Kinh tạng Tây Tạng (Kangyur Đại Học) — 047_མདོ་སྡེ།_ག

ྷའི་བུ་མོ་ཁྲི་ཕྲག་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །ལྷའི་བུ་
མོ་ཁྲི་ཕྲག་དེ་དག་ཐམས་ཅད་ཕྱིར་མི་ལྡོག་པ་ཉིད་ལ་བཙུད་ནས། བདུད་ཀྱི་གནས་དེ་ཉིད་དུ་འདོད་པའི་ཡོན་ཏན་ལྔ་དག་གིས་བདག་ཉིད་རྩེ་བ་མངོན་པར་སྤྲུལ་ཏོ། །དེ་ནས་བདུད་ཤུགས་འཆང་ཁྱི་རོ་བཏགས་པ་དེ་རང་གི་གནས་ག་ལ་བ་དེར་སོང་བ་དང་། གནས་དེ་ན་ལྷའི་བུ་དང་། ལྷའི་བུ་མོ་དེ་
དག་དང་ལྷན་ཅིག་ཏུ་རྩེ་ཞིང་ཡོངས་སུ་སྤྱོད་པ་མཐོང་ངོ་། །མཐོང་ནས་ཀྱང་སྡུག་བསྔལ་ཞིང་ཡིད་མི་བདེ་ལ། བློང་བློང་པོར་གྱུར་ཅིང་དེར་མི་དགའོ། །དེ་ནས་ལྷའི་བུ་མོ་ཁྲི་ཕྲག་དགུ་བཅུ་པོ་དེ་དག་བདུད་ཤུགས་འཆང་བློང་བློང་པོར་གྱུར་པར་རིག་ནས། སྙིང་རྗེ་ཆེན་པོ་སྐྱེས་ཏེ། བདུད་ཤུགས་

འཆང་འདི་སྲོག་ཆགས་རྣམས་ཀྱི་ཕྱིར་སྡིག་པའི་རོས་བློང་བློང་པོར་གྱུར་ཅིང་། ཡང་དག་པ་ཇི་ལྟ་བ་བཞིན་མི་ཤེས་པ་ལ་ལྟོས། ཀྱེ་ཨེ་མ་སློབ་དཔོན་དཔའ་བའི་སྟོབས་བདུད་ཤུགས་འཆང་འདི་བདག་ཅག་གི་བདུད་ཀྱི་གནས་ལ་དབང་ཕྱུག་གི་དབང་གིས་བགེགས་བགྱིད་པར་འགྱུར་ན།
བདག་ཅག་ལ་འཚེ་བར་མི་འགྱུར་བར་མཛད་དུ་གསོལ། དེ་ནས་བྱང་ཆུབ་སེམས་དཔའ་དཔའ་བའི་སྟོབས་ཀྱིས་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱེད་དེ། དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་པས་བདུད་ཤུགས་འཆང་གི་གནས་ཀྱི་གོང་དུ་
བདུད་ཀྱི་གནས་གཞན་ཆེས་རྫུ་འཕྲུལ་ཆེ་བ། ཆེས་གཟི་བརྗིད་ཆེ་བ། ཆེས་མཐུ་ཆེ་བ། ཆེས་གཟི་ཆེ་བ་ཞིག་མངོན་པར་སྤྲུལ་ཏོ། །འཇིག་རྟེན་གྱི་ཁམས་གཞན་ཞིག་ཀྱང་མངོན་པར་སྤྲུལ་ཏེ། དེར་བདུད་དེ་དབང་ཕྱུག་ལ་དབང་བྱེད་དེ། དེས་གནས་དེ་དང་བདུད་དེ་ཡང་ཐལ་བར་བརླགས་སོ། །
དེ་ནས་བདུད་ཤུགས་འཆང་གིས་བདུད་དེ་དང་བདུད་ཀྱི་གནས་དེ་མཐོང་ནས་ཡིད་གཉིས་སུ་གྱུར་ཏེ། བདག་ཀྱང་ཡུན་མི་རིང་བར་འཆི་བའི་ཆོས་སུ་འགྱུར་རོ། །བདུད་ཀྱི་གནས་འདིས་བདག་གི་ངོ་བོ་དང་། ཡོངས་སུ་འཛིན་པ་ཐམས་ཅད་དང་ཐ་དད་པའི་ངོ་བོར་འགྱུར་རོ་སྙམ་མོ། །གནས་དེ་
དག་གིས་དེ་ཀུན་ཏུ་སྐྱོ་བར་གྱུར་ཅིང་ཡིད་མི་དགའ་བར་གྱུར་ནས། འཇིགས་སྐྲག་བློང་བློང་པོར་གྱུར་ནས་བྱང་ཆུབ་སེམས་དཔའ་དཔའ་བའི་སྟོབས་དེ་ལ་འདི་སྐད་ཅེས་སྨྲས་སོ། །མཁས་པ་མགོན་མེད་མགོན་མཛོད་རྣམ་པར་ལྟུང་ལས་དགྲོལ་བར་མཛོད། །བྱིས་པའི་ངོ་བོ་བདག་གིས་མི་དགེ་གང་
བགྱིས་མི་རྟག་པས། །སྲིད་པར་འགྲོ་བ་ཀུན་གནོད་རྟག་པ་མ་ལུས་མཐོལ་ཞིང་མཆིས། རྣམ་འཇིག་ཆོས་ཀྱི་དངོས་པོ་ཅུང་ཟད་མགོན་སྐྱབས་བགྱིད་མ་མཆིས། །རྣམ་འཇིག་ཆོས་ཀུན་བདག་གིས་རྣམ་སྤང་བདག་ཀྱང་མ་གྲོལ་བ། །འདི་ལྟར་བཟོད་པར་མཛོད་ཅིག་དཔའ་སྟོབས་བདེ་བར་གཤེགས་པའི་སྲས། །
རྟབས་ལ་སྐྲག་ཅིང་ཉམས་པས་དེ་ཡི་ཡིད་ཀྱི་སྐྱོ་བ་ཆད། །ང་རྒྱལ་རྣམ་སྤངས་རྒྱལ་བའི་སྲས་ལ་ཐམས་ཅད་སྐྱབས་སུ་ཞུགས། །གང་གིས་རྒུད་འཇིགས་ཡོངས་མཐོང་འདི་ལྟར་ཁྱོད་ལ་སྐྱབས་སུ་མཆིས། །རྒྱལ་སྲས་མཁས་པ་སྡུག་བསྔལ་ཉམས་པ་དག་ལས་བདག་ལ་སྐྱོབས། །ཤུགས་འཆང་སྐྱོ་

བ་རྒྱལ་བའི་སྲས་ཀྱིས་གཟིགས་ནས་དེས་སྨྲས་པ། །གྲོགས་པོ་རྒྱལ་བའི་སྲས་ལ་བགེགས་མ་བྱེད་ཅིང་ང་རྒྱལ་སྤོངས། །སྲིད་ཀུན་མི་རྟག་ཡོངས་སུ་འཛིན་ལ་མངོན་པར་ཞེན་པ་ཐོང་། །སེམས་ནི་མངོན་པར་དད་པས་ངེས་པར་འབྱུང་བ་རབ་ཏུ་ཤེས། །སེམས་ཅན་གང་ཡང་འཁྲུགས་པའི་
ཡིད་ཀྱི་ཆོས་ཞེས་ནམ་ཡང་མེད། །ཡིད་ཀྱི་རྙོག་པ་བསལ་བཏང་རྒྱལ་བ་མཆོག་གིས་བསྟན་པ་མཐོང་། །དེས་སྨྲས་པ། རྒྱལ་སྲས་བདག་སེམས་རྙོག་པ་བྲལ་ཞིང་ཡིད་ཀྱིས་རྣམ་པར་འབད། །རྒྱལ་བའི་རིམ་གྲོ་བགྱིད་ཀྱིས་རྒྱལ་བའི་གསུང་དག་གསུངས་ཤིག་གསུངས། །དེས་སྨྲས་
པ། དེ་བཞིན་གཤེགས་པའི་ཡོན་ཏན་བྱང་ཆུབ་སེམས་ལ་བདུད་ཉོན་ཅིག །བདེ་གཤེགས་སྲས་ལས་གང་དག་ཐོས་པ་བདུད་ཀྱི་ཞགས་པ་གཅོད། །རྒྱལ་བས་རབ་གསུངས་ཆོས་ཉིད་མི་གཡོ་འགྱུར་མེད་ཆོས་ཀྱི་དབྱིངས། །རྒྱལ་བའི་སྲས་འདི་ཤེས་ན་རྒྱལ་བས་མཆོད་པ་བྱས་པར་
འགྱུར། །གང་དག་བློ་ངེས་མེད་པ་སོ་སོའི་སྐྱེ་བོ་བྱིས་པ་ཞེས། །བྱ་སྟེ་དེ་ལྟར་སེམས་ངེས་མེད་པ་ཀུན་རྟོག་རླུང་དང་འདྲ། །གང་དག་རྒྱལ་བའི་གསུང་ནི་རྣམ་ཤེས་དེ་དག་བདུད་ཀྱི་ཞགས། །རླུང་གི་སྟོབས་ཀྱིས་ཕུབ་མ་ཕྱར་ལྟར་མ་ལུས་ཤིན་ཏུ་བཅོམ། །འགྱུར་མེད་ཆོས་དབྱིངས་སྟོང་པ་མི་
གཡོ་གཉིས་མེད་སྨྲས་པ་ནི། །བདུད་སྟོབས་འཇོམས་པར་བྱེད་ཅིང་བདུད་དབང་སོང་བས་ཤེས་པར་དཀའ། །སེམས་ཅན་གང་དག་སྐྱེས་དང་འཆི་དང་འབྱུང་བ་གང་ཡང་མེད། །ཀུན་ཏུ་འཕོ་བ་མེད་ཅིང་ལས་དང་ལྟུང་བའང་ཡོད་པ་མ་ཡིན་ཏེ། །སྟོང་ཉིད་རྟོག་པར་བྱེད་ན་རྒྱལ་བའི་སྲས་དག་ཡིད་
མི་རྨོངས། །ཚུལ་བཞིན་མ་ཡིན་པ་ཡིས་ཆོས་འདི་ཀུན་ལ་བྱེད་པ་པོ། །ལས་དང་རྣམ་སྨིན་ཀུན་རྟོག་མི་མཁས་བདུད་ཀྱི་ཞགས་པས་འཆིང་། །ཀྱེ་མ་ཇི་ལྟར་སྐུད་མདུད་གཟིངས་པའི་སྐུད་པ་རྣམ་གྲོལ་ལྟར། །དེ་བཞིན་འདོད་ཆགས་མ་བྲལ་ཆོས་ལ་འདོད་ཆགས་བཅས་མཐོང་འཆིང་། །དེ་ཡིས་
སྡུག་བསྔལ་མྱོང་སྟེ་འདིར་ནི་སྡུག་བསྔལ་གང་ཡང་མེད། །གང་དག་རྒྱལ་བའི་གསུང་ལ་ཐེ་ཙོམ་མེད་ཡིད་དེ་འཆིང་མེད། །མར་མེ་གང་དག་ཟད་ལྟར་དེ་ནི་མ་ལུས་མྱ་ངན་འདའ། །འགྲོ་ལ་ཕན་བརྩོན་རྣམ་འདྲེན་བརྟན་པ་འགྲོ་བ་དེ་མི་གསུང་། །མེ་འབར་ཞི་ལྟར་འགྲོ་བ་མེད་ཅེས་རྒྱལ་སྲས་དཔའ་བའི་

ཚིག །འདི་ལྟར་དེ་ཚེ་འདི་དག་ཐོས་ནས་བདུད་དེ་དགའ་བར་འགྱུར། །དེ་བཞིན་སྟོབས་བཅུའི་སྐྱབས་སུ་སོང་ཞིང་སྟོབས་བཅུའི་སྤྱོད་པའང་སྒྲུབ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན། བྱང་ཆུབ་སེམས་དཔའ་དཔའ་བའི་སྟོབས་ཞེས་བྱ་བར་གྱུར་པ། དེ་
གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན། བྱང་ཆུབ་སེམས་དཔའ་དཔའ་བའི་སྟོབས་ཞེས་བྱ་བར་གྱུར་ཏེ། སེམས་ཅན་རྣམས་ཀྱི་མོས་པ་སྣ་ཚོགས་ཤེས་པ་འགོག་པ་ཤེས་པ་མངོན་པར་ཤེས་
སོ། །མཽད་གལ་གྱི་བུ་དེ་ལྟ་བས་ན། བྱང་ཆུབ་སེམས་དཔས་མོས་པ་སྣ་ཚོགས་ཤེས་པ་འགོག་པ་ཤེས་པ་ལ་བསླབ་པར་བྱའོ། །མཽད་གལ་གྱི་བུ་གཞན་ཡང་ངས་མོས་པ་སྣ་ཚོགས་པ་ཤེས་པ་འགོག་པར་འགྱུར་བའི་ལམ་ཤེས་པར་བྱ་བའི་དོན་དུ། སྔོན་བྱང་
ཆུབ་སེམས་དཔའི་སྤྱད་པ་སྤྱོད་པ་ན། དགེ་བའི་རྩ་བ་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་སྨན་གྱི་རྒྱལ་པོ་ཞེས་བྱ་བ་རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི། ཁ་ལོ་སྒྱུར་བ། བླ་ན་མེད་པ། ལྷ་དང་། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །
དེ་བཞིན་གཤེགས་པ་སྨན་གྱི་རྒྱལ་པོ། དེའི་སངས་རྒྱས་ཀྱི་ཞིང་དེར། བྱང་ཆུབ་སེམས་དཔའ་ཤུགས་མཚུངས་པ་མེད་པ་ཞེས་བྱ་བ། དེ་བཞིན་གཤེགས་པ་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པ། ཡུན་རིང་དུ་ཚངས་པར་སྤྱོད་པ་ཞིག་བྱུང་སྟེ། བཅོམ་ལྡན་འདས་
དེ་བཞིན་གཤེགས་པ་སྨན་གྱི་རྒྱལ་པོ་དེའི་རིམ་གྲོ་པ་ཡིན་ལ། དོན་ཤེས། ཆོས་ཤེས། དུས་ཤེས། ཚོད་ཤེས། བདག་ཤེས། འཁོར་ཤེས། གང་ཟག་མཆོག་དང་། མཆོག་མ་ཡིན་པ་དང་། ཡ་མཚན་ཅན་ཐམས་ཅད་

ཀྱི་གྲུབ་པའི་མཐའ་དང་། བསྟན་བཅོས་ཐམས་ཅད་ཀྱི་གྲུབ་པའི་མཐའ་དང་། བཟོའི་གནས་ཐམས་ཅད་ཀྱི་གྲུབ་པའི་མཐའ་ཤེས་ཏེ། དེ་ལྟར་འདིར་ཡུན་རིང་དུ་ཤེས་པ་སྤྱད་དོ། །དེ་དེ་བཞིན་གཤེགས་པ་སྨན་གྱི་རྒྱལ་པོ་དེའི་དྲུང་དུ་སོང་ནས་ཞབས་ལ་མགོ་བོས་
ཕྱག་འཚལ་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་ཤུགས་མཚུངས་པ་མེད་པས་བཅོམ་ལྡན་འདས་དེ་བཞིན་གཤེགས་པ་སྨན་གྱི་རྒྱལ་པོ་དེ་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། རྣམ་པར་འདྲེན་པ་མཆོག་བརྙེས་པ། །གླང་
ཆེན་ཁྱོད་ལ་ཞུ་བ་ནི། །སེམས་ཅན་རྣམས་ཀྱི་དབང་པོ་ཤེས། །རྒྱུ་གང་གིས་ནི་ཞི་བར་འགྱུར། །ཆོས་རྣམས་ཀུན་གྱི་ཕ་རོལ་གཤེགས། །བདག་གིས་ཞུས་པ་དེ་དག་གསུངས། །གང་དག་ཤེས་པ་དེ་ཡི་རྒྱུ། །ཐོས་ནས་འབད་པར་བགྱིད་པར་འགྱུར། །འཇིག་རྟེན་སྟོན་པ་མཁས་པ་སྟེ། །ཐམས་
ཅད་མཁྱེན་པ་འཇིགས་མི་མངའ། །ཇི་ལྟར་རྒྱལ་བའི་སྲས་ཀྱིས་ཞུས། །རྐང་གཉིས་མཆོག་གིས་དེ་ལུང་བསྟན། །གང་དག་ཐམས་ཅད་མཁྱེན་པ་ཡི། །མི་མཆོག་སེམས་ནི་སྐྱེད་བྱེད་ན། །དེ་ལྟར་དེར་ནི་ནང་དུ་ཞུགས། །དབང་པོ་དག་ཀྱང་ཉེ་བར་ཞི། །གང་དག་ཤེས་པ་དེ་ལ་འཇུག །འགྲོ་བ་
འབྱང་ཞིང་ཟད་པར་འགྱུར། །ཟད་པ་དེ་ལ་གང་ཤེས་པ། །འདི་ཡིས་དེ་ནི་འགག་པར་འགྱུར། །དེ་ཡིས་དེ་ནི་ལུང་བསྟན་པ། །རྒ་ནད་སྐྱེ་བ་མེད་པ་ཡིས། །ཆོས་ལ་བཟོད་པ་ཐོབ་པར་གྱུར། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་ཤུགས་མཚུངས་པ་མེད་པ་ཞེས་བྱ་
བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་ཤུགས་མཚུངས་པ་མེད་པ་ཞེས་བྱ་བར་གྱུར་ཏོ། །དགེ་བའི་རྩ་བ་དེས་ང་མོས་པ་སྣ་ཚོགས་ཤེས་པ་ཐོབ་བོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་མོས་པ་སྣ་
ཚོགས་ཤེས་པ་འགོག་པ་ཤེས་པ་མངོན་དུ་བྱེད་པར་འདོད་པས་ཐམས་ཅད་མཁྱེན་པའི་ཡེ་ཤེས་རྟོགས་པར་བྱ་བ་ལ་བརྩོན་པར་བྱའོ། །མཽད་གལ་གྱི་བུ་ངས་དབང་པོ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་

གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན། བྲམ་ཟེ་སྒྲ་རྣམ་པར་གྲགས་པ་ཞེས་བྱ་བ་ཤིང་སཱ་ལ་ཆེན་པོ་ལྟ་བུ་ཞིག་བྱུང་སྟེ། རིག་པ་ཐམས་ཅད་ཀྱི་ཕ་རོལ་ཏུ་ཕྱིན་པ། སྦྱིན་པ་པོ་སྦྱིན་བདག་ཆོས་ཀྱི་སྡུད་པ་དང་། ཟང་ཟིང་གི་སྡུད་
པས་ཤིན་ཏུ་སྡུད་པ་ཞིག་བྱུང་ངོ་། །དེ་ཐམས་ཅད་མཁྱེན་པའི་ཤེས་པ་རྟོགས་པར་བྱ་བ་ལ་བརྩོན་ནོ། །དེའི་ཚེ་དེ་བཞིན་གཤེགས་པ་སྒྲིབ་མེད་ལུང་སྟོན་ཞེས་བྱ་བ་བྱུང་སྟེ། དེ་བཞིན་གཤེགས་པ་དེའི་སྐུ་ཚེའི་ཚད་དཔག་ཏུ་མེད་པར་གྱུར། ཉན་ཐོས་ཀྱི་དགེ་འདུན་དཔག་ཏུ་མེད་པ་དག་བྱུང་།
སངས་རྒྱས་ཀྱི་ཞིང་དཔག་ཏུ་མེད་པ་དག་བྱུང་། ཉན་ཐོས་འདུས་པ་དཔག་ཏུ་མེད་པ་དག་བྱུང་ངོ་། །བྲམ་ཟེ་སྒྲ་རྣམ་པར་གྲགས་པ་ཤིང་སཱ་ལ་ཆེན་པོ་ལྟ་བུས་དེ་བཞིན་གཤེགས་པ་སྒྲིབ་མེད་ལུང་སྟོན་ཐོས་སོ། །ཐོས་ནས་བྲམ་ཟེ་བྱེ་བ་ཕྲག་དགུ་བཅུ་རྩ་བརྒྱད་དང་ལྷན་ཅིག་ཏུ་དེ་བཞིན་གཤེགས་པ་སྒྲིབ་མེད་
ལུང་སྟོན་དེའི་དྲུང་དུ་དོང་སྟེ་ཕྱིན་ནས། བཅོམ་ལྡན་འདས་དེ་བཞིན་གཤེགས་པ་སྒྲིབ་མེད་ལུང་སྟོན་དེ་ལ་མཆོད་པ་འདི་ལྟ་བུ་དག་བྱེད་དེ། ཐམས་ཅད་དང་ལྡན་པའི་བར་སྣང་ལ་ནོར་བུའི་བླ་རེ་ཀུན་ཏུ་བྲེས། ཐམས་ཅད་དང་ལྡན་པའི་ས་གསེར་གྱི་གླེགས་མས་ཀུན་ཏུ་གཡོགས། གསེར་གྱི་ཁང་པ་བརྩེགས་
པ་འཕང་དུ་དཔག་ཚད་གཅིག་ཙམ་པ་སྟོང་ཕྲག་བརྒྱད་ཅུ་གནས་བཅུར་ཀུན་དུ་བརྒྱན་ཏེ། ཁང་པ་བརྩེགས་པ་རེ་རེ་ཡང་བུ་མོ་རྒྱན་ཐམས་ཅད་ཀྱིས་བརྒྱན་པ་སྟོང་དག་མངོན་པར་འཛེག་གོ། །ཁང་པ་བརྩེགས་པ་རེ་རེའི་ས་ལ་ཡང་སིལ་སྙན་སྟོང་གི་སྒྲ་དབྱངས་འབྱུང་ངོ་། །ཁང་པ་བརྩེགས་པའི་ས་ཐམས་
ཅད་དུ་མེ་ཏོག་ཁ་དོག་རྣམ་པ་ལྔ་དག་བཀྲམ། ཁང་པ་བརྩེགས་པའི་ས་ཐམས་ཅད་དུ་ལྷའི་སྤོས་དང་ལྡན་པ་དག་གིས་བྱུགས། ལྷའི་བདུག་སྤོས་དག་གིས་བདུགས་ཤིང་བདུག་པར་བྱེད་དེ། ཁང་པ་བརྩེགས་པ་དེ་དག་ཐམས་ཅད་བདུག་པས་འཁྲིགས་པར་གྱུར། སྤོས་དང་སྤོས་དག་དང་བདུག་པ་
དག་གིས་དྲེགས་པར་གྱུར། སྤོས་དང་། བདུག་པ་དག་གིས་དགའ་བར་གྱུར་ཏོ། །སངས་རྒྱས་ཀྱི་མཐུས་ཁང་པ་བརྩེགས་པ་དེ་དག་ཐམས་ཅད་ཀྱང་མ་བཟུང་བར་བར་སྣང་ལ་འགྲོའོ། །ཁང་པ་བརྩེགས་པ་དེ་དག་ཐམས་ཅད་ལས་སངས་རྒྱས་ལ་བསྟོད་པའི་སྒྲ་གྲག་ཆོས་ལ་བསྟོད་པའི་སྒྲ་གྲག །དགེ་

འདུན་ལ་བསྟོད་པའི་སྒྲ་གྲག་གོ། །དེ་བཞིན་དུ་སྦྱར་ཏེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་སྒྲ་གྲག་གོ། །རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུའི་སྒྲ་གྲག་གོ། །མི་རྟག་པ་དང་། སྡུག་བསྔལ་
བ་དང་། བདག་མེད་པའི་སྒྲ་གྲག་གོ། །བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ལ་རྣམ་པར་གནས་པའི་སྒྲ་གྲག་གོ། །རྫུ་འཕྲུལ་གྱི་རྣམ་པའི་སྒྲ་གྲག་གོ། །ལྷའི་མིག་དང་། ལྷའི་རྣ་བའི་སྒྲ་དང་། སེམས་ཀྱི་རྣམ་གྲངས་ཀྱི་སྒྲ་དང་སྔོན་གྱི་གནས་ཀྱི་སྒྲ་
གྲག་གོ། །འགོག་པའི་སྒྲ་གྲག་གོ། །ཁ་ཅིག་ནི་ཐར་པ་དང་འཐུན་པའི་སྒྲ་སྟེ། གང་དེ་དག་ཁང་པ་བརྩེགས་པ་དེ་དག་ཐམས་ཅད་ལས་གྲག་གོ། །ཁང་པ་བརྩེགས་པ་དེ་དག་བར་སྣང་ལས་འགྲོ་བའི་མདུན་དུ་ཡང་སྤོས་ཆུའི་ཆར་རབ་ཏུ་བབ་ཅིང་། ཡང་དག་པར་འདས་པའི་ལྷའི་མེ་ཏོག་གི་ཆར་
རབ་ཏུ་བབ་བོ། །དེ་དེ་བཞིན་གཤེགས་པ་སྒྲིབ་མེད་ལུང་སྟོན་དེའི་སྤྱན་སྔར་འདུག་ནས་སྐོན་པ་ཁྲི་མེ་ཏོག་སྣ་ལྔ་དག་གིས་བཀང་ནས་མངོན་པར་གཏོར་རོ། །གཏོར་བ་དེ་དག་ཐམས་ཅད་ཀྱང་སངས་རྒྱས་ཀྱི་མཐུས་ས་ལ་མ་ལྷུང་ཞིང་སྟེང་དུ་མེ་ཏོག་གི་བླ་རེར་བྲེས་སོ། །དེ་ནས་བྲམ་ཟེ་སྒྲ་རྣམ་པར་གྲགས་
པ་ཤིང་སཱ་ལ་ཆེན་པོ་ལྟ་བུ་དེས་རྫུ་འཕྲུལ་གྱི་ཆོ་འཕྲུལ་འདི་ལྟ་བུ་འདི་དག་མཐོང་ནས། ཇི་ལྟ་བུའི་དགེ་བའི་རྩ་བའི་ཤུགས་ཐོབ་པ་དེ་ལྟ་བུའི་དགེ་བའི་རྩ་བའི་ཤུགས་ཐོབ་པས་ཤིང་ཏ་ལ་བདུན་སྲིད་དུ་ནམ་མཁའ་ལ་མངོན་པར་འཕགས་སོ། །དེ་བར་སྣང་ལ་སོང་ནས་བཅོམ་ལྡན་འདས་ལ་ཚིགས་
སུ་བཅད་དེ་མངོན་པར་བསྟོད་དོ། །དཔའ་བོ་ཐུགས་དག་མི་ཡི་སེང་གེས་བདུད་སྟོབས་རབ་ཏུ་བཅོམ། །ཉོན་མོངས་ཚོགས་བཅོམ་འགྲོ་བ་མཁྱེན་པས་བདེ་འགྲོ་རྗེས་སུ་བརྙེས། །སྲོག་ཆགས་ཀུན་སྨན་ཐབས་ཆེན་ཀུན་གྲུབ་དགེ་བ་སྡིག་མི་མངའ། །སྟོབས་བཅུས་སྲེད་པའི་ཆུ་བོ་རྣམས་བསྐམས་
སྲིད་པའི་རྒྱ་མཚོ་རྒལ། །མི་དབང་མི་ཡི་སེང་གེས་སྲིད་མཚོ་བསྐམས་ཏེ་སྐམ་ལ་ཞུགས། །སྲིད་མཚོར་ཞུགས་པའི་སེམས་ཅན་ཤིན་ཏུ་ཉམ་ཐག་གཞན་ཡང་སྒྲོལ། །མི་ཡི་སེང་གེས་མེ་གསུམ་གདུངས་པའི་སྐྱེ་བོ་དེ་ལས་ཐར་མཛད་ཅིང་། །རང་བྱུང་རང་བྱུང་ཉིད་ཀྱིས་ཐུགས་ཆུད་འཇིག་རྟེན་ལམ་སྟོན་མཛད། །

སྟོན་པར་གྱུར་པས་སེམས་ཅན་ལམ་ཉམས་པ་དག་ལམ་ལ་བསླབས། །དྲང་སྲོང་ཆེན་པོ་ཁྱོད་ལ་བསླབས་ན་བླ་མེད་བྱང་ཆུབ་འཐོབ། །ཁྱོད་ཀྱི་སྲས་དག་འཆིང་ལས་རྒལ་ཅིང་སྲིད་པའི་རྒྱ་མཚོ་རྒལ། །སྐམ་ལ་ཕྱིན་ཅིང་མྱ་ངན་འདས་པར་ཞུགས་ཏེ་ཕྱག་འཚལ་བགྱིད། །འདིར་ནི་འཇིག་རྟེན་མུན་ལམ་རབ་བྱུང་
ཆེན་པོ་ཁྱོད་ཀྱིས་བསྟན། །བདག་ཀྱང་བྱང་ཆུབ་ཐོབ་ནས་ལམ་རབ་ཉམས་པ་ལམ་ལ་བཞག །མགོན་པོ་ཁྱོད་ལ་བསླབས་ན་བླ་མེད་བྱང་ཆུབ་ཞི་བར་མཆི། །བྱང་ཆུབ་ཞི་བ་རྟོགས་ནས་འགྲོ་ཡིད་མ་ཞི་རབ་ཏུ་ཞི་བར་བགྱི། །འགྲོ་བ་ལམ་རབ་ཉམས་པ་འདི་དག་འཚལ་ནས་སྙིང་རྗེ་བསྐྱེད། །སྒྲོན་མ་གསལ་
བར་བགྱི་ཞིང་མིག་ལོང་གྱུར་པ་རྣམ་པར་སྦྱང་། །བདག་གིས་རྒྱལ་བ་བསྟོད་པའི་བསོད་ནམས་མི་ཉུང་འདི་བསྐྱེད་པས། །དགེ་རྩ་དེ་ཡིས་དགྲ་འདུལ་རྒྱལ་བར་བགྱི་ཞིང་འགྲོ་ལམ་བསྟན། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེ་སྒྲ་རྣམ་པར་གྲགས་པ་ཤིང་སཱ་ལ་ཆེན་པོ་ལྟ་བུར་
གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། །ང་དེའི་ཚེ་དེའི་དུས་ན་བྲམ་ཟེ་སྒྲ་རྣམ་པར་གྲགས་པ་ཤིང་སཱ་ལ་ཆེན་པོ་ལྟ་བུར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་འདི་ལྟར་བསླབ་པར་བྱ་སྟེ། དེ་བཞིན་གཤེགས་པ་ལ་ཡོན་ཏན་ཡོད་པ་དག་གིས་
བསྟོད་པར་བྱ་སྟེ། དེ་ལྟར་བསླབ་པར་བྱའོ། །མཽད་གལ་གྱི་བུ་གཞན་ཡང་ངས་དབང་པོ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་
ནས། དེའི་ཕ་རོལ་གྱི་ཡང་ཆེས་ཕ་རོལ་ན། བྲམ་ཟེ་རྒྱལ་གྱི་ལྷ་ཤིང་སཱ་ལ་ཆེན་པོ་ལྟ་བུ་ལས་བདག་གིར་བྱ་བ་ལ་མངོན་པར་བརྩོན་པ་ཞིག་བྱུང་སྟེ། དེང་བདག་གིས་དགེ་བ་ཅི་ཞིག་མངོན་པར་འདུས་བྱས་མི་དགེ་བ་ཅི་ཞིག་བཏང་། ལུང་དུ་མ་བསྟན་པ་ཅི་ཞིག་མངོན་པར་འདུས་བྱས་སྙམ། དེ་
ལས་བདག་གིར་བྱ་བ་ལ་མངོན་པར་བརྩོན་ཏེ། ལས་གང་དང་གང་མངོན་པར་འདུ་བྱ་བ་དེ་ཉིད་ཤིན་ཏུ་ཡོངས་སུ་ཤེས། ཡོངས་སུ་རིག །ཤིན་ཏུ་བརྟགས་པས་བྱེད་དེ། གལ་ཏེ་དགེ་བའི་ལས་མངོན་པར་འདུ་བྱེད་ན་ཤིན་ཏུ་བརྟགས་པས་མངོན་པར་འདུ་བྱེད་དོ། །དེ་དབང་པོ་གང་གིས་ལས་མངོན་པར་འདུས་བྱས་པའི་

དབང་པོ་དེ་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཏེ། གལ་ཏེ་འདོད་ཆགས་ཀྱི་ཕྱོགས་ལས་གང་གིས་འདོད་ཆགས་སྐྱེས་པ་བཟློག་པའི་དབང་པོ་དེ་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །གལ་ཏེ་ཆུང་ངུའམ། གལ་ཏེ་འབྲིང་ངམ། གལ་ཏེ་ཆེན་པོ་དག་སྟེ།
གལ་ཏེ་དབང་པོ་ཆུང་ངུས་ཉོན་མོངས་པ་ཆུང་ངུ་ཟློག་པར་བྱེད། གལ་ཏེ་དབང་པོ་ཆུང་ངུས་ཉོན་མོངས་པ་འབྲིང་ཟློག་པར་བྱེད། གལ་ཏེ་དབང་པོ་ཆུང་ངུས་ཉོན་མོངས་པ་ཆེན་པོ་ཟློག་པར་བྱེད་དོ། །གལ་ཏེ་དབང་པོ་འབྲིང་གིས་ཉོན་མོངས་པ་ཆུང་ངུ་ཟློག་པར་བྱེད། གལ་ཏེ་དབང་པོ་འབྲིང་གིས་ཉོན་
མོངས་པ་འབྲིང་ཟློག་པར་བྱེད། གལ་ཏེ་དབང་པོ་འབྲིང་གིས་ཉོན་མོངས་པ་ཆེན་པོ་ཟློག་པར་བྱེད་དོ། གལ་ཏེ་དབང་པོ་ཆེན་པོས་ཉོན་མོངས་པ་ཆུང་ངུ་ཟློག་པར་བྱེད། གལ་ཏེ་དབང་པོ་ཆེན་པོས་ཉོན་མོངས་པ་འབྲིང་ཟློག་པར་བྱེད། གལ་ཏེ་དབང་པོ་ཆེན་པོས་ཉོན་མོངས་པ་ཆེན་པོ་ཟློག་པར་
བྱེད་པའི་དབང་པོ་དེ་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །དེ་ཤེས་པ་དེ་དང་ལྡན་ཏེ། ལས་དེ་མངོན་པར་འདུས་བྱས་པས་བསྐལ་པ་བརྒྱད་ཅུར་ལོག་པར་ལྟུང་བར་མ་གྱུར་ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེ་རྒྱལ་གྱི་ལྷ་ཞེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་
པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྲམ་ཟེ་རྒྱལ་གྱི་ལྷ་ཞེས་བྱ་བར་གྱུར་ཏོ། །དེའི་ཚེ་ཡང་ངས་སེམས་ཅན་རྣམས་ཀྱི་དབང་པོ་ཤེས་པ་ལ་བསླབས་པར་གྱུར་ཏེ། ད་ལྟར་ཡང་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་སངས་རྒྱས་ནས་སེམས་ཅན་རྣམས་ཀྱི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་ཅན་རྣམས་ཀྱི་དབང་པོ་ཤེས་པ་ལ་བསླབ་པར་བྱའོ། །དབང་པོ་ཤེས་པ་ལ་སློབ་པའི་བྱང་ཆུབ་སེམས་དཔའ་ནི་ཕྱིར་མི་ལྡོག་ཅིང་མྱུར་དུ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་རྗེས་སུ་ཐོབ་བོ།། །།བམ་པོ་ཉི་ཤུ་གཅིག་པ། མཽད་གལ་གྱི་བུ་ངས་དབང་པོ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །

མཽད་གལ་གྱི་བུ་སྔོན་བྱུང་བ་འདས་པའི་དུས་ན་རྒྱལ་པོ་ཟླ་བའི་ལྷ་ཞེས་བྱ་བ་ཞིག་བྱུང་ངོ་། །དེའི་བུ་མོ་ཟླ་བའི་ལྷ་མོ་ཞེས་བྱ་བ་མཁས་ཤིང་ཡིད་གཞུངས་ལ། རྒྱལ་པོའི་བྱ་བ་བྱེད་པ་ཞིག་བྱུང་སྟེ། དེ་ཕ་དེའི་རྒྱལ་སྲིད་རྗེས་སུ་སྐྱོང་ངོ་། །དེ་ནས་རྒྱལ་པོ་ཟླ་བའི་ལྷ་དེས་བུ་མོ་དེ་ལ་སྨྲས་པ། བུ་མོ་རྒྱུ་གང་གིས་
དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ། ཇི་ལྟར་ན་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འཐོབ་པར་འགྱུར་བ་ཁྱོད་ལ་དྲིའོ། །དེས་དེ་ལ་སྨྲས་པ། དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་ཞིང་ཤིན་ཏུ་མང་དུ་ཐོས་པ་རྣམས་ལ་བསྙེན་བཀུར་བགྱིས་ན་དབང་པོ་ཤེས་
པ་ཀུན་འབྱུང་བ་ཤེས་པ་ཡང་དག་པར་འགྲུབ་པར་འགྱུར་ལགས་སོ། །དེ་ཅིའི་སླད་དུ་ཞེ་ན། དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་ཞིང་མང་དུ་ཐོས་པ་གང་དེ་དག་ལ་བསྙེན་བཀུར་བགྱིས་ན་ཤེས་པ་དེ་མངོན་པར་འདུ་བགྱིས་པར་འགྱུར་ཞིང་། ཤེས་པ་དེ་ལ་སློབ་པར་འགྱུར་ལགས་ཏེ། རྒྱུ་
དེས་ན་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པར་འགྱུར་ལགས་སོ། །དེ་ནས་རྒྱལ་པོ་ཟླ་བའི་ལྷས་ལུང་བསྟན་པ་དེ་ཐོས་ནས། སློང་བ་པོ་རྣམས་ལ་མགུ་ཞིང་དགའ་ལ་ཡི་རངས་ཏེ། རབ་ཏུ་དགའ་ནས་དད་པ་མི་ཕྱེད་པ་ཐོབ་བོ། །མཽད་གལ་གྱི་བུ་དེ་ཇི་སྙམ་དུ་སེམས།
དེའི་ཚེ་དེའི་དུས་ན། ཟླ་བའི་ལྷ་ཞེས་བྱ་བའི་བུ་མོར་གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རྒྱལ་པོ་ཟླ་བའི་ལྷ་ཞེས་བྱ་བའི་བུ་མོར་གྱུར་ཏོ། །དེའི་ཚེ་ཡང་ང་དབང་པོ་ཤེས་པ་ཀུན་འབྱུང་བ་ཤེས་པ་མཁྱེན་པར་གྱུར་ལ། ད་ལྟར་ཡང་དབང་པོ་ཤེས་པ་
ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། སེམས་ཅན་རྣམས་ལ་ཡང་ཡང་དག་པར་རབ་ཏུ་བསྟན་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་དབང་པོ་ཤེས་པ་ཀུན་འབྱུང་བ་ཤེས་པ་ལ་བརྩོན་པར་བྱའོ། །མཽད་གལ་གྱི་བུ་ངས་དབང་པོ་ཤེས་པ་འགོག་པ་ཤེས་
པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་རྣམ་པ་དུ་མ་དག་གི་བར་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ན། དེའི་ཕ་རོལ་གྱི་ཡང་ཆེས་ཕ་རོལ་ན། དྲང་སྲོང་ཀུན་འབྱུང་ཞེས་བྱ་བ་ལྔ་མངོན་པར་ཤེས་པ་ཞིག་བྱུང་ངོ་།

དེ་ཚལ་གྱི་ནང་ན་དཀའ་ཐུབ་བྱེད་པའི་ཚེ་འདི་སྙམ་དུ་སེམས་ཏེ། ཤེས་པ་གང་གིས་དབང་པོ་འགགས་ཤིང་ཡང་མི་སྐྱེ་བར་འགྱུར་སྙམ་མོ། །དེ་འདི་སྙམ་དུ་སེམས་ཏེ། འཕགས་པའི་ཤེས་པ་གང་གིས་དབང་པོ་འགག་པ་ཡོངས་སུ་ཤེས་ཏེ། དབང་པོ་ཤེས་
པའི་འགོག་པ་གང་མི་སྐྱེ་བ་དེ། འདི་ལྟ་སྟེ་དཔེར་ན། མིའི་མགོ་བཅད་པ་ལས་མགོ་ཕྱིར་མི་སྐྱེའོ། །དེ་བཞིན་དུ་དབང་པོ་འགགས་པ་ལས་ཡང་དབང་པོ་མི་སྐྱེ་སྟེ། དེ་དབང་པོ་ཤེས་པ་འགོག་པ་ཡིན་ནོ་སྙམ་ནས་དེ་ཤེས་པ་དེས་དབང་པོ་ཡོངས་སུ་ཤེས་པར་འདོད་ན་ཤེས་པ་དེ་མ་རྙེད་དོ། །
དེ་འདི་སྙམ་དུ་སེམས་ཏེ། ཤེས་པ་གང་གིས་དབང་པོ་ཡོངས་སུ་ཤེས་ཤིང་ཡང་མི་སྐྱེ་བའི་ཤེས་པ་དེ་བདག་གིས་ངེས་པར་འཚལ་བར་བྱའོ་སྙམ་ནས། དེ་ཤེས་པ་དེ་ཡོངས་སུ་ཤེས་པར་བྱ་བའི་ཕྱིར་དགེ་སྦྱོང་དང་། བྲམ་ཟེ་དོན་ཉུང་བ། བྱ་བ་ཉུང་བ་དགོན་པ་ན་གནས་པ་གང་དག་མཐོང་བ་དེ་
དག་གི་དྲུང་དུ་སོང་ནས་དྲིས་པ། གྲོགས་པོ་དག་ཤེས་པ་གང་གིས་དབང་པོ་ཡོངས་སུ་ཤེས་ཤིང་ཡང་སྐྱེ་བར་མི་འགྱུར། དེ་དག་གིས་འདི་སྐད་སྨྲས་སོ། །གྲོགས་པོ་བདག་ཅག་གིས་ཀྱང་ཤེས་པ་གང་གིས་དབང་པོ་ཡོངས་སུ་ཤེས་ཤིང་ཡང་སྐྱེ་བར་མི་འགྱུར་བ་མི་འཚལ་ལོ། །དེ་འདི་སྙམ་དུ་
སེམས་ཏེ། ཤེས་པ་གང་གིས་དབང་པོ་ཡོངས་སུ་ཤེས་ཤིང་ཡང་མི་སྐྱེ་བར་འགྱུར་བ་བདག་ཉིད་ཀྱིས་ཤེས་པ་བསྐྱེད་པར་བྱའོ་སྙམ་ནས། ཤེས་པ་དེ་བཙལ་བའི་ཕྱིར། གཏང་བར་དཀའ་བ་དཔག་ཏུ་མེད་པ་དག་ཡོངས་སུ་བཏང་བ་ནས། མགོ་ཡོངས་སུ་བཏང་བ་དང་། མིག་གི་བར་ཡོངས་
སུ་བཏང་ཡང་དེས་ཤེས་པ་དེ་མ་རྙེད་དོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དྲང་སྲོང་ཀུན་འབྱུང་ཞེས་བྱ་བར་གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་དྲང་སྲོང་ཀུན་འབྱུང་ཞེས་བྱ་བར་གྱུར་ཏོ། །ང་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་དེས་ཤེས་པ་གང་གིས་དབང་པོ་ཡོངས་སུ་ཤེས་ཤིང་ཡང་མི་སྐྱེ་བ་འདི་ལྟ་སྟེ། འཕགས་པའི་ལམ་གྱི་ཤེས་པ་དེ་རྙེད་དོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་གང་གིས་དབང་པོ་འདི་ཡོངས་སུ་ཤེས་

ཤིང་ཡང་མི་སྐྱེ་བ་འཕགས་པའི་ཤེས་པ་ཡོངས་སུ་བཙལ་བ་ལ་བརྩོན་པར་བྱའོ། །མཽད་གལ་གྱི་བུ་ངས་དབང་པོ་ཤེས་པ་འགོག་པར་འགྱུར་བའི་ལམ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཤེས་པ་གང་གིས་དབང་པོ་འགོག་པ་ཡོངས་སུ་ཤེས་ཤིང་ཡང་མི་སྐྱེ་བ་
ཤེས་པ་དེ་ཇི་ལྟར་འཐོབ་པར་བྱ་སྙམ་ནས། བཞོན་པའི་གླང་པོ་དཔག་ཏུ་མེད་པ་དག་ཡོངས་སུ་བཏང་། བཞོན་པའི་རྟ་དང་། དེ་བཞིན་དུ་བཞོན་པའི་ཤིང་རྟ་དཔག་ཏུ་མེད་པ་དག་ཡོངས་སུ་བཏང་། རྐང་ཐང་བ་དཔག་ཏུ་མེད་པ་དག་ཡོངས་སུ་བཏང་སྟེ། དེས་ན་ངས་ལམ་བར་
མའི་ཚོགས་དེ་བྱ་བའི་ཕྱིར་དགེ་བའི་རྩ་བ་དཔག་ཏུ་མེད་པ་དག་བསྐྱེད་དེ། གལ་ཏེ་དགེ་བའི་རྩ་བ་དེ་གཟུགས་ཅན་དུ་གྱུར་ན་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དུ་ཡང་མི་ཤོང་ངོ་། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་
ཡང་ཆེས་ཕ་རོལ་ན། རྒྱལ་པོ་དགའ་མཐོང་ཞེས་བྱ་བ་གླིང་བཞི་པའི་འཇིག་རྟེན་གྱི་ཁམས་ཀྱི་དབང་ཕྱུག་ལ་དབང་བྱེད་པ་ཞིག་བྱུང་ངོ་། །དེའི་གླིང་བཞི་པའི་འཇིག་རྟེན་གྱི་ཁམས་འདི་རྒྱས་པར་གྱུར་ཏེ། གླིང་རེ་རེ་ལ་ཡང་གྲོང་ཁྱེར་ས་ཡ་ཕྲག་བརྒྱད་བརྒྱད་བྱུང་ངོ་། །གྲོང་ཁྱེར་རེ་རེ་ཡང་ཆུར་
དཔག་ཚད་བཅུ། ཞེང་དུ་དཔག་ཚད་བཅུ་སྟེ། གྲུ་བཞི་ཡིན་ལ་ཤིན་ཏུ་སྤྲུལ་པ། མིག་མངས་རིས་སུ་བྲིས་པ། གསེར་གྱི་སྐུད་པས་གཡོགས་པ། ར་བ་རིན་པོ་ཆེ་ཐམས་ཅད་ལས་བྱས་པ། ཅོག་འཛམ་བུའི་ཆུ་བོའི་གསེར་ལས་བྱས་པ། ནོར་བུ་རིན་ཐང་མེད་པའི་དྲ་བས་སྟེང་ཤིན་ཏུ་
གཡོགས་པ། ནོར་བུ་རིན་ཐང་མེད་པ་དག་གིས་ས་གཞི་བཀྲམ་ལ། རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བས་ཤིན་ཏུ་གཡོགས་པ། སེམས་ཅན་དགེ་བའི་རྩ་བ་དཔག་ཏུ་མེད་པ་བསགས་པ་རྣམས་ཀྱི་གནས་ཏེ། རིན་པོ་ཆེ་སྣ་བདུན་གྱི་ཤིང་ལྗོན་པས་ཤིན་ཏུ་གཡོགས་པ། དེའི་
ཕྱི་ནང་དུ་ལོངས་སྤྱོད་དང་ལྡན་ཏེ། གང་གི་ཚེ་མི་དག་རྩེ་བར་འདོད་པར་གྱུར་པ་དེ་དག་གང་འདོད་པ། སིལ་སྙན་ཡན་ལག་ལྔ་པས་ཡོངས་སུ་སྤྱོད་དེ། དེའི་ཚེ་སིལ་སྙན་ཡན་ལག་ལྔ་པའི་སྒྲ་རབ་ཏུ་འབྱུང་ངོ་། །གང་གི་ཚེ་པི་ཝང་དང་། སིལ་སྙན་དག་གིས་ཡོངས་སུ་སྤྱོད་པར་འོས་པ་དེའི་ཚེ་

པི་ཝང་དང་། སིལ་སྙན་དག་གི་སྒྲ་རབ་ཏུ་འབྱུང་ངོ་། །གང་གི་ཚེ་དྲི་ཟའི་རོལ་མོས་ཡོངས་སུ་སྤྱོད་པར་འདོད་པ་དེའི་ཚེ་དྲི་ཟའི་རོལ་མོ་བྱེད་དོ། །རྒྱ་ཆེར་གང་དང་གང་ཉིད་རྩེ་བར་འདོད་པའི་རྩེད་མོ་དེ་དང་དེ་ཉིད་བྱུང་ངོ་། །ལོར་རམ། ལོ་སྟོང་དུ་འམ། ལོ་ཁྲིར་རྩེ་བར་འདོད་
ན་དེ་ཉིད་ཀྱིས་རྩེ་བར་བྱེད་དེ། དེ་རྟག་པར་རྒྱུན་ཏུ་རྩེ་བའི་རྗེས་སུ་འཇུག་གོ། །གྲོང་ཁྱེར་དེའི་འབྱོར་པ་དང་ལྡན་པ་ནི་དེ་འདྲ་སྟེ། དེ་ལྟར་གྲོང་ཁྱེར་ཐམས་ཅད་དུ་རྩེད་མོ་དེ་དག་དང་ལྡན་པར་གྱུར་ཏོ། །དེའི་ཚེ་དེ་བཞིན་གཤེགས་པ་བདུད་རྩིའི་འོད་ཟེར་ཞེས་བྱ་བ་བྱུང་སྟེ། དེའི་འཁོར་ཉན་ཐོས་འབུམ་
ཕྲག་བརྒྱད་བྱུང་ངོ་། །དེ་ནས་རྒྱལ་པོ་དགའ་མཐོང་གིས་གླིང་བཞི་པའི་འཇིག་རྟེན་གྱི་ཁམས་འདི་དར་གྱི་ལྡ་ལྡི་བཏགས་ཤིང་ཡུལ་ཐམས་ཅད་ཤིན་ཏུ་བརྒྱན་ཏེ། སྔོན་གྱི་མི་དང་བཅས་པར་བཅོམ་ལྡན་འདས་དེ་བཞིན་གཤེགས་པ་བདུད་རྩིའི་འོད་ཟེར་ཉན་ཐོས་ཀྱི་དགེ་འདུན་དང་བཅས་པ་དེའི་ཡོངས་སུ་
སྤྱོད་པའི་དོན་དུ་ཕུལ་ལོ། །བདག་གི་བུ་དང་ཆུང་མ་དང་འཁོར་ཀྱང་ཕུལ་ལོ། །དེར་བཅོམ་ལྡན་འདས་དེ་ཉན་ཐོས་ཀྱི་དགེ་འདུན་དང་བཅས་པ་ཉན་ཐོས་འབུམ་ཕྲག་བརྒྱད་དང་། ཐབས་ཅིག་ཏུ་སངས་རྒྱས་ཀྱི་བཞུགས་པ་དཔག་ཏུ་མེད་པས་བཞུགས་སོ། །དེ་ལ་ཡང་རྒྱལ་པོ་དགའ་མཐོང་གིས་ལོ་
ས་ཡ་ཕྲག་བརྒྱད་དུ་ཞལ་ཟས་རོ་བརྒྱ་པས་ཡོངས་སུ་མཉེས་པར་བྱས་སོ། །བཙུན་མོ་དང་འཁོར་དང་བཅས་པས་ཀྱང་ཡོངས་སུ་སྤྱད་པ་བྱས་སོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་དགའ་མཐོང་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་
ཚེ་དེའི་དུས་ན་རྒྱལ་པོ་དགའ་མཐོང་ཞེས་བྱ་བར་གྱུར་ཏོ། །མཽད་གལ་གྱི་བུ་རྒྱ་ཆེར་བྱ་སྟེ། དགེ་བའི་རྩ་བ་དེས་ང་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་བརྙེས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་དད་པར་བྱའོ། །
དད་པ་ཐོབ་པ་ནི་བསྐལ་པ་གྲངས་མེད་དཔག་ཏུ་མེད་པར་བདེ་བའི་ཡོ་བྱད་འགྲུབ་པར་འགྱུར། བྱང་ཆུབ་ཀྱང་འགྲུབ་པར་འགྱུར་རོ། །མཽད་གལ་གྱི་བུ་ངས་སྟོབས་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། སེམས་ཅན་ཐམས་ཅད་དབང་པོ་རྣམས་ཀྱི་སྟོབས་དང་།

སྟོབས་མ་ཡིན་པ་ཇི་ལྟར་ཤེས་པར་བྱ་སྙམ་ནས་དགེ་བའི་རྩ་བ་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་སེང་གེའི་བློ་གྲོས་ཞེས་བྱ་བ་ཆོས་ཀྱི་རྒྱལ་པོ་ཆོས་དང་ལྡན་པ།
གླིང་བཞི་པར་འདུས་པ་ཡོངས་སུ་སྐྱོང་བ་དང་ཞིང་དད་པ་དང་ལྡན་པ། བསྟན་བཅོས་ཐམས་ཅད་ལ་མཁས་པ། ཡོན་གནས་ལ་དགའ་བ། སྦྱིན་བདག་སྒྲ་ཐམས་ཅད་ལ་མཁས་པ་ཞིག་བྱུང་ངོ་། །དེ་འཇིག་རྟེན་ན་དགེ་སྦྱོང་དང་བྲམ་ཟེ་གང་དག་ཡོད་པ་དེ་དག་ཐམས་ཅད་བསྡུས་ནས་ཁ་ཟས་རོ་
བརྒྱ་པས་སྟོན་མོ་བྱས་སོ། །ཡུལ་ཀ་ཤི་ཀའི་གོས་ཀྱིས་ཀྱང་མངོན་པར་བཀབ་བོ། །བསྟན་བཅོས་ཐམས་ཅད་ལ་མཁས་པས་སེམས་ཅན་རྣམས་ཀྱི་སེམས་ཀྱི་སྤྱོད་པ་ལ་ཡང་རྣམ་པར་ལྟའོ། །ཤེས་རབ་ཀྱི་དབང་པོའི་སྟོབས་དང་། སྟོབས་མ་ཡིན་པ་ལ་ཡང་རྣམ་པར་འཇུག་གོ། །དེའི་
དབང་པོ་ཤེས་པའི་སྟོབས་དང་། སྟོབས་མ་ཡིན་པ་རྣམ་པར་ཤེས་པར་བྱ་བའི་ཕྱིར། སེམས་ཅན་ཤེས་པ་ཁྱད་པར་ཅན་རྣམས་ལ་ཡང་མཆོད་པ་བྱེད་དོ། །དེ་ནས་རྒྱལ་པོ་སེང་གེའི་བློ་གྲོས་ཀྱིས་སྟོབས་དང་། སྟོབས་མ་ཡིན་པ་འདི་ཤེས་པར་བྱ་བའི་ཕྱིར། ལོ་ཁྲི་ཕྲག་བརྒྱད་
དུ་ཉིན་མཚན་རྟག་པར་རྒྱུན་དུ་སྦྱིན་པ་བྱིན་ཞིང་། དགེ་སྦྱོང་དང་། བྲམ་ཟེ་དག་ལ་ཡང་ཡོངས་སུ་དྲིས་སོ། །ཤེས་པ་སྨྲ་བ་དག་ལ་ཡང་སྟོབས་དང་སྟོབས་མ་ཡིན་པ་ཤེས་པ་ཉེ་བར་བརྟགས་སོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན། རྒྱལ་པོ་སེང་གེའི་
བློ་གྲོས་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རྒྱལ་པོ་སེང་གེའི་བློ་གྲོས་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་དབང་པོའི་སྟོབས་དང་སྟོབས་མ་ཡིན་པ་ཤེས་པ་མངོན་
པར་འདོད་ན། ཤེས་པ་དང་ལྡན་པ་ལ་མཆོད་པ་བྱ་ཞིང་སྟོབས་དང་སྟོབས་མ་ཡིན་པ་ཤེས་པ་ལ་ཡང་རྣམ་པར་འཇུག་པར་བྱའོ། །མཽད་གལ་གྱི་བུ་ངས་སྟོབས་དང་སྟོབས་མ་ཡིན་པ་ཤེས་པར་བྱ་བའི་དོན་དུ། །སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་བླ་ན་མེད་པ་ཡང་དག་པར་

རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་རྣམས་ཀྱི་སྟོབས་ཤེས་པ་ཇི་ལྟར་ཤེས་པར་བྱ་སྙམ་ནས། དགེ་བའི་རྩ་བ་རྣམ་པ་སྣ་ཚོགས་ཡིད་བཞིན་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་
བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས་དེའི་ཕ་རོལ་གྱི་ཡང་ཆེས་ཕ་རོལ་ན་བྲམ་ཟེ་དབང་པོའི་ལྷ་ཞེས་བྱ་བ་ཤིང་སཱ་ལ་ཆེན་པོ་ལྟ་བུ། ཕྱུག་ཅིང་ནོར་མང་ལ་ལོངས་སྤྱོད་ཆེ་བ། མང་དུ་ཐོས་པ་རྣམས་ཡོངས་སུ་སྡུད་པ་ཤེས་པ་ལ་གུས་པ་ཞིག་བྱུང་སྟེ། དེ་དགེ་སྦྱོང་དང་
བྲམ་ཟེ་འདོན་པ་ལ་ལྷག་པར་མོས་པ་རྣམས་ཡོངས་སུ་སྡུད་པ། བྱེ་བྲག་ཤེས་ཤིང་བློའི་སྟོབས་ཀྱི་བྱེ་བྲག་ཤེས་པ། བརྩོན་འགྲུས་ཀྱི་རིམ་པའི་བྱེ་བྲག་ཤེས་པ། ཤེས་པ་ལ་ལྷག་པར་མོས་པ་དེ་དག་ཐམས་ཅད་ཀྱི་བར་དུ་སྤྲོ་བར་བྱེད་པ། ཇི་ལྟར་ཤེས་པ་དག་ཆུད་ཟ་བར་མི་
འགྱུར་སྙམ་ནས་མངོན་པར་བརྩོན་པ་རྣམས་ལ་རབ་ཏུ་སྤྲོ་བར་བྱེད་དོ། །དེས་སྲོག་ཆགས་སྟོང་ཕྲག་མང་པོ་དག་ཤེས་པ་སྣ་ཚོགས་མང་པོ་དག་ལ་རབ་ཏུ་བཙུད་དོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེ་དབང་པོའི་ལྷ་ཞེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་
པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན། བྲམ་ཟེ་དབང་པོའི་ལྷ་ཞེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་ཏོ། །ངས་སྲོག་ཆགས་སྟོང་ཕྲག་དཔག་ཏུ་མེད་པ་དེ་དག་ཤེས་པ་སྣ་ཚོགས་ལ་རབ་ཏུ་བཙུད་དོ། །དེའི་ཚེ་ང་ཤེས་པ་དང་ལྡན་ཞིང་
སྟོབས་དང་སྟོབས་མ་ཡིན་པ་ཤེས་པ་རྣམ་པར་ཤེས་ལ། ད་ལྟར་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་ཐམས་ཅད་ཀྱི་སྟོབས་དང་སྟོབས་མ་ཡིན་པ་ཤེས་པ་མངོན་པར་རྫོགས་པར་ཐུགས་སུ་ཆུད་དོ། །དེར་ཡང་ང་ལྟ་བུ་
མེད་པས་གང་གིས་ང་འཁོར་གྱི་ནང་དུ་སེང་གེའི་སྒྲ་བསྒྲག་གོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་ཕ་རོལ་གྱི་སྟོབས་དང་སྟོབས་མ་ཡིན་པ་ཤེས་པ་ལ་མངོན་པར་བརྩོན་པར་བྱའོ། །བདག་ཉིད་ཀྱང་བསྟན་བཅོས་འདོན་པ་ཐམས་ཅད་ལ་ལྷག་པར་མོས་པར་བྱའོ། །མཽད་གལ་

གྱི་བུ་ངས་སྟོབས་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་སེམས་ཅན་ཐམས་ཅད་ཀྱི་སྟོབས་བསྐྱེད་པའི་རིམ་པ་ཤེས་པ་ཇི་ལྟར་ཤེས་པར་བྱ་སྙམ་ནས་དགེ་བའི་རྩ་བ་རྣམ་པ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་
གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་མེས་བྱིན་ཞེས་བྱ་བ་འབྱུང་པོ་ཐམས་ཅད་ཀྱི་སྒྲ་ཤེས་པ་མཁས་ཤིང་དོན་སེམས་པ་ཞིག་བྱུང་ངོ་། །དེ་སྒྲ་གང་དང་གང་ཐོས་པ་དེ་ཉིད་ཀྱི་དོན་རྣམ་པར་ཤེས་ཏེ། ཐོས་པ་འདི་བྱུང་ན།
དེ་ཅིའི་ཕྱིར་དོན་བརྗོད། ཅིའི་ཕྱིར་དུས་ཀྱི་དོན་བརྗོད། ཡང་ཁ་ཅིག་ནི་བརྗོད། ཡང་ན་ཁ་ཅིག་ནི་མི་བརྗོད་དོ། །དེ་ལྟར་ཤེས་པ་ཐམས་ཅད་ལ་སྟོབས་དང་སྟོབས་མ་ཡིན་པ་རྗེས་སུ་འགྲོ་སྟེ། བྱ་བ་ཐམས་ཅད་ལ་ཤེས་པ་འདིའི་བྱ་བ་བྱས་ནས་ཅི་འགགས་སམ། འོན་ཏེ་མ་བྱས།
འོན་ཏེ་བྱ་བ་ཅུང་ཟད་ཅིག་བྱས་ནས་འགགས་སམ། ཅུང་ཟད་ཅིག་མ་བྱས། གང་ཟག་འདི་ཇི་ཙམ་ན་ཤེས་པའི་སྣོད་དུ་འགྱུར། ཇི་ཙམ་ན་ཉོན་མོངས་པ་ཞི་བར་ནུས། དེ་དེ་ལྟར་ཤེས་པ་དེ་ལ་ངེས་པར་བྱུང་སྟེ། འཛམ་བུ་གླིང་ཀུན་གྱི་ཤེས་པ་ཐམས་ཅད་ཀྱི་སློབ་དཔོན་དུ་གྱུར་ཏོ། །
མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་མེས་བྱིན་ཞེས་བྱ་བར་གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རྒྱལ་པོ་མེས་བྱིན་ཞེས་བྱ་བ་འབྱུང་པོ་ཐམས་ཅད་ཀྱི་སྒྲ་ཤེས་པ་བསྟན་བཅོས་ཐམས་ཅད་ཀྱི་དོན་ཤེས་པར་གྱུར་
ཏོ། །དགེ་བའི་རྩ་བ་དེ་ཉིད་ཀྱིས་ང་སྒྲ་ཐམས་ཅད་ཤེས་པ་རྣམ་པར་ཤེས་ཤིང་བསྟན་བཅོས་ཐམས་ཅད་ཀྱི་རྗེས་སུ་འཇུག་པ་ཤེས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །མཽད་གལ་གྱི་བུ་དེ་ལྟ་བས་ན། བྱང་ཆུབ་སེམས་དཔས་
བསྟན་བཅོས་ཐམས་ཅད་ལ་མཁས་པར་བྱ། བསྟན་བཅོས་ཐམས་ཅད་ཀྱི་དོན་ལ་ཡང་མཁས་པར་བྱའོ། །མཽད་གལ་གྱི་བུ་ངས་སྟོབས་ཤེས་པ་འགོག་པར་འགྱུར་བའི་ལམ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་སེམས་ཅན་རྣམས་ཀྱི་

སྟོབས་དང་སྟོབས་མ་ཡིན་པ་ཤེས་པ་འགོག་པར་འགྱུར་བའི་ལམ་ཤེས་པ་ཇི་ལྟར་རྣམ་པར་ཤེས་པར་བྱ་སྙམ་ནས། དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ན། དྲང་སྲོང་འོད་བཟང་ཞེས་བྱ་བ།
བརྟུལ་ཞུགས་དང་། དཀའ་ཐུབ་དང་། ཡོན་ཏན་དང་། ཤེས་པ་དང་ལྡན་པ་ཞིག་བྱུང་ངོ་། །དེའི་བརྟུལ་ཞུགས་ནི་རལ་པའི་ཐོར་ཚུགས་ལྔ་ཐོགས་ཏེ། དེ་དག་ལ་སོགས་པ་བརྟུལ་ཞུགས་ཀྱི་བྱེ་བྲག་དཔག་ཏུ་མེད་པར་གྱུར་ཏོ། །དེའི་དཀའ་ཐུབ་ཀྱི་ནགས་ཚལ་གྱི་ནང་དུ་གནས་པར་བརྩོན་ལ།
དེ་གྲང་བ་དང་དྲོ་བ་ཡིད་ལ་བྱེད་པའི་ཉོན་མོངས་པ་ཟད་ཅིང་བསྲེག་ལུགས་ཟ་བ། ལུས་ལ་མི་ལྟོས་པ་ཡིན་ཏེ། དེ་དག་ལ་སོགས་པ་གཞན་ཡང་དཀའ་ཐུབ་ཀྱི་བྱེ་བྲག་དཔག་ཏུ་མེད་པར་གྱུར་ཏོ། །དེའི་ཡོན་ཏན་གྱི་ཁྱད་པར་ནི་འདི་དག་ཡིན་ཏེ། སྲོག་ཆགས་འབྱུང་པོ་རྣམས་ལ་མི་འཚེམ་
བྱིན་པ་དག་ཤིན་ཏུ་སྡོམ། གཞན་གྱི་བུད་མེད་ཀྱི་དྲུང་དུ་འགྲོ་བའི་ཡིད་ལ་བྱེད་པ་མེད། ཆང་འཐུང་བ་སྤངས། སེམས་འཁྲུལ་བ་མེད། དཀའ་ཐུབ་དང་མ་བྲལ། ཕ་རོལ་གྱི་སེམས་རྗེས་སུ་སྲུང་། ཚིག་རྩུབ་པོ་ཡོངས་སུ་སྲུང་། ཀུན་ཤེས་པ་ལ་བསྟེན། སྔོན་གྱི་དྲང་སྲོང་གི་རྗེས་སུ་
དྲན་ཏེ། དེ་དག་ལ་སོགས་པ་གཞན་ཡང་ཡོན་ཏན་གྱི་ཁྱད་པར་དཔག་ཏུ་མེད་པ་དག་དང་ལྡན་པར་གྱུར་ཏོ། །དེའི་ཤེས་པའི་ཁྱད་པར་ནི་འདི་ལྟ་བུ་འདི་དག་ཡིན་ཏེ། འདི་ལྟ་སྟེ། རྫུ་འཕྲུལ་གྱི་རྣམ་པ་ཤེས་པ་དང་། ལྷའི་རྣ་བ་ཤེས་པ་དང་། ཕ་རོལ་གྱི་སེམས་ཤེས་པ་དང་། སྔོན་གྱི་གནས་
ཤེས་པ་དང་། སེམས་ཅན་རྣམས་ཀྱི་འཆི་འཕོ་དང་། སྐྱེ་བ་ཤེས་པ་དང་། བཟོའི་གནས་དང་། ལས་ཀྱི་གནས་ཀྱི་དོན་ཐམས་ཅད་ཤེས་པ་དང་། ཆོས་ཤེས། དུས་ཤེས། དུས་ཚོད་ཤེས། བདག་ཤེས། ཐབས་ལ་མཁས་པ་ཤེས་ཏེ། དེ་དག་ལ་སོགས་པ་གཞན་ཡང་ཤེས་
པའི་ཁྱད་པར་དག་དཔག་ཏུ་མེད་པར་གྱུར་ཏོ། །དེ་འདི་སྙམ་དུ་སེམས་ཏེ། བདག་གི་ཤེས་པའི་ཁྱད་པར་འདི་དག་ནི་རྟོགས་ན་ཤེས་པ་གང་གིས་ཤེས་པ་འདི་དག་ཐམས་ཅད་གང་དུ་འགོག་པར་འགྱུར་བའི་ཡོངས་སུ་ཤེས་པའི་ཤེས་པ་དེ་དག་མི་ཤེས་ཏེ། འཇིག་རྟེན་ན་དགེ་སྦྱོང་ངམ། བྲམ་ཟེ་གང་

དག་ཤེས་པ་འདི་ལ་བསླབས་པ་སུ་ཡོད་སྙམ་ནས། དེ་ཤེས་པ་དེ་བཙལ་བའི་ཕྱིར་སློངས་མོས་འཚོ་བར་གྱུར་ནས། དེ་མུ་སྟེགས་པ་ཐམས་ཅད་ཀྱི་དྲུང་དུ་སོང་བ་དང་། དེ་སློངས་མོས་འཚོ་བར་རིག་ནས་གདོལ་པ་ཡན་ཅད་དག་གིས་མཆོད་སྦྱིན་བྱེད་ཀྱང་གང་གིས་ཡང་མ་བླངས་སོ། །དེ་མ་བླངས་
པས་སློངས་མོས་འཚོ་བའི་སྒྲ་ཕྱོགས་བཅུའི་འཇིག་རྟེན་དུ་གྲགས་སོ། །དེའི་ཚེ་ལྷོ་ཕྱོགས་ན་གངས་རིའི་རྒྱལ་པོ་ལ་དྲང་སྲོང་ཀུན་རིག་ཅེས་བྱ་བ་ལྔ་མངོན་པར་ཤེས་པ་ཞིག་གནས་སོ། །དེ་ཉིན་མཚན་དུ་གནས་ན་འདུག་སྟེ། འཇིག་རྟེན་ཐམས་ཅད་ལ་རྟོག་པ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་སོ། །ཇི་ལྟར་སེམས་མཉམ་པར་གཞག་པས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དག་རབ་ཏུ་ཤེས། ངག་གི་སྤྱོད་པ་དག་ཀྱང་རབ་ཏུ་ཤེས། ལུས་ཀྱི་སྤྱོད་པ་དག་ཀྱང་རབ་ཏུ་ཤེས། དཀའ་ཐུབ་སྤྱོད་པ་དག་ཀྱང་རབ་ཏུ་ཤེས། བརྟུལ་ཞུགས་སྤྱོད་པ་དག་ཀྱང་རབ་
ཏུ་ཤེས། ཡོན་ཏན་སྤྱོད་པ་དག་ཀྱང་རབ་ཏུ་ཤེས། ཤེས་པ་སྤྱོད་པ་དག་ཀྱང་རབ་ཏུ་ཤེས། རྣམ་པར་ཤེས་པ་སྤྱོད་པ་དག་ཀྱང་རབ་ཏུ་ཤེས་སོ། །དེ་ལྷའི་མིག་གིས་སློངས་མོས་འཚོ་བ་འོད་བཟང་དེ་མཐོང་སྟེ། དེའི་སེམས་ཀྱང་རབ་ཏུ་ཤེས། དེའི་བསམ་པ་ཡང་རབ་ཏུ་ཤེས་སོ། །
སློངས་མོས་འཚོ་བ་འོད་བཟང་འདི་སྟོབས་དང་སྟོབས་མ་ཡིན་པ་ཤེས་པའི་ངེས་པར་འབྱུང་བ་རབ་ཏུ་མི་ཤེས་ཏེ། རབ་ཏུ་མི་ཤེས་པས་ཉམ་ཐག་གོ་སྙམ་ནས། དེ་དེ་ལ་སྙིང་རྗེ་སྐྱེས་སོ། །དེ་སྙིང་རྗེས་ནོན་པའི་སེམས་ཀྱིས་འདི་ལྟ་སྟེ་དཔེར་ན། སྐྱེས་བུའི་ལག་པ་བསྐུམ་པ་ལས་བརྐྱང་
བའམ། ལག་པ་བརྐྱང་བ་ལས་བསྐུམ་པ་དེ་བཞིན་དུ་དྲང་སྲོང་ཀུན་རིག་གངས་རིའི་རྒྱལ་པོ་ལས་བབས་ནས། སློངས་མོས་འཚོ་བ་འོད་བཟང་གི་མདུན་དུ་ཤེས་པ་དང་ལྡན་པར་བྱས་ནས་འདུག་གོ། །སློངས་མོས་འཚོ་བ་འོད་བཟང་གིས་ཤེས་རིག་དེ་རྒྱང་རིང་པོ་ནས་འོང་བ་མཐོང་ངོ་། །
མཐོང་ནས་ཀྱང་དེའི་ནུས་པ་སྤངས་ནས། ཀུན་རིག་ཤེས་ལྡན་གྱི་རྐང་པ་ལ་མགོ་བོས་ཕྱག་འཚལ་ཏེ། ཤེས་རིག་གི་སྟན་བཤམས་ནས་ལག་པ་གཉིས་ཀྱིས་ལེགས་པར་བཟུང་ནས་ཤེས་པ་སྨྲ་བར་སྟན་དེ་ལ་བཞག་གོ། །བཞག་ནས་ཤེས་པར་འདོད་པ་དང་ལྡན་པས་ཞེས་ཆེར་རབ་ཏུ་བྱས་ཏེ།

དྲང་སྲོང་ཀུན་རིག་དེ་ལ་ཚིགས་སུ་བཅད་པའི་དབྱངས་ཀྱིས་དྲི་བ་དྲིས་པ། མཁྱེན་པ་ཀུན་ལ་འཇིགས་མི་མངའ། །མཁྱེན་པ་གསུང་པས་གང་ལ། །གང་དུ་བདག་སྐྱེས་ཐེ་ཚོམ་མཆིས། །དགེ་བའི་སུག་ལས་ཅི་བགྱིས་པས། །སེམས་ཅན་ཀུན་ལ་ཕན་པ་བགྱིད། །སེམས་
ཅན་ཀུན་གྱི་སྤྱོད་པ་དང་། །སྟོབས་དང་སྟོབས་མ་ཡིན་ཤེས་དང་། །གང་གིས་ཁྱོད་ཀྱིས་ཤེས་མཆོག་ནི། །ཐོས་ནས་དེ་ནས་ཕྱིར་མི་འགག །ཤེས་པ་གང་གིས་རྣམ་ཤེས་པ། །ཡེ་ཤེས་ཆེན་པོ་ཁྱོད་ལ་ཞུ། །མཁས་པ་དེ་དག་བདག་ལ་གསུངས། །ཤེས་པ་ཡི་ནི་སྟོབས་དང་ལྡན། །ཤེས་པ་
ཀུན་ལ་འཇིགས་མེད་པ། །སྙིང་བརྩེ་བ་ན་དེ་དག་ཀུན། །ཇི་ལྟ་བཞིན་དུ་དེའི་ལུང་བསྟན། །ཆོས་སྦྱིན་པ་ལ་སེར་སྣ་མེད། །ཤེས་པ་དག་ཀྱང་ཡོངས་སུ་སྡུད། །ཤེས་ལྡན་རྣམས་ལ་དེ་དགའ་ཞིང་། །སྦྱིན་པ་ཡང་དག་སྡུད་པར་བྱེད། །ཤེས་པ་མང་པོ་རྣམས་ཀྱང་འདོད། །སྦྱིན་པ་ཡང་དག་སྡུད་པར་
བྱེད། །ཤེས་པའི་ཡེ་ཤེས་ཚོལ་བྱེད་པ། །ཡེ་ཤེས་དམ་པ་དེ་འཐོབ་བོ། །མཁས་པ་ཡི་ནི་ཤེས་པ་ཡིས། །མཛངས་པ་དེ་ནི་ཤེས་པ་རྟོགས། །འགོག་པར་འགྱུར་བའི་ལམ་ཤེས་ཤིང་། །མྱུར་བ་ཉིད་དུ་ཏིང་འཛིན་སྐྱེས། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན། སློངས་
མོས་འཚོ་བ་འོད་བཟང་ཞེས་བྱ་བར་གྱུར་པ་དེ་བཞིན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་སློངས་མོས་འཚོ་བ་འོད་བཟང་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དྲང་སྲོང་ཀུན་རིག་ཅེས་བྱ་བ་ཤེས་པ་སྨྲ་བར་གྱུར་པ་དེ་གཞན་ཡིན་
པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། དེ་བཞིན་གཤེགས་པ་མར་མེ་མཛད་དེ་དེའི་ཚེ་ཀུན་རིག་ཅེས་བྱ་བ་ཤེས་པ་སྨྲ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྟོབས་དང་སྟོབས་མ་ཡིན་པ་ཤེས་པ་འགོག་པར་འགྱུར་བའི་ལམ་ཤེས་པ་རྟོགས་
པར་འདོད་པས་ཡང་དག་པར་སྡོམ་པ་ཅན་དུ་བྱ། ཡེ་ཤེས་ཀྱི་སྣང་བ་འདོད་པར་ཡང་བྱ། འཇིག་རྟེན་གྱི་ཟང་ཟིང་ཡང་ཡོངས་སུ་གཏང་བར་བྱའོ། །མཽད་གལ་གྱི་བུ་ངས་བརྩོན་འགྲུས་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་སེམས་ཅན་ཐམས་ཅད་ཀྱི་དོན་དུ་

བརྩོན་འགྲུས་ཤེས་པ་ཇི་ལྟར་རྟོགས་པར་བྱ་སྙམ་ནས་དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་དེད་དཔོན་སློང་ལྡན་ཞེས་བྱ་བ་ཕྱུག་ཅིང་ནོར་མང་
ལ་ལོངས་སྤྱོད་ཆེ་བ། སྔོན་ནས་རབ་ཏུ་ཉོན་མོངས་པ་མེད་པ། དེད་དཔོན་གྱི་བུ་དེད་དཔོན་གྱི་བཟོའི་རིགས་ཁོང་དུ་ཆུད་པར་ལྡན་པ་ཞིག་བྱུང་ངོ་། །དེའི་ཕའི་བསམ་པ་བདག་ཇི་ལྟ་བུ་འདི་དང་མི་འབྲལ་བར་བྱ། དེ་ཅིའི་ཕྱིར་ཞེ་ན། བདག་ལ་བདུན་བརྒྱུད་ཚུན་ཆད་ཀྱི་ནོར་རྫས་མང་པོ་མ་ཉམས་
པར་ཡོད་དེ། དེས་ན་གཞོན་ནུ་འདི་འཚོ་བ་བདེ་བར་འགྱུར་རོ་སྙམ་མོ། །དེ་སྐྱེས་མ་ཐག་ཏུ་ཚོང་པ་གང་དག་གི་ཁྱེའུ་ཤེད་མཉམ་དུ་སྐྱེས་པ་དེ་དག་ཕ་མས་དེའི་སྟེན་གྲོགས་སུ་བྱིན་ཏེ། བུ་སྟེན་གྲོགས་འདི་དག་དང་དེ་ལྟར་ལྷན་ཅིག་ཏུ་དགའ་བར་རྩེས་ཤིག །ཡོངས་སུ་སྤྱོད་ཅིག །དེ་ཁྱིམ་བདག་དེ་
ཉིད་ཀྱི་ནང་ན་བཟོ་ཐམས་ཅད་སློབ་ཏུ་བཅུག་སྟེ། དེར་ཡི་གེ་དང་། དེར་བགྲང་བ་དང་། དེར་གྲངས་དང་། དེར་ཚོང་པའི་ཐ་སྙད་དང་། དེར་ཞིང་རྨེད་པའི་ཐ་སྙད་དང་། དེར་བཟོའི་ཐ་སྙད་དང་། དེར་བཟོ་ཐབས་ཐམས་ཅད་དང་། ཐ་ན་ལས་བྱེད་པའི་བཟོ་ཡང་སློབ་ཏུ་བཅུག་སྟེ། དེ་བཟོ་
ཐམས་ཅད་ལ་བསླབས་ཤིང་། སྒྱུ་རྩལ་གྱི་རྣམ་པ་ཐམས་ཅད་ཤེས་ཏེ། སྒྱུ་རྩལ་དྲུག་ཅུ་རྩ་བཞི་བསླབས་སོ། །སྟེན་གྲོགས་དེ་དག་དང་ལྷན་ཅིག་ཏུ་བཀུག་ཤུད་ཀྱིས་རྩེ་སྟེ། དེ་སྒྱུ་རྩལ་ཐམས་ཅད་ལ་བསླབས་པས། སྟེན་གྲོགས་དེ་དག་ལ་བསླབས་པ་ཐམས་ཅད་སྟོན་ཏོ། །དེ་ནས་སྟེན་
གྲོགས་གཅིག་གིས་ཡང་དག་པའི་ཚིག་གིས་སྐུལ་བར་བྱེད་དེ། གཞོན་ནུ་ཁྱོད་གཞན་དུ་འགྲོ་བའི་སྐྱོན་མི་ཤེས་སམ། སྐྱེ་བོ་གཞན་གྱིས་ཕྱིར་རྒོལ་བར་མི་ཤེས་སམ། ཡུལ་གཞན་དུ་འགྲོ་བའི་གཉེན་མ་ཡིན་པའི་སྐྱོན་མི་ཤེས་སམ། འབྲོག་གི་སྐྱོན་མི་ཤེས་སམ། ཆུའི་དགོན་པའི་སྐྱོན་
མི་ཤེས་སམ། བཟའ་བ་དཀོན་པ་དང་། བཏུང་བ་དཀོན་པ་དང་། སྐོམ་དཀོན་པའི་སྐྱོན་མི་ཤེས་སམ། མི་མཛའ་བའི་དགོན་པ་དང་། རྐུན་པོས་དཀྲུགས་པའི་སྐྱོན་མི་ཤེས་སམ། གཅན་གཟན་ཁྲོ་བས་དཀྲུགས་པའི་སྐྱོན་མི་ཤེས་སམ། ཆུས་དཀྲུགས་པ་དང་། རྒྱ་མཚོར་སོང་

བའི་གྲུ་བོ་ཆེ་འཇིག་པའི་སྐྱོན་མི་ཤེས་སམ། སྲིན་མོས་འཇིགས་པ་དང་། གནོད་པ་ཐམས་ཅད་ལས་ཡོངས་སུ་གྲོལ་བ་མི་ཤེས་སམ། གཞོན་ནུ་ཁྱོད་གཞན་གྱི་རྫས་ཀྱིས་ཡོངས་སུ་སྤྱོད་དམ། བདག་གི་སྡུག་བསྔལ་གྱི་རྣམ་པ་དེ་ཉིད་མི་ཤེས་ཏེ། ཆོས་མ་ཡིན་པས་བསླུས་
སོ། །སྡུག་བསྔལ་གྱིས་བསྡུས་པའི་རྫས་ཡ་ང་བའི་རྫས་འདི་དག་མི་དགོངས་སམ་ཞེས་ཏེ། སྟེན་གྲོགས་དེས་ཡོངས་སུ་བསྐུལ་བར་གྱུར་ཏོ། །ཚིག་ཤིན་ཏུ་ཐོས་ནས། སེམས་པའི་རྗེས་སུ་ཞུགས་ཏེ་ཉེས་པ་དེ་དག་ཐམས་ཅད་སྙིང་ལ་བཞག་ནས་དེས་དེ་ལ་སྨྲས་པ། སྟེན་གྲོགས་
བདག་ལ་བསྒོ་བ་ལེགས་སོ་ལེགས་སོ། །ད་ལྟར་གྱི་ནོར་བསགས་པ་ནི་སྡུག་བསྔལ་བ་ཡིན་ཏེ། སྟེན་གྲོགས་དེ་ལྟ་བས་ན་བདག་ཉིད་ཀྱི་ནོར་རྫས་ཡང་དག་པར་བསྡུ་བར་བྱའོ། །དེས་ཕ་མ་དག་ལ་སྨྲས་པ། ཡབ་ཡུམ་ཚོང་ལ་མཆི་ཞིང་དེད་དཔོན་གྱི་བཟོ་ནུས་པར་བགྱིའོ། །དེ་ནས་ཕ་
མ་དག་གིས་སྨྲས་པ། གཞོན་ནུ་ཁྱོད་གཞན་དུ་འགྲོ་བར་མ་བྱེད་ཅིག །བུ་གཞན་དུ་འགྲོ་བ་ལ་སྐྱོན་དཔག་ཏུ་མེད་པ་ཡོད་དོ། །བདུན་བརྒྱུད་ཚུན་ཆད་ཀྱི་ཕུགས་ཀྱི་ནོར་རྫས་རབ་ཏུ་མང་པོ་དེ་དག་ཡོད་དེ། འཁྲུལ་པ་མེད་པར་འདུག་གི །གང་དེ་དག་ལ་ཡོངས་སུ་སྤྱོད་ལ། ཁྱོད་ཀྱིས་གང་གཞན་
དུ་འགྲོ་བར་བྱས་པ་མེད་པར་གྱིས་ཤིག །བུ་གཞན་དུ་འགྲོ་བ་དང་། ནོར་རྫས་ཡང་དག་པར་བསྡུ་བ་དེ་ལ་ཡང་སྡུག་བསྔལ་མང་བ་སྟེ། གཞོན་ནུ་འདི་ནས་མ་འབྱུང་བར་ནོར་རྫས་ཀྱིས་ནོར་རྫས་ཀྱི་བྱ་བ་གྱིས་ཤིག །དེས་སྨྲས་པ། ཡབ་དེ་ལྟར་མ་ལགས་ཏེ། ཡང་དག་པར་མ་གསུངས་སོ། །དེ་ཅིའི་སླད་
དུ་ཞེ་ན། གལ་ཏེ་བདག་གི་བདུན་བརྒྱུད་ཀྱི་ཟུང་གིས་ནོར་རྫས་བཙལ་བ་དེ་ཅི་བུས་ཡོངས་སུ་མ་སྤྱད་དམ། གང་དྲུག་པའི་ཟུང་གིས་བཙལ་བ་དེ་ཅི་བུས་ཡོངས་སུ་མ་སྤྱད་དམ། གང་ལྔ་པའི་ཟུང་གིས་བསྒྲུབས་པ་དེ་ཅི་བུས་ཡོངས་སུ་མ་སྤྱད་དམ། གང་མེས་ཀྱི་ཡབ་ཀྱི་བར་གྱིས་བསྒྲུབས་པ་དེ་ཅི་
མེས་ཀྱིས་ཡོངས་སུ་མ་སྤྱད་དམ། གང་ཡབ་ཀྱི་ཡབ་ཀྱིས་བསྒྲུབས་པའི་ནོར་རྫས་དེ་ཅི་ཡབ་ཀྱིས་ཡོངས་སུ་མ་སྤྱད་དམ། དེ་བཞིན་དུ་བདག་ཀྱང་གཉེན་གྱིས་བསྒྲུབས་པའི་ནོར་རྫས་ཡོངས་སུ་སྤྱོད་པར་མི་སྤྲོའོ། །དེ་ཕ་མའི་འདོད་པ་དག་མེད་ནས། གྲུ་བོ་ཆེའི་ཚོང་བ་དང་སོང་སྟེ། དེ་རྒྱ་

མཚོ་ཆེན་པོར་ཞུགས་པ་དང་། རླུང་གིས་གྲུ་བོ་ཆེ་རིན་པོ་ཆེའི་གླིང་དུ་ཕུལ་ཏོ། །དེས་ནོར་བུ་རིན་པོ་ཆེ་རིན་ཐང་མེད་པ་སྣ་ཚོགས་དག་གིས་གྲུབ་བོ་ཆེ་བཀང་ངོ་། །དེ་འགྲོ་བ་ཤིན་ཏུ་གྲུབ་ནས་ཕྱིར་ལོག་སྟེ། རྒྱ་མཚོ་ལས་དེ་རྒལ་ནས་རྒྱ་མཚོ་ལ་ཉེ་རེག་བྱས་པ་དང་། ནོར་བུ་རིན་པོ་ཆེ་ལག་པ་ལ་བཏགས་
པ་རྒྱ་མཚོ་ཆེན་པོར་ལྷུང་ངོ་། །དེས་ནོར་བུ་རིན་པོ་ཆེ་དེ་ལྷུང་བ་ཙམ་ཉིད་ཀྱིས་ཆུ་ཕྱགས་ཐོགས་ཏེ། ནོར་བུ་རིན་པོ་ཆེའི་ཕྱིར་དེ་རིང་རྒྱ་མཚོ་འདི་བསྐམ་པར་བྱའོ་སྙམ་ནས། དེས་ཆུ་ཕྱགས་ཐོགས་ཏེ་རྒྱ་མཚོ་ཆེན་པོ་བསྐམ་པར་བརྩམས་པ་དང་། དེས་ཆུ་ཕྱགས་བཟུང་མ་ཐག་ཏུ། ལྷ་བྱེ་བ་ཁྲག་
ཁྲིག་སྟོང་ཕྲག་བརྒྱ་དག་གྲོགས་བྱེད་པར་གྲུབ་པར་གྱུར་ཏེ། རླུང་ཡང་གྲོགས་བྱེད་པར་གྱུར། མེ་ཡང་གྲོགས་བྱེད་པར་གྱུར་ཏོ། །དེ་ནས་ཆུ་ཕྱགས་ཀྱིས་ཆུ་ཕྱགས་མ་ཐག་ཏུ། རླུང་གིས་ནི་སྐེམས། མེས་ནི་སྲེག་གོ། །དེ་ནས་རྒྱ་མཚོའི་ལྷ་དེ་དག་གིས་ཚིགས་སུ་བཅད་དེ་སྨྲས་པ། རྒྱ་མཚོ་
འདི་ནི་མཐའ་ཡས་མི་ཟད་དེ། །ཆུང་ཟད་འགྱུར་གྱི་རྒྱ་མཚོ་དེ་ལྟ་མིན། །གྲོགས་པོ་མཁའ་ལ་ལམ་གྱི་ཚད་འདོད་ལྟར། །རྒྱ་མཚོ་བསྐམ་པ་དག་ཏུ་ཇི་ལྟར་ནུས། །དེས་ལྷ་དེ་དག་ལ་ཚིགས་སུ་བཅད་དེ་སླར་སྨྲས་པ། །ལྷ་དག་རྒྱ་མཚོ་མཐའ་ཡས་མ་ཡིན་ཏེ། །རྒྱ་མཚོ་དཔག་ཚད་མཐའ་ཡས་དཔག་
ཏུ་རྙེད། །བདག་གིས་བརྩོན་འགྲུས་མཐའ་ཡས་དཔག་མེད་དེ། །རྒྱ་མཚོ་ཆེན་པོ་བདག་གིས་བསྐམ་པར་ནུས། །རྒྱ་མཚོའི་ལྷ་དག་བདག་གི་སྟོབས་ལ་ལྟོས། །མཁའ་ལ་ལྷ་ཡིས་རབ་ཏུ་གང་བ་ལྟོས། །དཔག་མེད་ལྷ་དག་བདག་གི་གྲོགས་ཡིན་ཏེ། །འབར་དང་སྲེག་དང་དེ་བཞིན་རླུང་དུ་བྱེད། །
བདག་གིས་མཁའ་ལ་ཆུ་གཏོར་བ་དག་ལྟོས། །ནམ་མཁའ་དེར་ནི་འགྲོ་བ་མེད་པ་ལྟོས། །ལྷ་ཚོགས་དག་ནི་བདག་གི་གྲོགས་འགྱུར་ཏེ། །བར་སྣང་ཆུ་ནི་སྲེག་ཅིང་སྐེམས་པར་བྱེད། །བར་སྣང་རླུང་ནི་བདག་གི་གྲོགས་ཡིན་ཏེ། །རྒྱ་མཚོ་བསྐམ་པ་དག་ལ་ཞུམ་པ་མེད། །རྒྱ་མཚོས་བདག་
གི་ནོར་བུ་མ་བཏང་ན། །བདག་ལ་ཡོན་གནས་སྟོབས་དང་ལྡན་པ་སྟེ། །བདག་གི་ཡོན་གནས་སངས་རྒྱས་དཀོན་མཆོག་དང་། །དེ་བཞིན་སྤྲོས་མེད་ངེས་པར་འབྱུང་བའི་ཆོས། །འདྲེན་པའི་སྲས་དེ་དགེ་འདུན་རིན་ཆེན་ཡོད། །དེ་དག་བདག་གིར་འགྱུར་ཏེ་མཚོ་ལྷའི་མིན། །སྐྱེས་བུ་ཁྱོད་ཀྱི་

ཚིག་ནི་ངེས་པ་སྟེ། །དེ་བཞིན་བརྩོན་སྟོབས་ཁྱོད་དང་ལྡན་པ་ལེགས། །ནོར་བུ་དང་ནི་ལྡན་པར་འགྱུར་ཏེ་སྦྱིན། །དེ་རིང་དཀོན་མཆོག་གསུམ་ལ་འབུལ་བར་གྱིས། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དེད་དཔོན་སློང་ལྡན་ཞེས་བྱ་བར་
གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་དེད་དཔོན་གྱི་བུ་སློང་ལྡན་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་བརྩོན་འགྲུས་བརྩམ་པར་བྱའོ། །མཽད་གལ་གྱི་བུ་ལེ་ལོ་མེད་ཅིང་
བརྩོན་འགྲུས་བརྩམས་པའི་བྱང་ཆུབ་སེམས་དཔས་ནི་བདུད་ལྔ་ལས་རྒྱལ་བར་ནུས་སོ། །ལྔ་གང་ཞེ་ན་འདི་ལྟ་སྟེ། ཉོན་མོངས་པའི་བདུད་དང་། ཕུང་པོའི་བདུད་དང་། ལས་ཀྱི་བདུད་དང་། འཆི་བདག་གི་བདུད་དང་། ལྷའི་བུའི་བདུད་དོ། །མཽད་གལ་གྱི་བུ་ངས་བརྩོན་འགྲུས་
ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ། སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་
གྲགས་བཟང་ཞེས་བྱ་བ་ཆོས་ཀྱི་རྒྱལ་པོ་ཆོས་དང་ལྡན་པ་ཚེ་རིང་བ། རིང་དུ་འཚོ་བ་རིན་པོ་ཆེ་སྣ་བདུན་དང་ལྡན་པ། མིའི་འབྱོར་པ་བཞི་དང་ལྡན་པ། བུད་མེད་འབུམ་ཕྲག་དྲུག་གི་བདག་པོ། སྐྱེ་བོའི་བསམ་པ་ཐམས་ཅད་ལ་དབང་སྒྱུར་བ། དེ་བཞིན་གཤེགས་པ་དཔག་ཏུ་མེད་པ་དག་ལ་རིམ་གྲོ་
བྱས་པ། དགེ་བའི་རྩ་བ་བསགས་པ་དཔག་ཏུ་མེད་པ་དང་ལྡན་པ། སངས་རྒྱས་ཁྲི་ཕྲག་དཔག་ཏུ་མེད་པ་དག་ལ་དགེ་བའི་རྩ་བ་བསྐྱེད་པ་དང་ལྡན་པ་ཞིག་བྱུང་ངོ་། །དེའི་ཚེ་དེ་བཞིན་གཤེགས་པ་འོད་ཟེར་མཐའ་ཡས་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །
དེ་བཞིན་གཤེགས་པ་འོད་ཟེར་མཐའ་ཡས་དེའི་འཁོར་ཉན་ཐོས་དགྲ་བཅོམ་པ་ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ་ནས་དེ་བཞིན་དུ་སྦྱར་ཏེ། ཡང་དག་པའི་ཤེས་པས་རྣམ་པར་གྲོལ་བར་བྱེད་པ་བྱེ་བ་ཁྲག་ཁྲིག་ཕྲག་སྟོང་བརྒྱད་ཅུ་བྱུང་ངོ་། །དེ་བཞིན་གཤེགས་

པ་འོད་ཟེར་མཐའ་ཡས་དེའི་སྐུ་ཚེའི་ཚད་དཔག་ཏུ་མེད་པར་གྱུར་ཏོ། །དེའི་ཚེ་རྒྱལ་པོ་གྲགས་བཟང་དེའི་ཡུལ་རྣམ་པར་རྒྱལ་བྱེད་དེ་ནས་སེམས་ཅན་བྱེ་བ་ཁྲག་ཁྲིག་ཕྲག་དགུ་བཅུ་རྩ་དགུ་དག་དེ་བཞིན་གཤེགས་པ་དེའི་དྲུང་དུ་སྐྲ་དང་ཁ་སྤུ་བྲེགས་ནས། གོས་ངུར་སྨྲིག་བགོས་ཏེ། ཁྱིམ་ནས་ཁྱིམ་མེད་པར་
རབ་ཏུ་བྱུང་ངོ་། །དེ་དག་ཐམས་ཅད་བདེ་བ་སྐྱེས་པར་ནི་གྱུར་ན། དེ་དག་ལེ་ལོ་མེད་པ་ཡང་རྙིད་པར་གྱུར་ཏོ། །དེ་ནས་དེ་བཞིན་གཤེགས་པ་འོད་ཟེར་མཐའ་ཡས་ཏེ་སྔོན་གྱི་དགེ་སློང་གི་དགེ་འདུན་དེ་དག་དང་ཐབས་ཅིག་ཏུ་དགེ་སློང་དེ་དག་ག་ལ་བ་དེར་གཤེགས་ཏེ་ཕྱིན་ནས། དགེ་སློང་གི་དགེ་
འདུན་དེ་དག་གི་དབུས་སུ་བཞུགས་ཏེ། དེའི་ཚེ་བརྩོན་འགྲུས་ཤེས་པ་ཀུན་འབྱུང་བ་ཤེས་པ་དང་ཡང་དག་པར་རབ་ཏུ་ལྡན་པའི་གཏམ་འདི་ལྟ་བུ་འདི་དག་མཛད་དོ། །གང་ཟག་ཐེག་པ་བདེ་བས་བརྩོན་འགྲུས་ཤེས་པ་ཀུན་འབྱུང་བ་ཤེས་པ་སྒྲུབ་པར་འདོད་པས་ལམ་བར་མས་རྟོགས་པར་བྱ་སྟེ། འདི་
ལྟ་སྟེ། བྱང་ཆུབ་ཀྱི་ཡན་ལག་དུས་དང་དུས་མ་ཡིན་པར་བསྒོམ་པ་ལ་ཞུམ་པ་མེད་པའི་བརྩོན་འགྲུས་ཀྱིས་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་བསྒོམ་པར་བྱའོ། །ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་བསྒོམ་པར་བྱ། ཆོས་རྣམ་པར་འབྱེད་པ་ཡང་དག་བྱང་ཆུབ་
ཀྱི་ཡན་ལག་བཏང་སྙོམས་སུ་བྱ། དགའ་བ་ཡང་དག་བྱང་ཆུབ་ཀྱི་ཡན་ལག་བསྒོམ་པར་བྱ། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ལ་བཏང་སྙོམས་སུ་བྱ་སྟེ། དེ་ཡང་དྲན་པས་བརྟག་པར་བྱའོ། །སེམས་ཅན་རྣམས་ལ་བདེ་བར་སེམས་པ་དེ་ཡང་ཟས་ཞིམ་པོ་བཟའ་བ་དང་ལྡན་པ་
དང་། གནས་མལ་བདེ་བར་འདུག་པ་དང་། ལུས་གྱ་ནོམ་པ་སླ་བར་འགྱུར་རོ། །བརྩོན་འགྲུས་ཀྱི་སྤྱད་པ་རྩོམ་པས་སྡུག་བསྔལ་དང་བྲལ་ཞིང་། ཤེས་པ་བར་མ་དེས་བདེ་བར་ངེས་པར་འབྱུང་ངོ་། །དེའི་ཚེ་རྒྱལ་པོ་གྲགས་བཟང་དེ་ཆོས་བཤད་པ་དེ་དག་ལ་གུས་པར་བྱས་ཤིང་ཐོས་ལ་བརྩོན་
འགྲུས་ཤེས་པ་ཀུན་འབྱུང་བ་ཤེས་པ་རྟོགས་པས་མི་སྐྱེ་བའི་ཆོས་ལ་བཟོད་པ་ཐོབ་བོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་གྲགས་བཟང་ཞེས་བྱ་བར་གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་

རྒྱལ་པོ་གྲགས་བཟང་ཞེས་བྱ་བར་གྱུར་ཏོ། །དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་འདི་ལྟར་འཚལ་ཏེ། གང་གི་ཚེ་དེ་བཞིན་གཤེགས་པ་མར་མེ་
མཛད་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་བོ། །ཞེས་བཤད་པ་འདིའི་དོན་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་གང་ཟག་གི་དབང་གིས་སངས་རྒྱས་བཅོམ་ལྡན་འདས་དག་ཆོས་སྟོན་པ་གོ་བར་མཛད་དོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་
སེམས་དཔའ་བརྩོན་འགྲུས་ཤེས་པ་ཀུན་འབྱུང་བ་ཤེས་པ་བསྒྲུབ་པར་འདོད་པས་བརྩོན་འགྲུས་མཉམ་པ་ཉིད་ལ་མངོན་པར་བརྩོན་པར་བྱ་ཞིང་རྟོགས་པར་བྱ། བརྩོན་འགྲུས་ཤེས་པ་ཀུན་འབྱུང་བ་ཤེས་པ་ལ་ཆོས་སོ་སོར་བགེད་པ་དང་། ཟང་ཟིང་སོ་སོར་བགེད་པར་ཡང་བྱའོ། །མཽད་གལ་གྱི་བུ་ངས་
བརྩོན་འགྲུས་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་སེམས་ཅན་རྣམས་ལ་ཕན་པར་བྱ་བའི་ཕྱིར་བརྩོན་འགྲུས་ཤེས་པ་འགོག་པ་ཤེས་པ་ཇི་ལྟར་ཐོབ་པར་བྱ་སྙམ་ནས་དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་
གྱི་བུ་སྔོན་བྱུང་བ་འདས་པའི་དུས་ནས། དེ་བཞིན་དུ་སྦྱར་ཏེ། དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་བདུད་དད་པ་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་བདུད་དད་པ་དེའི་སངས་རྒྱས་ཀྱི་ཞིང་དུ་བདུད་ཤུགས་འཆང་ཞེས་བྱ་
བ་བྱུང་སྟེ། དེས་སངས་རྒྱས་ལྔ་བརྒྱ་དག་གི་གསུང་རབ་ལ་བདུད་ཀྱི་ལས་བྱས་སོ། །དེ་བཞིན་གཤེགས་པ་དེ་དག་ལ་སྲིད་པའི་འགྲོ་བར་འཆི་བ་དང་། སྐྱེ་བ་དེ་དང་དེ་དག་ཏུ་མདུད་པར་འཛིན་པ་རྗེས་སུ་དྲན་ཏེ། དེ་བཞིན་གཤེགས་པ་དེ་དག་བཞུགས་པ་དང་། ཡོངས་སུ་མྱ་ངན་ལས་འདས་པ་དེ་དག་
ལ་བདུད་ཀྱི་ལས་རྣམས་བྱས་སོ། །དེ་བཞིན་གཤེགས་པ་དེ་དག་དང་། དེ་བཞིན་གཤེགས་པའི་ཉན་ཐོས་དེ་དག་དང་། དེ་བཞིན་གཤེགས་པ་སོ་སོའི་གསུང་རབ་ལ་བར་ཆད་བྱས་པས་བསྐལ་པ་གྲངས་མེད་པར་ལོག་པར་ལྟུང་ངོ་། །དེ་དེ་བཞིན་གཤེགས་པ་བདུད་དད་པ་དེ་བྱང་ཆུབ་མངོན་པར་འཚང་རྒྱ་བར་

བཞེད་པའི་དེ་བཞིན་གཤེགས་པ་དེའི་གསུང་རབ་ལ་ཡང་བར་ཆད་བྱ་བར་འདོད་དོ། །དེ་ནས་བྱང་ཆུབ་སེམས་དཔའ་བདུད་དད་པ་དེ་བྱང་ཆུབ་ཀྱི་སྙིང་པོ་ལ་བཞུགས་པ་དང་། བདུད་ཤུགས་འཆང་དེ་སྔོན་གྱི་གནས་རྗེས་སུ་དྲན་ནོ། །དེ་བདུད་ཤུགས་འཆང་དེའི་དགེ་བའི་རྩ་བ་དེ་དག་གཟིགས་ནས་
ཇི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་དེ། དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་པས་བདུད་ཤུགས་འཆང་སྔོན་གྱི་དེ་བཞིན་གཤེགས་པ་དེ་དག་ལ་མདུད་པར་བཟུང་བ་རྗེས་སུ་དྲན་ཏེ། གང་སེམས་ཅན་དམྱལ་བ་ཆེན་པོར་སྐྱེས་པ་དེ་དག་རྗེས་སུ་
དྲན། གང་སེམས་ཅན་དམྱལ་བ་ཆེན་པོའི་རྒྱུར་གྱུར་པ་དེ་དག་རྗེས་སུ་དྲན་ནས། དེ་འཇིགས་སྐྲག་སྟེ། སྤུ་ཟིང་ཞེས་བྱེད་ནས། སྐྱོ་བ་ཐོབ་བོ། །སྐྱོ་བ་ཐོབ་པས་བྱང་ཆུབ་སེམས་དཔའ་དེ་ལ་སེམས་རབ་ཏུ་དང་བའི་དད་པ་ཐོབ་ནས། བྱང་ཆུབ་སེམས་དཔའ་བདུད་དད་པ་དེ་ལ་ཚིགས་སུ་བཅད་
དེ་སྨྲས་པ། ཤེས་རབ་ཆེན་པོ་ཡེ་ཤེས་དཔག་མེད་མངའ་བ་ཕན་མཛད་ཐུགས་རྗེ་ཅན། །འཇིག་རྟེན་ཀུན་ལ་ཕན་པ་མཛད་པ་བདེ་གཤེགས་ཁྱོད་ལ་སྐྱབས་སུ་མཆི། །ཇི་ལྟར་རལ་གྲི་གཟེབ་ལ་མི་མཆིས་སྐད་ཅིག་གྱེན་དུ་འཕར་ལྟར་བདག །དེ་ལྟར་རྒྱལ་པོ་ཁྱོད་ལ་དད་མ་བགྱིས་པས་སེམས་
ཅན་སྡུག་བསྔལ་མྱོང་། །ཇི་ལྟར་མི་དག་མདའ་མདུང་མདའ་བོ་ཆེས་བརྒྱ་བ་སྡུག་བསྔལ་ཚོར་འགྱུར་ལྟར། །ཁྱོད་ལྟ་ཡིད་ཀྱིས་སྡང་བ་སེམས་ཅན་དམྱལ་བར་མཆི་ཞིང་སྡུག་བསྔལ་མྱོང་། །ཇི་ལྟར་མི་དག་ཆས་ནས་རི་བོའི་རྩེར་སོང་ལྷུང་བ་ལུས་སྡུག་བསྔལ། །ལྷུང་བས་བརྒྱབ་ཅིང་ཕྱེར་བླགས་ལུས་
ནི་སྐད་ཅིག་ཙམ་ཡང་བདེ་མི་འཐོབ། །དེ་བཞིན་སྟོབས་བཅུ་ཁྱོད་ལ་ཡིད་ཀྱིས་སྣང་བའི་ལུས་ཀྱང་ཕྱེ་མར་འགྱུར། །ཇི་ལྟར་མི་དག་རལ་གྲི་དགྲ་སྟས་བརྒྱབ་ལྟར་སྲིད་འགྲོར་བདེ་མི་འཐོབ། །རྒྱལ་ལ་ཡིད་སྡང་སྲིད་འགྲོར་བདེ་བ་ཅུང་ཟད་ཙམ་ཡང་ཐོབ་པ་མེད། །དེ་ལྟ་བས་ན་བདེ་གཤེགས་ཁྱོད་
ལ་ཡིད་ནི་ཤིན་ཏུ་མངོན་དད་བགྱི། །མཆོག་སྦྱིན་ཁྱོད་ལ་སྐྱབས་སུ་མཆི་ཞིང་བདག་ནི་མི་དགེའི་ལས་མཐོལ་ལོ། །རྒྱལ་བ་སྟོབས་བཅུ་མངའ་བར་བདག་འགྱུར་དེ་རིང་སྨོན་ལམ་བརྟན་པར་འདེབས། །འགྲོ་བ་དཔག་མེད་སྲིད་པའི་འགྲོ་བར་མི་བདེ་སྡུག་བསྔལ་མང་པོ་མྱོང་། །སྟོབས་བཅུའི་སྟོབས་

དག་རབ་ཏུ་ཐོབ་ནས་བདུད་ཀྱི་སྟོབས་ནི་སྟོབས་མེད་བགྱི། །རྒྱལ་ལ་བདག་ནི་ཡིད་གཉིས་རྡུལ་ཙམ་མ་མཆིས་བདེ་བར་གཤེགས་པའི་བློ་ལ་འཇུག །རྒྱལ་བ་འགྲོ་གཙོ་སྟོབས་མཆོག་སྟོབས་མངའ་དཔག་ཏུ་མེད་པར་བདག་འགྱུར་བགྱི། །བདེ་གཤེགས་སྟོབས་བཅུ་སྟོབས་
མཆོག་ཁྱོད་ལ་མི་ཡི་ཚོགས་དག་སྐྱབས་སུ་མཆི། །སྲིད་པ་སྤངས་ཤིང་རྣམ་སྲིད་ཟད་ནས་བདག་ཀྱང་འགྲོ་བའི་རྒྱལ་བར་བགྱི། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བདུད་ཤུགས་འཆང་ཞེས་བྱ་བར་གྱུར་བ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེར་
གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་ངན་སོང་སྤོང་བར་འདོད་ཅིང་། སེམས་ཅན་གྱི་དོན་བྱ་བར་འདོད་པས་མདུད་པར་གཟུང་བར་མི་བྱའོ། །མཽད་གལ་གྱི་བུ་ངས་བརྩོན་འགྲུས་ཤེས་པ་འགོག་པར་འགྱུར་བའི་ལམ་ཤེས་པར་བྱ་བའི་དོན་ནས་དེ་བཞིན་དུ་སྦྱར་ཏེ། མངོན་
པར་འདུས་བྱས་པའི་བར་དུའོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ནས། འཁོར་བ་བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་དངོས་པོར་ངེས་པར་འཛིན་པ་ཞེས་བྱ་བ་ཆོས་ཀྱི་རྒྱལ་པོ་ཆོས་དང་ལྡན་པ་ཞིག་བྱུང་ངོ་། །དངོས་པོ་ཐམས་ཅད་ལ་ངེས་པ་འདི་སྐད་སྨྲ། འདི་
ལྟར་བལྟ་སྟེ། ཇི་ལྟར་དངོས་པོ་གང་གིས་བྱ་བ་དེ་དེ་ལྟར་གྱུར་ཏེ། གཞན་དུ་མ་ཡིན་ནོ། །དེའི་བློན་པོ་ཆོས་ལ་སྤྱོད་པ་ཞེས་བྱ་བ། མཛངས་ཤིང་དཔྱོད་པ་བྱ་བ་དང་། བྱ་བ་མ་ཡིན་པ་ལ་མཁས་པ། རྒྱལ་སྲིད་ཡོངས་སུ་སྐྱོང་བ། དེ་བཞིན་གཤེགས་པ་དཔག་ཏུ་མེད་པ་ལ་བསྙེན་
བཀུར་བྱས་པ། དགེ་བའི་རྩ་བ་དཔག་ཏུ་མེད་པ་བྱས་པ། ཐེག་པ་ཆེན་པོ་ལ་ཡང་དག་པར་རབ་ཏུ་གནས་པ་ཞིག་བྱུང་ངོ་། །དེ་རྒྱལ་པོ་དངོས་པོར་ངེས་པར་འཛིན་པ་དེ་ལྟ་བར་གྱུར་པ་དེ་ལས་འབྲལ་བར་འདོད་ནས་དེས་གསེར་གྱི་སྣོད་དག་བྱེད་དུ་བཅུག་སྟེ། ཏིལ་མར་གྱི་སྣོད་དང་། མར་གྱི་
སྣོད་དང་། ཁ་རའི་སྣོད་དང་། བཏུང་བའི་སྣོད་དང་། བཟའ་བའི་སྣོད་དེ་རིན་པོ་ཆེའི་སྣོད་ཀྱི་རྣམ་པ་དེ་དང་དེ་དག་བྱེད་དུ་བཅུག་སྟེ། དེ་སྣོད་དེ་དག་བྱས་ནས་རྒྱལ་པོ་དངོས་པོར་ངེས་པར་འཛིན་པ་དེ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་སྣོད་འདི་དག་གང་གི་སྣོད་དུ་ངེས་ལགས། དེས་སྨྲས་

པ་གྲོང་གི་གཙོ་བོ་སྣོད་འདི་དག་གང་གིར་རུང་བ་ཁྱོད་བདག་ཉིད་ཀྱིས་ཤེས་པར་གྱིས་ཤིག །འདི་ནི་རེ་ཤིག་ཆུའི་སྣོད་དུ་ངེས་སོ། །འདི་ནི་ཏིལ་མར་གྱི་སྣོད་དུ་ངེས་སོ། །འདི་ནི་མར་སར་གྱི་སྣོད་དུ་ངེས་སོ། །འདི་ནི་སྦྲང་རྩིའི་སྣོད་དོ། །འདི་ནི་བཏུང་བའི་སྣོད་དོ། །འདི་ནི་བཟའ་བའི་སྣོད་དོ། །འདི་
ནི་གསེར་གྱི་སྣོད་དོ། །འདི་ནི་དངུལ་གྱི་སྣོད་དེ། སྣོད་དེ་དག་ཐམས་ཅད་ནི་ངེས་པར་བསྟན་པ་ཡིན་ནོ། །དེ་ནས་བློན་པོ་དེས་སྣོད་དེ་དག་ཐམས་ཅད་བརྗེས་ཏེ། ཏིལ་མར་གྱི་སྣོད་དུ་མར་བླུགས། མར་གྱི་སྣོད་དུ་ཏིལ་མར་བླུགས། སྦྲང་རྩིའི་སྣོད་དུ་བཏུང་བ་བླུགས། བཏུང་བའི་སྣོད་དུ་
སྦྲང་རྩི་བླུགས་ཏེ། ཐབས་དེས་སྣོད་དེ་དག་ཐམས་ཅད་བརྗེས་སོ། །དེ་ནས་བློན་པོ་དེས་སྣོད་དེ་དག་ཐམས་ཅད་བརྗེས་ནས་རྒྱལ་པོ་དེ་གདུགས་ཚོད་ལ་སྤྱན་དྲངས་ཏེ་བཞུགས་ནས་རིམ་གྲོ་པ་ལ་སྨྲས་པ། གྲོགས་པོ་བཀྲུ་བཤལ་གྱི་ཆུ་སྣོད་ནས་ཆུ་ཁྱེར་ཏེ་ཤོག །བཀྲུ་བཤལ་བྱ་ཡིས་
ཆུ་ཉུང་ངུ་ཞིག་ཁྱེར་ཏེ་ཤོག །ཅེས་ཇི་སྐད་བསྒོ་བ་བཞིན་སྣོད་བཀང་སྟེ་ཕུལ་ལོ། །དེ་ནས་རྒྱལ་པོ་དངོས་པོར་ངེས་པར་འཛིན་པ་དེ་སྣོད་དེ་དག་བཀང་བ་མཐོང་ནས། བློན་པོ་དེ་ལ་འདི་སྐད་ཅེས་སྨྲས་སོ། །གྲོང་གི་གཙོ་བོ་སྣོད་བྱས་པ་འདི་དག་ཆུད་མ་ཟོས་སམ། གང་ཆུ་སྣོད་དུ་མར་བླུགས།
དེ་བཞིན་དུ་སྒྱུ་མར་བྱས་པའི་ཆོས་ཐམས་ཅད་ཆུད་མ་ཟོས་སམ། དེས་སྨྲས་པ། ཇི་ལྟར་སྣོད་ཀྱི་རྣམ་པ་འདི་དག་ཆབ་འཚལ་བ་དེ་བཞིན་དུ་དངོས་པོ་ཐམས་ཅད་རྣམ་པར་འཇིག་པའི་མཐའ་ལགས་ཏེ། དངོས་པོ་གང་ཡང་ངེས་པ་མ་མཆིས་སོ། །དངོས་པོ་ཐམས་ཅད་ནི་རྣམ་པར་འཇིག་པའི་
མཐའ་ལགས་ཤིང་། ཡོངས་སུ་འགྱུར་བའི་མཐའ་ལགས་སོ། །དངོས་པོ་ཐམས་ཅད་ནི་མི་རྟག་པ་ཉིད་ཀྱི་མཚན་ཉིད་ཀྱིས་རྣམ་པར་འཇིག་པའི་ཆོས་ཅན་ལགས་སོ། །དངོས་པོ་ཐམས་ཅད་ནི་ཡོངས་སུ་འགྱུར་བའི་མཚན་ཉིད་ཀྱིས་གཞན་དུ་གྱུར་ཏེ། དངོས་པོ་གང་ཡང་རྟག་པ་མ་ལགས། དངོས་
པོ་གང་ཡང་ངེས་པ་མ་ལགས་ལ། གཞན་དུ་མཐོང་ཞིང་གཞན་དུ་འགྱུར་ལགས་སོ། །རྒྱལ་པོ་ཆེན་པོ་དེ་ལྟ་ལགས་པས་མི་རྟག་པའི་དངོས་པོ་ལ་མི་རྟག་པའི་འདུ་ཤེས་བསྒོམ་པར་བགྱི། ངེས་པ་མ་མཆིས་པའི་དངོས་པོ་ལ་གཡོ་བའི་འདུ་ཤེས་བསྒོམ་པར་བགྱིའོ། །རྒྱལ་པོ་ཆེན་པོ་གཞན་ཡང་

དར་ལ་བབ་པ་ནི་རྒས་པར་འགྱུར། གཞོན་ནུ་ནི་བར་མར་འགྱུར། བར་མ་ནི་རྒས་པར་འགྱུར། རྒས་པ་ཡང་འགུམ་པར་གདའ་ལགས་ཏེ། དེ་ལྟ་ལགས་པས་དངོས་པོ་ཐམས་ཅད་ལ་ངེས་པར་མ་མཆིས་ལགས་སོ། །དེ་ནས་རྒྱལ་པོ་དངོས་པོར་འཛིན་པ་དེ། བློན་པོ་དེས་
གཞི་དེ་འདོར་དུ་བཅུག་གོ། །དེས་བློན་པོ་དེ་ལ་སྨྲས་པ། གྲོང་གི་གཙོ་བོ་ལེགས་སོ་ལེགས་སོ། །ཤེས་པ་འདི་རྟོགས་པར་བྱ་བའི་ཕྱིར་འབད་པར་བྱའོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བློན་པོ་ཆོས་སྤྱོད་ཅེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་
ལྟར་མི་བལྟ་སྟེ། ང་དེའི་ཚེ་དེའི་དུས་ན་བློན་པོ་ཆོས་སྤྱོད་ཅེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་དངོས་པོ་ཐམས་ཅད་ལ་ངེས་པ་མེད་པར་བྱ། བརྩོན་འགྲུས་ཀྱི་སྟོབས་ཀྱི་རིམ་པ་རྟོགས་པས་བྱ་བ་ལ་ལྕི་བ་དང་ཡང་བར་འགྱུར་རོ། །མཽད་གལ་གྱི་བུ་ངས་རིམ་པ་
ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། རིམ་པ་ཤེས་པས་སེམས་ཅན་རྣམས་ལ་ཇི་ལྟར་ཡང་དག་པར་རབ་ཏུ་བསྟན་པར་བྱ། བདག་གིས་སེམས་ཅན་དག་
རིམ་པ་ཤེས་པ་ལ་ཇི་ལྟར་རབ་ཏུ་དགོད། དགེ་བ་དང་མི་དགེ་བའི་ཆོས་ཀྱི་ཁྱད་པར་དག་ལ་མཁས་པ་དང་། ཡེ་ཤེས་ཀྱི་ཁྱད་པར་དག་ལ་མཁས་པར་གྱུར་སྙམ་ནས། དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་
པའི་དུས་ནས། དེའི་ཕ་རོལ་གྱི་ཡང་ཆེས་ཕ་རོལ་ན། རྒྱལ་པོ་ཀུན་ཏུ་གོ་བྱེད་ཅེས་བྱ་བ་ཞིག་བྱུང་སྟེ། དེ་རྒྱལ་སྲིད་ཐོབ་ནས་བག་ཡོད་པས་རྒྱལ་སྲིད་བྱེད་དོ། །དེའི་བཙུན་མོ་བུད་མེད་ཁྲི་ཕྲག་བརྒྱད་བྱུང་སྟེ། གཟུགས་བཟང་ཞིང་མཛེས་པ། བལྟ་ན་སྡུག་པ། ཁ་དོག་བཟང་པོ་
རྒྱས་པ། མཆོག་དང་ལྡན་པ། སྔར་ལྡང་ཞིང་ཕྱིས་ཉལ་བ། དེ་དག་གི་གཟུགས་ནི་ལྷ་མོ་དང་འདྲ། ཡོན་ཏན་ནི་འདོད་ཆགས་དང་བྲལ་བ་དང་འདྲའོ། །དེ་ནས་རྒྱལ་པོ་ཀུན་ཏུ་གོ་བྱེད་བུད་མེད་ཁྲི་ཕྲག་བརྒྱད་པོ་དེ་དག་གི་དབུས་སུ་འདུག་ནས་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །

ཇི་ལྟར་སེམས་མཉམ་པར་བཞག་པས། བསམ་གཏན་གྱི་བྱེ་བྲག་དང་། ཉོན་མོངས་པའི་བྱེ་བྲག་དང་། ཡོན་ཏན་གྱི་བྱེ་བྲག་དག་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །བུད་མེད་ཀྱི་ཚོགས་འདི་རེ་ཤིག་འདི་དག་ནི་ཤེས་པའི་བྱེ་བྲག། འདི་དག་ནི་ཉོན་མོངས་པའི་བྱེ་བྲག། འདི་དག་ནི་ཡོན་ཏན་
གྱི་བྱེ་བྲག །དེ་བུད་མེད་ཀྱི་ནང་དུ་འདུག་ནས། ཡུན་མི་རིང་བར་བུད་མེད་ཁྲི་ཕྲག་བརྒྱད་པོ་དག་ཡོངས་སུ་ཤེས་སོ། །དེ་བུད་མེད་གང་དག་གི་ལུས་ཤེས་པ་ཉམ་ཆུང་ཞིང་ཉོན་མོངས་པའི་སྟོབས་དང་ལྡན་པ། དེའི་ཉོན་མོངས་པ་རྣམ་པར་གདུལ་བའི་ཕྱིར་ཤེས་པ་སྐྱེད་པའི་ཆོས་སྟོན་ཏོ། །བུད་མེད་གང་
དག་ཉོན་མོངས་པའི་སྟོབས་ཆུང་ལ། ཤེས་པའི་སྟོབས་དང་ལྡན་པ། དེའི་ཉོན་མོངས་པ་ཆུང་ངུ་ཇི་ཙམ་ཡོད་པ་སྤང་བའི་ཕྱིར་ཆོས་བསྟན་ཏེ། བུད་མེད་འདོད་ཆགས་སྤྱོད་པ་དག་ལ་མི་གཙང་བ་དང་། མི་རྟག་པ་བསྟན། ཞེ་སྡང་སྤྱོད་པ་དག་ལ་བྱམས་པ་དང་། མི་རྟག་པ་བསྟན། གཏི་མུག་སྤྱོད་
པ་དག་ལ་རྟེན་ཅིང་འབྲེལ་བར་འབྱུང་བ་དང་། མི་རྟག་པ་བསྟན། རྣམ་པར་རྟོག་པ་སྤྱོད་པ་དག་ལ་དབུགས་འབྱུང་བ་དང་རྔུབ་པ་དྲན་པ་དང་། མི་རྟག་པ་བསྟན། མཚན་མ་སྤྱོད་པ་དག་ལ་མཚན་མ་མེད་པ་དང་། མི་རྟག་པ་བསྟན། བུད་མེད་བདག་ཏུ་མངོན་པར་ཞེན་པ་དག་ལ་སྟོང་པ་ཉིད་དང་། མི་རྟག་
པ་བསྟན། བུད་མེད་སྲིད་པ་ལ་སྲེད་པ་དག་ལ་སྨོན་པ་མེད་པ་དང་། མི་རྟག་པ་བསྟན་ཏེ། དེ་ལྟར་ཉོན་མོངས་པ་གང་དང་གང་སྤྱོད་པར་འགྱུར་བ་དེ་དང་དེ་དག་གི་གཉེན་པོས་གཅོད་དོ། །དེའི་བུད་མེད་གང་དག་འདོད་ཆགས་སྤྱོད་པ་དེ་དག་བསམ་གཏན་བསྒྲུབས་ཏེ། ཚངས་པའི་ལམ་བསྒོམས་
ནས་ཚངས་པའི་འཇིག་རྟེན་དུ་སྐྱེས་སོ། །བུད་མེད་ཞེ་སྡང་སྤྱོད་པ་དག་ལ་ཚད་མེད་པ་བསྒྲུབས་ཏེ། ཚངས་པའི་ལམ་བསྟན་ཏོ། །དེའི་བུད་མེད་དེ་དག་ཚད་མེད་པ་ལ་གནས་ཏེ། ཚངས་པའི་ལམ་བསྒོམས་ནས་ཚངས་པའི་འཇིག་རྟེན་དུ་སྐྱེས་སོ། །བུད་མེད་གང་དག་མཚན་མ་ལ་སྤྱོད་པ་དེ་དག་
མཚན་མ་མེད་པ་བསྒྲུབས་ཏེ། ཚངས་པའི་ལམ་བསྟན་ཏོ། །དེའི་བུད་མེད་དེ་དག་མཚན་མ་མེད་པ་བསྒྲུབས་ཏེ། ཚངས་པའི་ལམ་བསྒོམས་ནས་མཐོ་རིས་ཀྱི་འཇིག་རྟེན་དུ་སྐྱེས་སོ། །བུད་མེད་གང་དག་སྲིད་པའི་འདོད་ཆགས་ལ་ལྷག་པར་ཆགས་པ་དེ་དག་ལ་སྨོན་པ་མེད་པ་བསྒྲུབས་ཏེ་ཚངས་

པའི་ལམ་བསྟན་ཏོ། །དེའི་བུད་མེད་དེ་དག་སྨོན་པ་མེད་པ་བསྒྲུབས་ཏེ། ཚངས་པའི་ལམ་བསྒོམས་ནས་ཚངས་པའི་འཇིག་རྟེན་དུ་སྐྱེས་སོ། །དེ་ལྟར་རྒྱལ་པོ་ཀུན་ཏུ་གོ་བྱེད་དེས་ཤེས་པ་དང་ཉོན་མོངས་པ་དང་། ཡོན་ཏན་གྱི་ལས་དག་ཡང་དག་པར་རབ་ཏུ་བསྟན་པ་ན་
བུད་མེད་ཁྲི་ཕྲག་བརྒྱད་པོ་དེ་དག་འདོད་ཆགས་དང་བྲལ་བ་དག་ལ་རབ་ཏུ་བཙུད་ནས་ཚངས་པའི་འཇིག་རྟེན་དུ་སྐྱེས་སོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་ཀུན་ཏུ་གོ་བྱེད་ཅེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་
དེའི་དུས་ན། རྒྱལ་པོ་ཀུན་ཏུ་གོ་བྱེད་ཅེས་བྱ་བར་གྱུར་ཏོ། །ཤེས་པ་ཐ་མ་དང་འབྲིང་གི་བྱེ་བྲག་ལ་མཁས། ཉོན་མོངས་པ་ཐམ་དང་འབྲིང་དག་གི་བྱེ་བྲག་ལ་མཁས་ཡོན་ཏན་ཐ་མ་དང་འབྲིང་དག་གི་བྱེ་བྲག་དག་ལ་མཁས་སོ། །མཽད་གལ་གྱི་བུ་དེ་ལྟ་བས་ན། བྱང་ཆུབ་སེམས་དཔས་ཆོས་
ཐམས་ཅད་ཀྱི་ཐ་མ་དང་འབྲིང་ལ་མཁས་པར་བྱའོ། །མཽད་གལ་གྱི་བུ་ངས་རིམ་པ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་རིམ་པ་ཤེས་པ་ཀུན་འབྱུང་བ་
ཤེས་པ་སེམས་ཅན་རྣམས་ལ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས། དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན། རྒྱལ་པོ་ཉོན་མོངས་
པ་སྨོད་པ་ཞེས་བྱ་བ་ཞིག་བྱུང་ངོ་། །རྒྱལ་པོ་ཉོན་མོངས་པ་སྨོད་པ་དེའི་བཙུན་མོ་བུད་མེད་ཁྲི་ཕྲག་དགུ་བཅུ་བྱུང་སྟེ། གཟུགས་བཟང་ཞིང་མཛེས་པ་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཡིན་ནོ། །དེ་ལ་བུད་མེད་གང་དང་གང་དག་གི་མིག་གིས་མཐོང་བའི་བུད་མེད་དེ་དང་དེ་དག་ཉིད་ཉོན་
མོངས་པའི་འབྲས་བུ་དང་ལས་ཀྱི་འབྲས་བུ་ཡང་དག་པར་ཤེས་སོ། །དེ་དག་ཉོན་མོངས་པའི་འབྲས་བུ་དང་། ལས་ཀྱི་འབྲས་བུ་རིག་ནས་ཉོན་མོངས་པ་ཐམས་ཅད་ནས་ཐམས་ཅད་དུ་མི་སྐྱེ་ཞིང་། སྨད་པ་དེ་དག་ཀྱང་ཉེ་བར་ཤེས་པར་གྱུར་ཏོ། །དེས་བུད་མེད་ཁྲི་ཕྲག་དགུ་བཅུ་པོ་དག་བདག་གི་ལས་དང་།

བདག་གི་ཉོན་མོངས་པ་ཁོང་དུ་ཆུད་པར་བྱས་སོ། །དེ་བདག་གི་ལས་དང་བདག་གི་ཉོན་མོངས་པ་དེ་དག་ཡོངས་སུ་ཤེས་པ་ན། འདོད་པ་རྣམས་ལ་འདོད་ཆགས་དང་བྲལ་བ་རྗེས་སུ་ཐོབ་བོ།