Kinh tạng Tây Tạng (Kangyur Đại Học) — 034_ཤེས་རབ་སྣ་ཚོགས།

་ཅད་ལ་བླ་ན་མེད་པའི་བསླབ་པ་ཡོངས་སུ་དག་པ་
རབ་ཏུ་བསྟན། ཡང་དག་པར་རབ་ཏུ་སྟོན། ཡང་དག་པར་རབ་ཏུ་སྟོན་པར་འགྱུར་རོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་བསླབ་པ་འདི་ནི་འཇིག་རྟེན་ཐམས་ཅད་ལས་མངོན་པར་འཕགས་པའི་བསླབ་
པ་ཡིན་པའི་ཕྱིར་རོ། །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་བསླབ་པ་ནི་འཇིག་རྟེན་ཐམས་ཅད་ཀྱི་མཆོག །འཇིག་རྟེན་ཐམས་ཅད་ན་རང་བྱུང་གི་བསླབ་པའོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པའི་བྱང་ཆུབ་སེམས་
དཔའ་ནི་འཇིག་རྟེན་པ་དང་། འཇིག་རྟེན་ལས་འདས་པ་དང་། འདུས་བྱས་དང་། འདུས་མ་བྱས་དང་། ཟག་པ་དང་བཅས་པ་དང་། ཟག་པ་མེད་པ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། ཆོས་གང་ལ་ཡང་སློབ་པར་མི་འགྱུར། གང་དུ་ཡང་
ཆགས་པ་མི་བསྐྱེད་དེ། ཆོས་ཐམས་ཅད་ལ་མི་ཆགས་པར་གནས་པར་འགྱུར་རོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ཆགས་པ་མེད། བཅིངས་པ་མེད། གྲོལ་བ་མེད་དེ། ཆོས་གང་ཡང་འདུ་བར་རམ། བཅིངས་པ་ཉེ་བར་

གནས་པ་མ་ཡིན་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་མ་ཆགས་མ་བཅིངས་མ་གྲོལ་བའོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་མ་ཆགས་མ་བཅིངས་མ་གྲོལ་བའོ། །མིང་དང་གཟུགས་ཀྱང་མ་ཆགས་མ་
བཅིངས་མ་གྲོལ་བའོ། །ཕྱིན་ཅི་ལོག་དང་སྒྲིབ་པ་དང་ལྟ་བར་གྱུར་པ་ཡང་མ་ཆགས་མ་བཅིངས་མ་གྲོལ་བའོ། །འདོད་ཆགས་དང་། ཞེ་སྡང་དང་། གཏི་མུག་ཀྱང་མ་ཆགས་མ་བཅིངས་མ་གྲོལ་བའོ། །ནང་གི་སྐྱེ་མཆེད་དྲུག་ཀྱང་མ་ཆགས་མ་བཅིངས་མ་གྲོལ་བའོ། །ཕྱིའི་སྐྱེ་མཆེད་
དྲུག་ཀྱང་མ་ཆགས་མ་བཅིངས་མ་གྲོལ་བའོ། །འདོད་པ་དང་གཟུགས་དང་གཟུགས་མེད་པའི་ཁམས་ཀྱང་མ་ཆགས་མ་བཅིངས་མ་གྲོལ་བའོ། །བདག་གི་ཁམས་དང་སེམས་ཅན་གྱི་ཁམས་ཀྱང་མ་ཆགས་མ་བཅིངས་མ་གྲོལ་བའོ། །རྟེན་ཅིང་འབྲེལ་པར་འབྱུང་བ་ཡང་མ་ཆགས་མ་བཅིངས་
མ་གྲོལ་བའོ། །ཀུན་ནས་ཉོན་མོངས་པ་དང་རྣམ་པར་བྱང་བ་ཡང་མ་ཆགས་མ་བཅིངས་མ་གྲོལ་བའོ། །དེ་བཞིན་དུ་གཏོང་བ་དང་། སེར་སྣ་དང་། ཚུལ་ཁྲིམས་དང་། འཆལ་པའི་ཚུལ་ཁྲིམས་དང་། བཟོད་པ་དང་། གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་
དང་། རྣམ་པར་གཡེང་བ་དང་། ཤེས་རབ་དང་། འཆལ་པའི་ཤེས་རབ་ཀྱང་མ་ཆགས་མ་བཅིངས་མ་གྲོལ་བའོ། །སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་ཡང་མ་ཆགས་མ་བཅིངས་མ་གྲོལ་བའོ། །དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་།
རྫུ་འཕྲུལ་གྱི་རྐང་པ་དང་། ཚད་མེད་པ་དང་། ཕྱིན་ཅི་མ་ལོག་པ་ཡང་མ་ཆགས་མ་བཅིངས་མ་གྲོལ་བའོ། །དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པ་ཡང་མ་ཆགས་མ་བཅིངས་མ་གྲོལ་བའོ། །ས་དང་། ཆུ་དང་། མེ་
དང་། རླུང་དང་། ནམ་མཁའ་དང་། རྣམ་པར་ཤེས་པའི་ཁམས་ཀྱང་མ་ཆགས་མ་བཅིངས་མ་གྲོལ་བའོ། །མི་སྐྱེ་བ་དང་། ཟད་པ་དང་། མངོན་པར་འདུ་མི་བྱེད་པ་ཤེས་པ་ཡང་མ་ཆགས་མ་བཅིངས་མ་གྲོལ་བའོ། །རིག་པ་དང་། རྣམ་པར་གྲོལ་བ་ཡང་མ་ཆགས་མ་བཅིངས་མ་

གྲོལ་བའོ། །མངོན་པར་ཤེས་པ་ཡང་མ་ཆགས་མ་བཅིངས་མ་གྲོལ་བའོ། །རྣམ་པར་གྲོལ་བའི་ཡེ་ཤེས་མཐོང་བ་ཡང་མ་ཆགས་མ་བཅིངས་མ་གྲོལ་བའོ། །སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་ཀྱི་ཆོས་ཀྱང་མ་ཆགས་མ་བཅིངས་མ་གྲོལ་
བའོ། །མྱ་ངན་ལས་འདས་པ་ཡང་མ་ཆགས་མ་བཅིངས་མ་གྲོལ་བའོ། །སངས་རྒྱས་ཀྱི་ཡེ་ཤེས་དང་སྟོབས་དང་མི་འཇིགས་པ་ཡང་མ་ཆགས་མ་བཅིངས་མ་གྲོལ་བའོ། །འདས་པ་དང་། མ་འོངས་པ་དང་། ད་ལྟར་བྱུང་བ་ལ་ཐོགས་པ་མེད་པའི་ཡེ་ཤེས་མཐོང་བ་ཡང་མ་ཆགས་མ་བཅིངས་
མ་གྲོལ་བའོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ལ་བཅིང་བ་མི་དམིགས་པས་ཆོས་ཐམས་ཅད་ནི་ཆགས་པ་མེད་བཅིངས་པ་མེད་དོ། །དེའི་ཕྱིར་དེ་དག་གི་གྲོལ་བ་མི་དམིགས་སོ། །རབ་ཀྱི་རྩལ་གྱིས་རྣམ་པར་གནོན་པ་ཆགས་པ་མེད་ཅེས་བྱ་བ་ནི་
དེ་དག་ལ་དགྲོལ་བ་གང་ཡང་མེད་མོད་ཀྱི་འོན་ཀྱང་གང་དེ་ལྟར་ཆོས་རྣམས་མཐོང་བ་དེ་ནི་ཆགས་པ་མེད་པའི་ཡེ་ཤེས་མཐོང་བ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་མི་ཆགས་ཞེས་བྱ་བ་ནི་ཆགས་པ་མི་དམིགས་ཤིང་ཆགས་པ་མེད་པ་ལ་ཆགས་པ་ཡང་དག་པའི་མ་ཡིན་པའི་
ཕྱིར་ཆགས་པ་མེད་པ་ཞེས་བྱ་སྟེ། དེ་ལ་ནི་གང་ཆགས་པར་འགྱུར་བའམ། འཆིང་བར་འགྱུར་བ་ཅི་ཡང་མི་དམིགས་སོ། །གང་གི་ཕྱིར་གང་ཆགས་པར་འགྱུར་བ་དང་འཆིང་བར་འགྱུར་བ་མི་དམིགས་པ་དེའི་ཕྱིར་མི་ཆགས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་
རྟོགས་པ་མེད་ཅེས་བྱ་བ་ནི་རྟོགས་པ་མི་དམིགས་ཤིང་རྟོགས་པ་ཡོད་པ་མ་ཡིན་པའི་ཕྱིར་རྟོགས་པ་མེད་པ་ཞེས་བྱ་སྟེ། དེ་ལ་ནི་རྟོགས་པར་འགྱུར་བ་ཅི་ཡང་མེད་དོ། །དེ་ལ་གང་རྟོགས་པ་ཅི་ཡང་མི་དམིགས་ཏེ། གང་གི་ཕྱིར་གང་རྟོགས་པ་མི་དམིགས་པ་དེའི་ཕྱིར་རྟོགས་པ་མེད་
པ་ཞེས་བྱའོ། །གང་ཆགས་པ་མེད་ཅིང་རྟོགས་པ་མེད་པ་དེ་ལ་རྣམ་པར་གྲོལ་བ་ག་ལ་ཡོད། གང་ཆགས་པར་མི་འགྱུར་འཆིང་བར་མི་འགྱུར་བ་ནི་གྲོལ་བ་བྲལ་བ། བསིལ་བར་གྱུར་པ་རབ་ཏུ་རྣམ་པར་གྲོལ་བ་སྟེ། དེ་ལ་ནི་ཕྱིར་ཡང་རྟོགས་པར་བྱ་བ་གང་ཡང་མེད་པས་དེའི་ཕྱིར་གྲོལ་བ་

ཞེས་བྱ་སྟེ། དེ་ལ་ཐར་པ་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ཆོས་ཐམས་ཅད་མ་ཆགས་མ་བཅིངས་མ་གྲོལ་བའི་ཡེ་ཤེས་མཐོང་བ་ལ་འཇུག་པའོ། །རབ་ཀྱི་རྩལ་གྱིས་རྣམ་པར་གནོན་
པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་འགྱུར། མྱུར་དུ་ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པ་ཤེས་རབ་ཀྱི་ཕ་རོལ་ཏུ་
ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ཐམས་ཅད་ཀྱི་ཐེ་ཚོམ་གཅོད་པའི་ཕྱིར་ངས་ཕྱག་རྒྱ་འདི་བཞག་གོ། །རབ་ཀྱི་རྩལ་གྱིས་རྣམ་པར་གནོན་པ་ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་ངའི་ཉན་ཐོས་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་མི་ནུས་པའི་ཕྱིར་ངས་ཕྱག་རྒྱ་འདི་
བསྟན་ཅིང་བྱིན་གྱིས་བརླབས་སོ། །དེ་ནས་བཅོམ་ལྡན་འདས་ཀྱིས་བཟང་སྐྱོང་དང་། དེད་དཔོན་བཟང་པོ་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་ལ་བཀའ་སྩལ་པ། རིགས་ཀྱི་བུ་དག་ཁྱེད་ཀྱིས་དེ་བཞིན་
གཤེགས་པ་ཡོངས་སུ་མྱ་ངན་ལས་འདས་ནས་ཕྱི་མའི་ཚེ་ཕྱི་མའི་དུས་དམ་པའི་ཆོས་ནུབ་ཅིང་རབ་ཏུ་རྣམ་པར་འཇིག་སྟེ། ཟད་པར་འགྱུར་བའི་དུས་ན་དེ་བཞིན་གཤེགས་པས་བསྐལ་པ་བྱེ་བ་ཁྲག་ཁྲིག་འབུམ་ཕྲག་མང་པོར་ཡང་དག་པར་བསྒྲུབས་པའི་ཆོས་རིན་པོ་ཆེའི་མཛོད། ཤེས་རབ་
ཀྱི་ཕ་རོལ་ཏུ་ཕྱིན་པ་སྔོན་དུ་འགྲོ་བ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་འདི་གཟུང་བ་དང་གཞན་ལ་ཡང་རྒྱ་ཆེར་ཡང་དག་པར་སྟོན་ནུས་སམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་དེ་དག་གིས་འདི་སྐད་ཅེས་
གསོལ་ཏོ། །བཅོམ་ལྡན་འདས་བདག་ཅག་གིས་དེ་བཞིན་གཤེགས་པས་བསྐལ་པ་བྱེ་བ་ཁྲག་ཁྲིག་འབུམ་ཕྲག་མང་པོར་ཡང་དག་པར་བསྒྲུབས་པ་བླ་ན་མེད་པའི་ཆོས་རིན་པོ་ཆེའི་མཛོད། ཤེས་རབ་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཤེས་

རབ་ཀྱི་ཕ་རོལ་ཏུ་ཕྱིན་པའི་གནས་འདི་གཟུང་བ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པའི་རྔོ་ཐོགས་ལགས་སོ། །བཅོམ་ལྡན་འདས་དུས་དེ་ནི་འཇིགས་པ་ཆེན་པོ་མྱ་ངན་ཆེན་པོ་མ་རུངས་པ་ཆེན་པོར་འགྱུར་ཏེ། སེམས་ཅན་ཆོས་ཀྱིས་ཕོངས་པར་
འགྱུར་བའི་ལས་དང་ལྡན་པ་ཕལ་ཆེར་འབྱུང་། ལོག་པར་ཆགས་ཤིང་བརྐམ་པ། ལོག་པའི་འདོད་ཆགས་ཀྱིས་ཆགས་པ། ཆོས་མ་ལགས་པ་ལ་འདོད་ཆགས་ཀྱིས་ཆགས་པ། ཕྲག་དོག་དང་འདོད་པས་ཡོངས་སུ་ཟིན་པའི་སེམས་དང་ལྡན་པ། ཁྲོ་བ་གཏུམ་པ། བརླང་བ་བཀའ་
བློ་མི་བདེ་བ། གཡོན་ཅན་མི་སྲུན་པ་སྒྱུ་ཅན། ཆོས་མ་ལགས་པ་སྤྱོད་པ་དང་། འཐབ་པ་དང་། རྩོད་པ་དང་། མཚང་འདྲུ་བ་དང་། འདྲེག་པ་མང་བ། སྡོམ་པ་ལ་མི་གནས་པ། འདོད་པ་དང་། བརྐམ་པའི་ཟིལ་གྱིས་གནོན་པ། ལེ་ལོ་ཅན། བརྩོན་འགྲུས་ཆུང་བ། དྲན་པ་ཉམས་པ། ཤེས་
བཞིན་ཅན་མ་ལགས་པ། གཅམ་བུ་མུ་ཅོར་སྨྲ་བ། ཁ་ཕྱར་ཅན། སྡིག་པའི་ལས་ཁོང་ན་སྦེད་ཅིང་འཆབ་པ། འདོད་ཆགས་དང་། ཞེ་སྡང་དང་། གཏི་མུག་ཆེ་བ། མ་རིག་པའི་སྒོ་ངའི་སྦུབས་དང་། གཏི་མུག་གི་མུན་ནག་གི་ཟིལ་གྱིས་གནོན་པ། བདུད་ཀྱི་ཕྱོགས་དང་འཐུན་པར་སྤྱོད་པ། ཆོས་
འདུལ་བ་ཟབ་མོ་ཆོས་རིན་པོ་ཆེའི་མཛོད་འདི་ལ་ཕྱིར་རྒོལ་བ་འབྱུང་། མི་སྩུ་བའི་ངང་ཚུལ་ཅན་འབྱུང་ལགས་མོད་ཀྱི། བཅོམ་ལྡན་འདས་བདག་ཅག་རྣམས་དེ་བཞིན་གཤེགས་པས་བསྐལ་པ་བྱེ་བ་ཁྲག་ཁྲིག་འབུམ་ཕྲག་མང་པོར་དགེ་བའི་རྩ་བ་བསྒྲུབས་པ་བླ་ན་མེད་པའི་ཆོས་རིན་པོ་ཆེའི་
མཛོད་འདི་འཛིན་ཅིང་ཀློག་པར་སྤྲོ་ལགས་སོ། །གང་དག་ཐ་མའི་དུས་དེ་ན་ཆོས་འདི་ཚོལ་བ་ཆོས་འདི་ལ་སློབ་འཚལ་བ། གཡོ་མ་མཆིས་པ་དྲང་བ། སྒྱུ་མ་མཆིས་པ་གང་སྲོག་གི་ཕྱིར་ཡང་མི་གཏོང་བ། ཆོས་འདི་ལྟ་བུ་ལ་མི་རྒོལ་བ་ཆོས་ཀྱི་རྣམ་གྲངས་འདི་སྤོང་བར་མི་འགྱུར་བ། ཆོས་
ཀྱི་རྣམ་གྲངས་འདི་ལ་རྒྱབ་ཀྱིས་ཕྱོགས་པར་མི་འགྱུར་བ་ནི་རབ་ཏུ་ཉུང་བར་འགྱུར་ཏེ། དེ་དག་གི་དོན་བགྱི་ཞིང་སྤྲོ་བ་སྩལ་ནས། ཆོས་འདི་ལྟ་བུ་ལ་ཡང་དག་པར་གཟེངས་བསྟོད་པར་བགྱི། ཡང་དག་པར་རབ་ཏུ་དགའ་བར་བགྱི་ལགས་སོ། །དེ་ནས་བཅོམ་ལྡན་འདས་དེའི་དུས་

ན་ཆོས་ཀྱི་གནས་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་བྱིན་གྱིས་བརླབས་ཏེ་ཆོས་ཀྱི་རྣམ་གྲངས་འདི་ལ་བདུད་སྡིག་ཅན་རྣམས་ཀྱི་ཞགས་པ་གཅད་པའི་ཕྱིར་བྱིན་གྱིས་བརླབ་པ་མཛད་དོ། །དེ་ནས་བཅོམ་ལྡན་འདས་འཛུམ་པ་མཛད་པ་དང་། སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་འདི་སྣང་བ་ཆེན་པོས་ཁྱབ་པར་གྱུར་ཏོ། །ལྷ་རྣམས་ཀྱིས་ཀྱང་མི་མཐོང་། མི་རྣམས་ཀྱིས་ཀྱང་ལྷ་མཐོང་ངོ་། །གང་དེར་འདུས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དེ་དག་
ཐམས་ཅད་ཀྱིས་ལྷའི་མེ་ཏོག་བཅོམ་ལྡན་འདས་ལ་གཏོར། ལྷའི་གོས་ཀྱང་ཕུལ་ནས་སྒྲ་སྐད་ཆེན་པོ་ཕྱུང་སྟེ། ཨ་ལ་ལ་དེ་བཞིན་གཤེགས་པས་བདུད་སྡིག་ཅན་རྣམས་ཀྱི་སྤྱོད་ཡུལ་མ་ལགས་པ་བྱིན་གྱིས་བརླབས་པ་འདི་ནི་བྱིན་གྱིས་རླབས་ཆེན་པོ་ལགས་ཏེ། ཆོས་ཀྱི་བྱིན་གྱི་
རླབས་འདིས་བདུད་ཀྱི་ཞགས་པ་ཐམས་ཅད་བཀུམ་མོ། །རིགས་ཀྱི་བུའམ་རིགས་ཀྱི་བུ་མོ་དེ་དག་བདུད་སྡིག་ཅན་གྱིས་འཇིགས་སོ་སྙམ་དུ་དོགས་པར་མི་བགྱིའོ། །གང་ཆོས་ཀྱི་རྣམ་གྲངས་འདི་འཛིན་པ་དང་། ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པའི་བྱང་
ཆུབ་སེམས་དཔའ་དེ་དག་ནི་བདུད་སྡེ་དང་བཅས་པ་ལས་རྒལ་བར་འགྱུར་ལགས་སོ། །གང་ཆོས་ཀྱི་རྣམ་གྲངས་འདི་འཛིན་པ་དང་། ཀློག་པ་དང་། གཞན་ལ་ཡང་རྒྱ་ཆེར་ཡང་དག་པར་སྟོན་པ་དེ་དག་ནི་བདུད་སྡིག་ཅན་སྡེ་དང་བཅས་པ་ལས་རྒྱལ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་
ཆུབ་སེམས་དཔའ་རབ་ཀྱི་རྩལ་གྱིས་རྣམ་པར་གནོན་པ་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །རབ་ཀྱི་རྩལ་གྱིས་རྣམ་པར་གནོན་པ་དེ་དེ་བཞིན་ཏེ། ལྷའི་བུ་དེ་དག་གིས་ཚིག་ཇི་སྐད་སྨྲས་པ་བཞིན་ཏེ། རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་གཤེགས་པས་ཆོས་
ཀྱི་རྣམ་གྲངས་འདི་ལ་བདུད་སྡིག་ཅན་རྣམས་ཀྱི་མཚམས་བཅད་དོ། །རབ་ཀྱི་རྩལ་གྱིས་རྣམ་པར་གནོན་པ་རིགས་ཀྱི་བུའམ་རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། གཞན་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་ནི་བདུད་སྡིག་ཅན་

རྣམས་ཀྱི་སྤྱོད་ཡུལ་དུ་མི་འགྱུར་ཏེ། རིགས་ཀྱི་བུ་དང་རིགས་ཀྱི་བུ་མོ་དེ་དག་ནི་བདུད་སྡིག་ཅན་རྣམས་ཀྱིས་མི་ཚུགས་པར་འགྱུར་རོ། །གང་དག་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་
སྟོན་པ་དེ་དག་ནི་བདུད་དང་ཕྱིར་རྒོལ་བ་ཆོམས་པར་འགྱུར། གཡུལ་ལས་རྒྱལ་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ཀྱི་རྣམ་གྲངས་འདི་ནི་ཀུན་ནས་ཉོན་མོངས་པ་ཅན་དང་བདུད་ཀྱི་ཞགས་པས་བཅིངས་པའི་སེམས་ཅན་རྣམས་ཀྱི་ལག་ཏུ་འགྲོ་བར་མི་འགྱུར་ཏེ། རབ་ཀྱི་རྩལ་
གྱིས་རྣམ་པར་གནོན་པ་འདི་ནི་ཅང་ཤེས་པ་རྣམས་ཀྱིས་ཡིན་གྱི་ཅང་ཤེས་པ་མ་ཡིན་པ་རྣམས་ཀྱིས་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ་དཔེར་ན་གླང་པོ་ཆེ་ཅང་ཤེས་དང་རྟ་ཅང་ཤེས་གང་ཡིན་པ་དེ་དག་ནི་ཁམས་ཀྱི་རྒྱལ་པོ་རྣམས་ཀྱིས་ཡོངས་སུ་སྤྱོད་པ་མི་བྱེད་དོ། །
དེ་དག་ནི་སྐྱེ་བོ་གཏུམ་པོ་རྣམས་ཀྱིས་མཐོང་བར་ཡང་མི་འགྲོའོ། །རབ་ཀྱི་རྩལ་གྱིས་རྣམ་པར་གནོན་པ་གླང་པོ་ཆེ་ཅང་ཤེས་དང་རྟ་ཅང་ཤེས་དེ་ལྟ་བུ་ནི་འཁོར་ལོས་སྒྱུར་བའི་རྒྱལ་པོས་མཐོང་བ་ཉེ་བར་འགྲོ་སྟེ། དེ་དག་གི་ལོངས་སྤྱོད་དང་བསྙེན་བཀུར་བྱ་བ་དང་ཡོངས་སུ་སྤྱད་པའི་ཕྱིར་ཡང་མངོན་
པར་བྱུང་བས་དེ་དག་ནི་འཁོར་ལོས་སྒྱུར་བའི་རྒྱལ་པོ་རྣམས་ཀྱི་ཡོངས་སུ་སྤྱོད་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་འདི་ལྟ་བུའི་ཆོས་ཀྱི་རྣམ་གྲངས་འདི་ནི་མི་ཅང་ཤེས་ཀྱི་སེམས་ཅན་རྣམས་ཀྱི་ལོངས་སྤྱོད་ཀྱི་ཕྱིར་ལག་ཏུ་འགྲོ་བར་འགྱུར་རོ། །རབ་ཀྱི་
རྩལ་གྱིས་རྣམ་པར་གནོན་པ་འདི་ལྟ་སྟེ་དཔེར་ན་ཀླུའི་རྒྱལ་པོ་ཉེར་རྩི་དང་། ཀླུའི་རྒྱལ་པོ་རབ་གནས་དང་། ཀླུའི་རྒྱལ་པོ་ས་སྲུང་གི་བུ་དང་། དེ་དག་ནི་མི་རྣམས་ཀྱི་ལོངས་སྤྱོད་ཀྱི་ཕྱིར་ཉེ་བར་མི་འགྲོ །མི་རྣམས་ཀྱིས་མཐོང་བར་ཉེ་བར་མི་འགྲོ །དེ་དག་ནི་གཞན་གྱི་ཉེ་བར་སྤྱོད་པ་
དང་ལོངས་སྤྱོད་ཀྱི་ཕྱིར་ཡང་ཉེ་བར་མི་འགྲོའི། ཀླུའི་རྒྱལ་པོ་དེ་དག་ནི་ལྷ་ཅང་ཤེས་རྣམས་ཀྱི་ལོངས་སྤྱོད་ཀྱི་ཕྱིར་ཉེ་བར་འགྲོའོ། །ཇི་ལྟ་ཇི་ལྟ་བུར་ལྷའི་དབང་པོ་བརྒྱ་བྱིན་བཀོད་པ་བྱས་ནས་འགྲོ་བ་ན། ཀླུའི་རྒྱལ་པོ་དེ་དག་ཀྱང་དེ་ལྟ་དེ་ལྟ་བུར་དེ་འདྲ་བའི་བཀོད་པ་བྱས་ནས་ལོངས་སྤྱོད་ཀྱི་

ཕྱིར་ཉེ་བར་འགྲོའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཆོས་ཀྱི་རྣམ་གྲངས་འདི་ནི་འདི་ལྟ་སྟེ། མིའི་དབང་པོ་མི་ཅང་ཤེས་རྣམས་ཀྱིས་ཀློག་པ་དང་། བཤད་པ་དང་། རབ་ཏུ་བསྟན་པའི་ཉེ་བར་སྤྱོད་པ་དང་། ལོངས་སྤྱོད་དུ་འགྱུར་ཏེ། ཆོས་ཀྱི་རྣམ་གྲངས་འདི་
ནི་དེ་དག་གི་བཀོད་པ་ཆེན་པོ་དང་། རྒྱས་པ་ཆེན་པོ་དང་། ཆོས་ཀྱི་སྣང་བ་བྱེད་པར་འགྱུར། དེ་དག་ཆོས་ཀྱི་རྣམ་གྲངས་འདི་ལ་ཆོས་ཀྱི་དགའ་བ་བདུན་པོ་མྱོང་བར་འགྱུར་རོ། །གང་ཆོས་ཀྱི་རྣམ་གྲངས་འདི་ལས་ཚུལ་གཅིག་ཙམ་འཛིན་པ་དེ་དག་ཀྱང་མཆོག་ཏུ་དགའ་བ་དང་ལྡན་པར་འགྱུར་
ན་གང་ཐམས་ཅད་རྫོགས་པར་བྲིས་པ་དང་། འཛིན་པ་དང་། འཆང་བ་དང་། མཆོད་པ་དང་། རྒྱས་པར་བྱེད་པ་ལྟ་ཅི་སྨོས། ཆོས་ཀྱི་རྣམ་གྲངས་འདིས་མིའི་དབང་པོ་དང་མི་ཅང་ཤེས་དེ་དག་བཟུང་བར་འགྱུར་རོ། །འདི་ནི་ཅང་ཤེས་མ་ཡིན་པ་རྣམས་ཀྱི་སྤྱོད་ཡུལ་མ་ཡིན་ནོ། །རབ་ཀྱི་
རྩལ་གྱིས་རྣམ་པར་གནོན་པ་འདི་ནི་ཐེ་ཚོམ་ཐམས་ཅད་གཅོད་པའི་ཕྱིར་ངས་དེ་དག་སྨྲས་སོ། །ཆོས་ཀྱི་རྣམ་གྲངས་འདི་བཤད་པ་ན། བྱང་ཆུབ་སེམས་དཔའ་དུ་མ་དཔག་ཏུ་མེད་པ་དག་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སེམས་ཅན་གྲངས་མེད་དཔག་ཏུ་མེད་པ་དག་གིས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་དག་བྱང་ཆུབ་ཏུ་ངེས་པར་འགྱུར་བ་དེ་བཞིན་གཤེགས་པས་བསྟན་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་དང་། འཁོར་བཞི་དང་། ལྷ་དང་། མི་དང་།
ལྷ་མ་ཡིན་དང་། ཀླུ་དང་། གནོད་སྦྱིན་དང་། དྲི་ཟ་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཕན་ཡོན་གྱི་ལེའུ་ཞེས་བགྱི་སྟེ་བདུན་པའོ།། །།འཕགས་པ་རབ་ཀྱི་རྩལ་གྱིས་རྣམ་
པར་གནོན་པས་ཞུས་པ། ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེན་དྲ་བོ་དྷི་དང་། ཛི་ན་མི་ཏྲ་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།

༄༅། །རྒྱ་གར་སྐད་དུ། ཨཱརྱ་པཉྩ་ཤ་ཏི་ཀཱ་པྲཛྙཱ་པཱ་ར་མི་ཏཱ། བོད་སྐད་དུ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལྔ་བརྒྱ་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་
དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། བྱ་རྒོད་ཀྱི་ཕུང་པོའི་རི་ལ་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའི་ཚོགས་ཆེན་པོ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་
ལ་བཀའ་སྩལ་པ། རབ་འབྱོར་གཟུགས་ནི་དངོས་པོ་མེད་པ། དངོས་པོ་ངན་པ། དངོས་པོ་ཡོད་པའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་དངོས་པོ་མེད་པ། དངོས་པོ་ངན་པ། དངོས་པོ་ཡོད་
པའོ། །རབ་འབྱོར་མིག་དང་། གཟུགས་རྣམས་དང་། མིག་གི་རྣམ་པར་ཤེས་པ་དང་། རྣ་བ་དང་། སྒྲ་རྣམས་དང་། རྣ་བའི་རྣམ་པར་ཤེས་པ་དང་། སྣ་དང་། དྲི་རྣམས་དང་། སྣའི་རྣམ་པར་ཤེས་པ་དང་། ལྕེ་དང་། རོ་རྣམས་དང་། ལྕེའི་རྣམ་
པར་ཤེས་པ་དང་། ལུས་དང་། རེག་བྱ་རྣམས་དང་། ལུས་ཀྱི་རྣམ་པར་ཤེས་པ་དང་། ཡིད་དང་། ཆོས་རྣམས་དང་། ཡིད་ཀྱི་རྣམ་པར་ཤེས་པ་ནི་དངོས་པོ་མེད་པ། དངོས་པོ་ངན་པ། དངོས་པོ་ཡོད་པའོ། །དེ་ལྟར་གཟུགས་དེ་ལེའུ་གསུམ་དུ་བྱིས་པ་སོ་
སོའི་སྐྱེ་བོ་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་པས་གཟུགས་དེ་ལ་མངོན་པར་ཞེན་ཏོ། །མངོན་པར་སྒྲུབ་བོ། །སྒྲིབ་པར་བྱེད་དོ། །དེ་དག་གཟུགས་དེ་ལ་མངོན་པར་ཞེན་ཅིང་མངོན་པར་སྒྲུབ་སྟེ། སྒྲིབ་པར་བྱེད་པས་ཉན་ཐོས་ཀྱི་
ཐེག་པའམ། རང་སངས་རྒྱས་ཀྱི་ཐེག་པས་ཀྱང་ངེས་པར་འབྱུང་བར་མི་འགྱུར་ན། ཐེག་པ་ཆེན་པོས་ལྟ་སྨོས་ཀྱང་ཅི་དགོས། དེ་ལྟར་མངོན་པར་ཞེན་ཅིང་མངོན་པར་སྒྲུབ་སྟེ། སྒྲིབ་པར་བྱེད་པས། འདི་ལྟ་སྟེ། སེམས་ཅན་དམྱལ་བ་རྣམས་དང་། དུད་འགྲོ་

དང་། ཡི་དགས་རྣམས་དང་། ལྷ་རྣམས་དང་། མི་རྣམས་ཀྱི་ནང་དུ་ཡུན་རིང་པོར་རྒ་ཤི་མྱོང་ངོ་། །རབ་འབྱོར་དེ་བཞིན་དུ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དངོས་པོ་མེད་པ་དང་། དངོས་པོ་ངན་པ་དང་། དངོས་
པོ་ཡོད་པ་དང་། རབ་འབྱོར་མིག་དང་། གཟུགས་རྣམས་དང་། མིག་གི་རྣམ་པར་ཤེས་པ་དང་། རྣ་བ་དང་། སྒྲ་རྣམས་དང་། རྣ་བའི་རྣམ་པར་ཤེས་པ་དང་། སྣ་དང་། དྲི་རྣམས་དང་། སྣའི་རྣམ་པར་ཤེས་པ་དང་། ལྕེ་དང་། རོ་རྣམས་དང་། ལྕེའི་རྣམ་
པར་ཤེས་པ་དང་། ལུས་དང་། རེག་བྱ་རྣམས་དང་། ལུས་ཀྱི་རྣམ་པར་ཤེས་པ་དང་། ཡིད་དང་། ཆོས་རྣམས་དང་། ཡིད་ཀྱི་རྣམ་པར་ཤེས་པ་དངོས་པོ་མེད་པ་དང་། དངོས་པོ་ངན་པ་དང་། དངོས་པོ་ཡོད་པ་དེ་ལྟར་ཡིད་ཀྱི་རྣམ་པར་ཤེས་པ་དེ་ལེའུ་གསུམ་དུ་བྱིས་
པ་སོ་སོའི་སྐྱེ་བོ་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་པས་རྣམ་པར་ཤེས་པ་དེ་ལ་མངོན་པར་ཞེན་ཏོ། །མངོན་པར་སྒྲུབ་བོ། །སྒྲིབ་པར་བྱེད་དོ། །དེ་དག་རྣམ་པར་ཤེས་པ་དེ་ལ་མངོན་པར་ཞེན་ཅིང་མངོན་པར་སྒྲུབ་སྟེ། སྒྲིབ་པར་བྱེད་པས་ཉན་ཐོས་ཀྱི་
ཐེག་པའམ། རང་སངས་རྒྱས་ཀྱི་ཐེག་པས་ཀྱང་ངེས་པར་འབྱུང་བར་མི་འགྱུར་ན་ཐེག་པ་ཆེན་པོས་ལྟ་སྨོས་ཀྱང་ཅི་དགོས། དེ་ལྟར་མངོན་པར་ཞེན་ཅིང་མངོན་པར་སྒྲུབ་སྟེ། སྒྲིབ་པར་བྱེད་པས་འདི་ལྟ་སྟེ་སེམས་ཅན་དམྱལ་བ་རྣམས་དང་། དུད་འགྲོ་དང་། ཡི་དགས་
རྣམས་དང་། ལྷ་དང་མི་རྣམས་ཀྱི་ནང་དུ་ཡུན་རིང་པོར་རྒ་ཤི་མྱོང་ངོ་། །མཁས་པ་རྣམས་ཀྱིས་ནི་གཟུགས་དེ་དེ་ལྟར་ལེའུ་གསུམ་དུ་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་པས་མངོན་པར་ཞེན་པར་མི་བྱེད་ཅིང་མངོན་པར་སྒྲུབ་པར་མི་བྱེད་ཀྱི་གསལ་བར་བྱེད་དོ། །མངོན་པར་
ཞེན་པར་མི་བྱེད་ཅིང་མངོན་པར་སྒྲུབ་པར་མི་བྱེད་ཀྱི་གསལ་བར་བྱེད་པས་ཐེག་པ་ཆེན་པོས་ཀྱང་ངེས་པར་འབྱུང་བར་འགྱུར་ན་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པས་ལྟ་སྨོས་ཀྱང་ཅི་དགོས། དེ་ལྟར་མངོན་པར་ཞེན་པར་མི་བྱེད་ཅིང་མངོན་པར་སྒྲུབ་པར་མི་བྱེད་ཀྱི་གསལ་

བར་བྱེད་པས་འདི་ལྟ་སྟེ། སེམས་ཅན་དམྱལ་བ་རྣམས་དང་། དུད་འགྲོ་དང་། ཡི་དགས་རྣམས་དང་། ལྷ་དང་མི་རྣམས་ཀྱི་ནང་དུ་རྒ་ཤི་མྱོང་བ་མ་ཡིན་ནོ། །རབ་འབྱོར་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དང་།
མིག་དང་། གཟུགས་རྣམས་དང་། མིག་གི་རྣམ་པར་ཤེས་པ་དང་། རྣ་བ་དང་། སྒྲ་རྣམས་དང་། རྣ་བའི་རྣམ་པར་ཤེས་པ་དང་། སྣ་དང་། དྲི་རྣམས་དང་། སྣའི་རྣམ་པར་ཤེས་པ་དང་། ལྕེ་དང་། རོ་རྣམས་དང་། ལྕེའི་རྣམ་པར་ཤེས་པ་དང་། ལུས་དང་། རེག་བྱ་
རྣམས་དང་། ལུས་ཀྱི་རྣམ་པར་ཤེས་པ་རྣམས་དང་། ཡིད་དང་། ཆོས་རྣམས་དང་། ཡིད་ཀྱི་རྣམ་པར་ཤེས་པ་ལེའུ་གསུམ་དུ་མཁས་པ་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པས་མངོན་པར་ཞེན་པར་མི་བྱེད་ཅིང་མངོན་པར་སྒྲུབ་པར་མི་བྱེད་ཀྱི་གསལ་
བར་བྱེད་དོ། །མངོན་པར་ཞེན་པར་མི་བྱེད་ཅིང་མངོན་པར་སྒྲུབ་པར་མི་བྱེད་ཀྱི་གསལ་བར་བྱེད་པས་ཐེག་པ་ཆེན་པོས་ཀྱང་ངེས་པར་འབྱུང་བར་འགྱུར་ན་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པས་ལྟ་སྨོས་ཀྱང་ཅི་དགོས། དེ་ལྟར་མངོན་པར་ཞེན་པར་མི་བྱེད་ཅིང་མངོན་
པར་སྒྲུབ་པར་མི་བྱེད་ཀྱི་གསལ་བར་བྱེད་པས་འདི་ལྟ་སྟེ། སེམས་ཅན་དམྱལ་བ་རྣམས་དང་། དུད་འགྲོ་དང་། ཡི་དགས་རྣམས་དང་། ལྷ་དང་མི་རྣམས་ཀྱི་ནང་དུ་རྒ་ཤི་མྱོང་བ་མ་ཡིན་ནོ། །རབ་འབྱོར་གཟུགས་ནི་སྐྱེ་བའོ། །འཇིག་པའོ། །གཟུགས་ཀྱི་སྐྱེ་བ་གང་ཡིན་པ་
དེ་ནི་གཟུགས་ཀྱི་སྐྱེ་བ་མེད་པའོ། །གཟུགས་ཀྱི་སྐྱེ་བ་མེད་པ་གང་ཡིན་པ་དེ་ནི་གཟུགས་ཀྱི་སྐྱེ་བ་མེད་པའི་རང་བཞིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་གཟུགས་ཀྱི་སྐྱེ་བ་མེད་པའི་རང་བཞིན་དེ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པས་གཟུགས་ཀྱི་སྐྱེ་བ་མེད་པ་
གང་ཡིན་པ་དེ་ཡང་དག་པར་སྒྲུབ་བོ། །རབ་འབྱོར་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་སྐྱེ་བའོ། །འཆི་བའོ། །རྣམ་པར་ཤེས་པའི་སྐྱེ་བ་གང་ཡིན་པ་དེ་ནི་རྣམ་པར་ཤེས་པ་སྐྱེ་བ་མེད་པའོ། །རྣམ་པར་ཤེས་པའི་སྐྱེ་བ་མེད་པ་གང་ཡིན་

པ་དེ་ནི་རྣམ་པར་ཤེས་པའི་སྐྱེ་བ་མེད་པའི་རང་བཞིན་ཏེ། བྱང་ཆུབ་སེམས་དཔའ་རྣམ་པར་ཤེས་པའི་སྐྱེ་བ་མེད་པའི་རང་བཞིན་ཏེ། ཡང་དག་པ་ཇི་ལྟ་བ་བཞིན་ཏེ། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པས་རྣམ་པར་ཤེས་པའི་སྐྱེ་བ་མེད་པ་གང་ཡིན་པ་དེ་ཡང་དག་པར་སྒྲུབ་བོ། །
རབ་འབྱོར་གང་ལ་ལ་ཞིག་གཟུགས་ནི་བདག་གམ་བདག་གིའོ་ཞེས་དེ་སྐད་སྨྲ་ན་དེ་ནི་ཕྱི་རོལ་བྱིས་པ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ལ་ལ་ཞིག་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བདག་
གམ་བདག་གིའོ་ཞེས་དེ་སྐད་སྨྲ་ན། དེ་ནི་ཕྱི་རོལ་བྱིས་པ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ལ་ལ་ཞིག་གཟུགས་ནི་སྔོན་བྱས་པའི་རྒྱུ་ལས་བྱུང་བའོ་ཞེའམ། དབང་ཕྱུག་གིས་སྤྲུལ་པའི་རྒྱུ་ལས་བྱུང་བའོ་ཞེའམ། རྒྱུ་མེད་རྐྱེན་
མེད་པའོ་ཞེས་དེ་སྐད་སྨྲ་ན་དེ་ནི་ཕྱི་རོལ་བྱིས་པ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ལ་ལ་ཞིག་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་སྔོན་བྱས་པའི་རྒྱུ་ལས་བྱུང་བའོ་ཞེའམ། དབང་
ཕྱུག་གིས་སྤྲུལ་པའི་རྒྱུ་ལས་བྱུང་བའོ་ཞེའམ། རྒྱུ་མེད་རྐྱེན་མེད་པའོ་ཞེས་དེ་སྐད་སྨྲ་ན་དེ་ནི་ཕྱི་རོལ་བྱིས་པ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ། །ཞེས་ང་སྨྲའོ། །རབ་འབྱོར་གང་ཡང་གཟུགས་ནི་གཟུགས་སུ་ཡོད་པའི་མཚན་ཉིད་དོ། །ཚོར་བ་
ནི་མྱོང་བའི་མཚན་ཉིད་དོ། །འདུ་ཤེས་ནི་ཀུན་དུ་ཤེས་པའི་མཚན་ཉིད་དོ། །འདུ་བྱེད་རྣམས་ནི་མངོན་པར་འདུ་བྱེད་པའི་མཚན་ཉིད་དོ། །རྣམ་པར་ཤེས་པ་ནི་རྣམ་པར་ཤེས་པའི་མཚན་ཉིད་དོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་སྟེ།
ལོག་པར་ལྟ་བའོ་ཞེས་ང་སྨྲའོ། །རབ་འབྱོར་དེ་གང་ཡང་གཟུགས་ནི་སྡུག་བསྔལ་བ་སྟེ། རབ་ཏུ་མ་ཞི་བའོ། །གཟུགས་འགོག་པ་ནི་བདེ་བ་དང་ཞི་བའོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་ཞེས་བྱ་བ་ནས་ལོག་པར་ལྟ་བའི་བར་དུའོ་ཞེས་ང་སྨྲའོ། །རབ་འབྱོར་གང་ཡང་ཚོར་བ་

དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་སྡུག་བསྔལ་བ་སྟེ་རབ་ཏུ་མ་ཞི་བའོ། །རྣམ་པར་ཤེས་པ་འགོག་པ་ནི་བདེ་བ་དང་། ཞི་བའོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་ཞེས་བྱ་བ་ནས་ལོག་པར་ལྟ་བའི་བར་དུའོ་ཞེས་ང་
སྨྲའོ། །རབ་འབྱོར་གང་ཡང་གཟུགས་ནི་མེད་པ་ཉིད་དོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ཡང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
ནི་མེད་པ་ཉིད་དོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ཡང་བཅོམ་ལྡན་འདས་ཀྱིས་གཟུགས་རང་བཞིན་མེད་པ་དང་། སྐྱེ་བ་མེད་པ་དང་། འགག་པ་མེད་པ་དང་། གདོད་མ་ནས་
ཞི་བ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པར་བསྟན་པ་གང་ཡིན་པའི་བསྟན་པ་དེ་ཐམས་ཅད་ནི་ལྡེམ་པོར་དགོངས་པ་མ་ཡིན་པ་དགོངས་པ་མ་ཡིན་པ་སྟེ། སྒྲ་ཇི་བཞིན་པ་ཉིད་དུ་ཤེས་པར་བྱའོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་
ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ཡང་བཅོམ་ལྡན་འདས་ཀྱིས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རང་བཞིན་མེད་པ་དང་། སྐྱེ་བ་མེད་པ་དང་། འགག་པ་མེད་པ་དང་། གདོད་མ་ནས་ཞི་བ་དང་། རང་
བཞིན་གྱིས་ཡོངས་སུ་མྱ་ངན་ལས་འདས་པར་བསྟན་པ་གང་ཡིན་པའི་བསྟན་པ་དེ་ཐམས་ཅད་ནི་ལྡེམ་པོར་དགོངས་པ་མ་ཡིན་པ། དགོངས་པ་མ་ཡིན་པ་སྟེ། སྒྲ་ཇི་བཞིན་པ་ཉིད་དུ་ཤེས་པར་བྱའོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་སྟེ།
ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གཟུགས་ནི་ཡོད་དེ་གང་གཟུགས་ལ་མངོན་པར་ཞེན་པ་དང་། སྐྱེ་བ་དང་། བསྟན་པར་འགྱུར་བའོ། །གཟུགས་ནི་ཡོད་དེ་གང་གཟུགས་ལ་ཀུན་ནས་ཉོན་མོངས་པ་དང་། གནས་པ་དང་། འཇུག་པར་འགྱུར་བའོ། །གཟུགས་ནི་ཡོད་

དེ། གང་གཟུགས་ལ་རྣམ་པར་བྱང་བ་དང་། འབྱོར་པ་དང་དབང་དུ་འགྱུར་བའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་རྣམ་པར་ཤེས་པ་ལ་མངོན་པར་ཞེན་པ་དང་། སྐྱེ་བ་དང་། བསྟན་པར་འགྱུར་བའོ། །
རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་རྣམ་པར་ཤེས་པ་ལ་ཀུན་ནས་ཉོན་མོངས་པ་དང་། གནས་པ་དང་། འཇུག་པར་འགྱུར་བའོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་
ཡོད་དེ། གང་རྣམ་པར་ཤེས་པ་ལ་རྣམ་པར་བྱང་བ་དང་། འབྱོར་པ་དང་། དབང་དུ་འགྱུར་བའོ། །རབ་འབྱོར་གཟུགས་ནི་ཡོད་དེ། གང་བྱང་ཆུབ་སེམས་དཔའ་རྣམས་ཀྱིས་སྤངས་ཤིང་ཡོངས་སུ་ཤེས་ཏེ་བསྟན་ན་དབང་དུ་འགྱུར་བའོ། །རབ་འབྱོར་གཟུགས་ནི་ཡོད་དེ། གང་
སྤངས་ཤིང་ཡོངས་སུ་ཤེས་ཏེ་ཡང་དག་པར་བསྟན་ན་དབང་དུ་འགྱུར་བའོ། །རབ་འབྱོར་གཟུགས་ནི་ཡོད་དེ། གང་སྤངས་ཤིང་ཡོངས་སུ་ཤེས་ན་ཆོས་དཀར་པོ་དང་ལྡན་པ་དང་། ཆོས་ཐམས་ཅད་ལ་དབང་སྒྱུར་བ་དང་བདེ་བ་ཆེན་པོ་ལ་གནས་པར་འགྱུར་བའོ། །རབ་འབྱོར་ཚོར་བ་
དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་བྱང་ཆུབ་སེམས་དཔའ་རྣམས་ཀྱིས་སྤངས་ཤིང་ཡོངས་སུ་ཤེས་ཏེ་བསྟན་ན་དབང་དུ་འགྱུར་བའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
ནི་ཡོད་དེ། གང་སྤངས་ཤིང་ཡོངས་སུ་ཤེས་ཏེ་ཡང་དག་པར་བསྟན་ན་དབང་དུ་འགྱུར་བའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་སྤངས་ཤིང་ཡོངས་སུ་ཤེས་ན་ཆོས་དཀར་པོ་དང་ལྡན་པ་དང་། ཆོས་ཐམས་
ཅད་ལ་དབང་སྒྱུར་བ་དང་། བདེ་བ་ཆེན་པོ་ལ་གནས་པར་འགྱུར་རོ། །རབ་འབྱོར་བྱང་ཆུབ་སེམས་དཔའ་གང་ལ་ལ་ཞིག་གཟུགས་ལ་གཟུགས་ཙམ་དང་། སྡུག་བསྔལ་ཙམ་དུ་ཡང་དག་པར་རྗེས་སུ་མི་མཐོང་བ་དེ་གཟུགས་ལ་བདག་ཏུ་དམིགས་སོ། །གང་གཟུགས་ལ་བདག་ཏུ་

དམིགས་པ་དེ་གཟུགས་ལ་བདག་ཏུ་ལྟ་བར་དམིགས་སོ། །གང་གཟུགས་ལ་བདག་ཏུ་ལྟ་བར་དམིགས་པ་དེ་གཟུགས་ལ་ཐམས་ཅད་དམིགས་སོ། །གང་གཟུགས་ལ་ཐམས་ཅད་དམིགས་པ་དེ། གཟུགས་ལ་ཐམས་ཅད་མི་དམིགས་སོ། །གཟུགས་
ལ་ཐམས་ཅད་དམིགས་པ་ན་ཐམས་ཅད་མི་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པས་ཀྱང་ངེས་པར་འབྱུང་བར་མི་འགྱུར་ན་ཐེག་པ་ཆེན་པོས་ལྟ་སྨོས་ཀྱང་ཅི་དགོས། །རབ་འབྱོར་
བྱང་ཆུབ་སེམས་དཔའ་གང་ལ་ལ་ཞིག་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་ཤེས་པ་ཙམ་དང་། སྡུག་བསྔལ་ཙམ་དུ་ཡང་དག་པར་རྗེས་སུ་མི་མཐོང་བ་དེ་རྣམ་པར་ཤེས་པ་ལ་བདག་ཏུ་དམིགས་སོ། །གང་རྣམ་པར་ཤེས་པ་ལ་བདག་
ཏུ་དམིགས་པ་དེ་རྣམ་པར་ཤེས་པ་ལ་བདག་ཏུ་ལྟ་བར་དམིགས་སོ། །གང་རྣམ་པར་ཤེས་པ་ལ་བདག་ཏུ་ལྟ་བར་དམིགས་པ་དེ་རྣམ་པར་ཤེས་པ་ལ་ཐམས་ཅད་དམིགས་སོ། །གང་རྣམ་པར་ཤེས་པ་ལ་ཐམས་ཅད་དམིགས་པ་དེ་རྣམ་པར་ཤེས་པ་ལ་ཐམས་ཅད་མི་དམིགས་སོ། །གང་
རྣམ་པར་ཤེས་པ་ལ་ཐམས་ཅད་དམིགས་པ་ན་ཐམས་ཅད་མི་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པས་ཀྱང་ངེས་པར་འབྱུང་བར་མི་འགྱུར་ན་ཐེག་པ་ཆེན་པོས་ལྟ་
སྨོས་ཀྱང་ཅི་དགོས། རབ་འབྱོར་གང་ཡང་གཟུགས་ལ་གཟུགས་ཙམ་དང་། སྡུག་བསྔལ་ཙམ་དུ་ཡང་དག་པར་རྗེས་སུ་མཐོང་བ་དེ་གཟུགས་ལ་བདག་ཏུ་མི་དམིགས་སོ། །གང་གཟུགས་ལ་བདག་ཏུ་མི་དམིགས་པ་དེ་གཟུགས་ལ་བདག་ཏུ་ལྟ་བར་མི་དམིགས་སོ། །གང་
གཟུགས་ལ་བདག་ཏུ་ལྟ་བར་མི་དམིགས་པ་དེ་གཟུགས་ལ་ཐམས་ཅད་མི་དམིགས་སོ། །གང་གཟུགས་ལ་ཐམས་ཅད་མི་དམིགས་པ་དེ་གཟུགས་ལ་ཐམས་ཅད་དམིགས་སོ། །གང་གཟུགས་ལ་ཐམས་ཅད་མི་དམིགས་པ་ན་ཐམས་ཅད་དམིགས་པ་དེའི་དམིགས་པ་དེ་ཡོངས་སུ་

གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་དང་། རང་སངས་རྒྱས་ཀྱི་ཐེག་པས་ངེས་པར་འབྱུང་བར་འགྱུར་གྱི་ཐེག་པ་ཆེན་པོས་ནི་མ་ཡིན་ནོ། །རབ་འབྱོར་གང་ཡང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་ཤེས་པ་ཙམ་
དང་། སྡུག་བསྔལ་ཙམ་དུ་ཡང་དག་པར་རྗེས་སུ་མཐོང་བ་དེ་རྣམ་པར་ཤེས་པ་ལ་བདག་ཏུ་མི་དམིགས་སོ། །གང་རྣམ་པར་ཤེས་པ་ལ་བདག་ཏུ་མི་དམིགས་པ་དེ་རྣམ་པར་ཤེས་པ་ལ་བདག་ཏུ་ལྟ་བར་མི་དམིགས་སོ། །གང་རྣམ་པར་ཤེས་པ་ལ་བདག་ཏུ་ལྟ་བར་མི་དམིགས་པ་དེ་
རྣམ་པར་ཤེས་པ་ལ་ཐམས་ཅད་མི་དམིགས་སོ། །གང་རྣམ་པར་ཤེས་པ་ལ་ཐམས་ཅད་མི་དམིགས་པ་དེ་རྣམ་པར་ཤེས་པ་ལ་ཐམས་ཅད་དམིགས་སོ། །གང་རྣམ་པར་ཤེས་པ་ལ་ཐམས་ཅད་མི་དམིགས་པ་ན་ཐམས་ཅད་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་མི་དམིགས་
པ་དེ་ལ་གནས་ན། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པས་ངེས་པར་འབྱུང་བར་འགྱུར་གྱི་ཐེག་པ་ཆེན་པོས་ནི་མ་ཡིན་ནོ། །རབ་འབྱོར་གང་ལ་ལ་ཞིག་གཟུགས་ལ་ཡང་དག་པ་མ་ཡིན་པ་ཀུན་བརྟགས་པ་ཙམ་དང་། འཁྲུལ་པ་ཙམ་དུ་ཡང་དག་པར་རྗེས་སུ་མི་མཐོང་བ་དེ་
གཟུགས་ལ་གཟུགས་སུ་དམིགས་སོ། །གང་གཟུགས་ལ་གཟུགས་སུ་དམིགས་པ་དེ་གཟུགས་ལ་གཟུགས་སུ་ལྟ་བར་དམིགས་སོ། །གང་གཟུགས་ལ་གཟུགས་སུ་ལྟ་བར་དམིགས་པ་དེ་གཟུགས་ལ་ཐམས་ཅད་དམིགས་སོ། །གང་གཟུགས་ལ་ཐམས་ཅད་དམིགས་པ་དེ་གཟུགས་ལ་
ཐམས་ཅད་མི་དམིགས་སོ། །གང་གཟུགས་ལ་ཐམས་ཅད་དམིགས་པ་ན་ཐམས་ཅད་མི་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པས་ཀྱང་ངེས་པར་འབྱུང་བར་མི་འགྱུར་ན་ཐེག་པ་ཆེན་པོས་
ལྟ་སྨོས་ཀྱང་ཅི་དགོས། རབ་འབྱོར་གང་ཡང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་དག་པ་མ་ཡིན་པ་ཀུན་བརྟགས་པ་ཙམ་དང་། འཁྲུལ་པ་ཙམ་དུ་ཡང་དག་པར་རྗེས་སུ་མི་མཐོང་བ་དེ་རྣམ་པར་ཤེས་པ་ལ་རྣམ་པར་ཤེས་པར་དམིགས་སོ། །

གང་རྣམ་པར་ཤེས་པ་ལ་རྣམ་པར་ཤེས་པར་དམིགས་པ་དེ་རྣམ་པར་ཤེས་པ་ལ་རྣམ་པར་ཤེས་པར་ལྟ་བར་དམིགས་སོ། །གང་རྣམ་པར་ཤེས་པ་ལ་རྣམ་པར་ཤེས་པར་ལྟ་བར་དམིགས་པ་དེ་རྣམ་པར་ཤེས་པ་ལ་ཐམས་ཅད་དམིགས་སོ། །གང་རྣམ་པར་ཤེས་པ་
ལ་ཐམས་ཅད་དམིགས་པ་དེ་རྣམ་པར་ཤེས་པ་ལ་ཐམས་ཅད་མི་དམིགས་སོ། །གང་རྣམ་པར་ཤེས་པ་ལ་ཐམས་ཅད་དམིགས་པ་ན་ཐམས་ཅད་མི་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་
ཐེག་པས་ཀྱང་ངེས་པར་འབྱུང་བར་མི་འགྱུར་ན། ཐེག་པ་ཆེན་པོས་ལྟ་སྨོས་ཀྱང་ཅི་དགོས། རབ་འབྱོར་གང་གཟུགས་ལ་ཡང་དག་པ་མ་ཡིན་པ་ཀུན་བརྟགས་པ་ཙམ་དང་། འཁྲུལ་པ་ཙམ་དུ་ཡང་དག་པར་རྗེས་སུ་མཐོང་བ་དེ་གཟུགས་ལ་གཟུགས་སུ་མི་དམིགས་སོ། །གང་
གཟུགས་ལ་གཟུགས་སུ་མི་དམིགས་པ་དེ་གཟུགས་ལ་གཟུགས་སུ་ལྟ་བར་མི་དམིགས་སོ། །གང་གཟུགས་ལ་གཟུགས་སུ་ལྟ་བར་མི་དམིགས་པ་དེ་གཟུགས་ལ་ཐམས་ཅད་མི་དམིགས་སོ། །གང་གཟུགས་ལ་ཐམས་ཅད་མི་དམིགས་པ་དེ་གཟུགས་ལ་ཐམས་ཅད་མི་དམིགས་སོ། །
གང་གཟུགས་ལ་ཐམས་ཅད་མི་དམིགས་པ་ན་ཐམས་ཅད་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་མི་དམིགས་པ་དེ་ལ་གནས་ན་ཐེག་པ་ཆེན་པོས་ཀྱང་ངེས་པར་འབྱུང་བར་འགྱུར་ན་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པས་ལྟ་སྨོས་ཀྱང་ཅི་དགོས། རབ་
འབྱོར་གང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་དག་པ་མ་ཡིན་པ་ཀུན་བརྟགས་པ་ཙམ་དང་། འཁྲུལ་པ་ཙམ་དུ་ཡང་དག་པར་རྗེས་སུ་མཐོང་བ་དེ་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་སོ། །གང་རྣམ་པར་ཤེས་པ་ལ་རྣམ་པར་
ཤེས་པར་མི་དམིགས་པ་དེ་རྣམ་པར་ཤེས་པ་ལ་རྣམ་པར་ཤེས་པར་ལྟ་བར་མི་དམིགས་སོ། །གང་རྣམ་པར་ཤེས་པ་ལ་རྣམ་པར་ཤེས་པར་ལྟ་བར་མི་དམིགས་པ་དེ་རྣམ་པར་ཤེས་པ་ལ་ཐམས་ཅད་མི་དམིགས་སོ། །གང་རྣམ་པར་ཤེས་པ་ལ་ཐམས་ཅད་མི་དམིགས་པ་དེ་རྣམ་པར་ཤེས་པ་ལ་

ཐམས་ཅད་དམིགས་སོ། །གང་རྣམ་པར་ཤེས་པ་ལ་ཐམས་ཅད་མི་དམིགས་ན་ཐམས་ཅད་དམིགས་པ་དེའི་མི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་ཐེག་པ་ཆེན་པོས་ཀྱང་ངེས་པར་འབྱུང་བར་འགྱུར་ན་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་
པས་ལྟ་སྨོས་ཀྱང་ཅི་དགོས། །རབ་འབྱོར་བྱང་ཆུབ་སེམས་དཔའ་གཟུགས་ལ་སྒྲ་ཇི་བཞིན་དུ་མངོན་པར་ཞེན་ཏེ། ཐ་སྙད་དུ་ཀུན་དུ་སྤྱོད་ན་འཇིག་ཚོགས་ལ་ལྟ་བར་ཀུན་དུ་སྤྱོད་པ་ཡིན། ཡང་འབྱུང་བའི་སྲེད་པ་ལ་ཀུན་དུ་སྤྱོད་པ་ཡིན། འཇིག་པ་ཡོངས་སུ་ཚོལ་བར་ཀུན་དུ་སྤྱོད་པ་ཡིན་
ཏེ། གཟུགས་ཡོངས་སུ་མི་ཤེས་པའི་རྟགས་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྒྲ་ཇི་བཞིན་དུ་མངོན་པར་ཞེན་ཏེ། ཐ་སྙད་དུ་ཀུན་དུ་སྤྱོད་ན་འཇིག་ཚོགས་ལ་ལྟ་བར་ཀུན་དུ་སྤྱོད་པ་ཡིན། ཡང་
འབྱུང་བའི་སྲེད་པ་ལ་ཀུན་དུ་སྤྱོད་པ་ཡིན། འཇིག་པ་ཡོངས་སུ་ཚོལ་བར་ཀུན་དུ་སྤྱོད་པ་ཡིན་ཏེ། རྣམ་པར་ཤེས་པ་ཡོངས་སུ་མི་ཤེས་པའི་རྟགས་ཡིན་ནོ། །རབ་འབྱོར་བྱང་ཆུབ་སེམས་དཔའ་གཟུགས་ལ་སྒྲ་ཇི་བཞིན་དུ་མངོན་པར་ཞེན་ཏེ། ཐ་སྙད་དུ་ཀུན་དུ་མི་སྤྱོད་ན་འཇིག་ཚོགས་ལ་ལྟ་
བར་ཀུན་དུ་སྤྱོད་པ་མ་ཡིན། ཡང་འབྱུང་བའི་སྲེད་པ་ལ་ཀུན་དུ་སྤྱོད་པ་མ་ཡིན། འཇིག་པ་ཡོངས་སུ་ཚོལ་བར་ཀུན་དུ་སྤྱོད་པ་མ་ཡིན་ཏེ། གཟུགས་ཡོངས་སུ་ཤེས་པའི་རྟགས་ཡིན་ནོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་ལ་སྒྲ་ཇི་བཞིན་དུ་མངོན་པར་ཞེན་ཏེ། ཐ་སྙད་དུ་ཀུན་དུ་མི་སྤྱོད་ན་འཇིག་ཚོགས་ལ་ལྟ་བར་ཀུན་དུ་སྤྱོད་པ་མ་ཡིན། ཡང་འབྱུང་བའི་སྲེད་པ་ལ་ཀུན་དུ་སྤྱོད་པ་མ་ཡིན། འཇིག་པ་ཡོངས་སུ་ཚོལ་བར་ཀུན་དུ་སྤྱོད་པ་མ་ཡིན་ཏེ། རྣམ་པར་ཤེས་པ་ཡོངས་སུ་ཤེས་པའི་རྟགས་ཡིན་ནོ། །རབ་
འབྱོར་བྱང་ཆུབ་སེམས་དཔའ་གཟུགས་ལ་རྐྱེན་གང་དག་ཡོངས་སུ་བཟུང་ན་རྣམ་པར་བྱང་བར་འགྱུར་བའི་སེམས་ཀྱི་ས་བོན་ནི་གསུམ་པོ་འདི་དག་སྟེ། མོས་པ་སེམས་ཀྱི་ས་བོན་དང་། ཡིད་འབྱུང་བ་སེམས་ཀྱི་ས་བོན་དང་། ཆུད་མི་གསོན་པ་སེམས་ཀྱི་ས་བོན་ནོ། །རབ་འབྱོར་བྱང་ཆུབ་སེམས་

དཔས་གཟུགས་ལ་མངོན་པར་ཞེན་པ་མེད་པའི་སེམས་དང་། འབྲལ་བའི་སེམས་དང་། ཡོངས་སུ་སྦྱོང་བའི་སེམས་དང་། སེམས་གསུམ་པོ་འདི་དག་བསྐྱེད་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་སེམས་སྐྱེ་བ་དང་། མི་སྐྱེ་བ་དང་། ཆེར་
སྐྱེ་བ་དང་། མཉམ་དུ་སྐྱེ་བ་དེ་ཡང་དག་པར་རྗེས་སུ་མཐོང་སྟེ། དེ་ལྟར་ཡང་དག་པར་རྗེས་སུ་མཐོང་ན་མྱུར་དུ་བླ་ན་མེད་པའི་བྱང་ཆུབ་མངོན་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་
བྱེད་རྣམས་དང་། རྣམ་པར་ཤེས་པ་ལ་རྐྱེན་གང་དག་ཡོངས་སུ་བཟུང་ན་རྣམ་པར་བྱང་བར་འགྱུར་བའི་སེམས་ཀྱི་ས་བོན་ནི་གསུམ་པོ་འདི་དག་སྟེ། མོས་པ་སེམས་ཀྱི་ས་བོན་དང་། ཡིད་འབྱུང་བ་སེམས་ཀྱི་ས་བོན་དང་། ཆུད་མི་གསོན་པ་སེམས་ཀྱི་ས་བོན་ནོ། །རབ་འབྱོར་བྱང་ཆུབ་
སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མངོན་པར་ཞེན་པའི་སེམས་དང་བྲལ་བའི་སེམས་དང་། ཡོངས་སུ་སྦྱོང་བའི་སེམས་དང་། སེམས་གསུམ་པོ་འདི་དག་བསྐྱེད་པར་བྱའོ། །རབ་འབྱོར་གལ་ཏེ་བྱང་ཆུབ་སེམས་དཔས་
ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སེམས་སྐྱེ་བ་དང་། མི་སྐྱེ་བ་དང་། ཆེར་སྐྱེ་བ་དང་། མཉམ་དུ་སྐྱེ་བ་དང་། དེ་ལྟར་ཡང་དག་པར་རྗེས་སུ་མཐོང་སྟེ། དེ་དེ་ལྟར་ཡང་དག་པར་རྗེས་སུ་མཐོང་ན་མྱུར་དུ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་གལ་ཏེ་བྱང་ཆུབ་སེམས་དཔས་གཟུགས་ལ་ཡོད་པ་ཉིད་དང་། དེ་བཞིན་དུ་ཡོད་པ་ཉིད་དམ་མེད་པ་ཉིད་དུ་ཡང་དག་པར་རྗེས་སུ་མཐོང་ན་དེ་ཁོ་ན་མི་ཤེས་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་གལ་ཏེ་
བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡོད་པ་ཉིད་དང་དེ་བཞིན་དུ་ཡོད་པ་ཉིད་དམ་མེད་པ་ཉིད་དུ་ཡང་དག་པར་རྗེས་སུ་མཐོང་ན་དེ་ཁོ་ན་མི་ཤེས་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་གལ་ཏེ་བྱང་ཆུབ་

སེམས་དཔས་གཟུགས་ལ་ཡོད་པ་མ་ཡིན་པ་དང་དེ་བཞིན་དུ་ཡོད་པ་མ་ཡིན་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པར་ཡང་དག་པར་རྗེས་སུ་མཐོང་ན་དེ་ཁོ་ན་ཤེས་པའི་བྱང་ཆུབ་སེམས་དཔའ་ཞེས་བྱའོ། །རབ་འབྱོར་གལ་ཏེ་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་
བྱེད་རྣམས་དང་། རྣམ་པར་ཤེས་པ་ལ་ཡོད་པ་མ་ཡིན་པ་དང་། དེ་བཞིན་དུ་ཡོད་པ་མ་ཡིན་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པར་ཡང་དག་པར་རྗེས་སུ་མཐོང་ན་དེ་ཁོ་ན་ཤེས་པའི་བྱང་ཆུབ་སེམས་དཔའ་ཞེས་བྱའོ། །རབ་འབྱོར་བྱང་ཆུབ་སེམས་དཔའ་གཟུགས་ལ་
སེམས་མཉམ་པར་གཞག་པར་འདོད་ཅིང་གཟུགས་ལ་མོས་ལ། གཟུགས་ལ་སེམས་དེ་སྐྱོད་ཀུན་དུ་སྐྱོད་རྣམ་པར་སྐྱོད་ན། མོས་པ་ངན་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་ལ་སེམས་མཉམ་པར་གཞག་པར་འདོད་ཅིང་རྣམ་པར་ཤེས་པ་ལ་མོས་ལ། རྣམ་པར་ཤེས་པ་ལ་སེམས་དེ་སྐྱོད། ཀུན་དུ་སྐྱོད། རྣམ་པར་སྐྱོད་ན་མོས་པ་ངན་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་གཟུགས་ལ་སེམས་མཉམ་
པར་འདོད་ཅིང་། སེམས་དེ་གཟུགས་ལ་མོས་པ་ན། གཟུགས་ལ་སེམས་མི་འདོགས། ཀུན་དུ་མི་འདོགས། རྣམ་པར་མི་འདོགས་ན་མོས་པ་བཟང་པོའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་
པར་ཤེས་པ་ལ་སེམས་མཉམ་པར་གཞག་པར་འདོད་ཅིང་སེམས་དེ་རྣམ་པར་ཤེས་པ་ལ་མོས་པ་ན་རྣམ་པར་ཤེས་པ་ལ་སེམས་མི་འདོགས། ཀུན་དུ་མི་འདོགས། རྣམ་པར་མི་འདོགས་ན་མོས་པ་བཟང་པོའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་གཟུགས་ལ་
མཚན་ཉིད་མེད་པའི་ཆོས་ཡོངས་སུ་ཤེས་པར་བྱ་བ་དང་། སྡུག་བསྔལ་རབ་ཏུ་ཞི་བར་བྱ་བ་དང་། མྱ་ངན་ལས་འདས་པ་ལ་གཅིག་ཏུ་ངེས་པར་བྱ་བའི་ཕྱིར་ཞུགས་ན། ཡང་དག་པར་ཞུགས་པར་རིག་པར་བྱའོ། །བྱང་ཆུབ་སེམས་དཔའ་དེ་ལྟར་ཡང་དག་པར་ཞུགས་པ་ནི་མྱུར་དུ་བླ་ན་མེད་

པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མཚན་ཉིད་མེད་པའི་ཆོས་ཡོངས་སུ་ཤེས་པར་བྱ་བ་དང་། སྡུག་བསྔལ་
རབ་ཏུ་ཞི་བར་བྱ་བ་དང་། མྱ་ངན་ལས་འདས་པ་ལ་གཅིག་ཏུ་ངེས་པར་བྱ་བའི་ཕྱིར་ཞུགས་ན། ཡང་དག་པར་ཞུགས་པར་རིག་པར་བྱའོ། །བྱང་ཆུབ་སེམས་དཔའ་དེ་ལྟར་ཡང་དག་པར་ཞུགས་པ་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱའོ། །མཚན་ཉིད་མེད་པར་ཤེས་བྱ་དང་། །སྡུག་བསྔལ་ཞི་བར་བྱ་བ་དང་། །ཞི་བ་གཅིག་ཏུ་ངེས་བྱ་བར། །བྱང་ཆུབ་སེམས་དཔའ་སྒྲུབ་པར་བྱེད། །རབ་འབྱོར་བྱང་ཆུབ་སེམས་དཔའ་གཟུགས་ལ་སྣང་བ་མེད་པ་དང་། ཀུན་དུ་སྣང་བ་དང་། དེ་ལ་གནས་པ་
དང་། དེ་ལ་འཇུག་པའི་ཆོས་ཡང་དག་པ་ཇི་ལྟ་བ་བཞིན་དུ་ཤེས་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པ་ལ་སྣང་བ་མེད་པ་དང་། ཀུན་དུ་སྣང་བ་དང་། དེ་ལ་གནས་པ་དང་། དེ་འཇུག་པའི་ཆོས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །ཆོས་གང་སྣང་བ་མེད་པ་དང་། །
ཀུན་དུ་སྣང་བ་ཉིད་དང་ནི། །དེ་ལ་གནས་དང་རབ་འཇུག་པ། །དེ་ཤེས་ནས་ནི་བྱང་ཆུབ་འཐོབ། །རབ་འབྱོར་བྱང་ཆུབ་སེམས་དཔའ་གཟུགས་ལ་གཟུགས་ཡོངས་སུ་ཚོལ་བ་ན་དེ་མི་དམིགས་ཏེ། གཟུགས་མི་སྣང་བར་བྱས་ཤིང་གཟུགས་ཀྱི་ཆོས་ཉིད་ཀྱང་རབ་ཏུ་རྟོགས་པར་བྱས་
ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་ཤེས་པ་ཡོངས་སུ་ཚོལ་བ་ན་དེ་མི་དམིགས་ཏེ། རྣམ་པར་

ཤེས་པ་མི་སྣང་བར་བྱས་ཤིང་རྣམ་པར་ཤེས་པའི་ཆོས་ཉིད་ཀྱང་རབ་ཏུ་རྟོགས་པར་བྱས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་ཏུ་བཙལ་ན་མི་དམིགས་ཆོས། །སེམས་ལ་དངོས་པོར་མི་སྣང་བ། །ཆོས་ཉིད་ལེགས་པར་ཤེས་པ་
ཡི། །བློ་ལྡན་བྱང་ཆུབ་འཐོབ་པར་འགྱུར། །རབ་འབྱོར་བྱང་ཆུབ་སེམས་དཔའ་གཟུགས་ལ་དངོས་པོ་མེད་པར་མཁས་པ་ནི་གཟུགས་འཇིག་པ་དང་ལྡན་ཞིང་གཟུགས་ཀྱི་ཆོས་ཀྱི་དབྱིངས་ལས་མི་གཡོ་བར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
རྒྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་དངོས་པོ་མེད་པར་མཁས་པ་ནི་རྣམ་པར་ཤེས་པ་འཇིག་པ་དང་ལྡན་ཞིང་རྣམ་པར་ཤེས་པའི་ཆོས་ཀྱི་དབྱིངས་ལས་མི་གཡོ་བར་མྱུར་དུ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བློ་ལྡན་དངོས་པོ་མེད་མཁས་པ། །རྣམ་པར་འཇིག་དང་ལྡན་གྱུར་ཅིང་། །ཆོས་ཀྱི་དབྱིངས་ལས་མི་གཡོ་བར། །ཐམས་ཅད་མཁྱེན་པ་ཉིད་འཐོབ་འགྱུར། །རབ་འབྱོར་བྱང་ཆུབ་སེམས་དཔས་གཟུགས་ལ་དོན་དང་བྲལ་བ་དང་།
དོན་མེད་པ་དང་། དོན་ཆེན་པོར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་དོན་
དང་བྲལ་བ་དང་དོན་མེད་པ་དང་། དོན་ཆེན་པོར་ཡང་དག་པ་ཇི་ལྟ་བ་བཞིན་དུ་ཤེས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །དོན་བྲལ་བ་དང་དོན་མེད་དང་། །དོན་ཆེ་བ་ཡི་དོན་དུ་ནི། །ཤེས་ནས་བྱང་ཆུབ་སེམས་དཔའ་རྣམས། །བྱང་ཆུབ་
ཆེན་པོ་འཐོབ་པར་འགྱུར། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་གཟུགས་ལ་རྣམ་པར་རྟོག་པའི་འདོད་ཆགས་དང་། རབ་ཏུ་རྟོག་པའི་འདོད་ཆགས་དང་། རྣམ་པར་རྟོག་པའི་འདོད་ཆགས་དང་། འདོད་ཆགས་དང་། འདོད་ཆགས་ཆེན་པོ་དང་། འདོད་ཆགས་

ལྔ་ཡོངས་སུ་ཤེས་པར་བྱས་ཏེ། ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་རྟོག་པའི་འདོད་ཆགས་དང་། རབ་ཏུ་རྟོག་པའི་འདོད་ཆགས་
དང་། རྣམ་པར་རྟོག་པའི་འདོད་ཆགས་དང་། འདོད་ཆགས་དང་འདོད་ཆགས་ཆེན་པོ་དང་འདོད་ཆགས་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་འདོད་ཆགས་ལྔ་པོ་འདི་དག་ཡོངས་སུ་སྤངས་ནས། གཟུགས་ཀྱི་རང་བཞིན་མི་
དམིགས་སོ། །གཟུགས་ཀྱི་རང་བཞིན་མི་དམིགས་པས་གཟུགས་ལ་གཟུགས་སུ་མི་དམིགས་སོ། །གཟུགས་ལ་གཟུགས་སུ་མི་དམིགས་པས་གཟུགས་ལ་གཟུགས་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་
གཟུགས་མི་དམིགས་པ་དེས་གཟུགས་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་
འདོད་ཆགས་ལྔ་པོ་འདི་དག་ཡོངས་སུ་སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པར་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་
ཏེ། གང་རྣམ་པར་ཤེས་པ་ལ་རྣམ་པར་ཤེས་པ་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་ནས་རྣམ་པར་ཤེས་པ་དམིགས་པ་མི་དམིགས་པ་དེས་རྣམ་པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔའ་གཟུགས་ལ་རྣམ་པར་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། རབ་ཏུ་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། རྣམ་པར་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། ཞེ་སྡང་དང་། ཞེ་སྡང་ཆེན་པོ་

དང་། ཞེ་སྡང་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། རབ་ཏུ་རྟོག་པ་དང་། རྣམ་པར་དཔྱོད་པའི་ཞེ་སྡང་དང་།
རྣམ་པར་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། ཞེ་སྡང་དང་། ཞེ་སྡང་ཆེན་པོ་དང་། ཞེ་སྡང་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་ཞེ་སྡང་ལྔ་པོ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །
གཟུགས་ཀྱི་རང་བཞིན་མི་དམིགས་པས་གཟུགས་ལ་གཟུགས་སུ་མི་དམིགས་སོ། །གཟུགས་ལ་གཟུགས་སུ་མི་དམིགས་པས་གཟུགས་ལ་གཟུགས་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་གཟུགས་དམིགས་པ་མི་
དམིགས་པ་དེས་གཟུགས་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཞེ་སྡང་ལྔ་པོ་འདི་དག་ཡོངས་
སུ་སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་
པར་ཤེས་པ་ལ་རྣམ་པར་ཤེས་པ་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་རྣམ་པར་ཤེས་པ་དམིགས་པ་མི་དམིགས་པ་དེས་རྣམ་པར་ཤེས་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །
རབ་འབྱོར་བྱང་ཆུབ་སེམས་དཔའ་གཟུགས་ལ་འཁྲུལ་པའི་གཏི་མུག་དང་། འཁྲུལ་པའི་རྒྱུའི་གཏི་མུག་དང་། མི་འཁྲུལ་པའི་རྒྱུའི་གཏི་མུག་དང་། གཏི་མུག་དང་། གཏི་མུག་ཆེན་པོ་དང་། གཏི་མུག་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་

ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་འཁྲུལ་པའི་གཏི་མུག་དང་། འཁྲུལ་པའི་རྒྱུའི་གཏི་མུག་དང་། མི་འཁྲུལ་པའི་རྒྱུའི་གཏི་མུག་དང་། གཏི་མུག་དང་། གཏི་མུག་ཆེན་པོ་དང་། གཏི་མུག་ལྔ་ཡོངས་སུ་ཤེས་པར་བྱས་ཏེ་ཡོངས་
སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་གཏི་མུག་ལྔ་པོ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །གཟུགས་ཀྱི་རང་བཞིན་མི་དམིགས་པས་གཟུགས་ལ་གཟུགས་སུ་མི་དམིགས་སོ། །གཟུགས་ལ་གཟུགས་སུ་མི་དམིགས་པས་གཟུགས་
ལ་གཟུགས་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་གཟུགས་དམིགས་པ་མི་དམིགས་པ་དེས་གཟུགས་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་
འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་གཏི་མུག་ལྔ་པོ་འདི་དག་ཡོངས་སུ་སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པ་ལ་རྣམ་པར་
ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པར་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་པར་ཤེས་པ་ལ་རྣམ་པར་ཤེས་པ་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་རྣམ་པར་ཤེས་པ་
དམིགས་པ་མི་དམིགས་པ་དེས་རྣམ་པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་གཟུགས་ལ་མང་དུ་ཐོས་པའི་ང་རྒྱལ་དང་། མངོན་པར་མཐོ་བའི་ང་རྒྱལ་དང་།
མངོན་པའི་ང་རྒྱལ་དང་། ང་རྒྱལ་དང་། ང་རྒྱལ་ཆེན་པོ་དང་། ང་རྒྱལ་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མང་དུ་ཐོས་པའི་ང་རྒྱལ་དང་། མངོན་པར་

མཐོ་བའི་ང་རྒྱལ་དང་། མངོན་པའི་ངའི་ང་རྒྱལ་དང་། ང་རྒྱལ་དང་། ང་རྒྱལ་ཆེན་པོ་དང་། ང་རྒྱལ་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་ང་རྒྱལ་ལྔ་པོ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་
སོ། །གཟུགས་ཀྱི་རང་བཞིན་མི་དམིགས་པས་གཟུགས་ལ་གཟུགས་སུ་མི་དམིགས་སོ། །གཟུགས་ལ་གཟུགས་སུ་མི་དམིགས་པས་གཟུགས་ལ་གཟུགས་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་གཟུགས་དམིགས་པ་མི་
དམིགས་པ་དེས་གཟུགས་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ང་རྒྱལ་ལྔ་པོ་འདི་དག་
ཡོངས་སུ་སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པར་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་
པར་ཤེས་པ་ལ་རྣམ་པར་ཤེས་པ་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་རྣམ་པར་ཤེས་པ་དམིགས་པ་མི་དམིགས་པ་དེས་རྣམ་པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་
འབྱུང་ངོ་། །རབ་འབྱོར་བྱང་ཆུབ་སེམས་དཔས་གཟུགས་ལ་རང་བཞིན་ལ་ཕྱིན་ཅི་ལོག་གི་ལྟ་བ་དང་། ཡོད་དོ་སྙམ་པའི་ལྟ་བ་དང་། སྐུར་པ་འདེབས་པའི་ལྟ་བ་དང་། ལྟ་བ་དང་། ལྟ་བ་ཆེན་པོ་དང་། ལྟ་བ་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་
ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རང་བཞིན་ལ་ཕྱིན་ཅི་ལོག་པའི་ལྟ་བ་དང་། ཡོད་དོ་སྙམ་པའི་ལྟ་བ་དང་། སྐུར་པ་འདེབས་པའི་ལྟ་བ་དང་། ལྟ་བ་དང་། ལྟ་བ་ཆེན་པོ་དང་། ལྟ་བ་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་

བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་ལྟ་བ་ལྔ་པོ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །གཟུགས་ཀྱི་རང་བཞིན་མི་དམིགས་པས་གཟུགས་ལ་གཟུགས་སུ་མི་དམིགས་སོ། །གཟུགས་ལ་གཟུགས་སུ་མི་དམིགས་
པས་གཟུགས་ལ་གཟུགས་དམིགས་ཏེ་གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་གཟུགས་དམིགས་པ་མི་དམིགས་པ་དེས་གཟུགས་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ལྟ་བ་ལྔ་པོ་འདི་དག་ཡོངས་སུ་སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་
ཤེས་པ་ལ་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པར་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་པར་ཤེས་པ་ལ་རྣམ་པར་ཤེས་པར་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་རྣམ་
པར་ཤེས་པ་དམིགས་པ་མི་དམིགས་པ་དེས་རྣམ་པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་གཟུགས་དང་ཆོས་ལ་ཡིད་གཉིས་ཟ་བ་དང་། འགྲོ་བ་དང་། སྡུག་
བསྔལ་ལ་ཡིད་གཉིས་ཟ་བ་དང་། མྱ་ངན་ལས་འདས་པ་དང་། སངས་རྒྱས་དང་བྱང་ཆུབ་སེམས་དཔའ་ལ་ཡིད་གཉིས་ཟ་བ་དང་། ཡིད་གཉིས་ཟ་བ་དང་། ཡིད་གཉིས་ཟ་བ་ཆེན་པོ་དང་། ཡིད་གཉིས་ཟ་བ་ལྔ་ཡོངས་སུ་ཤེས་པར་བྱས་ཏེ། ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་
དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཆོས་ལ་ཡིད་གཉིས་ཟ་བ་དང་། འགྲོ་བ་དང་། སྡུག་བསྔལ་ལ་ཡིད་གཉིས་ཟ་བ་དང་། མྱ་ངན་ལས་འདས་པ་དང་། སངས་རྒྱས་དང་བྱང་ཆུབ་སེམས་དཔའ་ལ་ཡིད་གཉིས་ཟ་བ་དང་། ཡིད་གཉིས་ཟ་བ་དང་། ཡིད་

གཉིས་ཟ་བ་ཆེན་པོ་དང་། ཡིད་གཉིས་ཟ་བ་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་ཡིད་གཉིས་ཟ་བ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །གཟུགས་ཀྱི་རང་བཞིན་མི་དམིགས་པས་གཟུགས་
ལ་གཟུགས་སུ་མི་དམིགས་སོ། །གཟུགས་ལ་གཟུགས་སུ་མི་དམིགས་པས་གཟུགས་ལ་གཟུགས་སུ་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་གཟུགས་དམིགས་པ་མི་དམིགས་པ་དེས་གཟུགས་རྣམ་པ་ཐམས་ཅད་དུ་ཟིལ་གྱིས་
མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡིད་གཉིས་ཟ་བ་ལྔ་པོ་འདི་དག་ཡོངས་སུ་སྤངས་ནས་རྣམ་པར་ཤེས་པའི་རང་བཞིན་
མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པར་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་པར་ཤེས་པ་ལ་རྣམ་པར་ཤེས་པ་དམིགས་
པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་རྣམ་པར་ཤེས་པ་དམིགས་པ་མི་དམིགས་པ་དེས་རྣམ་པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་
དཔའ་གཟུགས་ཡོངས་སུ་ཚོལ་ཞིང་གཟུགས་ཀྱི་ཆོས་སྟོན་པ་གཟུགས་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་ཞིང་གཟུགས་དེ་ཇི་ལྟར་བརྗོད་པ་དང་། ཇི་ལྟར་བསྟན་པ་དང་། ཇི་ལྟར་བསྙད་པ་བཞིན་དུ་ཡོངས་སུ་ཚོལ་ཞིང་ཆོས་སྟོན་ཏེ། དེ་ལ་ལུས་དང་། ངག་དང་། ཡིད་ཀྱི་ལས་
ཡོངས་སུ་སྦྱོང་བ་གཟུགས་ལ་ཉེས་པ་ཡོངས་སུ་ཚོལ་བའི་བྱང་ཆུབ་སེམས་དཔར་རིག་པར་བྱའོ། །གཟུགས་ལ་དམ་པའི་ཆོས་མ་ཡིན་པའི་གཏམ་ཅན་གྱི་བྱང་ཆུབ་སེམས་དཔར་རིག་པར་བྱའོ། །གཟུགས་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་མ་དག་པའི་བྱང་ཆུབ་སེམས་དཔར་

རིག་པར་བྱའོ། །རབ་འབྱོར་བྱང་ཆུབ་སེམས་དཔའ་གཟུགས་ཡོངས་སུ་ཚོལ་ཞིང་གཟུགས་ཀྱི་ཆོས་སྟོན་ལ་གཟུགས་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་ཞིང་གཟུགས་དེ་ལ་ཇི་ལྟར་བརྗོད་པ་བཞིན་དུ་མ་ཡིན། ཇི་ལྟར་བསྟན་པ་བཞིན་དུ་མ་ཡིན།
ཇི་ལྟར་བསྙད་པ་བཞིན་དུ་མ་ཡིན་པར་ཡོངས་སུ་ཚོལ་ཞིང་ཆོས་སྟོན་ཏེ། དེ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་ན་གཟུགས་ལ་ལེགས་པར་ཚོལ་བའི་བྱང་ཆུབ་སེམས་དཔའ་སྟེ། ཡང་དག་པའི་ངག་གི་ལས་ཀྱི་གཏམ་ཅན་གྱི་བྱང་ཆུབ་སེམས་དཔར་རིག་པར་བྱའོ། །
གཟུགས་དེ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་དག་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡོངས་སུ་ཚོལ་ཞིང་རྣམ་པར་ཤེས་པའི་ཆོས་སྟོན་ལ། རྣམ་པར་
ཤེས་པ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་ཞིང་རྣམ་པར་ཤེས་པ་དེ་ཇི་ལྟར་བརྗོད་པ་དང་། ཇི་ལྟར་བསྟན་པ་དང་། ཇི་ལྟར་བསྙད་པ་བཞིན་དུ་ཡོངས་སུ་ཚོལ་ཞིང་ཆོས་སྟོན་ཏེ། དེ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་ན། རྣམ་པར་ཤེས་པ་ལ་ཉེས་པར་
ཡོངས་སུ་ཚོལ་བའི་བྱང་ཆུབ་སེམས་དཔར་རིག་པར་བྱའོ། །རྣམ་པར་ཤེས་པ་ལ་དམ་པའི་ཆོས་མ་ཡིན་པའི་གཏམ་ཅན་གྱི་བྱང་ཆུབ་སེམས་དཔར་རིག་པར་བྱའོ། །རྣམ་པར་ཤེས་པ་ལ་ལུས་དང་། ངག་དང་ཡིད་ཀྱི་ལས་ཡོངས་སུ་མ་དག་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་
བྱང་ཆུབ་སེམས་དཔའ་རྣམ་པར་ཤེས་པ་ཡོངས་སུ་ཚོལ་ཞིང་རྣམ་པར་ཤེས་པའི་ཆོས་སྟོན་ལ། རྣམ་པར་ཤེས་པ་ལ་ལུས་དང་ངག་དང་། ཡིད་ཀྱི་ལས་ཡོངས་སུ་སྦྱོང་ཞིང་རྣམ་པར་ཤེས་པ་དེ་ལ་ཇི་ལྟར་བརྗོད་པ་བཞིན་དུ་མ་ཡིན། ཇི་ལྟར་བསྟན་པ་བཞིན་དུ་མ་ཡིན། ཇི་ལྟར་བསྙད་པ་བཞིན་དུ་མ་ཡིན་
པར་ཡོངས་སུ་ཚོལ་ཞིང་ཆོས་སྟོན་ཏེ། དེ་ལ་ལུས་དང་ངག་དང་། ཡིད་ཀྱི་ལས་ཡོངས་སུ་སྦྱོང་ན་རྣམ་པར་ཤེས་པ་ལ་ལེགས་པར་ཚོལ་བའི་བྱང་ཆུབ་སེམས་དཔའ་སྟེ། ཡང་དག་པའི་ངག་གི་ལས་ཀྱི་གཏམ་ཅན་གྱི་བྱང་ཆུབ་སེམས་དཔར་རིག་པར་བྱའོ། །རྣམ་པར་ཤེས་པ་དེ་ལ་ལུས་དང་ངག་

དང་། ཡིད་ཀྱི་ལས་ཡོངས་སུ་དག་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་གཟུགས་ལ་སེམས་མཉམ་པར་གཞག་པར་འདོད་ཅིང་གཟུགས་དེ་ལ་ནང་དུ་མོས་ན། གཟུགས་ལ་མོས་པར་བྱ་བའི་གཟུགས་དང་། མོས་པའི་གཟུགས་གཉིས་
དམིགས་པར་འགྱུར་རོ། །དེ་ལ་བྱང་ཆུབ་སེམས་དཔའ་མོས་པའི་གཟུགས་ལ་མོས་པར་བྱ་བ་ཇི་ལྟ་བ་བཞིན་དུ་སྟོན་ཏམ། མོས་པར་བྱ་བ་ལ་མོས་པ་ཇི་ལྟ་བ་བཞིན་དུ་སྟོན་ན་གཟུགས་ལ་ཡང་དག་པ་མ་ཡིན་པར་སྟོན་པའི་བྱང་ཆུབ་སེམས་དཔར་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར་
མོས་པར་བྱ་བའི་གཟུགས་ལས་མོས་པའི་གཟུགས་ཀྱི་མཚན་ཉིད་གུད་ན་མེད་དོ། །རབ་འབྱོར་གལ་ཏེ་མོས་པར་བྱ་བའི་གཟུགས་ལས་མོས་པའི་གཟུགས་ཀྱི་མཚན་ཉིད་གུད་ན་ཡོད་ན་ནི་མོས་པར་བྱ་བ་ལ་སེམས་ཅན་མོས་པ་ཐ་དད་པ་རྣམས་དང་། མཚུངས་པར་ལྟ་བ་ཐ་དད་པར་དམིགས་པར་འགྱུར་
ཞིང་རྨི་ལམ་ལ་སོགས་པ་ལ་དམིགས་པ་མེད་པའི་མོས་པས་དམིགས་པར་ཡང་མི་འགྱུར་ལ། བྱིས་པ་སོ་སོའི་སྐྱེ་བོ་རྣམས་ཀྱང་གཟུགས་ལ་དེ་ཁོ་ན་མཐོང་བར་འགྱུར་ཞིང་རྣམ་པར་མི་རྟོག་པའི་མོས་པ་གྲུབ་པ། རིགས་པ་ལ་ཡང་མོས་པར་བྱ་བའི་གཟུགས་རྗེས་སུ་འཇུག་པར་མི་འགྱུར་བ་ཞིག་ན། རབ་
འབྱོར་འདི་ལྟར་མོས་པར་བྱ་བ་ལ་སེམས་ཅན་མོས་པ་ཐ་དད་པ་རྣམས་དང་། མཚུངས་པར་ལྟ་བ་ཐ་དད་པར་མ་གྱུར་ཅིང་རྨི་ལམ་ལ་སོགས་པ་ལ་ཡང་དམིགས་པ་མེད་པའི་མོས་པ་དམིགས་ལ། བྱིས་པ་སོ་སོའི་སྐྱེ་བོ་རྣམས་ཀྱང་གཟུགས་ལ་དེ་ཁོ་ན་མཐོང་བར་མ་གྱུར་ཏེ། རྣམ་པར་མི་རྟོག་པའི་མོས་
པ་གྲུབ་པ། རིགས་པ་ལ་ཡང་མོས་པར་བྱ་བའི་གཟུགས་རྗེས་སུ་འཇུག་སྟེ། དེའི་ཕྱིར་བྱང་ཆུབ་སེམས་དཔས་མོས་པའི་གཟུགས་ལས་མོས་པར་བྱ་བའི་གཟུགས་ཀྱི་མཚན་ཉིད་གུད་ན་མེད་པར་བལྟ་བར་བྱའོ། །གཞན་དུ་ན་མོས་པར་བྱ་བའི་གཟུགས་དེ་ཇི་ལྟ་བ་བཞིན་དུ་མཚན་མ་དང་བཅས་པའི་ལྟ་བའི་མོས་
པའི་གཟུགས་ཀྱང་ཡང་དག་པར་བྱུང་བ་ནི་མ་གཏོགས་སོ། །དེ་བས་ན་དོན་གཞན་སྣང་ངོ་། །དེ་ལྟར་མཐོང་བའི་བྱང་ཆུབ་སེམས་དཔས་མོས་པར་བྱ་བའི་གཟུགས་ཀྱི་འདུ་ཤེས་རྣམ་པར་འཇིག་སྟེ། དེ་འདི་སྙམ་དུ་སེམས་སོ། །མོས་པར་བྱ་བའི་གཟུགས་ཡོད་ན་མོས་པའི་གཟུགས་རིགས་པར་འགྱུར་གྱི།

མེད་ན་ནི་མ་ཡིན་པར་རིག་ནས་གཟུགས་ལ་འཁྲུལ་པའི་སེམས་དམིགས་ཏེ། མོས་པའི་གཟུགས་ཀྱི་འདུ་ཤེས་ཀྱང་རྣམ་པར་འཇིག་གོ། །དེ་གཟུགས་གཉིས་ཀྱི་འདུ་ཤེས་རྣམ་པར་བཤིག་ཅིང་གཟུགས་ཀྱི་འདུ་ཤེས་ཐམས་ཅད་བཤིག་ནས་གཟུགས་ཐམས་ཅད་མི་དམིགས་སོ། །
གཟུགས་ཐམས་ཅད་མི་དམིགས་པས་གཟུགས་ལ་འཁྲུལ་པར་དམིགས་སོ། །གཟུགས་ལ་འཁྲུལ་པར་དམིགས་པས་གཟུགས་ལ་འཁྲུལ་པའི་རྒྱུ་དམིགས་སོ། །གཟུགས་ལ་འཁྲུལ་པའི་རྒྱུ་དམིགས་པས་གཟུགས་ལ་འཁྲུལ་པ་མེད་པའི་ཆོས་ཡང་དག་པར་སྒྲུབ་བོ། །གཟུགས་ལ་
འཁྲུལ་པ་མེད་པའི་ཆོས་ཡང་དག་པར་སྒྲུབ་པས་གཟུགས་ལ་འཁྲུལ་པ་མེད་པའི་རྒྱུ་དམིགས་སོ། །གཟུགས་ལ་འཁྲུལ་པ་མེད་པའི་རྒྱུ་དམིགས་པས་གཟུགས་ལ་འཁྲུལ་པ་མེད་པའི་ཆོས་ཡང་དག་པར་སྒྲུབ་བོ། །གཟུགས་ལ་འཁྲུལ་པ་མེད་པའི་ཆོས་ཡང་དག་པར་སྒྲུབ་པས་གཟུགས་ལ་འཁྲུལ་པ་མེད་
པའི་རྒྱུ་འཐུན་པའི་ཆོས་ཡང་དག་པར་སྒྲུབ་སྟེ། དེས་གཟུགས་ལ་འཁྲུལ་པ་དང་། འཁྲུལ་པ་མེད་པའི་ཆོས་སྔ་ནས་ཡང་དག་པར་བསྒྲུབས་པ་ཡིན་ནོ། །དེ་གཟུགས་ལ་འཁྲུལ་པ་མེད་པའི་ཆོས་དང་འཁྲུལ་པ་མེད་པའི་རྒྱུ་འཐུན་པའི་ཆོས་ལ་བརྟེན་ནས་སངས་རྒྱས་ཀྱི་ཆོས་ཐམས་ཅད་སྒོམ་མོ། །སེམས་
ཅན་རྣམས་ཀྱང་ཡོངས་སུ་སྨིན་པར་བྱེད་དོ། །སངས་རྒྱས་ཀྱི་ཞིང་ཡང་ཡོངས་སུ་སྦྱོང་ངོ་། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱའོ། །བྱང་ཆུབ་སེམས་དཔའ་གཟུགས་ལ་དེ་ལྟར་སྟོན་ན་ཡང་དག་པར་སྟོན་པ་ཡིན་ནོ། །རབ་འབྱོར་བྱང་ཆུབ་
སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སེམས་མཉམ་པར་གཞག་པར་འདོད་ཅིང་རྣམ་པར་ཤེས་པ་དེ་ལ་ནང་དུ་མོས་ན་རྣམ་པར་ཤེས་པ་ལ་མོས་པར་བྱ་བའི་གཟུགས་དང་། མོས་པའི་གཟུགས་གཉིས་དམིགས་པར་འགྱུར་རོ། །དེ་ལ་བྱང་ཆུབ་
སེམས་དཔའ་མོས་པའི་རྣམ་པར་ཤེས་པ་ལ་མོས་པ་ལ། མོས་པར་བྱ་བ་ཇི་ལྟ་བ་བཞིན་དུ་སྟོན་ཏམ། མོས་པར་བྱ་བ་ལ་མོས་པ་ཇི་ལྟ་བ་བཞིན་དུ་སྟོན་ན་རྣམ་པར་ཤེས་པ་ལ་ཡང་དག་པ་མ་ཡིན་པར་སྟོན་པའི་བྱང་ཆུབ་སེམས་དཔར་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར་མོས་པར་བྱ་བའི་རྣམ་

པར་ཤེས་པ་ལས་མོས་པའི་རྣམ་པར་ཤེས་པའི་མཚན་ཉིད་གུད་ན་མེད་དོ། །རབ་འབྱོར་གལ་ཏེ་མོས་པར་བྱ་བའི་རྣམ་པར་ཤེས་པ་ལས་མོས་པའི་རྣམ་པར་ཤེས་པའི་མཚན་ཉིད་གུད་ན་ཡོད་ན་ནི་མོས་པར་བྱ་བ་ལ་སེམས་ཅན་མོས་པ་ཐ་དད་པ་རྣམས་དང་། མཚུངས་པར་ལྟ་བ་ཐ་དད་པར་དམིགས་
པར་འགྱུར་ཞིང་། རྨི་ལམ་ལ་སོགས་པ་ལ་དམིགས་པ་མེད་པའི་མོས་པ་དམིགས་པར་ཡང་མི་འགྱུར་ལ། བྱིས་པ་སོ་སོའི་སྐྱེ་བོ་རྣམས་ཀྱང་རྣམ་པར་ཤེས་པ་ལ་དེ་ཁོ་ན་མཐོང་བར་ཡང་འགྱུར་ཞིང་། རྣམ་པར་མི་རྟོག་པའི་མོས་པ་གྲུབ་པར་རིགས་པ་ལ་ཡང་མོས་པར་བྱ་བའི་རྣམ་པར་ཤེས་པར་
རྗེས་སུ་འཇུག་པར་མི་འགྱུར་བ་ཞིག་ན། རབ་འབྱོར་འདི་ལྟར་མོས་པར་བྱ་བ་ལ་སེམས་ཅན་མོས་པ་ཐ་དད་པ་རྣམས་དང་། མཚུངས་པར་ལྟ་བ་ཐ་དད་པར་མ་གྱུར་ཅིང་། །རྨི་ལམ་ལ་སོགས་པ་ལ་ཡང་དམིགས་པ་མེད་པའི་མོས་པ་དེ་དམིགས་ལ། བྱིས་པ་སོ་སོའི་སྐྱེ་བོ་རྣམས་ཀྱང་རྣམ་པར་ཤེས་པ་
ལ་དེ་ཁོ་ན་མཐོང་བར་མ་གྱུར་ཏེ། རྣམ་པར་མི་རྟོག་པའི་མོས་པ་གྲུབ་པ། རིག་པ་ལ་ཡང་མོས་པར་བྱ་བའི་རྣམ་པར་ཤེས་པ་རྗེས་སུ་འཇུག་སྟེ། དེའི་ཕྱིར་བྱང་ཆུབ་སེམས་དཔས་མོས་པའི་རྣམ་པར་ཤེས་པ་ལས་མོས་པར་བྱ་བའི་རྣམ་པར་ཤེས་པའི་མཚན་ཉིད་གུད་ན་མེད་པར་བལྟ་བར་
བྱའོ། །གཞན་དུ་ན་མོས་པར་བྱ་བའི་རྣམ་པར་ཤེས་པ་དེ་ཇི་ལྟ་བ་བཞིན་དུ་མཚན་མ་དང་བཅས་པའི་ལྟ་བའི་མོས་པའི་རྣམ་པར་ཤེས་པ་ཡང་ཡང་དག་པར་བྱུང་བ་ནི་མ་གཏོགས་སོ། །དེ་བས་ན་དོན་གཞན་སྣང་ངོ་། །དེ་ལྟར་མཐོང་བའི་བྱང་ཆུབ་སེམས་དཔའ་མོས་པར་བྱ་བའི་རྣམ་པར་
ཤེས་པའི་འདུ་ཤེས་རྣམ་པར་འཇིག་སྟེ། དེ་འདི་སྙམ་དུ་སེམས་སོ། །མོས་པར་བྱ་བའི་རྣམ་པར་ཤེས་པ་ཡོད་ན། མོས་པའི་རྣམ་པར་ཤེས་པ་ཡང་རིགས་པར་འགྱུར་གྱི། མེད་ན་ནི་མ་ཡིན་པར་རིག་ནས་མོས་པའི་རྣམ་པར་ཤེས་པ་ལ་མོས་པའི་རྣམ་པར་ཤེས་པའི་འདུ་ཤེས་ཀྱང་
རྣམ་པར་འཇིག་གོ། །དེ་རྣམ་པར་ཤེས་པ་གཉིས་ཀྱི་འདུ་ཤེས་རྣམ་པར་བཤིག་ནས་རྣམ་པར་ཤེས་པ་ཐམས་ཅད་མི་དམིགས་སོ། །རྣམ་པར་ཤེས་པ་ཐམས་ཅད་མི་དམིགས་པས་རྣམ་པར་ཤེས་པ་ལ་འཁྲུལ་པར་དམིགས་སོ། །རྣམ་པར་ཤེས་པ་ལ་འཁྲུལ་པར་དམིགས་པས་རྣམ་པར་

ཤེས་པ་ལ་འཁྲུལ་པའི་རྒྱུ་དམིགས་སོ། །རྣམ་པར་ཤེས་པ་ལ་འཁྲུལ་པའི་རྒྱུ་དམིགས་པས་རྣམ་པར་ཤེས་པ་ལ་འཁྲུལ་པ་མེད་པའི་ཆོས་ཡང་དག་པར་སྒྲུབ་བོ། །རྣམ་པར་ཤེས་པ་ལ་འཁྲུལ་པ་མེད་པའི་ཆོས་ཡང་དག་པར་སྒྲུབ་པས་རྣམ་པར་ཤེས་པ་ལ་འཁྲུལ་པ་
མེད་པའི་རྒྱུ་འཐུན་པའི་ཆོས་ཡང་དག་པར་སྒྲུབ་སྟེ། དེས་རྣམ་པར་ཤེས་པ་ལ་འཁྲུལ་པ་དང་། འཁྲུལ་པ་མེད་པའི་ཆོས་སྔ་ནས་ཡང་དག་པར་བསྒྲུབས་པ་ཡིན་ནོ། །དེ་རྣམ་པར་ཤེས་པ་ལ་འཁྲུལ་པ་མེད་པའི་ཆོས་དང་། འཁྲུལ་པ་མེད་པའི་རྒྱུ་འཐུན་པའི་ཆོས་ལ་བརྟེན་ནས་
སངས་རྒྱས་ཀྱི་ཆོས་ཐམས་ཅད་སྒོམ་མོ། །སེམས་ཅན་རྣམས་ཀྱང་ཡོངས་སུ་སྨིན་པར་བྱེད་དོ། །སངས་རྒྱས་ཀྱི་ཞིང་ཡང་ཡོངས་སུ་སྦྱོང་ངོ་། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱའོ། །བྱང་ཆུབ་སེམས་དཔའ་རྣམ་པར་ཤེས་
པ་ལ་དེ་ལྟར་སྟོན་ན། ཡང་དག་པར་སྟོན་པར་རིག་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་དམ་པའི་ཆོས་ཉེ་བར་བསྒྲུབ་པའི་བྱམས་པ་དང་། འཇིག་རྟེན་པའི་བདེ་བ་ཉེ་བར་བསྒྲུབ་པའི་བྱམས་པ་དང་། འཇིག་རྟེན་ལས་འདས་པའི་བདེ་བ་ཉེ་བར་བསྒྲུབ་པའི་
བྱམས་པ་དང་། བྱམས་པ་དང་། བྱམས་པ་ཆེན་པོ་དང་། བྱམས་པ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་དམ་པའི་ཆོས་ཉེ་བར་བསྒྲུབ་པའི་བྱམས་པ་དང་། འཇིག་
རྟེན་པའི་བདེ་བ་ཉེ་བར་བསྒྲུབ་པའི་བྱམས་པ་དང་། འཇིག་རྟེན་ལས་འདས་པའི་བདེ་བ་ཉེ་བར་བསྒྲུབ་པའི་བྱམས་པ་དང་། བྱམས་པ་དང་། བྱམས་པ་ཆེན་པོ་དང་། བྱམས་པ་རྣམ་པ་ལྔ་བསྒོམ་པར་བྱའོ། རབ་འབྱོར་བྱང་ཆུབ་སེ