Kinh tạng Tây Tạng (Kangyur Đại Học) — 034_ཤེས་རབ་སྣ་ཚོགས།

དུ་དོང་བ་རྣམས་ཀྱིས་ཆོས་རིན་པོ་ཆེ་འདི་བཟོད་པར་མི་ནུས་སོ། །ཀུན་དགའ་བོ་དམན་པ་ལ་མོས་པའི་སེམས་ཅན་རྣམས་ནི་འཁོར་ལོས་སྒྱུར་བའི་ནོར་མི་འདོད་ཀྱི། ཀུན་དགའ་བོ་གང་དག་འཁོར་ལོས་སྒྱུར་བའི་བུར་གྱུར་པ་དེ་དག་ནི་འཁོར་ལོས་སྒྱུར་བའི་ནོར་
འདོད་དོ། །ཀུན་དགའ་བོ་སེམས་ཅན་དབུལ་པོ་རྣམས་ནི་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་དང་། གོས་མང་པོ་དང་། གསེར་དང་། ནོར་བུ་
དང་། མུ་ཏིག་དང་། བཻ་ཌཱུརྱ་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་མང་པོ་དག་དགོས་པར་མི་འཛིན་ཏེ། དེ་རྙེད་ཀྱང་དགའ་བར་ཀུན་དུ་སྤྱོད་པར་མི་ནུས་ཤིང་རིན་ཐང་ཆུང་ངུར་འཚོང་ལ། མི་མཁས་པས་འདོར་རོ། །དེ་ཅིའི་ཕྱིར་ཞེ་ན།
དེ་དག་རིན་པོ་ཆེ་ལ་མི་མཁས་པའི་ཕྱིར་རོ། །ཀུན་དགའ་བོ་སེམས་ཅན་དབུལ་པོ་ནི་རིན་པོ་ཆེ་འདིའི་མིང་ནི་འདིའོ། །ཞེས་བྱ་བར་རིན་པོ་ཆེ་རྣམས་ཀྱི་མིང་ཡང་མི་ཤེས་སོ། །ཀུན་དགའ་བོ་དེ་བཞིན་དུ་དེ་བཞིན་གཤེགས་པའི་སྲས་བདེན་པ་མཐོང་བ་རྣམས་དང་། བྱང་
ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་ཆོས་རིན་པོ་ཆེའི་མཛོད་འདི་ཚོལ་བ་སྟེ། དེ་དག་ཆོས་རིན་པོ་ཆེ་དམིགས་སུ་མེད་པ་སྟོང་པ་ཉིད་དང་ལྡན་པ། སངས་རྒྱས་ཀྱི་ཆོས་དང་ལྡན་པ་འདི་འདོད་ཅིང་བཟོད་དེ་དེ་དག་དེས་བྱ་བ་བྱེད་དོ། །སེམས་ཅན་དབུལ་པོ་ཐོས་

པ་དང་བྲལ་བ། ཐོས་པ་ཉམས་པ། མིག་དང་མི་ལྡན་པའི་བྱིས་པ་དེ་དག་ནི་ཆོས་རིན་པོ་ཆེའི་མཛོད་རྙེད་ཀྱང་ཅི་ཞིག་བྱ་ཞེས་འདོར་ཞིང་གཞན་ལ་སྦྱིན་པར་སེམས་སོ། །ཀུན་དགའ་བོ་གདོལ་པ་དང་། གཡུང་པོ་དང་། སྨིག་མ་མཁན་དང་། དབུལ་པོས་འཚོ་
བའི་སེམས་ཅན་གང་དག་གཞན་ལ་ལས་རིན་པོ་ཆེ་མང་པོ་རྙེད་ན་བདག་མི་སྤྱོད་དེ་རིན་ཐང་ཆུང་ངུར་འཚོང་ཞིང་འདོར་རོ། །ཀུན་དགའ་བོ་སེམས་ཅན་དབུལ་པོ་ཞེས་བྱ་བ་དེ་ནི་མུ་སྟེགས་ཅན་ཐམས་ཅད་དང་། གང་དག་གཞན་མུ་སྟེགས་ཅན་གྱི་ཉན་ཐོས་རྣམས་ཀྱི་ཚིག་བླ་
དགས་སོ། །ཀུན་དགའ་བོ་སེམས་ཅན་དབུལ་པོ་ཞེས་བྱ་བ་དེ་ནི་བྱིས་པ་སོ་སོའི་སྐྱེ་བོ་ལྟ་བའི་འདམ་དུ་བྱིང་བ་དམིགས་པ་ཅན་འཆིང་བ་ལ་མངོན་པར་ཞེན་པ། མཚན་མ་ལ་སྤྱོད་པ། ལམ་ལོག་པར་སོང་བ་རྣམས་ཀྱི་ཚིག་བླ་དགས་ཏེ། དེ་དག་ནི་ཆོས་རིན་པོ་ཆེ་འདི་རྙེད་
ན་ཀུན་དུ་སྤྱོད་མི་ནུས་ཤིང་འདོར་ཏེ། དོན་མེད་པར་གཞན་ལ་ཡང་སྦྱིན་པར་བྱེད་དོ། །ཀུན་དགའ་བོ་གང་སངས་རྒྱས་ཀྱི་སྲས་སངས་རྒྱས་ཀྱི་སྤྱོད་ཡུལ་ལ་སྤྱོད་པ། དེ་བཞིན་གཤེགས་པའི་རིགས་རྒྱུན་མི་གཅོད་པར་གནས་པ་དེ་དག་ཆོས་རིན་པོ་ཆེ་འདི་ལ་ཡོངས་སུ་སྤྱོད་
དོ། །རྙེད་ནས་ཀྱང་ཆུད་མི་གཟོན་ཅིང་འདི་ལ་རིན་པོ་ཆེར་འདུ་ཤེས་པར་འགྱུར་རོ། །ཀུན་དགའ་བོ་ཝས་ནི་སེང་གེའི་སྒྲ་སྒྲོག་མི་ནུས་སོ། །ཀུན་དགའ་བོ་གང་སེང་གེའི་ཕྲུག་གུར་གྱུར་ལ། སེང་གེ་ཆེན་པོས་བསྐྱེད་པ་དེ་དག་ནི་སེང་གེའི་སྒྲ་སྒྲོག་གོ། །ཀུན་དགའ་བོ་དེ་
བཞིན་དུ་ཝ་ལྟ་བུ་ནི་བྱིས་པ་སོ་སོའི་སྐྱེ་བོ་ལོག་པར་ལྟ་བ་ཐམས་ཅད་དེ་དེ་དག་གིས་ནི་དེ་བཞིན་གཤེགས་པའི་སེང་གེའི་སྒྲ་དང་། ཡང་དག་པར་རྫོགས་པའི་སངས་རྒྱས་སེང་གེ་ཆེན་པོའི་ཆོས་ཡོངས་སུ་ལོངས་སྤྱོད་པར་མི་ནུས་སོ། །ཀུན་དགའ་བོ་གང་ཡང་དག་པར་རྫོགས་
པའི་སངས་རྒྱས་ཀྱི་སྲས་སངས་རྒྱས་ཀྱི་སེང་གེ་ཆེན་པོ་དང་རང་བྱུང་གི་ཡེ་ཤེས་ཀྱིས་བསྐྱེད་པ་དེ་དག་ནི་ཡང་དག་པར་རྫོགས་པའི་སངས་རྒྱས་ཀྱི་སེང་གེའི་སྒྲ་སྒྲོག་ཅིང་ཀུན་དུ་སྤྱོད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ།

བཅོམ་ལྡན་འདས་འདི་ལྟར་དེ་བཞིན་གཤེགས་པའི་འཁོར་ཡོངས་སུ་དག་པ་འདུས་པ་འདི་ངོ་མཚར་ལགས་སོ། །བཅོམ་ལྡན་འདས་དེ་བཞིན་གཤེགས་པའི་འཁོར་རང་བྱུང་གི་འཁོར། མི་ཚུགས་པའི་འཁོར། རྡོ་རྗེ་ལྟ་བུའི་འཁོར། མི་སྒུལ་བ། མི་
བསྐྱོད་པ། མི་འཁྲུགས་པའི་འཁོར་ཡོངས་སུ་དག་པ་འདི་ནི་རབ་ཏུ་ངོ་མཚར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ཁྱོད་འཁོར་འདིའི་ཡོན་ཏན་ཡོངས་སུ་རྗོད་དམ།
གསོལ་པ་བཅོམ་ལྡན་འདས་བདག་གིས་འཁོར་འདིའི་ཡོན་ཏན་ཡོངས་སུ་བརྗོད་པའི་རྔོ་མི་ཐོགས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འཁོར་འདི་ནི་རི་རབ་དང་འདྲ་སྟེ། ཡོན་ཏན་མཐའ་ཡས་པ་དང་ལྡན་པ་ལགས་པའི་སླད་དུའོ། །བཀའ་སྩལ་པ། ཤ་ར་
དྭ་ཏིའི་བུ་དེ་དེ་བཞིན་ཏེ། འཁོར་འདི་ནི་ཡོན་ཏན་མཐའ་ཡས་པ་དང་ལྡན་པ་སྟེ། འཁོར་འདིའི་ཡོན་ཏན་གྱི་མཐའ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་རྟོགས་པར་མི་ནུས་ན་སེམས་ཅན་གཞན་ཐམས་ཅད་ཀྱིས་ལྟ་ཅི་སྨོས། ཤ་ར་དྭ་ཏིའི་བུ་འཁོར་འདི་
ནི་དེ་བཞིན་གཤེགས་པས་བསྡུས་པ་མ་ཡིན་ཞིང་འདི་ལ་དེ་བཞིན་གཤེགས་པ་རྩོལ་བ་ཅི་ཡང་མི་མཛད་དེ། རང་གི་དགེ་བའི་རྩ་བས་ངའི་མིང་ཐོས་ནས་འཁོར་འདི་འདུས་ཏེ། དེ་བཞིན་གཤེགས་པས་འཁོར་འདི་གང་ལ་ཡང་མ་གླེངས་མ་བསྒོ་བར་དེ་དག་རང་གི་དགེ་བའི་རྩ་
བས་བསྐུལ་ནས་འཁོར་འདིར་ལྷགས་སོ། །འདི་ལྟ་བུའི་ཆོས་བསྟན་པ་ལ་འདི་ལྟ་བུའི་སེམས་ཅན་ཆེན་པོ་འདུ་བར་འགྱུར་བ་ནི་དེའི་ཆོས་ཉིད་དོ། །ཤ་ར་དྭ་ཏིའི་བུ་གང་སངས་རྒྱས་བཅོམ་ལྡན་འདས་གཞན་དག་བྱང་ཆུབ་སེམས་དཔའི་སྡེ་སྣོད་ཐེ་ཙོམ་ཐམས་ཅད་གཅོད་པ་འདི་
ཡང་དག་པར་སྟོན་པ་དེ་དག་གི་འཁོར་ཀྱང་འདི་ལྟ་བུ་འདུ་བར་འགྱུར་ཏེ། འདི་ལྟ་བུ་འདི་འདྲ་བའི་འཁོར་གྱི་དཀྱིལ་འཁོར་གདོན་མི་ཟ་བར་འབྱུང་བ་ནི་ཆོས་བསྟན་པ་འདིའི་ཆོས་ཉིད་དོ། །ཀུན་དགའ་བོའི་ལེའུ་ཞེས་བྱ་སྟེ་གཉིས་པའོ།། །།དེ་ནས་བཅོམ་ལྡན་འདས་

ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་ལ་བཀའ་སྩལ་པ། རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་ཏུ་ཕྱིན་པ། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ལ། བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་
ཕྱིན་པ་གང་ཞེ་ན། གང་ཆོས་ཐམས་ཅད་ཀྱི་ཚུ་རོལ་རྟོགས་པ་སྟེ། དེ་ནི་བསྟན་པར་མི་ནུས་མོད་ཀྱི། ཇི་ལྟར་ཁྱེད་ཤེས་པར་འགྱུར་བ་དང་། ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཐ་སྙད་ཀྱི་ཚིག་ཏུ་འགྱུར་བ་དེ་ལྟར་རབ་ཏུ་བཤད་པར་བྱའོ། །གཟུགས་ཤེས་རབ་ཀྱི་ཕ་
རོལ་ཏུ་ཕྱིན་པ་མ་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་གཟུགས་ལས་གཞན་པ་ཡང་མ་ཡིན་ནོ། །དེ་བཞིན་དུ་སྦྱར་ཏེ། དེ་ལྟར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་ཏེ། ཤེས་རབ་ཀྱི་ཕ་རོལ་
ཏུ་ཕྱིན་པ་རྣམ་པར་ཤེས་པ་ལས་གཞན་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་གཟུགས་ཀྱི་ཕ་རོལ་གང་ཡིན་པ་དེ་གཟུགས་མ་ཡིན་ནོ། །དེ་བཞིན་དུ་སྦྱར་ཏེ། དེ་ལྟར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པའི་ཕ་རོལ་གང་ཡིན་པ་དེ་རྣམ་པར་ཤེས་པ་མ་ཡིན་པའི་ཕྱིར་རོ། །གཟུགས་ཀྱི་ཕ་རོལ་ཇི་ལྟ་བར་གཟུགས་ཀྱང་དེ་བཞིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་ཕ་རོལ་ཇི་ལྟ་བར་རྣམ་པར་ཤེས་པ་ཡང་དེ་
བཞིན་ནོ། །རྣམ་པར་ཤེས་པའི་ཕ་རོལ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ནོ། །ཆོས་ཐམས་ཅད་ཀྱི་ཕ་རོལ་གང་ཡིན་པ་དེ་དག་ནི་ཆོས་ཐམས་ཅད་མ་ཡིན་ནོ། །ཆོས་ཐམས་ཅད་ཀྱི་ཕ་རོལ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ནོ། །རབ་ཀྱི་རྩལ་གྱིས་རྣམ་
པར་གནོན་པ་དེ་ལ་གཟུགས་ཀྱི་ཕ་རོལ་གང་ཡིན་པ་དེ་གཟུགས་མ་ཡིན་ནོ་ཞེས་བྱ་བ་དེ་ནི་གཟུགས་ཀྱི་འབྲལ་བ་བསྟན་པའོ། །གཟུགས་ཀྱི་ཕ་རོལ་ཇི་ལྟ་བར་གཟུགས་ཀྱང་དེ་བཞིན་ནོ་ཞེས་བྱ་བ་དེ་ནི་གཟུགས་ཀྱི་ངོ་བོ་ཉིད་བཤད་པ་བསྟན་པའོ། །དེ་ནི་གཟུགས་ཀྱི་ཇི་ལྟ་བ་

བཞིན་བསྟན་པའོ། །དེ་ནི་གཟུགས་ཀྱི་རང་བཞིན་བསྟན་པའོ། །དེ་ནི་གཟུགས་ཀྱི་མི་དམིགས་པ་བསྟན་པའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་ཕ་རོལ་གང་ཡིན་པ་དེ་རྣམ་པར་ཤེས་
པའི་མ་ཡིན་ནོ། །ཞེས་བྱ་བ་དེ་ནི་རྣམ་པར་ཤེས་པའི་འབྲལ་བ་བསྟན་པའོ། །རྣམ་པར་ཤེས་པའི་ཕ་རོལ་ཇི་ལྟ་བར་རྣམ་པར་ཤེས་པ་ཡང་དེ་བཞིན་ནོ་ཞེས་བྱ་བ་དེ་ནི་རྣམ་པར་ཤེས་པའི་ངོ་བོ་ཉིད་བཤད་པ་བསྟན་པའོ། །དེ་ནི་རྣམ་པར་ཤེས་པའི་ཇི་ལྟ་བ་བཞིན་དང་རྣམ་པར་
ཤེས་པའི་རང་བཞིན་དང་། རྣམ་པར་ཤེས་པ་མི་དམིགས་པ་བསྟན་པའོ། །རྣམ་པར་ཤེས་པའི་ཕ་རོལ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ནོ་ཞེས་བྱ་བ་དང་། ཆོས་ཐམས་ཅད་ཀྱི་ཕ་རོལ་གང་ཡིན་པ་དེ་དག་ཆོས་ཐམས་ཅད་མ་ཡིན་ནོ་ཞེས་བྱ་བ་དེ་ནི་ཆོས་ཐམས་
ཅད་ཀྱི་འབྲལ་བ་བསྟན་པའོ། །ཆོས་ཐམས་ཅད་ཀྱི་ཕ་རོལ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ནོ་ཞེས་བྱ་བ་དེ་ནི་ཆོས་ཐམས་ཅད་ཀྱི་ངོ་བོ་ཉིད་བཤད་པ་བསྟན་པའོ། །དེ་ནི་ཆོས་ཐམས་ཅད་ཀྱི་ཇི་ལྟ་བ་བཞིན་དང་། ཆོས་ཐམས་ཅད་ཀྱི་མཚན་ཉིད་དང་། ཆོས་ཐམས་
ཅད་ཀྱི་རང་བཞིན་དང་། ཆོས་ཐམས་ཅད་མི་དམིགས་པ་བསྟན་པའོ། །ཆོས་ཐམས་ཅད་ཀྱི་ཇི་ལྟ་བ་བཞིན་དང་། ཆོས་ཐམས་ཅད་ཀྱི་རང་བཞིན་དང་། ཆོས་ཐམས་ཅད་མི་དམིགས་པ་ཇི་ལྟ་བར་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དེ་བཞིན་ཏེ། རབ་ཀྱི་རྩལ་གྱིས་
རྣམ་པར་གནོན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་གཟུགས་ལ་མི་གནས་སོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་གནས་སོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་གཟུགས་ཀྱི་ནང་ངམ། ཕྱིའམ་གཉི་ག་མེད་པ་ལས་
རིང་དུ་གནས་པའང་མ་ཡིན་ཏེ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་ནང་ངམ། ཕྱིའམ་གཉི་ག་མེད་པ་ལས་རིང་དུ་གནས་པའང་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་

གཟུགས་དང་ལྡན་པ་ཡང་མ་ཡིན། གཟུགས་དང་མི་ལྡན་པའང་མ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དང་ལྡན་པ་ཡང་མ་ཡིན། མི་ལྡན་པ་ཡང་མ་ཡིན་ནོ། །རབ་ཀྱི་རྩལ་གྱིས་
རྣམ་པར་གནོན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཆོས་གང་དང་ཡང་ལྡན་པ་ཡང་མ་ཡིན། མི་ལྡན་པ་ཡང་མ་ཡིན་ནོ། །གཟུགས་ཀྱི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་གང་
ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་གང་ཡིན་
པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ཞེས་བྱ་བ་འདི་ནི་གཟུགས་དང་བྲལ་བའོ། །དེ་ཅིའི་ཕྱིར་ཞེ་ན། གཟུགས་ལ་ནི་གཟུགས་མེད་དེ། གང་མེད་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཚོར་བ་དང་། འདུ་ཤེས་
དང་། འདུ་བྱེད་རྣམས་དང་། རྣམ་པར་ཤེས་པ་ཡང་དེ་བཞིན་ཏེ། རབ་ཀྱི་རྩལ་གྱིས་རྣམ་པར་གནོན་པ་རྣམ་པར་ཤེས་པ་ཞེས་བྱ་བ་འདི་ནི་རྣམ་པར་ཤེས་པ་དང་བྲལ་བའོ། །རྣམ་པར་ཤེས་པ་ལ་རྣམ་པར་ཤེས་པ་མེད་དེ། གང་མེད་པ་ཤེས་རབ་ཀྱི་ཕ་རོལ་ཏུ་ཕྱིན་
པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་གཟུགས་ཀྱི་རང་བཞིན་དང་བྲལ་བའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་རྣམ་པར་ཤེས་པའི་རང་བཞིན་དང་བྲལ་བ་སྟེ། བྲལ་བའི་རང་བཞིན་གང་ཡིན་པ་
དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །གཟུགས་ལ་གཟུགས་ཀྱི་རང་བཞིན་མེད་དོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་ཤེས་པའི་རང་བཞིན་མེད་དེ། རང་བཞིན་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་

པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་གཟུགས་ཀྱི་སྤྱོད་ཡུལ་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་རྣམ་པར་ཤེས་པའི་སྤྱོད་ཡུལ་མ་ཡིན་ནོ། །རབ་ཀྱི་རྩལ་གྱིས་རྣམ་པར་
གནོན་པ་སྤྱོད་ཡུལ་མ་ཡིན་ཞེས་བྱ་བ་ནི། གཟུགས་ཀྱིས་གཟུགས་ཡང་དག་པར་མི་ཤེས་མི་མཐོང་བ་སྟེ། གཟུགས་ཀྱིས་མི་ཤེས་མི་མཐོང་བ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་ཚོར་བ་དང་། འདུ་ཤེས་དང་། འདུ་
བྱེད་རྣམས་དང་། རྣམ་པར་ཤེས་པས་རྣམ་པར་ཤེས་པ་མི་མཐོང་ངོ་། །རྣམ་པར་ཤེས་པས་མི་ཤེས་མི་མཐོང་བ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ཀྱིས་གཟུགས་ཀྱི་ངོ་བོ་ཉིད་མི་ཤེས་སོ། །ཚོར་བ་དང་།
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པས་རྣམ་པར་ཤེས་པའི་ངོ་བོ་ཉིད་མི་ཤེས་ཏེ། ངོ་བོ་ཉིད་མེད་པར་ཡོངས་སུ་ཤེས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་གཟུགས་ལ་ཀུན་དུ་སྦྱོར་བར་མི་
བྱེད། ཀུན་དུ་མི་སྦྱོར་བར་ཡང་མི་བྱེད་དོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་རྣམ་པར་ཤེས་པ་ལ་ཀུན་དུ་སྦྱོར་བར་མི་བྱེད། ཀུན་དུ་མི་སྦྱོར་བར་ཡང་མི་བྱེད་དེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་
རྣམས་དང་། རྣམ་པར་ཤེས་པ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་ཡང་མི་བྱེད་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འབྲི་བར་འགྱུར་བའམ། འཕེལ་བར་འགྱུར་བ་མ་ཡིན་ནོ། །དེ་བཞིན་
དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་འབྲི་བར་འགྱུར་བའམ། འཕེལ་བར་འགྱུར་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མི་འབྲི་མི་འཕེལ་བ་

གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་ཀུན་ནས་ཉོན་མོངས་པར་འགྱུར་བའམ། རྣམ་པར་བྱང་བར་འགྱུར་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་
ཀུན་ནས་ཉོན་མོངས་པར་འགྱུར་བའམ། རྣམ་པར་བྱང་བར་འགྱུར་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་ཡང་མ་ཡིན་པ་དེ་ཤེས་རབ་ཀྱི་ཕ་རོལ་
ཏུ་ཕྱིན་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་རྣམ་པར་དག་པའི་ཆོས་ཅན་ཡང་མ་ཡིན། རྣམ་པར་མ་དག་པའི་ཆོས་ཅན་ཡང་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་རྣམ་པར་
དག་པའི་ཆོས་ཅན་ཡང་མ་ཡིན། རྣམ་པར་མ་དག་པའི་ཆོས་ཅན་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྣམ་པར་དག་པའི་ཆོས་ཉིད་ཀྱང་མ་ཡིན། རྣམ་པར་མ་དག་པའི་ཆོས་ཉིད་ཀྱང་མ་
ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འཕོ་བའམ་མི་འཕོ་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་འཕོ་བའམ། མི་འཕོ་བ་
མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འཕོ་བ་ཡང་མ་ཡིན། མི་འཕོ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་སྦྱོར་
བའམ། མི་སྦྱོར་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་སྦྱོར་བའམ། མི་སྦྱོར་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་

འདུ་བ་ཡང་མ་ཡིན། བྲལ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འཆི་འཕོའམ། སྐྱེ་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པ་ཡང་འཆི་འཕོའམ། སྐྱེ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འཆི་འཕོ་ཡང་མ་ཡིན། སྐྱེ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་
གནོན་པ་གཟུགས་ནི་སྐྱེ་བའམ། འཆི་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་སྐྱེ་བའམ། འཆི་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
མི་སྐྱེ་མི་འཆི་བ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འཁོར་བར་འགྱུར་བའམ། འཁོར་བའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་འཁོར་
བར་འགྱུར་བའམ། འཁོར་བའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འཁོར་བར་མི་འགྱུར་ཞིང་འཁོར་བའི་ཆོས་ཅན་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་
རྩལ་གྱིས་རྣམ་པར་གནོན་པ་གཟུགས་ནི་ཟད་པར་འགྱུར་བའམ། ཟད་པའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ཟད་པར་འགྱུར་བའམ། ཟད་པའི་ཆོས་ཅན་མ་ཡིན་ཏེ། གཟུགས་དང་།
ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཟད་པར་མི་འགྱུར་ཞིང་ཟད་པའི་ཆོས་ཉིད་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་ཀུན་འབྱུང་བའི་ཆོས་ཅན་མ་ཡིན། འགོག་

པའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ཀུན་འབྱུང་བའི་ཆོས་ཅན་མ་ཡིན། འགོག་པའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་།
རྣམ་པར་ཤེས་པ་ཀུན་འབྱུང་བའི་ཆོས་ཉིད་ཀྱང་མ་ཡིན། འགོག་པའི་ཆོས་ཉིད་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་སྐྱེ་བའི་ཆོས་ཅན་ནམ། འཇིག་པའི་ཆོས་ཅན་མ་ཡིན་ནོ། །དེ་བཞིན་
དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་སྐྱེ་བའི་ཆོས་ཅན་ནམ། འཇིག་པའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྐྱེ་བའི་ཆོས་ཉིད་ཀྱང་
མ་ཡིན། འཇིག་པའི་ཆོས་ཉིད་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འགྱུར་བའི་ཆོས་ཅན་ནམ། མི་འགྱུར་བའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་
བྱེད་རྣམས་དང་། རྣམ་པར་ཤེས་པ་ཡང་འགྱུར་བའི་ཆོས་ཅན་ནམ། མི་འགྱུར་བའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འགྱུར་བའི་ཆོས་ཉིད་ཀྱང་མ་ཡིན། མི་འགྱུར་བའི་ཆོས་
ཉིད་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་རྟག་པའམ། མི་རྟག་པ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་རྟག་པའམ།
མི་རྟག་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྟག་པ་ཡང་མ་ཡིན། མི་རྟག་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་

གཟུགས་ནི་བདེ་བའམ། སྡུག་བསྔལ་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་བདེ་བའམ། སྡུག་བསྔལ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་།
འདུ་བྱེད་རྣམས་དང་། རྣམ་པར་ཤེས་པ་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་སྡུག་པའམ། མི་སྡུག་པ་མ་ཡིན་ནོ། །དེ་བཞིན་དུ་ཚོར་བ་དང་། འདུ་
ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་སྡུག་པའམ། མི་སྡུག་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྡུག་པ་ཡང་མ་ཡིན། མི་སྡུག་པ་ཡང་མ་ཡིན་པ་གང་ཡིན་པ་དེ་ཤེས་
རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་བདག་གམ། བདག་མེད་པ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་བདག་གམ། བདག་མེད་པ་མ་ཡིན་ཏེ། གཟུགས་
དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བདག་ཀྱང་མ་ཡིན། བདག་མེད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འདོད་ཆགས་ཀྱི་ཆོས་ཅན་ནམ།
འདོད་ཆགས་དང་བྲལ་བའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་འདོད་ཆགས་ཀྱི་ཆོས་ཅན་ནམ། འདོད་ཆགས་དང་བྲལ་བའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་
ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདོད་ཆགས་ཀྱི་ཆོས་ཉིད་ཀྱང་མ་ཡིན། འདོད་ཆགས་དང་བྲལ་བའི་ཆོས་ཉིད་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་ཞེ་སྡང་གི་

ཆོས་ཅན་ནམ། ཞེ་སྡང་དང་བྲལ་བའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ཞེ་སྡང་གི་ཆོས་ཅན་ནམ། ཞེ་སྡང་མེད་པའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་།
འདུ་བྱེད་རྣམས་དང་། རྣམ་པར་ཤེས་པ་ཞེ་སྡང་གི་ཆོས་ཉིད་ཀྱང་མ་ཡིན། ཞེ་སྡང་མེད་པའི་ཆོས་ཉིད་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་གཏི་མུག་གི་ཆོས་ཅན་ནམ། གཏི་མུག་མེད་པའི་ཆོས་ཅན་
མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་གཏི་མུག་གི་ཆོས་ཅན་ནམ་གཏི་མུག་མེད་པའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་གཏི་
མུག་གི་ཆོས་ཅན་ཡང་མ་ཡིན། གཏི་མུག་མེད་པའི་ཆོས་ཅན་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་བྱེད་པ་པོའམ། བྱེད་དུ་འཇུག་པ་གང་ཡང་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་།
འདུ་བྱེད་རྣམས་དང་། རྣམ་པར་ཤེས་པ་ལ་ཡང་བྱེད་པ་པོའམ། བྱེད་དུ་འཇུག་པ་གང་ཡང་མེད་དེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་བྱེད་པ་པོ་ཡང་མེད། བྱེད་དུ་འཇུག་པ་ཡང་མེད་པ་གང་ཡིན་པ་དེ་ཤེས་རབ་
ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་སློང་བ་པོའམ། ཀུན་ནས་སློང་བ་པོ་གང་ཡང་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སློང་བ་པོའམ། ཀུན་ནས་སློང་བ་པོ་གང་ཡང་མེད་
དེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སློང་བ་པོ་ཡང་མེད། ཀུན་ནས་སློང་བ་པོ་ཡང་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་ཤེས་པའམ།

ཤེས་པར་བྱེད་དུ་འཇུག་པ་གང་ཡང་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་ཤེས་པའམ། ཤེས་པར་བྱེད་དུ་འཇུག་པ་གང་ཡང་མེད་དེ། གཟུགས་དང་། ཚོར་བ་དང་། འདུ་ཤེས་དང་།
འདུ་བྱེད་རྣམས་དང་། རྣམ་པར་ཤེས་པ་ལ་ཤེས་པ་པོ་ཡང་མེད། ཤེས་པར་བྱེད་དུ་འཇུག་པ་ཡང་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་ཚོར་བ་པོ་འམ། ཚོར་བར་བྱེད་དུ་འཇུག་པ་གང་ཡང་མེད་དོ། །
དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཚོར་བ་པོའམ། ཚོར་བར་བྱེད་དུ་འཇུག་པ་གང་ཡང་མེད་དེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཚོར་བ་པོ་ཡང་མེད། ཚོར་
བར་བྱེད་དུ་འཇུག་པ་ཡང་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་ཤེས་པ་པོའམ། མཐོང་བ་པོ་གང་ཡང་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་
ཡང་ཤེས་པ་པོའམ། མཐོང་བ་པོ་གང་ཡང་མེད་དོ། །གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཤེས་པ་པོ་ཡང་མེད། མཐོང་བ་པོ་ཡང་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་
རྣམ་པར་གནོན་པ་གཟུགས་ལ་ནི་ཆད་པའམ། རྟག་པ་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་ཆད་པའམ། རྟག་པ་མེད་དེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པ་ཆད་པ་ཡང་མ་ཡིན། རྟག་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་མཐའ་འམ། མཐའ་མེད་པ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་

ཡང་མཐའ་འམ། མཐའ་མེད་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མཐའ་ཡོད་པ་ཡང་མ་ཡིན། མཐའ་མེད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་
རྣམ་པར་གནོན་པ་གཟུགས་ནི་ལྟ་བར་སོང་བ་ཡང་མ་ཡིན། ལྟ་བར་སོང་བ་སྤོང་བ་ཡང་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ལྟ་བར་སོང་བ་ཡང་མ་ཡིན། ལྟ་བར་སོང་བ་སྤོང་བ་ཡང་མ་ཡིན་ཏེ། གཟུགས་
དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལྟ་བར་སོང་བ་ཡང་མ་ཡིན། ལྟ་བར་སོང་བ་སྤོང་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་སྲེད་པ་ཡང་མ་ཡིན། སྲེད་པ་
སྤོང་བ་ཡང་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་སྲེད་པ་ཡང་མ་ཡིན། སྲེད་པ་སྤོང་བ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྲེད་པ་
ཡང་མ་ཡིན། སྲེད་པ་སྤོང་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་དགེ་བའམ་མི་དགེ་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
ཡང་དགེ་བའམ་མི་དགེ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དགེ་བ་ཡང་མ་ཡིན། མི་དགེ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་
པ་གཟུགས་ལ་འགྲོ་བའམ། འོང་བ་མི་མངོན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་འགྲོ་བའམ། འོང་བར་མི་མངོན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་

ཤེས་པ་འགྲོ་བའམ། འོང་བར་ཡང་མི་མངོན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་གནས་པ་
འམ། མི་གནས་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་གནས་པ་ཡང་མ་ཡིན། མི་གནས་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་
པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཚུ་རོལ་ལམ། ཕ་རོལ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཚུ་རོལ་ཡང་མ་ཡིན། ཕ་རོལ་ཡང་མ་ཡིན་པ་
གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཚུལ་ཁྲིམས་སམ། འཆལ་པའི་ཚུལ་ཁྲིམས་མ་ཡིན་ཏེ། གཟུགས་དང་། ཚོར་བ་དང་།
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཚུལ་ཁྲིམས་ཀྱང་མ་ཡིན། འཆལ་པའི་ཚུལ་ཁྲིམས་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་།
འདུ་བྱེད་རྣམས་དང་། རྣམ་པར་ཤེས་པ་ནི་རྗེས་སུ་ཆགས་པའམ། ཁོང་ཁྲོ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྗེས་སུ་ཆགས་པ་ཡང་མ་ཡིན། ཁོང་ཁྲོ་བ་ཡང་མ་ཡིན་པ་གང་ཡིན་པ་དེ་ཤེས་རབ་
ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་སྦྱིན་པར་བྱེད་པའམ། ལེན་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་

དང་། རྣམ་པར་ཤེས་པ་སྦྱིན་པར་བྱེད་པ་ཡང་མ་ཡིན། ལེན་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་བཟོད་པའམ། མི་
བཟོད་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བཟོད་པ་ཡང་མ་ཡིན། མི་བཟོད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་
བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་བརྩོན་འགྲུས་སམ། ལེ་ལོ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བརྩོན་འགྲུས་ཀྱང་མ་ཡིན། ལེ་ལོ་ཡང་མ་ཡིན་པ་གང་ཡིན་པ་དེ་
ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཏིང་ངེ་འཛིན་ཀྱང་མ་ཡིན། སེམས་རྣམ་པར་གཡེངས་པ་ཡང་མ་ཡིན་ཏེ། གཟུགས་དང་། ཚོར་བ་དང་།
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཏིང་ངེ་འཛིན་ཀྱང་མ་ཡིན། སེམས་རྣམ་པར་གཡེངས་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་།
འདུ་བྱེད་རྣམས་དང་། རྣམ་པར་ཤེས་པ་ནི་ཤེས་རབ་ཀྱང་མ་ཡིན། འཆལ་པའི་ཤེས་རབ་ཀྱང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཤེས་རབ་ཀྱང་མ་ཡིན། འཆལ་པའི་ཤེས་རབ་ཀྱང་མ་ཡིན་པ་གང་ཡིན་
པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཕྱིན་ཅི་ལོག་གམ། ཕྱིན་ཅི་ལོག་མ་ཡིན་པ་ཡང་མ་ཡིན་ཏེ། གཟུགས་དང་། ཚོར་བ་དང་།

འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཕྱིན་ཅི་ལོག་ཀྱང་མ་ཡིན། ཕྱིན་ཅི་ལོག་མ་ཡིན་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་
ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་དྲན་པ་ཉེ་བར་གཞག་པའམ། དྲན་པ་ཉེ་བར་གཞག་པ་མ་ཡིན་པ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དྲན་པ་ཡང་མ་ཡིན། མི་དྲན་
པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡང་དག་པའི་སྤོང་བའམ། ཡང་དག་པའི་སྤོང་བ་མ་ཡིན་པ་ཡང་
མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་དག་པའི་སྤོང་བ་ཡང་མ་ཡིན། ཡང་དག་པའི་སྤོང་བ་མ་ཡིན་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་
གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་རྫུ་འཕྲུལ་གྱི་རྐང་པའམ། ཚད་མེད་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྫུ་འཕྲུལ་གྱི་རྐང་པ་
ཡང་མ་ཡིན། ཚད་མེད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་དབང་པོ་དང་། སྟོབས་དང་། བྱང་ཆུབ་ཀྱི་
ཡན་ལག་དང་། ལམ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་

ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་རིག་པའམ། རྣམ་པར་གྲོལ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
རིག་པ་ཡང་མ་ཡིན། རྣམ་པར་གྲོལ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་བསམ་གཏན་དང་། རྣམ་པར་ཐར་
པ་དང་། ཏིང་ངེ་འཛིན་དང་། སྙོམས་པར་འཇུག་པ་ཡང་མ་ཡིན། མངོན་པར་ཤེས་པ་ཡང་མ་ཡིན། མངོན་པར་ཤེས་པ་མ་ཡིན་པ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བསམ་གཏན་དང་། རྣམ་
པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཡང་མ་ཡིན། མངོན་པར་ཤེས་པའང་མ་ཡིན། མངོན་པར་མི་ཤེས་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་།
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་སྟོང་པ་ཉིད་དམ། མཚན་མ་མེད་པའམ། སྨོན་པ་མེད་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྟོང་པ་ཉིད་ཀྱང་མ་ཡིན། མཚན་མ་མེད་པ་
ཡང་མ་ཡིན། སྨོན་པ་མེད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་འདུས་བྱས་སམ། འདུས་མ་བྱས་མ་ཡིན་ཏེ།
གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདུས་བྱས་ཀྱང་མ་ཡིན། འདུས་མ་བྱས་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་

ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་འདུ་བའམ། མི་འདུ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདུ་བ་ཡང་མ་ཡིན། མི་འདུ་བ་ཡང་མ་ཡིན་པ་གང་ཡིན་པ་དེ་ཤེས་
རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཤེས་པའམ། མི་ཤེས་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་
དང་། རྣམ་པར་ཤེས་པ་ཤེས་པ་ཡང་མ་ཡིན། མི་ཤེས་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་རློམ་སེམས་
སམ། གཡོ་བའམ། སྤྲོས་པ་མ་མཆིས་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རློམ་སེམས་མ་ཡིན། གཡོ་བ་མ་ཡིན། སྤྲོས་པ་མེད་པ་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་
རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་འདུ་ཤེས་མ་ཡིན། འདུ་ཤེས་མ་ཡིན་པ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་འདུ་ཤེས་མ་ཡིན། འདུ་ཤེས་མ་ཡིན་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཉེ་བར་ཞི་བ་ཡང་མ་ཡིན། ཉེ་
བར་མ་ཞི་བ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཉེ་བར་ཞི་བ་ཡང་མ་ཡིན། ཉེ་བར་མ་ཞི་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་

པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ལྡོག་པ་ཡང་མ་ཡིན། མི་ལྡོག་པ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལྡོག་པ་ཡང་མ་ཡིན། མི་ལྡོག་
པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་ཕུང་པོ་ལྔ་པོ་དག་མངོན་དུ་འགྲུབ་པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི། གང་ཕུང་པོ་ལྔ་པོ་དག་མངོན་དུ་འགྲུབ་པར་གཏོགས་པ་བསྟན་
པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་ཁམས་དང་། སྐྱེ་མཆེད་དང་། རྟེན་ཅིང་འབྲེལ་པར་འབྱུང་བ་མངོན་དུ་འགྲུབ་
པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་ཁམས་དང་། སྐྱེ་མཆེད་དང་། རྟེན་ཅིང་འབྲེལ་པར་འབྱུང་བ་མངོན་དུ་འགྲུབ་པར་གཏོགས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་
བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་ཕྱིན་ཅི་ལོག་དང་། སྒྲིབ་པ་མངོན་དུ་འགྲུབ་པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་ཕྱིན་ཅི་ལོག་དང་། སྒྲིབ་པ་མངོན་དུ་འགྲུབ་པར་
གཏོགས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་སྲེད་པར་སྤྱོད་པ་སུམ་ཅུ་རྩ་དྲུག་མངོན་དུ་འགྲུབ་
པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་སྲེད་པར་སྤྱོད་པ་སུམ་ཅུ་རྩ་དྲུག་མངོན་དུ་འགྲུབ་པར་གཏོགས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་

ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་ལྟ་བར་གྱུར་པ་དྲུག་ཅུ་རྩ་གཉིས་མངོན་དུ་འགྲུབ་པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་ལྟ་བར་གྱུར་པ་དྲུག་ཅུ་རྩ་གཉིས་མངོན་དུ་འགྲུབ་པར་གཏོགས་
པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་
དང་། སྙོམས་པར་འཇུག་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་།
ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་མངོན་པར་ཤེས་པ་ལྔ་པོ་དག་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་མངོན་པར་ཤེས་པ་ལྔ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་
ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་འདུས་བྱས་སུ་གཏོགས་པ། འཇིག་རྟེན་གྱི་དགེ་བ་དང་། མི་དགེ་བའི་ཆོས་ཐམས་ཅད་མངོན་དུ་འགྲུབ་པར་
གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་དེ་དག་གི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་
གང་དྲན་པ་ཉེ་བར་གཞག་པ་དང་། ཡང་དག་པའི་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་མངོན་དུ་འགྲུབ་པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་དྲན་པ་ཉེ་

བར་གཞག་པ་དང་། ཡང་དག་པའི་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་མངོན་དུ་འགྲུབ་པར་གཏོགས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་
བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་འཕགས་པའི་བདེན་པ་བཞི་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་འཕགས་པའི་བདེན་པ་བཞི་བསྟན་པའི་དེ་བཞིན་ཉིད་
དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་།
རྣམ་པར་གྲོལ་བའི་ཡེ་ཤེས་མཐོང་བ་རྣམ་པར་དག་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་རྣམ་པར་དག་པ་བསྟན་པའི་དེ་བཞིན་ཉིད་
དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་འདུས་མ་བྱས་སུ་གཏོགས་པ། འཇིག་རྟེན་ལས་འདས་པ། མི་གནས་པ། ཟག་པ་
མེད་པའི་ཆོས་རྣམས་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་གང་འདུས་མ་བྱས་སུ་གཏོགས་པ། འཇིག་རྟེན་ལས་འདས་པ། མི་གནས་པ། ཟག་པ་མེད་པའི་ཆོས་རྣམས་བསྟན་པ་འདི་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་
ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མི་སྐྱེ་བ་དང་། མངོན་པར་འདུས་མ་བྱས་པའི་ཆོས་བསྟན་པ་དེ་ཤེས་རབ་ཀྱི་ཕ་

རོལ་ཏུ་ཕྱིན་པ་མ་ཡིན་གྱི་གང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མི་སྐྱེ་བ་དང་། མངོན་པར་འདུས་མ་བྱས་པའི་ཆོས་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་།
ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་རིག་པ་དང་། རྣམ་པར་གྲོལ་བ་དང་། འདོད་ཆགས་དང་བྲལ་བ་དང་། འགོག་པ་དང་། མྱ་ངན་ལས་འདས་པ་བསྟན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི་
གང་རིག་པ་དང་། རྣམ་པར་གྲོལ་བ་དང་། འདོད་ཆགས་དང་བྲལ་བ་དང་། འགོག་པ་དང་། མྱ་ངན་ལས་འདས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་
ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ཅིའི་ཕྱིར་ཞེ་ན། གཟུགས་སུ་གཏོགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པར་གཏོགས་པ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་མ་
ཡིན། ས་དང་། ཆུ་དང་། མེ་དང་། རླུང་དང་། ནམ་མཁར་གཏོགས་པ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་སུ་གཏོགས་པ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན།
འདུས་བྱས་དང་། འདུས་མ་བྱས་སུ་གཏོགས་པ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན། འཇིག་རྟེན་པ་དང་། འཇིག་རྟེན་ལས་འདས་པ་དང་། ཟག་པ་དང་བཅས་པ་དང་། ཟག་པ་མེད་པའི་ཆོས་སུ་གཏོགས་པ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན། དགེ་བ་
དང་མི་དགེ་བའི་ཆོས་སུ་གཏོགས་པ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན། སེམས་ཅན་གྱི་ཁམས་སུ་གཏོགས་པ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་ཞིང་། ཆོས་དེ་དག་ལས་རྣམ་པར་གྲོལ་བ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་པའི་ཕྱིར་རོ། །

རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཆོས་གང་དུ་ཡང་གཏོགས་པ་ཡང་མ་ཡིན། མི་གཏོགས་པ་ཡང་མ་ཡིན་ཏེ། གང་གཏོགས་པ་དང་། གང་མི་གཏོགས་པའི་ཆོས་རྣམས་ཀྱི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་
མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་ཉིད་ཅེས་བྱ་བ་དེ་གང་གི་ཚིག་བླ་དགས་ཡིན་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཇི་ལྟར་བྱིས་པ་སོ་སོའི་སྐྱེ་བོ་རྣམས་ཀྱིས་
དམིགས་པའི་ཆོས་རྣམས་ཀྱིས་དམིགས་པའི་ཆོས་དེ་དག་ནི་དེ་བཞིན་དུ་མ་ཡིན་ཞིང་གཞན་དུའང་མ་ཡིན་ལ། ཇི་ལྟར་ཆོས་རྣམས་དེ་བཞིན་གཤེགས་པ་དང་། དེ་བཞིན་གཤེགས་པའི་ཉན་ཐོས་དང་། བྱང་ཆུབ་སེམས་དཔས་མཐོང་བའི་ཆོས་དེ་ལྟ་བུ་ནི་དེ་བཞིན་ཉིད་མ་
ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དེ་དེའི་ཕྱིར་དེ་བཞིན་ཉིད་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པའོ། །རབ་ཀྱི་རྩལ་གྱིས་རྣམ་པར་གནོན་པ་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆོས་གང་འབྲི་བའི་ཕྱིར་རམ། འཕེལ་བའི་ཕྱིར་ཉེ་བར་གནས་པ་མ་ཡིན་ནོ། །ཆོས་གང་འདུ་བའི་ཕྱིར་རམ། འབྲལ་བའི་ཕྱིར་རམ། བྲི་བའི་ཕྱིར་རམ། གང་བའི་ཕྱིར་རམ། སྩོགས་པའི་ཕྱིར་རམ། མི་སྩོགས་པའི་ཕྱིར་རམ། འཕོ་བའི་ཕྱིར་
རམ། མི་འཕོ་བའི་ཕྱིར་རམ། སྐྱེ་བའི་ཕྱིར་རམ། འགོག་པའི་ཕྱིར་རམ། ཀུན་ནས་ཉོན་མོངས་པའི་ཕྱིར་རམ། རྣམ་པར་བྱང་བའི་ཕྱིར་རམ། འཇུག་པའི་ཕྱིར་རམ། ལྡོག་པའི་ཕྱིར་རམ། ཀུན་འབྱུང་བའི་ཕྱིར་རམ། ནུབ་པའི་ཕྱིར་རམ། མཚན་ཉིད་ཀྱི་ཕྱིར་རམ། མཉམ་པའི་
ཕྱིར་རམ། མི་མཉམ་པའི་ཕྱིར་རམ། ཀུན་རྫོབ་ཀྱི་ཕྱིར་རམ། དོན་དམ་པའི་ཕྱིར་རམ། བདེ་བའི་ཕྱིར་རམ། སྡུག་བསྔལ་གྱི་ཕྱིར་རམ། རྟག་པའི་ཕྱིར་རམ། མི་རྟག་པའི་ཕྱིར་རམ། སྡུག་པའི་ཕྱིར་རམ། མི་སྡུག་པའི་ཕྱིར་རམ། བདག་གི་ཕྱིར་རམ། བདག་

མེད་པའི་ཕྱིར་རམ། བདེན་པའི་ཕྱིར་རམ། བརྫུན་པའི་ཕྱིར་རམ། བྱེད་པ་པོའི་ཕྱིར་རམ། བྱེད་པ་པོ་མེད་པའི་ཕྱིར་རམ། འབྱུང་བའི་ཕྱིར་རམ། མི་འབྱུང་བའི་ཕྱིར་རམ། ངོ་བོ་ཉིད་ཀྱི་ཕྱིར་རམ། ངོ་བོ་ཉིད་མེད་པའི་ཕྱིར་རམ། འཆི་འཕོ་བའི་ཕྱིར་རམ།
སྐྱེ་བའི་ཕྱིར་རམ། སྐྱེས་པའི་ཕྱིར་རམ། མངོན་པར་འགྲུབ་པའི་ཕྱིར་རམ། སྐྱེ་བའི་ཕྱིར་རམ། སྐྱེ་བ་ཀུན་འབྱུང་བའི་ཕྱིར་རམ། ཚོགས་པའི་ཕྱིར་རམ། མ་ཚོགས་པའི་ཕྱིར་རམ། འདོད་ཆགས་དང་བཅས་པའི་ཕྱིར་རམ། འདོད་ཆགས་དང་བྲལ་བའི་ཕྱིར་རམ། ཞེ་སྡང་
དང་བཅས་པའི་ཕྱིར་རམ། ཞེ་སྡང་དང་བྲལ་བའི་ཕྱིར་རམ། གཏི་མུག་དང་བཅས་པའི་ཕྱིར་རམ། གཏི་མུག་དང་བྲལ་བའི་ཕྱིར་རམ། ཕྱིན་ཅི་ལོག་གི་ཕྱིར་རམ། ཕྱིན་ཅི་ལོག་མ་ཡིན་པའི་ཕྱིར་རམ། དམིགས་པའི་ཕྱིར་རམ། དམིགས་པ་མེད་པའི་ཕྱིར་རམ། ཟད་པའི་ཕྱིར་
རམ། མི་ཟད་པའི་ཕྱིར་རམ། ཤེས་པའི་ཕྱིར་རམ། མི་ཤེས་པའི་ཕྱིར་རམ། མཐོ་བའི་ཕྱིར་རམ། དམའ་བའི་ཕྱིར་རམ། ཕན་པའི་ཕྱིར་རམ། མི་ཕན་པའི་ཕྱིར་རམ། འགྲོ་བའི་ཕྱིར་རམ། མི་འགྲོ་བའི་ཕྱིར་རམ། ཡོད་པའི་ཕྱིར་རམ། མེད་པའི་ཕྱིར་རམ། རྗེས་སུ་
ཆགས་པའི་ཕྱིར་རམ། ཁོང་ཁྲོ་བའི་ཕྱིར་རམ། སྣང་བའི་ཕྱིར་རམ། མུན་པའི་ཕྱིར་རམ། ལེ་ལོའི་ཕྱིར་རམ། བརྩོན་འགྲུས་བརྩམ་པའི་ཕྱིར་རམ། སྟོང་པ་ཉིད་ཀྱི་ཕྱིར་རམ། སྟོང་པ་ཉིད་མ་ཡིན་པའི་ཕྱིར་རམ། མཚན་མའི་ཕྱིར་རམ། མཚན་མ་མེད་པའི་ཕྱིར་རམ།
སྨོན་པའི་ཕྱིར་རམ། སྨོན་པ་མེད་པའི་ཕྱིར་རམ། མངོན་པར་འདུ་བྱེད་པའི་ཕྱིར་རམ། མངོན་པར་འདུ་མི་བྱེད་པའི་ཕྱིར་རམ། ནུབ་པའི་ཕྱིར་རམ། ནུབ་པ་མ་ཡིན་པའི་ཕྱིར་རམ། རིག་པའི་ཕྱིར་རམ། རྣམ་པར་གྲོལ་བའི་ཕྱིར་རམ། ཞི་བའི་ཕྱིར་རམ། ཉེ་བར་མ་ཞི་
བའི་ཕྱིར་རམ། འགྲུབ་པའི་ཕྱིར་རམ། མི་འགྲུབ་པའི་ཕྱིར་རམ། ཚུལ་བཞིན་གྱི་ཕྱིར་རམ། ཚུལ་བཞིན་མ་ཡིན་པའི་ཕྱིར་རམ། ཡོངས་སུ་ཤེས་པའི་ཕྱིར་རམ། ཡོངས་སུ་མི་ཤེས་པའི་ཕྱིར་རམ། ངེས་པར་འབྱུང་བའི་ཕྱིར་རམ། ངེས་པར་འབྱུང་བ་མ་ཡིན་པའི་ཕྱིར་

རམ། འདུལ་བའི་ཕྱིར་རམ། འདུལ་བ་མ་ཡིན་པའི་ཕྱིར་རམ། ཚུལ་ཁྲིམས་ཀྱི་ཕྱིར་རམ། འཆལ་པའི་ཚུལ་ཁྲིམས་ཀྱི་ཕྱིར་རམ། རྣམ་པར་གཡེང་བའི་ཕྱིར་རམ། རྣམ་པར་གཡེང་བ་མ་ཡིན་པའི་ཕྱིར་རམ། ཤེས་རབ་ཀྱི་ཕྱིར་རམ། འཆལ་པའི་ཤེས་རབ་
ཀྱི་ཕྱིར་རམ། རྣམ་པར་ཤེས་པའི་ཕྱིར་རམ། རྣམ་པར་ཤེས་པ་མ་ཡིན་པའི་ཕྱིར་རམ། གནས་པའི་ཕྱིར་རམ། མི་གནས་པའི་ཕྱིར་རམ། སྐལ་བ་མཉམ་པའི་ཕྱིར་རམ། སྐལ་བ་མི་མཉམ་པའི་ཕྱིར་རམ། འབྱུང་བའི་ཕྱིར་རམ། འཇིག་པའི་ཕྱིར་རམ། ཐོབ་པའི་
ཕྱིར་རམ། མ་ཐོབ་པའི་ཕྱིར་རམ། མངོན་པར་རྟོགས་པའི་ཕྱིར་རམ། མངོན་པར་རྟོགས་པ་མ་ཡིན་པའི་ཕྱིར་རམ། མངོན་སུམ་དུ་བྱ་བའི་ཕྱིར་རམ། མངོན་སུམ་དུ་བྱ་བ་མ་ཡིན་པའི་ཕྱིར་རམ། རབ་ཏུ་རྟོགས་པའི་ཕྱིར་རམ། རབ་ཏུ་མ་རྟོགས་པའི་ཕྱིར་ཉེ་བར་གནས་པ་མ་
ཡིན་ནོ། །དེ་བཞིན་ཉིད་ཀྱི་ལེའུ་སྟེ་གསུམ་པའོ།། །།བམ་པོ་གསུམ་པ། རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྐྱེས་བུ་རྨི་ལམ་རྨིས་པས་རྨི་ལམ་གྱི་རང་བཞིན་བཤད་པ་སྟོན་ཀྱང་། རྨི་ལམ་གྱི་རང་བཞིན་བསྟན་པ་མེད་དོ། །དེ་ཅིའི་
ཕྱིར་ཞེ་ན། རྨི་ལམ་ཉིད་ཀྱང་མེད་ན་རྨི་ལམ་གྱི་རང་བཞིན་བསྟན་པ་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་སྟོན་ཀྱང་། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གང་ཡང་མེད་དོ། །རབ་ཀྱི་རྩལ་གྱིས་
རྣམ་པར་གནོན་པ་འདི་ལྟ་སྟེ། དཔེར་ན་རྨི་ལམ་ནི་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྒྱུ་མ་
མཐོང་བའི་སྐྱེས་བུ་སྒྱུ་མའི་རང་བཞིན་བཤད་པ་སྟོན་ཀྱང་སྒྱུ་མའི་རང་བཞིན་གང་ཡང་མེད་ན། སྒྱུ་མའི་རང་བཞིན་བསྟན་པའི་ངོ་བོ་ཉིད་ལྟ་ག་ལ་ཡོད། དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་བསྟན་པ་གང་ཡང་མེད་དོ། །

རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྒྱུ་མ་ནི་ཆོས་གང་མངོན་པར་འགྲུབ་པའི་ཕྱིར་ཡང་ཉེ་བར་གནས་པ་མ་ཡིན་ནོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ཆོས་གང་མངོན་པར་འགྲུབ་པའི་ཕྱིར་ཡང་ཉེ་བར་གནས་པ་མ་
ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་མིག་ཡོར་མཐོང་བའི་སྐྱེས་བུ་མིག་ཡོར་གྱི་རང་བཞིན་སྟོན་ཀྱང་མིག་ཡོར་གྱི་རང་བཞིན་གང་ཡང་མེད་ན། མིག་ཡོར་གྱི་རང་བཞིན་བསྟན་པ་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་
དུ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གང་ཡང་མེད་ན་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་བསྟན་པ་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་མིག་ཡོར་ནི་ཆོས་གང་བསྟན་པར་ཡང་ཉེ་བར་གནས་པ་
མ་ཡིན་ནོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྨིག་རྒྱུ་མཐོང་བའི་སྐྱེས་བུ་སྨིག་རྒྱུ་བཤད་པ་སྟོན་ཀྱང་སྨིག་རྒྱུ་བསྟན་པ་གང་ཡང་མེད་ན་སྨིག་རྒྱུ་བསྟན་
པའི་རང་བཞིན་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་བསྟན་པ་གང་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྨིག་རྒྱུ་ནི་ཆོས་གང་བསྟན་
པར་ཡང་ཉེ་བར་གནས་པ་མ་ཡིན་ནོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་བྲག་ཅའི་སྤྱོད་ཡུལ་ལ་གནས་པའི་སྐྱེས་བུས། བྲག་ཅའི་སྒྲ་ཐོས་ཀྱི་དེ་ནི་མི་
མཐོང་སྟེ། ནམ་བདག་གིས་སྒྲ་ཕྱུང་བ་དེའི་ཚེ་སྒྲ་ཐོས་སོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པའི་ཚིག་ཐོས་པར་འགྱུར་ཡང་ཆོས་གང་བསྟན་པ་ཐོས་པར་འགྱུར་བ་མེད་དེ། གཞན་དུ་ན་ནམ་མངོན་པར་བཤད་པ་དེའི་ཚེ་ཀུན་ཤེས་ཤིང་ཐོས་པའི་ལམ་དུ་འགྱུར་རོ། །

རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ལྦུ་བ་རྡོས་པ་མཐོང་བའི་སྐྱེས་བུ་ལྦུ་བ་རྡོས་པའི་རང་བཞིན་སྟོན་ཀྱང་ལྦུ་བ་རྡོས་པའི་རང་བཞིན་ནང་དང་ཕྱི་ནས་ཀྱང་མི་དམིགས་ན་དེ་བསྟན་པའི་རང་བཞིན་དམིགས་པར་ལྟ་ག་ལ་འགྱུར། རབ་ཀྱི་རྩལ་གྱིས་རྣམ་པར་
གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཡང་མི་དམིགས་སོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ལྦུ་བ་རྡོས་པ་དེ་ནི་ཆོས་གང་མངོན་པར་འགྲུབ་པའི་རང་བཞིན་དུ་ཡང་ཉེ་བར་མི་འགྲོའོ། །རབ་ཀྱི་
རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ཆོས་གང་མངོན་པར་འགྲུབ་པའི་རང་བཞིན་དུ་ཡང་ཉེ་བར་མི་འགྲོའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ཆུའི་ཆུ་བུར་མཐོང་བའི་སྐྱེས་བུ་ཆུའི་ཆུ་བུར་གྱི་རང་བཞིན་སྟོན་ཀྱང་།
ཆུའི་ཆུ་བུར་གྱི་རང་བཞིན་ཡང་མེད་ན་ཆུའི་ཆུ་བུར་གྱི་རང་བཞིན་བསྟན་པ་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ།
དཔེར་ན་ཆུའི་ཆུ་བུར་ནི་ཆོས་གང་མངོན་པར་འགྲུབ་པ་འབྱུང་བར་ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ཆོས་གང་མངོན་པར་འགྲུབ་པ་འབྱུང་བར་ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་
གནོན་པ་འདི་ལྟ་སྟེ། དཔེར་ན་སྐྱེས་བུས་ཆུ་ཤིང་གི་སྙིང་པོ་ཀུན་དུ་བཙལ་ཀྱང་མི་རྙེད་མོད་ཀྱི་འོན་ཀྱང་དེའི་འདབ་མ་རྣམས་ཀྱིས་དགོས་པ་བྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་སྙིང་པོ་མེད་མོད་གྱི། །ཤེས་རབ་ཀྱི་ཕ་
རོལ་ཏུ་ཕྱིན་པས་དགོས་པ་བྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྐྱེས་བུ་ནམ་མཁའ་སྟོན་པར་ཐ་སྙད་འདོགས་ཀྱང་ནམ་མཁའ་ལ་ནི་བསྟན་པ་ཅི་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་

ཞེས་ཐ་སྙད་འདོགས་ཀྱང་ཆོས་གང་ཡང་བསྟན་པར་ཡང་ཐ་སྙད་གདགས་པར་བྱ་བ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ནམ་མཁའ་ཞེས་ཐ་སྙད་འདོགས་ཀྱང་ཆོས་གང་བསྟན་པར་ཡང་ཡོངས་སུ་འགྲུབ་ཅིང་ཐ་སྙད་གདགས་
པ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་ཐ་སྙད་འདོགས་ཀྱང་ཚིག་གང་བསྟན་པར་ཡང་ཐ་སྙད་དུ་གདགས་པ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་གྲིབ་མ་དང་ཉིན་ལོགས་ཞེས་ཐ་སྙད་དུ་
འདོགས་ཀྱང་དེ་གཉིས་ནི་ཆོས་གང་ཡོངས་སུ་མ་གྲུབ་པའི་ཕྱིར་ཡང་ཉེ་བར་མི་གནས་ལ་སྣང་བ་ཡང་མངོན་ནོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་ཐ་སྙད་འདོགས་པའི་ཚིག་ཏུ་འགྲོ་ཡང་ཆོས་གང་བསྟན་པར་ཡང་ཐ་སྙད་ཀྱི་ཚིག་ཏུ་ཡང་
མི་འགྲོ་ལ། ཆོས་རྣམས་སྣང་བར་ཡང་བྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་སྦྱངས་པ་ནི་སྣང་བ་ཆེན་པོར་ཉེ་བར་གནས་པར་གྱུར་ཀྱང་སྣང་བ་དེ་ནང་ངམ། ཕྱི་རོལ་ན་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་
ཤེས་རབ་ཀྱི་ཕ་རོལ་ཏུ་ཕྱིན་པ་སྣང་བའི་བྱ་བ་ཆེན་པོས་ཉེ་བར་གནས་ཀྱང་སྣང་བ་དེ་ནི་ནང་ངམ། ཕྱི་རོལ་དུ་མཐོང་བར་ཉེ་བར་མི་འགྲོའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ཡུངས་མར་གྱི་མར་མེ་བུས་ན་དེའི་འོད་འཕྲོ་བ་ཡུད་ཙམ་ཡང་མི་གནས་མོད་ཀྱི་སྣང་
བར་ཡང་བྱེད་དེ། སྣང་བ་དེས་གཟུགས་རྣམས་ཀྱང་མཐོང་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་གང་ལ་ཡང་མི་གནས་མོད་ཀྱི་ཆོས་རྣམས་ཀྱི་སྣང་བའི་བྱ་བ་ཡང་བྱེད་དོ། །སྣང་བ་དེས་འཕགས་པ་རྣམས་ཆོས་
ཐམས་ཅད་ཡང་དག་པ་ཇི་ལྟ་བ་བཞིན་དུ་མཐོང་བར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་པ་

བསྟན་པ་ངོ་མཚར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ཏེ། ཤཱ་རིའི་བུ་དེ་དེ་བཞིན་ནོ། །གཟུགས་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་
ཡོངས་སུ་མ་གྲུབ་བོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །མ་རིག་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །
འདུ་བྱེད་ཡོངས་སུ་མ་གྲུབ་པ་དང་། རྣམ་པར་ཤེས་པ་ཡོངས་སུ་མ་གྲུབ་པ་དང་། མིང་དང་གཟུགས་ཡོངས་སུ་མ་གྲུབ་པ་དང་། སྐྱེ་མཆེད་དྲུག་ཡོངས་སུ་མ་གྲུབ་པ་དང་། རེག་པ་ཡོངས་སུ་མ་གྲུབ་པ་དང་། ཚོར་བ་ཡོངས་སུ་མ་གྲུབ་པ་དང་། སྲེད་པ་ཡོངས་སུ་མ་གྲུབ་
པ་དང་། ལེན་པ་ཡོངས་སུ་མ་གྲུབ་པ་དང་། སྲིད་པ་ཡོངས་སུ་མ་གྲུབ་པ་དང་། སྐྱེ་བ་ཡོངས་སུ་མ་གྲུབ་པ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ཡོངས་སུ་མ་གྲུབ་
པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །ཁམས་དང་། སྐྱེ་མཆེད་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཞི་བ་དང་། ཕྱིན་ཅི་ལོག་དང་། སྒྲིབ་པ་དང་།
ལྟ་བ་རྣམ་པར་སྤྱོད་པ་དང་། སོགས་པ་དང་། ཉེ་བར་སོགས་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །བདེ་བ་དང་། སྡུག་བསྔལ་བ་དང་། བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་
ཏུ་ཕྱིན་པ་ཡོངས་སུ་མ་གྲུབ་བོ། །སྐྱེ་བ་དང་། འཇིག་པ་དང་། གནས་པ་དང་། གཞན་དུ་འགྱུར་བ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །ཀུན་འབྱུང་བ་དང་། ནུབ་པ་དང་། བདག་དང་། སེམས་ཅན་དང་། སྲོག་དང་། གསོ་

པ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་དང་། ཤེད་བུ་དང་། བྱེད་པ་པོ་དང་། བྱེད་དུ་འཇུག་པ་དང་། སློང་བ་པོ་དང་། ཀུན་ནས་སློང་བ་པོ་དང་། ཚོར་བ་པོ་དང་། ཚོར་བར་བྱེད་པ་པོ་དང་། ཤེས་པར་བྱེད་པ་དང་། ཤེས་པར་བྱེད་དུ་
འཇུག་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །བདེན་པ་དང་། བརྫུན་པ་དང་། འདུས་བྱས་དང་། འདུས་མ་བྱས་དང་། འགྲོ་བ་དང་། མི་འགྲོ་བ་དང་། མཐོང་བ་དང་བཅས་པ་དང་། མི་མཐོང་བ་དང་། ནང་དང་ཕྱི་ཡོངས་སུ་མ་གྲུབ་
པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །ས་དང་། ཆུ་དང་། མེ་དང་། རླུང་དང་། འདོད་པ་དང་། གཟུགས་དང་། གཟུགས་མེད་པ་དང་། ནམ་མཁའ་དང་། རྣམ་པར་ཤེས་པ་དང་། ཆོས་ཀྱི་ཁམས་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་
སུ་མ་གྲུབ་བོ། །ལས་ཀྱི་རྣམ་པར་སྨིན་པ་དང་། རྒྱུ་དང་། རྐྱེན་དང་། ཆད་པ་དང་། རྟག་པ་དང་། འདས་པ་དང་། མ་འོངས་པ་དང་། ད་ལྟར་བྱུང་བ་དང་། སྔོན་གྱི་མཐའ་དང་། ཕྱི་མའི་མཐའ་དང་། དབུས་དང་། ཚུལ་ཁྲིམས་དང་། འཆལ་པའི་ཚུལ་ཁྲིམས་དང་། བཟོད་
པ་དང་། གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། ཤེས་རབ་དང་། འཆལ་པའི་ཤེས་རབ་དང་། སེམས་དང་། ཡིད་དང་། རྣམ་པར་ཤེས་པ་དང་། དེ་མ་ཐག་པ་དང་། འཆི་འཕོ་དང་། སྐྱེ་བ་དང་། ཀུན་ནས་ཉོན་
མོངས་པ་དང་། རྣམ་པར་བྱང་བ་དང་། དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་དང་། འཕགས་པའི་བདེན་པ་དང་། ཚད་མེད་པ་དང་། བསམ་གཏན་དང་།
རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། དགེ་བ་དང་། མི་དགེ་བ་དང་། ཟག་པ་དང་བཅས་པ་དང་། ཟག་པ་མེད་པ་དང་། འཇིག་རྟེན་པ་དང་། འཇིག་

རྟེན་ལས་འདས་པ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། འདུས་བྱས་དང་། འདུས་མ་བྱས་དང་། ལུང་དུ་བསྟན་པ་དང་། ལུང་དུ་མ་བསྟན་པ་དང་། དཀར་པོ་དང་། ནག་པོ་དང་། དཀར་ནག་མ་ཡིན་པ་དང་། གཏོགས་པ་དང་། མི་གཏོགས་པ་
དང་། ངན་པ་དང་། བཟང་པོ་དང་། འབྲིང་དང་། འདོད་ཆགས་དང་། ཞེ་སྡང་དང་། གཏི་མུག་དང་། མཐོང་བ་དང་། ཐོས་པ་དང་། བྱེ་བྲག་ཕྱེད་པ་དང་། རྣམ་པར་ཤེས་པ་དང་། རློམ་སེམས་དང་། གནས་པ་དང་། རྣམ་པར་རྟོག་པ་དང་། དཔྱོད་པ་དང་། རྣམ་པར་དཔྱོད་
པ་དང་། དམིགས་པ་དང་། སྒྱུ་དང་། ཕྲག་དོག་དང་། སེར་སྣ་དང་། འདུ་བ་དང་། གཉིས་ཀྱི་མཚན་ཉིད་དང་། མ་སྐྱེས་པ་དང་། མངོན་པར་འདུ་མི་བྱེད་པ་དང་། ཞི་གནས་དང་། ལྷག་མཐོང་དང་། རིག་པ་དང་། རྣམ་པར་གྲོལ་བ་དང་། ཟད་པ་དང་། འདོད་ཆགས་དང་
བྲལ་བ་དང་། འགོག་པ་དང་། ཕུང་པོ་ཐམས་ཅད་ངེས་པར་འདོར་བ་དང་། འབྱུང་བ་དང་། ཀུན་རྫོབ་པ་དང་། དོན་དམ་པ་དང་། ཉན་ཐོས་ཀྱི་ས་དང་། རང་སངས་རྒྱས་ཀྱི་ས་དང་། ཐམས་ཅད་མཁྱེན་པའི་ཡེ་ཤེས་དང་། ཆགས་པ་མེད་པའི་ཡེ་ཤེས་དང་། རང་བྱུང་གི་ཡེ་
ཤེས་དང་། མི་མཉམ་པ་དང་མཉམ་པའི་ཡེ་ཤེས་དང་། བྱང་ཆུབ་སེམས་དཔའི་སྨོན་ལམ་དང་། ཉན་ཐོས་ཀྱི་དགེ་འདུན་དང་། རང་སངས་རྒྱས་ཀྱི་ཕུན་སུམ་ཚོགས་པ་དང་། ཚད་མེད་པར་གཏོགས་པ་དང་། མི་མཉམ་པ་དང་མཉམ་པའི་ཆོས་ཀྱི་ཡེ་ཤེས་དང་། ཆོས་ཐམས་
ཅད་ཀྱི་ཇི་ལྟ་བ་བཞིན་བསྟན་དུ་མེད་པ་དང་། ཆོས་ཐམས་ཅད་ཤེས་པ་དང་། མཐོང་བ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །བསིལ་བར་གྱུར་པ་དང་། ཞི་བ་དང་། རབ་ཏུ་ཞི་བ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་
སུ་མ་གྲུབ་བོ། །སེམས་ཅན་ཡོངས་སུ་སྨིན་པར་བྱ་བ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །མཚན་ཕུན་སུམ་ཚོགས་པ་དང་། སངས་རྒྱས་ཀྱི་ཞིང་ཡོངས་སུ་དག་པ་དང་། སངས་རྒྱས་ཀྱི་སྟོབས་དང་། མི་འཇིགས་པ་དང་། སངས་

རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །མྱ་ངན་ལས་འདས་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་བོ། །དགེ་བ་དང་། མི་དགེ་བའི་ཆོས་ཐམས་
ཅད་ཀྱི་བར་དུ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མ་གྲུབ་སྟེ། དེ་བཞིན་དུ་ཐམས་ཅད་ལ་ཡང་རྒྱས་པར་སྦྱར་རོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའ་ནི་གཟུགས་མེད། བསྟན་དུ་མེད། དངོས་པོ་མེད་དེ། ཡོངས་སུ་མ་གྲུབ་བོ། །
དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་གཟུགས་མེད། བསྟན་དུ་མེད། དངོས་པོ་མེད་དེ་ཡོངས་སུ་མ་གྲུབ་པའོ། །ཤཱ་རིའི་བུ་འདི་ལྟ་སྟེ། དཔེར་ན་འཇའ་ནི་ཚོན་གྱི་རྣམ་པ་སྣ་ཚོགས་སུ་ཀུན་དུ་སྣང་ཡང་དེ་ལ་ཚོན་གང་ཡང་ཡོངས་སུ་གྲུབ་པ་མེད་དེ་མི་དམིགས་སོ། །དེ་བཞིན་
དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་བསྟན་པ་སྣ་ཚོགས་སུ་ཉེ་བར་གནས་མོད་ཀྱི་དེ་ལ་བསྟན་པའི་རང་བཞིན་མི་དམིགས་སོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའ་ལ་སོར་མོ་ལྔ་ཡོངས་སུ་གྲུབ་པར་སྔོན་ནམ་ཡང་སུས་ཀྱང་མ་མཐོང་ངོ་། །ཤཱ་རིའི་བུ་དེ་བཞིན་དུ་
ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་གྲུབ་པའི་རང་བཞིན་སྔོན་ནམ་ཡང་སུས་ཀྱང་མ་མཐོང་ངོ་། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་མཐོང་
བར་དཀའ་བ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་སུ་ལ་ཡང་མཐོང་བར་ཉེ་བར་མི་འགྲོའོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཁོང་དུ་ཆུད་པར་དཀའ་བ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་འདི་ལ་ནི་གང་མངོན་པར་
རྫོགས་པར་རྟོགས་པ་ཡོངས་སུ་གྲུབ་པའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་བསྟན་དུ་མ་མཆིས་པ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཆོས་གང་བསྟན་པར་ཡང་ཉེ་བར་གནས་པ་

མ་ཡིན་ནོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་རང་བཞིན་མ་མཆིས་པ་ལགས་སོ། །བཀའ་སྩལ་པ། ཤཱ་རིའི་བུ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རང་བཞིན་མེད་པས་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་རང་བཞིན་མེད་དོ། །ཁམས་དང་། སྐྱེ་མཆེད་དང་། རྟེན་ཅིང་འབྲེལ་པར་འབྱུང་བ་རང་བཞིན་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རང་བཞིན་མེད་དོ། །ཕྱིན་ཅི་ལོག་དང་། སྒྲིབ་པ་དང་། ལྟ་བར་གྱུར་པ་དང་། སྲེད་པ་རྣམ་པར་སྤྱོད་པ་རང་བཞིན་མེད་པས་
ཤེས་རབ་ཀྱི་ཕ་རོལ་ཏུ་ཕྱིན་པ་རང་བཞིན་མེད་དོ། །བདག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་དང་། ཤེད་བུ་དང་། བྱེད་པ་པོ་དང་། བྱེད་དུ་འཇུག་པ་དང་། སློང་བ་པོ་དང་། ཀུན་ནས་སློང་བ་པོ་དང་། ཚོར་
བ་པོ་དང་། ཚོར་བར་བྱེད་པ་པོ་རང་བཞིན་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རང་བཞིན་མེད་དོ། །ས་དང་། ཆུ་དང་། མེ་དང་། རླུང་དང་། ནམ་མཁའ་དང་། རྣམ་པར་ཤེས་པ་དང་། ཆོས་ཀྱི་ཁམས་ཀྱི་རང་བཞིན་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རང་བཞིན་མེད་དོ། །
འདོད་པ་དང་། གཟུགས་དང་། གཟུགས་མེད་པའི་ཁམས་རང་བཞིན་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རང་བཞིན་མེད་དོ། །ཚུལ་ཁྲིམས་དང་། འཆལ་པའི་ཚུལ་ཁྲིམས་དང་། བཟོད་པ་དང་། གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་
དང་། རྣམ་པར་གཡེང་བ་དང་། ཤེས་རབ་དང་། འཆལ་པའི་ཤེས་རབ་རང་བཞིན་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རང་བཞིན་མེད་དོ། །བྱང་ཆུབ་ཀྱི་ཕྱོགས་ཀྱི་ཆོས་རྣམས་རང་བཞིན་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རང་བ