Kinh tạng Tây Tạng (Kangyur Đại Học) — 034_ཤེས་རབ་སྣ་ཚོགས།

ལྷག་པར་རྟོགས་པ་འདི་ནི་ཆོས་སོ། །གཞན་གྱིས་ཆོས་སྟོན་པར་མི་ནུས་པར་བསམས་ནས་རབ་ཏུ་འཇུག་པའི་རྣམ་
པའི་རྣམ་པར་རྟོག་པ་སྐྱེས་སོ། །དེ་ནས་མི་མཇེད་ཀྱི་བདག་པོ་ཚངས་པ་འཇིག་རྟེན་ཉམས་པར་འགྱུར་བའི་ཕྱིར་རོ་ཞེས་བསམས་ནས་སྟོང་ཕྲག་བཅུའི་ཁོར་ཡུག་གི་བརྒྱ་བྱིན་དང་། འཐབ་བྲལ་བཟང་པོ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་ཕྱུག་དང་། ཚངས་པ་ཆེན་པོ་རྣམས་ཁྲིད་ནས་སྟོན་
པའི་དྲུང་དུ་ཕྱིན་ནས། བཙུན་པ་བཅོམ་ལྡན་འདས་ཆོས་བསྟན་དུ་གསོལ། དང་པོའི་ཚུལ་གྱིས་ཆོས་བསྟན་དུ་གསོལ་ཞེས་ཞུས་སོ། །སྟོན་པས་དེ་རྣམས་ལ་གནང་བ་བྱིན་ནོ། །གང་ཞིག་ལ་བདག་གིས་དང་པོར་ཆོས་བསྟན་པར་བྱའོ་ཞེས་དགོངས་ཤིང་མཁས་པ་ཀུན་ལེན་དེའི་ཆོས་འདི་མྱུར་དུ་ཤེས་པར་
འགྱུར་བའི་ཐུགས་སྐྱེས་སོ། །སླར་ཡང་གཟིགས་ཏེ་དེ་དུས་ལས་འདས་ནས་ཞག་བདུན་ལོན་པར་རྟོགས་སོ། །འཆར་བྱེད་ལ་བརྟགས་པས་དེ་ཡང་དུས་ལས་འདས་པར་མཁྱེན་ནོ། །དགེ་སློང་ལྔ་སྡེས་བདག་ལ་བསྙེན་བཀུར་མང་པོ་བྱས་པས་ལྔ་སྡེའི་ཆེད་དུ་བསམས་ནས་དེ་རྣམས་གང་ན་གནས་པ་ཡིན་ཞེས་
བརྟགས་སོ། །གྲོང་ཁྱེར་བཱ་རཱ་ཎ་སཱིའི་རི་དགས་རྒྱུ་བའི་ནགས་ཚལ་ན་ཡོད་པར་མཁྱེན་ནོ། །དེར་གཤེགས་ནས་ཆོས་ཀྱི་འཁོར་ལོ་བསྐོར་རོ་ཞེས་དགོངས་ནས་ཞག་འགའ་ཞིག་ཏུ་བྱང་ཆུབ་ཀྱི་སྙིང་པོ་ཀུན་དུ་ཉེ་བ་ཉིད་དུ་བསོད་སྙོམས་མཛད་ཅིང་བཞུགས་ནས་དབྱར་ཟླ་འབྲིང་པོའི་ཉ་ལ་གྲོང་ཁྱེར་བཱ་རཱ་ཎ་སཱིར་གཤེགས་
པར་དགོངས་ནས་ཚེས་བཅུ་བཞིའི་མཚན་གྱི་མཐར་ནམ་ལངས་པ་ན་ཤིན་ཏུ་སྔ་བ་ཉིད་དུ་ལྷུང་བཟེད་དང་སྣམ་སྦྱར་བསྣམས་ནས་དཔག་ཚད་བཅྭ་བརྒྱད་ཡོད་པའི་ལམ་ལ་གཤེགས་ཤིང་ལམ་གྱི་བར་དུ་ཉེ་བར་གནས་པ་ཞེས་བྱ་བའི་འཚོ་བྱེད་གཅིག་གཟིགས་སོ། །དེ་ལ་རང་གི་སངས་རྒྱས་སུ་གྱུར་པ་བཤད་

དོ། །ཉི་མ་དེ་ཉིད་ལ་སྲོད་ཀྱི་དུས་སུ་དྲང་སྲོང་ལྷུང་བའི་གནས་སུ་གཤེགས་སོ། །གནས་བརྟན་ལྔ་སྡེས་དེ་བཞིན་གཤེགས་པ་བྱོན་པ་རིང་པོ་ཉིད་ནས་མཐོང་སྟེ། དགེ་སྦྱོང་གཽ་ཏ་མ་འདི་བཟའ་བ་མང་པོའི་ཕྱིར་ལུས་ཡོངས་སུ་རྫོགས་པར་གྱུར། དབང་པོ་ཡོངས་སུ་རྫོགས་པར་གྱུར། གསེར་གྱི་ཁ་དོག་ཏུ་
གྱུར་ནས་འོངས་ཀྱིས། འདི་ལ་ཕྱག་ལ་སོགས་པ་མི་བྱའོ། །འདི་རིགས་ཆེན་པོར་སྐྱེས་པ་ཡིན་པས་གདན་ཤོམ་པ་ཙམ་འོས་སོ། །དེའི་ཕྱིར་གདན་ཙམ་རིགས་སོ་ཞེས་གཏམ་བྱེད་དོ། །བཅོམ་ལྡན་འདས་ལ་ལྷ་དང་བཅས་པའི་འཇིག་རྟེན་རྣམས་ཀྱི་སེམས་དང་སྤྱོད་པ་ཤེས་པར་ནུས་པའི་ཡེ་ཤེས་
ཡོད་དོ། །དེ་ཡང་འདི་རྣམས་ཇི་ལྟར་སེམས་པ་ཡིན་ཞེས་བསམས་ནས་སེམས་ཤེས་པ་ཡིན་ནོ། །དེ་ནས་ལྷ་དང་མི་ཐམས་ཅད་ལ་མཐོང་བ་མེད་པའི་དབང་གིས་ཐམས་ཅད་དུ་ཁྱབ་པར་ནུས་པའི་བྱམས་པའི་སེམས་ཡང་དག་པར་བསྡུས་ནས། མ་མཐོང་བའི་དབང་གིས་བྱམས་པའི་སེམས་
ཀྱིས་ཁྱབ་པར་བཅོམ་ལྡན་འདས་ཀྱིས་བསྒོམས་ནས་དེ་བཞིན་གཤེགས་པ་ཉེ་བར་གཤེགས་ཤིང་གཤེགས་པ་ན། སྔར་གྱི་བཅའ་ཁྲིམས་རྣམས་གནས་པར་མི་ནུས་པས་ཕྱག་ཕུལ་ཞིང་བསྲུང་བ་དང་བསྙེན་བཀུར་ཐམས་ཅད་བྱས་སོ། །གཞན་ཡང་དགེ་སློང་དེ་རྣམས་ཡང་དག་པར་རྫོགས་པའི་སངས་
རྒྱས་གྲུབ་པ་མི་ཤེས་པའི་ཕྱིར་མིང་བརྗོད་པ་ན་ཚེ་དང་ལྡན་པ་ཞེས་སྨྲ་བ་ཐ་མལ་པའི་ཚིག་གིས་རྗོད་པར་བྱེད་དོ། །དེ་ནས་བཅོམ་ལྡན་འདས་ཀྱིས་དགེ་སློང་དག་བཅོམ་ལྡན་འདས་དང་དེ་བཞིན་གཤེགས་པའི་མིང་དང་ཚེ་དང་ལྡན་པ་ཞེས་ཐ་མལ་པའི་ཚིག་བརྗོད་པར་མི་རུང་ངོ་། །དགེ་སློང་དག་ང་ནི་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ་ཞེས་བདག་ཉིད་སངས་རྒྱས་སྒྲུབ་པར་བྱེད་པ་དང་གདན་བཤམས་པ་མཆོག་ལ་སངས་རྒྱས་བཞུགས་ཏེ། རྒྱུ་སྐར་བྲེ་མཆོག་གསུམ་འཛོམ་པ་ལ་བྱེ་བ་ཕྲག་བཅྭ་བརྒྱད་ཀྱི་ཚངས་པའི་འཁོར་གྱིས་བསྐོར་ནས་གནས་བརྟན་ལྔ་སྡེ་བོས་ཏེ་ཆོས་ཀྱི་འཁོར་ལོ་
བསྐོར་བའི་མདོའི་མཐར་བཤད་དོ། །དེ་རྣམས་ལ་གནས་བརྟན་ཀུན་ཤེས་ཀཽཌི་ནྱས་བཤད་པའི་རྗེས་སུ་འབྲངས་ནས་ཡེ་ཤེས་ཐོབ་པ་མདོའི་མཐར་བྱེ་བ་ཕྲག་བཅྭ་བརྒྱད་ཀྱི་ཚངས་པ་རྣམས་ཀྱིས་རྒྱུན་དུ་ཞུགས་པའི་འབྲས་བུ་ཐོབ་བོ། །སྟོན་པས་དེ་ཉིད་དུ་དབྱར་བཞུགས་སོ། །སྔར་ཡང་ཉི་མ་གཉིས་པ་ལ་

གནས་བརྟན་བརླངས་པ་ལ་ཆོས་སྦྱིན་ནོ་ཞེས་གཙུག་ལག་ཁང་དུ་བཞུགས་སོ། །ལྷག་མ་བཞི་པོ་བསོད་སྙོམས་ལ་སོང་ངོ་། །གནས་བརྟན་བརླངས་པས་ཉི་མ་ཕྱེད་ཀྱི་ནང་དུ་རྒྱུན་དུ་ཞུགས་པའི་འབྲས་བུ་ཐོབ་བོ། །འདི་ལྟ་བུའི་ཐབས་ཉིད་ཀྱིས་སླར་ཡང་ཉི་མ་ཕྱི་མ་ལ་གནས་བརྟན་བཟང་ལྡན་དང་། སླར་ཡང་ཉི་མ་
ཕྱི་མ་ལ་གནས་བརྟན་མིང་ཅན་དང་། སླར་ཡང་ཉི་མ་ཕྱི་མ་ལ་གནས་བརྟན་རྟ་ཐུལ་རྣམས་དེ་ཐམས་ཅད་ཀྱིས་རྒྱུན་དུ་ཞུགས་པའི་འབྲས་བུ་ཐོབ་པར་བྱས་ནས་ཚེས་ཉི་ཤུ་ལ་དགེ་སློང་ལྔ་པོ་འདུས་པ་ལ་བདག་མེད་པའི་མཚན་ཉིད་ཀྱི་མདོ་སྡེ་རྣམས་བཤད་དོ། །བཤད་པའི་མཐར་གནས་བརྟན་ལྔ་སྡེས་དགྲ་བཅོམ་པའི་འབྲས་བུ་
ཐོབ་བོ། །དེ་ནས་སྟོན་པས་རིགས་ཀྱི་བུ་གྲགས་པ་ཉེ་བར་མི་རྟེན་པར་གཟིགས་ནས། དེའི་མཚན་མོའི་ཆར་སྡུག་བསྔལ་བའི་སེམས་ཀྱིས་ཁྱིམ་སྤངས་ནས་འཐོན་པ་ལ་གྲགས་པ་འདིར་ཤོག་ཅེས་བོས་ནས་མཚན་མོ་དེ་ཉིད་ཀྱི་ཆ་ལ་རྒྱུན་དུ་ཞུགས་པའི་འབྲས་བུ་དང་སླར་ཡང་ཉི་མ་གཉིས་པ་ལ་དགྲ་བཅོམ་པའི་འབྲས་
བུ་གྲུབ་པར་བྱེད་དོ། །གཞན་ཡང་སླར་དེའི་གྲོགས་པོ་ལྔ་བཅུ་རྩ་བཞིས་རབ་ཏུ་བྱུང་ཞིང་དགེ་སློང་དུ་གྱུར་ནས་དགྲ་བཅོམ་པ་བྱེད་དོ། །འདི་ལྟར་འཇིག་རྟེན་དུ་དགྲ་བཅོམ་པ་དྲུག་ཅུ་རྩ་གཅིག་ཏུ་གྱུར་ཏོ། །སྟོན་པས་དབྱར་བཞུགས་ནས་དགག་དབྱེ་བྱས་ཏེ་དགེ་སློང་དྲུག་ཅུ་པོ་རྣམས་ཕྱོགས་ཕྱོགས་སུ་བཏང་
ནས། རང་ཉིད་ལྟེང་རྒྱས་སུ་གཤེགས་པའི་བར་གྱི་ལམ་ན་རས་བལ་ཅན་གྱི་ཚལ་ནི་དཔག་ཚད་བཅུ་པའོ། །གཞོན་ནུ་བཟང་སྡེ་བཏུལ་ལོ། །དེ་རྣམས་ལས་ཐམས་ཅད་ཀྱི་མཐའི་ཕྱི་མ་རྒྱུན་དུ་ཞུགས་པར་གྱུར་ལ། ཐོག་མ་ནི་ཕྱིར་མི་འོང་དུ་གྱུར་ཏོ། །དེ་རྣམས་ཀྱང་དགེ་སློང་གི་གཟུགས་ཀྱིས་
རབ་ཏུ་བྱུང་བ་བགྱིས་ནས་ཕྱོགས་ཕྱོགས་སུ་བཏང་སྟེ་ལྟེང་རྒྱས་སུ་གཤེགས་སོ། །སྟོང་ཕྲག་ཕྱེད་དང་གསུམ་གྱི་ཆོ་འཕྲུལ་ལྟ་ཞིང་ལྟེང་རྒྱས་འོད་སྲུང་ལ་སོགས་པའི་སྤུན་གསུམ་པོ་དང་རལ་པ་ཅན་སྟོང་ཕྲག་གཅིག་བཏུལ་བ་དགེ་སློང་གི་གཟུགས་ཀྱིས་རབ་ཏུ་བྱུང་བར་བྱས་ནས་རི་བོ་ག་ཡའི་རྩེ་མོ་ན་སྡོད་པ་
རྣམས་ལ་ཉི་མའི་རྣམ་གྲངས་ཀྱི་མདོ་སྡེ་བསྟན་ནས་དགྲ་བཅོམ་པར་བྱས་ཏེ། དེས་དགྲ་བཅོམ་པ་སྟོང་ཕྲག་རྣམས་འཁོར་དུ་བྱས་ནས་རྒྱལ་པོ་གཟུགས་ཅན་སྙིང་པོ་ལ་ཁས་བླངས་བྱིན་པ་དགྲོལ་བར་བྱ་བའི་དགོངས་པས་རྒྱལ་པོའི་ཁབ་ཀྱི་གྲོང་ཁྱེར་དང་ཉེ་བའི་ཤིང་དངར་གྱི་ཚལ་དུ་བྱོན་ནོ། །སྐྱེད་མོས་ཚལ་སྐྱོང་

བ་རྣམས་ཀྱིས་སྟོན་པ་བྱོན་ནོ་ཞེས་རྒྱལ་པོ་ལ་སྨྲས་སོ། །རྒྱལ་པོས་ཐོས་ཏེ། ཁྲི་ཕྲག་བཅུ་གཉིས་ཀྱི་བྲམ་ཟེ་དང་ཁྱིམ་བདག་འཁོར་དུ་བྱས་ནས་སྟོན་པ་དང་ཉེ་བར་སོང་སྟེ་འཁོར་ལོ་སྣ་ཚོགས་པའི་སྟེང་དུ་གསེར་གྱི་བླ་རེ་དང་འདྲ་བའི་འོད་ཟེར་ཕྱོགས་ཕྱོགས་སུ་འཕྲོ་ཞིང་བཞུགས་པའི་དེ་བཞིན་གཤེགས་
པའི་ཞབས་ལ་མགོ་བོས་ཕྱག་ལེགས་པར་བྱས་ནས་འཁོར་དང་བཅས་པ་ཕྱོགས་གཅིག་ཏུ་འཁོད་དོ། །དེ་ནས་ཡང་བྲམ་ཟེ་རྣམས་དང་ཁྱིམ་བདག་ལ་སོགས་པ་འདི་ལྟ་བུའི་སེམས་སུ་གྱུར་ཏེ། འོན་ཀྱང་དགེ་སྦྱོང་ཆེན་པོས་ལྟེང་རྒྱས་འོད་སྲུང་གི་རྗེས་སུ་ཚངས་པར་སྤྱོད་པ་སྤྱད་དམ། ཡང་ན་
ལྟེང་རྒྱས་འོད་སྲུང་གིས་དགེ་སྦྱོང་ཆེན་པོའི་རྗེས་སུ་ཚངས་པར་སྤྱོད་པ་སྤྱད་ཅེས་བསམས་སོ། །བཅོམ་ལྡན་འདས་ཀྱིས་དེ་རྣམས་སེམས་ཀྱི་རྟོག་པ་ཐུགས་ཀྱིས་མཁྱེན་ནས་གནས་བརྟན་ལ་ཚིགས་སུ་བཅད་པ་གསུངས་སོ། །ལྟེང་རྒྱས་གནས་སུ་གནས་ནས་ཅི་ཞིག་མཐོང་། །སྦྱིན་སྲེག་འདོར་བའི་
རྒྱུ་མཚན་ཅི་ཞིག་སྨྲ། །འོད་སྲུང་འདི་ཡི་དོན་ནི་དྲི་བར་བྱ། །ཁྱོད་ཀྱིས་ཇི་ལྟར་སྦྱིན་སྲེག་སྤོང་བ་ཡིན། །གནས་བརྟན་གྱིས་ཀྱང་བཅོམ་ལྡན་འདས་ཀྱི་དགོངས་པ་ཤེས་ནས། གཟུགས་དང་སྒྲ་དང་དེ་བཞིན་རོ་དང་དྲི། །བུད་མེད་འདོད་པ་ཡང་ནི་མཆོད་སྦྱིན་སྤྱོད། །འདི་རྣམས་དྲི་མ་ལེགས་
པར་རྟོགས་བྱས་ནས། །དེ་ཕྱིར་མེ་ཡི་སྦྱིན་སྲེག་འདི་སྤངས་སོ། །ཚིགས་སུ་བཅད་པ་འདི་བརྗོད་ནས་རང་ཉིད་ཉན་ཐོས་ཀྱི་འདོད་པ་བསལ་བར་བྱ་བའི་ཕྱིར་དེ་བཞིན་གཤེགས་པའི་ཞབས་ཀྱི་བོལ་དུ་མགོ་བོས་རེག་ནས། བདག་སྟོན་པ་བཙུན་པ་བཅོམ་ལྡན་འདས་ཀྱི་ཉན་ཐོས་ཡིན་ནོ་ཞེས་
སྨྲས་སོ། །ཤིང་ཏཱ་ལ་གཅིག་དང་ཤིང་ཏཱ་ལ་གཉིས་དང་ཤིང་ཏཱ་ལ་གསུམ་དང་ཇི་སྲིད་དུ་ཤིང་ཏཱ་ལ་བདུན་ཙམ་དུ་ནམ་མཁའ་ལ་འཕགས་ནས་བབས་ཏེ་དེ་བཞིན་གཤེགས་པ་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །དེའི་ཆོ་འཕྲུལ་ལྟ་ཞིང་མི་མང་པོ་རྣམས་ཀྱིས་ཨེ་མ་ཧོ་
སངས་རྒྱས་ཀྱི་མཐུ་ཆེན་པོ་འདི་ལྟ་བུའི་ལྟ་བ་བསྟན་པས། དགྲ་བཅོམ་པ་ཞེས་བྱ་བ་ལ་སེམས་ཤིང་། ལྟེང་རྒྱས་འོད་སྲུང་གི་ལྟ་བའི་དྲ་བ་བཅད་དེ་དེ་བཞིན་གཤེགས་པས་བཏུལ་ནས་སྟོན་པའི་ཡོན་ཏན་ཉིད་བརྗོད་དོ། །བཅོམ་ལྡན་འདས་ཀྱིས་ཁོ་བོས་ཀྱང་ད་ལྟ་ཁོ་ན་མ་ཡིན་པར་

ལྟེང་རྒྱས་འོད་སྲུང་བཏུལ་ལོ། །འདས་པ་ཉིད་དུའང་འདི་ངས་བཏུལ་ལོ་ཞེས་བརྗོད་ནས་དོན་འདི་འདས་པ་ན་མི་སྦྱིན་ཆེན་པོ་འོད་སྲུང་གི་སྐྱེས་རབས་སུ་བཤད་པའི་བདེན་པ་བཞི་པོ་གསལ་བར་བསྟན་ནོ། །དེའི་མོད་ལ་ཡུལ་མ་ག་དྷཱའི་རྒྱལ་པོ་འཁོར་ཁྲི་ཕྲག་བཅུ་གཅིག་དང་བཅས་
པས་རྒྱུན་དུ་ཞུགས་པའི་འབྲས་བུ་ཐོབ་བོ། །ཁྲི་ཕྲག་གཅིག་དགེ་བསྙེན་དུ་གྱུར་ཏོ། །རྒྱལ་པོ་སྟོན་པ་དང་ཉེ་བ་ཉིད་དུ་འདུག་སྟེ་བསླབ་པའི་གཞི་ལྔ་སོ་སོར་རབ་ཏུ་ཐོས་ནས་སྐྱབས་སུ་སོང་སྟེ་སང་གི་གདུགས་ཚོད་ལ་མགྲོན་དུ་གཉེར་ནས། སྟན་ལས་ལངས་ཏེ་བཅོམ་ལྡན་འདས་ལ་བསྐོར་བ་
བྱས་ནས་སོང་ངོ་། །སླར་ཡང་སང་གི་སྔ་དྲོ་ཉིད་བཅོམ་ལྡན་འདས་མཐོང་བ་དང་མ་མཐོང་བ་རྒྱལ་པོའི་ཁབ་ན་གནས་པ་རྣམས་ཀྱིས་བྱེ་བ་ཕྲག་བཅྭ་བརྒྱད་ཀྱི་གྲངས་ཀྱི་མི་རྣམས་དེ་བཞིན་གཤེགས་པ་བལྟ་བར་འདོད་པས་སྔ་དྲོ་ཉིད་རྒྱལ་པོའི་ཁབ་ནས་ཤིང་དངར་གྱི་ཚལ་དུ་སོང་སྟེ་རྒྱང་གྲགས་བཅུ་གཉིས་
སུ་མི་ཤོང་བར་ཤིང་དངར་གྱི་ཚལ་ཐམས་ཅད་རྒྱུན་མི་འཆད་པར་གྱུར་ཏོ། །མི་ཐམས་ཅད་ཀྱིས་སྟོབས་བཅུ་པའི་གཟུགས་མཆོག་ཐོབ་པར་འདོད་པ་བདག་ཉིད་ཀྱི་སྐུ་ལ་བལྟ་བས་ཚིམ་པར་མ་ནུས་སོ། །འདི་ལྟ་བུའི་ས་གཞིའི་ཁ་དོག་ཡིན་ནོ། །འདི་ལྟ་བུའི་གཟུགས་ཀྱི་གནས་སུ་དེ་བཞིན་གཤེགས་
པའི་མཚན་དང་དཔེ་བྱད་བཟང་པོ་ལ་སོགས་པའི་རབ་ཏུ་བྱེད་པ་ཐམས་ཅད་ཀྱང་གཟུགས་ཀྱི་སྐུ་དཔལ་གྱིས་བསྔགས་པར་བྱ་བར་འོས་སོ། །འདི་ལྟར་གཟུགས་མཆོག་ཐོབ་པའི་སྟོབས་བཅུ་པའི་སྐུ་བལྟ་བའི་ཕྱིར་མི་མང་པོ་རྒྱུན་མི་འཆད་དོ། །སྐྱེད་མོས་ཚལ་དང་ལམ་དུ་དགེ་སློང་གཅིག་གིས་ཀྱང་ཕྱི་རུ་
འཐོན་པའི་སྐབས་མེད་དོ། །ཉི་མ་དེའི་དུས་ན་བཅོམ་ལྡན་འདས་ཀྱི་གདུགས་ཚོད་ཡོལ་བ་ལྟ་བུར་གྱུར་ཏོ། །དེ་མ་ཐག་པར་བརྒྱ་བྱིན་སྡོད་པའི་སྟན་དྲོ་བའི་རྣམ་པར་མཐོང་སྟེ་དེས་རྣམ་པར་བརྟགས་སོ། །དེའི་རྒྱུ་མཚན་ཤེས་ནས་བྲམ་ཟེའི་ཁྱེའུའི་གཟུགས་སུ་མངོན་པར་སྤྲུལ་ཏེ། སངས་རྒྱས་དང་
ཆོས་དང་དགེ་འདུན་སོ་སོ་ལ་ཇི་ལྟར་རིགས་པའི་བསྟོད་པ་རྗོད་པར་བྱེད་དོ། །སྟོབས་བཅུ་པའི་སྔུན་དུ་ཆས་ནས་ལྷའི་མཐུ་ཡིས་ལམ་ཐོབ་པར་བྱས་སོ། །འདུལ་ཞིང་འདུལ་བའི་གྲོགས་སྔོན་བཅས། །བྲམ་ཟེ་རྣམ་གྲོལ་རལ་པ་དང་། །སེང་གེའི་གཟུགས་ཀྱིས་འཐོན་ནས་ནི། །བཅོམ་ལྡན་རྒྱལ་

པོའི་ཁབ་ནང་བྱོན། །གྲོལ་ཞིང་གྲོལ་བའི་གྲོགས་སྔོན་བཅས། །བྲམ་ཟེ་རྣམ་གྲོལ་རལ་པ་དང་། །སེང་གེའི་གཟུགས་ཀྱིས་འཐོན་ནས་ནི། །བཅོམ་ལྡན་རྒྱལ་པོའི་ཁབ་ནང་བྱོན། །བསྒྲལ་ཞིང་བསྒྲལ་བའི་གྲོགས་སྔོན་བཅས། །བྲམ་ཟེ་རྣམ་གྲོལ་རལ་པ་དང་། །སེང་གེའི་གཟུགས་
ཀྱིས་འཐོན་ནས་ནི། །རྒྱལ་པོའི་ཁབ་ནང་བཅོམ་ལྡན་བྱོན། །བཅུ་པོ་གསུང་བའི་སྟོབས་བཅུ་པ། །ཆོས་བཅུ་ལ་མཁས་བཅུ་ལ་གནས། །སྟོང་ཕྲག་བཅུ་ཡི་འཁོར་དང་ལྡན། །བཅོམ་ལྡན་རྒྱལ་པོའི་ཁབ་ནང་བྱོན། །ཚིགས་སུ་བཅད་པ་འདིས་ནི་སྟོན་པ་ལ་བསྔགས་པས་བསྟོད་ཅིང་
སྔུན་དུ་འགྲོ་བའི་མི་རྣམས་ཀྱིས་བྲམ་ཟེའི་ཁྱེའུའི་གཟུགས་ཀྱི་དཔལ་མཐོང་ནས་བྲམ་ཟེའི་ཁྱེའུ་འདི་ཤིན་ཏུ་གཟུགས་བཟང་བའོ། །སླར་ཡང་སྔར་མཐོང་བ་མེད་དོ་ཞེས་བསམས་ནས་བྲམ་ཟེའི་ཁྱེའུ་འདི་གང་ན་གནས་པ་ཡིན། གང་ཞིག་གི་ཡིན་ཞེས་སྨྲས་སོ། །དེ་ཐོས་ནས་བྲམ་ཟེའི་ཁྱེའུས་
སྨྲས་པ། གང་ཞིག་བསྟན་པ་ཐམས་ཅད་འདུལ། །གང་ཟག་ཟླ་མེད་སངས་རྒྱས་ཏེ། །དགྲ་བཅོམ་བདེ་གཤེགས་འཇིག་རྟེན་དུ། །དེ་ནི་བདག་གི་ཉེ་བར་གནས། །ཚིགས་སུ་བཅད་པ་བརྗོད་དེ་སྟོན་པས་བརྒྱ་བྱིན་གྱིས་སྐབས་ཕྱེ་བའི་ལམ་དུ་དགེ་སློང་སྟོང་ཕྲག་གཅིག་འཁོར་དུ་བྱས་
ནས་རྒྱལ་པོའི་ཁབ་ཀྱི་ནང་དུ་གཤེགས་སོ། །རྒྱལ་པོས་སངས་རྒྱས་ལ་སོགས་པའི་དགེ་འདུན་ལ་སྦྱིན་པ་ཆེན་པོ་ཕུལ་ལོ། །བཙུན་པ་བདག་དཀོན་མཆོག་གསུམ་སྤངས་ནས་སྡོད་པར་མི་ནུས་སོ། །དུས་དང་དུས་མ་ཡིན་པར་བཅོམ་ལྡན་འདས་དང་ཉེ་བར་འོང་བར་འདོད་དོ། །ཤིང་དངར་
ཅན་གྱི་སྐྱེད་མོས་ཚལ་ཤིན་ཏུ་ཐག་རིང་ངོ་། །སླར་ཡང་བདག་ཅག་གི་འོད་མའི་ཚལ་ཞེས་བྱ་བ་འདི་ཤིན་ཏུ་ཉེ་བས་གཤེགས་པ་དང་། འོང་བ་ཤིན་ཏུ་ཉེ་བས་སངས་རྒྱས་ལ་འོས་པའི་གནས་ལགས་པས་བཞེས་པར་ཞུ། དེས་གསེར་གྱི་རིལ་བ་སྤྱི་བླུགས་ལ་མེ་ཏོག་གི་དྲིས་བསྒོས་ཏེ།
ནོར་བུའི་ཁ་དོག་ཅན་གྱི་ཆུ་བླངས་ནས་འོད་མའི་ཚལ་ཡོངས་སུ་གཏོང་ཞིང་སྟོབས་བཅུ་པའི་ཕྱག་ཏུ་ཆུ་སྦྲེང་ནས། དེར་ཀུན་དགའ་ར་བ་བཞེས་ནས་སངས་རྒྱས་ཀྱི་བསྟན་པའི་གཞི་ཞེས་བརྗོད་ཅིང་ས་གཞི་ཆེན་པོ་གཡོས་སོ། །འཛམ་བུའི་གླིང་གི་ནང་ནས་འོད་མའི་ཚལ་སྤངས་པའི་ས་གཞི་གཡོས་

པ་འདི་བཞེས་ཏེ་སྡེ་གཞན་ནི་མེད་དོ། །སིཾ་གྷ་གླིང་གི་གཙུག་ལག་ཁང་ཆེན་པོ་སྤངས་ནས་ས་གཞི་ཆེན་པོ་གཡོས་པ་འདི་བཞེས་ཏེ། སྡེ་གཞན་ནི་མེད་དོ། །སྟོན་པས་འོད་མའི་ཚལ་གྱི་ཀུན་དགའ་ར་བ་བཞེས་ནས་རྒྱལ་པོ་ལ་རྗེས་སུ་ཡི་རང་བར་མཛད་ཅིང་སྟན་
ལས་བཞེངས་ཏེ། དགེ་སློང་གི་དགེ་འདུན་འཁོར་དུ་བྱས་ནས་འོད་མའི་ཚལ་དུ་བྱོན་ནོ། །དེའི་ཚེ་དེའི་དུས་ན་ཤཱ་རིའི་བུ་དང་། མཽད་གལ་གྱི་བུ་ཀུན་དུ་རྒྱུ་གཉིས་པོ་རྒྱལ་པོའི་ཁབ་ལ་བརྟེན་ནས་གནས་ཤིང་བདུད་རྩི་ཚོལ་བར་སེམས་སོ། །དེའི་ནང་ནས་ཤཱ་རིའི་བུས་གནས་བརྟན་རྟ་ཐུལ་
བསོད་སྙོམས་ལ་ཞུགས་པ་མཐོང་བས་སེམས་རབ་ཏུ་དངས་པར་གྱུར་ཏེ་བཟའ་བ་བྱིན་ནས་ཆོས་རྣམས་གང་དག་རྒྱུ་ལས་བྱུང་བ་དང་ཞེས་པའི་ཚིགས་བཅད་ཐོས་པས་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །རང་གི་གྲོགས་པོ་ཀུན་དུ་རྒྱུ་མཽད་གལ་ལ་ཡང་ཚིགས་སུ་བཅད་པ་དེ་ཉིད་སྨྲས་སོ། །
དེས་ཀྱང་རྒྱུན་དུ་ཞུགས་པའི་འབྲས་བུ་ཐོབ་བོ། །དེ་གཉིས་ཀྱིས་ཀྱང་རང་ཉིད་རྒྱལ་བ་ལ་བལྟས་ནས་རང་གི་འཁོར་དང་བཅས་པ་སྟོན་པའི་དྲུང་དུ་རབ་ཏུ་བྱུང་ངོ་། །དེ་རྣམས་ལས་མཽད་གལ་གྱི་བུ་ཆེན་པོ་ཞག་བདུན་ནས་དགྲ་བཅོམ་པ་ཐོབ་བོ། །གནས་བརྟན་ཤཱ་རིའི་བུས་ཟླ་བ་ཕྱེད་ནས་དགྲ་
བཅོམ་པ་ཐོབ་སྟེ་དེ་གཉིས་པོ་ཡང་སྟོན་པའི་ཉན་ཐོས་ཀྱི་མཆོག་ཏུ་གནས་པར་བཟུང་ངོ་། །གནས་བརྟན་ཤཱ་རིའི་བུས་དགྲ་བཅོམ་པ་ཐོབ་པའི་ཉིན་མོ་ཉིད་བཅོམ་ལྡན་འདས་ཀྱི་ཉན་ཐོས་ཀྱི་འདུས་པ་དང་པོར་བྱས་སོ། །སླར་ཡང་དེ་བཞིན་གཤེགས་པས་འོད་མའི་ཚལ་དེ་ཉིད་དུ་བཞུགས་སོ། །དེའི་
ཚེ་རྒྱལ་པོ་ཆེན་པོ་ཟས་གཙང་གིས་བདག་གི་སྲས་ལོ་དྲུག་ཏུ་དཀའ་བ་སྤྱད་ནས་མཆོག་གི་ཡང་དག་པར་རྫོགས་པའི་བྱང་ཆུབ་སྟེ། ཆོས་ཀྱི་འཁོར་ལོ་བསྐོར་ནས་རྒྱལ་པོའི་ཁབ་ཀྱི་འོད་མའི་ཚལ་དུ་བཞུགས་སོ་ཞེས་པ་ཐོས་ནས་བློན་པོ་ཕན་ཚུན་རྣམས་བོས་ཏེ་འདིར་ཤོག་ཅིག་སྐྱེས་བུ་སྟོང་ཕྲག་
གཅིག་གིས་འཁོར་ཁྲིད་དེ་རྒྱལ་པོའི་ཁབ་ཏུ་སོང་ལ་ངའི་ཚིག་གིས་ཁྱེད་ཀྱི་ཡབ་རྒྱལ་པོ་ཟས་གཙང་ཁྱེད་བལྟ་བར་འདོད་ཅེས་བརྗོད་པས་བདག་གི་སྲས་ཁྲིད་ལ་ཤོག་ཅེས་སྨྲས་སོ། །བློན་པོས་ཀྱང་ལྷ་དེ་བཞིན་དུ་བགྱིའོ་ཞེས་རྒྱལ་པོའི་གསུང་སྤྱི་བོས་བླངས་ནས་སྐྱེས་བུ་སྟོང་ཕྲག་གཅིག་གི་འཁོར་

དེ་ཁྲིད་དེ་མྱུར་བ་ཉིད་དུ་དཔག་ཚད་དྲུག་ཅུའི་ལམ་དུ་སོང་ནས་སྟོབས་བཅུ་པ་འཁོར་བཞིའི་ནང་དུ་བཞུགས་ནས་ཆོས་སྟོན་པའི་དུས་སུ་གཙུག་ལག་ཁང་དུ་ཞུགས་སོ། །དེ་རྒྱལ་པོས་བཏང་བའི་དོན་རེ་ཞིག་བཞག་ནས་འཁོར་ཐམས་ཅད་ཀྱི་མཐར་འཁོད་དེ་སྟོན་པའི་ཆོས་བསྟན་པ་ཐོས་ནས་ཇི་ལྟར་འཁོད་
པ་ཉིད་བཞིན་དུ་སྐྱེས་བུ་སྟོང་ཕྲག་གཅིག་དང་ལྷན་ཅིག་ཏུ་དགྲ་བཅོམ་པ་ཐོབ་ནས་རབ་ཏུ་འབྱུང་བར་ཞུགས་སོ། །བཅོམ་ལྡན་འདས་ཀྱིས་བཙུན་པ་རྣམས་འདིར་ཤོག་ཅིག་ཅེས་ཕྱག་བརྐྱང་ངོ་། །ཐམས་ཅད་དེ་ཉིད་དུ་རྫུ་འཕྲུལ་ལས་བྱུང་བའི་ལྷུང་བཟེད་དང་ཆོས་གོས་གསུམ་བཟུང་ནས། ལོ་བརྒྱ་
ལོན་པའི་གནས་བརྟན་ལྟ་བུར་གྱུར་ཏོ། །དགྲ་བཅོམ་པ་ཐོབ་པའི་དུས་ནས་བཟུང་སྟེ། སླར་ཡང་འཕགས་པ་ཞེས་བྱ་བ་རེ་ཞིག་བར་མར་གནས་པར་གྱུར་ཏོ། །རྒྱལ་པོས་བཏང་བའི་སྤྲིང་ཡིག་སྟོབས་བཅུ་པ་ལ་མ་བརྗོད་དོ། །རྒྱལ་པོས་བཏང་བའི་མི་རྣམས་ལས་གཅིག་ཀྱང་མ་བྱུང་
ཞིང་སྤྲིང་ཡིག་ཀྱང་མ་ཐོས་སོ། །འདིར་ཤོག་ལ་ཁྱེད་སོང་ཞིག་དང་དེ་ལྟ་བུའི་ངེས་པས་བློན་པོ་གཞན་གཅིག་བཏང་ངོ་། །དེས་སོང་ནས་ཡང་སྔར་བཞིན་དུ་འཁོར་དང་བཅས་པ་དགྲ་བཅོམ་པ་ཐོབ་ནས་ཅང་མི་གསུང་བར་གནས་སོ། །རྒྱལ་པོས་དེ་ལྟ་བུར་ངེས་པས་སྐྱེས་བུ་སྟོང་ཕྲག་རེ་རེའི་
འཁོར་དང་བཅས་པའི་བློན་པོ་དགུ་བཏང་ངོ་། །ཐམས་ཅད་རང་གི་དོན་རྫོགས་པར་བྱས་ནས་ཅང་མི་སྨྲ་བར་གྱུར་ཏེ་དེ་ཉིད་དུ་གནས་སོ། །རྒྱལ་པོས་སྤྲིང་ཡིག་ཙམ་གྱི་ལོ་རྒྱུས་ཀྱང་མ་ཐོབ་པོ་ཞེས་བསམས་ནས་མི་འདི་རྣམས་ང་ལ་མི་དགའ་བའི་རྒྱུ་མཚན་གྱིས་སྤྲིང་ཡིག་ཙམ་གྱི་ལོ་རྒྱུས་ཀྱང་མི་
བརྗོད་དོ། །སུ་ཞིག་ངའི་ཚིག་བཞིན་བྱེད་པར་སེམས། རྒྱལ་པོས་མི་ཐམས་ཅད་ལ་བརྟགས་པས་ནག་པོ་འཆར་ཀ་མཐོང་ངོ་། །དེ་ཡང་རྒྱལ་པོའི་དོན་ཐམས་ཅད་སྒྲུབ་པར་བྱེད་པའི་བློན་པོ་ཡིན་ནོ་ནང་མི་ཡིན་ནོ། །ཤིན་ཏུ་ཐུགས་ཆེས་པ་ཡིན་ནོ། །དེ་བཞིན་གཤེགས་པ་དང་
ལྷན་ཅིག་ལ་ཉིན་གཅིག་ཏུ་སྐྱེས་པ་ཡིན་ནོ། །དེ་དང་ལྷན་ཅིག་ཏུ་བརྩེ་བའི་གྲོགས་པོ་ཡིན་ནོ། །དེ་ནས་བློན་པོ་རྒྱལ་པོས་བོས་ཏེ། བུ་ནག་པོ་འཆར་ཀ་བདག་གི་སྲས་བལྟ་བར་འདོད་པས་སྐྱེས་བུ་སྟོང་ཕྲག་དགུ་བཏང་སྟེ་མི་གཅིག་ཀྱང་མ་འོངས་ནས་སྤྲིང་ཡིག་ཙམ་གྱི་ལོ་རྒྱུས་ཅི་

ཡང་མ་བྱུང་། སླར་ཡང་ཐམས་ཅད་ནད་ཀྱིས་ཐེབས་པ་ཡིན་ནམ་ཚེའི་བར་ཆད་དུ་གྱུར་པ་ཡིན་ནམ། བདག་འཚོ་བ་ཉིད་ཀྱི་བར་དུ་སྲས་པོ་བལྟ་བར་འདོད་དེ་བདག་གི་བུ་བལྟ་བར་ནུས་སམ་ཞེས་སྨྲས་སོ། །ལྷ་ནུས་ལགས་སོ། །གལ་ཏེ་རབ་ཏུ་ཕྱུང་ཡང་བལྟ་བར་
ནུས་སོ། །བུ་ཁྱོད་རབ་ཏུ་བྱུང་བའམ་མ་བྱུང་ཡང་། ང་སྲས་པོ་བལྟའོ་ཞེས་སྨྲས་སོ། །དེས་ལྷ་ལེགས་སོ་ཞེས་རྒྱལ་པོའི་གསུང་བླངས་ནས་རྒྱལ་པོའི་ཁབ་ཏུ་སོང་སྟེ། སྟོན་པ་ཆོས་སྟོན་པའི་དུས་སུ་འཁོར་རྣམས་ཀྱི་མཐར་འཁོད་དེ་ཆོས་ཐོས་ནས་འཁོར་དང་བཅས་པ་དགྲ་བཅོམ་པའི་འབྲས་
བུ་ཐོབ་པར་གྱུར་ཏེ་དགེ་སློང་གི་དངོས་པོར་སོ་སོར་གནས་སོ། །སྟོན་པ་སངས་རྒྱས་སུ་གྱུར་ནས་དང་པོའི་ལོ་ལ་དྲང་སྲོང་ལྷུང་བའི་གནས་སུ་དབྱར་བཞུགས་ཏེ། དགག་དབྱེ་བྱས་ནས་ལྟེང་རྒྱས་སུ་གཤེགས་ཤིང་དེར་ཟླ་བ་གསུམ་བཞུགས་ཏེ། རལ་པ་ཅན་སྤུན་རྣམས་བཏུལ་ནས་དགེ་སློང་སྟོང་ཕྲག་
གཅིག་གི་འཁོར་དང་བཅས་པ་དགུན་ཟླ་འབྲིང་པོའི་ཉ་ལ་རྒྱལ་པོའི་ཁབ་ཏུ་གཤེགས་ནས་ཟླ་བ་གཉིས་བཞུགས་སོ། །དེ་རྣམས་ནི་གྲོང་ཁྱེར་བཱ་རཱ་ཎ་སཱི་ནས་འོངས་པའི་བར་ཏེ། ཟླ་བ་ལྔ་སོང་ཞིང་དགུན་གྱི་དུས་ཐམས་ཅད་འདས་སོ། །གནས་བརྟན་འཆར་ཀ་འོངས་ནས་ཞག་བདུན་དང་བརྒྱད་སོང་
ངོ་། །དེས་དཔྱིད་ཟླ་ར་བའི་ཉ་ལ་བསམས་པ། དགུན་གྱི་དུས་འདས་ནས་དཔྱིད་ཀའི་དུས་སུ་སླེབ་པ་དང་། མི་རྣམས་ཀྱིས་འབྲུ་རྣམས་བླངས་ཏེ། ཕྱོགས་ཕྱོགས་ནས་ལམ་དུ་བྱུང་བས་རྩྭ་རྣམས་ལྗང་གུར་གྱུར་ཏོ། །ས་གཞི་དང་ནགས་ཚལ་གྱི་ཤིང་ལ་སོགས་པ་མེ་ཏོག་ཤིན་ཏུ་མང་
བ་ཁ་བྱེ་བ་ནི་ལམ་དུ་འགྲོ་བའི་དུས་སོ། །སྟོབས་བཅུ་པའི་ཉེ་དུ་དང་ཕྲད་པར་བྱེད་པའི་ལམ་དུ་འགྲོ་བའི་དུས་ཡིན་ནོ། །དེ་ནས་བཅོམ་ལྡན་འདས་ཀྱི་དྲུང་དུ་ཉེ་བར་སོང་ནས། བཙུན་པ་ལྗོན་ཤིང་དེ་ནི་ལྗང་གུར་གྱུར། །ཤིང་གི་ལོ་མ་ས་ལ་དུད་པ་དང་། །དེ་རྣམས་བར་ནས་འོད་ཟེར་འགྱེད་
པ་ཡིན། །དཔའ་བོ་ཆེན་པོ་གཉེན་གནས་གཤེགས་པའི་དུས། །ཧ་ཅང་མི་དྲོ་མི་གྲང་ཞིང་། །མུ་གེ་དང་ནི་བཀྲེས་པ་མེད། །ས་སྟེང་ཤིང་རྣམས་ལྗང་གུར་གྱུར། །ཐུབ་པ་ཆེན་པོ་དུས་འདིར་གྱུར། །ཚིགས་སུ་བཅད་པ་དྲུག་ཅུ་ཙམ་གྱིས་སྟོབས་བཅུ་པ་ལ་རིགས་ཀྱི་གྲོང་ཁྱེར་དུ་

གཤེགས་པའི་ཕྱིར་བསྔགས་པར་འོས་པའི་བསྔགས་པ་བརྗོད་པའོ། །དེ་ནས་སྟོན་པ་ལ་འཆར་ཀས་དབྱངས་སྙན་པོས་གཤེགས་པའི་བསྔགས་པར་འོས་པའི་བསྔགས་པ་གསུངས་སོ། །བཙུན་པ་ཁྱེད་ཀྱི་ཡབ་རྒྱལ་པོ་ཆེན་པོ་ཟས་གཙང་བལྟ་བར་འདོད་པས་ཉེ་དུ་རྣམས་རྗེས་སུ་འཛིན་པར་ཞུ།
ལེགས་སོ་འཆར་ཀ་ཉེ་དུ་རྣམས་རྗེས་སུ་གཟུང་བར་བགྱིའོ། །ཞེས་དགེ་སློང་གི་དགེ་འདུན་ལ་སྨྲོས་ཤིག། །གཤེགས་པའི་གནས་ཐམས་ཅད་ལ་བྱི་དོར་གྱིས་ཤིག་ཅེས་སྨྲོས་ཤིག །བཙུན་པ་ལེགས་སོ་ཞེས་གནས་བརྟན་སོང་ནས་སྨྲས་སོ། །བཅོམ་ལྡན་འདས་ཀྱིས་ཡུལ་ཨོཾ་གྷ་དང་མ་
ག་དྷཱ་ན་གནས་པའི་རིགས་ཀྱི་བུ་རྣམས་སྟོང་ཕྲག་བཅུ་དང་བཅས་པ་གྲོང་ཁྱེར་སེར་སྐྱའི་གཞི་ན་གནས་པའི་སྟོང་ཕྲག་བཅུ་པོ་ཐམས་ཅད་ཟག་པ་ཟད་པའི་དགེ་སློང་འཁོར་དུ་བྱས་ནས་རྒྱལ་པོའི་ཁབ་ནས་ཕྱི་རོལ་དུ་འཐོན་ཏེ། ཉི་མ་རེ་རེ་ལ་དཔག་ཚད་རེ་རེ་བགྲོད་ཅིང་རྒྱལ་པོའི་ཁབ་ནས་དཔག་
ཚད་དྲུག་ཅུའི་གྲོང་ཁྱེར་སེར་སྐྱའི་གཞིར་ཟླ་བ་གཉིས་ཀྱིས་སླེབ་པར་དགོངས་ཤིང་བུལ་བ་ཡང་མ་ཡིན་མྱུར་བ་ཡང་མ་ཡིན་པར་འབྲིང་པོར་གཤེགས་སོ། །གནས་བརྟན་གྱིས་ཀྱང་བཅོམ་ལྡན་འདས་བྱོན་ནོ་ཞེས་རྒྱལ་པོའི་དྲུང་དུ་སྨྲའོ་ཞེས་བསམས་ནས་ནམ་མཁའ་ལ་སོང་སྟེ་རྒྱལ་པོའི་གནས་
སུ་སླེབ་པར་གྱུར་ཏོ། །རྒྱལ་པོས་གནས་བརྟན་གཟིགས་ནས་ཐུགས་ཚིམ་པར་གྱུར་ཏེ། གདན་བཤམས་པ་ལ་བཞུགས་སུ་བཅུག་གོ། །རང་ལ་བྱེད་པ་བཞིན་བཅོས་ནས་རོ་སྣ་ཚོགས་པའི་བཟའ་བས་ལྷུང་བཟེད་བཀང་ནས་ཕུལ་ལོ། །གནས་བརྟན་ལངས་ནས་འགྲོ་བར་བསམས་
པ་དང་། བུ་བཞུགས་ལ་གསོལ་ཅིག །རྒྱལ་པོ་ཆེན་པོ་སྟོན་པ་དང་ཉེ་བར་སོང་སྟེ་བཟའོ། །སླར་ཡང་བུ་སྟོན་པ་ག་ན་ཡོད། སྟོང་ཕྲག་ཉི་ཤུའི་དགེ་སློང་འཁོར་དུ་བྱས་ནས་རྒྱལ་པོ་ཆེན་པོ་ཉིད་བལྟ་བའི་ཕྱིར་བྱོན་ནོ། །རྒྱལ་པོ་ཐུགས་ཚིམ་པར་གྱུར་ནས་སྨྲས་པ། ཁྱེད་འདི་གསོལ་ལ་
བདག་གི་སྲས་གྲོང་ཁྱེར་འདིར་མ་བྱོན་གྱི་བར་ལ་འདི་ཉིད་ནས་ལྷུང་བཟེད་དུ་བཟའ་བ་ཁྱེར་ལ་སོང་ཅིག་ཅེས་སྨྲས་སོ། །གནས་བརྟན་གྱིས་རྒྱལ་པོའི་གསུང་མཉན་ཏེ་རྒྱལ་པོས་གནས་བརྟན་གྱི་བཟའ་བ་གསོལ་ཟིན་པ་དང་ལྷུང་བཟེད་བཀྲུས་ནས། དྲི་བཟང་པོའི་ཕྱེ་མས་བྱུགས་ཏེ་བཟའ་བ་མཆོག་

གིས་གང་བར་བྱས་ནས་དེ་བཞིན་གཤེགས་པ་ལ་ཕུལ་ཅིག་ཞེས་སྨྲས་ནས་གནས་བརྟན་གྱི་ལག་པར་བྱིན་ནོ། །གནས་བརྟན་མི་ཐམས་ཅད་ཀྱིས་མཐོང་བ་དང་ལྷུང་བཟེད་ནམ་མཁའ་ལ་འཕངས་སོ། །རང་ཉིད་ཀྱང་ནམ་མཁའ་ལ་གཤེགས་ནས་བཟའ་བའི་ལྷུང་བཟེད་བཟུང་
སྟེ། སྟོན་པའི་ཕྱག་ཏུ་ཕུལ་ནས་སྟོན་པས་ཀྱང་དེར་བཟའ་བ་ལ་ལོངས་སྤྱོད་དོ། །གནས་བརྟན་ཐབས་འདིའི་ཉི་མ་རེ་རེ་བཞིན་དུ་བཟའ་བ་ཕུལ་ལོ། །སྟོན་པས་ཀྱང་ལམ་གྱི་བར་དུ་རྒྱལ་པོ་ཉིད་ཀྱི་གདུགས་ཚོད་ལ་ལོངས་སྤྱོད་དོ། །གནས་བརྟན་གྱིས་ཀྱང་གདུགས་ཚོད་ལ་ལོངས་སྤྱོད་པའི་
མཐར་ཉི་མ་རེ་རེ་བཞིན་དུ་དེ་རིང་འདི་ཙམ་ནས་བཅོམ་ལྡན་འདས་བྱོན་ནོ། །དེ་རིང་འདི་ཙམ་དུ་བཅོམ་ལྡན་འདས་བྱོན་ཞེས་པ་དང་། སངས་རྒྱས་ཀྱི་ཡོན་ཏན་ཡང་དག་པར་ལྡན་པ་ཉིད་བརྗོད་ཅིང་རྒྱལ་རིས་ཐམས་ཅད་སྟོན་པ་མ་མཐོང་བ་ཉིད་ཀྱིས་སྟོན་པའི་དྲུང་དུ་རང་ཉིད་ཀྱི་སེམས་དངས་པར་མཛད་དོ། །
དེའི་རྒྱུ་མཚན་གྱིས་གནས་བརྟན་ལ་བཅོམ་ལྡན་འདས་ཀྱིས་དགེ་སློང་དག་བདག་གི་ཉན་ཐོས་ཀྱི་ནང་ནས་རིགས་དད་པར་བྱེད་པ་རྣམས་ཀྱི་མཆོག་གང་ཡིན་ན་འདི་ནི་འཆར་ཀ་ཞེས་པའོ། །འདི་མཆོག་ཏུ་བཟུང་བས་ཤཱཀྱ་བ་རྣམས་ཀྱིས་ཀྱང་བཅོམ་ལྡན་འདས་རྗེས་སུ་བྱོན་པའི་སྔུན་ལ་བདག་ཅག་གི་
ཉེ་དུའི་གཙོ་བོ་བལྟའོ་ཞེས་འདུས་ནས་བཅོམ་ལྡན་འདས་བཞུགས་པའི་གནས་རྟོག་ཅིང་ཤཱཀྱ་ནྱ་གྲོ་དྷའི་ཀུན་དགའ་ར་བ་ཡིད་དུ་འོང་བ་སྟ་གོན་བྱས་སོ། །དེར་ཐམས་ཅད་ཉེར་བསྡོགས་བྱས་ནས་སྤོས་དང་མེ་ཏོག་སོ་སོ་ལག་ཏུ་ཐོགས་ཏེ། བསུ་བ་བྱེད་ཅིང་རྒྱན་ཐམས་ཅད་ཀྱིས་སོ་སོར་བརྒྱན་ནས་
གཞོན་ནུ་དང་གཞོན་ནུ་མ་གྲོང་ཁྱེར་གྱི་ཁྱེའུ་དང་བུ་མོ་སྔར་དང་པོར་བཏང་བ་རྣམས་དང་། དེ་ནས་རྒྱལ་པོའི་གཞོན་ནུ་དང་གཞོན་ནུ་མ་དག་དེ་རྣམས་ཀྱི་བར་རང་རང་གིས་སྤོས་དང་མེ་ཏོག་དང་ཕྱེ་མ་ལ་སོགས་པས་མཆོད་པ་བྱེད་ཅིང་། བཅོམ་ལྡན་འདས་ཀྱིས་བཞེས་ནས་ནྱ་གྲོ་དྷའི་ཀུན་དགའ་ར་བ་
ཉིད་དུ་བྱོན་ནོ། །དེར་བཅོམ་ལྡན་འདས་ཀྱིས་སྟོང་ཕྲག་ཉི་ཤུའི་ཟག་པ་ཟད་པའི་དགེ་སློང་འཁོར་དུ་བྱས་ནས་གདན་བཤམས་པ་མཆོག་ལ་སངས་རྒྱས་བཞུགས་སོ། །ཤཱཀྱའི་རིགས་ནི་ང་རྒྱལ་དང་ལྡན་པ་ཡིན། སེམས་རྩུབ་པ་ཡིན་པས་འདི་ནི་དོན་གྲུབ་གཞོན་ནུ་ངེད་དང་ལྷན་ཅིག་གཞོན་ནུ་

ཡིན་ནོ། །ངེད་ནི་ཕུ་བོ་ཡིན་ནོ། །འདི་ནི་སྲིང་མོའི་བུ་ཡིན་ནོ། །འདི་ནི་ཚ་བོ་ཡིན་ནོ་ཞེས་བསམས་ནས་ཁྱེའུ་དང་རྒྱལ་པོའི་གཞོན་ནུ་ཞེས་སྨྲས་ཏེ། ཁྱེད་ཀྱི་ཕྱག་གིས་བདག་ཁྱེད་ཀྱི་རྒྱབ་ཏུ་སྡོད་དོ་ཞེས་བསམས་སོ། །དེ་རྣམས་དེ་བཞིན་དུ་གནས་ནས། བཅོམ་ལྡན་འདས་ཀྱིས་དེ་རྣམས་
ཀྱི་བསམ་པ་གཟིགས་ནས་གཉེན་རྣམས་བདག་ལ་ཕྱག་མི་བྱེད་པར་འདོད་ཀྱང་ད་ལྟ་ཕྱག་བྱེད་དུ་གཞུག་དགོས་ཏེ། མངོན་པར་ཤེས་པའི་གཞི་དང་ཡེ་ཤེས་དང་བསམ་གཏན་དང་སྙོམས་པར་འཇུག་པ་བསྐྱེད་དགོས་སོ་སྙམ་སྟེ། བཞེངས་ནས་ནམ་མཁའ་ལ་གཤེགས་སོ། །དེ་
རྣམས་ཀྱི་མགོ་ལ་ཞབས་ཀྱི་རྡུལ་ལྷུང་བ་བཞིན་དུ་ཨ་མྲ་སྲུང་བའི་ཨ་མྲའི་ཤིང་གི་དྲུང་དུ་སོ་སོའི་ཆོ་འཕྲུལ་དང་མཚུངས་པར་ཆོ་འཕྲུལ་མཛད་དོ། །རྒྱལ་པོས་དེའི་ཡ་མཚན་ཆེ་བ་མཐོང་ངོ་ཞེས་སྨྲས་སོ། །བཅོམ་ལྡན་འདས་ཁྱེད་འཁྲུངས་པའི་ཉིན་མོ་དཀའ་ཐུབ་པ་ནག་པོ་ལྷ་ལེན་
གྱིས་ཕྱག་བྱེད་ཅིང་ཉེ་བར་གནས་པས་ཁྱེད་ཀྱིས་ཞབས་བསྐྱོད་པ་བྲམ་ཟེའི་སྤྱི་བོ་ལ་ཉེ་བར་གནས་སོ། །དེ་མཐོང་ནས་བདག་གིས་ཀྱང་ཁྱེད་ལ་ཕྱག་བྱས་སོ། །འདི་ནི་བདག་གི་ཕྱག་དང་པོ་ཡིན་ནོ། །བཀྲ་ཤིས་པའི་འབྲུ་འདེབས་པའི་ཉིན་མོ་འཛམ་བུའི་ཤིང་གི་གྲིབ་མའི་དཔལ་
གྱི་མལ་སྟན་ལ་ཁྱེད་བཞུགས་པ་ན་ཤིང་འཛམ་བུའི་གྲིབ་མས་མ་བཏང་བར་མཐོང་བའི་ཚེ་ཡང་ཞབས་ལ་ཕྱག་བྱས་སོ། །འདི་ནི་བདག་གི་ཕྱག་གཉིས་པ་ཡིན་ནོ། །ད་ལྟ་ནི་བདག་གིས་སྔར་མ་མཐོང་བའི་ཆོ་འཕྲུལ་ཡང་མཐོང་བས་ཁྱེད་ཀྱི་ཞབས་ལ་ཕྱག་བགྱིད་དོ། །འདི་ནི་བདག་
གི་ཕྱག་གསུམ་པ་ཡིན་ནོ། །སླར་ཡང་རྒྱལ་པོས་བཅོམ་ལྡན་འདས་ལ་ཕྱག་བྱེད་ཅིང་ཕྱག་བྱེད་པར་མི་ནུས་པའི་ཤཱཀྱའི་རིགས་གཅིག་ཀྱང་མེད་དོ། །ཐམས་ཅད་ཀྱིས་ཀྱང་ཕྱག་བྱེད་པ་ཉིད་དོ། །དེ་ནས་བཅོམ་ལྡན་འདས་ལ་ཉེ་དུ་རྣམས་ཀྱིས་ཕྱག་བྱེད་ཅིང་ནམ་མཁའ་ལས་བབས་ནས་
གདན་བཤམས་པའི་མཆོག་གི་གུང་ལ་བཞུགས་སོ། །བཅོམ་ལྡན་འདས་བཞུགས་ནས་ཉེ་དུ་རྣམས་དང་འདུས་པར་གྱུར་པ་ལ་ཐམས་ཅད་སེམས་གཅིག་ཏུ་གནས་སོ། །དེ་ནས་སྤྲིན་ཆེན་པོ་ལས་པད་མའི་འདབ་མ་ལ་ཆུ་མི་འཆགས་པ་ལྟ་བུའི་ཆར་འབེབས་སོ། །ཆུ་ཟངས་ཀྱི་མདོག་

ཅན་ས་ལ་སྒྲ་སྒྲོགས་ཤིང་འབབ་བོ། །འབང་བར་འདོད་པ་རྣམས་འབང་ངོ་། །འབང་བར་མི་འདོད་པ་རྣམས་མི་འབང་ངོ་། །ཐིགས་པ་ཙམ་ཡང་མི་ལྟུང་ངོ་། །དེ་མཐོང་ནས་ཐམས་ཅད་དུ་ཡ་མཚན་པ་དང་རྨད་དུ་བྱུང་བ་སྐྱེས་སོ། །ཨེ་མ་ཧོ་ངོ་མཚར་ཆེ། ཨེ་མ་ཧོ་རྨད་
དུ་བྱུང་ངོ་ཞེས་རྗོད་པར་བྱེད་དོ། །སྟོན་པས་འདི་ཁོ་ནམ་ཡིན་གྱི་བདག་གི་ཉེ་དུ་དང་ཕྲད་པ་ན་པད་མའི་འདབ་མ་ལ་ཆུ་མི་འཆགས་པ་ལྟ་བུའི་ཆར་འབེབས་ཤིང་འདས་པའི་དུས་སུའང་ངས་ཕབ་བོ། །འདིའི་དོན་བྱུང་བ་ནི་ཐམས་ཅད་སྒྲ་ལ་གྱི་སྐྱེས་རབས་སུ་བཤད་དོ། །ཆོས་བསྟན་པ་ཐོས་ནས་
ཐམས་ཅད་ལངས་ཏེ་ཕྱག་བྱས་ནས་སོང་ངོ་། །གཅིག་གིས་ཀྱང་རྒྱལ་པོ་དང་རྒྱལ་ཚབ་དང་བློན་པོ་རྣམས་སང་བདག་གི་གནས་སུ་བསོད་སྙོམས་ཁྱེར་འོང་ངོ་ཞེས་སྨྲ་བ་སོང་བ་དེ་རྣམས་ལས་གཅིག་ཀྱང་མ་བྱུང་ངོ་། །སྟོན་པས་སླར་ཉི་མ་གཉིས་པ་ལ་སྟོང་ཕྲག་ཉི་ཤུའི་དགེ་སློང་འཁོར་དུ་བྱས་
ནས་གྲོང་ཁྱེར་སེར་སྐྱའི་གཞིར་བསོད་སྙོམས་ལ་བཞུད་དོ། །གང་ཞིག་མགྲོན་དུ་གཉེར་བ་དང་། ལྷུང་བཟེད་ཁྱེར་བ་སུ་ཡང་མེད་དོ། །བཅོམ་ལྡན་འདས་སྒོ་དྲུང་དུ་འཁོད་དེ་རྣམ་པར་བརྟགས་པས་ཇི་ལྟར་སྔོན་གྱི་སངས་རྒྱས་རྣམས་ཀྱི་རིགས་ཀྱི་གྲོང་ཁྱེར་དུ་བྱོན་ནས་བསོད་སྙོམས་མཛད་པ་
བཞིན་དུ་གང་ཇི་ལྟར་རིགས་པར་མི་ཆེན་པོའི་ཁྱིམ་དུ་འགྲོ་ཞིང་ཡང་ན་གོ་རིམས་བཞིན་དུ་བསོད་སྙོམས་སྤྱོད་དོ། །དེ་ནས་སངས་རྒྱས་གཅིག་གིས་ཀྱང་ཇི་ལྟར་རིགས་པར་གཤེགས་པ་མ་མཐོང་བས་བདག་གིས་ཀྱང་ང་ནི་འདིའི་རིགས་སོ། །འདི་སྔོན་གྱི་སངས་རྒྱས་ཀྱི་རིགས་བཞིན་དུ་
བདག་གིས་ཀྱང་རིགས་པར་གཟུང་བར་བྱའོ། །བདག་གི་ཉན་ཐོས་ཀྱང་བདག་ཉིད་བཞིན་རྗེས་སུ་སློབ་ཅིང་བསོད་སྙོམས་ལ་རྫོགས་པར་བྱོན་ནོ། །འཁོད་པའི་ཁྱིམ་ནས་བཟུང་ནས་གོ་རིམས་བཞིན་དུ་བསོད་སྙོམས་ལ་སྤྱོད་དོ། །འཕགས་པ་གཞོན་ནུ་དོན་གྲུབ་བསོད་སྙོམས་ལ་གཤེགས་
སོ་ཞེས་བརྗོད་དོ། །ཉིས་ཐོག་དང་སུམ་ཐོག་ལ་སོགས་པའི་ཁང་བཟངས་རྣམས་སུ་སྟེང་གི་སྒོ་ཆུང་ཕྱེ་ནས་མི་ཐམས་ཅད་བལྟ་བར་གྱུར་ཏེ་ལྷ་མོ་སྒྲ་གཅན་འཛིན་གྱི་ཡུམ་ཡང་འཕགས་པའི་བུ་གྲོང་ཁྱེར་འདི་ཉིད་དུ་རྒྱལ་པོ་ཆེན་པོའི་མཐུས་གསེར་གྱི་དོ་ལི་ལ་སོགས་པ་ལ་ཞོན་ཏེ་དེ་རིང་ནས་སྐྲ་དང་ཁ་སྤུ་

བྲེགས་ཤིང་ངུར་སྨྲིག་གི་གོས་གྱོན་ནས་སྣོད་ལག་ཏུ་ཁྱེར་ཏེ། བསོད་སྙོམས་ལ་འགྲོ་བ་མཛེས་སམ་མི་མཛེས་ཞེས་སྟེང་གི་སྒོ་ཆུང་ཕྱེ་ནས་བལྟའོ། །སྣ་ཚོགས་པའི་འདོད་ཆགས་དང་བྲལ་བ་ཡང་དག་པར་འབར་ཞིང་སྐུ་ལུས་ཀྱི་འོད་ཀྱིས་གྲོང་ཁྱེར་གྱི་སྟེང་ཐམས་ཅད་སྣང་བར་མཛད་དེ། འདོམ་གང་
བའི་འོད་ཀུན་ནས་བསྐོར་ཞིང་རབ་ཏུ་གསལ་བ་དཔེ་བྱད་བཟང་པོ་བརྒྱད་ཅུ་དང་ལྡན་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ་སངས་རྒྱས་ཀྱི་དཔལ་དཔེ་མེད་པར་རྣམ་པར་གསལ་བ་མཐོང་ངོ་། །གཙུག་ཏོར་ནས་བཟུང་ནས་ཞབས་ཀྱི་མཐིལ་གྱི་བར་དེ་སྲིད་དོ། །དབུ་སྐྲ་གཡས་
འཁྱིལ་འཇམ་གནག་སྣུམ་པ་དང་། དཔྲལ་བ་དྲི་མེད་ཉི་མའི་མཐིལ་བཞིན་ནོ། །སྐུ་དང་འཚམ་པའི་ཤངས་ནི་མཐོ་བ་དང་། །མི་ཡི་སེང་གེ་འོད་ཟེར་གསལ་བར་མཛད། །འདི་ལྟ་བུ་ལ་སོགས་པའི་མིའི་སེང་གེ་ལ་ཚིགས་སུ་བཅད་པས་མངོན་པར་བསྟོད་དོ། །ཁྱེད་ཀྱི་སྲས་པོ་བསོད་
སྙོམས་ལ་སྤྱོད་དོ་ཞེས་རྒྱལ་པོ་ལ་སྨྲས་སོ། །རྒྱལ་པོའི་སེམས་སྡུག་བསྔལ་བས་གོས་ནས་བཟུང་སྟེ་མྱུར་ཞིང་མྱུར་བར་ཕྱིར་འཐོན་ཏ་བཅོམ་ལྡན་འདས་ཀྱི་དྲུང་དུ་འཁོད་ནས་སྨྲས་པ་ཅི་བཙུན་པ་བདག་ཅག་ངོ་ཚ་བས་ཅིའི་དོན་དུ་བསོད་སྙོམས་མཛད། དགེ་སློང་འདི་རྣམས་ཀྱི་བཟའ་བ་བདག་གིས་སྟེར་
བར་མི་ཤེས་བསམས་པ་ཡིན་ནམ་ཅི་ལགས། རྒྱལ་པོ་ཆེན་པོའི་རིགས་ཀྱི་སྤྱོད་པ་ཡིན་ནོ། །བཙུན་པ་བདག་ཅག་ཤཱཀྱའི་རིགས་ཞེས་བྱ་བའི་རིགས་སོ། །དེ་ལ་རྒྱལ་རིགས་གཅིག་ཀྱང་བསོད་སྙོམས་བྱེད་པའི་མིང་ཙམ་ཡང་མེད་དོ། །རྒྱལ་པོ་ཆེན་པོའི་རིགས་ཞེས་བྱ་བ་ནི་ཁྱོད་ཀྱི་
རིགས་འདི་ཡིན་ནོ། །བཀའ་སྩལ་པ། རྒྱལ་པོ་ཆེན་པོ་མི་དགྱེས་པ་མ་མཛད་ཅིག །སླར་ཡང་བདག་ཅག་གི་མར་མེ་མཛད་དང་ཀཽཌི་ནྱ་དང་འོད་སྲུང་ཞེས་བྱ་བ་འདི་སངས་རྒྱས་ཀྱི་རིགས་ཡིན་ནོ། །འདི་རྣམས་དང་གཞན་སངས་རྒྱས་སྟོང་ཕྲག་དུ་མས་ཀྱང་བསོད་སྙོམས་སྤྱོད་ཅིང་འཚོ་བར་
མཛད་ལ། སྲང་གི་དབུས་སུ་འཁོད་པ་ཉིད་དོ། །བག་མེད་ལྷག་མར་བྱེད་པ་མེད། །ཆོས་ལ་སྤྱོད་ཅིང་ལེགས་པར་སྤྱོད། །ཆོས་ལ་སྤྱད་ན་བདེ་བ་འབྱུང་། །འཇིག་རྟེན་འདི་དང་ཕྱི་མར་བ་དེ། །ཆོས་ཀྱི་རྐང་པའི་ཚིགས་སུ་བཅད་པ་འདི་བསྟན་ཅིང་བཤད་དོ། །ཚིགས་སུ་བཅད་

པའི་མཐར་རྒྱལ་པོས་རྒྱུན་དུ་ཞུགས་པའི་འབྲས་བུ་ཐོབ་བོ། །ཆོས་སྤྱོད་པ་ནི་ལེགས་པར་སྤྱོད། །ཉེས་པར་སྤྱོད་པ་མི་བྱ་ཞིང་། །ཆོས་སྤྱད་པ་ཡིས་བདེ་བ་འབྱུང་། །འཇིག་རྟེན་འདི་དང་ཕ་རོལ་དུའོ། །སླར་ཡང་ཆོས་ཀྱི་རྐང་པའི་ཚིགས་སུ་བཅད་པ་འདི་ཐོས་ནས་
ལན་ཅིག་ཕྱིར་འོང་གི་འབྲས་བུ་ཐོབ་པར་གྱུར་ཏོ། །ཆོས་སྐྱོང་བའི་སྐྱེས་རབས་ཐོས་ནས་ཕྱིར་མི་འོང་བའི་འབྲས་བུ་ཐོབ་པར་གྱུར་ཏོ། །འཆི་བའི་དུས་སུ་གདུགས་དཀར་པོའི་འོག་ཏུ་དཔལ་གྱི་མལ་སྟན་གྱི་སྟེང་དུ་གཟིམས་པ་ཉིད་ན་དགྲ་བཅོམ་པ་ཐོབ་པར་གྱུར་ཏོ། །དགོན་པར་གནས་ནས་དཀའ་ཐུབ་སྤྱོད་
པ་རྒྱལ་པོ་ལ་དགོས་པ་མེད་དོ། །རྒྱུན་དུ་ཞུགས་པའི་འབྲས་བུ་མངོན་དུ་བྱས་ནས་སླར་ཡང་བཅོམ་ལྡན་འདས་ཀྱི་ལྷུང་བཟེད་བཟུང་སྟེ། འཁོར་དང་བཅས་པ་ཁང་བཟངས་ཆེན་པོའི་སྟེང་དུ་སྤྱན་དྲངས་ནས་གྱ་ནོམ་པའི་བཟའ་བ་དང་བཅའ་བ་རྣམས་དྲངས་སོ། །གདུགས་ཚོད་ཟིན་པའི་མཐར་སྒྲ་གཅན་འཛིན་
གྱི་མ་མ་གཏོགས་པའི་བཙུན་མོ་འཁོར་དང་བཅས་པ་ཐམས་ཅད་འོངས་ནས་བཅོམ་ལྡན་འདས་ལ་ཕྱག་བྱས་སོ། །གཞན་ཡང་དེས་འཁོར་གྱི་མི་རྣམས་ལ་འཕགས་པའི་བུ་ལ་ཕྱག་གྱིས་ཞེས་བརྗོད་ནས། གལ་ཏེ་ཁོ་མོ་ལ་ཡོན་ཏན་ཡོད་ན་འཕགས་པའི་བུ་རང་ཉིད་ཀྱི་གནས་སུ་འབྱོན་ནོ། །བྱོན་པ་
ཉིད་ན་དེ་ལ་ཕྱག་བྱེད་དོ་ཞེས་བརྗོད་ནས་མ་འོངས་སོ། །རྒྱལ་པོས་ལྷུང་བཟེད་བཟུང་ནས་བཅོམ་ལྡན་འདས་ཉན་ཐོས་མཆོག་གཉིས་དང་བཅས་པ་རྒྱལ་པོའི་བུ་མོའི་ཁང་བཟངས་སུ་གཤེགས་ཏེ། རྒྱལ་པོའི་བུ་མོ་རང་ཉིད་ཇི་ལྟར་མོས་པའི་ཕྱག་བྱེད་ཅིང་གཞན་དང་འགལ་བ་ཅུང་ཟད་ཀྱང་མ་བྱེད་ཅེས་
ནས་གདན་བཤམས་པ་མཆོག་གི་གུང་ལ་བཞུགས་སོ། །དེ་མྱུར་དུ་འོངས་ནས་བྱིན་པ་བཟུང་སྟེ། ཞབས་ཀྱི་སྟེང་དུ་མགོ་བོ་བཞག་ནས་ཇི་ལྟར་འདོད་པའི་ཕྱག་བྱས་སོ། །རྒྱལ་པོ་དང་རྒྱལ་པོའི་བུ་མོས་བཅོམ་ལྡན་འདས་ལ་དགའ་བ་མང་པོས་ཡོན་ཏན་ལ་སོགས་པས་ཡོན་ཏན་དང་ལྡན་པར་
བརྗོད་ནས། བཙུན་པ་བདག་གི་བུ་མོས་ཉིད་ཀྱིས་གོས་ངུར་སྨྲིག་གྱོན་པ་ཐོས་ནས། དེ་ནས་བཟུང་སྟེ་དེང་གི་བར་དུ་གོས་ངུར་སྨྲིག་གྱོན་ནོ། །ཉིད་ཀྱིས་གདུགས་ཚོད་ལན་ཅིག་གསོལ་བ་ཐོས་ནས་བུ་མོས་ཀྱང་བཟའ་བ་ལན་ཅིག་ཟོས་སོ། །ཉིད་ཀྱིས་མལ་སྟན་ཆེན་པོ་སྤངས་པ་ཐོས་ནས། ཉལ་ཁྲི་

ཆུང་བ་ལ་ཉལ་ལོ། །ཉིད་ཀྱིས་མེ་ཏོག་གི་ཕྲེང་བ་དང་སྤོས་ལ་སོགས་པ་ལ་སྲེད་པ་མེད་པ་ཐོས་ནས། མེ་ཏོག་གི་ཕྲེང་བ་དང་སྤོས་ལ་སོགས་པ་ལ་ཆགས་པ་མེད་པ་སྐྱེས་སོ། །རང་གི་ཉེ་དུ་རྣམས་བདག་གིས་གསོའོ་ཞེས་འཕྲིན་བསྐུར་ནས། གཉེན་གཅིག་ལ་ཡང་བལྟ་བ་མི་འདུག་གོ། །བཅོམ་ལྡན་
འདས་འདི་ལྟ་བུའི་ཡོན་ཏན་དང་ལྡན་པ་ནི་བདག་གི་བུ་མོ་ཡིན་ནོ་ཞེས་གསོལ་ཏོ། །རྒྱལ་པོ་ཆེན་པོ་ཡ་མཚན་མི་ཆེའོ། །འདི་ད་ལྟ་ཁྱེད་སྲུང་བར་བྱེད་པའི་རྒྱལ་པོའི་བུ་མོ་ཡེ་ཤེས་ཡོངས་སུ་མ་སྨིན་པ་རང་གིས་བསྲུང་ངོ་། །སྔར་བསྲུང་བ་མེད་ཅིང་རི་ལ་སོགས་པ་ལ་འགྲོ་བ་ན། ཡེ་ཤེས་ཡོངས་
སུ་མ་རྫོགས་པ་རང་གིས་བསྲུངས་སོ་ཞེས་གསུངས་ནས། མི་འམ་ཅི་ཟླ་བའི་སྐྱེས་རབས་གསུངས་ཏེ་སྟན་ལས་བཞེངས་ནས་གཤེགས་སོ། །ཉི་མ་གཉིས་པ་ལ་རྒྱལ་བུ་གཞོན་ནུ་དགའ་བོ་རྒྱལ་པོར་དབང་བསྐུར་བ་དང་། ཁང་པ་གསར་པའི་ནང་དུ་ཞུགས་ཏེ་བཀྲ་ཤིས་པའི་བག་མ་བླངས་ནས་
ཉེ་བར་གནས་སོ། །དེའི་ཁྱིམ་དུ་གཤེགས་ནས་གཞོན་ནུ་ལྷུང་བཟེད་ཟུང་ཤིག་ཅེས་རབ་ཏུ་དབྱུང་བར་དགོངས་ནས་བཀྲ་ཤིས་བརྗོད་དེ། གདན་ལ་བཞེངས་ནས་གཤེགས་སོ། །ལྗོངས་ཀྱི་དགེ་བའི་བུ་མོས་འགྲོ་བ་མཐོང་ངོ་། །འཕགས་པའི་བུ་མྱུར་དུ་ཤོག་ཅེས་བརྗོད་ནས་བལྟའོ། །
དེས་ཀྱང་བཅོམ་ལྡན་འདས་ཀྱི་ལྷུང་བཟེད་གཟུང་བར་མ་ནུས་ནས་གཙུག་ལག་ཁང་ཉིད་དུ་གཤེགས་སོ། །བཅོམ་ལྡན་འདས་དེ་ལ་འདོད་པ་མེད་པ་ཉིད་ཀྱིས་རབ་ཏུ་འབྱུང་བ་བྱེད་དོ། །འདི་ལྟར་བཅོམ་ལྡན་འདས་གྲོང་ཁྱེར་སེར་སྐྱར་གཤེགས་ཤིང་ཉི་མ་གསུམ་པ་ལ་དགའ་བོ་རབ་ཏུ་བྱུང་
བར་བྱས་སོ། །ཉི་མ་བདུན་པ་ལ་སྒྲ་གཅན་འཛིན་གྱི་མས་གཞོན་ནུ་རྒྱན་གྱིས་བརྒྱན་ནས། བཅོམ་ལྡན་འདས་ཀྱི་དྲུང་དུ་བཏང་ངོ་། །བུ་སྟོང་ཕྲག་ཉི་ཤུའི་དགེ་སློང་འཁོར་དང་བཅས་པ་འདི་རྣམས་ལྟོས། གསེར་གྱི་ཁ་དོག་ཅན་གྱི་ཚངས་པའི་གཟུགས་ཀྱི་མདོག་ཅན་དགེ་སྦྱོང་འདི་ནི་ཁྱེད་ཀྱི་
ཡབ་བོ། །འདི་ལ་གཏེར་ཆེན་པོ་ཡོད་ཅིང་དེ་འཐོན་པ་ནས་བཟུང་ནས་གཏེར་མཐོང་བ་མེད་དོ། །སོང་ལ་ནོར་སློངས་ཤིག །བདག་ཁྱེད་ཀྱི་བུ་གཞོན་ནུ་ཡིན་ནོ། །རྒྱལ་པོར་དབང་བསྐུར་བ་ཐོབ་ནས་འཁོར་ལོས་སྒྱུར་བ་ལ་དབང་བྱེད་པར་འགྱུར་རོ། །བདག་ལ་ནོར་གྱི་དོན་དུ་

ནོར་སྩལ་དུ་གསོལ། ཡབ་ཀྱི་ནོར་བུ་བདག་ཡིན་ནོ་ཞེས་གསོལ་ཅིག་ཅེས་སྨྲས་པ་དང་། གཞོན་ནུ་བཅོམ་ལྡན་འདས་དང་ཉེ་བར་སོང་སྟེ། ཡབ་ཀྱི་དྲུང་དུ་དགའ་བ་སྐྱེས་སོ། །སེམས་སྤྲོ་བར་གྱུར་ཏོ། །དགེ་སྦྱོང་དེས་ཁྱེད་ཀྱི་གྲིབ་མ་ནི་དེའོ་ཞེས་བརྗོད་ནས། གཞན་
ཡང་རང་གི་རིགས་པས་བརྗོད་ཅིང་འཁོད་དོ། །བཅོམ་ལྡན་འདས་གདུགས་ཚོད་ཀྱི་མཐར་རྗེས་སུ་ཡི་རང་བ་མཛད་ནས་གདན་ལས་བཞེངས་ཏེ་གཤེགས་སོ། །གཞོན་ནུས་བདག་ལ་དགེ་སློང་ནོར་སྩལ་དུ་གསོལ། བདག་ལ་དགེ་སློང་ནོར་སྩལ་དུ་གསོལ། བཅོམ་ལྡན་འདས་ཀྱི་རྗེས་སུ་འབྲངས་ནས།
བཅོམ་ལྡན་འདས་ཀྱིས་གཞོན་ནུ་ཕྱིར་ལོག་ལ་ངའི་རྗེས་སུ་མ་འགྲོ་ཞེས་པ་དང་། རྗེས་སུ་འབྲང་བ་རྣམས་ཀྱང་བཅོམ་ལྡན་འདས་དང་འགྲོགས་ནས་བྱོན་ཏེ་ལྡོག་པར་མ་ནུས་ནས། གཞོན་ནུ་བཅོམ་ལྡན་འདས་དང་ལྷན་ཅིག་ཀུན་དགའ་ར་བ་ཉིད་དུ་ཕྱིན་ནོ། །དེ་ནས་བཅོམ་ལྡན་འདས་ཀྱིས་བསམས་པ།
འདི་ཡབ་ཀྱི་ནོར་འདོད་ཅིང་འཇིག་རྟེན་པའི་ནོར་ནི་འཚེ་བ་དང་བཅས་པ་ཡིན། ད་ནི་གཞོན་ནུ་ལ་བྱང་ཆུབ་སྙིང་པོ་དེས་ཐོབ་པའི་འཕགས་པའི་ནོར་རྣམ་པ་བདུན་བྱིན་ན་འཇིག་རྟེན་ལས་འདས་པའི་ནོར་གྱི་བདག་པོ་བྱེད་པར་འགྱུར་བར་དགོངས་ནས། ཚེ་དང་ལྡན་པ་ཤཱ་རིའི་བུ་བོས་ཏེ། དེའི་ཕྱིར་ན་ཤཱ་རིའི་བུ་ཁྱོད་ཀྱིས་
གཞོན་ནུ་སྒྲ་གཅན་འཛིན་རབ་ཏུ་ཕྱུང་ཞེས་བརྗོད་ནས་རབ་ཏུ་བྱུང་བ་བྱས་སོ། །སླར་ཡང་རྒྱལ་པོ་གཞོན་ནུའི་སྡུག་བསྔལ་ཆེར་སྐྱེས་ཏེ་བསྲན་པར་མ་ནུས་ནས། བཅོམ་ལྡན་འདས་ཀྱི་གནས་སུ་ཕྱིན་ཏེ། བཙུན་པ་འཕགས་པ་མ་དང་ཕ་ཡིས་རྗེས་སུ་མ་གནང་བའི་བུ་རབ་ཏུ་འབྱུང་བར་བྱེད་པ་མ་ལེགས་སོ་
ཞེས་དམ་པ་བསླངས་སོ། །བཅོམ་ལྡན་འདས་ཀྱིས་དེ་ལ་དམ་པ་བྱིན་ནོ། །སླར་ཡང་ཉི་མ་གཉིས་པ་ལ་རྒྱལ་པོའི་གནས་སུ་གདུགས་ཚོད་གསོལ་ནས་ཕྱོགས་གཅིག་ཏུ་འཁོད་དོ། །རྒྱལ་པོས་བཙུན་པ་ཉིད་དཀའ་བ་སྤྱོད་པའི་དུས་སུ་ལྷ་ཅིག་བདག་གི་དྲུང་དུ་ཉེ་བར་འོངས་ནས་ཁྱེད་ཀྱི་བུ་དུས་ལས་འདས་
སོ་ཞེས་སྨྲས་སོ། །དེའི་ཚིག་ལ་ཡིད་ཆེས་པ་མེད་ཅིང་བདག་གི་སྲས་བྱང་ཆུབ་མ་ཐོབ་བར་དུ་དུས་ལས་འདའ་བར་མི་བྱེད་དོ། །དེའི་ཚིག་བདག་གིས་བཀག་གོ་ཞེས་བརྗོད་དོ། །བཅོམ་ལྡན་འདས་ཀྱིས་བཀའ་སྩལ་པ། ད་ལྟ་ཇི་ལྟར་ཁྱོད་ཡིད་ཆེས་པར་བྱེད། སླར་རུས་པ་མཐོང་ནས་ཁྱེད་ཀྱི་བུ་

ཤིའོ་ཞེས་ཟེར་བ་ལ་ཡིད་ཆེས་པར་མ་བྱས་སོ། །འདིའི་དོན་འབྱུང་བ་ནི་ཆོས་སྐྱོང་བ་ཆེན་པོའི་སྐྱེས་རབས་སུ་བཤད་དོ། །གཏམ་གྱི་མཐར་རྒྱལ་པོས་ཕྱིར་མི་འོང་བའི་འབྲས་བུ་ལ་གནས་སོ། །དེ་ལྟར་བཅོམ་ལྡན་འདས་ཀྱི་ཡབ་འབྲས་བུ་གསུམ་ལ་སོ་སོར་གནས་ནས་དགེ་སློང་གི་དགེ་འདུན་
འཁོར་དུ་བྱས་སོ། །སླར་ཡང་རྒྱལ་པོའི་ཁབ་ཏུ་གཤེགས་ནས་བསིལ་བའི་ཚལ་དུ་བཞུགས་སོ། །དེའི་ཚེ་ཁྱིམ་བདག་མགོན་མེད་ཟས་སྦྱིན་གྱིས་ཤིང་རྟ་ལྔ་བརྒྱའི་ནོར་ཁྱེར་ནས་རྒྱལ་པོའི་ཁབ་ཏུ་རང་ཉིད་དགའ་བའི་གྲོགས་ཀྱི་ཁང་པར་སོང་སྟེ། དེས་སངས་རྒྱས་བཅོམ་ལྡན་འདས་བྱོན་ནོ་ཞེས་
པ་ཐོས་ནས་ཤིན་ཏུ་སྔ་བར་ལྷའི་མཐུས་སྒོ་ཕྱེ་སྟེ། སྟོན་པའི་དྲུང་དུ་ཉེ་བར་སོང་ནས་ཆོས་ཐོས་ཏེ་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །ཉི་མ་གཉིས་པ་ལ་སངས་རྒྱས་ལ་སོགས་པའི་དགེ་འདུན་ལ་སྦྱིན་པ་ཆེན་པོ་ཕུལ་ལོ། །མཉན་ཡོད་དུ་གཤེགས་པའི་ཕྱིར་དུ་སྟོན་པའི་དྲུང་དུ་དམ་
བཅའ་བླངས་ནས་བར་གྱི་ལམ་དཔག་ཚད་བཞི་བཅུ་རྩ་ལྔའི་གནས་སུ་འབུམ་ཕྲག་རེ་རེའི་ནོར་བྱིན་ནས་དཔག་ཚད་རེ་རེའི་གཙུག་ལག་ཁང་བྱས་སོ། །རྒྱལ་བྱེད་ཚལ་བྱེ་བ་ཕྲག་བཅྭ་བརྒྱད་ཀྱི་དབྱིག་གིས་ཉོས་ནས་ལས་ཁ་གསར་པ་བྱེད་ཅིང་དབུས་སུ་སྟོབས་བཅུ་པའི་དྲིའི་གཙང་ཁང་བྱེད་དོ། །
དེ་ལ་བསྐོར་བ་རྣམས་ལ་གནས་བརྟན་ཆེན་པོ་བརྒྱད་ཅུའི་བཞུགས་གནས་སོ། །ཆིག་ཐོག་དང་ཉིས་ཐོག་དང་ཁང་པ་རིང་པོ་དང་། བསྟི་གནས་ལ་སོགས་པའི་བཞུགས་གནས་དང་། རྫིང་བུ་དང་། འཆག་ས་དང་། མཚན་མོའི་བཞུགས་གནས་དང་། ཉིན་མོའི་བཞུགས་
གནས་སོ། །བྱེ་བ་ཕྲག་བཅྭ་བརྒྱད་ཀྱི་ནོར་སྤེལ་ཏེ་ཡིད་དུ་འོང་བའི་ས་ཕྱོགས་ཡིད་ལ་འཐད་པའི་གཙུག་ལག་ཁང་བྱེད་དོ། །སྟོབས་བཅུ་པ་བྱོན་པའི་ཕྱིར་དུ་ཕོ་ཉ་བ་བཏང་ངོ་། །སྟོན་པས་ཕོ་ཉ་བའི་འཕྲིན་གསན་ནས་དགེ་སློང་གི་དགེ་འདུན་ཆེན་པོའི་འཁོར་དུ་བྱས་ཏེ་རྒྱལ་པོའི་ཁབ་ནས་ཕྱིར་
བྱོན་ཏེ་གོ་རིམས་བཞིན་དུ་གྲོང་ཁྱེར་མཉན་ཡོད་དུ་བྱོན་ནོ། །གཙོ་བོ་ཆེན་པོ་གཙུག་ལག་ཁང་ཆེན་པོ་སྟ་གོན་བྱས་ནས་དེ་བཞིན་གཤེགས་པ་རྒྱལ་བྱེད་ཚལ་དུ་བྱོན་པའི་ཉིན་མོ་བུ་རྒྱན་ཐམས་ཅད་ཀྱིས་བརྒྱན་ནོ། །སླར་ཡང་བརྒྱན་པ་ཉིད་ཀྱི་གཞོན་ནུ་ལྔ་བརྒྱ་དང་བཅས་པ་བཏང་ངོ་། །དེ་

འཁོར་དང་བཅས་པ་ཁ་དོག་ལྔའི་གོས་ཡང་དག་པར་འབར་བའི་རྒྱལ་མཚན་ལྔ་བརྒྱ་ཐོགས་ནས་སྟོབས་བཅུ་པའི་མདུན་དུ་སོང་བར་གྱུར་ཏོ། །དེ་རྣམས་ཀྱི་ཕྱི་མ་ལ་ལེགས་བཟངས་ཆེན་མོ་དང་། ལེགས་བཟངས་མ་ཆུང་བ་སྟེ་བུ་མོ་གཉིས་གཞོན་ནུ་མ་ལྔ་བརྒྱ་དང་བཅས་པ་གསེར་
གྱིས་གང་བའི་བུམ་པ་ལག་པར་ཐོགས་ནས་ཕྱིར་འཐོན་ནོ། །དེའི་ཕྱི་མ་ལ་ཚོང་དཔོན་གྱི་ཆུང་མ་རྒྱན་ཐམས་ཅད་ཀྱིས་བརྒྱན་ནས་བུད་མེད་ལྔ་བརྒྱ་དང་བཅས་པ་གསེར་གྱིས་གང་བའི་སྡེར་མ་ཆེན་པོ་ཐོགས་ནས་ཕྱིར་འཐོན་ཏོ། །ཐམས་ཅད་ཕྱིན་ནས་ཚོང་དཔོན་རང་ཉིད་གོས་བཟང་པོ་གྱོན་ནོ། །དེ་
བཞིན་དུ་གོས་བཟང་པོ་གྱོན་པའི་ཚོང་དཔོན་ལྔ་བརྒྱ་དང་བཅས་པ་བཅོམ་ལྡན་འདས་ཀྱི་དྲུང་དུ་སོང་ངོ་། །བཅོམ་ལྡན་འདས་ཀྱི་འཁོར་དགེ་བསྙེན་འདི་རྣམས་མདུན་དུ་བྱས་ནས། དགེ་སློང་གི་དགེ་འདུན་ཆེན་པོ་རྣམས་འཁོར་དུ་བྱས་ཏེ། རང་ཉིད་ཀྱི་སྐུ་ལུས་ཀྱི་འོད་ཀྱིས་གསེར་གྱི་བཅུད་ཀྱི་གོང་བུ་
ལྟ་བུ་དང་མཚུངས་པ་དང་། ནགས་ཚལ་གྱི་བར་དུ་སྣང་བར་མཛད་ཅིང་མཐའ་ཡས་པའི་སངས་རྒྱས་ཀྱི་རོལ་པ་སངས་རྒྱས་ཀྱི་དཔལ་ཟླ་མེད་ཅིང་མཚུངས་པ་མེད་པ་རྒྱལ་བྱེད་ཚལ་གྱི་ནང་དུ་བྱོན་ནོ། །དེ་ནས་མགོན་མེད་ཟས་སྦྱིན་གྱིས་ཞུས་པ། བཙུན་པ་གཙུག་ལག་ཁང་འདི་ཇི་ལྟ་བུ་ལ་དབུལ་བར་
བགྱི། ཁྱིམ་བདག་གཙུག་ལག་ཁང་འདི་འོང་བ་དང་འགྲོ་བའི་དགེ་སློང་གི་དགེ་འདུན་རྣམས་ལ་ཕུལ་ཅིག །ལེགས་སོ་བཅོམ་ལྡན་འདས་ཞེས་ཚོང་དཔོན་ཆེན་པོས་གསེར་གྱི་རིལ་བ་སྤྱི་བླུགས་བླངས་ནས་སྟོབས་བཅུ་པའི་ཕྱག་ཏུ་ཆུ་སྦྲེང་སྟེ། རྒྱལ་བྱེད་ཚལ་གྱི་གཙུག་ལག་ཁང་འདི་འགྲོ་བ་དང་འོང་བའི་
ཕྱོགས་བཞིའི་སངས་རྒྱས་ལ་སོགས་པའི་དགེ་འདུན་ལ་སྦྱིན་ཞེས་ཕུལ་ལོ། །སྟོན་པས་གཙུག་ལག་ཁང་བཞེས་ནས་རྗེས་སུ་ཡི་རང་བ་མཛད་དོ། །གྲང་དང་དྲོ་བས་མི་ཉམས་ཤིང་། །དེ་ལྟར་རི་དགས་ལ་སོགས་པའི། །སྡིག་སྦྲུལ་དང་ནི་སྦྲང་བུ་དང་། །བ་མོ་དང་ནི་ཆར་པས་སོ། །དེ་
ལྟར་རླུང་དང་ཤིན་ཏུ་དྲོ། །སོ་སོར་ལུས་ལ་གོས་པ་དང་། །ཁང་ནང་གནས་ནས་བདེ་བ་སྐྱེས། །ཁང་པར་བསམ་གཏན་ལྷག་མཐོང་རྣམས། །དགེ་འདུན་གཙུག་ལག་ཁང་འབུལ་བ། །སངས་རྒྱས་མཆོག་གིས་བསྔགས་པར་མཛད། །སྐྱེས་བུ་མཁས་པས་དེ་ཡི་ཕྱིར། །བདག་

ཉིད་ཀྱི་ནི་ཕྱིར་དུ་ནི། །དགའ་བས་གཙུག་ལག་ཁང་བྱེད་པ། །མང་དུ་ཐོས་པ་གནས་པ་ཡིན། །དེ་རྣམས་ཀྱི་ནི་བཟའ་དང་བཏུང་། །གོས་དང་མལ་ཆ་སྟན་དང་ནི། །དེ་རྣམས་སེམས་ནི་དྲང་པོས་འབུལ། །རབ་ཏུ་དང་བའི་སེམས་ཀྱིས་སོ། །དེས་ནི་དེ་ལ་ཆོས་བསྟན་ཏོ། །སྡུག་
བསྔལ་ཐམས་ཅད་ཉེར་ཞིའི་ཕྱིར། །གང་དེའི་ཆོས་ནི་རྟོགས་པ་དང་། །རྟེན་མེད་མྱ་ངན་འདས་པར་བྱེད། །ཅེས་བྱ་བའི་གཙུག་ལག་ཁང་གི་ཕན་ཡོན་བཤད་དོ། །མགོན་མེད་ཟས་སྦྱིན་གྱིས་ཉི་མ་གཉིས་པ་ནས་བཟུང་ནས་སྦྱིན་པ་གཏོང་བའི་མགོ་བརྩམས་སོ། །ས་ཁམས་བྱས་པའི་ཁང་
བཟངས་ནི་ཟླ་བ་བཞིས་གྲུབ་བོ། །སླར་ཡང་མགོན་མེད་ཟས་སྦྱིན་གྱི་གཙུག་ལག་ཁང་ཆེན་པོ་ཟླ་བ་དགུས་གྲུབ་བོ། །གཙུག་ལག་ཁང་ཆེན་པོ་ལ་ཡང་བྱེ་བ་སྟོང་ཕྲག་བཅྭ་བརྒྱད་ཉིད་སོང་ངོ་། །འདི་ལ་གཙུག་ལག་ཁང་ཆེན་པོ་འདི་ཉིད་ལ་བྱེ་བ་ཕྲག་ལྔ་བཅུ་རྩ་བཞིའི་ནོར་ཡོངས་སུ་བཏང་ངོ་། །
སླར་ཡང་འདས་པའི་བཅོམ་ལྡན་འདས་རྣམ་པར་གཟིགས་ཀྱི་དུས་སུ་ཚོང་དཔོན་ཀུན་གྱི་གྲོགས་ཞེས་བྱ་བས་གསེར་གྱི་གླང་པོའི་རྐང་པའི་རྨིག་རྗེས་ལྟ་བུའི་ས་གཞི་ཉོས་ནས། གནས་འདི་ཉིད་དུ་དཔག་ཚད་གཅིག་གི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་གཙུག་ཏོར་ཅན་
གྱི་དུས་སུ་དཔལ་འཕེལ་ཞེས་བྱ་བའི་ཚོང་དཔོན་གྱི་བུས་གསེར་གྱི་སྡེར་མ་རྒྱུན་མི་འཆད་པས་ཉོས་པའི་ས་གཞིའི་གནས་དེ་ཉིད་དུ་རྒྱང་གྲགས་བཅུ་གཉིས་ཀྱི་ཚད་ཙམ་གྱི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་ཐམས་ཅད་སྐྱོབ་ཀྱི་དུས་སུ་ཚོང་དཔོན་བཀྲ་ཤིས་ཞེས་བྱ་བས་གསེར་གྱི་
ས་གཞི་གསེར་གྱི་རྐང་པའི་རྗེས་ལྟ་བུའི་ས་གཞི་ཉོས་ནས་གནས་དེ་ཉིད་དུ་དཔག་ཚད་ཕྱེད་ཀྱི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་ལོག་པར་དད་སེལ་གྱི་དུས་སུ་ཚོང་དཔོན་འཕོ་བ་མེད་པ་ཞེས་བྱ་བས་གསེར་གྱི་ཕ་གུ་ལྟ་བུ་རྒྱུན་མི་འཆད་པའི་ས་གཞི་ཉོས་ནས་གནས་ཉིད་དུ་རྒྱང་གྲགས་
བཞིའི་ཚད་ཀྱི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་གསེར་ཐུབ་ཀྱི་དུས་སུ་ཚོང་དཔོན་དྲག་པོ་ཞེས་བྱ་བས་གསེར་གྱི་རུས་སྦལ་རྒྱུན་མི་འཆད་པ་ལྟ་བུའི་ས་གཞི་ཉོས་ནས་གནས་དེ་ཉིད་དུ་རྒྱང་གྲགས་གཉིས་ཀྱི་ཚད་ཀྱི་ཀུན་དགའ་ར་བ་བྱས་སོ། །བཅོམ་ལྡན་འདས་འོད་སྲུང་གི་

དུས་སུ་ཚོང་དཔོན་བཀྲ་ཤིས་བཟང་པོ་ཞེས་བྱ་བས་གསེར་གྱི་ཕ་གུ་རྒྱུན་མི་འཆད་པ་ལྟ་བུས་ས་གཞི་ཉོས་ནས་གནས་དེ་ཉིད་དུ་རྒྱང་གྲགས་གཅིག་གི་ཚད་ཀྱི་ཀུན་དགའ་ར་བ་བྱས་སོ། །སླར་ཡང་བདག་ཅག་གི་བཅོམ་ལྡན་འདས་ཀྱི་དུས་སུ་ཚོང་དཔོན་མགོན་མེད་ཟས་སྦྱིན་གྱིས་བྱེ་བ་ཕྲག་
བཅྭ་བརྒྱད་ཀྱི་དབྱིག་གིས་གསེར་གྱི་འདྲ་མེན་དུ་བྱས་པ་རྒྱུན་མི་འཆད་པ་ལྟ་བུས་ས་གཞི་ཉོས་ནས་གནས་དེ་ཉིད་དུ་རྒྱང་གྲགས་ཕྱེད་ཀྱི་ཀུན་དགའ་ར་བ་བྱས་སོ། །གནས་འདི་སངས་རྒྱས་ཐམས་ཅད་ཀྱིས་མ་སྤངས་པའི་གནས་ཡིན་ནོ། །འདི་ལྟར་བྱང་ཆུབ་ཆེན་པོའི་སྙིང་པོའི་དྲུང་དུ་ཐམས་ཅད་མཁྱེན་པའི་
ཡེ་ཤེས་ཐོབ་པ་ཇི་སྲིད་པ་ནས་ཡོངས་སུ་མྱ་ངན་ལས་འདས་པའི་མཐར་ཐུག་པ་དེ་སྲིད་དུ་གང་དང་གང་གི་གནས་སུ་བཅོམ་ལྡན་འདས་བདག་བཞུགས་པ་འདི་ནི་ཉེ་བའི་གླེང་གཞི་ཞེས་བྱ་བའོ། །དེའི་ལུགས་ཀྱིས་སྐྱེས་རབས་ཐམས་ཅད་དུ་བསྔགས་པར་མཛད་དོ། །སྐྱེས་པ་རབས་ཀྱི་གླེང་གཞིའི་བཤད་པ་
རྫོགས་སྷོ།། །།པཎྜི་ཏ་ཨཱ་ནནྡ་ཤྲཱིའི་ཞལ་སྔ་ནས་དང་། མང་དུ་ཐོས་པའི་ལོཙྪ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།སའི་སྟེང་དུ་ཉི་ཟླ་
ལྟར་གྱུར་ཅིག། ༄༅༅། །རྒྱ་གར་སྐད་དུ། ཨཱ་ཊཱ་ནཱ་ཊི་ཡ་སཱུ་ཏྲ། བོད་སྐད་དུ། ལྕང་ལོ་ཅན་གྱི་ཕོ་བྲང་གི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་
རི་ལ་བཞུགས་སོ། །དེ་ནས་རྒྱལ་པོ་ཆེན་པོ་བཞི་པོ་གནོད་སྦྱིན་མང་པོའི་སྡེ་དང་། དྲི་ཟ་མང་པོའི་སྡེ་དང་གྲུལ་བུམ་གྱི་སྡེ་མང་པོ་དང་ཀླུའི་སྡེ་མང་པོ་རྣམས་ཕྱོགས་བཞི་བསྲུང་ཞིང་གནས་སོ། །ཕྱོགས་བཞིར་ཚན་ཚན་དུ་གནས་སོ། །ཕྱོགས་བཞི་སྐྱོབ་ཅིང་གནས་སོ། །མཚན་མོ་འོངས་ཏེ་
ཁ་དོག་སྣ་ཚོགས་པ་ཅན་གྱིས་བྱ་རྒོད་ཕུང་པོའི་རི་འབའ་ཞིག་སྣང་བར་བྱས་ཏེ། བཅོམ་ལྡན་འདས་ག་ལ་བ་དེར་སོང་ནས་བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གནོད་སྦྱིན་དེ་རྣམས་ལས་ཀྱང་གང་ལ་ལས་བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་

ཏུ་འཁོད་དོ། །གང་སུ་དག་གིས་བཅོམ་ལྡན་འདས་ལ་སྙུན་གསོལ་ཏེ་སྙུན་གསོལ་ནས་ཇི་ལྟར་སྙིང་པོ་དང་སྙིང་པོ་མེད་པའི་གཏམ་འདྲི་ཞིང་ཕྱོགས་གཅིག་ཏུ་འཁོད་དོ། །གང་སུ་དག་གིས་བཅོམ་ལྡན་འདས་ལ་ཐལ་མོ་སྦྱར་བའི་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་
མིང་དང་རིགས་དཔྱོད་ཅིང་ཕྱོགས་གཅིག་ཏུ་འཁོད་དོ། །གང་སུ་དག་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གནོད་སྦྱིན་མ་རུངས་པ་གང་ལ་ལ་ཞིག་བཅོམ་ལྡན་
འདས་ལ་མ་དད་པར་གྱུར་ཏོ། །གནོད་སྦྱིན་མ་རུངས་པ་གང་ལ་ལ་ཞིག་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་བཙུན་པ་བཅོམ་ལྡན་འདས་ལ་དད་པར་གྱུར་
ཏོ། །གནོད་སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་པའི་རྒྱུ་གང་ལགས། བཙུན་
པ་བཅོམ་ལྡན་འདས་ཀྱིས་སྲོག་གཅོད་པ་སྤོང་བའི་ཆོས་བསྟན་པ་དང་། མ་བྱིན་པར་ལེན་པ་སྤོང་བའི་ཆོས་བསྟན་པ་དང་། འདོད་པ་ལོག་པར་སྤྱོད་པ་སྤོང་བའི་ཆོས་བསྟན་པ་དང་། བརྫུན་དུ་སྨྲ་བ་སྤོང་བའི་ཆོས་བསྟན་པ་དང་། མྱོས་པར་འགྱུར་བའི་ཆང་གི་བཏུང་བ་སྤོང་བའི་ཆོས་བསྟན་
པ་མཛད་ལ། གནོད་སྦྱིན་གང་དེ་རྣམས་སྲོག་གཅོད་པ་སྤོང་བ་ལ་མི་དགའ་བར་གྱུར་པ་དང་། མ་བྱིན་པར་ལེན་པ་སྤོང་བ་ལ་མི་དགའ་བར་གྱུར་པ་དང་། འདོད་པ་ལོག་པར་སྤྱོད་པ་སྤོང་བ་ལ་མི་དགའ་བར་གྱུར་པ་དང་། བརྫུན་དུ་སྨྲ་བ་སྤོང་བ་ལ་མི་དགའ་བར་གྱུར་པ་དང་། མྱོས་པར་
འགྱུར་བའི་ཆང་གི་བཏུང་བ་སྤོང་བ་ལ་མི་དགའ་བར་གྱུར་པས་དེ་རྣམས་ལ་མི་དགའ་ཞིང་མི་འདོད་པར་གྱུར་ཏོ། །བཙུན་པ་བཅོམ་ལྡན་འདས་ཀྱིས་ཉན་ཐོས་ཇི་སྙེད་ཡོད་པ་རྣམས་འབྲོག་དགོན་པའི་ལམ་དུ་ཞུགས་ནས་ཉལ་བ་དང་འདུག་པ་ལ་བརྟེན་ནོ། །སྒྲ་མེད་ཅིང་དབྱངས་མེད་པར་དབེན་

པར་གནས་ཤིང་འདུ་འཛིའི་འཚེ་བ་མེད་དོ། །སོ་སོར་དགེ་སྦྱོང་རྣམས་འཐུན་པར་གནས་སོ། །དེ་ན་གནོད་སྦྱིན་མ་རུངས་པ་རྣམས་ཀྱི་གནས་ཡོད་དོ། །གང་ཞིག་གིས་བཅོམ་ལྡན་འདས་ཀྱི་གསུང་རབ་ལ་མ་དད་པར་གྱུར་ཏེ། དེ་རྣམས་དད་པར་བྱ་བའི་ཕྱིར་
བཙུན་པ་བཅོམ་ལྡན་འདས་ལ་བསླབ་པར་བྱ་སྟེ། ལྕང་ལོ་ཅན་གྱི་ཕོ་བྲང་གིས་བསྲུང་དུ་གསོལ། དགེ་སློང་ངམ་དགེ་སློང་མ་འམ། དགེ་བསྙེན་ནམ་དགེ་བསྙེན་མ་རྣམས་ལ་བསྲུང་བ་དང་། སྦ་བ་དང་འཚེ་བ་མེད་པ་དང་བདེ་བ་དང་ལེགས་པར་གནས་སོ། །བཅོམ་ལྡན་འདས་ཀྱིས་ཅང་མི་གསུང་
བའི་ཚུལ་གྱིས་གནང་ངོ་། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་བཅོམ་ལྡན་འདས་ཀྱིས་གནང་བ་ཤེས་ཏེ། དེའི་ཚེ་འདི་ལྟར་ལྕང་ལོ་ཅན་གྱི་ཕོ་བྲང་གིས་སྲུངས་ཤིག་ཅེས་གསོལ་ཏོ། །སྤྱན་ལྡན་དཔལ་དང་ལྡན་པ་ཡི། །རྣམ་པར་གཟིགས་ལ་ཕྱག་འཚལ་ལོ། །འབྱུང་པོ་རྣམས་
ལ་བརྩེ་བ་ཡི། །གཙུག་ཏོར་ཅན་ལའང་ཕྱག་འཚལ་ལོ། །མགོན་མེད་རྣམས་ལ་གདུང་བ་ཡི། །ཐམས་ཅད་སྐྱོབ་ལ་ཕྱག་འཚལ་ལོ། །བདུད་ཀྱི་སྡེ་རྣམས་འཇོམས་པ་ཡི། །འཁོར་བ་འཇིག་ལ་ཕྱག་འཚལ་ལོ། །བྲམ་ཟེ་དཔལ་དང་ལྡན་པ་ཡི། །གསེར་ཐུབ་ལ་ནི་ཕྱག་
འཚལ་ལོ། །སེམས་ཅན་རྣམ་གྲོལ་མཛད་པ་ཡི། །འོད་སྲུང་ལ་ནི་ཕྱག་འཚལ་ལོ། །ཤཱཀྱའི་སྲས་ནི་དཔལ་དང་ལྡན། །ཉི་མའི་རྒྱུད་ལ་ཕྱག་འཚལ་ལོ། །སྡུག་བསྔལ་ཀུན་ལས་སྒྲོལ་མཛད་པ། །གང་ཞིག་ཆོས་ནི་རབ་སྟོན་མཛད། །གང་ཡང་འཇིག་རྟེན་པར་གྱུར་པ། །ཇི་
ལྟ་བ་བཞིན་གཟིགས་གྱུར་པའི། །དེ་རྣམས་ལ་ནི་ཕྲ་མ་མེད། །འཇིགས་པ་མེད་པ་ཆེན་པོའོ། །གང་ཞིག་གཽ་ཏམ་ཕྱག་བྱེད་པ། །ལྷ་དང་མི་ལ་ཕན་པ་ཡིན། །རིག་པ་དང་ནི་ཞབས་སུ་ལྡན། །འཇིགས་པ་མེད་པ་ཆེན་པོ་སྟེ། །ཉི་མའི་དཀྱིལ་འཁོར་ཆེན་པོ་ནི། །གང་
ཞིག་ཏུ་ནི་ནུབ་ཅིང་འཆར། །གང་དུ་ཉི་མ་ནུབ་གྱུར་པ། །དེ་ནི་མཚན་མོར་འགྱུར་བ་ཡིན། །གང་དུ་ཉི་མ་ཤར་གྱུར་པ། །དེ་ནི་ཉིན་མོ་ཞེས་བརྗོད་དོ། །གཏིང་ནི་ཟབ་པའི་རྒྱ་མཚོ་ཡི། །དེ་ཡི་ཆུ་ཡི་བཅུད་བཟང་ངོ་། །དེ་ལྟར་དེར་ནི་སྐྱེས་གྱུར་པ། །རྒྱ་མཚོའི་ཆུ་ཡི་བཅུད་བཞིན་ནོ། །

འདིར་ནི་ཤར་གྱི་ཕྱོགས་ཀྱི་ནི། །སྐྱེ་བོ་རྣམས་ལ་འདི་བརྗོད་དེ། །དེ་ཡི་ཕྱོགས་ནི་ཀུན་སྐྱོང་བའི། །རྒྱལ་པོ་ཆེན་པོ་གྲགས་ཆེན་ལྡན། །དྲི་ཟ་རྣམས་ཀྱི་བདག་པོ་སྟེ། །མིང་ནི་རྒྱལ་པོ་ཡུལ་འཁོར་སྐྱོང་། །དྲི་ཟ་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་
བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །དེ་ཡང་སངས་རྒྱས་མཐོང་བ་དང་། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་
ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱོད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །
སངས་རྒྱས་གཽ་ཏམ་ཕྱག་འཚལ་ལོ། །གང་ཡང་ཡི་དགས་རྗོད་བྱེད་པ། །ཕྲ་མ་རྒྱབ་ཀྱི་ཤ་ཅན་དང་། །སྲོག་གཅོད་པ་ལ་ཆགས་པ་དང་། །སྐྱེ་བོ་མ་ལུས་འཇོམས་པའོ། །འདིར་ནི་ལྷོ་ཡི་ཕྱོགས་གནས་པའི། །སྐྱེ་བོ་རྣམས་ལ་འདི་སྐད་བརྗོད། །དེ་ཡི་གནས་ནི་ཡོངས་སྐྱོང་བ། །
རྒྱལ་པོ་ཆེན་པོ་གྲགས་ལྡན་པ། །གྲུལ་བུམ་རྣམས་ཀྱི་བདག་པོ་སྟེ། །མིང་ནི་འཕགས་སྐྱེས་པོ་ཞེས་བྱ། །གྲུལ་བུམ་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །
དེ་ནི་དགུ་བཅུ་རྩ་གཅིག་གོ། །དེ་ཡང་སངས་རྒྱས་མཐོང་བ་དང་། །ཉི་མའི་རྒྱུད་ཀྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །
མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །ཉི་མའི་དཀྱིལ་འཁོར་ཆེན་པོ་ནི། །གང་ནས་

གང་དུ་ཤར་གྱུར་པ། །དེར་ནི་ཉིན་མོར་འགྱུར་བ་སྟེ། །ཉིན་མོ་ཞེས་ནི་བརྗོད་པ་ཡིན། །གང་དུ་ཉི་མ་ནུབ་གྱུར་པ། །དེ་ནི་མཚན་མོར་རྗོད་པར་བྱེད། །གཏིང་ནི་ཟབ་པའི་རྒྱ་མཚོ་ཡི། །དེ་ཡི་ཆུ་ནི་བཅུད་བཟང་ངོ་། །དེ་ལྟར་དེར་ནི་སྐྱེས་གྱུར་པའི། །རྒྱ་མཚོའི་
ཆུ་ཡི་བཅུད་བཞིན་ནོ། །འདིར་ནི་ནུབ་ཀྱི་ཕྱོགས་ཀྱི་ནི། །སྐྱེ་བོ་རྣམས་ལ་འདི་བརྗོད་དེ། །དེ་ཡི་ཕྱོགས་ནི་ཀུན་སྐྱོང་བའི། །རྒྱལ་པོ་ཆེན་པོ་གྲགས་ཆེན་ལྡན། །ཀླུ་རྣམས་ཀྱི་ནི་བདག་པོ་སྟེ། །འདི་ཡི་མིང་ནི་མིག་མི་བཟང་། །ཀླུ་ཡི་འཁོར་དང་བཅས་པ་ནི། །གླུ་དང་གར་གྱིས་དགའ་
བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །དེ་ཡང་སངས་རྒྱས་མཐོང་བ་དང་། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་
བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་
པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །གང་ཞིག་བྱང་ཕྱོགས་སྒྲ་མི་སྙན། །ལྷུན་པོ་བལྟ་ན་སྡུག་རི་དགའ། །དེར་སྐྱེས་པ་ཡི་མི་རྣམས་ནི། །བདག་གིར་ཡོངས་སུ་བཟུང་བ་མེད། །དེ་རྣམས་ས་བོན་འདེབས་པ་མེད། །རྨོ་བ་ཡང་ནི་མེད་པ་ཡིན། །དཀའ་
སྤྱད་མེད་པར་འབྲས་སྨིན་ཞིང་། །མི་རྣམས་ཡོངས་སུ་ལོངས་སྤྱོད་དོ། །སྦུན་མེད་མ་གྲུགས་ཤིན་ཏུ་དག །དྲི་བཟང་འབྲས་ནི་འབྲས་བུར་ལྡན། །འབྲས་ཀྱི་འོ་མ་ལ་འཚེད་ཅིང་། །དེ་བཞིན་བཙོས་ནས་ལོངས་སྤྱོད་དོ། །བ་ལང་རྐང་གཅིག་ལ་ཞོན་ནས། །ཡུལ་དང་ཕྱོགས་སུ་
འགྲོ་བར་བྱེད། །རྐང་པ་གཅིག་པའི་ཕྱུགས་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །བུད་མེད་ཀྱི་ནི་བཞོན་པ་ལ། །ཞོན་ནས་ཡུལ་དང་ཕྱོགས་སུ་འགྲོ། །སྐྱེས་པའི་བཞོན་པ་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །གཞོན་ནུ་མ་ཡི་བཞོན་པ་ལ། །ཞོན་ནས་

ཡུལ་དང་ཕྱོགས་སུ་འགྲོ། །གཞོན་ནུའི་བཞོན་པ་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །བཞོན་པ་དེ་རྣམས་ལ་ཞོན་ནས། །ཕྱོགས་ཀུན་དུ་ནི་རྗེས་སུ་འགྲོ། །གཙོ་བོ་རྒྱལ་པོ་ཁྱད་མེད་དོ། །གླང་ཆེན་བཞོན་དང་རྟ་ཡི་བཞོན། །ལྷ་ཡི་བཞོན་པ་ལ་གནས་ནས། །ཁང་བཟངས་
དང་ནི་ཁྱོགས་དང་ནི། །རྒྱལ་པོ་ཆེན་པོ་གྲགས་དང་ལྡན། །དེའི་ཡང་གྲུབ་པའི་གྲོང་ཁྱེར་ནི། །དྲི་མེད་བར་སྣང་ལ་གནས་པ། །ལྕང་ལོ་ཅན་དང་ཀུ་ཤའི་གྲོང་། །ཕ་རོལ་ཀུ་ཤའི་གྲོང་དང་ནི། །ནཱ་ཊཱའི་གྲོང་དང་ཕ་རོལ་གྱི། །ཀུ་ཤི་ཏ་ཡི་གྲོང་ཡིན་ནོ། །བྱང་གི་ཕྱོགས་ན་ཐམས་ཅད་
རྒྱས། །སྐྱེ་བོའི་ཚོགས་པ་མང་པོ་གནས། །དགུ་བཅུ་རྩ་དགུ་གྲོང་མཁའ་ལ། །རྒྱལ་པོའི་ཕོ་བྲང་ལྕང་ལོ་ཅན། །སླར་ཡང་དྲང་སྲོང་ཆེན་པོ་དང་། །རྒྱལ་པོ་ཆེན་པོ་ལུས་ངན་པོ། །བི་སཱ་ཎཱ་ཞེས་པ་རྒྱལ་པོའི་ཕོ་བྲང་ངོ་། །དེའི་ཕྱིར་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། ལུས་ངན་པོ་
ཞེས་བརྗོད་དོ། །སོ་སོར་རབ་ཏུ་གསལ་ཞིང་ཞི་བ་དང་དེ་དང་དེར་ནི་དེ་དང་དེ་མདངས་དང་དེའི་གཟི་བརྗིད་དང་དཔའ་ཞིང་སྟོབས་དང་ལྡན་པའི་རྒྱལ་པོ་སྟོབས་དང་ལྡན་པའི་མིང་ངོ་། །ས་གཞི་ཡང་ནི་བཅུད་ལྡན་ནོ། །གནས་དེར་སྤྲིན་རྣམས་ཆར་འབེབས་པར་བྱེད་དོ། །དེར་ནི་བྷ་ག་ལ་བ་ཏཱི་ཞེས་
པའི་རྫིང་བུའོ། །གང་དུ་གནོད་སྦྱིན་ཚོགས་དང་ལྷན་ཅིག་ཏུ་གནས་སོ། །དེར་ནི་རྟག་ཏུ་ཤིང་གི་འབྲས། །སྣ་ཚོགས་བྱ་རྣམས་ལྷན་ཅིག་གནས། །རྨ་བྱ་ཁྲུང་ཁྲུང་སྒྲ་སྒྲོགས་ཤིང་། །ཁུ་བྱུག་རྣམས་ནི་ཚན་ཚན་གནས། །ཤང་ཤང་ཏེའུ་སྒྲ་སྒྲོགས་ཤིང་། །དེ་ནས་ཡང་ནི་ངུར་པ་
དང་། །གོང་མོ་ནགས་ཀྱི་བྱ་གག་ནི། །ནགས་ཀྱི་རྫིང་བུར་གནས་པའོ། །ནེ་ཚོ་རི་སྐེགས་དེ་སྒྲ་འབྱིན། །ད་ཎ་ཊ་མཱ་ཊ་བྱ་དཀར་ནི། །དུས་ཀུན་དུ་ནི་མཛེས་པར་བྱེད། །ལུས་ངན་རྒྱལ་པོའི་རྫིང་རྟག་མཛེས། །འདི་ནི་བྱང་གི་ཕྱོགས་ཀྱི་ཡུལ། །སྐྱེ་བོ་རྣམས་ནི་འདི་བཞིན་བརྗོད། །
དེ་ཡི་ཕྱོགས་ནི་ཡོངས་སྐྱོང་བའི། །རྒྱལ་པོ་ཆེན་པོ་གྲགས་དང་ལྡན། །གནོད་སྦྱིན་རྣམས་ཀྱི་བདག་པོ་སྟེ། །འདི་ཡི་མིང་ནི་ལུས་ངན་པོ། །གནོད་སྦྱིན་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་

པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །དེ་ཡང་སངས་རྒྱས་མཐོང་བ་དང་། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་
ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་
ཕྱག་འཚལ་ལོ། །འདིར་ནི་དྲང་སྲོང་ཆེན་པོས་ལྕང་ལོ་ཅན་གྱི་ཕོ་བྲང་དང་བཅས་པས་སྲུངས་ཤིག ། དགེ་སློང་ངམ་དགེ་སློང་མ་འམ་དགེ་བསྙེན་ནམ་དགེ་བསྙེན་མ་རྣམས་ལ་བསྲུང་བ་དང་། སྦ་བ་དང་། འཚེ་བ་མེད་པ་དང་། བདེ་བ་དང་ལེགས་པར་གནས་སོ། །དྲང་སྲོང་ཆེན་པོ་གང་སུ་དག་
དགེ་སློང་དང་བཅས་པ་འམ་དགེ་སློང་མ་དང་བཅས་པ་འམ་དགེ་བསྙེན་དང་བཅས་པ་འམ་དགེ་བསྙེན་མ་དང་བཅས་པ་རྣམས་ལ། འདིར་ལྕང་ལོ་ཅན་གྱི་ཕོ་བྲང་གིས་དེ་བསྲུང་བ་དང་ཡོངས་སུ་རྫོགས་པ་ཐམས་ཅད་ཡིད་ལ་ཟུང་ཤིག །དེའི་ཡང་མི་མ་ཡིན་རྣམས་སོ། །གནོད་སྦྱིན་ནམ་གནོད་
སྦྱིན་མོའམ་གནོད་སྦྱིན་གྱི་བུ་ཕོ་འམ། གནོད་སྦྱིན་གྱི་བུ་མོ་འམ་གནོད་སྦྱིན་གྱི་བློན་པོ་ཆེན་པོ་འམ་གནོད་སྦྱིན་གྱི་འཁོར་རམ་གནོད་སྦྱིན་གྱི་གཡོག་འཁོར་རམ། དྲི་ཟ་ཕོ་འམ་དྲི་ཟ་མོ་འམ་དྲི་ཟའི་བུ་ཕོ་འམ་དྲི་ཟའི་བུ་མོ་འམ་དྲི་ཟའི་བློན་པོ་ཆེན་པོ་འམ་དྲི་ཟའི་འཁོར་རམ་དྲི་ཟའི་གཡོག་
འཁོར་རམ། གྲུལ་བུམ་ཕོ་འམ་གྲུལ་བུམ་མོ་འམ་གྲུལ་བུམ་གྱི་བུ་ཕོ་འམ་གྲུལ་བུམ་གྱི་བུ་མོ་འམ་གྲུལ་བུམ་གྱི་བློན་པོ་ཆེན་པོ་འམ་གྲུལ་བུམ་གྱི་འཁོར་རམ་གྲུལ་བུམ་གྱི་གཡོག་འཁོར་རམ། ཀླུ་ཕོ་འམ་ཀླུ་མོ་འམ་ཀླུའི་བུ་ཕོ་འམ་ཀླུའི་བུ་མོ་འམ་ཀླུའི་བློན་པོ་ཆེན་པོ་འམ་ཀླུའི་འཁོར་རམ་
ཀླུའི་གཡོག་འཁོར་རམ། རབ་ཏུ་སྡང་བའི་སེམས་ཀྱིས་འགྲོ་འམ་རྗེས་སུ་འགྲོ་འམ་རྗེས་སུ་འགྲོ་བ་དང་སྡོད་པ་དང་ལྷན་ཅིག་ཏུ་སྡོད་པ་དང་། གནས་པ་དང་ལྷན་ཅིག་ཏུ་གནས་པ་དང་། ཉལ་བ་དང་ལྷན་ཅིག་ཏུ་ཉལ་བ་རྣམས་ནི་དྲང་སྲོང་ཆེན་པོ་འདི་རྣམས་ནི་མི་མ་ཡིན་ཞེས་བྱའོ། །གྲོང་ངམ་

གྲོང་རྡལ་ལམ་བཀུར་སྟི་བྱེད་པའམ་བསྟི་སྟང་དུ་བྱེད་པ་ལ་དྲང་སྲོང་ཆེན་པོ་མི་མ་ཡིན་རྣམས་ཀྱིས་དེ་ཐོབ་པ་མ་ཡིན་ནོ། །རྒྱལ་པོའི་ཕོ་བྲང་ལྕང་ལོ་ཅན་ཞེས་བྱ་བ་ལ་གཞིའམ་གནས་མེད་དོ། །དྲང་སྲོང་ཆེན་པོ་མི་མ་ཡིན་རྣམས་དང་གནོད་སྦྱིན་རྣམས་ཀྱིས་ལྷན་ཅིག་ཏུ་གནས་པའང་མི་འཐོབ་བོ། །དྲང་
སྲོང་ཆེན་པོ་གཞན་ཡང་མི་མ་ཡིན་རྣམས་ཀྱི་བཀའ་མཉན་པར་བྱའོ། །དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ཀྱིས་བདག་ལ་ཕན་པ་རྫོགས་པ་དང་། ཕ་རོལ་ལ་སྨོད་པ་དང་རྩོད་པ་དང་། དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ལ་སྣོད་མེར་རབ་ཏུ་འབར་བ་མགོ་ལ་བཀོན་པ་
དང་། དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ཀྱི་མགོ་བོ་ཚལ་པ་བདུན་དུ་གཤེག་པར་བྱེད་དོ། །དྲང་སྲོང་ཆེན་པོ་གཞན་ཡང་མི་མ་ཡིན་ནི་གཏུམ་པ་དང་དྲག་པ་དང་ཁྲོ་བའོ། །དེ་རྣམས་ཀྱིས་འདི་ལྟར་རྒྱལ་པོ་ཆེན་པོ་ལ་རྗོད་པར་བྱེད་དོ། །རྒྱལ་པོ་ཆེན་པོ་ལ་བརྗོད་པར་མ་ནུས་ན་སྐྱེས་བུ་
ལ་སོགས་པ་ལ་རྗོད་པར་བྱེད་དོ། །རྒྱལ་པོའི་སྐྱེས་བུ་ལ་བརྗོད་པར་མ་ནུས་ན་དེའི་འོག་མའི་སྐྱེས་བུ་རྣམས་ལ་རྗོད་པར་བྱེད་དོ། །དྲང་སྲོང་ཆེན་པོ་དེ་ཡང་མི་མ་ཡིན་རྣམས་རྒྱལ་པོ་ཆེན་པོ་ལ་འགལ་བ་སྨྲ་བའོ། །དྲང་སྲོང་ཆེན་པོ་འདི་ལྟ་སྟེ། མ་ག་དྷཱའི་ཡུལ་གྱི་རྒྱལ་པོ་ལ་ཆོམ་རྐུན་བྱུང་
ན་དེ་མ་ཐག་ཏུ་རྒྱལ་པོ་ལ་རྗོད་པར་བྱེད་དོ། །རྒྱལ་པོ་ལ་བརྗོད་པར་མ་ནུས་ན་རྒྱལ་པོའི་སྐྱེས་བུ་ལ་རྗོད་པར་བྱེད་དོ། །སྐྱེས་བུ་ལ་བརྗོད་པར་མ་ནུས་ན་དེའི་འོག་མའི་སྐྱེས་བུ་ལ་རྗོད་པར་བྱེད་པ་བཞིན་ནོ། །དྲང་སྲོང་ཆེན་པོ་དེ་ཡང་མ་ག་དྷཱའི་རྒྱལ་པོ་ལ་ཆོམ་རྐུན་གྱིས་གནོད་པ་བྱེད་པར་
བརྗོད་དོ། །དྲང་སྲོང་ཆེན་པོ་འདི་ལྟ་བུ་མི་མ་ཡིན་ཡོད་པ་རྣམས་གཏུམ་པ་དང་དྲག་པ་དང་ཁྲོ་བའོ། །དེ་མ་ཐག་ཏུ་རྒྱལ་པོ་ཆེན་པོ་རྣམས་ལ་རྗོད་པར་བྱེད་དོ། །རྒྱལ་པོ་ཆེན་པོ་ལ་བརྗོད་པར་མ་ནུས་ན་རྒྱལ་པོའི་སྐྱེས་བུ་ལ་རྗོད་པར་བྱེད་དོ། །སྐྱེས་བུ་ལ་བརྗོད་པར་མ་ནུས་ན་དེའི་འོག་
མའི་སྐྱེས་བུ་ལ་རྗོད་པར་བྱེད་དོ། །དྲང་སྲོང་ཆེན་པོ་དེ་ནི་མི་མ་ཡིན་རྣམས་རྒྱལ་པོ་ཆེན་པོ་རྣམས་ལ་འགལ་བར་རྗོད་པར་བྱེད་དོ། །དྲང་སྲོང་ཆེན་པོ་མི་མ་ཡིན་གང་ཞིག་གནོད་སྦྱིན་ཕོ་འམ་གནོད་སྦྱིན་མོ་འམ་གནོད་སྦྱིན་གྱི་བུ་འམ་གནོད་སྦྱིན་གྱི་བུ་མོ་འམ་གནོད་སྦྱིན་གྱི་བློན་པོ་ཆེན་

པོ་འམ་གནོད་སྦྱིན་གྱི་འཁོར་རམ་གནོད་སྦྱིན་གྱི་གཡོག་འཁོར་རམ། དྲི་ཟ་ཕོའམ་དྲི་ཟ་མོ་འམ་དྲི་ཟའི་བུ་ཕོ་འམ་དྲི་ཟའི་བུ་མོ་འམ་དྲི་ཟའི་བློན་པོ་ཆེན་པོ་འམ་དྲི་ཟའི་འཁོར་རམ་དྲི་ཟའི་གཡོག་འཁོར་རམ། གྲུལ་བུམ་ཕོ་འམ་གྲུལ་བུམ་མོ་འམ་གྲུལ་བུམ་གྱི་བུ་ཕོ་འམ་གྲུལ་བུམ་གྱི་
བུ་མོ་འམ་གྲུལ་བུམ་གྱི་བློན་པོ་ཆེན་པོ་འམ་གྲུལ་བུམ་གྱི་འཁོར་རམ་གྲུལ་བུམ་གྱི་གཡོག་འཁོར་རམ། ཀླུ་ཕོ་འམ་ཀླུ་མོ་འམ་ཀླུའི་བུ་ཕོ་འམ་ཀླུའི་བུ་མོ་འམ་ཀླུའི་བློན་པོ་ཆེན་པོའམ་ཀླུའི་འཁོར་རམ་ཀླུའི་གཡོག་འཁོར་རམ། རབ་ཏུ་སྡང་བའི་སེམས་ཀྱིས་དགེ་སློང་ངམ་དགེ་སློང་མ་འམ་དགེ་བསྙེན་
ནམ་དགེ་བསྙེན་མ་རྣམས་འགྲོ་བ་འམ་རྗེས་སུ་འགྲོ་བའམ་རྗེས་སུ་འགྲོ་བ་དང་སྡོད་པ་དང་ལྷན་ཅིག་ཏུ་སྡོད་པ་དང་། གནས་པ་དང་ལྷན་ཅིག་ཏུ་གནས་པ་དང་། ཉལ་བ་དང་ལྷན་ཅིག་ཏུ་ཉལ་བ་དང་། འདི་རྣམས་ནི་གནོད་སྦྱིན་རྣམས་དང་། གནོད་སྦྱིན་ཆེན་པོ་རྣམས་དང་། སྡེ་དཔོན་རྣམས་
དང་། སྡེ་དཔོན་ཆེན་པོ་རྣམས་ལ་གསོལ་བར་བྱེད་པ་དང་། ང་རོ་སྒྲོགས་པར་བྱེད་པ་དང་། སྒྲ་ཆེར་སྒྲོགས་པར་བྱེད་པའོ། །འདིར་གནོད་སྦྱིན་གྱིས་བཟུང་ནས་གནོད་སྦྱིན་འདིས་ཚེ་འཕྲོག་པར་བྱེད་པ་དང་། གནོད་སྦྱིན་འདིས་འཚེ་བར་བྱེད་པ་དང་། གནོད་སྦྱིན་འདིས་རྣམ་པར་ཐོ་འཚམ་
པར་བྱེད་པ་དང་། གནོད་སྦྱིན་འདིས་གནོད་པར་བྱེད་པ་དང་། གནོད་སྦྱིན་འདིས་རྣམ་པར་གནོད་པར་བྱེད་པ་དང་། གནོད་སྦྱིན་འདིས་ནི་མི་གཏོང་བར་བྱེད་དོ། །གནོད་སྦྱིན་རྣམས་དང་གནོད་སྦྱིན་ཆེན་པོ་རྣམས་དང་། སྡེ་དཔོན་རྣམས་དང་སྡེ་དཔོན་ཆེན་པོ་རྣམས་གང་ཞེ་ན། དབང་པོ་ཟླ་བ་ཆུ་
ཟླ་དང་། །བྷཱ་ར་དྭ་ཛ་སྐྱེ་དགུའི་བདག །ཙན་དན་དང་འོད་མཆོག་དང་། །མགུལ་པ་མཛེས་དང་མགུལ་ངེས་དང་། །སྐྱེ་དགུའི་བླ་མར་གྱུར་པ་དང་། །ལྷ་ལས་བྱུང་བའི་ཁ་ལོ་པ། །དྲི་ཟ་སྣ་ཚོགས་སྡེ་དང་ནི། །མི་རྒྱལ་རྒྱལ་བའི་ཁྱུ་མཆོག་དང་། །དེ་བཞིན་རི་དང་གངས་ཅན་དང་། །གང་བ་
སྨིན་དྲུག་ཕུག་དང་ནི། །འཚོ་བ་དང་ནི་བཏང་བཟུང་དང་། །སྣ་ཚོགས་བཤེས་གཉེན་གཉའ་ཤིང་འཛིན། །ས་སྐྱོང་རབ་ཏུ་རྟོགས་པ་དང་། །ངོ་ཚ་མིག་དང་ཁང་པ་དང་། །ལྔ་ལེན་གཏུམ་པོ་ཨཱལ་བ་ཀ། །སྲིད་སྒྲུབ་ཡིད་བཟང་བཞིན་བཟང་དང་། །ཞོ་གདོང་ནོར་བུ་ནོར་བུ་སྤྱོད། །དེ་བཞིན་དབང་

ཕྱུག་དང་བཅས་སོ། །འདི་རྣམས་ནི་གནོད་སྦྱིན་རྣམས་དང་། གནོད་སྦྱིན་ཆེན་པོ་རྣམས་དང་། སྡེ་དཔོན་རྣམས་དང་སྡེ་དཔོན་ཆེན་པོ་རྣམས་ལ་གསོལ་བར་བྱེད་པ་དང་། ང་རོ་སྒྲོགས་པར་བྱེད་པ་དང་། སྒྲ་ཆེར་སྒྲོགས་པར་བྱེད་པའོ། །འདིར་གནོད་སྦྱིན་གྱིས་བཟུང་ནས་གནོད་སྦྱིན་འདིས་
ཚེ་འཕྲོག་པར་བྱེད་པ་དང་། གནོད་སྦྱིན་འདིས་འཚེ་བར་བྱེད་པ་དང་། གནོད་སྦྱིན་འདིས་རྣམ་པར་ཐོ་འཚམ་པར་བྱེད་པ་དང་། གནོད་སྦྱིན་འདིས་གནོད་པར་བྱེད་པ་དང་། གནོད་སྦྱིན་འདིས་རྣམ་པར་གནོད་པར་བྱེད་པ་དང་། གནོད་སྦྱིན་འདིས་ནི་མི་གཏོང་བར་བྱེད་དོ། །དྲང་སྲོང་ཆེན་པོ་
འདིས་ནི་ལྕང་ལོ་ཅན་གྱི་ཕོ་བྲང་གིས་སྲུངས་ཤིག །དགེ་སློང་དང་དགེ་སློང་མ་དང་། དགེ་བསྙེན་དང་དགེ་བསྙེན་མ་རྣམས་ལ་བསྲུང་བ་དང་། སྦ་བ་དང་། འཚེ་བ་མེད་པ་དང་། བདེ་བ་དང་། ལེགས་པར་གནས་སོ། །དྲང་སྲོང་ཆེན་པོ་ད་ནི་བདག་ཅག་རྣམས་འགྲོ་བར་བགྱིའོ། །བདག་
ཅག་རྣམས་ནི་བྱ་བ་མང་བ་དང་བྱེད་པ་མང་བས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱེད་རྣམས་ད་ནི་འགྲོ་བར་གྱིས་ཤིག །དེ་ནས་རྒྱལ་པོ་ཆེན་པོ་བཞི་པོ་རྣམས་ལངས་ནས། བཅོམ་ལྡན་འདས་ལ་ཕྱག་བྱས་ཏེ་བསྐོར་བ་བྱས་ནས་དེར་མི་སྣང་བར་གྱུར་ཏོ། །གནོད་
སྦྱིན་དེ་རྣམས་ཀྱང་ལངས་ནས་གང་སུ་དག་གིས་བཅོམ་ལྡན་འདས་ལ་ཕྱག་བྱས་ཏེ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །གང་སུ་དག་གིས་བཅོམ་ལྡན་འདས་ལ་སྙུན་གསོལ་ཏེ་སྙུན་གསོལ་ནས་སྙིང་པོ་དང་སྙིང་པོ་མེད་པ་ཇི་ལྟར་ཞེས་ཞུས་པ་དེ་རྣམས་དེ་ཉིད་དུ་མི་སྣང་བར་གྱུར་ཏོ། །
གང་སུ་དག་གིས་བཅོམ་ལྡན་འདས་ག་ལ་བ་དེར་ཐལ་མོ་སྦྱར་ནས་དེ་ཉིད་དུ་མི་སྣང་བར་གྱུར་ཏོ། །གང་ལ་ལ་ཞིག་གིས་མིང་དང་རིགས་རྣམ་པར་དཔྱད་ནས་དེ་ཉིད་དུ་མི་སྣང་བར་གྱུར་ཏོ། །གང་ལ་ལ་ཞིག་ཅང་མི་སྨྲ་བར་གྱུར་ཏེ་དེ་ཉིད་དུ་མི་སྣང་བར་གྱུར་ཏོ། །ལྕང་ལོ་ཅན་གྱི་ཕོ་བྲང་
གི་མདོ་ལས་སྐབས་རབ་མཆོག་དང་པོའོ།། །།དེ་ནས་ཡང་བཅོམ་ལྡན་འདས་ཀྱིས་དེའི་མཚན་མོ་འདས་ནས་དགེ་སློང་རྣམས་བོས་ནས་དགེ་སློང་དག་འདིའི་མཚན་མོ་རྒྱལ་པོ་ཆེན་པོ་བཞི་པོ་རྣམས་དང་། གནོད་སྦྱིན་གྱི་སྡེ་དཔོན་ཆེན་པོ་རྣམས་དང་དྲི་ཟའི་སྡེ་མང་པོ་དང་། གྲུལ་བུམ་

གྱི་སྡེ་མང་པོ་དང་། ཀླུའི་སྡེ་མང་པོ་དང་། ཕྱོགས་བཞི་བསྲུང་ཞིང་གནས་སོ། །ཕྱོགས་བཞིར་ཚན་ཚན་དུ་གནས་སོ། །ཕྱོགས་བཞི་སྐྱོང་ཞིང་གནས་སོ། །མཚན་མོ་འོངས་ཏེ་ཁ་དོག་སྣ་ཚོགས་པ་ཅན་གྱིས་བྱ་རྒོད་ཕུང་པོའི་རི་འབའ་ཞིག་སྣང་བར་བྱས་ཏེ། བཅོམ་
ལྡན་འདས་ག་ལ་བ་དེར་སོང་སྟེ་སོང་ནས་ང་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །དགེ་སློང་དག་དང་གནོད་སྦྱིན་དེ་རྣམས་གང་ལ་ལ་ཞིག་གིས་ང་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་ང་ལ་སྙུན་གསོལ་ཏེ་སྙུན་གསོལ་ནས་ཇི་ལྟར་སྙིང་པོ་དང་སྙིང་པོ་མེད་
པའི་གཏམ་འདྲི་ཞིང་ཕྱོགས་གཅིག་ཏུ་འཁོད་དོ། །གང་སུ་དག་གིས་ང་ལ་ཐལ་མོ་སྦྱར་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་མིང་དང་རིགས་དཔྱོད་ཅིང་ཕྱོགས་གཅིག་ཏུ་འཁོད་དོ། །གང་སུ་དག་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་དགེ་སློང་
དག་དང་རྒྱལ་པོ་ཆེན་པོ་རྣམ་ཐོས་ཀྱི་བུས་ང་ལ་འདི་སྐད་ཅེས་གསོལ་ནས། གནོད་སྦྱིན་མ་རུངས་པ་ཡོད་པ་རྣམས་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་མ་རུངས་པ་གང་ལ་ལ་ཞིག་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་
བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་བཙུན་པ་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱ