Kinh tạng Tây Tạng (Kangyur Đại Học) — 011_འདུལ་བ།_ད

འདས་ཀྱིས་བཤད་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་བཅོམ་ལྡན་འདས་ཀྱི་དྲུང་ནས་དོང་ངོ་། །མགར་བའི་བུ་ཙུན་ད་ཡང་དེ་ཉིད་ན་འདུག་སྟེ། དེ་ནས་མགར་བའི་བུ་ཙུན་དས་ས་པའི་གྲོང་གི་མལ་ལྱ་རྣམས་དོང་ནས་
རིང་པོ་མ་ལོན་པར་ཤེས་ཏེ་སྟན་ལས་ལངས་ནས་བླ་གོས་ཕྱོགས་གཅིག་ཏུ་བྱས་ཏེ་བཅོམ་ལྡན་འདས་ག་ལ་བ་དེར་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་མཆིས་
འབྲང་དུ་བཤོས་ལ་གཤེགས་པར་ཅི་གནང་། བཅོམ་ལྡན་འདས་ཀྱིས་མགར་བའི་བུ་ཙུན་ད་ལ་ཅང་མི་གསུང་བས་གནང་ངོ་། །དེ་ནས་མགར་བའི་བུ་ཙུན་ད་བཅོམ་ལྡན་འདས་ཅང་མི་གསུང་བས་གནང་བར་ཤེས་ནས་བཅོམ་ལྡན་འདས་ཀྱིས་བཤད་པ་དེ་ལ་མངོན་པར་དགའ་སྟེ་རྗེས་སུ་
ཡི་རངས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་དྲུང་ནས་སོང་ངོ་། །དེ་ནས་མགར་བའི་བུ་ཙུན་དས་དེ་ཉིད་ཀྱི་ནུབ་མོ་བཅོམ་ལྡན་འདས་ལ་འབྲས་བཟང་པོའི་བཟའ་བ་སྦྱར་ཏེ། ལེགས་པར་བྱས་པའི་བཟའ་བ་སྟ་གོན་བྱས་ནས་དགེ་སློང་གི་དགེ་འདུན་ལ་གཙང་ཞིང་

བསོད་པའི་བཟའ་བ་དང་བཅའ་བ་བསོགས་ཏེ་ནང་པར་སྔར་ལངས་ནས་གདན་བཏིང་སྟེ་ཆུ་རྫ་བཞག་ནས་དེའི་འོག་ཏུ་བཅོམ་ལྡན་འདས་ལ་བཙུན་པ་བཅོམ་ལྡན་འདས་བཤོས་ཀྱི་སྟ་གོན་བགྱིས་ནས་ད་ལྟར་གདུགས་ཚོད་ལ་བབ་ན་གདུགས་ཚོད་མཁྱེན་པར་མཛད་དུ་
གསོལ་ཞེས་སྤྱན་དྲངས་པ་དང་། དེ་ནས་བཅོམ་ལྡན་འདས་སྔ་དྲོ་ཆོས་གོས་དང་སྨད་གཡོགས་མནབས། ལྷུང་བཟེད་བསྣམས་ཏེ། དགེ་སློང་མང་པོས་བསྐོར་ནས་དགེ་སློང་གི་དགེ་འདུན་གྱིས་མདུན་དུ་བྱས་ཏེ། མགར་བའི་བུ་ཙུན་དའི་བཀད་སར་གཤེགས་ཏེ་ཕྱིན་པ་དང་། དགེ་སློང་གི་
དགེ་འདུན་གྱི་མདུན་ན་གདན་བཏིང་བ་ལ་བཞུགས་སོ། །དེ་ནས་མགར་བའི་བུ་ཙུན་དས་སངས་རྒྱས་དང་། དགེ་སློང་གི་དགེ་འདུན་བདེ་བར་བཞུགས་པར་ཤེས་ནས་བཅོམ་ལྡན་འདས་ལ་འབྲས་བཟང་པོ་ལྕགས་གཞོང་དུ་བཟའ་བ་ལེགས་པར་བྱས་ཏེ་སྦྱར་བ་བདག་གི་ལག་གིས་
བྲིམས་ཏེ་བདར་རོ། །དགེ་སློང་གི་དགེ་འདུན་ལ་ཡང་གཙང་ཞིང་བསོད་པའི་བཟའ་བ་དང་བཅའ་བ་བདག་གི་ལག་གིས་བདར་ཅིང་བསྟབས་སོ། །དེའི་དུས་ན་དགེ་སློང་སྡིག་ཅན་གཞན་ཞིག་ལྕགས་གཞོང་དྲངས་ཏེ་མཆན་དུ་བཅུག་གོ། །དེ་ནས་དགེ་སློང་སྡིག་ཅན་དེ་བཅོམ་ལྡན་
འདས་ཀྱིས་གཟིགས། སངས་རྒྱས་ཀྱི་མཐུས་མགར་བའི་བུ་ཙུན་དས་ཀྱང་མཐོང་ངོ་། །དེ་ནས་མགར་བའི་བུ་ཙུན་དས་གཞོང་བུ་དུ་མའི་འབྲས་བཟང་པོ་བཟའ་བ་ལེགས་པར་སྦྱར་ཏེ་བདག་གི་ལག་པས་བྲིམས་ཤིང་བསྟབས་སོ། །དགེ་སློང་གི་དགེ་འདུན་དག་ལ་ཡང་གཙང་ཞིང་
བསོད་པའི་བཟའ་བ་དང་བཅའ་བ་བདག་གི་ལག་པས་བྲིམས་ཤིང་བསྟབས་སོ། །བཅོམ་ལྡན་འདས་ཀྱིས་གསོལ་ཟིན་པར་ཤེས་ནས་ཕྱག་ཆབ་གསོལ་ལོ། །ལྷུང་བཟེད་བླངས་ནས་སྟན་ངན་པ་ཞིག་བླངས་ཏེ་བཅོམ་ལྡན་འདས་ཀྱི་སྤྱན་སྔར་འདུག་ནས་བཅོམ་ལྡན་འདས་ལ་
ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། ཤིན་ཏུ་མང་བ་ཐུབ་པའི་བློ་ལ་ཞུ། །རྒལ་ཏེ་ཕ་རོལ་གཤེགས་པ་ཐེ་ཚོམ་རྒལ། །ཁ་ལོ་སྒྱུར་བའི་མཆོག་སྟེ་འདྲེན་པའི་མཆོག །འཇིག་རྟེན་དགེ་སྦྱོང་དུ་མཆིས་གསུང་བར་མཛོད། །དགེ་སྦྱོང་བཞི་སྟེ་ལྔ་པ་མེད། །

དེ་མངོན་ཤེས་ནས་ཁྱོད་ལ་སྨྲ། །ལམ་རྒྱལ་བ་དང་ལམ་འཆད་པ། །ལམ་འཚོ་དང་ནི་གང་ཞིག་ལམ་སུན་འབྱིན། །ལམ་རྒྱལ་བ་ལ་སངས་རྒྱས་ཅི་ཞིག་གསུངས། །ལམ་བཤད་ཇི་ལྟར་མཉམ་པ་མེད་ཅེས་བགྱི། །ཁྱོད་ལ་ཞུས་པ་ལམ་འཚོ་གསུངས། །འོན་ཏམ་ལམ་སུན་
འབྱིན་པ་བདག་ལ་གསུངས། །གང་གིས་ཐེ་ཚོམ་སྨྲ་བ་ཆད་ནས་ཉོན་མོངས་བྲལ། །གཞན་གྱིས་མི་བཀྲི་མྱ་ངན་འདའ་ལ་དགའ། །འཇིག་རྟེན་ལྷ་རུ་བཅས་པའི་སྟོན་པ་སྟེ། །དེ་ནི་ལམ་རྒྱལ་སངས་རྒྱས་ཀྱིས་སུ་གསུངས། །གང་གིས་རབ་དང་མཆོག་ཤེས་པའི། །གསུངས་
པའི་ཆོས་ལ་དེ་བཞིན་ཕྱེ། །དེ་ནི་ཐེ་ཙོམ་གཅོད་པའི་ཐུབ་པ་སྟེ། །གཞན་གྱིས་མི་བཀྲི་གཉིས་སུ་མེད། །དཀའ་ཐུབ་ཀྱིས་སུ་ལམ་བཤད་པ་རུ་གསུངས། །གང་གིས་ཆོས་ཚིག་ལེགས་བཤད་པ། །ལམ་འཚོ་དཀའ་ཐུབ་དྲན་པའི་བདག །ཁ་ན་མ་ཐོའི་ཚིག་ལ་སློབ་པ་ནི། །
གསུམ་སྟེ་དཀའ་ཐུབ་ཀྱིས་ནི་ལམ་འཚོར་གསུངས། །ལེགས་དགའ་ནང་ན་གཡོགས་བྱས་ན། །རབ་སྐེམས་རིགས་སུན་བྱུང་རྒྱལ་སྨྲ། །སྒྱུ་ཅན་སྡོམ་མེད་རབ་སྨྲ་བ། །མི་རིགས་སྤྱོད་པ་དེ་ནི་ལམ་སུན་འབྱིན། །ཁྱིམ་བདག་གང་ཞིག་རབ་བསམས་པ། །ཐོས་དང་ལྡན་ཏེ་འཕགས་
པའི་ཉན་ཐོས་ཀྱིས། །རབ་ཤེས་ཐམས་ཅད་འདི་འདྲར་མི་འགྱུར་རོ། །ཤེས་ནས་དེ་ཡི་དད་པ་འབྲི་མི་འགྱུར། །མི་སྲུན་འདི་དང་སྲུན་པ་དང་། །དག་པ་དང་ནི་མ་དག་པ། །མཉམ་པ་རུ་ནི་ཇི་ལྟར་བྱ། །གཅིག་གིས་སྡིག་པའི་ལས་བྱས་ནས། །སྡིག་མི་བྱེད་པའང་འགྲོ་རྣམས་དོགས། །
ཁ་དོག་གཟུགས་ལྡན་མིར་མི་བརྟག །མ་རབས་མཐོང་མ་ཐག་ཏུ་ཡིད་མི་བརྟན། །རབ་ཏུ་མི་སྡོམ་མང་དུ་མཚན་མ་ཅན། །མི་ཐུབ་པ་ནི་འཇིག་རྟེན་འདི་ན་སྤྱོད། །གསེར་གྱིས་གཡོགས་པའི་རྣ་ཆ་འདྲ། །ལྕགས་ཀྱི་དོང་ཙེ་གསེར་གྱིས་གཡོགས་པ་བཞིན། །ནང་ནི་ཞེ་སྡང་
ཕྱི་ནི་འཕགས་པའི་གཟུགས། །གཡོ་དང་ལྡན་པ་ཁ་ཅིག་འདི་ན་སྤྱད། །དེ་ནས་བཅོམ་ལྡན་འདས་ཀྱིས་མགར་བའི་བུ་ཙུན་དའི་སྦྱིན་པ་དེ་ལ་རྗེས་སུ་ཡི་རང་བ་འདིས་རྗེས་སུ་ཡི་རང་བར་མཛད་དོ། །བྱིན་ན་བསོད་ནམས་རབ་ཏུ་འཕེལ། །ཡང་དག་སྡོམ་ལས་ཁོན་མི་འཕེལ། །

ལེགས་པ་ཅན་གྱིས་སྡིག་པ་སྤོངས། །ཉོན་མོངས་ཟད་ནས་མྱ་ངན་འདའ། །དེ་ནས་བཅོམ་ལྡན་འདས་ཀྱིས་མགར་བའི་བུ་ཙུན་ད་ལ་ཆོས་ཀྱི་གཏམ་བསྟན་ཏེ། ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བ་བསྐྱེད་དེ།
རྣམ་གྲངས་དུ་མའི་ཆོས་ཀྱིས་ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བ་བསྐྱེད་དེ་སྟན་ལས་ལངས་ཏེ་སོང་ངོ་། །བཞེངས་ཏེ་གཤེགས་སོ།། །།འདུལ་བ་ཕྲན་ཚེགས་ཀྱི་གཞི། བམ་པོ་ལྔ་བཅུ་གཉིས་པ། བར་སྡོམ་ནི།
ཙ་པ་ལ་དང་ཚེ་ཡི་འདུ་བྱེད་མཛད། །གླང་པོ་ཆེན་པོ་གཟིགས་པར་མཛད་པ་དང་། །རུ་རྟ་ལ་སོགས་གྲོང་ཁྱེར་བཅུ་རྣམས་དང་། །གཡོས་པ་མདོ་སྡེ་དག་དང་སྡིག་པ་ཅན། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གྲོང་
ཁྱེར་རྩྭ་ཅན་ག་ལ་བར་འདོང་ངོ་། །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ཏོ། །དེ་ནས་བཅོམ་ལྡན་འདས་གྱད་ཀྱི་ལྗོངས་རྒྱུ་ཞིང་གཤེགས་པ་ནས། སྡིག་པ་ཅན་གྱི་བར་དང་། ཆུ་བོ་དབྱིག་ལྡན་གྱི་བར་དུ་བཅོམ་ལྡན་
འདས་ཤུལ་དུ་ཞུགས་ཏེ་གཤེགས་པ་ལས་ཤུལ་ནས་གྱུ་སྟེ་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ང་རྒྱབ་མི་བདེ་སྟེ་ངལ་བསོས། དེ་བཞིན་གཤེགས་པའི་བླ་གོས་བཞི་ལྟབ་ཏུ་ལྟོབ་ལ་ཐིང་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་
བོས་བཅོམ་ལྡན་འདས་ཀྱི་ལྟར་མཉན་ཏེ། རིངས་པ་རིངས་པར་བླ་གོས་བཞི་ལྟབ་ཏུ་བལྟབ་སྟེ་བཏིང་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པའི་བླ་གོས་བཞི་ལྟབ་ཏུ་བལྟབ་སྟེ་བཏིང་ལགས་ན་བཅོམ་ལྡན་འདས་ཀྱིས་ད་དེའི་དུས་ལ་
བབ་པར་དགོངས་སུ་གསོལ། དེ་ནས་བཅོམ་ལྡན་འདས་ཀྱིས་ན་བཟའ་སྣམ་སྦྱར་ལྟབ་མ་མང་དུ་མཛད་ནས་ཕངས་སུ་བཅུག་སྟེ། གློ་གཡས་པས་ཕབ་ནས་ཞབས་ཀྱི་སྟེང་དུ་ཞབས་གཞག་སྟེ། སྣང་བའི་འདུ་ཤེས་དང་། དྲན་པ་དང་། ཤེས་བཞིན་དང་། བཞེངས་པའི་འདུ་

ཤེས་ཐུགས་ལ་མཛད་ནས་གཟིམས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ཆུ་བོ་ཀ་ཀུ་སྟ་ནས་ཆུ་ལྷུང་བཟེད་གང་ལོང་ཤིག །ཆུ་དེ་ངས་བཏུང་བར་བྱ། ལུས་ལ་གཏོར་བར་ཡང་བྱའོ། །བཙུན་པ་བཀའ་
བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་ལྷུང་བཟེད་ཐོགས་ཏེ་ཆུ་བོ་ཀ་ཀུ་སྟ་ག་ལ་བར་སོང་བ་དང་། དེའི་ཚེ་ཆུ་བོ་ཀ་ཀུ་སྟ་ལ་ཤིང་རྟ་ལྔ་བརྒྱ་ཙམ་གྱི་ཚད་ཅིག་གིས་བརྒལ་ནས་རིང་པོ་མ་ལོན་ཏེ། དེ་དག་གིས་ཆུ་བོ་དཀྲུགས་ཤིང་གློངས་ཏེ་
རྙོགས་པ་དང་། དེ་ནས་ཚེ་དང་ལྡན་པ་ཀུན་དགའ་བོས་ཆུ་བོ་ཀ་ཀུ་སྟ་ལས་ཆུ་ལྷུང་བཟེད་གང་བླངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདི་ལྟར་ཆུ་བོ་ཀ་ཀུ་སྟ་ལ་ཤིང་རྟ་ལྔ་བརྒྱ་ཙམ་གྱི་ཚད་ཀྱིས་བརྒལ་ནས་རིང་
པོར་མ་ལགས་ཏེ། དེ་དག་གིས་ཆུ་བོ་ཀ་ཀུ་སྟ་དཀྲུགས་ཤིང་གློངས་ཏེ་རྙོགས་པར་བགྱིས་པས་བཙུན་པ་བཅོམ་ལྡན་འདས་ཆབ་འདིས་ཞལ་ཙམ་བཤལ་ཞིང་ཞབས་བཀྲུར་གསོལ། བཙུན་པ་འདི་ནས་མི་རིང་བ་ཞིག་ན་ཆུ་བོ་དབྱིག་ལྡན་མཆིས་ཏེ། བཅོམ་ལྡན་འདས་དེ་ལ་གསོལ་
ཞིང་སྐུ་ལ་ཡང་གདབ་པར་བགྱིའོ། །དེ་ནས་བཅོམ་ལྡན་འདས་ཀྱིས་ལྷུང་བཟེད་ཀྱི་ཆུ་དེས་ཞབས་བསིལ། ཞལ་བཤལ་བ་དང་། དེས་ན་བཅོམ་ལྡན་འདས་བཟོད་ཅིང་བདེ་བར་གྱུར་ནས། དེ་ནས་བཅོམ་ལྡན་འདས་བཞེངས་ཏེ་སྐྱིལ་མོ་ཀྲུང་བཅས་ནས་སྐུ་དྲང་པོར་བསྲང་
སྟེ་དྲན་པ་མངོན་དུ་གཞག་ནས་བཞུགས་སོ། །དེ་ནས་ཡང་དེའི་ཚེ་གྱད་ཀྱི་སྣ་ཆེན་པོ་ལ་གཏོགས་པ་གཡུང་པོ་ལམ་དེ་ཉིད་དུ་ཞུགས་པར་གྱུར་པ་དང་། གྱད་ཀྱི་སྣ་ཆེན་པོ་ལ་གཏོགས་པ་གཡུང་པོས་བཅོམ་ལྡན་འདས་མཛེས་པ། དད་པར་མཛད་པ། དབང་པོ་ཞི་བ་ཐུགས་
ཞི་བ་ཕ་རོལ་གྱི་སེམས་འདུལ་ཞིང་ཉེ་བར་ཞི་བར་མཛད་པ་དང་ལྡན་པ། གསེར་གྱི་མཆོད་སྡོང་ལྟར་དཔལ་འབར་བ་དེ་ཤིང་དྲུང་གཞན་ཞིག་གི་དྲུང་ན་རྟེན་ཅིང་བཞུགས་པ་མཐོང་ངོ་། །མཐོང་ནས་ཀྱང་བཅོམ་ལྡན་འདས་ག་ལ་བ་དེ་ལོགས་སུ་སོང་སྟེ་ཕྱིན་ནས་བཅོམ་ལྡན་འདས་

ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་པ་དང་། གྱད་ཀྱི་སྣ་ཆེན་པོ་ལ་གཏོགས་པ་གཡུང་པོ་ལ་བཅོམ་ལྡན་འདས་ཀྱིས་བཀའ་སྩལ་པ། །གཡུང་པོ་ཁྱོད་དགེ་སྦྱོང་ངམ། བྲམ་ཟེའི་ཆོས་
ཀྱི་གཙང་སྦྲ་གང་ལ་དགའ། བཙུན་པ་སྒྱུ་རྩལ་ཤེས་ཀྱི་བུ་རིང་དུ་འཕུར་གྱི་ཆོས་ཀྱི་གཙང་སྦྲ་ལ་དགའོ། །གཡུང་པོ་ཁྱོད་ཅིའི་ཕྱིར་སྒྱུ་རྩལ་ཤེས་ཀྱི་བུ་རིང་དུ་འཕུར་གྱི་ཆོས་ཀྱི་གཙང་སྦྲ་ལ་དགའ། བཙུན་པ་དུས་གཅིག་ཅིག་ན་སྒྱུ་རྩལ་ཤེས་ཀྱི་བུ་རིང་དུ་འཕུར་ལམ་དུ་
ཞུགས་པ་ལས་ལམ་ནས་གྱུ་སྟེ། ཤིང་གཞན་ཞིག་གི་དྲུང་དུ་རྟེན་ཅིང་ཉིན་པར་གྱི་སྤྱོད་པས་གནས་ཤིང་མཆིས་པ་དང་། དེ་ནས་ཡང་དེའི་ཚེ་ལམ་དེ་ཉིད་དུ་ཤིང་རྟ་ལྔ་བརྒྱ་ཙམ་གྱི་ཚད་ཅིག་ཀྱང་མཆིས་ནས་རིང་པོ་མ་ལགས་ཏེ། དེ་ནས་མི་གཞན་ཞིག་ཤིང་རྟ་དེའི་ཕྱིར་ལུས་པ་
སྒྱུ་རྩལ་ཤེས་ཀྱི་བུ་རིང་དུ་འཕུར་ག་ལ་བ་དེར་སོང་སྟེ་ཕྱིན་ནས་སྒྱུ་རྩལ་ཤེས་ཀྱི་བུ་རིང་དུ་འཕུར་ལ་འདི་སྐད་ཅེས་སྨྲས་སོ། །ཅི་ཤིང་རྟ་ལྔ་བརྒྱ་ཙམ་གྱི་ཚད་ཅིག་སོང་བ་མཐོང་བར་མ་གྱུར་ཏམ། ཀྱེ་སྐྱེས་བུ་མ་མཐོང་ངོ་། །གང་ཤིང་རྟ་ལྔ་བརྒྱ་ཙམ་དོང་བའི་སྒྲ་ཡང་ཐོས་པར་མ་གྱུར་
ཏམ། ཀྱེ་སྐྱེས་བུ་མ་ཐོས་སོ། །ཅི་ཉལ་བར་གྱུར་ཏམ། ཀྱེ་སྐྱེས་བུ་ང་ཉལ་བར་ཡང་མ་གྱུར་ཏོ། །ཅི་མི་ཉལ་བའི་འདུ་ཤེས་ཀྱིས་ཤིང་རྟ་ལྔ་བརྒྱ་ཙམ་དོང་བའི་སྒྲ་མ་ཐོས་པར་གྱུར་ཏམ། ཀྱེ་སྐྱེས་བུ་ངས་མི་ཉལ་བའི་འདུ་ཤེས་ཀྱིས་ཤིང་རྟ་ལྔ་བརྒྱ་ཙམ་དོང་བའི་སྒྲ་ཡང་མ་ཐོས་པར་གྱུར་
ཏོ། །དེ་ནས་མི་དེ་འདི་སྙམ་དུ་བསམས་ཏེ། ཇི་སྲིད་ཅིག་ནས་རབ་ཏུ་བྱུང་བ་ཞི་བར་གནས་པ་ཞིག །གང་འདི་ལྟར་མི་ཉལ་བའི་འདུ་ཤེས་ཀྱིས་ཤིང་རྟ་ལྔ་བརྒྱ་ཙམ་གྱི་ཚད་དོང་བའི་སྒྲ་ཡང་མ་ཐོས་སོ། །འདི་ལྟར་ཆོས་གོས་ཀྱང་རྡུལ་གྱི་ཕྱེ་མས་ཡོག་པར་ཤེས་ནས་མི་དེ་ངོ་མཚར་སྐྱེས་
ནས། སྒྱུ་རྩལ་ཤེས་ཀྱི་བུ་རིང་དུ་འཕུར་ལ་དད་ཅིང་དད་པའི་དབང་དུ་བྱས་སོ། །བཙུན་པ་དེ་ལྟ་བས་ན་བདག་སྒྱུ་རྩལ་ཤེས་ཀྱི་བུ་རིང་དུ་འཕུར་གྱི་གཙང་སྦྲའི་ཆོས་ལ་དགའ་བ་ལགས་སོ། །གཡུང་པོ་ཇི་སྙམ་དུ་སེམས། གང་ཤིང་རྟ་ལྔ་བརྒྱ་ཙམ་གྱི་ཚད་དོང་བའི་སྒྲ་དང་། གང་

འབྲུག་ཆེམས་ཞེས་ཟེར་བ་དང་། ཐོག་བབས་པ་འདི་གཉིས་ཀྱི་སྒྲ་གང་རྒྱ་ཆེ་བ་ཡིན། བཙུན་པ་ཅི་ལགས། ཤིང་རྟ་ལྔ་བརྒྱ་ཙམ་ལྟ་ཞོག་གི་ཅི་ལགས་ཤིང་རྟ་སྟོང་དང་། ཅི་ལགས་ཤིང་རྟ་བརྒྱ་སྟོང་འདི་དག་གང་བས་ཀྱང་གང་འབྲུག་ཆེམས་ཞེས་མཆི་བ་དང་། ཐོག་བབས་པའི་
སྒྲ་རྒྱ་ཆེ་བ་ལགས་སོ། །གཡུང་པོ་དུས་གཅིག་ཅིག་ན། ཡུལ་ཨ་དུ་མ་ཡ་འབྱུང་པོའི་ཁང་པའི་ཁྱམས་ན་བཞུགས་ཏེ། ང་སྔ་དྲོ་ན་བཟའ་སྨད་གཡོགས་བགོས་ལྷུང་བཟེད་དང་། ཆོས་གོས་ཐོགས་ཏེ་ཡུལ་ཨ་དུ་མན་དུར་བསོད་སྙོམས་ཀྱི་ཕྱིར་གཤེགས་ཏེ། ཡུལ་ཨ་དུ་
མན་དུར་བསོད་སྙོམས་བརྒྱུས་ནས་ཟས་ཀྱི་བྱ་བ་མཛད་དེ། ཟས་ཕྱི་མའི་བསོད་སྙོམས་སྤངས་ནས་ལྷུང་བཟེད་དང་ཆོས་གོས་མཁོས་སུ་ཕབ་སྟེ། ཞབས་བཀྲུས་ནས་འབྱུང་པོའི་ཁང་པའི་ཁྱམས་སུ་ནང་དུ་ཡང་དག་འཇོག་ལ་བཞུགས་སོ། །དེ་ནས་ཡང་དེའི་ཚེ་ཡུལ་ཨ་དུ་མ་
ཡ་ན་འབྲུག་ཆེམས་ཞེས་ཟེར་བ་དང་། ཐོག་བབས་པ་དང་། གླང་བཞི་དང་། ཁྱིམ་བདག་ཞིང་པ་སྤུན་གཉིས་ཤི་ནས་དེ་ནས་ཡུལ་ཨ་དུ་མ་ཡར་སྐྱེ་བོ་མང་པོས་སྒྲ་ཆེན་པོ་དང་། སྒྲ་མང་པོ་སྒྲོགས་པར་གྱུར་ཏོ། །ང་ཡང་དགོངས་ཀ་ནང་དུ་ཡང་དག་འཇོག་ལས་བཞེངས་ཏེ་
འབྱུང་པོའི་ཁང་པའི་ཁྱམས་ནས་བྱུང་སྟེ། འབྱུང་པོའི་ཁང་པའི་གྲིབ་མ་བླ་གབ་མེད་པར་འཆག་ས་ན་འཆག་པ་དང་། དེ་ནས་མི་གཞན་ཞིག་སྐྱེ་བོ་མང་པོ་དེ་དག་གི་དྲུང་ནས་ང་ག་ལ་བར་འོངས་ཏེ་ཕྱིན་ནས་ངའི་ཞབས་གཉིས་ལ་མགོ་བོས་ཕྱག་འཚལ་ཏེ་ང་འཆག་པའི་རྗེས་སུ་
འཆག་གོ། །ངས་དེ་ལ་འདི་སྐད་ཅེས་ཀྱེ་སྐྱེས་བུ་ཡུལ་ཨ་དུ་མ་ཡ་ན་སྐྱེ་བོ་མང་པོའི་སྒྲ་ཆེན་པོ་དང་། སྒྲ་མང་པོ་སྒྲོགས་པ་འདི་ཅི་ཞིག་ཡིན་ཞེས་བཀའ་སྩལ་པ་དང་། དེས་སྨྲས་པ། བཙུན་པ་འདི་ལྟར་ཡུལ་ཨ་དུ་མ་ཡར་འབྲུག་ཆེམས་ཞེས་མཆི་བ་དང་། ཐོག་བབས་པར་
གྱུར་ཏེ། གླང་བཞི་དང་། ཁྱིམ་བདག་ཞིང་པ་སྤུན་གཉིས་གུམ་སྟེ། དེས་ན་འདི་ལྟར་ཡུལ་ཨ་དུ་མ་ཡའི་སྐྱེ་བོ་མང་པོ་དག་སྒྲ་ཆེན་པོ་དང་། སྒྲ་མང་པོ་དག་སྒྲོགས་པར་གྱུར་ཏོ། །དེས་འདི་སྐད་ཅེས་བཅོམ་ལྡན་འདས་ཅི་ལགས། འབྲུག་ཆེམས་ཞེས་མཆི་བ་དང་།

ཐོག་བབས་པ་མ་གསན་ཏམ་ཞེས་སྨྲའོ། །དེ་ལ་ངས་འདི་སྐད་ཅེས་ཀྱེ་སྐྱེས་བུ་ངས་མ་ཐོས་སོ་ཞེས་བཀའ་སྩལ་པ་དང་། དེས་འདི་སྐད་ཅེས་ཅི་ལགས། བཅོམ་ལྡན་འདས་གཟིམས་པར་གྱུར་ཏམ་ཞེས་སྨྲའོ། །དེ་ལ་ངས་འདི་སྐད་ཅེས་ཀྱེ་སྐྱེས་བུ་
ཉལ་བར་མ་གྱུར་ཏོ་ཞེས་བཀའ་སྩལ་པ་དང་། དེས་འདི་སྐད་ཅེས་ཅི་ལགས། བཅོམ་ལྡན་འདས་མ་གཟིམས་པའི་འདུ་ཤེས་ཀྱིས་འབྲུག་ཆེམས་ཞེས་མཆི་བ་དང་། ཐོག་བབས་པ་མ་གསན་པར་གྱུར་ཏམ་ཞེས་སྨྲའོ། །དེ་ལ་འདི་སྐད་ཅེས་ཀྱེ་སྐྱེས་བུ་ང་ནི་མི་ཉལ་བའི་འདུ་ཤེས་
ཀྱིས་འབྲུག་ཆེམས་ཞེས་ཟེར་བ་དང་། ཐོག་བབས་པ་མ་ཐོས་སོ་ཞེས་བཀའ་སྩལ་པ་དང་། དེ་ནས་མི་དེས་འདི་སྙམ་དུ་ཇི་སྲིད་ཅིག་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞི་བར་བཞུགས་ནས། གང་གི་ཕྱིར་བཅོམ་
ལྡན་འདས་མ་གཟིམས་པའི་འདུ་ཤེས་ཀྱིས་འབྲུག་ཆེམས་ཞེས་ཟེར་བ་དང་། ཐོག་བབས་པའི་སྒྲ་མ་གསན་པར་གྱུར་པ་ནི་ངོ་མཚར་ཆེའོ་ཞེས་བསམས་ནས་སྐྱེས་བུ་དེ་ང་ལ་དད་པར་གྱུར་ཅིང་དད་པའི་དབང་དུ་བྱས་ཏེ། འདི་སྐད་ཅེས་བཙུན་པ་བཅོམ་ལྡན་འདས་ལ་སུ་ཞིག་མངོན་
པར་མི་དད་ལགས། བདག་ནི་འདི་ལྟར་བཙུན་པ་བཅོམ་ལྡན་འདས་ལ་རྒྱ་ཆེར་མངོན་པར་དད་ལགས་སོ་ཞེས་སྨྲས་སོ། །དེ་ནས་གྱད་ཀྱི་སྣ་ཆེན་པོ་ལ་གཏོགས་པ་གཡུང་པོས་གཡོག་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་རས་བཅོས་བུ་སར་པ་གསེར་གྱི་ཁ་དོག་ལྟར་སེར་
བ་ཟུང་གཅིག་ང་ལ་བྱིན་ཅིག་དང་། དེ་ངས་བཅོམ་ལྡན་འདས་ལ་དབུལ་བར་བྱའོ་ཞེས་སྨྲས་ནས་སྐྱེས་བུ་དེས་ཀྱང་གྱད་ཀྱི་སྣ་ཆེན་པོ་ལ་གཏོགས་པ་གཡུང་པོ་ལ་རས་བཅོས་བུ་སར་པ་གསེར་གྱི་མདོག་ལྟར་སེར་བ་ཟུང་གཅིག་བྱིན་ནོ། །དེ་ནས་གྱད་ཀྱི་སྣ་ཆེན་པོ་ལ་གཏོགས་
པ་གཡུང་པོས་རས་བཅོས་བུ་སར་པ་གསེར་གྱི་མདོག་ལྟར་སེར་བ་ཟུང་གཅིག་ཁྱེར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རས་བཅོས་བུ་སར་པ་གསེར་གྱི་མདོག་ལྟར་སེར་བ་ཟུང་གཅིག་པོ་འདི་བདག་ཅག་གི་ཡིད་དུ་མཆི་བ་དགའ་བ་བཅང་བར་

འོས་པ་དེ་ཐུགས་བརྩེ་བར་དགོངས་ཏེ། བཅོམ་ལྡན་འདས་ཀྱིས་བཞེས་སུ་གསོལ། བཅོམ་ལྡན་འདས་ཀྱིས་གྱད་ཀྱི་སྣ་ཆེན་པོ་ལ་གཏོགས་པ་གཡུང་པོ་ལ་ཐུགས་བརྩེ་བར་དགོངས་ནས་རས་བཅོས་བུ་སར་པ་གསེར་གྱི་མདོག་ལྟར་སེར་བ་ཟུང་གཅིག་བཞེས་པ་དང་། དེ་ནས་
གྱད་ཀྱི་སྣ་ཆེན་པོ་ལ་གཏོགས་པ་གཡུང་པོས་བཅོམ་ལྡན་འདས་ལ་འདི་སྐད་ཅེས་བདག་གིས་གཞན་ཡང་བཙུན་པ་བཅོམ་ལྡན་འདས་དང་དགེ་སློང་གི་དགེ་འདུན་ལ་རིམ་གྲོ་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་གཡུང་པོ་དགེ་བར་སྨྲས་སོ་ཞེས་བཀའ་སྩལ་ཏོ། །
དེ་ནས་གྱད་ཀྱི་སྣ་ཆེན་པོ་ལ་གཏོགས་པ་གཡུང་པོ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་གྱད་ཀྱི་
སྣ་ཆེན་པོ་ལ་གཏོགས་པ་གཡུང་པོ་སོང་ནས་རིང་པོ་མ་ལོན་པར་མཁྱེན་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་རས་བཅོས་བུ་སར་པ་གསེར་གྱི་མདོག་ལྟར་སེར་བ་ཟུང་གཅིག་ཁ་ཚར་གྲིས་ཆོད་ལ་ང་ལ་བྱིན་ཅིག་ངས་བགོ་བར་བྱའོ། །
ཚེ་དང་ལྡན་པ་ཀུན་དགའ་བོས་རས་བཅོས་བུ་སར་པ་གསེར་གྱི་མདོག་ལྟར་སེར་བ་ཁ་ཚར་དྲ་གྲིས་བཅད་ནས་བཅོམ་ལྡན་འདས་ལ་ཕུལ་བ་དང་། དེ་བཅོམ་ལྡན་འདས་ཀྱིས་གསོལ་ཏོ། །བཅོམ་ལྡན་འདས་ཀྱི་སྐུའི་ཁ་དོག་གསལ་བ་མཉམ་པར་སྣང་བར་གྱུར་ཏོ། །དེ་ནས་
ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གིས་དགུང་ལོ་ཉི་ཤུ་ལྷག་གཅིག་གི་བར་དུ་བཅོམ་ལྡན་འདས་ཀྱི་ཞབས་འབྲིང་ན་མཆིས་ན་བཅོམ་ལྡན་འདས་ཀྱི་སྐུའི་ཁ་དོག་གསལ་བ་འདི་ལྟ་བུ་བྱུང་བ་བདག་གིས་མངོན་པར་མ་འཚལ་
ན། བཙུན་པ་རྒྱུ་གང་རྐྱེན་གང་གིས་འདི་ལྟ་བུའི་སྐུ་ཁ་དོག་གསལ་བ་བྱུང་བར་གྱུར། ཀུན་དགའ་བོ་སྐུའི་ཁ་དོག་གསལ་བ་འདི་ལྟ་བུ་བྱུང་བ་འདི་ནི་རྒྱུ་གཉིས་དང་རྐྱེན་གཉིས་ཏེ། གཉིས་གང་ཞེ་ན། གང་གི་ནུབ་མོ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་

ཆུབ་ཏུ་མངོན་པར་རྫོགས་པར་སངས་རྒྱས་པ་དང་། གང་གི་ནུབ་མོ་དེ་བཞིན་གཤེགས་པ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བ་ཡིན་ཏེ། འདི་ནི་སྐུའི་ཁ་དོག་གསལ་བ་འདི་ལྟ་བུ་འབྱུང་བའི་རྒྱུ་གཉིས་པ་དང་
རྐྱེན་གཉིས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆུ་བོ་དབྱིག་ལྡན་ག་ལ་བར་དོང་ངོ་། །བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་
ལྡན་འདས་ཆུ་བོ་དབྱིག་ལྡན་ག་ལ་བར་གཤེགས་ཏེ་བྱོན་ནས་ཆུ་བོ་དབྱིག་ལྡན་གྱི་འགྲམ་མཐའ་གཅིག་ཏུ་ན་བཟའ་ཆོས་གོས་བཞག་སྟེ་བཞུགས་ནས་ཆུ་བོ་དབྱིག་ལྡན་གྱི་ནང་དུ་བཞུགས་ཏེ་སྐུ་ཁྲུས་ལེགས་པར་མཛད་ནས་ཆུ་བོ་དབྱིག་ལྡན་བརྒལ་ཏེ། ན་བཟའ་ཆོས་གོས་གཅིག་
པུ་དང་སྐུ་སྐེམས་ཤིང་བཞུགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་མགར་བའི་བུ་ཙུན་ད་འགྱོད་པ་སྐྱེས་ཏེ། གང་གི་ཕྱིར་སྟོན་པའི་བསོད་སྙོམས་ཕྱི་མ་གསོལ་བས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་
དབྱིངས་སུ་གཤེགས་ཏེ། སྐུལ་བྱེད་དེ་ནི་མ་རྙེད་པའོ། །རྙེད་པ་མ་ཡིན་པའོ་ཉེས་པ་རྙེད་པའོ། །བདེ་བ་རྙེད་པ་མ་ཡིན་པའོ་ཞེས་གཞན་དག་གིས་འགྱོད་པ་བསྐྱེད་ཀྱིས། ཀུན་དགའ་བོ་མགར་བའི་བུ་སྐུལ་བྱེད་འགྱོད་པ་སྐྱེས་པ་ལ་གནས་གཉིས་ཀྱིས་འགྱོད་པ་བསལ་བར་བྱ་སྟེ།
ཙུན་ད་བདག་གིས་བཅོམ་ལྡན་འདས་ལས་མངོན་སུམ་ཐོས་ཏེ། མངོན་སུམ་དུ་བཟུང་བ་ནི་བསོད་སྙོམས་ཀྱི་རྣམ་པར་སྨིན་པ་མཉམ་པ་དང་། མི་མཉམ་པ་རྣམ་པ་གཉིས་ཡོད་དེ། གང་དུ་བསོད་སྙོམས་གསོལ་ནས་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་མངོན་པར་འཚང་རྒྱ་བ་དང་། གང་དུ་བསོད་སྙོམས་གསོལ་ནས་དེ་བཞིན་གཤེགས་པ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་གཤེགས་པ་སྟེ། འདི་ནི་བསོད་སྙོམས་ཀྱི་རྣམ་པར་སྨིན་པ་མཉམ་པ་དང་། མི་མཉམ་པ་གཉིས་ཡོད་པ་ཡིན་ནོ། །

ཀུན་དགའ་བོ་དེ་ལྟ་བས་ན་འདི་ནི་མགར་བའི་བུ་སྐུལ་བྱེད་ཀྱིས་ལས་བྱས་ཤིང་བསགས་པ་ཡིན་ཏེ། ཚེར་འགྱུར་བ་དང་། ཁ་དོག་ཏུ་འགྱུར་བ་དང་། སྟོབས་སུ་འགྱུར་བ་དང་། ལོངས་སྤྱོད་དུ་འགྱུར་བ་དང་། བདེ་འགྲོར་འགྱུར་བ་དང་། ཕྱུག་པོ་འཁོར་དང་བཅས་པར་འགྱུར་བའི་
ལས་བྱས་ཤིང་བསགས་པ་ཡིན་ནོ།། །།བར་སྡོམ་ནི། ཚེ་དང་ཁ་དོག་སྟོབས་དག་དང་། །ལོངས་སྤྱོད་བདེ་འགྲོ་ཕྱུག་པོ་རྣམས། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཚེ་དང་ལྡན་པ་འདུན་པ་འདི་ནི་གཏུམ་པོ་གཟུ་ལུམས་ཅན།
བརླང་བ། གཤེ་བ། ཁྲོ་བ། བདག་ཅག་དགེ་སློང་རྣམས་ལ་ཀུན་དུ་གཤེ་བ་ལགས་ན། བཅོམ་ལྡན་འདས་འདས་པའི་འོག་ཏུ་འདི་ཇི་ལྟར་བསྒྲུབ་པར་བགྱི། ཀུན་དགའ་བོ་དགེ་སློང་འདུན་པ་འདིར་འདས་པའི་འོག་ཏུ་ཚངས་པའི་ཆད་པས་བསྡིགས་པར་བྱའོ། །ཚངས་པའི་ཆད་པས་
བསྡིགས་ནས་ཀྱང་སྐྱོ་བར་བྱའོ། །དེ་ལྟར་ཀུན་དུ་སྐྱོ་བ་སྐྱེས་ནས་ཀྱང་ཀ་ཏྱ་ཡ་ན་ལ་ལུང་ནོད་དུ་གཞུག་པར་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གྲོང་ཁྱེར་རྩྭ་ཅན་ག་ལ་བར་འདོང་ངོ་། །བཀའ་བཞིན་འཚལ་
ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་གྱད་ཀྱི་ལྗོངས་རྒྱུ་ཞིང་གཤེགས་པ་ན་གྲོང་ཁྱེར་རྩྭ་ཅན་གྱི་བར་དང་། ཆུ་བོ་དབྱིག་ལྡན་གྱི་བར་དུ་ཤུལ་དུ་ཞུགས་ཏེ་གཤེགས་པ་ལས་ཤུལ་ལས་གྱུ་སྟེ་ཚེ་དང་ལྡན་པ་ཀུན་དགའ་བོ་ལ་བཀའ་
སྩལ་པ། ཀུན་དགའ་བོ་ང་རྒྱབ་མི་བདེ་སྟེ་ངལ་བསོས། དེ་བཞིན་གཤེགས་པའི་བླ་གོས་བཞི་ལྟབ་ཏུ་ལྟོབ་ལ་ཐིང་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་རིངས་པ་རིངས་པར་བླ་གོས་བཞི་ལྟབ་ཏུ་བལྟབ་སྟེ། བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེ་བཞིན་གཤེགས་པའི་བླ་གོས་བཞི་ལྟབ་ཏུ་བལྟབ་སྟེ་བཏིང་ལགས་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ། དེ་ནས་བཅོམ་ལྡན་འདས་ཀྱིས་ན་བཟའ་སྣམ་སྦྱར་ལྟབ་མ་མང་དུ་མཛད་དེ་འཕངས་སུ་

བཅུག་ནས་གློ་གཡས་པ་ཕབ་སྟེ་ཞབས་ཀྱི་སྟེང་དུ་ཞབས་བཞག་ནས། སྣང་བའི་འདུ་ཤེས་དང་། དྲན་པ་དང་། ཤེས་བཞིན་དང་། བཞེངས་པའི་འདུ་ཤེས་ཐུགས་ལ་མཛད་ནས་གཟིམས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་
སྐད་ཅེས་བཀའ་སྩལ་ཏོ། །ཀུན་དགའ་བོ་བྱང་ཆུབ་ཀྱི་ཡན་ལག་སྨྲོས་ཤིག །བཅོམ་ལྡན་འདས་ཉིད་ཀྱིས་དྲན་པ་བྱང་ཆུབ་ཀྱི་ཡན་ལག་མངོན་པར་མཁྱེན་ཅིང་ཡང་དག་པར་ཐུགས་སུ་ཆུད་དེ་གསུངས་པ། དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་
པ་རྣམ་པར་སྤོང་བས་ཡོངས་སུ་བསྒྱུར་བ་ཆོས་རབ་ཏུ་རྣམ་པར་འབྱེད་པ་དང་། བརྩོན་འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་བྱང་ཆུབ་ཀྱི་ཡན་ལག་རྣམས་ཏེ། བཙུན་པ་བཅོམ་ལྡན་འདས་ཉིད་ཀྱིས་མངོན་པར་མཁྱེན་ཅིང་ཡང་དག་
པར་ཐུགས་སུ་ཆུད་དེ་གསུངས་པ། དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོང་བས་ཡོངས་སུ་བསྒྱུར་བ་ལགས་སོ། །ཀུན་དགའ་བོ་བརྩོན་འགྲུས་སྨྲས་སམ། བཅོམ་ལྡན་འདས་བརྩོན་འགྲུས་སྨྲས་ལགས་སོ། །ཀུན་
དགའ་བོ་བརྩོན་འགྲུས་བསྟེན་ཅིང་བསྒོམས་ཏེ་ལན་གྲངས་མང་དུ་བྱས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ་ཞེས་གསུངས་ནས་བཅོམ་ལྡན་འདས་བཞེངས་ཏེ་སྐྱིལ་མོ་ཀྲུང་བཅས་ནས་སྐུ་དྲང་པོར་བསྲངས་ཏེ་དྲན་པ་མངོན་དུ་བཞག་ནས་བཞུགས་སོ། །དེ་ནས་དགེ་སློང་གཞན་
ཞིག་གིས་ཚིགས་སུ་བཅད་དེ་སྨྲས་པ། སྟོན་པས་ཆོས་ནི་མང་རབ་གསན་སླད་དུ། །བདག་ཉིད་བསྙུང་བར་གྱུར་ཀྱང་གསོལ་བཏབ་ནས། །དགེ་སློང་རང་ཉིད་ཀྱིས་ནི་ཆོས་སྨྲས་པ། །བྱང་ཆུབ་ཡན་ལག་དེ་ཡིས་སྟོན་པར་གྱུར། །མཁས་ཤིང་བློ་དང་ལྡན་པ་རྟོགས་པ་སྟེ། །གནས་
བརྟན་ཀུན་དགའ་བོ་ཡིས་ལེགས་སྨྲས་པ། །ཐུབ་པའི་གསུང་ནི་རབ་ཏུ་དཀར་བ་ལས། །ཆོས་དེ་དེ་དག་ཁོ་ན་འཐོབ་པར་འགྱུར། །ཡང་དག་དྲན་དང་རྣམ་པར་འབྱེད་པ་དང་། །བརྩོན་འགྲུས་དགའ་བ་ཤིན་ཏུ་སྦྱངས་པའི་ལུས། །སེམས་དང་ཏིང་ངེ་འཛིན་དང་བཏང་སྙོམས་དང་། །

དཔའ་བོ་འདི་དག་བྱང་ཆུབ་ཡན་ལག་ལགས། །བྱང་ཆུབ་ཡན་ལག་རྣམས་ཀྱི་གཏམ་གསན་ཅིང་། །བྱང་ཆུབ་ཡན་ལག་རོ་ནི་རྣམ་མཁྱེན་པས། །བཅོམ་ལྡན་ཐུགས་ནི་ཤིན་ཏུ་མི་བདེ་བའི། །སྙུན་ཚབས་ཆེན་པོ་དག་ལས་བཞེངས་པར་གྱུར། །དེ་ལྟ་བས་ན་ཆོས་རྗེ་དེ་ཡིས་
ཀྱང་། །རིན་པོ་ཆེ་ཡི་ཆོས་འདི་འཆད་པ་ལ། །ཆོས་ནི་གསན་པར་བཞེད་གྱུར་གཞན་དག་ལྟ། །ཅི་ཕྱིར་དེས་ནི་འདི་ལ་མཉན་མི་བྱ། །དགེ་སློང་གང་ཞིག་ཤེས་རབ་མཆོག་ཡིན་པར། །ཤེས་རབ་སྟོབས་བཅུ་ལྡན་པས་བསྟན་པ་སྟེ། །ཉེ་རྒྱལ་དེ་ཡང་ན་བར་གྱུར་མོད་ཀྱི། །དམ་
ཆོས་མཉན་པའི་དོན་དུ་འགྲོ་བར་བྱེད། །མདོ་སྡེ་འཛིན་དང་འདུལ་འཛིན་མ་མོ་འཛིན། །མཁས་པ་ཆོས་ལུགས་མཁྱེན་པ་དེ་དག་ཀྱང་། །ཆོས་རྣམས་ཉན་པར་བྱེད་ན་གཞན་དག་ལྟ། །ཅི་ཕྱིར་དེས་ནི་འདི་ལ་མཉན་མི་བྱ། །ཐོས་ནས་ཇི་ལྟར་ཆོས་ཀྱི་བཀའ་ལ་ནི། །སེམས་
ཀྱིས་རྟོགས་ཤིང་ཉེ་བར་བཞག་གྱུར་ན། །ཟང་ཟིང་མེད་པའི་སངས་རྒྱས་གསུང་འདི་ནི། །དགའ་བས་དེ་བཞིན་ཉིད་ནི་འཐོབ་པར་འགྱུར། །དགའ་བའི་ཡིད་ཀྱིས་ཤིན་ཏུ་སྦྱངས་པའི་ལུས། །བདེ་བ་དག་ཀྱང་དེ་བཞིན་སྐྱེ་བར་འགྱུར། །བདེ་བར་གྱུར་པའི་སེམས་ནི་རྩེ་
གཅིག་སྟེ། །དེ་ཡི་ལོག་ཏུ་ཏིང་འཛིན་རེག་པར་འགྱུར། །མཉམ་པར་གྱུར་པའི་སེམས་ནི་འདི་དག་ཏུ། །འདུ་བྱེད་རྣམས་ལ་སྐྱབས་སུ་མི་བྱེད་ཅིང་། །སྐྱོ་བར་གྱུར་པས་འདོད་ཆགས་རྣམས་བྲལ་ཏེ། །སེམས་ནི་རྣམ་པར་གྲོལ་བ་དག་ཏུ་འགྱུར། །སྲིད་པར་འགྲོ་བ་
དག་ལ་སྐྱོ་གྱུར་ཏེ། །ལྷ་དང་མི་རྣམས་ལ་ཡང་མི་ཆགས་པ། །ཇི་ལྟར་མེ་ནི་བུད་ཤིང་མེད་གྱུར་བཞིན། །དགྲ་བཅོམ་གྱུར་ནས་ཡོངས་སུ་མྱ་ངན་འདས། །ཆོས་ཐོས་པ་ཡི་ཕན་ཡོན་མང་བར་ནི། །རྒྱལ་བ་རྣམས་ཀྱིས་དེ་དག་ཀུན་དུ་བཤད། །དེ་ལྟ་བས་ན་སྟོན་པའི་གསུང་
འདི་ལ། །ནན་ཏན་འབད་དེ་རབ་ཏུ་མཉན་པར་བྱ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གྲོང་ཁྱེར་རྩྭ་ཅན་ག་ལ་བར་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་

ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་གྱད་ཀྱི་ལྗོངས་རྒྱུ་ཞིང་གཤེགས་ཏེ་གྲོང་ཁྱེར་རྩྭ་ཅན་དུ་བྱོན་ནས་གྱད་ཀྱི་ཡུལ་དང་ཉེ་བ་ཤིང་སཱ་ལ་ཟུང་གི་ཚལ་ན་བཞུགས་སོ། །དེ་ནས་བཅོམ་ལྡན་འདས་དེ་ཉིད་དུ་ཡོངས་སུ་མྱ་ངན་ལས་འདའ་བ་དེའི་ཚེ་ཚེ་དང་ལྡན་པ་
ཀུན་དགའ་བོ་ལ་ཀུན་དགའ་བོ་ཤིང་སཱ་ལ་ཟུང་གཉིས་ཀྱི་བར་དུ་དེ་བཞིན་གཤེགས་པའི་ཁྲི་ཆོས་ལ་ཕངས་བྱང་ཕྱོགས་སུ་སྟོན་ཅིག །དེ་བཞིན་གཤེགས་པ་ནི་དེང་གི་མཚན་མོའི་གུང་ཐུན་འདི་ལ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་
འགྱུར་རོ་ཞེས་བཀའ་སྩལ་པ་དང་། བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་ཤིང་སཱ་ལ་ཟུང་གི་བར་དུ་ཁྲི་བཅས་ནས་ཕངས་བྱང་ཕྱོགས་སུ་བསྟན་ཏེ། བཅོམ་ལྡན་འདས་ག་ལ་བར་སོང་སྟེ་ཕྱིན་ནས་བཅོམ་ལྡན་འདས་ཀྱི་
ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་བཅོམ་ལྡན་འདས་ཤིང་སཱ་ལ་ཟུང་གི་བར་དུ་དེ་བཞིན་གཤེགས་པའི་ཁྲི་བཅས་ཏེ་ཕངས་བྱང་ཕྱོགས་སུ་བསྟན་ཏོ་ཞེས་གསོལ་
པ་དང་། །དེ་ནས་བཅོམ་ལྡན་འདས་ཁྲི་ག་ལ་བར་གཤེགས་ཏེ་བྱོན་ནས་གློ་གཡས་པས་ཕབ་སྟེ་ཞབས་ཀྱི་སྟེང་དུ་ཞབས་བཞག་ནས་གཟིམས་ཏེ། སྣང་བའི་འདུ་ཤེས་དང་། དྲན་པ་དང་། ཤེས་བཞིན་དང་། མྱ་ངན་ལས་འདའ་བའི་འདུ་ཤེས་ཐུགས་ལ་མཛད་དོ། །དེ་ནས་ཡང་
དེའི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་སུ་འདུག་ནས་ཁྲི་ལ་འཇུས་ཏེ་ངུ་ཞིང་མཆི་མ་བྱུང་ནས་འདི་སྐད་ཅེས་སྨྲའོ། །བཅོམ་ལྡན་འདས་ཤིན་ཏུ་མྱུར་བར་ཡོངས་སུ་མྱ་ངན་ལས་འདས་སོ། །བདེ་བར་གཤེགས་པ་ཤིན་ཏུ་མྱུར་བར་ཡོངས་སུ་མྱ་ངན་ལས་འདས་
སོ། །ཤིན་ཏུ་མྱུར་བར་འཇིག་རྟེན་གྱི་མིག་ལྡོངས་ཏེ། དགེ་སློང་དག་སྔོན་ནི་ཕྱོགས་དེ་དང་དེ་དག་དང་། ལྗོངས་དེ་དང་དེ་དག་ནས་བཅོམ་ལྡན་འདས་ག་ལ་བ་དེར་འོངས་ཏེ། འོངས་པ་དེ་དག་ལ་བཅོམ་ལྡན་འདས་ཀྱིས་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་

པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཚངས་པར་སྤྱད་པ་རབ་ཏུ་སྟོན་ཏེ། གང་གི་ཕྱིར་དུས་དུས་སུ་ཟབ་པ་ཟབ་མོའི་ཆོས་ཀྱི་གཏམ་ཡང་ཐོས་ཤིང་རྙེད་པ་ན་དེ་དག་གིས་ཀྱང་ད་བཅོམ་ལྡན་འདས་ཡོངས་སུ་
མྱ་ངན་ལས་འདས་པར་ཐོས་ཏེ། ཐོས་ནས་ཀྱང་འོང་བར་མི་འགྱུར་ཞིང་འདི་ལྟར་ཆོས་ཀྱི་ལོངས་སྤྱོད་ཆེན་པོ་འབའ་ཞིག་པོ་འདི་འཇིག་རྟེན་དུ་ནུབ་པར་གྱུར་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཀུན་དགའ་བོ་གང་ན་འདུག །བཅོམ་
ལྡན་འདས་ཚེ་དང་ལྡན་པ་ཀུན་དགའ་བོ་ནི་བཅོམ་ལྡན་འདས་ཀྱི་སྣམ་ལོགས་འདི་ན་མཆིས་ཏེ་ཁྲི་ལ་འཇུས་ནས་ངུ་ཞིང་མཆི་མ་བྱུང་ནས་འདི་སྐད་ཅེས་མཆིའོ། །བཅོམ་ལྡན་འདས་ནི་ཤིན་ཏུ་མྱུར་བར་ཡོངས་སུ་མྱ་ངན་ལས་འདས་སོ། །བདེ་བར་གཤེགས་པ་ནི་ཤིན་ཏུ་མྱུར་བར་ཡོངས་
སུ་མྱ་ངན་ལས་འདས་སོ། །ཤིན་ཏུ་མྱུར་བར་འཇིག་རྟེན་གྱི་མིག་ལྡོངས་ཏེ། དགེ་སློང་དག་སྔོན་ནི་ཞེས་བྱ་བ་ནས། འདི་ལྟར་ཆོས་ཀྱི་ལོངས་སྤྱོད་ཆེན་པོ་འཇིག་རྟེན་དུ་ནུབ་བོ་ཞེས་བྱ་བའི་བར་སྔ་མ་བཞིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་
ལ་བཀའ་སྩལ་པ། ཀུན་དགའ་བོ་ཁྱོད་མྱ་ངན་དང་། མི་བཟོད་པ་དང་། སྨྲེ་སྔགས་འདོན་པར་མ་བྱེད་ཅིག །དེ་ཅིའི་ཕྱིར་ཞེ་ན། ཀུན་དགའ་བོ་ཁྱོད་ཀྱིས་དེ་བཞིན་གཤེགས་པའི་ཉེ་གནས་བྱས་པ་ནི་བྱམས་པའི་ལུས་ཀྱི་ལས་ཀྱིས་ཕན་པ་དང་། བདེ་བ་དང་། གཉིས་སུ་མེད་པ་དང་།
ཚད་མེད་པར་བྱས་པ་དང་། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཀྱིས་ཕན་པ་དང་། བདེ་བ་དང་། གཉིས་སུ་མེད་པ་དང་། ཚད་མེད་པར་བྱས་སོ། །ཀུན་དགའ་བོ་གང་དག་འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་དེ་དག་ཀྱང་སངས་རྒྱས་བཅོམ་ལྡན་འདས་རྣམས་ཀྱི་ཉེ་གནས་ཀྱིས་ཚུལ་འདི་འདྲ་བར་བྱས་པར་གྱུར་ཏེ། དཔེར་ན་ད་ལྟར་ཁྱོད་ཀྱིས་ང་ལ་བྱ་བ་བཞིན་དུ་བྱས་པར་གྱུར་ཏེ། མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་

ཀྱང་སངས་རྒྱས་བཅོམ་ལྡན་འདས་རྣམས་ཀྱི་ཉེ་གནས་ཀྱིས་ཚུལ་འདི་འདྲ་བར་བྱེད་པར་འགྱུར་ཏེ། དཔེར་ན་ད་ལྟར་ཁྱོད་ཀྱིས་ང་ལ་བྱ་བ་བཞིན་ནོ། །ཀུན་དགའ་བོ་དེ་ལྟར་ན་ཁྱོད་མྱ་ངན་མ་བྱེད་ཅིག །མི་བཟོད་པར་མ་བྱེད་ཅིག །སྨྲེ་སྔགས་མ་འདོན་ཅིག །
གང་སྐྱེ་བ་དང་། འབྱུང་བ་དང་། བྱས་པ་དང་། འདུས་བྱས་པ་དང་། རྟེན་ཅིང་འབྲེལ་བར་འབྱུང་བ་འཇིག་པའི་ཆོས་ཅན་དེ་དག་ནི་འདི་ལྟར་མི་འཇིག་པ་འཐོབ་པར་ག་ལ་འགྱུར་ཏེ། འདི་ནི་གནས་མེད་དེ། རིག་པར་མི་ནུས་སོ། །ཀུན་དགའ་བོ་སྔོན་ཡང་ངས་བཤད་དེ། མཛའ་བོ་
དང་། སྡུག་པ་དང་། དགའ་བ་དང་། ཡིད་དུ་འོང་བ་དེ་དག་ཐམས་ཅད་ནི་འབྲལ་བ་དང་། འགྱེས་པ་དང་། འཇིག་པ་དང་། མེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ཡང་དག་པར་དགའ་བར་བྱ་བར་བཞེད་ནས་དགེ་སློང་རྣམས་ལ་བཀའ་སྩལ་པ།
དགེ་སློང་དག་འཁོར་ལོས་སྒྱུར་བའི་རྒྱལ་པོ་ལ་ངོ་མཚར་རྨད་དུ་བྱུང་བའི་ཆོས་བཞི་ཡོད་དེ། བཞི་གང་ཞེ་ན། གལ་ཏེ་རྒྱལ་རིགས་ཀྱི་འཁོར་འཁོར་ལོས་སྒྱུར་བའི་རྒྱལ་པོ་བལྟ་བའི་ཕྱིར་འོངས་པ་མཐོང་བས་ཡིད་དགའ་བར་འགྱུར་རོ། །གལ་ཏེ་ཉེ་བར་འོངས་པ་རྣམས་ལ་ཆོས་བཤད་ན་ཆོས་ཐོས་
པས་ཡིད་དགའ་བར་འགྱུར་རོ། །གལ་ཏེ་བྲམ་ཟེའི་འཁོར་དང་། ཁྱིམ་བདག་གི་འཁོར་དང་། དགེ་སྦྱོང་གི་འཁོར་འཁོར་ལོས་སྒྱུར་བའི་རྒྱལ་པོ་བལྟ་བའི་ཕྱིར་འོངས་པ་དེ་མཐོང་བས་ཡིད་དགའ་བར་འགྱུར་རོ། །གལ་ཏེ་ཉེ་བར་འོངས་པ་རྣམས་ལ་ཆོས་བཤད་ན་ཆོས་ཐོས་པས་
ཡིད་དགའ་བར་འགྱུར་རོ། །དགེ་སློང་དག་དེ་བཞིན་དུ་དགེ་སློང་ཀུན་དགའ་བོ་ལ་ཡང་ངོ་མཚར་རྨད་དུ་བྱུང་བའི་ཆོས་བཞི་ཡོད་དེ། བཞི་གང་ཞེ་ན། གལ་ཏེ་དགེ་སློང་གི་འཁོར་དགེ་སློང་ཀུན་དགའ་བོ་བལྟ་བའི་ཕྱིར་འོངས་པ་མཐོང་བས་ཡིད་དགའ་བར་འགྱུར་རོ། །གལ་ཏེ་འོངས་
པ་རྣམས་ལ་ཆོས་བཤད་ན་ཆོས་ཐོས་པས་ཡིད་དགའ་བར་འགྱུར་རོ། གལ་ཏེ་དགེ་སློང་མའི་འཁོར་དང་། དགེ་བསྙེན་གྱི་འཁོར་དང་། དགེ་བསྙེན་མའི་འཁོར་དགེ་སློང་ཀུན་དགའ་བོ་བལྟ་བའི་ཕྱིར་འོངས་པ་མཐོང་བས་ཡིད་དགའ་བར་འགྱུར་རོ། །གལ་ཏེ་འོངས་པ་རྣམས་ལ་

ཆོས་བཤད་ན་ཆོས་ཐོས་པས་ཡིད་དགའ་བར་འགྱུར་རོ། །དགེ་སློང་དག་གཞན་ཡང་དགེ་སློང་ཀུན་དགའ་བོ་ལ་ངོ་མཚར་རྨད་དུ་བྱུང་བའི་ཆོས་བཞི་ཡོད་དེ། བཞི་གང་ཞེ་ན། གལ་ཏེ་དགེ་སློང་ཀུན་དགའ་བོ་དགེ་སློང་གི་འཁོར་རྣམས་ལ་ཆོས་སྟོན་ན་གུས་པར་བྱས་ཏེ་སྟོན་གྱི་མ་གུས་པས་
མ་ཡིན་ནོ། །དེ་ནས་དགེ་སློང་གི་འཁོར་རྣམས་འདི་སྙམ་དུ་སེམས་ཏེ། ཀྱེ་མ་ཚེ་དང་ལྡན་པ་ཀུན་དགའ་བོ་མི་སྨྲ་བར་མི་འདུག་ཅིང་ཆོས་ཁོ་ན་འཆད་ཀྱང་ཅི་མ་རུང་སྙམ་ནས་དགེ་སློང་གི་འཁོར་རྣམས་དགེ་སློང་ཀུན་དགའ་བོ་ལ་ཆོས་ཉན་པས་མི་ངོམས་མོད་ཀྱི། འོན་ཀྱང་དགེ་སློང་ཀུན་དགའ་
བོ་ཅང་མི་སྨྲའོ། །གལ་ཏེ་དགེ་སློང་མའི་འཁོར་རྣམས་དང་། དགེ་བསྙེན་གྱི་འཁོར་དང་། དགེ་བསྙེན་མའི་འཁོར་རྣམས་ལ་དགེ་སློང་ཀུན་དགའ་བོ་ཆོས་སྟོན་ན་གུས་པར་བྱས་ཏེ་སྟོན་གྱི་མ་གུས་པས་ནི་མ་ཡིན་ནོ། །དེ་ནས་དགེ་བསྙེན་གྱི་འཁོར་ལ་སོགས་པ་འདི་སྙམ་དུ་སེམས་ཏེ།
ཀྱེ་མ་ཚེ་དང་ལྡན་པ་ཀུན་དགའ་བོ་མ་སྨྲེ་བར་མི་འདུག་ཅིང་ཆོས་ཁོ་ན་འཆད་ཀྱང་ཅི་མ་རུང་སྙམ་ནས་དགེ་བསྙེན་གྱི་འཁོར་ལ་སོགས་པ་དགེ་སློང་ཀུན་དགའ་བོ་ལ་ཆོས་ཉན་པས་མི་ངོམས་མོད་ཀྱི། འོན་ཀྱང་དགེ་སློང་ཀུན་དགའ་བོ་ནི་ཅང་མི་སྨྲ་བར་འདུག་གོ། །དེ་ནས་ཚེ་དང་ལྡན་པ་
ཀུན་དགའ་བོ་བཅོམ་ལྡན་འདས་ཀྱིས་ཡང་དག་པར་དགའ་བར་མཛད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཅིའི་སླད་དུ་འཇིག་རྟེན་ཐ་དད་པ་གྲོང་ཁྱེར་ཆེན་པོ་དྲུག་པོ་གང་དག་མཉན་ཡོད་དང་། གནས་བཅས་དང་། ཙམ་པ་དང་། བཱ་རཱ་ཎ་སཱི་དང་།
ཡངས་པ་ཅན་དང་། རྒྱལ་པོའི་ཁབ་ལ་སོགས་པ་གྲོང་ཁྱེར་ཆེན་པོ་དྲུག་པོ་འདི་ལྟ་བུ་སྤངས་ནས་གང་གྲོང་ཁྱེར་ངན་པ་དང་། དགོན་དུང་དང་། མཁར་ངན་པ་དང་། གྲོང་ཁྱེར་གྱི་ཡལ་ག་དང་། གྲོང་ཁྱེར་གྱི་ཐོ་ཤུལ་ཙམ་འདིར་མྱ་ངན་ལས་འདའ་བར་དགོངས། ཀུན་དགའ་
བོ་ཁྱོད་གྲོང་ཁྱེར་རྩྭ་ཅན་འདི་ལ་གྲོང་ཁྱེར་ངན་པ་ཞེའམ། དགོན་དུང་ཞེའམ། མཁར་ངན་པ་ཞེའམ། གྲོང་གི་ཡན་ལག་ཅེའམ། གྲོང་ཁྱེར་གྱི་ཐོ་ཤུལ་ཙམ་ཞེས་མ་སྨྲ་ཤིག །དེ་ཅིའི་ཕྱིར་ཞེ་ན། ཀུན་དགའ་བོ་སྔོན་བྱུང་བ་གྲོང་ཁྱེར་རྩྭ་ཅན་འདི་རྒྱལ་པོ་ཀུ་ཤ་ཅན་ཞེས་བྱ་བའི་

ཕོ་བྲང་དུ་གྱུར་ཏེ། འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་གང་བ། ཆུར་དཔག་ཚད་བཅུ་གཉིས། རྒྱར་དཔག་ཚད་བདུན་པར་གྱུར་ཏོ། །ཀུན་དགའ་བོ་རྒྱལ་པོ་ཀུ་ཤ་ཅན་གྱི་ར་བ་རྣམ་པ་བཞི་པོ་
གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་སྟེ། ར་བ་བདུན་གྱིས་ཀུན་དུ་བསྐོར་བར་གྱུར་ཏོ། །ཀུན་དགའ་བོ་རྒྱལ་པོ་རྩྭ་ཅན་གྱི་ཕོ་བྲང་གི་སྒོ་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་
ལས་བྱས་པ་དང་། ཤེལ་ལས་བྱས་པར་གྱུར་ཏོ། །ཀུན་དགའ་བོ་དེ་དག་གི་རྩང་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་སྟེ། འཕང་དུ་ནི་སྐྱེས་བུ་བདུན་སྲིད་ཙམ་ལ་སྐྱེས་བུ་ཕྱེད་དང་བཞིའི་སྲིད་ཙམ་ནི་
ཟབས་སུ་བརྐོས་ནས་ཁྱེའུ་གསུམ་གྱིས་བཙུགས་པར་གྱུར་ཏོ། །ཀུན་དགའ་བོ་རྒྱལ་པོ་ཀུ་ཤ་ཅན་གྱི་ཕོ་བྲང་གི་འོབས་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པའི་ཕ་གུའི་འོབས་རྣམ་པ་བདུན་གྱིས་
ཀུན་དུ་བསྐོར་ཏོ། །ཀུན་དགའ་བོ་རྒྱལ་པོ་ཀུ་ཤ་ཅན་གྱི་ཕོ་བྲང་ཏ་ལ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པའི་ཏ་ལའི་ཕྲེང་བདུན་གྱིས་ཀུན་དུ་བསྐོར་བར་གྱུར་ཏེ། ཀུན་དགའ་བོ་གསེར་གྱི་ཏ་ལ་ལ་ནི་
དངུལ་ལས་བྱས་པའི་ལོ་མ་དང་། མེ་ཏོག་དང་། འབྲས་བུ་དག་བྱས་པར་གྱུར་ཏོ། །ཀུན་དགའ་བོ་དངུལ་གྱི་ཏ་ལ་ལ་ནི་གསེར་དང་། བཻ་ཌཱུརྱ་དང་། ཤེལ་གྱིའོ། །ཀུན་དགའ་བོ་ཤེལ་གྱི་ཏ་ལ་ལ་ནི་བཻ་ཌཱུརྱ་ལས་བྱས་པའི་ལོ་མ་དང་། མེ་ཏོག་དང་། འབྲས་བུ་དག་བྱས་
པར་གྱུར་ཏོ། །ཀུན་དགའ་བོ་ཏ་ལ་དེ་རྣམས་རླུང་གིས་བསྐྱོད་པ་ན་འདི་ལྟ་བུའི་སྒྲ་ཡིད་དུ་འོང་བ་འབྱུང་སྟེ། དཔེར་ན་སྐྱེས་བུ་མཁས་པས་ཡན་ལག་ལྔ་དང་ལྡན་པའི་སིལ་སྙན་ཡང་དག་པར་བསྒྲགས་པ་བཞིན་ནོ། །ཀུན་དགའ་བོ་ཏ་ལ་དེ་དག་གི་བར་དུ་རྫིང་བཟང་པོ་

བཅས་པར་གྱུར་ཏེ། རྫིང་དེ་དག་ཀྱང་རྣམ་པ་བཞི་པོ་གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་ཕ་གུས་བྱས་པར་གྱུར་ཏོ། །ཀུན་དགའ་བོ་རྫིང་བུ་བཟང་པོ་དེ་དག་གི་ཐེམ་སྐས་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་
ལས་བྱས་པ་དང་། ཤེལ་ལས་བྱས་པར་གྱུར་ཏོ། །རྫིང་བུ་དེ་དག་གི་ཁ་ཁྱེར་ཡང་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པའི་ཁ་ཁྱེར་གྱིས་ཀུན་དུ་བསྐོར་བར་གྱུར་ཏོ། །ཀུན་དགའ་བོ་
གསེར་ལས་བྱས་པའི་ཁ་ཁྱེར་གྱི་གཟུངས་གཟེར་དང་། གདུང་བུ་དང་། རྟེན་མ་ནི་དངུལ་ལས་བྱས་པར་གྱུར་ཏོ། །དངུལ་ལས་བྱས་པའི་ནི་གསེར་ལས་བྱས་སོ། །བཻ་ཌཱུརྱ་ལས་བྱས་པའི་ནི་ཤེལ་ལས་བྱས་སོ། །ཤེལ་ལས་བྱས་པའི་ནི་གཟུངས་གཟེར་དང་།
གདུང་བུ་དང་། རྟེན་མ་བཻ་ཌཱུརྱ་ལས་བྱས་པར་གྱུར་ཏོ། །ཀུན་དགའ་བོ་རྫིང་བཟང་པོ་དེ་དག་གི་ནང་ན་མེ་ཏོག་ཆུ་ལས་སྐྱེ་བ་རྣམ་པ་སྣ་ཚོགས་འདི་ལྟ་སྟེ། ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། དྲི་མཆོག་དང་། དྲི་ངད་འཇམ་དང་། དུས་ཚིགས་
ཐམས་ཅད་པ་དང་། དུས་ཐམས་ཅད་པའི་མེ་ཏོག་གི་ཕྲེང་བའི་རྒྱུ་སྐྱེ་བོ་ཐམས་ཅད་ལ་དགག་པ་མེད་པ་བསྐྱེད་དོ། །ཀུན་དགའ་བོ་རྫིང་བཟང་པོ་དེ་དག་གི་འགྲམ་གཉིས་ན་མེ་ཏོག་སྐམ་ལ་སྐྱེ་བ་རྣམ་པ་སྣ་ཚོགས་འདི་ལྟ་སྟེ། ཨ་ཏི་མུག་ཏ་ཀ་དང་། ཙམ་པ་ཀ་དང་། སྐྱ་སྣར་དང་། པ་རི་ཤ་
ཀ་དང་། མ་ལི་ཀ་དང་། ན་བ་མ་ལི་ཀ་དང་། ཡིད་དུ་འོང་བ་དང་། ཡུ་ཏི་ཀ་དང་། དྷ་ནུསྐ་རི་དང་། དུས་ཚིགས་ཐམས་ཅད་པ་དང་། དུས་ཐམས་ཅད་པའི་མེ་ཏོག་གི་ཕྲེང་བའི་རྒྱུ་སྐྱེ་བོ་ཐམས་ཅད་ལ་དགག་པ་མེད་པ་བསྐྱེད་པར་གྱུར་ཏོ། །ཀུན་དགའ་བོ་རྒྱལ་པོ་ལེགས་མཐོང་
ཆེན་པོས་ཀྱང་ཏ་ལ་བཟང་པོ་དེ་དག་གི་བར་བར་དུ་ན་ཆུང་རྒྱན་ཐམས་ཅད་ཀྱིས་བརྒྱན་པ་བཞག་སྟེ། གང་དག་ཟས་འདོད་པ་ལ་ནི་ཟས་སྦྱིན་པར་བྱེད། སྐོམ་འདོད་པ་ལ་ནི་སྐོམ། གོས་འདོད་པ་ལ་ནི་གོས། ཕྲེང་བ་དང་། དྲི་དང་། བྱུག་པ་འདོད་པ་ལ་ནི་ཕྲེང་བ་དང་། དྲི་དང་།

བྱུག་པ་སྦྱིན་པར་བྱེད་དོ། །ཀུན་དགའ་བོ་རྒྱལ་པོ་ཀུ་ཤ་ཅན་གྱི་ཕོ་བྲང་ན་གང་དག་ར་རོ་བ་དང་། གཡོན་ཅན་དང་། ཆང་འཚོང་རྣམས་རྩེ་བ་དང་། དགའ་བ་དང་། དགའ་མགུར་སྤྱོད་པར་འདོད་པ་དེ་དག་ཏ་ལ་དེ་དག་གི་བར་བར་དུ་ཤིན་ཏུ་རྩེ་ཞིང་། དགའ་བ་
དང་། དགའ་མགུར་སྤྱོད་པར་གྱུར་ཏོ། །ཀུན་དགའ་བོ་རྒྱལ་པོ་རྩྭ་ཅན་གྱི་ཕོ་བྲང་ན་ཏ་ལ་དེ་དག་ལས་སྒྲ་ཡིད་དུ་འོང་བ་འདི་ལྟ་སྟེ། གླང་པོ་ཆེའི་སྒྲ་དང་། རྟའི་སྒྲ་དང་། ཤིང་རྟའི་སྒྲ་དང་། དཔུང་བུ་ཆུང་གི་སྒྲ་དང་། དུང་གི་སྒྲ་དང་། རྔ་བོ་ཆེའི་སྒྲ་དང་། ཚོགས་པའི་སྒྲ་དང་། རྔ་
པ་ཊ་ཧའི་སྒྲ་དང་། རོལ་མོའི་སྒྲ་དང་། གླུའི་སྒྲ་དང་། གླིང་བུའི་སྒྲ་དང་། སྦྱིན་པ་ནི་བྱིན། བསོད་ནམས་ནི་བྱས། ཟ་གཅིག་པ་ནི་སྨྱུང་བ་བྱས་ཏེ་ཚུལ་ཁྲིམས་ཡང་དག་པར་བླངས་པའི་སྒྲ་སྟེ་སྒྲ་བཅུ་གཉིས་དང་ལྡན་པར་གྱུར་ཏོ། །ཀུན་དགའ་བོ་རྒྱལ་པོ་རྩྭ་ཅན་གྱི་ཕོ་བྲང་ན་འཁོར་
ལོས་སྒྱུར་བའི་རྒྱལ་པོ་ལེགས་མཐོང་ཆེན་པོ་ཞེས་བྱ་བ་རིན་པོ་ཆེ་སྣ་བདུན་དང་མི་རྣམས་ཀྱི་འབྱོར་པ་བཞི་དང་ལྡན་ཏེ། རིན་པོ་ཆེ་སྣ་བདུན་གང་དང་ལྡན་ཞེ་ན། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་
རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་ནི་བློན་པོ་རིན་པོ་ཆེའོ། །ཀུན་དགའ་བོ་རྒྱལ་པོ་ལེགས་མཐོང་ཆེན་པོ་མི་རྣམས་ཀྱི་འབྱོར་པ་བཞི་གང་དང་ལྡན་ཞེ་ན། ཚེ་རིང་ཞིང་ཡུན་རིང་དུ་གནས་པ་ཡིན་ཏེ། གཞོན་ནུ་རྩེད་མོ་རྩེ་བ་ལ་ལོ་བརྒྱད་ཁྲི་བཞི་སྟོང་ལོན་ནོ། །
རྒྱལ་ཚབ་བྱེད་པ་ལ་ལོ་བརྒྱད་ཁྲི་བཞི་སྟོང་ལོན་ནོ། །རྒྱལ་པོ་ཆེན་པོ་བྱེད་པ་ལ་ལོ་བརྒྱད་ཁྲི་བཞི་སྟོང་ལོན་ནོ། །རྒྱལ་པོའི་དྲང་སྲོང་གི་ཚངས་པར་སྤྱོད་པ་ལ་ལོ་བརྒྱད་ཁྲི་བཞི་སྟོང་ལོན་ནོ། །ཀུན་དགའ་བོ་རྒྱལ་པོ་ལེགས་མཐོང་ཆེན་པོ་ཚེ་རིང་ཞིང་ཡུན་རིང་དུ་གནས་པ་ཡིན་ཏེ། དེས་
ལོ་བརྒྱད་ཁྲི་བཞི་སྟོང་ནི་གཞོན་ནུ་དགའ་བས་རྩེད་མོ་རྩེས། ལོ་བརྒྱད་ཁྲི་བཞི་སྟོང་ནི་རྒྱལ་ཚབ་བྱས། ལོ་བརྒྱད་ཁྲི་བཞི་སྟོང་ནི་རྒྱལ་པོ་ཆེན་པོ་བྱས། ལོ་བརྒྱད་ཁྲི་བཞི་སྟོང་ནི་རྒྱལ་པོའི་དྲང་སྲོང་གི་ཚངས་པར་སྤྱོད་པ་བྱས་པ་གང་ཡིན་པ་འདི་ནི་ཀུན་དགའ་བོ་རྒྱལ་པོ་ལེགས་མཐོང་ཆེན་

པོའི་འབྱོར་པ་ཞེས་བྱའོ། །ཀུན་དགའ་བོ་གཞན་ཡང་རྒྱལ་པོ་ལེགས་མཐོང་ཆེན་པོ་ནི་གཟུགས་བཟང་བ། མཛེས་པ། བལྟ་ན་སྡུག་པ། མིའི་ཁ་དོག་ལས་ནི་འདས། ལྷའི་ཁ་དོག་ནི་མ་ཐོབ་སྟེ། ཀུན་དགའ་བོ་རྒྱལ་པོ་ལེགས་མཐོང་ཆེན་པོའི་གཟུགས་བཟང་བ། མཛེས་པ།
བལྟ་ན་སྡུག་པ། མིའི་ཁ་དོག་ལས་ནི་འདས། ལྷའི་ཁ་དོག་ནི་མ་ཐོབ་པ་ཡིན་ཏེ། ཀུན་དགའ་བོ་འདི་ནི་རྒྱལ་པོ་ལེགས་མཐོང་ཆེན་པོའི་འབྱོར་པ་ཞེས་བྱའོ། །ཀུན་དགའ་བོ་གཞན་ཡང་རྒྱལ་པོ་ལེགས་མཐོང་ཆེན་པོ་གནོད་པ་ཆུང་ཞིང་ནད་མེད་པའི་རང་བཞིན་ཡིན་ཏེ། ཕོ་བ་ཧ་
ཅང་བསིལ་བ་མ་ཡིན་ཞིང་། ཧ་ཅང་དྲོ་བ་མ་ཡིན་པ། དྲོད་སྙོམས་པ་དང་། དུས་ཀུན་དུ་བདེ་བ་དང་། གནོད་པ་མེད་པ་དང་ལྡན་པས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ལེགས་པར་བདེ་བར་འཇུ་བར་གྱུར་ཏེ། ཀུན་དགའ་བོ་རྒྱལ་པོ་ལེགས་
མཐོང་ཆེན་པོ་གནོད་པ་ཉུང་ཞིང་ནད་མེད་པའི་རང་བཞིན་ཅན། ཕོ་བ་ཧ་ཅང་བསིལ་བ་མ་ཡིན་ཞིང་། ཧ་ཅང་དྲོ་བ་མ་ཡིན་པ། དྲོད་སྙོམས་པ་དང་། དུས་ཀུན་དུ་བདེ་བ་དང་། གནོད་པ་མེད་པ་དང་ལྡན་པས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ལེགས་
པར་བདེ་བར་འཇུ་བར་འགྱུར་བ་གང་ཡིན་པ་འདི་ནི་ཀུན་དགའ་བོ་རྒྱལ་པོ་ལེགས་མཐོང་ཆེན་པོའི་འབྱོར་པ་ཞེས་བྱའོ། །ཀུན་དགའ་བོ་གཞན་ཡང་རྒྱལ་པོ་ལེགས་མཐོང་ཆེན་པོ་ནི་གྲོང་མི་དང་ཡུལ་མི་རྣམས་ལ་སྙིང་དུ་སྡུག་ཅིང་ཡིད་དུ་འོང་བར་གྱུར་པ་ཡིན་ཏེ། དཔེར་ན་བུ་
རྣམས་ལ་ཕ་བཞིན་ནོ། །རྒྱལ་པོ་ལེགས་མཐོང་ཆེན་པོ་ནི་གྲོང་མི་དང་ཡུལ་མི་རྣམས་ཀྱི་སྙིང་དུ་སྡུག་ཅིང་ཡིད་དུ་འོང་བར་གྱུར་པ་དཔེར་ན་ཕ་ལ་བུ་རྣམས་བཞིན་ཏེ། ཀུན་དགའ་བོ་དུས་གཅིག་ཅིག་ན་རྒྱལ་པོ་ལེགས་མཐོང་ཆེན་པོ་སྐྱེད་མོས་ཚལ་གྱི་གནས་སུ་འགྲོ་བ་ན་ཁ་ལོ་
སྒྱུར་བ་ལ་སྨྲས་པ། ཁ་ལོ་སྒྱུར་བ་ཤིང་རྟ་རིམ་གྱིས་དལ་བུ་དལ་བུས་སྒྱུར་ཅིག་ངས་གྲོང་མི་དང་ཡུལ་མི་རྣམས་ལ་ཡུན་རིང་དུ་བལྟ་བར་བྱའོ། །གྲོང་མི་དང་ཡུལ་མི་རྣམས་ཀྱིས་ཀྱང་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་ཤིང་རྟ་རིམ་གྱིས་དལ་བུ་དལ་བུས་སྒྱུར་ཅིག །ངེད་ཀྱང་ལྷ་

ལ་ཡུན་རིང་དུ་བལྟ་བར་བྱའོ། །ཀུན་དགའ་བོ་གང་གི་ཚེ་རྒྱལ་པོ་ལེགས་མཐོང་ཆེན་པོ་གྲོང་མི་དང་ཡུལ་མི་རྣམས་ལ་སྙིང་དུ་སྡུག་ཅིང་ཡིད་དུ་འོང་བར་གྱུར་པ་ནི་དཔེར་ན་བུ་རྣམས་ལ་ཕ་བཞིན་ནོ། །རྒྱལ་པོ་ལེགས་མཐོང་ཆེན་པོ་ལ་གྲོང་མི་དང་ཡུལ་མི་རྣམས་ཀྱི་
སྙིང་དུ་སྡུག་ཅིང་ཡིད་དུ་འོང་བར་གྱུར་པ་ནི་དཔེར་ན་ཕ་ལ་བུ་རྣམས་བཞིན་ཏེ། ཀུན་དགའ་བོ་འདི་ནི་རྒྱལ་པོ་ལེགས་མཐོང་ཆེན་པོའི་འབྱོར་པ་ཞེས་བྱའོ། །དེ་ནས་གྲོང་མི་དང་ཡུལ་མི་རྣམས་ཀྱིས་གསེར་དང་། དངུལ་དང་། ནོར་བུ་རིན་པོ་ཆེ་དང་། ལ་བ་རིན་པོ་ཆེ་མང་པོ་དག་ཁྱེར་
ཏེ་རྒྱལ་པོ་ལེགས་མཐོང་ཆེན་པོ་གང་ན་བ་དེར་དོང་སྟེ་ཕྱིན་ནས་རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷའི་སླད་དུ་བདག་ཅག་གིས་གསེར་དང་། དངུལ་དང་། ནོར་བུ་རིན་པོ་ཆེ་དང་། ལ་བ་རིན་པོ་ཆེ་མང་པོ་དག་འཚལ་ཏེ་མཆིས་ལགས་ན། ལྷས་ཐུགས་བརྩེ་
བའི་སླད་དུ་འདི་དག་བཞེས་སུ་གསོལ། སྣ་བོ་དག་ངའི་ཡུལ་ན་འདི་འདྲ་བའི་ནོར་གྱི་རིགས་ཡོད་པས་མི་འདོད་དོ་ཞེས་སྨྲས་ནས། ལེན་དུ་མ་བཏུབ་པ་དང་། གྲོང་མི་དང་། ཡུལ་མི་རྣམས་ཀྱིས་རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷའི་སླད་དུ་བདག་ཅག་
གིས་གསེར་དང་། དངུལ་དང་། ནོར་བུ་རིན་པོ་ཆེ་དང་། ལ་བ་རིན་པོ་ཆེ་མང་པོ་འཚལ་ཏེ་མཆིས་པ་འདི་དག་ལྷས་ཐུགས་བརྩེ་བའི་སླད་དུ་བཞེས་སུ་གསོལ། རྒྱལ་པོ་ལེགས་མཐོང་ཆེན་པོས་ཀྱང་གྲོང་མི་དང་ཡུལ་མི་རྣམས་ལ་ལན་གཉིས་ལན་གསུམ་གྱི་བར་དུ་འདི་སྐད་ཅེས་སྨྲས་
སོ། །སྣ་བོ་དག་ངའི་ཡུལ་ན་འདི་འདྲ་བའི་ནོར་གྱི་རིགས་ཡོད་པས་མི་འདོད་དོ་ཞེས་སྨྲས་ནས། ལེན་དུ་མ་བཏུབ་བོ། །དེ་ནས་གྲོང་མི་དང་ཡུལ་མི་རྣམས་འདི་སྙམ་དུ་སེམས་ཏེ། བདག་ཅག་གིས་ལྷའི་ཕྱིར་གསེར་དང་། དངུལ་དང་། ནོར་བུ་རིན་པོ་ཆེ་དང་། ལ་བ་རིན་པོ་
ཆེ་མང་པོ་ཁྱེར་ཏེ་འོངས་པ་འདི་དག་བདག་ཅག་གིས་འདི་དག་བླངས་ཏེ་རང་རང་གི་གནས་སུ་འདོང་བ་ནི་བདག་ཅག་གི་ཚུལ་མ་ཡིན་པས་མ་ལ་བདག་ཅག་གིས་རྒྱལ་པོ་ལེགས་མཐོང་ཆེན་པོའི་མདུན་དུ་གསེར་དང་། དངུལ་གྱི་ཕུང་པོ་ཆེར་སྤུངས་ལ་མཐའ་གཅིག་ཏུ་ནོར་བུ་

རིན་པོ་ཆེ་དང་། ལ་བ་རིན་པོ་ཆེ་དག་བཞག་སྟེ། འདི་ནི་ལྷའི་དཀོར་གྱི་རིགས་ཡིན་ནོ་ཞེས་སྨྲས་ཏེ། བཏང་སྙོམས་སུ་བོར་ལ་འདོང་ངོ་སྙམ་ནས། གསེར་དང་། དངུལ་དང་། ནོར་བུ་རིན་པོ་ཆེ་དང་། ལ་བ་རིན་པོ་ཆེ་དག་རྒྱལ་པོ་ལེགས་མཐོང་ཆེན་པོའི་མདུན་དུ་ཉེ་བར་
བཞག་ནས་བཏང་སྙོམས་སུ་བོར་ཏེ་དོང་ངོ་། །དེ་ནས་རྒྱལ་པོ་ལེགས་མཐོང་ཆེན་པོ་འདི་སྙམ་དུ་སེམས་ཏེ། བདག་གི་ནོར་གྱི་རིགས་ནི་ཆོས་བཞིན་གྱིས་རྙེད་པ་ཡིན་གྱིས་ཆོས་མ་ཡིན་པས་ནི་མ་ཡིན་པས་མ་ལ་བདག་གིས་ཆོས་དང་མཐུན་པའི་ཁང་བཟངས་བརྩིག་གོ་སྙམ་པ་དང་།
མཐའི་རྒྱལ་ཕྲན་བརྒྱད་ཁྲི་བཞི་སྟོང་གིས་རྒྱལ་པོ་ལེགས་མཐོང་ཆེན་པོ་ཆོས་དང་མཐུན་པའི་ཁང་བཟངས་རྩིག་པར་སྤྲོའོ་ཞེས་ཐོས་སོ། །ཐོས་ནས་ཀྱང་རྒྱལ་པོ་ལེགས་མཐོང་ཆེན་པོ་ག་ལ་བ་དེར་དོང་སྟེ་ཕྱིན་ནས་རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷ་
ཆོས་དང་མཐུན་པའི་ཁང་བཟངས་རྩིག་པ་ལ་ཐུགས་ཀྱི་ཕྲིན་ལས་བསྐྱུང་དུ་གསོལ། ལྷའི་ཆོས་དང་མཐུན་པའི་ཁང་བཟངས་བདག་ཅག་གིས་བརྩིག་པར་བགྱིའོ། །སྣ་བོ་དག་ངའི་ཡུལ་ན་འདི་འདྲ་བའི་ནོར་གྱི་རིགས་ཡོད་པས་མི་དགོས་སོ་ཞེས་སྨྲས་ནས་མ་གནང་ངོ་། །
མཐའི་རྒྱལ་ཕྲན་བརྒྱད་ཁྲི་བཞི་སྟོང་གིས་ལན་གཉིས་ལན་གསུམ་གྱི་བར་དུ་རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷ་ཆོས་དང་མཐུན་པའི་ཁང་བཟངས་རྩིག་པ་ལ་ཐུགས་ཀྱི་ཕྲིན་ལས་བསྐྱུང་དུ་གསོལ། ལྷ་ཆོས་དང་མཐུན་པའི་ཁང་བཟངས་བདག་ཅག་གིས་
བརྩིག་པར་བགྱིའོ། །རྒྱལ་པོ་ལེགས་མཐོང་ཆེན་པོས་ཀྱང་ལན་གཉིས་ལན་གསུམ་གྱི་བར་དུ་མཐའི་རྒྱལ་ཕྲན་བརྒྱད་ཁྲི་བཞི་སྟོང་ལ་འདི་སྐད་ཅེས་སྨྲས་སོ། །སྣ་བོ་དག་ངའི་ཡུལ་ན་འདི་འདྲ་བའི་ནོར་གྱི་རིགས་ཡོད་པས་མི་དགོས་སོ་ཞེས་སྨྲས་ནས་མ་གནང་ངོ་། །དེ་ནས་མཐའི་
རྒྱལ་ཕྲན་བརྒྱད་ཁྲི་བཞི་སྟོང་གིས་རྒྱལ་པོ་ལེགས་མཐོང་ཆེན་པོའི་རྐང་པ་ལ་གཏུགས་ནས་ཁ་ཅིག་གིས་ནི་ལག་པ་ནས་བཟུང་། ཁ་ཅིག་གིས་ནི་གོས་ཀྱི་མཐའ་མ་ནས་བཟུང་། ཁ་ཅིག་གིས་ནི་རྒྱལ་པོ་ལེགས་མཐོང་ཆེན་པོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། རྒྱལ་

པོ་ལེགས་མཐོང་ཆེན་པོ་ལ་འདི་སྐད་ཅེས་གསོལ་ཏོ། །ལྷ་ཆོས་དང་མཐུན་པའི་ཁང་བཟངས་རྩིག་པ་ལ་ཐུགས་ཀྱི་ཕྲིན་ལས་བསྐྱུང་དུ་གསོལ། ལྷའི་ཆོས་ཀྱི་ཁང་བཟངས་བདག་ཅག་གིས་བརྩིག་པར་བགྱིའོ། །རྒྱལ་པོ་ལེགས་མཐོང་ཆེན་པོས་མཐའི་
རྒྱལ་ཕྲན་བརྒྱད་ཁྲི་བཞི་སྟོང་ལ་ཅང་མི་སྨྲ་བས་གནང་ངོ་། །དེ་ནས་མཐའི་རྒྱལ་ཕྲན་བརྒྱད་ཁྲི་བཞི་སྟོང་གིས་རྒྱལ་པོ་ལེགས་མཐོང་ཆེན་པོ་ཅང་མི་སྨྲ་བས་གནང་བར་རིག་ནས་རང་རང་གི་གནས་སུ་དོང་སྟེ། གསེར་དང་། དབྱིག་མང་པོ་དང་། རིན་པོ་ཆེའི་ཀ་བ་རེ་རེ་ཁྱེར་ཏེ།
རྒྱལ་པོ་ལེགས་མཐོང་ཆེན་པོ་ག་ལ་བ་དེ་ལོགས་སུ་སོང་ནས་ཕྱིན་པ་དང་། རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷའི་ཆོས་དང་མཐུན་པའི་ཁང་བཟངས་གང་དུ་ཅི་ཙམ་ཞིག་བརྩིག་པར་བགྱི་ལགས། སྣ་བོ་དག་ཁྱེད་ཀྱིས་དེའི་ཕྱིར་ཀུ་ཤ་ཅན་གྱི་ཤར་
ཕྱོགས་སུ་ཆོས་དང་མཐུན་པའི་ཁང་བཟངས་ཆུར་དཔག་ཚད་གཅིག །རྒྱར་དཔག་ཚད་གཅིག་པ་ཅིག་རྩིགས་ཤིག །ལྷ་བཀའ་བཞིན་འཚལ་ཞེས་མཐའི་རྒྱལ་ཕྲན་བརྒྱད་ཁྲི་བཞི་སྟོང་གིས་རྒྱལ་པོ་ལེགས་མཐོང་ཆེན་པོའི་ལྟར་མཉན་ནས། ཀུ་ཤ་ཅན་གྱི་ཤར་ཕྱོགས་
སུ་ཆོས་དང་མཐུན་པའི་ཁང་བཟངས་ཆུར་དཔག་ཚད་གཅིག །རྒྱར་དཔག་ཚད་གཅིག་པ་ཞིག་བརྩིགས་ཏེ། ཀུན་དགའ་བོ་ཆོས་དང་མཐུན་པའི་ཁང་བཟངས་ཀྱི་རྨང་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་
ལས་བྱས་པར་གྱུར་ཏོ། །ཀུན་དགའ་བོ་ཆོས་དང་མཐུན་པའི་ཁང་བཟངས་ཀྱི་ཀ་རྟེན་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པས་བྲེས་སོ། །ཀུན་དགའ་བོ་ཆོས་དང་མཐུན་པའི་ཁང་བཟངས་
ཀྱི་ཀ་བ་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་བཙུགས་སོ། །ཀུན་དགའ་བོ་གསེར་ལས་བྱས་པའི་ཀ་བ་ལ་ནི་ཀ་རྟེན་དང་། ཀ་ཞུ་དང་། བྲེ་ཕུལ་དང་། གདུང་དངུལ་ལས་བྱས་སོ། །དངུལ་

ལས་བྱས་པ་ལ་ནི་གསེར་གྱིའོ། །བཻ་ཌཱུརྱ་ལས་བྱས་པ་ལ་ནི་ཤེལ་གྱིའོ། །ཤེལ་ལས་བྱས་པ་ལ་ནི་ཀ་རྟེན་དང་། ཀ་ཞུ་དང་། བྲེ་ཕུལ་དང་། གདུང་བཻ་ཌཱུརྱ་ལས་བྱས་སོ། །ཀུན་དགའ་བོ་ཆོས་དང་མཐུན་པའི་ཁང་བཟངས་ཀྱི་གདུང་ཕྲན་རྣམ་པ་བཞི་པོ་གསེར་ལས་བྱས་པ་
དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་བྲེས་སོ། །ཀུན་དགའ་བོ་ཆོས་དང་མཐུན་པའི་ཁང་བཟངས་ཀྱི་མདུན་གདུང་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་
བྱས་པ་བྲེས་སོ། །ཀུན་དགའ་བོ་ཆོས་དང་མཐུན་པའི་ཁང་བཟངས་ཀྱི་གདུང་པོ་ཆེ་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་བྲེས་སོ།། །།འདུལ་བ་ཕྲན་ཚེགས་ཀྱི་གཞི། བམ་པོ་
ལྔ་བཅུ་རྩ་གསུམ་པ། ཀུན་དགའ་བོ་ཆོས་དང་མཐུན་པའི་ཁང་བཟངས་ཀྱི་བ་གམ་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་བཏགས་སོ། །ཀུན་དགའ་བོ་ཆོས་དང་མཐུན་པའི་ཁང་བཟངས་ལ་སྤང་ལེབ་
རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པས་གཡོགས་སོ། །ཀུན་དགའ་བོ་ཆོས་དང་མཐུན་པའི་ཁང་བཟངས་ལ་ཐེམ་སྐས་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་
ལས་བྱས་པ་དང་། ཤེལ་ལས་བྱས་པས་བརྩིགས་སོ། །ཀུན་དགའ་བོ་ཆོས་དང་མཐུན་པའི་ཁང་བཟངས་ལ་ལན་ཀན་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པས་བསྐོར་ཏོ། །ཀུན་དགའ་བོ་གསེར་
ལས་བྱས་པའི་ལན་ཀན་གྱི་གཟུངས་གཟེར་དང་། རྟེན་མ་དང་། གདུང་བུ་དངུལ་ལས་བྱས་སོ། །དངུལ་ལས་བྱས་པ་ལ་ནི་གསེར་གྱིའོ། །བཻ་ཌཱུརྱ་ལ་ནི་ཤེལ་གྱིའོ། །ཀུན་དགའ་བོ་ཤེལ་ལས་བྱས་པའི་ལན་ཀན་ལ་ནི་གཟུངས་གཟེར་དང་། གདུང་བུ་དང་། ལན་ཀན་གྱི་

རྟེན་མ་བཻ་ཌཱུརྱ་ལས་བྱས་སོ། །ཀུན་དགའ་བོ་ཆོས་དང་མཐུན་པའི་ཁང་བཟངས་ལ་ཁང་པ་རྩེག་མ་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པའི་ཁང་པ་བརྩིགས་སོ། །ཀུན་དགའ་བོ་
གསེར་ལས་བྱས་པའི་ཁང་པ་རྩེག་མ་ལ་ནི་དངུལ་ལས་བྱས་པའི་ཁྲི་ལྷས་མ་ཅན་དང་། གོ་ལི་ཀའི་རས་གདིང་བ་ཅན་དང་། སྟན་ནང་ཚངས་ཅན་གྱི་གདིང་བ་ཅན་དང་། ཟ་འུག་གི་སྟན་དང་། མེན་ཏྲིའི་སྟན་དང་། ཨར་མོ་ནིག་གི་སྟན་དང་། ཀ་ལིང་ཀའི་རས་ཕྲན་གྱི་སྟན་སྟེང་
གཡོགས་དང་བཅས་པ་ཕྱོགས་གཉིས་སུ་སྔས་དམར་པོ་ཅན་དག་བཞག་གོ། །དངུལ་ལས་བྱས་པ་ལ་ནི་གསེར་ལས་བྱས་པའོ། །བཻ་ཌཱུརྱ་ལས་བྱས་པ་ལ་ནི་ཤེལ་ལས་བྱས་པའོ། །ཤེལ་ལས་བྱས་པ་ལ་ནི་བཻ་ཌཱུརྱ་ལས་བྱས་པའི་ཁྲི་ལྷས་མ་ཅན་གྱི་ཞེས་བྱ་བ་ནས། ཕྱོགས་
གཉིས་སུ་སྔས་དམར་པོ་ཅན་དག་བཞག་གོ་ཞེས་བྱ་བའི་བར་གོང་མ་བཞིན་ནོ། །ཀུན་དགའ་བོ་གསེར་ལས་བྱས་པའི་ཁང་པ་རྩེག་མའི་མདུན་དུ་ནི་དངུལ་ལས་བྱས་པའི་ཏ་ལ་འདབ་མ་དང་། མེ་ཏོག་དང་། འབྲས་བུ་གསེར་ལས་བྱས་པ་སྦྲེངས་སོ། །དངུལ་ལས་བྱས་པ་
ལ་ནི་གསེར་ལས་བྱས་པའོ། །བཻ་ཌཱུརྱ་ལས་བྱས་པ་ལ་ནི་ཤེལ་ལས་བྱས་པའོ། །ཤེལ་ལས་བྱས་པའི་ཁང་པ་རྩེག་པའི་མདུན་དུ་ནི་བཻ་ཌཱུརྱ་ལས་བྱས་པའི་ཏ་ལ་འདབ་མ་དང་། མེ་ཏོག་དང་། འབྲས་བུ་ཤེལ་ལས་བྱས་པ་སྦྲེངས་སོ། །ཏ་ལ་དེ་རྣམས་རླུང་གིས་བསྐྱོད་པ་ན། འདི་
ལྟ་བུའི་སྒྲ་ཡིད་དུ་འོང་བ་འབྱུང་སྟེ། དཔེར་ན་སྐྱེས་བུ་མཁས་པས། ཡན་ལག་ལྔ་དང་ལྡན་པའི་སིལ་སྙན་ཡང་དག་པར་ལེགས་པར་བསྒྲགས་པ་བཞིན་ནོ། །ཀུན་དགའ་བོ་ཆོས་དང་མཐུན་པའི་ཁང་བཟངས་ལ་གསེར་གྱིས་གཅལ་བཀྲམ་ཞིང་ཙན་དན་གྱི་ཆུས་ཆག་ཆག་བཏབ་
ལ། གསེར་གྱི་དྲ་བ་དང་། གསེར་གྱི་དྲིལ་བུ་གཡེར་ཀ་བརྒྱུས་པས་བཏགས་པའོ།། །།བར་སྡོམ་ནི། རྨང་དང་ཀ་རྟེན་ཀ་བ་དང་། །གདུང་ཕྲན་མདུན་གདུང་གདུང་བོ་ཆེ། །བ་གམ་སྤང་ལེབ་ཐེམ་སྐས་དང་། །ལན་ཀན་རྩེག་མ་ཏ་ལ་གསེར། །དེ་ནས་མཐའི་རྒྱལ་ཕྲན་བརྒྱད་

ཁྲི་བཞི་སྟོང་གི་ཆོས་དང་མཐུན་པའི་ཁང་བཟངས་ཀྱི་བྱ་བ་ཐམས་ཅད་ཟིན་པར་རིག་ནས་ཆོས་དང་མཐུན་པའི་ཁང་བཟངས་ཀྱི་མདུན་དུ་ཆོས་དང་མཐུན་པའི་རྫིང་ཆུར་དཔག་ཚད་གཅིག །རྒྱར་དཔག་ཚད་གཅིག་པ་ཞིག་བྱས་ཏེ། ཀུན་དགའ་བོ་ཆོས་དང་མཐུན་པའི་
རྫིང་ཕ་གུ་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པས་བརྩིགས་སོ། །ཀུན་དགའ་བོ་ཆོས་དང་མཐུན་པའི་རྫིང་གི་ཐེམ་སྐས་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་
པ་དང་། ཤེལ་ལས་བྱས་པས་བརྩིགས་སོ། །ཀུན་དགའ་བོ་ཆོས་དང་མཐུན་པའི་རྫིང་ལ་ཁ་ཁྱེར་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པས་བསྐོར་ཏོ། །གསེར་ལས་བྱས་པའི་ཁ་ཁྱེར་ལ་ནི་གཟུངས་
གཟེར་དང་། གདུང་བུ་དང་། རྟེན་མ་དངུལ་ལས་བྱས་སོ། །དངུལ་ལས་བྱས་པ་ལ་ནི་གསེར་ལས་བྱས་སོ། །བཻ་ཌཱུརྱ་ལས་བྱས་པ་ལ་ནི་ཤེལ་ལས་བྱས་སོ། །ཤེལ་ལས་བྱས་པའི་ཁ་ཁྱེར་ལ་ནི་གཟུངས་གཟེར་དང་། གདུང་བུ་དང་། རྟེན་མ་བཻ་ཌཱུརྱ་ལས་བྱས་སོ། །ཀུན་
དགའ་བོ་ཆོས་དང་མཐུན་པའི་རྫིང་གི་ནང་ན་མེ་ཏོག་ཆུ་ལས་སྐྱེས་པ་རྣམ་པ་སྣ་ཚོགས་འདི་ལྟ་སྟེ། ཨུཏྤ་ལ་དང་། པད་མ་དང་། ཀུ་མུད་དང་། པད་མ་དཀར་པོ་དང་། དྲི་མཆོག་དང་། དྲི་ངད་འཇམ་དང་། དུས་ཚིགས་ཐམས་ཅད་པ་དང་། དུས་ཐམས་ཅད་པའི་མེ་ཏོག་གི་ཕྲེང་བའི་རྒྱུ་
སྐྱེ་བོ་ཐམས་ཅད་ལ་དགག་པ་མེད་པ་བསྐྱེད་དོ། །ཀུན་དགའ་བོ་ཆོས་དང་མཐུན་པའི་རྫིང་གི་འགྲམ་གཉིས་ན་མེ་ཏོག་སྐམ་ལས་སྐྱེ་བ་འདི་ལྟ་སྟེ། ཨ་ཏི་མུག་ཏ་ཀ་དང་། ཙམ་པ་ཀ་དང་། སྐྱ་སྣར་དང་། པ་རི་ཤ་ཀ་དང་། མ་ལི་ཀ་དང་། ན་བ་མ་ལི་ཀ་དང་། ཡིད་དུ་འོང་བ་དང་།
ཡུསྠི་ཀ་དང་། དྷ་ནུསྐ་རི་དང་། དུས་ཚིགས་ཐམས་ཅད་པ་དང་། དུས་ཐམས་ཅད་པའི་མེ་ཏོག་གི་ཕྲེང་བའི་རྒྱུ་སྐྱེ་བོ་ཐམས་ཅད་ལ་དགག་པ་མེད་པ་བསྐྱེད་དོ། །ཀུན་དགའ་བོ་ཆོས་དང་མཐུན་པའི་རྫིང་གསེར་གྱི་བྱེ་མ་བདལ་ཅིང་ཙན་དན་གྱི་ཆུས་ཆག་ཆག་བཏབ་ལ། གསེར་གྱི་

དྲ་བ་དང་། གསེར་གྱི་དྲིལ་བུ་གཡེར་ཀ་བརྒྱུས་པ་བཏགས་སོ། །དེ་ནས་མཐའི་རྒྱལ་ཕྲན་བརྒྱད་ཁྲི་བཞི་སྟོང་གིས་ཆོས་དང་མཐུན་པའི་རྫིང་གི་བྱ་བ་ཐམས་ཅད་ཟིན་པར་རིག་ནས་ཆོས་དང་མཐུན་པའི་རྫིང་གི་མདུན་དུ་ཆོས་དང་མཐུན་པའི་ཏ་ལའི་ཚལ་ཆུར་
དཔག་ཚད་གཅིག །རྒྱར་དཔག་ཚད་གཅིག་པ་ཞིག་བཙུགས་ཏེ། ཀུན་དགའ་བོ་ཆོས་དང་མཐུན་པའི་ཏ་ལའི་ཚལ་དུ་ཏ་ལ་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་བཙུགས་སོ། །ཀུན་དགའ་
བོ་གསེར་ལས་བྱས་པའི་ཏ་ལ་ལ་ནི་ལོ་མ་དང་། མེ་ཏོག་དང་། འབྲས་བུ་དངུལ་ལས་བྱས་པ་བཙུགས་སོ། །དངུལ་ལས་བྱས་པ་ལ་ནི་གསེར་ལས་བྱས་པའོ། །བཻ་ཌཱུརྱ་ལས་བྱས་པ་ལ་ནི་ཤེལ་ལས་བྱས་པའོ། །ཤེལ་ལས་བྱས་པའི་ཏ་ལ་ལ་ནི་ལོ་མ་དང་། མེ་ཏོག་དང་།
འབྲས་བུ་བཻ་ཌཱུརྱ་ལས་བྱས་པ་བཙུགས་སོ། །ཀུན་དགའ་བོ་ཏ་ལའི་ཚལ་དེ་དག་རླུང་གིས་བསྐྱོད་པ་ན་འདི་ལྟ་བུའི་སྒྲ་ཡིད་དུ་འོང་བ་འབྱུང་སྟེ། དཔེར་ན་སྐྱེས་བུ་མཁས་པས་ཡན་ལག་ལྔ་དང་ལྡན་པའི་སིལ་སྙན་ཡང་དག་པར་བསྒྲགས་པ་བཞིན་ནོ། །ཀུན་དགའ་བོ་ཆོས་དང་
མཐུན་པའི་ཏ་ལའི་ཚལ་དེ་ལན་ཀན་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པས་ཀུན་དུ་བསྐོར་ཏོ། །ཀུན་དགའ་བོ་གསེར་ལས་བྱས་པའི་ལན་ཀན་ལ་ནི་གཟུངས་གཟེར་དང་། གདུང་བུ་དང་། རྟེན་མ་དངུལ་
ལས་བྱས་སོ། །དངུལ་ལས་བྱས་པ་ལ་ནི་གསེར་ལས་བྱས་པའོ། །བཻ་ཌཱུརྱ་ལས་བྱས་པ་ལ་ནི་ཤེལ་ལས་བྱས་པའོ། །ཤེལ་ལས་བྱས་པའི་ལན་ཀན་ལ་ནི་གཟུངས་གཟེར་དང་། གདུང་བུ་དང་། རྟེན་མ་བཻ་ཌཱུརྱ་ལས་བྱས་སོ། །ཀུན་དགའ་བོ་ཆོས་དང་མཐུན་པའི་ཏ་ལའི་
ཚལ་ན་གསེར་གྱིས་གཅལ་བཀྲམ་ཞིང་ཙན་དན་གྱི་ཆུས་ཆག་ཆག་བཏབ་ལ། གསེར་གྱི་དྲ་བ་དང་། གསེར་གྱི་དྲིལ་བུ་གཡེར་ཀ་བརྒྱུས་པ་བཏགས་སོ། །དེ་ནས་མཐའི་རྒྱལ་ཕྲན་བརྒྱད་ཁྲི་བཞི་སྟོང་གིས་ཆོས་དང་མཐུན་པའི་ཁང་བཟངས་དང་། ཆོས་དང་མཐུན་པའི་རྫིང་

དང་། ཆོས་དང་མཐུན་པའི་ཏ་ལའི་ཚལ་གྱི་བྱ་བ་ཐམས་ཅད་ཟིན་པར་རིག་ནས་རྒྱལ་པོ་ལེགས་མཐོང་ཆེན་པོ་ག་ལ་བ་དེར་དོང་སྟེ་ལྷགས་ནས་རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷའི་ཆོས་དང་མཐུན་པའི་ཁང་བཟངས་དང་། ཆོས་དང་མཐུན་པའི་རྫིང་དང་། ཆོས་
དང་མཐུན་པའི་ཏ་ལའི་ཚལ་མཛད་པ་ཐམས་ཅད་བགྱིས་ལགས་ཏེ། ལྷ་ད་དེའི་དུས་ལ་བབ་པར་དགོངས་ཤིག །དེ་ནས་རྒྱལ་པོ་ལེགས་མཐོང་ཆེན་པོ་འདི་སྙམ་དུ་སེམས་ཏེ། འདི་ལྟར་ཆོས་དང་མཐུན་པའི་ཁང་བཟངས་འདིར་ཐོག་མར་བདག་ཁོ་ན་གནས་པ་ནི་བདག་གི་ཆ་མ་ཡིན་པས་མ་
ལ་བདག་གིས་བདག་གི་ཡུལ་ན་དགེ་སྦྱོང་དང་། བྲམ་ཟེ་དང་ཚུལ་བཟང་པོར་བཀུར་བ་གང་དག་གནས་པ་དེ་དག་ཆོས་དང་མཐུན་པའི་ཁང་བཟངས་སུ་ཐོག་མ་ཁོ་ནར་ཟན་བྱིན་ལ། རེ་རེ་ལ་ཡང་རས་བཅོས་བུ་སར་པ་ཟུང་རེ་བསྐོན་ནོ་སྙམ་མོ། །དེ་ནས་རྒྱལ་པོ་ལེགས་མཐོང་ཆེན་པོས་རང་གི་
ཡུལ་ན་དགེ་སྦྱོང་དང་། བྲམ་ཟེ་དང་ཚུལ་བཟང་པོར་བཀུར་བ་གང་དག་གནས་པ་དེ་དག་ཐོག་མ་ཁོ་ནར་ཆོས་དང་མཐུན་པའི་ཁང་བཟངས་སུ་ཟན་བྱིན་ནས། རེ་རེ་ལ་ཡང་རས་བཅོས་བུ་སར་པ་ཟུང་རེ་བསྐོན་ནོ། །དེ་ནས་ཡང་རྒྱལ་པོ་ལེགས་མཐོང་ཆེན་པོ་འདི་སྙམ་དུ་སེམས་ཏེ། ཆོས་དང་མཐུན་
པའི་ཁང་བཟངས་སུ་བདག་གིས་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྩེ་བ་དང་། དགའ་བ་དང་། དགའ་མགུར་སྤྱོད་པ་ནི་བདག་གི་ཚུལ་མ་ཡིན་པས་མ་ལ་བདག་གིས་ཆོས་དང་མཐུན་པའི་ཁང་བཟངས་སུ་སྐྱེས་བུ་ཉེ་གནས་གཅིག་དང་། རྒྱལ་པོའི་དྲང་སྲོང་གི་
ཚངས་པར་སྤྱོད་པ་སྤྱད་དོ་སྙམ་མོ། །དེ་ནས་རྒྱལ་པོ་ལེགས་མཐོང་ཆེན་པོ་ཆོས་དང་མཐུན་པའི་ཁང་བཟངས་སུ་སྐྱེས་བུ་ཉེ་གནས་གཅིག་དང་རྒྱལ་པོའི་དྲང་སྲོང་གི་ཚངས་པར་སྤྱོད་པ་སྤྱད་དོ། །དེ་ནས་རྒྱལ་པོ་ལེགས་མཐོང་ཆེན་པོ་གསེར་ལས་བྱས་པའི་ཁང་པ་རྩེག་མའི་ནང་དུ་
ཞུགས་ནས་དངུལ་ལས་བྱས་པའི་ཁྲི་ལ་འདུག་གོ། །ཁྲི་ལ་འདུག་ནས་འདོད་པ་དག་ལས་དབེན་པ། སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་། བདེ་བ་ཅན་བསམ་གཏན་དང་

པོ་རྫོགས་པར་བྱས་ཏེ་གནས་སོ། །དངུལ་ལས་བྱས་པའི་ཁྲི་ལས་བབས་ཏེ་གསེར་ལས་བྱས་པའི་ཁང་པ་རྩེག་མ་ནས་བྱུང་ནས་དངུལ་ལས་བྱས་པའི་ཁང་པ་རྩེག་མའི་ནང་དུ་ཞུགས་ཏེ་གསེར་ལས་བྱས་པའི་ཁྲི་ལ་འདུག་གོ། །ཁྲི་ལ་འདུག་ནས་འདོད་པ་དག་ལས་དབེན་
པ་ཞེས་བྱ་བ་ནས། བསམ་གཏན་དང་པོ་རྫོགས་པར་བྱས་ཏེ་གནས་སོ་ཞེས་བྱ་བའི་བར་གོང་མ་བཞིན་ནོ། །གསེར་ལས་བྱས་པའི་ཁྲི་ལས་བབས་ནས་དངུལ་ལས་བྱས་པའི་ཁང་པ་རྩེག་མ་ནས་བྱུང་ནས་བཻ་ཌཱུརྱ་ལས་བྱས་པའི་ཁང་པ་རྩེག་མའི་ནང་དུ་ཞུགས་ནས་ཤེལ་ལས་བྱས་པའི་ཁྲི་ལ་
འདུག་གོ། །ཁྲི་ལ་འདུག་ནས་འདོད་པ་དག་ལས་དབེན་པ་ཞེས་བྱ་བ་ནས། བསམ་གཏན་དང་པོ་རྫོགས་པར་བྱས་ཏེ་གནས་སོ་ཞེས་བྱ་བའི་བར་གོང་མ་བཞིན་ནོ། །ཤེལ་ལས་བྱས་པའི་ཁྲི་ལས་བབས་ཏེ་བཻ་ཌཱུརྱ་ལས་བྱས་པའི་ཁང་པ་རྩེག་མ་ནས་བྱུང་ནས་ཤེལ་ལས་བྱས་པའི་ཁང་པ་རྩེག་
མའི་ནང་དུ་ཞུགས་ནས་བཻ་ཌཱུརྱ་ལས་བྱས་པའི་ཁྲི་ལ་འདུག་གོ། །ཁྲི་ལ་འདུག་ནས་འདོད་པ་དག་ལས་དབེན་པ་ཞེས་བྱ་བ་ནས། བསམ་གཏན་དང་པོ་རྫོགས་པར་བྱས་ཏེ་གནས་སོ། །ཞེས་བྱ་བའི་བར་གོང་མ་བཞིན་ནོ། །དེ་ནས་བུད་མེད་བརྒྱད་ཁྲི་བཞི་སྟོང་བཙུན་མོ་རིན་པོ་ཆེ་ག་ལ་བ་
དེར་དོང་སྟེ་ལྷགས་ནས་བཙུན་མོ་རིན་པོ་ཆེ་ལ་འདི་སྐད་ཅེས་སྨྲས་སོ། །ལྷ་མོ་མཁྱེན་པར་མཛོད་ཅིག །བདག་ཅག་ནི་ལྷ་མ་མཐོང་ནས་རིང་ཞིག་ལགས་ཏེ། བདག་ཅག་ནི་ལྷ་མཐོང་བར་ཤིན་ཏུ་སྐོམ་པས་བདག་ཅག་ནི་ལྷ་བལྟ་བར་འཚལ་ལོ། །ཕུ་ནུ་མོ་ཁྱེད་ཅག་དེའི་ཕྱིར་སྡོད་ཅིག་དང་།
ཅི་ཙམ་ངས་བློན་པོ་རིན་པོ་ཆེ་ལ་དྲི་བར་བྱའོ། །དེ་ནས་བཙུན་མོ་རིན་པོ་ཆེས་བློན་པོ་རིན་པོ་ཆེ་ཕོ་ཉས་བཀུག་ནས་འདི་སྐད་ཅེས་སྨྲས་སོ། །དམག་དཔོན་ཤེས་པར་བྱོས་ཤིག །ངེད་ཀྱིས་ལྷ་མ་མཐོང་ནས་རིང་ཞིག་ལོན་ཏེ། ངེད་ལྷ་ལ་བལྟ་བར་ཤིན་ཏུ་སྐོམ་པས་དེང་ནི་ལྷ་བལྟ་བར་འདོད་
དོ། །དེའི་ཕྱིར་སྲིང་མོ་དག་ཁྱེད་ཐམས་ཅད་རྒྱན་སེར་པོ། གོས་སེར་པོ། ཕྲེང་བ་དང་། ཕྱང་ཕྲུལ་དང་། བྱུག་པ་སེར་པོ། །འཁོར་རྣམས་སེར་པོར་ཆོས་ཤིག་དང་། ཇི་ཙམ་བདག་གིས་མཐའི་རྒྱལ་ཕྲན་བརྒྱད་ཁྲི་བཞི་སྟོང་དང་། གླང་པོ་ཆེའི་རྒྱལ་པོ་ཉེ་བའི་གསོ་སྦྱོང་ལ་སོགས་

པ་གླང་པོ་ཆེ་བརྒྱད་ཁྲི་བཞི་སྟོང་དང་། རྟའི་རྒྱལ་པོ་སྤྲིན་གྱི་ཤུགས་ཅན་ལ་སོགས་པ་རྟ་བརྒྱད་ཁྲི་བཞི་སྟོང་དང་། ཤིང་རྟ་དགའ་དབྱངས་ལ་སོགས་པ་ཤིང་རྟ་བརྒྱད་ཁྲི་བཞི་སྟོང་བསྡུ་བར་བགྱིའོ། །དེ་ནས་བཙུན་མོ་ཐམས་ཅད་རྒྱན་སེར་པོ་དང་། གོས་སེར་པོ་དང་། ཕྲེང་བ་དང་། ཕྱང་
ཕྲུལ་དང་། བྱུག་པ་སེར་པོར་འཁོར་རྣམས་སེར་པོར་ཆས་སོ། །དེ་ནས་བློན་པོ་རིན་པོ་ཆེ་མཐའི་རྒྱལ་ཕྲན་བརྒྱད་ཁྲི་བཞི་སྟོང་དང་། གླང་པོ་ཆེའི་རྒྱལ་པོ་ཉེ་བའི་གསོ་སྦྱོང་ལ་སོགས་པ་གླང་པོ་ཆེ་བརྒྱད་ཁྲི་བཞི་སྟོང་དང་། རྟའི་རྒྱལ་པོ་སྤྲིན་གྱི་ཤུགས་ཅན་ལ་སོགས་པ་རྟ་བརྒྱད་ཁྲི་
བཞི་སྟོང་དང་། ཤིང་རྟ་དགའ་དབྱངས་ལ་སོགས་པ་ཤིང་རྟ་བརྒྱད་ཁྲི་བཞི་སྟོང་བསྡུས་སོ། །བསྡུས་ནས་བཙུན་མོ་རིན་པོ་ཆེ་ནི་ཤིང་རྟ་དགའ་དབྱངས་སུ་ཞུགས། བུད་མེད་ལྷག་མ་གཞན་ནི་རང་རང་གི་ཤིང་རྟར་ཞུགས་ཏེ་ཆོས་དང་མཐུན་པའི་ཁང་བཟངས་ག་ལ་བར་དོང་ངོ་། །དེའི་ཚེ་ཆོས་
དང་མཐུན་པའི་ཁང་བཟངས་ཀྱི་འོག་ནས་སྐྱེ་བོ་ཕལ་པོ་ཆེའི་སྒྲ་མང་པོ་དང་། སྒྲ་ཆེན་པོ་དག་གྲག་པ་དང་། རྒྱལ་པོ་ལེགས་མཐོང་ཆེན་པོས་ཆོས་དང་མཐུན་པའི་ཁང་བཟངས་ཀྱི་འོག་ན་སྐྱེ་བོ་ཕལ་པོ་ཆེའི་སྒྲ་གྲག་པ་ཐོས་སོ། །ཐོས་ནས་སྐྱེས་བུ་ཉེ་གནས་ལ་འདི་སྐད་ཅེས་སྨྲས་སོ། །
ཀྱེ་སྐྱེས་བུ་ཆོས་དང་མཐུན་པའི་ཁང་བཟངས་འདིའི་འོག་ན་སྐྱེ་བོ་ཕལ་པོ་ཆེའི་སྒྲ་མང་པོ་དང་། སྒྲ་ཆེན་པོ་གྲག་པ་འདི་ཅི་ཞིག་ཡིན། ལྷ་དེ་ན་བཙུན་མོ་རིན་པོ་ཆེ་ལ་སོགས་པ་བུད་མེད་བརྒྱད་ཁྲི་བཞི་སྟོང་ཆོས་དང་མཐུན་པའི་ཁང་བཟངས་ཀྱི་འོག་ནས་ལྷ་བལྟ་བར་འཚལ་ཏེ། བློན་པོ་རིན་པོ་ཆེ་
ལ་སོགས་པ་མཐའི་རྒྱལ་ཕྲན་བརྒྱད་ཁྲི་བཞི་སྟོང་དང་། གླང་པོ་ཆེའི་རྒྱལ་པོ་ཉེ་བའི་གསོ་སྦྱོང་ལ་སོགས་པ་གླང་པོ་ཆེ་བརྒྱད་ཁྲི་བཞི་སྟོང་དང་། རྟའི་རྒྱལ་པོ་སྤྲིན་གྱི་ཤུགས་ཅན་ལ་སོགས་པ་རྟ་བརྒྱད་ཁྲི་བཞི་སྟོང་དང་། ཤིང་རྟ་དགའ་དབྱངས་ལ་སོགས་པ་ཤིང་རྟ་བརྒྱད་ཁྲི་བཞི་སྟོང་ཆོས་དང་མཐུན་པའི་
ཁང་བཟངས་འདིའི་འོག་ནས་མཆི་བ་ལགས་སོ། །ཀྱེ་སྐྱེས་བུ་ཁྱོད་ཀྱིས་དེའི་ཕྱིར་ཆོས་དང་མཐུན་པའི་ཁང་བཟངས་ཀྱི་ཤོད་དུ་གང་ལ་ང་འདུག་ནས་སྐྱེ་བོ་མང་པོ་ལྟ་བ་གསེར་ལས་བྱས་པའི་སྟན་བཟང་པོ་ཤོམས་ཤིག །ལྷ་བཀའ་བཞིན་འཚལ་ཞེས་སྐྱེས་བུ་དེས་རྒྱལ་པོ་ལེགས་མཐོང་ཆེན་པོའི་ལྟར་

མཉན་ནས་ཆོས་དང་མཐུན་པའི་ཁང་བཟངས་ཀྱི་ཤོད་དུ་གསེར་ལས་བྱས་པའི་གདན་བཟང་པོ་བཤམས་ཏེ་རྒྱལ་པོ་ལེགས་མཐོང་ཆེན་པོ་ག་ལ་བར་སོང་ནས་ཕྱིན་ཏེ་རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷ་ཆོས་དང་མཐུན་པའི་ཁང་བཟངས་ཀྱི་ཤོད་དུ་གསེར་
ལས་བགྱིས་པའི་གདན་བཟང་པོ་བཤམས་ལགས་ན། ལྷ་ད་དེའི་དུས་ལ་བབ་པར་དགོངས་སུ་གསོལ། དེ་ནས་རྒྱལ་པོ་ལེགས་མཐོང་ཆེན་པོ་ཆོས་དང་མཐུན་པའི་ཁང་བཟངས་ནས་འབབ་པ་ན་བུད་མེད་དེ་ཐམས་ཅད་རྒྱན་སེར་པོ་དང་། གོས་སེར་པོ་དང་། ཕྲེང་བ་དང་། ཕྱང་ཕྲུལ་དང་། བྱུག་
པ་སེར་པོ་དང་། འཁོར་སེར་པོར་ཆས་པ་མཐོང་ངོ་། །མཐོང་ནས་ཀྱང་ཀྱེ་མ་བུད་མེད་འདི་དག་ནི་ཆགས་པར་འགྱུར་རོ་སྙམ་དུ་རིག་ནས་གནམ་དུ་ལྟ་ཞིང་འདུག་པ་དང་། བཙུན་མོ་རིན་པོ་ཆེས་རྒྱལ་པོ་ལེགས་མཐོང་ཆེན་པོ་གནམ་དུ་ལྟ་ཞིང་འདུག་པ་མཐོང་ངོ་། །མཐོང་ནས་འདི་སྙམ་དུ་
སེམས་ཏེ། ཇི་ལྟར་ལྷས་བདག་ཅག་མཐོང་ནས་གནམ་དུ་ལྟ་ཞིང་འདུག་པ་དང་སྦྱར་ན། ལྷས་བདག་ཅག་ལ་གནོད་པ་ཞིག་བྱེད་པར་མི་འགྱུར་གྲང་སྙམ་མོ། །དེ་ནས་རྒྱལ་པོ་ལེགས་མཐོང་ཆེན་པོ་ཆོས་དང་མཐུན་པའི་ཁང་བཟངས་ནས་བབས་ནས་གསེར་ལས་བྱས་པའི་སྟན་བཟང་པོ་
བཤམས་པ་ལ་འདུག་པ་དང་། བཙུན་མོ་རིན་པོ་ཆེ་རྒྱལ་པོ་ལེགས་མཐོང་ཆེན་པོ་ག་ལ་བ་དེར་སོང་སྟེ་ཕྱིན་ནས་རྒྱལ་པོ་ལེགས་མཐོང་ཆེན་པོའི་རྐང་པ་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཙུན་མོ་རིན་པོ་ཆེས་རྒྱལ་པོ་ལེགས་མཐོང་
ཆེན་པོ་ལ་འདི་སྐད་ཅེས་སྨྲས་སོ། །བུད་མེད་བརྒྱད་ཁྲི་བཞི་སྟང་པོ་འདི་དག་ནི་ལྷའི་ལགས་ཀྱིས། ལྷ་འདི་དག་ལ་དགྱེས་པ་བསྐྱེད་པ་དང་འཚོ་བའི་སླད་དུ་གཟིགས་སུ་གསོལ། བློན་པོ་རིན་པོ་ཆེ་ལ་སོགས་པ་མཐའི་རྒྱལ་ཕྲན་བརྒྱད་ཁྲི་བཞི་སྟོང་དང་། གླང་པོ་ཆེའི་རྒྱལ་པོ་ཉེ་བའི་
གསོ་སྦྱོང་ལ་སོགས་པ་གླང་པོ་ཆེ་བརྒྱད་ཁྲི་བཞི་སྟོང་དང་། རྟའི་རྒྱལ་པོ་སྤྲིན་གྱི་ཤུགས་ཅན་ལ་སོགས་པ་རྟ་བརྒྱད་ཁྲི་བཞི་སྟོང་དང་། ཤིང་རྟ་དགའ་དབྱངས་ལ་སོགས་པ་ཤིང་རྟ་བརྒྱད་ཁྲི་བཞི་སྟོང་དང་། རྒྱལ་པོའི་ཕོ་བྲང་རྩྭ་ཅན་ལ་སོགས་པ་གྲོང་ཁྱེར་བརྒྱད་ཁྲི་བཞི་སྟོང་དང་། ཁང་

པ་རྩེག་མ་བ་གམ་ཅན་ལ་སོགས་པ་ཁང་པ་རྩེག་མ་བརྒྱད་ཁྲི་བཞི་སྟོང་འདི་དག་ནི་ལྷའི་ལགས་ཀྱིས། ལྷ་འདི་དག་ལ་དགྱེས་པར་བསྐྱེད་པ་དང་། འཚོ་བའི་སླད་དུ་གཟིགས་སུ་གསོལ། སྲིང་མོ་ཁྱོད་སྔོན་ནི་ང་ལ་མཛའ་བཤེས་བཞིན་བྱེད་ན་ད་ནི་ཁྱོད་ཀྱིས་འགྲན་ཟླར་བྱས་སོ། །
དེ་ནས་བཙུན་མོ་རིན་པོ་ཆེ་རྒྱལ་པོ་ལེགས་མཐོང་ཆེན་པོས་སྲིང་མོ་ཞེས་བྱ་བའི་ཚིག་གིས་བོས་པས་ངུས་ཏེ་མཆི་མ་ཕྱུང་ནས་འདི་སྐད་ཅེས་སྨྲས་སོ། །ཇི་ལྟར་ལྷས་བདག་ཅག་ལ་སྲིང་མོ་ཞེས་བཀའ་སྩལ་ཏེ་བོས་པས་ད་ནི་བདག་ཅག་རིང་པོ་མི་ཐོགས་པར་ལྷ་དང་ཐབས་ཅིག་ཏུ་མི་འགྱུར་ཏེ་
འབྲལ་བ་དང་། འགྱེས་པ་དང་། རྣམ་པར་འབྲལ་བར་འགྱུར་རོ། །དེ་ནས་བཙུན་མོ་རིན་པོ་ཆེས་རྒྱལ་པོ་ལེགས་མཐོང་ཆེན་པོའི་གོས་ཀྱི་མཐའ་མ་ནས་བཟུང་སྟེ། མཆི་མ་བླགས་ནས་འདི་སྐད་ཅེས་སྨྲས་སོ། །ལྷས་བདག་ཅག་ལ་སྔོན་མཛའ་བཤེས་བཞིན་འགྲན་ཟླ་མ་མཆིས་པར་བགྱིས་པ་དེ་
ཇི་ལྟ་བུ་ལགས། སྲིང་མོ་ཁྱོད་ཚུར་ཤོག་འདི་སྐད་ཅེས་མི་རྣམས་ནི་ཡུན་ཐུང་ངུར་འཚོ་བ་སྐྱེས་ནས་མི་འཆི་བ་མེད་ཅིང་ཚེ་རབས་གཞན་དུ་འགྲོ་བར་འགྱུར་བས་དགེ་བ་བྱོས་ཤིག །ཚངས་པར་སྤྱད་པ་ལ་སྤྱོད་ཅིག་ཅེས་སྨྲོས་ཤིག །ལྷ་གང་དག་སྐད་ཅིག་ཐང་ཅིག་ཡུད་ཙམ་ལ་ལྷའི་སྐུ་ཐམས་ཅད་
ནས་ཐམས་ཅད་དུ་འཇིག་པར་འགྱུར་ཞིང་མི་དགའ་སྟེ། གང་ལྷའི་བུད་མེད་བརྒྱད་ཁྲི་བཞི་སྟོང་ལ་འདུན་པ་དང་། ཆགས་པ་དང་། སྡུག་པ་དང་། དགྱེས་པ་དང་། ཡིད་དུ་འོང་བར་འགྱུར་བའི་གནས་དེ་འཚོ་བར་བགྱི་བའི་སླད་དུ་ལྷས་སྤང་བར་མཛད་དུ་གསོལ། གང་དག་ལྷས་བློན་པོ་
རིན་པོ་ཆེ་ལ་སོགས་པ་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་དང་། གླང་པོ་ཆེའི་རྒྱལ་པོ་ཉེ་བའི་གསོ་སྦྱོང་ལ་སོགས་པ་གླང་པོ་ཆེ་བརྒྱད་ཁྲི་བཞི་སྟོང་དང་། རྟའི་རྒྱལ་པོ་སྤྲིན་གྱི་ཤུགས་ཅན་ལ་སོགས་པ་རྟ་བརྒྱད་ཁྲི་བཞི་སྟོང་དང་། ཤིང་རྟ་དགའ་དབྱངས་ལ་སོགས་པ་ཤིང་རྟ་བརྒྱད་ཁྲི་བཞི་སྟོང་དང་།
རྒྱལ་པོའི་ཕོ་བྲང་རྩྭ་ཅན་ལ་སོགས་པ་གྲོང་ཁྱེར་བརྒྱད་ཁྲི་བཞི་སྟོང་དང་། ཁང་པ་རྩེག་མ་བ་གམ་ཅན་ལ་སོགས་པ་ཁང་པ་རྩེག་མ་བརྒྱད་ཁྲི་བཞི་