Sự Nghiệp Anh Hùng (Apadāna)

Therāpadāna 
Sudhāvagga 
Senāsanadāyakattheraapadāna 
“Siddhatthassa bhagavato, 
adāsiṁ paṇṇasantharaṁ; 
Samantā upahārañca, 
kusumaṁ okiriṁ ahaṁ. 
Pāsādevaṁ guṇaṁ rammaṁ, 
Anubhomi mahārahaṁ; 
Mahagghāni ca pupphāni, 
Sayanebhisavanti me. 
Sayanehaṁ tuvaṭṭāmi, 
vicitte pupphasanthate; 
Pupphavuṭṭhi ca sayane, 
abhivassati tāvade. 
Catunnavutito kappe, 
adāsiṁ paṇṇasantharaṁ; 
Duggatiṁ nābhijānāmi, 
santharassa idaṁ phalaṁ. 
Tiṇasantharakā nāma, 
sattete cakkavattino; 
Ito te pañcame kappe, 
uppajjiṁsu janādhipā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā senāsanadāyako thero imā gāthāyo abhāsitthāti. 
Senāsanadāyakattherassāpadānaṁ aṭṭhamaṁ. 

Therāpadāna 
Sudhāvagga 
Veyyāvaccakattheraapadāna 
“Vipassissa bhagavato, 
mahāpūgagaṇo ahu; 
Veyyāvaccakaro āsiṁ, 
sabbakiccesu vāvaṭo. 
Deyyadhammo ca me natthi, 
sugatassa mahesino; 
Avandiṁ satthuno pāde, 
vippasannena cetasā. 
Ekanavutito kappe, 
veyyāvaccaṁ akāsahaṁ; 
Duggatiṁ nābhijānāmi, 
veyyāvaccassidaṁ phalaṁ. 
Ito ca aṭṭhame kappe, 
rājā āsiṁ sucintito; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā veyyāvaccako thero imā gāthāyo abhāsitthāti. 
Veyyāvaccakattherassāpadānaṁ navamaṁ. 

Therāpadāna 
Sudhāvagga 
Buddhupaṭṭhākattheraapadāna 
“Vipassissa bhagavato, 
ahosiṁ saṅkhadhammako; 
Niccupaṭṭhānayuttomhi, 
sugatassa mahesino. 
Upaṭṭhānaphalaṁ passa, 
lokanāthassa tādino; 
Saṭṭhitūriyasahassāni, 
parivārenti maṁ sadā. 
Ekanavutito kappe, 
upaṭṭhahiṁ mahāisiṁ; 
Duggatiṁ nābhijānāmi, 
upaṭṭhānassidaṁ phalaṁ. 
Catuvīse ito kappe, 
mahānigghosanāmakā; 
Soḷasāsiṁsu rājāno, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā buddhupaṭṭhāko thero imā gāthāyo abhāsitthāti. 
Buddhupaṭṭhākattherassāpadānaṁ dasamaṁ. 
Sudhāvaggo dasamo. 
Tassuddānaṁ 
Sudhā sucinti ceḷañca, 
sūcī ca gandhamāliyo; 
Tipupphiyo madhusenā, 
veyyāvacco cupaṭṭhako; 
Samasaṭṭhi ca gāthāyo, 
asmiṁ vagge pakittitā. 
Atha vagguddānaṁ 
Buddhavaggo hi paṭhamo, 
sīhāsani subhūti ca; 
Kuṇḍadhāno upāli ca, 
bījanisakacinti ca. 
Nāgasamālo timiro, 
sudhāvaggena te dasa; 
Catuddasasatā gāthā, 
pañcapaññāsameva ca. 
Buddhavaggadasakaṁ. 
Paṭhamasatakaṁ samattaṁ. 

Therāpadāna 
Bhikkhadāyivagga 
1 Bhikkhadāyakattheraapadāna 
“Suvaṇṇavaṇṇaṁ sambuddhaṁ, 
Āhutīnaṁ paṭiggahaṁ; 
Pavarā abhinikkhantaṁ, 
Vanā nibbanamāgataṁ. 
Kaṭacchubhikkhaṁ pādāsiṁ, 
siddhatthassa mahesino; 
Paññāya upasantassa, 
mahāvīrassa tādino. 
Padenānupadāyantaṁ, 
nibbāpente mahājanaṁ; 
Uḷārā vitti me jātā, 
buddhe ādiccabandhune. 
Catunnavutito kappe, 
yaṁ dānamadadiṁ tadā; 
Duggatiṁ nābhijānāmi, 
bhikkhādānassidaṁ phalaṁ. 
Sattāsītimhito kappe, 
mahāreṇu sanāmakā; 
Sattaratanasampannā, 
sattete cakkavattino. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā bhikkhadāyako thero imā gāthāyo abhāsitthāti. 
Bhikkhadāyakattherassāpadānaṁ paṭhamaṁ. 

Therāpadāna 
Bhikkhadāyivagga 
2 Ñāṇasaññikattheraapadāna 
“Suvaṇṇavaṇṇaṁ sambuddhaṁ, 
Nisabhājāniyaṁ yathā; 
Tidhāpabhinnaṁ mātaṅgaṁ, 
Kuñjaraṁva mahesinaṁ. 
Obhāsentaṁ disā sabbā, 
uḷurājaṁva pūritaṁ; 
Rathiyaṁ paṭipajjantaṁ, 
lokajeṭṭhaṁ apassahaṁ. 
Ñāṇe cittaṁ pasādetvā, 
paggahetvāna añjaliṁ; 
Pasannacitto sumano, 
siddhatthamabhivādayiṁ. 
Catunnavutito kappe, 
yaṁ kammamakariṁ tadā; 
Duggatiṁ nābhijānāmi, 
ñāṇasaññāyidaṁ phalaṁ. 
Tesattatimhito kappe, 
soḷasāsuṁ naruttamā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ñāṇasaññiko thero imā gāthāyo abhāsitthāti. 
Ñāṇasaññikattherassāpadānaṁ dutiyaṁ. 

Therāpadāna 
Bhikkhadāyivagga 
Uppalahatthiyattheraapadāna 
“Tivarāyaṁ nivāsīhaṁ, 
ahosiṁ māliko tadā; 
Addasaṁ virajaṁ buddhaṁ, 
siddhatthaṁ lokapūjitaṁ. 
Pasannacitto sumano, 
pupphahatthamadāsahaṁ; 
Yattha yatthupapajjāmi, 
tassa kammassa vāhasā. 
Anubhomi phalaṁ iṭṭhaṁ, 
pubbe sukatamattano; 
Parikkhitto sumallehi, 
pupphadānassidaṁ phalaṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphapūjāyidaṁ phalaṁ. 
Catunnavutupādāya, 
ṭhapetvā vattamānakaṁ; 
Pañcarājasatā tattha, 
najjasamasanāmakā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā uppalahatthiyo thero imā gāthāyo abhāsitthāti. 
Uppalahatthiyattherassāpadānaṁ tatiyaṁ. 

Therāpadāna 
Bhikkhadāyivagga 
Padapūjakattheraapadāna 
“Siddhatthassa bhagavato, 
jātipupphamadāsahaṁ; 
Pādesu satta pupphāni, 
hāsenokiritāni me. 
Tena kammenahaṁ ajja, 
abhibhomi narāmare; 
Dhāremi antimaṁ dehaṁ, 
sammāsambuddhasāsane. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphapūjāyidaṁ phalaṁ. 
Samantagandhanāmāsuṁ, 
terasa cakkavattino; 
Ito pañcamake kappe, 
cāturantā janādhipā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā padapūjako thero imā gāthāyo abhāsitthāti. 
Padapūjakattherassāpadānaṁ catutthaṁ. 

Therāpadāna 
Bhikkhadāyivagga 
Muṭṭhipupphiyattheraapadāna 
“Sudassanoti nāmena, 
mālākāro ahaṁ tadā; 
Addasaṁ virajaṁ buddhaṁ, 
lokajeṭṭhaṁ narāsabhaṁ. 
Jātipupphaṁ gahetvāna, 
pūjayiṁ padumuttaraṁ; 
Visuddhacakkhu sumano, 
dibbacakkhuṁ samajjhagaṁ. 
Etissā pupphapūjāya, 
cittassa paṇidhīhi ca; 
Kappānaṁ satasahassaṁ, 
duggatiṁ nupapajjahaṁ. 
Soḷasāsiṁsu rājāno, 
devuttarasanāmakā; 
Chattiṁsamhi ito kappe, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā muṭṭhipupphiyo thero imā gāthāyo abhāsitthāti. 
Muṭṭhipupphiyattherassāpadānaṁ pañcamaṁ. 

Therāpadāna 
Bhikkhadāyivagga 
Udakapūjakattheraapadāna 
“Suvaṇṇavaṇṇaṁ sambuddhaṁ, 
Gacchantaṁ anilañjase; 
Ghatāsanaṁva jalitaṁ, 
Ādittaṁva hutāsanaṁ. 
Pāṇinā udakaṁ gayha, 
ākāse ukkhipiṁ ahaṁ; 
Sampaṭicchi mahāvīro, 
buddho kāruṇiko isi. 
Antalikkhe ṭhito satthā, 
padumuttaranāmako; 
Mama saṅkappamaññāya, 
imaṁ gāthaṁ abhāsatha. 
‘Iminā dakadānena, 
pītiuppādanena ca; 
Kappasatasahassampi, 
duggatiṁ nupapajjati’. 
Tena kammena dvipadinda, 
lokajeṭṭha narāsabha; 
Pattomhi acalaṁ ṭhānaṁ, 
hitvā jayaparājayaṁ. 
Sahassarājanāmena, 
tayo te cakkavattino; 
Pañcasaṭṭhikappasate, 
cāturantā janādhipā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā udakapūjako thero imā gāthāyo abhāsitthāti. 
Udakapūjakattherassāpadānaṁ chaṭṭhaṁ. 

Therāpadāna 
Bhikkhadāyivagga 
Naḷamāliyattheraapadāna 
“Padumuttarabuddhassa, 
lokajeṭṭhassa tādino; 
Tiṇatthare nisinnassa, 
upasantassa tādino. 
Naḷamālaṁ gahetvāna, 
bandhitvā bījaniṁ ahaṁ; 
Buddhassa upanāmesiṁ, 
dvipadindassa tādino. 
Paṭiggahetvā sabbaññū, 
bījaniṁ lokanāyako; 
Mama saṅkappamaññāya, 
imaṁ gāthaṁ abhāsatha. 
‘Yathā me kāyo nibbāti, 
pariḷāho na vijjati; 
Tatheva tividhaggīhi, 
cittaṁ tava vimuccatu’. 
Sabbe devā samāgacchuṁ, 
ye keci vananissitā; 
Sossāma buddhavacanaṁ, 
hāsayantañca dāyakaṁ. 
Nisinno bhagavā tattha, 
devasaṅghapurakkhato; 
Dāyakaṁ sampahaṁsento, 
imā gāthā abhāsatha. 
‘Iminā bījanidānena, 
cittassa paṇidhīhi ca; 
Subbato nāma nāmena, 
cakkavattī bhavissati. 
Tena kammāvasesena, 
sukkamūlena codito; 
Māluto nāma nāmena, 
cakkavattī bhavissati’. 
Iminā bījanidānena, 
sammānavipulena ca; 
Kappasatasahassampi, 
duggatiṁ nupapajjati. 
Tiṁsakappasahassamhi, 
subbatā aṭṭhatiṁsa te; 
Ekūnatiṁsasahasse, 
aṭṭha mālutanāmakā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā naḷamāliyo thero imā gāthāyo abhāsitthāti. 
Naḷamāliyattherassāpadānaṁ sattamaṁ. 
Sattamabhāṇavāraṁ. 

Therāpadāna 
Buddhavagga 
Piṇḍolabhāradvājattheraapadāna 
“Padumuttaro nāma jino, 
sayambhū aggapuggalo; 
Purato himavantassa, 
cittakūṭe vasī tadā. 
Abhītarūpo tatthāsiṁ, 
migarājā catukkamo; 
Tassa saddaṁ suṇitvāna, 
vikkhambhanti bahujjanā. 
Suphullaṁ padumaṁ gayha, 
upagacchiṁ narāsabhaṁ; 
Vuṭṭhitassa samādhimhā, 
buddhassa abhiropayiṁ. 
Catuddisaṁ namassitvā, 
buddhaseṭṭhaṁ naruttamaṁ; 
Sakaṁ cittaṁ pasādetvā, 
sīhanādaṁ nadiṁ ahaṁ. 
Padumuttaro lokavidū, 
āhutīnaṁ paṭiggaho; 
Sakāsane nisīditvā, 
imā gāthā abhāsatha. 
Buddhassa giramaññāya, 
Sabbe devā samāgatā; 
‘Āgato vadataṁ seṭṭho, 
Dhammaṁ sossāma taṁ mayaṁ’. 
Tesaṁ hāsaparetānaṁ, 
purato lokanāyako; 
Mama saddaṁ pakittesi, 
dīghadassī mahāmuni. 
Yenidaṁ padumaṁ dinnaṁ, 
sīhanādo ca nādito; 
Tamahaṁ kittayissāmi, 
suṇātha mama bhāsato. 
Ito aṭṭhamake kappe, 
cakkavattī bhavissati; 
Sattaratanasampanno, 
catudīpamhi issaro. 
Kārayissati issariyaṁ, 
mahiyā catusaṭṭhiyā; 
Padumo nāma nāmena, 
cakkavattī mahabbalo. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Pakāsite pāvacane, 
brahmabandhu bhavissati; 
Brahmaññā abhinikkhamma, 
pabbajissati tāvade. 
Padhānapahitatto so, 
upasanto nirūpadhi; 
Sabbāsave pariññāya, 
nibbāyissatināsavo. 
Vijane pantaseyyamhi, 
vāḷamigasamākule; 
Sabbāsave pariññāya, 
nibbāyissatināsavo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā piṇḍolabhāradvājo thero imā gāthāyo abhāsitthāti. 
Piṇḍolabhāradvājattherassāpadānaṁ aṭṭhamaṁ. 

Therāpadāna 
Bhikkhadāyivagga 
8 Āsanupaṭṭhāhakattheraapadāna 
“Kānanaṁ vanamogayha, 
appasaddaṁ nirākulaṁ; 
Sīhāsanaṁ mayā dinnaṁ, 
atthadassissa tādino. 
Mālāhatthaṁ gahetvāna, 
katvā ca naṁ padakkhiṇaṁ; 
Satthāraṁ payirupāsitvā, 
pakkāmiṁ uttarāmukho. 
Tena kammena dvipadinda, 
lokajeṭṭha narāsabha; 
Sannibbāpemi attānaṁ, 
bhavā sabbe samūhatā. 
Aṭṭhārasakappasate, 
yaṁ dānamadadiṁ tadā; 
Duggatiṁ nābhijānāmi, 
sīhāsanassidaṁ phalaṁ. 
Ito sattakappasate, 
sannibbāpaka khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā āsanupaṭṭhāhako thero imā gāthāyo abhāsitthāti. 
Āsanupaṭṭhāhakattherassāpadānaṁ aṭṭhamaṁ. 

Therāpadāna 
Bhikkhadāyivagga 
Biḷālidāyakattheraapadāna 
“Himavantassāvidūre, 
vasāmi paṇṇasanthare; 
Ghāsesu gedhamāpanno, 
seyyasīlo cahaṁ tadā. 
Khaṇantālu kalambāni, 
biḷālitakkalāni ca; 
Kolaṁ bhallātakaṁ billaṁ, 
āhatvā paṭiyāditaṁ. 
Padumuttaro lokavidū, 
āhutīnaṁ paṭiggaho; 
Mama saṅkappamaññāya, 
āgacchi mama santikaṁ. 
Upāgataṁ mahānāgaṁ, 
devadevaṁ narāsabhaṁ; 
Biḷāliṁ paggahetvāna, 
pattamhi okiriṁ ahaṁ. 
Paribhuñji mahāvīro, 
tosayanto mamaṁ tadā; 
Paribhuñjitvāna sabbaññū, 
imaṁ gāthaṁ abhāsatha. 
‘Sakaṁ cittaṁ pasādetvā, 
biḷāliṁ me adā tuvaṁ; 
Kappānaṁ satasahassaṁ, 
duggatiṁ nupapajjasi’. 
Carimaṁ vattate mayhaṁ, 
bhavā sabbe samūhatā; 
Dhāremi antimaṁ dehaṁ, 
sammāsambuddhasāsane. 
Catupaññāsito kappe, 
sumekhaliyasavhayo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā biḷālidāyako thero imā gāthāyo abhāsitthāti. 
Biḷālidāyakattherassāpadānaṁ navamaṁ. 

Therāpadāna 
Bhikkhadāyivagga 
Reṇupūjakattheraapadāna 
“Suvaṇṇavaṇṇaṁ sambuddhaṁ, 
Sataraṁsiṁva bhāṇumaṁ; 
Obhāsentaṁ disā sabbā, 
Uḷurājaṁva pūritaṁ. 
Purakkhataṁ sāvakehi, 
sāgareheva medaniṁ; 
Nāgaṁ paggayha reṇūhi, 
vipassissābhiropayiṁ. 
Ekanavutito kappe, 
yaṁ reṇumabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṇṇatālīsito kappe, 
reṇu nāmāsi khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā reṇupūjako thero imā gāthāyo abhāsitthāti. 
Reṇupūjakattherassāpadānaṁ dasamaṁ. 
Bhikkhadāyivaggo ekādasamo. 
Tassuddānaṁ 
Bhikkhadāyī ñāṇasaññī, 
hatthiyo padapūjako; 
Muṭṭhipupphī udakado, 
naḷamāli upaṭṭhako; 
Biḷālidāyī reṇu ca, 
gāthāyo cha ca saṭṭhi ca. 

Therāpadāna 
Mahāparivāravagga 
1 Mahāparivārakattheraapadāna 
“Vipassī nāma bhagavā, 
lokajeṭṭho narāsabho; 
Aṭṭhasaṭṭhisahassehi, 
pāvisi bandhumaṁ tadā. 
Nagarā abhinikkhamma, 
agamaṁ dīpacetiyaṁ; 
Addasaṁ virajaṁ buddhaṁ, 
āhutīnaṁ paṭiggahaṁ. 
Cullāsītisahassāni, 
yakkhā mayhaṁ upantike; 
Upaṭṭhahanti sakkaccaṁ, 
indaṁva tidasā gaṇā. 
Bhavanā abhinikkhamma, 
dussaṁ paggayhahaṁ tadā; 
Sirasā abhivādesiṁ, 
tañcādāsiṁ mahesino. 
Aho buddhā aho dhammā, 
aho no satthu sampadā; 
Buddhassa ānubhāvena, 
vasudhāyaṁ pakampatha. 
Tañca acchariyaṁ disvā, 
abbhutaṁ lomahaṁsanaṁ; 
Buddhe cittaṁ pasādemi, 
dvipadindamhi tādine. 
Sohaṁ cittaṁ pasādetvā, 
dussaṁ datvāna satthuno; 
Saraṇañca upāgacchiṁ, 
sāmacco saparijjano. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Ito pannarase kappe, 
soḷasāsuṁ suvāhanā; 
Sattaratanasampannā, 
cakkavattī mahabbalā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā mahāparivārako thero imā gāthāyo abhāsitthāti. 
Mahāparivārakattherassāpadānaṁ paṭhamaṁ. 

Therāpadāna 
Mahāparivāravagga 
Sumaṅgalattheraapadāna 
“Atthadassī jinavaro, 
lokajeṭṭho narāsabho; 
Vihārā abhinikkhamma, 
taḷākaṁ upasaṅkami. 
Nhatvā pitvā ca sambuddho, 
uttaritvekacīvaro; 
Aṭṭhāsi bhagavā tattha, 
vilokento disodisaṁ. 
Bhavane upaviṭṭhohaṁ, 
addasaṁ lokanāyakaṁ; 
Haṭṭho haṭṭhena cittena, 
apphoṭesiṁ ahaṁ tadā. 
Sataraṁsiṁva jotantaṁ, 
pabhāsantaṁva kañcanaṁ; 
Naccagīte payuttohaṁ, 
pañcaṅgatūriyamhi ca. 
Yaṁ yaṁ yonupapajjāmi, 
devattaṁ atha mānusaṁ; 
Sabbe satte abhibhomi, 
vipulo hoti me yaso. 
Namo te purisājañña, 
namo te purisuttama; 
Attānaṁ tosayitvāna, 
pare tosesi tvaṁ muni. 
Pariggahe nisīditvā, 
hāsaṁ katvāna subbate; 
Upaṭṭhahitvā sambuddhaṁ, 
tusitaṁ upapajjahaṁ. 
Soḷaseto kappasate, 
dvinavaekacintitā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sumaṅgalo thero imā gāthāyo abhāsitthāti. 
Sumaṅgalattherassāpadānaṁ dutiyaṁ. 

Therāpadāna 
Mahāparivāravagga 
3 Saraṇagamaniyattheraapadāna 
“Ubhinnaṁ devarājūnaṁ, 
saṅgāmo samupaṭṭhito; 
Ahosi samupabyūḷho, 
mahāghoso avattatha. 
Padumuttaro lokavidū, 
āhutīnaṁ paṭiggaho; 
Antalikkhe ṭhito satthā, 
saṁvejesi mahājanaṁ. 
Sabbe devā attamanā, 
nikkhittakavacāvudhā; 
Sambuddhaṁ abhivādetvā, 
ekaggāsiṁsu tāvade. 
Mayhaṁ saṅkappamaññāya, 
vācāsabhimudīrayi; 
Anukampako lokavidū, 
nibbāpesi mahājanaṁ. 
Paduṭṭhacitto manujo, 
ekapāṇaṁ viheṭhayaṁ; 
Tena cittappadosena, 
apāyaṁ upapajjati. 
Saṅgāmasīse nāgova, 
bahū pāṇe viheṭhayaṁ; 
Nibbāpetha sakaṁ cittaṁ, 
mā haññittho punappunaṁ. 
Dvinnampi yakkharājūnaṁ, 
senā sā vimhitā ahu; 
Saraṇañca upāgacchuṁ, 
lokajeṭṭhaṁ sutādinaṁ. 
Saññāpetvāna janataṁ, 
padamuddhari cakkhumā; 
Pekkhamānova devehi, 
pakkāmi uttarāmukho. 
Paṭhamaṁ saraṇaṁ gacchiṁ, 
dvipadindassa tādino; 
Kappānaṁ satasahassaṁ, 
duggatiṁ nupapajjahaṁ. 
Mahādundubhināmā ca, 
soḷasāsuṁ rathesabhā; 
Tiṁsakappasahassamhi, 
rājāno cakkavattino. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saraṇagamaniyo thero imā gāthāyo abhāsitthāti. 
Saraṇagamaniyattherassāpadānaṁ tatiyaṁ. 

Therāpadāna 
Mahāparivāravagga 
Ekāsaniyattheraapadāna 
“Varuṇo nāma nāmena, 
devarājā ahaṁ tadā; 
Upaṭṭhahesiṁ sambuddhaṁ, 
sayoggabalavāhano. 
Nibbute lokanāthamhi, 
atthadassīnaruttame; 
Tūriyaṁ sabbamādāya, 
agamaṁ bodhimuttamaṁ. 
Vāditena ca naccena, 
sammatāḷasamāhito; 
Sammukhā viya sambuddhaṁ, 
upaṭṭhiṁ bodhimuttamaṁ. 
Upaṭṭhahitvā taṁ bodhiṁ, 
dharaṇīruhapādapaṁ; 
Pallaṅkaṁ ābhujitvāna, 
tattha kālaṅkato ahaṁ. 
Sakakammābhiraddhohaṁ, 
pasanno bodhimuttame; 
Tena cittappasādena, 
nimmānaṁ upapajjahaṁ. 
Saṭṭhitūriyasahassāni, 
parivārenti maṁ sadā; 
Manussesu ca devesu, 
vattamānaṁ bhavābhave. 
Tividhaggī nibbutā mayhaṁ, 
bhavā sabbe samūhatā; 
Dhāremi antimaṁ dehaṁ, 
sammāsambuddhasāsane. 
Subāhū nāma nāmena, 
catuttiṁsāsu khattiyā; 
Sattaratanasampannā, 
pañcakappasate ito. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekāsaniyo thero imā gāthāyo abhāsitthāti. 
Ekāsaniyattherassāpadānaṁ catutthaṁ. 

Therāpadāna 
Mahāparivāravagga 
Suvaṇṇapupphiyattheraapadāna 
“Vipassī nāma bhagavā, 
lokajeṭṭho narāsabho; 
Nisinno janakāyassa, 
desesi amataṁ padaṁ. 
Tassāhaṁ dhammaṁ sutvāna, 
dvipadindassa tādino; 
Soṇṇapupphāni cattāri, 
buddhassa abhiropayiṁ. 
Suvaṇṇacchadanaṁ āsi, 
yāvatā parisā tadā; 
Buddhābhā ca suvaṇṇābhā, 
āloko vipulo ahu. 
Udaggacitto sumano, 
vedajāto katañjalī; 
Vittisañjanano tesaṁ, 
diṭṭhadhammasukhāvaho. 
Āyācitvāna sambuddhaṁ, 
vanditvāna ca subbataṁ; 
Pāmojjaṁ janayitvāna, 
sakaṁ bhavanupāgamiṁ. 
Bhavane upaviṭṭhohaṁ, 
buddhaseṭṭhaṁ anussariṁ; 
Tena cittappasādena, 
tusitaṁ upapajjahaṁ. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Soḷasāsiṁsu rājāno, 
nemisammatanāmakā; 
Tetālīse ito kappe, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā suvaṇṇapupphiyo thero imā gāthāyo abhāsitthāti. 
Suvaṇṇapupphiyattherassāpadānaṁ pañcamaṁ. 

Therāpadāna 
Mahāparivāravagga 
Citakapūjakattheraapadāna 
“Vasāmi rājāyatane, 
sāmacco saparijjano; 
Parinibbute bhagavati, 
sikhino lokabandhuno. 
Pasannacitto sumano, 
citakaṁ agamāsahaṁ; 
Tūriyaṁ tattha vādetvā, 
gandhamālaṁ samokiriṁ. 
Citamhi pūjaṁ katvāna, 
vanditvā citakaṁ ahaṁ; 
Pasannacitto sumano, 
sakaṁ bhavanupāgamiṁ. 
Bhavane upaviṭṭhohaṁ, 
citapūjaṁ anussariṁ; 
Tena kammena dvipadinda, 
lokajeṭṭha narāsabha. 
Anubhotvāna sampattiṁ, 
devesu mānusesu ca; 
Pattomhi acalaṁ ṭhānaṁ, 
hitvā jayaparājayaṁ. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
citapūjāyidaṁ phalaṁ. 
Ekūnatiṁsakappamhi, 
ito soḷasa rājāno; 
Uggatā nāma nāmena, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā citakapūjako thero imā gāthāyo abhāsitthāti. 
Citakapūjakattherassāpadānaṁ chaṭṭhaṁ. 

Therāpadāna 
Mahāparivāravagga 
Buddhasaññakattheraapadāna 
“Yadā vipassī lokaggo, 
āyusaṅkhāramossaji; 
Pathavī sampakampittha, 
medanī jalamekhalā. 
Otataṁ vitthataṁ mayhaṁ, 
suvicittavaṭaṁsakaṁ; 
Bhavanampi pakampittha, 
buddhassa āyusaṅkhaye. 
Tāso mayhaṁ samuppanno, 
bhavane sampakampite; 
Uppādo nu kimatthāya, 
āloko vipulo ahu. 
Vessavaṇo idhāgamma, 
nibbāpesi mahājanaṁ; 
Pāṇabhūte bhayaṁ natthi, 
ekaggā hotha saṁvutā. 
Aho buddhā aho dhammā, 
aho no satthu sampadā; 
Yasmiṁ uppajjamānamhi, 
pathavī sampakampati. 
Buddhānubhāvaṁ kittetvā, 
kappaṁ saggamhi modahaṁ; 
Avasesesu kappesu, 
kusalaṁ caritaṁ mayā. 
Ekanavutito kappe, 
yaṁ saññamalabhiṁ tadā; 
Duggatiṁ nābhijānāmi, 
buddhasaññāyidaṁ phalaṁ. 
Ito cuddasakappamhi, 
rājā āsiṁ patāpavā; 
Samito nāma nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā buddhasaññako thero imā gāthāyo abhāsitthāti. 
Buddhasaññakattherassāpadānaṁ sattamaṁ. 

Therāpadāna 
Buddhavagga 
Khadiravaniyarevatattheraapadāna 
“Gaṅgā bhāgīrathī nāma, 
himavantā pabhāvitā; 
Kutitthe nāviko āsiṁ, 
orime ca tariṁ ahaṁ. 
Padumuttaro nāyako, 
sambuddho dvipaduttamo; 
Vasī satasahassehi, 
gaṅgātīramupāgato. 
Bahū nāvā samānetvā, 
vaḍḍhakīhi susaṅkhataṁ; 
Nāvāya chadanaṁ katvā, 
paṭimāniṁ narāsabhaṁ. 
Āgantvāna ca sambuddho, 
ārūhi tañca nāvakaṁ; 
Vārimajjhe ṭhito satthā, 
imā gāthā abhāsatha. 
‘Yo so tāresi sambuddhaṁ, 
saṅghañcāpi anāsavaṁ; 
Tena cittappasādena, 
devaloke ramissati. 
Nibbattissati te byamhaṁ, 
sukataṁ nāvasaṇṭhitaṁ; 
Ākāse pupphachadanaṁ, 
dhārayissati sabbadā. 
Aṭṭhapaññāsakappamhi, 
tārako nāma khattiyo; 
Cāturanto vijitāvī, 
cakkavattī bhavissati. 
Sattapaññāsakappamhi, 
cammako nāma khattiyo; 
Uggacchantova sūriyo, 
jotissati mahabbalo. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tidasā so cavitvāna, 
manussattaṁ gamissati; 
Revato nāma nāmena, 
brahmabandhu bhavissati. 
Agārā nikkhamitvāna, 
sukkamūlena codito; 
Gotamassa bhagavato, 
sāsane pabbajissati. 
So pacchā pabbajitvāna, 
yuttayogo vipassako; 
Sabbāsave pariññāya, 
nibbāyissatināsavo’. 
Vīriyaṁ me dhuradhorayhaṁ, 
Yogakkhemādhivāhanaṁ; 
Dhāremi antimaṁ dehaṁ, 
Sammāsambuddhasāsane. 
Satasahasse kataṁ kammaṁ, 
phalaṁ dassesi me idha; 
Sumutto saravegova, 
kilese jhāpayī mama. 
Tato maṁ vananirataṁ, 
disvā lokantagū muni; 
Vanavāsibhikkhūnaggaṁ, 
paññapesi mahāmati. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā khadiravaniyo revato thero imā gāthāyo abhāsitthāti. 
Khadiravaniyarevatattherassāpadānaṁ navamaṁ. 

Therāpadāna 
Mahāparivāravagga 
Maggasaññakattheraapadāna 
“Padumuttarabuddhassa, 
sāvakā vanacārino; 
Vippanaṭṭhā brahāraññe, 
andhāva anusuyyare. 
Anussaritvā sambuddhaṁ, 
padumuttaranāyakaṁ; 
Tassa te munino puttā, 
vippanaṭṭhā mahāvane. 
Bhavanā oruhitvāna, 
agamiṁ bhikkhusantikaṁ; 
Tesaṁ maggañca ācikkhiṁ, 
bhojanañca adāsahaṁ. 
Tena kammena dvipadinda, 
lokajeṭṭha narāsabha; 
Jātiyā sattavassohaṁ, 
arahattamapāpuṇiṁ. 
Sacakkhū nāma nāmena, 
dvādasa cakkavattino; 
Sattaratanasampannā, 
pañcakappasate ito. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā maggasaññako thero imā gāthāyo abhāsitthāti. 
Maggasaññakattherassāpadānaṁ aṭṭhamaṁ. 

Therāpadāna 
Mahāparivāravagga 
Paccupaṭṭhānasaññakattheraapadāna 
“Atthadassimhi sugate, 
nibbute samanantarā; 
Yakkhayoniṁ upapajjiṁ, 
yasaṁ patto cahaṁ tadā. 
Dulladdhaṁ vata me āsi, 
duppabhātaṁ duruṭṭhitaṁ; 
Yaṁ me bhoge vijjamāne, 
parinibbāyi cakkhumā. 
Mama saṅkappamaññāya, 
sāgaro nāma sāvako; 
Mamuddharitukāmo so, 
āgacchi mama santikaṁ. 
Kiṁ nu socasi mā bhāyi, 
cara dhammaṁ sumedhasa; 
Anuppadinnā buddhena, 
sabbesaṁ bījasampadā. 
Yo ce pūjeyya sambuddhaṁ, 
tiṭṭhantaṁ lokanāyakaṁ; 
Dhātuṁ sāsapamattampi, 
nibbutassāpi pūjaye. 
Same cittappasādamhi, 
samaṁ puññaṁ mahaggataṁ; 
Tasmā thūpaṁ karitvāna, 
pūjehi jinadhātuyo. 
Sāgarassa vaco sutvā, 
buddhathūpaṁ akāsahaṁ; 
Pañcavasse paricariṁ, 
munino thūpamuttamaṁ. 
Tena kammena dvipadinda, 
lokajeṭṭha narāsabha; 
Sampattiṁ anubhotvāna, 
arahattamapāpuṇiṁ. 
Bhūripaññā ca cattāro, 
sattakappasate ito; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā paccupaṭṭhānasaññako thero imā gāthāyo abhāsitthāti. 
Paccupaṭṭhānasaññakattherassāpadānaṁ navamaṁ. 

Therāpadāna 
Mahāparivāravagga 
Jātipūjakattheraapadāna 
“Jāyantassa vipassissa, 
āloko vipulo ahu; 
Pathavī ca pakampittha, 
sasāgarā sapabbatā. 
Nemittā ca viyākaṁsu, 
buddho loke bhavissati; 
Aggo ca sabbasattānaṁ, 
janataṁ uddharissati. 
Nemittānaṁ suṇitvāna, 
jātipūjamakāsahaṁ; 
Edisā pūjanā natthi, 
yādisā jātipūjanā. 
Saṅkharitvāna kusalaṁ, 
sakaṁ cittaṁ pasādayiṁ; 
Jātipūjaṁ karitvāna, 
tattha kālaṅkato ahaṁ. 
Yaṁ yaṁ yonupapajjāmi, 
devattaṁ atha mānusaṁ; 
Sabbe satte abhibhomi, 
jātipūjāyidaṁ phalaṁ. 
Dhātiyo maṁ upaṭṭhanti, 
mama cittavasānugā; 
Na tā sakkonti kopetuṁ, 
jātipūjāyidaṁ phalaṁ. 
Ekanavutito kappe, 
yaṁ pūjamakariṁ tadā; 
Duggatiṁ nābhijānāmi, 
jātipūjāyidaṁ phalaṁ. 
Supāricariyā nāma, 
catuttiṁsa janādhipā; 
Ito tatiyakappamhi, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā jātipūjako thero imā gāthāyo abhāsitthāti. 
Jātipūjakattherassāpadānaṁ dasamaṁ. 
Mahāparivāravaggo dvādasamo. 
Tassuddānaṁ 
Parivārasumaṅgalā, 
saraṇāsanapupphiyā; 
Citapūjī buddhasaññī, 
maggupaṭṭhānajātinā; 
Gāthāyo navuti vuttā, 
gaṇitāyo vibhāvihi. 

Therāpadāna 
Sereyyavagga 
Sereyyakattheraapadāna 
“Ajjhāyako mantadharo, 
tiṇṇaṁ vedāna pāragū; 
Abbhokāse ṭhito santo, 
addasaṁ lokanāyakaṁ. 
Sīhaṁ yathā vanacaraṁ, 
byaggharājaṁva nittasaṁ; 
Tidhāpabhinnamātaṅgaṁ, 
kuñjaraṁva mahesinaṁ. 
Sereyyakaṁ gahetvāna, 
ākāse ukkhipiṁ ahaṁ; 
Buddhassa ānubhāvena, 
parivārenti sabbaso. 
Adhiṭṭhahi mahāvīro, 
sabbaññū lokanāyako; 
Samantā pupphacchadanā, 
okiriṁsu narāsabhaṁ. 
Tato sā pupphakañcukā, 
antovaṇṭā bahimukhā; 
Sattāhaṁ chadanaṁ katvā, 
tato antaradhāyatha. 
Tañca acchariyaṁ disvā, 
abbhutaṁ lomahaṁsanaṁ; 
Buddhe cittaṁ pasādesiṁ, 
sugate lokanāyake. 
Tena cittappasādena, 
sukkamūlena codito; 
Kappānaṁ satasahassaṁ, 
duggatiṁ nupapajjahaṁ. 
Pannarasasahassamhi, 
kappānaṁ pañcavīsati; 
Vītamalā samānā ca, 
cakkavattī mahabbalā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā sereyyako thero imā gāthāyo abhāsitthāti. 
Sereyyakattherassāpadānaṁ paṭhamaṁ. 

Therāpadāna 
Sereyyavagga 
Pupphathūpiyattheraapadāna 
“Himavantassāvidūre, 
kukkuro nāma pabbato; 
Vemajjhe tassa vasati, 
brāhmaṇo mantapāragū. 
Pañca sissasahassāni, 
parivārenti maṁ sadā; 
Pubbuṭṭhāyī ca te āsuṁ, 
mantesu ca visāradā. 
Buddho loke samuppanno, 
taṁ vijānātha no bhavaṁ; 
Asītibyañjanānassa, 
bāttiṁsavaralakkhaṇā. 
Byāmappabho jinavaro, 
ādiccova virocati; 
Sissānaṁ vacanaṁ sutvā, 
brāhmaṇo mantapāragū. 
Assamā abhinikkhamma, 
disaṁ pucchati sissake; 
Yamhi dese mahāvīro, 
vasati lokanāyako. 
Tāhaṁ disaṁ namassissaṁ, 
jinaṁ appaṭipuggalaṁ; 
Udaggacitto sumano, 
pūjesiṁ taṁ tathāgataṁ. 
Etha sissā gamissāma, 
dakkhissāma tathāgataṁ; 
Vanditvā satthuno pāde, 
sossāma jinasāsanaṁ. 
Ekāhaṁ abhinikkhamma, 
byādhiṁ paṭilabhiṁ ahaṁ; 
Byādhinā pīḷito santo, 
sālaṁ vāsayituṁ gamiṁ. 
Sabbe sisse samānetvā, 
apucchiṁ te tathāgataṁ; 
Kīdisaṁ lokanāthassa, 
guṇaṁ paramabuddhino. 
Te me puṭṭhā viyākaṁsu, 
Yathā dassāvino tathā; 
Sakkaccaṁ buddhaseṭṭhaṁ taṁ, 
Desesuṁ mama sammukhā. 
Tesāhaṁ vacanaṁ sutvā, 
sakaṁ cittaṁ pasādayiṁ; 
Pupphehi thūpaṁ katvāna, 
tattha kālaṅkato ahaṁ. 
Te me sarīraṁ jhāpetvā, 
agamuṁ buddhasantikaṁ; 
Añjaliṁ paggahetvāna, 
satthāramabhivādayuṁ. 
Pupphehi thūpaṁ katvāna, 
sugatassa mahesino; 
Kappānaṁ satasahassaṁ, 
duggatiṁ nupapajjahaṁ. 
Cattālīsasahassamhi, 
kappe soḷasa khattiyā; 
Nāmenaggisamā nāma, 
cakkavattī mahabbalā. 
Vīsakappasahassamhi, 
rājāno cakkavattino; 
Ghatāsanasanāmāva, 
aṭṭhattiṁsa mahīpatī. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pupphathūpiyo thero imā gāthāyo abhāsitthāti. 
Pupphathūpiyattherassāpadānaṁ dutiyaṁ. 

Therāpadāna 
Sereyyavagga 
3 Pāyasadāyakattheraapadāna 
“Suvaṇṇavaṇṇo sambuddho, 
Bāttiṁsavaralakkhaṇo; 
Pavanā abhinikkhanto, 
Bhikkhusaṅghapurakkhato. 
Mahaccā kaṁsapātiyā, 
vaḍḍhetvā pāyasaṁ ahaṁ; 
Āhutiṁ yiṭṭhukāmo so, 
upanesiṁ baliṁ ahaṁ. 
Bhagavā tamhi samaye, 
lokajeṭṭho narāsabho; 
Caṅkamaṁ susamārūḷho, 
ambare anilāyane. 
Tañca acchariyaṁ disvā, 
abbhutaṁ lomahaṁsanaṁ; 
Ṭhapayitvā kaṁsapātiṁ, 
vipassiṁ abhivādayiṁ. 
Tuvaṁ devosi sabbaññū, 
sadeve sahamānuse; 
Anukampaṁ upādāya, 
paṭigaṇha mahāmuni. 
Paṭiggahesi bhagavā, 
sabbaññū lokanāyako; 
Mama saṅkappamaññāya, 
satthā loke mahāmuni. 
Ekanavutito kappe, 
yaṁ dānamadadiṁ tadā; 
Duggatiṁ nābhijānāmi, 
pāyasassa idaṁ phalaṁ. 
Ekatālīsito kappe, 
buddho nāmāsi khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pāyasadāyako thero imā gāthāyo abhāsitthāti. 
Pāyasadāyakattherassāpadānaṁ tatiyaṁ. 

Therāpadāna 
Sereyyavagga 
Gandhodakiyattheraapadāna 
“Nisajja pāsādavare, 
vipassiṁ addasaṁ jinaṁ; 
Kakudhaṁ vilasantaṁva, 
sabbaññuṁ tamanāsakaṁ. 
Pāsādassāvidūre ca, 
gacchati lokanāyako; 
Pabhā niddhāvate tassa, 
yathā ca sataraṁsino. 
Gandhodakañca paggayha, 
buddhaseṭṭhaṁ samokiriṁ; 
Tena cittappasādena, 
tattha kālaṅkato ahaṁ. 
Ekanavutito kappe, 
yaṁ gandhodakamākiriṁ; 
Duggatiṁ nābhijānāmi, 
buddhapūjāyidaṁ phalaṁ. 
Ekattiṁse ito kappe, 
sugandho nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā gandhodakiyo thero imā gāthāyo abhāsitthāti. 
Gandhodakiyattherassāpadānaṁ catutthaṁ. 

Therāpadāna 
Sereyyavagga 
Sammukhāthavikattheraapadāna 
“Jāyamāne vipassimhi, 
nimittaṁ byākariṁ ahaṁ; 
‘Nibbāpayiñca janataṁ, 
buddho loke bhavissati. 
Yasmiñca jāyamānasmiṁ, 
dasasahassi kampati; 
So dāni bhagavā satthā, 
dhammaṁ deseti cakkhumā. 
Yasmiñca jāyamānasmiṁ, 
āloko vipulo ahu; 
So dāni bhagavā satthā, 
dhammaṁ deseti cakkhumā. 
Yasmiñca jāyamānasmiṁ, 
saritāyo na sandayuṁ; 
So dāni bhagavā satthā, 
dhammaṁ deseti cakkhumā. 
Yasmiñca jāyamānasmiṁ, 
avīcaggi na pajjali; 
So dāni bhagavā satthā, 
dhammaṁ deseti cakkhumā. 
Yasmiñca jāyamānasmiṁ, 
pakkhisaṅgho na sañcari; 
So dāni bhagavā satthā, 
dhammaṁ deseti cakkhumā. 
Yasmiñca jāyamānasmiṁ, 
vātakkhandho na vāyati; 
So dāni bhagavā satthā, 
dhammaṁ deseti cakkhumā. 
Yasmiñca jāyamānasmiṁ, 
sabbaratanāni jotayuṁ; 
So dāni bhagavā satthā, 
dhammaṁ deseti cakkhumā. 
Yasmiñca jāyamānasmiṁ, 
sattāsuṁ padavikkamā; 
So dāni bhagavā satthā, 
dhammaṁ deseti cakkhumā. 
Jātamatto ca sambuddho, 
disā sabbā vilokayi; 
Vācāsabhimudīresi, 
esā buddhāna dhammatā’. 
Saṁvejayitvā janataṁ, 
thavitvā lokanāyakaṁ; 
Sambuddhaṁ abhivādetvā, 
pakkāmiṁ pācināmukho. 
Ekanavutito kappe, 
yaṁ buddhamabhithomayiṁ; 
Duggatiṁ nābhijānāmi, 
thomanāya idaṁ phalaṁ. 
Ito navutikappamhi, 
sammukhāthavikavhayo; 
Sattaratanasampanno, 
cakkavattī mahabbalo. 
Pathavīdundubhi nāma, 
ekūnanavutimhito; 
Sattaratanasampanno, 
cakkavattī mahabbalo. 
Aṭṭhāsītimhito kappe, 
obhāso nāma khattiyo; 
Sattaratanasampanno, 
cakkavattī mahabbalo. 
Sattāsītimhito kappe, 
saritacchedanavhayo; 
Sattaratanasampanno, 
cakkavattī mahabbalo. 
Agginibbāpano nāma, 
kappānaṁ chaḷasītiyā; 
Sattaratanasampanno, 
cakkavattī mahabbalo. 
Gatipacchedano nāma, 
kappānaṁ pañcasītiyā; 
Sattaratanasampanno, 
cakkavattī mahabbalo. 
Rājā vātasamo nāma, 
kappānaṁ cullasītiyā; 
Sattaratanasampanno, 
cakkavattī mahabbalo. 
Ratanapajjalo nāma, 
kappānaṁ teasītiyā; 
Sattaratanasampanno, 
cakkavattī mahabbalo. 
Padavikkamano nāma, 
kappānaṁ dveasītiyā; 
Sattaratanasampanno, 
cakkavattī mahabbalo. 
Rājā vilokano nāma, 
kappānaṁ ekasītiyā; 
Sattaratanasampanno, 
cakkavattī mahabbalo. 
Girasāroti nāmena, 
kappesītimhi khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sammukhāthaviko thero imā gāthāyo abhāsitthāti. 
Sammukhāthavikattherassāpadānaṁ pañcamaṁ. 

Therāpadāna 
Sereyyavagga 
Kusumāsaniyattheraapadāna 
“Nagare dhaññavatiyā, 
ahosiṁ brāhmaṇo tadā; 
Lakkhaṇe itihāse ca, 
sanighaṇḍusakeṭubhe. 
Padako veyyākaraṇo, 
nimittakovido ahaṁ; 
Mante ca sisse vācesiṁ, 
tiṇṇaṁ vedāna pāragū. 
Pañca uppalahatthāni, 
piṭṭhiyaṁ ṭhapitāni me; 
Āhutiṁ yiṭṭhukāmohaṁ, 
pitumātusamāgame. 
Tadā vipassī bhagavā, 
bhikkhusaṅghapurakkhato; 
Obhāsento disā sabbā, 
āgacchati narāsabho. 
Āsanaṁ paññapetvāna, 
nimantetvā mahāmuniṁ; 
Santharitvāna taṁ pupphaṁ, 
abhinesiṁ sakaṁ gharaṁ. 
Yaṁ me atthi sake gehe, 
āmisaṁ paccupaṭṭhitaṁ; 
Tāhaṁ buddhassa pādāsiṁ, 
pasanno sehi pāṇibhi. 
Bhuttāviṁ kālamaññāya, 
pupphahatthamadāsahaṁ; 
Anumoditvāna sabbaññū, 
pakkāmi uttarāmukho. 
Ekanavutito kappe, 
yaṁ pupphamadadiṁ tadā; 
Duggatiṁ nābhijānāmi, 
pupphadānassidaṁ phalaṁ. 
Anantaraṁ ito kappe, 
rājāhuṁ varadassano; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kusumāsaniyo thero imā gāthāyo abhāsitthāti. 
Kusumāsaniyattherassāpadānaṁ chaṭṭhaṁ. 

Therāpadāna 
Sereyyavagga 
Phaladāyakattheraapadāna 
“Ajjhāyako mantadharo, 
tiṇṇaṁ vedāna pāragū; 
Himavantassāvidūre, 
vasāmi assame ahaṁ. 
Aggihuttañca me atthi, 
puṇḍarīkaphalāni ca; 
Puṭake nikkhipitvāna, 
dumagge laggitaṁ mayā. 
Padumuttaro lokavidū, 
āhutīnaṁ paṭiggaho; 
Mamuddharitukāmo so, 
bhikkhanto mamupāgami. 
Pasannacitto sumano, 
phalaṁ buddhassadāsahaṁ; 
Vittisañjanano mayhaṁ, 
diṭṭhadhammasukhāvaho. 
Suvaṇṇavaṇṇo sambuddho, 
āhutīnaṁ paṭiggaho; 
Antalikkhe ṭhito satthā, 
imaṁ gāthaṁ abhāsatha. 
‘Iminā phaladānena, 
cetanāpaṇidhīhi ca; 
Kappānaṁ satasahassaṁ, 
duggatiṁ nupapajjati’. 
Teneva sukkamūlena, 
anubhotvāna sampadā; 
Pattomhi acalaṁ ṭhānaṁ, 
hitvā jayaparājayaṁ. 
Ito sattasate kappe, 
rājā āsiṁ sumaṅgalo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā phaladāyako thero imā gāthāyo abhāsitthāti. 
Phaladāyakattherassāpadānaṁ sattamaṁ. 

Therāpadāna 
Buddhavagga 
Ānandattheraapadāna 
“Ārāmadvārā nikkhamma, 
padumuttaro mahāmuni; 
Vassento amataṁ vuṭṭhiṁ, 
nibbāpesi mahājanaṁ. 
Satasahassaṁ te dhīrā, 
chaḷabhiññā mahiddhikā; 
Parivārenti sambuddhaṁ, 
chāyāva anapāyinī. 
Hatthikkhandhagato āsiṁ, 
setacchattaṁ varuttamaṁ; 
Sucārurūpaṁ disvāna, 
vitti me udapajjatha. 
Oruyha hatthikhandhamhā, 
upagacchiṁ narāsabhaṁ; 
Ratanāmayachattaṁ me, 
buddhaseṭṭhassa dhārayiṁ. 
Mama saṅkappamaññāya, 
padumuttaro mahāisi; 
Taṁ kathaṁ ṭhapayitvāna, 
imā gāthā abhāsatha. 
‘Yo so chattamadhāresi, 
soṇṇālaṅkārabhūsitaṁ; 
Tamahaṁ kittayissāmi, 
suṇotha mama bhāsato. 
Ito gantvā ayaṁ poso, 
tusitaṁ āvasissati; 
Anubhossati sampattiṁ, 
accharāhi purakkhato. 
Catuttiṁsatikkhattuñca, 
devarajjaṁ karissati; 
Balādhipo aṭṭhasataṁ, 
vasudhaṁ āvasissati. 
Aṭṭhapaññāsakkhattuñca, 
cakkavattī bhavissati; 
Padesarajjaṁ vipulaṁ, 
mahiyā kārayissati. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Sakyānaṁ kulaketussa, 
ñātibandhu bhavissati; 
Ānando nāma nāmena, 
upaṭṭhāko mahesino. 
Ātāpī nipako cāpi, 
bāhusacce sukovido; 
Nivātavutti atthaddho, 
sabbapāṭhī bhavissati. 
Padhānapahitatto so, 
upasanto nirūpadhi; 
Sabbāsave pariññāya, 
nibbāyissatināsavo. 
Santi āraññakā nāgā, 
kuñjarā saṭṭhihāyanā; 
Tidhāpabhinnā mātaṅgā, 
īsādantā urūḷhavā. 
Anekasatasahassā, 
paṇḍitāpi mahiddhikā; 
Sabbe te buddhanāgassa, 
na hontupaṇidhimhi te’. 
Ādiyāme namassāmi, 
majjhime atha pacchime; 
Pasannacitto sumano, 
buddhaseṭṭhaṁ upaṭṭhahiṁ. 
Ātāpī nipako cāpi, 
sampajāno patissato; 
Sotāpattiphalaṁ patto, 
sekhabhūmīsu kovido. 
Satasahassito kappe, 
yaṁ kammamabhinīhariṁ; 
Tāhaṁ bhūmimanuppatto, 
ṭhitā saddhammamācalā. 
Svāgataṁ vata me āsi, 
buddhaseṭṭhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā ānando thero imā gāthāyo abhāsitthāti. 
Ānandattherassāpadānaṁ dasamaṁ. 
Tassuddānaṁ 
Buddho paccekabuddho ca, 
sāriputto ca kolito; 
Kassapo anuruddho ca, 
puṇṇatthero upāli ca. 
Aññāsikoṇḍañño piṇḍolo, 
revatānandapaṇḍito; 
Chasatāni ca paññāsa, 
gāthāyo sabbapiṇḍitā. 
Apadāne buddhavaggo paṭhamo. 

Therāpadāna 
Sereyyavagga 
8 Ñāṇasaññikattheraapadāna 
“Pabbate himavantamhi, 
vasāmi pabbatantare; 
Pulinaṁ sobhanaṁ disvā, 
buddhaseṭṭhaṁ anussariṁ. 
Ñāṇe upanidhā natthi, 
saṅkhāraṁ natthi satthuno; 
Sabbadhammaṁ abhiññāya, 
ñāṇena adhimuccati. 
Namo te purisājañña, 
namo te purisuttama; 
Ñāṇena te samo natthi, 
yāvatā ñāṇamuttamaṁ. 
Ñāṇe cittaṁ pasādetvā, 
kappaṁ saggamhi modahaṁ; 
Avasesesu kappesu, 
kusalaṁ caritaṁ mayā. 
Ekanavutito kappe, 
yaṁ saññamalabhiṁ tadā; 
Duggatiṁ nābhijānāmi, 
ñāṇasaññāyidaṁ phalaṁ. 
Ito sattatikappamhi, 
eko pulinapupphiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ñāṇasaññiko thero imā gāthāyo abhāsitthāti. 
Ñāṇasaññikattherassāpadānaṁ aṭṭhamaṁ. 

Therāpadāna 
Sereyyavagga 
9 Gaṇṭhipupphiyattheraapadāna 
“Suvaṇṇavaṇṇo sambuddho, 
vipassī dakkhiṇāraho; 
Purakkhato sāvakehi, 
ārāmā abhinikkhami. 
Disvānahaṁ buddhaseṭṭhaṁ, 
sabbaññuṁ tamanāsakaṁ; 
Pasannacitto sumano, 
gaṇṭhipupphaṁ apūjayiṁ. 
Tena cittappasādena, 
dvipadindassa tādino; 
Haṭṭho haṭṭhena cittena, 
puna vandiṁ tathāgataṁ. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ekatālīsito kappe, 
caraṇo nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā gaṇṭhipupphiyo thero imā gāthāyo abhāsitthāti. 
Gaṇṭhipupphiyattherassāpadānaṁ navamaṁ. 

Therāpadāna 
Sereyyavagga 
Padumapūjakattheraapadāna 
“Himavantassāvidūre, 
gotamo nāma pabbato; 
Nānārukkhehi sañchanno, 
mahābhūtagaṇālayo. 
Vemajjhamhi ca tassāsi, 
assamo abhinimmito; 
Purakkhato sasissehi, 
vasāmi assame ahaṁ. 
Āyantu me sissagaṇā, 
padumaṁ āharantu me; 
Buddhapūjaṁ karissāmi, 
dvipadindassa tādino. 
Evanti te paṭissutvā, 
padumaṁ āhariṁsu me; 
Tathā nimittaṁ katvāhaṁ, 
buddhassa abhiropayiṁ. 
Sisse tadā samānetvā, 
sādhukaṁ anusāsahaṁ; 
Mā kho tumhe pamajjittha, 
appamādo sukhāvaho. 
Evaṁ samanusāsitvā, 
te sisse vacanakkhame; 
Appamādaguṇe yutto, 
tadā kālaṅkato ahaṁ. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ekapaññāsakappamhi, 
rājā āsiṁ jaluttamo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā padumapūjako thero imā gāthāyo abhāsitthāti. 
Padumapūjakattherassāpadānaṁ dasamaṁ. 
Sereyyavaggo terasamo. 
Tassuddānaṁ 
Sereyyako pupphathūpi, 
pāyaso gandhathomako; 
Āsani phalasaññī ca, 
gaṇṭhipadumapupphiyo; 
Pañcuttarasatā gāthā, 
gaṇitā atthadassibhi. 

Therāpadāna 
Sobhitavagga 
Sobhitattheraapadāna 
“Padumuttaro nāma jino, 
lokajeṭṭho narāsabho; 
Mahato janakāyassa, 
deseti amataṁ padaṁ. 
Tassāhaṁ vacanaṁ sutvā, 
vācāsabhimudīritaṁ; 
Añjaliṁ paggahetvāna, 
ekaggo āsahaṁ tadā. 
‘Yathā samuddo udadhīnamaggo, 
Nerū nagānaṁ pavaro siluccayo; 
Tatheva ye cittavasena vattare’, 
Na buddhañāṇassa kalaṁ upenti te. 
Dhammavidhiṁ ṭhapetvāna, 
buddho kāruṇiko isi; 
Bhikkhusaṅghe nisīditvā, 
imā gāthā abhāsatha. 
‘Yo so ñāṇaṁ pakittesi, 
buddhamhi lokanāyake; 
Kappānaṁ satasahassaṁ, 
duggatiṁ na gamissati. 
Kilese jhāpayitvāna, 
ekaggo susamāhito; 
Sobhito nāma nāmena, 
hessati satthu sāvako’. 
Paññāse kappasahasse, 
sattevāsuṁ yasuggatā; 
Sattaratanasampannā, 
cakkavattī mahabbalā. 
Kilesā jhāpitā mayhaṁ, 
bhavā sabbe samūhatā; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā sobhito thero imā gāthāyo abhāsitthāti. 
Sobhitattherassāpadānaṁ paṭhamaṁ. 

Therāpadāna 
Sobhitavagga 
Sudassanattheraapadāna 
“Vinatā nadiyā tīre, 
pilakkhu phalito ahu; 
Tāhaṁ rukkhaṁ gavesanto, 
addasaṁ lokanāyakaṁ. 
Ketakaṁ pupphitaṁ disvā, 
vaṇṭe chetvānahaṁ tadā; 
Buddhassa abhiropesiṁ, 
sikhino lokabandhuno. 
Yena ñāṇena pattosi, 
accutaṁ amataṁ padaṁ; 
Taṁ ñāṇaṁ abhipūjemi, 
buddhaseṭṭha mahāmuni. 
Ñāṇamhi pūjaṁ katvāna, 
pilakkhumaddasaṁ ahaṁ; 
Paṭiladdhomhi taṁ paññaṁ, 
ñāṇapūjāyidaṁ phalaṁ. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
ñāṇapūjāyidaṁ phalaṁ. 
Ito terasakappamhi, 
dvādasāsuṁ phaluggatā; 
Sattaratanasampannā, 
cakkavattī mahapphalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sudassano thero imā gāthāyo abhāsitthāti. 
Sudassanattherassāpadānaṁ dutiyaṁ. 

Therāpadāna 
Sobhitavagga 
3 Candanapūjanakattheraapadāna 
“Candabhāgānadītīre, 
ahosiṁ kinnaro tadā; 
Pupphabhakkho cahaṁ āsiṁ, 
pupphānivasano tathā. 
Atthadassī tu bhagavā, 
lokajeṭṭho narāsabho; 
Vipinaggena niyyāsi, 
haṁsarājāva ambare. 
Namo te purisājañña, 
cittaṁ te suvisodhitaṁ; 
Pasannamukhavaṇṇosi, 
vippasannamukhindriyo. 
Orohitvāna ākāsā, 
bhūripañño sumedhaso; 
Saṅghāṭiṁ pattharitvāna, 
pallaṅkena upāvisi. 
Vilīnaṁ candanādāya, 
agamāsiṁ jinantikaṁ; 
Pasannacitto sumano, 
buddhassa abhiropayiṁ. 
Abhivādetvāna sambuddhaṁ, 
lokajeṭṭhaṁ narāsabhaṁ; 
Pāmojjaṁ janayitvāna, 
pakkāmiṁ uttarāmukho. 
Aṭṭhārase kappasate, 
candanaṁ yaṁ apūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Catuddase kappasate, 
ito āsiṁsu te tayo; 
Rohaṇī nāma nāmena, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā candanapūjanako thero imā gāthāyo abhāsitthāti. 
Candanapūjanakattherassāpadānaṁ tatiyaṁ. 
Aṭṭhamabhāṇavāraṁ. 

Therāpadāna 
Sobhitavagga 
4 Pupphacchadaniyattheraapadāna 
“Sunando nāma nāmena, 
brāhmaṇo mantapāragū; 
Ajjhāyako yācayogo, 
vājapeyyaṁ ayājayi. 
Padumuttaro lokavidū, 
aggo kāruṇiko isi; 
Janataṁ anukampanto, 
ambare caṅkamī tadā. 
Caṅkamitvāna sambuddho, 
sabbaññū lokanāyako; 
Mettāya aphari satte, 
appamāṇe nirūpadhi. 
Vaṇṭe chetvāna pupphāni, 
brāhmaṇo mantapāragū; 
Sabbe sisse samānetvā, 
ākāse ukkhipāpayi. 
Yāvatā nagaraṁ āsi, 
pupphānaṁ chadanaṁ tadā; 
Buddhassa ānubhāvena, 
sattāhaṁ na vigacchatha. 
Teneva sukkamūlena, 
anubhotvāna sampadā; 
Sabbāsave pariññāya, 
tiṇṇo loke visattikaṁ. 
Ekārase kappasate, 
pañcatiṁsāsu khattiyā; 
Ambaraṁsasanāmā te, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pupphacchadaniyo thero imā gāthāyo abhāsitthāti. 
Pupphacchadaniyattherassāpadānaṁ catutthaṁ. 

Therāpadāna 
Sobhitavagga 
5 Rahosaññakattheraapadāna 
“Himavantassāvidūre, 
vasabho nāma pabbato; 
Tasmiṁ pabbatapādamhi, 
assamo āsi māpito. 
Tīṇi sissasahassāni, 
vācesiṁ brāhmaṇo tadā; 
Saṁharitvāna te sisse, 
ekamantaṁ upāvisiṁ. 
Ekamantaṁ nisīditvā, 
brāhmaṇo mantapāragū; 
Buddhavedaṁ gavesanto, 
ñāṇe cittaṁ pasādayiṁ. 
Tattha cittaṁ pasādetvā, 
nisīdiṁ paṇṇasanthare; 
Pallaṅkaṁ ābhujitvāna, 
tattha kālaṅkato ahaṁ. 
Ekattiṁse ito kappe, 
yaṁ saññamalabhiṁ tadā; 
Duggatiṁ nābhijānāmi, 
ñāṇasaññāyidaṁ phalaṁ. 
Sattavīsatikappamhi, 
rājā siridharo ahu; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā rahosaññako thero imā gāthāyo abhāsitthāti. 
Rahosaññakattherassāpadānaṁ pañcamaṁ. 

Therāpadāna 
Sobhitavagga 
Campakapupphiyattheraapadāna 
“Kaṇikāraṁva jotantaṁ, 
nisinnaṁ pabbatantare; 
Obhāsentaṁ disā sabbā, 
osadhiṁ viya tārakaṁ. 
Tayo māṇavakā āsuṁ, 
sake sippe susikkhitā; 
Khāribhāraṁ gahetvāna, 
anventi mama pacchato. 
Puṭake satta pupphāni, 
nikkhittāni tapassinā; 
Gahetvā tāni ñāṇamhi, 
vessabhussābhiropayiṁ. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
ñāṇapūjāyidaṁ phalaṁ. 
Ekūnatiṁsakappamhi, 
vipulābhasanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā campakapupphiyo thero imā gāthāyo abhāsitthāti. 
Campakapupphiyattherassāpadānaṁ chaṭṭhaṁ. 

Therāpadāna 
Sobhitavagga 
Atthasandassakattheraapadāna 
“Visālamāḷe āsīno, 
addasaṁ lokanāyakaṁ; 
Khīṇāsavaṁ balappattaṁ, 
bhikkhusaṅghapurakkhataṁ. 
Satasahassā tevijjā, 
chaḷabhiññā mahiddhikā; 
Parivārenti sambuddhaṁ, 
ko disvā nappasīdati. 
Ñāṇe upanidhā yassa, 
na vijjati sadevake; 
Anantañāṇaṁ sambuddhaṁ, 
ko disvā nappasīdati. 
Dhammakāyañca dīpentaṁ, 
kevalaṁ ratanākaraṁ; 
Vikappetuṁ na sakkonti, 
ko disvā nappasīdati. 
Imāhi tīhi gāthāhi, 
nāradovhayavacchalo; 
Padumuttaraṁ thavitvāna, 
sambuddhaṁ aparājitaṁ. 
Tena cittappasādena, 
buddhasanthavanena ca; 
Kappānaṁ satasahassaṁ, 
duggatiṁ nupapajjahaṁ. 
Ito tiṁsakappasate, 
sumitto nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā atthasandassako thero imā gāthāyo abhāsitthāti. 
Atthasandassakattherassāpadānaṁ sattamaṁ. 

Therāpadāna 
Sīhāsaniyavagga 
Sīhāsanadāyakattheraapadāna 
“Nibbute lokanāthamhi, 
siddhatthe dvipaduttame; 
Vitthārike pāvacane, 
bāhujaññamhi sāsane. 
Pasannacitto sumano, 
sīhāsanamakāsahaṁ; 
Sīhāsanaṁ karitvāna, 
pādapīṭhamakāsahaṁ. 
Sīhāsane ca vassante, 
gharaṁ tattha akāsahaṁ; 
Tena cittappasādena, 
tusitaṁ upapajjahaṁ. 
Āyāmena catubbīsa- 
yojanaṁ āsi tāvade; 
Vimānaṁ sukataṁ mayhaṁ, 
vitthārena catuddasa. 
Sataṁ kaññāsahassāni, 
parivārenti maṁ sadā; 
Soṇṇamayañca pallaṅkaṁ, 
byamhe āsi sunimmitaṁ. 
Hatthiyānaṁ assayānaṁ, 
dibbayānaṁ upaṭṭhitaṁ; 
Pāsādā sivikā ceva, 
nibbattanti yadicchakaṁ. 
Maṇimayā ca pallaṅkā, 
aññe sāramayā bahū; 
Nibbattanti mamaṁ sabbe, 
sīhāsanassidaṁ phalaṁ. 
Soṇṇamayā rūpimayā, 
phalikāveḷuriyāmayā; 
Pādukā abhirūhāmi, 
pādapīṭhassidaṁ phalaṁ. 
Catunnavutito kappe, 
yaṁ kammamakariṁ tadā; 
Duggatiṁ nābhijānāmi, 
puññakammassidaṁ phalaṁ. 
Tesattatimhito kappe, 
indanāmā tayo janā; 
Dvesattatimhito kappe, 
tayo sumananāmakā. 
Samasattatito kappe, 
tayo varuṇanāmakā; 
Sattaratanasampannā, 
catudīpamhi issarā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā sīhāsanadāyako thero imā gāthāyo abhāsitthāti. 
Sīhāsanadāyakattherassāpadānaṁ paṭhamaṁ. 

Therāpadāna 
Sobhitavagga 
8 Ekapasādaniyattheraapadāna 
“Nārado iti me nāmaṁ, 
kesavo iti maṁ vidū; 
Kusalākusalaṁ esaṁ, 
agamaṁ buddhasantikaṁ. 
Mettacitto kāruṇiko, 
atthadassī mahāmuni; 
Assāsayanto satte so, 
dhammaṁ deseti cakkhumā. 
Sakaṁ cittaṁ pasādetvā, 
sire katvāna añjaliṁ; 
Satthāraṁ abhivādetvā, 
pakkāmiṁ pācināmukho. 
Sattarase kappasate, 
rājā āsi mahīpati; 
Amittatāpano nāma, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekapasādaniyo thero imā gāthāyo abhāsitthāti. 
Ekapasādaniyattherassāpadānaṁ aṭṭhamaṁ. 

Therāpadāna 
Sobhitavagga 
9 Sālapupphadāyakattheraapadāna 
“Migarājā tadā āsiṁ, 
abhijāto sukesarī; 
Giriduggaṁ gavesanto, 
addasaṁ lokanāyakaṁ. 
Ayaṁ nu kho mahāvīro, 
nibbāpeti mahājanaṁ; 
Yannūnāhaṁ upāseyyaṁ, 
devadevaṁ narāsabhaṁ. 
Sākhaṁ sālassa bhañjitvā, 
sakosaṁ pupphamāhariṁ; 
Upagantvāna sambuddhaṁ, 
adāsiṁ pupphamuttamaṁ. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphadānassidaṁ phalaṁ. 
Ito ca navame kappe, 
virocanasanāmakā; 
Tayo āsiṁsu rājāno, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sālapupphadāyako thero imā gāthāyo abhāsitthāti. 
Sālapupphadāyakattherassāpadānaṁ navamaṁ. 

Therāpadāna 
Sobhitavagga 
10 Piyālaphaladāyakattheraapadāna 
“Pārāvato tadā āsiṁ, 
paraṁ anuparodhako; 
Pabbhāre seyyaṁ kappemi, 
avidūre sikhisatthuno. 
Sāyaṁ pātañca passāmi, 
buddhaṁ lokagganāyakaṁ; 
Deyyadhammo ca me natthi, 
dvipadindassa tādino. 
Piyālaphalamādāya, 
agamaṁ buddhasantikaṁ; 
Paṭiggahesi bhagavā, 
lokajeṭṭho narāsabho. 
Tato paraṁ upādāya, 
paricāriṁ vināyakaṁ; 
Tena cittappasādena, 
tattha kālaṅkato ahaṁ. 
Ekattiṁse ito kappe, 
yaṁ phalaṁ adadiṁ ahaṁ; 
Duggatiṁ nābhijānāmi, 
phaladānassidaṁ phalaṁ. 
Ito pannarase kappe, 
tayo āsuṁ piyālino; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā piyālaphaladāyako thero imā gāthāyo abhāsitthāti. 
Piyālaphaladāyakattherassāpadānaṁ dasamaṁ. 
Sobhitavaggo cuddasamo. 
Tassuddānaṁ 
Sobhitasudassano ca, 
candano pupphachadano; 
Raho campakapupphī ca, 
atthasandassakena ca. 
Ekapasādī sāladado, 
dasamo phaladāyako; 
Gāthāyo sattati dve ca, 
gaṇitāyo vibhāvibhi. 

Therāpadāna 
Chattavagga 
1 Atichattiyattheraapadāna 
“Parinibbute bhagavati, 
atthadassīnaruttame; 
Chattātichattaṁ kāretvā, 
thūpamhi abhiropayiṁ. 
Kālena kālamāgantvā, 
namassiṁ lokanāyakaṁ; 
Pupphacchadanaṁ katvāna, 
chattamhi abhiropayiṁ. 
Sattarase kappasate, 
devarajjamakārayiṁ; 
Manussattaṁ na gacchāmi, 
thūpapūjāyidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā atichattiyo thero imā gāthāyo abhāsitthāti. 
Atichattiyattherassāpadānaṁ paṭhamaṁ. 

Therāpadāna 
Chattavagga 
Thambhāropakattheraapadāna 
“Nibbute lokanāthamhi, 
dhammadassīnarāsabhe; 
Āropesiṁ dhajatthambhaṁ, 
buddhaseṭṭhassa cetiye. 
Nisseṇiṁ māpayitvāna, 
thūpaseṭṭhaṁ samāruhiṁ; 
Jātipupphaṁ gahetvāna, 
thūpamhi abhiropayiṁ. 
Aho buddhā aho dhammā, 
aho no satthu sampadā; 
Duggatiṁ nābhijānāmi, 
thūpapūjāyidaṁ phalaṁ. 
Catunnavutito kappe, 
thūpasīkhasanāmakā; 
Soḷasāsiṁsu rājāno, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā thambhāropako thero imā gāthāyo abhāsitthāti. 
Thambhāropakattherassāpadānaṁ dutiyaṁ. 

Therāpadāna 
Chattavagga 
Vedikārakattheraapadāna 
“Nibbute lokanāthamhi, 
piyadassīnaruttame; 
Pasannacitto sumano, 
muttāvedimakāsahaṁ. 
Maṇīhi parivāretvā, 
akāsiṁ vedimuttamaṁ; 
Vedikāya mahaṁ katvā, 
tattha kālaṅkato ahaṁ. 
Yaṁ yaṁ yonupapajjāmi, 
devattaṁ atha mānusaṁ; 
Maṇī dhārenti ākāse, 
puññakammassidaṁ phalaṁ. 
Soḷaseto kappasate, 
maṇippabhāsanāmakā; 
Chattiṁsāsiṁsu rājāno, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vedikārako thero imā gāthāyo abhāsitthāti. 
Vedikārakattherassāpadānaṁ tatiyaṁ. 

Therāpadāna 
Chattavagga 
Saparivāriyattheraapadāna 
“Padumuttaro nāma jino, 
lokajeṭṭho narāsabho; 
Jalitvā aggikkhandhova, 
sambuddho parinibbuto. 
Nibbute ca mahāvīre, 
thūpo vitthāriko ahu; 
Dūratova upaṭṭhenti, 
dhātugehavaruttame. 
Pasannacitto sumano, 
akaṁ candanavedikaṁ; 
Dissati thūpakhandho ca, 
thūpānucchaviko tadā. 
Bhave nibbattamānamhi, 
devatte atha mānuse; 
Omattaṁ me na passāmi, 
pubbakammassidaṁ phalaṁ. 
Pañcadasakappasate, 
ito aṭṭha janā ahuṁ; 
Sabbe samattanāmā te, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saparivāriyo thero imā gāthāyo abhāsitthāti. 
Saparivāriyattherassāpadānaṁ catutthaṁ. 

Therāpadāna 
Chattavagga 
5 Umāpupphiyattheraapadāna 
“Nibbute lokamahite, 
āhutīnaṁ paṭiggahe; 
Siddhatthamhi bhagavati, 
mahāthūpamaho ahu. 
Mahe pavattamānamhi, 
siddhatthassa mahesino; 
Umāpupphaṁ gahetvāna, 
thūpamhi abhiropayiṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
thūpapūjāyidaṁ phalaṁ. 
Ito ca navame kappe, 
somadevasanāmakā; 
Pañcāsītisu rājāno, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā umāpupphiyo thero imā gāthāyo abhāsitthāti. 
Umāpupphiyattherassāpadānaṁ pañcamaṁ. 

Therāpadāna 
Chattavagga 
6 Anulepadāyakattheraapadāna 
“Anomadassīmunino, 
bodhivedimakāsahaṁ; 
Sudhāya piṇḍaṁ datvāna, 
pāṇikammaṁ akāsahaṁ. 
Disvā taṁ sukataṁ kammaṁ, 
anomadassī naruttamo; 
Bhikkhusaṅghe ṭhito satthā, 
imaṁ gāthaṁ abhāsatha. 
‘Iminā sudhakammena, 
cetanāpaṇidhīhi ca; 
Sampattiṁ anubhotvāna, 
dukkhassantaṁ karissati’. 
Pasannamukhavaṇṇomhi, 
ekaggo susamāhito; 
Dhāremi antimaṁ dehaṁ, 
sammāsambuddhasāsane. 
Ito kappasate āsiṁ, 
paripuṇṇe anūnake; 
Rājā sabbaghano nāma, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā anulepadāyako thero imā gāthāyo abhāsitthāti. 
Anulepadāyakattherassāpadānaṁ chaṭṭhaṁ. 

Therāpadāna 
Chattavagga 
Maggadāyakattheraapadāna 
“Uttaritvāna nadikaṁ, 
vanaṁ gacchati cakkhumā; 
Tamaddasāsiṁ sambuddhaṁ, 
siddhatthaṁ varalakkhaṇaṁ. 
Kudāla piṭakamādāya, 
samaṁ katvāna taṁ pathaṁ; 
Satthāraṁ abhivādetvā, 
sakaṁ cittaṁ pasādayiṁ. 
Catunnavutito kappe, 
yaṁ kammamakariṁ tadā; 
Duggatiṁ nābhijānāmi, 
maggadānassidaṁ phalaṁ. 
Sattapaññāsakappamhi, 
eko āsiṁ janādhipo; 
Nāmena suppabuddhoti, 
n