Luận tạng Tây Tạng (Tengyur) — Tập 189

་པར་ངེས་པ་དག་གིས་གཏན་ཚིགས་ཤེས་པར་བྱེད་པ་ཡིན་ཏེ། འོལ་བྱི་མཐོང་བ་དང་མ་མཐོང་བ་ཙམ་གྱིས་ནི་མ་ཡིན་ནོ་ཞེས་བྱ་བའི་དོན་འདི་ཤེས་པར་བྱ་བའི་ཕྱིར། ངེས་པའི་སྒྲ་སྦྱར་ཏོ་ཞེས་བཤད་པ་ཡིན་ནོ། །དཀྱུས་མའི་
མཇུག་བསྡུ་བའི་ཕྱིར། དེས་ན་གཞན་གྱི་ངོ་བོའི་མཚན་ཉིད་མ་ཡིན་ཏེ་ཞེས་བྱ་བ་སྨོས་ཏེ། རྒྱུ་དེས་ན་གཞན་རྟོགས་པར་བྱེད་པའམ་གཞན་ཡང་རུང་བའི་ངོ་བོ་ཤེས་པ་ལ་སོགས་པ་གང་ཡིན་པ་དེ་ནི་རྟགས་ཀྱི་མཚན་ཉིད་མ་ཡིན་ནོ། །ཅིའི་ཕྱིར་ཞེ་ན། དེས་རྟགས་ཀྱི་ངོ་བོའི་ཁྱད་པར་ཞེས་བྱ་བ་
ལ་སོགས་པ་སྨོས་ཏེ། ཤེས་པ་ལ་སོགས་པ་གཞན་གྱི་ངོ་བོ་དེས་རྟགས་ཀྱི་ངོ་བོའི་ཁྱད་པར་འགའ་ཡང་མི་སྟོན་ཏོ། །ཕ་རོལ་པོ་མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ། ཡོད་པ་དང་མེད་པ་དག་གིས་གཏན་ཚིགས་ཤེས་པར་བྱེད་པར་འདོད་པ་དེ་ལ་ཡང་ངེས་པ་ཅིའི་ཕྱིར་སྨོས་

པ་ཡིན་ནམ་ཞེ་ན། དེའི་ཕྱིར་ཡོད་པ་དང་མེད་པ་དེ་དག་ནི་ཞེས་བྱ་བ་ལ་སོགས་པ་སྨོས་ཏེ། ཁ་ཅིག་ཡོད་པ་དང་མེད་པ་དག་གིས་གཏན་ཚིགས་ཤེས་པར་བྱེད་པར་འདོད་མོད་ཀྱི། འོན་ཀྱང་ཡོད་པ་དང་མེད་པ་དེ་དག་སྒྲུབ་པར་བྱེད་པའི་ཚད་མ་འཇུག་པ་ཁོ་ནས་ཁོང་དུ་ཆུད་པར་བྱའི། གཞན་དུ་ནི་མ་
ཡིན་ནོ། །ཅིའི་ཕྱིར་ཞེ་ན། ཐབས་གཞན་མེད་པའི་ཕྱིར་རོ་ཞེས་བྱ་བ་སྨོས་ཏེ། འདི་ལྟར་ཡོད་པ་དང་མེད་པ་དག་རྣམ་པར་གཞག་པར་བྱ་བ་ལ་དེ་སྒྲུབ་པར་བྱེད་པའི་ཚད་མ་མ་གཏོགས་པ་ཐབས་གཞན་མེད་དོ། །དེ་ཉིད་ཀྱི་ཕྱིར་ཅི་ནས་ཀྱང་ཡོད་པ་དང་མེད་པར་ངེས་པ་དེ་དག་འཛིན་པར་འགྱུར་སྙམ་ནས་ཡོད་པ་
དང་མེད་པ་འདི་གཉིས་གསལ་བར་བྱ་བའི་ཕྱིར། མཚན་ཉིད་ལས་ངེས་པ་སྨོས་ཏེ་བྱས་སོ། །ཡོད་པ་དང་མེད་པ་སྨོས་པ་ཁོ་ནས་ངེས་པ་ཉིད་འཕེན་པ་མ་ཡིན་ནམ། དེ་ལྟ་མ་ཡིན་ན་འདི་གཉིས་ཡོད་པ་ཁོ་ན་འགྲུབ་པར་མི་འགྱུར་རོ་ཞེ་ན། དེའི་ཕྱིར་ཡོད་པ་དང་མེད་པ་སྨོས་པ་ཙམ་གྱིས་ཀྱང་ཞེས་བྱ་བ་ལ་སོགས་པ་
སྨོས་ཏེ། དངོས་པོ་དང་དངོས་པོ་མེད་པ་སྨོས་པ་ཙམ་གྱིས་ཀྱང་དངོས་པོ་དང་དངོས་པོ་མེད་པར་རབ་ཏུ་བསྒྲུབ་པའི་ཚད་མ་འཇུག་པ་འཕེན་མོད་ཀྱི་ངེས་པ་སྨོས་སོ། །ཅིའི་ཕྱིར་ཞེ་ན། དེ་ལྟར་མ་ཡིན་ན་ཤེས་བྱ་ཡོད་པར་རྣམ་པར་གཞག་པ་ནི་ཞེས་བྱ་བ་ལ་སོགས་པ་སྨོས་ཏེ། གལ་ཏེ་དེ་དག་སྒྲུབ་པའི་ཚད་མ་འཕེན་
པར་མ་གྱུར་ན། དེའི་ཚེ་འདི་ལྟར་དངོས་པོ་དང་དངོས་པོ་མེད་པ་དེ་གཉིས་ཡོད་པར་རབ་ཏུ་མི་འགྲུབ་བོ། །ཅིའི་ཕྱིར་རབ་ཏུ་མི་འགྲུབ་ཅེ་ན། ཤེས་བྱ་ཡོད་པ་རྣམ་པར་གཞག་པ་ནི་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་ཤེས་བྱ་ཡོད་པའི་རྣམ་པར་གཞག་པ་ནི་ཤེས་པ་ཡོད་པའི་རྒྱུ་ཅན་ཡིན་པ་དེའི་ཕྱིར་དངོས་
པོ་ཐམས་ཅད་ལ་ཡོད་པར་རྣམ་པར་གཞག་པ་ཉིད་ཡོད་པར་རབ་ཏུ་སྒྲུབ་པ་འདྲེན་པར་ཁོང་དུ་ཆུད་པར་བྱའོ། །འདི་ལྟར་འདི་ནི་སྔོན་པོའོ། །འདི་ནི་སེར་པོའོ་ཞེས་རྣམ་པར་འཇོག་པར་བྱེད་པ་གང་ཡིན་པ་དེ་ནི་དེ་དམིགས་པ་ཁོ་ནས་བྱེད་ཀྱི། གཞན་དུ་མ་ཡིན་ནོ། །དེ་ལྟ་བས་ན། ཤེས་བྱ་རྣམ་པར་གཞག་
པ་ནི་ཤེས་པའི་རྒྱུ་ཅན་ཡིན་ནོ། །དེའི་ཕྱིར་ཤེས་བྱ་རྣམ་པར་གཞག་པ་ཉིད་དེ་བསྒྲུབ་པའི་ཚད་མ་འཕེན་པར་བྱེད་པ་ཡིན་ནོ། །གཏན་ཚིགས་གཞན་བསྟན་བཅོས་བྱེད་པ་ནི་གཞན་གྱི་དོན་ཡིན་པའི་ཡང་ཕྱིར་ཏེ་ཞེས་བྱ་བ་སྨོས་ཏེ། འདི་ལྟར་བསྟན་བཅོས་བྱེད་པ་ནི་གཞན་གྱི་དོན་ཡིན་ཏེ། གཞན་

གྱིས་རྟོགས་པར་བྱ་བའི་ཕྱིར་བསྟན་བཅོས་བྱེད་དོ་ཞེས་བྱ་བའི་ཐ་ཚིག་གོ། །གཞན་གྱི་དོན་དེ་ཉིད་བསྟན་པར་བྱ་བའི་ཕྱིར། ཚུལ་གསུམ་པའི་རྟགས་ཡོད་པ་ནི་ཞེས་བྱ་བ་ལ་སོགས་པ་སྨོས་ཏེ། གཞན་ལ་ཕན་པར་དགའ་བ་གང་ཞིག་གིས་གཞན་དག་ལ་ཚུལ་གསུམ་པའི་རྟགས་ནི། ཁྱེད་ལ་
རྗེས་སུ་དཔག་པར་བྱ་བའི་མཚན་ཉིད་ཀྱི་དོན་འདོམས་པར་བྱེད་པ་ཡིན་ནོ་ཞེས་སྨྲས་ན། གཞན་གང་དག་ཚུལ་དེ་མི་ཤེས་པ་དེ་དག་ནི་ཚུལ་དེས་ལྐོག་གི་དོན་ལ་འཇུག་པར་མི་འགྱུར་རོ། །དེ་ལྟ་བས་ན་བསྟན་བཅོས་སྟོན་པ་ནི། གཞན་ཤེས་པར་བྱེད་པ་ཡིན་པའི་ཕྱིར། ཡོད་པ་དང་མེད་པའི་ཡུལ་
བསྟན་པ་ན། ཤེས་པ་གྲུབ་མོད་ཀྱི། འོན་ཀྱང་རྟོག་གེ་ངན་པ་པ་ཁ་ཅིག་མཐུན་པའི་ཕྱོགས་དང་། མི་མཐུན་པའི་ཕྱོགས་ལ་གཏན་ཚིགས་ཡོད་པ་དང་མེད་པ་དེ་དག་ཁོ་ན་མཐོང་བ་དང་མ་མཐོང་བ་ཙམ་གྱིས་རྣམ་པར་འཇོག་པར་བྱེད་དེ། དེའི་བུ་ཡིན་པའི་ཕྱིར་སྔོ་བསངས་ཡིན་ཏེ། དེ་ལས་གཞན་
པའི་བུ་བཞིན་ནོ་ཞེས་བྱ་བ་ལ། དེའི་བུ་ཉིད་མཐུན་པའི་ཕྱོགས་ལ་ནི་མཐོང་བ་ཡོད་ལ་མི་མཐུན་པའི་ཕྱོགས་ལ་ནི་མ་མཐོང་ངོ་། །དེའི་ཕྱིར་དེ་དག་འདི་ཡང་མཐོང་བ་དང་མ་མཐོང་བ་དག་གིས་གཏན་ཚིགས་ཉིད་ཡིན་པར་སྟོན་ཏོ་ཞེས་གྲགས་ཏེ། དེ་ལྟ་བས་ན་དེ་དག་གི་འདོད་པ་དགག་པའི་ཕྱིར།
མཚན་ཉིད་བརྗོད་པར་ངེས་པའི་སྒྲ་འདི་རབ་ཏུ་སྦྱར་རོ། །ངེས་པ་ཞེས་བྱ་བའི་སྒྲ་སྨོས་པར་བྱ་བ་ལ་བདག་ཉིད་ཀྱི་དགོངས་པ་བསྟན་པར་བྱ་བའི་ཕྱིར། ཡོད་པ་དང་མེད་པ་དག་ཡོད་ཀྱང་ཞེས་བྱ་བ་ལ་སོགས་པ་སྨོས་ཏེ། ལ་ལར་ཡོད་པ་དང་མེད་པ་དག་དངོས་པོ་འཇུག་པས་ཡོད་མོད་ཀྱི། འོན་ཀྱང་
ཇི་སྲིད་དུ་རྗེས་སུ་འགྲོ་བ་དང་། ལྡོག་པ་དེ་དག་ཡོད་པ་ཉིད་ལ་ཐེ་ཚོམ་ཟ་བར་འགྱུར་རོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་འདི་གཉིས་ཡོད་པར་རྣམ་པར་གཞག་པ་ནི་ཚད་མ་གང་ལས་ཡོད་པ་དང་། མེད་པ་འདི་གཉིས་ངེས་པ་ཡིན་པ་དེ་ལ་རག་ལུས་པ་ཡིན་ནོ་ཞེས་བྱ་བའི་དོན་འདི་ཤེས་པར་
བྱ་བའི་ཕྱིར། ཁོ་བོས་ངེས་པ་སྨོས་པ་བྱས་པ་ཡིན་ནོ། །རྗེས་སུ་འགྲོ་བ་དང་ལྡོག་པ་ཞེས་བྱ་བའི་སྒྲ་ནི་འདིར་ཡོད་པ་དང་མེད་པ་དག་ལ་བྱའོ། །རབ་ཏུ་འགྲུབ་པ་ཞེས་བྱ་བའི་སྒྲ་ནི་རྣམ་པར་གཞག་པ་ལ་བྱའོ། །ཤེས་པ་ཉིད་ལོགས་ཤིག་ཏུ་མཚན་ཉིད་མ་ཡིན་པ་ཉིད་དུ་གཏན་ཚིགས་འདི་ཁོ་

ན་ཡང་བསྟན་པར་བྱ་བའི་ཕྱིར་གང་གི་ཕྱིར་ཡོད་པ་དང་མེད་པ་སྨོས་པ་ཙམ་གྱིས་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ་ཡོད་པ་དང་མེད་པ་སྨོས་པ་ཁོ་ནས་དེ་བསྒྲུབ་པའི་ཚད་མ་འཕེན་པར་བྱེད་པ་རྒྱུ་དེའི་ཕྱིར་ཡང་ཡོད་པ་
དང་མེད་པ་དག་ལས་ཤེས་པ་མཚན་ཉིད་ལོགས་ཤིག་ཏུ་གྱུར་པ་མ་ཡིན་ནོ། །འདིར་གཏན་ཚིགས་སུ་དེ་ཉིད་ཀྱིས་དོན་རྟོགས་པའི་ཕྱིར་ཞེས་བྱ་བ་སྨོས་ཏེ། གང་གི་ཕྱིར་ཡོད་པ་དང་མེད་པ་སྨོས་པ་དེ་ཉིད་ཀྱིས་ཤེས་པའི་དོན་རྟོགས་པ་དེའི་ཕྱིར་ལོགས་ཤིག་ཏུ་མི་བྱའོ། །འདིར་དཔེ་ཕྱོགས་ཀྱི་ཆོས་ཉིད་ལས་
ཉེ་བར་གཏོད་པའི་དོན་བཞིན་ནོ་ཞེས་སྨོས་པའི་ཕྱིར་དཔེར་ན་ཕྱོགས་ཀྱི་ཆོས་ཉིད་སྨོས་པ་ཁོ་ནས་ཉེ་བར་གཏོད་པའི་དོན་རྟོགས་པའི་ཕྱིར། ཕྱོགས་ཀྱི་ཆོས་ཉིད་ལས་ལོགས་ཤིག་ཏུ་མི་བརྗོད་པ་བཞིན་ནོ། །འདིར་ཕ་རོལ་པོས་འཁྲུལ་པ་བསྟན་པའི་ཕྱིར། འོ་ན་ནི་དེ་རྗེས་སུ་འགྲོ་བ་དང་ལྡོག་པ་དག་ཀྱང་
ཞེས་བྱ་བ་ལ་སོགས་པ་སྨོས་ཏེ། གལ་ཏེ་དོན་རྟོགས་པའི་ཕྱིར་ལོགས་ཤིག་ཏུ་བྱ་བར་མི་འདོད་ན། འོ་ན་ནི་ཀྱེ་རྗེས་སུ་འགྲོ་བ་དང་ལྡོག་པ་དག་ཀྱང་སོ་སོ་ཉིད་དུ་བརྗོད་པར་མི་བྱའོ། །འདིར་གཏན་ཚིགས་སུ་གཅིག་སྦྱོར་བས་གཉི་ག་རྟོགས་པའི་ཕྱིར་རོ་ཞེས་བྱ་བ་སྨོས་ཏེ། གང་གི་ཕྱིར་གཅིག་ཁོ་ན་
སྦྱར་བས་གཉི་ག་རྟོགས་པར་འགྱུར་བ་དེའི་ཕྱིར་ཉེ་བར་གཏོད་པ་བཞིན་དུ་འདི་གཉིས་སོ་སོར་བརྗོད་པར་མི་བྱའོ་ཞེས་བྱ་བ་ནི་ཕྱོགས་སྔ་མའོ། །གྲུབ་པའི་མཐའ་སྨྲ་བས་མ་ཡིན་ནོ། །མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ་ཞེས་བྱ་བ་ལ་སོགས་པ་སྨོས་ཏེ། མཐུན་པའི་ཕྱོགས་དང་མི་
མཐུན་པའི་ཕྱོགས་དག་ལ་གཏན་ཚིགས་ཡོད་པ་དང་མེད་པ་གང་དག་ཡིན་པ་དེ་དག་ནི་ཕན་ཚུན་ལྟོས་ནས་མཐུན་པའི་ཕྱོགས་ལ་ཡོད་པར་སྟོན་པར་བྱེད་པའི་ཚིག་གམ། མཐུན་པའི་ཕྱོགས་མ་ཡིན་པ་ལ་མེད་པར་སྟོན་པར་བྱེད་པའི་ཚིག་ཀྱང་རུང་། གཅིག་གིས་ཡོད་པ་དང་མེད་པ་གཉི་ག་གོ་བར་
བྱེད་དོ་ཞེས་བྱ་བའི་གཉིས་པ་དང་དོན་གཅིག་པ་ཁོ་ནར་བརྗོད་པ་ནི་མ་ཡིན་ནོ། །དེའི་ཕྱིར་འདི་གཉིས་དོན་ཐ་དད་པའི་ཕྱིར་སོ་སོར་ཡན་ལག་གཞན་ཉིད་ཡིན་ནོ། །ཕ་རོལ་པོས་འདི་གཉིས་དོན་གཅིག་ཁོ་ནར་གཞུང་གཟུགས་པའི་ཕྱིར། དེ་ཁོ་ན་ལ་ཡོད་པ་དང་ཞེས་བྱ་བ་ལ་སོགས་པ་སྨོས་ཏེ། ཀྱེ་མཐུན་

པའི་ཕྱོགས་ལ་ཡོད་པ་ཉིད་ཅེས་བྱ་བའི་ཚིག་གང་ཡིན་དེ་དང་མཐུན་པའི་ཕྱོགས་མ་ཡིན་པ་ལ་མེད་པར་ངེས་པ་ཞེས་བྱ་བའི་ཚིག་གང་ཡིན་པའི་ཚིག་འདི་དག་ཕན་ཚུན་འཕེན་པ་མ་ཡིན་ནམ། འདི་ལྟར་མཐུན་པའི་ཕྱོགས་ལ་ཡོད་པ་ཉིད་ཅེས་སྨྲས་ན་ཡང་། མཐུན་པའི་ཕྱོགས་མ་ཡིན་པ་ལ་མེད་པར་
རྟོགས་པར་འགྱུར་ལ་མཐུན་པའི་ཕྱོགས་མ་ཡིན་པ་ལ་མེད་པར་ངེས་ཞེས་སྨྲས་ན་ཡང་མཐུན་པའི་ཕྱོགས་ལ་ཡོད་པར་རྟོགས་པར་འགྱུར་ཏེ། དེ་ལྟ་བས་ན་གཉིས་པ་དང་དོན་གཅིག་གོ་ཞེས་བྱ་བ་ནི་ཕྱོགས་སྔ་མ་ཡིན་ནོ། །གྲུབ་པའི་མཐའ་སྨྲ་བས། ཚིག་འདིས་ནི་ཞེས་བྱ་བ་ལ་སོགས་པ་སྨོས་ཏེ།
ཀྱེ་ཚིག་གི་ནུས་པ་ནི་ཤུགས་ཀྱིས་གཉི་ག་འཕེན་པར་བྱེད་པ་གང་ཡིན་པ་དེ་ཡིན་ནོ། །ཅིའི་ཕྱིར་ཞེ་ན། ངེས་པ་སྟན་པ་གཅིག་ཀྱང་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་ངེས་པ་སྟོན་པའི་ཚིག་གཅིག་གང་ཡིན་པ་དེ་ཡང་འཕེན་པ་གཉིས་པ་མེད་པ་དེའི་ཕྱིར་གཉི་ག་འཕེན་པ་གང་ཡིན་པ་འདི་ནི་སྒྲའི་
ནུས་པ་ཡིན་གྱི་ངེས་པ་དང་བྲལ་བ་ཡོད་པ་དང་མེད་པ་དག་འབའ་ཞིག་ཕན་ཚུན་འཕེན་པར་བྱེད་པ་ནི་མ་ཡིན་ནོ། །དེ་ལ་འདི་སྙམ་དུ་འོ་ན་ངེས་པ་དང་ལྷན་ཅིག་པ་དག་འཕེན་པར་འགྱུར་རོ་སྙམ་དུ་སེམས་ན་དེའི་ཕྱིར། ངེས་པ་དང་ལྡན་པ་དག་ནི་འབའ་ཞིག་དག་མ་ཡིན་ཏེ་ཞེས་བྱ་བ་སྨོས་ཏེ། གང་གི་
ཚེ་ཡོད་པ་དང་མེད་པ་དག་ངེས་པ་དང་ལྡན་པ་ཡིན་པ་དེའི་ཚེ་འབའ་ཞིག་པ་དག་ཅེས་མི་བྱའོ། །འདིར་གཏན་ཚིགས་སུ་ངེས་པ་ནི་གཉི་གའི་ངོ་བོ་ཡིན་པའི་ཕྱིར་རོ་ཞེས་བྱ་བ་སྨོས་ཏེ། ཐམས་ཅད་དུ་ཡོད་པ་དང་དགག་པའི་ངོ་བོའི་དོན་ཡིན་པའི་ངེས་པ་ནི་གཉི་གའི་ངོ་བོ་ཡིན་ནོ། །འདི་ལྟར་བརྗོད་
པ་ལས་བཟློག་པ་འགོག་པའི་ངོ་བོ་ནི་ཡོད་པར་ངེས་པ་ཡིན་ཏེ། དེས་ན་རང་གི་སྒྲ་བརྗོད་པ་གང་ཡིན་པ་དང་། ངེས་པར་བཟུང་བའི་སྟོབས་ཀྱིས་བཀག་པ་ཡང་ཡིན་པ་དེ་གཉི་གའི་ངོ་བོར་འགྱུར་རོ། །དེ་ལྟ་བས་ན་ཡོད་པ་དང་མེད་པ་ངེས་པ་དང་ལྡན་པ་དག་ནི་འབའ་ཞིག་པ་དག་ཅེས་མི་བྱའོ།
མཇུག་བསྡུ་བའི་ཕྱིར། དེ་ལྟ་བས་ན་གང་གིས་ན་ཡོད་པའམ་མེད་པས་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་དེ་ལྟར་ངེས་པ་དང་བཅས་པ་དག་ལ་འབའ་ཞིག་པར་ཐ་སྙད་གདགས་པ་མེད་པ་དེའི་ཕྱིར། རྒྱུ་གང་གིས་ན་ཡོད་པ་འབའ་ཞིག་གིས་གཉིས་པ་མེད་པ་འཕེན་པར་

འགྱུར་བའམ་མེད་པ་འབའ་ཞིག་གིས་གཉིས་པ་ཡོད་པ་འཕེན་པར་འགྱུར་བ་དེ་ལ་ཡོད་པ་ཉིད་ཅེས་བྱ་བ་ངེས་པར་བཟུང་བ་དང་བཅས་པའི་ཚིག་འདིས་ཀྱང་དངོས་པོ་འབའ་ཞིག་ལ་མི་བྱ་ལ། དེ་མེད་པ་ལ་མེད་པར་ངེས་པ་ཞེས་བྱ་བ་ངེས་པ་གཟུང་བ་དང་བཅས་པའི་ཚིག་འདིས་ཀྱང་མེད་པ་འབའ་ཞིག་
ལ་མི་བྱའོ། །དེ་ལྟར་ཡོད་པ་དང་མེད་པ་དག་སྒྲ་འཇུག་པ་ལ་ལྟོས་ནས་ཕན་ཚུན་འཕེན་པར་བྱེད་པ་ཁོ་ན་ཡིན་པས་སོ་སོར་ཡན་ལག་གཞན་ཉིད་དུ་བསྟན་ནས། ཤེས་པ་དེ་དང་མཚན་ཉིད་མི་མཐུན་པ་ཉིད་དུ་བསྟན་པར་བྱ་བའི་ཕྱིར། ཤེས་པ་ནི་གཞན་ཤེས་པར་བྱེད་པའི་ཞེས་བྱ་བ་ལ་སོགས་པ་སྨོས་ཏེ། ཇི་ལྟར་
ཡོད་པ་དང་མེད་པ་དག་ཕན་ཚུན་ཐ་དད་པ་ལྟར་ཤེས་པ་ནི་དེ་ལྟར་གཞན་གྱིས་ཤེས་པར་བྱ་བའི་ཕྱིར་བཤད་པའི་མཚན་ཉིད་གསུམ་པ་ལས་ཐ་དད་པ་མ་ཡིན་ནོ། །དེའི་ཕྱིར་ཐ་དད་པ་མ་ཡིན་པའི་ཕྱིར་ཤེས་པ་ཉིད་ལོགས་ཤིག་ཏུ་མཚན་ཉིད་གཞན་མ་ཡིན་ནོ་ཞེས་བྱ་བ་གྲུབ་བོ། །འདི་ཐམས་ཅད་དུ་ཤེས་པ་སྨོས་པ་ནི་ཤེས་
པ་ཉིད་མཚོན་པར་བྱ་བའི་དོན་ཡིན་པར་བལྟ་བར་བྱའོ། །དེ་ལྟར་གནོད་པ་མ་བྱས་པའི་ཡུལ་ཅན་ཉིད་ལ་སོགས་པ་བསལ་ནས་མཇུག་བསྡུ་བའི་ཕྱིར། དེ་ལྟ་བས་ན་གཏན་ཚིགས་ནི་མཚན་ཉིད་གྲུབ་པ་མ་ཡིན་ནོ་ཞེས་བྱ་བ་སྨོས་ཏེ། གང་གི་ཕྱིར་དེ་སྐད་བཤད་པའི་རྣམ་པས་གནོད་པར་མ་བྱས་པའི་ཡུལ་ཅན་ཉིད་ལ་
སོགས་པའི་ལོགས་ཤིག་ཏུ་མཚན་ཉིད་གཞན་ཉིད་དུ་མི་མཐུན་པ་དེའི་ཕྱིར། གཏན་ཚིགས་མཚན་ཉིད་གྲུབ་པ་མ་ཡིན་ནོ་ཞེས་བྱ་བ་གྲུབ་པོ། །རིགས་པ་སྣ་ཚོགས་རིན་ཆེན་མཛེས་གསལ་བློ་ལྡན་རྣམས་ཀྱི་རིགས་པའི་འབྱུང་གནས་པ། །མུ་སྟེགས་མུན་གནག་ཤིན་ཏུ་འཇོམས་མཁས་ཐུབ་པའི་གྲུབ་
མཐའི་སྒྲོན་མ་གཏན་ཚིགས་ཀྱི། །ཐིགས་པ་འདི་ཚིག་རེ་ནས་རྣམ་བཀྲོལ་དགེ་བ་ཟླ་འོད་ལྟ་བུ་དཀར་ཐོབ་གང་། །དེ་དག་ཀུན་གྱིས་འགྲོ་བ་མྱུར་དུ་ཐམས་ཅད་མཁྱེན་ཉིད་ཐོབ་པར་བྱེད་གྱུར་ཅིག །གཏན་ཚིགས་ཐིགས་པ་དམ་པའི་ཚིག་དོན་ཙམ། །རབ་ཏུ་རྣམ་པར་དབྱེ་བའི་རྒྱས་བཤད་པ། །དུལ་བའི་ལྷས་
བགྱིས་འདིར་ནི་མི་མཐུན་པ། །གང་ལགས་དེ་ལ་འཕགས་པས་བཟོད་པར་མཛོད། །གཏན་ཚིགས་ཀྱི་ཐིགས་པའི་རྒྱ་ཆེར་འགྲེལ་པ་རྫོགས་སོ།། །།རྒྱ་གར་གྱི་མཁན་པོ་པྲཛྙ་བརྨ་དང་། ཞུ་ཆེན་གྱི་ལོ་ཙཱ་བ་དགེ་སློང་དཔལ་བརྩེགས་རཀྵི་ཏས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཧེ་ཏུ་བིནྡུ་བི་བ་ར་ཎ། བོད་སྐད་དུ། གཏན་ཚིགས་ཐིགས་པའི་འགྲེལ་པ། བཅོམ་ལྡན་འདས་རྡོ་རྗེ་འཆང་བ་ལ་ཕྱག་འཚལ་ལོ། །སྐྱེ་བོའི་ཚོགས་ཀྱི་ཉོན་མོངས་སྐྱོབ་པའི་ཕྱིར་ན་ཐུགས་རྗེ་ཆེན་པོ་ཡང་དག་བསྐྱེད་པ་ཅན། །བསོད་ནམས་ཡེ་ཤེས་
བདག་ཉིད་རབ་ཏུ་བསགས་པ་རྒྱ་ཆེ་བ་ཡི་རྒྱུ་དག་ངལ་བ་རྣམ་པར་བསལ། །ཤེས་བྱ་མ་ལུས་རབ་འབྱམས་དྲི་མ་མེད་པའི་ཤེས་རབ་འཆར་བའི་རི་བོ་ལ་བརྟེན་ནས། །འཇིག་རྟེན་སྙིང་གི་མུན་པ་འཇོམས་མཛད་རྒྱལ་བ་ཉི་མ་གང་ཡིན་དེ་ལ་སྤྱི་བོས་ཕྱག་འཚལ་ལོ། །ཆོས་ཀྱི་གྲགས་པའི་རྣམས་ལ་ནི། །
དཔྱད་ཟིན་ཀྱང་ནི་དཔྱད་པ་མཛེས། །རྒུན་ནི་བཙིར་བ་གྱུར་ཀྱང་ནི། །མངར་བ་ཅིས་ན་འདོར་འགྱུར་རམ། །འགྲོ་རྣམས་ཕྱོགས་གཅིག་གང་གི་བློ། །རིགས་ལམ་གནས་ནས་གཞལ་གྱུར་ན། །རྒྱལ་གྱུར་དེ་གསུང་ཟབ་མོ་གང་། །བདག་བློ་བླུན་པོས་ག་ལ་ཡིན། །དེ་ལྟ་ན་ཡང་བདག་ལས་ཀྱང་། །
གང་དག་ཁ་ཅིག་བློ་དམན་པ། །ཡོད་པ་རྣམས་ལ་བདག་གིས་ནི། །གཏན་ཚིགས་ཐིགས་པར་རྣམ་པར་དབྱེ། །ཁ་ཅིག་ནི་དོན་ལྐོག་ཏུ་གྱུར་པ་ལ་སོགས་པ་རབ་ཏུ་བྱེད་པ་རྩོམ་པའི་དགོས་པ་གསུངས་པ་དེ་ཡང་ཉན་པའི་སྐྱེ་བོ་འཇུག་པའི་དོན་ཡིན་ནོ་ཞེས་བྱ་བ་དེ་ལ། །བསྟན་བཅོས་ཐམས་
ཅད་ཉིད་དམ་ནི། །ཡང་ན་བྱ་བ་འགའ་ཞིག་ལ། །ཇི་སྲིད་དགོས་པ་མ་བརྗོད་པར། །དེ་སྲིད་གང་གིས་གཟུང་བར་བྱ། །ཞེ་ན། དེ་ནི་མི་རིགས་ཏེ། གང་གིས་རབ་ཏུ་བྱེད་པ་འདིའི་དགོས་པ་འདི་ཡིན་ནོ་ཞེས་བརྗོད་པས་དགོས་པའི་ཁྱད་པར་དག་གི་རབ་ཏུ་བྱེད་པ་ནི་ཐབས་སུ་ངེས་པ་ཡིན་ཏེ། ཐབས་
མ་ཡིན་པ་ལ་མི་འཇུག་པའི་ཕྱིར་དེ་དོན་དུ་གཉེར་བའི་རྟོག་པ་དང་ལྡན་པས་རབ་ཏུ་བྱེད་པ་མཉམ་པ་ལ་སོགས་པ་འཇུག་པར་འགྱུར་རོ་ཞེས་རྗོད་པར་བྱེད་པ་དོན་དང་ལྡན་པར་སྨྲ་བ་དེ་སྐད་སྟོན་པ་དེ་ནི་མི་རིགས་ཏེ། གང་གི་ཕྱིར་རྟོག་པ་དང་ལྡན་པ་རྣམས་ཀྱིས་དགོས་པ་དོན་དུ་གཉེར་བ་རྣམས་ནི་
དེའི་ཐབས་ངེས་པ་དེ་ཡོད་པ་ལས་ཡིན་ཏེ། དཔེར་ན་ཞིང་རྨོ་བ་ལ་སོགས་པ་རྣམས་ལོ་ཐོག་ལ་སོགས་པའི་ཐབས་ས་བོན་ལ་སོགས་པ་ས་བོན་མ་ཡིན་པ་ལས་དབེན་པའི་ས་བོན་ལ་སོགས་པ་ངེས་པར་འགྱུར་བ་བཞིན་ནོ། །གཞན་དུ་ན་ཐབས་མ་ངེས་པའི་ཐབས་ལས་བྱུང་བ་དོན་དུ་གཉེར་བ་ནི་རྟོག་

པ་དང་ལྡན་པ་རྣམས་སྤོང་བར་འགྱུར་ཏེ། ཐབས་ལས་བྱུང་བའམ་འབྱུང་བར་འགྱུར་བ་ལ་ཚད་མའི་བྱ་བ་མི་སྲིད་པའི་ཕྱིར་རོ། །མ་ངེས་སུ་ཟིན་ཀྱང་འབྲེལ་པ་མ་ཚང་བ་མེད་པའི་ཐབས་ངེས་པར་རུང་བ་འདི་དག་བརྗོད་པར་འདོད་པའི་འབྲས་བུ་བསྒྲུབ་པར་འགྱུར་བ་སྲིད་པས་རྟོག་པ་
དང་ལྡན་པ་འཇུག་པར་འགྱུར་བས་དེས་ན་ཡོངས་སུ་མི་སྤོང་ངོ་། །ངེས་པ་ཡང་ཚད་མ་ཁོ་ནས་ཡིན་ན་དགོས་པའི་ངག་ལ་ཚད་མ་མེད་དེ། སྒྲ་རྣམས་དང་ཕྱི་རོལ་གྱི་དོན་ལ་འབྲེལ་པ་མེད་པའི་ཕྱིར་རོ། །བརྗོད་པར་འདོད་པའི་ཚད་མ་དེ་ལ་ཡང་ཇི་ལྟ་བའི་དངོས་པོ་ལ་འཇུག་པའི་ངེས་པ་མེད་པའི་ཕྱིར་
དེས་ན་རབ་ཏུ་བྱེད་པའི་དགོས་པ་ཁྱད་པར་གྱི་ཐབས་ལ་ངེས་པ་མེད་དོ། །གང་གིས་ཇི་ལྟར་དོན་གང་བརྗོད་པར་འདོད་པ་དེ་ཇི་ལྟ་བར་དེས་རྗེས་སུ་མི་སྒྲུབ་པོ། །གཞན་བསམས་ནས་གཞན་དུ་བརྗོད་པས་འཇུག་པ་ན་སླུ་བ་མཐོང་བའི་ཕྱིར་འཇིག་རྟེན་པ་ཐམས་ཅད་ལ་ཡིད་བརྟན་དུ་མེད་པས་སོ། །
གལ་ཏེ་དགོས་པའི་ཁྱད་པར་ཉེ་བར་དགོད་པ་དེའི་ཐབས་སུ་གྱུར་པའི་རབ་ཏུ་བྱེད་པའི་ཡུལ་ལ་ཐེ་ཚོམ་སྐྱེ་བ་དེའི་ཕྱིར་དེ་ནི་ཞིང་རྨོ་བ་ལ་སོགས་པ་ཉིད་ལས་ས་བོན་དང་ས་བོན་མ་ཡིན་པར་ངེས་པས་འཇུག་པར་བརྗོད་དོ་ཞེ་ན། མ་ཡིན་ཏེ། དགོས་པའི་ཁྱད་པར་གྱི་ཐབས་ལ་ཐེ་ཚོམ་སྐྱེ་བ་ནི་དེ་བརྗོད་
པ་ལས་སྔར་ཡོད་པས་སྒྲུབ་པར་བྱེད་པ་དང་། གནོད་པར་བྱེད་པའི་ཚད་མ་མེད་པ་དེ་ནི་རིགས་པའི་སྟོབས་ལས་འོངས་པའི་ཕྱིར་རོ། །རྗེས་སུ་དཔག་པ་དེའི་དགོས་པ་ལ་སོགས་པ་བསྟན་པའི་ཕྱིར་རབ་ཏུ་བྱེད་པ་རྣམས་མཐོང་བས་ཅི་འདི་རྗེས་སུ་དཔག་པ་བསྟན་པའི་དགོས་པའམ། གཞན་ཅུང་
ཟད་ཅིག་ཡིན་ཞེས་དེ་ལྟ་བུའི་དངོས་པོའི་ཐེ་ཚོམ་སྔར་འཇུག་པ་ན་གང་གིས་བསལ་བར་ནུས། གཞན་ཡང་ཅི་འདི་དགོས་པ་མེད་པའམ། ཡང་ན་ཁོ་བོ་ཅག་མངོན་པར་འདོད་པའི་དགོས་པ་དང་ལྡན་པ་ཡིན་ནོ་ཞེས་ཤེས་པར་འདོད་པ་འཇུག་པ་སྲིད་པས་དགོས་པའི་ངག་ཉེ་བར་དགོད་པ་དོན་མེད་དོ། །
དེའི་ཕྱིར་གང་དགོས་པ་སྤངས་པའི་ངག་གམ་དེའི་དོན་ལ་རྟོག་པ་དང་ལྡན་པ་རྩོམ་པ་བྱེད་པའམ་སྟོན་པར་མི་འགྱུར་ཏེ། དཔེར་ན་སེའུ་བཅུ་པ་ཞེས་བྱ་བ་ལ་སོགས་པའི་ངག་དང་། བྱ་རོག་གི་སོ་རྟོག་པ་བཞིན་ནོ། །འདི་འམ་འདིའི་དོན་ཀྱང་དགོས་པ་མེད་པས་ཞེས་བྱ་བ་ནི་ཁྱད་པར་བྱེད་པ་མི་

དམིགས་པས་རྒོལ་བ་ན། དེ་མ་གྲུབ་པར་བརྗོད་པའི་ཕྱིར་ཐོག་མར་དགོས་པའི་ངག་ཉེ་བར་བཀོད་དོ། །དེ་ལ་དེ་བསྟན་པའི་ཕྱིར་ཞེས་བྱ་བའི་ཚིག་གི་བདག་ཉིད་འདིས་ནི་རབ་ཏུ་བྱེད་པའི་དགོས་པ་གསུངས་ཏེ། ཇི་ལྟར་ངག་གིས་བརྗོད་པར་བྱ་བ་རྟོགས་པ་ནི་ངག་གི་དགོས་པ་ཡིན་ཏེ། དེ་ཡང་འདི་
ལ་ཡོད་དེ་ཚིག་གི་ནང་ཚན་རྣམས་དང་ངག་ཕན་ཚུན་དུ་འབྲེལ་པ་ལས་བསྡུས་པའི་དོན་རྟོགས་སོ། །དེ་ལྟ་ན་རབ་ཏུ་བྱེད་པ་འདིར་རྗེས་སུ་དཔག་པ་བསྟན་ཏོ་ཞེས་བྱ་བ་དེ་ནི་བརྗོད་པར་བྱ་བ་ཡིན་ཏེ། དེའི་སྒྲ་ནི་དེ་ཉིད་དང་འབྲེལ་པའི་ཕྱིར་རོ། །གལ་ཏེ་ལྐོག་ཏུ་གྱུར་པའི་དོན་རྟོགས་པའི་ཞར་ལ་རྗེས་
སུ་དཔག་པ་བྱུང་བ་དེ་ལྟ་ན་ཡང་སྨྲ་བ་པོའི་བསམ་པ་དང་རྗེས་སུ་འབྲེལ་པའི་སྒྲ་འཇུག་པས་དེའི་སྒྲ་རབ་ཏུ་སྦྱར་གྱི། གཞན་དུ་ན་གཙོ་བོ་ལ་སྦྱར་བར་ཡང་ཇི་ལྟར་འགྱུར། སྒྲ་རྣམས་ཀྱི་རང་གི་ངོ་བོ་ནི་དོན་དང་འབྲེལ་པ་མེད་པའི་ཕྱིར་དང་ཕྱོགས་ཀྱི་ཆོས་ཞེས་བྱ་བ་ལ་སོགས་པས་རྗེས་སུ་དཔག་
པ་བསྟན་པའི་ཕྱིར་རོ། །རང་གི་ངོ་བོ་ཕྱིན་ཅི་མ་ལོག་པར་རྟོགས་པ་དེ་བསྟན་པ་ནི་རབ་ཏུ་བྱེད་པའི་དགོས་པ་ཡིན་ཏེ། དེ་བསྒྲུབ་པར་བྱ་བའི་ཕྱིར་རོ། །དེ་ཉིད་ཀྱི་ཕྱིར་རྗེས་སུ་དཔག་པ་བསྟན་པའི་ཡུལ་ནི་རབ་ཏུ་བྱེད་པའི་བྱ་བ་ཡིན་པ་བསྟན་ཏེ། དེ་བསྟན་པའི་ཕྱིར་ཞེས་བྱ་བ་ཎི་ཙའི་རྐྱེན་གྱིས་བསྟན་ཏེ།
དེས་ཀྱང་རབ་ཏུ་བྱེད་པ་དག་གི་དགོས་པ་ནི་བསྒྲུབ་པར་བྱ་བ་དང་། སྒྲུབ་པར་བྱེད་པའི་མཚན་ཉིད་འབྲེལ་པར་བསྟན་པ་ཡིན་ནོ། །གལ་ཏེ་སྒྲ་འཇུག་པའི་ཡུལ་བསྟན་པས་རབ་ཏུ་བྱེད་པའི་བྱ་བ་གཙོ་བོ་ཡིན་པར་བསྟན་པ་དེ་ལྟ་ན་ཡང་དངོས་པོའི་འཇུག་པ་ཁོ་ན་གཙོ་བོ་ཡིན་པར་བསྟན་ཏེ། དེ་ནི་
དེའི་བསྒྲུབ་པར་བྱ་བ་ཡིན་པའི་ཕྱིར་རོ། །ཅིག་ཤོས་ཀྱི་ཐབས་དེ་ནི་དོར་བར་བྱ་བ་ཡིན་ཏེ་གཙོ་བོ་མ་ཡིན་པའི་ཕྱིར་རོ། །དེའི་ཕྱིར་རྗེས་སུ་དཔག་པ་བསྟན་པ་ཁོ་ན་དགོས་པར་རྟོགས་པས་རབ་ཏུ་བྱེད་པའི་བྱ་བ་ནི་མ་ཡིན་ནོ་ཞེས་བྱའོ། །དོན་ལྐོག་ཏུ་གྱུར་པ་རྟོགས་པ་ནི་རྗེས་སུ་དཔག་པ་ལ་བརྟེན་
པའི་ཕྱིར་ཞེས་བྱ་བ་ལ་སོགས་པ་འདིས་ནི་རབ་ཏུ་བྱེད་པའི་དོན་རྗེས་སུ་དཔག་པའི་མཚན་ཉིད་ཀྱི་དགོས་པ་གསུངས་སོ། །ངག་རང་གི་དོན་རྟོགས་པའི་མཚན་ཉིད་ཀྱི་དགོས་པ་ཉིད་ལ་རྟོག་པ་དང་ལྡན་པ་འཇུག་པར་མི་འགྱུར་རོ། །འོན་ཀྱང་དེའི་བརྗོད་པར་བྱ་བའི་དོན་སྐྱེས་བུ་ལ་ཉེ་བར་མཁོ་བ་

ཡིན་ཏེ། དེ་ཡང་དེ་ལ་ཡོད་དེ། གང་གི་ཕྱིར་ལྐོག་ཏུ་གྱུར་པའི་དོན་རྟོགས་པ་གང་ཡིན་པ་དེ་ནི་ངེས་པའོ། །རྗེས་སུ་དཔག་པའི་ཚུལ་གསུམ་པའི་རྟགས་དེ་རྒྱུ་ལ་འབྲས་བུ་ཉེ་བར་བཏགས་པའི་ཕྱིར་ཐབས་གཞན་མ་ཡིན་པ་བསྒྲུབ་པར་བྱ་བ་དེ་བསྟན་པས་གཞན་གྱི་
འདོད་པ་བསལ་བའི་ཕྱིར་རོ། །རྟེན་ནི་རྒྱུའོ། །རྗེས་སུ་དཔག་པའི་རྟེན་གང་ཡིན་པ་ཞེས་བྱ་བ་ཐུན་མོང་དུ་རྣམ་པར་སྦྱོར་རོ། །དེས་ན་རྗེས་སུ་དཔག་པ་རྟེན་ཡིན་པས་ཞེས་བྱ་བ་བྱེ་བྲག་གང་གི་ཡིན་ཞེས་བྱ་བ་རྟོགས་པ་ན་གལ་ཏེ་ཡང་དོན་ལྐོག་ཏུ་གྱུར་པ་རྟོགས་པ་ནི་སྒྲའི་འབྲེལ་པ་མོ་རྟགས་སུ་
གོ་བ་དེ་ལྟ་ན་ཡང་དེ་ཚིག་གི་སྦྱོར་བའི་དུས་སུ་ཉེ་བ་མ་ཡིན་པས་ཕྱི་རོལ་དུ་གྱུར་པའི་ཕྱིར་མོ་རྟགས་ཀྱི་རྒྱུ་མཚན་མ་ཡིན་ཏེ། དཔེར་ན་འདི་བྲམ་ཟེ་མོར་བདེན་ནོ་ཞེས་པ་དང་། སྣོད་འདི་འབྲུ་བཞག་པ་ཞེས་བྱ་བ་བཞིན་ནོ། །འདིས་ཀྱང་དོན་ལྐོག་ཏུ་གྱུར་པ་རྟོགས་པ་ཐམས་ཅད་ཚད་མར་གྱུར་པ་ལས་
ཡིན་གྱི་གཞན་གྱིས་དེ་རྟོགས་སོ། །མི་རིགས་པའི་ཕྱིར་ཚུལ་གསུམ་པའི་རྟགས་ལ་བརྟེན་པ་ཁོ་ན་བཤད་པ་ཡིན་ཏེ། རྗེས་སུ་དཔག་པ་ཉིད་ལ་བརྟེན་པའི་ཕྱིར་ཞེས་ངེས་པར་གཟུང་བའི་ཕྱིར་རོ། །དེས་ཀྱང་སྒྲ་ལ་སོགས་པ་རྣམས་ཡིན་ན་ནི་རྗེས་སུ་དཔག་པའི་ཚད་མ་མ་ཡིན་ཏེ། གཞན་དུ་ན་དེ་རྣམས་
ཀྱང་བསྟན་པར་ཐལ་བར་འགྱུར་ཏེ་རྒྱུ་མཚན་མཚུངས་པའི་ཕྱིར་རོ། །དེ་ལྟ་ན་ལྐོག་ཏུ་གྱུར་པའི་དོན་ཐམས་ཅད་རྟོགས་པ་ནི་ཚད་མའི་བདག་ཉིད་ལས་ཡིན་གྱི་རང་དགས་ནི་མ་ཡིན་ནོ། །དེ་རང་གི་དོན་དང་འབྲེལ་པ་མེད་པས་ངེས་པ་ན་དེ་མི་སླུ་བར་རིགས་པ་མ་ཡིན་པའི་ཕྱིར་དང་། ཚད་མ་ནི་མི་སླུ་བ་
མཚན་ཉིད་ཡིན་པའི་ཕྱིར་རོ། །གཞན་ཡང་འབྲེལ་པ་མེད་པ་ལས་མ་ཡིན་པའི་ཕྱིར་དེ་ཐམས་ཅད་ལས་ཐམས་ཅད་རྟོགས་པར་ཐལ་བར་འགྱུར་རོ། །ཆོས་ཅན་དང་མ་འབྲེལ་དུ་ཟིན་ཀྱང་ཐམས་ཅད་ལ་རྟོགས་པ་སྐྱེ་སྟེ་ཉེ་བ་ལ་བསྐལ་པ་མེད་པའི་ཕྱིར་རོ། །དེ་ལྟར་གྱུར་པ་ཚུལ་གསུམ་པའི་རྟགས་
ཁོ་ན་ལས་ཡིན་པའི་ཕྱིར་ལྐོག་ཏུ་གྱུར་པའི་དོན་ཐམས་ཅད་རྟོགས་པ་ནི་ཚུལ་གསུམ་པའི་རྟགས་ལས་སྐྱེས་པ་ཉིད་རྗེས་སུ་དཔག་པ་ལས་ཐ་དད་པ་ནི་མ་ཡིན་ནོ་ཞེས་བྱའོ། །དོན་འདི་ཡང་ཕྱོགས་ཆོས་དེ་ཆས་ཁྱབ་པ་ནི། གཏན་ཚིགས་སུའི་ཞེ་ན། ལྐོག་ཏུ་གྱུར་པའི་དོན་རྟོགས་པ་ཡིན་ནོ་ཞེས་རང་

བཞིན་འབྲེལ་བ་བཤད་དོ། །ཕྱོགས་ཀྱི་ཆོས་ཉིད་དང་དེའི་ཆས་ཁྱབ་པ་ཉིད་ལྐོག་ཏུ་གྱུར་པའི་དོན་རྟོགས་པའི་གཏན་ཚིགས་སོ་ཞེས་ངེས་པར་གཟུང་བའི་ཕྱིར་རོ། །དོན་སྨོས་པ་ནི་ལྐོག་ཏུ་གྱུར་པའི་དོན་རྟོགས་སོ་ཞེས་བྱ་བ་རྗེས་སུ་དཔག་པ་ཡང་རང་གི་མཚན་ཉིད་ཀྱི་ཡུལ་ཅན་གྱི་ཚད་མར་བསྟན་
ཏེ། དོན་བྱེད་པར་ནུས་པ་ནི་དོན་ཡིན་ཏེ། རང་གི་མཚན་ཉིད་ཁོ་ནའི་བདག་ཉིད་དོ། །དེ་ཉིད་ཀྱི་ཕྱིར་དངོས་པོ་ལ་བརྟེན་ནས་ཚད་མ་རྣམ་པར་གཞག་པ་ནི་ཡིན་ནོ་ཞེས་འཆད་པར་འགྱུར་རོ། །གཞན་དུ་ན་དོན་བྱེད་པ་དོན་དུ་གཉེར་བ་རྗེས་སུ་དཔག་པ་ལས་འཇུག་པར་མི་འགྱུར་རོ། །སྤྱིའི་དངོས་པོ་
ཡང་ཤེས་པ་ཙམ་གྱི་མཚན་ཉིད་ཡིན་པའི་ཕྱིར། དེའི་དོན་བྱེད་པ་ཡིན་ཏེ། དེ་ཡང་དེ་ལས་སྐྱེ་བ་ཁོ་ནར་གྲུབ་པའི་ཕྱིར་རོ། །རིགས་ནི་བཙོ་བོ་དང་བསྲེག་པ་ལ་སོགས་པ་ལ་ཉེ་བར་མཁོ་བ་མེད་དེ། །རང་གི་མཚན་ཉིད་ཁོ་ན་དེ་ལ་ཉེ་བར་མཁོ་བའི་ཕྱིར་རོ། །གལ་ཏེ་དེ་དང་འབྲེལ་པར་དེ་ལ་འཇུག་པར་འགྱུར་
རོ་ཞེ་ན། མ་ཡིན་ཏེ་རྟག་པ་ལ་ཕན་གདགས་པར་བྱ་བ་འགའ་ཞིག་དང་འབྲེལ་པ་མེད་པའི་ཕྱིར་རོ། །འབྲེལ་པ་ཡོད་དུ་ཟིན་ཀྱང་། ཇི་ལྟར་གཞན་རྟོགས་པ་ན་གཞན་ལ་འཇུག་པ་ཡིན་ན་ཧ་ཅང་ཐལ་བར་འགྱུར་རོ། །གལ་ཏེ་འདུ་བ་ན་ཕྱེ་བ་ཉིད་ཀྱིས་ཐ་དད་པར་མི་ངེས་པས་དེ་ངེས་པ་ལ་འཁྲུལ་པས་
དེ་ལ་འཇུག་པར་འགྱུར་རོ་ཞེ་ན། དེ་ལྟ་ན་འོན་ཏེ་འཁྲུལ་པ་ཁོ་ན་ཡིན་པ་བླའི་བར་དུ་ལྷག་པའི་སྤྱིས་ཅི་ཞིག་བྱ། གལ་ཏེ་འཁྲུལ་པ་ལས་ས་བོན་མེད་པ་མི་རིགས་པའི་ཕྱིར་རོ་ཞེ་ན། དེ་ཁོ་ན་གསལ་བས་འབྲས་བུ་གཅིག་པ་དེ་ཅིས་ན་ས་བོན་མ་ཡིན། ཁ་དོག་དང་དབྱིབས་ཀྱི་རྣམ་པ་མཚུངས་པ་ལས་
སྤྱིར་ཤེས་པ་ཡིན་ནོ། །སྤྱི་ཡང་དེའི་ངོ་བོ་མ་ཡིན་ཏེ། །དེ་ཇི་ལྟར་འཁྲུལ་པའི་ས་བོན་ཡིན། གཞན་དག་ནི་འདྲ་བའི་རྒྱུ་མཚན་ལས་འཁྲུལ་པར་འདོད་པ་དེ་སྤྱི་ཤེས་པ་ནི་གསལ་བ་ཁོ་ན་རིགས་མི་མཐུན་པ་ལས་ལྡོག་པ་རྣམ་པ་འདྲ་བ་དེ་དང་། དེ་ཁོ་ན་འཁྲུལ་པའི་རྒྱུ་མཚན་ཡིན་ཏེ། དེ་མ་ཡིན་
པ་ལས་ལྡོག་པ་དེའི་རང་བཞིན་ཡིན་པའི་ཕྱིར་སྤྱི་དངོས་པོར་གྱུར་པ་དང་འབྲེལ་པ་མེད་པས་དེ་རྣམས་ལ་ཡོད་པར་མི་རུང་བའི་ཕྱིར་རོ། །གང་ཡང་གསལ་བའི་བདག་ཉིད་ཁོ་ན་ལ་སྤྱིར་བཏགས་ཏེ། །དེ་རང་གི་མཚན་ཉིད་ཀྱི་ཡུལ་ཅན་གྱི་རྗེས་སུ་དཔག་པར་ཁས་བླངས་པར་འགྱུར་རོ། །རང་གི་

མཚན་ཉིད་ཀྱི་སྤྱི་ཡིན་ན་རྗེས་སུ་དཔག་པ་ལ་ཇི་ལྟར་སོ་སོར་སྣང་བ་ཡིན་ཞེས་བསམ་པར་བྱ་སྟེ། གསལ་བའི་དངོས་པོ་སྤྱི་ལས་གཞན་པའི་ངོ་བོའི་སྤྱི་མི་འདོད་པས་བྱེ་བྲག་པའི་ལྟ་བ་ཁས་ལེན་པར་ཐལ་བར་འགྱུར་རོ། །དེ་ལ་ཡང་སྔར་བཤད་པའི་སྐྱོན་གྱིས་ལྐོག་ཏུ་གྱུར་པ་རང་གི་
ངོ་བོས་རྟོགས་པར་མི་ནུས་པས་རྟགས་ལ་བརྟེན་པས་མངོན་སུམ་ལས་རྗེས་སུ་དཔག་པ་ལོགས་ཤིག་ཏུ་བཤད་དེ། དེ་ཉིད་ཀྱང་རང་གི་མཚན་ཉིད་དེ་མ་ཡིན་པ་ལས་ལྡོག་པ་ལ་སྤྱིའི་མཚན་ཉིད་དུ་བཤད་ཟིན་ཏོ། །འདིས་མཚོན་པར་བྱེད་པས་ན་མཚན་ཉིད་ནི་ཞེས་སྤྱིའི་མཚན་ཉིད་དུ་བྱས་པ་དེས་ན་
རྗེས་སུ་དཔག་པའི་མཚན་ཉིད་ཡུལ་ཡིན་པ་ལ་འགལ་བ་མེད་པའི་ཕྱིར་རྒྱ་ཆེར་མི་བཤད་དོ། །མདོར་བསྡུས་ནས་ཞེས་བྱ་བ་ནི་ཟློས་པར་དོགས་པ་བསལ་བ་ཡིན་ཏེ། རྒྱ་ཆེར་ནི་རྣམ་འགྲེལ་ལ་སོགས་པར་བཤད་པའི་ཕྱིར་རོ། །རྟགས་ཀྱི་མཚན་ཉིད་རྗེས་སུ་དཔག་པ་བསྟན་པ་ནི། རང་གི་ངོ་བོ་དང་།
རབ་ཏུ་དབྱེ་བ་དང་། ཚད་མ་དང་། དེ་ངེས་པའོ། །དེ་ལ་ཕྱོགས་ཆོས་དེའི་ཆས་ཁྱབ་པ་ནི། གཏན་ཚིགས་ཞེས་བྱ་བས་ནི་རང་གི་ངོ་བོ་བསྟན་ཏོ། །དེ་ནི་རྣམ་གསུམ་ཉིད་ཅེས་བྱ་བས་རབ་ཏུ་དབྱེ་བའོ། །མེད་ན་མི་འབྱུང་ཞེས་བྱ་བ་ལ་སོགས་པས་ནི་རབ་ཏུ་དབྱེ་བ་ངེས་པར་བྱེད་པའི་ཚད་མ་ཉེ་བར་བཀོད་
དོ། །རྣམ་གསུམ་གྱི་རབ་ཏུ་དབྱེ་བ་ཡང་རྟགས་གསུམ་པོ་རྣམས་ཀྱི་ངོ་བོ་དང་རེ་རེའི་ངོ་བོ་ངེས་པར་བྱེད་པའི་ཚད་མ་འཇུག་པ་བཤད་པར་བྱའོ། །དེ་ལ་ཕྱོགས་ཀྱི་ཆོས་ནི་ཕྱོགས་ཀྱི་ཆའི་ཆོས་ཀྱིས་ཁྱབ་པ་མེད་ན་མི་འབྱུང་བ་ཡིན་ནོ་ཞེས་མཚན་ཉིད་བསྟན་ཏོ། །གཏན་ཚིགས་ཞེས་བྱ་བས་ནི་མཚན་གཞི་
བསྟན་ཏོ། །གཏན་ཚིགས་དེ་ནི་རྣམ་གསུམ་ཉིད། །ཅེས་བྱ་བས་དབྱེ་བ་བརྗོད་དོ། །འོན་ཏེ་གཏན་ཚིགས་གཞན་མེད་པར་ངེས་པར་གྱུར་ན་རྣམ་པ་གསུམ་ཁོ་ན་ཞེས་བྱ་བ་རིགས་ཀྱི་འགྲན་ཟླ་མེད་པར་ངེས་པས་ཡོད་པ་རྣམས་ལ་ངེས་པར་གཟུང་བ་དང་བཅས་པར་གཏན་ལ་དབབ་པོ། །དེ་སྨྲས་པ། གང་
ཕྱིར་འདི་ཁོ་ན་ཡིན་ཞེས། །འདི་ཡོད་པར་ནི་གཏན་ལ་འབེབས། །དངོས་གཞན་མེད་པར་རིགས་པ་ཅི། །རྗེས་འགྲོ་མེད་ན་འདི་མ་ཡིན། །ཞེའོ། གཏན་ཚིགས་མེད་པར་ནི་མངོན་སུམ་གྱིས་མི་རྟོགས་ཏེ། །དེ་ཡུལ་མེད་པ་དང་འགལ་བའི་ཕྱིར་རོ། །དེ་ལྟ་ན་དངོས་པོ་མེད་པ་ནི་དངོས་པོའི་བདག་ཉིད་ཀྱི་

ཆའི་མེད་པའི་མཚན་ཉིད་ཡིན་ན་དེའི་དབང་པོ་དང་ཉེ་བ་མེད་པའི་ཕྱིར་མངོན་སུམ་གྱི་ཡུལ་ཡིན་པར་འགལ་ལོ། །གང་ཡང་། རེ་ཞིག་དབང་པོས་འདི་མེད་ཅེས། །བློ་ནི་སྐྱེད་པར་བྱེད་པ་ཡིན། །དངོས་པོའི་ཆ་དང་འབྲེལ་ཉིད་ཀྱི། །དབང་པོ་རུང་བ་ཡིན་ཕྱིར་རོ། །ཞེས་བྱ་བ་སྨོས་སོ། ཡང་ན་ནུས་པ་
ཐམས་ཅད་ཀྱིས་སྟོང་པའི་མཚན་ཉིད་དེ་ཡང་དོན་གྱི་ནུས་པ་ལ་ལྟོས་པའི་མངོན་སུམ་གྱི་ཡུལ་དུ་འགལ་བའི་ཕྱིར་རོ། །རྗེས་སུ་དཔག་པས་ཀྱང་གཏན་ཚིགས་གཞན་མེད་པ་མི་རྟོགས་ཏེ། །དེ་ནི་རྟགས་རྣམ་པ་གསུམ་ལ་བརྟེན་པ་ཁོ་ནར་བཤད་པས་སོ། །རྣམ་གསུམ་ཉིད་ཅེས་བྱ་བ་ད་ནི་བཤད་
པར་བྱ་སྟེ། །དེ་ལ་འབྲས་བུ་དང་རང་བཞིན་དག་ནི་སྒྲུབ་པ་སྒྲུབ་པར་བྱེད་པའི་ཕྱིར་དགག་པ་མི་བྱེད་ལ་མི་དམིགས་པ་ལས་ཀྱང་གཏན་ཚིགས་གཞན་མེད་པར་ངེས་པ་མ་ཡིན་ནོ། །གང་གི་ཕྱིར་དེ་ནི་རྣམ་པ་བཞིར་གནས་ཏེ། །རང་བཞིན་དང་འབྲས་བུ་དང་ཁྱབ་པར་བྱེད་པ་མི་དམིགས་པ་དང་འགལ་
བ་དམིགས་པ་སྒྲུབ་པ་སྟེ་དེ་ལ་མཚུངས་པར་རུང་བའི་ངོ་བོ་ཤེས་པ་གཅིག་ལ་འདྲེ་བ་རང་བཞིན་མི་དམིགས་པ་ནི་གཞན་གྱི་ངོ་བོ་མི་དམིགས་པས་མེད་པའི་ཐ་སྙད་ཀྱི་གཏན་ཚིགས་སུ་འདོད་པ་དང་། གཏན་ཚིགས་གཞན་གཏན་མེད་པར་ཁས་བླངས་པས་རྗེས་སུ་བསྟན་པའི་ངོ་བོ་མ་ཡིན་ནོ། །གལ་ཏེ་
ཞིག་ན་ཡུལ་ལ་སོགས་པ་ཁོ་ན་ལ་འགོག་ན་ནི་འདིར་འགྱུར་གྱི་གཏན་མེད་པ་ནི་མ་ཡིན་ཏེ། རྒྱུ་དང་ཁྱབ་པར་བྱེད་པ་མི་དམིགས་པ་དག་ཀྱང་འབྲས་བུ་ཁྱབ་པར་བྱ་བ་མེད་པའི་གཏན་ཚིགས་ཀྱི་དངོས་པོ་ཡིན་ན་གཏན་ཚིགས་གཞན་ནི་གཏན་མེད་པར་ཁས་བླངས་པ་ལ་རྣམ་པ་འདི་ལྟ་བུ་མི་སྲིད་དོ། །དེ་ཇི་
ལྟར་དེ་དག་གིས་དེ་མེད་པར་གོ་བར་འགྱུར། འགལ་བ་ཡང་རྒྱུ་མ་ཚང་བ་མེད་པར་འབྱུང་བ་གཞན་ཡོད་ན་མེད་པར་གོ་བར་བྱ་བ་ཡིན་པའི་ཕྱིར་འགལ་བ་དམིགས་པ་ཡང་མི་སྲིད་དོ། །སྲིད་པ་ཡང་འབྲས་བུ་མི་དམིགས་པ་ལ་སོགས་པ་རྣམས་ཇི་ལྟར་གཏན་འགོག་པར་བྱེད་པ་ཡིན་ཞེས་དོགས་པ་ལ། གཏན་
ཚིགས་ལྟར་སྣང་དེ་ལས་གཞན། །ཅེས་བྱ་བ་སྨོས་ཏེ། དེས་ན་གང་གི་ཕྱིར་གཏན་ཚིགས་རྣམ་པ་གསུམ་ལས་གཞན་པའི་གཏན་ཚིགས་ལྟར་སྣང་བ་ཡིན་པ་དེའི་ཕྱིར། དེ་ནི་རྣམ་གསུམ་ཉིད་ཅེས་དེ་ལྟར་དགོངས་སོ། །འདིར་ནི་གང་དང་གང་ངེས་པ་དེ་དང་དེ་ལས་བཟློག་པ་ལ་མི་མཐུན་པའི་

ཕྱོགས་ཀྱིས་ཁྱབ་པ་དེའི་ངེས་པ་གྲུབ་པ་ཡིན་ཏེ། དཔེར་ན་གང་ཡོད་པ་དེ་སྐད་ཅིག་མ་ཁོ་ནའོ་ཞེས་པས་ཡོད་པ་སྐད་ཅིག་མ་རྣམས་ལ་ངེས་པར་བརྗོད་པས་ཡོད་པ་ལས་བཟློག་པ་མེད་པས་སྐད་ཅིག་མའི་མི་མཐུན་པའི་ཕྱོགས་སྐད་ཅིག་མ་མ་ཡིན་པ་ལ་ཁྱབ་པ་གྲུབ་པ་དེ་བཞིན་དུ་
འདིར་ཡང་གཏན་ཚིགས་རྣམ་པ་གསུམ་དུ་ངེས་པས་གཏན་ཚིགས་ལས་བཟློག་པའི་གཏན་ཚིགས་ལྟར་སྣང་བ་ལ་གྲངས་གསུམ་ལས་ཕྱི་རོལ་དུ་གྱུར་པའི་དོན་གྱིས་ཁྱབ་པས་གྲངས་གསུམ་ཁོ་ནར་ངེས་པ་ཡིན་ནོ། །དེས་ན་གཏན་ཚིགས་རྣམ་པ་གསུམ་པོ་ལས་ཐ་དད་པའི་དོན་རྣམས་ཀྱིས་གཏན་
ཚིགས་ལྟར་སྣང་བ་བསྟན་ཏོ། །དེས་ན་རང་བཞིན་འགལ་བ་དམིགས་པ་དང་འབྲས་བུ་དང་རང་བཞིན་དང་མི་དམིགས་པ་ལས་ཐ་དད་པའི་དོན་རྣམས་ནི་གཏན་ཚིགས་མ་ཡིན་པར་ངེས་པའི་ཕྱིར་རོ། །གཏན་ཚིགས་དང་དེར་སྣང་བ་དག་ཕན་ཚུན་སྤངས་ཏེ་གནས་པའི་མཚན་ཉིད་དེ་ཉིད་གཏན་
ཚིགས་སུ་རྟོག་པའི་དུས་ཁོ་ནར་འགལ་བར་རྟོགས་ཏེ། དེའི་བདག་ཉིད་དུ་དེ་ངེས་པར་སྣང་བའི་ཤེས་པ་ཉིད་དེ་ལས་བཟློག་པ་གཞན་པ་དེ་སྣང་བར་རྟོགས་པ་ནི་ཕན་ཚུན་གཅིག་ལ་གཅིག་མེད་པར་ངེས་པའི་ཕྱིར་རོ། །དེ་ལ་གཏན་ཚིགས་རྣམ་པ་གསུམ་ལས་བཟློག་པའི་དོན་རྣམས་ལ་གཏན་ཚིགས་ལྟར་
སྣང་བ་ཉེ་བར་དམིགས་པས་རང་ཉིད་དང་འགལ་བའི་གཏན་ཚིགས་གསལ་བ་དེ་ཡང་གཏན་ཚིགས་གསུམ་ལས་ཕྱི་རོལ་དུ་གྱུར་པའི་དོན་ནི་གཏན་མེད་པར་ཁས་མ་བླངས་སོ། །འོན་ཀྱང་དེ་རྣམས་ལ་གཏན་ཚིགས་དགག་པ་ནི་གཏན་ཚིགས་སུ་རྨོངས་པ་འབའ་ཞིག་གིས་གཞན་ལ་གྲགས་པ་དེ་ཉིད་དེ་ལ་སྒྲོ་
འདོགས་པའམ་ཐེ་ཚོམ་ཟ་བ་དེ་འགལ་བ་དམིགས་པས་བསལ་ཏོ། །གཏན་མེད་ན་ཇི་ལྟར་འགལ་བ་ཡིན་ཞེས་དེ་ཇི་སྟེ་བརྗོད། ལྷན་ཅིག་མི་གནས་པའི་མཚན་ཉིད་ཀྱི་འགལ་བ་མེད་ན་གང་གིས་ན་དེའི་རིགས་པས་ཐམས་ཅད་ལ་ཉེ་བར་བརྗོད་དམ། གང་དང་གང་འགོག་པ་དེ་དང་དེ་ལ་འགལ་བར་
རྟོགས་པ་མ་ཡིན་ན་གང་གིས་ཇི་ལྟར་མེད་པ་འགའ་ཞིག་དང་འགལ་བར་རྟོགས་ཞེས་རྩོད་པ་ཡིན་ཏེ། འདི་ན་གྲང་བའི་རེག་པ་མེད་དེ་མེ་ཡོད་དོ་ཞེས་བྱ་བ་བསྒྲུབ་པར་བྱ་བའི་ཆོས་ཅན་ཁོ་ན་ལ་གྲང་བའི་རེག་པ་དང་མེ་འགལ་བར་མི་འབྱུང་ལ། ཇི་ལྟར་རྟོགས་པ་ཉིད་འདི་གཞན་ལ་འགལ་བར་རྟོགས་པའི་

མེས་བསྒྲུབ་པར་བྱ་བའི་ཆོས་ཅན་ལ་འགོག་པ་དེ་བཞིན་དུ་གཏན་ཚིགས་ལྟར་སྣང་བ་ཉེ་བར་དམིགས་པས་གཏན་ཚིགས་རྣམ་པ་གསུམ་ལས་ཕྱི་རོལ་དུ་གྱུར་པའི་དོན་རྣམས་ལ་བཀག་པ་ཡིན་ན། ཐམས་ཅད་ལ་གཏན་མེད་པ་ཡང་མཚན་ཉིད་ཀྱི་འགལ་བར་རྟོགས་ཏེ། དཔེར་ན་སྐད་ཅིག་མ་བཞིན་
དུ་སྐད་ཅིག་མ་མ་ཡིན་པ་དེ་ནི་དངོས་པོ་འགའ་ཞིག་ལ་ཡང་མི་སྲིད་པའི་ཕྱིར་རོ། །དེ་བཞིན་དུ་ཡོད་པ་དང་མེད་པ་ཡང་ངོ་། །ནུས་པ་ཐམས་ཅད་དང་བྲལ་བའི་མཚན་ཉིད་ཡིན་པའི་ཕྱིར་བློ་གྲོས་ངན་པའི་འདོད་པ་དེ་རྣམས་ལ་ཤིན་ཏུ་གྲུབ་པས་ཆོག་གོ། །གཏན་ཚིགས་རྣམ་པ་གསུམ་ཁོ་ནར་ངེས་
པས་དེ་ལས་བཟློག་པ་ལ་དེའི་མི་མཐུན་པའི་ཕྱོགས་ཀྱིས་ཁྱབ་པར་གྱུར་པ་འདི་གནས་པ་ཡིན་ཏེ། །དེ་ལ་ངེས་པར་གྱུར་པ་ཡིན་ནོ་ཞེས་དགོས་པ་དང་ལྡན་པས་བཟློག་པ་ལ་ཁྱབ་པ་བསྟན་པའི་ཕྱིར་གཏན་ཚིགས་ལྟར་སྣང་དེ་ལས་གཞན་ཞེས་བྱ་བ་འདི་གསུངས་སོ། །དེ་ལྟར་གྱུར་ན་དེ་ནི་སྐད་ཅིག་མའི་
མི་མཐུན་པའི་ཕྱོགས་ལ་ཡོད་པ་ལས་བཟློག་པས་ཁྱབ་པ་ལ་གནོད་པར་བྱེད་པའི་ཚད་མས་ངེས་ཀྱི། །འདིར་ནི་གསུམ་གྱི་གྲངས་ལས་ཕྱི་རོལ་དུ་གྱུར་པའི་དོན་རྣམས་ལ་གཏན་ཚིགས་ལྟར་སྣང་བས་ཁྱབ་པ་ལ་ཚད་མས་གང་ཞིག་གིས་ངེས་ཤེ་ན། །མེད་ན་མི་འབྱུང་ངེས་ཕྱིར་རོ། །ཞེས་བྱ་བ་གསུངས་
སོ། །གཏན་ཚིགས་རྣམ་པ་གསུམ་ལས་ཐ་དད་པའི་རྟགས་ཁས་ལེན་པའམ། ཐེ་ཚོམ་ཟ་བ་ཉིད་ལ་དངོས་པོ་ལ་ཕྱོགས་ཀྱི་ཆོས་ཉིད་ཡོད་དུ་ཟིན་ཀྱང་མེད་ན་མི་འབྱུང་བ་མེད་དོ་ཞེས་བྱ་བའི་དོན་ཏོ། །དེ་ལྟར་ཡང་འཆད་པར་འགྱུར་ཏེ་དེ་ནི་གཏན་ཚིགས་རྣམ་པ་གསུམ་ལས་གཞན་ཡོད་པ་མ་ཡིན་ནོ་
ཞེས་ངེས་པར་བརྗོད་པའི་ཕྱིར་རོ། །མེད་ན་མི་འབྱུང་བ་མ་ཚང་ན་གཏན་ཚིགས་ལྟར་སྣང་བ་མ་གྲུབ་པ་དང་འགལ་བ་དང་མ་ངེས་པ་ཆོས་མཚུངས་པས་ཁྱབ་པའི་གཞལ་བྱ་ཉིད་ལ་སོགས་པར་ངེས་པ་བཞིན་དུ་གཏན་ཚིགས་ལྟར་སྣང་བ་ནི་བསྒྲུབ་པར་བྱའོ། །མེད་ན་མི་འབྱུང་བ་མ་ཚང་ལས་ཞེས་བྱ་
བས་རང་བཞིན་གྱི་གཏན་ཚིགས་སོ། །མེད་ན་མི་འབྱུང་བ་མ་ཚང་བ་ཡང་གཏན་ཚིགས་རྣམ་པ་གསུམ་ལ་ཐ་དད་པ་ཡིན་པའི་ཕྱིར་དེ་ལས་གཞན་པའི་དོན་རྣམས་ཁྱབ་པར་བྱེད་པ་མི་དམིགས་པས་དེ་གྲུབ་པ་ཡིན་ཏེ། །དེ་ལྟར་དེའི་བདག་ཉིད་དང་དེ་ལས་བྱུང་བ་དག་གིས་མེད་ན་མི་འབྱུང་བ་ལ་ཁྱབ་བོ། །དེ་

དག་དེ་ལ་གདོན་མི་ཟ་བར་ཡོད་ལ་དེ་ཡང་དེ་དག་ཁོ་ན་ལ་ཡོད་དེ་དེའི་རང་བཞིན་མ་ཡིན་པ་དང་དེ་ལས་བྱུང་བ་མ་ཡིན་པ་ནི་དེ་ལ་རག་ལས་པ་མེད་པས་དེ་ལ་མི་འཁྲུལ་པར་ངེས་པ་མེད་པའི་ཕྱིར་རོ། །རྒྱུ་དང་འབྲས་བུའི་དངོས་པོའམ། །རང་བཞིན་ངེས་པར་བྱེད་པ་ལས། །མེད་ན་མི་འབྱུང་
ངེས་པ་སྟེ། །མ་མཐོང་ལས་མིན་མཐོང་ལས་མིན། །གཞན་དུ་གཞན་ནི་གཞན་དག་དང་། །ངེས་པར་ཡོད་པའི་ངེས་པ་གང་། །དོན་གཞན་རྒྱུ་མཚན་ཅན་གྱི་ཆོས། །ཡིན་ན་གོས་ལ་ཚོན་བཞིན་ནོ། །ཞེས་གསུངས་སོ། །གཟུགས་ལ་སོགས་པ་ཡང་རོ་ལ་སོགས་པ་མེད་ན་མི་འབྱུང་བ་རང་གི་ངོ་བོ་ནི་མ་ཡིན་
ལ་འོན་ཀྱང་རང་གི་རྒྱུ་ལ་མི་འཁྲུལ་བའི་སྒོ་ནས་དེའི་རྒྱུ་ལས་བྱུང་བ་ཁོ་ན་མེད་ན་མི་འགྱུར་བའི་རྒྱུ་མཚན་ཡིན་ནོ་ཞེས་བྱའི། གཞན་དུ་ན་དེའི་བདག་ཉིད་མ་ཡིན་པ་དང་། །དེ་ལ་རག་ལས་པའམ་རྒྱུ་ལ་རག་ལས་པ་དེ་མེད་ན་མི་འབྱུང་བར་བརྟགས་ན་ནི་ཐམས་ཅད་ཀྱིས་ཐམས་ཅད་ཀྱི་དོན་མེ་མེད་ན་མི་
འབྱུང་བར་འགྱུར་ཏེ། ཁྱད་པར་མེད་པའི་ཕྱིར་རོ། །གལ་ཏེ་དོན་གཅིག་ཏུ་འདུ་བའི་རྒྱུ་མཚན་གཟུགས་དང་རོ་ལ་སོགས་པ་མེད་ན་མི་འབྱུང་བ་ཡིན་ནོ་ཞེ་ན། འོན་ཏེ་འདུ་བ་ཡང་བརྟེན་པ་དང་རྟེན་དུ་གྱུར་པར་ཉེ་བར་བརྗོད་དེ། དེ་ཡང་རྟེན་དང་བརྟེན་པའི་དངོས་པོའི་བདག་ཉིད་ཡིན་ན་ཕན་འདོགས་པ་མེད་
པར་ཧ་ཅང་ཐལ་བར་འགྱུར་བས་མི་འགྲུབ་པོ། །ཚོགས་པ་གཅིག་ལ་རག་ལས་པ་ཁོ་ན་ལ་དོན་གཅིག་ཏུ་འདུ་བ་ཡིན་ཏེ། ཇི་ལྟར་འདུ་བའམ་གཞན་པའི་འབྲེལ་པ་མི་སྲིད་པ་དེ་ལྟར་འབྲེལ་པ་བརྟག་པར་བསྟན་བཅོས་མཛད་པས་རྒྱས་པར་བསྟན་པས་དེ་ཉིད་དུ་ངེས་པར་བྱའོ། །གལ་ཏེ་དེས་དེ་རྒྱུའམ་
བསྐྱེད་པར་བྱ་བ་དང་། སྐྱེད་པར་བྱེད་པའི་དངོས་པོའམ་དེའི་བདག་ཉིད་དུ་ཟིན་ཀྱང་དེས་ན་མི་འབྱུང་བ་ལས་གཞན་མ་ཡིན་ནོ་ཞེས་འདིར་དངོས་པོའི་རང་བཞིན་གྱི་ལན་བརྗོད་དེ། གང་འདི་ལྟར་གྱུར་པ་ནི་ཁོ་བོ་འབའ་ཞིག་གིས་མ་ཡིན་གྱི་ཁྱོད་ཀྱིས་ཀྱང་མཐོང་ངོ་ཞེ་ན། དེ་ལྟ་ན་གློ་བུར་བ་དེ་དངོས་པོ་
རྣམས་ཀྱི་རང་བཞིན་ཡིན་ནོ་ཞེས་བྱ་བར་འགའ་ཞིག་མི་འགྱུར་བ་མ་ཡིན་ན། གཏན་ཚིགས་ཡུལ་དང་དུས་དང་རྫས་ངེས་པར་མི་རུང་ངོ་། །དེ་ཅུང་ཟད་གཅིག་ལ་ལར་འཇིག་པའམ་མ་ཡིན་པ་དང་གང་གང་ལ་ཅུང་ཟད་ཅིག་རག་ལས་པའམ་རག་ལས་པ་མེད་པ་དེ་ལྟ་མ་ཡིན་ན་ཁྱད་པར་མེད་པའི་ཕྱིར་

འདོད་པའི་ཡུལ་དང་དུས་རྫས་བཞིན་དུ་ཡུལ་ལ་སོགས་པ་གཞན་ན་ཡོད་པ་ལ་གང་གིས་ན་བསལ་བར་ནུས། དེའི་ཕྱིར་གང་གང་ཞིག་ལས་མེད་ཀྱང་འབྱུང་བར་མཐོང་བ་དེ་དང་དེ་ནི་འཁྲུལ་བའི་རྒྱུ་ཡིན་པ་དེ་ཁོ་ན་ཉིད་སེམས་པས་འདི་བརྗོད་ཀྱི། རྐང་པ་བརྐྱང་བའི་དམིགས་པ་ནི་མ་ཡིན་ནོ། །དེ་ཡང་མི་འཁྲུལ་
པའི་རྒྱུ་ཇི་ལྟར་བཤད་པ་ལས་གཞན་དུ་རྗེས་སུ་སྦྱོར་ན་ནི་དེ་མ་ཚང་བས་གཏན་ཚིགས་ཀྱི་མཚན་ཉིད་ལ་བརྟེན་པ་མ་ཡིན་ནོ་སྙམ་ནས། དེ་སྐད་དུ་ཡང་། ལྡན་པ་ལ་སོགས་གང་རྣམས་ལ། །འབྲེལ་པ་དེ་འདྲ་ཡོད་མིན་ན། །དེ་ནི་གཏན་ཚིགས་མིན་ཞེས་བཤད། །འཁྲུལ་པ་སྲིད་པ་ཉིད་ཀྱི་ཕྱིར། །ཞེས་
གསུངས་སོ། །འདིར་སྦྱོར་བ་ནི་གང་དང་གང་དེའི་བདག་ཉིད་དང་དེ་ལས་བྱུང་བ་མེད་པ་དེ་དང་དེ་ནི་མེད་ན་མི་འབྱུང་བ་མ་ཡིན་ཏེ། དཔེར་ན་གཞལ་བྱ་ལ་སོགས་པས་མི་རྟག་པ་བཞིན་ནོ། །རང་བཞིན་དང་འབྲས་བུ་དང་མི་དམིགས་པ་ལས་ཐ་དད་པའི་དོན་དེ་རྣམས་ཀྱང་འགའ་ཞིག་ཏུ་དེའི་བདག་ཉིད་དང་དེ་
ལས་བྱུང་བ་མེད་པས་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །རང་བཞིན་མི་དམིགས་པ་ནི་རང་བཞིན་གྱི་གཏན་ཚིགས་ཀྱི་ནང་དུ་འདུས་པའི་ཕྱིར་འདི་ནི་དེའི་བདག་ཉིད་ཀྱི་མཚན་ཉིད་ཀྱི་འབྲེལ་པ་ཁོ་ནའོ། །ཁྱབ་པར་བྱེད་པ་དང་། རྒྱུ་མི་དམིགས་པ་ཡང་དེའི་བདག་ཉིད་དང་དེ་ལས་བྱུང་བའི་
མཚན་ཉིད་ཀྱི་འབྲེལ་པ་ཁོ་ནས་ཁྱབ་པར་བྱ་བ་དང་འབྲས་བུ་ལྡོག་པ་སྒྲུབ་པར་བྱེད་དོ། །དེ་སྐད་དུ་ཡང་། དེའི་ཕྱིར་དེ་ཙམ་དང་འབྲེལ་པ། །ངོ་བོ་ཉིད་ཀྱིས་ངོ་བོ་ཉིད། །ལྡོག་པར་འགྱུར་བའམ་རྒྱུ་ཡིས་ནི། །འབྲས་བུ་འཁྲུལ་པ་མེད་པ་ཡིན། །ཞེས་གསུངས་སོ། །དེ་ལྟར་དེས་གཏན་ཚིགས་ཀྱི་
མཚན་ཉིད་དང་གྲངས་ངེས་པ་དང་། དེའི་འཐད་པ་ཞེས་བྱ་བ་དོན་རྣམ་པ་གསུམ་ཚིགས་སུ་བཅད་པ་འདིར་རྒྱས་པར་བཤད་དོ། །ཡང་ན་རྣམ་གསུམ་ཉིད་ཅེས་བྱ་བ་ནི་ཕྱོགས་ཀྱི་ཆོས་དེ་རྣམ་པ་གསུམ་སྟེ། རང་བཞིན་དང་། འབྲས་བུ་དང་མི་དམིགས་པར་བཤད་པ་ནི་དེའི་ཆས་ཁྱབ་པ་ལས་
གཞན་མ་ཡིན་ཏེ། དེ་ཡང་དེའི་ཆས་ཁྱབ་པ་རྣམ་པ་གསུམ་ཡིན་ནོ་ཞེས་བྱ་བར་འབྲེལ་ཏོ། །ཅིའི་ཕྱིར་ཞེ་ན། མེད་ན་མི་འབྱུང་བར་ངེས་པའི་ཕྱིར་རོ། །མེད་ན་མི་འབྱུང་བ་ལ་ཁྱབ་པའི་ཕྱོགས་ཀྱི་ཆོས་རྣམ་པ་གསུམ་ཁོ་ན་དང་། ཕྱོགས་ཀྱི་ཆོས་ངེས་པ་རྣམ་པ་གསུམ་སྟེ། མེད་ན་མི་འབྱུང་བར་

ངེས་པའི་ཕྱོགས་ཀྱི་ཆོས་ངེས་པར་རང་བཞིན་དང་འབྲས་བུ་དང་མི་དམིགས་པའི་བདག་ཉིད་ཕྱོགས་ཀྱི་ཆོས་ཐ་དད་པ་རྣམ་པ་གསུམ་མོ། །དེའི་ཆས་ཁྱབ་པ་མ་ཡིན་པ་ནི་གཏན་ཚིགས་མ་ཡིན་ཏེ་འབྲས་བུ་དང་། རང་བཞིན་དང་མི་དམིགས་པའི་བདག་ཉིད་རྣམ་པ་གསུམ་
ལ་ཕྱོགས་ཆོས་དེའི་ཆས་ཁྱབ་པ་ཁོ་ན་ཡིན་པའི་ཕྱིར་དེ་ནི་གཏན་ཚིགས་མེད་པ་མ་ཡིན་ནོ་ཞེས་བཤད་ཟིན་ཏོ། །དེའི་ཕྱིར་གཏན་ཚིགས་རྣམ་པ་གསུམ་ལས་ཕྱི་རོལ་དུ་གྱུར་པ་ལ་མེད་ན་མི་འབྱུང་བ་མེད་པའི་ཕྱིར་གཏན་ཚིགས་ཀྱི་ཐ་སྙད་དུ་བྱེད་པ་གཏན་ཚིགས་རྣམ་པ་གསུམ་ལ་མེད་ན་མི་འབྱུང་
བ་གདོན་མི་ཟ་བར་ཡོད་པས་དེ་གཏན་ཚིགས་མ་ཡིན་པར་བརྗོད་པ་བསལ་བ་ཡིན་ནོ། །དེ་ལྟ་ན་ཡང་དེ་ནི་གཏན་ཚིགས་ལྟར་སྣང་བ་ཡང་མཚན་ཉིད་འདི་བརྗོད་ན། དེ་ལ་སློབ་མ་རྣམས་གཏན་ཚིགས་ཀྱི་ཐ་སྙད་ལྡོག་པར་འགྱུར་རོ་སྙམ་ནས། གཏན་ཚིགས་ལྟར་སྣང་དེ་ལས་གཞན། ཞེས་
བྱ་བ་སྨོས་སོ། །དེ་བས་ན་ཕྱོགས་ཆོས་དེའི་ཆས་ཁྱབ་པ་ནི་ཞེས་བྱ་བ་གཏན་ཚིགས་ཀྱི་མཚན་ཉིད་ལས་གཞན་པ་དེ་དག་ནི་མཚན་ཉིད་མ་ཚང་བའོ། །གཏན་ཚིགས་ལྟར་སྣང་བ་གོ་བར་འགྱུར་རོ་སྙམ་ནས་དེའི་མཚན་ཉིད་མ་བརྗོད་དོ། །འདི་ལྟར་ཕྱོགས་ཆོས་ཞེས་བརྗོད་པས་གང་ལ་ཕྱོགས་ཆོས་
མེད་དེ་གཏན་ཚིགས་མ་ཡིན་ནོ། །དེའི་ཆས་ཁྱབ་པ་ཞེས་བྱ་བ་བརྗོད་པས་གང་ལ་དེའི་ཆས་ཁྱབ་པ་དང་བྲལ་བའི་ཁྱབ་པར་བྱ་བ་དང་ཁྱབ་པར་བྱེད་པ་ཕྱིན་ཅི་ལོག་པའོ། །དེ་ལ་ཡོད་པ་དང་མེད་པ་དེའི་གཏན་ཚིགས་ཀྱི་ཚུལ་མ་ཚང་བ་ནི་མ་གྲུབ་པའམ་འགལ་བའམ་མ་ངེས་པའི་གཏན་ཚིགས་ལྟར་
སྣང་བར་གོ་བར་བྱའོ། །འདི་ལྟར་མཚན་ཉིད་གང་གི་དོན་གང་ཡིན་སློབ་མ་ལ་བསྟན་པས་དེའི་མཚན་ཉིད་དང་བྲལ་བ་ལ་དེའི་ཐ་དད་རྣམ་ལ་རང་ཉིད་འཇུག་པར་མི་འགྱུར་རོ། །དེ་མ་ཡིན་པའི་ངོ་བོ་ཡོངས་སུ་སྤངས་ནས་དེའི་ངོ་བོ་རྟོགས་པའི་ཕྱིར་དེ་ནི་འབད་པ་མེད་པའི་འབྲས་བུ་དང་ལྡན་པ་ཡིན་ནོ། །
གཞན་དུ་གཏན་ཚིགས་ལྟར་སྣང་བ་བསྟན་པ་གང་ཡིན་པ་དེ་བློ་དམན་པའི་དབང་དུ་བྱས་པའོ། །རབ་ཏུ་བྱེད་པ་འདི་ནི་བློ་རྒྱ་ཆེ་བ་རྣམས་ལ་བསྟན་ན་མཛེས་ཏེ་མདོར་བསྡུས་ནས་བརྗོད་པའི་ཕྱིར་རོ། །དེ་ཉིད་ནི་མདོར་བསྡུས་ནས་ཇི་ལྟ་བར་བཤད་པ་བཞིན་དུ་རྟོགས་པར་ནུས་པས་བློ་དམན་པ་དག་ནི་

མ་ཡིན་ཏེ། དེ་དག་ནི་རྒྱས་པར་བརྗོད་པ་ལས་གཞན་པ་ཇི་ལྟ་བ་བཞིན་དུ་དོན་རྟོགས་པ་མེད་པའི་ཕྱིར་རོ། །དེ་ཉིད་ཀྱི་ཕྱིར་ན་དོན་གྱིས་འཕངས་པའི་ཉེ་བར་བཀོད་པ་སྔ་མ་ཁོ་ན་བཞིན་དུ་གཏན་ཚིགས་ལྟར་སྣང་བའི་མཚན་ཉིད་དང་དེ་ལ་ཉེ་བར་བརྗོད་དོ། །དེ་ནི་འདིར་གཏན་ཚིགས་ཀྱི་མཚན་ཉིད་དང་
གྲངས་ངེས་པ་དང་དེ་ནི་གཏན་ཚིགས་རྣམ་པ་གསུམ་དུ་ངེས་པས་བཟུང་བར་བཤད་དོ། །དེ་ནི་གཉི་གའི་རྒྱུ་ཡིན་པའི་ཕྱིར་གཉི་ག་དང་འབྲེལ་བར་བཤད་པ་དང་གཏན་ཚིགས་ལྟར་སྣང་བའི་མཚན་ཉིད་ཤུགས་ཀྱིས་བཤད་པས། རྗོད་པར་བྱེད་པའི་རྒྱུ་མཚན་མ་ཡིན་ནོ་སྙམ་ནས་ཚིགས་སུ་བཅད་པའི་
དོན་རྣམ་པ་དྲུག་ཏུ་རྒྱས་པར་བཤད་དོ། །གཞན་ཡང་འདི་དག་ཀྱང་ལེགས་པར་མཐོང་སྟེ། རྣམ་གསུམ་ཉིད་ཅེས་བྱ་བ་ནི། རང་བཞིན་དང་། འབྲས་བུ་དང་། མི་དམིགས་པ་ཐ་དད་པས་གཏན་ཚིགས་དེ་ནི་ཐ་དད་པའོ། །དེ་བཞིན་དུ་རྣམ་གསུམ་ཉིད་ནི་ཕྱོགས་ཀྱི་ཆོས་དང་རྗེས་སུ་འགྲོ་བ་
དང་ལྡོག་པའི་ངོ་བོ་ཐ་དད་པ་རྣམ་པ་གསུམ་ནི་ཚུལ་གསུམ་ཁོ་ནའོ། །དེའི་ཆས་ཁྱབ་ཅེས་བརྗོད་པས་རྗེས་སུ་འགྲོ་བ་དང་ལྡོག་པ་དག་བརྗོད་དོ། །གནོད་པ་མེད་པའི་ཡུལ་ཅན་ལ་སོགས་པའི་ཚུལ་གཞན་རུང་བ་ཡིན་དུ་ཟིན་ཀྱང་དེ་ནི་གཏན་ཚིགས་མ་ཡིན་ནོ། །གང་ལས་ཤེ་ན། གང་གི་ཕྱིར་
གཏན་ཚིགས་ལྟར་སྣང་བ་རང་བཞིན་ལ་སོགས་པ་རྣམ་པ་གསུམ་པོ་དེ་ལས་སམ་ཕྱོགས་ཀྱི་ཆོས་ལ་སོགས་པ་ཚུལ་གསུམ་པོ་དང་འབྲེལ་པ་ལས་གཞན་ནི་ཡང་དག་པར་ལྡན་པ་ལ་སོགས་པ་གཞན་དང་གནོད་པ་མེད་པའི་ཡུལ་ཅན་ལ་སོགས་པ་ལས་ཐ་དད་པའི་ཚུལ་དང་ལྡན་པ་ཁོ་ནའོ། །ཅིའི་ཕྱིར་
ཞེ་ན། མེད་ན་མི་འབྱུང་བ་རྣམ་པ་གསུམ་ཡིན། རྣམ་པ་གསུམ་ཁོ་ན་དང་ཚུལ་གསུམ་པོ་ཁོ་ནའི་གཏན་ཚིགས་ངེས་པ་གཞན་ལ་རང་བཞིན་ལ་སོགས་པ་ལས་ཐ་དད་པ་དང་ཚུལ་གཞན་ལ་རུང་བ་མེད་དོ་ཞེས་བྱ་བའི་དོན་ཏོ། །རང་བཞིན་ལ་སོགས་པ་ལས་ཐ་དད་པའི་འབྲེལ་པའི་རྒྱུ་མཚན་མེད་ན་མི་
འབྱུང་བ་མི་སྲིད་པ་དེ་བཞིན་དུ་ཚུལ་གཞན་ཡང་མེད་དོ། །ཇི་ལྟར་མེད་ན་མི་འབྱུང་བའི་ཚུལ་གཞན་ཡང་སྲིད་པ་ཁོ་ན་ཡིན་ནོ་ཞེས་བྱ་བ་དེ་ལྟར་མཚན་ཉིད་རྣམ་པ་དྲུག་ལ་སོགས་པའི་སྐབས་སུ་ཕྱོགས་ཀྱི་ཆོས་ཞེས་བྱ་བ་འདིར་གཏན་ཚིགས་ཀྱི་མཚན་ཉིད་ཀྱི་དབང་དུ་བྱས་པའོ། །གལ་ཏེ་ཕྱོགས་

སྤྱི་ཡིན་པར་ཉེ་བར་བཟུང་ན་ནི་གང་རྗེས་སུ་དཔག་པའི་ཡུལ་ཐམས་ཅད་ལ་གཏན་ཚིགས་མ་གྲུབ་པར་འགྱུར་བའམ། གྲུབ་ན་ནི་རྗེས་སུ་དཔག་པ་དོན་མེད་པ་ཡིན་ནོ་ཞེ་ན། ཕྱོགས་ནི་ཆོས་ཅན་ནོ་ཞེས་བྱ་བ་སྨོས་སོ། །གལ་ཏེ་སྤྱིའི་ཚིག་ཡིན་ན་ཇི་ལྟར་ཕྱོགས་ཀྱི་སྒྲ་ཆོས་ཙམ་ལ་
འཇུག་པ་ཡིན་ཞེ་ན། ཡན་ལག་ལ་སྤྱིར་ཉེ་བར་བཏགས་པའི་ཕྱིར་རོ། །ཕྱོགས་ཀྱི་སྒྲ་ནི་ཆོས་དང་། ཆོས་ཅན་ཡན་ལག་གཉི་གའི་སྤྱི་ཡིན་ཏེ་དེ་ནི་འདིར་ཆོས་ཅན་ཙམ་ལ་སྤྱིར་ཉེ་བར་བཏགས་ནས་ཕྱོགས་ཀྱི་སྒྲ་འཇུག་པའི་ཕྱིར་རོ། །དེའི་ཕྱོགས་གཅིག་ཏུ་གྱུར་པའི་རྒྱུ་མཚན་གྱིས་སྤྱིར་ཉེ་
བར་བཏགས་པའི་ཕྱིར། བསྒྲུབ་པར་བྱ་བའི་ཆོས་ཅན་ལས་གཞན་པ་དེ་ཐལ་བར་མི་འགྱུར་རོ། །དེ་སྐད་དུ། སྤྱི་དོན་བསྒྲུབ་བྱ་ཉིད་ཡིན་པས། །ཆོས་ཙམ་ཡང་ན་ཆོས་ཅན་ལ། །གཙོ་བོ་མིན་ཡང་ཉེ་བར་བཏགས། །བསྒྲུབ་བྱའི་ཕྱོགས་གཅིག་ཡིན་ཕྱིར་རོ། །ཞེས་གསུངས་ཏེ།
དེ་འདིར་སློབ་དཔོན་གྱིས་བཤད་པ་ལ། དབང་ཕྱུག་སྡེ་སྤོང་བའི་ལན་བཏབ་པར་འདོད་པས་ཕྱོགས་སྔ་མ་ནི། གལ་ཏེ་དགོས་པ་མེད་པའི་ཕྱིར། །ཞེས་བྱ་བ་ལ་སོགས་པ་སྨོས་ཏེ། དགོས་པ་མེད་ན་དངོས་ཀྱི་སྒྲའི་དོན་ཁྱད་དུ་གསད་པར་མི་འདོད་པའི་ཕྱིར་དགོས་པ་མེད་པས་ཉེ་བར་གདགས་པར་མི་
རིགས་སོ། །དེའི་ཕྱིར་ཆོས་ཅན་གྱི་ཆོས་ཡིན་པ་བླའོ་སྙམ་དུ་གཞན་སེམས་ན། དགོས་པ་མེད་པ་མ་ཡིན་ཏེ། གང་ལས་ཤེ་ན་ཐམས་ཅད་ནི་རྩོད་པའི་གཞི་འམ་གཞན་པའི་ཆོས་ཅན་ནོ། །དེའི་ཆོས་དེ་དགག་པའི་དོན་དུ་ཉེ་བར་བཏགས་པའི་དགོས་པ་དེ་ཡང་ཡོད་པ་དེའི་ཕྱིར་ཉེ་བར་བཏགས་པ་ནི་
ཆོས་ཅན་ཐམས་ཅད་ཀྱི་ཆོས་དགག་པའི་ཕྱིར་ཞེས་བྱ་བ་དགོས་པ་མེད་པ་མ་ཡིན་པས་གཏན་ཚིགས་མ་གྲུབ་པ་ཡིན་ནོ། །གལ་ཏེ་དེ་ལྟར་ཡོན་ཏན་ཅི་ཞིག་ཏུ་འགྱུར་ཞེ་ན། དེ་ལྟ་ན་མིག་གིས་གཟུང་བར་བྱ་བ་ཡིན་པའི་ཕྱིར་ཞེས་བྱ་བ་ལ་སོགས་པ་སྨོས་ཏེ། ཁྭའི་ནག་པོ་ཞེས་བྱ་བ་ལ་
སོགས་པ་སྨོས་པ་ནི་གཞི་ཐ་དད་པས་མ་གྲུབ་པ་ཡིན། ཡོངས་སུ་སྤངས་པ་ནི་གཏན་ཚིགས་ཀྱིས་བསལ་བ་ཡིན་ནོ། །ཆོས་ཅན་གྱི་ཆོས་ཞེས་ཐུང་མོང་དུ་བརྗོད་པ་དེ་དག་གིས་ཀྱང་དེ་གཏན་ཚིགས་སུ་འགྱུར་བས་ཆོས་ཅན་སྨོས་པས་ཀྱང་དེ་གྲུབ་པས་ཉེ་བར་བཏགས་སུ་མེད་དོ། །དེའི་ཕྱིར་ཉེ་བར་

བཏགས་པ་ཁོ་ན་དོན་མེད་དོ་སྙམ་ནས་གཞན་གྱིས། ཆོས་བརྗོད་པས་ཀྱང་ཞེས་བྱ་བ་སྨོས་ཏེ། ཆོས་ཅན་འབའ་ཞིག་བརྗོད་པ་ནི་མ་ཡིན་ཏེ། ཆོས་ཅན་ཡིན་པར་གཞི་ལྟ་གྲུབ་སྟེ་གཞི་ཆོས་ཅན་ཡིན་པས་གཞི་སྨོས་པ་དེ་གྲུབ་པས་དེ་ལས་ཡིན་ནོ། །གལ་ཏེ་ཡང་ཆོས་ནི་ཆོས་གཞན་ལ་བརྟེན་པའི་
རྒྱུ་མཚན་ཅི་ཞིག་ཡིན་ཅེ་ན། ཆོས་ནི་གཞན་ལ་བརྟེན་པ་ཡིན་པས་ཞེས་བྱ་བ་སྨོས་ཏེ། གཞན་གྱི་དབང་ཡིན་པའི་ཕྱིར་གདོན་མི་ཟ་བར་འདིས་ཆོས་ཅན་འཕངས་པ་ཡིན་ནོ། །དེའི་ཕྱིར་ཆོས་ཅན་ལྷག་པར་བརྗོད་པས་བསྒྲུབ་པར་བྱ་བའི་ཆོས་ཅན་ཁོ་ན་བྱེ་བྲག་ཏུ་བསྟན་པས་གང་ཡང་རུང་བ་ནི་མ་ཡིན་
ནོ། །ཆོས་ཅན་སྨོས་པས་མངོན་པར་འདོད་པའི་ཁྱད་པར་ཅན་གྱི་ཆོས་ཅན་འབའ་ཞིག་རྟོགས་པ་དེ་ཡང་བསྒྲུབ་པར་བྱ་བའི་ཆོས་ཅན་ཡིན་ནོ་སྙམ་དུ་འདོད་པས་ག་ལས་ཤེ་ན། ཉེ་བ་ཡིན་པའི་ཕྱིར་ཞེས་བྱ་བའི་གྲགས་པ་སྨོས་ཏེ། ཉེ་བ་ཡང་ཆོས་ཅན་བརྗོད་པས་མངོན་པར་འདོད་པ་ཁོ་ནར་རིག་
པར་བྱའོ། །ཆོས་ཅན་བརྗོད་པ་ཡང་ཆོས་ཅན་ཙམ་འཕངས་པ་ཁྱབ་པའི་རིགས་པ་ཡིན་ན་ནི། ཆོས་ཅན་བརྗོད་པ་དོན་མེད་པའི་ཕྱིར་རོ། །ཉེ་བར་གྱུར་པ་འདི་བསྒྲུབ་པར་བྱ་བའི་ཆོས་ཅན་ཡིན་ཏེ། དེ་ལ་ཐོག་མར་གཏན་ཚིགས་བསྟན་པའི་ཕྱིར་རོ། །གལ་ཏེ་བསྒྲུབ་པར་བྱ་བའི་ཆོས་ཅན་
ཉེ་བར་བརྗོད་པ་མ་ཡིན་ནོ། །ག་ལས་ཤེ་ན། དཔེའི་ཆོས་ཅན་ཡང་ཡིན་ཏེ་བསྒྲུབ་པར་བྱ་བའི་ཆོས་ཅན་འབའ་ཞིག་ཉེ་བ་མ་ཡིན་ཏེ། རེས་འགའ་ཁྱབ་པ་བསྟན་པ་སྔོན་དུ་འགྲོ་བའི་གཏན་ཚིགས་ཀྱི་སྦྱོར་བ་ལ་དཔེའི་ཆོས་ཅན་ལ་ཡང་ཐོག་མར་གཏན་ཚིགས་ཡོད་པར་སྟོན་པའི་ཕྱིར་རོ། །
གལ་ཏེ་ཉེ་བར་བསྒྲུབ་པར་བྱ་བའི་ཆོས་ཅན་དུ་མ་གྲུབ་པ་དེ་ལྟར་ཡོངས་སུ་ལྷག་པ་ལས་ཡིན་ཏེ། གང་གི་ཕྱིར་གཏན་ཚིགས་དེའི་ཆས་ཁྱབ་པ་ནི་དཔེའི་ཆོས་ཅན་ལ་ཡོད་པར་གྲུབ་པས་དཔེ་མེད་ན་གཏན་ཚིགས་དང་བསྒྲུབ་པར་བྱ་བའི་ཁྱབ་པ་བསྟན་པར་མི་ནུས་སོ་སྙམ་དུ་བསམས་ནས། ཆོས་
ཅན་ལྷག་པར་སྨོས་པ་དེས་ན་བསྒྲུབ་པར་བྱ་བའི་ཆོས་ཅན་ཡོངས་སུ་གཟུང་ངོ་། །དེའི་ཆས་ཁྱབ་པ་ཞེས་བྱ་བས་ཀྱང་དེའི་སྒྲ་ནི་ཆོས་བརྗོད་པ་ལ་ལྟོས་ནས་ཆོས་ཅན་དང་འབྲེལ་པའི་ཕྱིར་དེའི་འབྲེལ་པའི་དོན་ཀྱང་ཆོས་ཅན་སྨོས་པར་དགོས་པར་མི་བྱའོ། །གང་ལ་དགོས་པ་མེད་ན་མི་འབྱུང་བ་

དེ་ནི་ཡོངས་སུ་ལྷག་པའི་ཡུལ་ཡིན་ཏེ། ཆོས་ཅན་བརྗོད་པ་དང་དགོས་པ་གཞན་དང་འབྲེལ་པ་ཡིན་ན་ནི། དེ་ཡོངས་སུ་ལྷག་པ་ག་ལ་ཡིན་ཆོས་ཅན་བརྗོད་པས་ནི་བསྒྲུབ་པར་བྱ་བའི་ཆོས་ཅན་ཡོངས་སུ་བཟུང་ངོ་སྙམ་དུ་སེམས་ན་གྲུབ་པའི་མཐའ་སྨྲ་བས། གྲུབ་ཀྱང་
ཞེས་བྱ་བ་སྨོས་ཏེ། དེའི་ཆས་ཁྱབ་པ་དཔེའི་ཆོས་ཅན་ལ་ཡོད་པ་ལ་ཡང་ཆོས་ཅན་བརྗོད་པས་དཔེའི་ཆོས་ཅན་ཁོ་ནའི་ཆོས་གང་ཡིན་པ་དེ་གཏན་ཚིགས་ཡིན་ནོ་ཞེས་བསྣན་པའི་དོན་དུ་དོགས་པ་དེས་ན་མིག་གིས་བཟུང་བ་ལ་སོགས་པ་ཁོ་ན་ཡང་གཏན་ཚིགས་སུ་འགྱུར་གྱི་བྱས་པ་ལ་སོགས་
པ་མ་ཡིན་པས་མི་འདོད་པ་ཉིད་དུ་འགྱུར་བ་དེའི་ཕྱིར་ཉེ་བར་བཏགས་པར་བྱས་སོ། །ཅི་རྟོག་གེའི་བསྟན་བཅོས་ལ་བསྣན་པའི་ཕྱིར་བརྗོད་པ་མཐོང་ངམ་ཞེ་ན། མཐུན་པ་ལ་ཡོད་པ་ཁོ་ནས་ཞེས་བྱ་བ་ལ་སོགས་པ་སྨོས་ཏེ། དེ་ལ་གང་མཐུན་པ་ལ་ཡོད་པ་ཞེས་བྱ་བ་འདིར་གཏན་ཚིགས་ཀྱི་མཚན་
ཉིད་དེ། རིགས་མཐུན་པ་ཁོ་ན་ལ་ཡོད་པ་ཞེས་བྱ་བ་ངེས་པར་གཟུང་བས་གཏན་ཚིགས་ཀྱི་ལྡོག་པ་གྲུབ་མོད། གང་ལ་ཞེ་ན། བསྒྲུབ་པར་བྱ་བ་མེད་པའོ། །གང་འདི་མེད་པ་དེ་ནི་འདི་ཡིན་ནོ་ཞེས་བྱ་བས་མེད་པ་མེད་པར་སྨོས་པ་ནི་བསྣན་པའི་དོན་དུ་སློབ་དཔོན་གྱིས། མེད་པ་ལ་མེད་པ་ཞེས་བྱ་
བ་བཤད་པས་ཇི་ལྟ་བ་མེད་པ་ནི་གཞན་པ་དང་འགལ་བ་ལ་མ་ཡིན་པ་བཞིན་དུ། དེ་ལྟ་ན་འདིར་ཡང་ཆོས་ཅན་གྱི་ཆོས་ཞེས་བརྗོད་པས་བསྣན་པའི་དོན་དུ་དོགས་པར་འགྱུར་རོ། །གང་གི་ཚེ་ཞེ་ན། དཔེའི་ཆོས་ཅན་ལ་ཡོད་པར་གྲུབ་ཀྱང་ངོ་། །ག་ལས་ཤེ་ན། དེའི་ཆས་ཁྱབ་པ་ཞེས་སྨོས་
པས་སོ། །གང་ལ་ཞེ་ན། ཡོད་པ་བསྣན་པའི་དོན་ཡིན་པས་སོ། །དེ་ཉིད་ལ་དཔེའི་ཆོས་ཅན་ལ་ཡོད་པར་དོགས་པ་སྲིད་དོ། །གང་ལས་ཤེ་ན། ཡོངས་སུ་ལྷག་པས་བསྒྲུབ་པར་བྱ་བའི་ཆོས་ཅན་ཡོངས་སུ་བཟུང་བ་ནའོ། །འོ་ན་ནི་ཕྱོགས་ཀྱི་ཆོས་མེད་ན་གཏན་ཚིགས་མེད་པའི་ཕྱིར་
བསྣན་པའི་དོན་དུ་དོགས་པར་མི་བྱ་སྟེ། དེ་ལྟ་ན་བསྒྲུབ་པར་བྱ་བའི་ཆོས་ཅན་གྱིས་ཁྱབ་པའི་ཆོས་ཀྱང་གལ་ཏེ་ཆོས་ཅན་ཁ་ཅིག་ལ་ཉེ་བར་དམིགས་པ་དེ་དང་དེ་ཉིད་ལ་རང་གི་ཁྱབ་པར་བྱེད་པ་ལ་རྟོག་པ་སྐྱེའི་གཞན་དུ་ན་ཉེ་བ་དང་། རིང་བའི་རིམ་པ་བལྟ་བར་མི་འགྱུར་རོ། །ཆོས་ཅན་ཁ་ཅིག་ལ་མི་

དམིགས་ན་ཇི་ལྟར་གོ་བར་བྱེད་པ་ཡིན་དེ་ལྟར་ཡིན་ན་ཡང་ཐམས་ཅད་དུ་རང་གི་ཁྱབ་པར་བྱེད་པ་རྟོགས་པར་འགྱུར་ཏེ། ཉེ་བ་དང་རིང་བ་མེད་པའི་ཕྱིར་རོ་ཞེ་ན། དེས་ན་ཤུགས་ཀྱིས་ཞེས་བྱ་བ་ལ་སོགས་པ་སྨོས་ཏེ། གལ་ཏེ་འདི་དེ་མ་ཐག་ཏུ་ཤུགས་ཀྱིས་ཉེ་བར་བརྗོད་པ་དེའི་ཕྱིར་ཤུགས་
ཀྱི་དོན་ནི་བསྒྲུབ་པར་བྱ་བའི་ཆོས་ཅན་གྱི་མཚན་ཉིད་ཡོངས་སུ་བཟུང་བ་ཉན་པ་པོ་བློ་རྣོན་པོས་རྟོགས་པར་འགྱུར་ཏེ། འོན་ཀྱང་སྒྲ་མེད་པའི་དོན་ལ་རང་ཉིད་རྗེས་སུ་ཞུགས་ནས་རྟོགས་པར་དཀའ་བར་འགྱུར་བ་དང་། དེ་ལ་ཉེ་བར་བཏགས་པ་ཙམ་གྱིས་རང་ཉིད་སྒྲ་མེད་པའི་དོན་ལ་རྟོག་
པ་ན། ཆོས་ཅན་གྱི་ཆོས་ཞེས་བྱ་བ་འདི་དང་ཕྱོགས་ཆོས་ཞེས་བྱ་བ་ཡི་གེ་མཉམ་པ་དང་རྟོགས་པར་དཀའ་བ་ཡང་ཡོངས་སུ་སྤངས་པ་ཡིན་ནོ་ཞེས་བྱ་བའོ། །འདིར་ཡང་གི་སྒྲ་ནི་གང་གཞན་གྱིས་བསྟན་པ་ལ་རེ་བ་དང་བཅས་པ་དེས་ན་དོན་འདིའི་མཚན་ཉིད་བརྗོད་པས་རྟོགས་པར་མི་
འགྱུར་རོ་ཞེས་བྱ་བའོ། །ཇི་ལྟར་མཚན་ཉིད་རྟོགས་པའི་ཕྱོགས་ཀྱི་ཆོས་མེད་པས་གཏན་ཚིགས་མེད་ན་དོགས་པ་འདི་གང་ལས་ཡིན་སྙམ་པས་དེའི་ཕྱིར་དེ་དག་མཚན་ཉིད་ཀྱི་རྗེས་སུ་འབྲང་བ་རྣམས་ལ་བསྣན་པའི་དོན་དུ་དགོས་པ་ཡོངས་སུ་སྤང་པའི་ཕྱིར་ཡང་ཉེ་བར་བཏགས་པ་བྱས་སོ། །
འདིར་སྒྲའི་སྦྱོར་བ་ལ་གདོན་མི་ཟ་བར་རྣམ་པར་གཅོད་པའི་འབྲས་བུ་ཅན་ཉིད་དུ་ངེས་པར་གཟུང་བར་བྱ་སྟེ། ཕྱོགས་ཀྱི་ཆོས་ཞེས་བྱ་བ་འདིར་དྲུག་པའི་བསྡུ་བ་ཡིན་གྱི། གཞན་གྱི་བསྡུ་བ་ནི་སྲིད་པ་མ་ཡིན་ནོ། །དེ་ལྟ་ན་ཡང་ཕྱོགས་ཀྱི་ཆོས་ཞེས་བྱ་བ་ཁོ་ནར་ངེས་པ་བཟུང་བས་དེའི་ཆས་ཁྱབ་པ་
དང་འགལ་བ་ཡིན་ནོ་ཞེས་འགལ་བའི་མཚན་ཉིད་བརྗོད་པ་ན། གལ་ཏེ་ཕྱོགས་ཆོས་ཞེས་བྱ་བ་ལ་སོགས་པ་སྨོས་ཏེ། ཕྱོགས་ཀྱི་ཁྱད་པར་གཞན་རྣམ་པར་གཅོད་པ་ལ་ལྟོས་པའི་ཕྱིར། དེའི་ཁྱད་པར་ལ་ལྟོས་པའི་ཆོས་ནི་གཞན་ལ་ཕྱོགས་སུ་བྱས་པ་དང་གཞན་གྱི་ཚེའི་མཐུན་པའི་ཕྱོགས་ལ་རྗེས་
སུ་མི་འཇུག་གོ། །དེ་ལྟར་ན་ཕྱོགས་ཀྱིས་ཁྱད་པར་དུ་བྱ་བ་ནི་མཐུན་པའི་ཕྱོགས་ཁོ་ན་ཡིན་གྱི་གཞན་དུ་ནི་མ་ཡིན་ཏེ། དཔེར་ན་ལྷ་སྦྱིན་གྱི་བུ་གང་ཡིན་པ་དེ་ཁོ་ནའི་ཡིན་གྱི། མཆོད་སྦྱིན་གྱི་མ་ཡིན་པ་བཞིན་དུ་དེས་ན་གཞན་ལ་མི་འཇུག་པས་ཐུན་མོང་མ་ཡིན་པ་ཉིད་དུ་ཐུན་མོང་པ་ནི་མ་ཡིན་པས་དེའི་

ཆས་ཁྱབ་པ་དང་འགལ་ལོ་ཞེས་བྱ་བའི་དོན་ཏོ། །དེའི་ཆས་ཁྱབ་པ་ནི་བསྟན་པའི་ཕྱིར་ཐུན་མོང་བ་ཡིན་པ་དེས་ནི་ཕྱོགས་ཀྱི་ཆོས་ནི་དེའི་ཆས་ཁྱབ་པ་མ་ཡིན་ལ། ཡང་ན་དེའི་ཆས་ཁྱབ་པ་ནི་ཕྱོགས་ཀྱི་ཆོས་མ་ཡིན་པས་འགལ་བའི་མཚན་ཉིད་ཡིན་ནོ་ཞེས་བྱའོ། །འོན་ཀྱང་དེའི་ཆས་
ཁྱབ་པ་ནི་བསྒྲུབ་པར་བྱ་བའི་ཆོས་ཁྱབ་པར་བྱེད་པ་དེ་ནི་གཏན་ཚིགས་སུ་འགྱུར་བ་གཞི་ཆོས་ཅན་དེ་ལ་ཡོད་པ་ཁོ་ནའམ། ཡང་ན་ཁྱབ་པར་བྱ་བའི་གཏན་ཚིགས་དེ་ཉིད་ནི་ཁྱབ་པར་བྱེད་པ་བསྒྲུབ་བྱའི་ཆོས་སུ་གྱུར་པ་ཁོ་ན་ལ་ཡོད་པ་ཞེས་བྱ་བ་རང་གིས་བསྒྲུབ་པར་བྱ་བ་དང་། མེད་ན་མི་འབྱུང་བའི་མཚན་
ཉིད་འཆད་པར་འགྱུར་རོ། །འདིས་ཀྱང་ཕྱོགས་སུ་བྱས་པས་གཞན་ལ་འཇུག་པ་གདོན་མི་ཟ་བར་འཕངས་པ་ནི་མེད་ན་གང་གི་མཚན་ཉིད་ལ་གནོད་པར་དོགས་པ་ཡིན། དེ་ལྟ་ན་ཕྱོགས་སུ་བྱས་པ་དེ་ཉིད་ལ་ཡོད་པ་ཁོ་ན་བསྒྲུབ་པར་བྱ་བའི་ཆོས་ཅན་ལ་གཏན་ཚིགས་གནས་པ་དོན་དེའི་ཆས་ཁྱབ་པ་བསྟན་
པ་ཡིན་ནོ། །གང་ཞིག་དེའི་ཆོས་ཅན་ལ་རང་གི་བསྒྲུབ་པར་བྱ་བ་མེད་ན་མི་འབྱུང་བ་དེ་ཉིད་གོ་བར་བྱེད་པའི་རྒྱུ་མཚན་ཡིན་པའི་ཕྱིར་གཞན་གྱི་ཆོས་ཅན་དེ་ལ་ཡང་རང་གི་བསྒྲུབ་པར་བྱ་བ་མེད་ན་མི་འབྱུང་བའི་རྒྱུ་མཚན་ནི་སྒྲུབ་པར་བྱེད་པའི་ཚད་མའི་རྒྱུ་མཚན་མ་ཡིན་ནོ། །ལ་ལར་མཐུན་པའི་ཕྱོགས་
ཕལ་ཆེ་བའམ་ལྷན་ཅིག་ཡོད་པ་ཙམ་མཐོང་བ་རྒྱུ་མཚན་མ་ཡིན་ཏེ། དཔེར་ན་རྡོ་རྗེ་ལ་མཚོན་གྱིས་གཅོད་པ་ཡིན་ཏེ་ས་ཡིན་པའི་ཕྱིར་ཤིང་བཞིན་ནོ་ཞེས་བྱ་བ་ལ་སོགས་པས་གཞན་ལ་མཚོན་གྱིས་གཅོད་པ་མེད་ན་མི་འབྱུང་བ་ཡང་རྡོ་རྗེ་ལ་དེ་བཞིན་དུ་ཡོད་པར་འགྱུར་བ་མ་ཡིན་ནོ། །གལ་ཏེ་ཕྱོགས་སུ་
བྱས་པ་ལས་གཞན་ཁོ་ན་ལ་ཁྱབ་པ་བསྟན་པར་བྱའོ་ཞེས་བྱ་བའི་ངེས་པ་དེ་ཇི་ལྟར་ཡིན། ཡོད་པ་ཉིད་སྐད་ཅིག་མའི་དངོས་པོ་རྣམས་ལ་བསྟན་པ་གང་ཡིན་པ་ནི་དོན་ཐམས་ཅད་སྐད་ཅིག་མས་ཁྱབ་པར་འདོད་པས་དེ་ལས་འགའ་ཞིག་ཀྱང་མཐུན་པའི་ཕྱོགས་སུ་གྱུར་པ་མེད་དེ། གང་ཞིག་མེ་ལྕེ་འབར་
བ་ལ་སོགས་པ་འབའ་ཞིག་ལ་སྐད་ཅིག་མ་ཁས་བླངས་སུ་ཟིན་ཀྱང་དེ་ཡང་མངོན་སུམ་མ་ཡིན་ཏེ། སྐད་ཅིག་མའི་ཐ་དད་པར་གྱུར་པ་ནི་ཤིན་ཏུ་ཕྲ་བས་ཉེ་བར་མི་རྟོགས་པའི་ཕྱིར་རོ། །གཞན་ཁོ་ན་ལ་ཁྱབ་པ་མ་བསྟན་པར་བསྒྲུབ་པར་བྱ་བའི་ཆོས་ཅན་ལ་མ་ཡིན་ནོ་ཞེས་བྱ་བའི་རིགས་པ་འདི་ཅི་ཞིག་ཡིན། །

དེ་ལྟ་ན་གཏན་ཚིགས་ཀྱི་མཚན་ཉིད་བསྟན་པ་བརྟག་པ་ཡིན་གྱི། དངོས་པོའི་སྟོབས་ཀྱིས་ཞུགས་པ་མ་ཡིན་ནོ། །དེའི་ཕྱིར་རང་གི་བསྒྲུབ་པར་བྱ་བ་དང་འབྲེལ་པ་ལས་ཀྱང་གཏན་ཚིགས་ལ་ཁྱབ་པ་འགྲུབ་སྟེ། དེ་ཡང་མི་མཐུན་པའི་ཕྱོགས་ལ་གནོད་པ་ཅན་གྱི་ཚད་མ་ཡོད་ན་བསྒྲུབ་པར་བྱ་བའི་ཆོས་
ཅན་ལ་ཡང་འགྲུབ་པའི་ཕྱིར་གཞན་ལ་རྗེས་སུ་འབྲང་བ་ལ་ཅུང་ཟད་ཀྱང་ལྟོས་པ་མ་ཡིན་པས་སོ། །དེ་ཉིད་ཀྱི་ཕྱིར། གཞན་དུ་གང་དང་གང་ལ་འགའ་ཞིག་ཏུ་མཐོང་བ་དེའི་འབྲེལ་པར་རིག་པ་ནི། དེ་དང་དེ་ནི་དེ་ལ་གོ་བར་བྱེད་པ་ཡིན་ནོ་ཞེས་དངོས་པོའི་གོ་བར་བྱེད་པ་མཚུངས་ཏེ། གང་ཡང་རྗེས་སུ་
དཔག་པ་དང་། །དེ་མཚུངས་ལ་ཡང་ཡོད་གྱུར་པ། །ཞེས་བྱ་བ་ལ་སོགས་པའི་མཚན་ཉིད་ནི་དེ་ལ་བསྒྲུབ་པར་བྱ་བའི་ཆོས་དང་ལྡན་པ་ནི། མཐུན་པའི་ཕྱོགས་སུ་བརྗོད་དོ། །དེས་ན་ཡོད་པ་ཉིད་ནི་བསྒྲུབ་པར་བྱ་བའི་ཆོས་ཡོད་པ་ཡིན་ནོ་ཞེས་བྱ་བ་དེ་བཞིན་དུ་དེ་དང་དེའི་ཆོས་ཀྱིས་བསྒྲུབ་པར་བྱ་
བའི་ཆོས་ཅན་ཡང་མཐུན་པའི་ཕྱོགས་ཀྱི་དངོས་པོ་ལས་ལྡོག་པ་མ་ཡིན་ནོ། །བསྒྲུབ་པར་བྱ་བར་འདོད་པ་ཉིད་ཀྱིས་འདོད་པས་གཞན་པའི་ཕྱོགས་ཀྱི་མཚན་ཉིད་དེ་བསལ་བར་མི་ནུས་པའི་ཕྱིར་རོ། །དེའི་ཕྱིར། དེའི་ཆས་ཁྱབ་པ་ཞེས་བརྗོད་པས་རང་གི་བསྒྲུབ་པར་བྱ་བ་དང་། མེད་ན་མི་འབྱུང་
བའི་འབྲེལ་པའི་རྒྱུ་མཚན་ལས་གཞན་དུ་མི་རིགས་པར་བརྗོད་དོ། །གདོན་མི་ཟ་བར་གཞན་ལ་མི་འཇུག་པས་འཕངས་སོ་ཞེས་ཇི་ལྟར་དོགས་པ་ཡིན་ཞེ་ན། བདེན་ཏེ། གཏན་ཚིགས་ཐམས་ཅད་ཕྱོགས་སུ་བྱས་པ་ཁོ་ནའི་ཆོས་ཅན་ལ་རང་གི་བསྒྲུབ་པར་བྱ་བ་དང་འབྲེལ་པ་ཚད་མས་ངེས་པར་
ནུས་ན་ནི་འདིས་དོགས་པར་མི་བྱ་སྟེ། དཔེར་ན་ཡོད་པའི་མཚན་ཉིད་ཀྱི་རང་བཞིན་གྱི་གཏན་ཚིགས་ནི་སྐད་ཅིག་མ་བསྒྲུབ་པར་བྱ་བའི་བདག་ཉིད་ལས་བཟློག་པ་ལ་གནོད་པ་ཅན་གྱི་ཚད་མ་འཇུག་པ་བཞིན་དུ། འབྲས་བུའི་གཏན་ཚིགས་ནི་ཕྱོགས་སུ་བྱས་པའི་ཆོས་ཅན་དང་རང་བཞིན་གྱི་གཏན་
ཚིགས་འགའ་ཞིག་གི་འབྲེལ་པ་ནི་མངོན་སུམ་དང་མི་དམིགས་པས་སྒྲུབ་ན། ཇི་ལྟར་ལྐོག་ཏུ་གྱུར་པའི་བསྒྲུབ་པར་བྱ་བའི་ཆོས་གཟུང་བར་བྱ་བ་ཡིན། དེའི་ཕྱིར་གཞན་ལ་རབ་ཏུ་གྲུབ་པ་དེ་ལས་ཡིན་ནོ་ཞེས་བྱའོ། །དེ་ལ་ལྟོས་པས་གཞན་ལ་མི་འཇུག་པས་ཐུན་མོང་མ་ཡིན་པ་སྲིད་པར་

དོགས་པས་དེ་ནི་བསྒྲུབ་པར་བྱ་བ་དང་བཟློག་པ་གཞན་དག་ལ་འཇུག་པ་མ་ངེས་པ་ནི་དེ་གཉི་ག་ལས། དེའི་ཆོས་ཅན་ཕྱི་རོལ་དུ་གྱུར་པ་མི་རིགས་པས་མ་ངེས་པ་དང་། བསྒྲུབ་པར་བྱ་བ་ལ་འཇུག་པ་དང་རྣམ་པར་གཅོད་པ་དག་གིས་ཐམས་ཅད་བསྡུས་པས་གཏན་ཚིགས་དེ་
ལ་ཐེ་ཚོམ་ཟ་བར་འགྱུར་རོ། །ལ་ལར་སྔར་རྟེན་ལ་ཡོད་པར་བཟུང་བ་བརྗེད་པ་ལ་འབྲེལ་པ་སྒྲུབ་པའི་ཚད་མས་དྲན་པ་ནི་གཞན་ལ་འཇུག་པ་ལ་ལྟོས་པ་ཡིན་སྙམ་སེམས་ནས་འདི་དག་གི་ལན་ནི་མ་ཡིན་ཏེ་ཞེས་བྱ་བ་སྨོས་ཏེ། གཞན་ལ་མི་འཇུག་པ་ནི་མ་ཡིན་ནོ། །ག་ལས་ཤེ་ན་མ་འབྲེལ་
པ་ནི་འབྲེལ་པ་མེད་པའོ། །རྣམ་པར་གཅོད་པས་བྱེ་བྲག་ཏུ་བྱས་པའི་ཕྱིར་ཡིན་གྱི་ཕྱོགས་ནི་གཞན་དང་ལྡན་པ་རྣམ་པར་གཅོད་པས་བྱེ་བྲག་ཏུ་བྱས་པ་མ་ཡིན་ནོ། །དེ་ལྟ་ན་ཡང་མ་འབྲེལ་པ་རྣམ་པར་གཅོད་པ་ཡང་ཆོས་ཅན་ལ་ཆོས་ཡོད་པར་གང་ལ་ཐེ་ཚོམ་ཟ་བ་དེ་ལ་མ་འབྲེལ་པ་རྣམ་པར་གཅོད་
པའི་རིགས་པ་ཐོབ་པའི་ཕྱིར་ཏེ། དཔེར་ན་ནག་པ་འཕོང་སྐྱེན་ནོ་ཞེས་བྱ་བ་ལྟ་བུའོ། །ནག་པ་འཕོང་སྐྱེན་པ་ཅི་ཡོད་དམ་མེད་ཅེས་ཐེ་ཚོམ་ཟ་བ་དེའི་ཕྱིར་ནག་པ་འཕོང་སྐྱེན་ནོ་ཞེས་བྱ་བ་དེ་ལ་ཡོད་པར་སྟོན་པར་བྱེད་པ་ཐོས་ནས་ཕྱོགས་གཞན་ཡོད་པར་གྱུར་པ་ཉན་པ་པོ་དོགས་པར་རྣམ་པར་
གནས་པ་བསལ་བའི་ཕྱིར་མ་འབྲེལ་པ་རྣམ་པར་གཅོད་པའི་རིགས་པ་འདིར་ཐོབ་པའི་ཕྱིར་རོ། །གཞན་གྱི་འདོད་པའི་རྣམ་པར་གཅོད་པ་བསལ་བར་འདོད་པ་ནི། གཞན་དང་ལྡན་པ་རྣམ་པར་གཅོད་པས་ཁྱད་པར་དུ་བྱས་པ་མ་ཡིན་ནོ་ཞེས་བྱ་བ་སྨོས་ཏེ་གཞན་ལ་རྗེས་སུ་མི་འཇུག་པས་ཐུན་
མོང་མ་ཡིན་པ་ཞེས་བྱ་བར་སྦྱར་རོ། །འདིར་ཡང་དཔེ་ནི་དཔེར་ན། སྲིད་སྒྲུབ་འཕོང་སྐྱེན་ནོ་ཞེས་བྱ་བ་ལྟ་བུའོ། །སྒྲ་མཚུངས་ཀྱང་འདི་འཕོང་སྐྱེན་ནོ་ཞེས་བྱ་བའི་སྒྲའི་ནུས་པས་ཡོན་ཏན་ཁྱད་པར་ཅན་ལ་འཇུག་སྟེ། སྲིད་སྒྲུབ་འཕོང་སྐྱེན་པར་གྲུབ་པའི་ཕྱིར་མ་འབྲེལ་པ་དོགས་པ་མེད་དེ་འདི་འདྲའི་ཁྱད་པར་
བཅས་པ་གཞན་ལ་ཡང་ཡོད་དམ་མེད་ཅེས་གཞན་དང་ལྡན་པའི་ཉན་པ་པོ་དགོས་པ་ན་གང་གི་ཚེ་སྲིད་སྒྲུབ་འཕོང་སྐྱེན་ནོ་ཞེས་བརྗོད་པ་དེའི་ཚེ་གཞན་དང་ལྡན་པ་རྣམ་པར་གཅོད་པའི་རིགས་པ་འཐོབ་པོ། །བསྟན་པར་བྱ་བ་ལ་ཐེ་ཚོམ་གནས་པའི་ཕྱོགས་དག་ཕན་ཚུན་མི་མཐུན་པའི་ཕྱིར་གཅིག་ལ་བསྟན་པ་

དེས་གཞན་རྣམ་པར་བཅད་པར་རིགས་པའི་སྟོབས་ཀྱིས་འོངས་པའི་ཕྱིར་རོ། །དེ་འདིར་ཕྱོགས་ལ་ཆོས་འདི་ཡོད་དམ་མེད་ཅེས་དོགས་པ་ལ་ཕྱོགས་ཀྱི་ཆོས་ཞེས་དེ་ལ་ཡོད་པ་ཉིད་བསྟན་པའི་མ་འབྲེལ་པ་རྣམ་པར་གཅོད་པ་ཡིན་གྱི། གཞན་དང་ལྡན་པ་ནི་མ་ཡིན་ནོ། །དེའི་ཆས་ཁྱབ་པའི་
དེ་བསྟན་པས་ན་དེ་ལ་ཐེ་ཚོམ་ཟ་བར་འགྱུར་རོ་སྙམ་ནས་དེའི་ཆ་ནི་དེའི་ཆོས་སོ། །དེའི་སྒྲས་ནི་ཕྱོགས་ཁྱད་པར་དུ་བྱེད་ཀྱི་ཆོས་ནི་མ་ཡིན་ཏེ། ཆོས་ལ་ཆོས་རྟེན་པ་མི་སྲིད་པའི་ཕྱིར་རོ། །ཆ་ནི་ཆོས་ལ་བྱའི་ཕྱོགས་གཅིག་མ་ཡིན་ཏེ། ཕྱོགས་ཀྱི་སྒྲ་ཆོས་ཅན་ཙམ་བརྗོད་པའི་ཕྱིར་རོ། །དེའི་
ཆ་ནི་ཆ་ཤས་མ་ཡིན་ཏེ་ཕྱོགས་གཅིག་མེད་པའི་ཕྱིར་རོ། །ཕྱོགས་ཀྱི་ཆོས་ལ་ཡོད་པ་དེའི་ཁྱབ་པ་ནི་གང་ཁྱབ་པར་བྱ་བ་དང་། གང་ཁྱབ་པར་བྱེད་པ་དེ་གཉི་གའི་ཆོས་སུ་རྟོགས་པ་ཡིན་ཏེ། གང་གི་ཚེ་ཁྱབ་པར་བྱེད་པ་བརྗོད་པར་འདོད་པ་དེའི་ཚེ་ཁྱབ་པར་བྱེད་པར་གོ་བར་བྱའོ། །དེ་ལ་ཞེས་བྱ་
བ་ནི་ཡོད་པའི་འདུན་པའི་དོན་གཙོ་བོ་ཡིན་གྱི་འདིར་ངེས་པར་གཟུང་བ་ནི་མ་ཡིན་ཏེ། ཆོས་ལ་ཆོས་མི་རྟེན་པའི་ཕྱིར་རོ། །དེས་ན་འདིའི་དོན་ནི་དེ་ལ་ཁྱབ་པ་ནི་ཆོས་ཅན་གང་ལ་ཁྱབ་པར་བྱ་བ་ཡོད་པ་དེ་ལ་ཁྱབ་པར་བྱེད་པ་ཡོད་པ་ཁོ་ན་སྟེ། བདག་ཉིད་དུ་གྱུར་པའི་ཆོས་ཀྱིས་ཁྱབ་པ་ཡིན་ནོ། །དེ་ཡང་
ཁྱབ་པར་བྱ་བ་ཡོད་པ་ལ་ལྟོས་ནས་ཁྱབ་པར་བྱེད་པ་ཁོ་ནའི་ཁྱབ་པར་རྟོགས་སོ། །དེ་བཞིན་དུ་ངེས་བཟུང་གིས་ཁྱབ་པར་བྱེད་པ་ཁོ་ན་དེ་ལ་ཡོད་པ་ནི་མ་ཡིན་ཏེ། གཏན་ཚིགས་མེད་པར་ཐལ་བར་འགྱུར་བས་ཁྱབ་པར་བྱེད་པ་མ་ཡིན་པ་ལུས་ཅན་ཉིད་ལ་སོགས་པ་དེ་ཡོད་པའི་ཕྱིར་རོ། །དེ་ཁོ་ན་ལ་ཡོད་
པ་ཡང་མ་ཡིན་ཏེ། རྩོལ་བ་ལས་བྱུང་བ་ལ་སོགས་པ་གཏན་ཚིགས་མ་ཡིན་པར་འགྱུར་བ་དང་། ཐུན་མོང་གི་གཏན་ཚིགས་སུ་འགྱུར་ཏེ། གཞལ་བྱ་ལ་སོགས་པ་ཉིད་མི་རྟག་པ་ལ་ཡོད་པའི་ཕྱིར་རོ། །གང་གི་ཚེ་ཁྱབ་པར་བྱ་བའི་ཆོས་བརྗོད་པར་འདོད་པ་དེའི་ཚེ་ཁྱབ་པར་བྱ་བའི་གོ་བར་བྱེད་པ་ནི་ཁྱབ་
པར་བྱེད་པ་དེ་ཁོ་ན་ལ་ཡོད་པའོ། །ཆོས་ཅན་གང་ལ་ཁྱབ་པར་བྱེད་པ་ཡོད་པ་དེ་ཁོ་ན་ལ་ཡོད་པ་ན་དེ་མེད་དུ་ཟིན་ཀྱང་ཁྱབ་པ་ཡིན་ནོ། །འདི་ཡང་ཁྱབ་པར་བྱ་བ་ཁོ་ན་དེ་ལ་ཡོད་པ་ཞེས་ངེས་པར་བཟུང་བ་ནི་གཏན་ཚིགས་མེད་པ་ཐལ་བར་འགྱུར་བས་བརྟེན་པར་མི་བྱ་སྟེ། ཁྱབ་པར་བྱ་བ་མ་ཡིན་པ་ཡང་ཡོད་པའི་

པའི་ཕྱིར་རོ། །ཁྱབ་པར་བྱ་བ་ནི་དེ་ལ་ཡོད་པ་ཁོ་ན་ཡང་མ་ཡིན་ཏེ། །མཐུན་པའི་ཕྱོགས་ཀྱི་ཕྱོགས་གཅིག་ལ་ཡོད་པ་གཏན་ཚིགས་སུ་མི་འགྱུར་བ་དང་ཐུན་མོང་བ་གཏན་ཚིགས་སུ་འགྱུར་ཏེ། །གཞལ་བྱ་ནི་རྟག་པ་རྣམས་ལ་གདོན་མི་ཟ་བར་ཡོད་པའི་ཕྱིར་རོ། །ཁྱབ་པར་བྱ་
བ་དང་། །ཁྱབ་པར་བྱེད་པར་བརྗོད་པའི་ཁྱབ་པ་ནི་གཉི་ག་ལ་ཆོས་མཚུངས་པས་གཅིག་ཏུ་རྟོགས་ན་ནི་ལྡན་པ་ལ་སོགས་པ་གཞན་དུ་མ་གྱུར་ཅིག་ཅེས་བྱ་བའི་ཕྱིར་བསྟན་ཏོ། །འདི་ལྟར་སྔར་མི་ལྡན་པར་རྣམ་པར་བཅད་པས་ངེས་པར་བཟུང་ནས་ཕྱིས་གཞན་དང་ལྡན་པའི་རྣམ་པར་གཅོད་པ་ཡིན་
ན་གཉི་ག་ལ་རྣམ་པ་གཅིག་གིས་ཁྱབ་པོ་ཞེས་བྱ་བ་ལས་ཡིན། དེ་སྐད་དུ་ཡང་། རྟགས་ལ་རྟགས་ཅན་ཡོད་ཉིད་དང་། །ཅིག་ཤོས་རྟགས་ཅན་ཁོ་ན་ལའོ། །ངེས་པ་ལས་ནི་བཟློག་པ་ལ། །རྟགས་དང་རྟགས་ཅན་འབྲེལ་པ་མེད། །ཅེས་བྱ་བ་གསུངས་ཏེ། དེས་ན་སློབ་དཔོན་གྱིས་
ལྡན་པའི་སྟོབས་ཀྱིས་གོ་བར་བྱེད་པ་གཞན་དག་ལ་ཉེས་པ་བརྗོད་དོ། །ལྡན་ཡིན་མེ་དང་དུ་བ་ན། །ཆ་འགའ་ཞིག་གིས་མ་ཡིན་ཏེ། །དུ་བ་དེས་ནི་ཐམས་ཅད་ཀྱི། །གསལ་བྱེད་ཐོབ་པར་འགྱུར་ཕྱིར་ཏེ། །འདི་ལ་འཇུག་པ་མ་ཡིན་ནོ། །ཞེས་བཤད་དོ། །འདི་ལྟར་ལྡན་པ་ནི་གཉི་ག་ལ་ཁྱད་
པར་མེད་པར་ཐལ་བར་འགྱུར་བས་ཁྱབ་པ་མ་ཡིན་ནོ། །ཁྱབ་པར་བྱེད་པའི་ཆོས་ཀྱིས་ཁྱབ་པ་ཅི་འདྲ་བ་ཁྱབ་པར་བྱ་བ་ཆོས་དེ་འདྲ་བ་ནི་མ་ཡིན་ནོ་སྙམ་ནས། དེ་སྐད་དུ། གང་ཚེ་འབྲེལ་པ་གཉིས་ལ་གནས། །རྟགས་དང་རྟགས་ཅན་ལྷན་ཅིག་སྟེ། །རྟེན་དང་བརྟེན་པའི་ཡོད་པ་བཞིན། །ལྡན་པ་
ལ་ནི་དེ་མེད་དོ། །ཞེས་གསུངས་སོ། །དེས་ན་ཁྱབ་པར་བྱེད་པ་ནི་ཁྱབ་པར་བྱ་བ་མ་ཡིན་ལ་ཁྱབ་པར་བྱ་བ་དང་ཁྱབ་པར་བྱེད་པ་མ་ཡིན་ནོ། །དེའི་ཆས་ཁྱབ་པ་ནི་གཏན་ཚིགས་ཞེས་བརྗོད་པས། ལྡན་པའི་ཕྱོགས་བརྗོད་པའི་སྐྱོན་དུ་མི་འགྱུར་བ་དང་གཉི་ག་གོ་བར་བྱ་བ་དང་གོ་བར་བྱེད་པར་ཐལ་
བར་མི་འགྱུར་རོ། །ཇི་སྐད་དུ་བཤད་པའི་གཏན་ཚིགས་ཀྱི་མཚན་ཉིད་ཀྱི་ཁྱབ་པར་བྱེད་པ་ནི་གོ་བར་བྱ་བར་རྟོགས་ལ་ཁྱབ་པར་བྱ་བ་ནི་གོ་བྱེད་དུ་རྟོགས་སོ། །གལ་ཏེ་དེ་ལྟ་ན་ཕྱོགས་ཆོས་དེའི་ཆས་ཁྱབ་པ་ཞེས་བྱ་བ་དེ་ཙམ་གཏན་ཚིགས་ཀྱི་མཚན་ཉིད་ཡིན་པ་དེའི་ཕྱིར་ཕྱོགས་ཀྱི་ཆོས་དང་དེའི་ཆས་

ཁྱབ་པ་ཞེས་བྱ་བ་གཏན་ཚིགས་ཀྱི་ཚུལ་གཉིས་སུ་འགྱུར་ལ། གཞན་དུ་ཚུལ་གསུམ་དུ་བཤད་པ་དང་ཇི་ལྟར་འགལ་བར་མི་འགྱུར་ཞེ་ན། དེའི་ཆས་ཁྱབ་པ་ཞེས་བྱ་བའི་ཚིག་འདིས་རྗེས་སུ་འགྲོ་བ་དང་ལྡོག་པ་དག་བཤད་པར་རིག་པར་བྱའོ་ཞེས་བྱ་བར་སྦྱར་ཏེ། རྗེས་སུ་འགྲོ་བ་དང་ལྡོག་པ་དག་གི་ཚུལ་ཉིད་ཀྱིས་
ཁྱབ་པ་ཡོད་པའི་ཕྱིར་རོ། །འདི་ལྟར་གང་ཁོ་ནའི་རྗེས་སུ་འགྲོ་བ་དང་གང་ལྡོག་ན་ལྡོག་པ་དེ་ཉིད་དེས་ཁྱབ་པར་བརྗོད་དེ་དེའི་བདག་ཉིད་ཡིན་པའི་ཕྱིར་ན་ཁྱབ་པ་ཡིན་ནོ། །ཁྱབ་པ་བརྗོད་པས་རྗེས་སུ་འགྲོ་བ་དང་། ལྡོག་པ་བརྗོད་དེ། དེའི་ཕྱིར་ཁྱབ་པའི་ཚིག་གིས་རྗེས་སུ་འགྲོ་བ་དང་ལྡོག་པ་བརྗོད་པས་
འགལ་བ་མེད་པའི་ཕྱིར་རོ། །དེས་ན་ཤེས་པར་བྱེད་པའི་གཏན་ཚིགས་ཀྱི་དབང་དུ་བྱས་ནས་ངེས་པ་ཡིན་ནོ། །ངེས་པ་ཡང་ཚད་མ་དུ་མ་ཁོ་ནས་སམ་ཡང་ན་བདག་ཉིད་ཇི་ལྟ་བ་གང་དང་གང་གི་ཚད་མ་དེས་ངེས་པ་སྟེ། ཚད་མ་གང་དང་གང་ཡིན་པ་དེ་ནི་ཕྱིས་བཤད་པར་བྱའོ། །འམ་གྱི་སྒྲས་ནི་རྗེས་སུ་
འགྲོ་བ་དང་ལྡོག་པ་དག་ནི་དོན་མཚུངས་པར་བསྟན་གྱི་ཚིགས་ནི་མ་ཡིན་ནོ། །དེས་ན་མཐུན་པའི་ཕྱོགས་སམ་མི་མཐུན་པའི་ཕྱོགས་དག་གི་སྦྱོར་བ་གཅིག་གིས་གཉི་ག་རྟོགས་ཏེ། དཔག་པ་དང་སྒྲུབ་པའི་ཚུལ་དག་གི་འཇུག་པ་ཐ་དད་ཀྱང་དོན་དམ་པ་དེའི་བདག་ཉིད་ཡིན་པས་གཉི་ག་རྟོགས་པར་
བསྟན་ཏོ། །ལྡོག་པ་ནི་བསྒྲུབ་བྱ་ལྡོག་པས་རྟགས་ལྡོག་པའི་ཆོས་ཡིན་ཏོ། རང་བཞིན་གཅིག་ཏུ་གྱུར་པའི་ཆོས་ཡིན་ན་ནི་རྗེས་སུ་འགྲོ་བའི་ངོ་བོ་འདི་དངོས་པོ་ལ་འདི་འགལ་བ་མེད་དོ། །ཅི་ཕྱོགས་ཀྱི་ཆོས་ཀྱང་ཡིན་ནམ་ཞེ་ན། བདག་ཉིད་ཇི་ལྟ་བའི་ཚད་མས་བཤད་པ་ཡིན་ནོ་ཞེས་བྱ་བར་སྦྱར་ཏེ།
ངེས་པའི་ཞར་ལ་དེ་ཡང་འདིར་བསྟན་པའི་ཕྱིར་རོ། །གལ་ཏེ་ངེས་པ་གོ་བར་བྱེད་པ་ཉིད་དུ་བཤད་པས་ཇི་ལྟར་སླར་ཡང་རྗེས་སུ་འགྲོ་བའི་དོན་གྱིས་ཁྱབ་པ་ཡིན་ཞེ་ན། གང་གི་ཚེ་གཏན་ཚིགས་ཐམས་ཅད་ལ་ཞེས་བྱ་བ་སྨོས་ཏེ། གཏན་ཚིགས་གང་དང་གང་ལ་བསྒྲུབ་པར་བྱ་བ་དེ་དང་དེ་ལས་མེད་པ་
དེའི་ཚེ་བསྒྲུབ་པར་བྱ་བའི་ཆོས་དེས་གཏན་ཚིགས་དེ་ལ་ཁྱབ་པ་མི་འགྲུབ་བོ། །དེའི་ཕྱིར་གཏན་ཚིགས་གང་དང་གང་ལ་བསྒྲུབ་པར་བྱ་བའི་ཆོས་དེ་དང་དེ་ལ་ཡོད་པ་ནི་ཁྱབ་པར་བྱེད་པའི་ཆོས་ཀྱི་ངོ་བོ་ཁྱབ་པ་ཡིན་ནོ་ཞེས་བྱ་བ་ནི་རྗེས་སུ་འགྲོ་བའི་ངོ་བོའི་ཁྱབ་པའོ། །གང་དང་གང་ལྡོག་པ་ངེས་པས་དེ་ཡང་ལྡོག་

པ་དེས་ཁྱབ་པར་འགྲུབ་ཀྱི་བཟློག་པ་ནི་མ་ཡིན་ནོ། །དེས་ན་ཁྱབ་པར་བྱ་བའི་ངོ་བོའི་ཁྱབ་པ་ནི་ལྡོག་པའི་བདག་ཉིད་ཡིན་པའི་ཕྱིར་རོ། །ཡང་ན་བསྒྲུབ་པར་བྱ་བའི་ཆོས་ཁྱབ་པར་བྱེད་པ་མེད་ན་ཁྱབ་པ་མི་འགྲུབ་པའི་ཕྱིར་རོ། །དེ་ན་གཏན་ཚིགས་ཀྱི་ཁྱབ་པར་བྱ་བ་སྤངས་པ་ཡིན་ནོ། །
བསྒྲུབ་པར་བྱ་བའི་ཆོས་ཁྱབ་པར་བྱེད་པ་མེད་པ་ག་ལས་ཤེ་ན། བདག་ཉིད་ལྡོག་ན་གཏན་ཚིགས་ལྡོག་པ་མེད་པའི་ཕྱིར་རོ། །ལྡོག་པའི་བདག་ཉིད་ནི་ལྡོག་པར་བྱེད་པ་ཁྱབ་པར་བྱེད་པ་ཡིན་པའི་ཕྱིར། ཅིག་ཤོས་དེ་མེད་པ་ལ་མེད་པ་ཁོ་ན་ཁྱབ་པར་བྱ་བ་ཡིན་པའི་ཕྱིར་རོ། །དེའི་ཕྱིར་ལྡོག་པ་ཡོད་པ་ཉིད་
ཀྱིས་བསྒྲུབ་པར་བྱ་བས་ཁྱབ་པ་ལྡོག་པའི་བདག་ཉིད་ཁོ་ན་ལ་ཡོད་པར་རྟོགས་ཏེ་ཁྱབ་པར་བྱ་བའི་ཆོས་ཀྱི་མཚན་ཉིད་གྲུབ་པ་ཡིན་ནོ། །དེ་བས་ན་དེའི་ཆས་ཁྱབ་པའི་ཚིག་གིས་གང་གི་ཕྱིར་རྗེས་སུ་འགྲོ་བ་དང་ལྡོག་པ་བཤད་པའི་ཕྱིར་རོ། །དེ་ལྟར་དེའི་ཕྱིར་རྗེས་སུ་འགྲོ་བ་དང་ལྡོག་པ་དག་བདག་ཉིད་ཇི་
ལྟ་བའི་ཚད་མས་ངེས་པ་དག་གིས་དེའི་ཆས་ཁྱབ་པ་ངེས་པ་ཡིན་ནོ། །ཇི་སྐད་བཤད་པའི་བདག་ཉིད་ཇི་ལྟ་བའི་ཚད་མས་རྗེས་སུ་འགྲོ་བ་དང་ལྡོག་པ་དང་ཕྱོགས་ཆོས་ངེས་པ་བཤད་པའི་ཕྱིར་རོ། །དེ་ལ་ཚད་མ་གང་དང་གང་གིས་ངེས་པ་དེ་བསྟན་པའི་ཕྱིར་དེ་ལ་ཞེས་བྱ་བ་ལ་སོགས་པ་སྨོས་ཏེ། དེ་
ལ་ཕྱོགས་ཀྱི་ཆོས་ལ་སོགས་པ་དེ་རྣམས་ལའོ། །ཕྱོགས་ཀྱི་ཆོས་ངེས་པའི་སྐབས་ཕྱིས་བསྟན་དུ་ཟིན་ཀྱང་མདོའི་རིམ་པས་ཐོག་མར་བརྗོད་པས་ཕྱོགས་ཀྱི་ཆོས་ངེས་པ་ཞེས་བྱ་བར་སྦྱར་རོ། །རབ་ཏུ་གྲུབ་པ་འདི་ཅི་ཞིག་ཡིན་ཞེ་ན་རྟོགས་པའོ། །གང་ལ་ཞེ་ན། བསྒྲུབ་པར་བྱ་བའི་ཆོས་ཅན་
ལའོ། །གང་གིས་ཤེ་ན། མངོན་སུམ་དང་རྗེས་སུ་དཔག་པའི་སྒོ་ནས་སོ། །ཕྱོགས་ཀྱི་ཆོས་ཐམས་ཅད་མངོན་སུམ་དང་རྗེས་སུ་དཔག་པས་ངེས་པ་ནི་མ་ཡིན་ཏེ། འོན་ཀྱང་འགའ་ཞིག་ལ་ཁ་ཅིག་གིས་ཡིན་ནོ་ཞེས་བསྟན་པའི་ཕྱིར་འམ་གྱི་སྒྲ་སྨོས་པ་ཡིན་ནོ། །མངོན་སུམ་གྱིས་ཀྱང་རང་
ཉིད་ཀྱི་རང་གི་མཚན་ཉིད་ཀྱི་རྣམ་པ་ཉིད་ཡིན་དུ་ཟིན་ཀྱང་དེ་མ་ཐག་ཏུ་སྤྱིར་རྟོག་པའི་རྣམ་པ་སྐྱེད་པའི་ཕྱིར་རབ་ཏུ་གྲུབ་པ་ལ་ཉེ་བར་བརྟགས་ནས་ངེས་པར་བརྗོད་དོ། །མངོན་སུམ་གྱི་རྗེས་ལས་བྱུང་བའི་རྣམ་པར་རྟོག་པ་ལ་མ་གཏོགས་པ་རྟོགས་པ་མེད་དོ་ཞེས་བསྟན་ཏོ། །དེས་ན་གལ་ཏེ་སྤྱིའི་ངོ་

བོའི་རྟགས་རྣམ་པར་འཇོག་པ་དེ་ལྟ་ན་ཡང་རང་གི་མཚན་ཉིད་རྟོགས་པ་ཁོ་ན་དེ་རྣམ་པར་འཇོག་པའི་རྒྱུ་མཚན་ཡིན་པའི་ཕྱིར་ཕྱོགས་ཀྱི་ཆོས་མངོན་སུམ་ཡིན་པར་བསྒྲུབ་པར་བྱ་བའི་ཆོས་ཅན་རབ་ཏུ་གྲུབ་པ་ཞེས་བརྗོད་དོ། །འདི་ཡང་དེ་མ་ཐག་ཁོ་ནར་གསལ་བར་བྱེད་པར་འགྱུར་རོ། །ཡང་ན་རྗེས་སུ་
དཔག་པར་བསྒྲུབ་པར་བྱ་བའི་ཆོས་ཅན་ལ་ཕྱོགས་ཀྱི་ཆོས་རབ་ཏུ་གྲུབ་པར་ངེས་པ་དང་། ཚད་མ་དང་འབྲས་བུ་ཐ་དད་ནི་རྗེས་སུ་དཔག་པ་དང་རྗེས་སུ་དཔག་པས་ངེས་སོ། །འདིར་དཔེ་ནི་རིམ་པ་ཇི་ལྟ་བ་བཞིན་དུ་དཔེར་ན་ས་ཕྱོགས་ལ་དུ་བ་ཞེས་བྱ་བ་སྨོས་སོ་གང་ཞིག་དུ་བའི་སྤྱི་མངོན་སུམ་གྱིས་ངེས་སོ་སྙམ་
དུ་སེམས་ནས་ས་ཕྱོགས་དང་འབྲེལ་པའི་མེ་མངོན་སུམ་མ་ཡིན་ལ། གང་ཡང་མངོན་སུམ་ལ་ནམ་མཁའི་ཆའི་ངོ་བོ་སྣང་བ་ལ་སོགས་པ་དུ་བའི་བདག་ཉིད་དང་ལྡན་པར་མཐོང་བ་འདི་མེ་དང་ལྡན་པར་མཐོང་བ་ནི་མེད་པ་དེའི་ཕྱིར་ཇི་ལྟར་ས་ཕྱོགས་ཀྱི་དུ་བ་མངོན་སུམ་ལ་རབ་ཏུ་གྲུབ་པ་ཡིན་ན། དེའི་ཕྱིར་དུ་བ་ཁོ་ན་
ཆོས་ཅན་དུ་རིགས་ཏེ། དུ་བ་འདི་མེ་དང་བཅས་པ་ཡིན་ཏེ། དུ་བ་ཡིན་པའི་ཕྱིར་ཞེས་བསྒྲུབ་པར་བྱ་བ་ཡིན་ནོ་ཞེ་ན། མེ་དང་བཅས་པའི་དུ་བའི་ཆ་ཤས་ཡོངས་སུ་སྣང་ན་སྟེང་དུ་གནས་པའི་ཆ་མེ་དང་ལྷན་ཅིག་ཏུ་ཡོད་པ་