Luận tạng Tây Tạng (Tengyur) — Tập 169

ེས་རྗེས་སུ་འབྲང་བཞིན་པ། ཡིད་རབ་ཏུ་དགའ་བས་སླར་དཀའ་ཐུབ་ཀྱི་ནགས་སུ་ཞུགས་པར་གྱུར་ཏེ། དེ་ནས་དུས་ཀྱི་རིམ་པས་གླང་པོ་ཕྲུ་གུ་ཉིད་དོར་ནས། །སྨྱོན་ཆུས་དྲི་ནི་བསྒོས་པ་ནགས་ཀྱི་མཐའ་དང་ཕྱོགས་ཀྱི་བར། །མཆེ་བ་འདེབས་པ་རྣམས་ཀྱིས་རིང་དུ་བྱས་པའི་
གླང་པོ་གཞན། །རི་བོ་ཆེན་པོའི་ནང་དུ་ཚོགས་ཀྱི་བདག་པོ་བྱུང་བར་གྱུར། །གླང་པོ་དེས་ནི་དུས་གཅིག་ཚེ་ན་བིལ་བའི་ཤིང་ལས་ནི། །བུད་མེད་འོ་འཛིན་འོ་ཅན་འབྲས་བུ་བསགས་པ་བླངས་ནས་ནི། །བཀག་ནས་ཐུབ་པ་ལ་ནི་ཆུ་གཏེར་ཆུ་ཡི་བརླན་པ་བྱིན། །ལྷན་ཅིག་བྱེད་པའི་ཡལ་ག་
འབྲས་བུ་ཅན་རྣམས་དེ་ལ་བྱིན། །དམ་པ་བརྩེ་བ་དང་ལྡན་ཡོན་ཏན་བསྒྲུབ་པ་མཁས་པ་ལ། །དྲི་ཞིམ་བརླན་པ་ལྟར་ནི་རང་བཞིན་གྱིས་ནི་སྟོད་བྱེད་པ། །སྔར་ནི་ཕན་བྱེད་བདག་ཉིད་ཆེ་ལ་སུ་ཞིག་བྱ་བ་ཡི། །སྙིད་དང་བཅས་པའི་ཡིད་ལ་རྗེས་སུ་ཆགས་པ་རིང་པོར་མི་འགྱུར་རམ། །མོན་
ལུག་རྣམ་པར་བཅག་ལྟར་དྲི་ཞིམ་འཛག་པའི་སྨྱོན་ཆུའི་ཕྲེང་། །བུ་ཁྱོད་སྐྱེས་པ་ཆེན་པོ་འདི་ལྟར་སྨྲ་བཞིན་པར་གྱུར་ཏེ། །རི་བོའི་རྩིག་པ་ཕུག་པས་མཛད་པའི་ཕྱོགས་གཅིག་ལྡན་པ་ནི། །མཆེ་གཉིས་ཀུན་ད་ལྟར་དཀར་དེ་ལ་ཐུབ་པ་དེས་རེག་གྱུར། །སླར་ཡང་རྣ་བའི་ཏིང་ཏིང་
ཤགས་ཀྱིས་བཟློག་པར་གྱུར་པ་ཡི། །འཁོར་བའི་བུང་བ་རྣམས་ཀྱིས་ཀུན་འཐུངས་སྨྱོན་ཆུའི་དྲི་ཞིམ་པ། །གླང་པོའི་དབང་པོ་གཞན་གྱི་མཆེ་བས་ལྷག་པའི་ཡན་ལག་མཆོག །གླང་པོ་ལ་ནི་སྨྲ་བ་རྣམས་ཀྱི་མཁས་པས་འདི་ལྟར་སྨྲས། །གླང་པོའི་དབང་པོས་སྨྱོན་ཆུ་དྲི་ཞིམ་འཐུང་
བར་འདོད་པ་ཡི། །བུང་བ་རྣམས་ལ་རྣ་བ་རྣམ་པར་བརྡེགས་པས་མ་འགེགས་ཤིག །ཤིན་ཏུ་གུས་པ་མེད་པས་སྨད་པའི་གང་ཕྱིར་སྦྱིན་ཆེན་ཡང་། །དོན་གཉེར་རྣམས་ལ་ཀུན་ནས་དགའ་བ་བྱེད་པར་མི་འགྱུར་རོ། །ཚོགས་ནི་བསྐྱང་ཕྱིར་འོང་མ་རྣམས་ཀྱིས་མུན་པ་ཅན་གྱི་ནགས་ལ་གལ་

ཏེ་རྟག་ཏུ་འདོད། །གནོད་པའི་རྩེ་དང་ལྕགས་ཀྱུ་ལས་ནི་འབྱུང་བ་གལ་ཏེ་སྡུག་བསྔལ་རྣམས་ནི་ཁྱོད་མི་འདོད། །ས་སྐྱོང་གིས་བཏང་དེ་བས་གླང་པོའི་བདག་ཁྱོད་གླང་མོ་རྣམས་ཀྱི་རྗེས་སུ་མ་འགྲོ་ཞིག །ཆགས་པས་སྡུག་བསྔལ་ཆེན་པོ་ལ་ནི་མི་མཁས་པས་ནི་སུ་ཞིག་ཅེས་བྱ་
བཏང་མ་ཡིན། །དེ་རིང་ཁྱོད་ཀྱི་དཔྲལ་འབོར་སྤྲུགས་པས་རྣམ་པར་འབྲེལ་པའི་སྨྱོན་ཆུའི་གནས་ནི་བསྣོམས་བྱས་ཏེ། །མལ་ནི་རྩྭ་སྔོན་རྩེ་མོ་བཅག་པ་ཐ་མར་མཆེ་བ་གཉིས་ཀྱིས་བཅད་པ་མཐོང་ནས་ནི། །ཚོགས་ནི་སྐྱོང་བ་རྣམས་ཀྱིས་དོར་བ་མེ་ཏོག་ཟས་ཅན་ངེས་པར་ཁྱོད་ལ་ཕྲད་འདོད་དེ། །
དེ་བས་ཁྱོད་ནི་སོང་ཤིག་བུང་བ་རྣམས་ཀྱིས་ཉེ་བར་གླུ་བླངས་གདོང་ཅན་བདག་སླར་མཐོང་། །དེ་ནས་རིམ་གྱིས་མཆེ་བ་གཉིས་པའི་མཆོག་དེ་ཚོགས་ཀྱི་ནང་དུ་རྗེས་སུ་ཐོབ་པ་ལ། །ཐུབ་པ་དེས་ཤིང་ལོས་བྱས་པའི་ཁང་པར་ཞུགས་ཏེ། བསམ་གཏན་ལ་རྩེ་གཅིག་པ་བྱུང་བར་གྱུར་ཏོ། །དེ་ལྟར་
ན་བཅོམ་ལྡན་འདས་དེས་སྐྱེ་གནས་ཐམས་ཅད་དུ་འཇུག་པར་གྱུར་པས་ནམ་ཡང་གཞན་གྱི་དོན་ལ་གཡེལ་བ་ཉིད་དུ་མ་གྱུར་ཏོ་སྙམ་དུ་རྣམ་པར་བསམས་ནས་དེའི་ཆོས་ལ་རྗེས་སུ་འཇུག་པ་རྣམས་ཀྱིས་གནས་པར་བྱ་ཞེས་བྱ་བའོ། །བརྒྱ་བྱིན་གྱི་སྐྱེས་པའི་རབས་ཏེ་སྐྱེས་རབས་གསུམ་པའོ།། །།
ཡུལ་གྱི་འདམ་ལ་ནུབ་པའི་འཇིག་རྟེན་པ། །འདམ་བཞིན་དུ་ནི་བརྒལ་བར་དཀའ་བ་ལས། །ཤེས་རབ་ལས་བྱུང་ཐབས་ལྡན་བརྟན་པ་རྣམས། །བརྒལ་བའི་དོན་དུ་འབད་པར་བྱེད་པ་ཡིན། །འདི་ལྟར་རྗེས་སུ་ཐོས་ཏེ། ཐོས་པ་དང་། དུལ་བ་དང་། གཏོང་བ་དང་། ཡིད་གཞུངས་པ་དང་།
བཟོད་པའི་ཡོན་ཏན་གྱི་ནོར་བུ་རྣམས་ཀྱི་གཏེར་དང་། མདུན་ས་དང་མདུན་ས་ན་བློ་གྲོས་ཀྱི་བདག་ཉིད་ཆེན་པོ་རབ་ཏུ་གྲགས་པ་དང་། ལེགས་པར་སྤྱོད་པའི་སྟོན་ཀའི་དུས་ལྟར་དྲི་མ་མེད་པ་དང་། རྒྱ་ཆེ་བའི་རིགས་ཀྱི་ནམ་མཁའ་ལ་ཟླ་བ་དང་འདྲ་བ་དང་། ཟླ་བའི་དཀྱིལ་འཁོར་དང་རྗེས་སུ་མཐུན་
པའི་བཞིན་གྱི་པདྨ་དང་ལྡན་པ་དང་། པདྨའི་ལྟེ་བ་ལྟར་དཀར་བའི་ལུས་དང་ལྡན་པ་དང་། གཟུགས་དང་ལྡན་པ་འདྲ་བའི་ཚུལ་གྱི་ཕུན་སུམ་ཚོགས་པས་ཀུན་ནས་གཙང་བའི་ཡིད་དང་། ཅུང་ཟད་ཀྱང་དབང་པོའི་དགྲ་རྣམས་ཀྱིས་ཕམ་པར་མ་བྱས་པ་དང་སྐྱོན་རྣམས་ཀྱི་གཉེན་པོ་རྒྱལ་བ་དང་རང་

གི་ཕྱོགས་ལྟར་ཡོན་ཏན་རྣམས་སྔོན་དུ་སོང་བ་དང་། ཐེ་ཚོམ་མེད་པ་དང་ལུས་དང་འདྲ་བའི་ཆོས་དང་འདྲ་བ་དང་། དལ་འབྱོར་ཡང་དག་པར་ཐོབ་པ་དང་། སྐད་ཅིག་མར་ཡང་ཡུལ་གྱི་སྐྱོན་རྣམས་ཀྱིས་ཡིད་ལ་གླགས་མ་རྙེད་པ་ཀ་ཤི་ཀའི་རྒྱལ་པོའི་བློན་པོ་ཁྲ་ཅན་ཞེས་བྱ་བའི་བྱང་ཆུབ་
སེམས་དཔའ་བྱུང་བར་གྱུར་ཏོ། །འདོད་པ་མེ་ཏོག་རྣམས་བཞིན་དུ། །འཛུམ་པ་རྣམས་ནི་འགའ་ཞིག་ཀྱང་། །བདག་གི་སྐྱེད་མོས་ཚལ་བསྲུང་ལྟར། །སོ་སོར་འཛིན་འགྱུར་བློ་ཡང་ཕྲོགས། །ས་འཛིན་རྣམས་ཀྱི་རི་རབ་ལྟར་ནི་མཐོ་བའི་མདུན། །དཔག་བསམ་ཤིང་རྣམས་ལྟ་བུར་
ཡོངས་འདུ་ས་བརྟོལ་ནི། །དེ་ནི་ཀུན་དུ་མཁས་པ་རྣམས་ལས་འབྱུང་འགྱུར་ཏེ། །འདོད་དང་ལྡན་པ་རྣམས་ལ་ཉི་མ་ལྟར་ནི་ལྷག །ཇི་ལྟ་ཇི་ལྟར་བསྟན་བཅོས་རྣམ་དབེན་ལས་གསལ་བ། །སློབ་མ་རྣམས་ཀྱིས་འདི་ཡི་ཚིག་ལྕི་ཐོས་འགྱུར་བ། །དེ་ལྟ་དེ་ལྟར་འདི་རྣམས་ཀྱི་ནི་བློ་རིམ་གྱིས། །
སྟོན་ཀའི་ཡོན་ཏན་གྱིས་ནི་ཆུ་ལྟར་དངས་པར་འགྱུར། །དེ་ལྟར་འདོད་པ་ཐམས་ཅད་ལ་མཁས་པའི་བློ་དང་ལྡན་ཡང་བདག་ཉིད་ཆེན་པོ་དེ་ལུགས་ཀྱི་བསྟན་བཅོས་རྣམས་སྨོད་པའི་སྐྱོན་རྣམས་ལས་ཤིན་ཏུ་ནུབ་པའི་ཡིད་ཅན་ཀ་ཤི་ཀའི་རྒྱལ་པོ་བཟློག་པར་ནུས་པ་མ་ཡིན་ཏེ། གནས་སྐབས་
སྔོན་དུ་འགྲོ་བར་ཡང་འདི་ལ་དབེན་པའི་སར་སྐྱོན་རྣམས་ལས་རྣམ་པར་གཅོད་ཅིང་སྨྲས་པ། ལྷ་ལགས་ལུས་འཕགས་རྒྱལ་པོ་ལ་སོགས་པ་སྐྱོན་ལ་ལྟ་བ་གཉེན་པོ་རྒྱལ་པོ་གཞན་རྣམས་ཡོད་པ་ལྷའི་སྐྱོན་རྣམས་ཡོད་པ་རྣམས་ལ་རྩེ་གཅིག་པ་ཉིད་ནི་རིགས་པ་མ་ཡིན་ནོ། །ལྷས་གཟིགས་
ཤིག་གང་ཞིག་འཐུངས་ཏེ་བླ་མ་ཡང་ཁྲོ་བར་བྱེད་དེ་རྒྱུ་མཚན་མེད་པར་སླར་ནི་ངུ་། །འཁྲུལ་བར་འགྲོ་སྟེ་མ་དཔྱད་པ་ཡང་བྱེད་པར་འགྱུར་བ་ནད་ཀྱི་གཞིར་ནི་འགྱུར་བ་སྟེ། །འཇིག་རྟེན་པ་ཡི་མདུན་དུ་ཡང་ནི་སྨད་གཡོགས་བསལ་བར་བྱེད་དེ་སྨྱོན་པ་བཞིན་དུ་བྱེད། །དེ་ནི་ངོ་ཚ་བྲལ་བྱེད་
གཏི་མུག་སྐྱེད་པར་བྱེད་པ་སུ་ཞིག་ཅེས་བྱ་ཆང་འཐུང་འགྱུར། །གང་ཞིག་བརྩེ་ཞིང་ཇི་ལྟ་བ་བཞིན་མི་སྨྲ་བ་སྟེ་ཁྲོས་པས་རེག་པར་འགྱུར། །གཉིད་ནི་མི་མྱོང་བདག་ནི་ཕམ་ཞེས་བྱ་བའི་ཉོན་མོངས་པས་ནི་བརྒྱལ་ཕྱིར་སླར་ཆགས་འགྱུར། །ཤིན་ཏུ་བཤང་གཅི་བཀག་པས་རྙེད་པར་སླ་བའི་

ནད་རྣམས་ཀྱིས་ནི་ལྷག་པར་གནས་འགྱུར་ཏེ། །ཆོ་ལོ་དེ་ནི་སྐྱོན་མང་ཚོགས་ཀྱིས་དྲི་བཅས་སྐྱེས་པ་སུ་ཞིག་ཅེས་བྱ་རྩེ་བར་འགྱུར། །སྦྲུལ་ལས་རྒུད་པ་དང་ཡང་དགྲ་བས་ཀྱང་ནི་སླར་འཇིགས་རྟ་ལས་ཀྱང་ནི་ལྷུང་བ་སྟེ། །བཀྲེས་སྐོམ་ངལ་བའི་སྡུག་བསྔལ་
ཤིན་ཏུ་ཆེ་བ་ཉི་མའི་འོད་ཟེར་དྲག་པོ་བས་ཀྱང་ཆ། །བྱ་བ་རྣམས་ཀྱི་ཐ་མ་དམ་པའི་སྐྱེ་བོ་ལ་ནི་སྨད་པ་ཡང་དག་འགྲོ་བ་ལས་ལྷུང་བ། །དེ་ལྟར་སྐྱོན་དང་ལྡན་པའི་རི་དགས་ཤོར་བ་ཤེས་ནས་མཁས་པ་སུ་ཞིག་དེ་ལ་བརྟེན། །སྟོབས་ནི་ཉམས་པ་ཐོབ་པ་རྣམས་ལ་རྣམ་ཞུམ་པ། །སྡུག་བསྔལ་
གྱི་རྒྱུ་མུན་པ་རྣམས་ཀྱི་རྒྱུ་མཚན་ཏེ། །འདོད་པའི་མེ་ཡི་བསྲེག་ལུགས་བདག་ཉིད་བསྲེག་པའི་ཕྱིར། །བུད་མེད་རྣམས་ལ་ཤིན་ཏུ་ཆགས་པ་མེ་ཡིས་གདུངས་པའོ། །མི་སྐྱོད་ཚིག་ནི་རྩུབ་པ་སྐྱེ་དགུ་རྣམས་ལ་ནི། །འཇིགས་པ་བྱེད་པ་གནས་ཀྱི་ཁྱད་པར་གྱིས་མི་བཟད། །ལྟོ་འཕྱེའི་དབུགས་
ཀྱིས་རྣམ་པར་བྱུང་བ་བྱེད་པ་ཡི། །དུག་གི་མེ་ཡིས་འཕྲོག་པར་བྱེད་པའི་འོད་ཟེར་ལྟར། །ཕོངས་པ་དེ་ནི་ཞི་ཡང་བླ་ཡི་བསིལ་བའི་འོད་དབང་ཕྱུག །རགས་པ་མཚོན་པ་ཡང་མིན་ཏེ། །དྲག་པོའི་དཔྱ་ཅན་ལྟོ་འཕྱེ་བཞིན། །གང་གིས་སྨད་པ་ལུགས་མེད་པ། །དོན་སྨད་ཚུལ་ཤེས་རྣམས་
ཀྱིས་ནི། །རིང་བ་ཉིད་དུ་སྤང་བྱ་སྟེ། །ས་སྐྱོང་རྣམས་ཀྱིས་དུག་བཞིན་དུ། །མ་དཔྱད་མིག་ཅན་དཔའ་བོ་དང་། །ཤེས་རབ་ཀྱིས་རྒན་སྨོད་བྱེད་པ། །དབང་པོ་མ་རྒྱལ་ས་སྐྱོང་ལ། །ནམ་ཞིག་རྒུད་པ་ཞོན་མི་འགྱུར། །དེ་ལྟར་རྣམ་པར་རྒྱལ་བའི་སྐྱོན་འདི་རྣམས་ཤིན་ཏུ་རིང་པོ་ནས་ཐོབ་པ་
ཡང་རྒྱལ་པོའི་དཔལ་ནི་ནུབ་པར་བྱེད་དོ། །དཔུང་བའི་སྟོབས་ཀྱི་ས་དབང་རྣམས་ཀྱིས་བདག་བྱས་ཀྱང་། །ཤེས་རབ་རྒན་པ་རྣམས་ཀྱིས་ཚུལ་གྱིས་སྐྱོང་བཞིན་ཡང་། །ས་ཡི་བདག་པོའི་དཔལ་འདི་རྣམ་འགྱུར་འགྲོ་བ་སྟེ། །མཉེས་གཤིན་དོར་བའི་ལུས་ཅན་རྣམས་ལ་འགོད་
བྱེད་ལྟར། །དབང་པོའི་དགྲ་ནི་རྣམ་རྒྱལ་ཡོན་ཏན་དྲུག་པོ་མ་འདས་པ། །ཚུལ་གྱི་མིག་དང་ལྡན་པས་ཆེན་ཆུན་ཚོགས་ནི་ལྟ་བྱེད་པ། །རླུང་གིས་གདུངས་པའི་མེ་ལྕེ་རྣམས་ལྟར་གཡོ་བ་ཡང་། །ནོར་ཅན་མ་ཡིན་བདག་པོས་དཔལ་ནི་ཉེ་བར་སྟེར་བར་བྱེད། །དེ་བས་ན་བདག་ཉིད་

རྣམ་པར་རྒྱལ་བས་ལྷ་ཡིས་རྟག་ཏུ་གནས་པར་བྱ་ཞེས་ཟེར་རོ། །དེ་ནས་རྒྱལ་པོ་དེའི་ཡུལ་རྣམས་ཀྱིས་དབང་པོ་འཕྲོག་པའི་ཕྱིར་སྙིང་སྟོབས་པས་ཡང་ངོ་བསྲུང་གི་ཕྱིར་སྨྲས་པ། གང་ཞིག་ཁྱེད་ཅག་ལྟ་བུ་བླ་མ་རྣམས་ཀྱིས་བདག་ལ་གདམས་ངག་བྱས་པ་དེ་ནི་བདག་གིས་འདའ་བར་འགྱུར་
བ་མ་ཡིན་ཞེས་ཟེར་ཏེ། བྱང་ཆུབ་སེམས་དཔའ་རང་གི་ཁྱིམ་དུ་སོང་ནས་ཀྱང་། །རྫ་རྔ་གླིང་བུའི་སྒྲ་ཡིས་ནང་གང་བ། །གླུ་བཅས་སྒྲ་ལྡན་སྒེག་དང་བཅས་པའི་གར་མཁན་ལྡན། །ས་བདག་དེས་ནི་མྱོས་པ་ཉིད་ཀྱིས་མིག་དམར་བ། །བཙུན་མོའི་འཁོར་ན་ཡང་དག་རྒྱུ་ནི་ཞུགས་པར་
གྱུར། །དེ་ནས་སྒེག་བཅས་བཙུན་མོའི་ལག་གིས་གཏད་པ་ནི། །ཡིད་ནི་འཕྲོག་བྱེད་ཁུ་བྱུག་མིག་ལྟར་དམར་བ་ནི། །ཡིད་འབྱུང་མེ་ཡི་བུད་ཤིང་རྒུད་པ་རྣམས་ཀྱི་གཞི། །ལྟེ་བ་ཁ་ཕྱེའི་ཨུཏྤལ་གྱིས་བརྒྱན་ཆང་འཐུང་གྱུར། །དེ་ནས་རིམ་གྱིས་ཉི་མ་ནུབ་པར་ཉེར་སོང་ལ། །འདབ་
ཆགས་རྣམས་ནི་རིམ་གྱིས་ཚད་རྣམས་སོང་བ་ལ། །ས་བདག་དེ་ཡི་མདུན་དུ་མར་མེ་འཛིན་པ་རྣམས། །གུས་པ་དང་བཅས་འོངས་ཏེ་མར་མེའི་སྣོད་རྣམས་སྦར། །དེ་ནས་སྲོད་དུས་རི་བོང་གིས་མཚན་རྩེ་ཡོད་པར། །སྐད་ཅིག་དེས་ནི་འདོད་པའི་རྟེན་ཅན་ཆང་འཐུངས་ཏེ། །རྒོད་པས་
བསྐུམ་པའི་མཆུ་ལྡན་གར་མཁན་མོ་ཡི་གདོང་། །སྒེག་པའི་མིག་ཅན་ལ་ནི་ལྟ་བ་བཅིངས་པར་གྱུར། །དེ་ལྟར་ཆང་ནི་ཡོངས་སུ་འཕེལ་བས་རྨོངས་པའི་བདག །གྲགས་ཤིང་ཡིད་ནི་འཕྲོག་པའི་གར་དང་གླུ་ཡི་སྒྲ། །ཇི་ལྟར་ཡང་ནི་མཚན་མོའི་ཐ་མ་ཤེས་འགྱུར་ཏེ། །མི་བདག་
དེ་ནི་ཀུན་ནས་འོད་མེད་ཟླ་གཟུགས་ལྡན། །དེ་ནས་དེར་རོལ་བའི་བློན་པོ་ཁ་ཅིག་ཁྲ་ཅན་གྱི་ཤེས་རབ་ཀྱི་མཆེ་བའི་བདག་ཉིད་མི་བཟོད་པར་གྱུར་པས་ཀ་ཤའི་རྒྱལ་པོ་ལ་འདི་སྐད་སྨྲས་པར་གྱུར་ཏེ། ལྷའི་སྟེང་དུ་ཆགས་པ་དང་བྲལ་བའི་སྙིང་དང་འདྲ་བ་ཁྲ་ཅན་མཐོང་སྟེ། ཅིའི་
ཕྱིར་ཞེ་ན། བདག་ཅག་རྣམས་ཀྱིས་ཐོས་ཏེ་ཇི་ལྟར་འདི་ལུས་འཕགས་ཀྱི་རྒྱལ་པོ་ལ་བརྟེན་ནས་ལྷ་འཇིག་པ་ཉིད་ཀྱི་ཕྱིར་འབད་པར་བྱ་སྟེ། དེ་བས་ན་དེའི་སྟེང་དུ་ལྷས་ཡིད་ཆེས་པར་བྱ་བ་མ་ཡིན་ཞེས་ཟེར་རོ། །རྒྱལ་པོ་དེ་ཡང་རྨོངས་པའི་རང་བཞིན་གྱིས་མ་དཔྱད་པ་ཉིད་དུ་བྱང་ཆུབ་

སེམས་དཔའི་སྟེང་དུ་མཉེས་གཤིན་པ་ལ་གཡེལ་བར་ཀུན་ནས་སོང་བར་གྱུར་ཏོ། །བྱང་ཆུབ་སེམས་དཔས་ཀྱང་གཏམ་དེ་ཡིད་ཆེས་པ་རྣམས་ལ་ཀུན་ནས་ཉེ་བར་དམིགས་ཏེ། གྲོགས་པོ་སུ་ཞིག་གི་མདུན་དུ་འདི་ལྟར་སྨྲས་པར་གྱུར་ཏོ། །གདུག་པའི་བདག་ཉིད་
རོལ་པའི་བློན་པོ་འདི་རྣམས་ཀྱིས་རྒྱལ་པོ་འདི་བདག་གི་སྟེང་དུ་ཁྲོས་སུ་བཅུག་པ་སྟེ། རྣམ་པ་ཐམས་ཅད་དུ་སྐྱེ་བོ་ངན་པ་རྣམས་ཀྱིས་སྐྱེ་བ་ནི་གཅིག་ཏུ་གཞན་རྣམས་ལ་གནོད་པ་ཉིད་ཀྱི་ཕྱིར་ཏེ། །འགྲོ་སྡང་དམ་མིན་སྐྱེ་དང་སྦྲུལ་དག་གི་ནང་ན། །བདག་སྟེང་གདེངས་ཅན་མཆོག་དེ་
དམ་མིན་སྐྱེ་བོ་མིན། །ལྟོ་འཕྱེའི་གདེངས་ཀར་ནོར་བུ་ཆེན་པོ་ཡོད་པ་སྟེ། །སྐྱོན་རྣམས་མ་ལུས་འབྱུང་བྱེད་ཉིད་ནི་སྐྱོ་བ་ངན། །རང་བཞིན་གྱིས་ནི་སྐྱེས་པ་ཞེས་བྱ་ཁ་བ་ཉིད། །མེ་ལ་བརྟེན་པའི་ནིམ་པའི་འདབ་མ་དོར་བ་སྟེ། །དམ་མིན་སྐྱེ་བོས་དམ་པའི་སྐྱེ་བོའི་སྤྱོད་བྱས་ཀྱང་། །ནད་རྣམས་
གདོན་བྱེད་ཚིག་ནི་དུག་གི་ཚ་བ་དོར་མི་བྱེད། །སྐྱེ་བོ་ལ་ནི་འབྱུང་བར་བྱེད་ཅིང་འཆི་བའི་འཇིགས་པ་བྱེད་པ་སྦྲུལ་གྱི་དུག །ཡན་ལག་ལ་གནས་སྨན་པ་ལ་ནི་དུག་ཞིའི་སྔགས་རྣམས་ཀྱིས་ནི་ཞི་བར་ནུས། །བཟང་མིན་སྐྱེ་བོའི་ཚིག་གི་དུག་ནི་ཆེན་པོ་རྣམ་གཅོད་གནོད་བྱ་མིན་པ་ནི། །སོ་སོར་འཛིན་
དང་ཡིད་ལ་གདུངས་པ་སྲོག་དང་བྲལ་བའི་བར་དུ་འཛིན་པར་བྱེད། །སྐྱོན་ནི་མང་མཐོ་སྐད་ཅིག་གིས་འཇིག་ཀུན་ནས་སྐྲག་པ་བསྐྱེད་པ་ནི། །སྦྲུལ་རྣམས་ཀྱི་ནི་རྒྱུ་ནི་ཡིན་ཏེ་ས་ཡི་རྡུལ་གྱིས་ཉེ་བར་བསགས་པ་ནི། །རྒྱལ་སྲིད་ལས་བྱུང་ཆེན་པོ་ཉིད་ནི་གང་ཞིག་ཁྱིམ་དང་འདྲ་བར་ཀུན་ནས་སྤངས། །
དེ་ལས་ལངས་པའི་ཆོག་ཤེས་མིན་པའི་རྒུད་པ་ཆུང་ཡང་དེ་ལ་རེག་མི་བྱེད། །གལ་ཏེ་རྒུད་བསྐྱེད་སྡུག་བསྔལ་གྱིས་ནི་བརྟེན་བྱ་མི་སྐྱོང་མངོན་ཕྱོགས་ཉིད་དུ་ཁྲིད། །ཤེས་རབ་དང་ནི་རིགས་སྟོབས་རྣམ་པར་བྲལ་བ་ཡང་ནི་སྐྱེས་པའི་དཔལ་མཐོང་འགྱུར། །གལ་ཏེ་རི་དགས་བདག་པོས་
འབད་པ་མེད་པར་ལན་ནི་མང་པོ་གྲོགས་ཉིད་འགྲོ། །ཅེ་སྤྱང་གིས་ཀྱང་དེ་ལ་རྗེས་འགྲོ་མཆེ་བ་གཉིས་པའི་བདག་པོའི་ཤ་ཟ་འགྱུར། །དེ་བས་ན་བདག་ཅག་ལྟ་བུ་རྣམས་ལ་སའི་བདག་པོ་འདི་སྣོད་མ་ཡིན་ནོ། །ཞེས་སྨྲས་ནས་གཉེན་འདུན་དང་གྲོགས་པོའི་སྐྱེ་བོ་དང་ཡོ་བྱད་རྣམས་ཀུན་ནས་དོར་

ཏེ། ཁྲི་སྙན་གྱི་པགས་པ་དང་ཤིང་གི་ཤུན་པ་དང་། རིལ་བ་སྤྱི་བླུགས་འཛིན་ཅིང་རྟག་ཏུ་འབྲས་བུ་མོད་པ་བདུད་ཀྱི་ཡིད་ལ་རེ་བ་འབྲས་བུ་མེད་པར་བྱེད་པ། ཤིང་རྟ་དང་འདྲ་བར་ངེས་པ་ལ་གནས་ནས་དྲི་མ་མེད་པའི་ཆུ་དང་ལྡན་པའི་ཆུ་བོ་དང་འབྲེལ་པས་རླུང་བསིལ་བ་དང་། དུ་མའི་རི་
དགས་ཀྱི་ཚོགས་དང་འདབ་ཆགས་ཀྱི་ཚོགས་ཀྱིས་ཁྱབ་པ། དཀའ་ཐུབ་གྲུབ་པའི་ཐུབ་པ་རྣམས་ཀྱི་རྟེན་དང་ཤིན་ཏུ་དགའ་བར་གྱུར་པ་དང་། ཤིན་ཏུ་ཤིང་རྣམས་མང་བ་ཉིད་ཀྱིས་ཉིན་མོར་བྱེད་པའི་ཉི་མའི་འོད་ཟེར་རྣམས་ཀྱིས་འཇུག་པ་མ་ཐོབ་པ་དང་། ས་འཛིན་པའི་ཉེ་བར་བརྟེན་པ་འགའ་ཞིག་ལ་
བརྟེན་ནས་དཀའ་ཐུབ་སྤྱད་པར་གྱུར་ཏེ། བསམ་གཏན་བཞི་རྣམས་ཐོབ་ནས་ནི། །རིམ་གྱིས་བསྒོམ་པ་རྣམས་ཀྱི་མཆོག །བདག་ཉིད་ཆེན་པོ་དཀའ་ཐུབ་ཆེ། །དེས་ནི་མངོན་ཤེས་ལྔ་ལ་གནས། །དེ་ནས་བློན་པོ་དེ་ནི་དཀའ་ཐུབ་སྤྱོད་བཞིན་པ། །རབ་ཏུ་ཞི་བ་མཆོག་ནི་རྣམ་པར་མཐོང་བཞིན་པ། །དམན་པའི་བུ་ལོན་ཅན་ལྟར་
མཆོག་གི་བུ་ལོན་ཅན། །རིང་ནས་སྤངས་ཏེ་དགོས་པ་མེད་བཞིན་འགྲོ་བར་འགྱུར། །དེ་ནས་ཀ་ཤའི་རྒྱལ་པོས་དུས་གཅིག་གི་ཚེ་ན་བྲང་ལ་གཞུ་དམ་པར་བཞག་པས་གོ་ཆ་དང་ལྡན་པ་དང་། དྲི་མ་མེད་པའི་རྒྱན་རྣམས་ཀྱི་ནོར་བུའི་འོད་ཟེར་གྱིས་དཀྲིགས་པ་གསེར་གཅད་པ་ལྟར་དག་ཅིང་ཡན་
ལག་རྒྱས་པ། འཕྲོ་བར་བྱེད་པའི་རྟ་རྣམས་ཀྱི་ཚོགས་ཆས་ལས་སིལ་སིལ་གྱི་སྒྲ་འདབ་ཆགས་ཀྱི་ཚོགས་ཀུན་ནས་སྐྲག་པར་བྱེད་པའི་ཤིང་རྟའི་མཆོག་ལ་ཞོན་ནས་རི་དགས་ཤོར་བའི་ལྟད་མོས་སྙིང་འདྲེན་པར་གྱུར་པ། བྱང་ཆུབ་སེམས་དཔའ་དེ་དང་བཅས་པའི་ནགས་ལ་རྗེས་སུ་ཞུགས་
པར་གྱུར་ཏེ། ཤིང་རྟའི་ཤུགས་ཀྱི་དབང་གིས་བསྐྱོད་པར་བྱེད་པའི་རྒྱན། །རྣམས་ཀྱི་འོད་ཀྱིས་འཚོ་བའི་ལག་པ་གཉིས་སྣང་བྱས། །ཤུགས་ནི་གསལ་བའི་རི་དགས་རྗེས་ཚོལ་མི་སྐྱོང་ནི། །མཚོན་ཆ་ལ་མཁས་ཤུགས་ལྡན་བཅས་པར་རབ་འགྲོ་འགྱུར། །དེས་ནི་ཤིན་ཏུ་རིང་བའི་རི་དགས་
རྗེས་འབྲངས་ནས། །རི་དགས་ལྟར་ནི་རྒྱས་ཤིང་མཛེས་པས་བསྐྱོད་པའི་མིག །མིག་གི་མཐའ་མར་གཞུ་རྒྱུད་འཛིན་པ་མདའ་དང་བཅས། །མདའ་ཡི་རྟེན་ནི་མྱུར་དུ་མི་སྐྱོང་དེས་བྱས་འགྱུར། །དེ་ནས་རི་དགས་མོ་ཡི་གྲོགས་ལྟར་རིང་དུ་སོང་བ་ལ། །བསྐྱོད་པའི་རྨིག་པ་གཉིས་ཀྱིས་ནམ་མཁའ་

འཇལ་བར་བྱེད་པ་ལྟར། །ཤིང་རྟ་འདྲེན་པས་འཛིན་པ་རྟ་རྣམས་སྒྲ་སྒྲོགས་ཐག་པ་ཆད། །དེས་ན་གཞུ་རྒྱུད་མདའི་ལྟོང་རྣམས་བྲལ་མྱུར་དུ་ཁྱེར་བར་གྱུར། །དེ་ནས་བྱང་ཆུབ་སེམས་དཔས་ཀ་ཤའི་རྒྱལ་པོ་མཐོང་ནས་བདག་གི་སྤྱོད་ཡུལ་དུ་རྒྱལ་པོ་འདི་འོངས་པ་དེ་བས་ན། བདག་
གིས་འདི་ངན་འགྲོའི་རྒྱུ་དམ་པ་མ་ཡིན་པའི་གྲོགས་པོ་མང་བ་བདེ་བ་ཆུང་ངུ་མྱོང་བའི་རྒྱལ་པོ་ཉིད་འདི་ལས་གདོན་པར་བྱས་ཏེ། ལམ་བཟང་པོར་འཇུག་པར་འགྱུར་བ་ཞེས་བྱ་བ་རྣམ་པར་བསམས་ནས། སྐད་ཅིག་མ་ཉིད་ཀྱིས་རྫུ་འཕྲུལ་ཆེན་པོའི་མཐུས་མཆེ་བ་གཉིས་པའི་སྨྱོན་ཆུས་ཕྱོགས་
རྣམས་ཀྱི་བར་དྲི་དང་ལྡན་པར་བྱས་པ་དང་། རལ་གྲི་དང་། མདུང་ཐུང་དང་། ཅོང་ལོག་དང་། གསོར་མདུང་གི་འཇིགས་པ་དང་། རྒྱལ་མཚན་མཐོན་པོའི་རྩེ་མོ་རྣམས་ཀྱིས་མངོན་པར་གདུངས་པའི་ནགས་ཀྱི་ཤིང་ཡལ་ག་དང་ལྡན་པ་དང་། ཆུའི་ཁུར་གྱིས་ལྕི་བའི་ཆུ་འཛིན་པ་ལྟར་བརྟེན་པའི་
སྒྲ་ཅན་རྫ་རྔ་དང་ལྡན་པ་དང་། ཀུན་ནས་གང་བར་གྱུར་པའི་ཆུ་སྐྱར་ལྟར་དཀར་བའི་དུང་རྣམས་ཀྱི་སྒྲས་རྣ་བ་འདོན་པར་བྱས་པ་དང་། མངོན་དུ་ཕྱོགས་པར་འོངས་པའི་ཤིང་རྟའི་འཁོར་ལོ་རྣམས་ཀྱི་མཐའ་མས་དམའ་བར་བྱས་པའི་སའི་སྟེང་དང་ལྡན་པར་བྱས་པ་འདི་དང་འདི་ནས་མངོན་པར་འཇུག་
པར་གྱིས་ཤིག །ད་ནི་གང་དུ་འགྲོ་ཞེས་བྱ་བས་འཐབ་མོའི་ཚོགས་ཀྱིས་སྒྲ་སྒྲོགས་པ་དང་། ཀུན་ནས་གཞུ་བཀང་བ་དང་། གོ་ཆ་གོན་ནས་ཀུན་ནས་དཀྲོལ་བ་དང་། ཅ་ཅོའི་སྒྲ་འབྱུང་བས་རི་དགས་ཀྱི་ཚོགས་ཀུན་ནས་སྐྲག་པ་དང་། རྒྱུག་ཅིང་འཐབ་མོ་ལ་བརྩོན་པ་ལུས་འཕགས་རྒྱལ་པོའི་
དམག་ཚོགས་ཉེ་བར་སྟོན་ཅིང་གནས་ཏེ། རྡུལ་གྱི་མུན་པ་ཅན་གྱིས་བར་ནི་འདྲེས་བྱས་པ། །གླང་ཆེན་རྣམས་ཀྱི་སྣ་ཡི་ཆུ་ཐིགས་རྣམས་ཀྱིས་དགོད། །ས་སྐྱོང་རྣམས་ཀྱི་ཅོད་པན་རིན་ཆེན་དྲི་མེད་པའི། །འོད་ཟེར་གཡོ་བ་རྣམས་ཀྱིས་འགའ་ཞིག་སྒྲོན་བྱས་འདྲ། །གླང་ཆེན་རྣར་འཕྱང་དུང་
རྣམས་ཀྱིས་ནི་མཛེས་གྱུར་ཏེ། །རྣམ་རྒྱས་ཀུ་མུ་ད་རྣམས་ལྟར་ནི་འགའ་ཞིག་ཏུ། །དེ་ནས་རིམ་གྱིས་རིང་པོ་ནས་ནི་དེ། །ལུས་འཕགས་རྒྱལ་པོའི་ཟླ་ལྡན་མིག་ནི་མཚན་མོ་འཕེལ། །དེ་ནས་ཤིང་རྟ་ལ་གནས་རྣ་བའི་མཐའ་མ་འབྲེལ། །གཞུ་རྒྱུད་མདའ་དང་བཅས་པ་ལ་ལས་བྱས་པར་གྱུར། །

འཕྲོ་བའི་ལྟོ་འཕྱེ་ལྟོ་བའི་པགས་པའི་འོད་ལྡན་པ། །ལ་ལ་ཞིག་གིས་རལ་གྲི་ཤུབས་ནས་བཏོན་པར་གྱུར། །འཛག་པའི་སྨྱོན་ཆུའི་ཐིགས་པས་གོས་པའི་གདོང་ལྡན་པ། །གཡེར་ཀ་དང་བཅས་གླང་པོ་རྣམས་ཀྱིས་ཀུན་ནས་བསྒྲིབས། །དཔྲལ་འབུར་ལྕགས་ཀྱུས་བཏབ་པ་ལ་ནི་ལག་པས་
གཞན། །ཤིན་ཏུ་གླང་པོ་ཆེ་ནི་ཀུན་ནས་ལངས་པར་བྱས། །རྒྱ་ཆེན་བྲང་གི་མཐིལ་ནས་གཞུ་ནི་བཟུང་བྱས་ཏེ། །རྔ་མ་དང་བཅས་རྒྱུག་པའི་རྟ་ལ་གནས་པ་ནི། །གཞན་གྱི་མདའ་འཛིན་ནས་ནི་སྒྲོ་ལྡན་རྣོ་བ་ནི། །སོར་མོ་རྣམས་ཀྱིས་རྟེན་ནི་སར་པ་བཏོན་པར་གྱུར། །དེ་ནས་མངོན་པར་
ཕྱོགས་པར་གྱུར་པའི་དམག་དེ་མཐོང་ནས་ཀ་ཤིའི་རྒྱལ་པོ་ཀུན་ནས་སྐྲག་པའི་དབང་གིས་འདར་བ་ཡང་དག་པར་བྱུང་སྟེ། །ད་ནི་སུ་ལ་སྐྱབས་སུ་འགྲོ་ཞེས་ཟེར་བ་བདག་གིས་ཐོས་ཏེ། ཇི་ལྟར་བདག་ཉིད་ཆེན་པོ་ཁྲ་ཅན་དེ་དཀའ་ཐུབ་ཀྱི་ནགས་འདིར་ཞུགས་པ་དེ་ཉིད་བདག་ལ་དཀའ་ཐུབ་ཀྱི་སྟོབས་
ཀྱིས་ལུས་འཕགས་རྒྱལ་པོའི་སྟོབས་འདི་ལས་སྲུང་བར་བྱེད་པར་འགྱུར་རོ་སྙམ་དུ་རྣམ་པར་བསམས་ནས། ཤིང་རྟ་འདྲེན་པ་ལ་སྨྲས་པ། ཤིང་རྟ་འདྲེན་པ་ཤིང་རྟ་འདྲེན། །དེ་ཡི་དཀའ་ཐུབ་ནགས་གང་དུ། །ཁྲ་ཅན་བདག་ཉིད་ཆེན་པོ་ཡི། །ལམ་ཤེས་པ་ཡི་ལམ་དེ་ན། །བདག་གི་ཤིང་རྟ་
དྲང་བར་གྱིས། །དེ་ནས་འདྲེན་པས་དེ་ལྟར་བགྱི་ཞེས་སླར་མཉན་ནས། །ལྕག་གིས་ཀུན་ནས་བསྐུལ་བས་མྱུར་བར་འཕེལ་བ་ནི། །རབ་རྒྱས་སྣ་ལས་སྐྱེས་པའི་སྒྲ་ཅན་ཤུགས་ཀྱིས་ནི། །རྟ་རྣམས་ཐག་པ་རབ་ཏུ་བཀྲོལ་བ་བྱས་པར་འགྱུར། །དེ་ནས་མྱུར་བར་དཀའ་ཐུབ་ནགས་ནས་རྣམ་བྱུང་
ནས། །པདྨའི་ཕྲེང་བས་བྱས་པའི་ལག་པས་བརྐྱང་བྱས་ཏེ། །དོགས་པ་རྣམ་པར་དོར་ནས་སྤྱིལ་བོར་ཞུགས་མཛོད་ཅེས། །དཀའ་ཐུབ་ནོར་ཅན་དེས་ནི་མི་སྐྱོང་དེ་ལ་སྨྲས། །དེ་ནས་ཤིང་རྟ་མཆོག་ལ་རིམ་གྱིས་བཅས་ནས་ནི། །ལག་པ་ཀུན་ནས་བཟུང་སྟེ་འཇིགས་པས་འཁྲུག་པ་ལ། །རི་དགས་
དང་ནི་རྨ་བྱ་ཆུ་སྐྱར་བར་མེད་པ། །དཀའ་ཐུབ་ནགས་སུ་ཐུབ་པ་མཆོག་དེས་ཁྲིད་པར་གྱུར། །ས་ཡི་བདག་པོ་དེས་ཀྱང་སྤྱིལ་པོར་སོང་བ་ན། །ངལ་བས་ཀུན་ནས་ཁྱབ་པའི་ཡིད་རེ་བཅས། །ཤིང་རྟ་རྟ་དང་རྐང་ཐང་རྣམས་ཀྱིས་ཁྱབ་པ་ནི། །སྟོབས་ཀྱང་ཀུན་ནས་ཁྱབ་པའི་དབང་གིས་

རྣམ་པར་མི་སྣང་གྱུར། །དེ་ནས་རྒྱལ་པོ་དེས་གསོང་པོར་སྨྲ་བ་བྱས་ཤིང་སྤྱིལ་པོའི་གནས་དང་རྗེས་སུ་མཐུན་པའི་སྟན་འགའ་ཞིག་ལ་ཀུན་ནས་ཉེ་བར་ཞུགས་ཏེ། ཐམས་ཅད་དུ་བལྟ་བ་བཏང་བས་ལུས་འཕགས་རྒྱལ་པོའི་དམག་ཚོགས་དེ་མ་མཐོང་ཞིང་བྱང་ཆུབ་སེམས་
དཔའ་ལ་སྨྲས་པ། ཁྱོད་ཀྱི་དཀའ་ཐུབ་ནགས་སུ་བདག་ནི་ཞུགས་པ་ལ། །དགྲ་ཡི་དམག་དེ་མྱུར་བ་ཉིད་དུ་གང་དུ་སོང་། །ཁྱད་པར་དུ་ནི་ཡང་བ་དཀར་བ་ཆུང་ཟད་པས། །ཆུ་གཏེར་རྣམས་ཀྱི་ཕྲེང་བ་རླུང་གིས་གདུངས་པ་ལྟར། །ཁྲ་ཅན་གྱིས་སྨྲས་པ། རྒྱལ་པོ་ཆེན་པོ་ཁྱོད་རྣམ་པར་གདུལ་
བའི་ཕྱིར་བདག་གིས་རྫུ་འཕྲུལ་གྱི་ཆེ་བའི་བདག་ཉིད་བསྟན་པར་བྱས་པ་སྟེ། འདི་ནི་ལུས་འཕགས་རྒྱལ་པོའི་དམག་ཚོགས་གང་ན་ཡོད་ཅེས་ཟེར་རོ། །གཞན་ཡང་། གང་དུ་གཉེན་རྣམས་ལས་ཀྱང་འཇིགས། །དགྲ་འཇིགས་གཅིག་པུར་མ་ཟད་ཀྱི། །རྒྱལ་སྲིད་དེ་ནི་སྐྱོན་མང་བ། །སེམས་
བཅས་སུ་ཞིག་དོན་དུ་གཉེར། །འདི་ནི་གདོན་བྱ་གསད་བྱ་འདི། །དེ་ནི་རང་ཉིད་མིན་བླང་བྱ། །བསམ་པ་ཡང་འདི་དམྱལ་བའི་ཕྱིར། །ས་སྐྱོང་བྱ་འདི་སྨོས་ཅི་དགོས། །དེ་བས་རྒྱལ་སྲིད་བདེ་བ་ཆུང་། །ཐ་མར་འཇིགས་པ་ཆེན་པོ་ཅན། །དོར་ནས་གཅིག་དུ་དགེ་བ་ནི། །རབ་བྱུང་ཉིད་ལ་ཁྱོད་བརྟན་
མཛོད། །བདག་ལ་ཆགས་པ་ཟིལ་གྱིས་ནོན། །དཀའ་ཐུབ་ནགས་དང་རྒྱབ་ཕྱོགས་པ། །སྲོག་ཆགས་རྣམས་ནི་དེ་ལྟ་བུའི་མི་དགེ་བའི་སྤྱོད་པ་བྱེད་དེ་གང་གིས་ངན་འགྲོ་བརྟེན་པར་འགྱུར་ཏེ་ལྷས་གཟིགས་ཤིག །བསྲེག་ལུགས་དུ་བའི་བླ་བྲེས་ནི། །སྲབ་པའི་སྲིན་དང་རྗེས་མཐུན་པ། །
མེ་ཏོག་སྐྱེས་པའི་ཤིང་གི་ནང་། །པདྨ་སྔོ་བའི་མཐའ་ལྡན་པ། །མཐའ་མེད་པ་ཡི་ས་སྐྱེས་ལྡན། །ས་སྐྱེས་མཐུག་པའི་གྲིབ་མ་ཡིས། །བསིལ་བར་བྱེད་པའི་ས་ཕྱོགས་ཅན། །བུང་བ་ལྷུང་བས་ཀུན་སྐྲག་པ། །ཀུན་ནས་འདར་བའི་ལྟ་བ་ཅན། །དཀའ་ཐུབ་ཅན་རྣམས་བུ་མོ་ཡིས། །མེ་ཏོག་བཏུས་པར་
གྱུར་པ་ནི། །སྲུབ་བཞིན་པ་ཡི་གཙུབ་ཤིང་སྒྲས། །ཀུན་ནས་མེ་འབྱུང་མཚོན་བྱས་པ། །ཀུན་ནས་དཀའ་ཐུབ་མོ་རྣམས་ཀྱིས། །ཤིང་ལོའི་ཁང་སྒོ་བཅུག་བཞིན་པ། །ཞི་བ་ཤིང་ལོ་རྣམས་ཀྱི་གནས། །ཞི་མིན་སྐྱེ་བོ་དང་ནི་བྲལ། །གཉེན་འདུན་ཆགས་པས་དཀའ་ཐུབ་ནགས། །སྐྱེ་བོས་

འགྲོ་བར་ནུས་པ་མིན། །ལེགས་པ་རྣམས་ཀྱི་བར་ཆད་འདི། །མཉེས་གཤིན་གལ་ཏེ་སྐྱེ་མི་འགྱུར། །མཛའ་བོ་རྣམས་ཆད་མྱ་ངན་མེ། །ལུས་ཅན་རྣམས་ཡིད་སྲེག་མི་འགྱུར། །བདག་ལ་ཆགས་པས་འཇིག་རྟེན་འདི། །བྱ་མིན་སྟོབས་ཀྱིས་བྱེད་དུ་བཅུག །ངན་འགྲོར་འགྲོ་བའི་རྒྱུ་
ཉིད་ཕྱིར། །དགྲ་ལས་མཉེས་གཤིན་ཤིན་ཏུ་དཀའ། །བདག་ལ་ཆགས་པའི་རྨོངས་པ་ལས། །དེ་ལྟ་བུ་ནི་སུ་ཞིག་བྱེད། །གང་གིས་སྨད་སྨྲ་མངའ་རྣམས་ཀྱིས། །འབེན་ནི་སྐད་ཅིག་དེར་འགྲོ་འགྱུར། །གང་ཚེ་ཉིད་དུ་ཀུན་ནས་བསྙེན། །འཇིག་རྟེན་མཉེས་གཤིན་ཆེན་པོ་ཡིན། །
འདོད་ཆགས་ཞེ་སྡང་གཏི་མུག་དགྲས། །དེ་ཚེ་སྤང་བར་ཉེ་བར་སོང་། །མཉེས་གཤིན་ཆེན་པོ་རྣམས་མ་དཔྱད། །གཟི་བརྗིད་ལྡན་ཡང་སྐད་ཅིག་གིས། །སྐྱེ་བོ་ལ་འོངས་ཁོང་ནད་རྣམས། །མར་མེ་ལ་ནི་ཕྱེ་ལེབ་ལྟར། །ཡན་ལག་རྣམས་ལ་ཀུན་ནས་ཚད་དང་ཁོང་ན་ལྷག་པ་དབུགས་
ནི་འབྱུང་དང་འཇིགས་པ་དང་། །གཉེར་སེམས་དང་ནི་གཉིད་སད་པ་དང་ཉིན་མཚན་ལ་ཡང་ཤིན་ཏུ་མུན་ཅན་ཕྱོགས་རྣམས་དང་། །མཆི་མ་དང་བཅས་མིག་དང་བརྟན་མིན་གཉིད་ནི་མཛའ་བོའི་སྐྱེ་བོ་རྣམས་ཆད་དུས་སུ་བརྟན། །མཉེས་གཤིན་སྦྲུལ་གྱིས་བཏབ་པས་རྨོངས་པའི་ཡིད་ཅན་རྣམས་
ཀྱི་རྒུད་པ་འདི་རྣམས་འབྱུང་བ་ཡིན། །ལོངས་སྤྱོད་འདོད་པ་གླང་པོ་འཆིང་བ་ཆོག་ཤེས་རྣམ་པར་གཅོད་པར་བྱེད་པ་རྗེས་སོང་སྟེ། །འདོད་ཆགས་གླང་པོ་སྐྱོང་བས་བསྐུལ་བ་རྒྱགས་པའི་དབང་གིས་དམ་པ་མིན་པའི་ལམ་རྒྱུག་ཅིང་། །མཉེས་གཤིན་དཀའ་བ་ཆུང་བ་ཉིད་ཀྱིས་བཅག་པར་མི་ནུས་པ་ནི་
ཡིད་ཀྱི་གླང་པོ་ཆེ། །ཀུན་ནས་རྨོངས་ཤིང་སློང་མོ་པ་ཡི་སྡུག་བསྔལ་ཉོན་མོངས་ལྕགས་ཀྱུའི་རྨ་ནི་བཟོད་པར་བྱེད། །གཉེན་འདུན་མཉེས་གཤིན་པ་ནི་དགྲ་བོ་བཞིན་དང་ལག་འགྲོ་བཞིན་དང་དྲག་པའི་གླང་མོ་བཞིན་དང་མེ་བཞིན་དུ། །གང་གིས་རིང་ནས་ཡོངས་སུ་སྤངས་ནས་འགྲོ་བ་དེ་ལ་
ལོང་ནད་རྣམས་ནི་ཀུན་ནས་འཛུད་མི་བྱེད། །གང་ཞིག་འདི་ལ་བཙས་པའི་སྡུག་བསྔལ་བསྐྱོད་པ་མི་མཁས་པ་ཡི་སྐྱེ་བོས་འཁྱུད་པར་བྱེད། །རྟག་ཏུ་སྨན་མིན་ཟ་ལྟར་མི་བཟད་རྣམ་པ་རྒོད་པ་རྣམས་ནི་དེ་ལ་ཉོན་མོངས་བྱེད། །གང་ཞིག་གཉེན་འདུན་འཆིང་བ་བཅད་ནས་སྲིད་པའི་འཇིགས་

པ་གཅོད་ཕྱིར་ནགས་སུ་སོང་བ་ནི། །དེ་ནི་མཁས་པ་རྣམས་ཀུན་གྱི་ནི་ཉི་མ་བཞིན་དུ་འོད་ལྡན་རྣམས་ཀྱི་མདུན་སོང་བ། །དེ་ལ་སེམས་ནི་འབྱུང་བས་བྱས་པ་རྣོ་བའི་མདའ་ཡིས་བྱ་བའི་འབྲས་བུ་མེད་པའི་གཞུ། །སྐྱེས་པའི་འབྲས་བུ་བླ་ན་མེད་པ་ཞི་བའི་བདེ་བ་ཐོབ་པར་གྱུར་ཅིང་ངེས་
ནི་རྙེད། །དེ་ནས་རྒྱལ་པོ་དེ་རབ་ཏུ་འབྱུང་བ་ལ་ངེས་པར་བྱས་པས་བྱང་ཆུབ་སེམས་དཔའ་ལ་སྨྲས་པ། དྲི་མེད་རྒྱ་ཆེན་བློ་ཡི་གྲགས་པ་ཅན་ཁྱོད་ཀྱི། །འདི་ནི་རྫུ་འཕྲུལ་གྱི་སྟོབས་ཀུན་ནས་རྒྱ་ཆེ་བ། །མཐོང་ནས་བདག་གི་ཡིད་ཀྱང་མྱུར་བར་བྱེད་པ་སྟེ། །དཀའ་ཐུབ་ཀྱིས་ནི་དབང་བ་ཉིད་ཐོབ་
པ་ཡི་ཕྱིར། །ཨེ་མ་རྫུ་འཕྲུལ་འདི་ནི་དཀའ་ཐུབ་ཀྱིས་མོས་ལ། །གལ་ཏེ་བློ་ལྡན་རྣམས་ཀྱི་བློ་ཡི་སྟོབས་ཀྱིས་ཀྱང་། །དེ་ལྟར་སྐྱོན་ནི་མང་བ་དྲི་མ་ཅན་གྱི་ནི། །སྐད་ཅིག་གིས་འཇིགས་པ་ལ་རྒྱལ་པོ་ཉིད་ཀྱིས་ཅི། །དེ་ནས་རྒྱལ་པོ་དེས་རྟའི་ཁ་ལོ་བ་གདོང་མཆི་མ་དང་བཅས་པ་དེ་ལ་རྒྱན་
རྣམས་བྱིན་ནས་བྱང་ཆུབ་སེམས་དཔའི་དྲུང་དུ་རབ་ཏུ་བྱུང་བར་གྱུར་ཏོ། །ཤིང་རྟའི་ཁ་ལོ་བ་ཡིད་མི་དགའ་བ་དེས་ཀྱང་རྒྱལ་པོ་དེ་ལ་བསྐོར་བ་བྱས་ཏེ། དཀའ་ཐུབ་ཀྱི་ནགས་དེ་ནས་ཤིང་རྟ་མཆོག་བླངས་ནས་རྣམ་པར་བྱུང་བར་གྱུར་ཏེ། འཇམ་པའི་རྨིག་པ་གཉིས་ཀྱི་སྒྲ་ལྡན་རབ་ཏུ་འཕྲོ་བའི་མདུན་
གྱི་རྔ་མ་ཅན། །རབ་ཏུ་སྲབ་པའི་དྲི་མ་མེད་པའི་ཁ་ཆུའི་རྒྱུན་གྱིས་མལ་གྱི་དབུས་སྦངས་པ། །མི་སྐྱོང་དང་ནི་རྣམ་པར་བྲལ་བས་སྡུག་བསྔལ་གྱིས་ནི་རྣམ་འཁྲུགས་རྟ་དེ་རྣམས། །ཤིན་ཏུ་ལྕི་བ་ལྟར་ནི་དཀའ་བས་ཤིང་རྟ་དེ་ན་དལ་ཞིང་རྒྱུ་བར་གྱུར། །རྒྱལ་པོའི་ཁབ་ཏུ་ཡང་རིམ་གྱིས་རྗེས་སུ་ཐོས་པ་
འཁྲུགས་པ་དང་ལྡན་པའི་གྲོང་ཁྱེར་བའི་སྐྱེ་བོས་ཕྱིར་བྱུང་སྟེ། རྒྱལ་པོ་གང་ན་ཡོད་ཅེས་བྱ་བ་དྲིས་པར་གྱུར་བ་དང་། ཁྲ་ཅན་དྲུང་ན་རྒྱལ་པོ་འདི། །རབ་ཏུ་བྱུང་ཞིང་ཉེ་བར་གནས། །མཆི་མའི་མིག་བཅས་ཁ་ལོ་བས། །འདི་ལྟར་བརྗོད་ཅིང་མྱ་ངན་བྱེད། །དེ་ནས་སྐྱེ་བོ་རྣམས་ཀྱིས་བརྒྱུད་པས་རྒྱལ་པོ་
རབ་ཏུ་བྱུང་ངོ་ཞེས་བྱ་བ་ཐོས་ནས། རྒྱལ་པོའི་འཁོར་ཐམས་ཅད་དུ་ཀུན་ནས་འཁྲུགས་པ་ཉིད་དུ་སོང་བར་གྱུར་ཏོ། །དེ་ནས་ཀ་ཤིའི་རྒྱལ་པོའི་བཙུན་མོ་དེ་བདག་པོ་རབ་ཏུ་བྱུང་བ་ཐོས་པས་སེམས་མཆོག་ཏུ་སྨྲེ་སྔགས་འདོན་པར་གྱུར་ཏོ། །ཨེ་མ་དཔལ་གྱི་བརྩེ་མེད་ཉིད། །ཤིན་ཏུ་གཡོ་བའི་ལྷན་སྐྱེས་ཀྱང་། །

གཅིག་པུ་གང་དུ་ཡང་སོང་བ། །དཀའ་ཐུབ་ནགས་སུ་དོར་ནས་སོང་། །དཔལ་ལ་ཀླན་ཀ་བྱས་པས་ཅི། །བདག་གི་ཡིད་ལ་ཤིན་ཏུ་དྲག །གང་ཕྱིར་དེས་དོར་བདག་འཚོ་སྟེ། །གླང་པོ་ཆེས་ནི་གླང་མོ་བཞིན། །གཞོན་པ་ཤིན་ཏུ་འཇམ་པ་དང་། །རབ་ཏུ་བདེ་བར་གནས་པ་དེས། །བྱ་དཀའ་རབ་བྱུང་
ཉིད་ལ་ནི། །ཡིད་ནི་ཅི་ལྟར་དེས་ནི་བྱས། །ཟླ་ཚེས་བླ་བྲེས་ལྟར་དཀར་བ། །གོན་པའི་གོས་ནི་རབ་དོར་ནས། །ཇི་ལྟར་རང་བཞིན་གྱིས་རྩུབ་པའི། །ཤིང་ལོ་རྣམས་ནི་དེས་གོན་གྱུར། །ལི་ཁྲི་དང་བཅས་སོར་མོ་ཅན། །གང་གི་ལག་པས་བདག་ལ་ནི། །ཐིག་ལེར་བྱས་པ་དེ་རིང་དེས། །ཇི་ལྟར་ཀུ་
ཤ་རྣམས་འོང་གྱུར། །ནོར་བུ་དང་བཅས་གསེར་གྱི་སྣོད་ཀྱིས་ཕུལ་བ་ནི། །དྲི་ཞིམ་ཞིམ་པའི་ཆང་ནི་དགའ་བས་རབ་བཏུངས་བ། །དེས་ནི་ལག་པས་སམ་ནི་ཤིང་ལོ་སྦྱར་བས་སམ། །སྐོམ་པས་གདུངས་པ་ཆུ་ནི་ས་སྐྱོང་ཅི་ལྟར་འཐུང་། །ས་སྐྱོང་ཅོད་པན་ནོར་བུའི་འོད་རྣམས་གང་ཞིག་རིང་རེག་པ། །གྲོགས་
མོ་རྣམས་ཀྱིས་གུས་དང་བཅས་པའི་འདུད་པ་རྣམས་ཀྱི་ལྟར། །དེ་རྣམས་རྐང་པའི་སེན་མོའི་རིན་ཆེན་འོད་རྣམས་འཕྲོ་བྱེད་དེའི། །ནགས་ཀྱི་ས་ཡི་རྡུལ་རྣམས་ཀྱིས་ནི་ངེས་པར་སྔོ་བར་གྱུར། །དལ་ཞིང་མེ་ཏོག་རྣམས་ནི་མངོན་དུ་འཛིན་པར་བྱེད་འགྱུར་བ། །ཐོ་རངས་དུས་སུ་རིམ་གྱིས་ལག་
པས་ཡལ་ག་གཟུང་བྱས་ནས། །དོན་བྱས་ལྗོན་ཤིང་བུད་མེད་རྣམས་ནི་རླུང་གིས་འདར་བྱས་པ། །གང་རྣམས་དེ་ལ་ཟེའུ་འབྲུའི་སོར་མོ་རྣམས་ཀྱིས་ཡང་ཡང་རེག །དེ་ནས་བློན་པོ་རྣམས་ཅི་ལྟར་ཡང་བསྟན་པ་ཉིད་ལ་དམིགས་ནས་དུ་བའི་བཙུན་མོའི་འཁོར་དང་ལྷན་ཅིག་ཏུ་རྣམ་པར་བཟློག་ནས་རྒྱལ་
པོ་དེའི་སྲས་ཆེ་བ་ལ་དབང་བསྐུར་བ་བྱས་པར་གྱུར་ཏེ། རྒྱལ་པོ་དེས་ཀྱང་དཀའ་ཐུབ་དྲག་པོ་སྤྱོད་ཅིང་བྱང་ཆུབ་སེམས་དཔའི་མན་ངག་གིས། །རིམ་གྱིས་བསམ་གཏན་རྣམས་རྙེད་ནས། །མཆོག་ཏུ་ཞི་བདེ་ཐོབ་འགྱུར་དེ། །ལེགས་ཕྱིར་དབང་པོ་ཡང་དག་བསྡམས། །དེ་ལྟར་མགོན་པོ་དེ་ཡིས་ནི། །
བྱང་ཆུབ་སྤྱོད་པའི་རྗེས་འཇུག་པ། །ཞི་ཕྱིར་མང་པོ་གཏིང་རིང་བའི། །འདོད་པའི་འདམ་ལས་ཀུན་བཏོན་གྱུར། །དེ་ལྟར་མཆོད་བྱའི་ཐུབ་དེ་ལ། །གཞན་གྱི་དོན་ནི་སྟོན་མཛད་པའི། །ཁྱེད་ཅག་བརྟེན་ཞིང་གུས་ལྡན་པ། །ངེས་པར་ལེགས་ཕྱིར་འབྱུང་བར་ཤོག །ཁྲ་ཅན་གྱི་སྐྱེས་པའི་རབས་

ཏེ་སྐྱེས་རབས་བཞི་བའོ།། །།ས་གསུམ་ཕན་མཛད་བདག་ཉིད་ཆེན་པོ་རྣམས། །ལྷ་ཡི་བདེ་བ་ཡང་ནི་རྣམ་པར་འདོར། །གཞན་གྱི་སྡུག་བསྔལ་ཤིན་ཏུ་ལྕི་བས་ནི། །བརྩེ་ལྡན་རྣམས་ཀྱི་སེམས་ནི་སྡུག་བསྔལ་བྱེད། །འདི་ལྟར་རྗེས་སུ་ཐོས་ཏེ། ཕ་རོལ་ཏུ་ཕྱིན་
པ་མ་ལུས་པ་རྟོགས་པས་བྱང་ཆུབ་དང་ཉེ་བར་རང་གི་འོད་ཀྱིས་ཡན་ལག་སྣང་བར་མཛད་པའི་བྱང་ཆུབ་སེམས་དཔས་དུས་གཅིག་གི་ཚེ་ན་དགའ་ལྡན་གྱི་གནས་སུ་འཁྲུངས་པར་གྱུར་ཏོ། །བདག་ཉིད་ཆེན་པོ་དེས་ཀྱང་དེ་ན་གནས་པའི་ལྷ་རྣམས་ལ་ཆོས་ལས་མ་འདས་པའི་གཏམ་གྱིས་ལམ་
དམ་པ་མངོན་པར་གསལ་བར་མཛད་ནས། འདི་ལྟར་བསམས་པར་གྱུར་ཏེ། རྫོགས་ལྡན་གྱི་དུས་ན་འཇིག་རྟེན་པ་ཆོས་ལ་རྩེ་གཅིག་པ་བདེ་བར་ལམ་བཟང་པོ་ལ་འཇུག་པ་ཡིན་ཏེ། རྩོད་པའི་དུས་འདིར་ནི་རྒྱགས་པ་དང་ང་རྒྱལ་དང་ཆགས་པ་དང་ཞེ་སྡང་དང་གཏི་མུག་རྣམས་ཀྱི་དབང་དུ་
གྱུར་པའི་སྲོག་ཆགས་རྣམས་བདེ་བའི་ཆོས་རྨོངས་པའི་བདག་ཉིད་རྣམས་ངན་འགྲོ་གཞན་གྱི་དབང་དུ་སོང་བ་སྟེ། དེ་བས་ན་བདག་གིས་བྱང་ཆུབ་རྟོགས་ནས་འཁོར་བ་ནས་གདོན་པར་རིགས་ཞེས་ཟེར་རོ། །ཡུལ་དབུས་ན་ཡང་དད་པ་རྣམ་པར་དག་པའི་ཡིད་ཅན་འཇིག་རྟེན་པ་ཡིན་ཏེ། གང་
ཞིག་འདི་ཟས་གཙང་མ་ཞེས་བྱ་བ་གྲོང་ཁྱེར་སེར་སྐྱ་ན་མི་རྣམས་ཀྱི་བདག་པོ་ཡིན་པས་འདི་ནི་ཤིན་ཏུ་ཡང་དམ་པ་རྣམས་ཀྱི་སྤྱོད་པས་དྲང་སྲོང་ཆེན་པོ་རྣམས་པས་ཀྱང་ལྷག་པ་ཡིན་ཏེ། དེ་བས་ན་འདི་ཉིད་ཀྱི་བཙུན་མོའི་མཆོག་སྒྱུ་མ་ལྷ་མཛེས་ཀྱི་ཁོང་པར་སྐྱེ་བ་ཀུན་ནས་ལེན་པར་བྱེད་པར་འགྱུར་ཞེས་བྱ་བ་
རྣམ་པར་བསམས་ནས། མཚན་མོ་ཉལ་བའི་རྨི་ལམ་དུ། །ཁ་རི་ལྟར་དཀར་ལྕི་ཞིང་མཆེ་བ་དྲུག་པའི་སྨྱོན་ཆུ་ཡི། །དྲི་ཡིས་བསྒོས་པའི་གདོང་ཅན་མཆེ་བ་གཉིས་པའི་གཟུགས་བྱས་ནས། །ས་ཡི་བདག་པོ་ཟས་གཙང་དག་གི་བཙུན་མོའི་ལྟོ་བར་ནི། །འགྲོ་བ་རྣམས་ཀྱི་སྡུག་བསྔལ་
ཟད་ཕྱིར་དེ་ནི་ཞུགས་པར་གྱུར། །དེ་ནས་བཙུན་མོ་སྒྱུ་མ་ལྷ་མཛེས་ཆེན་མོས་རྒྱལ་པོ་ལ་རྨི་ལམ་དེ་སྨྲ་ཞིང་གནས་ཏེ། །ལྷ་ལགས་དེ་རིང་བདག་ལ་རྨི་ལམ་དུ་སྟོན་ཀའི་ཆུ་འཛིན་ལྟར་དཀར་བ་མཆེ་བ་དྲུག་པ་གླང་པོ་ཆེའི་དབང་པོ་ལྟོ་བ་གཡས་པ་ཁ་ཕྱེ་ནས་ཁོང་པར་ཞུགས་སོ་ཞེས་ཟེར་རོ། །

དེ་ནས་རྒྱལ་པོ་དེས་རྨི་ལམ་གྱི་འབྲས་བུ་ཤེས་པ་གཉིས་སྐྱེས་རྣམས་ཀྱི་མདུན་དུ་རྨི་ལམ་དེ་བརྗོད་ཅིང་གནས་སོ། །བྲམ་ཟེ་དེ་རྣམས་ཀྱིས་ཀྱང་དེ་ལ་ཞུས་པ། །རྒྱལ་པོ་ཆེན་པོ་ཁྱོད་ཀྱི་སྲས་འཁོར་ལོས་སྒྱུར་བ་འབྱུང་བར་འགྱུར་ཞེས་སྨྲའོ། །རྒྱལ་པོ་དེ་ཡང་ཡིད་དགའ་བས་གཉིས་སྐྱེས་དེ་རྣམས་ལ་གུས་པ་
མཛད་ནས་རྣམ་པར་བཏང་བར་གྱུར་ཏེ། བཙུན་མོ་བཙུན་མོའི་ནང་འཁོར་བཅས། །རྗེས་གནང་དེ་ནས་དུས་གཅིག་ཚེར། །ལུམྤའི་ཚལ་དུ་སོང་བར་གྱུར། །མེ་ཏོག་ཁུར་ནི་འཛིན་པ་ཡི། །ཡལ་ག་ཀུན་ནས་འཛིན་གྱུར་པའི། །བཙུན་མོའི་ལྟོ་བ་མྱུར་ཕྱེ་ནས། །བྱང་ཆུབ་སེམས་དཔའ་རྣམས་འབྱུང་
འགྱུར། །དེ་ནས་འཁྲུངས་པ་ཙམ་གྱིས་གསེར་གྱི་གཉའ་ཤིང་ལྟར་དཀར་ཏེ། །མིག་ནི་སྟོང་དང་ལྡན་པའི་ཀ་བས་རིམ་གྱིས་འཛིན་པར་གྱུར། །མེ་ཏོག་མན་དཱ་ར་ཡི་ཚོགས་དང་ལྷན་ཅིག་དེ་ཡི་དབུ་ལ་ནི། །མཁའ་ལས་དྲི་མ་མེད་པའི་ཆུ་ཡི་རྒྱུན་དག་བབ་པར་གྱུར། །འགྲོ་བ་རྣམས་ཀྱི་མགོན་གཅིག་
དེ་ནི་སྟོབས་བྱེད་ཀྱིས་བཞག་པ། །བརྟན་ཞིང་རིམ་གྱིས་ས་ནི་གོམ་པ་བདུན་ནི་དོར་བྱས་ནས། །ཤིན་ཏུ་ངོ་མཚར་བ་ཡི་ཚིག་འདི་ཞི་བར་གསུངས་པ་སྟེ། །བདག་ནི་སྐྱེ་བ་ཐ་མ་ཞེས་ཏེ་མུན་པ་རྣམས་མེད་ཕྱིར། །དེ་ནས་བཅོམ་པ་བསིལ་མིན་འོད་ཟེར་ལྟར་འབར་ཞི་བ་ཡི། །བདག་ཉིད་ཅན་དེའི་འོད་ནི་
ནོར་ལྡན་མ་ནི་སྣང་བྱེད་ཅིང་། །ཉི་ཟླ་དག་གིས་འབར་བའི་འོད་རྣམས་ཀྱིས་ནི་མི་ཕྱེད་པའི། །འཇིགས་པའི་མུན་པར་དམྱལ་བ་རྣམས་ལ་འཇིགས་པར་གྱུར། །བདག་ཉིད་ཆེན་པོ་ཆོས་ཀྱི་རྒྱལ་པོ་དེ་ཡང་འདི་ནི་དབང་བསྐུར་རོ་ཞེས་བྱ་བར་རབ་ཏུ་དགའ་བའི་ཡིད་དང་ལྡན་པའི་ལྷ་རྣམས་ཀྱིས་ནམ་
མཁའི་དཀྱིལ་ལ་རྔ་རྣམས་བརྡུངས་པར་གྱུར་ཏོ། །བཙུན་མོས་ནི་ཁྱོགས་ལ་ཞོན་ནས་བྱང་ཆུབ་སེམས་དཔའ་བླངས་ཏེ་རང་གི་ཁྱིམ་དུ་སོང་བར་གྱུར་ཏོ། །དེ་ནས་ཤིན་ཏུ་ངོ་མཚར་བའི་ཡིད་དང་ལྡན་པའི་ཟས་གཙང་མས་བཙོན་ཐམས་ཅད་བཙོན་ར་ནས་གྲོལ་བར་མཛད་དེ། གྲོང་ཁྱེར་
སེར་སྐྱ་ཀུན་ནས་མཐོང་བའི་རྒྱལ་མཚན་དང་བ་དན་རྣམས་ཀྱིས་སྣ་ཚོགས་པའི་ཚོང་ཁང་གི་ལམ་ཤིན་ཏུ་དྲི་ཞིམ་པའི་དྲིའི་ཆུས་སའི་སྟེང་དུ་ཆག་ཆག་བཏབ་པ་དང་། །མེ་ཏོག་སར་པ་རྣམས་བཀྲམ་པས་ལམ་རྣམས་ཀྱི་བར་མཛེས་པ་བྱེད་དུ་བཅུག་གོ། །འདྲེས་པའི་རི་དགས་ཀྱི་ནི་པགས་པས་

གཡོགས་པར་བྱས་པའི་ཕྲག་པའི་ཕྱོགས། །མེ་ཡི་འོད་ཅན་རལ་པ་རྣམས་ཀྱི་ཚོགས་ནི་ཀུན་ནས་འཛིན་བྱེད་ཅིང་། །དཀར་མིན་མིན་པའི་ལས་རྣམས་ཀྱི་ནི་མངོན་སུམ་དཀར་མིན་ཞེས་བྱ་བ། །ནམ་མཁའ་ལས་བྱུང་སྐྱེ་བོ་རྣམས་ལས་ས་ཡི་བདག་པོས་ཐོས་པར་གྱུར། །དེ་ནས་
རྒྱལ་པོ་དེ་མངོན་པར་བཞེངས་ཏེ་དྲང་སྲོང་ཆེན་པོ་དེ་བྱང་ཆུབ་སེམས་དཔའི་སྐྱེ་བ་ཤེས་པ་ལ་འཇུག་པར་བྱེད་པ་མངོན་པར་མཁྱེན་ཏེ་གསོང་པོར་སྨྲས་ནས། ཨརྒྷ་རབ་ཏུ་སྦྱིན་པ་ལ་སོགས་པ་བཀུར་སྟིས་རིམ་གྲོར་བྱས་ཏེ། གདན་ཡོངས་སུ་འཛིན་པར་བྱས་པ་འདི་ལ་བདེ་བ་དྲིས་ནས་མ་མའི་པད་བར་གནས་
པའི་བྱང་ཆུབ་སེམས་དཔའ་སྟོན་ཞིང་གསུངས་པ། བཅོམ་ལྡན་འདས་རེ་ཞིག་བདག་གི་སྲས་འདི་ལ་ཅི་ཚེ་རིང་བར་འགྱུར་རམ་མི་འགྱུར་གཟིགས་ཤིག་ཅེས་སོ། །དེ་ནས་དཀར་མིན་གྱིས་བྱང་ཆུབ་སེམས་དཔའ་བླངས་ཏེ་མཐོང་ནས་ཀྱང་འདི་ལྟར་བསམས་པར་གྱུར་ཏེ། ཇི་ལྟར་མཚན་གསལ་རྣམས་ཀྱིས་
འདི། །རྒྱན་དང་འདྲ་བར་བརྒྱན་བྱས་པས། །དེ་ལྟར་འགྲོ་བའི་སྡུག་བསྔལ་བ། །བསལ་ཆེད་སངས་རྒྱས་འབྱུང་བར་འགྱུར། །གང་ཚེ་སངས་རྒྱས་འདི་འབྱུང་བ། །དེ་ཚེ་བདག་ནི་ཤི་འགྲོ་འགྱུར། །འདི་ལས་ཆོས་གཏམ་ཐོས་གྱུར་པ། །གང་དག་ལུས་ཅན་དེ་དོན་བྱས། །དྲང་སྲོང་ཆེན་པོ་དག་པའི་
སེམས། །འདི་ལྟར་སེམས་པར་བྱེད་པ་དེའི། །མིག་དག་མིག་རྫིའི་རྩེ་མོ་དུད། །ངུ་བའི་མཆི་མ་བྱུང་བར་གྱུར། །དེ་ནས་ཟས་གཙང་མས་མཆི་མ་དང་ལྡན་པའི་མིག་ཅན་དཀར་མིན་ལ་གཟིགས་ནས་འཁྲུག་པ་དང་བཅས་པར་གསུངས་པ། ངེས་པར་འདི་ནི་ཚེ་ཐུང་བ་སྟེ་དེ་ནས་བཅོམ་ལྡན་འདས་མཆི་མ་
དང་བཅས་པའི་མིག་ཅན་དུ་ཡང་དག་པར་གྱུར་པ། ཀྱི་ཧུད་མཆེ་བ་ཉིད་སྲས་ཀྱི་པདྨ་བདག་གི་གཤིན་རྗེ་མཆེ་བ་གཉིས་པའི་བདག་པོས་རྩ་བ་ནས་འདོན་པར་གྱུར་ཞེས་སྨྲས་སོ། །དཀར་མིན་གྱིས་སྨྲས་པ། རྒྱལ་པོ་ཆེན་པོ་མྱ་ངན་གྱིས་ཆོག་ཅིང་ཆོག་སྟེ། བདག་ནི་བདག་རང་ལ་རྗེས་སུ་མྱ་ངན་བགྱིད་
དེ། གང་གི་ཚེ་འདི་ནི་ཡུལ་རྣམས་དོར་ནས་རྒ་བ་དང་འཆི་བས་ཟོས་པའི་ལུས་ཅན་རྣམས་གཟིགས་ནས་ཡིད་སྐྱོ་ཞིང་དཀའ་ཐུབ་ཀྱི་ནགས་སུ་སོང་སྟེ། སངས་རྒྱས་འབྱུང་བར་འགྱུར་བ། དེའི་ཚེ་ན་བདག་ནི་ཤི་བ་ཉིད་དུ་ཉེ་བར་འགྲོ་བར་འགྱུར་ཞེས་པ་དེ་བས་ན་མྱ་ངན་གྱིས་བདག་མིག་འདི་

མཆི་མ་དང་བཅས་པར་བྱས་སོ་ཞེས་སྨྲས་ནས། དྲང་སྲོང་ཆེན་པོ་དེ་སོང་བ་དང་དོན་གྲུབ་ཅེས་བྱ་བའི་མཚན་བྱང་ཆུབ་སེམས་དཔའ་ལ་བྱས་ཏེ། དུས་རིང་པོ་མ་ཡིན་པ་ཉིད་ཀྱིས་བླ་མ་རྣམས་ཀྱི་དྲུང་ནས་ཤེས་པ་ཐམས་ཅད་རྟོགས་ཤིང་། རིགས་མཐུན་པ་ལས་གྲགས་འཛིན་མ་ཞེས་བྱ་བའི་བུད་
མེད་བླངས་པར་གྱུར་ཏོ། །ཇི་ལྟར་འདི་རྒ་བ་དང་ན་བ་དང་འཆི་བའི་ནད་མི་ཤེས་པ་ཉིད་དུ་བདག་གི་སྲས་སུ་གྱུར་ཅིག་ཅེས་བྱ་བ་རྣམ་པར་བསམས་ནས། ཟས་གཙང་མའི་ཕོ་བྲང་གི་ནང་ཉིད་དུ་བཙུན་མོའི་འཁོར་གྱི་དབུས་སུ་འཇུག་པ་རྒྱུན་མི་འཆད་པའི་གར་དང་གླུ་ལྟ་བ་ཐོབ་པ་ལ་རྩེ་གཅིག་པ་བྱང་ཆུབ་སེམས་དཔའ་
བྱེད་དུ་འཇུག་ཅིང་གནས་སོ། །དེས་ཀྱང་གྲགས་འཛིན་མ་ལ་གཞོན་ནུ་སྒྲ་གཅན་འཛིན་ཞེས་བྱ་བའི་སྲས་བསྐྱེད་པར་བྱས་ནས། དུས་གཅིག་གི་ཚེ་ན་གླུ་དང་ཉེ་བར་འབྲེལ་བ་བཙུན་མོའི་འཁོར་ལ་འོས་པའི་སྐྱེད་མོས་ཚལ་རྣམས་གནས་ནས། ཕྱི་རོལ་དུ་འབྱུང་བའི་ཕྱིར་བློ་བྱས་ཏེ་ཡབ་ཀྱིས་རྗེས་སུ་གནང་བའི་
ཤིང་རྟ་མཆོག་ལ་ཞོན་ནས་མཛེས་པར་བྱས་པའི་སེར་སྐྱའི་ལམ་གཟིགས་ཤིང་ཀུན་ནས་གཤེགས་པར་གྱུར་ཏོ། །དངོས་སུ་ཡིད་འབྱུང་ལྟར་ནི་རྣ་བ་དང་ནི་མིག་ཕྱེ་བ། །མིག་ལ་མངོན་དགའ་ནང་འཁོར་ལས་ནི་དེ་ནས་དེ་ཐོས་ནས། །དེ་མཐོང་བ་ཡི་སླད་དུ་ཕྲད་འདོད་པ་ཡི་ཡིད་དང་ལྡན་པ་ཡི། །གྲོང་ཁྱེར་བུད་མེད་
རྣམས་ཀྱི་བྱ་བ་སྣ་ཚོགས་འབྱུང་བར་འགྱུར། །དེ་ནས་ལ་ལ་ཞིག་རྒྱན་མ་རྫོགས་པར་རབ་ཏུ་རློན་པའི་ཐིག་ལེས་དཔྲལ་བའི་དབུས་སུ་མངོན་པར་བརྒྱན་པ་དང་། རྣ་བ་ལས་ཨུཏྤ་ལ་ཀུན་ནས་འཕོ་བ་དང་། མིག་གཅིག་མིག་སྨན་གྱིས་བསྐུས་ལ་ལངས་ཏེ། མིག་ཐུར་འཛིན་པའི་པདྨ་དང་རྗེས་སུ་འདྲ་བའི་ལག་པས་ཡན་
ལག་མེད་དང་རྗེས་སུ་འདྲ་བའི་གཞོན་ནུ་འགྲོ་བ་འདི་ལ་ལྟོས་ཤིག་ཅེས་བྱ་བའི་གྲོགས་མོ་ལ་སྟོན་ཞིང་གནས་སོ། །ལ་ལ་ཞིག་ནི་སླར་ཨེ་མའོ་སྐལ་བ་དང་ལྡན་པ་གྲགས་འཛིན་མ་སྟེ། གང་ཞིག་འདིའི་ལྷན་ཅིག་སྤྱོད་མ་སྙམ་དུ་རྣམ་པར་བསམས་ནས་ཡུད་རིང་པོར་མིག་མི་གཡོ་ཞིང་འདི་མཐོང་བར་གྱུར་ཏེ། སླར་གཞན་དག་
ཀྱང་ལག་པ་གཉིས་ཀྱིས་འཛིན་པའི་སྐར་ཁུང་གི་ཀ་བ་ཤིང་འཛིན་པ་དང་འདྲ་བར་མཛེས་པར་གྱུར་ཏོ། །ལ་ལ་ཞིག་འདི་ལྟར་རྒྱལ་པོའི་སྲས་མཐོང་བའི་ལྟད་མོས་ཤིན་ཏུ་མྱུར་བར་ཁྱེད་ཀྱིས་འགྲོ་སྟེ། ནུ་མའི་འགྲམ་ནས་ལྟུང་བཞིན་པའི་མུ་ཏིག་ཧར་ཕྱེད་མ་བཅིངས་པ་འདི་ཀུན་ནས་ཐོགས་ཤིག །ཨེ་མའོ་ཁྱོད་ནི་ཤིན་ཏུ་གཡོ་

བའོ་ཞེས་བརྗོད་ཅིང་བླ་མའི་སྐྱེ་བོ་འདི་ཁྲོས་པ་མཐོང་སྟེ་ཅིའི་ཕྱིར་ཁྱོད་ངོ་ཚ་མེད་པ་ཞེས་བྱ་བ་གཞན་དག་ལ་ཀླན་ཀ་བྱས་པའོ། །སླར་ལ་ལ་ཞིག་ལྕི་བའི་འོ་མ་འཛིན་པའི་ཕྱོགས་གཅིག་ཏུ་ཀུན་ནས་རེག་པའི་ཕྱེད་ཕྱེ་བའི་སྒོ་རྗེས་སུ་འཛིན་པར་གྱུར་པའོ། །ལ་ལ་ཞིག་ནི་ཁྱེད་གཅིག་པུ་ཉིད་ཀྱི་
གཞོན་ནུ་མཐོང་བའི་ལྟད་མོ་ནི་མ་ཡིན་ཏེ། རེ་ཞིག་ནང་དུ་འགྲོ་ཆུག་ཤིག་དང་བདག་ཀྱང་རྒྱལ་པོའི་སྲས་མཐོང་བར་འདོད་པ་ལྟད་མོ་དང་ལྡན་པ་ཞེས་འདི་ལྟར་སྨྲས་པར་གྱུར་ཏེ། དེ་ལྟར་རྣམ་པར་སོང་བའི་ཕྱིར། །གཞོན་ནུ་མཐོང་འདོད་དེ་རྣམས་ཀྱི། །སྐེ་རགས་དང་ནི་རྐང་གདུབ་སྒྲ། །ཁྱིམ་རྣམས་ལས་ནི་རབ་
ཏུ་རྒྱས། །དེ་ནས་མི་དབང་སྲས་ནི་ལམ་ལ་རིམ་གྱིས་གཤེགས་མཛད་ཅིང་། །ལག་པ་རབ་འདར་དབྱིག་པ་མཛེས་པ་བྲལ་བ་དང་། །གནས་གཙང་བས་ནི་ཀུན་ནས་སྤྲུལ་པ་ཡན་ལག་ཀུན་ནས་སྒུར། །ཤིན་ཏུ་དཀར་བའི་མཆོག་གིས་ཡན་ལག་རྒན་པ་རྣམས་མཐོང་གྱུར། །དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་
དྲིས་པར་གྱུར་ཏེ། །རེ་ཞིག་ཁྱོད་ཀྱིས་སྨོས་ཤིག །སླར་འདི་ནི་གཞུ་བདུངས་པ་ལྟར་སྒུར་ཞིང་ཀུན་ནས་ཡན་ལག་སྟོབས་ཆུང་བ། །ཡོངས་སུ་སྨིན་པའི་ཀ་ཤིའི་མེ་ཏོག་ལྟར་མགོ་ལས་སྐྱེས་པ་དཀར་ཞིང་། མགོ་རབ་ཏུ་འདར་བས་ཅི་ཡང་སྟོན་པ་འདྲ་བ་འདི་སུ་ཞིག་མཐོང་བ་ཡིན། ཁ་ལོ་སྒྱུར་བས་གསོལ་བ། །
གཞོན་ནུ་ལགས་རྒས་པ་ཞེས་བྱ་བ་འཇིག་རྟེན་ཐམས་ཅད་ལ་ཁྱབ་པ། ལུས་དང་དབང་པོ་རྣམས་ལས་གསལ་བ་འཕྲོག་པར་བྱེད་པ། འདོད་པའི་གཏམ་དོར་བར་བྱེད་ཅིང་ཁྲོས་པ་ལྟར་གཞོན་ནུ་མ་རྣམས་ཀྱི་ལང་ཚོའི་ང་རྒྱལ་སེལ་བར་བྱེད་པ་གང་གིས་འདི་གནས་སྐབས་འདི་ལ་དྲངས་པར་གྱུར་པའོ་ཞེས་སོ། །དེ་ནས་
བདག་ཉིད་ཆེན་པོ་དེས་སླར་གསུངས་པ། གལ་ཏེ་རྒས་པས་གཞོན་པ་ཉིད་འདི་འདི་ལྟར་འཇིག་པར་བྱེད་ན་རྣམ་པར་འགྱུར་བའི་ལུས་འདི་ལ་ཆགས་པ་སུ་ཞིག་ཅེས་སོ། །ཁ་ལོ་སྒྱུར་བས་གསོལ་པ། གཞོན་ནུ་ལགས་རྒས་པ་གཅིག་པུར་མ་ཟད་ཀྱི་ན་བ་ཡང་ཁམས་འཁྲུགས་པ་ལས་ཡང་དག་པར་བྱུང་བ་ལུས་ཅན་རྣམས་ཀྱི་
དོན་མེད་པ་ཆེན་པོ་སྟེ། དེ་ལས་གཞན་ནི་ཤི་བ་ཞེས་བྱ་བ་ཐམས་ཅད་འཕྲོག་པ་ལ་མཁས་པ་ཤིན་ཏུ་དོན་མ་ཡིན་པ་སྟེ། གང་ཞིག་ཡོངས་སུ་བསམས་པར་གྱུར་པ་ཡང་ལུས་ཅན་རྣམས་ལ་སྡུག་བསྔལ་ཆེན་པོ་སྐྱེད་པར་བྱེད་པ་ཞེས་སོ། །བྱང་ཆུབ་སེམས་དཔས་སྨྲས་པ། འཆི་དང་ན་དང་རྒ་བའི་དགྲ་རྣམས་གསུམ་པོ་འདིས། །ཨེ་

མ་འགྲོ་བ་ཞག་རེར་རྗེས་སུ་བཅིངས་པ་སྟེ། །འཇིགས་པ་ཆེན་པོ་ཞེས་བྱ་མི་བཟད་ཡོད་པ་ལ། །ཅི་ལྟར་འདི་ནི་ཡུལ་རྣམས་ལ་ནི་རྩེ་གཅིག་པ། །དེ་ལྟར་ཁ་ལོ་བས་ནི་ཤིང་རྟ་མྱུར་དུ་བཟློག །ཁྱིམ་དུ་འགྲོ་ཕྱིར་སོང་ཤིག་སླར་ནི་འདིར་ཅི་འདུག །འཆི་དང་ན་དང་རྒ་བས་ཀུན་ནས་དོགས་པ་ཡིས། །བདག་ནི་སྐྱེད་མོས་ཚལ་ལ་དགའ་བ་འབྱུང་
མི་འགྱུར། །དེ་ནས་རྒྱལ་པོས་བྱུང་བར་གྱུར་པའི་སྲས་དང་རྣམ་པར་བྲལ་བས་དོགས་པ་ཅན་གྱི་ཡིད་ཀུན་ནས་སྐྱོ་བའི་ཡིད་ཅན་བྱང་ཆུབ་སེམས་དཔའ་གསན་ནས་དཀར་པོ་མིན་པའི་ཚིག་དེ་རྗེས་སུ་དྲན་ཏེ། ཁ་ལོ་སྒྱུར་བ་ལ་བཙུན་མོའི་འཁོར་དུ་འོངས་བའི་སྐྱེད་མོས་ཚལ་ཉིད་དུ་གཞོན་ནུ་ཁྲིད་པར་གྱིས་ཤིག་ཅེས་བྱ་བའི་ཕྲིན་བཏང་
བར་གྱུར་པ། ཁ་ལོ་སྒྱུར་བ་དེས་ཀྱང་མྱུར་བར་འདི་སྐྱེད་མོས་ཚལ་ཉིད་དུ་ཞུགས་ཏེ་གསོལ་པ། །ཚེ་དང་ལྡན་པས་བལྟ་བར་འོས་ཏེ་འདིར་ནི། །ཅུང་ཟད་ཅུང་ཟད་མེ་ཏོག་དགོད་པ་གསལ་བས་མཛེས་པ་དང་ནི་ལྡན་པ་ཡི། །དལ་བུ་དལ་བུས་མ་ལ་ཡ་ཡི་རླུང་ནི་རྒྱུ་བས་གར་ནི་བྱེད་བཅུག་པ། །སྐྱེད་མོས་ཚལ་གྱི་ལྗོན་ཤིང་བུ་
མོ་འདི་རྣམས་ཀྱིས་ནི་འོད་མེད་སྣང་བ་སྟེ། །མཐའ་མ་རྣམས་ལ་འཁོར་བའི་བུང་བའི་ཚོགས་ཀྱིས་ཕྲིང་བའི་རྩེ་མོར་སྒྲ་སྒྲོགས་སོ། །དེ་ནས་བྱང་ཆུབ་སེམས་དཔས་ཤིང་རྟ་ལས་བབས་ཏེ་རྒ་བ་དང་ན་བ་དང་འཆི་བ་ལ་བསམས་ནས་ཀུན་ནས་འཁྲུགས་པའི་བློ་གྲོས་དང་ལྡན་པ། །ཟུག་རྔུ་ནང་ན་ཡོད་པའི་མཆེ་བ་གཉིས་
པའི་བདག་པོ་ལྟར་འདི་ལྟར་གསུངས་པར་གྱུར་ཏེ། བློ་ཆུང་རྣམས་ཀྱི་བརྟན་གཅོད་ཉམས་མི་དགའ་བའི་མཐའ་མ་ཅན། །ཞི་བའི་བདག་ཉིད་རྣམས་ཀྱིས་ཡོངས་སྤོངས་ལྟོ་འཕྱེ་རྣམས་ལྟར་དྲག །འགྲོ་བའི་ཆེན་ཆུང་གཞོན་པ་ལ་ཡང་འདོད་རྩེ་གཅིག་པ་ཡིས། །ཀུན་ནས་འཁྲུགས་པའི་ཡིད་ནི་ཡུལ་རྣམས་ཀྱིས་ནི་
འཕྲོག་པ་ཡིན། །དེ་ནས་རྒྱལ་པོ་དེས་གར་དང་གླུ་ལ་མཁས་ཤིང་གསལ་བའི་བུད་མེད་རྣམས་བྱང་ཆུབ་སེམས་དཔའི་ཐུགས་འགུགས་པའི་ཕྱིར་སྐྱེད་མོས་ཚལ་དེར་བཏང་བར་གྱུར་ཏེ། དེ་རྣམས་ཀྱང་བྱང་ཆུབ་སེམས་དཔའ་ཅན་དུ་མངོན་པར་འོངས་ནས་རྒྱགས་པས་སྤོབས་པ་སྐྱེས་པ་དུས་ཀྱི་བྱ་བ་དེ་དང་དེ་
རྣམས་འབྱུང་བར་བྱས་པར་གྱུར་ཏོ། །དེ་ནས་ལ་ལ་ཞིག་གིས་འདི་ལ་སྨྲས་པར་གྱུར་བ། །གཞོན་ནུ་གཟིགས་ཤིག་མ་ལ་ཡ་ཡི་རླུང་རྣམས་འདི་ནི་དྲི་ཞིམ་མེ་ཏོག་ཤིང་རྣམས་ཀུན་ནས་འདར་བྱེད་རྒྱུ་བ་སྟེ། །བུང་བས་ཙཱུ་ཏའི་ཤིང་གི་སྙེ་མ་རབ་ཏུ་ཕྱེ་བར་གྱུར་པ་ལ་ནི་སྐོར་བར་བྱེད། །གཞུ་བདུངས་བ་ལ་བྱ་བ་རིད་པར་བདེ་བ་ཅི་ཕྱིར་འདི་

ནི་ཁྱོད་ཀྱི་གནས་པ་སྟེ། །སྒྲ་ནི་རིང་བ་ཁུ་བྱུག་མེ་ཏོག་གཞུ་ཅན་ལ་ནི་བསྐུལ་བ་ཤེས་བྱ་བདག་གི་དོགས། །གཞན་ཡང་རང་གི་རྔུལ་གྱིས་ཡན་ལག་འཚེད་བྱས་པ། །གཞོན་ནུ་ལྷན་སྐྱེས་སྙེ་མ་བུ་མོ་ནི། །བུང་བ་མཆོག་གིས་འཁོར་བར་བྱས་པ་ནི། །སྐད་ཅིག་མ་ལྟར་སྲབ་པ་ཡོངས་སུ་དོར། །གཞན་དག་གིས་ཀྱང་སླར་འདི་ལ་གསོལ་པ། །བུང་བ་ལྗོན་ཤིང་
བུད་མེད་སྐྱེ་བོ་ལོངས་སྤྱོད་པ། །མེ་ཏོག་རྡུལ་གྱིས་འོད་མེད་བྲལ་བ་དེ་མཐོང་ནས། །རླུང་གིས་ཀུན་ནས་འདར་བའི་གཞོན་ནུ་འདམ་སྐྱེས་ཀྱི། །པདྨོ་ཡང་དང་ཡང་དུ་སྡིགས་མཛུབ་འདྲ་བར་བྱེད། །ལ་ལ་ཞིག་གིས་ཀྱང་འདི་ལ་གསོལ་པ། །ཇི་སྲིད་བདག་གིས་ཁྱེད་ཕྱིར་མེ་ཏོག་རྣམས་བརྒྱུ་བ། །འདི་རྣམས་ཕྲ་བའི་མེ་ཏོག་རྡུལ་གྱིས་བར་རྣམས་མེད་པ་ནི། །བདག་
གིས་མིག་ལ་གནོད་པ་ཞི་མིན་འགྲོ་བ་རང་ཡིད་གཉིས། །གཞོན་ནུ་རིང་པོ་ནས་ནི་དེ་སྲིད་འདི་ནི་རྣམ་པར་ཟློག །གཞན་དག་རྣམས་ཀྱིས་ཀྱང་དགོད་པ་དང་བཅས་པར་མངོན་དུ་གནས་ཤིང་འདི་ལ་གསོལ་པ། སྦྲང་བྱེད་ཀྱི་ནི་རྣམ་པར་འདར་བའི་ཟེའུ་འབྲུ་ཀུ་བ་ལ་ཡི་གཞུ་རྒྱུད་ཀྱིས་ནི་ཀུན་ནས་བཅིངས། །མེ་ཏོག་གིས་བྱས་གཞུ་ནི་དུང་ཆག་ལྟ་བུར་དཀར་
བའི་གྲིབ་མ་བྲང་ལ་རྣམ་བཀོད་ནས། །ཟ་བའི་ཕྱིར་ནི་བརྙེས་པར་བྱེད་པའི་བུད་མེད་རྣམས་ནི་ཁྱེད་ལ་ཀུན་ནས་བརྡེགས་པར་འདོད། །མིག་གཅིག་བཙུམ་པར་བྱས་པ་འདོད་པའི་ལྷ་ནི་ངེས་པར་མེ་ཏོག་གི་མདའ་དྲང་བོར་བྱེད། །བྱང་ཆུབ་སེམས་དཔས་སྨྲས་པ། སྲིང་མོ་རྣམས་དམ་པ་མ་ཡིན་པའི་སྨྲ་བ་འདི་རྣམས་ཀྱིས་ཆོག་ཅིང་ཆོག་སྟེ།
བདག་གི་ཡིད་སྐྱོ་བའི་བསྲེག་བླུགས་ཟ་བ་ལ་ཆུའི་རྒྱུན་ལྟར་སྒེག་པའི་གཏམ་རྣམས་ཀྱིས་ཀུན་ནས་གླགས་ལྟར་རྙེད་པ་མ་ཡིན་ཏེ། སྲིང་མོ་རྣམས་ཞེས་དེ་དེ་ཡི། །ཚིག་ནི་ཤེས་ནས་བུད་མེད་རྣམས། །བཞིན་ནི་ཐུར་དུ་ལྟ་ཞིང་གནས། །ངོ་ཚས་རྣམ་པར་སྒེག་པ་དོར། །གཞོན་ནུ་མ་ཡི་ཚོགས་དེ་ངོ་མཚར་བར་གྱུར་ཤེས་ནས་ནི། །དག་པའི་
བློ་ཅན་རྒྱལ་པོའི་སྲས་པོ་ཡིད་བྱུང་ཡང་། །མེ་ཏོག་གིས་ནི་མདའ་རྣམས་ངེས་པར་དོང་པ་ལ་གཞག་ནས། །ངོ་ཚ་དང་བཅས་ཡིད་བྱུང་བས་ནི་གཞུ་ནི་ཕབ་པར་བྱས། །དེ་ནས་བྱང་ཆུབ་སེམས་དཔའ་བཙུན་མོའི་འཁོར་གྱི་ནགས་དེ་ལ་དགའ་བ་མ་ཐོབ་པར་གྱུར་ཏེ། ཉི་མ་ནུབ་འདོད་པ་ལ་ཤིང་རྟ་ལ་ཞོན་ནས་བུད་མེད་དེ་རྣམས་ཀྱང་ཁྱིམ་དུ་སོང་
བར་གྱུར་ཏོ། །དེ་ནས་བྱང་ཆུབ་སེམས་དཔའ་སྒེག་པའི་གཏམ་ལ་བརྙས་པར་གྱུར་ཅིང་མལ་གྱི་དབུས་ན་རྣམ་པར་བཞུགས་ཏེ། རྒ་བ་དང་། ན་བ་དང་འཆི་བ་རྣམས་ཉིད་ཡིད་ལ་བཞག་ནས་གཉེར་སེམས་ལ་རྩེ་གཅིག་པར་གྱུར་ཏོ། །དེ་ནས་གནས་གཙང་མ་བ་རྣམས་ཀྱིས་བདག་ཉིད་ཆེན་པོ་དེའི་ཡིད་སྐྱོ་བའི་ཕྱིར་མལ་སྐྱོང་བར་བྱེད་

མ་རྣམས་ལ་འཕྲལ་ཁོ་ནར་གཉིད་པ་དང་མི་སྨྲ་བ་ཉིད་བྱས་པར་གྱུར་ཏོ། །དེར་ཡང་ལ་ལ་ཞིག་རྣམས་རྒྱུན་མི་འཆད་པའི་སྒྲ་དང་དབུགས་ཀྱི་དབང་གིས་སོ་གསལ་བ་དང་། རྣམ་པར་འཛག་པའི་ཁ་ཆུའི་ཆ་ཡིས་ཐ་མ་བྱས་པའི་གདོང་རྣམས་འབྱུང་བར་གྱུར་ཏོ། །གཞན་དག་རྣམས་ལ་ནི་ས་འཇམ་པའི་སྟེང་དུ་ཀུན་ནས་གྲམ་
པ་དང་རབ་ཏུ་ལྷོད་པའི་སྨད་གཡོགས་ལྟུང་བ་ཉིད་ཀྱིས་བརླ་རབ་ཏུ་གསལ་བ་དང་། འོ་མ་འཛིན་པ་དག་གི་སྟེང་དུ་མུ་ཏིག་གི་ཧར་རྣམ་པར་འཁྲུགས་པར་གྱུར་པ་དང་། རྣམ་པར་གཏོར་བ་མི་མཉམ་པའི་ལག་ངར་གྱི་ལྗོན་ཤིང་དང་ལྡན་པ་ཤིང་རྣམས་དང་འདྲ་བའི་ལས་རྣམས་གནས་པར་གྱུར་ཏོ། །གཞན་དག་གིས་ཀྱང་རྫ་རྔ་ལ་རྣམ་
པར་ཞུགས་པར་བྱས་པའི་ཉིས་འགྱུར་གྱི་དཔུང་བའི་རྟེན་ལ་རྣམ་པར་གཞག་པའི་གདོང་ཅན་སྟན་ལས་རྣམ་པར་ལྟུང་ཞིང་དེ་ལྟ་ཉིད་དུ་ཉལ་བར་གྱུར་ཏེ། ལ་ལ་ཞིག་གི་གཉིད་ཀྱིས་སོར་མོ་རྣམས་ཀྱི་འབད་པས་འཕྲོག་པའི་ལག་པ་ལས་མ་མཆུ་དང་རྣམ་པར་འབྲེལ་པའི་བུ་ག་དང་པོ་ཅན་དུ་བུད་མེད་ཀྱི་མིག་གི་འབྲས་བུ་ལྟར་སྔོ་
བའི་གླིང་བུ་ལྷུང་བར་གྱུར་ཏོ། །མཆེ་བ་གཉིས་པ་རྣམས་ཀྱིས་རྣམ་པར་གནོན་པའི་པདྨོ་རྣམས་ལྟར་གནས་སྐབས་སྣ་ཚོགས་པའི་དེ་རྣམས་ཀྱི་གཟུགས་མཐོང་ནས་མར་མེ་རྣམས་ཀྱིས་དགོད་པ་དང་འདྲ་བ་སྟེ། དེ་ནས་བྱང་ཆུབ་སེམས་དཔའ་གཞོན་དུ་མེད་རྣམས་ལ་སྨད་པ་མཛད་ནས་མངོན་པར་བཞེངས་ཏེ། ཕྱི་རོལ་དུ་གཤེགས་ནས་ཀྱང་
མོས་པ་བླངས་ཏེ་གསུངས་པ། སྲིད་པའི་རྒྱ་མཚོ་འདི་ནི་ཀུན་ནས་རྒལ་འདོད་ཡིད། །དཀའ་ཐུབ་ནགས་སུ་འགྲོ་ཕྱིར་བཙོན་པ་སྟེ། །དེ་ཕྱིར་བདག་གི་ངེས་པ་བསྒྲུབ་པར་བྱ་བའི་ཕྱིར། །ཤུགས་ཆེན་ངང་པ་བསྔགས་ལྡན་རྟ་དེ་ཁྲིད་ལ་ཤོག །མོས་པས་ཀྱང་གནས་གཙང་མ་པ་རྣམས་ཀྱིས་བསྐུལ་བཞིན་པ་རྒྱལ་པོའི་ཆད་པ་ལ་གུས་
པ་མ་བྱས་པར་དེ་ལྟར་བགྱི་ཞེས་བྱ་བ་སླར་མཉན་ཏེ། མཆན་ཁུང་གཡོན་པར་རལ་གྲི་བཟུང་ནས། རྟའི་མཆོག་ངང་པ་བསྔགས་ལྡན་ཁྲིད་ནས་འོངས་སོ། །བྱང་ཆུབ་སེམས་དཔའ་ཞོན་པའི་རྟ་དེ་ལ་ཕྱིས་རྟ་ཁ་ཁྲིད་པའི་མོས་པ་དང་ལྷན་ཅིག་ཏུ་གནོད་སྦྱིན་རྣམས་ཀྱི་ལག་པའི་མཐིལ་དུ་རྨིག་པ་རྣམ་པར་གཞག་པ་ཐོ་རངས་ཀྱི་དུས་
སུ་ནམ་མཁའ་ནས་དྲང་སྲོང་ཆེན་པོ་ཨ་ར་ལའི་སྤྱིལ་བོ་དང་ཉེ་བར་འཇུག་ཅིང་གནས་པ་འགྱུར་ཅེས་པའོ། །དེ་ནས་རྒྱན་རྣམས་གསལ་བའི་རིན་ཆེན་གཟི་བརྗིད་ཀྱིས། །གསལ་བ་དེས་ནི་སྐུ་ལ་ཕོག་པར་མཛད་ནས་ནི། །རླབས་དང་ལྡན་པ་ཁུ་བྱུག་མགྲིན་པ་ལྟར་ནག་པའི། །མགོ་སྐྱེས་རྣམས་ནི་རིམ་གྱིས་རལ་གྲིས་གཅད་པར་མཛད། །

དངས་པའི་ཆུ་ཡི་རྟེན་ནི་ཨུཏྤ་ལ་གསལ་བར་བྱས་པ་ལྟར། །རྒྱན་ནི་གསལ་བ་དེ་ནི་ཀུན་ནས་མཐོང་སྟེ་མོས་པ་ནི། །རབ་ཏུ་སྟོབས་ཅན་མྱ་ངན་བསྲེག་བླུགས་ཟ་བས་ཀུན་གདུངས་པ། །མུ་ཏིག་དང་མཚུངས་ཆུ་ཐིགས་རྣམས་ནི་བཏང་བར་གྱུར། །བྱང་ཆུབ་སེམས་དཔས་གསུངས་པ། ཆོས་ལ་མངོན་དུ་ཕྱོགས་པའམ་སྐྱེ་
བོ་དཀའ་ཐུབ་ཀྱི་ནགས་སུ་མངོན་པར་འཇུག་པ་ལ་སྐྱེས་བུ་དམ་པས་སྡུག་བསྔལ་བྱ་བར་འོས་པ་མ་ཡིན་ཏེ། དེ་བས་ན་སོང་ཤིག་དང་བདག་གི་བླ་མའི་སྐྱེ་བ་ལ་འདི་སྐད་ཅེས་སྨྲོས་ཤིག །མི་བཟད་དཀའ་ཐུབ་ཀྱིས་བདག་ནི། །ལུས་འདི་ཡང་ནི་ཟད་འགྱུར་ཏེ། །བདག་གིས་གོ་འཕང་རྙེད་པའམ། །དེ་ཉིད་མཐོང་རྣམས་ཀྱིས་མཐོང་གང་། །
མོས་པས་ཀྱང་དེ་ལྟར་བགྱི་ཞེས་བྱང་ཆུབ་སེམས་དཔའ་ལ་མངོན་པར་ཕྱག་བཙལ་ནས་རྟ་དང་རྒྱན་རྣམས་བླངས་ཏེ། རིམ་གྱིས་གྲོང་ཁྱེར་དུ་འོངས་ནས། །བྱང་ཆུབ་སེམས་དཔའི་ལོ་རྒྱུས་དེ་མིའི་བདག་པོ་ལ་ཞུ་ཞིང་གནས་སོ། །ཟས་གཙང་མས་ཀྱང་དེའི་རྣམ་པར་ངེས་པ་གསན་ནས་བཙུན་མོའི་འཁོར་དང་ལྷན་ཅིག་ཏུ་རྣམ་
པ་མང་པོས་སྨྲེ་སྔགས་འདོན་པར་གྱུར་ཏོ། །བྱང་ཆུབ་སེམས་དཔས་ཀྱང་རྔོན་པའི་གཟུགས་འཛིན་པར་བྱེད་པའི་ལྷའི་བུ་ལ་རང་གི་རི་བོང་ཅན་གྱི་འོད་ཟེར་རྣམས་ལྟར་མཛེས་པའི་ན་བཟའ་གཉིས་ཀྱིས་གོས་དམར་པོ་དག་ཉོས་ནས་མནབས་ཏེ། རིམ་གྱིས་རིམ་གྱིས་ཨ་ར་ལའི་སྤྱིལ་པོར་ཕྱིན་པར་གྱུར་ཏོ། །ཨ་ར་ལས་
ནི་བྱང་ཆུབ་སེམས་དཔའ་འོངས་པ་མཐོང་སྟེ། ལེགས་པར་འོངས་སམ་ལེགས་པར་འོངས་སམ་ཞེས་བརྗོད་ནས་རང་གི་ཤིང་ལོའི་ཁང་པར་ཁྲིད་ནས་སའི་གདན་ལ་བཞུགས་སུ་བཅུག་ཅིང་བདེ་བར་སྔོན་དུ་འགྲོ་བས་སྨྲ་བ་བྱས་པར་གྱུར་ཏོ། །དེ་ནས་བྱང་ཆུབ་སེམས་དཔས་དེ་ལ་དྲིས་པ། ཁྱེད་རྣམས་ཀྱི་ཆོས་ཅི་ལྟ་བུ། །ཅི་ལྟར་ཡང་ནི་
རྟོགས་འགྱུར་ཏེ། །དེ་ཉིད་མཐོང་འདོད་བདག་ལ་ནི། །དམ་པ་བདག་གིས་གསུངས་པར་འོས། །ཨ་ར་ལས་སྨྲས་པ། སྐལ་བ་ཆེན་པོ་མཉན་པར་འོས་ཞེས་ཟེར་རོ། །རང་བཞིན་དང་རྣམ་པར་འགྱུར་བ་དག་གི་སྐྱེ་བ་དང་རྒ་བ་དང་འཆི་བ་རྣམས་དེ་ཁོ་ན་ཉིད་ཅེས་བྱ་བ་བརྗོད་པ་སྟེ། རང་བཞིན་ཡང་འབྱུང་བ་ཆེན་པོ་ལྔ་དང་། ང་རྒྱལ་དང་བསལ་བ་ཞེས་
བྱ་བའོ། །རྣམ་པར་འགྱུར་བ་རྣམས་ནི་དབང་པོ་རྣམས་དང་། དེའི་ཡུལ་རྣམས་དང་། ལག་པ་དང་། རྐང་པ་དང་། ངག་དང་། བཤང་སྒོ་དང་ཕོ་རྟགས་དང་ཡིད་ཅེས་པའི་ཞིང་འདི་རྣམས་རྣམ་པར་ཤེས་པ་ཞིང་ཤེས་པ་ཞེས་བྱ་བར་བརྗོད་པ་ཡིན་ཏེ། ཞིང་ཤེས་པ་ཡང་དེ་ཁོ་ན་ཉིད་ཤེས་པ་རྣམས་ཀྱིས་བདག་གསལ་བར་སྨྲ་བ་ཡིན་ནོ། །གང་ཞིག་སྐྱེ་བ་དང་

གནོད་པ་དང་ཤི་བའི་ཆོས་ཀྱི་བདག་ཉིད་དེ་ནི་གསལ་བ་ཞེས་བྱ་བར་རྟོགས་པར་བྱའོ། །མི་གསལ་བ་ཉིད་ནི་དེ་ལས་བཟློག་པ་སྟེ་དེ་ལྟར་མི་ཤེས་པ་དང་ལས་དང་སྲེད་པ་ནི་འཁོར་བའི་རྒྱུར་རྣམ་པར་ཤེས་པར་བྱའོ། །གསུམ་པོ་ལ་གནས་པའི་ཤེད་བུ་ནི་སྙིང་སྟོབས་འདའ་བར་བྱེད་ནས་འཇུག་པ་མ་ཡིན་ཏེ། རྐྱེན་དང་བྲལ་བ་དང་། ང་རྒྱལ་དང་། ཐེ་
ཚོམ་དང་། རྣམ་པར་ཀུན་ནས་མཆོངས་པ་དང་། ཁྱད་པར་མེད་པ་དང་། ཐབས་མ་ཡིན་པ་དང་། ཆགས་པ་དང་། མངོན་པར་ལྷུང་བ་རྣམས་ཏེ། དེ་ལ་རྐྱེན་དང་བྲལ་བ་ཞེས་བྱ་བ་ནི་ཕྱིན་ཅི་ལོག་ཏུ་འཇུག་པའོ། །བདག་ནི་མངོན་པར་སྨྲ་བ་དང་། བདག་ནི་ཤེས་པ་ཞེས་བྱ་བ་ལ་སོགས་པ་ནི་ང་རྒྱལ་ལོ། །གང་ཞིག་ཐེ་ཚོམ་མེད་པའི་དངོས་
པོ་རྣམས་ཀྱང་འདག་པའི་རི་ལུ་ལྟར་གཅིག་པོའི་དངོས་པོས་མཐོང་བ་དེ་ནི་ཐེ་ཚོམ་ཞེས་བྱ་བར་ཤེས་པར་བྱའོ། །གང་ཞིག་བདག་དེ་རྣམས་ཉིད་འདི་ཡིད་དང་བློ་དང་ལས་རྣམས་སོ། །གང་ཞིག་ཚོགས་འདི་དེ་ནི་བདག་ཅེས་བྱ་བ་མངོན་པར་ཀུན་ནས་མཆོངས་པ་སྨྲ་བ་ཡིན་ནོ། །ཁྱད་པར་མེད་པ་ནི་སླར་རབ་ཏུ་སད་པ་དང་མ་སད་པ་དག་གི་
རང་བཞིན་མེད་པ་རྣམས་ཀྱི་ཁྱད་པར་ཤེས་པ་ཉིད་དེ་དེ་ནི་ཁྱད་པར་མེད་པ་སྟེ་ཞེས་བྱ་བར་ཤེས་པར་བྱའོ། །སྭཱ་ཧཱ་བྱེད་པ་དང་། བཤད་བྱེད་པ་དང་། བསང་གཏོར་མངོན་པར་བསང་གཏོར་ལ་སོགས་པ་རྣམས་ནི་ཐབས་མ་ཡིན་པ་ཞེས་བྱ་བར་ཤེས་པར་བྱའོ། །དངོས་པོ་གང་ལ་ཤེས་རབ་དང་། ཡིད་དང་ངག་དང་། བློ་དང་ལས་རྣམས་ཀྱིས་
ཆགས་པ་ཉེ་བར་འགྲོ་བ་དེ་ནི་ཆགས་པ་ཞེས་བྱ་བར་བརྗོད་པ་ཡིན་ནོ། །འདི་ནི་བདག་གི་ཡིན་ནོ། །འདིའི་བདག་ཅེས་བྱ་བ་གང་ཞིག་སྡུག་བསྔལ་རློམ་སེམས་པ་དེ་ནི་མངོན་པར་ལྷུང་བའོ། །སྲོག་ཆགས་རྣམས་ཀྱིས་འཁོར་བའི་ལེ་ལོ་ཞེས་བྱ་བའོ། །མུན་པ་དང་གཏི་མུག་དང་རྒ་བ་དང་འཆི་བ་དང་སྐྱེ་བ་རྣམས་ཏེ། གཏི་མུག་ཆེན་པོ་ནི་འདོད་
པ་ཞེས་བྱ་བར་མིང་བཏགས་པའོ། །མུན་པ་ནི་ཁྲོ་བ་ཞེས་བྱ་བར་ཤེས་པར་གྱིས་ཤིག་སླར་ནི་སྡུག་བསྔལ་དམུས་ལོང་ཉིད་མུན་པར་བརྗོད་པ་ཡིན་ཏེ། མ་རིག་པ་འདི་ཚིགས་པ་ལྔ་དང་ལྡན་པས་རྨོངས་པ་བཅིངས་པ་ཡིད་ཅན་སྐྱེ་བ་ལ་སོགས་པའི་སྡུག་བསྔལ་ཆེན་པོ་ལ་ཡང་ནས་ཡང་དུ་འཇུག་པ་ཡིན་ཏེ། དེར་ཡང་བདག་ནི་མཐོང་
བ་པོ་དང་། ཉན་པ་པོ་དང་། ཤེས་པ་པོ་དང་། འབྲས་བུ་དང་རྒྱུ་ཞེས་བྱ་བ་འདི་ལྟར་མ་ཤེས་ནས་འཁོར་བར་ཡོངས་སུ་འཁོར་བ་ཡིན་ཏེ། རྒྱུ་འདི་རྣམས་ཀྱི་ནི་སྐྱེ་བའི་རྒྱུན་གྱི་འཇུག་པ་མཐོང་བ་ཡིན་ཏེ་རྒྱུ་མེད་པས་སྐྱེ་བ་མེད་པ་ཞེས་བྱ་བའོ། །དེ་ལ་ཐར་པ་འདོད་པས་རབ་ཏུ་སད་པ་དང་རབ་ཏུ་མ་སད་པ་དག་དང་། གསལ་བ་དང་མི་གསལ་

བདག་ཤེས་པར་བྱའོ། །བཞི་པོ་འདི་རྟོགས་ནས་ཞིང་ཤེས་པ་སྡུག་བསྔལ་ཐམས་ཅད་ལས་རྣམ་པར་གྲོལ་ཏེ་མི་ཟད་པའི་གོ་འཕང་ཐོབ་པར་འགྱུར་ཞེས་བྱ་བ་སྟེ། ཐོག་མར་ཁྱིམ་གྱི་འཆིང་བ་ཁོང་ནད་ས་བོན་དོར་ནས་ནི། །རྟགས་ནི་བཟུང་ནས་ཐར་པའི་བདེ་བ་ཉེ་བར་འདོད་པ་ཡི། །ཆོག་ཤེས་དང་ནི་ལྡན་པ་བླ་མེད་གོ་
འཕང་ཐོབ་འདོད་པ། །ཚུལ་ཁྲིམས་རྣམ་པར་དག་པ་ཉེར་བཟུང་ནགས་ནང་གནས་པར་དབེན། །ཕྱིས་ནི་ཆགས་པ་ཆགས་བྲལ་དག་ལས་རབ་ཏུ་བྱུང་བའི་འཇིགས་པ་དང་བདེ་བ་དག་ཤེས་ནས་དབང་པོའི་ཚོགས་ཐམས་ཅད་ཚར་བཅད་ནས་ཡིད་ཀྱིས་ཞི་བ་ལ་དམིགས་ཏེ། །དེ་ནས་འདོད་པ་རྣམས་དང་། སྡང་བ་ལ་སོགས་པ་
རྣམས་ལས་རྣམ་པར་དབེན་པ་རྣམ་པར་དབེན་པ་ལས་སྐྱེས་པའི་བསམ་གཏན་དང་པོ་རྟོག་པ་དང་བཅས་པ་ཐོབ་པ་ཡིན་ནོ། །དེས་ཀྱང་རྣམ་པ་འདི་ལྟ་བུའི་འདོད་པ་ལ་སྡོང་ཞིང་སྨོད་པའི་ཞི་བ་དང་ལྡན་པ་ཚངས་པའི་འཇིག་རྟེན་རྟོགས་པར་འགྱུར་རོ། །རྣམ་པར་རྟོག་པ་དེ་རྣམས་ཀྱང་ཡིད་ཀུན་ནས་འཁྲུགས་པར་བྱེད་པ་
ཤེས་ནས་དེ་དང་རྣམ་པར་བྲལ་བའི་དགའ་བ་དང་བདེ་བའི་བདག་ཉིད་ཅན་བསམ་གཏན་གཉིས་པ་ཐོབ་པ་ཡིན་ནོ། །དགའ་བ་དེས་ཀྱང་ཡིད་འཕྲོག་པར་གྱུར་པ་འོད་གསལ་གྱི་ལྷ་རྣམས་སུ་སྐྱེ་བ་ཡིན་ཏེ། གང་ཞིག་སླར་དགའ་བའི་བདེ་བ་དེ་ལས་སེམས་འདོན་པར་བྱེད་པ་དེ་ནི་གསུམ་པ་བདེ་བ་དང་དགའ་བ་དང་རྣམ་
པར་བྲལ་བའི་བསམ་གཏན་ཐོབ་པ་ཡིན་ནོ། །དེ་ཙམ་གྱི་བདེ་བ་ལ་ཡིད་ནུབ་པ་དེ་དགེ་རྒྱས་ཀྱི་ལྷ་རྣམས་སུ་སྐྱེ་བ་སོ་སོར་ཐོབ་པ་ཡིན་ནོ། །བདེ་བ་དེ་ལྟ་བུ་ཐོབ་ནས་གང་ཞིག་བཏང་སྙོམས་བྱེད་པ་དེ་ནི་བཞི་པ་བདེ་བ་དང་སྡུག་བསྔལ་རྣམ་པར་བྲལ་བའི་བསམ་གཏན་ཉེ་བར་ཐོབ་པ་ཡིན་ཏེ། དེ་ནི་ཚེ་རིང་བ་ཉིད་ཀྱིས་ཁ་ཅིག་ནི་གྲོལ་བ་ཉིད་
ངེས་པར་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། བདེ་བ་དང་སྡུག་བསྔལ་རྣམ་པར་གཅད་པའི་ཕྱིར་དང་། སེམས་ལ་བྱ་བ་མེད་པའི་ཕྱིར་རོ། །བསམ་གཏན་འདིའི་འབྲས་བུ་ཆེ་བའི་ལྷ་རྣམས་སུ་ཐུན་མོང་གི་འབྲས་བུ་མཁས་པ་རྣམས་སྨྲ་བ་ཡིན་ཏེ། ཏིང་ངེ་འཛིན་དེ་ལས་ལངས་ནས་ལུས་ཅན་རྣམས་ཀྱི་སྐྱོན་རྣམས་
མཐོང་སྟེ། ལུས་རྣམ་པར་བཟློག་པའི་ཕྱིར་ཡེ་ཤེས་རྟོགས་པར་འགྱུར་རོ། །བསམ་གཏན་དེ་ཡང་སྤངས་ནས་ཁྱད་པར་འདོད་པ་གཟུགས་ལ་ཤིན་ཏུ་འདོད་ཆགས་དང་བྲལ་བ་ཡིན་ཏེ། ལུས་འདི་ལ་སྡུག་བསྔལ་རྣམས་གང་ཞིག་ཡོད་པ་དེ་རྣམས་ནི་དང་པོར་བློས་ཀུན་ནས་ལྟ་བར་བྱེད་ཅིང་སྡུག་ཅིང་མཐུག་པའི་ཡང་རྫས་རྣམས་ལ་ཡང་

ནམ་མཁར་ལྷག་པའི་མོས་པ་སྐྱེད་པར་བྱེད་དེ། ནམ་མཁའ་ལ་སོང་བའི་བདག་ཉིད་མངོན་པར་བསྡུས་ནས་ནམ་མཁའ་མཐའ་ཡས་པ་མཐོང་ཞིང་ཁྱད་པར་རྟོགས་པའི་ཕྱིར་དང་བདག་ཉིད་ལ་མཁས་པ་ཡིན་པའི་ཕྱིར་བདག་ཉིད་ལ་བསྡུས་ཏེ་ཅུང་ཟད་མེད་ཅེས་བྱ་བ་ནི་ཅི་ཡང་མེད་པ་ཞེས་བྱ་བའི་འདུ་ཤེས་སུ་ཉེ་བར་སོང་བ་ལུས་དང་བྲལ་
བའི་གྲོལ་བ་ཞེས་བརྗོད་པ་ཡིན་ནོ། །བྱང་ཆུབ་སེམས་དཔས་སྨྲས་པ། གལ་ཏེ་སེམས་པ་པོ་ཡོད་ན། །གྲོལ་བ་ག་ལས་འབྱུང་བར་འགྱུར། །དགེ་དང་མི་དགེའི་བྱ་བ་རྣམས། །དེ་ཡོད་ལ་ནི་འཇུག་པ་ཡིན། །ཇི་ལྟར་ཡང་ཆུ་དང་ས་རྣམ་པར་བྲལ་བས་ས་བོན་ནི་གང་གིས་ཀྱང་རབ་ཏུ་བཙུགས་པ་མཐོང་བ་མ་ཡིན་ཏེ། དེའི་རྐྱེན་ལས་རྣམ་
པར་བཙུགས་པ་མཐོང་བ་ཡིན་ནོ། །དེ་བཞིན་དུ་བདག་ཀྱང་གཟུང་བར་བྱའོ། །ལས་དང་མི་ཤེས་པ་དང་སྲེད་པ་དོར་བས་ཐར་པ་གང་ཞིག་ངེས་པ་ཡིན་པ་དེ་ནི་བདག་པོ་ཡོད་པ་ལ་དེ་ཡོངས་སུ་དོར་བ་དམིགས་པར་འགྱུར་བ་མ་ཡིན་ཏེ། དེ་ཡོངས་སུ་མ་དོར་བ་ནི་ཐར་པ་ག་ལ་ཡོད། དེ་ལྟར་ང་རྒྱལ་ཡོངས་སུ་དོར་བ་ནི་བདག་ཡོད་པ་ག་
ལ་འགྱུར། ང་རྒྱལ་ཡོད་པ་ལ་ཡང་སྐྱེ་བའི་རྒྱུན་མི་གནས་པ་ཉིད་ཡིན་ཏེ་ཞེས་བྱ་བར་གསུངས་ནས། སྤྱིལ་བོ་དེ་ལས་ཨ་ར་ལའི། །བློ་གྲོས་ཆེན་པོ་དེ་བྱུང་ནས། །དཀའ་ཐུབ་དཀའ་བ་དྲག་རྣམས་ཀྱིས། །ལུས་ནི་སྐམ་ཞིང་བཞུགས་པར་གྱུར། །དཀའ་ཐུབ་འདིས་ནི་དེ་ཁོ་ན་ཉིད་རྟོགས་པར་འགྱུར་བ་མ་ཡིན་སྙམ་དུ་དགོངས་ཏེ་ལངས་
ནས། ཀུན་ནས་སྟོབས་ཆུང་བའི་ལུས་ཅན་བྱང་ཆུབ་སེམས་དཔས་ཆུ་བོ་ནཻ་རཱཉྫ་ན་ལ་ཁྲུས་མཛད་ནས། དགའ་མཛེས་ཀྱིས་ཕུལ་བའི་བསོད་སྙོམས་གསོལ་ནས་དུས་ཀྱི་ལྟོ་འཕྱེའི་རྒྱལ་པོས་མངོན་པར་བསྟོད་པ། དེ་ནི་རྩ་ཤའི་ཕྲེང་བས་རྒྱ་ཆེ་སྔོ་བའི་སྒྲོས། །ཀུན་ནས་དམར་སེར་ཡན་ལག་ཅན་གྱིས་སྐུ་ཁྱབ་པ། །མཚོ་སྐྱེས་
རྣམས་ཀྱི་རབ་ཏུ་གཡོ་བའི་འདབ་མ་ཅན། །ཨུཏྤལ་སྔོན་པོའི་འདབ་མ་བསྲེས་པའི་ཕྲེང་བ་ལྟར། །དེ་ནས་གོམ་པ་དལ་གཤེགས་ནས། །བློ་ལྡན་གསེར་གྱི་རི་ལྟར་འོངས། །བྱང་ཆུབ་ཤིང་གི་འོག་ཏུ་ནི། །བྱང་ཆུབ་ཕྱིར་ནི་དེ་བཞུགས་གྱུར། །དེ་ནས་བུ་མོ་རྣམས་ལྷན་ཅིག །མེ་ཏོག་གི་གཞུ་བླངས་ནས་ནི། །དེ་ཡི་ཡིད་ནི་དཀྲུགས་
པའི་ཕྱིར། །ཡིད་ཀྱི་སྐྱེ་གནས་ཀུན་ནས་འོངས། །ཤིཪྵའི་མེ་ཏོག་སར་པ་ནི། །དེ་ཡི་མདུན་དུ་སྒོམ་བྱེད་ཅིང་། །འབྲས་བུ་ཀུན་གཡོ་ལྟ་བ་ནི། །ལ་ལ་ཞིག་གིས་ཅུང་ཟད་བཟུང་། །གྲོགས་མོའི་རྣ་བར་གཞན་གྱིས་ནི། །དགོད་པ་སྔོན་འགྲོ་ཅི་ཡང་སྨྲས། །བློ་ལྡན་དེ་ལ་ལྟ་བ་ནི། །སྒེག་དང་བཅས་པར་གཏད་ཅིང་གནས། །གཞན་དག་མེ་ཏོག་

དུ་བ་ནི། །མིག་ནི་ངོ་ཚ་བར་བྱེད་ཅིང་། །གོས་ནི་མཚན་མ་ལས་ལྷུང་བ། །སྐ་རགས་ལྷོད་པར་བཀག་པར་གྱུར། །ཟླ་བ་ལྟར་མཛེས་ལང་ཚོ་འདི་ནི་གང་དུ་སྟེ། །དཀའ་ཐུབ་འདི་ནི་གང་དུ་ཨེ་མ་འདི་ནི་འགལ། །ཡུལ་རྣམས་ཉམས་སུ་མྱོང་ནས་འདི་ལྟར་རིགས་པ་སྟེ། །ཡོངས་སུ་སྨིན་པ་ཁྱེད་ཀྱིས་འབྲས་བུ་ཐོབ་པའི་ཕྱིར། །
ཕན་པར་འདོད་པ་ཉིད་ཀྱིས་ཁྱེད་ལ་སྨྲ་བ་སྟེ། །དུས་མིན་ཡོངས་སུ་ངལ་དུ་འཇུག་པ་ཅི་ཕྱིར་ལུས། །དེ་ལྟར་ལ་ལ་འདུད་པའི་ཡན་ལག་ཅན་ནི་སྨྲ་བ་སྟེ། །ཡན་ལག་མེད་པའི་སོ་སོར་གནོད་པ་ཆེ་དེ་ལ། །དེ་ལྟར་ལ་ལ་འདོད་པའི་ཡན་ལག་སྨྲས་པར་གྱུར། །ཁྱེད་ལ་ངན་འགྲོར་ཕྲད་འདོད་བུད་མེད་རྣམས་ལ་ནི། །བློ་ལྡན་ཁྱེད་ཀྱི་
རྗེས་སུ་མཐུན་མིན་ཅི་ཕྱིར་འདི། །འདི་ལྟར་དེ་ལ་མངོན་པར་སྨྲས་གྱུར་ལ་ལ་ཞིག །པདྨའི་འདབ་མ་རྣམས་ནི་སེན་མོས་གཏུབས་བྱེད་ཅིང་། །གང་གི་ཚེ་དེ་རྣམས་ལ་བྱང་ཆུབ་སེམས་དཔས་བརྙས་པ་དང་བཅས་པའི་ལྟ་བ་སྦྱིན་པར་མ་བྱས་པ་དེའི་ཚེ་བདུད་ཀྱི་བཀའ་བྱེད་རྣམ་པ་དུ་མར་འགྱུར་བའི་གདོང་ཅན་དེ་རྣམས་ལ་སྨྲས་
པ། འཇིགས་སུ་བཅུག་ནས་འདི་བསླང་བར་གྱུར་ཅིག་ཅེས་བྱ་བའོ། །དེ་ནས་སེང་གེའི་གདོང་ལ་ནི། །ཧཱུཾ་བྱས་པས་ནི་ཡང་ཡང་དུ། །མེ་སྟག་འོད་ནི་འཕྲོ་བ་ཡི། །འབར་བའི་གདོང་ལས་གྲོལ་བར་གྱུར། །དེ་རྣམས་དེ་ཡི་བཀའ་བྱེད་གདོང་ལས་བྱུང་། །ལྷུང་ཞིང་སྐད་ཅིག་གིས་གསུངས་ཏེ། །རབ་རྒྱས་མྱ་ངན་མེ་ཏོག་
ཉིད། །བྱང་ཆུབ་སེམས་དཔའི་སྟེང་དུ་འཕངས། །མེ་ལྡན་འཁོར་ལོ་སུ་ཞིག་གིས། །རྣམ་རྒྱས་ཟེའུ་འབྲུའི་ཚོགས་ལྡན་པ། །ཨུཏྤ་ལ་ཡི་མགོ་ཕྲེང་གྱུར། །སོ་བསྡམས་གཞན་དག་ཉིད་ཀྱིས་ནི། །གློག་བཞིན་ཁམ་པའི་སྨིན་མ་ཅན། །ཁ་བའི་རྩེ་མོ་སྟེང་དུ་འབེབས། །ཀུན་དའི་ཕུང་པོ་ཉིད་དུ་འགྱུར། །གཞན་དག་
སེར་སྐྱའི་མིག་ཅན་ནི། །རལ་གྲི་དང་བཅས་དཔུང་པ་བཏེག །ལྕགས་ཀྱི་ཀ་བའི་གྲིབ་མ་འདྲ། །སྐད་ཅིག་མི་གཡོ་ཉིད་དུ་གྱུར། །དེ་ནས་བཅོམ་ལྡན་འདས་ནི་བྱང་ཆུབ་ཤིང་གི་འོག་ཏུ་བཞུགས་བྱས་ནས། །འཕྲོ་བའི་མིག་གི་མེ་ཅན་དཀའ་བཞིན་དུ་ནི་བྱེད་རྣམས་ཀྱི་ནི་ཚོགས། །དཀར་བ་མིན་པར་འགྲོ་བའི་གྲོགས་ཀྱིས་
ཀུན་ནས་རབ་ཏུ་བསྐུལ་བཞིན་པ། །ནགས་ཀྱི་མེ་ནི་ཀུན་དུ་ཆུ་དང་ཉེ་ལས་བཞིན་དུ་ཞིག་པར་གྱུར། །མེ་ཏོག་རྒྱལ་མཚན་དང་ལྡན་པ་འཁོར་གྱི་སྐྱེ་བོ་དང་བཅས་པ་སོང་བ་ན། བཅོམ་ལྡན་འདས་དེ་བསམ་གཏན་བཞི་པ་ལས་བཞེངས་ཏེ་འདི་བསམས་པར་གྱུར་ཏེ། གལ་ཏེ་སྐྱེ་བ་སྔོན་ཡོད་ན། །ལས་རྣམས་ཀྱིས་ནི་འཇུག་པ་མིན། །

ལས་ལས་བྱུང་བའི་སྐྱེ་བ་མེད། །ལས་མེད་ན་ཡང་ལུས་ཅན་གྱི། །གཟུགས་དང་སྐལ་བཟང་སྐལ་བ་སོགས། །དགེ་བ་ཅི་ལྟར་འདོད་ནི་འདོད། །འོན་ཏེ་སྔོན་དུ་ལས་ཡོད་ན། །མ་སྐྱེས་པ་ལས་ག་ལས་ཏེ། །མཁས་པས་འདི་ལྟར་འགལ་མཐོང་ནས། །འཁོར་བའི་ཐོག་མ་རྟོག་མི་བྱེད། །གལ་ཏེ་རྒྱུ་མེད་འགྲོ་ཡིན་ན། །སུ་ཞིག་
ལས་དང་ཉིད་སྨྲ་འགྱུར། །རྒྱུ་མེད་པར་ནི་ཐར་པ་ཡང་། །རྟག་ཏུ་གྲུབ་པ་ཉིད་དུ་འགྱུར། །རྒྱུ་མེད་པར་ནི་ལུས་ཀྱང་འདི། །བསྐྱེད་པ་ཉིད་དུ་འགྱུར་བ་མིན། །ལ་ལ་དབང་ཕྱུག་རྒྱུ་ཡིན་པ། །མི་མཁས་པ་རྣམས་སྨྲ་བར་བྱེད། །གལ་ཏེ་དབང་ཕྱུག་གཞན་གྱིས་བྱས། །འདིར་ནི་དབང་ཕྱུག་ཉིད་ག་ལས། །འོན་ཏེ་མ་སྤྲུལ་
ཉིད་སྐྱེས་པ། །དེ་ལས་གཞན་ནི་ཅིས་མི་སྐྱེ། །དེ་ཕྱིར་དབང་ཕྱུག་སྨྲ་བ་འདི། །བདག་གི་སླད་དུ་དོན་མེད་ཉིད། །དེ་ལྟར་འཁོར་བའི་འཁོར་ལོ་འདི། །ཡང་དང་ཡང་དུ་འཁོར་བཞིན་པའི། །ནམ་ཡང་མཁས་པ་རྣམས་ཀྱིས་ནི། །ཐོག་མ་དམིགས་པར་འགྱུར་བ་མིན། །ནམ་མཁའི་ཁམས་འདི་ནི་རླུང་དང་མེ་དང་ཆུ་དང་ས་
རྣམས་ཀྱིས་ཀུན་ནས་འབྲེལ་པ་ནི་ལུས་ཞེས་བརྗོད་པ་ཡིན་ནོ། །དེ་ཡང་རྣམ་པར་ཤེས་པའི་ཁམས་ལ་བརྟེན་ནས་འགྲོ་བ་དང་འོང་བ་ལ་སོགས་པའི་བྱ་བ་རྣམས་བྱེད་དོ་ཞེས་བྱ་བ་སྟེ། །དེ་ལྟར་གནས་པ་ལ་སྐྱེས་པ་ཉེ་བར་བཏགས་པར་བྱ་ཞེས་ཟེར་རོ། །དེ་ནས་བཅོམ་ལྡན་འདས་མངོན་པར་རྫོགས་པའི་བྱང་ཆུབ་ཐོབ་ནས་དུ་མ་རྣམས་
ཀྱིས་མི་ཤེས་པའི་རབ་རིབ་སེལ་བར་མཛད་དེ། །གྲོང་ཁྱེར་སེར་སྐྱར་བྱོན་ནས་ཟས་གཙང་མ་ལ་ལེགས་པའི་ལམ་གསལ་བར་མཛད་དེ། དེ་ལྟར་བཅོམ་ལྡན་འདས་དེ་འགྲོ་བ་མ་ལུས་པ་རྣམས་ཀྱི་སྡུག་བསྔལ་ཉེ་བར་ཞི་བར་བྱ་བའི་དོན་དུ་ཡོངས་སུ་མྱ་ངན་ལས་འདའ་བར་ནུས་ཀྱང་ཤིན་ཏུ་རིང་པོར་འཁོར་བ་ན་ཀུན་ནས་
འཁོར་བར་གྱུར་ཏོ་ཞེས་བྱ་བ་སྟེ། བློ་ཆེན་དེ་ནི་བྱང་ཆུབ་ཕྱིར། །ལག་ཏུ་གཏད་ལྟར་སྦྱིན་བྱས་ཏེ། །ཡུན་རིང་ཤེས་རབ་ཕ་རོལ་ཕྱིན། །དམ་པ་བདེ་བར་གནས་པ་ཡིན། །ཨེ་མ་གལ་ཏེ་ཆོས་ནི་མུན་པ་འཇོམས། །བདེ་གཤེགས་ཀྱིས་གསུངས་འདི་ནི་རྣམ་དཔྱོད་ནས། །དྲི་མས་ཁྱབ་པའི་ལྟ་བས་མཐོང་བའི་ཕྱིར། །སྐྱེ་
བོ་འདི་ནི་གཞན་འདོད་རྟེན་མི་འགྱུར། །དེ་བཞིན་གཤེགས་པའི་དྲི་མེད་གསུང་ཡང་ཡོད་པ་ཞེས་བྱ་ལ། །རྨོངས་པ་ལམ་ངན་སོང་བའི་སྐྱེ་བོ་འདི་ནི་ཀུན་ནས་འཁོར། །རི་བོང་མཚན་པ་མངོན་གཤེར་ལ་ནི་གང་ཞིག་མི་ཟུམ་པ། །དམན་པའི་བློ་དེ་སོང་ཞིང་ཇི་ལྟར་ལྷུང་བར་འགྱུར་བ་མིན། །ཡང་དག་རྫོགས་པའི་

བྱང་ཆུབ་འདོད། །བྱང་ཆུབ་སེམས་དཔའི་སྤྱོད་པ་ནི། །སེང་གེ་ཞབས་འབྲིང་པས་བྱས་འདི། །ཆོས་འདོད་རྣམས་ཀྱི་ཕྲེང་བ་བྱས་པ་འདི། །སྐྱེས་པའི་རབས་ཀྱི་ཕྲེང་བ་བྱས་པ་ཡི། །དགེ་བ་ཅུང་ཟད་གང་ཞིག་བདག་གིས་བསགས། །དེ་ཡིས་འགྲོ་བ་འདི་ནི་བདེ་གཤེགས་ཀྱི། །འདོད་པ་ལ་དམིགས་ཐར་པའི་ཕྱིར་
གྱུར་ཅིག །རབ་འགྲོ་གཉའ་རལ་ཅན་བརྒྱ་བྱིན། །ཁྲ་ཅན་དོན་ཀུན་གྲུབ་ལྡན་པ། །ལྔ་ཡིས་ལྷག་པའི་སུམ་ཅུ་འདིར། །ཐུབ་པ་ཆེན་པོའི་སྐྱེས་རབས་རྣམས། །རིགས་པ་སྒྲ་ཡི་བསྟན་བཅོས་ཆ་ནི་རྣམ་པ་མང་པོ་ཤེས་ནས་སངས་རྒྱས་ཀྱིས་ཀྱང་གསུངས། །ཕྱི་མའི་སྙན་དང་གས་མཁན་གྱི་ཟླ་བས་ས་ནི་སྙན་དངགས་འོད་རྣམས་ཀྱིས་ནི་
རབ་གསལ་བྱས། །ཁ་ཆེར་ཉེ་བར་འཚེ་བའི་སྐྱོན་གྱིས་རྣམ་པར་གདུངས་པ་ཤེས་ནས་ཕྱི་རོལ་འགྲོ་འདོད་པས། །རི་དབང་ཁ་བ་ཅན་ལ་སེང་གེ་ཞབས་འབྲིང་ལས་ནི་སྲོག་རྣམས་དོར་ནས་མཐོ་རིས་སོང་། །རྒྱལ་པོའི་སྲས་སློབ་དཔོན་སེང་གེ་ཞབས་འབྲིང་པས་མཛད་པའི་སྐྱེས་པའི་རབས་ཀྱི་ཕྲེང་བ་རྫོགས་སོ།། །།
དགེ་སློང་དཔལ་ལྡན་བློ་གྲོས་འབྱུང་གནས་ཞེས་བྱ་མཁས་པ་ནི། །སེམས་ཅན་རྣམས་ལ་ཆོས་དང་ཟང་ཟིང་ཀུན་ནས་འགོད་མཛད་ཅིང་། །ཚད་མ་དང་ནི་ལུང་དང་རྒྱུད་རྣམས་དུ་མ་ལ་འདྲིས་པས། །འགྲོ་བའི་མངའ་བདག་གི་ནི་སྤྱོད་པ་འདི་ལ་གཉིས་པོ་དག །གཞལ་དུ་མེད་ཅིང་དྲི་མ་མེད་པ་ཀུན་
ནས་བསགས་ཏེ་དེ་ལས་འདི། །ཉོན་མོངས་ཤེས་བྱའི་སྒྲིབ་པའི་དྲི་མཆོག་བཞིན་དུ་མྱུར་སྤངས་སྔོན་དུ་འགྲོ་བ་ནི། །དེ་དང་དེ་ཡི་སྐྱེས་རབས་ཡོངས་བཟུང་འགྲོ་བ་སྡུག་བསྔལ་རྒྱ་མཚོ་ལས་ནི་གདོན་བྱས་ཏེ། །མཐར་ཡང་ཐུབ་དབང་རྣམས་བཞིན་མཐའ་དག་བྱ་བྱས་སངས་རྒྱས་ཁམས་གསུམ་
དུ་ནི་ཁྱེད་འབྱུང་ཤོག །ལྕང་ལོ་ཅན་གྱི་བུམ་པ་ཞེས་བྱ་མཁས་དང་ལྷན་ཅིག་འདི་ཉིད་དུ། །གང་ཞིག་ཚུལ་ཁྲིམས་འབྱུང་གནས་སྐད་གཉིས་པས་ནི་འདི་ལྟར་ཆོ་ག་བཞིན། །བདུད་ལས་རྣམ་པར་རྒྱལ་བའི་སྤྱོད་པ་ཤིན་ཏུ་རྣམ་དག་ཡངས་པ་ནི། །སྐྱེ་བོ་མ་ལུས་པ་ལ་ཕན་པའི་དོན་དུ་དེ་ཡིས་ཡང་དག་
བསྒྱུར།། །།རྒྱ་གར་གྱི་མཁན་པོ་པཎྜི་ཏ་ཨ་ལཾ་ཀ་དེ་བའི་ཞབས་དང་། བོད་ཀྱི་ལོ་ཙཱ་བ་ཤཱཀྱའི་དགེ་སློང་ཚུལ་ཁྲིམས་འབྱུང་གནས་སྦས་པས་དཔལ་གྱི་སྒྱེའུ་རིའི་རྩ་ཆོས་སྐོར་དབེན་པའི་གཙུག་ལག་ཁང་དུ་བསྒྱུར་བའོ།། །།

༄༅༅། །རྒྱ་གར་སྐད་དུ། ལོ་ཀ་ཨཱ་ནནྡ་ནཱ་ཊ་ཀ་ནཱ་མ། བོད་སྐད་དུ། འཇིག་རྟེན་ཀུན་དུ་དགའ་བའི་ཟློས་གར་ཞེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །བུང་བའི་ཕྲེང་བ་མི་གསལ་སྒྲ་སྒྲོགས་རྐང་པ་འདབ་མ་རྣམ་བསྐྱོད་པས། །གེ་སར་ཁ་འབུས་རོ་བཅུད་དང་བཅས་རྡུལ་ཕྲན་
ཚོགས་པས་ཁྱབ་གྱུར་ཅིང་། །སྦྲང་རྩི་རྒྱ་ཆེན་ཐིག་ལེས་རྣམ་ཁེངས་མེ་ཏོག་ཐལ་མོ་སྦྱར་བ་འདིས། །བདག་གིས་རྒྱལ་བའི་ཞབས་ལ་མཆོད་པས་ཁྱེད་རྣམས་ལ་ནི་ཞི་བར་མཛོད། །གཞན་ཡང་བྱམས་པའི་ཐུགས་ནི་རྒྱ་ཆེན་དགའ་བས་མགུལ་ནས་ཡང་དག་འཁྱུད་གྱུར་པ། །ཁྱེད་ཀྱི་སྙིང་རྗེས་བདག་ཅག་ཀྱང་ནི་
དེ་བཞིན་བཏང་སྙོམས་མཚུངས་མཛད་རིགས། །ལེགས་པའི་ལྷ་མོ་གྲགས་འཛིན་མཛད་བཞིན་བདག་ཅག་གིས་ནི་རྗེས་མི་འགྲོ། །བདུད་ཀྱི་བུ་མོས་ཕྲག་དོག་གིས་སྨྲས་ཁྱེད་རྣམས་སངས་རྒྱས་རྟོགས་པར་ཤོག །རྫོགས་བྱང་ཆུབ་ལ་བདུད་ནི་ཁྲོ་བས་སྐད་ཅིག་གཞུ་བཀང་དེ་ཡི་སྡེ་ཚན་རྣམས། །གང་གིས་རྣམ་པར་བྲོས་པས་
བུབ་ཅིང་ལོག་འདྲེན་ཞབས་ཀྱིས་མནན་ཏེ་མངོན་སྐད་འབྱིན། །ལུས་མེད་བུ་མོ་མྱོས་བྱེད་མ་རྣམས་མཆི་འཛག་འཆི་མེད་རྣམས་ཀྱིས་མཐོང་ནས་དགའ། །སྟོབས་བཅུ་མངའ་བའི་སྔོན་འགྲོ་གཞན་གྱིས་མི་ཐུབ་མས་ནི་ཁྱེད་རྣམས་སྐྱོང་བར་ཤོག །དགའ་བྱེད་ཀྱིས་མཆོད་པའི་མཐའ་ལས་མདོ་འཛིན་པའོ། །སྙན་
ངག་ཙན་དྲཱ་དཱ་ཤ་ཡཱ། །ཟློས་གར་འཇིག་རྟེན་ཀུན་དུ་དགའ། །སྔོན་མེད་ཟློས་གར་རབ་སྦྱར་བས། །དེ་རིང་ཚོགས་ལ་བདག་གིས་སྟོན། །དེ་ནི་ངེས་པར་སྙན་ངག་ཉིད། །ཤར་ཕྱོགས་ཛཱ་ཏུ་ཀར་ཎའི་རིགས་ལས་ནི། །ལྷ་མོ་རྒྱལ་མ་ཡིད་ཀྱི་ཤིང་རྟ་ལས། །གང་འཁྲུངས་ཁུར་ནི་འཁུར་བར་མི་ནུས་ཀྱང་། །
དེ་ཡི་བུ་ཞེས་རབ་ཏུ་གྲགས་པ་ཐོབ། །གཞན་ཡང་རབ་འབྱམ་རྒྱན་དང་བཅས་ཤིང་ཚིགས་བཅད་རྐྱང་པ་མཁས་པའི་འཇུག་ངོགས་རྒྱ་ཆེན་རྣམས། །གང་གིས་དངོས་པོ་གཅིག་གི་བརྗོད་བྱས་ལ་ཡང་རྒྱ་ཆེན་ཟད་པར་མི་འགྱུར་དང་། །གང་གིས་བྱཱ་ཀ་ར་ཎ་ནི་ཉུང་ཞིང་རབ་གསལ་ཡོངས་རྫོགས་གཞན་ཡང་མཛད་
གྱུར་ནས། །འཇིག་རྟེན་ཆགས་དང་འཇིག་རྟེན་མུན་པའི་ཚོགས་ཆེན་རབ་ཏུ་འཇོམས་མཛད་གྱུར། །དེ་ནས་ད་ནི་རོལ་ཆ་དང་བཅས་ཏེ་རྩོམ་པ་ན་རེ་ཞིག་རང་གི་འཕགས་མ་ལ་བོས་ཏེ་ཀྱེ་འཕགས་མ་རེ་ཞིག་འདིར་བྱོན་ཅེས་སོ། །དེ་ནས་དེ་ནི་གདུང་བའི་ཤུགས་དང་བཅས་ཏེ་རབ་ཏུ་ཞུགས་ནས། ཀྱེ་འཕགས་མ་

བདག་འོངས་སོ་བཀའ་བསྒོས་ཤིག་ཅེས་སོ། །མདོ་འཛིན་པ་ནས་ཀྱེ་འཕགས་མ་ཅིའི་ཕྱིར་ཁྱོད་སྡུག་བསྔལ་བར་བྱེད། ཟློས་གར་མ་ནས་ཅིའི་ཕྱིར་སྡུག་བསྔལ་བར་མི་འགྱུར་ཏེ། ཇི་ལྟར་ཁྱོད་ཀྱི་མིང་ཙམ་གྱིས་ཀྱང་ནི། །གནས་རྣམས་ཡང་དག་འདྲེན་ནུས་བུ་གཅིག་པོ། །ངེས་
པར་བདག་ནི་རབ་ཏུ་བྱུང་ནས་ནི། །རང་ལུས་འབྲས་བཅས་བསྒྲུབ་པར་བྱ་ཞེས་སྨྲ། །མདོ་འཛིན་པ་ནས། འདི་ནི་བྱང་ཆུབ་སེམས་དཔའ་མ་ཡིན་ནོ། །ཟློས་གར་མ་ནས། ཀྱེ་འཕགས་པ། དེ་བྱང་ཆུབ་སེམས་དཔའ་མ་ཡིན་ནམ་མཁའ་ལས་ཀྱང་མ་ལྷུང་ཞིང་། །རྣམ་པར་འཛིན་བྱེད་ཀྱི་མཐིལ་བརྟོལ་ནས་