Luận tạng Tây Tạng (Tengyur) — Tập 161

ོ། །འདིར་གཞུང་ནི་མ་མོ་ལས། དགེ་སློང་རྣམས་ལ་བཅོམ་ལྡན་འདས་ཀྱིས་འདུག་པར་གནང་སྟེ་གནས་མལ་སྦ་བའི་དོན་དུའོ། །གདིང་བ་མེད་པར་ཉེ་བར་སྤྱད་པར་མི་བྱའོ་ཞེས་
གསུངས་པ་ཡིན་ནོ། །དགེ་སློང་བྲམ་ཟེའི་བུ་མོས་ཞུས་པ་ལས་ཀྱང་། བཙུན་པ་སྟན་ཁྲ་བོ་ལ་འདུག་ཏུ་རུང་ངམ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་གདིང་བ་ཡོད་པར་གྱུར་པ་ན་རུང་སྟེ། གང་ཞིག་ཕལ་ཆེར་ཉམས་པར་འགྱུར་རོ་ཞེས་གསུངས་པ་ཡིན་ནོ། །ཕལ་ཆེར་མ་ཉམས་
པ་ལ་ཞེས་བྱ་བ་འདིར་ཡང་ཚིག་ནི་འདི་ཉིད་ཡིན་ཏེ། འདིར་གཞུང་ནི། དགེ་སློང་བྲམ་ཟེའི་བུ་མོས་ཞུས་པ་ལས་རིག་པར་བྱའོ། །གདིང་གཡོགས་ལ་ཡང་ཞེས་བྱ་བ་ནི་སྟེང་དུ་གཡོགས་པ་ལ་གདིང་གཡོགས་སུ་འདོད་དོ། །གཞན་ཡང་བར་ཆད་མ་བཅུག་པ་ནི། དགེ་འདུན་གྱི་གདིང་
གཡོགས་པའོ། །དེ་ལ་ཡང་བར་ཆད་མ་བཅུག་པར་ལོངས་སྤྱོད་པར་མི་བྱའོ། །ཐམས་ཅད་ཀྱི་ཁྲ་བོ་ཕལ་ཆེར་མ་ཉམས་པ་ལ་ཡང་ངོ་ཞེས་བྱ་བ་ནི་གང་ཟག་གི་གནས་མལ་ལ་ཡང་གདིང་བར་མ་བྱས་པ་ལ་མི་འདུག་པ་ལས་གདིང་གཡོགས་ལ་ཡང་བར་ཆད་མ་བཅུག་པར་ཉེ་བར་སྤྱད་པར་མི་བྱའོ་ཞེས་
བྱ་བ་ནི་ཡང་གང་གི་སྒྲས་དྲངས་པའོ། །དེ་མ་ཡིན་པའི་ནི་འདིར་ཁྲ་བོ་ལས་ཕལ་ཆེར་མ་ཉམས་པ་ལས། གཞན་གྱིས་བྱ་བ་དོན་གྱིས་རྣམ་པར་གཞག་པའོ། །ངན་ངོན་ཅན་དང་དྲི་མ་ཅན་གྱིས་མི་བྱའོ་ཞེས་བྱ་བ་ནི་ཡང་གདིང་བ་ལ་ཡང་བར་ཆད་མ་བཅུག་པ་ལ་ཞེས་བྱ་བའི་རྗེས་སུ་འབྲངས་ནས་ཀྱང་སླར་གདིང་
བའི་ཆོ་ག་ལ་འདིར་བར་ཆད་མ་བཅུག་པའི་ཆོ་ག་ཐོབ་པའོ། །བར་ཆད་མ་བཅུག་པའི་ཆོ་ག་ལས་ཀྱང་གདིང་བའི་ཆོ་གའོ། །དེ་ལྟ་བས་ན་ཐམས་ཅད་དུ་འདིས་གཉི་གའི་ཁོངས་སུ་བསྡུས་པར་བྱས་པའོ། །གདིང་བ་བཅང་བར་བྱའོ་ཞེས་བྱ་བ་ནི་བར་ཆད་མ་བཅུག་པ་བཟློག་པའི་དོན་དུ་འདི་སྨོས་སོ། །

དེ་ནི་སྟུག་ན་ཚིག་རྐྱང་རུང་ངོ་ཞེས་བྱ་བ་ནི་གདིང་བ་དེའོ། །སེངས་པ་ནི་ཉི་རིམ་མོ། །ཁྲ་ཁྲ་བོ་མི་རུང་ངོ་ཞེས་བྱ་བ་ནི་གདིང་བ་ཁྲ་བོ་བཀྲ་བ་ཁྲ་ཁྲ་བོར་འདུག་པ་དེ་བཀག་པའོ། །འདིར་མཚོན་གྱིས་དྲས་ཏེ་བཅང་བར་བྱའོ་ཞེས་གསུངས་སོ། །མཚོན་གྱིས་དྲས་པའི་གོས་ལོངས་སྤྱད་
པར་བྱའོ་ཞེས་བྱ་བ་སྤྱིའི་ཆོ་ག་བསྒྲུབ་པ་ཉིད་ཀྱི་ཕྱིར་འདིར་མ་བསྡུས་པའོ། །དེ་ལ་གླེགས་བུའི་འཕྲོ་བྱའོ་ཞེས་བྱ་བ་ནི་གདིང་བ་དེ་ལའོ། །ཕྱོགས་གང་དུ་ཞེ་ན། དེའི་ཕྱིར་འོག་རོལ་གྱི་སུམ་ཆའི་དང་པོར་རོ་ཞེས་བྱ་བ་སྨོས་ཏེ། འོག་རོལ་ཞེས་བྱ་བ་ནི་རྐང་པའི་མཐའ་ལོགས་སུ་སུམ་ཆའི་གང་ཡིན་པ་དེའི་
དང་པོ་དང་དབུས་དང་ཐ་མར་ནི་མ་ཡིན་ནོ་ཞེས་བྱ་བའི་དོན་ཏོ། །གླེགས་བུ་གཅིག་པ་བྱིན་གྱིས་བརླབ་པར་མི་བྱའོ་ཞེས་བྱ་བ་ནི་གདིང་བ་སྟེ་མ་མོ་ལས་འདུག་པ་འདི་ནི་འདིར་གདིང་བའོ། །གཡན་པ་དགབ་པ་དེ་དང་ལྡན་པས་བཅང་བར་བྱའོ་ཞེས་བྱ་བ་ལ་དེ་དང་ལྡན་པས་ཞེས་བྱ་བ་ནི་གཡན་པའོ། །དེ་ཞག་
ལྔ་འམ་དྲུག་ཅིང་སྦྱང་བར་བྱའོ། །སྲིན་བལ་གྱི་དང་། བལ་གྱི་དང་། ཤ་ནའི་དང་། ཟར་མའི་རུང་ངོ་ཞེས་བྱ་བ་ནི་བྱེ་བྲག་མ་སྨོས་པའི་ཕྱིར་བསམ་པའི་བྱེ་བྲག་གོ་བར་བྱེད་ནུས་པ་མེད་པའི་ཕྱིར་ཆོས་གོས་གསུམ་པོ་ཉིད་ཀྱིས་ཀྱང་ཆོས་གོས་ལྷག་པ་ཉིད་ཀྱང་རིག་པར་བྱའོ། །སྲོག་ཆགས་ཀྱི་ཡན་ལག་
རྣམས་བྱུང་བ་ཉིད་ཀྱི་ཕྱིར་ཀོ་ལྤགས་ལ་སོགས་པ་བཞིན་དུ་མི་རུང་བ་ཉིད་དུ་དོགས་པ་ལ། སྲིན་བལ་གྱི་དང་བལ་གྱི་དག་ཅེས་སྨོས་སོ། །ཤ་ནའི་དང་ཟར་མའི་རུང་བ་དག་ལ་ནི་རྩུབ་པར་གྱུར་པའི་ཕྱིར་གསོ་མ་དག་གོས་ལ་སོགས་པ་བཞིན་ནོ། །སྣམས་སུ་མ་བྱས་པ་དང་གསོ་མ་ནི་མི་རུང་ངོ་ཞེས་བྱ་བ་ནི།
དཔག་བསམ་གྱི་ཤིང་ལས་བྱུང་བའི་གོས་ལ་སོགས་པ་དང་། གསོ་མ་ལ་སོགས་པའི་གོས་ནི་མི་རུང་ངོ་ཞེས་བྱ་བའི་དོན་ཏོ། །སྤང་པའི་ཞུ་བ་ལས་ཉེས་བྱས་བྱེད་པ་ཉིད་ཀྱི་མི་རུང་བའི་ཁོངས་སུ་གང་ཞིག་མ་གཏོགས་པ་ལ་གོ་རིམས་བྱེད་པ་དེ་འདིར་བསྡུས་པའོ། །སྐྲ་ལས་བྱས་པ་དང་གཅེར་བུ་པ་དང་བྱ་
འུག་པ་བ་ཡང་དག་པར་ལེན་པ་ཡང་ངོ་ཞེས་བྱ་བ་ཡང་མི་རུང་ངོ་ཞེས་བྱ་བར་སྦྱར་ཏེ། འདིར་སོ་སོར་ཡང་དག་པར་ལེན་པའི་སྒྲ་མངོན་པར་འབབ་བོ། །སྐྲའི་ལ་བ་ཡང་དག་པར་ལེན་པ་དང་། །གཅེར་བུ་པ་ཡང་དག་པར་ལེན་པ་དང་། བྱ་འུག་པ་པ་ཡང་དག་པར་ལེན་པ་དང་ནི་མི་རུང་ངོ་། །འདིར་གཞུང་ནི།

དགེ་སློང་བྲམ་ཟེའི་བུ་མོས་ཞུས་པ་ལས། མུ་སྟེགས་ཅན་གྱི་རྒྱལ་མཚན་གསུམ་པོ་གཅེར་བུ་པ་ཉིད་དང་། བྱ་འུག་པ་པ་ཉིད་དང་། སྐྲའི་ལ་བ་འཆང་བར་བྱེད་ན་ཉེས་པ་སྦོམ་པོར་འགྱུར་རོ། །མུ་སྟེགས་ཅན་གྱི་རྒྱལ་མཚན་གསུམ་པོ་དག་མ་གཏོགས་པ་དེ་ལས་གཞན་པའི་མུ་སྟེགས་ཀྱི་རྒྱལ་མཚན་
འཆང་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །ཡང་དག་པར་བླང་བ་མངོན་དུ་གཏོང་བས་འཆང་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དེ་ལ་སྦོམ་པོའོ་ཞེས་བྱ་བ་ནི་སྐྲ་ལས་བྱས་པ་དང་། གཅེར་བུ་དང་། བྱ་འུག་པ་པ་ཡང་དག་པར་ལེན་པ་དེ་ལ་ནི་དགེ་འདུན་གྱི་
དབྱེན་གྱི་ཕྱོགས་སུ་གཏོགས་པའི་ཉེས་པ་སྦོམ་པོར་གྱུར་པར་རིག་པར་བྱའོ། །གཞན་བསྟེན་པ་ནི་དེའི་འོ་ཞེས་བྱ་བ་ནི་གསུམ་པོ་དག་ལས་གཞན་པའི་ཡང་དག་པར་བླང་བ་སྔོན་དུ་བཏང་བས་བསྟེན་པ་ནི་བསྟེན་དུ་རུང་བ་མ་ཡིན་ནོ་ཞེས་བྱ་བའི་དོན་ཏོ། །ཡང་དག་པར་བླང་པ་སྔོན་དུ་བཏང་བའི་བསྟེན་པ་
ལ་ནི་ཉེས་བྱས་ཏེ་ད་བས་ན་དེའི་འདི་བྱེད་པའོ། །ཐམས་ཅད་དུ་མུ་སྟེགས་ཀྱི་རྒྱལ་མཚན་འཆང་བ་དེ་དག་དག་པ་དང་གྲོལ་བར་འཛིན་པས་འཆང་ན་ནི་ཉེས་པ་སྦོམ་པོར་འགྱུར་རོ། །འདིར་ཡང་དག་པར་བླང་བ་ལ་ཐ་དད་པ་ཉིད་ཡིན་ཏེ། སྦྱོར་བ་གྲུབ་པ་ཉིད་ནི་མ་ཡིན་ནོ། །དེ་ལ་ཡང་འདིར་སྦོམ་པོ་
ཉིད་དུ་ལོགས་ཤིག་ཏུ་གསུངས་པས་གལ་ཏེ་འདིར་དག་པ་དང་གྲོལ་བ་ཉིད་ལས་འདིས་ཞེས་བྱ་བ་ལ་སྦོམ་པོའོ་ཞེས་དེའི་རྗེས་སུ་འབྲང་བར་རྟོགས་པར་བྱའོ། །སྐྲ་འབལ་བ་དང་། ལོ་མ་གྱོན་པ་དང་། གཡང་གཞིའི་སྨད་གཡོགས་སྟོད་གཡོགས་དང་བཅས་པས་འཚོ་བ་དང་། གསོ་རས་དང་ཡན་
ལག་གི་སྦུབས་དང་གོས་ཐམས་ཅད་སྔོ་བ་དང་། གདེངས་ཀ་ལྟ་བུ་དང་ཁ་ཚར་རིང་པོ་དང་། རལ་ཀ་དང་གཙུག་གཏོར་དང་མགོ་དཀྲི་བ་དང་། ར་ཕྱར་དང་རྔ་བལ་གྱི་སྣམ་བུ་དང་། མུ་སྟེགས་ཅན་གྱི་རྒྱལ་མཚན་ཡང་ངོ་ཞེས་བྱ་བ་ཡང་མི་རུང་ངོ་ཞེས་སྦྱར་རོ། །གསོ་རས་ཞེས་བྱ་བ་ནི་འདབ་མ་ལས་མ་
བྱས་པའི་གོས་ཞེས་བྱ་བ་ནི་རྒྱ་གར་བ་རྣམས་འདོད་དོ། །ཁ་ཆེ་བ་རྣམས་ནི། གསོ་མ་ལས་བྱས་པའི་གོས་སེང་སེང་པོའི་གོས་འདིའོ། །ཡན་ལག་གི་སྦུབས་ཞེས་བྱ་བ་ནི་ནུ་མ་ལ་སོགས་པ་གཡོགས་པའི་གོས་སོ། །གོས་ཐམས་ཅད་སྔོ་བ་ཞེས་བྱ་བའི་དོན་ཏོ། །འདིར་ཁ་ཅིག་ནི་ཐམས་ཅད་

སེར་བ་དང་ཐམས་ཅད་དམར་བ་དག་ལ་ཡང་བཀག་གོ་ཞེས་ཟེར་ཏེ། འདི་ནི་མི་རིགས་པ་སྟེ། དེ་གཡོགས་པ་ལ་མི་འདུན་པ་ཉིད་དུ་མ་མཐོང་བ་ཉིད་ཀྱི་ཕྱིར་རོ། །རལ་ག་ཞེས་བྱ་བ་ནི་ལྷམ་སྒྲོག་གུ་ཅན་གྱི་རྣམ་པའོ། །འདིས་ཤིང་དཔུང་ཆད་རྗེས་སུ་གནང་བ་འགལ་བ་
མེད་དེ་ཤིང་དཔུང་ཆད་ནི་རྣམ་པ་གཞན་གྱི་ཕྱིར་རོ། །དཔེར་ན་ལྷམ་ཡུ་རིངས་ཀྱི་རྣམ་པ་ལས་ལྷམ་སྒྲོག་གུ་ཅན་གྱི་རྣམ་པ་ཅུང་ཟད་ཞན་པ་དང་འདྲའོ། །མགོ་དཀྲི་བ་ཞེས་བྱ་བ་ནི་གཙུག་ཏོར་མ་ཡིན་པ་དང་འདྲ་བ་ཡིན་ཏེ། དེ་ནི་རང་གི་སྒྲས་སྨོས་པ་ཉིད་ཀྱི་ཕྱིར་རོ། །ར་ཕྱར་ཞེས་བྱ་བ་ནི་ར་བལ་ལས་བྱས་
པའི་ཕྱར་བའོ། །རྔ་བལ་གྱི་སྣམ་བུ་ཞེས་བྱ་བ་ནི་རྔ་མོའི་བལ་ལས་བྱས་པའི་སྣམ་བུའོ། །མུ་སྟེགས་ཀྱི་རྒྱལ་མཚན་ཡང་ཞེས་བྱ་བ་ལ། ཡང་གི་སྒྲས་ནི་མི་རུང་ངོ་ཞེས་བྱ་བར་སྦྱར་ཏེ། དེ་ལྟ་བས་ན་སྐབས་སུ་རྫོགས་པ་རབ་ཏུ་བསྟན་པའི་དོན་དུའོ། །ལྷག་མ་བརྩམས་པ་རྣམས་ལས་མུ་སྟེགས་ཀྱི་རྒྱལ་མཚན་
འཛིན་པ་སྒྲུབ་པའི་དོན་དུ་ནི་དེའི་སྒྲའོ། །པུ་ས་ལའི་འདབ་མ་གང་དང་མར་མེའི་སྙིང་པོ་ཙམ་དེས་ཀྱང་སྙོམས་པར་བྱ་བའི་ཕྱིར་བགོ་བཤའ་བྱའོ་ཞེས་བྱ་བ་ནི་བཟའ་བར་བྱ་བའི་ཟས་ནི་ཐ་ན་ཤིང་པུ་ས་ལའི་ལོ་མ་གང་ཙམ་དེས་དབང་བ་ཐམས་ཅད་ལ་སྙོམས་པར་བྱ་བའི་ཕྱིར་བགོ་བཤའ་བྱའོ། །གོས་ནི་ཐ་ན་མར་
མེའི་སྙིང་པོ་ཙམ་དེས་ཀྱང་བགོ་བཤའ་བྱའོ། །འདིར་གཞུང་ནི། ཕྲན་ཚོགས་དག་ལས་དེ་ནས་བརྩམས་ཏེ་ངེས་པ་མ་ཡིན་ཞེས་བྱ་བའི་བར་དུ་འདི་དྲངས་པའོ། །ལ་བ་དང་དེ་ལྟ་བུ་དག་ནི་བཙོངས་ཏེའོ་ཞེས་བྱ་བ་ནི་བགོ་བཤའ་བྱའོ་ཞེས་བྱ་བར་སྦྱར་རོ། །མི་བཤིགས་པ་ཉིད་དོ་ཞེས་བྱ་བ་ནི་དེ་ལས་གཞན་
པའི་གོས་བཞིན་དུ་མི་བཤིགས་པ་ཉིད་ཡིན་ནོ། །རྙེད་པ་བགོ་བ་ལ་ལྔ་བྱའོ། །རྙེད་པ་བགོ་བ་ལ་བྱ་བ་ལྔ་བྱ་བ་དེ་དག་གང་ཞེ་ན། དེའི་ཕྱིར་དེར་རྙེད་པ་འགོད་པར་འགྱུར་གྱི་དེར་ཁྱེད་ཅག་གིས་ཚོགས་པར་བྱའོ་ཞེས་དགེ་འདུན་ལ་བརྗོད་པར་བྱ་བ་དང་། གཎྜཱི་བརྡུང་བ་དང་། ཚུལ་ཤིང་བྲིམ་པ་དང་། བགྲང་བ་
དང་། སོ་སོའི་སྐལ་བ་བྲིམ་པའོ། །ཐ་མ་ཡན་ཆད་བྱེད་པ་ཉིད་ན་འོངས་པ་དབང་བ་ཉིད་ཡིན་ནོ་ཞེས་བྱ་བ་ནི་རྙེད་པ་འགོད་པའི་དུས་སུ་བྱ་བ་ལྔ་པོ་དེ་དག་གི་གཞན་དེ་སྲིད་དུ་བྱ་བ་ཉིད་ལ་འོངས་པ་ལ་བརྟེན་པ་ཉིད་དོ། །རེ་ཞིག་འདིར་དབང་བྱེད་པ་ཉིད་ལ་ལྔ་པོ་འདིར་ངེས་པ་ལ་དབང་དུ་བྱ་བ་ཉིད་ཡིན་ནམ་འོན་

ཏེ་ཅི་ཡང་མ་ཡིན་སྙམ་དུ་མི་ཤེས་པའི་བློ་ཅན་དག་ལ་གསུངས་པ་ནི། དེའི་ཕྱིར་མཇུག་ཏུ་ཕྱིན་པ་ཉིད་ནི་མི་དབང་ངོ་ཞེས་བྱ་བ་སྨོས་ཏེ། ཡོངས་སུ་རྫོགས་པ་ལ་ལྔ་པོ་མི་དབང་ངོ་ཞེས་བྱ་བའི་དོན་ཏོ། །དེ་ནི་རྙེད་པ་ཆུང་ངུ་ལ་ཡང་ངོ་ཞེས་བྱ་བ་ནི་ལྔ་རྣམས་ཞེས་བྱ་བ་ལ་སོགས་པ་སྨོས་ཏེ། དེའི་ནི་རྙེད་པ་
ཆུང་ངུ་ལ་ཡང་བྱའི་རྙེད་པ་ཆེན་པོ་འབའ་ཞིག་ལ་བྱ་བར་མ་ཟད་དོ། །རྙེད་པའི་བྱ་བ་དེར་ཞུགས་ནས་སོང་བ་ཉིད་ཡིན་ཡང་མི་དབང་བ་མ་ཡིན་ནོ་ཞེས་བྱ་བ་ནི་དབྱར་གནས་པ་ལ་སོགས་པའི་ལས་གང་གིས་རྙེད་པ་འགྲིམ་པར་བྱེད་པའི་བྱ་བ་དེར་ཞུགས་པར་གྱུར་ན། གཙུག་ལག་ཁང་གི་མཚམས་ལས་
འདས་ཏེ་སོང་བ་ཡང་རྙེད་པ་དེ་མི་འོས་པ་མ་ཡིན་ནོ། །དེའི་ཕྱིར་འགྲོ་བས་ནོད་པ་བཅོལ་བར་བྱའོ་ཞེས་བྱ་བ་ནི་གང་གི་ཕྱིར་རྙེད་པ་དེ་འོས་པ་དེ་བས་ན་འགྲོ་བས་རང་གི་སྐལ་བ་མནོད་པ་གཞན་ལ་བཅོལ་བར་བྱའོ། །ཁས་བླངས་པ་དང་ལྡན་པས་མ་མནོས་ན་བསབ་པར་བྱ་བ་ཉིད་དོ་ཞེས་བྱ་བ་ནི། མནོད་
དོ་ཞེས་དེ་ལྟར་དམ་བཅའ་བར་བྱེད་ཅིང་གལ་ཏེ་རྙེད་པ་མ་མནོས་ན་དེའི་ཚེ་རང་གི་སྒོ་ནས་བསབ་པར་བྱ་བ་ཉིད་ཡིན་ནོ་ཞེས་བྱ་བའི་དོན་ཏོ། །རྙེད་པ་ཆུང་ངུ་ལ་པ་ན་ལྔ་ལ་སོགས་པའོ་ཞེས་བྱ་བ་ནི། རྙེད་པ་ཆུང་ངུ་ལ་ཡང་གལ་ཏེ་མངོན་པར་ཁས་བླངས་པ་དང་ལྡན་པ་མ་མནོས་ན་བགོ་སྐལ་མ་ཤ་ཀ་ལྔ་
འམ་དེ་ལས་ལྷག་པ་ཡིན་ན་དེ་ལ་བསབ་པར་བྱ་བ་ཉིད་ཡིན་པའོ། །མ་བཅོལ་ན་མནོད་པར་མི་བྱའོ། །སློབ་དཔོན་ནམ་མཁན་པོའི་ནི་མནོད་པར་བྱའོ་ཞེས་བྱ་བ་ནི་མ་བཅོལ་ཡང་རྙེད་པ་མནོད་པར་བྱའོ། །ཡིད་གཅུགས་པའི་གནས་ཀྱི་དོན་དུ་ཡང་ངོ་ཞེས་བྱ་བ་ནི། ཡིད་གཅུགས་པའི་གནས་སུ་
གྱུར་པ་གང་ཡིན་པ་དེའི་དོན་དུ་མ་བཅོལ་ཡང་མནོད་པར་བྱ་སྟེ། སློབ་དཔོན་དང་མཁན་པོར་གྱུར་པ་ཉིད་ལ་མནོད་པར་བྱའོ། །རང་གི་ཕྱོགས་དང་མཐུན་པ་མ་ཡིན་པའི་དོན་དུ་མི་བྱའོ་ཞེས་བྱ་བ་ནི་བྱེ་བའི་ཕྱོགས་སུ་སོང་བའི་དོན་དུ་ཡང་མནོད་པར་མི་བྱའོ། །དེ་ནི་གནས་མལ་ལ་ཡང་ངོ་ཞེས་བྱ་བ་ནི། གནས་
མལ་གནོད་པར་བྱ་བ་ཉིད་ལ་ཡང་དེ་མ་བཅོལ་བ་ཞེས་བྱ་བ་ལ་སོགས་པར་རྟོགས་པར་བྱའོ། །འདིར་གཞུང་ནི། གནས་མལ་གྱི་གཞུང་ཞུ་བ་ལས། ཡིད་གཅུགས་གནས་ཀྱི་དོན་དུ་ཞེས་བྱ་བ་ལ་སོགས་པ་ལ་གང་གིས་བཅོལ་བ་གང་དུ་ཡང་ཡིད་ཆེས་པའི་དོན་དུ་གྱུར་པ་སྟེ། དེའི་ཕྱིར་མངོན་དུ་

ཕྱོགས་པར་གྱུར་པའི་དོན་ལ་གནས་མལ་མནོད་པར་བྱའོ་ཞེས་གསུངས་པ་ཡིན་ཏེ། ཁས་བླངས་པས་ཁས་མ་བླངས་པ་ལ་ནི་མ་ཡིན་ནོ་ཞེས་བྱ་བ་དེར་དོན་དེ་ཙམ་དུ་གསུངས་སོ། །རྙེད་པ་ལ་ཡང་སྦྱོར་བ་འདི་རྙེད་པ་མ་ཡིན་པར་འབྲེལ་བ་ལ་ཡང་འདིར་ཡང་ཞེས་བྱ་བ་དེ་ལྟར་སྨོས་སོ། །
ཟས་ལ་ཡང་ངོ་ཞེས་བྱ་བ་ཡང་མ་བཅོལ་ན་མནོད་པར་མི་བྱའོ་ཞེས་བྱ་བ་ལ་སོགས་པ་རིག་པར་བྱ་བ་སྟེ། འདིར་གཞུང་ནི། འདུལ་བྱེད་དག་ལས་ཐ་སྙད་འདི་ཡིན་ནོ། །འགོད་པ་དང་མ་བྱིན་པར་ལེན་པར་གཏོགས་པ་འདི་ཡང་གཞན་གྱི་ཚིག་གི་སྐབས་མེད་པའི་ཕྱིར་ཏེ། མ་བཅོལ་ན་མནོད་པར་མི་བྱའོ་ཞེས་
བྱ་བ་དེ་ཙམ་ཞིག་དེར་དོན་གསུངས་སོ། །དེ་ཐམས་ཅད་ལ་མ་བཅོལ་བ་ཉིད་ལ་མ་ཡིན་ཞེས་བྱ་བ་ལ་སོགས་པ་འདིར་རྣམ་པར་གཞག་པ་དེའི་ཕྱིར་ཐམས་ཅད་དེ་འདིར་སྦྱར་བར་བྱའོ། །གཞན་གྱི་དོན་དུ་མནོད་པར་ཕ་རོལ་ལ་གོ་བར་བྱའོ་ཞེས་བྱ་བ་ནི་གཞན་ཡང་མནོད་པར་བྱ་སྟེ། ཟས་གཅིག་པུ་ནི་མ་ཡིན་ནོ། །
འདིར་གཞུང་ནི་འདུལ་བྱེད་དག་ལས། ཐ་སྙད་འདི་འགྱོད་པ་གཅིག་པུ་ལས་སྐབས་མེད་པར་བྱ་བའི་ཕྱིར་ཟས་མནོད་པ་ལས་གླེང་གཞི་དེ་ལས་བྱེད་པའོ། །ཐ་སྙད་ལ་ནི་ཟས་མནོད་པ་མ་ཡིན་ཏེ། མནོད་པར་བྱེད་པས་གཞན་ལ་གོ་བར་བྱའོ་ཞེས་བྱ་བ་ཙམ་ཞིག་གསུངས་ཏེ་གཞན་དུ་མནོད་པར་བྱ་བ་ལ་
ཆོ་ག་འདི་རྣམ་པར་གཞག་པར་བྱ་བ་སྟེ། དེ་ལྟར་ན་བྱེ་བྲག་ལ་མ་བརྟེན་པའོ། །མི་དབང་བས་ནང་དུ་ཞུགས་ཏེ་མི་བྱའོ་ཞེས་བྱ་བ་ནི། རྙེད་པ་མི་དབང་བས་གང་དག་དབང་བ་དེ་དག་གི་ནང་དུ་ཞུགས་ཏེ་སྐལ་བ་མནོད་པར་མི་བྱའོ། །འདིར་གཞུང་ནི། དེ་ལྟ་བས་ན་དགེ་སློང་གི་གཞན་གྱི་རྙེད་པར་
འཇུག་པར་མི་བྱའོ་ཞེས་གསུངས་པ་ཡིན་ནོ། །འདིར་དཔེ་གཞན་ཡང་ཚེ་དང་ལྡན་པ་ཉེ་དགའ་མགྲོན་དུ་མ་བོས་པས་ཟས་ཟོས་ནས་རས་ཡུག་ཆེན་མནོས་པ་བཞིན་ནོ། །དབང་བ་གཅིག་ཉིད་ཀྱིས་ཤིན་ཏུ་མང་པོ་ཐོབ་པ་ལ་མི་དབང་བའི་རྒྱུར་འགྱུར་བ་མེད་དོ་ཞེས་བྱ་བ་ནི། གང་ཟག་གང་དེ་དག་ལ་འདིར་
ལུང་ནི་རྒན་ཞུགས་དེ་གཉིས་འདི་སྙམ་དུ་བདག་ཅག་གཉིས་ལས་རས་ཡུག་ཆེན་བརྒྱ་ཇི་ལྟར་འབྱུང་བར་འགྱུར་ཏེ། གཞན་ནས་འཇུག་ཏུ་གཞུག་པར་བྱའོ་སྙམ་དུ་སེམས་པ་དེ་བསལ་བའི་དོན་དུ་དེ་ཡིན་ཏེ། གང་ཞིག་དེད་དཔོན་གྱིས་དགེ་འདུན་གྱི་ཕྱིར་གཙུག་ལག་ཁང་དུ་རྙེད་པ་མང་པོ་བསྐུར་བ་ནས་གཙུག་

ལག་ཁང་དེ་ན་དགེ་སློང་གཅིག་པུ་ཞིག་གནས་པ་དེ་འགྱོད་པས་མི་ལེན་པ་ནས། བཅོམ་ལྡན་འདས་ཀྱིས་དེ་ནི་དེ་ན་གང་གནས་པ་དེའི་ཕྱིར་ཡིན་ནོ་ཞེས་རྗེས་སུ་གནང་བའི་བར་དུ་གསུངས་པ་དེ་ནི་དཔེ་གཞན་ཡིན་ནོ། །བྱེ་བ་ནི་ཆོས་མ་ཡིན་པའི་ཕྱོགས་དང་མཐུན་པ་དག་ཏུ་སོང་བ་དགེ་འདུན་གྱི་རྙེད་པ་མི་
དབང་ངོ་ཞེས་བྱ་བ་ནི། ཆོས་མ་ཡིན་པའི་ཕྱོགས་དང་མཐུན་པ་ཐ་དད་པ་རྣམས་ལ་ཆོས་ཀྱི་ཕྱོགས་དོར་ནས་སོང་བ་གང་ཡིན་པ་དེ་དགེ་འདུན་གྱི་རྙེད་པ་མི་དབང་བའོ་ཞེས་བྱ་བའི་དོན་ཏོ། །དེའི་དུས་ཀྱི་རྙེད་པ་ལ་ནི་ཆེས་རིང་དུ་གནས་ན་གནས་པ་ཉིད་ཡིན་ནོ་ཞེས་བྱ་བ་ལ། དེའི་དུས་ཀྱི་ཞེས་བྱ་བ་ནི་དབྱར་གནས་པ་
ལ་སོགས་པའི་དོན་དུས་དེར་རོ། །དེ་ནི་འདིར་སྐབས་དང་མཐུན་པ་ཐ་དད་པ་ཉིད་ཀྱི་དོན་ཞེས་བྱ་བ་སྨོས་སོ། །འདིར་བརྗོད་པ་ཡང་བབས་པ་དང་ཤི་བར་གྱུར་པ་གཉིས་ལ་ཡང་མི་འོས་པ་ཉིད་ཀྱི་དོགས་པ་ཡོད་པར་འགྱུར་བ་དེ་བས་ན་དེའི་ཕྱིར་བརྗོད་པར་བྱ་སྟེ། བབས་པ་དང་ཤི་བར་གྱུར་པ་གཉིས་ཀྱང་ངོ་ཞེས་བྱ་
བ་ནི་འདི་གཉིས་ཀྱང་ཆེས་རིང་དུ་གནས་པ་ཡིན་ན་དེའི་དུས་ཀྱི་རྙེད་པ་དབང་བ་ཉིད་ཡིན་ནོ་ཞེས་བྱ་བའི་དོན་ཏོ། །ཤི་བའི་ཕྱིར་འདི་སྨོས་པ་ལ་དགོས་པ་ཅི་ཡོད་ཅེ་ན། གལ་ཏེ་སུ་ཞིག་ལ་ཕུལ་ནས་ཤི་ན་བུ་ལོན་འདི་ལ་ཡོད་པའམ། ཉེ་བར་གནས་པས་ཡོ་བྱད་དྲུག་པོ་མ་ཐོབ་ན་དེ་ལ་སྦྱིན་པར་བྱའོ། །གལ་ཏེ་
མ་ཡིན་ན་གང་རྣམས་ཀྱིས་དེ་ནི་ཤི་བའི་ཡོ་བྱད་ལ་དབང་བ་ཉིད་དེ་དེ་རྣམས་ལ་འདིར་རྙེད་པ་ཞེས་བྱ་བ་འདི་བསྟན་པའོ། །རྙེད་པ་ནི་ཇི་ལྟར་རྣམ་པར་ངེས་པར་བྱེད་པ་ལྟར་རྣམ་པར་གཞག་གོ་ཞེས་བྱ་བ་ནི། གཙུག་ལག་ཁང་འདི་ན་གནས་པའི་དགེ་སློང་རྣམས་ཀྱིས་གནས་མལ་དང་བསོད་སྙོམས་ལ་སོགས་པ་
འདི་ལོངས་སྤྱོད་པར་བྱའོ་ཞེའམ། དེ་ན་གནས་པའི་རྟེན་པ་ལ་རྐང་པའི་མར་བསྐུ་བ་ལ་སྦྱར་བར་བྱའོ། །སྨན་གྱི་རིན་ལ་སོགས་པ་དང་ཞེས་བྱ་བ་འདིར་སྤྲོས་པ་མ་བྱས་ཏེ། སྤྲོས་པ་མ་བྱས་པ་ནི་གནས་ཁང་ལ་སོགས་པ་དགེ་སློང་གི་དབང་དུ་མཛད་ནས་རྙེད་པ་གནང་བ་ལ་དེ་ལྟ་བུར་གྱུར་པ་ཉིད་ཀྱིས་ལོངས་
སྤྱད་པར་བྱའོ། །གནས་ཁང་དང་ཞིང་དང་ཁང་པ་བརྩེགས་པ་འདི་ལ་ངེས་པར་དེ་ནི་གནས་པས་འདི་ལོངས་སྤྱོད་པར་བྱའོ་ཞེས་སྤྲོས་པ་མ་བྱས་ཏེ། དེ་ན་དགེ་སློང་གི་དབང་དུ་མཛད་ནས་གནང་བའོ། །གཞན་དུ་གནས་པས་ལོངས་སྤྱད་པར་བྱའོ། །འདིར་དགུན་ནམ་དབྱར་གནས་པ་ལ་འདི་དབུལ་བར་

བྱའོ། །ངེས་པར་གནས་པ་ཉིད་ཀྱིས་དེར་དུས་དེར་མནོད་པར་བྱའོ་ཞེས་བྱ་བ་ལ་སོགས་པ་རྣམ་པར་དཔྱད་པར་བྱས་ནས་གང་ཟག་ལ་སྦྱིན་བར་བྱ་སྟེ་དེ་ཉིད་ལ་དེའོ། །འཐོབ་པ་རྣམས་ཀྱིས་ཀྱང་ངོ་ཞེས་བྱ་བ་ཡང་། རྙེད་པ་ནི་ཇི་ལྟར་ངེས་པར་བྱེད་པ་ལྟར་རྙེད་པ་རྣམ་པར་གཞག་པའོ། །
གང་དུ་དེ་རྣམས་འགྲོ་བ་དེར་གཏོགས་པའི་རྣམ་པར་ངེས་པ་ལ་ཞེས་བྱ་བ་དེ་ནི་དོན་གྱིས་རྟོགས་པར་བྱའོ། །གང་དུ་ཡང་དེ་རྣམས་འགྲོ་བ་སྟེ། ཕུལ་བའི་རྫས་ལ་ཁྱིམ་ཆེ་གེ་མོ་ནི་ཁྱེད་ཀྱིའོ། །ཁྱིམ་ཆེ་གེ་མོ་ནི་ངེད་ཀྱིའོ། །ལམ་པོ་ཆེ་འདི་ནི་ཁྱེད་ཀྱིའོ། །ལམ་པོ་ཆེ་འདི་ནི་ངེད་ཀྱིའོ། །བཞི་མདོའི་དབུས་ཀྱི་ཞེས་བྱ་
བ་ལ་སོགས་པ་ལྟ་བུར་ཁྲིམས་སུ་བྱ་བ་བཅས་ནས་ཐ་དད་པ་དག་ལ་ཆོས་ཀྱི་འདོད་པ་ཁས་བླངས་པ་དང་མ་བླངས་པ་དག་གིས་ཕྱོགས་གཉིས་ལ་དབྱར་གནས་པར་ཁས་བླངས་པ་ལ་གཞི་མདོ་ལ་སོགས་པ་ལས་གནས་གཞན་ལས་གང་གིས་ཕྱོགས་གཞན་རྣམ་པར་ངེས་པའི་ཁྱིམ་གྱི་ཕྱོགས་གཞན་ཀྱི་རྙེད་པ་རྙེད་
པའོ། །ཁྱིམ་དེ་ཉིད་དུ་རྣམ་པར་ངེས་པར་བྱས་པའི་ཕྱོགས་ཀྱི་རྙེད་པ་དེའོ། །དེའི་ཕྱོགས་གཉིས་ཀ་ཡང་གལ་ཏེ་ཁྱིམ་དེ་དང་ལྡན་པ་རྙེད་པ་དེ་དང་སྦྱོར་བ་ཡིན་ན་དེ་ལྟར་ཡང་ཕྱོགས་དེ་ཉིད་ཁྱིམ་དེར་རྣམ་པར་ངེས་པ་ལ་རྙེད་པ་དེ་ཡོད་པར་འགྱུར་རོ། །འདིར་ཐམས་ཅད་སྟོན་པ་ལ་སུ་ཞིག་ལ་དགོས་པ་འགྲུབ་
པའི་ཕྱོགས་དེ་ལ་ཡང་རྙེད་པ་དེ་ལ་གཞན་གྱི་ཅི་ཞིག་སྙམ་པ་དེ་བཟློག་པའི་དོན་དུ་བརྗོད་པར་བྱ་སྟེ། དེའི་ཕྱིར་ཐམས་ཅད་ཀྱི་ཕུལ་ན་ཡང་ངོ་ཞེས་བྱ་བ་སྨོས་ཏེ། དེ་ལྟར་ཡང་ཇི་ལྟར་རྣམ་པར་ངེས་པའི་རྙེད་པ་རྣམ་པར་གཞག་པའི་དཔེར་འདིར་དབྱར་གྱི་དུས་སུ་བྱེད་པ་དག་གི་ཕྱོགས་དུས་གཞན་དག་ལ་ཡང་སྡེ་ཚན་
གཞན་ལ་ཡང་འདི་རུང་བས། དེའི་ཕྱིར་འདིར་སྤྱིར་མདོར་བསྡུས་པའོ། །གལ་ཏེ་ཟས་ལ་ཡང་དེ་ལྟར་རྣམ་པར་ངེས་པར་བྱས་པར་གྱུར་ན་དེའི་ཚེ་ཁྱིམ་གཞན་རྣམ་པར་མ་ངེས་པ་ལ་གཞན་གྱིས་བཟའ་བར་མི་བྱ་སྟེ། རྣམ་པར་མ་ངེས་པའི་ཕྱོགས་ཀྱི་ཁྱིམ་གཞན་ལས་རྙེད་པར་འགྱུར་བ་ཅིག་ཤོས་ཀྱིས་ཕྱོགས་ཀྱི་
རྗེས་སུ་གནང་བ་ཉིད་ཡིན་ན་ཉེས་པ་མེད་པར་རིག་པར་བྱའོ། །དགེ་འདུན་ཡོངས་སུ་མ་བཅད་ན་ལས་ཀྱི་མཚམས་ཀྱིས་ཡོངས་སུ་བཅད་དོ་ཞེས་བྱ་བ་ནི། དགེ་འདུན་ཡོངས་སུ་མ་བཅད་ན་དགེ་འདུན་ལ་རྙེད་པ་རྣམ་པར་ངེས་པ་ལ་གང་ཞིག་གནས་དེ་ལ་གསོལ་བ་ལ་སོགས་པའི་ལས་ཀྱི་མཚམས་དེས་དགེ་

འདུན་ཡོངས་སུ་བཅད་པ་དེའི་མཚམས་ཀྱི་ནང་དུ་གཏོགས་པའི་སྣ་ཚོགས་པའི་གནས་སམ་གནས་གཅིག་པ་ཐམས་ཅད་ལ། གློ་བུར་བ་དང་བཅས་པ་ལ་རྙེད་པ་དེ་ཞེས་བྱ་བའི་དོན་ཏོ། །འདི་ལ་གཅིག་ལ་སོགས་པ་ནི་དེ་ཉིད་དོ་ཞེས་བྱ་བ་ནི་འདིར་དགེ་འདུན་ལ་བརྟེན་ནས་ཕུལ་བའི་རྙེད་པ་ལ་གལ་ཏེ།
མཚམས་གཅིག་གི་ནང་དུ་གཏོགས་པར་གྱུར་པ་གཉིས་སམ་གསུམ་ནི་དགེ་འདུན་ཉིད་དོ། །དེ་ལ་དེ་ཙམ་དེར་འོས་པ་མ་ཡིན་ནོ་ཞེས་བྱ་བའི་དོན་ཏོ། །སྐྱེས་པའམ་བུད་མེད་དམ་མ་ནིང་འགའ་ཞིག་ལ་བརྟེན་ནས་དབྱར་གནས་པར་ཁས་ལེན་ཅིང་གནས་མེད་པར་དེ་ན་བུད་མེད་ལ་སོགས་པས་དབུལ་བར་
བྱེད་ན་དེ་གནས་ཆེ་གེ་མོར་དགེ་འདུན་ལ་ཕུལ་ལོ་ཟེར་ལ། གལ་ཏེ་དེ་ལྟར་གནས་དེར་མཚམས་གང་ཡིན་པའི་ཁོངས་སུ་ཆུད་པ་དེ་རྣམས་ཀྱི་རྙེད་པ་ནི་དེ་ཡིན་ནོ། །གལ་ཏེ་བདག་གིས་འདི་ཉིད་ཀྱི་དགེ་འདུན་ལ་ཕུལ་ལོ་ཞེས་ཟེར་ལ། གལ་ཏེ་དེ་ན་གང་ཟག་གཞན་མེད་ན་ནི་རྙེད་པ་དེ་མཚམས་ཀྱིས་བསྟབས་པ་ཡིན་
ནོ། །གལ་ཏེ་འདི་ཁྱོད་ཁོ་ན་ལ་ཕུལ་ལོ་ཞེས་ཟེར་ན་ནི་རྙེད་པ་དེ་རྟེན་གྱིས་བསྟབས་པ་ཡིན་ཏེ་རྟེན་གྱི་དབང་གིས་གྲུབ་ཅེས་བྱ་བའི་དོན་ཏོ། །ཆོས་ཀྱི་རྙེད་པ་ནི་དེ་སྨྲ་བ་རྣམས་དབང་བ་ཉིད་ཡིན་ནོ་ཞེས་བྱ་བ་ནི་འདིར་སྨྲ་བ་རྣམས་ལ་ཤུགས་ཀྱིས་དབང་བྱེད་པ་ཉིད་དོ། །དེའི་སྒྲས་ནི་ཆོས་དང་འབྲེལ་པའོ། །ཆོས་ཀྱི་རྙེད་པས་ནི་མ་
ཡིན་ནོ་ཞེས་བྱ་བར་རིག་པར་བྱའོ། །འདུལ་བ་བྱེ་བྲག་ཏུ་བཤད་པ་དག་ལས་མྱ་ངན་ལས་འདས་པ་དག་ལ་ཕུལ་བ་ནི་མཆོད་རྟེན་གྱི་དང་འདྲ་བར་གཞག་གོ་ཞེས་གསུངས་པས། དེའི་ཕྱིར་འདིར་ཆོས་རིན་པོ་ཆེ་མ་ཡིན་གྱི་འོན་ཏེ་གཞན་ཡིན་ཏེ། སིལ་བུ་དག་ལས་ཀྱང་དེར་ཆོས་གཞན་བཟུང་བ་ཞེས་བྱ་བར་རྟོགས་པར་
བྱའོ། །རིན་པོ་ཆེའི་གོ་རིམས་འདི་ནི་ཞེས་བྱ་བ་གལ་ཏེ་ཡོད་པར་འགྱུར་ན་ནི་མི་མཁས་པ་ལ་རིན་པོ་ཆེའི་གོ་རིམས་ལ་བརྡ་བྱས་པ་ལ་ཆོས་ཀྱི་མིང་ངོ་། །གཙུག་ལག་ཁང་གི་ཚིགས་སུ་བཅད་པ་གཅིག་འཛིན་པ་ནི་འདིར་དེ་ཉིད་ཀྱི་མཐའ་ཡིན་ནོ་ཞེས་བྱ་བ་ལ་དེ་ཉིད་ཀྱི་ཞེས་བྱ་བ་ནི་ཆོས་སྨྲ་བ་པོ་ཉིད་ལའོ། །འདི་ཞེས་བྱ་བ་ནི་
ཆོས་ཀྱི་རྙེད་པ་དབང་བ་འདི་ལའོ། །མདོ་འདི་ནི་རྩོད་པའི་གཞིའི་གཞུང་ལས་འབྱུང་ངོ་། །མཚན་མི་མཐུན་པའི་ཤི་བའི་ཡོ་བྱད་ལ་ཅིག་ཤོས་ཡོད་ན་མི་དབང་བ་ཉིད་དོ་ཞེས་བྱ་བ་ལ། མཚན་མི་མཐུན་པའི་ཞེས་བྱ་བ་ནི། འདིར་གཞུང་ནི། གླེང་གཞི་རྣམས་ལས། དགེ་སློང་དག་དགེ་ཚུལ་གྱི་རྒྱུད་དུ་གཏོགས་པ་དེའོ་ཞེས་

གསུངས་པ་ཡིན་ནོ། །ཅི་ཐམས་ཅད་དུ་རྣམ་པར་གཞག་པ་འདི་ཡིན་ནམ་ཞེ་ན་མ་ཡིན་ཏེ་དེའི་ཕྱིར་ཅིས་ཤོས་ཡོད་ན་ཞེས་བྱ་བ་སྨོས་ཏེ། ཅིག་ཤོས་ཞེས་བྱ་བ་གོང་ན་མཚན་མཐུན་པ་ཡོད་པ་དེ་མཚན་མ་མཐུན་པ་མི་དབང་ངོ་ཞེས་བྱ་བའི་དོན་ཏོ། །གནས་ནས་ཕྱུང་བའི་
ཡང་དེ་བཞིན་ནོ་ཞེས་བྱ་བ་ནི་ཅིག་ཤོས་ཡོད་ན་ཤི་བའི་ཡོ་བྱད་ལ་ཡང་གནས་ནས་ཕྱུང་བའི་མི་དབང་ངོ་ཞེས་བྱ་བ་འདིར་ཉེ་བར་གཞག་པའོ། །འདིར་གནས་ནས་ཕྱུང་བའི་ནི་ཅིག་ཤོས་ཉིད་ལ་མཐར་ཐུག་པའོ། །འདིར་གནས་ནས་མ་ཕྱུང་བ་ལ་ནི་ཅིག་ཤོས་ཀྱི་སྒྲའི་རྣམ་པར་གཞག་པའོ། །མེད་ན་
ཡང་ངོ་ཞེས་བྱ་བ་ནི་ཅིག་ཤོས་ལའོ། །རྒྱུ་ལས་སེམས་མ་ལོག་ནའོ་ཞེས་བྱ་བ་ནི་ལྟུང་བ་མ་མཐོང་བ་ལ་སོགས་པའི་རྒྱུ་གང་གིས་དེ་སྤང་བའི་ལས་བྱས་པའི་རྒྱུ་དེ་ལས་སེམས་མ་ལོག་ཅིང་བཟློག་པར་མ་བྱས་པ་དེ་ལའོ། །འདིར་གཞུང་ནི། གང་དབང་ལགས། དེ་དག་ལས་གང་གིས་དང་པོར་སྡིག་
པ་ཅན་གྱི་ལྟ་བའི་རྣམ་པ་སྤོང་བར་བྱེད་པའོ་ཞེས་གསུངས་པ་ཡིན་ནོ། །གང་གིས་མ་བཏང་བ་ཉིད་ལ་གཞན་གྱིས་ཀྱང་ཞེས་བྱ་བའི་འདིར་ཚིག་ཡོད་པ་དེ་དེ་བས་ན་འདིར་མདོ་བྱས་སོ། །འདིར་ལྟ་བ་དང་། འབྲེལ་བ་སྤང་བའི་རྒྱུ་ལས་མངོན་པར་ཞེན་པར་རིག་པར་བྱ་སྟེ། མཆོག་ཉིད་དུ་མཐོང་བའི་རབ་ཏུ་དབྱེ་བ་ཉིད་ཀྱི་ཕྱིར་
འདི་ལ་ལྟ་བ་ཉིད་དུ་རིག་པར་བྱའོ། །དེའི་དེ་མནོད་པར་བྱ་བ་ཉིད་ལ་དེ་ནི་ཐ་དད་པ་ཉིད་མ་ཡིན་ནོ་ཞེས་བྱ་བ་ནི། སྤངས་པ་དེ་ཤི་བའི་ཡོ་བྱད་རྣམས་དེ་མནོད་པར་བྱ་བ་ཉིད་ལ་སྤངས་པ་དེ་མ་སྤངས་པ་དང་ཐ་དད་པ་ཉིད་མ་ཡིན་ནོ། །སྤངས་པ་ནི་དགེ་འདུན་ལས་ཐ་དད་པ་ཉིད་མ་ཡིན་པའི་ཕྱིར་འོས་པ་ཉིད་དོ། །དེའི་ཤི་བའི་
ཡོ་བྱད་ལ་རང་བཞིན་གྱིས་གནས་པ་ཞེས་བྱ་བའི་དོན་ཏོ། །ཐ་དད་པའི་ལ་ནི་ཐ་དད་པ་ཉིད་དོ་ཞེས་བྱ་བ་ནི་འདོད་པ་གཞན་ལ་བརྟེན་པས་ཐ་དད་པ་ཕྱོགས་གཞན་དང་འབྲེལ་བ་ལ་ནི། ཐ་དད་པ་ཉིད་དེ་ཕྱོགས་གཞན་ལས་ཐ་དད་པར་གྱུར་པ་ཉིད་དོ། །དེའི་དེ་མནོད་པ་ཉིད་ལ་གཞན་གྱི་ཕྱོགས་སུ་གཏོགས་པའི་ཤི་བའི་
ཡོ་བྱད་ལ་གཞན་གྱི་ཕྱོགས་སུ་གཏོགས་པ་ལ་འོས་པ་ཉིད་མ་ཡིན་ནོ། །ཆོས་དང་མཐུན་པའི་འདོད་པ་ལ་བརྟེན་པ་རྣམས་ལ་ཞེས་བྱ་བའི་དོན་ཏོ། །འདིར་གཞུང་ནི། ཁས་བླངས་པ་རྣམས་ཀྱི་གནས་སུ་ཁས་མ་བླངས་པའི་དགེ་ཚུལ་འོངས་ཏེ། དུས་བྱས་པར་གྱུར་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཆོས་དང་

མཐུན་པའི་ཕྱོགས་ཁས་བླངས་པ་ནི་ཁས་བླངས་པ་ཡིན་ལ་ཆོས་མ་ཡིན་པ་དང་མཐུན་པའི་ཕྱོགས་ཁས་བླངས་པ་ནི་ཁས་མ་བླངས་པ་ཡིན་པར་རིག་པར་བྱའོ། །རབ་ཏུ་བྱུང་བ་དང་། ཚངས་པ་མཚུངས་པར་སྤྱོད་པ་ལས་གཞན་པ་དག་དེ་མི་དབང་བ་ཉིད་ཡིན་ནོ་ཞེས་བྱ་བ་ནི་རབ་ཏུ་བྱུང་བ་ཚངས་པ་མཚུངས་པར་སྤྱོད་པ་དག་ལས་གཞན་
ཉེ་དུ་ལ་སོགས་པ་དང་། རྒྱལ་པོ་ལ་ཡང་རབ་ཏུ་བྱུང་བ་ཤི་བའི་ཡོ་བྱད་དེ་མི་དབང་བ་ཡིན་ཏེ། དེ་ནི་རབ་ཏུ་བྱུང་བ་དང་ཚངས་པ་མཚུངས་པར་སྤྱོད་པ་དག་ཁོ་ན་དབང་བ་ཡིན་ནོ་ཞེས་བྱ་བའི་དོན་ཏོ། །འདིར་དགེ་སློང་ཞེས་མ་སྨོས་པ་ནི་དགེ་ཚུལ་དང་དགེ་ཚུལ་མ་ཡང་དབང་བ་ཉིད་དུ་བསྟན་པའི་ཕྱིར་རོ། །ཚངས་པ་མཚུངས་པར་སྤྱོད་
པ་ཞེས་སྨོས་པ་ནི་གཞན་མུ་སྟེགས་ཅན་བསལ་བའི་ཕྱིར་རོ། །གསོལ་བའམ་དང་པོ་དང་ཐ་མས་བྱིན་གྱིས་བརླབས་ཟིན་པ་ན་འོངས་པ་ནི་མི་དབང་ངོ་ཞེས་བྱ་བ་ནི་ཤི་བའི་ཡོ་བྱད་ལ་བྱིན་གྱིས་བརླབས་ཟིན་ཀྱང་རུང་སྟེ། གང་ཞིག་ཟིན་པ་ན་འོངས་པ་དེ་ལ་ཡང་དེ་དག་ནི་མི་དབང་བ་ཉིད་ཡིན་ནོ། །དེ་ལྟར་བྱུང་བ་བྱིན་གྱིས་བརླབ་པ་མ་ཟིན་
པ་ནི་དབང་བ་ཉིད་ཡིན་ནོ། །ལྷོ་ཕྱོགས་སུ་མཚན་མོའི་འོག་ཏུ་འདི་ལ་བྱིན་གྱིས་བརླབ་པར་བྱ་བ་ཉིད་དུ་གསུངས་སོ། །དེ་ལ་གང་ཞིག་མདུན་རོལ་དུ་བྱིན་གྱིས་བརླབ་པ་གཉིས་པོ་འདི་བྱེད་པར་འགྱུར་བ་དེས་གཞན་རྣམས་ལ་སྐལ་བ་མི་དབང་བ་ཉིད་དུ་ཡང་མི་འགྱུར་བ་ལས་དེ་མ་གྲགས་པ་ཉིད་ཀྱི་ཕྱིར་ལས་ཀྱི་ཆོ་ག་ལས་འདས་པ་
ཞེས་བྱ་བར་རིག་པར་བྱའོ། །དེ་ལས་འགའ་ཞིག་དགེ་འདུན་གྱི་རྒན་པ་དང་གསར་བུ་གཉིས་ལ་བྱིན་པ་ནི་དེ་ཞེས་བྱའོ་ཞེས་བྱ་བ་ལ། དེ་ལས་ཞེས་བྱ་བ་ནི་ཤི་བའི་ཡོ་བྱད་དེ་ལས་སོ། །འགའ་ཞིག་ཅེས་བྱ་བ་ནི་དངོས་པོ་འགའ་ཞིག་གོ། །དགེ་འདུན་གྱི་རྒན་པ་དང་དགེ་འདུན་གྱི་གསར་བུ་གཉིས་ལས་བྱིན་པ་ནི་དང་པོ་དང་ཐ་མ་ཡིན་
པ་ཞེས་བྱའོ། །འདིར་གཞུང་ནི། ཡོ་བྱད་གཅིག་བཙོངས་ཏེ་ཅུང་ཞིག་དགེ་འདུན་གྱི་རྒན་པ་དང་དགེ་འདུན་གྱི་གསར་བུ་ལ་བྱིན་ནས་གསུངས་པ་ཡིན་ནོ། །དེ་ལ་དོན་གྱི་དབང་གིས་ནི་འདིར་ཅུང་ཞིག་ཉིད་དང་། ཉོ་ཚོང་ཡང་ངེས་པ་ཅན་ནི་མ་ཡིན་ཏེ། དེ་བས་ན་འདིར་མདོར་བྱས་སོ། །གང་ན་བྱིན་གྱིས་བརླབ་པར་བྱ་བ་འདུག་པ་དེའི་
མཚམས་སུ་གཏོགས་པ་རྣམས་བྱིན་གྱིས་རློབ་པར་བྱེད་པ་ཡིན་ནོ་ཞེས་བྱ་བ་ནི་གནས་གང་ན་བྱིན་གྱིས་བརླབ་པར་བྱ་བའི་དངོས་པོ་འདུག་པ་དེའི་མཚམས་སུ་གཏོགས་པའི་བྱིན་གྱིས་རློབ་པར་བྱེད་པ་པོ་རྣམས་ཞེས་བྱ་བའི་དོན་ཏོ། །འདི་ལ་ཤི་བའི་གནས་ཉིད་ཀྱི་རྒྱུ་མ་ཡིན་ནོ་

ཞེས་བྱ་བ་ལ། འདི་ལ་ཞེས་བྱ་བ་ནི་ཤི་བའི་ཡོ་བྱད་བྱིན་གྱིས་བརླབ་པར་བྱ་བ་འདི་ལ་ཤི་བའི་གནས་ཉིད་ནི་རྒྱུ་མ་ཡིན་པའོ། །འདིར་ཤི་བ་དེའི་དབང་གིས་མཚམས་དེ་ན་གནས་པ་རྣམས་ཀྱིས་ཤི་བའི་ཡོ་བྱད་འདུག་པ་བྱིན་གྱིས་བརླབ་ཏུ་མི་རུང་བ་ཉིད་ཡིན་ནོ་ཞེས་བྱ་བའི་དོན་ཏོ། །མཚམས་
ཀྱི་བར་ན་འདུག་པ་ལ་ལུས་སམ་གཞན་གྱིས་རེག་པས་ཇི་ཙམ་ནོན་པ་དེར་གཏོགས་པ་རྣམས་སོ་ཞེས་བྱ་བ་ལ། མཚམས་ཀྱི་བར་ན་འདུག་པའི་ཤི་བའི་ཡོ་བྱད་དེ་ལ་ཤི་བ་དེའི་ལུས་ཀྱིས་རེག་གམ། གཞན་གྱིས་རེག་པའི་ཡོ་བྱད་བྱིན་གྱིས་བརླབ་པར་བྱ་བ་དེས་མཚམས་ཇི་ཙམ་ནོན་ཅིང་ཁྱབ་པའི་མཚམས་དེར་
གཏོགས་པའི་དགེ་སློང་རྣམས་ཀྱིས་བྱིན་གྱིས་རློབ་པར་བྱེད་པ་ཡིན་ཏེ། འདི་ལ་ནི་བྱིན་གྱིས་བརླབ་པར་བྱ་བའི་རྫས་ཀྱི་དབང་གིས་རྣམ་པར་གཞག་གི་ཤི་བའི་རོའི་དབང་གིས་ནི་མ་ཡིན་གྱི་ཞེས་བྱ་བ་དེ་ལ་བརྗོད་པ་སྟེ། མདོ་འདི་ནི་གླེང་གཞི་རྣམས་ལས་སོ། །གང་ན་ནོར་དང་འདྲ་བ་དེ་འདུག་པའི་ཁོངས་སུ་ཡོ་
བྱད་གཏོགས་པ་ཉིད་ཡིན་ནོ་ཞེས་བྱ་བ་ནི་ནོར་དང་འདྲ་བར་འགྱུར་བའི་དངོས་པོ་དེ་ལ་ཁྱིམ་པའམ་རབ་ཏུ་བྱུང་བའི་ནི་ནོར་དང་འདྲ་བའོ། །དེའི་ཁོངས་སུ་གཏོགས་པ་དེ་ནི་དེའི་ལུས་སུ་གྱུར་པ་སྟེ། འདི་འཛིན་པའི་བདག་ཉིད་ཅན་གྱི་ཕྱིར་ཞེས་བྱ་བའི་དོན་ཏོ། །དེ་ཁས་ལེན་པ་ཉིད་ལ་གང་དུ་འདི་ནོར་དང་འདྲ་བར་
འགྱུར་བ་དེའི་ཁོངས་སུ་ཡོ་བྱད་གཏོགས་པ་ཉིད་ཡིན་ནོ་ཞེས་བྱ་བའི་དོན་ཏོ། །དེའི་ཕྱིར་ནོར་དང་འདྲ་བས་གཞན་ན་འདུག་པ་བྱིན་གྱིས་བརླབ་པར་བྱའོ་ཞེས་བྱ་བ་ནི་གཞན་ན་འདུག་པས་ཀྱང་ཤི་བའི་ཡོ་བྱད་ཀྱི་ནོར་དང་འདྲ་བའི་གང་ཟག་དྲུང་ན་འདུག་པས་བྱིན་གྱིས་བརླབ་པར་བྱའོ། །བསྐུར་བ་སྐུར་བར་
བྱ་བས་མ་སྤངས་པ་ནི་དེ་ཉིད་ཡིན་ནོ་ཞེས་བྱ་བ་ནི་བསྐུར་བའི་དངོས་པོ་མ་སྤངས་པ་ནི་གང་གིས་སྐུར་བར་བྱེད་པས་བསྐུར་བར་བྱ་བ་ནི། དེ་ཉིད་ཡིན་ཏེ་བསྐུར་བར་བྱ་བ་དང་བཅས་པ་ཉིད་དོ། །སྤངས་པ་ནི་སྐུར་བར་བྱེད་པ་ཉིད་ཀྱིའོ་ཞེས་བྱ་བ་ནི་སྐུར་བར་བྱེད་པ་ནི་སྐུར་བར་བྱེད་པ་ཉིད་དེ་དངོས་པོ་ནི་དེ་ཉིད་ཡིན་
ནོ་ཞེས་བྱ་བའི་དོན་ཏོ། །དེས་སྤངས་ན་ཡང་ངོ་ཞེས་བྱ་བ་ལ། དེས་ཞེས་བྱ་བ་ནི་སྐུར་བར་བྱེད་པ་དེས་སོ། །གང་ལ་སྟེ་གང་ལ་སྐུར་བར་བྱེད་པ་དེ་ནི་སྤང་བར་འགྱུར་རོ། །འདིར་སྐུར་བར་བྱེད་པ་སྤངས་པ་ནི་བཤད་པ་ལ་སྐུར་བར་བྱེད་པ་སྤངས་བར་མི་འགྱུར་རོ། །གལ་ཏེ་འདིས་སྔ་མ་བཟུང་

ན་འདིས་བདག་ལ་ཅི་ཞིག་བྱ་ཞེས་བདག་གིས་འདི་སྤངས་སོ་ཞེས་བྱ་བ་སྟེ། དེ་ལྟར་ཡང་སྐུར་བར་བྱེད་པ་ཉིད་ཀྱི་དེ་དང་འབྲེལ་པ་ཞེས་བྱ་བའི་དོན་ཏོ། །འདིར་གཞུང་ནི། དགེ་སློང་གིས་དགེ་སློང་ལ་ཆོས་གོས་དག་བསྐུར་ནས་གང་ལ་བསྐུར་བ་དེས་སྤངས་ནས། གང་གིས་བསྐུར་བ་དེས་ཀྱང་
སྤང་ན་གང་ལ་བསྐུར་བ་དེ་ཡིར་བྱིན་གྱིས་རློབ་ན་ནི་བྱིན་གྱིས་མ་བརླབས་པ་ཡིན་ནོ། །གང་གིས་བསྐུར་བ་དེ་ཡིར་བྱིན་གྱིས་རློབ་པར་བྱེད་ན་ནི་བྱིན་གྱིས་བརླབས་པ་ཡིན་ཏེ། ལེགས་པར་བྱིན་གྱིས་བརླབས་པ་ཡིན་ནོ་ཞེས་གསུངས་པ་ཡིན་ཏེ། འདི་མི་རིགས་པར་ཤེས་པར་མི་བྱ་སྟེ། གང་གི་ཕྱིར་དེ་ལྟ་བུར་
གྱུར་པའི་འཇུག་པ་ལ་མི་དགོས་པའི་མི་གཙང་བ་ལ་བདག་གིས་འདི་དོར་རོ་སྙམ་པ་དེ་ལྟ་བུའི་བློ་དང་འདྲའོ། །དེའི་དགོས་པ་ནི་བདག་པོ་སོ་སོ་སོ་སོར་བྱེད་ཅིང་དེ་ལ་ཡིད་བརྟེན་ནས་རྣམ་པར་གཞག་པ་ཤི་བའི་ཡོ་བྱད་དུ་བྱིན་གྱིས་རློབ་པ་རྣམས་ཀྱིས་ཞེས་བྱ་བ་ལ་སོགས་པའོ། །ཕྱི་རོལ་དུ་ཡང་མཚམས་ཀྱི་
ནང་དུ་འདུ་ཤེས་པ་དག་གིས་འབའ་ཞིག་གིས་བྱིན་གྱིས་རློབ་པ་མི་འཆགས་སོ་ཞེས་བྱ་བ་ལ། ཕྱི་རོལ་དུ་ཡང་ཞེས་བྱ་བ་ནི་ནང་དུ་མ་བྱས་པ་ལ་སོགས་པ་བྱིན་གྱིས་བརླབ་པའོ། །མི་འཆགས་སོ་ཞེས་བྱ་བ་ལ་ཡང་གི་སྒྲ་འདི་ནི་མ་གྲགས་སོ། །ནང་དུ་འདུ་ཤེས་པ་དག་གིས་ཞེས་བྱ་བ་མཚམས་
ཀྱི་ཞེས་བྱ་བར་སྦྱར་ཏེ། མཚམས་ཀྱི་ནང་དུ་འདུ་ཤེས་པ་དག་གིས་ཞེས་བྱ་བའི་དོན་ཏོ། །འབའ་ཞིག་གིས་བྱིན་གྱིས་བརླབས་པ་ཞེས་བྱ་བ་འབའ་ཞིག་དག་གིས་བྱིན་གྱིས་བརླབ་པོ། །མཚམས་ཀྱི་ནང་དུ་འདུ་ཤེས་པ་རྣམས་ལ་ཕྱི་རོལ་དུ་ཡང་བྱིན་གྱིས་རློབ་པར་བྱེད་པ་ནི་འབའ་ཞིག་གིས་ཞེས་བྱ་བ་མི་
མཐུན་པ་དག་གིས་བྱིན་གྱིས་རློབ་པར་བྱེད་ན་མི་འཆགས་སོ། །མི་འཆགས་པར་མི་བྱའོ་ཞེས་སྤྱིར་བསྟན་པ་དེས་འདི་ལ་ཉེས་བྱས་སུ་ཤེས་པར་བྱའོ། །ཡིད་གཉིས་ཟ་བ་ལ་ཡང་ཡིད་གཉིས་ནི་མཚམས་ཀྱི་ནང་དུ་དེ་སྨོས་པ་ཞེས་བྱ་བར་རིག་པར་བྱའོ། །གང་ཞིག་ཕྱི་རོལ་དུ་མཚམས་ཀྱི་ནང་དུ་འདུ་ཤེས་
པའམ་ཡིད་གཉིས་ཟ་བས་རྐུ་སེམས་ཀྱིས་བྱིན་གྱིས་རློབ་པར་བྱེད་ན་རྐུ་སེམས་དེ་ལ་ཉེས་པ་སྦོམ་པོར་བྱས་པར་འགྱུར་རོ། །དེའི་ཕྱིར་རྐུ་སེམས་ལ་ཉེས་པ་སྦོམ་པོར་རིག་པར་བྱའོ། །བཙུན་པ་གང་ཞིག་མཚམས་ཀྱི་ནང་དུ་རྐུ་སེམས་ཀྱིས་སྔར་ཕྲོགས་པ་ཉིད་ཀྱི་ཕྱིར་ཉེས་པ་སྦོམ་པོར་བྱས་ན་ནི་དངོས་པོ་

ལས་རྣམ་པར་གཞག་གོ། །དབྱུང་བ་དང་རིམ་གྲོ་དང་ཆོས་མཉན་པ་དང་ཡོན་བཤད་པ་མ་བྱས་པར་བྱིན་གྱིས་བརླབ་པར་མི་བྱའོ། །ལྷུང་བཟེད་དང་ཆོས་གོས་ཁྱིམ་གཞན་ན་འདུག་པ་ཉིད་ནི་ཁྱིམ་བདག་གིས་གང་ལ་བྱིན་པ་དེ་དབང་བ་ཉིད་ཡིན་ནོ། །གལ་ཏེ་དབང་ཞིང་དེས་ཕོངས་པ་
ཡིན་ནའོ་ཞེས་བྱ་བ་ལ། འདིར་གཞུང་ནི། གླེང་གཞི་རྣམས་ལས་དེ་མཐར་ཐུག་པའོ། །ཁྱིམ་བདག་གིས་གང་ལ་བྱིན་པ་ཞེས་བྱ་བ་ནི་བྱེ་བྲག་ཡོངས་སུ་མ་སྨོས་པས་གཅིག་དང་དུ་མ་ཞེས་བྱ་བར་ཤེས་པར་བྱའོ། །གལ་ཏེ་འདི་ཁྱིམ་པ་དང་མུ་སྟེགས་པའི་རབ་ཏུ་བྱུང་བ་དང་། འདི་པའི་རབ་ཏུ་བྱུང་བའམ་
མཚམས་ཐ་དད་པ་གཞན་ལ་བྱིན་པར་གྱུར་ན་ཅི་དེ་ལ་ཡང་དབང་བ་ཉིད་དམ་ཞེ་ན། དེའི་ཕྱིར་གལ་ཏེ་དབང་ཞིང་ཞེས་བྱ་བ་སྨོས་སོ། །གང་ལ་རྙེད་པ་དེ་ཡོད་ན་གལ་ཏེ་དབང་བ་དེ་ལ་བྱིན་པར་གྱུར་ན་ཅི་དེ་ལ་ཡང་རྙེད་པ་ཙམ་གྱི་དབང་གིས་དེ་དབང་བ་ཉིད་ཡིན་ནམ་ཞེ་ན། ཕོངས་པ་ཡིན་ནའོ་ཞེས་བྱ་བ་སྨོས་ཏེ།
འདིར་གཞུང་ནི། མེད་དེ་འདིར་ཡང་ཆོ་ག་འདི་སྦྱར་བ་ཞེས་བྱ་བ་དེ་བས་ན་དེ་ལ་མངོན་པར་བརྟེན་པའོ། །གལ་ཏེ་ཁྱིམ་བདག་སྦྱིན་པའི་ཕྱིར་འཇུག་པར་མི་བྱེད་ན། དེའི་ཚེ་སུ་དབང་བ་ཉིད་ཡིན་ཞེ་ན། དེའི་ཕྱིར་སྦྱིན་པར་མི་བྱེད་ན་བླངས་པ་དང་ལྡན་པའོ་ཞེས་བྱ་བ་སྨོས་ཏེ། འདིར་ཡང་དབང་ཞིང་དེས་ཕོངས་
པའོ་ཞེས་བྱ་བ་དབང་དུ་བྱ་བ་དང་སྦྱར་བར་རིག་པར་བྱའོ། །དུ་མ་ལ་ཡང་ཞེས་བྱ་བ་ནི་ཁྱད་པར་ཡོངས་སུ་མ་བཟུང་བར་རིག་པར་བྱའོ། །དེ་ཡང་འདི་ཅིག་ཅར་བླངས་པ་ལ་ཤེས་པར་བྱའོ། །གཞན་ཡང་བརྗོད་པར་བྱ་སྟེ། མཐར་གྱིས་ནི་དང་པོའི་ཞེས་བྱ་བ་ནི་བླངས་པ་དང་ལྡན་པའོ་ཞེས་བྱ་བར་སྦྱར་རོ། །
གང་ཞིག་དང་པོར་བླངས་པ་དེ་ལ་ཞེས་བྱ་བའི་དོན་ཏོ། །གང་དུ་ཡོངས་སུ་འཛིན་པ་པོ་མེད་པ་ཉིད་དེ་ཙམ་ལ་བརྟེན་ནས། གང་ཟག་གང་ལ་ཡང་བྱེ་བྲག་ཏུ་མ་བྱས་པར་སུ་ཁྱེར་བ་ཁྱེར་ཅིག་སྙམ་དུ་བོར་བར་གྱུར་ན་དེ་ལ་སུ་དབང་བ་ཉིད་ཡིན་ཞེ་ན། དེའི་ཕྱིར་མེད་པ་ཉིད་ཡིན་ཞིང་མ་བསྔོས་པར་བོར་ན་སོང་བ་དང་
ལྡན་པའོ། །དེ་ནི་མཐར་གྱིས་དང་འདྲའོ་ཞེས་བྱ་བ་སྨོས་ཏེ། ཇི་ལྟར་མཐར་གྱིས་སློང་བ་དང་པོར་གང་གིས་བླངས་པ་དབང་བ་དང་འདྲ་བར་ཞེས་བྱ་བའི་དོན་ཏོ། །བུ་ལོན་པ་བྱུང་ན་དེ་ལ་གཞལ་བར་བྱ་བའི་ཚད་ཀྱི་ཤི་བའི་ཡོ་བྱད་དེ་དབང་བ་ཉིད་ཡིན་ནོ་ཞེས་བྱ་བ་ལ་དེ་ལ་གཞལ་བར་བྱ་བའི་ཚད་ཀྱི་ཞེས་བྱ་བ་

ནི། གང་ཞིག་བུ་ལོན་པ་དེ་ཤི་བ་དེས་གཞལ་བར་བྱ་བའི་རྫས་ཀྱི་ཚད་ཀྱི་ཞེས་བྱ་བའི་དོན་ཏོ། །དེ་དབང་བ་ཉིད་ཡིན་ནོ་ཞེས་བྱ་བ་ནི་བུ་ལོན་པ་ཉིད་དབང་བ་ཉིད་ཡིན་ནོ། །མ་བགོས་པར་བྱུང་ན་དེ་ལ་ཚངས་པ་མཚུངས་པར་སྤྱོད་པ་རྣམས་ཀྱིས་དེ་གཞལ་བར་བྱ་བ་ཡིན་གྱི། བགོས་པའི་འོག་ཏུ་བྱུང་ན་ནི་
དེ་ལ་མི་གཞལ་བར་བྱ་བ་ཉིད་དོ་སྙམ་དུ་དོགས་པ་བསལ་བའི་ཕྱིར་བགོས་ན་ཡང་ངོ་ཞེས་བྱ་བ་སྨོས་ཏེ། གཞལ་བར་བྱ་བ་ཉིད་དོ་ཞེས་བྱ་བར་སྦྱར་རོ། །དེ་དང་ལྷན་ཅིག་རྣམ་པར་གཞག་པ་དེ་ལ་སྦྱིན་པར་བྱ་བ་ཉིད་དམ་བླང་བར་བྱ་བ་ཉིད་གང་ཡིན་པ་སྟེ། དེ་ཉིད་ནི་མ་ཡིན་ནོ་ཞེས་བྱ་བ་ནི་ཤི་བ་དེ་དང་བུ་ལོན་དེད་པ་དང་།
བུ་ལོན་འཇལ་བར་ལྷན་ཅིག་གང་ཞིག་གནས་པ་དེ་ལ་འདིར་དགེ་སློང་རྣམས་ཀྱིས་གཞལ་བར་བྱ་བའམ། བསླང་བར་བྱ་བ་ཉིད་དེ་དེ་ཉིད་ལ་ནི་མ་ཡིན་ནོ། །གང་ཞིག་དེས་བུ་ལོན་པའི་དྲུང་ནས་བླངས་པ་དེ་བུ་ལོན་ཆགས་པ་ལ་སྦྱིན་པའོ། །ཀཱཪྵཱ་པ་ཎ་རྣམས་དབུལ་བར་བྱའོ་ཞེས་བྱ་བས་ཀཱཪྵཱ་པ་ཎ་རྣམས་བཟུང་བ་དེ་རྣམས་
ཉིད་གཞལ་བར་བྱའོ། །རས་ཡུག་ཆེན་བླངས་ཏེ་རིན་སྦྱིན་པར་བྱའོ་ཞེས་འཐམས་པ་ལ་ནི་རིན་སྦྱིན་པར་བྱའི་རས་ཡུག་ཆེན་དངོས་སྦྱིན་པར་མི་བྱ་བ་དང་། ཐ་ག་པ་ལ་རས་ཡུག་ཆེན་གྱི་དོན་དུ་རྒྱུ་སྤུན་གཏད་པ་ལས་ནི་རས་ཡུག་ཆེན་བླང་བར་བྱའི། རྒྱུ་སྤུན་བླང་བར་མི་བྱ་བ་ལྟ་བུའོ། །འདིར་གཞུང་ནི། དགེ་སློང་གིས་
ཕྲ་བ་བསླངས་པ་དང་། དེ་ན་རེ་འཕགས་པ་དག་བདག་གིས་དེ་ལ་སྦོམ་པོ་དབུལ་བར་བགྱི་བ་ལགས་སོ་ཞེས་ཟེར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་དགེ་སློང་ཤི་བ་ཅི་འདྲ་བ་གཏད་པ་དེ་འདྲ་བ་བསླང་བར་བྱའོ་ཞེས་གསུངས་པ་དེ་ནི་ཐ་སྙད་ཀྱི་ཆོ་གས་ངེས་པར་དེ་བླང་བ་མ་ཡིན་ནོ། །དེའི་ཕྱིར་འདིར་
འབད་པར་མི་བྱ་སྟེ། དེ་ནི་འབད་པའི་གནས་མ་ཡིན་ནོ་སྙམ་པ་དེ་ལ་འདི་བསྟན་པའོ། །གལ་ཏེ་ཐ་སྙད་ཙམ་སློབ་པ་དེའི་ཕྱིར་འདིར་མདོར་བྱས་སོ། །དེ་ཚངས་པ་མཚུངས་པར་སྤྱོད་པ་རྣམས་ལ་བུ་ལོན་ཆགས་པ་ཉིད་དུ་མི་འགྱུར་རོ་ཞེས་བྱ་བ་ནི་ཤི་བ་ལ་བུ་ལོན་ཆགས་པ་དེས། དེའི་དོན་ལས་མ་དག་པ་བྱས་པར་འདི་
ལ་ཚངས་པ་མཚུངས་པར་སྤྱོད་པ་རྣམས་ཀྱིས་གཞལ་བར་བྱ་བ་ཉིད་ནི་མ་ཡིན་ནོ་ཞེས་བྱ་བའི་དོན་ཏོ། །ལག་གི་བླས་དཀོན་མཆོག་གི་བླངས་པ་ཉིད་ཡིན་ཞེ་ན་དེའི་ཕྱིར་ཇི་སྙེད་པ་དེ་སྙེད་མཉམ་པར་བསབ་བོ་ཞེས་བྱ་བ་ན། སངས་རྒྱས་ལ་སོགས་པ་དཀོན་མཆོག་རྣམས་ཀྱི་དཀོར་ནི་དཀོན་མཆོག་གིའོ། །དེ་བླངས་པ་

ནི་འདིས་བཟུང་བ་སྟེ། དེ་བས་ན་དཀོན་མཆོག་གི་བླངས་པ་ཉིད་དེ། དེའི་དངོས་པོ་ནི་དེ་སྙེད་མཉམ་པར་བསབ་པར་བྱའོ། །དེའི་ཇི་སྙེད་པ་ལས་ཞེས་བྱ་བ་ནི་དཀོན་མཆོག་གི་ཇི་སྙེད་པ་ལས་དེ་དང་འབྲེལ་བ་བླངས་པ་ཉིད་ནི་མཉམ་པར་བསབ་སྟེ། དེ་སྙེད་པའི་དཀོན་མཆོག་ལ་ཆ་
མཉམ་པར་བྱ་སྟེ་མཉམ་པར་བསབ་པར་བྱ་སྟེ། འོན་ཀྱང་གལ་ཏེ་ཐ་དད་པར་བྱེད་པ་དེ་དགེ་འདུན་གྱི་ནི་མཆོད་རྟེན་གྱིར་བྱེད། མཆོད་རྟེན་གྱི་ནི་དགེ་འདུན་གྱིར་བྱེད་དེ་དེ་བཞིན་དུ་ཆོས་ཀྱི་ཡང་འདྲེས་པར་བྱེད་ན་ལྷུང་བཟེད་དང་ཆོས་གོས་ལས་ཆ་གསུམ་དུ་བྱས་ཏེ་ཞེས་བྱ་བ་གསུངས་སོ་ཞེ་ན། འོན་ཀྱང་བདེན་མོད་ཀྱི་དེ་ལྟར་
འདིས་དཀོན་མཆོག་གི་བླངས་པར་མི་འགྱུར་བ་ཡིན་ཏེ། གང་གི་ཕྱིར་རང་གི་འདོད་པ་བྱས་པས་གཞན་དང་འབྲེལ་བ་ལ་གཞན་དག་ལ་སྟེར་བ་ནི་མ་ཡིན་ནོ། །དེ་ནི་སྦྱིན་བདག་ཏུ་མི་འགྱུར་ཏེ། མཉམ་པར་བསབ་པ་ཉིད་འདི་ཤེས་པར་བྱེད་པ་ལ་དེ་ཉིད་འདིའི་དགོངས་པས་རྣམ་པར་གནས་པ་ཡིན་ཏེ། གང་གི་ཕྱིར་
མ་བླངས་པ་ལ་སྦྱིན་པར་རིགས་པ་མ་ཡིན་ནོ། །ཡིན་ན་ཞེས་བྱ་བ་སྨོས་པ་གང་ཡིན་པ་དེ་ཡང་དྲང་སྲོང་གི་ཡེ་ཤེས་ཀྱིས་ཐ་སྙད་མ་ཡིན་ནོ། །རབ་ཏུ་གྲགས་པ་ཅན་གྱིས་ཀྱང་སྡུག་བསྔལ་ཏེ། དེ་ལྟ་བུར་གྱུར་པ་ལས་བསལ་བར་ཤེས་པའོ། །དེ་བས་ན་འདི་ལྟ་བུའི་དབང་བརྩན་ཁོ་ན་དེ་རྣམ་པར་གནས་པ་ཡིན་
ཞེས་བྱ་བའོ། །གང་ཞིག་འདིར་ཇི་སྲིད་དུ་བླངས་པ་དེ་སྲིད་དུ་ཆ་གསུམ་བྱའོ། །ལྷག་མ་ནི་དགེ་འདུན་ཉིད་ལ་ཞེས་བྱ་བ་སྨོས་སོ། །དེ་ཡང་དེ་ཉིད་ཀྱི་ཕྱིར་གཟུང་བར་དཀའ་བས་ཞེས་བྱ་བ་མཐོང་ངོ་། །དེ་ནི་གཟུང་བར་དཀའ་བ་འདིས་ལྷག་པར་ཕུལ་བ་ལ་སྐྱོན་ཡོན་ཡང་མེད་དེ། དེ་བས་ན་ཐམས་ཅད་བླངས་པ་ལ་
བགོ་བཤའ་བྱེད་པ་ཞེས་བྱའོ། །ལག་གི་བླས་ཞེས་སྨོས་པ་ནི་འདིར་མཚོན་པ་ཙམ་དུ་རིག་པར་བྱའོ། །གཞན་དུ་ཡང་འདིས་དཀོན་མཆོག་གསུམ་གྱི་དཀོར་བླངས་ཤིང་ཁྱེར་བ་གཉིས་ཡིན་ནོ་སྙམ་དུ་ཤེས་ནས། དེའི་དཀོར་ལ་ཡང་འབུལ་བར་རིགས་པའི་ཕྱིར་རོ། །ནད་གཡོག་དང་བཅས་པ་ཉིད་ཡིན་ན་ཡོ་བྱད་
དྲུག་པོ་དེ་བདག་དབང་བ་ཉིད་ཡིན་པས་བྱིན་གྱིས་བརླབ་པར་མི་བྱ་བ་ཉིད་ཡིན་ནོ་ཞེས་བྱ་བ་ལ། དེ་དབང་བ་ཉིད་ཡིན་པས་ཞེས་བྱ་བ་ནི་དེ་ནད་གཡོག་དེ་དབང་བ་ཉིད་ཡིན་པས་དགེ་སློང་རྣམས་ཀྱིས་བྱིན་གྱིས་མི་བརླབ་པར་བྱ་བ་ཉིད་ཡིན་ནོ། །དེའི་རབ་དང་འབྲིང་དང་ཐ་མ་དང་བཅས་པ་ལས་སོ་ཞེས་བྱ་བ་ནི་དེ་ལ་ཁ་ཅིག་ནི་དགེ་

སློང་གི་ཡོ་བྱད་དང་འཚོ་བའི་ཡོ་བྱད་རབ་ལས་སྦྱིན་པར་བྱའོ། །ཁ་ཅིག་ནི་འབྲིང་། ཁ་གཅིག་ནི་ཐ་མ་དང་ལྡན་པའོ། །གསུམ་པོ་འདི་དང་བཅས་པ་དྲུག་པོ་སྦྱིན་པར་བྱ་བ་ཉིད་ཡིན་ནོ་ཞེས་བྱ་བའི་དོན་ཏོ། །དུ་མ་ཉིད་ཡིན་ན་ཐུན་མོང་ངོ་ཞེས་བྱ་བ་ནི་ནད་གཡོག་གཉིས་སམ་གསུམ་མམ་མང་པོ་ཉིད་ཡིན་ན། ཡོ་བྱད་དྲུག་
པོ་དེ་དག་གི་ཐུན་མོང་ཉིད་ཡིན་ནོ། །དེའི་དོན་དུ་སོང་བ་ཉིད་ཡིན་ལ་ནད་པ་ཤི་ན་སྦྱིན་པར་བྱ་བ་ཉིད་ཅེས་བྱ་བ་ལ། དེའི་དོན་དུ་ཞེས་བྱ་བ་ནི་ནད་པ་དེའི་དོན་དུའོ། །བཅས་པ་ཉིད་ཡིན་ན་ཞེས་བྱ་བ་ནི། གལ་ཏེ་ནད་པའི་དོན་དུ་ནད་གཡོག་དང་བཅས་པར་འགྱུར་བ་དེ་ལྟ་བས་ན་ཡང་ཡོ་བྱད་དྲུག་པོ་འདི་སྦྱིན་པར་བྱ་བ་ཉིད་ཡིན་གྱི་
གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །དགེ་སློང་བྲམ་ཟེའི་བུ་མོས་ཞུས་པ་ལས། དེ་དག་ལ་སོགས་པ་འདིར་བསྙེན་པར་མ་རྫོགས་པ་ལ་ཐམས་ཅད་འོས་པ་ཉིད་ཅེས་བྱ་བའི་མཐར་ཐུག་པ་གསུངས་པའོ། །རྫས་དེ་མི་དབང་བ་ལ་ནི་དེ་མི་སྦྱིན་ནོ་ཞེས་བྱ་བ་ལ། དེ་ཞེས་བྱ་བ་ནི་དྲུག་པོ་དེ་མི་སྦྱིན་པའོ། །ཁྱིམ་
པ་ལ་སོགས་པ་རྣམས་ལ་ནད་གཡོག་གིས་བྱ་བ་ཉིད་ཀྱི་ཕྱིར་སྤྱི་ལ་བྱ་བར་བཀག་པའོ། །འདིར་གཞུང་ནི། བཙུན་པ་བྲོ་གཡོག་ཁྱིམ་པ་ལགས་ན། དེ་ལ་བྲོ་གཡོག་གི་ཆོས་གོས་བརྩལ་བར་བགྱིའམ། བཅོམ་ལྡན་འདས་ཀྱིས་བཀའ་སྩལ་པ། ཅུང་ཟད་ཀྱང་སྦྱིན་པར་མི་བྱ་སྟེ། དེ་བཞིན་དུ་ནད་གཡོག་མ་དང་། དགེ་
སློབ་མ་དང་། དགེ་ཚུལ་མ་ལ་ཡང་སྦྱིན་ནོ་ཞེས་རྒྱ་ཆེར་གསུངས་པ་ཡིན་ནོ་ཞེས་བྱ་བ་དེ་འདིས་བསྡུས་པ་ཡིན་ནོ། །གང་ལ་ཡང་མཚན་མི་མཐུན་པ་དག་འབའ་ཞིག་ཡོད་ན་མཚན་མཐུན་པ་དག་མེད་པ་དེར་མཚན་མི་མཐུན་པ་དག་ལ་ཡང་སྦྱིན་པར་བྱ་བ་ཉིད་ཡིན་པར་ཤེས་པར་བྱའོ། །དེ་ལ་མཚན་མི་མཐུན་པ་དག་ལ་འོས་པ་
ཉིད་ཀྱི་ཕྱིར་རོ། །གཞན་དུ་གནས་པར་ཁས་བླངས་པ་ལ་མི་སྦྱིན་པར་མི་བྱའོ་ཞེས་བྱ་བ་ནི། ནད་གཡོག་གནས་གཞན་དུ་གནས་པར་ཁས་བླངས་པ་ལ་ཡོ་བྱད་དྲུག་པོ་དག་མི་སྦྱིན་པར་མི་བྱ་ཞིང་སྦྱིན་པར་བྱ་སྟེ། འདི་དང་འདི་ལས་གཞན་དུ་གནས་པར་ཁས་བླངས་པ་ནི་མི་སྦྱིན་པའི་རྒྱུ་མ་ཡིན་པའི་ཕྱིར་རོ་ཞེས་བྱ་བའི་དོན་
ཏོ། །འདི་ལ་བསྙེན་པར་མ་རྫོགས་པ་ནི་ཐམས་ཅད་དབང་བ་ཉིད་དོ་ཞེས་བྱ་བ་ནི་སོ་སོར་སྐལ་བའི་ཆ་འོས་པ་ཉིད་ཡིན་པའོ། །འདི་ཡང་འདི་ལ་སུམ་ཆ་འབྲི་བ་ལྟ་བུ་མ་ཡིན་ནོ་ཞེས་བྱ་བའི་དོན་ཏོ། །ནད་པས་སྨྲས་པས་བྱིན་པ་ཕྲི་བ་ཡང་ཇི་སྐད་སྨྲས་པ་བཞིན་བྱ་བ་ཉིད་དོ་ཞེས་བྱ་བ་ནི། ནད་པས་སྦྱིན་པ་སྨྲས་པ་ལ་གང་

དེ་ལ་སྨྲས་པ་དེ་དེས་ཕྲི་བར་གྱུར་ཀྱང་ཇི་ལྟར་དེས་དེ་ལ་སྨྲས་པ་དེ་ལྟར་ཁོ་ན་བཞིན་བྱ་དགོས་པར་རིག་པར་བྱའོ། །འདིར་གཞུང་ནི། འདུལ་བྱེད་དག་ལས་སྔར་ནད་པས་སྦྱིན་པ་དེ་བདག་ཉིད་ཤི་བ་མ་ཡིན་ནོ་ཞེས་བྱ་བ་དང་། དེ་ལྟ་བས་ན་འདི་ལ་མི་སྦྱིན་པ་མ་ཡིན་ནོ། །ནད་གཡོག་གིས་ཕྱིར་ཕྲི་
ཡང་གང་ཞིག་དེས་སྨྲས་པ། གཞན་གྱི་ཕྱིར་ཡང་འདི་ལ་བྱེ་བྲག་མེད་པས་རྣམ་པར་གཞག་པའོ་ཞེས་གསུངས་པ་ཙམ་བསྡུས་པ་ཞེས་བྱ་བའོ། །ཤི་བ་ཉིད་ཀྱི་དུས་ན་རྫས་ཉིད་བསྒྲུབ་པ་ལ་ནི་ནོར་བདག་མི་དབང་ངོ་ཞེས་བྱ་བ་ནི་རང་ཤི་བ་ཉིད་ཀྱི་དུས་ན་གནས་ལ་རང་གི་དངོས་པོ་བསྒྲུབ་པ་ལ་གལ་ཏེ་བདག་ཤི་བར་
གྱུར་ན་ཆེ་གེ་མོ་ཞིག་ལ་བདག་གི་རྫས་འདི་སྦྱིན་པར་བྱའོ་སྙམ་དུ་འདིར་བུ་ལོན་པ་རབ་ཏུ་བྱུང་བ་མི་དབང་བ་མེད་དོ། །རབ་ཏུ་བྱུང་བ་རྣམས་ལ་འདིར་དེ་བྱིན་གྱིས་བརླབ་པར་བྱ་བ་ཉིད་དོ་ཞེས་བྱ་བའི་དོན་ཏོ། །ཁྱིམ་ན་གནས་པ་ནི་དབང་ངོ་ཞེས་བྱ་བ་ནི། བུ་ལོན་པ་ཁྱིམ་ན་དབང་བ་ལ་ཤི་བའི་དུས་ན་རང་ཉིད་བསྒྲུབ་
པའི་ཕྱིར་དེ་དབང་བའོ། །འདིར་གཞུང་ནི། ཕྲན་ཚེགས་དག་ལས། ཁྱིམ་བདག་ནི་ལྟོས་པ་དང་བཅས་པས་དུས་བྱེད་ལ། རབ་ཏུ་བྱུང་བ་དག་ནི་ལྟོས་པ་མེད་པར་དུས་བྱེད་པའི་ཕྱིར་རོ་ཞེས་གསུངས་པ་ཡིན་ཏེ། དེ་ལྟ་བས་ན་ཁྱིམ་བདག་ནི་ལྟོས་པ་དང་བཅས་པའི་ཕྱིར་དབང་ལ། རབ་ཏུ་བྱུང་བ་ནི་ལྟོས་པ་
མེད་པའི་ཕྱིར་མི་དབང་ངོ་ཞེས་གསུངས་པ་དེ་བསྒྲུབ་པོ། །ཁྱིམ་པས་བུ་དང་ཆུང་མ་ཕུལ་ནས་ཤི་ན་ཅི་བདེ་བར་བྱའོ་ཞེས་བྱ་བ་ནི་ཁྱིམ་པས་དགེ་འདུན་ལ་བུ་དང་ཆུང་མ་ཕུལ་ནས་ཁྱིམ་པ་ཉིད་ཤི་ན། དེའི་བུ་དང་ཆུང་མ་དག་ཅི་བདེར་བྱས་ཏེ། བདག་གིར་མི་བྱའོ་ཞེས་བྱ་བའི་དོན་ཏོ། །གླང་པོ་ཆེ་དང་རྟ་དང་།
བོང་བུ་དང་དྲེའུ་དང་གོ་ཆ་རྣམས་ནི་རྒྱལ་པོ་ལ་དབུལ་ལོ། །དབྱིག་དང་གསེར་དང་གཞན་བྱས་པ་དང་མ་བྱས་པ་རྣམས་ནི་གསུམ་ལའོ་ཞེས་བྱ་བ་ནི་དབུལ་ལོ་ཞེས་བྱ་བར་སྦྱར་ཏེ། དབྱིག་དང་གསེར་དང་དེ་དག་ལས་གཞན་པ་ནི་ཟངས་ཀྱི་རང་བཞིན་ལ་སོགས་པ་བརྡུངས་སུ་བྱས་པ་དང་མ་བྱས་པ་རྣམས་ནི་དཀོན་
མཆོག་གསུམ་ལ་དབུལ་ལོ་ཞེས་བྱ་བའི་དོན་ཏོ། །རིན་པོ་ཆེ་རྣམས་ཀྱང་ངོ་ཞེས་བྱ་བ་ནི་ནོར་བུ་དང་བཻ་ཌཱུརྱ་དང་གཡས་སུ་འཁྱིལ་པ་ལ་སོགས་པ་རྣམས་ཀྱང་དཀོན་མཆོག་གསུམ་ལ་དབུལ་ལོ་ཞེས་བྱ་བའི་རྗེས་སྙེགས་པའི་ཕྱིར་ཡང་གི་སྒྲའོ། །མུ་ཏིག་རྣམས་ནི་གཞན་ཡོད་ན་དེའི་སྐལ་བས་སམ་ལྷག་པ་

ཡིན་ཡང་རུང་ངོ་། །གལ་ཏེ་མེད་ན་དེ་བཞིན་དུ་སངས་རྒྱས་ལའོ་ཞེས་བྱ་བ་ནི་གལ་ཏེ་མུ་ཏིག་ལས་གཞན་པའི་རིན་པོ་ཆེ་ཡོད་ན་དཀོན་མཆོག་དག་ལས་སངས་རྒྱས་དེའི་སྐལ་བས་མུ་ཏིག་རྣམས་བརྗེས་ཏེ། སངས་རྒྱས་ལ་དབུལ་བར་བྱའོ། །གལ་ཏེ་དཀོན་མཆོག་སུམ་ཆར་གྱི་སྐུ་སྐལ་ལས་ལྷག་པ་ཉིད་ཡིན་ན།
དེ་ལྟར་ཡང་དེ་དག་ཐམས་ཅད་སངས་རྒྱས་བཅོམ་ལྡན་འདས་ལ་དབུལ་བར་བྱའོ། །གལ་ཏེ་མུ་ཏིག་རྣམས་ལས་གཞན་པའི་རིན་པོ་ཆེ་མེད་ན་དེ་བཞིན་དུ་སྐྱིན་པ་མེད་ཀྱང་བླ་སྟེ། ཇི་སྲིད་དུ་སངས་རྒྱས་ཉག་གཅིག་ལ་དབུལ་བར་བགྱིའོ། །ཚོན་རྩི་ཆེན་པོ་རྣམས་ཀྱང་ངོ་ཞེས་བྱ་བ་ནི། གང་གུས་དང་མཚལ་དང་
མཐིང་ཤུན་དང་ལ་སོགས་པ་ཡང་སངས་རྒྱས་ལ་དབུལ་ལོ་ཞེས་བྱ་བའི་རྗེས་སྙེགས་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །དེ་དག་ནི་བཏགས་ཏེ་དྲི་གཙང་ཁང་གི་ཞལ་ཞལ་དུ་བྱའོ་ཞེས་བྱ་བ་ལ་དེ་དག་ཅེས་བྱ་བ་ལ་དེ་དག་ནི་མུ་ཏིག་རྣམས་སོ། །དེ་མ་ཡིན་པ་སངས་རྒྱས་ཀྱི་ནི་སྐུ་གཟུགས་དང་། དྲི་གཙང་ཁང་དང་མཆོད་
རྟེན་གྱི་ཡོ་བྱད་དུ་བྱའོ་ཞེས་བྱ་བ་ལ། དེ་མ་ཡིན་པ་ཞེས་བྱ་བ་ནི་མུ་ཏིག་དེ་ལས་གཞན་པ་རྣམས་སོ། །ཆོས་ཀྱི་ནི་སངས་རྒྱས་ཀྱི་བཀའ་ཞེས་བྲི་བ་དང་སེང་གེའི་ཁྲི་དག་གིའོ་ཞེས་བྱ་བ་ནི་ཡོ་བྱད་དུ་ངོ་ཞེས་བྱ་བར་སྦྱར་ཏེ་དབུལ་བའོ། །ཐེག་པ་ནི་སྐུ་གཟུགས་ལའོ་ཞེས་བྱ་བ་ནི། རྒྱལ་མཚན་དེའི་སྲོག་ཤིང་
དག་ནི་རྒྱལ་མཚན་གྱི་དོན་དུའོ་ཞེས་བྱ་བ་ནི། རྒྱལ་མཚན་གྱི་དོན་དུ་དབུལ་ལོ། །དེ་རུང་བའི་སྲོག་ཤིང་རྣམས་ཀྱང་ངོ་ཞེས་བྱ་བ་ནི། སྐུ་གཟུགས་ལ་དབུལ་ལོ་ཞེས་བྱ་བའི་རྗེས་སྙེགས་པའི་ཕྱིར། ཀྱང་ངོ་ཞེས་བྱ་བའི་སྒྲ་སྨོས་སོ། །གཞན་དག་དང་མཚོན་ཆ་རྣམས་ནི་དགེ་འདུན་ལའོ་ཞེས་བྱ་བ་ནི་དབུལ་ལོ་
ཞེས་སྦྱར་བར་བྱའོ། །གཞན་དག་དང་ཞེས་བྱ་བ་ནི། རྒྱལ་མཚན་གྱི་སྲོག་ཤིང་དུ་རུང་བ་ལས། འདི་ལྟ་སྟེ་ཐུང་ངུ་དག་ལའོ། །དེ་དག་ནི་ཁར་གསིལ་གྱི་ཡུ་བ་དང་ཁབ་དང་གྲི་གུར་བྱས་ཏེ་བྲིམ་མོ་ཞེས་བྱ་བ་ལ། དེ་བདག་ཅེས་བྱ་བ་ནི་སྲོག་ཤིང་ལ་སོགས་པ་རྣམས་སོ། །ཇི་ལྟར་རིགས་པ་དེ་རྣམས་ནི་ཡོ་བྱད་དུ་བྱ་
བར་རིག་པར་བྱའོ། །སྲོག་ཤིང་གཞན་དེ་དག་ནི་ཁར་གསིལ་གྱི་ཡུ་བར་བྱའོ། །མཚོན་ཆ་རྣམས་ནི་ཁབ་དང་གྲི་གུར་བྱས་ཏེ་དགེ་འདུན་ལ་བྲིམ་མོ། །དགེ་འདུན་གྱི་གཞན་རྣམས་ནི་གཞག་པ་དང་བགོ་བ་དང་བཟའ་བ་དག་ཏུ་ཅི་རིགས་པར་བྱའོ་ཞེས་བྱ་བ་ལ། གཞན་ནི་ཞེས་བྱ་བ་ནི་སྲོག་ཤིང་ལ་སོགས་པ་སྨོས་པའི་ཡོ་བྱད་

ཀྱིས་སོ། །ཞིང་དང་ཁང་ཁྱིམ་དང་ཚོང་ཁང་དང་། གནས་མལ་དང་མགར་སྤྱད་དང་། གསེར་མགར་གྱི་ལག་ཆ་དང་། འདྲེག་མཁན་གྱི་ལག་ཆ་དང་། རྫ་མཁན་གྱི་ལག་ཆ་དང་། ཤིང་མཁན་གྱི་ལག་ཆ་དང་། བསིལ་ཡབ་མཁན་གྱི་ལག་ཆ་དང་། བྲན་དང་བྲན་མོ་དང་། ལས་བྱེད་པ་
དང་ཞོ་ཤས་འཚོ་བ་དང་། བ་གླང་དང་མ་ཧེ་དང་། ར་དང་ལུག་དང་སྨན་དང་། སངས་རྒྱས་ཀྱི་བསྟན་བཅོས་ཀྱི་གླེགས་བམ་དང་། མྱུར་དུ་མི་གྲུབ་པའི་དམ་རྒྱ་དག་ནི། དང་པོར་འོས་པ་ཉིད་ཡིན་ནོ་ཞེས་བྱ་བ་ལ་མྱུར་དུ་མི་གྲུབ་པའི་ཞེས་བྱ་བ་ནི། བྲི་བར་བྱ་བ་གང་ཡིན་པ་དང་། གང་དུ་བྲི་བར་བྱ་བ་མྱུར་དུ་འགྲུབ་པར་མི་
ནུས་པའོ། །དང་པོར་འོས་པ་ཉིད་ཡིན་ནོ་ཞེས་བྱ་བ་ནི་གཞག་པར་འོས་པ་ཡིན་ནོ། །རས་དང་རས་ཡུག་ཆེན་པོ་དང་བེའུ་རས་དང་། མཆིལ་ལྷམ་དང་། ལྷམ་སྒྲོག་གུ་ཅན་དང་། འབྲུ་མར་དང་འབྲུ་མར་གྱི་སྣོད་དང་། བྱ་མ་བུམ་དང་རིལ་བ་སྤྱི་བླུགས་དང་། གླེགས་བམ་གཞན་དང་དམ་རྒྱ་གཞན་དང་། ཚོན་རྩི་
གཞན་དག་ནི་གཉིས་པར་འོས་པ་ཡིན་ནོ་ཞེས་བྱ་བ་ལ། བྱ་མ་བུམ་ཞེས་བྱ་བ་ནི་རྫ་མཁན་གྱི་སྣོད་དམིགས་ཀྱིས་བསལ་བའོ། །གཞན་དང་ཞེས་བྱ་བ་ལ། གཞན་གྱི་སྒྲས་ནི་གླེགས་བམ་ལ་སོགས་པ་གསུམ་པོ་རྣམས་དང་འབྲེལ་པའོ། །སངས་རྒྱས་ཀྱི་བསྟན་བཅོས་ཀྱི་གླེགས་བམ་མྱུར་བར་འབྲི་བ་མ་
ཡིན་པ་ཚོན་ཆེན་པོ་རྣམས་ལས་གླེགས་བམ་ལ་སོགས་པ། གཞན་རྣམས་ནི་ཕྱི་རོལ་པའི་བསྟན་བཅོས་ཀྱི་གླེགས་བམ་མོ། །མྱུར་བར་བསྒྲུབ་པར་བྱ་སྟེ། མྱུར་བར་འབྲི་བར་ཁར་གསིལ་གྱི་ཡུ་བ་དང་། བཙག་དང་རམས་ལ་སོགས་པ་ཚོན་ཆེན་པོ་རྣམས་ལས་ངེས་པར་གྲོལ་པའི་ཁ་དོག་ཅེས་བྱ་བ་ནི་འདི་རྣམས་
ཀྱིས་ཁ་དོག་གི་སྒྲ་འདི་བསྡུས་པར་བྱས་ཀྱི། ཚོན་རྩི་དང་ཁར་གསིལ་གྱི་ཡན་ལག་ཏུ་གྱུར་པ་ཁ་དོག་བྱེད་པ་ལ་བསྡུ་བའི་དོན་དུ་ནི་མ་ཡིན་ནོ། །གཉིས་པར་ཞེས་བྱ་བ་ནི་གོ་བར་འོས་པ་ཉིད་དུའོ། །འབྲས་དང་ཏིལ་དང་ནས་དང་མོན་སྲན་སྡེའུ་དང་མོན་སྲན་གྲེའུ་དང་། འབྲུ་གཞན་དང་བཟའ་བ་དང་བཏུང་བ་དག་ནི་གསུམ་
པར་འོས་པ་ཉིད་ཡིན་ནོ་ཞེས་བྱ་བ་ལ། གསུམ་པར་ཞེས་བྱ་བ་བཟའ་བར་འོས་པ་ཉིད་དོ། །གཞིར་གཏོགས་པའི་གོས་ཀྱི་གཞིའོ། །གླེགས་བུ་དང་གླེགས་བུ་ཕྱེད་པ་དག་མཉམ་པར་བྱའོ་ཞེས་བྱ་བ་ནི་ཡང་འདིར་གླེགས་བུ་རྣམས་ཀྱང་སོ་སོ་མཉམ་པ་ཉིད་དང་། གླེགས་བུ་ཕྱེད་རྣམས་ཀྱང་ལོགས་ཤིག་ཏུ་

མཉམ་པ་ཉིད་ཅེས་བྱ་བ་རྟོགས་པར་བྱའོ། །གླེགས་བུ་ཡང་གླེགས་བུ་ཕྱེད་རྣམས་དང་ལྷན་ཅིག་ཚད་མཉམ་པར་བྱ་ཞེས་བྱ་བའི་དོན་ཏོ། །མཉམ་པ་འདི་ནི་མཛེས་པ་ཉིད་དུ་བྱ་བའི་ཕྱིར་རོ། །གཞལ་བའི་ཕྱིར་དེའི་ཚད་ཀྱི་ཆག་ཤིང་བཅང་བར་བྱའོ་ཞེས་བྱ་བ་ནི། དེའི་ཚད་ཀྱི་ཞེས་བྱ་བ་ནི། གླེགས་བུ་དང་གླེགས་
བུ་ཕྱེད་ཀྱི་ཚད་ལ་དོན་གྱི་དབང་གིས་འཆང་བ་འདིའོ། །དེ་ལྟར་ཡང་གཞལ་བར་བྱ་བའི་ཕྱིར་ཞེས་བྱ་བ་སྨོས་ཏེ། དེ་བས་ན་འདི་རྗེས་སུ་གནང་བ་སྟེ། ངེས་པ་ནི་མ་ཡིན་ནོ། །གཅིག་གིས་དགོས་པའི་དོན་འགྲུབ་པར་འགྱུར་ན་དེ་ཙམ་འཆང་བ་ལ་ཉེས་བྱས་ཉིད་ནི་མ་ཡིན་ནོ། །དེ་ལྟར་ཡང་གཞན་ལས་ཆག་ཤིང་
ཁོ་ན་བཅང་བར་བྱའོ་ཞེས་གསུངས་ཏེ། བཅོམ་ལྡན་འདས་ཀྱིས་བཀའ་སྩལ་པ། ཆག་ཤིང་བྱ་ཞིང་དེའི་ཚད་ཀྱི་གླེགས་བུ་བྱའོ། །གླེགས་བུའི་ཚད་ཀྱི་གླེགས་བུ་ཕྱེད་བཅང་བར་བྱའོ་ཞེས་གསུངས་པ་ཡིན་ནོ། །གང་ཞིག་འདིར་ཆག་ཤིང་གི་སྒྲ་ལས་དོན་ཐ་དད་པར་ཞེས་བྱ་བ་མ་ཡིན་ནོ། །གང་གི་ཕྱིར་
འདིར་སྲོག་ཤིང་ནི་ཆག་ཤིང་དུ་གྱུར་པ་ཉིད་དུ་གསུངས་པ་རྣམ་པར་གནས་པ་ཡིན་ནོ། །གང་དུ་གདོང་གི་ཆག་ཤིང་ལས་འདི་ལ་ཤིན་ཏུ་ཆེ་བ་ཉིད་བསྟན་པའི་དོན་དུ་ཆག་ཤིང་གི་སྒྲའོ། །ཚལ་བུ་དག་ཀྱང་ངོ་ཞེས་བྱ་བ་ནི་མཉམ་པ་ཉིད་དུ་བྱའོ། །དེའི་ཚད་ཀྱི་ཆག་ཤིང་བཅང་བར་བྱའོ་ཞེས་བྱ་བ་ནི། གཞག་
པའི་ཕྱིར་ཚལ་བུའི་ཚད་ཀྱི་ཆག་ཤིང་བཅང་བར་བྱའོ་ཞེས་བྱ་བའི་དོན་ཏོ། །དེའི་ཚད་ནི་སོར་བཞིའོ་ཞེས་བྱ་བ་ལ་དེ་ལ་ཞེས་བྱ་བ་ནི་ཚལ་བུ་ལའོ། །བྱ་རོག་གི་མཐོ་གང་ངོ་ཞེས་བྱ་བ་ནི། མཐེ་བོའི་ལོགས་སུ་སོར་མོ་གང་ཡིན་པ་དེའི་དབུས་ཀྱི་ཚིགས་ཀྱི་ལོགས་སྟེངས་སུ་མཐེ་བོའི་ཚིགས་སུ་གཏད་དེ། གང་ཞིག་
སོར་བཅུ་གཉིས་པར་གྱུར་པ་ཡིན་པ་དེ་ནི་བྱ་རོག་གི་མཐོ་གང་དང་འདྲ་བར་བརྗོད་པའོ། །འདིའི་ཚད་ནི་སོར་བཞི་ཁོ་ན་སྟེ། དེ་བས་ན་དེ་ཉིད་ལ་དེ་རྣམ་པ་གཞན་གྱིས་བསྟན་པའོ། །ཆུང་ཚད་ནི་སོར་གཉིས་སམ་ཕྱེད་དང་གསུམ་མམ་མཐེབ་སོར་གཅིག་གོ་ཞེས་བྱ་བ་ནི། སོར་གཉིས་ནི་ཐོབ་པའོ། །གང་གི་ཕྱིར་
ཆུང་བ་ནི་སོར་བཞི་པ་དང་། ཆུང་ཚད་ནི་སོར་ཕྱེད་དང་གསུམ་མོ། །དེའི་བར་ནི་འབྲིང་ཚད་དུ་སྟེ་དེའི་བར་ནི་འབྲིང་དུའོ་ཞེས་འབྱུང་ངོ་། །གཞུང་ཁ་ཅིག་ལས་ནི་ཆེ་ཚད་ནི་སོར་བཞི་འམ། བྱ་རོག་གི་མཐོ་གང་ངོ་། །ཆུང་ཚད་ནི་སོར་གཉིས་སམ་མཐེབ་སོར་གཅིག་གོ། །དེའི་བར་ནི་འབྲིང་ཚད་དོ་ཞེས་གསུངས་

པ་ཡིན་ནོ། །སུ་ཞིག་སྦྱོར་བ་ལ་ཐམས་ཅད་སྦྱོར་བར་འགྱུར་བ་ཞེས་བྱ་བ་བསྡུས་ཏེ་ཉེ་བར་བཏགས་པ་འདི་བྱས་སོ། །ས་ལ་ཆོས་གོས་གདིང་བར་མི་བྱའོ། །དེའི་དོན་དུ་གཏན་པ་བྱའོ། །ཤིང་ལས་བྱས་པའམ་སྨྱིག་མ་ལས་བྱས་པ་གྲུ་བཞི་པ་རྟོད་པའི་ཕྱིར་ཐི་གུ་གཞུག་པའི་བུ་ག་བཏོད་པ་ནི་
དེ་ཞེས་བྱ་བ་ནི་ཐང་བཅད་ཅིང་བཅིང་བའི་ཕྱིར་ཐ་གུ་གང་ཡིན་པ་དེ་རྟོད་པའི་བུ་ག་བཏོད་པར་གྱུར་པ་དེ་ནི་གཏན་པ་ཞེས་བྱ་བའི་དོན་ཏོ། །ཆོས་གོས་ཇི་ཙམ་པར་རོ་ཞེས་བྱ་བ་ནི་ཆོས་གོས་དང་འཚམས་པའི་ཚད་བྱའོ་ཞེས་བྱ་བའི་དོན་ཏོ། །ཆོས་གོས་ཚད་ཐ་དད་པ་དུ་མ་ཡོད་པས་གཏན་པ་ཡང་དོན་གྱིས་འཇུག་པའི་ཕྱིར་
ཞེས་བྱ་བ་ནས་སོ། །ཡུ་བ་རྩི་ཅན་དང་ཁྲ་བོ་མི་བཅང་ངོ་ཞེས་དུ་མ་བྱ་དགོས་པར་རིག་པར་བྱའོ། །གྲི་གུས་དྲའོ། །དེ་བཅང་བར་བྱའོ་ཞེས་བྱ་བ་ལ། དེ་ཞེས་བྱ་བ་ནི་གྲི་གུ་དེའོ། །བྱ་རོག་གི་མཆུ་ལྟ་བུ་དང་། བྱ་གག་གི་གཤོག་པ་ལྟ་བུར་རོ། །ལྕགས་ལས་བྱས་པ་ལས་གཞན་མ་ཡིན་ནོ་ཞེས་བྱ་བ་ནི། ལྕགས་
ཀྱི་རང་བཞིན་ཁོ་ན་ལས་བྱ་ཞེས་བྱ་བའི་དོན་ཏོ། །དོན་གྱིས་འཇུག་པའི་ཕྱིར་ཞེས་བྱ་བ་བྱས་ནས་སོ། །ཡུ་བ་རྩི་ཅན་དང་ཁྲ་བོ་མི་བཅང་ངོ་ཞེས་བྱ་བ་ནི། ཡུ་བ་མི་བཅང་ངོ་ཞེས་བྱ་བའི་ཚིག་གི་ལྷག་མའོ། །སོར་དྲུག་གི་ཚད་ལས་ལྷག་པ་མི་བཅང་ངོ་ཞེས་བྱ་བ་ལ། འདིར་གཞུང་ནི། གྲི་གུ་ནི་གསུམ་སྟེ། ཆེན་པོ་དང་
འབྲིང་དང་ཆུང་ངུའོ། །ཆེན་པོ་ནི་སོར་དྲུག་གོ། །ཆུང་ངུ་ནི་སོར་བཞིའོ། །དེའི་བར་ནི་འབྲིང་ངོ་ཞེས་གསུངས་པ་ཡིན་ནོ། །དེ་ལས་མང་བ་ཉིད་ནི་སྤང་བར་རིག་པ་ཡིན་ཏེ། དེ་ལས་ཆུང་བ་ཉིད་ཀྱིས་ནི་དགོས་པ་མི་འགྲུབ་པར་བརྗོད་པ་ཞེས་བྱ་བ་འདིར་དེའི་བསྡུས་པ་ཉིད་ཤེས་ནས་དེ་ལྟར་སྨོས་སོ། །ཁ་ཅིག་ལས་ནི་བརྒྱད་
ལས་མི་བཅང་ངོ་ཞེས་བྱ་བ་ནི་འདོན་པའི་རྣམ་པར་རྟོག་པ་ལས་འདི་ཉེ་བར་བཏགས་པ་སྟེ། འདིར་གཞུང་ཁ་ཅིག་ལས་ནི། གྲི་གུ་སོར་བརྒྱད་ཀྱི་ཚད་ལས་ལྷག་པ་མི་བཅང་ངོ་ཞེས་འབྱུང་ངོ་། །འདིར་གཞུང་ནི་ཆེན་པོ་ནི་སོར་བརྒྱད་དོ་ཞེས་གསུངས་པ་ཡིན་ནོ། །ཤིང་བུ་ཐུང་བ་ཉིད་ལ་དེ་ཡོད་པར་གྱུར་ནའོ། །དེ་ལྟ་
བས་ན་མི་རིགས་པར་གྱུར་པ་འདི་ཞེས་བྱ་བ་མཐོང་བ་ཡིན་ནོ། །སོར་བཞི་བས་ཐུང་བ་ནི་དགོས་པ་མེད་དོ་ཞེས་བྱ་བ་ནི། མ་ལུས་པ་མ་ཡིན་པ་དགོས་པ་ལ་དགོངས་ནས་དགོས་པ་མེད་པ་ཉིད་བསྟན་པར་བྱ་སྟེ། དགོས་པ་ཙམ་ནི་མ་ཡིན་ནོ། །གང་གི་ཕྱིར་དེ་ལས་རྣམ་པ་ཐམས་ཅད་དུ་དགོས་པ་མི་འགྲུབ་པ་ནི་མ་ཡིན་

ནོ། ལྕི་བའི་བྱུག་པས་བསྐུས་པར་བཙེམ་མོ་ཞེས་བྱ་བ་ནི་དངོས་པོའམ་རྒྱུད་པས་བཙེམ་པར་བྱ་བའི་ཆོས་གོས་ལ་གནས་གང་ཡིན་པ་དེ་ལ་རྡུལ་ལྡང་བ་མེད་པར་བྱ་བའི་ཕྱིར་ལྕི་བའི་བྱུག་པས་བསྐུ་བར་བྱའོ། །ལྕི་བ་མེད་ན་ཆག་ཆག་གདབ་ཅིང་ཕྱགས་པར་རོ། །དེ་བཙེམ་པར་བྱའོ་ཞེས་བྱ་བ་ལ་དེ་ཞེས་བྱ་
བ་ནི་ཆོས་གོས་སོ། །འདིར་གཞུང་ནི། དགེ་སློང་དག་བྱ་གག་གི་གཤོག་ཤིང་ངམ། སྨྱིག་མའི་ཚལ་བུ་གང་ཡིན་པས་ཆོས་གོས་དག་འཚེམ་པར་བྱའོ་ཞེས་གསུངས་པས་དེའི་ཕྱིར་མདོ་འདི་བྱས་པའོ། །ཁབ་ཀྱིས་ཀྱང་ངོ་ཞེས་བྱ་བ་ལ་ཀྱང་ངོ་ཞེས་བྱ་བའི་སྒྲས་ནི་བྱ་གག་གི་གཤོག་ཤིང་དང་སྨྱིག་མའི་ཚལ་
བུ་འབའ་ཞིག་ཏུ་མ་ཟད་ཀྱི་ཁབ་ཀྱིས་ཀྱང་བཙེམ་དུ་རུང་བའོ། །བྱ་གག་གི་གཤོག་ཤིང་ལ་སོགས་པ་ལས་དེ་དང་མཐུན་པ་སྟེ་ཁབ་ཀྱིས་ནི་མ་ཡིན་ཏེ། ཁབ་ཀྱིས་འཚེམ་པའི་རྣམ་པ་སྟེ། འདིས་འཚེམ་པར་བྱེད་པའི་བཤད་པ་ཞེས་ཏེ་ཤེས་པར་མི་བྱའོ་ཞེས་བྱ་བའི་དོན་ཏོ། །དྲ་བའི་གཞུང་ནི་དགེ་སློང་དག་ལག་
པ་དག་གིས་དྲལ་བར་བྱེད་པ་ན་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གྲི་གུས་དྲ་བར་བྱའོ་ཞེས་བྱ་བ་ཡིན་ནོ། །ཁབ་ཀྱི་གཞུང་ནི་དགེ་སློང་དག་བྱ་གག་གི་གཤོག་ཤིང་དང་། སྨྱིག་མའི་ཚལ་བུས་ཆོས་གོས་དག་འཚེམ་པ་ན། བཅོམ་ལྡན་འདས་ཀྱིས་བཀའ་སྩལ་པ། ཁབ་བཅང་
བར་བྱའོ་ཞེས་གསུངས་པ་ཡིན་ནོ། །དེ་ལ་དྲ་བ་ཉམས་པའི་སྐྱོན་ལ་བརྟེན་ནས་ངེས་པར་ཤེས་པའོ། །ཁབ་ཀྱི་ཉེས་པ་ལ་མངོན་པར་མ་བརྟེན་པས་འཕགས་པ་བ་ཀུ་ལ་ལ་གླེང་གཞིའི་རྒྱུ་ལས་མི་ལྡོག་པར་རྗེས་སུ་གནང་ངོ་། །དེ་བཅང་བར་བྱའོ་ཞེས་བྱ་བ་ནི་ཁབ་དེའོ། །ར་གན་དང་ཟངས་དང་ཁར་བ་དང་
ལྕགས་ལས་བྱས་པ་ལས་གཞན་པ་མི་བཅང་ངོ་། །ཁ་ཅིག་ལས་ཟངས་དང་ལྕགས་རྣོ་བ་དག་ལས་བྱས་པའི་ཞེས་སོ་ཞེས་བྱ་བ་ནི། འདིར་མ་མོའི་གཞུང་ཁ་ཅིག་ལས་ཁབ་རྣོ་བཟངས་དང་རྣོ་ལྕགས་ལས་བྱས་པ་བཅང་ངོ་ཞེས་འབྱུང་སྟེ། རྣོ་བ་ཞེས་བྱ་བ་ནི་དེ་གཉིས་ཀྱི་རིགས་ཀྱི་བདག་ཉིད་གཞན་ཞིག་
ཡོད་དེ་ཞེས་གསུངས་པ་ཡིན་ནོ། །དེའི་ཁབ་རལ་སྤུ་གུའམ་ཆང་པ་ལྟ་བུ་བཅང་བར་བྱའོ། །དེ་ངོ་ཚ་མེད་པ་དང་དགེ་ཚུལ་དག་ལ་རག་ལས་པར་མི་བྱའོ་ཞེས་བྱ་བ་ལ་དེ་ཞེས་བྱ་བ་ནི་ཁབ་རལ་དེ་དེའི་ནི་མ་མོ་དག་ལས་སོ། །མི་ཤེས་པ་དང་མི་དྲན་པ་དང་། རང་བཞིན་དུ་གནས་པ་མ་ཡིན་པ་དག་ལ་ཡང་ཞེས་བྱ་

བ་ནི། རག་ལས་པར་མི་བྱའོ་ཞེས་བྱ་བ་ནི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ཁབ་དང་གྲི་གུ་དག་བཙས་མི་ཟོས་པར་བྱ་བའི་ཕྱིར་སྤྲ་ཚིལ་གྱིས་བསྐུས་པའི་རས་མར་གཞུག་པར་བྱའོ་ཞེས་བྱ་བ་ལ། འདིར་གཞུང་ནི། དགེ་སློང་རྣམས་ཀྱི་ཁབ་བཙས་ཟོས་པ་དང་།
བཅོམ་ལྡན་འདས་ཀྱིས་བཀའ་སྩལ་པ། རས་མལ་སྤྲ་ཚིལ་གྱིས་བསྐུ་བར་བྱ་ཞིང་དེར་ཁབ་དཀྲིས་ཏེ་གཞག་པར་བྱའོ་ཞེས་གསུངས་པ་དང་། གཞུང་གཞན་དག་ལས། ཁབ་དང་མཚོན་གཞག་པར་བྱའོ་ཞེས་གསུངས་པ་ཡིན་ཏེ། དེ་བས་ན་འདིར་མཚོན་གྱི་སྒྲ་སྨོས་སོ། །མི་འབྱིལ་བར་བྱ་བའི་ཕྱིར་
ཆོས་གོས་ལ་སྒྲོག་རྟེན་བྱས་ཏེ་སྒྲོག་གཟུངས་གདགས་སོ་ཞེས་བྱ་བ་ནི། མི་འབྱིལ་བར་བྱ་བའི་ཕྱིར་ཞེས་བྱ་བ་ནི། ཆོས་གོས་གྱོན་པ་ལུས་ལས་མི་འབྱིལ་བར་བྱ་བའི་ཕྱིར་རོ། །སྒྲོག་གུ་ཡང་ཞེས་བྱ་བ་ནི་མི་འབྱིལ་བར་བྱ་བའི་ཕྱིར་ཆོས་གོས་ལ་སྒྲོག་རྟེན་བྱས་པ་ལ་དེ་གདགས་པའོ། །གཙོ་བླག་མཁན་ལ་
གོས་ཁ་བསྒྱུར་བ་དང་ཁ་མ་བསྒྱུར་བ་འཁྲུར་གཞུག་པར་མི་བྱའོ་ཞེས་བྱ་བ་ལ། འདིར་གཞུང་ནི། དྲུག་སྡེ་དག་གཙོ་བླག་མཁན་དག་ལ་གོས་དག་འཁྲུར་འཇུག་པ་ནི། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གི་གོས་ངུར་སྨྲིག་དག་བཙོ་བླག་མཁན་དག་ལ་འཁྲུར་མི་འཇུག་པར་གཞོང་པ་འཇམ་པོར་
རང་གིས་བཀྲུ་བར་བྱའོ་ཞེས་གསུངས་པ་དང་། དྲུག་སྡེ་དག་གོས་དཀར་པོ་དག་བཙོ་བླག་མཁན་དག་ལ་འཁྲུར་འཇུག་པ་ན། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་ཐམས་ཅད་ནས་ཐམས་ཅད་དུ་བཙོ་བླག་མཁན་ལ་གོས་འཁྲུར་མི་འཇུག་གོ་ཞེས་གསུངས་པ་ཡིན་ནོ། །དེ་དང་
འདྲ་པར་རང་གིས་མི་བྱའོ་ཞེས་བྱ་བ་ནི། བཙོ་བླག་མཁན་དེ་དང་འདྲ་བར་མི་བྱའོ། །དེའི་ངོགས་སུ་མི་བྱའོ་ཞེས་བྱ་བ་ལ། དེའི་ཞེས་བྱ་བ་ནི་བཙོ་བླག་མཁན་དེའོ། །ཤིང་གི་ངོས་ལ་མི་བྱའོ་ཞེས་བྱ་བ་ནི། གོས་བཀྲུ་བར་མི་བྱའོ། །གཞོང་པ་འཇམ་པོར་བཀྲུ་བར་བྱའོ་ཞེས་བྱ་བ་ལ། འདིར་གཞུང་ནི། གཞོང་པ་
འཇམ་པོར་རང་གིས་བཀྲུ་བར་བྱའོ་ཞེས་གསུངས་པ་ཡིན་ནོ། །ཆུ་བདེ་བས་སོ་ཞེས་བྱ་བ་ལ། དེ་ནི་དྲི་མ་འདག་པའི་ཐབས་བསྟན་པའོ། །དེ་བས་ན་ཐབས་གཞན་གྱི་གནས་སུ་དེ་ལ་ནི་བསིལ་བ་ཉིད་ནི་ཧ་ཅང་མི་གྲང་བ་ནི་མ་ཡིན་ནོ། །ལག་པ་གཉིས་ཀྱིས་མཐར་གྱིས་བསྒྱུར་ཞིང་ངོ་ཞེས་བྱ་བ་ནི་བསྒྱུར་ཞིང་བཀྲུ་

བར་བྱའོ། །མི་ནུས་ན་རྐང་པ་གཉིས་ཀྱིས་སོ། །དེ་ལྟར་ཁྱིམ་པས་བཀྲུར་རུང་ངོ་ཞེས་བྱ་བ་ལ། དེ་ལྟར་ཞེས་བྱ་བ་ནི་ཇི་ལྟར་རང་གིས་བཀྲུ་བའི་ཆོ་ག་དེ་བསྟན་པ་དེ་ལྟར་རོ། །དེ་གཞན་དུ་འགྱུར་བར་སྤྱོད་པ་བསྲུང་བར་བྱའོ་ཞེས་བྱ་བ་ནི། ཆོ་ག་ཇི་སྐད་བསྟན་པ་ལས་གཞན་དུ་ཁྱིམ་པ་དེའི་ལོག་པར་སྤྱོད་པ་བསྲུང་བར་བྱའོ། །
འདིར་གཞུང་ནི། གཞན་གྱི་ལག་པ་གཉིས་ཀྱིས་ཀྱང་མི་ནུས་ལ། རྐང་པ་གཉིས་ཀྱིས་ཀྱང་མི་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་ཞལ་ཏ་བྱས་ཏེ་གཞན་གྱིས་བཀྲུ་བར་བྱའོ་ཞེས་གསུངས་པ་ཡིན་ནོ། །མི་ནུས་ན་ཞེས་བྱ་བ་སྨོས་པ་ནི། གླེང་གཞི་ལས་བྱུང་བས་སོ། །དེ་བས་ན་
འདིར་མ་བསྟན་ནོ། །ཕྱག་དར་ཁྲོད་ལེགས་པར་བཀྲུས་པ་དང་། བཙེམས་པ་དང་ཁ་བསྒྱུར་བ་བཅང་བར་བྱའོ་ཞེས་བྱ་བ་ནི་ལེགས་པར་ཞེས་ཀུན་ལ་སྦྱར་བར་བྱས་ཏེ་ལེགས་པར་བཀྲུ་བ་དང་ལེགས་པར་བཙེམ་པ་དང་ལེགས་པར་ཁ་བསྒྱུར་བར་ཞེས་བྱའོ། །དང་བ་བསྐྱེད་པ་མ་ཡིན་པ་ཉིད་བསལ་བའི་དོན་དུ་
འདི་ནི་འདུལ་བྱེད་དག་ལས་འདི་དང་མདོ་འོག་མའོ། །མི་གཙང་བས་གོས་པའི་ཆོས་གོས་མི་བཅང་ངོ་ཞེས་བྱ་བ་ནི། མི་བཅང་ངོ་ཞེས་བྱ་བར་སྦྱར་རོ། །ཚོན་བཟང་བ་ཉིད་དུ་བྱ་བའི་ཕྱིར་གྲིབ་མ་དང་ཉི་མ་འདྲེས་པར་གདུང་ཞིང་བསྐམ་པར་བྱའོ་ཞེས་བྱ་བ་ལ་གཞུང་ནི་རྣམ་པར་འབྱེད་པ་ཁ་ཅིག་དང་སྟན་གྱི་བསླབ་པའི་
གཞི་ལས་པིབ་པ་ལའི་ཚོན་བླངས་ཏེ། ཆམ་ཆོམ་བརྡུང་བར་བྱ་ཞིང་བསྐམས་ཏེ་བསྐོལ་བར་བྱའོ་ཞེས་གསུངས་པ་ཡིན་ནོ། །གཞན་དུ་བྱས་ན་ཚོན་ཉམས་པར་འགྱུར་ཏེ། དེ་ལྟར་བྱས་ན་འདི་གདུང་བར་བྱའོ། །དེའི་ཕྱིར་འདིར་པིབ་པ་ལ་ཞེས་སྨོས་པ་ནི་ཚོན་གཞན་གྱི་དཔེ་ཡིན་ཏེ་དེ་བས་ན་བྱེ་བྲག་མེད་པར་སྨོས་སོ། །གོས་
དག་མེད་པར་བསྐོལ་ལོ་ཞེས་བྱ་བ་ནི། ཚོན་ཡིན་ཏེ་ཆོས་གོས་དང་བཅས་པར་ནི་མ་ཡིན་ཞེས་བྱ་བའི་དོན་ཏོ། །བྱེ་བྲག་གསུམ་ཡན་ཆད་དུའོ་ཞེས་བྱ་བར་སྦྱར་རོ། །གང་གི་ཕྱིར། དེ་ལྟར་མང་བ་ཉིད་དུ་འདོད་པ་ཉིད་ཡིན་ན་ལན་གསུམ་དུ་བྱའོ། །ཕྱི་མ་ཆེས་ངན་པ་ཉིད་དོ་ཞེས་བྱ་བ་ནི་དང་པོ་བསྐོལ་བ་བས་ཕྱིས་
བསྐོལ་བ་ཤོས་སོ། །དེའི་ཕྱིར་ཐ་དད་པར་གཞག་གོ་ཞེས་བྱ་བ་ནི་བསྐོལ་བ་རྣམས་གཞག་པའོ། །འདི་ནི་དང་པོའི་ཞེས་བྱ་བ་ལ་སོགས་པའི་ཡི་གེ་བྲི་བའོ། །སྔར་དང་པོ་དང་སྦྱར་རོ་ཞེས་བྱ་བ་ནི་ཚོན་ནོ། །གོས་ཀུན་ནས་བསུབས་པ་ལའོ་ཞེས་བྱ་བ་ནི། ཚོན་ལེགས་པར་འཛིན་པ་ཉིད་དུ་བྱ་བའི་ཕྱིར་ཚོན་གྱིས་བསྒོ་

བའོ། །ཚོན་གྱིས་ཀུན་ནས་བསུབས་པའི་གོས་དེ་ལ་ཚོན་དང་སྦྱར་བར་བྱའོ། །དེ་བས་ན་དེ་ལས་ཐུན་ཇི་ཙམ་རན་པར་བཅུག་ཅིང་གཞོང་པར་བླུགས་སོ། །གཤེར་ཆེས་ན་འཇག་ལ་སྐམ་ཆེས་ན་འདྲིས་པར་འགྱུར་བས་དེའི་ཕྱིར་རན་པར་རོ་ཞེས་བྱ་བ་ནི་བླུགས་པའོ། །གཟར་ཐག་
ཐང་བཅད་ཉིད་ལ་བསྐམས་ན་བཟང་ངོ་ཞེས་བྱ་བ་ནི་གཟར་ཐག་ཐང་བཅད་ཅིང་བརྒྱངས་པ་ལ་བསྐམས་ན་བཟང་བའོ། །ཇི་ལྟར་ཞེ་ན། དེའི་ཕྱིར་མཐའ་དབྱར་བས་སོ་ཞེས་བྱ་བ་སྨོས་སོ། །ཇི་ལྟར་མཐའ་དབྱར་བར་བྱ་ཞེ་ན། དེའི་ཕྱིར་དབང་བུ་དག་གིས་སོ། །གཟུང་དཀའ་བ་རྣམས་ནི་རྩྭ་བཏིང་བར་རོ་ཞེས་བྱ་བ་ནི།
སྐམ་སར་རོ། །ཚོན་ཕྱོགས་གཅིག་ཏུ་མི་འཚིགས་པར་བྱ་བའི་ཕྱིར་ཡང་དང་ཡང་བསྒྱུར་བར་བྱའོ་ཞེས་བྱ་བ་ནི། ཚོན་ཕྱོགས་གཅིག་ཏུ་སོང་བར་མ་གྱུར་ཅིག་སྙམ་དུ་འདི་ཡང་ནས་ཡང་དུ་བསྒྱུར་བཟློག་བྱའོ། །ཚོན་སར་པ་ནི་སར་པ་དག་ལ་བླུགས་ན་བཟང་ངོ་ཞེས་བྱ་བ་ནི། ཚོན་སར་པ་ནི་སར་པ་དག་ལ་བླུགས་
ན་བཟང་ངོ་། །རྙིང་པ་ནི་རྙིང་པ་དག་ལའོ། །སར་པ་རྣམས་ནི་ཉི་མ་ལ་བསྐམས་ནའོ། །རྙིང་པ་རྣམས་ནི་གྲིབ་མ་ལའོ། །མི་འདྲིས་པར་བྱ་བའི་ཕྱིར་ཉི་མ་གཞན་ལ་ཆུའི་ཐུན་བླུགས་སོ། །བང་རིམ་དང་འཆག་སར་ཚོན་གྱི་ལས་མི་བྱའོ། །གཙུག་ལག་ཁང་དུ་མི་བྱའོ། །དེའི་སྟེང་དུ་མི་བྱའོ་ཞེས་བྱ་བ་
ལ། དེ་ཞེས་བྱ་བ་ནི་གཙུག་ལག་ཁང་གི་སྟེང་དུའོ། །ཚོན་གྱི་ལས་དེ་བྱེད་པ་དེ་ནི་དེའི་གནས་ཡིན་གྱིས་བང་རིམ་ལ་སོགས་པ་ནི་མ་ཡིན་ནོ། །འཐོར་འཐུང་བྱ་བའི་ཉེན་ཀོར་དུ་མི་བྱའོ་ཞེས་བྱ་བ་ནི་ཚོན་གྱི་ལས་མི་བྱའོ། །ཕྱོགས་དེར་ཞལ་ཞལ་བྱའོ། །གལ་ཏེ་རྡོ་ཐལ་གྱིས་བྱུགས་པ་ཡིན་ན་བཀྲུའོ། །གལ་ཏེ་བརྩམས་
པ་ན་རླུང་དང་ཆར་འོང་ན་ཁྱམས་སུ་བྱའོ། །བྱས་ཟིན་ནས་ཕྱོགས་དེར་ལྕི་བའམ་སས་བྱུག་པར་བྱའོ་ཞེས་བྱ་བ་ནི་བྱས་ཟིན་ནས་ཞེས་བྱ་བ་ནི་ཚོན་གྱི་ལས་སོ། །བཅག་པ་དང་བརྡབས་པས་རུང་བར་མ་གྱུར་པ་སྤྱད་པ་བསྟེན་པར་མི་བྱའོ་ཞེས་བྱ་བ་ནི་གོས་བཅག་པ་དང་། བརྡབས་པས་རུང་བར་མ་གྱུར་ཅིང་མ་གྲུབ་པ་
དང་འདྲ་བ་མ་གྲུབ་པའི་གོས་བསྟེན་པར་མི་བྱའོ། །ཡང་འདིར་རུང་བ་གང་ཡིན་པ་གང་དུ་བསྟེན་པར་མི་བྱ་ཞེ་ན། དེའི་ཕྱིར་འདི་ལ་འཚེར་བ་ཉམས་པ་ནི་རུང་བ་ཡིན་ནོ། །ཆུས་བརླན་པ་ཉིད་ནའོ། །ཟིལ་པས་བརླན་ནས་ལག་པས་མཉེ་བས་ཉམས་པར་བྱ་བ་ལའོ། །ཤམ་ཐབས་བགོས་པའི་སྟེང་དུ་སྐ་རགས་

བཅིང་ངོ་ཞེས་བྱ་བ་ནི་ཤམ་ཐབས་བགོས་པའི་སྟེང་དུ་སྐ་རགས་བཅིང་བར་བྱའོ། །ཅི་ཞིག་བཅིང་བར་བྱ་ཞེ་ན། དེའི་ཕྱིར་ཤུར་བུའམ་ལྕག་པོད་དམ། རྒྱ་ཅང་ངམ་ཤུར་བུ་ཕྲེ་འུས་སོ་ཞེས་བྱ་བ་སྨོས་ཏེ། །སྐུད་པ་མང་པོ་ལས་བཏགས་པ་སྲབ་ལ་ཞེང་ཆེ་བ་དང་། ལྷས་མ་གྲུ་བཞིར་འདུག་པ་དང་། སྐུད་པ་མང་པོས་
བཏགས་པ་ཉིད་ལ་བར་ཁོང་སྟོང་དུ་འདུག་པ་དང་། སྐུད་པ་ཕྲ་མོ་ལས་བཏགས་པ་མདོ་མདོར་བུ་གུ་ལྔའམ་དྲུག་རིམ་དུ་བྱས་པ་བཏོད་པ་རྣམས་གོ་རིམས་ཇི་ལྟ་བ་བཞིན་དུའོ། །སྐ་རགས་མ་བཅིངས་པར་གྲོང་དུ་འཇུག་པར་མི་བྱའོ་ཞེས་བྱ་བ་ནི། ཤམ་ཐབས་བགོས་པའི་སྟེང་དུ་སྐ་རགས་མ་བཅིངས་པར་གྲོང་དུ་འཇུག་
པར་མི་བྱ་བ་སྟེ། འདི་ནི་ཤམ་ཐབས་བརླག་པར་འགྱུར་པ་སྤང་བའི་ཕྱིར་རོ། །ཁྲིས་གཅིག་གིས་ཀྱང་ངོ་ཞེས་བྱ་བ་ནི། གལ་ཏེ་སྐ་རགས་ཁྲིས་གཅིག་གིས་བཅིངས་ན་དེ་ལྟར་ན་ཡང་མི་རུང་བའོ། །ཚོམ་བུ་ཅན་དང་ཚར་ཚར་ཅན་དང་ཟླ་གམ་ཅན་དང་གསེར་སྐུད་ནི་རྒྱན་མ་ཡིན་པ་མ་ཡིན་ནོ་ཞེས་བྱ་བ་ནི། རྒྱན་ཐོགས་པ་
བསྟེན་པར་མི་བྱའོ་ཞེས་སྨོས་པས་དེ་རྣམས་བཀག་པར་རིག་པར་བྱའོ། །ཁྲ་བོར་བྱས་པ་ཡང་དེ་དང་འདྲའོ་ཞེས་བྱ་བ་ནི། རྒྱན་བཞིན་དུའོ། །མདོ་འདི་ནི་གོས་ཀྱི་དོན་དུ་བྱས་པ་ཡིན་གྱི་རྩྭ་ལས་བྱས་པའམ། དེ་ལས་གཞན་པ་ཡང་རྒྱན་ཉིད་ཀྱི་ཁོངས་སུ་གཏོགས་པའི་ཕྱིར་རོ། །གཞི་མ་བཏིང་བའི་སར་ཆོས་
གོས་བཞག་པར་མི་བྱའོ་ཞེས་བྱ་བ་ནི། འདིར་ཐམས་ཅད་བར་དུ་གཅོད་པ་དང་། མ་ཉམས་པར་རས་སམ་ལོ་མ་ལ་སོགས་པ་གཞི་མ་བཏིང་བའི་ས་ལ་ཞེས་བྱ་བ་སྟེ། དེ་ནི་མ་རུང་བར་འགྱུར་བ་སྤང་བའི་ཕྱིར་རོ། །འདིར་གཞུང་ནི་རྣམ་པར་འབྱེད་པའི་སྟན་གྱི་གཞི་ལས་དགེ་སློང་རྣམས་ཆོས་གོས་དག་གྱོན་ཏེ། ས་ལ་
འཁོད་པ་ན་ཆོས་གོས་དག་མ་རུང་བར་གྱུར་པ་ན། བཅོམ་ལྡན་འདས་ཀྱིས་བཀའ་སྩལ་པ། དད་པས་སྦྱིན་པར་བྱས་པ་ཆུད་གསན་པར་མི་བྱ་བར་འདི་ལྟར་སྟན་ནང་ཚངས་ཅན་ལ་འདུག་པར་བྱའོ། །སྟན་ནང་ཚངས་ཅན་ཇི་ལྟ་བུ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། རྩྭའི་ཆུན་པོ་བཅིངས་
ཏེ་རས་མས་དཀྲི་བར་བྱའོ་ཞེས་གསུངས་པ་ཡིན་ནོ། །འདིར་སྟན་ནང་ཚངས་ཅན་ནི་དཔེ་ཙམ་དུ་ཟད་དེ། སྟན་གཞན་ལ་ཡང་འདུག་པར་བྱའོ། །འདི་ནི་ཆོས་གོས་མ་རུང་བར་འགྱུར་བ་སྤང་བའི་ཕྱིར་རོ་ཞེས་བྱ་བ་དེ་ལྟར་སྨོས་སོ། །མི་གཙང་བའི་ཕྱོགས་སུ་མི་གཞག་གོ་ཞེས་བྱ་བ་ནི། ས་མ་ཡིན་པར་གྱུར་

པ་ལ་ཡང་ངོ་། །བཏུལ་བ་ཡོད་ན་ཁུར་ལྕི་བས་མི་མནན་ནོ་ཞེས་བྱ་བ་ནི། ཆོས་གོས་མནན་པར་མི་བྱའོ། །གཞན་དུ་སྤྱོད་པས་ཡོངས་སུ་སྤྱད་པར་མི་བྱའོ་ཞེས་བྱ་བའི་གཞུང་ནི། འདིར་མ་མོ་ལས་སྟོད་དུ་བགོ་བ་སྨད་དུ་བགོ་བ་དང་སྨད་དུ་བགོ་བ་སྟོད་དུ་བགོ་བས་ཡོངས་སུ་ལོངས་སྤྱད་པར་
མི་བྱའོ་ཞེས་བྱ་བ་ལ་སོགས་པ་གསུངས་སོ། །བཤང་བ་དང་གཅི་བ་དང་མི་གཙང་བའི་བྱི་དོར་བྱ་བ་དག་ཏུ་བླ་གོས་བགོ་བ་བསྟེན་པར་མི་བྱའོ་ཞེས་བྱ་བ་ནི་བཤང་བ་དང་གཅི་བ་བྱ་བ་དང་། མི་གཙང་བའི་བྱི་དོར་བྱ་བ་དག་ཏུ་བླ་གོས་དག་བགོ་བར་མི་བྱའོ། །དེར་ཉལ་བར་མི་བྱའོ་ཞེས་བྱ་བ་ལ། དེར་ཞེས་བྱ་བ་ནི་
བླ་གོས་དེའི་སྟེང་དུའོ། །བསོད་སྙོམས་ལ་རྒྱུ་བ་དང་། མཆོད་སྟོན་དང་མཆོད་རྟེན་ལ་ཕྱག་བྱ་བ་དང་རྗེ་ས་བྱ་བ་དང་། དགེ་འདུན་ཚོགས་པ་དང་། གདམས་ངག་དང་ཆོས་མཉན་པ་ཉམས་སུ་མྱོང་བ་ལས་གཞན་པའི་བྱ་བ་ལ་སྣམ་སྦྱར་བགོ་བར་མི་བྱའོ་ཞེས་བྱ་བ་ནི་བགོ་བར་མི་བྱ་ཞེས་བྱ་བར་སྦྱར་རོ། །དེ་ལ་
འདུག་པའམ་ཉལ་བར་མི་བྱའོ་ཞེས་བྱ་བ་ནི་དེ་བརྫིས་ནས་འདུག་པའམ་ཉལ་བར་མི་བྱའོ། །དེས་ན་གྲྭ་བརྫི་བ་ཡང་འདིར་བཀག་པ་ཡིན་ནོ། །མ་མོ་དག་ལས་དེ་དག་དང་མདོ་འོག་མ་གཉིས་སོ། །འགའ་ཡང་བསྐུར་བ་ལ་སྦྱར་བར་མི་བྱའོ་ཞེས་བྱ་བ་ནི་དེའི་ནང་དུ་ཅི་ཡང་བཅུག་ནས་བསྐུར་བར་མི་བྱའོ་ཞེས་བྱ་བའི་
དོན་ཏོ། །ལུས་ལ་རེག་པར་བགོ་བར་མི་བྱའོ། །མཆན་ཁུང་གཡས་པའི་དྲོད་ཀྱིས་དེ་མ་རུང་བར་འགྱུར་རོ་ཞེས་བྱ་བ་ནི། མཆན་ཁུང་གང་གི་དྲོད་ཀྱིས་འདི་ཉམས་པར་འགྱུར་རོ་ཞེ་ན། དེའི་ཕྱིར་གཡས་པའི་ཞེས་བྱ་བ་སྨོས་སོ། །དེ་ལྟར་མི་འགྱུར་བར་བྱ་བའི་ཕྱིར་ཕྱོགས་དེར་གོས་གླན་པར་བྱའོ་ཞེས་བྱ་
བ་ལ། དེ་ལྟར་མི་འགྱུར་བར་བྱ་བའི་ཕྱིར་ཞེས་བྱ་བ་ནི། ཉམས་པར་འགྱུར་བ་མི་འགྲུབ་པའི་ཕྱིར་རོ། །ཕྱོགས་དེར་ཞེས་བྱ་བ་ནི་མཆན་ཁུང་གཡས་པའི་ཕྱོགས་དེར་རོ། །དེ་ལ་ཞེས་བྱ་བ་དེ་ནི་སྣམ་སྦྱར་དེ་ལའོ། །ཁྲུ་ཕྱེད་དང་དོ་དང་མཐོ་གང་ངོ་ཞེས་བྱ་བ་ནི། དེའི་ཚད་ནི་སྲིད་དུ་ཁྲུ་ཕྱེད་དང་དོ་ཞེང་དུ་མཐོ་གང་ངོ་། །ངོས་
གཉིས་ཀར་སྐུད་པའི་ཟུངས་ཀྱིས་སྦྱར་རོ་ཞེས་བྱ་བ་ནི་ངོས་གཉིས་ཀར་མཉམ་པར་གླན་པར་བྱའོ་ཞེས་བྱ་བ་ནི་དེའི་དོན་རྟོགས་པར་བྱའོ། །གཞན་དུ་ནི་གཉིས་ཀ་ལས། ངོས་གཉིས་ཀར་གླན་པར་བྱའོ་ཞེས་བྱ་བའོ། །སྐུད་པའི་ཟུངས་ཀྱིས་སྦྱར་བར་བྱའོ་ཞེས་བྱ་བ་ནི་སྟེན་པས་ནི་མ་ཡིན་ནོ། །དུས་དུས་སུ་དེ་བཀྲུ་

བ་དང་ཁ་བསྒྱུར་བར་བྱའོ། །དེའི་དེ་ནི་བཙག་གིས་སོ་ཞེས་བྱ་བ་ནི། གོས་དེའི་ཁ་བསྒྱུར་བ་དེ་ནི་བཙག་གིས་རིགས་པར་བྱའོ། །གདོང་ཕྱིས་བཅང་བར་བྱའོ་ཞེས་བྱ་བ་ལ། འདིར་གཞུང་ནི་གནས་བརྟན་གྱིས་དྲིས་པ་རུང་རམ། ཚེ་དང་ལྡན་པ་རྣམས་བདག་ནི་ནད་པས་ཏེ་མི་རུང་ངོ་། །ཅི་ཁྱོད་སྔོན་གདོང་ཕྱིས་
བཅང་བར་བྱས་ན་ད་ལྟར་ཅིའི་ཕྱིར་མི་འཆང་། བཅོམ་ལྡན་འདས་ཀྱིས་མ་གནང་ངོ་། །བར་སྐབས་དེར་གསུངས་པ་དེ་བས་ན་གདོང་ཕྱིས་བཅང་བར་བྱའོ་ཞེས་རྗེས་སུ་གནང་བའོ། །འདིར་གདོང་ཕྱིས་ནི་ལག་ཕྱིས་ལ་སོགས་པ་དག་གི་དཔེ་ཡིན་ཏེ། ཤིན་ཏུ་མོད་པ་ཉིད་དང་ཤིན་ཏུ་བཟོད་པ་ཞེས་བྱ་བའོ། །འདིར་
གདོང་པ་ནི་གཙོ་བོ་ཉིད་དུ་བསྟན་པའོ། །ལུས་འཛག་པས་རྣག་གཟན་ནོ་ཞེས་བྱ་བ་ནི་བཅང་བར་བྱའོ་ཞེས་བྱ་བར་སྦྱར་བར་བྱའོ། །གང་གི་ལུས་ཁྲག་གམ་རྣག་འཛག་པ་དེ་ནི་ལུས་འཛག་པ་ཞེས་བྱ་སྟེ། དེས་རྣག་གཟན་བཅང་བར་བྱའོ། །དེ་ཆོས་གོས་ཀྱི་ནང་དུ་བགོའོ་ཞེས་བྱ་བ་ལ་དེ་ཞེས་བྱ་བ་ནི་ལུས་
སྤྲུག་པ་དེའོ། །དབྱར་བ་ནི་སྐ་བའི་ཆུའམ་སོ་ཕག་གི་ཕྱེ་མ་སྦྱར་བའི་ཆུས་སྦངས་ཏེ་དལ་བུས་ཁད་ཀྱིས་འགོགས་པར་བྱའོ་ཞེས་བྱ་བ་ལ། སོ་ཕག་གི་ཕྱེ་མ་སྦྱར་ཞེས་བྱ་བ་ནི་ཆུས་སོ། །རྣག་དང་ཁྲག་ཀྱང་ངོ་ཞེས་བྱ་བ་ནི་སྐ་བའི་ཆུ་དང་སོ་ཕག་གི་ཕྱེ་མ་དང་སྦྱར་བའི་ཆུས་སྦངས་ཏེ་དལ་བུས་ཁད་ཀྱིས་འགོགས་པར་
བྱའོ། །དུས་དུས་སུ་དེ་བཀྲུ་བ་དང་སྐམ་པ་དང་ཁ་བསྒྱུར་བར་བྱའོ་ཞེས་བྱ་བ་ལ་དེ་ཞེས་བྱ་བ་ནི་ལུས་ཀྱི་རྣག་གཟན་ནོ། །དེ་ནི་དེའི་བཙག་གིས་བཟང་ངོ་ཞེས་བྱ་བ་ལ། དེ་ནི་ཞེས་བྱ་བ་ནི་རྣག་གཟན་དེ་ཁ་སྒྱུར་བར་བྱེད་པ་ནི་བཙག་གི་རྡུལ་བུ་གནས་འཛག་པར་སྤངས་པས་ཏེ། དེ་ལྟར་གྲང་མོ་དེ་མེད་པ་ཞེས་བྱ་བ་དེས་ཤེས་
པའོ། །འདིའི་དེ་ལ་སའི་སྙིང་པོ་བཟང་ངོ་ཞེས་བྱ་བ་ནི། འཛག་པ་དེའི་སྐམ་པ་དང་། ཤ་བཀྲར་མི་འགྱུར་བ་དེའི་སྨད་དུ་ནི་སའི་སྙིང་པོའི་ཕྱེ་མ་བཟང་ངོ་། །ཆོས་གོས་གར་བབ་བབ་ཏུ་མི་གཞག་གོ་ཞེས་