Luận tạng Tây Tạng (Tengyur) — Tập 158

ཡིན་ཞེ་ན། ཚངས་པར་སྤྱོད་པའི་ཞེས་བྱ་བ་སྨོས་པ་དེ་ཚོགས་ཀྱི་ལམ་ལེགས་པར་སྤྱོད་པ་དང་། ལམ་དང་ལམ་གྱི་འབྲས་བུ་ཞེས་བྱ་བའི་ཐ་ཚིག་གོ། །དེ་གང་ཞེ་ན། སྨྲས་པ། འདི་ལྟར་ཞེས་བྱ་བ་ནི་ཉེ་
བར་སྟོན་པར་བྱེད་པའོ། །དགེ་བའི་བཤེས་གཉེན་ཞེས་བྱ་བ་ནི་སྐྱེ་བོ་ཡོན་ཏན་དང་ལྡན་པ་ལ་རྗེས་སུ་དགའ་བའོ། །དགེ་བའི་གྲོགས་པོ་ཞེས་བྱ་བ་ནི་གྲོགས་པོ་དམ་པའི་བྱ་བ་ལ་ནན་ཏན་བྱེད་པའི་ཕྱིར་རོ། །དགེ་བ་བསྟེན་པ་ཞེས་བྱ་བ་ནི་གནས་གཅིག་ན་གནས་ཤིང་ཡང་དག་པའི་གཏམ་ལ་སོགས་པ་
བྱེད་པའི་ཕྱིར་རོ། །བྱ་བའི་སྒོ་ནས་བསྟེན་ན་སྡིག་པ་བྱས་པ་ལ་སོགས་པ་དང་། ཀུན་དགའ་བོ་ཁྱོད་ཅེས་བྱ་བ་ལ་སོགས་པས་དགའ་བའི་སྒོ་ནས་སྟོན་པར་མཛད་དེ། ཀུན་དགའ་བོ་ཞེས་བྱ་བ་ནི་འབོད་པའོ། །དེ་སྐད་མ་སྨྲ་ཅིག་ཅེས་བྱ་བ་ནི་མ་བརྗོད་ཅིག་པའོ། །འོ་ན་ཇི་ལྟར་བྱ་ཞེ་ན། མ་ལུས་པ་ཞེས་བྱ་བ་ལ་སོགས་
པ་སྨོས་ཏེ། ཐམས་ཅད་ཡིན་ནོ་ཞེས་བྱ་བའི་ཐ་ཚིག་གོ། །ཡོངས་སུ་རྫོགས་པ་ཞེས་བྱ་བ་ནི་ཆར་གྱུར་པ་ཚོགས་པའི་ཕྱིར་རོ། །ཡོངས་སུ་དག་པ་ཞེས་བྱ་བ་ནི་ཟག་པ་མེད་པ་རང་བཞིན་གྱིས་དག་པ་ཉིད་ཀྱི་ཕྱིར་རོ། །ཡོངས་སུ་བྱང་བ་ཞེས་བྱ་བ་ནི་མྱ་ངན་ལས་འདས་པའི་འབྲས་བུ་ཉིད་ཡིན་པའི་ཕྱིར་
རོ། །ཚིག་ཙམ་གྱིས་དད་པར་འགྱུར་བ་མ་ཡིན་ནོ་ཞེས་རིགས་པ་བསྟན་པར་བྱ་བའི་ཕྱིར་དེ་ཅིའི་ཕྱིར་ཞེ་ན་ཞེས་བྱ་བ་ནི་རྒྱུ་གང་གི་ཕྱིར་ཞེས་བྱ་བའི་ཐ་ཚིག་གོ། །ང་ཞེས་བྱ་བ་ནི་བཅོམ་ལྡན་འདས་བདག་ཉིད་ཉེ་བར་སྟོན་པར་བྱེད་པའོ། །བསྟེན་ན་ཞེས་བྱ་བ་ནི་འགྲོགས་པར་གྱུར་པས་སོ། །སྐྱེ་བའི་ཆོས་ཅན་
ཞེས་བྱ་བ་ནི་སྐྱེ་བ་ལས་སྐྱེ་ཞིང་འབྱུང་ན་དེའི་ཆོས་ཀྱི་རང་བཞིན་སེམས་ཅན་གང་དག་ལ་ཡོད་པ་དེ་ལ་དེ་སྐད་ཅེས་བྱའོ། །ཉོན་མོངས་པ་དང་ལས་གང་གིས་སྐྱེ་བའི་ཆོས་ཅན་གྱི་སེམས་ཅན་རྣམས་ལ་སྐྱེ་བའི་ཆོས་ཉིད་ཅེས་དེ་ལ་དངོས་པོའི་རྐྱེན་བརྗོད་པ་དེས་ཡོངས་སུ་གྲོལ་བ་སྟེ་དབྱེ་ཞིང་རྣམ་པར་

བྲལ་བར་འགྱུར་ཏེ། །སངས་རྒྱས་འབྱུང་བ་དེ་ཡོད་ན་ཁྱད་པར་དེ་ཡོད་པ་མེད་ན་མེད་པར་འགྱུར་རོ། །སེམས་ཅན་མེད་པས་ཀྱང་འདི་མེད་པ་ཁོ་ན་ཡིན་ནམ། གཙོ་བོ་མ་ཡིན་པ་ཉིད་ཀྱི་ཕྱིར་བགྲང་བར་བྱ་བ་མ་ཡིན་ཏེ། ལུད་ལ་སོགས་པ་ལྟ་བུ་སྟེ། གྲོའི་མྱུ་གུ་ལ་ནི་གྲོའི་ས་བོན་ཅན་ཞེས་བྱའི། ལུད་ལ་སོགས་པ་
ལ་སྐྱེས་པ་ཞེས་བྱ་བ་ནི་འཁར་རྔའི་སྒྲ་དང་འདྲའོ། །མྱ་ངན་ནི་སྡུག་པ་དང་བྲལ་བ་ལས་སྐྱེས་པའི་ནད་ཀྱིས་གདུང་བའོ། །སྨྲེ་སྔགས་འདོན་པ་ནི་དེ་རབ་ཏུ་བརྗོད་པའོ། །སྡུག་བསྔལ་ནི་ལུས་ཀྱི་སྟེ་བསྣུན་པ་དང་ནད་ལ་སོགས་པ་ལས་སྐྱེས་པའོ། །ཡིད་མི་བདེ་བ་ནི་འདོད་པ་མ་ཡིན་པའི་དོགས་པ་ལས་སྐྱེས་
པའི་ནང་གི་གདུང་བའོ། །འཁྲུག་པ་ནི་ཟིལ་གྱིས་མནན་པ་དང་འཆིང་བ་ལ་སོགས་པ་ཅན་ནོ། །དེ་བས་ན་འདིས་ནི་ཞེས་བྱ་བ་དེའི་ཕྱིར་འདིས་རིགས་པ་བསྟན་པའོ། །རྣམ་གྲངས་ནི་ཐ་དད་པར་རྣམ་པར་ཕྱེ་བའོ། །རིག་པར་གྱིས་ཤིག་ཅེས་བྱ་བ་ནི་ངེས་པར་ཤེས་པར་བྱའོ། །ཤཱཀྱ་གཉེན་ཞེས་བྱ་
བ་ལ་སོགས་པ་ལ་དེ་ནི་གཉེན་གྱི་སྲེད་པས་བསྟན་པ་ལ་ཉེས་པ་སྐྱེད་པར་མི་བྱེད་པ་དེའི་ཕྱིར་དེ་སྐད་དུ་བསྟན་ཏོ། །མཁན་པོ་རྩ་བར་གྱུར་པ་གོས་དབྱུང་བའི་གནས་གང་དག་ཡིན་པ་དེ་ནི་མཁན་པོ་རྩ་བ་ཅན་ཡིན་ཏེ། མཁན་པོ་རྩ་བ་ཅན་དུ་གྱུར་པ་དེ་དག་གིས་སོ། །ཡོངས་སུ་གཞག་པར་བྱ་ཞིང་ཞེས་བྱ་བ་ནི་
གསོལ་བ་དང་བཞིའི་ལས་ཀྱིས་ཟླ་བ་བཞིའི་བར་དུ་ཐག་ཉེ་བར་གཞག་པར་བྱ་བ་ཡིན་ནོ། །ལས་སུ་སྨྲ་བ་ཞེས་བྱ་བ་ནི་ལས་བྱས་པར་གྱུར་པ་འཇིག་པར་མི་འགྱུར་བར་སྨྲ་བའོ། །བྱ་བ་སྨྲ་བ་ཞེས་བྱ་བ་ནི་ཚོགས་པ་ལ་ལྟོས་པའི་ལས་འབྲས་བུ་འབྱིན་ཏོ་ཞེས་སྨྲ་བར་བྱེད་དེ། བྱ་བའི་ཚོགས་པ་ཡིན་ནོ། །
རྒྱུར་སྨྲས་པ་ཞེས་བྱ་བ་ནི་ཐམས་ཅད་རྒྱུ་དང་བཅས་པ་ཤེས་པའོ། །བརྩོན་འགྲུས་སུ་སྨྲ་བ་ཞེས་བྱ་བ་ནི་འབྲས་བུ་སྐྱེས་པ་ལ་ད་ལྟར་གྱི་སྐྱེས་བུའི་བྱེད་པར་སྨྲ་བའི་ངང་ཚུལ་ཅན་ཡིན་ནོ། །མཐོང་བའི་ཆོས་ལ་ཕན་པ་ཞེས་བྱ་བ་ནི་མངོན་སུམ་གྱི་སྐྱེ་བ་ལ་མངོན་པར་འདོད་པའི་འབྲས་བུ་སྐྱེ་བར་འགྱུར་བའི་ཕྱིར་
རོ། །བདེ་བ་ཞེས་བྱ་བ་ནི་སྡུག་བསྔལ་བཟློག་པའི་ཕྱིར་རོ། །འཇིག་རྟེན་ཕ་རོལ་ནི་ཚེ་ཕྱི་མའོ། །གཟུང་བར་བྱ་བ་ནི་ཡི་གེའི་སྒོ་ནས་སོ། །ཀུན་ཆུབ་པར་བྱ་ཞེས་བྱ་བ་ནི་དོན་གྱི་སྒོ་ནས་སོ། །བཅང་བར་བྱ་ཞེས་བྱ་བ་ལ་སོགས་པའི་རྣམ་པར་བཤད་པ་ནི་སྔ་མ་དང་འདྲའོ། །མདོའི་སྡེ་དང་དབྱངས་

ཀྱིས་བསྙད་པའི་སྡེ་ཞེས་བྱ་བ་ལ་སོགས་པ་སྨོས་ཏེ། དེ་ལ་མདོའི་སྡེ་ནི་ཚིག་ལྷུག་པའི་སྒོ་ནས་ཀུན་རྫོབ་དང་དོན་དམ་པའི་བདེན་པ་སྣང་ཞིང་རིགས་པའི་སྐབས་དང་ལྡན་པའི་སྙིང་པོའི་དོན་བསྡུས་པ་ཡིན་ནོ། །དཔེར་ན་གང་ཟག་གཅིག་འཇིག་རྟེན་དུ་སྐྱེས་ཏེ། འདུ་བྱེད་ཐམས་ཅད་ནི་མི་
རྟག་པའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ་ཞེས་བྱ་བ་ལྟ་བུ་སྟེ། གོ་རིམས་ཇི་ལྟ་བ་བཞིན་དུ་དཔེར་བྱེད་པ་ཡིན་ནོ། །བསྟན་མ་ཐག་པའི་མདོ་སྡེའི་དོན་ཚིགས་སུ་བཅད་པའི་སྦྱོར་བའི་སྒོ་ནས་རྗེས་སུ་བརྗོད་ཅིང་གསལ་བར་བརྗོད་པ་ཅན་ནི་དབྱངས་ཀྱིས་བསྙད་པའི་སྡེ་
ཡིན་ཏེ། དཔེར་ན་ནོར་བདུན་ཞེས་བྱ་བ་མདོའི་སྡེ་བསྟན་ནས། དད་པའི་ནོར་དང་། ཚུལ་ཁྲིམས་ཀྱི་ནོར་དང་། ངོ་ཚ་དང་ཁྲེལ་ཡོད་པ་ལས་སྐྱེས་པའི་ནོར་དང་། ཐོས་པའི་ནོར་དང་། གཏོང་བའི་ནོར་དང་། བདུན་པ་ཤེས་རབ་ཀྱི་ནི་ནོར་ཡིན་ཏེ། སྐྱེས་པའམ་བུད་མེད་གང་དག་ལ། །ནོར་འདི་ཡོད་པར་
གྱུར་པ་དེ། །དབུལ་མིན་དེ་ཡི་སྐྱེ་བ་ནི། །དོན་ཡོད་པར་ནི་ཤེས་པར་བྱ། །ཞེས་བྱ་བ་ལྟ་བུའོ། །གཞན་ཡོངས་སུ་འདྲི་བར་འགྱུར་བས་ལྷུག་པ་དང་། ཚིགས་སུ་བཅད་པ་རྗེས་སུ་འཆད་པ་དང་། འདས་པ་དང་མ་བྱོན་པ་དང་ད་ལྟར་སྟོན་པའི་ལུང་དུ་བསྟན་པའི་སྡེ་ཡིན་ཏེ། དཔེར་ན་དྲི་བ་བཞིན་དུ་ལུང་
བསྟན་པ་སྟེ། ཆ་གཅིག་ལུང་བསྟན་པར་བྱ་བའི་འདྲི་བ་ནི་ཇི་སྲིད་ཚུལ་ཁྲིམས་རྒས་པ་ལེགས་ཞེས་བྱ་བ་དང་། འདས་པ་ནི་སྔོན་འདས་པའི་དུས་ན་དེ་བཞིན་གཤེགས་པ་རྣམ་པར་གཟིགས་ཞེས་བྱ་བ་དང་། མ་འོངས་པ་ན་བྱམས་པ་འཚང་རྒྱ་བར་འགྱུར་རོ་ཞེས་བྱ་བ་དང་། ཀུན་དགའ་བོ་
སོང་ལ་དགེ་སློང་དེ་ལ་ཆེན་པོ་ལ་འོས་པའི་སྟན་བཤམས་པ་དང་། གནས་ཁང་མེ་ཏོག་དང་། སྤོས་དང་། དར་གྱི་ལྡ་ལྡིས་བརྒྱན་པར་གྱིས་ཤིག །དེས་ཀྱང་ནུབ་མོ་འདི་ཉིད་ལ་དགྲ་བཅོམ་པ་ཉིད་ཐོབ་པར་འགྱུར་རོ་ཞེས་གོ་རིམས་བཞིན་དུ་བསྟན་ཏོ། །སྔ་མའི་དགོས་པ་ལ་ལྟོས་ནས་ཚིགས་སུ་
བཅད་པར་སྦྱར་བ་ནི་ཚིགས་སུ་བཅད་པའི་སྡེ་ཞེས་བྱ་བ་ཡིན་ཏེ། དཔེར་ན་རྒྱལ་པོ་རྒྱལ་བའི་སྡེའི་ཚིགས་སུ་བཅད་པ་དང་། ཚུལ་ཁྲིམས་ཀྱི་ཚིགས་སུ་བཅད་པ་ལ་སོགས་པ་ལྟ་བུའོ། །ཚིག་གསུམ་མམ་བཞི་འམ། ལྔའམ་དྲུག་གི་ཚིགས་སུ་བཅད་པ་བསྟན་ནས་འགའ་ཞིག་པ་ལན་

པ་ལ་གནས་པའི་གང་ཟག་འབའ་ཞིག་པོ་དགའ་བ་དང་། ངོ་མཚར་ལ་ལྟོས་པའི་སྤོབས་པ་སྐྱེ་བར་འགྱུར་བ་ཡང་དག་པར་འཆད་པ་ནི་ཆེད་དུ་བརྗོད་པའི་སྡེ་ཡིན་ཏེ། དཔེར་ན་དེ་དག་ཀླུ་ལ་ཀླུ་དག་གིས་ཞེས་བྱ་བ་ལ་སོགས་པ་ལྟ་བུའོ། །མངོན་པར་བརྗོད་པའི་དགོས་པའི་ཚིག་ནི་གླེང་གཞིའི་སྡེ་ཡིན་ཏེ།
འདིས་ངེས་པར་བྱེད་ཅིང་སྟོན་པར་བྱེད་ཅེས་བྱ་བའི་ཐ་ཚིག་གོ། །དེ་ཡང་ཕལ་ཆེར་འདུལ་བ་དང་འབྲེལ་པ་དེར་འབྱུང་བར་བསམས་པ་ཉིད་ཀྱི་ཕྱིར་རོ། །དོན་གཞན་ཁོང་དུ་ཆུད་པར་བྱ་བའི་ཕྱིར་དང་། གཞན་གྱི་སྤྱོད་པ་བསྟན་པ་དང་། དཔེ་རྒྱ་ཆེར་རྗོད་པར་བྱེད་པ་ནི་རྟོགས་པ་བརྗོད་པའི་སྡེ་ཡིན་ཏེ། དཔེར་
ན་ཨུ་ཏྲ་ཡ་ན་དང་། མ་ག་དྷཱ་བཟང་མོའི་རྟོགས་པ་བརྗོད་པ་ལྟ་བུའོ། །སྐྱེས་བུས་སྦྱར་བ་མ་ཡིན་པ་བརྒྱུད་པས་འོངས་པའི་གཏམ་རྒྱུད་ནི་དེ་ལྟ་བུ་བྱུང་བའི་སྡེ་ཡིན་ཏེ། དཔེར་ན་གཞོན་ནུ་མ་བདུན་གྱི་གཏམ་རྒྱུད་ལ་སོགས་པ་ལྟ་བུའོ། །བྱང་ཆུབ་སེམས་དཔའི་སྔོན་གྱི་སྐྱེ་བའི་མཛད་སྤྱོད་སྐྱེས་པ་རབས་
ཀྱི་སྡེ་ཡིན་ཏེ། དཔེར་ན་རི་དགས་ཀྱི་སྐྱེས་པའི་རབས་ལ་སོགས་པ་ལྟ་བུའོ། །ཆོས་རབ་ཏུ་འབྱེད་པའི་གཏམ་རྒྱུད་དང་ལྡན་པ་མན་ངག་རྒྱ་ཆེ་བ་ཤིན་ཏུ་རྒྱས་པའི་སྡེ་ཡིན་ཏེ། དཔེར་ན་ལྔ་དང་གསུམ་དང་སྒྱུ་འཕྲུལ་དང་། བརྒྱ་བྱིན་གྱིས་དྲི་བ་ཁམས་དྲུག་གི་རྣམ་པར་དབྱེ་བ་ལ་སོགས་པ་ལྟ་བུའོ། །
དཀོན་མཆོག་གསུམ་གྱི་བྱེ་བྲག་ཤིན་ཏུ་གསལ་བར་བྱེད་པ་ནི་རྨད་དུ་བྱུང་བའི་སྡེ་ཡིན་ཏེ། འཇིག་རྟེན་པ་ལས་སྔོན་རབ་ཏུ་མ་གྲགས་པ་ཉིད་ཀྱི་ཕྱིར་རོ། །དཔེར་ན་ངོ་མཚར་དུ་གྱུར་པ་ལྷགས་པ་ལྟ་བུའོ། །མདོ་སྡེ་ལ་སོགས་པ་རྣམ་པར་འགྲེལ་ཅིང་དྲི་བ་དང་ལན་རྗོད་པར་བྱེད་པ་ནི་གཏན་ལ་དབབ་པར་བསྟན་
པའི་སྡེ་ཡིན་ཏེ། དཔེར་ན་གང་གིས་ན་འདི་ལ་འཇིག་རྟེན་པའི་ཆོས་ཀྱི་མཆོག་ཅེས་བྱ་བ་ལ་སོགས་པ་ལྟ་བུའོ། །དེ་ཉིད་ཀྱི་ཕྱིར་འདི་བཀའ་མ་ལུས་པའི་གཞི་ཉིད་ཡིན་པའི་ཕྱིར་བུའི་མ་དང་འདྲ་བར་མ་མོ་ཞེས་བྱ་བ་ལ། ཕྱིན་ཅི་མ་ལོག་པའི་ཆོས་ཀྱི་མཚན་ཉིད་ཀྱི་སྒོ་ཉིད་ཡིན་པའི་ཕྱིར་
ཆོས་མངོན་པ་ཞེས་བྱའོ། །བཀར་གཏོགས་པའི་རྣམ་པ་བཅུ་གཉིས་པོ་མདོར་བསྡུས་པ་དེ་ཉིད་ལ་སྡེ་སྣོད་གསུམ་ཞེས་བྱའོ། །སོ་སོར་འབྲང་བར་གྱིས་ཤིག་ཅེས་བྱ་བ་ནི་བཀའ་དེ་ནན་ཏན་དུ་བྱེད་པའི་སྒོ་ནས་སོ་སོར་འབྲང་བར་བྱ་ཞིང་རྗེས་སུ་འཇུག་པར་བྱ་བ་ཡིན་པས་ན་སོ་སོར་འབྲང་བའོ། །ཕྲ་ཞིང་

ཕྲ་བ་ཞེས་བྱ་བ་འདི་ལ་ཁ་ཅིག་ཉེས་བྱས་ཀྱི་ཁ་ན་མ་ཐོ་བ་ཐམས་ཅད་ལ་ཕྲ་ཞིང་ཕྲ་བར་བརྗོད་ལ། ཁ་ཅིག་ནི་ཞིང་ལས་དང་དབྱུ་གུ་ལས་ཀུན་ནས་ལྡང་བའི་སྐད་ཅིག་མ་རྒྱུ་ཅན་དང་གནས་གཞན་གྱི་བར་ན་གནས་པ་དང་། ནང་དུ་འཚོད་པ་ལས་བྱུང་བའི་ཉེས་བྱས་ཀྱི་ཁ་ན་མ་ཐོ་བ་ལ་བརྗོད་
ཅིང་། ཁ་ཅིག་ནི་ཡིད་ཀྱི་ཉེས་བྱས་ཀྱི་ཁ་ན་མ་ཐོ་བ་ཐམས་ཅད་ལས་ཕྲ་ཞིང་ཕྲ་བར་མཛད་དེ་དཔེར་ན་དོན་མེད་པར་གཞན་འཆི་བར་འདོད་པ་ལ་སོགས་པ་ལྟ་བུའོ། །ཉེ་བའི་ཚིག་མེད་པར་མིང་སྨོས་པ་ནི་མིང་ནས་བརྗོད་པའོ། །རིགས་ཀྱི་སྒོ་ནས་ཐ་སྙད་དུ་བྱེད་པ་ནི་རིགས་བརྗོད་པ་ཡིན་ཏེ། དཔེར་ན་གཽ་ཏ་མ་ཞེས་བྱ་
བ་ལ་སོགས་པ་ལྟ་བུའོ། །འདི་ལྟར་གཞུང་འདི་ལ་ཡང་གལ་ཏེ་གཞོན་པས་དགེ་སློང་ཤིན་ཏུ་རྒན་པ་ལ་ཡང་ཚེ་དང་ལྡན་པའི་ཚིག་གིས་རྗོད་པར་བྱེད་ན་ཉེས་པ་མེད་པར་སྣང་སྟེ། གང་གི་ཕྱིར་འདི་སྐད་དུ་ཚེ་དང་ལྡན་པའི་ཚིག་གམ། བཙུན་པའི་ཚིག་གིས་བརྗོད་པར་བྱའོ་ཞེས་གསུངས་པ་ཡིན་ནོ། །
ཕན་གདགས་པར་བྱའོ་ཞེས་བྱ་བ་ནི་ཐག་ཉེ་བར་གཞག་པར་བྱ་བའོ། །གཞུག་པར་བྱའོ་ཞེས་བྱ་བ་ནི་ཉེ་བར་བསྟན་པའོ། །གང་གིས་ཤེ་ན་ལྷུང་བཟེད་དང་ཞེས་བྱ་བ་ལ་སོགས་པ་སྨོས་པ་ཡིན་ནོ། །རྫོགས་པའི་ཏིང་ངེ་འཛིན་ཉེ་བར་བསྡུ་བ་ནི་རྣལ་འབྱོར་ཡིན་ལ། མ་རྫོགས་པ་ནི་ཡིད་ལ་བྱེད་པ་ཡིན་ནོ། །
མཆོད་རྟེན་བྱེད་ཅིང་ཞེས་བྱ་བ་ནི་རྫས་ཡོངས་སུ་གཏོང་བའི་སྒོ་ནས་མཆོད་རྟེན་ལ་མཆོད་པ་བྱེད་པའོ། །མཆོད་རྟེན་ལ་ཕྱག་འཚལ་བ་ཞེས་བྱ་བ་ནི་ལུས་ཀྱི་གཡོ་འགུལ་གྱི་སྒོ་ནས་མཆོད་རྟེན་ལ་བསྙེན་བཀུར་བྱེད་པ་ལ་ཕྱོགས་པའོ། །ཟིལ་གྱིས་གནོན་ཅིང་ཟིལ་གྱིས་མནན་ནས་ཞེས་བྱ་བ་ནི་ཟིལ་གྱིས་གནོན་ཅིང་ཚར་བཅད་པའོ། །དགེ་སློང་གིས་
དགེ་སློང་ལ་ཞེས་བྱ་བ་ནི་དགེ་སློང་སྟོན་པ་ལ་གུས་པའམ་འཇིགས་པས་སྟོན་པའི་མངོན་སུམ་དུ་ཞུ་བར་མི་ནུས་པ་གང་ཡིན་པ་དེ་ནི་གཞན་ནུས་པ་ལ་དྲི་བར་བྱ་ཞིང་དགེ་སློང་སྤོབས་པས་ནི་བདག་ཉིད་ཀྱིས་ཞུ་བར་བྱའོ། །ཁྱོད་ནི་དད་པས་དེ་སྐད་དུ་སྨྲའོ་ཞེས་བྱ་བ་ནི་སངས་རྒྱས་ལ་སོགས་པ་ལ་ཤེས་པའི་དད་པ་ཐོབ་པའི་
ཕྱིར་རོ། །འདིར་བཅོམ་ལྡན་འདས་ཀྱིས་ཡེ་ཤེས་གཟིགས་པ་ལ་འཇུག་པ་ནི་མ་ཡིན་ཏེ། མི་སློབ་པའི་ལམ་མ་སྐྱེས་པ་དང་། རྒྱུན་དུ་ཞུགས་པ་ལ་གཞན་གྱི་སེམས་ཤེས་མེད་པའི་ཕྱིར་རོ། །ཞི་བ་མི་གཡོ་བ་ཞེས་བྱ་བ་ནི་བསམ་གཏན་བཞི་པ་རྙོག་པས་མི་བསྐྱོད་པ་ཉིད་ཀྱི་ཕྱིར་དང་། ཤིན་ཏུ་ཞི་བ་ཉིད་ཀྱི་

ཕྱིར་རོ། །སངས་རྒྱས་བཅོམ་ལྡན་འདས་ཐུགས་གང་ལ་བརྟེན་ནས་ཡོངས་སུ་མྱ་ངན་ལས་འདས་ཤེ་ན། འདིར་འདོད་པ་ན་སྤྱོད་པའི་སེམས་ལྡོག་པ་མེད་པ་ལུང་དུ་མ་བསྟན་པ་བསམ་པའི་རང་བཞིན་ཅན་བསམ་གཏན་བཞི་པ་དང་འདྲ་བ་གཡོ་བ་མེད་པ་ཞེས་བྱ་བ་ཡོད་དེ། དེ་ལ་བརྟེན་ནས་ཞེས་སྟོན་ཏོ། །ཇི་ལྟར་ན་
བཅོམ་ལྡན་འདས་བསམ་གཏན་བཞི་པ་ལས་དེར་གཤེགས་ཤེ་ན། འདི་ལ་ཡང་བསམ་གཏན་བཞི་པའི་དེ་མ་ཐག་ཏུ་བཅོམ་ལྡན་འདས་བསམ་གཏན་གསུམ་པ་མངོན་སུམ་དུ་མཛད་ལ། བསམ་གཏན་གསུམ་པའི་དེ་མ་ཐག་ཏུ་བསམ་གཏན་གཉིས་པ་མངོན་སུམ་དུ་མཛད་ཅིང་། བསམ་གཏན་གཉིས་པའི་
དེ་མ་ཐག་ཏུ་བསམ་གཏན་དང་པོ་མངོན་སུམ་དུ་མཛད་དོ། །བསམ་གཏན་དང་པོའི་དེ་མ་ཐག་ཏུ་འདོད་པ་ན་སྤྱོད་པའི་སེམས་དང་། སེམས་དེ་མ་ཐག་ཏུ་ཡོངས་སུ་མྱ་ངན་ལས་འདས་པ་སྟོན་ཏོ། །ཁ་ཅིག་འདི་སྐད་དུ་སྨྲ་སྟེ། བསམ་གཏན་བཞི་པའི་དེ་མ་ཐག་ཏུ་བཅོམ་ལྡན་འདས་ཀྱིས་སེམས་དེ་མངོན་
སུམ་དུ་མཛད་པར་སྤྱོད་ལ། བསམ་གཏན་བཞི་པའི་དེ་མ་ཐག་ཏུ་འདོད་པ་ན་སྤྱོད་པའི་སེམས་དེ་མངོན་སུམ་དུ་མཛད་པ་དེ་ནི་སངས་རྒྱས་བཅོམ་ལྡན་འདས་ལས་གཞན་གྱིས་མ་ཡིན་ཞིང་བསམ་གཏན་བཞི་པའི་ས་པའི་སེམས་ཀྱང་རིས་མི་མཐུན་པ་དང་། མཉམ་པར་གཞག་པ་དང་། དགེ་བ་ཡིན་ཏེ། སེམས་
དེ་ལྟ་བུ་ལ་རྣམ་པར་གནས་པ་དག་མྱ་ངན་ལས་འདའ་བར་མི་འགྱུར་རོ་ཞེས་བྱ་བ་ནི་གྲུབ་པའི་མཐའ་ཡིན་ནོ། །དུས་ཇི་འདྲ་བ་ལ་བཅོམ་ལྡན་འདས་ཡོངས་སུ་མྱ་ངན་ལས་འདས་ཤེ་ན། འདིར་སྟོན་ཟླ་ཐ་ཆུངས་ཀྱི་ཡར་ངོའི་ཚེས་བརྒྱད་ཀྱི་མཚན་གྱི་ཐུན་བར་མ་ལ་ཟླ་བ་ནུབ་ཀྱི་རིའི་རྩེ་མོར་ཞུགས་པ་དང་།
བཅོམ་ལྡན་འདས་ཀྱང་བསམ་གཏན་གྱི་རིའི་རྩེ་མོ་ལས་བསྐྱོད་པར་གྱུར་པ་དང་། ཟླ་བ་ནུབ་པར་གྱུར་ཅིང་བཅོམ་ལྡན་འདས་ཀྱང་ཡོངས་སུ་མྱ་ངན་ལས་འདས་པར་གྱུར་ཏེ། འཇིག་རྟེན་དུ་མུན་པ་གཉིས་འབྱུང་བར་འགྱུར་བ་ནི་བྱིས་པ་སོ་སོའི་སྐྱེ་བོ་དག་ཤིན་ཏུ་སྐྱོ་བ་བསྐྱེད་པའི་དོན་ཡིན་ནོ་ཞེས་སྟོན་ཏོ། །
ཅུང་ཟད་མེད་པའི་སྐྱེ་མཆེད་ལ་སྙོམས་པར་ཞུགས་པ་ཞེས་བྱ་བ་ནི་དེ་དག་གི་ཆོས་ཉིད་ཡིན་ཏེ། འདི་ལྟར་ཡོངས་སུ་མྱ་ངན་ལས་འདའ་བའི་ཚེ་ཉན་ཐོས་ཆེན་པོ་ཡང་ལུགས་ལས་འབྱུང་བ་དང་ལུགས་ལས་བཟློག་པའི་བསམ་གཏན་བསྐྱེད་ནས་ཡོངས་སུ་མྱ་ངན་ལས་འདའ་བ་དེ་བས་ན་བཅོམ་ལྡན་འདས་ཀྱང་དེ་

ལྟར་མཛད་པ་ཡིན་ནོ། །བདེན་པ་མཐོང་བའི་རྩ་བ་དང་བྲལ་ཞིང་རྩ་བ་མེད་པའི་དད་པ་དང་ལྡན་ཡང་མཚམས་མེད་པ་བྱེད་པ་ཡིན་པའི་ཕྱིར་དང་། མཚམས་མེད་པ་བྱེད་པ་དག་ནི་གདོན་མི་ཟ་བར་དམྱལ་བའི་འབྲས་བུ་ཅན་ཡིན་པ་དེ་ཉིད་ཀྱི་ཕྱིར་འབྲས་བུ་ཉམས་སུ་མ་མྱོང་བར་བདེན་པ་
མཐོང་བར་ནུས་པ་མ་ཡིན་པ་དེ་བས་ན་མ་སྐྱེས་དགྲས་བདེན་པ་མཐོང་བར་མ་གྱུར་པ་ཡིན་ནོ། །མཛེས་པ་ཞེས་བྱ་བ་ནི་སྡུག་པའོ། །གཏོར་བ་ཞེས་བྱ་བ་ནི་མེ་ཏོག་གི་རྣམ་པས་གཏོར་བར་གྱུར་པའོ། །ཀྱེ་མ་འདུ་བྱེད་མི་རྟག་སྟེ་ཞེས་བྱ་བ་ལ་སོགས་པ་དེ་ལས་ཀྱེ་མ་འདུ་བྱེད་མི་རྟག་ཅེས་བྱ་བའི་འདུ་བྱེད་ནི་
རྣམ་པ་གསུམ་སྟེ། འདས་པ་དང་མ་འོངས་པ་དང་། ད་ལྟར་ཐ་དད་པའི་ཕྱིར་རོ། །དེ་ལ་འདས་པ་ནི་སྐྱེས་ཤིང་འགགས་པ་ཉིད་ཀྱི་ཕྱིར་མི་རྟག་པ་ཡིན་ལ། ཡང་སྐྱེ་བར་མི་འགྱུར་བ་དེ་བས་ན་སྐྱེ་ཞིང་འཇིག་པའི་ཆོས་ཅན་ཡིན་ནོ། །མ་འོངས་པ་ནི་སྐྱེ་བའི་ཆོས་ཅན་ཡིན་ཏེ། སྐྱེར་རུང་བ་ཉིད་ཀྱི་ཕྱིར་དང་།
སྐྱེ་ཞིང་འཇིག་པའི་ཆོས་ཅན་ནི་འཇིག་པར་རུང་བ་ཉིད་ཀྱི་ཕྱིར་ཡང་། སྐྱེ་བར་མི་འགྱུར་བས་ན་སྐྱེ་ཞིང་འཇིག་པའི་ཆོས་ཅན་ཡིན་ཏེ། ཡང་མ་འོངས་པ་གང་ཡིན་པ་དེ་དག་སྐྱེ་བའི་ཆོས་ཅན་དུ་བསྟན་ན། དེ་དག་གཅིག་ཏུ་སྐྱེ་བར་འགྱུར་གྱི་འགག་པར་མི་འགྱུར་རམ་ཞེ་ན། སྐྱེས་གྱུར་ནས་ནི་འགག་
པར་འགྱུར། །ཞེས་བྱ་བ་སྨོས་ཏེ། གང་སྐྱེས་པར་གྱུར་པ་དེ་ཉིད་འགག་པར་འགྱུར་གྱི། གང་དག་མ་སྐྱེས་པ་དེ་དག་ནི་འགོག་པར་ཡང་མི་འགྱུར་རོ། །གལ་ཏེ་དེ་དག་ཐམས་ཅད་སྡུག་བསྔལ་ཁོ་ན་མ་ཡིན་ནམ། ཇི་ད་ལྟར་བདེ་བ་ཡིན་ཞེ་ན། དེ་དག་ཅེས་བྱ་བ་སྨོས་ཏེ། མ་འོངས་པའི་འདུ་བྱེད་དེ་དག་
གི་རྒྱུ་ཟད་པའི་ཕྱིར་དང་། གཞན་ཡང་མ་སྐྱེས་པའི་ཕྱིར་ཉེར་ཞི་བདེ་བ་ཡིན་ཞེས་བྱ་བ་ནི་ཚིགས་སུ་བཅད་པའི་བསྡུས་པའི་དོན་ཡིན་ནོ། །ཡན་ལག་གི་དོན་ནི་ཀྱེ་མ་ནི་སྐྱོ་བ་ཡིན་ཏེ། འདི་ནི་སྡུག་བསྔལ་ལོ་ཞེས་སྐྱོ་བ་བསྐྱེད་པའི་དོན་ཏེ། གང་མི་རྟག་པ་དེ་ནི་སྡུག་བསྔལ་ལོ་ཞེས་མདོ་སྡེ་ལས་འབྱུང་བ་ཡིན་
ནོ། །བྱ་བ་ངེས་པར་བྱེད་པའི་དངོས་པོ་འདོར་བ་ནི་རྟག་པ་ཡིན་ལ། དེ་ལས་གཞན་པ་ནི་མི་རྟག་པ་སྟེ། སྐད་ཅིག་མ་དང་། ཡུལ་ཐུང་ངུར་གནས་པ་དང་། སྐྱེས་མ་ཐག་ཏུ་འཇིག་པ་ཞེས་བྱ་བའི་བར་དུའོ། །མི་རྟག་པ་ཉིད་ཐུགས་རྗེ་ཆེན་པོའི་ཡུལ་ཡིན་གྱི། སྡུག་བསྔལ་གྱི་སྡུག་བསྔལ་གྱིས་

གདུངས་པའི་དོན་ཉིད་ནི་མ་ཡིན་ནོ་ཞེས་སྟོན་པའམ། བཅོམ་ལྡན་འདས་སེམས་ཅན་དུ་བགྲང་བའི་འདུ་བྱེད་ཀྱི་ཡུལ་གྱི་རྣམ་པ་དེ་ལ་ཐུགས་བརྩེ་བར་མཛད་པ་ཡིན་ཏེ། ཕན་འདོགས་པའི་གཞིར་གྱུར་པའི་ཐུགས་རྗེ་སྐྱེད་པར་མཛད་ཅེས་བྱ་བའི་ཐ་ཚིག་གོ། །ཚོགས་པ་ལས་སྐྱེས་པའི་དངོས་པོ་ནི་འདུ་བྱེད་
ཡིན་ཏེ། ཕུང་པོ་ལྔ་ཞེས་བྱ་བའི་ཐ་ཚིག་གོ། །སྐྱེ་བ་ནི་འབྱུང་བ་ཡིན་ལ་འཇིག་པ་ནི་ཉམས་པར་གྱུར་པའོ། །གདོན་མི་ཟ་བར་འགྱུར་བའི་རང་བཞིན་ཅན་གྱི་ཆོས་དེ་གཉིས་གང་ལ་ཡོད་པ་དེ་ནི་སྐྱེ་ཞིང་འཇིག་པའི་ཆོས་ཅན་ཡིན་ཏེ། སྐྱེ་ཞིང་འཇིག་པའི་གནས་སྐབས་ཉམས་སུ་མྱོང་བར་འགྱུར་ཞེས་བྱ་བའི་
ཐ་ཚིག་སྟེ། རྒ་བའི་ཆོས་ལ་སོགས་པ་ལྟ་བུའོ། །དཔེར་ན་གདོན་མི་ཟ་བར་རྒས་པར་འགྱུར་བ་གང་ཡིན་པ་དེ་ནི་རྒ་བའི་ཆོས་ཅན་ཞེས་བྱ་སྟེ་དེ་དང་འདྲའོ། །མི་སྐྱེ་བའི་ཆོས་ཅན་དག་ནི་དེ་དང་འདྲ་བའི་ཕྱིར་འདུས་བྱས་སུ་བརྗོད་པ་ཡིན་ཏེ། སྟོན་ཀའི་སྤྲིན་ལ་ཆུ་འཛིན་ཞེས་བསྟན་པ་ལྟ་བུའོ། །སྐྱེས་གྱུར་
ནས་ཞེས་བྱ་བ་ནི་ད་ལྟར་གྱི་དུས་ཐོབ་པར་གྱུར་ཅེས་བྱ་བའི་ཐ་ཚིག་གོ། །གིའི་སྒྲ་ནི་སྐྱེས་པར་གྱུར་ནས་དེ་དག་གདོན་མི་ཟ་བར་འགག་པར་འགྱུར་རོ་ཞེས་བསྟན་པར་བྱ་བའི་དོན་ཏོ། །གང་གི་ཕྱིར་སྐྱེས་པར་གྱུར་ནས་འགག་པར་འགྱུར་ཞེས་བསྟན་ཏོ། །འགག་པར་འགྱུར་བ་ནི་ནུབ་ཅིང་འདས་པར་འགྱུར་
བའོ། །ཡང་ན་འདི་སྐད་དུ་བསྟན་པར་འགྱུར་ཏེ། ཇི་ལྟར་ན་མི་རྟག་པ་ཡིན་ཞིང་གང་གི་ཕྱིར་སྐྱེ་ཞིང་འཇིག་པའི་ཆོས་ཅན་ཡིན་ཞེ་ན། སྐྱེས་པ་ནི་གདོན་མི་ཟ་བར་འཇོག་པ་ཉིད་ཀྱི་ཕྱིར་བུམ་པ་ལ་སོགས་པ་ལྟ་བུ་ཡིན་ལ། མི་མཐུན་པ་ནི་ནམ་མཁའོ། །འདི་གཉིས་ཅིག་ཅར་འགྱུར་ན་ནི་སྐྱེ་བའི་དུས་
ཁོ་ན་འཇིག་པའི་དུས་སུ་འབྱུང་བ་དེའི་ཕྱིར་འདས་པ་དང་ད་ལྟར་ཉེས་པ་གཅིག་ཏུ་འགྱུར་རོ་ཞེ་ན། སྨྲས་པ། །སྐྱེས་གྱུར་ནས་ནི་འཇིག་པར་འགྱུར་བ་སྟེ། །ད་ལྟར་དུ་གྱུར་ནས་འདས་པར་འགྱུར་རོ་ཞེས་བྱ་བའི་ཐ་ཚིག་གོ། །འདི་ཀུན་ཁོ་ན་སྡུག་བསྔལ་ཡིན་ཏེ། མི་རྟག་པ་ཉིད་ཀྱི་ཕྱིར་དང་། གཞན་
ལ་རག་ལས་པ་ཉིད་ལ་བདེ་བ་མི་སྲིད་པའི་ཕྱིར་རོ། །དེ་ལྟ་ན་ནི་ལམ་ཡང་སྡུག་བསྔལ་ཡིན་པར་ཐོབ་པར་འགྱུར་རོ་ཞེ་ན། བདེན་པའི་གནས་སྐབས་ཀྱི་ལམ་སྡུག་བསྔལ་མ་ཡིན་ཏེ། འཕགས་པ་དག་དང་མི་མཐུན་པ་མ་ཡིན་པ་ཉིད་ཀྱི་ཕྱིར་རོ། །གཞན་དག་ཏུ་ནི་སྡུག་བསྔལ་ཡིན་ཏེ། གང་

མི་རྟག་པ་དེ་ནི་སྡུག་བསྔལ་ཡིན་ནོ་ཞེས་གསུངས་པའི་ཕྱིར་རོ། །དཔེར་ན་ཏིག་ཏ་ལ་སོགས་པའི་བཏུང་བ་སྡུག་བསྔལ་ཡིན་ཏེ། ནད་ཉེ་བར་ཞི་བའི་རྒྱུ་ཉིད་ཡིན་པའི་ཕྱིར་སྨན་དུ་བསྟེན་པ་དང་བདེ་བར་བརྗོད་པ་དེ་བཞིན་དུ་ལམ་ལ་སོགས་པ་ལ་ཡང་བརྗོད་པར་བྱའོ། །འདུ་བྱེད་ཀྱི་སྡུག་
བསྔལ་དེ་དག་ཉེ་བར་ཞི་བ་སྟེ། རིགས་པ་ཁྱད་པར་དུ་འཕགས་པ་ཡེ་ཤེས་གྲུབ་པས་ཐོབ་པའི་ཞི་བ་ནི་ཉེ་བར་ཞི་བ་སྟེ། སོ་སོར་བརྟགས་པའི་འགོག་པ་གང་ཡིན་པ་དེ་ནི་བདེ་བ་ཡིན་ཏེ། ཕུང་པོ་མེད་པའི་བདེ་བའི་མཆོག །ཅེས་གསུངས་པའི་ཕྱིར་རོ། །ལུས་ནི་སྐུ་ཡིན་ནོ། །གང་ཟག་ཟླ་མེད་ནི་གྲོགས་མེད་
ཅིང་གཉིས་པ་མེད་པ་ཞེས་བྱ་བའི་ཐ་ཚིག་གོ། །བརྟན་ཞིང་མི་གཡོ་བའི་ཐུགས་གང་ལ་མངའ་བ་དེ་ནི་བརྟན་པའི་ཐུགས་ཅན་ཏེ། བཅོམ་ལྡན་འདས་ཡིན་ནོ། །བརྟན་པའི་ཐུགས་ཅན་སྨོས་པས་དབུགས་འབྱུང་བ་དང་རྔུབ་པ་ཡང་མི་སྐྱེ་བ་བསྟན་པ་ཡིན་ཏེ། ཇི་ལྟར་འགོག་པའི་སྙོམས་པར་འཇུག་པ་
ལ་ཡང་དབུགས་འབྱུང་བ་དང་། རྔུབ་པ་སྐྱེ་བར་མི་འགྱུར་བ་དེ་བཞིན་དུའོ། །སྐྱོབ་པ་ཞེས་བྱ་བ་ནི་ཉོན་མོངས་པའི་དགྲའི་རྣམ་པར་འཚེ་བ་ལས་ཡོངས་སུ་སྲུང་བར་མཛད་པའོ། །ལམ་མཁྱེན་པའི་སྤྱན་དང་ལྡན་པ་ཉིད་ཀྱི་ཕྱིར་སྤྱན་ལྡན་ནོ། །འཁོར་བའི་འཇིགས་པ་བསྐྲུན་པར་མཛད་པའི་ཕྱིར་འཇིགས་པར་
མཛད་པར་གྱུར་པའོ། །བ་སྤུ་ལྡང་བ་ཅན་སྐྲག་པའི་སྒོ་ནས་བ་སྤུ་རབ་ཏུ་གཡོས་པའོ། །སྟོབས་བཅུ་དང་ལྡན་པ་ཉིད་ཀྱི་ཕྱིར་རྣམ་ཀུན་སྟོབས་དང་ལྡན་གྱུར་པའོ། །དུས་ཀྱང་མཛད་ཅེས་བྱ་བ་ནི་ཐ་མའི་དུས་སུ་མཛད་པ་ཡིན་ནོ། །ཞུམ་པ་མེད་པའི་སེམས་ཀྱིས་ཞེས་བྱ་བ་ནི་ཡིད་ཞུམ་པ་མེད་པའོ། །ཚོར་བ་བཟོད་པར་
མཛད་ནས་ནི་ཞེས་བྱ་བ་ནི་ཐ་མའི་དུས་ཀྱི་ཚོར་བ་བགྲང་བ་མེད་པར་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་གཤེགས་པའི་ཕྱིར་མེ་ཞི་བའི་དཔེས་བསྟན་པ་ཡིན་ཏེ། དཔེར་ན་མེ་ལ་རྒྱུ་མེད་པས་ཞི་བར་འགྱུར་བ་དེ་བཞིན་དུ། བཅོམ་ལྡན་འདས་སེམས་རྣམ་པར་གྲོལ་བ་ལ་རྒྱུ་མེད་པས་མྱ་
ངན་ལས་འདས་པར་གྱུར་པ་ཡིན་ནོ། །འདུས་བྱས་མི་རྟག་པ་ཉིད་དུ་བསྒོམ་པ་ལ་འདིར་འཕགས་པའི་མི་སྨྲ་བའི་དངོས་པོ་ཡིན་པར་རིག་པར་བྱའོ། །གནས་འཇོག་གི་རིགས་སུ་བརྒྱུད་པས་འོངས་པ་ཉིད་ཡིན་པའི་ཕྱིར་གནས་འཇོག་གི་སྒྲས་འབོད་པ་ཡིན་ནོ། །འགྲེ་ལྡོག་པ་ནི་ས་ལ་ལན་ཅིག་འགྲེ་བ་

ཡིན་ལ། རབ་ཏུ་འགྲེ་ལྡོག་པ་ནི་ཡང་དང་ཡང་དུ་ཀུན་ནས་འགྲེ་བ་ཡིན་ནོ། །གཡས་དང་གཡོན་གྱི་དཔུང་པའི་རྩ་ནས་ལག་པས་བཟུང་ཞིང་ངུ་བར་བྱེད་པ་ནི་དཔུང་པ་ལས་བཟུང་སྟེ་སྐད་འབྱིན་ཅིང་ངུ་བ་ཡིན་ནོ། །སེམས་ཀྱི་སྡུག་བསྔལ་དང་ཡིད་མི་བདེ་བ་དང་ལྡན་པ་ནི་འབྱོར་པ་ཡིན་ནོ། །དངོས་པོ་
རྣམས་ཀྱིས་འཇིགས་པ་གདོན་མི་ཟ་བར་འགྱུར་བ་ནི་འདིར་ཆོས་ཉིད་ཡིན་ཏེ། དེ་ལ་བརྟེན་པའམ། སོ་སོར་འབྲང་བའམ། རྗེས་སུ་འབྲང་བར་བྱེད་པའོ། །དམ་པ་དམ་པར་གྱུར་པ་ནི་གཙོ་བོ་དག་ལས་གཙོ་བོར་གྱུར་པའོ། །འགྱོད་པ་ནི་བྱས་པ་གཟོ་བ་དང་བསླབ་པའི་ཚིག་གི་འཆིང་བས་བཅིངས་
པར་གྱུར་པ་གང་ཡིན་པ་དེ་ལ་འདིར་འགྱོད་པ་ཡིན་པར་རིག་པར་བྱའོ། །རྒན་ཞུགས་ནི་ཤིན་ཏུ་རྒས་པར་གྱུར་བའོ། །འདུས་བྱས་ཐམས་ཅད་ནི་མི་རྟག་ཅེས་བྱ་བ་ལ་སོགས་པའི་རྣམ་པར་བཤད་པ་ནི་སྔ་མ་བཞིན་དུ་རིག་པར་བྱའོ། །སླད་བཞིན་སླད་བཞིན་ཞེས་བྱ་བ་ནི་སླད་མ་ལས་ཤིན་ཏུ་སླད་བཞིན་དུ་སྟེ།
ཐམས་ཅད་ཀྱི་ཐོག་མར་འཕགས་པ་འོད་སྲུངས་བཞུད་ཅིང་དེ་ནས་དགེ་སློང་གཞན་དང་དེའི་འོག་ཏུ་ཡང་དེ་དག་རྗེས་སུ་འབྲལ་པས་ཞེས་བྱ་བའི་ཐ་ཚིག་གོ། །སངས་རྒྱས་ཀྱི་མཐུ་ཞེས་བྱ་བ་ནི་འདིར་བྱིན་གྱིས་བརླབས་པ་ལ་མཐུར་རིག་པར་བྱ་སྟེ། བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེ་
ཉིད་ཀྱི་ཕྱིར་མངོན་སུམ་དུ་གྱུར་པའི་མཐུར་མི་འཐད་པ་ཡིན་ནོ། །མྱ་ངན་ལས་འདས་པའི་གྲོང་ཁྱེར་དུ་འཇིག་རྟེན་འདྲེན་པར་མཛད་པས་ན་འདྲེན་པའོ། །རྙེད་དཀའ་བ་ཉིད་ཀྱི་ཕྱིར་དང་། མངོན་པར་འདོད་པའི་འབྲས་བུ་སྐྱེད་པར་བྱེད་པའི་རྒྱུ་ཉིད་ཡིན་པའི་ཕྱིར་བཅོམ་ལྡན་འདས་ཀྱི་སྐུ་རིན་པོ་ཆེ་དང་
འདྲ་བས་ན་རིན་པོ་ཆེའི་སྐུ་ཡིན་ནོ། །རྫུ་འཕྲུལ་ཆེན་པོ་གང་ལ་མངའ་བ་དེ་ནི་རྫུ་འཕྲུལ་ཆེན་པོ་ཅན་ནོ། །ཉིད་ཀྱི་སྐུ་སྐྱེས་ཞེས་བྱ་བ་ནི་ཉིད་ཀྱི་སྐུ་ལས་སྐྱེས་པའོ། །ནང་རིམ་སྟེ་ནང་དུ་བགོ་བ་ནི་ཤམ་ཐབས་ཞེས་བྱ་ཞིང་ཕྱི་རིམ་ཆོས་གོས་ཡིན་ནོ། །བཅོམ་ལྡན་འདས་ཡོངས་སུ་མྱ་ངན་ལས་འདས་ཀྱང་
སྐུའི་རིང་བསྲེལ་སྒྲེན་མོར་མ་གྱུར་པ་དང་། གོས་ཚིག་པའི་དྲི་མས་གོས་པར་མ་གྱུར་ཅིག་སྙམ་པ་དེ་བས་ན་ཆོས་གོས་གཉིས་པོ་བཅོམ་ལྡན་འདས་ཀྱི་བྱིན་གྱི་རླབས་ཁོ་ནས་མ་ཚིག་པ་ཡིན་ཏེ། ཆོས་གོས་གཉིས་པོ་མ་ཚིག་པས་ན་བཅོམ་ལྡན་འདས་ལྷག་པར་ངོ་ཚ་དང་ཁྲེལ་ཡོད་པ་དང་ལྡན་

པར་བསྟན་པའི་ཕྱིར་དང་། ངོ་མཚར་བསྟན་པའི་སྒོ་ནས་ཀྱང་སངས་རྒྱས་ཀྱི་བསྟན་པ་ལ་མངོན་པར་མ་དད་པ་དག་དད་པ་བསྐྱེད་པའི་ཕྱིར་དང་། དད་པ་དག་བོགས་དབྱུང་བར་བྱ་བའི་ཕྱིར་ཞེས་བྱ་བ་དེ་ལྟ་བུ་ལ་སོགས་པ་ཕན་ཡོན་ཡིན་པར་རིག་པར་བྱའོ། །འོ་མ་ཅན་གྱི་ཤིང་
བཞི་ཞེས་བྱ་བ་ལ་བཅོམ་ལྡན་འདས་ཀྱི་སྐུ་སྦྱོང་བའི་ས་ཕྱོགས་ཉིད་དུ་སྐྱེས་པ་དེ་ནི་ངོ་མཚར་བསྟན་པ་ལས་འཇིག་རྟེན་པ་དད་པར་འགྱུར་བའི་དོན་ཉིད་དུ་བཅོམ་ལྡན་འདས་ཀྱི་བྱིན་གྱི་རླབས་ཁོ་ན་ལས་དེ་དག་སྐྱེས་པ་ཡིན་ནོ། །བུ་ལུ་ཀ་ལ་སོགས་པ་ཐམས་ཅད་རྒྱལ་རིགས་ཡིན་ལ། ཁྱབ་འཇུག་གླིང་པ་
ནི་བྲམ་ཟེ་ཉིད་ཡིན་ནོ། །མདའ་དང་མཚོན་ཆ་རིག་པ་ནི་མཚོན་ཆ་རིག་པའོ། །གཞན་གྱི་སྡེ་ནི་ཕ་རོལ་པོའི་དཔུང་གི་ཚོགས་ཡིན་ནོ། །བླ་ན་མེད་པའི་བཟོད་པ་དང་ཡང་དག་པར་ལྡན་པ་ཉིད་ཀྱི་ཕྱིར་བཅོམ་ལྡན་འདས་བཟོད་པ་ལ་བཞུགས་པའོ། །བཟོད་པའི་ཡོན་ཏན་གསུང་བའི་སྒོ་ནས་ཕ་རོལ་
པོ་ཡང་བཟོད་པ་ལ་ངེས་པར་སྦྱོར་བར་མཛད་པ་དེ་བས་ན་བཟོད་པའི་བསྔགས་པ་གསུང་ཞིང་བཞུགས་པའོ། །ཆ་བརྒྱད་ཅེས་བྱ་བ་ལ་སོགས་པ་ལ་ཆའི་སྒྲ་ནི་ཚད་མཚོན་པར་བྱེད་པའམ། ཆ་ཉིད་མཚོན་པར་བྱེད་པའོ། །ཀླུའི་རྒྱལ་པོས་མཆོད་པ་ཞེས་བྱ་བ་ནི་ཀྲོ་རྒྱུ་དག་གི་ཆ་གང་ཡིན་པ་དེ་ཀླུའི་རྒྱལ་
པོས་ཕྲོགས་ནས་མཆོད་པ་ཡིན་ནོ། །སུམ་ཅུ་རྩ་གསུམ་པའི་འཇིག་རྟེན་ན་ཞེས་བྱ་བ་ལ་སུམ་ཅུ་རྩ་གསུམ་པའི་ལྷའི་རིས་ན་མཆོད་ཅིང་གསོལ་པ་ཡིན་ནོ། །མཆོད་རྟེན་རྒྱ་ཆེར་བདུན་བརྩིགས་ཏེ་ཞེས་བྱ་བ་ནི་རྒྱལ་པོ་མྱ་ངན་མེད་ཀྱིས་རིང་བསྲེལ་ཡོད་པའི་མཆོད་རྟེན་བདུན་པོ་གང་ཡིན་པ་དེ་དག་
ཐམས་ཅད་བླངས་ནས་ཆོས་ཀྱི་རྒྱལ་པོས་སྟོང་ཕྲག་བརྒྱད་ཅུ་རྩ་བཞི་བྱས་པའི་སྒོ་ནས་འཛམ་བུའི་གླིང་མ་ལུས་པ་རྒྱ་ཆེར་ཁྱབ་པར་བྱས་པ་དེའི་ཕྱིར་དེ་སྐད་ཅེས་བྱའོ། །མཆོད་པ་བྱེད་པ་སྔོན་དུ་སོང་བ་ཅན་གྱིས་འདོད་པའི་འབྲས་བུ་ལ་སོགས་པ་དོན་དུ་གཉེར་བར་བྱེད་པས་ན་དོན་དུ་གཉེར་བ་སྟེ། དོན་དུ་
གཉེར་བ་ནི་དངོས་པོ་ལ་གནས་པ་ཡིན་ལ། དོན་དུ་གཉེར་བའི་དངོས་པོ་བཅོམ་ལྡན་འདས་ཀྱི་སྐུ་གདུང་གི་མཆོད་རྟེན་ཡིན་པ་དེ་བས་ན་ས་གཞི་སྟེ་ས་ཕྱོགས་བརྒྱན་པ་ཡིན་ནོ། །རབ་ཏུ་རི་མོར་བྱས་པ་ཞེས་བྱ་བ་ནི་ལེགས་པར་མཆོད་པའོ། །མཆོད་ཅེས་བྱ་བ་ནི་བཅོམ་ལྡན་འདས་ཀྱི་མཆོད་རྟེན་ལྷའི་དབང་

པོ་ལ་སོགས་པས་མཆོད་པའོ། །གནོད་སྦྱིན་ཞེས་བྱ་བ་ནི་གསང་བའི་མིང་གི་རྣམ་གྲངས་ཡིན་ནོ། །ཐུགས་རྗེས་སྤྱོད་ཅིང་ཐ་སྙད་དུ་མཛད་ནས་ཐུགས་རྗེར་ལྡན་པའོ། །ཤེས་རབ་མཆོག་ཅེས་བྱ་བ་ནི་ཐུགས་མཆོག་ཏུ་གྱུར་པའོ། །མྱ་ངན་འདས་ཞེས་བྱ་བ་ནི་ཞི་བར་གྱུར་པའོ། །བཅོམ་ལྡན་འདས་ཀྱི་དགོངས་
པ་དང་རྗེས་སུ་མཐུན་པར་མིང་དང་ཚིག་དང་ཡི་གེའི་ཚོགས་དག་མཐར་གྱིས་རྣམ་པར་བཀོད་ཅིང་བརྗོད་པ་ནི་བསྡུ་བ་ཡིན་ནོ། །དུ་བའི་མཐའ་ཅན་དུ་འགྱུར་རོ་ཞེས་བྱ་བ་ལ་དུ་བའི་མཐའ་ནི་དུ་བའི་མཐའ་ཡིན་ལ་དུ་བའི་མཐའ་གང་ལ་ཡོད་པ་དེ་ནི་དུ་བའི་མཐའ་ཅན་དུ་གྱུར་པ་སྟེ་བཀའ་ཡིན་ནོ། །དེའི་དོན་ཇི་སྲིད་
དུ་དུ་བ་རྒྱུན་མི་འཆད་པར་འབྱུང་བ་དེ་སྲིད་དུ་མི་དམིགས་པར་རྗེས་སུ་དཔག་པར་བྱ་ཞིང་དུ་བ་ཟློག་པ་ན་མེ་ཡུན་རིང་པོར་གནས་པར་མི་འགྱུར་བ། དེ་བཞིན་དུ་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་བཀའ་ཡང་བསྡུ་བ་མ་བྱས། དེའི་ཕྱིར་བཅོམ་ལྡན་འདས་ཀྱི་བསྟན་པ་ཡུན་རིང་
དུ་གནས་པར་མི་འགྱུར་ཏེ། བསྟན་པ་བཀའི་བདག་ཉིད་ཡིན་པའི་ཕྱིར་དང་། །ཁོང་དུ་ཆུད་པ་ནི་བཀའི་རྒྱུ་ཅན་ཞེས་བྱ་བ་ཡིན་ནོ། །ཤིན་ཏུ་མཐར་གྱུར་ཅིང་ཁྱད་པར་ཅན་དུ་ཕྱིན་པའི་སྒོ་ནས་མཐར་ཐུག་པའི་རྣམ་པ་འདི་ལ་ཡོད་པའི་ཕྱིར་མུར་ཐུག་པའི་མཐའ་ཅན་ཏེ་བསམ་གཏན་བཞི་པའི་ཆེན་པོའི་
ཆེན་པོའོ། །གདུལ་བྱ་ལ་ལྟོས་པ་ཞེས་བྱ་བ་ནི་གདུལ་བྱའི་སྐྱེ་བོ་ལ་ཐུགས་བརྩེ་བའོ། །འཐབ་མོ་ནི་གཟུགས་དང་སེམས་ཀྱི་སྒོ་ནས་སྨྲ་བ་དང་ཕྱིར་སྨྲ་བའོ། །མཚང་འདྲུ་བ་ནི་སྦ་བར་བྱ་བའི་དངོས་པོ་བརྗོད་པའི་སྒོ་ནས་ཕན་ཚུན་ངོ་ཚ་སྐྱེད་པར་བྱེད་པའོ། །ཚར་གཅོད་པ་ནི་ལན་དུ་བྱེད་པའི་
དངོས་པོ་ཡིད་ཀྱིས་གཟུང་བའོ། །ཤགས་འགྱེད་པ་ནི་འོག་གཟུ་ལ་སོགས་པ་ལ་རིགས་པའི་ཐ་སྙད་དུ་བྱེད་པའོ། །ལོག་པར་བྱས་པ་ནི་རྣམ་པ་གཞན་དུ་བསྟན་པའི་སྒོ་ནས་ལོག་པར་བྱེད་པའོ། །གཙེས་པ་ནི་འདིར་རྣམ་པར་འཚེ་བའི་རྣམ་གྲངས་ཡིན་ནོ། །བརྙས་པ་ནི་ཚར་གཅོད་པའོ། །
མི་ཤེས་པ་ཁོ་ན་མུན་པ་ཡིན་པས་ན་མི་ཤེས་པའི་མུན་པ་སྟེ། མི་ཤེས་པའི་མུན་པ་དེས་གཡོགས་ཤིང་བཀབ་པར་གྱུར་པ་གང་ཡིན་པ་དེ་ལ་དེ་སྐད་ཅེས་བྱའོ། །ཆོས་དང་འདྲ་བ་ཞེས་བྱ་བ་ནི་ཆོས་དང་ཚུལ་འདྲ་བའི་ཆོས་མ་ཡིན་པའོ། །བྲེ་མོའི་གཏམ་ནི་རྒྱལ་པོ་ལ་སོགས་དོན་དུ་མི་འགྱུར་བའི་

གཏམ་མོ། །ཐེ་ཚོམ་གྱིས་ལམ་གཉིས་པ་དེ་ལ་འཇུག་པའི་བློ་གང་ལ་ཡོད་པ་དེ་ལ་དེ་སྐད་ཅེས་བྱའོ། །སེར་སྣ་ཁོ་ན་དྲི་མ་ཡིན་ཏེ། དེས་ཟིལ་གྱིས་མནན་པ་དེའི་ཕྱིར་དྲུག་གིས་མགུ་བར་བྱ་བའི་ཆོས་ལས་ལྡོག་པ་ཡིན་ནོ། །སྦྱངས་པའི་ཡོན་ཏན་ཡང་དག་པར་བླངས་པ་ནི་བསོད་སྙོམས་
དང་དགོན་པ་པ་ལ་སོགས་པ་དྲི་མ་མེད་པའི་ཡོན་ཏན་ཡང་དག་པར་བླངས་པའོ། །བས་མཐའི་གནས་མལ་ནི་སྐྱེ་བོ་ལྷགས་པ་མེད་ཅིང་ཤིན་ཏུ་དབེན་པར་གྱུར་པའོ། །སྙིང་རྗེ་ཆེན་པོ་ལ་གོམས་པ་ནི་སྙིང་རྗེ་ཆེན་པོ་ལ་གོམས་པ་སྟེ། དེས་འཇུག་ཅིང་རྒྱུ་བའི་ཀུན་དུ་སྤྱོད་པའི་ལུས་དང་ངག་དང་ཡིད་ཀྱིས་
འཇུག་པ་གང་ལ་ཡོད་པ་དེ་ནི་སྙིང་རྗེ་ཆེན་པོ་ལ་གོམས་པས་འཇུག་པའི་ཀུན་དུ་སྤྱོད་པ་ཅན་ནོ། །འགྲོ་བ་མ་ལུས་པའི་དྲོད་འཛིན་པ་སྟེ་བཅོམ་ལྡན་འདས་བླ་ན་མེད་པའི་མྱ་ངན་ལས་འདས་པ་དགེ་བའི་ཕྱོགས་ཉིད་དུ་མངོན་དུ་གཤེགས་པ་ཉིད་ཡིན་པའི་ཕྱིར་རོ། །སྟོབས་བཅུ་དང་ལྡན་པ་བཅོམ་ལྡན་
འདས་ཀྱི་སྐུ་མི་རྟག་པ་ཉིད་ཀྱིས་གནོན་ཅིང་ཁྱབ་པ་དང་ཟིལ་གྱིས་གནོན་པའོ། །མི་ཤེས་པ་ཉིད་སེལ་བར་མཛད་པ་དེའི་ཕྱིར་སེམས་ཅན་ཐམས་ཅད་སད་པར་མཛད་པ་ཞེས་བསྟན་ཏོ། །མགོན་པོ་ནི་གཙོ་བོར་གྱུར་པའོ། །ལྷའི་དགྲ་ནི་ལྷ་མ་ཡིན་གྱི་དབང་པོའོ། །སུམ་ཅུའི་དབང་ཕྱུག་ནི་བརྒྱ་
བྱིན་ནོ། །དཔག་བསམ་གྱི་ཤིང་ལྟ་བུ་ནི་བཅོམ་ལྡན་འདས་ཏེ། དེ་ལ་མངོན་པར་དད་པ་དག་ལ་མངོན་པར་འདོད་པའི་འབྲས་བུ་སྩོལ་བར་མཛད་པ་ཉིད་ཀྱི་ཕྱིར་རོ། །དྲན་པ་ཡང་དག་བྱང་ཆུབ་ཀྱི་ཡན་ལག་ལ་སོགས་པ་ནི་མེ་ཏོག་དང་འདྲ་བ་ཡིན་ནོ། །རྒྱུན་དུ་ཞུགས་པའི་འབྲས་བུ་ལ་སོགས་པ་
དག་ནི་འབྲས་བུ་བཟང་པོའོ། །བསྐྱོད་པ་ནི་འཕངས་པའམ་གཡོས་པར་གྱུར་པའོ། །བློ་ལྡན་ཞེས་བྱ་བ་ནི་སྟོན་པ་ཐམས་ཅད་མཁྱེན་པའི་ཡེ་ཤེས་དང་ལྡན་པའི་ཉན་ཐོས་ཀྱི་དགེ་འདུན་ནོ། །བསྟན་མཆོག་ཅེས་བྱ་བ་ལ་སོགས་པ་ལ་འཕགས་པ་ཤཱ་རིའི་བུ་དང་། མཽད་གལ་གྱི་བུ་
ཆེན་པོ་ལ་སོགས་པ་ཉན་ཐོས་ཆེན་པོ་འགའ་ཞིག་རབ་ཏུ་ཞི་བར་གྱུར་ཅིང་ཁ་ཅིག་འགྲོ་བར་གྱུར་པའོ། །གནས་ཤིང་གནས་པས་ཞེས་བྱ་བ་ནི་དམ་པའི་ཆོས་བསྡུས་ནས་མཛེས་པའི་རྣམ་པར་གནས་པས་གཞག་པར་བྱ་བ་ཡིན་ནོ། །བཅོམ་ལྡན་འདས་བླ་ན་མེད་པའི་ཡེ་ཤེས་སྒྲོན་མ་མཛད་པ་ཉིད་

ཀྱི་ཕྱིར་འགྲོ་བ་མ་ལུས་པའི་སྒྲོན་མ་ལྟ་བུ་ཡིན་པར་རིག་པར་བྱའོ། །མཆོག་ཏུ་ཞེས་བྱ་བ་ནི་ཡོན་ཏན་གཙོ་བོར་གྱུར་པའི་ཕྱིར་རོ། །ཆོས་གོས་རྣམ་གསུམ་ནི་དངོས་པོ་རྣམ་པ་གསུམ་མོ། །བསམ་པ་ཀུན་གྱིས་ཞེས་བྱ་བ་ནི་རྣམ་པ་ཀུན་ནས་ཉེས་པའི་རྣམ་པ་ཀུན་གྱིས་སོ། །ཆུ་བོའི་རྒྱུན་བཞིན་འབབ་པ་ཞེས་
བྱ་བ་ནི་འཇིག་རྟེན་སྐྱོ་བ་བསྐྱེད་པར་བྱ་བའི་དོན་དུ་འཕགས་པ་བ་ལང་བདག་གིས་བྱིན་གྱིས་བརླབས་པ་ཁོ་ན་ལས་ཆུའི་རྒྱུན་གྱི་ཚིགས་སུ་བཅད་པ་ཐ་དད་པ་བརྗོད་པ་ཡིན་ནོ། །དུས་ངན་ཞེས་བྱ་བ་ལ་སོགས་པ་ལ་དུས་རྩོད་པའི་དུས་ཀྱི་ཉེས་པ་ཉམས་པ་ཉིད་དང་། ཚུལ་མ་ཡིན་པ་ཉིད་དུ་གྱུར་པའི་ཕྱིར་
རོ། །ལས་ནས་ནི་བདག་གིར་བྱེད་པ་དང་ལྡན་ཞེས་བྱ་བ་ལ་སྐྱེ་བོ་ལ་རག་ལས་པར་གྱུར་པའོ། །འགྲོ་བའི་མར་མེ་ནི་བཅོམ་ལྡན་འདས་ཡིན་ལ། ནུབ་པར་གྱུར་པ་ནི་ཞི་བར་གྱུར་པ་ཡིན་ནོ། །ཇི་ཞིག་བྱས་ནས་ཤེ་ན། འགྲོ་བ་ཀུན་འཇུག་ཅེས་བྱ་བ་ལ་སོགས་པ་སྨོས་ཏེ། འགྲོ་བ་སྟེ་སྲོག་ཆགས་
ཀྱི་ཚོགས་འཇུག་ཅིང་འབྱུང་བའམ། རྣམ་པ་མཁྱེན་ནས་སོ། །འདུས་བྱས་ཕུང་པོ་ཞེས་བྱ་བ་ནི་འདུས་བྱས་ཀྱི་ཚོགས་སོ། །སྐད་ཅིག་མར་ཡང་འཇིག་ཅེས་བྱ་བ་ནི་མྱུར་དུ་འཇིག་པ་ཅན་ནོ། །སྐྱེ་བ་ལ་སོགས་པའི་སྡུག་བསྔལ་ཁོ་ན་ཕོངས་པ་ཡིན་ཏེ། དེ་དང་ལྡན་པར་གྱུར་པའོ། །བྱེད་དོ་ཞེས་
བྱ་བ་ནི་རྟག་པ་སྟེ། རང་དབང་ཅན་ནང་ན་བྱེད་པའི་སྐྱེས་བུ་བདག་ཏུ་མངོན་པར་རྒྱལ་བ་ཞེས་བྱ་བ་ཡོད་དེ། བདག་ཅེས་བྱ་བ་ནི་ང་རྒྱལ་དེ་ལྟ་བུ་གང་ལ་ཡོད་པའི་སོ་སོའི་སྐྱེ་བོ་དེ་ནི་དོན་མེད་པ་ཅན་ཡིན་ནོ། །བག་ཡོད་བྱ་ཞེས་བྱ་བ་ནི་དགེ་བའི་ཆོས་བསྒོམ་པ་ལ་གཞོལ་བའི་ཤེས་ཀྱིས་གནས་པར་བྱ་
བའོ། །བསོད་ནམས་རབ་ཏུ་བྱུང་བ་ནི་སྦྱིན་པའི་རང་བཞིན་དང་། ཚུལ་ཁྲིམས་ཀྱི་རང་བཞིན་ནམ་ལུས་ལ་སོགས་པའི་སེམས་ལེགས་པར་སྤྱད་པའོ། །ཅིའི་ཕྱིར་དགེ་བའི་ཆོས་བསྒོམ་པ་ལ་གཞོལ་བར་བྱ་ཞེ་ན། འབྱུང་པོ་མང་པོ་ཞེས་བྱ་བ་ལ་སོགས་པ་ལ་སྨོས་ཏེ། འབྱུང་པོ་མང་པོ་
སྲོག་ཆགས་ཀྱི་ཚོགས་སོང་བ་སྟེ། འགའ་ཞིག་འདས་པའི་གནས་སྐབས་ཐོབ་པར་གྱུར་པ་ན་འགའ་ཞིག་ཕྱིར་སོང་བར་གྱུར་པའོ། །གཡོ་ཞེས་བྱ་བ་ནི་དཔལ་གྱི་འབྱོར་པ་གཡོ་བར་གྱུར་པའོ། །བ་ལང་གི་བདག་པོ་ནི་བ་ལང་བདག་ཡིན་ལ། དེའི་ཕྱི་ནས་ཞེས་བྱ་བ་ནི་བཅོམ་ལྡན་

འདས་ཀྱི་སླད་བཞིན་མཆི་བའོ། །ཇི་ཞིག་བྱས་ནས་ཤེ་ན། ཐུབ་པ་འདི་ལ་སློབ་མཆོག་ཅེས་བྱ་བ་ལ་སོགས་པ་སྟེ། སློབ་མཆོག་ནི་བཅོམ་ལྡན་འདས་ཀྱི་སློབ་མ་ནི་འཕགས་པ་འོད་སྲུངས་ལ་སོགས་པའོ། །རང་གི་དགོས་པ་ཞེས་བྱ་བ་ནི་ཉོན་མོངས་པ་མ་ལུས་པ་སྤངས་
པའོ། །རབ་ཏུ་མོས་པ་ནི་སློབ་མ་གཞན་དག་པས་ལྷག་པར་མོས་པའོ། །དེའི་མོས་པ་གང་གིས་ལྷག་པ་ཡིན་ཞེ་ན། བླ་མ་ལ་དད་ཅེས་བྱ་བ་སྨོས་ཏེ། བླ་མ་སྟེ་བཅོམ་ལྡན་འདས་དེའི་ཡུལ་ལ་དད་པ་དེས་སོ། །ཉེར་ཞི་ཞེས་བྱ་བ་ནི་ཉེ་བར་ཞི་བར་གྱུར་པའོ། །འཕགས་པའི་ཚུལ་གྱིས་ཞེས་
བྱ་བ་ནི་ལེགས་པར་སྤྱོད་པའོ། །ཆོས་ཀྱི་མིག་ཅན་ནི་བཅོམ་ལྡན་འདས་ཀྱིས་ཉིད་ཀྱི་མགུར་ནས་གསུངས་པའི་ཆོས་ཀྱི་མཚན་ཉིད་གང་ཡིན་པ་དེ་དང་འདྲ་བར་རོ། །བཅོམ་ལྡན་འདས་ཀྱིས་མ་ག་དྷཱར་ཆོས་ཀྱི་འཁོར་ལོ་བསྐོར་བ་དེའི་ཕྱིར་དེ་ལ་ཆོས་ཀྱི་སྐུ་མངོན་པར་བསྒྲུབས་ནས་ཞེས་བྱ་བ་སྨོས་
སོ། །འཚོ་བའི་ཡོ་བྱད་ནི་དགེ་སློང་དང་མཐུན་པའི་བཟའ་བ་དང་བཏུང་བ་ལ་སོགས་པའོ། །རྣམ་པར་ཤེས་པ་ཞེས་བྱ་བ་ནི་ཁྱད་པར་དུ་ཤེས་པས་ན་རྣམ་པར་ཤེས་པ་སྟེ། དཔེར་ན་མངོན་པར་འདོད་པའི་བྱ་བ་བྱེད་པའི་ཆོ་ག་ལ་མཁས་པ་ལྟ་བུ་སྟེ། གསོལ་བ་དང་གཉིས་ཀྱི་ལས་ཀྱིས་བློ་
མཐུན་པ་སྦྱིན་པར་བྱའོ། །ཇི་ལྟར་འདོད་པར་རྒྱལ་པོའི་ཁབ་ཏུ་འགྲོའོ་ཞེས་བྱ་བ་འདིས་ནི་འགྲོ་བ་དང་བཅས་པའི་འགྲོ་བ་བསྟན་ཏོ། །རྟག་ཏུ་མཉམ་པར་གཞག་པ་ཞེས་བྱ་བ་ནི་མི་བརྗེད་པའི་ཆོས་ཅན་ཡིན་པ་དེ་བས་ན་བྱ་བ་ལ་རྨོངས་པ་མེད་པ་ཡིན་ནོ། །རལ་བ་ནི་ཕྱོགས་ཀྱི་ཕྱོགས་
གཅིག་རལ་བའི་ཕྱིར་རོ། །གས་པ་ནི་རྣམ་པར་རིང་པོར་སྦྱོར་བའི་ཕྱིར་གས་པ་སྟེ། རྩིག་པ་ལ་སོགས་པའི་དངོས་པོ་ཡིན་ནོ། །ཚེ་དང་ལྡན་པ་མ་འགགས་པ་དགོངས་ཤིག་ཅེས་བྱ་བ་ལ་སོགས་པ་ལ། འཕགས་པ་འོད་སྲུངས་ཆེན་པོ་བདག་ཉིད་ཀྱིས་མཁྱེན་བཞིན་དུ་འཕགས་པ་མ་འགགས་པ་ལ་
བསྐུལ་བ་ནི་དབང་པོར་བསྟན་པའི་དོན་དུ་བྱས་པ་ཡིན་ནོ། །སྙིང་པོ་མེད་པ་ནི་མཆོག་མ་ཡིན་པའོ། །འཆལ་བའི་ཚུལ་ཁྲིམས་ཀྱི་དྲི་མ་བསལ་བའི་ཕྱིར་དག་པའོ། །ཚུལ་ཁྲིམས་ཁ་ན་མ་ཐོ་བ་མེད་པ་དང་ལྡན་པ་ཉིད་ཀྱི་ཕྱིར་གཙང་བའོ། །མི་སློབ་པའི་ལམ་དང་ལྡན་པའི་ཕྱིར་སྙིང་པོ་དང་ལྡན་པའོ། །

དེ་ཉིད་ཀྱི་ཕྱིར་བླ་ན་མེད་པའི་བསོད་ནམས་ཀྱི་ཞིང་སྟེ། འཇིག་རྟེན་གྱི་སྦྱིན་གནས་སུ་གྱུར་པ་ཡིན་ནོ། །སྐྱོ་བ་ནི་ཚར་གཅོད་པའོ། །གནད་ལ་བསྣུན་པ་བཞིན་དུ་ཞེས་བྱ་བ་ནི་གནད་ལ་བསྣུན་པ་དང་འདྲ་བར་སེམས་སྡུག་བསྔལ་དང་ལྡན་པར་གྱུར་པའོ། །ཚུལ་ཁྲིམས་ཀྱིས་རྒུད་པ་ལ་སོགས་པའི་རྣམ་པར་
བཤད་པ་ནི་སྔ་མ་བཞིན་ནོ། །བདག་གིས་ཉེས་པར་བྱས་པ་མེད་དོ་ཞེས་བྱ་བ་ནི་བདག་གིས་ཉེས་པར་བྱས་པ་ཅུང་ཟད་ཙམ་ཡང་མེད་པའི་ཕྱིར་རོ། །ཚུལ་ཤིང་ལོང་ཤིག་ཅེས་བྱ་བ་ལ་གལ་ཏེ་ཁྱོད་ཉེས་པ་མེད་པ་ཡིན་ན་ཚུལ་ཤིང་དེ་ལོང་ཤིག་པའོ། །བདེན་པ་སྨྲ་བ་ཞེས་བྱ་བ་ནི་དེ་ཁོ་ན་ཉིད་སྨྲ་བའི་ངང་ཚུལ་
ཅན་ནོ། །ཕན་པའི་བདེ་བའོ། །ལྟོས་པ་མེད་པར་སྨྲ་བ་ཞེས་བྱ་བ་ནི་ཞུམ་པ་མེད་པར་སྨྲ་བའི་ངང་ཚུལ་ཅན་ནོ། །ངོ་ཚ་མེད་པས་ནི་མ་ཡིན་ཞིང་ཞེས་བྱ་བ་ནི་ཁ་ན་མ་ཐོ་བ་ཀུན་དུ་སྤྱོད་པའི་ངོ་ཚ་དང་བྲལ་བས་ནི་མ་ཡིན་ནོ། །རྣམ་པར་རྒལ་བས་ནི་མ་ཡིན་ཏེ་ཞེས་བྱ་བ་ནི་བསླབ་པ་ལ་གཡེལ་བའི་བསམ་
པས་ནི་མ་ཡིན་ནོ། །ཆོས་ཀྱི་སྐུ་ལ་གནོད་པར་བྱེད་ཅིང་ཞེས་བྱ་བ་ལ་ཆོས་ཀྱི་སྐུ་ནི་བཅོམ་ལྡན་འདས་ཏེ། འཕགས་པའི་ལམ་གྱི་རང་བཞིན་ཡིན་ཏེ། བུད་མེད་ཀྱི་ཡུལ་ལ་རབ་ཏུ་བྱུང་བ་ལས་ཀྱང་ཚུལ་ཁྲིམས་འཆལ་བའི་རྒྱུའམ། ཡང་དང་ཡང་དུ་གོམས་པར་བྱེད་པས་ན་འཕགས་པའི་
ལམ་དེ་ལ་གནོད་པ་ཉིད་དུ་འགྱུར་ཞིང་། བུད་མེད་ཀྱི་ཡུལ་ཡོན་ཏན་གྱི་ཞིང་ཉམས་པར་བྱེད་པའི་སེར་བ་ལྟ་བུ་ཡིན་ནོ། །ལོ་སྟོང་ཚང་བར་གནས་པའི་ཚིག་ནི་དྲི་མ་ཐམས་ཅད་དང་བྲལ་བའི་གནས་སྐབས་སྟོན་པར་བྱེད་པ་དང་། འཕགས་པའི་གང་ཟག་བརྒྱད་པོ་ཤིན་ཏུ་རྒྱས་པར་འགྱུར་བ་སྟོན་པར་བྱེད་
པ་ཡིན་པར་རིག་པར་བྱའོ། །ལྷག་མ་ཅུང་ཟད་ཙམ་ཞེས་བྱ་བ་ནི་ཡོན་ཏན་གྱི་ཁྱད་པར་ཉུང་ངུ་དང་ལྡན་པ་ཡིན་ནོ། །ཉེས་པ་ཆུང་བ་ཞེས་བྱ་བ་ནི་ཉོན་མོངས་པས་བྱས་པའི་ཉེས་པ་ཆུང་བའོ། །འདོད་ཆགས་ཆུང་བ་ཞེས་བྱ་བ་ལ་སོགས་པ་ལ་ཀུན་དུ་སྤྱོད་པ་ཆུང་བ་ལས་འདིར་འདོད་ཆགས་ལ་སོགས་
པ་དག་ཆུང་བ་ཡིན་པར་རིག་པར་བྱའི་སྤངས་པ་ཆུང་བ་ཉིད་ནི་མ་ཡིན་ནོ། །ཚུལ་ཤིང་ཞོག་ཤིག་ཅེས་བྱ་བ་ལ་བདག་ལ་ཉེས་པ་མེད་པའི་ཕྱིར་བདག་ཉིད་ཀྱིས་ཚུལ་ཤིང་བླངས་པ་ཡིན་ན། ད་ལྟར་ཁྱོད་ཉེས་པ་དང་བཅས་པ་དེའི་ཕྱིར་ཚུལ་ཤིང་ཞོག་ཤིག །གང་ཁྱོད་ལ་བཅོམ་ལྡན་འདས་ཀྱིས་

སྤྱོས་ཏེ་ཞེས་བྱ་བ་འདི་ནི་འཆར་ཀའི་མདོ་ལས། ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་བོས་ཏེ། ཚེ་དང་ལྡན་པ་དག་དགེ་སློང་འདི་ནི་ཚུལ་ཁྲིམས་དང་ལྡན་ཞིང་ཤེས་རབ་དང་ལྡན་པ་སྟེ། དེ་ནི་ཡང་དང་ཡང་དུ་འདུ་ཤེས་རིག་པས་འགོག་པ་ལ་སྙོམས་པར་ཞུགས་པ་
དང་ལྡང་བ་ནས་ཁམ་གྱི་རྣམ་པ་ཟ་བའི་ལྷ་ལས་ཤིན་ཏུ་འདས་ནས་ཡིད་ཀྱི་རང་བཞིན་གྱི་ལུས་ཅན་ལྷ་གཞན་དུ་སྐྱེ་བར་འགྱུར་རོ། །དེ་དེར་ཡང་དང་ཡང་དུ་འདུ་ཤེས་རིག་པས་འགོག་པ་ལ་སྙོམས་པར་ཞུགས་པ་དང་ལྡན་པ་ནས་འཕགས་པ་འཆར་ཀས་འཕགས་པ་ཤཱ་རིའི་བུའི་ཚིག་ལན་གསུམ་གྱི་བར་
དུ་ཁྱད་དུ་བསད་པའི་བར་དང་དེ་ནས་བཅོམ་ལྡན་འདས་ཀྱི་ཐད་དུ་ཕྱིན་ནས་འཕགས་པ་ཤཱ་རིའི་བུས་ཡང་དེ་ཉིད་གསོལ་བ་དང་འཆར་ཀས་དེ་བཞིན་དུ་ཁྱད་དུ་བསད་དོ། །དེ་ནས་ཚེ་དང་<ལྡན་‚ལྡན་པ་>ཤཱ་རིའི་བུ་ཅང་མི་སྨྲ་བར་འདུག་པ་ནས་བཅོམ་ལྡན་འདས་ཀྱིས་འཕགས་པ་ཀུན་དགའ་བོ་སྐྱེས་བུ་རྨོངས་པ་
ཁྱོད་སྙིང་རྗེ་དང་ལྡན་དུ་ཟིན་ཀྱང་དགེ་སློང་གནས་བརྟན་ལ་རྩོད་པ་སྐྱེད་པར་བྱེད་ཅེས་བྱ་བའི་སྐབས་དེ་ལ་ཀུན་དགའ་བོས་འཕགས་པ་དཔེ་ཅན་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དཔེ་ཅན་འདིར་སྨྲས་པ། དེ་ནི་གཞན་གྱིས་བྱས་པ་གང་ཡིན་པ་དེ་ལ་གཞན་དུ་སྨྲས་པ་དེ་བས་ན་ཞེས་བྱ་བའི་བར་དུ་
འབྱུང་བ་ཡིན་ནོ། །རྐང་པས་བརྫིས་སོ་ཞེས་བྱ་བ་ནི་ཐ་ག་པས་ཕུལ་བའི་གོས་ཟུང་ལའོ། །བུད་མེད་ཀྱི་ཡུལ་ལ་གསང་བའི་མཛོད་ཀྱི་སྦུབས་སུ་ནུབ་པ་བསྟན་ཏོ་ཞེས་བྱ་བ་ནི་ཡོངས་སུ་མྱ་ངན་ལས་འདས་པའི་གནས་སྐབས་གྱད་ཀྱི་བུ་མོ་དག་ལ་བསྟན་ཏོ་ཞེས་བརྗོད་དོ། །བཅོམ་ལྡན་འདས་
ཀྱི་སྐུ་བུད་མེད་ཀྱི་ཡུལ་ལ་བསྟན་ནས་ཞེས་བྱ་བ་ནི་འདི་ལ་ཡང་ཡོངས་སུ་མྱ་ངན་ལས་འདས་པའི་སྐབས་དེ་ཉིད་གྱད་ཀྱི་བུ་མོ་དག་ལ་བསྟན་ཏོ་ཞེས་བརྗོད་དོ། །སྐྱབས་མེད་པ་ཞེས་བྱ་བ་ལ་སོགས་པ་ལ་སྡུག་བསྔལ་ལས་ཡོངས་སུ་སྐྱོབ་པ་མེད་པའི་ཕྱིར་སྐྱབས་མེད་པའོ། །ཆོས་དང་ལྡན་པའི་
གནས་མེད་པའི་ཕྱིར་གནས་མེད་པའོ། །ཐེ་ཚོམ་གཅོད་པར་བྱེད་པ་བླ་ན་མེད་པའི་ཕྱིར་སྣང་བ་མེད་པའོ། །ཆད་པས་གཅད་པ་ཞེས་བྱ་བ་ནི་ཆད་པས་གཅད་པའམ། ཚར་གཅད་པར་བྱ་བ་ལ་བདག་ཅག་གི་བསྟན་པའི་ལས་སུ་བྱ་བ་ལ་འཇུག་པར་བྱའོ། །རབ་ཏུ་སྦྱོར་ཞེས་བྱ་བ་ནི་ལམ་

བསྒོམ་པའི་བྱ་བ་བྱེད་པའོ། །ཤིང་དྲུང་ཞེས་བྱ་བ་ལ་སོགས་པ་ལ་ཤིང་དྲུང་ངམ་ཐིབས་པོ་དང་བཅས་པའི་ས་ཕྱོགས་སུ་ཡང་དག་པར་གནས་པས་སོ། །མྱ་ངན་ལས་འདས་པའི་སེམས་ལས་བསྐྱེད་པ་ནི་རང་ཉིད་ཀྱིས་ཉམས་སུ་མྱོང་བའི་སྒོ་ནས་ཉོན་མོངས་པ་ཐམས་ཅད་སྤངས་པ་ཞེས་བྱ་བ་ཕུང་པོ་
ལྷག་མ་དང་བཅས་པའི་མྱ་ངན་ལས་འདས་པ་ལ་སེམས་བསྐྱེད་པའམ་མངོན་སུམ་དུ་བྱའོ། །བག་མེད་མ་མཛད་ཅེས་བྱ་བ་ནི་མཆོག་ཏུ་བག་མེད་པར་མ་གྱུར་ཅིག་པའོ། །གཽ་ཏ་མ་ཞེས་བྱ་བ་ནི་རིགས་ཀྱི་མིང་ལས་འབོད་པའོ། །བསྒོམས་ཞེས་བྱ་བ་ནི་ཉོན་མོངས་པའི་ལྷག་མ་སྤང་བར་བྱ་བའི་ཕྱིར་
བརྩོན་པར་བྱེད་པའོ། །ཞི་བའི་གོ་འཕང་ལ་རེག་གྱུར། །ཞེས་བྱ་བ་ནི་མི་སློབ་པའི་ཡེ་ཤེས་ཀྱིས་བདེན་པ་བཞིའི་གོ་འཕང་མཐོང་བར་འགྱུར་བའོ། །འདོད་པའི་རྣམ་པར་རྟོག་པ་ལ་སོགས་པས་སེམས་དབང་དུ་བྱས་པ་ཉིད་ཀྱི་ཕྱིར་རང་གི་བྱ་བ་བྱེད་པའི་ངང་ཚུལ་ཅན་གྱི་དྲན་པ་ཉུང་ཟད་ཀྱང་མེད་པ་དེའི་ཕྱིར་
དྲན་པ་ཉམས་པ་ཞེས་བྱའོ། །སྔ་ཕྱི་དྲན་པའི་དུས་དང་བྲལ་བས་རིད་པའི་རྒྱུད་དེ། སེམས་ཀྱི་རྒྱུད་གང་ལ་ཡོད་པ་དེ་ནི་རིད་པའི་རྒྱུད་ཅན་གྱི་ཞེས་བྱའོ། །སེང་གེའི་ཁྲིའི་སྟེང་དུ་སྣམ་སྦྱར་བཏིང་བ་ནི་བཅོམ་ལྡན་འདས་དང་མདོ་སྡེའི་སྡེ་སྣོད་སྨྲ་བ་པོ་དེ་ལ་མཆོད་པར་བྱ་བའི་ཕྱིར་རོ། །མི་གཡོ་བ་ནི་མི་ལྡེག་པ་སྟེ།
རྒྱ་མཚོ་ཟབ་མོ་ཡང་ཡིན་ལ་མི་གཡོ་བ་ཡང་དེ་ཡིན་པས་ན་རྒྱ་མཚོ་ཟབ་མོ་མི་གཡོ་བ་ལྟ་བུའི་འཁོར་རྣམས་ཡིན་ལ། འདིར་ཡོན་ཏན་གྱི་སྒོ་ནས་ཟབ་པ་ཉིད་ཡིན་པར་རིག་པར་བྱའོ། །ཆོས་འཇིག་རྟེན་གསུམ་གྱིས་མཆོད་ཅིང་རྗེད་ཅེས་བྱ་བ་ལ་འཇིག་རྟེན་གསུམ་ནི་འདོད་པ་དང་། གཟུགས་དང་
གཟུགས་མེད་པའི་འཇིག་རྟེན་ནམ་མི་དང་འདོད་པ་ན་སྤྱོད་པ་དང་། །གཟུགས་ན་སྤྱོད་པའི་ལྷ་ཉིད་དམ། མི་དང་ཀླུ་དང་ལྷའི་འཇིག་རྟེན་དག་ཡིན་ནོ། །ཁྱེད་རྣམས་ཞེས་བྱ་བ་ནི་ཁྱེད་རྣམས་ཀྱི་ནང་ནས་གང་གུས་པར་ཉན་པ་དེ་དག་བསམས་ཤིང་མངོན་པར་འདོད་པའི་བདེ་བར་འགྱུར་རོ། །ཤིན་ཏུ་
བདེ་བ་ཉིད་ཀྱི་ཕྱིར་འཁོར་བ་ལས་སྙིང་པོའི་མཆོག་ཅེས་བསྟན་ཏོ། །རྟག་པ་ཞེས་བྱ་བ་ནི་མྱ་ངན་ལས་འདས་པའི་བདེ་བ་ཉིད་ཡིན་པའི་ཕྱིར་བརྟན་པ་སྟེ། གཅིག་ཏུ་བརྟེན་ཅིང་གསལ་བའོ། །བཅོམ་ལྡན་འདས་ཀྱི་ཡུལ་ལ་དྲན་པ་ནི་སངས་རྒྱས་རྗེས་སུ་དྲན་པ་སྟེ། དེས་སྒྲིབ་པ་དང་བྲལ་བའི་ཡིད་རབ་

ཏུ་སད་པ་གང་ལ་ཡོད་པ་དེ་ནི་ཡིད་སད་པར་བྱེད་པ་ཅན་ནོ། །ཁྱབ་པ་ནི་ཕྱོགས་རྣམ་པར་ཁྱབ་པར་བྱེད་པའི་ངང་ཚུལ་ཅན་ནོ། །འདི་སྐད་བདག་གིས་ཐོས་པ་ཞེས་བྱ་བ་ལ་སོགས་པ་ལ་འདི་སྐད་ཅེས་བྱ་བ་ནི་འཕགས་པ་ཀུན་དགའ་བོས་མདོ་སྡེ་དེ་ནི་འདི་སྐད་དུ་ཡིན་གྱི་རྣམ་པ་གཞན་དུ་ནི་མ་ཡིན་
ནོ་ཞེས་ངེས་པར་གཟུང་བ་ཡིན་ཏེ། བཅོམ་ལྡན་འདས་ཀྱིས་བསྟན་པའི་གོ་རིམས་དང་བདག་གིས་ཐོས་པའི་གོ་རིམས་གང་ཡིན་པ་དེ་ཉིད་ཀྱིས་ད་ལྟར་སྟོན་པར་བྱེད་ཀྱི་རྣམ་པ་གཞན་དུ་ནི་མ་ཡིན་ནོ། །བདག་གིས་ཞེས་བྱ་བ་ནི་མངོན་སུམ་དུ་བཟུང་བ་སྟོན་པར་བྱེད་པ་ཡིན་ཏེ། དེ་ཡང་བཅོམ་ལྡན་འདས་ཀྱི་
ཐད་དང་། བདེ་བར་གཤེགས་པའི་ཞལ་ནས་ཞེས་མངོན་སུམ་དུ་ཐོས་པ་དང་ལྡན་པའི་དགེ་སློང་དག་ལས་མངོན་སུམ་དུ་གཟུང་བ་ཡིན་ནོ། །ཇི་སྐད་དུ་འཕགས་པ་ཀུན་དགའ་བོས་ཚེ་དང་ལྡན་པ་དག་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་ཆ་ཤས་དང་བཅས་པ་བཅོམ་ལྡན་འདས་ཀྱི་ཐད་ལས་མངོན་དུ་གཟུང་བ་དང་།
གཉིས་པ་དགེ་སློང་དག་ལས་ཞེས་བསྟན་པ་ཡིན་ནོ། །ཐོས་པ་ཞེས་བྱ་བ་ནི་རྣ་བའི་བྱ་བ་ཙམ་གྱི་སྒོ་ནས་མདོ་སྡེ་འཛིན་པར་ནུས་པ་སྟོན་པའོ། །དུས་གཅིག་ན་ཞེས་བྱ་བ་ནི་གྲངས་གཅིག་ཏུ་འཆད་པའི་དུས་སྟོན་པར་བྱེད་པ་སྟེ། གཅིག་ཏུ་ཞེས་བྱ་བའི་བར་དུའོ། །བཅོམ་ལྡན་འདས་ཞེས་བྱ་བ་ལ་སོགས་པའི་རྣམ་
པར་བཤད་པ་ནི་སྔ་མ་བཞིན་ནོ། །གཟིར་བ་ནི་སྡུག་བསྔལ་སྐྱེད་པར་བྱེད་པ་མཚོན་ཆ་ལ་སོགས་པས་ལུས་ལ་བསྣུན་པར་གྱུར་པའོ། །རྨ་བྱུང་བ་ནི་རྣམ་པར་བསྣུན་པའོ། །ངན་དུ་བརྗོད་པའི་སྦྱོར་བ་ཞེས་བྱ་བ་ནི་འཁོར་བ་ངན་པ་ཞེས་བྱ་བ་དེ་སྐད་དུ་སྟོན་པར་བྱེད་པའི་ཚིག་བརྗོད་པའི་ཕྱིར་འཇུག་པའི་ཚིག་དེ་ཉིད་ནི་
བརྗོད་པ་ཡིན་པ་དེའི་ཕྱིར་ངུ་བའི་སྒྲ་མི་སྙན་པ་མཐོན་པོ་འབྱིན་པར་བྱེད་པའོ། །ཁྱད་པར་མེད་ཅེས་བྱ་བ་ནི་བདག་གིས་ཡོན་ཏན་ཁྱད་པར་དུ་འཕགས་པ་འདི་ལ་དེ་དག་སྡང་བར་མི་བྱའོ་སྙམ་པའི་ལྟོས་པ་དང་བྲལ་བའོ། །བླ་ན་མེད་པའི་སྟོབས་བཅུ་ལ་སོགས་པའི་ཡོན་ཏན་རིན་པོ་ཆེའི་གཞི་ཉིད་ཡིན་པའི་ཕྱིར་བཅོམ་
ལྡན་འདས་ནི་རིན་ཆེན་གཏེར་ཡིན་ནོ། །ཡོན་ཏན་རྒྱ་མཚོ་ནི་བླ་ན་མེད་པའི་བྱང་ཆུབ་ཀྱི་ཡན་ལག་ལ་སོགས་པའི་ཡོན་ཏན་གྱི་རྒྱ་མཚོའོ། །སྡུག་བསྔལ་འཕགས་པའི་བདེན་པ་འདི་ནི་ཞེས་བྱ་བ་ལ་སོགས་པའི་རྣམ་པར་འགྲེལ་པ་ནི་སྔ་མ་བཞིན་དུ་རིག་པར་བྱའོ། །མི་ལྷ་ལྷ་མིན་ཀླུའི་རྒྱལ་པོ་ཞེས་བྱ་བ་ནི་ཆོས་དང་བླ་ན་

མེད་པའི་ཕན་གདགས་པས་འཇིག་རྟེན་དགའ་བར་མཛད་པའི་ཕྱིར་བཅོམ་ལྡན་འདས་མི་ལ་སོགས་པའི་རྒྱལ་པོ་ཡིན་ཏེ་དེའོ། །ཞི་བར་གཤེགས་ཞེས་བྱ་བ་ལ་སོགས་པ་ལ་ཅི་འཚོ་བར་འགྱུར་བའམ། འོན་ཏེ་འཚེ་བ་མེད་པར་དགོས་པ་བསྒྲུབས་ཏེ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་
བཅོམ་ལྡན་འདས་རབ་ཏུ་ཞུགས་པ་ཡིན་ནོ། །ཞི་བ་ནི་ཞི་བ་སྟེ། ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་སུ་རབ་ཏུ་ཞུགས་པའོ། །ཐམས་ཅད་མཁྱེན་པས་སྟོང་པ་ཞེས་བྱ་བ་ནི་སྐྱེ་བོ་མ་ལུས་པ་མཁྱེན་པའི་སྟོན་པས་སྟོང་པ་མཐོང་ན་རྨོངས་པ་འཚོ་བ་ལ་བརྟན་པར་བྱེད་པ་འགའ་ཞིག་
སྙིང་པོའི་འདུ་ཤེས་ཉེ་བར་འཇོག་པར་འགྱུར་རོ། །འདི་ལྟར་དངོས་པོ་ཆེ་གེ་མོ་ཞིག་བདག་གིས་ཤེས་པར་བྱའོ་སྙམ་པའི་སྨོན་པའི་སེམས་བཞག་ནས་དོན་དེ་ཤེས་པ་ནི་སྨོན་ལམ་གྱི་ཡེ་ཤེས་ཡིན་ནོ། །དགག་པ་ནི་མངོན་སུམ་དུ་ཟློག་པའོ། །ཕྱིར་གཤེ་བ་ནི་ལྐོག་ཏུ་གྱུར་པའི་སྐྱོན་ནོ། །མི་མཐུན་པའི་སྨྲ་བ་ནི་བཟློག་
པ་མེད་པའམ། བཟློག་པའི་དོན་དུ་སྟོན་པའོ། །འདི་ནི་ཆོས་སོ་ཞེས་བྱ་བ་ནི་བསྟན་པའི་ཆོས་སོ། །འདུལ་བ་ནི་ཉོན་མོངས་བ་སྤང་བའི་ཐབས་སུ་གྱུར་པའོ། །སྟོན་པའི་བསྟན་པ་ཞེས་བྱ་བ་ནི་བཅོམ་ལྡན་འདས་ཀྱི་བཀའ་སྟེ། སྤོང་བར་བྱེད་པ་རིགས་ཀྱི་མན་ངག་སྟོན་པའོ། །རབ་ཏུ་གསལ་བ་ཞེས་བྱ་བ་ནི་འཇིགས་
པ་མེད་པ་ཉིད་ཀྱི་ཕྱིར་དབྱངས་ཞུམ་པ་མེད་པའོ། །སྡུག་བསྔལ་འཕགས་པའི་བདེན་པ་ཞེས་བྱ་བ་ལ་སོགས་པ་ལ་འབྲས་བུར་གྱུར་པའི་ཕུང་པོ་ལྔ་ལ་སྡུག་བསྔལ་གྱི་སྒྲས་བསྟན་པ་ཡིན་ནོ། །འཕགས་པ་རྣམས་ལ་བདེན་པ་ནི་འཕགས་པའི་བདེན་པ་སྟེ། འཕགས་པ་རྣམས་ཀྱིས་ཇི་ལྟ་བ་བཞིན་དུ་
གཟིགས་པའི་ཕྱིར་རོ། །རྒྱུར་གྱུར་པའི་ཕུང་པོ་ལྔ་ནི་ཀུན་འབྱུང་ཡིན་ཏེ། འདི་ལ་སྡུག་བསྔལ་འབྱུང་བས་ན་ཞེས་བྱ་བའི་དབང་དུ་བྱས་པའི་ཕྱིར་རོ། །ཕུང་པོ་ལྔའི་བདག་ཉིད་ཅན་གྱི་སྡུག་བསྔལ་འགོག་པས་ན་འགོག་པའི་བདེན་པའོ། །འགོག་པར་འགྲོ་བར་བྱེད་ཅིང་ཐོབ་པར་བྱེད་པའི་ཕྱིར་འགོག་པར་
འགྲོ་བའི་ལམ་སྟེ། ལམ་གྱི་བདེན་པ་ཡིན་ནོ། །སྐྱེ་བ་ལ་སོགས་པ་སྡུག་བསྔལ་གྱི་རྒྱུ་ཉིད་ཡིན་པའི་ཕྱིར་སྡུག་བསྔལ་ཉིད་དུ་བསྟན་ཏོ། །སྲིད་པ་ནི་ཆགས་པའི་མཚན་ཉིད་ཡིན་ལ། ཡང་སྲིད་དང་རྗེས་སུ་མཐུན་པ་ནི་ཡང་སྲིད་པ་ཅན་ནོ། །དེ་མ་ཐག་པའི་སྐྱེ་བོ་ལ་མངོན་པར་དགའ་ཞིང་མངོན་པར་འདོད་

པའི་ཕྱིར་དགའ་བའི་འདོད་ཆགས་དང་ལྡན་པའོ། །ཡུལ་ཐམས་ཅད་ལ་མངོན་པར་དགའ་བའི་ངང་ཚུལ་ཅན་ནི་དེ་དང་དེར་མངོན་པར་དགའ་བ་ཅན་ནོ། །མ་ལུས་པར་སྤངས་པ་ཞེས་བྱ་བ་ལ་སོགས་པ་ལ་དེ་ལ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་ལ་མཐོང་བའི་ལམ་
སྐད་ཅིག་མ་བཅོ་ལྔ་ལ་མྱ་ངན་ལས་འདས་པ་གང་ཡིན་པ་དེ་ནི་མ་ལུས་པར་སྤངས་པ་ཞེས་བྱ་བར་བསྟན་ཏེ། མཐོང་བས་སྤང་བར་བྱ་བའི་ཉོན་མོངས་པའི་ཚོགས་ལན་ཅིག་སྤངས་པའི་ཕྱིར་རོ། །རྒྱུན་དུ་ཞུགས་པའི་མྱ་ངན་ལས་འདས་པ་གང་ཡིན་པ་དེ་ནི་རྣམ་པར་བཏང་བ་ཞེས་བྱ་སྟེ། དེ་ཡང་སྤང་བར་བྱ་བ་
མི་སྲིད་པས་ངེས་པ་ཉིད་ཡིན་པའི་ཕྱིར་རོ། །ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པའི་འབྲས་བུ་གང་ཡིན་པ་དེ་ནི་སྤངས་པའི་དངོས་པོ་ཡིན་ཏེ། འདོད་པ་ན་སྤྱོད་པའི་ཉོན་མོངས་པ་རྒྱ་ཆེ་བ་ཤིན་ཏུ་སྨད་པར་བྱ་བ་སློབ་པར་བྱས་པ་ཉིད་ཀྱི་ཕྱིར་རོ། །ལན་ཅིག་ཕྱིར་འོང་བའི་
མྱ་ངན་ལས་འདས་པ་གང་ཡིན་པ་དེ་ནི་ཟད་པ་ཡིན་ཏེ། འདོད་པ་ན་སྤྱོད་པའི་ཉོན་མོངས་པ་ཐམས་ཅད་སྤངས་པའི་ཕྱིར་རོ། །ཕྱིར་མི་ལྡོག་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པའི་མྱ་ངན་ལས་འདས་པ་གང་ཡིན་པ་དེ་ནི་འདོད་ཆགས་དང་བྲལ་བ་སྟེ། དེ་ཐོབ་པར་གྱུར་ན་འདོད་པ་ལས་
འདོད་ཆགས་དང་བྲལ་བའི་ཕྱིར་རོ། །ཕྱིར་མི་འོང་བའི་མྱ་ངན་ལས་འདས་པ་གང་ཡིན་པ་དེ་ནི་འགོག་པ་ཡིན་ཏེ། ཡང་འདོད་པའི་ཁམས་སུ་འོང་བའི་འཆིང་བའི་རྒྱུ་མེད་པའི་ཕྱིར་རླུང་གི་ཆུ་འགོག་པ་ལྟ་བུའོ། །དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གང་ཡིན་པ་དེ་ནི་རྣམ་པར་ཞི་བ་སྟེ། ཉེས་
པ་མ་ལུས་པ་སྤངས་པ་གཅིག་ཏུ་ཞི་བ་དང་ཐག་ཉེ་བར་གནས་པ་ཉིད་ཡིན་པའི་ཕྱིར་རོ། །དགྲ་བཅོམ་པའི་མྱ་ངན་ལས་འདས་པ་གང་ཡིན་པ་དེ་ནི་ནུབ་པ་ཡིན་ཏེ། དེ་ཐོབ་པ་ན་ཀུན་དུ་སྦྱོར་བ་དང་འཆིང་བ་དང་། ཉེ་བའི་ཉོན་མོངས་པའི་ཀུན་ནས་དཀྲིས་པ་དང་། བག་ལ་ཉལ་ཐམས་ཅད་ནུབ་པའི་ཕྱིར་རོ། །ཡང་
དག་པའི་ལྟ་བ་ལ་སོགས་པ་ཡང་ལམ་གྱི་ཡན་ལག་ཟག་པ་མེད་པ་ཉིད་ཀྱི་ཕྱིར་ཡང་དག་པ་ཉིད་ཡིན་ནོ། །ཐབས་མ་ཡིན་པ་ཞེས་བྱ་བ་ནི་ཉོན་མོངས་པའི་རྣམ་པ་གཅིག་ཀྱང་ལྷག་མར་མ་བྱས་པ་ཉིད་ཀྱི་ཕྱིར་འདིས་ལྷག་མ་མེད་པར་སྤངས་པ་བརྗོད་པ་ཡིན་ནོ། །དགེ་སློང་དག་གཟུགས་བདག་མ་ཡིན་ཞེས་

བྱ་བ་ལ་སོགས་པ་ལ་བདག་མ་ཡིན་ཞེས་བྱ་བ་ནི་རང་དབང་མ་ཡིན་ཞིང་གཙོ་བོ་མ་ཡིན་ཞེས་བྱ་བའི་དོན་ཡིན་ཏེ། གལ་ཏེ་དེ་རང་དབང་དུ་གྱུར་པ་ཡིན་ན་ནི་གནོད་པའམ་གདུང་བའི་དོན་དང་གདུང་བའི་རྒྱུ་མཚན་དུ་མི་འགྱུར་ལ། གང་གི་ཕྱིར་འགའ་ཞིག་རང་དབང་གི་བློ་དང་ལྡན་པའི་བདག་ཉིད་ལ་གནོད་པའི་ཕྱིར་བརྩོན་
པར་མི་བྱེད་དོ། །སྡུག་བསྔལ་ཞེས་བྱ་བ་ནི་སྡུག་བསྔལ་གྱི་རྒྱུ་མཚན་ཏེ། ཕྱི་རོལ་གྱི་སྡུག་བསྔལ་མངོན་སུམ་དུ་བསྐྱེད་པའི་ཕྱིར་རོ། །ཐོབ་པ་ཞེས་བྱ་བ་ནི་དེ་ལྟར་ཐོབ་པར་བྱེད་ནུས་པར་འགྱུར་བའོ། །གཟུགས་ལ་ཞེས་བྱ་བ་ནི་གཟུགས་དང་འབྲེལ་པ་འདི་ཐོབ་པའོ། །འདི་ལྟ་བུར་ཞེས་བྱ་བ་ནི་མཛེས་པ་ལ་
སོགས་པའི་ཡོན་ཏན་དང་ལྡན་པའམ། བདེ་བ་སྐྱེད་པར་བྱེད་པའོ། །འདི་ལྟ་བུར་མ་གྱུར་ཅིག་ཅེས་བྱ་བ་ནི་ཡིད་དུ་མི་འོང་བའི་ཉེས་པ་མི་བཟད་པའམ་སྡུག་བསྔལ་སྐྱེད་པར་བྱེད་པའོ། །བདག་རང་རྒྱུད་ཉིད་ཡིན་པའི་ཕྱིར་རང་རྒྱུད་དུ་ཤེས་པ་ཡིན་ན་བདག་ཉིད་ཀྱིས་ཉེས་པ་བཟོད་པར་མི་འགྱུར་ཏེ། གང་
གི་ཕྱིར་གཟུགས་བདག་མ་ཡིན་པ་དེའི་ཕྱིར་རྣམ་པ་ཇི་སྲིད་དུ་ལས་ཀྱིས་འཕངས་པར་གྱུར་པའི་རྣམ་པ་དེ་སྲིད་དུ་རྗེས་སུ་འཇུག་པར་འགྱུར་རོ། །དགེ་སློང་དག་ཇི་སྙམ་དུ་སེམས་ཞེས་བྱ་བ་ལ་སོགས་པའི་རྣམ་པར་བཤད་པ་ནི་མངལ་དུ་འཇུག་པའི་མདོའི་རྣམ་པར་བཤད་པ་ལས་ལེགས་པར་རྣམ་པར་
ཕྱེ་བའི་ཕྱིར་ཡང་འདིར་རྣམ་པར་དབྱེ་བར་མི་བྱའོ། །འཇིག་རྟེན་ཅུང་ཟད་ཀྱང་ཉེ་བར་ལེན་པ་མེད་ཅེས་བྱ་བ་ནི་འཇིག་རྟེན་པ་དངོས་པོ་ཅུང་ཟད་ཁས་མི་ལེན་ཅིང་བདག་ཉིད་དུ་འཛིན་པ་མེད་དོ། །ཡོངས་སུ་གདུང་བ་མེད་ཅེས་བྱ་བ་ནི་ཡོངས་སུ་གདུང་བར་མི་བྱེད་པ་སྟེ། མངོན་པར་འདོད་པའི་དོན་གྲུབ་པར་
མ་གྱུར་པ་ལས་ཡིད་མི་བདེ་བ་སྐྱེས་པར་གྱུར་པ་གང་ཡིན་པ་དེ་ནི་འདིར་ཡོངས་སུ་གདུང་བ་ཡིན་ལ། དེ་ཡང་དངོས་པོ་ཐམས་ཅད་བདག་མེད་པ་ཉིད་དུ་བཟུང་བའི་ཕྱིར་དངོས་པོ་འགའ་ཞིག་ལ་ཡང་ཆགས་པ་མི་སྐྱེ་ལ། ཆགས་པ་མེད་པའི་ཕྱིར་ཡོངས་སུ་གདུང་བར་ཡང་མི་འགྱུར་རོ། །དེ་བས་བདག་ཉིད་
ཡོངས་སུ་མྱ་ངན་ལས་འདས་པར་འགྱུར་རོ་ཞེས་བྱ་བ་ནི་རང་རིག་པས་མངོན་སུམ་དུ་མཐོང་བར་གྱུར་པའོ། །རྣམ་པ་གང་ཞིག་ཅེ་ན། བདག་གི་སྐྱེ་བ་ནི་ཟད་ཅེས་བྱ་བ་ལ་སོགས་པ་སྨོས་ཏེ། དེའི་རྣམ་པར་བཤད་པ་ཡང་སྔ་མ་བཞིན་ནོ། །འདུལ་བའི་གླེང་གཞི་ཞེས་བྱ་བ་ལ་སོགས་པ་ལ་

གླེང་གཞི་ནི་ཡུལ་འགའ་ཞིག་ཏུ་བསླབ་པའི་གཞི་འདི་འབྱུང་བའོ། །འབྱུང་བ་ནི་ཉོན་མོངས་པ་ལ་སོགས་པ་ངེས་པའི་སྐབས་སོ། །ཤམ་ཐབས་ནི་འོག་ཏུ་བགོ་བ་ཡིན་ལ་མཐོ་བ་དང་དམའ་བ་ཀུན་ནས་སྤངས་པ་ཉིད་ཀྱི་ཕྱིར་ཟླུམ་པ་ནི་ཡོངས་སུ་ཟླུམ་པའོ། །ཆོས་གོས་
ནི་སྟོད་དུ་བགོ་བའོ། །འདི་ནི་བཅས་པའོ་ཞེས་བྱ་བ་ལ་སོགས་པ་ལ་བསླབ་པའི་གཞི་རྣམ་པར་གཞག་པ་ནི་བཅས་པ་ཡིན་ནོ། །བཅས་པ་སྨོས་པ་དགེ་སློང་འདི་ཙམ་གྱི་མདུན་དུ་ཉེས་པ་སྦོམ་པོ་བཤགས་པར་བྱའོ་ཞེས་བྱ་བ་ལ་སོགས་པ་ཡང་བསྡུས་པ་ཡིན་ནོ། །སྔོན་རྗེས་སུ་གནང་བའི་དངོས་པོ་
གང་ཡིན་པ་བཀག་པ་དང་། གང་སྔོན་བཀག་པ་ཡང་རྗེས་སུ་གནང་བ་ཡང་རྗེས་སུ་བཅས་པ་ཡིན་ཏེ། དཔེན་ན་མཆིལ་ལྷམ་རྗེས་སུ་གནང་བ་མཛད་ནས་དེ་ཉིད་ཀྱི་བྱེ་བྲག་བཀག་པ་མཛད་དེ། ཐུག་ཐུག་ཟེར་བ་དང་། ཐྲིག་ཐྲིག་ཟེར་བ་བཅང་བར་མི་བྱའོ་ཞེས་བྱ་བ་ལ་སོགས་པ་རྗེས་སུ་གནང་བ་དེ་དག་ཡང་
བཀག་པ་ཡིན་ལ། བཀག་པ་ཡང་རྗེས་སུ་གནང་བ་ནི་དཔེར་ན་དུས་མ་ཡིན་པའི་ཟས་སྔར་བཀག་པ་ལས་ནད་པ་ལ་ཡང་རྗེས་སུ་གནང་བ་མཛད་པ་འདི་ཡང་རྗེས་སུ་གནང་བ་ཡིན་པ་ལྟ་བུའོ། །རྣམ་པ་ཐམས་ཅད་དུ་དངོས་པོ་ནི་སྲོག་ལ་ཐུག་ཀྱང་མི་བྱའོ་ཞེས་བྱ་བ་ནི་དགག་པ་ཡིན་ཏེ། དཔེར་ན་ང་ལ་སྟོན་པར་
འཛིན་པ་དག་གིས་ཐ་ན་ཆང་རྩྭའི་མཆོག་མས་ཀྱང་བཏུང་བར་མི་བྱ་ཞིང་སྦྱིན་པར་མི་བྱ་བ་དང་། སྲོག་གཅོད་པ་ལ་སོགས་པ་རང་བཞིན་གྱིས་ཁ་ན་མ་ཐོ་བ་དང་བཅས་པ་གཅིག་ཏུ་བྱ་བ་མ་ཡིན་པ་ཉིད་དུ་གསུངས་པ་ལྟ་བུའོ། །གང་བྱ་བ་འགའ་ཞིག་ལ་འདོད་པས་འཇུག་པའི་ཡུལ་རྗེས་སུ་གནང་བ་ཡང་
བྱ་བ་མ་ཡིན་པའམ། བྱ་བའི་ཉེས་བྱས་ཞེས་བྱ་བའི་ཉེས་པ་འབྱུང་བ་མ་ཡིན་ཏེ། དཔེར་ན་ཕྱིར་རྒོལ་བ་ཚར་གཅད་པར་བྱ་བའི་ཕྱིར་ཕྱི་རོལ་གྱི་བསྟན་བཅོས་བཀླག་པར་བྱའོ་ཞེས་བྱ་བ་ལ་སོགས་པ་ལྟ་བུའོ། །ཟབ་མོའི་དོན་ཁོང་དུ་ཆུད་པའི་ནུས་པ་དང་བྲལ་བ་ཉིད་ཀྱི་ཕྱིར་
ཤེས་རབ་ཞན་པ་སྟེ། ཤེས་བྱའི་དངོས་པོ་ཕྱི་རོལ་ན་ཡོད་པའི་ཤེས་རབ་གང་ལ་ཡོད་པ་དེ་དག་ནི་ཤེས་རབ་ཞན་པ་ཅན་ཞེས་བྱ་བའི་དབང་དུ་བྱས་པའི་ཕྱིར་རོ། །དོན་ལ་ལྟོས་པ་མེད་པ་ཉིད་ཀྱི་ཕྱིར་ཡི་གེ་ཙམ་གྱི་རྗེས་སུ་འབྲང་བ་ཞེས་སྨོས་སོ། །དོན་ཟབ་མོ་ལ་མོས་པ་ཞེས་

བྱ་བ་ནི་དོན་ཟབ་མོ་ཁོང་དུ་ཆུད་པར་འདོད་པ་དང་བཅས་པའོ། །མ་ལྟ་བུ་ནི་ཆོས་མངོན་པ་སྟེ། མདོ་སྡེ་དང་འདུལ་བའི་སྡེ་སྣོད་དག་གི་དོན་འཆད་པའི་སྒོ་ནས་མ་ལྟ་བུ་ཉིད་ཡིན་པའི་ཕྱིར་རོ། །དེའི་ཕྱིར་མདོ་སྡེ་དང་འདུལ་བའི་དོན་ཡང་དག་པར་བསྲུང་བའི་ཕྱིར་ཞེས་བྱ་བ་སྨོས་ཏེ།
མདོ་སྡེ་དང་འདུལ་བ་ནི་དོན་གྱི་སྒོ་ནས་ཆོས་མངོན་པར་ཡང་དག་པར་འདུས་པ་དེ་ཉིད་ཀྱི་ཕྱིར་དེ་བསྡུས་པས་མདོ་སྡེ་དང་འདུལ་བའི་དོན་ཡང་དག་པར་བསྡུས་པར་འགྱུར་རོ། །ཤེས་བྱའི་མཚན་ཉིད་ཅེས་བྱ་བ་ནི་ཤེས་པར་བྱ་བ་ཡིན་པས་ན་ཤེས་བྱ་ཡིན་ལ། དེ་ཉིད་མཚན་ཉིད་
ཡིན་པ་དེ་བས་ན་ཆོས་མངོན་པར་རབ་ཏུ་བསྒྲགས་པ་སྟེ། རབ་ཏུ་གསལ་བར་བྱས་ཞེས་བྱ་བའི་ཐ་ཚིག་གོ། །མདོ་སྡེ་ནི་དགོངས་པ་སྟོན་པ་ཡིན་ལ། འདུལ་བ་ནི་འབྱུང་བ་སྟོན་པ་ཡིན་ཏེ། དགོངས་པ་ནི་བསམས་པ་ཡིན་ནོ། །དྲན་པ་ཉེ་བར་གཞག་པ་བཞི་ནི་ལུས་དང་
ཚོར་བ་དང་། སེམས་དང་། ཆོས་དྲན་པ་ཉེ་བར་གཞག་པའོ། །ཡང་དག་པར་སྤོང་བ་བཞི་ནི་དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་འདུན་པ་སྐྱེད་པར་བྱེད། བརྩོན་འགྲུས་རྩོམ་པར་བྱེད། སེམས་རབ་ཏུ་འཛིན་པར་བྱེད་དོ། །སྐྱེས་པ་རྣམས་ཕྱིར་དབྱུང་བར་བྱ་བའི་
ཕྱིར་དང་། མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པའི་ཕྱིར་དང་། སྐྱེས་པ་རྣམས་སྤང་བར་བྱ་བའི་ཕྱིར་འདུན་པ་སྐྱེད་པར་བྱེད། བརྩོན་འགྲུས་རྩོམ་པར་བྱེད། སེམས་རབ་ཏུ་འཛིན་པར་བྱེད་དོ། །རྫུ་འཕྲུལ་གྱི་རྐང་པ་བཞི་ནི་འདུན་པའི་ཏིང་ངེ་འཛིན་གཙོ་བོར་གྱུར་པའི་འདུ་བྱེད་
དང་ལྡན་པའི་རྫུ་འཕྲུལ་གྱི་རྐང་པ་དང་། བརྩོན་འགྲུས་ཀྱི་ཏིང་ངེ་འཛིན་དང་། སེམས་ཀྱི་ཏིང་ངེ་འཛིན་དང་། དཔྱོད་པའི་ཏིང་ངེ་འཛིན་གཙོ་བོར་གྱུར་པའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པའོ། །དབང་པོ་ལྔ་ནི་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་།
ཤེས་རབ་ཅེས་བྱའོ། །དེ་དག་ཁོ་ན་གནས་སྐབས་གཞན་ཐོབ་པར་གྱུར་པ་ལ་སྟོབས་ཞེས་བྱའོ། །བྱང་ཆུབ་ཀྱི་ཡན་ལག་བདུན་ནི་དྲན་པ་ཡང་དག་བྱང་ཆུབ་ཀྱི་ཡན་ལག་དང་། ཆོས་རྣམ་པར་འབྱེད་པ་དང་། བརྩོན་འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་

འཛིན་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ། །འཕགས་པའི་ལམ་ཡན་ལག་བརྒྱད་པ་ནི་ཡང་དག་པའི་ལྟ་བ་དང་། རྟོག་པ་དང་། ངག་དང་། ལས་ཀྱི་མཐའ་དང་། འཚོ་བ་དང་། རྩོལ་བ་དང་། དྲན་པ་དང་། ཏིང་ངེ་འཛིན་ཏོ། །སོ་སོ་ཡང་དག་པར་
རིག་པ་བཞི་ནི་ཆོས་དང་། དོན་དང་། ངེས་པའི་ཚིག་དང་། སྤོབས་པ་ཞེས་བྱའོ། །དགེ་སྦྱོང་གི་འབྲས་བུ་བཞི་ནི་རྒྱུན་དུ་ཞུགས་པའི་འབྲས་བུ་ལ་སོགས་པའོ། །ཆོས་ཀྱི་གནས་བཞི་ནི་བརྣབ་སེམས་མེད་པའི་ཆོས་ཀྱི་གནས་དང་། གནོད་སེམས་མེད་པ་དང་། ཡང་དག་པའི་དྲན་པ་དང་། ཡང་
དག་པའི་ཏིང་ངེ་འཛིན་ཆོས་ཀྱི་གནས་སོ། །ཉོན་མོངས་པ་མེད་པ་ཞེས་བྱ་བ་ནི་དགྲ་བཅོམ་པ་འགའ་ཞིག་གིས་སེམས་ཅན་ཉོན་མོངས་པ་ལས་བྱུང་བ་སྡུག་བསྔལ་བ་དང་བདག་ཉིད་མཆོད་པར་བྱ་བའི་བྱེ་བྲག་ཏུ་ཤེས་ནས་གཞན་དག་གིས་དེ་ལ་དམིགས་པའི་ཉོན་མོངས་པ་སྐྱེས་པ་ཡོངས་སུ་
སྤང་བར་འདོད་པས་དེ་དང་འདྲ་བའི་ཡེ་ཤེས་བསྐྱེད་པ་གང་གིས་རྣམ་པ་ཐམས་ཅད་དུ་ཕ་རོལ་པོ་དག་ལ་ཉོན་མོངས་པ་སྐྱེད་པར་མི་བྱེད་དོ། །ཉོན་མོངས་པ་ཡང་ཀུན་ནས་ཉོན་མོངས་པ་ཡིན་ཏེ། རང་དང་གཞན་གྱི་རྒྱུད་ཟད་པར་བྱེད་པའི་ཕྱིར་རོ། །སྨོན་ལམ་ཡེ་ཤེས་ལ་སོགས་པ་ནས་ལྷག་མཐོང་
གི་མཐར་ཐུག་པ་ནི་ཡོན་ཏན་གྱི་ཁྱད་པར་ཡིན་ནོ། །ཡང་དག་པར་བསྡུས་པའི་རྣམ་གྲངས་དང་ཆོས་ཀྱི་ཕུང་པོ་དང་། བཏགས་པ་ནི་བསྟན་བཅོས་ཀྱི་རང་བཞིན་ནོ། །སྡེ་སྣོད་ནི་ཕུང་པོ་ཡིན་ནོ། །ཀྱེ་ཞེས་བྱ་བ་ནི་སྤྱིར་བོད་པ་སྟེ། འདི་ལྟར་ཀྱེ་འཇིག་རྟེན་སྐྱོང་བ། ཀྱེ་ལྷ་ཞེས་བྱ་བ་
ལ་སོགས་པ་ལྟ་བུའོ། །ཆོས་ཀྱི་བསྟན་བཅོས་བསྡུས་ཤིང་རྗེས་སུ་མཐུན་པའི་ཚིག་དང་། ཡི་གེའི་སྒོ་ནས་གཞག་པ་ཅིའི་ཕྱིར་ཞེ་ན། འགྲོ་ལ་ཕན་ཕྱིར་ཞེས་སྨོས་པ་ཡིན་ནོ། །དེ་དག་གང་གིས་གསུངས་པ་ཡིན་ཞེ་ན། སྨྲས་པ། སྟོབས་བཅུའི་བཀའ་སྟེ། བཅོམ་ལྡན་
འདས་སྟོབས་བཅུས་གསུངས་པ་ཡིན་ནོ། །སེམས་ཅན་དཔག་ཏུ་མེད་པ་ལ་ཕན་འདོགས་པར་མཛད་པའི་ཕྱིར་དང་། དུབ་པ་དཔག་ཏུ་མེད་པ་ཐུགས་སུ་ཆུད་པ་ཉིད་ཀྱི་ཕྱིར་དང་། དོན་དཔག་ཏུ་མེད་པ་དང་ལྡན་པའི་ཕྱིར་ཚད་མེད་པ་ཞེས་བསྟན་ཏོ། །གང་གིས་འཇིག་རྟེན་

ཞེས་བྱ་བ་ལ་སོགས་པ་ལ། བཀའ་གང་གིས་འཇིག་རྟེན་ཡང་དག་པར་སྦྱོང་ཞིང་རྒྱུན་གྱིས་འཇོག་པས་ན་སྒྲོན་མའོ། །སྒྲོན་མ་ཁྱད་པར་ཇི་ལྟ་བུ་ཞེ་ན། སྨྲས་པ། བློའི་རབ་རིབ་སེལ་བ་སྟེ། བློ་ནི་ཤེས་རབ་ཡིན་ལ། དེའི་རབ་རིབ་ནི་མི་ཤེས་པ་ཡིན་ཏེ། དེ་འཇོམས་པར་བྱེད་
ཅིང་འཇིག་པར་བྱེད་པའི་ཕྱིར་རབ་རིབ་སེལ་བའོ། །འཇིག་རྟེན་ཁྱད་པར་ཇི་ལྟ་བུ་ཞེ་ན། བློ་ངན་ཞེས་བྱ་བ་ལ་སོགས་པ་སྨོས་ཏེ། སྨད་པའི་བློ་ནི་ངན་ནམ་ལོག་པའི་ཤེས་པའམ། མི་ཤེས་པ་ཁོ་ན་བློ་ངན་ཡིན་ནོ། །བློ་ངན་ཁོ་ནའི་མུན་པ་ཆེན་པོ་ནི། བློ་ངན་མུན་པ་ཆེན་
པོ་སྟེ། མུན་པ་ཆེན་པོ་དེར་འཇིག་རྟེན་ཉམས་ཤིང་འཁོར་བའི་འཇིག་རྟེན་དེའོ། །ཇི་སྲིད་དུ་འཕངས་པ་ཞེས་བྱ་བ་ནི་ཇི་སྲིད་དུ་བཅོམ་ལྡན་འདས་ཀྱི་ཕྲིན་ལས་ཀྱིས་འཕངས་པ་དེའི་སྟོབས་ཀྱིས་དུས་དེ་སྲིད་ཁོ་ནར་གནས་པར་འགྱུར་བའོ། །ཇི་སྐད་དུ་བཀའ་སྩལ་པ་ཞེས་བྱ་བ་
ནི་ངའི་བསྟན་པ་ལོ་སྟོང་རྨ་མེད་པར་གནས་པར་འགྱུར་བའི་ཕྱིར་བཅོམ་ལྡན་འདས་ཀྱིས་དུས་དེ་སྲིད་དུ་ཁོ་ནར་གནས་པར་འགྱུར་རོ་ཞེས་བཀའ་སྩལ་པའོ། །བཀའ་ལུང་བསྟན་པ་ཞེས་བྱ་བ་ལ་བཀའ་ལུང་ནི་ལུང་སྩལ་བ་ཡིན་ལ། བཀའ་ལུང་བསྟན་པ་ནི་བཀའ་ལུང་བསྟན་
པའོ། །ང་ཡོངས་སུ་མྱ་ངན་ལས་འདས་ནས་ཁྱོད་ཀྱིས་བསྟན་པ་བསྡུ་བ་གྱིས་ཤིག་ཅེས་བྱ་བ་དེ་ནི་བདག་གིས་ཅི་ནུས་སུ་བྱས་པ་ཡིན་ནོ། །མཛའ་བོ་བཞིན་དུ་ཡོངས་སུ་སྤྱོད་པ་ཞེས་བྱ་བ་ནི་བཅོམ་ལྡན་འདས་ལ་བསྙེན་བཀུར་བྱས་པའོ། །ཆོས་ཉིད་ཀྱིས་ཞེས་བྱ་བ་ནི་ཆོས་
ཀྱིས་སོ། །ཀུན་དུ་སྤྱོད་པ་ཞེས་བྱ་བ་ནི་ཁོང་དུ་ཆུད་པའི་ཀུན་དུ་སྤྱོད་པས་སོ། །གྲོགས་ཚངས་པ་མཚུངས་པར་སྤྱོད་པ་ནི་ལམ་གཅིག་ཏུ་ཞུགས་པའི་དགེ་སློང་དག་གོ། །བླ་མའི་བཀའ་ཞེས་བྱ་བ་ནི་བཅོམ་ལྡན་འདས་ཀྱི་བཀའོ། །ཆོས་ཀྱི་ལམ་ཞེས་བྱ་བ་ནི་ཆོས་ཀྱི་རང་
བཞིན་གྱི་ལམ་མམ་གོ་རིམས་ཡིན་ནོ། །གཅིག་ནས་གཅིག་ཏུ་ཞེས་བྱ་བ་ནི་ཕན་ཚུན་བརྗོད་པའི་སྒོ་ནས་སོ། །ངོ་ཚ་མེད་པ་ནི་ཚུལ་ཁྲིམས་འཆལ་པ་ཡིན་པར་རིག་པར་བྱའོ། །ངོ་ཚ་ཅན་ནི་བསླབ་པ་འདོད་པའོ། །ཕན་གདགས་པ་ནི་རྗེས་སུ་བཟུང་བའམ་བསྡུས་པའོ། །བདག་

ལ་ཕན་འདོགས་པའི་ཉོན་མོངས་པ་སྤངས་པའོ། །དཔལ་ནི་མྱ་ངན་ལས་འདས་པར་འགྲོ་བ་སྟེ། ཕུང་པོ་ལྷག་མ་མེད་པ་ཉིད་ཀྱིས་དཔལ་སྐྱེ་བར་བྱེད་པ་ཉིད་ཀྱི་ཕྱིར་རོ། །གྱོན་པ་ཞེས་བྱ་བ་ནི་ཡོངས་སུ་བགོས་པའོ། །མཆོད་རྟེན་ཆེན་པོ་བཞི་ནི་བལྟམས་པ་
དང་། བྱང་ཆུབ་པ་དང་། ཆོས་ཀྱི་འཁོར་ལོ་དང་། ཡོངས་སུ་མྱ་ངན་ལས་འདས་པ་ཞེས་བྱའོ། །མངོན་པར་དགའ་བ་ཞེས་པ་ནི་ལུས་ཀྱི་འགྱུར་བའི་སེམས་ཀྱིས་དགའ་བའི་བྱེ་བྲག་སྐྱེས་པའོ། །མཆོད་པ་ནི་དེ་འོངས་པ་ལས་དགའ་བར་རིག་ནས་ཕྱག་ལ་སོགས་པས་མཆོད་པའོ། །
ཚེམས་ཀྱི་མཆེ་བ་ལ་སོགས་པའི་མཚན་མ་ཞེས་བྱ་བ་ལ་སོགས་པའི་སྒྲས་ནི་བཅོམ་ལྡན་འདས་བྱང་ཆུབ་སེམས་དཔའི་གནས་སྐབས་སུ་གྱུར་པའི་དབུ་སྐྲ་དང་། ན་བཟའ་ལ་སོགས་པ་གཟུང་བ་ཡིན་ནོ། །བག་ཡོད་པར་གྱིས་ཤིག་ཅེས་བྱ་བ་ནི་དགེ་བའི་ཆོས་ཐམས་ཅད་སྒྲུབ་པ་
བག་ཡོད་པའི་རྩ་བ་ཅན་ཡིན་པ་དེའི་ཕྱིར་དེ་སྐད་དུ་བསྟན་ཏོ། །ཆད་པས་གཅད་པར་མཆིའོ་ཞེས་བྱ་བ་ནི་ཐོབ་པར་གྱུར་པའམ། ཆད་པ་དྲག་པོས་ཚར་གཅད་པར་བྱས་པར་གྱུར་པའོ། །སེམས་ཅན་གྱི་མཆོག་ཅེས་བྱ་བ་ནི་སེམས་ཅན་ཀུན་གྱི་གཙོ་བོར་གྱུར་པའི་ཕྱིར་རོ། །
སྐྱོ་བར་བྱའོ་ཞེས་བྱ་བ་ནི་བདག་གི་ལུས་བརྟན་པའི་སྒོ་ནས་དེ་དག་སྐྱོ་བ་བསྐྱེད་པར་བྱ་བའོ། །གདུང་བ་སྐྱེས་ཏེ་ཞེས་བྱ་བ་ལ། གདུང་བ་སྐྱེས་ཤིང་འབྱུང་བ་གང་ཡིན་པ་དེ་དག་གི་གདུང་བ་སྐྱེས་པར་གྱུར་པའོ། །འབར་བ་ནི་རབ་ཏུ་འབར་བའོ། །སྐྱེ་བ་ནི་འདུས་བྱས་ཀྱི་དངོས་པོ་
སྐྱེས་ཤིང་འབྱུང་བར་འགྱུར་བའོ། །འཇིག་པ་ནི་དེ་དག་ཁོ་ན་ཉམས་པར་གྱུར་པ་སྟེ། ཟག་པ་མེད་པའི་ཡེ་ཤེས་ཀྱིས་དེ་དག་མཐོང་བར་གྱུར་པ་ན་བླ་ན་མེད་པའི་དཔལ་བསྐྱེད་པ་དེའི་ཕྱིར་དེ་སྐད་དུ་བསྟན་ཏོ། །མ་དད་པ་ཞེས་བྱ་བ་ནི་དེ་བཞིན་གཤེགས་པས་བསྔགས་པའི་དད་པ་གང་
ལ་མེད་པ་དེ་ནི་དད་པ་མེད་པའོ། །ཞེ་སྡང་དང་བཅས་པ་དང་ལྡན་པའི་སེམས་ཀྱིས་ཚིགས་སུ་བཅད་པ་མ་ཡིན་པ་བརྫུན་གྱི་ཚིག་གིས་ཉེས་པ་རྗོད་པར་བྱེད་པའོ། །དད་པ་ལོག་པར་འཛིན་པས་འབྱིང་བ་ནི་འབྱིང་བ་སྟེ། སྡིག་པའི་འདམ་དུ་འབྱིང་བར་འགྱུར་བ་སྟེ། དཔེར་ན་བ་ལང་

འདམ་དུ་འབྱིང་བ་ལྟ་བུའོ། །ཉམས་པར་ཉེ་བར་སོང་ཞེས་བྱ་བ་ནི་སྡིག་པའི་ཆོས་ཀྱིས་འཇིག་པར་གྱུར་པའོ། །བདེ་ལེགས་འཆི་བ་ལྟས་ལ་སོགས་པ་ནི་སྡིག་པའི་ལྟ་བ་དང་ལྡན་པའོ། །གོ་མིན་ཏེ་ནི་ཤེས་རབ་མེད་པའོ། །ཐོས་ལ་འབྲས་བུ་མེད་ཅེས་བྱ་བ་ནི་འབྲས་བུ་དང་བྲལ་བ་ཡིན་ཏེ།
ཆོས་ཐོས་པའི་འབྲས་བུ་ནི་ཁོང་དུ་ཆུད་པ་ཡིན་ལ། ཆོས་ཁོང་དུ་ཆུད་པའི་འབྲས་བུ་ནི་སྒྲུབ་པ་ཡིན་ལ། འབྲས་བུ་ཁོང་དུ་ཆུད་པ་དང་བྲལ་བ་དེ་ཉིད་ཀྱི་ཕྱིར་འབྲས་བུ་མེད་ཅེས་བསྟན་ཏོ། །སྒྲུབ་པ་དང་བྲལ་བ་ཉིད་ཀྱི་ཕྱིར་དུག་དང་འདྲ་ཞེས་བསྟན་ཏོ། །གང་ཡང་ཐོས་པ་དང་ཡང་དག་པར་
ཤེས་པར་འགྱུར་བའི་ཐོས་པ་དེ་ནི་མཁས་པས་གསུངས་པ་ཡིན་ཏེ། དེ་ཉིད་དང་བྲལ་བའི་འབྲས་བུ་ཡིན་ནོ། །རྒས་པར་གྱུར་ཅེས་བྱ་བ་ནི་འཆི་བ་དང་ཐག་ཉེ་བར་གྱུར་པའོ། །ཉམས་པར་གྱུར་ཅེས་བྱ་བ་ནི་རང་གི་ནུས་པ་དང་བྲལ་བ་ཡིན་པ་དེའི་ཕྱིར་འདི་ལ་ཡང་དག་པའི་དྲན་པ་མེད་པ་ཡིན་ནོ། །
རྒས་པ་ཞེས་བྱ་བ་ནི་རྙིངས་ཤིང་རྒས་པའི་གནས་སྐབས་ཐོབ་པའི་སྒོ་ནས་དྲན་པའི་ནུས་པ་ཟིལ་གྱིས་གནོན་པའི་ནུས་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །གསར་བུ་དང་ནི་བདག་མི་མཚུངས། །ཞེས་བྱ་བ་ནི་བདག་དགེ་སློང་གསར་བུ་དག་དང་ལྷན་ཅིག་སེམས་འདྲ་བའི་སྒོ་ནས་མཉམ་པོར་
གྱུར་པ་མ་ཡིན་པའོ། །སྒོང་སྐྱེས་ནི་བྱ་ཡིན་ནོ། །གནས་དང་ལྡན་ཞེས་བྱ་བ་ནི་གཅིག་པུ་གནས་དང་ལྡན་པའོ། །གྲོགས་པོ་མངོན་པར་འདས་གྱུར་ཅིང་། །ཞེས་བྱ་བ་ལ་སོགས་པ་ལ། གྲོགས་པོ་ནི་འདིར་ཤཱ་རིའི་བུ་དང་མཽད་གལ་གྱི་བུ་ཆེན་པོ་ལ་སོགས་པ་ཉན་ཐོས་ཆེན་པོ་ཡིན་པར་རིག་པར་བྱ་སྟེ། ཉན་
ཐོས་ཆེན་པོར་ལུང་བསྟན་པ་ཉིད་དུ་མཚུངས་པ་ཉིད་ཀྱི་ཕྱིར་རོ། །གཞན་མཛའ་བོ་ཡང་མཉེན་ཞིང་མཉེན་པའི་དགྲ་བཅོམ་པ་དག་ཡིན་པར་རིག་པར་བྱའོ། །དེ་འདྲའི་གྲོགས་ནི་ཡོད་པ་མིན། །ཞེས་བྱ་བ་ནི་ཇི་ལྟར་དེ་དག་ཡོད་པ་དེ་འདྲ་བ་གཅིག་ཀྱང་ཡོད་པ་མ་ཡིན་ནོ། །ཇི་ལྟར། །བསམ་གཏན་
ཐོབ་པའི་དྲན་པ་ཡིས། །ཞེས་བྱ་བ་ལ་བསམ་གཏན་ཐོབ་པ་ནི་བསམ་གཏན་ཐོབ་པ་སྟེ། ཉམས་སུ་མྱོང་བའི་ཡུལ་དྲན་པར་གྱུར་པ་ལ་རྩེ་གཅིག་ཏུ་གྱུར་པ་ཞེས་བྱ་བའི་བར་དུའོ། །དྲན་པ་དེ་གཙོ་བོའི་འཇུག་པས་ཚོགས་དེ་ལ་དེའི་ཚེ་གཅིག་པུ་བྱ་བ་བྱེད་པ་དེ་བཞིན་དུ་འཕགས་པ་ཀུན་

དགའ་བོ་གཅིག་པུ་ལྷག་པར་གྱུར་པ་ཡིན་ནོ། །དྲི་མ་བྲལ་ཞེས་བྱ་བ་ལ་སོགས་པ་ལ། དེ་དག་མ་གཏོགས་པ་བདག་གཅིག་པུ་ལྷག་མར་གྱུར་པའོ། །དེ་དག་ཁྱད་པར་ཇི་ལྟ་བུ་ཅིག་ཅེ་ན། སྨྲས་པ། དྲི་མ་དང་བྲལ་ནས་ཞེས་བྱ་བ་ནི་ཉོན་མོངས་པའི་དྲི་མ་མ་ལུས་པར་སྤངས་
པའོ། །ཞི་བར་འགྲོ་བ་ནི་ཉེ་བར་ཞི་བ་ཐོབ་པར་གྱུར་པའོ། །འགྲོ་བ་དག་ལ་ཤེས་རབ་ཀྱི་སྣང་བ་སྩོལ་བར་མཛད་པ་དེ་ཉིད་ཀྱི་ཕྱིར་འགྲོ་བའི་སྒྲོན་མ་སྟེ་མ་གཏོགས་པའོ། །གཏི་མུག་ཁོ་ན་མུན་པ་ཡིན་པས་ན་གཏི་མུག་མུན་པ་སྟེ། ཡང་དག་པའི་དངོས་པོ་མཐོང་བ་ལ་སྒྲིབ་པར་བྱེད་པ་ཉིད་ཀྱི་ཕྱིར་རོ། །
གཏི་མུག་གི་མུན་པ་ཁོ་ན་རབ་རིབ་ཡིན་ཏེ། དེ་བསལ་བ་གང་ཡིན་པ་དེ་དག་ནི་གཏི་མུག་རབ་རིབ་བསལ་བ་སྟེ། དེ་མ་གཏོགས་པའོ། །ཡོན་ཏན་ཆེན་པོ་ཉིད་དང་ལྡན་པའི་ཕྱིར་ཆེན་པོ་སྟེ། དེ་མ་གཏོགས་པའོ། །ཚད་མེད་པའི་འདུལ་བ་གང་དག་ཡིན་པ་དེ་དག་ནི་ཚད་མེད་འདུལ་བ་སྟེ། འདུལ་བའི་
སྒྲས་ནི་འདིར་འདུལ་བའི་སྐྱེ་བོ་ལ་ཕན་གདགས་པ་ཡོངས་སུ་གཟུང་བ་ཡིན་ནོ། །ཅི་དང་འདྲ་བར་ཞེ་ན། དགོན་པའི་མཆོད་རྟེན་ནགས་ཀྱི་ཤིང་འདྲ་བར་ཞེས་བྱ་བ་སྨྲས་ཏེ། ཇི་ལྟར་དགོན་པའི་མཆོད་རྟེན་གྱི་ཤིང་ནགས་ཀྱི་ཤིང་དེ་དང་འདྲ་བར་དགྲ་བཅོམ་པ་དག་མ་གཏོགས་པར་གཅིག་པུ་ལྷག་
མར་གྱུར་པའོ། །གོང་བུའི་ཚུལ་དུ་ཤིང་གི་རྩ་བའི་ཕྱོགས་སུ་སོ་ཕག་གིས་བརྩིགས་ཤིང་དབྱིངས་སུ་བྱས་པ་ནི་མཆོད་རྟེན་གྱི་ཤིང་ཞེས་བྱ་ཞིང་། ནགས་ཀྱི་ཤིང་ནི་སོ་ཕག་གི་བྱ་བས་སྟོང་པའོ། །མཚན་དང་མི་ལྡན་པ་ཞེས་བྱ་བ་ནི་སྐྱེས་བུ་ཆེན་པོ་མཚན་སུམ་ཅུ་རྩ་གཉིས་དང་བྲལ་བའོ། །སངས་
རྒྱས་དང་འདྲ་བར་སྐྱེ་བོ་མཐའ་མེད་པར་འདུལ་བར་བྱེད་པའི་ཕྱིར་དང་སངས་རྒྱས་དང་འདྲ་བས་ན་སངས་རྒྱས་སོ། །བཅོམ་ལྡན་འདས་ཀྱི་སྲས་པོ་འདི་ཞེས་བྱ་བ་ལ་སོགས་པ་ལ། བཅོམ་ལྡན་འདས་དེ་སངས་རྒྱས་ཀྱི་སྲས་ཡིན་པས་ན་སྲས་སོ། །རྗེས་སུ་སྐྱེས་པ་ཞེས་བྱ་བ་ནི་བཅོམ་ལྡན་འདས་ཀྱི་
དུས་སུ་འབྱུང་བ་ཉིད་ཀྱི་ཕྱིར་རྗེས་སུ་སྐྱེས་པ་ཞེས་བསྟན་ཏོ། །མངོན་པར་སྐྱེས་པ་ནི་ཡོན་ཏན་དག་གི་སྒོ་ནས་བསྔགས་པ་ཉིད་ཀྱི་ཕྱིར་རོ། །དམ་པའི་ཆོས་ཁོ་ན་མཛོད་ཡིན་ཏེ། དེ་ཡོངས་སུ་སྲུང་བར་བྱེད་པ་དེ་ལ་བདག་གི་བློ་ངེས་པ་སྟེ། ངེས་པ་དང་ལྡན་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །སྲིད་པ་

འགོག་པར་བྱེད་ཅེས་བྱ་བ་ནི་ཉེ་བར་ལེན་པའི་ཕུང་པོ་ལྔ་འཇིག་པར་བྱེད་པའོ། །ཉོན་མོངས་པའི་དྲི་མ་དང་བྲལ་བ་ཉིད་ཀྱི་ཕྱིར་དེའི་བློ་རྣམ་པར་དག་པའོ། །མངོན་དུ་ཞེས་བྱ་བ་ནི་མངོན་དུ་ཕྱོགས་པའོ། །ཐུབ་པ་འདི་ནི་ཞེས་བྱ་བ་ལ་སོགས་པ་ལ། ཉོན་མོངས་པའི་བརྗོད་པ་མ་ལུས་པ་ལས་
ཉེ་བར་ལོག་པའི་ཕྱིར་ཐུབ་པའོ། །མྱ་ངན་ནི་སྐྱེ་བོ་མཛའ་བ་དང་བྲལ་བ་ལས་སྐྱེས་ཤིང་ཉོན་མོངས་པ་ལས་གྱུར་པའི་ཡིད་ཀྱི་གདུང་བའོ། །མྱ་ངན་ཁོ་ན་མུན་པ་ཡིན་ནོ་ཞེས་བྱ་བའི་དབང་དུ་བྱས་ནས་ཉོན་མོངས་པ་ཉེ་བར་ཞི་བའི་ཐབས་སྟོན་པར་མཛད་པ་ཉིད་ཀྱི་ཕྱིར་མྱ་ངན་མུན་པ་བསལ་བའོ། །
ཡང་ན་མུན་པ་ནི་མི་ཤེས་པ་ཡིན་ནོ། །སྐྱེ་བོ་མང་པོ་ནི་སྐྱེ་བོ་ཆེན་པོའོ། །རྗེས་སུ་བརྩེ་བའི་སྒྲས་ནི་འདིར་ཕན་འདོགས་པ་བརྗོད་པ་ཡིན་ནོ། །སྲིད་པ་གསུམ་ན་གནས་པ་དག་ལ་བླ་ན་མེད་པའི་ཡེ་ཤེས་ཀྱི་སྣང་བ་མཛད་པ་དེ་ཉིད་ཀྱི་ཕྱིར་སྒྲོན་མ་བཅོམ་ལྡན་འདས་ཏེ་བཅོམ་ལྡན་འདས་དེའོ། །འདབ་
མ་བརྒྱད་པ་ནི་པད་མ་ཡིན་ལ་ཁ་བྱེ་བ་ནི་རྒྱས་པ་ཡིན་ཏེ། པད་མའི་འདབ་མ་དང་འདྲ་བར་ཡངས་ཤིང་རྒྱ་ཆེ་བའི་སྤྱན་གང་ལ་མངའ་བ་དེ་ནི་སྤྱན་ཡངས་འདབ་མ་རྒྱས་པ་ཁ་བྱེ་བ་ཅན་ནོ། །ཁྱེད་ལ་བདག་ཅག་སྐྱབས་སུ་མཆི་བ་ནི་ཁྱོད་ཁོ་ན་སྐྱབས་སུ་གྱུར་པའོ། །ཞི་བར་གཤེགས་པ་སྟེ་གལ་
ཏེ་རབ་ཏུ་ཞི་བར་གཤེགས་ན་དེ་ནི་བདག་གི་དོན་ཏེ་བདག་གི་དཔལ་དུ་གྱུར་པའི་ཕྱིར་རོ། །སྐུ་ནི་ལུས་ཏེ་བདག་གི་ཡུལ་འདིར་དོར་ཅིག་པ་ཡིན་ནོ། །གནས་བརྟན་ཀུན་དགའ་བོས་སེམས་བསྐྱེད་པ་ཞེས་བྱ་བ་ནི་འཇིག་རྟེན་པའི་སེམས་ཏེ། ཉན་ཐོས་ཆེན་པོ་དག་ནི་བདེ་བར་གཤེགས་
པ་དང་འདྲ་བར་འཇིག་རྟེན་པའི་སེམས་བསྐྱེད་པ་ཡིན་ནོ། །ལམ་མེད་པ་ཞེས་བྱ་བ་ནི་ཕྱི་རོལ་དུ་འཇུག་པ་དང་བྲལ་བས་རབ་ཏུ་བྱུང་ཞིང་བསྙེན་པར་རྫོགས་པའི་ལས་བྱེད་དུ་རུང་བའོ། །དྲང་སྲོང་དང་འཁོར་ལྔ་བར