Luận tạng Tây Tạng (Tengyur) — Tập 158

ིད་ཉིད་ཀྱི་ཕྱིར་ཅོད་པན་བཏགས་པར་གྱུར་པ་ཡིན་ནོ། །བློན་པོ་ཆེན་པོ་ནི་རྒྱལ་ཚབ་ཏུ་དབང་བསྐུར་བ་ཡིན་ནོ། །རྐུན་མ་ནི་གཞན་གྱི་རྫས་འཕྲོག་པར་བྱེད་པའི་ཕྱིར་རོ། །བྱིས་པ་ནི་ཚར་གཅོད་པར་སྣང་བ་མ་མཐོང་བའི་ཕྱིར་རོ། །བླུན་པ་ནི་ཚར་བཅད་པར་སྣང་བ་མཐོང་བ་
ཡིན་པའི་ཕྱིར་རོ། །རྐུ་བ་ནི་རྐུ་སེམས་མངོན་དུ་ཕྱོགས་པའི་ཕྱིར་རོ། །གསོད་པ་ནི་གཞན་པ་ཉིད་དང་དད་པ་མེད་པ་ཉིད་ཀྱི་ཕྱིར་རོ། །བཅིངས་པ་ནི་དད་པ་ཡོད་དུ་ཟིན་ཀྱང་ཞེན་པ་ཉིད་ཡིན་པའམ། རྒྱ་ཆེ་བ་ཡོད་དུ་ཟིན་ཀྱང་དད་པ་མེད་པ་ཉིད་ཀྱིས་སོ། །སྤྱུག་པ་ནི་རྒྱ་ཆེ་བ་ཉིད་ཀྱི་ཕྱིར་དང་།
དད་པ་ཉིད་ཡིན་པའི་ཕྱིར་རོ། །དགེ་སློང་མའི་དངོས་པོ་ལས་ཉམས་པ་ཞེས་བྱ་བ་ནི་བསླབ་པ་ལ་ནན་ཏན་དུ་བྱེད་པ་ལྷོད་པ་ཡིན་པའི་ཕྱིར་རོ། །དགེ་སྦྱོང་གི་ཚུལ་འཇིག་པར་འགྱུར་བ་ནི་བཤགས་པའི་བསམ་པ་མ་སྐྱེས་པའི་ཕྱིར་རོ། །ཉམས་པ་ནི་བཤགས་པའི་བསམ་པ་ཡོད་དུ་ཟིན་
ཀྱང་བཤགས་པའི་ནུས་པ་མེད་པ་ཉིད་ཀྱི་ཕྱིར་རོ། །བཅོམ་པ་ནི་སྐལ་བ་མཉམ་ཞིང་རིས་མཐུན་པ་དེས་ཉོན་མོངས་པ་བཟློག་པའི་ནུས་པ་མེད་པའི་ཕྱིར་རོ། །ལྟུང་བ་ནི་རྒྱུད་ལ་དེ་སྐྱེས་པའི་ནུས་པ་མེད་པའི་ཕྱིར་རོ། །ཕམ་པར་འགྱུར་བ་ནི་ཉོན་མོངས་པ་ཚར་གཅད་པ་ཉིད་ཀྱི་ཕྱིར་རོ། །
ཕྱིར་བསླང་དུ་མེད་པར་གྱུར་པ་ནི་ཐབས་སུ་གྱུར་པ་གཞན་མེད་པའི་ཕྱིར་རོ། །བསམས་བཞིན་དུ་སྲོག་ཆགས་གྲོག་སྦུར་ལ་སོགས་པ་ཞེས་བྱ་བ་ལ་བསམས་བཞིན་དུ་སྟེ། ཕྲ་མོར་ལྟ་བར་བྱེད་པས་ན་ལྟ་བར་བྱེད་པ་ཡིན་ནོ། །སྲོག་ཆགས་གྲོག་སྦུར་གྱི་མིང་ཅན་སྲོག་གཅད་པར་མི་བྱ་ཞིང་ཐ་
དད་པར་བྱ་བ་མ་ཡིན་ནོ། །མི་ནི་དབང་པོའི་གྲོང་ཐ་དད་པ་གྲུབ་པ་ཡིན་ནོ། །མིར་ཆགས་པ་ནི་སྒོ་ངར་གཏོགས་པའམ། མངལ་ནས་སྐྱེས་པར་གཏོགས་པའི་དབང་པོའི་གནས་སྐབས་ཡོངས་སུ་མ་རྫོགས་པ་ཡིན་ནོ། །རང་གི་ལག་དར་ཏེ་ཞེས་བྱ་བ་ནི་རང་གི་ལག་གིས་དེ་ལ་མཚོན་ཆ་བྱིན་

པ་ནི་དགེ་སློང་མ་བདག་ཉིད་ཀྱིས་བསྟབས་པ་ཡིན་ནོ། །དེ་ལ་མཚོན་ཐོགས་པ་གཉེར་ཏམ་ཞེས་བྱ་བ་ནི་དེས་མཚོན་སྟོབས་པར་བྱེད་པ་གཉེར་བ་ཡིན་ནོ། །དེ་འཆིར་བཅུག་པ་ནི་སྡིག་པ་བྱེད་པ་འཆི་བའི་ཕྱིར་ཡང་དག་པར་བཀོད་པ་ཡིན་ནོ། །སྡུག་བསྔལ་བ་འགའ་
ཞིག་འཆི་བའི་བསྔགས་པ་བརྗོད་པ་སྟེ། སྡིག་བྱེད་པ་ནི་ལས་ཀྱི་རྣམ་པར་སྨིན་པར་འདོད་པ་མ་ཡིན་པ་དང་ཡང་དག་པར་ལྡན་པ་ཉིད་ཀྱི་ཕྱིར་རོ། །འཚོ་བ་ངན་པ་ནི་ལྷག་པར་སྡུག་བསྔལ་བ་ཉིད་ཡིན་པའི་ཕྱིར་རོ། །མི་གཙང་བ་ནི་འཇིག་རྟེན་པས་སྨད་པར་བྱ་བ་ཉིད་ཡིན་པའི་ཕྱིར་རོ། །
སེམས་ཀྱི་འདོད་པ་ནི་འཆིང་བའི་རྒྱུ་མཚན་བདག་ཉིད་ཀྱིས་རྙེད་པར་རྟོག་པར་བྱེད་པའི་ཕྱིར་ཐོག་མར་འཆི་བར་ཀུན་དུ་རྟོག་པར་བྱེད་ལ་འཆི་བའི་འོག་ཏུ་བདག་ཉིད་ཐོབ་པར་རྟོག་པའི་ཕྱིར་སེམས་ཀྱི་འདོད་པ་ཡིན་ནོ། །སེམས་ཀྱིས་ཕ་རོལ་པོ་འཆི་བར་རྟོག་པའི་ཕྱིར་སེམས་ཀྱིས་ཀུན་དུ་རྟོག་པ་
ཡིན་ནོ། །ཤེས་བཞིན་དུ་བརྫུན་དུ་སྨྲ་བ་ནི་ཤེས་བཞིན་དུ་བརྫུན་དུ་སྨྲ་བ་ཡིན་ནོ། །མེད་པ་ནི་ཐོབ་པ་ཡིན་ལ་མེད་བཞིན་པ་ནི་མངོན་སུམ་བྱེད་པའི་སྒོ་ནས་ཡིན་ནོ། །མིའི་ཆོས་ཀྱི་རང་བཞིན་བླ་མ་སྟེ་ཁྱད་པར་དུ་འཕགས་པ་སྨྲ་བར་འདོད་པ་ནི་བདེན་པ་མ་ཡིན་པ་སྨྲ་བར་འདོད་པ་ལ་ཞེས་བྱ་
བ་ཡིན་ནོ། །མངོན་པར་མི་ཤེས་པ་ནི་འཇིག་རྟེན་པའི་ཤེས་པའི་སྒོ་ནས་ཡིན་ལ། ཡོངས་སུ་མི་ཤེས་པ་ནི་འཇིག་རྟེན་ལས་འདས་པའི་སྒོ་ནས་ཡིན་ནོ། །འཕགས་པ་ནི་ཟག་པ་མེད་པའི་བྱེ་བྲག་ཁོང་དུ་ཆུད་པའི་ཁྱད་པར་ཐོབ་པའམ་ཤེས་པ་ཡིན་ནོ། །སྡུག་བསྔལ་ཤེས་པ་ལ་སོགས་
པ་ནི་མཐོང་བ་སྟེ་བཟོད་པ་ཡིན་ནོ། །རེག་པར་སྤྱོད་པ་ནི་བསམ་གཏན་བཞི་ཡིན་ནོ། །འདི་ཤེས་སོ། །འདི་མཐོང་ངོ་ཞེས་བྱ་བ་ལ་འཕགས་པའི་བདེན་པ་བཞི་ནི་ཤེས་པར་བྱ་བ་ཡིན་ལ། ལྷ་ལ་སོགས་པ་ནི་མཐོང་བར་བྱ་བ་ཡིན་ནོ། །ཀླུ་ནི་ཀླུ་ཕྲ་མོ་དག་ཡིན་ནོ། །ལྟོ་འཕྱེ་ཆེན་པོ་ནི་ཀླུ་ཆེན་པོ་ཡིན་ནོ། །
ཡང་ན་ལྟོ་འཕྱེ་ཆེན་པོ་ནི་སྦྲུལ་མི་བཟད་པ་ལ་བྱ་སྟེ། །མཐུ་ཆེ་བ་གང་ཡིན་པ་དེ་ལ་འདིར་གཟུང་ངོ་། །གཏམ་འདྲེ་བར་བྱེད་པ་ཞེས་བྱ་བ་ནི་གཏམ་འདྲེ་བ་ནི་གཏམ་ལ་སོགས་པ་འདྲི་བ་ཡིན་ནོ། །ཕེབས་པར་སྨྲ་བར་བྱེད་པ་ནི་དེ་རྒྱུན་གྱི་གཏམ་འདྲི་བ་ཡིན་ནོ། །སོ་སོར་ཀུན་དགའ་བར་བྱེད་པ་ནི་ཕ་རོལ་པོའི་བདེ་བ་

ཐོབ་པར་གྱུར་པ་ན་བདག་སྟོན་པར་བྱེད་པ་ཡིན་ནོ། །རྟག་ཏུ་ཡང་ལྷན་ཅིག་གནས་པར་བྱེད་དོ་ཞེས་བྱ་བ་ནི་ལྷ་ལ་སོགས་པ་དང་རྟག་ཏུ་ལྷན་ཅིག་འདུག་པར་བྱེད་ཅེས་བྱ་བའི་བར་དུ་སྟེ། གཟུགས་ན་སྤྱོད་པའི་བསྒོམས་པ་ལས་བྱུང་བ་བསམ་གཏན་གྱི་དངོས་གཞིའི་ས་དག་ཡིན་ནོ། །མི་རྟག་པའི་
འདུ་ཤེས་ནི་མི་རྟག་པ་ཉིད་དུ་འཛིན་པ་ཡིན་ནོ། །མི་རྟག་པར་ལྟ་བ་ནི་སྡུག་བསྔལ་གྱི་གཉེན་པོའི་ཕྱོགས་མ་ཡིན་པ་ཉིད་ཀྱི་ཕྱིར་སྡུག་བསྔལ་གྱི་འདུ་ཤེས་ཡིན་ནོ། །སྡུག་བསྔལ་ལ་བདག་མེད་པའི་འདུ་ཤེས་ནི་ཇི་ལྟར་གང་ཡང་སྡུག་བསྔལ་གྱི་བདག་ཉིད་ཡིན་པ་དེ་ལྟ་ན་ཡང་། སྡུག་བསྔལ་
གང་ཡིན་པ་དེ་ནི་བདག་མེད་པའི་འདུ་ཤེས་ཀྱིས་སུན་དབྱུང་བར་བྱ་བ་ཡིན་པའི་ཕྱིར་སྡུག་བསྔལ་ལ་བདག་མེད་པའི་འདུ་ཤེས་ཞེས་བྱ་བ་སྨོས་པ་ཡིན་ནོ། །ཟས་ལ་མི་མཐུན་པའི་འདུ་ཤེས་ནི་རོ་ལ་བརྐམ་པ་ལས་བཟློག་པ་ཡིན་པའི་ཕྱིར་རོ། །འཇིག་རྟེན་ཐམས་ཅད་ལ་མངོན་པར་མི་དགའ་
བའི་འདུ་ཤེས་ནི་ཆགས་པ་མེད་པའི་རང་བཞིན་ཡིན་པའི་ཕྱིར་རོ། །སྤོང་བའི་འདུ་ཤེས་ནི་ལྟ་བ་ལ་སོགས་པའི་ཉོན་མོངས་པ་བཟློག་པ་ལ་དམིགས་པ་ཡིན་ནོ། །འདོད་ཆགས་དང་བྲལ་བའི་འདུ་ཤེས་ནི་གང་དག་དེ་ལ་དམིགས་པའི་ཉོན་མོངས་པ་སྤངས་པའི་ཕྱིར་སྤངས་པ་དེ་དག་གིས་
སྤངས་པ་དེ་ནི་འདོད་ཆགས་དང་བྲལ་བ་ཞེས་བྱ་སྟེ། འདུན་པའི་འདོད་ཆགས་ལ་སོགས་པ་ལྡོག་པ་ཐོབ་པའི་ཕྱིར་རོ། །སྤངས་པ་དག་ལ་ཡང་ཀུན་དུ་སྤྱོད་པའི་འགོག་པའི་ཀུན་དུ་སྤྱོད་པ་ནི་འགོག་པ་ཡིན་ཏེ། དེ་ནི་འདིར་རང་བཞིན་གྱིས་འགོག་པ་དང་། དགེ་བ་ཟག་པ་དང་བཅས་པའི་
ཉོན་མོངས་པ་དག་གི་ཀུན་དུ་སྦྱོར་བ་འགོག་པ་དང་། དགེ་བ་དང་ཀུན་ནས་ཉོན་མོངས་པ་ནི་ལུང་དུ་མ་བསྟན་པའི་ཀུན་དུ་སྤྱོད་པའི་འགོག་པ་ཞེས་བྱ་བ་འགོག་པ་གསུམ་དུ་བསྟན་པ་ཡིན་ནོ། །རྣམ་པར་བསྔོས་པའི་འདུ་ཤེས་ནི་ལུས་ཀྱི་ཁ་དོག་གནག་ཏུ་དམིགས་པ་ཡིན་ནོ། རྣམ་
པར་རྣགས་པའི་འདུ་ཤེས་ནི་རྩ་བའི་གནས་སྐབས་འདྲུལ་བར་གནས་པ་ཡིན་ནོ། །རྣམ་པར་བམ་པའི་འདུ་ཤེས་ནི་ལུས་སྐྲངས་པར་དམིགས་པ་ཡིན་ནོ། །རྣམ་པར་འབུས་གཞིགས་པའི་འདུ་ཤེས་ནི་འབུས་གང་བར་དམིགས་པ་ཡིན་ནོ། །རྣམ་པར་ཟོས་པའི་འདུ་ཤེས་

ནི་ལུས་ཀྱི་ཤ་དང་པགས་པ་ཟོས་པར་དམིགས་པ་ཡིན་ནོ། །རྣམ་པར་དམར་བའི་འདུ་ཤེས་ནི་ལུས་ཀྱི་ཤའི་ལྷག་མ་ཉུང་བ་ལ་དམིགས་པ་ཡིན་ནོ། །རྣམ་པར་འཐོར་བའི་འདུ་ཤེས་ནི་ཡན་ལག་དང་ཉིང་ལག་ཕྱོགས་དང་ཕྱོགས་མཚམས་སུ་གཏོར་བར་དམིགས་པ་
ཡིན་ནོ། །རུས་གོང་གི་འདུ་ཤེས་ནི་ཤ་མེད་པའི་རུས་པ་ཙམ་དུ་དམིགས་པ་ཡིན་ནོ། །སྟོང་པ་ཉིད་ལ་སོ་སོར་རྟོག་པའི་འདུ་ཤེས་ནི་བདག་ཉིད་ལ་སྟོང་པ་ཉིད་དུ་འདུ་ཤེས་པ་ཡིན་ནོ། །བསམ་གཏན་དང་པོ་ནི་རྟོག་པ་དང་བཅས་དཔྱོད་པ་དང་བཅས་པ་ཡིན་ལ། གཉིས་པ་ནི་རྟོག་པ་མེད་
ཅིང་དཔྱོད་པ་མེད་པ་ཡིན་ལ། གསུམ་པ་ནི་དགའ་བ་མེད་པའི་བདེ་བ་ཡིན་ལ། བཞི་བ་ནི་སྡུག་བསྔལ་མེད་ཅིང་བདེ་བ་མེད་པ་ཡིན་ནོ། །གཞན་དག་ལ་ཕན་འདོགས་པའི་སེམས་ནི་བྱམས་པ་ཡིན་ལ། གཞན་སྡུག་བསྔལ་བ་དང་བྲལ་བར་འདོད་པ་ནི་སྙིང་རྗེ་ཡིན་ནོ། །གཞན་དག་གི་
ཕན་པ་དང་མགུ་བ་ལ་དམིགས་པ་དགའ་བ་ཡིན་ལ། གཞན་དག་གི་བདེ་སྡུག་ལ་བཏང་སྙོམས་སུ་བྱེད་པ་ནི་བཏང་སྙོམས་ཡིན་ཏེ། བསམས་པ་ལས་བྱུང་བ་དང་། བསྒོམས་པ་ལས་བྱུང་བའི་ཚད་མེད་པ་བཞི་པོ་དེ་དག་ཐག་ཉེ་བར་བྱས་པ་ཡིན་ནོ། །ནམ་མཁའ་མཐའ་ཡས་སྐྱེ་མཆེད་
ནི་ནམ་མཁའ་མཐའ་ཡས་པ་ཡིན་ནོ། །རྣམ་ཤེས་མཐའ་ཡས་པ་ཞེས་བྱ་བ་དང་། ཅི་ཡང་མེད་པ་ཞེས་བྱ་བ་ལ་སྦྱོར་བའི་སེམས་ཀྱིས་ཀུན་ནས་སློང་བ་ནམ་མཁའ་དང་རྣམ་པར་ཤེས་པ་མཐའ་ཡས་པའི་སྐྱེ་མཆེད་དག་ཡིན་ནོ། །འདུ་ཤེས་ཀྱི་ཆེ་བའི་བདག་ཉིད་ནི་འདུ་ཤེས་མེད་མིན་སྐྱེ་
མཆེད་ཡིན་ནོ། །ཟག་པ་མེད་པའི་ལམ་གྱིས་མཐོང་བས་སྤང་བར་བྱ་བའི་ཉོན་མོངས་པ་སྤངས་ནས་འདུས་བྱས་དང་འདུས་མ་བྱས་ཐ་དད་པའི་དབྱེ་བས་སེམས་ཀྱི་སྐད་ཅིག་བཅུ་དྲུག་ཐོབ་པ་གང་ཡིན་པ་དེ་ནི་རྒྱུན་དུ་ཞུགས་པའི་འབྲས་བུ་ཡིན་ནོ། །ཟག་པ་མེད་པའི་ལམ་གྱིས་བསྒོམ་པས་
སྤང་བར་བྱ་བ་རྣམ་པ་དྲུག་སྤངས་པས་འདུས་བྱས་དང་འདུས་མ་བྱས་ཀྱི་འབྲས་བུ་ཐོབ་པ་གང་ཡིན་པ་དེ་ནི་ལན་ཅིག་ཕྱིར་འོང་བའི་འབྲས་བུ་ཡིན་ནོ། །ཟག་པ་མེད་པའི་ལམ་གྱིས་འདོད་པ་ན་སྤྱོད་པའི་བསྒོམ་པས་སྤང་བར་བྱ་བའི་ཉོན་མོངས་པ་རྣམ་པ་དགུ་པ་སྤངས་པས་ཐོབ་པ་གང་ཡིན་པ་

དེ་ནི་ཕྱིར་མི་འོང་བའི་འབྲས་བུ་ཡིན་ནོ། །སྲིད་པའི་རྩེ་མོའི་བསྒོམ་པས་སྤང་བར་བྱ་བ་རྣམ་པ་དགུ་སྤངས་པས་འདུས་བྱས་དང་འདུས་མ་བྱས་ཀྱི་འབྲས་བུ་ཐོབ་པ་གང་ཡིན་པ་དེ་ནི་དགྲ་བཅོམ་པའི་འབྲས་བུའོ། །རྫུ་འཕྲུལ་ནི་ནམ་མཁའ་ལ་འགྲོ་བར་བྱེད་པ་ཡིན་ལ། དེའི་ཡུལ་ནི་ཏིང་ངེ་
འཛིན་གང་ལས་རྫུ་འཕྲུལ་འགྲུབ་པར་འགྱུར་བ་ཡིན་ནོ། །ལྷའི་རྣ་བ་ནི་ཡུལ་ཐག་རིང་བ་དང་ཕྲ་བ་དང་བར་དུ་ཆོད་པ་ཡིན་ནོ། །སེམས་ཀྱི་རྣམ་གྲངས་ཞེས་བྱ་བ་ནི་གཞན་གྱི་སེམས་ཤེས་པ་ཡིན་ནོ། །སྔོན་གྱི་སྐྱེ་བར་གནས་དང་དེར་སྐྱེས་པའི་ཕྱིར་སྔོན་གྱི་གནས་ཡིན་ཏེ། དེ་ལ་དམིགས་
པའི་ཏིང་ངེ་འཛིན་ལ་ཡང་སྔོན་གྱི་གནས་ཞེས་བྱའོ། །འཆི་འཕོ་དང་སྐྱེ་བ་ནི་འཆི་འཕོ་དང་སྐྱེ་བ་དེ་ལ་དམིགས་པའི་ལྷའི་མིག་ལ་ཡང་འཆི་འཕོ་དང་སྐྱེ་བ་ཞེས་བྱའོ། །ཟག་པ་ཟད་པ་དང་བཅས་པའི་ཤེས་པ་ཉིད་ལ་ཡང་ཟག་པ་ཟད་པའི་མངོན་པར་ཤེས་པ་ཞེས་བྱའོ། །རྣམ་པར་ཐར་པ་
བརྒྱད་ནི་གཟུགས་ཅན་གཟུགས་ལ་ལྟ་བ་ནས་ནང་གཟུགས་མེད་པའི་འདུ་ཤེས་ཀྱིས་ཕྱི་རོལ་གྱི་གཟུགས་ལ་ལྟ་བ་དགེ་བའི་རྣམ་པར་ཐར་པ་དང་། གཟུགས་མེད་པ་བཞི་དང་། འགོག་པའི་སྙོམས་པར་འཇུག་པ་ཡིན་ནོ། །གཉིས་ཀའི་ཆ་ལས་རྣམ་པར་གྲོལ་བ་ཞེས་བྱ་བ་ནི་ཉོན་མོངས་
པ་དང་། སྙོམས་པར་འཇུག་པའི་སྒྲིབ་པའི་ཆ་དག་ལས་རྣམ་པར་གྲོལ་བས་ན་གཉི་གའི་ཆ་ལས་རྣམ་པར་གྲོལ་བ་ཡིན་ནོ། །དབང་པོ་རྣོན་པོས་འགོག་པའི་སྙོམས་པར་འཇུག་པ་ཐོབ་པ་ནི་དགྲ་བཅོམ་པ་ཞེས་བྱའོ། །ཆགས་བཞིན་དུ་ཞེས་བྱ་བ་ནི་སྐྱེས་པ་དེ་ལ་འདོད་པའི་
འདོད་ཆགས་ཀྱི་སྒོ་ནས་ཆགས་པར་གྱུར་པ་ཡིན་ནོ། །ཆགས་ནས་ཞེས་བྱ་བ་ནི་སྐྱེས་བུ་ཀུན་ནས་ཆགས་པར་འགྱུར་བའི་སྒོ་ནས་སོ། །ཅུང་ཞིག་ནི་ཕྱོགས་གཅིག་ཡིན་ལ། རེག་པ་ནི་ཉུག་པར་བྱེད་པ་ཡིན་ཞིང་ཀུན་ནས་རེག་པ་ནི་ཡོངས་སུ་ཉུག་པར་བྱེད་པ་ཡིན་ནོ། །
འཇོ་སྒེག་བྱེད་པ་ནི་ཕན་ཚུན་རྔོད་པར་བྱེད་པའོ། །འཕྱར་གཡེང་ནི་འདོད་པ་དང་རྗེས་སུ་མཐུན་པའི་ཚིག་བརྗོད་པའོ། །རྩབ་ཧྲལ་ནི་འདོད་པ་དང་རྗེས་སུ་མཐུན་པའི་སྐད་གསང་མཐོ་ལ་མི་གསལ་བསྒྲོག་པར་བྱེད་པའོ། །གང་གི་ཚེ་ཁོ་བོ་སྔ་དྲོ་ལ་སོགས་པ་མཐོང་བར་གྱུར་

པ་དེའི་ཚེ་བདག་གྲུབ་པ་ཡིན་པར་ཤེས་པར་བྱའོ་ཞེས་བྱ་བ་ནི་ཡུལ་ཕྱོགས་སྟོན་པར་བྱེད་པ་ཡིན་ནོ། །གང་གི་ཚེ་ཁོ་བོ་སྦྱར་མ་དམར་སེར་བགོས་པ་དང་ལྷུང་བཟེད་ཐོགས་པར་མཐོང་བ་ཞེས་བྱ་བ་ལ་སོགས་པ་ནི་མཚན་མ་ཡིན་ནོ། །གཉི་ག་མངོན་པར་འདོད་པའི་
གནས་སུ་འགྲོ་བ་ནི་བརྡ་ཡིན་ནོ། །དངོས་པོ་བརྒྱད་ཅེས་བྱ་བ་ནི་ཡན་ལག་བརྒྱད་དང་ལྡན་པའི་ལུས་བཀན་པ་ཡིན་ཏེ། དེ་ཡང་ཀུན་ནས་ཆགས་པ་ཉིད་ནི་ཡན་ལག་གཅིག་ཡིན་ལ། འཇོ་སྒེག་བྱེད་པ་ནི་གཉིས་པ་ཡིན་ནོ། །འཕྱར་གཡེང་བྱེད་པ་ནི་གསུམ་པ་ཡིན་ནོ། །རྩབ་
ཧྲལ་བྱེད་པ་ནི་བཞི་པ་ཡིན་ནོ། །ཡུལ་ཕྱོགས་ནི་ལྔ་པ་ཡིན་ནོ། །མཚན་མ་ནི་དྲུག་པ་ཡིན་ནོ། །བརྡ་ནི་བདུན་པ་ཡིན་ནོ། །འོང་བ་བདག་གིར་བྱེད་པ་ནི་བརྒྱད་པ་ཡིན་ནོ། །ལུས་བཀན་པ་ཁོ་ན་ལས་ཕམ་པར་འགྱུར་བ་སློང་བར་བྱེད་པ་ཡིན་ལ་སེམས་ཀུན་ནས་ཆགས་པ་དང་གཡོ་ལ་
སོགས་པ་ནི་ཐམས་ཅད་དུ་སྦོམ་པོར་འགྱུར་རོ། །སྨྲ་བའི་ཡན་ལག་ཡོད་པ་དགེ་སློང་མས་དགེ་སློང་མའི་ཕམ་པར་འགྱུར་བ་ཞེས་བྱ་བའི་ཁ་ན་མ་ཐོ་བ་འཆབ་པར་བྱེད་པ་དེའི་ཚེ་དེ་ཉིད་ཀྱི་ཕམ་པར་འགྱུར་བའི་ཁ་ན་མ་ཐོ་བ་སློང་བར་འགྱུར་རོ། །བཟློག་པར་བྱ་བ་ནི་ཟློག་པ་དང་རྗེས་སུ་
མཐུན་པའི་ལས་ཡིན་ཏེ། བཟློག་པ་ཡང་དགེ་འདུན་ལས་ཕྱི་རོལ་དུ་བྱས་པ་ཡིན་ནོ། །ལངས་པ་ནི་མི་མཐུན་པ་ལ་བྱ་ལ། བསྙལ་བ་ནི་མཐུན་པ་ཡིན་ཏེ། ལངས་པར་གྱུར་ནས་བསྙལ་བ་བཞིན་གྱུར་པ་ནི་ལངས་པ་དང་བསྙལ་བའམ། སྐྱོ་བས་སྒྲ་ལངས་པར་གྱུར་པ་གང་ཡིན་པ་
དེ་ནི་ལངས་པ་ཡིན་ལ། འོག་ཏུ་བསྙལ་བས་ན་ཉལ་བ་ཡིན་ནོ། །ཤིན་ཏུ་འོག་ཏུ་འཇུག་པར་བྱེད་པས་ན་སྤུ་སྙོལ་བར་བྱེད་པ་ཡིན་ནོ། །ཉེས་པ་དེ་ལས་བཟློག་པའི་ཕྱིར་འཇུག་པ་ནི་འབྱུང་བའི་ཕྱིར་འཇུག་པ་ཡིན་ལ། དགེ་འདུན་དང་ལྷན་ཅིག་བྱ་བ་མཚུངས་པར་ཁས་བླངས་པས་ན་མཚུངས་པ་
སྟོན་པར་བྱེད་པ་ཡིན་ནོ། །དོར་བ་ནི་བཟློག་པར་བྱ་བའི་ལས་དང་བྲལ་བའི་ཕྱིར་རང་བཞིན་དུ་གནས་པ་ཐོབ་པར་གྱུར་པ་སྟེ། ཤིན་ཏུ་དམའ་བར་འཇུག་པ་ཡིན་ནོ། །དེ་དང་འདྲ་བར་ཡིད་ལ་བྱེད་པ་སྒོམ་པ་ནི་འདིར་སྦྱོར་བ་ཡིན་ལ་མོས་པ་ཡིད་ལ་བྱེད་པ་སྐོམ་པ་ནི་ཡིད་ལ་བྱེད་པ་ཡིན་ནོ། །

ཡང་དག་པར་རྗེས་སུ་སྦྱོར་བར་བྱ་བ་ནི་དགེ་བ་ལ་འཇུག་པར་བྱ་བ་ཡིན་ལ། ཡང་དག་པར་རྗེས་སུ་བསྟན་པར་བྱ་བ་ནི་མི་དགེ་བ་ལས་བཟློག་པ་ལའོ། །དགེ་སྦྱོང་བྱེད་པ་ཞེས་བྱ་བ་ལ་སོགས་པ་ལ། དགེ་སྦྱོང་ནི་དགེ་སྦྱོང་བྱེད་པ་ཡིན་ནོ། །གང་གི་ཕྱིར་བཟོད་པས་དགེ་སྦྱོང་དུ་གྱུར་པ་ཡིན་ཏེ།
བཟོད་པའི་རང་བཞིན་དག་ཀྱང་དགེ་སྦྱོང་བྱེད་པ་ཡིན་ལ། ཁྲོ་བ་དང་གཤེ་བ་དང་། བརྡེག་པ་དང་མཚང་འདྲུ་བ་བཟོད་པ་དག་ནི་དགེ་སྦྱོང་དུ་བྱེད་པའི་ཆོས་དག་ཡིན་པས་སླར་མི་ཁྲོ་བ་དང་། སླར་མཚང་མི་འབྲུ་བའི་བཟོད་པ་དང་ལྡན་པ་ནི་དགེ་སྦྱོང་མར་འགྱུར་བ་ཡིན་ནོ། །གང་ཁྱོད་སྔོན་ཞེས་བྱ་བ་
ལ་སོགས་པའི་གཞུང་གིས་མངོན་པར་འདོད་པའི་ཕུན་སུམ་ཚོགས་པ་བསྟན་པ་ཡིན་ནོ། །མི་གཡོ་བ་ནི་ཡང་བྱ་བ་མ་ཡིན་པའོ། །གཞག་པར་མི་འོས་པ་ནི་ཆོ་ག་བརྩམས་པ་ཁོ་ན་འཇིག་པ་མེད་པའི་ཕྱིར་གཞག་པར་འོས་པ་མ་ཡིན་པ་ཞེས་བྱའོ། །གང་བསྙེན་པར་རྫོགས་ནས་ཞེས་བྱ་བ་ལ་
སོགས་པས་ཚུལ་ཁྲིམས་ཀྱིས་མཉམ་པར་གྱུར་པ་ཉིད་དུ་ངེས་པར་སྦྱོར་བ་སྟོན་པ་ཡིན་ནོ། །ཚུལ་ཁྲིམས་ཀྱིས་མཉམ་པ་ཉིད་ནི་བསྙེན་པར་རྫོགས་ནས་ལོ་བརྒྱ་ལོན་པ་དང་། དེང་བསྙེན་པར་རྫོགས་པ་དག་ཚུལ་ཁྲིམས་ཉིད་ཀྱིས་མཚུངས་པ་སྟེ། སོ་སོར་ཐར་པའི་སྡོམ་པ་ཉིད་ཀྱིས་མཉམ་པ་
ཡིན་ནོ། །བསླབ་པ་ཉིད་ཀྱིས་མཉམ་པ་ཞེས་བྱ་བ་ལ། ཀུན་ཀྱང་སྲོག་གཅོད་པ་ལ་སོགས་པ་ལས་ལྡོག་པའི་བསླབ་པར་བྱ་བས་མཉམ་པ་དག་ཡིན་ནོ། །སོ་སོར་ཐར་པའི་མདོ་འདོན་པ་ཉིད་ཀྱིས་མཉམ་པ་ཞེས་བྱ་བ་ནི་ཀུན་ཀྱང་རྗེས་སུ་བསྟན་པའི་མཆོག་ལ་རག་ལས་པར་མཚུངས་པ་
ཡིན་ཏེ། ཀུན་ཀྱང་མཐར་ཚུལ་ཁྲིམས་རྣམ་པར་དག་པས་མཉམ་པ་ཞེས་བྱ་བའི་དོན་འདིར་འགྱུར་རོ། །ཕ་དང་མའི་འདུ་ཤེས་ཞེས་བྱ་བ་འདི་ནི་འཇིག་རྟེན་པའི་ཕ་མ་ལ་སོགས་པའི་ཐ་སྙད་ཀྱིས་སྒྲོ་འདོགས་པ་ལ་ངེས་པར་སྦྱར་བར་བྱ་བ་ཡིན་ནོ། །ངེས་པར་སྦྱོར་བའི་འབྲས་བུ་ཡང་ནད་
གཡོག་ལ་སོགས་པ་ཡིན་པར་བསྟན་པ་ཡིན་ནོ། །གུས་པ་ནི་ཡོན་ཏན་དོན་དུ་གཉེར་བ་སྔོན་དུ་སོང་བ་ཅན་གྱི་ཡོན་ཏན་དང་ལྡན་པ་དག་ལ་གུས་པ་ཡིན་ཏེ། དེ་དག་ནི་ཡོན་ཏན་ཐམས་ཅད་ཀྱི་འབྱུང་གནས་ཡིན་པ་དེའི་ཕྱིར་གུས་པ་དང་བཅས་པས་འཇུག་པར་བྱ་བ་ཡིན་ནོ་ཞེས་ནི་གཙོ་

བོ་གཉིས་པ་ལ་བྱ་སྟེ་བདག་ཉིད་གཙོ་བོ་གཉིས་པ་མཐོང་བས་བྱ་བ་མ་ཡིན་པ་ལས་སླར་ལོག་པར་འགྱུར་རོ། །གཉི་གའི་དབང་ལ་རག་ལུས་པ་ཉིད་ཀྱིས་གནས་པ་ནི་འཇིགས་པའི་དབང་གིས་སེམས་གནས་པ་ཡིན་ལ། སེམས་འཇིགས་པ་དང་བཅས་པའི་
དབང་གིས་འཇུག་ཅིང་གནས་པའི་ཕྱིར་འཇིགས་པ་དང་བཅས་པའི་དབང་དུ་གྱུར་པར་བྱ་བ་ཡིན་ཏེ། རྒན་རབས་རྣམས་ལ་ཡང་ཡོན་ཏན་དོན་དུ་གཉེར་བས་གུས་པར་བྱ་བ་དང་གཙོ་བོར་བྱ་བ་དང་སེམས་མཉེས་པ་མེད་པས་འཇིགས་པར་བྱ་བ་ཡིན་ནོ། །ཇི་ལྟར་གནས་བརྟན་དང་བར་
མ་དང་གསར་བུ་རྣམས་ལ་དེ་བཞིན་དུ་བྱའོ། །ལུང་མནོད་པར་བྱའོ་ཞེས་བྱ་བ་ལ་སོགས་པས་བྱ་བ་ལ་ངེས་པར་སྦྱར་བ་ཡིན་ནོ། །མ་ཐོབ་པ་ཐོབ་པར་བྱ་བ་ནི་རྙེད་པ་འགྱུར་བ་ཡིན་ལ། མ་རྟོགས་པ་རྟོགས་པར་བྱ་བ་ནི་ཁོང་དུ་ཆུད་པ་ཡིན་ནོ། །མངོན་དུ་མ་བྱས་པ་མངོན་སུམ་དུ་
བྱས་པ་ནི་མངོན་དུ་བྱས་པ་ཡིན་ནོ། །བརྩོན་པ་མི་དོར་བར་བྱའོ་ཞེས་བྱ་བ་ནི་བརྩོན་འགྲུས་བརྩམ་པར་བྱ་བ་ལ་ངེས་པར་སྦྱར་བ་ཡིན་ནོ། །གཏམ་འདྲེས་པ་ནི་རྒྱུན་མི་འཆད་པར་མཛའ་བ་ཡིན་ནོ། །ཕེབས་པར་སྨྲ་བ་ནི་འབྲིང་དུ་མཛའ་བ་ཡིན་ནོ། །སྨོས་འདྲིན་ནི་བཤེས་པར་གྱུར་པ་ཡིན་
ལ། འགྲོགས་བཤེས་ནི་ལམ་གཅིག་ཏུ་ཞུགས་པ་ལ་སོགས་པས་ཀུན་ནས་བསྐྱེད་པ་སྡུག་པ་གཡོ་བ་ཅན་ཡིན་ནོ། ཤེས་རབ་མཆོག་སྟེ་སངས་རྒྱས་བཅོམ་ལྡན་འདས་དེའི་བསྟན་པ་ལ་ཁྱོད་བསྙེན་པར་རྫོགས་པར་གྱུར་པས་ཇི་ལྟར་དལ་འབྱོར་ཏེ། དགེ་བའི་ལས་ཀྱི་གནས་སྐབས་
འབྱོར་བར་གྱུར་པ་ལྡོག་པ་མེད་པར་འགྱུར་བ་དེ་ལྟར་བྱ་བ་ཡིན་ནོ། །མཛེས་པ་ཞེས་བྱ་བ་འདིས་ནི་ལུས་དག་པ་དང་། ཡོངས་སུ་དག་པ་ཞེས་བྱ་བ་འདིས་ནི་ལས་དག་པ་བསྟན་པ་ཡིན་ནོ། །ལུས་ཡོངས་སུ་དག་པ་དང་ལས་ཡོངས་སུ་དག་པས་རབ་ཏུ་བྱུང་བ་དང་བསྙེན་པར་རྫོགས་པར་
གྱུར་ཏེ་མཛེས་པ་དང་ཡོངས་སུ་དག་པ་གཉི་ག་ལ་རབ་ཏུ་བྱུང་བ་དང་བསྙེན་པར་རྫོགས་པ་གཉི་ག་སྦྱར་བར་བྱའོ་ཞེས་བྱ་བའི་ཐ་ཚིག་གོ། །བག་ཡོད་པར་སྒྲུབས་ཤིག་ཅེས་བྱ་བ་ནི་བག་ཡོད་པ་ལ་ངེས་པར་སྦྱར་བ་ཡིན་ནོ། །སྐྱེ་དགུའི་བདག་མོ་ཆེན་མོ་རབ་ཏུ་བྱུང་བས་འཕེལ་བ་ཡིན་ལ།

གཞན་དག་རབ་ཏུ་བྱུང་བས་རྒྱས་པ་ཡིན་ཞིང་ཕྱོགས་ཕྱོགས་སུ་རབ་ཏུ་རྒྱུ་བའི་ཕྱིར་ཡངས་པར་གྱུར་པ་ཉིད་ཡིན་ནོ། །ཨེ་མའོ་ཞེས་བྱ་བ་ནི་དོན་དུ་གཉེར་བ་ལ་འཇུག་པ་ཡིན་ནོ། །གསར་དུ་འོངས་པས་བསྟན་པའི་བྱ་བ་ལ་གོམས་པ་མེད་པའི་ཕྱིར་གསར་བུ་ཡིན་ནོ། །གསར་བུ་བསྙེན་པར་
རྫོགས་པས་ན་བར་མ་ཡིན་ནོ། །ན་ཚོད་ཆུང་བ་ཉིད་ཀྱི་ཕྱིར་གཞོན་རབས་ཡིན་ནོ། །དུས་ཉུང་བ་ཉིད་ཀྱི་ཕྱིར་རབ་ཏུ་བྱུང་ནས་རིང་པོ་མ་ལོན་པ་ཡིན་ནོ། །དྲ་བ་བཀང་སྟེ་ཞེས་བྱ་བ་ནི་དྲ་བར་བཅུག་པ་ཡིན་ཏེ་དེ་ནི་དགེ་སློང་དག་བསོད་སྙོམས་ལ་རྒྱུ་བས་དུབ་པ་ཡོངས་སུ་སྤང་བའི་ཕྱིར་རང་གི་ཁྱིམ་ནས་
འབྲས་ཆན་ལ་སོགས་པའི་བསོད་སྙོམས་འཛིན་པར་བྱེད་པའི་དྲ་བ་དག་ཏུ་བསོད་སྙོམས་བཅུག་ནས་བདག་ཉིད་ཁོ་ན་གཙུག་ལག་ཁང་དུ་འོངས་ནས་བསོད་སྙོམས་སྟོབས་པར་འགྱུར་བ་དེ་བུད་མེད་རབ་ཏུ་བྱུང་བ་ལས་རྙེད་པའི་བར་ཆད་དུ་འགྱུར་རོ་ཞེས་བྱ་བའི་དོན་འདིར་འགྱུར་རོ། །ཉི་མ་གཅིག་ཀྱང་
ལོངས་སྤྱོད་པར་མ་གྱུར་པ་ནི་མ་བགོས་པ་ཡིན་ལ། ཐག་པས་བཏགས་མ་ཐག་པ་ནི་སར་པ་ཡིན་ནོ། །འདིའི་སྟེང་དུ་གཤེགས་ཤིག་པ་ནི་རྐང་པ་དག་གིས་གནོན་པར་རེག་ཅེས་བྱ་བ་ཡིན་ཏེ། འདིས་ནི་བསྙེན་བཀུར་བ་ཉམས་པ་ཡིན་ནོ། །ཡན་ལག་གི་མཆོག་ལས་སྐྱེས་པ་ནི་མགོ་ལས་སྐྱེས་པ་
ཡིན་ཏེ། འདིས་ནི་ཤིན་ཏུ་གུས་པར་ཕྱག་བྱེད་པ་ཉམས་པ་བསྟན་པ་ཡིན་ནོ། །གཟི་བརྗིད་ཀྱི་འོད་ཀྱིས་ཞེས་བྱ་བ་ནི་ཚུལ་ཁྲིམས་<གྱི་‚ཀྱི་>གཟི་བརྗིད་ཀྱིའོ། །ཟིལ་གྱིས་གནོན་པ་ནི་ཁྱབ་པར་གྱུར་པའམ་ཡོངས་སུ་ཟད་པ་སྒྲུབ་པར་འགྱུར་བ་ཡིན་ཏེ། འདིས་ནི་ཚུལ་ཁྲིམས་ཡོངས་སུ་ཉམས་པར་
བསྟན་པ་ཡིན་ནོ། །རོ་ཞེས་བྱ་བ་ནི་ཤི་བ་དང་འདྲ་བ་ཡིན་ཏེ། ཚུལ་ཁྲིམས་ཀྱི་འཚོ་བ་དང་བྲལ་བ་ཉིད་ཀྱི་ཕྱིར་རོ། །ཉམས་པ་མེད་པ་ཞེས་བྱ་བ་ནི་ལྟུང་བས་བྲལ་བའི་ཉེས་པ་མེད་པ་ཡིན་ནོ། །ཉམས་པ་མེད་པ་ཞེས་བྱ་བ་ནི་མི་ཚངས་པར་སྤྱོད་པ་འཁྲིག་པ་དང་འབྲེལ་བའི་ཁ་ན་མ་ཐོ་བ་
མེད་པ་ཡིན་ཏེ། བསྟན་པ་འཕགས་པའི་གང་ཟག་བརྒྱད་རྒྱས་པའི་རྒྱུན་ཡོད་པར་ཡང་འགྱུར་རོ། །འདིས་ནི་བུད་མེད་ཀྱི་ཡུལ་རབ་ཏུ་བྱུང་བ་ཡོན་ཏན་འཇིག་པའི་རྒྱུ་ཉིད་དུ་བསྟན་པ་ཡིན་ནོ། །དགེ་སློང་ཕ་མ་རྣམས་ཀྱི་ཐུན་མོང་དུ་གྱུར་པའི་ལམ་ནི་དགག་དབྱེ་ལ་སོགས་པ་ཡིན་ནོ།

གཟིར་བ་ནི་གནོད་པར་གྱུར་བ་ཡིན་ནོ། །ལན་ཅིག་བཅགས་པ་ནི་དགེ་སློང་མའི་དངོས་པོ་ཡང་ལན་ཅིག་བཏང་ནས་ཡང་ནོད་པའི་མཐུ་མེད་པ་ཞེས་བྱ་བ་ནི་སྡོམ་པ་སྐྱེ་བའི་ནུས་པ་མེད་པ་སྟེ། སྐྱེ་བའི་ཆོས་ཅན་མེད་པ་ཞེས་བྱ་བའི་བར་དུའོ། །མཛའ་བ་ལས་མཛའ་བ་
སྐྱེས་པར་གྱུར་ཏོ་ཞེས་བྱ་བ་ནི་རྒྱུན་གྱི་སྒོ་ནས་འཕེལ་བར་གྱུར་པ་ཡིན་ནོ། །འདས་ཤིང་དུས་འདས་པ་ཞེས་བྱ་བ་ལ་དུས་མ་ཡིན་པའི་འཆི་བས་འཆི་བ་ནི་འདས་པ་ཡིན་ལ། དུས་སུ་འཆི་བ་ནི་དུས་ལས་འདས་པ་ཡིན་ནོ། །མཛའ་བོའི་འབྲེལ་པ་སྔོན་དུ་སོང་བ་ཅན་ནི་འདིར་གྲོགས་པོ་ཡིན་
ནོ། །བུ་དང་ཚ་བོའི་འབྲེལ་པ་ནི་བུ་དང་ཚ་བོའི་འབྲེལ་པས་སོ། །བུ་མོའི་བུ་ནི་སྣག་གི་ཚ་བོ་ཡིན་ལ། དེའི་ཡང་བུ་ནི་ཡང་ཚ་ཡིན་ཏེ། སྣག་གི་ཚ་བོ་དང་ཡང་ཚ་དག་གི་འབྲེལ་པས་སོ། །རྙེད་པར་སྨོན་པ་ཞེས་བྱ་བ་ནི་བུ་མོ་ལ་འབབ་ཅིང་གཞོལ་བའི་སེམས་ཡིན་ནོ། །རིད་ཅིང་
ཞེས་བྱ་བ་ནི་ཤ་ཆུང་བར་གྱུར་པའོ། །ཉམ་ཆུང་བ་ཞེས་བྱ་བ་ནི་ལུས་ཀྱི་བྱ་བའི་ནུས་པ་དམན་པའོ། །ཚོགས་ཆེན་མ་ནི་སྨད་འཚོང་བ་ཡིན་ཏེ། ཚོགས་ཀྱིས་ཡོངས་སུ་ལོངས་སྤྱོད་པར་བྱ་བ་ཉིད་ཡིན་པའི་ཕྱིར་རོ། །བཀྲེན་པ་ནི་འདིར་ཡོངས་སུ་ཤེས་པ་དང་བྲལ་བ་ཡིན་པར་ཤེས་པར་
བྱའོ། །སྟེང་གཡོགས་ནི་ཁྱིམ་གྱི་སྟེང་དུ་ཁྱིམ་གཞན་བྱས་པ་ཡིན་ནོ། །ཤེས་པ་ཅན་མ་ཡིན་པ་ཞེས་བྱ་བ་ནི་མི་ཤེས་པའོ། །སྣོད་ནི་ཟངས་དང་བུམ་པ་ལ་སོགས་པ་ཡིན་ལ་སྤྱད་ནི་ཁ་ཕོར་དང་ནལ་ཟེ་ལ་སོགས་པ་ཡིན་ནོ། །རླུང་གི་ཤུགས་དང་འདྲ་བར་ཞེས་བྱ་བ་ནི་རླུང་མགྱོགས་པ་
དང་མཚུངས་པར་རོ། །མནའ་མ་བླངས་མ་ཐག་བཤེས་པ་མི་བརྟན་པ་ནི་འདྲིས་པ་མི་བརྟན་པའོ། །སེམས་དང་སེམས་ལས་བྱུང་བའི་རྒྱུ་བ་ནང་དུ་བསྡུས་ཏེ་ཞེས་བྱ་བ་ནི་ཡིད་མི་བདེ་བ་རྣམ་པ་དུ་མས་བསྲུངས་པར་གྱུར་པའོ། །རབ་ཏུ་གཞོན་ཞིང་ཞེས་བྱ་བ་ནི་གཞོན་ནུ་གཞན་དག་ལས་
ཤིན་ཏུ་གཞོན་ནུར་གྱུར་པའོ། །བྲལ་བ་ནི་ཡོངས་སུ་དོར་བའོ། །བྱུག་པ་དང་ཞེས་བྱ་བ་ལ་སོགས་པ་ལ་འདྲིམ་པར་བྱེད་པས་བླངས་པའི་དྲིའི་མཆོག་བྱུག་པ་ལ་སོགས་པ་དང་། གུས་པའི་ཚིག་དང་། དགའ་བ་སྐྱེད་པར་བྱེད་པའི་ཚིག་གིས་ངལ་བསོས་ནས་ཁྱིམ་དུ་འཇུག་པ་ཡིན་ནོ། །

སྦྲུལ་གདུག་པས་ཟིན་པ་ཞེས་བྱ་བ་ནི་སྦྲུལ་གྱིས་སྙིང་ག་ནས་བཟུང་བའམ། སོར་མོ་གཉིས་པ་ལ་རེག་པའི་སྒོ་ནས་བཟུང་བ་ཡིན་ནོ། །ལག་པས་བསྒུལ་ཏེ་ཞེས་བྱ་བ་ནི་ལག་པས་བསྒྱུར་ཏེའོ། །ཆུ་ངོགས་ཆད་པས་ཞེས་བྱ་བ་ལ་སོགས་པས་དེ་ཉིད་གཡང་ས་ཡིན་ནོ། །ཕྱི་ཕྱིར་ཞེས་བྱ་
བ་འདི་ནི་སྨྲེ་སྔགས་འདོན་པའི་ཚིག་གི་སྒོ་ནས་ཀྱི་ཧུད་ཅེས་འབོད་པའོ། །རྣམ་པ་ཞེས་བྱ་བ་ནི་རྣམ་པ་དང་རྣམ་པ་ནི་རྣམ་པ་སྟེ། རྣམ་པ་མང་པོ་ཞེས་བྱ་བའི་བར་དུའོ། །རྣམ་པ་ཆེན་པོའི་སྒོ་ནས་འབྲས་བུ་འབྱིན་པ་ལ་མངོན་དུ་ཕྱོགས་པ་འཕེལ་ཞིང་ཡོངས་སུ་རྒྱས་པར་གྱུར་པའོ། །དེའི་
ཕ་དང་མ་ལ་སོགས་པ་འཆི་བ་ནི་ཕ་དང་མ་ལ་སོགས་པའི་ལས་ཁོ་ན་ལས་གྲུབ་པ་ཡིན་ཏེ། དེའི་སྡིག་པའི་ལས་ཀྱང་ཕ་དང་མ་ལ་སོགས་པ་དེ་དག་གི་ལས་ཀྱི་ལྷན་ཅིག་བྱེད་པ་ཡིན་པ་དེའི་ཕྱིར་འགའ་ཞིག་ཀྱང་གཞན་གྱི་ལས་ཀྱིས་འཆི་བར་མི་འགྱུར་ཞིང་གཞན་གྱིས་བྱས་པའི་ལས་ཀྱི་རྣམ་
པར་སྨིན་པ་གཞན་གྱིས་མྱོང་བར་འགྱུར་བ་མ་ཡིན་ནོ། །ཅིག་ཅར་ཞེས་བྱ་བ་ནི་དུས་གཅིག་ཏུའོ། །དབེན་པ་ཞེས་བྱ་བ་ནི་སྐྱེ་བོ་རྒྱུ་བ་དང་བྲལ་བའམ་གཙང་བ་དག་ཡིན་ནོ། །བདེ་བར་གནས་པར་འགྱུར་རོ་ཞེས་བྱ་བ་ནི་གཞན་ལ་རག་ལུས་པ་མེད་པར་བདེ་བར་གནས་པའི་ངང་ཚུལ་ཅན་དུ་
འགྱུར་བའོ། །གླགས་བལྟས་པར་ཞེས་བྱ་བ་ནི་ཅི་ལྟར་འདོད་པར་ཡོངས་སུ་ལོངས་སྤྱོད་པའི་སྒོ་ནས་ཟིལ་གྱིས་གནོན་པར་འགྱུར་བའོ། །གནོད་སེམས་ཀྱིས་ཀུན་ནས་དཀྲིས་པར་གྱུར་ཏེ་ཞེས་བྱ་བ་ནི་གསོད་སེམས་འཇུག་པར་བྱེད་པའི་ཉོན་མོངས་པ་ཡིན་ནོ། །ཐབ་ནི་མེ་འབུད་པའི་
གནས་ཡིན་ཏེ། གང་འཇིག་རྟེན་པས་མེ་ཐབ་ཅེས་ཐ་སྙད་དུ་བཏགས་པ་ཡིན་ནོ། །ཟངས་ནི་སྣོད་ཀྱི་བྱེ་བྲག་གོ། །བྱིས་པ་ནི་ན་ཚོད་དང་པོ་ལ་བབ་པའོ། །འདོད་ཆགས་ཀྱི་ཁ་ན་མ་ཐོ་བ་ཆུང་མོད་ཀྱི་ཞེས་བྱ་བ་ལ་ནི་གསོད་པ་ལ་སོགས་པ་སྲིད་པ་དེའི་ཕྱིར་སྡིག་པ་ཆུང་བ་ཡིན་ནོ། །འབྲལ་
བར་ནི་དཀའོ་ཞེས་བྱ་བ་ནི་འདོད་ཆགས་རྡོ་རྗེ་ལྟ་བུས་ཤིན་ཏུ་སྤང་བར་བྱ་བ་ཉིད་ཡིན་པའི་ཕྱིར་རོ། །ཞེ་སྡང་ཁ་ན་མ་ཐོ་བ་དང་བཅས་པ་ཆེ་ལ་ཞེས་བྱ་བ་ནི་ཞེ་སྡང་གིས་སྲོག་གཅོད་པ་ལ་སོགས་པའི་ལས་ངན་པ་སྲིད་པའི་ཕྱིར་ཞེ་སྡང་ནི་སྡིག་པ་ཉིད་ཆེ་བ་ཡིན་ནོ། །བྲལ་བར་སླ་བ་ཞེས་བྱ་

བ་ནི་འདོད་པའི་ཁམས་ཀྱི་འདོད་ཆགས་དང་བྲལ་བས་མ་ལུས་པར་སྤངས་པའི་ཕྱིར་རོ། །རོ་འཇོག་པར་བྱེད་པའི་ཁྱིམ་རྐུ་བར་བྱེད་པ་ལ་བྱང་ཕྱོགས་པའི་མི་དུར་རྐུ་བ་ཞེས་ཐ་སྙད་དུ་བཏགས་པ་ཡིན་ནོ། །སྨྱོས་པའི་ནད་ཀྱིས་ནོན་པར་གྱུར་པས་ན་སྨྱོས་པར་གྱུར་པ་སྟེ། བར་
བར་དུ་རང་གི་སེམས་རྙེད་པར་གྱུར་པ་ཡིན་ནོ། །རྒྱུན་མི་འཆད་པར་སེམས་པར་གྱུར་པ་གང་ཡིན་པ་དེ་ནི་སེམས་གཡེངས་པ་ཡིན་ནོ། །ལག་པ་དང་རྐང་པ་གས་ཤིང་རྩུབ་པ་སྟེགས་ཤིང་རྩུབ་ལ་སྐྲ་རིང་བར་གྱུར་པའོ། །བསམ་གྱིས་མི་ཁྱབ་པ་ཞེས་བྱ་བ་ནི་བསམ་པའི་ཡུལ་ལས་ཤིན་ཏུ་འདས་པ་
ཡིན་ཏེ། ཇི་ལྟར་ལས་འདི་ལས་འབྲས་བུ་འདི་འབྱུང་བར་འགྱུར་རོ་ཞེས་བྱ་བ་དེ་ལྟར་བསམ་པར་བྱ་བ་ཉིད་མ་ཡིན་པའི་ཕྱིར་རོ། །ཤིན་ཏུ་ངོ་ཚ་བ་དང་ལྡན་པས་ན་ངོ་ཚ་བའི་ཚུལ་དུ་གྱུར་པ་ཡིན་ནོ། །ཕན་ཚུན་དུ་རྣ་བའི་ནང་དུ་སྨྲ་བར་བྱེད་པའི་ཕྱིར་གཅིག་ལ་གཅིག་རྣ་བར་བཤུབ་པའོ། །ལས་
ཀྱི་རྣམ་པར་སྨིན་པའི་རྒྱུད་ནི་རྣམ་པར་སྨིན་པའི་རྒྱུན་ཡིན་ནོ། །བདག་ཉིད་ཐར་བར་བྱའོ་ཞེས་བྱ་བ་ནི་བདག་ཉིད་ཉེས་པ་ལས་གྲོལ་བར་བྱ་བར་རོ། །ཕྱེས་བཏུལ་བའི་བཏུང་བ་ནི་ཆུ་གྲང་མོའི་སྐྱོ་མ་ཡིན་ནོ། །རབ་ཏུ་ཁྲོས་པའི་སེམས་ཀྱིས་སྨྲ་བ་དང་ཕྱིར་སྨྲ་བ་ནི་འཐབ་མོ་ཡིན་ནོ། །རབ་ཏུ་ཁྲོས་
པའི་སེམས་ཀྱིས་འཁོར་གྱི་ནང་དུ་བསྒྲག་པར་བྱ་བ་མ་ཡིན་པའི་དངོས་པོ་སྒྲོག་པར་བྱེད་པ་ནི་མཚང་འདྲུ་བའོ། །ཕན་ཚུན་གནོད་པར་བྱེད་པ་ནི་འཁྲུག་པ་ཡིན་ནོ། །ཕྱི་མིའི་མདུན་དུ་སྨྲ་བ་དང་ཕྱིར་སྨྲ་བ་ནི་རྩོད་པའོ། །གཡོའི་ཀུན་དུ་སྤྱོད་པས་ཞེས་བྱ་བ་ནི་བཅོས་མ་དང་གྱ་གྱུའི་བསམ་པས་སོ། །སྐྱེ་
གནས་དག་པར་གྱུར་ཏེ་ཞེས་བྱ་བ་ནི་སྐྱེ་གནས་ཚིལ་གྱིས་གཡོགས་པ་ཉིད་ལས་ཕྲག་དོག་གིས་དེ་རིད་པར་གྱུར་པར་རོ། །ཚིལ་དང་བྲལ་བར་གྱུར་པ་དེའི་ཕྱིར་འདིའི་མངལ་ཡོངས་སུ་དག་པར་གྱུར་པ་ཡིན་ནོ། །མངལ་རླུགས་པ་ནི་མངལ་མེད་པའི་ཐབས་སུ་གྱུར་པ་ཡིན་ནོ། །གཏད་པར་བྱའོ་ཞེས་བྱ་བ་ནི་
བཅོལ་བའི་ཚུལ་གྱིས་སྦྱིན་པར་བྱའོ། །ལོག་པའི་རྣམ་པར་རྟོག་པ་སྐྱེས་ཏེ་ཞེས་བྱ་བ་ནི་ཡིད་ཀྱི་རྣམ་པར་རྟོག་པའི་མེ་རབ་ཏུ་འབར་བར་གྱུར་ཏེའོ། །བསྣུན་ཏེ་ཞེས་བྱ་བ་ནི་ཤིན་ཏུ་བརྩུགས་ཀྱིས་བསྣུན་པའོ། །དགའ་བར་བྱ་བ་སྟེ་མགུ་བར་བྱེད་པར་རོ། །ངན་པར་སྨོད་པས་ཞེས་བྱ་བ་ནི་སྨོད་པའི་ཚིག་

གིས་ཀུན་ནས་ཁྱབ་པར་གྱུར་པའོ། །བྲང་རྡུང་བ་ནི་བྲང་དང་བཅས་པ་ལ་རྡེག་ཅིང་བསྣུན་པ་ཡིན་ནོ། །བདག་གི་ཁྱོ་སྦྲུལ་གྱིས་ཟོས་ནས་དུས་བྱེད་པར་ཤོག་ཤིག་ཅེས་བྱ་བ་ལ་སོགས་པའི་ཚིག་གིས་མནའ་འདོར་བར་བྱེད་པ་གང་ཡིན་པ་དེ་མནའ་འདོར་ཚིག་དེས་དེ་དོན་མེད་པ་འདིར་གྱུར་པ་མ་ཡིན་གྱི། འོན་ཀྱང་
གང་དེས་དེའི་བུ་ཉེས་པ་མེད་པར་བསད་པ་དང་བསམ་པ་དྲག་པོས་བརྫུན་དུ་སྨྲས་པ་དེའི་ཕྱིར་དེས་དོན་མེད་པ་དུ་མ་ཉམས་སུ་མྱོང་བར་གྱུར་པ་ཡིན་ནོ། །མནའི་ཚིག་ནི་ཉེས་པར་སྤྱོད་པའི་ལས་ཀྱི་འབྲས་བུ་ཡོངས་སུ་གྱུར་པ་ཙམ་ཡིན་ཏེ། དཔེར་ན་འགའ་ཞིག་གིས་བསོད་ནམས་བྱས་ནས་བདག་འདི་
ལས་འདི་ལྟ་བུའི་འབྲས་བུ་འབྱོར་པར་གྱུར་ཏོ་ཞེས་སྨྲས་བ་ལྟ་བུའོ། །ཟོང་ནི་ཟོང་དུ་ཐ་སྙད་དུ་བྱ་བའོ། །ཅུང་ཟད་ཀྱང་མི་ནུས་པ་ཞེས་བྱ་བ་ནི་ཅུང་ཞིག་ཙམ་ཡང་བྱེད་པའི་ནུས་པ་མེད་པའོ། །དྲིལ་བུའི་སྒྲ་དང་འདྲ་བ་ཞེས་བྱ་བ་ནི་དཔེར་ན་དྲིལ་བུའི་སྒྲ་ཐོག་མར་དྲག་ལ་ཕྱིས་གོ་རིམས་བཞིན་དུ་དལ་གྱིས་
ཆེས་དལ་བའི་རིམ་བཞིན་དུ་སྐྱེ་གནས་ཐམས་ཅད་ཀྱི་ཐམས་ཅད་དུ་ཉམས་པར་གྱུར་པ་དེ་དང་འདྲ་བར་ཚོར་བ་དག་ཀྱང་ཡིན་ནོ། །གཟུང་བར་དཀའ་བ་ཞེས་བྱ་བ་ནི་ཉོན་མོངས་པ་དག་ལས་བདག་ཉིད་རྙོག་པ་མེད་པར་གཟུང་བ་ཉིད་དུ་དཀའ་བས་ནུས་པ་ཡིན་ནོ། །སླུ་བར་བགྱིད་ན་ཞེས་བྱ་བ་ནི་
བགྲོད་པར་བྱེད་པ་ཡིན་ནོ། །འཕྱོན་མ་པ་ནི་བྱི་བོ་པར་རབ་ཏུ་གྲགས་པ་ཡིན་ནོ། །ནལ་གྱི་བུ་ནི་བྱི་བོ་པའི་བུར་གྲགས་པ་ཡིན་ནོ། །ཡང་ན་ཐམས་ཅད་དུ་བྱི་པོ་པ་ལ་དྭའི་སྒྲ་དང་འཇུག་པ་ཡོངས་སུ་མི་ཤེས་པ་ལ་ནལ་གྱི་བུར་བརྗོད་པ་ཡིན་ནོ། །བདེ་བ་ཆུང་ལ་ཞེས་བྱ་བ་ལ་སོགས་པ་ལ།
བདེ་བ་ནི་འདིར་ཡིད་བདེ་བའི་བདེ་བ་ཡིན་ནོ། །སྡུག་བསྔལ་ནི་ཚེ་འདི་ཉིད་ཀྱི་ཡིད་མི་བདེ་བའི་སྡུག་བསྔལ་ཡིན་ནོ། །ཉེས་དམིགས་ནི་དམྱལ་བ་ལ་སོགས་པའི་འགྲོ་བའི་སྡུག་བསྔལ་ཉམས་སུ་མྱོང་བའོ། །མི་རིགས་སོ་ཞེས་བྱ་བ་ནི་འཐད་པ་མ་ཡིན་པའོ། །འདོད་པ་ནི་འདོད་པའི་ཡོན་ཏན་ལྔ་
བསྟེན་པར་འདོད་པ་དང་ལོངས་སྤྱོད་པར་འདོད་པའོ། །ཀུན་དུ་སྦྱོར་བ་དག་འཕེལ་བར་འགྱུར་བ་ཞེས་བྱ་བ་ནི་རྒྱས་པར་འགྱུར་བའོ། །གཏོང་བ་ནི་ལྡོག་པའོ། །ངོམས་པ་ནི་ཡིད་མགུ་བར་གྱུར་པའོ། །མཐར་ཐུག་པར་འགྲོ་བས་ན་ཆོག་པའོ། །སྡིག་པའི་ལས་ནི་ལུས་ཀྱི་ཉེས་པར་སྤྱོད་པ་ལ་

སོགས་པའོ། །ཉན་ཐོས་པ་ཞེས་བྱ་བ་ནི་འཕགས་པའི་གང་ཟག་བརྒྱད་པོའོ། །དམ་པ་དག་ཅེས་བྱ་བ་ནི་དྲང་སྲོང་ཆེན་པོའོ། །ཡང་དག་པར་སོང་བ་ཞེས་བྱ་བ་ནི་བྱང་ཆུབ་སེམས་དཔའ་དག་གོ། །སྐྱེས་བུ་དམ་པ་ཞེས་བྱ་བ་ནི་སོ་སོའི་སྐྱེ་བོ་དགེ་བ་དག་གོ། །
དད་པའི་ཤུགས་ཀྱིས་ལུས་ཀྱི་སྤུ་གྱེན་དུ་ལྡང་བར་གྱུར་པས་ན་བ་སྤུ་ལྡང་བར་གྱུར་པའོ། །ཆུ་འགྲམ་གྱི་གད་པ་བཞིན་དུ་ཞེས་བྱ་བ་ནི་གང་གི་ཚེ་ཀླུང་གི་ངོགས་གོ་རིམས་བཞིན་དུ་དུམ་བུ་དུམ་བུར་ཆད་ཅིང་རྡིབ་པར་གྱུར་པ་དེ་བཞིན་དུ་དེ་དག་གིས་བསྟན་པ་ཉམས་པར་བྱེད་པ་ཡིན་ཏེ། བསྟན་པ་དང་
འགལ་བར་བྱ་བ་མ་ཡིན་པ་ཡང་ལྷག་པར་སྤྱོད་པའི་ཕྱིར་རོ། །ཉེས་པ་སྦོམ་པོར་འགྱུར་རོ་ཞེས་བྱ་བ་འདི་ནི་མི་ཚངས་པར་སྤྱོད་པའི་ཕམ་པར་གྱུར་པ་གཅོད་པར་བྱེད་པ་ཡིན་ནོ། །བསོད་སྙོམས་སྤྱོད་པའི་གནས་ལ་འདིར་སྤྱོད་ཡུལ་དུ་ཤེས་པར་བྱའོ། །བསྟན་བཅོས་ཀྱི་དོན་ཡོངས་སུ་ཤེས་པའི་
ནུས་པ་མེད་པས་ན་གླེན་པ་ཡིན་ལ། ལྷག་པར་ཆེ་བས་ན་རབ་ཏུ་གླེན་པ་ཡིན་ནོ། །ཡི་གེའི་སྒོ་ནས་འཛིན་པའི་ནུས་པ་མེད་པས་ན་རྨོངས་པ་ཡིན་ནོ། །ལྷག་པར་ཆེ་བ་ནི་མཆོག་ཏུ་རྨོངས་པ་ཡིན་ནོ། །རིགས་པ་ཞེས་བྱ་བ་ནི་ཚད་མ་དག་པའི་རྗེས་སུ་འགྲོ་བའོ། །གྲོལ་བ་ཞེས་བྱ་བ་ནི་ཆགས་
པ་མེད་པ་དང་ཉམས་པ་མེད་པའི་ཚིག་ཡིན་ནོ། །བཤད་པར་བརྩམས་པ་ཞེས་བྱ་བ་ནི་ཉེ་བར་བཀོད་པའམ། སྐབས་ཀྱིས་རྣམ་པར་བཤད་པ་ཡིན་ནོ། །ལུས་འཛིན་པའི་ནུས་པ་མེད་པ་སྐྱེད་པ་ནི་བརྒྱལ་བ་ཡིན་ནོ། །དགེ་སློང་དག་ཉི་མ་ནི་ཤར་ཞེས་བྱ་བ་ལ་སོགས་པ་ལ། ཤར་བར་བྱེད་
པའི་ཕྱིར་ཤར་བ་སྟེ། མཚན་མོས་བྱས་པའི་མུན་པ་སེལ་བར་བྱེད་པའི་ཕྱིར་རོ། །བྱ་རོག་ནི་ཟེར་ཞེས་བྱ་བ་ནི་སྒྲ་འབྱིན་པར་བྱེད་པའོ། །ཞིང་རྨོད་པ་ཞེས་བྱ་བ་ནི་ས་བོན་འདེབས་པར་བྱེད་པའོ། །ངུ་བ་ཞེས་བྱ་བ་ནི་སྨྲེ་སྔགས་འདོན་པའམ་ངུ་བར་བྱེད་པའོ། །མ་ལུས་པར་འཕྲོག་པར་བྱེད་པ་གང་
དག་ཡིན་པ་དེ་ནི་མི་རྒོད་པ་ཡིན་ནོ། །ཉི་མ་ཞེས་བྱ་བ་ནི་དེ་བཞིན་གཤེགས་པའི་ལྷག་པའི་ཚིག་ཡིན་ཏེ། ཉི་མའི་དཔེས་དེ་བཞིན་གཤེགས་པ་བསྟན་པར་རིག་པར་བྱའོ། །གང་གི་ཕྱིར་དེ་བཞིན་གཤེགས་པའི་ཡེ་ཤེས་ཀྱི་སྣང་བས་མི་ཤེས་པའི་མུན་པ་སེལ་བར་བྱེད་པ་ཡིན་པའི་ཕྱིར་ཡང་འདིར་

མཚུངས་པ་ཡིན་ནོ། །བྱ་རོག་ཟེར་བ་ཞེས་བྱ་བས་ནི་ཆོས་ཀྱི་སྣོད་ཅན་བསྟན་པ་ཡིན་ཏེ། དཔེར་ན་ཉི་མ་ཤར་བར་གྱུར་པ་ན་བྱ་རོག་ཟེར་བ་དེ་བཞིན་དུ་དེ་བཞིན་གཤེགས་པའི་ཉི་མ་ཤར་བར་གྱུར་བ་ན་བཅོམ་ལྡན་འདས་ཀྱིས་ཐོག་མར་ཆོས་བསྟན་ནས་ཞེས་བྱ་བའི་དབང་དུ་བྱས་ནས་ཆོས་ཀྱི་སྣོད་ཅན་ཆོས་
སྨྲ་བར་འགྱུར་རོ། །ཞིང་པ་སྨོས་པས་ནི་གཏོང་བ་པོ་དང་སྦྱིན་བདག་བསྟན་པ་ཡིན་ཏེ། དཔེར་ན་ཞིང་པས་ནི་ཞིང་བསྒྲུབས་ནས་ས་བོན་འདེབས་པར་བྱེད་པ་དེ་བཞིན་དུ་སངས་རྒྱས་བྱུང་བར་གྱུར་པ་ན་གཏོང་བ་པོ་དང་སྦྱིན་བདག་དག་གིས་སྦྱིན་གནས་ཀྱི་ཞིང་བསྒྲུབས་ནས་སྦྱིན་པའི་ས་བོན་གྱི་ཆར་འབེབས་
པར་འགྱུར་རོ། །མི་རྒོད་སྨོས་པས་ནི་བདུད་དང་བདུད་ཀྱི་འཁོར་བསྟན་པ་ཡིན་པར་རིག་པར་བྱ་སྟེ། དཔེར་ན་ཉིན་པར་མི་རྒོད་དག་མངོན་པར་འདོད་པའི་དོན་བསྒྲུབ་པའི་ཕྱིར་ངུ་བར་བྱེད་པ་དེ་བཞིན་དུ་བཅོམ་ལྡན་འདས་འཇིག་རྟེན་དུ་བྱུང་བར་གྱུར་པ་ན་བདུད་ཀྱི་སྤྱོད་ཡུལ་སྐྱེ་བོ་ཆེན་པོ་མངོན་པར་འདས་
པའི་ཕྱིར་བདུད་དང་བདུད་ཀྱི་འཁོར་ཀུན་ནས་ངུ་བར་བྱེད་པ་ཡིན་ནོ། །ཕྱིན་ཅི་མ་ལོག་པར་རྗེས་སུ་སྟོན་པར་མཛད་པ་ཉིད་ཀྱི་ཕྱིར་སྟོན་པ་ཡིན་ལ། སྟོན་པ་དེས་བྱ་བ་གང་ཡིན་པ་གདོན་མི་ཟ་བར་མཛད་པ་བྱ་བ་དེ་ནི་བྱ་བ་ཡིན་ཞིང་། བྱས་པ་ཡང་བདེན་པ་བཞི་བསྟན་པ་ཡིན་ཏེ། ངས་ཁྱེད་རྣམས་
ཏེ་ཁྱེད་ཅག་ལ་བྱ་བ་དེ་བྱས་པ་པ་ཡིན་ནོ་ཞེས་བྱ་བར་སྦྱར་རོ། །སྟོན་པ་ཁྱད་པར་ཇི་ལྟ་བུས་ཤེ་ན་རྗེས་སུ་བརྩེ་བ་ཅན་ཞེས་བྱ་བ་ལ་སོགས་པ་སྨོས་པ་ཡིན་ཏེ། སེམས་ཅན་སྡུག་བསྔལ་བ་མཐོང་བ་ན་རྗེས་སུ་སྟེ་ཕྱིས་བརྩེ་བར་གྱུར་པ་གང་ཡིན་པ་དེ་ནི་རྗེས་སུ་བརྩེ་བ་ཅན་ཏེ། གཞན་གྱི་སྡུག་བསྔལ་
བཟོད་པར་མི་སྤྱོད་ཅེས་བྱ་བའི་ཐ་ཚིག་གོ། །སྙིང་རྗེ་སྤྱོད་པའི་ཕྱིར་ཐུགས་རྗེ་ཅན་ཏེ། གང་ཞིག་སྡུག་བསྔལ་གྱིས་གཟིར་བ་རྣམས་ཀྱི་སྡུག་བསྔལ་བའི་ཐབས་དགོངས་པར་མཛད་པའོ། །དོན་དུ་བཞེད་པ་ཞེས་བྱ་བ་ནི་མངོན་པར་འདོད་པའི་དོན་བསྒྲུབས་པར་བརྩོན་པའོ། །ཕན་པར་
བཞེད་པ་ཞེས་བྱ་བ་ནི་འཇིག་རྟེན་གཉིས་དང་མི་འགལ་བའི་ཕན་པ་སྒྲུབ་པར་མཛད་པའོ། །ཐུགས་བརྩེ་བར་གྱུར་པ་ནི་ཞེས་བྱ་བ་ནི་རྟག་ཏུ་ཐུགས་བརྩེ་བ་དང་ཉེ་བར་ལྷག་པར་སྤྱོད་པ་སྟེ། ལན་དུ་ཕན་བཏགས་པ་ལ་ལྟོས་པ་འཇུག་པ་མེད་པའི་ཕྱིར་རོ། །ད་ནི་ཁྱེད་ཅག་གིས་ཞེས་བྱ་བ་འདིས་

ནི་འདི་སྐད་དུ་འདི་ལྟར་ངས་འགའ་ཞིག་ལ་མཆོག་གསལ་བའི་སྒོ་ནས་ཕན་གདགས་པར་མཛད་པའི་ནུས་པ་མི་མངའ་བ་སྟེ། དཔེར་ན་ང་ལ་ནུས་པ་མི་མངའ་བ་དེ་བཞིན་དུ་ལྷ་དང་བཅས་པའི་འཇིག་རྟེན་དག་ལ་ཡང་མཆོག་སྦྱིན་པའི་ནུས་པ་མེད་པ་དེའི་ཕྱིར་ཁྱེད་ཅག་གིས་
བདག་ཉིད་ཁོ་ནའི་ཉེས་པ་ཡོངས་སུ་དོར་བ་དང་ཡོན་ཏན་བསྒྲུབ་པར་བྱ་བ་བྱོས་ཤིག་ཅེས་བྱ་བ་བསྟན་པར་འགྱུར་རོ། །རིའི་ཕྲག་ནི་ལུང་པའོ། །ཕུག་ནི་ཁྱིམ་གྱི་རྣམ་པ་ཅན་སྐྱེས་བུའི་འབད་རྩོལ་ལ་ལྟོས་པ་མེད་པར་གྲུབ་པའོ། །སོག་མའི་ཚོགས་ནི་སོག་མའི་ཕུང་པོ་ཡིན་ནོ། །བག་མེད་པ་ཞེས་
བྱ་བ་ནི་བག་མེད་པར་མ་བྱེད་ཅིག་པའོ། །ཕྱིས་ཞེས་བྱ་བ་ནི་ང་ཡོངས་སུ་མྱ་ངན་ལས་འདས་པའམ། བཞུགས་གདན་གྱི་ཐ་མ་བརྙེས་པར་གྱུར་པ་ནའོ། །འདི་ནི་ངའི་རྗེས་སུ་བསྟན་པ་ཡིན་ཏེ་ཞེས་བྱ་བ་ནི་ངའི་གདམས་པའོ། །མཚོ་ནི་ཀླུང་ཡིན་ལ་སྐྱེད་མོས་ཚལ་ནི་མེ་ཏོག་དང་འབྲས་བུའི་ཤིང་དང་
ལྡན་པའི་ཕྱོགས་ཡིན་ནོ། །འབབ་ཆུ་ནི་འབྲུག་པའི་ཆུའོ། །ཆུ་བོ་དང་ཤིང་ལ་སོགས་པ་དེ་དག་གིས་བརྒྱན་པའི་སའི་སྟེང་སྟེ་ས་ཕྱོགས་སོ། །དགའ་བའི་ཞེས་བྱ་བ་ནི་དགའ་བ་སྐྱེད་པར་བྱེད་པའོ། །བུད་མེད་དང་མཐུན་པ་ནི་བུད་མེད་ཀྱི་ཡིད་ལ་བྱེད་པ་སྐྱེ་བ་དང་རྗེས་སུ་མཐུན་པའོ། །བུད་མེད་དུ་སྟོན་
པར་བྱེད་པ་ནི་བུད་མེད་ཀྱི་དབང་པོས་བྱིན་གྱིས་བརླབས་པ་ཡིན་ཏེ། དེས་བུད་མེད་ཀྱི་དངོས་པོར་རབ་ཏུ་གསལ་བར་བྱེད་པའི་ཕྱིར་རོ། །ལོངས་སྤྱོད་ཟད་པ་ཞེས་བྱ་བ་ནི་བཟའ་བ་ལ་སོགས་པ་ཉེ་བར་ལོངས་སྤྱད་པར་བྱ་བའི་དངོས་པོ་ཡོངས་སུ་ཟད་པའམ། གྲོང་ལ་སོགས་པ་ཡོངས་སུ་ཟད་པའོ། །
སྐྱེ་བོ་ཀུན་གྱིས་ཡོངས་སུ་ཤེས་པར་གྱུར་པ་ནི་གྲགས་པར་གྱུར་པའོ། །འབད་པ་མེད་པར་གོས་དང་བསོད་སྙོམས་ལ་སོགས་པ་རྙེད་པའི་ཕྱིར་བསོད་སྙོམས་ཆེན་པོའོ། །བཟའ་བ་དཀའ་བས་རྙེད་པའི་ཕྱིར་མུ་གེའི་དུས་ཡིན་ནོ། །གློ་བུར་པ་ཞེས་བྱ་བ་ནི་མ་བསམས་པར་འཕྲལ་ལ་འབྱུང་བ་ཡིན་
ནོ། །བཞག་པ་ཞེས་བྱ་བ་ནི་སྔ་དྲོའི་དུས་སུ་ཟས་ཙམ་བྱིན་ལེན་བྱས་ནས་ཉི་མ་ཕྱེད་ལས་འདས་པའི་ཕྱིར་ཡིན་ཏེ། དེ་ལ་བྱིན་ལེན་བྱས་ནས་དྲོ་ལས་འདས་པར་གྱུར་པ་ནི་བཞག་པ་ཡིན་ནོ། །ཐུན་མོང་མ་ཡིན་པའི་བར་ཆད་ནི་གླེ་འདམས་པ་ལ་སོགས་པའོ། །དགེ་སློང་མ་བར་དུ་ཞོག་ལ་

ཞེས་བྱ་བ་ནི་ལས་བྱེད་པས་དགེ་སློང་མ་ལ་དྲི་བར་བྱས་ཤིང་། དགེ་སློང་མས་བསྙེན་པར་རྫོགས་པར་འདོད་པ་ལ་དྲི་བར་བྱ་བ་ཡིན་ནོ། །ཁྲག་ནི་ཟླ་མཚན་གྱི་དུས་ཀྱི་ཁྲག་ཡིན་ནོ། །ཇི་ལྟ་བུའམ་དེ་ལྟ་བུས་ཞེས་བྱ་བ་ནི་ཐབས་གང་གིས་སམ་དེ་ཡིས་སོ། །དགེ་སློང་གི་མལ་སྟན་གྱི་ལྷག་
མ་ཞེས་བྱ་བ་ནི་གང་དགེ་སློང་ལས་བསྟབས་པ་དེ་དག་ལས་ལྷག་མར་གྱུར་པ་གང་ཡིན་པའོ། །རིམ་བཞིན་དུ་ཞེས་བྱ་བ་ནི་མཐར་གྱིས་གཞོལ་བ་དང་། འགོར་བ་མེད་པར་རོ། །ཐེ་ཚོམ་དགྲོལ་བ་ཙམ་དུ་ཞེས་བྱ་བ་ནི་ཐེ་ཚོམ་ཟློག་པ་ལ་འཇུག་པའམ་ཡང་ན་ཁོང་དུ་ཆུད་པ་ཙམ་གྱི་ཕྱིར་ཏེ། ཁོང་དུ་
ཆུད་པ་ནི་གོ་བ་ཡིན་ཏེ། ཡོངས་སུ་ཤེས་པའི་རྒྱུས་འདྲི་བར་བྱེད་པ་ཞེས་བྱ་བའི་བར་དུའོ། །རྐེད་ཆིངས་ཞེས་བྱ་བ་ནི་ཐམས་ཅད་དུ་གློ་བཅིང་བར་བྱ་བའི་དོན་གྱི་གོས་ལ་སོགས་པ་ཁོ་ན་ལ་རྐེད་ཆིངས་སུ་བསྟན་པ་ཡིན་ནོ། །བྲང་ཆིངས་ཞེས་བྱ་བ་ནི་ནུ་མ་ལ་ལྷོད་པའི་དངོས་པོར་མི་འགྱུར་བར་སྒྲུབ་པར་
བྱེད་པ་ནུ་མ་བཅིང་བའི་ཐབས་སུ་གྱུར་པའི་ཆིངས་མ་ཐམས་ཅད་ལ་བྲང་ཆིངས་ཉིད་དུ་བརྗོད་པ་ཡིན་ནོ། །མཛེས་གྱུར་གྱི་བར་ཆད་ཅེས་བྱ་བ་ནི་ནུ་མ་ཕན་ཚུན་མི་འབྱར་བར་བྱ་བའི་དོན་དུ་གོས་ལས་བྱས་པའི་བར་ཆད་ནི་མཛེས་གྱུར་གྱི་བར་ཆད་ཡིན་ཏེ། དེའི་ནུ་མ་དག་མཛེས་པའི་གནས་སྐབས་
སྒྲུབ་པར་འགྱུར་རོ། །མི་གཙང་བ་འཛག་ཅིང་འབྱུང་བའི་ས་ཕྱོགས་ནི་ལྗན་ལྗིན་ནོ། །མི་དགའ་བར་གྱུར་པ་ནི་འདིར་ཅོ་འདྲི་བའམ། གདུང་བ་སྐྱེ་བར་བྱེད་པའོ། །མཚན་བཟངས་མ་ཞེས་བྱ་བ་ནི་བུད་མེད་དག་ལ་སྙན་པའི་ཚིག་ཡིན་ཏེ། དཔལ་གྱིས་མཚན་པའི་མཛེས་པའི་མཚན་ཉིད་གང་ལ་ཡོད་
པ་དེ་ནི་འདིར་མཚན་བཟངས་མའོ། །ཀྱེ་མཚན་བཟངས་མ་ཞེས་བྱ་བ་དེ་ནི་བོད་པའི་ཚིག་ཡིན་ནོ། །བདག་མི་དགའ་བས་གཟིར་བ་ཞེས་བྱ་བ་དེ་ནི་ཁོ་མོ་སེམས་སྐྱོ་བས་གཟིར་བར་གྱུར་པའོ། །ལྷུང་བཟེད་ཆེན་པོ་ནི་ལྷུང་བཟེད་ཚད་ཆེན་པོའོ། །བརྒྱད་པ་ཞེས་བྱ་བ་ནི་མངོན་སུམ་དུ་བསྡིགས་པའོ། །
སྨད་པ་ཞེས་བྱ་བ་ནི་སྨོད་པ་ཡིན་ནོ། །དགེ་སློང་མ་མི་སྲུན་པ་ཁྱེད་ཀྱི་ཞེས་བྱ་བ་ནི་ཁྱེད་ཅག་ལས་གཞན་དག་གིས་ཚུལ་མ་ཡིན་པའི་ལས་བྱས་པ་དེའི་ཕྱིར་ཁྱེད་ཅག་ཀུན་གྱིས་མཐོང་བ་ཁོ་ན་ཞེས་བྱ་བ་དེ་ལྟ་བུ་ཡིད་ལ་བྱས་ནས་ཚིག་རྗོད་པ་ཡིན་ནོ། །བསམ་གྱིས་མི་ཁྱབ་པ་ཞེས་བྱ་བ་ནི་ཇི་ལྟར་རྣམ་པ་འགའ་

ཞིག་གིས་དེ་སྐྱེད་པར་གྱུར་ཅེས་བྱ་བའི་དངོས་པོ་དེ་བསམ་གྱིས་མི་ཁྱབ་པ་ཡིན་ཏེ། ལས་ཀྱི་ནུས་པ་སྣ་ཚོགས་པ་ཉིད་ཀྱི་ཕྱིར་རོ། །སློབ་དཔོན་ཚུལ་ཁྲིམས་བསྐྱངས་ཀྱིས་ཉེ་བར་སྦྱར་བ་ཕྲན་ཚེགས་ཀྱི་ཚིག་གི་རྣམ་པར་བཤད་པ་སྟེ་སྒོ་དྲུག་པ་རྫོགས་སོ།། །།རྩྭ་ཆུན་ཞེས་
བྱ་བ་ནི་དུབ་པ་ཡོངས་སུ་སྤང་བར་བྱ་བའི་ཕྱིར་དེ་རྗེས་སུ་གནང་ངོ་ཞེས་བྱ་བའི་དབང་དུ་བྱས་ནས་རྩྭའི་ཁྲེས་པོ་འཇམ་པོ་ལ་བྱའོ། །གཉུག་མར་གནས་པ་ཞེས་བྱ་བ་ནི་གང་རྟག་པར་གནས་པའོ། །སྲུང་བ་དང་། སྐྱོབ་པ་དང་སྦེད་པར་བྱེད་དོ་ཞེས་བྱ་བ་ལ། ཕ་རོལ་པོའི་དཔུང་གི་ཚོགས་ཀྱི་འཇིགས་པ་ལས་
སྲུང་བ་དང་། ཡམས་ལས་སྐྱོབ་པར་བྱེད་པ་དང་། རང་གི་དཔུང་གི་ཚོགས་ཀྱི་འཇིགས་པ་ལས་ཡོངས་སུ་སྲུང་བའི་སྦེད་པར་བྱེད་པ་ཡིན་ནོ། །གནོད་སྦྱིན་འདུས་པར་ཞེས་བྱ་བ་ནི་གནོད་སྦྱིན་འདུས་ཤིང་ཚོགས་པར་གྱུར་པར་རོ། །རང་གི་རིགས་དང་སྐལ་བ་མཉམ་པའི་རྒྱུད་ཀྱིས་ཞེས་བྱ་བ་ནི་རང་གི་རིགས་
རྒྱུད་ལས་འོངས་པའི་ཆོ་གས་སོ། །བཙས་པ་ཞེས་བྱ་བ་ནི་མེ་སྐོར་གྱི་ཆ་བྱད་དམ་བུ་བཙས་པ་ཡིན་ཏེ། དེ་འདུས་བྱས་ཤིང་མཛེས་པར་བྱས་པ་ཡིན་ནོ། །རི་སྟེ་རི་བོ་ལས་བྱ་ཀྲུང་ཀྲུང་སྐད་འབྱིན་ཅིང་སྒྲོག་པར་བྱེད་དོ། །སྤྱོད་ཡུལ་ཞེས་བྱ་བ་ནི་ངེས་པར་ཡོངས་སུ་ཚོལ་བར་བྱེད་པའི་གནས་ཡིན་ནོ། །གཅུགས་
པ་ནི་ཡིད་བརྟན་པའོ། །མཛའ་བ་ནི་མཛའ་བོར་གྱུར་པའོ། །དགའ་བ་ནི་གཉིས་ཀྱིས་གཉིས་སྙོམས་པར་འཇུག་པའོ། །ཡིད་བདེ་བ་ནི་ཕན་ཚུན་སེམས་རྗེས་སུ་མཐུན་པ་ཡིན་ནོ། །གང་གི་ཚེ་བདག་པོའི་ཡུལ་གཅུགས་པ་ལ་སོགས་པ་ལྷག་པར་ཀུན་དུ་སྤྱོད་པ་དེའི་ཚེ་དེ་གཅུགས་
པ་ལ་སོགས་པ་མང་པོར་འགྱུར་བ་ཡིན་ནོ། །ནགས་མའི་གནས་ལ་སོགས་པ་དབང་བ་གང་ཡིན་པ་དེ་དག་ནི་འདིར་གནས་ཐམས་ཅད་ལ་དབང་བྱེད་པ་ཡིན་ནོ། །རྟག་ཏུ་བསམ་པའི་སྒོ་ནས་གནོད་པ་ལ་འཇུག་པའི་ཕྱིར་ཁོ་ན་ཡིན་ནོ། །གསལ་པོར་གནོད་པ་རྩོམ་པར་བྱེད་པ་ཉིད་ཀྱི་ཕྱིར་དགྲ་
ཡིན་ནོ། །ཕགས་ནས་གནོད་པར་བྱེད་པ་གང་ཡིན་པ་དེ་ནི་སྙིང་རིང་བར་གྱུར་པའོ། །སྨྱོས་ནས་ངུ་ཞིང་ཞེས་བྱ་བ་ནི་སྨྱོས་ནས་སྨྲ་བའོ། །འགྱེལ་བ་ཞེས་བྱ་བ་ལ་སོགས་པ་ལ། ཁ་ཅིག་ཏུ་ནི་འགྱེལ་བར་བྱེད། ཁ་ཅིག་ཏུ་ནི་ས་ལ་ལྟུང་བར་བྱེད། ཁ་ཅིག་ཏུ་ནི་སྟེང་དུ་མཆོང་ཞིང་རྒལ་བར་

བྱེད། ས་ལ་འགྲེ་བ་ནི་ཀུན་ནས་འགྲེ་ཞིང་ཡོངས་སུ་འགྲེ་བར་བྱེད་པའོ། །ཁ་ཅིག་ཏུ་ནི་པུས་མོ་གཉིས་ཀྱིས་འགྲོ་བར་བྱེད་པའོ། །ཁ་ཅིག་ཏུ་ནི་ཙོག་པུར་འགྲོ་བར་བྱེད་པའོ། །ཡི་ཆད་པར་གྱུར་ཏེ་ཞེས་བྱ་བ་ནི་བུ་དང་བྲལ་བས་སྤྲོ་བ་མེད་པར་གྱུར་པའོ། །ཡང་ན་བསམ་པ་མེད་པས་གྱུར་པ་སྟེ། བུ་རྙེད་
པའི་བསམ་པ་དང་འབྲལ་བར་གྱུར་པའོ། །རྗེས་སུ་སོམས་ཤིག་ཅེས་བྱ་བ་ནི་དཔྱད་པར་བྱ་བའམ། །ཡོངས་སུ་དཔྱོད་པར་གྱིས་ཤིག་པའོ། །མངལ་ནི་ནང་ན་སེམས་ཅན་གནས་པའོ། སྔོན་གྱི་ལས་ཀྱི་རྣམ་པར་སྨིན་པས་འཕངས་པ་ཞེས་བྱ་བ་ནི་སྔོན་གྱི་ལས་ཀྱི་ཚོགས་པས་འཕངས་པས་ཐོབ་པར་གྱུར་
པའོ། །སོག་མ་ལ་སོགས་པའི་རྩྭ་ལས་བསྒྲུབས་པའི་ཨ་མྲའི་འབྲས་བུ་འཁྱེར་བའི་ཐབས་སུ་གྱུར་པ་ནི་སྣོད་ཡིན་ནོ། །གཏུམ་པོ་ནི་དྲག་པོའོ། །ཚོན་ངུར་སྨྲིག་གིས་ཁ་སྒྱུར་བའི་གོས་ནི་ངུར་སྨྲིག་གོ། །ཚངས་ནི་གོས་ཀྱི་དུམ་བུའོ། །ཉོས་པ་ནི་ཐར་པའི་ཕྱིར་རིན་བྱིན་པའོ། །གཏོར་མ་ཞེས་བྱ་བ་ནི་
དེ་དག་གི་ཆེད་དུ་ས་ཕྱོགས་གཙང་མར་བཟའ་བ་དོར་བ་གང་ཡིན་པ་དེ་ནི་གཏོར་མའོ། །ལྟ་བར་བྱེད་པ་ཞེས་བྱ་བ་ནི་གློ་སྐར་ལ་སོགས་པ་ལས་སོ། །བ་ལྕིས་སྐྱང་ནུལ་བྱས་པ་ལ་སོགས་པ་འདིར་ཡོངས་སུ་སྦྱངས་པར་བཞེད་དོ། །སྐྱེས་པའི་ཆུ་ངོགས་ཞེས་བྱ་བ་ནི་སྐྱེས་པ་ཁྲུས་བྱེད་པའི་ས་ཕྱོགས་ཡིན་
ནོ། །ལམ་གྱི་བཞི་མདོ་ནི་ལམ་བཞི་འདུས་པའོ། །སྡོམ་པ་སྐྱེ་བའི་སྣོད་མ་ཡིན་པ་ནི་སྐྱེ་བའི་ཆོས་ཉིད་མེད་པའོ། །བུད་མེད་ཀྱི་མཚན་དང་བཤང་བའི་ལམ་དང་བཅས་པ་གཅིག་ཏུ་གྱུར་པ་གང་ལ་ཡོད་པ་དེ་ནི་འདིར་གླེ་འདམས་པ་ཡིན་ནོ། །བུད་མེད་ཀྱི་དབང་པོ་ལས་རྟག་ཏུ་ཁྲག་འཛག་པ་
གང་ཡིན་པ་དེ་ནི་རྟག་ཏུ་ཟླ་མཚན་འཛག་པ་ཡིན་ནོ། །གང་གི་མངལ་གནས་པའི་གནས་ན་ཟླ་མཚན་མེད་པ་དེ་ནི་ཟླ་མཚན་མེད་པ་སྟེ་ཟླ་མཚན་ནི་ཁྲག་ཡིན་པར་བསྟན་ཏོ། །མཚན་མ་ཙམ་ཞེས་བྱ་བ་ནི་གང་གི་མཚན་མ་ཙམ་ཡོད་པ་ཡིན་ཏེ། ཡོངས་སུ་མ་རྫོགས་པའོ། །གསང་བའི་ཕྱོགས་
དགབ་པའི་ཐབས་སུ་གྱུར་པ་ནི་སྨེ་གབ་པོ། །ཐུ་ཞེས་བྱ་བ་ནི་མཆིལ་མ་གཏོར་བའོ། །བཤགས་པར་བྱ་བའི་ཁ་ན་མ་ཐོ་བ་བྱུང་བ་ཕྱིར་བཅོས་པའི་བསམ་པས་རང་གི་ངོ་བོ་འབྲལ་བ་ཡིན་ལ། གང་གི་མདུན་དུ་བཤགས་པར་བྱེད་པ་དེ་ལ་ཁ་ན་མ་ཐོ་བ་མེད་པའི་ཡུལ་ལ་ཇི་ལྟ་བ་བཞིན་དུ་ཤེས་

པ་སྐྱེད་པར་བྱེད་པ་ནི་བཤགས་པ་ཡིན་ནོ། །སེམས་ཀྱིས་ཀྱང་འཆབ་པའི་བློ་མེད་པ་ནི་མི་འཆབ་པ་ཞེས་བྱའོ། །རེག་པར་གནས་པར་འགྱུར་རོ་ཞེས་བྱ་བ་ནི་ཉེས་པ་མེད་པ་ཐོབ་པ་ལས་བདག་གི་སེམས་ཀྱི་བདེ་བ་ཆེན་པོར་འགྱུར་རོ། །སྐྱེངས་པར་གྱུར་ཏོ་ཞེས་བྱ་བ་ནི་
ངོ་ཚ་བར་གྱུར་པ་སྟེ། ཇི་ལྟར་བྱ་བ་ལ་རྨོངས་པར་གྱུར་ཅེས་བྱ་བའི་ཐ་ཚིག་གོ། །ཡོངས་སུ་དག་པ་ཞེས་བྱ་བ་ནི་ལྟུང་བ་མེད་པར་གྱུར་པའོ། །ལྟ་བ་མཐུན་པ་ཞེས་བྱ་བ་ནི་གང་གི་ལྟ་བ་རྣམ་པ་འགའ་ཞིག་ཀྱང་ཐ་དད་པ་མེད་པ་དེ་ལ་འདིར་ལྟ་བ་མཐུན་པར་བཞེད་དོ། །ཐུན་མོང་ནི་བསྙེན་པར་
རྫོགས་པའི་ལས་སོ། །འཇིགས་པར་གྱུར་ཏེ་ཞེས་བྱ་བ་ནི་ལས་བྱེད་པའི་ཕྱིར་ངག་གི་བྱེད་པ་མི་གསལ་བ་ཡིན་ནོ། །སེམས་གཞན་དུ་མི་འགྱུར་བས་དཔྱོད་པར་བྱེད་པ་ནི་ངེས་པར་བརྟགས་པ་ཡིན་ནོ། །བརྟུལ་བ་ནི་འདིར་སྐེམས་པར་བྱེད་པའོ། །མལ་སྟན་གྱིས་སྟོང་པའི་རྩྭའི་ལྷས་མ་ཅན་ནི་
ཁྲིའུ་མ་གཡོགས་པའོ། །དྲན་པ་ཉེ་བར་གཞག་པ་མ་ཡིན་པ་ནི་དྲན་པ་རྨོངས་པ་ཅན་ཡིན་པར་བཞེད་དོ། །ལེགས་པར་བགོས་ཤིང་ཞེས་བྱ་བ་ནི་སྟོད་གཡོགས་སོ། །ལེགས་པར་གཡོགས་པ་ནི་འོག་ཏུ་བགོ་བའོ། །ལེགས་པར་བརྒྱན་པ་ཞེས་བྱ་བ་ནི་རྒྱན་སྣ་ཚོགས་ཀྱི་བྱེ་བྲག་གིས་སོ། །
ཆང་གི་བཏུང་བ་ལ་མཁོ་བའི་གནས་ནི་ཆང་འཚོང་གི་གནས་སོ། །ཐབས་འདི་ནི་ལེགས་པ་ཞིག་སྟེ་ཞེས་བྱ་བ་ནི་ནོར་སྒྲུབ་པའི་ཐབས་འདི་ནི་བཟང་པོ་ཞིག་གོ། །ཟོང་ནི་ཆང་སྒྲུབ་པ་ལ་ཉེ་བར་མཁོ་བའི་རྫས་ཏེ་ཕབས་སམ། རིན་གྱི་རྣམ་གྲངས་ཡིན་ནོ། །སེམས་ཀྱི་བྱ་བས་ཉེ་བར་མཚོན་པ་ནི་ཕྲག་
དོག་ཡིན་ལ། མི་བཟོད་པ་ནི་བརྣག་པའི་ནུས་པ་མེད་པའོ། །རྙེད་པ་དག་འཕེལ་བར་གྱུར་ཏོ་ཞེས་བྱ་བ་ནི་རྒྱས་པར་གྱུར་པའོ། །མི་མཛའ་བ་རྣམས་ཀྱི་གཉའ་བར་རྡོག་པས་མནན་ལ་ཞེས་བྱ་བ་ནི་གནོད་པ་བྱེད་པ་ལ་གཞོལ་བ་ཁྱོད་ཚར་བཅད་ནས་སྟོབས་ཀྱིས་ཆང་འཚོང་གི་གནས་ལ་འཇུག་པར་བགྱིའོ་
ཞེས་བྱ་བ་ཡིན་པར་དགོངས་སོ། །འདིར་འཇུད་པར་བྱེད་པས་ན་འཇུད་པ་སྟེ། བུད་མེད་ཀྱི་ཟག་བྱེད་ཀྱི་ལམ་ཡིན་ལ། གཞུག་པར་རུང་བས་ན་འཇུད་མཐུན་མ་ཡིན་པའམ། འཇུད་པའི་ལས་ནི་འཇུད་མཐུན་མ་སྟེ་དེ་ལ་བསྒྲུབ་པར་བགྱི། འཇུག་པར་བགྱི་ལས་སུ་བགྱིའོ་ཞེས་བྱ་བའི་བར་དུའོ། །བཞིན་

བྱད་དང་ལྡན་པ་ཞེས་བྱ་བ་ནི་མདངས་དང་ལྡན་པར་གྱུར་པའོ། །ཇི་ལྟར་རུང་བ་ཞེས་བྱ་བ་ནི་སྐྱེས་བུ་ངན་པ་དང་འབྲིང་དང་། མཆོག་ལ་རུང་བ་ཉིད་དུ་འགྱུར་བའོ། །ཉེས་པ་སྦོམ་པོར་འགྱུར་རོ་ཞེས་བྱ་བ་ནི་མི་ཚངས་པར་སྤྱོད་པར་གྱུར་པའོ། །བྲན་མོ་སྤྱོད་པའི་གནས་དེ་ལ་འཇུག་པར་བྱེད་པ་ནི་ཞི་བ་བསྒྲུབ་པར་
བྱ་བའོ། །རས་ལས་བྱས་པའི་སྦྲ་ནི་ཇ་ཏོར་རོ། །སྲད་བུ་ལས་བྱས་པ་དེ་ལ་ཉེ་བར་མཁོ་བའི་སྣོད་བསྐུར་བའི་ཐབས་སུ་གྱུར་པ་ནི་དྲ་བ་ཡིན་ནོ། །དེའི་ཞལ་ཏ་བྱེད་པ་ཡིན་པའི་ཕྱིར་དྲ་བ་ཆེན་པོའི་ཞལ་ཏ་བྱེད་པའོ། །དགོས་པ་བྱུང་ན་ཞེས་བྱ་བ་ནི་རྐུན་པོ་ལ་སོགས་པ་ཐག་ཉེ་བར་གྱུར་ནའོ། །དགོན་པ་ན་གནས་
པ་ཞེས་མཐུན་པ་ཞེས་བྱ་བ་ནི་རིན་ཐང་ཆུང་བའོ། །ངན་དུ་བརྗོད་པ་ནི་སྐུར་པ་བཏབ་པའོ། །བྱ་བ་མ་ཡིན་པ་ཁོང་དུ་ཆུད་པར་བྱེད་པ་ནི་འདིར་བསླབ་པ་ཡིན་ལ། གུས་པ་མེད་པར་ཁོང་དུ་ཆུད་པར་བྱས་པ་དག་བསླབ་པའི་ཡུལ་ལ་རབ་ཏུ་བཅུག་པ་ནི་རྗེས་སུ་བསྟན་པ་ཡིན་ནོ། །འགལ་ཚབས་ཅན་དུ་འགྱུར་རོ་
ཞེས་བྱ་བ་ནི་དགེ་སློང་མ་ལ་རེག་པ་ཙམ་ཁོ་ན་ལ་ཉེས་བྱས་ཀྱི་ཉེས་པ་དང་ལྡན་པར་འགྱུར་ཞིང་། རེག་པ་བདག་གིར་བྱེད་པ་ནི་ཇི་ལྟར་ལུས་ཀྱི་ཀུན་ནས་རེག་པའི་བྱ་བ་བསྟན་པ་དེ་ནི་འདིར་ཡང་བྱ་བ་ཡིན་པར་རིག་པར་བྱའོ། །གནོད་པར་གྱུར་པ་ལ་སྦྱིན་པ་རྗེས་སུ་གནང་བའི་གོས་ནི་ཤམ་ཐབས་ཀྱི་གཟན་
ཡིན་ནོ། །དྲན་པ་ཉེ་བར་ཞོག་ལ་ཞེས་བྱ་བ་ནི་ཚུལ་བཞིན་ཡིད་ལ་བྱེད་པ་གཙོ་བོར་གྱུར་པའི་དྲན་པ་མངོན་སུམ་དུ་བྱས་པས་སོ། །བུད་མེད་སྡུག་པ་དང་བྲལ་བ་དག་ལག་པ་གཉིས་ཀྱིས་རང་གི་དཔུང་པའི་རྩ་བ་ལ་སྣུན་པར་བྱེད་པ་ནི་བྲང་རྡུང་བར་བྱེད་པའོ། །སྐྱེད་མོས་ཚལ་ཞེས་བྱ་བ་ལ་སོགས་པ་ལ།
མེ་ཏོག་ལ་སོགས་པའི་ཤིང་གིས་ཉེ་བར་མཚན་པ་ནི་སྐྱེད་མོས་ཚལ་ཡིན་ནོ། །དྲང་སྲོང་གི་གནས་ནི་དཀའ་ཐུབ་ཀྱི་གནས་ཡིན་ནོ། །གྲོང་ཁྱེར་ལས་ཕྱི་རོལ་གྱི་ཉེན་ཀོར་གྱིས་ནི་ཉེན་ཀོར་ཡིན་ནོ། །སྟོན་ཟླ་འབྲིང་པོའི་ཉའི་དུས་སྟོན་ཆེན་པོ་ནི་དགའ་སྟོན་དུ་རབ་ཏུ་གྲགས་པ་ཡིན་ནོ། །དེ་དང་འདྲ་བའི་
དུས་ནི་དུས་མ་ཡིན་པའི་དུས་སྟོན་ནོ། །སྔོན་གྱི་ལེགས་པར་སྤྱད་པ་ཞེས་བྱ་བ་ལ་སོགས་པ་ལ། ཁྱེད་ཀྱིས་སྐྱེ་བ་སྔ་མ་ལ་ལེགས་པར་སྤྱད་པ་སྟེ། ལས་བྱས་ཤིང་བསགས་པ་གང་ཡིན་པ་དེ་ཉིད་བསོད་ནམས་ཀྱི་ལས་ཀྱི་ཚོགས་སྡུད་པར་བྱེད་ཅིང་དགའ་སྟོན་འདིའི་རྒྱུར་གྱུར་པ་ཡིན་ནོ། །གནས་མ་

ཡིན་ཏེ་ཞེས་བྱ་བ་ནི་འདི་ལ་ཡོད་པ་མ་ཡིན་ཏེ། འདོད་པ་ཡོངས་སུ་ལོངས་སྤྱོད་པའི་རྒྱུ་ཉོན་མོངས་པ་སྤངས་པ་ཡིན་པའི་ཕྱིར་རོ། །ཉེ་བར་ཡོངས་སུ་ལོངས་སྤྱོད་པ་ཞེས་བྱ་བ་ནི་བདག་གིར་བྱས་ནས་ཡོངས་སུ་ལོངས་སྤྱོད་པའོ། །རྫུ་འཕྲུལ་མངོན་པར་སྒྲུབ་པ་ཞེས་བྱ་བ་ནི་དབང་
པོ་རྣོ་བ་དེ་ཉིད་ཀྱི་ཕྱིར་དེའི་རྫུ་འཕྲུལ་བསྐྱེད་པ་ཡིན་ཏེ། དེས་ནི་འདི་སྐད་དུ་ཐམས་ཅད་དུ་ཕྱིར་མི་འོང་བའི་རྫུ་འཕྲུལ་བསྐྱེད་པ་ཉིད་དུ་རུང་བར་འགྱུར་བ་ཡིན་ནོ་ཞེས་བསྟན་པར་འགྱུར་རོ། །ཡང་དག་པར་བྱུང་བ་ཞེས་བྱ་བ་ནི་ཤུགས་ཀྱིས་རྡོ་རྗེ་ལྟ་བུའི་ཏིང་ངེ་འཛིན་ཐོབ་པས་ཁམས་གསུམ་ལས་བྱུང་བ་ཡིན་
ནོ། །རྙེད་པ་ནི་དེས་ཁམས་གསུམ་པོའི་གཉེན་པོ་ཐོབ་པའོ། །རང་གི་དོན་ཕུན་སུམ་ཚོགས་པའི་ཕྱིར་བརྙེས་པ་ཡིན་ནོ། །གཞན་གྱི་དོན་ཕུན་སུམ་ཚོགས་པའི་ཕྱིར་རྙེད་པ་རྙེད་པའོ། །རུས་པའི་འཁྲུལ་འཁོར་ཞེས་བྱ་བ་ནི་ཕན་ཚུན་དུ་འབྲེལ་པའི་རུས་པའི་ཚོགས་སོ། །རྒྱན་མེད་པ་ཞེས་བྱ་བ་
ནི་ནང་གི་མཛེས་པའི་དངོས་པོ་དང་བྲལ་བར་གྱུར་པའོ། །སེམས་ཟློགས་ཤིག་ཅེས་བྱ་བ་ནི་འདོད་ཆགས་དང་ཀུན་ནས་འབྲེལ་པའི་སེམས་ཡོངས་སུ་སྤོངས་ཤིག་པའོ། །སེམས་ཅན་དམྱལ་བར་ལྟུང་བར་གྱུར་ཏ་རེ་ཞེས་བྱ་བ་ནི་རབ་ཏུ་བྱུང་བའི་ཡུལ་ལ་ཞེ་སྡང་གི་སེམས་བསྐྱེད་པ་ལས་སེམས་ཅན་
དམྱལ་བ་ཞིག་ཏུ་ལྟུང་བར་འགྱུར་རོ། །ཁྱིམ་པའི་ལས་ཞེས་བྱ་བ་ལ་སོགས་པ་ལ། ཁྱིམ་པའི་ལས་ཁྱོད་ཀྱིས་ཐམས་ཅད་ཀྱི་ཐམས་ཅད་དུ་ཡོངས་སུ་སྤངས་ནས་སོ། །ཁྱོད་ཀྱིས་<བསྙན་‚བསྙེན་>པར་རྫོགས་པ་དང་ཁས་བླངས་པ་འདི་ལྟར་ཀུན་ནས་ཆགས་པའི་སེམས་ཀྱིས་སྐྱེད་པ་ལ་ལྟ་བ་ལ་སོགས་པ་
སོམས་ཤིག་པའོ། །ཅུང་ཟད་འབབ་པ་ནི་ཆར་འཕྲལ་དུ་འབབ་པར་འདོད་པའམ། ཅུང་ཟད་ཅུང་ཟད་བབ་པའི་ཕྱིར་ཅུང་ཟད་འབབ་པའོ། །མི་བསྲུན་པ་ཞེས་བྱ་བ་ནི་ནོར་བྱེད་པ་མེད་པའི་ངང་ཚུལ་ཅན་ཡིན་ནོ། །གཡུལ་འགྱེད་པ་ལ་བརྩོན་པ་ནི་གྱད་ཡིན་ལ། རས་གཅིག་བཅིངས་པས་ན་གྱད་པར་
གོ་ཆ་བགོས་པའོ། །གྱད་ཆེན་པོ་ཞེས་བྱ་བ་ནི་གཞུང་གཞན་ཡིན་ཏེ། ཆེན་པོ་ནི་ཡན་ལག་ཤིན་ཏུ་རྒྱས་པ་དང་། ལུས་ཆེ་བ་ཡིན་ནོ། །རྡོ་ལེབ་ཀྱིས་ཞེས་བྱ་བ་ནི་རྡོའི་དུམ་བུས་སོ། །གོས་གཅུས་པས་ཞེས་བྱ་བ་ནི་གོས་བསྒྲིལ་བས་སོ། །སློབ་དཔོན་ཚུལ་ཁྲིམས་བསྐྱངས་ཀྱིས་ཉེ་བར་སྦྱར་བ་ཕྲན་

ཚེགས་ཀྱི་ཚིག་གི་རྣམ་པར་བཤད་པ་སྟེ་སྒོ་བདུན་པ་རྫོགས་སོ།། །།མཆོད་རྟེན་ནི་རུས་པ་བཞག་པའི་དོན་གྱིས་འཇིམ་པའི་ཕུང་པོའོ། །རང་བཞིན་ཡོངས་སུ་ཉམས་པས་ཞེས་བྱ་བ་ནི་སྐྱེ་བོ་དམ་པའི་རང་བཞིན་ལས་ལྷུང་བར་གྱུར་པའོ། །སྦྱར་མ་བྱིན་གྱིས་བརླབས་པར་ཞེས་བྱ་བ་ནི་
མཚོན་གྱིས་ཀུན་ནས་བསྣུན་དུ་མི་རུང་བར་སྙོམས་པར་འཇུག་པར་བྱས་པའོ། །ནང་དང་བཅས་པར་འགྱུར་བས་ཞེས་བྱ་བ་ནི་འཁོན་པར་གྱུར་པས་སོ། །དེ་ལ་མ་བལྟས་པར་ཞེས་བྱ་བ་ནི་དགེ་སློང་མ་ལུས་འདུད་པའི་ལུས་བོར་ནས་སོ། །གཟུ་བོ་བྱེད་པ་ཞེས་བྱ་བ་ནི་དྲང་པོར་བྱེད་པའོ། །དགག་དབྱེ་ལ་
གསོ་སྦྱོང་ཡོད་པ་མ་ཡིན་ཏེ་ཞེས་བྱ་བ་ནི་དགག་དབྱེ་བྱས་ནས་གསོ་སྦྱོང་བྱ་བ་མ་ཡིན་པའོ། །རྣམ་པར་དག་པའི་ཕྱིར་ཞེས་བྱ་བ་ནི་ལྟུང་བའི་དྲི་མ་རྣམ་པར་སྦྱོང་བའི་ཕྱིར་རོ། །སེམས་གཏོད་པ་ཞེས་བྱ་བ་ལ་གཏོད་པ་ནི་འདིར་ཁོ་ན་ཡོངས་སུ་སྤངས་པ་ཡིན་ནོ། །གླགས་པ་ནི་གླགས་སམ་དྲལ་
བའམ་ཕུག་པར་གྱུར་པའོ། །ཤད་ཀྱིས་སྦྱོང་བར་བྱེད་པ་ཞེས་བྱ་བ་ནི་དབང་དུ་བྱེད་པ་ལ་འཇུག་པར་བྱེད་པ་པོ་ཡིན་ནོ། །ཁོ་བོ་ཕྱོགས་དེ་ཉན་པར་ཡང་མི་འདོད་ན་ཞེས་བྱ་བ་ནི་ཁོ་བོ་ཕྱོགས་དེ་སྔར་མཐོང་བ་ཉིད་ཀྱི་སྒོ་ནས་མཐོང་བ་ཉིད་མྱོང་བར་ཡང་མི་འདོད་དོ། །མཐར་ཐུག་པ་ཞེས་བྱ་བ་ལ་ཐ་མར་
གྱུར་པའམ་མཐར་ཐུག་པ་སྟེ། ཐ་མར་གདོན་མི་ཟ་བར་འདི་ལྟར་འགྱུར་རོ་ཞེས་ངེས་པའི་སྒོ་ནས་ཤེས་པར་གྱུར་ཏོ་ཞེས་བྱ་བའི་ཐ་ཚིག་གོ། །འདོད་ཆགས་ལ་སོགས་པ་མི་དགེ་བའི་རྩ་བ་མང་དུ་བྱས་པའི་ཕྱིར་མ་ཆགས་པ་ལ་སོགས་པ་ཡོངས་སུ་སྤངས་པ་ཡིན་ལ། ཆགས་པ་མེད་པ་
ལ་སོགས་པ་མང་དུ་བྱས་པ་ལས་འདོད་ཆགས་ལ་སོགས་པ་ཡོངས་སུ་སྤངས་པ་ཡིན་ནོ། །ཕན་ཚུན་དགའ་ཞེས་བྱ་བ་ནི་མཛའ་བའི་ཚིག་བརྗོད་པ་སྔོན་དུ་སོང་བའི་སྒོ་ནས་སྒྲུབ་པར་བྱེད་པ་ཡིན་ནོ། །གཙུག་ཕུད་འབྲེག་པའི་དུས་སྟོན་ཞེས་བྱ་བ་ལ་སོགས་པ་ལ་ཉི་མ་གང་ལ་བྱང་ཆུབ་
སེམས་དཔས་དབུ་སྐྲ་བྲེགས་ཏེ་སྟེང་གི་ནམ་མཁའ་ལ་བོར་བ་དང་། བརྒྱ་བྱིན་གྱིས་བླངས་ནས་མཐོ་རིས་ཀྱི་གནས་སུ་བཞག་པར་གྱུར་པའི་ཉི་མ་དེ་ལ་དད་པ་དང་བྲམ་ཟེ་དང་ཁྱིམ་བདག་གིས་དུས་སྟོན་བྱས་པ་དེ་ལ་གཙུག་ཕུད་བྲེགས་པའི་དུས་སྟོན་དུ་རྣམ་པར་གཞག་པ་ཡིན་ནོ། །

བྱང་ཆུབ་སེམས་དཔའ་ཁྱིམ་གྱི་གནས་ནས་ལོ་ལྔ་པ་ལས་བྱུང་བའི་ལྔ་སྟོན་ནོ། །ཐམས་ཅད་མཁྱེན་པའི་ཡེ་ཤེས་བརྙེས་པར་གྱུར་པ་ནི་དུས་སྟོན་ཆེན་པོ་ཞེས་བྱའོ། །སྲེད་པ་ལ་སྤྱོད་པ་ཞེས་བྱ་བ་ལ། སྲེད་པ་ནི་སེམས་ཀྱི་ཞེན་པའོ། །གཉིས་སམ་གསུམ་ཞེས་བྱ་
བ་ནི་དགེ་སློང་མའི་གནས་བརྟན་དག་གོ། །འཁོར་དང་མཛའ་བོ་ཇི་ལྟ་བ་བཞིན་དུ་ཞེས་བྱ་བ་ལ་འཁོར་གྱི་རྣམ་པར་དབྱེ་བ་དང་། སྨོས་འདྲིན་ལ་སོགས་པ་རྣམ་པར་དབྱེ་བ་སྟེ། གང་གི་འཁོར་ཡིན་པའི་འཁོར་དང་བཅས་པ་དེས་ཕྱོགས་གཅིག་ཏུ་འཁོད་ཅིང་འཁོར་མེད་ན་ནི་སྨོས་འདྲིན་ལ་
སོགས་པ་ཞེས་བྱ་བའི་བར་དུའོ། །ཇི་ལྟར་རྣམ་པར་འབྱེད་པ་ལས་ལྟུང་བྱེད་རྣམས་ཀྱི་བཅུ་ཚུན་གསུམ་པ་བརྩམས་པ་ན་དགེ་སློང་མའི་སྟོན་པའི་བློ་མཐུན་བྱས་པ་དེ་ཁོ་ན་བཞིན་འདིར་ཡང་ཡིན་པས་འདིར་གཞུང་མངས་པའི་འཇིགས་པས་སྤྲོས་ནས་མ་བྲིས་སོ། །ཡོངས་སུ་དག་པ་བརྗོད་པར་
བྱའོ་ཞེས་བྱ་བ་ནི་དགེ་སློང་མའི་དགེ་འདུན་མའི་གསོ་སྦྱོང་གི་བར་དུ་གཅོད་པར་བྱེད་པ་ཉེས་པའི་དྲི་མ་དང་བྲལ་ལོ་ཞེས་བྱ་བ་དེ་ལྟར་བརྗོད་པར་བྱ་བ་ཡིན་ནོ། །ཕྱི་བཞིན་འབྲངས་ཏེ་ཞེས་བྱ་བ་ནི་རྗེས་བཞིན་དུ་སོང་བའོ། །དུམ་བུ་ལྔ་པ་ཞེས་བྱ་བ་ལ་སེམས་ཅན་དམྱལ་བ་ལ་སོགས་པའི་རྣམ་པར་དབྱེ་བ་
ལྔ་དང་ལྡན་པ་འཁོར་ལོ་དང་འདྲ་བས་ན་འཁོར་བའི་འཁོར་ལོའོ། །གསོ་སྦྱོང་ནི་དགེ་སློང་མའི་དགེ་འདུན་གྱིའོ། །དེ་མི་གསལ་བ་ཞེས་བྱ་བ་ནི་བརྡ་ལ་མི་མཁས་པའོ། །དེ་དག་གིས་དགེ་སློང་གཞན་ལ་མ་གསོལ་བར་ཞེས་བྱ་བ་ནི་དགེ་སློང་མས་ལུང་སྟོན་པའི་སྒོ་ནས་བློ་མཐུན་མེད་པར་རོ། །མ་
སྤོབས་ཏེ་ཞེས་བྱ་བ་ནི་ཟིལ་གྱིས་ནོན་པར་སླ་བའོ། །སྐྱེས་བུ་ཐ་མལ་པ་ཞེས་བྱ་བ་ནི་སྤྱོད་པ་དམན་པར་གྱུར་པའོ། །བསོད་ནམས་མ་ཡིན་པ་མང་དུ་འཕེལ་བར་འགྱུར་རོ་ཞེས་བྱ་བ་ནི་བདག་ཉིད་བསོད་ནམས་མ་ཡིན་པ་ཉིད་དུ་རུང་བ་མང་དུ་བྱེད་པར་འགྱུར་བའོ། །མཚན་བཟངས་མོ་ཞེས་བྱ་བ་
ནི་མཚན་མཛེས་པ་ཡིན་ནོ། །ཅུང་ཞིག་ཅེས་བྱ་བ་ནི་རྣམ་པར་འཚེ་བ་ཅུང་ཟད་དུ་མ་གྱུར་ཅིག་ཅེས་བྱ་བའི་བར་དུའོ། །ལེགས་པར་གསོལ་ལོ་ཞེས་བྱ་བ་ནི་དངོས་པོར་གསོལ་བར་བགྱི་བའོ། །ཤིན་ཏུ་གསོལ་ལོ་ཞེས་བྱ་བ་ནི་ཁྱེད་ལ་བདེ་བ་སྐྱེད་པར་བྱེད་པ་གསོལ་བར་བགྱི་བའོ། །དགའ་བར་

གྱུར་ན་ཞེས་བྱ་བ་ནི་ཇི་ལྟར་ཁྱིམ་དེར་མེ་ཏོག་གི་ཕྲེང་བ་བརྒྱུས་པ་དེ་བཞིན་དུ་ཁྱིམ་གཞན་དག་ཏུ་ཤིན་ཏུ་མཛེས་པར་བརྒྱུས་པར་གྱུར་པའོ། །རྙེད་པ་སྐྱེས་ཤིང་བརྙེས་པ་ཐོབ་པ་ཞེས་བྱ་བ་ལ་སྐྱེས་པ་ནི་འདིར་བསྙེན་བཀུར་ཡིན་པར་འདོད་ལ། བཅའ་བའི་རིན་ཐོབ་པའོ། །གཞན་གྱིས་འཚོ་ཞེས་བྱ་བ་
ནི་གཞན་གྱིས་འཚོ་བའི་ཐབས་སུ་གྱུར་པའོ། །ཁྱིམ་གྱི་བྱ་བ་ནི་ཁྱིམ་གྱི་བྲེལ་བ་ཡིན་ནོ། །ཆང་མནན་པ་ཞེས་བྱ་བ་ནི་སྦྱར་བའི་ཆང་ལ་སོགས་པའི་མྱོས་པའི་ཚོགས་སྣོད་གཅིག་ཏུ་བཅུག་པ་ཡིན་ནོ། །ཆང་ཉམས་པ་ཕྱིས་ཆང་ཉིད་དུ་རེད་པ་ནི་སླར་རུང་བར་གྱུར་པའོ། །གཞན་གྱི་འཚོ་བ་
ཉམས་པའི་རྒྱུ་སྐྱེད་པར་བྱེད་པ་ཉིད་ཡིན་པའི་ཕྱིར་ཁ་ན་མ་ཐོ་བའི་སྦོམ་པོ་འདི་ནི་མ་བྱིན་པར་ལེན་པའི་ཕམ་པ་གཅོད་པར་གྱུར་པ་ཉིད་ཡིན་ནོ། །ཁ་བསྟོད་པ་བྱས་ནས་ཞེས་བྱ་བ་ནི་བསམ་པའི་ཁ་རིང་དུ་བསྲིངས་ནས་སོ། །གླ་བྱིན་གྱིས་ཞེས་བྱ་བ་ནི་གླའི་སྒོ་ནས་སྦྱིན་པར་བྱེད་པའོ། །ཚོང་དུས་
ཀྱིས་ཐ་སྙད་དུ་བྱེད་པའི་ཕྱིར་ཚོང་པའོ། །ཚོང་གླས་ནས་ཞེས་བྱ་བ་ནི་ཇི་ལྟར་དགོས་པའི་དངོས་པོ་ཉོས་ནས་སོ། །མ་འོངས་པ་ལུང་སྟོན་པའི་སྒོ་ནས་འཚོ་བ་རྟོག་པར་བྱེད་པ་དང་། །ཁྱེའུ་དང་བུ་མོ་དག་གཏོར་མ་དང་གླ་ཟན་བྱིན་པའི་སྒོ་ནས་སྲུང་བར་བྱེད་པ་གང་ཡིན་པ་དེ་ནི་ལྷ་བོན་མོའོ། །
དྲིལ་བུ་དཀྲོལ་ཞིང་ཞེས་བྱ་བ་ནི་དྲི་མ་མེད་པ་དགྲོལ་བར་བྲེལ་བར་གྱུར་པའོ། །ཅིའི་ཕྱིར་ཞེ་ན། སྟོན་པའི་ཕྱིར་ཞེས་སྨོས་པ་ཡིན་ནོ། །སྔོན་གྱི་ལས་ཀྱིས་ནི་འཕྲལ་དུའམ་ལས་ཀྱི་ཤུགས་ཀྱིས་སོ། །དཀྱིལ་འཁོར་དང་མེ་ཏོག་ལ་སོགས་པ་ལུང་སྟོན་པར་བྱེད་པ་ལ་ཉེ་བར་མཁོ་བ་ནི་ལྷའི་
གཟུགས་བརྙན་མེ་ཏོག་དང་བདུག་པ་དང་དྲིལ་བུ་ལ་སོགས་པའི་ཚོགས་དང་ལྡན་པ་ནི་ལྷ་རྟེན་ཡིན་ནོ། །སྐྲ་འཆད་ཅིང་ཞེས་བྱ་བ་ནི་རྣམ་པར་འཆད་པའི་སྒོ་ནས་འཆད་པར་བྱེད་པ་ཡིན་ནོ། །འདག་རྫས་ཀྱི་ཕྱེ་མས་ཞེས་བྱ་བ་ནི་སྐྱུ་རུ་རའི་ཕྱེ་མ་ལ་སོགས་པའོ། །རྒྱུན་ལ་གནས་ནས་ཞེས་
བྱ་བ་ནི་རྒྱུན་ལས་བཟློག་པའི་རེག་པ་བདག་གིར་བྱེད་པ་སྟེ། མི་ཚངས་པར་སྤྱོད་པའི་ཕམ་པ་གཅོད་པར་གྱུར་པའི་ཉེས་པ་སྦོམ་པོར་འགྱུར་རོ། །རིའི་རྩེ་མོའི་ཚུལ་ལམ་ཞེས་བྱ་བ་ནི་རིའི་རྩེ་མོའི་རྣམ་པར་རོ། །བྱང་ཆུབ་ཀྱི་ཤིང་གི་ལོ་<མོའི་‚མའི་>རྣམ་པ་ལྟ་བུ་ཞེས་བྱ་བ་ལ། བྱང་ཆུབ་ཀྱི་ཤིང་

ནི་པི་པ་ལའི་ཤིང་ཡིན་ཏེ། དེའི་ལོ་མ་དང་འདྲ་བ་ནི་གཅིག་ཡིན་ནོ། །ཤིང་ནྱ་གྲོ་དྷའི་ལོ་མ་དང་འདྲ་བའམ་ལག་མཐིལ་གྱི་རྣམ་པ་ལྟ་བུ་སྟེ་ཟུར་བཞི་པ་ལྟ་བུ་ནི་གཉིས་པ་ཡིན་ནོ། །དགའ་བ་འཕེལ་ནས་ཞེས་བྱ་བ་ནི་རྙེད་པ་འཕེལ་བའི་དོན་དུའོ། །རྨི་ལམ་དུ་རྨིས་པ་ནི་
རྨི་ལམ་དུ་ཟན་ནི་སྦྲུ་མའོ། །ཞག་མ་བུད་ནས་ཞེས་བྱ་བ་ནི་ཞག་མ་ཡོངས་སུ་བུད་པར་གྱུར་པའོ། །ཁར་གསིལ་ནི་སྒྲ་སྒྲོགས་པར་བྱེད་པའོ། །ལོ་མའི་བཀད་ས་ནི་ལོ་མས་གཡོགས་པ་ཡིན་ནོ། །ཏིལ་དྲུས་མ་དང་བསྲེས་པའི་འབྲས་ཀྱི་ཕྱེ་མ་ལས་སྦྲུས་ཤིང་མར་གྱི་ནང་དུ་བཙོས་ཤིང་སྐམས་
ལ་སྲབ་པ་བཟའ་བའི་བྱེ་བྲག་གི་འབྲས་ཁུར་ཡིན་ནོ། །འབྲས་ཆན་ཞེས་བྱ་བ་ལ་སོགས་པ་ལ་འབྲས་ཆན་དང་བཏུང་བ་འདི་བཏུང་བར་བྱེད་པ་ནི་སྒྲ་ཁྲོག་ཁྲོག་ཟེར་བ་དང་། འབྲས་ཁུར་ནི་ཁྲུམ་ཁྲུམ་ཟེར་བའོ། །ལ་ཕུག་ནི་ཆོམ་ཆོམ་ཟེར་བའོ། །ལོ་མ་ལ་སོགས་པ་ནི་ལྕབ་ལྕབ་ཟེར་བའོ། །མཛེས་པ་ནི་གར་
མཁན་ཡིན་ནོ། །དགེ་འདུན་གྱི་ནང་ནས་བྱུང་ནས་ཐ་དད་པར་ཡོངས་སུ་ལོངས་སྤྱོད་པ་ནི་བཤོས་ཚུར་འདྲེན་པའོ། །འབྲས་བུ་ལ་སོགས་པས་བཀོལ་བ་ནི་བསྐ་བ་ཡིན་ནོ། །ཕྱོགས་གཅིག་ཚིག་པའི་ཕྱིར་ཚིག་པའོ། །ཀུན་ནས་ཚིག་པའི་ཕྱིར་རབ་ཏུ་ཚིག་པའོ། །རྣམ་པར་ཁྱབ་པ་ཞེས་བྱ་བ་ནི་རྨ་ཉམས་
པར་གྱུར་པའོ། །སེན་མོས་ཞིག་པར་འགྱུར་རོ་ཞེས་བྱ་བ་ནི་ཟད་པར་བྱེད་པའོ། །སླར་འཚོ་བར་ཞེས་བྱ་བ་ནི་རང་བཞིན་དུ་གནས་པའི་སྒོ་ནས་གྱུར་པའོ། །བ་མོ་ནི་ཁྱིམ་སྤྱོད་པའམ་བྱེད་པ་ཞེས་བྱ་བའི་བར་དུའམ། ཡང་ན་བྱི་བའོ། །འཕངས་པ་ཉིད་དུ་བརྩམས་པ་ཞེས་བྱ་བ་ནི་ཤིང་ལ་ཡོངས་སུ་རྒྱུ་བ་
ཉིད་དུ་བརྩམས་པའོ། །ཆོས་གོས་ལ་ཁྱད་པར་མེད་པ་ཡོངས་སུ་ལོངས་སྤྱད་པ་ཞེས་བྱ་བ་ནི་སྣམ་སྦྱར་ཡོངས་སུ་མ་བརྟུལ་བ་ཡིན་ནོ། །རྒྱལ་པོའི་གནས་ལྟ་བུ་ཞེས་བྱ་བ་ནི་ཆོས་གོས་ཐམས་ཅད་ཀྱི་མཆོག་ཏུ་གྱུར་པ་ཡིན་པ་དེའི་ཕྱིར་དེ་ཡོངས་སུ་བརྟུལ་བར་བྱ་བ་ཡིན་ནོ། །ལམ་ལ་བརྟེན་ནས་འཚོ་བ་
གང་ཡིན་པ་དེ་དག་ནི་ལམ་གྱིས་འཚོ་བ་སྟེ། ཚིག་སྐྱེལ་ལ་སོགས་པའོ། །གསེབ་ལམ་གྱིས་འཚོ་བ་ནི་རྐུན་པོ་ལ་སོགས་པའོ། །བརྡེགས་ཤིང་རབ་ཏུ་བརྡེགས་ཏེ་རྣམ་པར་བཤིག་པ་ཞེས་བྱ་བ་ནི་ཆུང་ངུ་དང་འབྲིང་དང་ཆེན་པོས་རིམ་པས་ཟིལ་གྱིས་གནོན་པའོ། །བརྡེགས་པ་ལ་སོགས་པས་གང་

ལས་འཇིགས་པ་མེད་པ་ཞེས་བྱ་བ་ནི་རྣམ་པ་ཐམས་ཅད་དུ་སྐྲག་པ་མེད་པའོ། །དགེ་སློང་གི་སྤྱོད་ཡུལ་ཅན་ཞེས་བྱ་བ་ནི་དགེ་སློང་གི་ཐ་སྙད་ལ་མཁས་པའམ་བཀའ་ལ་མཁས་པའོ། །སླུ་བར་བྱེད་པ་ཞེས་བྱ་བ་ནི་རྔོད་པར་བྱེད་པ་ཡིན་ཏེ། རྣམ་པ་གཞན་ཉིད་དུ་སྟོན་པའི་ཕྱིར་རོ། །འཕེལ་ནས་ཞེས་བྱ་བ་ནི་
ལྷག་མའི་ཚིག་ཡིན་ནོ། །རིགས་པ་སྨྲ་བ་ལ་མཁས་པ་ཞེས་བྱ་བ་ནི་རིགས་པས་ལན་ལྡོན་པ་ལ་མཁས་པའོ། །རྒྱུད་འཇམ་པ་ལ་མཁས་པ་ཞེས་བྱ་བ་ནི་སེམས་བརྩེ་བས་འཇམ་པོར་གྱུར་པའོ། །གྲོང་ཁྱེར་ཨི་ཙ་ཨ་ནང་ཀ་ལ་དེ་དང་ཐག་ཉེ་བ་ན་གནས་པ་ན་ཨུད་ཀ་ཊ་ཞེས་བྱ་བའི་གྲོང་རྡལ་ཏེ། ཨུད་ཀ་ཊ་
དེ་ཀུན་ནས་ལོངས་སྤྱོད་པར་བྱེད་པའོ། །ཁྱད་པར་ཇི་ལྟ་བུ་ཞེ་ན། རྒྱས་པ་ཞེས་བྱ་བ་སྨོས་ཏེ། རྫས་ལ་སོགས་པའི་ཡོ་བྱད་དང་ལྡན་པའོ། །གླ་སྐྱེད་དང་བཅས་པ་ཞེས་བྱ་བ་ནི་གླ་སྐྱེད་དང་བཅས་པས་འཇུག་པའི་ཕྱིར་གླ་སྐྱེད་དང་བཅས་པ་ཉིད་དོ། །གླ་སྐྱེད་ནི་ཤོ་གམ་གྱི་གནས་ལས་བྱུང་བའོ། །རྩྭ་དང་
ཤིང་དང་ཆུ་དང་བཅས་པ་རྣམས་ཞེས་བྱ་བ་ནི་རྩྭ་ལ་སོགས་པ་དང་ཤིན་ཏུ་འབྱོར་ཅིང་ལྡན་པའོ། །འདོན་པ་དང་ལྡན་པས་ན་བྲམ་ཟེའི་བུའོ། །བསྟན་བཅོས་དུ་མ་ཐོས་པའི་ཕྱིར་མང་དུ་ཐོས་པའོ། །ཐམས་ཅད་དུ་རུང་བའི་ཚིག་ལ་འཇུག་པའི་ཕྱིར་རིགས་པའི་ཚིག་སྟེ། ལན་ལྡོན་པའི་དུས་སུ་རབ་ཏུ་
རིགས་པའི་ཚིག་འདི་ལ་ཡོད་པས་ན་ཞེས་བྱ་བའི་དབང་དུ་བྱས་ནས་སོ། །སྐབས་དང་ལྡན་པ་འབྲེལ་པའི་ཚིག་སྙན་པའི་ངང་ཚུལ་གྱི་རང་བཞིན་གང་ལ་ཡོད་པ་དེ་ནི་སྙན་པར་སྨྲ་བ་ཅན་ཏེ། སྙན་པ་ཞེས་བྱ་བ་འདི་ནི་སྐད་ཀྱི་དབྱིངས་ཀྱི་ཚུལ་འདི་ཡིན་པ་དེའི་ཕྱིར་རང་གི་གནས་རབ་ཏུ་འཕོ་བ་དང་འབྲེལ་པའི་
ཚིག་སྨྲ་བ་གང་ལ་ཡོད་པ་དེ་ལ་དེ་སྐད་ཅེས་བྱའོ། །སྨྲང་ཞེས་བྱ་བ་ནི་རིག་བྱེད་རྣམ་པར་འབྲེལ་པའི་ངང་ལ་འདིར་སྨྲང་དུ་བཞེད་དོ། །ཕྱོགས་ཞེས་བྱ་བ་ནི་ཕྱོགས་བཞིའོ། །མཚམས་ཞེས་བྱ་བ་ནི་ཕྱོགས་མཚམས་བཞིའོ། །དགེ་བ་ཞེས་བྱ་བ་ནི་རྣམ་པ་ཐམས་ཅད་དུ་ཉེས་པ་མེད་པ་ཉིད་ཀྱི་ཕྱིར་རོ། །
སྙན་པ་དང་སྒྲ་དང་ཚིགས་སུ་བཅད་པ་ཞེས་བྱ་བ་ན་ཚིག་གསུམ་པོ་དེ་དག་ནི་དོན་གཅིག་ཡིན་ཏེ། དོན་ཇི་ལྟ་བ་བཞིན་དུ་གསལ་བར་བྱེད་པའི་ཕྱིར་རོ། །གང་གི་ཚེ་ཅིག་ཅར་གཅིག་ལ་རབ་ཏུ་སྦྱོར་བར་འགྱུར་བ་དེའི་ཚེ་ཚིག་གསུམ་པོ་འདི་དག་ཐ་དད་པའི་བྱེ་བྲག་སྟོན་པར་བྱེད་པ་ཡིན་པར་རིག་པར་

བྱའོ། །དེའི་ཁྱད་པར་ནི་འདི་ཡིན་ཏེ། མཆོག་ཏུ་ཕན་འདོགས་པར་བྱེད་པ་ཆོས་བསྟན་པ་ལ་སོགས་པ་ཡོན་ཏན་གཙོ་བོར་གྱུར་པ་དག་གི་གྲགས་པ་རྣམ་པར་རྒྱས་པ་ནི་སྙན་པའི་སྒྲས་བརྗོད་པ་ཡིན་ཏེ། དེ་ལྟར་ཡང་དེ་ཆོས་སྟོན་པ་ནི་ཐོག་མར་དགེ་བ་ཞེས་བྱ་བ་ལ་སོགས་པ་
གསུངས་པ་ཡིན་ནོ། །རང་གི་དོན་གཙོ་བོར་གྱུར་པའི་ཡོན་ཏན་དག་གི་སྙན་པ་རྣམ་པར་རྒྱས་པ་ནི་སྒྲ་སྨོས་པས་བཟུང་བ་ཡིན་ཏེ། དེ་ལྟར་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཞེས་བྱ་བ་ལ་སོགས་པ་སྨོས་པ་ཡིན་ནོ། །འབྲེལ་པ་དང་རྗེས་སུ་མཐུན་པའི་
གྲགས་པ་རྗོད་པར་བྱེད་པ་ནི་ཚིགས་སུ་བཅད་པ་ཡིན་ནོ། །དེ་བཞིན་གཤེགས་པ་ཞེས་བྱ་བ་ནི་ཕྱིན་ཅི་མ་ལོག་པར་གསུང་བ་སྟེ། དངོས་པོ་ཇི་ལྟ་བ་དེ་བཞིན་དུ་བྱོན་པ་ཉིད་ཀྱི་ཕྱིར་རོ། །འདིར་གང་ཕྱིན་ཅི་མ་ལོག་པ་སྟོན་པར་མཛད་པ་ཞེས་བྱ་བ་སངས་རྒྱས་བཅོམ་ལྡན་འདས་དེ་ནི་སྟོན་པ་ཉིད་ཡིན་ནོ། །
གང་ལས་དེ་བཞིན་གཤེགས་པ་ཉིད་དུ་འགྱུར་ཞེ་ན། དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བ་སྨོས་ཏེ། ལྷ་དང་བཅས་པའི་འཇིག་རྟེན་གྱིས་མཆོད་པར་འོས་པ་དང་། ཉོན་མོངས་པ་སྤངས་པ་ཉིད་ཀྱི་ཕྱིར་དགྲ་བཅོམ་པ་ཡིན་ལ། འགྲོ་བ་མ་ལུས་པར་ཡང་དག་པར་ཞུགས་པའི་ཕྱིར་
ཡང་དག་པར་རྫོགས་པའི་སངས་རྒྱས་ཡིན་ཏེ། འདིས་ནི་བདེན་པ་རྟོགས་པར་མཛད་པའི་རྒྱུ་ཉིད་བརྟེན་པ་ཡིན་ནོ། །ཉོན་མོངས་པས་ཟིལ་གྱིས་གནོན་པ་དང་། མི་ཤེས་པས་ཟིལ་གྱིས་གནོན་པ་ནི་ལོག་པར་སྨྲ་བ་ཡིན་ཏེ། ཉོན་མོངས་པ་སྤངས་པ་དང་། ཡང་དག་པར་རྫོགས་པའི་བྱང་ཆུབ་ཐུགས་
སུ་ཆུད་པ་དེའི་ཕྱིར་འདིས་མི་བདེན་པ་མ་ཡིན་པར་བརྗོད་པ་ཡིན་ནོ། །ཉོན་མོངས་པ་སྤངས་པ་དང་། ཡང་དག་པར་རྫོགས་པའི་བྱང་ཆུབ་ཀྱང་གང་ལས་ཤེ་ན། རིག་པ་དང་ཞབས་སུ་ལྡན་པ་ཞེས་བྱ་བ་སྨོས་ཏེ། རིག་པ་ནི་ཡང་དག་པའི་ལྟ་བ་ཡིན་ལ། ཞབས་ནི་ལམ་གྱི་ཡན་ལག་བདུན་ཡིན་པ་དེའི་ཕྱིར་
འདིས་ནི་འཕགས་པའི་ལམ་ཡན་ལག་བརྒྱད་པ་ཉོན་མོངས་པ་སྤངས་པ་དང་། ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཡིན་པར་བསྟན་ཏོ། །བདེ་བར་གཤེགས་པ་ནི་མཛེས་པར་གཤེགས་པས་ན་བདེ་བར་གཤེགས་པ་སྟེ། ཡང་ཕྱིར་མི་ལྡོག་པའི་ཕྱིར་འདིས་ནི་ལྡོག་པ་མེད་པའི་སྟོན་པ་ཉིད་བརྙེས་

པར་བསྟན་ཏོ། །འཇིག་རྟེན་སྐལ་བ་དང་ལྡན་པ་དང་མི་ལྡན་པ་མཁྱེན་པའི་ཕྱིར་འཇིག་རྟེན་རིག་པའོ། །འདིས་ནི་སྟོན་པའི་མཛད་པ་དང་པོ་བསྟན་པ་ཡིན་ནོ། །སྟོན་པའི་མཛད་པ་ཡང་རྣམ་པ་གཉིས་ཏེ། སྐལ་བ་དང་ལྡན་པ་དང་སྐལ་བ་དང་མི་ལྡན་པ་སོ་སོར་རྟོག་པ་ནི་དང་པོ་ཡིན་ལ། སྐལ་བ་ཇི་ལྟ་བ་
བཞིན་དུ། འདོན་པར་མཛད་པ་གཉིས་པ་ཡིན་པ་དེ་བས་ན། འཇིག་རྟེན་རིག་པ་ཞེས་བྱ་བ་འདིས་ནི་དང་པོ་བསྟན་ཏོ། །གཉིས་པ་བསྟན་པའི་ཕྱིར་སྐྱེས་བུ་འདུལ་བའི་ཁ་ལོ་སྒྱུར་བ་ཞེས་བྱ་བ་སྨོས་ཏེ། སྐྱེས་བུ་ཁོ་ན་འདུལ་བར་བྱ་བ་དང་འདུལ་བར་འོས་པ་ཉིད་ཡིན་པའི་ཕྱིར་སྐྱེས་བུ་འདུལ་བ་སྟེ།
དེ་དག་གི་ཁ་ལོ་སྒྱུར་བ་ནི་འདུལ་བར་མཛད་པ་པོ་ཡིན་ནོ། །སྐྱེས་བུ་འདུལ་བ་ཁྱད་པར་དུ་འཕགས་པ་ཞེས་བྱ་བ་ནི་བླ་ན་མེད་པ་ཞེས་བྱ་བ་ཡིན་ཏེ། སོར་ཕྲེང་ཅན་ལ་སོགས་པ་གདུལ་དཀའ་བ་རྣམས་འདུལ་བར་མཛད་པའི་ཕྱིར་དང་། འདོད་པའི་བསོད་ཉམས་ལ་རྗེས་སུ་སྦྱོར་བ་དང་། བདག་ཉིད་ཀྱི་
སྙོམ་ལས་ལ་རྗེས་སུ་སྦྱོར་བ་ཡོངས་སུ་སྤངས་པའི་སྒོ་ནས་བདེ་བར་འདུལ་བར་མཛད་པའི་ཕྱིར་དང་། ཕྱིར་ལྡོག་པ་མེད་པར་འདུལ་བར་མཛད་པའི་ཕྱིར་ཁ་ལོ་སྒྱུར་བ་བླ་ན་མེད་པ་ཡིན་ཏེ། འདིས་ནི་སྐལ་བ་ཇི་ལྟ་བ་བཞིན་དུ་འདོན་པར་མཛད་པ་སྟོན་པའི་ཕྲིན་ལས་གཉིས་པ་བསྟན་པ་ཡིན་ནོ། །ལྷ་
དང་མི་རྣམས་ཀྱི་སྟོན་པ་ཞེས་བྱ་བ་ནི་སྟོན་པའི་མཛད་པའི་སྣོད་ཡིན་ཏེ། འདིས་ནི་སྟོན་པའི་མཛད་པའི་སྣོད་ལྷ་དང་མི་རྣམས་ཡིན་གྱི། གཞན་འགའ་ཞིག་ནི་མ་ཡིན་ནོ་ཞེས་བསྟན་པ་ཡིན་ནོ། །སངས་རྒྱས་བཅོམ་ལྡན་འདས་ཞེས་བྱ་བ་ལ། སངས་རྒྱས་ཞེས་བྱ་བ་ནི་སངས་རྒྱས་བཅོམ་ལྡན་
འདས་སུ་རབ་ཏུ་གྲགས་པ་ཡིན་པ་སྟེ། དེ་ལ་སངས་རྒྱས་ཞེས་རབ་ཏུ་གྲགས་པ་གང་ཡིན་པ་དེ་ནི་སྟོན་པ་སྟེ། གོང་དུ་སྨོས་པའི་ཡོན་ཏན་དེ་དག་དང་ལྡན་པ་ཉིད་ཀྱི་ཕྱིར་རོ་ཞེས་བྱ་བའི་དོན་འདིར་འགྱུར་རོ། །འཇིག་རྟེན་ལྷ་དང་བཅས་པ་ཞེས་བྱ་བ་ནི་ལྷ་གཙོ་བོར་གྱུར་པའོ། །བདུད་དང་
བཅས་པ་ཞེས་བྱ་བ་ནི། འདོད་པའི་ཁམས་མ་ལུས་པའི་བདུད་གཙོ་བོར་གྱུར་པ་དེའི་ཕྱིར་བདུད་དང་བཅས་པ་ཞེས་བསྟན་ཏོ། །ཚངས་པ་དང་བཅས་པ་ཞེས་བྱ་བ་ནི་འཁོར་དང་འབྲེལ་པ་རྣམས་ཀྱི་ཚངས་པ་གཙོ་བོར་གྱུར་པ་དེའི་ཕྱིར་ཚངས་པ་དང་བཅས་པ་ཞེས་བསྟན་ཏོ། །བྲམ་ཟེ་དང་

དགེ་སྦྱོང་དུ་བཅས་ཞེས་བྱ་བ་ནི་མི་རྣམས་ལས་དགེ་སྦྱོང་དང་བྲམ་ཟེ་གཙོ་བོར་གྱུར་པ་དེའི་ཕྱིར། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་ཞེས་སྨོས་སོ། །ལྷ་དང་མིར་བཅས་པའི་ཞེས་བྱ་བ་ནི་རྒྱུད་ལྔར་སྐྱེས་པའི་སེམས་ཅན་དག་ལས་ལྷ་དང་མི་རྣམས་ཁོ་ན་བདེན་པ་
བཞིའི་སྣོད་དུ་གྱུར་པ་ཡིན་གྱི། གཞན་དག་ནི་མ་ཡིན་པ་དེའི་ཕྱིར་ལྷ་དང་མིར་བཅས་པ་ཞེས་བསྟན་ཏོ། །མཐོང་བའི་ཆོས་ཉིད་ལ་ཞེས་བྱ་བ་ནི་མངོན་སུམ་དུ་གྱུར་པའི་སྐྱེ་བ་ལའོ། །བདག་ཉིད་ཀྱིས་ཞེས་བྱ་བ་ནི་གཞན་གྱིས་ལུང་ཕོག་པ་མེད་པར་རོ། །མངོན་པར་ཤེས་པ་ཞེས་བྱ་བ་ནི་ཐམས་
ཅད་མཁྱེན་པའི་ཡེ་ཤེས་ཀྱིས་སོ། །མངོན་སུམ་དུ་བྱས་ཤིང་ཞེས་བྱ་བ་ནི་ཐེ་ཚོམ་མེད་པར་ཤེས་པས་སོ། །ཐོབ་པས་ན་ཞེས་བྱ་བ་ནི་ཡེ་ཤེས་ཀྱིས་ཀུན་ནས་འགེངས་པའམ། ཆེན་པོ་ཉིད་དུ་ཡོངས་སུ་གཅོད་པའོ། །རབ་ཏུ་ཤེས་སོ་ཞེས་བྱ་བ་ནི་ཤེས་པར་འགྱུར་བའམ། གཞན་དག་ལ་
བཙལ་བར་བྱེད་པ་ཡིན་ནོ། །ཅི་ཞིག་རབ་ཏུ་ཤེས་པ་ཡིན་ཞེ་ན། ངའི་སྐྱེ་བ་ནི་ཟད་དོ་ཞེས་བྱ་བ་སྨོས་ཏེ། ཁོ་བོའི་སྐྱེ་བའི་སྲིད་པ་རྫོགས་པར་གྱུར་པའོ། །སྐྱེ་བའི་སྲིད་པ་ཟད་པ་ཡང་གང་ལས་ཤེ་ན། ཚངས་པར་སྤྱོད་པ་སྤྱད་དོ་ཞེས་བྱ་བ་སྨོས་ཏེ། ཚངས་པ་ནི་མྱ་ངན་ལས་འདས་པ་ཡིན་ལ། གང་གིས་
དེ་ལ་སྤྱོད་པ་ནི་ཚངས་པར་སྤྱོད་པ་སྟེ་ལམ་ཡིན་ཞིང་། དེ་ལ་སྤྱད་པ་ནི་བདག་ཉིད་ཐམས་ཅད་ཀྱིས་གནས་པར་གྱུར་པའོ། །གང་གི་ཚེ་འཕགས་པའི་ལམ་ཡོངས་སུ་རྫོགས་པ་ལ་གནས་པར་བྱེད་པ་དེའི་ཚེ། མི་མཐུན་པའི་ཕྱོགས་ཐམས་ཅད་ལྡོག་པར་འགྱུར་རོ། །དེའི་དོན་ནི་འདི་ཡིན་ཏེ། གང་གི་
ཕྱིར་མི་མཐུན་པའི་ཕྱོགས་མ་ལུས་པར་ལྡོག་པར་རུང་བའི་ཚངས་པར་སྤྱོད་པ་ལ་གནས་པ་དེའི་ཕྱིར་སྐྱེ་བའི་སྲིད་པ་ཡོངས་སུ་རྫོགས་པ་ཡིན་ནོ། །དེ་ཉིད་ཀྱི་ཕྱིར་སྐྱེ་བ་ཟད་པར་བྱས་པ་ནི་མ་ཡིན་ལ། བྱས་པ་ནི་སྐྱེས་བུའི་དོན་ཡིན་ནོ། །སྐྱེ་བ་ཟད་པར་གྱུར་ཀྱང་བར་མ་དོར་ཡོངས་སུ་མྱ་ངན་ལས་འདས་
པའི་སྲིད་པ་བར་མ་དོའི་བྱ་བ་ཉོན་མོངས་པ་ཟད་པ་ཡང་ཡོད་པ་མ་ཡིན་ནམ་ཞེ་ན། འདི་ལས་སྲིད་པ་གཞན་མེད་དོ་ཞེས་བྱ་བ་སྨོས་ཏེ། ཡོད་ན་སྲིད་པ་བར་མ་དོའི་བྱ་བར་འགྱུར་ཏེ། དེ་ཉིད་ཀྱང་ཡོད་པ་མ་ཡིན་ན། གང་ལ་བྱ་བ་ཡོད་པར་འགྱུར། དེས་ཆོས་བསྟན་པ་ནི་བསྟན་པའི་ཆོས་སོ། །ཐོག་

མར་དགེ་བ་ཞེས་པ་ནི་ཐོས་པ་ལས་བྱུང་བའི་ཤེས་པས་ཡོངས་སུ་བཅད་པའི་དུས་སུ་བདེ་བ་སྐྱེད་པར་བྱེད་པ་ཉིད་ཀྱི་ཕྱིར་རོ། །བར་དུ་དགེ་བ་ཞེས་བྱ་བ་ནི་བསམས་པ་ལས་བྱུང་བའི་ཤེས་པས་ཡོངས་སུ་བདེ་བ་སྐྱེད་པ་ཉིད་ཀྱི་ཕྱིར་རོ། །ཐ་མར་དགེ་བ་ཞེས་བྱ་བ་ནི་བསྒོམས་པའི་དུས་སུ་བདེ་བ་སྐྱེད་པར་བྱེད་པའི་ཕྱིར་
རོ། །དག་པར་བྱེད་པའི་དོན་ཉིད་ཡིན་པའི་ཕྱིར་དོན་བཟང་པོའོ། །ཚིག་འབྲུ་ཁ་ན་མ་ཐོ་བ་མེད་པའི་ཕྱིར་ཚིག་འབྲུ་བཟང་པོའོ། །དེ་ལྟ་བུའི་རྣམ་པའི་ཆོས་བཤད་པ་ན། དོན་ཅི་ཞིག་སྟོན་པར་བྱེད་ཅེ་ན། སྨྲས་པ། ཚངས་པར་སྤྱོད་པ་སྟོན་པར་བྱ