Luận tạng Tây Tạng (Tengyur) — Tập 158

ེད་པ་ཡིན་ནོ། །ཁྱད་པར་ཇི་ལྟ་བུ་དང་ལྡན་པའི་ཚངས་པར་
སྤྱོད་པ་ཡིན་ཞེ་ན། ཡོངས་སུ་རྫོགས་པ་ཞེས་བྱ་བ་སྨོས་ཏེ། དུམ་བུར་མ་གྱུར་པ་ཉིད་ཀྱི་ཕྱིར། ཡོངས་སུ་རྫོགས་པ་དང་། སྐྱེས་བུའི་དོན་སྐྱེད་པར་བྱེད་པའི་ཕྱིར་ཡོངས་སུ་རྫོགས་པའོ། །ཉེས་པ་ཡོངས་སུ་སྤོང་བའི་རྒྱུ་ཉིད་ཡིན་པའི་ཕྱིར་ཡོངས་སུ་དག་པའོ། །རྟག་པའི་གནས་ཐོབ་པར་བྱེད་པ་ཉིད་ཀྱི་
ཕྱིར་ཡོངས་སུ་བྱང་བའོ། །མངོན་པར་འདོད་པའི་དོན་ཐོབ་པ་ཕྱེད་ཀྱི་གྲོགས་ལ་ལྟོས་པ་མེད་པ་ཉིད་ཀྱི་ཕྱིར་འབའ་ཞིག་གོ། །ཚངས་པར་སྤྱོད་པ་ཞེས་བྱ་བ་ནི་འཕགས་པའི་ལམ་མོ། །ལྗོངས་རྒྱུ་ཞིང་ཞེས་བྱ་བ་ནི། དགོས་པའི་དབང་གིས་འགྲོ་ཞིང་འཇུག་པར་བྱེད་པའོ། །རྣམ་པ་གཉིས་སུ་འགྱུར་རོ་
ཞེས་བྱ་བ་ནི་རྒྱུད་གཉིས་སུ་འགྱུར་བའོ། །འཁོར་ལོས་སྒྱུར་བ་ཞེས་བྱ་བ་ནི་འཁོར་ལོས་རྒྱལ་སྲིད་ལ་འཇུག་པའི་ངང་ཚུལ་གྱི་རང་བཞིན་གང་ལ་ཡོད་པ་དེ་ནི་འཁོར་ལོས་སྒྱུར་བའོ། །རི་རབ་ལ་ལྟོས་པའི་མཐའ་བཞི་གང་ལ་ཡོད་པ་དེ་ན་མཐའ་བཞི་པ་སྟེ། གླིང་བཞི་པའི་བདག་པོ་བྱེད་ཅེས་བྱ་བའི་ཐ་ཚིག་གོ། །རྣམ་པར་བཏུལ་ནས་
ཞེས་བྱ་བ་ནི་རྣམ་པར་རྒྱལ་བའི་ངང་ཚུལ་ཅན་ཏེ། འདི་ལ་མི་རྒྱལ་བའི་ཡུལ་ཡོད་པ་མ་ཡིན་ནོ་ཞེས་བྱ་བའི་བར་དུའོ། །ཆོས་སྤྱོད་པའི་ཕྱིར་ཆོས་དང་ལྡན་པའོ། །ཆོས་ཀྱི་རྒྱལ་བ་ཅན་ནི་ཆོས་ཀྱི་རྒྱལ་པོ་སྟེ། ཆོས་ཀྱི་རྒྱལ་སྲིད་བྱེད་པའི་ཕྱིར་རོ། །རྙེད་དཀའ་བ་དང་། འདོད་པའི་དོན་གྱི་འབྲས་བུ་ཅན་ཡིན་
པས་ན་རིན་པོ་ཆེ་ཞེས་བསྟན་ཏོ། །བང་མཛོད་ལ་དབང་བྱེད་པས་ན་ཁྱིམ་བདག་རིན་པོ་ཆེ་ཡིན་ནོ། །དམག་དཔོན་རིན་པོ་ཆེ་ནི། སྒྲུབ་པར་བྱེད་པའི་བདག་པོའོ། །མཆོག་ཏུ་སྤྲོ་བ་དང་ལྡན་པ་ཉིད་ཀྱི་ཕྱིར་དཔའ་བོའོ། །ལུས་ཀྱི་བྱ་བས་ཕ་རོལ་གྱི་སྟོབས་ཟིལ་གྱིས་གནོན་པའི་ནུས་པ་དང་ལྡན་པ་ཉིད་

ཀྱི་ཕྱིར་བརྟན་པའོ། །ཡན་ལག་དང་ཉིང་ལག་མཛེས་པ་ཉིད་ཀྱི་ཕྱིར་དང་། གཟུགས་ཁ་དོག་བཟང་བ་ཉིད་ཀྱི་ཕྱིར་ཡན་ལག་མཆོག་གི་གཟུགས་སོ། །ཁ་ཅིག་ནི་དེ་ཡན་ལག་གི་མཆོག་གི་སྟོབས་དང་ལྡན་པ་ཞེས་བྱ་བར་འདོད་དོ། །ཕ་རོལ་གྱི་དཔུང་གི་ཚོགས་རྣམ་པར་
འཇོམས་པ་ཡིན་པའི་ཕྱིར། ཕ་རོལ་གྱི་སྡེ་རབ་ཏུ་འདུལ་བར་བྱེད་པ་རྣམས་སོ། །ས་ཆེན་པོ་སྨོས་པས་ནི་གླིང་བཞི་པ་ཡོངས་སུ་བཟུང་བ་ཡིན་ནོ། །ས་ཆེན་པོ་དེ་མངོན་པར་བཀུག་ནས་ཞེས་བྱ་བ་ནི་དབང་དུ་བྱས་ནས་ཏེ། ཀུན་ནས་གནོན་ཅེས་བྱ་བའི་ཐ་ཚིག་གོ། །གནས་པར་བྱེད་ཅེས་བྱ་བ་ནི། བདག་
པོ་བྱེད་པའི་སྒོ་ནས་གནས་པར་བྱེད་པའམ། ལོངས་སྤྱོད་པར་བྱེད་པའམ། སྲུང་བར་བྱེད་པའོ། །ཁྱད་པར་ཅི་ལྟ་བུ་ཅན་ཞིག་ཅེ་ན། མ་ལུས་པ་ལ་སོགས་པ་སྨོས་ཏེ། ལྗོངས་ཐམས་ཅད་ལས་རྒྱལ་བའི་ཕྱིར་མ་ལུས་པའོ། །རྒྱལ་སྲིད་ཀྱི་དགྲ་ཚེར་མ་མེད་པའི་ཕྱིར་དགྲ་མེད་པ་སྟེ། གནོད་པའི་
རྩོམ་པ་དང་ལྡན་པའི་རྒྱལ་ཕྲུག་ལ་སོགས་པ་ནི་རྒྱལ་སྲིད་ཀྱི་དགྲར་གྱུར་པ་ཡིན་ནོ། །ངག་རྩུབ་མོའི་སྒོ་ནས་གནོད་པ་མེད་པའི་ཕྱིར་གནོད་པ་མེད་པའོ། །རྣམ་པ་གང་གིས་མངོན་པར་བཀུག་པ་ཡིན་ཞེ་ན། ཆད་པ་མེད་པ་ཞེས་བྱ་བ་ལ་སོགས་པ་སྨོས་ཏེ། གསེར་ལ་སོགས་པའི་ཆད་པས་གཅོད་པ་
ལ་འཇུག་པ་མེད་པའི་ཕྱིར་ཆད་པ་མེད་པས་སོ། །མཚོན་ཆས་ཚར་གཅོད་པ་མེད་པའི་ཕྱིར་མཚོན་ཆ་མེད་པས་སོ། །ཆོས་ཀྱི་ཞེས་བྱ་བ་ནི་ཚུལ་གྱིས་ཏེ། སེམས་ཅན་རྣམས་དགེ་བ་བཅུའི་ལས་ཀྱི་ལམ་ལ་སོ་སོར་འགོད་པར་མཛད་པའི་ཕྱིར་རོ། །སྙོམས་པར་ཞེས་བྱ་བ་ནི་བག་མེད་པ་སྟེ། ཤེས་
རབ་ཕུན་སུམ་ཚོགས་པ་དང་ལྡན་པ་ཉིད་ཀྱི་ཕྱིར་རོ། །གང་འཇིག་རྟེན་པ་ནི་སྙོམས་པར་ཞེས་བྱ་བ་སྙན་པའི་ཚིག་གིས་ཞེས་རྗོད་པར་བྱེད་དོ། དེ་སྟེ་སྐྲ་དང་ཁ་སྤུ་བྲེགས་ནས་ཞེས་བྱ་བ་ལ། ན་ཚོད་ལ་བབ་པའི་སྐྲ་དང་ཁ་སྤུ་ནང་གི་སྤྲས་པ་ཡོད་ན་རྒྱགས་པ་སྐྱེད་པར་བྱེད་པ་ཉིད་ཀྱི་ཕྱིར་དེ་བྲེགས་པ་
ཡིན་ལ། ཕྱི་རོལ་གྱི་སྤྲས་པ་གོས་དཀར་པོ་དེ་ཡོངས་སུ་སྤངས་ནས་ངུར་སྨྲིག་གིས་ཁ་བསྒྱུར་བའི་གོས་བགོས་ནས་སོ། །ཡང་དག་པ་ཁོ་ནའི་དད་པས་ཞེས་བྱ་བ་ནི་ཡོན་ཏན་སྔོན་དུ་སོང་བའི་དད་པ་ནི། ཡང་དག་པའི་དད་པ་སྟེ། དེས་རབ་ཏུ་བྱུང་བར་གྱུར་ནའོ། །འདིར་བྱུང་བ་ནི། བྱུང་བ་དང་འགྲོ་བ་ལ་

འཇུག་པ་སྟེ། ཁྱིམ་ནས་འབྱུང་བར་བྱ་ཞིང་། ཁྱིམ་མེད་པར་འགྲོ་བར་གྱུར་ནའོ། །གནས་ཆུང་ངུ་ནི་ཁྱིམ་ཡིན་ཏེ། ཁྱིམ་ནས་བྱུང་བ་ལ་ཆུང་མ་དང་འདྲེ་བ་ཞེས་བྱ་བ་ཁྱིམ་ཆུང་ངུ་དེ་ཡང་མེད་པའི་ཕྱིར། ཁྱིམ་མེད་པར་འགྲོ་བར་འགྱུར་བའོ། །དེ་བཞིན་གཤེགས་པ་ཞེས་བྱ་བ་ནི། ཕྱིན་ཅི་མ་ལོག་པར་
གསུངས་པ་ཡིན་ལ། ཉོན་མོངས་པ་ལ་སོགས་པའི་དགྲ་ངེས་པར་བཅོམ་པའི་ཕྱིར་དང་། ཁམས་གསུམ་པོ་མ་ལུས་པས་མཆོད་པར་འོས་པ་ཉིད་ཡིན་པའི་ཕྱིར་དགྲ་བཅོམ་པ་ཡིན་ཞིང་། དངོས་པོ་ཐམས་ཅད་ཕྱིན་ཅི་མ་ལོག་པར་ཐུགས་སུ་ཆུད་པའི་ཕྱིར། ཡང་དག་པར་རྫོགས་པའི་སངས་རྒྱས་
ཡིན་ནོ། །སྒྲ་གྲགས་པར་འགྱུར་རོ་ཞེས་བྱ་བ་ནི་འཇིག་རྟེན་མ་ལུས་པར་སྙན་པར་རབ་ཏུ་གྲགས་པར་གྱུར་པའོ། །མཆོག་ཏུ་བརྩམས་ལ་ཞེས་བྱ་བ་དེ་ནི་འབྲས་བུ་གཙོ་བོར་གྱུར་པ་ལའོ། །རབ་ཏུ་རྒན་པ་དག་དང་ཞེས་བྱ་བ་ནི་རྒན་པ་དག་ལས་ཀྱང་ཤིན་ཏུ་རྒན་པ་སྟེ། རྒན་ཞིང་རྒན་པ་དེ་དག་དང་
ངོ་། །བཅོམ་ལྡན་འདས་གང་ན་བ་ཞེས་བྱ་བ་ནི་བཅོམ་ལྡན་འདས་ཕྱོགས་གང་ན་བཞུགས་པའི་ཕྱོགས་རྒྱུར་གྱུར་པ་དེར་སོང་བའོ། །མངོན་དུ་ཞེས་བྱ་བ་ནི་མངོན་སུམ་དུའོ། །ཡང་དག་པར་དགའ་བ་ནི་ཕན་ཚུན་དགེ་བའི་གཏམ་འདྲི་བར་བྱེད་པའོ། །ཡང་དག་པར་མགུ་བ་ནི་ཕན་ཚུན་ཡོན་ཏན་
རྗོད་པར་བྱེད་པའོ། །བྱས་ནས་འཁོད་དོ་ཞེས་བྱ་བ་ནི་རྫོགས་པར་བྱས་ནས་སྤངས་པའམ་འཕངས་པར་གྱུར་པའོ། །ཆོས་དང་ལྡན་པ་ཞེས་བྱ་བ་ནི་ཆོས་དང་བྲལ་བར་མ་གྱུར་པའོ། །ཡང་དག་པར་བསྟན་ཞེས་བྱ་བ་ལ་སོགས་པ་ལ། མི་ཤེས་པ་ཤེས་པར་བྱེད་པ་ནི་ཡང་དག་པར་སྟོན་པར་
བྱེད་པ་སྟེ། བྱ་བ་ལུང་ཕོག་པ་ཞེས་བྱ་བའི་ཐ་ཚིག་གོ། །ཡོངས་སུ་ཤེས་པ་དང་ལྡན་པ་ལེ་ལོས་བཅོམ་པ་དག་ཡང་དག་པར་བཀོད་པ་ཡིན་ནོ། །བྱ་བའི་སྒོ་ནས་དགེ་བ་ལ་ཡང་དག་པར་བཀོད་པ་ཡིན་པའི་ཕྱིར་རོ། །ཡང་དག་པར་གཟེངས་བསྟོད་པ་ནི་མོས་པ་དམན་པ་དག་དངོས་པོ་
ཁྱད་པར་དུ་འཕགས་པ་ལ་མངོན་པར་སྦྱོར་བ་སྐྱེད་པར་བྱེད་པའོ། །ཡང་དག་པར་དགའ་བར་བྱས་པ་ནི་མོས་པ་རྒྱ་ཆེ་བ་དག་ཀྱང་ལས་སུ་བྱ་བ་ཆེན་པོ་ལ་སྤྲོ་བ་ཡང་དག་པར་སྐྱེད་པའི་ཕྱིར་ལས་སུ་བྱ་བ་དེ་བརྗོད་པ་ཡིན་ནོ། །སྐབས་སྐབས་སུ་གཏམ་ཟེར་བ་ལ་ཞེས་བྱ་བ་ནི་བར་བར་དུ་གཏམ་

རབ་ཏུ་འཇུག་པར་བྱེད་པའོ། །བླ་མའི་ཡུལ་ལ་གུས་པ་མེད་པའི་ཕྱིར་མ་གུས་པ་ཡིན་ལ། བདག་ཉིད་འགའ་ཞིག་ལ་ཡང་བདག་པོ་ཉིད་དུ་ལྟ་བ་མེད་པའི་ཕྱིར་ཞེས་གུས་པ་མེད་པ་སྟེ། རང་དབང་གིས་འཇུག་པར་བྱེད་ཅེས་བྱ་བའི་བར་དུའོ། །སེམས་སོ་ཞེས་བྱ་བ་ནི་སྨྲ་བར་
འདོད་པའོ། །རིག་པ་གསུམ་གང་ལ་ཡོད་པ་དེ་ནི་གསུམ་རིག་པ་ཡིན་ཏེ། དེ་ཡང་ངེས་བརྗོད་དང་། སྙན་དངགས་དང་། མཆོད་སྦྱིན་གྱི་རིག་བྱེད་དོ། །ཇི་ལྟ་ཇི་ལྟར་ཞེས་བྱ་བ་ནི། ཡང་དག་པར་བརྗོད་པ་ལ་འཇུག་པ་ཡིན་ནོ། །རྣམ་པ་གང་གིས་འགྲོ་བ་དང་འོང་བ་ཞེས་བྱ་བ་ལ་སོགས་པ་ལ། དེ་ལྟ་བུ་རྗོད་
པར་བྱེད་པ་ན་གུས་པ་མེད་པ་མ་ཡིན་ནོ། །གང་དེ་དག་ཅེས་བྱ་བ་ལ་སོགས་པ་ལ། གཙུག་ཕུད་བསལ་བས་སྐྲ་མེད་པ་ཉིད་ཀྱི་ཕྱིར་མགོ་རེག་སྟེ་སྨད་པ་ཡིན་ལ། མགོ་རེག་སྨོད་པའི་དགེ་སྦྱོང་དག་ནི་དགེ་སྦྱོང་ངན་པ་མགོ་རེག་གོ། །གཉེན་ནག་གི་ཚོགས་གང་ལ་ཡོད་པ་དེ་དག་ནི་གཉེན་ནག་པོ་ཅན་ཡིན་ཏེ།
དེ་ལྟར་ཡང་བྲམ་ཟེའི་རིགས་ནི་དཀར་པོ་ཡིན་ལ། རིགས་གཞན་དག་ནི་ནག་པོ་ཡིན་ནོ་ཞེས་འབྱུང་སྟེ། ཁྱེད་ཤིན་ཏུ་རིགས་གཞན་དུ་གྱུར་པ་ཡིན་ནོ་ཞེས་བྱ་བའི་ཐ་ཚིག་གོ། །སྐྱེ་དགུ་རྣམས་ཀྱི་བདག་པོ་ནི་སྐྱེ་བའི་སྒོ་ནས་བུད་མེད་ཀྱི་ཡུལ་སྐྱེ་དགུའི་བདག་པོ་ཡིན་ཏེ། སྐྱེ་དགུའི་བདག་པོ་ཡོངས་སུ་
ལེན་པ་གང་དག་ཡོད་པ་མ་ཡིན་པ་དེ་དག་ནི་སྐྱེ་དགུའི་བདག་པོ་མེད་པ་སྟེ། བུ་མོ་ཡོངས་སུ་འཛིན་པ་གང་ལ་ཡོད་པ་མ་ཡིན་པ་དེ་དག་ནི་འཇིག་རྟེན་པ་རྣམས་ཀྱིས་ཤིན་ཏུ་སྨད་པ་ཡིན་ནོ་ཞེས་བྱ་བར་དགོངས་སོ། །དེ་དག་དང་ལྷན་ཅིག་ཏུ་ང་འདི་ལྟར་གུས་པ་མེད་པའི་གཏམ་ཡང་དག་པར་འདྲེ་བར་བྱེད་པའོ། །
དོན་དེ་དགོས་པ་གང་ལ་ཡོད་པ་དེ་ལ་ནི་དོན་དང་ལྡན་པ་སྟེ། དོན་དང་ལྡན་པ་ཡང་ཡིན་ལ་འོངས་པ་ཡང་ཡིན་པས་ན་དོན་དང་ལྡན་པས་འོངས་པའོ། །གང་ཞིག་དགོས་པས་རབ་ཏུ་འཇུག་པ་དེ་ནི་དོན་དང་ལྡན་པས་འོངས་པ་ཡིན་ནོ། །ཁྱོད་དགོས་པས་ད་ལྟར་ཡང་བླ་མའི་ཁྱིམ་དུ་གནས་བཅས་པ་
དེའི་ཕྱིར་གཞན་གྱི་དབང་དང་མངགས་པ་ཡིན་པའམ། ཡང་ན་བླ་མའི་ཁྱིམ་དུ་གནས་བཅས་པ་དག་གི་བླ་མར་བྱེད་པ་སྔོན་དུ་སོང་བ་ཅན་གྱི་ཀུན་དུ་སྤྱོད་པ་མི་གནོང་བ་དེ་ནི་རིགས་པ་མ་ཡིན་ནོ་ཞེ་ན། དེའི་ཕྱིར་དེ་ནི་གནས་མ་བཅས་པ་སྟེ་ཞེས་བྱ་བ་སྨོས་པ་ཡིན་ཏེ། དེ་དག་ནི་བླ་མའི་སྐྱེ་བོ་

ལ་བསྙེན་བཀུར་མ་བྱས་པར་འདིར་འོངས་པ་ཡིན་ཏེ། བྲམ་ཟེའི་བུ་ཨམྦསྟ་བླ་མའི་ཁྱིམ་དུ་གནས་པའི་འབྲས་བུ་བླ་མར་བྱེད་པ་མེད་པའི་ཕྱིར་བླ་མའི་ཁྱིམ་ན་འདུག་པ་མ་ཡིན་ནོ། །མ་མགུ་བ་ནི་ཐོག་མར་ཁྲོ་བས་ཟིལ་གྱིས་མནན་པ་ཡིན་ནོ། །ཁྲོ་བ་སྔོན་དུ་སོང་བ་ཅན་གྱིས་ལུས་འགྱུར་བར་བྱེད་
པའི་ཕྱིར་ཁྲོས་པ་ཡིན་ནོ། །ཁྲོ་བའི་ཚིག་བརྗོད་པར་འདོད་པ་ནི་གཏུམ་པོར་གྱུར་པ་ཡིན་ནོ། །ཡི་མ་རངས་པ་ནི་སེམས་མགུ་བར་མ་གྱུར་པ་ཡིན་ནོ། །སྨྲ་བར་འདོད་པ་ཞེས་བྱ་བ་ནི་ཚིག་ངན་པའོ། །སྨོད་པར་འདོད་པ་ཞེས་བྱ་བ་ནི་ཚར་གཅོད་པར་བྱེད་འདོད་པའོ། །གླེང་བར་འདོད་པ་ཞེས་བྱ་
བ་ནི་མངོན་པར་འདོད་པ་མ་ཡིན་པའི་ཚིག་སྨྲ་བར་འདོད་པའོ། །དྲན་པར་བྱ་བ་ཉིད་དུ་འདོད་པ་ཞེས་བྱ་བ་ནི་དྲན་པ་མེད་པ་དྲན་པ་བསྐྱེད་པར་མངོན་པར་འདོད་པའོ། །ད་ལྟར་གྱི་ཞེས་བྱ་བ་ནི་ཡོངས་སུ་ཤེས་པ་མེད་པར་སྐྱེས་པ་ད་ལྟར་གྱི་དུས་སུ་བྱུང་བ་སྟེ། གོ་རིམས་གཞན་མ་ཡིན་པ་
ཞེས་བྱ་བའི་ཐ་ཚིག་གོ། །ཡང་ན་གླང་པོ་ཆེ་འོས་པ་གང་ཡིན་པ་དེ་དག་ནི་རྒྱལ་རིགས་ཡིན་ཏེ། བྲམ་ཟེ་དག་ལས་དམན་པར་གྱུར་པ་ཡིན་ནོ། །བསྙེན་བཀུར་མི་བྱེད་ཅེས་བྱ་བ་ནི་འདི་ཆེན་པོ་ཡིན་ནོ་ཞེས་བྱ་བ་དེ་ལྟ་བུའི་སེམས་ཀྱིས་འཛིན་པར་མི་བྱེད་པའོ། །བླ་མར་མི་བྱེད་ཅེས་བྱ་བ་ནི་ཁོ་བོ་
ལ་བླ་མའི་གནས་སུ་ལྟ་བར་མི་བྱེད་པའོ། །བཙུན་པར་མི་བྱེད་ཅེས་བྱ་བ་ནི་རིགས་བཟང་པོ་ཡིན་ནོ་ཞེས་དེ་ལྟར་ལྟ་བར་མི་བྱེད་པའོ། །མཆོད་པར་མི་བྱེད་ཅེས་བྱ་བ་ནི་ལུས་ཀྱིས་ཕྱག་འཚལ་བ་ལ་སོགས་པའི་མཆོད་པ་མི་བྱེད་པའོ། །ཁུག་རྟ་ཞེས་བྱ་བ་ནི་བྱའི་རིགས་ལུས་ཀྱི་ཚད་ཆུང་བའོ། །བདག་
ཉིད་ཅེས་བྱ་བ་ནི་ཤཱཀྱ་རྣམས་ཀྱི་གྲོང་ཁྱེར་རོ། །བདག་ཉིད་ཀྱིས་ཞེས་བྱ་བ་གཉིས་པ་སྨོས་པས་ནི་གྲོང་ཁྱེར་བདག་ཉིད་ཀྱིས་བྱས་པ་ཉིད་དུ་སྟོན་པར་བྱེད་པ་ཡིན་གྱི། གྲོང་ཁྱེར་དེ་དག་གཞན་གྱི་སྟོབས་ཀྱིས་བཟུང་བར་གྱུར་པ་ནི་མ་ཡིན་ནོ། །རྒྱུད་བཙལ་བ་ནི་དང་པོར་རྒྱུད་བསྒྲུབ་པའོ། །ཤིན་ཏུ་
བྱ་བ་ནི་ཤིན་ཏུ་རྒལ་བའི་དོན་དང་། བརྫུན་པ་ཞེས་བྱ་བའི་བར་དུའོ། །སྐབས་ཞེས་བྱ་བ་ནི་གནས་སྐབས་ཡིན་ནོ། །ཆོས་བཞིན་དུ་ཞེས་བྱ་བ་ནི་ཚུལ་གྱིས་སོ། །རབ་ཏུ་འདུད་པ་ནི་ཚར་བཅད་ཅིང་གནས་མེད་པ་ཞེས་བྱ་བའི་ཐ་ཚིག་གོ། །ལྗོངས་ཐ་མལ་པ་ནི་ཡུལ་འཁོར་ཡིན་ལ། ལྗོངས་ཀྱི་

ཕྱོགས་གཅིག་ནི་ཡུལ་ཡིན་ནོ། །གངས་རིའི་དྲུང་ཞེས་བྱ་བ་ནི་ཁ་བ་ཅན་གྱིས་བསྐོར་བའི་རི་བོའི་གམ་དག་གོ། །ཆུ་བོ་བྷ་གི་ར་ཐ་དེ་དུས་དེའི་ཚེ་དྲང་སྲོང་གི་དམོད་པས་དེར་ཁྲིད་པས་དེའི་ཕྱིར་བྷ་གི་ར་ཐའི་འགྲམ་ཞེས་བྱའོ། །ད་ལྟར་ནི་དཔག་ཚད་བདུན་ཅུས་བར་དུ་ཆོད་པར་ཆུ་བོ་
གང་གཱ་འབབ་པ་ཡིན་ནོ། །སྤྱིལ་བོ་ནི་རྩྭའི་སྤྱིལ་བུའོ། །དེར་འདོད་ཆགས་དེས་ཤིན་ཏུ་གནོད་པར་གྱུར་པས་སྐྱ་བོ་བསེང་བསེང་པོར་གྱུར་པ་ན་དྲང་སྲོང་སེར་སྐྱས་ཁྱེད་ཅག་ཅིའི་ཕྱིར་དེ་ལྟ་བུའི་རྣམ་པ་སྐྱེས་པར་གྱུར་ཅེས་དྲིས་པ་ན། དེ་དག་གིས་ཇི་ལྟར་གྱུར་པ་སྨྲས་པ་དང་། དྲང་སྲོང་གིས་འདི་ལྟ་སྟེ་
མས་དབྱེའི་སྲིང་མོ་དག་དང་ལྷན་ཅིག་དགའ་མགུར་སྤྱོད་ཅིག་ཅེས་སྨྲས་པ་དང་། དེ་དག་གིས་དྲང་སྲོང་གི་ཚིག་ཚད་མར་བྱས་ནས་མས་དབྱེའི་སྲིང་མོ་དག་དང་དགའ་མགུར་སྤྱོད་པར་གྱུར་ཅེས་བྱ་བའི་བར་དུའོ། །གཞོན་ནུ་དག་གིས་དེ་ལྟར་བྱེད་ནུས་སམ་ཞེས་བྱ་བ་ལ་མས་དབྱེའི་སྲིང་མོ་དག་དང་
འཚོས་པ་ལ་སོགས་པ་ལས་ངན་པར་གྱུར་པའོ། །ཆེད་དུ་རྗོད་པ་ཆེད་དུ་བརྗོད་དེ་ཞེས་བྱ་བ་ནི་མངོན་པར་འདོད་པའི་ཚིག་མངོན་པར་འདོད་པ་ཉིད་ཀྱི་སྒོ་ནས་རབ་ཏུ་སྒྲོགས་པར་བྱེད་པའོ། །ཨེ་མའོ་ནུས་སོ་ཞེས་བྱ་བ་ལ་ཨེ་མའི་སྒྲ་ནི་འདིར་རབ་ཏུ་དགའ་བ་ཡིན་ལ། ལས་ནུས་པ་གང་ལ་ཡོད་པ་
དེ་དག་ནི་ཤཱཀྱ་ཡིན་ལ། བསོད་ནམས་ཆེན་པོ་ནི་ཡོན་ཏན་དང་བསོད་ནམས་ཀྱིས་ཆེན་པོར་གྱུར་པའོ། །ཐོག་མ་ནི་དུས་རྩོམ་པ་ཡིན་ནོ། །རྒྱུད་ནི་རུས་ཀྱི་རྒྱུད་ཀྱི་འབྲེལ་པའོ། །གདོལ་པའི་རིགས་ལས་སྐྱེས་པ་ནི་གདོལ་པའི་རིགས་ཅན་ནམ། གཞན་འགའ་ཞིག་གི་རྒྱུད་ཀྱི་རིགས་
ཡིན་ནོ། །ཀྱེ་ཞེས་བྱ་བ་ནི་འདིར་བོད་པའི་ཚིག་ཡིན་ནོ། །དྲིལ་ཕྱིས་ནི་དྲི་བཟང་པོའི་རྫས་ཀྱི་ཕྱེ་མས་སོ། །རྡོ་རྗེ་གང་གི་ཕྱག་ན་མངའ་བ་དེ་ནི་ཕྱག་ན་རྡོ་རྗེའོ། །ཀུན་དུ་འབར་བ་ཞེས་བྱ་བ་ལ་སོགས་པ་ལ་འགའ་དང་འགའ་ཞིག་ན་ཆུང་ངུ་འབར་བ་སྲིད་པས་ན་ཀུན་དུ་ཡིན་ནོ། །འབར་
བ་དེ་དག་ཉིད་འབྲེལ་པར་གྱུར་པ་ནི་རབ་ཏུ་འབར་བ་ཉིད་ཡིན་ནོ། །རྒྱུན་མི་འཆད་པ་ཉིད་དུ་འབར་བས་ན་ཀུན་དུ་རབ་ཏུ་འབར་བ་ཉིད་ཡིན་ནོ། །ཀུན་དུ་འབར་བ་དག་གཅིག་ཏུ་གྱུར་པ་ནི་གཅིག་ཏུ་འབར་བར་གྱུར་པ་ཉིད་ཡིན་ནོ། །བསམས་པ་ནི་ཚིག་པར་གྱུར་པར་རོ། །དུས་ལས་འདས་

པ་ནི་དུས་ལ་བབ་པར་གྱུར་པའོ། །ཐོག་མར་དངངས་པའི་ཕྱིར་འཇིགས་པ་ཡིན་ནོ། །སྐྲག་པའི་རྒྱུ་མཐོང་བའི་ཕྱིར་དངངས་པ་ཡིན་ནོ། །ལོག་པར་ལྟུང་སྲིད་པའི་ཕྱིར་ཀུན་ནས་སྐྱོ་བའོ། །ཡོངས་སུ་སྐྱོ་བར་གྱུར་པ་དམིགས་པའི་ཕྱིར་བ་སྤུ་ལྡང་བར་གྱུར་ནས་སོ། །ཁྱེད་བདེན་ནོ་ཞེས་
བྱ་བ་ནི་གཽ་ཏ་མ་ཁྱོད་ཀྱིས་གསུངས་པ་འདི་ལྟ་སྟེ། བྲམ་ཟེའི་བུ་ཨམྦསྟ་ནི་ཤཱཀྱ་རྣམས་ཀྱི་བྲན་མོའི་བུ་ཡིན་ནོ་ཞེས་བྱ་བའི་ཚིག་དེ་ནི་བདེན་པའོ། །རྫུ་འཕྲུལ་ཆེ་བ་ནི་ཏིང་ངེ་འཛིན་གྲུབ་པའོ། །མཐུ་ཆེ་བ་ནི་ངོ་མཚར་ཉེ་བར་སྟོན་པའི་ནུས་པ་དང་ལྡན་པའོ། །བྲམ་ཟེའི་དམོད་པས་ཞེས་བྱ་བ་ནི་
ཚིག་རྩུབ་པོས་སོ། །ངོ་ཚ་བ་ནི་ཞུམ་པས་ཇི་ལྟར་བྱ་བ་ལ་རྨོངས་པར་གྱུར་པའོ། །ཕྲག་པ་གཉིས་འོག་ཏུ་ལྟུང་བར་གྱུར་པ་ཉིད་ཀྱི་ཕྱིར་ཕྲག་པ་ཕབ་པའོ། །ངོ་ཚ་བས་མགོ་ཐུར་དུ་བལྟས་པ་ནི་གདོང་སྨད་པའོ། །བསམ་པ་རྣམ་པ་སྣ་ཚོགས་ཀྱི་དབང་དུ་གྱུར་པ་ནི་རབ་ཏུ་སེམས་པའོ།
ཚིག་སྨྲ་བའི་ནུས་པ་མེད་པ་ནི་ཅང་མི་སྨྲ་བར་འདུག་པའོ། །སྨྲ་བར་བྱའོ་ཞེས་བྱ་བ་ནི་ཚིག་བརྗོད་པར་བྱ་བའོ། །ལྷན་ཅིག་འཚོས་པ་ལས་ཞེས་བྱ་བ་ནི་སྐྱེས་པ་དང་བུད་མེད་སྦྱོར་བའི་རྒྱུར་གྱུར་པའོ། །སྟན་ཞེས་བྱ་བ་ནི་ཉེ་བར་འདུག་པའི་དུས་ཀྱིའོ། །ཆུ་ཞེས་བྱ་བ་ནི་ཐོག་མའི་ཆུའམ།
རྐང་བཀྲུས་ཀྱི་ཆུའོ། །སྔགས་ཞེས་བྱ་བ་ལ་རིག་བྱེད་ཀྱི་དོན་རྣམ་པར་འབྲེལ་པ་ནི་སྔགས་ཡིན་ནོ། །ཀློག་པ་ཞེས་བྱ་བ་ནི་རིག་བྱེད་ལ་སོགས་པ་ཀློག་པར་བྱེད་པའོ། །རྒྱལ་རིགས་སུ་དབང་བསྐུར་བ་ནི་རྒྱལ་རིགས་དག་གི་ཆོ་ག་སྔོན་དུ་སོང་བ་ཅན་ཉེ་བར་ཐོབ་པའམ། རྒྱལ་སྲིད་ལ་
དབང་བསྐུར་བ་ཡིན་ནོ། །ཕའི་སྤུན་ཟླ་ནི་ཁུ་བོ་ཡིན་ཏེ། དེའི་བུ་ཡིན་ནོ། །རྒྱལ་རིགས་ཕན་ཚུན་རིགས་མཚུངས་པའི་ཕྱིར་སྤུན་ཟླ་ཡིན་ཏེ། སྤུན་ཟླའི་བུ་ཞེས་བྱ་བ་ནི་གཞུང་གཞན་ནོ། །སྲིང་མོའི་བུ་ནི་སྣག་གི་ཚ་བོ་ཡིན་ནོ། །ཐམས་ཅད་ཚངས་པ་ཉིད་ལས་སྐྱེས་པ་དེའི་ཕྱིར་རྒྱལ་རིགས་མ་
ཡིན་བྲམ་ཟེའི་ཕྱི་མོ་ཡིན་ནོ། །རྣམ་པ་ཀུན་ལས་བྲམ་ཟེ་དག་ལས་ཕྱི་རོལ་དུ་བྱས་པའི་ཕྱིར་བྲམ་ཟེའི་རིགས་ངན་ཡིན་ནོ། །རུས་ལས་ཞེས་བྱ་བ་ནི་གང་གི་ཕྱིར་རྒྱལ་རིགས་ལས་ཕྱི་རོལ་དུ་བྱས་པ་བྲམ་ཟེ་དག་ལས་སྟན་ལ་སོགས་པ་ཐོབ་པ་ཡིན་ལ། བྲམ་ཟེའི་གཞོན་ནུ་ནི་བྲམ་ཟེ་དག་གིས་

ཕྱི་རོལ་དུ་བྱས་པ་བྲམ་ཟེ་དག་ལས་ཀྱང་སྟན་ལ་སོགས་པ་ཐོབ་པ་མ་ཡིན་པ་དེའི་ཕྱིར་རུས་ལ་སོགས་པ་བྲམ་ཟེ་དག་ལས་རྒྱལ་རིགས་གཙོ་བོར་གྱུར་པ་ཡིན་ནོ། །ཕན་ཚུན་བརྒྱུད་པས་སྐྱེས་པ་ནི་རྒྱུད་ཡིན་ལ། གཽ་ཏ་མ་ལ་སོགས་པ་ནི་རིགས་ཡིན་ཏེ། རྐང་གཉིས་གང་
དག་རིགས་ཀྱི་རྗེས་སུ་འབྲང་ཞིང་རིགས་དང་འབྲེལ་པ་དེ་དག་ནི་རྐང་གཉིས་ནང་ན་རྒྱལ་རིགས་མཆོག་སྟེ་གཙོ་བོར་གྱུར་པ་ཡིན་ནོ། །ལྷ་དང་མིར་བཅས་པའི་འཇིག་རྟེན་དག་གི་ཡང་རིག་པ་དང་ཞབས་སུ་ལྡན་པ་ནི་མཆོག་སྟེ་གཙོ་བོར་གྱུར་པ་ཡིན་ནོ། །རིག་པ་ནི་གསུམ་སྟེ། སྔོན་གྱི་གནས་
ཤེས་པ་དང་། འཆི་འཕོ་དང་སྐྱེ་བ་ཤེས་པ་དང་། ཟག་པ་ཟད་པ་ཤེས་པའོ། །རྐང་པ་ནི་ཟག་པ་མེད་པའི་ཚུལ་ཁྲིམས་ཡིན་པའམ། ཡང་ན་རིག་པ་ནི་ཟག་པ་མེད་པའི་ཡང་དག་པའི་ལྟ་བ་ཡིན་ལ། རྐང་པ་ནི་ལམ་གྱི་ཡན་ལག་བདུན་ཡིན་ནོ། །ལེགས་པར་བཤད་པ་ནི་དོན་བཟང་པོ་དང་ལྡན་
པའོ། །གོ་འཕང་བཟང་པོ་དང་ལྡན་པ་ཉིད་ཀྱི་ཕྱིར་བདེ་འགྲོའོ། །རང་གི་བུ་མོ་སྟེར་བ་ནི་བག་མར་བཏང་བ་ཡིན་ལ། གཞན་གྱི་བུ་མོ་ལེན་པར་བྱེད་པ་ནི་བག་མ་ལེན་པ་ཡིན་ནོ། །རུས་སྨྲ་བ་ཞེས་བྱ་བ་ལ་སོགས་པ་ལ་རུས་ནི་རྒྱལ་རིགས་ལ་སོགས་པ་ཡིན་ནོ། །རིགས་ནི་གཽ་ཏ་མ་ལ་
སོགས་པ་ཡིན་ནོ། །བྲམ་ཟེའི་བུ་འདོན་པ་དང་ལྡན་པ་རིག་བྱེད་དང་རིག་བྱེད་ཀྱི་ཡན་ལག་རིག་པ་གང་ཡིན་པ་དེ་འདི་ལྟ་སྟེ་བྲམ་ཟེའི་རུས་དག་པར་འགྱུར་གྱི། གཞན་རྒྱལ་རིགས་ཀྱི་རུས་འགའ་ཞིག་ཅེའམ། གཽ་ཏ་མའི་རིགས་དག་པར་འགྱུར་གྱི། རིགས་མ་ཡིན་ནོ་ཞེས་སྨྲ་བའོ། །བྲམ་ཟེའི་
བུ་འདོན་པ་དང་ལྡན་པ་དག་པར་འགྱུར་གྱི། གཞན་འགའ་ཞིག་ཀྱང་མ་ཡིན་ཞེས་དེ་སྐད་སྨྲ་བ་དེ་དག་ལ་ཆགས་ཤིང་ཞེན་པ་གང་ཡིན་པ་དེ་དག་ནི་སྐལ་བ་མེད་པ་སྟེ་རུང་བ་མ་ཡིན་ནོ། །འདི་དག་ནི་ཞེས་བྱ་བ་ནི་བཤད་པར་གྱུར་པའོ། །བླ་ན་མེད་པ་ཞེས་བྱ་བ་ནི་གཙོ་བོར་གྱུར་པའོ། །རིག་པ་དང་
རྐང་པར་ལྡན་པ་ཞེས་བྱ་བ་ནི་རིག་པ་དང་རྐང་པར་འབྱོར་པའོ། །མངོན་སུམ་དུ་བྱས་པའི་སྒོ་ནས་ཁོང་དུ་ཆུད་པའོ། །སྤོངས་ཤིག་ཅེས་བྱ་བ་ནི་ཡོངས་སུ་དོར་བའོ། །འདི་ལྟར་མངོན་པར་དད་པར་གྱུར་པ་ཞེས་བྱ་བ་ལ་སོགས་པ་ལ། ཁོ་བོ་བཅོམ་ལྡན་འདས་ཀྱི་ཡུལ་ལ་ཤིན་ཏུ་མངོན་པར་

དད་པར་གྱུར་པ་སྟེ། ཡོན་ཏན་ལ་སེམས་པ་སྐྱེས་པར་གྱུར་ཅེས་བྱ་བའི་ཐ་ཚིག་གོ། །ཡོན་ཏན་སེམས་པ་ཉིད་བསྟན་པའི་ཕྱིར་གང་ཡང་མ་བྱུང་ངོ་ཞེས་བྱ་བ་ལ་སོགས་པ་སྨྲས་ཏེ། སངས་རྒྱས་བཅོམ་ལྡན་འདས་མ་གཏོགས་པ་ཁྱོད་དང་ཡོན་ཏན་གྱི་སྒོ་ནས་མཚུངས་པའི་སེམས་ཅན་གྱི་རིགས་
འགའ་ཞིག་འདས་པའི་དུས་སུ་མ་བྱུང་ལ། མ་འོངས་པའི་དུས་སུ་ཡང་འབྱུང་བར་མི་འགྱུར་ཞིང་། ད་ལྟར་ཡང་སངས་རྒྱས་གཉིས་པ་མེད་པའི་ཕྱིར་འཁོར་བའི་དཀྱིལ་འཁོར་མ་ལུས་པ་ན་ཁྱོད་དང་ཡོན་ཏན་གྱི་སྒོ་ནས་མཚུངས་པ་ད་ལྟར་གྱི་དུས་ན་ཡང་ཡོད་པ་མ་ཡིན་ནོ། །ལེགས་ཀྱིས་
ཞེས་བྱ་བ་ནི་ཆོས་བསྟན་པ་རིགས་པ་ཡིན་ནོ། །ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་ཅེས་བྱ་བའི་ཚིག་གསུམ་པོ་དེ་དག་ནི་ཉན་པ་པོ་རྣམས་སེམས་བསྐྱེད་པའི་བྱེ་བྲག་ལ་ངེས་པར་སྦྱར་བ་ཡིན་ཏེ། ཉན་པ་པོ་ཁ་ཅིག་སྣོད་ཁ་སྤུབ་པ་དང་འདྲ་ལ། ཁ་ཅིག་སྣོད་ཞབས་རྡོལ་བ་དང་འདྲ་
ཞིང་། ཁ་ཅིག་སྣོད་མི་གཙང་བ་དང་འདྲ་བ་ཡིན་ནོ། །ཁ་སྤུབ་པ་ལ་ཆུ་འཛག་པར་འགྱུར་ཞིང་། ཞབས་རྡོལ་བ་ལ་འཇུག་ཏུ་ཟིན་ཀྱང་གནས་པར་མི་འགྱུར་ལ། མི་གཙང་བ་ལ་འཇུག་ཅིང་གནས་སུ་ཟིན་ཀྱང་བཏུང་བར་བྱ་བ་མ་ཡིན་པ་དེ་བཞིན་དུ། འགའ་ཞིག་གི་ཡིད་ལ་ཆོས་བཤད་པར་
གྱུར་པ་ན། འཇུག་པར་མི་འགྱུར་ཏེ། འཛིན་པར་མི་ནུས་པའི་ཕྱིར་རོ། །ཁ་ཅིག་ལ་འཇུག་ཏུ་ཟིན་ཀྱང་གནས་པར་མི་འགྱུར་ཏེ་བརྗེད་པའི་ཕྱིར་རོ། །ཁ་ཅིག་ལ་འཇུག་ཅིང་གནས་ཀྱང་ཚུལ་བཞིན་མ་ཡིན་པའི་ཡིད་ལ་བྱེད་པའི་དབང་གིས་ལོག་པར་གཟུང་བར་འགྱུར་བ་དེའི་ཕྱིར། འདིར་བཅོམ་
ལྡན་འདས་ཀྱིས་སྣོད་ཁ་<སྤུབ་‚སྦུབ་>པ་ལ་སོགས་པའི་དཔེ་གསུམ་པོ་དག་གིས་དགེ་སློང་དེ་དག་གི་སེམས་རྣམ་པར་བཟློག་ནས། ཁ་གྱེན་དུ་བལྟ་བ་དང་། བརྟན་པ་དང་། གཙང་མའི་སྣོད་ཀྱི་དཔེ་ཅན་གྱི་སེམས་དག་ལ་ངེས་པར་སྦྱར་བ་ཡིན་ནོ། །ལེགས་པར་གྱིས་རབ་ཏུ་གྱིས་ཡིད་ལ་གྱིས་ཞེས་
བྱ་བ་ཡིན་པས་རྩེ་གཅིག་པའི་ཕྱིར་ལེགས་པ་ཡིན་ལ། མི་བརྗེད་པའི་ཕྱིར་རབ་ཏུ་ཉན་པ་ཡིན་ཞིང་ཚུལ་བཞིན་ཡིད་ལ་བྱེད་པས་འཇུག་པའི་ཕྱིར་ཡིད་ལ་བྱེད་པ་བཞིན་ནོ། །སྟོན་པར་མཛད་པས་ན་སྟོན་པ་སྟེ། གང་རྗེས་སུ་མཐུན་པར་ལུང་འབོགས་པ་སྦྱིན་པར་མཛད་པ་ལ་མཁས་པའོ། །

ཁྱིམ་བདག་ཅེས་བྱ་བ་ནི་གང་འགའ་ཞིག་རིགས་བཞི་པོ་དག་ལས་ཁྱིམ་གྱི་བདག་པོར་གྱུར་པའོ། །ཁྱིམ་བདག་གི་བུ་ཞེས་བྱ་བ་ནི་ན་ཚོད་རྒས་པར་གྱུར་པ་མ་ཡིན་པ་གང་ཡིན་པ་དེ་ཡང་ངོ་། །ཁྱིམ་བདག་སྨོས་པས་ཇི་སྐད་དུ་སྨོས་པའི་བྲམ་ཟེ་དག་པར་འགྱུར་ཞིང་བྲམ་ཟེ་
མ་ཡིན་ནོ་ཞེས་སྟོན་ཅིང་སྨྲ་བ་དེ་དག་བསལ་བ་ཡིན་ཏེ། རིགས་ཐམས་ཅད་དག་པ་དམིགས་པ་སྲིད་པའི་ཕྱིར་རོ། །ཁྱིམ་བདག་གི་བུ་སྨོས་པས་གང་འདི་སྙམ་དུ་འདི་ལྟ་སྟེ་གཞོན་ནུའི་སྐབས་སུ་ཐར་པ་ཐོབ་པ་མེད་དོ་ཞེས་སེམས་ཤིང་སྨྲ་བ་དེ་དག་བཀག་པ་ཡིན་ཏེ། ན་ཚོད་གཞོན་པ་དག་ལ་
ཡང་དག་པ་ཉིད་མཐོང་བའི་ཕྱིར་རོ། །ཡོན་ཏན་ལ་སེམས་པ་ནི་དད་པ་ཡིན་ཏེ། སོ་སོར་ཐོབ་པའོ། །སོ་སོ་ཡང་དག་པར་སློབ་པ་ནི་དཔྱོད་པར་བྱེད་པའམ་སེམས་ངེས་པར་འཛིན་པའོ། །གནོད་པ་ཞེས་བྱ་བ་ནི་བུ་དང་ཆུང་མ་ལ་སོགས་པ་གསོ་བའི་སྒོ་ནས་ཤིན་ཏུ་ཉམ་ང་བར་གྱུར་པའོ། །རྡུལ་
གྱི་གནས་ཞེས་བྱ་བ་ནི་ཉོན་མོངས་པ་རྣམ་པ་མང་པོ་སྐྱེ་བའི་གནས་སམ། སྡུག་བསྔལ་དང་སྐྱོ་བའི་རྣམ་པ་དུ་མའི་གནས་སུ་གྱུར་པའོ། །རབ་ཏུ་བྱུང་བ་ནི་དྲི་མ་མེད་པ་ཞེས་བྱ་བ་ལ་ཁྱིམ་གྱི་གནས་རྣམ་པ་མང་པོས་དཀྲུགས་པ་དང་རྣམ་པར་དཀྲུགས་པར་རོ། །བྲལ་བ་ནི་ཉོན་མོངས་པའི་
སྒོ་དུ་མ་སྐྱེ་བ་དང་བྲལ་བས་དོགས་པ་མེད་པའོ། །བྱ་དཀའ་བ་ཞེས་བྱ་བས་ནི་དཀའ་བས་བསྒྲུབ་པ་ཉིད་དུ་མི་ནུས་པ་ཡིན་ནོ། །ཁྱིམ་ན་གནས་པའི་ཕྱིར་ཁྱིམ་པའོ། །ཁྱིམ་ན་གནས་པ་ཞེས་བྱ་བ་ནི་ཆུང་མ་ཡོངས་སུ་འཛིན་པར་བྱེད་པར་གྱུར་པས་སོ། །ཇི་སྲིད་འཚོའི་བར་དུ་ཞེས་བྱ་བ་ནི་འཚོ་
བའི་མཐར་ཐུག་པའི་བར་དུའོ། །གཅིག་ཏུ་རྙོག་པ་མེད་པར་གྱུར་པ་ཞེས་བྱ་བ་ནི་གཅིག་ཏུ་དྲི་མ་མེད་པར་བསྒྲུབས་པ་སྟེ། །རྙོག་པ་ཐམས་ཅད་དང་བྲལ་བར་གྱུར་ཅེས་བྱ་བའི་དོན་ཏོ། །ཡོངས་སུ་རྫོགས་པ་ཞེས་བྱ་བའི་བཤད་པ་ནི་སྔ་མ་བཞིན་ནོ། །དེས་འདི་སོ་སོར་བརྟགས་ནས་
ཞེས་བྱ་བ་ནི་ཤེས་རབ་ཀྱིས་ཡོངས་སུ་དཔྱད་པའམ། སེམས་ལ་རབ་ཏུ་འབྱུང་བ་བཟོད་པ་ཉིད་དུ་བྱས་པར་གྱུར་པའོ། །ལོངས་སྤྱོད་ཀྱི་ཕུང་པོ་ནི་དབྱིག་དང་། གསེར་དང་། གྲོང་ལ་སོགས་པའི་ཚོགས་སོ། །གཉེན་གྱི་འཁོར་ཞེས་བྱ་བ་ནི་གཉེན་བརྒྱུད་པའམ་གཉེན་གྱི་ཚོགས་ཡིན་ནོ། །

ཚུལ་ཁྲིམས་དང་ལྡན་པ་ཞེས་བྱ་བ་ནི་ཤིན་ཏུ་ཚུལ་ཁྲིམས་དང་འབྱོར་པ་ཡིན་ནོ། །སོ་སོར་ཐར་པའི་སྡོམ་པས་བསྡམས་པ་ཞེས་བྱ་བ་ནི་དགེ་བསྙེན་དང་། དགེ་ཚུལ་དང་། དགེ་སློང་གི་སྡོམ་པ་དང་ལྡན་པའོ། །སྤྱོད་པ་དང་ལྡན་པ་ཞེས་བྱ་བ་ལ་ཀུན་དུ་སྤྱོད་པ་ནི་སྤྱོད་པ་སྟེ། གནས་ན་གནས་
པའི་དགེ་སློང་གི་བྱ་བ་དེ་དང་ལྡན་ཞིང་འབྱོར་པའོ། །སྤྱོད་ཡུལ་དང་ལྡན་པ་ཞེས་བྱ་བ་ནི་བསོད་སྙོམས་ལ་སོགས་པའི་རྒྱུ་མཚན་གྱིས་འགྲོ་བར་བྱེད་པ་དགེ་སློང་གི་བྱ་བ་དང་ལྡན་པའོ། །རྡུལ་ཙམ་ལ་ཡང་ཞེས་བྱ་བ་ནི་དམ་པ་རྣམས་ཀྱིས་སྨད་པ་ཉེས་བྱས་ཀྱི་ཁ་ན་མ་ཐོ་བ་ཆུང་ངུ་ཡིད་ཀྱིས་བསྡམ་
པར་བྱ་བ་དག་ལའོ། །འཇིགས་པར་ལྟ་བ་ཞེས་བྱ་བ་ནི་འཇིགས་པར་ལྟ་བའི་ངང་ཚུལ་གྱི་རང་བཞིན་གང་ལ་ཡོད་པ་དེ་ནི་འཇིགས་པར་ལྟ་བ་སྟེ། གང་འཇིག་རྟེན་པ་དང་བདག་གི་ཆོས་ཀྱི་དབང་དུ་བྱེད་པས་ཁ་ན་མ་ཐོ་བ་ཆུང་ངུ་ལ་ཡང་སྤྱོད་པར་མི་བྱེད་པ་ཡིན་ནོ། །ཇི་ལྟར་ན་ཚུལ་ཁྲིམས་དང་
ལྡན་པར་གྱུར་པ་ཡིན་ཞེ་ན། སྲོག་གཅོད་པ་སྤངས་ཏེ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཤིན་ཏུ་ལྟུང་བར་བྱེད་པས་གཅོད་པ་ཡིན་ལ། སྲོག་དག་གཅོད་པར་བྱེད་པས་ན་སྲོག་གཅོད་པའོ། །སྲོག་ཀྱང་སྲོག་གི་དབང་པོ་ཡིན་ཏེ། དབུགས་འབྱུང་བ་དང་རྔུབ་པ་ཡིན་ནོ། །དེ་
འགོག་པ་ནི་འཇིག་པ་ཡིན་ནོ། །དེ་སྤངས་པ་ནི་འདི་ལྟ་སྟེ། ཁོ་བོས་འདི་བྱ་བ་མ་ཡིན་པར་ཡིད་ཀྱིས་ལྡོག་པ་ལ་གཟུང་བར་བྱའོ། །སྲོག་གཅོད་པ་ལས་སླར་ལྡོག་པར་འགྱུར་ལ་ཞེས་བྱ་བ་ནི་ཀུན་དུ་སྤྱོད་པའི་དུས་སུ་ལུས་དང་ངག་གཞན་གྱི་སྲོག་འགོག་པར་བྱེད་པ་ལས་རྣམ་པར་ལྡོག་པར་
འགྱུར་བ་ཡིན་ནོ། །དབྱིག་པ་སྤངས་ཤིང་ཞེས་བྱ་བ་ནི་མཚོན་ཆ་མ་གཏོགས་པའི་གཞན་ལ་འཚེ་བར་བྱེད་པའི་ཐབས་སུ་གྱུར་པ་དང་བྲལ་བ་ཡིན་ནོ། །མཚོན་ཆ་སྤངས་པ་ཞེས་བྱ་བ་ནི་མཚོན་ཆ་ལས་གྱུར་པའི་འཚེ་བ་ཡོངས་སུ་དོར་བ་ཡིན་ནོ། །འདི་ལ་ངོ་ཚ་བ་ཡོད་པའི་ཕྱིར་ངོ་ཚ་ཅན་ཏེ།
གང་ཡོན་ཏན་དང་། གུས་པ་དང་ལྡན་པ་དང་། སྡིག་པས་འཇིགས་པར་གྱུར་པའོ། །སྙིང་བརྩེ་བ་དང་ལྡན་པ་ཉིད་ཀྱི་ཕྱིར་བརྩེ་བ་ཅན་ཡིན་ནོ། །ཡུལ་གང་ལ་བརྩེ་བ་དང་ལྡན་པ་ཡིན་ཞེ་ན། སེམས་ཅན་སྲོག་ཆགས་འབྱུང་པོར་གྱུར་པ་ཐམས་ཅད་ལ་ཞེས་བྱ་བ་སྨོས་ཏེ། ཐ་སྙད་བྱེད་

དུ་རུང་བ་ལ་འདིར་སེམས་ཅན་དུ་བཞེད་ལ། གང་དུ་ཐ་སྙད་དུ་རུང་བ་མ་ཡིན་པ་དུད་འགྲོའི་རྒྱུད་དུ་སྐྱེས་པ་ལ་སོགས་པ་གཟུང་ཞིང་། གང་དུ་གཟུགས་མི་སྣང་བར་གནས་པ་གནོད་སྦྱིན་དང་། ཤ་ཟ་ལ་སོགས་པ་དེ་དག་འབྱུང་པོ་ཉིད་དུ་བསྡུས་པ་ཡིན་ནོ། །ཤིན་ཏུ་ཆུང་བ་
ཉིད་ཀྱི་ཕྱིར་སྦུར་མས་ཉེ་བར་མཚོན་དུ་རུང་བའི་སྲོག་ཆགས་ཕྲ་ལ་འཇོམ་པ་དག་ནི་གྲོག་སྦུར་ཡིན་ཏེ། དེ་ཡན་ཆད་གསད་པར་བྱ་བའི་ཕྱིར་ཡིད་ལ་བྱས་པའམ། དེ་ལ་སོགས་པའི་སྲོག་ཆགས་གསོད་པ་ལས་སླར་ལྡོག་པ་ཡིན་ནོ། །དེས་མ་བྱིན་པར་ལེན་པ་ཞེས་བྱ་བ་ལ། །དེ་ཀུན་ནས་ལེན་པའི་ཕྱིར་ལེན་པ་
ཡིན་ལ། །མ་བྱིན་པར་ལེན་པ་ནི་མ་བྱིན་པར་ལེན་པ་སྟེ། མ་བྱིན་པར་རྐུ་བའི་སེམས་ཀྱིས་ལེན་པ་ཞེས་བྱ་བའི་ཐ་ཚིག་གོ། །ཇི་ལྟར་ལྡོག་པར་འགྱུར་ཞེ་ན། བྱིན་པ་ལེན་པ་ཞེས་བྱ་བ་ལ་སོགས་པ་སྨོས་ཏེ། བྱིན་པ་ལེན་པ་ནི་དངོས་པོ་ཀུན་ནས་ལེན་ཅིང་འཛིན་པར་བྱེད་པའི་ཕྱིར་བྱིན་པ་ལེན་པའོ། །བྱིན་པའི་དངོས་པོ་ལ་སེམས་ཀྱི་སྒོ་
ནས་རྟག་ཏུ་མངོན་པར་དགའ་བས་ན་བྱིན་པ་ལ་དགའ་བ་ཡིན་ནོ། །དངོས་པོ་བྱིན་པ་དང་། སྤངས་པ་དང་། བཏང་བ་ལེན་པར་འདོད་པའི་ངང་ཚུལ་ཅན་ནི་བྱིན་པ་དང་སྤངས་པ་དང་། བཏང་བ་ལ་རེ་བར་གྱུར་པ་ཡིན་ཏེ། ལྟོས་པ་མེད་པའི་སེམས་ཀྱིས་བྱིན་པ་གང་ཡིན་པ་དེ་ནི་བྱིན་པ་ཡིན་ཞིང་།
གྲོང་ལ་སོགས་པར་གང་དུ་དུས་དེ་སྲིད་དུ་བྱིན་པ་ནི་སྤངས་པ་ཡིན་ལ། གང་མུ་གེ་ལ་སོགས་པར་བང་མཛོད་ལ་སོགས་པ་དག་ཇི་ལྟར་བདེ་བར་ཡོངས་སུ་ལོངས་སྤྱོད་པའི་ཕྱིར་ཡོངས་སུ་བཏང་བ་ནི་བཏང་བ་ཡིན་ནོ། །མི་རྐུ་བ་ཞེས་བྱ་བ་ནི་འདི་ལ་རྐུ་བའི་སེམས་མེད་པ་ཡིན་ལ། གཞན་
གྱི་རྫས་ཀྱི་ཡུལ་ལ་འདོད་པ་མེད་པའི་ཕྱིར་ཆགས་པ་མེད་པ་ཡིན་ནོ། །བདག་ཉིད་དོར་བ་ནི་མ་བྱིན་པར་ལེན་པའི་ཁ་ན་མ་ཐོ་བ་ལས་སྲུང་བར་བྱེད་པའོ། །དག་པ་ཞེས་བྱ་བ་ནི་མ་བྱིན་པར་ལེན་པའི་དྲི་མ་མེད་པའི་ཕྱིར་རོ། །གཞན་གྱི་ནོར་ལ་ཆགས་པ་མེད་པའི་ཕྱིར་བཏང་བ་ཡིན་
ནོ། །མ་བྱིན་པར་ལེན་པའི་རྐྱེན་གྱི་བར་གྱིས་ཉེས་པ་འབྱུང་བ་མེད་པའི་ཕྱིར་ཁ་ན་མ་ཐོ་བ་མེད་པ་ཡིན་ནོ། །མི་ཚངས་པར་སྤྱོད་པ་སྤངས་ཏེ་ཞེས་བྱ་བ་ལ་ཚངས་པ་ནི་མྱ་ངན་ལས་འདས་པ་ཡིན་ལ། དེའི་རྒྱུ་མཚན་གྱི་སྤྱོད་པ་སྟེ། མྱ་ངན་ལས་འདས་པའི་བྱ་བ་ཅན་ནོ། །ཚངས་པར་

སྤྱོད་པ་མ་ཡིན་པ་ནི་མི་ཚངས་པར་སྤྱོད་པ་སྟེ་འཁོར་བའི་འབྲས་བུའི་བྱ་བ་ཅན་ནོ། །ཇི་ལྟར་སྲོག་གཅོད་པ་ལ་སོགས་པ་དག་ཀྱང་སྤྱིར་ཚངས་པར་སྤྱོད་པ་མ་ཡིན་པ་ཉིད་དུ་ཟིན་ཀྱང་མིང་འདི་ནི་འཁྲིག་པའི་ཡུལ་ལ་གྲགས་པའི་སྒྲ་ཡིན་ཏེ། གྲགས་པ་ནི་ཡུལ་ཕྲོགས་པར་བྱེད་པ་ཡིན་ནོ་ཞེས་བྱ་
བའི་ཚུལ་ཡིན་པའི་ཕྱིར་རོ། །ཇི་ལྟར་ན་མི་ཚངས་པར་སྤྱོད་པ་སྤངས་པ་ཡིན་ཞེ་ན། ཚངས་པར་སྤྱོད་པ་ཞེས་བྱ་བ་ལ་སོགས་པ་སྨོས་ཏེ། ཚངས་པའི་རྒྱུ་མཚན་དུ་སྤྱོད་པར་བྱེད་པའི་ཕྱིར་ཚངས་པར་སྤྱོད་པ་ཡིན་ལ། སེམས་ཀྱིས་ཀྱང་དྲན་པ་མེད་པའི་ཕྱིར་རིང་དུ་སྤྱོད་པའོ། །སྐྱེས་པ་
དང་བུད་མེད་ཀྱི་ཀུན་དུ་སྦྱོར་བའི་དྲི་མ་མེད་པའི་ཕྱིར་དག་པ་ཡིན་ནོ། །སེམས་ཀྱི་སྒོ་ནས་ལྷག་པར་ཆགས་པ་མེད་པའི་ཕྱིར་གཙང་བ་ཡིན་ནོ། །འཁྱུད་པ་དང་། འོ་བྱེད་པ་དང་། ཁྱིམ་གཅིག་ཏུ་འཇུག་པ་ལ་སོགས་པ་མེད་པའི་ཕྱིར་དྲི་ང་བ་མེད་པ་ཡིན་ནོ། །དེ་ཉིད་ཀྱི་ཕྱིར་དེ་རྒྱའི་རྣ་རུ་
ལས་ལྡོག་པ་ཞེས་བྱ་བའོ། །གང་བུད་མེད་ཀྱི་ཡུལ་ལ་ཆགས་པའི་སེམས་འགའ་འཇུག་པ་དེ་ཐམས་ཅད་གྲོང་བའི་ཆོས་ཡིན་ལ། དམ་པ་རྣམས་ཀྱིས་སྨད་པའི་ཕྱིར་སྨད་པ་ཡིན་ཏེ། དེ་དང་བྲལ་བ་དང་། དབེན་པ་དང་། སྤངས་པ་དང་། ལྡོག་པ་ཞེས་བྱ་བའི་བར་དུའོ། །བརྫུན་
དུ་སྨྲ་བ་སྤངས་ནས་ཞེས་བྱ་བ་ལ། གང་ཞིག་བདེན་པ་མངོན་པར་ཤེས་པའི་ཡུལ་ལ་ཡང་དག་པའི་ཡེ་ཤེས་རྣམ་པར་གཞག་པའི་ཚིག་རྗོད་པར་བྱེད་ཅིང་དེ་ལ་སྨྲ་བ་ཡིན་ནོ། །ཇི་ལྟར་ན་བརྫུན་དུ་སྨྲ་བ་ལས་སླར་ལྡོག་པར་འགྱུར་ཞེ་ན། བདེན་པར་སྨྲ་བ་ལ་སོགས་པ་སྨོས་པ་ཡིན་ཏེ།
བདེན་པར་སྨྲ་བར་བྱེད་པ་དང་། དེའི་ངང་ཚུལ་ཅན་ནི་བདེན་པར་སྨྲ་བའོ། །བདེན་པ་ལ་དགའ་བ་ཞེས་བྱ་བ་ནི། སེམས་ཀྱི་སྒོ་ནས་ཀྱང་བདེན་པའི་ཚིག་ལ་མངོན་པར་དགའ་བའོ། །དད་པར་གྱུར་པ་ཞེས་བྱ་བ་ལ། གང་ཟག་འདི་ལ་གཞན་དག་དད་པ་སྐྱེ་བར་འགྱུར་རོ་ཞེས་བྱ་
བའི་དབང་དུ་བྱས་ནས་བདེན་པར་སྨྲ་བ་ཉིད་ཀྱིས་སྐྱེ་བོ་ཐམས་ཅད་དད་པར་འགྱུར་བའི་ཚིག་ཅན་ཡིན་ནོ། །གང་ལ་ཡིད་ཆེས་པ་སྐྱེ་བར་འགྱུར་བ་ནི་ཡིད་ཆེས་པ་ཡིན་ཏེ། བདེན་པར་སྨྲ་བ་ཉིད་ཀྱིས་གཞན་ཡིད་ཆེས་པའི་གནས་ཉིད་ཡིན་པའི་ཕྱིར་རོ། །བརྟན་པ་ཞེས་བྱ་བ་ནི་བདེན་

པའི་ཚིག་སྨྲ་བ་ལ་བརྟན་ཞིང་གཡོ་བ་མེད་པ་ཉིད་ཡིན་ནོ། །དེ་ཉིད་ཀྱི་ཕྱིར་དེ་ནི་གང་སྨྲས་པ་དེ་བྱེད་པར་འགྱུར་རོ་ཞེས་བྱ་བའི་དབང་དུ་བྱས་ནས་འཇིག་རྟེན་ལ་མི་སླུ་བར་བྱེད་པ་ཡིན་ནོ། །དེས་ཕྲ་མ་སྤངས་ནས་ཞེས་བྱ་བ་ལ་སོགས་པ་ལ། གང་ཞིག་དབྱེ་བའི་བསམ་
པས་སེམས་ཉོན་མོངས་པ་ཅན་གྱི་ཚིག་བརྗོད་པ་དེ་ནི་ཕྲ་མ་ཡིན་ལ། ཕྲ་མའི་ལས་སམ་ཕྲ་མའི་དངོས་པོ་ནི་ཕྲ་མ་ཉིད་ཡིན་ནོ། །དེ་དག་ལས་བྱ་བ་ཚོགས་གཞན་དུ་རྣམ་པར་གཞག་པ་དག་ལས་སོ། །དེ་དག་ལ་ཞེས་བྱ་བ་ནི་ཚོགས་གཞན་དུ་རྣམ་པར་དག་པས་ན་དག་པའོ། །སྡུམ་པར་
བྱེད་ཅེས་བྱ་བ་ནི་འབྲེལ་པར་བྱེད་པའི་ངང་ཚུལ་ཅན་ཡིན་ནོ། །རྗེས་སུ་འཆོས་པར་བྱེད་པ་ཞེས་བྱ་བ་ནི་གཅིག་ཏུ་བྱེད་པའི་ངང་ཚུལ་ཅན་ཡིན་ནོ། །འདུས་པ་དག་ལ་དགའ་བ་ཞེས་བྱ་བ་ནི་ལུས་ཀྱི་སྒོ་ནས་སོ། །འདུས་པ་དག་ལ་མགུ་བ་ཞེས་བྱ་བ་ནི་སེམས་ཀྱི་སྒོ་ནས་སོ། །འདུ་བར་བྱེད་པའི་
ཚིག་སྨྲས་ཏེ་ཞེས་བྱ་བ་ནི་རྟག་ཏུ་འདུས་པ་བྱེད་པའི་ཚིག་བརྗོད་པ་ཡིན་ནོ། །དེས་ཚིག་རྩུབ་པོ་སྤངས་ནས་ཞེས་བྱ་བ་ལ། ཚིག་སྙན་པ་མ་ཡིན་པ་ནི་ཚིག་རྩུབ་པོ་ཡིན་ཏེ། དེ་སྤངས་ནས་སོ། །ཇི་ལྟར་སྤངས་ནས་ཤེ་ན། དེ་དག་གདུག་པའི་ཚིག་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ།
ཀུན་ནས་ཟ་བར་བྱེད་པས་ན་གདུག་པ་སྟེ། སྦྲུལ་གྱིས་ཟོས་པ་དང་འདྲ་བར་སྡུག་བསྔལ་སྐྱེད་པར་བྱེད་པའི་ཚིག་གམ། ཤིན་ཏུ་གནོད་པ་ནི་གདུག་པ་ཡིན་ནོ། །རང་བཞིན་གྱིས་དྲག་པ་ཉིད་ཀྱི་ཕྱིར་རྩུབ་པའོ། །གཞན་སྡུག་བསྔལ་སྐྱེད་པ་ཉིད་ཀྱི་ཕྱིར་གཞན་ལ་གནོད་པའོ། །གཞན་ལ་མངོན་
པར་ཞེན་པ་ཞེས་བྱ་བ་ནི་མངོན་པར་འཛིན་པ་བག་འཁུམས་པ་ཡིན་ནོ་ཞེས་བྱ་བའི་དབང་དུ་བྱས་ཏེ། གཞན་བག་འཁུམས་པ་སྐྱེད་པར་བྱེད་པའམ། གཞན་ཞེ་སྡང་སྐྱེད་པར་བྱེད་པ་ཡིན་ནོ། །འདོད་པའི་ཡུལ་ལས་ཤིན་ཏུ་འདས་པ་ཉིད་ཀྱི་ཕྱིར་མི་འདོད་པའོ། །འདོད་པར་བྱ་བ་ཉིད་མ་ཡིན་
པའི་ཕྱིར་མི་དགའ་བའོ། །དགའ་བའི་རྒྱུད་ཉིད་མ་ཡིན་པའི་ཕྱིར་མི་མགུ་བའོ། །ཡིད་ཀྱི་སྐད་ཅིག་མར་ཡང་བསམ་པར་བྱ་བ་མ་ཡིན་པས་ན་ཡིད་དུ་མི་འོང་བའོ། །ཏིང་ངེ་འཛིན་དང་མི་མཐུན་པ་ཉིད་ཀྱི་ཕྱིར་གཡེང་བའོ། །སེམས་འཁྲུག་པར་བྱེད་པ་ཉིད་ཀྱི་ཕྱིར་ཏིང་ངེ་འཛིན་དང་མི་

མཐུན་པའོ། །ཡིད་དུ་འོང་བ་ཉིད་ཡིན་པས་ན་མགུ་བར་བྱེད་པའོ། །རྣ་བར་འོང་བ་ནི་རྣ་བའི་རྣམ་པར་ཤེས་པའི་བདེ་བ་སྐྱེད་པར་བྱེད་པའོ། །ཡིད་དང་འཐད་པ་ཉིད་ཀྱི་ཕྱིར་དང་། རྟག་ཏུ་སྙིང་ལ་འབབ་པ་ཉིད་ཀྱི་ཕྱིར་ཡིད་དུ་འོང་བའོ། །རབ་ཏུ་མགུ་བ་སྐྱེ་བ་དང་རྗེས་སུ་མཐུན་པ་ཉིད་ཀྱི་ཕྱིར་
དགའ་བར་བྱ་བའོ། །གྲོང་ཁྱེར་དུ་བྱུང་བས་ན་གྲོང་ཁྱེར་པ་སྟེ། གྲོང་ལ་བརྟེན་པའི་སྐྱེ་བོ་དམ་པའི་ཞེས་བྱ་བའི་བར་དུའོ། །མཛེས་པ་ལ་གསལ་བ་ཞེས་བྱ་བ་ནི་ཡི་གེ་མཛེས་ཤིང་གསལ་བར་གྱུར་པའོ། །དོན་མཛེས་པ་ཉིད་ཀྱི་ཕྱིར་རྣམ་པར་ཤེས་པར་བྱ་བ་ཡིན་ནོ། །དེ་ཉིད་ཀྱི་
ཕྱིར་མཉན་པར་བྱ་བ་ནི་ཐོས་པ་དང་རྗེས་སུ་མཐུན་པ་ཡིན་ནོ། །དོན་དུ་གཉེར་བའི་སྒོ་ནས་འགའ་ཞིག་ལ་ཡང་གནས་པ་མེད་པའི་ཕྱིར་མི་གནས་པའོ། །སྐྱེ་བོ་ཐམས་ཅད་མངོན་པར་འདོད་པ་ཉིད་ཡིན་པའི་ཕྱིར་མི་འགལ་བ་སྟེ། རྗེས་སུ་མཐུན་པ་ཞེས་བྱ་བའི་བར་དུའོ། །རྣམ་པ་
གང་གི་སྒོ་ནས་ཀྱང་ཉོན་མོངས་པ་དག་གིས་མ་ཟིན་པའི་ཕྱིར་མཐའ་མེད་པའོ། །མི་འདོད་པ་ལ་སོགས་པ་བཟློག་པས་འདོད་པ་ལ་སོགས་པ་དག་ཏུ་འགྱུར་བར་རིག་པར་བྱའོ། །ཏིང་ངེ་འཛིན་དང་རྗེས་སུ་མཐུན་པའམ། བདེན་པ་ཉིད་ཀྱིས་མ་གཡེངས་པའོ། །གང་གི་ཕྱིར་རྣམ་པ་
ཐམས་ཅད་དུ་ཏིང་ངེ་འཛིན་སྐྱེད་པར་བྱེད་པ་དེ་ཉིད་ཀྱི་ཕྱིར་ཏིང་ངེ་འཛིན་དང་མཐུན་པ་ཡིན་ནོ། །དེས་ཚིག་ཀྱལ་པ་སྤངས་ནས་ཞེས་བྱ་བ་ལ་སོགས་པ་ལ། དོན་འབྲེལ་པ་མེད་ཅིང་དོན་སྨད་པ་དུ་མ་འདྲེན་པར་གྱུར་པའི་ཚིག་ནི་ཀྱལ་པ་ཡིན་ལ། དེ་རྗོད་པར་བྱེད་པའི་ཕྱིར་ཚིག་ཀྱལ་པ་སྟེ། དེ་
སྤངས་པ་ཡིན་ནོ། །ཇི་ལྟར་སྤངས་པ་ཡིན་ཞེ་ན། དེ་ཡང་ཞེས་བྱ་བ་ལ་སོགས་པ་སྨོས་ཏེ། སྐབས་དང་ལྡན་པའི་ཚིག་བརྗོད་པའི་ཕྱིར་དུས་སུ་སྨྲ་བ་ཡིན་ནོ། །ཡོད་པའི་དངོས་པོ་བརྗོད་པའི་ཕྱིར་བདེན་པར་སྨྲ་བ་ཡིན་ནོ། །དོན་དང་ལྡན་པའི་ཚིག་བརྗོད་པའི་ཕྱིར་དོན་སྨྲ་བ་ཡིན་ནོ། །དངོས་
པོའི་རང་གི་ངོ་བོ་རྗོད་པར་བྱེད་པའི་ཕྱིར་དེ་ཁོ་ན་ཉིད་སྨྲ་བ་ཡིན་ནོ། །ཆོས་རྗོད་པར་བྱེད་པའི་ཕྱིར་ཆོས་སྨྲ་བ་ཡིན་ནོ། །ཤེས་པས་ཡོངས་སུ་བཅད་པ་སྨྲ་བའི་ཕྱིར་བརྟགས་པ་སྨྲ་བ་ཡིན་ནོ། །གཞན་གྱི་རྒྱུད་ཀྱི་དོན་དཔྱོད་པར་ནུས་པ་རིག་པར་བྱེད་པ་ཡིན་པའི་ཕྱིར་བརྟགས་པ་དང་

ལྡན་པའོ། །ཉན་པ་པོ་སྐྱེ་བོ་མངོན་པར་འདོད་པའི་དུས་སུ་ཚིག་བརྗོད་པའི་ཕྱིར་དུས་སུའོ། །ཡོངས་སུ་བསྡུས་པའི་དོན་འབྲེལ་ཅན་རྗོད་པར་བྱེད་པའི་ཕྱིར་ཅལ་ཅོལ་མ་ཡིན་པའོ། །རྒྱུ་ལས་སྐྱེས་པ་དང་ལྡན་པ་ཉིད་ཀྱི་ཕྱིར་རྒྱུ་དང་བཅས་པ་ཡིན་ནོ། །རིག་པ་
དང་དཔེ་དང་མ་བྲལ་བས་ན། ལུང་དང་བཅས་པའོ། །ཆོས་ལས་མ་གཡོས་པ་ཉིད་ཀྱི་ཕྱིར་ཆོས་དང་ལྡན་པའོ། །དོན་དང་འབྱོར་པ་ཉིད་ཀྱི་ཕྱིར་དོན་དང་ལྡན་པའོ། །ཉོ་ཚོང་སྤངས་ནས་ཞེས་བྱ་བ་ལ་གོས་ལ་སོགས་པ་དག་ལ་བརྐམ་ཞིང་ཆགས་པས་ཡུལ་དང་རྗེས་སུ་མཐུན་པ་དང་།
དུས་དང་རྗེས་སུ་མཐུན་པར་རིན་ཡང་བར་ཉོས་པའི་སྒོ་ནས་ལེན་པའི་ཉོས་པ་ཡིན་ཞིང་། རིན་ཤིན་ཏུ་མང་པོའི་སྒོ་ནས་ཡོངས་སུ་གཏོང་བ་ནི་བཙོངས་པ་ཡིན་ཏེ། དེ་སྤངས་ནས་ཀུན་དུ་སྤྱོད་པའི་དུས་སུ་ལུས་དང་ངག་དང་ཡིད་སླར་ལྡོག་པ་ཡིན་ནོ། །དེས་བྲེ་ལ་སོགས་པའི་སྒྱུ་སྤངས་ནས་
ཞེས་བྱ་བ་ལ་སོགས་པ་ལ་གྲོ་ལ་སོགས་པ་འཇལ་བའི་སྣོད་ནི་འདིར་བྲེ་ཡིན་ལ། གསེར་ལ་སོགས་པ་འཇལ་བའི་ཐབས་སུ་གྱུར་པ་ནི་སྲང་ཡིན་ཞིང་། འཇུ་བའི་རྫས་མར་དང་ཏིལ་མར་ལ་སོགས་པ་འཇལ་བར་བྱེད་པའི་ཐབས་སུ་གྱུར་པ་ནི་འཇལ་བྱེད་ཡིན་ཏེ། བྲེ་ལ་སོགས་པ་
གཞན་སླུ་བར་བྱེད་པ་བྲེ་ལ་སོགས་པའི་སྒྱུ་ཡིན་པ་དེའི་ཕྱིར་སྨོས་པ་ཡིན་ནོ། །དེས་གསུག་དང་ཞེས་བྱ་བ་ལ་སོགས་པ་སྨོས་པ་ལ་གསུག་ནི་ལྐོག་ཏུ་གྱུར་པའི་ཆད་པ་ཡིན་ནོ། །སླུ་བ་ནི་ཐ་སྙད་དུ་གྱུར་པའི་སྒོ་ནས་བསླུས་ནས་ནོར་ལེན་པ་ཡིན་ནོ། །ཆད་པ་ནི་ཚར་བཅད་པ་སྔོན་དུ་སོང་བ་
ཅན་གྱི་ཆད་པ་ལེན་པ་ཡིན་ནོ། །གསུག་ལ་སོགས་པའི་ནོར་ལེན་པ་བདག་གིར་བྱེད་པ་ལས་སླར་ལྡོག་པ་ཡིན་ནོ། །དེས་གསོད་པ་ལ་སོགས་པ་ཞེས་བྱ་བ་ལ་སོགས་པ་ལ་གསོད་པ་ནི་གཞན་གྱི་སྲོག་འཕྲོག་པར་བྱེད་པ་ཡིན་ནོ། །བཅིང་བ་ནི་གདོས་དང་ལྕགས་ལ་སོགས་པའི་གནོད་
པའོ། །གཅད་པ་ནི་ལག་པ་ལ་སོགས་པ་ཡན་ལག་དང་ཉིང་ལག་དག་གོ། །ཕུག་པ་ནི་རྐང་པ་ལ་སོགས་པའི་རུས་པ་དག་གོ། །རྡེག་པ་ནི་ལྕག་ལ་སོགས་པ་དག་གིས་གཞན་གདུང་བ་སྐྱེད་པར་བྱེད་པ་ཡིན་ཏེ། གསོད་པ་ལ་སོགས་པ་དག་ལ་མཆོག་ཏུ་གཞོལ་ཞིང་སྤྲོ་བར་བྱེད་པ་

གང་ཡིན་པ་དེ་སྤངས་པ་ཡིན་ནོ། །སྣང་བ་དང་བཅས་པའི་ཁྱིམ་དུ་ཉལ་བ་སྤངས་ནས་ཞེས་བྱ་བ་ནི་མཚན་མོ་ཁྱིམ་ལ་སོགས་པ་ཉི་མ་དང་ཟླ་བ་མ་ཡིན་པའི་སྣང་བ་དག་དང་ལྡན་པར་ཉལ་བ་གང་ཡིན་པ་དེ་ཡོངས་སུ་སྤངས་པ་ཡིན་ནོ། །དེ་ཡོངས་སུ་དོར་བ་བསྟན་པ་ནི་རྒྱགས་པ་སྐྱེ་བ་ཟློག་པར་བྱེད་
པའི་ཕྱིར་རོ། །དེས་ཞིང་དག་གི་གཞི་ཞེས་བྱ་བ་ལ་སོགས་པ་ལས་འབྲུ་ལ་སོགས་པའི་རྫས་ཀྱི་རིགས་འདི་ལ་རྟེན་པར་བྱེད་ཅེས་བྱ་བའི་དབང་དུ་བྱས་ནས་ཞིང་ཁོ་ན་གཞི་ཡིན་པས་ན་ཞིང་གི་གཞི་ཡིན་ཏེ། འདིས་ནི་ཞིང་ལ་སོགས་པ་ལས་ལྡོག་པར་བསྟན་པ་ཡིན་ནོ། །ཁྱིམ་གྱི་གཞི་
ཡོངས་སུ་སྤངས་པས་ཡུལ་དེ་ལ་ཆགས་པ་སྤངས་པར་བསྟན་པ་ཡིན་ནོ། །ཚོང་དུས་ནི་ཚོང་ཁང་ཡིན་ཏེ། དེ་ཉིད་ཀྱི་གཞི་ཡིན་ཏེ། དེ་ཡོངས་སུ་དོར་བར་བསྟན་པས་ཚོང་པའི་ཐ་སྙད་དུ་བྱེད་པ་ལས་ལྡོག་པར་བསྟན་པ་ཡིན་ནོ། །གླང་པོ་ཆེ་ལ་སོགས་པའི་ཡོངས་སུ་འཛིན་པ་རྣམ་པར་
འཁྲུག་པའི་རྒྱུ་ཉིད་ཡིན་པ་དེའི་ཕྱིར་ཡོངས་སུ་འཛིན་པ་དེ་སྤངས་པར་བསྟན་པ་ཡིན་ནོ། །བྲན་དང་བྲན་མོ་ཞེས་བྱ་བ་ལ་སོགས་པ་ལ། བྲན་རྣམ་པ་ལྔར་གྲགས་པ་དེ་བཞིན་དུ་བྲན་མོ་ཡང་དེ་ཡིན་ནོ། །ལས་བྱེད་པ་ནི་སྐྱེས་བུ་ཞོ་ཤས་འཚོ་བ་ཡིན་ནོ། །སྐྱེས་བུ་རང་གི་བྱེད་པ་ལ་
བརྟེན་ནས་འཚོ་བར་བྱེད་པ་གང་ཡིན་པ་དེ་དག་ནི་གཡོག་དག་ཡིན་ནོ། །བུད་མེད་ཅེས་བྱ་བ་ལ་སོགས་པ་ལ་འདིས་ནི་རྣམ་པ་གང་དང་གང་གིས་ཀྱང་བུད་མེད་ཡོངས་སུ་འཛིན་པ་ཐམས་ཅད་ཀྱིས་ཐམས་ཅད་དུ་བཀག་པ་སྨོས་པ་ཡིན་ནོ། །སྐྱེས་བུ་ཉེ་དུ་འཆང་ཞིང་གསོ་བ་ལ་སོགས་པ་
ཡོངས་སུ་གཟུང་བ་ཡང་བཀག་ཅིང་འདིས་ནི་ཉེ་དུའི་ཁྱེའུ་དང་བུ་མོ་ཡོངས་སུ་འཛིན་པ་ཡང་བཟློག་པ་ཡིན་ནོ། །གསེར་ནི་ས་ལེ་སྦྲམ་ཡིན་ལ། དངུལ་ནི་དངུལ་ཉིད་ཡིན་ཏེ། འདིས་ནི་ཡུལ་དེ་བདག་གིར་བྱེད་ཅིང་ལེན་པ་སྤངས་པ་བསྟན་པ་ཡིན་ལ། འབྲས་དང་། ནས་དང་། གྲོ་ལ་
སོགས་པ་བཙོས་པ་མ་ཡིན་པ་དེ་བྱིན་ལེན་བྱེད་པ་རབ་ཏུ་བྱུང་བའི་ཚུལ་མ་ཡིན་པ་དེ་བས་ན་མི་བྱའོ། །ཟ་གཅིག་པ་ཞེས་བྱ་བ་ལ་སོགས་པ་ལ་གཅིག་ཀྱང་དེ་ཡིན་ལ་ཟ་བ་ཡང་དེ་ཡིན་པས་ན་ཟ་གཅིག་སྟེ། དེ་གང་ལ་ཡོད་པ་དེ་ནི་ཟ་གཅིག་པ་སྟེ། གང་འོར་གཅིག་ཟ་བའོ། །ནུབ་

མོ་ཞེས་བྱ་བ་ནི་ནུབ་མོའི་ཟས་ཀྱི་བྱ་བ་ལས་རྣམ་པར་ལྡོག་པ་ཡིན་ནོ། །འགའ་ཞིག་ཏུ་ཉི་མ་ཕྱེད་ཀྱི་འོག་ཏུ་ཟ་བར་འགྱུར་རོ་ཞེ་ན། དུས་མ་ཡིན་པའི་ཟས་ལས་སླར་ལྡོག་པ་སྨོས་པ་ཡིན་ནོ། །དུས་སུ་བསོད་སྙོམས་ལ་སོགས་པའི་དོན་དུ་རྒྱུ་བའི་ཕྱིར་དུས་སུ་སྤྱོད་པ་སྟེ།
སྔ་དྲོའི་དུས་སུ་སྤྱོད་ཡུལ་ལ་སྤྱོད་པར་བྱེད་པ་ཡིན་ནོ། །དེ་ཉིད་ཀྱི་ཕྱིར་དུས་སུ་སྤྱོད་པའི་སྦྱོར་བ་དང་ལྡན་པ་ཡིན་ཏེ། གང་གི་ཕྱིར་དུས་མ་ཡིན་པར་རྣམ་པ་གང་གིས་ཀྱང་སྤྱོད་པར་མི་བྱེད་པའོ། །ཡང་ན་དུས་སུ་སྤྱོད་པའི་སྦྱོར་བ་སྟེ། རིགས་པ་དང་ཚུལ་ཡིན་ལ། དེ་དང་ལྡན་པ་ནི་རྗེས་སུ་སོང་
བ་ཡིན་ཏེ། དུས་སུ་སྦྱོང་དུ་ཟིན་ཀྱང་ཚུལ་མ་ཡིན་པས་མི་སྤྱོད་དེ་འོན་ཀྱང་ཇི་ལྟར་སོ་སོར་ཐར་པའི་མདོ་ལས་བཅོམ་ལྡན་འདས་ཀྱིས་རྗེས་སུ་གནང་བ་དེ་བཞིན་དུ་སྤྱོད་པར་བྱེད་དོ། །ལུས་ནི་ལུས་པོ་ཡིན་ནོ། །བགོ་བ་ནི་ལྷགས་པ་ལ་སོགས་པ་རྣམ་པར་འཚེ་བ་ལས་སྲུང་བར་བྱེད་པ་ཡིན་པས་
ན་ལུས་ལ་བགོ་བའི་ཆོས་གོས་མ་རྙེད་པ་རྙེད་པ་དེས་མགུ་ཞིང་། ལྷག་པ་དང་གྱ་ནོམ་པ་ལ་སོགས་པ་མངོན་པར་འདོད་པ་མེད་པའི་ཕྱིར་རབ་ཏུ་མགུ་བ་ཡིན་ནོ། །ལྟོ་འགྲངས་པ་ཞེས་བྱ་བ་ནི་ལྟོ་ཡོངས་སུ་འགྲངས་པར་བྱེད་པའི་བསོད་སྙོམས་འགྲངས་པར་བྱེད་པ་ཙམ་གྱིས་བསོད་སྙོམས་
ལ་རྒྱུ་བར་བྱེད་པ་དེས་མགུ་བ་ཡིན་ནོ། །ལྷུང་བཟེད་དང་བཅས། ཆོས་གོས་དང་བཅས་ཏེ་ཞེས་བྱ་བ་ནི་འདོད་པ་ཆུང་བ་ཉིད་ཀྱིས་སྣོད་གཞན་མེད་པའི་ཕྱིར་དང་། ལྷུང་བཟེད་དང་ཆོས་གོས་ཀྱིས་ལུས་གནས་པ་སྒྲུབ་པ་ཡིན་པའི་ཕྱིར་རོ། །བྱ་གཤོག་པ་ཅན་ཞེས་བྱ་བ་ནི་བྱ་གཤོག་པ་སྐྱེས་
པར་གྱུར་པའོ། །གཤོག་པ་མ་གཏོགས་པའི་འདབ་མ་ནི་རྣུས་བུའི་སྒྲས་བརྗོད་པ་ཡིན་ནོ། །དགེ་སྦྱོང་དང་བྲམ་ཟེ་ཁ་ཅིག་ཅེས་བྱ་བ་ལ་སོགས་པ་ལ་ཕྱི་རོལ་གྱི་རབ་ཏུ་བྱུང་བ་ལས་རིགས་གཞན་ཡིན་པ་ལ་འདིར་དགེ་སྦྱོང་གི་སྒྲ་དང་། བྲམ་ཟེའི་རིགས་ལས་ཁྱིམ་གྱི་གནས་ཡོངས་སུ་བོར་
བ་ལ་བྲམ་ཟེའི་སྒྲས་བརྗོད་པ་ཡིན་ནོ། །ཁ་ཅིག་ཅེས་བྱ་བ་ནི་འགའ་ཞིག་ཡིན་གྱི་ཐམས་ཅད་ཁོ་ན་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །ཡོན་ཏན་ལ་སེམས་པ་སྔོན་དུ་སོང་བ་ཅན་གྱི་སེམས་དང་བ་ནི་དད་པ་ཡིན་ཏེ། དེས་བཟའ་བ་ལ་སོགས་པ་བྱིན་པ་གང་ཡིན་པ་དེ་ནི་དང་བས་བྱིན་པ་

དག་ཡིན་ནོ། །ས་བོན་གྱི་ཚོགས་ནི་ས་བོན་གྱི་ཚོགས་ཡིན་ལ། འབྱུང་པོའི་གནས་ནི་འབྱུང་པོ་དག་གི་གཞི་ཡིན་ཏེ་སྐྱེ་བ་ལ་སོགས་པའོ། །ཀུན་ནས་རྩོམ་པ་ནི་ས་བོན་འདེབས་པ་ལ་སོགས་པའི་བྱ་བས་རྣམ་པར་དཀྲུགས་པར་གྱུར་པའོ། །ཀུན་ནས་རྩོམ་པ་ལ་རྗེས་སུ་བརྩོན་པ་ནི་དེ་ལ་
གཞོལ་བ་དང་། དེ་ལ་སྦྱོར་ཞིང་འབྲེལ་པར་གྱུར་པའོ། །རྩ་བའི་ས་བོན་ནི་སྒེའུ་གཤེར་དང་ཡུང་བ་ལ་སོགས་པའོ། །སྡོང་བུའི་ས་བོན་ནི་སེའུ་དང་ལྕང་མ་ལ་སོགས་པའོ། །རྩེ་མོའི་ས་བོན་ནི་བུ་རམ་ཤིང་ལ་སོགས་པའོ། །བཀས་པའི་ས་བོན་ནི་འབྲུམ་ཤ་ལ་སོགས་པའོ། །ས་བོན་
གྱི་ས་བོན་ནི་གྲོ་ལ་སོགས་པའོ། །རྩེ་མོའི་སྒྲས་ནི་ཚིགས་བསྟན་པ་ཡིན་ལ། འབྲས་བུའི་སྣོད་བཀས་པ་ལས་ས་བོན་བྱུང་བ་ནི་བཀས་པའི་ས་བོན་ཡིན་ནོ། །བཟའ་བ་ལ་སོགས་པ་དག་བསགས་པའི་སྒོ་ནས་རྣམ་པར་གཞག་པ་ནི་སྩོགས་པ་ཡིན་ལ་དེ་ལ་རྩོམ་པའི་བྱ་བས་རྣམ་
པར་དཀྲུགས་པ་སྟེ། དེ་ལ་བརྩོན་ཞིང་དེ་དང་ལྡན་པས་གནས་པ་ཡིན་ནོ། །མལ་སྟན་མཐོན་པོ་ནི་པུས་མོའི་ཚད་ལས་མཐོ་བ་ཡིན་ལ། མལ་སྟན་ཆེན་པོ་ནི་རིན་ཐང་ཆེ་ཞིང་རིན་པོ་ཆེས་སྤྲས་པ་ཡིན་ནོ། །ཁྲིའུ་སྨོས་པས་ཁྲིའི་རིགས་ཐམས་ཅད་གཟུང་ངོ་། །ཁྲི་ཆེན་པོ་ནི་ཁྲི་
ཡིན་ལ་ཐི་གུས་ལྷས་པ་ནི་ཁྲི་ལྷས་མ་ཡིན་ནོ། །གང་ཁྲི་ནང་ཚངས་ཅན་གྱི་འོག་ཏུ་བཏིང་ཞིང་བཅུག་པ་དེ་ནི་གོ་ནི་ག་ཞེས་བྱའོ། །སྟན་ནང་ཚངས་ཅན་ནི་རབ་ཏུ་གྲགས་པ་ཡིན་ནོ། །བལ་གོས་ཆེན་པོ་ནི་གོས་ཀྱི་བྱེ་བྲག་ཡིན་ནོ། །གླང་པོ་ཆེའི་ཐབས་སྟན་ནི་གླང་པོ་ཆེའི་སྟེང་ནས་གཡོགས་
པའོ། །རྟའི་སྟན་ནི་སྒ་ལ་བཀབ་པ་རིན་ཐང་ཆེ་བ་གཞན་གོས་ཀྱི་ཁྱད་པར་དག་ཡིན་ནོ། །སྤུ་ཕྱོགས་གཅིག་པ་ནི་མེ་ཏོག་ཟས་ལ་སོགས་པའོ། །གཉི་གའི་ཕྱོགས་ལ་སྤུ་ཡོད་པ་ནི་བེའུ་ཕྲུག་ལ་སོགས་པའོ། །སྤུ་གྱེན་དུ་ལྟ་བ་ནི་མཐའ་ལོགས་ན་སྤུ་ཡོད་པའོ། །གོས་སྤུ་མཐུག་པ་
ནི་གོས་ཀྱི་བྱེ་བྲག་སྤུ་དང་བཅས་པ་ཉིད་ཡིན་ནོ། །ཡུལ་ཀ་ལིང་ཀ་ལས་བྱུང་བའི་གོས་ནི་ཀ་ལིང་ཀའི་གོས་ཡིན་ལ། དེ་ཉིད་གདིང་བ་ཡིན་ནོ། །མགོ་བོའི་མཐའ་དང་རྐང་པའི་མཐར་སྔས་དམར་ལ་ཆེ་བ་དེ་ནི་སྔས་ཡིན་ནོ། །རྒྱན་ནི་ཁྲུས་ལ་སོགས་པས་ལུས་མཛེས་པ་སྒྲུབ་པར་བྱེད་པ་

ཡིན་ནོ། །ལྷབ་ལྷུབ་ནི་ཕྱི་རོལ་གྱི་ཆ་སྤྱད་ཕྲེང་བ་དང་དྲི་དང་བྱུག་པ་ལ་སོགས་པ་ལུས་མཛེས་པ་སྒྲུབ་པར་བྱེད་པ་ཡིན་ནོ། །ཇི་ལྟར་རྒྱན་སྒྲུབ་པ་ཡིན་ཞེ་ན། འདི་ལྟ་སྟེ་ཞེས་བྱ་བ་ལ་སོགས་པ་སྨོས་ཏེ། བསྐུ་བ་ནི་ཏིལ་མར་དྲི་མ་ཅན་ལ་སོགས་པས་ལུས་ཀྱི་དྲི་མ་བསལ་
བར་བྱ་བའི་ཕྱིར་བསྐུ་མཉེ་བྱེད་པའོ། །ཀུན་དུ་བསྐུ་བ་ནི་དྲིའི་རྫས་ཀྱིས་ཀུན་ནས་བསྐུ་བའོ། །ཁ་དོག་གི་སྒྲས་ལུས་ཀྱི་ཁ་དོག་མཛེས་པ་བསྒྲུབ་པའི་དོན་དུ་དྲི་བཟང་པོའི་ཚོན་གྱིས་ལུས་ལ་བྱུགས་པ་བརྗོད་པ་ཡིན་ནོ། །སེན་མོ་བདར་བ་ནི་སེན་མོ་མཛེས་པ་སྒྲུབ་པར་བྱེད་པའོ། །སོ་བདར་བ་ནི་
སོ་མཛེས་པ་སྒྲུབ་པར་བྱེད་པའོ། །ཁའི་དྲི་ནི་ཁ་དྲི་བཟང་པོ་ཅན་དུ་བྱ་བའི་ཆེད་ཀྱི་དྲི་བཟང་པོའི་ཕྱེ་མའོ། །གདོང་གི་རྒྱན་ནི་ཁ་གདོང་མཛེས་པ་སྒྲུབ་པར་བྱེད་པའོ། །གདོང་གི་མེ་ལོང་ནི་གདོང་བལྟ་བའི་ཕྱིར་མེ་ལོང་འཆང་བར་བྱེད་པའོ། །ལག་པའི་གདུ་བུ་ཞེས་བྱ་བ་ནི་མཛེས་པ་སྒྲུབ་
པར་བྱེད་པའི་དོན་དུ་ལག་པ་གཉིས་ལ་གདུ་བུ་རྒྱན་ཅན་དང་། སོར་གདུབ་ལ་སོགས་པ་རྒྱན་འདོགས་པར་བྱེད་པའོ། །སྤྱི་བོ་བཅིངས་པ་ཞེས་བྱ་བ་ནི་གཙུག་ཕུད་ལ་རིན་པོ་ཆེ་ལ་སོགས་པའི་རྒྱན་འདོགས་པར་བྱེད་པའོ། །གདུགས་ཡུ་བ་སྦུ་གུ་ཅན་ཞེས་བྱ་བ་ནི་གདུགས་ཀྱི་ཡུ་བ་ནང་ཤིང་
ལ་ཕྱི་རོལ་གསེར་ལས་བྱས་པའོ། །རལ་གྱི་ཞེས་བྱ་བ་ནི་རལ་གྱི་ཆང་གཟུངས་ཀྱི་ཕྱོགས་རིན་པོ་ཆེས་སྤྲས་པའམ། ཤུབས་སྤྲས་པ་ཡིན་ནོ། །ནོར་བུའི་རྔ་ཡབ་ནི་རྔ་ཡབ་ཀྱི་ཡུ་བ་རིན་པོ་ཆེས་སྤྲས་པ་ཡིན་ནོ། །ལྷམ་རི་མོ་ཅན་ནི་ལྷམ་རིན་པོ་ཆེས་སྤྲས་པར་གྱུར་པའོ། །མ་བགོས་
པ་ནི་ཡོངས་སུ་ལོངས་མ་སྤྱད་པའོ། །སར་པ་ནི་ཐབས་ལས་འཕྲལ་དུ་བཏོན་པའོ། །གླང་པོ་ཆེ་འཐབ་པ་ཞེས་བྱ་བ་ལ་སོགས་པ་ལ། གང་གི་ཚེ་ཁྱིམ་བྱ་དང་། སྲེག་པ་དང་། འུར་བ་དག་ཚོགས་ནས་འཐབ་པར་བྱེད་པ་དེའི་ཚེ། ཁྱིམ་བྱ་དང་། སྲེག་པ་དང་། འུར་བ་དག་འཐབ་པ་
ཡིན་ནོ། །ཡ་ཏོག་སྨྱིག་མ་ཅན་ནི་སྨྱིག་མ་ལ་སོགས་པ་ལ་བྱ་བར་ཏ་ཀ་དག་སྐྱོན་པར་བྱེད་པའོ། །གྲོང་ཁྱེར་མཛེས་པར་བྱས་པ་ཞེས་བྱ་བ་ནི་གར་མཁན་གྱི་ཚོགས་དག་གིས་སོ། །བཞད་གད་ཀྱི་ཕྱིར་གཞན་གྱི་ཕྲག་པ་ལ་འཛེགས་པར་བྱེད་པ་ནི་ཕྲག་པ་ནས་མཆོང་བའོ། །རྒྱལ་མཚན་

གྱི་མཆོག་ཅེས་བྱ་བ་ནི་དཔུང་གི་ཚོགས་འགྲོ་བའི་སེང་གེའི་རྒྱལ་མཚན་ལ་སོགས་པའོ། །སྟོབས་ཀྱི་མཆོག་ནི་སྟོབས་ཀྱི་ཚོགས་ཀྱི་མཆོག་ཏུ་གྱུར་པའོ། །དཔུང་གི་ཚོགས་ནི་དཔུང་དཀོད་པའི་ཁྱད་པར་ཡིན་ཏེ། །འབྲུའི་ཕུར་མ་ལ་སོགས་པ་ལྟ་བུའོ། །ཚོམས་ནི་དཔུང་གི་ཆ་ཡིན་ཏེ། གླང་
པོ་ཆེ་ལ་སོགས་པ་བཅུ་ལ་སོགས་པའི་ཚོམས་ཡིན་ནོ། །སྐྱེ་བོ་ཆེན་པོའི་ཚོགས་པར་གྱུར་པ་ནི་འདུས་པ་ཆེན་པོ་ཡིན་ཏེ། གྱད་འཐབ་པ་དང་། ལྟད་མོའི་གནས་ལ་སོགས་པའོ། །གླང་པོ་ཆེའི་སྒྲ་ཞེས་བྱ་བ་ལ་སོགས་པ་ལ། བུད་པའི་སྒྲ་ནི་བརྡུང་བར་བྱ་བ་མི་བཟད་པའི་ཚོགས་བརྡུངས་པའོ། །
སིལ་སྙན་ཤིན་ཏུ་ཡིད་དུ་འོང་བའི་བྱེ་བྲག་ནི་ཤམ་མྱ་ཡིན་ནོ། །སོར་མོ་གཉིས་ཀྱི་སྦྱོར་བ་ལས་བྱུང་བ་ནི་ཡིད་དང་རྗེས་སུ་མཐུན་པའི་སྒྲ་ཡིན་ནོ། །རྫ་རྔའི་སྒྲ་ནི་རྫ་མའི་ཁ་པགས་པས་གཡོགས་པའམ། རོལ་ཆའི་བྱེ་བྲག་གཞན་ཡིན་ནོ། །སྙན་དངགས་ནི་ཚིགས་སུ་བཅད་པ་སྦྱོར་བའོ། །ཡི་གེ་
མཛེས་པ་ཉིད་ཀྱི་ཕྱིར་ཡི་གེ་སྣ་ཚོགས་པའོ། །ཚིག་གི་གོ་རིམས་མཛེས་པ་ཉིད་ཀྱི་ཕྱིར་ཚིག་གི་འབྲུ་སྣ་ཚོགས་པ་ཉིད་དོ། །འཇིག་རྟེན་གྱི་དོན་དང་འབྲེལ་པ་ཉིད་ཀྱི་ཕྱིར་འཇིག་རྟེན་ལ་རག་ལུས་པ་དང་ལྡན་པའོ། །གཏམ་ནི་འཇིག་རྟེན་པའི་གཏམ་རྒྱུད་ཡིན་ནོ། །ཨུག་ཤུད་ཅེས་བྱ་བ་ལ་
སོགས་པ་ལ་རྒྱན་རྩེ་བའི་ཐབས་སུ་གྱུར་པ། ཆ་བཞི་པ་དང་། ཆ་དྲུག་པ་ན་ཨུག་ཤུད་ཅེས་བྱའོ། །ན་ཡ་ནི་ཡན་ལག་བཞི་དང་རྩེ་བའི་ཐབས་སུ་གྱུར་པའོ། །རྒྱན་ནི་ཐ་མལ་པའི་རྒྱན་རྩེ་བའི་ཐབས་སུ་གྱུར་པའོ། །གནས་བརྒྱད་དང་གནས་བཅུ་ཞེས་བྱ་བ་དེ་ནི་རྒྱན་གྱི་རྟེན་གྱི་འགྱུར་བ་
བརྗོད་པ་ཡིན་ནོ། །དྲང་བའི་གནས་ལ་སོགས་པ་དག་ནི་རྒྱན་ལ་གོམས་པ་དག་ལས་ངེས་པར་བྱ་བ་ཡིན་ནོ། །རྒྱལ་པོའི་གཏམ་ཞེས་བྱ་བ་ལ་སོགས་པ་ལ། རྒྱལ་པོ་དང་སོ་སོར་འབྲེལ་པའི་གཏམ་ནི་རྒྱལ་པོའི་གཏམ་ལ་སོགས་པ་ཡིན་ནོ། །རྩོད་པ་ཞེས་བྱ་བ་ལ་སོགས་པ་ལ་ཞེ་སྡང་ལ་
སོགས་པས་དཀྲུགས་པའི་སེམས་ཀྱིས་ཕན་ཚུན་དུ་སྨྲ་བ་དང་ཕྱིར་སྨྲ་བ་ནི་རྩོད་པ་ཡིན་ནོ། །ཇི་ལྟར་ཞེ་ན། འདི་ལྟ་སྟེ་ཞེས་བྱ་བ་ལ་སོགས་པ་སྨོས་ཏེ། ཕྱི་རོལ་གྱི་བྱ་བ་མ་ཡིན་པ་ལས་ལྡོག་པ་ནི་ཆོས་ཡིན་ལ། ཡང་དག་པར་ལེན་པ་སྔོན་དུ་སོང་བའི་བྱ་བ་ལ་འཇུག་པ་ནི་འདུལ་བ་ཡིན་ནོ། །

བདག་ལ་རིགས་པ་ཞེས་བྱ་བ་ནི་མངོན་སུམ་ལ་སོགས་པ་དང་མི་འགལ་བ་ཡིན་ནོ། །ཁྱོད་ལ་མི་རིགས་སོ་ཞེས་བྱ་བ་མངོན་སུམ་ལ་སོགས་པ་དང་འགལ་བ་ཡིན་ནོ། །ཕན་པ་དང་བཅས་པ་ཞེས་བྱ་བ་ནི་སྔ་ཕྱི་མི་འགལ་བ་དང་འབྲེལ་པ་ཡིན་ནོ། །དེ་ལས་བཟློག་པའི་
ཕྱིར་ཕན་པ་དང་བཅས་པ་མ་ཡིན་པའོ། །ཤིན་ཏུ་མྱུར་བ་ཞེས་བྱ་བ་ནི་ཤིན་ཏུ་གྲགས་པའོ། །མཆོག་ཏུ་སྨྲ་བ་ཞེས་བྱ་བ་ནི་དོན་གྱི་དེ་ཁོ་ན་རྗོད་པར་བྱེད་པའམ། ཤིན་ཏུ་མྱུར་དུ་སྨྲ་བའི་སྒོ་ནས་དོན་གསལ་བ་ཉིད་ཀྱི་ཕྱིར་མཆོག་ཏུ་སྨྲ་བའོ། །རྩོད་པའི་ཕྱིར་ཞེས་བྱ་བ་ནི་རྩོད་པའི་རྒྱུ་མཚན་ཡིན་ལ།
བསྐྱེད་པ་ནི་རབ་ཏུ་འཇུག་པ་ཡིན་ནོ། །རྩོད་པ་ལས་རྣམ་པར་ཐར་པའི་ཕྱིར་ནི་རྩོད་པ་ཡོངས་སུ་སྤོང་བའི་ཕྱིར་རོ། །རྩོད་པ་ཞི་བར་བྱའོ་ཞེས་བྱ་བ་ལ། རྩོད་པ་ཉེ་བར་ཞི་བ་ནི་རྩོད་པའི་ལེན་སྦྱིན་པའི་སྒོ་ནས་རྩོད་པ་ཉེ་བར་ཞི་བར་བྱེད་པའོ། །ཚར་གཅད་པར་བགྱིའོ་ཞེས་བྱ་བ་ནི་ཕམ་པར་བྱ་བའོ། །ཕོ་
ཉར་འགྲོ་བ་ཞེས་བྱ་བ་ལ་སོགས་པ་ལ། འདི་ལས་དང་པོ་བླངས་ནས་དེ་ལ་སྐྱེལ་བར་བྱེད་པ་དང་། དེ་ལས་བླངས་ནས་འདིར་ལེན་པར་བྱེད་པའི་དོན་དུ་གཉེར་བའི་མངག་གཞུག་གང་ཡིན་པ་དེ་ནི་འདིར་ཕོ་ཉ་ཡིན་པར་རིག་པར་བྱའོ། །གང་དག་མི་འདོད་དུ་ཟིན་ཀྱང་མངགས་པ་དེ་ནི་མངག་གཞུག་
པ་ཡིན་ནོ། །ཕོ་ཉར་འགྲོ་བ་དེ་ཉིད་ཀྱི་རྒྱུ་མཚན་གྱིས་འཚོ་བར་བྱེད་པ་ནི་ལོག་པའི་ཡུལ་ལ་ཡོངས་སུ་ལོངས་སྤྱོད་པའི་ཕྱིར་ལོག་པའི་འཚོ་བ་ཡིན་ཏེ། དེས་འཚོ་བར་བྱེད་ཅིང་སྒྲུབ་པར་བྱེད་པའོ། །དེ་གང་གི་ཕོ་ཉར་འགྲོ་བ་ཡིན་ཞེ་ན། རྒྱལ་པོ་དང་ཞེས་བྱ་བ་ལ་སོགས་པ་སྨོས་ཏེ། རྒྱལ་
པོ་ནི་དབང་བསྐུར་བ་ཐོབ་པ་ཡིན་ཏེ། རྒྱལ་ཚབ་ཏུ་དབང་བསྐུར་བ་ནི་བློན་པོ་ཡིན་ནོ། །གྲོང་འདབ་ཀྱི་མི་ནི་གྲོང་འདབ་ཀྱི་གཙོ་བོར་གྱུར་པའོ། །ལྗོངས་ཀྱི་མི་ནི་ལྗོངས་ཀྱི་གཙོ་བོར་གྱུར་པའོ། །ནོར་ཅན་ནི་མཁར་གྱི་དབང་ཕྱུག་དག་ཡིན་ནོ། །ཚོང་དཔོན་ནི་ཚོང་བདག་གི་གཙོ་བོར་གྱུར་པའོ། །
དེད་དཔོན་ནི་གང་དག་འདྲེན་པར་བྱེད་པའི་སྒོ་ནས་དོན་མཐུན་དག་འདོན་པར་བྱེད་པའོ། །ཚུལ་འཆོས་པ་ཞེས་བྱ་བ་ལ་སོགས་པ་ལ། ཚུལ་འཆོས་པ་ནི་རྣམ་པ་གསུམ་སྟེ། རྙེད་པ་དང་བཀུར་སྟི་འདོད་པས་ཕ་རོལ་ལ་ཡོན་ཏན་སྲིད་པའི་བསམ་པས་གཞན་ལ་སྤྱོད་ལམ་སྟོན་པར་བྱེད་པ་དང་། དབེན་

པར་བྱེད་པའི་ཕྱོགས་སུ་གནས་པ་དང་། སན་ནི་ཁ་ཡང་དག་པར་སྟོན་པའོ། །ཁ་གསག་ནི་རྣམ་པ་གསུམ་སྟེ། རྙེད་པ་དང་བཀུར་སྟིའི་བསམ་པ་ཅན་གྱིས་སྙན་པར་སྨྲ་བ་དང་། བདག་གི་ཡོན་ཏན་བརྗོད་པ་དང་། ཆོས་སྨྲ་བའོ། །གཞོགས་སློང་ནི་རྣམ་པ་གསུམ་སྟེ། རྙེད་པའི་བསམ་པས་
ལུས་ཀྱི་གནོད་པའི་གཞི་ཡང་དག་པར་སྟོན་པ་དང་། མངོན་པར་འདོད་པའི་དངོས་པོ་ཚིག་གིས་མངགས་པ་དང་། ཕྱི་རོལ་གྱི་རྒྱུ་མཚན་ལུང་སྟོན་པའོ། །རྙེད་པའི་བསམ་པ་ཅན་གྱིས་སེར་སྣ་ཅན་ལ་སོགས་པ་ལ་གཏོང་བ་ལ་རྒྱ་ཆེར་བསྔགས་པ་བྱེད་པ་ནི་ཐོབ་ཀྱིས་འཇལ་བ་ཡིན་ནོ། །
གཞན་ལས་རྙེད་པའི་རྙེད་པ་གང་ཡིན་པ་དེ་རྙེད་པ་གཞན་གྱི་དོན་དུ་སྦྱིན་པར་བྱེད་པའམ། ཟང་ཟིང་ལ་སོགས་པ་རྙེད་པའི་དོན་དུ་སྟོབས་པར་བྱེད་ཅིང་། ཇི་ལྟར་ན་རྙེད་པ་རྙེད་པར་འགྱུར་ཞེས་རྙེད་པས་རྙེད་པ་བསྒྲུབ་པར་འདོད་པ་ཡིན་ནོ། །རིག་པ་ངན་པ་ཞེས་བྱ་བ་ལ་སོགས་པ་ལ་སྐྱེ་བ་འདིའི་འབྲས་
བུ་འཇིག་རྟེན་པའི་བཟོའི་བྱེ་བྲག་ནི་མཐོ་རིས་དང་ཐར་པའི་འབྲས་བུ་སྒྲུབ་པར་བྱེད་པ་མ་ཡིན་པས་གཙོ་བོ་མ་ཡིན་པ་ཉིད་ཀྱི་ཕྱིར་དང་། དེ་བཞིན་གཤེགས་པའི་བསྟན་པ་ལས་ཕྱི་རོལ་དུ་གྱུར་པ་ཉིད་ཀྱི་ཕྱིར་རིག་པ་ངན་པ་ཡིན་ནོ། །ལོག་པའི་འཚོ་བ་དེ་ཉིད་ལོག་པའི་ལས་ལ་བརྟེན་པའི་སྒོ་ནས་
འཚོ་བར་བྱེད་པས་ན་ལོག་པས་འཚོ་བ་ཡིན་ནོ། །ཇི་ལྟར་ཞེ་ན། ལྟས་ངན་དང་ཞེས་བྱ་བ་ལ་སོགས་པ་སྨོས་ཏེ། འཕྲལ་དུས་གས་པ་ལས་གང་བྱུང་ཞིང་སྐྱེ་བ་ནི་ལྟས་ངན་ཡིན་ཏེ། ལྟས་ངན་དེའི་འབྲས་བུ་གང་ཡིན་པ་དེ་ལུང་སྟོན་པར་བྱེད་ཅིང་ལུང་བསྟན་པ་དེས་ནོར་གྱི་ཚོགས་གང་
རྙེད་པ་དེས་འཚོ་བར་བྱེད་པ་ཡིན་ནོ། །རྨ་ཞེས་བྱ་བ་ནི་རྨ་ཅུང་ཞིག་སྐྱེས་པ་ནི་དོན་སྒྲུབ་པར་བྱེད་པ་ཡིན་ལ། ཁ་ཅིག་ནི་དོན་མ་ཡིན་པ་སྐྱེད་པར་བྱེད་པ་ཡིན་ནོ་ཞེས་རྨའི་མཚན་ཉིད་ལུང་བསྟན་པ་ལ་མཁས་པར་གྱུར་པའོ། །རྨི་ལམ་གྱི་མཚན་ཉིད་དང་། མེས་ཚིག་པ་དང་། ཆུས་
རེག་པ་ལས་འཕྲལ་དུ་གོས་སམ་ལུས་ལ་ཆུའི་ཐིགས་པ་ལྷུང་བ་ནི་ཆུས་རེག་པ་ཞེས་བྱ་བ་དང་། བྱི་བས་ཟོས་པའི་འབྲས་བུ་ལུང་སྟོན་པ་ལ་མཁས་པ་དེས་ཀྱང་འཚོ་བར་བྱེད་པ་ཡིན་ནོ། །གདོན་བབས་ནི་ཞུགས་པའོ། །དབྱངས་རྟོགས་པ་ཞེས་བྱ་བ་ལ། དབྱངས་སོ་སོ་ཐ་དད་

པའི་འགྱུར་བའི་འབྲས་བུ་ལུང་བསྟན་པ་ལ་མཁས་པའོ། །འབྱུང་པོ་ཐམས་ཅད་ཀྱི་སྐད་ཅེས་བྱ་བ་ལ། འབྱུང་པོ་ཐམས་ཅད་ཀྱི་སྐད་ཡོངས་སུ་ཤེས་པའི་ནུས་པ་རྙེད་པར་བྱེད་པའི་བསྟན་བཅོས་ཡོད་ལ། བསྟན་བཅོས་དེ་ལ་མངོན་པར་གོམས་པ་ལ་བྱའི་སྐད་ཀྱི་
དོན་རྣམ་པར་འབྲེལ་པ་ལ་ཡང་མཁས་པར་འགྱུར་རོ། །ཡན་ལག་རིག་པ་ནི་གང་གིས་ལུས་ཀྱི་མཚན་ཉིད་ཤེས་པའོ། །གོས་རིག་པ་ནི་གང་གིས་ཡོན་ཏན་དང་ལྡན་པ་དང་ཡོན་ཏན་ཡོད་པ་མ་ཡིན་ནོ་ཞེས་གོས་ཀྱི་མཚན་ཉིད་ཤེས་པའོ། །ནེ་ཙོ་རིག་པ་ནི་གང་གིས་ནེ་ཙོའི་མཚན་ཉིད་ཤེས་
པའོ། །དགོས་པའི་དོན་དུ་འགྲོ་བ་ལ་བསྔགས་པའི་མཚན་ཉིད་འབྱུང་བར་འགྱུར་བའི་ཤིས་པ་དེའི་མཚན་ཉིད་གང་གིས་ཤེས་པ་དེ་ནི་ཤེས་པའི་རིག་པའམ། །ནེ་ཙོ་མ་གཏོགས་པ་བྱ་གཞན་གྱི་མཚན་ཉིད་ལ་མཁས་པར་གྱུར་པའོ། །མཐེ་བོའི་རིག་པ་ནི་གང་གིས་མཐེ་བོ་ལ་འཇུག་པ་ལ་
སོགས་པ་བྱེད་པ་ཡིན་ནོ། །ཡུད་ཙམ་དག་ལ་རབ་ཏུ་སྦྱོར་བ་ཞེས་བྱ་བ་ལ་སོགས་པ་ལ། དུས་འདི་ནི་བཟང་ལ། འདི་ནི་བཟང་པོ་མ་ཡིན་པས་ཡུད་ཙམ་འདི་ལ་ལས་འདི་བྱའོ་ཞེས་བྱ་བ་ལ་སོགས་པ་ལྟ་བུའོ། །སྐར་མ་དག་ཤར་བ་ནི་སྐར་མ་བཟང་པོ་བྱུང་བ་ཡིན་ཏེ། དོན་དེ་ནི་རྒྱུ་སྐར་འགྲོ་བ་དང་
འོང་བ་ལ་མཁས་པ་དང་། བྱ་བ་རྩོམ་པའི་རྒྱུ་སྐར་གྱི་མིང་ལ་མཁས་པ་ཞེས་བྱ་བ་འདི་ཡིན་ནོ། །རོ་བརྟག་པ་ལ་ཞེས་བྱ་བ་ནི་མི་ཤི་བའི་ལུས་མ་སྣད་པ་ནི་རོའི་སྒྲས་བརྗོད་དེ། དེའི་བརྟག་པ་ནི་རོ་ལངས་ལ་སོགས་པའི་ལས་དེ་ལ་མཁས་པར་གྱུར་པའོ། །འཚེ་བ་ལ་སོགས་པ་ཞི་བའི་དོན་གྱི་ལས་
ནི་ཞི་བའི་ལས་ཡིན་ཏེ། རིག་བྱེད་ལས་བསྟན་པའམ་གཞན་པའོ། །རྒྱས་པའི་ལས་ནི་སྤེལ་བ་དང་འབྱོར་པ་རྒྱས་པར་བྱེད་པའི་ལས་ཤེས་བྱའི་བར་དུའོ། །དྲག་པོའི་ལས་ནི་གཞན་གྱི་སྲོག་ལ་གནོད་པར་བྱེད་པ་མགར་བ་ལ་སོགས་པའི་ལས་སམ། བཅུད་ཀྱིས་ལེན་གྱི་ལས་ཡིན་ནོ། །
འགའ་ཞིག་གིས་ནད་ཞི་བར་བྱེད་པའི་ཕྱིར་སྔགས་བཟླས་པའི་ཆུས་བརླན་པའི་གཏོར་མའི་ལས་ཡིན་ནོ། །ཡི་གེའི་རིག་པ་ནི་ཡི་གེའི་གྲངས་དང་། རྩིས་དང་། སྐར་མའི་བསྟན་བཅོས་རིག་པའོ། །དགོད་པ་ནི་ཡན་ལག་རྣམ་པར་དགོད་པའོ། །བཞི་པ་དང་། ལྔ་པ་དང་། ཉི་ཤུ་པ་

དག་ཅི་ཙམ་དུ་འགྱུར་ཞེས་དྲིས་པ་ལ་མྱུར་དུ་ཡོངས་སུ་ཤེས་པ་ནི་གྲངས་ལ་མཁས་པ་ཡིན་ནོ། །ལག་པས་ཕྱག་རྒྱའི་རྣམ་པ་བཅིང་བའམ། ལག་རྩིས་ཀྱི་བརྡ་ནི་ལག་བརྡ་ཡིན་ནོ། །ལམ་རིག་པ་ནི་གང་གིས་ལམ་དུ་འཇུག་པའི་འབྲས་བུ་ཤེས་པའོ། །ནད་ཞི་བའི་ཐབས་སུ་གྱུར་པའི་
མན་ངག་ནི་གསོ་བ་ཡིན་ནོ། །བུད་མེད་དག་གི་ཐུན་མོང་མ་ཡིན་པའི་ནད་ཉེ་བར་ཞི་བའི་ཐབས་སྟོན་པ་ནི་བུད་མེད་ཀྱི་གསོ་བ་ཡིན་ལ། དེ་བཞིན་དུ་སྐྱེས་པའི་གསོ་བ་དང་། གཞོན་ནུའི་གསོ་བ་དང་། གཞོན་ནུ་མའི་གསོ་བ་དག་ཀྱང་ཡིན་ནོ། །སྨན་དག་གི་སྦྱོར་བ་ཞེས་བྱ་བ་ནི་སྨིན་པ་ལ་སོགས་
པའི་རྫས་བྱིན་པས་འཚོ་བར་བྱེད་པའོ། །ནོར་བུའི་མཚན་ཉིད་དང་ཞེས་བྱ་བ་ལ་སོགས་པ་ལ། གང་དུ་ནོར་བུ་དུག་ལ་སོགས་པ་སེལ་བར་བྱེད་པའི་ནུས་པ་དུ་མ་དང་ལྡན་པ་དེ་དག་གི་མཚན་ཉིད་རབ་ཏུ་དབྱེ་བའི་སྒོ་ནས་ཤེས་པ་ཡིན་ནོ། །དབྱིག་པ་ལ་བཟང་པོ་དང་བཟང་པོ་མ་ཡིན་པའི་མཚན་ཉིད་
ཡོད་པ་ཉིད་ཀྱི་ཕྱིར་དབྱིག་པའི་མཚན་ཉིད་ལ་མཁས་པར་གྱུར་པའོ། །རལ་གྲི་ནི་རལ་གྲི་ཡིན་ཏེ། རལ་གྲི་ལ་སོགས་པའི་མཚོན་དག་གི་བཟང་པོ་དང་བཟང་པོ་མ་ཡིན་པའི་མཚན་ཉིད་ལ་མཁས་པར་གྱུར་པའོ། །གླང་པོ་ཆེ་ལ་སོགས་པ་ནས་གཞོན་ནུ་མའི་མཐར་ཐུག་པ་དག་གིས་མཛེས་པ་
དང་མཛེས་པ་མ་ཡིན་པའི་མཚན་ཉིད་ཡོད་པའི་མཚན་ཉིད་གང་དང་ལྡན་པ་དག་ཁྱིམ་དུ་གཞག་པ་ལས་དགེ་བ་དང་། མི་དགེ་བར་འགྱུར་བ་དེའི་མཚན་ཉིད་དང་། མཚན་ཉིད་འདི་དང་ལྡན་ན་ཚེ་ཐུང་ཞིང་འདིས་ཚེ་རིང་བར་འགྱུར་བ་དང་། འདིས་ལོངས་སྤྱོད་ཆུང་ཞིང་འདིས་ལོངས་སྤྱོད་ཆེ་
བར་འགྱུར་བ་དང་། བསོད་ནམས་ཆུང་བའི་མཚན་ཉིད་འདི་ཡིན་ཞིང་བསོད་ནམས་ཆེ་བ་འདི་ཡིན་པ་དང་། འདི་ལུས་ཆུང་ལ་ལུས་བོང་ཆེ་བ་དང་། འདི་རྗེ་བོའི་མཚན་ཉིད་ཡིན་ལ། འདི་བྲན་གྱི་མཚན་ཉིད་ཡིན་ནོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་པ་ཡིན་ནོ། །མགྱོགས་པ་ཞེས་
བྱ་བ་ལ་སོགས་པ་ནི་ནི་རུ་ཧ་དང་། མས་གཏོང་བ་དང་། ཡན་ལག་མ་ལུས་པ་དུགས་བྱས་པ་ནི་མགྱོགས་པའི་སྒྲས་བསྟན་ཏོ། །སྐྱུག་པ་དང་། འཁྲུ་བ་ནི་རབ་ཏུ་གྲགས་པ་ཡིན་ནོ། །གྱེན་དུ་བཤལ་བ་ནི་སྨན་སྔོན་དུ་སོང་བ་ཅན་གྱི་སྣ་ལ་སོགས་པ་ལས་འཛག་པར་གྱུར་པའོ། །སྣའི་ལས་

ནི་དུ་བ་རྔུབ་པའོ། །ཡན་ལག་གི་ཕྱོགས་གཅིག་གི་དུགས་ཀྱང་རབ་ཏུ་གྲགས་པ་ཡིན་ནོ། །སྙིང་གའི་ཕྱོགས་ན་ཡོངས་སུ་གནས་པའི་ནད་ཀྱི་གསོ་བ་བསྟན་པ་ནི་མ་ཞུ་བའི་གནས་བརྗོད་པའོ། །སྙིང་གའི་འོག་མན་ཆད་ཀྱིས་ནི་ཞུ་བའི་གནས་བརྗོད་པའོ། །ལུས་ཀྱི་
ཕྱོགས་ལས་བྱུང་བ་འབྲུམ་པ་འབྲས་བུའི་རྣམ་པ་ལྟ་བུ་བཤད་པ་དག་ནི་འབྲུམ་བུའོ། །བརྗོད་ལེའུ་ལག་པ་ལ་སོགས་པ་ལས་བྱུང་བ་འབྲས་ཀྱི་བྱ་བ་འཆད་པ་དག་ནི་འབྲས་ཀྱི་བརྗོད་ལེའུ་ཡིན་ནོ། །རི་དགས་རྣམས་འཁོར་ལོ་བཞིན་དུ་རྒྱུ་བ་ནི་རི་དགས་འགྲོ་བ་ཡིན་ཏེ། དེའི་འབྲས་བུ་ལུང་བསྟན་
པ་ལ་མཁས་པར་གྱུར་པའོ། །ཁྭ་དག་ནམ་མཁའ་ལ་ཚོགས་ཤིང་རྒྱུ་བ་ནི་ཁྭའི་ཚོགས་ཡིན་ཏེ། དེའི་འབྲས་བུ་ཡང་ཤེས་པར་གྱུར་པའོ། །ཀོས་ཀོའི་ཕྱོགས་འགུལ་བ་ལ་སོགས་པ་གྱུར་པ་སྲིད་པ་ནི་ཀོས་ཀོ་ཞོམ་པ་སྟེ། དེའི་འབྲས་བུ་ལུང་སྟོན་པ་ལ་མཁས་པར་གྱུར་པའོ། །འཕྲལ་
དུ་སོའི་ཕྲེང་བ་དག་གིས་ལྕེ་ལ་འབྱོར་པར་གྱུར་པ་ནི་ལྕེ་བཞར་བ་ཡིན་ནོ། །རོ་ལངས་ནི་འཁོར་ལོ་གཉིས་དང་ལྡན་པའི་ཤིང་རྟ་ལ་ཞོན་པ་ལག་པ་གཉིས་ཀྱིས་རལ་གྲི་སོ་སོར་འཛིན་པའོ། །རོ་ལངས་ཕྱེད་ནི་འཁོར་ལོ་གཅིག་པའི་ཤིང་རྟ་ལ་ཞོན་ཅིང་རལ་གྲི་གཅིག་འཛིན་པས་ཉེ་བར་མཚོན་པའོ། །
དགུག་པ་ཞེས་བྱ་བ་ལ་སོགས་པ་ལ། དགུག་པ་ནི་འབྱུང་པོ་དག་འདྲེན་པར་བྱེད་པའོ། །སླར་གཏོང་བ་ནི་ཨརྒ་ལ་སོགས་པ་སྦྲེངས་ནས་གཏོང་བར་བྱེད་པའོ། །ཀུན་ནས་རྨོངས་པར་བྱེད་པ་ནི་སྔགས་ཀྱིས་གཞན་གྱི་སེམས་རྣམ་པར་རྨོངས་པ་སྐྱེད་པར་བྱེད་པའོ། །རྣམ་པར་རྨོངས་
པ་ནི་ཁྱད་པར་སྔགས་ཀྱིས་གཞན་གྱི་ཡན་ལག་རྣམ་པར་བཤིག་ཅིང་འགྱུར་བའོ། །རྣམ་པར་བཤིག་པ་ནི་སྔགས་ཁོ་ནས་རོ་རྒྱབ་ལ་སོགས་པ་འཇིག་པར་འགྱུར་བའོ། །སྔགས་ཁོ་ནས་བདེ་བ་བསྐྱེད་པ་ནི་བདེ་བར་བྱས་པ་ཡིན་ལ། དེ་བཞིན་དུ་སྡུག་བསྔལ་བར་བྱས་པ་ཡིན་ནོ། །སྨན་
ལ་སོགས་པས་མངལ་བསྐྱེད་པ་ནི་སྦྲུམ་པར་བྱས་པ་ཡིན་ནོ། །མེ་ལ་ཏིལ་ལ་སོགས་པའི་སྦྱིན་སྲེག་བྱིན་པ་ནི་ཏིལ་ལ་སོགས་པའི་སྦྱིན་སྲེག་ཡིན་ནོ། །གསེར་ལ་སོགས་པ་བཅུག་པ་ནི། རྫས་ཀྱི་སྦྱིན་སྲེག་ཡིན་ནོ། །ཏིལ་མར་དང་མར་བཅུག་པ་ནི་སྦྱིན་སྲེག་གི་སྦྱིན་སྲེག་

ཡིན་ནོ། །ཉི་མ་ལ་བསྙེན་པའམ་རབ་ཏུ་ཆགས་པར་གྱུར་པ་དེ་ནི་བསྙེན་པའི་ཆོ་ག་ལ་མཁས་པའོ། །རྒྱུ་སྐར་ལ་ཕྱོགས་པ་དང་། ལྷ་ལ་ཕྱོགས་པ་དག་ཀྱང་དེ་དང་འདྲའོ། །དབང་ཕྱུག་གི་མཆོག་གི་འདུས་པ་སྒྲུབ་པར་བྱེད་པ་ནི་སྤོང་བ་ཆེན་པོ་དེ་ལ་མངོན་པར་སྦྱོར་བ་དེས་འཚོ་བར་བྱེད་པ་
ཡིན་ནོ། །འཇིགས་པར་འགྱུར་བ་ཞེས་བྱ་བ་ལ་སོགས་པ་ལ། འཇིགས་པར་འགྲོ་བའི་མཚན་ཉིད་ཤེས་པ་དང་། བདེ་བར་འགྱུར་བའི་མཚན་ཉིད་ཤེས་ཤིང་ལོ་ཉེས་དང་ལོ་ལེགས་པའི་མཚན་ཉིད་ཤེས་པར་འགྱུར་བའོ། །ངན་པར་འབབ་པས་ན་ཆར་མི་འབབ་པ་སྟེ་འབྲུ་ཉམས་པར་བྱེད་
པའོ། །དགེ་བར་འབབ་པས་ན་ཆར་འབབ་པར་འགྱུར་བ་སྟེ་འབྲུ་སྒྲུབ་པར་བྱེད་པའོ། །ལྷ་འཁྲུགས་པ་དང་བདུད་ལ་སོགས་པའི་རྣམ་པར་འཚེ་བ་ལས་བྱུང་བ་ནི་ཡམས་ཡིན་ནོ། །ཅིག་ཤོས་ནི་བཟློག་པའི་མཚན་ཉིད་ཡིན་ནོ། །ནང་གི་ཞེས་བྱ་བ་ལ་སོགས་པ་ལ་གཞན་གྱི་འདོད་པས་འགྲོ་
བ་ནི་བྲོས་པར་གྱུར་པ་ཡིན་ལ། རང་གི་འདོད་པས་འགྲོ་བ་ནི་སྙེགས་པར་གྱུར་པའོ། །ལམ་ཞེས་བྱ་བ་ལ་སོགས་པ་ལ་ལམ་ནི་རབ་ཏུ་གྲགས་པའི་ལམ་པོ་ཆེ་ཡིན་ལ། རབ་ཏུ་གྲགས་པ་མ་ཡིན་པ་ནི་ལམ་གོལ་བ་ཡིན་ནོ། །སྐར་མའི་གཟུགས་ལྟུང་བ་ནི་སྐར་མདའ་ལྟུང་བའོ། །ཕྱོགས་
དང་ནམ་མཁའི་ཕྱོགས་ཤིན་ཏུ་འོད་གསལ་བར་གྱུར་པ་ནི་ཕྱོགས་ཚིག་པའོ། །བར་སྣང་ལ་མི་བཟད་པའི་སྒྲ་འབྱུང་བ་ནི་ལྷའི་རྔ་བོ་ཆེ་དག་ཡིན་ནོ། །རང་གི་ཡོན་ཏན་སྒྲུབ་པ་ནི་རྫུ་འཕྲུལ་ཆེ་བའོ། །གཞན་ལ་ཕན་འདོགས་པར་བྱེད་པའི་སྒོ་ནས་མཐུ་ཆེ་བ་ཡིན་ནོ། །ཤར་བ་ནི་ཤར་གྱི་རི་
ལས་འབྱུང་བའོ། །ནུབ་པ་ནི་ནུབ་ཀྱི་རིར་ཞུགས་པར་གྱུར་པའོ། །ཀུན་ནས་ཉོན་མོངས་པ་ཞེས་བྱ་བ་ནི་ལྷ་མ་ཡིན་གྱི་དབང་པོ་སྒྲ་གཅན་ཡིན་ལ། །རྣམ་པར་བྱང་བ་ནི་ཤིན་ཏུ་དང་བར་གྱུར་པ་སྟེ། ཀུན་ནས་ཉོན་མོངས་པ་དང་རྣམ་པར་བྱང་བ་དག་གི་རྣམ་པར་གཞག་པའི་ལམ་གྱིས་རྣམ་པར་
གཞག་པའི་ལམ་ཞེས་བྱ་བ་དེ་ལྟ་བུའི་རྣམ་པར་སྨིན་པ་དང་ཞེས་བྱ་བ་དེ་ལྟ་བུའི་འབྲས་བུ་ཡིན་ནོ། །དེ་ཞེས་བྱ་བ་ལ་སོགས་པ་ལ། དེ་ཉིད་ནི་བསྟན་མ་ཐག་པའི་རབ་ཏུ་བྱུང་བའོ། །འཕགས་པ་ཞེས་བྱ་བ་ལ་སོགས་པ་ལ། ཟག་པ་མེད་པའི་ལམ་གྱི་ཚོགས་ཡིན་པའི་ཕྱིར་ཟག་པ་དང་བཅས་

པའི་ཚུལ་ཁྲིམས་ཀྱི་ཕུང་པོ་ལ་ཡང་འཕགས་པ་ཞེས་བྱའོ། །ནང་གི་ཞེས་བྱ་བ་ལ། བདག་ཉིད་ལྷག་པར་བྱས་པས་ན་ནང་ཡིན་ནོ། །གཞན་གྱི་སྐྱོན་བརྗོད་པའི་སྐབས་མེད་པའི་ཕྱིར་ཁ་ན་མ་ཐོ་བ་མེད་པ་ཡིན་ལ། དེའི་བདེ་བ་ནི་གང་ཚུལ་ཁྲིམས་ཡོངས་སུ་དག་
པའི་རྒྱུར་གྱུར་པ་ཡིན་ནོ། །སོ་སོར་མྱོང་བ་ནི་ཡོངས་སུ་རྫོགས་པར་ཉམས་སུ་མྱོང་བའོ། །སྒོ་སྦས་པ་ཞེས་བྱ་བ་ལ། གང་གི་སྒོ་སྦས་པ་ཞེས་བྱ་བ་ནི་སྒོ་སྦས་པའོ། །གང་གི་སྒོ་སྦས་ཤེ་ན། དབང་པོའི་ཞེས་བྱ་བ་སྨོས་པ་ཡིན་ནོ། །དེའི་དོན་ནི་འདི་ཡིན་ཏེ། མིག་ལ་སོགས་པའི་དབང་པོ་དག་
དགག་པའི་ཡུལ་ལ་འཇུག་པ་ལས་བཟློག་པ་གང་ཡིན་པ་དེ་ནི་དབང་པོའི་སྒོ་སྦས་པ་ཡིན་ནོ། །རྟག་ཏུ་མངོན་སུམ་དུ་གྱུར་པའི་སྒོ་ནས་དྲན་པ་ཀུན་ནས་བསྲུངས་པ་གང་ཡིན་པ་དེ་ནི་དྲན་པ་ཀུན་ནས་བསྲུངས་པའོ། །གུས་པས་མངོན་སུམ་དུ་བྱེད་པས་ན་དྲན་པ་ངེས་པར་བསྲུངས་པ་ཡིན་ཏེ།
སེམས་མི་དགེ་བའི་རྣམ་པའི་རྟོག་པ་དག་ལས་ངེས་པར་ཏེ། ཁྱད་པར་དུ་སྲུང་ཞིང་སྦེད་པར་བྱེད་པའི་ཕྱིར་ངེས་པར་བསྲུངས་པ་སྟེ། ངེས་པར་བསྲུངས་པ་གང་ཡིན་པ་དེ་ནི་དྲན་པ་ངེས་པར་བསྲུངས་པའོ། །དེ་ཉིད་ཀྱི་ཕྱིར་དྲན་པ་བསྲུངས་པའི་ཡིད་ཡིན་ཏེ། རྒྱུན་གྱིས་དྲན་པ་མངོན་དུ་བྱེད་པ་ཡིན་པའི་ཕྱིར་
རོ། །གནས་སྐབས་མཉམ་པར་སྤྱོད་དོ་ཞེས་བྱ་བ་ནི་མིག་ལ་སོགས་པའི་དབང་པོ་དག་ཡུལ་འཛིན་པའི་གནས་སྐབས་ལ་ཇི་ལྟར་ཉེས་པ་དང་ལྡན་པར་མི་འགྱུར་བ་དེ་ལྟར་མཉམ་པོར་དཔྱོད་ཅིང་འཇོག་པར་བྱེད་པའོ། །ཇི་ལྟར་གནས་སྐབས་མཉམ་པར་དཔྱོད་པར་འགྱུར་ཞེ་ན། དེ་མིག་གིས་ཞེས་བྱ་བ་
ལ་སོགས་པ་སྨོས་པ་ཡིན་ནོ། །མཚན་མར་མི་འཛིན་པ་ཞེས་བྱ་བ་ནི་གསད་པ་ལ་སོགས་པ་ཉིད་དུ་མཚན་མར་མི་འཛིན་གྱི། འོན་ཀྱང་ཇི་ལྟར་གཟུགས་དེའི་རང་བཞིན་ཁོ་ན་བཞིན་དུ་འཛིན་པར་བྱེད་དོ། །མཚན་མར་འཛིན་པ་སྔོན་དུ་སོང་བ་ཅན་གྱི་དངོས་པོ་གཞན་དང་འབྲེལ་པའི་མིང་གི་མཚན་མ་འཛིན་
པ་སྟེ། དཔེར་ན་ཨུཏྤ་ལ་སྔོན་པོ་དང་འབྲེལ་པའི་མིག་དང་། རི་བོང་ཅན་དང་འབྲེལ་པའི་གདོང་དང་། པད་མ་དང་འབྲེལ་པའི་ལག་པ་ཞེས་བྱ་བ་དེ་ལྟ་བུ་ལ་སོགས་པའོ། །གང་གི་ཕྱིར་ཞེས་བྱ་བ་ནི་གང་གི་རྒྱུ་མཚན་གྱིས་སོ། །སྡིག་པ་མི་དགེ་བའི་ཆོས་ནི་འདོད་ཆགས་ལ་སོགས་པ་ཡིན་ལ།

སེམས་རྗེས་སུ་འཇུག་པ་ནི་སེམས་ལ་བརྟེན་ནས་རབ་ཏུ་འཇུག་པའམ། སེམས་ཡོངས་སུ་དོར་བར་མི་བྱེད་པ་ཡིན་ནོ། །གང་ལ་སེམས་འཇུག་པར་འགྱུར་བ་ཡིན་ཞེ་ན། མིག་གི་དབང་པོས་ཞེས་བྱ་བ་ལ་སོགས་པ་སྨོས་པ་ཡིན་ཏེ། མིག་གི་དབང་པོའི་སྒོ་ནས་སྡོམ་པ་མ་ཡིན་པ་དེ་སྡོམ་པ་དེ་དང་
ལྡན་ཞིང་འབྱོར་པ་གང་ཡིན་པ་དེ་ལའོ། །ཅི་ཞིག་ཡོད་པར་གྱུར་ཞེ་ན། སྨྲས་པ། བརྣབ་སེམས་དང་གནོད་སེམས་ཡོད་པར་གྱུར་ནའོ། །ཡུལ་གང་ལ་བརྣབ་སེམས་དང་གནོད་སེམས་འབྱུང་བ་ཡིན་ཞེ་ན། འཇིག་རྟེན་ཏེ་ཉེ་བར་ལེན་པའི་ཕུང་པོ་ལྔའི་ཡུལ་ལའོ། །གཞན་གྱི་ཡུལ་ལ་ཆགས་པ་ནི་བརྣབ་
སེམས་ཡིན་ལ་མངོན་པར་འདོད་པའི་དོན་མ་འབྱོར་པ་སྔོན་དུ་སོང་བ་ཅན་ནི་ཡིད་མི་བདེ་བ་ཡིན་ཏེ། བརྣབ་སེམས་དང་ཡིད་མི་བདེ་བ་ནི་བརྣབ་སེམས་དང་ཡིད་མི་བདེ་བའོ། །དེ་ཡོད་པར་གྱུར་ན་དམ་པ་རྣམས་ཀྱིས་སྨད་པར་བྱ་བ་ཉིད་ཡིན་པའི་ཕྱིར་སྡིག་པ་དག་ཡིན་ལ། འདོད་པ་མ་ཡིན་པའི་
འགྲོ་བ་འདོད་པར་བྱེད་པ་ཉིད་ཡིན་པའི་ཕྱིར་མི་དགེ་བ་ཡིན་ནོ། །སྡིག་པ་མི་དགེ་བའི་ཆོས་དེ་དག་སྡོམ་པའི་ཕྱིར་ཏེ། མི་སྐྱེ་བར་བྱ་བའི་ཕྱིར་ནན་ཏན་དུ་བྱེད་ཅིང་སྒྲུབ་པར་བྱེད་པའམ། ཚུལ་བཞིན་མ་ཡིན་པའི་རྒྱུ་མཚན་འཛིན་པ་ལ་སོགས་པ་དབང་དུ་བྱེད་པའི་ཚུལ་དེ་སྡོམ་པའི་ཕྱིར་ནན་ཏན་
དུ་བྱེད་པ་ཡིན་ནོ། །གནོད་པ་མེད་པའི་བདེ་བ་ཞེས་བྱ་བ་ནི་རང་གི་སེམས་ཤིན་ཏུ་ཡོངས་སུ་མགུ་བར་གྱུར་པའི་བདེ་བ་ཉམས་སུ་མྱོང་བར་གྱུར་པའོ། །མངོན་པར་འདོད་པའི་གནས་སུ་འགྲོ་བར་བྱེད་པ་ནི་འགྲོ་བ་སྟེ། མངོན་དུ་ཕྱོགས་ནས་འགྲོས་བྱེད་པ་ཡིན་ནོ། །འོང་བ་ནི་ཕྱིར་ལྡོག་པའོ། །
ཤེས་བཞིན་དུ་གནས་པར་གྱུར་པ་ཞེས་བྱ་བ་ནི་ཤེས་རབ་སྔོན་དུ་བྱེད་པའི་སྒོ་ནས་འགྲོ་བ་དང་འོང་བའི་རྒྱུ་མཚན་ལ་ཁ་ན་མ་ཐོ་བ་ལ་ཀུན་དུ་སྤྱོད་པ་མ་ཡིན་པའོ། །མངོན་དུ་ཕྱོགས་པས་ལྟ་བར་བྱེད་པ་ནི་ལྟ་བ་ཡིན་ལ། ཟུར་གྱིས་ལྟ་བར་བྱེད་པ་ནི་ཀུན་དུ་ལྟ་བ་ཡིན་ནོ། །བསྐུམ་པ་ནི་དཔུང་བ་ལ་
སོགས་པའི་ཡན་ལག་སྡུད་པར་བྱེད་པའོ། །བརྐྱང་བ་ནི་དོན་རབ་ཏུ་གྲགས་པ་ཡིན་ནོ། །སྦྱར་མ་ནི་གོས་ཀྱི་མཆོག་ཡིན་ནོ། །ཆོས་གོས་ནི་གོས་ལྷག་མ་དག་ཡིན་ནོ། །འགྲོ་བ་ཞེས་བྱ་བ་ལ་སོགས་པ་ནི་སྤྱོད་ལམ་བཞི་སྟོན་པ་ཡིན་ནོ། །གཉིད་ལས་གྱུར་པའི་རྨྱ་བ་ནི་གཉིད་ཀྱིས་རྨྱ་བའོ། །

ལུས་རྨྱ་བས་གཟིར་བ་ནི་རྨྱ་བ་དེ་ཅུང་ཟད་གཉིད་ལོག་པས་སོ་སོར་བསལ་ཅིང་ཡོངས་སུ་སྤངས་པ་སྟེ། དེ་ལ་ཤེས་བཞིན་དུ་གནས་པ་ཡིན་ནོ། །ཤེས་བཞིན་ནི་ཤེས་རབ་ཡིན་ནོ། །ཕོངས་པ་མེད་པའི་བདེ་བ་ཞེས་བྱ་བ་ལ་སོགས་པ་ལ། ཡུལ་རྣམ་པ་སྣ་ཚོགས་ལ་ཡིད་ལྟུང་
བར་བྱེད་པ་ནི་ཕོངས་པ་ཡིན་ཏེ། ཕོངས་པ་མ་ཡིན་པ་ནི་ཕོངས་པ་མེད་པ་སྟེ། ཡུལ་གཅིག་ལ་འཇུག་པ་ཞེས་བྱ་བའི་ཐ་ཚིག་སྟེ། བདེ་བ་དེ་ཉིད་སོ་སོར་མྱོང་བར་གྱུར་པའོ། །དབེན་པར་ཞེས་བྱ་བ་ནི་ལུས་དང་སེམས་དབེན་པ་དང་ལྡན་པའོ། །འདི་ལ་ཉལ་བར་བྱེད་པའི་ཕྱིར་མལ་ཡིན་ནོ། །འདི་ལ་
འདུག་པར་བྱེད་པའི་ཕྱིར་སྟན་ཡིན་ནོ། །དགོན་པ་ནི་གྲོང་ལས་རྒྱང་གྲགས་ཀྱི་མཐར་གྱུར་པའོ། །སྐྱིལ་མོ་ཀྲུང་བཅས་པ་ནི་སྐྱིལ་མོ་ཀྲུང་བཅས་པར་གྱུར་པའོ། །ལུས་དྲང་པོར་བསྲང་ཞེས་བྱ་བ་ནི་ལུས་བསྲང་བ་ཉིད་ཡིན་ཏེ། རྩིབ་ལོགས་ཀྱི་ཕྱོགས་ནས་བརྩམས་ནས་ལྟོ་བ་རྒྱས་པར་
བྱས་པའོ། །མངོན་དུ་གཞག་པ་ཞེས་བྱ་བ་ནི་མངོན་དུ་ཕྱོགས་པར་གྱུར་པ་སྟེ་དྲན་པ་མངོན་དུ་གཞག་པ་ཡིན་ཏེ། རྣལ་འབྱོར་པས་སྣའི་རྩེ་མོ་ལ་མིག་གིས་བལྟས་ཏེ་བསམ་གཏན་བྱའོ་ཞེས་འཇིག་རྟེན་ན་རབ་ཏུ་གྲགས་པ་ཡོད་པས་ན་སྣའི་རྩེ་མོ་ལ་མིག་གཏད་ན་དྲན་པ་ཡང་སྒོམ་པར་བྱེད་པའི་དོན་
དེ་ཉིད་ལ་གཞག་པར་འགྱུར་བ་དེའི་ཕྱིར་འདིས་ནི་ལུས་ཀྱི་གནས་སྐབས་ཀྱི་བྱེ་བྲག་ཕྱིན་ཅི་མ་ལོག་པར་རྩོམ་པའི་རྒྱུ་མཚན་ཏིང་ངེ་འཛིན་གྱི་ཡན་ལག་ཅེས་བསྟན་པར་འགྱུར་རོ། །བརྣབ་སེམས་ཞེས་བྱ་བ་ལ་སོགས་པ་ལ། བརྣབ་སེམས་ནི་ཕ་རོལ་པོའི་ཡུལ་འདོད་པའི་མཚན་
ཉིད་ཅན་ནོ། །འཇིག་རྟེན་ཞེས་བྱ་བ་ནི་ཕུང་པོ་ལྔའི་རང་བཞིན་ཅན་ཡིན་ནོ། །སྤངས་པ་ནི་རེངས་པར་བྱེད་པ་སྟེ། འདིར་སྤངས་པའི་སྒྲས་བསྟན་པ་ཡིན་ནོ། །བརྣབ་སེམས་དང་བྲལ་བ་ཞེས་བྱ་བ་ནི་གང་གི་ཕྱིར་མངོན་སུམ་དུ་གྱུར་པའི་སྒོ་ནས་བརྣབ་སེམས་དང་བྲལ་བའི་
སེམས་ཡིན་པ་དེའི་ཕྱིར་དེ་སྐད་ཅེས་བྱའོ། །རྒྱུན་གྱི་སེམས་དེ་ལ་མངོན་དུ་ཕྱོགས་པའི་ཕྱིར་མང་དུ་བྱས་པ་ཞེས་བསྟན་ཏོ། །བརྣབ་སེམས་ཀྱི་སེམས་ཡོངས་སུ་སྤྱོད་པར་བྱེད་དོ་ཞེས་བྱ་བ་ནི་བརྣབ་སེམས་སྤང་བའི་ཕྱིར་ཤིན་ཏུ་འབྲེལ་པར་གྱུར་པའོ། །གནོད་སེམས་ནི་སེམས་

ཅན་ལ་རྣམ་པར་ཞེ་སྡང་བའི་མཚན་ཉིད་ཅན་དང་། རྨུགས་པ་ནི་ལུས་དང་སེམས་ལས་སུ་མི་རུང་བ་དང་། རྨོངས་པར་གྱུར་པའོ། །གཉིད་ནི་སེམས་མངོན་པར་བསྡུས་པ་སྟེ། འདི་གཉིས་ནི་ཕན་ཚུན་རྗེས་སུ་མཐུན་པ་ཉིད་ཀྱི་ཕྱིར་སྒྲིབ་པ་གཅིག་ཏུ་རྣམ་པར་གཞག་པ་ཡིན་ནོ། །རྒོད་པ་
ནི་སེམས་མ་ཞི་བ་ཡིན་ལ། འགྱོད་པ་ནི་སེམས་རྣམ་པར་སྐྱོ་བར་གྱུར་པ་སྟེ། འདི་གཉིས་ཀྱང་ཕན་ཚུན་རྗེས་སུ་མཐུན་པ་ཁོ་ན་ཉིད་ཀྱི་ཕྱིར་སྒྲིབ་པ་གཅིག་ཏུ་རྣམ་པར་གཞག་པ་ཡིན་ནོ། །ཡང་ན་མི་མཐུན་པའི་ཕྱོགས་གཅིག་ཉིད་ཡིན་པའི་ཕྱིར་དང་། རྟེན་གཅིག་ཉིད་ཡིན་པའི་ཕྱིར་དང་།
བྱ་བ་གཅིག་བྱེད་པ་ཉིད་ཀྱི་ཕྱིར་སྒྲིབ་པ་གཅིག་ཉིད་ཡིན་ནོ། །རྨུགས་པ་དང་གཉིད་དག་ནི་སྣང་བའི་འདུ་ཤེས་མི་མཐུན་པའི་ཕྱོགས་ཀྱི་ཆོས་ལྔའི་རྟེན་ཏེ། ལེ་ལོ་དང་། དགའ་བ་མེད་པ་དང་། གླལ་བ་དང་། ཟས་ལ་མི་དད་པ་དང་། སེམས་ཞུམ་པ་ཉིད་ཡིན་ལ། གཉི་ག་ཡང་སེམས་ཞུམ་པ་ཉིད་
སྐྱེད་པར་བྱེད་པ་ཞེས་བྱ་བ་གཅིག་བྱེད་པ་ཡིན་ནོ། །རྒོད་པ་དང་འགྱོད་པ་དག་ཀྱང་ཆོས་བཞིའི་རྟེན་བྱེད་པ་ཡིན་ཏེ། ཉེ་དུའི་རྣམ་པར་རྟོག་པ་དང་། ལྗོངས་ལ་རྣམ་པར་རྟོག་པ་དང་མི་འཆི་བའི་རྣམ་པར་རྟོག་པ་དང་། སྔོན་དགོད་པ་དང་། དགའ་བ་དང་། རྩེ་བ་དང་། ཀུན་དུ་སྤྱོད་པ་དང་རྗེས་སུ་དྲན་པ་ཡིན་ལ།
འདི་གཉི་ག་ཡང་སེམས་མ་ཞི་བ་སྐྱེས་པ་ལ་རབ་ཏུ་འཇུག་པ་ཉིད་ཡིན་པའི་ཕྱིར་ཡང་ཞི་གནས་ཀྱི