Luận tạng Tây Tạng (Tengyur) — Tập 158

་མི་མཐུན་པའི་ཕྱོགས་བྱ་བ་གཅིག་བྱེད་པ་ཡིན་ནོ། །རེ་བ་དང་བྲལ་བ་ལ་སོགས་པ་ཞེས་བྱ་བ་ལ། ཨེ་མའོ་བདག་གི་དོན་འདི་ཤེས་པར་བྱའོ་ཞེས་བྱ་བ་ནི་རྣམ་པ་འདི་ཞེས་བྱ་བའི་
དངོས་པོ་དག་ལ་ཐོག་མར་རེ་བ་སྐྱེ་བར་འགྱུར་ཏེ། དོན་ཇི་ལྟ་བ་བཞིན་དུ་ཁོང་དུ་མ་ཆུད་པ་ལས་ཅི་དོན་འདི་ལྟ་བུ་ཡིན་ནམ་འོན་ཏེ་འདི་ལྟ་བུ་མ་ཡིན་ཞེས་ཐེ་ཚོམ་སྐྱེ་བར་འགྱུར་རོ། །རེ་བ་དང་། ཐེ་ཚོམ་དང་བྲལ་ཞིང་ཡོངས་སུ་སྤངས་པ་གང་ཡིན་པ་དེ་ནི་རེ་བ་དང་བྲལ་བ་
དང་། ཐེ་ཚོམ་དང་བྲལ་བའོ། །དེ་ཉིད་ཀྱི་ཕྱིར་དད་པ་ལ་སོགས་པ་དགེ་བའི་ཆོས་དག་ལ་ཅི་ལྟ་ཅི་ལྟ་བུ་ཅན་ནི་ངེས་པའི་དོན་ཁོང་དུ་ཆུད་པའི་ཕྱིར་རོ། །ཅི་ལྟ་ཅི་ལྟ་བུའི་ཚིག་ནི་ཐེ་ཚོམ་ཁོ་ནའི་རྣམ་གྲངས་བརྗོད་པ་ཡིན་ལ། ཅི་ལྟ་ཅི་ལྟར་གང་ལ་ཡོད་པ་དེ་ནི་ཅི་ལྟ་ཅི་ལྟ་བུ་ཅན་ཡིན་ཏེ། ཅི་ལྟ་ཅི་ལྟ་བུ་ཅན་མེད་

པ་ནི་ཅི་ལྟ་ཅི་ལྟ་བུ་ཅན་མ་ཡིན་པའོ། །སེམས་ཡོངས་སུ་སྦྱོང་བ་ནི་འདིར་ཡང་ཐེ་ཚོམ་ཤིན་ཏུ་སྤང་བའི་ཕྱིར་རོ། །འཕགས་པའི་ལམ་དང་དེའི་སྦྱོར་བ་དགེ་བའི་རྩ་བ་དག་ལ་སྒྲིབ་པར་བྱེད་པའི་ཕྱིར་སྒྲིབ་པ་ཡིན་ཏེ། སྒྲིབ་པ་དེ་དག་ནི་ངེས་པ་ཉིད་དུ་རྣམ་པར་འཆིང་བར་བྱེད་པ་
ཉིད་ཀྱི་ཕྱིར་རོ། །བུན་ཞེས་བྱ་བ་ནི་སྐྱིན་པོ་བླངས་པའི་ཚུལ་གྱིས་དབྱིག་ལ་སོགས་པ་ལེན་པ་ཡིན་ནོ། །ལས་ཀྱི་མཐའ་ཞེས་བྱ་བ་ནི་སཱ་ལུ་ལ་སོགས་པ་ལས་ཀྱི་མཐའ་འམ། ཚོང་པའི་ཐ་སྙད་དུ་བྱེད་པ་ལ་རབ་ཏུ་སྦྱོར་བར་བྱེད་པ་ཡིན་ནོ། །འབྱོར་པར་གྱུར་ན་ཞེས་བྱ་བ་ནི་འབྱོར་པ་ཡོངས་སུ་
རྫོགས་པར་གྱུར་ནའོ། །རང་གི་ནོར་ཙམ་ཞེས་བྱ་བ་ལ་རང་གི་ནོར་ནི་གཏེར་ཡིན་ལ། བུད་མེད་ནི་ཆུང་མའོ། །ཙམ་གྱི་སྒྲ་ནི་ཉུང་ངུའི་ཉེ་བར་མཚོན་པ་ཡིན་ནོ། །ཡོད་པ་ནི་ཐོབ་པར་གྱུར་པའོ། །བདེ་བ་ནི་རྣམ་པར་ཤེས་པའི་ཚོགས་ལྔ་པོའོ། །ཡིད་དགའ་བར་འགྱུར་བ་ནི་ཡིད་ཀྱི་རྣམ་པར་ཤེས་
པའོ། །ནད་ཀུན་ནས་སྐྱེས་པའི་ཕྱིར་ནད་བུ་ཅན་ནོ། །ནད་ནི་སྡུག་བསྔལ་གྱི་རྒྱུ་ཉིད་ཡིན་པའི་ཕྱིར་སྡུག་བསྔལ་ལོ། །ནད་ཚབས་ཆེ་བ་ཞེས་བྱ་བ་ནི་ནད་རྒྱས་པ་ཉིད་ཀྱི་ཕྱིར་རོ། །ལུས་ལ་ཁྱབ་པར་བྱེད་ཅེས་བྱ་བ་ནི་ནོན་པར་བྱེད་པ་སྟེ། ཤིན་ཏུ་ལྕི་བ་སྐྱེད་པར་བྱེད་པ་ཡིན་པའི་ཕྱིར་རོ། །གནོད་པར་
བྱེད་ཅེས་བྱ་བ་ནི་ནད་སྐྱེད་པར་བྱེད་པའོ། །ནད་མེད་པ་ནི་ནད་དང་བྲལ་བར་གྱུར་པའོ། །ནད་མེད་པ་ཐོབ་པའི་ཕྱིར་སྟོབས་དང་ལྡན་པར་གྱུར་པའོ། །བྲན་ཞེས་བྱ་བ་ལ་སོགས་པ་ལ། བྲན་རྣམ་པ་ལྔ་ཉིད་ནི་མདོ་འདི་ཁོ་ན་ལས་བཤད་ཅིང་བསྟན་པ་ཡིན་ནོ། །མངག་གཞུག་པ་ཞེས་བྱ་བ་ནི་ནོར་
གྱིས་གསོས་པའི་མངག་གཞུག་བྱེད་པ་ལ་བྱའོ། །བསྒོ་བ་ཞེས་བྱ་བ་ནི་ནང་མི་དང་ཆོས་གྲོགས་ལ་སོགས་པ་ལ་བྱའོ། །བཀོལ་བར་བྱ་བ་མ་ཡིན་པ་ཞེས་བྱ་བ་ནི་ཡ་རབས་ལ་སོགས་པ་རང་དབང་ཅན་མ་ཡིན་པ་དག་གོ། །རིགས་པའི་སྒོ་ནས་འདོད་པས་འཇུག་པ་ནི་དབང་བྱེད་པ་ཡིན་ཏེ།
དབང་ཕྱུག་གི་མཆོག་གིས་ལས་དེ་གཞན་དུ་འགྲོ་བའི་ནུས་པ་མེད་ཅིང་རྟག་ཏུ་སྟེན་པར་བྱེད་པ་ཡང་མ་ཡིན་པའོ། །དེ་བས་ན་མངག་གཞུག་པ་ལ་སོགས་པ་ནོར་གྱིས་འཚོ་བ་བཞི་པོ་འདི་དག་ནི་ཕྱི་མ་ཕྱི་མ་ཞིང་ཁྱད་པར་དུ་འཕགས་པ་ཡིན་པར་རིག་པར་བྱའོ། །དམ་དུ་བཅིངས་པ་ནི་ཤིན་ཏུ་བཅིངས་

པར་གྱུར་པའོ། །བཅིངས་པའི་དུས་ན་རྣམ་པར་འཚེ་བ་མེད་པའི་ཕྱིར་བཀྲ་ཤིས་པའོ། །དེའི་རྒྱུ་མཚན་གྱི་དུས་ཕྱིས་ཀྱང་རྣམ་པར་འཚེ་བ་མེད་པའི་ཕྱིར་བདེ་བའོ། །ནོར་ཡོངས་སུ་བཏང་བ་མེད་པའི་ཕྱིར་གོད་མེད་པའོ། །འཇིགས་པ་ལས་ཞེས་བྱ་བ་དེ་ནི་དེ་འཇིགས་པ་དང་བཅས་པའི་གནས་
དག་ལས་བདེ་བར་གྱུར་ཅེས་བྱ་བ་ནི་འཚེ་བ་མེད་པའི་གནས་ཡིན་ནོ། །ཇི་ལྟར་བུན་དུ་གྱུར་པ་ཞེས་བྱ་བ་ལ་སོགས་པ་ལ། བུན་དུ་གྱུར་པ་ནི་བརྣབ་སེམས་ཀྱི་སྒྲིབ་པ་ཡིན་ཏེ། དེ་ཡོད་ན་འདོད་པའི་ཁམས་ལས་མ་འདས་པའི་ཕྱིར་རོ། །ནད་ནི་གནོད་སེམས་ཀྱི་སྒྲིབ་པ་ཡིན་ཏེ། གནོད་པ་བྱེད་པ་
ཉིད་ཡིན་པའི་ཕྱིར་རོ། །བྲན་དུ་གྱུར་པ་ནི་རྨུགས་པ་དང་གཉིད་ཀྱི་སྒྲིབ་པ་ཡིན་ཏེ། སེམས་རང་དབང་མེད་པ་ཉིད་ཡིན་པའི་ཕྱིར་རོ། །འཆིང་བར་གྱུར་པ་ལ་ནི་རྒོད་པ་དང་འགྱོད་པའི་སྒྲིབ་པ་ཡིན་ཏེ། འདོད་པའི་ཁམས་ལས་འདས་པ་དང་རྗེས་སུ་མཐུན་པའི་ཏིང་ངེ་འཛིན་གྱི་བར་དུ་གཅོད་པར་
བྱེད་པ་ཉིད་ཡིན་པའི་ཕྱིར་རོ། །འཇིགས་པ་ནི་ཐེ་ཚོམ་གྱི་སྒྲིབ་པ་ཡིན་ཏེ། མ་ངེས་པའི་རང་བཞིན་ཉིད་ཀྱིས་འཁོར་བ་པའི་འཇིགས་པའི་རྒྱུ་ཉིད་ཡིན་པའི་ཕྱིར་རོ། །ཡང་ན་བུ་ལོན་ལ་སོགས་པ་ནི་གནོད་སེམས་ནས་ཐེ་ཚོམ་གྱི་བར་དག་ཡིན་ནོ། །ཉེ་བར་ཉོན་མོངས་པར་བྱེད་པ་ཞེས་བྱ་
བ་ནི་དྲི་མ་ཅན་དུ་བྱེད་པའམ། ཉེ་བར་གདུང་བར་བྱེད་པ་ཡིན་ནོ། །སེམས་ཉེ་བར་ཉོན་མོངས་པ་ཉིད་ཀྱི་ཕྱིར་ཤེས་རབ་ཉམ་ཆུང་བ་སྟེ། དེ་བྱེད་པའི་ཕྱིར་ཤེས་རབ་ཉམ་ཆུང་བར་བྱེད་པའོ། །དགེ་བའི་ཆོས་སྐྱེ་བའི་བགེགས་བྱེད་པ་ཡིན་པའི་ཕྱིར་གནོད་པའི་ཕྱོགས་ཡིན་ཏེ། དེ་ཉིད་ཀྱི་
ཕྱིར་མྱ་ངན་ལས་འདས་པ་དང་མི་མཐུན་པ་ཡིན་ཏེ། མྱ་ངན་ལས་འདས་པའི་ལམ་དུ་འཇུག་པར་བྱེད་པའི་གེགས་བྱེད་པ་ཡིན་པའི་ཕྱིར་རོ། །འདོད་པ་དག་ལས་དབེན་པ་ཞེས་བྱ་བ་ལ་སོགས་པ་ནི་བསམ་གཏན་དང་པོ་ཉེ་བར་བསྒྲུབས་ནས་གནས་པ་ཡིན་ནོ། །ཁྱད་པར་ཇི་ལྟ་བུ་དང་
ལྡན་པའི་བསམ་གཏན་དང་པོ་ཞེ་ན། འདོད་པ་དག་ལས་དབེན་པ་ཞེས་བྱ་བ་ལ་སོགས་པ་སྨོས་ཏེ། འདུན་པའི་འདོད་ཆགས་ལ་འདིར་འདོད་པའི་སྒྲས་བསྟན་པ་ཡིན་ནོ། །ཡུལ་རྣམ་པ་སྣ་ཚོགས་ལ་རབ་ཏུ་འཇུག་པ་ཉིད་ཀྱི་ཕྱིར་འདོད་པ་དག་ཅེས་བྱ་བ་མང་པོའི་ཚིག་ཏུ་བྱས་པ་ཡིན་

ལ། འདོད་པའི་སྒྲས་ནི་འདོད་པའི་ཡོན་ཏན་ལྔ་པོ་དག་བཟུང་བ་ཡིན་ཏེ། དེ་དག་ལ་དབེན་པ་ནི་སྤངས་པ་དང་འདོད་པའི་རྣམ་པ་དང་བྲལ་བར་གྱུར་ཅེས་བྱ་བའི་ཐ་ཚིག་གོ། །འདོད་པ་ན་སྤྱོད་པའི་མི་དགེ་བ་མ་ལུས་པ་སྤངས་པ་ཉིད་ཀྱི་ཕྱིར་སྡིག་པ་མི་དགེ་བ་དག་ལས་དབེན་
པར་གྱུར་པ་དང་། རྟོག་པ་དང་དཔྱོད་པ་དང་། མཚུངས་པར་ལྡན་པར་སྨྲས་པ་ཡིན་ནོ། །དབེན་པ་ལས་སྐྱེས་པ་ཞེས་བྱ་བ་ལ། ལུས་དབེན་པ་དང་སེམས་དབེན་པ་ལས་འདིར་སེམས་དབེན་པ་ཉིད་གཟུང་སྟེ། དེ་ལས་སྐྱེས་པས་ན་དབེན་པ་ལས་སྐྱེས་པའོ། །དགའ་བ་དང་བདེ་བ་ནི་རྣམ་པར་ཤེས་
པའི་ཚོགས་གསུམ་གྱི་བདེ་བ་ཡིན་ཏེ། སྣ་དང་ལྕེའི་རྣམ་པར་ཤེས་པ་དག་མེད་པའི་ཕྱིར་རོ། །ཡང་ན་འདིས་རྣམ་པར་འབྱེད་པ་ན་དབེན་པ་སྟེ། ཐ་དད་པར་བྱས་ཞེས་བྱ་བའི་ཐ་ཚིག་གོ། །གང་ལས་རྣམ་པར་འབྱེད་པ་ཡིན་ཞེ་ན། འདོད་པ་དག་ལས་ཏེ། བགྲོད་པར་བྱ་བ་མ་ཡིན་པའི་ས་ཟག་པ་
དང་བཅས་པའི་ལམ་དབེན་པ་དེ་ལས་སྐྱེས་པ་ནི་དབེན་པ་ལས་སྐྱེས་པ་ཞེས་བྱའོ། །ཉེ་བར་བསྒྲུབས་ནས་ཞེས་བྱ་བ་ནི་ཤེས་པས་ཡོངས་སུ་རྫོགས་པར་ཤེས་ནས་སོ། །མངོན་པར་བརླན་ཏོ་ཞེས་བྱ་བ་ནི་ཀུན་ནས་འགེངས་པར་བྱེད་པའམ་ཁྱབ་པར་བྱེད་པའོ། །ཡོངས་སུ་བརླན་ཏོ་ཞེས་བྱ་བ་ནི་
ཤིན་ཏུ་འགེངས་པར་བྱེད་པའམ། ཤིན་ཏུ་ཁྱབ་པར་བྱེད་པའོ། །ཀུན་ནས་ཚིམ་པར་བྱེད་ཅེས་བྱ་བ་ནི་རབ་ཏུ་དགའ་བར་བྱེད་པའམ་ཉེ་བར་སོག་པར་བྱེད་པའོ། །ཀུན་ནས་ཁྱབ་པར་བྱེད་དོ་ཞེས་བྱ་བ་ནི་ཀུན་ནས་ཤིན་ཏུ་ཁྱབ་པར་བྱེད་དོ། །ཁྱབ་པར་མ་གྱུར་པ་ཞེས་བྱ་བ་ནི་གསལ་
བར་མ་གྱུར་པའོ། །ཁྱབ་པར་བྱ་བ་མ་ཡིན་པ་ཞེས་བྱ་བ་ནི་དེས་ཁྱབ་པར་མི་ནུས་པའི་ལུས་ཀྱི་ཕྱོགས་ཀྱི་གཞི་གང་ཡིན་པ་དེ་ཡོད་པ་མ་ཡིན་ནོ། །སློབ་མ་ནི་འདིར་བཟོའི་ཡོན་ཏན་སློབ་དཔོན་དང་མཚུངས་པར་གྱུར་པའོ། །མཁས་པ་ནི་རང་གི་ལས་ལ་མཁས་པར་གྱུར་པའོ། །ཁར་
ཕོར་ནི་ཁར་བའི་སྣོད་ཆེན་པོ་ཡིན་ལ། གཞོང་བུ་ནི་ཁར་སྡེར་གྱི་རྣམ་པའོ། །ཉ་ཕྱིས་ནི་ཁྲུས་ཀྱི་ཕྱེ་མའི་སྣོད་ཀྱི་རྣམ་པ་གཞན་ཡིན་ནོ། །ཆུས་བཏབ་པ་ཞེས་བྱ་བ་ནི་བརླན་པར་བྱས་པ་སྟེ། ཟློས་པའི་ཚིག་གཉིས་ཡིན་ནོ། །གཤེར་བར་བྱས་པ་ནི་བདས་པར་བྱས་པའོ། །སྣུམ་

པ་ནི་ཆུས་སོ། །སྣུམ་པར་གྱུར་པ་ནི་དབུས་ཀྱི་ཆར་རླན་ཞུགས་པར་གྱུར་པའོ། །སྣུམ་པས་ཁྱབ་པ་ནི་སྣུམ་གྱིས་ཀུན་ནས་ཟིན་པར་གྱུར་པའོ། །གསལ་བ་ནི་རྣམ་པ་ཐམས་ཅད་དུ་ཁྱབ་པ་ཡིན་པ་དེའི་ཕྱིར་ནང་དང་ཕྱི་དང་བཅས་པ་སྣུམ་པས་ཞེས་བྱ་བ་སྨོས་པ་ཡིན་ནོ། །སོ་སོར་མི་འགྱེས་པ་ཞེས་
བྱ་བ་ནི་འབྲུལ་བར་མི་འགྱུར་བའི་ངང་ཚུལ་ཅན་ཡིན་ནོ། །འཐོར་བར་མི་འགྱུར་རོ་ཞེས་བྱ་བ་ནི་ཕྲ་མོ་ཉིད་དུ་འཐོར་ཞིང་གནས་པར་མི་འགྱུར་བའོ། །དེ་དེ་བཞིན་དུ་ཞེས་བྱ་བའི་དཔེས་བསྟན་པའི་དོན་ལ་སྦྱོར་བར་བྱེད་པ་ཡིན་ཏེ། ཏིང་ངེ་འཛིན་ལ་རབ་ཏུ་འཇུག་པའི་སེམས་དེ་ནི་ཏིང་ངེ་འཛིན་ལས་
སེམས་མ་འཕྲོས་ཤིང་ཕྱི་རོལ་དུ་གཡེང་བ་མེད་པའི་ཕྱིར་འཐོར་བར་མི་འགྱུར་བ་ཡིན་ནོ། །རྣམ་པར་རྟོག་པ་དང་། རྣམ་པར་དཔྱོད་པ་ཉེ་བར་ཞི་བའི་ཕྱིར་ཞེས་བྱ་བ་ནི་སྤངས་པའི་ཕྱིར་རོ། །ནང་རབ་ཏུ་དང་བའི་ཕྱིར་ཞེས་བྱ་བ་ལ། ནང་རབ་ཏུ་དང་བའི་ཆོས་དེ་གང་ཡིན་ཞེ་ན། གང་གི་ཕྱིར་དེ་ལ་རྣལ་
འབྱོར་པ་འདི་སྙམ་དུ་མཉམ་པར་མ་བཞག་པའི་ས་ལས་དེ་འབྱུང་བ་མ་ཡིན་གྱི། འོན་ཀྱང་མཉམ་པར་གཞག་པ་ལས་ཀྱང་ཡིན་ནོ་ཞེས་སེམས་པར་འགྱུར་ཏེ། དེ་ལྟ་བུའི་རྣམ་པ་མངོན་པར་ཡིད་ཆེས་པའི་དད་པའི་རང་བཞིན་ལ་ནང་རབ་ཏུ་དང་བ་ཞེས་བྱའོ། །སེམས་གཅིག་ཏུ་དམིགས་པའི་ཕྱིར་
ཞེས་བྱ་བ་ཤིན་ཏུ་དམིགས་པ་གཅིག་ལ་འཇུག་པའི་ཕྱིར་རྣམ་པར་རྟོག་པ་དང་རྣམ་པར་དཔྱོད་པ་དང་བྲལ་བའི་ཕྱིར་སེམས་ཤིན་ཏུ་དམིགས་པ་གཅིག་པ་འཇུག་པ་ཡིན་ནོ། །ཏིང་ངེ་འཛིན་ལས་སྐྱེས་པ་ཞེས་བྱ་བ་ནི་འདིར་བསམ་གཏན་གཉིས་པ་གཙོ་བོར་གྱུར་པའི་ཏིང་ངེ་འཛིན་དེ་ལས་སྐྱེས་པ་
སྟེ། གང་གི་ཕྱིར་བསམ་གཏན་གཉིས་པ་གཙོ་བོར་གྱུར་པ་ལ་བརྟེན་ནས་བསམ་གཏན་དང་པོ་ལས་འདོད་ཆགས་དང་བྲལ་བར་གྱུར་པ་ཡིན་ནོ། །རི་བོའི་རྩེ་མོ་ཞེས་བྱ་བ་ནི་རི་བོའི་སྟེང་ཆུ་གནས་སུ་རུང་བའི་གནས་ནི་རི་བོའི་རྩེ་མོ་ཡིན་ནོ། །བཀོད་མ་ཞེས་བྱ་བ་ནི་ཆུ་འབྱུང་བའི་བུ་གུ་དང་ལྡན་
པའོ། །མཚེའུ་ཞེས་བྱ་བ་ནི་ལྟེང་ཀ་ཡིན་ནོ། །ཆུའི་རྫིང་བུ་ཞེས་བྱ་བ་ནི་ཆུ་འབྱུང་བའི་སེར་གའོ། །ཆུའི་བུ་གུ་ཞེས་བྱ་བ་ནི་དབུས་ན་ཆུ་འབྱུང་བའི་སེར་ག་ཡོད་པའོ། །ཆུའི་ཕུང་པོ་ཞེས་བྱ་བ་ནི་ཆུ་ཆེན་པོ་འབྱུང་བའི་སེར་ག་ཡིན་ནོ། །དེས་དགའ་བ་སྤངས་ནས་ཞེས་བྱ་བ་ནི་དགའ་

བའི་འདོད་ཆགས་དང་བྲལ་བའི་ཕྱིར་རོ། །བཏང་སྙོམས་ལ་གནས་སོ་ཞེས་བྱ་བ་ནི་འདུ་བྱེད་ཀྱི་བཏང་སྙོམས་ཀྱིས་སེམས་དགེ་བ་ལ་འཇུག་པའི་ཕྱིར་བཏང་སྙོམས་ཞེས་བསྟན་ཏོ། །དྲན་པ་དང་ཤེས་བཞིན་ཞེས་བྱ་བ་ནི་དྲན་པ་དང་ཤེས་རབ་གཙོ་བོར་གྱུར་པའོ། །བདེ་བ་
ལུས་ཀྱིས་ཞེས་བྱ་བ་ནི་ལུས་དང་ཡིད་ཀྱི་སྒོ་ནས་བདེ་བ་ཁྱད་པར་དུ་འཕགས་པ་ཉིད་ཡིན་པ་དེ་བས་ན་དེ་སྐད་ཅེས་བྱ་སྟེ། དེ་བས་ན་ཆགས་པའི་གནས་སྐབས་འདི་ལ་འཕགས་པས་ཐ་སྙད་དུ་བསྟན་པ་ཡིན་ནོ། །འཕགས་པ་ཞེས་བྱ་བ་ནི་སངས་རྒྱས་དང་། དེའི་ཉན་ཐོས་དག་ཡིན་ནོ། །ཐམས་
ཅད་ཀྱི་ཐམས་ཅད་དུ་ནུབ་པར་གྱུར་པ་ནི་རྩ་བ་ནུབ་པ་ཡིན་ནོ། །དེས་བདེ་བ་ཡང་སྤངས་ཞེས་བྱ་བ་ལ་སོགས་པ་ལ། བསམ་གཏན་གསུམ་པ་ལས་འདོད་ཆགས་དང་བྲལ་བའི་ཕྱིར་བདེ་བ་སྤངས་པ་བཞིན་ནོ། །དྲི་མ་མ་ལུས་པ་དང་བྲལ་བའི་ཕྱིར་སྡུག་བསྔལ་སྤངས་པ་ཡིན་ཏེ། བསམ་གཏན་
གསུམ་པའི་འདོད་ཆགས་དང་བྲལ་བའི་དུས་ཁོ་ན་ལ་བསྟན་ལ། འདོད་པའི་ཁམས་ཀྱི་འདོད་ཆགས་དང་བྲལ་བ་ཁོ་ན་ལས་ནི་སྡུག་བསྔལ་སྤངས་པར་གྱུར་པ་ཡིན་ནོ། །ཡིད་བདེ་བ་དང་ཡིད་མི་བདེ་བ་ཞེས་བྱ་བ་ལ། བསམ་གཏན་གཉིས་པའི་འདོད་ཆགས་དང་བྲལ་བས་ཡིད་བདེ་བ་སྤངས་
པ་དང་། འདོད་པའི་ཁམས་ཀྱི་འདོད་ཆགས་དང་བྲལ་བས་ནི་ཡིད་མི་བདེ་བ་སྤངས་པ་ཡིན་ནོ། །བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་དག་པ་ནི་འདིར་དྲི་མ་ལས་གྲོལ་བ་ཉིད་དང་། ལེགས་པར་ཡོངས་སུ་རྫོགས་པ་ཉིད་ཡིན་པར་རིག་པར་བྱའོ། །ས་འོག་མའི་ཉོན་
མོངས་པ་དང་བྲལ་བ་ཉིད་ཀྱི་ཕྱིར་སེམས་དེས་ཡོངས་སུ་དག་པ་ཡིན་ལ། རང་གི་ས་པའི་དྲི་མ་མེད་པའི་ཕྱིར་ཡོངས་སུ་དཀར་བ་ཡིན་ནོ། །མོས་པ་བྱས་ནས་ཞེས་བྱ་བ་ནི་དམིགས་པར་བྱས་པའོ། །ཁྱབ་པར་ཞེས་བྱ་བ་ནི་ཐམས་ཅད་ལ་ཁྱབ་པར་བྱས་པའོ། །ཉེ་བར་བསྒྲུབས་ནས་ཞེས་བྱ་
བ་ནི་ཡོངས་སུ་རྫོགས་པར་རམ། ཀུན་ནས་ལོངས་སྤྱོད་པའམ། ཤེས་པར་བྱས་ནས་སོ། །སྐྱེས་བུ་བརྒྱད་ཀྱིས་བཏགས་པའི་གོས་གང་ཡིན་པ་དེ་ནི་བརྒྱད་ཀྱིས་བཏགས་པ་སྟེ། ཤིན་ཏུ་ཚད་ཆེ་བ་ཉིད་ཀྱི་ཕྱིར་སྐྱེས་བུ་ཤིན་ཏུ་ཉུང་ངུས་བཏག་པར་ནུས་པ་མ་ཡིན་ནོ། །དེ་བཞིན་དུ་མཚན་ཉིད་

སྔ་མ་བཞིན་དུ་སྐྱེས་བུ་དགུའི་བྱ་བས་བསྒྲུབས་པ་ནི་དགུས་བཏགས་པ་ཡིན་ནོ། །མི་མཐོ་ཞེས་བྱ་བ་ནི་དེ་ཡན་ཆད་གཟུགས་ཅན་གྱི་ས་མེད་པའི་ཕྱིར་གནས་གོང་མ་ལ་མངོན་པར་འདོད་པའི་སེམས་མེད་པ་ཡིན་ནོ། །གཟུགས་ཀྱིས་ཐམས་ཅད་ཀྱི་སྟེང་ན་རྣམ་པར་གནས་པ་ཉིད་ཀྱི་ཕྱིར་མི་དམའ་བ་ཡིན་ནོ། །
མི་གཡོ་བ་ཐོབ་ཅེས་བྱ་བ་ནི་གཡོ་བ་མེད་པའི་གནས་སྐབས་ཐོབ་པར་གྱུར་པའོ། །ཁང་པ་བརྩེགས་པ་ཞེས་བྱ་བ་ལ་སོགས་པ་ལ། ཤིང་དང་གུར་ཐབས་སུ་བསྒྲུབས་པའི་ཁང་པ་ཆུང་ངུ་ནི་ཁང་པ་བརྩེགས་པ་ཡིན་ལ། ཁང་པ་བརྩེགས་པ་ཆེན་པོ་ནི་ཀ་བ་ཡིན་ཏེ། དེས་ཉེ་བར་མཚོན་པའི་ཁང་པ་ལ་
ཁང་པ་བརྩེགས་པ་ཞེས་བྱའོ། །འབྲུ་མར་གྱི་མར་མེ་ནི་གསལ་བྱེད་དོ། །མ་བསྒུལ་པ་ཞེས་བྱ་བ་ནི་ཕྱོགས་གཅིག་བསྒུལ་བའི་སྒོ་ནས་མ་བསྒུལ་པའོ། །མ་བསྐྱོད་པ་ཞེས་བྱ་བ་ནི་ཀུན་ནས་དཀྲུགས་པའི་སྒོ་ནས་བསྐྱོད་པར་མ་གྱུར་པའོ། །བདག་གི་ལུས་འདི་ནི་ཞེས་བྱ་བ་ལ་སོགས་པ་ལ།
གཟུགས་སུ་རུང་ཞིང་གནོད་པ་བྱར་རུང་བའི་ཕྱིར་གཟུགས་ཅན་ཡིན་ལ་རགས་པ་ཉིད་ཀྱི་ཕྱིར་རྒྱ་ཆེ་བ་ཡིན་ཞིང་འབྱུང་བ་ཆེན་པོ་བཞི་ལས་གྲུབ་པ་ཉིད་ཀྱི་ཕྱིར་འབྱུང་བ་རྒྱུར་བྱས་པའོ། །འདི་ལ་བརྟེན་ཞིང་ཞེས་བྱ་བ་ནི་རང་གི་ས་པའི་རྣམ་པར་ཤེས་པ་དེ་ལ་བརྟེན་པའི་སྒོ་ནས་སྐྱེས་པའི་ཕྱིར་རོ། །
འདི་ལ་གནས་ཏེ་ཞེས་བྱ་བ་དེ་ནི་ས་གཞན་ལ་ཡང་འདི་ལ་བརྟེན་ནས་སྐྱེས་པའི་ཕྱིར་རོ། །བདག་ཉིད་ཐམས་ཅད་ཀྱི་རྗེས་སུ་འཇུག་པ་ནི་ཞུགས་པ་ཡིན་ནོ། །ལུས་གཞན་ཞེས་བྱ་བ་ནི་ཁམས་གཞན་ཡིན་ནོ། །གཟུགས་དང་བ་དང་ལྡན་པ་ཉིད་ཀྱི་ཕྱིར་གཟུགས་ཅན་ནོ། །ཡིད་
ཙམ་ལས་སྐྱེས་པ་ཉིད་ཀྱི་ཕྱིར་དང་། ཁུ་ཁྲག་ལ་སོགས་པ་ཕྱི་རོལ་གྱི་རྒྱུ་ལ་ལྟོས་པ་མེད་པར་སྐྱེས་པའི་ཕྱིར་ཡིད་ལས་བྱུང་བའོ། །ཞར་བ་དང་འཁྲུལ་པ་མེད་པའི་ཕྱིར་མ་ཚང་བ་མེད་པའོ། །དབང་པོ་ཐམས་ཅད་ཚོགས་པ་ཉིད་ཀྱི་ཕྱིར་དབང་པོ་མ་ཉམས་པའོ། །ཉེས་པ་མེད་པའི་
ཕྱིར་དགེ་བའོ། །བྱས་པ་ཉིད་མ་ཡིན་པ་ཉིད་ཀྱི་ཕྱིར་རིགས་དང་ལྡན་པའོ། །གདོད་སྣང་བ་ཉིད་ཀྱི་ཕྱིར་གསལ་བའོ། །རྙོག་པའི་དྲི་མ་རགས་པ་གཞན་དང་གཞན་མེད་པའི་ཕྱིར་རྣམ་པར་དང་བའོ། །དྲི་མ་ཕྲ་མོ་ཡང་མེད་པའི་ཕྱིར་དྲི་མ་མེད་པའོ། །ཉག་མ་ནི་གྲེས་མའི་སྙིང་པོའོ། །དེས་

འདི་ལྟར་མཉམ་པར་གཞག་པའི་ཞེས་བྱ་བ་ལ་སོགས་པ་ལ། ཏིང་ངེ་འཛིན་དང་རྗེས་སུ་མཐུན་པ་ཉིད་ཀྱི་ཕྱིར་མཉམ་པར་གཞག་པའོ། །ཡོངས་སུ་དག་པ་ཞེས་བྱ་བ་ནི་ས་འོག་མའི་ཉེས་པ་སྤངས་པའི་ཕྱིར་རོ། །ཡོངས་སུ་དཀར་བ་ཞེས་བྱ་བ་ནི་རང་གི་ས་པའི་དྲི་མ་
ཡང་མེད་པའི་ཕྱིར་རོ། །ཉེས་པ་མེད་པ་ཞེས་བྱ་བ་ནི་ཉེས་པ་དང་བྲལ་བའི་ཕྱིར་ཏེ། ཉོན་མོངས་པ་མེད་པའོ། །དེ་ཉིད་ཀྱི་ཕྱིར་སེམས་དེ་ཉེ་བའི་ཉོན་མོངས་པ་དང་བྲལ་བ་ཡིན་ནོ། །གསལ་བར་སྤྱོད་པའི་ཕྱིར་དྲང་པོར་གྱུར་པའོ། །ཤིན་ཏུ་སྦྱངས་པ་དང་ལྡན་པའི་ཕྱིར་ལས་སུ་རུང་བ་ཡིན་ལ། ལས་
ལ་ཕན་པ་ནི་ལས་སུ་རུང་བ་སྟེ། དགེ་བའི་ཆོས་ཐམས་ཅད་སྐྱེད་པར་རུང་བ་ཡིན་ནོ་ཞེས་བྱ་བའི་ཐ་ཚིག་གོ། །མི་གཡོ་བ་ཐོབ་སྟེ་ཞེས་བྱ་བ་ནི་རྣམ་པར་རྟོག་པ་ལ་སོགས་པས་མི་བསྐྱོད་པ་ཡིན་ནོ། །རྫུ་འཕྲུལ་གྱི་ཡུལ་ཞེས་བྱ་བ་ལ་སོགས་པ་ལ། རྫུ་འཕྲུལ་ནི་ཏིང་ངེ་འཛིན་ཡིན་ལ། རྫུ་
འཕྲུལ་གྱི་ཡུལ་ནི་རྫུ་འཕྲུལ་གྱི་ཡུལ་ཏེ། སྤྲུལ་པ་དང་། ནམ་མཁའ་ལ་འགྲོ་བ་ལ་སོགས་པའོ། །དེ་ཤེས་པ་ནི་རྫུ་འཕྲུལ་གྱི་ཡུལ་ཤེས་པ་ཡིན་ལ། དེ་མངོན་སུམ་དུ་གྱུར་པ་ནི་མངོན་སུམ་དུ་གྱུར་པའོ། །མངོན་པར་ཤེས་པར་བྱེད་པས་ན་མངོན་པར་ཤེས་པ་ཞེས་བྱ་བའི་དབང་དུ་བྱས་ནས་ཤེས་
པ་དེ་ཉིད་མངོན་པར་ཤེས་པ་སྟེ་དེ་ལའོ། །སེམས་མངོན་པར་འཇུག་གོ་ཞེས་བྱ་བ་ནི་དབེན་པར་བྱེད་པ་སྐྱེད་པར་བྱེད་པའི་ཕྱིར་འཇོག་པར་བྱེད་པའོ། །སོ་སོར་མྱོང་བ་ཞེས་བྱ་བ་ནི་ཤེས་པས་ཁྱབ་པའམ་བྱེད་པ་ཡིན་ནོ། །མངོན་པར་སྣང་བ་གསལ་བའི་ཚུལ་གྱིས་གནས་པའོ། །མི་སྣང་བ་
ནི་ནུབ་པར་གྱུར་པའོ། །ཡེ་ཤེས་ནི་འདིར་ཟག་པ་དང་བཅས་པ་བསྒོམས་པ་ལས་བྱུང་བའོ། །མཐོང་བ་ནི་འཇིག་རྟེན་པའི་ཡང་དག་པའི་ལྟ་བའོ། །རྩིག་པ་ལས་ཐལ་བ་ཞེས་བྱ་བ་ནི་རྩིག་པས་ཆོད་པ་ཡིན་ལ། དེ་བཞིན་དུ་རིས་ཆོད་པ་དང་། རྩིག་པས་ཆོད་པའི་གནས་སུ་ཆགས་པ་མེད་པ་
སྟེ། ཐོགས་པ་མེད་པར་ལུས་ཀྱིས་འགྲོ་བ་ཡིན་ནོ། །ནུབ་པ་ནི་འོག་ཏུ་འགྲོ་བར་བྱེད་པའོ། །འབྱུང་བ་ནི་ཡང་ཕྱིར་འོང་བར་བྱེད་པའོ། །རྒྱུན་གྱི་སྟེང་ན་ཞེས་བྱ་བ་ནི་ནུབ་པ་མེད་པའི་ཕྱིར་རོ། །ཀུན་ནས་རེག་པ་ཞེས་པ་ནི་ཅུང་ཟད་ཡིན་ལ། རབ་ཏུ་ཞེས་བྱ་བ་ནི་ཀུན་ནས་ཡིན་པའི་ཕྱིར་རོ། །

ལུས་ཀྱིས་དབང་སྒྱུར་བར་བྱེད་དོ་ཞེས་བྱ་བ་ནི་ལུས་ཀྱིས་ཚངས་པའི་འཇིག་རྟེན་དུ་འགྲོ་ཞིང་བདག་པོ་བྱེད་པ་ཡིན་ཏེ། བསམ་གཏན་དང་པོའི་ས་པའི་རྫུ་འཕྲུལ་གྱིས་ཚངས་པའི་འཇིག་རྟེན་ལ་སོགས་པའི་བར་དུ་འགྲོ་བར་བྱེད་པ་དེའི་ཕྱིར་དེ་སྐད་ཅེས་བྱའོ། །གསེར་མགར་ནི་གསེར་བཟོ་བྱེད་པའོ། །
མགོར་རུང་བའི་རྒྱན་ནི་གླེགས་མའོ། །རྣ་རྒྱན་ནི་རྣ་བའི་རྒྱན་ཆུང་ངུ་ཡིན་ལ། རྣ་ཆ་ནི་རྣ་བའི་རྒྱན་ཆེན་པོ་ཡིན་ནོ། །མགྲིན་པའི་ཕྱོགས་ལ་རུང་བའི་རྒྱན་ནི་མགུལ་རྒྱན་ཡིན་ནོ། །ལག་པའི་རྒྱན་ནི་གདུ་བུ་རྒྱན་ཅན་ལ་སོགས་པའོ། །རྐང་རྒྱན་ནི་གཡེར་ཀ་ཅན་ལ་སོགས་པའོ། །སོར་གདུབ་
ནི་རབ་ཏུ་གྲགས་པ་ཡིན་ནོ། །གསེར་གྱི་ཕྲེང་བ་ནི་གསེར་ལས་བྱས་པའི་མགོ་བོའི་རྒྱན་ཡིན་ནོ། །མྱུར་ཞིང་མྱུར་བར་ཞེས་བྱ་བ་ནི་བྱ་བ་མང་པོ་མེད་པའི་སྒོ་ནས་སྐྱེན་པར་བྱེད་པ་ཡིན་ནོ། །ལྷའི་རྣ་བ་ཞེས་བྱ་བ་ལ་སོགས་པ་ལ། ལྷའི་ཡུལ་དུ་བྱུང་བས་ན་ལྷ་ཉིད་ཡིན་ཏེ། སྤྱིར་ལྷ་ཉིད་ཀྱི་
ནི་མ་ཡིན་གྱི་འོན་ཀྱང་བསྒོམས་པ་ལས་བྱུང་བ་རྣམ་པར་དག་པའི་སྒོ་ནས་ཡིན་ནོ། །མིའི་ལས་འདས་པ་ཞེས་བྱ་བ་ནི་འདི་ནི་མིའི་ཡིན་ལ། མིའི་ལས་ཤིན་ཏུ་འདས་པ་ནི་མིའི་ལས་འདས་པ་ཡིན་ཞིང་གཟུགས་ན་སྤྱོད་པའི་བསྒོམས་པ་ལས་བྱུང་བའི་རྣ་བ་ཞེས་བྱ་བའི་བར་དུ་སྟེ་རྣ་བ་དེས་
སོ། །མཚན་མོའི་མུན་པར་གྱུར་པ་སྟེ། མཚན་ཕྱེད་ཀྱི་དུས་སུ་སྐྱེ་བོ་འདུས་པའི་སྒྲ་དང་བྲལ་བ་ཉིད་ཀྱི་ཕྱིར་ཕྱོགས་དེར་དུང་གི་སྒྲས་ཐ་དད་པའི་ཕྱོགས་ཁྱབ་ཅིང་འཕྲོ་བར་བྱེད་པ་ཡིན་ནོ། །སེམས་ཀྱི་རྣམ་གྲངས་ཞེས་བྱ་བ་ལ། རྣམ་གྲངས་ནི་རྣམ་པའམ་རིམ་པ་ཡིན་ལ། སེམས་
ཀྱི་རྣམ་གྲངས་ནི་སེམས་ཀྱི་རྣམ་གྲངས་ཡིན་ཏེ། འདིས་མངོན་པར་ཤེས་པ་བྱེད་ཅེས་བྱ་བའི་དབང་དུ་བྱས་ནས། དེ་ལ་ཡེ་ཤེས་མངོན་སུམ་དུ་བྱེད་པ་ཁོ་ན་མངོན་པར་ཤེས་པ་ཡིན་ནོ། །སེམས་ཅན་གཞན་དག་ཅེས་བྱ་བ་ལ། གཞན་གྱི་སེམས་ཤེས་པ་ནི་རང་གི་སེམས་ལ་ལྟོས་
པ་མེད་པ་ཉིད་ཀྱི་ཕྱིར་རོ། །སེམས་ཅན་ནི་གང་ཟག་གི་རྣམ་གྲངས་ཡིན་པའམ། ཡང་ན་སྐད་ཅིག་རེ་རེའི་ཕུང་པོ་ལྔའི་ཚོགས་སེམས་ཅན་ཡིན་ནོ། །རིས་མཐུན་པའི་རྒྱུན་མ་ལུས་པ་ནི་གང་ཟག་ཡིན་ནོ། །རྣམ་པར་བརྟགས་པ་ཞེས་བྱ་བ་ནི་རྣམ་པར་རྟོག་པའི་བྱ་བ་དང་ལྡན་པའོ། །

རྣམ་པར་དཔྱོད་པ་ཞེས་བྱ་བ་ནི་དཔྱོད་པའི་བྱ་བ་དང་ལྡན་པའོ། །ཡིད་ཀྱིས་ཏེ་སེམས་ཀྱིས་ཡིད་དེ་སེམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཤིང་ཡོངས་སུ་གཅོད་པར་བྱེད་དོ། །ཇི་ལྟར་རབ་ཏུ་ཤེས་ཤེ་ན། འདོད་ཆགས་དང་བཅས་པ་ཞེས་བྱ་བ་ལ་སོགས་པ་སྨོས་ཏེ།
འདོད་ཆགས་དང་མཚུངས་པར་ལྡན་པ་ནི་འདོད་ཆགས་དང་བཅས་པའོ། །འདོད་ཆགས་དང་བྲལ་བ་ཞེས་བྱ་བ་ནི་འདོད་ཆགས་དང་ལྡན་པ་མ་ཡིན་པའོ། །དེ་བཞིན་དུ་ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བའོ། །
གཡེངས་པ་ནི་ཉོན་མོངས་པ་ཡིན་ཏེ། རྣམ་པར་གཡེངས་པ་དང་ལྡན་པ་ཉིད་ཀྱི་ཕྱིར་རོ། །མི་གཡེང་བ་ནི་དགེ་བ་ལ་དམིགས་པ་ལ་མངོན་པར་གཡེང་བ་མེད་པའི་ཕྱིར་རོ། །ལྷག་པར་ལེ་ལོའི་ཚོགས་དང་མཚུངས་པར་ལྡན་པའི་ཕྱིར་སེམས་ཉོན་མོངས་པ་ཅན་ནི་ཞུམ་པ་ཡིན་ནོ། །ལྷག་
པར་བརྩོན་འགྲུས་ཀྱི་ཚོགས་དང་མཚུངས་པར་ལྡན་པའི་ཕྱིར་སེམས་དགེ་བ་ལ་རབ་ཏུ་འཛིན་པ་ཡིན་ནོ། །འཕྱར་བ་ནི་ཉོན་མོངས་པ་ཅན་ཏེ། རྣམ་པར་བྱང་བ་ལས་འཕྱར་བ་དག་ལ་བརྟེན་པ་ཉིད་ཀྱི་ཕྱིར་རོ། །མི་འཕྱར་བ་ནི་དགེ་བ་སྟེ། དེ་ལས་བཟློག་པ་ཡིན་པའི་ཕྱིར་རོ། །རྒོད་པ་ནི་
ཉོན་མོངས་པ་ཅན་ཏེ། རྒོད་པའི་ཚོགས་དང་ལྷག་པར་མཚུངས་པར་ལྡན་པའི་ཕྱིར་རོ། །མི་རྒོད་པ་ནི་དེའི་གཉེན་པོ་ཉིད་ཡིན་པའི་ཕྱིར་དགེ་བ་ཡིན་ནོ། །ཉེ་བར་ཞི་བ་དང་། ཉེ་བར་མ་ཞི་བ་ཡང་དེ་བཞིན་ནོ། །མཉམ་པར་མ་བཞག་པ་ནི་ཉོན་མོངས་པ་ཅན་ཏེ། ལྷག་པར་གཡེངས་
པའི་ཚོགས་དང་ལྡན་པའི་ཕྱིར་རོ། །མཉམ་པར་བཞག་པ་ནི་དེའི་གཉེན་པོའི་ཕྱོགས་ཉིད་ཡིན་པའི་ཕྱིར་དགེ་བའོ། །མ་བསྒོམས་པ་ནི་ཉོན་མོངས་པ་ཅན་ཏེ། དམིགས་པ་ལ་བརྟེན་པ་དང་། བསྒོམ་པ་མ་བསྒོམས་པ་ཉིད་ཀྱི་ཕྱིར་རོ། །བསྒོམས་པ་ནི་དགེ་བ་ཡིན་ཏེ། དེ་གཉིས་
བསྒོམས་པ་ཉིད་ཀྱི་ཕྱིར་རོ། །མ་གྲོལ་བ་ནི་ཉོན་མོངས་པ་ཅན་ཏེ། རང་བཞིན་དང་རྒྱུད་ཀྱིས་རྣམ་པར་གྲོལ་བ་དག་ལས་མ་གྲོལ་བ་ཉིད་ཀྱི་ཕྱིར་རོ། །རྣམ་པར་གྲོལ་བ་ནི་དགེ་བ་སྟེ། དེ་གཉིས་ལས་རྣམ་པར་གྲོལ་བ་ཉིད་ཀྱི་ཕྱིར་རོ། །རིག་པ་གང་ཞེ་ན་ཞེས་བྱ་བ་ལ་སོགས་པ་ལ།

སྔོན་གྱི་སྐྱེ་བའི་གནས་ནི་སྐྱེ་བའི་གནས་སམ། གནས་སྐབས་ཡིན་ནོ། །འཇིག་པའི་དུས་ནི་འཇིག་པའི་བསྐལ་པ་ཡིན་ལ། གནས་པའི་དུས་ནི་ཆགས་པའི་བསྐལ་པ་ཡིན་ཏེ། འཇིག་པའི་བསྐལ་པ་ནི་སེམས་ཅན་དམྱལ་བ་མི་སྲིད་པའི་ཕྱིར་སྣོད་ཟད་པ་ཡིན་ནོ། །ཆགས་པའི་བསྐལ་པ་
ནི་ཐོག་མར་རླུང་ནས་སེམས་ཅན་དམྱལ་བའི་བར་སྲིད་པ་ཞེས་བྱ་བ་ཡིན་ནོ། །འདི་ལྟ་བུ་ཞེས་བྱ་བ་ལ། འདི་ལྟ་བུའི་ཚུལ་དུ་བདག་གི་མིང་བརྗོད་པ་རིགས་ནི་རྒྱལ་རིགས་ལ་སོགས་པའོ། །རུས་ནི་ཤུཎྜི་ལ་ལ་དང་བ་ར་དྭ་ཛ་ལ་སོགས་པའོ། །ཟས་ནི་ཁམ་གྱི་རྣམ་པའི་ཟས་ལ་སོགས་པའོ། །
འདི་ལྟ་བུར་ཚེ་ནི་རིང་ཞེས་བྱ་བ་ལ་བདག་ཟླ་བའི་མཐར་ཐུག་པའམ། ལོའི་མཐར་ཐུག་པར་ཚེ་རིང་བར་གྱུར་ཅེས་བྱ་བ་ལ་སོགས་པའོ། །རིང་དུ་གནས་ཏེ་ཞེས་བྱ་བ་ནི་བྱིས་པ་དང་གཞོན་ནུ་ལ་སོགས་པའི་གནས་སྐབས་ནི་རིང་དུ་གནས་པ་ཡིན་ནོ། །ཚེའི་མཐར་ཐུག་པ་ཞེས་བྱ་བ་ནི་ཀུན་
ནས་འཕངས་པའི་ཚེའི་མཐར་ཐུག་པ་དང་ལྡན་པར་གྱུར་པའོ། །རྣམ་པ་དང་བཅས་པ་ཞེས་བྱ་བ་ནི་མིང་དང་རིགས་དང་རུས་ལ་སོགས་པ་རྗེས་སུ་དྲན་པའི་རྣམ་པའོ། །གནས་དྲན་པ་ནི་ཡུལ་ཡིན་ནོ། །ཡང་ན་རྣམ་པའི་སྒྲས་སྲིད་པ་བར་མ་དོར་བརྗོད་པ་ཡིན་ཏེ། དེ་ནི་རྣམ་པ་ཙམ་ཉིད་
ཡིན་པའི་ཕྱིར་རོ། །སྔོན་གྱི་དུས་ཀྱི་གནས་ནི་ཡུལ་གྱི་སྒྲས་བརྗོད་པ་ཡིན་ནོ། །དེ་ལ་རྒྱལ་རིགས་ལ་སོགས་པའི་རིགས་ཀྱིས་བསྟན་པ་ནི་སྲིད་པ་བར་དོ་དང་བཅས་པ་དང་། སྔོན་གྱི་དུས་ཀྱི་གནས་དང་བཅས་པ་ཞེས་བྱ་བ་བསྟན་པར་འགྱུར་རོ། །འཆི་འཕོ་བ་དང་སྐྱེ་བ་ནི་འཆི་
འཕོ་དང་སྐྱེ་བ་སྟེ་དེ་ཡོངས་སུ་ཤེས་པའི་ཆེད་ཀྱི་ཤེས་པ་འཆི་འཕོ་དང་སྐྱེ་བ་ཤེས་པ་ཡིན་ལ། དེ་མངོན་སུམ་དུ་བྱེད་པ་ནི་མངོན་དུ་བྱེད་པའོ། །འཆི་བར་གྱུར་པ་ནི་འཕོ་བར་གྱུར་པའོ། །སྐྱེ་བར་གྱུར་པ་ནི་སྲིད་པ་བར་དོའི་གནས་སྐབས་ལ་རྣམ་པར་གནས་པའོ། །ཁ་དོག་སྡུག་པ་
ནི་བདེ་འགྲོར་འགྲོ་བར་རོ། །ཁ་དོག་མི་སྡུག་པ་ནི་ངན་འགྲོར་འགྲོ་བར་རོ། །དམན་པ་ཞེས་བྱ་བ་ནི་སྡིག་པ་བྱེད་པར་རོ། །གྱ་ནོམ་པ་ཞེས་བྱ་བ་ནི་བསོད་ནམས་བྱེད་པར་རོ། །ལས་ཇི་ལྟ་བ་བཞིན་དུ་ཉེ་བར་འགྲོ་བ་ཞེས་བྱ་བ་ནི་ལས་བྱས་པར་གྱུར་པའི་འབྲས་བུ་ལ་སྤྱོད་པར་རོ། །

སྐུར་པ་ནི་ཚིགས་སུ་བཅད་པ་མ་ཡིན་པ་མི་འདོད་པའི་ཚིག་གིས་གཤེ་བ་ཡིན་ནོ། །ལོག་པའི་ལྟ་བ་ལས་དང་ཆོས་ཡང་དག་པར་ལེན་པ་དེའི་རྒྱུས་ཞེས་བྱ་བ་ལ། ལས་ཡང་དག་པར་ལེན་པ་ལས་ཡང་དག་པར་ལེན་པ་བཞི་ཡོད་དེ། གནག་པ་དང་གནག་པའི་རྣམ་
པར་སྨིན་པ་ཞེས་བྱ་བ་ལ་སོགས་པའོ། །ཆོས་ཡང་དག་པར་ལེན་པ་ལ། ཆོས་ཡང་དག་པར་ལེན་པ་བཞི་ཡོད་དེ། ད་ལྟར་བདེ་བ་ལ་མ་འོངས་པ་ན་རྣམ་པར་སྨིན་པ་སྡུག་བསྔལ་བ་ཞེས་བྱ་བ་ལ་སོགས་པའོ། །ལོག་པའི་ལྟ་བས་འཇུག་པའི་ལས་ལ་དམ་བཅའ་བ་དང་། ཆོས་ལ་
དམ་བཅའ་བ་དེའི་རྒྱུས་སོ། །དེའི་རྒྱུ་ཞེས་བྱ་བ་ནི་ལོག་པའི་ལྟ་བ་དེ་ཉིད་རྒྱུར་གྱུར་པ་གང་ལ་ཡོད་པ་དེ་ནི་དེའི་རྒྱུ་ཡིན་ནོ། །དེ་ཉིད་རྐྱེན་དུ་གྱུར་པ་གང་ལ་ཡོད་པ་དེ་ནི་དེའི་རྐྱེན་ཞེས་བྱ་བའི་བྱེ་བྲག་ཡིན་ཏེ། དེ་དག་སྒྲུབ་པར་བྱེད་པའི་བྱ་བ་ཁྱད་པར་དུ་བྱེད་པ་ཡིན་ནོ། །ལུས་དང་བྲལ་ནས་ཞེས་བྱ་བ་ནི་
ཞིག་ནས་སོ། །འཆི་བའི་འོག་ཏུ་ནི་སྲོག་རྣམ་པར་ཉམས་པར་གྱུར་པའི་འོག་ཏུའོ། །ངན་སོང་ནི་ཡི་དགས་ཀྱི་འགྲོ་བའོ། །ངན་འགྲོ་ནི་དུད་འགྲོ་བའོ། །ལོག་པར་ལྟུང་བ་ནི་དམྱལ་བའི་འགྲོ་བ་སྟེ། སེམས་ཅན་དམྱལ་བ་རེ་རེར་དམྱལ་བ་དག་ཡིན་ནོ། །ངན་སོང་དང་། ངན་འགྲོ་
དང་། ལོག་པར་ལྟུང་བ་དང་། དམྱལ་བ་ནི་ངན་སོང་ངན་འགྲོ་ལོག་པར་ལྟུང་བ་སེམས་ཅན་ཞེས་བྱ་བ་དག་ཡིན་ནོ། །ལས་ཇི་ལྟ་བ་བཞིན་དུ་འགའ་ཞིག་ནི་ངན་སོང་། འགའ་ཞིག་ནི་ངན་འགྲོ། འགའ་ཞིག་ནི་ལོག་པར་ལྟུང་བ། འགའ་ཞིག་ནི་སེམས་ཅན་དམྱལ་བ་ཞེས་བྱ་བ་དེ་དག་ཏུ་སྐྱེ་
བར་འགྱུར་རོ། །བདེ་འགྲོ་ཞེས་བྱ་བ་ལ་སོགས་པ་མཛེས་པར་འགྲོ་བས་ན་བདེ་འགྲོ་སྟེ། དེར་སྐྱེ་བར་འགྱུར་རོ། །མིའི་འཇིག་རྟེན་ཡང་བདེ་འགྲོ་སྨོས་པས་བཟུང་བ་ཡིན་པ་དེའི་ཕྱིར་མཐོ་རིས་ཀྱི་འཇིག་རྟེན་སྨོས་པ་ཡིན་ལ། མཐོ་རིས་ནི་དུད་འགྲོའི་འགྲོ་བ་སྲིད་པའི་ཕྱིར་ལྷར་སྐྱེ་བར་འགྱུར་
རོ་ཞེས་སྨོས་པ་ཡིན་ནོ། །ཟག་པ་ཟད་པའི་ཞེས་བྱ་བ་ལ་སོགས་པ་ལ། ཟག་པ་ནི་འདོད་ཆགས་ལ་སོགས་པ་ཡིན་ལ་དེ་དག་ཟད་པ་ནི་སྤངས་པ་ཡིན་ནོ། །དེ་ལའམ་དེའི་ལྡོག་པར་བྱེད་པའི་ཤེས་པ་དེ་མངོན་སུམ་དུ་བྱེད་པ་ནི་མངོན་དུ་བྱེད་པའོ། །འདི་ནི་སྡུག་བསྔལ་འཕགས་པའི་

བདེན་པའོ་ཞེས་བྱ་བ་ནི་འབྲས་བུའི་རང་བཞིན་ཡིན་ལ། འདི་ནི་སྡུག་བསྔལ་ཀུན་འབྱུང་བའོ་ཞེས་བྱ་བ་ནི་རྒྱུར་གྱུར་པའི་ཕུང་པོ་ལྔའི་བདག་ཉིད་ཡིན་ནོ། །འགོག་པ་ནི་ཟད་པ་ཡིན་ལ། ལམ་ནི་ཟད་པ་ཐོབ་པར་འགྱུར་བའི་ཐབས་སུ་གྱུར་པ་ཡིན་ནོ། །འཕགས་པའི་བདེན་པའོ་ཞེས་བྱ་བ་ལ།
འཕགས་པ་དག་གིས་རང་གི་ངོ་བོའི་སྒོ་ནས་གཟིགས་པ་དེའི་ཕྱིར་འཕགས་པ་དག་ལ་དེ་དག་བདེན་པ་ཡིན་པས་ན་འཕགས་པའི་བདེན་པའོ། །ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་བྱ་བ་ནི་ཟག་པ་མེད་པའི་ཤེས་པས་དེ་ཁོ་ན་ཉིད་མཐོང་བ་ཡིན་ནོ། །ཤེས་པ་ཞེས་བྱ་བ་ནི་བར་
ཆད་མེད་པའི་ལམ་གྱིས་སོ། །མཐོང་བ་ཞེས་བྱ་བ་ནི་རྣམ་པར་གྲོལ་བའི་ལམ་གྱིས་སོ། །འདོད་པའི་ཟད་པ་ལས་སེམས་རྣམ་པར་གྲོལ་བ་ཞེས་བྱ་བ་ནི་འདོད་པའི་ཟག་པ་སྤངས་པའི་ཕྱིར་སེམས་རྣམ་པར་གྲོལ་བར་གྱུར་པ་ཡིན་ཏེ། མ་རིག་པ་མ་གཏོགས་པ་འདོད་པ་ན་སྤྱོད་པའི་ཉོན་མོངས་
པ་ཀུན་དུ་འཆིང་བ་དང་བཅས་པ་ནི་འདོད་པའི་ཟག་པའོ། །མ་རིག་པ་དོར་བའི་གཟུགས་དང་གཟུགས་མེད་ན་སྤྱོད་པའི་ཉོན་མོངས་པ་ཀུན་དུ་འཆིང་བ་དང་བཅས་པ་ནི་སྲིད་པའི་ཟག་པའོ། །ཁམས་གསུམ་པའི་མ་རིག་པ་ནི་མ་རིག་པའི་ཟག་པའོ། །རྣམ་པར་གྲོལ་བ་ལ་ཞེས་བྱ་བ་ནི་ཉོན་
མོངས་པའི་འཆིང་བ་ལས་རྣམ་པར་གྲོལ་བའོ། །རྣམ་པར་གྲོལ་ལོ་ཞེས་བྱ་བ་ནི་ཉོན་མོངས་པ་དང་བྲལ་བའོ་ཞེས་བྱ་བ་ནི་ཟད་པ་དང་མི་སྐྱེ་བ་ཤེས་པའོ། །མཐོང་བ་ནི་མི་སློབ་པའི་ཡང་དག་པའི་ལྟ་བའོ། །ཚོང་དུས་དང་། ཚོང་ཁང་དང་བྲལ་བའི་སྐྱེ་བོའི་ཚོགས་ཀྱི་གནས་ནི་གྲོང་
ཡིན་ལ། ཚོང་དུས་དང་ཚོང་ཁང་དང་ལྡན་པ་ནི་གྲོང་འདབ་ཡིན་ནོ། །གཏིང་ཟབ་པ་ནི་དཀའ་བའོ། །ཤིན་ཏུ་དངས་པ་ཉིད་ཀྱི་ཕྱིར་གསལ་བའོ། །རྡུལ་རགས་པ་མེད་པའི་ཕྱིར་རྣམ་པར་དངས་པའོ། །རྡུལ་ཕྲ་མོ་ཡང་མེད་པའི་ཕྱིར་རྙོག་པ་མེད་པའོ། །ཆུ་ལ་རྒྱུ་བའི་སྲོག་ཆགས་ཀྱི་ཡན་
ལག་དང་འབྲེལ་བ་ཅན་ནི་ཕྱིས་ཡིན་ལ། དེ་དག་ཁོ་ནའི་རུས་པའི་དུམ་བུ་ནི་ཤམ་བུ་ཀ་ཡིན་ནོ། །ཐབས་མ་ཡིན་པ་བཞི་ཞེས་བྱ་བ་ལ་སོགས་པ་ལ་ཐབས་སུ་གྱུར་པ་མ་ཡིན་པ་ནི། བླ་ན་མེད་པའི་རིག་པ་དང་རྐང་པར་ལྡན་པ་དེ་དག་སྐྱེད་པར་བྱེད་པར་ཐབས་སུ་གྱུར་པ་མ་ཡིན་པ་ཞེས་བྱ་བའི་

ཐ་ཚིག་གོ། །ཁ་ཅིག་ཅེས་བྱ་བ་ནི་འགའ་ཞིག་གོ། །སོང་སྟེ་ཞེས་བྱ་བ་ནི་ཡང་དག་པར་སོང་ནས་སོ། །ཡལ་ག་དང་ལོ་མའི་གནས་ཁང་ནི་སྤྱིལ་བུའོ། །རྩ་བ་དང་འབྲས་བུའི་ཁ་ཟས་ཀྱིས་འཚོ་བའི་སྒོ་ནས་རིག་པ་དང་རྐང་པར་ལྡན་པ་འདོད་དུ་ཟིན་ཀྱང་རྙེད་པར་མི་འགྱུར་
རོ། །ཇི་སྙམ་དུ་སེམས་ཞེས་བྱ་བའི་སྒྲ་ནི་འདྲི་བ་ལ་འཇུག་པ་ཡིན་ཞིང་སྙམ་སེམས་པ་ནི་ཤེས་ཤིང་ཀུན་ནས་མཐོང་བ་ལ་སོགས་པའོ། །དེར་ཞེས་བྱ་བ་ནི་རྩ་བ་དང་འབྲས་བུའི་ཟས་ཟ་བའི་ཐབས་ལ་ཁྱོད་སློབ་དཔོན་དང་བཅས་ཤིང་སློབ་དཔོན་དང་ལྷན་ཅིག་པར་མཐོང་བ་སྟེ། རྩ་བ་དང་འབྲས་བུའི་
ཟས་ཞེས་བྱ་བའི་ཐབས་ལ་རིག་པ་དང་རྐང་པར་ལྡན་པའི་བདག་ཉིད་སློབ་དཔོན་དང་ལྷན་ཅིག་ཏུ་གནས་པར་མཐོང་སྙམ་མོ་ཞེས་བྱ་བའི་ཐ་ཚིག་གོ། །རྩ་བ་དང་འབྲས་བུའི་ཁ་ཟས་ཀྱིས་འཚོ་བའི་སྒོ་ནས་རིག་པ་དང་ཞབས་སུ་ལྡན་པར་མངོན་པར་ཁོང་དུ་ཆུད་པས་རྩ་བ་དང་འབྲས་བུའི་ཟས་བཏང་
ཞིང་ཡོངས་སུ་སྤངས་ནས་ལོ་མའི་ཟས་འདི་ནི་འགའ་ཞིག་ཏུ་རིག་པ་དང་རྐང་པར་ལྡན་པ་མངོན་སུམ་དུ་བྱེད་པའི་ཐབས་སུ་བསྒྲུབ་པར་འགྱུར་རོ། །ཤིང་ལ་སོགས་པའི་འདབ་མ་འཇམ་པོ་ལ་ལོ་མའི་སྒྲས་བསྟན་པ་ཡིན་ནོ། །གང་གི་ཚེ་ལོ་མའི་ཟས་ཀྱིས་ཀྱང་རིག་པ་དང་རྐང་པར་ལྡན་པ་མངོན་
སུམ་དུ་བྱེད་པར་མི་ནུས་པ་དེའི་ཚེ་ངེས་པ་མེད་པར་གྱུར་པས་ལོ་མའི་ཟས་དེ་ཡང་ཡོངས་སུ་སྤངས་ནས་སྔགས་ཀྱི་གཞུང་ལ་གཞོལ་བར་འགྱུར་རོ། །གཞུང་ནི་ཚིག་ཡིན་ནོ། །འབྲེལ་པ་ནི་སྔ་ཕྱི་འགལ་བ་མེད་པར་རྣམ་པར་གཞག་པའི་སྒོ་ནས་རྣམ་པར་གཞག་པ་ཡིན་ནོ། །འགའ་ཞིག་
ཏུ་རིག་པ་དང་རྐང་པར་ལྡན་པ་མངོན་སུམ་དུ་བྱེད་པ་ལ་འདི་ཐབས་སུ་འགྱུར་རོ་ཞེས་བྱ་བའི་བསམ་པ་འདིས་སྦྱོར་བ་ཡིན་ནོ། །གང་གི་ཚེ་ཐབས་དེས་ཀྱང་ཁོང་དུ་ཆུད་པར་མ་གྱུར་པ་དེའི་ཚེ་གྲོང་གི་ནང་སྟེ་སྐྱེ་བོ་ཆེན་པོའི་ནང་དུ་ལྷགས་པ་སྟེ། འོངས་པའམ་ཕྱིན་པར་གྱུར་ནས་སོ། །སྦྱིན་པ་
བྱིན་ཞིང་ཞེས་བྱ་བ་ནི་སྦྱིན་པ་ལས་བྱུང་བའི་བསོད་ནམས་བྱས་པའོ། །བསོད་ནམས་བྱས་ཏེ་ཞེས་བྱ་བ་ནི་ཚུལ་ཁྲིམས་ལས་བྱུང་བའི་བསོད་ནམས་བྱས་པའོ། །འོངས་ཤིང་འོངས་པའི་ཞེས་བྱ་བ་ནི་ཟློས་པའི་ཚིག་གཉིས་ཡིན་ཏེ། འོངས་ནས་རིང་དུ་ལོན་པ་དག་ལས་གང་དག་ཕྱིས་འོངས་

པ་དེ་ནི་འོངས་ཤིང་འོངས་པ་ཡིན་ནོ། །ནུས་པ་ནི་རྫས་ཀྱི་ནུས་པ་ཡིན་ལ། སྟོབས་ནི་སྤྲོ་བ་དང་ལྡན་པ་ཡིན་ནོ། །ཁ་ཅིག་ནི་རྫས་ཡོད་ཀྱང་སྦྱིན་པའི་གནས་ལ་བསྙེན་བཀུར་གྱི་བྱ་བ་བྱེད་པའི་ལུས་ཀྱི་སྤྲོ་བ་དེ་ལ་ཡོད་པ་མ་ཡིན་ལ། ཁ་ཅིག་ལ་ནི་བྱེད་པར་ནུས་པ་དང་བཅས་པ་གཉི་ག་ཡོད་པ་དེ་བས་ན།
ནུས་པ་ཇི་ལྟ་བ་སྟོབས་ཇི་ལྟ་བ་བཞིན་དུ་ཞེས་བསྟན་པ་ཡིན་ནོ། །ཐབས་མ་ཡིན་པ་ཞེས་བྱ་བ་ལ་སོགས་པ་ལ་རིག་པ་དང་རྐང་པར་ལྡན་པའི་ཐབས་མ་ཡིན་པ་བཞི་པོ་གང་ཡིན་པ་དེ་དག་ལ་ཡང་ཁྱོད་སློབ་དཔོན་དང་བཅས་པར་གནས་ཤིང་འཇུག་པ་མ་ཡིན་ནོ། ཅིའི་ཕྱིར་ཡང་ཁྱོད་ཀྱིས་བླ་ན་
མེད་པའི་རིག་པ་དང་རྐང་པར་ལྡན་པ་མང་པོ་དང་ལྡན་པའི་ཤཱཀྱ་ལ་དམན་པར་སྨྲ་བའི་སྒོ་ནས་ཀུན་དུ་སྤྱོད་པར་བྱེད་དོ། །བྲམ་ཟེའི་དྲང་སྲོང་ཞེས་བྱ་བ་ལ་སོགས་པ་ལ། བྲམ་ཟེའི་རིགས་ལས་རབ་ཏུ་བྱུང་ཞིང་དཀའ་ཐུབ་གྲུབ་པ་ལ་བྲམ་ཟེའི་དྲང་སྲོང་ཞེས་བྱའོ། །རབ་ཏུ་འཇུག་པར་བྱེད་པ་ནི་འཇུག་
པར་བྱེད་པའི་ངང་ཚུལ་ཅན་ཡིན་ནོ། །བསྟོད་པ་ཞེས་བྱ་བ་ནི་བསྔགས་པའམ་བསྟོད་པ་དང་འབྲེལ་པའི་སྔགས་ཀྱི་ཚིག་དག་ཡིན་ནོ། །དབྱངས་ཞེས་བྱ་བ་ནི་ཚིག་གི་དབྱེ་བའི་སྒོ་ནས་ཀློག་པའོ། །ཡང་དག་པར་སྦྱོར་བ་ཞེས་བྱ་བ་ནི་འབྲེལ་པར་རྣམ་པར་འཇོག་པའི་སྒོ་ནས་རྣམ་པར་འཇོག་
པ་ཡིན་ནོ། །རྗེས་སུ་གླུར་ལེན་པ་ཞེས་བྱ་བ་ནི་ཡི་གེའི་སྒོ་ནས་དེ་དང་འདྲ་བར་ཀློག་པའོ། །རྗེས་སུ་རྗོད་པར་བྱེད་པ་ནི་དོན་གྱི་སྒོ་ནས་སོ། །གྲོང་ཁྱེར་ན་གནས་པ་ཞེས་བྱ་བ་ལ། ཁྱད་པར་ཇི་ལྟ་བུ་དང་ལྡན་པའི་གྲོང་ཁྱེར་ཞེ་ན། འོབས་ཀྱིས་བསྐོར་བ་ཞེས་བྱ་བ་ལ་སོགས་པ་སྨོས་ཏེ།
ལེགས་པར་བརྐོས་པའི་འོབས་སུ་བརྐོས་པས་ཀུན་ནས་བསྐོར་བའི་གྲོང་ཁྱེར་གང་དག་ཡིན་པ་དེ་དག་ནི་འོབས་ཀྱིས་བསྐོར་བའོ། །རྩང་བཙུགས་པ་ནི་འོབས་ཀྱི་འོག་ཏུ་རྣམ་པར་འཁྲུགས་ཤིང་མང་པོ་བཙུགས་ཤིང་ཕ་རོལ་གྱི་དཔུང་བཟློག་པར་བྱ་བའི་དོན་དུ་ལྕགས་ཀྱི་གཟེ་མ་བྱས་ནས་གང་གི་
ཚེ་ཕ་རོལ་པོའི་སྟོབས་གྲོང་ཁྱེར་དང་ཐག་ཉེ་བར་འོང་བར་འདོད་པ་དེའི་ཚེ་ལྕགས་ཀྱི་གཟེ་མ་ས་ལ་གཏོར་བ་དེས་ཕ་རོལ་གྱི་སྟོབས་བཟློག་པར་འགྱུར་བ་དང་། རྩང་གཟེ་མ་དང་ལྡན་པ་དག་ཕ་རོལ་པོའི་སྟོབས་འཇུག་པའི་གེགས་བྱེད་པའི་ཕྱིར་གྲོང་ཁྱེར་ཉིད་འགོག་པར་བྱེད་པའམ། འོབས་

ཀྱིས་ཀུན་ནས་བསྒགས་པ་ཉིད་ཀྱི་ཕྱིར་འགོག་པར་བྱེད་པའི་གྲོང་ཁྱེར་ཡིན་ནོ། །ཕྲག་པར་གཟར་ཞིང་ཞེས་བྱ་བ་ལ་སོགས་པའི་བཤད་པ་ནི་སྔ་མ་དང་འདྲའོ། །བྲམ་ཟེའི་ཁྱེའུའི་ཚོགས་ཀྱིས་མདུན་དུ་བདར་ནས་ཞེས་བྱ་བ་ནི་སྔོན་དུ་འགྲོ་བས་མཆོད་པ་ཡིན་ནོ། །སྤྱི་བོ་
བཅིངས་པ་ཞེས་བྱ་བ་ལ་སོགས་པ་ལ། སྤྱི་བོ་བཅིངས་པ་ནི་གཙུག་ཏོར་གྱི་རྣམ་པ་ལ་སོགས་པས་སྐྲའི་བཀོད་པ་མཛེས་པར་བྱས་པའོ། །ལག་པ་ཀུ་བའི་སྤུ་ཅན་ཞེས་བྱ་བ་ལ། ཇི་ལྟར་ཀུ་བ་གཞོན་ནུ་ལུང་ལས་མ་གཏོགས་པ་བ་སྤུ་ཕྲ་མོ་ཡོད་པ་དེ་བཞིན་དུ་དེ་དག་གི་ལག་པ་དག་ཀྱང་ངོ་། །ལྟོ་
དང་འདྲ་བར་ཀུན་ནས་ཟླུམ་པ་དང་། མཐོ་ལ་མི་ལྷོད་པའི་ནུ་མ་གང་ལ་ཡོད་པ་དེ་ནི་ལྟོ་དང་འདྲ་བའི་ནུ་མ་ཅན་ནོ། །བསྐུ་བ་ནི་དྲིའི་རྫས་སམ་འབྲུ་མར་གྱིས་ལུས་བྱུགས་པའོ། །དཔུང་པའི་རྒྱན་ནི་དཔུང་རྒྱན་ནོ། །དོ་ཤལ་ནི་མགུལ་རྒྱན་གྱི་བྱེ་བྲག་གོ། །ཤིན་ཏུ་བརྒྱན་པ་ནི་ལེགས་པར་ཀླུབས་པ་
ཡིན་ནོ། །རྐང་པ་བརྐྱང་སྟེ་ཞེས་བྱ་བ་ནི་རྐང་བ་རྐྱོང་བར་བྱེད་པས་སོ། །ཉེས་པ་དག་ཅེས་བྱ་བ་ནི་དྲང་སྲོང་རྙིང་པའི་ཆོས་ལས་བསྐྱོད་པ་དེའི་ཕྱིར་མཁན་པོའི་ཉེས་པ་ཞེས་བྱའོ། །རྩིག་པས་བསྒྲིབས་པའམ་ཞེས་བྱ་བ་ལ། ང་རྒྱལ་གྱིས་མངོན་སུམ་དུ་སྦྱིན་པར་མི་ནུས་པ་དག་དང་རྗེས་སུ་མཐུན་པའི་
སྒྲུབ་པ་མི་བྱེད་པ་དེ་བས་ན་རྒྱལ་པོ་བདག་གི་མདངས་ཀྱིས་གནོད་པར་མ་གྱུར་ཅིག་སྙམ་པ་དེའི་ཕྱིར་གོས་ཀྱིས་བསྒྲིབས་ཤིང་བར་དུ་གཅད་པ་ཡིན་ནོ། །ཤེས་པ་ཞེས་བྱ་བ་ནི་རྣམ་པར་ཤེས་པ་སྟེ། སྔ་ཕྱི་སྤྱོད་པ་ལ་མཁས་པའོ། །ལོངས་སྤྱོད་ལ་བཙོས་པའི་ཟས་ཡོངས་སུ་ལོངས་སྤྱོད་པའི་སྙིང་
པོ་ཉིད་ཡིན་པ་དེའི་ཕྱིར་བཙོས་པ་སློང་བ་ཞེས་བསྟན་ཏོ། །ཤིན་ཏུ་ང་རྒྱལ་བ་ཉིད་ཀྱིས་འདིར་ཉེས་པ་ཡིན་ནོ། །དཔྱོད་པར་བྱོས་ཤིག་ཅེས་བྱ་བ་ནི་ངེས་པར་དཔྱད་པར་བྱ་བའོ། །ལྐོག་ཏུ་བྱ་བ་ནི་རྒྱལ་པོས་སྟོང་པ་གཙང་བ་གྱ་ནོམ་པའོ། །སྨྲས་པ་ནི་ཡི་གེའི་སྒོ་ནས་སོ། །སྨྲ་བ་ནི་དོན་གྱི་བདག་
ཉིད་ཀྱི་སྒོ་ནས་སོ། །རྒྱལ་པོར་གྱུར་པའམ་ཞེས་བྱ་བ་ནི་རྒྱལ་པོར་དབང་བསྐུར་བ་ཐོབ་པའོ། །རྒྱལ་པོ་ཉིད་དུ་ཞུགས་པར་འགྱུར་བའམ་ཞེས་བྱ་བ་ནི་དབང་བསྐུར་དུ་རུང་བར་སྐྱེས་པའོ། །དྲང་སྲོང་ཉིད་དུ་ཞུགས་པར་འགྱུར་རམ་ཞེས་བྱ་བ་ནི་དྲང་སྲོང་གི་ལམ་ཐོབ་པར་གྱུར་པའོ། །ཤིན་ཏུ་

ཞེས་བྱ་བ་ནི་ཤིན་ཏུ་ཁྱད་པར་དུ་ལེགས་པར་རྩེ་གཅིག་ཏུ་གཏོད་པའི་སྒོ་ནས་ཡིད་ལ་བྱེད་པའོ། །དོན་དང་ཞེས་བྱ་བ་ནི་མངོན་པར་འདོད་པའི་དོན་ཐོབ་པའི་ཕྱིར་རོ། །ཕན་པ་དང་ཞེས་བྱ་བ་ནི་འཇིག་རྟེན་ཕ་རོལ་གྱི་ཕུན་སུམ་ཚོགས་པའི་ཕྱིར་རོ། །བདེ་བའི་ཕྱིར་ཞེས་བྱ་བ་ནི་ཐར་པའི་བདེ་བ་ཐོབ་པའི་
ཕྱིར་རོ། །འདོད་ཅིང་ཞེས་བྱ་བ་ནི་ཨེ་མའོ་བདག་གིས་མཚན་ཉིད་ཀྱིས་རང་གི་ངོ་བོ་ཤེས་པར་བྱའོ་ཞེས་དེ་ལྟར་འདོད་པ་དང་བཅས་པར་འགྱུར་བའོ། །ཐེ་ཚོམ་དུ་གྱུར་པས་ཞེས་བྱ་བ་ནི་ཅི་འདི་ལ་མཚན་དེ་གཉིས་ཡོད་དམ་མེད་ཅེས་སོ། །གསང་བའི་ཕྱོགས་ཀྱི་སྦ་བ་ནི་གསང་བའི་སྦ་བ་ཡིན་ལ།
སྦུབས་སུ་ནུབ་པ་ནི་ཞུགས་པའམ་གཡོགས་པས་སྦུབས་སུ་ནུབ་པ་སྟེ། སྦུབས་སུ་ནུབ་པ་ཡང་དེ་ཡིན་ལ། གསང་བའི་སྦ་བ་ཡང་ཡིན་པས་ན་གསང་བའི་སྦ་བ་སྦུབས་སུ་ནུབ་པའོ། །ཡངས་པ་ཉིད་ཀྱི་ཕྱིར་དང་སྲབ་པ་ཉིད་ཀྱི་ཕྱིར་ལྗགས་རིང་ལ་སྲབ་པའོ། །འདིས་སྐྱེས་བུ་ཆེན་པོར་མཚོན་
པར་བྱེད་པ་ཡིན་པས་ན་མཚན་ཏེ། ཞབས་ལེགས་པར་གནས་པ་ཡིན་ནོ། །མིའི་རྒྱུད་དུ་འཁྲུངས་པ་ཉིད་ཀྱི་ཕྱིར་མི་མཆོག་ཅེས་བྱ་བ་ཡིན་ཏེ། བཅོམ་ལྡན་འདས་ནི་འཁོར་བའི་ནང་དུ་འདུས་པའི་སེམས་ཅན་མ་ལུས་པའི་མཆོག་ཏུ་གྱུར་པ་ཡིན་ནོ། །བུད་མེད་ལྟ་བུ་ཞེས་བྱ་བའི་དབང་
དུ་བྱས་ནས། ལྕེ་བུད་མེད་དང་འདྲ་བ་ཞེས་བྱ་བ་ཡིན་ནོ། །བརྐྱང་མཛད་པ་ཞེས་བྱ་བ་ལ་ཞལ་ནས་ཕྱུང་བར་མཛད་ནས་སོ། །བདག་གི་ཐེ་ཚོམ་བསལ་བ་དོར་བར་རོ། །སྙན་པར་གྲགས་པ་ཞེས་བྱ་བ་ནི་གྲགས་པས་འཁོར་བ་མ་ལུས་པར་གྱུར་པའོ། །དཀའ་བས་རྙེད་པར་
ནུས་པའི་ཕྱིར་རྙེད་པར་ཤིན་ཏུ་དཀའ་བའོ། །རྒྱུ་མཚན་ཞེས་བྱ་བ་ནི་རྫུ་འཕྲུལ་གྱི་མཐུ་ལས་བྱུང་བའི་རྟགས་ཡིན་ནོ། །དེ་ལ་གསལ་བ་ནི་མ་གཡོགས་པར་ཏེ། གསང་བའི་སྦ་བ་སྦུབས་སུ་ནུབ་པར་མཐོང་བར་གྱུར་པའོ། །རྗེས་སུ་ཡི་རངས་ཏེ་ཞེས་བྱ་བ་ནི་ཚིག་གིས་སོ། །མངོན་
པར་བསྟོད་པ་ཞེས་བྱ་བ་ནི་སེམས་ཀྱིས་སོ། །ཁྱིམ་གྱི་མཆོག་ཅེས་བྱ་བ་ནི་ཁང་པའི་མཆོག་གོ། །མངོན་པར་འདོད་པའི་བྱ་བ་བྱེད་པའི་སྒོ་ནས་འདུས་ཤིང་རྟེན་སོ་སོར་འཇོག་པའི་སྒོ་ནས་འཁོད་པ་ཡིན་ནོ། །མང་དུ་ཞེས་བྱ་བ་ནི་བྲམ་ཟེའི་ཁྱེའུ་ཨམྦསྟ་འོང་བ་ལ་སྡོད་པའོ། །ཕྱག་

འཚལ་ཏེ་ཞེས་བྱ་བ་ནི་ཚིག་གི་སྒོ་ནས་ཕྱག་བྱས་ནས་སོ། །ཇི་ལྟར་བརྗོད་པ་ནི་ཇི་ལྟར་འཇུག་པ་དང་། ཇི་ལྟར་རབ་ཏུ་འཇུག་པར་བྱེད་པའོ། །ཁྲོས་ཤིང་ཞེས་བྱ་བ་ནི་ཐོག་མར་ཁྲོས་པའི་ཕྱིར་ཁྲོས་པའོ། །འཁྲུགས་པ་ནི་ལུས་འགྱུར་བའི་ཕྱིར་རོ། །གཏུམ་པ་ནི་ངག་
གིས་འགྱུར་བའི་ཕྱིར་རོ། །ཡི་མ་རངས་པ་ཞེས་བྱ་བ་ནི་རྒྱུན་གྱིས་སེམས་རངས་པ་མེད་པའོ། །ཨེ་མའོ་ཕོ་ཉ་བྱེད་པ་ཞེས་བྱ་བ་ནི་ཁྱོད་ཀྱིས་ཕོ་ཉའི་ལས་ཆེན་པོ་བྱས་པ་ཡིན་ཏེ་ངས་གཞན་ཁོ་ན་སྨྲས་པ་ཁྱོད་ཀྱིས་གཞན་ཁོ་ན་བྱས་པ་ཡིན་ནོ། །མི་འདོད་དུ་ཟིན་ཀྱང་མངོན་པར་འདོད་པའི་གནས་སུ་
མངག་གཞུག་ལ་འགྲོ་བར་བྱེད་པ་གང་ཡིན་པ་མངག་གཞུག་པའོ། །ང་ཡང་ངན་སོང་དུ་ལྟུང་ངོ་ཞེས་བྱ་བ་ནི་གང་གི་ཕྱིར་ཁྱོད་དེ་འདྲ་བའི་དྲང་སྲོང་ཆེན་པོ་ལ་བསྙེན་བཀུར་ལ་སྦྱོར་བར་མི་བྱེད་པས་ང་ཡང་སེམས་ཅན་དམྱལ་བར་ལྟུང་བར་འགྱུར་རོ། །དེ་དང་དེར་ཞེས་བྱ་བ་ནི་སྨད་པའི་ཟློས་པའི་ཚིག་
གཉིས་ཡིན་ནོ། །བདག་ཀྱང་ཚོད་བཟུང་བར་གྱུར་ཏོ་ཞེས་བྱ་བ་ལ། ཁོ་བོ་སྐབས་ཐམས་ཅད་དུ་ཉེས་པ་དང་ལྡན་པར་བྱེད་པའོ། །གུས་པ་མངོན་དུ་སོང་བའི་ལུས་དང་། ངག་གི་འཇུག་པ་ནི་བསྙེན་བཀུར་ཡིན་ནོ། །བཅའ་བར་བྱ་བ་ནི་རྩ་བ་ལ་སོགས་པ་ལྔ་ཡིན་ལ། བཟའ་བར་བྱ་བ་ནི་ཁུར་བ་
ལ་སོགས་པ་ལྔ་ཡིན་ནོ། །ཡི་རངས་པ་ཞེས་བྱ་བ་ནི་བཤད་མ་ཐག་པའི་ཚིག་གིས་སྤྲོ་བར་མཛད་པའོ། །མཆོད་སྦྱིན་ནང་ན་སྦྱིན་སྲེག་མཆོག །ཅེས་བྱ་བ་ལ་སོགས་པ་ལ། མེ་ལ་སྦྱིན་སྲེག་སྦྱིན་པ་ནི་མེའི་སྦྱིན་སྲེག་ཡིན་ལ། མཆོད་སྦྱིན་གང་དག་ལ་མེའི་སྦྱིན་སྲེག་གི་ཁ་ཡོད་པ་དེ་དག་ནི་སྦྱིན་
སྲེག་ཁ་ཡིན་ཏེ། མེ་ནི་ལྷའི་ཁ་ཡིན་ནོ་ཞེས་བྱ་བའི་ཚིག་དེས་ལྷའི་ཆེད་དུ་ཅུང་ཟད་མེ་ལ་སྦྱིན་སྲེག་བྱས་པ་དེ་ཐམས་ཅད་ལྷའི་ཁར་འཇུག་པ་ཡིན་ནོ་ཞེས་འཇིག་རྟེན་ན་རབ་ཏུ་གྲགས་པ་ཡིན་ནོ། །ཡང་ན་མཆོག་ནི་གཙོ་བོར་གྱུར་པ་ཡིན་ལ། མཆོད་སྦྱིན་ནི་གཏོང་མཆོད་ཡིན་ཏེ། གང་བསོད་
ནམས་ཀྱི་དོན་དུ་ལྷའི་ཆེད་དུ་སྦྱིན་པར་བྱའོ། །རིག་བྱེད་ཐམས་ཅད་ཀྱི་ནང་ན་སྐྱོད་བཅས་ཀྱི་རིག་བྱེད་གཙོ་བོར་གྱུར་པ་ཡིན་ནོ། །གང་དེ་དག་གི་ནང་ན་རྒྱལ་པོ་དེ་འདི་མཆོག་སྟེ། བསོད་ནམས་དང་བདག་པོའི་སྒོ་ནས་གཙོ་བོར་གྱུར་པ་ཡིན་ནོ། །རྒྱུ་སྐར་ཐམས་ཅད་ཀྱི་ནང་ན་ཟླ་བ་ནི་གདུང་

ཞིང་གསལ་བར་བྱེད་པའི་ཕྱིར་གསལ་བྱེད་དེ། དེ་དག་ཐམས་ཅད་ཀྱི་ནང་ན་ཉི་མ་ཁོ་ན་དཀྱིལ་འཁོར་དང་གསལ་བའི་སྒོ་ནས་མཆོག་སྟེ། གཙོ་བོར་གྱུར་པ་ཡིན་ནོ། །སྟེང་དུ་འོག་མིན་གྱི་མཐར་ཐུག་པ་ནས་ཐད་ཀར་འཇིག་རྟེན་གྱི་ཁམས་ཀྱི་མཐར་ཐུག་པ་དང་། འོག་ཏུ་རླུང་གི་དཀྱིལ་འཁོར་གྱི་བར་
དུའོ། །ཇི་སྙེད་འགྲོ་བར་འགྲོ་བ་དག །ཅེས་བྱ་བ་ལ། ཇི་སྙེད་འགྲོ་བའི་རྣམ་པའམ། སྲོག་ཆགས་རྒྱུ་བའི་བར་དུ་འཇུག་པའོ། །འཇིག་རྟེན་ལྷ་དང་བཅས་པའི་ཞེས་བྱ་བ་ནི་ལྷ་དང་བཅས་པའི་འཁོར་མ་ལུས་པ་དག་གིས་ཡང་དག་པར་རྫོགས་པའི་སངས་རྒྱས་ནི་མཆོག་དང་གཙོ་བོར་གྱུར་པ་ཡིན་ཏེ།
དཔེར་ན་སྦྱིན་སྲེག་ལ་སོགས་པ་མཆོད་སྦྱིན་ལ་སོགས་པའི་ནང་དུ་གཙོ་བོར་གྱུར་པ་ཡིན་པ་དེ་བཞིན་དུ། བཅོམ་ལྡན་འདས་ནི་འགྲོ་བ་ཐམས་ཅད་ཀྱི་གཙོ་བོར་གྱུར་པ་དེའི་ཕྱིར་མཆོད་པ་སྟེ། གང་གི་ཕྱིར་བཅོམ་ལྡན་འདས་ཀྱི་མཆོད་པ་ནི་ཚད་མེད་པ་དང་། འབྲས་བུ་མེད་པ་མ་ཡིན་པ་དང་།
འདོད་པའི་འབྲས་བུ་ཅན་ཡིན་བས་ན་རྟག་ཏུ་མཆོད་པར་བྱ་བ་ཡིན་ནོ། །ཏིལ་དྲུས་མ་དང་འབྲས་ཀྱི་བག་ཕྱེ་བསྲེས་པ་ལས་སྲབ་མོར་བྱས་ཤིང་མར་གྱི་ནང་དུ་བསྐོལ་བའི་ཟས་ཀྱི་བྱེ་བྲག་ནི་ཁུར་བ་ཡིན་ནོ། །སེམས་མཉེས་པར་བགྱིད་དམ་ཞེས་བྱ་བ་ནི་ཚུལ་མཐུན་པའི་སྒྲུབ་པས་སེམས་དང་རྗེས་
སུ་མཐུན་པར་འགྱུར་བའོ། །ཆོས་འདོད་པ་ཞེས་བྱ་བ་ནི་ཆོས་ལ་གུས་པ་དང་བཅས་པའོ། །བྱིས་པ་སྟེ་ཞེས་བྱ་བ་ལ་སོགས་པ་ལ། ལུང་ཐོས་པ་ལ་སོགས་པ་དང་བྲལ་བ་ཉིད་ཀྱི་ཕྱིར་བྱིས་པའོ། །སྐབས་ནི་གནས་སྐབས་ཡིན་ཏེ། སྐབས་ཤེས་པའི་ཕྱིར་སྐབས་འཚལ་བ་ཡིན་ལ།
སྐབས་འཚལ་བ་མ་ཡིན་པ་ནི་སྐབས་མ་འཚལ་བའོ། །དེ་ལྟར་ནི་ངས་འདི་ལྟར་སོང་ལ་བཅོམ་ལྡན་འདས་ཀྱི་མི་ཆེན་པོའི་མཚན་དག་ཡང་དག་པར་བསྟན་པའི་སྐབས་གཞན་ཁོ་ནར་གྱུར་པ་སྨྲས་པ་ཡིན་གྱི། འདི་ལྟར་ངས་བསྙེན་བཀུར་མི་བྱེད་པ་ནི་མ་ཡིན་པ་དེ་བས་ན། དེས་བསྙེན་བཀུར་
མ་བྱས་པ་དེའི་ཕྱིར་དེ་ནི་སྐབས་མི་ཤེས་པ་ཡིན་ནོ། །སྲབ་སྐྱོགས་ཞེས་བྱ་བ་ལ་སོགས་པ་ལ། རྟ་བཟློག་པའི་ཐབས་སུ་གྱུར་པ་ནི་སྲབ་སྐྱོགས་ཡིན་ལ། དེ་གཏོང་བ་ནི་འཕྲལ་དུ་ཡོངས་སུ་སྤོང་བའོ། །བསྒྲེང་བ་ནི་གྱེན་དུ་བསྒྲེང་བར་བྱེད་པའོ། །གནོད་པ་ཉུང་ངམ་ཞེས་བྱ་བ་ལ་སོགས་པ་ལ།

གནོད་པ་ནི་ཕྱི་རོལ་གྱི་རྣམ་པར་འཚེ་བས་གཟིར་བའོ། །ཁ་ན་མ་ཐོ་བ་ནི་ལུས་ལས་བྱུང་བའི་ནད་ཀྱིས་གཟིར་བའོ། །མི་བདེ་བ་ནི་ཡིད་སྐྱོ་བར་གྱུར་པའི་ནད་དོ། །བསྐྱོད་པ་ཡང་བ་ནི་བྱ་བ་ལ་ལུས་ཡང་བ་ཉིད་དོ། །འཚོ་བ་ནི་བསོད་སྙོམས་ཀྱི་སྒོ་ནས་གནས་པར་གྱུར་པའོ། །སྟོབས་
ནི་འཚོ་བའི་འབྲས་བུ་ནུས་པ་ཉིད་དོ། །བདེ་བ་ནི་ལུས་ཀྱིའོ། །རེག་པར་གནས་པ་ནི་མངོན་པར་དགའ་བ་དང་བཅས་པས་གནས་པའོ། །ཕུད་པ་ནི་ཡོངས་སུ་དོར་བའོ། །གོས་བགོས་པ་ཞེས་བྱ་བ་ལ་སོགས་པ་ལ། རྗེས་སུ་རེག་པ་ནི་རེག་པར་བྱེད་པའོ། །དོ་ཀེར་ནི་སྐྲ་གཙུག་ཕུད་དུ་བཅིངས་པའོ། །
གྲགས་པ་ལས་རྙེད་པ་ཞེས་བྱ་བ་ནི་ཐོབ་པར་གྱུར་པ་སྟེ། དེ་དག་ནི་རིགས་ཐམས་ཅད་ཀྱི་མཆོག་ཏུ་གྱུར་པ་ཡིན་ནོ། །མཉམ་པ་དེས་ལོངས་སྤྱོད་དག་གི་བགོ་བཤའ་བྱའོ་ཞེས་བྱ་བ་དེ་ལྟ་བུ་ནི་གྲགས་པ་ལས་རྙེད་པ་དག་ཡིན་ནོ། །གྲགས་པ་ཁོ་ནས་ཡོངས་སུ་ལོངས་སྤྱོད་པར་བྱེད་དོ་ཞེས་བྱ་བ་ལ། རིགས་
གཞན་ལ་ཕྱག་བྱས་པ་དེའི་ཚེ་བདག་ལ་སྙན་པར་མི་འགྱུར་རོ་སྙམ་པ་དེས་གཞན་གཡོའི་སྒོ་ནས་ཕྱག་བྱེད་པ་ཡིན་ནོ། །ཤིན་ཏུ་ང་རྒྱལ་ཅན་ཞེས་བྱ་བ་ནི་ལྷག་པའི་ང་རྒྱལ་དང་ལྡན་པའོ། །སངས་རྒྱས་ཞེས་བྱ་བ་ལ་སོགས་པ་ལ། སྦྱིན་པ་དང་ལྡན་པའི་གཏམ་ནི་སྦྱིན་པའི་གཏམ་མོ། །ཚུལ་ཁྲིམས་
ཀྱི་ཕན་ཡོན་གསལ་བར་བྱེད་པའི་གཏམ་ནི་ཚུལ་ཁྲིམས་ཀྱི་གཏམ་མོ། །མཐོ་རིས་ཀྱི་བསྔགས་པ་བརྗོད་པའི་གཏམ་ནི་མཐོ་རིས་དང་རྗེས་སུ་མཐུན་པའི་གཏམ་མོ། །འདོད་པའི་ཡོན་ཏན་ལྔའི་རོ་མྱོང་བ་གསལ་བར་བྱེད་པའི་གཏམ་ནི་རོ་མྱོང་བའི་གཏམ་ཡིན་ཏེ། ཇི་སྐད་དུ་གལ་ཏེ་བདག་འདོད་པའི་
ཡོན་ཏན་ལྔ་ལ་བརྟེན་པའི་བདེ་བ་སྐྱེ་ཞིང་སྐྱེས་པའི་འདོད་པ་དག་གི་རོ་མྱོང་བར་བརྗོད་པ་འདོད་པ་དེ་དག་གི་རོ་མྱང་བ་ནི་ཤིན་ཏུ་ཆུང་ལ་འོན་ཀྱང་དེ་དག་གི་ཉེས་དམིགས་ནི་ཆེ་བར་བསྟན་པ་ཡིན་ནོ། །འདོད་པའི་ཉེས་དམིགས་གསལ་བར་བྱེད་པའི་གཏམ་ནི་འདོད་པའི་ཉེས་དམིགས་ཀྱི་གཏམ་ཡིན་ཏེ།
ཇི་སྐད་དུ་འདོད་པའི་རྒྱུ་དང་། འདོད་པའི་གཞི་དང་། འདོད་པའི་རྟེན་གྱིས་མ་བུ་དང་ལྷན་ཅིག་རྩོད་པར་བྱེད་པས་ན། ལུས་དང་ངག་དང་ཡིད་ཀྱི་སྒོ་ནས་ཉེས་པར་སྤྱོད་པ་ཆེན་པོ་སྤྱོད་པས་སེམས་ཅན་དམྱལ་བ་དག་ཏུ་སྐྱེ་བར་འགྱུར་རོ་ཞེས་བསྟན་པ་ཡིན་ནོ། །ཀུན་ནས་ཉོན་མོངས་པའི་ཕྱོགས་ནི་

འདོད་ཆགས་ལ་སོགས་པ་ཡིན་ལ། འདིར་ཀུན་ནས་ཉོན་མོངས་པར་བྱེད་ཅེས་བྱ་བའི་དབང་དུ་བྱས་ནས་ཀུན་ནས་ཉོན་མོངས་པ་ནི་འཁོར་བ་ཡིན་ནོ། །རྣམ་པར་བྱང་བས་ན་རྣམ་པར་བྱང་བ་སྟེ། ཐར་པ་ཡིན་པའམ། འདིས་རྣམ་པར་བྱང་བར་བྱེད་པས་ནི་རྣམ་པར་བྱང་བ་སྟེ།། འཕགས་པའི་ལམ་
ཡིན་ཞིང་དེའི་ཕྱོགས་ནི་དད་པ་ལ་སོགས་པ་ཡིན་ནོ། །ངེས་པར་འབྱུང་བའི་དངོས་པོ་ནི་ངེས་པར་འབྱུང་བ་ཉིད་དེ། ཁྱིམ་གྱི་གནས་ཡོངས་སུ་སྤངས་པའམ། འདིས་ངེས་པར་འབྱུང་བ་སྟེ་ཞེས་བྱ་བའི་དབང་དུ་བྱས་ནས་འཕགས་པའི་ལམ་ངེས་པར་འབྱུང་བ་ཡིན་ཏེ། དེའི་དངོས་པོ་ནི་ངེས་པར་འབྱུང་བ་ཉིད་
དོ། །རབ་ཏུ་དབེན་པ་ནི་ལུས་དང་སེམས་ཀྱི་སྒོ་ནས་དབེན་པའི་གནས་སྐབས་ཡིན་ཏེ། དེ་དག་གི་བསྔགས་པ་ནི་ཡོན་ཏན་གྱི་གཏམ་ཡིན་ནོ། །ཡིད་བདེ་བ་ཁྱད་པར་དུ་འཕགས་པ་དང་ལྡན་པའི་ཕྱིར་དགའ་བའི་སེམས་སོ། །འཕགས་པའི་ལམ་སྐྱེ་བ་དང་རྗེས་སུ་མཐུན་པའི་ཕྱིར་དགེ་བའི་སེམས་སོ། །
རབ་ཏུ་དགའ་བ་དང་ལྡན་པའི་ཕྱིར་མགུ་བའི་སེམས་སོ། །ལམ་སྐྱེ་བའི་འཆི་བ་མ་ཡིན་པའི་ཕྱིར་སྒྲིབ་པ་མེད་པའི་སེམས་སོ། །མ་འོངས་པའི་ཡོན་ཏན་སྐྱེ་བའི་སྐལ་བ་དང་ལྡན་པའི་ཕྱིར་སྐལ་བ་ཡོད་པའོ། །མཐུ་ཞེས་བྱ་བ་ནི་ནུས་པའོ། །ཀུན་ནས་བསྟོད་པ་ནི་སྐྱེས་བུའི་དོན་བླ་ན་མེད་པ་ཡིན་ཏེ།
ཡང་དག་པར་བསྟོད་པའི་ཕྱིར་མཐུ་ཡོད་པས་ན་ཀུན་ནས་བསྟོད་པ་ཅན་ནམ། འདི་ལ་ཀུན་ནས་བསྟོད་པའི་དགོས་པའི་ཆོས་བསྟན་པ་ཡོད་པ་དེ་ནི་འདིར་ཀུན་ནས་བསྔགས་པ་ཅན་གྱི་ཆོས་བཤད་པ་སྟེ། འཕགས་པའི་ལམ་སྐྱེ་བ་དང་རྗེས་སུ་མཐུན་པ་ཞེས་བྱ་བའི་ཐ་ཚིག་གོ། །དག་པ་
ཞེས་བྱ་བ་ནི་དཀར་པོའོ། །ནག་པོ་དང་བྲལ་བ་ཞེས་བྱ་བ་ནི་དྲི་མ་མེད་པའོ། །བཙོར་རུང་བ་ཞེས་བྱ་བ་ནི་བཙོར་རུང་བར་གྱུར་པའོ། །ལེགས་པར་ཚོན་འཛིན་པ་ཞེས་བྱ་བ་ནི་ཤིན་ཏུ་ཚོན་ཆགས་པར་གྱུར་པའོ། །ཤིན་ཏུ་ཁོང་དུ་ཆུད་པ་ཞེས་བྱ་བ་ནི་ཟག་པ་མེད་པའི་ཤེས་པས་ཡོངས་སུ་གཅད་པའམ་
མཐོང་བར་གྱུར་པའོ། །ཆོས་མཐོང་བ་ནི་སྡུག་བསྔལ་གྱི་བདེན་པའོ། །རྙེད་པ་ནི་འགོག་པའོ། །རིག་པ་ནི་ཀུན་འབྱུང་ངོ་། །ཁོང་དུ་ཆུད་པ་ནི་ལམ་མོ། །འདོད་པ་དང་བྲལ་བ་ཞེས་བྱ་བ་ནི་འཁོར་བ་ཐོག་མ་མེད་པ་ནས་གོམས་པའི་ཆོས་དག་ཁོང་དུ་ཆུད་པའི་འདོད་པ་དང་བྲལ་བའོ། །དེ་བཞིན་དུ་

བདེན་པ་བཞིའི་ཡུལ་ལ་ཐེ་ཚོམ་དང་བྲལ་བར་གྱུར་པའོ། །གཞན་གྱི་དྲིང་མི་འཇོག་པ་ཞེས་བྱ་བ་ནི་གཞན་ཚད་མར་གྱུར་པ་མ་ཡིན་པའི་ཆོས་དག་རང་ཉིད་ཀྱིས་རྟོགས་པའི་ཕྱིར་རོ། །གཞན་གྱིས་མི་བཀྲི་བ་ནི་ཆོས་གཞན་དེ་ཡང་ཁོང་དུ་ཆུད་པ་ཉིད་ཀྱི་ཕྱིར་རོ། །སྟོན་པའི་
བསྟན་པ་སྟེ་བཤད་པའི་ཆོས་དང་། གཞན་རྣམ་པར་གནས་པའི་ཆོས་དག་ལ་མི་འཇིགས་པ་སྟེ། འཇིགས་པ་མེད་པ་ཉིད་ཐོབ་པའོ། །ཤིན་ཏུ་འདས་པ་ཞེས་བྱ་བ་ནི་ཆོས་ལ་རབ་ཏུ་ཞུགས་པ་ཡིན་ནོ། །འདས་པའི་ཚིག་གཉིས་པ་ནི་ཕྱིར་འཇིག་པར་མི་འགྱུར་བ་ཐོབ་པར་བགྱིའོ་ཞེས་བསྟན་པ་ཡིན་ནོ། །ཡང་
ན་དགའ་བའི་ཡུལ་ལ་ལེན་གཉིས་བརྗོད་པ་ཡིན་ནོ། །སྐྱབས་སུ་མཆི་སྟེ་ཞེས་བྱ་བ་ནི་<ཡངས་‚ཡོངས་>སུ་སྐྱོབ་པར་མཛད་པའི་སྒོ་ནས་རྟེན་སྒྲུབ་པར་བྱེད་པའོ། །ཇི་སྲིད་འཚོའི་བར་དུ་ཞེས་བྱ་བ་ནི་ཇི་སྲིད་འཚོའི་མཐར་ཐུག་པའི་བར་དུའོ། །སྲོག་དང་ལྡན་པ་ཞེས་བྱ་བ་ནི་ཇི་སྲིད་བདག་སྲོག་དང་ལྡན་པ་དེ་སྲིད་དུ་འགྲོ་བ་
ཡིན་ནོ། །ཟས་བཟའ་བར་བྱ་བ་ནི་ཟས་ལོངས་སྤྱོད་པར་བྱའོ། །དཔྱ་བ་ནི་འདོད་པ་མ་ཡིན་པ་སྟོན་པའི་ཚིག་བརྗོད་པའོ། །གཞོན་རབས་ཀྱི་དུས་ཡོལ་བར་གྱུར་ཅེས་བྱ་བ་ལ་སོགས་པ་ལ། མང་བ་ཉིད་ཀྱི་ཕྱིར་ཇི་སྲིད་དགེ་སློང་དག་དང་། གཞོན་རབས་སུ་རྣམ་པར་གནས་པ་དག་གིས་ཟས་ཐོབ་
པར་གྱུར་པ་དེ་སྲིད་དུ་དགེ་འདུན་གྱི་གནས་བརྟན་གྱིས་ཟས་ཟོས་ཤིང་ཟས་ཟོས་ནས་ཀྱང་ཡོན་བཤད་པར་བྱེད་པ་དང་། དགེ་སློང་གཞོན་པ་དག་ཡོན་བཤད་པར་གྱུར་པ་ན་ཟས་མ་ཟོས་ལ། ཡོན་བཤད་པ་ཡོངས་སུ་རྫོགས་པ་ན་ཡང་ཟས་ཀྱི་དུས་ལས་འདས་པར་གྱུར་པ་དེའི་ཕྱིར་དུས་ལས་འདས་པ་ཞེས་
བསྟན་ཏོ། །དོན་མི་གོ་བ་ཞེས་བྱ་བ་ལ་དོན་ཡོངས་སུ་ཤེས་པའི་ངང་ཚུལ་ཅན་མ་ཡིན་པའོ། །སྒྲ་མི་ཐོས་པ་ནི་སྒྲ་སོ་སོར་རིག་པ་མ་ཡིན་པའོ། །གྲལ་ཚར་གཉིས་སུ་ཞེས་བྱ་བ་ལ། ཇི་ལྟར་གྲལ་བཤམས་པ་དེ་བཞིན་དུ་གྲལ་གཉིས་པས་རྒན་རབས་དང་ཉེ་བའི་མཐར་སོན་པར་གྱུར་པ་
དེ་བས་ན་ཤིན་ཏུ་ཐག་ཉེ་བར་གནས་པའི་གསར་བུ་དོན་སོ་སོར་རིག་པར་འགྱུར་ཞིང་སྒྲ་སོ་སོར་རིག་པར་འགྱུར་བའོ། །རིབ་མའི་རྩ་ཞེས་བྱ་བ་ནི་མེ་ཏོག་གི་རིབ་མའི་མཐའ་ཕྱོགས་སུ་གྱུར་པའམ། རིབ་མའི་རྩ་བ་ནི་ཁྱིམ་གྱི་ཚར་དང་ཉེ་བའོ། །མི་དགེ་བ་ཞེས་བྱ་བ་ནི་རྣམ་པར་

སྨིན་པ་མི་འདོད་པ་ཉིད་ཀྱི་ཕྱིར་འདོད་པ་ལ་སོགས་པའི་རྣམ་པར་རྟོག་པ་སྟེ། མི་དགེ་བ་དེ་ལ་རྣམ་པར་རྟོག་པར་བྱེད་དོ། །འཕགས་པའི་སྐྱེ་བོས་སྨད་པ་ཉིད་ཀྱི་ཕྱིར་སྡིག་པ་ཡིན་ལ། འདུན་པའི་འདོད་ཆགས་ལ་བརྟེན་ནས་སྐྱེས་པའི་ཕྱིར་ཆགས་པ་ལ་བརྟེན་པ་ཡིན་ནོ། །ས་བོན་ཚ་བ་ལྟ་བུ་
ཞེས་བྱ་བ་ལ། ཚ་བ་ནི་ཁ་བའམ་རྣོ་བ་ཡིན་ཏེ། ཚ་བའི་ས་བོན་ནི་ཚ་བའི་ས་བོན་ཡིན་པས་ན་བདག་ཉིད་ཚ་བའི་འབྲས་བུའི་ས་བོན་ལྟར་ཞེས་བསྟན་པར་འགྱུར་ཏེ། ས་བོན་ཚ་བ་བྱེད་པ་མ་ཡིན་པ་ས་བོན་ཚ་བར་བྱེད་པ་ཡིན་པའི་ཕྱིར་བདག་ཉིད་ས་བོན་ཚ་བ་ལྟར་རང་ཉིད་ཀྱི་སེམས་གྱུར་པ་
ཡིན་ནོ། །འདོད་པའི་ཡོན་ཏན་ལྔའི་རྣམ་པར་རྟོག་པ་དང་ལྡན་པའི་ཕྱིར་བདག་ཉིད་དྲི་ང་བ་ཡིན་ལ། རེག་པའི་སྐྱེ་མཆེད་དྲུག་གིས་སྡོམ་པ་མ་ཡིན་པས་བསྡམས་པའི་ཕྱིར་བདག་ཉིད་ཟག་པ་ཡིན་ནོ། །རེག་པའི་སྐྱེ་མཆེད་དྲུག་པོ་དག་གིས་རྟག་ཏུ་འདོད་ཆགས་ལ་སོགས་པའི་ཉོན་
མོངས་པ་ཟག་པར་བྱེད་པའི་ཕྱིར་སྡིག་པའི་ཆོས་འདོད་ཆགས་ལ་སོགས་པ་ནི་སྦྲང་བུ་ཡིན་ཏེ། རང་དབང་དུ་གནས་པའི་རོ་མྱོང་བར་བྱེད་དོ། །རང་གི་འདོད་པས་ཡོངས་སུ་ལོངས་སྤྱོད་པ་ནི་མངོན་པར་བལྡགས་པའམ། རྒྱུན་གྱིས་དེ་ལ་གནས་པའོ། །འདི་ལ་གནས་ཡོད་པ་མ་ཡིན་ནོ་
ཞེས་བྱ་བ་ནི་འདི་ལ་གནས་ཡོད་པ་མ་ཡིན་ནོ། །གཞན་ཞེས་བྱ་བ་ནི་མ་བསྟན་པའི་གཙོ་བོར་གྱུར་པའི་དགེ་སློང་འགའ་ཞིག་གོ། །དེའི་ཚིག་བླ་དགས་སོ་ཞེས་བྱ་བ་ནི་དེའི་མིང་སྟོན་པར་བྱེད་པའོ། །འདུན་པའི་འདོད་ཆགས་དང་མཚུངས་པར་ལྡན་པའི་རྣམ་པར་རྟོག་པ་ནི་འདོད་པའི་རྣམ་
པར་རྟོག་པ་ཡིན་ནོ། །གནོད་སེམས་དང་མཚུངས་པར་ལྡན་པ་ནི་གནོད་སེམས་ཀྱི་རྣམ་པར་རྟོག་པ་ཡིན་ནོ། །གཞན་ལ་ཅོ་འདྲི་བ་དང་འཚེ་བ་དག་དང་མཚུངས་པར་ལྡན་པ་ནི་འཚེ་བའི་རྣམ་པར་རྟོག་པ་ཡིན་ནོ། །དགའ་བར་བྱེད་མངོན་པར་འདོད་པར་བྱེད་པ་ཡིན་པས་ན་འདོད་པ་ཡིན་ལ།
འདུན་པའི་འདོད་ཆགས་ཀྱི་སྒོ་ནས་ཡོན་ཏན་དུ་བྱེད་ཅིང་ཡང་དང་ཡང་དུ་གོམས་པར་བྱེད་པས་ན་ཡོན་ཏན་ཡིན་ནོ། །འདི་ལ་ཞེས་བྱ་བ་ནི་འདོད་པའི་ཡོན་ཏན་ལྔའི་ཡུལ་ལ་འདུན་པའི་འདོད་ཆགས་ནི་དོན་དུ་གཉེར་བའི་འདོད་ཆགས་སོ། །མིག་གིས་རེག་པའི་སྐྱེ་མཆེད་ཅེས་བྱ་བ་ལ་རེག་པའི་

སྐྱེ་མཆེད་སྐྱེད་པར་བྱེད་པའི་གནས་ཡིན་པས་ན་རེག་པའི་སྐྱེ་མཆེད་ཡིན་པ་ལ་མིག་ཁོ་ན་རེག་པའི་སྐྱེ་མཆེད་ཡིན་པས་མིག་གི་རེག་པའི་སྐྱེ་མཆེད་ཡིན་ཞིང་། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བར་འགྱུར་ཏེ། གསུམ་འདུས་པ་ནི་རེག་པ་ཡིན་ནོ་ཞེས་བརྗོད་
པའི་ཕྱིར་རོ། །དེ་བཞིན་དུ་རྣ་བ་ལ་སོགས་པའི་སྐྱེ་མཆེད་ཀྱང་རིག་པར་བྱའོ། །སྡོམ་པ་མ་ཡིན་པ་ཞེས་བྱ་བ་ནི་ཡུལ་མ་ཡིན་པ་ལས་ལྡོག་པ་མེད་པ་ནི་སྡོམ་པ་མ་ཡིན་པ་ཡིན་ཏེ། དེས་བསྡམས་པ་དང་ལྡན་པའོ། །སྡིག་པ་མི་དགེ་བའི་ཆོས་ལ་སེམས་རྗེས་སུ་འཇུག་པ་ནི་སེམས་ལ་བརྟེན་ནས་འཇུག་
པར་འགྱུར་བའོ། །ཅི་ཞིག་ཡོད་ཅེ་ན། སྨྲས་པ། བརྣབ་སེམས་དང་ཡིད་མི་བདེ་བ་ཡོད་ནའོ། །དེ་དག་ཡུལ་གང་ལ་ཞེ་ན། སྨྲས་པ། འཇིག་རྟེན་ཏེ་ཉེ་བར་ལེན་པའི་ཕུང་པོ་ལྔའོ། །མིག་དང་རྣ་བ་གང་མ་སྦས་ཞེས་བྱ་བ་ལ་སོགས་པ་ལ། མིག་དང་རྣ་བ་ཡུལ་ལ་རབ་ཏུ་འཇུག་པར་བྱེད་པའི་ཕྱིར་མིག་
དང་རྣ་བ་མ་སྦས་པ་ཡིན་ནོ། །འདུན་པའི་འདོད་ཆགས་ཀྱིས་གཟིར་བ་ནི་གནོད་པར་གྱུར་པའོ། །དེ་ལ་གནས་པ་ནི་བདེ་བར་གནས་པ་སྟེ། མྱ་ངན་ལས་འདས་པ་ལ་གནས་པ་ཡིན་ལ། བདེ་བར་གནས་པ་ལས་དགེ་སློང་དེ་རིང་དུ་གྱུར་པ་ཡིན་ནོ། །གནོད་པ་ནི་འཁོར་བའི་སྡུག་བསྔལ་ཏེ་སྐྱེ་བ་
ལ་སོགས་པ་ཡིན་ལ། དེའི་ནང་ན་གནས་པའི་སྒོ་ནས་དེ་ནི་གནོད་པ་ལ་ཉེ་བར་གྱུར་པ་ཡིན་ནོ། །གང་འདི་ཞེས་བྱ་བ་ལ་སོགས་པས་ནི་ཕན་ཡོན་སྟོན་པར་བྱེད་པ་ཡིན་ནོ། །ནང་གི་གནས་ནི་རང་གི་སེམས་རྩེ་གཅིག་པ་ཡིན་ལ། སྦྱོར་བར་བྱེད་པ་ནི་བཅོམ་ལྡན་འདས་ལ་སྦྱོར་བར་བྱེད་པ་པོས་བདག་ཉིད་ངེས་
པར་སྦྱོར་བའོ། །ཅི་ཞིག་བྱས་ནས་ཤེ་ན། སྨྲས་པ། མངོན་ཤེས་ཏེ་ཤིན་ཏུ་ཤེས་ནས་སོ། །དེ་གང་ཞེ་ན། བསམ་པ་ལ་སོགས་པ་ཤུགས་ཀྱིས་རྟོགས་པར་གྱུར་པའོ། །བདེ་བར་གནས་ཞེས་བྱ་བ་ནི་བདེ་བར་ཉལ་བ་སྟེ། འདི་ནི་ཡང་སྲིད་པར་མི་འཇུག་པའི་ཕན་ཡོན་གཞན་ཡིན་ནོ། །ཅི་ཞིག་
བྱས་ནས་ཤེ་ན། སྨྲས་པ། ཡང་དག་པའི་བཀའི་གོ་འཕང་གིས་སོ། །གོ་འཕང་ཁྱད་པར་ཇི་ལྟ་བུ་ཞེ་ན། སྐྱེས་བུ་ངན་པས་མ་བསྙེན་པའི་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྨད་པར་བྱ་བའི་སྐྱེས་བུ་ནི་སྐྱེས་བུ་ངན་པ་སྟེ། ལེ་ལོ་ལ་སོགས་པའི་ཉེས་པར་སྤྱོད་པ་དང་ལྡན་པའི་ཕྱིར་རོ། །དེས་

ཐོབ་པར་བྱ་བ་མ་ཡིན་པའི་ཕྱིར་མ་བརྟེན་པའོ། །གོ་འཕང་ནི་ཐར་པ་ཞེས་བྱ་བའི་གནས་ཡིན་ནོ། །འཕགས་པ་སྟེ་སངས་རྒྱས་བཅོམ་ལྡན་འདས་ཀྱིས་སོ། །ལེགས་བཤད་ནི་མཛེས་པར་རབ་ཏུ་བཤད་པ་ཡིན་ནོ། །སྤྱོད་ཡུལ་མ་ཡིན་པ་ལྔ་ཞེས་བྱ་བ་ནི་དགེ་སློང་འགྲོ་བ་ཚུལ་མ་ཡིན་པའི་ཕྱིར་སྤྱོད་ཡུལ་
མ་ཡིན་པའོ། །རོལ་མོའི་གནས་ནི་རོལ་མོ་མཁན་གྱི་གནས་སོ། །སྨད་འཚོང་མའི་གནས་ནི་འདིར་འདོད་པ་དག་འཇུག་པར་བྱེད་པའི་ཞེས་བྱ་བ་དེའི་དབང་དུ་བྱས་ནས་སྨད་འཚོང་མའི་ཁྱིམ་ཡིན་ནོ། །ཆང་འཚོང་གི་གནས་ནི་མྱོས་བྱེད་ཀྱི་བཏུང་བའི་ཁང་པ་ཡིན་ནོ། །གདོལ་པའི་གནས་ནི་
གདོལ་པའི་ཁྱིམ་ཡིན་ནོ། །ཇི་ལྟར་བཤམས་པ་བཞིན་དུ་ཞེས་བྱ་བ་ནི་ཇི་ལྟར་འགྲོ་བའི་དགེ་སློང་དེས་བཤམས་པར་གྱུར་པ་དེ་ཁོ་ན་བཞིན་དུ་དེས་བཏང་སྙོམས་སུ་གཞག་པར་གྱུར་པའོ། །སྔོན་གྱི་ལས་ཀྱིས་ཞེས་བྱ་བ་ལ། སྔོན་གྱི་ལས་ནི་འདིར་ལས་རྙིང་པ་ཡིན་པར་རིག་པར་བྱའོ། །སྦྲུལ་ནི་སྦྲུལ་
གྱི་སོ་གང་ཡིན་པ་དེ་གཞན་ལ་གནོད་པར་བྱེད་པའི་ཚེ་དུག་ཡོད་པའི་ཕྱིར་སྦྲུལ་གདུག་པའོ། །འབྲུ་མར་ཞེས་བྱ་བ་ནི་རྐང་པ་བསྐུ་བའི་ཕྱིར་རོ། །གང་སྔོན་གྱི་སྐྱེ་བ་དེས་ཚེ་ཐུང་བར་འགྱུར་བའི་ལས་བྱས་པ་དེ་ལེན་པ་ཉིད་ཀྱི་ཉེས་པ་ཡིན་ཏེ། དེས་བསྐྱེད་པ་ནི་འཕངས་པར་གྱུར་པའོ། །ནོན་པ་
ནི་གཡོ་འགུལ་བྱེད་པའི་ནུས་པ་ཆུང་བའོ། །ལུས་མ་ནུས་པ་སྡུག་བསྔལ་གྱི་ཚོར་བས་གནོད་པ་ནི་གཟིར་བའོ། །ཤི་བར་གྱུར་པ་ནི་དུས་ལས་འདས་པར་གྱུར་པའོ། །དེ་གཉིས་ཀྱིས་ཞེས་བྱ་བ་ནི་ངེས་པར་གཟུང་བའི་དྲུག་པ་ཡིན་ཏེ། དེ་གཉིས་ལས་གཅིག་གིས་སོ། །རྔུལ་གཟན་
བྱིན་བཞིན་དུ་ཞེས་བྱ་བ་ནི་དེས་རྔུལ་གཟན་མཚན་མོའི་གོས་ཀྱི་ཚུལ་དུ་བགོས་པ་དེའི་ཕྱིར་དེ་སྐད་ཅེས་བསྟན་ཏོ། །དེ་ལྟར་མི་སྡུག་པར་གྱུར་པ་ཞེས་བྱ་བ་ནི་དེ་ལྟར་འགྱུར་བ་ཐོབ་པར་གྱུར་པའོ། །བསྡུམ་པར་རུང་བ་ཞེས་བྱ་བ་ནི་སྦྱོར་དུ་རུང་བས་ན་བསྡུམ་དུ་རུང་བའོ། །འདུམ་པར་མི་
འགྱུར་གྱི་ཞེས་བྱ་བ་ནི་དེ་ཉེས་པ་གཞན་ཡོད་པའི་ཕྱིར་འདུམ་པར་བྱ་བ་མ་ཡིན་པའོ། །གོས་གཅིག་གང་ལ་ཡོད་པ་དེ་ནི་གོས་གཅིག་པ་སྟེ། གོས་གཅིག་གོན་པས་གཞན་ལ་ཕྱག་མི་བྱ་ཞིང་གོས་གཅིག་གྱོན་པ་ལ་ཡང་ཕྱག་མི་བྱ་ལ། གོས་གཅིག་གྱོན་པས་ཀྱང་གཞན་གྱི་ཕྱག་བདག་གིར་

མི་བྱའོ། །གང་དེ་ལ་ཞེས་བྱ་བ་ནི་ཐ་མལ་པའི་གནས་ལའོ། །མངོན་སུམ་དུ་ཕྱོགས་པས་འདུག་ཤིག་ཅེས་བྱ་བ་ནི་བསྟན་པའི་གནས་ལ་མངོན་སུམ་དུ་ཕྱོགས་པས་འདུག་པར་བྱ་བ་ཡིན་ནོ། །ལས་བདག་གིར་བྱེད་པ་ལ་དམིགས་ནས་ཞེས་བྱ་བ་ལ། བདག་ཉིད་ཀྱི་
ལས་ལ་རག་ལུས་པའམ། རང་གིས་བྱས་པའི་ལས་ཀྱི་འབྲས་བུ་ལོངས་སྤྱོད་དུ་རུང་བར་བདག་ཉིད་ཀྱིས་ཤེས་ནས་ཟས་ལ་སོགས་པའི་ཚོད་རིག་པར་བྱ་བ་ཡིན་ནོ། །རྡུལ་གྱིས་གང་བ་ནི་རྡུལ་གྱིས་ཁྱབ་པར་གྱུར་པའོ། །ལག་པ་ནས་བཟུང་བའི་སྒོ་ནས་ཉམ་ང་བ་ལས་བཏོན་པ་ནི་ལག་པ་
ནས་བཟུང་བ་ཡིན་ནོ། །སྲན་མ་ཤ་ལས་བྱས་པའམ་ཞེས་བྱ་བ་ནི་སྲན་མ་ཤ་ལ་སོགས་པ་ལས་བྱས་པའམ། འབྲས་བཏགས་པ་ལས་བསྒྲུབས་པའི་བཅའ་བའོ། །ཚོད་རིག་པར་བྱོས་ཤིག་ཅེས་བྱ་བ་ནི་ལེན་པ་ན་ཇི་ལྟར་ཉེ་གནས་དང་སློབ་མ་ལ་གནོད་པར་མི་འགྱུར་བ་དེ་ལྟར་ཚོད་ཤེས་པར་བྱ་བ་ཡིན་ནོ། །
གཙང་སྦྱོར་བ་ནི་ཟས་ཀྱི་ཞལ་ཏ་པའོ། །འབྲུ་མར་གྱི་སྣོད་ཅེས་བྱ་བ་ནི་པགས་པ་ལས་བྱས་པ་འབྲུ་མར་གྱི་སྣོད་ཀྱི་ཀོ་སྐུའོ། །ཁ་ཏོན་ཀློགས་ཤིག་ཅེས་བྱ་བ་ནི་ཀློག་ཏུ་བཅུག་པ་ཡིན་ནོ། །ཨུཏྤ་ལ་འམ་ཞེས་བྱ་བའམ་གྱི་སྒྲ་ནི་གཞན་གྱི་དོན་དུ་བལྟ་བར་བྱའོ། །ཇི་ལྟར་ཆུ་ཞེས་བྱ་བ་ནི་ཇི་ལྟ་ཇི་ལྟར་ཆུ་ལ་
འཕེལ་བར་འགྱུར་བ་དེ་ལྟ་དེ་ལྟར་ཨུཏྤ་ལ་ཡང་འགྱུར་རོ། །ཁྱིམ་སྟེ་བྲམ་ཟེ་དང་ཁྱིམ་བདག་གི་ཁྱིམ་བཤད་པར་གྱུར་པའི་ཉེས་པ་གང་དག་གིས་སུན་འབྱིན་པར་བྱེད་ཅིང་མ་དད་པར་བྱེད་པ་དེ་དག་གི་ནི་ཁྱིམ་སུན་འབྱིན་པ་ཡིན་ནོ། །ཇི་ལྟར་དེ་དག་ཁྱིམ་སུན་འབྱིན་པ་ཡིན་ཞེ་ན། སྨྲས་པ། གང་གི་ཕྱིར་སྡིག་པའི་
ཆོས་ཀུན་དུ་སྤྱོད་པ་ཡིན་ནོ། །ཇི་ལྟར་སྡིག་པའི་ཆོས་ཀུན་དུ་སྤྱོད་པ་ཡིན་ཞེ་ན། དེ་དག་བུད་མེད་ཀྱི་ཡུལ་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། །འདུ་འཛི་ལ་སོགས་པའི་ཚིག་གི་བཤད་པ་ནི་སྔ་མ་བཞིན་དུ་རིག་པར་བྱའོ། །སྣོད་གཅིག་གི་ནང་དུ་ཞེས་བྱ་བ་ནི་སྣོད་ཆེན་པོ་གཅིག་གི་ནང་དུའམ།
རྡོའི་སྣོད་གཅིག་ལའོ། །མེ་ཏོག་ཐོགས་པ་ནི་ཐོད་དམ་རྣ་བ་དག་ལའོ། །བྱ་དགའ་བྱིན་པ་ནི་མང་དུ་བྱིན་པས་དགའ་བར་གྱུར་པའོ། །རྒྱུག་པ་ནི་ཤུགས་ཀྱིས་འགྲོ་བའོ། །མཆོང་བ་ནི་རྒལ་བའོ། །རབ་ཏུ་མཆོང་བ་ནི་སྟེང་དུ་མཆོང་བའོ། །བརླ་གཅིག་གཡོབ་པ་ནི་བརླ་སྒྱུར་བྱེད་པའོ། །

དཔུང་པ་གཅིག་བསྐྱོད་པ་ནི་དཔུང་པ་སྒྱུར་བར་བྱེད་པའོ། །ཉ་བཞིན་དུ་སྒྱུར་བར་བྱེད་པ་ནི་ཉ་ལྟར་འགྱུར་ཞིང་འཕར་བའོ། །ཆུ་ལ་རྡོ་འཕར་འཕེན་པ་ནི་ཆུའི་སྟེང་དུ་རྡོའི་དུམ་བུ་འཕེན་པར་བྱེད་པའོ། །ལག་པ་གཅིག་གིས་བསྣུན་པས་ཆུའི་སྟེང་དུ་བསྣུན་པ་ནི་ཆུ་སྒྲ་འབྱིན་པའོ། །ལག་པ་གཉིས་ཀྱིས་རྡེག་
ཅིང་བསྣུན་པ་ནི་ཆུ་རྔ་རྡུང་བ་ཡིན་ནོ། །ཁ་རླུང་གིས་བཀང་བ་ལ་ལག་པའི་ཐལ་མོ་གཅིག་གིས་རྡེག་ཅིང་བསྣུན་པ་ནི་ཁའི་རྔ་རྡུང་བའམ། ཁའི་སྒོ་ནས་རྔ་བོ་ཆེའི་སྒྲ་ལྟར་སྒྲོགས་པ་ནི་ཁའི་རྔ་རྡུང་བ་ཡིན་ནོ། །ཁ་དང་ལག་པའི་སྦྱོར་བ་ལས་དུང་གི་སྒྲ་འབྱིན་པ་ནི་ཁའི་དུང་འབུད་པའོ། །ཁའི་སྒོ་ནས་རྔའི་སྒྲ་
སྒྲོགས་པ་ནི་ཁའི་རྔ་ལེན་པར་བྱེད་པའམ། ཁ་རླུང་གིས་བཀང་བ་ལག་པ་གཉིས་ཀྱིས་བརྡེགས་ཤིང་བསྣུན་པའོ། །དགེ་སྦྱོང་གི་ལས་མ་ཡིན་པ་ཞེས་བྱ་བ་ནི་དགེ་སྦྱོང་དང་ཚུལ་མཐུན་པ་མ་ཡིན་པའོ། །སྤྱོད་ལམ་ཞེས་བྱ་བ་ནི་ལུས་ཀྱི་སྤྱོད་ལམ་མོ། །སྤྱོད་པ་ཞེས་བྱ་བ་ནི་ལོག་པའི་སྤྱོད་ཡུལ་
ལ་སྤྱོད་པའོ། །ལོག་པར་ཞུགས་པས་ན་ཞེས་བྱ་བ་ནི་ཚུལ་མ་ཡིན་པའི་བྱ་བ་ལ་ཀུན་དུ་སྤྱོད་པའོ། །སྤངས་ཏེ་ཞེས་བྱ་བ་ནི་ཡོངས་སུ་དོར་བའོ། །འགལ་ཚབས་ཅན་དུ་འགྱུར་རོ་ཞེས་བྱ་བ་ནི་འགའ་ཞིག་ཏུ་དགེ་འདུན་ལྷག་མའི་གནས་ངན་ལེན་སྨྲ་བ་ལ་སོགས་པ་དང་། འགའ་ཞིག་ཏུ་ཇི་ལྟར་
གོས་ཀྱིས་བར་དུ་ཆོད་པའི་བུད་མེད་ཀྱི་ཡུལ་གྱི་ལུས་ལ་རེག་པ་བདག་གིར་བྱེད་པའི་ཉེས་པ་སྦོམ་པོ་དང་། ཁ་ཅིག་ཏུ་མྱོས་པར་བྱེད་པ་འཐུང་བ་ལ་སོགས་པ་ལྟུང་བྱེད་འབའ་ཞིག་པ་དང་། ཁ་ཅིག་ཏུ་གར་ལ་སོགས་པའི་ཉེས་བྱས་དག་ལ་འདིར་ཅི་རིགས་པར་འགལ་ཚབས་ཅན་གྱི་དོན་དུ་བལྟ་
བར་བྱའོ། །ཉམས་པར་བྱེད་པ་ནི་འདིར་ཞིང་འཇིག་པར་བྱེད་པའོ། །རྣམ་པར་འཇིག་པར་བྱེད་པ་ནི་ཀུན་དགའ་ར་བ་དང་། སྐྱེད་མོས་ཚལ་འཇིག་པར་བྱེད་པའོ། །གསོད་པར་བྱེད་པ་ནི་འདིས་ཕོངས་པར་བྱེད་པའོ། །ཡང་ན་ཉམས་པར་བྱེད་པ་ནི་ཕྱི་རོལ་གྱི་ཆ་བྱད་འཇིག་པར་བྱེད་པ་
ཡིན་ལ། རྣམ་པར་བཤིག་པ་ནི་ནང་གི་ཡོ་བྱད་འཇིག་པ་ཡིན་ཞིང་སྲོག་བཅད་པ་འདིས་ཕོངས་པར་བྱེད་པའོ། །གནོད་པ་ཆུང་ངམ་ཞེས་བྱ་བ་ལ་སོགས་པའི་བཤད་པ་སྔ་མ་དང་འདྲའོ། །ཕྱིན་ཅི་མ་ལོག་པ་གསུངས་པ་ཞེས་བྱ་བ་ནི་ཕྱིན་ཅི་མ་ལོག་པའི་ངག་གི་འབྲས་བུ་སྟོན་པར་མཛད་པའི་

ངང་ཚུལ་ཅན་ཏེ། བདེན་པ་གསུང་བ་ཞེས་བྱ་བར་དགོངས་སོ། །གཅིག་ཏུ་ངེས་པ་མ་ཡིན་ནོ་ཞེས་བྱ་བ་ནི་འདིར་ཁྱོད་མངོན་པར་འདོད་པའི་དངོས་པོ་གཅིག་ཏུ་ངེས་པ་མ་ཡིན་ཏེ། ཇི་ལྟར་ཁྱོད་འདོད་པ་དེ་ཁོ་ན་བཞིན་དུ་ལུང་བསྟན་པར་ནུས་པ་མ་ཡིན་ནོ། །རྩ་བ་ལའི་མཆོད་རྟེན་
ཞེས་བྱ་བ་ལ་རྩ་བ་ལ་ཞེས་བྱ་བ་ནི་མི་འགའ་ཞིག་གིས་བྱས་པའི་མཆོད་རྟེན་ནོ། །བྲི་བ་ཞེས་བྱ་བ་ནི་ཡོངས་སུ་ཉམས་པ་དང་མཐུན་པས་ན་བྲི་བ་ཡིན་ལ། བྲི་བ་མ་ཡིན་པ་ནི་མི་འབྲི་བ་སྟེ་ཡོངས་སུ་བྲི་བ་དང་འགལ་ཞེས་བྱ་བའི་ཐ་ཚིག་གོ། །བྲི་བ་ནི་འདིར་འབྱོར་པ་ཉམས་པ་ཡིན་ནོ། །ཡི་དམ་དུ་བཅས་
ནས་ཞེས་བྱ་བ་ནི་སེམས་ཀྱིས་ལྷག་པར་སྤྱད་པར་བྱ་བ་ཉིད་དུ་འཛིན་པའོ། །འཇུག་པར་བྱེད་པ་ན་ཞེས་བྱ་བ་ནི་དེའི་ཡུལ་དང་མཐུན་པར་འཇུག་པར་བྱེད་པའོ། །སྣང་ན་ཞེས་བྱ་བ་ནི་འཐད་པ་ཀུན་དུ་སྤྱོད་པའི་སྒོ་ནས་ཡུལ་བྲི་ཛི་དག་ལ་དེ་དག་གསལ་བར་སྣང་བར་གྱུར་པའོ། །ཕྱོགས་གཅིག་ལ་ཀུན་དུ་སྤྱོད་
པའི་དོགས་པ་བཟློག་པའི་ཕྱིར་ཚིག་གཉིས་པ་བཟུང་བ་ཡིན་ནོ། །འཕེལ་ཞེས་བྱ་བ་ནི་འབྱོར་པ་རྣམ་པར་འཕེལ་བ་ལ་འདིར་འཕེལ་བའི་སྒྲས་བསྟན་ཏོ། །ལེགས་སོ་ཞེས་བྱ་བ་ནི་འདིར་རིགས་པའོ། །ཚེ་དང་ལྡན་པ་ཀུན་དགའ་བོ་ལ་བོས་ནས་ཞེས་བྱ་བ་ལ་སོགས་པ་ལ། ཇི་ལྟར་ན་བཅོམ་ལྡན་འདས་
འཕགས་པ་ཀུན་དགའ་བོ་ལ་འདྲི་བ་མཛད་དེ། དངོས་པོ་ཐམས་ཅད་ཀྱི་དེ་ཁོ་ན་ཉིད་མཁྱེན་པ་ནི་གཞན་ལ་འདྲི་བ་མཛད་པ་རིགས་པ་མ་ཡིན་ནོ་ཞེ་ན། འདི་ལ་བླ་མ་དག་འཇིག་རྟེན་གྱི་ཐ་སྙད་ཀྱི་དོན་དང་། གང་དག་བཅོམ་ལྡན་འདས་ལ་ཐམས་ཅད་མཁྱེན་པ་དང་སངས་རྒྱས་མ་གྲུབ་པ་དེ་དག་ཡིད་ཆེས་པར་
བྱ་བའི་དོན་དང་། འཕགས་པ་ཀུན་དགའ་བོའི་སྤོབས་པ་བསྟན་པར་བྱ་བའི་ཕྱིར་ཞེས་བྱ་བ་དེ་ལྟ་བུ་ལ་སོགས་པར་སྟོན་པར་མཛད་དོ། །ཡང་དང་ཡང་དུ་འདུ་བ་ཞེས་བྱ་བ་ནི་ཡུལ་གྱི་བྱ་བར་དཔྱོད་པར་གྱུར་པས་ཡང་དང་ཡང་དུ་གནས་ལ་གཅིག་ཏུ་འདུ་བར་བྱེད་དོ། །མང་དུ་འདུ་བ་ལས་ཀྱང་གནས་པར་
འགྱུར་རོ་ཞེས་བྱ་བ་ནི་རྟག་ཏུ་གནས་པའམ་རྟག་ཏུ་གནས་པ་ལས་གནས་པར་འགྱུར་ཞིང་ལྡང་བར་ཡང་འགྱུར་རོ། །མཐུན་པ་ཞེས་བྱ་བ་ནི་འདུ་བ་དང་ལྡན་པ་བློ་གཅིག་ཏུ་གྱུར་པ་སྟེ། ཐམས་ཅད་རང་བཞིན་གཅིག་ལ་བརྩོན་པར་ཕན་ཚུན་རྗེས་སུ་མཐུན་པར་གྱུར་ཅེས་བྱ་བའི་ཐ་ཚིག་གོ། །བྱ་བ་ནི་ཐག་

ཉེ་བ་དང་གཙོ་བོར་གྱུར་པ་ཡིན་ནོ། །བྱེད་པ་ནི་ཐག་རིང་བ་དང་ཕྱིས་བྱ་བ་ཡིན་པ་ཉིད་ཀྱིས་གཙོ་བོར་གྱུར་པ་ཡིན་ནོ། །མི་རིགས་པ་ནི་རྣམ་པར་གཞག་པ་མ་ཡིན་པ་སྟེ། སྔོན་གྱི་ཆེན་པོ་དེ་དག་གིས་དངོས་པོའི་རང་བཞིན་རྣམ་པར་གཞག་པ་དེ། འཛིན་བར་མི་བྱེད་ཅིང་རྣམ་པར་འཇོག་པར་མི་བྱེད་པའོ། །
གང་ཡང་སྔོན་གྱི་ཆེན་པོ་དག་གིས་རྣམ་པར་གཞག་པ་དེ་གཅོད་པར་མི་བྱེད་པ་སྟེ། ཀུན་ནས་གཅོད་པར་བྱེད་པར་མི་འགྱུར་བའོ། །ཇི་ལྟར་ཞེས་བྱ་བ་ལ་སོགས་པ་ལ། ཇི་ལྟར་དེ་དག་རིགས་བརྒྱུད་པས་འོངས་པའི་རྗེས་སུ་མཐུན་པའི་ཆོས་བདེན་པ་དང་གཙང་སྦྲ་ལ་སོགས་པ་ཡང་དག་པར་བླངས་ནས་
གནས་པར་གྱུར་པའོ། །ཡུལ་བྲི་ཛིའི་བུད་མེད་ཅེས་བྱ་བ་ལ་སོགས་པ་ལ། བུད་མེད་ནི་མེ་སྐོར་བྱས་པ་ཡིན་ལ་གཞོན་ནུ་མ་ནི་མནའ་མ་བྱས་པ་ཡིན་ནོ། །ཡང་ན་བུད་མེད་ནི་བདག་པོ་དང་བྲལ་བར་འགྱུར་བའོ། །ཕ་ལ་སོགས་པས་བསྲུངས་པ་དང་། གཉེན་བཤེས་ཀྱིས་བྱ་བ་མ་ཡིན་པ་ལས་བཟློག་པའོ། །
བདུན་གྱི་རྒྱུད་ཀྱི་ནང་དུ་འདུས་བར་གྱུར་པས་ན་གཉེན་ཡིན་ནོ། །རིགས་ཞེས་བྱ་བ་ནི་སྤྱིར་བ་ར་དྭ་ཛ་ལ་སོགས་པའི་རིགས་སུ་ཆུད་པར་གྱུར་པའོ། །ཆད་པ་དང་བཅས་པ་ཞེས་བྱ་བ་ནི་འདོད་པས་ལོག་པར་གཡེམ་པའི་ཡུལ་དེ་ནི་འདིར་ཆད་པས་གཅད་པར་བྱ་བ་ཡིན་ནོ། །སྒྲིབ་པ་དང་བཅས་པ་ཞེས་བྱ་བ་ལ།
འདོད་པས་ལོག་པར་གཡེམ་པའི་ཡུལ་དེ་ནི་ཆད་པ་མ་གཏོགས་པར་ཚར་གཅད་པར་འོས་པའམ། སྲུང་མ་དང་བཅས་པ་སྟེ། སྲུང་བ་དང་སྐྱོབ་པ་རྣམ་པ་དུ་མ་དང་ལྡན་པར་གྱུར་པའོ། །གཞན་གྱིས་ཡོངས་སུ་ཟིན་པ་ཞེས་བྱ་བ་ནི་མནའ་མ་བྱས་པ་མེད་པར་གཞན་གྱི་དབང་གིས་ཐོབ་པར་གྱུར་པའོ། །ཕྲེང་
བའི་རྒྱུད་ནི་བོར་བ་ཞེས་བྱ་བར་ཐམས་ཅད་ཀྱིས་དང་པོར་བུ་མོ་དེ་སྦྱིན་པའི་རྒྱུ་མཚན་མེ་ཏོག་ལེན་པའི་སྒོ་ནས་བཟུང་བ་དག་ཡིན་ཏེ། གང་གི་ཕྱིར་གང་འགའ་ཞིག་བུ་མོ་སྦྱིན་པར་འདོད་པ་དེས་ཐོག་མར་མག་པར་འགྱུར་བ་ལ་ཕྲེང་བ་བྱིན་ནས་ཕྱིས་བུ་མོ་སྦྱིན་པར་བྱེད་པ་དེའི་ཕྱིར་བུ་མོ་དེ་ཕྲེང་བའི་རྒྱུད་བོར་བ་ཞེས་
བྱའོ། །བརྟུན་ཏེ་ཞེས་བྱ་བ་ནི་ཅི་བགྲོད་པར་བྱ་བའམ་མ་ཡིན་ཞེས་དཔྱོད་པ་མེད་པའོ། །མཐུས་ཞེས་བྱ་བ་ནི་ཟིལ་གྱིས་མནན་པའོ། །སྤྱོད་པ་ནི་འདིར་འདོད་པའི་ཡུལ་གྱི་ལས་སུ་བྱ་བ་སྟོན་པ་ཡིན་ནོ། །འདིར་རིགས་མཐུན་པ་ནི་སོས་ཀྱིས་རྒན་པ་ལ་རྒན་པོའི་སྒྲས་བརྗོད་པ་ཡིན་ནོ། །ཕའི་ཕ་ནི་འདིར་རྗེའི་

སྒྲས་བརྗོད་པ་ཡིན་ལ། རྗེ་དང་འདྲ་བ་ཞེས་བྱ་བ་ནི་རྗེ་དང་ན་ཚོད་འདྲ་བར་གྱུར་པའོ། །ཕ་དང་འདྲ་ཞེས་བྱ་བ་ནི་ཕ་དང་འདྲ་བར་གྱུར་པའོ། །བཙུན་པར་བྱེད་ཅེས་བྱ་བ་ལ་སོགས་པ་ལ་ནི་སེམས་ཀྱིས་ཆེན་པོ་ཉིད་དུ་འཛིན་པ་ནི་བཙུན་པར་བྱེད་པ་ཡིན་ནོ། །ལུང་འབོགས་པར་བྱེད་པའི་སྒོ་
ནས་ཚད་མར་གྱུར་པར་འཛིན་པ་ནི་བླ་མར་བྱེད་པ་ཡིན་ནོ། །གནས་མཐོན་པོར་འཇོག་པར་བྱེད་པ་ནི་རི་མོར་བྱེད་པ་ཡིན་ནོ། །སྔོན་དུ་ལྡང་བ་དང་ཕྱག་ལ་སོགས་པས་བླ་མར་བྱེད་པ་ནི་མཆོད་པ་ཡིན་ནོ། །དད་པས་ཞེས་བྱ་བ་ནི་དད་པ་སྔོན་དུ་སོང་བ་ཅན་གྱི་གུས་པས་སོ། །མཉན་པར་བྱ་བར་སེམས་པ་ནི་ཚིག་རྗོད་པར་
བྱེད་པའི་ཚེའོ། །བྱེད་པ་ནི་སྒྲུབ་པའི་དུས་སོ། །ཡུལ་བྲི་ཛིའི་མཆོད་རྟེན་ཞེས་བྱ་བ་དག་ནི་གང་དག་སྔོན་གྱི་བྲི་ཛི་དག་གིས་སྔོན་གྱི་ཡང་དག་པར་རྫོགས་པའི་སངས་རྒྱས་ཀྱི་ཆེད་དུ་བྱས་པའམ། སྔོན་གྱི་བྲི་ཛིའི་རུས་པའི་ཕུང་པོ་དག་ལ་འདིར་མཆོད་རྟེན་གྱི་སྒྲས་བརྗོད་པ་ཡིན་ནོ། །དེ་དག་གིས་རིགས་ཀྱི་གཙོ་བོ་
ཟད་པ་ཉིད་ཀྱིས་དེ་དག་གིས་མཆོད་པ་དང་། བླ་མར་བྱེད་པ་དང་། ལུང་འབོགས་པར་བྱེད་པ་དང་འདྲ་བར་གུས་པའི་སྒོ་ནས་འཛིན་པའོ། །དགྲ་བཅོམ་པ་ཞེས་བྱ་བ་ནི་ཉེས་པ་ཟད་པར་གྱུར་པའོ། །དྲག་པ་ཞེས་བྱ་བ་ནི་ཆེན་པོ་ཡིན་ནོ། །དྲན་པ་ཉེ་བར་འཇོག་པ་ཞེས་བྱ་བ་ནི་དུས་ཐམས་ཅད་དུ་ཡུལ་དེ་ལ་སྐྱེས་པར་
གྱུར་པའོ། །དྲན་པ་ཁྱད་པར་ཇི་ལྟ་བུ་དང་ལྡན་པ་ཞེ་ན། སྨྲས་པ། །སེམས་ཅན་ཀུན་དུ་བསྲུངས་པ་སྟེ། །བག་མེད་པ་ལས་སེམས་ཡོངས་སུ་བསྲུངས་པར་གྱུར་ཅེས་བྱ་བར་དགོངས་སོ། །འགྱུར་བ་ཞེས་བྱ་བ་ནི་གནོད་པར་བསྟན་པར་མི་འགྱུར་བའོ། །བགྲོད་པར་མི་འགྱུར་ཞེས་བྱ་བ་ནི་ཟིལ་གྱིས་གནོན་
པར་གྱུར་པ་མ་ཡིན་པའོ། །དེ་ནི་ད་ལྟར་ཞེས་བྱ་བའོ། །གསོ་སྦྱོང་གཙོ་བོར་གྱུར་པའི་གཙུག་ལག་ཁང་གི་ནང་ལ། འདིར་སྐེད་པའི་སྒྲས་བརྗོད་པ་ཡིན་ནོ། །ཡང་དང་ཡང་དུ་འདུས་པར་འགྱུར་བའི་དགེ་སློང་དག་ཅེས་པ་ནི་ལས་བརྒྱ་རྩ་གཅིག་གི་ནང་དུ་འདུས་པ་དགེ་འདུན་གྱི་བགྱི་བ་བྱུང་བར་གྱུར་པ་ནའོ། །
ཕལ་ཆེར་འདུས་པ་ནི་འདུ་བ་སྦྱིན་པ་ལ་འདྲ་བར་གྱུར་པའོ། །ལམ་ཚོགས་དང་བཅས་པ་ནི་འདིར་དགེ་བའི་ཆོས་ཡིན་པར་རིག་པར་བྱའོ། །མཐུན་བཞིན་དུ་ཞེས་བྱ་བ་ནི་བློ་གཅིག་ཏུ་གྱུར་པའོ། །བྱ་བ་ནི་བསྟན་པ་ལ་ཕན་འདོགས་པར་བྱེད་པ་དང་། ཉེ་བར་གནས་པ་གཙོ་བོར་གྱུར་པའོ། །བྱེད་པ་ནི་

དུས་ཕྱིས་འགྱུར་བའོ། །སྲེད་པའི་དབང་དུ་འགྲོ་བ་ནི་མི་རིགས་ཤིང་ཚུལ་མ་ཡིན་པའོ། །ཁྱད་པར་ཇི་ལྟ་བུ་དང་ལྡན་པའི་སྲེད་པས་ཤེ་ན། སྐྱེ་ཞིང་འབྱུང་བའི་ཞེས་བྱ་བ་ལ་སོགས་པ་སྨོས་ཏེ། ཡང་དང་ཡང་དུ་སྐྱེས་པ་ཞེས་བྱ་བའི་དབང་དུ་བྱས་ནས་ཟློས་པའི་ཚིག་གཉིས་ཡིན་ནོ། །སྤྱིར་ཡང་སྲིད་པ་དང་རྗེས་
སུ་མཐུན་པ་ནི་སྲེད་པ་ཡིན་ཞིང་། དེ་མ་ཐག་པའི་སྐྱེ་བ་དོན་དུ་གཉེར་བའི་འདོད་ཆགས་ནི་དགའ་བའི་འདོད་ཆགས་ཡིན་ལ། དེ་དང་ལྷན་ཅིག་པར་གྱུར་པ་ནི། ལྷན་ཅིག་འབྱུང་བ་ཡིན་ནོ། །དེ་དང་དེ་ལ་མངོན་པར་དགའ་བ་ཞེས་བྱ་བ་ནི་ཐམས་ཅད་དུ་དོན་དུ་གཉེར་བའི་ངང་ཚུལ་ཅན་ཡིན་ནོ། །དབང་དུ་འགྲོ་བ་
ཞེས་བྱ་བ་ནི་དེའི་དབང་དུ་འགྲོ་བར་གྱུར་པའོ། །གནས་བརྟན་ཞེས་བྱ་བ་ལ་སོགས་པ་ལ། གནས་བརྟན་ནི་འདིར་ལོ་བཅུ་ལོན་པ་ཡིན་ལ། རྒྱལ་ཚབ་ལྟ་བུ་ནི་ལོ་ཉི་ཤུ་ལོན་པ་ཡིན་ནོ། །རབ་ཏུ་བྱུང་ནས་རིང་དུ་ལོན་པ་ཡང་ལོ་སུམ་ཅུ་ལ་སོགས་པ་ལོན་པ་ཡིན་ནོ། །གོམས་པ་ནི་འཕགས་པའི་ལམ་ཡིན་ལ།
མངོན་པར་སྤྱོད་པ་ནི་ཚངས་པར་སྤྱད་པ་ཡིན་ནོ། །སྟོན་པ་སྟེ་སངས་རྒྱས་བཅོམ་ལྡན་འདས་ཡོན་ཏན་གྱི་སྒོ་ནས་བསྟོད་པ་ཡིན་ནོ། །བསྔགས་པ་ནི་དེ་དག་ནི་ཡོན་ཏན་དང་ལྡན་པ་ཡིན་ནོ་ཞེས་བྱ་བ་དེ་ལྟ་བུའི་རྣམ་པས་བསྔགས་པ་ཡིན་ནོ། །དེ་གང་གིས་བསྔགས་པ་ཡིན་ཞེ་ན། མཁས་པས་ཞེས་བྱ་བ་
སྨོས་ཏེ། རྣམ་པར་ཤེས་པར་བྱེད་པས་ན་མཁས་པ་སྟེ། ཤིན་ཏུ་ཤེས་རབ་དང་ལྡན་པ་ཞེས་བྱ་བའི་ཐ་ཚིག་གོ། །བསླབ་པ་ཞེས་བྱ་བ་ནི་བསླབ་པའི་གཞི་ཡིན་ནོ། །ཆོས་ཞེས་བྱ་བ་ནི་བསྟན་པའི་ཆོས་ཡིན་ནོ། །རྗེས་སུ་སྟོན་པ་ཞེས་བྱ་བ་ནི་ལམ་སྒོམ་པའམ། ཚོགས་ཀྱི་ལམ་ལུང་འབོགས་པ་ཡིན་ནོ། །
བག་ཡོད་པ་ནི་དགེ་བའི་ཆོས་སྒོམ་པའོ། །རབ་ཏུ་ཡངས་