Luận tạng Tây Tạng (Tengyur) — Tập 158

པ་ནི་ཕན་འདོགས་པ་སྟེ། གང་གི་ཕྱིར་ཆོས་སོ་སོར་རྒྱས་པ་ཐོབ་པར་གྱུར་པ་དེ་ལ་འདིར་སོ་སོར་རྒྱས་པའི་སྒྲས་བརྗོད་པ་ཡིན་ནོ། །ཏིང་ངེ་འཛིན་ནི་སེམས་རྩེ་གཅིག་པའོ། །ལས་ལ་དགའ་བར་འགྱུར་ཞེས་བྱ་བ་ལ་སོགས་པ་ལ། བསམ་གཏན་
དང་། འདོན་པ་དང་། ཆོས་དང་ལྡན་པའི་དགེ་འདུན་གྱི་ལས་མ་གཏོགས་པ་འདི་ལྟར་བྱ་བ་ལ་སོགས་པ་དེ་དག་ཐམས་ཅད་ལས་ཀྱི་སྒྲས་བརྗོད་པ་ཡིན་ནོ། །དགའ་བར་བྱ་བ་ཡིན་པས་ན་དགའ་བ་ཡིན་ལ། ལས་ལ་དགའ་བ་ནི་ལས་ལ་དགའ་བ་ཡིན་ཏེ། ལས་རྣམ་པ་སྣ་ཚོགས་ནི་འབྲེལ་པར་

གྱུར་ཅེས་བྱ་བའི་ཐ་ཚིག་གོ། །དོན་དེ་ཉིད་ལ་ཡི་གེའི་ཡུལ་གྱིས་སྨྲ་བ་དང་། ཕྱིར་སྨྲ་བ་དང་། ཕྱིར་སྨྲ་བས་རྩོད་པར་བྱེད་པ་ནི་འདིར་སྨྲ་བའི་སྒྲས་བརྗོད་པ་ཡིན་ནོ། །གཉིད་ལ་དགའ་བ་ཞེས་བྱ་བ་ནི་རྟག་ཏུ་གཉིད་ལ་ཕྱོགས་པར་གྱུར་པའོ། །རྒྱལ་པོ་དང་རྐུན་པོ་དང་གཡུལ་ལ་སོགས་
པའི་གཏམ་ནི་བྲེ་མོ་གཏམ་ཡིན་ནོ། །འདྲེ་བ་ནི་རབ་ཏུ་བྱུང་བ་དང་ཁྱིམ་པ་དང་ཤིན་ཏུ་འདྲེས་པར་གྱུར་པའམ། འདོད་པའི་རྣམ་པར་རྟོག་པ་དང་འདྲེས་པར་གྱུར་པའོ། །རྙེད་པ་ནི་ནོར་ཐོབ་པའོ། །སེམས་ཀྱིས་ཆེན་པོ་ཉིད་དུ་འཛིན་པ་ནི་བཀུར་སྟི་ཡིན་ནོ། །ཚིགས་སུ་བཅད་པ་ནི་གྲགས་པའོ། །གཞན་གྱི་འདུ་ཤེས་
ནི་གཞན་ཁོང་དུ་ཆུད་པ་སྟེ། རྙེད་པ་དང་བཀུར་སྟི་དང་ཚིགས་སུ་བཅད་པའི་ཆེད་ནི་རྙེད་པ་དང་བཀུར་སྟི་དང་ཚིགས་སུ་བཅད་པའི་དོན་ནི་གཞན་གྱི་འདུ་ཤེས་ཏེ་སྤངས་པའི་སྦྱོར་བའི་རྗེས་སུ་ལྡན་པར་སྤྱོད་པ་ནི་མ་ཡིན་ཏེ། ཉོན་མོངས་པ་སྤངས་ཤིང་དོར་བའི་སྦྱོར་བ་ནི་སྤངས་པའི་སྦྱོར་བ་ཡིན་ལ། དེ་དང་རྗེས་སུ་འབྲེལ་
པ་དེའི་ཕྱིར་འབྲེལ་པར་གྱུར་པ་ཡིན་ནོ། །ཅུང་ཟད་ཙམ་དང་ཆེས་ཅུང་ཟད་ཙམ་གྱིས་བྱ་བ་ལ་ཤིན་ཏུ་ཆུད་པ་ནི་ཅུང་ཟད་ཙམ་ཡིན་ལ། གཙོ་བོ་མ་ཡིན་པ་ཉིད་ཀྱི་ཕྱིར་ཡོན་ཏན་གོང་མ་ལ་ལྟོས་པ་མེད་པ་ཞེས་བྱ་བ་ནི་ཆེས་ཅུང་ཟད་ཙམ་ཡིན་ཏེ། དཔེར་ན་རང་གི་མཚན་ཉིད་འཛིན་པའི་ཉོན་མོངས་པ་ཟིལ་གྱིས་གནོན་པ་ནི་
གནས་ཀྱི་རྒྱུ་མཚན་ལྟ་བུའོ། །དེ་ཉིད་ཁྱད་པར་རྟོགས་པ་ཡིན་ཏེ། རྟོགས་པའི་ཁོང་དུ་ཆུད་པ་མ་ཡིན་པ་དེའི་ཕྱིར་རོ། །བར་ནི་དབུས་ཡིན་ནོ། །ཡོན་ཏན་གོང་མ་བརྙེས་པར་བྱེད་པའི་བྱ་བའི་ཕྱིར་སེམས་བཟོད་པ་མེད་པའི་སྐྱོ་བ་དང་། ཡིད་འབྱུང་བ་ནི་རྣམ་གྲངས་ཡིན་ནོ། །གོང་མའི་བྱ་བ་ཡོད་ན་ཞེས་བྱ་བ་ལ།
ཉོན་མོངས་པ་མ་ལུས་པ་སྤངས་པ་ནི་འདི་གོང་མའི་བྱ་བ་ཡིན་ཏེ། དེ་ཡོད་པར་གྱུར་ནའོ། །དད་པ་དང་ལྡན་པ་ཞེས་བྱ་བ་ལ་སོགས་པ་ལ། དད་པ་ཁྱད་པར་ཅན་དང་ལྡན་པར་གྱུར་པ་ནི་དད་པ་དང་ལྡན་པར་གྱུར་པའོ། །ངོ་ཚ་ནི་གུས་པ་དང་ལྡན་པ་ཡིན་ལ། ངོ་ཚ་གང་ལ་ཡོད་པ་དེ་དག་ནི་ངོ་ཚ་དང་ལྡན་པ་སྟེ། གུས་
པ་དང་བཅས་པ་ཞེས་བྱ་བར་དགོངས་སོ། །ཁ་ན་མ་ཐོ་བ་དག་ལ་འཇིགས་པར་ལྟ་བ་ཉིད་ནི་ཁྲེལ་ཡིན་ཏེ་དེ་གང་ལ་ཡོད་པ་དེ་དག་ནི་ཁྲེལ་ཡོད་པའོ། །དགེ་བའི་ཆོས་བསྐྱེད་པ་དང་། མི་དགེ་བའི་ཆོས་སྤང་བའི་ཕྱིར་གང་དག་བརྩོན་འགྲུས་རྩོམ་པ་དེ་དག་ནི་བརྩོན་འགྲུས་བརྩམས་པ་ཡིན་ནོ། །གང་དགེ་

བའི་ཆོས་ལ་དྲན་པ་ཉེ་བར་གནས་ཤིང་དྲང་པོར་གྱུར་པས་འཇུག་པ་དེ་དག་ནི་དྲན་པ་ཉེ་བར་གཞག་པ་ཡིན་ནོ། །སེམས་རྩེ་གཅིག་པ་ཐོབ་པ་ནི་མཉམ་པར་གཞག་པ་ཡིན་ལ། ཤེས་རབ་ཅན་ནི་ཤིན་ཏུ་ཤེས་རབ་དང་ལྡན་པར་གྱུར་པའོ། །ཆོས་ཤེས་པ་ཞེས་བྱ་བ་ལ་སོགས་པ་ལ། མདོ་སྡེ་ལས་ཇི་ལྟར་ན་དགེ་
སློང་ཆོས་ཤེས་པ་ཡིན། འདི་ལ་དགེ་སློང་ཆོས་ཤེས་པ་ཡིན་ཏེ། དཔེར་ན་མདོའི་སྡེ་དང་། དབྱངས་ཀྱིས་བསྙད་པའི་སྡེ་ཞེས་བྱ་བ་ལ་སོགས་པ་དང་། ཇི་ལྟར་ན་དོན་ཤེས་པ་ཡིན། འདི་ལ་དགེ་སློང་དོན་ཤེས་པ་ཡིན་ཏེ། སྨྲས་པ་འདི་དང་འདིའི་དོན་འདི་དང་འདི་ཡིན་ནོ་ཞེས་ངག་གི་དོན་ཡོངས་སུ་ཤེས་
པར་ནུས་པ་དང་ལྡན་པ་ཞེས་བྱ་བའི་བར་དུ་འབྱུང་བ་ཡིན་ནོ། །དུས་ཤེས་པ་ཞེས་བྱ་བ་ནི་འདི་ནི་བདག་གི་ཞི་གནས་ཀྱི་རྒྱུ་མཚན་དང་། འདི་ནི་རབ་ཏུ་འཛིན་པའི་རྒྱུ་མཚན་དང་། འདི་ནི་བཏང་སྙོམས་ཀྱི་རྒྱུ་མཚན་གྱིས་དུས་ཡིན་ནོ་ཞེས་འདི་ལ་དགེ་སློང་གིས་ཤེས་པ་སྟེ། ཏིང་ངེ་འཛིན་བསྒོམ་པའི་དུས་ནི་
དགེ་བ་དང་བརྩོན་འགྲུས་ཀྱི་དུས་དགེ་བ་དང་། བཏང་སྙོམས་ཀྱི་དུས་དགེ་བ་ཞེས་བྱ་བའི་དོན་འདིར་འགྱུར་རོ། །ཚོད་ཤེས་པ་ཞེས་བྱ་བ་ནི་བཟའ་བ་དང་། བཏུང་བ་དང་། བཅའ་བ་དང་། མྱང་བ་དག་གི་ཚོད་རིག་པ་ཡིན་ནོ། །བདག་ཤེས་པ་ཞེས་བྱ་བ་ནི་ཁོ་བོའི་ཚུལ་ཁྲིམས་དང་། ཐོས་པ་དང་། ཤེས་
རབ་དང་། ལུང་དང་། རྟོགས་པ་ལ་སོགས་པ་འདི་ཙམ་དང་ལྡན་པར་བདག་འཇལ་བ་ལ་མཁས་པ་ཡིན་ཏེ། བདག་ཤེས་པས་གཞན་ལ་སྨོད་པར་མི་འགྱུར་རོ། །འཁོར་ཤེས་པ་ཞེས་བྱ་བ་ནི་རྒྱལ་རིགས་ལ་སོགས་པའི་འཁོར་དང་མཐུན་པར་ཐ་སྙད་དུ་བྱེད་པ་ལ་མཁས་པ་ཡིན་ནོ། །དེ་སྐད་དུ་ཡང་དེ་
ལ་བདག་གིས་འདི་ལྟར་གཞུག་པར་བྱ། འདི་ལྟར་གནས་པར་བྱ་ཞེས་བྱ་བ་ལ་སོགས་པར་བསྟན་པ་ཡིན་ནོ། །གང་ཟག་མཆོག་དང་མཆོག་མ་ཡིན་པ་ཤེས་པ་ཞེས་བྱ་བ་ལ། གང་ཟག་ཐམས་ཅད་ཀྱི་ཡུལ་ཁྱད་པར་དུ་འཕགས་པ་དང་། ཁྱད་པར་དུ་འཕགས་པ་མ་ཡིན་པའི་བྱེ་བྲག་ཡོངས་སུ་ཤེས་པ་
ལ་མཁས་པར་གྱུར་པ་ཡིན་ནོ། །དྲན་པ་ཡང་དག་བྱང་ཆུབ་ཀྱི་ཡན་ལག་ཅེས་བྱ་བ་ལ་སོགས་པ་ལ། མི་ཤེས་པ་ལྷག་མ་མེད་པ་དང་བྲལ་བའི་ཕྱིར་དང་། བྱ་བ་བྱས་པ་ཁོང་དུ་ཆུད་པའི་ཕྱིར་དང་། ཡང་བྱ་བ་མེད་པ་ཁོང་དུ་ཆུད་པའི་ཕྱིར་ཟད་ལ་མི་སྐྱེ་བའི་ཡེ་ཤེས་ནི་བྱང་ཆུབ་ཡིན་ལ་དྲན་པ་ལ་སོགས་པ་དེ་དག་

ནི་དེ་དང་མཐུན་པའི་ཕྱིར་བྱང་ཆུབ་ཀྱི་ཡན་ལག་ཅེས་བྱའོ། །དྲན་པ་ནི་དོན་མངོན་པར་བརྗོད་པ་སྟེ། བྱས་པ་དང་། བྱ་བ་དང་། བྱེད་པར་འགྱུར་བའི་ཆོས་བརྗོད་པར་མི་འགྱུར་བ་ཞེས་བྱ་བའི་ཐ་ཚིག་གོ། །དྲན་པ་ཁོ་ན་ཡང་དག་བྱང་ཆུབ་ཀྱི་ཡན་ལག་ཡིན་ནོ། །ཁྱད་པར་ཇི་ལྟ་བུ་དང་ལྡན་
པ་ཞེ་ན། དབེན་པ་ལ་བརྟེན་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། དབེན་པ་ནི་འདིར་ལུས་དབེན་པ་དང་། སེམས་དབེན་པ་ཡིན་ལ། དབེན་པ་ལ་བརྟེན་ཅིང་རབ་ཏུ་འཇུག་པའི་ཕྱིར་དབེན་པ་ལ་བརྟེན་པའོ། །འདོད་པའི་ཁམས་ལ་སོགས་པའི་འདོད་ཆགས་དང་བྲལ་བ་བརྟེན་ཅིང་རབ་ཏུ་འཇུག་པའི་ཕྱིར་
འདོད་ཆགས་དང་བྲལ་བ་ལ་བརྟེན་པའོ། །ཉོན་མོངས་པ་སྤངས་པ་ལ་གནས་པས་རབ་ཏུ་འཇུག་པའི་ཕྱིར་འགོག་པ་ལ་བརྟེན་པའོ། །ཡོན་ཏན་གོང་ནས་གོང་དུ་འཕེལ་བ་ལ་གནས་པས་རབ་ཏུ་འཇུག་པའི་ཕྱིར་འདུ་འཛི་དང་བྲལ་བ་སྟེ། ཡོན་ཏན་ཆུང་ངུའི་རྣམ་པ་སྔ་མ་སྔ་མ་དོར་ཞིང་སྔ་ན་མེད་པའི་ཡོན་ཏན་
འབྲིང་དང་ཆེན་པོ་སྐྱེད་པ་ནི་འདུ་འཛི་དང་བྲལ་བ་ཞེས་བྱ་བའི་དབང་དུ་བྱས་ནས་སོ། །ཡང་ན་དབེན་པ་ལ་བརྟེན་པ་ཞེས་བྱ་བ་ནི་སྦྱོར་བའི་ལས་ལ་བརྟེན་པ་ཡིན་ནོ། །འདོད་ཆགས་དང་བྲལ་བ་ལ་བརྟེན་པ་ནི་བར་ཆད་མེད་པའི་ལམ་ལ་བརྟེན་པ་ཡིན་ཏེ་དེས་ཉོན་མོངས་པ་ཐོབ་པ་གཅོད་པའི་ཕྱིར་རོ། །འགོག་
པ་ལ་བརྟེན་པ་ཞེས་བྱ་བ་ནི་རྣམ་པར་གྲོལ་བའི་ལམ་ལ་བརྟེན་པ་ཡིན་ཏེ། དེའི་བྲལ་བ་ཐོབ་པ་སྐྱེད་པར་བྱེད་པ་ཉིད་ཀྱི་ཕྱིར་རོ། །འདུ་འཛི་དང་བྲལ་བ་ཞེས་བྱ་བ་ནི་ཁྱད་པར་གྱི་ལམ་ལ་བརྟེན་པ་ཡིན་ཏེ། ཁྱད་པར་ཁོང་དུ་ཆུད་པའི་སྒོ་ནས་ཡོན་ཏན་ཁྱད་པར་ཅན་དུ་ཡོངས་སུ་གྱུར་པའི་ཕྱིར་རོ། །ཆོས་རྣམ་པར་
འབྱེད་པ་ནི་ཆུང་ངུ་དང་འབྲིང་དང་ཆེན་པོ་ཉིད་དུ་ཁོང་དུ་ཆུད་པ་དག་ཆོས་རྣམ་པར་འབྱེད་པ་ཡིན་ནོ། །དགེ་བ་དང་མི་དགེ་བའི་ཆོས་སྐྱེད་ཅིང་འགོག་པ་ལ་མངོན་པར་སྤྲོ་བ་ནི་བརྩོན་འགྲུས་ཡིན་ནོ། །དགའ་བ་ནི་ཡིད་བདེ་བའོ། །ཤིན་ཏུ་སྦྱངས་པ་ནི་སེམས་ལས་སུ་རུང་བ་ཉིད་ཡིན་ནོ། །ཏིང་ངེ་འཛིན་ནི་
སེམས་རྩེ་གཅིག་པ་ཉིད་ཡིན་ནོ། །བཏང་སྙོམས་ནི་དགེ་བའི་ཆོས་ལ་འཇུག་པ་ལ་བཏང་སྙོམས་སུ་བྱེད་པ་ཡིན་ནོ། །ཡང་དག་པར་སྡུག་པར་འགྱུར་བའི་ཞེས་བྱ་བ་ལ་སོགས་པ་ལ་དགའ་བ་དང་མཚུངས་པར་ལྡན་པའི་འདོད་ཆགས་ནི་ཡང་དག་པར་སྡུག་པ་ཡིན་ལ། ཡང་དག་པར་དགའ་བ་དང་རྗེས་

སུ་མཐུན་པ་ནི་ཡང་དག་པར་སྡུག་པར་འགྱུར་བ་ཡིན་ནོ། །བྱམས་པ་དག་གི་གནས་པ་ནི་བྱམས་པའི་གནས་པའོ། །དེ་གང་ཞེ་ན། སྨྲས་པ། ལུས་ཀྱི་ལས་ཏེ་ལུས་ཅན་གྱི་འཇུག་པ་ཞེས་བྱ་བའི་ཐ་ཚིག་གོ། །དཔེར་ན་གྲོགས་པོ་རབ་ཀྱི་ལུས་ཀྱི་ལས་དང་འཇུག་པ་དེ་དང་འདྲའོ་ཞེས་བྱ་བའི་དོན་འདིར་འགྱུར་རོ། །
སྟོན་པ་དང་ཉེ་བར་བྱེད་པ་ཞེས་བྱ་བ་ནི་ཚུལ་དང་མཐུན་པར་བསྙེན་བཀུར་བྱེད་པའི་ཕྱིར་རོ། །ཁྱད་པར་ཤེས་པར་བྱེད་པས་ན་མཁས་པའོ། །ཤེས་པའི་སྒོ་ནས་རྟག་ཏུ་དགེ་བ་ལ་ཀུན་དུ་སྤྱོད་པའི་ངང་ཚུལ་ཅན་དུ་གྱུར་པ་ཞེས་བྱ་བའི་མཁས་པ་མ་ཡིན་གྱི་ཚངས་པ་མཚུངས་པར་སྤྱོད་པ་ཡིན་ཏེ། དེ་དག་གི་ཡང་
ཉེ་བར་བྱེད་པའོ། །ཆོས་འདི་ནི་ཞེས་བྱ་བ་ལ་སོགས་པ་བྱམས་པའི་ལུས་ཀྱི་ལས་ལ་འདིར་ཆོས་ཀྱི་སྒྲས་བསྟན་པ་ཡིན་ནོ། །འདིས་མགུ་བར་བྱེད་པས་ན་མགུ་བར་བྱེད་པའོ། །ཡུལ་གང་ལ་བྱམས་པའི་ལུས་ཀྱི་ལས་འཇུག་པར་འགྱུར་བ་དེ་ལ་གདོན་མི་ཟ་བར་བླ་མའི་བློ་ཉིད་ཀྱང་འཇུག་པར་འགྱུར་རོ་ཞེས་
བྱ་བའི་དབང་དུ་བྱས་ནས་བླ་མར་བྱེད་པས་ན་བླ་མར་བྱེད་པ་ཡིན་ནོ། །ཡིད་མགུ་བས་ན་ཡིད་མི་མགུ་སྟེ། ཡིད་མགུ་བར་བྱེད་པས་ན་ཡིད་མགུ་བར་བྱེད་པའོ། །མགུ་བའི་ཕྱིར་ཞེས་བྱ་བ་ལ་སོགས་པ་ནི་མགུ་བ་ལ་སོགས་པ་ནི་རྒྱུ་མཚན་ཡིན་ནོ། །ཡུལ་གང་ལ་བྱམས་པའི་ལུས་ཀྱི་ལས་བྱེད་པ་དེ་ལ་
ཡང་བྱེད་པ་པོའི་བླ་མའི་བློ་སྐྱེད་པར་བྱེད་དེ། དེ་ལ་འདིར་བླ་མར་དགོངས་སོ། །བསྒོམ་པའི་ཕྱིར་ཞེས་བྱ་བ་ལ། བྱམས་པའི་ལུས་ཀྱི་ལས་ཀྱི་ཡུལ་གང་ཡིན་པ་དེའི་ཡོན་ཏན་བསྒོམ་པ་སྟེ། ཡང་དང་ཡང་མངོན་སུམ་དུ་བྱེད་པའམ་བསྒོམ་པ་ཡིན་པར་དགོངས་སོ། །བསྡུ་བའི་ཕྱིར་ཞེས་བྱ་བ་ནི་
འདྲེ་བར་བྱ་བའི་ཕྱིར་རོ། །མཐུན་པའི་ཕྱིར་ཞེས་བྱ་བ་ནི་སེམས་གཅིག་ཏུ་གྱུར་པའི་ཕྱིར་རོ། །སེམས་ཀྱིས་གནོད་པ་བྱེད་པའི་དངོས་པོ་འཛིན་པ་མེད་པའི་ཕྱིར་མི་འཐོབ་པར་བྱ་བའི་ཕྱིར་རོ། །རྩུབ་མོ་སྨྲ་བ་དང་། ཕྱིར་སྨྲ་བ་མེད་པའི་ཕྱིར་མི་རྩོད་པར་བྱ་བའི་ཕྱིར་རོ། །གཅིག་ཏུ་འགྱུར་བ་
ནི་རོ་གཅིག་ཏུ་འགྱུར་བའོ། །བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཞེས་བྱ་བ་ནི་བྱམས་པའི་ལུས་དང་ངག་གི་ལས་དང་ལྡན་པ་ནི་གསལ་བ་ཉིད་ཀྱི་ཕྱིར་མགུ་བར་བྱེད་པ་ལ་སོགས་པ་ཉིད་ཡིན་ལ། ཡིད་ཀྱི་ལས་ནི་གསལ་བ་ཉིད་ཀྱི་ཕྱིར་ཇི་ལྟར་རིགས་ཤེ་ན། འདིར་

བླ་མ་དང་བྱམས་པའི་གནས་ཐམས་ཅད་ནི་མགུ་བ་དང་བླ་མར་འགྱུར་བ་ཡིན་ཞིང་ཡོངས་སུ་མི་ཤེས་པའི་རང་བཞིན་ཡང་མ་ཡིན་པ་དེའི་ཕྱིར་འདི་ལ་ཉེས་པ་ཡོད་པ་མ་ཡིན་ནོ་ཞེས་སྟོན་པར་མཛད་དོ། །ཆོས་དང་ལྡན་པས་ཐོབ་པ་ཞེས་བྱ་བ་ལ་སོགས་པ་ལ་ཆོས་ལས་མ་བྱེ་བས་
ན་ཆོས་དང་ལྡན་པ་སྟེ། རྣམ་པ་ཐམས་ཅད་དུ་རུང་བ་ཞེས་བྱ་བའི་བར་དུའོ། །རིགས་པས་ཐོབ་པའི་ཆོས་ཀྱི་རྙེད་པ་ཡིན་གྱི་ཆོས་ཚུལ་འཆོས་པ་དང་ཁ་གསག་ལ་སོགས་པ་ལོག་པའི་འཚོ་བའི་སྒོ་ནས་རྙེད་པར་གྱུར་པ་ནི་མ་ཡིན་ནོ། །ཐ་ན་ལྷུང་བཟེད་དུ་འོངས་པ་ཞེས་བྱ་བ་ནི་ལྷུང་བཟེད་དུ་བྱིན་གྱིས་
བརླབས་ཤིང་ཐོབ་པར་གྱུར་པའོ། །ལྷུང་བཟེད་དུ་ཆུད་པ་ཞེས་བྱ་བ་ནི་ལྷུང་བཟེད་དུ་ཟས་ཞུགས་པར་གྱུར་པའོ། །གཞན་ལ་འགོད་པར་བྱེད་པའི་ཕྱིར་ཐུན་མོང་དུ་སྤྱོད་པར་བྱེད་པའོ། །གསལ་པོར་ཟ་བའི་ཕྱིར་བསྣོགས་ཏེ་མི་སྤྱོད་པ་སྟེ། ཕ་རོལ་པོ་ལ་འགོད་པར་བྱེད་པས་འཇིགས་པའི་ཕྱིར་
ཕག་ཏུ་ཟ་བར་མི་བྱེད་པ་ཞེས་བྱ་བ་གང་ཡིན་པ་དེ་ལ་དེ་སྐད་ཅེས་བྱའོ། །གང་ཚུལ་ཁྲིམས་ཞེས་བྱ་བ་ལ་སོགས་པ་ལ་ཉེས་བྱས་ཙམ་གྱི་འཚལ་བའི་ཚུལ་ཁྲིམས་ཀྱིས་ཀྱང་མ་གནོད་པ་ཉིད་ཀྱི་ཕྱིར་མ་ཉམས་པ་ཡིན་ནོ། །འཆལ་བའི་ཚུལ་ཁྲིམས་ཀྱི་རྒྱུ་ཅན་གྱི་འདོད་པའི་རྣམ་པར་རྟོག་པ་ལ་སོགས་པས་
མ་གནོད་པ་ཉིད་ཀྱི་ཕྱིར་མ་རལ་བ་ཡིན་ནོ། །བདག་གི་ཚུལ་ཁྲིམས་འདིས་འདོད་པ་ན་སྤྱོད་པ་འདོད་པའི་འབྲས་བུར་གྱུར་ཅིག་ཅེས་དེ་ལྟ་བུ་སྔོ་བར་མི་བྱེད་པའི་ཕྱིར་མ་སྦགས་པ་ཡིན་ནོ། །གཟུགས་དང་གཟུགས་མེད་པ་ན་སྤྱོད་པའི་འབྲས་བུ་ཉིད་དུ་སྔོ་བར་མི་བྱེད་པའི་ཕྱིར་མ་འདྲེས་པ་ཡིན་ནོ། །
གང་གི་ཕྱིར་ཚུལ་ཁྲིམས་ཀྱིས་འཁོར་བའི་འབྲས་བུ་དོན་དུ་གཉེར་ན་ཚུལ་ཁྲིམས་དེ་ཤིན་ཏུ་རྣམ་པར་དག་པར་མི་འགྱུར་བ་དེའི་ཕྱིར་མ་སྦགས་པ་དང་མ་འདྲེས་པ་ཞེས་བསྟན་ཏོ། །རང་དབང་ཅན་ཞེས་བྱ་བ་ནི་གཞན་ལ་རག་མི་ལུས་ཤིང་རང་དབང་དུ་གྱུར་པ་ཡིན་ནོ། །གང་ཚུལ་ཁྲིམས་ཀྱི་རང་བཞིན་
ཁོ་ནས་སྲུང་བར་བྱེད་ཀྱི་གཞན་གྱི་ངོར་མ་ཡིན་པ་དེ་ནི་ཕན་པ་ཞེས་བྱའོ། །མ་འདྲེས་པ་ཞེས་བྱ་བ་ནི་ཁྱིམ་པའི་སྐྱེ་བོ་དང་འདྲེ་བས་ཟིལ་གྱིས་གནོན་པར་མི་འགྱུར་རོ། །ལེགས་པར་བླངས་པ་ཞེས་བྱ་བ་ནི་འཛིན་པའི་དུས་སུ་ཆེན་པོའི་སེམས་ཀྱིས་བླངས་པ་ཡིན་ནོ། །ལེགས་པར་བརྩམས་པ་

ཞེས་བྱ་བ་ནི་ཉི་མ་རེ་རེ་ཞིང་འཕེལ་བར་བྱེད་པ་ཡིན་ནོ། །དེ་ཉིད་ཀྱི་ཕྱིར་མཁས་པས་བསྔགས་པ་ཡིན་ནོ། །གང་གི་ཕྱིར་མྱ་ངན་ལས་འདས་པར་བསྔོས་པ་ཉིད་ཀྱི་ཕྱིར་མ་སྨད་པའོ། །གང་ལྟ་བ་འདི་ནི་ཞེས་བྱ་བ་ལ་སོགས་པ་ལ། ལྟ་བ་ནི་འདིར་ཟག་པ་མེད་པའི་ཤེས་རབ་ཡིན་པར་རིག་པར་བྱའོ། །
དེ་ཉིད་ཀྱི་ཕྱིར་དེ་འཕགས་པ་ངེས་པར་འབྱུང་བ་ནི་ངེས་པར་འབྱུང་བ་སྟེ། ཡང་མི་ལྡོག་པ་ཐོབ་པར་བྱེད་པའམ། ངེས་པར་འགྲོ་བ་ཡིན་ལ་ངེས་པར་འབྱུང་བའི་ཕྱིར་ནུས་པ་ཡོད་པས་ན་ངེས་པར་འབྱུང་བར་འགྱུར་བ་ཡིན་ཏེ། ངེས་པར་འབྱུང་བ་དང་རྗེས་སུ་མཐུན་པ་ཞེས་བྱ་བའི་བར་དུའོ། །ངེས་པར་
ཁོང་དུ་ཆུད་པ་ནི་ངེས་པར་རྟོགས་པ་ཡིན་ལ། ངེས་པར་རྟོགས་པའི་ཕྱིར་དེ་ཡོད་པས་ན་ངེས་པར་རྟོགས་པར་འགྱུར་བའོ། །གང་གིས་ཤེ་ན། ལྟ་བས་ངེས་པར་འབྱུང་བ་སྟེ། འཁོར་བའི་འཆིང་བའི་གནས་ནས་ངེས་པར་འགྲོ་བར་བྱེད་པ་ཡིན་ནོ། དེ་གང་ཞེ་ན། དེ་བྱེད་པ་ཞེས་བྱ་བ་སྨོས་
ཏེ། ཟག་པ་མེད་པའི་ལྟ་བ་དེ་བྱེད་ཅིང་སྐྱེད་པར་བྱེད་པ་གང་ཡིན་པ་དེ་ནི་དེ་བྱེད་པ་ཞེས་བྱའོ། །ཅིའི་ཕྱིར་ངེས་པར་འབྱུང་བར་བྱེད་ཅེ་ན། ཡང་དག་པར་སྡུག་བསྔལ་བ་ཞེས་བྱ་བ་ལ་སོགས་པ་སྨོས་ཏེ། སྡུག་བསྔལ་ཟད་པ་ཡང་ཕྱིར་མི་ལྡོག་པར་ཕྱིན་ཅི་མ་ལོག་པ་ནི་ཡང་དག་པར་སྡུག་བསྔལ་ཟད་པ་སྟེ།
དེ་ནི་དགེ་སློང་དག་སྤངས་ཤིང་གང་ཟག་པ་མེད་པའི་ཡེ་ཤེས་ཀྱིས་སྤངས་པ་ཞེས་བྱ་བའི་བར་དུའོ། །འདིས་ནི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་བསྟན་པ་ཡིན་ནོ། །སྡུག་བསྔལ་མཐར་བྱ་བའི་ཕྱིར་ཞེས་བྱ་བ་འདིས་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པ་བསྟན་
པའམ། དེ་བྱེད་པ་ངེས་པར་འབྱུང་བ་ཡིན་ནོ། །ཤེས་རབ་དེ་ཉིད་ངེས་པས་བྱུང་བ་དེ་ཉིད་ངེས་པར་འབྱུང་བ་ཡིན་ཏེ། ཉོན་མོངས་པའི་དྲི་མ་རབ་ཏུ་འབྱིན་པར་བྱེད་པའི་ཕྱིར་རོ། །ཅིའི་ཕྱིར་ངེས་པར་འབྱིན་པར་བྱེད་ཅེ་ན། ཡང་དག་པར་སྡུག་བསྔལ་ཟད་པར་བྱ་བའི་ཕྱིར་དང་། སྡུག་བསྔལ་མཐར་བྱ་བའི་
ཕྱིར་རོ། །གང་གི་སྡུག་བསྔལ་ཟད་པར་བྱ་བ་ཡིན་ཞེ་ན། སྨྲས་པ་དེ་བྱེད་པ་སྟེ། དེ་མངོན་སུམ་དུ་བྱེད་པའི་ཞེས་བྱ་བའི་དོན་ཏོ། །དོང་བ་ཞེས་བྱ་བ་ནི་སོང་ཤིག་པའམ། ཁོ་བོས་ཇི་སྲིད་པ་ཏ་ལའི་གྲོང་དུ་ཕྱིན་གྱི་བར་དུ་ཕྱི་བཞིན་འབྲང་བའི་དགེ་སྦྱོང་གི་ཚུལ་དུའོ། །འོད་མའི་སྲོག་ཤིང་ཅན་ཞེས་བྱ་བ་ནི་གྲོང་ཡིན་ནོ། །

རྒྱལ་པོས་བྱས་པའི་གནས་ནི་རྒྱལ་པོའི་གནས་ཏེ་དེར་རོ། །འཕགས་པའི་བདེན་པ་བཞི་ཞེས་བྱ་བ་ལ་ཐོས་པ་ལས་བྱུང་བའི་ཤེས་པས་མི་ཤེས་པའི་ཕྱིར་དང་། མཐོང་བའི་ལམ་གྱིས་མ་མཐོང་བའི་ཕྱིར་དང་། སློབ་པའི་ལམ་གྱིས་ཁོང་དུ་མ་ཆུད་པའི་ཕྱིར་དང་། མི་
སློབ་པའི་ལམ་གྱིས་སོ་སོར་མི་རིག་པའི་ཕྱིར་རམ། སྦྱོར་བའི་ལམ་ལ་སོགས་པས་མི་ཤེས་པ་ལ་སོགས་པ་ཡིན་པར་རིག་པར་བྱའོ། །དུས་རིང་པོ་ཞེས་བྱ་བ་ནི་ཐོག་མ་མེད་པའི་དུས་ཡིན་ནོ། །རྒྱུག་ཅིང་ཞེས་བྱ་བ་ནི་ལྷ་དང་མིའི་འགྲོ་བ་རང་གི་འདོད་པས་འགྲོ་བའི་སྒོ་ནས་འཕངས་པའམ་སྐྱེད་
པ་ཡིན་ནོ། །སེམས་ཅན་དམྱལ་བའི་འགྲོ་བ་ལ་སོགས་པར་མི་འདོད་བཞིན་དུ་འགྲོ་བས་ན་ཀུན་དུ་འགྲོ་བའོ། །རྗེས་སུ་རྟོགས་ཤིང་ཞེས་བྱ་བ་ནི་སློབ་པའི་ལམ་གྱིས་སོ། །སོ་སོར་རྟོགས་པས་ཞེས་བྱ་བ་ནི་མི་སློབ་པའི་ལམ་གྱིས་སོ། །སྲིད་པར་འཁྲིད་པ་ནི་ཡང་སྲིད་ཀྱི་སྲེད་པའམ་འདོད་ཆགས་ལ་
སོགས་པ་ཐམས་ཅད་ཉིད་དོ། །སྐྱེ་བའི་འཁོར་བ་ཞེས་བྱ་བ་ནི་སྐྱེ་བའི་རྒྱུན་སྤངས་པ་ཡིན་ནོ། །ཡང་སྲིད་པ་མེད་དེ་ཞེས་བྱ་བ་འདིས་ནི་ཡང་སྲིད་ཀྱི་འཁོར་བ་མེད་པར་བསྟན་པ་ཡིན་ནོ། །ཤིང་པ་ལའི་མཆོད་རྟེན་ན་ཞེས་བྱ་བ་ནི་ཤིང་པ་ཊ་ལས་ཉེ་བར་མཚོན་པའི་བཅོམ་ལྡན་འདས་ཤཱཀྱ་ཐུབ་པའམ། ཡང་
དག་པར་རྫོགས་པའི་སངས་རྒྱས་འོད་སྲུངས་ཀྱི་དབུ་སྐྲ་དང་སེན་མོའི་མཆོད་རྟེན་ཡིན་ནོ། །འདུས་པ་ལས་འདུས་པ་ཞེས་བྱ་བ་ལ་སོགས་པ་ལ། རིགས་ཐ་དད་པའི་ཚོགས་ནི་འདིར་འདུས་པ་ཡིན་ལ། རིགས་གཅིག་ཏུ་གྱུར་པ་དག་གི་འདུས་པ་ནི་ཚོགས་ཡིན་ནོ། །སོང་སྟེ་ཞེས་བྱ་བ་ནི་ཡང་དག་
པར་འོངས་པར་གྱུར་པའོ། །དྲུང་དུ་ཕྱིན་པ་ནི་སེམས་གཅིག་ཏུ་འདྲེས་པར་གྱུར་པའོ། །ཁྱིམ་བདག་གི་སྒྲས་ནི་བྲམ་ཟེ་མ་གཏོགས་པ་འགྲོ་བ་གཙོ་བོར་གྱུར་པ་གཟུང་ངོ་། །ཉེས་དམིགས་ནི་ཉེས་པ་ཡིན་ནོ། །འཇིག་རྟེན་འདི་དང་འཇིག་རྟེན་ཕ་རོལ་གྱི་ཕན་པ་ལ་བརྩོན་པས་མི་གཞོལ་བ་ཉིད་ནི་བག་
མེད་པ་ཡིན་ལ། བག་མེད་པ་དང་ལྡན་པའི་ཕྱིར་སེམས་ཅན་ཡང་བག་མེད་པ་ཡིན་པར་རིག་པར་བྱའོ། །བག་མེད་པ་ཁོ་ན་གནས་དང་རྟེན་དང་གཞི་ཡིན་པས་བག་མེད་པར་གནས་པའོ། །དེ་ཉིད་རྒྱུ་ཡིན་དེའི་རྒྱུས་ལོངས་སྤྱོད་ཆེན་པོ་ཉམས་པ་སྟེ། ལོངས་སྤྱོད་འཇིག་པར་འགྱུར་བ་ཐོབ་

པར་འགྱུར་རོ། །བག་མེད་པའི་རྒྱུས་ཞེས་བྱ་བ་དེ་ཙམ་གྱིས་ཆོག་མོད། ཅིའི་ཕྱིར་གནས་ཀྱི་སྒྲ་བྱས་ཤེ་ན། འདིར་གནས་ཀྱི་སྒྲ་སྨོས་པས་རྟག་ཏུ་བག་མེད་པ་ལ་འཇུག་པ་སྟོན་པར་བྱེད་དེ། །རྟག་ཏུ་བག་མེད་པ་ལ་འཇུག་ན་ནི་ལོངས་སྤྱོད་ཉམས་པ་འགྲུབ་པར་འགྱུར་ལ། བར་བར་དུ་བག་མེད་པ་ཡོངས་
སུ་སྤངས་ན་ནི་ལོངས་སྤྱོད་ཉམས་པར་མི་འགྱུར་བའི་ཕྱིར་ཐག་ཉེ་བའི་རྟེན་བསྟན་པར་བྱ་བའི་ཕྱིར་གནས་སྨོས་པ་ཡིན་ནོ་ཞེས་སྟོན་པར་མཛད་དོ། །འཁོར་ཞེས་བྱ་བ་ནི་འདིར་རིགས་གཅིག་པ་དང་ཚོགས་ཀྱི་སྒོ་ནས་ཉེ་བར་ཞི་བ་ཡིན་ནོ། །རྒྱལ་རིགས་དང་བྲམ་ཟེ་མ་གཏོགས་པ་འགྲོ་བ་གཙོ་བོ་འདུས་པ་
ནི་ཁྱིམ་བདག་གི་འཁོར་ཡིན་ནོ། །དཀའ་ཐུབ་དང་མཁས་པ་དག་འདུས་པ་ནི་དགེ་སྦྱོང་གི་འཁོར་ཡིན་ནོ། །ཐུར་དུ་ལྟ་བ་ནི་འཁུམས་པའོ། །མགོ་སྨོད་པ་ནི་འདིར་ཞུམ་པ་ཡིན་ཏེ། མཆོག་གི་སྒྲས་མགོ་བོ་བརྗོད་པ་ཡིན་ཏེ། ཡན་ལག་གི་གཙོ་བོ་ཡིན་པའི་ཕྱིར་རོ། །མཆོག་ཏུ་འཕགས་པར་
གྱུར་པ་གང་ལ་ཡོད་པ་དེ་ནི་མ་ཞུམ་པ་ཡིན་ལ། མ་ཞུམ་པ་མེད་པ་ནི་ཞུམ་པ་ཡིན་ནོ། །ཡང་ན་ཞུམ་པ་ནི་གཟི་མེད་པར་གྱུར་པ་སྟེ། ཚིག་གི་འཇུག་པ་ལ་སྤོབས་པ་མེད་པར་གྱུར་པའོ། །ཕྱོགས་དང་ཕྱོགས་མཚམས་ཞེས་བྱ་བ་ལ་སོགས་པའི་ཚིག་གིས་བཤད་པ་བྲམ་ཟེའི་བུ་ཨཾ་བསྟའི་མདོ་བཤད་པ་
དཔྱད་པ་ཡིན་ནོ། །ནག་པོའི་རྣམ་གྲངས་ཉིད་ཡིན་པས་ན་འདིར་ཡོན་ཏན་མ་ཡིན་ཞེས་བྱ་བ་ལ་སོགས་པ་ནི་ཁྱད་པར་ཡིན་ནོ། །ངན་པ་ཉིད་ཡིན་པའི་ཕྱིར་དང་། སྡིག་པའི་སྐྱེ་བོས་བསྟེན་པ་ཉིད་ཀྱི་ཕྱིར་སྡིག་པ་ཞེས་བྱའོ། །འགྱོད་པ་ནི་ཕྱིས་གདུང་བར་གྱུར་པ་ཡིན་ལ། འགྱོད་པ་གང་ལ་ཡོད་པ་དེ་ནི་
འགྱོད་པར་གྱུར་པ་སྟེ། ཁོ་བོས་གང་བག་མེད་པའི་དབང་གིས་དགེ་བ་མ་སྤྱད་པ་དེ་བཟང་པོ་མ་བྱས་སོ་ཞེས་བྱ་བ་ལ་སོགས་པས་ཕྱིས་གདུང་བ་དང་ལྡན་པར་འགྱུར་རོ། །ཉེས་དམིགས་བཞི་པོ་དེ་དག་ནི་མཐོང་བའི་ཆོས་ཡིན་ལ། སེམས་ཅན་དམྱལ་བར་སྐྱེ་བར་འགྱུར་བ་ནི་ཚེ་ཕྱི་མ་ཡིན་ནོ། །ནག་པོའི་
རྣམ་གྲངས་ལས་བཟློག་པ་ནི་དཀར་པོའི་རྣམ་གྲངས་ཡིན་པར་རིག་པར་བྱའོ། །གནས་ནི་གནས་ཀྱི་བྱེ་བྲག་ཡིན་ནོ། །བློན་པོ་ཆེན་པོ་ཞེས་བྱ་བ་ནི་བདག་པོའི་སྒོ་ནས་ཆེན་པོའི་ཚད་ཙམ་གང་ལ་ཡོད་པ་དེ་ནི་བློན་པོ་ཆེན་པོ་ཡིན་ཏེ། ཡུལ་མ་ག་དྷཱའི་བློན་པོ་ཆེན་པོ་ནི་ཡུལ་མ་ག་དྷཱའི་བློན་པོ་ཆེན་པོའོ། །

གནོད་པ་བྱ་བའི་ཕྱིར་ཞེས་བྱ་བ་ནི་བཟློག་པར་བྱ་བའི་ཕྱིར་རོ། །གཞན་པར་འདོད་པ་ནི་བསྒྲུབ་པར་འདོད་ཅིང་བྱེད་འདོད་པའོ། །བསོད་ནམས་བྱ་བ་ནི་བསོད་ནམས་དང་། བདག་པོའི་སྒོ་ནས་དེ་ཆེ་བར་བརྗོད་ལ། མཐུ་ཆེ་བ་གཞན་དག་ལས་
ཤིན་ཏུ་མཐུ་ཆེ་བ་དེ་ནི་མཐུ་ཆེ་ཞིང་བསོད་ནམས་ཆེ་བ་ཡིན་ནོ། །གནས་ཀྱི་དངོས་པོ་འཛིན་པ་ཞེས་བྱ་བ་ནི་རྟེན་འཛིན་པར་བྱེད་པའོ། །སུམ་ཅུ་རྩ་གསུམ་རིས་ཀྱི་ལྷ་དག་ཀྱང་དེར་འཁོར་གཞག་པར་བྱ་བའི་ཕྱིར་གནས་ཀྱི་དངོས་པོ་འཛིན་པར་བྱེད་པ་དེའི་ཕྱིར་སུམ་ཅུ་རྩ་གསུམ་
གྱི་ལྷ་དང་ལྷན་ཅིག་ཏུ་འགྲོ་བ་བཞིན་ནོ་སྙམ་དུ་དེ་དག་དང་ལྷན་ཅིག་བརྡ་བྱས་པ་ཡིན་ནོ་ཞེས་བསྟན་པ་ཡིན་ནོ། །གཞན་དུ་ན་ཇི་ལྟར་དེ་དག་འདིར་གནས་ཀྱི་དངོས་པོ་འཛིན་པར་འགྱུར། མིའི་འཁོར་བསྲུང་བར་བྱ་བའི་དོན་དུ་ལྷ་རྣམས་ཀྱི་དངོས་པོ་འཛིན་པ་ཡིན་ནོ་ཞེས་བྱ་བར་རིག་པར་
བྱའོ། །ཇི་སྲིད་ཀུན་དགའ་བོ་ཞེས་བྱ་བ་ལ་སོགས་པ་ལ་ཇི་སྲིད་འཛམ་བུའི་གླིང་མ་ལུས་པ་འཕགས་པའི་ཐ་སྙད་དང་། འཕགས་པའི་ཚོང་གི་ལམ་ཡོད་པ་དེ་དག་ནི་འཕགས་པའི་གནས་ལ་སོགས་པ་དེ་དག་ཐམས་ཅད་ཀྱི་ཡུལ་པ་ཊ་ལི་པུ་ཏྲ་མཆོག་ཏུ་འགྱུར་རོ་ཞེས་བྱ་བ་དོན་འདིར་
འགྱུར་རོ། །འགྲོ་བ་འཕགས་པའི་སྤྱོད་པས་གནས་པའི་ཕྱིར་འཕགས་པའི་གནས་ཡིན་ལ། ཚུལ་མ་ཡིན་པ་དང་བྲལ་བ་ཉིད་ཀྱི་ཆོས་དང་ལྡན་པ་ཉིད་ཀྱི་ཕྱིར་འཕགས་པའི་ཐ་སྙད་ཡིན་ནོ། །ཚོང་པའི་ལམ་ནི་ཚོང་པའི་ལམ་སྟེ། ཚོང་པ་རབ་ཏུ་རྒྱུ་བའི་ལམ་ཡིན་ལ། ཆོས་དང་ལྡན་པའི་
ཤོ་གམ་དང་། གྲུ་བཙས་ལེན་པའི་ཕྱིར་དང་། དོར་ཐབས་ཀྱི་མཛད་པ་མེད་པའི་ཕྱིར་འཕགས་པའི་ཚོང་པའི་ལམ་མོ། །ཐབས་གང་ཡིན་པ་དེས་ཁུར་བུར་བཅིངས་པ་ནི་ཐུམ་པོར་བརྗོད་དེ། གང་དུ་ཐུམ་པོར་འབྱེད་ཅིང་བཤིག་པར་བྱེད་པ་དེ་ནི་ཐུམ་པོར་བྱེད་པ་སྟེ། ཐུམ་པོ་འབྱེད་པ་ལ་
རྣམ་པར་འཚེ་བ་མེད་པ་དེ་ཉིད་ཀྱི་ཕྱིར་ཡུལ་པ་ཊ་ལི་པུ་ཏྲ་ལ་མཆོག་ཉིད་དུ་བསྟན་པ་ཡིན་ནོ། །འདིར་བར་ཆད་གསུམ་ཡིན་པར་རིག་པར་བྱའོ་ཞེས་བྱ་བ་ལ་སོགས་པ་ལ། འཇིག་རྟེན་པའི་རྐྱེན་བར་ཆད་ཡིན་པའམ། འཇིག་པ་ཁོ་ན་བར་ཆད་ཡིན་ནོ། །མེ་ཞེས་བྱ་བ་ནི་མེའི་ཐད་ལས་

སོ། །ཆུ་ཞེས་བྱ་བ་ནི་ཆུ་ལས་ཀྱང་ངོ་། །གཅིག་ལ་གཅིག་འབྱེད་པ་ནི་ནང་ཕན་ཚུན་འབྱེད་པ་ལས་ཀྱང་ངོ་། །ཅིའི་ཕྱིར་ཡང་བཅོམ་ལྡན་འདས་འཇིག་པའི་རྐྱེན་གཅིག་ཁོ་ན་སྟོན་པར་མི་མཛད་དེ། བཅོམ་ལྡན་འདས་ནི་ཐམས་ཅད་མཁྱེན་པ་ཉིད་ཡིན་པའི་ཕྱིར་རོ་ཞེ་ན།
འདིར་བླ་མ་དག་འཇིག་པའི་རྒྱུ་གཞན་ཡོངས་སུ་སྲུང་བ་ལ་ཕྱོགས་པ་དག་གི་གཞན་གྱི་འཇིག་པ་དག་བཅོམ་ལྡན་འདས་ཀྱིས་མཁྱེན་པ་དེའི་ཕྱིར་གསུམ་པོ་དེ་དག་ལ་བག་ཡོད་པར་གྱུར་པ་དེ་དག་འཇིག་པར་ཡང་མི་ནུས་སོ་སྙམ་པའི་ངེས་པ་དེས་སྟོན་པར་མཛད་ཀྱི་མི་མཁྱེན་པའི་ཕྱིར་ནི་མ་ཡིན་
ནོ་ཞེས་སྟོན་པར་མཛད་དོ། །བསྙེན་བཀུར་ཞེས་བྱ་བ་ནི་གུས་པའི་ཚུལ་གྱིས་ལུས་དང་ངག་གི་འཇུག་པས་ཉེ་བར་སྤྱོད་པ་ཡིན་ནོ། །གསེར་ལས་བསྒྱུར་བ་ནི་གསེར་ལས་བྱས་པའོ། །བྱ་ནི་སྣོད་ཀྱི་བྱེ་བྲག་ཡིན་ནོ། །གསོལ་བ་འདེབས་པར་གྱུར་པ་ནི་དོན་དུ་གཉེར་བར་གྱུར་པའོ། །
བསོད་ནམས་ཀྱི་རྒྱུན་ཞེས་བྱ་བ་ལ་སོགས་པ་ལ། རྒྱུན་ནི་རབ་ཏུ་འབབ་པ་ལ་བྱའོ། །བསོད་ནམས་ནི་སྦྱིན་པའི་རང་བཞིན་ཏེ། སེམས་གང་གིས་སྦྱིན་པ་དང་། དངོས་པོ་གང་ཡང་རུང་བ་སྦྱིན་པ་དང་། དེ་དང་འབྲེལ་བའི་ལུས་དང་ངག་གི་བྱ་བ་དེ་དག་ཐམས་ཅད་སྦྱིན་པའི་ནང་དུ་འདུས་པ་ཁོ་ན་ཡིན་ནོ། །
དགེ་བ་སྨོས་པས། སྦྱིན་པ་མ་གཏོགས་པ་ནུས་པ་སྔོན་དུ་ལྡང་བ་ལ་སོགས་པ་དང་། ངག་གི་ལས་སྙན་པའི་ཚིག་ལ་སོགས་པ་དང་། དད་པ་དང་མཚུངས་པར་ལྡན་པའི་ཡིད་ཀྱི་ལས་གང་ཡིན་པ་དེ་དག་ཐམས་ཅད་བཟུང་ངོ་། །བསོད་ནམས་དེ་ཉིད་མ་འོངས་པའི་བདེ་བ་སྐྱེད་པར་བྱེད་པའི་རྟེན་
ཉིད་ཡིན་པའི་ཕྱིར་བདེ་བའི་གཞི་ཞེས་བསྟན་ཏོ། །དོན་དང་ཞེས་བྱ་བ་ནི་མངོན་པར་འདོད་པ་ཐོབ་པར་བྱ་བའི་ཕྱིར་རོ། །ཕན་པ་དང་ཞེས་བྱ་བ་ནི་མངོན་པར་འདོད་པའི་སེམས་ཀྱི་བདེ་བ་གནས་པའི་ཕྱིར་རམ། རབ་ཏུ་བརྩམས་པའི་ལས་ཡོངས་སུ་རྫོགས་པར་བྱ་བའི་ཕྱིར་རོ། །དེའི་ཕྱིར་ཞེས་བྱ་བ་
ནི་མཐོང་བའི་ཆོས་ཀྱི་བདེ་བའི་ཕྱིར་རོ། །ཡོན་ཤོད་ཅིག་ཅེས་བྱ་བ་ནི་སྦྱིན་པའི་འབྲས་བུ་ཡོངས་སུ་བསྔོ་བའོ། །དད་པ་ཅན་ཞེས་བྱ་བ་ལ་སོགས་པ་ལ། སྲོག་གཅོད་པ་མ་གཏོགས་པ་འགའ་ཞིག་ལྷ་ལ་མཆོད་པ་བྱེད་པ་དེ་ནི་དད་པ་ཅན་ཡིན་པར་རིག་པར་བྱའོ། །སྐྱེས་བུ་གང་ཟག་ཅེས་བྱ་བ་

ནི་ཁྱིམ་པ་ཡིན་གྱི་རབ་ཏུ་བྱུང་བའི་སྐྱེས་བུ་མ་ཡིན་ནོ། །སྟོན་པའི་བཀའ་བཞིན་བྱེད་པར་འགྱུར། །ཞེས་བྱ་བ་ནི་བཀའ་ལྟར་བྱེད་པ་ཡིན་ཏེ། གང་གི་ཕྱིར་སངས་རྒྱས་བཅོམ་ལྡན་འདས་ཀྱིས་ལྷ་རྣམས་ལ་མཆོད་པ་བྱེད་པའི་ཁྱིམ་པ་ལ་བསྔགས་ཤིང་བསྟོད་པ་ཡིན་ནོ། །
བསྟན་བཅོས་ཡོངས་སུ་ཤེས་པ་ལ་མཁས་པ་ནི་ཡིད་གཞུངས་པ་ཡིན་ལ། འཇིག་རྟེན་གྱི་ཐ་སྙད་ལ་མཁས་པ་ནི་མཁས་པ་ཡིན་ནོ། །རྟོག་ཅེས་བྱ་བ་ནི་བྱེད་པ་ཡིན་ནོ། །ཚུལ་ཁྲིམས་གང་ལ་ཡོད་པ་དེ་དག་ནི་ཚུལ་ཁྲིམས་དང་ལྡན་པའོ། །ཡོན་གྱི་བཤད་པ་ཞེས་བྱ་བ་ནི་ཟས་ལས་བྱུང་བའི་
བསོད་ནམས་ཀྱི་འབྲས་བུ་ལྷ་རྣམས་ལ་ཡོངས་སུ་བསྔོ་བར་བྱ་བ་ཡིན་ནོ། །རི་མོར་བྱས་དང་ཞེས་བྱ་བ་ནི་གནས་མཐོན་པོ་ཐོབ་པར་འགྱུར་བའི་བསྙེན་བཀུར་གྱིས་དེའི་ཚེ་ཡང་སྦྱིན་པ་པོའི་ཕྱིར་རི་མོར་བྱེད་པ་དང་། མཆོད་པར་གྱུར་པས་ཀྱང་མཆོད་པར་བྱེད་དོ། །དེ་ལྟར་སྦྱིན་པ་པོ་ལ་སྡུག་བསྔལ་
ལས་ཡོངས་སུ་བསྐྱབ་པར་མཛད་པའི་སྒོ་ནས་ཐུགས་བརྩེ་བར་མཛད་དོ། །རྟག་ཏུ་གྲོད་པར་ཉལ་བའི་ཕྱིར་མི་ལས་སྐྱེས་ཏེ། བུ་སྡུག་ཡིན་ཏེ། དཔེར་ན་མ་དེ་ལ་རྗེས་སུ་བརྩེ་བར་བྱེད་པ་དེ་བཞིན་དུ་བརྩེ་བར་མཛད་དོ། །བཟང་པོ་མཐོང་བར་འགྱུར་ཞེས་བྱ་བ་ནི་ཐམས་ཅད་དུ་ཤིས་པ་མྱོང་བར་
འགྱུར་རོ། །དོར་བའི་ཆོས་ཅན་ཞེས་བྱ་བ་ནི་ཟས་ལ་སོགས་པ་དོར་བའི་རང་བཞིན་དུའོ། །བཏང་བའི་ཆོས་ཅན་ཞེས་བྱ་བ་ལ། སྦྱིན་པས་ཡོངས་སུ་དོར་བའི་ཆོས་ཅན་དུའོ། །ཕྱི་བཞིན་དུ་ཞེས་བྱ་བ་ནི་རྒྱབ་ཀྱི་ཕྱོགས་སུ་ཕྱི་བཞིན་དུའོ་ཞེས་བྱ་བའི་ཐ་ཚིག་གོ། །བཅོམ་ལྡན་འདས་སྔོན་དུ་
གཤེགས་ཤིང་དེ་ནས་དགེ་སློང་དག་ཕྱིས་ཆར་གྱི་རྣམ་པ་ལྟ་བུའོ། །བརྩིག་པར་བྱའོ་ཞེས་བྱ་བ་ནི་འདུ་ཤེས་པ་རྣམ་པར་གཞག་པའི་སྒོ་ནས་བསྒྲུབ་པར་བྱའོ། །ཆུ་བོ་ཆེན་པོར་འཇུག་པའི་གནས་ནི་ཆུ་ངོགས་ཡིན་ནོ། །སོ་ཕག་ལ་སོགས་པའི་འཇུག་པའི་ཐབས་སུ་གྱུར་པའི་ཐེམ་པ་བྱེད་
པ་ནི་ཐེམ་པ་སྦྱར་བ་ཡིན་ནོ། །དབུས་ཀྱི་ཐོག་ནས་ཞེས་བྱ་བ་ནི་ཤིན་ཏུ་དབུས་ཀྱི་ཆ་ནས་སོ། །ཤིང་ཤལ་མ་ལི་བཞོགས་པ་ནི་ཤིང་ཤལ་མ་ལིའི་སྤང་ལེབ་ཡིན་ཏེ། དེ་ཤིན་ཏུ་ཡང་བ་ཉིད་ཀྱིས་ཆུ་རྒལ་བའི་ཐབས་ཉིད་ཡིན་པ་དེའི་ཉེ་བར་སྦྱོར་བར་བྱེད་དོ། །ཀུ་བའི་ཚོགས་ཕན་ཚུན་སྦྲེལ་བ་ནི་ཀུ་བའི་གཟིངས་

སོ། །ཤིང་བལ་གྱིས་བཀང་བའི་ནང་ཚངས་ཅན་ནི་ཤིང་བལ་གྱི་ཁྲེས་པོ་ཡིན་ནོ། །རྐྱལ་པ་ནི་པགས་པ་ལས་བྱས་པའི་རྒལ་བའི་ཐབས་སུ་གྱུར་པའོ། །ཕ་རོལ་དུ་འགྲོ་བར་བྱེད་པ་ནི་ཕར་རྒལ་བ་ཡིན་ནོ། །ཚུ་རོལ་དུ་རྒལ་བར་བྱེད་པ་ནི་ཚུར་རྒལ་བ་ཡིན་ནོ། །ཆུ་ཟབ་མོའི་ནང་དུ་འགྲོ་བ་བསྒྲུབ་
པར་བྱ་བའི་ཕྱིར་ཆུའི་རྒྱུན་ཉིད་ལས་ས་དང་འདྲ་བར་མི་འབྱིང་བ་ཡིན་ནོ། །དགེ་སློང་གི་དགེ་འདུན་དང་ཐབས་ཅིག་ཏུ་ཞེས་བྱ་བ་ནི་དགེ་སློང་གི་དགེ་འདུན་གྱིས་ཀྱང་བཅོམ་ལྡན་འདས་ཀྱི་རྫུ་འཕྲུལ་གྱི་མཐུས་ཕ་རོལ་གྱི་འགྲམ་དུ་ཕྱིན་པར་གྱུར་པ་ཡིན་ནོ། །གང་དག་ཅེས་བྱ་བ་ལ་སོགས་པ་ལ།
གང་དག་རྒལ་བ་ནི་གང་ཞིག་ད་ལྟར་རྒལ་བའི་ཕྱིར་སྤོབས་པ་ཡིན་ནོ། །རྒྱ་མཚོ་ནི་ཆུ་འཛིན་ཡིན་ལ། མཚོའམ་རྒྱ་མཚོར་འཇུག་པའི་ཆུ་བོ་ཞེས་བྱ་བའི་ཐ་ཚིག་གོ། །ཟམ་པ་དང་བཅས་པ་ནི་ཆུ་ལོན་བརྩིགས་པ་ལ་སོགས་པའི་ཚུལ་དུ་ཟམ་པ་བཏགས་ནས་འདམ་རྫབ་སྤངས་པ་ཡིན་ནོ། །རྒལ་
བ་ནི་ལྟེང་ཀ་ལ་སོགས་པ་ཆུས་ཁྱབ་པའི་ཕྱོགས་ལས་སོ། །དེའི་འོག་ཏུ་ཅི་ཞིག་བྱེད་ཅེ་ན། སྨྲས་པ་གཟིངས་བཅས་པ་ནི་རྩ་བ་དང་ཡལ་ག་དང་ལོ་མ་ལ་སོགས་པ་བཙགས་ནས་སྔོན་དུ་ཆུ་ལ་འཇལ་བར་བྱེད་པའམ། གྲུ་ལ་སོགས་པ་ལ་སྐྱེ་བོ་དེ་དག་ཡང་དག་པར་བརྟེན་ནས་སོ། །ཁ་ཅིག་
ནི་ཆུ་བོ་གང་གཱ་རྒལ་བར་འདོད་པ་དེའི་ཕྱིར་གྲུ་ལ་སོགས་པ་ཡོངས་སུ་ལེན་པའི་སྒོ་ནས་སོ། །རྒལ་བ་ནི་ཕ་རོལ་གྱི་འགྲམ་དུ་ཕྱིན་པའོ། །གང་ཞེ་ན། སྐྱེ་བོ་ཡིད་གཞུངས་པ་སྟེ། གང་དག་མཁས་པ་དང་གསལ་བ་དེ་དག་མི་འགོར་བར་བྱེད་པ་ཉིད་ཀྱི་ཕྱིར་དང་པོར་རྒལ་བ་ཡིན་ནོ། །བཅོམ་
ལྡན་འདས་ནི་སྐྱེ་བོ་ཡིད་གཞུངས་པ་ཐམས་ཅད་ཀྱིས་གཅེས་པ་འཛིན་པ་ཉིད་ཡིན་པའི་ཕྱིར། སངས་རྒྱས་བཅོམ་ལྡན་འདས་ནི་རྒལ་ནས་སུ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཉོན་མོངས་པ་བག་ཆགས་དང་བཅས་པ་སྤངས་པའི་ཕྱིར་དང་། ཆོས་ཐམས་ཅད་རྣམ་པ་ཐམས་
ཅད་དུ་ཐུགས་སུ་ཆུད་པའི་ཕྱིར་གོ་རིམས་བཞིན་དུ་སྤངས་པ་དང་ཡེ་ཤེས་ཕུན་སུམ་ཚོགས་པ་བསྟན་ཏོ། །ཐམས་ཅད་ཀྱི་དང་པོར་རྒལ་བ་དེ་ཡང་ཚངས་པ་ཡིན་ལ། རྒྱུན་མི་འཆད་པར་ཚིག་གི་དོན་ལ་གཞོལ་བར་བྱེད་པའི་སྒོ་ནས་ཕྱི་རོལ་དུ་ཡིད་ཕྱོགས་པ་ཉིད་ཀྱི་ཕྱིར་ཐུགས་

མཆོག་ཅེས་བྱའོ། །སྐམ་ལ་བཞུགས་པ་ནི་ཆུ་བོ་གང་གཱའི་ངོགས་ན་བཞུགས་པ་ཡིན་ནོ། །དགེ་སློང་དག་འདིར་ཁྲུས་བྱེད་ཅེས་བྱ་བ་ནི་དགེ་སློང་དག་ཕ་རོལ་གྱི་འགྲམ་དུ་རྒལ་ནས་ཆུས་ལུས་ཡོངས་སུ་རླན་པར་བྱེད་པའོ། །གཟིངས་འཆའ་བ་ནི་ཉན་ཐོས་གང་དག་ད་ལྟར་ཡང་
མ་རྒལ་བ་ཕྱིས་འོངས་པའི་དགེ་སློང་དེ་དག་གཟིངས་ལོན་པར་བྱེད་པ་ཡིན་ནོ། །འདི་ལྟར་དེ་ལ་འདི་སྐད་དུ་བརྗོད་པའི་ཚིགས་སུ་བཅད་པའི་དོན་དེ་ལྟར་འདིར་ཡང་དོན་མཚོན་པར་བྱ་བ་ཡིན་ཏེ། གང་དག་རྒལ་བར་བྱེད་པ་ནི་རྒལ་བར་འདོད་པའོ། །རྒྱ་མཚོ་ནི་འཁོར་སྐྱེད་པར་བྱེད་པའི་མཚོའི་དབའ་
<གློང་‚ཀློང་>ཡིན་ནོ། །ཟམ་པ་དང་བཅས་པ་ནི་མཐོང་བའི་ལམ་མངོན་དུ་བྱས་པ་ཡིན་ནོ། །འདམ་རྫབ་སྤངས་པ་ནི་མཐོང་བས་སྤང་བར་བྱ་བའི་ཉོན་མོངས་པ་སྤངས་པ་ཡིན་ནོ། །སྐྱེ་བོ་གཟིངས་འཆའ་བ་ནི་དེའི་བག་ལ་ཉལ་སྤང་བར་བྱ་བའི་ཕྱིར་བསྒོམ་པའི་ལམ་སྒོམ་པར་བྱེད་པ་ཡིན་ནོ། །ལམ་གཉིས་
ཀྱིས་ཀུན་ནས་འཆིང་བའི་ཚོགས་སྤངས་པའི་ཕྱིར་རྒལ་བ་ཡིན་ནོ། །ཡིད་གཞུངས་པ་ནི། འཕགས་པའི་གང་ཟག་དག་ཡིན་ནོ། །རྒལ་བའི་གཙོ་བོ་གང་ཡིན་ཞེ་ན། སྨྲས་པ། སངས་རྒྱས་ཞེས་བྱ་བ་ལ་སོགས་པས་རང་བྱུང་ཉིད་བསྟན་ཏོ། །སྐམ་སར་བཞུགས་པ་ཞེས་བྱ་བ་ནི་ཕུང་པོ་ལྷག་མ་དང་
བཅས་པའི་མྱ་ངན་ལས་འདས་པ་ཡིན་ཏེ། མདོ་སྡེ་ལས་ཕ་རོལ་གྱི་ངོགས་ནི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་དེའི་ཚིག་བླ་དགས་ཡིན་ནོ་ཞེས་བསྟན་ཏོ། །བཞུགས་པ་ཞེས་བྱ་བ་ནི་སྙིང་རྗེ་ཆེན་པོ་སྟོན་པར་བྱེད་པ་ཡིན་ཏེ། དེ་མེད་པར་བཅོམ་ལྡན་འདས་སྲིད་པར་སྐད་
ཅིག་ཀྱང་བཞུགས་པར་མི་འགྱུར་རོ། །དགེ་སློང་དག་འདིར་ཞེས་བྱ་བ་ལ་སོགས་པས་མཐོང་བའི་ཆོས་ལ་བདེ་བར་གནས་པ་བསྟན་ཏོ། །གཟིངས་འཆའ་ཞེས་བྱ་བས་ནི་ངེས་པར་འབྱེད་པའི་ཆ་དང་མཐུན་པ་ལས་གནས་ནས་མཐོང་བའི་ལམ་ལ་སོགས་པ་མངོན་སུམ་དུ་བྱེད་པ་ཡིན་པ་དེ་བས་ན་འདིས་
ནི་ཞུགས་པ་སྟོན་པ་ཡིན་ནོ། །དེའི་ཕྱིར་ཞུགས་པ་བཞི་དང་འབྲས་བུ་བཞི་ལ་གནས་པའི་དགེ་སློང་དེ་དག་ནི་ཡོན་གནས་རིག་པ་དང་རྐང་པ་དང་ཏིང་ངེ་འཛིན་དང་ལྡན་པ་ཡིན་ནོ། །ཆར་གྱི་འབྱུང་གནས་ནི་ཞིང་ཁྱད་པར་ཅན་སྒྲུབ་པར་བྱེད་པའི་ཕྱིར་དགའ་བ་སྐྱེད་པར་བྱེད་དོ། །ཚུལ་ཁྲིམས་འདི་ཞེས་

བྱ་བ་ནི་མངོན་སུམ་དུ་གནས་པ་དག་ཡིན་ཏེ། བཅོམ་ལྡན་འདས་ཀྱིས་ཆོས་ཐམས་ཅད་མངོན་སུམ་དུ་གཟིགས་པ་དེ་ཉིད་ཀྱི་ཕྱིར་དེ་སྐད་ཅེས་བསྟན་ཏོ། །སོ་སོར་ཐར་པ་དང་། བསམ་གཏན་དང་། ཟག་པ་མེད་པའི་སྡོམ་པའི་རང་བཞིན་དག་ཡིན་ནོ། །ཏིང་ངེ་འཛིན་ཞེས་བྱ་བ་ལ། ཏིང་ངེ་འཛིན་གསུམ་
སྟེ། རྟོག་པ་དང་བཅས་པ་དང་དཔྱོད་པ་དང་བཅས་པ་ལ་སོགས་པའོ། །ཤེས་རབ་འདི་ཞེས་བྱ་བ་ནི་ཐོས་པ་ལས་བྱུང་བ་དང་། བསམས་པ་ལས་བྱུང་བ་དང་། བསྒོམས་པ་ལས་བྱུང་བ་དང་། ཟག་པ་མེད་པའོ། །ཚུལ་ཁྲིམས་ཡོངས་སུ་བསྒོམས་པས་ཞེས་བྱ་བ་ནི་ཚུལ་ཁྲིམས་ཤིན་ཏུ་རྣམ་
པར་དག་པ་བསྒོམས་པ་སྟེ། རྒྱུད་ལ་ཚུལ་ཁྲིམས་རྣམ་པར་དག་པ་སྐྱེ་བར་འགྱུར་བའི་ཕྱིར་རོ། །རིང་དུ་གནས་པར་འགྱུར་རོ་ཞེས་བྱ་བ་ནི་ཡོངས་སུ་གཞོམ་པའི་ཕྱིར་རུང་བར་འགྱུར་བ་ཡིན་ནོ། །ཤེས་རབ་བསྒོམས་པ་ནི་བསྟན་པ་ཞེས་བྱའོ། །ཡང་དག་རྣམ་པར་གྲོལ་བར་འགྱུར་རོ་ཞེས་བྱ་བ་ནི་
ཡོངས་སུ་ཉམས་པར་མི་འགྱུར་བ་ཉིད་ཡིན་ཏེ། དེ་ལྟར་དགེ་སློང་དག་གང་སྤངས་པ་དེ་ནི་འཕགས་པའི་ཤེས་རབ་ཀྱིས་སྤངས་པ་ཡིན་ནོ་ཞེས་བསྟན་པ་ཡིན་ནོ། །ཀུཉྫི་ཀའི་གནས་ཞེས་བྱ་བ་ནི་དྲང་སྲོང་ཀུཉྫི་ཀས་བྱས་པ་ཉིད་ཡིན་པའི་ཕྱིར་རོ། །འོག་མའི་ཆ་དང་མཐུན་པ་ཞེས་བྱ་བ་ལ། འོག་མའི་ཆ་དང་
མཐུན་པ་ནི་མི་དགེ་བའི་ཆོས་ཐམས་ཅད་དང་ལྡན་པའི་ཕྱིར་འདོད་པའི་ཁམས་ཡིན་ལ། དེ་དག་ཀྱང་དེ་དང་རྗེས་སུ་མཐུན་པ་ཡིན་པ་དེ་བས་ན་འོག་མའི་ཆ་དང་མཐུན་པ་ཡིན་ཞེས་བྱའོ། །དེ་དག་ཀྱང་འདོད་པ་ལ་འདུན་པ་དང་། གནོད་སེམས་དང་། འཇིག་ཚོགས་སུ་ལྟ་བ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་
འཛིན་པ་དང་། ཐེ་ཚོམ་དག་ཡིན་ནོ། །རྫུས་ཏེ་སྐྱེ་བ་ཞེས་བྱ་བ་ནི་དེ་ན་སྐྱེ་གནས་གཞན་མེད་པའི་ཕྱིར་རོ། །དེ་ཉིད་ལ་རྩོལ་ལོ་ཞེས་བྱ་བ་དང་བརྩོན་འགྲུས་རྩོམ་མོ། །སེམས་འཛིན་ཏོ། །རབ་ཏུ་འཛིན་ཏོ་ཞེས་བྱ་བ་སྨོས་ཏེ། བརྩོན་འགྲུས་བརྩམས་པ་ནི་མི་དགེ་བའི་ཆོས་རྣམས་སྤང་བར་བྱ་
བའི་ཕྱིར་དང་། དགེ་བའི་ཆོས་རྣམས་བསྒོམ་པར་བྱ་བའི་ཕྱིར་ཤིན་ཏུ་སྤྲོ་བ་དང་བཅས་པར་འགྱུར་བའོ། །སེམས་འཛིན་པ་ཞེས་བྱ་བ་ནི་ཡུལ་མ་ཡིན་པ་ལས་ཟློག་པར་བྱེད་པ་དང་། ཡུལ་ལ་རབ་ཏུ་འཇུག་པར་བྱེད་པ་ཡིན་ནོ། །རབ་ཏུ་འཛིན་པ་ཞེས་བྱ་བ་ནི་རྒྱུན་གྱིས་ཡུལ་ལ་སེམས་འཛིན་པར་

བྱེད་པ་ཡིན་ནོ། །དགེ་བའི་ཆོས་ཞེས་བྱ་བ་ལ་སོགས་པ་ལ། འབྲས་བུ་འདོད་པ་ཉིད་ཀྱི་ཕྱིར་དགེ་བ་ཡིན་ནོ། །གནས་པ་ནི་བརྟེན་པར་གྱུར་པའི་ཕྱིར་རོ། །མི་བརྗེད་པའི་ཕྱིར་ཞེས་བྱ་བ་ནི་དྲན་པ་རྨོངས་པའི་ཉེས་པ་བཟློག་པར་བྱ་བའི་ཕྱིར་རོ། །གོམས་པར་བྱེད་པ་ནི་བསྒོམ་པ་ཡིན་ལ།
བསྒོམ་པ་དག་ཡོངས་སུ་རྫོགས་པ་ནི་བསྒོམ་པ་ཡོངས་སུ་རྫོགས་པ་ཡིན་ཏེ། བསྒོམ་པ་འགྲུབ་པ་དེའི་ཕྱིར་རོ། །ཡང་དང་ཡང་དུ་བསྒོམ་པ་ནི་ཕྱི་ཕྱིར་བསྒོམ་པ་ཡིན་ཏེ། ཆུང་ངུའི་རྣམ་པ་གྲུབ་པའི་ཕྱིར་ཡང་ནས་ཡང་མངོན་སུམ་དུ་བྱེད་དོ། །འཕེལ་བ་ནི་འབྲིང་གི་རྣམ་པ་གྲུབ་པ་ཡིན་ནོ། །རྒྱས་པ་ནི་ཆེན་
པོའི་རྣམ་པ་གྲུབ་པ་ཡིན་ནོ། །ཡང་ན་བསྒོམ་པ་ཡོངས་སུ་རྟོགས་པ་ནི་ཆུང་ངུའི་རྣམ་པ་གྲུབ་པ་ཡིན་ནོ། །ཕྱི་ཕྱིར་བསྒོམ་པ་ནི་འབྲིང་གི་རྣམ་པ་གྲུབ་པ་ཡིན་ནོ། །འཕེལ་བ་ནི་ཆེན་པོའི་རྣམ་པ་གྲུབ་པ་ཡིན་ནོ། །དུས་རིང་པོར་རྒྱུན་གྱིས་རྗེས་སུ་འཇུག་པ་ནི་རྒྱས་པ་ཡིན་ཏེ། དུས་རིང་པོར་ཁྱབ་པར་བྱེད་པ་
ཡིན་པའི་ཕྱིར་རོ། །འགྲོ་བ་དང་འོང་བ་ཞེས་བྱ་བ་ལ་སོགས་པ་དག་གི་རྣམ་པར་བཤད་པ་ནི་བྲམ་ཟེའི་ཁྱེའུ་ཨཾ་བསྟའི་མདོའི་རྣམ་པར་བཤད་པར་བལྟ་བར་བྱའོ། །ནང་གི་ལུས་ལ་ཞེས་བྱ་བ་ལ་སོགས་པའི་བཤད་པ་ནི་མངལ་དུ་འཇུག་པའི་མདོ་བཤད་པ་ལྟ་བུར་རིག་པར་བྱའོ། །ཤིང་རྟ་རེ་རེ་ལ་ཞོན་ཏེ་
ཞེས་བྱ་བ་ནི་ཤིང་རྟ་སོ་སོ་ཐ་དད་པ་ལ་ཞོན་ནས་སོ། །རྟ་སྔོན་པོ་ཞེས་བྱ་བ་ལ་སོགས་པ་རྟ་བཟློག་པའི་ཐབས་སུ་གྱུར་པ་སྲབ་ཡིན་ནོ། །ལྕག་ནི་འགྲོ་བར་བྱེད་པའི་ཐབས་སུ་གྱུར་པའོ། །དོ་ཀེར་ནི་སྤྱི་བོའི་དབུས་ན་འདུག་པའི་སྤྱི་བཅིངས་ཏེ། གཙུག་ཏོར་གྱི་རྣམ་པ་ཉིད་དམ་ཅོད་པན་ལ་དོ་ཀེར་གྱི་
སྒྲས་བརྗོད་དོ། །ཡུ་བ་ནོར་བུ་ལས་བྱས་པའམ། ཡུ་བ་ནོར་བུས་སྤྲས་པའི་རྔ་ཡབ་པོ། །ཅི་ལྟར་ན་དེ་དག་སྔོན་པོ་ལ་སོགས་པ་ཉིད་དུ་འགྱུར་བ་ཡིན་ཞེ་ན། འདིར་ཁ་ཅིག་ནི་ངོ་བོ་ཉིད་ཀྱིས་སྔོན་པོའི་རྟ་ལ་སོགས་པ་དང་ལྡན་པ་ཉིད་ཀྱི་ཕྱིར་རོ་ཞེས་བརྗོད་དོ། །ཁ་ཅིག་ནི་ནོར་བུའི་འོད་ཀྱི་ཕྱིར་རོ་ཞེས་
བརྗོད་དོ། །ཅོད་པན་གསལ་བར་བྱེད་པའི་བདག་ཉིད་ཅན་གྱི་ནོར་བུ་མཐོན་ཀ་ཡོད་པའི་ཕྱིར་འཁོར་དང་བཅས་པ་སྔོན་པོ་ཉིད་དུ་གྱུར་པ་ཡིན་ནོ། །ཁ་ཅིག་ནི་བཅོམ་ལྡན་འདས་ཀྱིས་ནོར་བུའི་མཐུ་ནི་བསམ་གྱིས་མི་ཁྱབ་པ་ཡིན་ནོ་ཞེས་གསུངས་ཏེ། ནོར་བུ་སེར་པོའི་མཐུས་སེར་པོ་དང་། ནོར་བུ་

དམར་པོའི་མཐུས་དམར་པོ་དང་། ནོར་བུ་དཀར་པོའི་མཐུས་དཀར་པོར་གྱུར་པ་ཡིན་ནོ། །ཕར་ཁྱེད་ཅེས་བྱ་བ་ལ་སོགས་པ་ལ། མངོན་དུ་ཕྱོགས་པས་རྣམ་པར་གནས་པ་ནི་གནས་པ་འདི་ལས་ཚུར་མི་འོང་བ་ནི་ཕར་ཁྱེད་ཅེས་བྱ་བའི་སྒྲ་བྱིན་ལ་མངོན་དུ་ཕྱོགས་ནས་འོང་བ་ནི་ཕ་རོལ་ནས་མངོན་དུ་ཕྱོགས་
ནས་ཚུར་འོང་བར་བྱེད་པས་ན་ཚུར་གྱི་སྒྲ་ཡིན་ནོ། །སྒྲོགས་པར་གྱུར་པ་ནི་བརྗོད་པར་གྱུར་པ་སྟེ། དེས་ཉེ་བར་མཚོན་པ་དག་གིས་འབྱུང་བ་ཡིན་ནོ། །དེ་ཁྱད་པར་ཇི་ལྟ་བུ་དང་ལྡན་ཞེ་ན། སྒྲ་མཐོན་པོ་ཞེས་བྱ་བ་ལ་སོགས་པ་སྨོས་ཏེ། ཐག་རིང་དུ་ཁྱབ་པར་བྱེད་པའི་སྒྲ་ནི་སྒྲ་མཐོན་པོ་ཡིན་ནོ། །སྐྱེ་བོ་
མང་པོའི་སྒྲ་ནི་སྒྲ་ཆེན་པོ་ཡིན་ཏེ། སྒྲ་མཐོན་པོ་དང་། སྒྲ་ཆེན་པོ་གང་ཡིན་པ་དེ་དག་སྒྲ་མཐོན་པོ་དང་སྒྲ་ཆེན་པོ་ཡིན་ནོ། །ཡངས་པ་ཅན་ནས་ཞེས་བྱ་བ་ནི་ཡངས་པ་ཅན་དག་ལས་སོ། །འདི་ལྟ་བུའི་འབྱོར་པ་ཞེས་བྱ་བ་ལ། འབྱོར་པ་ནི་ཕུན་སུམ་ཚོགས་པའོ། །ཕུན་སུམ་ཚོགས་པ་ནི་སྐྱིད་པའི་འབྱོར་པ་
གསལ་བར་བྱེད་པ་ཡིན་ནོ། །ཆ་ལུགས་ནི་ཆ་བྱད་དོ། །སྟན་སོ་སོར་འཇོག་པའི་སྒོ་ནས་འཁོད་པའོ། །བྱ་བ་གཅིག་གི་སྒོ་ནས་འདུས་པ་ཡིན་ནོ། །བདག་སྤོབས་སོ་ཞེས་བྱ་བ་ནི་བདག་མངོན་པར་འདོད་པའི་ཚིག་སྨྲ་བར་འདོད་པའི་ཕྱིར་སྤོབས་པ་སྐྱེས་པ་སྟེ། རབ་ཏུ་དགའ་བས་ལེན་གཉིས་བརྗོད་
པ་ཡིན་ནོ། །སྤོབས་པར་བྱོས་ཤིག་ཅེས་བྱ་བ་ནི་བཅོམ་ལྡན་འདས་ཀྱིས་བྱ་བའི་ཚུལ་དུ་སྤོབས་པའི་ཕྱིར་གནང་བ་སྩོལ་བ་ཡིན་ནོ། །ཨངྒའི་ཞེས་བྱ་བ་ལ་སོགས་པ་ལ། རྙེད་པ་རབ་རྙེད་པ་ཞེས་བྱ་བ་ནི་ཤིན་ཏུ་མཛེས་པར་རྙེད་པ་ནི་རབ་ཏུ་རྙེད་པའོ། །གང་གི་ཞེ་ན། སྨྲས་པ། ཨངྒའི་རྒྱལ་པོ་སྟེ། ཡུལ་
ཨངྒའི་རྒྱལ་པོ་ནི་ཨངྒའི་རྒྱལ་པོ་ཡིན་པས་ན་དེའི་ཨུ་ཏྲ་ཡ་ནས་བཏང་བའི་ནོར་བུའི་གོ་ཆ་འཆང་བའི་ཕྱིར་ནོར་བུའི་གོ་ཆ་འཆང་བ་ཅན་ཏེ། དེའི་ཡུལ་མ་ག་དྷཱ་དེའི་རིམ་པས་ཐོབ་པ་ཡིན་པ་དེའི་ཕྱིར་ཡུལ་མ་ག་དྷཱའི་དབང་ཕྱུག་ཅེས་བྱ་བ་སྨོས་པ་ཡིན་ནོ། །ཡུལ་ཨངྒའི་རྒྱལ་པོ་གཟུགས་ཅན་སྙིང་པོས།
གཞོན་ནུའི་གནས་སྐབས་སུ་སྟོབས་ཀྱིས་གནོན་པ་ཉིད་ཀྱི་ཕྱིར་རིམ་པས་ཐོབ་བ་མ་ཡིན་ནོ། །ཇི་ལྟར་ན་དེའི་རྙེད་པ་རབ་ཏུ་རྙེད་པ་ཡིན་ཞེ་ན། །རྣམ་རྒྱལ་གང་དུ་སངས་རྒྱས་འབྱུང་བ་ནི། །ཞེས་བྱ་བ་སྨོས་ཏེ། ནིའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་དེའི་རྣམ་པར་རྒྱལ་བའི་ཡུལ་དུ་སངས་

རྒྱས་བཅོམ་ལྡན་འདས་འབྱུང་བ་དེའི་ཕྱིར་དེའི་རྙེད་པ་རབ་ཏུ་རྙེད་པ་ཞེས་བྱ་བ་ཡིན་ནོ། །བཅོམ་ལྡན་འདས་ཁྱད་པར་ཇི་ལྟ་བུ་དང་ལྡན་པ་ཞེ་ན། སྒྲ་སྒྲོགས་ཞེས་བྱ་བ་ལ་སོགས་པ་སྨོས་པ་ཡིན་ཏེ། འགྲོ་བ་ཐམས་ཅད་ལ་དྲི་མ་མེད་པའི་སྙན་པས་ཁྱབ་པར་གྱུར་པ་ནི་སྒྲ་གྲགས་པས་
ཁྱབ་པ་ཡིན་ནོ། །གངས་ཅན་རི་ཞེས་བྱ་བ་ནི་ཇི་ལྟར་རིའི་རྒྱལ་པོ་གངས་ཅན་འགྲོ་བ་ཐམས་ཅད་ལ་མཐོན་པོ་ཉིད་དུ་གྲགས་པར་གྱུར་པ་དེ་བཞིན་དུའོ། །ཆུ་སྐྱེས་ཞེས་བྱ་བ་ལ་སོགས་པ་ལ་ཆུ་ལས་སྐྱེས་པས་ན་ཆུ་སྐྱེས་སོ། །དེ་གང་ཞེ་ན། སྨྲས་པ། མེ་ཏོག་ཀོ་ཀ་སྟེ་པད་མ་ཞེས་བྱ་བའི་ཐ་ཚིག་གོ། །དེ་
ཁྱད་པར་ཇི་ལྟ་བུ་དང་ལྡན་པ་ཞེ་ན། སྨྲས་པ། མཛེས་སྐྱེས་ཏེ་ཁ་དོག་དང་དབྱིབས་མཛེས་པའོ། །ཐོ་རངས་ཏེ་ཐུན་དང་པོ་ཁོ་ན་ལ་ཆུ་ལས་ངེས་པར་བྱུང་བ་ནི་ཐོ་རངས་ཁ་འབུས་པ་ཡིན་ཏེ། ཐོ་རས་བྱུང་བ་ཉིད་ཀྱི་ཕྱིར་རོ། །ཐོ་རས་ཀྱི་དུས་སུ་ཆུ་ལས་བྱུང་བའི་ཕྱིར་ཤིན་ཏུ་རྒྱས་པར་གྱུར་པ་ཡིན་ཏེ། དེ་སྐད་དུ་ཉི་
མ་ཤར་བའི་ཚེ་ཁ་བྱེ་བར་འགྱུར་ཞེས་འབྱུང་ངོ་། །དྲི་དང་ལྡན་པ་སྟེ་ཞེས་བྱ་བ་ཤིན་ཏུ་དྲི་དང་འབྱོར་པ་ཡིན་ནོ། །ཇི་ལྟར་པད་མ་དེ་དྲི་དང་མདངས་ཀྱིས་རྣམ་པར་གསལ་ཞིང་མཛེས་པ་དེ་བཞིན་དུ། བཅོམ་ལྡན་འདས་ཚུལ་ཁྲིམས་ཀྱི་དྲི་དང་ཤིན་ཏུ་འབྱོར་པ་དང་། འོད་འདོམ་གང་བས་གསལ་བར་གྱུར་
པས་ན་རྣམ་པར་མཛེས་པར་གྱུར་པ་ལ་ལྟོས་ཤིག །བཅོམ་ལྡན་འདས་ཀྱང་ཉི་མའི་རིགས་ལས་འཁྲུངས་པ་དེ་ཉིད་ཀྱི་ཕྱིར་བཅོམ་ལྡན་འདས་ཉིད་ཉི་མ་ཡིན་ནོ། །ལྟོས་ཤིག་ཅེས་བྱ་བ་ནི་ཀུན་དུ་ལྟོས་ཤིག་པ་ཡིན་ནོ། །ཉི་མ་འཆར་བ་བཞིན་ཞེས་བྱ་བ་ནི་ཇི་ལྟ་བར་སྣང་སྟེ། ནམ་མཁའ་ལ་ཉི་མ་གཟི་
བརྗིད་འབར་བར་གྱུར་པ་དེ་བཞིན་དུ། བཅོམ་ལྡན་འདས་ཀྱང་ངོ་། །དེ་བཞིན་གཤེགས་པ་ནི་འདས་པ་དང་། མ་འོངས་པའི་ཡང་དག་པར་རྫོགས་པའི་སངས་རྒྱས་སོ། །ཤེས་རབ་སྟོབས་ཞེས་བྱ་བ་ནི་ཤེས་རབ་ཀྱི་སྟོབས་ནི་ཤེས་རབ་སྟོབས་ཏེ། ཤེས་རབ་ཀྱི་ནུས་པ་ཡིན་ནོ། །དེ་དག་གིས་
ཅི་ཞིག་མཛད་ཅེ་ན། གང་གིས་འདིར་ལྷགས་ཞེས་བྱ་བ་ལ་སོགས་པ་སྨོས་ཏེ། བདག་དང་ཐ་མ་དག་ལ་མང་པོའི་ཚིག་ཏུ་བྱའོ་ཞེས་བྱ་བའི་རིགས་པས་གང་དག་གིས་ཞེས་བྱ་བ་མང་པོའི་ཚིག་འདིས་བཅོམ་ལྡན་འདས་ཁོ་ན་ལ་སྨྲས་པ་ཡིན་ལ། མིག་ལ་མང་པོའི་ཚིག་མི་རིགས་པ་དེའི་ཕྱིར་གང་

དག་གིས་ཞེས་བྱ་བ་སྨོས་པ་ཡིན་ཏེ། ད་ལྟར་བྱུང་བའི་བླ་མ་གང་དག་ཤེས་རབ་སྟོབས་ཀྱིས་འདིར་ལྷགས་པ་དག་གིས་ཐེ་ཚོམ་དང་ཡིད་གཉིས་བསལ་བར་མཛད་པའམ། འདུལ་བར་མཛད་པའམ། འཇིག་པར་མཛད་པ་ཡིན་ནོ། །དེ་དག་ཉིད་མིག་བྱེད་པ་ཡིན་ཏེ་སྐྱེ་བོ་གདུལ་བྱའི་བླ་ན་མེད་པའི་ཤེས་
རབ་ཀྱི་མིག་སྐྱེད་པར་བྱེད་པའི་རྒྱུ་ཉིད་ཡིན་པའི་ཕྱིར་རོ། །དེ་དག་ཉིད་སྣང་བར་བྱེད་པ་ཡང་ཡིན་ཏེ། ཤེས་རབ་ཀྱིས་སྣང་བར་བྱེད་པ་ཉིད་ཀྱི་ཕྱིར་རོ། །ཅི་དང་འདྲ་བར་ཞེ་ན། ཇི་ལྟར་མཚན་མོ་ཞེས་བྱ་བ་ལ་སོགས་པ་སྨོས་ཏེ། ཇི་ལྟར་མཚན་མོ་མུན་པ་དག་མེ་རབ་ཏུ་འབར་བས་གསལ་བར་བྱེད་པ་ཡིན་ཏེ།
ཕྱི་རོལ་གྱི་མུན་པ་འཇོམས་པར་བྱེད་པའི་ཕྱིར་རོ། །མིག་ཡུལ་ལ་འཇུག་པ་དང་རྗེས་སུ་མཐུན་པ་ཉིད་ཀྱི་ཕྱིར་མིག་བྱེད་པར་འགྱུར་བ་དེ་བཞིན་དུ་བཅོམ་ལྡན་འདས་ཀྱི་ཞལ་སྔ་ནས་ཀྱང་ཞེས་བྱ་བ་ཡིན་ནོ། །ལེགས་པར་སྨྲས་སོ་ཞེས་བྱ་བ་ནི་དོན་དང་ཚིག་དང་ཡི་གེ་མཛེས་པ་ཉིད་ཀྱི་ཕྱིར་དང་། སྐབས་དང་
ལྡན་པ་ཉིད་ཀྱི་ཕྱིར་འདིར་ཡང་དགའ་བས་ལེན་གཉིས་བརྗོད་པ་ཡིན་ནོ། །མཛེས་པར་སྨྲས་པ་ནི་ལེགས་པར་སྨྲས་པ་ཡིན་ལ། ལེགས་པར་སྨྲས་པ་དེ་དག་གི་དགོས་པ་ཡིན་པས་ན་ལེགས་པར་སྨྲ་བའི་ཕྱིར་ཏེ། ལེགས་པར་བཤད་པ་ཀློག་པས་སེམས་མགུ་བ་བདག་གིས་མགུ་བ་སྦྱིན་པ་ཡིན་ནོ། །མ་དང་
འདྲ་བས་ཞེས་བྱ་བ་ལ་སོགས་པ་ལ། མ་ནི་མ་ཉིད་ཡིན་ནོ། །མ་དང་མཚུངས་པས་ན་མ་དང་འདྲ་བ་སྟེ། བུ་སྐྱེར་རུང་བའི་བུད་མེད་ཡིན་ནོ། །དེ་ནི་སྐྱེས་བུ་མཉེས་པར་བྱེད་པའི་ཤེས་རབ་དང་ལྡན་པ་ཡིན་ལ། ཡུལ་གཞན་དང་ནི་མ་ཡིན་ཏེ། བློ་ཆུང་བས་དེ་ཐམས་ཅད་དུ་ཤེས་རབ་སྒྲུབ་པའི་ནུས་པ་མེད་པ་ཞེས་བསྟན་
ཏོ། །འོན་ཀྱང་དོན་དང་དེ་ལ་བདག་ཅག་བསླུས་པས་དེ་བས་ན་བདག་ཅག་ལ་ཤིན་ཏུ་ཚུལ་མི་མཐུན་པ་བྱས་པ་ཡིན་ནོ། །ཡང་ན་བདག་པོ་ངན་པ་ཉིད་ཀྱི་ཕྱིར་མ་དང་འདྲ་བ་ཡིན་ནོ། །ཤེས་རབ་ཆུང་བ་ཉིད་ཀྱི་ཕྱིར་ཤེས་རབ་ཆུང་བ་ཅན་ནོ། །གཞན་གྱིས་སྔར་མ་མཐོང་བ་ནི་ངོ་མཚར་བ་ཡིན་ལ། སྔར་མ་
ཐོས་པ་ནི་རྨད་དུ་བྱུང་བ་ཡིན་ནོ། །དེ་ལྟ་དེ་ལྟར་ཞེས་བྱ་བ་ལ་སོགས་པ་དག་གི་བཤད་པ་ནི་སྔ་མ་བཞིན་ནོ། །གུས་པར་ཉན་པ་ཞེས་བྱ་བ་ནི་གུས་པ་བསྐྱེད་ནས་ཉན་པའི་ཕྱིར་གུས་པར་ཉན་པ་ཡིན་ནོ། །ཆོས་སམ་ཆོས་སྨྲ་བ་ལ་སྟོན་པ་ཉིད་དུ་ལྟ་ཞིང་འཛིན་པས་ཉན་པའི་ཕྱིར་བླ་མར་བྱས་པ་ཡིན་ནོ། །རུ་ཤིང་

དུ་བྱས་པ་ཞེས་བྱ་བ་ནི་ཁོང་དུ་ཆུད་པའི་ཕྱིར་བདག་གིས་གདོན་མི་ཟ་བར་དེ་དག་རྟོགས་པར་བྱའོ་ཞེས་གུས་པ་ཉེ་བར་གཞག་པ་ཡིན་ནོ། །ཐོས་པ་སེམས་ཀྱིས་འཛིན་པ་ནི་ཡིད་ལ་བྱེད་པ་ཡིན་ནོ། །སེམས་དམིགས་པ་གཅིག་ལ་འཇུག་པ་ནི་སེམས་རྩེ་གཅིག་པ་ཡིན་ནོ། །
མཉན་པར་བྱ་བ་མ་ཡིན་པའི་ཡུལ་ཐམས་ཅད་ལས་ལྡོག་པ་དང་མཉན་པར་བྱ་བ་དེ་ལ་གཏོང་བ་ནི་རྣ་བའོ། །སེམས་ཅན་ཐམས་ཅད་ཀྱིས་བསམས་ནས་ཞེས་བྱ་བ་ནི་ཡུལ་གཞན་ལ་རྣམ་པར་ཤེས་པ་འཇུག་པ་བཟློག་པ་དང་། དེའི་ཡུལ་གཅིག་ལ་རྣ་བའི་རྣམ་པར་ཤེས་པ་བསྐྱེད་པ་ཡིན་ནོ། །ཁོང་དུ་ཆུད་པ་ནི་
ཐོབ་པར་གྱུར་པའོ། །དགའ་བ་ནི་ཡིད་བདེ་བ་ཡིན་ནོ། །ཉེས་པའི་གཉེན་པོའི་ཕྱོགས་ཚོལ་བ་ན་དེ་རྙེད་པ་ལས་ཡིད་ཡོངས་སུ་མགུ་བར་གྱུར་པ་དེ་ནི་མགུ་བ་ཡིན་ནོ། །འབྲས་བུ་འདོད་པ་ཉིད་ཀྱི་ཕྱིར་དགེ་བ་ཡིན་ནོ། །འབྲས་བུ་རྒྱ་ཆེ་བ་ཉིད་ཀྱི་ཕྱིར་ཆེ་བ་ཡིན་ནོ། །ཁྱིམ་ལ་སོགས་པའི་འཆིང་བ་ལས་ངེས་
པར་འབྱུང་བ་དང་མཐུན་པ་ཉིད་ཀྱི་ཕྱིར་དང་། འཕགས་པའི་ལམ་དང་མཐུན་པའི་ཕྱིར་ངེས་པར་འབྱུང་བ་ལྡན་པ་ཡིན་ལ། འདིས་ངེས་པར་འབྱུང་བས་ན་ངེས་པར་འབྱུང་བ་སྟེ་འཕགས་པའི་ལམ་ཡིན་ནོ། །ངེས་པར་འབྱུང་བའི་དངོས་པོ་ནི་ངེས་པར་འབྱུང་བ་ཉིད་དོ། །དེ་ལྟ་དེ་ལྟར་ནན་ཏན་བྱེད་པ་
ཞེས་བྱ་བ་ནི་ཚུལ་དང་མཐུན་པའི་སྒྲུབ་པ་བྱེད་པ་ཡིན་ནོ། །དོན་ལ་ནན་ཏན་བྱེད་པའི་གནས་ནི་དོན་ཆེན་པོའི་གནས་ཡིན་ནོ། །ཟབ་ཅིང་གཏིང་རིང་བ་ཉིད་ཀྱིས་ན་རྟོགས་པར་དཀའ་བའོ། །སོ་སོར་རིག་པ་ནི་ཤེས་པར་གྱུར་པའོ། །གང་གི་ཕྱིར་འདི་ལྟར་སངས་རྒྱས་བཅོམ་ལྡན་འདས་ནི་ཡོན་ཏན་
རིན་པོ་ཆེ་དང་ལྡན་པ་དེ་བས་ན་བྱས་པ་ཤེས་པ་ཡིན་ཏེ། ཇི་ལྟར་ཁྱོད་ཀྱིས་མཆོད་པ་དེ་ལྟར་མཆོད་པར་བྱའོ་ཞེས་བྱ་བའི་དོན་འདི་བསྟན་པའི་ཕྱིར་བྱས་པ་ཤེས་པ་དང་ཞེས་བྱ་བ་ལ་སོགས་པ་སྨོས་པ་ཡིན་ནོ། །བྱས་པས་ཏེ་ཕན་བཏགས་པ་ཤེས་པར་བྱེད་པས་ན་བྱས་པ་ཤེས་པ་ཡིན་ཏེ། སྦྱོར་བའི་
དུས་ཡོངས་སུ་ཤེས་པས་སོ། །དངོས་གཞི་ཕན་བཏགས་པའི་འབྲས་བུ་བདག་ཉིད་ཀྱིས་མངོན་སུམ་དུ་བྱེད་པའི་སྒོ་ནས་གང་དག་གིས་ཚོར་བ་དེ་དག་ནི་བྱས་པ་ཚོར་བ་ཡིན་ནོ། །ཡང་ན་བདག་ཉིད་ཀྱིས་ཡོངས་སུ་ཤེས་པའི་ཕྱིར་བྱས་པ་ཤེས་པ་ཡིན་ལ། འདི་ལྟ་སྟེ་འདི་ནི་བདག་ཉིད་ལ་ཕན་

འདོགས་པ་ཡིན་ནོ་ཞེས་གཞན་ལ་སྨྲས་པའི་ཕྱིར་བྱས་པ་ཚོར་བ་ཡིན་ནོ། །དེ་ལྟར་བསླབ་པར་བྱའོ་ཞེས་བྱ་བ་ནི་དེ་ལྟར་བསྒྲུབ་པར་བྱ་བ་ཡིན་ནོ། །དགེ་སློང་གི་ཚོགས་ཀྱིས་བསྐོར་ནས་ཞེས་བྱ་བ་ནི་འཁོར་ཕུན་སུམ་ཚོགས་པ་བསྟན་པ་ཡིན་ནོ། །མདུན་དུ་བདར་བའི་ཚིག་གིས་ནི་བསྙེན་བཀུར་བསྟན་
པ་ཡིན་ནོ། །བྱིན་ན་དགའ་བར་འགྱུར་རོ་ཞེས་བྱ་བ་ལ་སོགས་པ་ལ་ཐམས་ཅད་སྦྱིན་པ་དགའ་བའི་ལམ་ལ་བརྟེན་པ་དང་འདྲ་བར་སྐྱེ་བོ་རྣམས་རྟེན་པར་བྱེད་དོ། །དེ་ལ་གྲགས་པ་ཡང་དག་འཐོབ་ཅིང་ཞེས་བྱ་བ་ནི་སྦྱིན་པ་ལས་བྱུང་བ་ཡིན་ནོ། །ཡོན་ཏན་གཞན་ལས་བྱུང་བའི་གྲགས་པ་ནི་སྙན་པའི་
སྒྲས་བརྗོད་པ་ཡིན་ནོ། །ཞུམ་པ་མེད་པ་ནི་ངོ་ཚ་བ་མེད་པ་དང་མགོ་འཕང་མཐོ་བ་ཡིན་ནོ། །འདུས་པའི་ནང་དུ་འགྲོ་བ་ཞེས་བྱ་བ་ནི་འཁོར་གྱི་ནང་དུ་འཇུག་པ་ཡིན་ནོ། །འཇིགས་པ་མེད་པར་འགྱུར་ཞེས་བྱ་བ་ནི་སྐྲག་པ་མེད་པར་འགྱུར་བའམ། སྤོབས་པ་སྐྱེ་བར་འགྱུར་རོ། །གང་གི་ཕྱིར་དེ་
ལྟ་ཡིན་པ་དེའི་ཕྱིར་མཁས་པ་བློ་དང་ལྡན་པ་སྦྱིན་པ་སྦྱིན་པར་བྱེད་དོ། །འདིར་ཞེས་བྱ་བ་ནི་མིའི་འཇིག་རྟེན་ཡིན་ཏེ། ལེན་པ་པོ་སྲིད་པའི་ཕྱིར་རོ། །ཅི་ཞིག་བྱས་ནས་ཤེ་ན། སེར་སྣའི་དྲི་མ་སྤངས་ཤིང་ཞེས་བྱ་བ་སྨོས་ཏེ། ནོར་ལ་ཆགས་པ་ནི་ཆགས་པ་ཡིན་ལ། དེ་ཉིད་དྲི་མ་ཡིན་པས་ན་
སྤངས་ཤིང་ཡོངས་སུ་བོར་ནས་སོ། །བདེ་བ་ཚོལ་བ་ཞེས་བྱ་བ་ནི་མ་འོངས་པའི་སྐྱེ་བའི་བདེ་བ་མངོན་པར་འདོད་པ་སྟེ། བདེ་བ་ཚོལ་བའི་ངང་ཚུལ་ཅན་གྱི་རང་བཞིན་གང་ཡིན་པ་དེ་དག་ནི་བདེ་བ་ཚོལ་བ་ཅན་ཡིན་ནོ་ཞེས་དབང་དུ་བྱས་ནས་སོ། །འདི་ལས་འབྲས་བུ་ཅིར་འགྱུར་ཞེ་ན། དེ་
དག་ཅེས་བྱ་བ་ལ་སོགས་པ་སྨོས་ཏེ། སྦྱིན་པ་པོ་དེ་དག་ཡུན་རིང་པོར་རྩེད་འཇོའི་དགའ་བ་ཉམས་སུ་མྱོང་བར་འགྱུར་རོ། །གང་དུ་ཞེ་ན། སྨྲས་པ། སུམ་ཅུ་རྩ་གསུམ་ལྷའི་རིས་སུ་གནས་པ་སྟེ་འདུག་པར་འགྱུར་རོ། །དེར་གནས་སུ་ཟིན་ཀྱང་འགའ་ཞིག་ཏུ་དུད་འགྲོ་དང་སྐལ་བ་མཉམ་པ་ཉིད་
དུ་སྐྱེ་བར་འགྱུར་བའང་སྲིད་པ་ཡོད་པའི་ཕྱིར་དེ་རྣམ་པར་གཅད་པའི་དོན་དུ་སྨྲས་པ། ལྷ་རྣམས་དང་སྐལ་བ་མཉམ་པ་ཉིད་ནི་ལྷ་དང་སྐལ་བ་མཉམ་པ་ཉིད་དེ། དེའི་ནང་དུ་སྐྱེ་བར་འགྱུར་རོ། །སྐབས་ཕྱེ་ཞེས་བྱ་བ་གང་དག་གིས་སྦྱིན་པ་ལ་སོགས་པས་ཐར་པའི་གྲོང་ཁྱེར་གྱི་སྐབས་འབྱེད་པ་

དེ་དག་ནི་སྐབས་ཕྱེ་བ་ཡིན་ནོ། །གང་དག་གིས་ཚུལ་ཁྲིམས་ཀྱི་རང་བཞིན་དང་། བསྒོམ་པའི་རང་བཞིན་གྱི་དགེ་བ་བྱས་པ་དེ་དག་ལ་དེ་སྐད་ཅེས་བྱའོ། །འདི་ནས་འཆི་འཕོ་ཞེས་བྱ་བ་ནི་མིའི་སྐྱེ་བ་ལས་རང་གི་ལུས་ལས་བྱུང་བའི་འོད་ཀྱིས་གསལ་བར་བྱས་པ་ཉིད་ཀྱི་ཕྱིར་རང་གི་
འོད་དག་གིས་སོ། །དགའ་བས་དགའ་བའི་སྐྱེད་མོས་ཚལ་གྱི་ནགས་སུ་རྗེས་སུ་སྤྱོད་པ་སྟེ། རང་གི་འདོད་པས་གནས་པར་འགྱུར་རོ། །རྩེ་བ་ནི་ཡོ་བྱད་གཙོ་བོར་གྱུར་པ་མ་ཡིན་པ་དང་། དགའ་བ་ནི་གཙོ་བོར་གྱུར་པའི་ཡོ་བྱད་ཀྱིས་བདག་ཉིད་མགུ་བ་སྐྱེད་པའོ། །གཉི་ག་ཞེས་བྱ་བ་ནི་གཙོ་བོ་མ་ཡིན་
པའི་ཡོ་བྱད་ཀྱིས་རྩེ་ཞིང་དགའ་བར་གྱུར་པའོ། །ལྡན་པ་ཞེས་བྱ་བ་ནི་གཟུགས་ལ་སོགས་པ་འདོད་པའི་ཡོན་ཏན་ལྔ་དང་ལྡན་པ་ཡིན་ནོ། །གཞན་ཅི་ཞིག་བྱས་ནས་ཤེ་ན། གྲོལ་བ་ཞེས་བྱ་བ་ལ་སོགས་པ་སྨོས་ཏེ། ཉོན་མོངས་པའི་འཆིང་བ་བག་ཆགས་ལས་རྣམ་པར་གྲོལ་བ་ཉིད་ཀྱི་ཕྱིར་བཅོམ་ལྡན་
འདས་ནི་རྣམ་པར་གྲོལ་བ་ཡིན་ལ། དེའི་གསུང་ཐོས་པ་ནི་གསུང་ནན་ཏན་དུ་བྱས་སོ། །སྐྱོབ་པ་ཞེས་བྱ་བ་ནི་ཡོངས་སུ་སྐྱོང་བར་མཛད་པ་སྟེ། གདུལ་བྱའི་སྐྱེ་བོ་ཉོན་མོངས་པའི་དགྲ་བོ་མ་ལུས་པ་ལས་ཡོངས་སུ་བསྲུང་བར་མཛད་པ་ཉིད་ཀྱི་ཕྱིར་རོ། །ཐོས་པ་སྒྲོགས་པར་བྱེད་པའི་ཕྱིར་
ཉན་ཐོས་དེ་སློབ་མ་ཉིད་ཡིན་ནོ། །མཐོ་རིས་དགའ་བ་ནི་ལྷའི་འཇིག་རྟེན་གྱི་དགའ་བ་ཉམས་སུ་མྱོང་བར་འགྱུར་བའོ། །མུ་གེ་ཞེས་བྱ་བ་ལ་སོགས་པ་ལ་དུས་གང་གི་ཚེ་བཟའ་བ་དཀའ་བ་རྙེད་པར་གྱུར་པ་དེ་ནི་མུ་གེའི་དུས་ཡིན་ནོ། །སྐྱེ་བོ་ཐམས་ཅད་འབྲུ་ཉུང་བས་འཚོ་བའི་ཕྱིར་དཀའ་བའི་
དུས་ཡིན་པའམ། རྒལ་དཀའ་བས་ན་དཀའ་བ་ཡིན་ནོ། །དུས་རིང་པོ་དང་རྗེས་སུ་འབྲེལ་པའི་ཕྱིར་འབྲོག་དགོན་པ་ཡིན་ནོ། །ཤེས་པ་ནི་འདྲིས་པ་ལ་བྱའོ། །ཕེབས་པར་སྨྲ་བ་ནི་ཡིད་བརྟན་པ་ཡིན་ཏེ། མཛའ་བ་བར་མའི་གནས་ཡིན་ནོ། །མཛའ་བ་བཞག་པར་བྱ་བ་ནི་འགྲོགས་
བཤེས་ཡིན་ཏེ་མཛའ་བའོ། །གནས་ཆེན་པོ་ཡིན་ཏེ་ཇི་ལྟར་བཤེས་པ་ཉིད་དུ་དབྱར་གནས་པར་བྱ་བ་ཡིན་ནོ། །ཇི་ལྟར་བཤེས་པ་ཞེས་བྱ་བའོ་དོན་གང་གི་གང་མཛའ་བའི་གནས་ཡིན་པ་དེས་དེ་ལ་བརྟེན་ནས་དབྱར་ཚུལ་དུ་འཇུག་པར་བྱ་བའི་ཞེས་བྱ་བ་འདི་ཡིན་ནོ། །བསོད་སྙོམས་ཀྱིས་འབྲེལ་

བར་འགྱུར་རོ་ཞེས་བྱ་བ་ནི་བསོད་སྙོམས་ཀྱི་གནོད་པས་སྡུག་བསྔལ་ཉམས་སུ་མྱོང་བར་འགྱུར་རོ། །དབྱར་གྱི་གནས་དེར་ཞེས་བྱ་བ་ལ་སོགས་པ་ལ། ཐོག་མར་བརྣག་དཀའ་བ་ཉིད་ཀྱི་ཕྱིར་རྩུབ་པ་ཡིན་ནོ། །སྐུ་ལ་ཤིན་ཏུ་ཞུགས་པ་ཉིད་ཀྱི་ཕྱིར་བཟོད་དཀའ་བ་ཡིན་ནོ། །གྲོངས་པ་ལ་ཐུག་པ་ལ་ཙམ་
དུ་གྱུར་པས་ན་གྲོངས་པ་ལ་ཐུག་པ་ཙམ་སྟེ། གྲོངས་པ་དང་འདྲ་བར་ཞེས་བྱ་བའི་ཐ་ཚིག་གོ། །བརྩོན་འགྲུས་ཀྱིས་སོ་སོ་སྦྱངས་ཏེ་ཞེས་བྱ་བ་ནི་ནུས་པ་མེད་པར་བྱས་པ་ཉིད་དམ། ཚར་བཅད་པའི་སྒོ་ནས་འབྲང་བ་མེད་པར་བྱས་པ་ཡིན་ནོ། །མཚན་མ་ཐམས་ཅད་ཡིད་ལ་མི་བྱེད་པའི་ཕྱིར་ཞེས་བྱ་བ་
ལ་སོགས་པ་ལ། མཚན་མ་ནི་བཅུ་སྟེ། གཟུགས་དང་། སྒྲ་དང་། དྲི་དང་། རོ་དང་། རེག་བྱ་སྟེ་ལྔ་དང་། སྐྱེ་བ་དང་། རྒ་བ་དང་། མི་རྟག་པ་དང་། སྐྱེས་པ་དང་། བུད་མེད་ཀྱི་མཚན་མ་ཞེས་བྱ་བ་ལྔ་ཡིན་ནོ། །ཡིད་ལ་མི་བྱེད་པའི་ཕྱིར་ཞེས་བྱ་བ་ནི་མངོན་སུམ་དུ་མི་བྱ་བའི་ཕྱིར་རོ། །མྱ་ངན་
ལས་འདས་པ་ལ་དམིགས་པ་ནི་ཏིང་ངེ་འཛིན་ཡིན་ལ། མཚན་མ་མེད་པ་ནི་མཚན་མ་བཅུ་མེད་པའི་ཕྱིར་མྱ་ངན་ལས་འདས་པ་ལ་མཚན་མ་མེད་པ་ཞེས་བསྟན་ཏོ། །ལུས་ལ་བརྟེན་ནས་སྐྱེས་པའི་ཕྱིར་ལུས་ཀྱིས་མངོན་སུམ་དུ་བྱས་ནས་ཞེས་བསྟན་ཏོ། །ཉེ་བར་བསྒྲུབས་ཏེ་ཞེས་བྱ་བ་ནི་ཡེ་ཤེས་
ཀྱིས་ཡོངས་སུ་རྫོགས་པར་མཁྱེན་ནས་སོ། །གནས་པ་ནི་དབྱར་ལ་མངོན་དུ་ཕྱོགས་པར་གྱུར་པས་བཅོམ་ལྡན་འདས་ལ་བསྙུན་དྲག་པོ་སྐྱེ་བ་མི་རིགས་ཏེ། གང་གི་ཕྱིར་འཕགས་པ་བ་ཀུ་ལས་འཕགས་པའི་དགེ་འདུན་ལ་དད་པའི་སེམས་ཀྱིས་ཨ་རུ་ར་གཅིག་ཕུལ་བ་དེ་ལས་ནི་རིགས་མཐུན་པ་ཟད་
པའི་ཕྱིར་སྐྱེ་བ་གཞན་དུ་ནི་ལུས་ལ་ནད་མེད་པ་དང་། དེ་སྐད་ཅིག་མ་གཅིག་ཀྱང་མགོ་བོ་ཟུག་རྔུ་བསྟེན་པར་མི་འགྱུར་རོ་ཞེས་བྱ་བའི་བར་དུ་འབྱུང་བ་མ་ཡིན་ནམ། བཅོམ་ལྡན་འདས་ནི་བྱང་ཆུབ་སེམས་དཔའི་གནས་སྐབས་སུ་སངས་རྒྱས་དང་དགེ་འདུན་ལ་རྫས་རྣམ་པ་སྣ་ཚོགས་ཀྱི་སྦྱིན་པ་མཛད་
པ་ཡིན་ལ། འོན་ཀྱང་བཅོམ་ལྡན་འདས་བསྙུན་གྱིས་གཙེས་པར་གྱུར་པ་དེ་ཇི་ལྟར་རིགས་ཏེ། འདིར་སྨྲ་བར་བྱའོ་ཞེ་ན། འདིར་བླ་མ་དག་ནི་འཕགས་པ་བ་ཀུ་ལ་ཨ་རུ་ར་དེ་སྦྱིན་པའི་རྣམ་པར་སྨིན་པ་ལ་བརྟེན་པར་འགྱུར་བ་མ་ཡིན་པ་དེ་བས་ན་ཕྱིས་རྣམ་པར་སྨིན་པ་འབྱིན་པར་འགྱུར་བ་དེ་དང་

རྣམ་པར་སྨིན་པ་མཐའ་དག་འབྱིན་པའི་སྒོ་ནས་སྦྱིན་པ་དེ་ལས་བྱུང་བའི་རྣམ་པར་སྨིན་པ་ལ་བརྟེན་པ་ཡིན་ལ། བཅོམ་ལྡན་འདས་ནི་བྱང་ཆུབ་སེམས་དཔར་གྱུར་ནས་གང་སྨན་གྱི་སྦྱིན་པ་བྱིན་པ་དེ་ནི་སྐྱེ་བ་དུ་མར་རྣམ་པར་སྨིན་པ་ཡིན་ཏེ། དེ་ཉིད་ཀྱི་ལྷག་མ་ཁོ་ནས་མངོན་པར་རྫོགས་
པར་འཚང་རྒྱ་བའི་གནས་སྐབས་ན་བཅོམ་ལྡན་འདས་བསྙུན་ཉུང་བར་བཞུགས་ཏེ། གང་དུ་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་དུས་སུ་བསྙུན་ལྕི་བ་སྐྱེ་བར་འགྱུར་བ་དེ་ནི་སེམས་ཅན་ལ་ཕན་གདགས་པར་མཛད་པར་རུང་བ་གཅིག་ཏུ་ངེས་པར་རུང་བར་འགྱུར་བའི་ལས་ཀྱི་འབྲས་བུ་ཡིན་པར་
རིག་པར་བྱ་སྟེ། གང་བྱང་ཆུབ་སེམས་དཔའི་མི་དགེ་བའི་ལས་ལས་གྱུར་པ་སེམས་ཅན་ལ་ཕན་འདོགས་པར་མཛད་པར་རུང་བ་མ་ཡིན་པའི་འབྲས་བུ་དེ་ཐམས་ཅད་ནི་བྱང་ཆུབ་སེམས་དཔའི་གནས་སྐབས་ཁོ་ན་ལ་འབྲས་བུ་སྨིན་པ་ཡིན་ལ། གང་དུ་བྱང་ཆུབ་སེམས་དཔའི་ཕན་གདགས་པར་
མཛད་དུ་རུང་བའི་འབྲས་བུ་དེ་ནི། སངས་རྒྱས་ཀྱི་གནས་སྐབས་སུ་འབྲས་བུ་འབྱིན་པར་བྱེད་དེ། སངས་རྒྱས་བཅོམ་ལྡན་འདས་ནི་སེམས་ཅན་ལ་ཕན་འདོགས་པ་གཙོ་བོར་གྱུར་པ་ཡིན་ནོ་ཞེས་སྟོན་པར་མཛད་དོ། །ཇི་ལྟར་ན་བསྙུན་དེ་སེམས་ཅན་ལ་ཕན་འདོགས་པར་བྱེད་པར་འགྱུར་
ཞེ་ན། འདིར་བཅོམ་ལྡན་འདས་ཀྱིས་ཕྲིན་ལས་ཀྱི་རྒྱུན་ཅན་གྱི་བསྙུན་ཡང་དག་པར་འཁྲུད་པ་བསྟན་པས། ལྷ་དང་མིའི་ངེས་པར་མྱོང་བར་འགྱུར་བའི་ལས་ཆུད་མི་ཟ་བར་འགྱུར་བ་མཐོང་ལ་ཆུད་མི་ཟ་བར་འགྱུར་བ་དེ་མཐོང་བ་ལས་འཁོར་བ་ལས་འཇིགས་པ་ཆེན་པོ་དང་སྐྱོ་བ་དང་བཅས་པ་སྐྱེ་བར་
འགྱུར་ཏེ། གང་གི་ཕྱིར་བཅོམ་ལྡན་འདས་འདི་ནི་ཉོན་མོངས་པ་བག་ཆགས་དང་བཅས་པ་སྤངས་ཤིང་། ཡོན་ཏན་ཐམས་ཅད་ཀྱི་འབྱོར་པ་རབ་ཀྱི་མཐའ་བརྙེས་པར་གྱུར་པ་ཡིན་ཡང་ལས་ཀྱི་འབྲས་བུ་འདོད་པ་མ་ཡིན་པ་ཉམས་སུ་མྱོང་བར་འགྱུར་བ་དེ་བས་ན་ཁོ་བོ་ཅག་སྲིད་པའི་འདམ་གྱི་ནང་དུ་
བྱིང་བར་གྱུར་པ་དག་ཅི་འདྲ་བའི་གནས་སྐབས་སུ་འགྱུར་སྙམ་དུ་ཤེས་ནས་དགེ་བའི་ལས་ལ་རྩོལ་བ་དང་བཅས་པར་འགྱུར་རོ། །འཁོར་བ་ཡོངས་སུ་གཏོང་བ་དང་། མྱ་ངན་ལས་འདས་པ་བརྙེས་པར་བྱེད་པ་ལ་བརྩོན་པ་དང་བཅས་པ་ཉིད་ནི་ཕྱིར་སྨྲས་པ་དག་གི་གོ་རིམས་ཀྱིས་འཁོར་བའི་བདེ་

བ་ཉམས་སུ་མྱོང་ཞིང་ཐར་པ་ཐོབ་པར་འགྱུར་བའི་ཕྱིར། བཅོམ་ལྡན་འདས་ཀྱིས་འདོད་པར་བྱ་བ་མ་ཡིན་པའི་ཕྲིན་ལས་ཐམས་ཅད་རྫོགས་པའི་སངས་རྒྱས་ཀྱི་གནས་སྐབས་སུ་འབྲས་བུ་འབྱིན་པར་བྱེད་པ། སེམས་ཅན་ལ་ཕན་འདོགས་པར་བྱེད་པ་ཁོ་ན་ཡིན་གྱི། བསྙུན་གྱི་འབྲས་བུ་འབྱིན་
པར་བྱེད་པ་ཅན་གྱི་ལས་ཁོ་ན་ནི་མ་ཡིན་ནོ་ཞེས་སྟོན་པར་མཛད་དོ། །བཟོད་པ་དང་རྗེས་སུ་མཐུན་པས་ན་བཟོད་པར་བྱ་བ་ཡིན་ཏེ། བརྣག་དཀའ་བ་ཞེས་བྱ་བའི་ཐ་ཚིག་གོ། །འཚོ་བ་དང་རྗེས་སུ་མཐུན་པ་ནི་འཚོ་བར་གྱུར་པ་སྟེ། དུས་དེ་སྲིད་བསྙུན་པར་མཛད་པ་ནུས་པ་མེད་པར་མཛད་ཅེས་བྱ་བའི་
བར་དུའོ། །མ་དུ་ར་ཀར་སྐྱེས་པ་ཞེས་བྱ་བ་ལ་སོགས་པའི་བཤད་པ་ནི་ཤཱ་རིའི་བུ་མྱ་ངན་ལས་འདས་པའི་སྐབས་སུ་དཔྱད་པར་བྱའོ། །དབུགས་ཕྱུང་བ་ཙམ་ཞེས་བྱ་བ་ནི་དབུགས་ཕྱིར་ཕྱུང་བ་ཙམ་མོ། །གསུང་བ་གསུང་བར་འགྱུར་བ་ཞེས་བྱ་བ་དོན་དང་འབྲེལ་པ་གསུང་གིས་བཤད་པར་འགྱུར་
བའོ། །ངའི་དགེ་སློང་གི་དགེ་འདུན་ཞེས་བྱ་བ་ལ་སོགས་པ་ལ། འཇིག་ཚོགས་སུ་ལྟ་བ་ལ་སོགས་པའི་ཉོན་མོངས་པ་བག་ཆགས་དང་བཅས་པ་སྤངས་པ་དག་ནི་འདི་ལྟར་ང་ཡིར་མི་འགྱུར་བ་ནི་ངའི་དགེ་སློང་གི་དགེ་འདུན་ཡིན་ནོ། །ངའི་ཕྱིར་ཞེས་བྱ་བ་ནི་ངའི་རྗེས་སུ་སྟོན་པ་སྟེ། གང་ཁོ་ན་རྗེས་
སུ་སྟོན་པར་བྱེད་པ་དེ་ཐམས་ཅད་ངས་བྱ་བ་ཡོངས་སུ་རྫོགས་པར་བྱས་པ་ཡིན་ནོ་ཞེས་དགོངས་སོ། །ཡོངས་སུ་ལྟ་བའོ་ཞེས་བྱ་བ་ནི་ལུང་ཕོག་པ་སྦྱིན་པའི་སྒོ་ནས་གནས་པར་བྱ་བའམ་ཡོངས་སུ་བསྐྱང་བར་བྱ་བའོ། །རེ་བ་ཞེས་བྱ་བ་ནི་མངོན་པར་འདོད་པའོ། །ངས་བསྒོའོ་ཞེས་བྱ་བ་ལ་སོགས་པ་ལ།
རྟག་ཏུ་ཕྱི་རོལ་ལ་མངོན་སུམ་དུ་བྱ་ཞིང་དུས་ཐམས་ཅད་བསྒོམ་པར་བྱའོ་ཞེས་བྱ་བར་དགོངས་སོ། །སློབ་དཔོན་དཔེ་མཁྱུད་ཅེས་བྱ་བ་ནི་སློབ་དཔོན་ཆོས་སྟོན་པ་ལ་མཁས་པ་དག་གི་དཔེ་མཁྱུད་ནི་སློབ་དཔོན་དཔེ་མཁྱུད་དེ། ཆོས་ཀྱི་སེར་སྣ་ཡིན་ལ་རང་གི་ངོ་བོའི་སྒོ་ནས་སྟོན་པར་མི་བྱེད་ཅེས་བྱ་བའི་ཐ་
ཚིག་གོ། །གཉེར་མ་དང་སྐྲ་དཀར་སྐྱེས་པའི་ཕྱིར་བགྲེས་པ་ཡིན་ནོ། །རྒས་པས་ལུས་མ་རུང་བ་ཉིད་ཀྱི་ཕྱིར་འཁོགས་པ་ཡིན་ནོ། །གནས་སྐབས་གཞན་ཐོབ་པ་ཉིད་ཀྱི་ཕྱིར་གཏུགས་པ་ཡིན་ནོ། །རྣམ་པ་གཉིས་ལ་བརྟེན་ནས་ཞེས་བྱ་བ་ལ། སྔོན་གྱི་ལས་ཀྱིས་འཕངས་པའི་ཚེ་ནི་རྟེན་

གཅིག་ཡིན་ལ། །བཟའ་པ་དང་བཏུང་བ་དང་། བསྐུ་མཉེ་ལ་སོགས་པའི་ཡོ་བྱད་ནི་གཉིས་པ་ཡིན་ཏེ། དེ་གཉིས་ཀྱིས་གནས་པར་བྱེད་པའི་ཕྱིར་རོ། །ཤིང་རྟ་རྙིང་པ་ན་ས་གཞི་རྟེན་གཅིག་ཡིན་ཏེ། རྙིངས་པ་ཉིད་ཀྱི་ཕྱིར་ཉི་མ་རེ་རེ་ལ་པགས་པ་དང་། རྒྱུས་པ་དང་ཤིང་ལ་སོགས་པས་འཆོས་
པར་བྱེད་པ་དེ་ནི་སྟན་གཉིས་པ་ཡིན་ནོ། །མྱ་ངན་མ་བྱེད་ཅིག་ཅེས་བྱ་བའི་བཤད་པ་ནི་ཤཱ་རིའི་བུ་ཡོངས་སུ་མྱ་ངན་ལས་འདས་པའི་སྐབས་སུ་བལྟ་བར་བྱའོ། །བསླབ་པ་དག་ལ་གུས་པར་བྱེད་པ་ནི་བསླབ་འདོད་པ་ཡིན་ཏེ། བདག་ཉིད་གླིང་དུ་འཇོག་པའི་བསླབ་པ་དག་ལ་ཤིན་ཏུ་སྲུང་བར་བྱེད་པ་དེ་བས་ན་དེ་སྐད་
ཅེས་བསྟན་པ་ཡིན་ནོ། །ཀུན་དགའ་བོ་ཞེས་བྱ་བ་ལ་སོགས་པ་ལ། བྲི་ཛིའི་མིང་ཅན་གྱི་རྒྱལ་རིགས་དག་གི་ཡུལ་གྱི་ས་གཞི་ནི་བྲི་ཛིའི་གནས་ཡིན་ནོ། །རྩྭ་བ་ལའི་མིང་ཅན་གྱི་མཆོད་རྟེན་དེས་ཉེ་བར་མཚོན་པའི་ཡུལ་ཕྱོགས་ལ་སྒྲ་དེས་གཟུང་བ་ཡིན་ནོ། །ཨ་མྲའི་ཤིང་ཆེན་པོ་བདུན་གྱིས་ཉེ་བར་མཚོན་
པ་ནི་ཤིང་ཨ་མྲ་བདུན་པའོ། །བུ་མང་པོའི་མཆོད་རྟེན་གྱིས་ཉེ་བར་མཚོན་པའི་གནས་ནི་བུ་མང་པོ་པ་ཡིན་ཏེ། འདི་ལ་བུད་མེད་འགའ་ཞིག་ལས་བུ་མང་པོ་སྐྱེས་པ་དེ་དག་ཐམས་ཅད་ཀྱིས་རང་རྒྱལ་བའི་བྱང་ཆུབ་མངོན་སུམ་དུ་བྱས་ཏེ། ས་ཕྱོགས་དེ་ཉིད་དུ་འོངས་ནས་ཡོངས་སུ་མྱ་ངན་ལས་འདས་པ་དེ་
དག་གི་ལུས་ཀྱི་མཆོད་རྟེན་བྱས་པ་ཉིད་ཀྱི་ཕྱིར་བུ་མང་པོ་པ་ཞེས་བསྟན་པ་ཡིན་ནོ་ཞེས་བསྟན་པའམ། བུ་མང་པོ་པ་ཞེས་བྱ་བའི་མིང་གི་སྒྲ་ཡིན་ནོ། །དྲང་སྲོང་གཽ་ཏ་མས་བརྟེན་པའི་ཤིང་ནྱ་གྲོ་དྷས་ཉེ་བར་མཚོན་པའི་གནས་ནི་གཽ་ཏ་མའི་ནྱ་གྲོ་དྷ་ཡིན་ནོ། །ཤིང་སཱ་ལ་ཆེན་པོ་གཉིས་ཀྱིས་ཉེ་བར་མཚོན་པའི་
ཡུལ་ལ་ཤིང་སཱ་ལ་གཉིས་ཀྱི་སྒྲས་བསྟན་ཏོ། །གཅེར་བུ་པ་འདོར་བའི་མཆོད་རྟེན་གྱིས་ཉེ་བར་མཚོན་པའི་ཡུལ་ལ་དེ་སྐད་ཅེས་བྱའོ། །ཅོད་པན་བཏགས་པའི་མཆོད་རྟེན་གྱིས་ཉེ་བར་མཚོན་པའི་ཡུལ་དགའ་བར་བྱེད་པ་ཡིན་ཏེ། རྒྱལ་པོ་ཆེན་པོ་བལྟ་ན་སྡུག་པའི་བུ་ཀུན་གྱི་ཐ་ཆུངས་བདག་གིས་ཡུན་
རིང་པོ་ནས་རྒྱལ་སྲིད་འཐོབ་བར་འགྱུར་རོ་སྙམ་པས་རབ་ཏུ་བྱུང་ངོ་། །རབ་ཏུ་བྱུང་ནས་ཀྱང་དེས་རང་རྒྱལ་བའི་བྱང་ཆུབ་མངོན་སུམ་དུ་བྱས་ནས་ཡོངས་སུ་མྱ་ངན་ལས་འདས་པ་ན་དེའི་མས་མཆོད་རྟེན་བྱས་པ་ན། རྒྱལ་པོ་ཆེན་པོ་བལྟ་ན་སྡུག་གིས་བྱུང་བའི་མཐའ་རྙེད་ནས་རང་གི་ཅོད་པན་མཆོད་རྟེན་ལ་བཏགས་

པས་ན་ཅོད་པན་བཏགས་པའི་མཆོད་རྟེན་ཞེས་བྱ་བའི་བར་དུའོ། །གནས་དེ་དག་ཐམས་ཅད་ཡངས་པ་ཅན་ཁོ་ནའི་མ་ཡིན་གྱི། འོན་ཀྱང་ཇི་ལྟར་སྲིད་པར་གཞན་དུ་ཡང་ཡིན་ནོ། །འཛམ་བུའི་གླིང་སྣ་ཚོགས་ཞེས་བྱ་བ་ལ་སྣ་ཚོགས་པ་བརྗོད་པ་ནི་དགའ་བར་བྱ་བ་ཉིད་ཀྱི་ཁྱད་པར་བྱེད་པ་ཡིན་པར་རིག་པར་བྱའོ། །
དགའ་བར་བྱ་བ་ནི་སེམས་དགའ་བ་དང་མཐུན་པས་ན་དགའ་བར་འགྱུར་བའོ། །ཤིན་ཏུ་འདོད་པར་བྱ་བ་ཡིན་པས་ན་མདྷུ་ར་ཞེས་བརྗོད་དོ། །རྫུ་འཕྲུལ་གྱི་རྐང་པ་བཞི་ནི་འདུན་པའི་ཏིང་ངེ་འཛིན་དང་། སེམས་ཀྱི་ཏིང་ངེ་འཛིན་དང་། བརྩོན་འགྲུས་ཀྱི་ཏིང་ངེ་འཛིན་དང་། དཔྱོད་པའི་ཏིང་ངེ་འཛིན་ནོ། །བསྙེན་
ཅིང་བསྒོམས་པ་ནི་བསྒོམས་པས་ཀུན་ནས་བསྙེན་པ་སྟེ། གུས་པར་བསྒོམ་པ་ཡིན་པར་བསྟན་ཏོ། །རྟག་ཏུ་བསྒོམ་པ་ནི་མང་དུ་བྱས་པ་ཡིན་པར་བསྟན་ཏོ། །བསྐལ་པ་ནི་འདིར་བསྐལ་པ་ཆེན་པོ་ཡིན་པར་རིག་པར་བྱའོ། །བསྐལ་པ་བས་ལྷག་པ་དང་། ཆ་དང་། དུམ་བུ་དུས་གང་ལ་ཡོད་པ་དེ་ནི་བསྐལ་པ་ལས་
ལྷག་པའི་དུས་ཡིན་ཏེ་བསྐལ་པ་དུ་མས་ཉེ་བར་མཚོན་པའི་དུས་ཞེས་བྱ་བའི་ཐ་ཚིག་གོ། །ཀུན་དགའ་བོ་ཡངས་པ་ཅན་ཞེས་བྱ་བ་ལ་སོགས་པ་ནི་ཡངས་པ་ཅན་ལ་སོགས་པའི་ཚིག་གི་དགོས་པ་བརྗོད་པ་ཡིན་ནོ། །གང་གི་ཕྱིར་སངས་རྒྱས་བཅོམ་ལྡན་འདས་ནི་དགོངས་པས་སྟོང་པའི་ཚིག་གསུང་བར་མི་
འགྱུར་རོ་ཞེ་ན། འདིར་འཛམ་བུའི་གླིང་གི་མི་རྣམས་ལ་བརྟེན་ནས་བཅོམ་ལྡན་འདས་ཀྱིས་རྣམ་པ་ཐམས་ཅད་མཁྱེན་པའི་ཡེ་ཤེས་ཐུགས་སུ་ཆུད་པ་དེ་བས་ན་བྱས་པ་ཤེས་པ་ཉིད་མངོན་དུ་མཛད་ནས་འཛམ་བུའི་གླིང་གི་གདགས་པ་གསུང་པ་ཡིན་པ་དེ་ཉིད་ཀྱི་ཕྱིར་ཐོག་མ་ཁོ་ནར་ཡངས་པ་ཅན་གྱི་མིང་
སྨོས་པ་མཛད་པ་ཡིན་ནོ། །གང་གི་ཕྱིར་བཅོམ་ལྡན་འདས་ཡངས་པ་ཅན་ན་བཞུགས་ནས་བཀའ་འདི་གསུངས་པ་ཡིན་པར་བརྗོད་དོ། །གཞན་གང་འགའ་ཞིག་འདི་ལ་བཅོམ་ལྡན་འདས་བཞུགས་པའི་ནུས་པ་མི་མངའ་བ་དེ་བས་ན་འདི་ལྟར་འཛམ་བུའི་གླིང་སྣ་ཚོགས་པ་ཡང་སྤངས་ནས་ཡོངས་
སུ་མྱ་ངན་ལས་འདས་པ་ཡིན་ནོ་སྙམ་དུ་སེམས་པ་དེའི་ཚེ་ཐེ་ཚོམ་བཟློག་པར་བྱ་བའི་ཕྱིར་གང་འགའ་ཞིག་རྫུ་འཕྲུལ་གྱི་རྐང་པ་བཞི་ལ་ཞེས་བྱ་བ་ལ་སོགས་པ་སྨོས་པ་ཡིན་ཏེ། བསྐལ་པ་ལས་ལྷག་པའི་དུས་སུ་བཅོམ་ལྡན་འདས་བཞུགས་པའི་ནུས་པ་དང་ལྡན་དུ་ཟིན་ཀྱང་གང་དུས་ལྷག་པར་མི་བཞུགས་

པ་དེ་ནི་འཁོར་བ་དེའི་ཉེས་དམིགས་བསྟན་པར་བྱ་བའི་ཕྱིར་དང་། མྱ་ངན་ལས་འདས་པའི་ཡོན་ཏན་རབ་ཏུ་གསལ་བར་བྱེད་པའི་དོན་ཡིན་པར་རིག་པར་བྱའོ། །བཅོམ་ལྡན་འདས་ཀྱིས་འདི་ལྟ་སྟེ་འཁོར་བ་འདི་ནི་སྐྱེ་བ་དང་རྒ་བ་དང་ན་བ་དང་རྣམ་པར་འཚེ་བའི་བྱེ་བྲག་དུ་མ་དང་ལྡན་པ་
དེའི་ཕྱིར་ཡོན་ཏན་གྱི་འབྱོར་པ་རབ་ཀྱི་མཐར་བརྙེས་ཤིང་བག་ཆགས་དང་བཅས་པའི་ཉེས་པ་སྤངས་པས་གནས་པའི་སྐལ་བ་ཅན་ཡིན་དུ་ཟིན་ཀྱང་གནས་པར་མི་བྱ་ཞིང་སྡུག་བསྔལ་ཐམས་ཅད་ཉེ་བར་ཞི་བའི་མྱ་ངན་ལས་འདས་པའི་གྲོང་ཁྱེར་ཁོ་ནར་འཇུག་པ་དེ་བས་ན་འཁོར་བ་འདི་ལ་ཆགས་པར་མི་བྱའི། འོན་
ཀྱང་ཚུལ་ཁྲིམས་དང་། ཐོས་པ་དང་། བསྒོམ་པའི་ཐབས་ཀྱི་ལམ་བསྒོམ་པ་ཡོངས་སུ་རྫོགས་པར་བྱ་བ་དེས་ཁོ་བོ་ཅག་གིས་ཀྱང་ཐར་པ་ཐོབ་པར་འགྱུར་རོ་ཞེས་བྱ་བ་དེ་ཤེས་ནས་ལྷ་མང་པོ་འཁོར་བ་ལས་སྐྱོ་ཞིང་མྱ་ངན་ལས་འདས་པ་དང་བརྩོན་པ་དང་བཅས་པ་སྐྱེ་བར་བསྟན་པ་ཡིན་ནོ། །གདུལ་
བའི་འབྲས་བུ་མེད་པ་ནི་མཛད་པ་རྫོགས་པ་ཡིན་པས་བཅོམ་ལྡན་འདས་མི་བཞུགས་པ་ཡིན་ནོ་ཞེས་བརྗོད་པ་ལ། ཀུན་དགའ་བོ་གལ་ཏེ་རྫུ་འཕྲུལ་གྱི་རྐང་པ་བཞི་ཞེས་བྱ་བ་ལ་སོགས་པ་ལ་འཕགས་པ་ཀུན་དགའ་བོ་དང་ལྷན་ཅིག་གཏམ་བརྗོད་པ་མཛད་པ་དེ་ནི་ཀུན་དགའ་བོ་ཁོ་ན་ལ་ཉེས་པ་སྦྱོར་བའི་སྒོ་
ནས་དགྲ་བཅོམ་པ་ཉིད་ཀྱི་འབྲས་བུ་ཐོབ་པར་བྱ་བའི་དོན་ཡིན་ཏེ། བཅོམ་ལྡན་འདས་ཀྱིས་ཡོངས་སུ་མྱ་ངན་ལས་འདས་ནས་གནས་བརྟན་ཆེན་པོ་འོད་སྲུངས་འཕགས་པ་ཀུན་དགའ་བོ་ལ་སྤྱོ་བ་བརྒྱད་ཀྱིས་སྤྱོས་པ་དེ་ལས་ཉེས་ཏེ། གང་འཕགས་པ་ཀུན་དགའ་བོ་ཁོ་ནས་འདི་ལྟ་སྟེ། བཅོམ་ལྡན་འདས་
བསྐལ་པར་བཞུགས་སུ་གསོལ། བསྐལ་པ་ལས་ལྷག་པར་བཞུགས་སུ་གསོལ་ཞེས་མ་གསོལ་བའི་ཉེས་པ་འདི་ནི་ཤིན་ཏུ་ལྕི་བ་ཡིན་ཏེ། ཉེས་པ་དེས་ཀྱང་སྲིད་པ་ལས་སྐྱོ་བ་དང་ལྡན་པར་འགྱུར་ཞིང་སྐྱོ་བ་ལས་ཀྱང་དགྲ་བཅོམ་པ་ཉིད་ཀྱི་འབྲས་བུ་འཐོབ་པར་འགྱུར་རོ་ཞེས་གཟིགས་པ་ཡིན་ནོ། །ཁེབས་
པར་ཞེས་བྱ་བ་ནི་བར་དུ་གཅོད་པས་ཁྱབ་པར་འགྱུར་རོ། །ཤིན་ཏུ་གསལ་བ་ཉིད་ཀྱིས་ནི་རྒྱ་ཆེ་བ་ཡིན་ནོ། །ངག་ཏུ་བརྗོད་པའི་སྤོབས་པ་ནི་འདིར་སྣང་བའི་སྒྲས་བརྗོད་པ་ཡིན་ནོ། །རྒྱུ་མཚན་སྣང་བའི་རྒྱུ་ཡིན་ཏེ། དེ་ཡང་ཀུན་དགའ་བོ་ཡངས་པ་ཅན་ཞེས་བྱ་བ་ལ་སོགས་པ་བརྗོད་པ་ཡིན་ནོ། །སོ་སོར་

རྟོགས་པ་ནི་ཁོང་དུ་ཆུད་པའོ། །འཁྲུགས་པར་མི་འགྱུར་བ་ཞེས་བྱ་བ་ནི་རྣམ་པར་མི་འཁྲུགས་པས་གནས་པ་དང་ལྡན་པའོ། །བཅོམ་ལྡན་འདས་ཡོངས་སུ་མྱ་ངན་ལས་འདའ་བར་མཛད་དུ་གསོལ་ཞེས་བྱ་བ་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་འགྱུར་རོ། །ཇི་
ལྟར་ཡོངས་སུ་མྱ་ངན་ལས་འདས་སྙམ་དུ་དོགས་པ་ལ། བདེ་བར་གཤེགས་པ་ཡོངས་སུ་མྱ་ངན་ལས་འདའ་བའི་དུས་ལ་བབ་པོ་ཞེས་བྱ་བ་སྨོས་པ་ཡིན་ནོ། །ཕུང་པོ་དང་ཁམས་དང་སྐྱེ་མཆེད་ལ་མཁས་པ་ལ་འདིར་མཁས་པར་རིག་པར་བྱའོ། །མདོ་སྡེ་ལ་སོགས་པ་ནང་ཕན་ཚུན་འདྲེས་པ་
དག་གི་མཚན་ཉིད་རྣམ་པར་འབྱེད་པའི་ནུས་པ་དང་ལྡན་པ་གསལ་བ་ཡིན་ནོ། །དོན་མྱུར་དུ་གཅོད་པའི་ནུས་པ་དང་ལྡན་པ་ནི་ཡིད་གཞུངས་པའོ། །ཆོས་དང་བཅས་པས་ཞེས་བྱ་བ་ནི་རིགས་པས་སོ། །རང་གི་རྒོལ་བའི་ཡོངས་སུ་གསལ་བར་བྱེད་པའི་ཕྱིར་ཡོངས་སུ་དག་པར་བྱེད་པའོ། །
རྒྱས་པར་འབྱུང་བ་ནི་རྒྱས་པའོ། །དེ་གང་ཞེ་ན། སྨྲས་པ། ཚངས་པར་སྤྱོད་པ་སྟེ། མི་མང་པོ་དག་གིས་འཕགས་པའི་ལམ་བསྐྱེད་པ་དེ་ཉིད་ཀྱི་ཕྱིར་རྒྱས་པར་ཞེས་བྱ་བ་སྨོས་སོ། །དེ་ཉིད་ཀྱི་ཕྱིར་སྐྱེ་བོ་མང་པོ་ལ་ཕན་པ་ཡིན་ཏེ། སྐྱེ་བོ་མང་པོ་དག་ལ་ཕན་པ་བྱེད་པ་ཉིད་ཀྱི་ཕྱིར་རོ། །མཐའ་མེད་
པ་དག་གིས་མངོན་སུམ་དུ་བྱས་པ་དེ་ཉིད་ཀྱི་ཕྱིར་ཡངས་པར་གྱུར་པ་ཞེས་སྨོས་སོ། །དེ་ཉིད་ཀྱི་ཕྱིར་སྨྲས་པ། ཇི་སྲིད་ལྷ་དང་མི་དག་ལ་ཡང་དག་པར་རབ་ཏུ་བསྒྲགས་པ་སྟེ། ཤིན་ཏུ་གསལ་བ་དང་རབ་ཏུ་གསལ་བར་མཛད་པ་ཞེས་བྱ་བའི་ཐ་ཚིག་གོ། །བརྩོན་པ་ཆུང་བར་གྱིས་ཤིག་ཅེས་བྱ་བ་ནི་རྩོལ་བ་
ཆུང་བའོ། །མངོན་པར་འདོད་པའི་དགོས་པ་གྲུབ་པར་ཐོས་པའི་ཕྱིར་དགའ་བ་ཡིན་ནོ། །བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེའི་ཕྱིར་མངོན་པར་འདོད་པ་ཡིན་ལ། མངོན་པར་འདོད་པའི་འབྲས་བུ་གྲུབ་པར་དབུགས་ཕྱུང་བའི་ཕྱིར་མགུ་བ་ཡིན་ལ། འཇིག་རྟེན་གྱི་འབྲས་བུ་རང་གི་དབང་
གིས་གནས་པ་དེ་ནི་མངོན་པར་འདོད་པ་ཡིན་ལ། བཅོམ་ལྡན་འདས་ཡོངས་སུ་མྱ་ངན་ལས་འདས་པ་ལས་ཀྱང་ཕལ་ཆེར་འཇིག་རྟེན་གྱི་བདུད་ཀྱི་དབང་དུ་འགྱུར་ཏེ། འབྲས་བུ་དེ་གཉིས་གྲུབ་པར་བསྟན་པའི་ཕྱིར་རབ་ཏུ་དགའ་བ་སྟེ་ཤིན་ཏུ་དགའ་བ་ལྡན་པ་ཡིན་ནོ། །ཡི་རངས་པ་ནི་འདིར་དགའ་བ་ཡིན་

པར་རིག་པར་བྱ་སྟེ། དེ་ཉིད་ཡིད་བདེ་བ་ཡིན་ནོ། །འཚོ་བའི་འདུ་བྱེད་བྱིན་གྱིས་བརླབས་ནས་ཞེས་བྱ་བ་ནི་སྔོན་གྱི་སྐྱེ་བར་བྱས་པའི་རྣམ་པར་སྨིན་པའི་འཚོ་བ་ལས་ཀྱི་རྣམ་པར་སྨིན་པའི་ལྷག་མ་བར་མ་དོར་འཆི་བའི་ཏིང་ངེ་འཛིན་གྱིས་དྲངས་ནས་ལྷག་མར་བྱས་པ་ཡིན་ནོ། །ཚེའི་འདུ་བྱེད་ནི་སྤངས་སོ་ཞེས་བྱ་བ་
དེས་དེ་སྐད་དུ་བསྟན་པ་ཡིན་ནོ། །མཉམ་དང་མི་མཉམ་ཞེས་བྱ་བ་ལ་སོགས་པ་ལ་སྲང་གིས་བཅལ་བས་ན་མཉམ་པ་སྟེ་འདྲ་བ་ཡིན་ལ། དེ་སྲིད་པ་ཞེས་བྱ་བ་དང་འདིར་སྦྱར་རོ། །དེ་ལ་མངོན་པར་དགའ་བར་བྱེད་པ་ནི་བྱ་བའི་ཚིག་ཡིན་ནོ། །དེ་ལས་བཟློག་པ་ནི་མི་མཉམ་པ་ཉིད་ཡིན་ལ། དང་ནི་
མཚུངས་པར་སྡུད་པའི་དོན་ཡིན་ནོ། །སྲིད་པ་དང་འདུ་བྱེད་ཅེས་བྱ་བ་འདིར་ངེས་པར་བྱའོ། །སྲིད་པ་བདག་ཉིད་ཀྱི་དངོས་པོ་སྟེ་དེ་ཡང་རྣམ་པ་གཉིས་ཡིན་ལ། མིང་དང་གཟུགས་ལ་སོགས་པའི་བདག་ཉིད་ཡིན་པའི་ཕྱིར་རོ། །དེ་ལ་གཟུགས་ཀྱི་ཚོགས་ནི་འདྲ་བ་ཡིན་ཏེ། སྔོན་དང་ཕྱི་མ་ལ་བྱེ་བྲག་མེད་
པའི་ཕྱིར་རོ། །མིང་གི་ཚོགས་ནི་མི་འདྲ་བ་ཡིན་ཏེ། དུས་ཕྱིས་རྫོགས་པའི་བྱང་ཆུབ་ཐོབ་པའི་ཕྱིར་རོ། །སྲིད་པའི་འདུ་བྱེད་ནི་ཚེའི་འདུ་བྱེད་ཡིན་ཏེ། དེ་ཡོད་ན་འདུ་བྱེད་ཀྱི་རྒྱུད་ཀྱི་འཇུག་པ་ཐ་དད་པའི་ཕྱིར་རོ། །ཐུབ་པ་སྟེ་བཅོམ་ལྡན་འདས་ཀྱིས་སྤངས་པ་ནི་གཞན་གྱི་དོན་མཛད་པ་མེད་པ་ཉིད་ཀྱི་ཕྱིར་རོ། །
ཐུབ་པས་གཡོའི་བྱེ་བྲག་གིས་སྐུ་ཚེ་སྤངས་པར་བྱིན་གྱིས་བརླབས་པའི་རྒྱུ་ནང་དུ་ཞེས་བྱ་བ་ལ་སོགས་པ་སྨོས་ཏེ། ནང་ལ་དགའ་བ་ནི་ནང་བརྟག་པ་ལ་ཕྱོགས་པ་ཉིད་ཀྱི་ཕྱིར་ཏེ། འདིས་ནི་ཡེ་ཤེས་ལ་དབང་བ་བསྟན་ཏོ། །མཉམ་པར་གཞག་པ་ནི་ཏིང་ངེ་འཛིན་ལ་དབང་བརྙེས་པ་ཡིན་ནོ། །ནིའི་སྒྲས་ནི་དབང་
དུ་གྱུར་པ་གཉིས་དང་འབྲེལ་པ་མངོན་པར་འདོད་པའི་འབྲས་བུ་སྒྲུབ་པར་བྱེད་པ་ཡིན་ནོ་ཞེས་བསྟན་པའི་དོན་ཏོ། །བཅོམ་པ་ནི་བཅོམ་པར་གྱུར་པ་སྟེ། སྔོན་གྱི་སྲིད་པའི་འདུ་བྱེད་སྤངས་པར་གྱུར་པ་དེ་བས་ན་འདྲ་བ་དང་མི་འདྲ་བའི་སྲིད་པ་བཅོམ་པ་ཡིན་ནོ། །མཛོད་དང་འདྲ་བའི་སྒོ་ང་ལས་བྱུང་བས་ན་
སྒོ་ང་ལས་བྱུང་བ་སྟེ་བྱ་ཡིན་ནོ། །མཛོད་ནི་སྒོ་ངའི་སྦུབས་ཡིན་ཏེ། དཔེར་ན་ཁྱིམ་བྱའི་ཕྲུ་གུ་ལུས་ཆེར་སྐྱེས་པ་དང་མཆུས་སྒོ་ངའི་སྦུབས་དྲལ་ནས་འབྱུང་བ་དེ་བཞིན་དུ་བཅོམ་ལྡན་འདས་ཀྱིས་ཟག་པ་དང་བཅས་པ་དང་ཟག་པ་མེད་པའི་བདག་ཉིད་ཀྱིས་དངོས་པོ་ཡེ་ཤེས་ཤིན་ཏུ་བརྟོལ་ནས་མྱ་ངན་ལས་འདས་

པ་ཡིན་ནོ། །རྒྱུ་ནི་ནང་གི་ཡན་ལག་གི་བྱེ་བྲག་རྒྱུ་ཡིན་ལ། རྐྱེན་ནི་ཕྱི་རོལ་གྱི་ཡན་ལག་ཡིན་ནོ། །རླུང་མི་བཟད་པ་ཞེས་བྱ་བ་ནི་རྣམ་པར་འཁྲུགས་པ་ཡིན་ནོ། །ཏིང་ངེ་འཛིན་གྲུབ་པ་ནི་རྫུ་འཕྲུལ་ཆེ་བ་ཡིན་ནོ། །ངོ་མཚར་ཉེ་བར་སྟོན་པའི་ནུས་པ་དང་ལྡན་པ་ནི་མཐུ་ཆེ་བ་ཡིན་ནོ། །ཆུང་བ་ཞེས་བྱ་བ་ནི་འབྱུང་བ་
ཡིན་ནོ། །ས་ལ་ཆུང་བར་དམིགས་པའི་འདུ་ཤེས་ནི་ས་ལ་ཆུང་བར་འདུ་ཤེས་པའོ། །བྱིན་གྱིས་བརླབས་པ་ནི་རྣམ་པར་གཞག་པའམ་བསྐྱེད་པ་ཡིན་ཏེ། ཏིང་ངེ་འཛིན་གྱི་མཐུས་ས་ཡང་ཚོལ་བ་ཉིད་དུ་གྱུར་པའོ། །ཆུ་ལ་ཚད་མེད་པར་དམིགས་པའི་འདུ་ཤེས་བྱིན་གྱིས་བརླབས་པ་དེའི་ཕྱིར་ས་གཡོས་པར་འགྱུར་
རོ། །ས་གཡོས་པ་འདི་ལ་ཡང་འགའ་ཞིག་ཏུ་འདོད་པའི་རྒྱུ་མཚན་སྟོན་པར་བྱེད་པ་ཡིན་