Luận tạng Tây Tạng (Tengyur) — Tập 158

གསལ་བ་ནི་ཅ་ཅོའི་སྒྲའོ། །ཁྲི་ལམ་ཞེས་བྱ་བ་ལ་སོགས་པ་ལ་ལམ་པོ་ཆེ་གང་ལ་ཤིང་རྟ་བསྐྱོད་པར་ནུས་པ་དེ་ནི་ཁྲི་ལམ་མོ། །ཤིང་རྟ་བསྣུར་དུ་རུང་བའི་ལམ་པོ་ཆེ་ནི་ཚོང་དུས་ཀྱི་སྲང་ངོ་། །བཞི་མདོ་ནི་ཁྲི་ལམ་གྱི་སྣའི་ལམ་ཁ་བྲག་
བཞི་པའོ། །སུམ་མདོ་ནི་ཁྲི་ལམ་གྱི་སྣའི་ལམ་ཁ་བྲག་གསུམ་པའོ། །དྲིལ་བསྒྲགས་ཏེ་ཞེས་བྱ་བ་རྒྱལ་པོའི་བཀས་དམ་བཅས་པ་དྲིལ་དཀྲོལ་ཞིང་སྒྲོགས་པར་བྱེད་པ་གང་ཡིན་པ་དེ་ནི་དྲིལ་བསྒྲགས་པའོ། །གྲོང་ན་གནས་པས་ན་གྲོང་མི་རྣམས་སོ། །དཔལ་ཡང་དག་པར་

སྐྱེས་ནས་ཞེས་བྱ་བ་ནི་དཔལ་ཆེ་བ་ཉིད་དམ་སྔ་ན་མེད་པའི་དཔལ་བྱུང་ནས་སོ། །ཆུང་མ་ཉིད་དུ་བྱས་ནས་བདག་ཉིད་ཀྱི་ཁྱིམ་དུ་ཕྱིན་པར་བྱེད་པ་ནི་ཁྲིད་པར་བྱེད་པའོ། །སྨད་པར་བྱ་བའི་བདག་པོ་ཡིན་པས་ན་ཁྱིམ་ཐབ་སྟེ་བྲན་མོའི་ཁྱིམ་ཐབ་བོ། །བུ་ཟ་བར་
བྱེད་པས་ན་བུ་ཟན་མོ་སྟེ་སྲིན་མོའོ། །ཁ་ཅིག་ནི་དེའི་བུ་མོ་མཁའ་འགྲོ་མ་ལ་བུ་ཟན་མོ་ཞེས་ཟེར་རོ། །དེ་བལྟ་བར་བགྱི་ཞེས་བྱ་བ་ནི་དེ་བལྟ་བའི་འདོད་པ་དང་བཅས་པའོ། །ཕན་ཚུན་མཐོང་བར་མོས་པ་ནི་ཕྲད་པའི་བརྩོན་པ་དང་ལྡན་པའོ། །དགའ་བ་ནི་སྲེད་པར་གྱུར་པའོ། །
དུབ་པར་གྱུར་པ་ལས་ངལ་བ་གང་ཡིན་པ་དེས་བསྐྱེད་པའི་ལེ་ལོ་ནི་ཀུན་ནས་བསྐྱེད་པའི་ལེ་ལོའོ། །ཉེས་དམིགས་ཞེས་བྱ་བ་ནི་ཉེས་པར་གྱུར་པའོ། །ཁྲོ་བ་ཞེས་བྱ་བ་ནི་འཁྲུགས་པའི་ངང་ཚུལ་ཅན་ཏེ་རྩྭའི་མེ་དང་འདྲ་བས་སྐད་ཅིག་གིས་འབར་བར་བྱེད་པའི་ཕྱིར་རོ། །ཁོན་དུ་འཛིན་
པ་ཞེས་བྱ་བ་ནི་མདུད་པར་འཛིན་པའོ། །སྙིང་རིངས་པ་ཞེས་བྱ་བ་ནི་ཡིད་བརྟན་པ་འཇོམས་པར་བྱེད་པ་ཉིད་ཀྱི་ཕྱིར་རོ། །ཕན་བཏགས་པ་བརྗེད་པའི་ཕྱིར་བྱས་པ་མི་གཟོ་བའོ། །དུག་རྣོ་བ་ཞེས་བྱ་བ་ནི་དུག་ཕྱིར་གསོ་བར་མི་ནུས་པ་ཉིད་ཀྱི་ཕྱིར་རོ། །བུད་མེད་ཀྱི་ཡུལ་གྱི་
འདོད་ཆགས་དྲགས་པ་ནི་དུག་རྣོ་བ་ཞེས་བྱའོ། །དགེ་བའི་རྩ་བ་བསགས་པ་ཞེས་བྱ་བ་ནི་ཐར་པའི་ཆ་དང་མཐུན་པ་བསྐྱེད་པའོ། །སློབ་པའི་སློབ་དཔོན་ནི་སློབ་དཔོན་དང་མཁན་པོ་ལ་བྱ་སྟེ། དེ་གཉིས་མེད་པར་རང་གི་བློ་དང་ནུས་པས་ཞེས་བྱ་བའི་བར་དུའོ། །བྱང་ཆུབ་ཀྱི་ཕྱོགས་
སུམ་ཅུ་རྩ་བདུན་ཞེས་བྱ་བ་ལ། ཟད་པ་དང་མི་སྐྱེ་བ་ཤེས་པ་ཞེས་པ་ནི་བྱང་ཆུབ་ཡིན་ལ་དེའི་ཕྱོགས་ནི་དེ་དག་གི་ཕྱོགས་སུ་གྱུར་པས་ན་ཕྱོགས་ཏེ་དེ་ཡང་སུམ་ཅུ་རྩ་བདུན་ནོ། །འདི་ལྟ་སྟེ་དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་
དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་ཞེས་བྱའོ། །དེ་མངོན་དུ་བྱས་པ་ནི་བསྐྱེད་པའོ། །མངོན་སུམ་དུ་བྱས་སོ་ཞེས་བྱ་བ་ནི་ཡེ་ཤེས་དང་ཐོབ་པ་མངོན་སུམ་དུ་བྱས་པའོ། །འབར་བ་ནི་ལུས་

ལས་མེ་སྦར་བའོ། །གསལ་བ་ནི་འོད་འཕྲོ་བའོ། །ཆར་འབབ་པ་ནི་ཆུ་འབབ་པའོ། །གློག་འགྱུ་བ་ནི་གློག་འཕྲོ་བ་སྟེ། རེ་རེས་ཀྱང་སོ་སོའི་སྐྱེ་བོའི་སེམས་འཕྲོག་པར་བྱེད་ཅིང་འདྲེན་པར་བྱེད་པའི་ཕྱིར་ཆོ་འཕྲུལ་ལོ། །ཉོན་མོངས་པའི་འཆིང་བས་བཅིངས་པ་དག་ནི་འཕགས་
པ་དག་ལས་ཐ་དད་པར་གྱུར་པའི་ཕྱིར་སོ་སོའི་སྐྱེ་བོ་དག་གོ། །བསོད་སྙོམས་ནི་ལུས་གནས་པ་སྒྲུབ་པར་བྱེད་པའོ། །རྗེའི་སྲས་ཞེས་བྱ་བ་ལ། ཁྱིམ་བདག་གི་ཕ་ལ་འདིར་རྗེ་བོ་ཡིན་པར་རིག་པར་བྱ་བ་ཡིན་ལ་དེའི་བུ་ནི་རྗེའི་སྲས་སོ། །ཡེ་ཤེས་དང་སྤངས་པ་ཕུན་སུམ་ཚོགས་པ་
དག་ནི་བདག་ཉིད་ཆེན་པོའོ། །བརྟུལ་ཞུགས་ཀྱི་འབྲས་བུ་ཐོབ་པའི་ཕྱིར་བརྟུལ་ཞུགས་གྲུབ་པའོ། །གསོ་བ་ནི་བསྐྱེད་པའོ། །གཟུགས་བཟང་བ་ནི་ཁ་དོག་གི་སྒོ་ནས་སོ། །བལྟ་ན་སྡུག་པ་ནི་དབྱིབས་ཀྱི་སྒོ་ནས་སོ། །མཛེས་པ་ནི་སེམས་དང་བ་བསྐྱེད་པའོ། །གཞི་
བརྟག་པ་ནི་ཞིང་དང་ཁྱིམ་དང་ས་གཞི་བརྟགས་པ་དག་ཡིན་ཏེ། ས་གཞི་བཀྲ་ཤིས་པར་སྤྲོ་བར་བྱ་བ་དང་། བཀྲ་ཤིས་བ་མ་ཡིན་པར་སྤྲོ་བར་བྱ་བ་དེ་བས་ན་བརྟག་པར་བྱ་བ་ཡིན་ནོ། །གོས་དག་ཡོན་ཏན་དང་ལྡན་པ་དང་། ཡོན་ཏན་མེད་པར་འགྱུར་བ་དེའི་ཕྱིར་བརྟག་པར་བྱ་བ་ཡིན་ནོ། །
ཤིང་ཡང་བྱ་བ་དུ་མ་ལ་མཁོ་བའི་ཕྱིར། ནང་དུ་མ་ཞི་བར་བྱེད་པ་དང་། གསེར་ལ་སོགས་པའི་རིགས་ཡོད་པས་ན་བརྟག་པར་བྱ་བ་ཡིན་ནོ། །གླང་པོ་དང་། རྟ་དང་། རིན་པོ་ཆེ་དང་། སྐྱེས་པ་དང་། བུད་མེད་བརྟག་པར་བྱ་བ་ཡིན་ཏེ། དགོས་པ་ནི་རབ་ཏུ་གྲགས་
པ་ཡིན་ནོ། །འབྱེད་པ་ཞེས་བྱ་བ་ནི་མཚན་ཉིད་མཐོང་ནས་བསྟན་བཅོས་ཀྱི་སྒོར་སྦྱོར་བ་ཉིད་དུ་ནུས་པའི་ཕྱིར་འབྱེད་པའོ། །གཞན་དག་ཀྱང་མ་ལུས་པ་ཁོང་དུ་ཆུད་པས་ན་ཀློག་པའོ། །བརྟག་པ་དེ་དག་ཉིད་མངོན་པར་ཤེས་པས་ན་མཁས་པའོ། །ལས་སུ་བྱ་བ་ཐམས་ཅད་ལ་སྒྲིན་
པས་ན་སྤྱོད་པ་གསལ་བའོ། །རྒྱུད་ཐམས་ཅད་ཀྱི་རྒྱུད་ལ་མཁས་པ་ཞེས་བྱ་བ་ནི་བཟོ་ལ་སོགས་པ་ཤེས་པའི་ཡུལ་ཐམས་ཅད་ལ་མཁས་པའོ། །རྒྱལ་པོ་ཞེས་བྱ་བ་ནི་རྒྱལ་རིགས་སྤྱི་བོར་དབང་བསྐུར་ཞིང་རྒྱལ་ཕྲན་རྣམས་ཀྱིས་སྤྱི་བོས་ཕྱག་བྱས་པར་གྱུར་པ་སྟེ། འདིས་

ནི་གོ་རིམས་བཞིན་དུ་ཐོབ་པ་ཉིད་བསྟན་པ་ཡིན་ནོ། །ལྗོངས་ཀྱི་དབང་ཕྱུག་ནི་གཙོ་བོ་ཉིད་ཡིན་ལ་དེའི་མཐུ་ནི་ནུས་པའོ། །བརྩོན་འགྲུས་ནི་སྤྲོ་བ་ཕུན་སུམ་ཚོགས་པའོ། །ཡན་ལག་ཐམས་ཅད་ལས་ཀྱང་ལྗོངས་ཀྱི་ཡན་ལག་ཤེས་རབ་ཀྱི་ནུས་པ་དང་། སྤྲོ་བས་
སྲུང་བ་དང་། སྤེལ་བ་དང་། བསྐྱང་བ་ནི་གཙོ་བོའི་ནུས་པ་ཡིན་ཏེ། གང་གི་ཕྱིར་ལྗོངས་ཀྱི་རང་བཞིན་ཡང་དག་པར་བསྐྱངས་པར་གྱུར་པ་ན། བདག་པོ་བློན་པོ་དང་། ཆད་པ་དང་། བང་མཛོད་དང་། མཁར་དང་། གྲོགས་བཤེས་ཀྱི་རང་བཞིན་དུ་འགྱུར་བ་དེའི་ཕྱིར་ལྗོངས་ཀྱི་རང་
བཞིན་གྱི་དབང་ཕྱུག་ཁོ་ན་ཤེས་རབ་ཀྱི་བདག་ཉིད་དང་ནུས་པ་དང་། བརྩོན་པས་ལྷག་པར་སྤྱོད་པར་བྱའོ། །ས་ཆེན་པོའི་དཀྱིལ་འཁོར་ཞེས་བྱ་བ་ནི་གློག་པ་དང་ལྗོངས་ཀྱི་དབང་ཕྱུག་ལ་གནས་པའི་གཙོ་བོ་ཉིད་དང་མཁས་པ་ཉིད་དུ་བསྟན་པ་ཡིན་ཏེ། དོན་དེ་ཉིད་འདིར་ཡང་ཤེས་པར་བྱ་སྟེ།
དེ་ནི་འདི་སྐད་དུ་ལྗོངས་ཀྱི་དབང་ཕྱུག་མིའི་བདག་པོ་དང་། རྒྱལ་ཕྲན་ལ་སོགས་པ་གང་ཡིན་པ་དེ་དག་གི་ས་ཆེན་པོའི་དཀྱིལ་འཁོར་ཉིད་གཙོ་བོ་ཁོ་ན་ཡིན་ཏེ། རྒྱལ་པོའི་རྒྱལ་པོ་ཞེས་བྱ་བའི་ཐ་ཚིག་གོ། །མངོན་པར་རྒྱལ་བར་བྱས་པ་ནི་རྒྱལ་བར་གྱུར་པའོ། །གནས་པ་རྣམས་ཀྱི་
ཞེས་བྱ་བ་ནི་དབང་བྱེད་པ་དང་། སྲུང་བར་བྱེད་པ་དག་གི་ཞེས་བྱ་བར་དགོངས་སོ། །བཟོའི་གནས་ཞེས་བྱ་བ་ནི་སློབ་པ་པོ་ཁོང་དུ་ཆུད་པའི་གཞི་ནི་བཟོའི་གནས་སོ། །ལས་ཀྱི་གནས་ནི་སློབ་པ་དང་རྩོམ་པ་སྒྲུབ་པ་དག་ཡིན་ཏེ། གནད་ལ་སོགས་པ་ལ་ཕོག་པ་ནི་བསླབ་པའི་སྒོ་ནས་
བསྒྲུབ་པར་བྱ་བ་ཡིན་ལ། གླང་པོ་ཆེ་ལ་སོགས་པ་ལ་ཞོན་པའི་བསླབ་པ་དང་། བརྩལ་བའི་སྒོ་ནས་བསྒྲུབ་པར་བྱ་བ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པའི་ཐ་དད་པ་ཞེས་བྱ་བ་ནི་ཚུལ་སྣ་ཚོགས་པའོ། །གླང་པོ་ཆེ་དང་། རྟ་དང་། ཤིང་རྟ་ལ་ཞོན་པ་ཞེས་བྱ་བ་ནི་གནས་གཅིག་ཡིན་ནོ། །
རལ་གྲིའི་ཐབས་ནི་རལ་གྲི་ལ་སོགས་པའི་འཛིན་སྟངས་ཏེ། དེ་ལ་མཁས་པ་ཉིད་ནི་འཛིན་སྟངས་ཤེས་པའོ། །གཞུ་ལ་མཁས་པ་ཉིད་ནི་གཞུའི་རིག་པ་ཤེས་པ་སྟེ། འདིས་ནི་མདའ་དང་མཚོན་ཆ་ཤེས་པ་སྟེ། གནས་གཉིས་པ་བསྟན་པ་ཡིན་ནོ། །ཕྱིར་བསྣུར་བ་ནི་གཡུལ་ལས་

ཕྱིར་ལོག་པའོ། །མདུན་དུ་བསྣུར་བ་ནི་རབ་ཏུ་འཇུག་པ་སྟེ། འདི་ལ་མཁས་པ་ཉིད་ནི་གནས་གསུམ་ཡིན་ནོ། །ལྕགས་ཀྱུ་དང་ཞགས་པ་དང་། མདའ་བོ་ཆེ་འཛིན་པ་ལ་མཁས་པ་ཉིད་ནི། མདའ་དང་མཚོན་ཆ་ཤེས་པ་ཁོ་ནའི་ནང་དུ་འདུའོ། །གཅད་པ་ནི་གོ་ཆའི་མདུད་པ་ལ་
སོགས་པའོ། །དྲལ་བ་ནི་ཡ་ལད་ལ་སོགས་པའོ། །དབུག་པ་ནི་གནད་ལ་སོགས་པའོ། །དེ་དག་ལ་མཁས་པ་ཡང་མདའ་དང་མཚོན་ཆ་ཤེས་པའི་ནང་དུ་འདུའོ། །གོམ་སྟངས་ཀྱི་གཡུལ་ཤེས་པ་ནི་བཞི་པའོ། །དེ་ཉིད་ཀྱང་འཛིན་སྟངས་དང་། གོམ་སྟངས་དང་། ཐོར་
ཚུགས་ཀྱི་འཛིན་སྟངས་ལ་མཁས་པ་ཡིན་ཏེ། ཕ་རོལ་པོའི་རལ་གྲིའམ་ཤང་ལང་གིས་རབ་ཏུ་བསྣུན་པར་འདོད་པའི་ཁུ་ཚུར་ཇི་ལྟར་གཞན་གྱི་བརྡེག་སྤྱད་པར་འགྱུར་བ་དེ་ལྟར་འཛིན་པ་ཡིན་ལ་དབུག་པའི་གཡུལ་ལ་གོམ་སྟངས་ཉེ་བར་མཁོ་བ་ཡིན་ནོ། །ཐོར་ཚུགས་ཀྱི་འཛིན་སྟངས་ནི་སྐྲའི་
འཛིན་ཐབས་ཡིན་ཏེ། གཡུལ་མང་པོ་ཁོ་ན་ཡོད་དོ། །སྒྲའི་རྗེས་སུ་འབྲངས་ནས་རྡེག་པར་བྱེད་པ་ནི་སྒྲ་གྲག་པར་ཕོག་པའོ། །གནད་ལ་རྡེག་པར་བྱེད་པ་ནི་གནད་དུ་ཕོག་པའོ། །འཁྲུལ་པ་མེད་པར་བསྣུན་པ་ནི་མི་འཆོར་བར་ཕོག་པའོ། །གཏིང་དུ་བསྣུན་པ་ནི་ཚབས་ཆེ་བའོ། །
གཅད་པ་ལ་སོགས་པས་མཚོན་ཆ་ལྟུང་བར་བྱེད་པ་ཤེས་པ་ནི་གནས་ལྔ་ཡིན་ནོ། །གཞན་དག་ནི་གཅད་པ་ལ་སོགས་པ་གནས་གསུམ་དག་ཡིན་ལ། འཛིན་སྟངས་ལ་སོགས་པ་གནས་བཞི་པ་ཡིན་ཞིང་། དགྲ་ལ་ཕོག་པ་ལ་སོགས་པ་གནས་ལྔ་པ་ཡིན་པར་བརྗོད་དོ། །
བྲམ་ཟེའི་སྤྱོད་པ་ཞེས་བྱ་བ་ནི་བྲམ་ཟེ་ལ་རིགས་པའི་སྤྱོད་ལམ་དང་ཆ་ལུགས་ལ་བྱའོ། །ཆོ་ག་ཞེས་བྱ་བ་ནི་བྲམ་ཟེ་ལ་རིགས་པའི་སྤྱོད་པ་དང་ཚུལ་སྤྱོད་ཉིད་ཡིན་ཏེ། རྟག་པ་དང་། འདོད་པ་ཉིད་དང་། རྒྱུ་མཚན་གྱི་ལས་དག་ལ་ནན་ཏན་དུ་བྱེད་པ་ལ་བྱ་བར་མན་ངག་བརྒྱུད་པ་
ལས་བྱུང་བ་ཡིན་ནོ། །གཙང་སྦྲ་ཞེས་བྱ་བ་ནི་གནས་སྐབས་དང་ཚུལ་མཐུན་པའི་ཡན་ལག་གི་གཙང་སྦྲ་ལ་བྱའོ། །མཚུངས་པར་སྤྱོད་པ་ཞེས་བྱ་བ་ནི་བྲམ་ཟེ་ལ་རིགས་པ་སྔོན་དུ་ལྡང་བ་དང་། གསོང་པོར་སྨྲ་བ་ལ་སོགས་པ་ཕན་ཚུན་ཀུན་དུ་ཐ་སྙད་དུ་བྱེད་པ་ཁོ་ན་ལ་བྱའོ། །

རིལ་བའི་སྒྲས་ནི་བྲམ་ཟེ་དག་གིས་གཙང་སྦྲ་བྱེད་པའི་སྣོད་ཡིན་ཏེ། སྤྱི་བླུགས་ཞེས་ཀྱང་བརྗོད་པ་གང་ཡིན་པ་དེ་གནས་སྐབས་དང་རྗེས་སུ་མཐུན་པར་འཛིན་པ་བསླབ་པར་བྱ་བ་ཡིན་ནོ། །ཐལ་བ་ལེན་པ་ཞེས་བྱ་བ་ནི་ཐལ་བའི་བྱ་བ་གང་ཡིན་པ་དེའི་དོན་དུ་ལེན་པར་བྱེད་པ་
ནི་བྲམ་ཟེ་ལ་རིགས་པ་ཉིད་ཡིན་ནོ། །སས་ཀྱང་གང་གི་ཕྱིར་ཇི་སྲིད་དུ་ཇི་ལྟར་གཙང་སྦྲའི་དོན་དུ་ལེན་པར་བྱེད་པ་ཡིན་པ་དེ་བས་ན་བསྟན་པ་ཡིན་ནོ། །ཡི་གེ་ཨོཾ་དེ་ནི་བྲམ་ཟེས་བསྒོམ་པར་བྱ་བ་དེ་བས་ན་དེ་སྒོམ་པ་དང་རྗེས་སུ་མཐུན་པས་ན་གཟུང་བར་བྱ་བ་དང་། ཡི་གེ་བྷོ་ཞེས་བྱ་བ་ནི་
རྣལ་འབྱོར་གྱི་དུས་སུ་ལེགས་པར་སྦྱར་བས་འབོད་པ་ཡིན་པས་ན་བྲམ་ཟེས་ཇི་ལྟ་བ་བཞིན་དུ་རབ་ཏུ་སྦྱར་བར་བྱ་བ་ཡིན་ནོ། །ངེས་བརྗོད་ཀྱི་རིག་བྱེད་ནི་ངེས་བརྗོད་ཤེས་པའི་ངག་གི་ཚིག་གི་ཚད་ངེས་པ་དག་གོ། །མཆོད་སྦྱིན་གྱི་རིག་བྱེད་ནི་ཚིག་གི་ཚད་མ་ངེས་པའོ། །སྙན་ཚིག་གི་རིག་བྱེད་
ནི་བརྒྱ་བྱིན་དང་ཚངས་པ་ལ་སོགས་པའི་བསྟོད་པའི་ངག་གོ། །སྲིད་སྲུང་གི་རིག་བྱེད་ནི་སྐྱེ་དགུ་བསྲུང་བའི་ཐབས་སུ་གྱུར་པའི་ཆེད་དུ་བསྟན་པ་སྟེ། བྲམ་ཟེའི་རིག་བྱེད་བཞིའི་སྒྲའི་དོན་ཡོངས་སུ་ཤེས་པར་བྱ་བ་ཡིན་པ་དང་། ལས་དང་ཤེས་པ་ལ་ངེས་པར་སྦྱར་བར་བྱ་བ་ཡིན་
པར་ཤེས་པར་བྱའོ་ཞེས་བསྟན་པ་ཡིན་ནོ། །དྲང་སྲོང་གར་ག་དང་། མ་ཐ་རའི་གཞུང་ཞེས་བྱ་བ་ནི་སྐར་མའི་བསྟན་བཅོས་ཡིན་ལ། ས་གཡོ་བ་དང་འབྲས་བུའི་རྣམ་པར་བཤད་པ་ནི་སྐར་མའི་གཞུང་ཉིད་ཡིན་ཏེ། དེ་དག་ལ་མཁས་པའོ། །ནང་ཞེས་བྱ་བ་ནི་བྲམ་ཟེ་དག་གིས་
བསྒྲག་པར་བྱ་བ་མ་ཡིན་པའི་གཞུང་ཡིན། ངེས་བརྗོད་ཀྱང་གཞུང་དེ་དག་ཉིད་ཀྱི་བྱེ་བྲག་ཡིན་ཏེ། དེ་ལ་ཡང་མཁས་པའོ། །མཆོད་སྦྱིན་བྱེད་པ་ནི་བདག་ཉིད་མཆོད་སྦྱིན་བྱེད་པའོ། །མཆོད་སྦྱིན་བྱེད་དུ་འཇུག་པ་ནི་ངེས་བརྗོད་མཁན་དུ་གྱུར་པའི་སྒོ་ནས་གཞན་བྱེད་དུ་འཇུག་པའོ། །
འདོན་པ་ནི་བདག་ཉིད་ཀློག་པའོ། །འདོན་དུ་བཅུག་པ་ནི་གཞན་འདོན་དུ་བཅུག་པའོ། །སྦྱིན་པ་ནི་བྲམ་ཟེས་བྲམ་ཟེ་རྣམས་ལའོ། །ལེན་པ་ནི་བྲམ་ཟེས་རིགས་གསུམ་པོ་དག་ལ་སྟེ། དྲུག་པོ་དེ་དག་ནི་བྲམ་ཟེའི་ལས་ཡིན་ནོ། །བརྩོན་པ་ནི་མངོན་པར་སྦྱོར་བའོ། །ཁྲོ་བ་ཆེར་སྐྱེས་ནས་

ཞེས་བྱ་བ་ལ་བརྣག་མི་བཟོད་པའི་རང་བཞིན་ནི་འདིར་ཁྲོ་བ་ཡིན་པར་རིག་པར་བྱའོ། །སྐྱེས་བུ་གླ་བ་ཞེས་བྱ་བ་ལ་གླས་པས་བྱེད་པ་གང་ཡིན་པ་དེ་ནི་གླ་བའོ། །ནམ་ངའི་ཡབ་ལྷ་ཉིད་དུ་བཞུད་པར་གྱུར་པ་ན་ཞེས་བྱ་བ་ནི་རིས་མཐུན་པ་སྤངས་ནས་མཐོ་རིས་ཐོབ་པར་གྱུར་པ་ནའོ། །ཕ་རོལ་
གནོད་པའི་སྦྱོར་བས་ཞེས་བྱ་བ་ནི་གསོད་པར་བྱེད་པའི་སྦྱོར་བས་སོ། །དགོན་པའི་ནགས་ཀྱི་གནས་ཞེས་བྱ་བ་ལ་སོགས་པ་ལ། གྲོང་ལས་རྒྱང་གྲགས་ཀྱི་མཐའ་ཕན་ཆད་ནི་དགོན་པ་ཡིན་ལ། ནགས་ཀྱི་གནས་ནི་ནགས་ཀྱི་ཕྱོགས་གཅིག་ཡིན་ནོ། །ཁྱད་པར་དུ་
མཐར་གྱུར་པ་ནི་བས་མཐའོ། །རྣལ་འབྱོར་བ་འདི་ལ་ཉལ་བའི་ཕྱིར་མལ་ཡིན་ལ། འདི་ལ་འདུག་པའི་ཕྱིར་སྟན་ཡིན་ནོ། །གཙང་བ་ཞེས་བྱ་བ་ནི་རྣམ་པར་དབེན་པའམ། དག་པར་རམ་དགའ་བར་བྱེད་པའོ། །སྡིག་པའི་སྐྱེ་བོ་སྟེ་རྒལ་དཀའ་བའམ། སྨད་
པའི་ལས་ནི་སྡིག་པའི་སྐྱེ་བོ་ཡིན་ལ། བྲལ་བ་ནི་མེད་པར་གྱུར་པ་སྟེ། སྡིག་པའི་སྐྱེ་བོ་གང་ལ་ཡོད་པ་མ་ཡིན་པ་དེ་ནི་སྡིག་པའི་སྐྱེ་བོ་དང་བྲལ་བའོ། །སེམས་ཅན་རྒྱུ་བ་མེད་པ་ནི་དབེན་པ་ཡིན་ལ། མི་རྣམས་ཀྱིས་དབེན་པ་ནི་མིས་དབེན་པར་གྱུར་པ་སྟེ། དེའི་ཕྱིར་བསྟེན་
པར་བྱ་བའམ། ངེས་པར་སྦྱར་བར་བྱ་བའམ། གནས་པར་བྱ་བའོ། །ནང་དུ་ཡང་དག་འཇོག་ནི་རྣམ་པར་དབེན་པའི་ས་ཕྱོགས་སུ་གནས་པའི་སེམས་རྩེ་གཅིག་པ་ཉིད་དོ། །ནང་དུ་ཡང་དག་འཇོག་དང་རྗེས་སུ་མཐུན་པ་ནི་ནང་དུ་ཡང་དག་འཇོག་དང་ཚུལ་མཐུན་པ་ཅན་ནོ། །
གནས་མལ་ཞེས་བྱ་བ་ནི་ཐམས་ཅད་དུ་སྦྱར་བར་བྱ་བ་ཡིན་ནོ། །གུས་པ་སྔོན་དུ་སོང་བ་ཅན་གྱི་ལུས་དང་ངག་གིས་འཇུག་པ་ནི་བསྙེན་བཀུར་རོ། །ཅོད་པན་ནི་རྒྱལ་པོའི་རྟགས་ཡིན་ལ། གཙུག་ཏོར་ནི་སྐྲ་བཅིངས་པ་སྟེ། སྤྱི་བོའི་སྟེང་དུ་གཙུག་ཏོར་གྱི་རྣམ་པ་ལྟ་བུར་
བྱས་པའི་ཅོད་པན་ནམ། གཙུག་ཏོར་དེ་བླ་མ་ལ་ཉེ་བར་གཞོལ་བའི་དུས་སུ་དགྲོལ་བར་བྱ་བ་ཉིད་དོ། །གདུགས་ནི་རྒྱལ་པོ་ལ་འོས་པའོ། །རིན་པོ་ཆེས་སྤྲས་པ་གཡག་རྔ་ལས་བྱས་པའི་རྔ་ཡབ་ནི་ནོར་བུའི་རྔ་ཡབ་བོ། །ལྷམ་རི་མོ་ཅན་ཞེས་བྱ་བ་ནི་རིན་པོ་ཆེས་སྤྲས་པ་ཉིད་ཀྱིས་

རི་མོ་ཅན་ཡིན་གྱི་ཚོན་གྱིས་ནི་མ་ཡིན་ནོ། །གདོང་རྒྱབ་ཕྱོགས་སུ་བལྟས་པ་ནི་གཅིག་པུས་འཇུག་པར་འདོད་པ་སྟོན་པའོ། །གསང་བའི་ལས་ནི་གཅིག་པུས་བསྒྲུབ་པར་བྱ་བའོ། །སྒོ་དོག་པ་ནི་སྒོའུ་ཆུང་ངོ་། །དལ་གྱིས་ཞེས་བྱ་བ་ནི་ཤིན་ཏུ་དྲག་པར་
མ་ཡིན་པའོ། །ཅུང་ཟད་ཅུང་ཟད་ཅེས་བྱ་བ་ནི་ཡང་དང་ཡང་དུ་མ་ཡིན་པའོ། །བཅོམ་ལྡན་འདས་ནི་བདག་གིས་ཡུན་རིང་པོ་ཞིག་ནས་མཐོང་ངོ་། །བདེ་བར་གཤེགས་པ་ནི་བདག་གིས་ཡུན་རིང་མོ་ཞིག་ནས་མཐོང་ངོ་ཞེས་བྱ་བ་ནི་གུས་པའི་ཕྱིར་ལན་གཉིས་བརྗོད་པ་ཡིན་ནོ། །རྒྱགས་
པ་དང་། ང་རྒྱལ་ཤིན་ཏུ་བཅོམ་པ་ནི་འདིར་དམན་པ་ཡིན་པར་རིག་པར་བྱའོ། །ཆོས་ཀྱི་རྗེས་སུ་འགྲོ་བ་ཅན་ནི་ཆོས་ཀྱི་རྒྱུ་ཅན་ནོ། །དེ་བཞིན་གཤེགས་པ་ཞེས་བྱ་བ་ནི་དེ་ཁོ་ན་བཞིན་མ་ཡིན་པ་མི་གསུང་བ་སྟེ། དངོས་པོ་ཇི་ལྟ་བ་དེ་བཞིན་དུ་གསུངས་པ་ཉིད་ཀྱི་ཕྱིར་དང་།
ཐུགས་སུ་ཆུད་པ་ཉིད་ཀྱི་ཕྱིར་རོ། །ལྷ་དང་བཅས་པའི་འཇིག་རྟེན་གྱིས་མཆོད་པར་འོས་པ་དང་ཉོན་མོངས་པ་སྤངས་པ་ཉིད་ཀྱི་ཕྱིར་དགྲ་བཅོམ་པའོ། །ཡང་དག་པར་འགྲོ་བ་མ་ལུས་པ་ཐུགས་སུ་ཆུད་པའི་ཕྱིར། ཡང་དག་པར་རྫོགས་པའི་སངས་རྒྱས་སོ། །ཁྱོད་ཀྱི་ཆོས་
འདུལ་བ་ལེགས་པར་གསུངས་པ་ཞེས་བྱ་བ་ནི་འབྲས་བུ་དང་བཅས་པ་སྟོན་པའི་ཆོས་ནི་འདིར་ཆོས་འདུལ་བ་ཡིན་པར་འདོད་ལ། དེ་ཁྱོད་ཀྱིས་ལེགས་པར་གསུངས་པ་ནི་ཇི་ལྟ་བ་བཞིན་དུ་ཕྱིན་ཅི་མ་ལོག་པར་བསྟན་པ་སྟེ། གང་ཡང་བཅོམ་ལྡན་འདས་ཀྱིས་རྒྱུན་དུ་ཞུགས་པའི་
འབྲས་བུ་ལ་སོགས་པ་བསྒྲུབ་པའི་ཕྱིར་བྱ་བར་གསུངས་པའི་བྱ་བ་དེ་ཇི་ལྟ་བ་བཞིན་དུ་ཁོང་དུ་ཆུད་པར་གྱུར་པ་ན་འབྲས་བུའི་ངེས་པ་ལ་འཁྲུལ་པ་མེད་པའི་ཕྱིར་ལེགས་པར་གསུངས་པའི་ཆོས་ཞེས་བྱ་བའམ། ཡང་ན་ཆོས་ནི་ལམ་ཡན་ལག་ལྔ་པ་དག་སྟེ། ཡང་དག་པའི་ལྟ་བ་
དང་། ཡང་དག་པའི་རྟོག་པ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཞེས་བྱ་བའོ། །འདུལ་བ་ནི་ལམ་གྱི་ཡན་ལག་གསུམ་སྟེ། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་

འཚོ་བ་ཞེས་བྱ་བའོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་དག་ནི་ལེགས་པར་ཞུགས་པ་ཞེས་བྱ་བ་ལ་སྡུག་བསྔལ་ལ་ཆོས་ཤེས་པ་དང་། སྡུག་བསྔལ་མྱུར་དུ་ཤེས་པ་དང་། བདེ་བ་ལ་ཆོས་ཤེས་པ་དང་། བདེ་བ་མྱུར་དུ་ཤེས་པའོ། །ཞུགས་པ་ནི་ལམ་ཡིན་ཏེ། བཅོམ་
ལྡན་འདས་ཀྱིས་རབ་ཏུ་ཕྱུང་བའི་སློབ་མ་དགེ་འདུན་དག་ནི་ལམ་ལ་ཡང་དག་པར་སྟེན་པར་བྱེད་པ་ཞེས་བྱ་བའི་དོན་ཏོ། །ཁ་ཅིག་ཅེས་བྱ་བ་ནི་འགའ་ཞིག་གོ། །དཀའ་ཐུབ་པའི་མཁས་པ་ནི་དགེ་སྦྱོང་ངོ་། །ཁྱིམ་ན་གནས་པའི་མཁས་པ་ནི་བྲམ་ཟེའོ། །མཁས་པ་ཞེས་བྱ་བ་ནི་བྱང་
བའི་ཕྱིར་མཁས་པའོ། །ཅི་དེ་ཡང་དག་པར་གྱུར་པའི་མཁས་པ་ཡིན་ནམ་ཞེ་ན། སྨྲས་པ། མཁས་པར་སྙེམས་པ་ནི་བདག་ཉིད་མཁས་པར་སེམས་ཤིང་ཤེས་པའི་ཕྱིར་མཁས་པར་སྙེམས་པ་ཡིན་གྱི་དོན་དམ་པར་ནི་མཁས་པ་མ་ཡིན་ནོ། །རབ་ཏུ་བྱ་བ་བྱས་པས་ཞེས་བྱ་བ་ནི་
ཁྱད་པར་དུ་བྱས་པ་ནི་རབ་ཏུ་བྱ་བ་སྟེ། བྱ་བ་ཡང་བསྟན་བཅོས་ཉན་པ་དང་། སེམས་པ་དང་། གོམས་པར་བྱེད་པའོ། །རབ་ཏུ་བྱ་བ་གང་གིས་གོམས་པར་བྱས་པ་དེ་ནི་རབ་ཏུ་བྱ་བ་བྱས་པའོ། །གང་དུ་ཞེ་ན། སྨྲས་པ་དང་བཤད་པ་དང་གཞན་རབ་ཏུ་སྨྲ་བ་དག་ཏུ་སྟེ། རང་གི་
གྲུབ་པའི་མཐའ་རྣམ་པར་འཆད་པར་བྱེད་པ་ནི་བཤད་པ་ཡིན་ལ། གཞན་རབ་ཏུ་སྨྲ་བ་ནི་གཞན་གྱི་གྲུབ་པའི་མཐའ་སྨྲ་བའི་བསྟན་བཅོས་ཏེ། བཤད་པ་དང་གཞན་རབ་ཏུ་སྨྲ་བ་ནི་བཤད་པ་དང་གཞན་རབ་ཏུ་སྨྲ་བ་སྟེ། དེ་དག་ལ་མཁས་པར་གྱུར་ཅེས་བྱ་བའི་བར་དུའོ། །བྱིས་
པས་གསལ་བར་ཕོག་པའི་ཚུལ་དུ་སྐྱེ་བོ་མང་པོས་བཀུར་བ་ཅན་ཞེས་བྱ་བ་ལ། ཕོག་པ་ནི་བཅད་པའོ། །གསལ་པོ་རྣམ་པར་གསལ་བར་ཕོག་པ་སྟེ་གསལ་པོར་ཕོག་པའོ། །བྱིས་པའི་གསལ་བར་ཕོག་པ་ནི་བྱིས་པས་གསལ་བར་ཕོག་པ་སྟེ། བྱིས་པས་གསལ་བར་
ཕོག་པའི་ཚུལ་དུ་བློས་དོན་ཕྲ་བར་ཡོངས་སུ་གཅོད་པར་བྱེད་པ་སྐྱེ་བོ་མང་པོས་བཀུར་བ་སྟེ། འདོད་ཅིང་མངོན་པར་འདོད་པར་བྱ་བ་གང་ཡིན་པ་དེ་ལ་དེ་སྐད་ཅེས་བྱའོ། །ཡང་ན་བྱིས་པ་ཞེས་བྱ་བ་ནི་སྤུའི་མིང་གི་བྱེ་བྲག་ཡིན་ལ། དེ་གསལ་བ་ནི་སྦྲངས་པ་ཡིན་ཏེ། དེ་ལ་ཕོག་

པ་ནི་རིང་པོར་བཀས་པ་ཡིན་ནོ། །དེ་ཉིད་ཚུལ་དེ་དཔེར་བྱེད་པ་ཡིན་པ་དེའི་ཕྱིར་སྐྱེ་བོ་མང་པོས་བཀུར་བ་སྟེ་བསྔགས་པའོ། །བདག་ཉིད་ཀྱི་ཤེས་རབ་ཀྱི་སྤོབས་པས་ཞེས་བྱ་བ་ལ། ཤེས་རབ་ནི་ཆོས་རབ་ཏུ་དཔྱོད་པ་ཡིན། དངོས་པོའི་དེ་ཁོ་ན་ཉིད་རྣམ་
པར་འབྱེད་པ་ཞེས་བྱ་བའི་བར་དུའོ། །གཞན་གྱི་ལྟ་བར་གྱུར་པ་ཞེས་བྱ་བ་ནི་ལྟ་བའི་རྣམ་པའོ། །རྣམ་པར་བཅོམ་པ་ནི་རྣམ་པར་བཤིག་པར་གྱུར་པའོ། །སྤྱོད་པ་ཞེས་བྱ་བ་ནི་གནས་པར་གྱུར་པའོ། །འདྲི་བ་མངོན་དུ་བྱེད་པ་ཞེས་བྱ་བ་ནི་ཡང་དག་པར་སྦྱོར་བར་བྱེད་པའོ། །རྩོད་
པའི་གཞུང་གཟུགས་པར་བྱའོ་ཞེས་བྱ་བ་ནི་རྩོད་པའི་སྒོ་ནས་འབོད་པའོ། །མི་རིགས་པ་ནི་རྗེས་སུ་དཔག་པ་དང་འགལ་བའོ། །མི་འདྲ་བ་ནི་སྔ་ཕྱི་འགལ་བའོ། །མི་འཐད་པ་ཞེས་བྱ་བ་ནི་མངོན་སུམ་དང་། རང་གི་ཚིག་དང་། གྲགས་པ་དང་འགལ་བའོ། །ཐོག་མར་མངོན་དུ་
གྱུར་པ་ནི་གཟིགས་པའོ། །རྒྱུན་གྱི་རྟོག་པ་ནི་རྣམ་པར་གཟིགས་པའོ། །ཡིད་དགའ་བ་ནི་སེམས་ཡོངས་སུ་ཚིམ་པའོ། །མངོན་པར་རངས་པ་ནི་མགུ་བར་གྱུར་པའོ། །སྐྱབས་སུ་སོང་བ་ནི་སངས་རྒྱས་བཅོམ་ལྡན་འདས་ལ་སྐྱོབ་པ་ཉིད་དུ་འཛིན་པ་སྟེ། དེ་བཞིན་དུ་ཆོས་དང་
དགེ་འདུན་ལའོ། །བསླབ་པའི་གཞི་ནི་སྲོག་གཅོད་པ་ལ་སོགས་པ་ལས་ལྡོག་པའོ། །ཟད་པ་དང་མི་སྐྱེ་བ་ཤེས་པ་ནི་དགྲ་བཅོམ་པའོ་ཉོན་མོངས་པའི་སྒྲིབ་པ་དང་བྲལ་བར་གྱུར་པས་ན་རྣམ་པར་གྲོལ་བའོ། །དགའ་བ་ནི་ཡིད་བདེ་བའོ། །བདེ་བ་ནི་རྣམ་པར་ཤེས་པའི་ཚོགས་
ལྔའོ། །རྣམ་པར་གྲོལ་བའི་དགའ་བ་དང་བདེ་བ་སོ་སོར་མྱོང་ཞིང་ཉམས་སུ་མྱོང་བ་ལ་དེ་སྐད་ཅེས་བྱའོ། །ཅུང་ཟད་ནི་ཅུང་ཟད་དོ། །ཉམས་པ་ནི་གཞན་གྱི་དོན་བསྒྲུབ་པར་མི་ནུས་པའི་ཕྱིར་རོ། །རབ་ཏུ་ཉམས་པ་ནི་རང་གི་དོན་བསྒྲུབ་པར་མི་ནུས་པའི་ཕྱིར་རོ། །སྐྱ་བོ་བསེང་
བསེང་པོ་ཞེས་བྱ་བ་ནི་ནད་ལས་གྱུར་པའི་སྐམས་པ་ཞེས་བྱ་བ་ནི་ཤ་ཡོངས་སུ་ཟད་པའོ། །རྗུད་པ་ཞེས་བྱ་བ་ནི་བྱ་བ་བྱེད་པའི་ནུས་པ་མེད་པའོ། །མདངས་མེད་པ་ནི་ལུས་མདངས་གྱ་ནོམ་པ་མ་ཡིན་པའོ། །དབང་པོ་ཉམས་པ་ནི་དབང་པོ་ཞོམ་པའོ། །སྐྱེ་བོ་མང་པོས་ཞེས་

བྱ་བ་ལ་སོགས་པ་ལ། གཟུགས་ཡིད་དུ་མི་འོང་བ་ཉིད་ཡོད་པའི་ཕྱིར་སྐྱེ་བོ་མང་པོའི་མིག་གིས་ཆགས་པའི་གནས་མ་ཡིན་ནོ་ཞེས་བྱ་བའི་ཐ་ཚིག་གོ། །མངོན་པར་མི་དགའ་བ་ཞེས་བྱ་བ་ནི་ཁྱིམ་གྱི་གནས་ལ་འདོད་པ་དང་བཅས་པའོ། །སྨད་པར་བྱ་བ་ཡིན་པས་ན་
སྡིག་པ་ཡིན་ལ། འགྲོ་བ་འདོད་པར་བྱ་བ་མ་ཡིན་པར་འདོད་པས་མི་དགེ་བའོ། །འདོད་ཆགས་ཀྱིས་གཟིར་བ་ཞེས་བྱ་བ་ནི་གཟིར་བ་ལ་འཆི་བར་བྱེད་པ་ཡིན་ལ། འཆི་བར་བྱེད་པ་འམ་གཟིར་བ་ནི་འདོད་ཆགས་ཡིན་པ་དེའི་ཕྱིར་འདོད་ཆགས་ཀྱི་འཆིང་བས་བཅིངས་
པས་འདོད་ཆགས་དང་འཆིང་བས་བདག་གཟིར་བར་གྱུར་པ་དེ་བས་ན་ཁོ་བོའི་གནས་སྐབས་འདི་འདྲ་བ་འམ། གཞུང་གཞན་ལས་ནི་འདོད་ཆགས་ཀྱི་འཆིང་བ་ཞེས་འབྱུང་བ་སྟེ། འདིར་དོན་དེ་ནི་ཡུལ་གྱིས་དབང་པོ་ཀུན་ནས་བསྐྱོད་པའི་མཚན་ཉིད་འཆི་བ་ཡིན་ལ། དེ་ཉིད་
འདོད་ཆགས་ཡིན་ཏེ། ན་ཚོད་ལ་སོགས་པ་འཇོམས་པའི་རྒྱུ་ཉིད་ཡིན་པའི་ཕྱིར་རོ། །བསགས་པ་ནི་སྔ་ན་མེད་པ་བདག་གིར་བྱས་པའོ། །མང་དུ་ཐོབ་པ་ནི་རབ་ཏུ་མང་བ་དང་། རབ་ཏུ་རྒྱ་ཆེ་བ་ཞེས་བྱ་བའི་ཐ་ཚིག་གོ། །མང་དུ་ཐོབ་པ་དེ་ཡང་འགའ་ཞིག་ཏུ་གྱུར་པ་དེ་དགག་པའི་
ཕྱིར་སྨྲ་བ་བཀག་པ་མེད་པ་རྙེད་པ་སྟེ། སྡུག་བསྔལ་མེད་པས་རྙེད་པ་ཡིན་ཏེ། རྟག་ཏུ་བདག་ཉིད་ཀྱི་འདོད་པ་དང་བདེ་བས་སོ། །ཤིན་ཏུ་མངོན་པར་དགའ་བ་ནི་རབ་ཏུ་དགའ་བའི་ཚུལ་གྱིས་སོ། །དབང་པོ་ཚིམ་པར་གྱུར་པ་ནི་དབང་པོ་རྒྱས་པའོ། །ཚུལ་ཁྲིམས་ཀྱི་གཟི་དང་ཡང་
དག་པར་ལྡན་པ་ཉིད་ཀྱི་ཕྱིར་བཞིན་གྱི་མདོག་གསལ་བའོ། །པགས་པའི་སྐྱོན་ཐིག་ལེ་ནག་པོ་དང་། གཉེར་མ་ལ་སོགས་པ་དང་བྲལ་བ་ཉིད་ཀྱི་ཕྱིར་པགས་པའི་མདོག་ཡོངས་སུ་དངས་པའོ། །འབད་པ་ཉུང་བ་ནི་བྱ་བ་ཉུང་བའོ། །གཞན་ལ་རག་ལུས་པས་འཚོ་བའི་ཐབས་ནི་གཞན་ལ་
རག་ལུས་པ་སྟེ་དེ་མེད་པའོ། །ཇི་སྲིད་འཚོའི་བར་དུ་ཞེས་བྱ་བ་ནི་ཇི་སྲིད་འཚོའི་མཐར་ཐུག་པའོ། །ཚངས་པ་ནི་མྱ་ངན་ལས་འདས་པ་ཡིན་ལ། དེའི་རྒྱུ་མཚན་སོ་སོར་ཐར་པའི་སྡོམ་པའི་ཚུལ་ཁྲིམས་ལ་སོགས་པ་ནི་སྤྱོད་པ་ཡིན་ཏེ། ཚངས་པར་སྤྱོད་པ་དང་འགྲོ་བར་བྱེད་པ་ཡིན་པའི་ཕྱིར་རོ། །དེ་

སྤྱོད་པར་ནུས་པ་ནི་བསྒྲུབ་པར་ནུས་པའོ། །ཚངས་པར་སྤྱོད་པ་ཁྱད་པར་ཇི་ལྟ་བུ་ཞིག་ཅེ་ན། སྨྲས་པ། རལ་པ་མེད་པ་ཉིད་ཀྱི་ཕྱིར་ཡོངས་སུ་རྫོགས་པའོ། །འབྲས་བུ་བསྒྲུབ་པའི་ཕྱིར་དང་། ཉེས་པ་མ་ལུས་པ་ཡོངས་སུ་སྤོང་བར་བྱེད་པའི་རྒྱུ་ཉིད་
ཡིན་པའི་ཕྱིར་ཡོངས་སུ་དག་པའོ། །ཡོན་ཏན་སྒྲུབ་པར་བྱེད་པའི་ཐབས་ཉིད་ཡིན་པའི་ཕྱིར་ཡོངས་སུ་བྱང་བའོ། །འབའ་ཞིག་ཅེས་བྱ་བ་ནི་ཐར་པ་ཐོབ་པར་བྱ་བའི་ཕྱིར་ཕྱོགས་གཞན་ལ་རག་ལུས་པ་མེད་པའི་ཕྱིར་འབའ་ཞིག་གོ། །དོན་གྱི་གནས་ཞེས་བྱ་བ་ནི་གང་ལ་གནས་ན་
རྒྱལ་པོའི་ནོར་སྐྱེ་བར་བྱེད་པ་དེ་ནི་དོན་གྱི་གནས་སོ། །འདོད་པའི་རྒྱུ་ནི་བག་ལ་ཉལ་མ་སྤངས་པའོ། །གཞི་ནི་ཡུལ་ལོ། །དབང་ནི་རྟེན་ལ་བྱའོ། །རྣམ་པར་རྩོད་པ་ཞེས་བྱ་བ་ནི་སྐྱེས་བུ་ཁྲོ་བ་སྐྱེས་ནས་སྨྲ་བའོ། །ལོག་པར་བཟུང་ནས་ནི་སེམས་རབ་ཏུ་འཁྲུགས་པའོ། །རྩོད་པ་འབྱུང་སྟེ་
ཞེས་བྱ་བ་ནི་སྣ་ཚོགས་སུ་སྨྲ་བ་ནི་རྩོད་པ་སྟེ། སྨྲ་བ་དང་ཕྱིར་སྨྲ་བ་ཡིན་ལ། དེ་འབྱུང་བ་ནི་ཐོབ་པར་གྱུར་པའོ། །ཉེས་པ་ནི་བསྔགས་པ་མ་ཡིན་པ་སྟེ། འགའ་ཞིག་ཁོ་ན་གནས་ཏེ་སྐབས་སུའོ། །ཀུན་ཏུ་སྦྱོར་བར་བྱེད་ཅེས་བྱ་བ་ནི་དགེ་སློང་དག་རྩོད་པར་གྱུར་པའོ། །བསླབ་པ་བཏང་
སྟེ་ཞེས་བྱ་བ་ནི་དགེ་སློང་གི་དངོས་པོ་ལས་ཉམས་པ་རྗེས་སུ་ཐོབ་པའོ། །འཕྱ་ཞིང་སྨོད་པ་ནི་འཕྱ་ཞིང་སྨོད་པར་བྱེད་པའོ། །ངན་པ་ཞེས་བྱ་བ་ནི་ཡོན་ཏན་དང་བྲལ་བ་ཉིད་ཀྱི་ཕྱིར་རོ། །གྲོང་མི་ཞེས་བྱ་བ་ནི་མི་བཤེས་པའི་སྒོ་ནས་སྨད་པའོ། །དཔལ་མེད་པ་ཞེས་བྱ་བ་ནི་འཕགས་པའི་ལམ་གྱི་དཔལ་
ལས་ཡོངས་སུ་ཉམས་པའི་ཕྱིར་རོ། །གསད་པར་བྱ་བ་ནི་སྲོག་དང་བྲལ་བར་བྱ་བའོ། །རྒྱ་ཆེ་བ་ནི་འཇིག་རྟེན་ཐམས་ཅད་ལ་རབ་ཏུ་གྲགས་པའོ། །རྒྱལ་རིགས་ཤིང་སཱ་ལ་ཆེན་པོ་ནི་རྒྱལ་རིགས་ཀྱི་མཆོག་ཏུ་གྱུར་པའོ། །བྲམ་ཟེའི་རིགས་ཤིང་སཱ་ལ་ཆེན་པོ་སྟེ། མཆོག་ཏུ་གྱུར་པ་དག་མི་
འོང་ཞིང་མི་སྡོད་དོ། །གུས་པ་མེད་པ་ནི་བླ་མའི་ཡུལ་ལ་གུས་པ་དང་བྲལ་བའོ། །བསྟི་སྟང་མེད་པ་ཞེས་བྱ་བ་ནི་བླ་མའི་ཡུལ་ལ་གཙོ་བོའི་བློ་དང་བྲལ་བའོ། །སྨྲ་བ་ནི་བརྗོད་པ་ཡིན་ལ་སེམས་པ་ནི་ཤེས་པར་བྱེད་པའོ། །གདུལ་བྱའི་སྐྱེ་བོ་འཁོར་བརྒྱ་ཕྲག་མང་པོ་གང་ཡིན་པ་དེ་ནི་འདིར་བརྒྱ་ཕྲག་

དུ་མ་སྟེ་དེའི་འོ། །སྙན་པ་དང་གྱ་ནོམ་པ་དག་ལས་ཤིན་ཏུ་སྙན་པ་ནི་སྙན་ལ་འཇམ་པའོ། །སྦྲང་བུས་རྣམ་པར་སྒྱུར་བ་ནི་སྦྲང་རྩི་སྟེ། ཚིགས་མ་མེད་པ་དེས་ཁ་ཚིམ་པར་བྱེད་པ་ལྟ་བུའོ། །རྫུ་འཕྲུལ་ཆེན་པོ་འདི་ལ་མངའ་བའི་ཕྱིར་རྫུ་འཕྲུལ་ཆེན་པོའོ། །ཤིན་ཏུ་ངོ་མཚར་ཆེ་བར་ཉེ་བར་
སྟོན་པར་སྤྱོད་པས་ན་མཐུ་ཆེ་བའོ། །ཏིང་ངེ་འཛིན་ཁྱད་པར་ཅན་རྙེད་པས་ན་སྟོབས་ཆེ་བའོ། །ཆད་པས་མ་ཡིན་ཞེས་བྱ་བ་ནི་རྫས་དང་ངག་གི་ཆད་པ་སྤངས་པས་སོ། །མཚོན་ཆས་མ་ཡིན་ཞེས་བྱ་བ་ནི་མཚོན་ཆས་ཚར་གཅད་པ་སྤངས་པས་སོ། །ཆོས་ཀྱིས་ཞེས་བྱ་བ་ནི་རིགས་པས་སོ། །
སྙོམས་པས་ཞེས་བྱ་བ་ནི་འདུལ་བར་བྱེད་པའི་ངན་པ་སྤངས་པའི་ཕྱིར་རམ། ཡང་ན་གཞན་གྱི་སེམས་བསྲུང་བའི་སྒོ་ནས་སོ། །ནོར་གྱི་དབང་དུ་བྱས་པ་ཞེས་བྱ་བ་ནི་རྫས་གཙོ་བོར་བྱེད་པ་སྟེ། ཇི་སྲིད་ལོའམ། ཇི་སྲིད་ཟླ་བ་བཅུའི་བར་དུ་ཚངས་པར་སྤྱོད་པ་སྤྱད་པར་བྱའོ། །ཞེས་
བྱ་བ་དེ་ལྟ་བུའི་རང་བཞིན་གྱི་སེམས་ཀྱིས་ཚངས་པར་སྤྱོད་པ་སྤྱད་པའི་ཕྱིར་དེ་ནོར་གྱི་དབང་དུ་བྱས་པའམ། མཐོ་རིས་ཀྱི་བདེ་བའི་ཕྱིར་ཚངས་པར་སྤྱོད་པ་སྤྱད་པ་གང་ཡིན་པ་དེ་དག་ནོར་གྱི་དབང་དུ་བྱས་ནས་ཚངས་པར་སྤྱོད་པའོ། །དེའི་རྣམ་པ་ཞེས་བྱ་བ་ལ་སོགས་པ་ལ། རྣམ་
པ་ནི་རབ་ཏུ་བྱུང་བ་དང་རྗེས་སུ་མཐུན་པའི་བྱ་བ་སྟེ། ཀུན་ཏུ་སྤྱོད་པར་གྲགས་པའོ། །རྟགས་ནི་རབ་ཏུ་བྱུང་བའི་ཆ་ལུགས་སོ། །མཚན་མ་ནི་ཉེས་པར་སྤྱོད་པ་ལས་ཟློག་པའོ། །བསྙེན་པ་ཞེས་བྱ་བ་ནི་འདོད་པའི་ཡོན་ཏན་ལྔའི་རྗེས་སུ་ཞུགས་པའོ། །ལྡན་པར་གྱུར་པ་ཞེས་བྱ་བ་ནི་
དེ་དག་དང་ཤིན་ཏུ་འབྱོར་པར་གྱུར་པའམ། དེ་དག་ལ་ཤིན་ཏུ་ཆགས་པར་གྱུར་པའོ། །སྲོག་གི་མཐའ་ནི་སྲོག་གི་མཐར་གཏུགས་པའོ། །ཞལ་ཏ་བ་དྲང་སྲོང་བྱིན་དང་། སྙིང་པ་ཞེས་བྱ་བ་ལ་ཁྱིམ་མམ་རྒྱལ་པོའི་ཕོ་བྲང་ན་མཆོག་ཏུ་ཡིད་བརྟན་པར་བྱ་བ་གང་ཡིན་པ་དེ་ནི་ཞལ་ཏ་བ་ཞེས་
བྱའོ། །འདི་གཉིས་འཚོ་བ་དང་ལོངས་སྤྱོད་ཀྱང་ཚོལ་བ་ཞེས་བྱ་བ་ལ། ཚོལ་བ་ནི་ཡོངས་སུ་ཚོལ་བ་ཡིན་ཏེ། འདི་གཉིས་ཀྱི་སྲོག་འཇིག་པའི་རྒྱུ་ལས་ཡོངས་སུ་བསྲུང་བར་བགྱིའོ་ཞེས་བྱ་བའི་ཐ་ཚིག་གོ། །སྐྲ་དཀར་སྐྱེས་པ་ནི་རྒས་པའོ། །རྒས་པས་རིད་པ་ནི་འཁོགས་པའོ། །རྒས་

པས་ཡན་ལག་གི་ཚིགས་ཤིན་ཏུ་ལྷོད་པར་གྱུར་པ་ནི་དགོག་ཏུ་གྱུར་པའོ། །ཟུང་ཤིག་ཅེས་བྱ་བ་ཀླག་པ་དང་། བཅང་བ་ཞེས་བྱ་བ་ནི་མི་བརྗེད་པའི་སྒོ་ནས་སོ། །གཞན་འཛིན་དུ་བཅུག་པ་ཡང་དོན་གྱི་སྒོ་དང་། ཀློག་ཏུ་བཅུག་པ་ཡང་ཡི་གེའི་སྒོ་ནས་སོ། །དོན་དང་ལྡན་པ་ཞེས་
བྱ་བ་ལ། དོན་དང་འབྱོར་པ་དང་ཆོས་དང་ཡང་འབྱོར་པའོ། །ཚངས་པར་སྤྱོད་པ་དང་རྗེས་སུ་མཐུན་པའི་ཕྱིར། ཚངས་པར་སྤྱོད་པ་དང་ལྡན་པའོ། །མངོན་པར་ཤེས་པའི་ཕྱིར་ཏེ། ཟག་པ་མེད་པའི་ཡེ་ཤེས་བསྐྱེད་པའི་ཕྱིར་རོ། །ཡང་དག་པར་བྱང་ཆུབ་པའི་ཕྱིར་ཏེ། ཕུང་པོ་ལྷག་མ་དང་
བཅས་པའི་མྱ་ངན་ལས་འདས་པའི་ཕྱིར་རོ། །མྱ་ངན་ལས་འདས་པའི་ཕྱིར་ཞེས་བྱ་བ་ནི། ཕུང་པོའི་ལྷག་མ་མེད་པའི་མྱ་ངན་ལས་འདས་པའི་ཕྱིར་རོ། །སྙིང་རྗེ་སྐྱེ་བའི་རྒྱུ་མཚན་ཉིད་ཡིན་པའི་ཕྱིར་སྙིང་རྗེའི་རྒྱུ་ཅན་གྱི་ཡི་གེའི་རྣམ་པ་དེས་འདུ་བ་དང་སོང་བ་ནི་རྒྱུ་བའོ། །རྒྱལ་པོའི་
རིགས་ལས་སྐྱེས་པའི་ཕྱིར་རྒྱལ་རིགས་སོ། །རྒྱལ་ཕྲན་གྱིས་སྤྱི་བོས་ཕྱག་བྱས་པ་ཉིད་ཀྱི་ཕྱིར་སྤྱི་བོར་དབང་བསྐུར་བའོ། །དེ་ལས་ཁྱད་པར་དུ་འཕགས་པ་ཞེས་བྱ་བ་ནི་གྲོང་ཁྱེར་མཛེས་པར་བྱས་པ་བས་ལམ་ཤིན་ཏུ་ཁྱད་པར་དུ་འཕགས་པར་མཛེས་པར་བྱས་པའོ། །ཕྱིར་བཅོས་མི་ནུས་པ་ནི་
མ་ཞུ་བ་སྟེ་ཡན་ལག་འཁུམས་པའོ། །འཁོར་ལོས་རྣམ་པར་བཅོམ་པས་འཁོར་ལོས་བརྐོས་པའི་སའོ། །རོ་ནི་ཤི་བའི་ལུས་སོ། །ཤིན་ཏུ་རྣམ་པར་འགྱུར་བ་ནི་གཟུགས་མི་སྡུག་པར་གྱུར་པའོ། །ནུས་པ་ཇི་ལྟ་བ་ཞེས་བྱ་བ་ལ་སོགས་པ་ལ་ནུས་པ་ནི་ནང་གི་སྤྲོ་བའོ། །སྟོབས་ནི་ཕན་པར་བྱེད་
པ་ཕུན་སུམ་ཚོགས་པས་སོ། །ངན་པ་ནི་རིགས་དམའ་མོར་སྐྱེས་པའོ། །དམན་པ་ནི་སྡུག་བསྔལ་བར་གྱུར་པའོ། །སྙིང་བརྩེ་བར་བྱ་བས་ནི་བཀྲེན་པ་ནོར་འདོད་པའོ། །བདག་ཉིད་གཅིག་པུ་སོ་སོར་སངས་རྒྱས་པས་ན་རང་སངས་རྒྱས་སོ། །བས་མཐའི་གནས་མལ་ལ་ཐ་དད་པ་ཞེས་བྱ་བ་ནི་
དབེན་པའི་གནས་བསྟེན་པར་རོ། །སྦྱིན་གནས་གཅིག་པུ་ཞེས་བྱ་བ་ནི་འཇིག་རྟེན་དུ་སངས་རྒྱས་གཉིས་ཅིག་ཅར་མི་འབྱུང་བ་བཞིན་དུ་བསེ་རུ་དང་འདྲ་བར་རང་སངས་རྒྱས་གཅིག་པུ་ཁོ་ན་འབྱུང་བའོ། །གཟུགས་མཛེས་པ་ཞེས་བྱ་བ་ནི་ལུས་ཀྱི་སྒོ་ནས་རབ་ཏུ་དང་བ་སྐྱེད་པར་བྱེད་

པ་སྟེ། ལུས་ལ་སོགས་པའི་བྱ་བ་ཤིན་ཏུ་ཞི་བ་ཉིད་ཀྱི་སྒོ་ནས་སེམས་རབ་ཏུ་དང་བ་སྐྱེད་པ་ཉིད་དུ་ཡང་དག་པར་རྗེས་སུ་དཔག་པའོ། །རྩ་བ་ནས་བཅད་པ་ཞེས་བྱ་བ་ནི་རྩ་བ་ངེས་པར་བཅད་པའོ། །རྩུབ་པ་ནི་ཤིན་ཏུ་དྲག་པའོ། །ཁྱུ་མཆོག་གི་ཚིག་ཅེས་བྱ་བ་ལ་སོགས་པ་ལ་འདི་ལ་ཁྱུ་མཆོག་
གི་ཡིན་པས་ན་ཁྱུ་མཆོག་གི་སྟེ། འཇིགས་པ་མེད་པའི་ངག་གོ། །གཅིག་ཏུ་ཆད་པར་བྱས་ཏེ་ཞེས་བྱ་བ་ནི་གདོན་མི་ཟ་བར་བྱ་བར་དམ་བཅས་པའོ། །འཁོར་ཏེ་སྐྱེ་བོ་མང་པོ་ཚོགས་པའོ། །སེང་གེའི་སྒྲ་བསྒྲགས་པ་ནི་སེང་གེ་ལྟར་སྒྲོགས་པའོ། །གསད་པར་བྱ་བ་ནི་སྲོག་དང་དབྲལ་
བར་བྱ་བའོ། །བྱ་བ་ནི་ཐག་ཉེ་བར་གྱུར་པའོ། །བྱེད་པ་ནི་དུས་ཀྱིས་ཆོད་པར་གྱུར་པའོ། །གོ་ཆ་བསྐོན་པ་ནི་གོ་བགོས་པའོ། །ཤིང་ཀ་ཀོ་ཏ་ཀ་ཤུན་པ་བཤུས་པ་ར་རི་ཅན་ཞེས་བྱ་བ་ལ། ཕྱོགས་དང་ཕྱོགས་ལས་ཤུན་པ་གོགས་པར་གྱུར་པའི་ཕྱིར་ཤུན་པ་བཤུས་པའོ། །གནས་དང་གནས་སུ་ཤུན་
པ་སྐམས་ཤིང་རྙིངས་པ་ནི་ཕྲ་བར་གྱུར་པ་ཉིད་ཀྱི་ཕྱིར་ར་རི་ཅན་ཏེ། ཤུན་པ་གཟུགས་མི་སྡུག་པར་གྱུར་པ་ནི་ར་རི་ཅན་ཡིན་ནོ་ཞེས་བྱ་བའི་དབང་དུ་བྱས་པའི་ཕྱིར་རོ། །ལྷག་མ་ཙམ་ཆུང་ལ་སྲབ་པ་ནི་ལོ་མ་ཉུང་ལ་སྲབ་པའོ། །ལོ་མ་སྲབ་པ་ཉིད་ཀྱི་ཕྱིར་གྲིབ་མ་ཆུང་བའོ། །བྱམས་པ་ནི་དགྱེས་
པའོ། །ཐུགས་བརྩེ་བ་ནི་རྗེས་སུ་བརྩེ་བར་མཛད་པའོ། །ཕྲུ་མ་བཏབ་པ་ནི་དམག་གི་བཀོད་པ་བྱས་ནས་སོ། །བསྐོར་བ་ནི་སྟེང་ནས་གཡོགས་པར་འདོད་པའོ། །འཇིག་རྟེན་ནི་ལས་བདག་གིར་བྱེད་པ་ཞེས་བྱ་བ་ལ་སོགས་པ་ལ་འཇིག་རྟེན་གྱི་ལས་བདག་པོ་ཡིན་པ་དེའི་ཕྱིར་ལས་
བདག་གིར་བྱེད་པའོ། །འཇིག་རྟེན་གྱི་ལས་སྐྱེད་པར་བྱེད་པའི་གནས་ཡིན་པ་དེ་བས་ན་ལས་ལས་སྐྱེས་པའོ། །རང་ཉིད་ཀྱིས་བྱས་པའི་ལས་ཀྱི་འབྲས་བུ་ལ་ཉེ་བར་སྤྱོད་པའི་ཕྱིར། ལས་ཀྱི་བགོ་སྐལ་ལ་སྤྱོད་པའོ། །རང་གིས་བྱས་པའི་ལས་ལ་ཉེ་བར་བརྟེན་ནས་འཇུག་པའི་
ཕྱིར་ལས་ལ་བརྟེན་པའོ། །ལས་དེ་མྱོང་བར་འགྱུར་རོ་ཞེས་བྱ་བ་ནི་ལས་བྱས་ཤིང་བསགས་པའི་འབྲས་བུ་ལ་གཅིག་ཏུ་ཉེ་བར་སྤྱོད་པའི་ཕྱིར་རོ། །གཞུ་རྒྱུད་ནི་འདྲེན་པའི་ཐབས་སུ་གྱུར་པའོ། །ནན་ཐག་ཅེས་བྱ་བ་ནི་རྟ་ལ་སོགས་པའི་གོ་ཆ་འཆིང་བར་བྱེད་པའོ། །འབྲེང་བ་ཞེས་བྱ་བ་

ནི་གླང་པོ་དག་གི་འབྲེང་ཐག་གོ། །རྣ་བའི་གཡོགས་མ་ནི་རྣ་བའི་བུག་པ་རྒྱན་དང་བཅས་པའོ། །གོ་ཆ་བཤིག་ནས་ཞེས་བྱ་བ་ནི་གོ་ཆ་དུམ་བུར་བྱས་ནས་སོ། །ལས་ཀྱི་མཐའ་ཞེས་བྱ་བ་ནི་འབྲས་སཱ་ལུ་ལ་སོགས་པའི་ལས་ཀྱི་མཐའོ། །བརྩོན་འགྲུས་ཆེན་པོ་ཞེས་བྱ་བ་ལ་
སོགས་པ་ལ། བརྩོན་འགྲུས་ནི་ཡིད་ཀྱི་སྤྲོ་བའོ། །སྟོབས་ནི་ལུས་ཀྱིའོ། །ཕ་རོལ་གནོན་པ་ནི་བྱ་བ་བྱེད་ནུས་པའོ། །འོངས་པ་ནི་ཉེ་བར་ཕྱིན་པའོ། །ཡ་མཚན་དུ་གྱུར་པ་ནི་ངོ་མཚར་དུ་གྱུར་པའོ། །ངོ་མཚར་གྱིས་དེ་དག་གི་མིག་བགྲད་པས་ན་མིག་གདངས་པའོ། །ཁོ་བོ་ནི་དེའི་བང་ཆེན་ཏེ་ཞེས་
བྱ་བ་ནི་ཁོ་བོའི་རྗེས་སུ་ཕན་འདོགས་པའི་མཆོག་གིས་སྦྱོར་བར་གྱུར་པའོ། །དགོན་པ་བསྲུང་བར་བྱོས་ཤིག་ཅེས་བྱ་བ་ནི་རི་དགས་གསོད་པའི་གནས་ཤིང་གི་རིབ་མས་ཀུན་ནས་བསྐོར་བའི་རི་དགས་འཇུག་པའི་ས་ཕྱོགས་ཤིག་ནས་བྱས་པའོ། །ངག་འཇམ་པ་ཞེས་བྱ་བ་ལ་སོགས་པ་ལ།
ངག་འཇམ་པ་སྟེ། ངག་འཇིག་རྟེན་གྱི་འཇམ་པ་ཞེས་བརྗོད་པའོ། །སྦྱིན་པ་ནི་རྗེས་སུ་སྦྱིན་པའོ། །ཚིག་གི་ངོར་སྔོན་དུ་སོང་བ་ཅན་ནི་འབྱེད་པའོ། །ཀུན་དུ་སྤྱོད་པ་ནི་རིགས་པའོ། །གལ་ཏེ་བསྟན་མ་ཐག་པས་དོན་སྒྲུབ་པ་མ་གྲུབ་པར་གྱུར་པ་དེའི་ཚེ་གསེར་ལ་སོགས་པའི་ཆད་པ་
འདིར་རིགས་ཡིན་ཏེ། ཆད་པ་དབབ་པའི་སྒོ་ནས་དོན་བསྒྲུབ་པར་བྱ་བའོ། །སྟོབས་ནི་གླང་པོ་ཆེ་ལ་སོགས་པར་སྒྲུབ་པར་བྱེད་པའི་བྱེ་བྲག་གོ། །བྱས་ཏེ་ཞེས་བྱ་བ་ནི་བསྒྲུབས་ཏེའོ། །ཐོབ་ནས་ཞེས་བྱ་བ་ནི་རྣམ་པ་ཐམས་ཅད་ཀྱིས་ཡོངས་སུ་མཐར་ཕྱིན་ནས་སོ། །དགའ་ན་ཞེས་
བྱ་བ་ནི་འདོད་ནའོ། །ལྟ་བ་ནི་ཐོག་མར་སྤྱོད་པའོ། །བཙལ་བ་ནི་རྒྱུན་གྱིས་གཅོད་པའོ། །བརྩོན་པའི་མཚོན་ཆ་ཞེས་བྱ་བ་ནི་ཤཱཀྱ་གསོད་པ་ལ་བརྩོན་པས་མཚོན་ཆ་འཕྱར་བར་བྱེད་པའོ། །མའི་ཕ་ནི་འདིར་མེས་པོའོ། །ཚོགས་པ་ནི་འདུས་པ་ཡིན་ལ། ཚོགས་ཀྱི་ཕྱིར་རབ་ཏུ་
སྨིན་པ་ནི་ལས་མཐུན་པར་བྱས་པ་སྟེ། ཚོགས་ཀྱི་འབྲས་བུ་ཉམས་སུ་མྱོང་བར་གྱུར་པའི་ལས་ཞེས་བྱ་བའི་ཐ་ཚིག་གོ། །མལ་ལ་བ་ཧི་ནི་རི་བྲག་གི་བྱེ་བྲག་གོ། །གྲོང་ནི་རྩིག་པ་དང་རིབ་མས་ཡོངས་སུ་བསྐོར་བའི་ཁྱིམ་གྱི་ཚོགས་སོ། །གྲོང་རྡལ་ནི་ཡུལ་འཁོར་ཏེ་རྒྱལ་ཁམས་ཀྱི་ཁྱད་པར་རོ། །རྒྱལ་

པོའི་ཕོ་བྲང་ནི་རྒྱལ་པོའི་ཁབ་ཀྱིས་ཉེ་བར་མཚོན་པའི་གྲོང་ཁྱེར་རོ། །ཨེ་མ་ཧོ་ཤཱཀྱ་ནི་བསྲེགས་སོ་ཞེས་བྱ་བ་ལ་སོགས་པ་ནི། རྗེས་སུ་བརྩེ་བས་ལན་གཉིས་བརྗོད་པའོ། །དོང་བརྐོས་ལ་ཞེས་བྱ་བ་ལ་སོགས་པ་ལ། ཤཱཀྱའི་གཞོན་ནུ་ཇི་སྙེད་པ་དོང་དེ་སྙེད་པ་ཁོ་ན་བརྐོས་ནས་ཤཱཀྱའི་གཞོན་ནུ་དོང་རེ་
རེར་བཅུག་པ་རེ་རེའི་སྟེང་དུ་ལྕགས་ལས་བྱས་པའི་གླང་པོ་ཆེའི་རྐང་པའི་རྣམ་པ་ལྟ་བུས་གཡོགས་པར་བྱ་ཞིང་དེའི་འོག་ཏུ་གླང་པོ་ཆེའི་བརྫིས་ན་གླང་པོ་ཆེའི་རྐང་པ་ལྕགས་ཀྱི་རྐང་པ་ལྟ་བུས་བསྡིགས་པ་ལས་དེ་དག་ཕྱེ་མར་བརླག་པར་འགྱུར་རོ། །ཡང་ན་ལྕགས་ལས་བྱས་པའི་བཤལ་སྤྱད་
ལྕགས་ཀྱི་རྐང་པ་ལྟ་བུ་ཞེས་བྱའོ། །དུ་བ་འཐུལ་བར་བྱེད་ཅིང་ཞེས་བྱ་བ་ནི་དུ་བ་འབྱིན་པར་བྱེད་པའོ། །ཙི་རི་རི་ཟེར་ནས་བྱ་བ་ནི་ཙི་རི་རི་སྒྲ་ཅུང་ཟད་སྒྲོག་པའོ། །སྒྲ་ཡང་འབྱིན་ཏོ་ཞེས་བྱ་བ་ནི་སྒྲ་ཤིན་ཏུ་ཆེ་བ་སྒྲོག་པའོ། །ཕྲིན་ལས་རྣམ་པར་སྨིན་པ་ནི་ཕྲིན་ལས་གྱུར་པ་སྟེ། ཕྲིན་
ལས་ཀྱི་རྣམ་པ་ཞེས་བྱ་བའི་ཐ་ཚིག་གོ། །རུས་མཚུངས་པ་ནི་རུས་དང་བཅས་པ་ཡིན་ལ། དྲང་སྲོང་དྲོ་ནའི་རིགས་དང་བཅས་པ་ནི་རུས་དྲོ་ནར་བཅས་པའོ། །རང་བཞིན་གྱི་ཉེས་པས་མ་གོས་པ་ཉིད་ཀྱི་ཕྱིར་ཉེས་པ་མེད་པའོ། །གནོད་པ་མེད་པ་ནི་ཞེས་བྱ་བ་ནི་གནོད་པ་བྱས་པ་མེད་པར་
རོ། །ཉམ་ཐག་པའི་སྐད་ནི་སྡུག་བསྔལ་གྱིས་གཟིར་བ་རྣམས་ཀྱི་ཧ་ཧའི་སྒྲ་མཐོན་པོའོ། །ཁྱད་པར་རམ་ཞེས་བྱ་བ་ལ་སོགས་པ་ལ་མངོན་སུམ་གྱིས་ཡོངས་སུ་གཅད་པར་བྱ་བའི་བྱེ་བྲག་ནི་ཁྱད་པར་རོ། །རྗེས་སུ་དཔག་པའི་ཤེས་པས་ཡོངས་སུ་གཅད་པར་བྱ་བ་ནི་བསམ་པའོ། །བྱེད་པ་
སྣ་ཚོགས་གསལ་བའི་ཚུལ་གྱིས་རྣམ་པ་གཞན་ཉིད་དོ། །ཤན་པ་ནི་ཕྱུགས་གསོད་པའོ། །མངོན་པར་བསྒྲུབས་ཏེ་ཞེས་བྱ་བ་ནི་གྲུབ་པར་གྱུར་ནའོ། །སྤྱོད་པར་གྱུར་པ་ཞེས་བྱ་བ་ནི་སྐྱོང་བར་གྱུར་པའོ། །ཁྱིམ་བྱ་གསོད་པར་བྱེད་པས་ན་ཁྱིམ་བྱ་གསོད་པའོ། །དེ་བཞིན་དུ་ཕག་གསོད་པ་
ཡང་ངོ་། །བྱ་བ་ཞེས་བྱ་བ་ནི་བྱ་འཛིན་པས་ན་འཚོ་བར་བྱེད་པའི་ཐབས་ཅན་ནོ། །རྒྱ་ནི་རི་བོང་འཛིན་པར་བྱེད་པའི་ཐབས་ཏེ། དེས་བྱ་བ་བྱེད་པའི་ཕྱིར་རི་བོང་ལ་རྒྱས་འདེབས་པའོ། །སློབ་པ་རྣམས་ཀྱི་གཟི་བརྗིད་ཀྱིས་ཕོག་པར་གྱུར་པ་ཞེས་བྱ་བ་ནི་སློབ་པའི་གང་ཟག་རྣམས་ལ་མངོན་པར་

དད་པའི་ལྷས་ཚིག་རྩུབ་པོས་བརྡེགས་པ་འམ། བསྒོམ་པས་སྤང་བར་བྱ་བའི་ཁོང་ཁྲོ་བ་མ་སྤངས་པའི་ཕྱིར་སློབ་པ་རྣམས་ཀྱི་གཟི་བརྗིད་ཀྱིས་ཕོག་པར་གྱུར་པ་ནི་ཚིག་རྩུབ་པོ་ཡོངས་སུ་བརྗོད་པའམ། སློབ་པ་དུ་མ་བསད་པར་གྱུར་པ་ལས་སྡིག་པ་དཔག་ཏུ་མེད་
པ་དང་ལྡན་པས་སློབ་པ་རྣམས་ཀྱི་གཟི་བརྗིད་ཀྱིས་ཕོག་པར་གྱུར་པའོ། །སྦྲུལ་གྱིས་བལྟས་པ་བཞིན་དུ་ཞེས་བྱ་བ་ནི་ཇི་ལྟར་སྦྲུལ་མཐོང་བའི་དུག་ཅན་གྱིས་བལྟས་པ་སྟེ། མཐོང་བས་རིགས་ཐལ་བར་འགྱུར་བ་དེ་བཞིན་དུ་ཀོ་ས་ལའི་རིགས་བརྒྱུད་མེད་པར་འགྱུར་རོ། །ཉ་པ་ནི་ཉ་
གསོད་པར་བྱེད་པའོ། །གཅད་ཅིང་གཅད་ཅིང་ཞེས་བྱ་བ་ནི་ཟློས་པའི་ཚིག་གཉིས་ཡིན་ལ། བཅད་པ་ནི་གཏུབས་པའོ། །དགྲ་བོ་ཕྱིར་བཟློག་པའི་དོན་དུ་གདུ་བུའི་རྣམ་པ་ལྟ་བུའི་ཁང་པ་སུམ་རྩེག་གམ་ལྔ་རྩེག་གི་ཁང་བཟངས་སོ། །སྐྱེས་པ་མེད་པར་ཞེས་བྱ་བ་ནི་སྐྱེས་བུ་དང་ཤིན་
ཏུ་བྲལ་བའོ། །རོལ་མོའི་ཚོགས་ཀྱིས་ཞེས་བྱ་བ་ལ། རོལ་མོ་ནི་འདིར་གར་ལ་བྱའོ། །འདི་ནི་དགར་འགྱུར་ཞེས་བྱ་བ་ནི་འཇིག་རྟེན་འདིར་དགའ་བ་ཉམས་སུ་མྱོང་བར་གྱུར་པའོ། །གཞན་དུའང་དགའ་བར་འགྱུར་ཞེས་བྱ་བ་ནི་འཇིག་རྟེན་ཕ་རོལ་དུའོ། །དེ་ནི་དགར་འགྱུར་
ཞེས་བྱ་བའི་སྒྲ་ནི་ངེས་པར་གཟུང་བ་ལ་སྟེ། དེ་ཉིད་དགའ་བར་འགྱུར་བ་དང་དེ་ཉིད་རབ་ཏུ་དགའ་བར་འགྱུར་བའོ། །གང་གི་ཚེ་ཞེ་ན། སྨྲས་པ། བདག་ཉིད་ལས་ཀྱི་རྣམ་པར་སྨིན་པ་མཐོང་ནས་ཞེས་སྨོས་སོ། །མགུ་གྱུར་ཞེས་བྱ་བ་ནི་མགུ་བ་སྐྱེས་པར་གྱུར་པའོ། །བསྔགས་པར་འགྱུར་
བས་ན་བདེ་འགྲོ་སྟེ། གང་གི་ཚེ་དེར་འགྲོ་བར་འགྱུར་བ་དེའི་ཚེ་ཕྱིར་འགྲོ་བར་འགྱུར་རོ། །ངོམ་པ་ནི་སྤྱིར་བདག་ཉིད་སྟོང་པར་བྱེད་པ་སྟེ། འདི་ལྟར་བདག་ནི་སྟོབས་དང་། བརྩོན་པ་དང་། ཕ་རོལ་གནོན་པ་ཕུན་སུམ་ཚོགས་པ་ཞེས་ངོམ་པའོ། །རྣམ་པར་ངོམ་པ་ནི་ཁྱད་པར་དུ་བདག་དང་འདྲ་བར་འགའ་
ཞིག་ཀྱང་མེད་དེ། གང་གི་ཕྱིར་ཁོ་བོ་འཛམ་བུའི་གླིང་གི་གཙོ་བོར་གྱུར་པའི་ཤཱཀྱ་རྣམས་བརླག་པར་གྱུར་ཅེས་བྱ་བ་ལྟ་བུའོ། །བསླབ་པའི་གཞི་བསྡམས་གྱུར་ཅེས་བྱ་བ་ནི་སྲོག་གཅོད་པ་ལ་སོགས་པ་ལས་ལྡོག་པའི་བསླབ་པའི་གཞིས་བསྡམས་པར་གྱུར་པའོ། །ཀླུ་རྣམས་བསད་བཞིན་ཞེས་

བྱ་བ་ལ་སོགས་པ་ལ། ཀླུ་རྣམས་གསད་པ་སྟེ། སྲོག་དང་བྲལ་བར་གྱུར་ན་ཀླུའི་བུ་མོ་དག་ཀྱང་གསད་པར་བྱ་བ་ཡིན་ཏེ། ཁྱད་དུ་ཞུགས་ནས་གནོད་པར་གྱུར་ན་མི་རུང་བའོ། །དེའི་ཁྱད་པར་ཇི་ལྟ་བུ་ཞེ་ན། སྤྲིན་གྱིས་གཡོགས་བཞིན་དུག་གིས་རབ་གང་བ། །ཞེས་བྱ་བ་སྨོས་ཏེ།
སྤྲིན་ཏེ་ཆུ་འཛིན་གྱིས་གཡོགས་ཤིང་ཁྱབ་པ་དེ་བཞིན་དུ་དུག་གིས་ཀྱང་། ཀུན་ནས་གང་བར་གྱུར་པ་དེའི་ཕྱིར་གསད་པར་བྱ་བ་ཡིན་ན། ཇི་ལྟར་དེ་དག་གསད་པར་བྱ་བ་ཡིན་པ་དེ་བཞིན་དུ་ཤཱཀྱའི་བུ་མོ་དེ་དག་གི་ཡང་ལག་པ་དང་། རྐང་པ་ཆོད་ཅིག་པའོ། །གང་གི་ཕྱིར་ལག་པ་དང་
རྐང་པ་བཅད་པ་ལས་ཤི་བར་གྱུར་པ་དེ་དག་ཉིད་ཀྱི་གཉེན་རྣམས་ཀྱི་ནི་ཕྱི་བཞིན་ཏེ། སླད་བཞིན་འགྲོ་བར་འགྱུར་རོ། །སྡུག་བསྔལ་ནི་མི་མཐུན་པར་གྱུར་པའོ། །དྲག་པ་ཞེས་བྱ་བ་ནི་ཆེན་པོའོ། །རྩུབ་པ་ཞེས་བྱ་བ་ནི་ཐོག་མ་ཉིད་ནས་བརྣག་པར་དཀའ་བའོ། །ཚ་བ་ཞེས་བྱ་བ་ནི་མཐའ་
མར་བརྣག་པར་དཀའ་བའོ། །ཡིད་དུ་མི་འོང་བ་ཞེས་བྱ་བ་ནི་དྲན་པའི་ཤེས་པས་ཡུལ་དུ་བྱས་པ་ན་ཡང་ཡིད་མི་བདེ་བ་སྐྱེད་པར་བྱེད་པའོ། །བསམས་པ་ནི་ཡང་དག་པར་བསྐུལ་བའོ། །འཇིག་རྟེན་པའི་ཐུགས་ཞེས་བྱ་བ་ལ་འཇིག་རྟེན་ལ་ཕན་པས་ན་འཇིག་རྟེན་པ་སྟེ། འཇིག་
རྟེན་ཐམས་ཅད་ཀྱི་ཐུགས་ཤེས་པར་གྱུར་ཅིག་ཅེས་དགོངས་པ་འདིས་བསྐྱེད་པ་ནི་འཇིག་རྟེན་པའི་ཐུགས་སོ། །དེ་ཟག་པ་དང་བཅས་པའམ། ཟག་མེད་ཡིན་ཞེ་ན། དུས་དེའི་ཚེ་བཅོམ་ལྡན་འདས་ཀྱི་མཐུས་སེམས་ཅན་ཐམས་ཅད་ཀྱིས་བདེ་འགྲོ་གཞན་གྱི་སེམས་ཤེས་པ་ཐོབ་
པར་འགྱུར་ཏེ། འཇིག་རྟེན་ཐམས་ཅད་ཀྱི་ཐུན་མོང་དུ་གྱུར་པའམ། ཟག་པ་དང་བཅས་པའི་ཐུགས་ལ་འཇིག་རྟེན་པའི་ཐུགས་སོ་ཞེས་བྱའོ། །དབུགས་ཕྱུང་ཤིག་ཅེས་བྱ་བ་ནི་དགའ་བ་སྐྱེད་ཅིག་པའོ། །ལས་བདག་གིར་གྱིས་ཤིག་ཅེས་བྱ་བ་ནི་ལས་ལ་རྟེན་ཅིག་པའོ། །ལུང་མནོད་
པ་ཞེས་བྱ་བ་ནི་གདམས་ངག་ལེན་པའོ། །ཀློག་པ་ཞེས་བྱ་བ་ནི་ཇི་ལྟར་བཟུང་བ་ལྟར་ཀློག་པའོ། །འདོན་པ་ནི་ཀླགས་པ་མི་བརྗེད་པར་བྱ་བའི་འདོན་པའོ། །ནམ་རྨུས་པར་གྱུར་པ་ནི་ཉི་མ་སྤྲིན་དང་བཅས་པར་གྱུར་པའོ། །རྒྱན་ལ་ཉེ་བར་སྤྱོད་པ་ཞེས་བྱ་བ་ནི་རྩ་བའི་གནས་

ལས་ཕྱི་རོལ་གྱི་ཉེ་འཁོར་དུ་གྱུར་པའི་ས་ནི་ཉེ་བར་སྤྱོད་པ་ཡིན་ཏེ། འཆག་པ་དོན་དུ་གཉེར་བ་རྣམས་ཉེ་བར་སྤྱོད་པར་བྱེད་པའི་ཕྱིར་རོ། །བུད་མེད་ཀྱི་ཡང་རྒྱན་ཉེ་བར་སྤྱོད་པ་ཡིན་ཏེ། སྐྱེས་བུའི་སེམས་དགའ་བར་བྱེད་པ་དོན་དུ་གཉེར་བའི་བུད་མེད་དག་རྒྱན་ལ་ཉེ་བར་
སྤྱོད་ཅིང་སྟེན་པར་ཉེ་བར་སྤྱོད་པའི་ཕྱིར་རོ། །ཉི་མ་དང་མཐུན་ཞིང་འཕྲོད་པས་ན་ནོར་བུ་མེ་ཤེལ་ཏེ་ཉི་མའི་འོད་དང་ཡང་དག་པར་འབྱོར་པ་ན་མེ་འབྱིན་པར་བྱེད་པའི་ཕྱིར་རོ།། །།བམ་པོ་ལྔ་པ། འདི་ན་ཚིག་འགྱུར་ཞེས་བྱ་བ་ནི་ཚེ་འདིར་རོ། །གཞན་དུའང་ཚིག་པར་
འགྱུར་ཞེས་བྱ་བ་ནི་ཚེ་ཕྱི་མར་རོ། །གཉིས་ཀར་ཚིག་པར་འགྱུར་ཞེས་བྱ་བ་ནི་གང་གི་ཕྱིར་འཇིག་རྟེན་འདི་དང་གཞན་དུ་ཅིག་ཅར་དེ་ཚིག་པར་འགྱུར་བས་ན་སྡིག་པ་བྱེད་པ་དེ་དང་དེ་དག་ཚིག་པར་འགྱུར་བའོ། །གང་གི་ཚེ་ཞེ་ན། བདག་ཉིད་ལས་ཀྱི་རྣམ་པར་སྨིན་པ་མཐོང་ནས་ཞེས་བྱ་བ་
སྨོས་སོ། །སྨད་པའམ་དམན་པའི་འགྲོ་བ་ནི་ངན་འགྲོའོ། །གདུང་འགྱུར་ཞེས་བྱ་བ་ནི་ཡིད་ཀྱི་གདུང་བར་འགྱུར་བའོ། །རྒྱན་སྤེལ་མ་ཞེས་བྱ་བ་ལ་སོགས་པ་ལ། གསེར་སྐུད་ཀྱི་ལྕུ་གུ་གསུམ་པའམ། བཞི་པའི་ཚོགས་ཀྱི་བར་བར་དུ་རིན་པོ་ཆེ་སྣ་ཚོགས་ཀྱི་ཕྲ་མདུད་ཀྱིས་སྤྲས་
པ་ལ་གདུ་བུ་སྤེལ་མ་ཞེས་བྱ་བའོ། །གསེར་གྱི་ཕག་བུའི་དབུས་གྲོག་མོ་ལྟ་བུ་ཅན་གསེར་སྐུད་ཀྱིས་བརྒྱུས་པ་མཐའ་ནས་གཡེར་ཀ་བཏགས་པ་ཅན་དག་ལས་བྱས་པ་གསེར་གྱི་འོག་པག་གང་ཡིན་པ་དེ་ནི་ཕྱང་ཕྲུལ་ཅན་ནོ། །གསེར་ལས་བྱས་པའི་རྒྱན་ཟླ་གམ་གསུམ་པ་དག་
ལས་བྱས་པའི་འོག་པག་གང་ཡིན་པ་དེ་ནི་ལུ་གུ་རྒྱུད་དོ། །གསེར་ལས་བྱས་པའི་སྐུད་པ་ནི་རྒྱན་གསེར་སྐུད་ཅན་ནོ། །ལོངས་སྤྱོད་དེ་འདོད་པའི་ལོངས་སྤྱོད་དག་གོ། །བདག་ཀྱང་ཡུན་རིང་དུ་ལོན་པ་ནི་རྒས་པའི་གནས་སྐབས་ཐོབ་པ་ཉིད་ཀྱི་ཕྱིར་རོ། །དྲང་བ་ནི་ཐ་སྙད་དུ་བྱ་བ་ལ་
གསལ་པོར་བྱེད་པའོ། །གཡོ་ཀུན་དུ་སྤྱོད་པ་ནི་ལས་ལ་སོགས་པས་གྱ་གྱུར་སྤྱོད་པའོ། །ཤིན་ཏུ་དྲགས་པའི་མི་འཇིགས་པ་ནི་འཇིགས་པ་མེད་པ་ཡིན་མོད་ཀྱི་འདིར་བྱ་བ་མ་ཡིན་པ་ལས་ལོག་པ་ལ་རག་ལུས་པའི་རབ་ཏུ་བྱུང་བའི་མི་འཇིགས་པ་གང་ཡིན་པ་ནི་མི་

འཇིགས་པ་རྒྱ་ཆེ་བ་དང་། མཆོག་ཏུ་གྱུར་པ་ཡིན་ནོ། །སྤོབས་པ་དགེའོ་ཞེས་བྱ་བ་ནི་བདག་ཉིད་ཀྱི་ཤེས་རབ་སྐྱེས་པ་ནི་སྤོབས་པ་ཡིན་ལ། དེ་དགེ་བ་ནི་ཡོངས་སུ་དག་པ་ཡིན་ཏེ། རབ་ཏུ་བྱུང་བའི་ཡུལ་ཉིད་ཡིན་པའི་ཕྱིར་རོ། །ཕན་ཡོན་རྣམ་པ་ལྔ་ཞེས་བྱ་བ་ནི་ཡོན་ཏན་རྣམ་པ་ལྔའོ། །
རང་གི་དོན་མ་འདྲེས་པ་ཞེས་བྱ་བ་ལ་སོགས་པ་ལ། རབ་ཏུ་བྱུང་བ་མོས་པ་ནི་རབ་ཏུ་བྱུང་བར་འདོད་པའོ། །རང་གི་དོན་མ་འདྲེས་པ་ནི་སྐྱེས་བུའི་དོན་ཐུན་མོང་མ་ཡིན་པ་ཡིན་ཏེ། དོན་འདི་ནི་སྐྱེས་བུའི་དོན་ཁ་ཅིག་མང་པོ་དང་ལྷན་ཅིག་བསྒྲུབ་པར་བྱ་བ་ཐུན་མོང་ལ། མྱ་ངན་ལས་འདས་
པའི་མཚན་ཉིད་འདི་ནི་རང་གི་དོན་ཐུན་མོང་མ་ཡིན་པ་ཡིན་པས་ན་གཞན་འགའ་ཞིག་གིས་ཀྱང་བསྒྲུབ་པར་བྱ་བ་མ་ཡིན་གྱི། འོན་ཀྱང་གཅིག་པུ་ཁོ་ནས་ཡིན་ནོ། །དེ་ལ་དོན་འདི་ནི་མང་པོ་དང་ལྷན་ཅིག་བསྒྲུབས་པ་གང་ཡིན་པ་འདི་ནི་དོན་དམ་པར་སྐྱེས་བུའི་དོན་མ་ཡིན་གྱི་འོན་ཀྱང་རབ་ཏུ་
བྱུང་བ་ཐོབ་པའི་སྒོ་ནས་གཅིག་པུས་བསྒྲུབས་པ་གང་ཡིན་པ་དེ་ནི་ཐུན་མོང་མ་ཡིན་པ་དང་། དོན་དམ་པ་དང་། སྐྱེས་བུའི་དོན་ཡིན་ནོ། །རྗེས་སུ་ཐོབ་པར་འགྱུར་བ་ནི་རྙེད་པར་འགྱུར་བའོ། །བྲན་ཞེས་བྱ་བ་ནི་ཁྱིམ་དུ་སྐྱེས་པ་དང་། རྙེད་པ་དང་། ཉོས་པ་དང་། འཕྲོགས་
པ་དང་། ཁས་བླངས་པ་ཞེས་བྱ་བ་རྣམ་པ་ལྔའོ། །མངག་གཞུག་པ་ཞེས་བྱ་བ་ནི་ནོར་གྱིས་གསོས་ནས་མངག་གཞུག་བྱེད་པའོ། །བསྒོ་བ་ཞེས་བྱ་བ་ནི་ནང་འཁོར་དང་ཆོས་གྲོགས་ལ་སོགས་པ་ལ་བྱའོ། །གཞན་ལ་རག་ལུས་པ་ཞེས་བྱ་བ་ནི་རང་དབང་མེད་པ་ཞང་བློན་ལ་
སོགས་པའོ། །འདོད་དགུར་འགྲོར་མེད་པ་ནི་སྣ་ཆེན་པོ་ལ་གཏོགས་པ་སྟེ། གང་གི་ཕྱིར་དེ་ནི་དབང་ཕྱུག་གི་མཆོག་གི་ས་ལས་གཞན་དུ་འགྲོ་བའི་ནུས་པ་མེད་ཅིང་རྟག་ཏུ་སྟེན་པར་ཡང་མི་བྱེད་པ་དེའི་ཕྱིར་མངག་གཞུག་པ་ལ་སོགས་པ་བཞི་པོ་དེ་དག་ནི་ཕྱི་མ་ཕྱི་མ་ཞིང་ཁྱད་པར་
དུ་འཕགས་པར་རིག་པར་བྱའོ། །མཆོད་པ་ནི་སྦྱིན་པ་དང་བསྙེན་བཀུར་དང་ཕྱག་ལ་སོགས་པའོ། །བསྟོད་པ་ནི་ཡོན་ཏན་སྨོས་པའི་སྒོ་ནས་སོ། །བླ་ན་མེད་པ་ནི་གོང་ན་གཞན་མེད་པ་ཉིད་ཀྱི་ཕྱིར་རོ། །རྣལ་འབྱོར་གྱི་བདེ་བ་ནི་མ་ཐོབ་པ་ཐོབ་པ་དང་ཐོབ་པ་སོ་སོར་སྐྱོང་བའོ། །མྱ་ངན་

ལས་འདས་པ་འཁོར་བ་སྲིད་དུ་མ་ཐོབ་པ་རྙེད་ཅིང་ཐོབ་པ་ཕྱིར་མི་གཏོང་བའི་ཕྱིར་ཁྱད་པར་དུ་འཕགས་པའི་རྣལ་འབྱོར་བདེ་བར་བྱེད་པའོ། །མ་ཐོབ་པར་ཞེས་བྱ་བ་ནི་མྱ་ངན་ལས་འདས་པ་མ་རྙེད་པར་རོ། །བདག་ཅེས་བྱ་ནི་ཚུལ་ཁྲིམས་ཀྱི་ཡོན་ཏན་རྙེད་པ་ལས་ཉམས་
པར་མ་གྱུར་པའོ། །ཉན་ཐོས་ཞེས་བྱ་བ་ནི་འཕགས་པའི་གང་ཟག་བརྒྱད་དོ། །མཆོག་ནི་དྲང་སྲོང་དག་གོ། །ཡང་དག་པར་སོང་བ་ནི་བྱང་ཆུབ་སེམས་དཔའོ། །སྐྱེས་བུ་དམ་པ་རྣམས་ཀྱིས་ཞེས་བྱ་བ་ནི་སོ་སོའི་སྐྱེ་བོ་མཁས་པ་རྣམས་ཀྱིས་སོ། །འདིར་མྱ་ངན་ལས་འདས་པ་ཁོ་ན་རང་གི་དོན་
མ་འདྲེས་པ་མ་ཡིན་ནམ། དེ་བས་ན་ཅིའི་ཕྱིར་ཕན་ཡོན་དེ་གཉིས་སུ་བྱས་ཤེ་ན། བདེན་ཏེ་མྱ་ངན་ལས་འདས་པ་དེ་ཉིད་ནི་གཅིག་ཏུ་ཁྱིམ་པ་དང་འབྲེལ་པའི་སྒོ་ནས་ཐོབ་པར་ནུས་པ་ནི་མ་ཡིན་གྱི། འོན་ཀྱང་གཅིག་པུ་ཁོ་ནས་ཞེས་བསྟན་པའི་ཕྱིར་ཐ་དད་པར་བྱ་བ་ཡིན་ནོ། །རྣམ་པ་གཞན་
དུ་ན་རང་གི་དོན་མ་འདྲེས་པ་ཁོ་ནར་ཐམས་ཅད་འདུས་པའི་ཕྱིར་ལྔ་ཉིད་དུ་མི་འཐད་པར་འགྱུར་བ་དེ་བས་ན་མྱ་ངན་ལས་འདས་པ་ཐོབ་པ་ནི་ཕན་ཡོན་གཅིག་ཡིན་ལ། །དེ་ཐོབ་པའི་རྒྱུ་མཚན་གཅིག་པུ་ཉིད་རབ་ཏུ་བྱུང་བས་རྙེད་པ་ཞེས་བྱ་བ་ནི་ཕན་ཡོན་གཉིས་པ་ཡིན་ནོ། །གང་
ཞིག་བདག་ལ་མཆོད་པ་བྱེད་པ་དེ་དག་ལ་བདག་གིས་མཆོད་པ་ཞེས་བྱ་བ་ནི་གསུམ་པ་ཡིན་ལ། མངོན་པར་འདོད་པའི་མྱ་ངན་ལས་འདས་པ་མ་ཐོབ་ཀྱི་བར་དུ་མཐོ་རིས་ཐོབ་པ་ནི་བཞི་པ་ཡིན་ཞིང་། སྐྱེས་བུ་དམ་པས་རབ་ཏུ་བསྔགས་པའི་ལམ་བསྟེན་པ་ནི་འདིར་ཕན་ཡོན་ལྔ་པ་
ཡིན་ནོ། །བདག་ཉིད་ཀྱི་སྤྱོད་ཡུལ་ཞེས་བྱ་བ་ནི་རང་གི་སྤྱོད་ཡུལ་གྱི་སའོ། །ཡབ་བྱོན་པའི་ཡུལ་ཞེས་བྱ་བ་ནི་དགེ་སློང་གི་དངོས་པོ་རབ་ཏུ་སྐྱེ་བའི་གནས་ཡིན་པའི་ཕྱིར་ཏེ། བསོད་སྙོམས་ལེན་པས་དགེ་སློང་གི་དངོས་པོར་འགྱུར་བ་ཡིན་གྱི་ཟས་མང་པོ་ཡོངས་སུ་ཚོལ་བ་ལས་ནི་མ་ཡིན་ནོ། །
ཆུང་མ་རྙིང་པ་ཞེས་བྱ་བ་ནི་ཁྱིམ་པའི་གནས་སྐབས་ན་ལོག་པར་གཡེམ་པའི་ལས་ལྷན་ཅིག་བྱེད་པ་ཅན་བྱ་བ་མ་ཡིན་པ་ཐམས་ཅད་ལ་སེམས་འཇུག་པ་དེའི་ཕྱིར། ཁྱོད་ཀྱིས་སེམས་སྲུངས་ཤིག་ཅེས་སྨོས་པ་ཡིན་ནོ། །རེག་པའི་དུག་ཅེས་བྱ་བ་ནི་རེག་པ་ཙམ་གྱིས་འདོད་ཆགས་ཀྱི་དུག་ལྡང་

བར་བྱེད་པའི་ཕྱིར་རོ། །རྒྱགས་པའི་མུན་པ་ཞེས་བྱ་བ་ནི་རྒྱགས་པས་རྣམ་པར་རྨོངས་པར་གྱུར་པའོ། །སྲེད་པའི་མུན་པ་ཞེས་བྱ་བ་ནི་སྲེད་པས་རྨོངས་པར་གྱུར་པའོ། །མགོ་སྤྲ་ཐོག་གི་རྣམ་པ་ལྟ་བུ་ཞེས་བྱ་བ་ནི་སྤྲ་བའི་མེ་ཏོག་བཞིན་དུ་མགོ་དཀར་པོར་གྱུར་པའོ། །རྒན་ཞུགས་ཞེས་བྱ་བ་ནི་ན་ཚོད་རྒས་
ནས་རབ་ཏུ་བྱུང་བའོ། །ཕན་པ་བྱས་པ་ཤེས་པར་གྱུར་པ་གང་ཡིན་པ་དེ་ནི་བྱས་པ་གཟོ་བའོ། །བྱས་པ་ཤེས་པ་ཞེས་བྱ་བ་ནི་འདིས་བདག་ལ་ཕན་པ་ཆེན་པོ་བྱས་སོ་ཞེས་གཞན་ལ་སྒྲོག་པར་བྱེད་པའོ། །སྦྱོར་བ་ནི་རབ་ཏུ་སྦྱོར་བ་དང་བྱ་བ་སྟེ། དེས་ཉམས་པ་ནི་རྒུད་པར་གྱུར་པའོ། །དེ་བས་ན་འདི་ལྟར་དགེ་སློང་
དག་གིས་མི་ཚངས་པར་སྤྱོད་པ་བསྟེན་པར་བྱ་བ་མ་ཡིན་ནོ་ཞེས་མི་ཤེས་པ་དེའི་ཕྱིར་བསམ་པ་ནི་མ་ཉམས་པའོ། །ཕས་ཕམ་པ་བཞི་ནི་མི་ཚངས་པར་སྤྱོད་པ་ལས་ལྡོག་པ་ལ་སོགས་བདག་ལས་སོ། །བདུད་རིས་ནི་བདུད་ཀྱི་སྡེ་ཡིན་ལ་གཙེས་པ་ནི་གནོད་པ་བྱས་པས་སོ། །ཚངས་པ་ནི་མྱ་ངན་ལས་
འདས་པ་ཡིན་ལ། དེའི་རྒྱུ་མཚན་དུ་སྤྱོད་པ་ནི་ཚངས་པར་སྤྱོད་པ་སྟེ། དེ་དང་འགལ་བ་ནི་མི་ཚངས་པར་སྤྱོད་པའོ། །བྱ་བ་མ་ཡིན་པ་ཐམས་ཅད་ཚངས་པར་སྤྱོད་པ་མ་ཡིན་པ་དེའི་ཕྱིར་རྒྱ་རྣ་རུ་ཞེས་བྱ་བ་སྨོས་ཏེ། སྐྱེས་པ་དང་བུད་མེད་ཀྱི་ཀུན་དུ་སྦྱོར་བ་ནི་འཁྲིག་པ་ཡིན་ལ། དེ་འབྱུང་བའི་
ལས་ནི་རྒྱ་རྣ་རུའོ། །སྐལ་བ་ཡོད་ན་ཞེས་བྱ་བ་ནི་འཕགས་པའི་ལམ་སྐྱེར་རུང་བའོ། །ངོ་བཞིན་གནག་ཅིང་མཆི་མ་དང་བཅས་པ་བཞིན་དུ་ཞེས་བྱ་བ་ནི་ཁ་གདོང་ངན་ཅིང་མཆི་མས་ཁྱབ་བཞིན་དུའོ། །བྱ་བ་མ་ཡིན་པ་བྱེད་པ་ནི་བྱ་བ་མ་ཡིན་པ་སྤྱོད་པའོ། །རང་བཞིན་ཏེ་དགེ་སློང་གི་བྱ་བ་ལ་
གནས་པས་ན་རང་བཞིན་དུ་གནས་པའོ། །གསོང་པོར་སྨྲ་བ་ནི་ལུས་ཀྱིས་ཕྱག་བྱ་བ་མ་གཏོགས་པ་ཚིག་གིས་ཕྱག་བྱེད་པའོ། །ཕྱག་བྱེད་པ་ནི་ཡན་ལག་ལྔས་གཏུགས་པའམ། བྱིན་པ་བཅིང་བའོ། །ཐལ་མོ་སྦྱར་བ་ཞེས་བྱ་བ་ནི་ལག་པ་གཉིས་ཐལ་མོ་སྦྱར་བ་སྔོན་དུ་སོང་
བ་ཅན་གུས་པའོ། །འདུད་པའི་ལས་ནི་ལུས་ཀྱིས་ཕྱག་བྱས་པ་སྔོན་དུ་སོང་བ་ཅན་ནོ། །བསུ་བ་ཞེས་བྱ་བ་ནི་གོམ་པའི་རིམ་པ་གཅིག་བསྣུར་བའི་སྒོ་ནས་སོ། །མཉན་པ་དང་ལུང་ནོད་པ་ཉེ་བར་གཞག་པར་མི་བྱའོ། །གཞན་རབ་ཏུ་འབྱིན་པ་དང་དགེ་ཚུལ་ལ་གནས་སྦྱིན་པའི་སྒོ་ནས་ཀྱང་བསྡུ་

བར་མི་བྱའོ། །ཚུལ་ཁྲིམས་ཀྱི་རྒུད་པ་ནི་ཚུལ་ཁྲིམས་ཉམས་པའོ། །ལྟ་བས་རྒུད་པ་ནི་ལྟ་བ་ཕྱིན་ཅི་ལོག་པ་དང་སྨད་པ་ཅན་ནོ། །ཆོ་གས་རྒུད་པ་ནི་སྤྱོད་ཡུལ་མ་ཡིན་པར་འགྲོ་བ་དང་འོང་བ་ལ་སོགས་པའོ། །འཚོ་བས་རྒུད་པ་ནི་ཁ་གསག་དང་། ཐོབ་ཀྱིས་འཇལ་བ་ལ་སོགས་
པ་ལོག་པའི་འཚོ་བས་སོ། །ལྕི་བ་ཤིན་ཏུ་འཇམ་པོས་བྱུགས་ཤིག་ཅེས་བྱ་བ་ནི་ལྕི་བ་སར་པ་བཟང་པོ་དང་ལྡན་པས་བསྒྲུབ་པའོ། །དུས་ཤེས་པ་ཞེས་བྱ་བ་ནི་ཟས་ཀྱི་དུས་སོ། །མཐུ་ནི་ནུས་པའོ། །ཟས་བཤམས་པ་འཇོག་པར་བྱེད་པའི་གནས་ལ་ཟས་ཀྱི་གནས་ཞེས་བྱའོ། །དུས་ཤེས་པར་
བྱས་ལ་ཞེས་བྱ་བ་ནི་ཉི་མ་ནུབ་པའི་དུས་ལ་ཚོགས་པའི་དུས་སོ། །འདུག་ཅིང་ཞེས་བྱ་བ་ནི་བྱེད་བཞིན་དུ་ཞེས་བྱ་བའི་ཐ་ཚིག་གོ། །རྒན་རིམས་ཇི་ལྟ་བ་བཞིན་དུ་ཞེས་བྱ་བ་ནི་བསྙེན་པར་རྫོགས་པའི་རིམ་པ་བཞིན་དུའོ། །སོས་སམ་ཞེས་བྱ་བ་ནི་ཁྱེད་ཀྱི་ཁམས་སྙོམས་སམ་ཞེས་བྱ་བའོ། །
དུ་བའི་རེང་བུས་ཞེས་བྱ་བ་ནི་དུ་བ་སྐྱེད་པར་བྱེད་པའི་ཐབས་ཡང་དག་པར་སྦྱར་བའོ། །རྫེའུ་ཁ་སྦྱར་ཞེས་བྱ་བ་ནི་རྫེའུ་ཁ་སྦྱར་དུ་བྱས་པས་སོ། །གཅེའུ་ཞེས་བྱ་བ་ནི་ལྕགས་ལས་བྱས་པ་ཅན་དུ་བ་རྔུབ་པའི་ཐབས་སུ་གྱུར་པའོ། །རྣོ་བ་ནི་མཚོན་ལྟར་རོ། །སྣོད་ཅེས་བྱ་བ་ནི་དེ་འཇོག་པར་བྱེད་པའི་རྫས་
སོ། །རྒྱལ་སྲིད་ལ་འཁོར་ལོས་འཇུག་པའི་ངང་ཚུལ་ཅན་གྱི་རང་བཞིན་གང་ཡིན་པ་ནི་འཁོར་ལོས་སྒྱུར་བ་ཡིན་ལ། དེའི་གསོ་བ་ནི་ནད་ཞི་བར་བྱེད་པའི་ཐབས་སུ་གྱུར་པའོ། །གང་གིས་སྣ་སྨན་གྱི་ལས་བྱེད་པ་དེ་ནི་བླུགས་སྤྱོད་དོ། །བརྣངས་པ་ནི་ཟོས་པའི་ཁམ་མགྲིན་པའི་ཕྱོགས་སུ་ཐོགས་པའོ། །
གང་གིས་ཁམ་ཐོགས་པ་གལ་ཏེ་བསལ་བར་བྱ་བའི་འཕུལ་བའི་སྤྱད་ཀྱིས་བཏུང་བར་བྱེད་པ་ནི་འཕུལ་བའི་བཏུང་ཕོར་རོ། །ཁྱོགས་ཞེས་བྱ་བ་ནི་རྟ་གཡག་རྔའི་ཚོམ་བུས་སྦྱངས་པ་དང་། དྲིལ་བུ་བཏགས་པའི་ཁྱོགས་བྱས་ནས་སོ། །འཇིག་རྟེན་ལ་བུ་བཞིན་དུ་སེམས་ཤིང་ཞེས་བྱ་བ་ནི་ཇི་ལྟར་
འགའ་ཞིག་བུའི་ནང་དུ་འགྲོ་བར་གྱུར་པ་ན་གུས་པར་མི་འགྱུར་བ་དེ་བཞིན་དུ་དེས་གུས་པར་འགྱུར་ཞིང་། དེ་བཞིན་དུ་དེ་དག་ཀྱང་གུས་པར་མི་འགྱུར་བ་ལྟ་བུའོ། །ནགས་དང་ཐག་ཉེ་བའི་ས་ཕྱོགས་ནི་ཤིང་རྩའོ། །བཤང་བ་ཀུན་དུ་སྐྱེས་པས་ན་བཤང་བ་བྲོ་བར་གྱུར་པའོ། །གཅི་བ་ཀུན་དུ་སྐྱེས་པས་ན་

གཅི་བ་བྲོ་བར་གྱུར་པ་སྟེ། གཅི་བའི་དབང་དུ་གྱུར་པ་གང་ཡིན་པ་དེ་ལ་འདི་སྐད་ཅེས་བྱའོ། །ཚེར་མས་ཉེ་བར་མཚོན་པ་ཚེར་མ་དང་ལྡན་པས་ན་ཚེར་མ་ཅན་ནོ། །བཤང་བ་དང་གཅི་བའི་སྐྱབས་ཀྱིས་ཞེས་བྱ་བ་ནི་ཁང་པའི་རྣམ་པ་ལྟ་བུར་རོ། །གདུང་རིངས་ནི་ཤིང་གི་གདུང་མ་ཆེན་པོའོ། །
བུ་གུ་གཏོད་པ་ནི་ཕྱིར་ཕྱོགས་པར་རོ། །གཙང་སྦྲ་ཐ་དད་པ་ཞེས་བྱ་བ་ནི་ཕན་ཚུན་གཙང་སྦྲ་ཐ་དད་པ་དེའི་ཕྱིར་ཁོ་བོ་རིལ་བས་ཆུ་བཏུང་བར་མི་བྱ་བའོ། །སྣོད་དབེན་པར་བྲུག་པ་ལ་སོགས་པའི་བྱ་བ་ལ་ལྷག་པར་སྦྱར་བས་ན་སྣོད་སྤྱད་འབྲུག་པའོ། །ཆུ་ཁང་ཞེས་བྱ་བ་ནི་ཆུ་གཞག་པར་བྱ་བའི་དོན་གྱི་
གནས་སོ། །སོ་ཕག་གི་ཕག་གུ་སོ་བཏང་བ་ཡིན་པར་རིག་པར་བྱའོ། །གཞི་ཞེས་བྱ་བ་ནི་བུམ་པ་མི་གཡོ་ཞིང་བརྟན་པར་གནས་པས་སྒྲུབ་པར་བྱེད་པའོ། །ས་བླའི་གནོད་སྦྱིན་རྣམས་ཀྱིས་ཞེས་བྱ་བ་ནི་ས་ལ་གནས་པར་གྱུར་པའོ། །སྒྲ་འབྱིན་ཅིང་ཞེས་བྱ་བ་ནི་སྒྲ་ཅུང་ཟད་འདོན་པར་བྱེད་པའོ། །
དབྱངས་རྗེས་སུ་སྒྲོགས་པ་ཞེས་བྱ་བ་ནི་ཕ་རོལ་པོའི་རྣ་བའི་རྣམ་པར་ཤེས་པ་སྐྱེད་པར་བྱེད་པའི་སྒྲ་མཐོན་པོ་སྒྲོགས་པའོ། །བསྐལ་པར་བཞུགས་ཞེས་བྱ་བ་ནི་བསྐལ་པ་ཆེན་པོར་རོ། །བར་སྣང་ལ་རྒྱུ་བ་རྣམས་ནི་ནམ་མཁའ་ལ་གནས་པའོ། །དེ་ནས་སྐད་ཅིག་ཅེས་བྱ་བ་ནི་བུད་མེད་རས་
བལ་གྱི་འདའ་བ་ལས་མྱུར་དུ་འཁལ་བའི་དཔུང་པ་བརྒྱང་བའི་མཐར་ཐུག་པའི་དུས་དེ་ཙམ་ལ་འདིར་སྐད་ཅིག་མར་འདོད་དེ་སྐད་ཅིག་མ་དེས་མྱུར་དུ་སོང་ནས་སོ། །ཐང་ཅིག་ཅེས་བྱ་བ་ནི་ཙ་ཤ་ཀ་གཉིས་ལ་གྲགས་པ་ཡིན་ཏེ་དེའི་ནང་དུ་སོང་ནས་སོ། །ཡུད་ཙམ་ཞེས་བྱ་བ་ནི་ཆུ་ཚོད་གཉིས་
ལ་གྲགས་པ་ཡིན་ཏེ་དེས་དལ་གྱིས་སོང་ནས་སོ། །དེ་ནས་སྐད་ཅིག་ཐང་ཅིག་ཡུད་ཙམ་གྱི་ཞེས་བྱ་བ་ནི་འདིར་སྐད་ཅིག་མ་ལ་སོགས་པ་འདུས་པའི་དུས་གང་ཡིན་པ་དེ་ལ་དལ་གྱིས་སོང་ནས་ཚངས་པའི་འཇིག་རྟེན་གྱི་བར་དུ་སྒྲ་བྱུང་བར་གྱུར་པའོ། །མང་པོ་རྣམས་ལ་བར་ཆད་
བྱས་ཞེས་བྱ་བ་ནི་སྒྲ་དེ་ཐོས་པར་གྱུར་པས་ཡིད་རྣམ་པར་འཁྲུགས་ཏེ་དམ་པའི་ཆོས་ཉན་པའི་བར་ཆད་སྐྱེས་པར་གྱུར་པའམ། ཡང་ན་བསྐལ་པར་བཞུགས་ཤིག་ཅེས་ཐོས་པ་ལས་དེ་དག་ལྟོས་པ་དང་བཅས་པ་སྐྱེ་བར་འགྱུར་ཏེ། ཡུལ་འདི་ལ་བཅོམ་ལྡན་འདས་བསྐལ་

པར་བཞུགས་པ་དེའི་ཕྱིར་ཐར་པ་དང་། རྗེས་སུ་མཐུན་པའི་བྱ་བ་བྱེད་པའི་སྤྲོ་བ་ཆུང་བ་སྐྱེ་བར་འགྱུར་ཞིང་ཕྱིས་བྱའོ་སྙམ་པས་དེ་དག་གི་བསོད་ནམས་ཆེན་པོའི་བར་ཆད་དུ་འགྱུར་རོ། །མཐུན་མི་ཕྱེད་ཅེས་བྱ་བ་ལ་སོགས་པ་ལ་ཆོས་དང་ཟང་ཟིང་གི་ལོངས་སྤྱོད་དམ་ཕན་ཚུན་
མཐུན་པ་རྗེས་སུ་སྦྱིན་པས་ན་མཐུན་མི་ཕྱེད་པའོ། །དགེ་བའི་ཕྱོགས་འཕེལ་བ་ལ་རབ་ཏུ་དགའ་བས་ན་ཀུན་དུ་དགའ་བའོ། །ཕན་ཚུན་ལྟ་བར་འདོད་པས་ལོག་པའི་རྩོད་པའི་ཚོགས་སྤངས་པས་ན་མི་རྩོད་པའོ། །སེམས་མཉམ་པར་མ་བཞག་པ་ལས་རྩེ་གཅིག་པའི་མཉམ་པར་བཞག་
པ་ཡོངས་སུ་སྐྱོང་བར་བྱེད་པས་ན་མཆོག་གཅིག་པའོ། །སོ་སོར་ཐར་པ་ཐ་མི་དད་པར་འདོན་པས་དང་། ཕན་ཚུན་ཀློག་པར་བྱ་བ་ཉིད་ཡིན་པས་ན་འདོན་པ་གཅིག་པའོ། །གཞན་གྱི་དྲིང་མི་འཇོག་པ་ཉིད་ཀྱིས་ན་ཆུ་དང་འོ་མ་གཅིག་ཏུ་འདྲེས་པའོ། །སྟོན་པ་ནི་བཅོམ་ལྡན་འདས་
ཡིན་ལ། བསྟན་པ་ནི་བཀའ་ཡིན་ནོ། །གསལ་བར་གྱུར་པ་ནི་རབ་ཏུ་གསལ་བར་གྱུར་པའོ། །དེ་ལ་བལྟས་པ་ཁོ་ནས་དེ་བཞིན་གཤེགས་པ་ལ་ཕྱག་བྱས་ན་ལེགས་པར་ཕྱག་བྱས་པ་ཡིན་ནོ། །སྲུ་ནི་ཡུམ་གྱི་མཆེད་ཟླའོ། །བརྩོན་འགྲུས་བརྩམས་ཤིང་ཞེས་བྱ་བ་ནི་བརྩོན་འགྲུས་དེ་ལ་
གཞོལ་བར་གྱུར་པའོ། །བདག་རབ་འཇོག་ཅེས་བྱ་བ་ནི་སེམས་དགེ་བའི་ཆོས་བསྒོམ་པ་ལ་སོ་སོར་འཇོག་པའོ། །བརྟན་པ་ཕ་རོལ་གནོན་པ་ནི་ཐམས་ཅད་དུ་དགེ་བའི་བྱ་བ་ལ་བརྟན་པའོ། །ལུས་འཛིན་པའི་ནུས་པ་དང་ལྡན་པའི་ཡོངས་སུ་མྱ་ངན་ལས་འདས་པ་བདག་ཉིད་འདོད་
པས་ན་བརྟུན་ཏེ་མྱ་ངན་ལས་འདས་པ་འཚལ་བའམ། གནས་པ་ཉིད་མི་ནུས་པས་ཡོངས་སུ་མྱ་ངན་ལས་འདས་པར་འཚལ་ལོ་ཞེས་བྱ་བའི་བར་དུའོ། །ལུས་འཛིན་པར་ནུས་པ་དེ་དག་གིས་ཀྱང་མྱ་ངན་ལས་འདས་པའི་ཡོན་ཏན་འཁོར་བའི་ཉེས་དམིགས་མཐོང་བའི་ཕྱིར་མྱ་ངན་
ལས་འདའ་བར་འཚལ་བའོ། །བཅོམ་ལྡན་འདས་དགྱེས་བཞིན་དུ་མྱ་ངན་ལས་འདའ་བའི་ཕྱིར་སྨྲའམ་ཞེས་བྱ་བ་ལ་སོགས་པ་ནི་ལན་གཉིས་བརྗོད་པའོ། །དེ་ལྟ་བུའི་ཆོས་ཅན་ཡིན་ན་ཞེས་བྱ་བ་ནི་རྣམ་པར་མཐོང་བའི་ཆོས་ཅན་ནོ། །མངོན་པར་བསྟོད་པ་ནི་སེམས་ཀྱིས་སོ། །

རྗེས་སུ་ཡི་རང་བ་ནི་ངག་གིས་སོ། །རྣམ་པར་མ་འཁྲུལ་པ་ཞེས་བྱ་བ་ནི་བསམ་པ་དང་བག་ལ་ཉལ་དང་། ཁམས་དང་རང་བཞིན་མ་འཁྲུལ་པའི་སྒོ་ནས་སོ། །ལུས་ལས་འོད་ཟེར་ངེས་པར་འབྱུང་བའི་རྒྱུ་ཅན་གྱི་ཏིང་ངེ་འཛིན་ཏེ། གཟི་བརྗིད་ཀྱི་རྒྱུར་གྱུར་པ་ལའོ། །བཙོད་
ཀྱི་མདོག་ཅེས་བྱ་བ་ནི་འོད་ཟེར་གྱི་ཁ་དོག་བཙོད་ཀྱི་རྣམ་པ་ལྟ་བུའོ། །ཟུང་ནི་ཕྲུགས་ལ་བྱ་བའོ། །བསམ་གཏན་དང་པོ་ལ་བརྟེན་ནས་ཞེས་བྱ་བ་ནི་བསམ་གཏན་དང་པོའི་སེམས་ཀྱིས་དེ་མ་ཐག་སོ་སོར་ཡོངས་སུ་མྱ་ངན་ལས་འདས་པའོ། །ལུས་ལ་མཆོད་པ་ལྷག་པར་བྱ་བ་ཞེས་བྱ་བ་ནི་
ལུས་ལ་མཆོད་པའི་རྒྱུ་ཅན་ནོ། །ཡིད་བརྟན་པ་དྲང་སྲོང་བྱིན་དང་རྙིང་པ་ཞེས་བྱ་བ་ནི་གྲོང་དང་རྒྱལ་པོའི་ཕོ་བྲང་དུ་མཆོག་ཏུ་ཡིད་ཆེས་པ་གང་ཡིན་པ་དེ་ལ་ཡིད་བརྟན་པ་ཞེས་བྱའོ། །དགེ་སློང་དག་ལྟོས་ཤིག་ཅེས་བྱ་བ་ནི་སྐྱེ་དགུའི་བདག་མོ་ཆེན་མོའི་ལུས་ལ་སོགས་པ་ལའོ། །ཅིའི་
ཕྱིར་བཅོམ་ལྡན་འདས་ཀྱིས་དགེ་སློང་རྣམས་ལ་ཡང་དེ་དག་གི་ལུས་སྟོན་པར་མཛད་ཅེ་ན། འདིར་སྨྲས་པ། འཁོར་བའི་ཉེས་པ་རབ་ཏུ་བསྟན་པའི་ཕྱིར་དང་། མྱ་ངན་ལས་འདས་པའི་ཡོན་ཏན་ཐུན་མོང་མ་ཡིན་པ་བསྟན་པའི་ཕྱིར་དང་། བཅོམ་ལྡན་འདས་ཀྱིས་དེ་དག་ཐམས་ཅད་
ནི་དབང་དུ་གྱུར་པ་བཞིན་དུ་ལུས་འཛིན་པའི་ནུས་པ་དང་ལྡན་ཞིང་ལུས་རྒས་པས་ཉམས་པ་མེད་པ་དེ། གང་གི་ཕྱིར་འདི་དག་གི་ལུས་ནི་གཞོན་ནུ་མ་ལོ་བཅུ་དྲུག་ལོན་པའི་ལུས་ཀྱི་གནས་སྐབས་དང་མཚུངས་པ་དེའི་ཕྱིར་འཁོར་བ་ལ་ཆེར་སྐྱོ་བར་བྱ་བ་དང་། མྱ་ངན་ལས་འདས་
པའི་ཕན་ཡོན་ཆེན་པོ་མཐོང་བ་ལས་མངོན་པར་འདོད་པ་སྤེལ་བར་བྱ་བའི་ཕྱིར་བསྟན་པ་ཡིན་ནོ། །མི་རྟག་པ་དང་ལྡན་པ་ཞེས་བྱ་བ་ནི་འདུ་བྱེད་ཐམས་ཅད་མི་རྟག་པ་ཉིད་དང་། ཡིད་བརྟན་དུ་མེད་པ་ཉིད་དང་། ཆོས་ཐམས་ཅད་ནི་རྣམ་པར་འགྱུར་བའོ་ཞེས་བྱ་བ་ལ་སོགས་
པའོ། །ས་བླངས་པ་ནི་ཡོངས་སུ་བསྲུང་བར་བྱ་བའི་དོན་དུ་མགོ་བོའི་ཕྱོགས་སུ་སའི་ཆང་པས་བསྐོར་བའོ། །གོས་སྔོན་པོ་ཅན་ཞེས་བྱ་བ་ནི་ཡོངས་སུ་བགོ་བར་བྱ་བ་སྔོ་བ་སྟེ། ཕྱག་ན་རྡོ་རྗེའི་འཁོར་ཉེ་གནས་རྟག་ཏུ་ཐག་ཉེ་བ་གནས་པ་ལྔ་བརྒྱ་དག་གིས་སོ། །མདངས་ཞེས་

བྱ་བ་ནི་སྙིང་གི་ཕྱོགས་ན་གནས་པ་སྲོག་འཛིན་པར་བྱེད་པའི་རྫས་ཀྱི་བྱེ་བྲག་ཡིན་ལ། དེ་འཕྲོགས་པ་ནི་གནས་ནས་བསྐྱོད་པ་ཡིན་ཏེ། དེ་བསྐྱོད་པ་ནི་སྐྱེ་བོ་ཡུན་རིང་དུ་གནས་པར་མི་འགྱུར་རོ། །འཚོ་བ་ལ་ཆགས་པ་ནི་འཚོ་བའི་བསམ་པ་ཅན་ཞེས་བྱ་བའི་ཐ་ཚིག་
གོ། །ངེས་པར་ཞེས་བྱ་བ་ནི་ངེས་པར་བྱེད་པས་ན་ངེས་པ་སྟེ། མཐོང་བའི་ལམ་ཡིན་ཏེ། ཡང་དག་པར་ངེས་པའི་ཕུང་པོ་ངེས་པར་བྱེད་པའི་ཕྱིར་རོ། །དེ་རྩོམ་པ་ནི་སྐྱེད་པར་བྱེད་པ་ཡིན་ཏེ། རྩོམ་པ་དེ་དང་ལྡན་པའོ། །ཁུ་བ་ཐམས་ཅད་ནི་ཉམས་ལ་ཕན་པར་འགྱུར་རོ་ཞེས་བྱ་བ་ལ། ཉམས་ནི་འདིར་
སྟོབས་ཀྱི་རྣམ་གྲངས་སོ། །བརྐོས་ཏེ་ཞེས་བྱ་བ་ནི་ཕུར་པ་འདེབས་པ་ལྟར་རྐོ་བར་བྱེད་པ་ནའོ། །ལག་ཟུངས་བཅུག་ན་འཁྲུལ་ཞིང་ཞེས་བྱ་བ་ནི་ལག་ཟུངས་འཛིན་པར་བྱེད་པའི་གཟེར་བུས་སྒོའི་སྒོ་གླེགས་ལ་ཀླན་པ་ལག་པས་བསྐྱོད་པའི་སྒོ་ནས་ཏེ་ཀླན་པ་ཉིད་དུ་འདོད་པའོ། །
གསོར་བུ་ཞེས་བྱ་བ་ནི་གསོར་དང་འདྲ་བའི་ཤིང་གི་ཡུ་བ་ཅན་ཏེ་སྲུབ་པའི་ཐབས་ཡིན་ཏེ། དེས་བུག་པ་གཏོད་ནས་ལག་ཟུངས་དང་འབྲེལ་པའི་ལྕགས་ཀྱི་གཟེར་བུ་མེ་ལ་བསྲོས་ནས་བུག་པར་གཞུག་པར་བྱའོ། །རླུང་གིས་གནོད་པར་གྱུར་ཏེ། ཞེས་བྱ་བ་ནི་རླུང་
གི་ནད་ཀྱིས་སོ། །འདིར་ཚད་ཆེན་པོའི་ནལ་ཟེལ་སྨན་གྱི་ནལ་ཟེར་ཤེས་པར་བྱ་སྟེ། ཆུ་བསྲོར་ཡང་བཏུབ་པའོ། །ལྕགས་ཀྱི་གཟར་བུ་ནི་ལྕགས་ཀྱི་གཟར་བུ་ཆེན་པོའོ། །ཤིང་གི་ཐལ་ཕྱགས་ཞེས་བྱ་བ་ནི་གཎྜཱིའི་ཐེའུ་འི་རྣམ་པ་ལྟ་བུར་ཡུ་བ་རིང་པོ་ཅན་དུ་བྱས་པ་ཡིན་ནོ། །ཁྲི་
ནི་འདིར་ཁྲིའུ་ཆུང་ངུ་ལ་བྱའོ། །སྔས་ནང་ཚངས་ཅན་ནི་འདིར་ནང་ཚངས་ཀྱི་དབྱིབས་ཆེ་བ་ཡིན་ཏེ། གང་གི་ཚེ་ཉལ་བའི་དུས་ན་རྒྱབ་ཕྱོགས་སུ་གཞག་པ་དེ་ལ་བྱའོ། །གཟོང་བུ་ནི་ཤིང་མཁན་གྱི་རྫས་ཡིན་ཏེ། གང་གིས་ཤིང་གཅོད་པ་དང་། འབིགས་པར་བྱེད་པའོ། །སྟེའུ་
ནི་ཤིང་མཁན་གྱིས་འཇོག་པའི་ཐབས་སུ་གྱུར་པའོ། །སྐས་ནི་གཙུག་ལག་ཁང་ལ་སོགས་པ་བརྩམས་པའི་ལས་སར་གྱི་གྲོགས་སུ་གྱུར་པའོ། །སྐྱེས་བུ་ཆེན་པོའི་མཚན་སུམ་ཅུ་དང་ལྡན་པ་ཞེས་བྱ་བ་ནི་མདོམས་ཀྱི་སྦ་བ་སྦུབས་སུ་ནུབ་པ་དང་། ལྗགས་རིང་ལ་སྲབ་པ་དག་མ་

གཏོགས་པའོ། །ཤིན་ཏུ་ཆགས་ཞེས་བྱ་བ་ལ་སོགས་པ་ལ་འདོད་པས་འདོད་ཆགས་དགའ་མགུར་སྤྱོད་པས་ན་ཆགས་པ་ཉིད་དོ། །ཉེ་བར་འགྲོ་བར་འདུན་པས་ན་ཞེན་པ་ཉིད་དོ། །ཡན་ལག་འཛིན་པར་འདུན་པས་ན་འཆུམས་པའོ། །གཉིས་ཀྱིས་གཉིས་སྦྱོར་བར་འདུན་པས་ན་
མདུད་པའོ། །སེམས་རྣམ་པར་རྨོངས་པའམ། ལུས་རྣམ་པར་འགྱུར་བས་ན་རྒྱལ་བ་ཉིད་དོ། །འཁྲིག་པའི་བྱ་བ་ཡོངས་སུ་རྫོགས་ནས་ཀྱང་དེ་ལ་ཞེན་པས་ན་ལྷག་པར་ཆགས་པ་ཉིད་དོ། །ལྷག་པར་ཆགས་པར་གྱུར་པ་ནི། གཞན་དག་དེ་ལ་ཉེ་བར་སྤྱོད་པ་བཟློག་པར་
འདོད་པའོ། །འོད་ཟེར་ནི་འོད་ལ་བྱའོ། །མཚན་མ་ནི་བདེ་བ་དང་། མཛེས་པ་ཕུན་སུམ་ཚོགས་པའི་དོན་དུ་དཔྲལ་བའི་ཕྱོགས་སུ་ཐིག་ལེ་བྱས་པའོ། །གསོལ་བར་མ་ནུས་པའི་ཞེས་བྱ་བ་ནི་དཀའ་བར་དེའི་ཞབས་དྲུང་དུ་ཕྱིན་པར་འགྱུར་བའི་ཕྱིར་རོ། །མ་སྤོབས་པ་
ཞེས་བྱ་བ་ནི་ཉེ་བར་ཕྱིན་ནས་ཞུ་བའི་སྐབས་དཀའ་བ་ཉིད་ཀྱི་ཕྱིར་རོ། །སྟོབས་ཀྱིས་འཁོར་ལོས་སྒྱུར་བ་དང་འདྲ་བར་ཡན་ལག་བཞི་པོ་དེ་ཉིད་ཀྱིས་རྒྱལ་སྲིད་ལ་དབང་བསྒྱུར་བའི་སྟོབས་ཀྱིས་འཁོར་ལོས་སྒྱུར་བའོ། །མཁྲིག་མ་ཞེས་བྱ་བ་ནི་གདུ་བུ་འདོགས་པའི་ཕྱོགས་སོ། །
འདིར་ཁ་ཅིག་ན་རེ་གལ་ཏེ་དགའ་བོའི་དུས་ཐམས་ཅད་དུ་འབྲོས་པའི་བསམ་པ་དང་ལྡན་པར་གྱུར་པ་ཡིན་ན་དེ་ལ་ཇི་ལྟར་སྡོམ་པ་སྐྱེ་བར་འགྱུར། སྡོམ་པ་སྐྱེ་བ་བརྟན་པ་དང་དགེ་བའི་སེམས་ལ་རབ་ཏུ་རག་ལུས་པ་ཉིད་ཀྱི་ཕྱིར་རོ་ཞེས་རྗོད་པར་བྱེད་དེ། དེ་ནི་འདིར་བླ་མའི་ལུང་ལས་དགའ་
བོ་ནི་ཤིན་ཏུ་འདོད་ཆགས་དྲག་པས་སེམས་བརྟན་པ་དང་། །སེམས་ཉོན་མོངས་པ་ཅན་ཡིན་ཏེ། བཅོམ་ལྡན་འདས་ཀྱི་ཞབས་དྲུང་དང་དགེ་འདུན་དང་ཐག་ཉེ་བར་འདུག་པ་ན་དེའི་སེམས་འདོད་ཆགས་དང་། ཀུན་ནས་ལྡན་པ་ལྡོག་པ་དང་དགེ་བའི་སེམས་མངོན་སུམ་དུ་གྱུར་པ་ཡིན་པས།
དགེ་བའི་སེམས་དང་སྡོམ་པ་སྐྱེ་བ་ཞེས་བྱ་བ་འདི་ལ་འགལ་བ་ཡོད་པ་མ་ཡིན་ནོ། །གཙུག་ལག་ཁང་ཡོངས་སུ་ཉམས་པ་གང་ཡིན་པ་དེ་ཡང་ཞེས་བྱ་བ་ནི་དགེ་སློང་འགའ་ཞིག་གིས་ཀྱང་གཙུག་ལག་ཁང་གི་ཀུན་དུ་སྤྱོད་པའི་ལས། མ་བྱས་པ་གང་ཡིན་པ་དེ་དག་ཐམས་ཅད་ཁྱོད་ཀྱིས་

གྱིས་ཤིག་པའོ། །སྐྱོ་བ་ནི་དུབ་པས་སྐྱོ་བའོ། །ལམ་ཕྲན་ནི་གསེབ་ལམ་མོ། །ཁ་དོག་དང་ལྡན་པ་ཞེས་བྱ་བ་ནི་ཁ་དོག་ཕུན་སུམ་ཚོགས་པ་ཡོངས་སུ་རྫོགས་པར་གྱུར་པའོ། །དུ་རུ་སྐའི་འབྲུ་མར་ནི་དུ་རུ་སྐའི་དྲིའི་རྫས་ཀྱིས་བསྒོས་པའི་འབྲུ་མར་རོ། །ཡིད་དགའ་
བ་ཞེས་བྱ་བ་ནི་སེམས་རབ་ཏུ་དགའ་བའོ། །ཤིན་ཏུ་ཡིད་མགུ་བ་ནི་ཡིད་མགུ་བས་སོ། །ཆེད་དུ་བརྗོད་པ་ཆེད་དུ་བརྗོད་དེ་ཞེས་བྱ་བ་ནི་མངོན་པར་འདོད་པའི་དངོས་པོ་མངོན་པར་འདོད་པའི་སྒོ་ནས་གསལ་བར་བྱེད་པའོ། །ཨེ་མ་ཧོ་ངོ་མཚར་ཆེའོ། །སངས་རྒྱས་བཅོམ་ལྡན་འདས་ཡོན་
ཏན་དང་ལྡན་པ་ངོ་མཚར་ཆེའོ། །དེ་བཞིན་དུ་ཆོས་དང་དགེ་འདུན་ཡང་ངོ་། །ལེགས་པར་གསུངས་པའི་ཆོས་ནི་འབྲས་བུ་ངེས་པ་ལ་འཁྲུལ་པ་མེད་པ་ཉིད་དོ། །འཛག་སྣོད་ཅེས་བྱ་བ་ནི་དབང་པོ་རབ་ཏུ་གཞུག་པའི་ཕྱིར་བསྟན་པའོ། །དེ་བཞིན་དུ་བཅངས་པ་དང་ཞེས་བྱ་བ་ནི་
ཡོངས་སུ་སྦྱོང་བའི་ལས་མ་བྱས་པའོ། །པུཎྜ་རཱི་ཀ་ལ་རྟོག་བཞིན་དུ་ཞེས་བྱ་བ་ནི་འདོད་ཆགས་ཀྱི་ཀུན་དུ་སྦྱོར་བ་དང་ཡང་དག་པར་ལྡན་པས་སོ། །སེམས་ཆགས་ཤིང་ཞེས་བྱ་བ་ནི་སྐད་ཅིག་ཙམ་ཡང་དེ་དང་འབྲལ་བར་གནས་པ་ཉིད་དུ་མི་ནུས་པའོ། །བརྒྱའི་ཆར་ཡང་ཉེ་བར་
མི་འགྲོ་ཞེས་བྱ་བ་ལ་སོགས་པ་ལ་བརྒྱའི་ཆར་ཏེ་གྲངས་སུ་ཡང་མི་འགྲོའོ། །བརྒྱའི་སྒྲ་ནི་འདིར་མང་པོ་ཉིད་ཉེ་བར་མཚོན་པར་བྱ་བའི་དོན་ཏོ། །སྟོང་གི་ཆར་ཡང་ཞེས་བྱ་བ་ནི་ཤིན་ཏུ་མང་པོ་ཉིད་ཉེ་བར་མཚོན་པར་བྱ་བའི་ཕྱིར་རོ། །འབུམ་གྱི་ཆར་ཡང་ཞེས་བྱ་བ་ནི་རབ་ཏུ་མང་པོ་ཉིད་ཉེ་བར་མཚོན་
པར་བྱ་བའི་ཕྱིར་རོ། །གྲངས་སུ་ཡང་ཞེས་བྱ་བ་ནི་དྲུག་ཅུ་གནས་གཞན་ལྷག་པར་གྱུར་པ་ལ་ཡང་གྲངས་སུ་ཉེ་བར་མི་འགྲོ་བའོ། །ཆར་ཡང་ཞེས་བྱ་བ་ནི་གྲངས་ཀྱི་ཆ་ཤས་སུ་སྟེ། འདིར་ཆའི་སྒྲ་ནི་ཆ་ཤས་ཀྱི་རྣམ་གྲངས་ཡིན་ནོ། །བགྲང་བར་ཡང་ཞེས་བྱ་བ་ནི་དོན་དམ་པ་ཉིད་དུ་བརྫུས་
བ་ནི་བགྲང་བ་སྟེ། སྤྲེའུ་མོ་འདི་ནི་ཡང་དག་པ་ཉིད་དུ་གྱུར་པ་མ་ཡིན་ཏེ། པུཎྜ་རཱི་ཀ་ལ་ལྟོས་ནས་ཞེས་བྱ་བའི་བར་དུའོ། །དཔེར་ཡང་ཞེས་བྱ་བ་ནི་དཔེ་ཉིད་དུ་འགྱུར་བའོ། །རྒྱུར་ཡང་སྟེ། དཔེའི་རྒྱུ་ཙམ་དུ་ཡང་མི་འགྱུར་བའོ། །རྩེ་བ་ནི་པི་ཝང་ལ་སོགས་པ་རོལ་མོའི་ཁྱད་པར་རོ། །

བཞིན་རབ་ཏུ་དང་བའི་ཕྱིར་དགའ་བའོ། །ཡིད་ཀྱི་བདེ་བ་ནི་ཉམས་སུ་མྱོང་བའི་ཕྱིར་མགུ་བའོ། །སྐད་རབ་ཏུ་དང་བའི་ཕྱིར་རངས་པའོ། །ཤིན་ཏུ་ཁྲེལ་བ་ནི་ངོ་ཚ་བའི་རྒྱུ་མཚན་ཡིན་པའི་ཕྱིར་སེམས་ཀྱིས་ཡོངས་སུ་སྤང་བ་ཉིད་དུ་འདོད་པའོ། །ངོ་ཚ་ནི་ངོ་ཚ་བར་གྱུར་པས་གཞན་གྱི་
བཞིན་ལ་ཡང་བལྟ་བ་ཉིད་ཀྱི་ནུས་པ་མེད་པའོ། །རྣམ་པར་འདོར་ཞིང་ཞེས་བྱ་བ་ནི་སེམས་ཀྱིས་ངོ་ཚ་བའི་དངོས་པོ་ཡོངས་སུ་སྤོང་བར་བྱེད་པའོ། །སྨོད་པར་བྱེད་ཅེས་བྱ་བ་ནི་ཡོངས་སུ་སྤངས་པའི་འོག་ཏུ་བདག་ཉིད་ལ་སྨོད་པར་བྱེད་པའོ། །དམྱལ་བས་ཁྱབ་པའི་ས་ཕྱོགས་མ་ཡིན་
པ་ནི་གནས་མཐོན་པོའོ། །ཕྱུང་བ་ནི་མིག་གོ། །བཅད་པ་ནི་ཤའོ། །ཕུག་པ་ནི་རུས་པའོ། །མཚོན་མདུང་ཐུང་ལ་སོགས་པ་ནི་མཚོན་ཆའི་བྱེ་བྲག་གོ། །འགའ་ཞིག་ཅུང་ཟད་འབར་བར་གྱུར་པས་ན་ཅུང་ཟད་འབར་བའོ། །ཅུང་ཟད་འབར་བ་དེ་ཉིད་འཕེལ་བར་གྱུར་པས་ན་རབ་ཏུ་འབར་
བའོ། །རྒྱུན་མི་འཆད་པར་འབར་བ་ཉིད་ཀྱིས་ན་ཀུན་ནས་རབ་ཏུ་འབར་བ་ཉིད་དོ། །འབར་བ་དེ་དག་ཐམས་ཅད་གཅིག་ཏུ་འདུས་པར་གྱུར་པས་ན་གཅིག་ཏུ་འབར་བར་གྱུར་པའོ། །སྐྲག་པ་ཞེས་བྱ་བ་ནི་མངོན་པར་འདོད་པའི་དངོས་པོ་མ་ཡིན་པར་ཐོས་པའི་ཕྱིར་རོ། །སྐྱོ་བ་ཞེས་བྱ་བ་ནི་
སེམས་སྐྱོ་བ་དང་ལྡན་པ་སྐྱེ་བར་གྱུར་པའོ། །བ་སྤུ་ལྡང་བ་ཞེས་བྱ་བ་ནི་ལུས་ཀྱི་སྤུ་ལྡང་བར་གྱུར་པའོ། །དམན་པ་ནི་ཞུམ་པའོ། །ཞེན་པ་ནི་སྐྱོ་བར་གྱུར་པས་བག་འཁུམས་པ་སྟེ་དུ་བ་ཉིད་དུ་འདོན་པ་ལྟ་བུའོ། །སྨོན་པས་ཞེས་བྱ་བ་ནི་མཐོ་རིས་ལ་སོགས་པའི་འབྲས་བུའི་དོན་ངེས་
པའོ། །ཚེ་དང་ལྡན་པ་མཛེས་དགའ་ཞེས་བྱ་བའི་སྒྲ་འདི་ནི་དེ་བཞིན་གཤེགས་པའི་བསྟན་པ་ལ་ཞུགས་པ་དག་ལ་མཆོད་པ་ཡིན་ཏེ། མངོན་པར་འདོད་པའི་ཚེ་དང་ལྡན་པ་ཉིད་ཡིན་པའི་ཕྱིར་རོ། །ཐོག་མར་ཞེས་བྱ་བ་ནི་འཛིན་པའི་དུས་ཡིན་ལ། དགེ་བ་ཞེས་བྱ་བ་ནི་བཟང་པོ་སྟེ།
ཁ་ན་མ་ཐོ་བ་མེད་པ་ཉིད་ཀྱི་ཕྱིར་རོ། །བར་དུ་ཞེས་བྱ་བ་ནི་སེམས་པའི་གནས་སྐབས་སུའོ། །ཐ་མར་ཞེས་བྱ་བ་ནི་བསྒོམ་པའི་གནས་སྐབས་སུའོ། །དོན་བཟང་པོ་ཞེས་བྱ་བ་ནི་དོན་ཕྱིན་ཅི་མ་ལོག་པ་དང་ལྡན་པའི་ཕྱིར་རོ། །ཚིག་འབྲུ་བཟང་པོ་ཞེས་བྱ་བ་ནི་སྒྲུབ་པར་བྱེད་པའི་སྒྲ་དང་ལྡན་

པའི་ཕྱིར་རོ། །འདི་ཁྱད་པར་དུ་འཕགས་པའི་དགོས་པ་དང་ལྡན་པ་ཉིད་དུ་གསུངས་པ་ནི་མ་འདྲེས་པ་ཞེས་བྱ་བ་ལ་སོགས་པ་གསུངས་པ་ཡིན་ཏེ། མ་འདྲེས་པ་ཞེས་བྱ་བ་ནི་སྡུག་བསྔལ་ཐམས་ཅད་ཟློག་པར་བྱེད་པ་ལ་ཐེག་པ་ཆེན་པོ་ལ་ལྟོས་པ་མེད་
པའི་ཕྱིར་མ་འདྲེས་པ་སྟེ། ཚངས་པར་སྤྱོད་པའོ། །ཡོངས་སུ་རྫོགས་པ་ནི་རལ་པ་མེད་པ་སྟེ། འབྲས་བུ་མ་ལུས་པ་སྒྲུབ་པར་བྱེད་པ་ཡིན་པའི་ཕྱིར་རོ། །ཡོངས་སུ་དག་པ་ནི་ཉོན་མོངས་པའི་དྲི་མ་དང་བྲལ་བའི་ཕྱིར་རོ། །ཡོངས་སུ་བྱང་བ་ནི་ཡང་སྲིད་པར་འབྱུང་བའི་ལས་
སྤངས་པའི་ཕྱིར་རོ། །འདིའི་མིང་གང་ཞེ་ན། འདི་ལྟ་སྟེ། མངལ་དུ་འཇུག་པ་ཞེས་བྱ་བ་སྨོས་པ་ཡིན་ནོ། །ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་ཅེས་བྱ་བའི་ཚིག་གསུམ་པོ་དེ་དག་ནི་ཉན་པ་པོའི་སེམས་བསྐྱེད་པའི་བྱེ་བྲག་ལ་རྣམ་པར་སྦྱར་བའི་ཕྱིར་ཏེ། ཉན་པ་
པོ་ཁ་ཅིག་ནི་སྣོད་ཁ་སྦུབ་པ་ལྟ་བུ་ཡོད་ལ། ཁ་ཅིག་ནི་སྣོད་ཞབས་རྡོལ་ལྟ་བུ་ཡོད་ཅིང་། ཁ་ཅིག་ནི་སྣོད་མི་གཙང་བ་ལྟ་བུ་ཡོད་དོ། །ཁ་སྦུབ་པ་ལ་ཆུ་མི་འཇུག་ལ། རྡོལ་བ་ལ་འཇུག་ཀྱང་གནས་པར་མི་འགྱུར་ཞིང་མི་གཙང་བ་ལ་འཇུག་ཅིང་གནས་ཀྱང་བཏུང་བར་བྱ་བ་མ་ཡིན་
པར་འགྱུར་བ་དེ་བཞིན་དུ་འགའ་ཞིག་གིས་ཡིད་ལ་ཆོས་བཤད་པར་གྱུར་པ་འཇུག་པར་མི་འགྱུར་ཏེ། རྩེ་གཅིག་ཏུ་ཉན་པ་མེད་པའི་ཕྱིར་རོ། །འགའ་ཞིག་ལ་རབ་ཏུ་འཇུག་ཀྱང་གནས་པར་མི་འགྱུར་ཏེ། བརྗེད་ངས་པའི་ཕྱིར་རོ། །འགའ་ཞིག་ལ་རབ་ཏུ་འཇུག་ཅིང་
གནས་སུ་ཟིན་ཀྱང་ལོག་པ་ཉིད་དུ་འཛིན་པར་འགྱུར་ཏེ། ཚུལ་བཞིན་མ་ཡིན་པ་ཡིད་ལ་བྱེད་པའི་དབང་གི་ཕྱིར་རོ། །དེ་ནི་འདིར་བཅོམ་ལྡན་འདས་ཀྱིས་སྣོད་ཁ་སྦུབ་པ་ལ་སོགས་པའི་དཔེས་སེམས་གསུམ་པོ་དག་ལས་དགེ་སློང་དག་རྣམ་པར་བཟློག་ཅིང་ཁ་ཡར་བལྟ་བ་དང་སྲ་
བ་དང་གཙང་བའི་སྣོད་ཀྱི་དཔེ་ཅན་གྱི་སེམས་ལ་ངེས་པར་སྦྱར་བ་ཡིན་ཏེ། །ལེགས་པར་ཟུང་ཤིག་ཤིན་ཏུ་ཟུང་ཤིག །ཡིད་ལ་ཟུང་ཤིག་ཅེས་བྱ་བའོ། །ལེགས་པར་ཉན་པ་ནི་རྩེ་གཅིག་པའི་ཕྱིར་རོ། །ཤིན་ཏུ་ཉན་པ་ནི་བརྗེད་ངས་པ་མེད་པའི་ཕྱིར་རོ། །ཡིད་ལ་ཟུང་ཤིག་པ་

ནི་ཚུལ་བཞིན་ཡིད་ལ་བྱེད་པ་ཡང་དག་པར་འབྱུང་བའི་ཕྱིར་རོ། །ཆགས་པ་ཞེས་བྱ་བ་ནི་འདོད་ཆགས་ཀྱིས་ཀུན་ནས་སྤྱོད་པ་མངོན་སུམ་དུ་གྱུར་པའོ། །འདུས་པར་གྱུར་པ་