Luận tạng Tây Tạng (Tengyur) — Tập 158

་མཛོད་མ་བསམས་པར་ཞེས་བྱ་བ་ལ་སོགས་པ་ལ། རྒྱལ་པོའི་ཡུལ་གྱི་རྒྱལ་
པོའི་དཀོར་མཛོད་གང་ཡིན་པ་དེ་ནི་མ་བསམས་པར་འཕེལ་བར་འགྱུར་ཞིང་ལམ་སོང་སྟེ་དོན་མཐུན་སྟོབས་མཆོག་མ་བསམས་པར་འགའ་ཞིག་ཏུ་དེའི་རྐྱེན་གྱིས་དེ་འཇིག་པར་འགྱུར་བའོ། །སྐལ་བ་མེད་པ་ནི་ཚུལ་ངན་པའོ། །ལྟ་བས་མི་ངོམས་པ་ཞེས་བྱ་བ་ནི་ལྟ་བས་ཆོག་པར་མི་བྱེད་
པའོ། །རྒྱལ་པོ་ནི་འཁོར་ལོས་སྒྱུར་བའོ། །རི་བོ་ནི་རི་རབ་པོ། །རིགས་ལྡན་ཞེས་བྱ་བ་ནི་རང་བཞིན་གྱིས་འཇམ་པའོ། །བྱིས་པ་དག་དང་ཞེས་བྱ་བ་ལ་སོགས་པ་ལ། བྱིས་པ་ནི་འདིར་བྱིས་པའི་ཁྱེའུའོ། །སྦྲུལ་ནི་བྲང་འགྲོའོ། །གནོད་བྱེད་མ་ནི་སྐྱེས་བུ་གཞན་ལ་
རབ་ཏུ་ཆགས་པར་འགྱུར་བའོ། །མི་བརྟེན་པ་ནི་གང་དགའ་བ་ཡུན་རིང་དུ་འཛིན་པར་མི་བྱེད་པའམ། ཅིག་ཤོས་དགའ་བ་སྟེ། ཐ་མལ་པ་སྟེན་པར་བྱེད་པའོ། །དཔའ་བོ་ནི་འདིར་གཡུལ་ངོགས་སུ་དགའ་བའོ། །གང་ལ་ཞེ་ན་སྨྲས་པ། ཤིན་ཏུ་གནོད་པར་གྱུར་པ་
དང་ཤིན་ཏུ་ཉམ་ང་བར་ཞུགས་པའི་སེམས་ཅན་ལའོ། །གཏམ་མི་བྱའོ་ཞེས་བྱ་བ་ནི་ཁྱོད་དང་གཏམ་མི་བྱའོ། །སྦྱིན་པ་མ་མཐོང་ཞེས་བྱ་བ་ལ་སོགས་པ་ལ། སྐྱེས་བུ་གང་ཞིག་ལ་འགའ་ཞིག་གིས་སྦྱིན་པ་མ་མཐོང་བ་དེ་ནི་འདིར་ཞེ་སྡང་ཚུལ་དུ་འགྱུར་བའོ། །ཕྲོད་

པ་མི་བྱེད་པ་ནི་གང་ཞིག་རྟག་ཏུ་ཕ་རོལ་པོ་ལ་འགལ་བ་སྤྱོད་པའོ། །མི་མཐོང་སྤྱོད་པ་ནི་གང་ཞིག་འགའ་ཞིག་ལ་རྗེས་སུ་མཐུན་པར་མི་སྤྱོད་ཅིང་། གཞན་ལ་རྟག་ཏུ་ཉེ་བར་སྤྱོད་པ་སྒྲོགས་པར་བྱེད་པའོ། །སྦྱིན་པ་བྱིན་ནས་ཡང་རིམ་གྱིས་དབྲི་བ་ནས་ཐམས་ཅད་ཀྱི་ཐམས་ཅད་དུ་སྦྱིན་
པར་མི་བྱེད་པའི་བར་དུའོ། །གནས་བརྟན་ནི་འདིར་ལོ་བཅུ་ལོན་པར་འདོད་ལ། རྒན་པ་ཡང་ལུས་རྙིངས་པར་གྱུར་པའོ། །ཚིག་ངན་ནི་གང་ཕ་རོལ་སྨྲ་བ་བརྣག་པར་མི་ནུས་པའོ། །སྨྱིན་ཐབས་ནི་དིག་ཐབས་སུ་སྨྲ་བ་ནི་ཤིན་ཏུ་ཁྲོས་པ་ཉིད་ཀྱི་ཕྱིར་རོ། །བ་སྤུ་གྱེན་དུ་བགྲེང་བ་
ནི་བ་སྤུ་གྱེན་དུ་འཇུག་པའོ། །བཞིན་ནི་གཉེར་མར་ལྡན་པ་ནི་བཞིན་གཉེར་མས་ཁྱབ་པར་གྱུར་པ་ཅན་ནོ། །ཁ་སྤུ་ཆུང་བ་ནི་ཁ་སྤུ་བྱི་བའོ། །འདོད་ཆགས་གཅོང་ཅན་ཞེས་བྱ་བ་ལ་སོགས་པ་ལ། གང་ཞིག་ལྷག་པར་འདོད་ཆགས་ཀྱི་ཤས་དང་ལྡན་པ་ཡིན་ནོ། །དོན་ལ་
སེམས་པ་ནི་གང་ཞིག་རྟག་ཏུ་ནོར་སྒྲུབ་པའི་ཐབས་སེམས་པར་བྱེད་པ་དང་། གང་ཞིག་ཐ་སྙད་དུ་བྱེད་པའི་སྒོ་ནས་མངོན་པར་སྦྱོར་བར་བྱེད་པའོ། །འཛགས་པ་ཞེས་བྱ་བ་ནི་སེམས་ཅན་དམ་པ་མ་ཡིན་པའོ། །སེལ་བ་ནི་ཐོག་འབབ་པ་དང་བཅས་པའི་སེར་བའོ། །
མི་རྟག་པ་ནི་སྐད་ཅིག་མས་མི་རྟག་པ་ཉིད་དོ། །དོན་མེད་པར་འདོད་པ་ཞེས་བྱ་བ་ནི་དོན་འཇིག་པར་འདོད་པ་དང་འཇིག་རྟེན་འདི་དང་འཇིག་རྟེན་ཕ་རོལ་དུ་ཕན་པ་མ་ཡིན་པ་བྱེད་པས་ན་ཕན་པར་མི་འདོད་པ་དང་བདེ་བར་མི་འདོད་པ་ཞེས་བྱ་བ་ནི་བདེ་བ་སྐྱེས་པ་འཇིག་པར་བྱེད་པའོ། །
རེག་པར་མི་འདོད་པ་ཞེས་བྱ་བ་ནི་མ་སྐྱེས་པ་སྐྱེས་པ་དང་གེགས་བྱེད་པའོ། །གྲུབ་པ་དང་བདེ་བར་མི་འདོད་པ་ཞེས་བྱ་བ་ལ། མ་ཐོབ་པ་ནི་གྲུབ་པ་ཡིན་ལ། ཡོན་ཏན་རྙེད་པ་ཡོངས་སུ་སྐྱོང་བར་བྱེད་པ་བདེ་བ་ཡིན་ཏེ། དེ་ཡང་མ་ཐོབ་པ་མི་ཐོབ་པར་བྱ་བའི་ཕྱིར་དང་། རྙེད་
པ་འཇིག་པར་བྱ་བའི་ཕྱིར་ཞུགས་པ་ཡིན་ནོ། །བྱས་ཞེས་བྱ་བ་ནི་འདས་པའི་དུས་ཡིན་ལ་བྱེད་པ་ནི་ད་ལྟར་གྱི་དུས་ཡིན་ཞིང་། བྱེད་པར་འགྱུར་བ་ནི་མ་འོངས་པའི་དུས་ཡིན་ནོ། །ཕྱིན་ཅི་ལོག་ཏུ་གྱུར་པ་ཡིན་དུ་ཟིན་ཀྱང་ཡང་དང་ཡང་དུ་སྨྲ་བས་ན་བྱ་རོག་དང་འདྲ་བའོ། །མང་དུ་

དོན་མེད་པར་སྨྲ་བའི་ཕྱིར་མུ་ཅོར་སྨྲ་བ་ཡིན་ལ། ཡང་དང་ཡང་དུ་འབྲེལ་པ་མེད་པ་མི་གསལ་བ་སྨྲ་བའི་ཕྱིར་ཅ་ཅོར་སྨྲ་བའོ། །སོག་པ་ཞེས་བྱ་བ་ནི་སོག་པར་བྱེད་པའི་ངང་ཚུལ་ཅན་ནོ། །སྐད་འབྱིན་པ་ཞེས་བྱ་བ་ནི་དོན་མེད་པའི་སྐད་སྒྲོག་པར་བྱེད་པའོ། །
རིགས་པར་མི་བྱེད་པ་ནི་འདིར་ཕྱིན་ཅི་ལོག་གི་རྣམ་གྲངས་ཡིན་ནོ། །ལྷོ་ངོས་སུ་སོང་ཞེས་བྱ་བ་ནི་ལྷོ་ཕྱོགས་སུ་འགྲོ་བར་བྱེད་པའི་ཕྱིར་ལྷོ་ངོས་སུ་སོང་བ་དང་གམ་དུ་སོང་བར་གྱུར་པའོ། །འོད་ནི་ཉི་མའོ། །མེས་ཚིག་པ་ལ་ཞེས་བྱ་བ་ལ་ཡང་བཀྲ་མི་ཤིས་པའོ་ཞེས་བྱ་བའི་དབང་
དུ་བྱས་ནས་ཡང་མེའི་ནང་དུ་བཅུག་ནས་སྲེག་པར་བྱེད་པའོ། །ཟོས་པ་ནི་བཟའ་བར་བྱ་ཞིང་ལོངས་སྤྱད་པར་བྱ་བའོ། །འཐུངས་པ་ནི་བཏུང་བའོ། །བཅའ་བ་ནི་བཅའ་བར་བྱའོ། །མྱངས་པ་ནི་ཨ་མྲ་ལ་སོགས་པ་གཞིབ་པར་བྱ་བའོ། །ཐོགས་པ་མེད་པའི་ཡེ་ཤེས་ཞེས་བྱ་བ་ལ་
སོགས་པ་ལ་ཤེས་པར་བྱ་བའི་ཡུལ་འགའ་ཞིག་ལ་ཆགས་པ་མེད་པའི་ཐོགས་པ་མེད་པའི་ཡེ་ཤེས་ཏེ། ཐམས་ཅད་མཁྱེན་པའི་ཡེ་ཤེས་ཞེས་བྱ་བའི་ཐ་ཚིག་གོ། །དེ་ཉིད་སྟོབས་ཡིན་ཏེ་སངས་རྒྱས་བཅོམ་ལྡན་འདས་སྟོབས་དེས་འཁོར་ལོས་སྒྱུར་བའོ། །དེའི་སྟོབས་བཅུ་དང་ལྡན་
པས་ན་ཁྱུ་མཆོག་གི་གནས་རྒྱ་ཆེན་པོ་ཞེས་བྱ་བ་ལ་སོགས་པ་སྨོས་པ་ཡིན་ཏེ། སེམས་རྒྱ་ཆེན་པོ་ལ་བརྟེན་པར་བྱ་བ་ཉིད་ཡིན་པའི་ཕྱིར་རྒྱ་ཆེན་པོ་ཉིད་ཡིན་ལ། འདི་ཁྱུ་མཆོག་གི་ཡིན་པས་ན་ཁྱུ་མཆོག་གིའོ། །དེ་གང་ཞེ་ན། སྨྲས་པ། གནས་ནི་གོ་འཕང་ཞེས་བྱ་བའི་དོན་ཡིན་
ཏེ། བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱིས་བསྟན་པར་མཛད་པའི་འཇིགས་པ་མེད་པའི་གོ་འཕང་ཞལ་གྱིས་བཞེས་པར་གྱུར་པའོ། །ཚངས་པའི་འཁོར་ལོ་བསྐོར་བར་མཛད་ཅིང་ཞེས་བྱ་བ་ནི་འཕགས་པའི་ལམ་གྱི་འཁོར་ལོ་རབ་ཏུ་བསྐོར་བར་མཛད་པའོ། །ཡང་དག་
པར་སེང་གེའི་སྒྲ་སྒྲོགས་སོ་ཞེས་བྱ་བ་ནི་མུ་སྟེགས་ཅན་ཐམས་ཅད་སྐྲག་པར་བྱེད་ཅིང་བདག་མེད་པར་གསལ་བར་བྱེད་པའི་བཀའ་སྒྲོགས་པར་མཛད་པའོ། །གནས་དང་གནས་མ་ཡིན་པ་ཞེས་བྱ་བ་ལ་སོགས་པ་ལ་གནས་ནི་སྲིད་པ་ཡིན་ལ་གནས་མེད་པ་ནི་མི་སྲིད་པ་ཡིན་ཏེ། ལུས་ལ་

སོགས་པའི་དགེ་བ་ལས་འབྲས་བུ་འདོད་པ་ནི་སྲིད་པ་ཡིན་ལ་མི་འདོད་པ་ནི་མི་སྲིད་པ་ཡིན་ཞིང་དགེ་བའི་ལས་ཀྱི་འབྲས་བུ་འདོད་པ་མ་ཡིན་པ་ནི་མི་སྲིད་པ་ཡིན་ཏེ། འདོད་པ་ནི་སྲིད་པ་དག་ཡིན་ནོ། །ཡང་དག་པ་ཇི་ལྟ་བ་བཞིན་དུ་ཤེས་སོ་ཞེས་བྱ་བ་ནི་དེ་ཁོ་ན་ཉིད་ཇི་ལྟ་བ་བཞིན་དུ་སྟེ་ཕྱིན་ཅི་མ་
ལོག་པ་ཉིད་དུའོ། །ལས་དང་ཆོས་ཡང་དག་པར་བླངས་པའི་ཞེས་བྱ་བ་ལ་སོགས་པ་ལ་ལས་ནི་རྣམ་པ་གསུམ་སྟེ། ལུས་དང་ངག་དང་ཡིད་ཀྱི་རང་བཞིན་ནོ། །དེའི་དབྱེ་བ་བཞི་ལས་ཡང་དག་པར་བླངས་པ་ཞེས་བྱ་སྟེ། ཇི་སྐད་དུ་ལས་ནག་པོ་དང་རྣམ་པར་སྨིན་པ་ནག་པོ་དང་། དགེ་
བ་དང་རྣམ་པར་སྨིན་པ་དགེ་བ་དང་། གནག་ལ་དགེ་བ་དང་རྣམ་པར་སྨིན་པ་གནག་ལ་དགེ་བ་དང་། གནག་པ་མ་ཡིན་ལ་དགེ་བ་དང་རྣམ་པར་སྨིན་པ་གནག་པ་མ་ཡིན་ལ་དགེ་བ་ཡོད་དོ་ཞེས་འབྱུང་བ་ཡིན་ནོ། །ཆོས་ཡང་དག་པར་བླངས་པ་ལ་ནི་རྣམ་པ་བཞིར་འགྱུར་ཏེ། ཆོས་ཡང་
དག་པར་བླངས་པ་ད་ལྟར་བདེ་བ་མ་འོངས་པ་རྣམ་པར་སྨིན་པ་སྡུག་བསྔལ་བ་ཡོད་པ་དང་། ཆོས་ཡང་དག་པར་བླངས་པ་ད་ལྟར་སྡུག་བསྔལ་ཞིང་མ་འོངས་པ་ན་རྣམ་པར་སྨིན་པ་བདེ་བ་ཡོད་པ་དང་། ཆོས་ཡང་དག་པར་བླངས་པ་ད་ལྟར་སྡུག་བསྔལ་ཞིང་མ་འོངས་པ་ན་
ཡང་རྣམ་པར་སྨིན་པ་སྡུག་བསྔལ་ཡོད་པ་དང་། ཆོས་ཡང་དག་པར་བླངས་པ་ད་ལྟར་བདེ་ཞིང་མ་འོངས་པ་ན་ཡང་རྣམ་པར་སྨིན་པ་བདེ་བ་ཡོད་པ་ཡིན་ཏེ། རྣམ་པར་སྨིན་པ་ཡང་དག་པ་ཇི་ལྟ་བ་བཞིན་དུ་ཡང་རབ་ཏུ་མཁྱེན་ཏོ། །གནས་ཞེས་བྱ་བ་ནི་འདིའི་དུས་ཏེ། ཚོགས་
པ་འགའ་ཞིག་ཡོད་ན་ལས་དང་ཆོས་ཡང་དག་པར་བླངས་པ་གང་དག་གི་འབྲས་བུ་འབྱིན་པར་འགྱུར་རོ་ཞེས་དེ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དངོས་པོ་ཞེས་བྱ་བ་ནི་རྟེན་ཡིན་ཏེ། ལྷ་ལ་སོགས་པའི་འགྲོ་བ་རྟེན་འགའ་ཞིག་ཡོད་ན་དེ་དག་ལས་ངེས་པར་འབྲས་
བུ་འབྱུང་བར་འགྱུར་རོ་ཞེས་བྱ་བ་དང་། རྒྱུ་ཞེས་བྱ་བ་ནི་རྒྱུ་ཇི་སྙེད་པ་དང་རྐྱེན་ཇི་སྙེད་པ་དེ་ཡོད་ན་འབྲས་བུའི་བྱ་བ་བྱེད་པར་འགྱུར་རོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །བསམ་གཏན་དང་རྣམ་པར་ཐར་པ་ཞེས་བྱ་བ་ལ་སོགས་པ་ལ། བསམ་གཏན་ནི་དང་པོ་ལ་

སོགས་པ་བཞི་ཡིན་ལ། རྣམ་པར་ཐར་པ་ནི་བརྒྱད་ཡིན་ནོ། །ཏིང་ངེ་འཛིན་ནི་གསུམ་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའོ། །སྙོམས་པར་འཇུག་པ་ནི་གཟུགས་མེད་པ་བཞི་དག་ཡིན་ནོ། །དེ་ལ་ཀུན་ནས་ཉོན་མོངས་པ་
ནི་སྙོམས་པར་འཇུག་པའི་གེགས་ཡིན་ཏེ། ཆོས་དག་འདིའི་བགེགས་སུ་འགྱུར་བའི་ཕྱིར་སྲིད་པར་འགྱུར་བའོ། །རྣམ་པར་གནས་པ་ནི་སྙོམས་པར་འཇུག་པ་གནས་པར་བྱེད་པ་སྟེ། ཆོས་གང་དག་གིས་འདི་གནས་པར་བྱ་བའི་ཕྱིར་སྲིད་པར་འགྱུར་བའོ། །རྣམ་པར་
བྱང་བ་ཞེས་བྱ་བ་ནི་ཆོས་གང་དག་གིས་འདི་རྣམ་པར་དག་པར་བྱ་བའི་ཕྱིར་སྲིད་པའི་འགྱུར་བ་གསུམ་པོ་དེ་དག་གིས་གོ་རིམས་བཞིན་དུ་སྤངས་པའི་ཆ་དང་མཐུན་པ་དང་གནས་པའི་ཆ་དང་མཐུན་པ་དང་། ཁྱད་པར་གྱི་ཆ་དང་མཐུན་པ་བསྟན་པ་ཡིན་ཏེ། དེ་དག་ཡང་དག་པ་ཇི་
ལྟ་བ་བཞིན་དུ་རབ་ཏུ་མཁྱེན་ཏེ། སེམས་ཅན་གང་ཟག་གི་རྣམ་གྲངས་ཡིན་ལ། མཆོག་དང་མཆོག་མ་ཡིན་པ་ཡང་དག་པ་ཇི་ལྟ་བ་བཞིན་དུ་མཁྱེན་པ་ཞེས་བྱ་བ་ལ། མཆོག་ནི་ཁྱད་པར་དུ་འཕགས་པ་ཡིན་ཞིང་མཆོག་མ་ཡིན་པ་ནི་དམན་པ་ཡིན་ཏེ། སེམས་ཅན་འདི་
ནི་དབང་པོ་རྟུལ་བ་ཡིན་ལ། འདི་དབང་པོ་འབྲིང་ཡིན། འདི་ནི་དབང་པོ་རྣོན་པོ་ཡིན་ནོ་ཞེས་བྱ་བ་ཡིན་ནོ། །དབང་པོ་ཡང་འདིར་དད་པ་ལ་སོགས་པ་ཡིན་པར་འདོད་དོ། །མོས་པ་སྣ་ཚོགས་ཞེས་བྱ་བ་ནི་མོས་པ་ནི་འདོད་པ་དང་མངོན་པར་བསམས་པ་ཞེས་བྱ་བའི་དོན་ཡིན་ཏེ།
སེམས་ཅན་རྣམས་ཀྱི་མོས་པ་རྣམ་པ་སྣ་ཚོགས་པ་དེ་ཡང་དེ་ཁོ་ན་ཉིད་དུ་ཇི་ལྟ་བ་བཞིན་དུ་བཅོམ་ལྡན་འདས་ཉག་གཅིག་གིས་མཁྱེན་པར་འགྱུར་གྱི་གཞན་དག་གིས་མ་ཡིན་ནོ། །ཁམས་སྣ་ཚོགས་ཞེས་བྱ་བ་ལ་སོགས་པ་ལ་ཁམས་ནི་བསམ་པ་དང་རང་བཞིན་ཞེས་བྱ་བའི་
དོན་ཡིན་ལ། དེ་ཡང་སེམས་ཅན་དག་གིས་སྐྱེ་བ་གཞན་དུ་གོམས་པའི་དབང་གིས་དེ་སེམས་ཅན་སོ་སོའི་རྒྱུད་ཀྱི་དབྱེ་བ་ལས་ཁམས་སྣ་ཚོགས་ཞེས་སྨོས་པ་ཡིན་ནོ། །གཅིག་ལ་ཡང་ཁམས་དུ་མ་སྲིད་པའི་ཕྱིར་ཁམས་དུ་མ་ཞེས་སྨོས་པ་ཡིན་ནོ། །ཐམས་ཅད་

དུ་འགྲོ་བ་ཞེས་བྱ་བ་ནི་ཐམས་ཅད་དེ་ཡུལ་ཐམས་ཅད་དུ་འགྲོ་བའི་ངང་ཚུལ་འདི་ལ་ཡོད་པས་ན་དེ་ལ་འདི་ཐམས་ཅད་དུ་འགྲོ་བ་ཡིན་ལ། དངོས་པོའི་བྱེ་བྲག་འདིས་རྟོགས་པར་བྱེད་པའི་ཕྱིར་ལམ་ཡིན་ཏེ། ཐམས་ཅད་དུ་འགྲོ་བ་ཡང་འདི་ཡིན་ལ་ལམ་ཡང་ཡིན་པས་ན་ཐམས་ཅད་དུ་འགྲོ་བའི་ལམ་
མོ། །དེ་ཡང་ཡེ་ཤེས་ཡིན་ཏེ། དེ་འདིར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སྔོན་གྱི་གནས་ཞེས་བྱ་བ་ནི་སྔོན་གྱི་སྐྱེ་བའི་གནས་སོ། །འཇིག་པའི་བསྐལ་པ་ཞེས་བྱ་བ་ལ་སོགས་པ་ལ། འཇིག་པའི་བསྐལ་པ་ནི་སེམས་ཅན་དམྱལ་བ་མི་སྲིད་པའི་ཕྱིར་སྣོད་འཇིག་པ་ཡིན་ལ།
འཆགས་པའི་བསྐལ་པ་ནི་ཐོག་མར་རླུང་ནས་དམྱལ་བའི་བར་དུ་སྲིད་པར་གྱུར་པའོ། །འཇིག་པ་ནི་ཉམས་པ་ཡིན་ཏེ། སེམས་ཅན་རྣམས་ཀྱི་བསམ་པ་གཅིག་ཏུ་གནས་ཤིང་འདུས་པར་བྱེད་པའི་ཕྱིར་རོ། །འཆགས་པ་ཡང་འབྱུང་བ་ཞེས་བྱ་བ་ནི་སྐྱེ་བའི་ཆོས་ཅན་དུ་གྱུར་པའོ། །
མིང་འདི་ཞེས་བྱ་བ་ལ་སོགས་པ་ལ་མིང་ནི་ཆོས་སྦྱིན་ལ་སོགས་པའོ། །རུས་ནི་བྲམ་ཟེ་ལ་སོགས་པའོ། །རིགས་ནི་གཽ་ཏ་མ་ལ་སོགས་པའོ། །ཁ་ཟས་ནི་ཆང་ཟན་གྱི་རྣམ་པ་ལ་སོགས་པའོ། །བདེ་བ་དང་སྡུག་བསྔལ་བ་ནི་ཉམས་སུ་མྱོང་བའི་ངང་ཚུལ་ཅན་ནོ། །དུས་རིང་པོར་
འཚོ་བའི་ཕྱིར་ཚེ་རིང་བའོ། །བྱིས་པའི་གནས་སྐབས་ལ་སོགས་པའི་དུས་རིང་པོར་གནས་པའི་ཕྱིར་ཡུན་རིང་དུ་གནས་པའོ། །ཇི་སྲིད་དུ་ཚེ་འཕངས་པར་གནས་པའི་ཕྱིར་འདི་ལྟར་དེའི་ཚེའི་མཐར་ཐུག་པ་སྟེ། འདིས་ནི་བར་མ་དོར་འཆི་བ་མེད་པར་བསྟན་པ་ཡིན་ནོ། །གནས་
དང་བཅས་པ་ནི་ཡུལ་དང་བཅས་པའོ། །རྣམ་པ་དང་བཅས་པས་ཞེས་བྱ་བ་ནི་མིང་དང་དུས་ལ་སོགས་པའི་རྣམ་པ་དང་བཅས་པ་ཡིན་ནོ། །ལྷའི་མིག་ཅེས་བྱ་བ་ལ་ཅི་ལྷའི་མིག་སྤྱིའམ་འོན་ཏེ་མ་ཡིན་ཞེ་ན། སྨྲས་པ། རྣམ་པར་དག་པ་སྟེ། བསྒོམས་པ་ལས་བྱུང་བའི་ཡིན་
གྱི་སྤྱི་ནི་མ་ཡིན་ནོ། །མིའི་ལས་ཤིན་ཏུ་འདས་པ་ཞེས་བྱ་བ་ནི་ཁྱད་པར་དུ་འཕགས་པའི་མི་ལ་སྐྱེར་རུང་བ་ཉིད་ཀྱིས་སོ། །ཁ་དོག་བཟང་པོ་ཞེས་བྱ་བ་ནི་མདངས་མཛེས་པར་གྱུར་པའོ། །ཁ་དོག་ངན་པ་ནི་མདངས་མཛེས་པ་མ་ཡིན་ནོ། །དམན་པ་ཞེས་བྱ་བ་ནི་བསོད་ནམས་དང་

མི་ལྡན་པའོ། །གྱ་ནོམ་པ་ཞེས་བྱ་བ་ནི་བསོད་ནམས་དང་ལྡན་པར་གྱུར་པའོ། །ལས་ཇི་ལྟ་བར་ལོངས་སྤྱོད་པ་ཞེས་བྱ་བ་ནི་བདག་ཉིད་ཀྱིས་བྱས་པའི་ལས་ཀྱི་འབྲས་བུ་ལ་སྤྱོད་པར་འགྱུར་བའོ། །ཡང་དག་པ་མ་ཡིན་པའི་སྐྱོན་བརྗོད་པ་ནི་སྐུར་པ་
འདེབས་པའོ། །ལོག་པར་ལྟ་བའི་ལས་ཞེས་བྱ་བ་ལ་སོགས་པ་ལ་ལོག་པར་ལྟ་བ་སྔོན་དུ་སོང་བ་ཅན་གྱི་ལས་དང་། །ཆོས་ཡང་དག་པར་བླངས་པའི་རྒྱུའི་ཕྱིར་རོ། །དེའི་རྒྱུ་ཞེས་བྱ་བ་ནི་ལོག་པའི་ལྟ་བ་རབ་ཏུ་འཇུག་པར་བྱེད་པའི་ལས་དང་། ཆོས་ཡང་དག་པར་
བླངས་པའི་རྒྱུའོ། །དེའི་རྐྱེན་ནི་དེ་ཉིད་དང་འདྲའོ། །ལུས་དང་བྲལ་བ་སྟེ་འཇིག་ཅིང་ཤི་བའི་འོག་ཏུ་ངན་སོང་ལ་སོགས་པར་སྐྱེ་བར་འགྱུར་བའོ། །ངན་པར་སོང་བས་ན་ངན་སོང་སྟེ། དམྱལ་བ་དང་། དུད་འགྲོ་དང་། ཡི་དགས་ཡིན་ལ། དེ་ཉིད་སྨད་པར་བྱ་བ་ཉིད་
ཡིན་པའི་ཕྱིར་ངན་འགྲོ་ཡིན་ཞིང་། ལོག་པར་ལྟུང་བའི་གནས་ཉིད་ཡིན་པའི་ཕྱིར་དེ་ཉིད་ལོག་པར་ལྟུང་བ་ཡིན་ནོ། །སེམས་ཅན་དམྱལ་བ་སྨོས་པས་དམྱལ་བ་རེ་རེ་བཟུང་བ་ཡིན་ནོ། །ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ནི་ངན་སོང་ངན་འགྲོ་
ལོག་པར་ལྟུང་བ་སེམས་ཅན་དམྱལ་བ་སྟེ་དེ་དག་ཏུའོ། །བདེ་འགྲོ་ཞེས་བྱ་བ་ལ་བདེ་འགྲོ་རྣམ་པ་གཉིས་ཡོད་ན་བདེ་འགྲོ་གང་ལ་བྱ་ཞེ་ན། མཐོ་རིས་ཀྱི་འཇིག་རྟེན་ཞེས་བྱ་བ་སྨོས་པ་ཡིན་ནོ། །དེ་ལ་ཡང་ཁ་ཅིག་ཏུ་གནས་སྟོང་པ་དག་ཏུ་སྐྱེ་བར་འགྱུར་རོ་ཞེ་ན།
ལྷའི་ཞེས་བྱ་བ་སྨོས་པ་ཡིན་ནོ། །ཟག་པ་ཟད་པ་ལས་ཞེས་བྱ་བ་ནི་འདོད་ཆགས་ལ་སོགས་པ་སྤངས་པར་གྱུར་པ་ལས་སོ། །སེམས་རྣམ་པར་གྲོལ་བ་ཞེས་བྱ་བ་ནི་སེམས་ཉོན་མོངས་པའི་འཆིང་བ་ལས་གྲོལ་བར་གྱུར་པའོ། །ཤེས་རབ་རྣམ་པར་གྲོལ་བ་
ཞེས་བྱ་བ་ནི་ཤེས་རབ་མ་རིག་པ་དང་ཉེ་བའི་ཉོན་མོངས་པ་དང་བྲལ་བས་སོ། །མཐོང་བའི་ཆོས་ཁོ་ན་ལ་ཞེས་བྱ་བ་ནི་མངོན་སུམ་དུ་གྱུར་པའི་སྐྱེ་བ་ལའོ། །བདག་ཉིད་ཀྱིས་ཞེས་བྱ་བ་ནི་ལུང་ཕོག་པ་མེད་པའོ། །མངོན་པར་ཤེས་པས་ཞེས་བྱ་བ་ནི་ཡེ་ཤེས་ཀྱིས་

སོ། །མངོན་སུམ་དུ་བྱས་ཤིང་ཞེས་བྱ་བས་ནི་ཐེ་ཚོམ་མེད་ཅིང་ཁོང་དུ་ཆུད་ཅིང་ངོ་། །ཞུགས་པ་ཞེས་བྱ་བ་ནི་ཐག་ཉེ་བར་བྱས་པའམ། དེ་གཉིས་དང་ལྡན་པར་གྱུར་པའམ་ཆེན་པོ་ཉིད་དུ་ཤེས་པའོ། །རབ་ཏུ་ཤེས་པས་ན་ཞེས་བྱ་བ་ནི་ཤེས་པ་གཞན་གྱིས་ཡོངས་སུ་
བཅད་ནས་སོ། །ངའི་སྐྱེ་བ་ནི་ཟད་དོ་ཞེས་བྱ་བ་ནི་བདག་གི་སྐྱེ་བའི་སྲིད་པ་རྫོགས་པར་གྱུར་པར་རོ། །སྐྱེ་བའི་སྲིད་པ་ཟད་པ་ཡང་ཅིའི་ཕྱིར་ཞེ་ན། ཚངས་པར་སྤྱོད་པ་ནི་བསྟེན་ཏོ་ཞེས་སྨོས་པ་ཡིན་ཏེ། ཚངས་པ་ནི་མྱ་ངན་ལས་འདས་པ་ཡིན་ལ། དེ་ལ་གང་གིས་སྤྱོད་པ་
དེ་ནི་ཚངས་པར་སྤྱོད་པ་སྟེ་ལམ་ཡིན་ཏེ། དེ་ལ་བདག་ཉིད་ཐམས་ཅད་ཀྱིས་གནས་པར་གྱུར་པ་ནི་བསྟེན་པ་ཡིན་ནོ། །གང་གི་ཚེ་འཕགས་པའི་ལམ་ཡོངས་སུ་རྫོགས་པ་ལ་གནས་པ་དེའི་ཚེ་མི་མཐུན་པའི་ཕྱོགས་ཐམས་ཅད་ལྡོག་པར་འགྱུར་བའོ། །བྱ་བ་བྱས་སོ་ཞེས་
བྱ་བ་ནི་ཉོན་མོངས་པ་སྤངས་པའོ། །འདི་ལས་སྲིད་པ་གཞན་མི་ཤེས་སོ་ཞེས་བྱ་བ་ནི་ཡང་སྲིད་པའི་ལས་ཀྱི་འབྲས་བུ་མེད་པའི་ཕྱིར་རོ། །རྒྱལ་པོས་ཞེས་བྱ་བ་ལ་སོགས་པ་ལ་རྒྱལ་པོས་ཐམས་ཅད་དུ་རང་གི་རིགས་དང་འཐད་པའི་ཆོས་གང་ཡིན་པ་དང་། ཚུལ་ཏེ་ཚུལ་ཁྲིམས་གང་ཡིན་
པ་དེ་ལ་བརྟག་པར་བྱ་ཞིང་རྗེས་སུ་འཇུག་པར་བྱ་བ་ཡིན་ནོ། །དེ་ཁྱད་པར་ཇི་ལྟ་བུ་ཞེ་ན། འཇུག་དང་རྗེས་འཇུག་ཚུལ་དུ་ཞེས་བྱ་བ་སྨོས་ཏེ། རང་བཞིན་གྱིས་རྗེས་སུ་འཇུག་པ་ནི་འཇུག་པ་ཡིན་ལ་སྔ་མས་འདི་ལྟར་བྱས་པ་དེའི་ཕྱིར་བདག་ཀྱང་རྣམ་པ་འདིས་བྱ་བ་ལ་རྗེས་སུ་
འཇུག་པར་བྱའོ་ཞེས་བྱ་བ་ནི་རྗེས་སུ་འཇུག་པ་ཡིན་ནོ། །རྒྱལ་པོ་བཟོད་པ་ཞེས་བྱ་བ་ལ་སོགས་པ་ལ། རྒྱལ་པོ་བཟོད་པ་ནི་ཆོས་ཀྱི་མཆོག་ཡིན་པའི་ཕྱིར། ལྷས་བ་ལང་སྐྱོང་གི་མའི་ཉེས་པ་བཟོད་པར་བྱ་བ་ཡིན་ནོ། །འཇིག་རྟེན་འདི་ན་ཞེས་བྱ་བ་ལ་སོགས་པ་ལ། ཇི་ལྟ་
བར་བྱ་བ་སྟེ། རིན་པོ་ཆེ་གང་ཡིན་པ་དང་མཉམ་པར་བྱ་བ་སྟེ། ལེགས་པར་བཤད་པ་གང་ཡིན་པ་དེ་ནི་ཁྱོད་ཀྱིས་མ་མཐོང་བ་དང་མ་ཐོས་པ་སྟེ། མཐོང་བ་དང་ཐོས་མོད་ཀྱི་ཞེས་བྱ་བར་དགོངས་སོ། །དེ་ལྟར་ན་ཡང་བདག་གཙོ་བོ་ལ་དད་པས་ཅུང་ཞིག་སྡུག་པ་དང་མཛའ་བ་

དང་ཡིད་བརྟན་པའི་སྒོ་ནས་རབ་ཏུ་ཁྲོས་པ་ཉེས་པ་དང་བཅས་པ་ནི་སྡུག་པས་རབ་ཏུ་ཁྲོས་པ་ཡིན་ནོ་ཞེས་བརྗོད་པར་བྱ་བ་ཡིན་ནོ། །བདག་པོའི་བརྟུལ་ཞུགས་ཞེས་བྱ་བ་ལ་ཉེ་བར་ལོངས་སྤྱོད་པ་ལ་འདིར་བརྟུལ་ཞུགས་ཀྱི་སྒྲས་བརྗོད་པ་ཡིན་ཏེ། བདག་
པོའི་བརྟུལ་ཞུགས་གང་ལ་ཡོད་པ་དེ་ནི་འདིར་བདག་པོའི་བརྟུལ་ཞུགས་ཅན་ཏེ། བུད་མེད་ལ་བདག་པོ་ཁོ་ན་ལོངས་སྤྱོད་པར་བྱེད་ཀྱི་སྐྱེས་བུ་གཞན་དག་ནི་མ་ཡིན་པ་དེ་འདིར་འདོད་པ་ཡིན་ནོ། །གཟུགས་དང་ཡོན་ཏན་དང་ལྡན་ཞེས་བྱ་བ་ལ་ཡོན་ཏན་སྨོས་པས་འདིར་སྒྱུ་རྩལ་
ལ་མཁས་པ་ཉིད་བཟུང་བ་ཡིན་ནོ། །ཆུང་མ་ཡང་མེ་སྐོར་བྱས་པ་དེ་བས་ན་འདི་ཅིག་ཅར་ཡོངས་སུ་སྤང་བར་རིགས་པ་མ་ཡིན་ནོ། །རྗེའི་ཕྱིར་ནི་ཞེས་བྱ་བ་ནི་གང་གི་ཕྱིར་ཁྱེད་བདག་གི་རྗེར་གྱུར་པ་དེ་བས་ན་བདག་གིས་གདོན་མི་ཟ་བར་ཕན་པ་གསོལ་བ་ཡིན་གྱི། བུད་མེད་ཀྱི་
རྒྱུ་མཚན་གྱིས་ནི་མ་ཡིན་ནོ། །དོན་བཟང་པོ་དང་ལྡན་པ་ཉིད་ཀྱི་ཕྱིར་ལེགས་པར་བཤད་པ་ཡིན་ལ། ཡི་གེ་འགྲེལ་པ་དང་ལྡན་པ་ཉིད་ཀྱི་ཕྱིར་ལེགས་པར་སྨྲས་པའོ། །ངས་ལེགས་པར་སྨྲས་པ་ཁྱོད་ལ་ཡུལ་ཀ་ནྱ་ཀུབ་ཛ་སྦྱིན་ཞིང་ཞི་བ་ལ་ཡང་རྣམ་པ་ཐམས་ཅད་ཀྱིས་
བཟོད་པར་བྱའོ། །འདུ་ཞིང་འདུག་པའི་ཁྱིམ་གང་ཡིན་པ་དེ་ནི་འདུ་ཁང་ཡིན་ཏེ། སྐྱེ་བོ་ཆེན་པོ་འདུ་བའི་གནས་ཞེས་བྱ་བའི་ཐ་ཚིག་གོ། །འདུས་པ་ནི་ཚོགས་པ་ཡིན་ཏེ། ལས་སུ་བྱ་བའི་དོན་གཅིག་ཁོ་ན་ལས་འདུས་པར་གྱུར་པའོ། །གཏམ་ལ་སོགས་པ་ཟེར་བ་ནི་གཏམ་ལ་
འཇུག་པའོ། །དངོས་པོ་འདོད་པ་གང་ཡིན་པ་དེ་ནི་འདོད་པ་ཆེ་བའོ། །བརྟག་པའི་ཕྱིར་ཞེས་བྱ་བ་ནི་དཔྱད་པའི་ཕྱིར་རོ། །མངོན་དུ་བྱ་བ་ནི་མངོན་སུམ་དུ་བྱ་བའོ། །རྣམ་གྲངས་དུ་མ་ནི་རྣམ་པ་དུ་མས་སོ། །ཡང་དག་པར་གཟེངས་བསྟོད་པ་ནི་རབ་ཏུ་དགའ་བ་སྐྱེས་པ་དང་རྗེས་སུ་
མཐུན་པར་རོ། །ཡང་དག་པར་རབ་ཏུ་མགུ་བ་ནི་སྡུག་པ་སྐྱེད་པར་བྱེད་པར་རོ། །བྱས་ནས་ཞེས་བྱ་བ་ནི་ཡོངས་སུ་རྫོགས་པར་བྱས་ནས་སོ། །དུལ་བ་མ་ཡིན་པའི་ཆ་ལུགས་འཛིན་པ་ཞེས་བྱ་བ་ནི་རྒོད་པའི་ཆ་ལུགས་འཛིན་པའོ། །འཇམ་པའི་སྦྱོར་བས་ཞེས་བྱ་བ་ནི་ངག་འཇམ་

པོས་སོ། །དབྱེ་བའི་སྦྱོར་བས་ཞེས་བྱ་བས་ནི་ཁྱེད་ཅག་འདི་ལྟར་མཛེས་པར་མི་བྱེད་པ་གང་ཡིན་པ་དེས་ནི་ཁྱེད་ཅག་ལ་མངོན་པར་དད་པ་རྣམས་མ་དད་པར་འགྱུར་ལ། དེ་དག་མ་དད་པ་ལས་ནི་ཁྱེད་ཅག་གི་བསོད་སྙོམས་ལ་སོགས་པ་རྣམ་པར་ཉམས་པར་འགྱུར་རོ་ཞེས་བྱ་བ་དེ་ནི་འབྱེད་
པའི་ཚིག་ཡིན་ནོ། །མི་མཛེས་པར་བྱས་པ་ནི་ལོག་པར་ཞུགས་པའོ། །ཡན་ལག་ནི་ལག་པ་ལ་སོགས་པའོ། །ཉིང་ལག་ནི་སོར་མོ་ལ་སོགས་པའོ། །ཟིན་པ་ནི་སྐྱེས་བུའི་སེམས་འཛིན་པའི་ལས་མྱུར་བར་བྱེད་པའོ། །སྒྱུ་རྩལ་ཅན་ཞེས་བྱ་བ་ལ་སྒྱུ་རྩལ་ནི་གོང་དུ་རྣམ་
པར་བཤད་པའི་སྒྱུ་རྩལ་དྲུག་ཅུ་རྩ་བཞིའོ། །སྤྱོད་པ་ནི་སྒེག་པ་དང་བཅས་པས་འགྲོ་བ་ཡིན་ལ། གནས་པ་ནི་དེ་ཁོ་ན་དང་འདྲའོ། །འཇིག་རྟེན་ལས་འདས་པའི་ལམ་གྱིས་འདོད་ཆགས་དང་བྲལ་བ་གང་ཡིན་པ་དེ་འདོད་པ་ལ་བསྐྱོད་པར་མི་ནུས་པ་དེའི་ཕྱིར་དྲང་སྲོང་འཇིག་
རྟེན་པའི་ལམ་གྱི་འདོད་ཆགས་དང་བྲལ་བ་དང་ཞེས་སྨོས་པ་ཡིན་ནོ། །རྩོམ་པའི་དུས་ལ་ཐོག་མ་ཡོད་པ་མ་ཡིན་པ་གང་ཡིན་པ་དེ་ནི་ཐོག་མ་མེད་པ་ཡིན་ལ། བསགས་པ་ནི་གོམས་པར་བྱས་པའོ། །ཉོན་མོངས་པ་ལ་སོགས་པ་སྟེ། འདོད་ཆགས་ལ་སོགས་པའི་ཀུན་དུ་
སྤྱོད་པ་རྒྱུན་དུ་སྐྱེས་པར་གྱུར་པའོ། །དེ་ཁྱིམ་གྱི་སྐར་ཁུང་དྲ་བ་ཅན་ཞེས་བྱ་བ་ལ་སོགས་པ་ལ་དེའི་འོད་བཟང་པོའོ། །བྱ་བ་ཐམས་ཅད་བཏང་བའི་བློས་ཞེས་བྱ་བ་ནི་སེམས་སོ་སོར་བསྡུས་པར་གྱུར་པའོ། །ཡུགས་ས་མོ་ནི་བདག་པོ་ཤི་བར་གྱུར་པའོ། །ཕའི་རྗེས་སུ་
ཞུགས་པ་ཞེས་བྱ་བ་ནི་ཕ་དང་མེས་པོ་བརྒྱུད་པ་ལ་སོགས་འོངས་པར་གྱུར་པའོ། །ཁྱོད་དགེ་བ་ལ་དད་པས་ན་ཞེས་བྱ་བ་ལ། སངས་རྒྱས་ཀྱི་བསྟན་པ་ལ་མངོན་པར་དད་པས་སོ། །ཁྱོད་ཀྱི་ཁྱིམ་དུ་སུ་ཞིག་འོངས་ཞེས་བྱ་བ་ནི་ཁྱོད་ཀྱི་ཁྱིམ་དུ་གཞན་མུ་སྟེགས་ཅན་འཇུག་
པར་མི་འགྱུར་གྱི། གལ་ཏེ་དེ་དག་འཇུག་པར་གྱུར་ན་ནི་སྤྱོད་པ་མ་ཡིན་པ་བྱེད་པར་འགྱུར་ལ། དགེ་སློང་དག་འོངས་ན་ནི་དེ་དག་གི་ནང་ན་འགའ་ཞིག་ནི་འདོད་ཆགས་དང་བྲལ་བ་ཡིན་ལ། འགའ་ཞིག་ནི་འཚོ་བའི་རྒྱུས་ཀྱང་བྱ་བ་མ་ཡིན་པ་བྱེད་པར་མི་འགྱུར་བའི་

ཕྱིར་དགོས་པ་མེད་པར་དེ་སློངས་ཤིག་པའོ། །རྫས་ཀྱི་སྙིང་པོ་གཞག་པའི་ཁང་པའི་ལྡེ་མིག་དང་། སྙིང་པོ་མ་ཡིན་པའི་རྫས་གཞག་པའི་ལྡེ་མིག་ཀྱོག་པོ་དག་གོ། །བུད་མེད་ཀྱི་གཡོ་དང་ཞེས་བྱ་བ་ལ་སོགས་པ་ལ། གསུམ་པོ་དེ་དག་ཀྱང་གཡོའི་
རྣམ་གྲངས་ཡིན་ལ། ཁྱད་པར་དུ་ནི་སེམས་གྱ་གྱུས་འཇུག་པ་དང་། ཟུར་མིག་གིས་ལྟ་བ་ལ་སོགས་པ་ནི་འདིར་གཡོ་ཡིན་ལ། སྐྱེས་བུའི་སེམས་གཟུང་བར་བྱ་བའི་ཕྱིར་གཡོས་འཇུག་པའི་ངག་གི་ལས་ཉིད་ནི་སྒྱུ་ཡིན་ཞིང་། དོན་དེ་ཉིད་ལ་ལུས་ཀྱི་འགྱུར་བ་ལ་ཚུལ་འཆོས་
ཞེས་བྱའོ། །འདོད་ཆགས་ཀྱི་གནས་བཅུ་ཞེས་བྱ་བ་ལ། གནས་དང་པོ་ནི་འདོད་ཆགས་ཀྱི་དགའ་བ་སྐྱེད་པར་བྱེད་པའོ། །གཉིས་པ་ནི་ཡིད་ཆགས་པའོ། །གསུམ་པ་ནི་ཀུན་དུ་རྟོག་པ་འཕེལ་བར་བྱེད་པའོ། །བཞི་པ་ནི་གཉིད་ལོག་པ་དང་གཉིད་སད་པ་དང་འདྲ་བར་
སྐྱེད་པར་བྱེད་པའོ། །ལྔ་པ་ནི་ལུས་ཉམ་ཆུང་བ་སྐྱེད་པར་བྱེད་པའོ། །དྲུག་པ་ནི་ཡུལ་ལ་མངོན་དུ་ཕྱོགས་པས་འཇུག་པར་བྱེད་པའོ། །བདུན་པ་ནི་ངོ་ཚ་སེལ་བར་བྱེད་པའོ། །བརྒྱད་པ་ནི་འདོད་ཆགས་ཀྱི་དབང་དུ་གྱུར་པར་བྱེད་པའོ། །དགུ་པ་ནི་སྐྱེད་པར་བྱེད་པའོ། །
གནས་བཅུ་པ་ཐོབ་པས་ན་ནི་ལུས་བརྒྱལ་བར་བྱེད་པ་ཡིན་ལ། བརྒྱལ་བ་ལས་ཀྱང་འཆི་བར་འགྱུར་རོ། །ཟད་པ་དང་ཉམས་པ་མེད་པའི་ཕྱིར་འོངས་པའི་ཕྱིར་རྙེད་པ་ནི་སྐྱེས་པ་ཡིན་ལ། དོན་ཐོབ་པ་ནི་ཕྱིར་རྙེད་པ་ཐོབ་ནས་སོ། །ཚུལ་མ་ཡིན་པའི་གནོད་པ་ཞེས་བྱ་བ་ནི་
རིགས་པ་མ་ཡིན་པར་འཆི་བའི་སྡུག་བསྔལ་དུ་འགྱུར་ཞེས་བྱ་བའི་ཐ་ཚིག་གོ། །ཤིན་ཏུ་མདངས་དང་ལྡན་པ་ཉིད་ཀྱི་ཕྱིར་སྐྱེས་བུ་ལ་རབ་ཏུ་མཛེས་པའོ། །ཚུལ་མ་ཡིན་པར་སྤྱད་པ་ཞེས་བྱ་བ་ནི་མི་ཚངས་པར་སྤྱོད་པའི་མིང་ཅན་གྱི་ཚུལ་དང་མི་མཐུན་པའི་བྱ་བས་སོ། །མདུད་
པ་བོར་ནས་ཞེས་བྱ་བ་ནི་པུས་འཁྱུད་དང་འདྲ་བར་ཆོས་གོས་ཀྱིས་ལུས་དཀྲིས་ནས་སོ། །མི་མ་ཡིན་པ་མང་པོ་སྟེ། གནོད་སྦྱིན་མོ་དྲག་མོས་ཁྱབ་པར་གྱུར་པར་རོ། །ཐོར་བུ་ནི་འབྲུམ་བུའོ། །ཟས་ཀྱི་ཆོ་ག་ཞེས་བྱ་བ་ནི་ཕན་པའི་ཟས་ཀྱི་རྣམ་པའོ། །ཐེ་ཚོམ་ཞེས་བྱ་

ནི་སེམས་སྐྱོ་བར་རོ། །ཟིལ་གྱིས་མནན་པ་ཞེས་བྱ་བ་ནི་ཤིན་ཏུ་ཚར་བཅད་པར་གྱུར་པའོ། །དགའ་བར་བྱས་པ་ནི་མཆོག་ཏུ་དགའ་བ་ལ་སྦྱར་བའོ། །མགུ་བར་བྱས་པ་ཞེས་བྱ་བ་ནི་མགུ་བ་ཉིད་དུ་སྦྱར་བར་གྱུར་པའོ། །རྒྱུ་མཐུན་པར་སྐྱེས་པ་ཞེས་བྱ་བ་ནི་འདྲེ་ལ་སོགས་པའི་ཁུ་བ་
དག་ལས་སྐྱེས་པ་ཡིན་པས་ན་དེ་ནི་རྒྱུ་མཐུན་པར་སྐྱེས་པ་ཡིན་ནོ། །ཤིན་ཏུ་མི་སྡུག་པ་ཞེས་བྱ་བ་ནི་ལག་པ་དང་རྐང་པ་ལ་སོགས་པའི་གཟུགས་ངན་པའོ། །ཡུང་དང་འདྲ་བའི་འཚེར་བའི་སྐྲ་གང་ལ་ཡོད་པ་དེ་ནི་སྐྲ་སེར་བའོ། །རྩྭ་སྔོན་པོའི་ཁ་དོག་དང་འདྲ་བའི་སྐྲ་ཡོད་པས་ན་
སྐྲ་སྔོན་པོའོ། །ཁང་པའི་བར་ཏེ་ཁང་པའི་བར་མཚམས་སུའོ། །གྲོང་ཁྱེར་ལས་ཕྱི་རོལ་གྱི་ཐིབས་པོ་དང་བཅས་པའི་ཕྱོགས་ནི་ནགས་སྟུག་པོའི་ཕྱོགས་སོ། །མདངས་ཀྱིས་གསོ་བ་ནི་འཚོ་བའི་ཐབས་སྦྱིན་པའོ། །གཟུགས་མི་གསལ་བ་ཞེས་བྱ་བ་ནི་སྐྱེས་པའི་
ཕྱོགས་དང་། བུད་མེད་ཀྱི་ཕྱོགས་སུ་ཡང་གསལ་བར་མ་གྱུར་པའོ། །ཉེ་བར་སྟོན་ནས་ཞེས་བྱ་བ་ནི་འདིའི་ཞེས་ཕྱོགས་སུ་གསལ་བར་རོ། །ཀུན་ནས་མཛེས་པ་ནི་དད་པ་སྐྱེད་པར་བྱེད་པ་ཡིན་པས་ན་ཀུན་ནས་མཛེས་པའོ། །ཡོངས་སུ་སྨྲ་བས་ན་སྨྲས་པའོ། །ངན་
པ་ནི་སྨད་པར་བྱ་བའོ། །ནོར་ལ་སོགས་པ་གཟི་དང་བྲལ་བ་ཉིད་ཀྱི་ཕྱིར་ཐ་མའོ། །ཁྱད་པར་དུ་འཕགས་པའི་གནས་དགོད་པའི་སྒོ་ནས་གདོན་པར་དཀའ་བ་ཉིད་ཡིན་པའི་ཕྱིར་གནོད་པའོ། །སྡིག་པ་བྱེད་པ་ལས་དཀའ་བས་བཟློག་པར་བྱ་བ་ཉིད་ཡིན་པའི་ཕྱིར་
གནོད་པར་གྱུར་པའོ། །བཟའ་བ་ལ་སོགས་པ་ཆུང་བ་ཉིད་ཀྱི་ཕྱིར་བཟའ་བཏུང་མི་འབྱོར་པའོ། །སྐྲ་སེར་ཞེས་བྱ་བ་ལ་སོགས་པ་ལ། གང་དག་གི་སྐྲ་ངོ་བོ་ཉིད་ཀྱིས་ཡུང་གིས་ཁ་སྒྱུར་བ་ལྟ་བུ་དེ་དག་ནི་སྐྲ་སེར་དག་ཡིན་ནོ། །གང་དག་གི་སྐྲ་སེང་གེའི་ལྟ་བུ་ཡོད་པ་དེ་
དག་ནི་སྐྲ་སེར་སྐྱའོ། །གང་དག་གི་སྐྲ་ངོ་བོ་ཉིད་ཀྱིས་རམས་ཀྱིས་ཁ་སྒྱུར་བ་ལྟ་བུ་ཡོད་པ་དེ་དག་ནི་སྐྲ་ལྗང་གུ་དག་ཡིན་ནོ། །གང་དག་གི་སྐྲ་སྐྱེས་པ་ཁོ་ན་ནས་དཀར་པོར་ཡོད་པ་དེ་དག་ནི་སྐྲ་དཀར་བ་དག་ཡིན་ཏེ། །ཕྱིས་སྐྲ་དཀར་དུ་གྱུར་པ་ཉིད་ནི་མ་ཡིན་ནོ། །གང་དག་

གི་སྐྲ་གླང་པོ་ཆེ་ལྟ་བུ་ཡོད་པ་དེ་དག་ནི་གླང་ཆེན་སྐྲ་འདྲ་དག་ཡིན་ནོ། །གང་དག་གི་མགོ་ཟངས་མའི་བུམ་པ་ལྟར་འཇམ་ཞིང་སྐྲ་མེད་པ་དེ་དག་ནི་སྐྲ་མེད་དག་ཡིན་ནོ། །གང་དག་གི་མགོ་ལ་སུལ་ཆེན་པོ་གསུམ་མམ་བཞི་ཡོད་ལ། གང་དག་གི་འབར་འབུར་
དུ་མངོན་པ་དེ་དག་ནི་མགོ་འབར་འབུར་ཅན་དག་ཡིན་ནོ། །གང་དག་གི་མགོ་ལ་ལྟོས་ནས་མགོ་བོའི་ཚད་ཤིན་ཏུ་ཆེ་བར་མངོན་པའི་ཕྱིར་གླང་པོ་ཆེ་ཡིན་ནོ། །གང་དག་གི་ལུས་ཤིན་ཏུ་སྦོམ་པ་ལས་སུ་མི་རུང་བ་ནི་ཧ་ཅང་སྦོམ་པའོ། །ལུས་གླེབས་པ་འདྲ་བ་ཞེས་བྱ་བ་ནི། གང་དག་གི་
ལུས་འབྲས་ཀྱི་སྲུབས་དང་འདྲ་བར་ལེབ་ལེབ་པོར་འདུག་པ་སྟེ། དཔེར་ན་འབྲས་ཀྱི་སྲུབས་གཏུན་ཤིང་གིས་བརྡུངས་པ་ན་ལེབ་ལེབ་པོར་འགྱུར་ཞིང་རྔམས་སྲབ་པ་ཉིད་དུ་གྱུར་པ་དེ་དག་ལ་སྲུབས་ལེབ་ཅེས་བརྗོད་དོ། །དེ་དང་འདྲ་བར་དེ་དག་གི་ལུས་སམ་མགོ་ཡང་དེ་དང་འདྲའོ། །
གང་དག་གི་མགོ་བོང་བུ་དང་ཕག་གི་མགོ་འདྲ་བ་དེ་དག་ནི་བོང་བུ་དང་ཕག་གི་མགོ་ལྟ་བུ་ཡིན་ནོ། །གང་དག་ལ་མགོ་གཉིས་ཡོད་པ་དེ་དག་ནི་མགོ་གཉིས་པ་དག་ཡིན་ནོ། །གང་དག་ལ་དཔྲལ་བ་ཡན་ཆད་མཚོགས་མ་མེད་པ་དེ་དག་ནི་མགོ་ཆུང་ཡིན་ལ། ཁ་ཅིག་ནི་མགྲིན་
པ་ཡན་ཆད་མེད་དེ་བྲང་ལ་སྣ་ལ་སོགས་པ་ཡོད་པའི་ཕྱིར་རོ་ཞེས་བརྗོད་དོ། །གང་དག་གི་རྣ་བ་གླང་པོ་ཆེའི་འདྲ་བ་དེ་དག་ནི་གླང་ཆེན་རྣ་འདྲ་དག་ཡིན་ནོ། །གང་དག་གི་རྣ་བ་རྟའི་རྣ་བ་འདྲ་བ་ཡོད་པ་དེ་དག་ནི་རྟ་རྣ་འདྲ་བ་ཡིན་ནོ། །གང་དག་གི་རྣ་བ་བ་ལང་དང་སྤྲེའུའི་
འདྲ་བ་ཡོད་པ་དེ་དག་ནི་བ་ལང་རྣ་འདྲ་སྤྲེའུའི་རྣ་འདྲ་བ་དག་ཡིན་ནོ། །གང་དག་གི་རྣ་བ་བོང་བུ་དང་ཕག་འདྲ་བ་ཡོད་པ་དེ་ནི་བོང་བུ་རྣ་འདྲ་ཕག་རྣ་འདྲ་བ་དག་ཡིན་ནོ། །གང་དག་ལ་རྣ་བ་གཅིག་ཡོད་པ་དེ་དག་ནི་རྣ་བ་གཅིག་པ་དག་ཡིན་ནོ། །གང་དག་ལ་རྣ་བ་མེད་པ་དེ་དག་
ནི་རྣ་མེད་དག་ཡིན་ནོ། །གང་དག་གི་མིག་ཙན་དན་དམར་པོ་ལྟར་དམར་བ་དེ་དག་ནི་མིག་དམར་བ་དག་ཡིན་ནོ། །གང་དག་གི་མིག་ཚད་ལས་ཤིན་ཏུ་འདས་ཏེ་ཚུལ་དང་མཐུན་པ་མ་ཡིན་པ་དེ་དག་ནི་ཧ་ཅང་མིག་ཆེ་བ་དག་ཡིན་ནོ། །གང་དག་གི་མིག་ཤིན་ཏུ་ཆུང་ཞིང་ཟླུམ་

པོར་ཡོད་པ་དེ་དག་ནི་མིག་ཆུང་བ་དག་ཡིན་ནོ། །ཁ་ཅིག་ནི་གང་དག་གི་མིག་ལྤགས་ཤིན་ཏུ་དམར་ལ་རྫི་མ་མེད་པར་གྱུར་པ་དེ་དག་ནི་མིག་ཚག་པ་ཞེས་བརྗོད་དོ། །གང་དག་གི་མིག་ལ་ཁ་དོག་དམར་པོ་དང་སེར་པོ་འདྲེན་མར་ཡོད་པའི་ཕྱིར་དེ་དག་གི་མིག་ནི་ཧ་ཅང་སེར་བ་དག་
ཡིན་ནོ། །གང་དག་གི་མིག་ནོར་བུ་མཆིང་བུ་ལྟར་འཚེར་བ་དེ་དག་ནི་ཤེལ་མིག་དག་ཡིན་ནོ། །གང་དག་གི་མིག་ཆུའི་ཆུ་བུར་ལྟར་ཕྱི་རོལ་དུ་རློ་བར་གྱུར་པ་དེ་དག་ནི་མིག་ཆུ་བུར་ལྟ་བུ་དག་ཡིན་ནོ། །གང་དག་གི་སྐྱེས་པ་ཉིད་ནས་མིག་གཅིག་ལས་མེད་པ་དེ་དག་ནི་མིག་གཅིག་
པ་དག་ཡིན་ཏེ། དེ་ཉིད་ཀྱི་ཕྱིར་ཞར་བ་ལ་སོགས་པ་ལས་ལོགས་ཤིག་ཏུ་རྣམ་པར་གཞག་པ་ཡིན་ནོ། །གང་དག་ལ་མིག་མེད་པ་དེ་དག་ནི་མིག་མེད་པ་དག་ཡིན་ནོ། །གང་དག་ལ་སྣ་གླང་པོ་ཆེ་ལ་སོགས་པ་དང་འདྲ་བ་ཡོད་པ་དེ་དག་ནི་གླང་ཆེན་ལ་སོགས་སྣ་འདྲ་ཡིན་ནོ། །གང་དག་
ལ་སྣའི་སྦུབས་གཅིག་ཡོད་པ་དེ་དག་ནི་སྣ་སྦུབས་གཅིག་པ་དག་ཡིན་ནོ། །གང་དག་ལ་ཀོས་ཀོ་གླང་པོ་ཆེའི་འདྲ་བ་ཡོད་པ་དེ་དག་ནི་གླང་ཆེན་ཀོས་འདྲ་དག་ཡིན་ཏེ། དེ་བཞིན་དུ་རྟ་ཀོས་འདྲ་ཞེས་བྱ་བ་ལ་སོགས་པ་ཡང་རིག་པར་བྱའོ། །གང་དག་ལ་ཀོས་ཀོ་གཡས་པའམ། །
གཡོན་པ་གཅིག་ཁོ་ན་ཡོད་པ་དེ་དག་ནི་ཀོས་སྨྱུང་དག་ཡིན་ནོ། །གང་དག་ལ་ཀོས་ཀོ་མེད་པ་དེ་དག་ནི་ཀོས་མེད་པ་དག་ཡིན་ནོ། །གང་དག་གི་སོ་གླང་པོ་ཆེ་འདྲ་བ་དེ་དག་ནི་གླང་ཆེན་སོ་འདྲ་དག་ཡིན་ནོ། །རྟ་སོ་འདྲ་ཞེས་བྱ་བ་ལ་སོགས་པ་ཡང་དེ་བཞིན་དུ་རིག་པར་བྱའོ། །
གང་དག་གི་མགུལ་ཧ་ཅང་རིང་ཆེས་པ་དེ་དག་ནི་མགུལ་རིང་ཆེས་པའོ། །གང་དག་ལ་མགུལ་མེད་ཅིང་མགོ་ཕྲག་གོང་ལ་འབྱར་བ་དེ་དག་ནི་མཇིང་ནུབ་དག་ཡིན་ནོ། །གང་དག་གི་མིག་མགོ་བོའི་མདུན་དུ་གུག་པ་ཉིད་ཀྱི་ཕྱིར་ཕྲག་པའི་ཕྱོགས་དང་མཉམ་པར་གྱུར་པ་དེ་དག་
ནི་ཕྲག་མིག་དག་ཡིན་ནོ། །ཡང་ན་གང་དག་གི་མིག་ཕྲག་པའི་ཕྱོགས་ཁོ་ན་ལ་ཡོད་པ་དེ་དག་ནི་ཕྲག་མིག་དག་ཡིན་ནོ། །མི་སྡུག་པར་རབ་ཏུ་སྒུར་བ་ནི་ཆེས་སྒུར་བ་དག་ཡིན་ནོ། །གང་དག་གི་ཕོ་མཚན་ཆད་པ་དེ་དག་ནི་ཕོ་མཚན་ཆད་པ་དག་ཡིན་ཏེ། སྐྱེས་པའི་གཅི་བ་འབྱུང་

བའི་གནས་ལ་ཕོ་མཚན་ཞེས་བྱའོ། །གང་དག་གི་རླིག་པ་རླུང་གིས་རླུགས་པར་གྱུར་པ་དེ་དག་ནི་རླིག་རླུགས་པ་དག་ཡིན་ནོ། །གང་དག་ལ་རླིག་པའི་འབྲས་བུ་གཅིག་ཁོ་ན་ཡོད་པ་དེ་དག་ནི་རླིག་གཅིག་པ་དག་ཡིན་ནོ། །གང་དག་ལ་རླིག་པ་མེད་པ་དེ་
དག་ནི་རླིག་མེད་དག་ཡིན་ནོ། །ཚད་ལས་ཤིན་ཏུ་འདས་པ་དག་ཡིན་པས་ན་ཧ་ཅང་རིང་བའོ། །ཧ་ཅང་ཐུང་བ་ཤིན་ཏུ་འབོལ་བུ་ཐུང་ངུ་གྱུར་པ་དག་ཡིན་ནོ། །སྐེམ་པོ་ནི་ལུས་སྐམས་པར་གྱུར་པ་དག་ཡིན་ནོ། །གང་དག་ལ་འབད་རྩོལ་ཆུང་ངུས་ཀྱང་དབུགས་རྩེག་པ་ལ་
སོགས་པའི་སྐྱོན་འབྱུང་བར་འགྱུར་བ་ཡོད་པ་དེ་དག་ནི་མ་འོས་པར་ངལ་སྐྱེན་པ་ཞེས་བྱའོ། །ངལ་བ་ནི་ཆད་པའི་རྣམ་གྲངས་ཉིད་ཡིན་པའི་ཕྱིར་ལས་ཅུང་ཟད་ཀྱང་བྱེད་པར་མི་བཟོད་ཅེས་བྱ་བའི་ཐ་ཚིག་གོ། །ཚོ་ཆེས་པའི་ཚིལ་གྱིས་ནོན་པར་གྱུར་པ་ཉིད་ཡིན་པའི་ཕྱིར་ཧ་ཅང་སྦོམ་
པོར་གྱུར་པའོ། །ཤ་མདོག་ཁ་དོག་རྣམ་བཞི་དང་ཞེས་བྱ་བ་ནི་སྔོན་པོ་དང་། དམར་པོ་དང་། སེར་པོ་དང་། དཀར་པོ་དག་ཡིན་ཏེ། ཁ་དོག་གི་བྱེ་བྲག་སྨད་པར་བྱ་བ་གང་ཡིན་པ་དེ་དག་འདིར་བཀག་པ་ཡིན་གྱི། ལྷ་རྣམས་ཀྱི་གཟུགས་མཛེས་པ་ལྟ་བུ་དག་ནི་མ་ཡིན་ནོ། །གྱོལ་
པོ་ནི་རྐང་པ་ཆག་པ་དག་གམ་རྐང་པ་ས་ལ་དྲུད་པ་དག་ཡིན་ནོ། །གང་དག་གི་རྐང་པ་གཉིས་ཤིན་ཏུ་མདངས་ཏེ་འགྲོ་བ་དེ་དག་ནི་ལུས་ཉམས་པ་དག་ཡིན་ནོ། །ཡང་ན་གང་དག་གི་རྐང་པ་གཉིས་གཅིག་གི་སྟེང་དུ་གཅིག་འདོར་ཞིང་འགྲོ་བ་དེ་དག་ལ་ལུས་ཉམས་པ་དག་
ཡིན་ནོ། །མཛེས་པར་བྱ་ཞེས་བྱ་བ་འདིས་ནི་ལུས་ཡོངས་སུ་དག་པར་རོ། །ཡོངས་སུ་དག་པ་ཞེས་བྱ་བ་འདིས་ནི་ལས་དག་པ་བསྟན་པ་ཡིན་ནོ། །ལུས་ཡོངས་སུ་དག་པ་དང་ལས་ཡོངས་སུ་དག་པ་རབ་ཏུ་འབྱུང་བ་དང་བསྙེན་པར་རྫོགས་པ་གཉི་ག་དག་ལ་གཉི་ག་སྦྱར་བར་
བྱ་བ་ཡིན་ཏེ། ཡོངས་སུ་དག་པ་དང་མཛེས་པར་རབ་ཏུ་འབྱུང་བ་དང་བསྙེན་པར་རྫོགས་པར་བྱའོ་ཞེས་བྱ་བའི་ཐ་ཚིག་གོ། །བདེན་པའི་མཚན་གང་ཡིན་པ་དེ་ནི་བདེན་པའི་མཚན་ཏེ་དངོས་པོ་ཐམས་ཅད་ཐུགས་སུ་ཆུད་པའི་ཕྱིར་སངས་རྒྱས་ཡིན་ནོ་ཞེས་བྱ་བའི་དབང་

དུ་བྱས་ནས་སངས་རྒྱས་བཅོམ་ལྡན་འདས་ཡིན་ནོ། །གཏམ་འདྲེས་པ་ནི་རྒྱུན་མི་འཆད་པར་མཛའ་བའོ། །ཕེབས་པར་སྨྲ་བ་ནི་འབྲིང་དུ་མཛའ་བའོ། །སྨོས་འདྲིན་ནི་དེ་ཡོངས་སུ་བཤེས་པར་གྱུར་པའོ། །འགྲོགས་བཤེས་ནི་ལམ་གཅིག་ཏུ་འགྲོ་བ་ལ་སོགས་པས་
ཤིན་ཏུ་མཛའ་བ་སྐྱེས་པར་གྱུར་པའོ། །དགེ་འདུན་གྱིས་དགེ་འདུན་བསྙེན་པར་རྫོགས་པ་ཞེས་བྱ་བའི་ཚིག་འདིས་ནི་གསལ་པོར་འགལ་བ་བརྗོད་པ་ཡིན་ཏེ། གལ་ཏེ་དགེ་འདུན་གྱིས་དགེ་འདུན་བསྙེན་པར་རྫོགས་པར་བྱེད་པ་དེའི་ཚེ་བསྙེན་པར་རྫོགས་པ་དག་བསྙེན་
པར་རྫོགས་པ་མི་སྐྱེ་ཞིང་བསྙེན་པར་རྫོགས་པར་བྱེད་པ་ཡང་འགལ་ཚབས་ཅན་དུ་འགྱུར་རོ། །འདི་ལྟར་གང་སྔར་འོངས་པ་ཞེས་བྱ་བ་ལ། གང་འགའ་ཞིག་སྔར་འོངས་པར་གྱུར་པ་དེས་རྙེད་པ་སྔར་བླང་བར་བྱ་བ་ཡིན་པ་ལས་ཕྱིས་བསྐོ་བར་བྱ་བ་ཡིན་ནོ། །དྲན་པ་
ཉམས་པར་བྱས་པ་སྟེ། གང་དག་ལ་ལས་སུ་བྱ་བའི་དུས་སུ་དྲན་པའི་རིགས་ཅུང་ཟད་སྐྱེ་བར་མི་འགྱུར་བ་ཡིན་ནོ། །གང་དག་གིས་སྐྱེས་པར་གྱུར་ཀྱང་ཉམ་ཆུང་བར་གྱུར་པ་དེ་དག་ནི་དྲན་པ་ཞན་པ་ཡིན་ནོ། །གྲོང་ཁྱེར་ཆེན་པོ་དྲུག་ནི་འདི་ལྟ་སྟེ། གྲོང་ཁྱེར་ཙམ་པ་དང་།
གྲོང་ཁྱེར་བཱ་རཱ་ཎ་སཱི་དང་། རྒྱལ་པོའི་ཁབ་དང་། ཡངས་པ་ཅན་དང་། མཉན་ཡོད་དང་། སེར་སྐྱ་དག་ཡིན་ནོ། །སེམས་ཀྱིས་ཆེན་པོ་ཉིད་དུ་འཛིན་པ་ཡིན་པའི་ཕྱིར་བཀུར་སྟིར་བྱས་པའོ། །བླ་མར་བྱས་པ་ཞེས་བྱ་བ་ནི་ལུང་འབོགས་པའི་སྒོ་ནས་བླ་མའི་གནས་སུ་གྱུར་
པ་ཡིན་ནོ། །རི་མོར་བྱས་ཞེས་བྱ་བ་ནི་སྐྱེ་བོ་ཐམས་ཅད་ལས་ཁྱད་པར་དུ་འཕགས་པའི་གནས་སུ་གཞག་པར་གྱུར་པ་ཡིན་ནོ། །མཆོད་པར་བྱས་ཞེས་བྱ་བ་ནི། ལུས་བཏུད་པས་ཕྱག་བྱས་པ་ལ་སོགས་པས་སོ། །གང་དག་གིས་ཤེ་ན། རྒྱལ་པོ་ཞེས་བྱ་བ་
ལ་སོགས་པ་སྨོས་པ་ཡིན་ཏེ། རྒྱལ་པོ་ནི་དབང་བསྐུར་བར་གྱུར་པའོ། །གང་གི་ཚད་རྒྱལ་པོ་དང་འདྲ་བ་ཙམ་དུ་གྱུར་པ་གང་ཡིན་པ་དེ་ནི་རྒྱལ་པོ་དང་འདྲ་བ་ཙམ་མོ། །རྒྱལ་པོའི་བློན་པོ་དམ་པའམ་རྒྱལ་ཚབ་ཡིན་ནོ། །ཁྱིམ་བདག་ནི་གང་ཞིག་རྟག་ཏུ་མགོན་མེད་པ་དག་

ལ་ཟས་སྦྱིན་པ་སྦྱིན་པར་བྱེད་པ་སྟེ། དཔེར་ན་ཁྱིམ་བདག་མགོན་མེད་ཟས་སྦྱིན་ལྟ་བུའོ། །གྲོང་རྡལ་གྱི་གཙོ་བོ་ལ་འདིར་གྲོང་རྡལ་གྱི་མི་དང་། ལྗོངས་ཀྱི་མི་གཙོ་བོ་ལ་ལྗོངས་ཀྱི་མིར་འདོད་དོ། །བྱེ་བ་ཕྲག་བརྒྱའི་དབང་ཕྱུག་ཡིན་པས་ན་ནོར་ཅན་ནོ། །ཚོང་
དཔོན་ནི་ཚོང་པའི་གཙོ་བོར་གྱུར་པའོ། །དེད་དཔོན་ནི་གང་གི་ཡུལ་ནས་ཡུལ་གཞན་དུ་དོན་མཐུན་དེད་པར་བྱེད་པའོ། །བརྙེས་པ་ཡང་བཅོམ་ལྡན་འདས་ཀྱིས་ཆོས་གོས་ལ་སོགས་པ་བརྙེས་པར་གྱུར་པའོ། །ཡུན་རིང་པོ་ཤིག་ལས་ཞེས་བྱ་བ་ནི་སངས་རྒྱས་ཉིད་དུ་གོམས་པ་
རྩོམ་པ་ལ་སོགས་པ་ནས་སོ། །རྫོགས་བྱེད་ལ་སོགས་པ་སྟོན་པ་དྲུག་ཅེས་བྱ་བ་ལ་རྫོགས་བྱེད་ཅེས་བྱ་བ་ནི་མིང་ཡིན་ལ། འོད་སྲུངས་ཞེས་བྱ་བ་ནི་རྒྱུད་ཡིན་ནོ། །ཀུན་དུ་རྒྱུ་ཞེས་བྱ་བ་ནི་མིང་ཡིན་ལ། གནག་ལྷས་ཀྱི་བུ་ཞེས་བྱ་བ་ནི་རྒྱུད་ཡིན་ནོ། །ཡང་དག་རྒྱལ་བ་ཅན་ཞེས་བྱ་བ་ཡང་
མིང་ཙམ་ཡིན་ལ། སྨྲ་འདོད་ཀྱི་བུ་མོའི་བུ་ཞེས་བྱ་བ་ནི་རྒྱུད་ཡིན་ནོ། །མི་ཕམ་ཞེས་བྱ་བ་ནི་མིང་ཡིན་ལ། སྐྲའི་ལ་བའི་ཆ་ལུགས་འཛིན་པ་ཉིད་ཀྱི་ཕྱིར་སྐྲའི་ལ་བ་ཅན་ནོ། །ནོག་ཅན་ཞེས་བྱ་བ་ནི་མིང་ཡིན་ལ། ཀ་ཏྱ་ཡའི་བུ་ཞེས་བྱ་བ་ནི་རིགས་ཡིན་ནོ། །གཅེར་བུ་པ་ཞེས་བྱ་བ་ནི་དཀའ་ཐུབ་ཀྱི་
རིགས་ཅན་འགའ་ཞིག་གི་མིང་ཡིན་ལ། གཉེན་གྱི་བུ་ཞེས་བྱ་བ་ནི་རིགས་ཡིན་ནོ། །ཐམས་ཅད་མཁྱེན་པ་མ་ཡིན་པའི་ངོ་བོ་ཉིད་ཀྱིས་ལོག་པའི་ང་རྒྱལ་ཡོད་པའི་ཕྱིར་བདག་ཐམས་ཅད་མཁྱེན་པ་ཡིན་ནོ་ཞེས་དེ་ལྟར་རློམ་སེམས་པ་དག་ཡིན་ནོ། །གནས་པ་ཞེས་བྱ་བ་ནི་དེ་ནས་བསོད་སྙོམས་ལ་
སོགས་པ་ཚོལ་བར་བྱེད་པའི་ཕྱིར་རོ། །མིའི་ཆོས་ལས་བླ་མར་གྱུར་པ་ཞེས་བྱ་བ་ནི་མིའི་ཆོས་ཐ་མལ་པ་ལས་ཁྱད་པར་དུ་འཕགས་པ་ཉིད་ཡིན་པའི་ཕྱིར་མངོན་པར་ཤེས་པ་ལ་སོགས་པ་ནི་མིའི་ཆོས་ལས་བླ་མར་གྱུར་པ་ཡིན་ནོ། །གང་ཞིག་མིའི་ཆོས་ལས་བླ་མར་གྱུར་པའི་རྒྱུ་མཚན་རྫུ་འཕྲུལ་གྱི་ཆོ་འཕྲུལ་
དེས་བདག་གིས་དགུག་པ་སྟེ། བདག་གིས་མངོན་པར་སྦྱར་བར་བྱའོ། །རྫུ་འཕྲུལ་དང་ལྡན་པ་ཞེས་བྱ་བ་ནི་སྙོམས་པར་འཇུག་པ་མངོན་པར་བསྒྲུབས་པའོ། །ཤེས་པ་སྨྲ་བ་ཞེས་བྱ་བ་ནི་བདག་ལ་ཤེས་པ་ཁྱད་པར་དུ་འཕགས་པ་འདི་ལྟ་བུ་ཡོད་དོ་ཞེས་སྨྲ་བའི་ངང་ཚུལ་ཅན་ཡིན་ནོ། །བདག་ཉིད་

སེམས་པ་ཞེས་བྱ་བ་ནི་མངོན་པའི་ང་རྒྱལ་གྱིས་ཤེས་པ་ཡིན་གྱི་དོན་དམ་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །ལམ་གྱི་ཕྱེད་ཅེས་བྱ་བ་ལ་སོགས་པ་ལ་བདག་ཉིད་ཀྱིས་གཙུག་ལག་ཁང་ལས་དེ་ལམ་ཕྱེད་དུ་ཤོག་ཤིག །བདག་ཉིད་ཀྱང་རང་གི་གནས་ཁང་ལས་ལམ་ཕྱེད་དུ་མཆིའོ། །དེའི་གན་དུ་བདག་
དང་དེའི་གཙུག་ལག་ཁང་དང་བདག་གི་གནས་ཁང་དུ་ཡང་མི་འོང་ངོ་ཞེས་བྱ་བའོ། །རོ་དང་འདྲ་བ་ཞེས་བྱ་བ་ལ། འཕགས་པའི་ལམ་གྱི་འཚོ་བའི་ཐབས་དང་བྲལ་བ་ཉིད་ཀྱི་ཕྱིར་རོ་ཡིན་པའམ། བཅོམ་ལྡན་འདས་ཀྱི་ཐད་ལས་ཁྱོད་རོ་དང་འདྲ་བ་ཡོན་ཏན་མེད་པའི་ཕྱིར་རོ་དང་འདྲ་བ་ཡིན་ནོ། །གཅིག་ཏུ་ཞེས་བྱ་བ་
ནི་གཅིག་ཏུ་མངོན་པར་དད་པ་འཁྲུལ་པ་མེད་པའོ། །ཚར་གཅད་པའི་ཕྱིར་ཞེས་བྱ་བ་ནི་ཟིལ་གྱིས་མནན་པར་བྱ་བའི་ཕྱིར་རོ། །ཀུན་དགའི་ཕྱིར་ཞེས་བྱ་བ་ནི་མཆོག་ཏུ་དགའ་བ་དང་ལྡན་པར་བྱ་བར་རོ། །སྐྱེ་བོ་དམ་པ་ནི་འདིར་ཐར་པའི་ཆ་དང་མཐུན་པ་ལ་ཕན་པ་ཡོད་པ་ཡིན་པར་འདོད་དོ། །མགུ་བའི་ཕྱིར་
ཞེས་བྱ་བ་ནི་ཀུན་དུ་མགུ་བ་དང་ལྡན་པར་མཛད་པར་རོ། །དགེ་བ་རྣམས་ནི་བཅབ་པར་བྱའོ་ཞེས་བྱ་བ་ལ། དགེ་བའི་ཡོན་ཏན་གྱི་རྣམ་གྲངས་ཡིན་ནོ། །དེའི་དོན་ནི་འདི་ཡིན་ཏེ་ཐམས་ཅད་དུ་ཡོན་ཏན་བཅབ་པར་བྱ་བ་མ་ཡིན་གྱི། གང་གི་ཕྱིར་ད་ཤ་དང་ཀ་པ་ལ་དག་གི་ལྟ་བ་རྣམ་པར་དཔྱད་པར་བྱ་བའི་ཕྱིར་ཆོ་
འཕྲུལ་བསྟན་པར་བྱའོ་ཞེས་གསུངས་པ་དང་། རྫུ་འཕྲུལ་གྱིས་འགྲོ་བ་རྫས་སུ་གནང་བ་དང་ཉེས་པ་ཐམས་ཅད་དུ་བསྒྲག་པར་བྱ་བ་མ་ཡིན་ཏེ། འཇིག་རྟེན་མ་དད་པ་རྙེད་པར་འགྱུར་ན་མི་རུང་ངོ་། །གང་དུ་ཡོན་ཏན་བསྒྲགས་པར་བྱས་པར་གྱུར་ན་ཕན་པ་ཆེན་པོ་འབྱུང་བར་མི་འགྱུར་བས་དེའི་ཚེ་གདོན་མི་ཟ་བར་
དགེ་བ་བཅབ་པར་བྱ་བ་ཡིན་པ་དང་། གང་གི་ཚེ་ཉེས་པ་བསྒྲགས་པ་ན་ཕ་རོལ་པོ་མ་དད་པ་སྐྱེ་བར་མི་འགྱུར་བ་དེའི་ཚེ་བསྒྲགས་པར་བྱ་བ་ཡིན་ལ། ཕ་རོལ་མ་དད་པ་སྐྱེ་བར་འགྱུར་ན་བསྒྲག་པར་བྱ་བ་མ་ཡིན་ནོ་ཞེས་བྱ་བ་འདི་ཡིན་ནོ། །སྔོན་དང་ཐ་མ་མ་ཡིན་པའི་སེམས་ཅན་ལ་ཞེས་བྱ་བ་ནི་གང་བྱང་ཆུབ་
ཀྱི་སེམས་སྐྱེས་པ་དང་། བཅོམ་ལྡན་འདས་མ་གཏོགས་པ་གཞན་འགའ་ཞིག་བསྐྱེད་པའི་ནུས་པ་མེད་པ་དེ་ལྟ་བུ་ལ་འདིར་སྔོན་དང་ཐ་མ་མ་ཡིན་པའི་སེམས་ཅན་དུ་འདོད་དོ། །དགེ་བའི་རྩ་བ་བསགས་པ་ཞེས་བྱ་བ་ནི་གང་ལ་བསྐལ་པ་གྲངས་མེད་པ་གསུམ་དུ་གོམས་པ་ཡོངས་སུ་རྫོགས་པ་ཡོད་པ་དེ་ལ་

འདིར་དགེ་བའི་རྩ་བ་བསགས་པ་ཡིན་པར་འདོད་དོ། །ཇི་ལྟར་རིགས་པར་རྗེས་སུ་སྒྲུབས་ཤིག་ཅེས་བྱ་བ་ནི་ཁྱོད་ཇི་ལྟར་འདོད་པ་དེ་བཞིན་དུ་མཛེས་པར་གྱིས་ཤིག་ཅེས་བྱ་བ་ཡིན་ནོ། །སྐྲ་དཀར་དང་སྟོབས་མེད་པའི་ཕྱིར་རྒས་པ་ཡིན་ནོ། །དབང་པོ་ཡོངས་སུ་ཉམས་པའི་ཕྱིར་འཁོགས་
པ་ཡིན་ནོ། །ཡན་ལག་དང་ཉིང་ལག་ཐམས་ཅད་ལྷོད་པར་གྱུར་པ་ཉིད་ཀྱི་ཕྱིར་གཏུགས་པ་ཡིན་ནོ། །འདི་ནི་དགྲ་བཅོམ་པའི་ཡོན་ཏན་དང་ལྡན་པ་ཡིན་ནོ་ཞེས་སྐྱེ་བོ་མང་པོ་བློ་མཐུན་པར་གྱུར་པ་ནི་དགྲ་བཅོམ་པར་བློ་མཐུན་པ་ཡིན་ནོ། །མཐུན་པར་ཚངས་པའི་རྒྱུ་མཚན་ལ་སྤྱོད་པ་ཡིན་པའི་ཕྱིར་ཚངས་པ་མཚུངས་
པར་སྤྱོད་པ་ཡིན་ནོ། །ཤིན་ཏུ་མི་འཐད་པ་ནི་རིགས་པ་མ་ཡིན་པའོ། །གཡོས་ཀུན་དུ་སྤྱོད་པས་ཞེས་བྱ་བ་ནི་འདིས་བདག་ཅག་གི་བསམ་པ་ཤེས་པར་མ་གྱུར་ཅིག་ཅེས་བྱ་བའི་བཅོས་པའི་བསམ་པའོ། །ཟག་པ་ཟད་པ་མ་གཏོགས་པར་མངོན་པར་ཤེས་པ་ལྔ་གང་ལ་ཡོད་པ་དེ་ནི་མངོན་པར་ཤེས་པ་ལྔ་དང་ལྡན་པ་
དག་ཡིན་ཏེ། དེ་ཡང་ལྷའི་མིག་དང་། ལྷའི་རྣ་བ་དང་། རྫུ་འཕྲུལ་གྱི་ཡུལ་དང་། སྔོན་གྱི་གནས་དང་། འཆི་འཕོ་དང་སྐྱེ་བ་དག་ཡིན་ནོ། །རིའི་ཕྲག་ནི་རིའི་སྐྱབས་ཅན་ནོ། །དེ་དག་གིས་ཇི་ལྟར་ན་ཉི་མ་བདུན་གྱིས་ས་འདི་ཙམ་བསྐོར་བར་ནུས་ཤེ་ན། འདིར་ཁ་ཅིག་ནི་བདུད་ཀྱི་སྟོབས་ལ་ཞེས་རྗོད་པར་བྱེད་ལ།
གཞན་དག་ནི་རྐང་མགྱོགས་ཀྱི་སྨན་གྱི་སྟོབས་ལ་ཞེས་རྗོད་པར་བྱེད་དོ། །མཛའ་བ་དང་མི་མཛའ་བ་དང་ཐ་མལ་པའི་ཞེས་བྱ་བ་ལ། འཇིག་རྟེན་པ་ཐམས་ཅད་ལ་ཕྱོགས་གསུམ་ཡོད་པ་ཡིན་ཏེ། འདི་ལྟར་མཛའ་བོའི་ཕྱོགས་དང་། མི་མཛའ་བའི་ཕྱོགས་དང་། ཐ་མལ་པའི་ཕྱོགས་ཞེས་བྱ་བའོ། །བདེན་
པའི་ཚིག་གསོལ་ཅིག་ཅེས་བྱ་བ་ནི་བདེན་པ་སྔོན་དུ་སོང་བ་ཅན་གསོལ་བ་སྟེ་དོན་དུ་གཉེར་བར་བྱེད་པ་ཡིན་ནོ། །དབུགས་ཕྱུང་བ་ཞེས་བྱ་བ་ནི་དེ་དག་ཡིད་ཆེས་པ་སྐྱེས་པར་གྱུར་པའོ། །བདེན་པའི་ཚིག་གང་གིས་ཞེས་བྱ་བ་ལ་སོགས་པ་ལ། བདེན་པ་སྨོས་པས་བཅད་མ་ཐག་པའི་ཚིག་དངོས་པོ་ལ་གནས་
པའི་བདེན་པ་ཉིད་བསྟན་པ་ཡིན་ལ། བདེན་པའི་ཚིག་སྨོས་པས་ནི་མི་ལས་བདེན་པ་ཉིད་དུ་བསྟན་པ་ཡིན་ནོ། །གཟུགས་མེད་པ་ནི་གཟུགས་མེད་པ་གསུམ་ལས་སྐྱེས་པ་ཡིན་ནོ། །འདུ་ཤེས་མེད་འདུ་ཤེས་མེད་མིན་ཞེས་བྱ་བ་ནི་སྲིད་པའི་རྩེ་མོར་སྐྱེས་པ་ཡིན་ནོ། །འདུ་ཤེས་མེད་པ་ཞེས་བྱ་བ་ནི་འགོག་

པ་དང་འདུ་ཤེས་མེད་པའི་སྙོམས་པར་འཇུག་པས་འདུ་ཤེས་ཡང་དག་པ་གསལ་བ་ཡིན་ནོ། །འདོད་ཆགས་དང་བྲལ་བ་ཞེས་བྱ་བ་ནི་དོན་དམ་པའི་མྱ་ངན་ལས་འདས་པ་ཡིན་ནོ། །ཐར་པའི་ཐབས་ཁས་བླངས་པ་སྔོན་དུ་སོང་བ་ཅན་གྱི་མཐུན་པས་འདུས་པ་ནི་དགེ་འདུན་དག་ཡིན་ནོ། །འདི་ལྟར་འགའ་ཞིག་ཏུ་བློ་མི་བརྟན་
པས་འདུས་པ་ནི་ཚོགས་དག་ཡིན་ནོ། །རིགས་མཐུན་པས་བསྡུས་པ་ནི་འདུས་པ་དག་ཡིན་ནོ། །མང་པོ་དག་གི་ནང་ནས་འགའ་ཞིག་ཤེས་པ་ཁོང་དུ་ཆུད་པར་བྱ་བའི་ཕྱིར་སློབ་མ་ཉིད་དུ་འདུས་པ་ནི་འཁོར་ཡིན་ནོ། །ཚུལ་ཁྲིམས་ཞེས་བྱ་བ་ལ་སོགས་པ་ལ། ཚུལ་ཁྲིམས་ནི་རང་བཞིན་གྱི་ཁ་ན་མ་ཐོ་བ་དང་བཅས་
པ་ལས་ལྡོག་པའི་རང་བཞིན་ཡིན་ལ། བརྟུལ་ཞུགས་ནི་དུས་མ་ཡིན་པའི་ཟས་ལ་སོགས་པ་བཅས་པའི་ཁ་ན་མ་ཐོ་བ་དང་བཅས་པ་ལས་ལྡོག་པ་ཡིན་ནོ། །དེ་དག་གིས་ལུས་གདུང་བར་བྱེད་ཅིང་མེ་ལྔ་སྟེན་པ་ལ་སོགས་པ་ལུས་གདུང་བར་བྱེད་པའི་ཕྱིར་དཀའ་ཐུབ་ཡིན་ནོ། །ཚངས་པར་སྤྱོད་པ་ལ་གནས་པ་ནི་
མི་ཚངས་པར་སྤྱོད་པ་འགའ་ཞིག་ལས་ལྡོག་པར་གྱུར་པའོ། །འཕགས་པ་དགྱེས་པའི་ཞེས་བྱ་བ་ནི་ཟག་པ་མེད་པའོ། །བདེན་པའི་ཚིག་གསོལ་བ་དེའི་ཡན་ལག་དང་ཉིང་ལག་ཇི་ལྟར་སྔོན་གྱི་བཞིན་དུ་གྲུབ་པར་གྱུར་ཏོ་ཞེས་བྱ་བ་དེ་ཇི་ལྟར་རིགས་ཏེ། རྣམ་པར་སྨིན་པ་ལས་སྐྱེས་པའི་ལུས་ཞིག་ནས་ཡང་
སྐྱེ་བ་མི་སྲིད་པའི་ཕྱིར་རོ་ཞེ་ན། འདི་ལ་ཁ་ཅིག་ནི་བཅོམ་ལྡན་འདས་ཀྱིས་གསུངས་པའི་བདེན་པའི་ཚིག་གི་སྟོབས་དང་རྒྱུ་མཐུན་པའི་འབྱུང་བ་ཆེན་པོ་བཞི་པོ་དག་གི་ལུས་ཀྱི་དབང་པོ་དེ་ཡན་ལག་དང་ཉིང་ལག་རབ་ཏུ་བསྐྱེད་པ་ཡིན་ནོ་ཞེས་བརྗོད་ལ། ཁ་ཅིག་ནི་སངས་རྒྱས་རྣམས་ཀྱི་དམིགས་པའི་ཁྱད་པར་
ནི་བསམ་གྱིས་མི་ཁྱབ་པ་ཡིན་པ་དེའི་ཕྱིར་བཅོམ་ལྡན་འདས་ཀྱིས་རྫུ་འཕྲུལ་གྱིས་བྱས་པ་འདི་ལ་ངོ་མཚར་མེད་དོ་ཞེས་རྗོད་པར་བྱེད་དོ། །ཅ་ཅོའི་སྒྲ་ནི་དགོད་པའི་རྣམ་པ་ཡིན་ཏེ། ཅ་ཅོའི་སྒྲ་དབྱུག་སྒྲ་ཞེས་བྱ་བ་སྒྲ་ཆེར་བསྒྲགས་པའོ། །འདི་ནས་ཐོས་མ་ཐག་ཏུ་བདེན་པ་མངོན་པར་རྟོགས་
ནས་ཞེས་བྱ་བ་ནི་བདེན་པ་ཁོང་དུ་ཆུད་མ་ཐག་ཏུ་ཤིན་ཏུ་དབང་པོ་རྣོ་བ་ཉིད་ཀྱི་ཕྱིར་ཕྱིར་མི་འོང་བའི་འབྲས་བུ་མངོན་སུམ་དུ་བྱས་པ་ཡིན་ནོ། །བར་དུ་ཞེས་བྱ་བ་ནི་གཙུག་ལག་ཁང་དང་ཐག་ཉེ་བར་ཀ་བ་བཞི་བསྒྲེང་སྟེ། སྟེང་བླ་རེས་ཕུབ་པ་ནི་གོས་ཀྱིས་བླ་གབ་ཅན་དུ་བྱས་པ་ཡིན་ནོ། །རྡོ་རྗེ་ལ་སོགས་

པ་ལ་གསེར་ལས་བྱས་པའི་སེང་གེའི་ཁྲི་རྡོ་རྗེ་དང་། བཻ་ཌཱུཪྻ་དང་། རིན་པོ་ཆེ་ལ་སོགས་པས་བརྒྱན་པ་བཤམས་སོ། །གནོད་པ་ཆུང་ངམ་ཞེས་བྱ་བ་ལ་སོགས་པ་ལ་གནོད་པ་ནི་ཕྱི་རོལ་གྱི་རྣམ་པར་འཚེ་བས་གཟིར་བ་ཡིན་ནོ། །ཁ་ན་མ་ཐོ་བ་ནི་ལུས་ལས་སྐྱེས་པའི་ནད་ཀྱིས་གཟིར་
བའོ། །ཉམ་ང་བ་ནི་ཡིད་སྐྱོ་བའི་ནད་ཡིན་ནོ། །བསྐྱོད་པ་ཡང་བ་ནི་ལུས་ཀྱི་བྱ་བ་ལེ་ལོ་མེད་པ་ཉིད་ཡིན་ནོ། །འཚོ་བ་ནི་བསོད་སྙོམས་ཀྱིས་གནས་པ་ཡིན་ནོ། །སྟོབས་དང་ལྡན་པ་ནི་འཚོ་བའི་འབྲས་བུ་ནུས་པ་ཉིད་ཡིན་ནོ། །བདེ་བ་ནི་ལུས་ཀྱི་ཡིན་ནོ། །བདེ་བ་ལ་རེག་པར་གནས་པ་ནི་མངོན་པར་དགྱེས་པ་དང་
བཅས་པས་གནས་པ་ཡིན་ནོ། །གལ་ཏེ་ཇི་སྟེ་ཡང་རྣམ་པ་དེ་དག་གིས་ཁྱིམ་པ་དག་སོ་སོར་ཀུན་དགའ་བར་འགྱུར་ལ། བཅོམ་ལྡན་འདས་ཀྱང་རི་མོར་བྱས་པ་དེས་དགྱེས་པར་འགྱུར་བ་ཁོ་ན་ཡིན་ནོ། །ཡལ་ག་ནི་སྡོང་པོ་ལས་གྱེས་པ་ཡིན་ལ། ཡལ་ག་ཕྲ་མོ་ཡང་ཡལ་ག་ལས་གྱེས་པ་ཡིན་ནོ། །དེས་རྒྱས་
པ་ནི་ཡངས་པར་གྱུར་པའོ། །མངོན་པར་འདུས་བྱས་པ་ཞེས་བྱ་བ་ནི་བྱས་པ་དང་བཅས་པར་རོ། །གཡོས་ཞེས་བྱ་བ་ལ་སོགས་པས་ནི་ཆུང་ངུ་དང་འབྲིང་དང་ཆེན་པོར་གཡོས་བསྟན་པ་ཡིན་ནོ། །གནོད་པའི་གཏམ་ནི་ཧ་ཧའི་སྒྲ་འདོན་པའམ། སྒྲོག་པར་བྱེད་པ་ཡིན་ནོ། །འདི་ལ་ཡང་ཆུང་ངུ་ལ་སོགས་
པའི་དབྱེ་བ་ཤེས་པར་བྱའོ། །དྲང་སྲོང་དེ་དག་གིས་སངས་རྒྱས་བཅོམ་ལྡན་འདས་ཞེས་བྱ་བ་ནས་མཐོང་ངོ་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཁྱད་པར་ཇི་ལྟ་བུ་དང་ལྡན་པ་ཞེ་ན། ཉི་མ་ཤར་མ་ཐག་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། འཕྲལ་དུ་ཤར་མ་ཐག་པ་ནི་ཉི་མ་ཤར་མ་ཐག་
པ་ཡིན་ལ། དེའི་འོད་ཀྱིས་མཛེས་པའི་དཀྱིལ་འཁོར་གང་ཡིན་པ་དང་། གསེར་བཙོ་མའི་མདོག་ནི་གསེར་བཏུལ་བ་སྟེ་དྲི་མ་མེད་པ་དེ་གཏུབས་པའི་དུམ་བུ་སྤུངས་ཤིང་ཕུང་པོར་བྱས་པ་གང་ཡིན་པ་དེ་དང་འདྲ་བར་དམར་བ་དག་ཡིན་ནོ། །མེ་ཏོག་ཀུ་རན་ད་ཀའི་ཚོགས་དང་། ཨ་ཤོ་ཀའི་ཕུང་པོ་ལྟར་དམར་བ་
ཡིན་ནོ། །ཆུ་འཛིན་ཆུ་བཅས་ཀྱི་ཟབ་པའི་སྒྲ་དང་། རྒྱ་མཚོ་དང་། སྟོན་ཀའི་ཁྱུ་མཆོག་དང་། རྔ་བོ་ཆེའི་སྒྲ་ལྟར་གསུང་ཟབ་པ་ཡིན་ནོ། །ཤིན་ཏུ་གསལ་བས་ན་རྣམ་པར་གསལ་བ་ཡིན་ལ་ཐོས་ན་བདེ་བ་ནི་རྣ་བའི་རྣམ་པར་ཤེས་པ་བདེ་བསྐྱེད་པ་ཡིན་ཏེ། རྣམ་པར་གསལ་བ་དང་། ཐོས་ན་བདེ་བ་དང་། སྙན་

པའི་གསུང་གང་ལ་མངའ་བ་དེ་ལ་དེ་སྐད་ཅེས་བྱའོ། །འོ་མའི་མཚོ་ནི་འོ་མའི་རྒྱ་མཚོ་ཡིན་ལ། དེའི་དབུ་བ་ནི་དབུ་བའི་ཕྲེང་བ་ཡིན་ཏེ། འོ་མའི་མཚོ་དབུ་བའི་ཕྲེང་བ་དང་འདྲ་བར་དཀར་བའི་མཛོད་སྤུ་དེས་རྣམ་པར་སྤྲས་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །གྲངས་མེད་པ་ནི་བགྲང་བའི་ཕྱིར་མི་ནུས་པ་
ཡིན་ལ། གཞན་ལ་མ་མཐོང་བའི་ཕྱིར་ངོ་མཚར་ཡིན་ཞིང་བསམ་པར་བྱ་བ་མ་ཡིན་པའི་ནུས་པ་མངའ་བའི་ཕྱིར་བསམ་གྱིས་མི་ཁྱབ་པ་ཡིན་ནོ། །གནས་ནི་གྲངས་མེད་པ་ལ་སོགས་པའི་ཡོན་ཏན་གྱི་རྟེན་ཡིན་ནོ། །སྲིད་པར་དགའ་བ་སྟེ་ཞེན་པ་གང་ཡིན་པ་དང་། བདེ་བ་གང་ཡིན་པ་དང་། གཞན་
གྱིས་བཀུར་སྟི་བྱས་པ་དེ་དག་ལ་རེ་བ་སྟེ། དེ་ལ་མངོན་པར་འདོད་ཅིང་ཆགས་པ་གང་ཡིན་པ་དེ་ཉིད་དྲི་མའི་འདམ་དང་ཉེས་པ་ཡིན་ཏེ། ཉེས་པ་དེ་དང་བྲལ་བ་གང་ལ་ཡོད་པ་དེ་ལ་དེ་སྐད་ཅེས་བྱའོ། །དཔག་ཏུ་མེད་པའི་དུས་བསགས་པ་ཞེས་བྱ་བ་ནི་བསྐལ་པ་གྲངས་མེད་པ་གསུམ་དུ་བསགས་པ་
ཡིན་ནོ། །གང་ཞེ་ན། ཚོགས་ཞེས་བྱ་བ་སྨོས་ཏེ། ཚོགས་དེས་ཐོབ་པར་གྱུར་པའི་བླ་ན་མེད་པའི་ཡེ་ཤེས་དམ་པ་གང་ཡིན་པ་དེ་ཁོ་ན་རྒྱན་ཡིན་པ་དེའི་ཕྱིར་སྙན་པའི་རྒྱན་གང་ལ་ཡོད་པ་དེ་ལ་དེ་སྐད་ཅེས་བྱའོ། །ལྷའི་དབང་པོ་བརྒྱ་བྱིན་དེའི་ཅོད་པན་ཏེ། ཅོད་པན་ལ་རིན་ཆེན་རྒྱན་བཏགས་པ་དེས་
ཞབས་གཉིས་ལ་བྲིས་པར་གྱུར་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །ཅོད་པན་མཛེས་པར་བྱ་བའི་ཕྱིར་མཐའི་ཕྱོགས་སུ་གསེར་གྱི་ལྕུ་གུ་དང་། རིན་པོ་ཆེ་འོད་གསལ་བ་བཏགས་པ་ནི་རིན་པོ་ཆེའི་རྒྱན་གྱི་སྒྲས་བརྗོད་པ་ཡིན་ནོ། །མཆོད་པར་འོས་པ་སྟེ། མཆོད་པར་བྱ་བ་ལྷ་ལ་སོགས་
པ་རྣམས་ཀྱིས་སངས་རྒྱས་བཅོམ་ལྡན་འདས་ལ་མངོན་པར་མཆོད་པ་ཡིན་ནོ། །དེ་བཞིན་གཤེགས་པ་ལ་རྒྱལ་པོ་ཆེན་པོ་སྐུལ་བར་བྱེད་པ་གང་ཡིན། ཅིའི་ཕྱིར་བཅོམ་ལྡན་འདས་སྐུལ་བར་བྱེད་པ་ཞལ་གྱིས་བཞེས་པར་འགྱུར་ཞེ་ན། འདིར་སྨྲས་པ། བཅོམ་ལྡན་འདས་ཀྱིས་འདི་སྐད་དུ་
ང་ནི་རྫུ་འཕྲུལ་དང་ཆོ་འཕྲུལ་རབ་ཏུ་བསྟན་པའི་ཕྱིར་དོན་དུ་གཉེར་བ་མ་ཡིན་གྱི། གལ་ཏེ་སྐྱེས་བུ་གཙོ་བོ་འགའ་ཞིག་སྐུལ་བར་བྱེད་པ་དེའི་ཚེ་སེམས་ཅན་ལ་ཕན་འདོགས་པ་ཆེན་པོ་སྔོན་དུ་མཛད་ནས་ཆོ་འཕྲུལ་ཆེན་པོ་རྣམ་པར་བསྟན་པར་བྱའོ་ཞེས་བསྟན་པ་དང་། སྐྱེས་བུ་དམ་པ་ནི་བསྐུལ་ནས་བྱ་བ་

ཆེན་པོ་ལ་འཇུག་པར་འགྱུར་བ་ལྟར་བཅོམ་ལྡན་འདས་སེམས་ཅན་ཐམས་ཅད་ཀྱི་དམ་པར་གྱུར་པ་དེའི་ཕྱིར་གཞན་གྱིས་བསྐུལ་བ་ཞལ་གྱིས་བཞེས་པ་ཡིན་ནོ། །དོན་ནི་མངོན་པར་འདོད་པའི་དོན་སྒྲུབ་པའི་ཕྱིར་རོ། །ཕན་པ་ནི་འཇིག་རྟེན་གཉིས་དང་མི་འགལ་བའི་འབྲས་བུ་
འབྱོར་པར་བྱ་བའི་ཕྱིར་རོ། །བདེ་བའི་ཕྱིར་ཞེས་བྱ་བ་ནི་ཐར་པའི་བདེ་བ་བསྐྱེད་པར་བྱ་བའི་ཕྱིར་རོ། །ཇི་ལྟར་སེམས་རྩེ་གཅིག་པའི་མཉམ་པར་གཞག་པ་ཐོབ་པས་ཉིད་ཀྱི་གདན་ལས་མི་སྣང་བར་གྱུར་ཏེ་ཞེས་བྱ་བ་ལ་སོགས་པའི་རྣམ་པར་བཤད་པ་ནི་སྔ་མ་བཞིན་རིག་པར་བྱའོ། །བླ་ན་མེད་པའི་ཆོ་འཕྲུལ་ཆེན་
པོ་ཞེས་བྱ་བ་ནི་ཆོ་འཕྲུལ་གང་ཞིག་དེ་བཞིན་གཤེགས་པ་མ་གཏོགས་པ་འཇིག་རྟེན་ཐམས་ཅད་ཀྱིས་བསྐྱེད་པ་ཉིད་དུ་མི་ནུས་པ་དེ་ནི་དེ་བཞིན་གཤེགས་པའི་ཐུན་མོང་མ་ཡིན་པ་ཡིན་ནོ། །ཤིང་རྟའི་འཁོར་ལོ་ཙམ་ཞེས་བྱ་བ་ལ། ཤིང་རྟའི་འཁོར་ལོ་ཙམ་གྱིས་ནི་པདྨའི་གེ་སར་བསྟན་པ་ཡིན་ནོ། །སྡོང་བུ་
ཞེས་བྱ་བ་ནི་པདྨའི་ཡུ་བ་ཡིན་ནོ། །དགོངས་པའི་སེམས་ཀྱིས་ཤེས་ནས་ཞེས་བྱ་བ་ནི་དུས་དེའི་ཚེ་བཅོམ་ལྡན་འདས་ཀྱི་སྟོབས་ཀྱིས་དེ་དག་ཐམས་ཅད་ཀྱིས་དེ་ལྟར་བཅོམ་ལྡན་འདས་ཀྱི་ཐུགས་ཡོངས་སུ་ཤེས་པའི་ནུས་པ་དང་ལྡན་པའི་སེམས་དང་ལྡན་པར་གྱུར་པའོ། །སངས་རྒྱས་ཀྱི་ཚོགས་ནི་མཛེས་
པའི་རྒྱུ་ཡིན་ཏེ། དཔེར་ན་རྣ་བ་ལ་མེ་ཏོག་ལ་སོགས་པའི་ཚོགས་བཏགས་པ་བདེ་བ་དང་མཛེས་པ་བསྒྲུབ་པར་བྱ་བའི་དོན་ཡིན་པ་དེ་དང་འདྲ་བར་ཕྱོགས་མཚམས་ཀྱི་སྒོ་ཐམས་ཅད་མཛེས་པ་འབྱོར་བར་བྱ་བའི་ཕྱིར་བཅོམ་ལྡན་འདས་ཀྱིས་འོག་མིན་གྱི་མཐར་ཐུག་པའི་བར་དུ་སངས་རྒྱས་ཀྱི་ཚོགས་སྤྲུལ་པ་མཛད་
པ་ནི་ལྷ་དང་མི་དུ་མ་མཐོ་རིས་དང་ཐར་པ་ལ་བློ་འཛེག་པར་བྱ་བའི་ཕྱིར་རོ། །བཀའ་ལུང་སྟོན་པ་ནི་འདིར་གཞན་ལ་ཡོན་ཏན་ཁྱད་པར་ཅན་ཁོང་དུ་ཆུད་པ་བརྡ་སྤྲོད་པ་ཡིན་ནོ། །མིག་མི་འཛུམས་པ་ཞེས་བྱ་བ་ནི་འབྱེད་པ་དང་འཛུམས་པ་སྤངས་པའི་མིག་གིས་ལྟ་བར་བྱེད་པའོ། །རྒྱུན་མི་འཆད་པར་ཕྱག་
འཚལ་བ་ཞེས་བྱ་བ་ནི་ལྡོག་པ་མེད་པར་སྦྱོར་བ་ལ་བརྩོན་པ་ཡིན་ནོ། །སྒྲ་འབྱིན་པ་ཞེས་བྱ་བ་ནི་རབ་ཏུ་དགའ་བར་འགྱུར་བའི་སེམས་ཀྱིས་རང་གི་རིས་དང་སྐལ་བ་མཉམ་པ་ལ་རབ་ཏུ་གྲགས་པའི་ཡིད་དུ་འོང་བའི་སྒྲ་སྒྲོག་པར་བྱེད་པའོ། །མཆོད་པ་ལྷག་པར་ཞེན་པ་བྱ་བ་ནི་མཆོད་པའི་རྒྱུ་མཚན་ཡིན་

ལ། །སྤྲོ་བ་སྐྱེས་པ་ནི་ལས་སུ་བྱ་བ་ལའོ། །བསྐུལ་བར་བྱ་བའི་ཕྱིར་ཞེས་བྱ་བ་ནི་གཞུག་པར་བྱ་བའི་ཕྱིར་རམ། སྤྲོ་བ་བསྐྱེད་པར་བྱ་བའི་ཕྱིར་རོ། །བརྩམ་པར་བྱ་ཞིང་ཞེས་བྱ་བ་ནི་སྤྲོ་བའི་མིང་ཅན་གྱི་ཡིད་ལ་བྱེད་པའི་བྱ་བས་འབྱུང་བར་བརྩམ་པར་བྱ་བ་ཡིན་ནོ། །དབྱུང་བར་བྱ་ཞེས་བྱ་བ་ནི་སྲེད་པས་
སྦྱར་བའི་ཕོངས་གཟེབ་ལས་དབྱུང་བར་གྱིས་ཤིག་པ་ཡིན་ནོ། །བྱུང་ནས་ཇི་ཞིག་བྱ་བ་ཡིན་ཞེ་ན། སྨྲས་པ། སངས་རྒྱས་བཅོམ་ལྡན་འདས་ཀྱི་བསྟན་པ་འཕགས་པའི་ལམ་ཡན་ལག་བརྒྱད་པའི་མཚན་ཉིད་ཅན་ལ་འཇུག་ཅིང་མངོན་པར་སྦྱར་བར་བྱ་བ་ཡིན་ནོ། །ཁོ་བོ་སྟེ་བདག་གི་འཆི་བའི་དགྲ་
བོའི་སྡེ་གཞོམ་ཞིང་བཅོམ་པར་བྱ་བ་ཡིན་ཏེ། གང་གི་ཕྱིར་ཉོན་མོངས་པའི་མིང་ཅན་གྱི་ཉོན་མོངས་པའི་སྡེའི་དབང་གིས་བདག་འཆི་བདག་གི་སྡེས་ཡང་དང་ཡང་དུ་ཕམ་པར་འགྱུར་བའི་ཕྱིར་རོ། །ཅིའི་ཕྱིར་འཆི་བདག་སྡེ་ཕམ་པར་བྱ་བའི་ཕྱིར་སངས་རྒྱས་ཀྱི་བསྟན་པ་ལ་མངོན་པར་སྦྱོར་བར་བྱ་བ་
ཡིན་ཞེ་ན། སྨྲས་པ། གང་གི་ཕྱིར་གང་ཞིག་རབ་ཏུ་བག་ཡོད་པ་སྟེ་བག་མེད་པ་སྤངས་པས་ཆོས་འདུལ་བ་འདི་ལ་སྤྱོད་པར་འགྱུར་བའོ། །ཆོས་ནི་ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཡིན་ལ།
འདུལ་བ་ནི་ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་ཡིན་ནོ། །སྐྱེ་བའི་འཁོར་བ་སྟེ་རྒྱུན་སྤངས་ནས་ཉེ་བར་ལེན་པའི་ཕུང་པོ་ལྔའི་མཚན་ཉིད་ཅན་གྱི་སྡུག་བསྔལ་མཐར་བྱེད་པར་འགྱུར་བ་དེའི་ཕྱིར་སངས་རྒྱས་ཀྱི་བསྟན་པ་ལ་འཇུག་པར་བྱ་བ་ཡིན་ནོ། །ཇི་སྲིད་
ཉི་མ་མ་ཤར་བ་ཞེས་བྱ་བ་ནི་ཇི་སྲིད་དུ་ཉི་མ་ཤར་བར་མ་གྱུར་པར་རོ། །དེ་སྲིད་སྲིན་བུ་མེ་ཁྱེར་སྣང་ཞེས་བྱ་བ་ནི་དེ་སྲིད་དུ་ཕྱོགས་འགའ་ཞིག་གསལ་བར་བྱེད་པ་ཡིན་ནོ། །མཁའ་ལ་སྣང་བྱེད་འཆར་ན་ནི་ཞེས་བྱ་བ་ནི་གང་གི་ཚེ་ཡང་མཁའ་སྟེ་ནམ་མཁའ་ལ་སྤྲིན་ལ་སོགས་པའི་སྒྲིབ་པ་མེད་པའི་ཕྱིར་སྣང་བྱེད་
ཤར་ཞིང་དེ་གནས་པར་གྱུར་པ་ན་སྲིན་བུ་མེ་ཁྱེར་སྔོན་པོ་ཉིད་དུ་འགྱུར་རོ་ཞེས་བྱ་བར་སྦྱར་རོ། །སྣང་བར་བྱེད་པས་ན་སྣང་བྱེད་ཡིན་ཏེ། མཉམ་པ་དང་མི་མཉམ་པ་རབ་ཏུ་སྣང་བར་བྱེད་ཅེས་བྱ་བའི་ཐ་ཚིག་གམ། གསལ་བར་བྱེད་པ་ཐམས་ཅད་ཟིལ་གྱིས་གནོན་པའི་སྒོ་ནས་གསལ་བར་བྱེད་པ་ཡིན་

པས་ན་སྣང་བྱེད་ཡིན་ནོ། །སྔོན་པོ་ཉིད་དུ་འགྱུར་བ་ནི་ནམ་མཁའ་ལ་འོད་ཟེར་སྟོང་དང་ལྡན་པ་ཅན་གནས་པར་གྱུར་པའི་ཚེ་སྲིན་བུ་མེ་ཁྱེར་འོད་མེད་པར་གྱུར་ཏེ། མངོན་པར་འདོད་པ་མ་ཡིན་པའི་ཁ་དོག་ཙམ་ལ་གནས་པའི་ཕྱིར་རོ། །འདིར་དེའི་རྒྱུ་ནི་གང་གི་ཕྱིར་འོད་མེད་པ་དང་།
དེའི་སྔོན་བཞིན་དུ་འབར་བ་མ་ཡིན་པས་སོ། །དཔེ་བསྟན་ནས་དེ་བསྒྲུབ་པར་བྱ་བའི་ཕྱིར་སྨྲས་པ། སྣང་བར་གྱུར་ཅེས་བྱ་བ་ནི་སྣང་བར་བྱེད་པས་ན་སྣང་བྱེད་དེ། དངོས་པོའི་རྐྱེན་ཡིན་པའི་ཕྱིར་རོ། །གྱུར་པ་ནི་རང་གི་གྲུབ་པའི་མཐའ་ཙམ་གསལ་བར་བྱས་པར་གྱུར་ཅེས་བྱ་བའི་ཐ་ཚིག་གོ། །གང་
དག་གིས་ཤེ་ན། རྫོགས་བྱེད་ལ་སོགས་པ་འཇིག་རྟེན་འདོད་གཞུང་རྟོག་པར་བྱེད་པའི་རྟོག་གེ་པ་དག་གིས་སོ། །གང་ཇི་སྲིད་ཅིག་ཏུ་ཞེ་ན། སྨྲས་པ། ཇི་སྲིད་དེ་བཞིན་གཤེགས་པ་མ་ཤར་བ་སྟེ་དུས་ཇི་སྲིད་དུ་སངས་རྒྱས་བཅོམ་ལྡན་འདས་འབྱུང་བར་མ་གྱུར་པར་རོ། །འཇིག་རྟེན་རྫོགས་སངས་རྒྱས་
ཤར་བ། །ཞེས་བྱ་བ་ནི། གང་གི་ཚེ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བས་གདུལ་བྱའི་འཇིག་རྟེན་གྱི་པདྨ་དང་ལྡན་པའི་ཕྱོགས་དེ་ཉིད་དྲི་མ་མེད་པར་སྣང་བའི་སྒོ་ནས་རབ་ཏུ་གསལ་བར་བྱས་པའམ། རབ་ཏུ་སད་པར་བྱས་པ་ཡིན་ནོ། །རྟོག་ཅེ་ན་ཉན་ཐོས་བཅས་མི་སྣང་ཞེས་བྱ་བ་ནི་
མང་པོ་དེ་དག་ལས་འགའ་ཞིག་ཀྱང་མཛེས་པར་གྱུར་པ་མ་ཡིན་ཏེ། ཉན་ཐོས་འདི་དང་རྟོག་གེ་པ་འདིའི་ཚིག་གི་རྗེས་སུ་འབྲང་བར་འགྱུར་རོ། །དགེ་སློང་དག་མཚན་མ་ཟུང་ཤིག་ཅེས་བྱ་བ་ནི་ཡང་དང་ཡང་དུ་བསྒོམ་པར་བྱ་བའི་ཕྱིར་མཚན་མ་ཡིད་ལ་གྱིས་ཤིག་ཅེས་བྱ་བ་ཡིན་ནོ། །མི་སྣང་
བར་གྱུར་ཏོ་ཞེས་བྱ་བ་ནི་བཅབ་པའི་སྤང་བ་མཛད་པའི་སྒོ་ནས་བསྐྱོད་པ་མཛད་པ་ཡིན་ནོ། །ཅང་མི་སྨྲ་བ་ཞེས་བྱ་བ་ལ་སོགས་པ་ལ། ཤིན་ཏུ་ཞུམ་པའི་ཕྱིར་ཅུང་ཟད་ཞིག་ཀྱང་སྨྲ་བའི་ནུས་པ་མེད་པ་དེ་བས་ན་ཅང་མི་སྨྲ་བ་ཡིན་ནོ། །ངོ་ཚ་དང་ཇི་ལྟར་བྱ་བ་ལ་རྨོངས་པར་གྱུར་པའི་ཕྱིར་བག་འཁུམས་
པར་གྱུར་པ་ཡིན་ནོ། །ཕྲག་པ་ཕབ་པ་ཞེས་བྱ་བ་ནི་ཤིན་ཏུ་ངོ་ཚ་བས་ཕྲག་པའི་ཕྱོགས་འཕྱངས་པར་གྱུར་པ་ཡིན་ནོ། །གདོང་སྨད་པ་ཞེས་བྱ་བ་ནི་མགོ་ཐུར་དུ་བལྟས་པ་ཡིན་ནོ། །སྤོབས་པ་མེད་པ་ཞེས་བྱ་བ་ནི་ལན་ལྡོན་པ་ཙམ་གྱིས་ནུས་པ་མེད་པ་ཡིན་ནོ། །ཤིན་ཏུ་སེམས་ཤིང་ཞེས་བྱ་བ་ནི་

བྲོས་པའི་ཐབས་སེམས་པར་གྱུར་པ་ཡིན་ནོ། །ཀུན་དུ་བསྐྲད་པར་བྱའོ་ཞེས་བྱ་བ་ནི་ཆེར་བསྐྲད་པས་འབྱེར་བར་འགྱུར་བར་བྱ་བར་རོ། །སྐྲག་པ་ནི་རྣམ་པར་འཁྲུགས་པའི་སྒོ་ནས་འཇིགས་པར་བྱེད་པ་ཡིན་ནོ། །འདུན་ཁང་ཞེས་བྱ་བ་ནི་ཁྱིམ་པའི་ལུས་ཀྱི་ཚད་ལ་སོགས་པའོ། །བཅོམ་
ལྡན་འདས་ཀྱིས་ནི་ཇི་ལྟར་བཅོམ་ལྡན་འདས་ཀྱི་ཆོ་འཕྲུལ་གྱི་འདུན་ཁང་དང་སྐྱེ་བོ་ཆེན་པོའི་ཚོགས་ཅུང་ཞིག་ཀྱང་འགྱུར་བ་མེད་པ་དེ་ལྟར་བྱིན་གྱིས་བརླབས་པ་ཡིན་ནོ། །རི་བོ་དང་ནི་ནགས་དག་དང་། །ཞེས་བྱ་བ་ལ་སོགས་པ་ལ། སྐྱབས་ཀྱི་སྟོབས་ལས་དྲི་མ་མེད་པའི་ཡོན་ཏན་རྙེད་པར་འགྱུར་བའི་
ཕྱིར་དེ་ཉིད་མང་ཞིག་ཅེས་སྨོས་པ་ཡིན་ནོ། །ཆོ་འཕྲུལ་ཆེན་པོ་བསྟན་པ་ལས་མུ་སྟེགས་བྱེད་འགའ་ཞིག་ནི་རི་བོ་དང་། གཞན་དག་ནགས་དང་། ཀུན་དགའ་ར་བ་དང་། ལྷའི་ཁང་པ་དང་། ཤིང་དྲུང་དག་ཏུ་གནས་པ་དེ་མཐོང་ནས་ཚིགས་སུ་བཅད་པ་ལྔ་པོ་དེ་དག་བྱུང་བ་ཡིན་ནོ། །མང་པོ་ནི་དུ་མ་ཡིན་
ལ་སྐྱབས་སུ་སོང་བར་གྱུར་པ་ནི་རྟེན་འཛིན་པར་གྱུར་པ་ཡིན་ནོ། །རི་བོ་ནི་ཁ་བ་ཅན་ལ་སོགས་པས་འཛིན་ནོ། །ནགས་ནི་ཤིང་ཐིབས་པོ་དག་ཡིན་ནོ། །ཀུན་དགའ་ར་བ་ནི་ཁྱིམ་དང་ཉེ་བའི་ནགས་ལ་སོགས་པ་ཡིན་ནོ། །མཆོད་རྟེན་དང་ཤིང་དྲུང་ཞེས་བྱ་བ་ལ་མཆོད་རྟེན་ནི་ལྷའི་ཁང་པ་སོ་ཕག་ལ་
སོགས་པ་བསགས་པ་ཉིད་ཡིན་པའི་ཕྱིར་རོ། །ཤིང་ནི་ཤིང་གི་དབྱིབས་ལ་སོགས་པ་དང་ལྡན་པའམ། སོ་ཕག་ལ་སོགས་པ་བསགས་པའི་གོང་བུའི་ཚུལ་དུ་གང་གིས་རྩ་བའི་ཕྱོགས་ཤིང་གི་དབྱིབས་སུ་ཡོད་པ་དེ་ནི་མཆོད་རྟེན་ཤིང་ཞེས་བྱ་བ་ཡིན་ནོ། །དེ་དག་ལ་སྐྱབས་སུ་འགྲོ་བ་གང་དག་ཡིན་
ཞེ་ན། སྨྲས་པ། མི་དག་འཇིགས་པས་བསྡིགས་པ་སྟེ། །མུ་སྟེགས་བྱེད་ལ་སོགས་པ་འཇིགས་པས་བཅོམ་པར་གྱུར་པ་དག་ཡིན་ནོ། །དེ་དག་སྐྱབས་ཀྱི་མཆོག་མ་ཡིན་ཏེ། དེ་དག་མངོན་པར་འདོད་པའི་རི་ལ་སོགས་པ་ཉེ་བའི་རྟེན་དག་ནི་ངན་སོང་དག་ལས་སྐྱོབ་པ་ཉིད་དུ་ནུས་པ་ཉིད་མ་ཡིན་
པའི་ཕྱིར་རོ། །དམ་པའི་སྐྱབས་ནི་དེ་མ་ཡིན་ཏེ། དེ་དག་གི་ཉེ་བའི་རྟེན་གྱིས་འཁོར་བ་ཡོངས་སུ་སྤོང་བ་ཉིད་དུ་མི་ནུས་པ་ཉིད་ཀྱི་ཕྱིར་རོ། །འདི་ལྟར། །སྐྱབས་དེ་དག་ནི་ཐོབ་གྱུར་པས། །སྡུག་བསྔལ་ཀུན་ལས་ཐར་མི་འགྱུར། །ཞེས་བྱ་བ་དེ་དག་ནི་གསལ་བས་མ་བཤད་དོ། །དེ་ལྟར་སྐྱབས་

གང་ཡིན་ཞེ་ན། གང་གིས་སངས་རྒྱས་རྣམས་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། སངས་རྒྱས་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པ་ཡོན་ཏན་གྱི་ཕུང་པོ་ཅན་ཡིན་ནོ། །ཆོས་ནི་དོན་དམ་པའི་ཆོས་ཉིད་ཡིན་པའི་ཕྱིར་མྱ་ངན་ལས་འདས་པ་ཡིན་ཏེ།
དགོས་པའི་གཙོ་བོ་ཉིད་ཡིན་པའི་ཕྱིར་རོ། །དགེ་འདུན་ནི་ཉན་ཐོས་ཀྱི་རྒྱུད་ལ་གནས་པའི་འཕགས་པའི་ལམ་ཡིན་ནོ། །དེ་དག་ལས་འགའ་ཞིག་ལ་སྐྱབས་སུ་སོང་ན་ཡང་གསུམ་ལ་སྐྱབས་སུ་སོང་བ་མ་ཡིན་ནོ་ཞེས་བསྟན་པར་བྱ་བའི་ཕྱིར་དང་། སྒྲ་གསུམ་ཆར་ལ་གསུངས་པ་ཡིན་ནོ། །དེ་
དག་ཕན་ཚུན་ཐ་དད་པ་ཡིན་པའི་ཕྱིར་དེ་ཙམ་གྱི་སྐྱབས་སུ་སོང་བ་ནི་མ་ཡིན་གྱི། འོན་ཀྱང་རྟོགས་ནས་དད་པ་རྙེད་པ་ལས་ཡིན་ཏེ། དེ་ཡང་བདེན་པ་མཐོང་བ་ལས་འགྱུར་བའི་ཕྱིར་འཕགས་པའི་བདེན་པ་བཞི་པོ་ལ་སྨོས་པ་ཡིན་ནོ། །ཤེས་རབ་སྟེ་ཟག་པ་མེད་པའི་ཤེས་རབ་ཀྱིས་སོ། །བདེན་
པའི་མིང་བརྗོད་པར་བྱ་བའི་ཕྱིར། སྡུག་བསྔལ་སྡུག་བསྔལ་ཀུན་འབྱུང་དང་། །ཞེས་སྨོས་པ་ཡིན་ཏེ། །ཤེས་རབ་ཀྱིས་ནི་མཐོང་གྱུར་པ། །ཞེས་བྱ་བ་རྗེས་སུ་འཇུག་པ་ཡིན་ནོ། །ཡན་ལག་བརྒྱད་ཅེས་བྱ་བ་ལ་ཡན་ལག་ནི་ཆ་ཡིན་ཏེ། ཡན་ལག་བརྒྱད་གང་ལ་ཡོད་པ་སྟེ། ཚོགས་པ་ཡན་ལག་
དང་ལྡན་པ་ཡིན་ཏེ། ཡན་ལག་དྲུག་དང་ལྡན་པའི་ཕྱི་མ་ལྟ་བུའོ། །ལམ་ཇི་ལྟ་བུར་གྱུར་པ་ཤེས་རབ་ཀྱིས་མཐོང་བ་ཡིན་ཞེ་ན། སྨྲས་པ། འཇིགས་པ་མེད་པའི་གནས་ཐོབ་པར་བྱེད་པ་ཉིད་ཡིན་པའི་ཕྱིར་བདེ་བ་ཡིན་ནོ། །དེ་དག་ཁོ་ན་ལ་མྱ་ངན་འདས་འགྲོ་བ་ཞེས་སྨོས་ཏེ། མྱ་ངན་ལས་
འདས་པ་ཐོབ་པར་བྱེད་པ་ཡིན་ནོ། །སྔར་བཤད་པ་དེ་དག་ཁས་བླངས་པའི་ཚུལ་གྱིས་ལམ་མངོན་སུམ་དུ་བྱེད་པ་དང་། དེ་དག་ཉིད་སྐྱབས་ཀྱི་མཆོག་ཡིན་པ་དང་། སྐྱབས་ཀྱི་མཆོག་ཡིན་པས་དེ་དག་ལ་བརྟེན་པས། སྡུག་བསྔལ་མ་ལུས་པ་བསལ་བར་འགྱུར་བའི་ཕྱིར་རོ། །དེའི་བྱིན་གྱི་
རླབས་ལས་ཞེས་བྱ་བ་ནི་ཆོ་འཕྲུལ་ཆེན་པོའི་གནས་ལས་སོ། །ཁྱད་པར་ཆེན་པོ་ཁོང་དུ་ཆུད་དེ་ཞེས་བྱ་བ་ལ་སོགས་པའི་ཚིག་གི་དོན་གྱི་རྣམ་པར་བཤད་པ་ནི་སྔ་མ་བཞིན་བལྟ་བར་བྱའོ། །འཇིག་རྟེན་འདི་རྟག་ཅེས་བྱ་བ་ནི་འཇིག་རྟེན་འགྱུར་བ་མེད་པས་རྟག་པ་ཡིན་ནོ། །མི་རྟག་པ་ཞེས་བྱ་བ་ནི་

འཕགས་པའི་ལམ་མེད་པར་རྒྱུན་ཆད་པར་གྱུར་པ་ཡིན་ནོ། །རྟག་པ་ཉིད་ཀྱང་མ་ཡིན་ཞེས་བྱ་བ་ནི་གཅིག་ཏུ་རྟག་པ་ཉིད་མ་ཡིན་པ་སྟེ། མུ་སྟེགས་བྱེད་ཀྱིས་ཀུན་དུ་བརྟགས་པའི་སྐྱེ་གནས་ལས་སྐྱེས་ནས་དེ་ཀུན་དུ་བརྟགས་པའི་བདེ་བ་དང་སྡུག་བསྔལ་ཉམས་སུ་མྱོང་ཞིང་འཁོར་བའི་མཐར་བྱེད་པ་ཡིན་
པའི་ཕྱིར་རོ། །མི་རྟག་པ་ཡང་མ་ཡིན་ཞེས་བྱ་བ་ནི་གཅིག་ཏུ་མི་རྟག་པ་ཉིད་མ་ཡིན་པ་སྟེ། འཁོར་བ་ལ་ཡུན་རིང་དུ་འཁོར་བར་བྱེད་པ་ཡིན་པའི་ཕྱིར་རོ། །དེ་རྟག་པ་དང་མི་རྟག་པ་ཞེས་བྱ་བ་ལ། གང་དག་གཞན་གྱིས་བཅོམ་པའི་སྒོ་ནས་འཆི་བ་མེད་པ་དེ་དག་ནི་རྟག་པ་ཉིད་ཡིན་ནོ། །གང་དག་ཡོད་
པ་དེ་དག་ནི་མི་རྟག་པ་ཉིད་ཡིན་ནོ། །མཐའ་དང་ལྡན་པ་ཞེས་བྱ་བ་ནི་མུ་སྟེགས་བྱེད་ཀྱིས་ཀུན་དུ་བརྟགས་པའི་བདེ་བ་དང་སྡུག་བསྔལ་ཉམས་སུ་མྱོང་ནས་འཇིག་པའི་ཕྱིར་རོ། །མཐའ་དང་མི་ལྡན་པ་ཞེས་བྱ་བ་ནི་བདེ་བ་དང་སྡུག་བསྔལ་ཉམས་སུ་མྱོང་བ་མང་བ་ཉིད་ཀྱི་ཕྱིར་དང་། ཡུན་རིང་དུ་གནས་པ་
ཡིན་པའི་ཕྱིར་རོ། །མཐའ་དང་ལྡན་པ་དང་མཐའ་དང་མི་ལྡན་པ་ཞེས་བྱ་བ་ནི་ཕ་རོལ་གྱིས་བཅོམ་པའི་འཆི་བ་མཐའ་དང་ལྡན་པ་ཡིན་ལ། ཕ་རོལ་གྱིས་བཅོམ་པ་འཆི་བ་མེད་པ་ནི་མཐའ་དང་མི་ལྡན་པ་ཡིན་ནོ། །མཐའ་དང་ལྡན་པ་ཡང་མ་ཡིན་ལ་མཐའ་དང་མི་ལྡན་པ་ཡང་མ་ཡིན་ནོ་ཞེས་བྱ་བ་ལ།
གཅིག་ཏུ་མཐའ་དང་ལྡན་པ་མ་ཡིན་པ་སྟེ། འཁོར་བའི་དུས་རིང་བ་ཉིད་ཀྱི་ཕྱིར་རོ། །མཐའ་དང་མི་ལྡན་པ་ཡང་མ་ཡིན་ཏེ། གདོན་མི་ཟ་བར་ཆད་པའི་ཕྱིར་རོ། །སྲོག་གང་ཡིན་པ་དེ་ཞེས་བྱ་བ་ལ་སོགས་པ་ལ། སྲོག་ནི་འདིར་བདག་ལ་འདོད་པ་ཡིན་ནོ། །བདག་འདིར་ཞེས་བྱ་བ་ལ་སོགས་
ལ། བདག་ཀྱང་བདག་ཉིད་དུ་འདོད་པ་ཡིན་ནོ། །ཡོད་ཅེས་བྱ་བ་ནི་དུས་ཅུང་ཞིག་གནས་པ་ཡིན་པའི་ཕྱིར་རོ། །མེད་ཅེས་བྱ་བ་ནི་དུས་ཅུང་ཟད་གནས་ནས་ཡང་མེད་པ་ཡིན་ནོ། །ཡོད་པ་ཉིད་ཀྱང་མ་ཡིན་ཞེས་བྱ་བ་ནི་གཅིག་ཏུ་ཡོད་པ་མ་ཡིན་ཏེ་ཆད་པ་ཡིན་པའི་ཕྱིར་རོ། །མེད་པ་ཡང་མ་
ཡིན་ཏེ། གཅིག་ཏུ་མེད་པ་ཡིན་པས་ན་གནས་སྐབས་གཞན་དག་ཀྱང་སྲིད་པ་ཡིན་པའི་ཕྱིར་རོ། །འདི་ཉིད་བདེན་གྱི་ཞེས་བྱ་བ་ནི་དོན་དམ་པར་རོ། །གཞན་ནི་གཏི་མུག་གོ་ཞེས་བྱ་བ་ནི་གཞན་གྱི་གཞུང་བརྫུན་པའོ། །དྲག་ཏུ་སོང་ངོ་ཞེས་བྱ་བ་ནི་མགྱོགས་པར་སོང་བ་ཡིན་ནོ། །རྭ་ལས་གྱུར་

པའི་དྲེགས་པ་ནི་རྭའི་དྲེགས་པ་ཡིན་ཏེ། རྭའི་དྲེགས་པ་ཆགས་པ་གང་ལ་ཡོད་པ་དེ་ནི་རྭའི་དྲེགས་པ་ཆགས་པ་འདྲ་བ་སྟེ། ཁྱོད་དེ་དང་འདྲ་བར་རོ། །སྐྱེ་བོ་བསེང་བསེང་པོར་ཞེས་བྱ་བ་ནི་གཟི་དང་བྲལ་ཞིང་མདངས་མེད་པར་གྱུར་པའོ། །ཤཱཀྱ་ནི་བཅོམ་ལྡན་འདས་ཡིན་ལ།
དེའི་ཆོས་ནི་བསྟན་པའི་ཆོས་སམ། དམ་པའི་ཆོས་དེ་མ་ཤེས་པས་སོ། །ངོ་ཚ་ཡོན་ཏན་ཐམས་ཅད་ཀྱི་རྩ་བར་གྱུར་པ་དེ་མེད་པ་གང་ཡིན་པ་དེ་ནི་འཛེམ་མེད་ཡིན་ནོ། །ཀྱེ་འཛེམ་མེད་བོང་བུ་བཞིན་དུ་ཞེས་བྱ་བ་ནི་བོང་བུ་ཇི་ལྟ་བ་དེ་བཞིན་དུ་ཁྱོད་འཁྱམ་པ་སྟེ་རྒྱུ་བར་གྱུར་པ་ཡིན་ནོ། །བདག་གི་
མདུན་འདུག་ཁྱོད་ནི་བདུད་དུ་ངེས། །ཞེས་བྱ་བ་ལ་སོགས་པ་ལ། གང་གི་ཕྱིར་བདག་གི་མདུན་དུ་འདུག་པའི་འཆི་བདག་ངེས་པར་ཏེ་གདོན་མི་ཟ་བར་ལྷག་མའི་དེ་མ་ཐག་ཏུ་གྱུར་པ་ཡིན་པས་ན་ཁོ་བོ་འཆི་བའི་ཕྱིར་ཡང་དག་པར་གནས་པར་གྱུར་པ་ཡིན་ནོ། །མཐུ་ནི་ལུས་ཀྱི་སྟོབས་ཡིན་ལ། བརྩོན་པ་ནི་
སྤྲོ་བ་ཡིན་ནོ། །དངོས་པོ་ཀུན་ལ་ཞེས་བྱ་བ་ལ་སོགས་པ་ལ། འགའ་ཞིག་འདུས་བྱས་ཀྱི་དངོས་པོར་གྱུར་པ་གང་ཡིན་པ་དེ་དག་ཐམས་ཅད་ཉིད་སྐྱིད་སྡུག་གི་སྐལ་བ་ཅན་ཡིན་ལ། བདག་གིས་ཀྱང་བདེ་བ་དང་སྡུག་བསྔལ་ཉམས་སུ་མྱོང་ནས། ད་ནི་སྡུག་བསྔལ་ལས་བདག་གྲོལ་བ་ཡིན་ནོ། །
བདེ་བའི་ཕྱིར་ནི་ཐར་པའི་ཕྱིར་འགྲོ་བ་ཡིན་ནོ། །གཟིར་ཏེ་འོད་ཟེར་རབ་ཏུ་ཚ་བས་སོ། །དེ་གང་གི་འོད་ཟེར་ཡིན་ཞེ་ན། ཉི་མ་ཞེས་སྨོས་པ་ཡིན་ནོ། །མི་སྲུན་པ་ནི་སེམས་རབ་ཏུ་རྩུབ་པ་ཡིན་ལ། དེ་སྤངས་པ་སྟེ་ཡོངས་སུ་བཏང་ནས་རྫིང་བུ་དེ་དག་ན་ཡོད་པ་དེ་མྱུར་དུ་སྟོན་ཅིག་ཅེས་བྱ་བ་ཡིན་ནོ། །ཆུ་
གཙང་བ་ནི་ཆུ་ཡོངས་སུ་དག་པ་ཡིན་ལ། བསིལ་བ་ཉིད་ཀྱི་ཕྱིར་གངས་ཀྱི་ཆུ་ལྟ་བུའོ། །ཆུ་ལ་གནས་པ་ནི་ངང་པ་ཡིན་ལ། པདྨ་ནི་མེ་ཏོག་ཡིན་ཏེ། པདྨ་དང་ལྡན་པ་ནི་པདྨ་ཅན་ཡིན་ནོ། །རབ་ཏུ་གཙང་བ་ནི་ཤིན་ཏུ་གཙང་བའོ། །ཀྱེ་སྐྱེས་བུ་ཐ་མ། ཀྱེ་སྐྱེས་བུ་སྡིག་ཅན། ཀྱེ་སྐྱེས་བུ་བདེན་པ་
མེད་པས་སོ། །མ་ནིང་ཉིད་ཡིན་པའི་ཕྱིར་ཕོ་མིན་པ་ཡིན་ལ། སྐྱེས་པའི་གཟུགས་ཡོད་པ་ཉིད་ཀྱི་ཕྱིར་སྐྱེས་པའི་ཆུང་མ་མིན་པ་ཡིན་ནོ། །རྣམ་པ་སྣ་ཚོགས་སུ་སྟོན་པ་ཞེས་བྱ་བ་ནི་ཕན་ཚུན་འགལ་བར་ལུང་འབོགས་པའི་ཕྱིར་རོ། །ཆོས་ཀྱི་གོས་ཀྱིས་གཡོགས་པ་ཅན་ཞེས་བྱ་བ་ནི་ཆོས་ཀྱི་

རང་བཞིན་ཅན་གྱི་གོས་ཀྱིས་གཡོགས་པར་གྱུར་པའོ། །གཟར་བུ་གཅིག་གིས་ཟས་ཡོངས་སུ་ལོངས་སྤྱོད་པའི་བརྟུལ་ཞུགས་ཡོད་པ་ཉིད་ཀྱི་ཕྱིར་གཟར་བུའི་ཟས་ཀྱི་བརྟུལ་ཞུགས་ཅན་ཞེས་བྱ་བའམ་བསོད་སྙོམས་ལ་ཞུགས་ནས་ཇི་ལྟ་བ་བཞིན་དུ་རྙེད་པའི་བསོད་སྙོམས་སྦྱིན་བདག་མངོན་
སུམ་དུ་སོང་བཞིན་དུ་ལག་པ་ཁོ་ན་ཟ་བར་བྱེད་པའི་ཕྱིར་གཟར་བུ་ཟས་ཀྱི་བརྟུལ་ཞུགས་ཅན་ཡིན་ནོ། །ངན་སོང་ཞེས་བྱ་བ་ནི་སྤྱིར་རིམ་པ་བཞིན་ངན་འགྲོ་གསུམ་དུ་ངེས་པ་ཡིན་ནོ། །ད་ལྟར་ནི་དམྱལ་བ་པར་ངེས་པ་ཉིད་ཡིན་པའི་ཕྱིར་སེམས་ཅན་དམྱལ་བ་པ་ཡིན་ནོ། །རྒྱུ་བར་བྱད་པས་ན་འགྲོ་བ་སྟེ།
འགྲོ་བར་བྱེད་པ་ཡིན་ལ། བསོད་སྙོམས་ལ་ལག་པ་འཕྱང་བ་སྟེ། ལག་པ་བརྐྱང་བས་འགྲོ་བར་བྱེད་པས་ན་ལག་པ་འཕྱང་ཞིང་འགྲོ་བ་ཅན་ཡིན་ནོ། །རྐང་ལག་སྐྱ་བོར་གྱུར་པས་ཉེ་བར་མཚོན་པས་ཆུ་ཡིས་གཡེངས་པར་གྱུར་པ་ཡིན་ནོ། །དེ་ནི་ཆོས་སྤྱོད་ཅེས་བྱ་བ་ནི་ཆོས་བྱེད་པའོ། །འདིས་
མཚོན་པར་བྱེད་པ་ཡིན་པས་ན་མཚན་ཏེ་སྐྱེས་པའི་དབང་པོ་ཡིན་ལ། མཚན་དེའི་མཚན་ཉིད་ཀུན་ནས་སྐྱེས་པ་ཡིན་ཏེ། དེ་སྐྱེས་པ་གང་ལ་ཡོད་པ་དེ་ནི་སྐྱེས་པའི་མཚན་གྱི་མཚན་ཉིད་ཅན་ཡིན་ནོ། །གནས་སྐབས་ནི་འདི་སྐྱེས་བུའི་དབང་པོ་བྱིན་གྱིས་བརླབས་པ་ལ་བྱའོ། །མདེའུ་སྤུ་གྲིའི་ཁའི་རྣམ་པ་
ཅན་ཡངས་པ་ཅན་གྱི་མདའི་རྣམ་པ་ནི་མདའི་སྟེའུ་ཁ་ཡིན་ནོ། །བཅད་པ་ནི་དུམ་བུར་བྱས་པ་ཡིན་ནོ། །འདི་ཉིད་ཁོ་ན་བདེན་པ་སྟེ། གང་སྔར་ཤི་བར་གྱུར་པ་དེ་ཁོ་ན་ཉིད་དོ་ཞེས་རིག་ནས་དེ་དག་ཀྱང་དེ་བཞིན་དུ་དུས་ལས་འདས་པར་གྱུར་པ་ཡིན་ནོ། །མིའི་ཆོས་ལས་བླ་མར་གྱུར་པའི་ཡུལ་ལ་མུ་
སྟེགས་ཅན་དག་གིས་འགྲེན་པ་སྟེ་རྩོད་པར་གྱུར་པ་ལས་སོ། །མུ་སྟེགས་ཅན་ཐམས་ཅད་བཅོམ་པར་བྱས་ཞེས་བྱ་བ་ནི་བརྩོན་པ་བཅོམ་པ་ཉིད་ཀྱི་ཕྱིར་རོ། །རབ་ཏུ་ཕམ་པར་བྱས་ཞེས་བྱ་བ་ནི་ཕ་རོལ་གནོན་པ་བཤིག་པ་ཡིན་པའི་ཕྱིར་རོ། །རྒྱབ་ཀྱིས་ཕྱོགས་པར་བྱས་ཞེས་བྱ་བ་ནི་རབ་ཏུ་བྲོས་པར་
བྱེད་པ་ལ་གཞོལ་བར་བསྒྲུབས་པ་ཡིན་ནོ། །སྤ་གོང་བར་གྱུར་པ་ཞེས་བྱ་བ་ནི་ལན་གླན་པ་མེད་པར་བྱས་པར་གྱུར་པ་ཡིན་ནོ། །བསོད་སྙོམས་བདེ་བར་རྙེད་པ་ནི་ལོ་ལེགས་པ་ཡིན་ནོ། །ངེས་པར་སྐྱེས་པ་ཞེས་བྱ་བ་ནི་ལེགས་པར་བྱང་བར་སྐྱེས་པ་ཡིན་ནོ། །བྱ་བ་ཐམས་ཅད་ལ་སྤྲོ་བ་དང་བཅས་

པ་ཉིད་ཀྱི་ཕྱིར་དཔའ་བོ་ཡིན་ནོ། །བདག་བཅོམ་པ་མེད་པར་བྱ་བ་ལ་འཇུག་པ་ནི་རྟུལ་ཕོད་པ་ཡིན་ནོ། །དྲག་པ་ཉིད་ཀྱི་ཕྱིར་གཏུམ་པ་ཡིན་ལ། བྱ་བ་བྱེད་པར་ནུས་པ་ཉིད་ཀྱི་ཕྱིར་རྣམ་པར་གནོན་པ་དང་ལྡན་པར་གྱུར་པ་ཡིན་ནོ། །མི་དགེས་པ་ཞེས་བྱ་བ་ནི་ཀྱེ་མའོ་རྒྱལ་མོ་འདི་བཀའ་
སྒྲུབ་པར་བྱེད་དམ་ཞེས་དེ་སྙམ་དུ་མི་དགྱེས་པར་གྱུར་པའོ། །གདུངས་པར་གྱུར་པ་ནི་དེའི་རྒྱུ་མཚན་གྱིས་གདུང་བ་ཉམས་སུ་མྱོང་བར་གྱུར་པའོ། །དེས་སྨྲས་པ། ཕྱིན་ཅི་ལོག་ཏུ་བཟུང་བའི་ཕྱིར་མི་ཉན་པ་ཡིན་ནོ། །ཆུང་བ་ཞེས་བྱ་བ་ནི་འདི་ནུས་པ་ཆུང་བའམ་བློ་ཆུང་བར་གྱུར་པའོ། །མ་བརྙོངས་ཤིག་
ཅེས་བྱ་བ་ནི་ཡིད་ཆེས་པར་རམ། ལས་སུ་བྱ་བ་མེད་པར་རོ། །བུ་མོ་ལས་སྐྱེས་པའི་བུ་ནི་བུ་མོའི་བུའོ། །སྒྲིན་པ་ནི་སྐྱེས་བུ་ཐམས་ཅད་ཀྱི་གནས་སྟོན་པ་ལ་མཁས་པ་ཉིད་དོ། །རྩོམ་པ་དང་ལྡན་པ་ཞེས་བྱ་བ་ནི་རྒྱལ་པོ་ལ་མཁོ་བའམ། ཡོན་ཏན་དག་ལ་འབད་པ་དང་ལྡན་པའོ། །མཐུན་
པར་སྐྱེས་པ་ཞེས་བྱ་བ་ནི་བདག་གི་བྱ་བ་དང་ངོ་། །ཡང་ན་མཐུན་པར་སྐྱེས་པ་ནི་མཛེས་པར་གྱུར་པ་ཡིན་ནོ། །མོ་གཤམ་ནི་འདིར་སྐྱེ་བའི་ཆོས་ཅན་མེད་པ་ཡིན་ནོ། །བསྐུ་མཉེ་ནི་བསྐུ་བྱུག་ལ་སོགས་པ་བྱས་པ་ཡིན་ནོ། །འཇིགས་པ་ནི་དོན་མེད་པར་འགྱུར་བའི་དོགས་པ་སྐྱེས་པ་ཡིན་ནོ། །སྐྲག་
པ་ནི་ཆེས་སྔངས་པ་དང་ལྡན་པ་ཡིན་ནོ། །སེམས་མི་དགའ་བ་ནི་སྐྱོ་བ་དང་བཅས་པ་ཡིན་ནོ། །བདེ་བ་ཞེས་བྱ་བ་ནི་སྐྱེ་བོ་ཐམས་ཅད་མངོན་པར་འདོད་པར་བྱ་བར་རོ། །བསྔགས་པ་ཞེས་བྱ་བ་ནི་འཇིག་རྟེན་མ་ལུས་པ་མངོན་པར་འདོད་པའོ། །སྡུག་བསྔལ་བཞིན་དུ་སྨྲེ་བ་ཞེས་བྱ་བ་ནི་རང་གི་སེམས་ཀྱི་
སྐྱོ་བ་སྒྲོགས་པར་བྱེད་པ་ཡིན་ནོ། །བརྒྱལ་བ་ནི་ཁྱབ་པར་གྱུར་པའོ། །འདི་ལ་ཉལ་བས་ན་མལ་སྟན་ཡིན་ལ། སྐྱེས་བུ་ཆེན་པོ་འོས་པ་ཡིན་པས་ན་ཆེན་པོ་ལ་འོས་པའོ། །རྩྭའི་རྣམ་པ་ལས་བྱས་པའི་གོས་ནི་དུ་གུ་ལའི་གོས་ཡིན་ཏེ། གཙང་བ་དང་ཡང་བ་བགོས་ན་རང་གི་འདོད་པའི་ལྷ་མཆོད་
པ་སྒྲུབ་པར་བྱེད་པ་ཡིན་པ་དེའི་ཕྱིར་དེ་ཡང་མལ་གྱི་གམ་དུ་གཞག་པར་འོས་པ་རིགས་པ་ཡིན་གྱི། ཆེན་པོ་ལ་འོས་པ་ནི་མ་ཡིན་ནོ། །བཏིང་བས་ཉེ་བར་མཛེས་པ་ཞེས་བྱ་བ་ནི་ཆེན་པོ་ལ་འོས་པའི་གོས་རྣམ་པ་སྣ་ཚོགས་ཀྱིས་གཡོགས་པར་གྱུར་པས་སོ། །གོས་གཅིག་པར་ཞེས་བྱ་བ་ནི་ས་

ཕྱོགས་གོས་ཀྱིས་ཆོད་པར་རོ། །མདངས་ཅན་ཞེས་བྱ་བ་ལ། མདངས་ནི་འདིར་དྲེགས་པའི་རྣམ་གྲངས་ཡིན་ཏེ། དྲེགས་པ་དང་བཅས་པའི་ལུས་ཀྱིས་ཞེས་བྱ་བའི་བར་དུའོ། །ཐེག་པ་ནི་ཤིང་རྟ་དང་ཁྱོགས་ལ་སོགས་པ་ཡིན་ནོ། །བཞོན་པ་ནི་གླང་པོ་ཆེ་ལ་སོགས་པ་ཡིན་ནོ། །རྒྱལ་པོ་བཞིན་དུ་
ཞེས་བྱ་བ་ནི་རྒྱལ་པོ་ལ་རུང་བ་ཡིན་ནོ། །འཇིག་རྟེན་ཐོབ་ནས་ཞེས་བྱ་བ་ནི་ཁྱེད་ཀྱིས་འཇིག་རྟེན་ཐོབ་པ་སྟེ་གྲུབ་པར་གྱུར་པ་དེའི་ཚེ་སྐྱེ་དགུ་མང་པོ་སྐྱེ་བོའི་ཚོགས་ཀྱིས་ཐལ་མོ་སྦྱར་ནས་མཆོད་པ་ཡིན་ནོ། །ཁྱད་པར་གྱུར་པ་གང་དག་གིས་ཤེ་ན། རྔ་སྒྲ་དྲག་པོ་དང་། གླུ་དབྱངས་ཞེས་བྱ་བ་ལ་
སོགས་པ་སྨོས་པ་ཡིན་ནོ། །མིའི་དབང་པོའི་དབང་གི་རྗེས་འགྲོ་བ། །ཞེས་བྱ་བ་ནི་རྒྱལ་རིགས་ཀྱིས་དབང་དེས་ཐོབ་པའི་མཚན་ཉིད་འདི་ཡིན་ཏེ། འདི་ལྟར་བདེ་བར་གྱུར་པ་དེས་དགའ་བར་མི་བྱ་བ་དང་