Luận tạng Tây Tạng (Tengyur) — Tập 158

མཐོལ་བ་དང་བཤགས་པ་དང་གཉེན་པོ་བསྟེན་པ་དག་གིས་ཉམས་པར་གྱུར་པ་ནི་སྐྱེ་བ་དེ་ཉིད་ཀྱི་ཡིན་པ་དེའི་ཕྱིར་དེ་ནི་ཡོངས་སུ་རྫོགས་པའི་རྣམ་པར་སྨིན་པ་འབྱིན་
ནུས་པར་མི་འགྱུར་རོ་ཞེས་བྱ་བ་མ་བསགས་པ་ཉིད་ཡིན་པའི་ཕྱིར་ཟད་པ་ཞེས་གསུངས་པ་ཡིན་ནོ། །སྔོན་བྱུང་བར་གྱུར་པ་ནི་སྔོན་བྱུང་བ་འདས་པའོ། །དེ་བཞིན་གཤེགས་པ་དེ་ཁོ་ན་བཞིན་མ་ཡིན་པ་མི་གསུང་བ་སྟེ། དངོས་པོ་ཇི་ལྟ་བ་དེ་བཞིན་དུ་གསུང་པ་ཉིད་ཀྱི་ཕྱིར་དེ་ནི་འདིར་སྟོན་པ་ཉིད་དེ་

སངས་རྒྱས་བཅོམ་ལྡན་འདས་སོ། །གང་དེ་ཁོ་ན་བཞིན་མ་ཡིན་པ་སྟོན་པར་མི་མཛད་པ་ཞེས་བྱ་བ་ནི་དེ་བཞིན་གཤེགས་པ་ཉིད་དོ། །དེ་བཞིན་གཤེགས་པ་ཉིད་གང་ལས་ཤེ་ན། དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་སྨོས་ཏེ། ལྷ་དང་བཅས་པའི་འཇིག་རྟེན་གྱིས་མཆོད་པར་
འོས་པ་དང་། ཉོན་མོངས་པ་སྤངས་པ་ཉིད་ཀྱི་ཕྱིར་དགྲ་བཅོམ་པའོ། །ཡང་དག་པར་རྫོགས་པའི་སངས་རྒྱས་ནི་འགྲོ་བ་མ་ལུས་པ་མཁྱེན་པར་གྱུར་པའི་ཕྱིར་ཡང་དག་པར་རྫོགས་པའི་སངས་རྒྱས་སོ། །འདིས་ནི་བདེན་པ་སྟོན་པའི་རྒྱུ་བསྟན་པ་ཡིན་ཏེ། གང་གི་ཕྱིར་ཉོན་མོངས་པས་ཟིལ་གྱིས་ནོན་པ་དང་། མི་
ཤེས་པས་ཟིལ་གྱིས་ནོན་པ་དག་བརྫུན་དུ་སྨྲ་བར་འགྱུར་ལ། ཉོན་མོངས་པ་སྤངས་ཤིང་ཡང་དག་པར་རྫོགས་པའི་བྱང་ཆུབ་ཐུགས་སུ་ཆུད་པ་དེའི་ཕྱིར། འདིས་ནི་བདེན་པ་མ་ཡིན་པ་སྟོན་པར་མི་མཛད་དོ། །ཉོན་མོངས་པ་སྤངས་པ་དང་། ཡང་དག་པར་རྫོགས་པའི་བྱང་ཆུབ་ཀྱང་གང་ལས་ཤེས་
ན། རིག་པ་དང་ཞབས་སུ་ལྡན་པ་ཞེས་བྱ་བ་སྨོས་ཏེ། རིག་པ་ནི་ཡང་དག་པར་ལྟ་བ་ཡིན་ལ། ཞབས་ནི་ལམ་གྱི་ཡན་ལག་བདུན་ཡིན་ནོ། །དེ་བས་ན་འདིས་ནི་འཕགས་པའི་ལམ་ཡན་ལག་བརྒྱད་པ་ནི་ཉོན་མོངས་པ་སྤངས་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཉིད་དུ་བསྟན་པ་ཡིན་ནོ། །བདེ་
བར་གཤེགས་པ་ནི་མཛེས་པར་གཤེགས་པས་ན་བདེ་བར་གཤེགས་པ་སྟེ། ཡང་ཕྱིར་མི་ལྡོག་པའི་ཕྱིར་རོ། །འདིས་ནི་ཕྱིར་མི་ལྡོག་པའི་སྟོན་པ་ཉིད་བརྙེས་པར་སྟོན་ཏོ། །སྐལ་བ་དང་ལྡན་པ་དང་མི་ལྡན་པའི་འཇིག་རྟེན་མཁྱེན་པའི་ཕྱིར་འཇིག་རྟེན་མཁྱེན་པའོ། །འདིས་ནི་སྟོན་པའི་
མཛད་པ་དང་པོ་བསྟན་པ་ཡིན་ནོ། །སྟོན་པའི་མཛད་པ་ནི་རྣམ་པ་གཉིས་ཏེ། སྐལ་བ་དང་ལྡན་པ་དང་སྐལ་བ་དང་མི་ལྡན་པ་སོ་སོར་རྟོག་པ་ནི་དང་པོ་ཡིན་ལ། སྐལ་བ་ཇི་ལྟ་བ་བཞིན་དུ་འདོན་པ་ནི་གཉིས་པ་ཡིན་པ་དེའི་ཕྱིར་འཇིག་རྟེན་རིག་པ་ཞེས་བྱ་བ་འདིས་དང་པོ་བསྟན་པའོ། །གཉིས་པ་བསྟན་
པའི་ཕྱིར་སྐྱེས་བུ་འདུལ་བའི་ཁ་ལོ་སྒྱུར་བ་ཞེས་བྱ་བ་སྨོས་ཏེ། སྐྱེས་བུ་ཁོ་ན་གདུལ་བྱ་ཡིན་ཏེ། འདུལ་བར་འོས་པ་ཉིད་ཡིན་པའི་ཕྱིར་སྐྱེས་བུ་འདུལ་བའོ། །དེ་དག་གི་ཁ་ལོ་སྒྱུར་བ་ནི་འདུལ་བར་མཛད་པའོ། །ཁ་ལོ་སྒྱུར་བའི་ཁྱད་པར་ནི་བླ་ན་མེད་པ་ཞེས་བྱ་བ་ཡིན་ཏེ། སོར་ཕྲེང་ཅན་ལ་

སོགས་པ་གདུལ་དཀའ་བ་འདུལ་བར་མཛད་པའི་ཕྱིར་དང་། འདོད་པའི་བསོད་ཉམས་ལ་རྗེས་སུ་སྦྱོར་བ་དང་། བདག་ཉིད་ངལ་བའི་རྗེས་སུ་སྦྱོར་བ་ཡོངས་སུ་སྤངས་ནས་བདེ་བར་འདུལ་བར་མཛད་པའི་ཕྱིར་དང་། ཡང་ཕྱིར་ཟློག་པ་མེད་པར་འདུལ་བའི་ཕྱིར་ཁ་ལོ་སྒྱུར་བ་བླ་ན་མེད་
པའོ། །འདིས་ནི་སྐལ་བ་ཇི་ལྟ་བ་བཞིན་དུ་འདོན་པར་མཛད་པ་སྟོན་པའི་ཕྲིན་ལས་གཉིས་པ་བསྟན་ཏེ། །ལྷ་དང་མི་རྣམས་ཀྱི་སྟོན་པ་ཞེས་བྱ་བ་འདིས་ནི་ལྷ་དང་མི་རྣམས་ནི་སྟོན་པའི་གང་ཟག་མཛད་པའི་སྣོད་ཡིན་གྱི་གཞན་འགའ་ཞིག་ཀྱང་མ་ཡིན་ནོ་ཞེས་སྟོན་པའི་ཕྲིན་ལས་ཀྱི་སྣོད་
བསྟན་ཏོ། །སངས་རྒྱས་བཅོམ་ལྡན་འདས་ཞེས་བྱ་བ་ལ་སངས་རྒྱས་ནི་རབ་ཏུ་གྲགས་པའི་སངས་རྒྱས་ཏེ་བཅོམ་ལྡན་འདས་སོ། །དེ་བས་ན་དོན་འདིས་ནི་སངས་རྒྱས་ཞེས་རབ་ཏུ་གྲགས་པ་གང་ཡིན་པ་འདི་ནི་སྟོན་པ་ཡིན་ཏེ། སྔར་སྨོས་པའི་ཡོན་ཏན་དང་ལྡན་པ་ཉིད་ཀྱི་ཕྱིར་རོ། །རྒྱལ་སྲིད་ནི་བདག་
པོའོ། །དེ་བྱེད་དུ་བཅུག་པ་ནི་གཞན་བློན་པོ་ལ་སོགས་པའི་སྒོ་ནས་སོ། །འབྱོར་པ་ཞེས་བྱ་བ་ནི་ཞིང་པ་དང་ཕྱུགས་སྐྱོང་བ་ཡུལ་གྱི་ཡོན་ཏན་དང་ཚོང་པ་དང་རྒྱལ་པོ་བསྟེན་པ་བདག་པོའི་ཡོན་ཏན་ལས་གྲུབ་པའི་རྒྱལ་སྲིད་གང་ལ་ཡོད་པ་དེ་ནི་འབྱོར་པའོ། །རྒྱས་པ་ཞེས་བྱ་བ་ནི་ཚད་མེད་པ་དང་།
ལེགས་པར་བསྐྱངས་པའི་སྒོ་ནས་གང་དུ་ནང་གི་གཏེར་མངོན་པར་འཕེལ་བར་གྱུར་པ་དེ་ནི་རྒྱས་པའོ། །བདག་པོས་ཕ་རོལ་གྱི་དཔུང་གི་ཚོགས་ཀྱི་རྣམ་པར་འཚེ་བ་ལས་བསྲུངས་པ་ནི་བདེ་བའོ། །ལོ་ལེགས་པ་ཞེས་བྱ་བ་ནི་བདག་པོ་དང་། ལྗོངས་ཀྱི་མི་དག་ལྷ་དང་ལྡན་པ་ཉིད་ཀྱིས་དུས་ཇི་ལྟ་བ་བཞིན་དུ་
ལྷས་ཆར་འབེབས་ཤིང་འབྲུ་རྒྱས་པས་སློང་མོ་ལེགས་པར་རྙེད་པའི་ཕྱིར་རྒྱལ་སྲིད་ལོ་ལེགས་པའོ། །མི་ནི་གཉེན་དང་རྒྱལ་པོས་ཉེ་བར་འཚོ་བའི་སྐྱེ་བོ་དང་འཁོར་དང་འགྲོན་པོ་ཡངས་ཤིང་རྒྱ་ཆེ་བ་མང་པོར་གྱུར་པ་གང་ཡིན་པ་དེ་ནི་སྐྱེ་བོ་མང་པོའོ། །གང་བ་ནི་མང་པོ་དང་ལྡན་པར་གྱུར་པ་སྟེ། གྲོང་
བ་ལ་སོགས་པས་མ་ཆད་པའི་རྒྱལ་སྲིད་གང་ལ་ཡོད་པ་དེ་ནི་མི་དང་སྐྱེ་བོ་མང་པོས་གང་བའོ། །འཐབ་མོ་ཞེས་བྱ་བ་ལ་སོགས་པ་ལ་འཐབ་མོ་ནི་བྱ་བ་མ་ཡིན་པ་ལ་ཆགས་པའམ། གཏོང་བར་དཀའ་བའོ། །འཐབ་པ་ནི་སྐྱེ་བོ་དག་ཁྲོ་བ་ལ་ཕྱིར་ཁྲོ་བའོ། །ནང་འཁྲུག་ནི་འགའ་ཞིག་གིས་རང་གི་

ཚོགས་འཁྲུག་པ་སློང་བ་གང་ཡིན་པ་དེ་ལ་བྱའོ། །ཕྱིའི་དགྲ་ནི་ཕ་རོལ་གྱི་དཔུང་གི་ཚོགས་ཀྱིས་དཀྲུགས་པའོ། །ཆོམ་རྐུན་ནི་རྐུན་པོའོ། །ཕྱུག་པ་ནི་གསེར་ལ་སོགས་པས་སོ། །ནོར་ཆེ་བ་ནི་མ་ཧེ་ལ་སོགས་པས་སོ། །ལོངས་སྤྱོད་ཆེ་བ་ནི་གྲོང་ལ་སོགས་པས་སོ། །ཡོངས་སུ་བཟུང་
བ་ཡངས་ཤིང་རྒྱ་ཆེ་བ་ཞེས་བྱ་བ་ལ་སོགས་པ་ལ། འདིའི་ཡོངས་སུ་བཟུང་བ་ཡངས་ཤིང་རྒྱ་ཆེ་བ་སྟེ། འདིའི་འཁོར་མང་ཞིང་རྒྱས་པ་ཞེས་བྱ་བའི་ཐ་ཚིག་གོ། །ནོར་ལ་གྲངས་མེད་པ་ཉིད་ཀྱི་ཕྱིར་རྣམ་ཐོས་ཀྱི་བུའི་ནོར་དང་ལྡན་པའོ། །རྟག་ཏུ་གཏོང་བའི་ངང་ཚུལ་ཅན་ཉིད་ཡིན་པའི་ཕྱིར་རྣམ་
ཐོས་ཀྱི་བུ་ལ་ནོར་གྱིས་འགྲན་པ་སྟེ། རྣམ་ཐོས་ཀྱི་བུའི་ནོར་བཏང་བས་ཡོངས་སུ་ཟད་པར་མི་འགྱུར་བ་བཞིན་དུ་འདིའི་ཡང་བཏང་བས་ཟད་པར་མི་འགྱུར་བའི་ཕྱིར་འགྲན་པའོ། །ཆོས་དང་ལྡན་པ་ཞེས་བྱ་བ་ལ་སོགས་པ་ལ་ཆོས་དང་མ་བྲལ་བ་ནི་ཆོས་དང་ལྡན་པའོ། །བཀའ་མཆིད་ཀྱིས་ཡང་
དག་པར་བསྟན་པ་ནི་བྱ་བ་ལ་བསྟན་པའོ། །ཡང་དག་པར་འཛིན་དུ་བཅུག་པ་ནི་སྦྱིན་པ་ལ་རྣམ་པར་བཀོད་པའོ། །ཡང་དག་པར་གཟེངས་བསྟོད་པ་ནི་ཚེ་འདི་ཉིད་སྦྱིན་པ་ལ་སོགས་པའི་ཕན་ཡོན་བརྗོད་པའོ། །ཡང་དག་པར་རབ་ཏུ་དགའ་བར་མཛད་པ་ནི་འཇིག་རྟེན་ཕ་རོལ་གྱི་ཕན་ཡོན་སྟོན་
པར་མཛད་པའོ། །ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ག་ལ་བ་ཞེས་བྱ་བ་ལ་སོགས་པ་ལ། སངས་རྒྱས་རྣམ་པར་གཟིགས་བཞུགས་པ་ག་ལ་བ་སྟེ། ཕྱོགས་དེ་ལོགས་སུ་ཐལ་མོ་སྦྱར་བ་དང་ལུས་ཀྱིས་ཕྱག་འཚལ་ཏེ་ཞེས་བྱ་བའི་བར་དུའོ། །ན་བཟའ་
ནི་སྣམ་སྦྱར་ལ་སོགས་པའོ། །གནས་མལ་ནི་ཁྲི་དང་ཁྲིའུ་ལ་སོགས་པ་སྟེ། གང་ལ་དགེ་སློང་དག་ཉལ་ཞིང་འདུག་པའོ། །བསྙུན་པ་དག་གི་རྐྱེན་ཏེ་བསྙུན་ཟློག་པར་བྱེད་པའི་རྒྱུ་མཚན་གྱི་སྨན་ནོ། །དེ་བས་ན་བསྙུང་བའི་རྐྱེན་ཡང་དེ་ཉིད་ཡིན་ལ་སྨན་ཡང་དེ་དག་ཡིན་པའམ། བསྙུང་
བའི་རྐྱེན་ཏེ་ཚད་མ་དང་། སྐྱབས་དང་རྟེན་པར་བྱ་བ་ནི་བསྙུང་བའི་རྐྱེན་སྨན་དག་ཉིད་དོ། །འཚོ་བ་ལ་མཁོ་བ་དེ་དག་ཐམས་ཅད་ཀྱང་དེ་དག་གིས་སྲོག་སྐྱོང་བར་བྱེད། ཡོངས་སུ་སྲུང་བར་བྱེད་ཅེས་བྱ་བའི་དབང་དུ་བྱས་ནས་ཡོ་བྱད་ཅེས་བྱའོ། །བཞེས་པར་ཅི་གནང་ཞེས་བྱ་བ་ནི་ཞལ་གྱིས་བཞེས་

པར་རོ། །ཅང་མི་གསུང་བར་ཞེས་བྱ་བ་ནི་ཚིག་གིས་གནང་བ་ནི་ཐ་མལ་པའི་རྟགས་ཡིན་པ་དེ་བས་ན་ཡང་དག་པར་རྫོགས་པའི་སངས་རྒྱས་དང་དེའི་ཉན་ཐོས་རྣམས་ནི་ཅང་མི་གསུང་བས་གནང་བར་མཛད་པའོ། །ལན་དུ་མ་ནི་ལན་མང་དུའོ། །འདོད་རྒྱལ་དུ་མི་གཏོང་བ་ནི་རང་
དགར་མི་གཏོང་བའོ། །བཟང་པོ་ནི་མཆོག་ཡིན་ཏེ། བཟང་པོ་ཁོ་ན་བཟང་པོ་ཉིད་དོ། །བཤོས་དག་གི་བཟང་པོ་ཉིད་ནི་བཤོས་བཟང་པོ་ཉིད་དོ། །གང་དུ་ཤིན་ཏུ་ཁྱད་པར་དུ་འཕགས་ཤིང་བསོད་པའི་ཟས་བསྒྲུབ་པར་ནུས་པ་གང་ཡིན་པ་དེར་བཤོས་གསོལ་བར་བྱ་བའི་དོན་ཏོ། །ཆུར་ནི་
ཆུས་ཡོངས་སུ་བཀང་བའི་སྣོད་གཙང་མའི་བྱེ་བྲག་གོ། །གང་ལ་ད་དེའི་དུས་ལ་བབ་པར་དགོངས་སུ་གསོལ་ཞེས་བྱ་བ་ལ། ཁྱིམ་གྱི་ནང་དུ་ཡང་དག་པར་གཤེགས་པའི་མཛད་པ་གང་ལ་ད་ནི་ཆོགས་པའི་དུས་ལ་བབ་པར་མཁྱེན་ནས་དེ་མཛད་པའི་རིགས་སོ། །ཞེས་བྱ་བ་ལ་ལྟོས་པའོ། །
དགེ་སློང་གི་ཚོགས་ཀྱིས་ཡོངས་སུ་བསྐོར་ཞིང་ཞེས་བྱ་བ་ནི་འཁོར་དུ་གྱུར་པའི་དགེ་སློང་དག་གིས་ཁྱབ་པའོ། །འཁོར་འགའ་ཞིག་ནི་སྔོན་ནས་ཀྱང་འགྲོ་བར་བྱེད་ཅིང་ཕྱི་བཞིན་དུ་ཡང་འབྲང་བར་བྱེད་པས་བྱེ་བྲག་ཏུ་བྱེད་པ་ནི་མདུན་དུ་བདར་ནས་ཞེས་བྱ་བ་སྨོས་སོ། །མདུན་དུ་བདར་བ་ནི་མངོན་དུ་
གཤེགས་པའོ། །བཀད་ས་ནི་དེར་ཟས་ཐམས་ཅད་སོགས་པར་བྱེད་པ་ཞེས་བྱ་བའི་དབང་དུ་བྱས་ནས་བཤོས་གསོལ་བའི་གནས་སོ། །ཚིམ་པར་བྱེད་པ་ནི་དབང་པོའི་འབྱུང་བ་ཆེན་པོ་ཚིམ་པར་བྱེད་པ་འདོད་པའི་ཟས་སྟོབས་པར་བྱེད་པའོ། །སྟོབས་པར་བྱེད་པ་ནི་ལྷག་པར་འདོད་པ་སྟོབས་
པར་བྱེད་པའོ། །ཕྱག་བཅབས་པ་ནི་ཕྱག་བསིལ་བར་གྱུར་པའོ། །སྟན་ཆེས་དམའ་བ་ནི་ཤིན་ཏུ་དམའ་བའོ། །རྒྱལ་པོའི་བཀས་དྲིལ་དཀྲོལ་ཞིང་དམ་བཅས་པ་གང་གསལ་པོར་བྱེད་པ་གང་ཡིན་པ་དེ་ནི་དྲིལ་བསྒྲགས་པ་སྟེ། དབང་ཕྱུག་གི་མཆོག་ཁོ་ན་ལ་འོས་པ་ཡིན་ནོ། །
འཚོང་བ་ནི་འཕེལ་བ་ཁོ་ནར་བྱེད་པ་སྟེ། བཅའ་བ་ལ་སོགས་པ་མར་ལ་སོགས་པའི་ནང་དུ་འཚེད་པར་བྱེད་པ་ན་ཚོས་པ་ཉིད་དུ་སྒྲུབ་པར་བྱེད་པ་གང་ཡིན་པ་དེ་ནི་འཚོད་པར་བྱེད་པའོ། །དེ་རང་གི་འབྱོར་པ་ལེགས་པའི་མཐའ་ཅན་ནི་ཞེས་བྱ་བ་ལ། རང་གི་འབྱོར་པ་ནི་ནོར་ཡིན་ལ། དེའི་

ཁྱད་པར་ནི་ལེགས་པའི་མཐའ་ཅན་ཞེས་སྨོས་ཏེ། འཐབ་རྩོད་ཉེ་བར་ཞི་བའི་ནོར་ལ་ལེགས་པའི་མཐའ་ཅན་ཞེས་བྱའོ། །ནོར་ལ་གནས་སྐབས་གསུམ་སྟེ། སྒྲུབ་པ་དང་། སྲུང་བ་དང་། ཡོངས་སུ་ལོངས་སྤྱོད་པའི་གནས་སྐབས་སོ། །དེ་ལ་ནོར་གྱི་ཐ་མ་ཡོངས་སུ་ལོངས་སྤྱོད་
པ་འདི་ལ་མཛེས་པའི་མཐའ་ཡོད་པ་ནི་ཟློག་པར་ཡོངས་སུ་ལོངས་སྤྱོད་པ་སྟེ། དེ་འདྲ་བའི་ནོར་ནི་བདེ་བ་ཐོབ་པར་བྱེད་པ་ཡིན་ནོ་ཞེས་འབྱུང་ངོ་། །སེམས་འཁྲུགས་པ་ལ་ཤིན་ཏུ་སྡིག་པའི་འབྲས་བུ་དང་ལྡན་པ་རྩུབ་པའོ། །རྡོ་ནི་སོ་ཕག་གི་དུམ་བུའམ། རྡོའི་དུམ་བུའོ། །བོང་བ་ནི་ས་
ལས་བྱས་པའི་རྐང་རྟེན་གྱི་དུམ་བུའམ་བོང་བ་ཉིད་དོ། །གྱོ་མོ་ནི་རྫ་དུམ་སོ་བཏང་བའམ། ཁམ་ཕོར་གྱི་དུམ་བུའོ། །དྲི་ཞིམ་པོའི་བདུག་པས་བཀང་བའི་སྣོད་ནི་དྲི་ཞིམ་པོའི་པོག་པོར་རོ། །བཞག་པ་ནི་དཔྱངས་ནས་བཞག་པའོ། །དར་གྱི་ཆུན་པོ་སྟེ་ཕན་ཚུན་ཡོངས་སུ་འབྲེལ་པའི་དར་གྱི་
ཆུན་པོའི་ཚོགས་ནི་དར་གྱི་ཆུན་པོ་མང་པོའོ། །དཔྱངས་པ་ནི་ཡོངས་སུ་བསྐོར་ཞིང་གཡོགས་པ་ལ་བྱ་སྟེ། དར་གྱི་ཆུན་པོའི་ཚོགས་དཔྱངས་ཤིང་ཡོངས་སུ་བསྐོར་བ་རྒྱལ་པོའི་ཕོ་བྲང་གང་ལ་ཡོད་པ་དེ་ལ་དེ་སྐད་ཅེས་བྱའོ། །རྒྱལ་མཚན་ནི་སེང་གེའི་རྒྱལ་མཚན་ལ་སོགས་པའོ། །བ་དན་ནི་
ཤིང་ལ་བཏགས་པའི་གོས་ཀྱི་བྱེ་བྲག་གོ། །བསྒྲེང་བ་ནི་བསླང་བར་གྱུར་པའོ། །རིན་པོ་ཆེའི་ཁྲི་ནི་གསེར་ལ་སོགས་པ་ལས་བྱས་པའོ། །བེའུ་རས་ཁྲ་བོ་ལ་སོགས་པ་གོས་དེ་དག་གིས་མཛེས་པར་བསྒྲུབས་པ་ནི་གདན་བཤམས་པའོ། །འཇམ་པ་ནི་མཉེན་པའོ། །རྒྱ་ཆེ་བ་ནི་གཏོས་ཆེ་བའོ། །ཤིན་
ཏུ་དྲི་ཞིམ་པ་ནི་དྲི་བཟང་པོའི་དྲི་དང་ལྡན་ཞིང་འབྱོར་པའི་ཟས་སོ། །ཡིད་དུ་འོང་བ་དང་འདྲ་བ་ནི་ཡིད་དང་རྗེས་སུ་མཐུན་པ་སྟོན་པའོ། །རྒྱལ་པོ་ལ་འོས་པའི་གདུགས་རྒྱ་ཆེ་བ་གང་ལ་འོད་མའི་རྩིབས་བརྒྱ་ཡོད་པ་དེ་ནི་གདུགས་རྩིབས་བརྒྱ་པའོ། །གསེར་དང་ནོར་བུས་སྤྲས་པའི་ཡུ་བ་ཅན་གཡག་རྔ་ལས་བྱས་
པའི་རྔ་ཡབ་ནི་གསེར་དང་ནོར་བུས་སྤྲས་པའི་རྔ་ཡབ་བོ། །སྒོར་ངེས་པར་སྦྱོར་བས་ན་སྒོ་བའོ། །ཤེས་པ་ཞེས་བྱ་བ་ལ་སོགས་པ་ལ་ཡིད་ཀྱིས་ཤེས་པར་བྱ་བ་མཐོང་བ་ནི་ཤེས་པའོ། །མིག་གིས་བལྟ་བར་བྱ་བ་མཐོང་བ་ན་བལྟ་བའོ། །རིགས་དང་བཅས་པར་འཇུག་པས་ན་རིགས་དང་ལྡན་པ་

ཡིན་ལ། ཀཽ་ཤི་ཀའི་རིགས་དང་བཅས་པ་ནི། ཀཽ་ཤི་ཀའི་རིགས་དང་ལྡན་པ་སྟེ། དྲང་སྲོང་ཀཽ་ཤི་ཀའི་རིགས་ལས་བརྒྱུད་ནས་གང་སྐྱེས་པའོ། །གང་གིས་ཟག་པ་མེད་པའི་ཡེ་ཤེས་ཀྱིས་སྡུག་བསྔལ་ལ་སོགས་པའི་བདེན་པ་མཐོང་བ་དག་ནི་བདེན་པ་མཐོང་བ་སྟེ།
རྒྱུན་དུ་ཞུགས་པ་ཞེས་བྱ་བའི་དོན་ཏོ། །རྣམ་པ་ནི་མཆོད་པའོ། །ཚེའི་སྒྲ་ནི་ཐམས་ཅད་དུ་འདས་པའི་དུས་བརྗོད་པའོ། །དུས་ནི་ཁྱིམ་བདག་ཉེས་མེད་ཀྱི་གནས་སྐབས་ཉེ་བར་མཚོན་པར་བྱེད་པའི་དུས་ཡིན་ཏེ། དེའི་ཚེ་དེའི་དུས་ཞེས་བྱ་བའི་བར་དུའོ། །ཤུགས་མཉམ་ཞེས་བྱ་བ་ལ་
སོགས་པ་ལ། ཤུགས་ནི་མགྱོགས་པ་སྟེ། སངས་རྒྱས་ཉིད་ཀྱི་ལམ་རྒྱུའི་ཚོགས་ལ་སྙིང་རྗེ་སྔོན་དུ་སོང་བ་ཅན་གྱི་འཇུག་པ་ནི་འདིར་ཤུགས་ཡིན་ཏེ། བདག་རྒྱུའི་ཚོགས་ལ་རབ་ཏུ་འཇུག་གོ་ཞེས་བྱ་བའི་ཐ་ཚིག་གོ། །སྟོབས་མཉམ་པ་ཞེས་བྱ་བ་ལ། སྟོབས་ནི་འབྲས་བུ་ཕུན་
སུམ་ཚོགས་པ་སྟེ། བདག་སྟོབས་ལ་སོགས་པའི་རང་བཞིན་གྱི་འབྲས་བུ་ཕུན་སུམ་ཚོགས་པ་ཡང་མཚུངས་སོ་ཞེས་བྱ་བའི་ཐ་ཚིག་གོ། །བརྩོན་འགྲུས་མཉམ་པ་ཞེས་བྱ་བ་ནི་གཞན་ལ་ཕན་འདོགས་པའི་འབྱོར་པ་ལ་འབད་རྩོལ་གྱི་བརྩོན་འགྲུས་ཏེ། གཞན་ལ་ཕན་པ་བསྐྱེད་པ་
མཚུངས་སོ་ཞེས་བྱ་བའི་དོན་ཏོ། །རྒྱུ་རྣམ་པ་དེ་གསུམ་གྱིས་མཉམ་ཞིང་མཚུངས་པ་ཐོབ་པར་གྱུར་པའོ། །ཡི་རངས་པ་ནི་སེམས་དགའ་བའོ། །མངོན་པར་བསྟོད་པ་ནི་མངོན་པར་བསྟོད་པར་གྱུར་པའོ། །མགར་བ་ནི་ལྕགས་མགར་རོ། །བཞིན་བཟངས་ཁྱོད་ཅེས་བྱ་བ་ལ། བཞིན་
བཟངས་ཀྱི་སྒྲས་ནི་ཁ་གདོང་མཚོན་པར་བྱེད་པ་ཡིན་ལ། ཁྱོད་ཅེས་བྱ་བ་ནི་ལས་བྱེད་པའོ། །རིན་མེད་པ་ནི་ཚིག་ཙམ་གྱིས་ལས་བྱེད་དུ་འཇུག་པ་གང་ཡིན་པ་དེ་ལ་དེ་སྐད་ཅེས་བརྗོད་དོ། །རྔན་པ་ནི་དགའ་བཞིན་དུ་སྟེར་བའོ། །བརྒྱངས་པ་ནི་དུས་ཟད་པར་བྱེད་པའོ། །མཛའ་བོ་ནི་བརྩེ་བ་དང་
ལྡན་པའོ། །འགྲོ་བར་བྱེད་པས་ན་འགྲོ་བ་སྟེ་དགེ་སློང་ངོ་། །གཉན་གྱི་ཁྱིམ་ནི་རིགས་རྒྱུད་ཀྱི་ཚོགས་དག་གི་ཁྱིམ་མོ། །ཉེ་བར་འགྲོ་བའི་དགེ་སློང་དང་འདྲིས་པ་དེའི་ཁང་པ་ནི་འདྲིས་པའི་ཁྱིམ་མོ། །ཤེས་པ་ནི་མཁས་པའོ། །དབེན་པ་སྨོས་པ་ནི་འཇིག་རྟེན་མ་དད་པ་སྤང་བའི་ཕྱིར་རོ། །མེ་ཏོག་

པདྨ་ལྟར་དམར་བའི་ཡུ་བ་ཅན་ཞེས་བྱ་བ་ནི། ཀུན་ནས་བསྐོར་བ་ལས་གྲུབ་པའི་ཤིན་ཏུ་དང་བ་སྟེ། བཀྲ་བ་དང་ཉེ་བར་བཀྲ་བའི་ཡུ་བ་ཅན་ཞེས་བྱ་བའི་བར་དུའོ། །དགེ་སྦྱོང་ཞེས་བྱ་བ་ལ་སོགས་པ་ལ། དགེ་སྦྱོང་གི་ཀུན་དུ་སྤྱོད་པ་གང་ལ་ཡོད་པ་དེ་ནི་དགེ་སྦྱོང་དག་གོ། །འདོད་པའི་ཡོན་ཏན་ནི་
འདོད་པར་བྱ་བ་ཡིན་པའི་ཕྱིར་འདོད་པ་ཡིན་ལ། གོམས་པར་བྱ་བ་ཡིན་པའི་ཕྱིར་ཡོན་ཏན་ཏེ། འདོད་པའམ་འདུན་པའི་འདོད་ཆགས་ཀྱིས་དེ་གོམས་པར་བྱ་བ་ཡིན་པའི་ཕྱིར་འདོད་པའི་ཡོན་ཏན་ནོ། །གཟིར་བ་ནི་གནོད་པར་གྱུར་པ་སྟེ། ཁྱེད་ཅག་གཞན་གཡོས་འདོད་པ་ལ་ལོངས་སྤྱོད་པར་
གྱུར་ཅེས་བྱ་བའི་བར་དུའོ། །ལྕགས་ལས་རྣམ་པར་བསྒྱུར་བ་ནི་ལྕགས་ལས་བྱས་པའོ། །རྨོངས་པ་མེད་པར་ལན་ལྡོན་པར་ནུས་པ་ནི་སྤོབས་པ་ཡིན་ལ་དེ་མེད་པར་གྱུར་པ་ནི་ཉམས་པར་གྱུར་པའོ། །མཚོན་ཆའི་རྣམ་པ་ལྟ་བུ་མ་གནང་བ་ནི་རྩེ་མོ་རྣོ་བ་ཉིད་ཡོངས་སུ་སྤང་བར་བྱ་བའི་ཕྱིར་རོ། །
བསྒྲུབ་པར་བྱ་བ་གདགས་པའི་དོན་དང་། སྲད་བུ་དབང་དུ་བྱ་བའི་དོན་དུ་བུག་པ་གྲུ་བཞི་ནི་སྲ་བརྐྱང་ཞེས་བྱ་བ་ཡིན་ཏེ། དེ་ལ་གོས་གདིང་བའི་ཚད་ཀྱི་རྣམ་པ་སྤང་ལེབ་ཀྱི་འཁོར་གྱི་ཚད་ཡིན་ཏེ། མཚན་མའི་རྣམ་པ་ནས་བཟུང་སྟེ་འདྲ་བའོ། །མེ་ལོང་ལ་སོགས་པ་གདོང་མཛེས་པར་
བྱེད་པའི་ཐབས་སུ་གྱུར་པའི་དངོས་པོ་བསྒྲུབ་པའི་རྫས་སོ། །ཆུའི་སྣོད་ལོང་ལ་རྨ་ལ་སོགས་པ་ལ་ལྟ་བ་ལ་ཉེས་པ་མེད་པར་གསུངས་པ་ནི་སྐྱོ་བ་བསྐྱེད་པར་རབ་ཏུ་བསྟན་པའི་ཕྱིར་རོ། །སྐྲ་ཤད་པར་བྱེད་པའི་རྫས་ནི་སོ་མངས་སོ། །རྩྭ་པུ་ཤེལ་ཙི་ལ་སོགས་པ་ལས་བྱས་པའི་ཁྲེས་
པོ་ནི་བཤད་སྤྱད་དོ། །ཀཽ་ཤཱམྦཱི་ནི་གྲོང་ཁྱེར་རོ། །ཕག་མོའི་མཚན་མའི་ཕུག་ནི་ཕག་མོའི་ཕུག་གོ། །སྐྱེད་མོས་ཚལ་ནི་རྩེད་མོའི་གནས་སོ། །བར་མེད་ཅིང་བར་ཆད་མེད་པར་མེ་ཏོག་རྒྱས་པ་ནི་ཀུན་ནས་རྒྱས་པར་གྱུར་པ་སྟེ། གང་དུ་མེ་ཏོག་དག་སྐྱེས་པར་གྱུར་པ་ཞེས་བྱ་བའི་དབང་དུ་
བྱས་པ་ཡིན་ནོ། །ནགས་ཀྱི་འཁོར་ནི་ནགས་ཀྱི་ཚོགས་སོ། །ནགས་ཉུལ་བ་ནི་ཐིབས་པོའི་ཕྱོགས་སོ་སོར་རྟོགས་པའོ། །གནོད་པར་བྱེད་པ་ལ་སོགས་པ་འོང་བ་ཡོངས་སུ་སྤང་བའི་ཕྱིར་ལ་གཅན་དག་ལ་བཀོད་པའོ། །གང་ལ་ཞེས་བྱ་བ་ལ་སོགས་པ་ལ། ལས་སུ་བྱ་བ་གང་ལ་སྒྲུབ་པར་

བྱེད་པའི་འདུ་ཤེས་པ་ཞེས་བྱ་བའི་ཐ་ཚིག་གོ། །ཅི་ལྟར་འདོད་པ་བཞིན་དུ་རབ་ཏུ་རྒྱུ་ཞིང་འཁོད་དོ་ཞེས་བྱ་བ་ལ་རབ་ཏུ་རྒྱུ་བ་ནི་འགྲོ་བ་རྣམ་པ་སྣ་ཚོགས་ཀྱི་རྣམ་པའོ། །གནས་པར་བྱེད་པས་ན་འཁོད་པ་སྟེ། གནས་པར་བྱེད་པ་ནི་བདག་ཉིད་ཀྱི་འདོད་པས་རྒྱུག་པ་དང་མཆོང་
བ་ལ་སོགས་པའི་བྱ་བ་དང་། གཉིད་ཀྱིས་ལོག་པ་ལ་སོགས་པའི་བྱ་བ་དང་བྱེད་པ་རྩོམ་པའོ། །བར་བར་དུ་གོས་ཀྱི་དུམ་བུ་གླན་པ་ནི་ཚེམ་བུའོ། །ཆོས་གོས་དང་ཤམ་ཐབས་རལ་བ་ནི་རྙིངས་པར་གྱུར་པའོ། །གསོད་པའི་བསམ་པས་མཚོན་ཆ་འདེབས་པར་བྱེད་པ་ནི་མཚོན་འཕྱར་
བའོ། །སྲིད་པའི་རྩེ་མོའི་བསྒོམ་པས་སྤང་བར་བྱ་བ་རྣམ་པ་དགུ་སྤངས་པས་ཐོབ་པ་འདུས་བྱས་དང་འདུས་མ་བྱས་ཀྱི་འབྲས་བུ་གང་ཡིན་པ་དེ་ནི་དགྲ་བཅོམ་པའི་འབྲས་བུའོ། །འདོད་པ་ནི་སྤྱོད་པའི་བསྒོམ་པས་སྤང་བར་བྱ་བའི་ཉོན་མོངས་པ་རྣམ་པ་དགུ་ཟག་པ་མེད་པའི་ལམ་གྱིས་
སྤངས་པས་ཐོབ་པ་གང་ཡིན་པ་དེ་ནི་ཕྱིར་མི་འོང་བའི་འབྲས་བུའོ། །བསྒོམ་པས་སྤང་བར་བྱ་བ་རྣམ་པ་དྲུག་ཟག་པ་མེད་པའི་ལམ་གྱིས་སྤངས་པས་ཐོབ་པ་འདུས་བྱས་དང་འདུས་མ་བྱས་ཀྱི་འབྲས་བུ་གང་ཡིན་པ་དེ་ནི་ལན་ཅིག་ཕྱིར་འོང་བའི་འབྲས་བུའོ། །མཐོང་བས་སྤང་བར་བྱ་བའི་
ཉོན་མོངས་པ་ཟག་པ་མེད་པའི་ལམ་གྱིས་སྤངས་ནས། ཤེས་པ་སྐད་ཅིག་མ་བཅུ་དྲུག་འདུས་བྱས་དང་འདུས་མ་བྱས་ཀྱི་དབྱེ་བ་ཐ་དད་པ་ཐོབ་པ་གང་ཡིན་པ་དེ་ནི་རྒྱུན་དུ་ཞུགས་པའི་འབྲས་བུའོ། །རྣམ་པར་རྟོག་པ་དང་རྣམ་པར་དཔྱོད་པའི་དགའ་བའི་བདེ་བ་དང་ཡང་དག་པར་ལྡན་པ་
སེམས་རྩེ་གཅིག་པའི་དགེ་བ་ནི་བསམ་གཏན་དང་པོའོ། །རྟོག་པ་དང་དཔྱོད་པ་དང་བྲལ་བའི་དགའ་བའི་བདེ་བ་དང་ཡང་དག་པར་ལྡན་པ་སེམས་རྩེ་གཅིག་པའི་དགེ་བ་ནི་གཉིས་པའོ། །དགའ་བའི་འདོད་ཆགས་དང་བྲལ་བས་དགའ་བ་མེད་པའི་བདེ་བ་དང་ཡང་དག་པར་ལྡན་པ་
ནི་གསུམ་པའོ། །བཏང་སྙོམས་དང་ཡང་དག་པར་ལྡན་པ་ནི་བཞི་པའོ། །ཐོབ་པ་ནི་མཐོང་བའི་སྒོ་ནས་ཐོབ་པའོ། །བོང་ཚོད་ཆེ་བ་དང་། རྐང་ལག་རིང་བའི་སྲིན་བུ་ནི་རྔ་མོ་ལྟ་བུའི་སྲིན་བུ་སྟེ། རྔ་མོ་ལྟ་བུའི་སྲིན་བུས་གསོན་པོ་ཉིད་དུ་ཟར་བཅུག་པའི་བསམ་པ་དེའི་ལྷག་

པའི་ཚིག་གོ། །རྒྱལ་པོ་ལ་ཡང་དེའི་རིགས་ཅན་གྱི་སྲོག་ཆགས་བསྡུས་པ་ཡོད་པ་ཁོ་ན་ཡིན་པ་དེའི་ཕྱིར་འོན་ཅིག་ཅེས་སྨྲ་བ་ཡིན་ནོ། །ཉེས་པ་ཡོད་པ་ཡིན་པའི་ཕྱིར་ཉེས་པ་མེད་པའོ། །གཞན་ལ་གནོད་པ་བྱེད་པར་མ་བརྩམས་པ་ཉིད་ཀྱི་ཕྱིར་གནོད་པ་མ་བྱས་པའམ། གནོད་པ་བྱེད་
པ་མ་ཡིན་པའོ། །གཞན་དང་འབྲེལ་པའི་ཕྱིར་བདག་ཉིད་མངོན་སུམ་དུ་གནོད་པ་བྱེད་པ་མ་ཡིན་པས་ན་གནོད་པ་བྱེད་པ་མ་ཡིན་པ་ཅན་ཐར་བར་བྱའོ་སྙམ་མོ། །རི་དགས་གསོད་པའི་ཕྱིར་དགའ་བ་ནི་ཀུན་ནས་འཚེ་བར་བྱེད་པ་ལའོ། །ལྷག་པར་རྨོངས་པས་ཀུན་ཏུ་དཔྱོད་པའི་སྐྱེས་བུ་ནི་བླུན་པོའོ། །
སྡུག་བསྔལ་བ་ནི་ལུས་ཀྱིའོ། །ཉམ་ང་བ་ནི་སེམས་ཀྱིའོ། །སོར་གཉིས་ནི་སོར་གཉིས་སོ། །སོར་གཉིས་སུ་འཇུག་ཅིང་ཁྱབ་པའི་ཕྱིར་སོར་གཉིས་ཀྱི་ཚད་དེ་སོར་གཉིས་སླེབ་པ་ཞེས་བྱ་བའི་ཐ་ཚིག་གོ། །།བམ་པོ་གསུམ་པ། །འདོད་པ་སྟེ་གཟུགས་ལ་སོགས་པ་ལ་ལོངས་
སྤྱོད་པར་བྱེད་པའི་ཕྱིར་འདོད་པ་ལ་ལོངས་སྤྱོད་པའོ། །བསྟེན་པར་བྱ་བ་ནི་ཉམས་སུ་མྱོང་བར་བྱ་བའོ། །ཕྱི་རུབ་ལ་ཞེས་བྱ་བ་ལ་སོགས་པ་ལ་བློ་སྐར་གྱི་རྣམ་པ་ནི་འདི་ཡིན་ཏེ། དེའི་ཕྱི་རོལ་གྱི་ངོས་སུ་རུབ་པ་ནང་གི་ངོས་ཡངས་པ་རྒྱ་མཚོ་ལྟ་བུར་བྱས་པའི་དབྱིབས་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། རིམ་
བཞིན་ཡངས་པ་ཞེས་བྱ་བའི་བར་དུའོ། །གློ་སྐར་ནི་སྐར་ཁུང་དྲ་བ་ཅན་ནོ། །སྒོ་གླེགས་ནི་སྒོ་གླེགས་ཀྱི་མིང་ཅན་གྱི་ཤིང་ལེབ་སྟེ། གང་གི་གློ་སྐར་གྱི་སྒོ་གཅོད་པར་བྱེད་པའོ། །འཁོར་གཏན་ནི་སྒོ་གླེགས་ཕྱིར་མི་ཕྱེད་པའི་ཐབས་སུ་གྱུར་པ་སྟེ། སྒོའི་སྒོ་གླེགས་ཀྱི་དབུས་ཀྱི་ཕྱོགས་སུ་ཁྲུ་གང་གི་ཚད་ཀྱི་ཤིང་གཟེར་བུས་སྦྱར་བ་དེ་འཛིན་
པའི་ཤིང་དེ་འཁོར་ལོ་བཞིན་ཡོངས་སུ་བསྐོར་ནས་གཟུང་བར་བྱ་བ་དེ་ལ་འཇོག་པར་བྱེད་པའི་ཕྱིར་འཁོར་གཏན་ཞེས་བྱའོ། །སྒོའི་ཡ་ཕུབས་ལ་ཉེ་བར་བཏགས་པའི་ཕུར་པ་ལ་སོགས་པ་ནི་གནམ་གཟེར་རོ། །རྩིག་པའི་བུ་གའི་ནང་དུ་ཆུད་པའི་ཤིང་བུ་རེད་བུ་ནི་འཕྲེད་གཏན་ཞེས་བྱའོ། །རའི་རྐང་པའི་
རྣམ་པ་ཅན་གྱི་ཤིང་བུ་ནི་དབྱུག་གུ་སྐམ་ཁ་སྟེ། གང་གི་ཕྱིར་དེས་གློ་སྐར་གྱི་འཕྲེད་གཏན་འཛུད་པ་དང་འབྱིན་པར་བྱེད་པའོ། །སྒོ་ལ་སྒོ་གླེགས་ཆུག་ཤིག་ཅེས་བྱ་བ་ནི་སྒོ་གླེགས་གདགས་པའོ། །ལྡེ་མིག་ཀྱོག་པོ་ཞེས་བྱ་བ་ནི་སྒོ་གླེགས་འབྱེད་པའི་ཐབས་སུ་གྱུར་པའོ། །ལག་ཟུངས་

ཞེས་བྱ་བ་ནི་ལྕགས་ལས་བྱས་པ་སྒོ་ནང་དུ་འདྲེན་པའི་ཐབས་སུ་གྱུར་པའོ། །སོ་ཕག་གི་སྟེགས་བུ་ནི་ཕུག་རོན་གྱི་ཕྲེང་བ་ཅན་ནོ། །ཞལ་ཞལ་ནི་རྡོ་ཐལ་གྱི་ཞལ་ཞལ་དུ་རིག་པར་བྱའོ། །ལྕགས་ཀྱི་ཐལ་ཕྱག་ནི་ལྕགས་ལས་བྱས་པའོ། །མཁྲིས་པ་ལ་སོགས་པའི་ཉེས་པས་འཁྲུགས་
པ་ནི་རྨྱ་བ་སྟེ། ནང་ན་ཡོད་པའི་མེ་ཉམས་པར་གྱུར་པའོ། །འབྲུ་མར་ལ་སོགས་ཞེས་བྱ་བ་ནི་ཉུངས་ཀར་གྱི་མར་རོ། །སོ་བ་བཏགས་པ་ནི་ཕྱེའོ། །སྦྲུས་པ་ནི་གཉེན་པོར་གྱུར་པའོ། །རྩྭ་སྟེན་ནི་རྩྭ་མུན་ཛ་ལ་སོགས་པའི་སྙིང་པོའོ། །གྱོ་མོ་ནི་ཁམ་ཕོར་ལ་སོགས་པའི་དུམ་བུའོ། །ཁྲུས་
ཀྱི་དོན་གྱི་ཁང་པ་ནི་ཁྲུས་ཁང་ངོ་། །ལྕི་བ་ནི་ལྕི་རློན་ནོ། །ཚ་ཁུག་ནི་ཚའི་སྣོད་དོ། །གཡོ་མེད་པ་ཞེས་བྱ་བ་ལ་སོགས་པ་ལ། སེམས་རྟོགས་པ་མེད་པས་ཀུན་ཏུ་སྤྱོད་པ་ནི་གཡོ་མེད་པའོ། །གཞན་སླུ་བར་བྱེད་པ་ནི་སྒྱུ་སྟེ་དེ་མེད་པའོ། །ཚིག་ཀུན་ལ་ཡིད་ཆེས་པ་ནི་དྲང་པོ་སྟེ། དེ་ཉིད་ཀྱིས་རྣམ་པ་ཐམས་
ཅད་དུ་དྲང་བའི་རང་བཞིན་ཅན་ལ་རང་བཞིན་གྱིས་དྲངས་པ་ཞེས་གསུངས་པའི་ཕྱིར་རོ། །ཉིན་རེ་ཞིང་ཞེས་བྱ་བ་ནི་ཉིན་རེ་ལའམ་ཉིན་རེའི་ཐོ་རངས་ཞིང་ངོ་། །མི་མཛེས་པ་ནི་མཛེས་པ་མ་ཡིན་པའོ། །མི་རིགས་པ་ནི་དགེ་སློང་གི་ཚུལ་མ་ཡིན་པའོ། །ཚངས་པ་ནི་མྱ་ངན་ལས་འདས་པ་ཡིན་ལ། དེའི་
རྒྱུ་མཚན་ནི་སྤྱོད་པ་ཡིན་པའི་ཕྱིར་ཚངས་པར་སྤྱོད་པའོ། །ཚངས་པར་སྤྱོད་པ་མ་ཡིན་པ་ནི་མི་ཚངས་པར་སྤྱོད་པ་སྟེ། མྱ་ངན་ལས་འདས་པ་དང་འགལ་བའི་ལས་སུ་བྱ་བ་བྱེད་ཅེས་བྱ་བའི་ཐ་ཚིག་གོ། །ཕས་ཕམ་པ་ཞེས་བྱ་བ་ནི་ལྟུང་བའི་རྗེས་སུ་འགྲོ་བའི་མིང་ཡིན་ཏེ། དེ་དང་ལྡན་པའི་ཕྱིར་གང་
ཟག་ལ་ཡང་ཕས་ཕམ་པ་ཞེས་བྱའོ། །གསོལ་བ་དང་གཉིས་ཀྱི་ལས་རྣམ་པར་བྱེད་པའི་སྒོ་ནས་དགེ་སློང་དག་གང་གི་ཁྱིམ་ནས་བསོད་སྙོམས་ལེན་པར་བྱེད་པ་དེ་ལ་བརྟེན་ནས། དགེ་སློང་དག་གིས་ལྷུང་བཟེད་ཁ་སྦུབ་པ་ནི་ངེས་པར་ཁ་སྦུབ་པ་ཡིན་པར་བལྟ་བར་བྱའོ། །དྲིས་པའི་ཚིག་གིས་ཞེས་
བྱ་བ་ནི་གཎྜཱི་བརྡུངས་པ་ན་ལམ་གྱི་ཕྱོགས་ན་གནས་པའི་དགེ་སློང་གིས་ཅིའི་ཕྱིར་གཎྜཱི་བརྡུངས་པ་སྔོན་དུ་སོང་བ་ཅན་གྱི་འདུས་པ་མཛད་ཅེས་དྲིས་པ་གང་ཡིན་པ་དེ་ལ། དྲིས་ནས་ལན་དུ་བརྗོད་པ་དེ་ནི་དྲིས་པའི་ཚིག་ཡིན་ནོ། །དེས་དགེ་སློང་རྣམས་ལ་ཡང་དག་པར་བསྒོ་བ་སྟེ། རྒྱུ་བརྗོད་པ་སྔོན་དུ་

སོང་བ་ཅན་གྱི་དགེ་འདུན་རྣམས་འདུག་ཅིང་མཐུན་པར་གྱུར་པ་ཞེས་བྱ་བའི་ཐ་ཚིག་གོ། །མཐུན་པ་ནི་འདུས་པ་ཡིན་ལ། འདུས་པ་སྔོན་དུ་སོང་བ་ཅན་གྱི་སྟན་སོ་སོར་སྟོབ་པར་བྱེད་པ་ནི་འདུག་པར་གྱུར་པའོ། །གསོལ་བ་ནི་དགེ་འདུན་ལ་གོ་བར་བྱེད་པའོ། །གལ་ཏེ་དགེ་འདུན་གྱི་དུས་ལ་བབ་ཅིང་
བཟོད་ན་ཞེས་བྱ་བ་དེ་ལ་ནི་འདྲི་བ་ཡིན་ཏེ། གལ་ཏེ་དགེ་འདུན་གྱི་སྐབས་ལ་བབ་ཅིང་ལྷུང་བཟེད་ཁ་སྦུབ་པ་ལ་རིགས་པར་སྤོབས་པ་ནི་བཟོད་པ་སྟེ། རིགས་པར་དགོངས་སམ་ཞེས་དྲིས་པའོ། །གནང་བར་མཛོད་ཅིག་ཅེས་བྱ་བ་ནི་དོན་དུ་གཉེར་བ་སྟེ། ལས་བྱེད་པས་དགེ་འདུན་ལས་གནང་བ་
གསོལ་བ་ནི་གལ་ཏེ་དགེ་འདུན་གྱིས་རིགས་པར་སྤོབས་པ་མཛད་ན་ལྷུང་བཟེད་ཁ་སྦུབ་པའི་ཕྱིར། དེ་དགེ་འདུན་གྱིས་གནང་བར་མཛོད་ཅིག་པའོ། །གང་དག་བཟོད་པ་ཞེས་བྱ་བ་ནི་གང་དག་ལིཙྪ་བཱི་ཆེན་པོ་ལ་ལྷུང་བཟེད་ཁ་སྦུབ་པར་རིགས་པས་སྤོབས་པ་དེ་དག་ནི་ཅང་མི་སྨྲ་བར་འདུག་པར་བྱ་བ་ཡིན་
ལ། གཞན་དག་ནི་སྨྲ་བར་བྱ་བ་ཡིན་ཏེ། གང་གི་ཕྱིར་དགེ་འདུན་མི་གསུང་བར་བཞུགས་པ་དེའི་ཕྱིར། དགེ་འདུན་གྱིས་ལྷུང་བཟེད་ཁ་སྦུབ་པ་ལ་བཟོད་པ་དང་ལས་བྱེད་པ་ལ་དགེ་འདུན་གྱིས་གནང་བ་སྩལ་བ་ཡིན་ནོ།། །།ཚུལ་ཤིང་བོར་བ་ནི་མིང་བྱང་ལས་མིང་ཕྱིས་པར་གྱུར་
པ་སྟེ། དད་པ་ཅན་གྱི་ནང་ནས་གསལ་བར་གྱུར་ཅེས་བྱ་བའི་ཐ་ཚིག་གོ། །མི་ཤེས་པ་ནི་ཅི་ཞིག་བྱ་བ་ལ་སོགས་པ་ལ་རྨོངས་པའོ། །སྟན་ལ་སྤྱོད་པ་ནི་འཐད་པའམ་རབ་ཏུ་གྲགས་པ་བཞིན་དུའོ། །གསོལ་བ་འབའ་ཞིག་ཅེས་ཕྱོགས་གང་དུ་བཞག་ན་བྱས་པར་གྱུར་པ་ལས་ཐོབ་པ་ལ་
སོགས་པའི་སྒྲ་ཐོས་པར་གྱུར་པ་དེ་ནི་ཐོས་པའི་ཉེ་འཁོར་དེ་ལས་བཀར་བ་ནི་བསྐྲད་པའོ། །མཐོང་བའི་ཉེ་འཁོར་ནི་གང་དུ་འདུག་ན་དགེ་འདུན་མཐོང་བར་གྱུར་པའོ། །གསོལ་བ་འབའ་ཞིག་ཅེས་བྱ་བ་ནི་ལས་ཀྱི་ཚིག་གིས་གཏོང་བར་གོ་བར་བྱེད་པའོ། །གསོལ་བས་
བཀག་པ་ལ་ཡང་ཀུན་ཏུ་སྤྱོད་པར་གནང་བ་ནི་སླར་བཟློག་པའོ། །ལས་ལ་ཕན་པ་ནི་ལས་སུ་རུང་བ་སྟེ། རུང་བ་ཞེས་བྱ་བའི་བར་དུའོ། །ཟས་ཀྱི་བྱ་བ་བྱས་ནས་ཞེས་བྱ་བ་ལ། ཟས་ཀྱི་བྱ་བ་བྱས་པ་སྟེ་ཡོངས་སུ་ལོངས་སྤྱོད་ནས་སོ། །ཕྱི་མའི་ཟས་ནི་ཟས་ཀྱི་དུས་ལས་འོག་

ཏུའོ། །བསོད་སྙོམས་ལས་སླར་ལོག་པ་ནི་ཕྱིར་ལོག་པ་སྟེ། ཟས་ཀྱི་ལྷག་མ་སྤངས་པའི་ཕྱིར་རོ། །ལྷུང་བཟེད་དང་ཆོས་གོས་མཁོས་སུ་ཕབ་པ་ནི་གཞག་པའོ། །ཡིད་ལ་བྱེད་པ་ནི་ཏིང་ངེ་འཛིན་གྱི་རྣམ་པའོ། །སྡུག་བསྔལ་ནི་ལུས་ཀྱིའོ། །ཉམ་ང་བ་ནི་སེམས་ལས་
བྱུང་བའོ། །ཀུན་ནས་གཟིར་བ་ནི་མངོན་པར་འདོད་པ་མ་ཡིན་པའི་གནས་སྐབས་སོ། །འདོད་ཆགས་ཀྱི་རང་བཞིན་པ་ནི་མི་གཙང་བ་སྟེ། རྣམ་པར་བསྔོས་པ་ལ་སོགས་པ་མི་གཙང་བའི་དངོས་པོ་ལ་དམིགས་པ་ཉིད་ཀྱི་ཕྱིར་མི་གཙང་བ་ཞེས་བྱ་བའོ། །བསྒོམ་པར་བྱའོ་ཞེས་བྱ་བ་ནི་ཡང་དང་ཡང་
མངོན་དུ་བྱ་བའོ། །བརྡེག་པར་བྱ་བ་ཞེས་བྱ་བ་ནི་ཚུལ་བཞིན་ཡིད་ལ་བྱེད་པའི་མདས་སེམས་ལ་བརྡེག་པར་བྱ་བའོ། །ལུས་ལ་དམིགས་པའི་དྲན་པ་ནི་ལུས་སུ་གཏོགས་པ་སྟེ། གང་གི་ཚེ་ལུས་དྲན་པ་ཉེ་བར་གཞག་པ་ཐོབ་པར་གྱུར་པ་དེའི་ཚེ་དེ་བསྒོམ་པར་འགྱུར་རོ། །རྩེ་བར་བྱེད་
པ་ནི་འོ་དང་འཁྱུད་པ་ལ་སོགས་པས་སོ། །དགའ་བར་བྱེད་པ་ནི་ཆུང་མའི་ཡུལ་ལ་དགའ་བའི་སེམས་ཀྱིས་སོ། །དགའ་དགུར་སྤྱོད་པ་ནི་འཁྲིག་པ་ཀུན་ཏུ་སྤྱོད་པའི་སྒོ་ནས་སོ། །གཟུགས་མཛེས་པ་ནི་ཁ་དོག་གིས་སོ། །བལྟ་ན་སྡུག་པ་ནི་དབྱིབས་ཀྱི་སྒོ་ནས་སོ། །མཛེས་པ་ནི་དང་བ་དང་
དགའ་བའི་རྒྱུ་ཅན་གྱི་ཡིད་དུ་འོང་བའོ། །སྔོན་དང་མི་འདྲ་བར་རྣམ་པར་གྱུར་པས་གཟུགས་མི་སྡུག་པའོ། །གནས་ནི་གནས་ཁང་དུ་འཇུག་པར་བྱ་བའོ། །མདངས་རྒྱས་པ་ཞེས་བྱ་བ་ནི་ཡོངས་སུ་རྒྱས་པར་གྱུར་པ་ཉིད་དོ། །མེ་ལོང་ལྟར་ཞེས་བྱ་བ་ནི་ཇི་ལྟར་མེ་ལོང་ལ་ཅུང་ཟད་ཙམ་གྱིས་མི་སྡུག་
པར་གྱུར་པ་དེ་བཞིན་དུ་ཁ་གདོང་དག་ཀྱང་ངོ་། །ཤོར་བ་ནི་གང་དཔའ་བོར་གྱུར་པ་འདིར་བཟང་པོར་རིག་པར་བྱ་སྟེ་དེ་དག་གི་ཤོར་བའོ། །བཅའ་བའི་རིན་ནི་གསེར་ལ་སོགས་པའོ། །བདག་ཅག་རྗེས་སུ་བཟུང་ན་ཞེས་བྱ་བ་ནི་ཁོ་བོ་ཅག་ལ་རྗེས་སུ་བརྩེ་ནའོ། །འཕྱ་བར་བྱེད་པ་ནི་མིང་སྨོས་པའི་
སྒོ་ནས་འགའ་ཞིག་ལ་ཚུལ་མ་ཡིན་པ་རྗོད་པར་བྱེད་པའོ། །སྨོད་པར་བྱེད་པ་ནི་མིང་སྨོས་པ་མེད་པར་སྤྱིར་འགའ་ཞིག་འདི་ལྟ་བུ་བྱེད་དོ་ཞེས་ཉེས་པ་རྗོད་པར་བྱེད་དོ། །ངན་དུ་ཟེར་བ་ནི་ཉེས་པ་བརྗོད་པའི་སྒོ་ནས་འདྲི་བ་ལ་སྦྱོར་བའོ། །ཤཱཀྱའི་བུའི་སྡོམ་པ་ལ་གནས་པ་ནི་ཤཱཀྱའི་བུའོ། །

དགེ་སྦྱོང་ནི་ཐར་པའི་དོན་དུ་འཇུག་པའོ། །ཚིག་པ་ནི་རྣམ་པར་ཉམས་པའོ། །དགེ་སྦྱོང་ཞེས་བྱ་བ་ནི་ཐར་པའི་དོན་དུ་ཡོངས་སུ་སྦྱོང་བའོ། །བྲམ་ཟེ་ནི་ལུས་དང་ངག་གིས་ཉེས་པར་སྤྱོད་པ་ལས་ལྡོག་པ་ཡིན་གྱི། བྱ་བ་མ་ཡིན་པར་བྱེད་པར་སྣང་བ་གང་ཡིན་པ་དེ་དག་ནི། ཐར་པའི་དོན་དུ་
ཡོངས་སུ་སྦྱོང་ཞིང་བྱེད་པ་མ་ཡིན་ནོ། །རྣམ་པར་བརྗེད་པ་དྲན་པར་བྱེད་པ་ནི་སྦྱང་བའོ། །སྤ་གང་བར་གྱུར་པ་ཞེས་བྱ་བ་ནི་སྐྱོ་བས་གདོང་ཐུར་དུ་བལྟས་པའོ། །དེའི་ཚེ་ཞེས་བྱ་བ་ལ་ཁ་ལུའི་སྒྲ་ནི་ངེས་པར་གཟུང་བའམ། ངག་མཛེས་པར་བྱ་བའི་དོན་ཏོ། །ཚེ་ནི་དུས་ཡིན་ཏེ། བདུན་པའི་
དོན་གྱི་རྒྱུའི་གསུམ་པ་ཡིན་པ་དེ་བས་ན་དུས་དེ་ནས་ཞེས་བྱ་བའི་དོན་དུ་འགྱུར་རོ། །དད་པ་ཅན་ཞེས་བྱ་བ་ལ་སོགས་པ་ལ་རྟེན་ཅིང་འབྲེལ་པར་འབྱུང་བ་ལ་སོགས་པ་ལས་དང་འབྲེལ་བ་དང་། གཞན་ལས་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་སྐྱེས་པར་ཡིད་ཆེས་པ་ནི་དད་
པའོ། །སྡིག་པ་ལས་རྣམ་པར་བཟློག་པའི་ཕྱིར་བཟང་པོའོ། །སེམས་དགེ་བའི་ལས་ལ་བརྟེན་པ་ནི་དགེ་བའི་བསམ་པ་ཅན་ནོ། །དཀོན་མཆོག་གསུམ་ལ་སྐྱབས་སུ་འགྲོ་བ་སྔོན་དུ་སོང་བ་ཅན་གྱི་དགེ་བསྙེན་གྱི་བསླབ་པའི་གཞི་ལྔ་ལ་རྣམ་པར་བཀོད་པ་ནི་ངེས་པར་འཇོག་
པའོ། །དེ་དག་ཀྱང་སྲོག་གཅོད་པ་ལས་ལྡོག་པ་ལ་སོགས་པ་ནས་འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ལྡོག་པའི་བར་དུའོ། །ལུས་ཀྱི་མདངས་སྨད་པར་བྱ་བ་ནི་ཁ་དོག་ངན་པའོ། །ལུས་ཆུང་བ་ནི་ལུས་ཀྱི་ཚད་ཆུང་བའོ། །འདུས་པ་ནི་
ཐག་ཉེ་བ་ན་གནས་པའི་ཉེ་དུ་དག་འདུས་པའོ། །ལྷགས་པ་ནི་ཐག་རིང་པོ་ན་གནས་པ་དག་འོངས་པར་གྱུར་པའོ། །ཉི་མ་བདུན་པོའི་ཚོགས་ནི་ཉིན་ཞག་བདུན་པའོ། །གལ་ཏེ་ཡང་ཉི་མ་ཉི་ཤུ་རྩ་གཅིག་པོ་བདུན་པ་གསུམ་དག་ཡིན་པ་དེ་ལྟ་ན་ཡང་བདུན་པ་རེ་རེ་ཡོངས་སུ་རྫོགས་པ་ལ་སྐྱེ་བའི་ཚིག་
ཡོད་པ་དེ་མ་བརྗོད་པར་འགྱུར་ལ་བདུན་པ་གསུམ་འབའ་ཞིག་བརྗོད་ན་ཡང་བར་མེད་པའི་ཐེ་ཚོམ་གྱིས་ཉི་མ་ལྷག་པ་སྲིད་པར་འགྱུར་བས་གཉི་ག་སྨོས་པ་ཡིན་ནོ། །གསོས་པ་ནི་ཁྲུས་དང་བསྐུ་མཉེ་ལ་སོགས་པ་ཕྱི་རོལ་གྱི་མཁོ་བའི་ཡོ་བྱད་ཀྱི་སྒོ་ནས་སོ། །བསྐྱེད་པ་ནི་ནང་དུ་གཏོགས་པའི་བཟའ་

བའི་ཁྱད་པར་དག་གིས་སོ། །བསོད་པ་ནི་ཡིད་དང་འཐད་པའོ། །བཅའ་བ་ནི་རྩ་བ་ལ་སོགས་པའོ། །བཟའ་བ་ནི་སྣུམ་ཁུར་ལ་སོགས་པའོ། །མཚན་མ་ནི་སྔོན་སྦྱིན་པ་དྲན་པར་བྱེད་པའི་ཐབས་སོ། །སྒྲ་སྙན་པ་ནི་སྒྲ་མཛེས་པའོ། །ཤེས་པར་བྱས་ནས་ཞེས་བྱ་
བ་ནི་དབྱངས་ཀྱི་ཡུལ་ལ་ཕ་རོལ་པོའི་རྣམ་པར་ཤེས་པ་སྐྱེད་པར་བྱེད་པའོ། །ཐར་པའི་ཆ་དང་མཐུན་པ་ནི་ཐར་པ་དང་རྗེས་སུ་མཐུན་པ་སྟེ། གང་ཟག་གང་ལ་སྐྱེས་ན་ངེས་པར་ཡོངས་སུ་མྱ་ངན་ལས་འདའ་བའི་ཆོས་སུ་འགྱུར་བའོ། །བོས་པ་ནི་ཉེ་བར་བསྟན་པའམ་གོ་བར་བྱེད་པ་ཡིན་ཏེ། གང་
གི་ཕྱིར་གོ་བར་བྱེད་པ་ནི་འབོད་དོན་ཡིན་པའི་ཕྱིར་རོ། །རི་བྲགས་ནི་མཐའ་འཁོབ་ཀྱི་གྲོང་ངོ་། །བསྐྱོད་པ་ནི་རབ་ཏུ་བསྒུལ་བའོ། །འབྱུང་པོ་གང་དག་འདིར་ནི་ལྷགས་གྱུར་པ། །ཞེས་བྱ་བ་ལ་སོགས་པ་ལ། འབྱུང་པོ་གང་དག་ཅེས་བྱ་བ་ནི་ཉན་པ་པོའི་སྐྱེ་བོ་དག་ལ་ངེས་པར་སྦྱོར་བའོ། །
འབྱུང་པོས་ནི་སྣང་བ་དང་མི་སྣང་བའི་སེམས་ཅན་ནོ། །འདིར་ཞེས་བྱ་བ་ནི་ཆོས་ཉན་པའི་ས་ཕྱོགས་སུའོ། །ལྷགས་པར་གྱུར་པ་ནི་འཁོད་པ་སྟེ། ཆོས་ཉན་པའི་ཕྱིར་གནས་པར་གྱུར་པའོ། །སའམ་ཞེས་བྱ་བ་ནི་ས་ལ་གནས་པར་གྱུར་པའོ། །འོན་ཏེ་བར་སྣང་འཁོད་པ་རྣམས་
ཞེས་བྱ་བ་ནི་ནམ་མཁའ་བར་སྣང་ལ་གནས་པ་རྣམས་བྱམས་པ་ནི་སྐྱེ་དགུ་རྣམས་ལ་ཕན་པའི་སེམས་སོ། །བྱེད་པ་ནི་སྒྲུབ་པར་བྱེད་པའམ། སྒོམ་པར་བྱེད་པའོ། །བསམ་པ་ཕུན་སུམ་ཚོགས་པ་བསྟན་ནས། སྦྱོར་བ་ཕུན་སུམ་ཚོགས་པ་ནི་ཉིན་དང་མཚན་དུ་ཞེས་བྱ་བ་སྨོས་ཏེ།
ཉིན་མོ་དང་མཚན་མོ་རྟག་ཏུ་ཆོས་དེ་ལེགས་པར་སྤྱད་པ་སྤྱོད་པར་གྱུར་ཅིག་པའོ། །ཆེ་བ་ནི་དངོས་པོ་རྒྱ་ཆེ་བའོ། །མོས་པ་ཅན་ནི་མངོན་པར་འདོད་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །མ་དད་པར་རིག་པར་འགྱུར་བ་ནི་ཉམས་སུ་མྱོང་བའམ། གསལ་པོར་གྱུར་པའོ། །རིན་
ཐང་ཆེ་བར་གྱུར་པའི་ཕྱིར་རིན་ཐང་ཆེ་བའམ། མི་ཆེན་པོ་ལ་འོས་པའི་ཕྱིར་ཆེན་པོ་ལ་འོས་པའོ། །སྙན་པ་དང་ཡིད་དུ་འོང་བ་ལས་ཤིན་ཏུ་སྙན་པས་ན་སྙན་ཅིང་མཉེན་པའོ། །འཇིགས་སུ་རུང་བ་ནི་བྱད་ངན་པས། སྐྱོ་བའི་གནས་སུ་གྱུར་པའོ། །དད་པ་འབྲི་བ་ནི་དེ་ལ་མི་ཕྱོགས་པ་སྟེ།

ཡིད་དང་མི་འཐད་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །ཚིགས་སུ་བཅད་པ་ནི་སྡེབ་སྦྱོར་གྱི་རང་བཞིན་གྱི་བྱེ་བྲག་སྟེ་ཚིག་གི་བཀོད་པའོ། །གང་དག་གཟུགས་ལ་ཞེས་བྱ་བ་ལ་སོགས་པ་ལ། གསལ་རྒྱལ་ལ་སོགས་པའི་སེམས་ཅན་གང་དག་ལེགས་པར་བཤད་པའི་སེམས་དང་ལྡན་པ་
ཉིད་ཀྱི་ཕྱིར་གཟུགས་ལ་ཚོད་འཛིན་པ་ནི་ཕ་རོལ་པོ་མཐོང་ནས་ཁ་དོག་དང་དབྱིབས་ཙམ་གྱི་སྒོ་ནས་དེ་མཛེས་པ་དང་མི་མཛེས་པ་དག་ལ་ཚོད་འཛིན་པར་བྱེད་པ་སྟེ། ཡོན་ཏན་དང་སྐྱོན་དང་ལྡན་པ་ཉིད་དུ་ཁོང་དུ་མ་ཆུད་པའི་ཕྱིར་རོ། །ངའི་ཞེས་བྱ་བ་ནི་འཕགས་པ་བཟང་སྙན་བདག་ཉིད་སྨྲ་བ་སྟེ། གང་དག་
གིས་ང་ལ་གཟུགས་སུ་ཤེས་པ་ཡོན་ཏན་གྱི་སྒོ་ནས་མ་ཡིན་ནོ་ཞེས་བྱ་བའི་ཐ་ཚིག་གོ། །སྒྲའི་རྗེས་སུ་འབྲང་བ་ནི་དབྱངས་སྙན་པའི་རྗེས་སུ་འཇུག་པའོ། །འདུན་པའི་འདོད་ཆགས་དབང་དུ་ལྡན་པ་ནི་འདོད་པའི་འདོད་ཆགས་ཀྱི་འདོད་པས་བྱེད་པ་ཐོབ་པར་གྱུར་པ་སྟེ། གང་གི་ཕྱིར་དེ་གཞན་གྱི་དབང་
དུ་གྱུར་པས་གཟུགས་ལ་སོགས་པ་མཛེས་པ་ཚོལ་བར་བྱེད་དོ། །སྐྱེ་བོ་དེ་ཡིས་ང་མི་མཐོང་། །ཞེས་བྱ་བ་ནི་འདོད་པའི་དབང་དུ་གྱུར་པ་དག་ལ་ཡོན་ཏན་གཞན་ཤིན་ཏུ་རྟོག་པའི་ནུས་པ་མེད་པའི་ཕྱིར་ཇི་ལྟར་ན་དེ་དག་གིས་ང་ཤེས་པར་མི་འགྱུར་བའོ། །ཇི་སྟེ་ནང་ལ་རྣམ་ཤེས་ཀྱང་། །ཞེས་བྱ་བ་
ལ་སོགས་པ་ལ་གལ་ཏེ་ནང་གི་བྱེད་པས་དེ་ཚོད་འཛིན་པར་བྱེད་ན་ཕྱི་རོལ་དག་ཀྱང་མ་མཐོང་བའི་ཕྱིར་མིག་གིས་ཀྱང་མི་མཐོང་ངོ་། །ནང་གི་མཉམ་པར་གཞག་པའི་འབྲས་བུ་ནི་ནང་གི་འབྲས་བུ་སྟེ། དེ་ལྟ་བུའི་ངང་ཚུལ་འདི་ལ་ཡོད་པའི་ཕྱིར་དེ་འདིར་ནང་གི་འབྲས་བུ་མཐོང་བའོ། །དེ་ཡང་
སྒྲས་ནི་ཁྲིད་པ་ཡིན་ཞེས་བྱ་བ་ནི་ངག་གི་སྒྲའི་སྒོ་ནས་ལམ་ལ་གཞག་པར་གྱུར་པའོ། །ཕྱི་རོལ་འབྲས་བུ་མཐོང་བར་བྱེད་པ་ནི་གཟུགས་ཙམ་སྙིང་པོར་འཛིན་པའི་ངང་ཚུལ་ཅན་ནོ། །ཀུན་ཏུ་བསྒྲིབས་པ་ཞེས་བྱ་བ་ནི་ཀུན་ནས་བསྒྲིབས་པ་འདིས་ནང་དང་ཕྱི་རོལ་དུ་བཅས་པ་ཁོང་དུ་མ་ཆུད་པའི་
ཕྱིར་རོ། །ཅི་སྟེ་ནང་ལའང་ཞེས་བྱ་བ་ནི་གལ་ཏེ་ཡང་ཟག་པ་མེད་པའི་སྟོབས་སམ། ཤའི་མིག་གིས་ནང་དང་ཕྱི་རོལ་དུ་བཅས་པའི་རྣམ་པར་མཐོང་བའོ། །བསྟན་པ་དེ་ནི་གཞན་དུ་བཀྲིར་མི་འདོད་པ་སྟེ། ཇི་ལྟ་བ་བཞིན་དུ་ཁོང་དུ་ཆུད་པ་ལས་བསྐྱོད་པར་མི་ནུས་པའི་ཕྱིར་རོ། །དེ་ཉིད་

ལས་འབྱུང་བའི་ཤེས་རབ་ཅན་ཞེས་བྱ་བ་སྟེ། མྱ་ངན་ལས་འདས་པའི་འབྲས་བུ་ཁོང་དུ་ཆུད་པའི་བློ་དང་ལྡན་པ་ཞེས་བྱ་བའི་ཐ་ཚིག་གོ། །འཕགས་པའི་ལམ་གྱི་སྟོབས་ཀྱིས་ཤེས་བཞིན་དད་པ་རྙེད་པ་ལས་ནང་དུ་མི་འདོད་པ་བཤད་པ་ཡིན་ནོ། །བལྟ་བས་ཆོག་མི་ཤེས་
པ་ཞེས་བྱ་བ་ནི་བལྟ་བས་ངོམས་པར་མི་འགྱུར་བའོ། །ཡིད་ཚིམ་པར་བྱེད་པ་ཞེས་བྱ་བ་ནི་དད་པས་སེམས་རྒྱས་པར་བྱེད་པའོ། །ཀུ་ཀུ་ཏ་ཡ་ཞེས་བྱ་བ་ནི། ཀུ་ཀུ་ཞེས་སྒྲ་འབྱིན་པར་བྱེད་པ་སྟེ། ཁུ་བྱུག་རབ་ཏུ་དགའ་བ་སྐྱེས་པ་ན་སྒྲའི་བྱེ་བྲག་མི་གསལ་བར་ཀུ་ཀུ་ཞེས་སྒྲོགས་པར་
བྱེད་དོ། །ལས་དྲུག་ལ་དགའ་བ་ཞེས་བྱ་བ་ལ། མཆོད་སྦྱིན་བྱེད་པ་ནི་བདག་ཉིད་མཆོད་སྦྱིན་བྱེད་པའོ། །མཆོད་སྦྱིན་བྱེད་དུ་བཅུག་པ་ནི་མཁན་པོར་གྱུར་པའི་སྒོ་ནས་གཞན་མཆོད་སྦྱིན་བྱེད་དུ་བཅུག་པའོ། །འདོན་པ་ནི་བདག་ཉིད་འདོན་པའོ། །འདོན་དུ་བཅུག་པ་ནི་གཞན་འདོན་དུ་
བཅུག་པའོ། །སྦྱིན་པ་ནི་བྲམ་ཟེས་བྲམ་ཟེ་ལའོ། །ལེན་པ་ནི་རིགས་གསུམ་པོ་ལས་བྲམ་ཟེ་མི་ལེན་པས་ན་དེ་དག་ནི་ལས་དྲུག་ཡིན་ནོ། །དེ་ལ་དགའ་བ་ནི་མངོན་པར་སྦྱོར་བའོ། །དགེ་བའི་ལས་ཀྱི་འབྲས་བུ་ལ་ཡོངས་སུ་སྔོ་བ་བྱེད་པ་ནི་སྨོན་ལམ་མོ། །གཅིག་ཏུ་གནག་པ་སྟེ་གཅིག་ཏུ་མི་
དགེ་བ་དང་། གཅིག་ཏུ་དཀར་བ་སྟེ་གཅིག་ཏུ་དགེ་བ་དང་། འདྲེན་མ་སྟེ་དགེ་བ་དང་མི་དགེ་བའི་ལས་འདྲེན་མར་གྱུར་པའོ། །བསླབ་པར་བྱའོ་ཞེས་བྱ་བ་ནི་བསྒྲུབ་པར་བྱ་བའོ། །སྐོན་པ་ནས་རྒྱ་ཤུག་བྱོ་བ་ལྟར་ཞེས་པ་ནི་ཅི་ལྟར་རྒྱ་ཤུག་གི་འབྲས་བུ་དག་སྐོན་པར་བླུགས་པར་གྱུར་པ་ན་སྒྲ་
མི་གསལ་བ་དང་རྣམ་པར་འཁྲུགས་པ་སྙན་པ་དང་། བྲལ་བ་འབྱིན་པར་འགྱུར་བ་དེ་བཞིན་དུ་ཚིག་གི་རིམ་པ་སྙན་པ་དང་བྲལ་བའི་ཡི་གེ་འདོན་པར་བྱེད་པའོ། །དབྱངས་སྙན་པ་ཞེས་བྱ་བ་ནི་དབྱངས་མཛེས་པར་གྱུར་པ་སྟེ། དེ་གོམས་པར་བྱ་བ་ཡིན་པའི་ཕྱིར་རོ། །དོན་དང་མི་ལྡན་
པ་དང་འབྲེལ་པ་མེད་པའི་བརྗོད་པ་ནི་ངན་དུ་སྨྲ་བའོ། །སྟོན་པར་བྱེད་པ་ཞེས་བྱ་བ་ནི་སློབ་པ་འཛིན་དུ་བཅུག་པའོ། །བརྗེད་པའི་དོན་རབ་ཏུ་འདྲི་བར་བྱེད་པ་ནི་ཀུན་ཏུ་འདྲི་བར་བྱེད་པའོ། །གླུ་དང་རོལ་མོའི་སྒྲ་སློབ་པར་བྱེད་པའི་ཁང་པ་ནི་རོལ་མོའི་གནས་སོ། །ཡོན་ཏན་བརྗོད་པ་ནི་

ཡོན་ཏན་སྒྲོགས་པར་བྱེད་པའོ། །རྒྱུད་གསུམ་པོ་ཞེས་བྱ་བ་ལ། རྒྱུད་གསུམ་པོ་དེ་དག་གི་ཚོགས་པ་ནི་རྒྱུད་གསུམ་པ་སྟེ། གྲངས་སྔོན་དུ་འགྲོ་བ་གཉིས་པ་ཡིན་ཏེ་དེ་ཡང་མ་ནིང་གི་རྟགས་ཞེས་བྱ་བའི་དབང་དུ་བྱས་ནས་རྒྱུད་གསུམ་པ་ཞེས་བྱ་བ་སྟེ། རྟ་ལ་སོགས་པ་ལྟ་བུའོ། །སངས་
རྒྱས་ལ་བསྟོད་པ་སྟེ་རྒྱུད་དང་པོ་དང་། མདོའི་དོན་འཛིན་པར་བྱེད་པའི་གཏམ་སྟེ་རྒྱུད་གཉིས་པ་དང་། ཡོངས་སུ་བསྔོ་བའི་རྒྱུད་ཡིན་ནོ། །རིགས་པ་ཞེས་བྱ་བ་ནི་དུས་གཞན་དག་ཏུ་ཡང་ངོ་། །གཞོན་ནུ་ཞེས་བྱ་བ་ནི་དེ་ལ་གསར་དུ་ཞུགས་པར་གྱུར་པའོ། །ཆོས་ཐམས་ཅད་མི་རྟག་པ་
ཞེས་བྱ་བ་ནི་ཡིད་ལ་བྱེད་པ་འདིས་བཅོམ་ཞིང་ཟིལ་གྱིས་གནོན་པའོ། །ལྷུང་བཟེད་ཀྱི་སྣོད་ནི་ལྷུང་བཟེད་གཞུག་པའི་སྣོད་དོ། །ལུང་ཐག་ནི་མཆན་ཁུང་གི་ཕྱོགས་སུ་དཔྱངས་པའི་ཐབས་སུ་གྱུར་པའོ། །རྒྱུན་ནི་པགས་པའི་འབྲེང་བུའོ། །རྔ་ནི་རྫ་རྔའོ། །ལྟེབས་པར་མི་འགྱུར་བར་བྱ་
བའི་ཕྱིར་བྱ་རོག་གི་རྐང་པའི་རྣམ་པ་ལྟར་སྐུད་པས་གནན་པ་ནི་བྱ་རོག་གི་རྐང་པའོ། །བསླབ་པ་འདོད་པའི་ཕྱིར་བསླབ་པ་འདོད་པ་སྟེ། དེའི་དངོས་པོ་ནི་དེ་ཉིད་དོ། །བསླབ་པ་ལ་གུས་པར་བྱེད་ཅེས་པའི་བར་དུའོ། །དྲ་བར་འོས་པ་ཡིན་པའི་ཕྱིར་དྲ་བར་བྱ་བ་སྟེ་དེ་མ་ཡིན་པའོ། །གོས་སྤུ་ཅན་ནི་
བེའུ་ཕྲུག་གོ། །ཕྱིང་པ་ནི་རབ་ཏུ་གྲགས་པའོ། །ལ་བ་མཐུག་པོ་ནི་ཀླམ་མོ། །རས་སེང་བ་ནི་གོས་ཕྲ་མོ་སྟེ། དེ་དག་ནི་དྲ་བར་བྱ་བ་མ་ཡིན་ལ། དགོས་པ་ཡོད་པ་ནི་བྱིན་གྱིས་བརླབ་པར་བྱའོ། །རྒས་པ་ནི་རྒས་པས་གནས་སྐབས་གཞན་ཐོབ་པའོ། །གླགས་བལྟས་པ་ནི་ཟིལ་
གྱིས་མནན་པར་བྱ་བར་རོ། །རྐུན་པོ་ནི་མཐུས་འཕྲོག་པར་བྱེད་པའོ། །གཡོན་ཅན་ནི་འཇབ་བུས་རྐུ་བར་བྱེད་པའོ། །སྔ་མ་ནི་རང་གི་སེམས་ཀྱིས་ཕྱུང་ལ་ཞེས་བྱ་བ་ནི་ཆོས་གོས་དེ་ལ་ལྟོས་པ་མེད་པར་བྱ་བའོ། །ངས་སྔར་བཤད་པ་ཞེས་བྱ་བ་ནི་གསོ་སྦྱོང་གི་གཞི་ལས་དགེ་སྦྱོང་གིས་གསོ་
སྦྱོང་གི་ཉི་མ་ལ་གནས་མལ་བཤམས་ཏེ་ཞེས་བྱ་བ་ལ་སོགས་པ་ཐམས་ཅད་བསྒྲུབས་ནས་གལ་ཏེ་གསོ་སྦྱོང་བྱིན་གྱིས་བརླབ་ཏུ་རུང་བའི་དགེ་སློང་རྙེད་པར་མ་གྱུར་པ་དེའི་ཚེ། སེམས་ཀྱིས་གསོ་སྦྱོང་བྱིན་གྱིས་བརླབ་པར་བྱའོ། །དེ་བཞིན་དུ་དགག་དབྱེ་བྱ་བ་དང་། གཅིག་པུས་གོས་བྱིན་

གྱིས་བརླབ་པ་དང་། མེད་པའི་དུས་སུ་ཆོས་གོས་དབྱུང་བ་དང་། གང་ཟག་གིས་མགྲོན་དུ་བོས་པ་ལ་གཉིས་པ་ཡོད་ན་སེམས་ཀྱིས་དང་དུ་བླང་བར་བྱའོ། །གདུངས་པ་ནི་གཟིར་བར་གྱུར་པའོ། །བསྐལ་པ་སྟེ་བསྐལ་པ་ཆེན་པོའི་བྱ་བ་ཡིན་ལ་དེ་དག་གི་སྟོང་
དེ་ལའོ། །དཀའ་བས་རྙེད་པར་ནུས་པའི་ཕྱིར་རྙེད་དཀའ་བའོ། །འདྲེན་པ་ནི་མདུན་དུ་གཤེགས་པར་མཛད་པ་ཞེས་བྱ་བ་དེའི་ཕྱིར་འདྲེན་པ་དེ་ལའོ། །སྙིང་རྗེའི་བདག་ཉིད་ཅན་སྙིང་རྗེས་དབང་དུ་བྱས་པའི་ཐུགས་གང་གིས་གཡོ་མེད་པའི་དགོངས་པས་སེམས་ཅན་ལ་ཐུགས་རྗེ་བ་
སྟེ། སྡུག་བསྔལ་དང་བྲལ་བར་བཞེད་པའོ། །སྲིད་པར་ཆགས་པ་ཞེས་བྱ་བ་ལ་སྲིད་པར་ཆགས་པ་ནི་སྲེད་པ་སྟེ། དེ་རྣམ་པར་སྤངས་པའོ། །འདིས་ནི་སྲེད་པ་བག་ཆགས་དང་བཅས་པར་སྤངས་པར་བསྟན་པ་ཡིན་ནོ། །དེའི་བསྟན་པ་མཆོག་ལ་སྲོག་གཅོད་པ་ལས་སླར་བཟློག་པ་
ལ་སོགས་པ་བསླབ་པ་བཟུང་ཞིང་བླངས་ནས་སྲོག་འཚོ་བ་ནི་ཡོངས་སུ་གཏང་བར་བྱའི། འོན་ཀྱང་སྲོག་གཅད་པར་མི་བྱའོ། །མཐུ་ནི་འདིར་ལུས་ཀྱི་ནུས་པ་ལ་བྱའོ། །རྒྱལ་པོ་ཆེན་པོ་བཞི་དག་གི་ཡིན་པ་དེ་དག་ནི་རྒྱལ་ཆེན་བཞིའི་རིས་ཏེ། དེ་དག་ཏུ་སྐྱེ་བ་ནི་འབྱུང་བར་འགྱུར་བའོ། །ཆོས་ཉིད་
ཀྱིས་ཞེས་བྱ་བ་ནི་གདོན་མི་ཟ་བར་འགྱུར་བའོ། །ཡོངས་སུ་གནས་པ་ནི་ཡོངས་སུ་གནས་པའི་གནས་སྐབས་ཏེ། དེས་གང་གི་ཚེ་མཐོ་རིས་དེ་ན་སྤྱོད་ལམ་བཞི་པོ་གང་ཡང་རུང་བ་གཅིག་གིས་ཡོངས་སུ་གནས་པ་དེའི་ཚེ་ཡོངས་སུ་གནས་པ་སྟེན་པར་འགྱུར་བ་དེ་སྐབས་སྒྲུབ་པར་མི་བྱེད་
པའི་བློ་ཅན་གྱི་ལྷའི་བུ་སྐྱེས་ནས་ཡུན་རིང་དུ་མ་ལོན་པ་བཅོམ་ལྡན་འདས་ལ་བལྟ་བའི་ཕྱིར་ཉེ་བར་འགྲོ་བར་བྱེད་དོ། །ལུས་རབ་ཏུ་གཡོ་བར་བྱེད་པའི་ཕྱིར་རྣ་ཆ་གདུབ་ཀོར་གཡོ་བའོ། །དྲི་མ་མེད་པ་ནི་ཤིན་ཏུ་འཚེར་བའོ། །ལྟོ་བའི་ཕྱོགས་ཁྱབ་པ་ནི་དོ་ཤལ་ལོ། །ནུ་མའི་ཕྱོགས་ཁྱབ་པ་ནི་
སེ་མོ་དོའོ། །བརྒྱན་ནི་སྤུད་པའོ། །ལྷའི་འབྱོར་པ་ཡིན་པའི་ཕྱིར་ལྷའི་འོ། །སྣང་བ་ནི་འོད་ཀྱིས་སོ། །བསམ་པ་ནི་རྒྱ་ཆེ་བ་དང་། རྒྱ་ཆེ་བ་མ་ཡིན་པའི་ཆོས་བསྟན་པ་ལ་མོས་པ་དང་མངོན་པར་འདོད་པའོ། །བག་ལ་ཉལ་བ་ནི་ཉོན་མོངས་པ་དྲག་ཅིང་དྲག་པའི་ཀུན་དུ་སྤྱོད་པ་སྟེ།

གང་ལ་ཉོན་མོངས་པ་གང་གིས་གནོད་པར་གྱུར་པ་དེ་ལ་དེ་དང་རྗེས་སུ་མཐུན་པར་སྟོན་པའོ། །ཁམས་ནི་རིགས་ཡིན་ཏེ། འགའ་ཞིག་ནི་འཇམ་པོ་དང་། འགའ་ཞིག་ནི་རྩུབ་པའི་ཆོས་བསྟན་པས་འདུལ་བར་འགྱུར་རོ། །དམྱལ་བའི་གཏམ་ནི་རྩུབ་པ་ཡིན་ལ། མཐོ་རིས་ཀྱི་གཏམ་
ནི་བཟློག་པའོ། །རང་བཞིན་ནི་དད་པ་ལ་སོགས་པའི་དབང་པོའི་རང་བཞིན་ཏེ། དབང་པོ་རྣོ་རྟུལ་ཐ་དད་པའི་ཕྱིར་རོ། །འཕགས་པའི་བདེན་པ་བཞི་སོ་སོར་རྟོགས་པར་བྱེད་པ་དེ་ལྟར་ཞེས་བྱ་བ་ནི་འཕགས་པའི་བདེན་པ་བཞི་ཁོང་དུ་ཆུད་པ་དང་རྗེས་སུ་མཐུན་པར་རོ། །འཇིག་
ཚོགས་སུ་ལྟ་བ་ཞེས་བྱ་བ་ལ་སོགས་པ་ལ། འཇིག་ཚོགས་སུ་ལྟ་བའི་རིའི་རྩེ་མོ་ཉི་ཤུ་དག་གིས་མཐོ་བར་གྱུར་པ་སྟེ། གཟུགས་ལ་སོགས་པའི་ཕུང་པོ་ལྔ་ལ་བདག་ཏུ་འཛིན་པ་དང་། འཇིག་ཚོགས་སུ་ལྟ་བའི་རྩེ་མོ་ལྔ་ལ་བདག་མ་གཏོགས་པ་ཕུང་པོ་ལྔར་ཡོངས་སུ་བརྟགས་ཏེ།
དེ་ལ་རྒྱན་དང་འདྲ་བར་འཛིན་ལ། ཅིག་ཤོས་ལྔ་ལ་བྲན་དང་འདྲ་བར་འཛིན་ཅིང་གཞན་ལྔ་ལ་སྣོད་དང་འདྲ་བར་ལྟ་བར་བྱེད་དོ། །ཡང་ལྔ་ནི་ཇི་སྐད་དུ་གཟུགས་ལ་བདག་དང་། བདག་གཟུགས་དང་ལྡན་པ་དང་། གཟུགས་བདག་གི་ཡིན་པ་དང་། གཟུགས་ལ་བདག་གནས་
སོ་ཞེས་ཡང་དག་པར་རྗེས་སུ་མཐོང་ངོ་ཞེས་བྱ་བ་དེ་ལྟ་བུ་ལ་སོགས་པ་དག་འབྱུང་བ་ཡིན་ནོ། །འཇིག་ཚོགས་སུ་ལྟ་བ་ཡང་ཉོན་མོངས་པ་ཐམས་ཅད་སྐྱེ་བའི་རྒྱུའི་གཙོ་བོ་ཉིད་ཡིན་པའི་ཕྱིར་མཐོང་བས་སྤང་བར་བྱ་བ་དག་གང་གི་གཙོ་བོ་ཡིན་པ་སྟེ་དེ་བས་ན་ཉོན་མོངས་པའི་གཙོ་བོ་བཅོམ་པར་
བསྟན་པ་ལས་མཐོང་བས་སྤང་བར་བྱ་བའི་ཉོན་མོངས་པ་ཐམས་ཅད་བཅོམ་ཞིང་སྤངས་པར་བསྟན་པ་ཡིན་ནོ། །ཁྱོད་མཐུས་ཏེ་ཁྱོད་ཀྱིས་ཕན་འདོགས་པར་མཛད་པའི་ནུས་པས་བཀག་པར་གྱུར་པའོ། །རབ་དྲག་ཅེས་བྱ་བ་ནི་ཤིན་ཏུ་དྲག་པར་གྱུར་པའོ། །ངན་སོང་ཤུལ་ཞེས་བྱ་བ་
ནི་ངན་སོང་བའི་ལས་དང་ཉོན་མོངས་པ་ནི་ངན་སོང་གི་རྒྱུ་ཡིན་པའི་ཕྱིར་ངན་སོང་ཤུལ་དང་། སྲིད་པ་བར་མ་དོའི་ངན་སོང་དེ་གཉི་ག་བཀག་པ་ཡིན་ཏེ། ངན་སོང་བའི་ལས་དང་རྗེས་སུ་མཐུན་པའི་ཉོན་མོངས་པའི་ཀུན་དུ་སྤྱོད་པ་མེད་པའི་ཕྱིར་དང་། ངན་སོང་བའི་སྔ་ན་མེད་པའི་ལས་མ་བྱས་པའི་

ཕྱིར་དང་། བྱས་པའི་ལྷན་ཅིག་བྱེད་པའི་ཕྱོགས་ཟད་པར་གྱུར་པའི་ཕྱིར་ལས་དང་ཉོན་མོངས་པ་བཀག་པ་ཡིན་ལ། སོ་སོར་བརྟགས་པ་མ་ཡིན་པའི་འགོག་པ་ཐོབ་པའི་ཕྱིར་ངན་སོང་བའི་ཕུང་པོའི་སྲིད་པ་བར་མ་དོའི་ལམ་བཀག་པ་ཡིན་ནོ། །མཐོ་རིས་འགྲོ་བ་ཞེས་བྱ་བ་ནི་
མཐོ་རིས་སུ་སྐྱེས་པར་གྱུར་པའོ། །བསོད་ནམས་བཟང་པོ་བྱེད་པའི་རྒྱུ་མཚན་གང་དག་ལ་ཡོད་པ་དེ་ནི་བསོད་ནམས་བཟང་པོ་བྱེད་པའོ། །མྱ་ངན་ལས་འདས་པའི་ཤུལ་ནི་འཕགས་པའི་ལམ་ཡན་ལག་བརྒྱད་པའོ། །ཤིན་ཏུ་རྣམ་དག་ཁྱོད་བསྟན་བདག་གིས་ནི། །ཞེས་བྱ་བ་ལ་སོགས་པ་ལ་
ཁྱོད་ཀྱི་བཀའ་དྲིན་ལས་བདག་གིས་དེ་རིང་དག་པའི་མིག་སྟེ། ཟག་པ་མེད་པའི་ཤེས་རབ་ཀྱི་མཚན་ཉིད་ཐོབ་པར་གྱུར་པའོ། །དག་པའི་རྒྱུ་མཚན་ནི་སྐྱོན་བྲལ་ཞེས་བྱ་བ་སྨོས་ཏེ། རང་གི་ཕྱིར་ཉོན་མོངས་པའི་ཉེས་པ་དང་བྲལ་བར་གྱུར་པའི་ཕྱིར་རོ། །ཤིན་ཏུ་རྣམ་དག་ཅེས་བྱ་བ་ནི་བཅོམ་
ལྡན་འདས་ལ་འབོད་པའོ། །གོ་འཕང་ཞི་བ་ནི་མྱ་ངན་ལས་འདས་པ་སྟེ། ཉོན་མོངས་པའི་རྒོད་པ་ཞི་བའི་ཕྱིར་དང་། འདུས་བྱས་མི་རྟག་པའི་རྒོད་པ་ཞི་བའི་ཕྱིར་རོ། །འཕགས་པ་དགྱེས་པ་ནི་བཞེད་ཅིང་བསྟེན་པར་བྱ་བ་ཡིན་ཏེ། ཡིད་ལ་རེ་བ་ཡོངས་སུ་རྫོགས་པ་ནི་འཕགས་པ་དགྱེས་པ་ཐོབ་པའོ། །སྡུག་
བསྔལ་རྒྱ་མཚོའི་ཕ་རོལ་རྒལ་བར་གྱུར། །ཞེས་བྱ་བ་ནི་སྐྱེ་བ་གཅིག་ན་སྲིད་པ་ལན་བདུན་པ་ལས་སྲིད་པ་གཞན་མེད་པའི་ཕྱིར་རྒལ་བར་གྱུར་པའོ། །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བའོ། །ཞེས་བྱ་བ་དང་། སྲིད་པ་སྟོང་དུ་མཐོང་བར་རབ་ཏུ་དཀོན་པ་ཞེས་བྱ་བ་དང་།
ཐུབ་པ་ཞེས་བྱ་བ་བཞི་དག་ནི་འབོད་པའི་ཚིག་ཡིན་ནོ། །དེ་རིང་ཁྱོད་མཐོང་བའི་བདག་གི་འབྱོར་པ་གང་ཡིན་པ་དེ་ནི་འབྲས་བུ་དང་བཅས་པའི་སྐྱེ་བ་ཡིན་ཏེ། བཅོམ་ལྡན་འདས་ཀྱི་ཞལ་མཐོང་བ་ནི་ཐར་པ་ཐོབ་པར་བྱེད་པའི་འབྲས་བུ་ཅན་ཡིན་པའི་ཕྱིར་རོ། །དོ་ཤལ་རབ་འཆང་བ་
ཞེས་བྱ་བ་འདིས་ནི་ལུས་རྒྱན་གྱིས་བརྒྱན་པའི་མཛེས་པ་བསྟན་པ་ཡིན་ནོ། །དགའ་བ་སྐྱེས་གྱུར་ཅེས་བྱ་བ་འདིས་ནི་རངས་པར་གྱུར་པའི་ཡིད་ཀྱིས་མཛེས་པ་སྟོན་པ་ཡིན་ནོ། །བཏུད་དེ་ཕྱག་འཚལ་བ་ཞེས་བྱ་བ་ནི་མགོ་བོ་བཏུད་པར་གྱུར་པས་ཞབས་ལ་མངོན་པར་ཕྱག་བྱས་པ་ཞེས་བྱ་བའི་དོན་

ཏོ། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ཞེས་བྱ་བ་ནི་བྱ་བ་ཁྱད་པར་དུ་བྱེད་པ་ཡིན་ཏེ། གཡས་ཕྱོགས་ལ་བརྟེན་ནས་སོང་བའོ། །སྐྱབས་གསུམ་རྙེད་པའི་ཕྱིར་ཚོང་པ་ལྟ་བུ་སྟེ། གང་གི་ཕྱིར། གང་དག་སངས་རྒྱས་སྐྱབས་འགྲོ་བ། །དེ་དག་མི་ཡི་རྙེད་པ་ཡིན། །ཞེས་བྱ་
བ་ལ་སོགས་པ་འབྱུང་བ་ཡིན་ནོ། །ཡང་དག་པའི་འཚོ་བའི་འབྲུ་འབྱོར་པའི་ཕྱིར་ཞིང་པ་ལྟ་བུའོ། །མཐོང་བས་སྤང་བར་བྱ་བའི་ཉོན་མོངས་པ་ལས་རྣམ་པར་རྒྱལ་བར་བྱ་བའི་ཕྱིར་དཔའ་བོ་ལྟ་བུའོ། །ཤིན་ཏུ་སྡུག་བསྔལ་གྱི་ནད་དང་ལྡན་པའི་ངན་སོང་གི་ཕུང་པོ་སྤངས་པར་གྱུར་པའི་ཕྱིར་ནད་
ཐམས་ཅད་ལས་ཡོངས་སུ་ཐར་པ་ལྟ་བུའོ། །ཆ་ལུགས་གང་གིས་ཞེས་བྱ་བ་ནི་སྔར་འོངས་པའི་ཆ་ལུགས་དང་མཐུན་པ་ཡིན་མོད་ཀྱི། འདོད་ཆགས་ལ་སོགས་པ་དང་བྲལ་བར་གྱུར་པས། ལྷག་པ་འདི་ལ་ཡོད་པའི་ཕྱིར། །ཞེས་བསྟན་པར་བྱ་བའི་ཕྱིར་ཆ་ལུགས་གང་གིས་ཞེས་
སྨོས་པ་ཡིན་ནོ། །སོ་སོར་ཀུན་དགའ་བར་མཛད་པ་ནི་སྙན་པའི་ཚིག་གིས་སོ། །དགེ་སློང་ཁྱོད་གང་ནས་འདིར་འོངས་ཞེས་བྱ་བ་ནི་མདོར་བསྡུས་ཤིང་རང་བཞིན་དང་བྲལ་བའི་སྒྲས་གསུངས་པ་ཡིན་གྱི་རྣམ་པ་གཞན་དུ་ན་འདི་སྐད་དུ་གང་ན་གནས་པ་ནས་འོངས་པར་གྱུར་ཞེས་བརྗོད་པར་
བྱ་བ་ཡིན་ནོ། །ཟག་པ་མེད་པའི་ཡེ་ཤེས་ཀྱིས་དངོས་པོའི་རང་བཞིན་ཡོངས་སུ་ཤེས་པ་ནི་ཆོས་ཉིད་མཐོང་བའོ། །བདག་ཉིད་ཆེན་པོ་ཞེས་བྱ་བ་ནི་བསོད་ནམས་དང་ཡེ་ཤེས་ཀྱི་ཚོགས་དང་ལྡན་པའོ། །བསླབ་པ་སྟེ་གདོན་མི་ཟ་བར་བསྲུང་བར་བྱ་བ་སྲོག་གཅོད་པ་ལས་ལྡོག་པ་
ལ་སོགས་པ་གང་ཡིན་པ་དེ་ལས་འདས་པ་ནི་རྣམ་པར་རྒལ་བའོ། །རིལ་བ་ཞབས་ཚགས་ནི། རིལ་ཚགས་ཀྱི་ཁ་གོས་ཀྱིས་གཡོགས་པ་ལ་ཆུ་བཙགས་པར་བྱ་བའོ། །གྲོལ་བར་བྱེད་པའི་རས་ནི་ཟང་ཟིང་མེད་པའི་གོས་ཀྱི་དུམ་བུའོ། །ནང་དང་བཅས་པ་ནི་ཁོན་ཅན་ནོ། །
བླ་མའི་ཡུལ་ལ་ངོ་ཚ་བ་ནི་གུས་པའོ། །མངོན་དུ་ཕྱོགས་ནས་འོངས་པའི་ལམ་གྲོགས་གཉིས་པ་ནི་དོན་མཐུན་ནོ། །བྲེལ་བར་མི་འགྱུར་ན་ཞེས་བྱ་བ་ནི་རུང་བའི་ཆུས་སོ། །དྲག་ཏུ་འབབ་པ་ཞེས་བྱ་བ་ནི་མྱུར་དུ་འབབ་པའོ། །རྒྱང་གྲགས་རྒྱང་གྲགས་སུ་ཞེས་བྱ་བ་ནི། རྒྱང་

གྲགས་ཀྱི་མཐའ་དང་རྒྱང་གྲགས་ཀྱི་མཐར་རོ། །བར་དུ་ཞེས་བྱ་བ་ནི་རྒྱང་གྲགས་ཀྱི་བར་དུའོ། །ཀུན་ནས་འཁྲུགས་པ་ནི་འདྲེས་པར་གྱུར་པའོ། །ཆུ་ལེན་པའི་འཇུག་ཕྱོགས་ནི་ཆུ་འགྲམ་མོ། །ཚུལ་ཁྲིམས་ཀྱིས་རྒུད་པ་ནི་རང་བཞིན་གྱིས་ཁ་ན་མ་ཐོ་བ་དང་བཅས་པ་
ལས་ལྡོག་པའི་མཚན་ཉིད་ཀྱི་ཚུལ་ཁྲིམས་ཉམས་པར་གྱུར་པའོ། །ལྟ་བས་རྒུད་པ་ནི་ལྟ་བ་ཀུན་དུ་སྤྱོད་པའོ། །སྤྱོད་པས་རྒུད་པ་ནི་བཅས་པའི་ཁ་ན་མ་ཐོ་བ་དང་བཅས་པ་ལས་ལྡོག་པའི་མཚན་ཉིད་ཀྱི་ཚུལ་ཁྲིམས་ཉམས་པར་གྱུར་པའོ། །འགྲོ་བ་དང་འོང་བ་ལ་སོགས་པའི་སྤྱོད་
ལམ་གྱིས་རྒྱུའི་སྤྱོད་པ་དེས་རྒུད་པ་སྟེ། ཕྱིན་ཅི་ལོག་ཀུན་དུ་སྤྱོད་པའོ། །འཚོ་བས་རྒུད་པ་ནི་ལོག་པའི་འཚོ་བས་འཚོ་བའོ། །ཁྲོན་པ་ནི་ཆུ་དོང་ངོ་། །དུས་ཇི་སྲིད་དུ་བ་ལང་དྲུག་དང་ལྡན་པའི་ཤིང་རྟ་སྨྱུག་མ་ཅན་གྱི་ལོགས་ནས་བསྐོར་ཏེ། མཇུག་མའི་གནས་སུ་ཕྱིན་པར་གྱུར་པའི་
དུས་དེ་སྲིད་དུ་བརྟག་པར་བྱའོ། །ཡོངས་སུ་ལོངས་སྤྱོད་པའི་རྗེས་སུ་འགྲོ་བས་ན། ཡོངས་སུ་ལོངས་སྤྱོད་པ་ལས་བྱུང་བའོ། །སྣོད་སྤྱད་སྦེད་པར་བྱེད་པ་ལ་སོགས་པའི་ལས་དག་ལ་ངེས་པར་སྦྱོར་བས་ན་སྣོད་སྤྱད་འབྲུབ་པའོ། །གསོལ་བ་དང་གཉིས་ཀྱི་ལས་རྗེས་སུ་བསྒྲུབ་པ་ནི་
སྤྲོ་བའོ། །སྐབས་དབྱེ་བར་བྱའོ་ཞེས་བྱ་བ་ནི་དེ་ནས་ལས་ལ་ངེས་པར་སྦྱར་བར་བྱའོ། །འཁོར་མེད་པ་ནི་གང་ཞིག་ལྷན་ཅིག་གནས་པ་དང་ཉེ་གནས་མེད་པའོ། །ལག་པ་ལ་ཐོགས་པ་ཞེས་བྱ་བ་ནི་སྐད་གསང་མཐོན་པོས་དགོད་པ་ནི་གད་རྒྱངས་སོ། །ལམ་དུ་འགྲོ་བའི་ཚེ་ཞེས་
བྱ་བ་ལ་འདས་པ་ལ་སོགས་པའི་དུས་གསལ་བའི་ཕྱིར་དང་། འཕགས་པའི་ལམ་གསལ་བར་བྱ་བའི་ཕྱིར་ལམ་དུ་འགྲོ་བའི་ཚེ་ཞེས་སྨོས་པ་ཡིན་ནོ། །ལྷུང་བཟེད་ལ་བཟུང་བ་ནི་བྱིན་ལེན་འཇིག་པར་འགྱུར་བ་ཡོངས་སུ་སྤང་བའི་ཕྱིར་རོ། །གོང་བུ་ཞེས་བྱ་བ་ནི་
བཟའ་བར་བྱ་བའི་གོང་བུར་བྱས་པ་དེའི་མིང་ཡིན་ནོ། །མཆི་མ་དང་བཅས་ཤིང་མྱ་ངན་གྱི་མཆི་མ་དང་ལྡན་པར་གྱུར་པའི་ཕྱིར། མཆི་མས་བརྣངས་བཞིན་དུའོ། །ངོ་ཚ་ནི་ངོ་ཚ་བ་སྟེ་ངོ་ཚ་གང་ལ་ཡོད་པ་དེ་ནི་ངོ་ཚ་བ་དང་ལྡན་པ་སྟེ་དེ་ལའོ། །སྟོན་པར་མཛད་ཅིང་ཕྱིན་ཅི་མ་ལོག་

པར་རྗེས་སུ་སྟོན་པར་མཛད་པའི་ཕྱིར་སྟོན་པ་སྟེ་སྟོན་པ་དེ་ལའོ། །ངོ་ཚ་དང་ཁྲེལ་མེད་པ་ཞེས་བྱ་བ་ནི་ཁྲུས་རས་བགོས་པའི་སྒོ་ནས་སོ། །སྒྲེན་མོ་ནི་འདིར་ཆུའི་ནང་དུ་ཁྲུས་བྱེད་པ་ལའོ། །ཐམས་ཅད་དུ་ཐེ་ཚོམ་སྐྱེས་པར་གྱུར་པའི་ཕྱིར་གང་ཅི་ལ་ཡང་དོགས་པར་གྱུར་པའོ། །དེར་སོང་བ་ནི་དེ་
རྒྱུར་བྱས་ནས་སོ། །ཚོས་དཀའ་བ་ནི་གང་མེས་ཀྱང་ཚོས་པར་མ་གྲུབ་པའོ། །རུང་བ་མ་ཡིན་པའི་ས་ནི་མཚམས་ནང་ངོ་། །དགེ་བའི་རྩ་བ་ནི་ཐར་པའི་ཆ་དང་མཐུན་པའོ། །རྒྱུ་དང་རྐྱེན་གྱི་ཚོགས་པ་ལས་སྐྱེས་པ་ཉིད་ཀྱི་ཕྱིར་གཟུགས་ལ་སོགས་པའི་ཕུང་པོ་ནི་འདུས་བྱས་སོ། །
སྐད་ཅིག་མས་འཇིག་པ་ལ་སྦྱོར་བའི་ཕྱིར་མི་རྟག་པའོ། །ནང་ན་བྱེད་པའི་སྐྱེས་བུས་སྟོང་པའི་ཕྱིར་བདག་མེད་པའོ། །སྡུག་བསྔལ་མ་ལུས་པ་ཉེ་བར་ཞི་བའི་ཕྱིར་མྱ་ངན་ལས་འདས་པ་ནི་ཞི་བའོ། །ཀ་ཤའི་གནས་ནི་ཀ་ཤའི་འབྱུང་གནས་ཏེ། དེ་བཞིན་དུ་ཀུ་ཤའི་གནས་ཀྱང་དེ་བཞིན་
ནོ། །ཟླ་བ་བརྒྱད་དམ་དགུ་ཞེས་བྱ་བ་ལ་མངལ་ཡང་དག་པར་སྨིན་པ་ཅན་ཟླ་བ་དགུའམ་བཅུ་ནས་བཙས་པར་འགྱུར་ཏེ། འདིར་ཡང་མངལ་ཡོངས་སུ་སྨིན་པ་དེའི་ཕྱིར་འགའ་ཞིག་ཏུ་ནི་ཟླ་བ་དགུ་དང་འགའ་ཞིག་ཏུ་ནི་ཟླ་བ་བཅུ་ནས་སྐྱེ་བར་འགྱུར་བ་དེ་བས་ན་སྡུད་པ་པོས་ཟླ་བ་བརྒྱད་དམ་
དགུ་འདས་ནས་ཞེས་མ་ངེས་པའི་ཚིག་ཏུ་མཛད་ནས། རིད་པ་ཞེས་བྱ་བ་ལ་སོགས་པ་ལ་རིད་པ་ནི་ཤ་ཡོངས་སུ་ཟད་པའོ། །ཉམ་ཆུང་བ་ནི་བྱ་བ་བྱེད་པའི་ནུས་པ་ཆུང་བའོ། །སྐམས་པ་ནི་གཟི་མེད་པར་གྱུར་པའོ། །ལུས་མ་ཐོབ་པ་ནི་ལུས་ཀུན་དུ་བསྐྱོད་པའི་ནུས་པ་ཡང་མེད་
པའོ། །རི་རབ་དང་འདྲ་བ་ནི་གང་ཡོན་ཏན་ཆེན་པོས་སོ། །ཟ་བ་ལ་རིང་དུ་ཐོགས་པ་ནི་བདག་ཉིད་འདོད་པས་དལ་གྱིས་ཟ་བའོ། །བ་ལང་རྒན་པོ་བཞིན་དུ་ལྡད་པ་ནི་སྐྱུག་ཅིང་དལ་གྱིས་ལྡད་པའོ། །བྱ་བ་བྱས་པ་ནི་འདིར་ཉོན་མོངས་པ་སྤངས་པར་གྱུར་པའོ། །བྱེད་པ་
བྱས་པ་ནི་བྲལ་བར་གྱུར་པ་བསྐྱེད་པའོ། །རྩུབ་པ་ནི་ཤིན་ཏུ་དྲག་པའོ། །འཇིག་པ་ཞེས་བྱ་བ་ནི་ཤིན་ཏུ་རྒལ་བ་དང་གནོད་པ་བྱས་ཞེས་བྱ་བའི་བར་དུའོ། །བསྲབས་པ་ནི་དེའི་སྡུག་བསྔལ་གྱི་འབྲས་བུ་བསྲབས་པའི་ཕྱིར་རོ། །ཡོངས་སུ་ཟད་པ་ནི་འགའ་ཞིག་གི་སྡུག་བསྔལ་

གྱི་མཐའ་ལྡོག་པའོ། །བྱང་བ་ནི་རྣམ་པར་སྨིན་པའི་སྡུག་བསྔལ་མ་ལུས་པ་བཟློག་པར་གྱུར་པའོ། །ཤིན་ཏུ་མཐར་གྱུར་པས་བས་མཐའ་སྟེ། གནས་མལ་ཐག་རིང་པོར་གྱུར་པའོ། །དེ་ན་གནས་པ་ནི་དེ་ལ་དད་པའོ། །ལྷག་པར་གྱུར་པའི་རྒྱལ་པོ་ནི་རྒྱལ་པོའི་
རྒྱལ་པོ་ཡིན་ལ། ཤཱཀྱའི་རྒྱལ་པོའི་རྒྱལ་པོ་ནི་ཤཱཀྱའི་རྒྱལ་པོའོ། །ཤིན་ཏུ་སྤྱད་པ་ནི་ལས་སུ་བྱ་བའོ། །བྱས་ཏེ་ཞེས་བྱ་བ་ནི་སེམས་ཀྱིས་དམིགས་ནས་སོ། །ལྷུང་བཟེད་ཀྱི་གཞི་ནི་གཞིའམ་རྟེན་ནོ། །འདི་ནི་སྦྱིན་པར་བྱེད་པ་ཡིན་ལ་བདག་ནི་ལེན་པར་བྱེད་པ་ཡིན་ནོ་སྙན་པ་ནི་བྱིན་ལེན་བྱེད་པའི་
སེམས་སོ། །དྲ་བ་ནི་ལྷུང་བཟེད་གཞུག་པའི་སྣོད་དོ། །ཚོང་དུས་ནི་བཙོང་བར་བྱ་བའི་རྫས་དགྲམ་པར་བྱ་བའི་གནས་སོ། །འདིར་བཀྲེན་པའི་སྒྲས་ནི་བརྣག་མི་ནུས་པ་བརྗོད་པའམ། ཡོན་ཏན་གྱིས་དབུལ་བར་གྱུར་པའོ། །ལན་ལྡོན་པའི་ནུས་པ་མེད་པ་ནི་སྤོབས་པ་མེད་པའོ། །
འདིར་ཁར་བའི་སྣོད་བདག་གིར་བྱེད་པ་བཀག་པ་ཡིན་ནོ་ཞེས་བྱ་བར་རིག་པར་བྱ་ཞིང་ནད་བཟློག་པའི་ཕྱིར། ཕུལ་བུའི་བཏུང་ཕོར་རྗེས་སུ་གནང་བ་ཡིན་པར་རིག་པར་བྱའོ། །ཟི་ཟི་ཞེས་ཟེར་བར་གྱུར་པ་ན་ཞེས་བྱ་བ་ནི། སྦྲང་མའི་ཚོགས་ཀྱི་སྒྲ་སྟེ། ཟི་ཟིའི་སྒྲ་དེ་དང་འདྲ་བར་སྒྲོགས་པར་
བྱེད་པའི་ཕྱིར་ས་ཕྱོགས་སུ་ཟི་ཟི་ཞེས་ཟེར་བར་གྱུར་པའོ། །རྐང་པ་བཀྲུ་བའི་གནས་གང་ཡིན་པ་དེ་ནི་རྐང་པ་བཀྲུ་བའི་གནས་སོ། །དབུས་སུ་མཐོ་བ་ནི་རུས་སྦལ་གྱི་རྣམ་པ་ལྟ་བུར་རོ། །རྩུབ་པོ་ཞེས་བྱ་བ་ནི་ཧྲུད་ཧྲུད་པོ་སྟེ། དྲི་མ་བསལ་བར་བྱ་བའི་ཕྱིར་དེ་བཤམས་པ་ཡིན་ནོ། །རྐང་
པ་བཀྲུ་བའི་སྣོད་ཅེས་བྱ་བ་དེ་ནི་ཆོལ་ཟངས་ཀྱི་མིང་ངོ་། །རྔ་མོའི་རྣམ་པ་ལྟ་བུ་ཞེས་བྱ་བ་ནི་འོག་གི་ཆ་རྔ་མོའི་རྒྱབ་ལྟ་བུའོ། །མི་ལྡེག་ཅིང་གནས་པར་བྱ་བའི་ཕྱིར་གླང་པོ་ཆེའི་རྨིག་མཐིལ་ལྟ་བུ་རྗེས་སུ་གནང་བ་ཡིན་ཏེ། འོག་གི་ཆའི་མཐིལ་གླང་པོ་ཆེའི་རྨིག་མཐིལ་ལྟ་བུར་བྱའོ། །ཀ་
དམ་པའི་མེ་ཏོག་འདྲ་བ་ནི་ཆོལ་ཟངས་ཀྱི་དབུས་སུ་ལྟེ་བ་མཐོན་པོར་བྱ་བའོ། །རྩུབ་པ་ཡང་ཧྲུད་ཧྲུད་པོ་ཡིན་ཏེ། རྐང་པ་གཡས་གནས་པ་གྲུབ་པར་བྱ་བའི་དོན་དུ་ལྟེ་བ་རྗེས་སུ་གནང་བ་ཡིན་ནོ། །ཁང་ཐོག་ནི་ཁང་སྟེང་ངོ་། །སྒོ་ཕག་ཏུ་ཞེས་བྱ་བ་ནི་སྒོ་དང་རྩིག་པའི་བར་

དུའོ། །རླུང་སྐྱེད་པར་བྱེད་པའི་ཐབས་སུ་གྱུར་པ་ནི་བསིལ་ཡབ་བོ། །ཡུ་བ་གསེར་ལ་སོགས་པས་རྣམ་པར་སྤྲས་པ་ནི་གསེར་ལ་སོགས་པ་ལས་རྣམ་པར་བྱས་པའོ། །ཤིང་ལས་བྱས་པ་ཡང་ངོ་། །མེ་ཏོག་པདྨ་ལྟར་འཚེར་བ་ནི་འཁོར་ལོས་བསྲུབས་པའོ། །རི་མོ་རབ་ཏུ་
བྲིས་པ་ནི་བཀྲ་བ་དང་ཉེ་བར་བཀྲ་བ་སྟེ། བཀྲ་བ་ནི་རི་མོ་རགས་པ་གཙོ་བོར་གྱུར་པའོ། །ཉེ་བར་བཀྲ་བ་ནི་རི་མོ་ཕྲ་བ་གཙོ་བོར་གྱུར་པའོ། །རིན་པོ་ཆེས་སྤྲས་པ་ནི་རིན་པོ་ཆེས་བརྒྱན་པའོ། །རྩྭ་བལ་བ་ཛ་ལས་བྱས་པ་ནི་རྩྭ་གྲེས་མའི་རིགས་ལས་བསྒྲུབས་པའོ། །འབྲུམ་བུས་གང་
པ་ནི་ཁྱབ་པར་གྱུར་པའོ། །ལྡུམ་བུ་ཤ་ནའི་རིགས་བརྡུངས་ནས་སྐུད་པའི་ཚོགས་དང་འདྲ་བའི་སྦྲང་ཡབ་བྱའོ། །འདབ་མ་བསྡུས་པ་ཞེས་བྱ་བ་ནི་འདབ་མའི་ཚོགས་སོ། །འཛེགས་པ་ནི་ལས་ལ་སྤྲོ་བ་དག་གི་བྱ་བ་ལ་འཇུག་པའོ། །ཤམ་ཐབས་ཀྱི་འོག་གི་མདུན་རྒྱབ་ཀྱི་མཐའ་ཕན་
ཚུན་བཅིངས་པ་ནི་མདུད་པ་དོར་བའོ། །ཁར་བ་ཆོངས་ཤིག་ཅེས་བྱ་བ་ནི་ཁར་བ་བཅངས་པ་ལ་ཉེས་པ་མེད་པའི་ངེས་པའོ། །སྡུག་བསྔལ་ལས་འདོན་པར་བྱེད་པ་ནི་བརྩེ་བ་སྟེ། བྱ་བ་འདི་ཡང་རྗེས་སུ་བརྩེ་བས་མཛད་པ་ཉིད་ཡིན་པའི་ཕྱིར་རྗེས་སུ་བརྩེ་བ་ལ་བརྟེན་ནས་དགེ་
འདུན་གྱིས་བྱའི། ཕྱིར་ཕན་འདོགས་པ་ལ་ལྟོས་པས་བྱ་བ་མ་ཡིན་པའི་ཕྱིར་ཐུགས་བརྩེ་བ་ཅན་ཐུགས་བརྩེ་བའི་སླད་དུ་ཞེས་སྨོས་པ་ཡིན་ནོ། །རྒན་པོ་དག་ལས་ཤིན་ཏུ་རྒས་པས་ན་རྒན་པོ་རྒས་པ་སྟེ། གང་ཅུང་ཟད་རྒས་ཤིང་ཉམ་ཆུང་བས་སྐྲ་དཀར་ཅིག་ཙམ་གྱིས་ཀྱང་
བདག་རིད་པར་གྱུར་ཏོ་སྙམ་དུ་སེམས་པའོ། །གང་དག་རླུང་ཉུང་ཟད་ཅིག་གིས་གནོད་པར་གྱུར་པ་ནི་རླུང་ཉུང་ཟད་ཙམ་གྱིས་གནོད་པར་གྱུར་པ་ན་བདག་ནད་པའོ་སྙམ་དུ་སེམས་པའོ། །ཅིག་ཅར་ཁར་བ་དང་འདྲ་བའི་གནང་བ་སྦྱིན་པར་བྱའོ་ཞེས་བྱ་བ་ནི་ཁར་བ་དང་འདྲ་བའི་སྔགས་
བརྗོད་པའི་དུས་སུ་ཅིག་ཅར་མིང་སྨོས་པར་བྱའོ། །ཆེན་པོའི་ཆེན་པོ་ནི་བསམ་གཏན་བཞི་པ་ཡིན་ལ། མཐའ་དང་བྲལ་བའི་མཐའི་རྣམ་པ་འདི་ལ་ཡོད་པས་ན་ཞེས་བྱ་བའི་དབང་དུ་བྱས་ནས་མཐར་ཕྱིན་པའོ། །ཁོམ་པར་གྱུར་པ་མཆོག་ཅེས་བྱ་བ་ནི་མི་ཁོམ་པ་བརྒྱད་སྤངས་པ་

སྟེ། དུས་ཀྱི་བྱེ་བྲག་སངས་རྒྱས་འབྱུང་བ་ལ་སོགས་པའི་ཁོམ་པ་ཡང་དག་པར་འབྱུང་བའོ། །དྲི་ང་བ་མེད་པ་ཞེས་བྱ་བ་ནི་ཡོངས་སུ་བྲལ་བའོ། །འདུས་པ་ནི་གང་དུ་སྐྱེ་བོ་དམ་པ་འདུས་པར་གྱུར་ཏེ། ཇི་ལྟར་གཙུག་ལག་ཁང་ལ་སོགས་པ་ཡོངས་སུ་ལོངས་
སྤྱོད་པ་དང་། ཁྱིམ་དུ་ཉེ་བར་རྒྱུ་བ་ལ་སོགས་པ་མ་གནང་བ་དག་ཀྱང་གནང་བ་སྟེ། ལྷག་པར་སྤྱད་པར་བྱ་བ་ཡང་ཡིན་ནོ། །སློབ་དཔོན་ཚུལ་ཁྲིམས་བསྐྱངས་ཀྱིས་ཉེ་བར་སྦྱར་བ་ཕྲན་ཚེགས་ཀྱི་ཚིག་གི་རྣམ་པར་བཤད་པ་ལས་སྒོ་དང་པོ་རྫོགས་སོ།། །།ཕྱོགས་བཞི་ནི་ཕྱོགས་
བཞིའོ། །དེ་ལ་གནས་པས་ན་ཕྱོགས་བཞིའི་དགེ་སློང་གི་དགེ་འདུན་ཏེ་དེ་ལ་ཕུལ་བར་གྱུར་པའོ། །བ་ལང་གི་སྤུ་དག་དང་བ་ལང་གི་སྤུ་དང་འདྲ་བ་ནི་བ་ལང་གི་སྤུ་འདྲ་སྟེ། དེ་དང་འདྲ་བར་རོ། །ཇི་ལྟར་བ་ལང་གི་སྤུ་འདྲ་བར་སྐྲ་འདྲེག་པར་བྱེད་པ་དེ་བཞིན་དུ་བྲེག་པར་མི་བྱའོ། །གསང་
བའི་ཕྱོགས་ནི་མདོམས་སོ། །དགེ་བའི་ཕྱོགས་ཞེས་བྱ་བ་ལ་དགེ་བ་ནི་མྱ་ངན་ལས་འདས་པ་སྟེ། ཐར་པ་ནི་དོན་དམ་པར་དགེ་བའོ་ཞེས་གསུངས་པའི་ཕྱིར་རོ། །དེའི་ཕྱོགས་ནི་མི་གཙང་བ་ནས་བརྩམས་ཏེ། ཟད་པ་ཤེས་པའི་བར་དུའོ། །དེའི་བྱེད་པ་ནི་སྒྲུབ་པར་བྱེད་པའམ། དེའི་
མངོན་པར་སྦྱོར་བའོ། །བྱིན་པ་དང་ཡན་ལག་བརླའི་སྤུ་བྲེག་ནུས་སམ་ཞེས་བྱ་བ་ལ་སོགས་པ་ལ། བྱེད་ནུས་སམ་ཞེས་བྱ་བ་ནི་ཀུ་རེ་བྱེད་པ་ནི་ཕན་ཚུན་རྣམ་པར་རྩེ་བའོ། །ཡང་དག་པར་རྩེ་བར་བྱེད་པ་ནི་ལག་པ་འདྲེན་པར་བྱེད་པ་ལ་སོགས་པས་དགའ་བར་བྱེད་པའོ། །ཀུན་ནས་
ཅ་ཅོ་འདོན་པར་བྱེད་པ་ནི་སྒྲ་མཐོ་ལ་མི་གསལ་བ་འདོན་པའོ། །ལུས་དང་ངག་གིས་འཕྱར་གཡེང་གི་ལས་བྱེད་པ་ནི་འཕྱར་བ་ཡིན་ལ། དེ་ཉིད་རྒྱུན་མི་ཆད་པར་བྱེད་པ་ནི་གཡེང་བའོ། །ལུས་ལ་བརྡེག་པ་ནི་ཀུན་ནས་ཆགས་པའི་སེམས་ཀྱིས་ལུས་ལ་བསྣུན་པའོ། །ཉེས་པ་ལྷག་
པར་སྤྱོད་པ་ལ་ངོ་ཚ་བ་གང་ལ་ཡོད་པ་དེ་ནི་འདིར་ངོ་ཚ་བ་དང་ལྡན་པར་རིག་པར་བྱའོ། །བག་མེད་པ་ལྷག་པར་སྤྱོད་པའི་ཉེས་པ་ལ་ཕྱིས་གདུང་ཞིང་གཉེན་པོ་བྱེད་པའི་ངང་ཚུལ་ཅན་ནི་འགྱོད་པ་དང་ལྡན་པའོ། །བསླབ་པ་ཡོངས་སུ་སྐྱོང་བ་ལ་མངོན་པར་དགའ་བ་དང་བཅས་པ་གང་ཡིན་པ་

དེ་ནི་བསླབ་པར་འདོད་པའོ། །དྲན་པ་ཉེ་བར་གཞག་པ་ནི་ཕན་ཚུན་ལུས་ལ་རེག་པ་ཡོངས་སུ་སྤང་བའི་ཕྱིར་རོ། །གཏུར་བུ་ནི་ཆོས་གོས་ཀྱི་སྣོད་དོ། །བཏིང་བ་ཞེས་བྱ་བ་ནི་རྩྭ་ལ་སོགས་པའི་གཞི་ལའོ། །གནས་ནི་འདུག་པར་བྱ་བའི་དོན་གྱི་གཞིའོ། །གྲང་བས་ཉེན་པར་གྱུར་
ཏོ་ཞེས་བྱ་བ་ནི་གནོད་པར་གྱུར་པའོ། །ཇི་སྲིད་ཕྱིན་པའི་བར་དུ་ཞེས་བྱ་བ་ནི་ཇི་སྲིད་དུ་དགེ་སློང་དག་གི་ལུས་ལ་ཁྱབ་པར་གྱུར་པའི་བར་དུའོ། །བཀབ་པ་ནི་ལེགས་པར་བཀབ་པའོ། །གཅིག་ཏུ་བརྩོན་པ་ཞེས་བྱ་བ་ནི་བསྟན་པ་ལ་གཅིག་ཏུ་ངེས་པར་བརྩོན་པ་སྟེ། འབད་པ་དང་ལྡན་
པའི་སྐྱེས་བུ་གང་ཡིན་པ་དེ་ནི་གཅིག་ཏུ་བརྩོན་པའམ། ཡང་ན་གཅིག་ཏུ་བརྩོན་པར་བྱེད་པས་ན་གཅིག་ཏུ་བརྩོན་པར་བྱེད་པ་སྟེ། གང་ཟག་གི་ཡིད་ལ་གནས་པའི་བསྟན་པ་དེ་ལ་ཡང་གཅིག་ཏུ་བརྩོན་པ་ཞེས་བྱའོ། །བདེ་བ་ཡང་དག་པར་སྐྱེས་པ་འདི་ལ་ཡོད་པས་ན་བདེ་བ་དང་
ལྡན་པའོ། །ཆོས་མངོན་པར་རྗོད་པར་བྱེད་པའི་ཕྱིར་ཆོས་སྨྲ་བ་སྟེ། དེ་དྲན་པའི་ཡུལ་དུ་འོངས་པར་འགྱུར་ཞེས་བྱ་བའི་ཐ་ཚིག་གོ། །འཕྱ་བ་ནི་ཉེ་བར་དགོད་པའི་ཚུལ་གྱིས་སོ། །རབ་ཏུ་བྱུང་བ་ལས་བབས་སམ་ཞེས་བྱ་བ་ནི་དགེ་སློང་གི་དངོས་པོ་ཡང་དག་པར་ཐོབ་པ་
ཡོངས་སུ་བཏང་བར་གྱུར་པའོ། །རབ་ཏུ་ཞེས་བྱ་བའི་ཚིག་ནི་ལུས་ཀྱིས་རེག་པ་ཡོངས་སུ་སྤང་བར་བྱ་བའི་ཕྱིར་རོ། །གོས་བྱེད་པ་ཞེས་བྱ་བ་ནི་གོས་འཚོང་བ་སྟེ། རང་གི་ཁྱིམ་དུ་སྣལ་མ་བཀལ་བའམ་ཚོང་འདུས་སུ་བྱས་པའམ། འཐག་པའི་ལག་གིས་གོས་དག་བྱེད་པ་གང་
ཡིན་པ་དེ་ལ་དེ་སྐད་ཅེས་བྱའོ། །ནོར་རྫས་ཀྱིས་བསྒྲུབས་པའི་གཙུག་ལག་ཁང་ནི་རྫས་ལས་བྱུང་བ་དེ་ཉིད་དེ། དེ་བསྲུང་བར་བྱ་བའི་ཕྱིར་བཅོམ་ལྡན་འདས་བཞུགས་པའོ། །ནང་དུ་ཡང་དག་པར་འཇོག་པར་བཞེད་པ་ཞེས་བྱ་བ་ནི་དབེན་པར་སྙོམས་པར་འཇུག་པའི་བདེ་བས་བཞུགས་པར་
བཞེད་པའོ། །གཙུག་ལག་ཁང་དེ་ཉིད་དུ་མངོན་དུ་ཕྱོགས་ནས་བསོད་སྙོམས་བླངས་པ་གང་ཡིན་པ་དེ་ནི་བཅོམ་ལྡན་འདས་ཀྱི་བསོད་སྙོམས་མངོན་པར་བླངས་པའོ། །ཁྲོས་པ་ནི་ཞེ་སྡང་གི་ཀུན་ནས་དཀྲིས་པས་ཁྱབ་པའོ། །ཟོང་ནི་བཙོང་བར་བྱ་བའི་དངོས་པོའོ། །གདུགས་ནི་

རབ་ཏུ་གྲགས་པའོ། །ཡུ་བ་རིང་པོ་ཞེས་བྱ་བ་ནི་ཤིན་ཏུ་གདུགས་ཀྱི་ཡུ་བ་རིང་པོར་གྱུར་པའོ། །ནོར་ཅན་ནི་མཁར་གྱི་དབང་ཕྱུག་ཡིན་ལ། ཚོང་དཔོན་ནི་ཚོང་པའི་གཙོ་བོ་ཉིད་དུ་དབང་བསྐུར་བར་གྱུར་པའོ། །ཡུལ་ནས་ཡུལ་གཞན་དུ་དོན་མཐུན་དག་གང་
གིས་ཁྲིད་པར་བྱེད་པ་དེ་ནི་དེད་དཔོན་ནོ། །ཁ་ཅིག་ནི་ལུས་ལ་རྩིབས་ཞེས་བྱ་བ་དེ་བས་ན་རང་གི་ལུས་ཀྱི་ཚད་དུ་གདུགས་ཀྱི་ཡུ་བ་བྱའོ་ཞེས་བྱ་བ་དང་། ཁ་ཅིག་ནི་གདུགས་ཀྱི་རྩིབས་ཀྱི་ཚད་དུ་ཞེས་ཟེར་རོ། །རུང་བ་བྱེད་དུ་གནང་བ་ནི་ཐག་ཉེ་བའི་ཟང་ཟིང་དང་། རེག་པར་འགྱུར་
བ་ཡོངས་སུ་སྤང་བའི་ཕྱིར་རོ། །འཇིག་རྟེན་རྒྱང་འཕེན་ནི་མེད་པ་པའི་གཞུང་ལུགས་ཡིན་ལ། དེ་འདོན་པའི་ཕྱིར་འཇིག་རྟེན་རྒྱང་འཕེན་པའོ། །རྩོད་པ་ནི་ཚིག་རྣམ་པར་དཔྱོད་པའོ། །རྩོད་པའི་གནས་ཞེས་བྱ་བ་ནི་འདྲི་བ་པོ་ཀུན་ནས་ཚོགས་པར་བྱེད་པའོ། །ཕྱོགས་
དང་ཕྱོགས་ཅིག་ཤོས་ནི་ཕྱོགས་སྔ་མ་དང་ཕྱི་མའོ། །གསར་དུ་ལྷགས་པ་ཉིད་ཀྱིས་མཆོད་པར་བྱས་པ་ནི་གསར་དུ་འོངས་པའོ། །མི་རིགས་པ་ནི་རྗེས་སུ་དཔག་པ་དང་འགལ་བའོ། །མི་འདྲ་བ་ནི་སྔ་ཕྱི་འགལ་བའོ། །མི་འཐད་པ་ནི་མངོན་སུམ་དང་། གྲགས་པ་
དང་། རང་གི་ཚིག་དང་འགལ་བའོ། །བྱིས་པ་ཞེས་བྱ་བ་ལ་སོགས་པ་ལ། མདོ་སྡེ་ལ་སོགས་པ་བྱང་བར་མ་གྱུར་ཅིང་། མི་མཁས་པས་ན་བྱིས་པའོ། །བསླབས་པར་གྱུར་ན་ཡང་བསྟེན་པར་མི་ནུས་པ་ནི་གླེན་པའོ། །གཞན་ལ་སྟོན་པར་བྱེད་པའི་ནུས་པ་མེད་པ་ནི་
མི་གསལ་བའོ། །དངོས་པོ་དེ་ཁོ་ན་ཉིད་རྣམ་པར་འབྱེད་པའི་སྒོ་ནས་རྣམ་པར་བཞག་པའི་ནུས་པ་མེད་པའི་ཕྱིར་མི་ཤེས་པའོ། །མི་འདོད་པ་ཞེས་བྱ་བ་ནི་ཤིན་ཏུ་མྱུར་བར་འགྲོ་བའི་ངང་ཚུལ་ཅན་ནོ་བདེ་བའི་དུས་ནི་སྔ་དྲོའོ། །བདེ་བ་སྦྱོར་བ་དང་གོ་རིམས་སྒྲོ་བཏགས་ནས་འདོན་པའི་ཕྱིར་བརྩམས་
སོ་ཞེས་བྱ་བ་ནི་ཇི་ལྟར་བྲམ་ཟེའི་རིགས་བྱེད་ཀྱི་ཚིག་དང་གོ་རིམས་ཀྱི་རིམ་པའི་ཚིག་དེ་དང་གོ་རིམས་དེ་ལ་སྒྲོ་བཏགས་ནས་རིགས་བྱེད་དང་འདྲ་བར་འདོན་པའི་ཕྱིར་བརྩམས་པའོ། །བར་བར་དུ་གཞུང་བརྗེད་པ་ནི་གཞུང་ཁྲལ་ཁྲུལ་དུ་གྱུར་པའོ། །ཉམས་པ་ནི་ངག་ཉམས་

པའི་སྒོ་ནས་ཉམས་པར་གྱུར་པའོ། །ངེས་པའི་ཚིག་ནི་དཔེར་ན་འགྲོ་བའི་ཕྱིར་བ་ལང་དང་། སའི་སྟེང་དུ་སྒྲ་སྒྲོགས་པའི་ཕྱིར་རྨ་བྱ་དང་། གཟུགས་སུ་རུང་བས་ན་གཟུགས་དང་། རྣམ་པར་ཤེས་པར་བྱེད་པས་ན་རྣམ་པར་ཤེས་པ་ཞེས་བྱ་བ་ལ་སོགས་པ་ལྟ་བུའོ། །
ཡུལ་དང་ཡུལ་གྱི་ངེས་པའི་ཚིག་གཞན་ཏེ། རྣམ་པ་གཞན་དུ་ན་ཡུལ་དེ་ན་གནས་པ་དག་གིས་སངས་རྒྱས་ཀྱི་ཚིག་བསྟན་པ་ཉིད་དུ་ནུས་པར་མི་འགྱུར་བ་དེའི་ཕྱིར་ཡུལ་དེ་ན་རབ་ཏུ་གྲགས་པའི་ངེས་པའི་ཚིག་གིས་སངས་རྒྱས་ཀྱི་ཚིག་བརྗོད་ཅིང་བསྟན་པར་འགྱུར་གྱི། སྐད་དེ་
དག་ལ་ཚིག་དང་གོ་རིམས་ལ་སོགས་པ་རྣམ་པར་འགྱུར་བ་དེ་མེད་པ་ནི་དེ་དག་ལ་སངས་རྒྱས་ཀྱི་ཚིག་བསྟན་པར་མི་ནུས་པ་དེ་བས་ན་སྐད་དེ་དང་རྗེས་སུ་མཐུན་པའི་ཚིག་དང་གོ་རིམས་ཀྱིས་སངས་རྒྱས་ཀྱི་ཚིག་བརྗོད་ཅིང་བསྟན་པར་འགྱུར་རོ། །བགྲོད་པར་བྱ་བ་མ་ཡིན་
པར་སོང་བ་ནི་གནས་མ་ཡིན་པར་འཇུག་པ་སྟེ། གང་གི་ཕྱིར་ཁོ་བོ་ཅག་དེ་དག་གིས་ཟིལ་གྱིས་གནོན་པར་མི་འགྱུར་བའོ། །མི་དགའ་བར་བྱའོ་ཞེས་བྱ་བ་ནི་བྱ་བ་མ་ཡིན་པ་ལ་འཇུག་པར་བྱ་བའོ། །སྣོད་སྤྱད་མང་བ་ཞེས་བྱ་བ་ལ་སོགས་པ་ལ་གང་ལ་འཇོག་པར་བྱེད་པ་སྤྲོག་མ་ལ་
སོགས་པ་དེ་དག་ནི་སྣོད་སྤྱད་དོ། །ཡོ་བྱད་ནི་གཞག་པར་བྱ་བའི་རྫས་སོ། །སེང་གེ་ལྟར་བརྩེ་བ་མེད་པ་ཞེས་བྱ་བ་ནི་ཇི་ལྟར་སེང་གེས་ཟོས་པའི་ལྷག་མ་སྤངས་པར་གྱུར་ནས་འགའ་ཞིག་ཏུ་ཡང་ཟ་བར་མི་བྱེད་པ་དེ་བཞིན་དུ་དགེ་སློང་གིས་བརྩེ་བ་མེད་པར་མི་བྱ་སྟེ།
འོན་ཀྱང་བཟོད་པར་འོས་པ་ཡིན་པའི་ཕྱིར་བཟོད་པར་བྱ་བ་ཡིན་ནོ། །མུན་པ་རབ་ཏུ་གནག་པ་ཞེས་བྱ་བ་ནི་མུན་པ་མཐུག་པོ་དང་ལྡན་པར་གྱུར་པ་ནི་ཞེས་བྱ་བའི་ཐ་ཚིག་གོ། །དལ་གྱིས་ཞེས་བྱ་བ་ནི་ཤིན་ཏུ་དྲག་པོར་མི་འབབ་པའི་ཕྱིར་རོ། །ཅུང་ཟད་ཅུང་ཟད་ཅེས་བྱ་བ་ནི་
དུས་ཀྱིས་ཆོད་ཅིང་ཆོད་ཅིང་འབབ་པའི་ཕྱིར་རོ། །འབབ་པར་གྱུར་པ་ན་ཞེས་བྱ་བ་ནི་བརླན་པར་གྱུར་པ་ནའོ། །ཆོས་ཉིད་ཅེས་བྱ་བ་ནི་དེ་གདོན་མི་ཟ་བར་འགྱུར་བའོ། །དངོས་པོ་ཐམས་ཅད་ཐུགས་སུ་ཆུད་པའི་ཕྱིར་སངས་རྒྱས་ཡིན་ལ། འདོད་ཆགས་ལ་སོགས་པ་ཉོན་

མོངས་པ་བཅོམ་པ་ཉིད་ཀྱི་ཕྱིར་བཅོམ་ལྡན་འདས་སོ། །ནང་དུ་ཡང་དག་བཞག་པ་ནི་<དབན་‚དབེན་>པར་བཞུགས་པའོ། །འཇིགས་པ་ནི་སྔངས་པའོ། །འཇིགས་སུ་རུང་བ་ནི་འཇིགས་པའི་རྒྱུ་མཚན་ནོ། །སྔང་བ་ནི་སྤོབས་པ་ཉམས་པའོ། །བ་སྤུ་ལྡང་བ་
ནི་འཇིགས་པའི་རྒྱུ་སྔོན་དུ་སོང་བ་ཅན་གྱི་བ་སྤུ་ལྡང་བའོ། །རྣམ་པར་དག་པའི་ཆོས་སུ་འགྱུར་རོ་ཞེས་བྱ་བ་ནི་ཉོན་མོངས་པའི་དྲི་མ་དང་བྲལ་བར་འགྱུར་བའོ། །གོས་སྤུ་ཅན་ནི་རས་སྤུ་ཅན་ལ་སོགས་པའོ། །ལ་བའི་མཆོག་ཅེས་བྱ་བ་ནི་ཡུལ་པར་སིག་ལས་བྱུང་བ་ཤིན་ཏུ་རིན་ཆེ་བ་དང་
མཐུག་པ་མཛུབ་ཀྱི་ཚད་པས་ལྷག་པའི་སྤུ་ཅན་ལ་ལ་བའི་མཆོག་ཅེས་ཐ་སྙད་དུ་བཏགས་པ་ཡིན་ཏེ། ཤིན་ཏུ་ཆེ་བ་ཉིད་དང་། ཉུང་བ་མ་ཡིན་པ་ཉིད་ཀྱིས་གང་ཟག་ལ་བཀག་པ་མཚོན་པར་བྱ་བ་ཡིན་ཏེ། གང་གི་ཕྱིར་རུང་བ་མ་ཡིན་པ་ནི་རང་ཉིད་ལ་བཀག་པ་ཡོད་པའི་
ཕྱིར་རོ། །འཛིན་པར་བྱེད་པའི་ཐབས་སུ་གྱུར་པ་དེ་ནི་སྒྲོ་གུའོ། །གང་གིས་འཛིན་པ་དེ་ནི་སྒྲོག་མདུད་དོ། །སྐ་རགས་ནི་ཤུར་བུར་རབ་ཏུ་གྲགས་པའོ། །དྲ་བའི་རྣམ་པ་ལྟ་བུ་མིག་ཕྲ་མོ་ཅན་ནི་ཤུར་བུ་ཕྲེའུ་འོ། །སྲད་བུ་ཟུར་བཞི་པ་ནི་ལྕག་ཕོད་དོ།། །།
བམ་པོ་བཞི་པ། ཞལ་ཏ་པ་ནི་བྱ་བ་བྱེད་པ་སྟེ། གྲོང་ལ་སོགས་པའི་ལས་སེམས་པར་བྱེད་པའི་ཕྱིར་རོ། །བྲམ་ཟེའི་བུ་ཞེས་བྱ་བ་ནི་བྲམ་ཟེ་ལོ་བཞི་བཅུ་མ་ལོན་པ་ལ། འདིར་བྲམ་ཟེའི་བུའི་སྒྲས་བསྟན་པ་ཡིན་ནོ། །དཔྱ་ནར་མ་ཞེས་བྱ་བ་ནི་ཡུལ་ལས་བྱུང་བར་
རབ་ཏུ་གྲགས་པའོ། །གླ་སྐྱེད་ནི་ཤོ་གམ་དང་གྲུ་བཙས་ལ་སོགས་པ་ལས་བྱུང་བའོ། །ཉི་མ་ནི་ཚེས་གཅིག་ལ་སོགས་པའོ། །ཚེས་གྲངས་ནི་ཟླ་ལྷག་ལ་སོགས་པའོ། །མྱུར་བར་ཡོངས་སུ་གཅོད་པར་བྱེད་པ་ནི་སྒྲིན་ཞིང་མྱུར་བའོ། །སྤྱིར་བྱ་བ་དང་བྱ་བ་མ་ཡིན་པ་
ཡོངས་སུ་གཅོད་པས་ན་མཁས་པ་ཞེས་བྱ་བའོ། །རྩ་བ་ནི་གླ་སྒང་ལ་སོགས་པའོ། །སྡོང་བུ་ནི་སླེ་ཏྲས་ལ་སོགས་པའོ། །ལོ་མ་ནི་བལ་བུའི་ལོ་མ་ལ་སོགས་པའོ། །མེ་ཏོག་ནི་ཀླུ་ཤིང་གི་མེ་ཏོག་ལ་སོགས་པའོ། །འབྲས་བུ་ནི་སྨན་ཨ་རུ་ར་ལ་སོགས་པའོ། །

མང་དུ་བཏུས་ཏེ་ཞེས་བྱ་བ་ནི་གཞོན་པའི་ཕྱིར་དང་། བློ་དང་ལྡན་པས་མ་ལུས་པར་བཏུད་ནས་སོ། །དགའ་བ་ནི་ཡིད་དགའ་བའོ། །མགུ་བ་ནི་དགའ་བའི་བྱེ་བྲག་གོ། །སྐལ་བ་ཆུང་བ་ནི་བསོད་ནམས་ཆུང་བར་གྱུར་པའོ། །ལག་པའི་མཐིལ་ཏེ་ལག་པའི་
དཀྱིལ་ན་ལྕགས་ཀྱུའི་རྣམ་པ་དང་། འཁོར་ལོའི་རྣམ་པ་དང་། ཕྲེང་བའི་རྣམ་པ་ལྟ་བུའི་རི་མོ་གང་ལ་ཡོད་པ་དེའི་ཕྱིར་ན་རྒྱལ་པོར་འགྱུར་ཏེ། བདག་པོ་ཉིད་དུ་འཛིན་པར་བྱེད་དོ། །ཤས་རྒྱས་པའི་བཞིན་མཚན་ཐམས་ཅད་དང་ལྡན་པ་ལ་ཞིང་དང་འདྲ་བ་ཞེས་བྱའོ། །གང་
གི་རྐང་མཐིལ་ལ་གྲོང་ཁྱེར་དང་རྩིག་པའི་རྣམ་པ་ལྟ་བུའི་རི་མོ་ཡོད་པའོ། །རྟ་བབས་ནི་རྩ་བའི་སྒོ་ལས་ཕྱི་རོལ་གྱི་རྩིག་པ་མ་གཏོགས་པར་ཤིང་གཉིས་བསྒྲེངས་པ་ལ་ཤིང་གཅིག་གིས་སྟེང་ནས་བཀབ་པ་སྒོའི་རྣམ་པ་ལྟ་བུ་ཡིན་ཏེ། འདིའི་མིང་གཞན་ནི་སྒོ་དང་པོ་ཞེས་བྱ་བ་ཡིན་ནོ། །
དོགས་པ་མེད་པས་སོང་ཤིག་ཅེས་བྱ་བ་ནི་བྱ་བ་མེད་པར་གྱུར་པས་སོ། །རེག་བྱ་དང་ལྡན་པ་ཞེས་བྱ་བ་ནི་སྐྱེ་བོ་གཞན་དང་ཐུན་མོང་མ་ཡིན་པ་ཁྱད་པར་དུ་འཕགས་པ་ལ་འདིར་རེག་བྱར་བསམས་པའོ། །རྗེ་བོ་ནི་བདག་པོའོ། །མི་སྙན་པ་སྒྲོགས་པར་འགྱུར་གྱི་ཞེས་བྱ་བ་ནི་གྲགས་
པ་མ་ཡིན་པ་དང་ལྡན་པ་ཉིད་ཀྱིས་སོ། །གཅིག་ནས་གཅིག་ཏུ་ཐོས་ཏེ་ཞེས་བྱ་བ་ནི་མཐར་གྱིས་གཏམ་ཐོས་པར་གྱུར་ཏེའོ། །དཔུང་གི་ཚོགས་ནི་དཔུང་གི་འདུས་པའོ། །ཡན་ལག་བཞི་སྟེ། གླང་པོ་དང་། རྟ་དང་། ཤིང་རྟ་དང་། རྐང་ཐང་གི་མིང་ཅན་གང་ལ་ཡོད་པ་དེ་ནི་
ཡན་ལག་བཞི་དང་ལྡན་པའོ། །སྐྱེ་བོ་མང་པོའི་སྒྲ་མི་