Luận tạng Tây Tạng (Tengyur) — Tập 158

ལ། འགའ་ཞིག་ཏུ་ནི་འདོད་པ་མ་ཡིན་པའི་རྒྱུ་མཚན་སྟོན་པར་བྱེད་པ་ཡིན་ནོ་ཞེས་བྱ་བར་རིག་པར་བྱའོ། །ཉེས་པ་ནི་ཉེས་པས་བྱས་པའི་ལས་སྔོན་དུ་སོང་བ་ཅན་གྱི་ཉེས་པ་ཡིན་ནོ། །རྣམ་པར་སྨིན་པ་གཉིས་སུ་
འགྱུར་བ་ཞེས་བྱ་བ་ནི་བདེན་པའི་རྣམ་པར་སྨིན་པ་དང་བདེན་པ་མ་ཡིན་པའི་རྣམ་པར་སྨིན་པའོ། །མི་རྟག་པ་ཞེས་བྱ་བ་ལ་སོགས་པའི་བཤད་པ་ནི་མངལ་དུ་འཇུག་པའི་མདོའི་སྐབས་སུ་དཔྱད་པ་ཡིན་ནོ། །མཐོང་བའི་ཆོས་ཀྱི་ཞེས་བྱ་བ་ནི་མངོན་སུམ་སྐྱེ་བའོ། །ཕྱི་མ་ནི་འཇིག་རྟེན་ཕ་རོལ་ལོ། །བཅང་བར་
བྱ་ཞེས་བྱ་བ་ནི་བདག་གི་དོན་གཟུང་བའི་སྒོ་ནས་སོ། །འཛིན་པར་བྱེད་པ་ནི་གཞན་ལ་དོན་གྱི་སྒོ་ནས་སྟོན་པའོ། །ཀློག་པར་བྱེད་པ་ནི་ཡི་གེའི་སྒོ་ནས་སོ། །ཀུན་ཆུབ་པར་བྱེད་པ་ནི་དོན་གྱི་སྒོ་ནས་སོ། །ཡངས་པའི་ཚལ་ནས་བྱུང་ནས་ཞེས་བྱ་བ་ནི་གྲོང་ཁྱེར་ཡངས་པ་ཅན་དང་ཐག་ཉེ་བའི་དགོན་པའི་ནགས་ཁྲོད་
མངོན་དུ་ཕྱོགས་པས་གཤེགས་པའོ། །གཡས་ཕྱོགས་སུ་ཞེས་བྱ་བ་ལ་སོགས་པ་ལ་བཅོམ་ལྡན་འདས་ཐམས་ཅད་དུ་གཡས་ཕྱོགས་སུ་བསྐོར་བ་མཛད་པ་དེ་ཉིད་ཀྱི་ཕྱིར་གཡས་ཕྱོགས་སུ་གཟིགས་ཏེ། གླང་པོ་ཆེན་པོ་དང་འདྲ་བར་སྐུ་ཐམས་ཅད་ཀྱིས་ཕྱོགས་ཏེ་གཟིགས་པའི་ཕྱིར་གླང་པོ་ཆེའི་གཟིགས་སྟངས་ཀྱིས་
གཟིགས་པ་ཞེས་བསྟན་ཏོ། །ཅིའི་ཕྱིར་བཅོམ་ལྡན་འདས་གླང་པོ་ཆེའི་ལྟ་སྟངས་ཀྱིས་གཟིགས་པར་མཛད་ཅེ་ན། འདི་ལ་བླ་མ་དག་བཅོམ་ལྡན་འདས་མངོན་པར་འདོད་པའི་འབྲས་བུ་སྟོན་པར་མཛད་པའི་ཕྱིར་གླང་པོ་ཆེའི་ལྟ་སྟངས་སུ་མཛད་ལ། ཡང་གྲོང་ཁྱེར་ཡངས་པ་ཅན་དུ་མི་འཇུག་པ་ཡང་འདིར་བཅོམ་

ལྡན་འདས་མངོན་པར་བཞེད་པ་ཡིན་པ་དེ་བས་ན་འདིར་གླང་པོ་ཆེའི་ལྟ་སྟངས་ཀྱིས་གཟིགས་པ་ནི་དེ་སྟོན་པར་བྱེད་པ་ཡིན་པར་བལྟ་བར་བྱའོ་ཞེས་སྟོན་ཏོ། །དེ་སྟོན་པ་ཡང་ཅིའི་ཕྱིར་ཞེ་ན། འདི་ལ་ཡང་གྲོང་ཁྱེར་ཡངས་པ་ཅན་ན་གནས་པའི་ལྷ་རྣམས་ལ་ཕན་གདགས་པའི་ཕྱིར་ཏེ། དེ་དག་གིས་རྒྱུ་མཚན་
མཐོང་བ་ལས་བཅོམ་ལྡན་འདས་གྲོང་ཁྱེར་ཡངས་པ་ཅན་དུ་ཡང་འཇུག་པར་མི་མཛད་པ་དང་། ཡོངས་སུ་མྱ་ངན་ལས་འདའ་བར་བཞེད་དོ་སྙམ་པས་གལ་ཏེ་ཁོ་ཅག་བག་མེད་པར་གནས་པ་དེའི་ཚེ་བདག་ཅག་ཆེར་ཉམས་པར་འགྱུར་རོ་སྙམ་དུ་གཟིགས་ནས། བཅོམ་ལྡན་འདས་ཀྱི་སླད་བཞིན་དུ་འབྲང་བ་དང་། དགེ་བའི་ཆོས་
སྒོམ་པ་ལ་བག་ཡོད་པར་གནས་པར་འགྱུར་བ་དེ་བས་ན། དེ་དག་གི་དོན་ཆེན་པོ་འགྲུབ་པར་འགྱུར་བའི་ཕྱིར་གླང་པོ་ཆེའི་ལྟ་སྟངས་ཀྱིས་གཟིགས་པ་ནི་འདིར་དགོས་པ་དང་བཅས་པ་ཁོ་ན་ཡིན་ནོ་ཞེས་སྟོན་པར་མཛད་དོ། །གཞན་དུ་སྔར་མ་མཐོང་བ་ནི་ངོ་མཚར་ཡིན་ནོ། །སྔོན་མ་ཐོས་པ་ནི་རྨད་དུ་བྱུང་བ་ཡིན་ནོ།
གྲོང་ལ་འཁོར་བརྒྱ་ཕྲག་དུ་མ་ཡོད་པ་དེ་ནི་འདིར་བརྒྱ་ཕྲག་དུ་མ་ཅན་ཡིན་ནོ། །སྲིད་ནི་རིང་བ་ཉིད་དོ། །ཞེང་དུ་གྱུར་པ་ནི་ཡངས་པར་གྱུར་པའོ། །ཁ་དོག་མཛེས་པར་གྱུར་པ་ནི་ཁ་དོག་དང་གཟུགས་རྫོགས་པར་གྱུར་པའོ། །དབྱངས་སྙན་པར་གྱུར་པ་ནི་དབྱངས་མཛེས་པར་གྱུར་པའོ། །དོན་སྨྲ་བ་ནི་དོན་སྟོན་
པར་བྱེད་པའི་ཚིག་རྗོད་པར་བྱེད་པའོ། །ལྷག་པར་ཞེས་བྱ་བ་ནི་ཕྱིས་སམ་ལྷག་པའི་དོན་ཡིན་ནོ། །གནས་པ་ཞེས་བྱ་བ་ནི་ལྷན་ཅིག་གནས་པའམ་ལེགས་པར་གནས་པ་ཉིད་དོ། །སྟོན་པ་གདུལ་བྱའི་ཐབས་སུ་གྱུར་པ་ལ་མཁས་པ་ཡིན་པ་དེ་བས་ན་ཐབས་འདིས་མངོན་པར་མ་དད་པ་དད་པ་སྐྱེད་པར་བྱེད་པའི་
ཆོས་སྟོན་པར་འགྱུར་རོ། །མདོ་སྡེའི་མཐའི་རྗེས་སུ་འབྲང་བས་གནས་པར་བྱའི། གང་ཟག་གི་རྗེས་སུ་འབྲང་བར་མི་བྱའོ་ཞེས་བྱ་བ་ལས། མདོ་སྡེའི་མཐའ་ཞེས་བྱ་བ་ལ། མདོ་སྡེའི་སྡེ་སྣོད་དང་འདུལ་བར་གཏོགས་པ་ཡིན་ནོ། །འདུལ་བའི་བདག་ཉིད་ཀྱི་མདོ་ནི་ཡང་བསླབ་པའི་གཞི་ངེས་པར་བྱེད་པས་ན་མདོ་སྡེ་
སྟེ། དཔེར་ན་སོ་སོར་ཐར་པའི་མདོ་ལྟ་བུའོ། །གདུལ་བར་གཏོགས་པའི་བསླབ་པའི་གཞི་གཞན་མ་ལུས་པ་དག་ཀྱང་དེ་བཞིན་ནོ། །མདོ་སྡེའི་མཐའ་ནི་ངེས་པར་བྱེད་པ་སྟེ། འདིས་ངེས་པར་བྱེད་ཅེས་བྱ་བའི་དབང་དུ་བྱས་ནས་ཆོས་མངོན་པ་ཡིན་ལ། བཀའ་ཡན་ལག་བཅུ་གཉིས་སུ་གཏོགས་པའི་མན་ངག་

སྟོན་པར་བྱེད་པའི་ཆོས་མངོན་པ་ཉིད་མ་མོ་ཡིན་ནོ། །ཆོས་མངོན་པའི་རྗེས་སུ་འབྲངས་ནས་སློབ་དཔོན་གྱིས་མཛད་པའི་བཤད་པ་ཡང་མདོ་སྡེའི་མཐའ་ཡིན་ནོ། །དེ་བས་ན་འདི་མདོ་སྡེའི་སྒྲས་མདོ་སྡེ་དང་། འདུལ་བའི་སྡེ་སྣོད་དང་། མཐའི་སྒྲས་ཆོས་མངོན་པའི་སྡེ་སྣོད་སློབ་དཔོན་གྱིས་མཛད་པའི་བཤད་པ་ལུང་གི་
རྗེས་སུ་འབྲངས་པ་དང་བཅས་པ་གཟུང་ངོ་། །དེའི་དོན་ནི་འདི་ཡིན་ཏེ། མདོ་སྡེ་དང་། འདུལ་བ་དང་། ཆོས་མངོན་པའི་སྡེ་སྣོད་ངེས་པར་བྱེད་པ་དེ་དག་ངེས་པར་བྱས་པ་ཁོ་ནར་རྗེས་སུ་འབྲང་བ་སྟེ། །སོ་སོར་འབྲང་བར་བྱ་བ་དང་རྗེས་སུ་འགྲོ་བར་བྱ་བ་ཡིན་ལ། སྡེ་སྣོད་གསུམ་པོ་ངེས་པ་ཉིད་དུ་ལེགས་པར་བྱས་པའི་ལྟ་བ་དེས་
བསྒོམ་པ་ལ་མངོན་པར་སྦྱོར་བས་ཐར་པ་ལེགས་པར་ཐོབ་པར་འགྱུར་རོ། །གང་ཟག་གི་རྗེས་སུ་འབྲང་བར་མི་བྱ་བ་ནི་གང་ང་གཅིག་པུའམ། ང་དང་འདྲ་བའི་རྗེས་སུ་འབྲང་བར་བྱ་བ་ཡིན་ཏེ། ང་ཡོངས་སུ་མྱ་ངན་ལས་འདས་ནས་ངའི་བཀའི་རྗེས་སུ་འགྲོ་བར་བྱ་ཞིང་། གྲོལ་བའི་ཕྱིར་གང་ཟག་གཞན་འགའ་ཞིག་གི་ནི་
མ་ཡིན་ནའོ་ཞེས་བྱ་བའི་བཤད་པ་འདིས་མདོ་དང་འདུལ་བའི་མཐའི་སྒྲ་སྡེ་སྣོད་གསུམ་པོ་དག་ལ་འཇུག་པར་རིག་པར་བྱའོ། །དེ་དག་གང་ལས་ཤེ་ན། འོག་ནས་བཅོམ་ལྡན་འདས་ཉིད་ཀྱིས་མདོ་སྡེའི་མཐའི་རྗེས་སུ་འབྲང་བ་སྡེ་སྣོད་གསུམ་ལ་མཁས་པ་བཤད་པ་ལས། གང་མདོ་སྡེ་ལ་འཇུག་པར་བྱ་ཞིང་འདུལ་བ་
ལ་ཡང་དག་པར་བལྟ་བར་བྱའོ། །གལ་ཏེ་མདོ་སྡེ་ལ་འཇུག་པར་གྱུར་ཅིང་འདུལ་བ་ལ་སྣང་བར་གྱུར་ན་མདོ་སྡེ་ལ་གནས་འདུལ་བ་ལ་སྣང་། ཆོས་ཉིད་དང་མི་འགལ་བ་ཡིན་ནོ་ཞེས་བཤད་པར་འགྱུར་རོ། །དེ་ལྟར་གྱུར་ན་འདིར་རབ་ཏུ་གྲགས་པའི་སྡེ་སྣོད་གསུམ་ལ་འདུལ་བའི་མཐའི་རྗེས་སུ་འབྲང་
བར་བརྗོད་དོ། །གང་ཟག་ནི་དེའི་དོན་དང་གཞུང་ཚད་མར་གྱུར་པ་ལ་མཁས་པ་སྟེ། འདིར་ནག་པོ་བསྟན་པ་དང་། ཆེན་པོ་བསྟན་པ་འདིའི་རྟོགས་པ་པོ་ཡོངས་སུ་རྟོག་པར་བྱེད་པའི་དོན་ཡོན་ཏན་དང་ལྡན་པ་ཡིན། བརྟག་པར་བྱ་བ་ཡང་གང་གཞན་གྱིས་སངས་རྒྱས་ཀྱི་བཀའ་ཡིན་པར་སྨྲས་
པ་འདི་ལ་ནི་སངས་རྒྱས་ཀྱི་བཀའ་ཉིད་དུ་བརྒྱུད་པས་འོངས་པ་མ་ཡིན་ཞིང་རྟོག་པར་བྱེད་པ་ནི་མདོ་སྡེ་དང་འདུལ་བ་དང་མ་མོ་ལ་འཇུག་པར་བྱེད་པ་ཡིན་ནོ། །ནག་པོ་བསྟན་པ་དང་ཆེན་པོ་བསྟན་པའི་ཆར་གྱུར་པ་སྡེ་སྣོད་གསུམ་པོ་མདོ་སྡེ་དང་འདུལ་བ་དང་ཆོས་མངོན་པ་ཡང་བརྟག་པའི་གཞི་ཡིན་ནོ། །

འོན་ཀྱང་རྟོག་པར་བྱེད་པ་པོ་ལ་སྡེ་སྣོད་གསུམ་པོ་གང་དག་ལ་གཞུག་པར་བྱ་བ་སངས་རྒྱས་ཀྱི་བཀའ་ཉིད་དུ་མ་གྲགས་པའི་གཞུང་གཞན་གང་ལ་གྲགས་པ་ཡིན། འདི་ལ་འདྲི་བར་བྱ་བ་ཇི་ཞིག་ཡོད་དེ་བརྒྱུད་པས་འོངས་པ་ཡིན་ནོ། །གལ་ཏེ་དེ་ལྟ་ན་ནི་ཇི་ལྟར་ཁྱེད་ལ་སྡེ་སྣོད་གསུམ་པོ་
དང་བརྒྱུད་པས་འོངས་པ་ཡིན་པའི་ཕྱིར་རབ་ཏུ་གྲགས་པ་ཡིན་པ་དེ་བཞིན་དུ་ཕ་རོལ་པོ་ཡང་གཞན་དུ་གྲགས་པ་ཡིན་ནོ། །བདེན་ཏེ་གང་ཞིག་ཕ་རོལ་པོ་ལ་བརྒྱུད་པས་འོངས་པ་ཁོ་བོ་ལ་བརྒྱུད་པས་འོངས་པ་མ་ཡིན་པ་དེ་ནི་ཇི་སྲིད་ཁོ་བོ་ལ་སངས་རྒྱས་ཀྱི་བཀའ་ཉིད་དུ་བརྒྱུད་པས་འོངས་པ་མ་ཡིན་པས་དེ་ཡོངས་སུ་དོར་
བར་བྱ་བ་ནི་མ་ཡིན་གྱི། འོན་ཀྱང་རང་གི་སངས་རྒྱས་ཀྱི་བཀའ་བརྒྱུད་པས་འོངས་པ་ལ་བཅུག་ནས་དཔྱད་པར་བྱ་བ་ཡིན་ནོ། །དེ་བས་ན་འདིར་ནག་པོ་བསྟན་པ་དང་ཆེན་པོ་བསྟན་པ་ལ་གསུམ་པོ་བསྟན་པར་བྱ་བ་ཡིན་ནོ། །སྡེ་སྣོད་གསུམ་པོ་བརྒྱུད་པས་རབ་ཏུ་གྲགས་པ་དེའི་དོན་དང་གཞུང་འཇལ་བར་བྱེད་པའི་
མཁས་པ་ནི་རྟོག་པར་བྱེད་པ་པོ་ཡིན་ལ། གང་ཞིག་སངས་རྒྱས་ཀྱི་བཀའ་ཉིད་དུ་དེ་ལ་མ་གྲུབ་པ་ཉིད་ནི་བརྟག་པར་བྱ་བ་ཡིན་ནོ། །དེ་ལྟར་ན་གང་ཞིག་སངས་རྒྱས་ཀྱི་བཀར་མ་གྲགས་པ་ཕན་ཚུན་རྗེས་སུ་ཞུགས་པའི་ཕྱིར་རམ། འགལ་བ་མེད་པའི་ཕྱིར་སངས་རྒྱས་ཀྱི་བཀར་རབ་ཏུ་གྲགས་པ་ཡིན་པར་
ཁོང་དུ་ཆུད་པར་མི་བྱ་སྟེ། ཙ་ར་ཀ་ལ་སོགས་པ་ལ་སངས་རྒྱས་ཀྱི་བཀའ་ཉིད་དུ་ཐལ་བར་མ་གྱུར་ཅིག་པ་ཡིན་ནོ། །འོན་ཀྱང་ཡོངས་སུ་རྫོགས་པར་སངས་རྒྱས་ཀྱི་བཀར་གྲུབ་པ་ཡོད་དེ། དེའི་དོན་འཇལ་བར་བྱེད་པའི་མཁས་པ་ནི་གྲུབ་པ་པོ་སྟེ་གང་ཞིག་རྟོགས་པ་པོ་སྔ་ན་མེད་པ་དེ་ལ་གཞན་དང་
འདི་ནི་སངས་རྒྱས་ཀྱི་བཀའ་ཉིད་དུ་སྨྲས་པ་དེ་རྟོག་པར་བྱེད་པ་པོ་དེས་གཞུག་ཅིང་གཞུག་ཅིང་དཔྱད་པར་བྱའོ་ཞེས་བྱ་བ་ནི་ནག་པོ་བསྟན་པ་དང་ཆེན་པོ་བསྟན་པའི་དོན་ཡིན་ནོ། །སྡེ་པའི་ནང་ཐ་དད་པའི་ཁྱད་པར་དེ་དག་འགལ་བའི་ཕྱིར་གཞན་དུ་མི་འཇུག་པ་མ་ཡིན་ནམ། ཇི་ལྟར་ན་སངས་རྒྱས་ཀྱི་བཀའ་
ཉིད་ཡིན་ཞེ་ན། ཉོན་ཅིག་བཅོམ་ལྡན་འདས་ཀྱིས་བསྟན་པ་ཐ་དད་པའི་དབྱེ་བ་བཅོ་བརྒྱད་དུ་གསུངས་པ་གཞུང་ཐ་དད་པ་དང་། དོན་ཐ་དད་པའི་ཁྱད་པར་གྱི་སྒོ་ནས་དབྱེ་བ་བཅོ་བརྒྱད་ནི་རིགས་པ་མ་ཡིན་ནོ། །དེའི་ཕྱིར་བཅོམ་ལྡན་འདས་ཉིད་ཀྱིས་ཅི་སྲིད་འགལ་བའི་སྒོ་ནས་གཞན་དག་ལས་ཐ་དད་པར་འགྱུར་

བ་དེ་སྲིད་དུ་འགལ་བར་ལུང་བསྟན་པ་ཡིན་ལ། གལ་ཏེ་དེ་སྲིད་དུ་ཡང་འགལ་བར་མི་འགྱུར་ན་ཐ་དད་པ་ཉིད་དུ་ཡང་མི་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་ཇི་སྲིད་དུ་འགལ་བ་ཐ་དད་པའི་རྒྱུ་མཚན་དུ་གསུངས་པས་དེ་སྲིད་དུ་དོན་དང་གཞུང་ཕན་ཚུན་རྗེས་སུ་འཇུག་པར་མི་འགྱུར་རོ། །དེ་བསྡུས་པའི་
དོན་ནི་འདི་ཡིན་ཏེ། གང་བཅོམ་ལྡན་འདས་ཀྱིས་ཆ་ཇི་སྲིད་པ་ལ་ལ་ཕན་ཚུན་འགལ་བར་གསུངས་པ་དེ་ཉིད་ཀྱང་བཅོམ་ལྡན་འདས་ཀྱིས་ནག་པོ་བསྟན་པ་དང་ཆེན་པོ་བསྟན་པའི་གཡོས་མི་འགལ་བར་གསུངས་པ་ལ་འོན་ཀྱང་ཆ་དེ་ཡོངས་སུ་དོར་ཞིང་ཆ་གཞན་ནག་པོ་བསྟན་པ་དང་ཆེན་པོ་བསྟན་པའི་སྒོ་ནས་
རྗེས་སུ་འཇུག་པར་བྱ་བ་ཡིན་ནོ། །དེ་ཡང་ཆའི་དབྱེ་བ་གཞན་ཡིན་གྱི་རྣམ་པར་གྲོལ་བའི་རས་ལ་ནི་ཐ་དད་པ་མེད་དོ་ཞེས་བཅོམ་ལྡན་འདས་ཀྱིས་གསུངས་པ་ཡིན་ནོ། །རྣམ་པར་གྲོལ་བ་ཡང་འདིར་འདུས་བྱས་དང་འདུས་མ་བྱས་ཡིན་ལ། འདུས་མ་བྱས་ནི་མྱ་ངན་ལས་འདས་པ་ཡིན་ནོ། །འདུས་བྱས་ནི་
ལམ་གྱི་ནང་དུ་འདུས་པ་ལྷག་པར་མོས་པ་ཡིན་ལ། དེས་ནི་འདིར་ཐར་པའི་ལམ་གསུངས་པ་ཡིན་ནོ། །ལམ་ལ་ཡང་ནན་ཏན་དུ་བྱེད་པ་དང་། ཕ་རོལ་ཏུ་ཕྱིན་པའི་ཚོགས་ཡོད་པ་ཡིན་ཏེ། དེ་དག་གི་རྒྱུ་འཁོར་བ་ལས་ཡིད་བྱུང་བ་དང་། སེམས་ཅན་ལ་སྙིང་རྗེ་བ་ཡོད་པ་ཡིན་ནོ། །རྒྱུ་ནི་བཞི་སྟེ་བརྩོན་པའི་
རྒྱུ་ཞེས་བྱ་བའི་ཐ་ཚིག་གོ། །རྣམ་པར་གྲོལ་བ་ཡང་འབྲེལ་པ་ཅན་གྱི་སྒྲ་ཉིད་ཡིན་པའི་ཕྱིར་གང་ལས་རྣམ་པར་གྲོལ་བ་དེས་འཕངས་པ་སྡུག་བསྔལ་གྱི་བདེན་པ་ཡིན་ནོ། །ཇི་ལྟར་རྣམ་པར་གྲོལ་བ་དེས་ཀྱང་འཕངས་པ་ནི་ཀུན་འབྱུང་གི་བདེན་པ་ཡིན་ཏེ། ཀུན་འབྱུང་ཡོད་ན་ནི་སྡུག་བསྔལ་སྐྱེ་བར་འགྱུར་ལ།
དེ་ལྟར་གྱུར་དང་སྡུག་བསྔལ་ལས་རྣམ་པར་གྲོལ་བ་མེད་པ་དེའི་ཕྱིར་ཀུན་འབྱུང་ཤེས་ནས་སྤང་བར་བྱའོ། །དེ་ལྟར་ན་སྡུག་བསྔལ་ལས་ཡོངས་སུ་གྲོལ་བར་འགྱུར་བ་དེ་བས་ན་འདིར་རྣམ་པར་གྲོལ་བའི་སྒྲས་འཕགས་པའི་བདེན་པ་བཞི་གཟུང་ཞིང་ལམ་ལ་ནན་ཏན་དུ་བྱེད་པ་དང་། ཚོགས་ཀྱི་རྒྱུ་ཡང་
བསྡུས་པ་ཡིན་ནོ། །བཅོམ་ལྡན་འདས་ཀྱིས་སྡེ་པའི་དབྱེ་བ་བཅོ་བརྒྱད་པོ་འདི་ཙམ་གྱིས་ཕན་ཚུན་རྗེས་སུ་ཞུགས་པར་གསུངས་པ་ཡིན་པ་དེ་བས་ན་རྗེས་སུ་ཞུགས་པའི་ཕྱིར་ནག་པོ་བསྟན་པ་དང་ཆེན་པོ་བསྟན་པ་འདི་ལས་ལྷག་པ་ཅི་ཞིག་ནུས་ཏེ་ཆ་འདི་ཙམ་གྱིས་ཐ་དད་པ་དག་ཀྱང་ཕན་ཚུན་རྗེས་སུ་

ཞུགས་པ་བསྟན་པ་ཡིན་ལ། གང་འདི་ཙམ་དུ་ཡང་རྗེས་སུ་ཞུགས་པ་དེ་ནི་སངས་རྒྱས་ཀྱི་བཀའ་མ་ཡིན་ནོ། །དེ་ལྟར་ཡང་ཐེག་པ་ཆེན་པོའི་ལམ་དང་འདྲ་བ་སྔགས་ལ་ཡོད་དོ། །གང་གཟུངས་འདིས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་
བར་འགྱུར་རོ། །དེ་བཞིན་གཤེགས་པ་འོད་དཔག་ཏུ་མེད་པའི་ཐད་ལས་གཟུངས་སྨྲ་བས་ཀྱང་རིག་པ་མནོས་ནས་ཉོན་མོངས་པ་སྤངས་ཏེ། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །བཅོམ་ལྡན་འདས་ཀྱིས་འཕགས་པ་སྤྱན་རས་
གཟིགས་དབང་ཕྱུག་གི་ཐད་ལས་རིག་པ་བླངས་ཏེ། གཞན་ལ་ཕན་གདགས་པ་མཛད་པའི་ཕྱིར་འཇུག་པར་འགྱུར་ཞེས་འབྱུང་སྟེ། སྔགས་དང་ཡི་གེ་ལམ་གྱི་ཡན་ལག་མ་ཡིན། ཚོགས་མ་ཡིན། རྒྱུ་མ་ཡིན། ལེགས་པར་སྤྱད་པ་དང་། ཉེས་པར་སྤྱད་པ་མ་ཡིན་པ་དེ་ཇི་ལྟར་ན་དེ་དག་མི་ཟད་པའི་རྒྱུ་དང་། བསོད་ནམས་
འཕེལ་བའི་རྒྱུ་དག་ཏུ་ཡང་རིགས་ཏེ། དེ་བཞིན་དུ་ཀློག་པ་ཡང་ངོ་། །དེ་ནི་འདིར་ལམ་དང་ཚུལ་མཐུན་པ་ཡིན་གྱི་དེ་ལམ་མ་ཡིན། མདོ་སྡེ་མ་ཡིན། འདུལ་བ་མ་ཡིན། ཆོས་ཉིད་ལ་འཇུག་པ་མ་ཡིན། དེ་ནག་པོ་བསྟན་པ་དང་ཆེན་པོ་བསྟན་པའི་སྡེ་སྣོད་གསུམ་གྱི་ཆར་གྱུར་པ་མ་ཡིན་ཏེ། དེ་ལ་ཐེག་པ་ཆེན་པོའི་ནང་དུ་
འདུས་པ་ཡིན་ནོ་ཞེས་བྱ་བ་དེ་ནི་ངེས་པ་ཡིན་ནོ། །ཀུན་དགའ་བོ་ཇི་ལྟར་ན་དགེ་སློང་དག་མདོ་སྡེའི་མཐའི་རྗེས་སུ་འབྲང་བ་ཡིན་གྱི། མངོན་དུ་བྱ་བ་མངོན་སུམ་དུ་ཐོས་པ་ཞེས་བྱ་བ་ནི་ཐོས་པ་ལས་བྱུང་བའི་ཤེས་པ་ཡི་གེའི་བདག་ཉིད་ཅན་གྱིས་སོ། །བསམས་པ་ལས་བྱུང་བ་དོན་གྱི་བདག་ཉིད་ཅན་གྱིས་ཏེ་ཤིན་
ཏུ་ངེས་པ་ཞེས་བྱ་བར་དགོངས་སོ། །འདི་ལྟ་སྟེ་ཞེས་བྱ་བ་དེ་ནི་ཉེ་བར་སྟོན་པའི་ཚིག་ཡིན་ནོ། །ཆོས་ནི་སྟོན་པའི་ཆོས་ཡིན་ནོ། །འདུལ་བ་ནི་སྤོང་བའི་ཐབས་སུ་གྱུར་པའོ། །སྟོན་པའི་བསྟན་པ་ཞེས་བྱ་བ་ལ་ཡང་དག་པར་རྗེས་སུ་སྟོན་པར་མཛད་པས་ན་སྟོན་པ་སྟེ། སངས་རྒྱས་བཅོམ་ལྡན་འདས་ཕྱིན་ཅི་
མ་ལོག་པར་སྟོན་པར་མཛད་པ་ཞེས་བྱ་བའི་ཐ་ཚིག་གོ། །དེའི་བསྟན་པ་འདི་ཡིན་པས་ན་བསྟན་པ་སྟེ། བཀའ་འམ་ཆེད་དུ་བསྟན་པ་ཞེས་བྱ་བ་ཡིན་ནོ། །དེའི་དོན་ནི་འདི་ཡིན་ཏེ། བཅོམ་ལྡན་འདས་ཀྱིས་བསྟན་པའི་ཆོས་དང་སྤོང་བའི་ཐབས་སུ་གྱུར་པ་རིམ་པས་འདི་བསྟན་པ་ཡིན་ཏེ། རིམ་པ་འདིས་འཇུག་

པ་དག་ཆོས་ཁོང་དུ་ཆུད་པ་དང་སྤངས་པ་འགྲུབ་པར་འགྱུར་རོ། །སྤྲོ་བར་མི་བྱ་ཞེས་བྱ་བ་ནི་ཁྱོད་ཀྱིས་ལེགས་པར་སྨྲས་སོ་ཞེས་བྱ་བ་དེ་ལྟ་བུའི་གཟེངས་བསྟོད་པ་སྦྱིན་པར་མི་བྱའོ། །སྨད་པར་ཡང་མི་བྱ་བ་ཞེས་བྱ་བ་ནི་ཚར་གཅད་པའི་སྒོ་ནས་ཁྱོད་ཀྱིས་མཛེས་པ་མ་ཡིན་པ་སྨྲས་སོ་ཞེས་བྱ་བའོ། །རྣ་བྱོས་ཏེ་ཞེས་བྱ་བ་
ནི་རྣ་བའི་རྣམ་པར་ཤེས་པ་དེ་ལ་གཏད་པར་བྱས་ནས་སོ། །ཆོས་ཀྱི་ཚིག་འབྲུ་ཞེས་བྱ་བ་ནི་བསྟན་པའི་ཆོས་ཀྱི་དོན་གསལ་བར་བྱེད་པའི་ཚིག་གང་ཡིན་པ་དང་། ཡི་གེ་སྟེ་རྗོད་བྱེད་གང་ཡིན་པ་དེ་དག་བཟུང་ཞིང་སེམས་ཀྱིས་ཤིན་ཏུ་ངེས་པར་བྱས་ནས་སོ། །མདོ་སྡེ་ལ་འཇུག་པར་བྱ་ཞེས་བྱ་བ་ནི་མདོ་སྡེའི་སྡེ་སྣོད་
ལ་མཐར་གྱིས་རབ་ཏུ་འཇུག་པར་བྱའོ། །འདུལ་བ་ལ་ཡང་དག་པར་བལྟ་བར་བྱ་ཞེས་བྱ་བ་ལ། འདུལ་བའི་སྡེ་སྣོད་ལ་མཚན་ཉིད་གང་དག་གསུངས་པ་དེ་དག་ལྷན་ཅིག་སྦྱར་བར་བྱ་བ་ཡིན་ནོ། །མདོ་སྡེ་ལ་མི་འཇུག་ཅེས་བྱ་བ་དེ་ནི་བླ་ན་མེད་པའི་སྐྱེས་བུའི་དོན་སྒྲུབ་པར་བྱེད་པ་ཉིད་དང་རྗེས་སུ་མཐུན་པར་འགྱུར་བ་
མ་ཡིན་ནོ། །འདུལ་བ་ལ་མི་སྣང་ཞེས་བྱ་བ་ནི་འདུལ་བ་ལས་གསུངས་པའི་མཚན་ཉིད་བླ་ན་མེད་པའི་དོན་སྒྲུབ་པར་བྱེད་པ་ཁོ་ན་ཉིད་དང་འགལ་བར་འགྱུར་རོ། །ཆོས་ཉིད་དང་ཡང་འགལ་ན་ཞེས་བྱ་བ་དེ་ནི་འགལ་བའི་བཤད་པ་དང་ལྡན་པ་ཉིད་ཀྱི་ཕྱིར་མི་འཐད་པ་ཡིན་ནོ། །ཆོས་ཉིད་ཀྱང་ཆོས་མངོན་པའི་སྡེ་སྣོད་
དམ་རྟེན་ཅིང་འབྲེལ་པར་འབྱུང་བ་ལུགས་ལས་འབྱུང་བ་དང་ལུགས་ལས་བཟློག་པ་ཡིན་ནོ། །ཉེས་པར་བཟུང་བ་ཞེས་བྱ་བ་ནི་རྣམ་པ་གཞན་དུ་གཟུང་བའི་སྒོ་ནས་སྨད་པར་གཟུང་བའི་ཕྱིར་རོ། །དེ་ལྟར་ནི་ཞེས་བྱ་བ་ནི་གང་གི་ཕྱིར་རོ། །གནས་འདིར་གཙུག་ལག་ཁང་ལ་མངོན་པར་འདོད་དེ་དེ་ནའོ། །ཆེན་པོ་ཞེས་
བྱ་བ་ནི་ཚུལ་ཁྲིམས་ལ་སོགས་པའི་ཡོན་ཏན་དག་གིས་བདག་པོ་ཆེན་པོར་གྱུར་པའོ། །གནས་བརྟན་ཞེས་བྱ་བ་ལ། གནས་བརྟན་ནི་འདིར་འདུལ་བ་ལ་མཁས་པ་ཡིན་པར་རིག་པར་བྱའོ། །སོ་སོར་ཐར་པ་དང་བཅས་པ་ཞེས་བྱ་བ་ནི་སོ་སོར་ཐར་པའི་མདོ་འདོན་པའི་གནས་བརྟན་དང་བཅས་ཤིང་ལྡན་པའོ། །
ཆོས་སུ་འདུ་ཤེས་པ་ཅན་ཞེས་བྱ་བ་ནི་ཆོས་ཀྱི་འདུ་ཤེས་ནི་ཆོས་སུ་འདུ་ཤེས་པ་སྟེ། དེ་གང་ལ་ཡོད་པ་ནི་ཆོས་སུ་འདུ་ཤེས་པ་ཅན་ཏེ་དེས་སོ། །འདུལ་བར་འདུ་ཤེས་པ་ཅན་ཡང་དེ་བཞིན་ནོ། །ཆོས་མ་ཡིན་པ་འདུལ་བ་མ་ཡིན་པ་ཞེས་བྱ་བ་ནི་ཆོས་དང་འདུལ་བ་དང་འགལ་བའོ། །མདོ་སྡེ་འཛིན་པ་ནི་གཞུང་གི་སྒོ་

དང་དོན་གྱི་སྒོའམ་གཞན་གྱི་སྒོ་ནས་མདོ་སྡེ་མ་ལུས་པར་འཛིན་པར་བྱེད་པའོ། །དེ་བཞིན་དུ་འདུལ་བ་འཛིན་པ་དང་། མ་མོ་འཛིན་པ་ཡང་ཁོང་དུ་ཆུད་པར་བྱའོ། །མ་མོའི་སྒྲས་ནི་ཆོས་མངོན་པ་བརྗོད་པ་ཡིན་ཏེ། མདོ་སྡེ་དང་འདུལ་བའི་སྡེ་སྣོད་དག་གིས་མ་ལྟ་བུའི་གནས་ཡིན་པའི་ཕྱིར་རོ། །
མང་དུ་ཤེས་པ་ནི་དགེ་འདུན་གྱི་ཚད་ལས་ཉུང་བ་སྟེ། དགེ་འདུན་གསུམ་ཞེས་བྱ་བའི་བར་དུའོ། །འདིར་དགེ་སློང་ཆོས་ཀྱིས་རྒན་པ་ནི་གནས་བརྟན་དུ་བཞེད་ལ། གནས་བརྟན་གཞན་ནི་གནས་བརྟན་གཙོ་བོར་གྱུར་པའོ། །ཇི་ལྟར་དགེ་སློང་མང་པོ་དག་ལས་ཡོན་ཏན་གྱིས་འདིར་གཙོ་བོར་བཞེད་ལ། གཙོ་བོ་ལས་
གཞན་ནི་དམ་པར་གྱུར་པའོ། །བཞི་པོ་འདི་ནི་ནག་པོ་བསྟན་པ་ཡིན་ནོ། །མདོ་སྡེ་ལ་འཇུག་ཅེས་བྱ་བ་ནི་སྔ་མ་བཟློག་པ་དང་ལྷན་ཅིག་སྦྱར་བར་བྱའོ། །དོན་ཅི་ལྟ་བ་བཞིན་དུ་འཛིན་ཅིང་འཁྲུལ་པ་སྤངས་པ་ཉིད་ཀྱི་ཕྱིར་ལེགས་པར་བཟུང་བ་ཡིན་ནོ། །གཞན་ལ་སྙད་འདོགས་པའི་སྒོ་ནས་བརྗོད་པ་ནི་བསྟན་པ་
ཡིན་ཏེ། ནག་པོ་ཡང་དེ་ཡིན་ལ་བསྟན་པ་ཡང་ཡིན་པས་ནག་པོ་བསྟན་པ་ཡིན་ནོ། །ཕ་རོལ་པོ་སངས་རྒྱས་ཀྱི་བཀའ་ཉིད་དུ་འདོད་པའི་ཚིག་གང་ཡིན་པ་དེ་སངས་རྒྱས་ཀྱི་བཀའ་མ་ཡིན་པ་ཉིད་དུ་བསྒྲུབ་པའི་ཚིག་ནི་ནག་པོའི་སྒྲས་བསྟན་པ་ཡིན་ལ། དེས་ཉེ་བར་མཚོན་པའི་སྙད་འདོགས་པ་ནི་ནག་པོ་བསྟན་པ་
ཞེས་བྱ་བའོ། །ལེགས་པར་བྱ་ཞེས་བྱ་བ་ནི་རིགས་པར་རོ། །ཤིན་ཏུ་ནི་ཁྱད་པར་དུ་ཡང་དག་པར་སྦྱར་ཏེ་ཞེས་བྱ་བ་ནི་ཡང་ནས་ཡང་དུ་བཅའ་བ་དང་ཡང་དག་པར་རྗེས་སུ་སྦྱོར་བར་བྱས་ནས་སམ། ཡི་གེའི་བདག་ཉིད་ཀྱིས་ཤིན་ཏུ་དཔྱད་པར་བྱ་བ་ཡིན་ནོ། །ཡང་དག་བརྟགས་ལ་ཞེས་བྱ་བ་ནི་མདོ་སྡེ་ལས་འཇུག་པ་ལ་
སོགས་པའི་སྒོ་ནས་དོན་གྱི་བདག་ཉིད་དུ་ཤིན་ཏུ་དཔྱད་ནས་སོ། །དོར་བར་བྱ་ཞེས་བྱ་བ་ནི་ཡོངས་སུ་སྤང་བར་བྱ་བའོ། །སངས་རྒྱས་ཀྱི་བཀའ་ཉིད་ཀྱིས་དོན་ཆེན་པོ་དང་ལྡན་པའི་ཕྱིར་ཆེན་པོ་བསྟན་པ་ཡིན་ནོ། །གཟུང་བར་བྱའོ་ཞེས་བྱ་བ་ནི་འདི་ནི་སངས་རྒྱས་ཀྱི་བཀའ་ཡིན་ནོ་ཞེས་བྱ་བའི་སྒོ་ནས་གུས་པར་གཟུང་བར་
བྱ་བ་ཡིན་ནོ། །སྲོག་ཆགས་ཛ་ལུ་ཀའི་ནགས་ཚལ་མཐུག་མོ་ཞེས་བྱ་བ་ནི། སྲོག་ཆགས་ཛ་ལུས་ཉེ་བར་མཚོན་པ་ཉིད་ཀྱི་ཕྱིར་རམ། མིང་གི་སྒྲ་ནི་སྲོག་ཆགས་ཛ་ལུ་ཀའི་ནགས་ཚལ་མཐུག་མོ་ཞེས་བྱའོ། །མགར་བ་ནི་གསེར་མགར་རོ། །ཀོ་ལ་སྨིན་པ་ཞེས་བྱ་བ་ལ་ཀོ་ལ་ཞེས་བྱ་བ་ནི་འབྲུའི་བྱེ་བྲག་

ཁྱད་པར་ཅན་འགའ་ཞིག་ཡིན་ལ། སྨིན་པ་ནི་ཡང་དག་པར་གྱུར་པའོ། །ཀོ་ལ་གང་ཡིན་པ་དེ་ནི་ཀོ་ལ་ཀ་སྨིན་པ་ཡིན་ཏེ། ཚོགས་པ་ཆེན་པོའི་བྱེ་བྲག་གིས་བཟང་པོར་བྱས་པ་ལེགས་པར་བྱས་པ་བཟང་བ་ཡིན་ནོ། །མཆན་ཁུང་དུ་གཞག་གོ་ཞེས་བྱ་བ་ནི་རྐུ་སེམས་ཀྱིས་མཆན་ཁུང་གི་ཕྱོགས་སུ་སྦས་པ་
ཡིན་ནོ། །བཅོམ་ལྡན་འདས་ཀྱི་མཐུས་བརྡུངས་མགར་མཁན་གྱི་བུ་སྐུལ་བྱེད་ཀྱིས་མཐོང་བ་དགེ་སློང་གི་ཡུལ་དེ་ལ་འཇུག་པར་མཛད་པ་བཅོམ་ལྡན་འདས་ཇི་ལ་དགོངས་པ་ཡིན་ཞེ་ན། འདི་ལ་བཅོམ་ལྡན་འདས་ཀྱི་དགོངས་པ་ནི་འདི་ཡིན་ཏེ། གལ་ཏེ་བརྡུངས་མགར་མཁན་གྱི་བུ་སྐུལ་བྱེད་ཀྱིས་དགེ་སློང་དེ་སྣོད་རྐུ་
བ་མཐོང་བ་དེའི་ཚེ་སྐུལ་བྱེད་འཁོར་འདི་མ་སད་པ་མ་ཡིན་གང་གི་ཕྱིར་དགེ་སློང་འདི་ནི་བཅོམ་ལྡན་འདས་ཀྱི་སྤྱན་སྔར་གནས་ཤིང་དགྲ་བཅོམ་པ་དུ་མའི་ནང་དུ་ཆུད་ཀྱང་འདི་ལྟ་བུའི་ལས་བྱེད་དོ་ཞེས་འཁོར་བའི་གནས་ངན་པ་ཡིན་ནོ་སྙམ་པས་བཅོམ་ལྡན་འདས་དང་དགེ་སློང་ཉེས་པ་ཟད་པ་དག་ལ་དད་པ་འཕེལ་ཞིང་
འགྱུར་བ་དང་། ཐར་པའི་དོན་གྱི་བྱ་བ་ལ་རྩོལ་བར་འགྱུར་བ་དང་། བཤད་པར་འགྱུར་བའི་འདྲི་བའི་སྐབས་བྱས་པ་ཡིན་པའི་ཕྱིར་སྐུལ་བྱེད་ཀྱིས་མཐོང་བ་དགེ་སློང་གི་ཡུལ་ལ་འཕགས་པ་ནི་ཤིན་ཏུ་དོན་ཆེན་པོ་ཡིན་ནོ་ཞེས་སྟོན་ཏོ། །ཐུབ་པ་བློ་གྲོས་རབ་ཡངས་པ། །ཞེས་བྱ་བ་ལ་སོགས་པ་ལ། ཉོན་མོངས་པ་
ལས་གྱུར་པའི་ཚིག་ཉེ་བར་ཞི་བའི་ཕྱིར་ཐུབ་པ་སྟེ། ཐུབ་པ་བཅོམ་ལྡན་འདས་དེ་ལ་ཞུ་བར་བགྱིའོ། །ཁྱད་པར་ཇི་ལྟ་བུ་དང་ལྡན་པའི་ཐུབ་པ་ཞེ་ན། བློ་གྲོས་རབ་ཡངས་ཞེས་བྱ་བ་ལ་སོགས་པ་སྨོས་ཏེ། བློ་གྲོས་ཏེ་ཤེས་རབ་ཡངས་ཤིང་རྒྱ་ཆེ་བར་གྱུར་པ་གང་ལ་ཡོད་པ་དེ་ནི་བློ་གྲོས་རབ་ཏུ་ཡངས་པ་ཡིན་ཏེ།
ཐམས་ཅད་མཁྱེན་པའི་ཡེ་ཤེས་དང་ལྡན་པ་ཉིད་ཀྱི་ཕྱིར་རོ། །འཁོར་བའི་རྒྱ་མཚོ་ཆེན་པོ་ལས་རྒལ་བ་ཉིད་ཀྱི་ཕྱིར་རྒལ་བ་ཡིན་ནོ། །ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་ཕ་རོལ་གྱི་ཕྱོགས་ཡང་དག་པར་བརྙེས་པའི་ཕྱིར་ཕ་རོལ་གཤེགས་པ་ཡིན་ནོ། །ཐེ་ཚོམ་མ་ལུས་པ་སྤངས་པའི་ཕྱིར་
ཐེ་ཚོམ་ལས་རྒལ་བ་ཡིན་ནོ། །ཁ་ལོ་སྒྱུར་བ་ནི་སྔོན་དུ་འགྲོ་བའོ། །ཐམས་ཅད་ཀྱི་དང་པོར་མྱ་ངན་ལས་འདས་པའི་ལམ་སྟོན་པར་མཛད་པའི་སྒོ་ནས་ཁ་ལོ་སྒྱུར་བ་ཐམས་ཅད་ཀྱི་གཙོ་བོར་གྱུར་པ་ཉིད་ཡིན་པའི་ཕྱིར་ཁ་ལོ་སྒྱུར་བའི་མཆོག་ཡིན་ནོ། །གནས་ཁྱད་དུ་འཕགས་པར་འདྲེན་པར་བྱེད་པའི་ཕྱིར་

འདྲེན་པ་ཡིན་ལ། སྡུག་བསྔལ་ཐམས་ཅད་ཀྱི་འཇུག་པ་ཟློག་པར་བྱེད་ཅིང་མྱ་ངན་ལས་འདས་པའི་གྲོང་ཁྱེར་ལ་རབ་ཏུ་འཇུག་པར་བྱེད་པ་ཉིད་ཀྱི་སྒོ་ནས་གཙོ་བོར་གྱུར་པ་ཉིད་ཡིན་པའི་ཕྱིར་འདྲེན་པའི་མཆོག་ཡིན་ཏེ། དེ་ལྟ་བུའི་ཡོན་ཏན་དང་ལྡན་པའི་ཐུབ་པ་ལ་ཞུ་བར་བྱའོ། །ཅི་ཞིག་ཞུ་བར་
བྱ་ཞེ་ན། འཇིག་རྟེན་དགེ་སྦྱོང་དུ་མཆིས་ཞེས་བྱ་བ་སྨོས་ཏེ། ཀྱེ་བཅོམ་ལྡན་འདས་ཞུས་པ་ལན་གྱི་བཀས་གསུངས་ཤིག་པ་ཡིན་ནོ། །དགེ་སྦྱོང་བཞི་སྟེ་ཞེས་བྱ་བ་ནི་བཅོམ་ལྡན་འདས་ཀྱིས་བཀའ་སྩལ་པ་མངོན་སུམ་དུ་བྱས་ནས་ཞེས་བྱ་བ་ནི་དགེ་སྦྱོང་བཞི་པོ་དེ་དག་ཐེ་ཚོམ་མེད་པར་མཁྱེན་ནས་ཁྱོད་ལ་སྨྲ་བ་སྟེ་
བསྒྲག་པར་བྱའོ། །ལམ་རྒྱལ་བ་ནི་ཞེས་བྱ་བ་ནི་སྐུལ་བྱེད་དོ། །གང་གིས་ཐེ་ཚོམ་སྨྲ་བ་བཅད་ནས་ཞེས་བྱ་བ་ནི་བཅོམ་ལྡན་འདས་སོ། །ཐེ་ཚོམ་ཞེས་བྱ་བ་ནི་ཡིད་གཉིས་ཀྱི་རྒྱུ་ཅན་སེམས་རྣམ་པར་ཚོལ་བ་སྟེ། ཐེ་ཚོམ་སྨྲ་བ་ཆད་པ་གང་ཡིན་པ་དེ་ནི་ཐེ་ཚོམ་སྨྲ་བ་ཆད་པ་སྟེ། ཡིད་གཉིས་ཀྱིས་བག་ལ་ཉལ་མ་
ལུས་པ་སྤངས་པ་ཡིན་ནོ། །འདིས་ནི་མཐོང་བས་སྤང་བར་བྱ་བའི་ཉོན་མོངས་པ་སྤངས་པ་བསྟན་ཏོ། །བསྒོམ་པས་སྤང་བར་བྱ་བ་འདོད་ཆགས་ལ་སོགས་པའི་ཟུག་རྔུ་དང་བྲལ་བ་ཉིད་ཀྱི་ཕྱིར་ཟུག་རྔུ་དང་བྲལ་བ་སྟེ། བསྒོམ་པས་སྤང་བར་བྱ་བའི་ཉོན་མོངས་པ་མ་ལུས་པ་སྤངས་པ་ཞེས་བྱ་བའི་དོན་ཏོ། །ཤིན་ཏུ་
བསྟན་པ་ཉིད་ཀྱི་ཕྱིར་དང་། ཡོངས་སུ་མི་ཉམས་པའི་ཆོས་ཉིད་ཡིན་པའི་ཕྱིར་དང་། འཁོར་བ་མ་ལུས་པའི་ཡོན་གནས་གཅིག་ཉིད་ཡིན་པའི་ཕྱིར་གཞན་གྱི་དྲིང་མི་འཇོག་པ་ཡིན་ནོ། །མྱ་ངན་ལས་འདས་པ་ལ་དགའ་ཞེས་བྱ་བ་ནི་གདུལ་བྱ་ལ་ཕན་འདོགས་པ་ལ་རག་ལས་པ་ཉིད་ཀྱི་ཕྱིར་ཕུང་པོ་ལྷག་མ་དང་
བཅས་པའི་མྱ་ངན་ལས་འདས་པ་ལ་དགའ་བ་ཡིན་ནོ། །དེ་ཉིད་ཀྱི་ཕྱིར་ལྷ་དང་བཅས་པའི་འཇིག་རྟེན་གྱིས་བཅོམ་ལྡན་འདས་དེ་ཉིད་སྟོན་པ་ཡིན་ནོ། །དེ་ནི་ཞེས་བྱ་བ་ནི་བཤད་མ་ཐག་པའི་ཡོན་ཏན་ནོ། །སངས་རྒྱས་བཅོམ་ལྡན་འདས་ཡིན་ལ། སངས་རྒྱས་ཀྱིས་སངས་རྒྱས་ཀྱི་ལམ་གྱི་རྒྱལ་བ་ཡིན་ནོ་ཞེས་བྱ་
བའི་དབང་དུ་བྱས་ནས་ལམ་རྒྱལ་བ་གསུངས་པ་ཡིན་ནོ། །གང་གིས་གསུངས་པའི་ཆོས་རྣམ་པར་ཕྱེ་བ་ནི་གཞན་དག་ལ་རབ་ཏུ་བསྟན་པ་དེ་ནི་ལམ་འཆད་པ་ཡིན་ནོ། །འཕགས་པ་ཤཱ་རིའི་བུ་ཆོས་ཀྱི་སྡེ་དཔོན་གཉིས་པ་ཉིད་ཡིན་པའི་ཕྱིར་དང་། ཆོས་ཀྱི་འཁོར་ལོ་རྗེས་སུ་སྐོར་བར་མཛད་པ་ཉིད་ཀྱི་ཕྱིར་རོ། །

ཆོས་ཁྱད་པར་ཇི་ལྟ་བུ་ཅན་ཞེ་ན། སྨྲས་པ། རབ་མཆོག་ནི་ཁྱད་པར་དུ་འཕགས་པའོ། །ཤེས་པ་ནི་རིག་པ་ཉིད་དོ། །ཇི་ལྟར་ཤེས་པ་ཉིད་ཡིན་ཞེ་ན། མཆོག་ཅེས་བྱ་བ་སྨོས་ཏེ། དེ་ཉིད་ནི་བྱ་བའི་ཁྱད་པར་ཡིན་ཏེ། དེས་ཤིན་ཏུ་ཞེས་བྱ་བའི་ཐ་ཚིག་གོ། །ཐེ་ཚོམ་གཅོད་པར་བྱེད་པས་ན་ཐེ་ཚོམ་གཅོད་པ་སྟེ། དེ་ནི་སེམས་
ཅན་མ་ལུས་པའི་ཐེ་ཚོམ་གཅོད་པ་ཉིད་ཡིན་པའི་ཕྱིར་རོ། །ཉོན་མོངས་པའི་བརྗོད་པ་ཉེ་བར་ཞི་བའི་ཕྱིར་ཐུབ་པ་ཡིན་ལ། མྱ་ངན་ལས་འདས་པའི་ཆོས་མངོན་སུམ་དུ་བྱེད་པའི་ཕྱིར་གཞན་གྱི་དྲིང་མི་འཇོག་པ་ཡིན་ནོ། །ལམ་འཚོ་བ་ནི་འཕགས་པའི་གང་ཟག་བདུན་ནམ་དེ་དག་གི་ནང་ནས་གཞན་པའོ། །འཕགས་
པའི་བདེན་པ་བཞི་ནི་ཆོས་ཀྱི་ཚིག་ཡིན་ཏེ་དེའོ། །ལེགས་བཤད་པ་ཞེས་བྱ་བ་ནི་མཛེས་པར་བཤད་པ་སྟེ། ཆོས་ཀྱི་ཚིག་དེ་ཉིད་ལམ་ཡིན་ལ་ལམ་དེ་ལ་གནས་ནས་འཚོ་བ་ནི་དགེ་བའི་ཆོས་ཀྱི་འཚོ་བས་འཚོ་བར་བྱེད་པའི་ཕྱིར་རོ། །ཡང་དག་སྡོམ་པ་ཞེས་བྱ་བ་ནི་ཟག་པ་མེད་པའི་སྡོམ་པ་དང་ལྡན་པའི་ཕྱིར་རོ། །
དྲན་པ་ཉེ་བར་གཞག་པ་བསྒོམས་པ་རབ་ཏུ་གྱུར་པ་ཐོབ་པ་ཉིད་ཀྱི་ཕྱིར་དྲན་པའི་བདག་ཉིད་ཅན་ཡིན་ནོ། །ཁ་ན་མ་ཐོ་བ་མེད་པའི་ཚིག་སྡུག་བསྔལ་འཕགས་པའི་བདེན་པ་ལ་སོགས་པ་དེ་དག་གི་བསྒོམ་པས་སྤང་བར་བྱའོ། །ཉོན་མོངས་པ་སྤང་བར་བྱ་བའི་ཕྱིར་སློབ་པ་སྟེ། བསྒོམ་པ་གོམས་པར་བྱེད་པ་ཡིན་ནོ།
གང་ཡང་དགེ་སློང་དང་ཚུལ་འདྲ་བ་ཕམ་པར་གྱུར་པ་ལྷག་པར་སྤྱོད་པའི་ཕྱིར་ལམ་སུན་འབྱིན་པ་ཡིན་པར་རིག་པར་བྱའོ། །ཅི་ལྟར་ན་ཚུལ་དང་མི་མཐུན་པར་སྤྱོད་པ་ཡིན་ཞེ་ན། ལེགས་དགའ་ནང་ན་ཞེས་བྱ་བ་ལ་སོགས་པ་སྨོས་པ་ཡིན་ཏེ། གང་དག་བསླབ་པ་འདོད་པ་ཉིད་ཀྱིས་ལུས་དང་ངག་གི་ཀུན་དུ་སྤྱོད་པ་
འདུལ་བ་དེ་དག་ནི་འདིར་ལེགས་དགའ་ཡིན་པར་རིག་པར་བྱའོ། །ལེགས་པ་ལ་དགའ་བ་དེ་དག་གི་ནང་ན་གཡོགས་པར་བྱས་པ་ཉིད་ཀྱི་ཕྱིར་གཡོགས་པ་སྟེ་ཆ་ལུགས་ཡིན་ལ། དེ་དག་ཆ་ལུགས་ཀྱིས་རྣམ་པར་གནས་པར་གྱུར་པ་གང་ཡིན་པའོ། །འདི་ལ་ཞེས་བྱ་བ་ནི་བསྟན་པ་ལའོ། །དེ་ཁྱད་པར་ཇི་ལྟ་བུ་ཅན་ཞེ་ན།
རབ་སྐེམས་ཞེས་བྱ་བ་ལ་སོགས་པ་སྨོས་ཏེ། ཚུལ་མ་ཡིན་པས་ཕ་རོལ་ཟིལ་གྱིས་གནོན་པའི་ངང་ཚུལ་ཅན་རབ་སྐེམས་ཡིན་ནོ། །ལུས་དང་ངག་གི་འཇུག་པ་སྨད་པ་གང་གིས་ཁྱིམ་སུན་འབྱིན་པར་བྱེད་པ་དེ་ནི་ཁྱིམ་སུན་འབྱིན་པ་ཡིན་ནོ། །ཐམས་ཅད་དུ་ཚིག་རབ་ཏུ་གཏོད་པ་ན་ཚིག་ལ་བརྐམ་པ་ཡིན་ནོ། །

སྤྱོད་ལམ་ལོག་པར་སྟོན་པའི་སྒོ་ནས་ཕ་རོལ་པོ་སླུ་བར་བྱེད་པ་ཉིད་ཀྱི་ཕྱིར་སྒྱུ་ཅན་ཡིན་ནོ། །འབྲེལ་པའི་ཚིག་སྨྲ་བ་ཉིད་ཀྱི་ཕྱིར་སྡོམ་མེད་རབ་སྨྲ་ཡིན་ནོ། །ལམ་ནི་འཕགས་པའི་ལམ་ཡིན་ལ་སུན་འབྱིན་པར་བྱེད་པ་ནི་རང་གི་རྒྱུད་ཀྱི་འཇུག་པ་ཡིན་ཏེ། དེའི་ཕྱིར་ལམ་སུན་འབྱིན་པ་ཡིན་ནོ། །
སྐུལ་བྱེད་དགེ་སློང་གཞན་དག་ཀྱང་འདི་འདྲ་བའི་རིགས་ཅན་ཁོ་ན་ཡིན་ནོ་སྙམ་དུ་དོགས་པར་འགྱུར་བ་ལ་དེ་ལྡོག་པར་བྱ་བའི་ཕྱིར། དེ་ལྟར་བསམས་ནས་ཞེས་བྱ་བ་སྨྲས་པ་ཡིན་ནོ། །ཐམས་ཅད་འདི་འདྲར་མི་འགྱུར་རོ། །ཞེས་བྱ་བ་ནི་ཅི་ལྟར་དགེ་སློང་དེ་དག་ཅེས་འདི་ལྟར་བསམས་ཤིང་དཔྱད་ནས་དགེ་སློང་
ཐམས་ཅད་འདི་འདྲ་བར་མི་འགྱུར་རོ། །ཁྱིམ་པ་གང་ཞིག་ཅེས་བྱ་བ་ནི་ཁྱིམ་ན་གནས་པའོ། །ལུང་ཐོས་པ་དང་ལྡན་པའི་ཕྱིར་ཐོས་པ་དང་ལྡན་པའོ། །རྟོགས་པ་དང་ལྡན་པ་ཉིད་ཀྱི་ཕྱིར་འཕགས་པ་ཉན་ཐོས་སོ། །འཕགས་པའི་བདེན་པ་བཞི་པོ་མཛེས་པར་ཤེས་པ་ཉིད་ཀྱི་ཕྱིར་ལེགས་རྟོགས་སོ། །དེ་ལྟར་
ཤེས་ནས་ཞེས་བྱ་བ་ནི་ཡོངས་སུ་བཅད་ནས་སོ། །དེ་ཡིས་དད་པ་ཤེས་མི་འགྱུར། །ཞེས་བྱ་བ་ནི་གང་དགེ་སློང་སྡིག་པ་ཅན་དེ་ལ་དད་པ་མི་སྐྱེ་སྟེ། འདི་ལྟར་དགེ་སློང་འདི་ནི་སྨད་པ་ཡིན་ནོ་སྙམ་པ་དེས། དགེ་སློང་དད་པ་ལྡན་པ་གཞན་ལ་ཡང་མི་སྲུན་པ་སྙམ་དུ་སེམས་པར་འགྱུར་རོ། །དེ་གང་ལས་ཤེ་ན།
ཇི་ལྟར་མི་སྲུན་པ་ཞེས་བྱ་བ་ལ་སོགས་པ་སྨོས་ཏེ། ཇི་ལྟར་མཉམ་པོར་བྱ་བ་དང་མི་བྱ་བ་ཞེས་བྱ་བའི་ཐ་ཚིག་གོ། །གང་ཞེ་ན། མི་སྲུན་པ་མ་ཡིན་པ་ཉེས་པ་མེད་པ་དང་། མི་སྲུན་པ་དང་ལྡན་པ་གཅིག་མཚུངས་པར་བྱས་པའོ། །དག་པ་ཞེས་བྱ་བ་ནི་རྣམ་པར་དག་པའི་ཡོན་ཏན་དང་ལྡན་པ་ཡིན་ལ། མ་དག་པ་ནི་
ཡོན་ཏན་མེད་པའོ། །གང་གཅིག་དང་འབྲལ་བའི་སྡིག་པའི་ལས་སུ་འགྱུར་བའི་སྡིག་པའི་ལས་དེས་སྐྱེ་བོ་སྡིག་པ་མི་བྱེད་པ་ལ་དོགས་པར་འགྱུར་བའི་དོགས་པ་བསྐྱེད་པའི་རྒྱུ་མཚན་དུ་འགྱུར་རོ། །ཇི་ལྟར་ཡོངས་སུ་དག་པའི་སྐྱེ་བོ་རྟོགས་པའི་གནས་སུ་འགྱུར་ཞེ་ན། ཁ་དོག་གཟུགས་ལྡན་ཞེས་བྱ་བ་
ལ་སོགས་པ་སྨོས་ཏེ། གང་གི་ཕྱིར་འདི་ལྟར་ལེགས་པར་མཚོན་པ་དང་ལེགས་པར་ཡོངས་སུ་ཆོད་པར་མི་འགྱུར་བ་དེའི་ཕྱིར་ཅིག་ཤོས་མཐོང་བས་ཡིད་མི་བརྟེན་པ་སྟེ། ཡིད་ཆེས་པར་མི་བྱའོ། །ཅིག་ཤོས་ཀྱང་དེ་ཡིན་ལ་མཐོང་བ་ཡང་དེ་ཡིན་པས་ན་ཅིག་ཤོས་མཐོང་བ་སྟེ། དམན་པ་མཐོང་བ་ཞེས་བྱ་བའི་

བར་དུའོ། །ཅིའི་ཕྱིར་ཡིད་བརྟན་པ་མ་ཡིན་ཞེ་ན། རབ་ཏུ་སྡོམ་པ་ཞེས་བྱ་བ་ལ་སོགས་པ་སྨོས་ཏེ། ནིའི་སྒྲ་ནི་གང་གི་ཕྱིར་འཇིག་རྟེན་འདི་ན་ལེགས་པར་མི་སྡོམ་ཞིང་སྡིག་པ་ལས་མི་ལྡོག་པ་མང་པོ་སྤྱོད་པ་ཤིན་ཏུ་སྡོམ་པས་ནི་རབ་ཏུ་སྡོམ་པས་སོ། །དེ་དག་གི་རྟགས་དེ་ཆ་ལུགས་དེས་ཉེ་བར་མཚན་པ་ཡིན་ནོ། །དེ་ཁྱད་
པར་ཅི་ལྟ་བུ་ཞེ་ན། འདྲ་བ་ཞེས་བྱ་བ་སྨོས་ཏེ། སྐྱེ་བོ་དམ་པ་དང་འདྲ་ཞིང་རྣམ་པར་མཚུངས་པར་གྱུར་པའོ། །ཅི་དང་འདྲ་བར་ཞེ་ན། གསེར་གྱིས་གཡོགས་པའི་རྣ་ཆ་ཞེས་བྱ་བ་སྨོས་ཏེ། གཡོགས་པ་ནི་གསེར་གྱིས་བསྒོས་པའི་སྒོ་ནས་གསེར་གྱི་ཁ་དོག་ཏུ་འགྱུར་བ་ཡིན་ལ། རྣ་ཆ་ནི་རྣ་བའི་རྒྱན་ཡིན་ནོ། །མ་ཤ་ཕྱེད་
ལྕགས་གསེར་གྱིས་བསྒོས་པ་བཞིན། །ཞེས་བྱ་བ་ལ། ལྕགས་ཉུང་ངུ་ནི་མ་ཤ་ཕྱེད་ལྕགས་ཏེ། དེ་གསེར་གྱི་ནང་དུ་བཅུག་ནས་རྣ་རྒྱན་དུ་འདོགས་པ་དེ་བཞིན་དུ། ཤིན་ཏུ་མི་སྲུན་པ་དེ་ཉེས་པར་སྤྱོད་པ་མང་པོ་ལྷག་པར་སྤྱོད་པའི་སྒོ་ནས་ལུས་དང་ངག་གི་སྤྱོད་པ་བཅོས་པ་སྟོན་པའི་ཕྱིར་ཕྱི་རོལ་འཕགས་པའི་
གཟུགས་སུ་སྤྱོད་པ་སྟེ། འཁོར་མང་པོ་དང་ལྡན་པར་གནས་པ་ཡིན་ནོ། །སྦྱིན་པས་བསོད་ནམས་རབ་ཏུ་འཕེལ། །ཞེས་བྱ་བ་ལ་སོགས་པ་ལ་སྦྱིན་པ་སྟེ། གང་ཟག་ལ་ཞིང་དང་ཟ་བ་ལ་སོགས་པའི་སྦྱིན་པ་དད་པས་རབ་ཏུ་སྦྱིན་ན་བསོད་ནམས་འཕེལ་ཞིང་ལེགས་པར་སྤྱོད་པ་རྒྱས་པར་འགྱུར་རོ། །རྟག་ཏུ་
རྒྱུན་མི་འཆད་པར་བསོད་ནམས་མངོན་པར་འཕེལ་བར་འགྱུར་བ་ཞེས་བྱ་བ་འདིར་སྨྲས་པ་ཡིན་ཏེ། གལ་ཏེ་ཡང་ཁྱོད་ཀྱིས་བསོད་ནམས་ཉེ་བར་ལོངས་སྤྱད་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་དེ་ལྟ་ན་ཡང་ཁྱོད་ཀྱི་བསོད་ནམས་འཕེལ་བ་ཁོ་ནར་འགྱུར་གྱི། སྡིག་པ་ནི་མ་ཡིན་ནོ། །ཞེས་སྟོན་
པར་བྱེད་པ་ཡིན་ནོ། །སྡིག་པ་ཅན་གྱི་དགེ་སློང་གི་དབང་དུ་བྱས་ནས་སྨྲས་པ། ཡང་དག་སྡོམ་ལས་ཁོན་མི་འཕེལ་བ་སྟེ། འགའ་ཞིག་ཏུ་ཚུལ་ཁྲིམས་ལས་ཁོན་མི་འཕེལ་ཏེ། གཞན་ལ་གནོད་པ་བྱེད་པ་མེད་ཅེས་བྱ་བའི་ཐ་ཚིག་གོ། །ཡང་ན་ཡང་དག་པར་སྡོམ་པ་ནི་བཟོད་པ་ཡིན་ཏེ། ལུང་ལས།
བཟོད་པ་དཀའ་ཐུབ་དམ་པ་ཡིན། །ཞེས་འབྱུང་བ་དེའི་ཕྱིར་རྒྱུ་དེས་ཁོན་ཏེ་མདུད་པར་འཛིན་པ་སྐྱེ་བར་མི་འགྱུར་རོ། །དགེ་བ་ཅན་གྱིས་སྡིག་པ་སྤོང་། །ཞེས་བྱ་བ་ནི་བྱིས་པ་ལ་སོགས་པའི་ཡོན་ཏན་བསྒོམ་པའི་བདག་ཉིད་ཅན་གྱི་དགེ་བ་གང་ལ་ཡོད་པ་དེ་ནི་དགེ་བ་ཅན་ཏེ། དེས་སྡིག་པ་སྟེ་ཉེས་

པར་སྤྱོད་པ་ཀུན་གྱི་འབྲས་བུའི་བདག་ཉིད་དེ་ཡོངས་སུ་སྤོང་བར་བྱེད་པའམ། མཐོང་བའི་ལམ་མངོན་སུམ་དུ་བྱས་པའོ། །སྲིད་པའི་འབྲས་བུ་ལེགས་པར་སྤྱོད་པ་བསྟན་ནས་མྱ་ངན་ལས་འདས་པའི་འབྲས་བུ་ཉོན་མོངས་པ་ཟད་པ་ལས་མྱ་ངན་ལས་འདས་པ་ཞེས་བྱ་བ་སྨོས་ཏེ། ཐར་
པ་ཡང་ཉོན་མོངས་པ་སྤངས་པ་ལས་ཐོབ་པའམ། འདིས་བསྒོམ་པའི་ལམ་བསྟན་པ་ཡིན་ནོ། །ཁྱིམ་པའི་བདག་ཉིད་ནི་འབྲས་བུ་ལ་སྦྱོར་བའི་དོན་དང་ལྡན་པ་ཡིན་ལ། རབ་ཏུ་བྱུང་བ་ནི་ཚུལ་ཁྲིམས་དང་། སོ་སོ་སྐྱེ་བོ་ངེས་པར་འབྱེད་པའི་ཆ་དང་མཐུན་པ་ཐོབ་པ་ནི་བཟོད་པ་དང་སློབ་པ་དང་། ཉོན་མོངས་
པ་སྤོང་བར་བྱེད་པ་ཞེས་བྱ་བ་གང་ཟག་བཞིའི་ཕན་ཡོན་སྟོན་པར་བྱེད་པ་ཡིན་ནོ། །ན་བ་ཞེས་བྱ་བ་ནི་ནད་ཀྱིས་རྣམ་པར་དཀྲུགས་པས་འཇུག་པ་སྟེ། ན་བ་དང་འདྲ་བར་སྤྱོད་པས་ན་བའོ། །དེ་ཞེས་བྱ་བ་ནི་རྒྱབ་བོ། །ངལ་བསོ་བ་ཞེས་བྱ་བ་ནི་ས་ལ་མཉམ་པར་ཁྱབ་པའི་སྒོ་ནས་དྲང་པོར་བྱ་བའོ། །ལྟ་བ་མང་པོ་
ནི་ཆོས་ཀྱི་མཆོག་སྟེ་སྣམ་སྦྱར་རོ། །དབུ་སྔས་སུ་བཅུག་སྟེ་ཞེས་བྱ་བ་ནི་དེ་རྒྱུ་མཚན་གྱི་བདུན་པ་ཞེས་བྱ་བའི་དབང་དུ་བྱས་ནས་དབུའི་རྒྱུ་མཚན་དུ་བཞག་པ་ཡིན་ནོ། །བསྐྱོད་ཅིང་ཞེས་བྱ་བ་ལ་སོགས་པ་ལ། འོག་གི་ཆའི་ས་འཁྲུགས་ཤིང་བསྐྱོད་པ་ཡིན་ལ། ཆུ་དང་འདྲེས་པར་ཡོངས་སུ་
འཁྲུགས་པས་ན་དཀྲུགས་པ་ཡིན་ཏེ། ཀུན་ནས་འཁྲུགས་པས་ན་རྙོག་པར་བྱས་པ་ཡིན་པའམ། ཡང་ན་འོག་ཏུ་འཁྲུགས་པ་ནི་བསྐྱོད་པ་ཡིན་ལ། བར་དུ་འཁྲུགས་པ་ནི་འཁྲུགས་པ་ཡིན་ཞིང་མ་ལུས་པར་འཁྲུགས་པའི་ཕྱིར་རྙོག་པར་བྱས་པ་ཡིན་ནོ། །གྱད་ཀྱི་བློན་པོ་ཞེས་བྱ་བ་ནི་གྱད་ཀྱི་མིང་ཅན་གྱི་
རྒྱལ་རིགས་གཙོ་བོར་གྱུར་པའོ། །ལམ་དུ་ཞུགས་པ་ནི་ལམ་དུ་ཞུགས་པ་སྟེ། འགྲོ་བ་ལ་རབ་ཏུ་འཇུག་པ་ཞེས་བྱ་བའི་བར་དུའོ། །མཛེས་པ་ནི་ཁ་དོག་གི་སྒོ་ནས་རབ་ཏུ་དང་བ་སྐྱེད་པར་བྱེད་པ་ཉིད་ཀྱི་ཕྱིར་རོ། །དད་པར་མཛད་པ་ནི་དབྱིབས་ཀྱི་སྒོ་ནས་སོ། །མིག་ལ་སོགས་པའི་དབང་པོ་ཞི་བ་གང་ལ་
ཡོད་པ་དེ་ལ་དེ་སྐད་ཅེས་བྱ་སྟེ། དབང་པོ་སྡོམ་པ་བླ་ན་མེད་པ་དང་ལྡན་པའི་ཕྱིར་རོ། །ཡིད་འཁྲུག་པའི་རྒྱུ་བག་ཆགས་དང་བཅས་པའི་བག་ལ་ཉལ་བ་སྤངས་པའི་ཕྱིར་ཡིད་ཞི་བའོ། །དེ་ཉིད་ཀྱི་ཕྱིར་མཆོག་ཏུ་སེམས་དུལ་ཞིང་ཉེ་བར་ཞི་བ་དང་ལྡན་པར་འགྱུར་བ་དང་། ཁྱད་པར་དུ་འཕགས་པའི་ཡིད་ཀྱིས་

སྡོམ་པ་དང་འབྱོར་པའི་ཕྱིར་རོ། །དཔལ་ཏེ་འོད་འདོམ་གང་བའི་མིང་ཅན་གྱི་འོད་ཟེར་རབ་ཏུ་འབར་བའོ། །ཅི་དང་འདྲ་བར་ཞེ་ན། གསེར་གྱི་སྡོང་པོ་བཞིན་ཞེས་བྱ་བ་སྨོས་ཏེ། དེ་ལྟ་བུར་གྱུར་པའི་བཅོམ་ལྡན་འདས་དེ་མཐོང་ནས་སོ། །ཉོན་མོངས་པའི་དྲི་མ་བསལ་བའི་ནུས་པ་དང་ལྡན་པའི་གཙང་སྦྲ་བྱེད་པའི་གཙང་སྦྲ་
དག་ནི་ཚོགས་ཀྱི་ལམ་དང་བཅས་པའོ། །དགའ་བ་ཞེས་བྱ་བ་ནི་བཟོད་པར་གྱུར་པའོ། །འདུ་ཤེས་པར་གྱུར་ཞེས་བྱ་བ་ནི་མི་ཉལ་བའི་འདུ་ཤེས་དང་ལྡན་པར་གྱུར་པའོ། །རྡུལ་གྱིས་གོས་པ་སྨོས་པ་ནི་སྣམ་སྦྱར་ཤིང་རྟའི་ལམ་དང་ཐག་ཉེ་བ་ན་གནས་པ་སྟོན་པ་ཡིན་པར་བལྟ་བར་བྱའོ། །རབ་ཏུ་དད་པའི་
གནས་སྐབས་ནི་རབ་ཏུ་དང་བ་སྔོན་དུ་སོང་བའི་མཆོད་པའོ། །སེར་བ་འབབ་པ་ནི་སེར་བ་ལྷགས་པར་གྱུར་པའོ། །ཐོག་འབབ་པ་ནི་རྡོ་རྗེའི་ཐོག་ལྷགས་པར་གྱུར་པའོ། །འབྱུང་པོའི་ཁང་པ་ནི་གཙུག་ལག་ཁང་གི་མིང་ཡིན་ནོ། །སྒྲ་མཐོན་པོ་ཞེས་བྱ་བ་ལ་སོགས་པ་ལ། སྒྲ་མཐོན་པོ་ཉིད་ནི་ཐག་རིང་པོ་
ཁྱབ་པར་གྱུར་པའི་སྒྲ་ཉིད་ཡིན་ལ། སྒྲ་ཆེན་པོ་ཉིད་ནི་གང་དུ་དུ་མས་ཅིག་ཅར་ཅ་ཅོའི་སྒྲ་འདོན་པ་གང་ཡིན་པ་དེ་ཡིན་པར་རིག་པར་བྱའོ། །སྐྱེ་བོ་ཆེན་པོའི་སྒྲ་ཡང་དག་པར་འབྱུང་བ་རྒྱ་ཆེ་བའི་སྒྲ་ནི་ངེས་པར་སྒྲོགས་པའོ། །གསེར་བཞིན་དུ་སེར་བ་ཞེས་བྱ་བ་ནི་ཚོན་སེར་པོ་ཤིན་ཏུ་བསྒྱུར་བའོ། །རས་
ཟུང་ནི་གོས་ཕྲུགས་སོ། །དགའ་བའི་རྒྱུ་ཉིད་ཡིན་པའི་ཕྱིར་དགའ་བའོ། །ཡིད་མགུ་བར་བྱེད་པ་ཉིད་ཀྱི་ཕྱིར་ཡིད་དུ་འོང་བས་ཏེ། དེ་ཉིད་ཀྱི་ཕྱིར་བཅང་བར་བྱ་བ་ཡིན་ནོ། །ཡང་བདག་ཀྱང་བཅོམ་ལྡན་འདས་ལ་ཉེ་བར་གནས་སོ་ཞེས་བྱ་བ་ནི་སྐྱེས་བུ་དམ་པའི་སྙན་པའི་ཚིག་ཡིན་ནོ། །ཆེར་གསལ་
བ་ཞེས་བྱ་བ་ནི་བཅོམ་ལྡན་འདས་ཀྱི་སྐུའི་ཁ་དོག་གི་འོད་ཀྱིས་གོས་དེ་ལྷག་པར་གསལ་བར་བྱས་པ་བཞིན་དུ་གསལ་བར་བསྟན་པ་ཡིན་ཏེ། །གོས་ཁོ་ན་ལས་འོད་འདི་ཤེས་པར་བྱ་བ་ཡིན་པ་དེ་བས་ན་བཞིན་གྱི་སྒྲར་བྱས་པ་ཡིན་ནོ། །ལྷག་གི་བར་དུ་ཞེས་བྱ་བ་ནི་ལོ་ཉི་ཤུའི་འོག་ཏུ་ལོ་སུམ་ཅུ་རྫོགས་
པའི་ནང་ནི་ལྷག་པའི་སྒྲ་ཡིན་པར་རིག་པར་བྱའོ། །འགྱོད་པ་ཞེས་བྱ་བ་ནི་བཅོམ་ལྡན་འདས་བདག་གི་བསོད་སྙོམས་བཞེས་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པའི་དེ་བས་ན་བདག་ནི་སྐལ་བ་མེད་པའོ་ཞེས་བྱ་བའི་སྔོན་དུ་སོང་བ་ཅན་གྱི་ཕྱིར་

གདུང་བ་དེ་ནི་འགྱོད་པ་ཡིན་ནོ། །གཞན་གྱིས་ཞེས་བྱ་བ་ནི་ཕྱིས་གདུང་བ་དང་རྗེས་སུ་མཐུན་པའི་ཚིག་བརྗོད་པའོ། །མ་རྙེད་པ་ཞེས་བྱ་བ་ནི་ཁྱོད་འདི་ལས་ཉམས་པར་གྱུར་པ་སྟེ། མ་ཐོབ་ཅིང་འཕེལ་བར་མ་གྱུར་པའོ། །སྡུག་བསྔལ་སྐྱེད་པར་བྱེད་པ་ཉིད་ཀྱི་ཕྱིར་ཉེས་པ་རྙེད་པའོ། །
ཐ་མ་ཞེས་བྱ་བ་ནི་ཕྱི་མ་མེད་པའོ། །ཕུང་པོ་ལ་སོགས་པ་ལྷག་མ་མེད་པའི་ཕྱིར་མྱ་ངན་ལས་འདས་པའི་དབྱིངས་སོ། །སོ་སོར་གསལ་བར་བྱའོ་ཞེས་བྱ་བ་ནི་བཤད་པར་གྱུར་པའི་ཚིག་གིས་གསལ་བར་བྱའོ། །རྣམ་པར་སྨིན་པ་མཚུངས་པ་ཞེས་བྱ་བ་ནི་རྣམ་པར་སྨིན་པའི་འབྲས་བུ་མཚུངས་པ་སྟེ།
བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཁོང་དུ་ཆུད་པའི་ཚེ་ཉོན་མོངས་པ་དང་ལྷའི་བུའི་བདུད་ཕམ་པར་མཛད་པ་དང་། བླ་ན་མེད་པའི་སེམས་ཅན་གྱི་དོན་མཛད་པར་རྩོམ་པ་དང་། ཉོན་མོངས་པའི་བག་ཆགས་དང་བཅས་པ་སྤངས་པའི་ཕྱིར། ཐུགས་ཤིན་ཏུ་ཞི་བར་གྱུར་པ་
ཡིན་ལ། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པའི་ཚེ་ཡང་ཕུང་པོ་དང་འཆི་བདག་གི་བདུད་ལས་རྒྱལ་ཞིང་གདུལ་བྱའི་དགོས་པ་མ་ལུས་པ་བསྒྲུབས་པ་དང་། མཆོག་ཏུ་ཞི་བ་ལ་འཇུག་པ་ཡིན་པ་དེ་བས་ན། བསོད་སྙོམས་དེ་གཉིས་རྣམ་པར་སྨིན་པ་མཚུངས་པར་
བསྟན་པ་ཡིན་ནོ། །ཚེ་དང་ལྡན་པ་ཞེས་བྱ་བ་ནི་ཚེ་སྐྱེད་པར་བྱེད་པའོ། །བྱས་པ་ནི་བསྒྲུབས་པའོ། །བསམས་པ་ཞེས་བྱ་བ་ནི་བསམས་བཞིན་དུ་བྱས་པ་དང་འགྱོད་པ་ལ་སོགས་པའི་ཉེས་པ་བཅོམ་པར་མ་གྱུར་པ་དང་། ཡོངས་སུ་རྫོགས་པ་དང་ལྡན་པའོ། །གཏུམ་པ་ཞེས་བྱ་བ་ལ་སོགས་པ་ལ་དྲག་ཏུ་
འཁྲུགས་པ་ནི་གཏུམ་པ་ཡིན་ལ། མྱུར་དུ་ཁྲོ་བའི་འབྲས་བུ་སྐྱེད་པར་བྱེད་པ་ཉིད་ཀྱི་ཕྱིར་མི་བགྲུངས་པ་ཡིན་ཞིང་ལུས་དང་ངག་གི་སྤྱོད་པ་རྩུབ་པ་ཉིད་ཀྱི་ཕྱིར་རྩུབ་པ་ཡིན་ནོ། །ཡང་ན་ཡིད་ཀྱི་འགྱུར་བ་ལས་གཏུམ་པ་ཡིན་ནོ། །ལུས་ཀྱི་འགྱུར་བ་ལས་མི་བགྲུངས་པ་ཡིན་ཞིང་། ངག་གི་འགྱུར་བ་ལས་རྩུབ་པ་
ཡིན་ནོ། །ཀུན་ནས་གཤེ་བ་ནི་ཕ་རོལ་གྱིས་གནོན་པའི་སྒོ་ནས་གཤེ་བར་བྱེད་པའོ། །ཁྲོ་བར་བྱེད་པས་ན་ཁྲོ་བའོ། །མི་འདོད་པའི་ཚིག་བརྗོད་པའི་ཕྱིར་ཡོངས་སུ་སྨྲ་བའོ། །དགེ་འདུན་ཐམས་ཅད་ཀྱིས་མི་སྨྲ་བའི་སྡོམ་པ་བྱས་པ་ནི་ཚངས་པའི་ཆད་པ་ཡིན་ཏེ། བསོད་ནམས་སྐྱེ་བའི་རྒྱུ་མཚན་ཡོངས་

སུ་གནས་པའི་སྡོམ་པ་ཡང་འདི་ལ་སྦྱིན་པར་བྱ་བའམ། འཐབ་ཀྲོལ་བྱེད་པ་བསྡིགས་པར་བྱའོ་ཞེས་གསུངས་པས་བསྡིགས་པའི་ལས་ལ་འདིར་ཚངས་པའི་ཆད་པ་ཞེས་བྱ་བའོ། །སྐྱོ་བར་འགྱུར་རོ་ཞེས་བྱ་བ་ནི་ཐོག་མར་སྐྱོ་བ་ཡིན་ནོ། །སྐྱོ་བར་འགྱུར་ཏང་ཞེས་བྱ་བ་ནི་རྒྱུན་གྱི་སྒོ་ནས་སྐྱོ་བ་དང་ལྡན་པར་འགྱུར་བའོ། །
ཀཱ་ཏྱཱ་ཡ་ན་ལ་གདམས་པ་བཞིན་དུ་ཞེས་བྱ་བ་ནི་དྲང་སྲོང་མ་ལ་གདམས་པ་སྟེ། ཀཱ་ཏྱཱ་ཡ་ན་འཇིག་རྟེན་གཉིས་ལ་བརྟེན་པ་ཡིན་ཏེ་ཞེས་བྱ་བ་ལ་སོགས་པའི་སྒོ་ནས་ཤེས་པར་བྱའོ། །ཤེས་བར་བྱའོ་ཞེས་བྱ་བ་ནི་བྱང་ཆུབ་ཀྱི་ཡན་ལག་བརྗོད་པ་ལ་སྤོབས་པ་དང་བཅས་པར་བྱ་བ་ཡིན་ནོ། །དབེན་པ་ལ་གནས་པ་
ཞེས་བྱ་བ་ལ་སོགས་པའི་ཚིག་གི་རྣམ་པར་བཤད་པ་ནི་སྔ་མ་བཞིན་ནོ། །སོ་སོར་དམིགས་པ་ལ་བསྒོམ་པའི་སྒོ་ནས་བསྟེན་པར་བྱས་པའོ། །སྦྱོར་བའི་སྒོ་ནས་བསྒོམས་པའོ། །རྟག་ཏུ་སྦྱོར་བའི་སྒོ་ནས་མང་དུ་བྱས་པའོ། །གྱ་ནོམ་པ་ཉིད་ཀྱི་ཕྱིར་དང་། རོ་མངར་བ་དང་འདྲ་བར་མངོན་པར་འདོད་པ་ཉིད་
ཡིན་པའི་ཕྱིར་ཆོས་མངར་བ་ཡིན་ལ། དེ་མཉན་པའི་ཕྱིར་ནི་མཉན་པའི་དོན་དུའོ། །བྱང་ཆུབ་ཀྱི་ཡན་ལག་སྟོན་པ་ལ་རྣམ་པར་མཁས་པ་ལ་འདིར་མཁས་པ་ཡིན་པར་རིག་པར་བྱའོ། །བློ་ལྡན་ནི་མྱུར་དུ་ཡོངས་སུ་ཤེས་པའི་ནུས་པ་དང་ལྡན་པའོ། །དགེ་བ་ནི་ཁོང་དུ་ཆུད་པར་བྱེད་པའི་ཚིག་བརྗོད་པར་
ནུས་པ་ལ་བྱང་པའོ། །ཐུབ་པ་ཞེས་བྱ་བ་དེ་ནི་འདིར་བོད་པའི་ཚིག་ཡིན་ནོ། །རོ་ཤེས་པས་ཞེས་བྱ་བ་ནི་བྱང་ཆུབ་ཀྱི་ཡན་ལག་གིས་རོ་སོ་སོར་ཉམས་སུ་མྱོང་བར་གྱུར་པའོ། །ཚབས་ཆེ་བ་ནི་ཤིན་ཏུ་དྲག་པར་གྱུར་པའོ། །ཆོས་མ་ལུས་པར་སྟོན་པར་མཛད་པ་པོ་ཉིད་ཡིན་པའི་ཕྱིར་ཆོས་ཀྱི་བདག་པོ་
ཡིན་ནོ། །གང་ཡང་མཆོག་ཏུ་གསུངས་པའི་འཕགས་པ་ཤཱ་རིའི་བུ་དེ་ཡང་འཕགས་པ་དགའ་བོས་གསུངས་པའི་ཆོས་མཉན་པའི་ཕྱིར་སོང་བ་སྟེ། ཆོས་ཀྱི་ཤུགས་ཐོབ་པར་གྱུར་པའོ། །རིགས་དང་མི་རིགས་ཤེས་པ་ནི། །ཞེས་བྱ་བ་ནི་ཆོས་ཀྱི་མཚན་ཉིད་ཀྱི་ཚུལ་ལ་མཁས་པར་གྱུར་པའོ། །བཀའ་
ཤེས་པའི་སེམས་ནི་ཁོང་དུ་ཆུད་པ་དང་རྗེས་སུ་མཐུན་པའི་སེམས་སོ། །ཐོས་མ་ཐག་ཏུ་ཟང་ཟིང་གི་དགའ་བ་ཐོབ་པར་འགྱུར་ལ། འདིར་ནི་འདོད་པའི་ཡོན་ཏན་ལ་ལྟོས་པ་མེད་པས་ཟང་ཟིང་མེད་པའི་དགའ་བ་ཡིན་ནོ། །དགའ་བ་སྔོན་དུ་སོང་བ་ཅན་སེམས་ལས་སུ་རུང་བའི་མཚན་ཉིད་སེམས་ཤིན་ཏུ་སྦྱངས་

པ་སྐྱེ་བར་འགྱུར་ལ། ཤིན་ཏུ་སྦྱངས་པའི་དེ་མ་ཐག་ཏུ་བདེ་བར་འགྱུར་ཞིང་། བདེ་བ་ལ་གཞོལ་བའི་སེམས་ཀྱིས་ཏིང་ངེ་འཛིན་རྩེ་གཅིག་པ་སྐྱེ་བར་འགྱུར་བའོ། །འདུ་བྱེད་ལ་ནི་སྐྱབས་སུ་ཤེས་པར་བྱ། །ཞེས་བྱ་བ་ལ་གང་གི་ཕྱིར་འདུས་བྱས་མ་ལུས་པ་ལ་རྣལ་འབྱོར་པ་སེམས་སྐྱོ་
བར་འགྱུར་བ་དེ་དག་སྐྱབས་ཀྱི་ཕྱིར་རྟོག་པ་མ་ཡིན་ནོ་ཞེས་བྱ་བར་མཁྱེན་ནས་སྡུག་བསྔལ་ལས་ཡོངས་སུ་བསྲུང་བའི་དོན་ལ་སྐྱབས་ཀྱི་དོན་དུ་གསུངས་པ་ཡིན་ཏེ། འདུས་བྱས་ཀུན་སྡུག་བསྔལ་མ་ལུས་པའི་རྒྱུ་ཉིད་ཡིན་པའི་ཕྱིར་རོ། །སེམས་ཅན་ཆགས་པ་མེད་པར་གྱུར་ན་ཉོན་མོངས་པའི་འཆིང་བ་ལས་
རྣམ་པར་གྲོལ་བར་འགྱུར་རོ། །སྐྱོ་ནས་སུ་ཞེས་བྱ་བ་འདིས་ནི་ཕན་ཡོན་བསྟན་པ་ཡིན་ནོ། །མྱ་ངན་འདའ་ཞེས་བྱ་བ་ནི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་སུའོ། །ཅི་ཞིག་བྱས་ནས་ཤེ་ན། སྐྱོ་ནས་སུ་ཞེས་བྱ་བ་ལ་སོགས་པ་སྨོས་ཏེ། སྲིད་པར་འགྲོ་བ་སྟེ་ཇི་སྲིད་པའི་རྣམ་པ་ལས་སྐྱོ་
བར་གྱུར་པའོ། །སྐྱོ་བ་ལས་ལྷ་དང་མི་རྣམས་ལ་ཆགས་པ་མེད་པ་སྟེ། འཆིང་བ་མེད་པར་འགྱུར་རོ། །མེ་ལྟ་བུ་ཞེས་བྱ་བ་ལ་མེ་ལྕེ་གང་ལ་ཡོད་པ་དེ་ནི་མེ་ལྕེ་ཅན་ཏེ་མེ་ཡིན་ནོ། །དེའི་དོན་ནི་འདི་ཡིན་ཏེ། ཇི་ལྟར་མེ་བུད་ཤིང་ཞེས་བྱ་བའི་རྒྱུ་ཡོངས་སུ་ཟད་ན་ཞི་བར་འགྱུར་བ་དེ་བཞིན་དུ་ཉོན་མོངས་པ་མ་ལུས་པའི་རྒྱུ་
ཡོངས་སུ་ཟད་པ་ན་དགྲ་བཅོམ་པ་ཡོངས་སུ་མྱ་ངན་ལས་འདའ་བར་འགྱུར་རོ། །དབུ་བྱང་ཕྱོགས་སུ་སྟོན་ལ་ཞེས་བྱ་བ་ལ་ཅིའི་ཕྱིར་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་ཚེ་དབུ་བྱང་ཕྱོགས་སུ་སྟོན་ལ་ཁྲི་ཤོམས་ཤིག་ཅེས་བཀའ་སྩོལ་བར་མཛད་ཅེ་ན། འདི་ལ་བཅོམ་ལྡན་འདས་འདི་སྐད་དུ་འདི་
ལྟ་སྟེ། ང་ཡོངས་སུ་མྱ་ངན་ལས་འདས་པ་ན་བྱང་ཕྱོགས་ཀྱི་རྒྱུད་ཉིད་དུ་རྟོགས་པ་དང་། བསམ་གཏན་དང་ཟློས་པའི་སྒོ་ནས་ངའི་བསྟན་པ་རབ་ཏུ་གསལ་བར་འགྱུར་རོ་ཞེས་གསུངས་པར་སྟོན་ཏོ། །ཤིན་ཏུ་མྱུར་བར་ཞེས་པ་ནི་ཤིན་ཏུ་མགྱོགས་པར་རོ། །ཤིན་ཏུ་ཞེས་བྱ་བ་ནི་འདིར་གུས་པས་ལན་གཉིས་བརྗོད་
པའོ། །བྱ་བ་དང་བྱ་བ་མ་ཡིན་པ་རབ་ཏུ་གསལ་བར་མཛད་པའི་སྒོ་ནས་བཅོམ་ལྡན་འདས་འཇིག་རྟེན་གྱི་མིག་ཏུ་གྱུར་པ་ཡིན་པ་དེའི་ཕྱིར་མིག་ནུབ་པར་གྱུར་པ་ཞེས་སྨོས་སོ། །དེ་དང་དེ་ནས་ཞེས་བྱ་བ་ནི་མིང་མ་བརྗོད་པའི་ཕྱོགས་ནས་སོ། །ཟབ་པ་དག་ལས་ཟབ་པ་དང་ཟབ་ཅིང་ཟབ་པའོ། །ལོངས་སྤྱོད་ནི་

ཤེས་པས་ཉམས་སུ་མྱོང་བའོ། །འབའ་ཞིག་ཅེས་བྱ་བ་ནི་ཉོན་མོངས་པ་སྤང་བ་ལ་གྲོགས་ལ་ལྟོས་པ་མེད་པའོ། །མྱ་ངན་མ་བྱེད་ཅེས་བྱ་བ་ནི་སྡུག་པ་དང་བྲལ་བ་ལས་སྐྱེས་པའི་གདུང་བ་མ་སྐྱེད་ཅིག་པའོ། །དུབ་པར་མ་བྱེད་ཅེས་བྱ་བ་ནི་དེའི་རྒྱུ་ཅན་ཁོ་ནའི་ལུས་དུབ་པར་མ་བྱེད་ཅིག་པའོ། །སྨྲེ་སྔགས་མ་འདོན་ཅིག་
ཅེས་བྱ་བ་ནི་ངག་གི་རབ་ཏུ་བརྗོད་པ་ཡང་མ་བྱེད་ཅིག་པའོ། །ཉེ་བར་གནས་པ་ཞེས་བྱ་བ་ནི་བསྙེན་བཀུར་བྱས་པའོ། །གང་གིས་ཤེ་ན་བྱམས་པའི་ཞེས་བྱ་བ་ལ་སོགས་པ་སྨོས་ཏེ། གྲོགས་པོ་ལས་བྱུང་བའི་ལུས་ཀྱི་ལས་ནི་བྱམས་པ་ཡིན་ཏེ། གྲོགས་པོ་ཉིད་ཀྱི་སྒོ་ནས་ཞེས་བྱ་བའི་ཐ་ཚིག་གོ། །ཕན་པ་
ཞེས་བྱ་བ་ནི་རང་ལ་ཕན་པའི་བློ་སྟེ། དགེ་བ་ཚོལ་བའི་སྒོ་ནས་ཡིན་གྱི། རྫས་ལ་ཆགས་པའི་སྒོ་ནས་ནི་མ་ཡིན་ནོ། །བདེ་བ་ཞེས་བྱ་བ་ནི་ཇི་ལྟར་ན་བཅོམ་ལྡན་འདས་བདག་གི་བསྙེན་བཀུར་གྱིས་བདེ་བར་འགྱུར་ཞེས་བྱ་བའི་བསམ་པ་འདིས་བདེ་བར་སེམས་པའོ། །གཉིས་སུ་མེད་པ་ཞེས་བྱ་བ་ནི་ཚུལ་
གཅིག་པ་སྟེ། རྩོམ་པའི་དུས་ཆེན་པོ་དང་ཕྱིས་སྨན་པར་གྱུར་པའི་སྒོ་ནས་ཞེས་བྱ་བའི་ཐ་ཚིག་གོ། །ཚད་མེད་པ་ཞེས་བྱ་བ་ནི་འབྲས་བུ་ཚད་མེད་པ་ཉིད་ཀྱི་ཕྱིར་ཚད་མེད་པ་ཞེས་གསུངས་པའམ། ཡོན་ཏན་ཚད་མེད་པ་ཅན་གྱི་སེམས་ཅན་གྱི་ཡུལ་ཉིད་ཡིན་པའི་ཕྱིར་རོ། །གང་སྐྱེས་ཤིང་འབྱུང་བ་ཞེས་
བྱ་བ་ལ་སོགས་པའི་རྣམ་པར་བཤད་པ་ནི་སྔ་མ་བཞིན་ནོ། །མགུ་བར་བཞེད་ནས་ཞེས་བྱ་བ་ནི་དགའ་བར་བཞེད་པའམ། རབ་ཏུ་མགུ་བར་བཞེད་པའོ། །གུས་པ་དང་བཅས་པར་ཆོས་འཆད་ཅེས་བྱ་བ་ནི་ཆོས་དང་ཐོག་མར་སྟོན་པ་ལ་གུས་པ་ཉེ་བར་འཇོག་པའམ། ཉན་པ་པོ་ནི་སྐྱེ་བོ་ཁོང་དུ་ཆུད་པའི་ཕྱིར་
འབད་པ་ལ་བརྟེན་ནས། ཇི་ལྟར་ན་བདག་གི་ངག་ཉན་པ་པོའི་སྐྱེ་བོས་ཁོང་དུ་ཆུད་པར་འགྱུར་ཞེས་དེ་ལྟར་གུས་པ་ཉེ་བར་བཞག་ནས་སྟོན་པར་བྱེད་དོ། །གྲོང་ཁྱེར་དམ་པ་ཞེས་བྱ་བ་ལ་སོགས་པ་ལ་ཆུང་བ་ཉིད་ཀྱི་ཕྱིར་དང་། སྨད་པ་ཉིད་ཡིན་པའི་ཕྱིར་གྲོང་ཁྱེར་ངན་པའོ། །དགོན་པ་དང་འདྲ་བར་གྲོང་
ཁྱེར་ཀུན་གྱི་ཐ་སྙད་དུ་བྱ་བ་མེད་པའི་ཕྱིར་རོ། །སྨོད་པར་བྱ་བའི་ཡུལ་ནི་ཡུལ་ངན་པའོ། །རྫོང་དང་འདྲ་བར་སྐྱེ་བོ་ཉུང་ངུ་གནས་པའི་གནས་ཉིད་ཡིན་པའི་ཕྱིར་མཁར་གྱི་གྲོང་ཁྱེར་རོ། །ར་བ་དང་། ཡོལ་བ་ལ་སོགས་པ་དང་། འོབས་མེད་པའི་ཕྱིར་གྲོང་ཁྱེར་ཡུ་བོ་སྟེ། ཡལ་ག་ཙམ་དུ་གྱུར་པ་ཉིད་ཀྱི་ཕྱིར་རམ་གཙོ་བོར་

གྱུར་པ་མ་ཡིན་པའི་ཕྱིར་རོ། །ཕྱི་རོལ་གྱི་སྐྱེ་བོ་འཁོད་པའི་གནས་ཉམས་པའི་ཕྱིར་དང་། རྩ་བའི་གྲོང་ཁྱེར་ལྷག་མ་ཙམ་ཉིད་ཡིན་པའི་ཕྱིར་གྲོང་ཁྱེར་གྱི་ཐོ་ཡོར་ཡིན་ཏེ། གྲོང་ཁྱེར་དང་ཚུལ་འདྲ་བ་ཅན་ཞེས་བྱ་བའི་བར་དུའོ། །ཡོངས་སུ་མྱ་ངན་ལས་འདའ་སྙམ་དུ་དགོངས་པ་ནི་མཁྱེན་པའོ། །
འོབས་ཀྱི་ནང་གི་ལོགས་སུ་དགྲ་བོ་བསྣུན་པར་བྱ་བའི་ཆེད་ཀྱི་རིབ་མའི་རྣམ་པ་ཅན་གྱི་ཤིང་གིས་བསྐོར་བ་ནི་ར་བ་ཡིན་ལ། དེ་ཡང་གསེར་ལ་སོགས་པ་ལས་བྱས་པ་ཡང་ཡོད་པ་ཡིན་ནོ། །དེ་ཚད་ཇི་ཙམ་ཞེ་ན། སྨྲས་པ། སྐྱེས་བདུན་གྱི་ཚད་ཡིན་ལ། སའི་ནང་དུ་བཞི་པའི་ཆ་སྟེ་ཕྱེད་གང་ལ་ཡོད་པ་ཞེས་བྱ་བའི་དབང་
དུ་བྱས་ནས་སྐྱེས་བུ་ཕྱེད་དང་བཞིའི་ཚད་དུ་དགོས་པ་ཡིན་ནོ། །བསྐྱོད་པ་ཞེས་བྱ་བ་ནི་འཕངས་པར་གྱུར་པའོ། །ཡན་ལག་ལྔ་དང་ལྡན་པའི་སིལ་སྙན་གྱི་རྣམ་པར་བཤད་པ་ནི་སྔ་མ་བཞིན་ནོ། །འོག་གཞི་ནི་འོག་གི་རྟེན་དུ་གྱུར་པའོ། །སྡོང་བུ་ནི་དབུས་སུ་བཅུག་པའོ། །ཆུ་ལས་སྐྱེས་པ་ནི་ཆུ་ལས་སྐྱེས་པའོ། །
ཕྲེང་བར་འཐད་པ་ནི་ཕྲེང་བར་རུང་བ་སྟེ། མེ་ཏོག་ཨུཏྤ་ལ་ལ་སོགས་པའོ། །སུ་གན་དྷི་ཀ་དང་། མྲྀ་དུ་གན་དྷི་ཀ་ནི་མེ་ཏོག་གི་རྣམ་པ་ཡིན་ནོ། །རང་གི་དུས་མ་ལུས་པར་ཁྱབ་པའི་ཕྱིར་ཐམས་ཅད་པ་མ་ཡིན་ནོ། །དུས་མ་ལུས་པར་ཁྱབ་པའི་ཕྱིར་དུས་ཐམས་ཅད་པ་ཡིན་ནོ། །མི་འགོག་པ་ནི་སྐྱེ་བོ་ཐམས་
ཅད་ཀྱིས་ཉེ་བར་ལོངས་སྤྱོད་པ་ཉིད་ཀྱི་ཕྱིར་རོ། །ཐང་ལས་སྐྱེས་པ་ཉིད་ཀྱི་ཕྱིར་ཐང་ལས་སྐྱེས་པའོ། །ར་རོ་བ་ཞེས་བྱ་བ་ལ་སོགས་པ་ལ་ར་རོ་བ་ནི་མྱོས་བྱེད་ཀྱིས་མྱོས་པས་དཀྲུགས་པའོ། །གཡོན་ཅན་ནི་ཕ་རོལ་པོ་སླུ་བར་བྱེད་པའོ། །གཞུངས་པ་ནི་རྒྱན་དང་བུད་མེད་ལ་ཞེན་པའོ། །རྩེ་བར་འདོད་པ་ནི་ཕྱི་
རོལ་གྱི་ཆ་བྱད་ཀྱིས་སོ། །སྟེག་པར་འདོད་པ་ནི་ལུས་ཀུན་ནས་འཁྱུད་པས་སོ། །དགའ་མགུར་སྤྱོད་པར་འདོད་པ་ནི་འཁྲིག་པས་སོ། །སྒྲའི་བཀོད་པ་ནི་རོལ་ཆ་མང་པོ་ཅིག་ཅར་དཀྲོལ་བ་ལས་སྒྲ་བྱུང་བའམ། ཡང་ན་སྒྲའི་བཀོད་པ་ནི་རོལ་ཆའི་བྱེ་བྲག་གི་སྒྲ་ཆེན་པོ་ལ་བྱའོ། །མི་རྣམས་ཀྱི་འབྱོར་བ་ཞེས་བྱ་བ་
ནི་མི་རྣམས་ཁོ་ནའི་ཚེ་རིང་བ་ལ་སོགས་པ་ལ་འབྱོར་པ་ཞེས་བྱ་བ་དེའི་ཕྱིར་ལྷ་རྣམས་ལས་མི་བྱེ་བྲག་ཏུ་བྱས་པ་ཡིན་ནོ། །ལྷ་རྣམས་ནི་རང་བཞིན་གྱིས་ཚེ་རིང་བ་ལ་སོགས་པའི་ཡོན་ཏན་དང་ལྡན་པར་འབྱུང་བ་ཉིད་ཀྱི་ཕྱིར་རོ། །ཚེ་རིང་པོར་ཀུན་ནས་ཁྱབ་པའི་ཕྱིར་ཚེ་རིང་བའོ། །ཇི་ལྟར་འཕགས་པ་བཞིན་དུ་འཚོ་

བའི་ཕྱིར་ཡུན་རིང་དུ་གནས་པར་གྱུར་པའམ། གཞོན་ནུ་ལ་སོགས་པའི་གནས་སྐབས་སུ་ཡུན་རིང་དུ་གནས་པའི་ཕྱིར་ཡུན་རིང་དུ་གནས་པར་གྱུར་པའོ། །མིའི་ཁ་དོག་ལས་ཤིན་ཏུ་འདས་པ་ཞེས་བྱ་བ་ནི་མིའི་ཁ་དོག་དང་གཟུགས་ལས་ཁ་དོག་ཁྱད་པར་དུ་འཕགས་པ་ཐོབ་པ་ཡིན་ནོ། །གནོད་པ་ཉུང་ཞེས་བྱ་བ་ལ་
གནོད་པ་སྟེ། ཕྱི་རོལ་གྱི་རྣམ་པར་འཚེ་བའི་གདུང་བ་དེ་རབ་ཏུ་ཆུང་བ་གང་ལ་ཡོད་པ་དེ་ནི་གནོད་པ་ཆུང་བའོ། །རང་གི་ལུས་ལས་བྱུང་བའི་ནད་ཡོད་པ་ནད་མེད་པའི་རང་བཞིན་ཅན་དུ་གྱུར་པ་སྟེ། ནད་ཀྱི་རྣམ་པ་མེད་པ་ཡིན་ནོ། །འཇུ་བ་ནི་འཇུ་བར་བྱེད་པའི་མེ་ཡིན་ཏེ། འཇུ་བར་བྱེད་པ་དེ་དང་ལྡན་པ་ཡིན་ནོ། །འཇུ་
བར་བྱེད་པ་དང་ལྡན་པ་ཁྱད་པར་ཇི་ལྟ་བུ་ཞེ་ན་མཉམ་པ་ཞེས་བྱ་བ་སྨོས་ཏེ་མཉམ་པའི་གནས་སྐབས་ཀྱི་རྒྱུ་ཉིད་ཡིན་པའི་ཕྱིར་འཇུག་པའི་གནས་དང་མཉམ་པའོ། །ཟས་ཡང་དག་པར་འཇུ་བར་བྱེད་པའི་ཕྱིར་འཇུ་བར་བྱེད་པའོ། །ཧ་ཅང་ཡང་མི་དྲོ་ཞེས་བྱ་བ་ནི་འགྱུར་བྱེད་ཀྱི་ནད་དང་འདྲ་བར་ཤིན་ཏུ་བྲུ་བ་ཚ་བ་མ་
ཡིན་པའོ། །ཧ་ཅང་ཡང་མི་གྲང་ཞེས་བྱ་བ་ནི་ཤིན་ཏུ་ནུས་པ་མེད་པ་མ་ཡིན་པའོ། །ནད་སྐྱེད་པར་བྱེད་པ་ཉིད་མ་ཡིན་པའི་ཕྱིར་གནོད་པ་མེད་པའོ། །དུས་དང་དུས་སུ་བདེ་བ་སྐྱེད་པ་ཉིད་ཀྱི་ཕྱིར་དུས་ཀྱི་བདེ་བའོ། །གྲོང་འདབ་ན་ཡོད་པས་ན་གྲོང་འདབ་པའོ། །ལྗོངས་ན་ཡོད་པས་ན་ལྗོངས་པའོ། །དལ་གྱིས་ཞེས་བྱ་
བ་ནི་རྡེག་པ་མེད་པར་དབྱུ་གུས་དལ་གྱིས་དེད་པའོ། །བགས་ཀྱིས་ནི་རང་གི་འབད་རྩོལ་གྱིས་མྱུར་དུ་འགྲོ་བ་འགོག་པའོ། །ནོར་བུ་རིན་པོ་ཆེ་ཞེས་བྱ་བ་ནི་འོད་གསལ་བའི་བདག་ཉིད་ཅན་དང་། རིན་ཆེ་བ་དང་རྙེད་དཀའ་བའོ། །གླང་པོ་རིན་པོ་ཆེ་ཡང་དེ་དང་འདྲ་བའོ། །གྲོང་དཔོན་ཞེས་བྱ་བ་ནི་གཙོ་བོར་གྱུར་པའི་
མིང་ལས་བོད་པའོ། །གོས་སེར་པོ་དང་རྒྱན་ལ་སོགས་པ་བཀྲ་ཤིས་པར་འདོད་པ་ཉིད་ཡིན་པ་དེའི་ཕྱིར་འདི་སྐད་དུ། འདི་ལྟར་རྒྱན་ཐམས་ཅད་སེར་པོར་གྱུར་པ་ཞེས་བྱ་བ་ལ་སོགས་པ་སྨོས་པ་ཡིན་ནོ། །སྟན་བཟང་པོ་ཞེས་བྱ་བ་ནི་རྒྱལ་པོ་ལ་འོས་པའི་སྟན་ཡིན་ནོ། །མཐོང་བ་ཞེས་བྱ་བ་ནི་མཐོང་བར་གྱུར་
པ་ནའོ། །ཡིད་འཕྲོག་པ་ཞེས་བྱ་བ་ནི་འདོད་ཆགས་སྐྱེ་བ་དང་རྗེས་སུ་མཐུན་པའོ། །དབང་པོ་རྣམས་སྡུད་པ་ནི་ཡུལ་དང་བུད་མེད་ཀྱི་གཟུགས་ལ་སོགས་པ་ལས་ཕྱིར་ཟློག་པར་བྱེད་པའོ། །འདུན་པ་སྐྱེ་བར་མཛོད་ཅིག་ཅེས་བྱ་བ་ནི་འདོད་པར་མཛོད་ཅིག་པ་ཡིན་ནོ། །ལྟོས་པར་མཛོད་ཅིག་ཅེས་བྱ་བ་ནི་འཚོ་བ་

ལ་ལྟོས་པ་དང་བཅས་པར་གྱུར་པའོ། །གྲོགས་པོ་ལྟར་ཞེས་བྱ་བ་ནི་གྲོགས་པོ་ཉིད་དུའོ། །དགྲ་བོ་ནི་ཁྱིམ་ལ་སོགས་པའི་དགྲ་བོར་གྱུར་པའོ། །ཚེ་ཕྱི་མ་ནི་འཇིག་རྟེན་ཕ་རོལ་ལོ། །དགེ་བ་ནི་སྦྱིན་པའི་རང་བཞིན་ཡིན་ལ། ཚངས་པར་སྤྱོད་པ་ནི་ཚུལ་ཁྲིམས་དང་བསྒོམ་པའི་རང་བཞིན་
ཡིན་པའམ། ཡང་ན་དགེ་བ་ནི་འཁོར་བའི་འབྲས་བུ་ཡིན་ལ། ཚངས་པར་སྤྱོད་པ་ནི་ཐར་བའི་འབྲས་བུ་ཡིན་ནོ། །སྐད་ཅིག་ཡུད་ཙམ་ཐང་ཅིག་ཅེས་པ་ནི་འཆི་བའི་དུས་ཉེ་བར་མཚོན་པའི་ཚིག་ཡིན་ནོ། །གལ་ཏེ་བདག་ཉི་མ་འདི་ལ་འཆི་བར་བྱའོ་ཞེས་འཆི་བའི་དུས་ངེས་པར་ཤེས་པ་དེ་ལྟ་ན་ཡང་མཆོག་ཏུ་བག་མེད་པས་
གནས་པར་རིགས་པ་མ་ཡིན་ཏེ། དང་པོ་ཉིད་ནས་འཆི་བའི་དུས་ངེས་པ་མེད་པ་དེ་བས་ན། རབ་ཏུ་བག་ཡོད་པས་དགེ་བའི་ཆོས་བསྒོམ་པར་བྱའོ། །ཟླ་བར་ཡང་ཞེས་བྱ་བ་དེ་ལ་དེ་དག་འཆི་བའི་རྣམ་པར་འཚེ་བར་ཉེ་བར་གྱུར་པ་དེའི་ཚེ་འགྱོད་པར་འགྱུར་རོ་ཞེས་བྱ་བ་དེ་ལྟར་བདག་གི་ཡུལ་ལ་རྗེས་སུ་གདམས་པ་
ལ་འཇུག་པར་བྱའོ་ཞེས་ཚིག་འདིས་དེ་སྐད་དུ་བསྟན་པར་འགྱུར་རོ། །འདུན་ཞེས་བྱ་བ་ལ་སོགས་པ་འདོད་ཆགས་ཀྱི་འདུན་པ་ལ་སོགས་པ་ལ་གནས་སྐབས་ཀྱི་རྒྱུ་ཅན་གྱི་རྣམ་གྲངས་ཡིན་ཏེ། གནས་སྐབས་ཁ་ཅིག་ཏུ་འདུན་པ་ཡིན་ལ། གནས་སྐབས་ཁ་ཅིག་ཏུ་སྡུག་པ་ལ་སོགས་པ་ཡིན་ནོ། །ཁྱད་པར་ཡང་
བརྗོད་པར་བྱ་སྟེ་ཡུལ་གྱི་ཡོན་ཏན་འཛིན་པར་འདོད་པ་ནི་འདུན་པ་ཡིན་ལ། ཡུལ་ལ་ངེས་པ་ཡོད་དུ་ཟིན་ཀྱང་གསལ་བ་ནི་འདོད་ཆགས་ཡིན་ཞིང་། སེམས་རྩུབ་པ་གསལ་བའི་ཕྱིར་སྡུག་པ་ཡིན་ནོ། །ཉེས་པའི་ཆ་ཡོངས་སུ་བཏང་ནས་ཡང་དང་ཡང་དུ་སྐྱེ་ཞིང་རྗེས་སུ་འཛིན་པའི་འདོད་ཆགས་ནི་དགའ་བ་ཡིན་
ལ། ཡུལ་གཞན་ལས་ལྷག་པར་ཆགས་པ་ནི་ཡིད་དུ་འོང་བ་ཡིན་ཞིང་ཡུལ་མང་པོ་ཡོད་པ་ལ་ཡུལ་གང་གི་རོ་ལ་དགའ་བའི་འདོད་ཆགས་པའི་ཡུལ་དེ་ནི་སྡུག་པ་ཡིན་ནོ། །ཡུལ་ཐམས་ཅད་ལས་ལྡོག་པ་ཡུལ་གང་ལ་གཅིག་ཏུ་གྱུར་པ་བཞིན་དུ་འདོད་ཆགས་པ་དེ་ལ་ཆགས་པ་ཞེས་བྱའོ། །བྱམས་པ་
དང་ལྡན་པ་ཞེས་བྱ་བ་ནི་བྱམས་པ་དང་ཡང་དག་པར་འབྱོར་པའོ། །སེམས་གང་ལ་དགྲ་བོ་མེད་པ་དེ་ནི་དགྲ་བོ་མེད་པ་ཡིན་ཏེ། དགྲ་བོའི་རྒྱུ་མཚན་ཐམས་ཅད་མངོན་དུ་བྱེད་པ་མེད་པ་དེའི་ཕྱིར་རོ། །སེམས་ཅན་ཐམས་ཅད་གྲོགས་པོ་རབ་ཀྱི་ཕྱོགས་སུ་འཕངས་པ་དེ་བས་ན་སེམས་དེ་འགྲན་ཟླ་མེད་

པའོ། །སེམས་ཅན་ཐམས་ཅད་བདེ་བར་ལྷག་པར་མོས་པ་དེ་བས་ན་སེམས་དེ་གནོད་པ་མེད་པའོ། །ཡུན་རིང་པོར་གོམས་པར་བྱས་པ་དེ་བས་ན་སྤངས་པའོ། །སེམས་ཅན་ཐམས་ཅད་ལ་དམིགས་པ་དེ་བས་ན་ཡུལ་ཆེ་བ་ཉིད་ཀྱི་ཕྱིར་རྒྱ་ཆེ་བའོ། །འདོད་པའི་འབྲས་བུ་ཚད་མེད་པ་དེ་བས་ན་ཚད་མེད་པའོ།
སེམས་དེ་གུས་པར་བསྒོམས་པས་ན་རབ་ཏུ་བསྒོམས་པ་སྟེ་སེམས་དེས་སོ། །ལྷག་པར་མོས་ནས་ཞེས་བྱ་བ་ནི་ལྷག་པར་མོས་པས་ཚུལ་བཞིན་ཡིད་ལ་བྱེད་པ་ཉིད་ཀྱི་ཕྱིར་ཕྱོགས་གཅིག་ཏུ་རྣམ་པར་གནས་པ་དག་གི་བདེ་བ་དེ་ལ་ལྷག་པར་མོས་པར་བྱས་ནས་སོ། །ཁྱབ་པར་བྱས་ནས་ཞེས་བྱ་བ་ནི་ཕྱིས་
ཁྱབ་པར་བྱས་པའོ། །སྙོམས་པར་ཞུགས་ཤིང་ཞེས་བྱ་བ་ནི་ཡེ་ཤེས་ཀྱིས་ཤེས་ནས་སོ། །འདུག་གོ་ཞེས་བྱ་བ་ནི་རྒྱུན་གྱིས་གནས་པའོ། །ཀུན་དུ་ནི་ཐམས་ཅད་ཀྱི་ཐམས་ཅད་དུ་སྟེ། ལྷག་མ་མེད་པར་ཞེས་བྱ་བའི་ཐ་ཚིག་གོ། །དེ་དག་གི་རྣམ་པ་གང་ཞེ་ན། སྨྲས་པ། ཀྱེ་མའོ་སེམས་ཅན་བདེ་བར་
གྱུར་ཅིག་སྙམ་པའི་ཡིད་ལ་བྱེད་པས་ན་བྱམས་པ་ལ་སྙོམས་པར་འཇུག་པ་དང་། ཀྱེ་མའོ་སེམས་ཅན་སྡུག་བསྔལ་བར་གྱུར་ཏོ་སྙམ་དུ་སྙིང་རྗེ་དང་། ཀྱེ་མའོ་སེམས་ཅན་དགའ་བར་གྱུར་ཅིག་སྙམ་དུ་དགའ་བ་དང་། སེམས་ཅན་མཉམ་པ་ཐ་མལ་པ་དེ་ལྟ་བུའི་ཡིད་ལ་བྱེད་པས་བཏང་སྙོམས་པར་འཇུག་པའོ། །
ཚངས་པའི་གནས་བཞི་ནི་བྱམས་པ་ལ་སོགས་པ་སྟེ། དེ་བསྒོམས་ནས་སོ། །འདོད་པ་སྟེ། འདོད་པའི་ཡོན་ཏན་ལྔ་པོ་དག་ལ་འདུན་པ་དོན་དུ་གཉེར་བའི་སྔོན་དུ་སོང་བ་ཅན་གྱི་འདོད་པའི་འདོད་ཆགས་གང་ཡིན་པ་དེ་སྤངས་ནས་ཏེའོ། །དེ་ལ་མང་དུ་གནས་ཞེས་བྱ་བའི་བྱམས་པ་ལ་སོགས་པ་ཡང་དང་
ཡང་དུ་མངོན་སུམ་དུ་བྱེད་པའི་ངང་ཚུལ་ཅན་ནོ། །འཆི་བའི་མཐར་ཐུག་པར་གྱུར་པས་ན་འཆི་བའི་མཐར་ཐུག་པའོ། །སྙམ་པར་གྱུར་ཏོ་ཞེས་བྱ་བ་ནི་བཟའ་བ་དང་ཟས་ལས་གྱུར་པ་དབུགས་རྒྱུ་བ་དལ་བ་ལ་སོགས་པ་ལུས་ཀྱི་གནོད་པའོ། །སྲིད་པའི་སྲེད་པ་ནི་སྲིད་པའི་མིག་ཡིན་ནོ། །སྐྱེ་བ་ནི་
འཁོར་བའི་སྐྱེ་བའི་རྒྱུན་ནོ། །ཡང་སྲིད་པའི་ལས་དང་ལས་ཀྱི་འབྲས་བུ་མེད་པའི་ཕྱིར་ད་ནི་ཡང་སྲིད་པ་མེད་དོ་སྨོན་པ་ཡིན་ནོ། །སྤྱན་སྔ་ན་འདུག་པར་གྱུར་པ་ཞེས་བྱ་བ་ནི་ཉེ་བ་ན་སྤྱོད་པའོ། །ལྷ་ལ་ཕན་གདགས་པར་བྱ་བ་ཁོ་ནའི་ཕྱིར་བཅོམ་ལྡན་འདས་ཀྱིས་འཕགས་པ་ཨུ་པ་མ་ན་ཕྱིར་བསལ་

བ་ཡིན་ཏེ། གང་གི་ཕྱིར་དང་པོའི་ལྷ་སྟོང་ཕྲག་བཅོམ་ལྡན་འདས་ཀྱི་ཐད་ལས་ཆོས་ཉན་པར་མི་འདོད་པ་དང་། ཤིན་ཏུ་མཐུ་ཆེ་བ་ཉིད་ཀྱིས་འཕགས་པ་ཨུ་པ་མ་ན་ཕྱི་རོལ་དུ་བྱ་བར་མི་ནུས་པ་དང་། བཅོམ་ལྡན་འདས་མ་གཏོགས་པ་འགའ་ཞིག་གིས་ཀྱང་ཕྱོགས་འདི་ལས་དེ་འདི་
ལྟར་བསལ་བར་ནུས་པ་མ་ཡིན་པ་དེ་ནི་དེའི་ཕྱིར་གཞན་ལ་ཕན་གདགས་པར་བྱ་བའི་ཕྱིར་བཅོམ་ལྡན་འདས་ཀྱིས་བསལ་བ་མཛད་པ་ཡིན་ནོ། །སྨོན་ལམ་གྱི་དབང་གིས་འཕགས་པ་ཨུ་པ་མ་ནའི་གཟི་ལྷ་རྣམས་ཀྱིས་མི་བཟོད་པ་ཡིན་གྱི་མཐུ་ཆེ་བ་ཉིད་ཀྱིས་མ་ཡིན་ཏེ། གཞན་དུ་ན་བཅོམ་ལྡན་འདས་ཀྱི་
གཟི་ཤིན་ཏུ་མི་བཟོད་པར་འགྱུར་ཏེ། འཕགས་པ་ཨུ་པ་མ་ན་བྱེ་བ་སྟོང་པས་ཀྱང་བཅོམ་ལྡན་འདས་ཤིན་ཏུ་མཐུ་ཆེ་བའི་ཕྱིར་རོ། །མདུན་ན་རྣམ་པར་གནས་པ་ལ་ཕྱི་རོལ་དུ་བྱས་པ་ནི་ཤིང་སཱ་ལ་ཟུང་གི་ཚལ་ནི་ཤིང་སཱ་ལ་ཆེན་པོ་གཉིས་ཀྱིས་ཉེ་བར་མཚོན་པའི་སཱ་ལའི་ནགས་སོ། །མཐུ་ཆེན་པོའི་
སྒྲས་འདིར་བདག་ཉིད་ཀྱི་དངོས་པོ་དང་ཆེན་པོའི་སྒོ་ནས་ཆེན་པོར་གཟུང་ངོ་། །གལ་ཏེ་དཔག་ཚད་བཅུ་གཉིས་ཀྱི་ནང་མ་ལུས་པར་ལྷས་ཁྱབ་པར་གྱུར་པས་དེར་མི་དང་དུད་འགྲོ་ཇི་ལྟར་གནས་པར་འགྱུར་ཞེ་ན། འདི་ལ་བཅོམ་ལྡན་འདས་ཀྱི་མཐུ་དང་། ལྷ་དེ་དག་ཉིད་ཀྱི་རྫུ་འཕྲུལ་ལམ་ལུས་
འོད་དང་འདྲ་བ་དེའི་ཕྱིར་འགའ་ཞིག་ཀྱང་གནོད་པ་བྱེད་པར་མི་འགྱུར་རོ་ཞེས་སྟོན་ཏོ། །དུས་མ་ཡིན་པར་ཆར་ཞེས་བྱ་བ་ལ་དབྱར་ཆར་བྱུང་བའི་དུས་ཡིན་ལ་ལྷག་མ་ནི་མ་ངེས་པ་ཡིན་ལ་དེའི་ཕྱིར་དེ་སྐད་དུ་གསུངས་པ་ཡིན་ནོ། །གྲང་བའི་དུས་ཞེས་བྱ་བ་ནི་དགུན་ཟླ་ཐ་ཆུངས་དང་དཔྱིད་ཟླ་ར་
བའོ། །ཤིང་བལ་རྨལ་བ་ནི་ས་བོན་དང་ཐ་དད་པར་བྱེད་པའོ། །གོས་ཕྲུགས་ནི་གོས་ཟུང་ངོ་། །དྲི་ཞེས་བྱ་བ་ལ་སོགས་པ་ལ་དྲི་ནི་གླ་རྩི་ལ་སོགས་པ་ཡིན་ལ། ཕྲེང་བ་ནི་མེ་ཏོག་ཛཱ་ཏི་ལ་སོགས་པའོ། །བདུག་སྤོས་ནི་ཨ་ཀ་རུ་ལ་སོགས་པ་ཡིན་ལ། ཕྱེ་མ་ནི་གོས་ལ་བསྒོས་པ་ལ་སོགས་པའོ། །
རིགས་ཡོངས་སུ་སྒྲོགས་པ་ཞེས་བྱ་བ་ནི། ཅིག་ཅར་ཉེ་དུ་མ་ལུས་པའི་མིང་སྨོས་པ་མེད་པའི་ཕྱིར་ཚེགས་ཆུང་བའི་དོན་ཏོ། །བསྙུང་བའི་སྡོམ་པ་ལས་བྱུང་བའམ། བཅོམ་ལྡན་འདས་ཀྱི་མཐུའམ་སྨོན་ལམ་གྱི་དབང་ལས་ཞེས་བྱ་བ་འདི་ནི་རྣམ་པ་གཞན་ཡིན་ནོ། །ལྷ་རྣམས་ཀྱི་བརྡུང་བར་བྱ་བ་

རྡུང་བར་བྱེད་པ་ལ་འདིར་དྲི་ཟར་རིག་པར་བྱ་ཞིང་དེ་དག་གི་བཟོ་ལས་མཁས་པ་ཉིད་ཀྱི་བདག་པོ་སྟེ་རྒྱལ་པོ་ཡིན་ནོ། །བརྡུང་བར་བྱ་བའི་སྒྲའི་བྱེ་བྲག་རྡུང་བར་བྱེད་པའི་སྒོ་ནས་སྦྱོར་བ་ནི་དབྱངས་ཡིན་ནོ། །བྱེ་བ་ཞེས་བྱ་བ་ལ་འབུམ་ཕྲག་བརྒྱ་ནི་བྱེ་བའོ། །བརྟུལ་ནས་ཞེས་བྱ་བ་ནི་མཆོག་ཏུ་འབྱེར་བར་བྱས་ནས་
སོ། །མུ་སྟེགས་ཅན་ཞེས་བྱ་བ་ལ་སོགས་པ་ལ་ཉན་ཐོས་དག་གིས་གདུལ་བར་བྱ་བ་གང་ཡིན་པ་དེ་ནི་བཅོམ་ལྡན་འདས་ཀྱིས་ཀྱང་གདུལ་བར་སྤྱོད་ཀྱི་གཅིག་ཏུ་སངས་རྒྱས་ཀྱི་གདུལ་བྱ་ཤཱ་རིའི་བུ་ལ་སོགས་པ་གདུལ་བ་ཉིད་དུ་ནུས་པ་མ་ཡིན་པས་གཅིག་ཏུ་རབ་ཏུ་དགའ་བ་སངས་རྒྱས་ཀྱི་གདུལ་བྱ་ཡིན་པ་དེའི་ཕྱིར་
བཅོམ་ལྡན་འདས་བླ་ན་མེད་པའི་གདུལ་བྱའི་སྐྱེ་བོ་གདུལ་བ་ལ་མཁས་པའི་ཕྱིར་འབད་པ་བཞག་པས་འདུལ་བར་འགྱུར་རོ། །མྱོས་པ་ནི་ཤིན་ཏུ་སྒྲ་སྙན་པར་རྡུང་བའོ། །དགྲ་བཅོམ་པར་གྲགས་པ་ཞེས་བྱ་བ་ནི་འདི་ལ་འཇིག་རྟེན་མ་ལུས་པ་དགྲ་བཅོམ་པར་བློ་མཐུན་པར་གྱུར་པའོ། །ཁྱིམ་ནི་འདུག་
གནས་སོ། །ཉིན་པར་སྤྱོད་པ་ནི་ཉིན་མོ་སྤྱོད་པའི་གནས་སོ། །ཁ་འབུས་པ་ཞེས་བྱ་བ་ལ་སོགས་པ་ལ་དཔྱིད་ཀྱི་དུས་སུ་ཤིང་གི་དྲོད་སོ་མ་བྱུང་བའི་ཕྱོགས་མཐོན་པོ་མཐོན་པོར་གྱུར་པ་ནི་ཁ་འབུས་པ་ཞེས་བྱ་བ་ལ། དེ་སྐྱེས་པ་གང་ཡིན་པ་དེ་ནི་ཁ་འབུས་པར་འགྱུར་བ་ཞེས་བྱའོ། །དེ་ཉིད་གང་
གི་ཚེ་ཤིང་བལ་གྱི་ས་བོན་གྱི་རྣམ་པ་ལྟ་བུར་ཤིན་ཏུ་མཐོན་པོར་འགྱུར་བ་དེའི་ཚེ་མྱུ་གུ་སྐྱེ་ཞེས་བྱའོ། །ཁ་མ་གྱེས་པ་ནི་མེ་ཏོག་གི་རྒྱུ་མཚན་ཡིན་ནོ། །ཁ་མ་གྱེས་པ་ཡོངས་སུ་སྨིན་པའི་གནས་སྐབས་ཐོབ་པར་གྱུར་པ་ནི་བྱ་རོག་གི་མཆུ་འདྲ་བ་ཡིན་པར་རིག་པར་བྱ་སྟེ། བྱ་རོག་གི་མཆུ་དང་འདྲ་བར་
མེ་ཏོག་གི་འདབ་མའི་མཐའ་ངེས་པར་འབྱུང་བའི་ཕྱིར་རོ། །རྣམ་པ་ཐམས་ཅད་དུ་ཁ་བྱེ་བའི་ཕྱིར། ཐམས་ཅད་ཡོངས་སུ་རྒྱས་པའོ། །འདབ་མ་ཕལ་ཆེར་འཇམ་པ་ཉིད་ཀྱི་ཕྱིར་ལྷམ་མེ་ཞེས་གསུངས་པ་ཡིན་ནོ། །ཤིང་ལས་འོད་འཕྲོ་བ་ལྟར་ཤེས་པ་དེའི་ཕྱིར་ལྷན་ནེ་ཞེས་གསུངས་སོ། །མེ་ཏོག་ཕུན་
སུམ་ཚོགས་པས་ཤིང་ཐམས་ཅད་ཟིལ་གྱིས་གནོན་པའི་ཕྱིར་ལྷང་ངེ་ཞེས་གསུངས་སོ། །ཆོས་ཁོང་དུ་ཆུད་པར་འདོད་པ་ལ་འདིར་ཐེ་ཚོམ་ཞེས་བྱའོ། །བསམས་པ་ཞེས་བྱ་བ་ནི་སོ་སོར་བསམས་པ་ཞེས་བྱའོ། །ཡུལ་གང་ལ་བསམས་པ་ཡིན་ཞེ་ན། བསལ་བར་ནུས་པ་ཞེས་བྱ་བ་ལ་སོགས་པ་སྨོས་

ཏེ། བཅོམ་ལྡན་འདས་ཉག་གཅིག་གིས་བདག་གི་ཐེ་ཚོམ་བསལ་བར་སྤྱོད་ཀྱང་། གཞན་འགའ་ཞིག་གིས་ཀྱང་མ་ཡིན་ནོ་ཞེས་བྱ་བ་དེ་ལྟ་བུའི་བསམ་པ་ཡོད་པ་ཡིན་ལ། བསམ་པ་ཅུང་ཞིག་ནི་མངོན་པར་འདོད་པའི་ཆོས་ཀྱི་ཕྱོགས་ལ་ཡོད་པ་ཡིན་ནོ། །བདག་བཅོམ་ལྡན་འདས་ག་
ལ་བ་དེར་ཉེ་བར་འགྲོ་བའི་བསམ་པ་གནོད་པ་མེད་པས་བླ་མར་གྱུར་པ་ཡིན་ནོ། །སྐུ་མཉེལ་ཞིང་ཞེས་བྱ་བ་ནི་སྐུ་བསྙུན་གྱིས་མཉེལ་བར་གྱུར་པའོ། །ཚུར་ཤོག་ཅེས་བྱ་བས་རབ་ཏུ་བྱུང་བ་ཡིན་ཏེ། མངོན་སུམ་དུ་ཉན་ཐོས་སུ་འགྱུར་བར་རིག་པར་བྱའོ། །དགའ་ཞེས་བྱ་བ་ལ་སོགས་པ་ལ། མངོན་པར་
འདོད་པས་བཅོམ་ལྡན་འདས་ཀྱི་བསྟན་པ་རྙེད་པའི་སྐབས་ཉིད་ཡིན་པའི་ཕྱིར་དགའ་བའོ། །མངོན་པར་འདོད་པའི་དྲིས་པའི་དོན་གྱི་ལན་བརྩམས་པ་བཞིན་རྙེད་པའི་ཕྱིར་མགུ་བའོ། །ཉོན་མོངས་པ་སྤོང་བར་བྱེད་པའི་གཉེན་པོའི་ཕྱོགས་རྙེད་པའི་བསམ་པས་རབ་ཏུ་དགའ་བའོ། །ཐར་པར་བླ་
ན་མེད་པ་ཐོབ་པའི་བསམ་པས་ད་ལྟར་ལུས་ཀྱི་བདེ་བ་སྐྱེས་པར་གྱུར་པའོ། །དགའ་བ་ནི་འདིར་དགེ་བའི་ཆོས་ལ་འདུན་པའོ། །མུ་སྟེགས་ཅན་སྐྱེད་པར་བྱེད་པ་ཞེས་བྱ་བ་ནི་མུ་སྟེགས་ཅན་སྐྱེད་པའི་གནས་ཡིན་ཏེ། གང་གི་ཕྱིར་གང་པོ་ལ་སོགས་པ་དག་ལ་མུ་སྟེགས་ཅན་འབྱུང་བར་འགྱུར་བ་དེའི་ཕྱིར་གང་
པོ་ལ་སོགས་པ་དང་། མུ་སྟེགས་ཅན་སྐྱེད་པར་བྱེད་པ་ཞེས་གསུངས་སོ། །རང་རང་གིས་ཁས་འཆེས་པ་ནི་བདག་ཉིད་སོ་སོར་དམ་བཅས་པ་ཡིན་ཏེ། བརྟུལ་ཞུགས་འདིས་བདག་ཅག་འཁོར་བ་ལས་གྲོལ་བར་འགྱུར་རོ་ཞེས་བྱ་བ་འདི་དག་ནི་དམ་བཅས་པའོ། །ཅི་དེ་དག་གིས་བདག་ཉིད་ཀྱིས་
དམ་བཅས་པ་ཉམས་སུ་མྱོང་བའི་སྒོ་ནས་ཤེས་པར་འགྱུར་ན་ནི་གང་གི་ཚེ་དམ་བཅས་པ་ཉམས་སུ་མྱོང་བ་གྲུབ་པ་དེའི་ཚེ་དམ་བཅས་པ་ཡོངས་སུ་རྫོགས་པར་ཁོང་དུ་ཆུད་པར་འགྱུར་རོ། །དེའི་དོན་ནི་ཅི་དེ་དག་གིས་ཐར་པ་བླ་ན་མེད་པ་ཐོབ་པར་འགྱུར་རམ། འོན་ཏེ་མ་ཡིན་ཞེས་བྱ་བ་འདི་ཡིན་ནོ། །
གཅིག་པོ་འདིས་སུམ་ཅུར་མ་ལོངས་པ་ནི་གཅིག་གིས་སུམ་ཅུ་མ་ཡིན་པ་སྟེ་ལོ་གྲངས་ཉི་ཤུ་རྩ་དགུའོ། །དགེ་བ་གང་ཞིག་ཚོལ་བ་ཞེས་བྱ་བ་ནི་དགེ་བ་གང་ཞེས་བྱ་བ་སྟེ། དེ་ལྟར་ཚོལ་བའི་ངང་ཚུལ་ཅན་ནོ། །ལོ་ལས་ལྷག་པར་ཞེས་བྱ་བ་ནི་ལོ་གཅིག་གིས་ལྷག་པ་སྟེ། ལོ་ནི་ལོ་གཅིག་ཅིག་

གི་རྣམ་གྲངས་ཡིན་པའི་ཕྱིར་རོ། །ཚུལ་ཁྲིམས་ནི་སོ་སོར་ཐར་པ་ལ་སོགས་པའི་སྡོམ་པའོ། །ཏིང་ངེ་འཛིན་ནི་ཟག་པ་དང་བཅས་པ་དང་ཟག་པ་མེད་པའོ། །རིག་པ་ནི་གསུམ་སྟེ། སྔོན་གྱི་གནས་ཤེས་པ་དང་། འཆི་འཕོ་དང་སྐྱེ་བ་ཤེས་པ་དང་། ཟག་པ་ཟད་པ་ཤེས་པའོ། །རྐང་པ་ནི་རྫུ་འཕྲུལ་གྱི་ཡུལ་ཤེས་པ་
དང་། ལྷའི་རྣ་བ་ཤེས་པ་དང་། སེམས་ཀྱི་རྣམ་གྲངས་ཤེས་པའོ། །ཏིང་ངེ་འཛིན་ནི་སེམས་རྩེ་གཅིག་པ་ཉིད་དོ། །བསྒོམས་པ་ནི་ཆུང་ངུ་དང་། འབྲིང་དང་ཆེན་པོའི་གོ་རིམས་ཀྱིས་སོ། །རིམ་པ་ལས་མ་གཡོས་པས་ན་རིགས་པ་སྟེ། འཕགས་པའི་ལམ་ཞེས་བྱ་བའི་ཆོས་ཡིན་ནོ། །དེའི་ཕྱོགས་གཅིག་ནི་
ཡང་ཕྱོགས་གཅིག་ཙམ་འཆད་པ་ལ་སྟོན་པ་པོ་ཞེས་བྱའོ། །འདི་ལས་ཞེས་བྱ་བ་ནི་ངའི་བསྟན་པ་ལས་ཕྱི་རོལ་ན་ཚད་མར་གྱུར་པ་གཞན་མེད་པ་ཡིན་ནོ། །ཅིའི་ཕྱིར་ཡོད་པ་མ་ཡིན་ཞེ་ན། རབ་བཟང་གང་ལ་ཞེས་བྱ་བ་ལ་སོགས་པས་རྒྱུར་སྨྲས་པ་ཡིན་ཏེ། བཀའ་གང་ལ་འཕགས་པའི་ལམ་ཡན་
ལག་བརྒྱད་པ་ཡོད་པ་དེ་ཉིད་ལ་དབང་པོའི་དགེ་སྦྱོང་ལ་སོགས་པ་སྣང་སྟེ། གང་གི་ཕྱིར་ལམ་གྱི་སྒོ་ནས་དགེ་སྦྱོང་དུ་གྱུར་པ་ཡིན་ནོ། །དགེ་སྦྱོང་ནི་རྒྱུན་དུ་ཞུགས་པར་གྱུར་པ་བཞི་ནི་བཞི་ཡིན་པར་རིག་པར་བྱའོ། །མཉམ་པོར་སྤྱོད་པས་ན་དགེ་སྦྱོང་སྟེ། རྒྱུན་དུ་ཞུགས་པ་དང་། ལན་ཅིག་ཕྱིར་འོང་
བ་པ་དང་། ཕྱིར་མི་འོང་བའི་རང་བཞིན་ནོ། །སྡིག་པ་སྤངས་པས་ན་བྲམ་ཟེ་སྟེ། དགྲ་བཅོམ་པའོ། །སློབ་དཔོན་ཆེན་པོ་ནི་བཅོམ་ལྡན་འདས་ཡིན་ཏེ། སྤྱོད་པ་ཐམས་ཅད་ཁོང་དུ་ཆུད་པར་མཛད་པའི་སྒོ་ནས་ཆེན་པོ་ཉིད་ཡིན་པའི་ཕྱིར་རོ། །མང་དུ་ཐོས་པ་ནི་ཐོས་པ་བསགས་པ་ཡིན་ཏེ། ཐོས་པ་འཛིན་
པའི་མཆོག་ཏུ་སློབ་དཔོན་ཆེན་པོས་ལུང་སྟོན་པའི་དབང་བསྐུར་བས་དབང་བསྐུར་བའམ། ཡང་ན་འཕགས་པའི་ལམ་ལ་སོ་སོར་དགོད་པའི་སློབ་དཔོན་ཆེན་པོས་དབང་བསྐུར་བ་ཡིན་ནོ། །ཤེས་ཏེ་ཞེས་བྱ་བ་ནི་བདག་གི་སྐྱེ་བ་ནི་ཟད་དོ་ཞེས་བྱ་བ་ལ་སོགས་པ་དངོས་པོ་ཡོངས་སུ་ཤེས་པ་དང་ལྡན་པ་
ཉིད་ཀྱི་ཕྱིར་རོ། །ཉོན་མོངས་པ་ལ་སོགས་པ་བཅོམ་པའི་ཕྱིར་དགྲ་བཅོམ་པའོ། །ཉོན་མོངས་པ་དང་སྙོམས་པར་འཇུག་པའི་སྒྲིབ་པ་དང་བྲལ་བའི་སེམས་རྣམ་པར་གྲོལ་བའོ། །སྨོན་ལམ་གྱི་དབང་གིས་རབ་ཏུ་བཟང་པོ་སྔར་ཡོངས་སུ་མྱ་ངན་ལས་འདས་པའི་བློ་སྐྱེས་པ་ཡིན་ནོ། །བཟོད་པ་ཞེས་བྱ་བ་

ནི་རང་གི་འདོད་པས་གནས་པ་ཉིད་དུ་ནུས་པའོ། །ཅིའི་ཕྱིར་རབ་ཏུ་བཟང་པོས་གནས་ལྔ་བྱིན་གྱིས་བརླབས་པར་གྱུར་ཞེ་ན། འདིར་མུ་སྟེགས་ཅན་གྱི་ཚོགས་ཆེན་པོ་བཅོམ་ལྡན་འདས་ཀྱིས་བསྟན་པ་ལ་གཞུག་པའི་དོན་ཡིན་ཏེ། གང་གི་ཕྱིར་དེ་མ་ཐག་པ་ཉིད་དུ་བཅོམ་ལྡན་འདས་ཀྱིས་ཕྱི་
རོལ་ན་དགེ་སྦྱོང་ངམ་བྲམ་ཟེའམ་ཕས་ཀྱི་རྒོལ་བས་སྟོང་པ་ཡིན་ནོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །མུ་སྟེགས་ཅན་གྱིས་ཀྱང་འདིར་རབ་ཏུ་བཟང་པོ་ཡོངས་སུ་མྱ་ངན་ལས་འདས་པར་ཐོས་པ་དེ་ལས་རབ་ཏུ་དགའ་བའི་ཤུགས་ཐོབ་པར་གྱུར་ཏོ། །གོས་ཀྱི་འཕན་ཤིན་ཏུ་ཆེ་བ་བསྒྲེངས་ནས་ཀུ་ཤའི་གྲོང་
ཁྱེར་མ་ལུས་པ་བསྐོར་ནས་དགེ་སྦྱོང་གཽ་ཏ་མ་ལ་འདི་སྐད་སྨྲས་ཏེ། འདི་ལྟར་འདི་ན་དགེ་སློང་དང་པོ་ནས་འཁོར་རྣམས་ལ་བདག་ཅག་གི་ཚངས་པར་སྤྱོད་པ་རབ་ཏུ་བཟང་པོ་འདི་ཡོངས་སུ་མྱ་ངན་ལས་འདས་སོ་ཞེས་ཡང་དག་པའི་སེང་གེའི་སྒྲ་བསྒྲགས་པ་དེའི་ཕྱིར་ཇི་ལྟར་ན་དགེ་སྦྱོང་གཽ་ཏ་མ་དེ་བདེན་པ་སྨྲ་བ་
ཡིན་ཞེས་སྒྲོགས་པར་བྱེད་དོ། །དེ་ཐོས་པ་ལས་མུ་སྟེགས་ཅན་སྟོང་ཕྲག་དུ་མ་དེ་ལ་མངོན་པར་དད་པ་ཡང་འདུས་ཤིང་འགྲོ་བར་བྱེད་ལ། བར་མ་དང་མ་དད་པ་མང་པོ་དག་ལྟད་མོ་ལ་འགྲོ་བ་ན་གང་གི་ཚེ་མུ་སྟེགས་ཅན་དག་རབ་ཏུ་བཟང་པོའི་ཕྱོགས་སུ་འོངས་པ་དེའི་ཚེ་རབ་ཏུ་བཟང་པོ་མུ་སྟེགས་ཅན་གྱི་ཆ་
ལུགས་སུ་མཐོང་བ་དེའི་ཕྱིར་ཤིན་ཏུ་མངོན་པའི་ང་རྒྱལ་དང་འཇིགས་པར་འགྱུར་ལ། གང་གི་ཚེ་ཁྱོགས་འདེགས་པའི་བྱ་བ་བྱེད་མི་ནུས་པ་དེའི་ཚེ་རྒྱགས་པ་དང་ང་རྒྱལ་བཅོམ་པ་དང་། ངོ་ཚས་ཁྱབ་པ་དང་ཇི་ལྟར་བྱ་བ་ལ་རྨོངས་པར་གྱུར་པས་བཅོམ་ལྡན་འདས་ཀྱིས་བསྟན་པ་ལ་མངོན་པར་དད་པ་དང་།
དགེ་བའི་ཆོས་སྒོམ་པ་ལ་ཕྱོགས་པར་འགྱུར་བ་དེའི་ཕྱིར་དེ་དག་གིས་དཔལ་ཆེན་པོ་ཐོབ་པར་འགྱུར་བ་ན་མ་དད་པ་མང་པོ་ཐ་མལ་པར་འགྱུར་ཞིང་། ཐ་མལ་པ་དག་ཀྱང་བཅོམ་ལྡན་འདས་ཀྱིས་བསྟན་པ་ལ་ངེས་པར་འགྱུར་བ་དེ་བས་ན་དེ་དག་གིས་ཤིན་ཏུ་དོན་ཆེན་པོ་ཐོབ་པར་འགྱུར་བའི་ཕྱིར་ཤིན་ཏུ་
བཟང་པོས་གནས་ལྔ་བྱིན་གྱིས་བརླབས་པ་དོན་དང་བཅས་པ་ཁོ་ན་ཡིན་ནོ་ཞེས་བསྟན་ཏོ། །སྨད་ནས་ཞེས་བྱ་བ་ནི་དཔྱད་པས་སོ། །གནད་ཆད་པ་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་སྐུ་ཡང་མིའི་རྒྱུད་ཀྱིས་ཡོངས་སུ་བཟུང་བ་ཡིན་པ་དེ་བས་ན་གནད་ཆད་པ་ཞེས་བྱ་བ་ལ་སོགས་པ་

གསུངས་ཏེ། བཅོམ་ལྡན་འདས་ལ་ནི་གནད་ཆད་པའི་ཚོར་བ་འབྱུང་བའི་སྐབས་མི་མངའ་བའི་ཕྱིར་རོ། །ཆོས་ལ་ངེས་པར་བཀོད་པ་ཞེས་བྱ་བ་ནི་འཕགས་པའི་ལམ་གྱི་ཆོས་ཚོགས་དང་བཅས་པ་ལ་ངེས་པར་སྦྱར་བའོ། །རྟོག་པ་ནི་ཆོས་ཉུང་ངུ་ཐོས་པས་དོན་ཡོངས་སུ་ཤེས་པར་ནུས་པའོ། །དཔྱོད་པ་ནི་
ཡོངས་སུ་གཅོད་པར་ནུས་པའོ། །མཁས་པ་ནི་འདིར་བྱ་བ་དང་བྱ་བ་མ་ཡིན་པ་ལ་བྱང་བའོ། །གསལ་བ་ནི་དངོས་པོ་རྣམ་པར་འབྱེད་པའི་ནུས་པའོ། །ཡིད་གཞུངས་པ་ནི་མྱུར་དུ་ཡོངས་སུ་གཅོད་པའི་ནུས་པ་དང་ལྡན་པའོ། །བསྐོར་ཏོ་ཞེས་བྱ་བ་ནི་ཀུན་ནས་བསྐོར་བའི་སྒོ་ནས་དོག་མོར་བྱས་པར་གྱུར་པའོ། །བརྩོན་
འགྲུས་ནི་འབད་རྩོལ་ལོ། །གནད་ཅེས་བྱ་བ་ལ་སོགས་པ་ལ། གནད་ཀྱི་ཕྱོགས་མཚོན་རྣོན་པོས་བཅད་པ་འདྲ་བའི་ཚོར་བ་འབྱུང་བའི་ཕྱིར་གནད་ཆད་པར་འགྱུར་བ་ཞེས་གསུངས་སོ། །ཚིག་བྱེ་བར་གྱུར་པ་ཡང་དེ་དང་འདྲ་བ་སྟེ། ཉི་མ་དང་དུས་འདི་ལ་བདག་ཅག་ཚོགས་ནས་དེའི་སྟེང་དུ་ལྷགས་པར་བྱའོ་ཞེས་བྱ་བ་
ནི་བརྡར་བཏགས་པ་ཡིན་ནོ། །འགྲམ་ནི་ཆུས་ཡོངས་སུ་སྤངས་པ་བྱེ་མ་དང་བཅས་པའི་ཕྱོགས་ཡིན་ནོ། །པད་མའི་འདབ་མ་དང་པདྨའི་འདབ་མ་ལ་རྐང་པ་བཞག་པས་ཞེས་བྱ་བ་ནི་ཇི་ལྟར་པད་མའི་འདབ་མ་ཤུགས་ཀྱིས་མནན་པ་ལས་ཀྱང་ཆུ་ལ་མི་འབྱིང་བ་དེ་བཞིན་དུ་ལུས་ཡང་མོར་བྱས་པའོ། །འདོད་པའི་
སྦྱིན་པ་ནི་ཇི་ལྟར་བསམས་པ་བཞིན་དུ་སྒྲུབ་པར་བྱེད་པའི་སྦྱིན་པའོ། །གྲོགས་པོ་ནི་གང་ཞིག་བྱ་བའི་དུས་ལ་ཉེ་བར་སྦྱོར་བའི་གྲོགས་ཡིན་ཏེ། གང་དེ་དང་རྟག་ཏུ་ལྷན་ཅིག་གནས་པར་བྱེད་པའོ། །གང་དང་ལྷན་ཅིག་བར་དུ་གནས་པར་འདོད་པ་དེ་ལ་འདིར་བརྟེན་པའི་སྒྲས་བསྟེན་པ་ཡིན་ནོ། །གཅིག་
པུ་ཞེས་བྱ་བ་ནི་གྲོགས་མེད་པ་ཉིད་ཀྱི་ཕྱིར་རོ། །དབེན་པ་ན་ཞེས་བྱ་བ་ནི་སོ་སོར་དབེན་པ་ཕྱོགས་ན་གནས་པའི་ཕྱིར་ཏེ། གཅིག་པུ་ལམ་གྱི་བཞི་མདོ་ནས་ཡང་གནས་སྲིད་པ་དེ་བསལ་བར་བྱ་བའི་ཕྱིར་རོ། །ནང་དུ་ཡང་དག་འཇོག་པའི་ཚེ་ཞེས་བྱ་བ་ནི་འཇུག་པའི་རྣམ་པར་ཤེས་པ་སྡུད་པར་བྱེད་ཅིང་ཡིད་
ཙམ་འཇུག་པའི་ཕྱིར་དེའི་གནས་སྐབས་ནི་གཅིག་ཏུ་གྱུར་པ་ཡིན་ནོ། །སེམས་ལ་ཞེས་བྱ་བ་ནི་བདག་མ་ཡིན་པ་སྟེ། མུ་སྟེགས་ཅན་དག་བདག་ལ་བརྟེན་པའི་རྣམ་པར་རྟོག་པ་ཞེས་འདོད་པའི་གཞུང་དེ་དགག་པའི་ཕྱིར་རོ། །འདི་ལྟ་བུའི་ཞེས་བྱ་བ་ནི་བཤད་པར་འགྱུར་བའི་རྣམ་པའོ། །སེམས་ཀྱིས་ཡོངས་སུ་

རྟོག་པ་ཞེས་བྱ་བ་ནི་ཆུ་དང་འོ་མ་དང་འདྲ་བར་མཚུངས་པར་ལྡན་པ་ཉིད་ཡིན་པའི་ཕྱིར་ཟངས་གཞོང་དང་འབྲས་བུ་ལྟ་བུ་མ་ཡིན་ནོ་ཞེས་སྟོན་པར་བྱེད་པ་ཡིན་ཏེ། ཡོངས་སུ་རྟོག་པ་ནི་འདིར་དངོས་པོའི་ཡུལ་ཡོངས་སུ་དག་པ་ལ་རྟོག་པ་ཡིན་ནོ། །སྐྱེས་པ་ནི་འབྱུང་བའོ། །ཕྱེད་ཅེས་བྱ་བ་
ནི་ཆུང་ངུ་དང་བཅས་པར་ཆུང་ཞིང་དམན་པ་སྟེ་མང་པོ་མ་ཡིན་ཞེས་བྱ་བའི་ཐ་ཚིག་གོ། །ཕྱེད་འདི་གང་གི་