Luận tạng Tây Tạng (Tengyur) — Tập 105

་མི་འཐད་པའི་ཕྱིར། བདག་ལ་སོགས་པ་ནི་མི་བསྐྱེད་ཀྱི་གཞན་མི་རྟག་པ་འགའ་ཞིག་གི་སྟོབས་འབྱུང་བ་ཡིན་ནོ་ཞེས་ཏེ་བསྡུས་པའི་དོན་ཏོ། །ཇི་ལྟར་བདག་ཅེས་བྱ་བ་མ་སྐྱེས་པས་མེད་ཅེ་ན། རེ་ཞིག་སྐྱེ་གནས་བདག་ཉིད་འདི་ལྟ་བུ་ཞིག་ཏུ་

འབྱུང་བར་མི་བྱའོ་ཞེས་བློ་སྔོན་དུ་བཏང་ནས་སྐྱེ་བའམ། ཡང་ན་ཡུལ་ལ་སོགས་པ་ཡོད་པ་ཙམ་གྱིས་སྐྱེ་ཞེས་བྱ་བ་གཉིས་སུ་བརྟག་གྲང་སྟེ། དེ་ལ་ཕྱོགས་དང་པོ་ནི་ཁྱེད་ཉིད་ཁས་མི་ལེན་པའི་ཕྱིར། དེ་ཉིད་བདག་ནི་ཞེས་བྱ་བ་ལ་སོགས་པ་སྨོས་སོ། །དེ་ལྟ་ཡིན་ན་ཡང་སྨོས་པ་ཅི་ཡོད་སྙམ་པ་ལ། མ་
སྐྱེས་པར་དེ་མེད་ན་ནི། །ཞེས་བྱ་བ་སྨོས་ཏེ། དེ་ལྟར་མ་སྐྱེས་ན་མེད་པའི་ཕྱིར་དེ་འབྲས་བུ་བསྐྱེད་པ་ལྟ་ག་ལ་ནུས་སྙམ་དུ་བསམས་པའོ། །ད་ནི་ཕྱོགས་གཉིས་པའི་དབང་དུ་བྱས་ནས་དེའི་ཚེ་སྐྱེ་བར་འདོད་པ་ཞེས་སྨོས་ཏེ། གཞན་གྱིས་བསམས་པའི་བློ་སྔོན་དུ་བཏང་ནས་མ་སྐྱེས་ཀྱང་། ཡུལ་ལ་སོགས་
པའི་རྐྱེན་ཚོགས་པའི་ཚེ་སྐྱེ་བར་འདོད་དམ་སྙམ་ན། དེ་ལྟ་ཡིན་ན་ཡུལ་ནི་དུས་གསུམ་ཆར་དུ་ཡོད་པ་དེ་ལ་དམིགས་ཏེ་འབྱུང་བའི་བདག་ཀྱང་རྟག་ཏུ་གནས་པའི་ཕྱིར་དུས་ཐམས་ཅད་དུ་མི་འགལ་བས་ཡུལ་ལ་རྟག་ཏུ་ཞེས་པ་ལ་སོགས་པ་སྟེ། འོན་ཏེ་དེ་ནི་རྟག་པ་ཡིན་པའི་ཕྱིར་འདོད་པ་ཁོ་ནའོ་ཞེ་
ན་ཇི་སྟེ་ཞེས་བྱ་བ་ལ་སོགས་པ་སྨོས་ཏེ། དེ་ལྟར་རྟག་པ་ཉིད་ཀྱིས་ནུས་པ་ཐམས་ཅད་ཀྱིས་སྟོང་པའི་ཕྱིར། ནམ་མཁའ་བཞིན་དུ་འབྲས་བུ་མི་སྐྱེད་པར་ཤིན་ཏུ་ཡང་གསལ་ཞེས་བྱ་བའི་དོན་ཏོ། །དེ་ལྟ་ཡིན་དུ་ཟིན་ཀྱང་ལྷན་ཅིག་བྱེད་པའི་རྐྱེན་གཞན་ལ་ལྟོས་ཏེ། འབྲས་བུ་བསྐྱེད་དོ་ཞེ་ན། རྐྱེན་
རྣམས་ཞེས་བྱ་བ་ལ་སོགས་པ་སྨོས་ཏེ། དེ་ནི་རྟག་པར་འགྱུར་བ་མེད་པའི་ཕྱིར་གྲོགས་ཅི་ཞིག་བྱར་ཡོད། དེ་བས་ན་ལྷན་ཅིག་བྱེད་པའི་རྐྱེན་ལ་ལྟོས་ཏེ་འབྲས་བུ་སྐྱེ་བར་ཡང་མི་འཐད་དོ། །ཇི་ལྟར་ན་བདག་དེ་ལ་འགྱུར་བ་མེད་ཅེ་ན། བྱེད་པའི་ཚེ་ཡང་ཞེས་བྱ་བ་ལ་སོགས་པ་སྨོས་ཏེ། ལྷན་ཅིག་
བྱེད་པའི་རྐྱེན་དང་ཕྲད་པའི་ཚེ་ཡང་རྟག་པ་ཡིན་པའི་ཕྱིར། སྔོན་གྱི་མ་ཕྲད་པའི་ཚེ་ཡང་གནས་སྐབས་ཁོ་ན་བཞིན་ཡིན་ན། བྱེད་པས་བྱ་བ་ལྷན་ཅིག་བྱེད་པའི་རྐྱེན་གྱིས་བདག་དེ་ལ་སྔར་མི་ནུས་པ་ལས་ནུས་པའི་མཚན་ཉིད་ཀྱི་གྲོགས་ཅི་ཞིག་བྱ་སྟེ། ཅུང་ཟད་ཀྱང་མ་བྱས་སོ་ཞེས་བྱ་བའི་ཐ་ཚིག་
གོ། །དེས་ནི་ལྷན་ཅིག་བྱེད་པའི་རྐྱེན་ཡོད་པར་གྲུབ་ན་ཡང་ཞེས་ཁས་བླངས་ནས་བཅད་དོ། །དེ་ནི་ལྷན་ཅིག་བྱེད་པའི་རྐྱེན་ཉིད་ཀྱང་མ་གྲུབ་པར་བསྟན་པའི་ཕྱིར། དེའི་བྱེད་པར་ཞེས་བྱ་བ་ལ་སོགས་པ་སྨོས་ཏེ། བདག་དེའི་ལྷན་ཅིག་བྱེད་པའི་རྐྱེན་ནི་འདི་ཡིན་ནོ་ཞེས་གཞག་པའི་རྒྱུ་མཚན་

བདག་དང་ལྷན་ཅིག་བྱེད་པའི་རྐྱེན་དུ་འདོད་པའི་དངོས་པོ་དེ་གཉིས་ལ་འབྲས་བུ་སྐྱེད་མི་ནུས་པ་ལས་ཕྱིས་ངེས་པའི་མཚན་ཉིད་དུ་ཕན་འདོགས་པར་འགྱུར་བའི་འབྲེལ་པ་ཅི་ཞིག་ཡོད་དེ་བདག་ནི་རྟག་པ་ཡིན་པའི་ཕྱིར་ཕན་གདགས་པར་བྱ་བ་མ་ཡིན་ལ་རྟག་པ་ཉིད་ཀྱིས་འགྱུར་བ་མེད་པའི་
ཕྱིར། ལྷན་ཅིག་བྱེད་པའི་རྐྱེན་ཡང་ཕན་འདོགས་པར་བྱེད་པ་མ་ཡིན་པས་དེ་ལྟར་ན་འབྲས་བུ་ཐམས་ཅད་ནི་རྒྱུ་རྐྱེན་གཞན་མི་རྟག་པའི་དབང་གིས་འབྲས་བུ་དེ་རང་ལ་དབང་མེད་པར་སྐྱེའོ་ཞེས་བྱ་བའི་དོན་ཏོ། །དེ་ལྟར་ན་དགྲ་ལ་སོགས་པ་དེ་དག་གནོད་པ་དེ་དག་ནི་རྐྱེན་ལས་བྱུང་བ་སྟེ། རྟེན་འབྲེལ་ཡིན་
པའི་ཕྱིར་དོན་དམ་པར་རང་བཞིན་མེད་དོ་ཞེས་བྱ་བའི་ཐ་ཚིག་གོ། །ད་ནི་དེ་ལྟར་ཤེས་པའི་ཕན་ཡོན་བསྟན་པའི་ཕྱིར། དེ་ལྟར་ཤེས་ན་ཞེས་བྱ་བ་ལ་སོགས་པ་གཉིས་གསུངས་སོ། །གལ་ཏེ་དེ་ལྟར་ཆོས་ཐམས་ཅད་རང་བཞིན་མེད་པ་ཡིན་ཏེ། བཟོད་པ་བསྒོམ་པ་ཉིད་མི་རིགས་སོ་སྙམ་པ་འདི་
སེམས་ཅན་ལ་བསྡོགས་ནས། གང་གིས་ཞེས་བྱ་བ་ལ་སོགས་པ་སྨོས་སོ། །སློབ་དཔོན་གྱིས་དེ་ལ་བརྟེན་ནས་ཞེས་བྱ་བ་ལ་སོགས་པ་སྨོས་ཏེ། ཀུན་རྫོབ་ཏུ་བཟོད་པ་བསྒོམ་པ་ལ་བརྟེན་ནས། སྡུག་བསྔལ་སྤོང་བའི་དགོས་པ་ཡོད་པའི་ཕྱིར། བཟོད་པ་བསྒོམ་པར་མི་འགལ་ལོ་སྙམ་དུ་བསམས་པའོ། །
དེ་བས་ཞེས་བྱ་བ་ལ་སོགས་པས་ནི་གོང་དུ་བསྟན་པའི་དོན་མཇུག་བསྡུ་བའོ། །གལ་ཏེ་རང་དགས་ཞེས་བྱ་བ་ལ་སོགས་པས་ནི་གལ་ཏེ་གཞན་དག་གནོད་པར་བྱེད་པ་དེ་རྐྱེན་ལ་མི་ལྟོས་པར་ཁས་ལེན་པའི་ངེས་པ་བསྟན་ཏོ། །ད་ནི་ལུས་ཀྱིས་བརྡེག་པ་ལ་སོགས་པའི་ཚུལ་གྱིས་གནོད་པ་བྱེད་
པ་དེ་དག་ཀུན་རྫོབ་ཀྱི་བདེན་པའི་དབང་དུ་བྱས་པའི་ཆོས་ཀྱི་མཚན་ཉིད་ལ་ངེས་པར་སེམས་པའི་བཟོད་པ་བསྒོམ་པར་བསྟན་པར་བྱ་བའི་ཕྱིར་བག་མེད་པས་ནི་བདག་ཅེས་བྱ་བའི་ཚིགས་སུ་བཅད་པ་བཞི་གསུངས་ཏེ། བསྡུས་པའི་དོན་ནི་ཀུན་རྫོབ་ཏུ་ཡང་ཉོན་མོངས་པའི་དབང་གིས་ཤིན་ཏུ་གཅེས་
པའི་བདག་ཉིད་ལ་ཡང་གནོད་པ་བྱེད་པ་དེ་དག་ཉོན་མོངས་པའི་དབང་གིས་གཞན་ལ་གནོད་པ་བྱེད་པ་མི་རིགས་པ་མེད་པ་ལས། དེ་དག་སྙིང་རྗེ་བར་རིགས་ཀྱི་ཁྲོ་བར་བྱ་བར་མི་རིགས་སོ་ཞེས་བྱ་བ་ཡིན་ནོ། །ད་ནི་གཞན་ལ་གནོད་པ་བྱེད་པ་སེམས་ཅན་རྣམས་ཀྱི་རང་བཞིན་ནི་རང་བཞིན་པ་ཉིད་ཀྱི་ཕྱིར་

ཁྲོ་བར་བྱ་བར་མི་རིགས་ལ། འོན་ཏེ་རང་བཞིན་མ་ཡིན་ན་ཡང་དེའི་རང་བཞིན་མ་ཡིན་པ་ཉིད་ཀྱི་ཕྱིར་ཁྲོ་བར་བྱ་བར་མི་རིགས་སོ་ཞེས་དཔེའི་སྒོ་ནས་བསྟན་པའི་ཕྱིར། གལ་ཏེ་གཞན་ལ་ཞེས་བྱ་བ་ལ་སོགས་པ་ཚིགས་སུ་བཅད་པ་གཉིས་སྨོས་སོ། །ཡང་གཅིག་ཏུ་ན་གཞན་གྱི་མཚོན་ལ་སོགས་པས་
ཉེས་ཀྱི་སེམས་ཅན་གྱིས་མ་ཉེས་པའི་ཕྱིར་དང་། གཉིས་སུ་ན་སེམས་ཅན་གྱིས་ཀྱང་མ་ཉེས་ཀྱི་དེའི་རྒྱུད་ལ་ཡོད་པའི་ཞེ་སྡང་གིས་ཉེས་པའི་ཕྱིར་དང་། གསུམ་དུ་ན་ཞེ་སྡང་གིས་ཀྱང་མ་ཉེས་ཀྱི་བདག་ཉིད་ཀྱི་ལས་ཀྱིས་ཉེས་པའི་ཕྱིར་སེམས་ཅན་ལ་ཁྲོ་བར་བྱར་མེད་དོ་ཞེས་བསྟན་པའི་ཕྱིར། དབྱུག་
པ་ལ་སོགས་པ་ཞེས་བྱ་བ་ལ་སོགས་པ་གཉིས་སྨོས་སོ། །རྣམ་པ་གཅིག་ཏུ་ན་བདག་གིས་ནི་སྡུག་བསྔལ་འབྱུང་བའི་གཞིའི་ལུས་བཟུང་ལ་གཞན་གྱིས་ནི་སྡུག་བསྔལ་འབྱུང་བའི་རྐྱེན་མཚོན་ཕྱུང་བའི་ཕྱིར། བདག་ལ་ནད་ལ་སོགས་པའི་སྡུག་བསྔལ་འབྱུང་བ་ནི་བདག་ཅག་གཉི་གས་ཉེས་པས་
གཞན་འབའ་ཞིག་ལ་ཁྲོ་བར་བྱར་མེད་དོ་ཞེས་བསྟན་པའི་ཕྱིར། དེའི་མཚོན་དང་ཞེས་བྱ་བ་ལ་སོགས་པའི་ཚིགས་སུ་བཅད་པ་བཞི་སྨོས་སོ། །ཡང་རྣམ་པ་གཅིག་ཏུ་ན་བདག་གིས་ཚེ་སྔ་མའི་དུས་སུ་གཞན་ལ་གནོད་པ་བྱས་པའི་ལས་ཀྱི་དབང་གིས་བསྐུལ་ནས་ཚེ་འདིར་བདག་ལ་གནོད་པ་བྱས་
པའི་དབང་གིས་དེ་དག་སྐྱེ་བ་ཕྱི་མར་ངན་སོང་དུ་ལྟུང་བར་འགྱུར་བའི་ཕྱིར་བདག་ནི་དེ་དག་ལ་ཤིན་ཏུ་གནོད་པ་བྱེད་པ་ཡིན་ལ་བདག་ནི་དེ་དག་ལ་བརྟེན་ཏེ་བཟོད་པ་བསྒོམ་པ། ཟླ་བ་སྒྲོན་མའི་མདོ་ལས། བྱིས་པས་ཡང་དག་མ་ལགས་པས། །སྤྱོས་ཤིང་བརྒྱབ་པ་བཟོད་པར་བགྱི། །སྨོད་དང་འདྲེན་པ་
དང་དུ་བླང་། །བྱང་ཆུབ་སེམས་དཔའ་གཞན་དག་ལ། །བདག་གིས་གནོད་སེམས་བསྐྱེད་པ་དང་། །སྔོན་ཆད་བདག་གིས་སྡིག་པའི་ལས། །བགྱིས་པ་རྣམས་ནི་བྱང་བར་འགྱུར། །ཞེས་ཇི་སྐད་གསུངས་པའི་ཚུལ་གྱིས་སྔོན་ནས་བསགས་པའི་སྡིག་པ་བྱང་བར་བྱེད་པ་བཟོད་པ་ལས་
བྱུང་བའི་བསོད་ནམས་དཔག་ཏུ་མེད་པ་སྡུད་པར་བྱེད་པའི་ཕྱིར་དེ་དག་ནི་བདག་ལ་ཕན་འདོགས་པ་ཡིན་པས་དེ་དག་ལ་ཤིན་ཏུ་ཡང་ཁྲོ་བར་བྱ་བར་མི་རིགས་སོ་ཞེས་བསྟན་པའི་ཕྱིར། བདག་གི་ལས་ཀྱིས་ཞེས་བྱ་བ་ལ་སོགས་པ་ཚིགས་སུ་བཅད་པ་གསུམ་གསུངས་སོ། །འོན་ཏེ་གནོད་པ་བྱེད་པ་དེ་

དག་ལ་བདག་གིས་བཟོད་པ་བསྒོམ་པའི་བསམ་པའི་ཡོན་ཏན་གྱིས་དགྲ་བོ་དེ་དག་ཀྱང་འགྱོད་པ་སྐྱེས་པའི་དབང་གིས་ཤད་ཀྱིས་སྦྱངས་པ་ལ་སོགས་པ་བྱས་ནས་ངན་སོང་དུ་ལྟུང་བར་མ་གྱུར་ན་དེའི་ཚེ་དགྲ་བོ་དེ་ལ་བདག་ཤིན་ཏུ་དྲིན་ཆེ་བ་ཡིན་ནོ་ཞེ་ན། དེའི་ཚེ་བདག་ཉིད་ངན་
སོང་དུ་སྐྱེ་བའི་རྒྱུ་མ་ལགས་པས་བདག་ཉིད་ཀྱིས་དོན་བྱས་པར་ཟད་ཀྱི། དེའི་ཚེ་ཡང་གཞན་ལ་ལྷག་པར་དྲིན་ཆེ་རྒྱུ་མེད་དོ་ཞེས་བསྟན་པའི་ཕྱིར། བདག་གི་བསམ་པའི་ཞེས་བྱ་བ་ལ་སོགས་པ་སྨོས་པའོ། །ཅིའི་ཕྱིར་ཞེ་ན། བདག་གིས་བཟོད་པ་མ་བསྒོམས་ན་དགྲ་བོ་དེ་དག་ཀྱང་ཤས་ཆེར་ཉོན་མོངས་པ་སྐྱེ་
བའི་ཕྱིར་དེ་དག་ཀྱང་ངན་སོང་དུ་ལྟུང་བར་འགྱུར་ཞིང་དེས་ན་གཞན་གྱི་ལུས་བསྲུང་བའི་སྤྱོད་པ་ཡང་ཉམས་པར་འགྱུར་རོ་ཞེས་བསྟན་པའི་ཕྱིར། འོན་ཏེ་ལེན་དུ་ཞེས་བྱ་བ་ལ་སོགས་པ་སྨོས་སོ། །ད་ནི་ངག་གི་མི་སྙན་པ་སྨྲ་བ་ལ་སོགས་པ་ལ་ཆོས་ཀྱི་མཚན་ཉིད་ལ་ངེས་པར་སེམས་པའི་བཟོད་པ་བསྒོམ་
པའི་དབང་དུ་བྱས་ནས་ཡང་ཡིད་ནི་གཟུགས་ཅན་མ་ཡིན་པའི་ཕྱིར་ཐམས་ཅད་དུ་གང་གིས་ཀྱང་གནོད་པ་བྱ་བར་མི་ནུས་ལ། ལུས་ནི་གཟུགས་ཅན་མ་ཡིན་པའི་ཕྱིར་དང་ཞེན་པས་བདག་ཏུ་གཟུང་བའི་ཕྱིར་དེ་ལ་བརྡེག་པ་ལ་སོགས་པས་གནོད་པ་བྱ་བར་ནུས་ཀྱི་མི་སྙན་པར་སྨྲ་བ་ལ་སོགས་པ་རྣམས་ཀྱི་
ནི་ལུས་ལ་ཡང་གནོད་པ་བྱ་བར་མི་ནུས་ན་གཟུགས་ཅན་མ་ཡིན་པ་ལ་ལྟ་སྨོས་ཀྱང་ཅི་དགོས་ཏེ། དེ་བས་ན་གང་ལ་ཡང་མི་གནོད་པས་ཤིན་ཏུ་ཡང་ཁྲོ་བར་མི་རིགས་སོ་ཞེས་བྱ་བ་བསྟན་པའི་ཕྱིར། ཡིད་ནི་ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་གསུངས་སོ། །འོན་ཏེ་མི་སྙན་པར་སྨྲ་བ་
དེ་ནི་བདག་ལ་མི་དགའ་བ་ལ་མ་ཡིན་པའི་ཕྱིར་དེ་བདག་མི་འདོད་དེ་ཁྲོའོ་ཞེ་ན། གཞན་དག་ཅེས་བྱ་བ་ལ་སོགས་པ་སྨོས་སོ། །འོན་ཏེ་གཞན་དག་བདག་ལ་མི་དགའ་བ་དེས་ནི་བདག་གི་གྲགས་པ་མ་ཡིན་པ་བསྒྲགས་པས་བདག་གི་རྙེད་པ་ལ་སོགས་པའི་བར་ཆད་བྱེད་པའི་ཕྱིར་གཞན་དག་མི་
དགའ་བར་འདི་བདག་མི་འདོད་དོ་སྙམ་དུ་བསམས་ནས་རྙེད་པའི་བར་ཆད་ཅེས་པ་ལ་སོགས་པ་སྨོས་སོ། །སློབ་དཔོན་གྱིས་བདག་གི་རྙེད་པ་ཞེས་བྱ་བ་ལ་སོགས་པ་སྨོས་ཏེ། འདི་སྐད་བསྟན་ཏེ། སྡིག་པ་དང་བསྔོས་པའི་ནད་པ་འདི་འདོར་ལ། རྙེད་པ་བསྒྲུབ་པའི་དོན་དུ་གཞན་ལ་ཁྲོས་པ་ནི་

རྟག་པ་ནི་འབྲལ་བའི་ཕྱིར། གལ་ཏེ་སྡིག་པ་མི་སོགས་སུ་རུང་བ་དེ་རྙེད་པ་མེད་པའི་ཕྱིར། བདག་ཉིད་ཤི་བ་ནི་བླའི་སྡིག་པ་བསྡུས་པའི་རྙེད་པ་ལོག་པས་འཚོ་བའི་སྒོ་ནས་ཡུན་རིང་དུ་གནས་པ་ལས་ནི་མེད་དེ། ཅིའི་ཕྱིར་ཞེ་ན། དེ་ལྟར་གནས་ཀྱང་མཐར་འཆི་བར་འགྱུར་ལ། དེའི་རྗེས་ལ་ངན་སོང་དུ་
ལྟུང་བར་འགྱུར་རོ་ཞེས་བྱ་བ་ཡིན་ནོ། །གལ་ཏེ་རྙེད་པ་འདི་འདོར་བ་མ་ཡིན་ཏེ། ཤི་འཕོས་ཀྱང་མི་འབྲལ་བར་གནས་སོ་ཞེ་ན། རྨི་ལམ་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་ཞེ་ན། རྙེད་པ་མང་པོ་ཞེས་བྱ་བ་ལ་སོགས་པ་སྨོས་སོ། །གཞན་གྱི་གལ་ཏེ་རྙེད་པས་ཞེས་བྱ་བ་ལ་སོགས་
པ་སྨོས་ཏེ། གལ་ཏེ་སྡིག་པས་བསྒྲུབས་པའི་རྙེད་པས་གསོན་པར་འགྱུར་ཞིང་རྗེས་ལ་སྡིག་པ་ཟད་པར་བྱ་ཞིང་བསོད་ནམས་བསགས་པར་བྱ་བ་ཡིན་པས། དེས་ན་རྙེད་པའི་དོན་དུ་ཁྲོས་པ་ལ་འགལ་བ་མེད་དོ་ཞེ་ན། ལེན་དུ་རྙེད་པའི་དོན་དུ་ཞེས་བྱ་བ་ལ་སོགས་པ་སྨོས་སོ། །དེ་བས་ན་སྡིག་
པས་བསྒྲུབས་པའི་རྙེད་པའི་སྒོ་ནས་གསོན་པར་བྱ་བའི་དོན་ཉིད་མི་འགྲུབ་སྟེ། སླར་ཞིང་སྡིག་པ་ནི་འཕེལ་ཞིང་བསོད་ནམས་ནི་ཉམས་པར་འགྱུར་ཏེ། ཇི་སྐད་དུ། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཡང་། །ཁོང་
ཁྲོ་གཅིག་གིས་འཇོམས་པར་བྱེད། །ཅེས་གོང་དུ་བཤད་པ་ལྟ་བུའོ། །གལ་ཏེ་ཐ་མལ་པའི་ངང་ལ་གནས་པའི་སེམས་བསྟན་པ་ཉམས་པར་བྱེད་པས། རྒྱུ་དེའི་ཕྱིར་མི་སྙན་པར་སྨྲ་བ་ལ་ཁྲོའོ་ཞེ་ན། འོ་ན་ནི་སྔོན་ཆད་སྙན་པར་སྨྲ་བ་ལ། ཡིད་ཁྱོད་ཅི་ཕྱིར་མི་ཁྲོ་སྐྱེ་སྟེ་བརྟན་པ་ཉམས་པར་བྱེད་
པར་མཚུངས་སོ་སྙམ་དུ་བསམས་པའོ། །ད་ནི་སྙན་པར་སྨྲ་བ་དེ་ཇི་ལྟར་དད་པ་མེད་པའི་གང་ཟག་དགེ་བའི་ལས་ལ་མི་འཇུག་ཅིང་མི་དགེ་བའི་ལས་ལ་འཇུག་པར་བྱེད་པས་སྙིང་རྗེའི་གནས་ཡིན་པ་དེ་བཞིན་དུ། འདི་ཡང་སྙིང་རྗེའི་གནས་ཉིད་དུ་བསྟན་པའི་ཕྱིར། དད་པ་ཞེས་བྱ་བ་ལ་སོགས་
པ་སྨོས་སོ། །ད་ནི་དཀོན་མཆོག་ལ་གནོད་པ་བྱེད་པའི་དབང་དུ་བྱས་ནས། ཆོས་ཀྱི་མཚན་ཉིད་ལ་ངེས་པར་སེམས་པའི་བཟོད་པ་བསྟན་པའི་ཕྱིར། སྐུ་གཟུགས་ཞེས་བྱ་བ་ལ་སོགས་པ་སྨོས་ཏེ། དེ་ལ་ཞེ་སྡང་བསྐྱེད་པར་བྱ་བ་ནི་མ་ཡིན་ཏེ། བདག་ནི་ངན་སོང་དུ་ལྟུང་བར་འགྱུར་

བའི་ཕྱིར་དང་། དེས་སངས་རྒྱས་ལ་གནང་བར་མི་འགྱུར་བའི་ཕྱིར། འོན་ཀྱང་བདག་ཉིད་ལ་ཡང་ནུས་པ་དང་ལྡན་ཞིང་སྦྱོར་བ་དང་། གཞིའི་གནས་སྐབས་སུ་སྙིང་རྗེ་ལ་སོགས་པའི་བསམ་པའི་ཐབས་ལ་མཁས་པ་དང་ལྡན་པ་ལ་སྦྱོར་བའི་ཐབས་ལ་མཁས་པས་ཟིན་པའི་
བསྒྲུབ་པར་བྱ་བ་དེ་ཉིད་ཀྱི་ཡང་དོན་དུ་འགྱུར་ཞིང་གཞན་མང་པོ་དག་གི་མི་མོས་པ་སྐྱེ་བར་འགྱུར་ལ་ཐབས་གཞན་གྱིས་མི་བཟློགས་པར་ལས་དེ་བྱེད་པའི་ཕྱིར་ཚར་གཅད་པའི་ཞིང་དུ་འགྱུར་བ་ཡང་ཡིན་ན་ནི། དེའི་ཚེ་གདོན་མི་ཟ་བར་བྱ་དགོས་ཏེ། འདིར་སྡུག་བསྔལ་ཡང་ཕྱི་མ་ལ་ཕན་པར་འགྱུར་བར་བྱ་བའི་
ཕྱིར་དང་། གལ་ཏེ་མ་བྱས་ན་དེའི་ཚེ་ལྟུང་བར་འགྱུར་ཏེ། སྡོམ་པ་ཉི་ཤུ་པ་ལས་ཇི་སྐད་དུ། གཞན་གྱི་ཡིད་མི་བདེ་བ་སྲུང་བའི་ཕྱིར། །མ་བྱས་ན་ནི་ཉོན་མོངས་བཅས་ཀྱང་ཆོས་མི་བྱེད། །ཅེས་བྱ་བའི་ལྟུང་བར་འགྱུར་ལ་དེ་ལྟ་མ་ཡིན་ཏེ། ད་ནི་བླ་མ་དང་བཤེས་གཉེན་ལ་སོགས་ལ་གནོད་པ་བྱེད་
པ་རྣམས་ལ་དོན་དམ་པའི་བདེན་པའི་དབང་དུ་བྱས་པའི་ཆོས་ཀྱི་མཚན་ཉིད་ལ་ངེས་པར་སེམས་པའི་བཟོད་པ་བསྒོམ་པར་བསྟན་པ། བླ་མ་ཞེས་བྱ་བ་ལ་སོགས་པ་སྨོས་ཏེ་སྔ་མ་བཞིན་ནོ། །ད་ནི་ཀུན་རྫོབ་ཀྱི་བདེན་པའི་དབང་དུ་བྱས་ནས་བཟོད་པ་བསྒོམ་པ་བསྟན་པའི་ཕྱིར། ལུས་ཅན་རྣམས་ལ་ཞེས་
བྱ་བ་ལ་སོགས་པ་སྨོས་ཏེ། དེ་ཡང་གོང་དུ་དབྱུག་པ་ལ་སོགས་པ་དངོས་བཀོལ་ཏེ་ཞེས་བྱ་བ་ལ་སོགས་པ་སྔར་བཤད་པ་བཞིན་ནོ། །ད་ནི་གཉི་གས་ཉེས་པའི་ཕྱིར་གཞན་འབའ་ཞིག་ལ་ཁྲོར་མེད་དོ་བར་བསྟན་པའི་ཕྱིར། ལ་ལ་རྨོངས་པས་ཞེས་བྱ་བ་ལ་སོགས་པ་སྨོས་ཏེ། དེ་ཡང་དེའི་མཚོན་དང་
བདག་གི་ལུས་ཞེས་སྔར་བཤད་པ་དང་མཚུངས་སོ། །བདག་གི་གཉེན་ལ་སོགས་པ་ཉིད་ཀྱི་ལས་ཀྱིས་ངེས་པར་གཞན་ལ་ཁྲོ་བ་བྱར་མེད་པར་བསྟན་པའི་ཕྱིར། གང་གིས་གཞན་དག་ཅེས་བྱ་བ་ལ་སོགས་པ་སྨོས་ཏེ། དེ་ཡང་གོང་དུ། བྱིས་པ་སྡུག་བསྔལ་མེད་འདོད་ཅིང་། །ཞེས་བྱ་བ་ལ་སོགས་པ་
ཇི་སྐད་བསྟན་པ་དང་མཚུངས་སོ། །ད་ནི་འཇུག་པའི་ཚུལ་གྱིས་ཐམས་ཅད་ཀྱང་ལས་ལ་རག་ལས་པའི་ཕྱིར་མ་འོངས་པའི་དུས་སུ་ཕན་ཚུན་དགེ་བའི་སེམས་སུ་འགྱུར་གྱི། དེ་ལས་གཞན་པའི་སེམས་སུ་མི་འགྱུར་བར་བྱ་བའི་ཕྱིར། ད་ལྟར་གྱི་དུས་སུ་བསོད་ནམས་ལ་འབད་པར་བྱའོ་ཞེས་བསྟན་

པར་བྱ་བའི་ཕྱིར། དེ་ལྟར་མཐོང་ནས་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་འཕགས་པ་བརྒྱད་སྟོང་པ་ལས་གང་གཱའི་ལྷ་མོའི་ལེའུའི་ནང་ནས་ཇི་སྐད་གསུངས་པ་དེ་བཞིན་དུ་བསྒྲུབ་པར་བྱའོ་ཞེས་བྱ་བའི་དོན་ཏོ། །ད་ནི་ཞེ་སྡང་གི་རྒྱུ་སྤངས་པའི་སྒོ་ནས་ཞེ་སྡང་སྤང་བར་བྱ་བར་བསྟན་པའི་ཕྱིར།
དཔེར་ན་ཁྱིམ་ཚིག་ཅེས་བྱ་བ་ལ་སོགས་པ་སྨོས་ཏེ། གང་ལ་ལྷག་པར་ཆགས་པ་དེ་ལ་བདག་གིས་གནོད་པར་བྱས་པས་ཞེ་སྡང་འབྱུང་བའི་ཕྱིར། ཆགས་པ་ནི་ཞེ་སྡང་གི་རྒྱུ་ཡིན་ལ། བསྐལ་པ་སྟོང་དུ་བསགས་པའི་ཞེ་སྡང་བྱ་བ་ལ་སོགས་པ་གོང་དུ་བསྟན་པ་བཞིན་དུ་ཞེ་སྡང་སྐྱེས་པའི་དབང་གིས་བསོད་
ནམས་ཚིག་པར་དོགས་པའི་ཕྱིར། ཞེ་སྡང་སྤོང་བའི་དོན་དུ་དེའི་རྒྱུ་ལྷག་པར་ཆགས་པ་སྤང་བར་བྱའོ་ཞེས་བྱ་བའི་དོན་ཏོ། །འོན་ཏེ་དེ་སྤོང་བའི་གནས་སྐབས་ཀྱི་སྡུག་བསྔལ་བཟོད་པར་མི་ནུས་སོ་ཞེ་ན། སྡུག་བསྔལ་ཆེན་པོ་སྤང་བའི་ཕྱིར། དེ་སྤོང་བའི་ཐབས་སུ་གྱུར་པའི་སྡུག་བསྔལ་བཟོད་པར་བྱ་བ་ཡིན་
པས། ངན་སོང་གསུམ་གྱི་སྡུག་བསྔལ་གྱི་རྒྱུ་ཞེ་སྡང་སྤང་བའི་ཕྱིར། ཞེ་སྡང་གི་རྒྱུ་འདོད་ཆགས་སྤོང་བའི་གནས་སྐབས་ཀྱི་སྡུག་བསྔལ་ལ་བཟོད་པར་བྱ་བའི་སྒོ་ནས། ཞེ་སྡང་བཟློག་པར་བྱ་དགོས་སོ་ཞེས་བྱ་བའི་དོན་ཏོ། །ཡང་གང་གི་ཚེ་རེས་འགའ་བདག་དང་གཞན་
གྱི་རྒྱུད་ལ་མངོན་པར་མཐོ་བ་དང་། ངེས་པར་ལེགས་པར་སྒྲུབ་པའི་དོན་བྱེད་པར་ཡང་འཕྲལ་གྱི་འདོད་པའི་ཡོན་ཏན་ཙམ་བསྒྲུབ་པའི་དོན་དུ་མི་དགེ་བའི་ལས་བྱས་པའི་རྒྱུས་སེམས་ཅན་དམྱལ་བ་ལ་སོགས་པའི་སྡུག་བསྔལ་དཔག་ཏུ་མེད་པ་ཡང་བཟོད་པར་ནུས་ན། ལྷག་པར་ཆགས་པ་སྤང་བའི་
གནས་སྐབས་ཀྱི་སྡུག་བསྔལ་འདི་ནི་ཅི་སྟེ་བཟོད་པར་མི་ནུས་ཏེ། ཅིའི་ཕྱིར་ཞེ་ན། དམྱལ་བ་ལ་སོགས་པའི་སྡུག་བསྔལ་དེ་ཙམ་དུ་གནོད་པ་ཡང་མ་ཡིན་པའི་ཕྱིར་ཏེ། ཇི་ལྟར་ཞེ་ན། དེ་ལ་བརྟེན་ནས་ཞེ་སྡང་ལ་སོགས་པ་སྤང་བའི་རིམ་གྱིས་གླགས་དང་། གཞན་གྱི་དོན་ཆེན་པོ་མངོན་
པར་མཐོ་བ་དང་། ངེས་པར་ལེགས་པ་ཡང་འགྲུབ་པའི་ཕྱིར། འགྲོ་བ་བདག་དང་གཞན་གྱི་དོན་ཆེན་པོ་མངོན་པར་མཐོ་བ་དང་། ངེས་པར་ལེགས་པའི་རྒྱུར་གྱུར་པའི་ཞེ་སྡང་གི་རྒྱུ་ལྷག་པར་ཆགས་པ་སྤང་བའི་གནས་སྐབས་སུ་སྡུག་བསྔལ་དང་དུ་བླང་བ་འདི་ལ་ཕན་ཡོན་མཐོང་བའི་སྒོ་ནས་

དགའ་བ་བསྐྱེད་པར་རིགས་ཀྱི། སྒྱིད་ལུག་པར་མི་བྱའོ་ཞེས་བྱ་བའི་དོན་ཏོ། །ད་ནི་ཞེ་སྡང་གི་ཆར་གཏོགས་པ་ཕྲག་དོག་སྤོང་བའི་དབང་དུ་བྱས་ནས། གཞན་གྱི་ཡོན་ཏན་བརྗོད་པ་ཐོས་པའི་ཚེ་དེ་ལ་ཕྲག་དོག་སྤང་བའི་ཕྱིར། གཞན་གྱིས་ཞེས་བྱ་བ་ལ་སོགས་པ་སྨོས་ཏེ།
གལ་ཏེ་འགའ་ཞིག་གིས་གཞན་གྱི་ཡོན་ཏན་དང་ལྡན་པ་ལ་བསྟོད་པའི་རྒྱུས། བསྟོད་པའི་ཡུལ་དེའི་ཡིད་ལ་དགའ་བ་སྐྱེ་ན། དེའི་ཚེ་ཡིད་ཁྱོད་ཀྱིས་ཀྱང་ཕ་རོལ་པོ་དེ་ལ་བསྟོད་པའི་སྒོ་ནས་གཞན་གྱིས་བསྟོད་ཅིང་དགའ་བར་བྱས་པ་ལྟར། ཅིའི་ཕྱིར་དགའ་བར་མི་བྱེད་དེ། དགའ་བར་བྱ་བར་
རིགས་སོ་ཞེས་བྱ་བའི་དོན་ཏོ། །འོན་ཏེ་དེ་ལྟར་ན་བྱས་ན་ཕན་ཡོན་ཅི་ཡོད་སྙམ་ན། ཁྱོད་ཀྱི་ཞེས་བྱ་བ་ལ་སོགས་པ་སྨོས་ཏེ། གཞན་ཡོན་ཏན་དང་ལྡན་པ་ཁྱོད་ཀྱི་ཡིད་དགའ་བ་དང་བདེ་བ་ནི་མ་འོངས་པའི་དུས་སུ་ཡང་བདག་ཉིད་ལ་གཞན་གྱིས་བསྟོད་པ་ལ་སོགས་པའི་རྒྱུས་ཡིད་དགའ་བའི་བདེ་བ་
འབྱུང་ལ། གཞན་ཡང་སེམས་ཅན་གྱི་དོན་བྱེད་པའི་ཚུལ་ཁྲིམས་བཅུ་གཅིག་ལས་གཞན་གྱི་ཡོན་ཏན་བརྗོད་པས་དགའ་བར་བྱེད་པའི་ཚུལ་ཁྲིམས་ཡིན་པའི་ཕྱིར། ཁ་ན་མ་ཐོ་བ་མེད་པ་ཡང་ཡིན་ཞིང་དེ་ཉིད་ཀྱི་ཕྱིར་དེ་བཞིན་གཤེགས་པས་ཀྱང་། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་
སོགས་པ་ལས། གཞན་གང་དག་ཕ་རོལ་ཏུ་ཕྱིན་པ་དྲུག་ལ་གནས་པ་དེ་དག་གི་ལེགས་པ་བརྗོད་ཅིང་མཐུན་པས་དགའ་བར་བྱའོ་ཞེས་ཡོན་ཏན་དང་ལྡན་པ་རྣམས་ལ་བྱ་བའི་ཆ་ཡིན་པར་གནང་བ་ཡིན་ནོ། །དེར་མ་ཟད་ཀྱི་གཞན་ལ་ཡོན་ཏན་ཇི་ལྟ་བ་བཞིན་དུ་བརྗོད་ཅིང་དགའ་བར་བྱེད་པ་འདི་ནི་
བསྡུ་བའི་དངོས་པོ་བཞི་ལས་སྙན་པར་སྨྲ་བ་ཞེས་བྱ་སྟེ། བདག་ཉིད་ལ་ཚེགས་ཆུང་བའི་སྒོ་ནས་གཞན་མོས་པར་བྱེད་པའི་ཕྱིར། གཞན་བསྡུ་བའི་མཆོག་ཀྱང་ཡིན་ཞེས་བཤད་དོ། །གལ་ཏེ་འདི་སྙམ་དུ་ཕ་རོལ་པོ་བསྟོད་པའི་ཡུལ་དེ་ལ་གཞན་གྱིས་བསྟོད་པས་དགའ་བར་བྱེད་པ་དེ་ལྟར་
བདག་གིས་ནི་བསྟོད་ཀྱང་དགའ་བ་མི་སྐྱེ་བའི་ཕྱིར། སྟོད་པར་མི་བྱེད་དོ། །སྙན་པའི་དོགས་པ་བསུས་ནས། གཞན་ཡང་ཞེས་བྱ་བ་ལ་སོགས་པ་སྨོས་ཏེ། གཞན་ནི་བདག་གིས་བསྟོད་དུ་ཟིན་ཀྱང་ཕ་རོལ་གྱིས་བསྟོད་པས་ཡུལ་དེའི་རྒྱུད་ལ་དགའ་བ་སྐྱེ་བ་དེ་ལྟར་བདེ་བ་སྐྱེ་བར་མི་འགྱུར་རོ་

ཞེས་གལ་ཏེ་ཡིད་ཁྱོད་བསྟོད་པའི་ཡུལ་དེའི་རྒྱུད་ལ་ཡིད་དགའ་བའི་བདེ་བ་འདི་སྐྱེ་བར་མི་འདོད་ན་དེའི་ཚེ་སྲོག་གཅོད་པ་སྤོང་བ་དང་། གླ་པ་ལ་གླ་རྔན་སྦྱིན་པ་ལ་སོགས་པའི་འབྲས་བུ་གང་ཞེ་ན། མཐོང་བ་སྟེ་འདིར་གླ་པས་ལས་བྱེད་པ་ལ་སོགས་པ་མ་མཐོང་བ་སྟེ། ཚེ་ཕྱི་མར་མཐོ་རིས་ཐོབ་པ་ལ་
སོགས་པ་ཡང་ཉམས་ཏེ་མི་འབྱུང་བར་ཐལ་བར་འགྱུར་བ་ཞིག་ན་དེའི་ཚེ་སྲོག་གཅོད་པ་སྤོང་བ་ལ་སོགས་པ་ལ་བརྟེན་པའི་ཕྱིར། འབྲས་བུ་མཐོ་རིས་སུ་སྐྱེ་བ་ལ་སོགས་པ་གདོན་མི་ཟ་བར་འབྱུང་དུ་རུང་བ་བཞིན་དུ། གཞན་ལ་བསྟོད་པ་ཞེས་བྱ་བའི་རྒྱུ་དེ་བདག་གིས་བྱས་ན་ཡང་དེའི་ཚེ་དེའི་འབྲས་བུ་ཕ་
རོལ་པོ་དེའི་རྒྱུད་ལ་ཡིད་དགའ་བ་སྐྱེ་བར་འགྱུར་བས། ཕ་རོལ་པོ་དེ་ལ་གཞན་གྱིས་བསྟོད་པའི་ཚེ་བདག་གིས་ཀྱང་བསྟོད་པར་བྱའི། ཕྲག་དོག་མི་བྱའོ་ཞེས་བྱ་བའི་དོན་ཏོ། །ཡང་ཇི་ལྟར་གཞན་གྱིས་བདག་རང་གི་ཡོན་ཏན་བརྗོད་པའི་ཚེ། བདག་ལ་སྟོད་པར་བྱེད་པའི་གང་ཟག་གཞན་ལ་
བདག་ཡིད་དགའ་ཞིང་བདེ་བ་སྐྱེད་པར་འདོད་པར་བྱེད་ན། དེ་བཞིན་དུ་བདག་གིས་གཞན་གྱི་ཡོན་ཏན་བརྗོད་པའི་དུས་དེའི་ཚེ། ཕ་རོལ་པོ་དེ་བདག་རང་ལ་ཡིད་དགའ་ཞིང་བདེ་བ་སྐྱེ་བར་ཇི་སྟེ་མི་འདོད་པར་བྱེད་དེ། གདོན་མི་ཟ་བར་འདོད་པར་བྱ་དགོས་སོ་ཞེས་བྱ་བའི་དོན་ཏོ། །ད་ནི་ཕ་རོལ་པོ་ཡོན་ཏན་
དང་ལྡན་པ་ལ་སོགས་པ་མཐོང་བའི་ཚེ། དེ་ལ་ཕྲག་དོག་སྤོང་བར་བསྟན་པའི་སེམས་ཅན་ཐམས་ཅད་ཅེས་བྱ་བ་ལ་སོགས་པ་སྨོས་ཏེ། བདག་གིས་སེམས་ཅན་ཐམས་ཅད་ཀྱི་དོན་དུ་དང་པོར་བྱང་ཆུབ་ཏུ་སེམས་བསྐྱེད་པ་ཡིན་པའི་ཕྱིར། གང་གི་ཚེ་བདག་གིས་མ་བསྒྲུབས་པར་སེམས་ཅན་
ཉིད་ཀྱིས་བདེ་བ་ཕུན་སུམ་ཚོགས་པ་རྙེད་པ་དེའི་ཚེ། དེ་ལ་ཤིན་ཏུ་དགའ་བར་བྱ་བར་རིགས་ཀྱི་ཕྲག་དོག་མི་བྱའོ་ཞེས་བསྟན་ཏོ། །ད་ནི་ཞེ་སྡང་ལ་བརྟེན་པའི་ཆོས་རྣམ་པ་གཉིས་ལས། དང་པོ་དགྲ་ལ་སོགས་པའི་སྡུག་བསྔལ་བྱུང་བའི་ཚེ། དེ་ལ་རྗེས་སུ་ཡི་རང་བ་སྤང་བར་བསྟན་པའི་
ཕྱིར། གལ་ཏེ་དགྲ་ཞིག་ཅེས་བྱ་བ་ལ་སོགས་པ་སྨོས་ཏེ། བྱུང་བ་ཉིད་ཀྱིས་ཆོག་མོད་དེ་ལ་དགའ་བ་བསྐྱེད་མོད་མེད་དོ་ཞེས་བྱ་བའི་ཐ་ཚིག་གོ། །ད་ནི་ཉེས་པ་མ་བྱུང་བ་ལས་ཡིད་སྨོན་མི་བྱ་བར་བསྟན་པའི་ཕྱིར། ཁྱོད་ཀྱིས་ཞེས་བྱ་བ་ལ་སོགས་པ་སྨོས་སོ། །གལ་ཏེ་ཡིད་སྨོན་

བྱས་པའི་གཞིས་སྡུག་བསྔལ་དེ། ཕ་རོལ་པོ་ལ་གྲུབ་པའི་ཕྱིར་དེ་ལ་གདགས་པར་བྱེད་དོ་ཞེ་ན། ཁྱོད་ཀྱི་འདོད་པས་ཞེས་བྱ་བ་ལ་སོགས་པ་སྨོས་ཏེ། དེ་ཡང་གྲུབ་པ་ཉིད་ཀྱིས་ཆོག་མོད། དེ་ལ་དགའ་བར་བྱ་མི་དགོས་ཞེས་བྱ་བའི་དོན་ཏེ། །གལ་ཏེ་དེས་མཚུངས་
པར་འགྱུར་བའི་ཕྱིར་དེ་ལ་བདག་དགའ་བར་བྱེད་དོ་ཞེ་ན་མ་ཡིན་ཏེ། དེ་ལས་ཕུང་བ་གཞན་ཅི་ཡོད། །ཅེས་བྱ་བ་སྨོས་སོ། །ཇི་ལྟར་ཕུང་བར་འགྱུར་ཞེ་ན། ཉོན་མོངས་ཞེས་བྱ་བ་ལ་སོགས་པ་སྨོས་ཏེ། ཉོན་མོངས་པའི་ཉ་པས་བཏབ་པའི་མཆིལ་པ་སྟེ་ལྕགས་ཀྱུའོ། །དེས་ནི་བདག་གི་
སེམས་ཀྱི་རྒྱུད་གཞན་དུ་མི་འཆོར་བར་གཟུང་བ་ལ་ཤིན་ཏུ་མི་བཟད་པར་གཟེ་ཞིང་རྣོ་སྟེ། གང་ཞེ་ན། དགྲ་ལ་སོགས་པ་སྡུག་བསྔལ་བྱུང་ཟིན་པ་ལ་དགའ་བར་བྱེད་པ་དང་། མ་བྱུང་བ་ལ་ཡིད་སྨོན་བྱེད་པ་སྟེ། དེས་བཟུང་ན་བདག་ཚེ་ཕྱི་མའི་དུས་སུ་སེམས་ཅན་དམྱལ་བ་ལ་སོགས་པར་གདོན་
མི་ཟ་བར་འཚེད་པར་འགྱུར་རོ་ཞེས་བྱ་བའི་དོན་ཏོ། །ད་ནི་བསྟོད་པ་ལ་སོགས་པ་ལ་ལྷག་པར་དགའ་བར་བྱ་བ་ཡིན་གྱི། གནོད་པ་བྱེད་པ་རྣམས་ནི་བདག་ལ་ཕན་འདོགས་པ་ཡིན་པའི་ཕྱིར། དེ་ལ་ནི་ཁྲོ་བར་མི་བྱ་བར་དགའ་བར་བྱའོ་ཞེས་བསྟན་པའི་ཕྱིར། བསྟོད་དང་ཞེས་བྱ་བ་ལ་སོགས་
པ་སྨོས་ཏེ། དེ་ལ་དགའ་ཞིང་ཆགས་པར་བྱ་བའི་རྒྱུ་མེད་པའི་ཕྱིར་རོ། །ཅིའི་ཕྱིར་ཞེ་ན། དེས་བསོད་ནམས་ལ་སོགས་པར་མི་འགྱུར་བའི་ཕྱིར་རོ། །འོན་ཏེ་དེ་ལ་རང་དོན་ཞིག་ཡོད་དོ་སྙམ་ན་བདག་ནི་ཞེས་བྱ་བ་ལ་སོགས་པ་སྨོས་ཏེ། འོན་ཏེ་དེས་ཡིད་བདེ་བར་འགྱུར་རོ་སྙམ་ན།
ཡིད་བདེ་བ་འབའ་ཞིག་ཅེས་བྱ་བ་སྨོས་ཏེ། རབ་ཏུ་བྱུང་ནས་ཀྱང་དགོས་པ་མེད་དོ་ཞེས་བྱ་བའི་དོན་ཏོ། །ཡང་འཇིག་རྟེན་པ་དག་ནི་ཕྱུག་པོ་དང་དཔའ་བོ་ལ་སོགས་པ་ཡིན་པའི་གྲགས་པའི་དབང་གིས་བྱ་བ་སྣ་ཚོགས་བྱེད་མོད་ཀྱི། གྲགས་པ་ནི་ཚིག་གི་བདག་ཉིད་ཡིན་པས་དེ་ལ་ཆགས་
པར་བྱ་བའི་རྒྱུ་མེད་དོ་ཞེས་བསྟན་པའི་ཕྱིར། གྲགས་པའི་དོན་དུ་ཞེས་བྱ་བ་ལ་སོགས་པ་སྨོས་སོ། །གཞན་ཡང་འགྱུར་བའི་སྡུག་བསྔལ་གྱི་ངོ་བོ་ཉིད་ཡིན་པས་དེ་ལ་ཆགས་པར་མི་བྱའོ་ཞེས་བསྟན་པའི་ཕྱིར། བྱེ་མའི་ཁང་བུ་ཞེས་བྱ་བ་ལ་སོགས་པ་སྨོས་སོ། །འོན་ཏེ་འདི་སྙམ་དུ་

བསྟོད་པ་ལ་སོགས་པའི་ཚིག་ནི་བེམས་པོ་ཡིན་པའི་ཕྱིར་བདག་གི་ཡོན་ཏན་བརྗོད་པར་བྱ་བའི་བསམ་པ་མེད་པས། དེ་ཆགས་པར་བྱ་བ་མ་ཡིན་ནམ་སྟོད་པར་བྱེད་པའི་གང་ཟག་དེ་བདག་ལ་དགའ་བ་ཡིན་པའི་ཕྱིར་དེ་ལ་བདག་ཆགས་པར་བྱེད་དོ་སྙམ་ནས། རེ་ཞིག་ཅེས་བྱ་བ་ལ་སོགས་པ་སྨོས་སོ། །
སློབ་དཔོན་གྱིས་ལེན་དུ་གཞན་ནམ་ཞེས་བྱ་བ་ལ་སོགས་པ་སྨོས་ཏེ། ཕ་རོལ་པོ་དེ་བདག་གམ་བདག་གི་གཉེན་བཤེས་ལ་སོགས་པ་དག་ལ་དགའ་བ་ལ་དགའ་བ་ཡིན་དུ་ཟིན་ཀྱང་དེ་ནི་ཕ་རོལ་པོ་དེ་ཉིད་ཀྱི་རང་བཞིན་པས་ཉམས་སུ་མྱོང་དུ་ཟད་ཀྱང་བདག་ལ་མི་ཕན་ནོ་ཞེས་བྱ་བའི་དོན་ཏོ། །གལ་ཏེ་དེས་
བདག་ལ་ཕན་ན་ནི་དེའི་ཚེ་གཞན་དག་ཀྱང་བདེ་བར་བྱ་བའི་ཕྱིར། བདག་གིས་ཀྱང་བསྟོད་ཅིང་དགའ་བར་བྱ་བར་རིགས་ན། དེ་ལྟར་ཅིའི་ཕྱིར་མི་བྱེད་དེ། དེ་ལྟར་ཡང་བྱ་དགོས་སོ་ཞེས་བསྟན་པར་བྱ་བའི་ཕྱིར། དེ་བདེ་བ་ཡིས་ཞེས་བྱ་བ་ལ་སོགས་པ་སྨོས་ཏེ། བདག་བདེ་ཞེས་བྱ་བ་ནི་བདག་
དགའ་བར་བྱ་བའི་དོན་དུ་བདག་ཀྱང་ཅི་སྟེ་མི་བདེ་སྟེ། ཅིའི་ཕྱིར་དག་པར་མི་བྱེད་ཅེས་བྱ་བའི་དོན་ཏོ། །དེ་བས་ཞེས་བྱ་བ་ལ་སོགས་པ་ནི་ཇི་སྐད་བཤད་པའི་ཚུལ་གྱིས་གཞན་དགའ་བ་དེ་ལ་ལྷག་པར་ཆགས་པར་བྱ་བའི་རྒྱུ་མེད་དོ་ཞེས་བསྟན་ཏོ། །ད་ནི་སྟོད་པར་བྱེད་པ་ལ་སོགས་པའི་ཉེས་དམིགས་
ཤེས་པར་བྱ་བའི་སྒོ་ནས་དེ་ལ་ཆགས་པ་སྤོང་བར་བསྟན་པའི་ཕྱིར། བསྟོད་ཅེས་བྱ་བ་ལ་སོགས་པ་སྨོས་སོ། །ད་ནི་གནོད་པ་བྱེད་པའི་ཕན་ཡོན་ཤེས་པར་བྱ་བའི་སྒོ་ནས་དེ་ལ་ཁྲོ་བར་མི་བྱ་བ་བསྟན་པའི་ཕྱིར། གང་དག་བདག་བཅིངས་ཞེས་བྱ་བ་ལ་སོགས་པ་སྨོས་ཏེ། གཞན་གྱིས་གནོད་པ་བྱས་པ་
ལ་བཟོད་པ་བྱས་པའི་རྒྱུས་བདག་གི་སྡིག་པ་བྱང་ཞིང་བསོད་ནམས་སྤེལ་བས་ངན་སོང་ལས་ཐར་བར་བྱ་བའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་བསོད་ནམས་ཀྱི་གེགས་བྱེད་པའི་ཕྱིར་དེ་ལ་ཁྲོ་བར་བྱེད་ཅེ་ན། འདི་ནི་ཞེས་བྱ་བ་ལ་སོགས་པ་སྨོས་ཏེ། བསོད་ནམས་ཀྱི་རྒྱུ་འདི་དཀའ་
ཐུབ་ཡིན་ལ། དཀའ་ཐུབ་ཀྱི་མཆོག་ཏུ་གྱུར་པ་ནི་བཟོད་པ་ཡིན་ཞིང་དེའི་རྒྱུ་ནི་གནོད་པ་བྱེད་པ་རྣམས་ཡིན་ལ། གལ་ཏེ་བདག་ལ་གནོད་པར་བྱེད་པ་ཡོད་བཞིན་དུ་བཟོད་པ་སྒོམ་པར་མི་བྱེད་ན། དེའི་ཚེ་བདག་གིས་གེགས་བྱས་པ་ཡིན་གྱི་གནོད་པར་བྱེད་པ་རྣམས་ཀྱིས་གེགས་བྱས་པ་མ་ཡིན་ནོ་ཞེ་ན།

གང་ཞིག་ཅེས་བྱ་བ་ལ་སོགས་པ་སྨོས་སོ། །དེ་ལྟར་རྒྱུ་ཡིན་པའི་ཕྱིར་གེགས་ཉིད་དུ་མི་འཐད་པའི་དཔེ་བསྟན་པའི་ཕྱིར། དུས་སུ་ཕྱིན་པའི་ཞེས་བྱ་བ་ལ་སོགས་པ་སྨོས་སོ། །དེ་ལྟ་བས་ན་བཟོད་པའི་རྒྱུ་ནི་རྙེད་པར་དཀའ་བ་ཡིན་པ་ལས་རེས་འགའ་རྙེད་པའི་ཚེ། དེའི་ཕན་
ཡོན་ཤེས་པར་བྱ་བའི་སྒོ་ནས་དེ་ལ་ཁྲོ་བར་མི་བྱའི་དགའ་བར་བྱ་བ་ཉིད་དུ་བསྟན་པའི་ཕྱིར། འཇིག་རྟེན་ན་ནི་ཞེས་བྱ་བ་ལ་སོགས་པ་སྨོས་སོ། །བཟོད་པ་ལས་བྱུང་བའི་བསོད་ནམས་འདི་ནི་གནོད་པར་བྱེད་པ་འདི་ལ་བརྟེན་ཏེ་འགྲུབ་པས། དགེ་བའི་རྩ་བ་དེ་ཡང་དེ་ཉིད་ཀྱི་དོན་དུ་ཡོངས་སུ་བསྔོ་
བའི་ཚུལ་གྱིས་དེ་མཆོད་པར་བྱ་བ་ཉིད་དུ་བསྟན་པའི་ཕྱིར། འདི་དང་ཞེས་བྱ་བ་ལ་སོགས་པ་སྨོས་སོ། །འོན་ཏེ་དེ་ལྟར་རྒྱུ་ཡིན་དུ་ཟིན་ཀྱང་ཕན་གདགས་པའི་བསམ་པ་མེད་པས་མཆོད་པར་བྱ་བ་མ་ཡིན་ནོ་སྙམ་དུ་བསམ་ནས། གལ་ཏེ་བཟོད་པ་སྒྲུབ་ཅེས་བྱ་བ་ལ་སོགས་པ་སྨོས་སོ། །རྒྱུ་ཡིན་
ཡང་བསམ་པ་མེད་པ་ཙམ་གྱིས་མཆོད་པར་བྱ་བ་མ་ཡིན་པ་ནི། དེའི་ཚེ་དེ་ལ་མགོ་བསྒྲེ་བའི་ཕྱིར། འགྲུབ་པའི་ནི་ཞེས་བྱ་བ་ལ་སོགས་པ་སྨོས་སོ། །ཕ་རོལ་པོས་མི་མཚུངས་པ་ཉིད་དུ་བསྟན་པའི་ཕྱིར། གལ་ཏེ་དགྲ་འདི་ཞེས་བྱ་བ་ལ་སོགས་པ་སྨོས་སོ། །དེ་ལྟར་གནོད་པར་བྱ་བའི་བསམ་
པ་དང་ལྡན་པས་བཟོད་པའི་རྒྱུ་ཉིད་ཡིན་གྱི། དེ་ལྟ་མ་ཡིན་ན་ནི་རྒྱུ་ཉིད་དུ་ཡང་མི་རུང་བའི་ཕན་གདགས་པའི་བསམ་པ་མེད་ཀྱང་མཆོད་པར་བྱ་བའི་གནས་ཡིན་པས་སྨན་པ་བཞིན་དུ་ཞེས་བྱ་བ་ལ་སོགས་པ་སྨོས་སོ། །དེ་ལྟར་སེམས་ཅན་རྣམས་ལ་བརྟེན་ནས་སྦྱིན་པ་དང་ཚུལ་ཁྲིམས་དང་
བཟོད་པ་ལ་སོགས་པའི་ཆོས་སྐྱེ་བས་དེའི་ཕྱིར་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་སྙམ་པ་ལ། འདི་དག་ཅེས་བྱ་བ་ལ་སོགས་པ་སྨོས་སོ། །དེ་ལྟར་དགེ་བའི་ཆོས་སྐྱེ་བའི་རྒྱུར་འདྲ་བས་རྒྱལ་བ་བཞིན་དུ་སེམས་ཅན་ལ་ཡང་མཆོད་པའི་གནས་ཡིན་པའི་ཕྱིར། སེམས་ཅན་
རྣམས་དང་ཞེས་བྱ་བ་སྨོས་སོ། །འོ་ན་རྣམ་པ་ཐམས་ཅད་དུ་འདྲའོ་ཞེ་ན། སངས་རྒྱས་ནི་གཞན་ལ་ཕན་གདགས་པའི་མཐུ་མངའ་ལ། སེམས་ཅན་ལ་ནི་དེ་ལྟ་མ་ཡིན་ཡང་། དགེ་བའི་ཆོས་སྐྱེ་བར་འདྲ་བའི་ཕྱིར། བསམ་པའི་ཡོན་ཏན་ཞེས་བྱ་བ་ལ་སོགས་པ་སྨོས་སོ། །འོན་ཏེ་

འབྲས་བུའི་སྒོ་ནས་ཇི་ལྟར་མཉམ་པ་ཡིན་སྙམ་པ་ལ་བྱམས་སེམས་ཞེས་བྱ་བ་ལ་སོགས་པ་སྨོས་ཏེ། དགེ་བའི་ལས་སྟོབས་དང་ལྡན་པ་ནི་མཐོང་བའི་ཆོས་ལ་མྱོང་བར་འགྱུར་བ་ཡིན་ལ། དེ་ནི་གཉི་ག་ལས་ཀྱང་འགྲུབ་སྟེ། ཇི་ལྟར་སེམས་ཅན་ཡིན་ཡང་བྱམས་པའི་ཏིང་ངེ་འཛིན་ལས་ལངས་པ་ལ་
མཆོད་པ་བྱས་པ་ལྟ་བུ་སྟེ། ཇི་ལྟར་ཆོས་མངོན་པ་ལས། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། ཡོན་ནི་མཐོང་བའི་ཆོས་ལ་མྱོང་། །ཞེས་བཤད་པ་ལྟ་བུ་དང་། དེ་བཞིན་དུ་སངས་རྒྱས་ལ་མཆོད་པ་བྱས་པས་ཚེ་འདི་ཉིད་ལ་རྣམ་པར་
སྨིན་པ་ཕྱུག་པོ་ལ་སོགས་པའི་འབྲས་བུ་ཉམས་སུ་མྱོང་བར་འགྱུར་རོ་ཞེས་མདོ་སྡེ་ལས་ཇི་སྐད་གསུངས་པ་ལྟ་བུའོ། །འོན་ཏེ་དེ་བཞིན་གཤེགས་པ་ཡོན་ཏན་དཔག་ཏུ་མེད་པ་དང་ལྡན་པའི་ཕྱིར། མཆོད་པར་བྱ་བར་རིགས་ཀྱི་སེམས་ཅན་རྣམས་ལ་ནི་དེ་ལྟ་མ་ཡིན་ནོ་ཞེ་ན། དེ་བཞིན་གཤེགས་པའི་
ཡོན་ཏན་རྣམས་ཀྱི་ནང་ནས་གང་ལ་བརྟེན་ཏེ་སངས་རྒྱས་ཀྱི་ཆོས་སྐྱེ་བ་ཞེས་བྱ་བའི་ཡོན་ཏན་ནི་སེམས་ཅན་རྣམས་ལའང་ཡོད་པའི་ཕྱིར། དེས་ན་མཆོད་པའི་གནས་ཡིན་པས་ཡོན་ཏན་རྒྱ་མཚོ་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་དེ་བཞིན་གཤེགས་པ་ལ་མཆོད་པ་ལ་སོགས་པ་ལ་
བརྟེན་ནས་སངས་རྒྱས་ཀྱི་ཆོས་སྐྱེ་བ་བཞིན་དུ་སེམས་ཅན་རྣམས་ལ་བརྟེན་ནས་ཀྱང་སྐྱེ་བར་འགྱུར་རོ་ཞེས་བྱ་བའི་ཐ་ཚིག་གོ། །ད་ནི་ཐམས་ཅད་ལ་ཤིན་ཏུ་ཕན་འདོགས་པར་མཛད་པའི་དེ་བཞིན་གཤེགས་པ་དེ་རྣམས་ལ་དྲིན་ལན་ལྡོན་པའི་ཐབས་དམ་པ་ཡིན་པའི་ཕྱིར་ཡང་སེམས་ཅན་རྣམས་མགུ་བར་བྱའོ་
ཞེས་བསྟན་པའི་ཕྱིར། གཞན་ཡང་ཞེས་བྱ་བ་ལ་སོགས་པ་སྨོས་སོ། །འོན་ཏེ་ཇི་ཙམ་དུ་བདག་ལ་ཕན་འདོགས་པར་མཛད་ཅེ་ན། གང་གི་ཕྱིར་ཞེས་བྱ་བ་ལ་སོགས་པ་སྨོས་སོ། །ད་ནི་སློབ་དཔོན་ཉིད་ཀྱིས་སེམས་ཅན་གྱིས་དོན་ལ་འབད་པར་བདག་ཉིད་ལ་གདམས་པའི་ཕྱིར་རེ་ཞིག་ཅེས་བྱ་
བ་ལ་སོགས་པ་སྨོས་སོ། །འོན་ཏེ་གང་དག་བདེ་བས་ཐུབ་པ་རྣམས་དགྱེས་པར་འགྱུར་ཞིང་། གང་ལ་གནོད་པ་བྱས་ན་ཐུབ་པའི་དབང་པོ་རྣམས་མི་དགྱེས་འབྱུང་བར་འགྱུར་བ་ཡིན་ཞེ་ན། དེ་དག་ཅེས་བྱ་བ་ལ་སོགས་པ་སྨོས་སོ། །ཇི་ལྟར་ཞེ་ན། ཇི་ལྟར་ཞེས་བྱ་བ་ལ་སོགས་པ་སྨོས་སོ། །

ད་ནི་བདག་གིས་སྔོན་ཆད་སེམས་ཅན་ལ་གནོད་པ་བྱས་པས་དེ་བཞིན་གཤེགས་པ་རྣམས་མི་དགྱེས་པར་འགྱུར་ཞིང་། སྡིག་པ་བཤགས་ཤིང་ཕྱིན་ཆད་མི་བྱེད་པར་བསྡམ་པར་བྱ་བའི་ཕྱིར། དེ་བས་བདག་གིས་ཞེས་བྱ་བ་ལ་སོགས་པ་སྨོས་སོ། །འགུམས་ཀྱང་མི་བསྔོ་ཞེས་
བྱ་བ་ནི། སེམས་ཅན་དེ་དག་གིས་བདག་གི་སྲོག་བཅད་ཀྱང་དེ་བཞིན་གཤེགས་པ་རྣམས་མི་དགྱེས་པས་མི་བསྡོ་སྟེ། འོ་ན་ཇི་ལྟར་ཞེ་ན། བདག་གི་སྲོག་གཅོད་པ་ནི་བླའི། མི་དགྱེས་པ་ནི་མི་བགྱིའོ་ཞེས་བྱ་བའི་དོན་ཏོ། །འོན་ཏེ་དེ་ཅིའི་ཕྱིར་ཞེ་ན། སེམས་ཅན་རྣམས་མགུ་བར་འགྱུར་བ་དེ་ལྟར་
བྱ་ཞེ་ན། དེ་ཉིད་ཅེས་བྱ་བ་ལ་སོགས་པ་སྨོས་སོ། །འོན་ཏེ་ཉེས་དམིགས་ཅི་ཞིག་ཡོད་ནས་དེ་སྤང་བའི་ཕྱིར་སེམས་ཅན་རྣམས་མགུ་བ་དེ་ལྟར་ཞེ་ན། དཔེར་ན་རྒྱལ་པོ་ཞེས་བྱ་བ་ལ་སོགས་པ་སྨོས་སོ། །འོན་ཏེ་སེམས་ཅན་རྣམས་མགུ་བར་བྱས་ན་ཕན་ཡོན་ཅི་ཞིག་ཡོད་ནས་དེ་ལྟར་བྱ་ཞེ་ན། སེམས་ཅན་
མགུ་ལས་ཞེས་བྱ་བ་ལ་སོགས་པ་སྨོས་སོ། །བསྟན་བཅོས་ཀྱི་མིང་གི་དོན་ནི་སྔ་མ་བཞིན་ནོ། །བཟོད་པ་བསྟན་པ་ཞེས་བྱ་བ་སྟེ་ལེའུ་ལྔ་པའོ།། །།ད་ནི་བཟོད་པ་དང་ལྡན་པ་ལ་བརྩོན་འགྲུས་འབྱུང་བས། དགེ་བའི་ཆོས་ཡོངས་སུ་རྫོགས་པར་བྱ་བའི་ཕྱིར་ལེའུ་དྲུག་པ་
གསུངས་ཏེ། བརྩོན་འགྲུས་བརྩམས་པའི་ཕན་ཡོན་དང་མ་བརྩམས་པའི་ཉེས་དམིགས་བསྟན་པའི་སྒོ་ནས། བརྩོན་འགྲུས་བརྩམ་པར་བྱ་བ་བསྟན་པའི་ཕྱིར། དེ་ལྟར་བཟོད་པས་ཞེས་སྨོས་སོ། །ད་ནི་བརྩོན་འགྲུས་ཀྱི་ལེའུ་ལས་རྣམ་པར་གཞག་པ་བསྟན་པའི་ཕྱིར། སྒྱིད་ལུག་ཅེས་བྱ་
བ་ལ་སོགས་པ་སྨོས་ཏེ། དེ་ལ་རྩ་བ་དང་པོས་ནི་མི་མཐུན་པའི་ཕྱོགས་གཞོམ་པ་བསྟན་ཏོ། །རྩ་བ་གཉིས་པས་ནི་བརྩོན་འགྲུས་ཀྱི་ངོ་བོ་ཉིད་བསྟན་ཏོ། །གསུམ་པས་ནི་གང་གི་དོན་དུ་བརྩམས་པ་བསྟན་ཏོ། །བཞི་པས་ནི་གང་ལ་བརྩམས་པ་བསྟན་ཏོ། །ད་ནི་དེའི་རྒྱས་པར་བཤད་པ་
བསྟན་པའི་ཕྱིར། དེ་ལ་སྒྱིད་ལུག་པའི་སྟོབས་གཞོམ་པའི་དབང་དུ་བྱས་ནས། བདག་གི་ཞེས་བྱ་བ་ལ་སོགས་པ་སྨོས་སོ། །དེ་ཅིའི་ཕྱིར་ཞེ་ན། འདི་ལྟར་ཞེས་བྱ་བ་ལ་སོགས་པ་སྨོས་སོ། །འོན་ཏེ་བྱང་ཆུབ་ཐོབ་པར་བྱ་བ་ལ་ནི་ཤིན་ཏུ་གཅེས་པའི་རྐང་ལག་ལ་སོགས་པ་ཉིད་ཀྱང་བཏང་

དགོས་པའི་ཕྱིར་དེ་ནི་བདག་གིས་མི་ཕོད་དེ་འཇིགས་སོ་ཞེ་ན། གཅེས་དང་ཞེས་བྱ་བ་ལ་སོགས་པ་སྨོས་སོ། །གཅེས་དང་མི་གཅེས་པ་ཇི་ལྟ་བ་བཞིན་དུ་མི་ཤེས་པས་གཅེས་པར་བྱ་བ་མ་ཡིན་པ་ལ་གཅེས་སུ་གཟུང་བའི་ཕྱིར་འཇིགས་པར་ཟད་པས། འཇིགས་པར་མི་བྱའོ་ཞེས་བྱ་བའི་དོན་ཏོ། །
གཞན་ཡང་རེས་འགའ་མི་དགེ་བའི་ལས་ཀྱིས་ངན་སོང་དུ་སྐྱེས་པའི་དུས་སུ་དོན་མེད་པར་ཡང་ནས་ཡང་དུ་ལུས་དང་ཡན་ལག་ལ་སོགས་པ་གཏོང་བར་བྱེད་པ་ནི། བྱང་ཆུབ་ཆེན་པོ་བསྒྲུབ་པའི་དོན་དུ་གཏོང་བའི་སྡུག་བསྔལ་གྱིས་ཏེ་འཇིགས་ཞེས་གསུངས་པའི་ཕྱིར། བསྐལ་པ་བྱེ་བ་ཞེས་བྱ་
བ་ལ་སོགས་པ་གསུངས་སོ། །དེ་བས་ན་འཁོར་བའི་སྡུག་བསྔལ་ཆེན་པོ་བསལ་བའི་ཕྱིར་བྱང་ཆུབ་བསྒྲུབ་པའི་གནས་སྐབས་ཀྱི་ཡན་ལག་གཏོང་བ་ལ་སོགས་པའི་སྡུག་བསྔལ་གྱིས་འཇིགས་པར་མི་བྱའི། དེ་བཟོད་ཅིང་དང་དུ་བླང་བར་བྱའི་ཞེས་བསྟན་པར་བྱ་བའི་ཕྱིར། བདག་གི་བྱང་ཆུབ་ཅེས་
བྱ་བ་ལ་སོགས་པ་སྨོས་སོ། །འོན་ཏེ་འཁོར་བའི་སྡུག་བསྔལ་ཆེན་པོ་བསལ་བར་བྱ་བའི་ཕྱིར། ཐ་མལ་པའི་ཕྱིར་ནད་སེལ་བའི་སྡུག་བསྔལ་ལྟ་བུ་ཞིག་དང་དུ་བླང་བར་བྱ་དགོས་སམ་ཞེ་ན། མི་དགོས་པར་བསྟན་པའི་ཕྱིར། གསོ་དཔྱད་ཅེས་བྱ་བ་སྨོས་སོ། །འོ་ན་ཇི་ལྟ་བུས་གསོ་
བར་མཛད་ཅེ་ན། ཆོ་ག་ཤིན་ཏུ་ཞེས་བྱ་བ་ལ་སོགས་པ་སྨོས་སོ། །འོན་ཏེ་དེའི་ཚེ་ཤ་ལ་སོགས་པ་ཡང་གཏང་བར་བྱ་བ་མ་ཡིན་ནམ། ཇི་ལྟར་ན་ཆོ་ག་འཇམ་པོ་ཡིན་ཞེ་ན། ཚོད་མ་ལ་སོགས་པ་གསུངས་ཏེ། བསྡུས་པའི་དོན་ནི་ལས་དང་པོ་པའི་སྐབས་སུ་ཤ་ལ་སོགས་པ་གཏང་བར་
བྱ་བ་མ་ཡིན་གྱི། ཚོད་མ་ལ་སོགས་པ་སྦྱིན་པ་ཙམ་དུ་ཟད་ལ་དེ་ནི་དགའ་བ་མེད་པའི་ཕྱིར་དང་། གང་གིས་ལྷག་པའི་བསམ་པ་དག་པའི་སར་ཆུད་པར་འགྱུར་བའི་དུས་སུ་ནི་གཏོང་བ་ལ་ཤིན་ཏུ་གོམས་པར་འགྱུར་བའི་ཕྱིར་དཀའ་བ་མེད་པས་ཆོ་ག་ཤིན་ཏུ་འཇམ་པོ་ཡིན་ནོ་ཞེས་བྱ་བའི་དོན་ཏོ། །
འོན་ཏེ་གོམས་པར་འགྱུར་བ་དེ་ལྟ་ཡིན་ན་ཡང་ཚ་བ་ལ་སོགས་པའི་སྡུག་བསྔལ་དང་ཡན་ལག་ལ་སོགས་པ་མ་ཚང་བའི་རྒྱུས་སེམས་ལ་མི་དགའ་བ་སྐྱེ་བའི་ཕྱིར་ཆོ་ག་ཤིན་ཏུ་འཇམ་པོ་མ་ཡིན་ནོ་ཞེ་ན། སྡིག་པ་སྤང་ཕྱིར་ཞེས་བྱ་བ་ལ་སོགས་པ་སྨོས་སོ། །ལུས་ལ་གནོད་པ་འབྱུང་བའི་རྒྱུ་

སྡིག་པ་སྤང་བའི་ཕྱིར་དང་། སེམས་ལ་གནོད་པ་བྱེད་པའི་ལོག་པར་རྟོག་པའི་གཉེན་པོ་རང་བཞིན་མེད་པ་ཉིད་དུ་མཁས་པའི་ཕྱིར། སྡུག་བསྔལ་དང་ཡིད་མི་བདེ་བ་མེད་ཀྱི་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་གོམས་པར་བྱས་པའི་བསོད་ནམས་ཀྱི་ཡན་
ལག་ལ་བསོད་ནམས་བཅད་པ་ཉིད་ཀྱི་དུས་སུ་བདེ་བའི་ཚོར་བ་ཤ་སྟག་འབྱུང་བའི་ཕྱིར། ལུས་བདེ་བ་ཡིན་ཞིང་ལུས་ལ་སོགས་པ་གཏོང་བ་དེ་ཉིད་བྱང་ཆུབ་ཆེན་པོའི་རྒྱུ་ཉིད་ཡིན་པར་མཁས་པའི་ཕྱིར། བདག་གིས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་སྙམ་དུ་སེམས་དགའ་བ་སྐྱེ་བར་
འགྱུར་བས། དེ་ལྟ་བས་ན་ཆོ་ག་ཤིན་ཏུ་འཇམ་པོ་ཉིད་ཡིན་པའི་ཕྱིར། བསྐལ་པ་གྲངས་མེད་པ་གསུམ་གྱི་བར་དུ་སེམས་ཅན་རྣམས་ཀྱི་དོན་འཁོར་བར་གནས་ཤིང་བྱ་དཀའ་བའི་སྤྱོད་པ་ཇི་སྙེད་བྱེད་དུ་ཟིན་ཀྱང་དེས་སྐྱོ་ཞིང་སྒྱིད་ལུག་པར་མི་བྱའོ། །འོ་ན་ཅི་ཞེ་ན། ལེའུ་དང་པོར་ཇི་སྐད་བཤད་པའི་ཚུལ་
དུ་བྱང་ཆུབ་ཀྱི་སེམས་ཤིན་ཏུ་འཇམ་པོ་ཉིད་ཡིན་པའི་ཕྱིར། སྡིག་པ་ཐམས་ཅད་ཟད་པར་བྱེད་ཅིང་། བསོད་ནམས་དཔག་ཏུ་མེད་པ་འཚོགས་པས། འཕགས་པ་ཕུང་པོ་གསུམ་པ་ལས་ཇི་སྐད་གསུངས་པ་བཞིན་དུ། ཉན་ཐོས་དང་རང་སངས་རྒྱས་ལ་སོགས་པ་ལས་ཁྱད་པར་དུ་འཕགས་པའི་ཕྱིར།
མཆོག་ཏུ་སྤྲོ་བ་བསྐྱེད་པར་བྱའོ་ཞེས་བྱ་བའི་དོན་ཏོ། །དེ་བས་ཞེས་བྱ་བ་ལ་སོགས་པ་ནི་མཇུག་སྡུད་དེ། བདེ་ནས་བདེ་བར་ཞེས་བྱ་བ་ནི་བདེ་འགྲོ་རྣམས་སུའོ། །སེམས་ཞེས་བྱ་བ་ནི་བྱང་ཆུབ་ཀྱི་སེམས་ཀྱི་ཕན་ཡོན་ཤེས་པའོ། །དེས་ནི་མི་ཞུམ་པའི་བརྩོན་འགྲུས་ཀྱི་སྒོ་ནས་སྒྱིད་ལུག་པའི་
སྟོབས་གཞོམ་པ་བསྟན་ཏོ། །དེ་བས་ན་སེམས་ཅན་གྱི་དོན་བསྒྲུབ་པ་བསྟན་པའི་ཕྱིར། གོ་ཆ་དང་། སྦྱོར་བ་དང་། མི་ལྡོག་པ་དང་། ཆོག་པར་མི་འཛིན་པའི་བརྩོན་འགྲུས་ཀྱི་སྒོ་ནས་སྙོམ་ལས་ཀྱི་སྟོབས་གཞོམ་པའི་ཕྱིར། སེམས་ཅན་དོན་ནི་ཞེས་བྱ་བ་ལ་སོགས་པ་རྐང་པ་གཉིས་
ཀྱིས་དཔུང་རྣམ་པ་བཞི་བསྐྱེད་པ་བསྟན་ཏེ། ཚིགས་སུ་བཅད་པ་སྡེབས་པའི་དབང་གིས་འདི་ལྟར་གསུངས་ཀྱང་། དོན་གྱི་དབང་གིས་འདི་ལྟར་སྦྱར་ཏེ། ཆོ་གའི་བརྩོན་འགྲུས་ཏེ་མོས་པའི་དཔུང་བསྐྱེད་པ་དང་། སྦྱོར་བ་སྟེ་རིགས་པའི་དཔུང་དང་། མི་ལྡོག་པ་སྟེ་བརྟན་པའི་དཔུང་དང་།

ཆོག་པར་མི་འཛིན་པ་སྟེ། དགའ་བའི་དཔུང་བསྐྱེད་པར་བྱའོ་ཞེས་བྱ་བའི་དོན་ཏོ། །ད་ནི་རྒྱས་པར་བཤད་པའི་དབང་དུ་བྱས་ནས། མོས་དཔུང་བསྐྱེད་པ་རྐང་པ་གཉིས་ཀྱིས་བསྟན་ཏེ། དགེ་བའི་ལས་དེ་མ་བྱས་པའི་ཉེས་དམིགས་འཁོར་བའི་སྡུག་བསྔལ་གྱི་འཇིགས་པ་དང་། དེ་བྱས་པའི་
ཕན་ཡོན་བདག་དང་གཞན་གྱི་དོན་ཡོངས་སུ་རྫོགས་པར་འགྱུར་བའི་ཕན་ཡོན་ལ་བསམས་པས། བདག་གིས་དགེ་བའི་ཆོས་བསྒྲུབ་པར་བྱའོ་སྙམ་དུ་སེམས་ལ་གོ་གོན་པའི་མོས་པའི་མཚན་ཉིད་ཀྱི་དཔུང་བསྐྱེད་པར་བྱའོ་ཞེས་བྱ་བའི་དོན་ཏོ། །ད་ནི་དེའི་འོག་ཏུ་སྦྱོར་བའི་བརྩོན་འགྲུས་ཀྱི་དབང་དུ་བྱས་ནས།
བྱ་བར་མི་རིགས་པ་ལས་ལྡོག་ཅིང་བྱ་བར་རིགས་པ་ལ་སྦྱོར་བས་རིགས་པའི་དཔུང་བསྐྱེད་པར་བསྟན་པའི་ཕྱིར། ཉམ་ང་ཆེ་ཐང་ཞེས་བྱ་བ་ལ་སོགས་པ་སྨོས་ཏེ། བྱ་བར་རིགས་པ་ནི་བདག་དང་གཞན་དུ་བརྗེ་བར་འགྱུར་བ་ཡིན་ལ་ལོག་པར་ནི་བྱ་བར་མི་རིགས་པ་ཡིན་ནོ། །དེ་ལྟར་བྱ་བར་རིགས་པ་
ལ་སྦྱོར་བའི་ཚེ་བརྩམས་པའི་འཕྲོ་མི་གཅོད་པས་མི་ལྡོག་པའི་བརྩོན་འགྲུས་ཏེ། བརྟེན་པའི་དཔུང་བསྐྱེད་པའི་དབང་དུ་བྱས་ནས་ཉོན་མོངས་ཞེས་བྱ་བ་ལ་སོགས་པ་སྨོས་ཏེ། གང་གིས་ཉོན་མོངས་པའི་དབང་དུ་གྱུར་ན་བྱ་བར་རིགས་པ་ལས་ལྡོག་པར་འགྱུར་བའི་ཕྱིར། གང་དུ་ཉོན་མོངས་པ་སྐྱེ་བར་
འགྱུར་བའི་རྐྱེན་དང་ལྷན་ཅིག་གནས་པའི་དུས་ན་གཉེན་པོ་སྣ་ཚོགས་ཀྱིས་ཉོན་མོངས་པའི་དབང་དུ་མི་གཏོང་ཞིང་། བྱ་བར་རིགས་པའི་ལས་ལས་མི་ལྡོག་པར་བརྟན་པར་བྱའོ་ཞེས་བྱ་བའི་དོན་ཏོ། །ཡང་ཉོན་མོངས་པ་ཞེས་བྱ་བ་ནི་སྡུག་བསྔལ་གྱི་དོན་ཡིན་ཏེ། བདག་ཉིད་དགེ་བའི་ལས་ལ་ཞུགས་
པའི་ཚེ་བྱ་དཀའ་བའི་སྡུག་བསྔལ་ཇི་སྙེད་བྱུང་ཡང་གཉེན་པོ་སྣ་ཚོགས་ཀྱི་སྒོ་ནས་སྡུག་བསྔལ་དེ་དག་གིས་ཇི་མི་སྙམ་པར་བྱ་ཞིང་། ལས་དེ་ལ་མི་ལྡོག་པར་བརྟན་པར་བྱའོ་ཞེས་བྱ་བའི་ཐ་ཚིག་གོ། །ད་ནི་བྱ་བར་རིགས་པའི་ལས་ཇི་སྙེད་བྱས་ཀྱང་། དེས་ཆོག་པར་མི་འཛིན་པར་ཡང་ནས་ཡང་དུ་བྱེད་
འདོད་པའི་དགའ་བའི་དཔུང་བསྐྱེད་པར་བསྟན་པའི་ཕྱིར། རྩེད་མོ་ཞེས་བྱ་བ་སྨོས་སོ། །ཅིའི་ཕྱིར་དེ་ལྟར་བྱ་སྙམ་པ་ལ། བདེ་བའི་དོན་དུ་ཞེས་བྱ་བ་ལ་སོགས་པ་སྨོས་ཏེ། ཡང་འཇིག་རྟེན་དག་ན་ལས་གང་ཞིག་བྱས་པས་འདོད་པའི་བདེ་བ་འགྲུབ་པའི་ངེས་པ་མེད་པ་ལ་ཡང་འགྲུབ་

པར་སྲིད་པ་ཙམ་གྱི་སྒོ་ནས་ཀྱང་། ཡང་ནས་ཡང་དུ་བརྩོན་འགྲུས་རྩོམ་པར་བྱེད་ན། གདོན་མི་ཟ་བར་འདོད་པའི་བདེ་བ་འགྲུབ་པར་འགྱུར་བའི་ལས་ལ་ཡང་ནས་ཡང་དུ་བརྩོན་འགྲུས་བརྩམས་ན་འདོད་པའི་བདེ་བ་ཐོབ་པའི་ཕྱིར། ཡང་ནས་ཡང་དུ་བརྩོན་འགྲུས་བརྩམ་
པར་བྱའོ་ཞེས་བྱ་བའི་དོན་ཏོ། །ཡང་ལས་སུ་བྱ་བ་འགའ་ཞིག་གིས་མ་འོངས་པའི་སྡུག་བསྔལ་དཔག་ཏུ་མེད་པ་སྐྱེད་ཀྱང་། འཕྲལ་གྱི་བདེ་བ་ཙམ་ལ་བལྟས་ནས་དེས་ངོམས་པར་མི་བྱེད། ཐམས་ཅད་ལ་ཕན་པ་དང་བདེ་བ་སྐྱེད་པར་བྱེད་པའི་དགེ་བའི་ལས་ཀྱིས་ལྷ་ཤིན་ཏུ་ཡང་ངོམས་པར་མི་བྱ་
སྟེ། ཡང་ནས་ཡང་དུ་བརྩོན་འགྲུས་བརྩམ་པར་བྱའོ་ཞེས་བསྟན་པའི་ཕྱིར། སྤུ་གྲི་ཞེས་བྱ་བ་ལ་སོགས་པ་སྨོས་ཏེ། རྣམ་སྨིན་བདེ་ལ་ཞི་བ་ཡི། །ཞེས་བྱ་བ་ལ། བདེ་བ་ནི་ཚེ་འདིའོ། །ཞི་བ་ནི་ཚེ་ཕྱི་མའིའོ། །ཡང་ན་བདེ་བ་ནི་མཐོ་རིས་ཀྱིའོ། །ཞི་བ་ནི་ཐར་པའིའོ། །ཡང་ན་
བདེ་བ་ནི་ཚེ་ཕྱི་མའིའོ། །ཞི་བ་ནི་ཚེ་འདིའི་སྟེ། ཉོན་མོངས་པ་དང་ལས་དེ་ཉིད་ཀྱི་མི་མཐུན་པའི་ཕྱོགས་ཞི་བར་བྱེད་པའི་ཕྱིར་རོ། །ཡང་ན་བདེ་བ་ནི་གཞན་གྱི་དོན་ཏོ། །ཞི་བ་ནི་རང་གི་དོན་ཏོ། །འདི་ལྟར་ཞེས་བྱ་བ་ལ་སོགས་པས་ནི་མཇུག་སྡུད་དོ། །འོ་ན་མི་དགེ་བའི་ལས་ལ་ཡང་ཆོག་
པར་མི་འཛིན་པར་དགའ་བའི་དཔུང་བསྐྱེད་པར་བྱའམ་ཞེ་ན། མ་ཡིན་ཏེ། མི་དགེ་བའི་ལས་ལ་ནི་ལྷན་ཅིག་རྗེས་སུ་སྤྱོད་པའི་ཤེས་བཞིན་གྱིས་བྱེད་པའི་མོད་ལ་ཚོར་བར་འགྱུར་ན་ཕྱིས་བྱེད་པར་འདོད་པའི་བསམ་པ་སྤང་བར་བྱའོ་ཞེས་བསྟན་པའི་ཕྱིར་རྗེས་སུ་ཞེས་བྱ་བ་ལ་སོགས་པ་སྨོས་སོ། །
ད་ནི་མི་དགེ་བའི་ལས་ལ་མངོན་པར་དགའ་བའི་རྒྱུ་ཉོན་མོངས་པའི་མཚོན་བརྗེད་ངས་པ་དང་། ཤེས་བཞིན་མ་ཡིན་པའི་དབང་དུ་མི་གཏོང་ཞིང་དྲན་པ་དང་ཤེས་བཞིན་ལ་གནས་ཏེ། ཉོན་མོངས་པ་རྣམས་སྤང་བར་བྱའོ་ཞེས་བསྟན་པའི་ཕྱིར། འཐབ་རྙིང་ཞེས་བྱ་བ་ལ་སོགས་པ་སྨོས་སོ། །
དྲན་པ་ཉམས་པར་འགྱུར་ན་ཇི་ལྟར་བྱ་ཞེ་ན། གཡུལ་དུ་ཞེས་བྱ་བ་ལ་སོགས་པ་སྨོས་སོ། །དང་པོ་ཉིད་ནས་ཀྱང་མི་འཆོར་བར་བསྒྲུབ་པའི་ཕྱིར། ཡུངས་མར་ཞེས་བྱ་བ་སྨོས་ཏེ། དྲན་པ་ཞེས་བྱ་བ་ནི། མཚོན་པ་ཙམ་དུ་ཟད་ཀྱི་ཤེས་བཞིན་ལ་ཡང་རིག་པར་བྱའོ། །གལ་ཏེ་དེ་ལྟར་

འབད་ཀྱང་རེས་འགའ་ལྟུང་བ་བྱུང་ན་ཇི་ལྟར་བྱ་སྙམ་པ་ལ། ཉེས་པ་འབྱུང་བ་ཞེས་བྱ་བ་ལ་སོགས་པ་སྨོས་སོ། །དགེ་བཤེས་ཕྲད་དང་ཞེས་བྱ་བ་ལ་སོགས་པའི་དོན་ནི། གལ་ཏེ་འདི་སྙམ་དུ་དགེ་བའི་བཤེས་གཉེན་དང་ཕྲད་པ་ལ་སོགས་པ་ལ་བརྟེན་ཏེ། དུས་ཐམས་ཅད་དུ་དྲན་པ་དང་མི་འབྲལ་
བར་བྱ་སྙམ་ན་དེའི་ཚེ་དེ་ལ་ཐབས་ཇི་ལྟར་བྱ་སྙམ་པ་ཡིན་ནོ། །དེས་ན་གདམས་ངག་མི་བརྗེད་པར་བྱ་ཞིང་བདག་ཉིད་ཀྱི་ལུས་སེམས་ཀྱི་སོ་གློད་དེ་ཧ་ཅང་ཡང་བསྒྲིམ་པ་མ་ཡིན་པར་བྱས་ལ། ལས་ལ་མ་ཞུགས་པའི་གོང་རོལ་ནས་བྱ་བ་ཐམས་ཅད་ཀྱི་ཐོག་མར་འགྲོ་བའི་བཤེས་བཞིན་ལ་གནས་པར་
བྱས་ན། དེའི་ཚེ་དུས་ཐམས་ཅད་དུ་མི་འབྲལ་བར་འགྱུར་རོ་ཞེས་བྱ་བའི་ཕྱིར། བག་ཡོད་གཏམ་ཞེས་བྱ་བ་ལ་སོགས་པ་སྨོས་སོ། །དེ་ལྟར་མ་བྱས་ན་ཉེས་པ་ཅི་ཡོད་སྙམ་པ་ལ། ཇི་ལྟར་ཁྲག་ལ་ཞེས་བྱ་བ་སྨོས་སོ། །ད་ནི་དཔུང་རྣམ་པ་བཞི་ལ་གནས་ཏེ། སྙོམ་ལས་ཀྱི་སྟོབས་གཞོམ་པར་བྱ་བ་མཇུག་
བསྡུས་ཏེ་བསྟན་པའི་ཕྱིར། དེ་བས་པང་དུ་ཞེས་བྱ་བ་ལ་སོགས་པ་སྨོས་སོ། །དེ་ལྟར་མི་མཐུན་པའི་ཕྱོགས་གཞོམ་པར་བསྟན་ནས། ད་ནི་བརྩོན་འགྲུས་ཀྱི་ངོ་བོའི་དབང་དུ་བྱས་ནས། བདག་ཉིད་ལ་དགེ་བའི་ཆོས་ཡོངས་སུ་རྫོགས་པ་ནི། བརྩོན་འགྲུས་རྣམ་པ་ལྔའི་དབང་དུ་གྱུར་པས་འགྲུབ་པར་
འགྱུར་རོ་ཞེས་བསྟན་པའི་ཕྱིར། ཇི་ལྟར་ཤིང་བལ་ཞེས་བྱ་བ་ལ་སོགས་པ་སྨོས་ཏེ། མོས་པའི་དབང་དུ་གྱུར་པ་ཞེས་བྱ་བ་ནི་མཚོན་པ་ཙམ་དུ་ཟད་ཀྱི། དེ་བཞིན་དུ་མི་ཞུམ་པའི་དབང་དུ་གྱུར་པ་དང་། རིགས་པའི་དབང་དུ་གྱུར་པ་དང་། བརྟན་པའི་དབང་དུ་གྱུར་པ་དང་། དགའ་བའི་དབང་དུ་གྱུར་པས་
ཞེས་བྱ་བ་དེ་ལྟར་ཡང་ཤེས་པར་བྱའོ། །ད་ནི་གང་གི་དོན་དུ་བརྩོན་འགྲུས་བརྩམས་པའི་དབང་དུ་བྱས་ནས། འདི་སྙམ་དུ་ཉན་ཐོས་ལ་སོགས་པ་དག་ཀྱང་དེ་ལྟར་བརྩོན་འགྲུས་རྩོམ་པ་མ་ཡིན་ནམ། དེའི་ཚེ་བྱང་ཆུབ་སེམས་དཔའི་བརྩོན་འགྲུས་འདི་གང་གིས་ཁྱད་པར་དུ་འཕགས་སྙམ་པའི་སྒོ་
ནས་བསྡུས་ནས། དེ་དག་དེ་ལྟར་བརྩོན་འགྲུས་རྩོམ་མོད་ཀྱི། དེ་དག་ནི་བདག་གཅིག་པུ་དུལ་བར་བྱ་བའི་ཕྱིར་བརྩོན་འགྲུས་རྩོམ་གྱི་བདག་དང་གཞན་མཉམ་པ་ཉིད་དུ་བྱ་བའི་དོན་དུ་བརྩོན་འགྲུས་རྩོམ་པ་མ་ཡིན་ལ། བྱང་ཆུབ་སེམས་དཔའ་ནི་བདག་དང་གཞན་མཉམ་པ་ཉིད་དུ་བྱ་བའི་དོན་དུ་

བརྩོན་འགྲུས་རྩོམ་པར་བྱེད་པས། དེ་ལྟར་ན་ཉན་ཐོས་ལ་སོགས་པའི་བརྩོན་འགྲུས་པས་བྱང་ཆུབ་སེམས་དཔའི་བརྩོན་འགྲུས་དགོས་པའི་སྒོ་ནས། ཁྱད་པར་དུ་འཕགས་པར་བསྟན་པར་བྱའོ་སྙམ་དུ་སློབ་དཔོན་གྱི་ཐུགས་ལ་གཞག་ནས། ལག་པ་ལ་སོགས་ཞེས་བྱ་
བ་ལ་སོགས་པ་སྨོས་སོ། །འདིར་འགྲེལ་པ་བྱེད་པ་གཞན་དག་ན་རེ། བདག་དང་གཞན་དུ་མཉམ་པ་དང་། །ཞེས་བྱ་བ་དང་། བདག་དང་གཞན་དུ་བརྗེ་བ་ཞེས་བྱ་བ་འདི་ནི། སློབ་དཔོན་གྱིས་སྐབས་འདིར་བཤད་ཀྱང་། འདིར་ནི་བསམ་པ་དང་ཤེས་རབ་ཀྱིས་བསྡུས་པ་ཡིན་པའི་ཕྱིར་བཤད་
པའི་རིགས་པ་མ་ཡིན་པས། ལེའུ་འོག་མར་བཤད་པར་བྱའོ་ཞེས། སློབ་དཔོན་ལ་སྐྱོན་རྗོད་པར་བྱེད་པ་དེ་དག་གིས་ནི། སློབ་དཔོན་གྱི་དགོངས་པ་མ་ཤེས་པར་མཐོང་སྟེ། གལ་ཏེ་དོན་གཉིས་པོ་འདིར་མ་བཤད་ན། དུས་དེའི་རྒོལ་བ་དེ་ལ་ལན་ཇི་ལྟར་གདབ་ཅིང་། ཉན་ཐོས་ལ་
སོགས་པའི་བརྩོན་འགྲུས་ལས་བྱང་ཆུབ་སེམས་དཔའི་བརྩོན་འགྲུས་རྒྱུ་གང་གིས་ཁྱད་པར་དུ་འཕགས་ཏེ་དེའི་ཁྱད་པར་མ་བསྟན་པ་ཉིད་དུ་འགྱུར་བས། གཞན་གྱི་བཤད་པ་དེ་ནི་ཤིན་ཏུ་རིགས་པ་མ་ཡིན་པའི་ཕྱིར་རྟོགས་པ་དང་ལྡན་པ་རྣམས་ཀྱིས། སློབ་དཔོན་ཉིད་ཀྱིས་འདིར་བཤད་པའི་
དགོངས་པ་བཙལ་བར་བྱའོ། །སློབ་དཔོན་གྱིས་དགོངས་པ་མི་ཚོལ་བར་སློབ་དཔོན་བློ་གྲོས་མི་ཟད་པས་འཕགས་པ་འཇམ་དཔལ་གྱི་དངོས་གྲུབ་བརྙེས་པའི་བཀའ་ལུང་ཁྱད་དུ་བསད་ནས། སོ་སོ་སྐྱེ་བོ་རང་དགར་སྨྲ་བ་རྣམས་ཀྱི་རྗེས་སུ་འབྲང་བར་བྱ་བ་ནི་ཤིན་ཏུ་རིགས་པ་མ་ཡིན་པས་དེ་ནི་
ཐག་བསྲིངས་ཏེ་སྤང་བར་བྱའོ། །དེ་བས་ན་སློབ་དཔོན་གྱི་དགོངས་པ་ནི་གོང་དུ་བཤད་པ་ལྟ་བུ་ཡིན་ནོ་སྙམ་དུ་སེམས་སོ། །ཅིའི་ཕྱིར་བདག་དང་གཞན་མཉམ་པ་ཉིད་དུ་བྱ་བའི་ཕྱིར་བརྩོན་འགྲུས་རྩོམ་ཞེ་ན། བདག་ཉིད་ལྟར་བདེ་བ་འདོད་ལ་སྡུག་བསྔལ་མི་འདོད་པ་བཞིན་དུ་སེམས་ཅན་ཐམས་
ཅད་ཀྱང་དེ་བཞིན་ཏེ། དེ་བས་ན་བདག་ལ་ཇི་ལྟར་བདེ་བས་ཕན་གདགས་ཤིང་སྡུག་བསྔལ་ལས་བསྐྱབ་པ་དེ་བཞིན་དུ་སེམས་ཅན་ཐམས་ཅད་ལ་ཡང་དེ་བཞིན་དུ་བྱ་དགོས་ཏེ། དཔེར་ན་ལུས་འདི་ཉིད་ལ་ལག་པ་ལ་སོགས་པ་ནང་ཚན་དུ་དབྱེ་བ་མང་ཡང་བདེ་བས་ཕན་གདགས་ཤིང་གནོད་པ་ལས་

བསྲུང་བ་ཐམས་ཅད་མཚུངས་པ་བཞིན་ནོ། །དེ་བས་ན་བདག་དང་གཞན་མཉམ་པ་ཉིད་དུ་བྱ་བའི་དོན་དུ་བརྩོན་འགྲུས་རྩོམ་ཞེས་བྱ་བ་ནི། བདག་དང་གཞན་གྱི་དོན་ཕུན་སུམ་ཚོགས་པ་རབ་ཀྱི་མཐར་ཕྱིན་པར་བྱ་བའི་དོན་དུ་བརྩོན་འགྲུས་བརྩམ་པར་བྱ་བའི་དོན་ཡིན་ནོ། །འོན་ཏེ་གཞན་གྱི་སྡུག་བསྔལ་དེ་
བདག་ལ་མི་འབབ་པ་མ་ཡིན་ནམ། ཅིའི་ཕྱིར་མི་བཟོད་དེ། གསལ་བར་སྙམ་པ་ལ། དེ་ལྟ་ཡིན་མོད་ཀྱི་རང་གི་ཉམས་ཀྱིས་ཏེ། ཇི་ལྟ་ཞེ་ན། བདག་གི་སྡུག་བསྔལ་དེ་གཞན་ལ་མི་འབབ་ཀྱང་རང་གི་ལུས་ལ་ཆགས་པའི་ཕྱིར་ཏེ། མི་བཟོད་པའི་ཉམས་ཀྱིས་སོ། །དེ་བས་ན་བདག་གི་སྡུག་བསྔལ་
ཞེས་བྱ་བ་ལ་སོགས་པ་སྨོས་སོ། །གལ་ཏེ་དེ་ལྟར་ཉམས་གཅིག་པ་ཡིན་དུ་ཟིན་ཀྱང་ཕན་ཚུན་མི་གནོད་པ་ཉིད་ཀྱི་ཕྱིར་བསལ་བར་མི་རིགས་སོ་ཞེ་ན། སྡུག་བསྔལ་གྱི་ངོ་བོ་ཉིད་དུ་མཚུངས་པའི་ཕྱིར་ཏེ། དེ་བས་ན་བདག་གིས་གཞན་གྱི་སྡུག་བསྔལ་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་བདག་
བཞིན་དུ་གཞན་ལ་ཕན་པར་བྱ་ཞེ་ན། གཞན་དེ་ཡང་སེམས་ཅན་ཡིན་པའི་ཕྱིར་ཏེ། དེ་བས་ན་བདག་གི་གཞན་ལས་ཞེས་སྨོས་སོ། །ཡང་གཞན་གྱི་དོན་དུ་བསྟན་པར་བྱ་བའི་ཕྱིར། གང་གི་ཚེ་བདག་དང་ཞེས་བྱ་བ་ལ་སོགས་པ་ཚིགས་སུ་བཅད་པ་གཉིས་སྨོས་ཏེ། འདོད་པ་མཚུངས་
པའི་ཕྱིར་གཉི་ག་མཉམ་པ་ཉིད་དུ་བྱ་དགོས་ཞེས་བྱ་བའི་དོན་ཏོ། །གཞན་ཡང་གལ་ཏེ་དེ་ལ་ཞེས་བྱ་བ་ལ་སོགས་པ་སྨོས་ཏེ། གཞན་གྱི་རྒྱུད་ལ་ཡོད་པའི་སྡུག་བསྔལ་དེ་ནི་གཞན་ཉིད་ལ་གནོད་པ་ཡིན་པའི་ཕྱིར། གཞན་དེ་ཉིད་ཀྱིས་བསྲུང་བར་རིགས་ཀྱི་བདག་ལ་མི་གནོད་པའི་ཕྱིར་བདག་ལ་
བསྲུང་བར་མི་རིགས་སོ་ཞེ་ན། གལ་ཏེ་དེ་ལྟ་ན་ནི་ཚེ་ཕྱི་མ་ངན་སོང་དུ་སྐྱེ་བའི་སྡུག་བསྔལ་དེ་ཡང་ད་ལྟར་རང་གི་ལུས་འདི་ཉིད་ལ་མི་གནོད་པའི་ཕྱིར་ལུས་འདིས་སྦྱིན་པ་གཏོང་བ་ལ་སོགས་པའི་ཚུལ་གྱིས་བསྲུང་བར་མི་རིགས་སོ་སྙམ་ནས། བདག་གིས་དེ་ནི་ཞེས་བྱ་བ་ལ་སོགས་པ་སྨོས་སོ། །
ཡང་གང་གི་ཚེ་གཞན་གྱི་སྡུག་བསྔལ་དེ་ནི་གཞན་ཉིད་ཀྱིས་བསྲུང་བར་བྱ་བ་ཡིན་ནོ། །དེའི་ཚེ་རྐང་པའི་སྡུག་བསྔལ་ཡང་རྐང་པ་ཉིད་ཀྱིས་བསྲུང་བར་བྱའི། ལག་པས་བསྲུང་བར་མི་རིགས་སོ་སྙམ་དུ་བསམ་ནས། གང་ཚེ་གང་གི་ཞེས་བྱ་བ་ལ་སོགས་པ་སྨོས་སོ། །འོན་ཏེ་མ་འོངས་

པའི་སྡུག་བསྔལ་དང་། རྐང་པའི་སྡུག་བསྔལ་ཡང་གོ་རིམས་བཞིན་དུ། ཚེ་འདིའི་ལུས་དང་། ལག་པས་བསྲུང་བར་རིགས་ཏེ། རྒྱུད་དང་ཚོགས་གཅིག་པའི་ཕྱིར་ལ། གཞན་གྱི་སྡུག་བསྔལ་དེ་ནི་བདག་དང་རྒྱུད་དང་ཚོགས་པ་མི་གཅིག་པའི་ཕྱིར་རོ་ཞེ་ན། རྒྱུད་དང་ཞེས་བྱ་བ་ལ་
སོགས་པ་སྨོས་ཏེ། དཔེར་ན་ཕྲེང་བ་དང་ཆུའི་རྒྱུད་ལ་རྒྱུན་ཅན་གྱི་དབང་པོ་དང་གཉིས་པ་དང་། ཆུ་རྒྱུན་སྔ་མ་ཕྱི་མ་ལ་སོགས་པ་སོ་སོ་ཐ་དད་པ་ཉིད་ཡིན་ལ། དེ་ལ་མ་གཏོགས་པའི་རྒྱུན་ཅན་ཞེས་བྱ་བ་གཅིག་པ་ནི་མེད་པ་བཞིན་དུ། ཚེ་ཕྱི་མ་ཡང་རྒྱུད་ནི་ཚེ་སྔ་ཕྱིའི་སྐྱེ་འཇིག་སོ་སོ་ཐ་དད་པ་
ཡིན་ལ། དེ་ལས་མ་གཏོགས་པའི་རྒྱུད་ཅེས་བྱ་བ་གཅིག་པ་ནི་ཅུང་ཟད་ཙམ་ཡང་མེད་དོ། །ཡང་དེ་བཞིན་དུ་ནགས་ཚལ་གྱི་ཚོགས་ཞེས་བྱ་བ་ཡང་། ཚོགས་པ་ཅན་ནི་དང་བ་དང་ཁ་ད་རེ་སོགས་པ་ཐ་དད་པ་ཡིན་ལ། དེ་ལས་མ་གཏོགས་པ་ཅན་ཞེས་བྱ་བ་གཅིག་པ་མེད་པ་བཞིན་དུ། ལུས་
ལ་ཡང་ཚོགས་པ་ཅན་ནི་ལག་པ་ལ་སོགས་པ་མཚན་ཉིད་མི་མཐུན་པའི་ཕྱིར་སོ་སོ་ཐ་དད་པ་ཡིན་ལ། དེ་ལས་མ་གཏོགས་པའི་ལུས་ཀྱི་ཚོགས་བྱ་བ་གཅིག་པ་ཉིད་དུ་གཞན་པ་ནི་ཅུང་ཟད་ཀྱང་མེད་དོ། །འོན་ཏེ་དེ་ལྟ་ཡིན་ན། ཚེ་སྔ་མ་ལ་སེམས་ཅན་གྱི་རྒྱུད་ཅེས་བྱ་བ་དང་ལག་པ་ལ་སོགས་པ་
ལུས་ཀྱི་ཚོགས་ཞེས་བྱ་བར་གཅིག་ཏུ་འཛིན་པར་བྱེད་ཅེ་ན། དེ་ནི་འཁྲུལ་པའི་དབང་གིས་གཅིག་ཏུ་འཛིན་པ་ཡིན་ཞེས་བྱ་བའི་ཐ་ཚིག་གོ། །ད་ནི་ཡང་ཁས་བླངས་ནས་བརྗོད་པར་བྱ་སྟེ། ཇི་ལྟར་ལག་པ་ལ་སོགས་པ་ལུས་ཀྱི་ཡན་ལག་ཏུ་གཅིག་པའི་ཕྱིར་རྐང་པའི་དོན་ལག་པས་བྱེད་པ་
བཞིན་དུ། སེམས་ཅན་ཐམས་ཅད་ཀྱང་འགྲོ་བའི་ཡན་ལག་ཏུ་གཅིག་པའི་ཕྱིར་བདག་བཞིན་དུ་གཞན་གྱི་དོན་ཡང་བྱའོ་ཞེས་བསྟན་པའི་ཕྱིར། ཇི་ལྟར་ལག་པ་ཞེས་བྱ་བ་ལ་སོགས་པ་སྨོས་སོ། །ཡང་ན་ཇི་ལྟར་སེམས་ཅན་ཐམས་ཅད་ལ་ཡང་བདག་བཞིན་དུ་གོམས་པར་བྱས་པའི་སྒོ་
ནས། གཞན་གྱི་དོན་བྱའོ་ཞེས་བསྟན་པའི་ཕྱིར། ཇི་ལྟར་བདག་མེད་ཅེས་བྱ་བ་ལ་སོགས་པ་སྨོས་སོ། །དེ་ལྟར་བདག་དང་སེམས་ཅན་ཐམས་ཅད་གཅིག་པ་ཉིད་དུ་གཟུང་བ་ལ་ཡོན་ཏན་ཅི་ཡོད་སྙམ་པ་ལ། དེ་ལྟར་ན་ནི་ཞེས་བྱ་བ་ལ་སོགས་པ་སྨོས་སོ། །དེ་བས་ན་ཇི་ལྟར་ཞེས་བྱ་བས་ནི་

མཇུག་སྡུད་དོ། །བསྲུང་སེམས་ཞེས་བྱ་བ་ནི་སྡུག་བསྔལ་ལས་སོ། །སྙིང་རྗེའི་སེམས་ཞེས་བྱ་བ་ནི་གོང་མ་དང་ཟློས་པའི་ཕྱིར་ཡི་གེ་ནོར་བར་བརྩི་སྟེ། དེ་བས་ན་བྱང་ཆུབ་སེམས་ནི་གོམས་པར་བྱ་ཞེས་བྱ་བ་ཡིན་ནོ། །དེ་བས་ན་མགོན་པོ་ཞེས་བྱ་བ་ལ་སོགས་པ་ལ་རང་གི་མཚན་ཞེས་བྱ་བ་ནི།
གང་གིས་བདག་གི་མིང་ཐོས་པ་དེ་དག་ཀྱང་འཇིགས་པ་བརྒྱད་ལས་ཐར་བར་གྱུར་ཅིག་ཅེས་བྱ་བ་ལ་སོགས་པའི་ཚུལ་གྱིས་སོ། །བདག་དང་གཞན་མཉམ་པ་ཉིད་དུ་བྱ་བ་དེ་ནི་དཀའ་བའི་ཕྱིར་མི་ནུས་སོ་སྙམ་ན། གོམས་པར་གྱུར་ན་དཀའ་བ་མེད་པའི་ཕྱིར། དཀའ་ལས་ཞེས་བྱ་བ་ལ་
སོགས་པ་སྨོས་ཏེ། གང་གི་མིང་ཞེས་བྱ་བ་ནི་འདྲེ་ལ་སོགས་པའོ། །དེ་ཉིད་མེད་ན་ཞེས་བྱ་བ་ནི་ཤིན་ཏུ་འདྲིས་པར་གྱུར་པའི་ཕྱིར་འདྲེ་ལ་སོགས་པ་དེ་ཉིད་མེད་ནའོ། །དེ་ལྟར་བདག་དང་གཞན་མཉམ་པ་ཉིད་དུ་བྱ་བར་འདོད་པ་དེ། ལས་གང་ཞིག་ལ་བརྩོན་འགྲུས་བརྩམ་པར་བྱ་ཞེ་ན། བདག་
གི་བདེ་བ་གཞན་ལ་བཏང་ཞིང་གཞན་གྱི་སྡུག་བསྔལ་བདག་གིས་དང་དུ་བླང་བའི་ཚུལ་གྱིས་བདག་དང་གཞན་བརྗེ་བར་བྱ་བ་ཉན་ཐོས་ལ་སོགས་པས་ཐོས་ན། སྐྲག་པར་འགྱུར་བའི་ཕྱིར་གསང་བར་བྱ་བ་དེ་ལ་བརྩོན་འགྲུས་བརྩམ་པར་བྱའོ་ཞེས་བསྟན་པའི་ཕྱིར། གང་ཞིག་བདག་དང་
ཞེས་བྱ་བ་ལ་སོགས་པ་སྨོས་སོ། །ཇི་ཙམ་གྱིས་བདག་དང་གཞན་དུ་བརྗེ་བ་ཞེས་བྱ་ཞེ་ན། གང་ཞིག་བདག་གི་བདེ་བ་ཟས་དང་སྐོམ་ལ་སོགས་པ་གཞན་ལ་བྱིན་ཞིང་། དེ་ཉིད་ཀྱི་བཀྲེས་པ་ལ་སོགས་པའི་སྡུག་བསྔལ་བདག་གིས་དང་དུ་བླངས་པ་ལྟ་བུ་ཡང་ཡིན་མོད་ཀྱི། དེ་ཙམ་
འབའ་ཞིག་ལ་ནི་མི་བྱའམ། འོ་ན་ཅི་ཞེ་ན། གང་གི་ཚེ་སྡོམ་པའི་ཚུལ་ཁྲིམས་ཀྱི་དབང་དུ་བྱས་ནས། སེམས་ཅན་ཐམས་ཅད་བདེ་བར་བྱའོ་ཞེས་བྱམས་པ་ཆེན་པོས་ཀུན་ནས་བསླང་ནས། གཞན་བདེ་བ་དང་ཕྲད་པར་བྱ་བའི་དོན་དུ་བདག་གི་ཁྱིམ་གྱི་བདེ་བ་ལ་སོགས་པ་ཡལ་བར་
འདོར་བར་བྱེད་པ་དེ་ཙམ་གྱིས་ན་བདེ་བ་གཞན་ལ་བཏང་ཞེས་བྱ་སྟེ། མདོར་ན་བདག་གི་བདེ་བ་གཞན་བདེ་བར་བྱ་བའི་ཕྱིར་བཏང་ཞེས་བྱ་བའི་ཐ་ཚིག་གོ། །དེ་བཞིན་དུ་གཞན་གྱི་སྡུག་བསྔལ་བདག་གིས་དང་དུ་བླང་ཞེས་བྱ་བ་ཡང་གཞན་གྱི་སྡུག་བསྔལ་བསལ་བར་བྱ་བའི་སྙིང་རྗེ་ཆེན་

པོས་ཀུན་ནས་བསླང་ནས། རབ་ཏུ་བྱུང་བ་ལ་སོགས་པའི་དཀའ་ལས་དང་དུ་བླང་ཞེས་བྱ་བ་སྟེ། མདོར་ན་གཞན་གྱི་སྡུག་བསྔལ་བསལ་བར་བྱ་བའི་དོན་དུ་བདག་གིས་སྡུག་བསྔལ་ཉམས་སུ་བླང་བ་ཞེས་བྱ་བའི་ཐ་ཚིག་གོ། །དེ་བཞིན་དུ་དགེ་བའི་ཆོས་གཞན་
དག་ལ་ཡང་ཅི་ཞིག་པར་བྱ་སྟེ། མདོར་ན་ཅི་ཙམ་དུ་གཞན་བདེ་བའི་ཕྱིར་བདག་གི་བདེ་བ་ལ་མི་ལྟ་བ་དེ་ནི། བདག་གི་བདེ་བ་གཞན་ལ་བཏང་བ་ཡིན་ལ། ཇི་ཙམ་དུ་གཞན་གྱི་སྡུག་བསྔལ་བསལ་བའི་ཕྱིར་བྱ་དཀའ་བ་ཇི་སྙེད་ཉམས་སུ་ལེན་པ་ནི་གཞན་གྱི་སྡུག་བསྔལ་བདག་གིས་དང་
དུ་བླངས་པ་ཞེས་བྱའོ། །ཡང་ཅིའི་ཕྱིར་བདག་གི་བདེ་བ་གཞན་ལ་གཏང་བར་བྱའི། བདག་ཉིད་ལ་ཕན་གདགས་པར་མི་བྱ་ཞེ་ན། བདག་གི་ལུས་ནི་ཚེ་འདི་དང་ཕྱི་མའི་འཇིགས་པ་བསྐྱེད་པའི་རྒྱུར་གྱུར་པའི་ཕྱིར། འདི་ལ་དགྲ་བཞིན་དུ་སྡང་བར་བྱའི། བདེ་བས་ཕན་གདགས་པར་བྱ་རིན་མི་
ཆོག་གོ་སྙམ་ནས། བདག་དང་ལུས་ཞེས་བྱ་བ་ལ་སོགས་པ་སྨོས་སོ། །འཇིགས་པ་གནས་ཆུང་ངུ་ལ་ཡང་ཞེས་བྱ་བ་ནི་སྐྲག་པར་བྱ་རིན་མི་ཆོག་པ་ལ་ཡང་ངོ་། །ཇི་ལྟར་འཇིགས་པ་སྐྱེ་བའི་གནས་ཡིན་ཞེ་ན། རྒྱས་པར་བཤད་པའི་ཕྱིར། ལུས་གང་ཞེས་བྱ་བ་སྨོས་ཏེ། སུ་ཞིག་ཅེས་བྱ་བ་
ནི་གཉི་ག་ཡང་དགག་པའི་དགྲ་སྟེ། སུ་ཞིག་དེ་ལ་འདོད་ཅིང་བསྲུང་བ་དང་། མཆོད་པར་བྱེད་ཀྱི་སུ་ཡང་མི་འདོད་ཅེས་བྱ་བ་དང་། སུ་ཞིག་དགྲ་བཞིན་དུ་སྡང་བར་མི་བྱེད་ཅིང་དགྲ་བཞིན་དུ་བརྙས་པར་མི་བྱེད་དེ། ལུས་འདི་ལ་དགྲ་བཞིན་དུ་སྡང་ཞིང་བརྙས་པར་བྱའོ་ཞེས་བྱ་བའི་དོན་ཏོ། །
བདག་གི་དོན་བྱས་ན་ཉེས་དམིགས་ཅི་ཡོད། གཞན་གྱི་དོན་བྱས་ན་ཕན་ཡོན་ཅི་ཞིག་ཡོད་ནས་རང་གི་དོན་ཡལ་བར་བོར་ཏེ་གཞན་གྱི་དོན་ལ་འབད་པར་བྱ་སྙམ་པ་ལ། གལ་ཏེ་བྱིན་ན་ཞེས་བྱ་བ་ལ་སོགས་པ་སྨོས་ཏེ། འདྲེའི་ཚུལ་ཞེས་བྱ་བ་ནི་དམན་པའི་སྤྱོད་པ་ཞེས་བྱ་བའི་དོན་ཏོ། །ལྷའི་
ཆོས་ཞེས་བྱ་བ་ནི་ཁྱད་པར་གྱི་སྤྱོད་པ་ཞེས་བྱ་བའི་དོན་ཏོ། །བདག་ཕྱིར་ཞེས་བྱ་བ་ནི་བདེ་བར་བྱ་བའི་ཕྱིར་རོ། །གཞན་ཕྱིར་ཞེས་བྱ་བ་ལ་སོགས་པ་ནི་གཞན་བདེ་བར་བྱ་བའི་ཕྱིར་རོ། །དེ་ཉིད་ཅེས་བྱ་བ་ནི་བདག་མཐོ་བར་འདོད་ནས་བདག་ལ་སྟོད་པར་བྱེད་པའོ། །གཞན་ལ་སྤྲོ་བྱས་ན་ཞེས་

བྱ་བ་ནི། གཞན་ལ་སྤྲོ་བར་བྱ་བའི་ཕྱིར་གཞན་ལ་བསྟོད་པའོ། །ལྷག་མ་ནི་གོ་སླའོ། །མདོར་བསྡུས་ཏེ་བསྟན་པའི་ཕྱིར་འཇིག་རྟེན་ཞེས་བྱ་བ་སྨོས་སོ། །དེ་ལྟ་ཡིན་པར་ཅི་མངོན་སྙམ་པ་ལ། མང་དུ་བཤད་ལྟ་ཞེས་བྱ་བ་ལ་སོགས་པ་སྨོས་སོ། །བདག་དང་གཞན་དུ་མ་བརྗེས་
པའི་ཉེས་དམིགས་གཞན་བསྟན་པའི་ཕྱིར། བདག་བདེ་ཞེས་བྱ་བ་སྨོས་སོ། །འོ་ན་ཚེ་ཕྱི་མའི་དོན་འགྲུབ་བམ་སྙམ་པ་ལ། འཁོར་བ་ན་ཡང་ཞེས་སྨོས་སོ། །འོ་ན་ཚེ་འདིའི་དོན་འགྲུབ་བམ་སྙམ་པ་ལ་འཇིག་རྟེན་ཞེས་བྱ་བ་སྨོས་སོ། །བདག་དང་གཞན་དུ་བརྗེ་བར་མི་བྱ་བའི་སྒོ་ནས་དེ་སྤོང་དུ་
གཞུག་པར་བྱ་བའི་ཕྱིར། མཐོང་དང་ཞེས་བྱ་བ་སྨོས་ཏེ། མཐོང་བ་ཞེས་བྱ་བ་ནི་ཚེ་འདི་ལའོ། །མ་མཐོང་བ་ཞེས་བྱ་བ་ནི་ཚེ་ཕྱི་མ་ལའོ། །བདག་ཏུ་འཛིན་པ་ལས་གྱུར་ཞེས་བྱ་བ་ནི་བདག་ཏུ་ཆགས་པའི་དབང་གིས་བདག་གི་དོན་བྱེད་པའོ། །འདྲེ་ཆེན་ཞེས་པ་ཡང་དེ་ཉིད་དོ། །ད་ནི་
བདག་དང་གཞན་མཉམ་པ་ཉིད་དུ་བྱ་བའི་ཕྱིར། བདག་དང་གཞན་བརྗེ་བར་བྱའོ་ཞེས་མཇུག་བསྡུས་ཏེ་བསྟན་པའི་ཕྱིར་དེ་ལྟར་ཞེས་བྱ་བ་སྨོས་ཏེ། གནོད་པ་དང་སྡུག་བསྔལ་ཞེས་བྱ་བ་ནི་མཚོན་པ་ཙམ་དུ་ཟད་ཀྱི་བདེ་བ་དང་ཡིད་བདེ་བ་ཐོབ་པར་བྱ་བའི་ཕྱིར་ཞེས་བྱ་བ་ཡང་ཤེས་པར་བྱའོ། །
གནོད་པ་ནི་ཚེ་འདིའོ། །སྡུག་བསྔལ་ནི་ཚེ་ཕྱི་མའོ། །ཡང་ན་གནོད་པ་ནི་ཡིད་ཀྱིའོ། །སྡུག་བསྔལ་ནི་ལུས་ཀྱིའོ། །དེ་ལྟར་བདག་དང་གཞན་དུ་བརྗེ་བར་བྱ་བ་ཉིད་དུ་སློབ་དཔོན་ཉིད་ཀྱི་ཐུགས་དང་གཞན་གྱི་རྒྱུད་བྱེ་བྲག་མ་ཕྱེ་བར་སྤྱིར་བསྟན་ཏོ། །འགྲེལ་པ་བྱེད་པ་ཁ་ཅིག་ན་རེ་ལུང་གིས་
བསྟན་པ་ཟེར་མོད་ཀྱི། དེ་ནི་མི་རིགས་ཏེ། ལུང་གང་ཡང་ཁུངས་སུ་མ་དྲངས་པའི་ཕྱིར་རོ། །འོན་ཏེ་ལུང་གི་དོན་བསྟན་པ་ཡིན་ནོ་ཞེ་ན། འོ་ན་ནི་དེའི་ཚེ་འདི་འབའ་ཞིག་ལུང་གིས་བསྟན་པ་ཞེས་བྱ་བར་མི་རིགས་ཏེ། གཞུང་མཐའ་དག་གིས་ཀྱང་ལུང་གི་དོན་བསྟན་པའི་ཕྱིར་རོ། །དེ་ལྟ་བས་
ན་བདག་དང་གཞན་གྱི་རྒྱུད་ལ་བྱེ་བྲག་ཕྱེ་བ་མེད་པར་བདག་དང་གཞན་གྱི་བརྗེ་བར་བྱ་བ་ཉིད་དུ་སྤྱིར་གདགས་པ་བསྟན་པ་ཞེས་བྱའོ། །ད་ནི་སློབ་དཔོན་གྱིས་བྱེ་བྲག་ཏུ་བདག་ཉིད་ཀྱིས་ཡིད་ལ་བདག་དང་གཞན་དུ་བརྗེ་བར་བྱའོ་ཞེས་གདམས་པ་བསྟན་པའི་ཕྱིར། བདག་ནི་ཞེས་བྱ་བ་སྨོས་

ཏེ། བདག་ནི་དབང་བ་ཡིན་པའི་ཕྱིར། གཞན་གྱི་དོན་བྱ་བ་ལས་རང་གི་དོན་མི་བྱའོ་ཞེས་བྱ་བའི་དོན་ཏོ། །གཞན་དབང་བ་དེ་ཉིད་གང་ཡིན་དོན་ཇི་ལྟ་བུ་ཞིག་བྱ་སྙམ་པ་ལ། གོ་རིམས་བཞིན་དུ་གཞན་དབང་བ་དེ་ནི་བདག་ཉིད་ཀྱི་ཕུང་པོ་དང་མིག་ལ་སོགས་པ་ཡིན་ལ། དོན་
ནི་དེ་ལ་ཕན་པར་འགྱུར་རོ་ཞེས་བསྟན་པའི་ཕྱིར། གཞན་དབང་ཞེས་བྱ་བ་ལ་སོགས་པ་སྨོས་སོ། །འོན་ཏེ་རང་གི་དོན་བྱ་བ་ལ་ཉེས་ཅི་ཡོད་ཅེ་ན། ཡིད་ཁྱོད་ཅེས་བྱ་བ་ལ་སོགས་པ་སྨོས་སོ། །འོན་ཏེ་གཞན་གྱི་དོན་བྱ་བ་ལ་ཕན་ཡོན་ཅི་ཡོད་ཅེ་ན། དེ་ལྟས་ཞེས་བྱ་བ་ལ་སོགས་པ་སྨོས་ཏེ།
ལས་འདི་ཞེས་བྱ་བ་ནི་གཞན་གྱི་དོན་བྱེད་པའོ། །ཕུན་སུམ་བདེ་བ་མིན་ཞེས་བྱ་བ་ནི། སངས་རྒྱས་ཀྱི་ཕུན་སུམ་ཚོགས་པའི་བདེ་བ་ཐོབ་པ་ལས་མ་གཏོགས་པའི་ཁམས་གསུམ་གྱི་འཁོར་བའི་སྡུག་བསྔལ་འདི་འདྲ་བའི་གནས་སྐབས་སུ་རེ་མི་འགྱུར་བ་ཞིག་ན་ཞེས་བྱ་བའི་དོན་ཏོ། །ད་ནི་རང་
ཉིད་ལ་བདག་ཏུ་བཟུང་ནས་དོན་བྱེད་པ་བྱེད་བཞིན་དུ་གཞན་གྱི་དོན་ཡང་གྱིས་ཤིག་ཅེས་གདམས་པའི་ཕྱིར། དེ་བས་ཞེས་བྱ་བ་ལ་སོགས་པ་སྨོས་ཏེ། གཞན་དག་གིས་ཞེས་བྱ་བ་ནི་ཕ་མ་ལ་སོགས་པའོ། །གཞན་གྱི་དོན་ཇི་ལྟར་བྱ་སྙམ་པ་ལ། གཞན་གྱི་རྟོག་ཅེས་བྱ་བ་སྨོས་ཏེ།
གཞན་གྱི་རྒྱུད་ལ་བདེ་བ་གང་གིས་ཕོངས་པ་དང་། སྡུག་བསྔལ་གང་དང་ལྡན་པ་དེ་ཉིད་བརྟགས་ནས་གཞན་གྱི་སྡུག་བསྔལ་བསལ་ཞིང་བདེ་བ་བསྒྲུབ་པའི་ཕྱིར། བདག་གི་བདེ་བ་ལ་མི་ལྟ་བར་བོར་ནས། གཞན་ལ་ཕན་པ་བྱེད་པའི་སྡུག་བསྔལ་དང་དུ་བླང་བར་བྱའོ་ཞེས་བྱ་བའི་དོན་ཏོ། །དེ་
ཡང་ཇི་ལྟར་བྱ་སྙམ་པ་ལ། བདག་སྐྱིད་ཅེས་བྱ་བ་ལ་སོགས་པ་སྨོས་སོ། །ཅི་ནས་ཀྱང་བདག་ལ་ཕྲག་དོག་བྱས་པའི་སྒོ་ནས་ཏེ། ཇི་ལྟ་ཞེ་ན། གཞན་སྐྱིད་པར་བྱ་བའི་དོན་དུ། བདག་སྐྱིད་པ་ཡལ་བར་བོར་ཏེ། གཞན་ལ་བཏང་བར་བྱ་བའམ། བདག་གི་མཐོ་བ་བཏང་སྟེ། གཞན་
དག་མཐོ་བར་བྱ་བའི་ཕྱིར་གཞན་ལ་བསྟོད་པར་བྱ་བའམ། བདག་གིས་གཞན་ལ་ཕན་པ་བྱེད་པ་ཡལ་བར་བོར་ཏེ། གཞན་ལ་སྦྱིན་ཞིང་གཏོང་དུ་གཞུག་པའི་སྒོ་ནས་ཏེ། ཇི་ལྟར་མདོ་ལས། དེ་ལས་ཡོ་བྱད་དག་ལོང་ལ་སྦྱིན་པ་བྱིན་ཅེས་ཇི་སྐད་གསུངས་པ་ལྟ་བུའོ། །དེ་ལྟར་ན་བདག་སྐྱིད་

ཅེས་བྱ་བ་ནི་ཡོ་བྱད་ཀྱི་སྒོ་ནས་སོ། །བདག་མཐོ་བྱ་བ་ནི་ཡོན་ཏན་གྱི་སྒོ་ནས་སོ། །བདག་གི་ཕན་བྱེད་ཅེས་བྱ་བ་ནི་ཕན་འདོགས་པའི་སྒོ་ནས་སོ། །ཡང་ན་བདག་སྐྱིད་ཅེས་བྱ་བ་ལ་སོགས་པ་ནི་ཇི་ལྟར་བདག་ཉིད་སྡོམ་པ་གསུམ་ལ་གནས་པ་དེ་བཞིན་དུ་གཞན་དག་ཀྱང་སྡོམ་པ་ལ་དགོད་པའི་
དབང་དུ་བྱས་ཏེ། བདག་སྐྱིད་གཞན་ནི་མི་སྐྱིད་ལ། །ཞེས་བྱ་བ་ནི་བདག་ནི་སྡོམ་པའི་ཚུལ་ཁྲིམས་ལ་གནས་པའི་སྒོ་ནས་སེམས་བདེ་བ་ལ་རེག་པར་གནས་པའི་ཚུལ་གྱིས་སྐྱིད་ལ། གཞན་ནི་མི་སྐྱིད་པ་ཇི་སྟེ་སྙམ་ནས་གཞན་དེ་དག་ལ་འགོད་པ་དང་། བདག་མཐོ་གཞན་ནི་དམའ་བ་དང་། །ཞེས་
བྱ་བ་ནི། བདག་ནི་དགེ་བའི་ཆོས་སྡུད་པའི་ཡོན་ཏན་གྱིས་བརྒྱན་པའི་སྒོ་ནས་མཐོ་ལ། གཞན་ནི་དེ་ལྟ་མ་ཡིན་པ་ཇི་སྟེ་སྙམ་ནས་གཞན་དག་ཀྱང་དེ་ལ་འགོད་པ་དང་། བདག་ནི་ཕན་བྱེད་གཞན་མིན་ཞེས་བྱ་བ་ནི། བདག་ནི་སེམས་ཅན་གྱི་དོན་བྱེད་པའི་ཚུལ་ཁྲིམས་ཀྱི་སྒོ་ནས་
གཞན་ལ་ཕན་པར་བྱེད་ལ། གཞན་ནི་དེ་ལྟ་མ་ཡིན་པ་ཇི་སྟེ་སྙམ་ནས་གཞན་དག་ཀྱང་དེ་དགོད་པའི་ཚུལ་གྱིས་བདག་ཉིད་འབའ་ཞིག་དེ་ལྟར་གནས་པ་ལ། བདག་ལ་ཕྲག་དོག་ཅིས་མི་བྱེད་དེ། གཞན་དག་ཀྱང་དེ་ལ་དགོད་པར་བྱའོ་ཞེས་བྱ་བའི་དོན་ཏོ། །དེ་བས་ན་གཞན་ལ་ཕན་
གདགས་པའི་དོན་དུ་བདག་གི་བདེ་བ་ལ་མི་ལྟ་ཞིང་དེ་ཡལ་བར་བོར་བའི་སྒོ་ནས་བདག་བདེ་བ་ལ་དང་བྲལ་གྱིས་ཏེ། གཞན་གྱི་སྡུག་བསྔལ་བསལ་བའི་དོན་དུ་བདག་གིས་དཀའ་བ་སྤྱད་པའི་སྒོ་ནས་བདག་ལ་སྦྱོར་ཞེས་བྱའོ། །ཡང་སྤྱོད་ལམ་ཐམས་ཅད་དུ་བདག་དང་གཞན་བརྗེ་བར་མི་
བྱེད་པའི་ཉེས་པ་བསལ་ཕྱིར་ལྷན་ཅིག་རྗེས་སུ་སྤྱོད་པའི་ཤེས་བཞིན་གྱིས་བརྟག་པར་བྱ་བ་ཡིན་པས་ན། རེས་འགའ་ཞེས་བྱ་བ་ལ་སོགས་པ་སྨོས་སོ། །ཅི་ནས་ཀྱང་གཞན་གྱི་ཉེས་པ་བདག་གིས་དང་དུ་བླང་བར་བྱ་བ་ཡིན་པས། གཞན་གྱི་ཉེས་པ་ཞེས་བྱ་བ་ལ་སོགས་པ་
སྨོས་ཏེ། གཞན་གྱིས་ཉེས་པ་བྱས་ཀྱང་བདག་གིས་ཉེས་པ་ལྟར་བྱའོ་ཞེས་བྱ་བའི་དོན་ཏོ། །འོན་ཏེ་གཞན་གྱི་ཉེས་པ་བཞིན་དུ་རང་གི་ཉེས་པ་ཡང་བཅབ་པར་བྱའམ་ཞེན་མ་ཡིན་ཏེ། བདག་གི་ཉེས་པ་ཞེས་བྱ་བ་ལ་སོགས་པ་སྨོས་སོ། །བདག་མཐོ་བ་བསལ་ནས། གཞན་མཐོ་

བར་བྱ་བའི་ཕྱིར། གཞན་གྱི་གྲགས་པ་ཞེས་བྱ་བ་ལ་སོགས་པ་སྨོས་སོ། །ཅི་ནས་ཀྱང་གཞན་མཐོ་ཞིང་བདག་དམའ་བར་བྱ་བའི་ཕྱིར། བདག་ནི་བྲན་གྱི་ཞེས་བྱ་བ་ལ་སོགས་པ་དྲུག་གསུངས་ཏེ། མདོར་ན་ཐ་མལ་པའི་སྤྱོད་ལམ་ཐམས་ཅད་ཀྱང་། སྤྱོད་
ཡུལ་ཡོངས་སུ་དག་པའི་མདོ་ལས་གསུངས་པའི་ཚུལ་དུ་གཞན་གྱི་དོན་དུ་བསྔོ་ཞིང་བྱེད་ན་སྡོམ་པ་གསུམ་གྱིས་བསྡུས་པའི་དགེ་བའི་ལས་ལ་ལྟ་ཅི་སྨོས་ཏེ། དེ་བས་གྲལ་གྱི་ཐ་མ་ལྟར། །དོན་རྣམས་ཀུན་ལ་བཀོལ་བར་གྱིས། །ཞེས་བྱ་བ་དངོས་སུ་གཞན་གྱི་བང་ཆེན་ལ་སོགས་པ་ཞེས་
བྱེད་པ་ལྟ་བུ་མ་ཡིན་ཏེ། མི་ནུས་པའི་ཕྱིར་དང་། དེ་སེམས་ཅན་ཐམས་ཅད་ཀྱི་དོན་དུ་མི་འགྱུར་བའི་ཕྱིར་རོ། །འདི་ནི་སྐྱོན་ཅན་ཞེས་བྱ་བ་ནི་བདག་གི་ཡོན་ཏན་གཞན་ལ་བསྒྲགས་པར་གྱུར་ན་དྲེགས་པ་དང་ང་རྒྱལ་སྐྱེ་བའི་སྐྱོན་འབྱུང་བས་བསྒྲགས་པར་མི་བྱ་སྟེ། བཅབ་པར་བྱའོ་
ཞེས་བྱ་བའི་དོན་ཏོ། །ད་ནི་མདོར་བསྡུས་ནས་སྔོན་གྱི་དུས་སུ་བདག་བདེ་བར་བྱ་བའི་དོན་དུ། གཞན་ལ་གནོད་པ་བྱས་པ་དེ་ད་ཕྱིན་ཆད་ནི་དེའི་ལན་གྱི་ཚུལ་དུ་གཞན་པ་བྱ་བ་དེ། བདག་གིས་དང་དུ་བླང་བར་བྱའོ་ཞེས། མདོར་ན་ཞེས་བྱ་བ་ལ་སོགས་པ་སྨོས་ཏེ། སེམས་ཅན་རྣམས་
ཀྱི་དོན་དུ་དགེ་བའི་རྩ་བ་དེ་དང་། དེ་དག་འགྲུབ་པར་བྱེད་པའི་སྡུག་བསྔལ་དང་དུ་བླང་བར་བྱའོ་ཞེས་བྱ་བའི་དོན་ཏོ། །འདི་ནི་ཞེས་བྱ་བ་ལ་སོགས་པས་ནི་འདི་སྐད་བསྟན་ཏེ། གཉའ་བོ་དྲག་པོ་གཉའ་ཕུད་པའི་ཚུལ་དུའམ། གླེགས་བམ་ཁ་ཅིག་ལས་གཉའ་ཐག་ཅེས་འབྱུང་
སྟེ། དེའི་ཚེ་གཉའ་ཐག་འགྱུར་བའི་ཚུལ་དུ་ཞེས་བྱ་བའི་དོན་ཏོ། །ཚུལ་དེ་བཞིན་དུ་བདག་གི་སེམས་དེ་ཡང་རང་གི་དོན་བྱེད་པའི་ལས་ལ་ཤེད་སྐྱེད་པར་མི་བྱའོ། །འོན་ཀྱང་བག་སར་བཞིན་དུ་ངོ་ཚ་ཤེས་པ་དང་། འཇིགས་པ་སྟེ་ཁྲེལ་ཡོད་པ་གཉིས་ཀྱི་གཉའ་བའམ་གཉའ་ཐག་
གིས་བསྡམས་ཏེ་གཞག་གོ་ཞེས་བྱ་བའི་དོན་ཏོ། །དེ་ལྟར་མ་བྱས་པའི་ཉེས་དམིགས་ཀྱི་དབང་དུ་བྱས་ནས། འོན་ཏེ་དེ་ལྟར་ཞེས་བྱ་བ་ལ་སོགས་པ་སྨོས་སོ། །དེ་ལྟར་འདས་པའི་དུས་སུ་རང་གི་དོན་བྱས་པར་གྱུར་ཀྱང་ཕྱིན་ཆད་དུ་རང་གི་དོན་མི་བྱའི་གཞན་གྱི་དོན་ལ་འབད་པར་བྱ་

བའི་རང་གི་དོན་བྱས་པའི་ཉེས་དམིགས་དང་། གཞན་གྱི་དོན་བྱས་པའི་ཕན་ཡོན་གྱི་སྒོ་ནས་བསྟན་པར་བྱ་བའི་ཕྱིར། ཁྱོད་ཀྱིས་ཁོ་བོ་ཞེས་བྱ་བ་ལ་སོགས་པ་ཚིགས་སུ་བཅད་པ་བཞི་སྨོས་ཏེ། ཁྱོད་ཀྱི་རྩ་ཡང་ཀུན་ཤེས་བྱ་བ་ནི་རྒྱུ་སྟེ། ངན་སོང་དུ་སྐྱེ་བའི་རྒྱུ་རང་གི་དོན་བྱེད་པར་འདོད་པ་བཅོམ་པ་
དང་། ངན་སོང་དུ་འགྲོ་བའི་ཐབས་མེད་དོ་ཞེས་བྱ་བའི་དོན་ཏོ། །ལྷག་མ་ནི་གོ་སླའོ། །ད་ནི་བདག་དང་གཞན་དུ་བརྗེ་བར་བྱ་བའི་དོན་ཉིད་དང་། དེའི་ཕན་ཡོན་བསྟན་པའི་སྒོ་ནས་མཇུག་བསྡུ་བའི་ཕྱིར། དེ་སྟེ་ཞེས་བྱ་བ་ལ་སོགས་པ་སྨོས་ཏེ། བདག་གི་བདེ་བ་ཡལ་བར་བོར་ཏེ།
གཞན་དག་བདེ་བར་བྱས་ཤིང་གཞན་གྱི་སྡུག་བསྔལ་བསལ་བའི་དོན་དུ་བདག་གི་སྡུག་བསྔལ་དང་དུ་བླངས་ན་དུས་དེའི་ཚེ་བདག་དང་གཞན་གྱི་དོན་འགྲུབ་པའི་ཕྱིར། བདག་དང་གཞན་དུ་འགྲུབ་པར་བྱའོ་ཞེས་བྱ་བའི་དོན་ཏོ། །བསྟན་བཅོས་ཀྱི་མིང་གི་དོན་ནི་སྔ་མ་བཞིན་ནོ། །བརྩོན་
འགྲུས་བསྟན་པ་ཞེས་བྱ་བ་སྟེ་ལེའུ་དྲུག་པའི་བཤད་པ་རྫོགས་སོ།། །།བརྩོན་འགྲུས་དང་ལྡན་པ་ལ་བསམ་གཏན་འབྱུང་ཞིང་། སེམས་མཉམ་པར་གཞག་པ་ལས་ཉོན་མོངས་པའི་གཉེན་པོ་ལྷག་མཐོང་འབྱུང་བས། ལྷག་མཐོང་བསྐྱེད་པར་བྱ་བའི་ཕྱིར།
དེའི་རྒྱུ་བསམ་གཏན་བསྐྱེད་པའི་དོན་དུ། ཞི་གནས་ཞེས་བྱ་བ་ལ་སོགས་པ་ལེའུ་བདུན་པ་གསུངས་ཏེ། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཞེས་བྱ་བས་ནི་གང་གི་དོན་དུ་ཞི་གནས་བཙལ་བ་བསྟན་ཏོ། །ལྷག་མས་ནི་
ཇི་ལྟར་བཙལ་བ་བསྟན་ཏེ། ཞི་གནས་ཀྱི་ཚོགས་ལ་གནས་པར་བྱ་བ་དང་། ཚོགས་ལ་གནས་པ་དེས་མཉམ་པར་གཞག་པའི་གནས་སྐབས་སུ་ཇི་ལྟར་བཙལ་བར་བྱ་བ་དང་གཉིས་ཀྱིས་བསྟན་ཏེ། སྔ་མ་ཞི་གནས་ཀྱི་ཚོགས་ལ་གནས་པར་བྱ་བ་ལ། འཇིག་རྟེན་ལ་ཆགས་པ་སྤང་
པ་དང་དགོན་པར་གནས་པར་བྱ་བ་གཉིས་ལས། དེ་ལ། དང་པོའི་དབང་དུ་བྱས་ནས་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་བྱ་བས་ནི་མདོར་བསྟན་ཏེ། འཇིག་རྟེན་ལ་ཆགས་པ་ནི་དགོན་པར་གནས་པ་ལ་སོགས་པས་མི་འགྲུབ་པས་ཞི་གནས་ཐོབ་པར་

མི་འགྱུར་ལ། དེ་ལས་བཟློག་པས་ནི་འགྲུབ་པར་འགྱུར་རོ་ཞེས་བྱ་བའི་དོན་ཏོ། །ད་ནི་དེ་ཉིད་རྒྱས་པར་བཤད་པའི་དབང་དུ་བྱས་ནས། གཉེན་འདུན་ལ་སོགས་པ་ལ་ཆགས་པ་སྤང་བ་དང་། འཇིག་རྟེན་གྱི་ཆོས་བརྒྱད་ལ་ཆགས་པ་སྤང་བ་གཉིས་ལས་རེ་ཞིག་དང་
པོའི་དབང་དུ་བྱས་ནས། མི་རྟག་པ་ཡིན་པའི་ཕྱིར། ཆགས་པར་བྱེད་པ་མི་རིགས་ལ། གཉེན་ལ་སོགས་པ་ཡང་མི་རྟག་པ་ཡིན་པའི་ཕྱིར་ཆགས་པར་བྱ་བར་མི་རིགས་ཏེ། མྱུར་དུ་འབྲལ་བར་འགྱུར་རོ་སྙམ་དུ་བསམ་པའོ། །ད་ནི་གཉེན་ལ་སོགས་པ་ལ་ལྷག་པར་ཆགས་པའི་ཉེས་
དམིགས་བསྟན་པའི་སྒོ་ནས། དེ་ལ་ལྷག་པར་ཆགས་པ་སྤང་བའི་ཕྱིར། དེས་ནི་ཞེས་བྱ་བ་ལ་སོགས་པ་སྨོས་སོ། །དེ་ལ་ལྷག་པར་ཆགས་པའི་རྒྱུ་སྡུག་པ་སྟེ་ཡིད་དུ་འོང་བའི་དངོས་པོ་མཐོ་རིས་དང་ཐར་པ་ཐོབ་པར་མི་འགྱུར་རོ་ཞེས་བསྟན་པའི་དོན་ཏོ། །གཞན་ཡང་གཉེན་ལ་སོགས་
པ་དེ་མཐོང་བའི་ཚེ་ན་ནི་མཐོང་ན་ཅི་རུང་དུ་སྙམ་ནས་ཡིད་དགའ་བར་མི་འགྱུར་ཞིང་། དེའི་དབང་གིས་ཡིད་ཀྱང་ཏིང་ངེ་འཛིན་ལ་མཉམ་པར་འཇོག་པར་མི་འགྱུར་ལ། འོ་ན་མཐོང་ན་ཕན་ནམ་ཞེ་ན། མཐོང་ཡང་ངོམས་པར་མི་འགྱུར་བས། སྔ་མ་བཞིན་དེ་སྔར་མ་ཕྲད་པའི་གནས་སྐབས་
བཞིན་དུ་ད་རུང་ཡང་མ་བྲལ་ན་ནི་ཅི་མ་རུང་སྙམ་པའི་སྲེད་པས་གདུང་བར་འགྱུར་རོ། །ཉེས་དམིགས་གཞན་བསྟན་པའི་ཕྱིར། སེམས་ཅན་རྣམས་ལ་ཞེས་བྱ་བ་ལ་སོགས་པ་སྨོས་ཏེ། ཀུན་ནས་སྒྲིབ་ཅེས་བྱ་བ་ནི་དེའི་རྐྱེན་གྱིས་འཁོར་བའི་སྡུག་བསྔལ་ལ་མི་སེམས་པའི་ཕྱིར་རོ། །
ཐ་མར་ཞེས་བྱ་བ་ནི་འཆི་བའི་དུས་སུ་འགྱོད་པར་འགྱུར་བའི་ཕྱིར་རོ། །དོན་མེད་ཅེས་བྱ་བ་ནི་དགེ་བ་མ་བརྩམས་པའི་ཕྱིར་རོ། །འཇིག་པར་འགྱུར་ཞེས་བྱ་བ་ནི་མྱ་ངན་ལས་འདས་པ་མི་འཐོབ་པའི་ཕྱིར་རོ། །སྐལ་བ་མཉམ་སྦྱོང་ན་ཞེས་བྱ་བ་ནི་མི་དགེ་བའི་ལས་ཀྱི་རྗེས་སུ་འཇུག་
པའི་ཕྱིར་རོ། །དགའ་བའི་གནས་ལ་ཞེས་བྱ་བ་ནི་དགའ་བར་བྱེད་པའི་གནས་སོ། །གཞན་ཡང་བྱིས་པ་རྣམས་ཀྱི་མཚན་ཉིད་བསྟན་པའི་ཕྱིར། ཕན་པར་སྨྲས་ན་ཞེས་བྱ་བ་ལ་སོགས་པ་སྨོས་ཏེ། ཕན་ལས་ཞེས་བྱ་བ་ནི་དགེ་བའི་ལས་སོ། །བཟློག་ཅེས་བྱ་བ་ནི་ཕ་རོལ་པོ་

དེ་དག་གོ། །ལྷག་མ་ནི་གོ་སླའོ། །རེས་འགའ་ཕྲད་པའི་ཚེ་ཇི་ལྟར་བྱ་སྙམ་པ་ལ། ཕྲད་ན་ཞེས་བྱ་བ་ལ་སོགས་པ་སྨོས་ཏེ། ཆོས་ཀྱི་དོན་ཙམ་ཞེས་བྱ་བ་ནི། གདམས་ངག་འཚོ་བའི་རྐྱེན་ཙམ་མོ། །ཀུན་ལ་ཞེས་བྱ་བ་ནི་སྦྱིན་བདག་ལ་སོགས་པ་ལའོ། །ད་ནི་གཉིས་པ་
འཇིག་རྟེན་པའི་ཆོས་བརྒྱད་ལ་ཆགས་པ་སྤང་བའི་དབང་དུ་བྱས་ནས། དེའི་ཉེས་དམིགས་བསྟན་པར་བྱ་བའི་ཕྱིར། བདག་ནི་རྙེད་མང་བཀུར་སྟི་ཞེས་བྱ་བ་ལ་སོགས་པ་སྨོས་སོ། །འོ་ན་ཇི་ལྟར་སྤང་བར་བྱ་ཞེ་ན། འདི་དག་ཅེས་བྱ་བ་ལ་སོགས་པ་སྨོས་ཏེ། མི་རྟག་པ་ཡིན་ནོ་ཞེས་
བྱ་བའི་ཐ་ཚིག་སྟེ། དེ་བས་ན་དེ་དག་དང་རྟག་ཏུ་འགྲོགས་པར་འགྱུར་བ་ཡིན་ནོ་ཞེས་བྱ་བའི་དོན་ཏོ། །སྟོད་པ་དང་སྨོད་པ་ལ་དགའ་བ་དང་མི་དགའ་བ་སྤོང་བའི་ཕྱིར། བདག་ལ་སྨོད་པ་ཞེས་བྱ་བ་ལ་སོགས་པ་སྨོས་ཏེ། སེམས་ཅན་ཐམས་ཅད་བདག་ལ་སྟོད་པའམ་སྨོད་པར་
བྱེད་པ་ནི་མ་ཡིན་གྱི། ཁ་ཅིག་དེ་ལྟར་བྱེད་པ་ཙམ་གྱིས་དགའ་བའམ། མི་དགའ་བར་བྱ་རིན་ཆེན་མི་ཆོག་གོ་ཞེས་བྱ་བའི་དོན་ཏོ། །ཅིའི་ཕྱིར་དེ་ལྟར་ཡིན་སྙམ་པ་ལ་སེམས་ཅན་ཞེས་བྱ་བ་སྨོས་ཏེ། མོས་པ་སྣ་ཚོགས་པའི་ཕྱིར་རོ་ཞེས་བྱ་བའི་དོན་ཏོ། །སེམས་ཅན་རྙེད་པ་
ཞེས་བྱ་བ་ལ་སོགས་པས་ནི་དེ་དག་དང་འགྲོགས་པ་སྤང་བར་བྱའོ་ཞེས་བྱ་བའི་དོན་ཏོ། །ད་ནི་ཞི་གནས་ཀྱི་ཚོགས་ལས་གཉིས