Luận tạng Tây Tạng (Tengyur) — Tập 101

། མིའི་སེམས་ལས་ཀྱང་མིའི་རྒྱུན་ཁོ་ན་འབྱུང་ལ། ལྷའི་སེམས་ལས་ཀྱང་ལྷའི་རྒྱུན་ཁོ་ན་འབྱུང་།
དུད་འགྲོའི་སེམས་ལས་ཀྱང་དུད་འགྲོའི་རྒྱུན་ཁོ་ན་འབྱུང་། ཡི་དྭགས་ཀྱི་སེམས་ལས་ཀྱང་ཡི་དྭགས་ཀྱི་རྒྱུན་ཁོ་ན་འབྱུང་། སེམས་ཅན་དམྱལ་བའི་སེམས་ལས་ཀྱང་སེམས་དམྱལ་བའི་རྒྱུན་ཁོ་ན་འབྱུང་བར་འགྱུར་རོ། །དེ་ལྟར་གྱུར་ན་འགྲོ་བ་འཁྲུལ་པ་མེད་པས་རྩོམ་པ་ཐམས་ཅད་དོན་མེད་པ་ཉིད་དུ་
འགྱུར་ཏེ། དེ་ལ་ཉེས་པའི་སྐྱོན་ཆེན་པོ་དེ་དག་ལ་སོགས་པ་མང་དུ་འབྱུང་བར་འགྱུར་རོ། །དེ་ཉིད་ཀྱི་རྗེས་སུ་དཔག་པ་བསྟན་པའི་ཕྱིར། མིའི་རྒྱུད་ལས་ལྷ་ལ་སོགས་པའི་རྒྱུད་དུ་སྐྱེ་བར་མི་འགྱུར་ཏེ། རིགས་ཐ་དད་པའི་ཕྱིར། དཔེར་ན་ཤིང་ནིམ་པའི་ས་བོན་ལས་ཨ་མྲ་ལ་སོགས་པའི་

འབྲས་བུ་སྐྱེ་བར་མི་འགྱུར་བ་བཞིན་པས་རྗེས་སུ་དཔག་པས་གནོད་པའི་ཕྱིར་རོ་ཞེས་བྱ་བ་སྨྲས་ཏེ། དེས་ནི་གལ་ཏེ་སྡེ་པ་གཞན་དག་གི་ས་བོན་གྱི་རྒྱུན་དང་ཆོས་མཐུན་པའི་མཚན་ཉིད་བརྟག་པ་དེ་ལྟར་གྱུར་ན་འགྲོ་བ་འཁྲུལ་པ་མེད་པས་རྩོམ་པ་ཐམས་ཅད་དོན་མེད་པ་ཉིད་དུ་འགྱུར་
བའི་ཉེས་པའི་སྐྱོན་ཆེན་པོ་མང་དུ་འབྱུང་བར་འགྱུར་བ་སྟོན་ཏེ། དེ་དག་ནི་ཆོས་ཅན་དང་། བསྒྲུབ་པར་བྱ་བ་ཆོས་དང་། སྒྲུབ་པའི་ཆོས་དང་། དཔེ་དང་མཇུག་བསྡུ་བ་ཡིན་པར་གོ་རིམས་བཞིན་དུ་སྦྱར་ཏེ། དཔེར་ན་ཤིང་ནིམ་པའི་ས་བོན་དང་ཨ་མྲ་ལ་སོགས་པའི་འབྲས་བུ་ནི་རིགས་ཐ་
དད་པའི་ཕྱིར། ཤིང་ནིམ་པའི་ས་བོན་ལས་ཨ་མྲ་ལ་སོགས་པའི་འབྲས་བུ་སྐྱེ་བར་མི་འགྱུར་བ་དེ་བཞིན་དུ། མིའི་རྒྱུད་དང་ལྷ་ལ་སོགས་པའི་རྒྱུད་ཀྱང་རིགས་ཐ་དད་པའི་ཕྱིར། མིའི་རྒྱུད་ལས་ལྷ་ལ་སོགས་པའི་རྒྱུད་དུ་སྐྱེ་བར་མི་འགྱུར་བས། རྗེས་སུ་དཔག་པ་དེས་གནོད་
པའི་ཕྱིར། གལ་ཏེ་སྡེ་པ་གཞན་དག་གི་ས་བོན་གྱི་རྒྱུན་དང་ཆོས་མཐུན་པའི་མཚན་ཉིད་ཀྱི་བརྟག་པ་དེ་ལྟར་གྱུར་ན། ཉེས་པའི་སྐྱོན་ཆེན་པོ་མང་དུ་འབྱུང་བར་འགྱུར་བས། དེ་ནི་མི་འདོད་དོ། །དེ་བཞིན་དུ་དགེ་བའི་སེམས་ལས་མི་དགེ་བ་དང་། ལུང་དུ་མ་བསྟན་པའི་སེམས་དང་།
མི་དགེ་བའི་སེམས་ལས་དགེ་བ་དང་ལུང་དུ་མ་བསྟན་པའི་སེམས་དང་། ལུང་དུ་མ་བསྟན་པའི་སེམས་ལས་དགེ་བ་དང་མི་དགེ་བའི་སེམས་དང་། འདོད་པ་ན་སྤྱོད་པའི་སེམས་ལས་གཟུགས་དང་གཟུགས་མེད་པ་ན་སྤྱོད་པ་དང་། འཇིག་རྟེན་ལས་འདས་པའི་སེམས་དང་། གཟུགས་
ན་སྤྱོད་པའི་སེམས་ལས་འདོད་པ་དང་། གཟུགས་མེད་པ་ན་སྤྱོད་པ་དང་། འཇིག་རྟེན་ལས་འདས་པའི་སེམས་དང་། གཟུགས་མེད་པ་ན་སྤྱོད་པའི་སེམས་ལས་འདོད་པ་དང་གཟུགས་ན་སྤྱོད་པ་དང་། འཇིག་རྟེན་ལས་འདས་པའི་སེམས་སྐྱེ་བར་མི་འགྱུར་ཏེ། རྗེས་སུ་དཔག་པ་ཇི་སྐད་བསྟན་པས་གནོད་པར་
འགྱུར་བའི་ཕྱིར་ཏེ་ཞེས་བྱ་བས་གཏན་ཚིགས་དང་དཔེ་སྔ་མ་བཞིན་དུ་སྦྱར་ཏེ། དེས་ནི་གལ་ཏེ་སྡེ་པ་གཞན་དག་གི་ས་བོན་གྱི་རྒྱུན་དང་ཆོས་མཐུན་པའི་མཚན་ཉིད་ཀྱི་བརྟག་པ་དེ་ལྟར་གྱུར་ན། དགེ་བ་དང་མི་དགེ་བ་དང་ལུང་དུ་མ་བསྟན་པ་ཟག་པ་མེད་པའི་སེམས་སྣ་ཚོགས་མཇུག་ཐོགས་སུ་མི་སྐྱེ་ཞིང་ཁམས་

འཁྲུལ་པ་མེད་པས་རྩོམ་པ་ཐམས་ཅད་དོན་མེད་པ་ཉིད་དུ་འགྱུར་བའི་ཉེས་པའི་སྐྱོན་ཆེན་པོ་མང་དུ་འབྱུང་བར་འགྱུར་བ་སྟོན་ཏེ། དེ་དག་ཀྱང་ཆོས་ཅན་དང་། བསྒྲུབ་པར་བྱ་བ་ཆོས་དང་། སྒྲུབ་པའི་ཆོས་དང་། དཔེ་དང་། མཇུག་བསྡུ་བ་ཡིན་པར་གོ་རིམས་བཞིན་དུ་སྦྱར་ཏེ། དཔེར་ན་ཤིང་ནིམ་
པའི་ས་བོན་དང་ཨ་མྲ་ལ་སོགས་པའི་འབྲས་བུ་ནི་རིགས་ཐ་དད་པའི་ཕྱིར་ཤིང་ནིམ་པའི་ས་བོན་ལས་ཨ་མྲ་ལ་སོགས་པའི་འབྲས་བུ་སྐྱེ་བར་མི་འགྱུར་བ་བཞིན་དུ། དགེ་བའི་སེམས་དང་མི་དགེ་བའི་སེམས་ལ་སོགས་པ་དང་འདོད་པ་ན་སྤྱོད་པའི་སེམས་དང་། གཟུགས་ན་སྤྱོད་པའི་སེམས་ལ་སོགས་
པ་དག་ཀྱང་རིགས་ཐ་དད་པའི་ཕྱིར། དགེ་བའི་སེམས་ལས་མི་དགེ་བའི་སེམས་ལ་སོགས་པ་དང་། འདོད་པ་ན་སྤྱོད་པའི་སེམས་ལས་གཟུགས་ན་སྤྱོད་པའི་སེམས་ལ་སོགས་པ་སྐྱེ་བར་མི་འགྱུར་བས་རྗེས་སུ་དཔག་པ་དེས་གནོད་པའི་ཕྱིར། གལ་ཏེ་སྡེ་པ་གཞན་དག་གི་ས་བོན་གྱི་རྒྱུན་དང་། ཆོས་
མཐུན་པའི་མཚན་ཉིད་ཀྱི་བརྟག་པ་དེ་ལྟར་གྱུར་ན་ཉེས་པའི་སྐྱོན་ཆེན་པོ་མང་དུ་འབྱུང་བར་འགྱུར་བས། དེ་ཡང་མི་འདོད་དོ། །དེ་ལྟར་ན་དགེ་བ་དང་། མི་དགེ་བ་དག་བྱ་བ་དང་སྤང་བར་མི་འཐད་པས་དེའི་ཕྱིར་བརྟག་པ་དེ་ནི་འདིར་འཐད་པ་མ་ཡིན་ནོ་ཞེས་བྱ་བ་ནི་མཇུག་བསྡུ་བ་དང་། ཚད་མའི་འབྲས་བུ་
ཡིན་ཏེ། དགེ་བ་དང་མི་དགེ་བ་དང་བསྒྲིབས་པ་དང་མ་བསྒྲིབས་པའི་ལུང་དུ་མ་བསྟན་པའི་བྱེ་བྲག་ལས་སེམས་སྣ་ཚོགས་པ་ཉིད་དུ་འགྱུར་ཞིང་། སེམས་སྣ་ཚོགས་པ་ཉིད་ལས་རྒྱུན་སྣ་ཚོགས་ཉིད་དུ་འགྱུར། རྒྱུན་སྣ་ཚོགས་ཉིད་ལས་ལས་སྣ་ཚོགས་ཉིད་དང་ལས་སྣ་ཚོགས་ཉིད་ལས་འགྲོ་བ་དང་།
རིགས་དང་། རུས་དང་། ཡུལ་དང་། དུས་དང་། དབང་པོ་དང་། ཁ་དོག་དང་། དབྱིབས་དང་། སྟོབས་དང་། བློ་ལ་སོགས་པ་ཐ་དད་པར་འགྱུར་བ་ཡིན་ན། དེ་ཡང་བརྟག་པ་འདིས་མི་འཐད་པས་དེའི་ཕྱིར། སྐྱོན་ཆེན་པོ་མང་པོ་དུ་མར་འགྱུར་བས་བརྟག་པ་དེ་ནི་འདིར་འཐད་པ་མ་ཡིན་ནོ། །དེ་ལྟར་
སྡེ་པ་གཞན་དག་གིས་སྨྲས་པའི་གཞུང་མི་འཐད་པར་སུན་ཕྱུང་ནས། ད་ནི་རང་གི་གྲུབ་པའི་མཐའ་བསྟན་པའི་ཕྱིར། འོ་ན་ཇི་ལྟ་བུར་འཐད་ཅེ་ན། སྨོས་པའི་སྐྱོན་གྱི་དྲི་མས་མ་གོས་པ། །སངས་རྒྱས་རྣམས་དང་རང་རྒྱལ་དང་། །ཉན་ཐོས་རྣམས་ཀྱིས་གསུངས་པ་ཡི། །བརྟག་པ་གང་ཞིག་

འདིར་འཐད་པ། །དེ་ནི་རབ་ཏུ་བརྗོད་པར་བྱ། །ཞེས་བྱ་བ་སྨྲས་སོ། །དེ་ཉིད་བསྟན་པའི་ཕྱིར། དེ་ཡང་གང་ཞེ་ན། ཇི་ལྟར་བུ་ལོན་དཔང་རྒྱ་ལྟར། །དེ་ལྟར་ལས་ཀྱང་ཆུད་མི་ཟ། །ཞེས་བྱ་བ་ལ་སོགས་པ་སྟེ། ཆུད་མི་ཟ་བ་ཞེས་བྱ་བའི་ཆོས་དེའི་མཚན་ཉིད་ཀྱི་བྱེ་བྲག་ཏུ་སྨྲ་བ་རྣམས་ཀྱི་
གྲུབ་པའི་མཐའ་ལས་བུ་ལོན་ཇི་ལྟ་བ་དེ་ལྟར་ནི་ལས་བལྟ་བར་བྱ་ལ། དཔང་རྒྱ་ཇི་ལྟ་བ་དེ་ལྟར་ནི་ཆུད་མི་ཟ་བ་དེ་བལྟ་བར་བྱ་སྟེ། དེ་ལྟ་བས་ན་ལས་ཀྱི་སྐད་ཅིག་མ་དེ་བྱས་མ་ཐག་ཏུ་འགག་ལ། ལས་སྐད་ཅིག་མ་དེའི་ཆུད་མི་ཟ་བ་ཞེས་བྱ་བ་སྐད་ཅིག་མ་མ་ཡིན་པའི་ཆོས་ལས་ཀྱི་རྒྱུ་ལས་བྱུང་བ་ལུང་
དུ་མ་བསྟན་པ་སེམས་དང་མི་ལྡན་པའི་འདུ་བྱེད་དུ་གཏོགས་པ་སེམས་ཀྱི་རྒྱུད་ལ་སྐྱེ་བ་ངེས་པར་གནས་པ་བུ་ལོན་གྱི་དཔང་རྒྱ་ལྟ་བུ་ཞིག་ཡོད་པ་དེས་ལས་འགགས་པ་བུ་ལོན་གྱི་ནོར་གཞན་ལ་བཏང་བ་ལྟ་བུ་དེའི་རྣམ་པར་སྨིན་པ་ཆུད་མི་ཟ་བར་འཛིན་ཅིང་གནས་པས། དེས་གང་ཟག་བྱེད་པ་པོ་ལ་
ཚེ་འདི་འམ། ཕྱི་མ་འམ། ལན་གྲངས་གཞན་ལ་རྣམ་པར་སྨིན་པ་དང་རྒྱུ་མཐུན་པའི་འབྲས་བུ་ཆུད་མི་ཟ་བར་འབུལ་ཞིང་བྱེད་པ་པོས་འབྲས་བུ་མྱོང་བར་འགྱུར་བས། ལས་དང་འབྲས་བུར་འབྲེལ་པ་ཡོད་པའི་ཕྱིར། ལུང་ལས་ཀྱང་། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་
ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །ཅེས་གསུངས་པས་དེའི་ཕྱིར། ལས་དང་འབྲས་བུར་འབྲེལ་པ་ཡང་ཡོད་ལ། རྟག་པ་དང་ཆད་པའི་སྐྱོན་དུ་ཡང་མི་འགྱུར་བ་ཡིན་པས། དེས་ན་ཁོ་བོ་ཅག་གི་གཏན་ཚིགས་ལས་དང་འབྲས་བུར་
འབྲེལ་པ་ཡོད་པའི་ཕྱིར་རོ་ཞེས་བྱ་བ་གྲུབ་པས་བརྟག་པ་དེ་ཉིད་འདིར་འཐད་པ་ཡིན་ནོ་ཞེས་ཟེར་རོ། །དེ་ཉིད་བསྟན་པའི་ཕྱིར། བུ་ལོན་གྱི་དཔང་རྒྱ་ཇི་ལྟ་བ་དེ་ལྟར་ལས་ཀྱི་ཕྱག་རྒྱ་ཆུད་མི་ཟ་བའི་མཚན་ཉིད་ཀྱི་ཆོས་ངེས་པར་གནས་ཏེ། དཔེར་ན་བུ་ལོན་གྱི་ནོར་དེ་སྤྱད་ཀྱང་དཔང་རྒྱ་ཡོད་པས་
ནོར་བདག་གི་ནོར་ཆུད་མི་ཟ་ཞིང་ནོར་གྱི་ཕུང་པོ་སྐྱེད་དང་བཅས་པ་འོང་བར་འགྱུར་བ་དེ་བཞིན་དུ། ལས་སྐད་ཅིག་མ་འགགས་སུ་ཟིན་ཀྱང་དེའི་རྒྱུ་ལས་བྱུང་བ་ཆུད་མི་ཟ་བ་ཞེས་བྱ་བའི་ཆོས་ཡོད་པས་བྱེད་པ་པོའི་ལས་ཀྱི་འབྲས་བུ་ཆུད་མི་ཟ་ཞིང་འབྲས་བུ་ཁྱད་པར་ཅན་དང་བཅས་པ་འོང་བར་

འགྱུར་རོ་ཞེས་བྱ་བ་སྨྲས་སོ། །ཇི་ལྟར་ནོར་བདག་གི་ནོར་ཕྱིར་ཁུགས་ན་བུ་ལོན་གྱི་དཔང་རྒྱ་རོར་འགྱུར་བ་དེ་ལྟར་བྱེད་པ་པོས་འབྲས་བུ་མྱོང་ན་ཆུད་མི་ཟ་བ་ཡང་དེ་བཞིན་དུ་འགྱུར་རོ་ཞེས་བྱ་བ་ནི། འོག་ནས་རྣམ་པར་སྨིན་ཀྱང་གནས་པ་ཡིན། །ཞེས་འབྱུང་བས། དེ་ཤོག་རོ་དང་འདྲ་བར་
གནས་སུ་ཟིན་ཀྱང་ཡང་འབྲས་བུ་སྐྱེད་པར་ནི་མི་ནུས་ཏེ། འབྲས་བུ་སྐྱེད་ཟིན་པའི་ཕྱིར་ངེས་པར་སྤྱད་ཟིན་པའི་དཔང་རྒྱ་བཞིན་ནོ། །ཆུད་མི་ཟ་བ་དེ་རྣམ་པ་དུ་ཡོད་ཅེ་ན། དེའི་ཕྱིར། དེ་ནི་ཁམས་ལས་རྣམ་པ་བཞི། །ཆུད་མི་ཟ་བ་དེ་ནི་འདོད་པ་དང་། གཟུགས་དང་གཟུགས་མེད་པར་
གཏོགས་པ་དང་ཟག་པ་མེད་པའི་ཁམས་ཀྱི་བྱེ་བྲག་ལས་རྣམ་པ་བཞིར་འགྱུར་རོ་ཞེས་བྱ་བ་སྨྲས་ཏེ། ཁམས་གསུམ་པ་དང་ཟག་པ་མེད་པར་གཏོགས་པ་ཞེས་བྱ་བའི་ཐ་ཚིག་གོ། །ཆུད་མི་ཟ་བ་དེའི་རང་བཞིན་ཇི་ལྟ་བུ་ཞེ་ན། དེའི་ཕྱིར། དེ་ཡང་རང་བཞིན་ལུང་མ་བསྟན། །དགེ་བ་དང་མི་
དགེ་བ་ཉིད་བརྡ་མི་སྤྲོད་པའི་ཕྱིར་རོ་ཞེས་བྱ་བ་སྨྲས་ཏེ། ཁམས་གསུམ་པ་དང་ཟག་པ་མེད་པར་གཏོགས་པའི་ལས་དག་ནི་དགེ་བ་དང་མི་དགེ་བ་ཡིན་མོད་ཀྱི། དེ་དག་གི་རྣམ་པར་སྨིན་པ་འཛིན་པའི་ཆུད་མི་ཟ་བ་དེ་ནི་དགེ་བ་དང་མི་དགེ་བ་ཉིད་དུ་བརྡ་མི་སྤྲོད་པའི་ཕྱིར། རང་བཞིན་གྱིས་ལུང་དུ་
མ་བསྟན་པ་ཡིན་ནོ། །ཁམས་གསུམ་པ་དང་ཟག་པ་མེད་པར་གཏོགས་པའི་ལས་དག་ཟག་པ་དང་བཅས་པ་དང་ཟག་པ་མེད་པ་ཡིན་པས་དེ་དག་གི་རྣམ་པར་སྨིན་པ་འཛིན་པའི་ཆུད་མི་ཟ་བ་དེ་ཡང་ལས་ཀྱི་བྱེ་བྲག་གིས་རྣམ་པར་དབྱེ་ན་ཟག་པ་དང་བཅས་པ་དང་ཟག་པ་མེད་པ་རྣམ་པ་གཉིས་སུ་
ཤེས་པར་བྱ་བར་ཟད་ཀྱི། དེའི་ངོ་བོ་ཉིད་ནི་ཟག་པ་དང་བཅས་པ་དང་ཟག་པ་མེད་པ་ཉིད་དུ་བརྡ་མི་སྤྲོད་པའི་ཕྱིར། ཡང་རང་བཞིན་གྱིས་ལུང་དུ་མ་བསྟན་པ་ཡིན་ནོ། །ཆུད་མི་ཟ་བ་དེ་ཇི་ལྟར་སྤོང་བར་འགྱུར་ཞེ་ན། དེའ་ཕྱིར། སྤོང་བས་སྤང་བ་མ་ཡིན་ཏེ། སྡུག་བསྔལ་དང་། ཀུན་འབྱུང་བ་དང་འགོག་པ་
དང་ལམ་མཐོང་བས་སྤང་པར་བྱ་བ་སྤོང་བས་སྤོང་བར་བྱ་བ་མ་ཡིན་པའི་ཕྱིར་རོ་ཞེས་བྱ་བ་སྨྲས་ཏེ། ཆུད་མི་ཟ་བ་རྣམ་པ་བཞི་པོ་རང་བཞིན་གྱིས་ལུང་དུ་མ་བསྟན་པ་དེ་ནི་བདེན་པ་བཞི་མཐོང་བས་སྤང་བར་བྱ་བ་ཁམས་གསུམ་གྱི་ཕྲ་རྒྱས་བརྒྱད་ཅུ་རྩ་བརྒྱད་སྤོང་བས་སྤང་བ་མ་ཡིན་ཏེ། དེ་ལྟར་མཐོང་

བའི་ལམ་གྱིས་ནི་མི་དགེ་བ་དང་ཟག་པ་དང་བཅས་པའི་ལས་དང་ཉོན་མོངས་པ་རྣམས་སྤོང་བ་ཡིན་གྱི། དགེ་བ་དང་ཟག་པ་མེད་པ་དང་ལུང་དུ་མ་བསྟན་པ་སྤོང་བ་མ་ཡིན་ལ། ཆུད་མི་ཟ་བ་དེ་ནི་རང་བཞིན་གྱིས་ལུང་དུ་མ་བསྟན་པ་ཡིན་པས་མཐོང་བའི་ལམ་གྱིས་སྤང་བ་མ་ཡིན་པའི་ཕྱིར་
རོ། །འོ་ན་དེ་གང་གིས་སྤོང་ཞེ་ན། དེའི་ཕྱིར་བསྒོམ་པས་སྤོང་བ་ཉིད་ཀྱང་ཡིན། འབྲས་བུ་འཕོ་བ་ན་བསྒོམ་པའི་ལམ་གྱིས་སྤང་བ་ཡིན་པའི་ཕྱིར་རོ་ཞེས་བྱ་བ་སྨྲས་ཏེ། ཆུད་མི་ཟ་བ་དེ་མཐོང་བའི་ལམ་གྱི་སྐད་ཅིག་མ་བཅོ་ལྔའི་བར་དུ་ནི་མི་སྤོང་ངོ་། །སྐད་ཅིག་མ་བཅོ་ལྔ་པ་ནས་སྐད་ཅིག་
མ་བཅུ་དྲུག་པར་རྒྱུན་ཏུ་ཞུགས་པའི་འབྲས་བུར་འཕོ་བ་ན་བསྒོམ་པའི་ལམ་གྱིས་སོ་སོའི་སྐྱེ་བོའི་ལས་མི་དགེ་བ་དང་། ཟག་པ་དང་བཅས་པ་དང་། རྒྱུན་དུ་འཇུག་པའི་ལས་ཀྱི་རྣམ་པར་སྨིན་པ་འཛིན་པའི་ཆུད་མི་ཟ་བ་ལུང་དུ་མ་བསྟན་པ་དེ་སྤང་བ་ཡིན་ལ། དེ་བཞིན་དུ་རྒྱུན་
དུ་ཞུགས་པའི་འབྲས་བུ་ནས། ལན་ཅིག་ཕྱིར་འོང་བའི་འབྲས་བུར་འཕོ་བ་ན་བསྒོམ་པའི་ལམ་གྱིས་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བར་འཇུག་པའི་ལས་དགེ་བ་དང་། ཟག་པ་མེད་པའི་རྣམ་པར་སྨིན་པ་འཛིན་པའི་ཆུད་མི་ཟ་བ་ལུང་དུ་མ་བསྟན་པ་དེ་སྤང་བ་དང་། ལན་ཅིག་ཕྱིར་
འོང་བའི་འབྲས་བུ་ནས་ཕྱིར་མི་འོང་བའི་འབྲས་བུར་འཕོ་བ་ན། བསྒོམ་པའི་ལམ་གྱིས་ལན་ཅིག་ཕྱིར་འོང་བ་དང་། ཕྱིར་མི་འོང་བར་འཇུག་པའི་ཆུད་མི་ཟ་བ་དེ་སྤང་བ་དང་། ཕྱིར་མི་འོང་བའི་འབྲས་བུ་ནས་དགྲ་བཅོམ་པ་ཉིད་ཀྱི་འབྲས་བུར་འཕོ་བ་ན་བསྒོམ་པའི་ལམ་གྱིས་ཕྱིར་མི་འོང་བ་དང་དགྲ་
བཅོམ་པར་འཇུག་པའི་ཆུད་མི་ཟ་བ་དེ་སྤང་བ་དང་དགྲ་བཅོམ་པའི་ཆུད་མི་ཟ་བ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་སྤང་བ་ཡིན་པའི་ཕྱིར། ཆུད་མི་ཟ་བ་དེ་ནི་བསྒོམ་པས་སྤང་བ་ཉིད་ཡིན་ནོ། །ཀྱང་ཞེས་བྱ་བའི་སྒྲ་ནི་འབྲས་བུ་སྐྱེས་པས་ཀྱང་སྤང་བ་ཉིད་ཡིན་ནོ་ཞེས་
རྣམ་པར་བརྟག་པའི་དོན་ཏོ་ཞེས་བྱ་བ་ནི་ཀྱང་གི་སྒྲས་ཇི་ལྟར་ནོར་བདག་གིས་ནོར་ཕྱིར་ཁུགས་ན་བུ་ལོན་གྱི་དཔང་རྒྱ་རོར་འབྱུང་བ་དེ་ལྟར་བྱེད་པ་པོས་འབྲས་བུ་མྱོང་བ་ན་ཆུད་མི་ཟ་བ་ཡང་དེ་བཞིན་དུ་འགྱུར་རོ་ཞེས་བྱ་བ་ཡང་བསྡུ་བའི་དོན་ཏེ། དེའི་འོག་ནས་རྣམ་པར་སྨིན་ཀྱང་གནས་པ་ཡིན་ཞེས་

འབྱུང་བས་ཆུད་མི་ཟ་བ་དེས། ཚེ་འདི་འམ་ཕྱི་མ་དང་ལན་གྲངས་གཞན་ལ་བྱེད་པ་པོ་ལ་ལས་ཀྱི་འབྲས་བུ་ཕུལ་ཏེ་བྱེད་པ་པོས་འབྲས་བུ་མྱོང་ཡང་ཆུད་མི་ཟ་བ་དེ་ནི། ལས་རྣམ་པར་སྨིན་ནས་འགག་པ་དེ་ལྟར་ངེས་པར་འགག་པ་ཉིད་མ་ཡིན་ཏེ། ཇི་སྲིད་དུ་འབྲས་བུ་འཕོས་པ་དང་ཤི་བར་མ་གྱུར་གྱི་
བར་དུ་གནས་པ་ཡིན་མོད་ཀྱི། དེ་གནས་སུ་ཟིན་ཀྱང་ཡང་འབྲས་བུ་བསྐྱེད་པར་ནི་མི་ནུས་ཏེ། འབྲས་བུ་བསྐྱེད་ཟིན་པའི་ཕྱིར། ངེས་པར་སྤྱད་ཟིན་པའི་དཔང་རྒྱ་བཞིན་དུ་འགྱུར་བ་ལ་དགོངས་ནས། འདིར་ཀྱང་གི་སྒྲས་འབྲས་བུ་བསྐྱེད་པས་ཀྱང་སྤང་བ་ཉིད་ཡིན་ནོ་ཞེས་རྣམ་པར་བརྟག་པའི་
དོན་བསྟན་ཏོ། །ཆུད་མི་ཟ་བ་དེ་མཐོང་བའི་ལམ་གྱིས་མ་སྤངས་པའི་ཡོན་ཏན་བསྟན་པའི་ཕྱིར། དེ་ཕྱིར་ཆུད་མི་ཟ་བ་ཡི། །ལས་ཀྱི་འབྲས་བུ་བསྐྱེད་པར་འགྱུར། །གང་ཕྱིར་དེ་སྡུག་བསྔལ་ལ་སོགས་པ་མཐོང་བས་སྤང་བར་བྱ་བ་སྤོང་བས་སྤང་བ་མ་ཡིན་པ་དེའི་ཕྱིར། སྡུག་བསྔལ་ལ་སོགས་
པ་མཐོང་བས་སྤང་བར་བྱ་བའི་ལས་མི་དགེ་བ་མཐོང་བས་ལམ་གྱིས་སྤངས་པ་བཞིན་དུ་བསྒོམ་པའི་ལམ་གྱི་ལས་དགེ་བ་རང་འགགས་ཏེ། སྤངས་སུ་ཟིན་ཀྱང་ཆུད་མི་ཟ་བས་བསྒོམ་པའི་ལམ་གྱི་འབྲས་བུ་ཐོབ་པ་རྣམས་ལ་ཡང་ལས་རྣམས་ཀྱི་འབྲས་བུ་བསྐྱེད་པར་འགྱུར་རོ་ཞེས་བྱ་བ་སྨྲས་ཏེ། གང་
གི་ཕྱིར་ཆུད་མི་ཟ་བ་དེ་སྤོང་བས་སྤང་བ་མ་ཡིན་པ་དེའི་ཕྱིར་ཇི་ལྟར་མཐོང་བའི་ལམ་གྱི་ལས་ནི་མི་དགེ་བ་སྤངས་པ་བཞིན་དུ་བསྒོམ་པའི་ལམ་གྱི་ལས་དགེ་བ་རང་འགགས་ཏེ་སྤངས་སུ་ཟིན་ཀྱང་ཆུད་མི་ཟ་བ་མཐོང་བའི་ལམ་གྱིས་སྤངས་པ་བསྒོམ་པའི་ལམ་གྱི་གནས་སྐབས་ན། ཡོད་པ་དེས་
བསྒོམ་པའི་ལམ་གྱི་འབྲས་བུ་ཐོབ་པའི་གང་ཟག་རྣམས་ལ་ཡང་ལས་རྣམས་ཀྱི་འབྲས་བུ་བསྐྱེད་པར་འགྱུར་བ་ནི་ཆུད་མི་ཟ་བ་དེ་མཐོང་བའི་ལམ་གྱིས་མ་སྤངས་པའི་ཡོན་ཏན་ཡིན་ནོ། །ཆུད་མི་ཟ་བ་དེ་མཐོང་བའི་ལམ་གྱིས་སྤང་བ་དང་། ལས་འགག་པ་བཞིན་དུ་སྤོང་ཞིང་འགག་པར་གྱུར་ན་
མི་རུང་བའི་ཉེས་དམིགས་བསྟན་པའི་ཕྱིར། དེ་ལ་ཆུད་མི་ཟ་བ་དེ། གལ་ཏེ་སྤོང་བས་སྤངས་པ་དང་། །ལས་འཕོ་བ་དང་མཐུན་འགྱུར་ན། །དེ་ལ་ལས་འཇིག་པ་ལ་སོགས་པའི་སྐྱོན་རྣམས་སུ་ནི་ཐལ་བར་འགྱུར། དེ་ལ་གལ་ཏེ་ཆུད་མི་ཟ་བ་དེ་སྡུག་བསྔལ་ལ་སོགས་པ་མཐོང་བས་སྤང་བར་བྱ་

བའི་ཉོན་མོངས་པའི་ཕྲ་རྒྱས་སྡུག་བསྔལ་ལ་སོགས་པ་མཐོང་བས་སྤང་བར་བྱ་བ་དང་། རིགས་མཐུན་པ་ཡིན་པར་གྱུར་ཏམ། ལས་བྱས་མ་ཐག་ཏུ་རང་འགག་ཅིང་འཕོ་བ་དང་རིས་མཐུན་པར་ཡིན་པར་གྱུར་ན། དེ་ལས་ཀྱི་འབྲས་བུ་མེད་པས། ལས་འཇིག་པ་ལ་སོགས་པའི་
སྐྱོན་རྣམས་སུ་ཐལ་བར་འགྱུར་རོ་ཞེས་བྱ་བ་སྨྲས་ཏེ། གལ་ཏེ་ཆུད་མི་ཟ་བ་དེ་མཐོང་བས་སྤང་པའི་ཕྲ་རྒྱས་དག་དང་རིས་མཐུན་ཞིང་མཐོང་བས་སྤོང་བར་བྱ་བ་ཡིན་ནམ། ལས་བྱས་མ་ཐག་ཏུ་རང་འགག་ཅིང་འཕོ་བ་དང་། རིས་མཐུན་ཞིང་འགག་པ་ཡིན་པར་གྱུར་ན། དེ་ལྟ་ན་སྡུག་བསྔལ་ལ་སོགས་པ་མཐོང་ཞིང་
སྤང་བར་བྱ་བ་སྤངས་ཏེ་མེད་པ་བཞིན་ནམ། ལས་འགགས་ཏེ་མེད་པ་བཞིན་དུ། ཆུད་མི་ཟ་བ་དེ་ཡང་མེད་པར་འགྱུར་བས། དེ་ལ་ལས་ཀྱི་འབྲས་བུ་མེད་པས། ལས་འཇིག་པ་དང་འབྲས་བུ་འཇིག་པ་ལ་སོགས་པའི་སྐྱོན་རྣམས་སུ་ཐལ་བར་འགྱུར་བས། དེ་ནི་མི་འདོད་དེ། ཆུད་མི་ཟ་བ་དེ་མཐོང་བའི་ལམ་
གྱིས་སྤང་བ་མ་ཡིན་པའི་ཁུངས་བསྟན་པའི་ཕྱིར། ལས་དགེ་བ་ནི་མཐོང་བའི་ལམ་གྱིས་སྤང་བ་ཡིན་པར་བལྟ་བར་བྱ་སྟེ། འཕགས་པ་ཡང་སོ་སོའི་སྐྱེ་བོའི་ལས་དང་ལྡན་པར་གྱུར་ན་མི་རུང་བའི་ཕྱིར་རོ་ཞེས་བྱ་བ་སྨྲས་ཏེ། ལས་མི་དགེ་བ་ནི་མཐོང་བའི་ལམ་གྱིས་སྤོང་བ་ཡིན་ཏེ། དེ་ལྟ་མ་ཡིན་དུ་ཟིན་ཀྱང་མཐོང་བ་
ཐོབ་པའི་འཕགས་པ་ཡང་སོ་སོའི་སྐྱེ་བོའི་ལས་མི་དགེ་བ་དང་ལྡན་པར་འགྱུར་བས་དེ་ནི་མི་འདོད་དོ། །དེའི་ཕྱིར་མཐོང་བའི་ལམ་གྱིས་ནི་ལས་མི་དགེ་བ་འབའ་ཞིག་སྤོང་བར་ཟད་ཀྱི་དགེ་བ་དང་ལུང་དུ་མ་བསྟན་པ་དག་མི་སྤང་ལ། ཆུད་མི་ཟ་བ་དེ་ནི་ལུང་དུ་མ་བསྟན་པ་ཡིན་པས་མཐོང་བས་སྤང་བར་བྱ་བ་དང་
རིས་མཐུན་པ་མ་ཡིན་པའི་ཕྱིར་མཐོང་བས་སྤང་བར་བྱ་བ་མ་ཡིན་ནོ། །དེ་ལྟ་བས་ན་མཐོང་བས་སྤང་བར་བྱ་བ་དང་ལས་བཞིན་དུ་སྤང་བར་བྱ་བ་མ་ཡིན་ཏེ་ཞེས་བྱ་བ་ནི་ཉེས་དམིགས་དེ་གཉིས་བསལ་བའི་མཇུག་བསྡུ་བ་ཡིན་ཏེ། ཆུད་མི་ཟ་བ་དེ་ནི་སྤོང་བས་སྤང་བ་དང་རིས་མཐུན་པ་ཡིན་ལ། ལས་འཕོ་བ་དང་རིས་མཐུན་
པ་ཡང་མ་ཡིན་པས། མཐོང་བས་སྤང་བར་བྱ་བ་དང་ལས་བཞིན་དུ་སྤང་བར་བྱ་བ་མ་ཡིན་ནོ། །འོ་ན་ནམ་སྤོང་ཞེ་ན། དེའི་ཕྱིར། འབྲས་བུ་འཕོས་ན་ནི་སྤོང་བར་འགྱུར་རོ་ཞེས་བྱ་བ་སྨྲས་ཏེ། དེའི་འོག་ནས། དེ་ནི་འབྲས་བུ་འཕོས་པ་དང་། ཤི་བར་གྱུར་ན་འགག་པར་འགྱུར། ཞེས་འབྱུང་བའི་སྐབས་ཀྱིས་སྟོན་པར་འགྱུར་རོ། །

ཆུད་མི་ཟ་བ་དེ་ཁམས་འཕོ་བས་ཇི་ལྟར་སྤོང་བར་འགྱུར་ཞེ་ན། དེའི་ཕྱིར་འདོད་པར་གཏོགས་པ་ནི་འདོད་པའི་ཁམས་ལས་ཡང་དག་པར་འདས་པས་སྤོང་ལ། གཟུགས་དང་གཟུགས་མེད་པར་གཏོགས་པ་དག་ཀྱང་གཟུགས་དང་གཟུགས་མེད་པའི་ཁམས་དག་ལས་ཡང་དག་པར་འདས་པས་སྤོང་ངོ་ཞེས་བྱ་བ་སྨྲས་ཏེ།
ཁམས་གཞན་ནས་ཤི་འཕོས་ཏེ་ཁམས་གཞན་དུ་སྐྱེ་བའི་ཚེ་ན་ཁམས་སྔ་མའི་ཆུད་མི་ཟ་བ་ཁམས་མཚུངས་པར་ཉིང་མཚམས་སྦྱོར་བའི་ཚེ་གཅིག་པུ་ཁོ་ནར་སྐྱེ་བ་དེ་ཡང་སྤོང་ཞིང་། ཁམས་གཞན་གྱི་ཆུད་མི་ཟ་བ་གཞན་སྐྱེའོ། །ཆུད་མི་ཟ་བ་ཇི་ལྟར་སྐྱེ་བར་འགྱུར་ཞེ་ན། དེའི་ཕྱིར། ཁམས་མཚུངས་ལས་ནི་ཆ་མཚུངས་དང་། །ཆ་མི
མཚུངས་པ་ཐམས་ཅད་ཀྱི། །དེ་ནི་ཉིང་མཚམས་སྦྱོར་བའི་ཚེ། །གཅིག་པུ་ཁོ་ན་སྐྱེ་བར་འགྱུར། །ཁམས་མཚུངས་པའི་ཞེས་བྱ་བ་ནི་ཁམས་འདྲ་བའི་འོ། །ལས་ཆ་མཚུངས་པ་ནི་རིགས་མཐུན་པའོ། །ཆ་མི་མཚུངས་པ་ནི་རིགས་མི་མཐུན་པའོ། །དེ་དག་ཐམས་ཅད་ཀྱི་ཆུད་མི་ཟ་བ་དེ་ཚེ་འདི་ལ་རེ་རེ་
ལས་སྐྱེས་པ་དག་ནི་ཉིང་མཚམས་སྦྱོར་བའི་དུས་ཀྱི་ཚེ་དེ་དག་ཐམས་ཅད་འགག་པ་ན་ཡང་གཅིག་ཁོ་ན་སྐྱེ་བར་འགྱུར་རོ་ཞེས་བྱ་བ་སྨྲས་ཏེ། འདོད་པ་དང་གཟུགས་དང་གཟུགས་མེད་པ་དང་། ཟག་པ་མེད་པའི་ཁམས་དག་ལས་ཁམས་མཚུངས་པའི་ལས་དགེ་བའམ་མི་དགེ་བའམ། ལུང་དུ་མ་བསྟན་པའམ།
ཟག་པ་མེད་པ་སོ་སོར་ཆ་མཚུངས་ཤིང་རིགས་མཐུན་པ་དང་། ཕན་ཚུན་ཆ་མི་མཚུངས་ཤིང་རིགས་མི་མཐུན་པ་མང་པོ་དེ་དག་ཐམས་ཅད་ཀྱི་ཆུད་མི་ཟ་བ་དེ་ཚེ་འདི་ལ་ནི་ལས་རེ་རེ་ལས་སྐྱེའོ། །ཉིང་མཚམས་སྦྱོར་བའི་དུས་ཀྱི་ཚེ་ན་ནི་ལས་རེ་རེ་ལས་སྐྱེས་པ་དེ་དག་ཐམས་ཅད་འཆི་བའི་ཆར་གཏོགས་པའི་སེམས་དང་ལྷན་
ཅིག་འགག་ཅིང་གཅིག་པུ་ཁོ་ན་ཞིག་སྐྱེ་བའི་ཆར་གཏོགས་པའི་སེམས་དང་ལྷན་ཅིག་ཏུ་སྐྱེ་བར་འགྱུར་ཏེ། དེས་ནི་ཉིང་མཚམས་སྦྱོར་བའི་ཚེ་གཅིག་པུ་ཁོ་ནར་སྐྱེ་བར་འགྱུར་བའི་ཚུལ་བསྟན་ཏོ། །ད་ནི་འདི་ལ་ཁམས་མཚུངས་པའི་ལས་ཆ་མཚུངས་པ་དང་། ཆ་མི་མཚུངས་པ་མང་པོ་དེ་དག་ཐམས་ཅད་ཀྱི་ཆུད་
མི་ཟ་བ་དེ་ལས་རེ་རེ་ལས་ཐ་དད་པར་སྐྱེ་བ་དང་། རྣམ་པར་སྨིན་ན་ཡང་གནས་པའི་ཚུལ་བསྟན་པའི་ཕྱིར། ཚེ་འདི་ལ་ནི་ལས་རང་ལས། །རྣམ་པ་གཉིས་པོ་ཐམས་ཅད་ཀྱི། །དེ་ནི་ཐ་དད་སྐྱེ་འགྱུར་ཞིང་། །རྣམ་པར་སྨིན་ཀྱང་གནས་པ་ཡིན། །ཞེས་བྱ་བ་སྨྲས་སོ། །དེ་དག་ཉིད་བྱེ་བྲག་ཏུ་བཤད་པ་བསྟན་པའི་ཕྱིར།

ཚེ་འདི་ལ་ནི་ལས་དང་ལས་སོ་སོ་བ་སེམས་པ་དང་བསམས་པའི་བྱེ་བྲག་གམ་དགེ་བ་དང་མི་དགེ་བའི་བྱེ་བྲག་གིས་རྣམ་པ་གཉིས་པོ་ཐམས་ཅད་ཀྱི་ཆུད་མི་ཟ་བ་གང་ཡིན་པ་དེ་ནི་ཐ་དད་པར་སྐྱེ་བར་འགྱུར་རོ་ཞེས་བྱ་བ་སྨྲས་ཏེ། དེས་ནི་ཚེ་འདི་ལ་ཁམས་མཚུངས་པའི་ལས་དང་ལས་སོ་སོ་བ་ཆ་མཚུངས་པ་དང་།
ཆ་མི་མཚུངས་པ་མང་པོ་དེ་དག་ཐམས་ཅད་ཀྱི་ཆུད་མི་ཟ་བ་དེ་ལས་རེ་རེ་ལས་ཐ་དད་པར་སྐྱེ་བའི་ཚུལ་བསྟན་ཏོ། །རྣམ་པར་སྨིན་ན་ཡང་གནས་པ་ཡིན་ཏེ། དེ་ནི་ལས་རྣམ་པར་སྨིན་པའི་རྒྱུས་འགག་པ་ལྟར་ངེས་པ་ཉིད་མ་ཡིན་ནོ་ཞེས་བྱ་བས་ནི། རྣམ་པར་སྨིན་ན་ཡང་གནས་པའི་ཚུལ་བསྟན་ཏེ། ཆུད་མི་ཟ་བ་དེས་ཚེ་འདི་
འམ་ཕྱི་མའམ་ལན་གྲངས་གཞན་ལ་བྱེད་པ་པོ་ལ་ལས་ཀྱི་འབྲས་བུ་ཕུལ་ཏེ་བྱེད་པ་པོས་འབྲས་བུ་མྱོང་ཡང་ཆུད་མི་ཟ་བ་དེ་ནི། ལས་རྣམ་པར་སྨིན་ནས་འགག་པ་ལྟར་ངེས་པར་འགག་པ་ཉིད་མ་ཡིན་ཏེ། ཇི་སྲིད་དུ་འབྲས་བུ་འཕོ་བ་དང་ཤི་བར་མ་གྱུར་གྱི་བར་དུ་གནས་པ་ཡིན་ནོ། །དེ་ལྟ་ན་སྔར་བསྒོམ་པས་སྤང་བ་
ཉིད་ཀྱང་ཡིན་ཞེས་བསྟན་པའི་སྐབས་སུ་ཀྱང་ཞེས་བྱ་བའི་སྒྲས་ནི་འབྲས་བུ་བསྐྱེད་པས་ཀྱང་སྤང་བ་ཡིན་ནོ་ཞེས་རྣམ་པར་བརྟག་པའི་དོན་ཏོ་ཞེས་སྨོས་པ་དེ་ཡང་འགག་ལ་ཆུད་མི་ཟ་བ་གནས་པ་དེ་ཡང་དང་ཡང་དུ་ལས་ཀྱི་འབྲས་བུ་བསྐྱེད་པར་ཡང་འགྱུར་རོ་སྙམ་དུ་དོགས་པ་བསལ་བའི་ཕྱིར། དེ་གནས་སུ་ཟིན་
ཀྱང་འབྲས་བུ་བསྐྱེད་པར་མི་ནུས་ཏེ། འབྲས་བུ་བསྐྱེད་ཟིན་པའི་ཕྱིར་ངེས་པར་སྤྱད་ཟིན་པའི་དཔང་རྒྱ་བཞིན་ནོ་ཞེས་བྱ་བ་སྨྲས་ཏེ། དེས་ཇི་ལྟར་ནོར་བདག་གིས་ནོར་ཕྱིར་ཁུགས་ན། བུ་ལོན་གྱི་དཔང་རྒྱ་རོར་འབྱུང་བ་ལྟར་བྱེད་པ་པོས་འབྲས་བུ་མྱོང་ན་ཆུད་མི་ཟ་བ་ཡང་དེ་བཞིན་དུ་འགྱུར་
རོ་ཞེས་བྱ་བ་ཉིད་བསྟན་ཏེ། དེ་ཤོག་རོ་དང་འདྲ་བར་གནས་སུ་ཟིན་ཀྱང་ཡང་འབྲས་བུ་བསྐྱེད་པར་མི་ནུས་པས་སྤངས་པ་དང་འདྲ་བའི་ཕྱིར། སྔར་བསྒོམས་པས་སྤོང་བ་ཉིད་ཀྱང་མིན་ཞེས་བསྟན་པའི་སྐབས་སུ་ཀྱང་ཞེས་བྱ་བའི་སྒྲ་ནི་འབྲས་བུ་བསྐྱེད་པས་ཀྱང་སྤང་བ་ཉིད་ཡིན་ནོ་ཞེས་རྣམ་པར་བརྟག་
པའི་དོན་ཏེ་ཞེས་སྨོས་པ་དེ་ཡང་མི་འགལ་ལ། ཆུད་མི་ཟ་བ་གནས་པ་དེས་ཡང་དང་ཡང་དུ་ལས་ཀྱི་འབྲས་བུ་བསྐྱེད་པར་ཡང་མི་འགྱུར་རོ། །ཆུད་མི་ཟ་བ་དེ་ཇི་ལྟར་འགག་པར་འགྱུར་བ་དང་དེའི་རྣམ་པར་དབྱེ་བ་བསྟན་པའི་ཕྱིར། དེ་ནི་འབྲས་བུ་འཕོས་པ་དང་། ཤི་བར་གྱུར་ན་འགག་པར་འགྱུར། །

དེ་ཡི་རྣམ་དབྱེ་ཟག་མེད་དང་། །ཟག་དང་བཅས་པར་ཤེས་པར་བྱ། །ཞེས་བྱ་བ་སྨྲས་ཏེ། དེ་དག་ཉིད་བྱེ་བྲག་ཏུ་བཤད་པ་བསྟན་པའི་ཕྱིར། ལས་དེའི་ཆུད་མི་ཟ་བ་དེའི་འགག་པ་ནི་རྣམ་པ་གཉིས་སུ་ངེས་པ་ཡིན་ཏེ། འབྲས་བུ་འཕོས་པར་གྱུར་པ་དང་། ཤི་བར་གྱུར་པའོ་ཞེས་བྱ་བ་ནི་མདོར་བསྟན་པའོ། །
དེ་ལ་འབྲས་བུ་འཕོས་པར་གྱུར་པ་ནི་བསྒོམ་པས་སྤང་བ་ཉིད་ཡིན་ཞེས་བསྟན་པ་ཡིན་ནོ་ཞེས་བྱ་བ་ནི་ཆུད་མི་ཟ་བ་དེ་མཐོང་བའི་ལམ་གྱི་སྐད་ཅིག་མ་བཅོ་ལྔའི་བར་དུ་ནི་མི་སྤོང་ངོ་། །སྐད་ཅིག་མ་བཅོ་ལྔ་པ་ནས་སྐད་ཅིག་མ་བཅུ་དྲུག་པར་རྒྱུན་དུ་ཞུགས་པའི་འབྲས་བུར་འཕོ་བ་ན་བསྒོམ་པའི་ལམ་གྱི་སོ་སོའི་སྐྱེ་བོའི་ལས་
མི་དགེ་བ་དང་། ཟག་པ་དང་བཅས་པ་དང་། རྒྱུན་དུ་ཞུགས་པའི་ལས་ཀྱི་རྣམ་པར་སྨིན་པ་འཛིན་པའི་ཆུད་མི་ཟ་བ་ལུང་དུ་མ་བསྟན་པ་དེ་སྤོང་ལ། རྒྱུན་ཏུ་ཞུགས་པའི་འབྲས་བུ་ནས་ལན་ཅིག་ཕྱིར་འོང་བའི་འབྲས་བུར་འཕོ་བ་ན་བསྒོམ་པའི་ལམ་གྱིས་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བར་འཇུག་པའི་
ལས་དགེ་བ་དང་། ཟག་པ་མེད་པའི་རྣམ་པར་སྨིན་པ་འཛིན་པའི་ཆུད་མི་ཟ་བ་ལུང་དུ་མ་བསྟན་པ་དེ་སྤོང་བ་དང་། ལན་ཅིག་ཕྱིར་འོང་བའི་འབྲས་བུ་ནས་ཕྱིར་མི་འོང་བའི་འབྲས་བུར་འཕོ་བ་ན་བསྒོམ་པའི་ལམ་གྱིས་ལན་ཅིག་ཕྱིར་འོང་བ་དང་། ཕྱིར་མི་འོང་བར་འཇུག་པའི་ཆུད་མི་ཟ་བ་དེ་སྤོང་བ་དང་། ཕྱིར་
མི་འོང་བའི་འབྲས་བུ་ནས་དགྲ་བཅོམ་པ་ཉིད་ཀྱི་འབྲས་བུར་འཕོ་བ་ན་བསྒོམ་པའི་ལམ་གྱིས་ཕྱིར་མི་འོང་བ་དང་། དགྲ་བཅོམ་པར་འཇུག་པའི་ཆུད་མི་ཟ་བ་དེ་སྤོང་བ་དང་། དགྲ་བཅོམ་པའི་ཆུད་མི་ཟ་བ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་སྤོང་བ་ནི་འབྲས་བུ་འཕོས་པར་གྱུར་པས་
འགག་པ་ཡིན་ཏེ། དེ་དག་གིས་ནི་འབྲས་བུ་མ་བསྐྱེད་པའི་ཆུད་མི་ཟ་བ་ཡང་སྤོང་བར་འགྱུར་རོ། །ཤི་བར་གྱུར་པ་ནི། ཁམས་མཚུངས་ལས་ནི་ཆ་མཚུངས་དང་། །ཆ་མི་མཚུངས་པར་ཐམས་ཅད་ཀྱི། །དེ་ནི་ཉིང་མཚམས་སྦྱོར་བའི་ཚེ། །གཅིག་པུ་ཁོ་ན་སྐྱེ་བར་འགྱུར། །ཞེས་བྱ་བ་བསྟན་པ་ཡིན་ནོ་ཞེས་བྱ་བ་ནི།
ཁམས་མཚུངས་པའི་ལས་ཆ་མཚུངས་པ་དང་ཆ་མི་མཚུངས་པ་མང་པོ་དེ་དག་ཐམས་ཅད་ཀྱི་ཆུད་མི་ཟ་བ་ཚེ་འདི་ལ་ལས་སྐྱེས་པ་དག་ཉིང་མཚམས་སྦྱོར་བའི་དུས་ཀྱི་ཚེ་ན་འཆི་བའི་ཆར་གཏོགས་པའི་སེམས་དང་ལྷན་ཅིག་འགག་པ་ནི་ཤི་བར་འགྱུར་བས་འགག་པ་ཡིན་ཏེ། དེ་དག་གིས་ནི་འབྲས་བུ་བསྐྱེད་པའི་ཆུད་མི་ཟ་

བ་ཡང་སྤོང་བར་འགྱུར་རོ། །དེའི་དེ་ཡང་རྣམ་པར་དབྱེ་ན་རྣམ་པ་གཉིས་སུ་ཤེས་པར་བྱ་བ་སྟེ་ཟག་པ་མེད་པ་དང་། ཟག་པ་དང་བཅས་པའི་ལས་ཀྱི་བྱེ་བྲག་གིས་སོ་ཞེས་བྱ་བས་ནི་དེའི་རྣམ་པར་དབྱེ་བ་བསྟན་ཏེ། ཁམས་གསུམ་པ་དང་། ཟག་པ་མེད་པར་གཏོགས་པའི་ལས་དག་ཟག་པ་དང་བཅས་
པ་དང་ཟག་པ་མེད་པ་ཡིན་པས། དེ་དག་གི་རྣམ་པར་སྨིན་པ་འཛིན་པའི་ཆུད་མི་ཟ་བ་དེ་དག་ཀྱང་ལས་ཀྱི་བྱེ་བྲག་གིས་རྣམ་པར་དབྱེ་ན་ཟག་པ་དང་བཅས་པ་དང་། ཟག་པ་མེད་པ་རྣམ་པ་གཉིས་སུ་ཤེས་པར་བྱ་བར་ཟད་ཀྱི། དེའི་ངོ་བོ་ཉིད་ནི་ཟག་པ་དང་བཅས་པ་དང་། ཟག་པ་མེད་པ་ཉིད་དུ་བརྡ་མི་སྤྲོད་པའི་ཕྱིར་
རང་བཞིན་གྱིས་ལུང་དུ་མ་བསྟན་པ་ཡིན་པར་ཤེས་པར་བྱའོ། །དེའི་ཕྱིར་དེ་ལྟར་ཆུད་མི་ཟ་བ་ཡོད་ན་སྲོག་ཆགས་ལས་སྣ་ཚོགས་ལས་སྐྱེས་པ་འགྲོ་བ་དང་། རིགས་དང་། རུས་དང་། ཡུལ་དང་། དུས་ཐ་དད་པ་རྣམས་ཀྱི་ལུས་དང་། དབང་པོ་དང་། ཁ་དོག་དང་། དབྱིབས་དང་། སྟོབས་དང་། བློ་དང་།
མོས་པ་དང་། ངང་ཚུལ་དང་། ལོངས་སྤྱོད་ལ་སོགས་པ་ཐ་དད་པ་དག་མངོན་པར་འགྲུབ་པར་འགྱུར་རོ་ཞེས་བྱ་བས་ནི། དེ་ལྟར་ཆུད་མི་ཟ་བ་ཡོད་ན་ལས་དང་འབྲས་བུར་འབྲེལ་པ་ཡང་ཡོད་པར་འགྱུར་བའི་ཚུལ་བསྟན་པ་ཡིན་ནོ། །དེའི་ཕྱིར། སྟོང་པ་ཉིད་དང་ཆད་མིན་དང་། །འཁོར་བ་དང་ནི་རྟག་པ་
མིན། །ལས་རྣམས་ཆུད་མི་ཟ་བའི་ཆོས། །སངས་རྒྱས་ཀྱིས་ནི་བསྟན་པ་ཡིན། །ཞེས་བྱ་བ་ནི་མཇུག་བསྡུ་བ་ཡིན་ཏེ། དེ་ལྟ་ན་སྟོང་པ་ཉིད་ཀྱང་འཐད་ལ་སྟོང་པ་ཉིད་ཡིན་ཡང་ཆད་པར་མི་འགྱུར་བ་དང་། འཁོར་བ་ཡང་འཐད་པ་འཁོར་བ་ཡོད་ཀྱང་རྟག་པར་མི་འགྱུར་བ་དང་། ལས་རྣམས་ཀྱང་ནི་ཆུད་
མི་ཟ་བ་དང་ཆུད་མི་ཟ་བའི་ཆོས་སངས་རྒྱས་ཀྱིས་གསུངས་པ་དེ་ཡང་གྲུབ་པ་ཡིན་ནོ་ཞེས་ཟེར་རོ། །དེ་ཉིད་བསྟན་པའི་ཕྱིར། དེ་ལྟར་གང་གི་ཕྱིར་ལས་དང་འབྲས་བུར་འབྲེལ་བ་དེའི་ཕྱིར་སྟོང་པ་ཉིད་ཀྱང་འཐད་པ་ཡིན་ཏེ། འདུ་བྱེད་རྣམས་མུ་སྟེགས་བྱེད་ཀྱིས་ཡོངས་སུ་བཏགས་པའི་བདག་གིས་སྟོང་པའི་ཕྱིར་རོ། །
ཆད་པ་ཡང་མ་ཡིན་ཏེ། ཆུད་མི་ཟ་བ་ངེས་པར་གནས་པའི་ཕྱིར་རོ། །འཁོར་བ་ཡང་འཐད་དེ། འགྲོ་བ་ཐ་དད་པར་འདུ་བྱེད་རྣམས་མངོན་པར་འགྲུབ་པའི་མཚན་ཉིད་ཡོད་པའི་ཕྱིར་རོ། །རྟག་པ་ཡང་མ་ཡིན་ཏེ། ལས་རྣམ་པར་འཇིག་པའི་ཕྱིར་རོ། །ལས་རྣམས་ཀྱང་ཆུད་མི་ཟ་བ་སྟེ། ཆུད་མི་ཟ་བ་ཞེས་བྱ་བའི་

ཆོས་སངས་རྒྱས་ཀྱིས་བསྟན་པ་དེ་ཡང་གྲུབ་པའི་ཕྱིར་རོ་ཞེས་བྱ་བ་སྨྲས་སོ། །དེ་ལྟ་བས་ན་རྟག་པ་དེ་ཉིད་འདིར་འཐད་པ་ཡིན་ནོ་ཞེས་བྱ་བ་ནི། རང་གི་གྲུབ་པའི་མཐའ་བསྟན་པའི་མཇུག་བསྡུ་བ་ཡིན་ནོ། །དེའི་ཕྱིར་སྔར་སྨྲས་པའི་གཏན་ཚིགས་ལས་དང་འབྲས་བུར་འབྲེལ་པའི་ཕྱིར་རོ་ཞེས་བྱ་བ་དེའི་དོན་མ་
གྲུབ་པ་ཉིད་ཀྱང་མ་ཡིན་ལ་རྟག་པ་དང་ཆད་པའི་སྐྱོན་དུ་ཡང་ཐལ་བར་མི་འགྱུར་རོ་ཞེས་བྱ་བ་ནི། བྱེ་བྲག་ཏུ་སྨྲ་བ་དག་གིས་སྔར་སྡེ་པ་གཞན་དག་གིས་སྨྲས་པའི་གཞུང་མི་འཐད་པར་སུན་དབྱུང་བ་རང་གི་གྲུབ་པའི་མཐའ་ལས་ལས་དང་འབྲས་བུར་འབྲེལ་པ་ཡོད་པར་བསྟན་པའི་མཇུག་བསྡུ་བ་དང་།
ཚད་མའི་འབྲས་བུ་ཡིན་ཏེ། དེ་ལྟར་ཆུད་མི་ཟ་བ་ཞེས་བྱ་བའི་ཆོས་ཡོད་པ་དེའི་ཕྱིར། ཁོ་བོ་ཅག་གིས་སྔར་སྨྲས་པའི་གཏན་ཚིགས་ལས་དང་འབྲས་བུར་འབྲེལ་པ་ཡོད་པའི་ཕྱིར་རོ་ཞེས་བྱ་བ་གྲུབ་པས། དེས་བསྒྲུབ་པར་བྱ་བ་དོན་དམ་པར་ནང་གི་འདུ་བྱེད་ལ་འཁོར་བ་ཡོད་པ་ཁོ་ན་ཡིན་ཏེ་ཞེས་བྱ་བ་གྲུབ་བོ། །
འཁོར་བ་ཡོད་པར་གྲུབ་ན་བཅིངས་པ་ཡོད་པས་ཐར་པ་ཡང་ཡོད་པའི་ཕྱིར། སྔར་རབ་ཏུ་བྱེད་པ་འདས་མ་ཐག་པའི་སྐབས་སུ་དོན་དམ་པར་ནང་གི་དངོས་པོ་རྣམས་ལ་ངོ་བོ་ཉིད་ཡོད་པ་ཁོ་ན་ཡིན་ཏེ། དེ་དག་ལ་བཅིངས་པ་དང་ཐར་པ་ཡོད་པའི་ཕྱིར་རོ་ཞེས་བྱ་བའི་གཏན་ཚིགས་ཀྱི་རྩ་བ་གྲུབ་པས་སྔར་ཁོ་བོ་ཅག་གི་
དོན་དམ་པར་ནང་གི་དངོས་པོ་རྣམས་ལ་ངོ་བོ་ཉིད་ཡོད་པ་ཁོ་ན་ཡིན་ནོ་ཞེས་ཇི་སྐད་སྨྲས་པའི་དོན་གྲུབ་བོ་ཞེས་ཟེར་རོ། །ད་ནི་བསྟན་བཅོས་མཛད་པ་ཉིད་ཀྱིས་ས་བོན་གྱི་རྒྱུན་ལ་རྟོག་པའི་ཕྱོགས་དང་ཆུད་མི་ཟ་བ་ལ་རྟོག་པའི་ཕྱོགས་དེ་གཉིས་ཀ་མི་འཐད་པར་གོ་རིམས་བཞིན་དུ་སུན་དབྱུང་བའི་ཕྱིར། འདིར་བཤད་
པ། ཁོ་བོ་ཅག་གི་ཕྱོགས་ལ། གང་ཕྱིར་ལས་ནི་སྐྱེ་མེད་པ། །དེའི་ཕྱིར་ལས་ཁོ་ན་བཞིན་དུ་དོན་དམ་པར་ས་བོན་གྱི་རྒྱུན་སྐྱེ་བ་མེད་པས་དཔེ་མེད་པའི་ཕྱིར། སྒྲུབ་པ་མ་ཚང་བའི་སྐྱོན་ཡོད་དོ་ཞེས་བྱ་བ་སྨྲས་ཏེ། དེས་ནི་སྔར་སྡེ་པ་གཞན་དག་གི་ལས་དང་འབྲས་བུར་འབྲེལ་པ་ནི་འཐད་པ་ཁོ་ན་ཡིན་ཏེ། ཅིའི་ཕྱིར་ཞེ་
ན། རྒྱུན་གྱི་རྒྱུན་ལས་འབྲས་བུ་འགྲུབ་པའི་ཕྱིར་ཏེ། འདི་ལྟ་སྟེ་དཔེར་ན། མྱུ་གུ་ལ་སོགས་རྒྱུན་གང་ནི། །ས་བོན་ལས་ནི་མངོན་པར་འབྱུང་། །དེ་ལས་འབྲས་བུ་ས་བོན་ནི། །མེད་ན་དེ་ཡང་འབྱུང་མི་འགྱུར། །གང་ཕྱིར་ས་བོན་ལས་རྒྱུན་དང་། །རྒྱུན་ལས་འབྲས་བུ་འབྱུང་འགྱུར་ཞིང་། །ས་བོན་འབྲས་བུའི་སྔོན་འགྲོ་

བ། །དེའི་ཕྱིར་ཆད་མིན་རྟག་མ་ཡིན། །ཞེས་སྨྲས་པའི་དཔེ་དེ་ཇི་ལྟར་དོན་དམ་པར་ལས་སྐྱེ་བ་མེད་པ་དེ་བཞིན་དུ་སྐྱེ་བ་མེད་པས་ཕ་རོལ་པོའི་སྒྲུབ་པ་དཔེ་མ་ཚང་བའི་སྐྱོན་ཡོད་པས་མི་རུང་བར་བསྟན་ཏོ། །གལ་ཏེ་ལས་དེའི་ཕྱིར་སྐྱེ་བ་མེད་ཅེ་ན་ཞེས་བྱ་བ་ནི་ཕ་རོལ་པོ་དག་དེ་སྐད་ཅེས་འདྲི་བའི་ཚིག་ཡིན་ནོ། །
དེའི་ལན་དུ། གང་ཕྱིར་དངོས་ཉིད་མེད་དེའི་ཕྱིར། །གང་ཕྱིར་ལས་ངོ་བོ་ཉིད་མེད་པ་དེའི་ཕྱིར་སྐྱེ་བ་མེད་དོ་ཞེས་བྱ་བ་སྨྲས་ཏེ། དེས་ན་སྔར་སྡེ་པ་གཞན་དག་གིས་དེ་ལྟར་དེ་བཞིན་དུ། སེམས་ཀྱི་རྒྱུན་ནི་གང་ཡིན་པ། །སེམས་པ་ལས་ནི་མངོན་པར་འབྱུང་། །དེ་ལས་འབྲས་བུ་སེམས་པ་ནི། །མེད་ན་དེ་ཡང་
འབྱུང་མི་འགྱུར། །གང་ཕྱིར་སེམས་པ་ལས་རྒྱུན་དང་། །རྒྱུན་ལས་འབྲས་བུ་འབྱུང་འགྱུར་ཞིང་། །ལས་ནི་འབྲས་བུའི་སྔོན་འགྲོ་བ། །དེའི་ཕྱིར་ཆད་མིན་རྟག་མ་ཡིན། །ཞེས་སྨྲས་པའི་བསྒྲུབ་པ་མ་གྲུབ་པར་བསྟན་ཏོ། །དེ་ལྟར་རེ་ཞིག་ཕྱོགས་དང་པོ་ཤོས་ཀྱི་ཕྱིར་སྐྱོན་བཤད་དོ་ཞེས་བྱ་བ་ནི། །མཇུག་བསྡུ་
བ་དང་ཚད་མའི་འབྲས་བུ་ཡིན་ཏེ། དེས་ནི་སྔར་སྡེ་པ་གཞན་དག་གིས་དེའི་ཕྱིར་འདིར་རྗེས་སུ་དཔག་པ་ནི་དོན་དམ་པར་སེམས་ཅན་གྱི་སྒྲར་བརྗོད་པའི་འདུ་བྱེད་རྣམས་ལ། ལས་དང་འབྲས་བུར་འབྲེལ་པ་ཡོད་པ་ཁོ་ན་ཡིན་ཏེ། བཅོམ་ལྡན་འདས་ཀྱིས་འབྲས་བུ་ཁྱད་པར་ཅན་ཐོབ་པར་འདོད་པ་རྣམས་
ལ་དེ་དང་འབྲེལ་པ་ཐོབ་པར་བྱ་བའི་ཕྱིར། ཐབས་བསྟན་པ་ཡོད་པའི་ཕྱིར། དཔེར་ན་ས་བོན་དང་འབྲས་བུར་འབྲེལ་པ་བཞིན་ནོ། །འདི་ན་གང་ཡོད་པ་མ་ཡིན་པ་དེ་ལ་ནི་བཅོམ་ལྡན་འདས་ཀྱིས་དེ་དང་འབྲེལ་པ་ཐོབ་པར་བྱ་བའི་ཕྱིར་ཐབས་མ་བསྟན་ཏེ། དཔེར་ན་ནམ་མཁའི་མེ་ཏོག་གི་ཕྲེང་བ་བཞིན་ནོ། །
འདི་ལ་ནི་ཆོས་སྒྲུབ་པའི་ཐབས་རྣམས་ནི། དཀར་པོའི་ལས་ཀྱི་ལམ་བཅུ་སྟེ། །ཆོས་ཀྱི་འབྲས་བུ་འདི་བཞིན་དུ། །འདོད་པའི་ཡོན་ཏན་རྣམ་ལྔའོ། །རྣམ་པར་སྨིན་པ་དང་རྒྱུ་མཐུན་པའི་འབྲས་བུའི་བྱེ་བྲག་ལས་སོ་ཞེས་བཅོམ་ལྡན་འདས་ཀྱིས་འབྲས་བུ་ཁྱད་པར་ཅན་འདོད་པ་རྣམས་ལ་དེ་དང་འབྲེལ་པ་ཐོབ་
པར་བྱ་བའི་ཕྱིར། ཐབས་བསྟན་པ་ཡོད་པས་དེའི་ཕྱིར་གཏན་ཚིགས་ཇི་སྐད་སྨོས་པའི་མཐུས་ཇི་སྐད་སྨོས་པའི་དོན་གྲུབ་བོ་ཞེས་སྨྲས་པའི་སྒྲུབ་པ་ཉམས་པར་བསྟན་ཏོ། །ཕྱོགས་གཉིས་པ་ཤོས་ཀྱིས་གང་སྨྲས་པ་དེ་ལ་ཡང་གལ་ཏེ་སྒྲུབ་པའི་སྦྱོར་བ་ཡིན་ཏེ། ལས་དང་འབྲས་བུར་འབྲེལ་པ་ཡང་ཡོད་ལ་

རྟག་པ་དང་ཆད་པའི་སྐྱོན་དུ་ཡང་མི་འགྱུར་ཏེ། ཆུད་མི་ཟ་བ་ཡོད་པའི་ཕྱིར་རོ་ཞེ་ན་ཞེས་བྱ་བ་ནི། སྔར་ཉན་ཐོས་བྱེ་བྲག་ཏུ་སྨྲ་བ་དག་གིས། །ཇི་ལྟར་བུ་ལོན་དཔང་རྒྱ་ལྟར། །དེ་ལྟར་ལས་ཀྱང་ཆུད་མི་ཟ། །ཞེས་བྱ་བ་ལ་སོགས་པས་ཆུད་མི་ཟ་བ་ཡོད་པའི་ཕྱིར། ལས་དང་འབྲས་བུར་འབྲེལ་པ་ཡང་ཡོད་
ལ། རྟག་པ་དང་ཆད་པའི་སྐྱོན་དུ་མི་འགྱུར་རོ་ཞེས་སྨྲས་པའི་སྒྲུབ་པ་མི་འཐད་པར་སྟོན་ཏོ། །དེ་ཇི་ལྟར་མི་འཐད་ཅེ་ན། དེ་ལྟ་ན་ཡང་ཁོ་བོ་ཅག་གི་ཕྱོགས་ལ། །གང་ཕྱིར་ལས་ནི་སྐྱེ་མེད་པ། །དེའི་ཕྱིར་དོན་དམ་པར་ཆུད་མི་ཟ་བ་ཡང་མ་གྲུབ་ཏེ། །འདི་ལྟར་ལས་དེ་སྐྱེས་ན་ནི་ལས་དེའི་འབྲས་བུ་ཆུད་མི་ཟ་བར་
འགྱུར་བ་ཞིག་ན། ལས་དེ་ཡང་མ་སྐྱེས་པས་ལས་དེ་མེད་པའི་ཕྱིར། ཆུད་མི་ཟ་བ་དེ་ཡང་མེད་པས་དོན་དམ་པར་གཏན་ཚིགས་ཀྱི་དོན་མ་གྲུབ་པ་ཉིད་དོ། །ཀུན་རྫོབ་ཏུ་ལས་དང་འབྲས་བུར་འབྲེལ་པར་སྟོན་ན་ནི་དོན་འགལ་བ་ཉིད་དོ་ཞེས་བྱ་བ་སྨྲས་ཏེ། དེས་ནི་ཉན་ཐོས་བྱེ་བྲག་ཏུ་སྨྲ་བ་དག་གི་གཏན་
ཚིགས་ཆུད་མི་ཟ་བ་ཡོད་པའི་ཕྱིར་རོ་ཞེས་བྱ་བ་དེའི་དོན་མ་གྲུབ་པ་ཉིད་དང་འགལ་བ་ཉིད་དུ་བསྟན་ཏོ། །ཕྱོགས་དང་པོ་པའི་ཕྱོགས་གཉིས་པ་པས་གལ་ཏེ་ཁྱོད་ཀྱི་ས་བོན་གྱི་རྒྱུན་དང་ཆོས་མཐུན་པའི་མཚན་ཉིད་ཀྱི་བརྟག་པ་དེ་ལྟར་གྱུར་ན་ཉེས་པའི་སྐྱོན་ཆེན་པོ་མང་དུ་འབྱུང་བར་འགྱུར་ཏེ་ཞེས་གང་སྨྲས་པ་
དེ་ཡང་རིགས་པ་མ་ཡིན་ཏེ་ཞེས་བྱ་བ་ནི། སྔར་སྡེ་པ་གཞན་དག་གིས་སྨྲས་པའི་ཕྱོགས་ལ་བྱེ་བྲག་ཏུ་སྨྲ་བ་དག་གིས་གལ་ཏེ་བརྟག་པ་དེར་གྱུར་ན། །ཉེས་པ་ཆེན་པོ་མང་པོར་འགྱུར། །དེ་ལྟ་བས་ན་བརྟག་པ་དེ། །འདིར་ནི་འཐད་པ་མ་ཡིན་ནོ། །ཞེས་བྱ་བས་གལ་ཏེ་ཁྱོད་ཀྱི་ས་བོན་གྱི་རྒྱུན་དང་ཆོས་མཐུན་པའི་
མཚན་ཉིད་ཀྱི་བརྟག་པ་དེ་ལྟར་གྱུར་ན་ཉེས་པའི་སྐྱོན་ཆེན་པོ་མང་དུ་འབྱུང་བར་འགྱུར་ཏེ། མིའི་རྒྱུད་ལས་ལྷ་ལ་སོགས་པའི་རྒྱུད་དུ་སྐྱེ་བར་འགྱུར་ཏེ། རིགས་ཐ་དད་པའི་ཕྱིར། དཔེར་ན་ཤིང་ནིམ་པའི་ས་བོན་ལས་ཨ་མྲ་ལ་སོགས་པའི་འབྲས་བུ་སྐྱེ་བར་མི་འགྱུར་བ་བཞིན་པས། རྗེས་སུ་དཔག་པས་གནོད་
པའི་ཕྱིར་རོ། །དེ་བཞིན་དུ་དགེ་བའི་སེམས་ལས་མི་དགེ་བ་དང་། ལུང་དུ་མ་བསྟན་པའི་སེམས་དང་། མི་དགེ་བའི་སེམས་ལས་དགེ་བ་དང་ལུང་དུ་མ་བསྟན་པའི་སེམས་དང་། ལུང་དུ་མ་བསྟན་པའི་སེམས་ལས་དགེ་བ་དང་མི་དགེ་བའི་སེམས་དང་། འདོད་པ་ན་སྤྱོད་པའི་སེམས་ལས་གཟུགས་དང་

གཟུགས་མེད་པ་ན་སྤྱོད་པ་དང་། འཇིག་རྟེན་པ་ལས་འདས་པའི་སེམས་དང་། གཟུགས་ན་སྤྱོད་པའི་སེམས་ལས་འདོད་པ་ན་སྤྱོད་པ་དང་། གཟུགས་མེད་པ་ན་སྤྱོད་པ་དང་། འཇིག་རྟེན་ལས་འདས་པའི་སེམས་དང་། གཟུགས་མེད་པ་ན་སྤྱོད་པའི་སེམས་ལས་འདོད་པ་དང་། གཟུགས་ན་
སྤྱོད་པ་དང་། འཇིག་རྟེན་ལས་འདས་པའི་སེམས་སྐྱེ་བར་མི་འགྱུར་ཏེ། རྗེས་སུ་དཔག་པ་ཇི་སྐད་བསྟན་པས་གནོད་པར་འགྱུར་བའི་ཕྱིར་ཏེ། དེ་ལྟ་ན་དགེ་བ་དང་མི་དགེ་བ་དག་བྱ་བ་དང་སྤང་བར་མི་འཐད་པས་དེའི་ཕྱིར། བརྟག་པ་དེ་ནི་འདིར་འཐད་པ་མ་ཡིན་ནོ་ཞེས་སྨྲས་པའི་ཕྱོགས་ཕྱི་མ་ཤོས་དེ་རིགས་པ་མ་
ཡིན་པར་འགྲེལ་པ་བྱེད་པ་ཉིད་ཀྱིས་སུན་འབྱིན་པའི་ཚིག་ཡིན་ནོ། །ཅིའི་ཕྱིར་དེ་རིགས་པ་མ་ཡིན་ཞེ་ན། དེའི་ཕྱིར། རྒྱུ་དང་འབྲས་བུའི་རྒྱུན་རྗེས་སུ་འཇུག་པ་ཉིད་ཀྱིས་འབྲེལ་པ་མེད་ན་མི་འབྱུང་བ་ཉིད་དང་། རྟག་པ་མ་ཡིན་པ་དང་། ཆད་པ་མ་ཡིན་པ་ཉིད་མེད་ན་མི་འབྱུང་བ་ཉིད་ཀྱི་ས་བོན་གྱི་རྒྱུན་དཔེ་ཉིད་དུ་
འདོད་པའི་ཕྱིར་རོ་ཞེས་བྱ་བ་སྨྲས་ཏེ། སྔར་སྡེ་པ་གཞན་དག་གིས་ས་བོན་གྱི་རྒྱུན་ལས་མྱུ་གུ་ལ་སོགས་པའི་རྒྱུན་འབྲེལ་པར་འབྱུང་བས་དེ་ལས་དང་འབྲས་བུར་འབྲེལ་པའི་ཆོས་མཐུན་པའི་དཔེ་ཉིད་དུ་བཞག་པ་ནི། ཀུན་རྫོབ་ཏུ་རྗེས་སུ་འགྲོ་བ་དང་ལྡོག་པའི་ཚུལ་གྱིས་མེད་ན་མི་འབྱུང་བའི་
འབྲེལ་པས་རྒྱུན་དང་འབྲས་བུའི་རྒྱུན་རྗེས་སུ་འཇུག་པ་དང་། རྟག་པ་དང་ཆད་པ་མ་ཡིན་པའི་འབྲེལ་པ་དང་ལྡན་པ་དཔེ་ཉིད་དུ་འདོད་པས་དེ་ལ་ཉེས་པ་མེད་པའི་ཕྱིར་རོ། །དེའི་ཁྱད་པར་བསྒྲུབ་པར་བྱ་བ་ལ་རྣམ་པར་རྟོག་པར་བྱེད་པ་ཡང་རྣམ་པར་རྟོག་པ་འདྲ་བའི་ལྟག་ཆོད་དུ་འགྱུར་ཏེ། སེམས་དང་
སེམས་ལས་བྱུང་བའི་རྒྱུན་ལས་དེ་དག་གི་རྒྱུན་འབྱུང་བས་རིགས་ཐ་དད་པའི་ཕྱིར་ཞེས་བྱ་བའི་གཏན་ཚིགས་ཀྱི་དོན་མ་གྲུབ་པ་ཉིད་དོ་ཞེས་བྱ་བས་ནི་སྔར་སྡེ་པ་གཞན་དག་གིས་ས་བོན་གྱི་རྒྱུན་གྱི་དཔེས་མཚོན་པའི་དོན་སེམས་པའི་རྒྱུན་ལས་སེམས་ཀྱི་རྒྱུན་འབྱུང་བ་དེའི་ཁྱད་པར་དག་ནང་གི་དངོས་པོས་
བསྒྲུབ་པར་བྱ་བ་ལ་བྱེ་བྲག་ཏུ་སྨྲ་བ་དག་སྐྱོན་འདོགས་ཤིང་རྣམ་པར་རྟོག་པར་བྱེད་པ་དེ་རྣམ་པར་རྟོག་པའི་གསལ་བ་དང་དེ་ཁོ་ན་མ་ཡིན་གྱི། དེ་ལྟར་སྣང་བའི་ལྟག་ཆོད་ཡིན་པར་སྟོན་ཏེ། དེ་ཡང་དཔེར་ན་འགའ་ཞིག་གིས་བུམ་པ་ནི་མི་རྟག་སྟེ། བྱས་པའི་ཕྱིར་དཔེར་ན་སྒྲ་བཞིན་ནོ་ཞེས་རྗེས་སུ་དཔག་

པའི་གསལ་བ་དང་། དེ་ཁོ་ན་སྨྲས་པ་ལ། རྟོག་གེ་པ་ངན་པ་ཁ་ཅིག་ན་རེ། བུམ་པ་མི་རྟག་པ་བྱས་པའི་ཕྱིར་སྒྲ་དང་འདྲ་ན། འོ་ན་ནི་ཇི་ལྟར་བུམ་པ་ལ་སོ་བཏང་བ་ཉིད་དང་། ཁ་དོག་དང་དབྱིབས་ཀྱི་གཟུགས་ཉིད་དང་། མིག་གི་གཟུང་བ་ཉིད་ཡོད་པ་དེ་དག་སྒྲ་ལ་ཡང་ཡོད་པར་འགྱུར་བའི་
རིགས་སོ་ཞེས་ཟེར་བའི་རྣམ་པར་རྟོག་པ་དེ་གསལ་བ་དང་། དེ་ཁོ་ན་མ་ཡིན་གྱི་རྣམ་པར་རྟོག་པ་ལྟར་སྣང་བའི་ལྟག་ཆོད་དུ་འགྱུར་བ་དེ་བཞིན་དུ། འདིར་ཡང་སྡེ་པ་གཞན་དག་གིས་ཁམས་གསུམ་པའི་སེམས་དང་སེམས་ལས་བྱུང་བའི་རྒྱུན་ལས་དེ་དག་གི་རྒྱུན་ཉིད་འབྱུང་སྟེ། དཔེར་ན་ས་
བོན་གྱི་རྒྱུན་ལས་མྱུ་གུ་ལ་སོགས་པའི་རྒྱུན་འབྱུང་བ་བཞིན་ནོ་ཞེས་བྱ་བ་རྗེས་སུ་དཔག་པའི་གསལ་བ་དང་དེ་ཁོ་ན་ཉིད་སྨྲས་པ་ལ། བྱེ་བྲག་ཏུ་སྨྲ་བ་དག་ན་རེ། དེ་ལྟར་ན་མིའི་རྒྱུད་ལས་ལྷ་ལ་སོགས་པའི་རྒྱུད་དུ་སྐྱེ་བར་མི་འགྱུར་ལ། དགེ་བའི་སེམས་ལས་ཀྱང་མི་དགེ་བ་དང་ལུང་དུ་མ་
བསྟན་པ་ལ་སོགས་པའི་སེམས་སྐྱེ་བར་མི་འགྱུར་ཞིང་འདོད་པ་ན་སྤྱོད་པའི་སེམས་ལས་ཀྱང་། གཟུགས་དང་གཟུགས་མེད་པ་ན་སྤྱོད་པ་དང་། འཇིག་རྟེན་ལས་འདས་པའི་སེམས་སྐྱེ་བར་མི་འགྱུར་ཏེ། རིགས་ཐ་དད་པའི་ཕྱིར་དཔེར་ན་ཤིང་ནིམ་པའི་ས་བོན་ལས་ཨ་མྲ་ལ་སོགས་
པའི་འབྲས་བུ་སྐྱེ་བར་མི་འགྱུར་བ་བཞིན་པས་རྗེས་སུ་དཔག་པས་གནོད་པའི་ཕྱིར། བརྟག་པ་དེ་ནི་འདིར་འཐད་པ་མ་ཡིན་ནོ་ཞེས་ཟེར་བའི་རྣམ་པར་རྟོག་པར་བྱེད་པ་དེ་ཡང་བསལ་བ་དང་དེ་ཁོ་ན་མ་ཡིན་ཏེ། རྣམ་པར་རྟོག་པ་ལྟར་སྣང་བའི་ལྟག་ཆོད་ཙམ་དུ་ཟད་པས། བྱེ་བྲག་ཏུ་
སྨྲ་བ་དག་གི་གཏན་ཚིགས་རིགས་ཐ་དད་པའི་ཕྱིར་ཞེས་བྱ་བ་དེའི་དོན་མ་གྲུབ་པ་ཉིད་དོ། །གཏན་ཚིགས་ཀྱི་དོན་མ་ངེས་པ་ཉིད་ཀྱི་སྐྱོན་ཡང་ཡོད་དེ། དེ་དག་གི་ཕྱོགས་ལ་བ་ལང་གི་སྤུ་དང་ལུག་གི་བལ་དག་ལས་རྩྭ་དཱུར་བའི་རྒྱུན་འབྱུང་བའི་ཕྱིར་དང་། རྭ་ལས་སྨྱིག་མ་སྐྱེ་བའི་
ཕྱིར་རོ་ཞེས་བྱ་བས་ནི། འབྲེལ་པ་བྱེད་པས་བྱེ་བྲག་ཏུ་སྨྲ་བ་དག་གི་གཏན་ཚིགས་རིགས་ཐ་དད་པའི་ཕྱིར་ཞེས་བྱ་བ་དེའི་དོན་མ་ངེས་པ་ཉིད་དུ་སུན་དབྱུང་བའི་ཚིག་ཡིན་ཏེ། འཇིག་རྟེན་ན་སློབ་དཔོན་གྱིས་གང་དག་གི་ཕྱོགས་ལས་ས་བོན་གྱི་རྒྱུན་གྱི་དཔེ་འཐད་པར་བསྒྲུབས་པ་དེ་དག་

གི་ཕྱོགས་ལ་བ་ལང་གི་སྤུ་དང་ལུག་གི་བལ་དག་ལས་རྩྭ་དཱུར་བའི་རྒྱུན་འབྱུང་བ་དང་། རྭ་ལས་སྨྱིག་མ་སྐྱེ་བ་དང་། ཇི་ཀག་ལས་སྒྱུར་རྩིར་འགྱུར་བ་དང་། ཆབ་བྲོམ་ལས་མེ་འབྱུང་བར་མཐོང་བས། དེ་ནི་ཇེ་རེ་ཞིག་རིགས་ཐ་དད་པའི་ཕྱིར། དཔེར་ན་ཤིང་ནིམ་པའི་ས་བོན་
ལས་ཨ་མྲ་ལ་སོགས་པའི་འབྲས་བུ་སྐྱེ་བར་མི་འགྱུར་བ་བཞིན་དུ། མིའི་རྒྱུད་ལས་ལྷ་ལ་སོགས་པའི་རྒྱུད་དུ་སྐྱེ་བར་མི་འགྱུར་བ་ཡིན་ནམ། འོན་ཏེ་རིགས་ཐ་དད་པའི་ཕྱིར། དཔེར་ན་བ་ལང་གི་སྤུ་དང་ལུག་གི་བལ་དག་ལས་རྩྭ་དཱུར་བའི་རྒྱུན་འབྱུང་བ་དང་། རྭ་ལས་སྨྱིག་མ་སྐྱེ་བ་ལ་སོགས་པ་བཞིན་དུ་མིའི་
རྒྱུད་ལས་ལྷ་ལ་སོགས་པའི་རྒྱུད་དུ་སྐྱེ་བར་འགྱུར་བས་མ་ངེས་པ་ཉིད་ཡིན་པས། བྱེ་བྲག་ཏུ་སྨྲ་བ་དག་གི་གཏན་ཚིགས་དེ་མ་གྲུབ་པོ། །འདིར་སྨྲས་པ། ལུང་ལས་འབྱུང་བ་ཡང་རྟགས་ཡིན་པས་ཆུད་མི་ཟ་བ་ཡང་བཅོམ་ལྡན་འདས་ཀྱིས་གསུངས་ལ། དེའི་རྟགས་རྟག་པ་མ་ཡིན་པ་དང་། ཆད་པ་
མ་ཡིན་པ་ཉིད་ཀྱང་གྲུབ་པའི་ཕྱིར། ལས་བཞིན་དུ་དོན་དམ་པར་ཆུད་མི་ཟ་བ་ཡང་མ་གྲུབ་པས་གཏན་ཚིགས་ཀྱི་དོན་མ་གྲུབ་པ་ཉིད་དོ་ཞེས་གང་སྨྲས་པ་དེ་རིགས་པ་མ་ཡིན་ནོ་ཞེས་བྱ་བ་ནི། འདིར་ཆུད་མི་ཟ་བ་ཡོད་པར་སྨྲ་བ་དག་ལུང་གི་གཏན་ཚིགས་ཀྱི་ཆུད་མི་ཟ་བ་ཡོད་པར་སྒྲུབ་པའི་ཚིག་ཡིན་ཏེ། དེ་དག་
ན་རེ་ཚུལ་གསུམ་པའི་རྟགས་ལ་ཚུལ་གསུམ་ནི་རྗེས་སུ་དཔག་པར་བྱ་བ་ལ་ཡོད་པ་ཉིད་དང་། མཐུན་པའི་ཕྱོགས་ལ་ཡོད་པ་ཉིད་དང་། མི་མཐུན་པའི་ཕྱོགས་ལ་མེད་པ་ཉིད་དུ་ངེས་པའི་ཚུལ་ལོ། །ཚུལ་གསུམ་པོ་དེ་དག་ལ་རྟགས་ཀྱང་གསུམ་སྟེ། མི་དམིགས་པ་དང་། ངོ་བོ་ཉིད་དང་འབྲས་བུའོ། །དེ་ལ་
མི་དམིགས་པ་ལས་ནི་དངོས་པོ་མེད་པར་རྗེས་སུ་དཔག་ལ། ངོ་བོ་ཉིད་ལས་ནི་མི་རྟག་པར་རྗེས་སུ་དཔག་ལ། འབྲས་བུ་ལས་ནི་རྒྱུ་རྗེས་སུ་དཔག་པ་ཡིན་ནོ། །ཚད་མ་ཡང་རྣམ་པ་གསུམ་སྟེ། མངོན་སུམ་དང་། རྗེས་སུ་དཔག་པ་དང་། ཡིད་ཆེས་པའི་ལུང་གི་ཚད་མའོ། །དེ་དག་གི་གཞལ་བྱ་ཡང་རྣམ་པ་གསུམ་སྟེ།
སོ་སོའི་ཤེས་པའི་དོན་དང་། སྨྲས་པའི་དོན་དང་། བཤད་པའི་དོན་ཏོ། །དེ་ལ་སོ་སོའི་ཤེས་པའི་དོན་ནི་རང་གི་མཚན་ཉིད་མངོན་སུམ་གྱི་ཡུལ་ཡིན་པས་དེ་ལ་རྟགས་ཀྱིས་བརྟག་མི་དགོས་སོ། །སྨྲས་པའི་དོན་ནི་སྤྱིའི་མཚན་ཉིད་ལྐོག་ཏུ་གྱུར་པ་སྟེ། རྗེས་སུ་དཔག་པའི་ཡུལ་ཡིན་པས་དེ་ནི་ཚུལ་གསུམ་

པའི་རྟགས་ཀྱིས་བརྟག་པར་བྱའོ། །བཤད་པའི་དོན་ནི་རང་དང་སྤྱིའི་མཚན་ཉིད་ཤིན་ཏུ་ལྐོག་ཏུ་གྱུར་པ་སྟེ། ཡིད་ཆེས་པའི་ལུང་གི་ཡུལ་ཡིན་པས། དེ་ཡང་ཚུལ་གསུམ་པའི་རྟགས་ཀྱིས་བརྟག་པར་བྱ་བ་ཡིན་པའི་ཕྱིར། ལུང་ལས་འབྱུང་བ་ཡང་རྟགས་ཡིན་པས་ཆུད་མི་ཟ་བ་ཡང་བཅོམ་ལྡན་
འདས་ཀྱིས་གསུངས་པ། དེ་ཡོད་པའི་རྟགས་ལས་དང་འབྲས་བུར་འབྲེལ་པ་རྟག་པ་མ་ཡིན་པ་དང་། ཆད་པ་མ་ཡིན་པ་ཉིད་ཀྱང་གྲུབ་པའི་ཕྱིར། ཁྱེད་དབུ་མ་པས་སྔར་འདི་སྐད་ཅེས་ཕྱོགས་གཉིས་པ་ཤོས་ཀྱིས་གང་སྨྲས་པ་དེ་ལ་ཡང་གལ་ཏེ་སྒྲུབ་པའི་སྦྱོར་བ་ཡིན་ཏེ། ལས་དང་འབྲས་བུར་འབྲེལ་
པ་ཡང་ཡོད་ལ་རྟག་པ་དང་། ཆད་པའི་སྐྱོན་དུ་ཡང་མི་འགྱུར་ཏེ། ཆུད་མི་ཟ་བ་ཡོད་པའི་ཕྱིར་རོ་ཞེ་ན། དེ་ལྟ་ན་ཡང་ཁོ་བོ་ཅག་གི་ཕྱོགས་ལ། གང་ཕྱིར་ལས་ནི་སྐྱེ་མེད་པ། །དེའི་ཕྱིར་དོན་དམ་པར་ཆུད་མི་ཟ་བ་ཡང་མ་གྲུབ་སྟེ། འདི་ལྟར་དེ་སྐྱེས་ན་ནི་དེའི་ཆུད་མི་ཟ་བར་ཡང་ཡོད་པར་འགྱུར་བ་ཞིག་ན། དེ་
ཡང་མ་སྐྱེས་པས་དེ་མེད་པའི་ཕྱིར་དེ་ཡང་མེད་པས་གཏན་ཚིགས་ཀྱི་དོན་མ་གྲུབ་པ་ཉིད་དོ་ཞེས་གང་སྨྲས་པ་དེ་རིགས་པ་མ་ཡིན་ནོ་ཞེས་ཟེར་རོ། །དེ་སྐད་ཅེས་ཟེར་བ་དེའི་ལན་དུ། འགྲེལ་པ་བྱེད་པ་ཉིད་ཀྱིས་འདིར་བཤད་པ། བཅོམ་ལྡན་འདས་ཀྱིས། གང་ཕྱིར་དེ་ནི་མ་སྐྱེས་པ། །དེ་ཕྱིར་ཆུད་ཟར་མི་འགྱུར་
རོ། །ཞེས་གསུངས་པས་དེའི་ཕྱིར་སྐྱེས་པ་ལ་ཆུད་ཟ་བར་མི་འགྱུར་རོ་ཞེས་གང་གསུངས་པ་དེ་འདོད་ལ། དེ་ཡང་ཕ་རོལ་པོའི་ཕྱོགས་ལ་མ་གྲུབ་པས་རང་ལ་དོན་མ་གྲུབ་པ་ཉིད་དོ་ཞེས་བྱ་བ་སྨྲས་ཏེ། ལུང་ལས་འབྱུང་བ་ཡང་རྟགས་ཡིན་པར་ཁོ་བོ་ཅག་ཀྱང་ཁས་ལེན་པས། བཅོམ་ལྡན་འདས་ཀྱིས་གང་གི་ཕྱིར་
ལས་དེ་མ་སྐྱེས་པ་དེའི་ཕྱིར་ཆུད་ཟ་བར་མི་འགྱུར་རོ་ཞེས་གང་གསུངས་པ་དེ་ཁོ་བོ་ཅག་འདོད་ལ། དེ་ཡང་ཁྱེད་ཕ་རོལ་པོའི་ཕྱོགས་ལ་མ་གྲུབ་པས། ཁྱེད་ཀྱི་ཕྱོགས་ལ་མ་སྐྱེས་ན་ནི་ཆུད་མི་ཟ་བར་མི་འགྱུར་བས་ཆུད་མི་ཟ་བའི་དོན་མ་གྲུབ་པ་ཉིད་ཡིན་ལ། མ་སྐྱེས་པ་ལ་ཆུད་ཟ་བར་མི་འགྱུར་རོ་ཞེས་གང་གསུངས་པ་ཁོ་བོ་ཅག་
འདོད་པ་དེ་ནི་ཁྱེད་རང་ལ་མ་གྲུབ་པ་ཉིད་ཡིན་པས། ཁྱེད་ཀྱི་བསྒྲུབ་པར་བྱ་བ་དང་གཏན་ཚིགས་ཀྱི་དོན་རང་ལ་མ་གྲུབ་པ་ཉིད་ཡིན་པས་མི་རུང་ངོ་། །ངོ་བོ་ཉིད་ཡོད་པར་སྨྲ་བས་ཀྱང་ལས་ལ་ངོ་བོ་ཉིད་མེད་དོ་ཞེས་ངེས་པར་ཁོང་དུ་ཆུད་པར་བྱ་དགོས་སོ་ཞེས་བྱ་བ་ནི། ཁྱེད་ངོ་བོ་ཉིད་ཡོད་པར་སྨྲ་བ་དག་ཀྱང་ལུང་ལ་བརྟེན་ཅིང་

ལས་ཀྱང་ཆུད་མི་ཟ་བར་འདོད་པ་ཡིན་ན། དེ་ལྟར་བཅོམ་ལྡན་འདས་ཀྱིས་ལས་མ་སྐྱེས་ཤིང་ངོ་བོ་ཉིད་མེད་པའི་ཕྱིར་ཆུད་ཟ་བར་མི་འགྱུར་རོ་ཞེས་གསུངས་པས། ཁྱེད་ཀྱིས་ཀྱང་ལས་ལ་ངོ་བོ་ཉིད་མེད་དོ་ཞེས་ངེས་པར་ཁོང་དུ་ཆུད་པར་བྱ་དགོས་སོ། །གཞན་དུ་དམ་བཅས་ན་ཞེས་བྱ་བ་ལ་སོགས་
པས་ནི། ལས་ལ་ངོ་བོ་ཉིད་ཡོད་པར་དམ་བཅས་ན་མི་རུང་བའི་ཉེས་དམིགས་མང་པོ་དག་སྟོན་ཏོ། །དེའི་ཕྱིར་གལ་ཏེ་ལས་ལ་ངོ་བོ་ཉིད་ཡོད། རྟག་པར་འགྱུར་བར་ཐེ་ཚོམ་མེད། །རང་བཞིན་ནི་མི་འགྱུར་བའི་ཕྱིར་རོ་ཞེས་བྱ་བར་དགོངས་སོ་ཞེས་བྱ་བ་སྨྲས་ཏེ། གལ་ཏེ་ལས་ལ་རང་བཞིན་གྱིས་ངོ་བོ་ཉིད་ཡོད་པར་
གྱུར་ན་རྟག་པར་འགྱུར་བར་ཐེ་ཚོམ་མེད་དོ། །རང་བཞིན་མི་འགྱུར་བའི་ཕྱིར་རོ་ཞེས་བྱ་བར་དགོངས་སོ། །དེ་ལྟར་ལས་རྟག་པར་གྱུར་པར་ཐེ་ཚོམ་མེད། རང་བཞིན་ནི་མི་འགྱུར་བའི་ཕྱིར་རོ་ཞེས་བྱ་བར་དགོངས་སོ་ཞེས་བྱ་བ་སྨྲས་ཏེ། གལ་ཏེ་ལས་ལ་རང་བཞིན་གྱིས་ངོ་བོ་ཉིད་ཡོད་པར་གྱུར་ན་རྟག་པར་འགྱུར་བར།
དེ་ལྟར་ལས་རྟག་པར་གྱུར་ན་དེ་ལ་ཉེས་དམིགས་ཅི་ཡོད་ཅེ་ན། དེའི་ཕྱིར་ལས་ནི་བྱས་པ་མ་ཡིན་འགྱུར། །རྟག་ལ་བྱ་བ་མེད་ཕྱིར་རོ། །ཞེས་བྱ་བ་སྨྲས་ཏེ། དེ་ལྟར་ལས་རྟག་པར་གྱུར་ན་ལས་དེ་ལུས་དང་ངག་དང་ཡིད་ཀྱིས་བྱས་པ་མ་ཡིན་པར་འགྱུར་ཏེ། ཅིའི་ཕྱིར་ཞེ་ན། རྟག་པ་ལས་བྱ་བ་མེད་པའི་
ཕྱིར་རོ། །ལས་མ་བྱས་པ་ལ་འབྲས་བུ་ཆུད་མི་ཟ་བར་ཡོད་པར་འདོད་པའི་ཉེས་དམིགས་གཞན་བསྟན་པའི་ཕྱིར། ལས་མ་བྱས་པ་ལ་འབྲས་བུ་མྱོང་བ་ཡོད་པར་རྟོག་ན། ཅི་སྟེ་ལས་ནི་མ་བྱས་ན། །མ་བྱས་པ་དང་འཕྲད་འཇིགས་འགྱུར། །ཞེས་བྱ་བ་སྨྲས་ཏེ། ཅི་སྟེ་ལས་ལུས་དང་ངག་དང་ཡིད་
ཀྱིས་མ་བྱས་པ་ལ་འབྲས་བུ་བདེ་བ་དང་སྡུག་བསྔལ་ལ་སོགས་པ་མྱོང་བ་ཡོད་པར་རྟོག་ན། མ་བྱས་པ་དང་འཕྲད་པའི་འཇིགས་པ་ཡོད་པར་འགྱུར་བས་དེ་ནི་མི་འདོད་དོ། །ལས་མ་བྱས་པས་འབྲས་བུ་མྱོང་བ་ཡོད་པར་རྟོག་པའི་ཉེས་དམིགས་གཞན་བསྟན་པའི་ཕྱིར་གཞན་ཡང་། ཚངས་སྤྱོད་
གནས་པ་མ་ཡིན་པའང་། །དེ་ལ་སྐྱོན་དུ་ཐལ་བར་འགྱུར། །ཞེས་བྱ་བ་སྨྲས་ཏེ། ལས་མ་བྱས་པ་ལ་འབྲས་བུ་མྱོང་བ་ཡོད་པར་རྟོག་ན་དེ་ལ་མྱ་ངན་ལས་འདས་པ་ལ་སྤྱོད་པའི་དོན་དུ་གནས་པ་མ་ཡིན་པའང་དེ་ལ་སྤྱོད་པའི་དོན་དུ་གནས་པ་ཡིན་པའི་སྐྱོན་དུ་ཐལ་བར་འགྱུར་བས་དེ་ཡང་མི་འདོད་དོ། །དེ་ཉིད་བྱེ་བྲག་

ཏུ་བཤད་པས་བསྟན་པའི་ཕྱིར། ཚངས་པ་ནི་མྱ་ངན་ལས་འདས་པའོ། །ཚངས་པར་སྤྱོད་པ་ནི་དེ་ལ་སྤྱོད་པའོ། །ཚངས་པར་སྤྱོད་པ་ལ་གནས་པ་ནི་དེའི་དོན་དུ་གནས་པའོ། །ཚངས་པར་སྤྱོད་པ་ལ་གནས་པ་མ་ཡིན་པ་ནི་ཚངས་པར་སྤྱོད་པ་ལ་མི་གནས་པའོ། །དེ་ལ་ཚངས་པར་སྤྱོད་པ་ལ་གནས་པ་མ་ཡིན་པ་
ཡང་། ཚངས་པར་སྤྱོད་པ་ལ་གནས་པའི་སྐྱོན་དུ་ཐལ་བར་འགྱུར་ཏེ། མྱ་ངན་ལས་འདས་པ་ཐོབ་པར་བྱེད་པའི་ལས་མ་བྱས་པ་ཉིད་ལ་ཡང་དེ་ཡོད་པར་འགྱུར་བའི་ཕྱིར་རོ་ཞེས་བྱ་བར་དགོངས་སོ་ཞེས་བྱ་བ་སྨྲས་སོ། །དེའི་ཉེས་དམིགས་གཞན་དག་ཀྱང་བསྟན་པའི་ཕྱིར། དེ་བཞིན་དུ་བུམ་པ་དང་སྣམ་བུ་དག་གྱིས་
ཤིག་ཅེས་བྱ་བ་ལ་སོགས་པའི་ཐ་སྙད་ཐམས་ཅད་ཉིད་དང་ཡང་། འགལ་བར་འགྱུར་བར་ཐེ་ཚོམ་མེད། །ཅེས་བྱ་བ་སྨྲས་སོ། །དེའི་ཉེས་དམིགས་གཞན་དག་ཀྱང་བསྟན་པའི་ཕྱིར། གཞན་ཡང་། བསོད་ནམས་དང་ནི་སྡིག་བྱེད་པའི། །རྣམ་པར་དབྱེ་བའང་འཐད་མི་འགྱུར། །འདི་ནི་བསོད་ནམས་བྱེད་
པའོ། །འདི་ནི་སྡིག་པ་བྱེད་པའོ། །ཞེས་བྱ་བའི་རྣམ་པར་དབྱེ་བ་དག་ཀྱང་འཐད་པར་ཉིད་དུ་མི་འགྱུར་རོ་ཞེས་བྱ་བ་སྨྲས་སོ། །ལས་རྟག་པ་མ་བྱས་པ་འབྲས་བུ་མྱོང་བ་ཡོད་པར་རྟོག་པའི་ཉེས་དམིགས་རྣམ་པ་གཞན་དག་ཀྱང་བསྟན་པའི་ཕྱིར། དེ་ཡི་རྣམ་སྨིན་སྨིན་གྱུར་པ། །ཡང་དང་ཡང་དུ་རྣམ་སྨིན་འགྱུར། །
དེ་ཡི་རྣམ་སྨིན་སྨིན་འགྱུར་བ། །ཞེས་བྱ་བ་ནི། དེའི་རྣམ་པར་སྨིན་པ་སྨིན་ཟིན་པར་གྱུར་པ་སྟེ། ལས་ཀྱི་འབྲས་བུ་བསྐྱེད་ཟིན་པ་ཞེས་བྱ་བའི་ཐ་ཚིག་གོ་ཞེས་བྱ་བ་སྨྲས་ཏེ། གལ་ཏེ་ལས་བརྟག་པ་མ་བྱས་པ་ལ་འབྲས་བུ་མྱོང་བ་ཡོད་པར་རྟོག་ན་ལས་དེའི་འབྲས་བུ་བསྐྱེད་ཟིན་ན། ལས་ཕྱི་མ་གཞན་མ་
བྱས་སུ་ཟིན་ཀྱང་ལས་དེ་ལ་ཡང་དང་ཡང་དུ་རྣམ་པར་སྨིན་པའི་འབྲས་བུ་གཞན་དག་སྨིན་པར་འགྱུར་བའི་སྐྱོན་དུ་འགྱུར་བས་དེ་ཡང་མི་འདོད་དོ། །གལ་ཏེ་ཅིའི་ཕྱིར་ལས་ཀྱི་རྣམ་པར་སྨིན་པ་སྨིན་ཟིན་ཀྱང་ཡང་དང་ཡང་དུ་རྣམ་པར་འགྱུར་བར་བཤད་ཅེ་ན་ཞེས་བྱ་བ་ནི། གལ་ཏེ་ཕ་རོལ་པོ་དག་དེ་སྐད་ཅེས་འདྲི་
ནའོ། །དེའི་ལན་དུ་གལ་ཏེ་གང་ཕྱིར་ལས་གནས་པ། །དེ་ཕྱིར་ངོ་བོ་ཉིད་ཡོད་ཕྱིར། །གལ་ཏེ་གང་གི་ཕྱིར་ལས་ངོ་བོ་ཉིད་ཀྱིས་ངེས་པར་གནས་པ་དེའི་ཕྱིར་ངོ་བོ་ཉིད་ཡོད་པའི་ཕྱིར་རོ་ཞེས་བྱ་བ་སྨྲས་ཏེ། གལ་ཏེ་གང་གི་ཕྱིར་ཕ་རོལ་པོ་དག་འདོད་པ་ལྟར་ལས་ལ་ངོ་བོ་ཉིད་ཡོད་ཅིང་། རང་བཞིན་མི་འགྱུར་བར་

ངོ་བོ་ཉིད་རང་བཞིན་གྱི་ངེས་པར་གནས་པ་ཡིན་པར་གྱུར་ན་དེའི་ཕྱིར། རྒྱུ་ངོ་བོ་ཉིད་ཀྱིས་རྟག་པར་ཡོད་པའི་ཕྱིར། འབྲས་བུ་སྨིན་ཟིན་ཀྱང་ཡང་དང་ཡང་དུ་རྣམ་པར་སྨིན་པའི་སྐྱོན་དུ་འགྱུར་བར་བཤད་དེ། རྒྱུན་དག་ན་འབྲས་བུ་ཡང་རྟག་ཏུ་ཡོད་པའམ་མེད་པ་གཅིག་ཏུ་འགྱུར་བའི་ཕྱིར་རོ། །
གལ་ཏེ་དེ་གནས་སུ་ཟིན་ཀྱང་ཡང་འབྲས་བུ་བསྐྱེད་པར་ནི་མི་ནུས་ཏེ་འབྲས་བུ་བསྐྱེད་ཟིན་པའི་ཕྱིར། ངེས་པར་དཔྱད་ཟིན་པའི་དཔང་རྒྱ་བཞིན་ནོ་ཞེ་ན་ཞེས་བྱ་བ་ནི། གལ་ཏེ་ཕ་རོལ་པོ་དག་དེ་སྐད་ཅེས་ཟེར་ནའོ། །དེའི་ལན་དུ་ངེས་པར་དཔྱད་པའི་ཟིན་པའི་དཔང་རྒྱ་ཡང་དོན་དམ་པར་མ་གྲུབ་པའི་ཕྱིར་དེ་ནི་
ལན་མ་ཡིན་ནོ་ཞེས་བྱ་བ་སྨྲས་ཏེ། སྒྲུབ་པའི་དཔེ་མ་ཚང་བའི་ཕྱིར་རོ། །ཕྱིར་རྒོལ་བ་དག་ན་རེ། དོན་དམ་པར་ལས་ནི་ཡོད་པ་ཁོ་ན་ཡིན་ཏེ། དེའི་རྒྱུ་ཡོད་པའི་ཕྱིར་རོ། །འདི་ན་གང་མེད་པ་དེ་ནི་རྒྱུ་མི་འཐད་དེ་དཔེར་ན་རུས་སྦལ་གྱི་སྤུའི་གོས་བཞིན་ནོ། །ལས་ལ་ནི་རྒྱུ་ཉོན་མོངས་པ་དག་ཡོད་པས་
དེའི་ཕྱིར། གཏན་ཚིགས་ཇི་སྐད་སྨོས་པའི་མཐུས་དོན་དམ་པར་ལས་ཡོད་པ་ཁོ་ན་ཡིན་ནོ་ཞེས་བྱ་བ་ནི། ཕ་རོལ་པོ་དག་ལས་ཀྱི་རྒྱུ་ཉོན་མོངས་པ་དག་ཡོད་པའི་གཏན་ཚིགས་ཀྱིས་དོན་དམ་པར་ལས་ཀྱང་ཡོད་པ་ཁོ་ན་ཡིན་ནོ་ཞེས་བསྒྲུབ་པའི་ཚིག་ཡིན་ཏེ། དེ་དག་ནི་ཆོས་ཅན་དང་། བསྒྲུབ་པར་བྱ་བ་ཆོས་
དང་། སྒྲུབ་པའི་ཆོས་དང་། མི་མཐུན་པའི་ཕྱོགས་ཀྱི་དཔེ་དང་། ཉེ་བར་སྦྱར་བའི་སྦྱོར་བ་དང་། མཇུག་བསྡུ་བ་ཡིན་པར་གོ་རིམས་བཞིན་དུ་སྦྱར་ཏེ། འདི་ན་རུས་སྦལ་གྱི་སྤུའི་གོས་ལྟ་བུ་གང་རྒྱུ་མེད་པ་དེ་དག་ནི་དོན་དམ་པར་ཡོད་པ་མ་ཡིན་གྱི། ལས་ལ་ནི་རྒྱུ་ཉོན་མོངས་པ་དག་ཡོད་པས། དེའི་ཕྱིར་
གཏན་ཚིགས་ཇི་སྐད་སྨོས་པའི་མཐུས་དོན་དམ་པར་ལས་ནི་ཡོད་པ་ཁོ་ན་ཡིན་ནོ་ཞེས་ཟེར་རོ། །དེ་སྐད་ཅེས་ཟེར་བ་དེའི་ལན་དུ། འདིར་འགྲེལ་པ་བྱེད་པ་ཉིད་ཀྱིས། དེ་ནི་བཟང་པོ་མ་ཡིན་ཏེ། །ལས་འདི་ཉོན་མོངས་བདག་ཉིད་ཡིན། །ཉོན་མོངས་དེ་དག་ཡང་དག་མིན། །གལ་ཏེ་ཉོན་མོངས་ཡང་དག་
སྨིན། །ལས་ནི་དེ་ཡིས་ཇི་ལྟར་བྱས། །ཞེས་བྱ་བ་སྨྲས་ཏེ། ཕ་རོལ་པོ་དག་འདོད་པ་ལྟར། །ལས་འདི་ཉོན་མོངས་པའི་རྒྱུ་ལས་བྱུང་བ་ཡིན་ན་ངོ་བོ་ཉིད་མེད་དེ། ཉོན་མོངས་པའི་རྒྱུ་ལས་བྱུང་བས་རང་གི་ངོ་བོ་ཉིད་དུ་མ་གྲུབ་པའི་ཕྱིར་རོ། །ཉོན་མོངས་པ་རྣམས་ཀྱང་ངོ་བོ་ཉིད་ཡོད་པ་མ་ཡིན་ནོ། །ལས་དེ་ཉོན་

མོངས་པ་དེ་དག་གིས་ཇི་ལྟར་བྱ་སྟེ། ཉོན་མོངས་པའི་རྒྱུ་ལས་བྱུང་བ་མ་ཡིན་པས། ཕ་རོལ་པོའི་གཏན་ཚིགས་ལས་ལ་རྒྱུ་ཡོད་པའི་ཕྱིར་རོ་ཞེས་བྱ་བ་དེ་མ་གྲུབ་པས་དོན་དམ་པར་ལས་ལ་ངོ་བོ་ཉིད་ཡོད་པ་མ་ཡིན་ནོ་ཞེས་བྱ་བར་བསྟན་ཏོ། །དེ་ཉིད་བྱེ་བྲག་ཏུ་བཤད་པ་བསྟན་པའི་ཕྱིར། ལས་
འདི་ཉོན་མོངས་བདག་ཉིད་ན། །ཞེས་བྱ་བ་ནི། ལས་འདི་ཉོན་མོངས་པའི་རྒྱུ་ལས་བྱུང་བ་ཡིན་ན་ཞེས་བྱ་བའི་ཐ་ཚིག་སྟེ། དཔེར་ན་བུམ་པ་འཇིམ་པའི་བདག་ཉིད་ཡིན་ན་ཞེས་བྱ་བ་ལྟ་བུའོ་ཞེས་བྱ་བ་སྨྲས་ཏེ། དེས་ནི་དེ་ལྟ་ན་ངོ་བོ་ཉིད་མེད་དོ་ཞེས་དགག་པ་བསྟན་ཏོ། །ཅིའི་ཕྱིར་དེ་ལྟ་ན་ངོ་བོ་ཉིད་མེད་ཅེ་ན་
དེའི་ཕྱིར། །ཉོན་མོངས་དེ་དག་ཡང་དག་མིན། །ཞེས་བྱ་བ་ནི་ཉོན་མོངས་པའི་ངོ་བོ་ཉིད་མེད་དོ་ཞེས་བྱ་བའི་ཐ་ཚིག་སྟེ། སྐྱེ་བ་བཀག་པའི་ཕྱིར་དང་། འདོད་ཆགས་དང་། ཆགས་པ་བརྟག་པར་དེའི་ངོ་བོ་ཉིད་བཀག་པའི་ཕྱིར་རམ། ཡང་དག་སྡུག་དང་མི་སྡུག་པའི། །ཕྱིན་ཅི་ལོག་ལ་རྟེན་འབྱུང་
བ། །དེ་དག་ངོ་བོ་ཉིད་མེད་པས། །དེ་ཕྱིར་ཉོན་མོངས་ཡང་དག་མིན། །ཞེས་བྱ་བ་འགོག་པར་འགྱུར་བའི་ཕྱིར་རོ་ཞེས་བྱ་བ་སྨྲས་ཏེ། ཉོན་མོངས་པ་དག་ངོ་བོ་ཉིད་མེད་པས། ཉོན་མོངས་པའི་བདག་ཉིད་ལས་ཀྱང་ངོ་བོ་ཉིད་མེད་དོ། །དེ་ཉིད་བསྟན་པའི་ཕྱིར། དེའི་ཕྱིར་དེ་ལྟར་གལ་ཏེ་ཉོན་མོངས་
པ་དེ་དག་ཡང་དག་པར་ངོ་བོ་ཉིད་མེད་པ་ཡིན་ན། ལས་དེ་དག་གིས་བྱས་པར་ཇི་ལྟར་འགྱུར་ཏེ། ལས་ཀྱི་རྒྱུ་ཉོན་མོངས་པ་མ་ཡིན་ནོ་ཞེས་བྱ་བའི་ཐ་ཚིག་གོ་ཞེས་བྱ་བ་སྨྲས་སོ། །དེའི་ཕྱིར་གཏན་ཚིགས་ཀྱི་དོན་མ་གྲུབ་པ་ཉིད་དམ། དོན་འགལ་བ་ཉིད་དོ་ཞེས་བྱ་བ་ནི་མཇུག་བསྡུ་བ་དང་། ཚད་མའི་འབྲས་བུ་
ཡིན་ཏེ། དེ་ལྟར་ཉོན་མོངས་པ་དེ་དག་ཡང་དག་པ་མ་ཡིན་པ་དེའི་ཕྱིར། ཕ་རོལ་པོ་དག་གི་གཏན་ཚིགས་ལས་ཀྱི་རྒྱུ་ཡོད་པའི་ཕྱིར་རོ་ཞེས་བྱ་བ་དེ་དོན་མ་གྲུབ་པ་ཉིད་དམ། འགལ་བ་ཉིད་ཡིན་པས། དོན་དམ་པར་ལས་ལ་ངོ་བོ་ཉིད་ཡོད་པར་མ་གྲུབ་པོ།། །།བམ་པོ་ལྔ་བཅུ་
བརྒྱད་པ། །འདིར་སྨྲས་པ། དོན་དམ་པར་ཉོན་མོངས་པ་རྣམས་ནི་ཡོད་པ་ཁོ་ན་ཡིན་ཏེ། དེ་དག་གི་འབྲས་བུ་ཡོད་པའི་ཕྱིར་རོ། །འདི་ན་གང་མེད་པ་དེ་ལ་ནི་འབྲས་བུ་གཟུང་དུ་མེད་དེ། དཔེར་ན་འོན་པའི་རྣ་བའི་དབང་པོའི་འབྲས་བུ་རྣ་བའི་རྣམ་པར་ཤེས་པ་བཞིན་ནོ། །ཉོན་མོངས་པ་རྣམས་ལ་

ནི་འབྲས་བུ་ལས་དང་ལུས་ཀྱི་མཚན་ཉིད་ཡོད་པས་དེའི་ཕྱིར། དོན་དམ་པར་ཉོན་མོངས་པ་རྣམས་ནི་ཡོད་པ་ཁོ་ན་ཡིན་པས་གཏན་ཚིགས་ཀྱི་དོན་མ་གྲུབ་པ་ཉིད་དང་། དོན་འགལ་བ་ཉིད་མ་ཡིན་པའི་ཕྱིར། འདོད་པའི་དོན་གྲུབ་བོ་ཞེས་བྱ་བ་ནི་འདིར་ཕ་རོལ་པོ་དག་ཉོན་མོངས་པ་རྣམས་
ཀྱི་འབྲས་བུ་ལས་དང་ལུས་ཀྱི་མཚན་ཉིད་ཡོད་པའི་གཏན་ཚིགས་ཀྱིས་ཉོན་མོངས་པ་རྣམས་ཡོད་པར་བསྒྲུབ་པའི་གཞུང་ཡིན་ཏེ། དེ་དག་གི་ཆོས་ཅན་དང་། བསྒྲུབ་པར་བྱ་བ་ཆོས་དང་། སྒྲུབ་པའི་ཆོས་དང་། ཆོས་མི་མཐུན་པའི་ཕྱོགས་ཀྱི་དཔེ་དང་། ཉེ་བར་སྦྱར་བའི་སྦྱོར་བ་དང་། མཇུག་བསྡུ་བ་
དང་། ཚད་མའི་འབྲས་བུ་ཡིན་པར་གོ་རིམས་བཞིན་དུ་སྦྱར་ཏེ། འདི་ན་འོན་པའི་རྣ་བའི་དབང་པོ་ལྟ་བུ་གང་ལ་འབྲས་བུ་རྣ་བའི་རྣམ་པར་ཤེས་པ་མེད་པ་དེ་ནི་ཡོད་པ་མ་ཡིན་གྱི། ཉོན་མོངས་པ་རྣམས་ལ་འབྲས་བུ་ལས་དང་ལུས་ཀྱི་མཚན་ཉིད་ཡོད་པ་དེ་དག་ནི་ཡོད་པ་ཁོ་ན་ཡིན་པས་ཁོ་བོ་ཅག་གིས་སྔར་དོན་
དམ་པར་ལས་ནི་ཡོད་པ་ཁོ་ན་ཡིན་ཏེ། དེའི་རྒྱུ་ཉོན་མོངས་པ་ཡོད་པའི་ཕྱིར་རོ་ཞེས་སྨྲས་པའི་གཏན་ཚིགས་ཀྱི་དོན་མ་གྲུབ་པ་ཉིད་དང་། དོན་འགལ་བ་ཉིད་མ་ཡིན་པའི་ཕྱིར། ཁོ་བོ་ཅག་འདོད་པ་དོན་དམ་པར་ལས་ཡོད་པ་ཁོ་ན་ཡིན་ཏེ་ཞེས་བྱ་བའི་དོན་གྲུབ་པོ་ཞེས་ཟེར་རོ། །ཡང་ན་དོན་དམ་པར་ལས་ནི་
ཡོད་པ་ཁོ་ན་ཡིན་ཏེ། དེའི་འབྲས་བུ་ཡོད་པའི་ཕྱིར་རོ། །འདི་ན་གང་མེད་པ་དེ་ལ་ནི་འབྲས་བུ་མེད་དོ། །དཔེར་ན་ནམ་མཁའི་མེ་ཏོག་གི་འབྲས་བུ་བཞིན་ནོ། །ལས་ལ་ནི་འབྲས་བུ་ལུས་ཀྱི་མཚན་ཉིད་ཡོད་པས་དེའི་ཕྱིར་དོན་དམ་པར་ལས་ནི་ཡོད་པ་ཁོ་ན་ཡིན་པས་ལས་ཡོད་པ་མ་ཡིན་པར་བསྒྲུབ་
པའི་རྗེས་སུ་དཔག་པ་དག་ལ་རྟོག་གེ་ཕྱི་མས་གནོད་པར་འགྱུར་རོ་ཞེས་བྱ་བ་ནི། འདིར་ཕ་རོལ་པོ་དག་ལས་ཀྱི་འབྲས་བུ་ལུས་ཀྱི་མཚན་ཉིད་ཡོད་པའི་གཏན་ཚིགས་ཀྱིས་ཡོད་པར་བསྒྲུབ་པའི་གཞུང་རྣམ་པ་གཅིག་ཡིན་ཏེ། དེ་དག་ཀྱང་ཆོས་ཅན་དང་། བསྒྲུབ་པར་བྱ་བ་ཆོས་དང་། སྒྲུབ་པའི་
ཆོས་དང་། ཆོས་མི་མཐུན་པའི་ཕྱོགས་ཀྱི་དཔེ་དང་། ཉེ་བར་སྦྱར་བའི་སྦྱོར་བ་དང་། མཇུག་བསྡུ་བ་དང་། ཚད་མའི་འབྲས་བུ་ཡིན་པར་གོ་རིམས་བཞིན་དུ་སྦྱར་ཏེ། འདི་ན་ནམ་མཁའི་མེ་ཏོག་ལྟ་བུ་གང་ལ་འབྲས་བུ་མེད་པ་དེ་ནི་ཡོད་པ་མ་ཡིན་གྱི། ལས་ལ་འབྲས་བུ་ལུས་ཀྱི་མཚན་ཉིད་

ཡོད་པ་དེ་ནི་ཡོད་པ་ཁོ་ན་ཡིན་པས། སྔར་ཁོ་བོ་ཅག་གིས་ལས་ཡོད་པར་བསྒྲུབ་པ་ལ། ཁྱེད་དབུ་མ་པས་ལས་ཡོད་པ་མ་ཡིན་པར་སྒྲུབ་པའི་རྗེས་སུ་དཔག་པ་སྨྲས་པ་དག་ལ། ཁོ་བོ་ཅག་གི་རྟོག་གེ་ཕྱི་མ་འདིས་གནོད་པར་འགྱུར་བའི་ཕྱིར། ཁྱེད་དབུ་མ་པའི་སྒྲུབ་པ་སྔ་མ་དེ་མ་གྲུབ་
པོ་ཞེས་ཟེར་རོ། །དེ་སྐད་ཅེས་ཟེར་བ་དེའི་ལན་དུ་འགྲེལ་པ་བྱེད་པ་ཉིད་ཀྱིས་འདིར་བཤད་པ། ལས་དང་ཉོན་མོངས་པ་དག་ནི། །ལུས་རྣམས་ཀྱི་ནི་རྐྱེན་དུ་བསྟན། །བསྟན་བཅོས་ལས་དེ་ལྟར་བསྟན་པ་ནི་ཐ་སྙད་པ་དག་ཡིན་གྱི་དོན་དམ་པ་པ་ནི་མ་ཡིན་ནོ་ཞེས་བྱ་བ་སྨྲས་ཏེ། ཆོས་མངོན་པའི་བསྟན་བཅོས་
ལས། ལས་ཀྱི་ཀུན་ནས་ཉོན་མོངས་པ་དང་། ཉོན་མོངས་པའི་ཀུན་ནས་ཉོན་མོངས་པ་དང་། སྐྱེ་བའི་ཀུན་ནས་ཉོན་མོངས་པ་རྣམས་ཀྱི་རྐྱེན་དུ་བསྟན་པ་ནི། ཐ་སྙད་པ་དག་ཡིན་གྱི། དོན་དམ་པ་པ་ནི་མ་ཡིན་པས། ཁྱེད་དོན་དམ་པར་ལས་དང་། ཉོན་མོངས་པ་དག་ཡོད་པར་འདོད་པའི་སྒྲུབ་པ་སྔར་སྨྲས་པ་
གཉི་ག་མི་གྲུབ་བོ་ཞེས་སྟོན་ཏོ། །དེ་དག་ཅིའི་ཕྱིར་དོན་དམ་པ་པ་མ་ཡིན་ཞེ་ན་དེའི་ཕྱིར། དོན་དམ་པར་ནི་ཁོ་བོ་ཅག་གི་ཕྱོགས་ལ་སྒྲུབ་པ་སྔར་བསྟན་པ་དག་གིས། གལ་ཏེ་ལས་དང་ཉོན་མོངས་པ། །དེ་སྟོང་ལུས་ལ་ཇི་ལྟར་བརྗོད། །ལས་དང་ཉོན་མོངས་པ་དག་ལ་ངོ་བོ་ཉིད་མེད་པའི་ཕྱིར། ལས་དང་ཉོན་
མོངས་པ་དག་ཁོ་ན་བཞིན་དུ་ལུས་ཀྱང་མ་གྲུབ་པའི་ཕྱིར་རོ་ཞེས་བྱ་བར་དགོངས་སོ་ཞེས་བྱ་བ་སྨྲས་སོ། །དེའི་ཕྱིར་དེ་དག་གི་འབྲས་བུ་ཡོད་པའི་ཕྱིར་རོ་ཞེས་བྱ་བའི་གཏན་ཚིགས་ཀྱི་དོན་མ་གྲུབ་པས་ཇི་སྐད་བསྟན་པའི་སྐྱོན་ཡང་མ་ཉམས་ལ། དཔེ་མ་གྲུབ་པར་རྟོག་གེ་ཕྱི་མས་གནོད་པ་ཡང་མེད་དོ་ཞེས་བྱ་བས་ནི།
ཕ་རོལ་པོ་དག་གིས་སྔར་སྨྲས་པའི་སྒྲུབ་པ་རྣམ་གཉིས་ཀྱི་གཏན་ཚིགས་ཀྱི་དོན་ཀྱང་མ་གྲུབ་ལ། དབུ་མ་པ་ལ་ཡང་རྟོག་གེ་ཕྱི་མས་གནོད་པ་མེད་པར་བསྟན་ཏོ། །སྨྲས་པ་དོན་དམ་པར་ལས་ནི་ཡོད་པ་ཁོ་ན་ཡིན་ཏེ། དེའི་འབྲས་བུ་ལ་ལོངས་སྤྱོད་པའི་ཟ་བ་པོ་ཡོད་པའི་ཕྱིར་རོ། །འདི་ན་གང་མེད་པ་དེ་ལ་
ནི་དེའི་འབྲས་བུ་ལ་ལོངས་སྤྱོད་པའི་ཟ་བ་པོ་མེད་དེ། དཔེར་ན་ནམ་མཁའི་མེ་ཏོག་གི་ཕྲེང་བ་བཞིན་ནོ་ཞེས་བྱ་བ་ལ་སོགས་པ་ནི། འདིར་ཕ་རོལ་པ་དག་ལས་ཀྱི་འབྲས་བུ་ལ་ལོངས་སྤྱོད་པའི་ཟ་བ་པོ་ཡོད་པའི་གཏན་ཚིགས་ཀྱིས་དོན་དམ་པར་ལས་ཡོད་པ་ཁོ་ནར་སྒྲུབ་པའི་གཞུང་ཡིན་ཏེ། དེ་དག་ནི་ཆོས་

ཅན་དང་། བསྒྲུབ་པར་བྱ་བ་ཆོས་དང་། སྒྲུབ་པའི་ཆོས་དང་། ཆོས་མི་མཐུན་པའི་ཕྱོགས་ཀྱི་དཔེ་ཡིན་པར་གོ་རིམས་བཞིན་དུ་སྦྱར་རོ། །དེའི་ཉེ་བར་སྦྱར་བའི་སྦྱོར་བ་བསྟན་པའི་ཕྱིར། ལས་ལ་ནི་འབྲས་བུ་ལ་ལོངས་སྤྱོད་པའི་ཟ་བ་པོ། མ་རིག་བསྒྲིབས་པའི་སྐྱེ་བོ་གང་། །སྲེད་ལྡན་དེ་ནི་
ཟ་བ་པོ། །དེ་ཡང་བྱེད་ལས་གཞན་མིན་ཞིང་། །དེ་ཉིད་དེ་ཡང་མ་ཡིན་ནོ། །ཞེས་བྱ་བ་ཡོད་དེ་ཞེས་བྱ་བ་སྨྲས་ཏེ། ལས་ལ་ནི་འབྲས་བུ་ལ་ལོངས་སྤྱོད་པའི་ཟ་བ་པོ་མ་རིག་པས་བསྒྲིབས་པའི་སྐྱེ་བོ་སྲེད་པའི་ཀུན་ཏུ་སྦྱོར་བ་དང་ལྡན་པ་དེ་ཡོད་དེ། ཟ་བ་པོ་དེ་ཡང་བྱེད་པ་པོ་ལས་གཞན་ཉིད་ཀྱང་མ་ཡིན་ཞིང་། དེ་ཉིད་
དེ་ཡང་མ་ཡིན་པ་དེའི་ཕྱིར། དེ་ནི་དོན་དམ་པར་ལས་ནི་ཡོད་པ་ཁོ་ན་ཡིན་ནོ་ཞེས་མཇུག་བསྡུ་བ་འོག་ནས་འབྱུང་བ་དང་སྦྱར་རོ། །ཉེ་བར་སྦྱར་བའི་སྦྱོར་བ་བསྟན་པའི་ཚིག་ལེའུར་བྱས་པ་དེའི་ཚིག་གི་དོན་བྱེ་བྲག་ཏུ་བཤད་པ་བསྟན་པའི་ཕྱིར། དེ་ལ་མ་རིག་པ་ནི་རིག་པའི་མི་མཐུན་པའི་ཕྱོགས་སུ་གྱུར་པའི་ཆོས་
སོ། །དེས་བསྒྲིབས་པ་ནི་གཡོགས་པའོ། །སྐྱེ་བོ་གང་ཞེས་བྱ་བ་ནི་སྐྱེ་བ་པོ་གང་ཡིན་པ་སྟེ་སྲོག་ཆགས་སོ། །སྲེད་ལྡན་ཞེས་བྱ་བ་ལ་སྲེད་པ་ནི་འདོད་པའོ། །དེ་ལ་ཀུན་ཏུ་སྦྱོར་བ་དེ་ཉིད་ཡོད་པས་སྲེད་ལྡན་དེ་སྲེད་པའི་ཀུན་ཏུ་སྦྱོར་བ་དང་ལྡན་ཞེས་བྱ་བའི་ཐ་ཚིག་གོ། །དེ་ནི་ལས་ཀྱི་འབྲས་བུའི་ཟ་བ་པོ་སྟེ། ཇི་སྐད་
དུ་མདོ་སྡེ་ལས། མ་རིག་བསྒྲིབས་པའི་སེམས་ཅན་དང་། །སྲེད་པའི་ཀུན་ཏུ་སྦྱོར་དང་ལྡན། །ཞེས་བྱ་བ་དང་། དེ་བཞིན་དུ་ཇི་སྟེ་ཁྱོད་རང་ཉིད་ཀྱིས་སྡིག་པའི་ལས་འདི་བྱས་ན་ཁྱོད་རང་ཉིད་ཀྱིས་དེའི་རྣམ་པར་སྨིན་པ་ཉམས་སུ་མྱོང་བར་བྱ་དགོས་སོ་ཞེས་གསུངས་པའི་ཕྱིར་རོ། །དེ་ཡང་བྱེད་པ་པོ་ལས་
གཞན་མ་ཡིན་ཞིང་། དེ་ཉིད་དེ་ཡང་མ་ཡིན་ཏེ། དེ་ཉིད་དང་གཞན་ཉིད་དུ་བརྗོད་པར་བྱ་བ་མ་ཡིན་པའི་ཕྱིར་རོ་ཞེས་བྱ་བ་སྨྲས་སོ། །དེ་དག་གི་མཇུག་བསྡུ་བ་བསྟན་པའི་ཕྱིར། དེའི་ཕྱིར་གཏན་ཚིགས་ཇི་སྐད་སྨོས་པའི་མཐུས་ལས་ཀྱི་འབྲས་བུ་ལ་ལོངས་སྤྱོད་པའི་ཟ་བ་པོ་ཡོད་པས་དོན་དམ་པར་ལས་ནི་
ཡོད་པ་ཁོ་ན་ཡིན་ནོ་ཞེས་བྱ་བ་སྨྲས་ཏེ། འདི་ན་ནམ་མཁའི་མེ་ཏོག་གི་འབྲས་བུ་ཕྲེང་བ་ལྟ་བུ་གང་ལ་ལོངས་སྤྱོད་པའི་ཟ་བ་པོ་མེད་པའི་ནམ་མཁའ་དེ་ནི་ཡོད་པ་མ་ཡིན་གྱི། ལས་ཀྱི་འབྲས་བུ་ལ་ལོངས་སྤྱོད་པའི་ཟ་བ་པོ་མ་རིག་པས་བསྒྲིབས་པའི་སྐྱེ་བོ་སྲེད་པ་དང་ལྡན་པས་བྱེད་པ་པོ་དང་གཞན་ཉིད་དུ་བརྗོད་པར་

བྱ་བ་མ་ཡིན་པ་ཡོད་པའི་ལས་དེ་ནི་དོན་དམ་པར་ཡོད་པ་ཁོ་ན་ཡིན་ནོ་ཞེས་ཟེར་རོ། །དེ་སྐད་ཅེས་ཟེར་བ་དེའི་ལན་དུ་འགྲེལ་པ་བྱེད་པ་ཉིད་ཀྱིས་འདིར་བཤད་པ། དེ་ནི་བསྟན་བཅོས་ཀྱི་དང་པོ་ཁོ་ནར་དངོས་པོ་སྤྱིར། དེ་ཕྱིར་རྐྱེན་ལས་འབྱུང་མ་ཡིན། །རྐྱེན་མིན་ལས་འབྱུང་འབྲས་བུ་ནི། །ཡོད་མིན་འབྲས་
བུ་མེད་པས་ན། །རྐྱེན་མིན་རྐྱེན་དུ་ག་ལ་འགྱུར། །ཞེས་དཔྱད་ཟིན་པས་ཞེས་བྱ་བ་སྨྲས་ཏེ། དེ་ནི་སྔར་རྐྱེན་བརྟག་པའི་ལེའུར་དངོས་པོ་སྤྱིར་རྐྱེན་དང་རྐྱེན་མ་ཡིན་པ་ལས་བྱུང་བ་མ་ཡིན་པས་དེ་ལ་བྱེད་པ་པོ་དང་ཟ་བ་པོ་ཡང་མེད་པའི་ཚུལ་ཉིད་ཚིག་ལེའུར་བྱས་པ་འདིས་དཔྱད་ཟིན་པས། ཕ་རོལ་པོ་སྒྲུབ་པ་དེ་
ནི་མི་འགྲུབ་པོ་ཞེས་སྟོན་ཏོ། །དེ་ཉིད་བསྟན་པའི་ཕྱིར། གང་གི་ཕྱིར་ན་ལས་འདི་ནི། །རྐྱེན་ལས་བྱུང་བ་མ་ཡིན་ཞིང་། །རྐྱེན་མིན་ལས་ནི་ཡོད་མིན་པ། །དེ་ཕྱིར་བྱེད་པ་པོ་ཡང་མེད། །བྱེད་པ་པོ་དེ་ཡང་ལས་དེ་བཞིན་དུ་མ་སྐྱེས་པའི་ཕྱིར་དང་། བྱེད་པ་པོ་བཀག་པའི་ཕྱིར་དང་། རྫས་སུ་ཡོད་པ་མ་ཡིན་པའི་ཕྱིར་རོ་
ཞེས་བྱ་བར་དགོངས་སོ་ཞེས་བྱ་བ་སྨྲས་ཏེ། གང་གི་ཕྱིར་རྟེན་ཅིང་འབྲེལ་པར་འབྱུང་བ་སྨྲ་བ་རྣམས་ལ། ལས་འདི་ཞེས་བྱ་བ་དེ་རྐྱེན་ལས་བྱུང་ངོ་ཞེས་བྱ་བ་མི་སྲིད་ལ་རྒྱུ་མེད་པ་ལས་འབྱུང་བར་སྨྲ་བ་རྣམས་ལ་ཡང་ལས་འདི་ཞེས་བྱ་བ་དེ་རྒྱུ་མེད་པ་ལས་འབྱུང་ངོ་ཞེས་བྱ་བ་མི་སྲིད་པ་དེའི་ཕྱིར། ལས་ནི་རེ་ཞིག་རྐྱེན་
ལས་འབྱུང་བ་ཡང་ཡོད་པ་མ་ཡིན་ཞིང་། རྐྱེན་མ་ཡིན་པ་ལས་འབྱུང་བ་ཡང་ཡོད་པ་མ་ཡིན་ནོ། །གང་གི་ཕྱིར་ལས་ཡོད་པ་མ་ཡིན་པ་དེའི་ཕྱིར། ལས་མེད་པའི་བྱེད་པ་པོ་ཡང་མེད་དོ་ཞེས་བྱ་བར་དགོངས་སོ། །དེའི་ཕྱིར་དེ་ལྟར་སྒྲུབ་པ་ཇི་སྐད་བསྟན་པས། གལ་ཏེ་ལས་དང་བྱེད་མེད་ན། །ལས་སྐྱེས་འབྲས་བུ་ག་ལ་
ཡོད། །ཅེས་བྱ་བ་ནི་དེའི་ཕྱིར། དེ་ལྟར་བརྟགས་ན་གལ་ཏེ་ལས་ཀྱང་མེད་ལ་བྱེད་པ་པོ་ཡང་མེད་ན་ལས་ལས་སྐྱེས་པའི་འབྲས་བུ་ལྟ་ཡོད་པར་ག་ལ་འགྱུར། ཅི་སྟེ་འགྱུར་ན་ནི་ལས་ལས་སྐྱེས་པའི་འབྲས་བུ་མ་ཡིན་པ་དང་། རྒྱུ་མེད་པ་ལས་འབྱུང་བའི་འབྲས་བུར་འགྱུར་བས་དེ་ནི་མི་འདོད་དོ། །སྐྱོན་དུ་མར་
ཐལ་བར་འགྱུར་བའི་ཕྱིར་རོ་ཞེས་བསྟན་ཏོ། །དེས་ན། ཅི་སྟེ་འབྲས་བུ་ཡོད་མིན་ན། །ཟ་བ་པོ་ལྟ་ག་ལ་ཡོད། །ཟ་བ་པོའི་སྒྲ་བརྗོད་པ་ཉིད་ཀྱི་རྒྱུ་མེད་པའི་ཕྱིར་རོ་ཞེས་བྱ་བར་དགོངས་སོ་ཞེས་བྱ་བས་ནི། ཅི་སྟེ་འབྲས་བུ་ཡོད་པ་མ་ཡིན་ན་ཟ་བ་པོ་ལྟ་ཡོད་པར་ག་ལ་འགྱུར་ཏེ། འདི་ལྟར་འབྲས་བུའི་

ཟ་བ་པོར་འགྱུར་བ་ཡིན་ན་འབྲས་བུ་དེ་ཡང་མི་འཐད་དེ་དེ་མེད་ན་དེ་གང་གི་ཟ་བ་པོར་འགྱུར། དེ་ལྟ་བས་ན་བྱེད་པ་པོ་དང་ལས་དང་འབྲས་བུ་དང་ཟ་བ་པོ་ཡོད་དོ་ཞེས་བྱ་བ་དེ་ནི་གླུའི་ཚིག་ཙམ་དུ་ཟད་དོ། །བྱེད་པ་པོ་དང་ལས་དང་འབྲས་བུ་དང་ཟ་བ་པོ་དག་གི་འཐད་ན་འཁོར་བ་ཇི་ལྟར་འཐད་པར་འགྱུར་ཞེས་བྱ་
བར་དགོངས་སོ། །དེའི་ཕྱིར་དེའི་འབྲས་བུ་ལ་ལོངས་སྤྱོད་པའི་ཟ་བ་པོ་ཡོད་པའི་ཕྱིར་རོ་ཞེས་བྱ་བའི་གཏན་ཚིགས་དེའི་དོན་མ་གྲུབ་པ་ཉིད་དོ། །ལོག་པར་སྟོན་ན་ནི་དོན་འགལ་བ་ཉིད་དོ་ཞེས་བྱ་བ་ནི་མཇུག་བསྡུ་བ་དང་། ཚད་མའི་འབྲས་བུ་ཡིན་ཏེ། དེ་ལྟར་བྱེད་པ་པོ་དང་ལས་དང་འབྲས་བུ་དང་ཟ་བ་པོ་དག་མི་
འཐད་པ་དེའི་ཕྱིར། ཕ་རོལ་པོའི་གཏན་ཚིགས་དེའི་འབྲས་བུ་ལ་ལོངས་སྤྱོད་པའི་ཟ་བ་པོ་ཡོད་པའི་ཕྱིར་རོ་ཞེས་བྱ་བའི་གཏན་ཚིགས་དེ་དོན་དམ་པར་ནི་མ་གྲུབ་པ་ཉིད་ཡིན་ལ་ཀུན་རྫོབ་ཏུ་ནི་འགལ་བ་ཉིད་ཡིན་ནོ། །འདིར་ཁ་ཅིག་གིས་སྨྲས་པ། ལས་དང་འབྲས་བུ་ལ་སྐུར་པ་འདེབས་པའི་ལྟ་བ་ནི། ལོག་པར་ལྟ་བ་
ཡིན་པས། དབུ་མ་སྨྲ་བ་པའི་སྐྱོན་གྱི་ལིང་ཏོག་གིས་བློ་གྲོས་ཀྱི་མིག་བསྒྲིབས་པ་རྣམས་ལ་དེ་ཁོ་ན་མཐོང་བ་མི་འཐད་དོ་ཞེས་བྱ་བ་ནི་རང་གི་སྡེ་པ་དག་དབུ་མ་པ་ལ་སྐུར་པ་འདེབས་པའི་ཚིག་ཡིན་ཏེ། འདི་ལྟར་བཅོམ་ལྡན་འདས་ཀྱིས་ལས་དང་འབྲས་བུ་ལ་སྐུར་པ་འདེབས་པའི་ལྟ་བ་ནི་ལོག་པར་ལྟ་བ་ཡིན་
པར་གསུངས་པས་དེ་དག་ཐམས་ཅད་དབུ་མ་པ་ཉིད་ལ་འབྱུང་བར་འགྱུར་ཏེ། ཅིའི་ཕྱིར་ཞེ་ན། འདི་ལྟར་དབུ་མ་པ་ནི་བྱེད་པ་པོ་དང་ལས་དང་འབྲས་བུ་དང་ཟ་བ་པོ་དག་མེད་ཅིང་འཁོར་བ་དང་མྱ་ངན་ལས་འདས་པའི་ལམ་གྱི་ཚོགས་ཐམས་ཅད་དྲུངས་འབྱིན་པ་ཡིན་པས་དབུ་མ་སྨྲ་བ་ལྟ་བའི་སྐྱོན་གྱི་ལིང་ཏོག་གིས་བློ་
གྲོས་ཀྱི་མིག་བསྒྲིབས་པ་རྣམས་ལ་དེ་ཁོ་ན་མཐོང་བ་མི་འཐད་དོ་ཞེས་ཟེར་རོ། །དེ་སྐད་ཅེས་ཟེར་བ་དེའི་ལན་དུ། འགྲེལ་པ་བྱེད་པ་ཉིད་ཀྱིས་འདིར་བཤད་པ། ཇི་ལྟར་སྤྲུལ་པ་སྟོན་བྱེད་པ། །རྫུ་འཕྲུལ་ཕུན་སུམ་ཚོགས་པ་ཡིས། །སྤྲུལ་ཞིང་སྤྲུལ་པའང་གཞན་སྤྲུལ་བྱེད། །སྤྲུལ་པ་དེས་ཀྱང་གཞན་དག་
ལྟར། །སྤྲུལ་པ་བྱེད་པ་ཞེས་བྱ་བར་སྦྱར་རོ་ཞེས་བྱ་བ་སྨྲས་ཏེ། དེས་ནི་དངོས་པོ་ཡོད་པར་འཛིན་པ་བཟློག་པའི་དཔེ་བསྟན་ཏེ། ཇི་ལྟར་སྤྲུལ་པ་སྟོན་པར་བྱེད་པའི་གང་ཟག་རྫུ་འཕྲུལ་ཕུན་སུམ་ཚོགས་པས་སྤྲུལ་པ་སྤྲུལ་ཞིང་སྤྲུལ་པ་དེ་ཡང་གཞན་སྤྲུལ་པར་བྱེད་ལ། སྤྲུལ་པ་གཞན་དེས་ཀྱང་གཞན་དག་སྤྲུལ་པར་

བྱེད་པ་ལྟར་བྱེད་པ་པོས་ལས་གང་བྱས་པ་དང་ལས་དེའི་འབྲས་བུ་ལ་གང་ལོངས་སྤྱོད་པར་བྱེད་པའི་ཟ་བ་པོ་དག་ཀྱང་ཚུལ་དེ་བཞིན་ནོ་ཞེས་སྟོན་ཏོ། །དཔེ་དེས་མཚོན་པའི་དངོས་པོ་བསྟན་པའི་ཕྱིར། དེ་བཞིན་བྱེད་པོས་ལས་གང་བྱས། །དེ་ཡང་སྤྲུལ་པའི་རྣམ་པ་བཞིན། །དེ་བཞིན་དུ་བྱེད་པ་པོས་ལས་གང་བྱས་
པའི་བྱེད་པ་པོ་དེ་ཡང་སྤྲུལ་པའི་རྣམ་པ་བཞིན་ཏེ། ཐོག་མ་མེད་པ་ནས་རྐྱེན་བརྒྱུད་པ་ལས་བྱུང་བའི་བདག་ཉིད་ཡིན་པའི་ཕྱིར་རོ། །ལས་དེ་ཡང་སྤྲུལ་པའི་རྣམ་པ་བཞིན་ཏེ། ངོ་བོ་ཉིད་མེད་པའི་ཕྱིར་རོ་ཞེས་བྱ་བ་སྨྲས་སོ། །དེ་དག་ཉིད་ཀྱི་དཔེ་གཞན་བསྟན་པའི་ཕྱིར། དཔེར་ན་སྤྲུལ་པས་སྤྲུལ་གཞན་ཞིག །
སྤྲུལ་པ་མཛད་པ་དེ་བཞིན་ནོ། །དཔེར་ན་དེ་བཞིན་གཤེགས་པའི་སྤྲུལ་པས་སྤྲུལ་པ་གཞན་ཞིག་སྤྲུལ་པ་མཛད་པ་དེ་ལ་ཡང་ངོ་བོ་ཉིད་མེད་པ་དེ་བཞིན་ནོ་ཞེས་བྱ་བ་སྨྲས་སོ། །དེ་ནི་དཔེ་དང་དངོས་པོ་དེ་དག་གི་མཇུག་བསྡུ་བའི་དོན་བསྟན་པའི་ཕྱིར། ཉོན་མོངས་ལས་དང་ལུས་རྣམས་དང་། །བྱེད་པ་པོ་
དང་འབྲས་བུ་དག །དྲི་ཟའི་གྲོང་ཁྱེར་ལྟ་བུ་དང་། །སྨིག་རྒྱུ་རྨི་ལམ་འདྲ་བ་ཡིན། །འདོད་ཆགས་ལ་སོགས་པ་ཉོན་མོངས་པ་དང་། སེམས་པ་ལ་སོགས་པ་ལས་དང་ཕུང་པོའི་མཚན་ཉིད་ཀྱི་ལུས་དང་། སེམས་དང་སེམས་ལས་བྱུང་བ་ཞེས་བྱ་བ་བྱེད་པ་པོ་དང་། འགྲོ་བ་ལྔར་བདེ་བ་དང་སྡུག་བསྔལ་
མྱོང་བའི་མཚན་ཉིད་ཀྱི་འབྲས་བུ་རྒྱུ་དང་རྐྱེན་ཚོགས་པས་བསྐྱེད་པ་ཐ་སྙད་དུ་གྲགས་པ་མཐོ་རིས་དང་བྱང་གྲོལ་འཐོབ་པའི་ཚོགས་སུ་གྱུར་པ་དག་ཐ་སྙད་དུ་ཁས་ལེན་པས་དེའི་ཕྱིར། ལས་དང་འབྲས་བུ་ལ་སྐུར་པ་མི་འདེབས་པས་ཇི་སྐད་སྨྲས་པའི་སྐྱོན་མེད་དོ་ཞེས་བྱ་བ་སྨྲས་ཏེ། དེའི་ཕྱིར་དབུ་མ་སྨྲ་བ་
རྣམས་ལ་དེ་ཁོ་ན་མཐོང་བ་མི་འཐད་པའི་སྐྱོན་མེད་དོ། །དེ་གལ་ཏེ་དོན་དམ་པར་དེ་དག་ལ་སྐུར་པ་བཏབ་པས་དེ་ནི་ལན་མ་ཡིན་ནོ་ཞེ་ན་ཞེས་བྱ་བ་ནི། གལ་ཏེ་ཕ་རོལ་པོ་དག་འདི་སྐད་ཅེས་དབུ་མ་པས་ཀུན་རྫོབ་ཏུ་དེ་དག་ཁས་བླངས་ཀྱང་དོན་དམ་པར་དེ་དག་ལ་སྐུར་པ་བཏབ་པས་ཚིག་སྔ་མ་དེ་ནི་ལན་མ་
ཡིན་ནོ་ཞེས་ཟེར་ནའོ། །དེའི་ལན་དུ། དེ་ནི་སྔར་གལ་ཏེ་དངོས་པོ་མ་གྲུབ་ན། །དངོས་མེད་འགྲུབ་པར་མི་འགྱུར་རོ། །ཡོད་ཅེས་བྱ་བར་རྟག་པར་འཛིན། །མེད་ཅེས་བྱ་བ་ཆད་པར་ལྟ། །དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱའོ། །ཞེས་བསྟན་པ་དེར་སྒྲུབ་པ་སྨྲས་པས་ལས་

དང་འབྲས་བུ་མེད་པར་སྨྲ་བ་ཁས་མ་བླངས་པའི་ཕྱིར་ལན་མ་ཡིན་པ་མ་ཡིན་ནོ་ཞེས་བྱ་བ་སྨྲས་ཏེ། དེ་ནི་སྔར་དངོས་པོ་དང་དངོས་པོ་མེད་པ་བརྟག་པའི་རབ་ཏུ་བྱེད་པའི་སྐབས་སུ་དེ་སྐད་བསྟན་པ་དེར་ཁོ་བོ་ཅག་གིས་མེད་པར་དགག་པའི་སྒྲུབ་པ་སྨྲས་པས་མ་ཡིན་པར་དགག་པ་ཁས་མ་བླངས་
པའི་ཕྱིར། ཁོ་བོ་ཅག་གི་སྒྲུབ་པ་སྔ་མ་དེ་ལན་མ་ཡིན་པ་མ་ཡིན་ནོ། །ཚིག་ལེའུར་བྱས་པ་འདས་མ་ཐག་པ་གསུམ་པོ་དག་གིས་དངོས་པོ་ཡོད་པར་འཛིན་པ་བཟློག་པའི་དཔེ་བསྟན་པ་དེ་དག་གི་དོན་རྣམ་པ་གཞན་དུ་བཤད་པ་བསྟན་པའི་ཕྱིར། ཡང་ན་རྣམ་པར་རྨོངས་པའི་སེམས་དང་ལྡན་པ་དག་དོན་དམ་
པར་དངོས་པོ་རྣམས་ངོ་བོ་ཉིད་མེད་པ་ཡིན་ན་ལས་དང་འབྲས་བུ་དང་དེ་དག་འབྲེལ་པ་དང་བྱེད་པ་པོ་དང་ཟ་བ་པོ་དག་མེད་པས་ཚངས་པར་སྤྱོད་པ་ལ་གནས་པ་དོན་མེད་པར་འགྱུར་རོ་སྙམ་དུ་སེམས་པ་རྣམས་ཀྱི་རྣམ་པར་རྨོངས་པའི་ཡོལ་བ་བཤུ་བའི་ཕྱིར། ལས་ལ་སོགས་པ་ཀུན་རྫོབ་ཏུ་སྤྲུལ་པ་ལ་སོགས་པའི་རྣམ་
པ་བཞིན་དུ་ཡོད་པར་བསྟན་པའི་ཕྱིར། ཇི་ལྟར་སྤྲུལ་པ་སྟོན་བྱེད་པ། །རྫུ་འཕྲུལ་ཕུན་སུམ་ཚོགས་པ་ཡིས། །སྤྲུལ་ཞིང་སྤྲུལ་པའང་གཞན་སྤྲུལ་བྱེད། །སྤྲུལ་པ་དེས་ཀྱང་གཞན་དག་ལྟར། །ཞེས་བྱ་བ་ལ་སོགས་པ་རྒྱ་ཆེར་གསུངས་སོ་ཞེས་བྱ་བ་སྨྲ