Luận tạng Tây Tạng (Tengyur) — Tập 73

༄༅༅། །རྒྱ་གར་སྐད་དུ། ཨཱརྱ་མུ་ཁ་ཥ་ཊ་དྷཱ་ར་ཎི་བྱཱ་ཁྱ་ཏ། བོད་སྐད་དུ། འཕགས་པ་སྒོ་དྲུག་པའི་གཟུངས་ཀྱི་རྣམ་པར་བཤད་པ། འཇམ་དཔལ་གཞོན་ནུར་གྱུར་པ་ལ་ཕྱག་
འཚལ་ལོ། །གཟུངས་འདི་ནི་དོན་དྲུག་ལ་བརྩམས་ནས་གསུངས་པར་མངོན་ཏེ། ཤེས་རབ་ཡོངས་སུ་རྫོགས་པ་དང་། སྙིང་རྗེའི་སྟོབས་རྣམ་པར་དག་པ་དང་། རང་གི་རྒྱུད་རྣམ་པར་དག་པ་དང་། གཞན་
གྱིས་བསྒྲུབས་པའི་གེགས་ཡོངས་སུ་ཤེས་པ་དང་། བྱང་ཆུབ་ཀྱི་ཚོགས་ཀུན་དུ་སྡུད་པ་དང་དེའི་འབྲས་བུ་ཡང་དག་པའི་ཡེ་ཤེས་དང་དེ་བཞིན་ཉིད་དོ། །རྣམ་གྲངས་གཞན་ཡང་སྡུག་བསྔལ་བའི་
དུས་དང་། བདེ་བའི་དུས་ན་སེམས་ཅན་གྱི་ཁམས་འཛིན་པ་དང་། བདག་དང་གཞན་ལས་ཚོགས་ཀྱི་བར་ཆད་ཡོངས་སུ་སྤོང་བ་དང་། ཚོགས་ཀྱི་རྣམ་པ་ཐམས་ཅད་སོགས་པ་དང་། ཚོགས་བསགས་
པ་ཡང་རང་གི་དོན་ཕུན་སུམ་ཚོགས་པ་དང་། གཞན་གྱི་དོན་ཕུན་སུམ་ཚོགས་པ་ལས་བརྩམས་ནས་བསྟན་ཏོ། །རྣམ་གྲངས་གཞན་དུའང་རྟོགས་ཏེ། ཐམས་ཅད་མཁྱེན་པ་ཉིད་ལས་ལྡོག་པའི་རྒྱུ་ནི་དྲུག་

སྟེ། སེམས་ཅན་ལ་མི་ཕྱོགས་ཤིང་འཁོར་བའི་སྡུག་བསྔལ་ལ་ཇི་སྙམ་པ་མེད་པ་དང་། འཇིག་རྟེན་པའི་ཕུན་སུམ་ཚོགས་པ་དག་ལ་ཀུན་དུ་འཛིན་པའི་སེམས་ཉིད་དང་། ཉོན་མོངས་པ་དང་ལས་ཀྱི་སྒྲིབ་པ་
སོགས་པ་དང་། མི་དགེ་བའི་གྲོགས་པོས་ཡོངས་སུ་བསྐྱོད་པའི་རྗེས་སུ་འཇུག་པ་དང་། ཚོགས་མ་བསགས་པ་ཉིད་དང་། སྲིད་པའི་ཕུན་སུམ་ཚོགས་པ་ལ་གཞོལ་བའི་སེམས་ཟང་ཟིང་དང་བཅས་པ་ཉིད་དེ། དེའི་གཉེན་པོར་གོ་
རིམས་བཞིན་དུ་སྒོ་དྲུག་པོ་དག་རིག་པར་བྱའོ། །དང་པོ་དང་གཉིས་པས་ནི་སྡུག་བསྔལ་བ་དང་བདེ་བའི་གནས་སྐབས་ན། སེམས་ཅན་ཡོངས་སུ་མི་གཏོང་བས་སེམས་ཅན་ཡོངས་སུ་སྨིན་པར་བྱེད་པ་བསྟན་ཏོ། །ལྔ་པས་
ནི་སངས་རྒྱས་ཀྱི་ཆོས་ཡོངས་སུ་སྨིན་པར་བྱེད་དོ། །གསུམ་པ་དང་བཞི་པས་ནི་གེགས་སེལ་བས་བདག་ཉིད་ཀྱིས་བསྒྲུབ་པར་ནུས་པ་ཉིད་དོ། །དྲུག་པས་ཉན་ཐོས་དང་། རང་སངས་རྒྱས་དང་ཐུན་མོང་མ་ཡིན་པའི་འབྲས་བུ་ཆོས་ཀྱི་
སྐུ་ཞེས་བྱ་བ་ཕུལ་དུ་དབྱུང་དུ་མེད་པའི་ཕྱིར་དང་། སེམས་ཅན་ཐམས་ཅད་ཀྱི་དོན་བྱ་བར་ཉེ་བར་གནས་པའི་ཕྱིར་འཁོར་བའི་མཐའ་ཇི་སྲིད་པ་ཡིན་པར་རིག་པར་བྱའོ། །རྣམ་པ་གཅིག་ཏུ་ན་རྣམ་གྲངས་གཞན་ཡང་བསམ་པ་

ཡོངས་སུ་དག་པ་རྣམ་པ་བཞིས་ཡོངས་སུ་བསྟན་ཏེ། ཆོས་ལ་བདག་མེད་པར་རབ་ཏུ་རྟོགས་པས། སེམས་ཅན་ལོག་པར་ཞུགས་པ་རྣམས་དང་། འཁོར་བའི་སྡུག་བསྔལ་རྣམས་ཀྱིས་མི་གཡོས་པ་ཉིད་དང་། ཕུན་སུམ་ཚོགས་པའི་དུས་ན་སེམས་ཅན་ལ་བལྟ་བ་དང་བཅས་པ་ལ་ཀུན་དུ་
རྨོངས་པ་མི་འབྱུང་བ་དང་། མ་དག་པའི་རྒྱུ་གནས་ངན་ལེན་གྱི་འབྲས་བུ་སྐྱེད་པའི་མཐུ་དང་མི་མཐུན་པར་བྱེད་པ་དང་། དེ་ཡོངས་སུ་བརྟས་པར་བྱེད་པའི་རྒྱུ་ཡོངས་སུ་སྤོང་བས་སོ། །སྦྱོར་བ་རྣམ་པར་དག་པ་ནི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་ལ་སྦྱོར་བར་བྱེད་པའོ། །བསམ་
པ་རྣམ་པར་དག་པའི་འབྲས་བུ་ནི་བླ་ན་མེད་པའི་ཡེ་ཤེས་སོ།། །།སྦྱོར་བ་རྣམ་པར་དག་པའི་འབྲས་བུ་ནི། རྣམ་པར་གྲོལ་བ་སྟེ་གནས་གྱུར་པའོ། །བླ་ན་མེད་པའི་ཡེ་ཤེས་དང་། རྣམ་པར་གྲོལ་བ་ནི་སྦྱོར་བ་རྣམ་པར་དག་པའི་འབྲས་བུ་ཡིན་ཏེ། ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་
འཇིག་རྟེན་པའམ་འཇིག་རྟེན་ལས་འདས་པའང་རུང་གང་ཅི་ཡོད་པ་དེ་བླ་ན་མེད་པའི་ཡེ་ཤེས་ཀྱི་འབྲས་བུར་གྱུར་ཅིག་ཅེས་བྱ་བ་ལ་སོགས་པ་གསུང་བའི་ཕྱིར་རོ། །ཕ་རོལ་ཏུ་ཕྱིན་པ་ཡོངས་སུ་མ་རྫོགས་ན། བསམ་པ་འབའ་ཞིག་གིས་བླ་ན་མེད་པའི་ཡེ་ཤེས་བསྐྱེད་མི་ནུས་པའི་ཕྱིར་ཏེ།
ཕ་རོལ་ཏུ་ཕྱིན་པའི་འབྲས་བུར་བཤད་དེ། རིགས་མཐུན་པའི་ཕྱིར་བླ་ན་མེད་པའི་ཡེ་ཤེས་ཉིད་བསམ་པ་རྣམ་པར་དག་པའི་འབྲས་བུར་རིགས་སོ། །དེ་གཉིས་ཀའི་འབྲས་བུ་ནི་གཉིས་ཀ་སྟེ་བསམ་པ་དང་སྦྱོར་བ་གཅིག་ལ་གཅིག་ལྟོས་པ་གཉིས་ཤིན་ཏུ་མཐར་ཐུག་པའི་ཕྱིར་རོ། །ཆོས་ཐམས་ཅད་
མི་དམིགས་པའི་རྣམ་པར་ཡོངས་སུ་བསྒོམས་པས་ཡོངས་སུ་བསྔོས་པའི་དབང་གིས་ཐམས་ཅད་མཁྱེན་པའི་ཡེ་ཤེས་དང་། དེ་བཞིན་གཤེགས་པའི་ཡོན་ཏན་གཞན་རྣམས་ཀྱང་འཐོབ་སྟེ་རྒྱུ་ཡིན་པའི་ཕྱིར་རོ། །དེ་ལྟ་མ་ཡིན་ན་ནི་བསམ་པ་ཡོངས་སུ་སྦྱངས་པ་འབྲས་བུ་མེད་པ་ཁོ་ནར་འགྱུར་
རོ། །དེ་གཉིས་ནི་འཁོར་བ་དང་མྱ་ངན་ལས་འདས་པ་ལ་མི་གནས་པ་ཡིན་ནོ། །རྒྱུ་རྣམ་པ་གཉིས་ཀྱང་ཤེས་རབ་དང་སྙིང་རྗེ་མཉམ་པ་ཉིད་ཀྱིས་ཡོངས་སུ་ཟིན་པ་སྟེ། རྣམ་པ་དེ་ཉིད་ཀྱིས་ཡང་དག་པར་བསྒྲུབས་པའི་ཕྱིར་རོ། །ཡོན་ཏན་དེ་ལྟ་བུ་ཐོབ་པར་བྱ་བའི་ཕྱིར་བྱང་ཆུབ་སེམས་དཔའ་

དགེ་བའི་རྩ་བ་ཐམས་ཅད་ཡོངས་སུ་བསྔོ་བར་བྱའོ། །དེ་ལྟ་བས་ན་འདི་ནི་དགེ་བའི་རྩ་བ་ཡོངས་སུ་བསྔོ་བ་ཆེན་པོ་ཞེས་བྱའོ། །དེ་ལྟར་རྣམ་པ་དྲུག་པོ་བདག་གིས་བསྒོམས་པ་དེ་དག་གི་ཕན་ཡོན་རྣམ་པ་དྲུག་ཁོང་དུ་ཆུད་པར་བྱ་སྟེ་གོ་རིམས་བཞིན་ནོ། །དགེ་བའི་རྩ་བ་
འདི་དང་ལྡན་པའི་བྱང་ཆུབ་སེམས་དཔའ་ནི་འཁོར་བར་འཁོར་བ་ན་སྡུག་བསྔལ་སྲབ་མོར་མྱོང་བར་འགྱུར་ཏེ་དེས་ཡོངས་སུ་གཏུགས་པར་མི་འགྱུར་བ་དང་། ཟད་མི་ཤེས་པ་དང་རྒྱ་ཆེ་བའི་རྒྱུན་གྱིས་འཇིག་རྟེན་པའི་ཕུན་སུམ་ཚོགས་པ་མྱོང་བར་འགྱུར་ཞིང་སེམས་ཅན་གྱི་ཁམས་ཚད་མེད་པ་
ཡོངས་སུ་སྨིན་པར་བྱེད་པ་དང་། སྒྲིབ་པ་མེད་པར་དགེ་བའི་རྩ་བ་རྣམས་མྱུར་དུ་ཡང་དག་པར་སྡུད་པར་བྱེད་ལ་དགེ་བ་ལ་ཀུན་དུ་དགའ་ཞིང་དགེ་བ་ལ་མོས་པ་དང་། བྱང་ཆུབ་སེམས་དཔའ་ལ་འཁྲུལ་པ་ཤིན་ཏུ་ཕྲ་བ་ཡང་མི་སྣང་ཞིང་རབ་ཏུ་རྟོགས་པས་སེལ་བ་དང་། མྱུར་དུ་ཚོགས་ཡོངས་སུ་རྫོགས་
པར་བྱེད་ཅིང་ཐམས་ཅད་མཁྱེན་པ་ཉིད་མངོན་པར་བསྒྲུབ་པའི་ཏིང་ངེ་འཛིན་ཀྱང་ཐོབ་པ་དང་། འཇིག་རྟེན་ཇི་ཙམ་པ་དང་སེམས་ཅན་ཇི་སྙེད་དེ་ཙམ་དུ་སེམས་ཅན་ཐམས་ཅད་ཀྱི་དོན་བྱེད་པར་སྣང་སྟེ་དེ་ཡང་བསྒྲུབ་པོ། །འཕགས་པ་སྒོ་དྲུག་པའི་གཟུངས་ཀྱི་རྣམ་པར་བཤད་པ། སློབ་
དཔོན་དབྱིག་གཉེན་གྱིས་མཛད་པ་རྫོགས་སོ།། ༄༅། །རྒྱ་གར་སྐད་དུ། ཨཱརྱ་ཨ་ནནྟ་མུ་ཁ་ནིརྷཱ་ར་དྷཱ་རི་ཎཱི་བྱཱ་ཁྱཱ་ནཾ་ཀཱ་རི་ཀཱ། བོད་སྐད་དུ། འཕགས་པ་སྒོ་མཐའ་ཡས་པ་སྒྲུབ་པའི་གཟུངས་རྣམ་པར་བཤད་པའི་ཚིག་ལེའུར་བྱས་པ། འཇམ་དཔལ་གཞོན་ནུར་གྱུར་པ་
ལ་ཕྱག་འཚལ་ལོ། །རྫོགས་པའི་སངས་རྒྱས་ཆོས་དང་ནི། །དགེ་འདུན་ལ་ཡང་ཕྱག་འཚལ་ནས། །མཐའ་ཡས་སྒོས་སྒྲུབ་གཟུངས་ཀྱི་དོན། །མདོར་བསྡུས་རྣམ་པར་དབྱེ་བར་བྱ། །རྫོགས་པའི་སངས་རྒྱས་སྲས་དང་བཅས་པ་ཤེས་བྱ་ཀུན་གྱི་ཡང་དག་ཐུགས་ཆུད་པའི། །སྤྱོད་ཡུལ་ཟབ་
མོའི་གཟུངས་འདི་ཅིག་བདག་འདྲ་ཉོན་མོངས་བློ་ཞན་པ་ཡིས་ག་ལ་ལྕོགས། །དེ་ནི་གནས་མ་ཡིན་པར་ཤིན་ཏུ་མངོན་བཞིན་འོན་ཀྱང་གཟུངས་དོན་རྣམ་པར་དབྱེ་བྱ་བར། །བདག་ནི་དད་པས་གུས་པར་བསྐུལ་ལ་གཞན་དབང་བློ་ཅན་བདག་གིས་མི་བྱ་ཅི་ཡང་མེད། །འཇིག་རྟེན་མ་ལུས་ཡང་

དག་འདོད་པའི་དངོས་པོ་སྒྲུབ་པ་ཡི། །མཐུ་དང་ལྡན་པ་མ་ཡིན་དམན་ཞིང་དོན་ཀྱང་མ་བྱས་པས། །བདག་ནི་ཚེ་རབས་ཕྱི་མ་ལ་ཡང་བླུན་པོ་འདི་འདྲ་བར། །འགྱུར་དུ་དོགས་ཕྱིར་འདི་ཡི་ལུས་ནི་རབ་ཏུ་དབྱེ་བར་བྱ། །གླེང་བསླང་བ་དང་གླེང་གཞི་དང་། །འདུས་པ་དང་ནི་དགོས་པ་ལ། །
ཡང་དག་བརྟགས་ན་དོན་ཆེན་ཕྱིར། །ཞུ་བ་ལ་ནི་ནན་ཏན་བྱས། །དོན་ཆེན་བས་ན་ཐུབ་པ་ལ། །རྒྱ་ཆེར་མཁྱེན་པར་གསོལ་བ་དང་། །ཐུབ་ལ་གསོལ་བ་འདེབས་པ་དང་། །དམ་བཅའ་མངོན་དུ་ཕྱོགས་བྱ་དང་། །སྒྲུབ་དང་གཟུངས་ཀྱི་ངོ་བོ་དང་། །དེ་ལ་བསྟོད་དང་ཕན་ཡོན་དང་། །ཐོབ་
པའི་ཐབས་དང་ཕན་ཡོན་དང་། །དེ་ནི་སྔོན་བྱུང་བརྗོད་པ་དང་། །ཆོས་ཀྱི་རྣམ་གྲངས་ཆེ་ཉིད་དང་། །མིང་ཞུས་པ་དང་བྱ་བ་གཉིས། །ཡི་རངས་པ་དང་བསྟན་པ་སྟེ། །འདི་ལ་འདི་ནི་མདོར་བསྡུས་པའོ། །བསྒྲུབ་བྱ་སྒྲུབ་པའི་བྱེ་བྲག་གིས། །གླེང་བསླང་རྣམ་པ་བརྒྱད་དུ་བསྟན། །མདོར་
ན་འདི་ལ་བསྒྲུབ་བྱ་གསུམ། །སྒྲུབ་པ་རྣམ་པ་ལྔར་འདོད་དོ། །གླེང་གཞི་ཐུབ་པས་གསུངས་པ་འདི། །དེ་ཡིས་གདུལ་བའི་དབང་མཛད་ནས། །རྣམ་པ་ལྔ་དང་ལྡན་པ་སྟེ། །ཕོངས་པ་རྣམ་པ་གསུམ་དུ་འདོད། །འདི་དག་ལ་སོགས་ཚིག་གིས་ནི། །དེ་དག་བྱིན་གྱིས་བརླབ་པར་བསྟན། །
བདུད་གཉིས་དེ་དག་བཅོམ་པ་ཡིས། །གདུལ་བ་ལ་ནི་ཐུགས་བརྩེའི་ཕྱིར། །སྤྲུལ་པའི་སྐུས་ནི་མྱ་ངན་ལས། །འདའ་བར་འདོད་ཀྱི་ཅིག་ཤོས་མིན། །གཏན་དུ་གནས་པའི་རྒྱུ་ལྡན་པ། །མྱ་ངན་འདའ་བར་ཡང་མི་རིགས། །རྫོགས་སངས་རྒྱས་ཀྱི་མཐུས་བསྟན་པས། །མ་བསྒྲིམས་
བསྒྲིམས་དང་བསྒྲིམས་པ་ཡིས། །འཕྱས་སུ་འགྱུར་བ་བསལ་བའི་ཕྱིར། །བསྡུ་བ་རྣམ་པ་གསུམ་དུ་གཞག །བཙུན་པར་མི་འགྱུར་བསལ་བའི་ཕྱིར། །ཐུབ་པས་མངོན་དུ་མ་མཛད་དེ། །གུས་པ་བསྐྱེད་པར་བྱ་བའི་ཕྱིར། །གཞན་དག་སྡུད་པར་བྱེད་དུ་བཅུག །དེས་འདུལ་དབང་
མཛད་བཅོམ་ལྡན་གྱིས། །དེ་གཉིས་མྱ་ངན་འདས་པར་བསྟན། །འདིར་ནི་དེ་སྨོས་པ་ཡི་ཕྱིར། །ཡང་དག་མྱ་ངན་འདས་མ་ཡིན། །བསྡུ་བ་གསུམ་ལ་སྐོ་བ་དང་། །བསྐོ་བར་བྱ་བའི་བྱ་བ་དང་། །དེ་ཡི་འབྲས་བུ་གོ་རིམས་དག །བསྟན་པ་ཟད་པར་འདོད་པ་ཡིན། །བྱང་ཆུབ་མཆོག་གི་རིམ་ཡིན་ལ། །

བློ་ཞན་བཤེས་གཉེན་དམན་བསྟེན་པ། །གང་དག་དམན་པའི་ལམ་བསྟེན་པ། །དེ་དག་རྣམ་པ་བཞི་དག་གིས། །མངོན་དུ་ཕྱོགས་པར་མཛད་པ་ན། །མཐའ་དག་ཀྱང་ནི་འདུས་པ་དང་། །ཆེ་བ་ཉིད་ནི་རྒྱལ་བས་བསྟན། །གང་ཞིག་བསྒྲིམས་ཏེ་བསྡུ་བ་དང་། །གང་ཡང་བསྒྲིམ་
ནི་མི་དགོས་ལ། །འཇིག་རྟེན་སྤྱོད་པའི་ཚུལ་གྱིས་འཇུག །གང་ཕྱིར་དེ་བཞིན་གཤེགས་པ་ནི། །སྐྱོན་དང་ཉོན་མོངས་ཕུང་པོ་བསྩལ། །དོན་ཀུན་ཡང་དག་མཁྱེན་པ་སྟེ། །དེ་ཕྱིར་རྒྱལ་བ་ཞུ་བར་འོས། །དད་པས་མོས་པ་ལ་སོགས་པས། །གོང་ནས་གོང་དུ་ཐོབ་པའི་ཕྱིར། །གདུལ་བྱའི་བསམ་པའི་
བྱེ་བྲག་གིས། །དོན་ནི་རྣམ་ལྔར་བསྟན་པ་ཡིན། །སྡུག་བསྔལ་ལ་སོགས་ཡུལ་རྣམས་ལ། །ནེམ་ནུར་བྱེད་པ་སོམ་ཉིར་བསྟན། །དེ་སྤངས་ས་ཐོབ་འདི་ཡིན་པར། །འདིར་ནི་དོན་གྱིས་བསྟན་པ་ཡིན། །ཕྱིར་མི་ལྡོག་པའི་ས་ལ་ནི། །ཐོབ་པ་རྣམ་པ་གཉིས་སུ་བསྟན། །སྐྱེ་བ་གཅིག་གིས་
ཐོགས་པ་རྣམས། །ས་ནི་རྟེན་བཞིས་ཐོབ་པར་འགྱུར། །སྤྱོད་པ་སྦྱིན་སོགས་ཕ་རོལ་ཕྱིན། །ཚོགས་ཀྱིས་རྣམ་པ་གཉིས་སུ་འགྱུར། །གསུམ་ནི་བསོད་ནམས་ཕ་རོལ་ཕྱིན། །ལྷག་མ་ཡེ་ཤེས་ཅིག་ཤོས་གཉིས། །དེས་གདུལ་ཕྱིར་ནི་གནས་པ་དང་། །བསྟན་པ་དོན་ཡོད་མཚུངས་པ་མེད། །
སྨོན་ལམ་འབྲས་བུ་འགྲུབ་པ་དང་། །དགའ་དགུར་ཞིང་ནི་སྟོན་པར་བྱེད། །སེམས་ཅན་ལ་སོགས་རྣམ་དག་ནི། །སེམས་ཅན་ཆོས་དོན་གཉེར་དང་ཞིང་། །རང་བཞིན་བདག་མེད་མཐོང་བ་ཡིན། །དེ་ནི་འདོད་པའི་དོན་གྲུབ་བྱེད། །གདུལ་བྱ་རྣམས་ཀྱི་བྱེ་བྲག་གིས། །ལུས་སོགས་ཡིད་དུ་འོང་
བར་གཞག །ཐམས་ཅད་མཁྱེན་པའི་ཡོན་ཏན་གྱིས། །ཚོགས་ཀྱི་གཞི་ཡང་སྐྱེ་བ་ཡིན། །གཟུངས་ནི་རྣམ་གསུམ་གང་གི་ཕྱིར། །ཚིག་དང་དོན་དང་གཉི་ག་འཛིན། །ལེགས་པ་ལས་ནི་ཉམས་པ་ན། འཛིན་པར་བྱེད་པས་དེ་ཕྱིར་གཟུངས། །བདག་དང་གཞན་གྱི་དོན་གྲུབ་ཕྱིར། །གཟུངས་
ཉིད་སྒོ་མོ་སྒོ་ཡིན་ནོ། །དེ་ལ་འཇུག་པ་དེ་ཤེས་པ། །དེ་ཡང་རྣམ་བཞིར་བསྟན་པ་ཡིན། །ཞུ་བ་འདི་ནི་མདོར་བསྡུ་ན། །བྱང་ཆུབ་སེམས་དཔའ་ཀུན་ལ་ཡང་། །གང་ལ་ཇི་སྙེད་འོས་ཡིན་པ། །དེ་ལ་དེ་སྙེད་འགྱུར་བ་ཡིན། །ཞུ་བའི་འབྲས་བུ་བློ་ལྡན་གྱིས། །ཞུ་བ་ཉིད་དུ་རབ་ཏུ་གསུངས། །

ཡང་ན་འབྲས་དང་ཐ་དད་པར། །སྒྲོ་བཏགས་ཞུ་བ་ཉིད་དུ་གསུངས། །ཚིག་དང་དོན་དང་གཉི་ག་དང་། །ཐོས་སོགས་ཤེས་པའི་བྱེ་བྲག་དང་། །མངོན་སུམ་རྗེས་དཔག་རྣམ་གཉིས་ཀྱིས། །རྣམ་པར་དག་པས་རྣམ་གསུམ་མོ། །སྤྱོད་པ་ཕ་རོལ་ཕྱིན་བཅུ་དང་། །ཡང་ན་སྟོང་ཉིད་སྐྱོན་མེད་ཉིད། །དེ་ཡི་
དག་པས་ཐོབ་པས་ན། །ཐམས་ཅད་མཁྱེན་པའི་གོ་འཕང་ཐོབ། །སྣོད་ནི་ཁས་ཕུབ་རྡོལ་བ་དང་། །མི་གཙང་བ་ཡི་གཉེན་པོར་རམ། །གཟུ་བ་ལ་སོགས་ཡོན་ཏན་ལྡན། །ཁྱོད་ཀྱིས་ཉོན་ལ་གཞན་དུ་མིན། །གང་ཕྱིར་ཚད་མ་ལྡན་པས་ན། །ཐོག་མ་བར་དང་ཐ་མར་དགེ། །ཆུང་ངུ་འབྲིང་དང་ཆེན་
པོ་ཡི། །ཉེས་པ་རྣམས་ནི་ཟད་བྱེད་དང་། །ཚིག་འབྲུ་དོན་དང་གཉི་ག་ཤེས། །མངོན་སུམ་ལ་སོགས་མི་འགལ་བ། །ཐོས་ལ་སོགས་པས་བློ་བསྐྱེད་དང་། །བདག་སོགས་འབྱོར་པའི་རྒྱུ་ཡིན་ཕྱིར། །དོན་གསོལ་ཞལ་གྱིས་བཞེས་པས་ན། །དེ་ཡིས་བདག་ཉིད་གསོལ་བར་ཕྱོགས། །ཐུབ་པ་
སེམས་ཅན་དོན་མཁྱེན་ཕྱིར། །འདིར་ནི་བསྲུང་བ་ལ་སོགས་གསུངས། །ཡང་དག་ཏུ་ན་དེ་ཆོས་ལྡན། །དངོས་པོའི་ངོ་བོར་ཁས་མི་ལེན། །རྐྱེན་ལ་རག་ལས་འབྱུང་ཕྱིར་ཏེ། །སྒྱུ་མ་རྨི་ལམ་སྨིག་རྒྱུ་བཞིན། །དགག་པར་བྱ་བ་མེད་པས་ན། །ཡང་དག་ཏུ་ན་བདག་མེད་མངོན། །ཡང་དག་
མཁྱེན་ཏེ་ཆོས་རྣམས་ཀུན། །ཐམས་ཅད་དངོས་པོར་འཛིན་མི་མཛད། །ཚད་མ་ལྡན་པ་མ་ཡིན་པས། །ཡོད་མེད་ལ་སོགས་མཚན་ཉིད་དུ། །དེ་ནི་ཆོས་ཀུན་ཁས་མི་ལེན། །དེ་ཕྱིར་མཁས་པ་འཛིན་མི་བྱེད། །དེ་ཕྱིར་དེ་ནི་སྟོང་པ་མིན། །མི་སྟོང་མ་ཡིན་ཡོད་མེད་མིན། །མི་སྐྱེ་མ་ཡིན་
སྐྱེ་མིན་ཞེས། །བྱ་བ་ལ་སོགས་བཅོམ་ལྡན་གསུངས། །བསམ་གཏན་གྱི་ནི་ལམ་འདི་ཡིས། །གསང་སྔགས་ཚིག་རྣམས་བསམས་ན་ནི། །འབྲས་བུ་རྫོགས་པར་འཐོབ་འགྱུར་གྱི། །འདོད་པ་ཉི་ཚེས་དེ་ལྟ་མིན། །ཚིག་རྣམས་རེ་རེའི་རྣལ་འབྱོར་ལ། །མངོན་དུ་ཕྱོགས་པར་བྱེད་བཞིན་དུ། །
གསང་སྔགས་རན་པར་བརྗོད་བྱ་སྟེ། །དེ་ཕྱིར་འདིར་ནི་ཚིག་སྨྲས་སོ། །ཡི་གེ་རེ་རེ་བསམ་པ་ཡི། །རྣལ་འབྱོར་སུས་ཀྱང་མི་ནུས་ཏེ། །ཚིག་རེ་ནས་ནི་ངེས་པར་ཡང་། །བརྗོད་པར་བྱ་བས་དེ་སྨོས་སོ། །རྣལ་འབྱོར་མེད་པའི་གསང་སྔགས་འདྲི། །དེ་ལྟར་འབྲས་བུ་སྟོན་མི་འགྱུར། །གསང་

སྔགས་ཚིག་ནི་གསང་སྔགས་ཏེ། །དེ་ཕྱིར་རྣལ་འབྱོར་མེད་མི་བྱ། །གསུངས་པའི་མིང་ནི་འདོགས་པ་དང་། །ཐོབ་པའི་ཐབས་ནི་བསྟན་པ་དང་། །དེས་ཞེས་བྱ་བ་སོགས་ཚིག་གིས། །གཟུངས་ནི་འོག་ནས་འབྱུང་བ་ཉིད། །འདི་ཞེས་གསུངས་པ་བརྗོད་བྱ་ཡིན། །འཛིན་
པ་དོན་ལས་བཞེད་པ་ཡིན། །རློམ་སེམས་མངོན་པར་ཞེན་པ་སྟེ། །མ་དམིགས་ཕྱིར་ན་དེ་འདིར་མེད། །མི་སྡུག་མ་ཡིན་གཉི་གར་སྡུག །སྡུག་པ་དེ་ཡང་རྣམ་གཉིས་འདོད། །ཆོས་རྣམས་ཐམས་ཅད་ཐུབ་པ་ཡིས། །རྣམ་པ་བཞིར་ནི་བསྡུ་བ་མཛད། །གནོད་སེམས་གཏི་མུག་འདོད་ཆགས་
རྣམས། །དེ་ཡི་སྒོ་ནས་འབྱུང་ཕྱིར་རོ། །སྤང་བའི་ཐབས་ནི་བསྒྲུབ་པའི་ཕྱིར། །དེ་དག་དངོས་པོ་མེད་པར་བསྟན། །འདི་ལ་ཐོབ་བྱ་རྣམས་ཐོབ་དང་། །དེ་དག་ཉིད་ནི་བསྒོམ་པ་དང་། །སྤང་བྱ་རྣམས་ནི་སྤང་བ་དང་། །འཕེལ་བ་ཐམས་ཅད་ཡིན་པར་བཞེད། །དེ་ཕྱིར་རྣལ་འབྱོར་ཅན་དེ་ནི། །
ཐོས་བསམ་ལ་སོགས་བྱུང་བ་ཡི། །ཤེས་པ་རྣམས་ཀྱིས་ནམ་དུ་ཡང་། །འདུས་བྱས་འདུས་མ་བྱས་ཀྱི་ཆོས། །དེ་དག་ཐོབ་སོགས་སྦྱོར་མི་བྱེད། །ཡང་ན་ཆུང་འབྲིང་ཆེན་པོ་ཡི། །སྦྱོར་བ་རྣམས་ཀྱིས་སྦྱོར་མི་བྱེད། །དེ་བཞིན་ཟག་བཅས་སློབ་སོགས་ཀྱི། །ལམ་རྣམས་ཀྱིས་ཀྱང་སྦྱོར་མི་བྱེད། །
རྒྱུ་དང་རྐྱེན་ནམ་ཆགས་སོགས་ཀྱི། །བག་ཉལ་རྣམས་དང་ལྡན་དེ་དག །འདིར་ནི་མཚུངས་ལྡན་ཤེས་བྱ་སྟེ། །བཟློག་པ་ལས་ནི་ལྡན་པ་མིན། །རྣམ་པ་མེད་པའི་ཤེས་པ་ཡིས། །ཡུལ་ལ་འཛིན་པར་མི་རུང་ངོ་། །རྣམ་པ་ཚད་མ་མིན་ཕྱིར་དང་། །མི་རུང་ཕྱིར་ན་ཅིག་ཤོས་མིན། །ལུས་དང་ལུས་
མེད་འཕེལ་བ་དེ། །རྫས་དང་རྫས་མེད་རྣམ་པ་གཉིས། །ལྟོས་པར་གནས་པའི་ངོ་བོའི་ཕྱིར། །མི་མཐུན་པ་དང་ལྷན་ཅིག་བཤད། །ཡང་དག་ཏུ་ན་སྐུ་གཉིས་ཀྱི། །རང་བཞིན་མ་མཐོང་གང་ཡིན་པ། །དེ་ཉིད་སངས་རྒྱས་རྗེས་དྲན་ཏེ། །རྟོག་པ་ཐམས་ཅད་སེལ་བ་ཡིན། །རྐྱེན་ལ་རག་ལས་འབྱུང་
བའི་ཕྱིར། །སྒྱུ་མ་བཞིན་དུ་གང་མ་སྐྱེས། །བདེན་པར་བསམས་ན་གཟུགས་ལ་སོགས། །དེ་ནི་དེ་བཞིན་གཤེགས་མ་ཡིན། །དགག་པར་བྱ་བ་མེད་པས་ན། །ཡང་དག་ཏུ་ན་དགག་མེད་མངོན། །དེ་ཕྱིར་བརྟགས་ན་གཟུགས་མེད་སོགས། །དེ་ནི་དེ་བཞིན་གཤེགས་མ་ཡིན། །དེས་ན་གཉི་ག་མ་ཡིན་

དང་། །ཅིག་ཤོས་དེ་དག་བཀག་ཤེས་བྱ། །དེ་ཡི་ཕྱིར་ན་དེ་གཉིས་དེ། །སོ་སོར་དགག་པ་མ་མཛད་དོ། །དེ་ལྟར་རྣམ་རྟོག་མེད་གྱུར་ན། །ཆོས་ཀྱི་སྐུ་ནི་མཐོང་བ་སྟེ། །སངས་རྒྱས་རྗེས་དྲན་ཀུན་མཁྱེན་གྱི། །ཡོན་ཏན་ཕུན་སུམ་ཚོགས་པའི་གཞི། །ལོངས་སྤྱོད་རྫོགས་པར་མཛད་པའི་སྐུ། །རྣམ་
པ་ཉི་ཤུས་བཤད་པ་ཡིན། །ཅིག་ཤོས་བཅོ་བརྒྱད་ཤེས་པར་བྱ། །འདིར་ནི་དེ་གཉིས་ཕྲིན་ལས་བཞི། །དེ་ཡི་མཛད་པའི་འབྲས་བུ་དྲུག །དེ་དངོས་རྣམ་གཉིས་རྒྱུ་རྣམ་བདུན། །མཉམ་པ་ཉིད་ལ་གནས་ནས་སུ། །དེ་དག་ལ་ནི་བསྒོམ་པར་བྱ། །ཡང་ན་ལོངས་སྤྱོད་རྫོགས་པའི་སྐུ། །རྒྱུ་དང་
བཅས་དང་འབྲས་བུར་བཅས། །ཡང་དག་ཏུ་ན་གང་མ་མཐོང་། །དེ་ནི་སངས་རྒྱས་རྗེས་སུ་དྲན། །ལོངས་སྤྱོད་རྫོགས་པ་ཉི་ཤུ་སྟེ། །འབྲས་བུ་ཉི་ཤུ་གཉིས་སུ་བཞེད། །དེ་ཡི་རྒྱུ་ནི་བཅོ་ལྔ་སྟེ། །གང་གི་ཕྱིར་ནི་ནན་ཏན་བྱེད། །ཇི་ལྟར་གང་ལ་བྱེ་བྲག་གིས། །ཟག་བཅས་ཅིག་ཤོས་བྱེ་
བྲག་གིས། །བྱ་བ་རྣམ་གཉིས་ཤེས་པར་བྱ། །ལྷག་མ་དག་ནི་སྔར་བཤད་བཞིན། །སར་པ་འཇུག་པའི་རྒྱུ་ཉིད་ཡིན། །གང་ཚེ་དེ་ལས་མ་ཐོབ་བ། །སངས་རྒྱས་ཉིད་དུ་གཅིག་ཏུ་ངེས། །སངས་རྒྱས་ཉིད་ཀྱི་ས་ཐོབ་ལ། །གནས་སྐབས་དག་ནི་ཐམས་ཅད་དུ། །བདུད་ཀྱི་ལས་ནི་རྣམ་སྤོང་
ན། །གཟུངས་ཀྱིས་ཐོབ་པར་མི་འགྱུར་གང་། །ཐོབ་བྱ་གཞན་ནི་ཅི་ཞིག་ཡོད། །ཡང་ན་དད་པས་མོས་ལ་སོགས། །དབང་དུ་མཛད་དེ་གོ་རིམས་བཞིན། །མིང་རྣམས་ལྔ་པོ་འདི་དག་ནི། །དོན་དང་མཐུན་པར་གསུངས་པ་ཡིན། །འབྲས་བུ་ཡང་དག་བསྟན་པས་ཀྱང་། །འདུལ་བ་རྣམས་
ནི་འཇུག་འགྱུར་ཏེ། །དེ་ཡི་ཕྱིར་ན་ཐུབ་པ་ཡིས། །ཐུགས་རྗེས་ཕན་ཡོན་ཡང་དག་གསུངས། །ཆོས་དང་དད་པས་རྗེས་འབྲང་བའི། །དབང་མཛད་འདི་ཡི་ཕན་ཡོན་གཉིས། །རྒྱལ་བས་གསུངས་ཏེ་སྔ་མ་སྔ། །ཕྱི་མ་པོ་ནི་ཕྱི་མ་ཡིན། །ཡང་ན་ཕན་ཡོན་གཉིས་ཀ་ཡང་། །ཆོས་དང་དད་
པས་རྗེས་འབྲངས་པའི། །ཕྱི་མ་སྔ་མའི་བཏགས་པ་ཡིན། །ཕྱི་མ་ཡི་ནི་གཉིས་ཀ་དངོས། །སྟོབས་དང་ཕ་རོལ་ཕྱིན་ས་དང་། །མི་འཇིགས་ཡོན་ཏན་ལ་སོགས་པ། །རྣམ་ཐར་སྒོ་དང་མངོན་ཤེས་དང་། །གཟུངས་སྒོར་བཅས་པ་མཐའ་ཡས་སམ། །དེ་དག་མཐའ་ཡས་ཐབས་རྣམས་ཀྱི། །

བསྒྲུབ་པར་བྱ་བ་གང་ཡིན་པ། །དེ་ཕྱིར་མཐའ་ཡས་སྒོས་སྒྲུབ་པའི། །གཟུངས་ཞེས་བྱ་བར་བསྒྲགས་པ་ཡིན། །འདིར་ནི་དོན་གྱི་གཟུངས་ཡིན་པའམ། །ཡང་ན་གཟུངས་དོན་སྟོན་པ་ཡི། །ཡི་གེ་ཚོགས་ནི་འདི་ཉིད་ལ། །གཟུངས་ཞེས་བྱ་བར་དགོངས་པ་ཡིན། །ཐོས་སོགས་
ལས་བྱུང་ཤེས་པ་རྣམས། །ཆུང་དང་འབྲིང་ལ་སོགས་ལྡན་པ། །གཟུངས་ཀྱི་དོན་ནི་ཐོབ་འགྱུར་ནས། །བྱང་ཆུབ་སེམས་དཔར་འགྱུར་བ་གང་། །དེ་དག་ཕྱིར་མི་ལྡོག་ཉིད་དུ། །མཚུངས་དེ་དུས་ནི་ཐ་དད་དོ། །བྱང་ཆུབ་མྱུར་བ་ཉིད་གསུངས་དང་། །དེ་ནི་གཞན་ལ་ལྟོས་ཏེ་དགོངས། །
དམིགས་པ་ཐམས་ཅད་ཡོད་མིན་པ། །འདིར་ནི་དམིགས་པ་མེད་པར་བསྒྲགས། །དམིགས་པ་ཡོད་པ་མ་ཡིན་ཕྱིར། །དམིགས་པ་མེད་པའང་རིགས་ལྡན་མིན། །གང་ཚེ་འདི་ལ་དམིགས་མེད་པའི། །སྤྱོད་པ་ཆེན་པོ་ཡོད་གྱུར་ན། །དེ་ཉིད་ཡང་དག་ཤེས་དེའི་ཕྱིར། །དེ་ལས་མི་འགྲུབ་ཅི་
ཞིག་ཡོད། །ཁྱོད་ཀྱིས་ཉེས་པ་མ་ལུས་པ། །སྤོང་བ་སངས་རྒྱས་རྗེས་དྲན་ཉིད། །དེ་ཡི་གཉེན་པོ་ཡིན་པས་ན། །དེ་ཕྱིར་ཅི་བདེར་བསྒོམ་པར་གྱིས། །འཁོར་གསུམ་རྣམ་པར་དག་པའི་ཕྱིར། །སྦྱིན་པ་ལ་སོགས་མཆོག་དང་ལྡན། །ཡང་དག་རྫོགས་པའི་བྱང་ཆུབ་རྒྱུའི། །ཁྱད་པར་འདི་ལས་ཐོས་
པར་འགྱུར། །འདིར་ནི་ཐུབ་པའི་དབང་པོ་ཡིས། །ཡི་གེའི་དོན་དང་གཉི་ག་ཡི། །གཟུངས་ཀྱི་ཕན་ཡོན་བཀའ་སྩལ་ཏེ། །ཅི་རིགས་པར་ནི་སྦྱར་བར་ཟད། །ཡང་ན་ཕན་ཡོན་ཐམས་ཅད་ཀྱང་། །གཟུངས་རྣམས་ཀུན་ལ་བཤད་བྱ་སྟེ། །ཁ་ཅིག་དག་ནི་དུས་གཞན་ལས། །དགོངས་པ་ཙམ་
དུ་ཟད་པ་ཡིན། །མཉམ་ཉིད་ཅེས་བྱ་དུས་དང་དོན། །གང་ཟག་གཞན་ཞེས་བྱ་བ་ཡི། །དགོངས་པ་རྣམས་ཀྱིས་ཐུབ་པའི་གསུང་། །ཅི་རིགས་པར་ནི་རྟོགས་པར་བྱ། །གཟུངས་ཞེས་བྱ་འདིར་ཁ་ཅིག་ཏུ། །མགོན་པོ་ཐུགས་རྗེ་ཅན་གྱིས་ནི། །གཟུངས་ཞེས་པ་ནི་ཆེན་པོ་ཡི། །ཆེན་པོའང་
ཡིན་པར་བཀའ་སྩལ་ཏོ། །གསང་སྔགས་ཚིག་ནི་སྔ་མ་ཡིས། །བསྲུང་བའི་ཆོ་ག་འདི་བྱས་ལ། །གཙང་མས་འདུ་དང་ཆགས་སྤངས་ཤིང་། །ལུས་ཀྱི་འདུ་འཛི་སྤང་བྱ་སྟེ། །དེ་ནི་རྟོག་པའི་དྲ་བ་ཡི། །རྒྱུན་རྣམས་མ་ལུས་སྤངས་ན་ནི། །སངས་རྒྱས་རྗེས་སུ་དྲན་པ་ཙམ། །རབ་ཏུ་བསྒོམ་པ་

གུས་བྱས་ལས། །སེམས་ནི་རྩེ་གཅིག་བྱས་ནས་སུ། །སངས་རྒྱས་རྗེས་སུ་དྲན་པ་ནི། །དེ་ནི་ཆོ་ག་བཞིན་དུ་བསྒོམ། །སྐྱོ་བར་གྱུར་ན་བློ་ཅན་གྱིས། །དེར་གནས་སེམས་ཀྱིས་དུས་བསྟུད་དོ། །བློ་ཅན་དེ་ལྟར་སྒོམ་བྱེད་པ། །དེ་ལ་ཞག་བདུན་ཐ་མར་ནི། །སངས་རྒྱས་བྱེ་བ་བརྒྱད་ཅུ་རྣམས། །
དེ་ཡི་འོག་ཏུ་གཟུངས་སྦྱིན་མཛད། །གསང་སྔགས་ཚིག་ནི་རེ་རེ་ཞིང་། །སངས་རྒྱས་བྱེ་བས་བྱིན་བརླབས་ལ། །དེས་ཀྱང་སྔར་ནི་དེ་དག་གིས། །བཟླས་ནས་བསྲུང་སོགས་ཕུན་ཚོགས་བྱས། །དེ་ཕྱིར་སངས་རྒྱས་བྱེ་བ་ནི། །བརྒྱད་ཅུས་དེ་ལ་གཟུངས་སྦྱིན་མཛད། །ཡང་ན་དགུ་བཅུ་
ལས་ཐོས་ལྟར། །བསྒོམས་མཐུ་དེ་ནི་འདི་འདྲའོ། །གཟུངས་སོགས་བསམ་པ་བསམ་བྱ་ཡིན། །གཟུངས་མེད་སོགས་པ་བསམ་བྱ་མིན། །ཡང་ན་སྤྲུལ་པ་བསམ་བྱ་ཡིན། །ལོངས་སྤྱོད་རྫོགས་པ་བསམ་བྱ་མིན། །ཡང་ན་བསམ་བྱ་བསམ་བྱ་མིན། །དངོས་བསམ་བསམ་བྱ་བསམ་བྱ་མིན། །གཟོད་ནས་མ་སྐྱེས་
པས་མེད་ཕྱིར། །བསམ་པ་དེ་དག་བསམ་མི་བྱ། །ཆོས་དབྱིངས་སོམས་ཤིག་དེ་ལ་ཡང་། །ལོག་པར་བསམ་པར་མི་བྱའོ། །དེ་ལྟར་ཞག་བདུན་སེམས་ན་ནི། །དེ་ཡི་འོག་ཏུ་གཟུངས་ཐོབ་འགྱུར། །བློ་ལྡན་ཅི་འདྲ་གང་དུ་དང་། །ཇི་ལྟར་གནས་དང་གང་བསྒོམས་དང་། །གང་བྱས་པས་
ནི་ཐོབ་འགྱུར་བ། །དེ་ནི་བཞི་པ་རྣམས་ཀྱིས་བསྟན། །ཁྲིམས་ལྡན་དེ་ཡི་མི་མཐུན་ཕྱོགས། །གཉིས་གྲོལ་དེ་ཡི་འཕེལ་བྱེད་ལྡན། །ཉེས་པ་དང་ནི་ཕན་ཡོན་རྣམས། །བསྟན་པས་དེ་ལ་འཛུད་པར་བྱེད། །སྔར་བསྟན་པ་ཡི་དོན་ཉིད་ནི། །ཆོས་ཀྱི་རྗེས་འབྲངས་ཆེད་དུ་སྟེ། །རིགས་
པ་ཕན་ཡོན་བྱེ་བྲག་གིས། །ཚིགས་བཅད་རྣམས་ཀྱིས་ཡང་བསྟན་ཏོ། །དགོན་སོགས་གནས་ཤིང་ཟབ་མོ་ལ། །ཆོས་རྣམས་ལ་ནི་ལེགས་པར་སྤྱོད། །རྙེད་དང་བཀུར་སྟི་ཚིགས་བཅད་ལ། །ལྷག་པར་ཆགས་མེད་བརྟུལ་ཞུགས་ཅན། །རྟག་ཏུ་སྡུག་པའི་དངོས་པོ་ཀུན། །
འབྲས་བུ་ལ་ནི་མི་ལྟའམ། །འཛིན་མེད་སེམས་ཀྱིས་གཏོང་བྱེད་པས། །གཟུངས་འདི་ཐོབ་པར་འགྱུར་བ་ཡིན། །དང་པོ་གནས་ཡིན་དེ་ནས་ལས། །དེ་ནས་རྙེད་སོགས་ཚོལ་བ་སྤོང་། །དེར་ཡང་མ་ཟད་ཐམས་ཅད་ལ། །མི་ལྟ་བར་ཡང་གཏོང་བར་བྱེད། །དོན་གཅིག་

རྟོགས་ནས་ཀུན་ཤེས་ན། །བརྒྱད་ཅེས་བྱ་བས་ཅི་ཞིག་བྱ། །ཡི་གེ་སོ་སོའི་དོན་ཤེས་ན། །འདི་ཡང་ཧ་ཅང་ཉུངས་པ་ཡིན། །བསྟན་བྱ་སྟོན་པ་ཉེན་པ་ཡིན། །ངོ་བོ་དེ་ཉིད་རྣམ་གསུམ་བསྟན། །བརྒྱ་ལས་བསྟན་བྱ་གང་ཡིན་དེ། །རྣམ་གཉིས་ཐམས་ཅད་རྣམ་པ་གཅིག །
ཡི་གེ་འབྲུ་བརྒྱད་འདི་དག་ནི། །བྱང་ཆུབ་སེམས་དཔའ་མཁས་ལྡན་པ། །བརྒྱད་པོ་དག་གི་ཏིང་འཛིན་རྣམས། །སྨོས་པ་ཡིན་པར་ཐུབ་པས་གསུངས། །དེ་ཡི་དོན་ནི་བསྒོམས་པ་ལ། །དེ་ཀུན་མངོན་དུ་ཕྱོགས་པར་གནས། །གཟུངས་ནི་ཐོབ་པར་བྱ་བའི་ཕྱིར། །ཀུན་དུ་བརྩོན་པར་རབ་ཏུ་
བྱེད། །བྱང་ཆུབ་སེམས་དཔའ་རྣམས་དང་ནི། །སངས་རྒྱས་རྣམས་དང་གནོད་སྦྱིན་རྣམས། །རིམ་བཞིན་བཀོད་པའི་དཀྱིལ་འཁོར་འདི། །རྨི་ལམ་དུ་ནི་བསྟན་པ་ཡིན། །པདྨའི་རྒྱལ་པོ་དཀར་པོ་ཞིག །འདབ་མ་བརྒྱད་པ་ཡིད་དུ་འོང་། །དེ་དབུས་ཐུབ་པ་མཚུངས་མེད་པ། །བུམ་པ་དང་ནི་
བཅས་པར་གཞག །འདབ་བརྒྱད་དག་ལ་ཐུབ་པའི་སྲས། །རྣམ་པར་སྣང་བྱེད་སོགས་བརྒྱད་ཀུན། །ཐུབ་པ་དང་ནི་རང་རང་གི། །ཡི་གེ་ས་བོན་ལྡན་པར་དགོད། །འདབ་མ་རྣམས་ཀྱི་བར་དག་ཏུ། །གནོད་སྦྱིན་བརྒྱད་གཞག་ཆོ་ག་གཅིག །ཆོ་ག་གཞན་ཡང་དེ་བཞིན་དུ། །ཚོན་ཕྱེ་སྣ་ལྔས་
གྲུ་བཞིར་བྲི། །མཁས་པས་དེ་དབུས་ཐུབ་པ་ནི། །པདྨ་དཀར་པོ་འདབ་བརྒྱད་ལ། །བུམ་པ་ཆུས་བཀང་ལྡན་པར་གཞག །དེ་བཞིན་ཐུབ་སྲས་དེ་དག་ཀྱང་། །པདྨ་གདན་བཅས་ཆུ་བུམ་བཅས། །ཕྱོགས་བཞི་དག་ཏུ་གཉིས་གཉིས་དགོད། །ཕྱོགས་ཀུན་བྱང་ཆུབ་སེམས་དཔའ་ཡི། །བར་དུ་གནོད་
སྦྱིན་དེ་དག་དགོད། །དཀར་པོའི་སྟན་ལ་འཁོད་རྣམས་སོ། །སློབ་མ་གཙང་མ་ཡོན་ཏན་ཅན། །གཟུངས་བསྒོམས་རྣལ་འབྱོར་གྲུབ་འདོད་ལ། །བུམ་པ་དེ་དག་གིས་དབང་བསྐུར། །དེ་ལྟར་རྨི་ལམ་བསྟན་པ་ཡིན། །ཆོ་ག་བདག་གིས་གསལ་བརྗོད་ལ། །བདག་ཉིད་ལེགས་དྲན་བྱ་ཕྱིར་
གྱིས། །མངོན་པའི་ང་རྒྱལ་ཅུང་ཟད་མེད། །དམ་པའི་དོན་དུ་སྟོང་པ་དང་། །སྟོང་མིན་ལ་སོགས་ཆོས་རྣམས་ཀུན། །ངོ་བོ་ཉིད་མེད་རྣམ་ཤེས་པ། །ཁོང་དུ་ཆུད་ཕྱིར་དང་པོར་བཞེད། །ལོངས་སྤྱོད་རྫོགས་པའི་སྐུ་དང་ནི། །སྤྲུལ་པའི་སྐུ་གཉིས་ལས་སྐུར་བསྟན། །དེ་གཉིས་འཇིག་རྟེན་དོན་

འབྱོར་པ། །མ་ལུས་ཕྱིར་ནི་མཛད་ཕྱིར་རོ། །ཀུན་རྫོབ་ཏུ་དང་དོན་དམ་པར། །མཚན་དང་མཚན་མེད་ལ་སོགས་པའི། །སྐུ་གཉིས་རྣམ་པར་ཤེས་པ་ནི། །ཁོང་དུ་ཆུད་ཕྱིར་གཞན་དུ་བཞེད། །བྱིས་པ་དང་ནི་མཁས་པའི་ཆོས། །དྲི་མ་ཅན་དང་དྲི་མ་མེད། །མི་སྟོང་མིན་སོགས་སྟོང་མིན་སོགས། །ཇི་
བཞིན་གཉིས་ནི་བསྟན་པ་ཡིན། །དེ་ཡི་འཇུག་པར་རྣམ་པར་ཤེས། །ཁོང་དུ་ཆུད་པ་མངོན་སུམ་བྱེད། །གསུམ་པ་འདི་ནི་མཁས་པ་ཡིས། །དེ་ལྟ་བུར་ནི་ཤེས་པར་བྱ། །སྐྱེ་སོགས་སྐྱེ་བ་མེད་སོགས་ཀྱིས། །འཇུག་པ་སྐྱེ་བ་མེད་པ་དང་། །འགག་མེད་ཤེས་པ་གང་ཡིན་དེ། །ཁོང་དུ་ཆུད་
ཕྱིར་གཞན་དུ་བཞེད། །སྔ་མ་ཇི་ལྟར་སྣང་བར་ཏེ། །ཕྱི་མ་དམ་པའི་དོན་དུ་ཡིན། །དེ་ལྟར་གང་གང་དོན་ཤེས་པ། །ཁོང་དུ་ཆུད་ཕྱིར་ལྔ་པར་བཞེད། །ཡང་ན་ཡང་དག་མི་སྣང་ཕྱིར། །དེ་གཉིས་ངོ་བོ་ཉིད་མེད་ཉིད། །དེ་ལྟར་ཡང་དག་དོན་ཤེས་པ། །ཁོང་དུ་ཆུད་ཕྱིར་ལྔ་པར་བཞེད། །གཟུངས་
ཀྱི་ཆོས་ཀྱི་རྣམ་གྲངས་ཀྱི། །སྟོང་པ་ཉིད་ལ་སོགས་པ་ཡི། །ཆོས་ཀྱི་དབྱིངས་ནི་འདི་ཤེས་པ། །རྟོགས་ཕྱིར་དྲུག་པ་འདིར་བཞེད་དོ། །ཡང་ན་གཟུངས་ཆོས་རྣམ་གྲངས་ཀྱིས། །སྟོང་པ་ཉིད་ལ་སོགས་པ་ཉིད། །ཆོས་དབྱིངས་ཡིན་པར་རྣམ་ཤེས་པ། །ཁོང་དུ་ཆུད་ཕྱིར་དྲུག་པར་བཞེད། །ངོ་བོ་ཉིད་
སོགས་རྣམ་རྟོག་པ། །སྤང་བའི་ཐབས་ནི་གདུལ་རྣམས་ལ། །བསྟན་པར་བྱ་ཕྱིར་མགོན་རྣམས་ཀྱིས། །སྟོང་ཉིད་ལ་སོགས་བསྟན་པ་མཛད། །ཞི་གནས་ལ་སོགས་ཉིད་ཡིན་ཞེས། །ཆོས་རྣམས་ཐམས་ཅད་མདོར་སྡུད་དེ། །དེ་དག་དེ་བཞིན་ཉིད་ཤེས་པ། །ཁོང་དུ་ཆུད་ཕྱིར་བདུན་
པར་བཞེད། །ཀུན་རྫོབ་ཏུ་ནི་ཆོས་རྣམས་ཀུན། །སྐད་ཅིག་པ་གང་དེ་དག་ནི། །གཟོད་ནས་ཞི་ཕྱིར་དོན་དམ་དུ། །ཟད་མེད་ལ་སོགས་བྱེ་བྲག་བསྟན། །མངོན་ཞེན་རྣམ་གསུམ་སྤང་བའི་ཕྱིར། །ཟད་མེད་ལ་སོགས་བྱེ་བྲག་གམ། །ཡང་ན་ཁམས་ཀྱི་བྱེ་བྲག་གིས། །རྣམ་པ་གསུམ་དུ་གསུངས་
པ་ཡིན། །ཆོས་ཀུན་མྱ་ངན་འདས་པ་གང་། །དེ་འདིར་དེ་བཞིན་ཉིད་དུ་བསྟན། །དེ་ལ་འཇུག་པ་རྟོགས་པ་སྟེ། །དེ་རྟོགས་ཕྱིར་ན་བརྒྱད་པར་བཞེད། །དེས་ནི་བསོད་ནམས་སྐྱེད་པ་ན། །གཟུངས་སམ་ཡང་ན་ཡི་གེ་ཡི། །དོན་ལ་གང་གིས་འཇུག་འགྱུར་བ། །དོན་རྟོགས་དེ་ནི་གསུམ་དུ་བསྟན། །

ཐོས་པར་འདོད་པས་ཉིན་རེ་ཞིང་། །ལྷག་པར་རྗེས་སུ་དྲན་པར་བྱེད། །གཟུངས་ནི་བསོད་ནམས་ཆུང་ངུ་ཡིས། །ཤིན་ཏུ་ཐོས་པར་མི་འགྱུར་རོ། །བྱེ་བྲག་ལ་ནི་དགོངས་པའི་ཕྱིར། །བརྩོན་པ་ཡི་ནི་ཚིག་ཀྱང་གསུངས། །དེ་ཕྱིར་ཁྲུས་སོགས་སྔར་བྱས་ལ། །ཀློག་པ་ལ་སོགས་
དེ་དག་བྱ། །དེ་ནི་སྦྱིན་པ་ལ་སོགས་ལ། །རྟག་ཏུ་ཡང་དག་དགའ་སོགས་དང་། །དེ་ནི་བདག་མེད་ལ་འཇུག་བྱ། །ཡང་ན་དེ་དག་ཉིད་ལ་འཇུག །གཟུངས་ཀྱི་ཆོས་ཀྱི་རྣམ་གྲངས་ལ། །ཞུགས་པ་དག་ལ་སོགས་པ་དེ། །ཡང་དག་དགའ་བ་ལ་སོགས་བྱ། །ཡང་ན་གཟུངས་ལ་
གཞུག་པར་བྱ། །དོན་ནི་སྔར་ཡང་བཤད་མོད་ཀྱི། །ཆོས་ཀྱི་རྗེས་སུ་འབྲང་བའི་ཕྱིར། །རིགས་པ་ཕན་ཡོན་བྱེ་བྲག་གིས། །ཚིགས་སུ་བཅད་པ་གཉིས་ཀྱིས་བསྟན། །གཟུངས་ལ་བརྩོན་པའི་རྣལ་འབྱོར་པ། །ཐོབ་བྱ་མ་ཐོབ་བར་དུ་ཡང་། །ཕན་ཡོན་རྣམ་པ་བཞི་པོ་དག །བཞི་
པོ་གསུམ་གྱིས་ཐོབ་པར་འགྱུར། །སྔོན་འབྱུང་བ་ནི་མདོར་བསྡུ་ན། །རྣམ་པ་དགུར་ནི་བསྟན་པར་མཛད། །དེར་ཡང་སོ་སོར་དབྱེ་བ་ནི། །རྣམ་པ་མང་པོའི་དབྱེ་བ་ཡོད། །ཆགས་བྲལ་སློབ་དང་མི་སློབ་དང་། །བསེ་རུ་ལ་སོགས་རྒྱལ་བའི་སྲས། །དེ་དག་གིས་ཤེས་ལམ་ལས་འདས། །གྲངས་མེད་ལ་སོགས་བསྟན་
པ་ཡིན། །གཞལ་བྱའི་དངོས་པོ་བྱེ་བྲག་དག །གོ་བྱེད་གྲངས་དང་བསྟོད་གཞལ་དང་། །ཀུན་ནས་གཞལ་དང་ཚད་ཅེས་བྱ། །དེ་དག་མེད་ཕྱིར་དེ་སྐད་བསྟན། །སྔ་མ་སྔ་མ་སྒྲུབ་པ་ཡི། །གཏན་ཚིགས་ཕྱི་མ་ཕྱི་མ་ཡིན། །ཡང་ན་ལ་ལ་སྔར་མ་ཐོས། །གང་ཡང་རུང་བས་དོན་དེ་སྟོན། །གདུལ་
བྱའི་དོན་ནི་རབ་སྒྲུབ་ཕྱིར། །ཡེ་ཤེས་སྤངས་པའི་རང་བཞིན་ཉིད། །ཅི་འདྲ་དེ་ནི་རྒྱུ་དང་བཅས། །ཕུན་སུམ་ཚོགས་གཉིས་བསྟོད་པ་གསུངས། །སྟོན་པ་རྣམ་གཉིས་གང་གིས་ཐོབ། །ཅི་འདྲ་དེ་ཡི་ལམ་རྣམ་གཉིས། །གང་དག་ལ་ནི་དེ་གནས་དང་། །དེ་དང་ལྡན་པར་སྟོན་པར་བྱེད། །
འཇིག་རྟེན་ཚེ་ནི་དཔག་མེད་ཚེ། །ཐུབ་པ་ཆེན་པོ་སྐྱེས་པ་དེ། །ཡོངས་སུ་མྱ་ངན་འདས་པ་ཡི། །དུས་བབ་པ་ནི་དེ་འདྲའོ། །དེ་ཡི་རྒྱུ་ནི་སྤངས་པའི་ཕྱིར། །དེས་ནི་རྨུགས་གཉིད་དེ་མ་བསྟེན། །དངོས་པོའི་ངོ་བོ་ཉིད་ཤེས་པས། །དགའ་བ་རྣམ་གསུམ་སྤང་བར་བྱ། །འཇིག་རྟེན་ཁམས་གཞན་སངས་

རྒྱས་རྣམས། །སྣང་བ་ཐོབ་པ་དེས་མཐོང་སྟེ། །ཆོས་བསྟན་པ་ནི་ཐོས་སོ་ཞེས། །བྱས་པའི་ཆོས་ལ་ཉེས་པ་མེད། །ཡང་ན་བློ་བཟང་འཇིག་རྟེན་ཁམས། །འདི་གཞན་སངས་རྒྱས་བཞུགས་པ་མཐོང་། །བསྟན་པ་འབྱུང་ལ་བརྟེན་ནས་ནི། །ཅིག་ཅར་སྐྱེ་བ་འགག་པ་ཡིན། །རྫོགས་པའི་
སངས་རྒྱས་ཐམས་ཅད་ཀྱིས། །བསྟན་དེ་དགུ་བཅུ་ལས་ཐོབ་པ། །དེས་ན་ཆོས་ཀྱི་དེ་ཁོ་ན། །བསྟན་པ་ཐབས་དང་བཅས་པ་བརྗོད། །འདི་ལས་ཆོས་ནི་ནན་ཏན་དུ། །ལེགས་སུ་ཉམས་སུ་ལེན་པར་བསྟན། །ཡང་ན་འཛིན་པ་ལ་སོགས་པ། །ཡོན་ཏན་བསྐྱེད་པར་འགྱུར་བ་ཡིན། །སངས་
རྒྱས་གཞན་དག་མ་ཡིན་ཞེས། །དེ་ཡི་མཚན་ནི་སྨོས་པ་མཛད། །དེས་ན་ཐུབ་པ་བཞུགས་པ་ནི། །འཇིག་རྟེན་ཕན་ཕྱིར་ཉིད་དུ་བསྟན། །སྡོམ་བརྩོན་ཚུལ་ཁྲིམས་ལྡན་པ་དང་། །གཞན་དོན་གཞོལ་བས་རྩོལ་བ་ལས། །གཟུངས་ནི་ཐོབ་པར་ཐུབ་པ་དེས། །རབ་ཏུ་བྱུང་དང་ལྡན་པས་
བསྟན། །མོད་ལ་ཞེས་བྱ་དེ་མ་ཐག །ཡང་ན་ཅིག་ཅར་འབྱུང་བ་ཡིན། །དགུ་བཅུ་ཞེས་བྱ་ལ་སོགས་ཚིག །དེས་ནི་དུས་གཞན་དགོངས་པ་ཡིན། །ཕུལ་ཕྱིན་ཡོན་ཏན་ལྡན་པ་ཡི། །གཟུངས་ནི་ཐོབ་པར་འགྱུར་བའི་ཕྱིར། །བདེ་བར་གཤེགས་པའི་སྲས་པོ་དེ། །གཟུངས་ཐོབ་རྣམས་
ཀྱི་མཆོག་ཡིན་ནོ། །ཡེ་ཤེས་ཁྱད་འཕགས་འབྲེལ་པ་དང་། །ཡོན་ཏན་ཕུལ་ཕྱིན་ལྡན་པའི་ཕྱིར། །དེ་ནི་གཟུངས་ཚིག་ལྡན་རྣམས་ཀྱི། །མཆོག་ཏུ་རྒྱལ་བ་རྣམས་ཀྱིས་བསྟན། །སྤོབས་པ་རྒྱུན་མི་ཆད་པ་རྣམས། །སོ་སོ་ཡང་དག་རིག་ཐོབ་རྣམས། །དེ་དག་ཕུལ་ཕྱིན་ལྡན་པའི་
ཕྱིར། །དེ་ནང་རྒྱལ་སྲས་དེ་མཆོག་གོ། །དེ་དག་གིས་གསུངས་ཚུལ་ཁྲིམས་ནི། །བསྒྲུབ་པ་མཉེས་བྱེད་རུང་བར་འདོད། །བསྐལ་པ་གསུམ་དུ་ཚོགས་རྣམས་ནི། །ཡོངས་སུ་རྫོགས་བྱས་བྱང་ཆུབ་ཐོབ། །དངོས་པོ་སྟོང་པས་འདོད་མི་བྱ། །ཚད་མ་དང་ཡང་འགལ་བའི་
ཕྱིར། །མི་མཐུན་བློ་ནི་མི་བསྐྱེད་ཅིང་། །ཅིས་ཀྱང་ཐེ་ཚོམ་མི་བྱའོ། །ཐོས་པ་ལ་སོགས་ཤེས་པའམ། །ཡང་ན་ཚད་མ་གསུམ་པོ་ཡིས། །ཡོངས་སུ་བཅད་པར་མི་རུང་ཕྱིར། །སོམ་ཉི་ལ་སོགས་ཚིག་གསུམ་སྨོས། །སྤྱིར་བསྟན་པ་ནི་ཡོད་མོད་ཀྱི། །འོན་ཀྱང་བདག་གིས་འབྲས་

བུར་བཤད། །འདི་ནི་མཚོན་པ་ཁོ་ན་སྟེ། །མདོ་ཡི་ཚིག་གིས་མངོན་པ་ཡིན། །དེ་ནི་མི་ལྡོག་ས་ཡི་དང་། །རྫོགས་པའི་སངས་རྒྱས་མཉེས་བྱ་ཡི། །རྒྱུར་འགྱུར་བས་ན་དེ་ཡི་ཕྱིར། །དེ་ཡིས་བྱང་ཆུབ་མྱུར་དུ་ཐོབ། །དོན་དང་ཡི་གེ་གཉིས་ཀ་ལས། །འདི་ནི་ཀུན་ཆུབ་བྱེད་པར་
བསྟན། །ཐོས་བསམ་ལ་སོགས་ཐམས་ཅད་དང་། །ཡང་ན་ཡི་གེར་འདྲི་སོགས་ཀུན། །རིགས་པས་འགལ་བ་མ་ཡིན་དང་། །ཡང་ན་ཇི་སྐད་ཐོས་པ་བཞིན། །ཡིད་ལ་བྱེད་པ་གང་ཡིན་པ། །དེ་ནི་ཚུལ་བཞིན་ཡིད་བྱེད་ཡིན། །དོན་དང་ཡི་གེའི་སྒོ་ནས་འདི། །རྒྱ་ཆེར་ཡང་དག་སྟོན་པར་
བྱེད། །ཡང་ན་རྣམ་པ་ཐམས་ཅད་དུ། །གཟུངས་འདི་ཡང་དག་སྟོན་པར་བྱེད། །དེ་ཡི་དེ་ནི་བདག་ཉིད་ཀྱིས། །ཚད་མས་ཤེས་པར་མི་ནུས་ལ། །གཞན་དག་གིས་ནི་བསྟན་ན་ཡང་། །དེ་ནི་བསམ་པར་མི་ནུས་སོ། །ཤེས་བྱ་མ་ལུས་མཁྱེན་པའི་ཕྱིར། །འདྲེན་པ་རྣམས་ཀྱིས་དེ་ཚད་དེ། །མངོན་
སུམ་ཡོངས་སུ་མཁྱེན་པ་དང་། །དགོངས་པར་ཡང་ནི་སྤྱོད་པ་ཡིན། །བློ་རྨོངས་རྣམས་དང་མ་འདུས་དང་། །སྐྱེ་བོ་བློ་ནི་གཡེངས་རྣམས་ཕྱིར། །དོན་དེ་ཚིགས་སུ་བཅད་རྣམས་ཀྱིས། །ཐུབ་པ་ཡིས་ནི་བཟླས་ཏེ་གསུངས། །གཞི་དང་རྫས་བཟང་མང་པོ་དང་། །ཡོངས་སུ་བཀང་བའི་
བྱེ་བྲག་གིས། །སྦྱིན་པར་བྱ་བའི་ཁྱད་ལས་འདི། །སྦྱིན་པ་ཁྱད་པར་འཕགས་པར་བསྟན། །གཟུངས་ཀྱི་ཆོས་ཀྱི་རྣམ་གྲངས་ལ། །མངོན་པར་བརྩོན་པ་གང་ཡིན་པ། །དེ་ནི་གཟུངས་ལ་བརྩོན་ཞེས་བྱ། །དེ་ལྟར་སྐབས་ཀྱིས་མངོན་པ་ཡིན། །ལུས་དང་ངག་དང་བློ་གྲོས་ལ། །སྟོབས་
དང་གཟི་བརྗིད་རབ་རྣོ་བ། །རིམ་བཞིན་གཟི་བརྗིད་ཤེས་པར་བྱ། །ལུས་ཀྱི་སྒྲ་དེས་ལུས་གནས་བསྡུ། །ལུས་ནི་རྣམ་གསུམ་བྱེ་བྲག་གིས། །བསྲུང་སྐྱོབ་སྦེད་གསུངས་ཡང་ན་ནི། །གང་ཕྱིར་གནམ་བསྐོས་ལ་སོགས་པའི། །བྱེ་བྲག་གིས་ནི་གནོད་པ་གསུམ། །ཡང་ན་བདག་
གཞན་རྐྱེན་གྱུར་ལས། །གནོད་པ་རྣམ་གསུམ་ཤེས་པར་བྱ། །སེམས་ཅན་སེམས་ཅན་མིན་བགྲང་བའི། །བྱེ་བྲག་གིས་ནི་གཞན་གཉིས་བསྟན། །མངོན་དུ་ཕྱོགས་པར་བྱ་བ་གཉིས། །འོང་བར་བྱ་བའི་ཕྱིར་གསུངས་ཏེ། །གཅིག་གིས་སྤྲོ་བར་བྱ་བ་བསྟན། །གཉིས་ཀྱིས་དེ་དག་

གུས་པ་སྟེ། །གནོད་སྦྱིན་རྣམས་ནི་འདོང་བྱའི་ཕྱིར། །འཆག་པ་བསུ་བའི་བསམ་པར་བསྟེན། །དེ་ལྟར་མིན་དུ་ཟིན་ན་ནི། །དེ་ཡིས་ལྷག་པ་ཅི་ཞིག་བསྟན། །དེ་ལྟར་དོན་དུ་གཉེར་ཤེས་ནས། །འོང་བར་སྤྲོ་བའི་སེམས་ལྡན་རྣམས། །སྤྲོ་བའི་མཐུ་ལ་དམིགས་ནས་ནི། །དེ་དག་ངེས་པར་འོང་བར་
འགྱུར། །གནོད་སྦྱིན་དེ་དག་ལྷགས་ནས་ནི། །བརྟན་བཞིན་བརྟུལ་ཞུགས་སྤྱོད་དེ་ལ། །མྱུར་དུ་གཟུངས་ཀྱི་སྒོ་རྣམས་ནི། །ཐེ་ཚོམ་མེད་པར་སྟོན་པར་བྱེད། །ཡན་ལག་ཀུན་གྱི་གཙོ་བོ་བཞིན། །བསྙད་པས་དེ་དག་བློ་དགའ་བས། །ལྷགས་པ་ཡིན་ཏེ་དེ་དག་ལས། །འབྲས་བུར་འགྱུར་བར་ཐེ་ཚོམ་
མེད། །ཡི་གེ་བརྒྱད་པོ་དེ་དག་ནི། །བྱང་ཆུབ་སེམས་དཔའ་བརྒྱད་པོ་ཡིན། །དེ་ཕྱིར་དོན་དེ་བསྒོམས་པ་ལ། །དེ་དག་ཐམས་ཅད་ཕན་འདོགས་སོ། །གཞན་ལ་ཕན་འདོགས་ཞུགས་པའི་ཕྱིར། །སྨོན་ལམ་སྟོབས་ཀྱིས་དེ་དག་རྣམས། །དེ་དང་དེར་ནི་སྐྱེད་བྱེད་པ། །གང་ཡིན་དེ་ལ་ཐེ་ཚོམ་མེད། །
སེམས་དཔའ་ཞེས་ནི་གསུངས་པ་འདི། །སེམས་ནི་སྙིང་རྗེས་བརླན་རྣམས་ཀྱིས། །ཕན་པར་བྱ་བ་འདོད་པའི་བློས། །སྙིང་བརྩེ་ནས་ནི་བལྟས་པ་ཡིན། །རྒྱལ་བའི་སྲས་པོ་དེ་དག་ནི། །ཕན་པ་ཉེ་བར་བསྒྲུབ་པ་དང་། །གནོད་པ་མེད་པར་སྤང་བ་ཡིས། །གཟུངས་ཐོབ་བྱ་ཕྱིར་མངོན་
པར་བརྩོན། །གཟུངས་ལ་བརྩོན་བྱེད་གང་ཞེ་ན། །གང་ཞིག་ཉན་སེམས་རྗེས་ཡི་རང་། །འདྲི་དང་ལུང་ནོད་འདོན་ལ་སོགས། །སྟོན་པའི་ཚུལ་གྱིས་བརྩོན་བྱེད་པའོ། །གཟུངས་བསྐྱེད་ཆོ་ག་རྒྱལ་བ་ཡིས། །བདག་གཞན་ལྟོས་ལས་བཟླས་ཏེ་གསུངས། །སྟོན་པ་ལ་སོགས་བྱེ་བྲག་
གིས། །གཞན་ནི་རྣམ་པ་གསུམ་དུ་འགྱུར། །ཆོས་དང་ཟང་ཟིང་བྱེ་བྲག་ལས། །བགོ་བཤའ་རྣམ་པ་གཉིས་སུ་བསྟན། །ཆུང་དང་ཉུང་དང་མང་པོ་ནི། །རྫས་དང་གྲངས་དང་གཉི་གར་བསྟན། །གཟུངས་དོན་བསྟན་པ་ཡིན་མོད་ཀྱི། །འོན་ཀྱང་སྤྱིར་ཡང་བསྟན་པ་མཛད། །བྱས་གཟོ་
ལ་སོགས་གཞན་དུ་ཡང་། །བྱ་བའི་ཕྱིར་ན་གསུངས་པ་ཡིན། །འདིར་ནི་གཙོ་བོར་ཐུབ་པ་ཡིས། །འབྲས་བུ་གཉིས་སུ་བསྟན་པ་ཡིན། །མཐོ་རིས་ལ་སོགས་འབྲས་བུ་ནི། །གཞན་བསྟན་པ་ལས་རྟོགས་པར་འགྱུར། །བདག་དང་གཞན་དོན་རིམ་བཞིན་དུ། །ཞུས་པ་དང་

ནི་དགོས་པ་ལྟར། །ཡང་ན་དོན་ནི་ཆེ་བའི་ཕྱིར། །ཚིག་གཉིས་ཀྱིས་ནི་བཟླས་ཏེ་ཞུས། །འདི་ནི་གོ་རིམས་ཁོ་ན་བཞིན། །རྒྱུ་དང་འབྲས་བུའི་དངོས་པོ་ཡིས། །མིང་ནི་རྣམ་པ་བཞིར་མཛད་དེ། །དེ་ཕྱིར་མིང་ཉུང་ལྷག་པ་མེད། །ལུགས་འབྱུང་ལུགས་
འབྱུང་མ་ཡིན་ལས། །སྒྲུབ་དང་བསྒྲུབ་བྱའི་དངོས་པོ་ཡིས། །མིང་ནི་རྣམ་པ་བཞིར་མཛད་ཏེ། །དེ་ཕྱིར་མི་ཉུང་ལྷག་པ་མེད། །ཡང་ན་ཡོན་ཏན་ཐམས་ཅད་དང་། །ཡེ་ཤེས་ཕུན་སུམ་སྤོང་ཕུན་སུམ། །ཁྱད་པར་འཕགས་པ་ཕུན་སུམ་གྱི། །རྟེན་ནི་དེ་ཉིད་ཡིན་ཕྱིར་རོ། །ཐུབ་པའི་
གསུང་ལས་འཇིག་རྟེན་གྱིས། །དོན་ཆེན་སྐྱེས་པ་མཐོང་གྱུར་ནས། །སེམས་ནི་རངས་པར་གྱུར་པའི་ཕྱིར། །མཁས་རྣམས་མངོན་པར་བསྟོད་པར་བྱེད། །ཐུབ་པའི་གསུང་ལས་རྐྱེན་རྐྱེན་དུ། །ཁྱད་པར་ཐོབ་པར་གྱུར་ནས་ནི། །ཡིད་ཀྱང་དགའ་བར་གྱུར་པའི་ཕྱིར། །མཁས་པས་ཁ་ཅིག་
མངོན་པར་བསྟོད། །གསལ་ཞིང་དྲི་མེད་ཡོན་ཏན་ལྡན་པ་ཤིན་ཏུ་གཏིང་དཔག་དཀའ་བས་ཉམས་དགའ་གཟུངས་སྔགས་འདི། །བདག་འདྲ་ཉོན་མོངས་ཤིན་ཏུ་བློ་ཞན་གཞན་དུ་བདག་གིས་ཆེ་ལོང་རྣམ་པར་ཕྱེ་བ་ཡི། །བསོད་ནམས་ཕུང་པོ་ཕལ་ཆེན་རྣམས་ལ་ཕན་པ་རྙེད་པའི་མཐུ་
ཅན་ཐོས་པ་གང་ཡིན་པ། །དེ་དག་ཐམས་ཅད་ཀྱིས་ནི་འགྲོ་བ་འདི་དག་ཀུན་གྱིས་ཡེ་ཤེས་སྙིང་པོ་རྟག་ཏུ་འཆང་བར་ཤོག །འཕགས་པ་སྒོ་མཐའ་ཡས་པ་བསྒྲུབ་པའི་གཟུངས་རྣམ་པར་བཤད་པ་ཚིག་ལེའུར་བྱས་པ། སློབ་དཔོན་ཡེ་ཤེས་སྙིང་པོས་མཛད་པ་རྫོགས་སོ།། །།
རྒྱ་གར་གྱི་མཁན་པོ་པྲཛྙཱ་བརྨ་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།༄༅། །རྒྱ་གར་སྐད་དུ། ཨཱརྱ་ཨ་ནནྟ་མུ་ཁ་ནིརྷ་ར་དྷཱ་ར་ཎི་ཊཱི་ཀཱ། བོད་སྐད་དུ། འཕགས་པ་སྒོ་མཐའ་ཡས་པ་སྒྲུབ་པའི་
གཟུངས་ཀྱི་རྒྱ་ཆེར་འགྲེལ་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྫོགས་སངས་རྒྱས་དང་ཆོས་དང་ནི། །དགེ་འདུན་ལ་ཡང་ཕྱག་འཚལ་ནས། །མཐའ་ཡས་སྒོ་སྒྲུབ་གཟུངས་ཀྱི་དོན། །མདོར་བསྡུས་རྣམ་པར་དབྱེ་བར་བྱ། །རྫོགས་པའི་སངས་རྒྱས་སྲས་དང་

བཅས་པ་ཤེས་བྱ་ཀུན་གྱི་ཡང་དག་ཐུགས་སུ་ཆུད་གྱུར་པའི། །སྤྱོད་ཡུལ་ཟབ་མོའི་གཟུངས་འདི་ཇི་ག་བདག་འདྲ་ཉོན་མོངས་བློ་ཞན་པ་ཡིས་ག་ལ་ལྕོགས། །དེ་ནི་གནས་མ་ཡིན་པར་ཤིན་ཏུ་མངོན་བཞིན་འོན་ཀྱང་གཟུངས་དོན་རྣམ་པར་དབྱེ་བར་བྱ། །བདག་ནི་དད་པས་གུས་པར་བསྐུལ་ལ་
གཞན་དབང་བློ་ཅན་དག་གིས་མི་བྱ་ཅི་ཡང་མེད། །འཇིག་རྟེན་མ་ལུས་ཡང་དག་འདོད་པའི་དངོས་པོ་སྒྲུབ་པ་ཡི། །མཐུ་དང་ལྡན་པ་མ་ཡིན་དམན་ཞིང་དོན་ཀྱང་མ་བྱས་པས། །བདག་ནི་ཚེ་རབས་ཕྱི་མ་ལ་ཡང་སྐྱེ་བོ་འདི་འདྲ་བར། །འགྱུར་དུ་དོགས་ཕྱིར་འདི་ལུས་རབ་ཏུ་དབྱེ་བར་བྱ། །
གླེང་བསླང་བ་དང་གླེང་གཞི་དང་། །འདུས་པ་དང་ནི་དགོས་པ་ལ། །ཡང་དག་བརྟགས་ནས་དོན་ཆེན་ཕྱིར། །ཞུ་བ་ལ་ནི་ནན་ཏན་བྱས། །དོན་ཕྱེ་བས་ན་ཐུབ་པ་ལ། །རྒྱ་ཆེར་མཁྱེན་པར་གསོལ་བ་དང་། །ཐུབ་ལ་གསོལ་བ་འདེབས་པ་དང་། །དམ་བཅའ་མངོན་དུ་ཕྱོགས་བྱ་དང་། །
བསྲུང་དང་གཟུངས་ཀྱི་ངོ་བོ་དང་། །དེ་ལ་བསྟོད་དང་ཕན་ཡོན་དང་། །འཐོབ་པའི་ཐབས་དང་ཕན་ཡོན་དང་། །དེ་ཡི་སྔོན་བྱུང་བརྗོད་པ་དང་། །ཆོས་ཀྱི་རྣམ་གྲངས་ཆེ་ཉིད་དང་། །མིང་ཞུས་པ་དང་བྱ་བ་གཉིས། །ཡི་རངས་པར་ཡང་བསྟན་པ་སྟེ། །འདི་ལ་འདིར་ནི་མདོར་བསྡུས་པའོ། །མདོ་འདིར་
དོན་རྣམ་པ་བཅུ་དགུས་བསྟན་ཏེ་དེ་ལ་ཡང་དག་པར་སྡུད་པར་བྱེད་པས་བདག་ཉིད་ཚད་མ་ཉིད་དུ་བརྗོད་པས་ཡང་དག་བསྡུ་བར་བྱ་བའི་དོན་ཕྱིན་ཅི་མ་ལོག་པར་བསྟན་པའི་ཕྱིར་ཐོག་མར་གླེང་བསླང་བ་བསྟན་ཏེ། ཕྱིན་ཅི་མ་ལོག་པར་བསྟན་པ་དེ་ཡང་གདུལ་བྱའི་སྐྱེ་བོ་ཐེ་ཚོམ་
མེད་པར་འདི་ལ་གཟུད་པའི་ཕྱིར་རོ། །དེའི་འོག་ཏུ་གླེང་གཞི་ནི་བསྟན་པའི་གཞིར་གྱུར་པའི་ཕྱིར་དེ་བསྟན་ཏོ། །དེ་ནས་བསྟན་པའི་གནས་དེ་ཡིན་པའི་ཕྱིར་དང་། །དེའི་དགོས་པ་ཡིན་པའི་ཕྱིར་འཁོར་རྣམས་འདུས་པ་བསྟན་ཏོ། །དེ་ནས་འཁོར་འདུས་པ་མཐོང་ནས་དགོས་པ་ལ་བརྟགས་
པའི་ཞུ་བ་བྱ་བ་བསྟན་ཏོ། །དེ་ནས་དེ་ལྟར་དགོས་པ་ལ་བརྟགས་ཏེ་གཞག་པའི་དོན་བཅོམ་ལྡན་འདས་ལ་མཁྱེན་པར་གསོལ་བ་བསྟན་ཏོ། །དེ་ནས་མཁྱེན་པར་གསོལ་བའི་དོན་ལ་དགོས་པ་ཡོད་པའི་ཕྱིར་དེས་ན་དེ་ཉིད་ཀྱི་ཕྱིར་བསྟན་པར་དམ་བཅའ་བ་བསྟན་ཏོ། །དེ་ནས་དྲིས་པ་དང་

ལན་གདབ་པའི་ཆེ་བ་ཉིད་བརྗོད་པའི་ཕྱིར་འདྲི་བ་པོ་མངོན་དུ་ཕྱོགས་པར་བྱ་བ་བསྟན་ཏོ། །དེ་ནས་བདུད་ལ་སོགས་པས་གནོད་པ་བྱེད་པ་བསལ་བའི་ཕྱིར་ཀུན་ནས་བསྲུང་བ་བསྟན་ཏོ། །དེ་ནས་བསྲུང་བ་རྙེད་པ་ལ་སེམས་ཅན་རྣམས་འདི་ལ་གུས་པ་བསྐྱེད་པའི་ཕྱིར་དང་། ཡོན་
ཏན་ཕུན་སུམ་ཚོགས་པ་ཐམས་ཅད་ཀྱི་རྟེན་ཡིན་པས་འདྲི་བ་པོའི་དོན་འདོད་པ་བསྒྲུབ་པའི་ཕྱིར་ཆེ་བ་ཉིད་བརྗོད་པའི་དོན་དུ་གཟུངས་ཀྱི་ངོ་བོ་བསྟན་ཏོ། །དེ་ནས་སེམས་ཅན་རྣམས་སྤྲོ་བ་བསྐྱེད་པ་དང་། ལྷག་པར་གུས་པ་བསྐྱེད་པའི་ཕྱིར་ཆེ་བ་ཉིད་བརྗོད་པའི་དོན་དུ་གཟུངས་ཀྱི་ངོ་བོ་
ཉིད་དེ་ལ་བསྟོད་པ་བསྟན་ཏོ། །དེ་ནས་འབྲས་བུ་ཡང་དག་པར་བསྟན་པས་ཀྱང་སེམས་ཅན་རྣམས་དེ་ལ་གཟུང་པའི་ཕྱིར་གཟུངས་ཀྱི་ངོ་བོའི་ཕན་ཡོན་བརྗོད་དོ། །དེ་ནས་གཟུངས་ཀྱི་འབྲས་བུ་ཐོས་ནས་མཆོག་ཏུ་དགའ་བ་དགའ་སྟོན་ལྟ་བུ་སྐྱེས་པས་ཐོབ་པར་བྱ་བའི་ཐབས་ཚོལ་བས་དེའི་
འོག་ཏུ་དེ་ཐོབ་པར་བྱ་བའི་ཐབས་བསྟན་ཏོ། །དེ་ནས་དེ་ལ་གུས་པར་འཇུག་པར་བྱ་བའི་ཕྱིར་དང་། གཟུངས་ཀྱི་ངོ་བོའི་ཆེ་བ་ཉིད་བརྗོད་པར་བྱ་བའི་ཕྱིར། དེ་ཐོབ་པར་བྱ་བའི་ཐབས་ལ་འཇུག་པའི་ཕན་ཡོན་བསྟན་ཏོ། །དེ་ནས་དེའི་འོག་ཏུ་གཟུངས་ལ་སོགས་པའི་འབྲས་བུ་དེ་ལ་ངེས་
པ་ཤིན་ཏུ་བརྟན་པ་བསྐྱེད་པའི་ཕྱིར་སྔོན་བྱུང་བ་བསྟན་ཏོ། །དེས་འདོད་པའི་དོན་རབ་ཏུ་བསྒྲུབས་ནས་ཀྱང་བརྗོད་པར་བྱ་བ་དང་བརྗོད་པ་ལ་གུས་པ་བསྐྱེད་པའི་ཕྱིར། དེའི་འོག་ཏུ་ཆོས་ཀྱི་རྣམ་གྲངས་ཀྱི་ཆེ་བ་ཉིད་མཇུག་སྡུད་པར་བྱེད་དོ། །དེ་ནས་ཆོས་ཀྱི་རྣམ་གྲངས་ཀྱི་ཆེ་བ་ཉིད་ཐོབ་སྟེ་
དགའ་བ་སྐྱེས་ནས་ཐ་སྙད་དུ་བྱ་བའི་ཕྱིར་མིང་ཞུའོ། །དེ་ནས་ཆོས་ཀྱི་རྣམ་གྲངས་ཀྱི་འབྲས་བུའི་བྱེ་བྲག་ཡང་དག་པར་བསྟན་པའི་ཕྱིར་མིང་འདོགས་སོ། །དེ་ནས་མདོ་ཡོངས་སུ་རྫོགས་པ་ན། བཅོམ་ལྡན་འདས་ཆོས་སྟོན་པ་དོན་མེད་པ་མ་ཡིན་པར་བསྟན་པའི་ཕྱིར། །ཐམས་ཅད་
ཀྱང་སྐལ་བ་ཇི་ལྟ་བ་བཞིན་དུ་འབྲས་བུ་ཐོབ་པར་གྱུར་ཏོ་ཞེས་རབ་ཏུ་བསྟན་པའི་དོན་དུ་ཡི་རང་བ་བསྟན་ཏེ། དོན་དེ་དག་གི་སྦྱར་བ་ནི་དེ་ལྟ་བུ་ཡིན་ནོ། །དེ་ལ། བསྒྲུབ་བྱ་སྒྲུབ་པའི་བྱེ་བྲག་གིས། །གླེང་བསླང་རྣམ་པ་བརྒྱད་དུ་བསྟན། །མདོར་ན་འདི་ལ་བསྒྲུབ་བྱ་གསུམ། །སྒྲུབ་པ་རྣམ་པ་ལྔར་

འདོད་དོ། །འདི་ལྟར་གླེང་བསླང་བ་ནི་བསྒྲུབ་པར་བྱ་བ་དང་སྒྲུབ་པའི་བྱེ་བྲག་གིས་རྣམ་པ་གཉིས་སུ་འགྱུར་ཏེ། བསྒྲུབ་པར་བྱ་བ་ནི་ཡང་དག་པར་སྡུད་པར་བྱེད་པས་བདག་ཉིད་ཚད་མ་ཉིད་དུ་བྱ་བ་ཡིན་ཏེ། དེའི་ཚིག་གིས་ཆོས་ཀྱི་རྣམ་གྲངས་འདི་ལ་གཞན་དག་གིས་ངེས་པ་བསྐྱེད་
པའི་ཕྱིར་དང་། ངེས་པ་སྐྱེས་ནས་མི་རྣམས་ནན་ཏན་བྱེད་པ་ལ་གནས་པས་འདོད་པ་ཐོབ་པར་འགྱུར་གྱི། དེ་ལྟ་མ་ཡིན་ན་མི་འཐོབ་པར་བསྟན་པའི་ཕྱིར་རོ། །ཚད་མ་ཉིད་དུ་བྱ་བ་དེ་ཡང་ཡུལ་དང་། ལུས་དང་། རང་གི་ངོ་བོ་དང་རྣམ་པ་གསུམ་གྱིས་བསྟན་ཏེ། དེ་ལ་ཡུལ་ནི་མདོའི་
དོན་འོག་ནས་འབྱུང་བ་རྣམས་སོ། །ལུས་ནི་བདག་ཉིད་དེ་ཡང་དག་པར་སྡུད་པར་བྱེད་པའོ། །རང་གི་ངོ་བོ་ནི་རྣ་བའི་རྣམ་པར་ཤེས་པས་ངེས་པར་འཛིན་པ་སྟེ། འདི་སྐད་ཅེས་བྱ་བ་ལ་སོགས་པའི་ཚིག་གསུམ་གྱིས་དེ་དག་གོ་རིམས་བཞིན་དུ་བསྟན་ཏོ། །སྒྲུབ་པ་ནི་རྣམ་པ་ལྔས་བསྟན་ཏེ། དུས་
ཀྱི་བྱེ་བྲག་ནི་དུས་གཅིག་ན་ཞེས་བྱ་བ་སྟེ། དེ་ཡང་གང་གི་ཚེ་གོང་མ་དང་སྦྱར་ན་དེའི་ཚེ་འཁོར་རྣམས་ཀྱི་ངེས་པ་བསྐྱེད་པའི་ཕྱིར་བདག་ཉིད་མང་དུ་ཐོས་པར་བསྟན་ཏེ། འདི་ལྟར་བདག་གིས་དུས་གཅིག་ན་འདི་ཐོས་ཀྱི་དུས་གཞན་ན་ཡང་གཞན་དག་ཐོས་སོ། །དེ་བས་ན་བདག་ནི་མང་དུ་ཐོས་
པ་ཡིན་ཏེ། དེའི་བདག་གི་ཚིག་ནི་ཡིད་ཆེས་པར་བྱ་བ་ཡིན་པར་བསྟན་པའི་ཕྱིར་རོ། །གང་གི་ཚེ་འོག་མ་དང་སྦྱར་ན་དེའི་ཚེ་དུས་གཅིག་ན་བཅོམ་ལྡན་འདས་གྲོང་ཁྱེར་ཡངས་པ་ཅན་ན་བཞུགས་ཀྱི་དུས་གཞན་གྱི་ཚེ་ནི་གུད་ན་ཡང་བཞུགས་ཏེ། དེ་བས་ན་ཡུལ་དེ་དག་ཀྱང་ལེགས་པ་འདོད་
པ་རྣམས་ཀྱིས་བསྟེན་པར་བྱ་བ་ཡིན་པར་བསྟན་ཏོ། །བྱེད་པ་པོའི་བྱེ་བྲག་ནི་བཅོམ་ལྡན་འདས་ཞེས་པ་སྟེ། བདུད་བཞི་བཅོམ་པའམ། དབང་ཕྱུག་ལ་སོགས་པའི་ཡོན་ཏན་དང་ལྡན་པས་བྱེད་པ་པོ་ཁྱད་པར་དུ་འཕགས་ཏེ། འདི་ནི་འདི་ལྟ་བུ་ཞིག་གིས་བསྟན་པ་ལས་ནི་ཕྱིན་ཅི་མ་ལོག་པ་
ཡིན་ནོ། །ས་གཞི་འདི་ནི་འདི་ལྟ་བུ་ཞིག་གནས་པ་ལས་ན་བསོད་ནམས་ཀྱི་ཁྱད་པར་དང་ལྡན་པ་ཡིན་གྱི་ཐེ་ཚོམ་མ་བྱེད་ཅིག་པར་བསྟན་པའི་ཕྱིར་རོ། །བྱ་བའི་<བྲེ་‚བྱེ་>བྲག་ནི་བཞུགས་ཏེ་ཞེས་བྱ་བ་སྟེ། ལྷ་དང་ཚངས་པ་དང་། སངས་རྒྱས་ལ་སོགས་པའི་གནས་པ་རྣམས་ཀྱིས་

གནས་པའོ། །ཡང་ན་རྫུ་འཕྲུལ་ལ་སོགས་པ་རྣམ་པ་སྣ་ཚོགས་ཀྱིས་གདུལ་བྱ་རྣམས་ཀྱི་སེམས་འཕྲོག་པས་གནས་པ་སྟེ། །འདི་གཉིས་ཀྱིས་ནི་བཅོམ་ལྡན་འདས་ཚུལ་ཡོངས་སུ་དག་པ་དང་། གཞན་ལ་ཕན་འདོགས་པའི་བྱ་བ་ལ་མཁས་པར་ཡང་བསྟན་ཏོ། །ཡུལ་གྱི་བྱེ་
བྲག་ནི་ཡུལ་ཡངས་པ་ཅན་ན་ཚལ་ཆེན་པོའི་ཁང་པ་བརྩེགས་པའི་ཁང་བཟངས་ན་ཞེས་བྱ་བ་སྟེ། དེ་ཡང་རྣམ་པ་གསུམ་སྟེ། ལོངས་སྤྱོད་པའི་ཕྱིར་ཉེ་བ་དང་རབ་ཏུ་ཉེ་བ་དང་ཤིན་ཏུ་ཉེ་བར་བསྟན་ཏོ། །ཉེ་བ་དང་རབ་ཏུ་ཉེ་བ་དང་། ཤིན་ཏུ་ཉེ་བ་དག་གིས་ནི་འཇིག་རྟེན་གྱི་གུས་པའི་ཁྱད་པར་ཆུང་ངུ་
དང་། འབྲིང་དང་ཆེན་པོ་བསྐྱེད་པས་བསོད་ནམས་ཀྱི་ཕུང་པོའི་ཁྱད་པར་ཆུང་ངུ་དང་འབྲིང་དང་ཆེན་པོ་བསྐྱེད་པར་བྱ་བའི་ཕྱིར་རོ། །ཐ་གྲུ་ཆེ་བའི་ཕྱིར་ཡངས་པའོ། །ཡང་ན་བྲམ་ཟེ་དང་ཁྱིམ་བདག་རྣམས་འབྱོར་པ་རྒྱ་ཆེན་པོས་དེ་ན་གནས་པའི་ཕྱིར་ཡངས་པའོ། །ཞ་འབྲིང་བའི་བྱེ་བྲག་
ནི་བསོད་ནམས་ཆེ་བར་བསྟན་པའི་ཕྱིར་རོ། །དེ་ཡང་རྣམ་པ་གཉིས་ཏེ། ཞ་འབྲིང་བ་ཉན་ཐོས་ཀྱི་བྱེ་བྲག་དང་། ཞ་འབྲིང་བ་བྱང་ཆུབ་སེམས་དཔའི་བྱེ་བྲག་གོ། །དེ་ལ་ཞ་འབྲིང་བ་ཉན་ཐོས་ཀྱི་བྱེ་བྲག་ནི་རྣམ་པ་ལྔས་བསྟན་ཏེ། ཡོན་ཏན་ནི་ཆེན་པོ་ཞེས་བྱ་བ་སྟེ། བྱམས་པ་ལ་སོགས་པའི་
ཡོན་ཏན་གྱི་ཆེ་བ་ཉིད་དང་ལྡན་པའི་ཕྱིར་རོ། །ཉོན་མོངས་པ་སྤངས་པ་ནི་དགེ་སློང་ཞེས་བྱ་བ་སྟེ། ཉོན་མོངས་པ་བཅོམ་པས་ན་དགེ་སློང་ཡིན་པའི་ཕྱིར་རོ། །དེ་ཁོ་ན་ཤེས་པ་བསྐྱེད་པ་ནི་དགེ་འདུན་ཞེས་བྱ་བ་སྟེ། ཆོས་ཀྱི་དེ་ཁོ་ན་ཉིད་མངོན་སུམ་དུ་བྱེད་པས་བདུད་ལ་སོགས་པ་དག་གིས་
ཕྱེད་པར་དཀའ་བས་དགེ་འདུན་ཡིན་པའི་ཕྱིར་རོ། །ཚུལ་ཁྲིམས་ནི་དགེ་སློང་ཞེས་བྱ་བ་སྟེ། སོ་སོར་ཐར་པའི་སྡོམ་པ་ཐོབ་པས་དགེ་སློང་ཡིན་པའི་ཕྱིར་ཏེ། དེའི་ཕྱིར་དོན་གྱི་བྱེ་བྲག་གིས་དགེ་སློང་ལན་གཉིས་སུ་སྨོས་སོ། །གྲངས་ནི་བརྒྱད་སྟོང་ཞེས་བྱ་བ་སྟེ། གྲངས་བརྒྱད་
སྟོང་དུ་ངེས་པར་ཆད་པའོ། །ཞ་འབྲིང་བ་བྱང་ཆུབ་སེམས་དཔའི་བྱེ་བྲག་ནི་རྣམ་པ་གསུམ་དུ་བསྟན་ཏེ། གྲངས་ནི་རབ་ཏུ་མང་པོ་ཞེས་བྱ་བ་སྟེ། ཞ་འབྲིང་བ་ཉན་ཐོས་པས་ལྷག་པའི་ཕྱིར་རབ་ཏུ་མང་པོ་ཡིན་ནོ། །ཤེས་རབ་དང་ཐབས་དང་ལྡན་པ་ནི། བྱང་ཆུབ་སེམས་དཔའ་ཞེས་བྱ་བ་སྟེ།

སྒྲ་འདི་གཉིས་ནི་ཤེས་རབ་དང་ཐབས་ལ་བྱ་བར་དོན་ཡོད་ཞགས་པའི་མདོ་ལས་འབྱུང་བའི་ཕྱིར་རོ། །སྟོང་པ་ཉིད་ལ་གནས་པ་དང་ལྡན་པ་ནི་སེམས་དཔའ་ཆེན་པོ་ཞེས་བྱ་བ་སྟེ། ཆོས་ཐམས་ཅད་ཀྱི་ངོ་བོ་ཉིད་མེད་པ་ཆེན་པོ་ལ་སེམས་དཔའི་ཕྱིར་རོ། །ཡང་ན་སེམས་ཅན་གྱི་ཁམས་མ་ལུས་
པ་ཡོངས་སུ་བསྐྱབ་པའི་བསམ་པ་དང་ལྡན་པ་སྟེ། བསམ་པ་ཆེ་བའི་ཕྱིར་རོ། །ཡང་ན་སྨོན་ལམ་ཆེན་པོ་དང་ལྡན་པ་སྟེ། སྔོན་བྱང་ཆུབ་ཏུ་སྨོན་ལམ་བཏབ་པའི་ཕྱིར་ཏེ། དེ་བས་ན་དེ་དག་གི་བསམ་པ་ཆེ་བའི་ཕྱིར་སེམས་དཔའ་ཆེན་པོ་སྨོས་སོ། །དེ་ལྟར་ན་རྣམ་པ་ལྔས་བདག་ཉིད་ཚད་མ་
ཉིད་དུ་བསྒྲུབས་ཏེ། འདི་ལྟར་འཇིག་རྟེན་ན་ཡང་ལོག་པར་ཞུགས་པ་ལ། དུས་དང་ཡུལ་དང་བྱ་བ་ལ་སོགས་པ་དྲན་པར་བྱེད་པས་བརྡ་སྤྲོད་པ་སྣང་བའི་ཕྱིར་རོ། །ཇི་སྐད་བསྟན་པའི་དགོས་པ་ཡང་ཞར་ལ་འགྲུབ་སྟེ། ཆུར་བ་ལ་སོགས་པའི་དོན་བྱེད་པ་ན་ཞོ་ལ་སོགས་པ་ཡང་འགྲུབ་
པ་བཞིན་ནོ། །ད་ནི་གླེང་གཞི་བརྗོད་པར་བྱ་སྟེ། གླེང་གཞི་ཐུབ་པས་གསུངས་པ་འདི། །དེ་ཡིས་གདུལ་བའི་དབང་མཛད་ནས། །རྣམ་པ་ལྔ་དང་ལྡན་པ་སྟེ། །ཕོངས་པ་རྣམ་པ་གསུམ་དུ་འདོད། །གླེང་གཞི་དེས་གདུལ་བ་རྣམས་ལ་དགོངས་པར་མཛད་ནས། བཅོམ་ལྡན་འདས་ཀྱིས་གླེང་
གཞི་རྣམ་པ་དང་ལྡན་པ་བཀའ་སྩལ་ཏོ། །གླེང་གཞི་དེ་ནི་གཟུངས་བསྟན་པའི་ཕྱིར་ཏེ། འདི་ལྟར་བཅོམ་ལྡན་འདས་སྐུ་རུས་པ་རྡོ་རྗེ་ལྟར་སྲ་བའི་སྐུ་མངའ་བ་ཡང་མི་རྟག་པར་ཡང་རྟོགས་ཏེ། ལྷག་པར་ཆེས་སྐྱོ་བ་སྐྱེས་ནས་གཟུངས་མཉན་པའི་སྣོད་དུ་འགྱུར་ཞིང་མྱུར་དུ་བསྒྲུབ་པར་ཡང་
འགྱུར་བས་དེའི་ཕྱིར་བཅོམ་ལྡན་འདས་ཀྱིས་བསྟན་ཏོ། །འཇིག་རྟེན་ན་ཡང་འཆི་བའི་ཚེ་སྣོད་དུ་གྱུར་པ་དག་ཁོ་ན་ལ་ཞེས་པ་སྟོན་པར་བྱེད་པས་དེའི་ཕྱིར་དེ་དང་འདྲ་བར་ཆོས་ཀྱི་རྣམ་གྲངས་འདི་ཉིད་ཆོས་ཐམས་ཅད་ཀྱི་ནང་ན་གཅེས་པར་སྟོན་ཅིང་གཙོ་བོ་ཡིན་པར་ཡང་སྟོན་ཏོ། །རྣམ་པ་ལྔ་དང་
ལྡན་པ་ནི་འདི་ལྟ་སྟེ། ཐུགས་རྗེ་ཆེན་པོ་དང་ལྡན་པ་ནི། དེ་ཡང་བཅོམ་ལྡན་འདས་ཀྱིས་ཞེས་བྱ་བས་བསྟན་ཏེ། འདི་ལྟར་དབང་ཕྱུག་ལ་སོགས་པའི་ཡོན་ཏན་དང་ལྡན་བཞིན་དུ། སྐུ་ཚེའི་འདུ་བྱེད་དག་འདོར་བར་མཛད་པ་ནི་ཐུགས་རྗེ་ཆེན་པོ་མེད་པར་མི་རུང་ངོ་། །སྨོན་ལམ་ཆེན་པོ་དང་ལྡན་

པ་ནི། དེ་ཡང་དྲན་པ་དང་ལྡན་ཞིང་ཞེས་པས་བསྟན་ཏེ། སྔོན་བཅོམ་ལྡན་འདས་ཀྱིས་བདག་གི་སྲོག་ཡོངས་སུ་བཏང་བས་ཀྱང་སེམས་ཅན་གྱི་དོན་བྱའོ་ཞེས་སྨོན་ལམ་བཏབ་པོ། །དེའི་ཕྱིར་དྲན་པ་དང་ལྡན་བཞིན་དུ་སྐུ་ཚེའི་འདུ་བྱེད་དག་བོར་ཏེ། སྔོན་གྱི་སྨོན་ལམ་དྲན་
པས་བོར་རོ་ཞེས་བྱ་བའི་ཐ་ཚིག་གོ། །ཤེས་རབ་དང་ལྡན་པ་ནི། དེ་ཡང་མཁྱེན་བཞིན་དུ་ཞེས་བྱ་བས་བསྟན་ཏེ། འདི་ལྟར་མཁྱེན་བཞིན་དུ་སྐུ་ཚེའི་འདུ་བྱེད་དག་བོར་རོ། །དེ་ནི་འདི་སྐད་དུ་ཅི་ནས་གཞན་གྱི་དོན་འགྲུབ་པར་འགྱུར་བ་དེ་ལྟར་བོར་རོ་ཞེས་བསྟན་པར་འགྱུར་རོ། །ཕོངས་
པའི་དངོས་པོ་གཏོང་བ་དང་ལྡན་པ་ནི། ཚེའི་འདུ་བྱེད་དག་གཏང་བར་གྱུར་ཏོ་ཞེས་བྱ་བས་བསྟན་ཏེ། དེ་ཡང་བཅོམ་ལྡན་འདས་ཀྱིས་བདག་ཅག་གི་ཕྱིར་སྐུ་ཡོངས་སུ་བཏང་བ་ཡང་མཛད་དོ་སྙམ་དུ་འཛིན་པ་རྣམས་བཅོམ་ལྡན་འདས་ལ་གུས་པ་བསྐྱེད་པའི་ཕྱིར་རོ། །ཕོངས་པའི་
དངོས་པོ་ཡང་རྣམ་པ་གསུམ་གྱིས་བསྟན་ཏེ། ནང་གི་ཁྱད་པར་དུ་འཕགས་པ་དང་། མང་བ་དང་། ཡོངས་སུ་གཏོང་བའི་ཡུལ་གྱིས་བསྟན་ཏོ། །ཚེ་རྣམས་བཏང་བར་གྱུར་ཏོ་ཞེས་བྱ་བས་ཀྱང་ཆོག་ན། འདུ་བྱེད་སྨོས་པ་ནི་ཚེའི་རྫས་གུད་ན་མེད་པར་བསྟན་པའི་ཕྱིར་རོ། །དགོས་
པ་དང་ལྡན་པ་ནི། དེ་ཡང་འདི་དག་ཅེས་བྱ་བ་ལ་སོགས་པས་བསྟན་ཏེ། དེ་ཡང་བཅོམ་ལྡན་འདས་ནི་དགོས་པ་མངོན་དུ་གཏོང་བར་བསྟན་པ་ཡིན་ནོ། །དགོས་པ་དེ་ཡང་རྣམ་པ་ལྔས་བསྟན་ཏེ། ཉེ་བ་མངོན་སུམ་གྱི་དངོས་པོ་བསྟན་པ་དང་། གྲངས་བསྟན་པ་དང་། དུས་བསྟན་པ་འདི་
གསུམ་ནི། སངས་རྒྱས་ཀྱིས་གདུལ་བའི་སེམས་ཅན་ཡོངས་སུ་སྨིན་པར་མཛད་པའི་དུས་འདིར་ཟད་དོ་ཞེས་བསྟན་པའི་ཕྱིར་རོ། །འདས་པ་བསྟན་པ་དང་། ཡོངས་སུ་མྱ་ངན་ལས་འདའ་བར་བསྟན་པ་འདི་ནི། སངས་རྒྱས་ཀྱིས་གདུལ་བའི་སེམས་ཅན་ཡོངས་སུ་སྨིན་པར་མཛད་པའི་
དུས་མེད་པར་འགྱུར་བ་བསྟན་པའི་ཕྱིར་རོ། །གལ་ཏེ་ཚེའི་འདུ་བྱེད་རྣམས་བཏང་བར་གྱུར་ན། འདི་དག་ཅེས་བྱ་བ་ལ་སོགས་པའི་ཚིག་ཇི་ལྟ་བུ་ཞེ་ན། སྨྲས་པ། འདི་དག་ལ་སོགས་ཚིག་གིས་ནི། །དེ་དག་བྱིན་གྱིས་བརླབ་པར་བསྟན། །ཟླ་བ་གསུམ་པོ་འདི་དག་འདས་ནས་ཡོངས་

སུ་མྱ་ངན་འདའོ་ཞེས་བྱ་བའི་ཚིག་འདིས་ཚེའི་འདུ་བྱེད་དེ་དག་བྱིན་གྱིས་བརླབ་པར་བཅོམ་ལྡན་འདས་ཀྱིས་བསྟན་ཏོ། །དེ་ནི་བདུད་གཉིས་བཅོམ་པ་ཡིས། །གདུལ་བ་ལ་ནི་ཐུགས་བརྩེ་ཕྱིར། །འཆི་བདག་དང་ཕུང་པོའི་མཚན་ཉིད་ཀྱི་བདུད་གཉིས་བཅོམ་པས་གདུལ་
བ་གང་ཡིན་པ་དེ་ལ་ཐུགས་བརྩེ་བའི་ཕྱིར་བྱིན་གྱིས་བརླབ་པ་དེ་མཛད་དེ། འཆི་བ་ལ་དབང་བར་བསྟན་པའི་ཕྱིར་ནི་བཏང་ངོ་། །ཕུང་པོ་ལ་དབང་མངའ་བར་བསྟན་པའི་ཕྱིར་ནི་བྱིན་གྱིས་བརླབས་ཏེ་དེ་ལྟར་ངེས་པར་གཟུང་བར་བྱའོ། །ཡང་ན་འཆི་
བདག་དང་ཕུང་པོ་གཉིས་ལས་བཟློག་སྟེ་ཤེས་པར་བྱའོ། །ཡང་ན་ལྷག་པ་རྣམས་ནི་བཏང་ལ། ཟླ་བ་གསུམ་གྱི་དུས་ཚུན་ཆད་ནི་གཞག་པར་ཁོང་དུ་ཆུད་པར་བྱའོ། །འདི་ལ་ཡང་བཅོམ་ལྡན་འདས་ལ་བདུད་གཉིས་བཅོམ་པ་མངའ་སྟེ་སྦྱར་བར་བྱའོ། །གདུལ་བའི་བསམ་པའི་བྱེ་བྲག་
གིས་མྱ་ངན་ལས་འདའ་བར་འཇུག་པའི་ཕྱིར། སྤྲུལ་པའི་སྐུས་ནི་མྱ་ངན་ལས། །འདའ་བར་འདོད་ཀྱི་ཅིག་ཤོས་མིན། །ལོངས་སྤྱོད་རྫོགས་པའི་སྐུས་མྱ་ངན་ལས་འདའ་བར་ནི་མི་འདོད་དོ། །ཅིའི་ཕྱིར་ཞེ་ན། གཏན་དུ་གནས་པའི་རྒྱུ་ལྡན་པ། །སངས་རྒྱས་རྣམས་ནི། མྱ་ངན་འདའ་
བར་ཡང་མི་རིགས། གཏན་དུ་གནས་པའི་རྒྱུ་ནི་བསོད་ནམས་དང་ཡེ་ཤེས་ཀྱི་ཚོགས་ཡིན་ལ། དེ་ཡང་གུས་པར་བསྐལ་པ་གྲངས་མེད་པ་དུ་མར་རྒྱུན་དུ་བསྒྲུབས་པའི་ཕྱིར་ཕུལ་དུ་བྱུང་བ་སྟེ། དེ་བས་ན་འབྲས་བུ་ནི་རྒྱུ་དང་འདྲ་བའི་ཕྱིར། དེའི་འབྲས་བུ་ཡང་ཕུལ་དུ་བྱུང་བ་ཡིན་པས་
ལོངས་སྤྱོད་རྫོགས་པའི་སྐུས་མྱ་ངན་ལས་འདའ་བར་ག་ལ་འགྱུར། དེ་ལྟ་མ་ཡིན་དུ་ཟིན་ན་ཆེན་པོའི་འབྲས་བུ་ཆུང་ངུར་གྱུར་ལ། ཆུང་ངུའི་འབྲས་བུ་ཆེན་པོར་འགྱུར་བས་སྲོག་གཅོད་པ་སྤངས་པ་ལ་སོགས་པ་དང་། ཚེ་རིང་བར་འགྱུར་བ་ལ་སོགས་པ་དག་རྒྱུ་དང་འབྲས་བུའི་དངོས་པོ་ཉིད་དུ་
མི་འགྱུར་བའི་རིགས་སོ། །གལ་ཏེ་ཚེ་དཔག་ཏུ་མེད་པ་ཞིག་ལས་བཅོམ་ལྡན་འདས་ཀྱིས་སྐུ་ཚེ་བཏང་བའི་ཕྱིར་མྱ་ངན་ལས་འདས་སོ་ཞེ་ན་མ་ཡིན་ཏེ། རྫུ་འཕྲུལ་གྱི་རྐང་པ་བཞི་པོ་འདི་དག་ཅེས་བྱ་བ་ལ་སོགས་པ་གསུངས་པའི་ཕྱིར་རོ། །ཡང་ཞེས་བྱ་བ་ནི་དམ་བཅས་པ་མ་རྫོགས་

པ་རྣམས་མྱ་ངན་ལས་འདའ་བར་མི་རིགས་པ་ཁོ་ནར་ངེས་པར་གཟུང་བར་བྱ་སྟེ། དགེ་བ་གཞན་ཡང་དམ་བཅས་པ་ལས་འགལ་བར་མི་བྱེད་ན། དགེ་བ་མ་ལུས་པའི་བླ་མར་གྱུར་པ། སངས་རྒྱས་བཅོམ་ལྡན་འདས་རྣམས་ལྟ་མཛད་པར་ག་ལ་འགྱུར་བ་དེ་དག་གིས་ནི་
བདག་ཅག་གིས་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཏུ་དགོད་པར་བྱའོ་ཞེས་བྱ་བ་ལ་སོགས་པར་ཐུགས་དམ་བཅས་ཏེ། དེ་བས་ན་ཇི་སྲིད་དུ་གཟུང་བར་བྱ་བའི་སེམས་ཅན་གཅིག་ཙམ་ཡོད་པ་དེ་སྲིད་དུ་དེ་དག་མྱ་ངན་ལས་འདའ་བ་ནི་མི་རིགས་པ་དང་། སངས་རྒྱས་
ཀྱིས་གདུལ་བའི་སེམས་ཅན་མེད་དུ་ཟིན་ཀྱང་བརྒྱ་བྱིན་ལ་སོགས་པའི་གཟུགས་ཀྱིས་གདུལ་བ་ཡོད་པའི་ཕྱིར་རོ། །དེ་བས་ན་སྤྲུལ་པའི་སྐུ་ཁོ་ནས་མྱ་ངན་ལས་འདའ་བར་འདོད་དེ། དེ་ལྟར་ཡང་ངེས་པར་གཟུང་བར་བྱའོ། །སངས་རྒྱས་མྱ་ངན་ཡོང་མི་འདའ། །ཆོས་ཀྱང་ནུབ་པར་མི་
འགྱུར་ཏེ། །སེམས་ཅན་ཡོངས་སུ་སྨིན་མཛད་ཕྱིར། །ཡོངས་སུ་མྱ་ངན་འདའ་བ་སྟོན། །ཞེས་བྱ་བ་ལ་སོགས་པ་གསུངས་པའི་ཕྱིར་རོ། །ད་ནི་འཁོར་རྣམས་བསྡུ་བ་བསྟན་ཏེ། །རྫོགས་སངས་རྒྱས་ཀྱི་མཐུས་བསྟངས་པས། །མ་བསྒྲིམས་བསྒྲིམས་དང་བསྒྲིམས་པ་ཡིས། །འཕྱས་
སུ་འགྱུར་བ་བསལ་བའི་ཕྱིར། །བསྡུ་བ་རྣམ་པ་གསུམ་དུ་གཞག །བཅོམ་ལྡན་འདས་ཀྱིས་བསྡུ་བ་རྣམ་པ་གསུམ་བྱེད་དུ་བཅུག་པ་ལ། མ་བསྒྲིམས་པར་བསྡུས་པ་ནི་མཽད་གལ་གྱི་བུ་ཆེན་པོས་བྱས་པ་སྟེ། དེ་བས་ན་སྟོང་སྨོས་པ་ཡིན་ཏེ། འཇིག་རྟེན་གྱི་ཁམས་སྟོང་དུ་ནི་ཉན་ཐོས་ཀྱིས་
ཀྱང་མངོན་པར་འདུ་བྱ་མི་དགོས་པར་བྱེད་ནུས་སོ། །བསྒྲིམས་ཏེ་བསྡུས་པ་ནི་ཤཱ་རིའི་བུས་བྱས་པ་སྟེ། དེ་བས་ན་དེར་རྫུ་འཕྲུལ་མངོན་པར་བྱ་བར་སྨོས་སོ། །བསྒྲིམས་ཏེ་བསྡུས་པ་ཅིག་ཤོས་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་བྱས་པ་སྟེ། དེ་བས་ན་དེ་བལྟས་ཞེས་སྨོས་ཏེ།
ཏིང་ངེ་འཛིན་གྱི་བྱེ་བྲག་གིས་བསྐྱེད་པའི་རྟགས་ཀྱིས་བྱེ་བྲག་འགའ་ལ་བལྟས་ཞེས་བྱའོ། །འདི་དག་ཐམས་ཅད་ཀྱང་བཅོམ་ལྡན་འདས་ཀྱིས་མཛད་པ་ཡིན་ཏེ། དང་པོ་དང་ཐ་མ་ནི་བཀས་མཛད་དོ། །བར་མ་ནི་མཐུས་མཛད་དེ། བཅོམ་ལྡན་འདས་ཀྱིས་གང་གིས་མ་མཛད་པའི་རྣམ་པ་

དེ་མེད་པར་བསྟན་པའི་ཕྱིར་རོ། །བསྡུ་བ་གསུམ་པོ་འདི་ལྟ་བུ་བཅོམ་ལྡན་འདས་ཀྱིས་མཛད་པ་འདི་ཡང་། ལ་ལ་འདི་སྙམ་དུ་བཅོམ་ལྡན་འདས་ནི་གདུལ་བའི་ཕྲིན་ལས་ཡོངས་སུ་མ་རྫོགས་པར་མྱ་ངན་ལས་འདས་སོ་སྙམ་དུ་འཕྱ་བར་འགྱུར་བ་བསལ་བའི་ཕྱིརོ། །དེ་བས་ན་ཉན་ཐོས་ཆེན་པོ་
ལ་སོགས་པ་སྨོས་སོ། །དེ་ལྟ་མ་ཡིན་དུ་ཟིན་ན་སུ་ཡང་རུང་བ་ལ་བཅོམ་ལྡན་འདས་ཀྱིས་བྱིན་གྱིས་བརླབས་ན་ཡང་ཐམས་ཅད་སྡུད་ནུས་པས་ཉན་ཐོས་ཆེན་པོ་ལ་སོགས་པ་སྨོས་ཅི་དགོས་ཏེ། སྨོས་པས་ན་གང་དུ་བཅོམ་ལྡན་འདས་ཀྱིས་འདི་ལྟ་བུ་དག་བྱིན་གྱིས་བརླབས་ཏེ། འཁོར་
སྡུད་པ་དེར་སངས་རྒྱས་ཀྱིས་གདུལ་བའི་སེམས་ཅན་གང་འདུ་བར་མི་འགྱུར་བ་དང་། ཡོངས་སུ་སྨིན་པར་མི་འགྱུར་བ་སུ་ཡང་མེད་དོ་ཞེས་སྟོན་ཏོ། །དེ་བས་ན་གདུལ་བའི་དོན་ཡོངས་སུ་རྫོགས་ནས་གདོད་བཅོམ་ལྡན་འདས་ཡོངས་སུ་མྱ་ངན་ལས་འདས་སོ། །བཙུན་པར་མི་འགྱུར་བསལ་བའི་ཕྱིར། །
ཐུབ་པས་མངོན་དུ་མ་མཛད་དེ། །གུས་པ་བསྐྱེད་པར་བྱ་བའི་ཕྱིར། །གཞན་དག་སྡུད་པར་བྱེད་དུ་བཅུག །བཅོམ་ལྡན་འདས་ཉིད་ཀྱི་མཛད་སྤྱོད་མོད་ཀྱི། མི་བཙུན་པར་འགྱུར་བ་བསལ་བའི་ཕྱིར་གདུལ་བ་ཐམས་ཅད་བདག་ཉིད་ཀྱིས་བསྡུ་བ་མ་མཛད་དོ། །དེ་བས་ན་གུས་པ་
བསྐྱེད་པའི་ཕྱིར་བཅོམ་ལྡན་འདས་ཀྱིས་མཽད་གལ་གྱི་བུ་ཆེན་པོ་ལ་སོགས་པ་ལ་སྡུད་དུ་བཅུག་གོ། །དེས་འདུལ་དབང་མཛད་བཅོམ་ལྡན་གྱིས། །དེ་གཉིས་མྱ་ངན་འདས་པར་བསྟན། །འདིར་ནི་དེ་གཉིས་སྨོས་པའི་ཕྱིར། །ཡང་དག་མྱ་ངན་འདས་མ་ཡིན། །འཕགས་པ་ཤཱ་རིའི་
བུ་དང་། མཽད་གལ་གྱི་བུ་གཉིས་དེའི་སྔ་རོལ་དུ་མྱ་ངན་ལས་འདས་པས་གདུལ་བའི་སེམས་ཅན་རྣམས་ཀྱི་དབང་དུ་མཛད་ནས་བཅོམ་ལྡན་འདས་ཀྱིས་དེ་གཉིས་མྱ་ངན་ལས་འདས་པར་བསྟན་པ་ཡིན་གྱི་དེ་གཉིས་ལ་འདིར་བསྐུལ་བ་མཛད་པས་ཡང་དག་པའི་དོན་དུ་དེ་གཉིས་མྱ་ངན་ལས་
འདས་པ་ནི་མ་ཡིན་ནོ། །བསྡུ་བ་གསུམ་ལ་སྐོ་བ་དང་། །བསྐོ་བར་བྱ་བའི་བྱ་བ་དང་། །དེ་ཡི་འབྲས་བུ་གོ་རིམས་དག །བསྟན་པ་ཟད་པར་འདོད་པ་ཡིན། །བསྡུ་བ་རྣམ་པ་གསུམ་ལ་ཡང་མདོར་བསྡུ་བ་སྐོ་བ་པོའི་བྱ་བ་དང་། བསྐོ་བར་བྱ་བའི་བྱ་བ་དང་། དེའི་འབྲས་བུ་དང་། འབྲས་བུའི་གོ་

རིམས་བསྟན་པར་ཁོང་དུ་ཆུད་པར་བྱའོ། །དེ་ལ་བསྡུ་བ་དང་པོ་ལ་སྐོ་བ་པོའི་བྱ་བ་ནི་མངོན་དུ་ཕྱོགས་པར་བྱ་བ་དང་། བྱ་བ་ལ་བསྐོ་བའོ། །བྱ་བ་ལ་བསྐོ་བ་དེ་ལ་ཡང་གཙོ་བོ་མ་ཡིན་པའི་བྱ་བ་དང་། གཙོ་བོའི་བྱ་བ་དང་རྣམ་པ་གཉིས་སོ། །དེ་ཡང་སོང་ལ་ཞེས་བྱ་བ་ལ་
སོགས་པས་གོ་རིམས་བཞིན་བསྟན་ཏོ། །བསྐོ་བར་བྱ་བའི་བྱ་བ་ནི་བཀའ་མཉན་པ་དང་། དེ་བཞིན་དུ་སྒྲུབ་པ་སྟེ། དེ་བཞིན་དུ་བསྒྲུབ་པ་ནི། བཅོམ་ལྡན་འདས་ཀྱིས་བཀའ་སྩལ་མ་ཐག་ཏུ་རི་རབ་ཀྱི་རྩེ་མོ་ལ་འདུག་སྟེ། སྐད་ཅིག་གིས་གོ་བར་བྱས་པའོ། །སྐད་ཅིག་དེ་ཉིད་ལ་ཞེས་བྱ་བ་ནི་བཅོམ་
ལྡན་འདས་ལ་གུས་པར་བྱེད་པ་བསྟན་པའི་ཕྱིར་དང་། གདུལ་བའི་དུས་ལས་ཡོལ་བ་བསལ་བའི་ཕྱིར་དང་། གདུལ་བའི་བྱ་བ་དག་ལ་གུས་པར་བྱེད་པ་བསྟན་པའི་ཕྱིར་རོ། །མངོན་པར་འདུ་བྱེད་པ་མེད་པའི་རྫུ་འཕྲུལ་དང་ལྡན་པར་བསྟན་པར་ཡང་མངོན་ནོ། །འདི་ནི་འདུག་པ་དང་གོ་
བར་བྱེད་པ་གཉིས་ཀ་ལ་ཡང་སྦྱར་བར་བྱའོ། །རང་གི་རྫུ་འཕྲུལ་གྱི་སྟོབས་སྨོས་པ་ཡང་གཉིས་ཀ་དང་སྦྱར་བར་བྱའོ། །རི་རབ་ཀྱི་རྩེ་མོ་སྨོས་པ་དང་། སྟོང་གི་འཇིག་རྟེན་གྱི་ཁམས་སུ་གོ་བར་བྱེད་པ་འདི་གཉིས་ནི་ཆེ་བ་ཉིད་བསྟན་པའི་ཕྱིར་ཏེ། འདིས་ནི་གང་ན་འདི་ལྟ་བུའི་
སྡུད་པ་པོ་ཡོད་པ་དེར་ནི་སངས་རྒྱས་ཀྱིས་གདུལ་བ་སུ་ཡང་མི་འདུལ་བ་མེད་པར་བསྟན་ཏོ། །གོ་བར་བྱེད་པ་ཡང་དོན་རྣམ་པ་བརྒྱད་དང་ལྡན་ཏེ་གུས་པར་ཉམས་སུ་ལེན་དུ་གཞུག་པའི་ཕྱིར་མངོན་དུ་ཕྱོགས་པར་བྱ་བའི་དོན་དང་། རྗེས་སུ་ཆགས་པ་ལ་སོགས་པ་མེད་པར་ཤེས་པར་བྱ་བའི་
ཕྱིར་མཐའ་དག་གི་དོན་དང་། བཀའ་དང་མཐུན་པའི་དོན་བསྒྲུབ་པའི་ཕྱིར་གཞིའི་དོན་དང་། དེ་ཁོ་ན་རྟོགས་པ་དག་སློབ་མར་གྱུར་ཏེ། དེ་ལྟ་བུ་དག་ལ་ཡང་ཕན་འདོགས་པས་ཆོས་ཀྱི་རྣམ་གྲངས་ཀྱི་ཆེ་བ་ཉིད་བསྟན་པའི་ཕྱིར་ཆོས་ཀྱི་དེ་ཁོ་ན་རྟོགས་པའི་དོན་དང་། བསྐུལ་བ་ལ་སོགས་པའི་
མ་ལོངས་པ་མེད་པ་བསྟན་པའི་ཕྱིར་འཇུག་པར་བྱ་བའི་དོན་དང་། དེ་དག་ཉིད་ལ་ཆོས་བསྟན་པས་ཕན་འདོགས་པའི་ཕྱིར་ཆོས་འདོད་པའི་དོན་དང་། རང་གི་དོན་རབ་ཏུ་བསྟན་པས་དེ་དག་གི་སྤྲོ་བ་བསྐྱེད་པའི་ཕྱིར་འབྲས་བུ་ཉེ་བར་བསྟན་པའི་དོན་དང་། བསྒྲིམས་པ་མེད་པར་འདུལ་བར་

བསྟན་པའི་ཕྱིར་རང་དབང་ཡོད་པར་བསྟན་པའི་དོན་ཏོ། །དེ་གཉིས་ཀྱི་འབྲས་བུ་ཡང་རྣམ་པ་གསུམ་གྱིས་བསྟན་ཏེ། གྲངས་དང་། ཉོན་མོངས་པ་སྤངས་པ་དང་ལྡན་པ་དང་འདུས་པའོ། །དེའི་གོ་རིམས་ཀྱང་རྣམ་པ་བཞིས་བསྟན་ཏེ། མཐོང་བ་དང་ཕྱག་འཚལ་བ་དང་། བསྐོར་བ་བྱེད་པ་
དང་། འཁོད་པའོ། །དེ་དག་ཀྱང་དངོས་པོས་གོ་རིམས་སུ་གྱུར་པར་རིག་པར་བྱ་སྟེ། ལྷགས་པའི་འོག་ཏུ་ཐོག་མ་ཁོ་ནར་མཐོང་ངོ་། །དེ་ནས་མཐོང་བས་ལུས་ཚིམ་པར་གྱུར་ནས་ཕྱག་འཚལ་ལོ། །དེ་ནས་དད་པའི་ཤུགས་མངོན་པར་འཕེལ་ནས་བསྐོར་བ་བྱེད་དོ། །དེ་ནས་གོ་རིམས་བཞིན་
བྱས་ནས་གོང་གི་ཕྱིར་ལྷགས་པ་དེའི་ཕྱིར་འཁོད་དོ། །བསྡུ་བ་གཉིས་པ་ལ་སྐོ་བ་པོའི་བྱ་བ་ནི་སངས་རྒྱས་ཀྱི་མཐུ་སྟེ། མཐུ་ནི་དབང་ཡིན་ནོ། །བསྐོ་བར་བྱ་བའི་བྱ་བ་ནི་ཐབས་དཔྱོད་པ་དང་། དེའི་འབྲས་བུ་དཔྱོད་པ་དང་། ཐབས་སྒྲུབ་པ་དང་། དེའི་འབྲས་བུ་བསྒྲུབ་པ་སྟེ། རྟོག་པ་
མངོན་དུ་གཏོང་བ་ནི་ཐབས་དང་དེའི་འབྲས་བུ་དཔྱད་ནས་དེ་བསྒྲུབས་པས་འབྲས་བུ་འགྲུབ་པར་བྱེད་དོ། །དེ་བས་ན་དེ་དག་གོ་རིམས་ནི་དེ་ལྟ་བུ་ཡིན་ནོ། །འབྲས་བུ་དཔྱོད་པ་ཡང་རྣམ་པ་ལྔ་སྟེ། མཐའ་དག་པ་དག་དང་གཞི་དང་། གདུལ་བ་དང་། དེའི་རབ་ཏུ་དབྱེ་བ་དང་། རང་གི་ངོ་བོ་
སྟེ། ཉན་ཐོས་ཀྱི་ཐེག་པ་ཅན་ལ་སོགས་པ་སྨོས་པའི་ཕྱིར་རོ། །བྱང་ཆུབ་མཆོག་གི་རིགས་ཡིན་ལ། །བློ་ཞན་བཤེས་གཉེན་དམན་བསྟེན་པས། །གང་དག་དམན་པའི་ལམ་བསྟེན་པ། །དེ་དག་འདིར་བཀུག་ཤེས་པར་བྱ་སྟེ་དེ་ལྟ་མ་ཡིན་ན་ཆོས་བསྟན་པ་འདི་དག་ལ་ཕན་མེད་པས་དེ་
དག་བཀུག་པས་ཅི་ཞིག་བྱ་སྟེ། མདོ་རྫོགས་ཀྱི་བར་དུ་ཡང་གཞན་ནས་ཇི་སྐད་འབྱུང་བ་བཞིན་དུ། ཉན་ཐོས་ཀྱི་ཐེག་པ་ཅན་རྣམས་ཀྱིས་འབྲས་བུ་ནི་ཅི་ཡང་མ་བསྟན་ལ། བཅོམ་ལྡན་འདས་ཀྱིས་ཆོས་བསྟན་པ་ནི་འབྲས་བུ་མེད་པ་མ་ཡིན་ནོ། །དེ་ལྟ་བས་ན་དེ་དག་ལ་ཡང་དེའི་ཚེ་ཕྱིར་
མི་ལྡོག་པའི་ས་ལ་འགོད་པ་ལ་སོགས་པའི་འབྲས་བུ་ཡོད་པར་ངེས་པར་གཟུང་བར་བྱའོ། །དེ་བས་ན་དེ་དག་ནི་སངས་རྒྱས་ཀྱི་རིགས་ཅན་ཁོ་ན་ཡིན་པ་ལས། ཅི་ཞིག་ལྟར་གྱུར་ཏེ། ཐེག་པ་གཞན་ལ་ཞུགས་པར་ཤེས་པར་བྱའོ། །འབྲས་བུ་དེའི་གོ་རིམས་ཀྱང་རྣམ་པ་བཞི་སྟེ། སྔ་མ་བཞིན་

དུ་ངེས་པར་གཟུང་ངོ་། །བསྡུ་བ་གསུམ་པ་ལ་སྐོ་བ་པོའི་བྱ་བ་ནི། མངོན་དུ་ཕྱོགས་པར་བྱ་བ་དང་། བྱ་བ་ལ་བསྐོ་བའོ། །དེ་དག་རྣམ་པ་བཞི་དག་གིས། །མངོན་དུ་ཕྱོགས་པར་མཛད་པ་ན། །བསྡུ་བའི་མཐའ་དག་ཉིད་དང་ནི། །ཆེན་པོ་ཉིད་ཀྱང་རྒྱལ་བས་བསྟན། །མངོན་
དུ་ཕྱོགས་པར་བྱ་བ་ཡང་རྣམ་པ་བཞི་སྟེ། ཏིང་ངེ་འཛིན་ཐོབ་པ་ནི། མཐོང་བ་དོན་ཡོད་ཅེས་བྱ་བའི་ཏིང་ངེ་འཛིན་ཏེ། དེ་ཐོབ་པའི་ཕྱིར་བྱང་ཆུབ་སེམས་དཔའ་ཡང་མཐོང་བ་དོན་ཡོད་ཅེས་གསུངས་པ་དང་། ཏིང་ངེ་འཛིན་དེའི་འབྲས་བུ་ཐོབ་པ་ནི། ཏིང་ངེ་འཛིན་འགའ་ཞིག་འབྲས་བུ་མཐོང་
བ་དོན་ཡོད་པ་ཉིད་དེ། དེ་ཐོབ་པའི་ཕྱིར་མཐོང་བ་དོན་ཡོད་ཅེས་གསུངས་པ་དང་། སྨོན་ལམ་གྱི་འབྲས་བུ་ཐོབ་པ་ནི། །སྔོན་གྱི་སྨོན་ལམ་གྱི་འབྲས་བུ་ཐོབ་པར་བྱ་བའི་ཕྱིར། མཐོང་བ་དོན་ཡོད་ཅེས་གསུངས་པ་དང་། ཡོན་ཏན་བསྒྲུབས་པའི་འབྲས་བུ་ཐོབ་པ་དེས་གང་གིས་མཐོང་
བ་དོན་ཡོད་པར་གྱུར་པ་དེ་ལྟ་བུའི་ཡོན་ཏན་བསྒྲུབས་པས་ན་དེའི་ཕྱིར་མཐོང་བ་དོན་ཡོད་གསུངས་པའོ། །དེའི་མཐོང་བ་དོན་ཡོད་པ་ཉིད་ནི། དེ་མཐོང་བ་འབྲས་བུ་མེད་པར་མི་འགྱུར་བའི་ཕྱིར་རོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་ལ་ཡང་སྦྱར་བར་བྱའོ། །རྣམ་པ་འདི་
དག་གིས་བསྡུ་བའི་མཐའ་དག་ཉིད་དང་། ཆེན་པོ་ཉིད་བསྟན་ཏེ། སྡུད་པ་པོ་རྣམས་ཆེ་བའི་ཕྱིར་རོ། །བྱ་བ་ལ་བསྐོ་བ་ནི་རྣམ་པ་གཉིས་ཏེ། གཙོ་བོ་མ་ཡིན་པའི་བྱ་བ་དང་། གཙོ་བོའི་བྱ་བའོ། །གཙོ་བོ་མ་ཡིན་པའི་བྱ་བ་ཡང་རང་གི་ངོ་བོ་དང་། ཡུལ་གྱིས་རྣམ་པ་གཉིས་སུ་འགྱུར་ཏེ།
ཡུལ་ནི་ཐམས་ཅད་ཀྱི་ཞེས་བྱ་བ་ལ་སོགས་པ་སྟེ། དེ་ཕན་ཆད་ནས་སངས་རྒྱས་ཀྱིས་གདུལ་བ་མེད་པའི་ཕྱིར་རོ། །གཙོ་བོའི་བྱ་བ་ནི་མཐའ་དག་དང་། གདུལ་བའི་རང་གི་ངོ་བོ་དང་། དེའི་དབྱེ་བ་དང་། གཞི་དང་། རང་གི་ངོ་བོས་བསྟན་ཏེ། དེའི་གདུལ་བའི་རང་གི་ངོ་བོ་བསྟན་པ་ནི།
ཉན་ཐོས་ལ་སོགས་པ་གཞན་སངས་རྒྱས་ཀྱིས་གདུལ་བ་མེད་པའི་ཕྱིར་རོ། །དེའི་དབྱེ་བ་བསྟན་པ་ནི། དེ་སྙེད་ཅིག་གི་དབྱེ་བས་ཐ་དད་པའི་བྱང་ཆུབ་སེམས་དཔའ་རྣམས་བཀུག་པའོ། །ཉན་ཐོས་ལ་སོགས་པ་གང་ཡིན་པ་དེ་དག་དགུག་པ་ལ་ཤིན་ཏུ་དཀའ་བ་ཅི་ཞིག་ཡོད་ན་མ་བཀུག་པར་ཞེ་ན། དེའི་

ཕྱིར་དེ་དག་ལ་དེས་གདུལ་བ་མེད་པར་བསྟན་པའི་ཕྱིར་རོ། །སྲིད་པ་ཐ་མ་པ་ནི་ཚེ་འདི་ཉིད་ལ་མངོན་པར་རྫོགས་པར་འཚང་རྒྱ་བའོ། །སྐྱེ་བ་གཅིག་གིས་ཐོགས་པ་ནི་ཚེ་ཕྱི་མ་ལ་མངོན་པར་རྫོགས་པར་འཚང་རྒྱ་བའོ། །ཕྱིར་མི་ལྡོག་པ་ནི་ས་བརྒྱད་པ་ཐོབ་པ་རྣམས་སོ། །མི་སྐྱེ་བའི་ཆོས་ལ་བཟོད་
པ་ཐོབ་པ་ནི་རབ་ཏུ་དགའ་བ་ལ་སོགས་པའི་ས་ཐོབ་པ་རྣམས་སོ། །དད་པས་མོས་པ་ནི་མོས་པས་སྤྱོད་པའི་ས་ཐོབ་པ་རྣམས་སོ། །སྲིད་པ་ཐ་མ་པ་སྨོས་པ་ནི་ཆོས་ཀྱི་རྣམ་གྲངས་ཀྱི་ཆེ་བ་ཉིད་བསྟན་པའི་ཕྱིར་ཏེ། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་རྣམས་ལ་ཡང་ཕན་
འདོགས་པ་ཡིན་པའི་ཕྱིར་རོ། །བསྡུ་བ་ཞེས་བྱ་བ་འདི་ནི་གཞན་ཡིན་ལ། དེ་ཡང་བསྡུ་བར་བྱ་བའི་བྱ་བ་བརྗོད་པར་འདོད་ན་རུང་སྟེ། དེ་ལྟ་ན་བསྒྲིམས་ཏེ་བསྡུ་བ་འདི་ཇི་ལྟར་རུང་ཞེ་ན། ཉེས་པ་མེད་དེ་འདི་ལྟར་གང་ཞིག་བསྒྲིམས་ཏེ་བསྡུ་བ་དང་། གང་ཡང་བསྒྲིམས་ནི་མི་དགོས་པ། །
བརྗོད་པར་འདོད་པ་འདི་ལ་འདི། །འཇིག་རྟེན་སྤྱོད་པའི་ཚུལ་གྱིས་འཇུག །བྱ་བ་མ་སྦྱར་དུ་ཟིན་ཀྱང་ནུས་པ་ལ་སོགས་པ་མཐོང་བའི་དབང་གིས་སྒྲ་འདི་འཇིག་རྟེན་ན་སྦྱོར་ཏེ། ཚོང་བའི་གྲོང་ནན་གྱིས་སྡུས་ཤིག་ཅེས་བྱ་བ་ལ་སོགས་པ་དང་འདྲ་བས་ན་ཉེས་པ་མེད་དོ། །བསྐོ་བར་བྱ་བའི་བྱ་
བ་ནི། བཀའ་མཉན་པ་དང་། དེ་བཞིན་དུ་བསྒྲུབ་པའོ། །དེའི་འབྲས་བུ་དང་། དེའི་གོ་རིམས་ཀྱི་དོན་ནི་ཕལ་ཆེར་གོང་དུ་ཐལ་བས་རྣམ་པར་མི་ཕྱེའོ། །ལེགས་སོ་ཞེས་བྱ་བའི་སྒྲ་ནི་འདིར་དེ་ལྟར་འཚལ་ལོ་ཞེས་བྱ་བའོ། །བརྗོད་དུ་མེད་པ་ནི་གྲངས་ཀྱི་བྱེ་བྲག་ཡིན་ཏེ། དེས་ཀྱང་བརྗོད་
དུ་མེད་པའོ། །ཡང་ན་བརྗོད་དུ་མེད་པའི་ཡང་། བརྗོད་དུ་མེད་པ་ཉིད་གྲངས་ཀྱི་བྱེ་བྲག་ཡིན་ཏེ། བརྒྱ་ཞེས་བྱ་བ་ལ་སོགས་པ་བཞིན་ནོ། །དེ་ཡང་བྱེ་བ་ཁྲག་ཁྲིག་ཕྲག་འབུམ་གྱི་བྱེ་བྲག་ཡིན་ནོ། །ད་ནི་དགོས་པ་བརྟགས་ནས་ཕན་པ་ཆེ་བ་དང་། གདུལ་བའི་བྱེ་
བྲག་དང་། གུས་པའི་བྱེ་བྲག་དང་། སྟོན་པ་པོའི་བྱེ་བྲག་དང་། དགོས་པའི་བྱེ་བྲག་དང་། རྣམ་པ་ལྔས་ཞུ་བ་བསྟན་ཏོ། །སྟོན་པ་པོ་ནི་བྱེ་བྲག་རྣམ་པ་གསུམ་གྱིས་ཁྱད་པར་དུ་འཕགས་ཏེ། གང་ཕྱིར་དེ་བཞིན་གཤེགས་པ་ནི། །སྐྱོན་དང་ཉོན་མོངས་ཕུང་པོ་བསྩལ། །དོན་ཀུན་

ཡང་དག་མཁྱེན་པ་སྟེ། །དེ་ཕྱིར་རྒྱལ་ལ་ཞུ་བར་འོས། །གང་གི་ཕྱིར་ཕྱིན་ཅི་མ་ལོག་པར་གསུངས་པས་ན་དེ་བཞིན་གཤེགས་པ་སྟེ། དེའི་ཕྱིར་ཞུ་བར་འོས་ཏེ། དེ་ཡང་ཉོན་མོངས་པ་དང་ཤེས་བྱའི་སྒྲིབ་པ་སྤངས་པའི་ཕྱིར་རོ། །དེའི་དེ་ཡང་དོན་ཐམས་ཅད་ཡང་དག་པར་
མཁྱེན་པའི་ཕྱིར་རོ། །ཡང་ན་གང་གི་ཕྱིར་ཡང་དག་པར་རྫོགས་པའི་སངས་རྒྱས་ཡིན་པ་དེའི་ཕྱིར་ཞུ་བར་འོས་ཏེ། དེའི་དེ་ཡང་ཉོན་མོངས་པ་དང་ཤེས་བྱའི་སྒྲིབ་པ་སྤངས་པའི་ཕྱིར་རོ། །དེའི་དེ་ཡང་དེ་བཞིན་གཤེགས་པ་ཡིན་པའི་ཕྱིར་ཏེ། བདེ་བར་གཤེགས་པ་རྣམས་ཀྱིས་བགྲོད་པ་དང་། རྗེས་སུ་བགྲོད་
པའི་ལམ་དུ་གཤེགས་པའི་ཕྱིར་རོ་ཞེས་བྱ་བའི་ཐ་ཚིག་གོ། །དད་པས་མོས་པ་ལ་སོགས་པས། །གོང་ནས་གོང་དུ་འཐོབ་པའི་ཕྱིར། །གདུལ་བྱའི་བསམ་པའི་བྱེ་བྲག་གིས། །དོན་ནི་རྣམ་ལྔར་བསྟན་པ་ཡིན། །དགོས་པའི་བྱེ་བྲག་ནི་རྣམ་པ་ལྔ་སྟེ། དད་པས་མོས་པ་རྣམས་ཀྱིས་མི་སྐྱེ་བའི་ཆོས་ལ་བཟོད་པ་
འཐོབ་པ་དང་། མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་ཀྱིས་ཕྱིར་མི་ལྡོག་པའི་ས་འཐོབ་པ་དང་། དེ་རྣམས་ཀྱིས་སྐྱེ་བ་གཅིག་གིས་ཐོགས་པ་ཉིད་འཐོབ་པ་དང་། དེ་རྣམས་ཀྱིས་ཀྱང་སྲིད་པ་ཐ་མ་པ་ཉིད་འཐོབ་པ་དང་། སྲིད་པ་ཐ་མ་བ་རྣམས་ཀྱིས་ཀྱང་གཟུངས་ཀྱི་སྒོར་འཇུག་པ་འཐོབ་
པའོ། །སྡུག་བསྔལ་ལ་སོགས་ཡུལ་རྣམས་ལ། །ནེར་ནུར་བྱེད་པ་སོམ་ཉིར་བསྟན། །དེ་སྤངས་ས་ཐོབ་འདི་ཡིན་པར། །འདིར་ནི་དོན་གྱིས་བསྟན་པ་ཡིན། །དོན་གྱིས་ན་སྡུག་བསྔལ་ལ་སོགས་པའི་བདེན་པ་ལ་དམིགས་པའི་ཐེ་ཚོམ་སྤངས་ན། དད་པས་མོས་པ་རྣམས་ཀྱིས་ས་ཐོབ་པར་
བསྟན་ཏོ། །སོམ་ཉི་སྤངས་པས་སྡུག་བསྔལ་ལ་སོགས་པའི་བདེན་པ་མཐོང་བས་སྤང་བར་བྱ་བའི་ཉོན་མོངས་པའི་ཚོགས་ཀྱང་སྤངས་པར་ཁོང་དུ་ཆུད་པར་བྱ་སྟེ། དེ་དག་ནི་ཅིག་ཅར་སྤོང་བར་འགྱུར་བའི་ཕྱིར་རོ། །ཐམས་ཅད་ཅེས་སྨོས་པ་ནི་བདེན་པ་བཞི་ལ་དམིགས་པའི་སོམ་ཉི་བསྡུ་བའི་
ཕྱིར་རམ། ཆུང་ངུ་ལ་སོགས་པའི་བྱེ་བྲག་གིས་ཐ་དད་པ་བསྡུ་བའི་ཕྱིར་རོ། །ཕྱིར་མི་ལྡོག་པའི་ས་ནི་འདིར། །རྣམ་པ་གཉིས་ཀྱིས་འཐོབ་པར་བསྟན། །ས་དང་པོ་ཐོབ་པས་མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་ཀྱིས་ནི་རང་གི་སྟོབས་དང་གཞན་གྱི་སྟོབས་རྣམ་པ་གཉིས་ཀྱིས་ཕྱིར་མི་ལྡོག་

པའི་ས་ཐོབ་པར་བསྟན་ཏོ། །སྒྲིབ་པ་མེད་པ་ནི་ཉོན་མོངས་པ་དང་ཤེས་བྱའི་སྒྲིབ་པ་སྤངས་པའི་ཕྱིར་ཏེ། ཡེ་ཤེས་དང་སྤོབས་པ་གང་ལ་ཡོད་པ་དེའི་ངོ་བོ་ནི་ཞེས་བྱ་བར་ཚིག་རྣམ་པར་སྦྱར་རོ། །ཡང་ན་སྒྲིབ་པ་མེད་པ་ནི་ཐམས་ཅད་མཁྱེན་པའི་ཡེ་ཤེས་ཏེ། འདིས་སྣང་བར་བྱེད་པས་དེའི་ངོ་བོ་ཉིད་དེ་
ཡིན་པས་ཡང་ངེས་པར་གཟུང་བར་བྱའོ། །འདིས་མི་གཡོས་པའི་ས་བསྟན་ཏེ། དེ་ནི་རང་གི་སྟོབས་ཡིན་ནོ། །གཞན་གྱི་སྟོབས་ནི་རྣམ་པ་གསུམ་གྱིས་བསྟན་ཏེ། དགེ་བའི་བཤེས་གཉེན་དུ་མ་ལ་བརྟེན་པས། ཐོས་པ་ལས་བྱུང་བའི་ཤེས་པ་འཐོབ་པ་དང་། བསམས་པ་ལས་བྱུང་བའི་ཤེས་པ་
འཐོབ་པ་དང་། བསྒོམས་པ་ལས་བྱུང་བའི་ཤེས་པ་འཐོབ་པ་