Luận tạng Tây Tạng (Tengyur) — Tập 71

སྟེ། འདིར་
ཡི་གེ་མངས་སུ་དོགས་པས་མ་སྤྲོས་སོ། །རྟག་ཏུ་མཚན་མོ་སྦྱིན་པར་བྱ། །ཞེས་བྱ་བ་ནི་དངོས་གྲུབ་ཐོབ་ཀྱི་བར་དུ་ནུབ་མོའི་དུས་ཤིག་ཏུ་ལན་རེ་གཏོར་མ་སྦྱིན་པའི་དོན་ཏོ། །དགའ་ནས་ཞེས་བྱ་བ་ནི་བསྙེན་པས་མགུ་ཞེས་བྱ་བའི་ཐ་ཚིག་གོ། །མངོན་དུ་ཕྱོགས་པ་ཞེས་བྱ་བ་ནི་
བསྙེན་པ་བྱས་པའི་དབང་གིས་དངོས་གྲུབ་ཐོབ་པར་ངེས་པའོ། །རྙེད་པ་རྙེད་ཅིང་ཞེས་བྱ་བ་ནི་ནོར་རྫས་འདུ་བའི་དོན་ཏོ། །ས་བོན་འབྱུང་བར་བྱེད་ཅེས་བྱ་བ་ནི་ཁུ་བ་རླུགས་པའོ། །འདོད་ཆགས་ཟིལ་གྱིས་ནོན་པའི་བུད་མེད་དག །ཅེས་བྱ་བ་ནི་གནོད་སྦྱིན་མོ་མི་གཟུགས་ལས་ཁྱད་
པར་དུ་འཕགས་པ་ལྷའི་བུ་མོའི་གཟུགས་དང་འདྲ་བ་དེ་མཐོང་བས་རང་དབང་མེད་པར་འདོད་ཆགས་ཀྱིས་མྱོས་ནས་སྒྲུབ་པ་གཞན་མི་དྲན་པར་འགྱུར་བའི་ཕྱིར་རོ། །གནོད་པར་བྱེད་པ་ངེས་པར་གནས་པར་འགྱུར། །ཞེས་བྱ་བ་ནི་སྒྲུབ་པ་པོས་དངོས་གྲུབ་མི་ཐོབ་པར་བྱ་བའི་དོན་དུ།
རྩེད་འཇོ་ལ་སོགས་པས་བསྟེན་ཅིང་སེམས་གཡེང་བར་བྱེད་ཅེས་བྱ་བའི་ཐ་ཚིག་གོ། །གནོད་པ་བྱེད་ཚེ་འགྲོ་བར་མི་བྱ་ཞིང་། །ཞེས་བྱ་བ་ནི་དེ་དག་གིས་བྲོས་པའི་དུས་སུ་བསླུར་མི་བཏུབ་པའོ། །རྙེད་པ་མང་ཉུང་ལ་ཡང་འདོད་མི་སྐྱེད། །ཅེས་བྱ་བ་ནི་དེའི་དུས་སུ་ཅི་རྙེད་ན་ཡང་མི་

བསླང་བ་དང་གཞན་ལ་གཏང་བའི་དོན་ཏོ། །མཚན་མོ་ཁུ་བ་དགག་བྱས་ནས། །ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། བུ་མོས་བཀལ་པའི་སྐུད་པ་ནི། །ལེ་བརྒན་རྩི་འམ་གུར་ཀུམ་བཙོས། །དེ་ནི་བཟླས་བརྗོད་སྟོང་བྱས་ཤིང་། །མདུད་པ་
དག་ནི་བདུན་བོར་ལ། །སྲོད་ལ་རིག་སྔགས་འདི་ཡིས་ནི། །བདག་གི་རྐེད་པར་བཅིང་བར་བྱ། །ཞེས་གསུངས་པ་ཉིད་འདིར་སྦྱར་རོ། །བརྩོན་འགྲུས་རབ་ཏུ་བསྐྱེད་དེ་བསྒྲུབ་པར་བྱ། །ཞེས་བྱ་བ་ནི་བགེགས་ཀྱིས་བསླུས་པའི་དབང་དུ་ཡང་མི་གཏང་། འདི་དག་ནི་དངོས་གྲུབ་དང་
ཉེ་བའི་མཚན་མའོ་ཞེས་ཡ་ཡ་པོའི་དགའ་བ་བསྐྱེད་པར་ཡང་མི་བྱ་བར་སྔོན་བས་ཀྱང་ཤིན་དུ་བརྩོན་འགྲུས་བསྐྱེད་དེ་སྒྲུབ་པའི་དོན་ཏོ། །སེམས་རྨོངས་པ་ཞེས་བྱ་བ་ནི་སྒྲུབ་པ་པོ་བླུན་པོ་ཁ་ཅིག་གོ། །གཞན་དུ་བརྩམས་ནས་ཞེས་བྱ་བ་ནི་འདོད་ཆགས་ལ་ཞེན་པའི་དབང་གིས་བགེགས་ཀྱིས་
འབྲོངས་པའི་ཚེ་བསླུར་བཏུབ་པ་དང་། ནོར་རྫས་དག་བླངས་པ་དང་། བརྩོན་འགྲུས་ལྷོད་པས་སྒྲུབ་པ་རྣམས་སོ། །ཕུང་བར་འགྱུར་ཞེས་བྱ་བ་ནི་སྲོག་དང་བྲལ་བར་བྱེད་པའི་ཕྱིར་རོ། །ཤ་ཟའི་གནོད་སྦྱིན་མོ་ལའང་དེ་ཉིད་དོ། །ཞེས་བྱ་བ་ནི་ཆོ་གའི་སྦུབས་གོང་མ་དང་འདྲ་བར་
བསྟན་ཏོ། །ཆོ་ག་ལྷག་མ་འདི་རྣམས་བྱ། །ཞེས་བྱ་བ་ནི་སྔ་མ་ལས་མ་བཤད་པའོ། །གཞན་ནི་གོ་བར་ཟད་དོ། །གོས་ཀྱང་སྔོན་པོ་ཞེས་བྱ་བ་ནི་སྒྲུབ་པ་པོ་རང་བགོ་བའོ། །བྲང་གིས་འགྲོ་བ་ཞེས་བྱ་བ་ནི་ཀླུ་རྣམས་ཀྱི་རང་བཞིན་གྱི་གཟུགས་སྦྲུལ་ཡིན་པའི་ཕྱིར་རོ། །རྟག་ཏུ་འབྱུང་
ཞེས་བྱ་བ་ནི་རྫས་དེ་རྣམས་པྲ་སེ་ན་སྟོན་པའི་གཞི་ཡིན་ཏེ། སྣང་དུ་བཏུབ་ཅེས་བྱ་བའི་ཐ་ཚིག་གོ། །མཐོ་རིས་ཞེས་བྱ་བ་ནི་ལྷ་ཡུལ་བ་རྣམས་སོ། །ས་སྟེངས་ཞེས་བྱ་བ་ནི་མི་རྣམས་སོ། །དེའི་ཤུགས་ཀྱིས་ངན་སོང་དག་ཀྱང་རྟོགས་པར་ཁོང་དུ་ཆུད་པར་བྱའོ། །དུས་དང་མི་
ལྡན་པ་ཞེས་བྱ་བ་ནི་དུས་གསུམ་ལས་འདས་པ་འཕགས་པ་དགྲ་བཅོམ་པ་ལ་སོགས་པ་ཡང་རྟོགས་པར་འགྱུར་བའི་དོན་ཏོ། །གཞན་ནི་གོ་བར་ཟད་དོ། །སྔོན་དུ་ཆོ་ག་བཞིན་བཟླས་ཤིང་། །ཞེས་བྱ་བ་ནི་སོ་སོའི་ཆོ་ག་ཞིབ་མོ་དག་ལས་བསྙེན་པའི་གྲངས་ངེས་པར་གཟུང་པའོ། །

ཚེས་གྲངས་བཟང་ལ་ཞེས་བྱ་བ་ནི་ཡར་གྱི་ངོའི་དུས་ཚིགས་རྣམས་སོ། །སྨྱུང་བ་ཞེས་བྱ་བ་ནི་ཞག་གཅིག་གི་མདུན་ནས་ཁ་ཟས་སྤང་བར་བསྟན་ཏོ། །དགོངས་ཀར་ཞེས་བྱ་བ་ནི་སྨྱུང་བ་བྱས་པའི་ཕྱི་འཕྲེད་དོ། །བྱིས་པ་གཞོན་ནུ་ཞེས་བྱ་བ་ནི་ལོ་བཅུ་དྲུག་ལོན་པ་
མན་ཆད་དོ། །སྟ་གོན་གནས་པར་བྱ་ཞེས་བྱ་བ་ནི་བྱིས་པ་དེ་དག་ཀྱང་སྨྱུང་བ་བྱེད་དུ་བཅུག་ལ་འདི་དག་གིས་མཐོང་བར་གྱུར་ཅིག་ཅེས་ལྷ་ལ་གསོལ་བ་བཏབ་སྟེ་དེ་རྣམས་བསྲུང་བར་བྱས་ནས་མེ་ཏོག་དང་སྤོས་དག་ཀྱང་བདག་གིས་ལག་དར་ཏེ་བྱིན་ནས་ས་གཙང་མར་གོས་སར་
པ་བསྐོན་ཏེ། བསྙལ་བའི་དོན་ཏོ། །ཁྲུས་བྱས་ཞེས་བྱ་བ་ནི་སྒྲུབ་པ་པོ་དང་བྱིས་པ་གཉིས་ཀའོ། །ཤར་ཕྱོགས་ཁ་བལྟས་ཀུ་ཤའི་སྟན་སྟེང་དུ། །འདུག་ནས་ཞེས་བྱ་བ་ནི་སྒྲུབ་པ་པོ་ཉིད་དོ། །གསང་སྔགས་རྗེས་སུ་དྲན་པར་བྱ། །ཞེས་བྱ་བ་ནི་ལྷའི་ཏིང་ངེ་འཛིན་ལ་
གནས་ལས་བརྩམ་པར་བསྟན་ཏོ། །ཐལ་བ་གཙང་མ་ཞེས་བྱ་བ་ནི་སྦྱིན་སྲེག་བྱ་བའི་ཐལ་བའོ། །རྩེ་གཅིག་སེམས་ཀྱིས་གསང་སྔགས་ཟློས་བཞིན་དུ། །ཞེས་བྱ་བ་ནི་བདག་ཉིད་ལྷའི་ཏིང་ངེ་འཛིན་དུ་ཇི་ལྟ་བ་བཞིན་དུ་བསྒོམས་པ་ལས་མ་ཉམས་པས་གཞི་གང་ཡིན་པ་ལ་
ལྷ་སྤྱན་དྲངས་ཏེ་མཆོད་ནས། དངོས་པོ་གང་བལྟ་བར་བྱ་བ་ཡང་སྟོན་ཅིག་ཅེས་བསྐུལ་ཞིང་བཟླས་བརྗོད་བྱ་བར་བསྟན་ཏོ། །ནུབ་ཏུ་ཁ་བསྟན་ཞེས་བྱ་བ་ནི་སྒྲུབ་པ་པོ་ཁ་བལྟ་དགོས་པའི་ཕྱིར་ཏེ་བར་གཉའ་ཤིང་གང་ལྷག་ཙམ་གྱིས་བཅད་ནས་བལྟར་གཞུག་གོ། །ལྷ་
ཡི་མིག་གིས་ཞེས་བྱ་བ་ནི་སྦྱིན་སྲེག་བྱས་པའི་ཐལ་བས་སོར་མོ་ལ་བསྐུས་ཏེ། གསང་སྔགས་དག་ཀྱང་བཟླས་ནས། ལྷའི་མིག་ཏུ་བྱིན་གྱིས་བརླབ་ཏུ་གསོལ། །ཞེས་བསྐུལ་ཚིག་བཅུག་ནས། བྱིས་པའི་མིག་ལ་བསྐུ་བའི་དོན་ཏོ། །བལྟས་ན་ཞེས་བྱ་བ་ནི་ཉི་མ་ཤར་
བགབ་ནས་དྲོས་ཆེན་གྱི་བར་དུ་བལྟར་གཞུག་པའི་ཐ་ཚིག་གོ། །མཐོང་བར་གྱུར་ཞེས་བྱ་བ་ནི་དངོས་པོ་རྣམས་གཟུགས་སུ་མཐོང་བ་འམ། ཡི་གེའི་འབྲས་བུས་ཀྱང་བརྡ་སྤྲོད་པར་བྱེད་དོ། །ཁ་ཅིག་ན་རེ་གཞི་བསྙེན་ན་སྒྲར་ཡང་གྲག་ཅེའོ། །གཞན་ནི་གོ་བར་ཟད་དོ། །གལ་ཏེ་

ཡིད་ཆེས་པར་ནི་མ་གྱུར་ན། །ཞེས་བྱ་བ་ནི་པྲ་སེ་ནས་གཏན་ལ་མ་ཕེབས་སུ་དོགས་ན་ཞེས་བྱ་བའི་ཐ་ཚིག་གོ། །རིག་སྔགས་མི་གདུག་ཅེས་བྱ་བ་ནི་རིག་སྔགས་ཀྱི་ལྷ་ལ་ཡང་རྣམ་པ་གཉིས་ཏེ། སངས་རྒྱས་དང་བྱང་ཆུབ་སེམས་དཔའ་དག་ནི་ཡེ་ཤེས་ལས་བྱུང་བའོ། །དབང་
ཕྱུག་ལ་སོགས་པ་ནི་རྣམ་པར་སྨིན་པས་བསྐྱེད་པའོ། །དེ་བཞིན་དུ་དེ་དག་གི་བྱིན་གྱི་རླབས་ལས་འཁོར་བའི་མཐའ་ཇི་ཙམ་པར་སེམས་ཅན་གྱི་དོན་མཛད་པ་ཁྲོ་བོ་འཇིགས་པའི་མེ་ལ་སོགས་པ་དང་། འཇིག་རྟེན་པའི་ཡང་བསྐལ་པའི་མཐར་ཐུག་པར་མ་མོ་ལ་སོགས་པ་དྲག་ཅིང་
གདུག་པར་བྱིན་གྱིས་བརླབས་པ་དག་ཡོད་དེ། དེ་དག་ཕབ་ན་བྱིས་པ་འཆི་བའི་ཉེན་ཡོད་པས་དེ་ལྟ་བུ་མ་ཡིན་པའི་གསང་སྔགས་མི་གདུག་པ་བཟླས་པར་བསྟན་ཏོ། །ང་ཡི་གསང་སྔགས་ཞེས་བྱ་བ་ནི་སྐབས་འདིར་རྡོ་རྗེའི་རིགས་ཀྱི་ཤས་ཆེར་གསུངས་པའི་ཐ་ཚིག་གོ། །དག་པ་ཞེས་
བྱ་བ་ནི་ཡི་གེ་ལྷག་ཆད་མེད་པའོ། །གང་ཡང་རུང་ཞེས་བྱ་བ་ནི་སྒྲུབ་པ་པོ་ཉིད་གང་ལ་དད་པའོ། །གསོ་སྦྱོང་བྱས་པས་ནན་ཏན་བཟུང་ནས་སུ། །ཞེས་བྱ་བ་ནི་རང་གི་ལྷ་མཉེས་པར་བྱ་བའི་དོན་ཡིན་པས། ལྷ་གཟུང་བ་ཡང་རང་གི་ལྷ་ལ་བཟོད་པར་གསོལ་ཡང་མི་དགོས། བླ་མ་ལས་
ནོད་ཀྱང་མི་དགོས་པར་རང་གིས་གསོ་སྦྱོང་བྱས་ནས་གཟུང་བར་བསྟན་ཏོ། །རྒྱལ་བའི་རིང་བསྲེལ་ཞེས་བྱ་བ་ལ་སོགས་པས་ནི་དེའི་བསྙེན་པའི་གནས་བསྟན་ཏོ། །གཡོ་བ་ཞེས་བྱ་བ་ནི་ཡུལ་སོ་སོར་འཇུག་པའོ། །རབ་ཏུ་བསྡམས་ནས་ཞེས་བྱ་བ་ནི་སོ་སོར་དག་པར་བསྟན་ཏོ། །དེ་ལ་
ཡིད་གཞོལ་བ་ཞེས་བྱ་བ་ནི་ལྷའི་དེ་ཁོ་ན་ལ་སེམས་གཏོད་ཅིང་། བཟླས་བརྗོད་ཡན་ལག་དང་ལྡན་པར་བྱེད་པའོ། །བྱམས་ལ་གནས་ཤིང་ཞེས་བྱ་བ་ནི་དང་པོར་བྱམས་པའི་ཏིང་ངེ་འཛིན་བསྒོམས་ལ་དེའི་རྗེས་ལ་ལྷའི་སྦྱོར་བ་བྱ་བར་བསྟན་ཏེ། དེ་ནི་བསོད་ནམས་འཕེལ་བས་
བགེགས་ཀྱིས་མི་ཚུགས་པར་འགྱུར་རོ། །ཀུ་ཤའི་ཁྲེས་ལ་འདུག་ཅེས་བྱ་བ་ནི་དེའི་དཀའ་ཐུབ་ཀྱི་སྟན་བསྟན་པ་སྟེ། དབྱིབས་དང་ཚད་དང་སོགས་པས་ནི་སྔར་བཤད་པ་དང་མཐུན་པར་རིག་པར་བྱའོ། །ཇི་སྲིད་དུ་ནི་རྩེ་གཅིག་གནས་གྱུར་པ། །ཞེས་བྱ་བ་ནི་སེམས་བཟླས་བརྗོད་

ལ་ཞེན་ཏེ། གཞན་དུ་མི་གཡོ་བར་གྱུར་པའི་དོན་ཏོ། །དེ་སྲིད་དུ་ནི་འབུམ་མམ་ཉིས་འབུམ་བཟླས། །ཞེས་བྱ་བ་ནི་སེམས་ཀྱི་གདེང་ལས་དཔག་པར་བྱ་བའི་ཐ་ཚིག་གོ། །ཧཱུཾ་ཞེས་བྱ་བ་ནི་གསང་སྔགས་གང་ཡང་རུང་བའི་ཀླད་ལ་སྤེལ་བའི་དོན་ཏོ། །ཤིང་ལའང་
འབབ་ན་མི་ལ་སྨོས་ཅི་དགོས། །ཞེས་བྱ་བ་ནི་སྤྱིར་གསང་སྔགས་མཐུ་ཆེ་བར་རྗེས་སུ་བསྔགས་པའོ། །སྣོད་ཅེས་བྱ་བ་ནི་བྱིས་པ་ཡོན་ཏན་དང་ལྡན་པ་ལ་ལྷ་དབབ་པའི་སྐལ་བ་ཡོད་པས་སྣོད་དུ་རུང་ཞེས་བྱ་བའི་དོན་ཏོ། །ཚིག་གི་དོན་གཞན་ནི་གོ་སླ་བས་མ་ཕྱེའོ། །ཚེས་གྲངས་
བཟང་ལ་ཞེས་བྱ་བ་ནི་ངོ་གཉིས་ཀྱི་དུས་ཚིགས་རྣམས་སོ། །སྨྱུང་བ་བྱས་པ་ཞེས་བྱ་བ་ནི་རིག་སྔགས་འཆང་ཉིད་དང་བྱིས་པ་རྣམས་སོ། །ཁྲུས་བྱས་གོས་དཀར་བསྐོན་ཞེས་བྱ་བ་ནི་འབེབས་པ་ཉིད་ཀྱིས་སྔ་དྲོའོ། །ཤར་ཕྱོགས་ཁ་བསྟན་རྒྱན་ནི་རྣམ་པར་སྤངས། །ཞེས་བྱ་
བ་ཡང་བུས་པ་རྣམས་ཏེ། དེ་དག་འདབ་མ་ཕྲག་པར་བཀོད་ལ། གཉའ་བ་ལ་དབབ་པར་བྱ་བའི་གསང་སྔགས་སྤྱན་དྲངས་ཏེ་མཆོད་ནས་ཁོང་དུ་ཞུགས་པར་བསམ་མོ། །བདུག་པས་བདུགས་ཤིང་ཞེས་བྱ་བ་ནི་གུ་གུལ་གྱིས་བདུགས་པས་སོ། །རྫོགས་པར་གྱུར་པར་
ཤེས་པར་བྱ། །ཞེས་བྱ་བ་ནི་ལྷ་ཞུགས་པའི་མཚན་མ་མ་ལུས་ཞེས་བྱ་བའི་དོན་ཏོ། །འཇིགས་པ་མེད་པ་ཞེས་བྱ་བ་ནི་མ་བབས་སུ་དོགས་པ་མེད་ཅེས་བྱ་བའི་ཐ་ཚིག་གོ། །རིག་པ་མཆོག་གི་གསང་སྔགས་དྲན་བྱས་ནས། །ཞེས་བྱ་བ་ནི་དེར་བགེགས་གཞན་མི་འཇུག་པར་
བྱ་བའི་དོན་དུ་བསྲུང་བར་གསུངས་སོ། །གཞན་ནི་གོ་བར་ཟད་དོ། །གང་ཞིག་བླུན་པས་གཞན་དུ་བརྩམས་ནས་ནི། །དེ་ནི་མི་རྣམས་ཀུན་གྱིས་དཔྱས་པར་འགྱུར། །ཞེས་བྱ་བ་ནི་ལྷ་གདུག་པ་ཕབ་པས་བྱིས་པ་ཐལ་བྱུང་ཁྱེར་བ་དང་། བསྙེན་པ་གུས་པར་མ་བྱས་ཤིང་། ཆོ་ག་
མ་སྨིན་པས་མ་ཕེབས་ན་དཔྱས་སུ་འགྱུར་བའི་ཕྱིར་རོ། །གཞན་ནི་གོ་བར་ཟད་དོ། །དྲག་པོའི་སྦྱིན་སྲེག་ཉི་ཤུ་རྩ་གཅིག་བྱ། །ཞེས་བྱ་བ་ནི་དྲག་པོའི་ཐབ་ཏུ་མེ་ཁྲོ་གཉེར་ལ་བསྐྲད་པའི་བསྐུལ་ཚིག་བཅུག་ནས་དྲག་པོའི་ལས་བྱ་བར་བསྟན་ཏོ། །སྔ་མ་བཞིན་ཞེས་བྱ་བ་ལ་

སོགས་པས་ནི་གོང་དུ་སྨོས་པའི་ཆོ་ག་རྣམས་ལས་མི་འགལ་བར་བྱས་པའི་ཕན་ཡོན་བརྗོད་པའོ། །སྔགས་པ་ཡུན་རིངས་ཉོན་མོངས་མི་འགྱུར་རོ། །ཞེས་བྱ་བ་ནི་ཡོན་ཏན་དང་སྐྱོན་ལྷ་ཉིད་ལས་ལུང་ཐོབ་པའི་ཕྱིར་རོ། །ལེའུ་བདུན་པའི་དོན་བཤད་ཟིན་ཏོ།། །།སངས་
རྒྱས་ཀྱིས་གསུངས་ཞེས་བྱ་བ་ནི་མི་སླུ་བའི་ཁུངས་ཏེ་ལུང་ཤིན་ཏུ་དག་པ་ཡིན་པར་བསྟན་ཏོ། །ཡན་ལག་བརྒྱད་ཅེས་བྱ་བ་ནི་ལམ་དེའི་རང་བཞིན་གྱི་རྣམ་གྲངས་སོ། །ལམ་ཞེས་བྱ་བ་ནི་རྣལ་འབྱོར་པ་རྣམས་ཀྱིས་བགྲོད་པར་བྱ་བ་སྒྲུབ་པའི་གཞི་ཡིན་པའི་ཕྱིར་རོ། །ཡང་དག་
པའི་འཚོ་བ་ཞེས་བྱ་བ་ནི་ཚུལ་འཚོས་པ་དང་གཞོགས་སློང་ལ་སོགས་པ་ལོག་པས་འཚོ་བའི་ཉེས་པ་སྤངས་ཤིང་ཡོངས་སུ་དག་པའི་ལུས་དང་ངག་གི་ལས་ཀུན་དུ་སྤྱོད་པའོ། །ཡང་དག་པའི་ལས་ཀྱི་མཐའ་ཞེས་བྱ་བ་ནི་སྲོག་གཅོད་པ་ལ་སོགས་པའི་ཉེས་པ་སྤངས་ཤིང་
ལུས་ཀྱི་ལས་ཡོངས་སུ་དག་པའོ། །ཡང་དག་པའི་ཏིང་ངེ་འཛིན་ཞེས་བྱ་བ་ནི་གོང་ནས་གོང་དུ་ཡོན་ཏན་གྱི་ཁྱད་པར་རྣམས་མངོན་པར་བསྒྲུབ་པའི་ཕྱིར་རྟག་ཏུ་མཉམ་པར་གཞག་པའོ། །ཡང་དག་པའི་ངག་ཅེས་བྱ་བ་ནི་གཞན་དག་ལ་གདམས་ངག་མ་ནོར་བར་འཆད་ཅིང་
བརྫུན་པ་ལ་སོགས་པའི་ཉེས་པ་སྤོང་བའོ། །ཡང་དག་པའི་རྩོལ་བ་ཞེས་བྱ་བ་ནི་ཉེས་པ་ཐམས་ཅད་སྤོང་བ་ལ་མངོན་པར་སྤྲོ་བའོ། །ཡང་དག་པའི་རྟོག་པ་ཞེས་བྱ་བ་ནི། དེས་ཇི་ལྟར་རྟོགས་པའི་དོན་རྣམ་པར་བཞག་ནས་གདོན་པའོ། །ཡང་དག་པའི་དྲན་པ་ཞེས་བྱ་བ་ནི་
དེ་ཉིད་མི་བརྗེད་པའོ། །ཡང་དག་པའི་ལྟ་བ་ཞེས་བྱ་བ་ནི་དེ་ཁོ་ན་ཉིད་ཀྱི་དོན་ལ་མ་ནོར་བའི་རང་བཞིན་དུ་འཛིན་པའོ། །འདིར་གོ་རིམས་འཁྲུགས་པ་ནི་ཚིགས་སུ་བཅད་པ་སྦྱར་བ་ལ་བདེ་བའི་ཕྱིར་རོ། །སོ་སོ་སོ་སོར་ཡང་དག་བསྟེན་པར་བྱ། །ཞེས་བྱ་བ་ནི་ལམ་གྱི་ཡན་ལག་རེ་རེ་
ལ་ཡང་གུས་པས་བརྟེན་པར་བསྟན་ཏོ། །ཡང་ན་སོ་སོའི་སྐྱེ་བོ་དང་འཕགས་པ་ཉན་ཐོས་དང་། །རང་བྱང་ཆུབ་དང་། བྱང་ཆུབ་སེམས་དཔའ་རྣམས་ཀྱིས་སོ་སོའི་རྒྱུའི་སྟོབས་ཀྱིས་འཇུག་ཅེས་བྱ་བའི་ཐ་ཚིག་གོ། །ལམ་འདི་རྣམས་ཀྱིས་ཞེས་བྱ་བ་ནི་བཤད་མ་ཐག་པའི་

ཡན་ལག་བརྒྱད་པའོ། །གསང་སྔགས་དངོས་གྲུབ་སྒྲུབ་ཅིང་། དེ་བཞིན་འདིས་ནི་མཐོ་རིས་ཞེས་བྱ་བས་ནི་སོ་སོའི་སྐྱེ་བོ་མངོན་པར་མཐོ་བར་འདོད་པ་རྣམས་ཀྱིས་བགྲོད་དགོས་པར་བསྟན་ཏོ། །ཐར་པ་ཐོབ་ཅེས་བྱ་བ་ནི་ཉན་ཐོས་དང་རང་སངས་རྒྱས་ཀྱི་འབྲས་བུ་འདོད་
པས་འཕགས་པའི་ལམ་བགྲོད་དགོས་པར་བསྟན་ཏོ། །རྒྱལ་སྲས་ཞེས་བྱ་བ་ནི་བྱང་ཆུབ་སེམས་དཔའ་རྣམས་སོ། །སྔོན་གྱི་རྒྱལ་བ་ཞེས་བྱ་བ་ནི་འདས་པའི་སངས་རྒྱས་རྣམས་སོ། །དེ་བཞིན་གཤེགས་པར་འགྱུར་ཞེས་བྱ་བ་ནི་མ་བྱོན་པའི་སངས་རྒྱས་རྣམས་སོ། །འབྱུང་
བའི་ལམ་སྲོལ་ཡང་འདི་ཉིད་ཡིན་པར་གསུངས་པའི་དོན་ཏོ། །ངོམས་མེད་སེམས་ཀྱིས་ཞེས་བྱ་བ་ནི་གོ་འཕང་ཁྱད་པར་ཅན་འདོད་པ་རྣམས་ཀྱིས་བགྲོད་པ་དེ་ངེས་པར་བསྒྲུབ་དགོས་པའི་ཕྱིར་རོ། །བདེན་པའི་ལམ་དམིགས་ན་ཞེས་བྱ་བ་ནི་མི་སླུ་བའི་གཞི་དེ་ལ་ངེས་པར་གཟུད་
དེ་ཡིད་བརྟན་ན་ཞེས་བྱ་བའི་དོན་ཏོ། །དགེ་བའི་ལས་དེ་ཡང་དག་བསྐྱེད་པ་ཡིན། །ཞེས་བྱ་བ་ནི་དེའི་ཕན་ཡོན་གྱིས་སོ་སོའི་འབྲས་བུ་ཐོབ་པར་འགྱུར་རོ་ཞེས་བྱ་བའི་ཐ་ཚིག་གོ། །ཡོངས་སུ་འཛིན་པ་རྣམ་པར་སྤངས་ནས་སུ། །ཞེས་བྱ་བ་ལ་སོགས་པས་ནི་ཡང་དག་པའི་འཚོ་
བ་རྣམ་པར་ཕྱེ་སྟེ་བསྟན་པའོ། །སྟག་ཅེས་བྱ་བ་ནི་སྲོག་ཕངས་པ་དང་བྲལ་བར་བྱེད་པས་བསྙེན་དུ་མི་རུང་བའི་དོན་ཏོ། །སྦྲུལ་ཞེས་བྱ་བ་ནི་གདུག་ཅིང་མ་རུངས་པ་ཉིད་ཡིན་པས་ཡིད་འབྱུང་བར་བྱ་བ་ཡིན་ནོ། །མེ་ཞེས་བྱ་བ་ནི་གདུང་བར་བྱེད་པ་ཉིད་ཀྱིས་སྡུག་བསྔལ་བསྐྱེད་པའི་
ཐ་ཚིག་གོ། །འཇིག་རྟེན་ལ་བསམས་ནས་ཞེས་བྱ་བ་ནི་དཔེ་གོང་མ་རྣམས་དང་འཇིག་རྟེན་པའི་འདོད་པའི་ཡོན་ཏན་དང་མཚུངས་པར་དམིགས་པར་བསྟན་པ་སྟེ། ཇི་སྐད་དུ། འདོད་པ་རྣམས་ནི་ཕུང་བ་བསྐྱེད་པ་སྟེ། །རྒྱལ་བའི་དབང་པོས་ཀིམ་པའི་འབྲས་འདྲར་གསུངས། །
དེ་དག་སྤང་བྱ་དེ་ཡི་ལྕགས་སྒྲོག་གིས། །འཁོར་བའི་བཙོན་རར་འཇིག་རྟེན་འདི་དག་བཅིངས། །ཞེས་བཤད་པ་ལྟ་བུའོ། །སྤངས་ཏེ་ཞེས་བྱ་བ་ནི་གཉེན་པོ་བསྒོམ་པའི་དུས་སུའོ། །བུད་མེད་མཚན་ཉིད་ཅེས་བྱ་བ་ལ་སོགས་པས་ནི་ཡང་དག་པའི་དྲན་པའི་མི་མཐུན་པའི་

ཕྱོགས་སྤང་བར་བསྟན་ཏོ། །གླང་ཆེན་རྟ་དང་ཞེས་བྱ་བ་ལ་སོགས་པས་ནི་ཡང་དག་པའི་རྩོལ་བའི་མི་མཐུན་པའི་ཕྱོགས་སྤང་བར་བསྟན་ཏོ། །ཡུལ་སའི་གཏམ་དང་ཞེས་བྱ་བ་ལ་སོགས་པས་ནི་ཡང་དག་པའི་ངག་གི་མི་མཐུན་པའི་ཕྱོགས་སྤང་བར་བསྟན་ཏོ། །བསྟི་
གནས་ཞེས་བྱ་བ་ལ་སོགས་པས་ནི་ཡང་དག་པའི་ལས་ཀྱི་མཐའ་བསྟན་ཏེ། དེ་ལ་བསྟི་གནས་ནི་བསོད་ནམས་འདོད་པ་དག་གིས་ལམ་གྱིས་དུབ་པ་རྣམས་བསྟན་པའི་གནས་བཤམས་པའོ། །སྔར་བཤད་པའི་གནས་རྣམས་མ་རྙེད་ན་ཞེས་བྱ་བ་ནི་གང་དུ། །དྲོ་ལ་བརྟན་
ཞིང་འཇིམ་པས་ཞལ་ཞལ་བྱས། །ཞེས་བྱ་བ་ལ་སོགས་པའི་གནས་སྒྲུབ་པ་པོ་དབུལ་པོས་མི་ནུས་ན་ཞེས་བྱ་བའི་དོན་ཏོ། །ལྷ་ཁང་སྟོང་པ་ཞེས་བྱ་བ་ལ་སོགས་པས་ནི་རིག་སྔགས་འཆང་དབུལ་པོ་རྣམས་གནས་དེ་དག་ཏུ་བསྒྲུབ་པར་བསྟན་ཏོ། །ཡང་ན་གནས་ནི་ངེས་པར་
མ་བྱས་ན། །ཞེས་བྱ་བ་ནི་དང་པོ་ནས་གནས་གར་བདེ་བ་དེར་བསྟན་པར་དམ་བཅས་པའོ། །ཟླ་བ་བརྒྱད་པོ་ཞེས་བྱ་བ་ནི་སྟོན་ཟླ་ཐ་ཆུངས་ཉ་ནས་དབྱར་ཟླ་འབྲང་པོའི་ཉའི་བར་རོ། །གནས་འདི་གང་ཡང་རུང་བ་ཅིག་ཏུ་བསྟེན། །ཞེས་བྱ་བ་ནི་སྒྲུབ་པ་པོ་དབུལ་པོ་མ་ཡིན་པས་ཀྱང་
གནས་གར་བདེ་བ་དེར་འཕོ་ཞིང་བསྙེན་པ་བྱ་བར་དམ་བཅས་ན་ནི་འཕོས་པའི་ཉེས་པ་མེད་ཅེས་བྱ་བའི་ཐ་ཚིག་གོ། །མཚོ་དང་ཞེས་བྱ་བ་ལ་སོགས་པས་ནི། གང་དང་གང་དུ་གནས་སུ་རུང་བའི་རྣམ་གྲངས་བསྟན་པའོ། །དགུན་དཔྱིད་ཅེས་བྱ་བ་ནི་གོང་དུ་སྨོས་པའི་ཟླ་བ་བརྒྱད་པོ་
ལས་བཞི་བཞིའོ། །དབྱར་ནི་གཅིག་ཏུ་གནས་པར་བྱའོ་ཞེས་བྱ་བ་ནི་དབྱར་ཟླ་འབྲིང་པོ་ཉ་ནས་སྟོན་ཟླ་འབྲིང་པོ་ཉའི་བར་དུ་ཟླ་བ་གསུམ་ནི་མི་འཕོ་བར་གནས་གཅིག་ཏུ་གནས་ཏེ་བཟླས་བརྗོད་བྱ་བར་གསུངས་སོ། །དཔེ་ནི་གོ་བར་ཟད་དོ། །སྔགས་པས་དབྱར་ནི་སྒྲུབ་ལ་མི་
འཇུག་པར། །ཞེས་བྱ་བ་ནི་བསྙེན་པ་རྫོགས་ཏེ་སྒྲུབ་པ་ལ་འཇུག་པ་དག་གིས་ཀྱང་ཆར་པ་ལ་སོགས་པའི་བགེགས་མང་བས་ཟླ་བ་དེ་གསུམ་ལ་བསྒྲུབ་པར་མི་བྱ་བའི་དོན་ཏོ། །བཟླས་བརྗོད་ཀྱིས་ནི་དུས་ཀྱང་འདའ་བར་བྱ། །ཞེས་བྱ་བ་ནི་བསྙེན་པའི་གྲངས་ཚང་གིས་ཀྱང་དབྱར་

འདས་འདས་སུ་ཉིན་རེ་ཞིག་དུས་གཉིས་སམ་དུས་གཅིག་ལ་བཟླས་བརྗོད་བར་ཆད་མེད་པར་བསྟན་ཏོ། །སྟོན་ཟླ་འབྲིང་པོ་ཉ་ནས་ཐ་ཆུངས་ཉའི་བར་དུ་ཟླ་བ་གཅིག་མ་སྨོས་པ་ནི་བསྒྲུབ་པའི་དུས་སུ་ནི་མི་རུང་སྟེ། རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་
སྐད་དུ། སྟོན་ཟླ་འབྲིང་པོ་གློག་འགྱུ་ཞིང་། །སྒྲ་ཆེན་རྣམས་ཀྱང་འབྱུང་བར་འགྱུར། །ཞེས་གསུངས་སོ། །དབྱར་གྱི་ནང་དུ་མ་བསྡུས་པ་ནི་ཟླ་བ་འདི་ལ་ཚུལ་ནས་བྱུང་བའི་ཕྱིར་རོ། །གསང་སྔགས་གཟི་བརྗིད་བསྐྱེད་པས་ཞེས་བྱ་བ་ནི་བཟླས་བརྗོད་དང་སྦྱིན་སྲེག་གིས་
བྱིན་བསྐྱེད་ནས་དངོས་གྲུབ་ཏུ་འགྱུར་བའི་མཐུ་དང་ལྡན་པའི་དོན་ཏོ། །བདག་ཉིད་ཅེས་བྱ་བ་ནི་སྒྲུབ་པ་པོའི་སྐྱེས་བུའོ། །ཟླུམ་པོ་ཞེས་བྱ་བ་ནི་ཀུན་དུ་དཀྱིལ་འཁོར་རོ། །གྲུ་གསུམ་ཞེས་བྱ་བ་ནི་ཟུར་གསུམ་མོ། །གྲུ་བཞི་ཞེས་བྱ་བ་ནི་ལྷམ་པའོ། །པདྨ་ལྟ་བུ་ཞེས་བྱ་བ་ནི་པདྨའི་
འདབ་མ་ཡ་གཅིག་གི་དབྱིབས་སོ། །དབྱིབས་ལེགས་ཤིང་། འཇམ་ཞིང་ཤིན་ཏུ་མཉམ་པར་བྱས་ནས་སུ། །ས་དང་ལྕི་བས་ལེགས་པར་བྱུག །ཅེས་བྱ་བ་ནི་ཐབ་ཀྱི་དབྱིབས་རྣམ་པ་བཞི་ཆར་ལ་ཡང་སྦྱར་བའི་དོན་ཏོ། །དབང་ཐང་བསྐྱེད་ཅེས་བྱ་བ་ནི་དབང་ཕྱུག་གི་དཔལ་
མངོན་དུ་ཕྱོགས་པར་སྒྲུབ་པའི་དོན་ཏོ། །ནོར་འགུགས་པ་ཞེས་བྱ་བ་ནི་གཏེར་ལ་སོགས་པ་བསྡུ་བའོ། །སྤྱན་དྲང་བ་ཞེས་བྱ་བ་ནི་ལྷ་མཉེས་པར་བྱ་བའི་དོན་དུ་ཚིམ་པ་དང་གཟི་བྱིན་བསྐྱེད་པའི་སྦྱིན་སྲེག་བྱེད་པ་སྟེ། དེ་དག་ནི་རྒྱས་པའི་ལས་སོ། །ཞི་བའི་ཆོ་ག་ཞེས་བྱ་བ་ནི་རབ་ཏུ་
གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། དུས་མིན་འཆི་དང་ནད་རྣམས་དང་། །ཡམས་ཀྱི་ནད་དང་གནོད་པ་དང་། །དེ་བཞིན་བགེགས་དང་ནད་འགོ་དང་། །ཞི་བར་བྱེད་པས་ཞི་ཞེས་བྱ། །ཞེས་གསུངས་སོ། །བྱ་བར་ཤིས་ཞེས་བྱ་བ་ནི་རྒྱས་པ་དང་ཞི་བའི་ལས་ཐབ་
ཁུང་ཟླུམ་པོར་བྱས་ན་འགྲུབ་པར་བསྟན་ཏོ། །དགར་ཞེས་བྱ་བ་ནི་གནས་སྔ་མ་ནས་འཕོ་ཞིང་འགྲོ་འདོད་པར་བྱེད་པའི་སྦྱོར་བའོ། །བསྐྲད་པ་ཞེས་བྱ་བ་ནི་མི་མ་ཡིན་པའི་གདོན་རྣམས་ཁོ་ན་ལ་སྟེ། གནས་དེ་ནས་མི་འགྲོ་མི་སྣང་བར་ཚར་བཅད་པའོ། །བསད་པ་

ཞེས་བྱ་བ་ནི་སྲོག་དང་བྲལ་བར་བྱེད་པའོ། །གཤེད་བྱེད་ཅེས་བྱ་བ་ནི་རོ་ལངས་རྦད་པ་ལ་སོགས་པའོ། །སོགས་པ་དྲག་པོ་རྣམས་ཞེས་བྱ་བ་ནི་དགྲའི་ཡུལ་དུ་ནད་འབྱུང་བ་དང་། དམག་མནན་པ་དང་། དབྱེ་བ་ལ་སོགས་པ་གཏོང་བ་དང་། དེ་ལྟ་བུ་དག་དང་ཆ་མཐུན་པར་སྒྲུབ་
པ་ཐམས་ཅད་དོ། །སྲོག་སྐམ་པའམ་ཡན་ལག་གཞིག་པ་ཞེས་བྱ་བ་འདིར་ཡང་དྲག་པོའི་ལས་དང་མཐུན་པར་གསུངས་པ་རྒྱུད་གཞན་ལས་ཐབ་ཁུང་གྲུ་བཞི་པོར་རྒྱས་པའི་ལས་དང་སྦྱར་བ་མི་འགལ་ལོ་ཞེ་ན། ཀླུ་དང་གནོད་སྦྱིན་ལ་སོགས་པ་གཟིར་བ་དང་། ལྷ་མ་ཡིན་
གྱི་ཕུག་གི་འཁྲུལ་འཁོར་ལ་སོགས་པ་ཆོམས་ནས། ཁྱད་པར་གྱི་དཔལ་མངོན་དུ་ཕྱོགས་པའི་ཕྱིར་ཉེས་པ་མེད་དོ། །བུད་མེད་ཅེས་བྱ་བ་ནི་ཡུགས་ས་མོ་ལ་སོགས་པའོ། །བུ་མོ་ཞེས་བྱ་བ་ནི་བདག་འདོད་པ་སྟེ། དེ་བཞིན་དུ་བཟློག་ནས་སྦྱོར་བ་བྱས་པས་ནི་སྐྱེས་པ་ཡང་
དབང་དུ་འགྱུར་བར་གོ་བར་བྱའོ། །གྲོང་དང་ཡུལ་འཁོར་འཐོབ་པ་ཞེས་བྱ་བ་ཡང་དབང་གི་ལས་ཀྱིས་འགྲུབ་པའི་ཕྱིར་རོ། །དོན་ཀུན་ཞེས་བྱ་བ་ནི་འདོད་པའི་ཡོན་ཏན་ལྔའོ། །ལྕི་བ་གཙང་མ་ཞེས་བྱ་བ་ནི་བའི་ལྕི་བ་ས་ལ་མ་ལྷུང་པའོ། །ཐ་མ་ཐོག་ཐག་ཏུ་ཀུ་ཤ་དགྲམ་པར་
བྱ་ཞེས་བྱ་བ་ནི་བཅོམ་ལྡན་འདས་མ་ཙུནྡའི་ཆོ་ག་ཞིབ་མོ་ལས་ཇི་སྐད་དུ། ཀུ་ཤའི་རྩྭ་ནི་རློན་པ་དག །ཐབ་ཁུང་བསྐོར་བའི་ཚུལ་དུ་བཏིང་། །ཐ་མས་རྩེ་མོ་མནན་ནས་སུ། །རྩ་བ་དག་ཀྱང་རྩེ་མོས་མནན། །ཞེས་གསུངས་པའི་ཕྱིར་རོ། །ཕྱག་ན་རྡོ་རྗེ་དང་ཞེས་བྱ་བ་ནི་འདིར་
རྡོ་རྗེའི་རིགས་ཀྱི་ཤས་ཆེར་གསུངས་པའི་ཕྱིར། དེ་སྐད་མོས་ཏེ། རིགས་གཞན་ནི་སྐབས་སུ་ཡང་སོ་སོའི་གཙོ་བོ་ལ་རིག་པར་བྱའོ། །ཡམ་ཤིང་མང་པོ་ཞེས་བྱ་བ་ནི་རྣམ་གྲངས་བཅུ་གཉིས་སུ་ཕྱེ་བའམ། །ལས་ཀྱི་བྱེ་བྲག་གིས་ཐ་དད་པ་རྣམས་ལས་སྣ་གཅིག་ཡིན་གྱི་
འདིར་སྣ་ཚོགས་བ་སོགས་པ་ནི་མ་ཡིན་ནོ། །ཐབ་ཀྱི་དྲུང་དུ་བཞག་སྟེ་ཞེས་བྱ་བ་ནི་སྒྲུབ་པ་པོའི་གཡས་ཕྱོགས་སུ་བཞག་པའི་དོན་ཏོ། །བདུན་ནམ་བརྒྱད་ཅེས་བྱ་བ་ནི་བགེགས་ཀྱི་མཚན་མ་ཆུང་ངུ་བྱུང་བའི་ངོ་ལོན་དུ་བསྟན་ཏོ། །བཅུ་ཞེས་བྱ་བ་ནི་འབྲིང་གི་ངོ་ལོན་དུ་བསྟན་ཏོ། །

ཉི་ཤུ་ཞེས་བྱ་བ་ནི་བགེགས་ཆེན་པོའི་མཚན་མ་ཞིག་བྱུང་ན་དེས་བཟློག་པར་དགོངས་པའི་དོན་ཏོ། །ཀུ་ཤ་བཏིང་བའམ་ཁྲེས་སམ་རྩྭ་སྟན་ལ། །ཞེས་བྱ་བ་ནི་གསང་བའི་དཀྱིལ་འཁོར་ལས། ཞི་བ་ལ་ནི་པདྨའི་སྟན། །རྒྱས་པ་ལ་ནི་ཀུ་ཤའི་ཁྲེས།
དྲག་ཤུལ་སྤྱོད་ལ་སྟན་མེད་པར། །ཞེས་གསུངས་སོ། །འདུག་ནས་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། སྐྱིལ་ཀྲུང་བཀྲ་ཤིས་བཟང་པོ་སྟེ། །དེ་དག་འདུག་པ་གསུམ་ཡིན་ནོ། །ཞེས་གསུངས་ཏེ། ལས་རྣམ་གསུམ་དང་སྦྱར་རོ། །དྲག་པོ་ལ་ནི་གསང་བའི་
དཀྱིལ་འཁོར་ལས། ཇི་སྐད་དུ། རྐང་པས་རྐང་པ་མནན་ཏེ་བྱ། །ཞེས་གསུངས་སོ། །ཤར་ཕྱོགས་ཁ་བལྟས་ཞེས་བྱ་བ་ནི་ལྷ་མཉེས་པར་བྱ་བའི་སྐབས་དང་འབྲེལ་པས། རྒྱས་པའི་ལས་ཀྱི་དབང་དུ་གསུངས་པར་གོ་བར་བྱ་སྟེ། འདིས་ཐམས་ཅད་ལ་མི་བསྒྲེ་བར་གསང་
བའི་དཀྱིལ་འཁོར་ལས་ཇི་སྐད་དུ། །བྱང་དུ་ཁ་བལྟས་ཞི་བའི་ཕྱིར། །ཤར་དུ་ཁ་བལྟས་རྒྱས་པ་ལ། །ལྷོ་ཕྱོགས་ཁ་བལྟས་དྲག་པོ་ཡི། །སྦྱིན་སྲེག་ལས་ནི་བརྩམ་པར་བྱ། །ཞེས་གསུངས་པའི་ཕྱིར་རོ། །རྫས་རྣམས་ཞེས་བྱ་བ་ནི་སོ་སོའི་ཆོ་ག་ཞིབ་མོ་དག་ལས་ཇི་སྐད་
བཤད་པ་རྣམས་སོ། །མར་དང་སྦྲང་རྩི་འོ་མ་ལ་བཏགས་ནས། །ཞེས་བྱ་བ་ལ། རང་གི་ལྷ་མཉེས་པར་བྱེད་པའི་སྐབས་དང་འབྲེལ་བས་རྒྱས་པའི་དོན་ཉེ་བར་གཟུང་བའི་ཐ་ཚིག་གོ། །མེ་ནི་སྟོན་པར་བྱེད་ཅེས་བྱ་བ་ནི་བཟླས་བརྗོད་ལ་ཡང་ཞེན་ལས་ལ་གོམས་ནས་
སྦྱིན་སྲེག་བྱས་ན། མེ་ཡང་མཚན་མ་སྟོན་ཏོ། །དེ་ཉིད་ཀྱི་དབང་དུ་མཛད་ནས་བྱང་ཆུབ་ཀྱི་སྙིང་པོའི་རྒྱུད་ཆེན་པོ་ལས་ཀྱང་། ལས་དང་པོ་པས་སྦྱིན་སྲེག་བྱས་པས་ནི་བགེགས་ཀྱི་ཟས་སུ་འགྱུར་རོ་ཞེས་གསུངས་སོ། །ཚིག་གི་དོན་གཞན་ནི་གོ་སླ་བས་མ་ཕྱེའོ། །
མེ་ཡི་མཚན་མ་འདི་རྣམས་མཐོང་ནས་ནེ། །ཞེས་བྱ་བ་ནི་ངན་པ་རྣམས་བྱུང་ན་ཞེས་བྱ་བའི་དོན་ཏོ། །སྟོབས་པོ་ཆེ་ཡིས་མར་གྱི་སྦྱིན་སྲེག་བྱ། །ཞེས་བྱ་བ་ནི་སྦྱིན་སྲེག་སྔ་མ་བྱེད་པའི་འཕྲོ་གཞག་སྟེ། ཐབ་དེར་བླ་ཐབས་སུ་ཁྲོ་བོའི་རྒྱལ་པོ་དེ་སྤྱན་དྲངས་ལ། མར་གྱི་དགང་

བླུགས་ཉི་ཤུ་རྩ་གཅིག་དབུལ་བས་ནི་ལྟ་ངན་དེའི་ངོ་ལོན་པས་དེ་ནས་སྔ་མའི་འཕྲོ་ནས་བཟུང་སྟེ། རང་གི་ལྷ་ལ་སྦྱིན་སྲེག་དབུལ་བའི་དོན་ཏོ། །སྦྱིན་པ་དག་དང་ཞེས་བྱ་བ་ལ་སོགས་པས་ནི་གོང་དུ། གཙུག་ཕུད་གཞག་སྟེ་སྐྲ་ནི་བྲེག་པར་བྱ། །ཞེས་གསུངས་པས་སྐྲ་ལས་
ཐལ་ཏེ། སྤུ་འདི་དག་བཏོགས་པ་ལ་སོགས་པ་ལ་འཇུག་པ་དགག་པར་བསྟན་ཏོ། །རལ་གྲི་སོ་ལ་འཛིན་ཞེས་པའི་དཔེ་ནི་གོ་བར་ཟད་དོ། །ལེགས་པར་མ་བཟླས་ཞེས་བྱ་བ་ནི་མ་གུས་པའོ། །འབྲས་བུ་མེད་ཅེས་བྱ་བ་ནི་མཐོང་བ་དང་མ་མཐོང་བའི་ཕན་ཡོན་ནོ། །ཕུང་
བར་འགྱུར་ཞེས་བྱ་བ་ནི་འཆི་བ་ལ་སོགས་པའི་ཉེན་ཡོད་པའི་དོན་ཏོ། །མི་ནི་ཚུལ་ཁྲིམས་གཙང་སྦྲར་མི་ལྡན་ཡང་། །ཞེས་བྱ་བ་ལ་སོགས་པས་ནི་འཕགས་པ་དོན་ཡོད་ཞགས་པའི་ཆོ་ག་ཞིབ་མོ་ལས། དཔེར་ན་མི་ལ་ལས་ཙནྡན་ནམ། ག་པུར་རམ་གུར་
ཀུམ་མམ་གླ་རྩི་ཡང་རུང་སྟེ། སྤྱོས་ཤིང་མཚང་བྲུས་ནས། ལུས་ལ་བྱུགས་ཀྱང་ཙནྡན་ལ་སོགས་པ་འདི་སྙམ་དུ་འདིས་བདག་སྤྱོས་ཀྱིས་འདི་ལ་དྲི་ང་བར་བྱའོ་སྙམ་དུ་མི་སེམས་ཏེ། ཆོས་ཀྱིས་དྲི་ཞིམ་པོ་ཁོ་ནར་བྱེད་པ་བཞིན་དུ། བདག་གིས་དོན་ཡོད་ཞགས་པའི་
སྙིང་པོ་འདི་ཡང་ཁྲོས་ཏེ་དྲན་ནམ་བཏོན་ཀྱང་དེ་ལ་བསྲུང་བ་དང་བསྐྱབ་པ་དང་སྦེད་པར་བགྱིད་ལགས་སོ་ཞེས་འབྱུང་བ་དང་འགལ་བར་འགྱུར་བའི་ཐེ་ཚོམ་བསལ་བར་བསྟན་ཏོ། །གཞན་ནི་གོ་བར་ཟད་དོ། །ལྷ་དང་ཞེས་བྱ་བ་ལ་སོགས་པས་ནི་གདོན་རྣམས་ཀྱི་རིགས་
བསྟན་པའོ། །རི་རབ་སྟེང་གནས་དང་ཞེས་བྱ་བ་ལ་སོགས་པས་ནི་དེ་དག་གི་གནས་བསྟན་ཏོ། །དེ་ལྟར་རིགས་དང་གནས་ཙམ་སྨོས་པས་སྤྱིར་གཉེར་བ་ཡང་གདོན་དེ་དག་རྣམ་གྲངས་མ་ངེས་པས་རེ་རེ་ནས་བརྗོད་ཀྱིས་མི་ལང་བའི་ཕྱིར་རོ། །དེ་དག་བཞེད་ནས་ཞེས་བྱ་བ་
ལ་སོགས་པས་ནི་མདངས་ལེན་པ་རྣམས་ལ་བསྔོ་བའི་དོན་ཏོ། །བཏུང་ཞིང་བསྣམས་སུ་གསོལ་ཞེས་བྱ་བ་ནི་ཁམ་གྱིས་ཟ་བ་རྣམས་ལ་སྦྱིན་པར་བསྟན་ཏོ། །དེ་ལྟར་གདོན་ལ་མཆོད་པར་བྱས་ནས་སུ། །ཞེས་བྱ་བ་ནི་དེ་ལ་མཁས་པ་དག་ན་རེ། བདེན་བྲལ་གྱི་ཕྱོགས་

ནས་རྒྱང་བསྲིངས་ཏེ་བྱའོ་ཞེས་ཟེར་རོ། །ལས་འདི་རྣམས་ནི་འབྲས་བུ་མཆིས་པར་མཛོད། །ཅེས་བྱ་བ་ནི་དེ་དག་ལ་ལས་བཅོལ་བར་བསྟན་ཏོ། །དེ་ནས་ཕྱོགས་སྐྱོང་རྣམས་ལ་མཆོད་པར་བྱ། །ཞེས་བྱ་བ་ནི་དེའི་འོག་ཏུ་དབང་ལྡན་གྱི་ཕྱོགས་ནས་བརྩམས་ཏེ་
རེ་རེ་ནས་མཆོད་པར་བྱ་བའི་དོན་ཏོ། །ཅིའི་ཕྱིར་གདོན་རྣམས་ལ་སྔར་མཆོད་ཅེ་ན་དེ་དག་གཏུམ་ཞིང་མྱུར་དུ་འཚེ་བའི་ཕྱིར་རོ། །ལྷ་རྣམས་ཀུན་དང་ཞེས་བྱ་བ་ལ་སོགས་པས་ནི་འཇིག་རྟེན་སྐྱོང་བ་དེ་དག་ཀྱང་འཁོར་དང་བཅས་པར་མཆོད་པའི་ཐ་ཚིག་སྟེ། འདིར་འཁོར་མ་
སྨོས་པ་རྣམས་ཀྱང་། རིག་པ་མཆོག་གི་རྒྱུད་དག་ལས་གསུངས་པ་བཞིན་བརྗོད་པར་བྱ་སྟེ། འདིར་ནི་ཡི་གེ་མངས་སུ་དོགས་པས་མ་སྤྲོས་སོ། །དེ་ལྟར་གང་ཞིག་ཅེས་བྱ་བ་ལ་སོགས་པས་ནི་གཏོར་མ་གཏོང་བའི་ཕན་ཡོན་བསྟན་པའོ། །ལེའུ་བརྒྱད་པའི་དོན་བཤད་ཟིན་
ཏོ།། །།དེ་བཞིན་གཤེགས་པ་ལ་སྐུ་མཚལ་འབྱིན་ཞེས་བྱ་བ་ནི་ཞེ་སྡང་དྲག་པོས་དེའི་སྐུའི་ཡན་ལག་ལ་བཅད་པའི་ངན་སེམས་བསྐྱེད་པའོ། །མཚམས་མེད་པ་ཞེས་བྱ་བ་ནི་འཇིག་རྟེན་འདི་ནས་ཕ་རོལ་ཏུ་ཉིང་མཚམས་སྦྱོར་བ་ན། སྐྱེ་གནས་གང་གིས་ཀྱང་བར་དུ་མི་ཆོད་
པར་མནར་མེད་པའི་དམྱལ་བར་ངེས་པར་སྦྱོར་བའི་དོན་ཏོ། །ཕུང་པོ་འདི་ལ་ཞེས་བྱ་བ་ནི་ད་ལྟར་གྱི་ལུས་ཉེ་བར་ལེན་པས་ཟིན་པའོ། །མཆོད་རྟེན་ཞེས་བྱ་བ་ནི་སྐུ་གཟུགས་དང་སྐུ་གདུང་བཞུགས་པའི་མཆོད་རྟེན་དང་ལུང་གི་ཆོས་སོ། །འཇིག་ཅེས་བྱ་བ་ནི་དེ་དག་གཏན་དུ་
མི་སྣང་བར་བྱེད་པའོ། །བྱང་ཆུབ་སེམས་དཔའ་ཞེས་བྱ་བ་ནི་ས་ཆེན་པོ་ལ་གནས་པའོ། །སློབ་པ་ཞེས་བྱ་བ་ནི་མོས་པའི་ས་ལ་གནས་པའོ། །མཚམས་མེད་པ་དང་ཉེ་བ་ཞེས་བྱ་བ་ནི་མཚམས་མེད་པ་ལྔ་དང་མི་བཟད་པར་འདྲ་བ་ལས། །དགེ་བའི་ལས་དྲག་པོ་དག་གིས་དེ་
ལས་བཟློག་པ་དག་སྲིད་པ་ནི་བྱེ་བྲག་གོ། །ཚུལ་ཉམས་པ་ཞེས་བྱ་བ་ནི་མཐོ་རིས་དང་བྱང་གྲོལ་ཐོབ་པའི་རྒྱུ་མེད་པར་གྱུར་པའོ། །བསྐལ་པའི་བར་དུ་ཞེས་བྱ་བ་ནི་བསྐལ་པ་ཆེན་པོ་གཅིག་ཏུ་ཞེས་བྱ་བའི་དོན་ཏོ། །མནར་མེད་པ་ཡི་སྡུག་བསྔལ་མྱོང་བར་འགྱུར། །ཞེས་བྱ་བ་

ནི་ཕྱོགས་དྲུག་ནས་མེ་འབར་བ་འཁྲིགས་པས་སེམས་ཅན་རྣམས་ཀྱི་པགས་པ་དང་ཤ་དང་རྒྱུས་པ་དང་རུས་པ་དང་རྐང་མར་མེའི་སྙིང་པོ་ལ་ཞེན་པ་བཞིན་དུ་ལུས་པོ་ལ་ཁྱབ་ནས། །དེ་ནས་ཉམ་ཐག་པའི་ང་རོ་མ་གཏོགས་པར་འདི་དག་ནི་སེམས་ཅན་ནོ། །འདི་དག་ནི་མེ་ཡིན་
ནོ་ཞེས་དབྱེ་བར་མི་ནུས་པའི་ཕྱིར་སྡུག་བསྔལ་བརྒྱུད་པའི་བར་མཚམས་མེད་པའི་དམྱལ་བ་མནར་མེད་པ་ཞེས་བྱ་བའི་ཐ་ཚིག་གོ། །ཆོས་ཀྱི་སྐུ་སྤོང་བ་ཞེས་བྱ་བ་ནི་འཐོབ་པའི་ཆོས་ལ་རྒྱབ་ཀྱིས་ཕྱོགས་པའོ། །བསླབ་པའི་ཚིག་མ་ལུས་པས་བརྒྱན་པ་ཞེས་བྱ་བ་ནི་
སོ་སོར་ཐར་པའི་སྡོམ་པས་བསྡུས་པ་ལ་གནས་པའོ། །ངན་པའི་སེམས་ཞེས་བྱ་བ་ནི་ཞེ་སྡང་གིས་དཀྲུགས་པའོ། །དཀའ་བར་སྤྱོད་པར་ལྡན་ཞེས་བྱ་བ་ནི་དཀའ་ཐུབ་ཁྱད་པར་ཅན་རླུང་ཟ་བ་ལ་སོགས་པ་བྱེད་པའོ། །དངོས་གྲུབ་མི་ཐོབ་ཅེས་བྱ་བ་ནི་ཤིང་ཏཱ་ལའི་མགོ་བཅད་
པ་བཞིན་དུ། དངོས་གྲུབ་ཐོབ་པའི་སྐལ་བ་ཅན་དུ་སླར་གསོར་མེད་དོ་ཞེས་བྱ་བའི་ཐ་ཚིག་གོ། །བདག་ཉིད་མནར་མེད་ཡུན་རིང་དམྱལ་བར་བཙོས། །ཞེས་བྱ་བ་ནི་གོང་མ་གཉིས་དང་མཐུན་པར་བསྟན་ཏེ། སྐྱེ་གནས་གཞན་གྱིས་བར་དུ་མ་ཆོད་པ་སྲིད་པ་དང་། བསྐལ་
བར་མི་གནས་པ་ནི་བྱེ་བྲག་གོ། །མདོར་བཤད་པའོ་ཞེས་བྱ་བ་དང་མཚམས་མེད་པ་དང་མཐུན་པའི་ཆོས་འདིར་མ་སྨོས་པ་རྣམས་ཀྱང་། དེ་དག་དང་འདྲ་བར་སྡིག་ལྕི་བར་བསྟན་ཏོ། །བྱང་ཆུབ་སེམས་ནི་བླངས་པ་ལས། །ཞེས་བྱ་བ་ནི་བྱང་ཆུབ་ཀྱི་སྡོམ་པ་མནོས་པ་སྟེ།
སྨོན་པ་བྱང་ཆུབ་ཀྱི་སེམས་དང་ལྡན་པའི་དོན་ཏོ། །རྨོངས་པས་ཞེས་བྱ་བ་ནི་སྒྲུབ་པ་པོས་བྱང་ཆུབ་ཏུ་སེམས་བསྐྱེད་པ་མི་མཁས་པ་ཁ་ཅིག་གོ། །དེ་ལ་མི་དགར་གྱུར་ནས་སུ། །ཞེས་བྱ་བ་ནི་བྱང་ཆུབ་ཏུ་སེམས་བསྐྱེད་པ་དེས་གཞན་ལ་ཕྱག་བྱས་ན་དེ་དག་གི་དཔལ་
འབྲི་བར་འགྱུར་བའི་ཕྱིར་རོ། །གང་གི་ཚེ་ན་སེམས་ནི་དང་བ་ཡིས། །ཞེས་བྱ་བ་ལ་སོགས་པས་ནི་བྱང་ཆུབ་ཀྱི་སྡོམ་པ་མནོས་པའི་སྐྱེས་བུ་དེ་མཆོད་པའི་གནས་ཡིན་པར་བསྟན་ཏོ། །བསླབ་པ་མཐའ་དག་བླངས་པ་ཞེས་བྱ་བ་ནི་ཚུལ་ཁྲིམས་རྣམ་པ་གསུམ་པོ་དག་མནོས་

ཞེས་བྱ་བའི་ཐ་ཚིག་གོ། །སེམས་ཅན་ཀུན་ལ་མི་འཇིགས་སྦྱིན་པ་ཞེས་བྱ་བ་ནི་སྙིང་རྗེ་ལ་གནས་པས་ལྷག་པར་སྲོག་གཅོད་པ་ལ་སོགས་པའི་ཐོ་འཚམ་པ་སྤོང་བའི་སྡོམ་པ་ལེན་ཏེ། ཇི་སྐད་དུ། བྱང་ཆུབ་སེམས་དཔའི་ལྟུང་བ་ནི་ཕལ་ཆེར་ཞེ་སྡང་ལས་
བྱུང་གི་ཞེས་བཤད་པ་ལྟ་བུའོ། །དཀོན་མཆོག་གསུམ་གྱི་གདུང་ཡང་བསབས་པ་ཡིན། །ཞེས་བྱ་བ་ནི་བྱང་ཆུབ་ཏུ་སེམས་བསྐྱེད་པ་ལ་བརྟེན་ནས། བླ་ན་མེད་པའི་སངས་རྒྱས་སུ་གྲུབ་ན། དམ་པའི་ཆོས་འཆད་ཅིང་འཕགས་པའི་དགེ་འདུན་གྱི་ཚོགས་ཀྱང་སྡུད་པའི་དོན་
ཏོ། །མི་བཟད་པའི་ལས་བྱེད་ཅེས་བྱ་བ་ནི་སེམས་ཅན་ལ་རྡེག་པ་དང་འཆིང་བ་དང་། གོ་རར་འཇུག་པ་ལ་སོགས་པའི་གནོད་པའི་སྦྱོར་བས་ཐོ་འཚམ་པའོ། །ཐུབ་པ་གསོད་ཅེས་བྱ་བ་ནི་ལུས་དང་ངག་མི་དགེ་བ་ལས་སྡོམ་པའི་དྲང་སྲོང་རྣམས་སྲོག་དང་བྲལ་བར་བྱེད་པ་སྟེ།
འདིར་ནི་འཇིག་རྟེན་པ་རྣམས་ལ་གོ་བར་བྱ་བའོ། །གཞན་ནི་བརྡ་ཕྲད་པར་ཟད་དོ། །ཕན་གནོད་བྱས་པའི་དགེ་སྡིག་མཐའ་མི་རྟོགས། །ཞེས་བྱ་བ་ནི། གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །གལ་ཏེ་ངན་སེམས་སྐྱེད་པར་བྱེད་པ་སྟེ། །ངན་སེམས་བསྐྱེད་པའི་གྲངས་
བཞིན་བསྐལ་པར་ནི། །དམྱལ་བར་གནས་པར་འགྱུར་ཞེས་ཐུབ་པས་གསུངས། །འོན་ཏེ་གང་ཞིག་ཡིད་རབ་དང་བྱེད་ན། །དེ་ཡི་འབྲས་བུ་དེ་ལས་ལྷག་པར་འཕེལ། །ཞེས་བཤད་པའི་ཕྱིར་རོ། །ཕ་རོལ་དུ་ཡང་གྲུབ་མི་ཐོབ། །ཅེས་བྱ་བ་ནི་སེམས་ཅན་ལ་ཐོ་འཚམ་པའི་རྣམ་
པ་དེ་དག་གོང་མ་དག་པས་ལྕི་བར་བསྟན་པའི་དོན་ཏོ། །བདུད་ཀྱི་དགྲ་ཞེས་བྱ་བ་ནི་སངས་རྒྱས་དེ་བདུད་ནག་པོའི་ཕྱོགས་མེ་ཏོག་མདའ་ལ་སོགས་པས་དགྲར་བཟུང་བའི་ཕྱིར་རོ། །དེ་ཡང་ཉེ་བར་བསྟན་པར་ཟད་ཀྱི་དངོས་སུ་འཇིག་རྟེན་ལས་འདས་པའི་གསང་སྔགས་ཐམས་
ཅད་དང་། དཀོན་མཆོག་གསུམ་ལ་ཕུལ་བའི་མེ་ཏོག་ཀུན་ལ་གོ་བར་བྱའོ། །བཀྲེས་པས་གདུངས་ཀྱང་ཞེས་བྱ་བ་ནི་གོང་དུ། འབྱུང་པོའི་ཟས་དང་ལྷ་བཤོས་གཏོར་མ་དང་། །གུ་ལང་མཆོད་བྱས་གཏོར་མ་མི་བཟའོ། །ཞེས་བྱ་བ་ཉིད་ཀྱི་རྣམ་གྲངས་བསྟན་པའོ། །

འཇིགས་ཀྱང་ཕྱག་མི་བྱ་ཞེས་བྱ་བ་ནི། །རྨོངས་པས་འཇིག་རྟེན་ལྷ་ཚོགས་ཕྱག་བྱས་ན། །དེ་དག་དེ་ལ་མི་དགར་གྱུར་ནས་སུ། །ཞེས་བྱ་བ་ཉིད་ཀྱི་རྣམ་གྲངས་རྒྱས་པར་འདིར་བསྟན་ཏོ། །དེ་རྣམས་ཆོས་ལ་ངན་སེམས་མི་བྱ་ཞིང་། །ཞེས་བྱ་བ་ནི་རྣམ་པར་སྣང་མཛད་མངོན་
པར་རྫོགས་པར་བྱང་ཆུབ་པའི་རྒྱུད་ཆེན་པོ་ལས། ཇི་སྐད་དུ། གསང་བའི་བདག་པོ་འདི་ནི་བྱིས་པ་སོ་སོའི་སྐྱེ་བོ་འཁོར་བ་ན་ཀུན་དུ་འཁྱམས་པ་རྣམས་ཀྱི་དབུགས་འབྱིན་པའི་མཆོག་ཡིན་ཏེ་ཞེས་རྒྱ་ཆེར་གསུངས་པའི་ཕྱིར་རོ། །གཞན་ནི་གོ་བར་ཟད་དོ། །བདེ་བར་གཤེགས་
པ་ཀུན་གྱིས་བསྟེན་པའི་གནས། །ཞེས་བྱ་བ་ནི་རྡོ་རྗེའི་གདན་ལ་སོགས་པའི་མཆོད་རྟེན་བརྒྱད་དོ། །རྒྱལ་སྲས་རྣམས་ཞེས་བྱ་བ་ལ་སོགས་པས་ནི་བཀུར་སྟིའི་གནས་རྣམས་བརྗོད་པའོ། །དད་པས་རྒྱལ་བའི་ཐུགས་སྲས་ལ་ཕྱག་བྱའོ། །ཞེས་བྱ་བ་ནི་བྱང་ཆུབ་སེམས་དཔའ་
རྣམས་ཡོན་ཏན་ཕྱིར་ཞིང་སྐྱེས་ཏེ། དེ་ལས་སངས་རྒྱས་ཉིད་ཀྱི་གོ་འཕང་དུ་འབྱུང་བའི་ཕྱིར་རོ། །བདེ་བར་གཤེགས་པ་མིན་ཞེས་བྱ་བ་ནི་དགོངས་པའི་དོན་མི་ཤེས་པ་དག་ལྷག་མ་མེད་པའི་མྱ་ངན་ལས་འདའ་བར་འགྱུར་རོ་ཞེས། དེ་ལས་སྔ་མ་ལྷག་པར་ནན་ཏན་གྱིས་གུས་
པར་ཕྱག་མི་འཚལ་བ་དག་སྲིད་ཅེས་བྱ་བའི་ཐ་ཚིག་གོ། །དགོངས་པ་ནི་འདི་ཡིན་ཏེ། །ལ་ལར་རྫོགས་པར་བྱང་ཆུབ་སྟོན། །ལ་ལར་མེད་བཞིན་མྱ་ངན་འདས། །ནམ་ཡང་མེད་པ་མ་ཡིན་ཏེ། །དེ་བཞིན་གཤེགས་པ་རྟག་པའི་སྐུ། །ཞེས་ཇི་སྐད་བཤད་པའོ། །འཇིག་
རྟེན་ཀུན་གྱི་མངོན་མཐོའི་བསླབ་པ་ཅན། །ཞེས་བྱ་བ་ནི་སྡོམ་པ་ནོད་པ་ཉིད་ཀྱི་ཚེ་ན་ཇི་སྐད་དུ། དུས་འདི་ནས་བཟུང་ནས་ནམ་བྱང་ཆུབ་ཀྱི་སྙིང་པོ་ལ་གནས་ཀྱི་བར་དུ། སེམས་ཅན་ཐམས་ཅད་བསྒྲལ་བ་དང་། སེམས་ཅན་ཐམས་ཅད་སྒྲོལ་བ་དང་། སེམས་ཅན་ཐམས་ཅད་དབུགས་
དབྱུང་བ་དང་། སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བ་དང་། སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ལ་དགོད་པའི་སླད་དུ་ཞེས་སྡོམ་པ་བླངས་པའི་ཕྱིར་རོ། །སྙིང་རྗེའི་བདག་ཉིད་འགྲོ་བའི་དོན་དུ་ནི། །སྐྱེ་བ་ལེན་པ་ཞེས་བྱ་བ་ནི་སྐྱེ་བ་ལ་དབང་

ཐོབ་ཀྱིས་ཀྱང་གང་དང་གང་དུ་སེམས་ཅན་གདུལ་བ་ཡོད་པ་དེ་དང་དེར་སྐྱེ་བ་ལེན་གྱི་ཞིང་དག་པ་དག་ཁོ་ནར་ངེས་པར་སྐྱེ་བ་མི་འཛིན་པའི་དོན་ཏོ། །སྐྱེས་བུ་བསམ་ཡས་ཞེས་བྱ་བ་ནི་རིག་པའི་གནས་ལྔ་ལ་འབྱམས་པས། བདག་གཞན་གྱི་དོན་ཕུན་སུམ་ཚོགས་
པར་སྒྲུབ་པའི་ཐ་ཚིག་གོ། །རྨད་བྱུང་རྫུ་འཕྲུལ་ཅན་ཞེས་བྱ་བ་ནི་ཉན་ཐོས་ལ་སོགས་པ་ལ་མེད་པའི་ཆོ་འཕྲུལ་སྣ་ཚོགས་སྟོན་པའི་ཐ་ཚིག་གོ། །དེ་ལ་རྒྱལ་བ་ཐམས་ཅད་ཐུགས་བྱུང་ནས། །ཞེས་བྱ་བ་ནི་བྱང་ཆུབ་སེམས་དཔའ་ལ་མ་གུས་པའི་སྡིག་གི་མཐུ་ལས་བྱུང་བའི་
སྒྲིབ་པས་ཐུགས་རྗེས་བསྐྱང་བར་དགོངས་པ་ལས། སྤྱན་རས་ཀྱིས་འཚོ་བའི་སྐལ་བ་མེད་པར་གྱུར་པ་སྟེ། ཇི་སྐད་དུ། ཇི་ལྟར་ཉི་མའི་འོད་ཟེར་རྣམས། །སྤྲིན་ལ་སོགས་པས་བསྒྲིབ་པར་འདོད། །དེ་བཞིན་སངས་རྒྱས་ཡེ་ཤེས་རྣམས། །སེམས་ཅན་གྱི་ནི་ཉེས་པས་
བསྒྲིབས། །ཞེས་བཤད་པའི་ཕྱིར་རོ། །གཞན་ནི་གོ་བར་ཟད་དོ། །ཁྲོ་ལ་ཁྲོ་བ་དང་ཞེས་བྱ་བ་ནི་ཁྲོ་བོས་འདུལ་བ་རྣམས་ལ་འཕགས་པ་བདུད་རྩི་ཐབ་སྦྱོར་ལ་སོགས་པས་ཁྲོ་བོའི་ཚུལ་གྱིས་སེམས་ཅན་རྣམས་ཀྱི་དོན་མཛད་པའོ། །འདོད་ཆགས་ཅན་ལ་ཆགས་
ཅན་ལྟར་སྟོན་པ། །ཞེས་བྱ་བ་ནི་ཟང་ཟིང་ལ་ཆགས་ཏེ་ཁྱིམ་གྱི་གནས་ནས་འཕགས་མི་ནུས་པ་རྣམས་གདུལ་བའི་དོན་དུ་ནི་འཕགས་པ་དྲི་མ་མེད་པར་གྲགས་པ་ལ་སོགས་པ་བཙུན་མོའི་འཁོར་དང་བཅས་པ་ལྟ་བུར་སྟོན་པའོ། །བྱང་ཆུབ་མཆོག་གནས་ཞེས་བྱ་བ་ནི་དོན་
དམ་པའི་རྟོག་པས་ཆོས་ཀྱི་དབྱིངས་ལ་གནས་པའི་ཕྱིར་རོ། །ལས་དང་རྣམ་སྨིན་མཁྱེན་པ་ཡིས། །ཞེས་བྱ་བ་ནི་ཁམས་དང་བག་ལ་ཉལ་རྫོགས་པས་ཀུན་བརྗོད་པའི་ཆོ་འཕྲུལ་སྟོན་པའི་དོན་ཏོ། །འགྲོ་བ་ཀུན་དང་ཇི་ལྟར་མཐུན་པ་ཡི། །གསང་སྔགས་གཟུགས་ཀྱི་རྗེས་སུ་
ཆགས་མཛད་པ། །ཞེས་བྱ་བ་ནི་ཁྲོ་བོ་དང་ཞི་བ་ལ་སོགས་པའི་གཟུགས་ཐ་དད་པ་རྣམས་ཀྱིས་གདུལ་བྱའི་འགྲོ་བ་རྣམས་ཡིད་མགུ་བར་བྱེད་པའི་སྒོ་ནས། རྫུ་འཕྲུལ་གྱི་ཆོ་འཕྲུལ་སྟོན་ཞེས་བྱ་བའི་ཐ་ཚིག་གོ། །སྔགས་ཀྱིས་རྣམ་འདྲེན་ཞེས་བྱ་བ་ནི་གསང་སྔགས་ཀྱི་

རང་བཞིན་རྣམ་པ་དྲུག་ཏུ་ཕྱེ་སྟེ། རྗེས་སུ་བསྟན་པས། མངོན་པར་མཐོ་བ་དང་ངེས་པར་ལེགས་པ་ལ་སེམས་ཅན་རྣམས་བཀོད་པའི་ཕྱིར་རྗེས་སུ་བསྟན་པའི་ཆོ་འཕྲུལ་སྟོན་པའི་དོན་ཏོ། །ལེའུ་དགུ་པའི་དོན་བཤད་ཟིན་ཏོ།། །།གསང་སྔགས་རིག་སྔགས་རྣམ་པ་
སྣ་ཚོགས་དག །ཅེས་བྱ་བ་ནི་གཙུག་ཏོར་རྣམས་དང་ཡུམ་རྣམས་དང་། ཁྲོ་བོ་རྣམས་དང་དེ་བཞིན་ཁྲོ་མོ་དང་། ཕྱག་བརྙན་ལ་སོགས་པ་དང་། གཞན་ཡང་དེ་བཞིན་གཤེགས་པའི་རིགས་སུ་བསྡུ་བའི་བྱང་ཆུབ་སེམས་དཔའ་རྣམས་དང་། །གནས་གཙང་མའི་ལྷ་
རྣམས་སུ་རྣམ་གྲངས་དུ་མར་ཕྱེ་བ་དག་གོ། །བྱེ་བ་ཕྲག་གསུམ་དང་ནི་འབུམ་ཕྲག་ལྔ། །ཞེས་བྱ་བ་ནི་ཤློ་ཀའི་གྲངས་སོ། །རིག་འཛིན་གྱི་སྡེ་སྣོད་ཅེས་བྱ་བ་ནི་རིག་སྔགས་འཆང་རྣམས་ཀྱི་བསླབ་པའི་གཞི་དང་། ལྟ་བའི་ཀླུང་གིས་གྲུབ་པའི་མཐའ་འདི་ཉིད་ཀྱིས་སྟོན་པའི་དོན་
ཏོ། །རྒྱལ་བས་གསུངས་ཞེས་བྱ་བ་ནི་དེ་བཞིན་གཤེགས་པའི་རིགས་ཀྱི་དབང་དུ་མཛད་ནས་བཀའ་སྩལ་པའོ། །ངས་ནི་ཞེས་བྱ་བ་ནི་ཕྱག་ན་རྡོ་རྗེས་གསུངས་པ་རྣམས་སོ། །གསང་བ་པ་རྣམས་གཞོམ་པ་ཞེས་བྱ་བ་ནི་དེས་ཁྱད་པར་དུ་གནོད་སྦྱིན་ལ་སོགས་པ་གདུལ་བར་བསྟན་
ཏོ། །དབུལ་བའི་སྡུག་བསྔལ་སེལ་ཞེས་བྱ་བ་ནི་ལྷ་མ་ཡིན་གྱི་དཔལ་གྱི་སྒོ་འབྱེད་པ་དང་། གཏེར་དབྱུང་བའི་ཆོ་ག་ལ་སོགས་པས་སེམས་ཅན་རྣམས་ལ་ཕན་འདོགས་པའི་དོན་ཏོ། །ཕོ་ཉ་མོ་བཅུ་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། རྡོ་རྗེའི་བློ་གྲོས་མ་དང་། དྲིལ་བུ་
མ་དང་། ནག་མོ་དང་། གཞན་གྱིས་མི་ཐུབ་མ་དང་། མཛེས་མ་དང་། ཤུགས་དང་། ཐོག་ཐག་དང་། བདེན་མ་དང་། ཉི་མ་དང་། རྡོ་རྗེའི་དབྱུག་པ་མ་ཞེས་འབྱུང་བ་དག་གོ། །རིག་པའི་རྒྱལ་པོ་བདུན་ཞེས་བྱ་བ་ནི་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། རབ་ཏུ་གྲུབ་
པ་དང་། དབུ་རྒྱན་རྩེ་གསུམ་དང་། བཛྲ་ཀི་ལི་ཀི་ལ་དང་། རིན་ཆེན་ཀི་ལི་ཀི་ལ་དང་། གཟུགས་ལེགས་དང་། རྡོ་རྗེའི་ཐིགས་པ་དང་། རྡོ་རྗེའི་རོལ་པའོ། །དེ་བཞིན་ཕྱག་བརྙན་དྲུག་ཅུ་རྩ་བཞི་དང་། །ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། རྡོ་རྗེའི་ལྟ་བ་ལ་

སོགས་པ་འབྱུང་བ་རྣམས་ཏེ། དངོས་སུ་ཕོ་ཉ་མོ་བཅུའི་ཕྱག་བརྙན་ཡིན་ནོ། །ང་ཡི་སྙིང་པོ་དམ་པ་བརྒྱད་རྣམས་དང་། །ཞེས་བྱ་བ་ནི་འཕགས་པ་སྟོབས་པོ་ཆེའི་ཆོ་ག་ཞིབ་མོ་དང་། རྣམ་པར་རྒྱལ་བའི་རྒྱུད་ཆེན་པོ་ལས། ཇི་སྐད་དུ། སྙིང་པོ་ནི་ཀི་ལི་ཀི་ལ་
དང་། འགྲོ་ལྡིང་དང་། ལུས་དམར་དང་། རྡོ་རྗེ་རྣམ་པར་འཇོམས་པ་དང་། རྡོ་རྗེ་རྒྱ་ཆེན་དང་། སྙིང་པོའི་མཆོག་དང་། སོག་མེད་གཏུམ་པོ་དང་། དཔལ་ལྡན་ཞི་བར་གྲགས་པ་ཞེས་བྱ་བ་དག་སྟེ། ལྷ་དེ་རྣམས་ནི་ཕྱག་ན་རྡོ་རྗེའི་ཐུགས་ཀྱི་ཡོན་ཏན་གྱི་ཁྱད་པར་ལས་བརྒྱད་དུ་ཕྱེ་བར་
རིག་པར་བྱའོ། །ཁྲོ་བོ་དྲག་པོ་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། ཚོགས་བརྒྱད་བཤད་པ་དག་སྟེ། བདུད་རྩི་ཐབ་སྦྱོར་དང་། རྨུགས་བྱེད་དང་། རྫོང་ལྡན་དང་། མཚན་སྦྱིན་དང་། ལྕགས་ཅན་དང་། སོ་ཅན་དང་། གསར་ཅན་དང་། གཏུམ་བྱེད་དག་གོ། །
རིག་པ་མཆོག་ལ་སོགས་པ་མཐུ་བོ་ཆེ་རིག་པའི་བདག་པོ་ཞེས་བྱ་བ་ནི་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། རིག་པའི་རྒྱལ་པོ་གཞན་བསྟན་ཏེ། རིག་པ་མཆོག་དང་། གླང་པོའི་རྣ་བ་དང་། གནོད་མཛེས་དང་། བསྡིགས་སུ་རུང་བ་དང་། འཕྲོག་བྱེད་དང་། རྡོ་རྗེའི་ཞགས་
པ་དག་གོ། །གསང་སྔགས་རྗེས་སུ་འབྲང་བཅས་ཞེས་བྱ་བ་ནི་རིག་པའི་རྒྱལ་པོ་རྣམས་ཀྱི་རྗེས་སུ་འབྲང་བའི་ལྷའི་བྱེ་བྲག་མང་པོར་བསྟན་པ་རྣམས་སོ། །དེ་ཡི་རིག་སྔགས་བདག་པོ་རྟ་མགྲིན་དང་། །ཞེས་བྱ་བ་ནི་པདྨའི་རིགས་ཀྱི་གསང་སྔགས་ཐམས་ཅད་ཀྱི་རྒྱལ་པོ་ཡིན་པའི་དོན་ཏོ། །
དེ་ཡི་མིང་ཅན་དཀྱིལ་འཁོར་ཞེས་བྱ་བ་ནི་དཔལ་རྟ་མགྲིན་པདྨའི་རིགས་ཀྱི་རིག་པའི་རྒྱལ་པོ་ཡིན་པས། དཔལ་སྡོམ་གྱི་རྒྱུད་ལ་སོགས་པ་ལས། རབ་ཏུ་གནས་པའི་དཀྱིལ་འཁོར་འབྱུང་ངོ་ཅོག་ལ་དེའི་མིང་ཅན་ཞེས་གདགས་ཏེ། འཕགས་པ་རྟ་མགྲིན་ཉིད་ཀྱི་ཁྱད་པར་གྱི་
དཀྱིལ་འཁོར་འབའ་ཞིག་ལ་གདམས་པ་ནི་མ་ཡིན་ནོ། །དོན་ཡོད་ཞགས་པ་བདུན་བསྟན་པ། །ཞེས་བྱ་བ་ནི་བཤད་མ་ཐག་པའི་དོན་ཡོད་པའི་ཞགས་པ་དྲུག་དང་དཔལ་རྟ་མགྲིན་དང་བདུན་ནོ། །ཉི་མ་བདུན་ལྟར་འབར་ཞེས་བྱ་བའི་དཔེས་ནི་སྒྲུབ་པ་པོའི་ལས་དང་ཉོན་མོངས་པ་ཐམས་ཅད་

བསྲེག་ཅིང་མངོན་པར་མཐོ་བའི་དཔལ་ཡང་འབར་བར་བྱེད་པའི་དོན་ཏོ། །དེ་རྣམས་རྟ་མགྲིན་དཀྱིལ་འཁོར་གསང་སྔགས་ཏེ། །ཞེས་བྱ་བ་ནི་རིག་པའི་རྒྱལ་པོ་ཡིན་པས། དེ་དག་གི་དཀྱིལ་འཁོར་ལ་ཡང་དབང་བསྒྱུར་བར་བསྟན་ཏོ། །མི་ལ་མཆོག་སྦྱིན་ཞེས་བྱ་བ་ནི་དམ་པ་བརྒྱད་ལ་
སོགས་པ་སྟེར་བའི་དོན་ཏོ། །འཇིག་རྟེན་གསུམ་གྱིས་འདུད་ཅེས་བྱ་བ་ནི་ལྷའི་རིགས་དང་མིའི་རིགས་དང་། ཀླུའི་རིགས་རྣམས་ཀྱིས་མཆོད་གནས་སུ་གྱུར་ཅེས་བྱ་བའི་ཐ་ཚིག་གོ། །སྒྲོལ་མ་ཞེས་བྱ་བ་ལ་སོགས་པ་ནི་པདྨའི་རིགས་ཀྱི་ཡུམ་བརྒྱད་ཡོད་པར་བསྟན་པའོ། །དེ་དག་
དཀྱིལ་འཁོར་ཞེས་བྱ་བ་ནི་ཡུམ་དེ་རྣམས་ཀྱི་དཀྱིལ་འཁོར་ཞེས་བྱ་བའི་ཐ་ཚིག་གོ། །སྣ་ཚོགས་གཟུགས་ཅན་ཞེས་བྱ་བ་ནི་དཀྱིལ་འཁོར་གྱི་ཚུལ་ཐ་དད་པ་དང་། འཁོར་སྣ་མང་བར་བསྟན་ཏོ། །ཕྱག་རྒྱ་རྣམ་པ་སྣ་ཚོགས་རྣམས་དང་ལྡན། །ཞེས་བྱ་བ་ནི་ལས་ཀྱི་བྱེ་བྲག་གིས་
ལྷ་རེ་རེ་ལ་ཡང་ཕྱག་རྒྱ་དུ་མ་དང་བཅས་པའི་ཕྱིར་རོ། །རྒྱས་པའི་གསང་སྔགས་རྒྱུད་དུ་ཞེས་བྱ་བ་ནི་རིགས་བཞི་པར་བསྟན་པའོ། །འོག་པག་ཅན། རིག་པའི་དབང་ཕྱུག་གསང་སྔགས་བདག་མོར་གསུངས། །ཞེས་བྱ་བ་ནི་རིགས་བཞི་པ་འདིས་གསང་སྔགས་ཐམས་ཅད་ལ་
དབང་བསྒྱུར་བར་བསྟན་ཏོ། །དངོས་སུ་ལྔས་རྩེན་གྱི་བཙུན་མོ་འཕྲོག་མ་ཡིན་ནོ། །དེ་ལ་ལྔས་རྩེན་ཡང་ནི་མངོན་པར་དགའ། །ཞེས་བྱ་བ་ནི་རིགས་ཀྱི་བདག་པོས་དེ་རྒྱལ་མོར་བསྒོ་བར་དགའ་བའི་དོན་ཏོ། །གནོད་སྦྱིན་དབང་ཕྱུག་ཅེས་བྱ་བ་ནི་རྒྱས་པའི་རིགས་ལ་གཏོགས་པའི་
གནོད་སྦྱིན་གྱི་སྡེ་དཔོན་རྣམས་སོ། །དེ་དང་རྟག་ཏུ་མཐུན་པ་ཞེས་བྱ་བ་ནི་ལྔས་རྩེན་དང་གནོད་སྦྱིན་གྱི་གཙོ་བོ་རྣམས་བློ་མཐུན་པས། འོག་པག་ཅན་འདིས་རྒྱས་པའི་རིགས་ཀྱི་གསང་སྔགས་ཀྱི་བདག་མོར་དབང་བསྐུར་བའི་དོན་ཏོ། །དེ་ཡི་བཀའ་ཡིས་གསང་སྔགས་ཚོགས་
རྣམས་བཤད། །ཅེས་བྱ་བ་ནི་འོག་པག་ཅན་རྒྱས་པའི་རིགས་ཀྱི་རྒྱུད་རྣམས་བཤད་ཅེས་བྱ་བའི་ཐ་ཚིག་གོ། །ལྔས་རྩེན་གྱིས་ནི་སྟོང་ཕྲག་ཉི་ཤུ་སྟེ། །ཞེས་བྱ་བ་ནི་རྒྱས་པའི་རིགས་ལ་ལྔས་རྩེན་གྱི་རྒྱུད་དུ་གྲགས་པ་ནི་ཤློ་ཀ་ཉི་ཁྲིའོ། །དེ་ཡི་ཆུང་མ་ཞེས་བྱ་བ་ནི་འཕྲོག་མ་ཉིད་དེ། དེའི་ཕྱེད་

བཤད་དོ་ཞེས་བྱ་བ་ནི་ཤློ་ཀ་ཁྲི་བཤད་པའི་དོན་ཏོ། །ནོར་གྱི་བདག་པོ་ཞེས་བྱ་བ་ནི་རིགས་ལྔ་པ་ནོར་བུའི་རིགས་བསྟན་པ་སྟེ། དངོས་སུ་དཔལ་ནོར་བུ་བཟང་པོའོ། །སྟོང་ཕྲག་སུམ་ཅུ་ཞེས་བྱ་བ་ནི་ནོར་བུའི་རིགས་ལ་དཔལ་ནོར་བུ་བཟང་པོའི་རྒྱུད་དུ་གྲགས་པ་ནི་ཤློ་ཀ་སུམ་ཁྲི་བཤད་པར་བསྟན་ཏོ། །གང་པོའི་
ཕ་ཞེས་བྱ་བ་ནི་ལྷའི་དྲང་སྲོང་རྣམ་ཐོས་ཞེས་བྱ་བ་ཡིན་ནོ། །ལྷ་དང་ལྷ་མིན་ལ་སོགས་རྒྱལ་བ་ལ། དད་པ་རྣམས་ཀྱིས་གསང་སྔགས་མཐའ་ཡས་བཤད། །ཅེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྤྱན་སྔར་གནང་ཞིང་རྗེས་སུ་ཐུགས་རངས་ནས་སོ་སོ་
ནས་བཤད་པའོ། །གཞན་ཡང་ཁ་ཅིག་གནས་མེད་རྣམ་པར་འཁྱམ། །ཞེས་བྱ་བ་ནི་ཕ་རོལ་ཏུ་ཕྱིན་པས་བསྐྱེད་པའི་རིགས་བཞི་པོ་དེ་དག་གི་བགབ་ཏུ་མ་བསྡུས་པའོ། །གཞན་ནི་གོ་བར་ཟད་དོ། །ངས་བཤད་གང་ཡིན་དེ་ཞེས་བྱ་བ་ནི་འཇིག་རྟེན་པའི་རིགས་རྒྱལ་བ་ལ་
དད་པ་རྣམས་སོ། །བཞི་པོ་འདི་དག་རྣམ་པར་སྦྱང་བར་བྱ། །ཞེས་བྱ་བ་ནི་དེ་དག་གི་རིགས་བཞི་པོའི་བགབ་ཏུ་ཕལ་ཆེར་འདུས་པར་བསྟན་ཏོ། །གང་གཞན་ལ་ལ་འདི་ན་གནས་མེད་པར། །ཞེས་བྱ་བ་ནི་རིགས་བཞིར་མ་བསྡུས་པ་རྣམས་སོ། །བདེ་བར་གཤེགས་ལ་བརྟེན་
ཞེས་བྱ་བ་ནི་དད་པས་སངས་རྒྱས་ཀྱི་སྤྱན་སྔར་སོ་སོའི་ཆོ་ག་ཞིབ་མོ་བཤད་པའོ། །ཡོངས་འཁྱམ་པ་ཞེས་བྱ་བ་ནི་དེ་དག་རིགས་ལྔ་ཆར་གྱིས་མ་བསྡུས་པའི་དོན་ཏོ། །དེ་བཞིན་གཤེགས་པའི་རིགས་སུ་མ་བསྡུས་སམ་ཞེ་ན། དེའི་རིགས་སུ་གཏོགས་པ་ནི་གཙུག་ཏོར་ལ་སོགས་
པ་ཡེ་ཤེས་ལས་བྱུང་བ་ཡིན་ལ། འདི་དག་ནི་རྣམ་པར་སྨིན་པས་བསྐྱེད་པའི་ཕྱིར་རོ། །མདོ་སྡེ་འདིར་ནི་ཞེས་བྱ་བ་ནི་དཔུང་བཟངས་ཀྱིས་ཞུས་པའི་རྒྱུད་འདིར་ཞེས་བྱ་བའི་དོན་ཏོ། །དེ་དག་ཐམས་ཅད་ཀྱང་ཞེས་བྱ་བ་ནི་འཕགས་པའི་རིགས་ལྔ་དང་། འཇིག་རྟེན་པའི་རིགས་
དང་དྲུག་ཅར་རོ། །རྣམ་པར་སྦྱང་ཞེས་བྱ་བ་ནི་རྒྱུད་འདི་ཆོ་ག་ཐམས་ཅད་ལ་སྦྱར་བར་བསྟན་ཏོ། །སྲིད་པ་གསུམ་ཞེས་བྱ་བ་ནི་འདོད་པ་དང་གཟུགས་དང་གཟུགས་མེད་པའོ། །རྒྱལ་བ་ཞེས་བྱ་བ་ནི་སངས་རྒྱས་སོ། །དཀོན་པ་ཞེས་བྱ་བ་ནི་ཨུ་དུམྺཱ་རའི་མེ་ཏོག་དང་འདྲ་བའི་དོན་

ཏོ། །མཆོག་ཅེས་བྱ་བ་ནི་ཡིད་བཞིན་གྱི་ནོར་བུ་ལྟར་དེ་དང་ཡོན་ཏན་མཉམ་པ་མེད་པའི་ཕྱིར་རོ། །དེ་ཡི་འོག་ཏུ་དེ་ལས་བྱུང་བའི་ཆོས། །ཞེས་བྱ་བ་ནི་རང་གི་དོན་དུ་རྟོགས་པའི་ཆོས་ཐུགས་སུ་ཆུད་པ་དང་། གཞན་གྱི་དོན་དུ་ལུང་གི་ཆོས་ངེས་པར་བསྟན་པ་རྣམས་སོ། །དེའི་དགེ་
འདུན་ཞེས་བྱ་བ་ནི་སངས་རྒྱས་ཀྱི་བསྟན་པ་ལ་རབ་ཏུ་བྱུང་བའི་འཕགས་པ་ཉན་ཐོས་རྣམས་སོ། །སྐྱེས་ཆེན་བརྒྱད་པོ་ཞེས་བྱ་བ་ནི་རྒྱུན་དུ་ཞུགས་པ་ལ་སོགས་པ་ཟུང་བཞི་ཡ་བརྒྱད་དོ། །སྲིད་པ་གསུམ་ན་དཀོན་མཆོག་གསུམ་པོ་གཙོ། །ཞེས་བྱ་བ་ནི་ཁམས་གསུམ་
པ་ཐམས་ཅད་ཀྱིས་མཆོད་ཅིང་བཀུར་སྟི་བྱ་བའི་འོས་བླ་ན་མེད་པར་བསྟན་ཏོ། །གཞན་ནི་གོ་བར་ཟད་དོ། །བདེ་བར་གཤེགས་པ་མིན་ཞེས་བྱ་བ་ནི་ཐེག་པ་ཆེན་པོ་ལ་མི་ཕྱོགས་པ་རྣམས་སོ། །ཉན་ཐོས་དང་རང་སངས་རྒྱས་རྣམས་ཀྱི་ལམ་ལ་གནས་པ་དང་ཞེས་བྱ་བ་ནི་ཐེག་
པ་དམན་པ་ལ་ཕྱོགས་པའོ། །དད་པ་མེད་ཅིང་ཞེས་བྱ་བ་ནི་གསང་སྔགས་ཀྱི་ཕྱོགས་ལ་མ་དད་པའོ། །ཚུལ་འཆོས་ཞེས་བྱ་བ་ནི་གཞན་ལ་སླུ་བའི་བསམ་པས་གསང་སྔགས་ཀྱི་སྒོ་ནས་ཐེག་པ་ཆེན་པོ་ལ་དད་པ་ལྟར་སྤྱོད་ལམ་བསྒྱུར་བའོ། །འཇུངས་པ་ཞེས་
བྱ་བ་ནི་སེར་སྣས་ཀུན་ནས་དཀྲིས་པའོ། །གཞན་ནི་གོ་སླ་བས་མ་ཕྱེའོ། །གང་གི་ང་ཡི་རྗེས་སུ་འབྲང་བའི་གདོན། །འབྱུང་པོ་ཀླུ་དང་གནོད་སྦྱིན་ཤ་ཟ་ཡི། །ཞེས་བྱ་བ་ནི་རྣམ་པར་སྨིན་པས་བསྐྱེད་པའི་འཇིག་རྟེན་ལས་མ་འདས་པ་དེ་དག་ཕྱག་ན་རྡོ་རྗེའི་བྱིན་གྱི་རླབས་ཀྱིས་
བཏུལ་ནས། སོ་སོ་ནས་དམ་ཚིག་ཕུལ་ཏེ་རྡོ་རྗེའི་རིགས་སུ་བསྡུས་པ་རྣམས་སོ། །ང་ཡི་སྔགས་ཟློས་རྡོ་རྗེ་ཐོགས་པ་དང་། །ཞེས་བྱ་བ་ནི་བཤད་མ་ཐག་པའི་སྣོད་དུ་མ་གྱུར་པ་རྣམས་སོ། །ཕུང་བར་བྱེད་ཅེས་བྱ་བ་ནི་གསོད་པའམ་རིགས་ཀྱང་རླག་པར་བྱེད་ཅེས་བྱ་བའི་ཐ་ཚིག་གོ། །
ཐེག་པ་མཆོག་ཅེས་བྱ་བ་ནི་ཐེག་པ་ཆེན་པོ་སྟེ། དེའི་བླ་མར་གྱུར་པ་གཞན་མེད་པའི་ཕྱིར་རོ། །རྒྱ་ཆེན་ཞེས་བྱ་བ་ནི་ཐེག་པ་གཞན་ལས་ཁྱད་པར་དུ་དམིགས་པ་ལ་སོགས་པ་ཁྱད་ཞུགས་པར་ཆེ་བའི་ཕྱིར་རོ། །བརྩོན་འགྲུས་ཆེ་ཞིང་ཞེས་བྱ་བ་ནི་བདག་དང་གཞན་གྱི་དོན་དུ་བརྩོན་པའི་

དོན་ཏོ། །བྱང་ཆུབ་ཀྱི་སེམས་བརྟན་པ་ཞེས་བྱ་བ་ནི་བརྩོན་འགྲུས་དང་ཏིང་ངེ་འཛིན་དང་། ཤེས་རབ་མཚུངས་པར་ལྡན་པས་བྱང་ཆུབ་ཀྱི་སེམས་གཟུང་བའི་ཐ་ཚིག་གོ། །སངས་རྒྱས་པའི་གསང་སྔགས་ཞེས་བྱ་བ་ནི་རིགས་ལྔས་བསྡུས་པའོ། །ཡངས་ཤིང་
ཞེས་བྱ་བ་ནི་སྒོ་མང་པོ་ནས་དྲངས་པའི་དོན་ཏོ། །རྒྱ་ཆེན་བཤད་པ་ཞེས་བྱ་བ་ནི་འབྲས་བུ་ཆེན་པོ་དང་ལྡན་པ་ཞེས་བྱ་བའི་ཐ་ཚིག་གོ། །དེ་ནས་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་འདུལ་བའི་སྐྱེ་བོ་རྣམས་ཀྱི་ངོར། འཇིག་རྟེན་ལས་འདས་པའི་གསང་སྔགས་
རྣམས་ཀྱི་རྒྱུད་གཙོར་བཤད་པའི་སྐབས་ནས་གླེངས་པའི་དེ་མ་ཐག་པའོ། །གཞན་ཡང་འཇིག་རྟེན་པ་བསྡུས་ནས་ཞར་ལ་བཤད་པ་འདི་དག་ཅེས་བྱ་བ་ནི་འཇིག་རྟེན་ལས་འདས་པའི་རྒྱུད་ཀྱི་སྡོམ་བཤད་པའི་ཟླ་བ་གླེངས་ཞེས་བྱ་བའི་ཐ་ཚིག་གོ། །དྲག་པོ་ཞེས་བྱ་བ་ནི་ལྷ་ཆེན་པོའི་
མིང་གི་རྣམ་གྲངས་སོ། །ནོར་ལྷའི་བུ་ཞེས་བྱ་བ་ནི་ཁྱབ་འཇུག་གི་རྣམ་གྲངས་སོ། །གཏུམ་བྱེད་མ་ཞེས་བྱ་བ་ནི་འཇིག་རྟེན་པའི་རིག་སྔགས་ཀྱི་ལྷ་མོ་སྐལ་ལྡན་མ་ཞེས་བརྗོད་པ་སྟེ། མཁའ་འགྲོ་རྣམས་ཀྱི་ལྷ་ཞེས་ཀྱང་གྲག་གོ། །ཕུར་བུ་གསུམ་པ་ཞེས་བྱ་བ་ནི་གདོལ་པའི་རྒྱལ་པོའོ། །
མཚན་མོ་རྒྱུ་བའི་དབང་པོ་ཞེས་བྱ་བ་ནི་གནོད་སྦྱིན་གྱི་སྡེ་དཔོན་རྣམས་སོ། །འཇིག་རྟེན་བདག་པོ་བཞི་ཞེས་བྱ་བ་ནི་རྒྱལ་པོ་ཆེན་པོ་རྣམས་སོ། །ལྷའི་དབང་པོ་ཞེས་བྱ་བ་ནི་བརྒྱ་བྱིན་ནོ། །རང་སྔགས་མདོ་སྡེའི་རྗེས་འབྲངས་ཞེས་བྱ་བ་ནི་སོ་སོའི་ཚུལ་མ་ཉམས་པ་སྟེ། གཞན་གྱི་ཆོ་
ག་དང་མ་བསྲེས་ཞེས་བྱ་བའི་ཐ་ཚིག་གོ། །དད་པ་སྐྱེད་ཅེས་བྱ་བ་ནི་སོ་སོའི་ལྷ་དེ་དག་ལ་དང་བས་ཐེ་ཚོམ་མེད་པར་སྒྲུབ་པའོ། །དེ་ལས་བཟློག་ན་དངོས་གྲུབ་མི་ཐོབ་ལ། །ཞེས་བྱ་བ་ནི་སོ་སོའི་ཆོ་ག་དང་འགལ་བར་བསྒྲུབ་པ་དང་། ལྷ་དེ་དག་ཉིད་ལ་མ་དད་པ་རྣམས་སོ། །སྡུག་བསྔལ་
མང་པོ་ཡང་ནི་ཐོབ་པར་འགྱུར། །ཞེས་བྱ་བ་ནི་བཟླས་བརྗོད་ལ་སོགས་པའི་ལས་ཆེན་པོ་ནི་བྱས་ལ། འབྲས་བུ་མི་ཐོབ་པའམ། ཡང་ན་དེ་དག་འཁྲུགས་ནས་ཉེན་དུ་གྱུར་བའི་དོན་ཏོ། །ལེའུ་བཅུ་པའི་དོན་བཤད་ཟིན་ཏོ།། །།བཅུད་ལེན་ཞེས་བྱ་བ་ནི་སྨན་བཅུད་ལེན་ཏེ། དེ་ཡང་

ཁམས་ལས་བྱུང་བ་དང་། རྩ་ལས་བྱུང་བ་དང་། སྲོག་ཆགས་ཀྱི་ལུས་ལས་བྱུང་བ་དང་། ལྡེ་གུ་དང་རྣམ་པ་བཞིའོ། །དེ་དག་གི་ཕན་ཡོན་ནི་ཚེ་རིང་བ་དང་། ནད་མེད་པ་དང་། དབང་པོ་རྣོ་བ་དང་། སླར་གཞོན་ནུར་གྱུར་པ་སྟེ། དེ་ཡང་གསང་སྔགས་མཉེས་པའི་སྒོ་ནས། བཅུད་
ལེན་གྱི་མཐུ་འགྲུབ་ཀྱིས་སྐལ་བ་མེད་པ་རྣམས་ལ་ནི་མ་ཡིན་ཏེ། རྡོ་རྗེ་གཙུག་ཏོར་གྱི་རྒྱུད་ལས་ཀྱང་། ཇི་སྐད་དུ། སྨན་གྱི་ཡང་ནི་ལུས་ཅན་ལ། །ཉེ་བར་གྱུར་དང་སྔགས་གྲུབ་པས། །དབང་དུ་གྱུར་པར་རྟག་པར་རོ། །ཞེས་གསུངས་པའི་ཕྱིར་རོ། །ལྷ་དང་མིའི་གཏེར་
ཞེས་བྱ་བ་ནི་ས་ལ་ཡོད་དོ། །དེ་ལ་ལྷའི་གཏེར་ཁ་གབ་ཡོད་དེ། དེ་ཕྱེ་ན་རི་ལུ་དང་ལིག་བུ་མིག་དང་མཆིལ་ལྷམ་དང་གླེགས་བམ་དག་འབྱུང་སྟེ། དེ་དག་གི་ཕན་ཡོན་ནི་ནམ་མཁའ་ལ་འགྲོ་བ་དང་། ལུས་མི་སྣང་བར་འགྱུར་བ་དང་། རྐང་པས་མགྱོགས་པ་དང་། བསྟན་བཅོས་
ཐམས་ཅད་ལ་ཐོགས་པ་མེད་པའི་བློ་དང་ལྡན་པར་འགྱུར་རོ། །མིའི་གཏེར་ནི་གསེར་དང་དངུལ་དང་རིན་པོ་ཆེ་སྣ་ཚོགས་དག་འབྱུང་བའོ། །ལྷ་མ་ཡིན་གྱི་ཕུག་ཏུ་འགྲོ་བ་ཞེས་བྱ་བ་ནི་དཔལ་གྱི་སྒོ་དང་སླས་ཀྱི་སྒོ་ནས་འགྲོ་སྟེ། དེ་ལ་དཔལ་གྱི་ཕུག་གི་སྒོ་དབྱེ་བ་ནི་ལྷའི་གཏེར་གྱི་དངོས་
གྲུབ་རྣམས་ལས་གང་ཡང་རུང་བ་ཅིག་ཐོབ་པར་འགྱུར་རོ། །སླས་ཀྱི་ཕུག་གི་སྒོ་དབྱེ་ན་ནི་ལྷ་མ་ཡིན་གྱི་བུ་མོ་དང་ཕྲད་དེ། ལྷ་མ་ཡིན་གྱི་གནས་སུ་ཁྲིད་ནས་དེ་དག་དང་འཚོ་ཞིང་བསྐལ་པར་གནས་པར་འགྱུར་རོ། །ནོར་རྒྱུན་མ་ཞེས་བྱ་བ་ནི་སྨན་སྣ་ཚོགས་བསྡུས་ནས་རོ་ཉེ་ལ་སོགས་པ་
ལས་གསེར་དངུལ་དུ་བྱེད་པའོ། །འབྱུང་ཁུངས་ཞེས་བྱ་བ་ནི་གསེར་དངུལ་ལ་སོགས་པའི་ཁྲོན་ཕྱིན་པའོ། །གསང་སྔགས་ཀྱི་དངོས་གྲུབ་ཅེས་བྱ་བ་ནི་འཇིག་རྟེན་ལས་འདས་པ་དང་། འཇིག་རྟེན་པའི་ལྷ་མཉེས་པ་ཐོབ་པའོ། །གསེར་སྒྱུར་རྩི་ཞེས་བྱ་ནི་དངུལ་ཆུའི་རིགས་གསེར་
དུ་སྣང་བ་ཞེས་བྱ་བ་ཅིག་ཡོད་དེ་དེ་ནི་སྲང་གཅིག་གིས་ལྕགས་སྲང་སྟོང་གསེར་དུ་སྒྱུར་ནུས་ལ་དངུལ་ཆུ་སྲང་གཅིག་པོ་དེས་ནི་ལྕགས་སྲང་སྟོང་པོ་དེས་ཟད་པར་བྱ་བའམ། ལྕགས་བསྒྱུར་བར་མི་ནུས་སོ་ཟེར། ལ་ལ་ན་རེ་རས་ཞེས་བྱ་བ་དངུལ་ཆུ་འདྲ་བ་ཞིག་ཡོད་དེ། དེ་ལྟ་བུའི་

ཐིགས་པ་གཅིག་གིས་ཟངས་སྲང་སྟོང་གསེར་དུ་སྒྱུར་ནུས་ཞེས་གྲག་གོ། །རིན་ཐང་མེད་པའི་རིན་ཆེན་ནོར་སྦྱིན་ཏེ། །ཞེས་བྱ་བ་ནི་ནོར་གྱི་རྒྱུན་གྲུབ་པའོ། །སྡིག་པ་སྤོང་བར་བྱེད་པས་ཞེས་བྱ་བ་ནི་རྣམ་པ་དེ་དག་འདོད་པས་བསོད་ནམས་ཁྱད་པར་ཅན་ལ་བརྟེན་དགོས་
པའི་ཕྱིར་རོ། །མཆོག་ཏུ་སྟོན་ཞེས་བྱ་བ་ནི་དམ་པ་བརྒྱད་པོ་དེ་རྣམས་ཀྱི་ནང་ན་འབྲས་བུ་ཆེ་བའི་ཕྱིར་རོ། །དང་པོར་བསྟན་པའི་སྣོད་ཅེས་བྱ་བ་ནི་གསང་སྔགས་གྲུབ་པ་དང་། ཕུག་ཏུ་འགྲོ་བ་དང་བཅུད་ཀྱིས་ལེན་གྲུབ་པའོ། །རྡུལ་ཞེས་བྱ་བ་ནི་འདིར་འདོད་ཆགས་ཀྱི་དྲི་མ་ལས་
དགོངས་སོ། །ཤེས་ཆེ་བ་ཞེས་བྱ་བ་ནི་སྒྲུབ་པ་པོ་ལ་ལའི་རྒྱུད་ལ་འདོད་ཆགས་ཀྱི་བག་ལ་ཉལ་ཆེ་བ་རྣམས་སོ། །འབྲིང་པོ་རྣམས་གྲུབ་པར་འགྱུར་ཞེས་བྱ་བ་ནི་རིན་པོ་ཆེ་ལ་སོགས་པ་ནོར་གྱི་རྒྱུན་དང་། འབྱུང་ཁུངས་ཀྱི་ཁྲོན་ཕྱིན་པ་སྟེ། དེ་དག་ནི་འདོད་ཆགས་ཀྱི་ཤས་ཆེ་བས་ཀྱང་འགྲུབ་
པར་བསྟན་ཏོ། །ཐ་མ་ཞེས་བྱ་བ་ནི་གསེར་དང་ནོར་བསྒྱུར་བའི་རྩི་སྟེ། སྦྱོར་བ་དཀའ་ཞིང་ཆུད་ཟ་ལ་འབྲས་བུ་ཆུད་ཟ་བའི་ཕྱིར་རོ། །མུན་པ་ཞེས་བྱ་བ་ནི་ཡང་དག་པའི་དོན་ལ་སྒྲིབ་པས་གཏི་མུག་ལ་བྱའོ། །རྟེན་ཞེས་བྱ་བ་ནི་གཏི་མུག་གི་ཤས་ཆེ་བའི་སྒྲུབ་པ་པོས། ལས་གོང་མ་དག་
ནི་མི་ལྕོགས་པའི་ཕྱིར། ཐ་མ་ཙམ་ལ་བརྟེན་དགོས་པར་བསྟན་ཏོ། །གང་ཞིག་མཆོག་ཏུ་བསྟན་པ་བསྟེན་འདོད་པས། ཞེས་བྱ་བ་ནི་བཅུད་ཀྱིས་ལེན་ལ་སོགས་པ་དང་པོར་བསྟན་པ་རྣམས་སྒྲུབ་པར་འདོད་པའོ། །དེས་ནི་ཐ་མར་བསྟན་པ་རྣམ་པར་སྤང་། །ཞེས་བྱ་བ་ནི་གསེར་
སྒྱུར་ལ་སོགས་པའི་ལས་ཕྲན་ཚེགས་མི་བྱ་བར་བསྟན་ཏོ། །ཇི་ལྟར་ཚབས་ཀྱི་མདའ་བདར་བ་བཞིན་དུ་སྔར་མི་སྤྱད་པ་དང་འདྲའོ། །གལ་ཏེ་ནོར་ལ་སྲེད་ཅིང་སྡུག་བསྔལ་གྱིས། །གདུངས་ན་འབྲིང་པོ་ལ་ནི་བསྟེན་པར་བྱ། །ཞེས་བྱ་བ་ནི་སྒྲུབ་པ་པོ་དང་དངོས་གྲུབ་མཆོག་སྒྲུབ་པའི་
ཡོན་ཏན་གཞན་རྣམས་ཡོད་ལ་སྲིད་པའི་ཤས་ཆེ་ན་ཞེས་བྱ་བའི་དོན་ཏོ། །ལྷའི་བདེ་བ་ཞེས་བྱ་བ་ལ་སོགས་པས་ནི་གོང་དུ་སྨོས་པའི་འབྲས་བུ་རྣམས་བརྗོད་པའོ། །དཀའ་ཐུབ་སྟོབས་ཀྱིས་ཐོབ། ཆགས་དང་རྣམ་བྲལ་ཞེས་བྱ་བ་ལ་སོགས་པས་ནི། འབྲས་བུ་དེ་རྣམས་ཐོབ་པའི་

རྒྱུ་བསྟན་ཏོ། །རྡོ་རྗེ་མཚོན་ཞེས་བྱ་བའི་དཔེས་ནི། །ལས་དང་ཉོན་མོངས་པའི་དྲ་བའི་ཐིགས་པོ་མཐའ་དག་གཅོད་ཅིང་འབིགས་པར་བསྟན་ཏོ། །མེ་ཞེས་བྱ་བའི་དཔེས་ནི། དུག་གསུམ་གྱི་ནགས་སྦྱོར་གྱི་ཚང་ཚིང་མཐའ་དག་སྲེག་པར་སྟོན། གནམ་ལྕགས་ཞེས་བྱ་བའི་དཔེས་
ནི། བག་ལ་ཉལ་ཕྲ་མོ་ལུས་པ་རྣམས་ཀྱང་དམིགས་ཀྱིས་སེལ་ཞེས་བྱ་བའི་ཐ་ཚིག་གོ། །མིའི་འཇིག་རྟེན་ཞེས་བྱ་བ་ནི་བྱ་བའི་རྒྱུད་འདིས་མི་རྣམས་ཀྱི་དོན་དུ་གསུངས་པའི་ཤས་ཆེ་བའི་དོན་ཏོ། །འཇིག་རྟེན་འདི་དང་ཕ་རོལ་ཉིད་ན་ཡང་། །སྡུག་བསྔལ་སེལ་ཅིང་ཞེས་བྱ་བ་
ནི་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། ཇི་སྐད་དུ། ཚེ་འདི་ལ་དངོས་གྲུབ་ལ་ངེས་པར་གཞོལ་བར་འགྱུར་བ་དང་། ཤི་འཕོས་ནས་ཀྱང་རྡོ་རྗེའི་རིགས་སུ་གཞོན་ནུའི་ལུས་ཐོབ་པར་འགྱུར་རོ་ཞེས་གསུངས་པའི་ཕྱིར་རོ། །སྡིག་འཇོམས་ཞེས་བྱ་བ་ནི་འོག་ནས། ཇི་སྐད་
དུ། ཚེ་རབས་སྟོང་ནས་གནས་པའི་སྡིག་པའི་མུན། །བཟླས་བརྗོད་བྱས་པས་མྱུར་དུ་སེལ་བར་བྱེད། །ཅེས་གསུངས་པ་ལྟ་བུའོ། །གཞན་མེད་དོ་ཞེས་བྱ་བ་ནི་གསང་སྔགས་འདྲ་བའི་འདྲེན་པ་མེད་ཅེས་བཤད་པའི་ཕྱིར་རོ། །གང་ཞིག་ཅེས་བྱ་བ་ནི་རིག་སྔགས་ཀྱི་བྱིན་གྱི་རླབས་གང་
གིས་ཞེས་བྱ་བའི་དོན་ཏོ། །དཔག་བསམ་ལྗོན་པའི་ཤིང་ལྟ་བུར། ཞེས་བྱ་བ་ནི་སེམས་ཅན་རྣམས་ཀྱི་རེ་བ་སྣ་ཚོགས་སྐོང་བའི་དཔེར་བརྗོད་པའོ། །ལ་ལར་དངོས་གྲུབ་ཅེས་བྱ་བ་ལ་སོགས་པས་ནི་དེའི་ཕན་ཡོན་གྱི་འབྲས་བུ་སྣ་ཚོགས་སུ་ཕྱེ་སྟེ་བསྟན་པ་རྣམས་ཀྱི་རྣམ་གྲངས་
བཀོད་པའོ། །གསང་སྔགས་ཞེས་བྱ་བ་ནི་གསང་སྔགས་རྣམས་ཀྱི་ལྷ་དེ་ནི་ཞེས་བྱ་བར་སྦྱར་རོ། །སྣ་ཚོགས་གཟུགས་སུ་རྣམ་སྤྲུལ་ནས། །ཞེས་བྱ་བ་ནི་སངས་རྒྱས་ལ་སོགས་པ་དག་པའི་གཟུགས་དང་། གནོད་སྦྱིན་ལ་སོགས་པ་མ་དག་པའི་གཟུགས་སུ་བསྟན་པའི་དོན་
ཏོ། །གང་ཞིག་སྡུག་བསྔལ་གང་གིས་འཇིགས་སྐྲག་པ། །ཞེས་བྱ་བ་ལ་སོགས་པས་ཀྱང་། གསང་སྔགས་ལ་བརྟེན་པའི་ཕན་ཡོན་གྱི་འབྲས་བུ་གཞན་བརྗོད་པའོ། །གང་ཞིག་ཅེས་བྱ་བ་ནི་རིག་སྔགས་འཆང་དངོས་གྲུབ་ཆེན་པོ་སྒྲུབ་པར་མི་རྩོལ་བ་རྣམས་སོ། །ཡུལ་ཞེས་

བྱ་བ་ནི་དགོན་པར་མ་སྤངས་པའམ། འདོད་པའི་ཡོན་ཏན་ལྔ་ལ་སྤྱོད་པའོ། །ཁྱིམ་ཞེས་བྱ་བ་ནི་རབ་ཏུ་མ་བྱུང་ཞིང་འཆོ་ཚིས་ལྷུར་ལེན་པའོ། །དཀའ་ཐུབ་མ་ཉམས་ཞེས་བྱ་བ་ནི་དམ་ཚིག་རྣམས་བསྲུངས་པའོ། །རྩེ་གཅིག་སེམས་ཀྱིས་ཞེས་བྱ་བ་ནི་བཟླས་
བརྗོད་ཡན་ལག་དང་ལྡན་པར་བྱེད་པའོ། །ཉིན་གཅིག་བཞིན་དུ་ཅུང་ཟད་སྔགས་ཟློས་ན། །ཞེས་བྱ་བ་ནི་ཡི་དམ་རྒྱུན་མི་འཆད་པར་བྱེད་བའོ། །དེ་ཡི་གསང་སྔགས་དུས་གཅིག་ན་ནི་འགྲུབ། །ཅེས་བྱ་བ་ནི་གསང་སྔགས་ཀྱི་ལྷའི་སྔོན་གྱི་སྨོན་ལམ་དང་། སྒྲུབ་པ་པོའི་མོས་
པའི་ཤུགས་ཀྱིས་ཚེ་རབས་གཞན་དང་གཞན་དུ་ཡང་ལྷ་དེའི་ཆོ་ག་ཞིབ་མོ་དང་མི་འབྲལ་ཏེ། རྒྱུའི་སྟོབས་ཇི་ཙམ་པས་ལས་སྲིད་པ་ཕྱི་མ་དང་ཡང་ཕྱི་མ་ལ་སོགས་པར་དངོས་གྲུབ་ཐོབ་པར་གསུངས་སོ། །ཆོ་ག་བཞིན་དུ་ཞེས་བྱ་བ་ནི་བརྟུལ་ཞུགས་ལ་སོགས་པའི་ཆོ་ག་མཐའ་
དག་བསྙེན་པ་ལ་སྦྱོར་བ་དང་འདྲ་བར་བཤད་དོ། །དང་པོར་འབུམ་བཟླས་ནས་ཞེས་བྱ་བ་ནི་ཆོ་ག་ཞིབ་མོ་དག་ལ་བསྙེན་བའི་གྲངས་ངེས་པར་གསུངས་པ་ལ་མ་གཏོགས་པར་འཇུག་པའི་སྤྱོད་པ་སྔར་སྤྱད་པ་འབུམ་བཟླས་བརྗོད་བྱ་དགོས་པའི་དོན་ཏོ། །དེ་ནས་སྔགས་པ་སྒྲུབ་ལ་འཇུག་
པར་བྱ། །ཞེས་བྱ་བ་ནི་སྔར་སྤྱོད་པ་བྱས་ནས་སོ་སོའི་ཆོ་ག་ཞིབ་མོ་བསྙེན་པའི་གྲངས་ངེས་པའི་མགོ་གཟུགས་པར་བསྟན་ཏོ། །ཡུན་རིང་ཉོན་མི་མོངས་ཞེས་བྱ་བ་ནི་ལུས་དང་སེམས་སྦྱངས་པས་ལས་སུ་བྱ་བ་ཐམས་ཅད་ཆུད་མི་གསོན་པའི་ཕྱིར་རོ། །ལུས་ལས་ཡི་དྲིལ་ཕྱིས་བྱས་
ནས་སུ། །ཞེས་བྱ་བ་ལ་སོགས་པ་ནི་གོང་དུ་དུས་གསུམ་ཁྲུས་བྱས་ཏེ་ཞེས་འབྱུང་ལ། ཁྲུས་ཀྱི་ཆོ་ག་དེར་མ་གསུངས་པ་འདིར་བསྟན་ཏོ། །སྦྲིད་པ་བྱུང་ན་ཁ་ཡང་བཀྲུ་བར་བྱ། །ཞེས་བྱ་བ་ནི་གཙང་སྦྲའི་རྣམ་གྲངས་གཞན་བསྟན་པའོ། །གཙང་སྦྲ་ལ་དད་ཅེས་བྱ་བ་ནི་ཕྱི་རོལ་གྱི་དྲི་
མ་སྤོང་བའོ། །ཟློས་ལ་དགའ་ཞེས་བྱ་བ་ནི་བཟླས་བརྗོད་བྱས་བའི་སྟོབས་ཆེ་བའོ། །སྙིང་རྗེ་ཅན་ཞེས་བྱ་བ་ནི་རང་བཞིན་གྱིས་སེམས་ཅན་རྣམས་ལ་བརྩེ་བའོ། །ལེན་པ་ལས་ནི་ལྡོག་ཅེས་བྱ་བ་ནི་སྲེད་པའི་ཤས་ཆུང་བས་ཡོ་བྱད་མི་མཁོ་བ་མི་སོགས་ཞེས་བྱ་བའི་ཐ་ཚིག་གོ། །

སློང་མོ་ཟས་ཟ་ཞེས་བྱ་བ་ནི་བསོད་སྙོམས་ལ་བརྟེན་པའོ། །ལྷའི་ལས་ལ་བརྩོན་ཞེས་བྱ་བ་ནི་བཟླས་བརྗོད་དང་། མདོ་སྡེ་བཀླག་པ་དང་། མཆོད་རྟེན་གདབ་པ་དང་། མཆོད་པ་བྱེད་པ་ལ་སོགས་པ་དགེ་བའི་ཕྱོགས་ལ་སྐྱོ་བ་མེད་པའོ། །དེ་ཡི་ལུས་ལ་གསང་སྔགས་འཇུག་པར་
འགྱུར། །ཞེས་བྱ་བ་ནི་གསང་སྔགས་ཀྱི་བྱིན་གྱི་རླབས་འཇུག་པའི་སྣོད་ཡིན་པར་བསྟན་ཏོ། །འགའ་ཡིས་བུད་མེད་གོས་དང་ནོར་རྣམས་དང་། །ཞེས་བྱ་བ་ལ་སོགས་པ་ནི་བསྙེན་པ་ལ་སྦྱོར་བའི་དུས་སུ་ཅི་ཡང་མི་བླང་བར་བསྟན་པའི་དོན་ཏོ། །ས་ཕུང་བཤང་སྒོར་ལྔ་སྟེ་ཞེས་བྱ་བ་ལ་
སོགས་པས་ནི་ཁྲུས་ཀྱི་ཆོ་ག་འདི་འདག་པའི་ཆལ་དང་ཚད་བསྟན་པའོ། །སོས་ཀའི་ནགས་ཞེས་བྱ་བ་ནི་དཔྱིད་ཀྱི་དུས་སུ་ཉི་མས་གདུངས་པས་སྐོམ་པའི་དོན་ཏོ། །མ་བསྒྲིམས་བཞིན་དུ་ཚང་ཚིང་ཀུན་བསྲེག་ལྟར། །ཞེས་བྱ་བ་ནི་ཤིང་རློན་པ་ལ་མེ་བཏང་བ་ལྟར། མིས་འབད་པའི་
ནན་ཏན་མི་དགོས་ཞེས་བྱ་བའི་ཐ་ཚིག་གོ། །བཟླས་བརྗོད་མེ་ཞེས་བྱ་བ་ནི་སྡིག་པ་ཐམས་ཅད་བསྲེག་པའི་རྒྱུའི་གཙོ་བོར་བསྟན་ཏོ། །ཚུལ་ཁྲིམས་རླུང་གིས་སྦར། བརྩོན་འགྲུས་ཆེན་པོའི་མེ་ལྕེས་ཞེས་བྱ་བ་ནི་ལྷན་ཅིག་བྱེད་པའི་རྒྱུར་བསྟན་པའོ། །སྡིག་པའི་གངས་ཞེས་བྱ་བ་ནི་འདོད་
ཆགས་དང་ཞེ་སྡང་དང་གཏི་མུག་གི་རྒྱུན་ཡང་དང་ཡང་དུ་བྱུང་བའི་བག་ཆགས་ཐ་མར་འགྱུར་ཞེས་བྱ་བའི་དོན་ཏོ། །གཞན་ནི་གོ་བར་ཟད་དོ། །ཅི་སྟེ་སྦྱིན་སྲེག་དང་བཟླས་བརྗོད་ཀྱི་གསང་སྔགས་བསྒྲུབས་ཀྱང་དངོས་གྲུབ་མ་ཐོབ་ན་ཞེས་བྱ་བ་ནི་ཇི་སྐད་གསུངས་པའི་ཆོ་ག་བཞིན་དུ། གུས་
པར་ལེན་བདུན་གྱི་བར་དུ་སྤོགས་ཤིང་བསྒྲུབས་ན་ཡང་དངོས་གྲུབ་མ་ཐོབ་ན་ཞེས་བྱ་བའི་ཐ་ཚིག་གོ། །འཇིམ་པ་ལ་ནི་མཆོད་རྟེན་འབུམ་གདབ་པའམ། ཡང་ན་ཆུ་འགྲམ་བྱེ་མ་དག་ལ་གདབ། ཅེས་བྱ་བ་ནི་བསོད་ནམས་ཀྱི་ཚོགས་ཆེར་བསྐྱེད་དགོས་པར་སྟོན་ཏོ། །དོན་དེ་ཉིད་རབ་ཏུ་
གྲུབ་པར་བྱེད་པའི་རྒྱུད་ཆེན་པོ་ལས་ཀྱང་། ཇི་སྐད་དུ། རྒྱ་མཚོར་འབབ་པའི་བྱེ་མ་ལ། །མཆོད་རྟེན་དག་ནི་ཁྲུ་གང་པ། །ཞེས་བྱ་བ་དང་། །དེ་བཞིན་དུ། རེ་རེའི་མདུན་དུ་འདུག་ནས་ནི། །བཟླས་བརྗོད་དག་ཀྱང་སྟོང་དུ་བྱ། །མཆོད་རྟེན་ཐ་མ་འབར་བར་ནི། །མཐོང་ན་ངེས་པར་

འགྲུབ་པར་འགྱུར། །ཞེས་བྱ་བ་ལ་སོགས་པ་གསུངས་པའི་ཕྱིར་རོ། །དེས་ནི་ཞེས་བྱ་བ་ལ་སོགས་མཆོད་རྟེན་གདབ་པའི་ཕན་ཡོན་དེས་ཞེས་བྱ་བའི་ཐ་ཚིག་གོ། །དེས་ནི་དེ་ཡི་སྡིག་པ་སྲིད་གཞན་ལ། །བྱས་པ་གང་ཡིན་དེ་ནི་ཟད་འགྱུར་ན། །ཞེས་བྱ་བ་ནི་ཚེ་
རབས་གཞན་ལ་སྒྲིབ་པ་ཆེན་པོ་བྱས་པ་ཐམས་ཅད་འབྱང་བར་བསྟན་ཏེ། རྒྱུད་དེ་ཉིད་ལས་ཇི་སྐད་དུ། །མཚམས་མེད་ལྔ་དག་བྱེད་པ་ཡང་། །མཆོད་རྟེན་འབར་བར་གྱུར་ན་ནི། །ངེས་པ་ཉིད་དུ་འགྲུབ་པར་འགྱུར། །ཞེས་གསུངས་པའི་ཕྱིར་རོ། །དེས་ནི་ཞེས་བྱ་བ་ནི་སྡིག་པ་ཟད་
ནས་ཞེས་བྱ་བའི་དོན་ཏོ། །མཐོང་བའི་ཆོས་ཞེས་བྱ་བ་ནི་ཚེ་འདི་ཉིད་ཅེས་བྱ་བའི་ཐ་ཚིག་གོ། །བསོད་ནམས་འབྲས་བུ་ཐོབ་ཅེས་བྱ་བ་ནི་དངོས་གྲུབ་ཀྱི་དཔལ་ཐོབ་པའི་དོན་ཏོ། །སྔགས་ཀྱི་རྩ་བ་དང་པོ་ཚུལ་ཁྲིམས་ཏེ། །ཞེས་བྱ་བ་ནི་སྡོམ་པ་དང་དགེ་བའི་ཆོས་སྡུད་པ་དང་། སེམས་
ཅན་གྱི་དོན་བྱེད་པའི་ཚུལ་ཁྲིམས་རྣམས་ཀྱིས་དཀར་པོའི་ཕྱོགས་ཀྱི་གཞི་ཐམས་ཅད་བསྡུས་པའི་ཕྱིར་རོ། །ཡང་ན་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་དོར་ནི་འཕགས་པ་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། ཇི་སྐད་དུ། བདག་ཉིད་
རང་གི་ལྷའི་གཟུགས་སུ་བྱས་ལ། ཐེ་ཚོམ་མེད་པའི་ཡིད་ཀྱིས་ང་རྒྱལ་བསྐྱེད་ཅིང་། རྟག་པར་དུས་ཐམས་ཅད་དུ་བསྐྱོད་ཀྱང་མི་གཡོ་བ་དེའི་ཚེ་ཚུལ་ཁྲིམས་དང་ལྡན་པ་ཡིན་ནོ་ཞེས་འབྱུང་བའི་ཕྱིར་རོ། །ཇི་ལྟར་མི་དབང་ཞེས་བྱ་བ་ནི་དཔེ་བསྟན་པ་སྟེ། དེ་ལ་ཡན་ལག་བདུན་དང་ལྡན། །
ཞེས་བྱ་བ་ནི་མཁར་དང་བློན་པོ་སྙིང་ཉེ་ཞིང་ལྕོགས་པ་དང་། གྲུ་དང་། ནོར་དང་། གླང་པོ་ཆེ་དང་། རྟ་དང་། དམག་མི་རྣམས་དང་ལྡན་པའོ། །སྐྱེ་བ་མེད་པར་སྐྱེ་དགུ་འདུལ་བར་བྱེད། །ཅེས་བྱ་བ་ནི་དངོས་པོ་བདུན་དང་ལྡན་པའི་རྒྱལ་པོ་དེ་ནི་བདེ་བླག་ཏུ་རྒྱལ་སྲིད་ལ་དབང་བསྒྱུར་
བས། བདེ་བ་ལ་རེག་ཅིང་དགྲ་དྲེགས་པ་ཐམས་ཅད་ཀྱང་ཐུལ་བའི་དོན་ཏོ། །དེ་བཞིན་སྔགས་པའང་ཡན་ལག་འདི་བཞིན་དུ། །ལྡན་པར་གྱུར་ན་སྡིག་པ་འདུལ་བར་བྱེད། །ཅེས་བྱ་བ་ནི་ཚུལ་ཁྲིམས་ཀྱི་མཁར་དང་། བརྩོན་འགྲུས་ཀྱི་བློན་པོ་དང་། བཟོད་པའི་གྲུ་དང་། དད་པའི་ནོར་དང་།

བླ་ན་མེད་པའི་བྱང་ཆུབ་ཆེན་པོར་སྨོན་པའི་བློ་གྲོས་ཀྱི་གླང་པོ་དང་། གཞན་གྱི་གསང་སྔགས་གཅོད་པ་ལ་སོགས་པའི་དོན་ཆུང་ངུ་ལ་རང་གི་གསང་སྔགས་མ་སྤྱད་པའི་རྟ་ཅང་ཤེས་དང་། ལེ་ལོ་སྤངས་པའི་དམག་མིའི་ཚོགས་དེ་བདུན་དང་ལྡན་ན། དངོས་གྲུབ་ཀྱི་སྐྱིད་པའི་དཔལ་ཡང་
ཉམས་སུ་མྱོང་ལ། །ལས་དང་ཉོན་མོངས་པའི་དགྲའི་ཚོགས་ཀྱང་ཆོམས་པའི་དོན་ཏོ། །དང་པོར་བཟླས་བརྗོད་ཕལ་ཆེར་བྱས་ནས་སུ། ཞེས་བྱ་བ་ནི། ལས་དང་པོ་པ་རྣམས་ཀྱིས་ཞེས་བྱ་བའི་ཐ་ཚིག་གོ། །དེ་ཡི་འོག་ཏུ་འདིར་ནི་སྦྱིན་སྲེག་བྱ། །ཞེས་བྱ་བ་ནི་ལས་རྣམས་ལ་གོམས་
པས་ཆོ་གའི་གནས་ཐམས་ཅད་ལ་ཐགས་ཐོགས་མེད་པར་ལྕོགས་པ་རྣམས་ཀྱིས་བྱ་བར་བསྟན་ཏོ། །གཞན་ནི་གོ་སླ་བས་མ་ཕྱེའོ། །རྒྱལ་བ་ལ་དད་ཅེས་བྱ་བ་ནི་སངས་རྒྱས་ལ་དད་པའི་འཇིག་རྟེན་པའི་ལྷ་རྣམས་སོ། །གཞན་ལ་ཕན་བརྩོན་ཞེས་བྱ་བ་ནི་མ་འོངས་པའི་སེམས་ཅན་
རྣམས་ལ་བརྩེ་བར་སེམས་པ་སྟེ། དེ་ཡང་ལྷ་ཞེས་བྱ་བ་ལ་སོགས་པ་འཇིག་རྟེན་པའི་གསང་སྔགས་ཀྱི་ལྷ་སངས་རྒྱས་ལ་དད་པ་རྣམས་སོ། །རྒྱལ་བའི་ཉན་ཐོས་རང་སངས་རྒྱས། །དེ་བཞིན་གཤེགས་དང་བྱང་ཆུབ་སེམས་དཔའ་ཡིས། །ཞེས་བྱ་བ་ནི་འཇིག་རྟེན་པའི་ཞུ་གནས་
རྣམས་སྨོས་པའོ། །མ་འོངས་སེམས་ཅན་ཞེས་བྱ་བ་ལ་སོགས་པས་ནི་སོ་སོའི་གསང་སྔགས་ཕུལ་བ་རྣམས་བཞེས་པར་གནང་ཞིང་བྱིན་གྱིས་བརླབ་པའི་རྒྱུ་བསྟན་ཏོ། །དེ་དག་འབྲས་བུ་ཞེས་བྱ་བ་ལ་སོགས་པས་ནི་འབྲས་བུ་རྣམ་པར་དབྱེ་བ་བསྟན་ཏེ། དཔལ་ཞེས་བྱ་བ་ནི་
ལྷ་མ་ཡིན་གྱི་ཕུག་གི་སྒོའི་རྣམ་གྲངས་ཀྱི་མིང་ངོ་། །ཕུག་ཏུ་འགྲོ་ཞེས་བྱ་བ་ཡང་རྣམ་གྲངས་གཞན་ཏེ་སླས་ཀྱི་སྒོ་ལ་བྱའོ། །མིག་འཕྲུལ་སྒྱུ་མ་ཞེས་བྱ་བ་ནི་སངས་རྒྱས་ཀྱི་གཟུགས་མང་པོར་སྟོན་པ་ལ་སོགས་པའོ། །མཚན་མོ་རྒྱུ་བ་ཞེས་བྱ་བ་ནི་རོ་ལོངས་ལ་སོགས་པ་དུར་ཁྲོད་ཀྱི་
ལས་རྣམས་གྲུབ་པའོ། །དེ་དག་མཆོག་ཡིན་ཞེས་བྱ་བ་ནི་རྣམ་པ་དེ་བརྒྱད་དངོས་གྲུབ་རབ་ཡིན་པར་བསྟན་ཏོ། །འབྲིང་ནི་ས་བདག་གོ་ཞེས་བྱ་བ་ནི་རྒྱལ་པོར་གྱུར་པའོ། །གཞན་ནི་གོ་བར་ཟད་དོ། །ངོ་མཚར་སྣ་ཚོགས་དག་ནི་སྟོན་པར་བྱེད། །ཅེས་བྱ་བ་ནི་གླུ་ལེན་པ་དང་རྔ་རྡུང་བ་དང་

ཚམ་ངམ་ལུས་ཀྱི་སྒྱུར་བ་ལ་སོགས་པས་གདོན་དག་སྐྲོད་པའོ། །ཕྲ་མོའི་ཕྲན་ཚེགས་ཡིན་ཞེས་བྱ་བ་ནི་དངོས་གྲུབ་ཆུང་ངུ་བསྟན་པ་བས་ཀྱང་ཆུང་བ་ཞེས་བྱ་བའི་དོན་ཏོ། །བྱ་བ་ཅེས་བྱ་བ་ནི་སྦྲུལ་གྱིས་ཟིན་ཏམ་དུག་འཐུངས་པའི་ལུས་ལ་ལག་པས་བྱབ་ཅིང་སྔགས་
གདབ་པའོ། །ཁུ་ཚུར་ཐལ་ལྕག་སྐྲ་དྲང་དང་། རྣ་བར་བཟླས་ཞེས་བྱ་བ་ནི་དུག་གིས་ཕོག་སྟེ་མྱོས་པ་བསླང་བའི་ཐབས་བསྟན་ཏོ། །དབབ་པ་ཞེས་བྱ་བ་ནི་དུག་དེ་ཤིང་ལ་སོགས་པ་ལ་ཕབ་ནས་དོར་བའོ། །བསྐྲད་པ་ཞེས་བྱ་བ་ནི་སྔགས་བཏབ་པས་འབྲོས་སུ་གཞུག་པའོ། །
གསད་པ་ཞེས་བྱ་བ་ནི་སྔགས་ཀྱིས་དེ་ཉིད་དུ་གསད་དེ་ཤི་བར་བྱ་བའོ། །བཅིང་བ་ཞེས་བྱ་བ་ནི་དུག་གི་མཐུ་གཡོར་མི་གནང་པར་སྔགས་དང་ཕྱག་རྒྱས་བཅིང་བའོ། །བོད་པ་ཞེས་བྱ་བ་ནི་མྱོས་པ་བསླང་བའི་དོན་དུ་ཁུས་གདབ་ཅིང་མིང་ནས་བོད་པའོ། །རིག་པའི་གོས་དང་སྔགས་
གོས་དང་། །ཞེས་བྱ་བ་ནི་དུག་གིས་ཕོག་པའི་གོས་ལ་ཆུའི་དཀྱིལ་འཁོར་དཀར་པོའི་སྟེང་དུ། ཆུའི་ས་བོན་དཀར་པོ་གཅིག་མགོ་ཐུར་དུ་བསྟན་ཏེ་གཞག་པ་ལས། ཆུ་རྒྱུན་དཀར་པོ་བབ་པས་ཉིས་རིམ་དུ་བསྐོར་ཞིང་འཁྱིལ་པ་ལས་བདུད་རྩིའི་རྒྱུན་འབབ་པར་བསམས་ལ།
འཁོར་གྱི་མི་རྣམས་ཀྱི་ཁར་ཡང་གསོ་བའི་ས་བོན་བཀོད་དེ། རིག་སྔགས་ཟློས་ཤིང་གོས་དེ་བཤུས་ལ་འཁོར་གྱི་མི་རྣམས་ཀྱིས་ཀྱང་དུག་ཕྲོགས་སོ་ཞེས་བརྗོད་པར་བྱའོ། །རྡོག་པས་བསྣུན་དང་རྣམ་པར་བསྐྱོད་པ་དང་། །ཞེས་བྱ་བ་ནི་མྱོས་པ་ལས་བསླང་བའི་དོན་དུ། རྟིང་སྒྲས་
བསྡིགས་པ་དང་ལུས་བསྒུལ་བའོ། །མིག་ཏུ་དུག་སོང་ལྟར་ནི་གཞུག་པ་དང་། །ཞེས་བྱ་བ་ནི་མིག་ལ་ཞེན་པ་དང་འདྲ་ན། དེར་སྔགས་ཀྱི་འབྲུ་བཀོད་དེ་མིག་ཕྱེ་ནས་བལྟར་གཞུག་པའི་ཐ་ཚིག་གོ། །ཁབ་ཀྱིས་གཟུགས་པ་དང་ཞེས་བྱ་བ་ནི་མྱོས་པ་བསླང་བའི་དོན་དུ། སེན་མོ་ལ་
སོགས་པའི་ཡན་ལག་ལ་ཁབ་ཀྱིས་གཟུགས་པའི་དོན་ཏོ། །སྐྱུག་ཏུ་གཞུག་ཅེས་བྱ་བ་ནི་ཟོས་ཤིང་འཐུངས་པས་འཕྲང་དུ་ཚོར་ན་སྐྱུག་ཏུ་གཞུག་པའི་ཐ་ཚིག་གོ། །ཕུ་ཞེས་བུད་དང་ཞེས་བྱ་བ་ནི་རིག་སྔགས་བཟླས་པའི་དབུགས་ཀྱིས་བུད་པའོ། །ཡན་ལག་གཞིག་པ་ཞེས་བྱ་བ་ནི་

སྔགས་དང་སྨན་གྱིས་མ་ཕྱིན་པའི་མི་ལ། མའི་ས་བོན་ཁོང་དུ་གཞུག་པ་དང་བཅས་ཏེ་བསྲེགས་ནས་ཐལ་བར་སྦྱོར་བ་བྱས་ཏེ། དེ་ནས་གསོ་བའི་ས་བོན་གྱིས་ལུས་བསྐྱེད་པའི་དོན་ཏོ། །བྲང་གི་འགྲོ་བ་དག་ཀྱང་དགུག་པ་དང་། །ཞེས་བྱ་བ་ནི་སྦྲུལ་དེ་ཉིད་སྔགས་ཀྱི་མཐུས་བཀུག་
སྟེ། ངོ་མཚར་དག་བསྟན་པའོ། །བཅིངས་ཞེས་བྱ་བ་ནི་ཕྱག་རྒྱས་ཡན་ལག་ཏུ་འབྲོས་སུ་མི་གནང་བར་མཚམས་བཅད་པའོ། །མནན་པར་བྱ་བ་ཞེས་བྱ་བ་ནི་དུག་གི་མཐུ་ཉིད་བཀུག་ལ་ཕུར་བུས་བཏབ་སྟེ། སའི་སྙིང་པོས་བསྐྱེད་པའི་དབང་ཆེན་གྱི་དཀྱིལ་འཁོར་མནན་པའི་
དོན་ཏོ། །རྨོངས་པར་བྱ་ཞེས་བྱ་བ་ནི་སྦྱོར་བ་དེ་རྣམས་ཀྱིས་སྦྱར་ན། དུག་གི་མཐུ་དྲུག་གོ་ཞེས་བྱ་བའི་ཐ་ཚིག་གོ། །དུག་ཟར་གཞུག་པ་ཞེས་བྱ་བ་ནི་འགྲོ་བའི་དུག་བསད་པའི་དོན་དུ་གནས་པའི་དུག་འབྱིན་ལ། དེ་ཉིད་སྨན་དང་སྔགས་ཀྱི་ཕྱག་རྒྱས་གསད་པར་བསྟན་པའོ། །དུག་
ནི་གཞན་ལ་སྤོ་བར་བྱ་བ་དང་། །ཞེས་བྱ་བ་ནི་རླུང་གི་ས་བོན་གྱིས་བསྐྱེད་པའི་རླུང་གི་དཀྱིལ་འཁོར་གྱི་སྟེང་དུ་དུག་བཞག་ལ་གཞན་གྱི་ལུས་ལ་སྤོའོ། །དེ་ནས་ཀྱང་ཤིང་ལ་སོགས་པ་ལ་སྤོས་ནས་སའི་དཀྱིལ་འཁོར་གྱིས་མནན་ཏེ་གཞག་པའི་དོན་ཏོ། །ལྕགས་ཀྱུར་ལྡན་པས་དྲང་
བར་བྱ་བའམ། །ཞེས་བྱ་བ་ནི་ཚིགས་ལ་ཞེན་པ་རྣམས་ལྕགས་ཀྱུའི་ཕྱག་རྒྱས་དྲང་བར་བསྟན་ཏོ། །ལུས་ལ་ཞེན་པའི་དུག་ནི་བསླང་བ་དང་། །ཞེས་བྱ་བ་ནི་རྐང་པ་ལ་ཞེན་ཏེ་དབྱུང་དཀའ་བར་གྱུར་ན། རླུང་དང་མེའི་དཀྱིལ་འཁོར་གྱི་སྟེང་དུ། དུག་བཞག་ན་སློང་བར་བྱེད་དེ།
ལངས་ཏེ་དེ་ནས་སྤོ་བ་དང་གསད་པ་དག་བྱ་བའི་དོན་ཏོ། །ཟོས་པར་བཟའ་བ་དང་ཞེས་བྱ་བ་ནི་སྔ་མའི་རྨ་ཁར་སྦྲུལ་ལ་སོགས་པའི་སྲོག་ཆགས་ཟར་གཞུག་ཅེས་བྱ་བའི་ཐ་ཚིག་གོ། །ཟོས་པས་བཅད་པ་དང་ཞེས་བྱ་བ་ནི་གདུག་པས་ཟིན་པའི་ཁ་འཕྲོ་བཅད་དེ་དོར་བའོ། །ས་བཅིང་
བ་དང་ཞེས་བྱ་བ་ནི་དུག་མཆེད་དེ་ཡན་ལག་གཞན་དུ་འཕྲོས་སུ་མི་གནང་བར་མཚམས་བཅད་པའོ། །ཕོ་ཉ་བཏང་བ་དང་ཞེས་བྱ་བ་ནི་སྦྲུལ་གྱིས་ཟིན་ཏམ། དུག་འཐུངས་སོ་ཞེས་སྦྲོན་པའི་མི་སྟེ། དེའི་ཚུལ་ལ་སོགས་པའི་བརྟག་པ་ནི། ནམ་མཁའ་ལྡིང་གི་རྒྱུད་ཞི་བའི་གཙུག་

ཏོར་རྣལ་འབྱོར་དག་ལས་བལྟ་བར་བྱ་སྟེ། འདིར་ཡི་གེ་མངས་སུ་དོགས་པས་མ་སྤྲོས་སོ། །བསྐྲད་པ་ཞེས་བྱ་བ་ནི་དུག་གིས་བཏབ་པ་ཉིད་ལ་བྱ་བའི་དོན་ཏོ། །ཀླུ་རྣམས་གཞིག་པ་ཞེས་བྱ་བ་ནི་སྦྲུལ་མགོའི་ཕྱག་རྒྱ་ལ་སོགས་པ་བསྟན་པས་ཀླུའི་གདོན་
རྣམས་གཞི་ལ་བའི་ཐ་ཚིག་གོ། །རྔ་དང་དུང་གི་སྒྲས་ནི་བསླང་བར་བྱ། །ཞེས་བྱ་བ་ནི་སྨན་དང་སྤོས་ལ་བསྔགས་པས། རོལ་མོའི་ཆ་བྱད་ལ་བསྐུས་ཏེ། བསྒྲགས་པས་དུག་གིས་མྱོས་པ་བསླང་བའི་དོན་ཏོ། །ས་ཡི་སྟེང་ན་སྦྲུལ་ནི་བརྒྱད་ཅུ་དག །གཞན་ལ་གནོད་པ་བྱེད་ཅིང་
རྣམ་པར་འཁྱམ། ཞེས་བྱ་བ་ནི་སྦྲུལ་གྱི་རིགས་ཀྱི་སྡོམ་བཤད་པའོ། །དེ་དག་རྣམས་ལས་ཉི་ཤུ་གདེངས་ཀ་ཅན། །འཁྱིལ་པ་དྲུག་དང་ཞེས་བྱ་བ་ནི་རིགས་སོ་སོར་དབྱེ་ན་དུག་ཅན་དུ་རིག་པར་བྱའོ། །ཁྲ་བོ་བཅུ་གསུམ་ཞེས་བྱ་བ་ནི་དུག་ཅན་ཡང་ཡོད་དུག་མེད་ཀྱང་ཡོད་པར་རིག་
པར་བྱའོ། །སུམ་ཅུ་གང་ཡིན་རིགས་དེའི་ནང་དུ་གཏོགས། །ཞེས་བྱ་བ་ནི་བར་མ་དོའི་རིགས་སུ་བསྡུ་ཞེས་བྱ་བའི་ཐ་ཚིག་གོ། །གཅིག་ལྷག་པ་ཡང་བར་མ་དོའི་རིགས་གར་ཡང་བརྩིར་རུང་བས་ཉེས་པ་མེད་དོ། །གོ་དྷ་ཞེས་བྱ་བ་ནི་རྩངས་པ་དང་འདྲ་བར་འ