Luận tạng Tây Tạng (Tengyur) — Tập 71

སང་སྔགས་བཟླས་བརྗོད་ན། །མྱུར་དུ་དེ་ཡི་ལུས་ནི་ཞིག་པར་འགྱུར། །གང་ཞིག་ང་རིགས་རྗེས་སུ་འབྲང་བའི་གདོན། །འབྱུང་པོ་གནོད་སྦྱིན་ཀླུ་དང་ཤ་ཟ་ཡིས། །ང་ཡི་སྔགས་བཟླས་རྡོ་རྗེ་ཐོགས་པ་དག །མཐོང་ན་ཁྲོས་ནས་ཕུང་བར་བྱེད་པར་འགྱུར། །ཞེས་
བྱ་བ་གསུངས་སོ། །དེ་བཞིན་དུ་གསང་སྔགས་གྲུབ་པ་པོ་རྣམས་ཀྱི་དམ་ཚིག་དང་། །འདུལ་བ་དང་སྤྱོད་པ་གསུངས་པ་བཤད་པ་སྟེ། དེ་ལ་ཡན་ལག་ཁ་ཅིག་ཉམས་སུ་ལེན་མ་ནུས་ཀྱང་། ཁ་ཅིག་ཉམས་སུ་མི་བླང་དུ་མི་རུང་བ་གང་ཡིན་པ་དེ་བསྟན་པ་ནི་དོན་བཞི་པ་སྟེ། དེའི་ཕྱིར།
གང་ཞིག་ཐེག་མཆོག་རྒྱ་ཆེན་ཀློག་པ་དང་། །དེ་ལ་དད་ཅིང་དེ་ཉིད་འཆད་པར་སྤྲོ། །བརྩོན་འགྲུས་ཆེ་ཞིང་བྱང་ཆུབ་སེམས་བརྟན་པ། །དེ་ལ་ང་ཡི་གསང་སྔགས་མཆོག་སྦྱིན་མཛད། །ཅེས་བྱ་བ་གསུངས་སོ། །དེ་ལྟར་འདིས་ནི་དེ་བཞིན་གཤེགས་པ་ལ་སོགས་པ་རིགས་ཀྱི་བདག་
པོ་རྣམས་ཀྱིས་གསང་སྔགས་དང་། རིག་སྔགས་རྣམས་གསུངས་པའི་བར་རྣམས་འབུམ་དང་། བྱེ་བ་ལ་སོགས་པར་དེ་དག་བསྡུས་ཏེ། རྒྱས་པར་བསྟན་པ་དང་། དེ་ལྟར་མཉེས་པར་བྱ་བའི་ཆོ་ག་ཡང་། སྤྲོས་པ་དང་བཅས་པར་བསྟན་པར་ཁོང་དུ་ཆུད་པར་བྱའོ། །དེ་ནི་
འཇིག་རྟེན་ལས་འདས་པའི་གསང་སྔགས་ཀྱི་ཆོ་གའི་ཞར་ལ། དྲག་པོ་ལ་སོགས་པའི་འཇིག་རྟེན་གྱི་ལྷ་ཁྱད་པར་ཅན་རྣམས་ཀྱིས། རིག་སྔགས་དང་གསང་སྔགས་དང་། རང་རང་གི་གསང་སྔགས་ཀྱི་རྒྱུད་དང་། ཆོ་ག་ཞིབ་མོ་བཤད་པ་དང་དེ་དག་གི་གྲངས་ཞར་ལ་བསྟན་
པར་བྱ་བ་དང་། སངས་རྒྱས་ཀྱི་དཀྱིལ་འཁོར་གྱི་སློབ་དཔོན་རྣམས་མང་དུ་ཐོས་པར་བསྟན་པའི་དོན་ནི་ལྔ་པ་སྟེ། དེའི་ཕྱིར། དྲག་པོ་ཡིས་ནི་བྱེ་བ་ཕྲག་བཅུ་བཤད། །ནོར་ལྷའི་བུས་ནི་སྟོང་ཕྲག་སུམ་ཅུ་སྟེ། ཚངས་པ་ཡིས་ནི་སྟོང་ཕྲག་དྲུག་ཅུ་ཉིད། །ཉི་མས་ཀྱང་ནི་འབུམ་
ཕྲག་གསུམ་བཤད་དོ། །ནམ་མཁའ་ལྡིང་གིས་སྟོང་ཕྲག་བཅོ་བརྒྱད་དེ། ཞེས་བྱ་བ་ལ་སོགས་པ་ནས། རང་སྔགས་མདོ་སྡེའི་རྗེས་འབྲངས་དད་བསྐྱེད་ནས། མ་བསྒྲིམས་བཞིན་དུ་ཐེ་ཚོམ་མེད་པར་འགྲུབ། དེ་ལས་བཟློག་ན་དངོས་གྲུབ་མི་ཐོབ་ལ། །སྡུག་བསྔལ་མང་

པོ་ཡང་ནི་ཐོབ་པར་འགྱུར། ཞེས་བྱ་བའི་བར་དུ་གསུངས་པའོ།། །།ལེའུ་བཅུ་གཅིག་པར་འདིར་ནི་གསང་སྔགས་སྨྲ་བ་དང་། བཅུད་ཀྱིས་ལེན་ལ་སོགས་པ་བརྟག་པ་བརྒྱད་ཀྱི་མིང་བཤད་པ་དང་། བསྟན་པ་དེ་རྣམས་ཀྱི་དངོས་གྲུབ་རབ་དང་། འབྲིང་དང་། ཐ་མའི་བྱེ་
བྲག་བསྟན་པའི་དོན་དང་། གསང་སྔགས་སྨྲ་བའི་ཡོན་ཏན་གོང་མའི་ཡང་གོང་མར་བརྗོད་པར་བསྟན་པ་ནི་དོན་དང་པོ་སྟེ། དེ་ལ་བཅུད་ཀྱིས་ལེན་དང་གཏེར་དང་ཕུག་འགྲོ་དང་། །ནོར་སྒྱུར་འབྱུང་ཁུངས་སྔགས་དང་གསེར་སྒྱུར་རྩི། །རིན་ཐང་མེད་པའི་རིན་ཆེན་ནོར་སྦྱིན་ཏེ། བརྒྱད་
པོ་བསྟན་པ་ཡོངས་སུ་བསྒྲགས་པ་ཡིན། །ཞེས་བྱ་བ་གསུངས་སོ། །བསྟན་པ་དེ་དག་རབ་ལ་སོགས་པར་དབྱེ་བའི་དབང་དུ་བྱས་ནས། །སྔགས་དང་ཕུག་ཏུ་འགྲོ་དང་བཅུད་ཀྱིས་ལེན། །སྡིག་པ་སྤོང་བར་བྱེད་པས་མཆོག་ཏུ་བསྟན། །རིན་ཆེན་དང་ནི་གཏེར་དང་འབྱུང་ཁུངས་
འབྲིང་། གསེར་སྒྱུར་རྩི་དང་ནོར་སྒྱུར་ཐ་མའོ། །ཞེས་བྱ་བ་གསུངས་སོ། །དེ་དག་སྒྲུབ་པ་ལ་འཇུག་པ་རྣམས་མཆོག་ལ་སོགས་པར་དབྱེ་བ་ནི་འདི་ཡིན་ཏེ། མི་ནི་སེམས་སྟོབས་ལྡན་ཞིང་ཆོས་ལ་བརྩོན། །དཀའ་ཐུབ་ཀྱིས་ཕྱུག་དང་པོར་བསྟན་པའི་སྣོད། །རྡུལ་ཤས་ཆེ་བ་ལ་
ནི་འབྲིང་པོར་གསུངས། །ཐ་མ་ལ་ནི་མུན་པ་ཅན་གྱིས་བསྟན། །གང་ཞིག་མཆོག་ཏུ་བསྟན་པ་དེ་སྟོན་པ། །དེས་ནི་ཐ་མར་བསྟན་པ་རྣམ་པར་སྤངས། །གལ་ཏེ་ནོར་ལ་སྲེད་ཅིང་སྡུག་བསྔལ་གྱིས། །གདུངས་ན་འབྲིང་པོ་ལ་ནི་བསྟན་པར་བྱ། །ཞེས་བྱ་བ་གསུངས་སོ། །ད་ནི་བསྟན་
པ་འདི་རྣམས་ཀྱི་དངོས་གྲུབ་དང་མཐུན་པའི་དཀའ་ཐུབ་དང་། གསང་སྔགས་ཀྱི་བཟླས་བརྗོད་ལ་སོགས་པའི་ཐབས་བསྟན་པ་ནི། །ལྷ་ཡི་བདེ་བ་དང་ནི་འབྱོར་པ་དང་། །ཚེ་དང་སྟོབས་གཟུགས་ཕུན་སུམ་ཚོགས་པ་དང་། །ཐོས་མང་མདངས་བཟངས་གཅིག་པུ་ཡིད་གཞུངས་དང་།
དབང་ཐང་ཚེ་ཀུན་དཀའ་ཐུབ་སྟོབས་ཀྱིས་ཐོབ། །ཆགས་དང་རྣམ་བྲལ་དགེ་ལ་དགའ་བ་དང་། །རྟག་ཏུ་དཀོན་མཆོག་གསུམ་ལ་གཞོལ་བ་དང་། །སྡིག་པ་སྤངས་ཞིང་བཟླས་བརྗོད་ལྡན་པ་ཡིས། །མི་ལ་ལྷ་རྫས་དངོས་གྲུབ་རིང་བ་མེད། །ཅེས་བྱ་བ་གསུངས་སོ། །ད་ནི་བསྟན་པ་དེ་

རྣམས་ཀྱི་ནང་ན། གསང་སྔགས་བསྟན་པ་མཆོག་ཡིན་པ་དང་། སྡུག་བསྔལ་སེལ་བར་བསྟན་པ་ནི། རྡོ་རྗེ་མཚོན་མེ་གནམ་ལྕགས་མཐུ་འདྲ་ཡི། །གསང་སྔགས་མི་ཡི་འཇིག་རྟེན་མཆོག་སྦྱིན་མཛད། །འཇིག་རྟེན་འདི་དང་ཕ་རོལ་ཉིད་ན་ཡང་། སྡུག་
བསྔལ་སེལ་ཞིང་སྡིག་འཇོམས་གཞན་མེད་དོ། །གང་ཞིག་དཔག་བསམ་ལྗོན་པའི་ཤིང་ལྟ་བུར། །ལ་ལར་དངོས་གྲུབ་ལ་ལར་བསོད་ནམས་དང་། །གཞན་ལ་གཟུགས་སྟོབས་ཚེ་དང་བདེ་བ་གང་། །ཡིད་མཐུན་འབྲས་བུ་འདོད་པའི་མི་ལ་སྩོལ། །གསང་སྔགས་སྣ་ཚོགས་
གཟུགས་སུ་རྣམ་སྤྲུལ་ནས། །གང་ཞིག་སྡུག་བསྔལ་གང་ཞིག་འཇིགས་སྐྲག་པའམ། །རྒྱལ་པོ་ཆོམ་རྐུན་ཐོག་གིས་འཇིགས་སྐྲག་པའི། །འགྲོ་བའི་ཚོགས་ཆེན་མཐའ་དག་སྐྱོབ་མཛད་པ། །ཞེས་བྱ་བ་གསུངས་སོ། །གཞན་ཡང་གསང་སྔགས་སྒྲུབ་པ་རྣམ་པ་གཉིས་ཏེ།
ཇི་སྐད་དུ་གསུངས་པའི་གསང་སྔགས་སྒྲུབ་པ་པོའི་འཇུག་པའི་སྤྱོད་པ་དང་། སྦྱོར་བའི་སྤྱོད་པ་དང་། དངོས་གྲུབ་སྒྲུབ་པ་པོའི་སྤྱོད་པ་དང་། སྒྲུབ་པའི་སྤྱོད་པ་བསླབས་ནས་ཁྱིམ་ནས་བྱུང་སྟེ། ཇི་སྐད་དུ་གསུངས་པའི་གནས་རྣམས་སུ་འཇུག་ནས། གསང་སྔགས་མཉེས་པར་
བྱེད་པ་གང་ཡིན་པ་དེའི་དོན་དུ་མཉེས་པར་བྱ་བའི་རིམ་པ་བསྟན་པ་ནི་འདི་དག་ཐམས་ཅད་ཡིན་ནོ། །གང་ཡང་ཇི་སྐད་གསུངས་པའི་འཇུག་པ་ལ་སོགས་པའི་སྤྱོད་པ་བསླབས་ནས་ཁྱིམ་ན་གནས་ཤིང་ཡུལ་ལ་སོགས་པ་འདོད་པ་ལ་ལོངས་སྤྱོད་ཅིང་ཇི་སྐད་གསུངས་པའི་གསང་སྔགས་
མཉེས་པར་བྱ་བའི་རྗེས་སུ་འཇུག་ཅིང་ཉིན་གཅིག་བཞིན་དུ་བཟླས་བརྗོད་ལ་སོགས་པ་ཅི་ནུས་སུ་བྱེད་པ་གང་ཡིན་པ་དེ་རྣམས་ཀྱང་ཡུན་རིང་ཞིག་ལོན་ནས། ཚེ་འདིའམ་ཚེ་རབས་གཞན་དུ་དེ་མཉེས་པར་བྱས་པ་ལས་བྱུང་བའི་བསོད་ནམས་ཀྱི་བག་ཆགས་བརྟས་ན། ཚེ་རབས་གཞན་ལ་
གྲུབ་པར་འགྱུར་བ་དེ་བསྟན་པ་ནི་དོན་གཉིས་པ་སྟེ། དེའི་ཕྱིར། གང་ཞིག་ཡུལ་དང་ཁྱིམ་ལ་བརྟེན་ཀྱང་རུང་། །དཀའ་ཐུབ་མ་ཉམས་རྩེ་གཅིག་སེམས་ཀྱིས་ནི། །ཉིན་གཅིག་བཞིན་དུ་ཅུང་ཟད་སྔགས་ཟློས་པ། །དེ་ཡི་གསང་སྔགས་དུས་ཤིག་ན་ནི་འགྲུབ། །ཅེས་བྱ་བ་གསུངས་སོ། །

ད་ནི་སྒྲུབ་པ་པོ་རྣམ་གཉིས་ཀྱིས་བཟླས་བརྗོད་གོམས་པར་བྱ་བའི་ཕྱིར། སྔར་བསྙེན་པའི་བཟླས་བརྗོད་ཇི་སྐད་བསྟན་པའི་གྲངས་ལས་ལྷག་པར་འབུམ་ཕྲག་གཅིག་བསྒྲིམས་ནས། བཟླས་བརྗོད་བྱས་ནས་སྔར་བསྙེན་པ་ཇི་སྐད་གསུངས་པ་བཞིན་དུ་ལྷུར་བླང་བར་བསྟན་པ་ནི་དོན་གསུམ་
པ་སྟེ། དེའི་ཕྱིར། ཆོ་ག་བཞིན་དུ་དང་པོར་འབུམ་བཟླས་ནས། །དེ་ནས་གསང་སྔགས་སྒྲུབ་ལ་འཇུག་པར་བྱ། །དེས་ན་དངོས་གྲུབ་མྱུར་དུ་འཐོབ་འགྱུར་ལ། །གསང་སྔགས་ཆོ་གས་ཡུན་རིང་ཉོན་མི་མོངས། །ཞེས་གསུངས་སོ། །དེ་བཞིན་དུ་སྒྲུབ་པ་པོའི་ཁྲུས་ཀྱི་ཆོ་ག་གཏན་
ལ་དབབ་པ་དང་། ཉེ་རིག་གི་ཆོ་ག་བསྟན་པ་ནི་དོན་བཞི་པ་སྟེ། དེའི་ཕྱིར། ལུས་ལ་ས་ཡིས་དྲིལ་ཕྱིས་བྱས་ནས་སུ། །ཆུ་ཆེན་རྙོག་མ་མེད་པར་ཞུགས་ནས་ཀྱང་། །ཇི་ཙམ་འདོད་པའི་བར་དུ་ཁྲུས་བྱས་ཏེ། །བྱུང་ནས་ཤར་རམ་བྱང་དུ་ཁ་བལྟས་ལ། །ཆུ་ཡིས་ལག་པ་རྐང་
པ་བཀྲུས་ནས་ནི། །པུས་མོའི་ཕྱི་རོལ་དུ་ནི་བསྟན་བྱས་ཏེ། །བར་དུ་ལག་གཞག་ཙོག་ཙོག་པོར་འདུག་ནས། །སྒྲ་མེད་དབུ་བ་མེད་པས་ཉེ་རེག་བྱ། །ལན་གསུམ་བར་དུ་ཆུ་ནི་འཐུངས་ནས་ཀྱང་། །མཆུ་ལ་ལན་གཉིས་ཡོངས་སུ་ཕྱི་བར་བྱ། །ཞེས་བྱ་བ་གསུངས་སོ། །དེ་
བཞིན་དུ་སོ་ལ་ཆགས་པའི་ལྷག་མ་ཡོད་པར་ཚོར་བ་དང་། རང་སྦྲིད་པ་བྱུང་ན་ཁ་འཁྲུ་བའི་ཆོ་ག་བྱ་བ་དང་། དེ་བཞིན་དུ་སྐྱེས་པ་དང་བུད་མེད་ཀྱི་ལུས་ལ་རེག་པ་དགག་པ་བསྟན་པ་དང་། བག་མེད་པས་དེ་དག་རྣམས་ཀྱིས་རེག་པར་གྱུར་ན་ཁྲུས་བྱ་དགོས་པ་བསྟན་པ་
ནི་དོན་ལྔ་པ་སྟེ། དེའི་ཕྱིར། སོ་ལ་ཆགས་པ་ལྕེ་ཡིས་རེག་པ་དང་། །སྦྲིད་པ་བྱུང་ན་ཁ་ཡང་བཀྲུ་བར་བྱ། །རབ་བྱུང་སྐྱེས་པ་བུད་མེད་གཞོན་ནུ་དང་། །གཞོན་ནུ་མ་དང་རྒན་པོ་བྲམ་ཟེ་རྣམས། །དེ་ལ་སྔགས་པས་ནམ་ཡང་རེག་མི་བྱ། །སྔགས་པས་དེ་དག་རྣམས་ལ་མི་བསམ་
མོ། །བརྒྱ་ལ་དེ་དག་རྣམས་ལ་རེག་གྱུར་ཏམ། །སྒྲུབ་པས་དེ་དག་རྣམས་ལ་རེག་གྱུར་ན། །སླར་ཡང་ཁྲུས་དང་འཐོར་འཐུང་བྱས་ནས་སུ། །དེ་ནས་ཕྱིར་ཡང་ཟློས་ལ་འཇུག་པར་བྱ། །ཞེས་བྱ་བ་གསུངས་སོ། །གཙང་སྦྲ་དང་བཟླས་བརྗོད་དང་། མཆོད་པ་ལ་སོགས་པ་ཇི་སྐད་

གསུངས་པ་བཞིན་བྱས་ན། མྱུར་དུ་གསང་སྔགས་ཀྱི་བྱིན་གྱིས་རློབ་པར་མཛད་དོ་ཞེས་བསྟན་པ་ནི་དོན་དྲུག་པ་སྟེ། དེའི་ཕྱིར། གཙང་སྦྲ་ལ་དང་ཟློས་དགའ་སྙིང་རྗེ་ཅན། །རྟག་ཏུ་ལེན་པ་ལས་ནི་ལོག་པ་དང་། །སློང་མོའི་ཟས་ཟ་ལྷ་ཡི་ལས་བརྩོན་
པ། །དེ་ཡི་ལུས་ལ་གསང་སྔགས་འཇུག་པར་འགྱུར། །ཞེས་བྱ་བ་གསུངས་སོ། །དེ་བཞིན་དུ་སྒྲུབ་པ་པོའི་རྣམ་པ་ཐམས་ཅད་དུ་མི་བསླང་བར་བསྟན་པ་ནི་དོན་བདུན་པ་སྟེ། དེའི་ཕྱིར། འགའ་ཡིས་བུད་མེད་གོས་དང་ནོར་རྣམས་དང་། །བཞོན་པ་རྒྱན་དང་བྱུག་པ་
བཟའ་བཏུང་དང་། །མལ་སྟན་རྣམས་ནི་མང་ཉུང་བྱིན་གྱུར་ན། །དེ་ལས་སྒྲུབ་ལ་གནས་པས་མི་བསླང་ངོ་། །ཞེས་བྱ་བ་གསུངས་སོ། །དེ་བཞིན་དུ་སྒྲུབ་པ་པོའི་ཕྱི་རོལ་ཆེ་ཆུང་གི་གཙང་སྦྲ་བསྟན་པ་ནི་དོན་བརྒྱད་པ་སྟེ། དེའི་ཕྱིར། ས་ཕུང་བཤང་སྒོར་ལྔ་སྟེ་མཚན་
ལ་གསུམ། །གཡོན་ལ་གསུམ་སྟེ་ལག་པ་གཉིས་ལ་བདུན། །ཡང་ན་ས་དང་ཆུ་ཡིས་ཇི་སྲིད་དུ། །དྲི་མ་དྲི་བྲལ་དེ་སྲིད་བར་དུ་བྱ། །ཞེས་གསུངས་སོ། །དེ་བཞིན་དུ་ཚུལ་ཁྲིམས་དང་ལྡན་པའི་སྒྲུབ་པ་པོས་བཟླས་བརྗོད་བྱས་པས་སྡིག་པ་འབྱང་བའི་རྒྱུར་འགྱུར་བ་དང་།
ཐོག་མ་མེད་པའི་དུས་ནས་བསགས་པའི་སྡིག་པ་རྣམས་ཀྱང་བཟླས་བརྗོད་བྱས་པས་འབྱང་བར་འགྱུར་རོ་ཞེས་བསྟན་པ་ནི་དོན་དགུ་པ་སྟེ། དེའི་ཕྱིར། སོས་ཀ་ནགས་མེ་མཆེད་པའི་མེ་ལྕེ་ཡིས། །མ་བསྒྲིམས་བཞིན་དུ་ཚང་ཚིང་ཀུན་བསྲེགས་ལྟར། །བཟླས་བརྗོད་
མེ་ལ་ཚུལ་ཁྲིམས་རླུང་གིས་སྦར། །བརྩོན་འགྲུས་ཆེན་པོའི་མེ་ལྕེས་སྡིག་པ་བསྲེག །ཇི་ལྟར་གངས་ལ་ཉི་མའི་འོད་ཟེར་གྱིས། །གདུངས་ན་གཟི་བརྗིད་མི་བཟོད་འཇུ་བ་བཞིན། །ཚུལ་ཁྲིམས་ཉི་མའི་འོད་ཟེར་བཟླས་བརྗོད་ཀྱིས། །གདུངས་ན་སྡིག་པའི་གངས་ཀྱང་ཟད་
པར་འགྱུར། །མུན་ནག་སྨག་ལ་མར་མེ་ཕྱུང་བ་ཡིས། །མུན་ནག་མ་ལུས་སེལ་བར་བྱེད་པ་ལྟར། །ཚེ་རབས་སྟོང་ནས་གནས་པའི་སྡིག་པའི་མུན། །བཟླས་བརྗོད་མར་མེས་མྱུར་དུ་སེལ་བར་བྱེད། །ཅེས་བྱ་བ་གསུངས་སོ། །དེ་བཞིན་དུ་ཇི་ལྟར་གསུངས་པའི་ཆོ་ག་

བཞིན་དུ། སྔར་བསྙེན་པ་བྱས་ནས་བསྒྲུབས་ཀྱང་གསང་སྔགས་ཀྱི་འབྲས་བུ་མ་ཐོབ་ན། དེའི་ཚེ་སྡིག་པ་མ་ལུས་པ་ཟད་པར་བྱ་བའི་ཕྱིར། མཆོད་རྟེན་འབུམ་གདབ་པར་བསྟན་པ་ནི་དོན་བཅུ་པ་སྟེ། དེའི་ཕྱིར། ཅི་སྟེ་སྦྱིན་སྲེག་དང་ནི་བཟླས་བརྗོད་ཀྱིས། །གསང་སྔགས་
བསྒྲུབས་ཀྱང་དངོས་གྲུབ་མ་ཐོབ་ན། །འཇིམ་པ་ལས་ནི་མཆོད་རྟེན་འབུམ་གདབ་པའམ། །ཡང་ན་ཆུ་འགྲམ་བྱེ་མ་དག་ལ་གདབ། །དེས་ནི་དེ་ཡི་སྡིག་པ་སྲིད་གཞན་ལ། །བྱས་པ་དེ་ནི་གང་ཡིན་ཟད་གྱུར་ན། །དེས་ན་གསང་སྔགས་མཐུ་ཡིས་འདི་ཉིད་དུ། །མཐོང་བའི་
ཆོས་ལ་བསོད་ནམས་འབྲས་བུ་ཐོབ། །ཅེས་བྱ་བའི་བར་དུ་གསུངས་སོ། །དེ་བཞིན་དུ་སྔར་སྦྱང་གི་ནད་དུ་འདུག་པའི་ས་བོན་གྱི་དཔེ་བསྟན་པས། །གསང་སྔགས་བཟླས་བརྗོད་ལ་སོགས་པའི་ཚོགས་པ་ལ་བརྟེན་ནས་གསང་སྔགས་ཀྱི་འབྲས་བུ་འབྱུང་གི །གསང་སྔགས་
ཀྱི་ལྷ་ལ་སོགས་པ་འབའ་ཞིག་ལས་ནི་མ་ཡིན་པས་དེའི་ཕྱིར་དེའི་ཚོགས་བསྟན་པ་ནི་དོན་བཅུ་གཅིག་པ་སྟེ། དེའི་ཕྱིར། གསང་སྔགས་རྩ་བ་དང་པོར་ཚུལ་ཁྲིམས་ཏེ། །དེ་ནས་བརྩོན་འགྲུས་དང་ནི་བཟོད་པ་དང་། །རྒྱལ་བ་ལ་ནི་དད་དང་བྱང་ཆུབ་སེམས། །གསང་སྔགས་དང་ནི་
ལེ་ལོ་མེད་པའོ། །ཞེས་བྱ་བར་རྒྱ་ཆེར་སྦྱར་རོ། །སྔར་བསྙེན་པ་རྫོགས་ནས། སྔགས་པས་རང་གི་ལྷ་མཉེས་པར་བྱ་བའི་དོན་དུ་སྦྱིན་སྲེག་བྱ་བ་དེ་བསྟན་པ་ནི་དོན་བཅུ་གཉིས་པ་སྟེ། དེའི་ཕྱིར། དང་པོར་བཟླས་བརྗོད་ཕལ་ཆེར་བྱས་ནས་སུ། །དེ་ཡི་འོག་ཏུ་འདིར་ནི་སྦྱིན་སྲེག་
བྱ། །སྦྱིན་སྲེག་གིས་ནི་གསང་སྔགས་མཆོག་མྱུར་སྩོལ། །ཡིད་དུ་འོང་བའི་འདོད་པའང་སྦྱིན་པར་མཛད། །ཅེས་བྱ་བ་གསུངས་སོ། །དེ་བཞིན་དུ་གང་གིས་མིའི་ཆུང་མ་བཀུག་པ་དང་། གནོད་སྦྱིན་གྱི་བུ་མོ་གསང་སྔགས་ཀྱི་དབང་གིས་བཀུག་སྟེ། འདོད་པར་ལོངས་སྤྱོད་
པ་དེ་ལ། །ཕ་རོལ་གྱི་བུད་མེད་ལོངས་སྤྱད་པའི་ཕྱིར་འདོད་པས་ལོག་པར་གཡེམ་པ་ལ་སོགས་པ་བྱས་པའི་ཉེས་པ་གང་ཡིན་པ་དེ་ཡོངས་སུ་སྤང་བ་ནི་དོན་བཅུ་གསུམ་པ་སྟེ། དེའི་ཕྱིར། གང་གིས་དཔག་ཚད་བརྒྱ་ཡི་ཕ་རོལ་ནས། །གསང་སྔགས་མཐུ་ཡིས་བུད་མེད་བཀུག་

ཀྱང་དེ། བུད་མེད་མ་ཡིན་གནོད་སྦྱིན་བུ་མོ་སྟེ། །དེ་གཟུགས་ཆ་བྱད་ཀྱིས་ནི་སྔགས་པ་བསྟེན། །འདོད་པའི་དོན་ཕྱིར་བསྒྲུབ་པ་གང་ཡིན་དེ། །གྲུབ་ནའང་གནོད་སྦྱིན་བུ་མོ་སྦྱིན་པར་བྱེད། །ཅེས་བྱ་བ་ལ་སོགས་པ་ནས། གཞན་གྱི་ཆུང་མར་ཡིད་ལ་
བསམས་ནས་སུ། །འདོད་པ་སྟེན་པར་བྱེད་པ་གང་ཡིན་དེ། །མི་ཤེས་ཡིད་ཀྱིས་གཞན་གྱི་ཆུང་མ་ལ། །འདོད་པ་སྤྱད་པས་སྡིག་པ་མང་དུ་ཐོབ། །ཅེས་བྱ་བའི་བར་དུ་གསུངས་སོ། །དེ་བཞིན་དུ་འཇིག་རྟེན་པའི་གསང་སྔགས་ལྷ་དང་ཀླུ་དང་གནོད་སྦྱིན་ལ་སོགས་པས་ཇི་
ལྟར་ཁོང་དུ་ཆུད་པ་བཞིན་དུ་སྨྲས་པ་དེ་ཡང་། སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་རྣམས་ཀྱིས་བྱིན་གྱིས་བརླབ་པའི་ཕྱིར། དེ་རྣམས་ཀྱི་དངོས་གྲུབ་རབ་དང་འབྲིང་དང་། ཐ་མའི་མཚན་ཉིད་ཇི་ལྟ་བ་བཞིན་བསྟན་པ་དེ་ནི་དོན་བཅུ་
བཞི་པ་སྟེ། དེའི་ཕྱིར། རྒྱལ་བ་ལ་དད་གཞན་ལ་ཕན་བརྩོན་པའི། །ལྷ་དང་ལྷ་མིན་གནོད་སྦྱིན་དྲི་ཟ་དང་། །གྲུབ་པར་བཅས་པས་སྔགས་བཤད་གང་ཡིན་པ། །ཞེས་བྱ་བ་ལ་སོགས་པ་ནས། དེ་དག་འབྲས་བུའང་རབ་དང་འབྲིང་དང་ནི། །ཐ་མར་དབྱེ་བས་རྣམ་པ་
གསུམ་དུ་བསྟན། །ཞེས་བྱ་བ་ལ་སོགས་པ་རྒྱ་ཆེར་སྦྱར་རོ། །དེ་བཞིན་དུ་འཇིག་རྟེན་དང་འཇིག་རྟེན་ལས་འདས་པའི་རིག་སྔགས་དང་། གསང་སྔགས་ཀྱི་རྒྱུད་དང་ཆོ་ག་ཞིབ་མོར་དུག་གི་ལས་ཀྱི་དབྱེ་བ་བཤད་པའི་མིང་བསྡུས་ནས་བསྟན་པ་ནི་དོན་བཅོ་ལྔ་པ་སྟེ། དེའི་
ཕྱིར། བྱ་བ་དང་ཁུ་ཚུར་ཐལ་ལྕག་སྐྲ་དྲང་དང་། །རྣ་བར་བཟླས་དང་དབབ་དང་བསྐྲད་པ་དང་། །ཞེས་བྱ་བ་ལ་སོགས་པ་ནས། དུང་གི་སྒྲས་ནི་བསླང་བར་བྱ་བ་སྟེ། །རྣམ་པ་འདི་དག་དུག་གི་ལས་སུ་བཤད། །ཅེས་བྱ་བའི་བར་དུ་རྒྱས་པར་གསུངས་སོ། །དེ་བཞིན་དུ་སྦྲུལ་གྱི་
རིགས་ཀྱི་བྱེ་བྲག་བསྟན་པ་ནི་དོན་བཅུ་དྲུག་པ་སྟེ། དེའི་ཕྱིར། ས་ཡི་སྟེང་ན་སྦྲུལ་ནི་བརྒྱད་ཅུ་དག །གཞན་ལ་གནོད་པར་བྱེད་ཅིང་རྣམ་པར་འཁྱམ། །དེ་དག་རྣམས་ལས་ཉི་ཤུ་གདེངས་ཀ་ཅན། །འཁྱིལ་པ་དྲུག་དང་དུག་མེད་བཅུ་གཉིས་དང་། །དེ་བཞིན་སྦྲུལ་ནི་ཁྲོ་བོ་བཅུ་གསུམ་

སྟེ། སུམ་ཅུ་གང་ཡིན་དེ་ནི་རིགས་སུ་གཏོགས། །སྦལ་པ་གོ་དྷ་སྡིག་པ་ཁ་བརྒྱད་དང་། །རྣམ་པར་དབྱེ་ན་རབ་ཏུ་མང་པོ་ཡོད། །ཅེས་བྱ་བ་གསུངས་སོ། །དེ་བཞིན་དུ་མི་ལ་སོགས་པའི་ལུས་ལ་སྦྲུལ་དེ་དག་དུག་གཏོང་བའི་སྦྱོར་བ་བསྟན་པ་ནི་དོན་བཅུ་བདུན་པ་སྟེ། དེའི་ཕྱིར།
གཅིན་རྟུག་ཁ་ཆུ་རེག་དང་མཐོང་བ་དང་། །མཆེ་བ་བཙུགས་པ་ལས་ནི་དུག་ཀྱང་གཏོང་། །དེ་ལས་དུག་གི་རྒྱུ་ལ་མཁས་པ་ཡིས། །རབ་འབྲིང་ཐ་མ་གསུམ་དུ་རྣམ་པར་དབྱེ། །ཞེས་བྱ་བ་གསུངས་སོ། །དེ་དག་ལས་མི་ལ་སོགས་པ་ལ་ཟ་བར་བྱེད་པའི་རྒྱུ་བསྟན་པ་ནི་དོན་བཅོ་
བརྒྱད་པ་སྟེ། དེའི་ཕྱིར། དུག་མོད་ཁྲོ་བོའི་དབང་གྱུར་སྐྲག་པ་དང་། །དེ་བཞིན་དངངས་པའམ་བཀྲེས་པའི་ཁ་ཟས་ཕྱིར། །ཤ་ཁོན་ཡོད་པའམ་གཤིན་རྗེས་བསྒོ་བའམ། །ལུས་ལ་བརྫིས་ནས་དེ་དག་ཟ་བར་བྱེད། །ཅེས་བྱ་བ་ལ་སོགས་པ་གསུངས་སོ། །དེ་ལ་མི་ལ་སོགས་
པ་ལ་སྦྲུལ་དེ་དག་གིས་ཇི་ལྟར་མཆེ་བས་བཏབ་ནས་དུག་གཏོང་བར་བྱེད་པ་དང་དེ་དག་གིས་མཆེ་བས་བཏབ་པའི་མཚན་ཉིད་བསྟན་པ་ནི་དོན་བཅུ་དགུ་པ་སྟེ། དེའི་ཕྱིར། ཟོས་པ་དེ་ཡང་རྣམ་པ་བཞིར་འགྱུར་ཏེ། །མཆེ་བས་ཟིན་དང་སོས་བཅད་བཏབ་པའོ། །གང་དུ་མཆེ་བ་
གཅིག་གིས་ཁྲག་ཕྱུང་རྗེས། །དེ་ནི་དུག་ཆུང་བས་ནི་ཟིན་པར་བཤད། །གང་དུ་མཆེ་བ་གཉིས་ཀྱིས་བཏབ་ནས་སུ། །ཁྲག་དག་ཕྱུང་བར་གྱུར་པ་ཟོས་པའོ། །གལ་ཏེ་མཆེ་བ་གསུམ་གྱིས་ཤ་བཅད་པ། །དེ་ནི་བཅད་པར་གྱུར་པ་ཡིན་ཞེས་བསྟན། །གང་དུ་མཆེ་བ་བཞི་ཡིས་
བཏབ་ནས་སུ། །སྦྲུལ་གྱི་ལུས་ནི་བཟློག་པར་གྱུར་པ་དེ། །བཏབ་ནས་ཟོས་པ་ཡིན་ཞེས་བཤད་པ་སྟེ། །དེ་ནི་སྨན་རྣམས་ཀྱིས་ཀྱང་བཟློག་པར་དཀའ། །ཞེས་བྱ་བ་གསུངས་སོ། །དེ་ལ་གསང་སྔགས་ཀྱི་རྒྱུད་ཐམས་ཅད་ལས་རྣམ་པ་གཉིས་ཀྱིས་དུག་གསོ་བར་བསྟན་པ་ལས།
དེ་གཉིས་ལས་ཀྱང་སྔགས་ཀྱིས་གསོ་བ་གཙོར་བསྟན་པ་ནི་དོན་ཉི་ཤུ་པ་སྟེ། དེའི་ཕྱིར། མེ་ཡི་རང་བཞིན་གནད་དུ་འཕན་པའི་དུག །མཚོན་དང་མེ་དང་འདྲ་ཞིང་མཚུངས་པ་དག །ཇི་ལྟར་སྔགས་ཀྱིས་རབ་ཏུ་ཞི་འགྱུར་བ། །དེ་བཞིན་སྨན་གྱིས་ཞི་བར་མི་ནུས་སོ། །ཞེས་

བྱ་བ་ལ་སོགས་པ་ནས། དུག་གི་མཐུ་སྟོབས་ཤེས་ནས་རབ་བསྒྲིམས་ཏེ། །གསང་སྔགས་ཆོ་ག་བཞིན་དུ་བཟླས་སྒྲུབ་ན། །སྦྱོར་བ་འདིས་ནི་དུག་ཀྱང་འཕྲོག་པར་བྱེད། །བ་ལང་ཁྱུ་ན་སེང་གེ་ཇི་ལྟ་བར། །དུག་ཅན་སྦྲུལ་དང་དོན་མེད་ལྷན་ཅིག་རྩེ། །ཞེས་
བྱ་བའི་བར་དུ་གསུངས་སོ། །དེ་བཞིན་དུ་གདོན་གྱིས་ཟིན་པས་གསོ་བའི་དབང་དུ་བྱས་ནས། །གདོན་རྣམས་ཀྱི་དབྱེ་བ་བསྟན་པ་ནི་དོན་ཉི་ཤུ་གཅིག་པ་སྟེ་དེའི་ཕྱིར། ལྷ་དང་ལྷ་མིན་གནོད་སྦྱིན་གྲུབ་པ་དང་། །དྲི་ཟ་འབྱུང་པོ་མཚུན་དང་གསང་བ་དང་། །ཡི་དགས་ཤ་ཟ་དག་དང་
ལུས་སྲུལ་པོ། །སྨྱོ་བྱེད་མདངས་འཕྲོག་པ་དང་གྲིབ་གནོན་དག །ས་ཡི་སྟེང་ན་གདོན་ནི་སྣ་ཚོགས་པ། །མི་ཤ་ཚིལ་ཡང་ཟ་ཞིང་ཁྲག་ཀྱང་འཐུང་། །ཞེས་བྱ་བ་གསུངས་སོ། །མི་ལ་སོགས་པ་དེ་དག་གི་གླགས་སྐབས་བསྟན་པ་ནི་དོན་ཉི་ཤུ་གཉིས་པ་སྟེ། དེའི་ཕྱིར། མྱ་ངན་
འདོད་གདུངས་ཁྲོ་བས་ཉམ་ཐག་པའི། །གླགས་སྐབས་རྙེད་ནས་ལུས་ལ་འཇུག་པར་བྱེད། །ཅེས་བྱ་བ་གསུངས་སོ། །གདོན་གྱིས་ཟིན་པ་རྣམས་ཀྱི་སྤྱོད་པ་བསྟན་པ་ནི་དོན་ཉི་ཤུ་གསུམ་པ་སྟེ། དེའི་ཕྱིར། དེ་དག་རྣམས་ཀྱིས་ཟིན་པའི་མི་འཕྱན་ཅིང་། །གླུ་ལེན་གར་བྱེད་
དགོད་དང་ཁྲོ་བ་དང་། །དགའ་ཞིང་རྔམ་པ་ཆེ་ལ་སྨྲ་འདོད་དང་། །སྤྱོད་པ་སྣ་ཚོགས་བྱེད་པའི་ལྷ་རྣམས་དང་། །ལྷ་མིན་ལྟར་འཆོས་སྐྱེ་བོ་བཞད་གད་བྱེད། །ཅེས་བྱ་བ་གསུངས་སོ། །མི་ལ་སོགས་པ་རྣམ་པ་གསུམ་གྱི་ཕྱིར་འཛིན་པར་བསྟན་པ་ནི་དོན་ཉི་ཤུ་བཞི་པ་སྟེ།
དེའི་ཕྱིར། གཏོར་མ་འདོད་པའམ་རྩེད་མོ་བྱེད་འདོད་པས། །གསད་པའི་དོན་དུ་ལུས་ལ་འབེབས་ཤིང་འཇུག །ཅེས་བྱ་བ་གསུངས་སོ། །གདོན་གྱིས་ཟིན་པ་རྣམས་ཐར་བར་བྱ་བའི་ཐབས་སུ་གྱུར་པ་གསང་སྔགས་རྣམས་དང་། དེའི་ལས་བྱེད་པ་རྣམས་ཀྱི་མིང་བསྟན་པ་ནི་དོན་ཉི་
ཤུ་ལྔ་པ་སྟེ། དེའི་ཕྱིར། གསང་བ་པ་རྣམས་གཞིག་ཕྱིར་རིགས་ཀྱི་མཆོག །མཐུ་ཆེན་མཆོག་སྦྱིན་རྡོ་རྗེ་ལྕགས་ཀྱུའམ། །གཞན་ཡང་ང་ཡི་རིགས་ལས་བྱུང་རིག་པའམ། །ཁྲོ་བོ་བདུད་རྩི་ཐབ་སྦྱོར་ལ་སོགས་པས་སོ། །ཞེས་བྱ་བ་ལ་སོགས་པ་ནས། འབྱུང་པོའི་རིག་

སྔགས་འདིར་ནི་ཀུན་མཐོང་དང་། །གདོན་གྱི་སྤྱོད་པ་མ་ལུས་ཤེས་ནས་སུ། །ཕྱི་ནས་གདོན་རྣམས་དོགས་མེད་འདུལ་ན་ནི། །གདོན་གྱིས་མི་འཇིགས་སླར་ཡང་ཚུགས་པ་མེད། །ཅེས་བྱ་བ་གསུངས་སོ། །དེ་བཞིན་དུ་སངས་རྒྱས་དང་བྱང་ཆུབ་སེམས་དཔའ་དང་། རང་སངས་
རྒྱས་དང་། ཉན་ཐོས་ལ་མངོན་པར་དད་པ་རྣམས་ཀྱིས་གསང་སྔགས་བཤད་པ་གང་ཡིན་པ་དེ་དག་ལ། འཇིག་རྟེན་པའི་ལྷས་སྨྲས་པའི་གསང་སྔགས་རྣམས་ཀྱི་མཐུས་མི་ཐུབ་པར་བསྟན་པ་ནི་དོན་ཉི་ཤུ་དྲུག་པ་སྟེ། དེའི་ཕྱིར། རིག་གསུམ་འཕེལ་དང་སྲིད་གསུམ་མཐར་
ཕྱིན་པའི། །ཞེས་བྱ་བ་ལ་སོགས་པ་ནས། འཇིག་རྟེན་ལྷ་ཚོགས་རྣམས་ཀྱིས་བསྔགས་པ་ཡི། །གསང་སྔགས་མཐུ་ཡིས་དེ་ལ་བསྐྱོད་དུ་མེད། །ཅེས་བྱ་བའི་བར་དུ་གསུངས་སོ། །གསང་སྔགས་ཀྱི་མདོ་སྡེ་འདི་བཤད་པ་རྫོགས་པར་བསྟན་པ་ནི་དོན་ཉི་ཤུ་བདུན་པ་སྟེ། དེའི་
ཕྱིར། རྡོ་རྗེ་འཆང་གི་གསུང་ཐོས་ལྷ་རྣམས་དང་། །ཚངས་པ་ལྷ་མིན་གནོད་སྦྱིན་གྲུབ་པ་དང་། རིག་འཛིན་ཀླུ་དང་གནོད་སྦྱིན་དྲི་ཟ་དང་། །གསང་བ་པ་དང་མཚུན་དང་འབྱུང་པོ་རྣམས། །དད་པས་ཞབས་ལ་སྤྱི་བོས་ཕྱག་འཚལ་ཏེ། །གུས་པས་ཐལ་མོ་སྦྱར་ནས་ཚིག་
གསོལ་པ། །ཞེས་བྱ་བ་ལ་སོགས་པ་ནས། གཞལ་མེད་ཁང་དུ་མངོན་དུ་ཞུགས་ནས་ཀྱང་། །ཇི་ལྟར་འོངས་པ་ནམ་མཁའི་ལམ་ནས་དོང་། །ཞེས་བྱ་བའི་བར་དུ་རྒྱས་པར་སྦྱར་རོ། །དེ་བཞིན་དུ་ལྷ་རྣམས་དང་ནས། ཕྱག་ན་རྡོ་རྗེས་ཡང་། དཔུང་བཟངས་ལ་བསྟན་པ་ནི་དོན་ཉི་ཤུ་
བརྒྱད་པ་སྟེ། དེའི་ཕྱིར། ལྷ་རྣམས་ཀུན་གྱིས་མདོ་འདི་ཤེས་ཟིན་གྱིས། །ཁྱོད་ཀྱིས་འཇིག་རྟེན་འདིར་ནི་གྲགས་པར་གྱིས། །ཞེས་བྱ་བ་ལ་སོགས་པ་གསུངས་སོ། །འཕགས་པ་དཔུང་བཟངས་ཀྱིས་ཞུས་པའི་རྒྱུད་ཀྱི་བསྡུས་པའི་དོན་སློབ་དཔོན་སངས་རྒྱས་གསང་བས་མཛད་པ་རྫོགས་སོ། །
༄། །འཕགས་པ་དཔུང་བཟངས་ཀྱིས་ཞུས་པའི་རྒྱུད་ཀྱི་ཚིག་གི་དོན་བཤད་པའི་བརྗེད་བྱང་བཞུགས།། ༄༅༅། །ཆོས་དབྱིངས་མཉམ་པ་ཉིད་ལ་རབ་ཞུགས་ཀྱང་། །ཐུགས་རྗེས་གཏན་དུ་མྱ་ངན་མི་འདའ་ཞིང་། །འགྲོ་བའི་དོན་མཛད་མཐའ་ཡས་གཟུགས་མངའ་བ། །དཔལ་

བརྟན་རྡོ་རྗེ་བསྣམས་ལ་ཕྱག་འཚལ་ལོ། །དེ་ལྟར་བསྡུས་པའི་དོན་དང་དགོས་པ་དག །སློབ་དཔོན་ཁྱད་པར་ཅན་གྱིས་གསལ་མཛད་ཀྱང་། །ཚིག་གི་དོན་དང་མཚམས་སྦྱར་བརྒལ་བའི་ལན། །རང་ལ་གཅེས་པའི་དོན་དུ་ཅུང་ཟད་དབྱེ། །དེ་ལ་གནོད་སྦྱིན་
བདག་པོ་ཞེས་བྱ་བ་ནི་ཕྱག་ན་རྡོ་རྗེ་སྟེ། གནོད་སྦྱིན་ཐམས་ཅད་འདུལ་བར་མངའ་གསོལ་བའི་ཕྱིར་རོ། །ཉི་མ་སྟོང་གི་གཟི་ཞེས་བྱ་བ་ནི་སྐུ་དང་ཐུགས་ཀྱི་ཡོན་ཏན་ལ་སྦྱར་རོ། །ཐུགས་རྗེ་ཞེས་བྱ་བ་ནི་སེམས་ཅན་ཐམས་ཅད་ལ་བརྩེ་བར་དགོངས་པའི་དོན་ཏོ། །རྩེ་གཅིག་ཡིད་གྱུར་
ཞེས་བྱ་བ་ནི་དེ་བཞིན་ཉིད་ལ་དགོངས་པའི་དོན་ཏོ། །བཞུགས་པ་ལ་ཞེས་བྱ་བ་ནི་ཚངས་པའི་གནས་པ་ལ་སོགས་པ་སྟེ་ཐུགས་རྗེས་ཞེས་སྨོས་པའི་ཕྱིར་རོ། །དཔུང་བཟངས་ཚུལ་བཞིན་གུས་པར་ཕྱག་འཚལ་ནས། །ཞེས་བྱ་བ་ནི་ཤིན་ཏུ་དང་བས་མགོ་བོས་ཡབ་ཀྱི་ཞབས་ལ་
གཏུགས་ཏེ་ཕྱག་བྱས་པའི་དོན་ཏོ། །ཚོགས་ཀུན་གྲུབ་ལ་ཞུས་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔལ་ལ་སོགས་པས། རིག་སྔགས་དང་གསང་སྔགས་མང་པོ་སོ་སོའི་ཆོ་ག་ཞིབ་མོ་གསུངས་པ་རྣམས་ངེས་པར་དངོས་གྲུབ་ཏུ་གྱུར་པར་བྱ་བའི་དོན་རྣམས་ཞུས་ཞེས་བྱ་
བའི་ཐ་ཚིག་གོ། །ས་སྟེང་མི་རྣམས་ཞེས་བྱ་བ་ནི་སྐབས་འདི་ལ་སོགས་རིག་སྔགས་འཆང་ལ་སྦྱར་བའི་ཤས་ཆུང་བའི་དོན་ཏོ། །བཟླས་བརྗོད་ཅེས་བྱ་བ་ནི་ཡན་ལག་བཞི་པའི་དོན་ཏོ། །སྨྱུང་བ་ཞེས་བྱ་བ་ནི་ཁ་ཟས་མི་ཟ་བའོ། །དཀའ་ཐུབ་ཅེས་བྱ་བ་ནི་འགལ་བའི་ཟས་དང་གོས་
སྤང་བའོ། །ངེས་པར་སྤྱད་པ་ཞེས་བྱ་བ་ནི་སྨྱུང་བ་དང་མི་སྨྲ་བའི་དཀའ་ཐུབ་ཀྱི་དུས་འདི་སྲིད་གཅིག་ཏུ་བྱའོ་ཞེས་ལུས་དང་ངག་གི་སྒོ་ཤིན་ཏུ་སྡོམ་པའོ། །རབ་ཏུ་བསྒྲིམས་ཀྱང་གྲུབ་པ་མ་མཐོང་ན། །ཞེས་བྱ་བ་ནི་འབད་པར་ནི་གཟིགས་ལ་གྲུབ་པར་ནི་མ་གཟིགས་ཞེས་བྱ་བའི་ཐ་
ཚིག་གོ། །གཙོ་བོ་ཁྱོད་ཀྱིས་ཞེས་བྱ་བ་ནི་སྐབས་འདིར་ཕྱག་ན་རྡོ་རྗེ་ཁོ་ན་སྨོས་པ་ནི་ས་འཛིན་ནམ་རྡོ་རྗེའི་རིགས་ཀྱི་ཤས་ཆེར་གསུངས་པར་རིག་པར་བྱའོ། །སྡིག་འཇོམས་ཞེས་བྱ་བ་ནི་གསང་སྔགས་དེ་དག་གི་ལས་རྣམ་པར་དག་པ་བསྟན་ཏོ། །དག་བྱེད་རྣམས་ཀྱི་མཆོག་ཅེས་

བྱ་བ་ནི་རང་བཞིན་རྣམ་པར་དག་པ་བསྟན་ཏོ། །བདེན་པའི་གསུང་གིས་རབ་ཏུ་བཀའ་སྩལ་ན། །ཞེས་བྱ་བ་ནི་རྒྱུད་རྣམ་པར་དག་པར་བསྟན་པའོ། །ཇི་ལྟར་སྔགས་རྣམས་འབྲས་བུ་མ་མཆིས་གྱུར། །ཞེས་བྱ་བ་ནི་རྣམ་པར་དག་པའི་ཁུངས་ནས་བྱུང་བ་ལ། སླུ་བ་མི་སྲིད་པར་
བརྗོད་པའོ། །རབ་དང་འབྲིང་དང་དེ་བཞིན་ཐ་མ་ཞེས་བྱ་བ་ལ་སོགས་པས་ནི་ནམ་མཁའ་ལ་འགྲོ་བ་ལ་སོགས་པའི་དངོས་གྲུབ་སྒྲུབ་པ་པོ་ལ་ཡོན་ཏན་ཡང་ཡོད། གསང་སྔགས་ཀྱང་མཐུ་ཆེ་མོད་ཀྱི། མ་བསྒྲུབས་པའི་ཕྱིར་དངོས་གྲུབ་མ་ཐོབ་བོ་ཞེས་བྱ་བའི་གླན་
ཀ་བསལ་བའི་དོན་ཏོ། །འབྲས་བུ་ཞེས་བྱ་བ་དང་གྲུབ་པ་ཞེས་བྱ་བ་ནི་རྣམ་གྲངས་ཏེ། ནམ་མཁའ་ལ་འགྲོ་བ་ལ་སོགས་པའོ། །སྒྲུབ་པ་ཉོན་མོངས་ཁོ་ན་ཅི་རུང་ལགས། །ཞེས་བྱ་བ་ནི་ངལ་བའི་འབྲས་བུ་མེད་པ་ནི་སྨད་པའོ་ཞེས་བྱ་བའི་ཐ་ཚིག་གོ། །རྒྱལ་བ་ཞེས་བྱ་བ་ནི་སྡིག་
པ་མི་དགེ་བའི་ཆོས་ལས་རྒྱལ་བའི་ཕྱིར་སངས་རྒྱས་ཏེ། ཇི་སྐད་དུ། སྡིག་པ་མི་དགེའི་ཆོས་ལས་ང་རྒྱལ་ཏེ། །དེ་ཕྱིར་ང་ནི་ཉེ་འགྲོ་རྒྱལ་བ་ཡིན། །ཞེས་གསུངས་པ་ལྟ་བུའོ། །ཡེ་ཤེས་ཞི་བ་ཞེས་བྱ་བ་ནི་སངས་རྒྱས་ཀྱི་མཁྱེན་པ་ལ་འདོད་ཆགས་ལ་སོགས་པ་མ་ཞི་བ་མི་
སྲིད་པའི་ཕྱིར་རོ། །དེ་ཡིས་འདི་དག་གསོ་བར་སྔོན་གསུངས་ན། །ཞེས་བྱ་བ་ནི་ཡེ་ཤེས་དེ་སེམས་ཅན་རྣམས་ཀྱིས་རྟོགས་པར་བྱ་བའི་དོན་དུ་འདོད་ཆགས་ནས་ལེ་ལོའི་བར་གྱི་གཉེན་པོར་མ་ཆགས་པ་ནས་བརྩོན་འགྲུས་ཀྱི་བར་ལ་གདུལ་བྱ་རྣམས་དགོད་པར་ལུང་ལས་གསུངས་
པའོ། །གང་ལ་སྔགས་དང་རིག་པའང་འགྲུབ་མེད་པ། །ཞེས་བྱ་བ་ནི་གསང་སྔགས་ཀྱི་སྒོ་ནས་འཇུག་པ་རྣམས་བག་མེད་པའི་གནས་ནས་བསླངས་ཏེ། དངོས་གྲུབ་ཐོབ་པར་འགྱུར་བའི་ཐབས་བཤད་པར་གསོལ་བ་འདེབས་པའི་དོན་ཏོ། །དེ་དག་རྣམས་ཀྱང་ཇི་ལྟར་གསོལ་བར་
བགྱི། །ཞེས་བྱ་བ་ནི་ཞར་ལ་ཕ་རོལ་ཏུ་ཕྱིན་པའི་སྒོ་ནས་འཇུག་པ་རྣམས་ཀྱང་བག་མེད་པའི་གནས་ནས་བསླངས་ཏེ། མ་ཆགས་པ་ནས་བརྩོན་འགྲུས་ཀྱི་བར་ལ་དགོད་པར་གསོལ་བ་འདེབས་པའི་ཐ་ཚིག་གོ། །ཐུགས་རྗེ་དང་ལྡན་པས་ཞེས་བྱ་བ་ལ་སོགས་པས་ནི། ཡང་གསང་

སྔགས་ཀྱི་ལས་དང་རང་བཞིན་དང་རྒྱུ་རྣམ་པར་དག་པ་དེ་ཅིའི་ཕྱིར་མ་གྲུབ་ཅེས་བཟླས་ཏེ་ཞུས་པའོ། །ཆོ་ག་ཞེས་བྱ་བ་ནི་འཇུག་པ་ལ་སོགས་པ་དང་གསང་སྔགས་དང་ཕྱག་རྒྱའོ། །ཉམས་ཞེས་བྱ་བ་ནི་དེ་དག་ཉིད་ལས་མ་ཚང་བའམ་འཁྲུལ་པའོ། །མཐུ་མ་
མཆིས་ཞེས་བྱ་བ་ནི་ཀྱེ་གསང་སྔགས་དེ་དག་ལ་འགྲུབ་པར་ནུས་པའི་མཐུ་ཡོད་དམ་ཞེས་བྱ་བའི་དོན་ཏོ། །དུས་ཀྱི་རང་བཞིན་ཞེས་བྱ་བ་ནི་དབྱར་དགུན་དང་སྔ་དྲོ་ལ་སོགས་པའི་དུས་དང་མ་སྦྱར་བའི་ཉེས་པའམ་ཞེས་བྱ་བའི་ཐ་ཚིག་གོ། །སྡིག་པས་བསྒྲིབས་ཞེས་བྱ་བ་ནི་
མཚམས་མེད་པ་ལ་སོགས་པ་མི་དགེ་བའི་ལས་བསགས་པས་མངོན་པར་མཐོ་བའི་དཔལ་དང་དངོས་གྲུབ་ཐོབ་པའི་སྐལ་བ་དང་མི་ལྡན་པར་གྱུར་ཏམ་ཞེས་བྱ་བའི་དོན་ཏོ། །གསང་སྔགས་གཞན་དུ་གྱུར་ཏམ་ཞེས་བྱ་བ་ནི་ཡི་གེ་ལྷག་པ་དང་ཆད་པས་དབྱིངས་དང་རྣམ་པར་ཐར་
པའི་སྒོ་སྟོན་པའི་སྒྲ་གཞན་དུ་གྱུར་ཏམ། ཞེས་བྱ་བའི་ཐ་ཚིག་གོ། །མཆོད་ལས་གྱུར་ཞེས་བྱ་བ་ནི་རིགས་ཀྱི་བྱེ་བྲག་གིས་གཞན་གྱི་མཆོད་པ་གཞན་ལ་ཕུལ་བས་འོས་པ་མ་ཡིན་པའམ། །ཡང་ན་མ་ལྕོགས་པའི་ཉེས་པའམ་ཞེས་བྱ་བའི་དོན་ཏོ། །ཐམས་ཅད་མ་ལུས་
བཅོམ་ལྡན་འདས་ཀྱིས་གསུངས། །ཞེས་བྱ་བ་ནི་དཔུང་བཟངས་ཀྱིས་ཡོངས་སུ་ཞུས་པ་རྣམས་མ་ལུས་པར་བཀའ་སྩོལ་ཅིག་ཅེས་མཇུག་བསྡུས་པའོ། །ཡུད་ཙམ་ཞེས་བྱ་བ་ནི་སེ་གོལ་ཐང་ཅིག་སྐད་ཅིག་མ་དྲུག་ཅུ་རྩ་བཞི་ལ་སོགས་ཏེ། དུས་ཀྱི་བྱེ་བྲག་རབ་ཏུ་ཕྲ་བར་འདྲེན་
པ་ལ་ནི་མི་བྱའི། །འཕྲལ་གྱི་སྤྱོད་པའི་སྐད་ཅིག་ཡུད་ཙམ་ཞེས་བྱ་བ་ལ་གདགས་སོ། །དགོངས་ནས་ཞེས་བྱ་བ་ནི་མ་འོངས་པའི་སོ་སོའི་སྐྱེ་བོའི་སློབ་དཔོན་རྣམས་ལ་གདམས་པའི་དབང་དུ་མཛད་དེ་ཞུས་པའི་དོན་མ་འཁྲུལ་པ་དང་ལྡན་པ་དང་འཁྲུལ་པ་གླན་པར་བསྟན་ཏོ། །རྡོ་རྗེ་ཞེས་
བྱ་བ་ནི་བཅོམ་ལྡན་འདས་ཀྱི་ཡེ་ཤེས་ཀྱི་མཚན་མའོ། །མེ་སྟག་ཅེས་བྱ་བ་ནི་འོད་ཟེར་རོ། །འཕྲོ་ཞེས་བྱ་བ་ནི་སེམས་ཅན་གྱི་དོན་རྒྱས་པར་མཛད་པའི་མཚན་ཉིད་དོ། །ཨེ་མའོ་ཞེས་བྱ་བ་ནི་ཡབ་ཐུགས་དགྱེས་ཤིང་དམ་པའི་ཚིག་གོ། །ཟླ་བའི་འོད་ལྟར་ལམ་མེ་བའི། །ཞེས་བྱ་བ་ནི་

ཐུགས་རྗེ་ཆེན་པོས་སེམས་ཅན་ཐམས་ཅད་ལ་དབྲི་བཀོལ་མེད་པར་ཕན་འདོགས་པའི་དཔེ་སྟེ། ཇི་སྐད་དུ། འོད་ཟེར་རབ་ཏུ་གསལ་བ་ཡིས། །གནམ་ནི་རྒོད་པ་ལྟར་བྱེད་པའི། །སྟོན་ཀའི་ཟླ་བ་དེ་དང་ནི། །འཇིག་རྟེན་རྣམས་དང་ཅི་ཡིས་འབྲེལ། །ཞེས་འབྱུང་བ་དང་འདྲ་བར། །
སྙིང་རྗེས་སེམས་ཅན་ཕན་ཕྱིར་ཞེས་བྱ་བའི་དོན་དང་ཡང་། དམ་པ་རིང་ན་གནས་གྱུར་ཀྱང་། །མ་འདྲིས་གཉེན་དུ་མ་འབྲེལ་བའི། །སྐྱེ་བོ་དགའ་བས་རྗེས་འབྲངས་པ། །དེ་ཡི་རྒྱུ་ནི་ཡོན་ཏན་དཔལ། །ཞེས་བཤད་དོ། །ཤིན་ཏུ་དྲི་མ་མེད་པའི་སེམས། །ཞེས་བྱ་བ་ནི་ལྷག་
པར་སེམས་ཅན་རྣམས་ལ་བཅོས་པ་མེད་པར་བརྩེ་ཞེས་བྱ་བའི་ཐ་ཚིག་གོ། །དེ་ཡིས་ཞེས་བྱ་བ་ནི་ཐུགས་རྗེ་ལྷག་པར་ཆེ་བ་དེའི་ཕན་ཡོན་གྱིས་ཞེས་བྱ་བའི་དོན་ཏོ། །བདེ་གཤེགས་སྲས་ནང་ཞེས་བྱ་བ་ནི་ཐུགས་ལས་སྐྱེས་པའི་བྱང་ཆུབ་སེམས་དཔའ་སར་ཆུད་པ་རྣམས་ཀྱི་ནང་ངོ་། །
ཕ་རོལ་ཕྱིན་པར་གྱུར་ཞེས་བྱ་བ་ནི་སངས་རྒྱས་ཀྱི་ཚོགས་མྱུར་དུ་རྫོགས་པར་འགྱུར་རོ་ཞེས་བྱ་བའི་ཐ་ཚིག་གོ། །ཐུགས་རྗེ་དེ་ལྟར་སྐྱེས་པ་ཙམ་གྱིས་མཐར་ཐུག་པ་མ་ཡིན་གྱིས་ཀྱང་། །འཇིག་རྟེན་ན་ས་བོན་ཤིན་ཏུ་བཟང་ཞིང་སྐྱོན་མེད་པ་ལ་དེའི་འབྲས་བུ་བཟང་པོ་ཞེས་འདོགས་པ་
བཞིན་ཏེ་ཉེས་པ་མེད་དོ། །རང་གི་བདེ་མ་ཆགས་ཞེས་བྱ་བ་ནི་བྱང་ཆུབ་སེམས་དཔའ་རྣམས་བདག་གི་འདུ་ཤེས་དང་བྲལ་བས་བདག་ལ་ཕངས་པར་སེམས་པ་ཡང་མེད་ན་ཡོ་བྱད་ཐམས་ཅད་ལ་ཕངས་པར་སེམས་པ་ལྟ་ག་ལ་ཡོད་དེ་འཁོར་ལོས་སྒྱུར་བའི་རྒྱལ་སྲིད་ལ་སོགས་པ་
ཡང་རྩྭ་དང་འདྲ་བར་འདོར་བའི་ཕྱིར་རོ། །རང་གི་སྡུག་བསྔལ་རྣམས་ཀྱིས་མི་བརྗེད་ཀྱང་། །ཞེས་བྱ་བ་ཡང་བདག་ཏུ་འཛིན་པ་དང་བྲལ་བའི་དབང་གིས་འཆི་བ་ལ་སོགས་པའི་སྡུག་བསྔལ་གྱིས་མི་འཇིགས་ཞེས་བྱ་བའི་དོན་ཏོ། །གཞན་གྱི་སྡུག་བསྔལ་རྣམས་ཀྱིས་སྡུག་བསྔལ་ཏེ། །
ཞེས་བྱ་བ་ནི་སྙིང་རྗེ་ཆེན་པོ་སྔོན་དུ་འགྲོ་བའི་ལྷག་པའི་བསམ་པ་མ་ཉམས་པ་དང་མི་དམའ་བས་སེམས་ཅན་ཐམས་ཅད་ཀྱི་དགེ་བའི་རྩ་བ་བསྐྱེད་པའི་ཕྱིར་ཤིན་ཏུ་བརྩོན་པར་བྱེད་པའི་ཐ་ཚིག་གོ། །དེ་དག་བདེ་བས་དགའ་དང་ལྡན་པར་གྱུར། །ཞེས་བྱ་བ་ནི་བྱམས་པ་ཆེན་པོ་དང་ལྡན་པ་རྣམས་

ཀྱི་ཆོས་ཉིད་དོ། །སྐྱེ་བོ་དམ་པས་གཞན་གྱི་བདེ་བསྒྲུབས་སམ། །སྡུག་བསྔལ་བཟློག་ན་དེ་དང་མཚུངས་པར་ནི། །བདེ་དང་སྡུག་བསྔལ་རབ་ཏུ་མྱོང་བར་འགྱུར། །རང་གི་བདེ་བ་གྲུབ་ཀྱང་དེ་ལྟ་མིན། །ཞེས་བཤད་དོ། །རྩེ་གཅིག་ཡིད་བྱོས་ཞེས་བྱ་བ་ནི་བྱང་ཆུབ་
སེམས་དཔའི་རྒྱུད་ལ་མ་ཞི་བར་མི་འབྱུང་གིས་ཀྱང་མ་འོངས་པའི་སྐྱེ་བོ་ཆོས་ཉན་པའི་མི་རྣམས་ལ་གདམས་པའི་དབང་དུ་མཛད་དེ་གསུངས་སོ། །དེ་ཡི་བརྟུལ་ཞུགས་ཞེས་བྱ་བ་ནི་འཇུག་པ་ལ་སོགས་པ་རྣམ་པ་བཞིའོ། །དེ་ཡིས་ཞེས་བྱ་བ་ནི་སྒྲུབ་པ་པོའི་སྐྱེས་བུས་སོ། །བདེ་
བར་གཤེགས་པ་ཞེས་བྱ་བ་ནི་སངས་རྒྱས་ཏེ། དེ་ནི་བདེ་བར་གྱུར་ཅིང་མཐོ་རིས་ཀྱི་བདེ་བ་དང་ལྡན་པ་ལ་གནོད་པ་མི་མངའ་བའི་དོན་ཏོ། །དད་པ་སྐྱེས་ནས་ཞེས་བྱ་བ་ནི་དེ་ལ་དང་བ་དང་འདུན་པ་བསྐྱེད་པར་བྱ་བའི་ཐ་ཚིག་གོ། །དེ་བཞིན་དུ་ཞེས་བྱ་བ་ནི་དང་བ་དང་འདུན་པ་ལྟར་
རོ། །བྱང་ཆུབ་སེམས་ཀྱང་བསྐྱེད་ཅེས་བྱ་བ་ནི་འདིར་སྨོས་པ་དང་སྦྱར་རོ། །སེར་སྣ་ཞེས་བྱ་བ་ནི་འདོད་ཆགས་ཀྱི་ཆར་གཏོགས་པའི་སེམས་ཀྱིས་ཡོ་བྱད་རྣམས་ཀུན་དུ་འཛིན་པའོ། །དྲེགས་དང་རྒྱགས་པ་ཞེས་བྱ་བ་ནི་རྣམ་པ་གསུམ་སྟེ། རིགས་དང་སྟོབས་དང་གཟུགས་
དང་ཡིད་གཞུངས་པ་དང་བློ་དང་ལོངས་སྤྱོད་དང་། དབང་ཕྱུག་ལ་སོགས་པས་སོ། །རྣམ་སྤངས་ཏེ་ཞེས་བྱ་བ་ནི་ཐམས་ཅད་དུ་བསལ་ཏེའོ། །དཀོན་མཆོག་གསུམ་ལ་དད་པ་བརྟན་པར་བྱ། །ཞེས་བྱ་བ་ནི་སངས་རྒྱས་ལ་བལྟ་བ་དང་ཆོས་ཉན་པ་དང་། དགེ་འདུན་ལ་རིམ་
གྲོ་བྱ་བའི་དོན་ཏོ། །རྡོ་རྗེའི་རིགས་ཞེས་བརྗོད་པ་རྒྱ་ཆེན་དང་། །ཞེས་བྱ་བ་ནི་འདིར་རྡོ་རྗེའི་རིགས་ཀྱི་ཤས་ཆེར་གསུངས་པའི་ལྷའི་བྱེ་བྲག་མང་པོ་རྣམས་སོ། །ང་ལ་ཡང་ནི་དད་ཅིང་དགའ་བར་བྱ། །ཞེས་བྱ་བ་ནི་ཕྱག་ན་རྡོ་རྗེ་ལ་མོས་པར་བྱ་བའི་དོན་ཏོ། །ཚིག་རྩུབ་ཅེས་
བྱ་བ་ནི་ཞེར་འདེབས་ཤིང་བརླང་བའོ། །ཕྲ་མ་ཞེས་བྱ་བ་ནི་དབྱེན་གྱི་ཚིག་གོ། །འཁྱལ་པ་སྨྲ་ཞེས་བྱ་བ་ནི་ཚིག་གི་རྣམ་པར་གཡེངས་པའོ། །གཞན་གྱི་བུད་མེད་བགྲོད་ཅེས་བྱ་བ་ནི་རུས་དང་བདག་པོ་དང་ཆོས་ཀྱིས་བསྲུངས་པ་རྣམས་ལ་གཉིས་ཀྱི་དབང་པོ་སྤྲོད་པའམ།

ཡན་ལག་མ་ཡིན་པར་སྤྱོད་པ་དོན་གཉེར་བའོ། །བརྫུན་ཞེས་བྱ་བ་ནི་སླུ་བའི་ཚིག་གོ། །རྐུན་པོ་ཞེས་བྱ་བ་ནི་རྐུ་སེམས་ཉེ་བར་བཞག་སྟེ་མ་བྱིན་པར་ལེན་པའོ། །གཞན་གྱི་སྲོག་གཅོད་གནོད་བྱེད་ཅེས་བྱ་བ་ནི། ཆེད་དུ་བསམས་ཏེ་ལུས་ཀྱིས་མཐོ་བཙམས་པ་ཆེན་
པོ་བྱེད་པའོ། །ཆང་དང་བྱེད་པ་ནི་རང་བཞིན་གྱིས་ཁ་ན་མ་ཐོ་བ་མ་ཡིན་གྱིས་ཀྱང་ཉེས་པ་ཐམས་ཅད་འབྱུང་བའི་རྩ་བར་འགྱུར་བའི་ཕྱིར་རོ། །རྟག་ཏུ་སྤང་བར་ཞེས་བྱ་བ་ནི་ཐམས་ཅད་ལ་སྦྱར་བའི་དོན་ཏོ། །རྨོངས་པ་གང་གིས་ཞེས་བྱ་བ་ནི་མི་བླུན་པོ་འགའོ། །བསོད་ནམས་
བསགས་བྱས་ཀྱང་ཞེས་བྱ་བ་ནི། ཡོངས་སུ་མ་དག་པ་ལ་སོགས་པའི་སྦྱིན་པ་བྱས་པའོ། །ཐམས་ཅད་ལོག་པར་ལྟ་བས་བཅོམ་པས་ན། །ཞེས་བྱ་བ་ནི་རྒྱུ་དང་འབྲས་བུ་དང་བྱེད་པ་ལ་སྐུར་པ་འདེབས་པ་དང་། །ཚུལ་ཁྲིམས་ངན་པའི་ལྟ་བ་དང་མ་བྲལ་བའི་ཕྱིར་དགེ་བའི་
ཕྱོགས་ཐམས་ཅད་ལ་རྒྱབ་ཀྱིས་ཕྱོགས་པར་གྱུར་ཏོ། །དེ་ཡི་རྣམ་སྨིན་མི་འདོད་འབྲས་བུར་འགྱུར། །ཞེས་བྱ་བ་ནི་ཡིད་དུ་མི་འོང་བ་སྟེ་ངན་སོང་དུ་ལྷུང་བའི་དོན་ཏོ། །འོ་ན། བསྐལ་པ་དག་ནི་བརྒྱ་རུ་ཡང་། །ལས་རྣམས་ཆུད་ཟར་མི་འགྱུར་ཏེ། །ཞེས་བཤད་པ་དང་སྦྱར་
ན། ལོག་པར་ལྟ་བའི་སྡིག་པས་མི་འདོད་པ་མྱོང་ཡང་བསོད་ནམས་བྱས་པས་འདོད་པའི་འབྲས་བུ་ཅིའི་ཕྱིར་མི་འགྱུར་ཞེ་ན། ལོག་པར་ལྟ་བའི་མེས་བསྲེགས་པས་དགེ་བ་མི་སྐྱེ་ཞེས་བྱ་བའི་ཐ་ཚིག་གོ། །དཔེར་བརྗོད་པ་ནི་ས་བོན་ཚིག་པའོ། །འདིར་ངག་རྩུབ་པོ་དང་སྲོག་
གཅོད་པའི་རྒྱུ་ནི་གནོད་སེམས་ཡིན་ལ། མ་བྱིན་པར་ལེན་པའི་རྒྱུ་ནི་བརྣབ་སེམས་ཡིན་པ་དེ་གཉིས་གུད་དུ་མ་ཕྱེ་སྟེ་འབྲས་བུ་ལ་བསྡུས་སོ། །གོ་རིམས་འཁྲུགས་པ་ནི་ཚིགས་སུ་བཅད་པ་སྦྱར་བ་ལ་བདེ་བའི་ཕྱིར་རོ། །ལོག་པར་ལྟ་བ་རྣམ་སྤངས་ལ། །ཞེས་བྱ་བ་ལ་
སོགས་པས་ནི་རྗེས་སུ་བསྟན་པ་བརྗོད་པའོ། །ལྷ་ནི་ས་དང་རི་ལ་གནས་པ་དང་ལྷ་ཡུལ་པའོ། །ལྷ་མ་ཡིན་ཞེས་བྱ་བ་ནི་སྐབས་འདིར་ལྷ་མ་གཏོགས་པའི་གདོན་ཐམས་ཅད་ལ་རིག་པར་བྱའོ། །ཤ་ཁྲག་ཟ་འཐུང་ཞེས་བྱ་བ་ནི་དེ་དག་གི་ཟས་ཐ་དད་པར་སྨོས་པའོ། །མཚན་

མོ་རྒྱུ་བ་ཞེས་བསྟན་པ་ནི་མི་མ་ཡིན་པའི་གདོན་རྣམས་དེའི་དུས་སུ་སྤྱོད་པའི་ཕྱིར་རོ། །གནོད་པ་བྱེད་ཅིང་རྒྱུ་ཞེས་བྱ་བ་ནི་མི་རྣམས་ལ་གཙེ་བའི་བསམ་པ་ཁོ་ནས་བགེགས་བྱེད་པར་ངེས་པ་ཞེས་བྱ་བའི་ཐ་ཚིག་གོ། །བཟླས་བརྗོད་བརྩོན་པའི་སེམས་ནི་གཡེང་
བར་བྱེད། །ཅེས་བྱ་བ་ནི་ཁྱད་པར་དུ་བགེགས་བྱེད་པར་བསྟན་ཏོ། །དེ་དག་རྣམས་ཀྱི་གཉེན་པོར་གྱུར་པའི་ཕྱིར། །ཞེས་བྱ་བ་ལ་སོགས་པས་ནི་བགེགས་བྱེད་པའི་རྒྱུར་བསྟན་ཏོ། །གནོད་བྱེད་དེ་དག་ཅེས་བྱ་བ་ནི་བགེགས་རྣམས་སོ། །བདག་ཉིད་ཅེས་བྱ་བ་ནི་སྒྲུབ་པ་པོའི་
སྐྱེས་བུའོ། །འབྱོར་བར་བྱ་ཕྱིར་ཞེས་བྱ་བ་ནི་དངོས་གྲུབ་ཀྱི་དཔལ་མངོན་དུ་ཕྱོགས་པར་བྱ་བའི་ཐ་ཚིག་གོ། །ངས་གསུངས་པའི་ཞེས་བྱ་བ་ནི་རྡོ་རྗེའི་རིགས་ཤས་ཆེར་གསུངས་པའི་དོན་ཏོ། །དཀྱིལ་འཁོར་ལྷ་དང་ལྷ་མིན་གནས་གྱུར་པ། །དམ་ཚིག་ཇི་བཞིན་ཞེས་བྱ་བ་ནི་དམ་
ཚིག་གི་དཀྱིལ་འཁོར་ཚུལ་བཞིན་དུ་བྲིས་པ་སྟེ། །དེར་མི་མ་ཡིན་པ་ཐམས་ཅད་ཀྱིས་དམ་ཚིག་ཕུལ་བས་རྒྱ་ཆེ་བར་ཁོང་དུ་ཆུད་པར་བྱའོ། །བསོད་ནམས་དོན་དུ་བལྟ་ཞེས་བྱ་བ་ནི་དེར་ཞུགས་ན་བསོད་ནམས་འཕེལ་ཞེས་བྱ་བའི་ཐ་ཚིག་གོ། །སྣ་ཚོགས་པའི་གདོན་ཞེས་
བྱ་བ་ནི་གདོན་གྱི་རིགས་སྟོང་ཕྲག་བརྒྱད་ཅུ་རྩ་བཞི་དག་ཏུ་འཕེལ་བའོ། །རྣམ་པ་སྣ་ཚོགས་ལས་བྱེད་པའི། །དཀྱིལ་འཁོར་ཞེས་བྱ་བ་ནི་གདོན་དེ་དག་གཞོམ་པའི་གཉེན་པོར། དཀྱིལ་འཁོར་ཐ་དད་པར་བཤད་པ་དག་སྟེ། དེ་དག་ནི་གདོན་གྱི་རིགས་རེ་རེའི་ལས་ཉི་ཚེ་བྱེད་
པས་རྒྱ་ཆུང་བར་བསྟན་ཏོ། །གནོད་བྱེད་གཞོམ་པའི་ཕྱིར་ཞེས་བྱ་བ་ནི་ས་འཛིན་ཏེ་དངོས་སུ་གདོན་ཐམས་ཅད་འཇོམས་པར་གོ་བར་བྱའོ། །གང་ཡང་རིག་པ་མཆོག་ཏུ་གསུངས་པ་དང་། །ཞེས་བྱ་བ་ནི་རྒྱུད་དེར་གདོན་སྣ་ཚོགས་ཀྱི་གཉེན་པོར་དཀྱིལ་འཁོར་གང་དག་གང་
བཤད་པའོ། །ཁྲོ་བོའི་དཀྱིལ་འཁོར་དུ་ཡང་འཇུག་པར་བྱ། །ཞེས་བྱ་བ་ནི་དེ་ཉིད་ལ་སོགས་པ་བརྒྱད་ཀྱི་དཀྱིལ་འཁོར་འབྱུང་བའོ། །དེར་ནི་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོར་ཞེས་བྱ་བའི་དོན་ཏོ། །དམ་ཚིག་སྣ་ཚོགས་ངས་བཤད་པ། །ཞེས་བྱ་བ་ནི་ཕྱག་ན་རྡོ་རྗེ་དང་

དབང་ཕྱུག་ཆེན་པོའི་དམ་ཚིག་བཤད་པའི་དཀྱིལ་འཁོར་གྱི་རྒྱལ་པོ་དེར་ཐམས་ཅད་ཀྱི་དམ་ཚིག་འདུས་ཞེས་བྱ་བའི་ཐ་ཚིག་གོ། །སྡིག་པ་བསལ་ཕྱིར་རྒྱུན་དུ་བལྟ་བར་བྱ། །ཞེས་བྱ་བ་ནི་དཀྱིལ་འཁོར་གྱི་རྒྱལ་པོ་དེར་ཞུགས་ན་སྡིག་པ་ཐམས་ཅད་འབྱང་ཞེས་བྱ་བའི་དོན་ཏོ། །རྡོ་རྗེའི་
རིགས་གཙོ་ཞེས་བྱ་བ་ནི་ཡུམ་མཱ་མ་ཀཱིའོ། །ཕོ་ཉ་མོའི་ཚོགས་དང་རིག་པ་མང་པོས་བསྟན་པའི་ལྷ་མོ་ཞེས་བྱ་བ་ཡང་དེ་ཉིད་དོ། །ཐམས་ཅད་ཀྱིས་མཆོད་ཅིང་བསྙེན་བཀུར་བྱ་བའི་གནས་ཡིན་པར་བསྟན་ཏོ། །ཟློས་པ་ཞེས་བྱ་བ་ནི་ཡུམ་གྱི་གསང་སྔགས་ཟློས་པའི་རིག་སྔགས་འཆང་
པའོ། །མཐོང་ནས་ཞེས་བྱ་བ་ནི་བགེགས་ཀྱིས་མཐོང་ཞེས་བྱ་བའི་དོན་ཏོ། །བགེགས་རྣམས་ཕུང་བ་དང་། རྔམ་པ་འདོན་ཅིང་ཤིན་ཏུ་སྐྲག་པར་འགྱུར། །ཞེས་བྱ་བ་ནི་ཡུམ་གྱི་གསང་སྔགས་མཐུ་རླབས་ཆེ་བར་བསྟན་པའི་ཐ་ཚིག་གོ། །ཇི་ལྟ་ཇི་ལྟར་དཀྱིལ་འཁོར་མཐོང་བ་དང་། །
ཞེས་བྱ་བ་ནི་དམ་ཚིག་གི་དཀྱིལ་འཁོར་དུ་ཞུགས་པའོ། །དེ་ལྟ་དེ་ལྟར་རྡོ་རྗེའི་རིགས་བསྟན་དང་། །ཞེས་བྱ་བ་ནི་དཀྱིལ་འཁོར་དུ་ཞུགས་ནས་ལྷར་མནོས་ཏེ་གསང་སྔགས་རྗེས་སུ་དྲན་པའོ། །རིག་པའི་ཚོགས་ལ་བརྟེན་པའི་བསོད་ནམས་ཀྱིས། །ཞེས་བྱ་བ་ནི་རིགས་གཞན་གྱི་
རིག་སྔགས་ཀྱི་ཚོགས་ལ་བརྟེན་པའི་མཐུ་ཡང་དེ་བཞིན་དུ་ཆེ་བར་དགོངས་པའོ། །དེ་ཡི་ལུས་ལ་བྱིན་རླབས་མ་ལུས་འཇུག །ཅེས་བྱ་བ་ནི་དཀྱིལ་འཁོར་དུ་ཞུགས་པའི་དུས་ན་མིའི་སྤྱོད་ཡུལ་དུ་མ་གྱུར་གྱིས་ཀྱང་། ཡེ་ཤེས་ཀྱི་རང་བཞིན་རྡོ་རྗེ་ལ་སོགས་པའི་ཕྱག་རྒྱ་རྣམས་
ལས་གསང་སྔགས་ཀྱི་བྱིན་གྱི་རླབས་ཀྱིས་འོད་ཟེར་བྱུང་སྟེ། དེ་དག་སྒྲུབ་པ་པོའི་ལུས་ལ་འཇུག །ཅེས་བྱ་བའི་ཐ་ཚིག་གོ །མི་ཚུགས་རྡོ་རྗེའི་བདག་ཉིད་ཅེས་བྱ་བ་ལ་སོགས་པས་ནི་དེའི་ཕན་ཡོན་བསྟན་ཏོ། །ང་ཡི་དམ་ཚིག་མཐོང་བའི་བུ་དག་གིས། །ཞེས་བྱ་བ་ལ་སོགས་
པས་ནི་དཀྱིལ་འཁོར་དུ་ཞུགས་པའི་ཕན་ཡོན་གྱི་རྣམ་གྲངས་གཞན་བསྟན་པའོ། །རིག་སྔགས་མ་མཐོང་བ་ནི་ལྷའི་རང་བཞིན་མི་ཤེས་པའོ། །དམ་ཚིག་མ་མཐོང་ཞེས་བྱ་བ་ནི་དམ་ཚིག་གི་དཀྱིལ་འཁོར་དུ་མ་ཞུགས་ཤིང་དམ་ཚིག་མི་སྲུང་བའོ། །སྙིང་རྗེ་མེད་ཅེས་བྱ་བ་ནི་རང་བཞིན་

རྩུབ་པའོ། །བྱང་ཆུབ་ཀྱི་སེམས་མ་བསྐྱེད་ཅེས་བྱ་བ་ནི་སྨོན་པ་ཙམ་ཡང་མེད་པའོ། །སངས་རྒྱས་ལ་མ་དད་ཅེས་བྱ་བ་ནི་ཡིད་མ་ཆེས་པས་བརྙས་ཤིང་མ་དད་པའི་དོན་ཏོ། །ལྷ་གཞན་ལ་བརྟེན་ཞེས་བྱ་བ་ནི་འཇིག་རྟེན་པའི་ལྷ་ལ་བརྟེན་ཅིང་མུ་སྟེགས་པའི་ཕྱོགས་
འཛིན་པའོ། །ང་ཡི་གསང་སྔགས་བཟླས་ན་ཕུང་བར་འགྱུར། །ཞེས་བྱ་བ་ནི་འཆི་བ་དང་འཇིག་རྟེན་ཕ་རོལ་དུ་ཡང་ངན་སོང་དུ་སྐྱེ་བར་འགྱུར་རོ། །བསམ་པ་ཞན་ཅིང་ཞེས་བྱ་བ་ནི་སེམས་ཞུམ་པའོ། །ཉམས་ཀྱིས་མི་ལྕོགས་པས་ཞེས་བྱ་བ་ནི་ཡོ་བྱད་དང་མི་ལྡན་ཞེས་བྱ་བའི་དོན་ཏོ། །
དཀྱིལ་འཁོར་ཀུན་ཞེས་བྱ་བ་ནི་གོང་དུ་སྨོས་པ་ཐམས་ཅད་དོ། །བལྟ་བར་མི་ནུས་ནའང་ཞེས་བྱ་བ་ནི་ཡོ་བྱད་མ་འབྱོར་ཏེ་སེམས་ཞུམ་ནས། དཀྱིལ་འཁོར་འབྲི་ཞིང་འཇུག་མ་ནུས་ན་ཡང་། ཞེས་བྱ་བའི་དོན་ཏོ། །གཅིག་ཙམ་ཞིག་ཀྱང་དད་པས་མཐོང་གྱུར་ན། །ཞེས་བྱ་བ་ནི་ཡོ་
བྱད་མེད་པའི་སྒྲུབ་པ་པོ་དབུལ་པོས་ཀྱང་དཀྱིལ་འཁོར་དེ་དག་རྣམས་ལས་ཉམས་ཀྱིས་གང་ལྕོགས་པ་གཅིག་ནི་ངེས་པར་འདྲི་དགོས་པར་གསུངས་ཏེ། དོན་དེ་ཉིད་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས་ཀྱང་ཇི་སྐད་དུ། ཡོ་བྱད་ཆུང་ངུ་དག་གིས་ཀྱང་། །བཟླས་བརྗོད་བྱེད་པས་
དཀྱིལ་འཁོར་བྲི། །ཞེས་གསུངས་པའི་ཕྱིར་རོ། །གནོད་སྦྱིན་གྱི་ཚོགས་ཞེས་བྱ་བ་ནི་ས་དང་རི་དང་རི་རབ་ཀྱི་ངོས་ལ་གནས་པའོ། །མཚན་མོ་རྒྱུ་བ་ཞེས་བྱ་བ་ནི་མི་མ་ཡིན་པ་ཐམས་ཅད་དོ། །ས་བླའི་གདོན་ཞེས་བྱ་བ་ནི་བར་སྣང་བ་ལས་ཁྲུ་གང་གིས་སྤགས་པ་ཡན་ཆད་ན་གནོད་སྦྱིན་
གྱི་གྲོང་གནས་པ་རྣམས་སོ། །ཀླུའི་བདག་པོ་ཞེས་བྱ་བ་ནི་ཀླུའི་རྒྱལ་པོའོ། །ལྷ་ཞེས་བྱ་བ་ནི་ས་དང་རི་ལ་གནས་པ་དང་ལྷ་ཡུལ་པའོ། །སོགས་པ་ཞེས་བྱ་བས་ནི་འདིར་མ་སྨོས་པའི་གདོན་ཐམས་ཅད་བསྡུས་པར་རིག་པར་བྱའོ། །བགེགས་ཞེས་བྱ་བ་ནི་རྣམ་པར་འཇིགས་པ་ལ་
སོགས་པའོ། །ལོག་འདྲེན་ཞེས་བྱ་བ་ནི། དེ་དག་ཉིད་གནོད་པར་བྱེད་པའི་ཁྱད་པར་གྱིས་མིང་གཞན་ནོ། །བརྟུལ་ཞུགས་གནས་པ་ཞེས་བྱ་བ་ནི་རིག་སྔགས་འཆང་འཇུག་པ་ལ་སོགས་པའི་དུས་སུ་ཚུལ་ཁྲིམས་རྣམ་པ་གསུམ་པོ་དག་ལ་གནས་པའོ། །གླགས་མི་ལྟ་ཞེས་བྱ་

བ་ནི་ཚུལ་ཁྲིམས་དེ་དག་ལ་གནས་པའི་ཕན་ཡོན་གྱིས་གོང་དུ་སྨོས་པའི་གདོན་ཐམས་ཅད་འཛེམ་ནས་རྒོལ་མི་ཕོད་པར་བསྟན་ཏོ། །ཚུལ་ཁྲིམས་ལ་བརྟེན་ནས་ཞེས་བྱ་བ་ནི་ཚུལ་ཁྲིམས་ནི་དགེ་བའི་ཕྱོགས་ཐམས་ཅད་ཀྱི་རྟེན་ཡིན་པར་བརྗོད་པའོ། །ཆོས་དཀར་པོ་ཞེས་བྱ་བ་
ནི་མོས་པ་སྤྱོད་པའི་ས་ལ་སྣང་བ་ཐོབ་པའི་དུས་སུ་དངོས་པོར་རྣམ་པར་བྱང་བའི་ཕྱོགས་སྐྱེས་པ་གང་ཡིན་པའོ། །སྙིང་རྗེའི་ཆུས་བརླན་པས་ནི་རྣམ་པར་སྐྱེ། །ཞེས་བྱ་བ་ནི་འདིར་སྙིང་རྗེའི་རྩ་བའི་རླན་གྱིས་ཚུལ་ཁྲིམས་ཀྱི་ས་གཞི་ལ་བརྟེན་པའི་བྱང་ཆུབ་ཀྱི་སེམས་ཀྱི་མྱུ་གུ་བསྐྱེད་ཅེས་བྱ་
བར་སྦྱར་རོ། །རྒྱལ་བ་ངས་གསུངས་ཞེས་བྱ་བ་ནི་སངས་རྒྱས་ཀྱིས་ཤིན་ཏུ་ལེགས་པར་ཕྱེ་སྟེ་བསྟན་ཞེས་བྱ་བའི་དོན་ཏོ། །སོ་སོར་ཐར་པའི་བསླབ་པ་ཞེས་བྱ་བས་ནི་མྱ་ངན་ལས་འདས་པའི་གྲོང་ཁྱེར་དུ་ཕྱིན་པར་བྱེད་ཅེས་བྱ་བའི་ཐ་ཚིག་གོ། །ཚུལ་ཁྲིམས་རྣམ་པར་དག་པ་ཞེས་
བྱ་བ་ནི་ཟག་པ་མེད་པའི་རྒྱུ་ཡིན་པའི་ཕྱིར་རོ། །འདུལ་བ་ཞེས་བྱ་བ་ནི་གདུལ་བྱ་རྣམས་སྲབ་ཀྱིས་ཁ་ལོ་སྒྱུར་བ་དང་འདྲ་བའི་དོན་ཏོ། །མ་ལུས་ཞེས་བྱ་བ་ནི་རབ་ཏུ་བྱུང་བ་ལ་བསླབ་བའི་གཞི་ཐམས་ཅད་དོ། །སྔགས་པ་ཁྱིམ་པ་རྣམས་ལ་ནི་གཞན་ཏེ། རྟགས་ཞེས་བྱ་བ་སྐྲ་དང་ཁ་
སྤུ་བྲེག་པ་དང་། ངུར་སྨྲིག་གི་སྣམ་སྦྱར་བཅང་བ་ལ་སོགས་པ་དང་། ཆོ་ག་སྤང་ཞེས་བྱ་བ་ཡང་ལྷུང་བཟེད་བདུག་པ་ལ་སོགས་པ་བྱ་མི་དགོས་པ་བསྟན་ཏོ། །ལྷག་མ་རྣམས་ནི་ཉམས་སུ་བླང་བར་བྱ། །ཞེས་བྱ་བ་ནི་བསླབ་པའི་གཞི་བསྙེན་གནས་དང་རིག་སྔགས་ཀྱི་བརྟུལ་ཞུགས་
ལ་གནས་པས་སྨད་འཚོང་དང་གདོལ་པ་དང་ཤན་པ་དང་རྒྱལ་པོའི་ཕོ་བྲང་དུ་མི་འགྲོ་བའི་སྤྱོད་ཡུལ་ཕུན་སུམ་ཚོགས་པ་ལ་ནི་རབ་ཏུ་བྱུང་བ་བཞིན་དུ་བསླབ་པར་བྱ་བའི་དོན་ཏོ། །དེ་ལྟར་སྡིག་པའི་ཆོས་ལས་རྣམ་གྲོལ་ནས། །ཞེས་བྱ་བ་ནི་སྡོམ་པ་ལ་གནས་པའི་ཕྱིར་རོ། །ལེགས་
པར་གསུངས་པའི་ཕྱིར་ཆོས་ཞེས་བྱ་བ་ནི་གཞན་ཕྱི་རོལ་པ་དང་མི་འདྲ་བར་བཅོམ་ལྡན་འདས་ཀྱིས་ལེགས་པར་བསྟན་ཞིང་གོ་བར་བྱས་ཏེ་རིག་པ་དང་ལྡན་ཞེས་བྱ་བའི་ཐ་ཚིག་གོ། །དག་ཅིང་ཞེས་བྱ་བ་ནི་ཉོན་མོངས་པ་དང་མ་འདྲེས་པའི་དོན་ཏོ། །གྲོལ་བ་ཞེས་བྱ་བ་ནི་ཁམས་གསུམ་

གྱི་འཆིང་བ་གཅོད་པའི་ཐ་ཚིག་གོ། །ཟློས་པས་སྐྱོ་ན་མདོ་སྡེ་བཀླག་པར་བྱ། །ཞེས་བྱ་བ་ནི་བཟླས་བརྗོད་བཏང་བའི་དུས་ན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་གདོན་པར་བསྟན་པའི་དོན་ཏོ། །གཙང་ཞིང་ཞེས་བྱ་བ་ནི་ས་གཞི་ལ་སོགས་པ་སྐྱོན་མེད་
པའོ། །དབེན་པའི་ས་ཕྱོགས་ཞེས་བྱ་བ་ནི་རྟོག་ལམ་དུ་མ་བབ་པའོ། །འཇིམ་པའམ་ནི་བྱེ་མ་ཞེས་བྱ་བ་ནི་ཡུལ་རྣམས་ཀྱིས་གང་མོད་པ་ལས་བྱ་བའི་དོན་ཏོ། །ལས་བྱས་པའི་བདེ་གཤེགས་མཆོད་རྟེན་ཞེས་བྱ་བ་ནི་མཆོད་རྟེན་གྱི་ཆ་དབྱེ་བ་ལས་བདེ་བར་གཤེགས་པའི་ཆེ་
བའི་ཡོན་ཏན་དེ་ལ། རྫོགས་པར་གཞག་པས་མཆོད་པའི་འོས་ཡིན་པར་བསྟན་ཏོ། །རྟེན་འབྲེལ་སྙིང་པོ་ཅན་ཞེས་བྱ་བ་ནི་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པའི་རྒྱུད་ཆེན་པོ་ལས། ཇི་སྐད་དུ། ཆོས་གང་རྒྱུས་བྱུང་དེ་དག་གི། །རྒྱུ་དང་དེ་འགོག་གང་
ཡིན་པ། དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །ཞེས་གསུངས་པ་འདི་དང་ལྡན་པར་བསྟན་ཏོ། །སྡིག་པ་སྦྱང་བའི་ཕྱིར་ནི་རྟག་ཏུ་གདབ། །ཅེས་བྱ་བ་ནི་ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བའི་གཟུངས་
ལས། ཇི་སྐད་དུ། གངྒཱའི་ཀླུང་གི་བྱེ་མ་སྙེད་དེ་བཞིན་གཤེགས་པ་རྣམས་ལ་དགེ་བའི་རྩ་བ་བསྐྱེད་པར་འགྱུར་རོ་ཞེས་བྱ་བ་ལ་སོགས་པའི་ཡོན་ཏན་མང་པོར་འགྱུར་བའི་ཕྱིར་རོ། །རིང་བསྲེལ་ཅན་གྱིས་ཞེས་བྱ་བ་ནི་བྱང་ཆུབ་ཀྱི་སྙིང་པོའི་རྒྱན་གྱི་གཟུངས་ཀྱི་ཆོ་ག་ཞིབ་མོ་ལས།
ཆོས་ཀྱི་སྐུའི་རིང་བསྲེལ་དང་། དེ་བཞིན་གཤེགས་པའི་སྐུ་གདུང་གི་རིང་བསྲེལ་དང་། སྐུ་བལ་གྱི་རིང་བསྲེལ་དང་། ཆོས་ཀྱི་རིང་བསྲེལ་དང་། ཡུངས་འབྲུ་ཙམ་གྱི་རིང་བསྲེལ་ཞེས་གསུངས་ཏེ། །འདི་རྣམས་གང་དང་ལྡན་ན་ཡང་རིང་བསྲེལ་ཅན་དུ་གོ་བར་བྱའོ། །སྐུ་གཟུགས་
ཞེས་བྱ་བའི་མཚན་ཉིད་ནི་འོག་མས་འཆད་དོ། །མཆོད་རྟེན་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས་བྱ་གག་གི་སྒོ་ང་འདྲ་བར་འདུག་ན་དངོས་གྲུབ་སྦྱིན་པར་འགྱུར་རོ་ཞེས་གསུངས་ཏེ། དེ་དང་སྦྱར་རོ། །བསྟོད་ཅིང་ཞེས་བྱ་བ་ལ་སོགས་པས་ནི་ལུས་དང་ངག་དང་ཡིད་ཀྱི་

མཆོད་པ་དང་མཐུན་མཐུན་དུ་སྦྱར་བའི་དོན་ཏོ། །རབ་ཏུ་གྲུབ་པར་བྱེད་བའི་རྒྱུད་ཆེན་པོ་ལས། ཡིད་ཀྱི་མཆོད་པ་ལྷག་པར་ནན་ཏན་དུ་བྱ་དགོས་པར་གསུངས་ཏེ། ཇི་སྐད་དུ། ཡིད་ཀྱི་མཆོད་པ་ཁྱད་པར་ཅན། །ཡང་དག་ཉིད་དུ་བརྩམ་པར་བྱ། །ཆོས་ཀྱི་ཐོག་མར་ཡིད་
འགྲོ་ཞེས། །ཐུབ་པ་ཆེན་པོས་བཀའ་སྩལ་ཏོ། །ཞེས་གསུངས་པའི་ཕྱིར་རོ། །ནམ་ཡང་འཁོར་ལོ་གཅིག་པའི་ཤིང་རྟ་ནི། །རྟ་དང་ལྡན་ཡང་ཞེས་བྱ་བ་ལ་སོགས་པས་ནི་སྒྲུབ་པ་པོས་གང་དུ་སྨོས་པའི་ཚུལ་ལས་མི་འགལ་བར་འབད་ཀྱིས་ཀྱང་། སྒྲུབ་པའི་གྲོགས་
མཆོག་མེད་ན་དངོས་གྲུབ་མི་ཐོབ་པར་བསྟན་ཏེ། ཚིག་གི་དོན་གཞན་ནི་གོ་བར་ཟད་དོ། །རྩོད་པའི་དུས་ཞེས་སྨོས་པས་ནི་འདི་ལྟར་ཏིང་ངེ་འཛིན་བརྟན་པའི་དུས་དང་། ཏིང་ངེ་འཛིན་དགེ་བའི་རྩ་བ་ལ་བརྟེན་པའི་དུས་དང་། ཐོས་པ་འཛིན་པའི་དུས་ན་ཡང་ཁམས་གསུམ་ལས་
སྒྲོལ་བའི་རྒྱུ་ངེས་པར་གནས་ཀྱི། དུས་ལྔ་བརྒྱའི་ཐ་མ་ལ་དགེ་བའི་རྩ་བ་མཐུ་ཆུང་བའི་ཚེ་དངོས་གྲུབ་ཀྱི་མཐུ་ལ་བརྟེན་ནས་ཐར་པའི་ལམ་ལ་འཇུག་པར་བསྟན་པའི་དོན་དུ་རྩོད་པའི་དུས་སུ་དངོས་གྲུབ་སྒྲུབ་པ་གཙོར་གསུངས་ཞེས་བྱ་བའི་ཐ་ཚིག་གོ། །ལེའུ་དང་པོའི་དོན་བཤད་ཟིན་
ཏོ།། །།རང་སངས་རྒྱས་ཞེས་བྱ་བ་ནི་རང་བྱང་ཆུབ་སྟེ་དེ་དག་བཞུགས་པའི་གནས་ནི་བཱ་རཱ་ཎ་སཱིའི་དྲང་སྲོང་ལྷུང་བའི་རི་ལ་སོགས་པའོ། །བདེ་གཤེགས་ཉིད་སྐྱེས་ཞེས་བྱ་བ་ནི་བྱང་ཆུབ་སེམས་དཔའ་རྣམས་ཏེ་དེ་དག་གི་གནས་ངེས་པ་ནི་རི་བོ་རྩེ་ལྔ་ལ་སོགས་པའོ། །རྒྱལ་བ་སྔོན་ཆད་
གང་ན་བཞུགས་པ་ཡི། །གནས་གང་ཞེས་བྱ་བ་ནི་བྱ་རྒོད་ཕུང་པོའི་རི་ལ་སོགས་པའོ། །བསོད་ནམ་ལྡན་ཞིང་ཞེས་བྱ་བ་ནི་འཕགས་པ་བསོད་ནམས་དང་ལྡན་པས་ཞབས་ཀྱིས་བཅགས་པའོ། །ཡིད་དགའ་བ་ཞེས་བྱ་བ་ནི་སྒྲུབ་པ་པོ་གནས་དེར་མོས་པའོ། །ལྷ་དང་ལྷ་མིན་སོགས་པས་
ཕྱག་འཚལ་མཆོད། །ཅེས་བྱ་བ་ནི་སྔོན་འཕགས་པ་རྣམས་བཞུགས་པའི་ཚེ། །དེ་དག་གིས་ཕྱག་བྱས་ཤིང་མཆོད་པའམ། །ཡང་ན་སྔོན་ཞབས་ཀྱིས་བཅགས་པས་དེ་ཡང་ས་ཕྱོགས་མཆོད་པའི་འོས་ཡིན་པའི་ཕྱིར་རོ། །གསོ་སྦྱོང་སྡོམ་པ་དང་ནི་ལྡན་པ་ཡིས། །ཞེས་བྱ་བ་ནི་སྒྲུབ་པ་

པོའི་སྐྱེས་བུའོ། །བདག་ཉིད་དག་པར་བྱ་ཕྱིར་བརྟེན་བྱ་བ། །ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། གནས་དེ་རྣམས་སུ་དངོས་གྲུབ་ནི། །རྣམ་པ་གསུམ་དག་རབ་ཏུ་བསྟན། །ངེས་ཤིང་མྱུར་ལ་རྒྱ་ཆེ་ཞིང་། །བགེགས་མེད་པར་ཡང་དེར་འགྱུར་རོ། །
ཞེས་པའི་ཕྱིར་རོ། །དེ་ལྟ་བུ་དག་མ་རྙེད་ཅེས་བྱ་བ་ནི་བྱིན་གྱིས་བརླབས་པའི་གནས་སོ། །གཞན་ཡང་ཞེས་བྱ་བ་ནི་རང་བཞིན་གྱིས་ཡོན་ཏན་ཅན་བཙལ་བར་བསྟན་པའོ། །ཆུ་བོ་ཆུ་ཀླུང་ཞེས་བྱ་བ་ལ་སོགས་པས་ནི་གནས་ཀྱི་རང་བཞིན་གྱི་ཡོན་ཏན་རྣམས་བརྗོད་པའོ། །མི་བཟད་གདོན་
རྣམས་ཀྱང་ནི་མི་གནས་པ། །ཞེས་པ་ནི་ཀླུ་ནག་པོ་གདུག་པ་ལ་སོགས་པའོ། །གྲོག་པོ་གྲོག་མཁར་ཐལ་བ་སྐྲ་ཤད་དང་། །ཉལ་ཉིལ་སོལ་བ་ཚ་སྒོའམ་བཙོག་ཅན་སྤང་། །ཞེས་བྱ་བ་ལ་སོགས་པས་ནི་གནས་ཀྱི་མཚན་ཉིད་མངོན་པར་འདུས་བྱས་པའི་ཡོན་ཏན་དང་ལྡན་པར་བྱ་
བར་བསྟན་ཏོ། །ལྷོ་ཕྱོགས་སུ་ནི་ནམ་ཡང་སྒོ་མི་གདོད། །ཅེས་བྱ་བ་ནི་གཤིན་རྗེའི་ཕྱོགས་ཡིན་པས་བཀྲ་མི་ཤིས་པའི་ཕྱིར་རོ། །དྲི་གཙང་ཁང་པ་དེ་ཡི་ཕྱོགས་ཅིག་ཏུ། །ཞེས་བྱ་བ་ནི་ཤར་ཕྱོགས་ལ་དགོངས་པའི་དོན་ཏོ། །རྒྱལ་བའི་ལམ་མཆོག་རྣམ་པར་སྟོན་པ་ཡི། །ཞེས་
བྱ་བ་ནི་དངོས་གྲུབ་དང་ཐར་པ་ཞེས་བྱ་བའི་ཐ་ཚིག་གོ། །རས་ཀྱི་སྐུ་གཟུགས་ལས་ཕྱིར་བསྟན་པར་གདགས། །ཞེས་བྱ་བ་ནི་སྒྲུབ་པ་པོའི་ཁྱད་པར་གྱི་ལྷའི་གཟུགས་ནི་སོ་སོའི་ཆོ་ག་ཞིབ་མོ་དག་ལས་འབྱུང་སྟེ་ཡོད་ཀྱང་རུང་མི་འབྱུང་སྟེ་མེད་ཀྱང་རུང་གི་སངས་རྒྱས་ཀྱི་སྐུ་གཟུགས་ནི་
རྒྱས་པ་ལ་སོགས་པའི་ལས་འགྲུབ་པའི་དོན་དུ་ངེས་པར་གཞག་པར་བསྟན་པའོ། །ཡང་ན་ཤིང་གཟུགས་ལེགས་པ་མཆོད་ཕྱིར་གཞག །ཅེས་བྱ་བ་ཡང་ཕན་ཡོན་གོང་མ་དང་འདྲ་བའི་ཕྱིར་རོ། །ཤིང་གི་སྐུ་གཟུགས་དེའི་ཚད་ཇི་ཙམ་ཞེས་བྱ་ཞེ་ན། །གསང་རྒྱུད་ལྟར་རམ། འཕགས་
པ་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས་བདེ་བར་གཤེགས་པའི་མཐོ་གང་ཚད་ཀྱི་སྐུ་གཟུགས་གཞག་ལ་ཞེས་འབྱུང་སྟེ་དེ་དང་སྦྱར་རོ། །ཐག་པས་བཏགས་ཞེས་བྱ་བ་ལ་སོགས་པ་རི་མོར་བྲི་བའི་ཆོ་ག་ཡང་རྒྱུད་དེ་ཉིད་ཀྱི་ཚིག་གིས་དགྲོལ་བར་བྱ་བ་སྟེ། དེ་ལས་ཇི་སྐད་དུ། བྲམ་

ཟེའམ་རྒྱལ་རིགས་ཀྱི་བུ་མོ་གཟུགས་བཟང་བ། ཡན་ལག་ཐམས་ཅད་ཡོངས་སུ་རྫོགས་པ། གསོ་སྦྱང་བཟུང་བ་ཞག་གི་རིན་ལ་མ་བརྩེགས་པར་ཉོས་པའི་ཤིང་བལ་འཁལ་དུ་བཅུག་ལ། ཚེས་གྲངས་དང་བྱེད་པ་དང་ཡུད་ཙམ་བཟང་པོ་ལ་ཡན་ལག་ཐམས་ཅད་ཡོངས་སུ་རྫོགས་
པའི་ཐ་ག་པ་འཐག་ཏུ་གཞུག་སྟེ། བ་ལང་གི་ལྕི་བ་ས་ལ་མ་ལྷུང་བས་དཀྱིལ་འཁོར་བསྐུས་ལ། སྤོས་དང་མེ་ཏོག་དང་བདུག་པ་ལ་སོགས་པས་ཡང་མཆོད་དོ། །ཐ་ག་པའི་ཐགས་ཆ་རྣམས་ཀྱང་བའི་རྣམ་ལྔ་དང་སྤོས་ཆུས་བཀྲུའོ་ཞེས་གསུངས་སོ། །འཇམ་ལ་སྙོམས་
པ་དང་། ཐགས་བཟངས་དེ་བཞིན་སྐྲ་ཤད་མེད་པ་དང་། །ཞེས་བྱ་བ་ཡང་དེ་ཉིད་ལས་སྐྲ་མེད་པ་དང་མཉམ་པ་དང་འཇམ་པར་བྱའོ་ཞེས་གསུངས་སོ། །ཁོ་ལག་ཆེ་ཞིང་ཞེས་བྱ་བ་ནི་ཆུ་ཞིང་འཚམ་པར་མི་ཆུང་བའོ། །མ་ཉམས་ཞེས་བྱ་བ་ནི་མ་དྲས་པའོ། །ཁ་ཚར་བཅས་ཞེས་
བྱ་བ་ནི་མ་གོད་པའོ། །གཙང་མ་ཞེས་བྱ་བ་ཡང་རྒྱུད་དེ་ཉིད་ལས། སྒྲུབ་པ་པོ་ཁྲུས་བྱས་ཤིང་བྱུག་པས་བྱུགས་ལ། ཐོད་ཟེའུ་ཀས་བཅིངས་ཤིང་དྲི་ཞིམ་པོའི་དྲི་དང་ལྡན་པར་བྱས་པས་མཆོད་པ་རྒྱ་ཆེར་བྱས་ལ། ཨ་ཀ་རུའི་བདུག་པ་བསྲེག་ཅིང་ཐ་ག་པ་ལ་ཡོན་བཟང་དུ་བྱིན་ལ་
དགྲོལ་བར་བྱའོ། །བཀྲོལ་ནས་ཀྱང་བྱིན་གྱིས་བརླབས་ཏེ། ས་ཕྱོགས་གཙང་མར་མེ་ཏོག་གི་སིལ་མ་བཀྲམ་པ་སྤོས་དང་བདུག་པས་བདུགས་ལ་སྤོས་ཆུའི་ནང་དུ་བཅུག་སྟེ་ཞག་བདུན་དུ་གཞག་གོ་ཞེས་གསུངས་སོ། །སྤོས་ཀྱིས་བཏབ་པ་ཞེས་བྱ་བ་ཡང་དེ་ཉིད་ལས་ཕྱེ་མ་འཇམ་
པོས་རས་ལ་ལན་མང་དུ་བསྒོ་བར་བྱའོ། །ཀླུ་ཤིང་དང་ཙམ་པ་ཀ་དང་སྐྱ་སྣར་ལ་སོགས་པའི་མེ་ཏོག་གིས་ཀྱང་བསྐོར་བར་བྱའོ། །དེའི་འོག་ཏུ་སྲུང་བ་བྱས་པས་ཚེས་གྲངས་ངན་པ་དང་མི་མཐུན་པར་འཇུག་པའི་ཉེས་པ་དང་བྲལ་ཞིང་། ཚེས་གྲངས་དང་བྱེད་པ་དང་། ཡུད་ཙམ་
བཟང་པོ་ལ་རོལ་མོའི་སྒྲ་སྣ་ཚོགས་མང་པོ་འབྱིན་པ། ཤིས་པར་བརྗོད་པ་ཡོད་པ། མེ་ཏོག་བཀྲམ་པའི་དཀྱིལ་འཁོར་དུ་མཆོད་པ་རྒྱ་ཆེར་བྱས་ལ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ནས་གསོལ་བ་བཏབ་སྟེ་བྲིའོ་ཞེས་གསུངས་སོ། །དེ་ལ་ནི་ཞེས་བྱ་བ་ནི་དག་ཅིང་བསྒོས་

པའི་རས་ལའོ། །ཚོན་རྩི་སྤྱིན་མེད་ཅེས་བྱ་བ་ནི་ཀ་པི་ཏ་དང་སྦྱར་བའོ། །ཁྲུས་བྱས་གཙང་ལ་གསོ་སྦྱོང་གཟུང་བའི་མི། །མཁས་པས་ཞེས་བྱ་བ་ཡང་དེ་ཉིད་ལས། །རི་མོ་མཁན་གསོ་སྦྱོང་གཟུང་བ། མཁས་པ་དད་པ་སྙིང་རྗེ་དང་ལྡན་པ་སེར་སྣ་མེད་པ་
ཡན་ལག་ཐམས་ཅད་ཡོངས་སུ་རྫོགས་པས་བྲི་བར་གསུངས་སོ། །བ་ལང་སྤུ་ཞེས་བྱ་བ་ནི་རྣ་སྤུ་སྟེ་པིར་གྱི་རྒྱུའོ། །བྲི་བར་བྱ་ཞེས་བྱ་བ་ཡང་། དེ་ཉིད་ལས་སྒྲུབ་པ་པོ་བྱམས་པའི་སེམས་དང་ལྡན་པ། ཐོད་ཟེའུ་ཀ་བཅིངས་པ། སྔགས་བགྲང་ནོར་བུ་འཆང་བ་དང་བཅས་པར་
རི་མོ་མཁན་གྱི་རྒྱབ་ན་འདུག་ཅིང་། བཅོམ་ལྡན་འདས་ཀྱི་སྐུ་གཟུགས་དང་ཁ་དོག་དང་བཅས་པར་བྱའོ། །ཕྱག་རྒྱ་དང་ཡི་གེ་རྣམས་ཀྱང་བསམ་མོ། །ཡང་ན་སྒྲུབ་པ་པོ་བདག་ཉིད་ཀྱིས་བྲི་བར་བྱའོ་ཞེས་གསུངས་སོ། །དེའི་ཁ་དོག་དང་ཚུལ་ནི་རིག་པ་མཆོག་གི་རྒྱུད་ཆེན་པོ་
ལས། དེ་བཞིན་གཤེགས་པའི་སྐུ་གཟུགས་བརྙན་གསེར་གྱི་ཁ་དོག་ལྟ་བུ་མཚན་ཐམས་ཅད་ཡོངས་སུ་རྫོགས་ཤིང་དཔལ་གྱི་བེའུས་བརྒྱན་པ། ཕྱག་གཡས་པ་མཆོག་སྦྱིན་པའི་ཚུལ་ལམ་སྐྱབས་མཛད་པའི་ཚུལ་ལ་བལྟས་ཏེ། རིག་སྔགས་བསྒྲུབ་པར་བྱའོ་ཞེས་གསུངས་
སོ། །ཤིང་གཟུགས་ཀྱི་ཚུལ་དེ་དང་མཐུན་པར་ཁོང་དུ་ཆུད་པར་བྱའོ། །ཕྲེང་བ་ཞེས་བྱ་བ་ལ་སོགས་པའི་མཆོད་པ་ནི་རབ་ཏུ་གྲུབ་པའི་རྒྱུད་ཆེན་པོ་ལས་བལྟ་བར་བྱ་སྟེ། འདིར་ཡི་གེ་མང་དུ་དོགས་པས་མ་སྤྲོས་སོ། །སྐུ་གཟུགས་ཆེར་མཆོད་དེ་ཞེས་བྱ་བ་ནི་བྲི་བ་ཟིན་ནས་ཏེ། དེ་ཡང་
ཕྱག་ན་རྡོ་རྗེ་དབང་བསྐུར་བའི་རྒྱུད་དེ་ཉིད་ལས། གདུགས་དང་རྒྱལ་མཚན་དང་བ་དན་བསྒྲེང་ཞིང་། སིལ་སྙན་དང་དགའ་བར་འགྱུར་བའི་སྒྲ་མང་པོ་དང་། ཤིས་པ་རྒྱ་ཆེན་པོ་དང་། བཀྲ་ཤིས་བརྗོད་པ་རྣམས་ཀྱིས་མཆོད་པར་བྱའོ་ཞེས་གསུངས་སོ། །ནུབ་ཕྱོགས་ཞལ་བསྟན་
ཞེས་བྱ་བ་ནི་བསྙེན་པ་ལ་འཇུག་པའི་དུས་སུ་རྒྱས་བའི་ལས་དང་སྦྱར་དགོས་པས་སྐུ་གཟུགས་ཞལ་ནུབ་ཕྱོགས་སུ་བསྟན་ལ། སྒྲུབ་པ་པོ་ཁ་ཤར་ཕྱོགས་སུ་བསྟན་པའི་དོན་ཏོ། །དེ་ཡི་སྤྱན་སྔར་དངོས་གྲུབ་བརྩམ་པར་བྱ། །ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། སྐུ་གཟུགས་

ལ་ཐད་ཀར་བལྟ་ཞིང་བསྒྲུབ་པར་བྱ་བ་སྟེ། གཞན་དུ་བལྟ་ཞིང་བསྒྲུབ་པར་མི་བྱའོ་ཞེས་གསུངས་སོ། །ཡང་དེ་ཉིད་ལས་དེ་བཞིན་གཤེགས་པའི་སྤྱན་སྔར་དྲག་ཤུལ་བསྒྲུབ་པར་མི་བྱ་སྟེ། དེ་ནི་ལག་ན་རྡོ་རྗེའི་དྲུང་དུ་བསྒྲུབ་པར་བྱའོ་ཞེས་ཀྱང་གསུངས་སོ། །གཙུག་ཕུད་གཞག་སྟེ་སྐྲ་
ནི་བྲེགས་ནས་སུ། །ཞེས་བྱ་བ་ནི་སྒྲུབ་པ་པོ་ཁྱིམ་པ་རྣམས་ཚུལ་བསྒྱུར་བར་བསྟན་ཏོ། །འབྱུང་ཁུངས་ཚོན་གྱིས་གོས་ཀྱི་ཁ་དོག་བསྒྱུར། །ཞེས་བྱ་བ་ནི་རབ་ཏུ་བྱུང་བ་རྣམས་ཏེ་ངུར་སྨྲིག་ལས་དགོངས་སོ། །གོས་དཀར་པོ་ཞེས་བྱ་བ་ནི་ཁྱིམ་པ་རྣམས་ལའོ། །ཤིང་ལོ་ཞེས་བྱ་བ་
ལ་སོགས་པ་ནི་གཉིས་ཀའི་ཐུན་མོང་གི་བརྟུལ་ཞུགས་ཁྱད་པར་ཅན་ལས་དགོངས་པར་རིག་པར་བྱའོ། །གཞན་ནི་གོ་བར་ཟད་དོ། །བཟའ་བཏུང་མོད་ཅེས་བྱ་བ་ནི། གྲོང་བཀྲེན་པ་མ་ཡིན་པའི་དོན་ཏོ། །དམངས་རིགས་མང་བ་ཞེས་བྱ་བ་ནི་དེ་དག་ལུགས་ཀྱིས་དགེ་སྦྱོང་དང་བྲམ་ཟེ་
ལ་རིམ་གྲོ་ཆེ་བའི་ཕྱིར་རོ། །མགྲོན་པོ་ལ་མཆོད་བྱེད་ཅེས་བྱ་བ་ནི་བསོད་སྙོམས་པ་ལ་སོགས་ཏེ་གློ་བུར་བ་ལ་བྱམས་པའི་དོན་ཏོ། །ལེགས་པར་གནས་པའི་གྲོང་ཞེས་བྱ་བ་ནི་བཟའ་བཏུང་མོད་པའམ་ཡང་ན་ཆོམ་པོ་ལ་སོགས་པའི་གཡོན་ཅན་རྣམས་ཀྱིས་ཕུང་བར་མི་འགྱུར་
བའོ། །ཧ་ཅང་མི་ཉེ་ཞེས་བྱ་བ་ནི་སྒྲུབ་པའི་གནས་གྲོང་དེ་དང་ཉེ་ཆེས་ན་རྣལ་འབྱོར་ལ་སྦྱོར་བའི་དུས་སུ་སྒྲ་ལ་སོགས་པའི་ཚེར་མས་གནོད་པར་འགྱུར་བའི་ཕྱིར་རོ། །ཧ་ཅང་མི་རིང་ཞེས་བྱ་བ་ནི་བསོད་སྙོམས་བསྙག་ཏུ་མི་སླེབས་པའམ། ཡང་ན་སྐྱེ་བོ་གཡོན་ཅན་རྣམས་འཚེ་
བའི་ཕྱིར་རོ། །བྲམ་ཟེ་ཕྱི་རོལ་སྐྱེ་བོ་ཞེས་བྱ་བ་ནི་བསྟན་པ་ལས་ཕྱི་རོལ་པའོ། །མེད་ཅེས་བྱ་བ་ནི་གནས་པའོ། །ང་རྒྱལ་གྱིས་ནི་ནོན་པ་ཞེས་བྱ་བ་ནི་རང་བཞིན་གྱིས་མངོན་པའི་ང་རྒྱལ་དང་། ཆེ་བའི་ང་རྒྱལ་དང་ལྡན་པའི་ཕྱིར་རོ། །བྲམ་ཟེ་རྣམས་རིགས་ཀྱིས་རློམ་ཞིང་ཞེས་བྱ་
བ་ནི་ཚངས་པའི་བུ་ཡིན་པར་སེམས་པའི་ཕྱིར་རོ། །སྙིང་རྗེ་མི་ལྡན་པ་ཞེས་བྱ་བ་ནི་སངས་རྒྱས་ཀྱི་བསྟན་པ་ལ་ཕྱོགས་པ་རྣམས་ལ་རྣམ་པ་སྣ་ཚོགས་ཀྱིས་མཐོ་བཙམས་པའི་དུས་ན་བརྩེ་བ་མེད་པའི་ཐ་ཚིག་གོ། །དེ་དག་ཅེས་བྱ་བ་ནི་བྲམ་ཟེ་རྣམས་སོ། །བདེ་བར་གཤེགས་

པའི་མཆོད་རྟེན་ཞེས་བྱ་བ་ནི་སྐུ་གཟུགས་ལ་སོགས་པའོ། །མཆོད་པ་ཞེས་བྱ་བ་ནི་ཕྱོགས་འདིའི་ནང་པའི་རིག་སྔགས་འཆང་བའོ། །མཐོང་ནས་བགེགས་ཀྱང་བྱེད་པར་འགྱུར། །ཞེས་བྱ་བ་ནི་བྲམ་ཟེ་རྣམས་ཐབས་སྣ་ཚོགས་ཀྱིས་འགོག་པའི་དོན་ཏོ། །བྲམ་ཟེ་སངས་
རྒྱས་པ་ལས་ཇི་ལྟར་དམན། །ཞེས་བྱ་བ་ལ་སོགས་པས་ནི། སྒྲུབ་པ་པོ་དམངས་རིགས་ཞིག་ཡིན་ན་བྲམ་ཟེ་རྣམས་འདི་སྐད་དུ། ཁྱེད་ངེད་ལ་བཀུར་སྟི་དང་མཆོད་པ་བྱེད་པ་དང་། རང་གི་ལས་སྦྱིན་པ་བྱེད་པ་དང་། ཕྱུགས་འཚོ་བས་གྲོལ་བ་ཡིན་ན། ཅིའི་ཕྱིར་སངས་རྒྱས་པའི་
ལྟ་བ་ལ་ཕྱོགས་ཤིང་དེའི་གསང་སྔགས་ཟློས་ཞེས་འཚེ་བའི་དོན་ཏོ། །ལྷ་དང་མགྲོན་མཆོད་པ་ཞེས་བྱ་བ་ནི་དེའི་དོན་དང་བྲམ་ཟེའི་གཞུང་གིས་སྲོག་གཅོད་པར་གནང་བའོ། །ལས་དྲུག་ཅེས་བྱ་བ་ནི་བྲམ་ཟེ་རྣམས་མཆོད་སྦྱིན་བྱེད། བྱེད་དུ་འཇུག །སྨྲང་འདོན། འདོན་དུ་འཇུག །
སྦྱིན་པར་བྱེད། སྦྱིན་པ་ལན་པ་དང་ལྡན་པའོ་ཞེས་བརྟགས་པའོ། །རྒྱལ་པོ་དང་ནི་མེ་ལྷ་བསྟེན་པ་ཞེས་བྱ་བ་ནི་སྲིད་བཙལ་བ་དང་། ལྷ་མཉེས་པར་བྱ་བའི་དོན་གྱི་ཕྱིར་རོ། །བུ་ཡི་དོན་དུ་འགྲོ་བར་བྱ་བ་དག །ཅེས་བྱ་བ་ནི་རིགས་རྒྱུན་མི་གཅད་པར་བྱ་བའི་ཕྱིར་རང་དབང་བའི་བུད་
མེད་དང་འཚོ་བའོ། །བྲམ་ཟེ་རྣམས་ཀྱིས་ངེས་པར་གྲུབ་པ་ཡིན། །ཞེས་བྱ་བ་ནི་སྒྲུབ་པ་པོ་བྲམ་ཟེའི་རིགས་ཤིག་ཡིན་ན་ནི། དེའི་ཕྱི་རོལ་པའི་བྲམ་ཟེ་རྣམས་བདག་ཅག་གིས་ལས་ངེས་པ་འདི་ལྟ་བུ་བོར་ནས་ཅིའི་ཕྱིར་སངས་རྒྱས་པའི་གསང་སྔགས་ཟློས་ཞེས་འཚོ་བའི་དོན་སྟོན་ཏོ། །
རྒྱལ་རིགས་རྗེའུ་རིགས་རྣམས་ཀྱང་རང་གི་ལས་གྲུབ་པ་འདི་ལ་ཐེ་ཚོམ་བྱེད་ཅེས་བྱ་བ་ནི་སྒྲུབ་པ་པོ་རྒྱལ་རིགས་ན་རང་གི་ལས་བཞི་དང་འགྲོ་བ་སྐྱོང་བ་ཡིན། སྒྲུབ་པ་པོ་རྗེའུ་རིགས་ན་རང་གི་ལས་གཉིས་དང་ཞིང་མེད་པ་ཡིན་ན། ཅིའི་ཕྱིར་འདི་ལ་ཐེ་ཚོམ་དུ་གྱུར་ཅིང་ལྟ་བ་གཞན་དུ་
ཕྱོགས་ཞེས་འཚེ་བར་བྱེད་པའི་དོན་ཏོ། །བརྫུན་དུ་སྨྲ་བ་སྣ་ཚོགས་སྐྱོན་དག་གིས། །ཞེས་བྱ་བ་ནི་གོང་དུ་བཤད་པ་ལྟ་བུའི་གཞུང་དེ་དག་འཇུགས་པའི་ཚེ་ཁ་སྟོབས་ཀྱིས་སྒྲོ་འདོགས་པ་དང་སྐུར་པ་འདེབས་པའོ། །བདག་དང་གཞན་གྱི་སེམས་ནི་སྲེག་པར་བྱེད། །ཅེས་བྱ་བ་ནི་ཁྲོས་པའི་དབང་

གིས་ཞེ་སྡང་ལངས་པའི་ཕྱིར་དགེ་བའི་རྩ་བ་བསྲེགས་ཏེ་ཇི་སྐད་དུ། ཡིད་ལ་ཞེ་སྡང་ཡོད་ན་བདག་དང་གཞན་དག་ལ། །ཕན་པར་འགྱུར་བ་མེད་བཞིན་རབ་ཏུ་སྲེག་པར་བྱེད། །ཅེས་བཤད་པ་དེ་ལྟ་བུའོ། །ཡན་ལག་བརྒྱད་ལམ་གནས་པར་རབ་ཏུ་བྱུང་བ་ལ་མ་སྨོས་ཀྱིས་ཀྱང་། གཉིས་
ཀ་ལ་གདམས་པའི་དོན་དུ་གོ་བར་བྱའོ། །ཉི་མ་ཕྱེད་མཚམས་ཚུན་ཆད་བླང་བར་བྱ། །ཞེས་བྱ་བ་ནི་འདི་ནི་སངས་རྒྱས་པའི་དུས་ཡིན་པའི་ཕྱིར་རོ། །བྲམ་ཟེའི་དུས་ནི་ཕྱི་དྲོ་ཡིན་པས་ན། །ཞེས་བྱ་བ་ནི་དེ་དག་གི་ཟས་ཟ་བའི་དུས་ངེས་པའོ། །དེ་ཕྱིར་བྲམ་ཟེའི་ཁྱིམ་དུ་འགྲོ་མི་
བྱ། །ཞེས་བྱ་བ་ནི་དུས་མི་མཐུན་ཏེ། ཁ་ཟས་མེད་པ་དང་གླན་ཀ་ཚོལ་བའི་ཕྱིར་རོ། །དགེ་དང་མི་དགེའི་ཤེས་པ་བཟུང་བ་ནི། །ཞེས་བྱ་བ་ནི་ལས་ལེགས་ཉེས་ཀྱི་འབྲས་བུ་འདོད་པ་དང་མི་འདོད་པར་སྨིན་པར་རིག་ན་ཞེས་བྱ་བའི་དོན་ཏོ། །བྲམ་ཟེ་དམངས་རིགས་དག་ལ་ཁྱད་
པར་མེད། །ཅེས་བྱ་བ་ནི་བྲམ་ཟེ་རྣམས་ཚངས་པའི་བུ་ཡིན་པས་རང་བཞིན་གྱིས་དག་སྟེ། རིགས་མཐོ་བའི་ཕྱིར་མཐོ་རིས་སུ་སྐྱེ་ལ། གཞན་རྣམས་ནི་རིགས་ཀྱིས་དམའ་བས་འགྲོ་བ་གཞན་དུ་སྐྱེའོ་ཞེས་བྲམ་ཟེའི་གཞུང་ལས་འབྱུང་བ་དགག་པའི་དོན་དུ། ལས་ལེགས་
ཉེས་ཀྱི་དབང་གིས་གནས་མཐོ་དམན་དུ་སྐྱེ་བར་མཚུངས་པར་བསྟན་པའོ། །བརྟགས་པ་ཞེས་བྱ་བ་ནི་གང་ལ་གང་མེད་པ་དེ་ལ་དེ་འདོགས་པ་སྟེ། ནམ་མཁའི་མེ་ཏོག་གི་གཙུག་ཕུད་ཅེས་བྱ་བ་དང་འདྲའོ། །གཞན་ནི་གོ་སླ་བས་མ་ཕྱེའོ། །འདོད་པའི་ཁམས་ནི་ཁ་ཟས་ཀྱིས་གནས་
ཞེས། །རྒྱལ་བས་ཆོས་གཅིག་ཏུ་ནི་བཀའ་སྩལ་པས། །ཞེས་བྱ་བ་ནི་ཁམས་གང་མ་དག་ན་སེམས་པའི་ཟས་ཀྱིས་ལུས་བརྟེན་ཏེ། འཇུ་བའི་ཟས་ལ་མི་ལྟོས་པ་ལྟར་འདིར་དེ་ལྟ་མ་ཡིན་པར་བསྟན་ཏོ། །ལུས་ནི་ཆུ་ཤིང་བཞིན་དུ་རིག་བྱ་སྟེ། །ཞེས་བྱ་བ་ནི་སྙིང་པོ་མེད་
པ་དེ་འཇུ་བའི་ཟས་ཁོ་ནས་བརྟེན་པར་བསྟན་ཏོ། །སོགས་ལ་ཞེས་བྱ་བ་ནི་བཅའ་བ་དང་བལྡག་པ་དང་གཞིབས་པ་དང་བཏུང་བ་དག་གོ། །ཆགས་མི་བྱ་ཞེས་བྱ་བ་ནི་ཚེ་དང་ལོངས་སྤྱོད་ལ་དགའ་བའི་དོན་དུ་མ་ཡིན་གྱི། གཞན་དུ་ན་ལུས་གནས་པ་ཙམ་དུ་བྱ་བའི་ཕྱིར་བཟའ་ཞེས་བྱ་བའི་

ཐ་ཚིག་གོ། །དབང་པོ་དྲུག་པོ་ཞེས་བྱ་བ་ནི་མིག་གི་དབང་པོ་ནས་ཡིད་ཀྱི་དབང་པོའི་བར་དག་གོ། །ཡུལ་ལ་ཞེས་བྱ་བ་ནི་གཟུགས་ནས་ཆོས་ཀྱི་བར་དག་གོ། །འཕྲོས་པ་ཞེས་བྱ་བ་ནི་སོ་སོར་འཇུག་པའོ། །བདེ་གཤེགས་གསུངས་པའི་ཤེས་པས་བསྲུང་
བར་བྱ། །ཞེས་བྱ་བ་ནི་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པས་སུན་ཕྱུང་སྟེ་འཕྲོ་བ་དགག་པར་བསྟན་ཏོ། །ལྷུང་བཟེད་དེ་དག་ལས་གཅིག་ཐོགས་ནས་སུ། །ཞེས་བྱ་བ་ནི་གོང་དུ་སྨོས་པའི་ཀུ་བ་ལ་སོགས་པ་ལས་གང་འབྱོར་པའོ། །གཉའ་ཤིང་
གང་དུ་བལྟ་ཞིང་ཞེས་བྱ་བ་ནི་སྤྱོད་ལམ་ཞི་བར་བྱེད་པར་བསྟན་ཏོ། །འཛུམ་ཞིང་འགྲོ་ལ་སྨྲ་ཞིང་མིག་ཟུར་ཅན། །ཞེས་བྱ་བ་ནི་བུད་མེད་ཀྱི་ངག་འདོད་ཆགས་ལ་ཞེན་པས་སྐྱེས་པ་ལ་ཡང་འདོད་ཆགས་སྐྱེད་པར་བྱེད་པའི་དོན་ཏོ། །ཡན་ལག་ཐམས་ཅད་ཡིད་འཕྲོག་བྱེད་པའི་
གཟུགས། །ཞེས་བྱ་བ་ནི་སྐྱེས་པའི་སེམས་སླུ་བའི་དོན་ཏོ། །མཚོན་ཆ་འཇེབས་འདྲ་བས་ཞེས་བྱ་བ་ནི་དགེ་བ་སྲོག་དང་འདྲ་བའི་རྒྱུན་གཅོད་ཅེས་བྱ་བའི་ཐ་ཚིག་གོ། །སྐྱེས་པའི་སེམས་དག་མངོན་དུ་འཕྲོག་པར་བྱེད། །ཅེས་བྱ་བ་ནི་རང་དབང་མེད་པར་ཉོན་མོངས་པའི་དབང་དུ་
འགྱུར་བའི་དོན་ཏོ། །ལྕགས་ཀྱི་ཐོང་ལྕགས་རབ་ཏུ་འབར་བ་ཡིས། །མིག་ནི་རྣམ་པར་བཀབ་པ་ཆེས་བླ་ཡི། །ཞེས་བྱ་བ་ནི་འདྲ་བའི་དོན་མཐོང་བའི་ཕྱིར་རོ། །ཉིས་ན་དྲན་པ་ཉམས་བྱེད་བུད་མེད་ཀྱི། །དཀྱུས་རིང་མིག་ཅན་བཞིན་ནི་མ་མཐོང་སླ། །ཞེས་བྱ་བ་ནི་འདོད་ཆགས་ལ་
སོགས་པའི་རྒྱུ་མཐོང་བའི་ཕྱིར་རོ། །ཡང་ན་གནོད་པ་དེ་ཙམ་དང་བསྡོས་ཏེ་མི་བལྟའོ་ཞེས་དགག་པར་བསྟན་ཏོ། །གང་དུ་དགའ་བར་འགྲོ་ཞེས་བྱ་བ་ནི་བསོད་སྙོམས་ལ་གང་མོས་པའི་གྲོང་དུ་འགྲོ་ཞེས་བྱ་བའི་ཐ་ཚིག་གོ། །འཛིན་མེད་ཅེས་བྱ་བ་ནི་གྲོང་དེ་དག་ཏུ་འགྲོ་བ་ན་
བུད་མེད་ལ་སོགས་པ་ལ་མཚན་མ་དང་མངོན་རྟགས་སུ་མི་གཟུང་བའོ། །སེམས་ཀྱིས་ཞེས་བྱ་བ་ནི་བློ་སྔོན་དུ་བཏང་བའོ། །སེམས་ནི་རྣམ་པར་བཏུལ་བཞིན་དུ། །ཞེས་བྱ་བ་ནི། འདོད་པའི་ཡོན་ཏན་ལྔ་ལ་སེམས་འཕྲོ་བ་མི་རྟག་པ་ལ་སོགས་པའི་གཉེན་པོ་ལ་བརྟེན་ཅིང་གླན་པའོ། །

རབ་དང་འབྲིང་ལ་སོགས་པར་ཞེས་བྱ་བ་ནི་རྒྱལ་རིགས་ལ་སོགས་པའི་རིགས་བཞིའི་ཁྱིམ་དུ་བསོད་སྙོམས་བསླང་བར་གསུངས་ཏེ། གདོལ་པ་དག་གི་དེར་ནི་མ་ཡིན་ནོ། །སྤངས་ནས་སུ་ཞེས་བྱ་བ་ནི་དེ་དག་ཏུ་སྤྱོད་ལམ་མ་ཞི་བ་སྤངས་པའི་དོན་ཏོ། །མི་སྨྲ་བར་ནི་ཞེས་
བྱ་བ་ནི་ངག་གི་བརྟུལ་ཞུགས་ལ་གནས་པའི་ཕྱིར་རོ། །གང་ན་བ་བཞོན་བེའུ་ཕྲུག་ཆུང་བ་དང་། །ཞེས་བྱ་བ་ལ་སོགས་པས་ནི་གནོད་པ་དང་ཆགས་པའི་སྒོ་ནས་གཉེན་དུ་འགྱུར་བས་སྤང་བར་བསྟན་ཏོ། །བསོད་སྙོམས་ཅི་རྙེད་ཅེས་བྱ་བ་ནི་ཇི་ཙམ་རྙེད་པ་ལས་ཞེས་བྱ་བའི་དོན་
ཏོ། །དང་པོར་ཇི་ལྟར་བདེ་བར་བགོ་བར་བྱ། །ཞེས་བྱ་བ་ནི་ཆ་གསུམ་དུ་བགོས་ཏེ་ཆ་དང་པོ་ཆུང་ངུ་གཅིག་ནི་ལྷ་ལ་དབུལ་བར་བསྟན་ཏོ། །རྐང་པ་བཀྲུས་ཏེ་ཞེས་བྱ་བ་ནི། དང་པོར་བསོད་སྙོམས་བླངས་ནས་སླར་འཁོར་བའི་དུས་སུ་སྟེ། ཚིགས་སུ་བཅད་པ་སྦྱར་བ་ལ་བདེ་
བའི་ཕྱིར་འདིར་སྨོས་པར་གོ་བར་བྱའོ། །གློ་བུར་བ་ལ་བྱིན་ནས་སུ་ཞེས་བྱ་བ་ནི་ཆ་གཉིས་པའོ། །ལུས་བསྲུང་ཕྱིར་ནི་ཁ་ཟས་བཟའ་བར་བྱ། །ཞེས་བྱ་བ་ནི་ཆ་གསུམ་པ་བདག་ཉིད་ཀྱིས་བཟའ་བར་བསྟན་ཏོ། །དུས་སུ་ཟོས་ནས་ཞེས་བྱ་བ་ནི་ཕྱེད་མཚམས་སུ་བཟའ་བའི་དོན་ཏོ། །
དུས་གསུམ་ཁྲུས་བྱས་ཏེ་ཞེས་བྱ་བའི་དོན་ནི་ཕྱི་རོལ་ཆེ་ཆུང་དང་ཁ་ཟས་བཟའ་བ་དང་། བཟླས་བརྗོད་ཀྱི་དུས་འདི་གསུམ་དུ་ཁྲུས་བྱ་བར་བསྟན་མོད་ཀྱི། བཟླས་བརྗོད་ཉིད་དུས་གསུམ་དུ་བྱ་དགོས་པས་ཁྲུས་ནི་མང་དུ་བྱ་དགོས་པར་རིག་པར་བྱའོ། །གཞན་ནི་གོ་བར་ཟད་དོ། །
རྗེས་སུ་དྲན་དྲུག་ཅེས་བྱ་བ་ནི་སངས་རྒྱས་དང་ཆོས་དང་དགེ་འདུན་དང་ལྷ་དང་གཏོང་བ་དང་ཚུལ་ཁྲིམས་རྗེས་སུ་དྲན་པའོ། །སོ་སོའི་ཡོན་ཏན་དང་ཞེས་བྱ་བ་ནི་དང་པོ་གསུམ་ནི་རང་བཞིན་གྱི་ཡོན་ཏན་ལས་རྗེས་སུ་དྲན་པར་བྱའོ། །བཞི་པ་ནི་རྒྱུ་ཡི་ཡོན་ཏན་ལས་རྗེས་སུ་དྲན་པར་བྱའོ། །
ལྔ་པ་དང་དྲུག་པ་ནི་འབྲས་བུའི་ཡོན་ཏན་ལས་རྗེས་སུ་དྲན་པར་བྱས་ཏེ། འདིར་ནི་མདོར་བརྗོད་པ་ཡིན་ནོ། །རྒྱས་པར་ནི་མདོ་སྡེ་ལས་བལྟ་བར་བྱ་སྟེ། འདིར་ཡི་གེ་མངས་སུ་དོགས་ནས་མ་སྤྲོས་སོ། །རིག་པར་བཅས་ཏེ་རྗེས་སུ་དྲན་པར་བྱ། །ཞེས་བྱ་བ་ནི། འགྲེང་དང་འདུག་

དང་མ་ལོག་ཉལ་བ་དང་། །འགྲོ་འཕྲེས་ཟ་ཀློག་ཅེས་བྱ་བའི་དུས་ནི། གོང་དུ་སྨོས་པ་དྲུག་པོ་དེ་དག་རྗེས་སུ་དྲན་པར་བྱས་ལ། བཟླས་བརྗོད་བྱེད་པའི་དུས་སུ་ནི་རང་གི་རིག་སྔགས་རྗེས་སུ་དྲན་པའི་དོན་ཏོ། །ལེའུ་གཉིས་པའི་དོན་བཤད་ཟིན་ཏོ།། །།འདོད་
ཆགས་ཞེས་བྱ་བ་ནི་ཉེ་བར་ལེན་པའི་ཕུང་པོ་ལྔ་ལ་ཞེན་པ་དང་། ལྷག་པར་ཆགས་པའོ། །སོགས་པ་ཞེས་བྱ་བ་ནི་ཁོང་ཁྲོ་བ་དང་། ང་རྒྱལ་དང་། མ་རིག་པ་དང་། ལྟ་བ་དང་། ཐེ་ཚོམ་ལ་སོགས་པའི་ཉོན་མོངས་པ་རྣམས་སོ། །ཚོགས་ལྡན་པ་ཞེས་བྱ་བ་ནི་ཁྲོ་བ་དང་ཁོན་དུ་
འཛིན་པ་ལ་སོགས་པ་ཉེ་བའི་ཉོན་མོངས་པ་རྣམས་སོ། །སེམས་ནི་འཁོར་བ་ཡིན་པར་ཀུན་དུ་བརྗོད། །ཅེས་བྱ་བ་ནི་ཇི་ཙམ་དུ་སེམས་ཀྱི་རྒྱུད་ལ་འདོད་ཆགས་ལ་སོགས་པའི་ཉོན་མོངས་པ་རྣམས་དང་ལྡན་ན་དེ་སྲིད་དུ་འཁོར་བ་ཞེས་བྱ་བའི་དོན་ཏོ། །ཉོན་མོངས་རྣམ་གྲོལ་
ཞེས་བྱ་བ་ནི་འདོད་ཆགས་ལ་སོགས་པའི་ཉོན་མོངས་པ་རྣམས་སྤངས་པ་ཉིད་འཁོར་བ་ལས་ལོག་པར་བསྟན་ཏོ། །ཤེལ་ཞེས་བྱ་བ་ནི་རང་གི་སེམས་ཀྱི་རྒྱུད་ལ་ཉོན་མོངས་པའི་སྒྲིབ་པ་སྤངས་པའི་དག་པའི་དཔེའོ། །ཟླ་བ་འདྲ་བ་ཞེས་བྱ་བ་ནི་ཤེས་བྱའི་སྒྲིབ་པ་ཡང་སྤངས་
པས། བདག་དང་གཞན་གྱི་རྒྱུད་གཉི་གའི་གཏི་མུག་གི་མུན་པ་སེལ་བའི་དཔེ་བརྗོད་པའོ། །སྲིད་པའི་རྒྱ་མཚོའི་མཐར་ནི་ཡོངས་སུ་བསྒྲགས་ཞེས་བྱ་བ་ནི་འདོད་ཆགས་ལ་སོགས་པའི་ཉོན་མོངས་པ་དང་བྲལ་བའི་དབང་གིས་ཡང་སྲིད་པར་སེམས་མངོན་དུ་ཕྱོགས་པར་བྱེད་པའི་
སྐྱེ་བོའི་རྐྱེན་རྣམས་ཀྱི་ཚོགས་ལྡོག་པའི་ཕྱིར་རོ། །དཔེར་ན་དྲི་མེད་ཆུ་ནི་རྡུལ་སོགས་ཀྱིས། །སྐད་ཅིག་ཏུ་ཡང་རྙོག་པར་བྱེད་པ་ལྟར། །ཞེས་བྱ་བ་ནི་ཆུ་དངས་པའི་ནང་དུ་བཙག་ལ་སོགས་པ་མཉེས་ན། གཞན་དུ་སྣང་སྟེ་ཆུའི་རང་བཞིན་དུ་མི་སྣང་བ་ལྟ་བུའོ། །དེ་བཞིན་རྣམ་དག་དྲི་མ་
མེད་པའི་སེམས། །འདོད་ཆགས་ལ་སོགས་སྐྱོན་གྱིས་རྙོགས་པར་འགྱུར། །ཞེས་བྱ་བ་ཡང་གློ་བུར་གྱི་དྲི་མས་ཉོན་མོངས་པར་བྱས་ཀྱི་གཅིག་པ་མ་ཡིན་ཏེ། ཆུ་ཁམས་གསེར་དང་ནམ་མཁའ་རྣམས། །དག་པ་བཞིན་དུ་དག་པར་འདོད། །ཅེས་ཇི་སྐད་བཤད་པ་ལྟ་བུའོ། །འོ་ན་

སེམས་ཀྱི་ངོ་བོ་ཉིད་དེ་ཇི་ལྟ་བུ་ཞིག་ཅེ་ན། རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པའི་རྒྱུད་ཆེན་པོ་ལས་འདི་སྐད་དུ། དངོས་པོ་ཐམས་ཅད་དང་བྲལ་བ་ཕུང་པོ་དང་ཁམས་དང་སྐྱེ་མཆེད་དང་། གཟུང་བ་དང་འཛིན་པ་རྣམ་པར་སྤངས་པ། །ཆོས་བདག་མེད་པ་མཉམ་པ་ཉིད་
ཀྱིས་རང་གི་སེམས་གཟོད་མ་ནས་མ་སྐྱེས་པ་སྟོང་པ་ཉིད་ཀྱི་ངོ་བོ་ཉིད་ཅེས་གསུངས་སོ། །བདག་གི་དེ་ཁོ་ན་ཉིད་ཀྱི་ཆོས་ཉིད་དེ་ལྟ་བུ་དང་། ལྷའི་ཆོས་ཀྱི་སྐུ་དེ་བཞིན་ཉིད་དང་ཡང་དབྱེར་མེད་དོ། །དོན་དེ་ཉིད་འཕགས་པ་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས་འདི་སྐད་དུ།
བདག་གི་ངག་མ་གཏོགས་པར་ཡིད་མེད། ཡིད་མ་གཏོགས་པར་ངག་མེད། བདག་གི་ཡིད་མ་གཏོགས་པར་ལྷའི་སྐུ་མེད་དེ་ཡིད་ཉིད་ངག་ཡིན། ངག་ཉིད་ཡིད་ཡིན་ལ། ལྷའི་གཟུགས་ཉིད་ཀྱང་ཡིད་ཡིན་ལ། ངག་ཉིད་ཀྱང་ལྷའི་གཟུགས་ཡིན་ནོ་ཞེས་རྒྱ་ཆེར་གསུངས་སོ། །
དེ་ལྟར་དེ་ཁོ་ན་ཉིད་ཀྱི་དོན་ལ་དམིགས་པའི་ཏིང་ངེ་འཛིན་འདི་ངེས་པར་བསྒོམས་པའི་དོན་ནི་འཕགས་པ་རྡོ་རྗེའི་གཙུག་ཏོར་རྒྱུད་ཕྱི་མ་བསམ་གཏན་གྱི་ལེའུ་ལས་འདི་སྐད་དུ། མི་འབྱེད་འབྱེད་པ་རྣམ་པར་སྤངས། །ཕྲ་བ་མི་གཡོ་གསལ་བ་སྟེ། །བློ་ཡི་སྤྱོད་པ་མདུན་ན་གནས། །
ཞེས་གསུངས་པ་སྟེ། དེ་ལྟར་ཅི་ནུས་སུ་བསྒོམ་ཞིང་གོམས་པར་བྱེད་པ་ནི་སྒྲུབ་པ་པོ་དེ་ཁོ་ན་ཉིད་ཀྱི་དོན་ལ་དམིགས་པ་ཞེས་བྱའོ། །གཞན་ནི་གོ་བར་ཟད་དོ། །འདུག་ནས་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། སྐྱིལ་མོ་བཀྲ་ཤིས་བཟང་མོ་སྟེ། དེ་དག་
འདུག་པ་གསུམ་ཡིན་ནོ། །ཞེས་གསུངས་པ་ཉིད་བལྟ་བར་བྱའོ། །དབང་པོ་ཡང་དག་བསྡམ་པ་ཞེས་བྱ་བ་ནི་ངོ་བོ་ཉིད་ཀྱིས་གཡེངས་པ་ལ་སོགས་ཏེ། རྣམ་པར་གཡེང་བ་དྲུག་ལས་སླར་གླན་པར་དགོངས་པའོ། །ལུས་ཀྱང་དྲང་ཞིང་ཞེས་བྱ་བ་ནི་སྒལ་ཚིགས་བསྲང་བའི་དོན་ཏོ། །བརྟན་
པ་ཞེས་བྱ་བ་ནི་དང་པོ་ལས་ཕྱིས་མི་བསྐྱོད་པའི་ཐ་ཚིག་གོ། །ཕྱིས་ནི་ཞེས་བྱ་བ་ནི་ལུས་བརྟན་པོར་བཞག་ནས་དེའི་འོག་ཏུ་བཟླས་བརྗོད་བརྩམ་པར་བསྟན་ཏོ། །མ་མཆུ་ཤིན་ཏུ་མཛེས་པར་ཡང་བསྒུལ་ཞིང་། །ཞེས་བྱ་བ་ནི་ཤུབ་བུར་བཟླས་བརྗོད་བྱ་བའི་དོན་ཏོ། །གསང་སྔགས་ཅི་

དགར་བཟླས་བརྗོད་བྱ། །ཞེས་བྱ་བ་ནི་བཟླས་བརྗོད་ཀྱི་ཡན་ལག་བཞི་ལ་སོགས་པ་གང་ལས་གོམས་པའི་ཚུལ་དུ་བཟླས་པའི་ཐ་ཚིག་གོ། །སེམས་ནི་གློག་དང་འདྲ་ཞེས་བྱ་བ་ནི་བྱུང་མ་ཐག་ཏུ་འགག་པའི་མཚན་ཉིད་དུ་བསྟན་ཏོ། །སྤྲེའུ་དང་འདྲ་ཞེས་བྱ་བ་ནི་ཡུལ་
ཀུན་དུ་འཇུག་པའི་དོན་ཏོ། །རླུང་དང་མཚུངས་ཞེས་བྱ་བ་ནི་རིང་དུ་འགྲོ་ཞིང་གཟུང་རྒྱུ་མ