Luận tạng Tây Tạng (Tengyur) — Tập 71

ེད་པར་རྒྱུ་བའོ། །རྒྱ་མཚོ་ཆེན་པོ་ཡི་ནི་རླབས་དང་འདྲ། །ཞེས་བྱ་བ་ནི། ཇི་ལྟར་རྒྱ་མཚོའི་རླབས་དེ་ཆེ་ཆུང་དང་གཉེར་མ་སྣ་ཚོགས་སུ་འགྱུར་བ་བཞིན་དུ། སེམས་འདི་ཡང་དངོས་པོ་སྣ་
ཚོགས་ཀྱི་ངང་དུ་འབྱུང་བའི་དོན་ཏོ། །སྒྱུ་ཅན་ཞེས་བྱ་བ་ནི་ཕྱིན་ཅི་ལོག་ཏུ་སླུ་བའི་ཐ་ཚིག་གོ། །འདོད་དགུར་ཡུལ་ལ་མངོན་དགའ་བ། །ཞེས་པ་ནི་འདོད་ཆགས་ལ་སོགས་པའི་ཡུལ་ལ་སོ་སོར་ཞེན་པར་རྒྱུ་བའི་དོན་ཏོ། །གཡོ་ཞིང་འཕྱེན་པ་ཞེས་བྱ་བ་ནི་མི་བརྟན་པའོ། །ངེས་པར་
གདུལ་བར་བྱ་ཞེས་བྱ་བ་ནི་རང་གི་ལྷའི་བཟླས་བརྗོད་ལ་འབད་པའི་དུས་སུ་རང་ཡན་དུ་མི་གཏོང་བར་དགུག་པའི་དོན་ཏོ། །གང་ཚེ་ཟློས་དགའི་སེམས་ནི་ཞི་བ་ལ། །བརྟེན་པས་ཉིད་ཀྱི་དྲན་པ་རྨོངས་གྱུར་ན། །ཞེས་བྱ་བ་ནི་རྒོད་པ་ལས་དགུག་དྲགས་པས་བྱིང་བར་གྱུར་པའོ། །
ལངས་ནས་བཅག་ཅིང་ཞེས་བྱ་བ་ལ་སོགས་པས་ནི་གཉིད་བསལ་བའི་ཐབས་བསྟན་པའོ། །ལས་ཀྱི་དབང་གྱུར་ཞེས་བྱ་བ་ནི་དེས་སྐྱིད་སྡུག་ཏུ་གྱུར་པའོ། །བདག་པོ་མེད་ཅེས་བྱ་བ་ནི་སྡུག་བསྔལ་ལས་སྐྱོབ་པར་བྱེད་པའི་རྗེ་དཔོན་འགའ་ཡང་མེད་པའི་དོན་ཏོ། །མགོན་མེད་
ཅེས་བྱ་བ་ནི་ཉོན་མོངས་པས་ལོག་པར་ཁྲིད་ཀྱང་དེ་ལས་བཟློག་པའི་ཉེ་དུ་གང་ཡང་མེད་པར་བསྟན་ཏོ། །རྟེན་མེད་ཅེས་བྱ་བ་ནི་མི་རྟག་པ་དང་སྐད་ཅིག་མས་བཅོམ་པའི་ཚེ་སྡོད་པའི་མཐུ་མེད་པའི་དོན་ཏོ། །ཚེ་རབས་གཅིག་ནས་གཅིག་ཅེས་བྱ་བ་ནི་ཁམས་གསུམ་གྱི་ནང་དུ་འཁོར་བའོ། །
ལུས་ཀྱི་ཁ་བརྒྱུད་ཅེས་བྱ་བ་ནི། སྐྱེ་གནས་བཞི་ཡི་མིང་ལ་བརྟགས། །ཞེས་བྱ་བའི་ཐ་ཚིག་གོ། །རྗེས་སུ་རབ་འགྲོ་བ་ཞེས་བྱ་བ་ནི། འགྲོ་བ་དྲུག་པོ་དག་གི་ནང་དུའོ། །དེ་ཡི་རྗེས་སུ་དགེ་དང་མི་དགེ་འབྲང་། །ཞེས་བྱ་བ་ནི་ལྷ་ལ་སོགས་པའི་སྐྱེ་གནས་སུ་ལུས་བླངས་ཀྱང་།

སེམས་དང་འབྲེལ་པ་མ་ཡིན་གྱི། །ལས་དགེ་བ་ལ་སོགས་པའི་བག་ཆགས་ཁོ་ན་དང་འབྲེལ་བར་བསྟན་ཏོ། །གཞན་ནི་གོ་བར་ཟད་དོ། །འདོད་ཆགས་ཤས་ཆེ་བ་ཞེས་བྱ་བ་ནི་སྒྲུབ་པ་པོ་ཁ་ཅིག་གོ། །མི་གཙང་ཤ་ཚིལ་དང་། པགས་པ་ཀེང་རུས་བལྟ་བས་རྣམ་པར་བཟློག །ཅེས་
བྱ་བ་ནི་གཉེན་པོ་རྣམ་པར་ཐར་པའི་ལམ་མི་སྡུག་པའི་ཏིང་ངེ་འཛིན་བསྒོམ་པར་བསྟན་ཏེ། དེ་ཡང་། ཐོག་མར་པགས་པའི་རིམ་པ་འདི། །རང་གི་བློ་ཡིས་ཐ་དད་ཕྱེ། །ཤ་ཡང་རུས་པའི་དྲ་བ་ལས། །ཤེས་རབ་མཚོན་གྱིས་གུང་དུ་ཕྱེ། །རུས་པ་རྣམས་ཀྱང་དབྱེ་བྱས་ནས། །རྐང་
གི་བར་དུ་བལྟ་བྱ་ཞིང་། །འདི་ལ་སྙིང་པོ་ཅི་ཡོད་ཅེས། །བདག་ཉིད་ཀྱིས་ནི་བརྟག་པར་གྱིས། །ཞེས་ཇི་སྐད་བཤད་པ་ལྟ་བུའོ། །བྱམས་དང་ཞེས་བྱ་བ་ནི་སྒྲུབ་པ་པོ་ལ་ལ་ཞེ་སྡང་གི་ཤས་ཆེ་བ་ལ་གཉེན་པོ་བྱམས་པའི་ཏིང་ངེ་འཛིན་བསྒོམ་པར་བསྟན་ཏེ། དེ་ལ་དང་པོར་གང་
ཟག་ཡོན་ཏན་དང་ལྡན་པ་བཀུར་སྟི་བྱ་བར་འོས་པ་བླ་མ་ལྟ་བུའི་གནས་ཤིག་ལ་དད་པ་བསྐྱེད་ནས་སྐྱེས་བུ་དམ་པ་འདི་བདེ་བར་གྱུར་ཅིག་སྙམ་པའི་ཡིད་ལ་བྱེད་པ་འཇུག་པར་བྱེད་དེ། ཇི་སྲིད་དུ་འདི་སེམས་ཆུང་ངུ་འབྱུང་བ་དེ་སྲིད་དུ་འཇུག་པར་བྱེད་དོ། །དེ་ནས་གང་ཟག་སྡུག་པ་ལ་
སེམས་གཏོད་པར་བྱེད་དེ། དེ་ལ་ཡང་ཇི་སྲིད་དུ་གང་ཟག་སྔ་མ་དང་མཉམ་པའི་སེམས་བསྐྱེད་པ་དེ་སྲིད་དུ། སེམས་གཏོད་པར་བྱེད་དོ། །དེ་ནས་གང་ཟག་ཐ་མལ་པ་ལ་གཏོད་པར་བྱེད་དེ་སྔ་མ་བཞིན་ནོ། །དེ་ནས་གང་ཟག་མི་སྡུག་པ་ལ་གཏོད་པར་བྱེད་དེ་སྔ་མ་བཞིན་ནོ། །གལ་ཏེ་འདི་
ལ་གང་ཟག་ཤ་ཁོན་ཅན་ཞིག་ཡོད་ན། དེ་ལ་འདི་བདེ་བར་གྱུར་ཅིག་སྙམ་པའི་སེམས་བསྐྱེད་པར་བྱ་སྟེ། དེ་ལ་ཡང་ཇི་སྲིད་དུ་སྔ་མ་དག་དང་ལྷན་ཅིག་མཉམ་པའི་སེམས་བསྐྱེད་པ་དེ་སྲིད་དུ་སྐྱེད་པར་བྱེད་དེ། འདི་ཙམ་གྱིས་ན་བྱམས་པའི་སེམས་ཀྱིས་རྣམ་པར་གྲོལ་བ་མཚམས་
ཐ་དད་པ་བསྒོམས་པ་ཡིན་ནོ། །དེ་ཕྱིན་ཆད་ནི་ཕྱོགས་ཁྱད་པར་བྱེད་པའི་དབང་གིས་ཡིད་ལ་བྱེད་པར་རིག་པར་བྱའོ། །སྙིང་རྗེ་ཞེས་བྱ་བ་ནི་གང་ཟག་སྡུག་བསྔལ་བ་མགོན་མེད་པ་སྐྱབས་མེད་པ་ལ་དམིགས་ནས། རིམ་པ་འདི་ཉིད་ཀྱིས་འཇུག་པར་བྱའོ། །འདིའི་ཕན་ཡོན་

ཡང་རྣམ་པར་སྣང་མཛད་ཀྱི་རྒྱུད་ཕྱི་མ་ལས། །གང་གིས་རྟ་དང་འདྲ་བའི་སེམས། །མཉམ་པར་གཞག་པས་བཏུལ་ནས་སུ། །བྱམས་དང་སྙིང་རྗེ་བརྟན་བྱས་ན། །དངོས་གྲུབ་བརྟན་པ་མོད་ལ་ཐོབ། །ཅེས་ཇི་སྐད་གསུངས་
པ་ལྟ་བུའོ། །ཆུས་གདབ་ཞེ་སྡང་ལ་ཞེས་བྱ་བ་ནི་བྱམས་པ་དང་སྙིང་རྗེས་ཞེ་སྡང་གི་མེ་བསད་པ་འམ། ཡང་ན་དགེ་བའི་རྩ་བ་བསྐྱེད་པའི་དོན་ཏོ། །གཏི་མུག་ཅེས་བྱ་བ་ནི་མི་ཤེས་པ་སྟེ། སྒྲུབ་པ་པོ་ལ་ལའི་རྒྱུད་ལ་གཏི་མུག་གི་ཤས་ཆེ་ཞེས་བྱ་བའི་ཐ་ཚིག་གོ། །རྟེན་
འབྲེལ་ལམ་གྱིས་སོ་ཞེས་བྱ་བ་ནི་གཏི་མུག་གི་གཉེན་པོ་སྟེ། འདི་ལྟར་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ནས། སྐྱེ་བའི་རྐྱེན་གྱིས་རྒ་ཤི་ཞེས་བྱ་བའི་བར་དུའོ། །དེ་བཞིན་དུ་མ་རིག་པ་མ་བྱུང་ན་འདུ་བྱེད་རྣམས་ཀྱང་མི་མངོན། སྐྱེ་བ་མ་བྱུང་ན་རྒ་ཤིའི་བར་དུ་ཡང་མི་མངོན་
པ་ཞིག་ན་ཞེས་བྱ་བ་ལ་སོགས་པ་རྒྱས་པར་མདོ་སྡེ་ལས་ཇི་སྐད་འབྱུང་བ་བཞིན་བལྟ་བར་བྱ་སྟེ། འདིར་ནི་ཡི་གེ་མངས་སུ་དོགས་པས་མ་སྤྲོས་སོ། །རེ་ཞིག་ཅིག་ན་དགྲ་ཡང་མཛའ་བོར་འགྱུར། །ཞེས་བྱ་བ་ལ་སོགས་པས་ནི་ངེས་པ་མེད་པར་བསྟན་ཏོ། །བློ་གྲོས་ལྡན་པས་ནམ་ཡང་
ཆགས་མི་བྱ། །ཞེས་བྱ་བ་ནི་སྒྲུབ་པ་པོའི་ཕྱིན་ཅི་ལོག་གི་བློ་བཟློག་པར་རྩོལ་བ་རྣམས་ཀྱིས་ཞེས་བྱ་བའི་ཐ་ཚིག་གོ། །གཉེན་ལ་དགའ་བའི་སེམས་ཀྱི་རྣམ་རྟོག་དག །བཟློག་ནས་ཞེས་བྱ་བའི་ཤུགས་ཀྱིས་ནི་དགྲ་ལ་ཞེ་སྡང་བཟློག་དགོས་པར་ཡང་གོ་བར་བྱའོ། །དེ་ལྟར་ན་དགེ་བ་
ལ་སེམས་ཅི་བདེར་འཇོག་ནུས་ཀྱི་དེ་ལྟ་མ་ཡིན་ཏེ་མཛའ་བ་བཟུང་ན་ནི། ཧ་ཅང་ཡང་བྱེད་འདོད་པར་འགྱུར། མི་མཛའ་བས་བཟུང་ན་ནི། ཐམས་ཅད་ཀྱི་ཐམས་ཅད་དུ་བྱེད་མི་འདོད་པར་གྱུར་པས། རྗེས་སུ་ཆགས་པ་དང་ཁོང་ཁྲོ་བའི་སེམས་གཉིས་དང་ལྡན་པས་ནི་ཆོས་མཉམ་པ་
ཉིད་དེ་ཁོང་དུ་ཆུད་པར་བྱེད་མི་ནུས་སོ། །སྔགས་འཆང་ནམ་ཡང་སྨྲ་བར་མི་བྱའོ། །ཞེས་བྱ་བ་ནི་བཟླས་བརྗོད་ལ་སྦྱོར་བའི་དུས་སུ་ཐམས་ཅད་བཀག་གོ། །ཇི་སྟེ་དགོས་པ་ཡོད་ན་སྔགས་གཡོག་དང་། །བཟླས་བརྗོད་ཟིན་ནས་ཅུང་ཟད་སྨྲ་བར་བྱ། །ཞེས་བྱ་བ་ནི་བསྙེན་པ་ལ་ཞུགས་

པའི་ཚེ་བཟླས་བརྗོད་དང་མདོ་སྡེ་བཀླག་པ་མ་གཏོགས་པའི་ཚིག་མི་སྨྲ་བའི་བརྟུལ་ཞུགས་ལ་གནས་པའི་དུས་སུ་ཡང་ཆེད་ཆེ་བ་ཞིག་ཡོད་ན། །སྔགས་གཡོག་ཁོ་ན་ཅུང་ཟད་སྨྲ་བར་སྐབས་ཕྱེ་བའོ། །མེ་ཏོག་དྲི་སྣོད་ཅེས་བྱ་བ་ལ་སོགས་པས་ནི་ལྷ་མཉེས་པར་བྱ་བའི་དོན་དུ་དགེ་
བ་གང་དང་གང་སྤྱད་པའོ། །སངས་རྒྱས་བྱང་ཆུབ་མཆོག་ཏུ་བསྔོ་བར་བྱ། །ཞེས་བྱ་བ་ནི་ཐབས་མཁས་པར་འབྲས་བུ་ཡོངས་སུ་མི་ཟད་པར་བྱ་བའི་ཕྱིར་རྒྱ་ཆེན་པོར་བསྔོ་བར་བསྟན་ཏོ། །ཆུ་ཀླུང་ཞེས་བྱ་བ་ནི་ཕྱོགས་ཐ་དད་པ་ནས་འབབ་པའི་རོ་སྣ་ཚོགས་དང་ལྡན་པའོ། །རྒྱ་
མཚོར་ཕྱིན་པ་ན། །ལན་ཚྭའི་རོར་ནི་གཅིག་ཏུ་གྱུར། །ཅེས་བྱ་བ་ནི་དེར་སོན་པའི་དབང་གིས་རོ་གཅིག་པར་གྱུར་པར་བསྟན་ཏོ། །དེ་བཞིན་ཞེས་བྱ་བ་ནི་དཔེ་བརྗོད་པ་དེ་བཞིན་དུ་ཞེས་བྱ་བའི་ཐ་ཚིག་གོ། །རྒྱལ་བའི་རོར་ནི་གཅིག་ཏུ་འགྱུར། །ཞེས་བྱ་བ་ནི་ཚུལ་ཁྲིམས་དང་
བརྩོན་འགྲུས་ལ་སོགས་པ་སྒོ་ཐ་དད་པ་ནས་བསྒྲུབས་པ་ཡང་། འབྲས་བུ་སངས་རྒྱས་ཁོ་ནར་འགྲུབ་པར་བསྟན་པའི་དོན་ཏོ། །འབྲས་བུའི་ཕྱིར་སཱ་ལུ་བསྐྱེད་ཀྱིས་ཞེས་བྱ་བ་ལ་སོགས་པས་ནི་དེ་ལྟར་དགེ་བ་སྤྱད་དོ་ཅོག་སངས་རྒྱས་ཉིད་དུ་བསྔོས་ན་ནམ་མཁའ་ལ་འགྲོ་བ་
ལ་སོགས་པའི་རིག་སྔགས་འཆང་དུ་མི་འགྲུབ་པར་དོགས་པའི་རྟོག་པ་བསལ་ཏེ། ཚིག་གི་དོན་གཞན་ནི་གོ་བར་ཟད་དོ། །སོག་མ་དཔེར་བརྗོད་པ་ནི་ལྷ་དང་མིའི་ལོངས་སྤྱོད་ལ་སྙིང་པོ་མེད་པར་ཞར་ལ་བསྟན་པའི་ཐ་ཚིག་གོ། །ཚེ་རིང་བ་ལེགས་པར་ཐོབ་པ་ཞེས་བྱ་བ་ནི་སྲོག་
གཅོད་པ་སྤངས་པའི་འབྲས་བུའོ། །དང་ཞེས་བྱ་བ་ནི་མི་དགེ་བ་ལྷག་མ་དགུ་སྤང་བའི་ཚུལ་ཁྲིམས་ལ་ཡང་དེ་བཞིན་དུ་སྤྲོ་བ་བསྐྱེད་པར་བྱ་བའི་ཐ་ཚིག་གོ། །ཆོས་བཞིན་བསྒྲུབས་ཞེས་བྱ་བ་ནི། དགེ་བ་བཅུའི་ཚུལ་བཞིན་སྤྱོད་པའོ། །ཡུལ་དག་རྙེད་པ་ཞེས་བྱ་བ་ནི་དེའི་དབང་
གིས་མངོན་པར་མཐོ་བའི་དཔལ་མངོན་དུ་ཕྱོགས་པར་འགྱུར་ཞེས་བྱ་བའི་ཐ་ཚིག་གོ། །སྐྱོ་བ་མེད་པར་འགྱུར་ཞིང་ཞེས་བྱ་བ་ནི་དགེ་བ་བཅུའི་འབྲས་བུའི་ཕན་ཡོན་དཔག་ཏུ་མེད་པར་རྫོགས་པའི་ཕྱིར་རྒྱུ་ཉིད་ཟད་མི་ཤེས་པར་བསྔོ་བའི་དོན་ཏོ། །འགྲོ་བའི་བསམ་པ་རྣམས་ནི་རྟག་

ཏུ་རྫོགས་པར་བྱ། །ཞེས་བྱ་བ་ནི་དཔག་བསམ་གྱི་ཤིང་ལྗོན་པའམ་ཡིད་བཞིན་གྱི་ནོར་བུ་ལྟ་བུར་སེམས་ཅན་རྣམས་ཀྱི་རེ་བ་སྣ་ཚོགས་སྐོང་བའི་མཐུ་དང་ལྡན་པར་གྱུར་ཅིག་ཅེས་བསྔོ་བར་བསྟན་ཏོ། །གྲགས་དང་མ་གྲགས་ཞེས་བྱ་བ་ལ་སོགས་པ་ནི་འཇིག་རྟེན་
གྱི་ཆོས་བརྒྱད་བརྗོད་པ་སྟེ། རབ་བཅོམ་སྟེ་ཞེས་བྱ་བ་ནི་མི་རྟག་པ་ལ་སོགས་པ་ལ། དམིགས་པས་སོ་སོར་བརྟག་ཅེས་བྱ་བའི་ཐ་ཚིག་གོ། །སྡིག་པའི་གནས་སུ་གྱུར་པ་ཞེས་བྱ་བ་ནི་འཇིག་རྟེན་པའི་ཕན་ཡོན་གྲགས་པ་ལ་སོགས་པ་ཞིག་བྱུང་ནས་ཆགས་ཤིང་རྒྱགས་པ་ནི་
སྡིག་པའི་གནས་ཡིན་ནོ། །དེ་བཞིན་དུ་འཇིག་རྟེན་པའི་སྐྱོན་མ་གྲགས་པ་ལ་སོགས་པ་རྣམས་བྱུང་བའི་ཚེ། ཞུམ་ཞིང་འཁྲུག་པ་ཡང་སྡིག་པའི་གནས་ཡིན་ནོ། །སྤང་བར་བྱ་ཞེས་བྱ་བ་ནི་ཐམས་ཅད་དུའོ། །ལྷན་ཅིག་མི་གནས་ལྟར་ཞེས་བྱ་བ་ནི་རྒྱ་མཚོ་ཆེན་པོའི་ནང་
དུ་མི་རོ་བོར་ན། ཀླུ་མཐུ་བོ་ཆེ་རྣམས་ཀྱིས་གཅིག་གི་གནས་ནས་གཅིག་ཏུ་ཕུལ་ཏེ། མཐར་ཕྱིན་པ་ནི་དཔེར་བརྗོད་པའོ། །དེ་བཞིན་རྣམ་རྟོག་སེམས་ཀྱིས་སྡིག་བྱས་པ། །ཞེས་བྱ་བ་ནི་ཆགས་པ་ནས་ལེ་ལོའི་བར་གྱིས་དབང་དུ་གྱུར་པའོ། །སྔགས་པ་སྐད་ཅིག་ཙམ་ཡང་གནས་མི་
བྱ། །ཞེས་བྱ་བ་ནི་མ་ཆགས་པ་ནས་བརྩོན་འགྲུས་ཀྱི་བར་གྱིས་གསལ་བར་བྱ་བའི་དོན་ཏོ། །རྩེ་གཅིག་སེམས་ཀྱིས་ཞེས་བྱ་བ་ནི་རྣམ་པར་རྟོག་པས་གླགས་མི་ཐོད་བའི་ཞི་གནས་དང་ལྷག་མཐོང་གིས་འཁྱུད་པའི་ཏིང་ངེ་འཛིན་ཏོ། །ཟློས་ལ་མངོན་པར་དགའ་བ་ཡི། །ཞེས་
བྱ་བ་ནི་བཟླས་བརྗོད་ཤེས་རབ་དང་ལྡན་པས་སྒྲིབ་པ་བསལ་བའི་དབང་གིས་བཟླས་བརྗོད་ལ་ཞེན་ཏེ་ཏིང་ངེ་འཛིན་གྱི་བདེ་བ་དང་ལྡན་ཞེས་བྱ་བའི་ཐ་ཚིག་གོ། །ལུས་ལ་ཆོས་ཀྱང་དེ་བཞིན་འབར་བར་འགྱུར། །ཞེས་བྱ་བ་ནི་ཏིང་ངེ་འཛིན་ཐོབ་པས་སེམས་བྱང་སྟེ། དགའ་བ་ཐོབ་
པའི་དབང་གིས་ལུས་ཀྱང་བྱང་ནས་རིག་སྔགས་འཆང་ལྷའི་གཟུགས་སུ་གྱུར་ཏེ། གཟི་བརྗིད་ཐོབ་བོ་ཞེས་བྱ་བའི་དོན་ཏོ། །གཞན་ནི་གོ་བར་ཟད་དོ། །དེ་ལྟར་བཟླས་བརྗོད་བྱེད་པའི་སྒྲུབ་པ་པོས། །ཉིན་གཅིག་བཞིན་དུ་བྱས་ནས་ཞེས་བྱ་བ་ནི་བསོད་སྙོམས་བླང་བ་དང་།

བཟླས་བརྗོད་བྱ་བ་དང་། མདོ་སྡེ་བཀླག་པ་དང་། མཆོད་རྟེན་གདབ་པ་ལ་སོགས་པའི་དགེ་བ་སྤྱད་པ་འབའ་ཞིག་གིས་ཉིན་པར་གྱི་དུས་འདས་པར་བྱ་བའི་ཐ་ཚིག་གོ། །བཟླས་པ་ཕུལ་ནས་ཞེས་བྱ་བ་ནི་འཕགས་པ་རྨུགས་འཛིན་ལ་སོགས་ཏེ་ནོར་ཅན་གྱི་རིགས་སྒྲུབ་པ་ལ་ནི་བསོད་
ནམས་ཀྱི་ཚོགས་བསྟན་པར་བྱ་བའི་དོན་ཏོ། །བཟླས་བརྗོད་བྱས་པ་རྣམས་གསེར་གྱི་བུམ་པ་རིན་པོ་ཆེ་སྣ་ཚོགས་ཀྱིས་སྤྲས་པའི་ནང་དུ་བཅུག་སྟེ། ཁ་པདྨ་དཀར་པོས་བཅད་ནས་ལྷའི་ཕྱག་ཏུ་དབུལ་བར་བསམ་པར་བྱེད་ཅེས་གྲག་གོ། །གསང་སྔགས་གཞན་ལ་ནི་འདིས་མི་
བསྒྲེ་སྟེ། བཟླས་བརྗོད་བྱས་པའི་བསོད་ནམས་ཀྱི་ཚོགས་འཕེལ་བར་བྱ་བའི་དོན་དུ། རང་གི་ལྷ་ལ་དབུལ་བར་བསྟན་ཏེ། ཇི་སྐད་དུ། སངས་རྒྱས་བཅོམ་ལྡན་འདས་ཐམས་ཅད་ལ་དགེ་བའི་རྩ་བ་ཐམས་ཅད་ཕུལ་ནས། བསོད་ནམས་ཀྱི་ཕུང་པོ་ཡོངས་སུ་བསྡུས་པའི་
བསོད་ནམས་ཀྱི་ཕུང་པོ་དཔག་ཏུ་མ་མཆིས་ཤིང་བསམ་གྱིས་མི་ཁྱབ་པ་དེ་བཞིན་གཤེགས་པའི་ཡེ་ཤེས་ཀྱིས་མཁྱེན་པ་གང་ལགས་པ་དེས་བདག་བརྟན་པར་གྱུར་ནས་ཞེས་བྱ་བ་དང་འདྲའོ། །ནུབ་མོ་ཞེས་བྱ་བ་ནི་ཉིན་པར་མི་ཉལ་བར་བསྟན་ཏོ། །ཀུ་ཤ་བཏིང་ནས་ཉལ་བར་
བྱ། །ཞེས་བྱ་བ་ནི་ཁྲི་ལ་མི་ཉལ་བར་བསྟན་ཏོ། །བྱམས་པ་ཞེས་བྱ་བ་ནི་སེམས་ཅན་རྣམས་བདེ་བ་དང་ཕྲད་པར་ཤོག་ཅིག་པའི་བསམ་པའོ། །སྙིང་རྗེ་ཞེས་བྱ་བ་ནི་སྡུག་བསྔལ་བ་རྣམས་དེ་དང་བྲལ་བར་ཤོག་ཤིག་པའི་བསམ་པའོ། །དགའ་བ་ཞེས་བྱ་བ་ནི་བདེ་བ་རྣམས་
དང་མི་འབྲལ་བར་ཤོག་ཤིག་པའི་བསམ་པའོ། །བཏང་སྙོམས་ཞེས་བྱ་བ་ནི་ཕན་པ་དང་བདེ་བས་གཞན་དག་གི་ཉོན་མོངས་པ་མི་སྐྱེ་བར་བྱ་བའི་ཕྱིར་ཀུན་ནས་ཉོན་མོངས་པ་མེད་པའི་བསམ་པའོ། །ལྡན་ཞེས་བྱ་བ་ནི་རང་གི་ལྷའི་ལྷག་པའི་ཏིང་ངེ་འཛིན་ལ་གནས་པའི་ཞར་
ལ་དེ་རྣམས་རྗེས་སུ་དྲན་པར་བྱ་བ་ཙམ་དུ་ཟད་ཀྱི། རྒྱུན་གྱི་ཏིང་ངེ་འཛིན་རྣམས་རྣམ་པར་ཕྱེ་སྟེ་བསྒོམ་པ་ལྟ་བུ་ནི་མ་ཡིན་ནོ། །བཅས་པར་དྲན་བྱས་ཏེ་ཞེས་བྱ་བ་ནི་ལྷ་དང་གཏོང་བ་དང་ཚུལ་ཁྲིམས་སོ། །ཤཱ་རིའི་བུ་ལ་ཕྱག་འཚལ་ནས་ཉལ་བ་ནི་བསོད་ནམས་འཕེལ་བའི་དོན་དུ་

ཉལ་བ་སྟེ། རིག་པ་མཆོག་གི་རྒྱུད་ཆེན་པོ་ལས། ཐུབ་པ་སངས་རྒྱས་གཉིས་པ་ནི། །འཕགས་པ་ཤ་ར་དྭ་ཏིའི་བུ། །ལྷ་དང་ལྷ་མིན་དྲི་ཟར་བཅས། །ཀླུ་དང་གནོད་སྦྱིན་ཚོགས་ཀྱིས་མཆོད། །ཅེས་གསུངས་པའི་ཕྱིར་རོ། །ང་ལ་ཐལ་སྦྱར་བཏུད་ནས་
ཉལ། །ཞེས་བྱ་བ་ནི་ལོག་འདྲེན་རྨོངས་པར་བྱ་བའི་དོན་དུ་སྟེ། ཡང་རྒྱུད་དེ་ཉིད་ལས། དེ་བཞིན་དམ་པ་གྲུབ་པ་དེ། །རིག་སྔགས་འཆང་ཀུན་དབང་ཕྱུག་རྗེ། །དཔའ་བོ་གཅིག་པོ་དགྲ་ཐུལ་བ། །རྡོ་རྗེ་འཛིན་ལ་ཕྱག་འཚལ་ལོ། །ཞེས་གསུངས་པའི་ཕྱིར་རོ། །སྡིག་པ་
མཐའ་དག་ཟད་པར་བྱ། །ཞེས་བྱ་བ་ནི་རིམ་པ་དེ་རྣམས་སྤྱད་པས་སོ། །ལེའུ་གསུམ་པའི་དོན་བཤད་ཟིན་ཏོ།། །།སོར་བཅུ་ཞེས་བྱ་བ་ལ་སོགས་པས་ནི་རྡོ་རྗེ་རྣམས་ཀྱི་ཚད་བསྟན་ཏོ། །རིག་སྔགས་འཆང་ཉིད་ཅེས་བྱ་བ་ནི་ནམ་མཁར་འགྲོ་བ་ཁོ་ནའོ། །ས་རྣམས་ཐོབ་
པ་ཞེས་བྱ་བ་ནི་ཡུལ་ཐམས་ཅད་ལ་དབང་བའི་རྒྱལ་པོའོ། །རྒྱལ་པོའི་དོན་དུ་ཞེས་བྱ་བ་ནི་རྒྱལ་ཕྲན་དོན་དུ་གཉེར་བའོ། །རིན་ཆེན་འབྱུང་བ་ནི་དེའི་གཏེར་རྒྱ་མཚོ་ཡིན་ནོ། །དོན་ཀུན་སྒྲུབ་པ་ཞེས་བྱ་བ་ནི་ཡུལ་ཐམས་ཅད་ལ། ལྕགས་གསུམ་གྱི་ཞེས་བྱ་བ་ནི་གསེར་དང་
དངུལ་དང་ཟངས་རྣམས་བསྲེས་པའི་རྡོ་རྗེ་ཞེས་བྱ་བའི་ཐ་ཚིག་གོ། །གདོན་གཞན་ཞེས་བྱ་བ་ནི་གནོད་སྦྱིན་མ་གཏོགས་པ་ཐམས་ཅད་དོ། །སེང་ལྡེང་ཞེས་བྱ་བ་ནི་དེའི་རྡོ་རྗེས་གཞོམ་པའི་དོན་ཏོ། །དཔལ་ཞེས་བྱ་བ་ནི་དབང་ཕྱུག་གི་དོན་འབྱོར་པའོ། །ཚེ་ཞེས་བྱ་བ་ནི་
བརྟན་པ་དང་སྲིད་པའོ། །ནོར་རྫས་ཞེས་བྱ་བ་ནི་གཏེར་ལ་སོགས་པ་དང་རྟ་ལ་སོགས་པ་འཕེལ་བར་གྲུབ་པའོ། །ཤ་ཟ་སྒྲུབ་པ་ལ་ཡང་རྟག་ཏུ་ཤིས། །ཞེས་བྱ་བ་ཡང་བ་རུ་རའི་ཤིང་ལས་བྱས་པའི་རྡོ་རྗེ་ཉིད་དོ། །གཟུགས་བསྒྱུར་བ་ཞེས་བྱ་བ་ནི་མི་ལས་བྱོལ་སོང་ལ་
སོགས་པར་བསྒྱུར་ཞིང་བརྫུའོ། །ས་ལས་བྱས་པའི་རྡོ་རྗེ་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། ཆུ་ངོགས་གཉིས་ཀ་ནས་བླངས་པའི་ས་ཞེས་གསུངས་སོ། །ཡིད་དུ་འོང་བའི་འདོད་པ་ཞེས་བྱ་བ་ནི་འདོད་པའི་ཡོན་ཏན་རྣམ་ལྔ་ཡིད་བཞིན་དུ་འབྱོར་པར་སྒྲུབ་

པའོ། །དབྱིབས་ལེགས་ཞེས་བྱ་བ་ནི་ཆུ་ཞེང་འཚམ་པའོ། །འཇམ་ཞིང་ཞེས་བྱ་བ་ནི་བྱི་དོར་ལེགས་པའོ། །མ་ཉམས་ཞེས་བྱ་བ་ནི་མཚན་ཉིད་རྫོགས་པའོ། །ཡང་ན་ཡ་ཡོ་མེད་པའི་དོན་ཏོ། །རྨ་མེད་ཅེས་བྱ་བ་ནི་སེལ་ལམ་འཕན་མེད་པའོ། །རྡོ་རྗེ་རྩེ་ལྔ་ཞེས་བྱ་
བ་ནི་དེ་ཐམས་ཅད་ཀྱི་དབྱིབས་ཏེ་རིགས་ལྔའི་ངོ་བོ་ཉིད་དུ་བསྟན་པའི་དོན་ཏོ། །གཞན་ནི་གོ་བར་ཟད་དོ། །རྡོ་རྗེ་མེད་ན་གྲུབ་པར་མི་འགྱུར་རོ། །ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། རྡོ་རྗེ་དེ་ནི་བཅངས་པ་ཡིས། །བགེགས་དང་ལོག་འདྲེན་
ཐམས་ཅད་དང་། །གང་དག་གནོད་པར་བྱེད་པ་རྣམས། །ཤིན་ཏུ་སྐྲག་ནས་འབྱེར་བར་བྱེད། །ཅེས་བྱ་བ་དང་། དེ་བཞིན་དུ་ལས་ཀྱི་རྡོ་རྗེ་ཞེས་བྱ་སྟེ། དེ་ཉིད་སྨད་ཀྱི་ལས་ཀྱང་བྱེད། །འདི་ནི་སྒྲུབ་པ་པོ་རྣམས་ཀྱི། །གསང་ཞིང་ཕྲ་བ་གཅིག་པུར་བསྒྲགས། །ཞེས་
གསུངས་པའི་ཕྱིར་རོ། །ཁུ་ཚུར་བཅངས་ནས་ཞེས་བྱ་བ་ནི་རིག་སྔགས་འཆང་དངོས་གྲུབ་ལ་མི་རྩོལ་བ་རྣམས་ཀྱི་ངོར་གསུངས་སོ། །ལྡོང་རོས་ཞེས་བྱ་བ་ལ་སོགས་པས་ནི་སྒྲུབ་པ་པོའི་རྫས་ཀྱི་མཚན་ཉིད་བསྟན་ཏེ། དེ་ཡང་ཆོ་ག་ཞིབ་མོ་ཁ་ཅིག་ཏུ་གསང་སྔགས་
གསུངས་ལ། རྫས་གང་ལས་སྒྲུབ་པ་མ་གསུངས་པ་དང་། གཞན་དག་ཏུ་རྫས་ཐམས་ཅད་ལ་སྒྲུབ་ཅེས་ཁུངས་ཕྱུང་ལ། རྫས་དངོས་སུ་མ་བསྟན་པ་རྣམས་སྤྱིའི་རྒྱུད་འདི་དང་སྦྱར་རོ། །རྫས་ནི་བཅུ་བདུན་སྒྲུབ་པ་པོ་དེ་རྣམས་ཀྱིས། །ཞེས་བྱ་བ་ནི་གྲངས་ངེས་པ་སྟེ་དེ་དག་
བལྟ་བ་དང་། གཟུང་བ་དང་། སྦྱང་བ་དང་། རབ་ཏུ་གྲུབ་པར་བྱེད་པ་དང་། རིག་པ་མཆོག་གི་རྒྱུད་ཆེན་པོ་དེ་དག་ལས་འབྱུང་སྟེ། འདིར་ཡི་གེ་མངས་སུ་དོགས་ནས་མ་སྤྲོས་སོ། །གྲུབ་པ་རྣམ་པ་གསུམ་རྣམས་གྲུབ་པར་བྱེད། །ཅེས་བྱ་བ་ནི། དེ་དག་སྦྱངས་ནས་བསྒྲུབས་
ན་འབར་བ་དང་། དུད་པ་འབྱུང་བ་དང་། ཚེའི་བྱེ་བྲག་གིས་རབ་དང་འབྲིང་དང་ཐ་མའི་དངོས་གྲུབ་ཐོབ་པའི་དོན་ཏོ། །རང་སྔགས་ཆོ་གར་ལྷག་པར་བཤད་པ་གང་། །ཞེས་བྱ་བ་ནི་སོ་སོའི་ཆོ་ག་ཞིབ་མོ་དག་ཏུ་འདིར་མ་སྨོས་པའི་རྫས་ཞིག་བྱུང་ན་ཡང་སྒྲུབ་ཏུ་རུང་ཞེས་བྱ་བའི་ཐ་ཚིག་

གོ། །དེར་ཡང་གྲུབ་པ་རྣམ་པ་གསུམ་དུ་མཐོང་། །ཞེས་བྱ་བ་ནི་རྫས་བཅུ་བདུན་ལས་ལྷག་པའི་འགལ་བ་མེད་དེ། །དངོས་གྲུབ་ཏུ་གྱུར་པར་བསྟན་ཏོ། །བགེགས་དང་ལོག་འདྲེན་གྲུབ་པར་མི་དགའ་བ། །ཞེས་བྱ་བ་ནི་དེ་དག་གི་རང་བཞིན་བསྟན་ཏོ། །རིག་
པའི་ཚོགས་རྣམས་ཀྱི་ནི་མདུན་ནས་རྒྱུ། །ཞེས་བྱ་བ་ལ་སོགས་པས་ནི་དེ་དག་གི་སྤྱོད་པ་བསྟན་ཏོ། །རྣམ་པ་བཞི་ཡོད་དེ་ཞེས་བྱ་བ་ནི་དེ་དག་གི་རིགས་ཀྱི་སྡོམ་སྟེ། འོག་ནས་རིགས་གཉིས་འབྱུང་བས་བསྣན་ན་རིགས་དྲུག་ཏུ་བགེགས་ཐམས་ཅད་འདུས་སོ། །འཇིག་རྟེན་སྐྱོང་
བ་བཞི་ཞེས་བྱ་བ་ནི་རྒྱལ་པོ་ཆེན་པོ་བཞིའོ། །དེ་དག་གཡོག་འཁོར་ཞེས་བྱ་བ་ནི་རྒྱལ་པོ་ཆེན་པོ་བཞིའི་གཡོག་འཁོར་དུ་གཏོགས་པའོ། །མྱ་ངན་མེད་པ་ཞེས་བྱ་བ་ཡང་དེ་ཉིད་དེ་བགེགས་ཀྱི་རིགས་རྣམས་འཇིག་ཅེས་བྱ་བའི་སྡེ་དཔོན་མིང་ངོ་། །དེ་ཡི་གཡོག་འཁོར་བྱེ་བ་
ཕྲག་བདུན་རྣམས། །ཞེས་བྱ་བ་ནི་རྣམ་པར་འཇིག་གི་རིགས་ལ་གཏོགས་པ་མྱ་ངན་མེད་པའི་གཡོག་གི་གྲངས་སོ། །དེ་དག་གསང་སྔགས་སྒྲུབ་ལ་བགེགས་བྱེད་དོ། །ཞེས་བྱ་བ་ནི་རྒྱལ་པོ་ཆེན་པོ་བཞི་ཡིས་གསང་སྔགས་སྒྲུབ་པ་རྣམས་ལ་བགེགས་བྱེད་པའི་དོན་ཏོ། །
ས་སྟེངས་མཐའ་དག་ཀུན་དུ་བགེགས་ཀྱང་བྱེད། །ཅེས་བྱ་བ་ནི་རང་གི་རིགས་དང་གཞན་ལ་ཡང་བྱེད་དེ། འཇིག་རྟེན་ལས་འདས་པ་དང་འཇིག་རྟེན་པ་ཐམས་ཅད་ལ་ཡང་གོ་བར་བྱའོ། །གཞན་ནི་གོ་སླ་བས་མི་ཕྱེའོ། །ཁྲོས་ཤིང་འཁྲུགས་ནས་ཕྱིར་ཡང་ཕྱོགས་པར་
འགྱུར། །ཞེས་བྱ་བ་ནི་བགེགས་ཀྱི་དབང་དུ་གྱུར་པའི་ཉེས་དམིགས་བསྟན་པ་སྟེ། བདག་དང་གནས་དང་རྫས་རྣམས་བསྲུང་བར་གསུངས་པ་རྣམས་ཁྱད་དུ་བསད་དེ་མ་བྱས་པས་དངོས་གྲུབ་ཀྱི་སྣོད་དུ་མི་རུང་བའི་དོན་ཏོ། །སེམས་ནི་འཇུངས་ཤིང་ཞེས་བྱ་བ་ནི་སེར་སྣའི་
དབང་གིས་གཞན་གྱི་འབྱོར་པ་མི་བཟོད་པའོ། །རྨོངས་པ་ཞེས་བྱ་བ་ནི་བླུན་པས་མ་དཔྱད་པར་བྱས་པའོ། །ལྷ་ཞེས་བྱ་བ་ནི་བགེགས་སྤྲུལ་པར་བྱིན་གྱིས་རློབ་པ་རྣམས་སོ། །ལོག་འདྲེན་བགེགས་ཀྱི་ལུགས་འདི་གཏོད། །ཅེས་བྱ་བ་ནི་ཕྲག་དོག་གི་བར་གཏོད་པའི་དོན་ཏོ། །

རིག་པ་མཆོག་གི་རྒྱུད་ཆེན་པོ་ལས། ཇི་སྐད་དུ། ལྷ་རྣམས་ལ་ཡང་ལྷ་མིན་རྣམས། །འཐབ་པའི་ཕྱིར་ནི་དང་བ་ལྟར། །སེམས་ཅན་རྣམས་ལ་བགེགས་བྱེད་ཕྱིར། །དེ་བཞིན་བགེགས་རྣམས་འབྱུང་བར་འགྱུར། །ཞེས་གསུངས་སོ། །རྣམ་པར་སྣང་མཛད་མངོན་པར་
རྫོགས་པར་བྱང་ཆུབ་པའི་རྒྱུད་ཆེན་པོ་ལས་ནི་གཞན་དུ་བཀའ་སྩལ་ཏེ། སྔོན་ཆད་སེར་སྣ་བསྟེན་པའི་ཕྱིར། །བགེགས་ནི་རང་གི་སེམས་ལས་བྱུང་། །ཞེས་གསུངས་སོ། །གཉེན་པོ་ཡང་དེ་ཉིད་ལས་ཇི་སྐད་དུ། དེ་ཡི་རྒྱུ་ནི་གཞིག་པའི་ཕྱིར། །གང་དུ་སེམས་དང་སེམས་
འབྱུང་བའི། །རྟོག་པ་ཐམས་ཅད་སྤོང་བ་དང་། །རྣམ་པར་རྟོག་པ་ལས་བྱུང་བའི། །སྤྲོས་པ་ཐམས་ཅད་འགག་འགྱུར་བ། །བྱང་ཆུབ་སེམས་ཞེས་བཤད་པ་ཡིན། །ཞེས་གསུངས་ཏེ། དེ་དང་ཡང་སྦྱར་བར་བྱའོ། །བཟློག་མི་ནུས་ཞེས་བྱ་བ་ནི་བགེགས་མི་བྱེད་པའི་ལུགས་
སྡོད་པར་མི་ནུས་པའི་དོན་ཏོ། །བགེགས་ཀྱིས་འཇིགས་སུ་རུང་བ་བྱས་པ་དག །ཅེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས་ཇི་སྐད་དུ། ལོག་འདྲེན་དེ་དག་ནི་བསོད་ནམས་ཀྱང་ཟད་པར་བྱེད་དེ། ལོག་འདྲེན་རྣམས་ཀྱིས་རེག་པ་ཙམ་གྱིས་ལྷའི་ལོ་སྟོང་གི་བར་དུ་ཕ་
རོལ་ཏུ་ཕྱིན་པ་དྲུག་བསགས་པའི་བསོད་ནམས་ཀྱི་ཕུང་པོ་ཡང་ཐལ་བར་རློག་པར་བྱེད་ཅིང་། རིག་སྔགས་སྒྲུབ་པའི་བསོད་ནམས་ཀྱང་ཟད་པར་བྱེད་དེ། དེས་ན་རིག་སྔགས་འགྲུབ་པར་མི་འགྱུར་རོ་ཞེས་གསུངས་སོ། །སྔར་བཤད་པ་ནི་དེ་དག་ཟློག་པར་བྱེད། །ཅེས་བྱ་བ་
ལ་སོགས་པས་ནི་གོང་དུ་བཟླས་བརྗོད་དང་དཀྱིལ་འཁོར་དུ་འཇུག་པར་གསུངས་པ་དག་གོ། །གཞན་ནི་གོ་བར་ཟད་དོ། །འདི་ལྟར་ཕན་ཚུན་དུ་ནི་འགྲོ་བ་ན། །རིག་པ་འདོན་པའི་སེམས་ནི་གཡེང་བར་བྱེད། །ཅེས་བྱ་བ་ནི་བགེགས་འཇུག་ཅེས་བྱ་བར་གོ་བར་བྱ་སྟེ། རྒྱུད་དེ་ཉིད་
ལས། ངེས་པར་གནས་པ་ལ་ཡང་གནས་ནས། གནས་སུ་འགྲོ་བ་ལ་ཡང་གོམ་པ་རེ་རེ་ལ་ལོག་འདྲེན་རྣམས་གླགས་ཚོལ་བའི་ཕྱིར་འཁོད་པ་ཡང་ཡོད་དོ་ཞེས་གསུངས་སོ། །དཔེར་ན་ཆུ་ནང་གྲིབ་མ་སྣང་བ་ལྟར། །ཞེས་བྱ་བ་ནི་གྲིབ་མ་ཆུའི་ནང་དུ་འབྱུང་བ་ན།

ཐོགས་པའམ་སོང་བའི་རྗེས་ཤུལ་མི་སྣང་བར་གཏིང་དུ་ཕྱིན་ཏོ། །དེ་བཞིན་མི་ཡི་ལུས་ལ་འཇུག་པར་འགྱུར། །ཞེས་བྱ་བ་ཡང་ཐོགས་པ་མེད་ཅིང་རྨ་མེད་པར་འཇུག་པའི་དོན་ཏོ། །འཁྲུ་ཚེ་གཞན་ལ་ཞེས་བྱ་བ་ལ་སོགས་པ་ནི་བགེགས་ཀྱི་རིགས་དྲུག་
སོ་སོ་ལ་ཡང་ཁྱད་པར་དུ་བགེགས་བྱེད་པ་རྣམས་ཀྱིས་རང་བཞིན་བསྟན་པ་སྟེ་ཚུལ་ནི་འོག་ནས་འཆད་དོ། །མ་བརྩལ་མེ་ནི་འབྱུང་བ་ལྟར། །ཞེས་བྱ་བ་ནི་རང་དབང་མེད་པར་འབྱུང་བའི་དཔེའོ། །འདོད་ཆགས་མེ་ཆེན་ཞེས་བྱ་བ་དེས་དགེ་བའི་རྩ་བ་ཐམས་ཅད་བསྲེག་པའི་དོན་
ཏོ། །གཡོ་ཞིང་འགུལ་བ་ཞེས་ནི་བྱ་བའི་བགེགས། །ཞེས་བྱ་བ་ལ་སོགས་པས་ནི་ཁྱད་པར་དུ་བགེགས་བྱེད་པ་དེ་དག་སྒྲུབ་པ་པོ་ལ་འཛིན་པའི་དུས་དང་། ཟིན་པའི་མཚན་མ་བསྟན་པ་སྟེ་ཚིག་གི་དོན་ནི་གོ་སླ་བས་མ་ཕྱེའོ། །བགེགས་ཀྱིས་བརླམས་པ་ཞེས་བྱ་བ་ནི་དེས་ཟིན་
ནས་མིའི་རང་བཞིན་གྱུར་པའོ། །ཕྱོགས་ན་ལམ་མིན་ལམ་དུ་མཐོང་། །ཞེས་བྱ་བ་ནི་ལོག་པའི་སྤྱོད་པ་ལ་འཇུག་པའོ། །གཞན་ནི་གོ་བར་ཟད་དོ། །བགེགས་དང་ལོག་འདྲེན་རྣམ་པར་གཞིག་པའི་ཕྱིར། །ཞེས་བྱ་བ་ནི་དེ་དག་གཞོམ་པའི་དོན་དུ་ཞེས་བྱ་བའི་ཐ་ཚིག་གོ། །བདུད་རྩི་
ཐབ་སྦྱོར་དྲག་ཤུལ་ལས་ཅན་སྦྱོར། །སྔགས་པ་དེ་ཡིས་གསང་སྔགས་ལམ་ཞུགས་པ། །ཞེས་བྱ་བ་ཡང་རྒྱུད་དེ་ཉིད་ལས། །དེ་བས་ན་རིག་སྔགས་འཆང་གིས་ཉི་མ་ཤར་ཕྱོགས་སུ་ཁ་བལྟས་ལ། རྟག་ཏུ་ཆུ་ཁྱོར་བ་གང་གཏོར་ནས་ཁྲོ་བོའི་གསང་སྔགས་ཀྱང་ལན་བདུན་བརྗོད་
པར་བྱ་སྟེ། ཇི་སྐད་དུ། བདག་མིང་འདི་ཞེས་བྱ་བ་རིག་སྔགས་ཆེ་གེ་མོ་ཞིག་སྒྲུབ་ཀྱིས་ཁྱེད་ཡིད་དགའ་བར་གྱིས་ཤིག་ཅེས་སྨྲ་བར་བྱའོ། །བགེགས་དང་ལོག་འདྲེན་རྣམས་ཀྱིས་ཡང་མི་ཚུགས། །ཞེས་བྱ་བ་ནི་བདུད་རྩི་ཐབ་སྦྱོར་གྱི་ལམ་དུ་ཞུགས་པའི་ཕན་ཡོན་བསྟན་པ་སྟེ།
ཡང་རྒྱུད་དེ་ཉིད་ལས་དེས་ལོག་འདྲེན་རྣམས་དགའ་ཞིང་མགུ་ལ་ཡིད་དགའ་བར་འགྱུར་ཏེ། དངོས་གྲུབ་སྦྱིན་པར་བྱེད་ཅིང་སེམས་ཀྱང་དང་བར་འགྱུར་རོ་ཞེས་གསུངས་སོ། །བགེགས་ཀྱི་རྣམ་གྲངས་མང་པོ་དེ་དག་གི་ངོ་ལོན་དང་གཉེན་པོ་ཐ་དད་པ་ཡང་རྒྱུད་དེ་ལས་རྒྱས་པར་སོ་

སོར་ཕྱེ་སྟེ་བསྟན་པ་རྣམས་འདིར་ཡི་གེ་མངས་སུ་དོགས་ཏེ་མ་སྤྲོས་པས་རྒྱུད་ཉིད་ལས་བལྟ་བར་བྱའོ། །ཕྱུགས་ལྷས་ཞེས་བྱ་བ་ལ་སོགས་པས་ནི་དབང་བསྐུར་བའི་གནས་བསྟན་ཏོ། །ཤིང་གཅིག་ཅེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཀུན་དུ་ཟླུམ་པོའི་ཤིང་
དྲུང་ངམ། །ཞེས་གསུངས་སོ། །གཞན་ནི་གོ་བར་ཟད་དོ། །དཀྱིལ་འཁོར་གྲུ་བཞི་ལྷམ་པ་ཁྲུ་བཞིའི་ཚད། །ཅེས་བྱ་བ་ནི་དཀྱིལ་འཁོར་གྱི་ཕྱིའི་རྒྱའི་ར་བའི་ཚད་དོ། །ཚོན་རྩི་རྣམ་པ་སྣ་ཚོགས་ཞེས་བྱ་བ་ནི་དཀར་པོ་དང་དམར་པོ་དང་སེར་པོ་དང་ལྗང་གུ་དང་ནག་པོ་རྣམས་ཏེ།
དེ་ཡང་དབུས་སུ་ནི་ཁྲུ་ཕྱེད་པའི་ས་ཁྲུ་དོ་དོར་རོ། །ཕྱོགས་ཀྱི་ལྷ་རྣམས་གནས་ནི་ཡོངས་སུ་གཟུང་། །ཞེས་བྱ་བ་ནི་དེའི་ཕྱི་རིམ་ཁྱོན་ཁྲུ་གང་ཞིག་ཡོད་པའི་སུམ་ཆ་འཁོར་སར་གཞག་སྟེ། སུམ་གཉིས་ལ་ལྷ་རྣམས་དགོད་པ་ནི་གསང་བའི་དཀྱིལ་འཁོར་ལས། ཇི་སྐད་དུ།
བརྒྱ་བྱིན་གྱི་ནི་རྡོ་རྗེར་གསུངས། །མེ་ལྷའི་ཕྱག་རྒྱ་ཞུགས་ཐབ་ཡིན། །གཤིན་རྗེའི་ཕྱག་རྒྱ་བེ་ཅོན་ཡིན། །བདེན་བྲལ་གྱི་ནི་རལ་གྲི་ཡིན། །ཆུ་བདག་གི་ནི་ཞགས་པར་བཤད། །རླུང་གི་ཕྱག་རྒྱ་རྒྱལ་མཚན་ཡིན། །ཀུ་བེ་ར་ཡི་དབྱུག་ཏོ་ཡིན། །དབང་ཕྱུག་གི་ནི་རྩེ་གསུམ་
གསུངས། །ས་ཡི་ཕྱག་རྒྱ་བུམ་པ་ཡིན། །ཉི་ཟླའི་ཕྱག་རྒྱ་ཟླུམ་པོར་བྱ། །ཞེས་གསུངས་ཏེ། ཤར་ཕྱོགས་ནས་བརྩམ་པར་བྱའོ། །ཟླ་བ་ནི་མདུང་རྩེ་གསུམ་པ་དང་རྡོ་རྗེའི་བར་དུ་གཞག་སྟེ་དཀར་པོར་བྱའོ། །ཉི་མ་ནི་རལ་གྲི་དང་ཞགས་པའི་བར་དུ་གཞག་སྟེ་ཤིན་ཏུ་དམར་
པོར་བྱའོ། །སའི་ལྷ་མོའི་བུམ་པ་ནི་ཞགས་པ་དང་རྒྱལ་མཚན་གྱི་བར་དུ་གཞག་གོ། །སྒོ་བཞི་པ་ལ་ཞེས་བྱ་བ་ཡང་རྒྱུད་དེ་ཉིད་ལས། དབུས་སུ་སྒོ་ནི་གདོད་པར་བྱ། །ངོས་གཉིས་སུ་ནི་ཚད་དག་ཀྱང་། །བཞི་བཞི་དག་ནི་དོར་བར་བྱ། །ཞེས་གསུངས་སོ། །ཀུ་ཤའི་རྩྭ་ཡང་
དགྲམ་ཞེས་བྱ་བ་ནི་དཀྱིལ་འཁོར་གྱི་རི་མོ་ལ་མ་བབ་པའི་ཐ་མ་ཐོག་ཐག་རྩེ་མོས་རྩ་བ་མནན་ནས་བསྐོར་རོ། །བཟའ་བ་ཞེས་བྱ་བ་ནི་ཁུར་བ་སྣ་ཚོགས་སོ། །ཤ་ཆང་ལ་ཕུག་ཅེས་བྱ་བ་ནི་སྤྱིར་སྨོས་ཀྱང་། ལྷ་གཞན་ལ་སྦྱིན་པར་བྱ་བ་མ་ཡིན་ཏེ། གཤིན་རྗེ་དང་བདེན་བྲལ་ལ་

སྦྱིན་ནོ། །འབྲས་བུ་མང་པོ་ཞེས་བྱ་བ་ནི་ཤིང་ཐོག་སྣ་ཚོགས་སོ། །གཏོར་མ་སྦྱིན་ཞེས་བྱ་བ་ནི་གཏོར་མ་དེ་དག་སྦྱར་ནས་འཁོར་བའི་སྣམ་བུ་ལ་སོ་སོའི་མདུན་དུ་དབབ་བོ། །བུམ་པ་ཞེས་བྱ་བ་ནི་ཚད་དང་དབྱིབས་ནི་འདིར་ཡི་གེ་མངས་སུ་དོགས་ནས་མ་སྤྲོས་ཏེ།
འགྲོ་ལྡིང་གི་བུམ་པའི་ཆོ་ག་ལས་བལྟ་བར་བྱའོ། །པདྨ་དམར་པོའི་མདོག་འདྲ་བ། །ཞེས་བྱ་བ་ནི་སོ་བཏང་ལེགས་པས་ཁ་དོག་དམར་པོར་གྱུར་པའོ། །ནག་པོ་ར་རི་མེད་ཅེས་བྱ་བ་ནི་སོ་བཏང་ཉེས་པའི་སྐྱོན་མེད་པའོ། །རིན་ཆེན་བཅས་ཞེས་བྱ་བ་ནི་གསང་བའི་དཀྱིལ་
འཁོར་ལས་ཇི་སྐད་དུ། བྱི་རུ་དང་ནི་ས་ལེ་སྦྲམ། །དུང་དང་མུ་ཏིག་ནོར་བུ་སྟེ། །རིན་ཆེན་ཀུན་ཞེས་བྱ་བ་ལ། །ལྔ་པོ་འདི་དག་ཤེས་པར་བྱ། །ཞེས་གསུངས་སོ། །སྨན་དང་ཞེས་བྱ་བ་ཡང་དེ་ཉིད་ལས། །སིང་ཧ་བྱ་ཀྲྀ་ཀ་ར་ཎི། །ཧ་ས་ཧ་ས་དེ་བ་སྟེ། །སྨན་རྣམས་ཀུན་ཞེས་
བྱ་བ་ལ། །ལྔ་པོ་འདི་དག་ཤེས་པར་བྱ། །ཞེས་གསུངས་སོ། །འབྲུ་དང་ཞེས་བྱ་བ་ཡང་དེ་ཉིད་ལས། །འབྲས་ཀྱི་སོ་བ་མོ་སྲན་གྲེའུ། །ནས་དང་ཏིལ་དང་གྲོ་དང་ལྔ། །འབྲུ་རྣམས་ཀུན་ཞེས་བྱ་བ་ནི། །ལས་རྣམས་ཀུན་ལ་འདི་དག་གཟུང་། །ཞེས་གསུངས་སོ། །སྤོས་ཆུས་
བཀང་ཞེས་བྱ་བ་ནི་འཕགས་པ་འཇམ་དཔལ་གྱི་རྒྱུད་ཆེན་པོ་ལས། ཙནྡན་དང་ག་པུར་དང་གུར་ཀུམ་གྱིས་བསྲེ་བ་གསུངས་སོ། །བཞི་ཞེས་བྱ་བ་ནི་བུམ་པ་རེ་རེའི་ནང་དུ་ལྷ་རེ་རེ་སྤྱན་འདྲེན་པའི་ཕྱིར་རོ། །ལྡུམ་བུས་ཁ་བཀང་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། འོ་མ་
ཡོད་པའི་ཤིང་གི་ཡལ་གས་ཁ་བརྒྱན་པར་གསུངས་སོ། །རས་ཀྱིས་མགུལ་བ་དཀྲིས་ཞེས་བྱ་བ་ནི་རས་ཕྲན་དཀར་པོ་ཁ་ཚར་མ་གོད་པ་ཁྱེའུ་གཙང་གིས་མགྲིན་པ་བཅིང་བའི་དོན་ཏོ། །ལུས་དམར་པོ་དང་ཀི་ལི་ཀི་ལི་དང་། །འགྲོ་ལྡིང་བའི་ཞེས་བྱ་བའི་ལྷ་འདི་དག་ནི་ཕྱག་ན་
རྡོ་རྗེའི་ཐུགས་ཀྱི་རང་བཞིན་སྙིང་པོ་ཞེས་བྱ་སྟེ། གཏན་ཚིགས་ནི་འོག་ནས་འཆད་དོ། །སོགས་པ་ཞེས་བྱ་བ་ནི་འཕགས་པ་སྟོབས་པོ་ཆེ་ལས་རིག་པར་བྱ་སྟེ། འོག་ནས་སྦྱིན་སྲེག་གི་སྐབས་སུ་ཡང་ལས་ཐམས་ཅད་ལ་སྦྱར་བར་འབྱུང་སྟེ། ཇི་སྐད་དུ། མེ་ཡི་མཚན་མ་འདི་

རྣམས་མཐོང་ནས་ནི། །སྟོབས་པོ་ཆེ་ཡིས་མར་གྱི་སྦྱིན་སྲེག་བྱ། །ཞེས་འབྱུང་བས་ལྷ་གཞན་མ་ཡིན་པར་མངོན་ནོ། །ཁྲོ་བོ་སྔ་མ་གསུམ་པོ་ནས་བཟླས་པ་ཡང་མ་ཡིན་ཏེ། བུམ་པ་བཞི་ཡོད་ལ། བཟླས་བརྗོད་བྱེད་ཅིང་བུམ་པ་རེ་རེས་བཀྲུ། །ཞེས་འབྱུང་བ་དང་
འགལ་བའི་ཕྱིར་རོ། །བརྒྱར་བཟླས་ཏེ་ཞེས་བྱ་བ་ནི་བུམ་པ་རེ་རེ་ལ་ལྷ་རེ་རེས་བརྒྱ་རྩ་བརྒྱད་བཟླས་པའི་དོན་ཏོ། །ཁོར་ཡུག་ཏུ་ནི་གཞག་པར་བྱ། །ཞེས་བྱ་བ་ནི་ཁྲུས་བྱེད་པའི་ས་བོར་བའི་ཕྱི་རིམ་གྱི་གྲྭ་བཞིར་ཡང་ཀུ་ཤ་བཏིང་ནས་དེའི་སྟེང་དུ་བུམ་པ་གཞག་སྟེ་དེའི་ནང་དུ་ཁྲོ་བོ་རྣམས་སྤྱན་དྲང་
ངོ་། །དེའི་ནང་དུ་སྤྱན་དྲང་བར་ཅི་མངོན་ཞེ་ན། ལས་ཀྱི་ཕྲེང་བ་ལས། འཇིག་རྟེན་དབང་ཕྱུག་ཆུ་དབུས་སྤྱན་དྲངས་ཏེ། །ཞེས་གསུངས་པ་དེ་དང་མཐུན་པའི་ཕྱིར་རོ། །དེ་ལྟ་བས་ན་བུམ་པ་དེ་དག་ཀྱང་ཡིད་བཞིན་གྱི་མཚོ་བདུད་རྩིའི་ཆུས་གང་བར་བསམས་ལ། དེ་ལ་
གནས་རྣམས་བཀོད་དེ་འཕགས་པ་རྣམས་མཆོད་ཡོན་ནམ་གསང་སྔགས་ཀྱིས་སྤྱན་དྲང་ངོ་། །དེ་ནས་བྱུག་སྤོས་བདུག་སྤོས་ལ་སོགས་དབུལ། །ཞེས་བྱ་བ་ནི་དེ་དག་གཤེགས་པར་རིག་པ་དང་མཆོད་པ་རྣམ་ལྔ་རིམ་པ་བཞིན་དུ་དབུལ་བའི་དོན་ཏོ། །དེ་ནས་ཕྱོགས་སྐྱོང་
དག་ལ་ཡང་གཏོར་མ་བསྔོས་ནས་བཟླས་བརྗོད་བརྩམ་པར་བྱའོ། །བཟླས་བརྗོད་ཟིན་ནས་ཕྱོགས་ཀྱི་ལྷ་རྣམས་དགའ་བར་བྱ་བའི་ཕྱིར་རིག་པ་མཆོག་གི་རྒྱུད་ཆེན་པོ་ལས། དེ་དག་ལས་བསྟོད་པའི་ཚིག་འབྱུང་བ་བརྗོད་པར་བྱ་སྟེ། འདིར་ཡི་གེ་མངས་སུ་དོགས་པས་མ་སྤྲོས་སོ། །
བདེ་བའི་སྟན་ལ་གཞག་ཅེས་བྱ་བ་ནི་དཀྱིལ་འཁོར་གྱི་དབུས་སུ་ཀུ་ཤའི་ཁྲེས་ཅིག་གཞག་ལ། དེའི་སྟེང་དུ་ནད་པ་གཞག་གོ། །བཟླས་བརྗོད་བྱེད་ཅིང་བུམ་པ་རེ་རེས་བཀྲུ། །ཞེས་བྱ་བ་ནི་ལྷ་གང་གི་བཟླས་པའི་བུམ་པ་དེ་ཆུ་བླུགས་པ་ནི་དེ་ཉིད་ཀྱི་གསང་སྔགས་བརྗོད་པའི་དོན་
ཏོ། །འོན་ཀྱང་ལོག་འདྲེན་རྣམས་ལས་ཐར་བར་འགྱུར། །ཞེས་བྱ་བ་ནི་བགེགས་ཀྱིས་ཟིན་པའམ། མ་ཟིན་པ་རྣམས་ཀྱིས་ལས་འདི་བྱས་ན་ཡང་ཕྱིས་མི་ཚུགས་པར་ཐར་པའོ། །སྒྲུབ་པ་པོ་ཡི་མིང་ནི་འབའ་ཞིག་ལ། །བགེགས་རྣམས་གཞིག་ཕྱིར་ཕན་པར་མ་ཟད་ཀྱི། །ཞེས་

བྱ་བ་ལ་སོགས་པས་ནི་ཞར་གྱི་ཕན་ཡོན་བསྟན་ཏེ། ཚིག་གི་དོན་གཞན་ནི་གོ་བར་ཟད་དོ། །བུ་མོ་དག་ཅེས་བྱ་བ་ནི་མི་ལ་མ་སོང་བའོ། །བུད་མེད་ཕལ་ཞེས་བྱ་བ་ནི་སྨད་འཚོང་མའོ། །ལེའུ་བཞི་བའི་དོན་བཤད་ཟིན་ཏོ།། །།རྣམ་པར་བསལ་ཏེ་ཞེས་བྱ་བ་ནི་
བགེགས་དང་བྲལ་བའི་དབང་གིས་སྡིག་པའི་དྲི་མ་མེད་དེ་སེམས་ཀྱི་རྒྱུད་དང་ཞེས་བྱ་བའི་ཐ་ཚིག་གོ། །ཆོ་ག་ཉམས་དང་ཞེས་བྱ་བ་ནི་སྐད་ཅིག་གསུངས་པའི་ཆོ་ག་རྣམས་མ་ལྕོགས་པར་ཟློས་པའོ། །ཡི་གེ་གུག་སྐྱེད་མེད་ཅེས་བྱ་བ་ནི་ལྷག་པ་དང་ཆད་པས་དབྱིངས་དང་རྣམ་པར་ཐར་པའི་
སྒོ་སྟོན་པའི་དོན་གྱིས་སྒྲ་གཞན་དུ་གྱུར་བའི་ཕྱིར་རོ། །མཆོད་པ་མེད་ཅེས་པ་ནི་མ་འབྱོར་པའོ། །མི་གཙང་ཞེས་བྱ་བ་ནི་ཕྱི་ནང་གི་དྲི་མ་མ་བསལ་བའོ། །དངོས་གྲུབ་རྒྱ་ཆེན་མི་སྟེར་རོ། །ཞེས་བྱ་བ་ནི་སྐྱོན་གོང་མ་རྣམས་དང་མ་བྲལ་བའི་ཉེས་པས་ཞེས་བྱ་བའི་ཐ་ཚིག་གོ། །ཆར་པ་
ལེགས་པར་འབེབས་ཞེས་བྱ་བ་ནི་ལོ་ལེགས་པའི་སྐལ་བ་དང་ལྡན་པ་རྣམས་ཀྱི་ཡུལ་དུའོ། །མི་ཡི་སྐལ་བ་དང་ལྡན་པ་ཞེས་བྱ་བ་ནི་ཚེ་འདི་དང་གཞན་དུ་སྤྱད་པའི་བསོད་ནམས་ཀྱི་འཕྲོ་ཡོད་པའོ། །འདོད་པ་བཞིན་དུ་ཞེས་བྱ་བ་ནི་ནམ་མཁའ་ལ་འགྲོ་བ་ལ་སོགས་པ་སྒྲུབ་པ་
པོ་གང་ལ་རེ་བའི་འབྲས་བུ་ཐོབ་པའི་དོན་ཏོ། །ཡུལ་ཞེས་བྱ་བ་ནི་རབ་ཏུ་གྲུབ་པའི་རྒྱུད་ཆེན་པོ་ལས་ཇི་སྐད་དུ། གང་དུ་བདུད་བཞི་བཏུལ་ནས་ནི། །བཅོམ་ལྡན་མངོན་པར་སངས་རྒྱས་པར། །དངོས་གྲུབ་མང་པོ་ཀུན་གྱི་མཆོག །རྨད་བྱུང་གོ་འཕང་ཐོབ་གྱུར་པ། །ཞེས་བྱ་བ་
ལ་སོགས་པའོ། །དུས་ཞེས་བྱ་བ་ཡང་རྒྱུད་དེ་ཉིད་ལས། །ཇི་སྐད་དུ། དགུན་ཟླ་ཐ་ཆུངས་སྟོན་ཟླ་འབྲིང་། །དཔྱིད་ཟླ་ར་བ་འབྲིང་པོ་དང་། །དབྱར་ཟླ་ར་བའི་ཉ་ལ་ཡང་། །སྒྲུབ་པ་ཆེན་པོ་བརྩམ་པར་བྱ། །ཞེས་གསུངས་པའོ། །ཆོ་ག་ཞེས་བྱ་བ་ནི་ལྷ་གཟི་བྱིན་བསྐྱེད་པ་ལ་སོགས་
པའོ། །ལས་ཞེས་བྱ་བ་ནི་རྣམ་པ་བཞིའོ། །སྡིག་པ་བྱང་ཞེས་བྱ་བ་ནི་བཟླས་བརྗོད་དང་བསམ་གཏན་དང་དཀའ་ཐུབ་ལ་སོགས་པས་འབྱང་བའི་དོན་ཏོ། །བསོད་ནམས་བསགས་པ་ཞེས་བྱ་བ་ནི་ཚུལ་ཁྲིམས་རྣམ་པ་གསུམ་པོ་ལ་གནས་ཤིང་ཕ་རོལ་ཏུ་ཕྱིན་པ་རྣམས་དང་ལྡན་པའོ། །

གུས་པ་ཞེས་བྱ་བ་ནི་ལྷ་དང་བླ་མ་ལ་ཡིད་ཆེས་པས། ནན་ཏན་ངེས་པར་བྱེད་པར་འགྱུར་བའི་དོན་ཏོ། །བཟླས་བརྗོད་ཅེས་བྱ་བ་ནི་ཡན་ལག་དང་ལྡན་པར་བྱེད་ཅེས་བྱ་བའི་ཐ་ཚིག་གོ། །ཇི་ཙམ་སྡིག་པ་མང་པོ་ཞེས་བྱ་བ་ལ་སོགས་པས་ནི་སྔ་མའི་ཡོན་ཏན་ལས་བཟློག་པའི་སྐྱོན་
རྣམས་བརྗོད་པའོ། །བར་ཆད་སྔགས་གཞན་བཟླས་ཞེས་བྱ་བ་ནི་སྒྲུབ་པ་པོ་བློ་ཙམ་ལ་མ་ཕེབས་པ་ཁ་ཅིག་ལྷ་ལ་ལྷའི་ཡོན་ཏན་མྱུར་མྱུར་སྐད་འབྱུང་བ་དག་ཐོས་ནས། རང་གི་ཁྱད་པར་གྱི་ལྷ་བཏང་སྟེ། དེའི་གསང་སྔགས་ཟློས་པའོ། །བཟླས་པ་བཏང་ཞེས་བྱ་བ་ནི་བསྙེན་པའི་
གྲངས་ཚང་ནས་སྒྲུབ་པའི་དུས་ལ་སྡོད་པའི་སྐབས་སུ་སྟེ། རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། སྔོན་དུ་བསྙེན་པ་རྫོགས་པ་ལ། །མི་ནུས་ན་ནི་དུས་གཅིག་གམ། དུས་གཉིས་སུ་ནི་ཆོ་ག་བསྒོམ། །ཞེས་བྱ་བ་དེ་མ་ཟློས་པའོ། །གཞན་ལ་བྱིན་ཞེས་བྱ་བ་
ནི་བདག་གིས་བསྙེན་པ་བྱས་པ་རྣམས་གཞན་དངོས་གྲུབ་ཐོབ་པར་བསྔོས་ནས་སྦྱིན་པའོ། །དེས་ཇི་ལྟར་ཕན་ཐོགས་པར་འགྱུར་ཞེ་ན། འཕགས་པ་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། ཇི་སྐད་དུ། ལས་གཞན་གྱིས་བྱས་ལ་འབྲས་བུ་གཞན་སྤྱོད་པའི་དཔེ་
འཁོར་ལོས་སྒྱུར་བའི་རྒྱལ་པོ་དང་ཞིང་པ་བརྗོད་པ་ལྟ་བུར་གོ་བར་བྱའོ། །དུས་གསུམ་མཆོད་པ་ལ་ནི་བརྩོན་བྱས་ནས། །སླར་ཡང་འབུམ་བཟླས་ཞེས་བྱ་བ་ནི་གོང་དུ་སྨོས་པའི་སྐྱོན་དེ་དག་བྱུང་ནས། སླར་བསབ་པར་འདོད་པས་སྔོན་དུ་བསྙེན་པ་བྱས་པ་རྣམས་ཀྱང་བརྡེག་
བསྣུན་ཏེ། སྔོན་པས་ཀྱང་མཆོད་པའི་བུངས་བསྐྱེད། ཡོ་བྱད་བཟང་དུ་བསྟར་ནས་བསབ་པའི་དོན་དུ་འབུམ་བཟླས་བརྗོད་བྱ་བར་བསྟན་ཏོ། །སྒྲུབ་ལ་འཇུག་པར་བྱ་ཞེས་བྱ་བ་ནི་དེ་ལྟར་ཉེས་པ་བསབ་ནས། དེའི་འོག་ཏུ་བསྙེན་པའི་མགོ་གཟུགས་ཞེས་བྱ་བའི་ཐ་ཚིག་གོ། །སྟོང་
ཕྲག་ཅེས་བྱ་བ་ནི་ཐམས་ཅད་ལ་སྦྱར་རོ། །བཅུ་ཞེས་བྱ་བ་ནི་དངོས་གྲུབ་རབ་ཀྱི་དོན་དུའོ། །བརྒྱད་དམ་བདུན་ཞེས་བྱ་བ་ནི་འབྲིང་ལས་དགོངས་པའོ། །བཞི་ཞེས་བྱ་བ་ནི་དངོས་གྲུབ་ཐ་མ་སྒྲུབ་པ་རྣམས་ཀྱི་གྲངས་སོ། །བཟླས་མཐར་ཞེས་བྱ་བ་ནི་བསབ་པའི་དོན་དུ་བཟླས་བརྗོད་

འབུམ་བྱེད་པའི་ཚེ། འབུམ་གྱི་གྲངས་མ་ཚང་གི་བར་དུ་བཟླས་བརྗོད་དུས་གསུམ་དུ་བྱེད་པར་མཇུག་ཐོགས་སུ་སྦྱིན་སྲེག་བྱ་དགོས་པར་བསྟན་པའོ། །མར་གྱི་སྦྱིན་སྲེག་བྱ་ཞེས་བྱ་བ་ནི་དེའི་ཚེ་མར་འབའ་ཞིག་གི་སྦྱིན་སྲེག་བྱ་བར་གསུངས་སོ། །ཡང་ན་ཞེས་བྱ་
བ་ལ་སོགས་པས་ནི་མར་འབའ་ཞིག་གི་སྦྱིན་སྲེག་ལས་རྣམ་པ་གཞན་དུ་ཡང་བསྟན་ཏོ། །འཛམ་བུ་མ་ནུ་ཞེས་བྱ་བ་ལ་སོགས་པས་ནི་ཡམ་ཤིང་གི་རིགས་བསྟན་ཏོ། །ཡམ་ཤིང་གཞོན་ནུ་ཞེས་བྱ་བས་ནི་མཚན་ཉིད་བསྟན་ཏོ། །སོར་བཅུ་གཉིས་པའི་ཞེས་བྱ་བས་ནི་ཚད་བསྟན་ཏོ། །
ཞོ་མར་སྦྲང་རྩི་ལ་བཏགས་ནས། །ཞེས་བྱ་བ་ནི་བསབ་པའི་དོན་དུ་སྦྱིན་སྲེག་བྱེད་པ་རྒྱས་པའི་ལས་དང་སྦྱར་དགོས་པའི་ཕྱིར་རོ། །ང་ཡི་མདུན་དུ་ཞེས་བྱ་བ་ནི་ཕྱག་ན་རྡོ་རྗེའི་སྐུ་གཟུགས་ཀྱི་དྲུང་གཡོན་ལེགས་སུ་བཞག་པའི་དོན་ཏོ། །མངོན་དུ་ཕྱོགས་པར་བཞག་ཅེས་བྱ་བ་ནི་འཇིམ་
གཟུགས་དེའི་ཞལ་ཡང་ཕྱག་ན་རྡོ་རྗེ་ལ་བསྟན་པའི་ཐ་ཚིག་གོ། །ཀི་ལི་ཀི་སོགས་ཞེས་བྱ་བ་ནི་གོང་དུ་བུམ་པའི་ཆོ་ག་ལས་འབྱུང་བའི་ལྷ་བཞི་པོ་རྣམས་སོ། །སྙིང་པོས་མར་དང་འོ་མ་ཞེས་བྱ་བ་ནི་མར་དང་འོ་མ་གཙང་མས་བུམ་པ་བཀང་ལ། ལྷ་དེ་རྣམས་ཀྱི་སྙིང་པོ་བརྒྱ་རྩ་
བརྒྱད་བཟླས་པའི་དོན་ཏོ། །དེའི་གཟུགས་བརྙན་བཀྲུ་ཞེས་བྱ་བ་ནི་འཇིམ་གཟུགས་དེ་དུས་གསུམ་དུ་བཟླས་པའི་མར་དང་འོ་མས་བཀྲུ་བའི་དོན་ཏོ། །དེ་ལྟར་ཞག་བདུན་བྱས་ནས་ཞེས་བྱ་བ་ནི་ཞག་བདུན་དུ་དུས་གསུམ་དུ་བཀྲུས་པས་གཟུགས་བརྙན་དེ་ཡང་འཇིག་པར་འགྱུར་
ཏེ་ཞེས་པའི་རྫས་དང་། བཀྲུ་བའི་རྫས་བཅས་ཏེ། ཆུ་ཀླུང་ཆེན་པོར་དོར་རོ། །དེའི་གཟུགས་ཞེས་བྱ་བ་ནི་རང་གི་ལྷའི་གཟུགས་སྤྲ་ཚིལ་ལས་བྱས་པའོ། །མདའ་དུག་དང་སྐེ་ཚེས་བྱུགས་ནས་ཞེས་བྱ་བ་ནི་དེའི་ལྡེ་གུས་གཟུགས་བརྙན་བསྐུ་བའི་དོན་ཏོ། །ཀི་ལི་ཀི་ལ་འགྲོ་
ལྡིང་ལ་སོགས་པའི། །སྔགས་ཀྱིས་ཞེས་བྱ་བ་ཡང་། གོང་མའི་ལྷ་བཞི་པོ་དེ་རྣམས་ཉིད་དེ། ལྷ་དེ་རྣམས་དྲག་པོའི་ཚུལ་གྱིས་དྲག་པོའི་ཐབ་ཏུ་སྤྱན་དྲངས་ལ། རང་གི་ལྷ་ལ་དྲག་ཤུལ་མཛོད་ཅིག་ཅེས་གསོལ་བ་གདབ་པའི་དོན་ཏོ། །དེ་ལ་ཞེས་བྱ་བ་ནི་རང་གི་ལྷའི་གཟུགས་

བརྙན་ནོ། །ཡུངས་མར་ཚ་བ་དང་སྦྱར་ཞེས་བྱ་བ་ནི་དེའི་དུམ་བུར་བཅད་ནས་ཡུངས་མར་ཚྭ་དང་བསྲེ་བའི་ཐ་ཚིག་གོ། །ཞག་བདུན་དུས་གསུམ་སྦྱིན་སྲེག་ལས་བྱས་ན། །ཞེས་བྱ་བ་ནི་གཟུགས་ཀྱི་དུམ་བུ་དེ་དང་དྲག་པོའི་རྫས་རྣམས་བསོགས་ལ་དྲག་པོའི་བསྐུལ་ཚིག་བཅུག་སྟེ།
སྦྱིན་སྲེག་བྱ་བའི་དོན་ཏོ། །གསང་སྔགས་འོངས་ནས་རྨི་ལམ་དག་ཏུ་ནི། །ཞེས་བྱ་བ་ནི་དྲག་ཤུལ་སྤྱད་པའི་རྗེས་ལ་ངེས་པར་ལྷ་བྱོན་ཏེ་སྟོན་པའི་ཐ་ཚིག་གོ། །ཆོ་ག་ཉམས་པའམ་ཡི་གེ་ལྷག་ཆད་སྟོན། །ཞེས་བྱ་བ་ནི་གསང་སྔགས་ཀྱི་ལྷ་རྣམས་ཀྱང་ཐུགས་རྗེ་ཆེན་པོ་དང་
ལྡན་པས་ཆོ་ག་མ་ཉམས་ན། དངོས་གྲུབ་མི་སྟེར་མི་སྲིད་པས་སྒྲུབ་པ་པོས་ཆོ་ག་ཉམས་པ་འགའ་ཞིག་ངོས་མ་ཟིན་པར་དྲག་ཤུལ་གྱི་ལས་བྱས་ཏེ་བསྐུལ་བས་གང་ཉེས་པ་དེ་སྟོན་པར་འགྱུར་ཞེས་བྱ་བའི་དོན་ཏོ། །ཇི་ལྟར་རྒྱ་མཚོ་དུས་ལས་མི་འདའ་ལྟར། །ཞེས་བྱ་བ་ནི་
ཆོས་ཉིད་དེ་གཞན་དུ་འགྱུར་མི་སྲིད་པར་བསྟན་པའོ། །སྔགས་ཀྱིས་གཞན་གྱི་གསང་སྔགས་མི་གནོན་ཅིང་། །ཞེས་བྱ་བ་ལ་སོགས་པས་ནི་གསང་སྔགས་མཐུ་ཆེ་བར་བསྟན་པའི་སྐབས་སུ། དེ་ལྟར་ལས་སྣ་ཚོགས་འགྲུབ་ནུས་པར་བརྡ་སྤྲད་ཀྱིས་ཀྱང་། དེ་དག་གཅིག་
ལ་གཅིག་གནོད་པ་མི་མཛད་ཅེས་བྱ་བའི་ཐ་ཚིག་གོ། །དཔེ་ནི་གོ་སླ་བས་མ་ཕྱེའོ། །དེ་བཞིན་ཞེས་བྱ་བ་ནི་དེའི་ཕྱིར་ཞེས་བྱ་བའི་དོན་ཏོ། །སྔགས་པས་གང་ཡང་རུང་བའི་སྔགས་བཟླས་ནས། །ཞེས་བྱ་བ་ནི་གསང་སྔགས་གདུག་པ་གང་ཡང་རུང་བའོ། །གཞན་གྱི་གསང་
སྔགས་མནན་མི་བྱ། །ཞེས་བྱ་བ་ནི་ཕྲག་དོག་གི་དབང་གིས་སྒྲུབ་པ་པོ་གཞན་དངོས་གྲུབ་ཐོབ་ཏུ་དོགས་ནས། དེའི་ལྷ་ལ་ཕུར་བུས་འདེབས་པ་དག་དགག་པར་བསྟན་ཏོ། །གསང་སྔགས་བཅད་དང་བཅིང་བར་མི་བྱ་ཞིང་། །ཞེས་བྱ་བ་ཡང་དེའི་དངོས་གྲུབ་བཀག་པའི་དོན་དུ། གཞན་གྱི་
ལྷའི་གཟུགས་བརྙན་ནམ་རྩྭ་ཀུ་ཤ་ལས་མཚོན་རྣོན་པོས་གཅོད་པ་དང་། དེའི་གཟུགས་བརྙན་ཚོན་སྣ་ལྔའི་སྐུད་པས་འཆིང་བ་ལྟ་བུའི་ལས་དྲག་པོ་བྱེད་དུ་མ་གནང་བའི་དོན་ཏོ། །ཡི་གེ་ལྷག་ཆད་གསང་སྔགས་མི་སྦྱིན་ནོ། །ཞེས་བྱ་བ་ནི་སེར་སྣའི་ཐ་བ་དང་མ་བྲལ་

བས་གཞན་མི་འགྲུབ་པར་བྱ་བའི་དོན་དུ། གསང་སྔགས་ཀྱི་ཡི་གེ་འབྲུ་བསྣན་པའམ། ཕྲི་སྟེ་སྦྱིན་པ་དགག་པར་བསྟན་པའོ། །ལས་རྣམས་སྤྱད་པས་གཞན་དུ་བསྒྱུར་མི་བྱ། །ཞེས་བྱ་བ་ནི་ཞི་བའི་ལས་བྱེད་འདོད་པ་རྣམས་ལ་མི་འགྲུབ་པར་བྱ་
བའི་དོན་དུ། དྲག་པོ་ལ་སོགས་པའི་ཚུལ་དུ་མན་ངག་ལོག་པར་མི་བསྟན་ཏོ་ཞེས་བྱ་བའི་ཐ་ཚིག་གོ། །གནས་རྣམས་གཟིར་བར་ནམ་ཡང་མི་བྱའོ། །ཞེས་བྱ་བ་ནི་ཀླུ་ལ་སོགས་པ་གནས་པའི་ས་གཞི་ལ། དེ་དག་གཙེ་བའི་དོན་དུ་གསང་སྔགས་དྲག་པོའི་ཕུར་བུས་
གདབ་པ་ལ་སོགས་མི་བྱ་བར་བསྟན་ཏོ། །གཞན་ནི་གོ་སླ་བར་ཟད་དོ། །དངོས་གྲུབ་ཕྱིར་ནི་རྣམ་པ་བཅུར་གསུངས་ཏེ། །ཞེས་བྱ་བ་ནི་སྒྲུབ་པ་པོ་ལ་ལའི་ལུགས་ལས་གཙོ་བོ་བཅུར་འདོད་ཅེས་བྱ་བའི་ཐ་ཚིག་གོ། །དེ་ཡང་སྔགས་པ་དང་ཞེས་བྱ་བ་ནི་སྒྲུབ་པ་པོའི་སྐྱེས་བུའོ། །རང་
སྔགས་ཞེས་བྱ་བ་ནི་བསྒྲུབ་པར་བྱ་བའི་ཁྱད་པར་གྱི་ལྷའོ། །གཡོག་ཅེས་བྱ་བ་ནི་སྒྲུབ་པ་པོའི་གྲོགས་མཆོག་གོ། །རྫས་ཞེས་བྱ་བ་ནི་ལྡོང་རོས་ལ་སོགས་པའོ། །བརྩོན་འགྲུས་ཞེས་བྱ་བ་ནི་སྦྱོར་བ་ལ་སོགས་པའོ། །ཕྱོགས་ཞེས་བྱ་བ་ནི་དབུས་ལ་སོགས་པའི་ཡུལ་ལོ། །ས་གཞི་
ཞེས་བྱ་བ་ནི་རིའི་རྩེ་མོ་ལ་སོགས་པའི་གནས་སོ། །དུས་ཞེས་བྱ་བ་ནི་དཔྱིད་ཟླ་ལ་སོགས་པ་དང་། སྔ་དྲོ་ལ་སོགས་པའོ། །ཡན་ལག་རྫོགས་པའི་ལྷ་ཞེས་པ་ནི་རི་མོ་དང་ཤིང་གཟུགས་ལ་སོགས་པའོ། །སེམས་སྟོབས་ཞེས་བྱ་བ་ནི་འཇིགས་པ་མེད་ཅིང་སྲན་ཆེ་བའོ། །ཚིག་གི་
དོན་ལྷག་མ་ནི་གོ་བར་ཟད་དོ། །བཅུ་ཞེས་བྱ་བ་ནི་བཤད་པ་ཐ་མའོ། །བརྒྱད་ཅེས་བྱ་བ་ནི་བཅུ་པོ་དེ་དག་ལས་ཐ་མ་གཉིས་ཕྲི་བའོ། །ལྔ་ཞེས་བྱ་བ་ནི། གཞན་དག་ཁ་ཅིག་རིག་འཛིན་གྲོགས་ཞེས་ཟེར། །གཞན་དག་ཕྱོགས་དང་བརྩོན་འགྲུས་དུས་རྣམས་ཉིད། །ཅེས་བྱ་བ་འདི་ཉིད་ཀྱིས་
བསྟན་པར་རིག་པར་བྱའོ། །བཞི་ཞེས་བྱ་བ་ནི། །གཞན་ནི་རྫས་དང་ས་གཞིའི་ལྷ་དང་སྔགས། །ཞེས་བྱ་བ་དེ་ཉིད་ཀྱིས་བསྟན་ཏོ། །གསུམ་ཞེས་བྱ་བ་ནི་ལྔ་པོའི་གྲངས་སུ་སྨོས་པའི་རྐང་པ་འོག་མ། གཞན་དག་ཕྱོགས་དང་བརྩོན་འགྲུས་དུས་རྣམས་ཉིད། །ཅེས་བྱ་བས་བསྟན་ཏོ། །

གཅིག་ཅེས་བྱ་བ་ནི། ཁ་ཅིག་སེམས་སྟོབས་ཡིན་ཞེས་རྣམ་པར་སྨྲ། །ཞེས་བྱ་བས་བསྟན་ཏོ། །སྔགས་རིག་རང་རང་བློ་ཡིས་རྣམ་པར་འཆད། །ཅེས་བྱ་བ་ནི་དེ་བཞིན་གཤེགས་པ་འཇིག་རྟེན་དུ་མ་བྱུང་བའི་ཚེ་འཇིག་རྟེན་པའི་ལྷ་དེ་དག་གིས་སོ་སོར་བརྟགས་ཞེས་བྱ་བའི་ཐ་ཚིག་གོ། །
སངས་རྒྱས་རྒྱུད་ལ་ཆོ་ག་གཉིས་ཀྱིས་འགྲུབ། །ཅེས་བྱ་བ་ནི་ཤིན་ཏུ་རིགས་པར་གསུངས་ཞེས་བྱ་བའི་དོན་ཏོ། །དེ་ཡང་སྒྲུབ་པ་གང་ཞིག་རང་གི་ཡོན་ཏན་རྫོགས། །ཞེས་བྱ་བ་ལ་སོགས་པ་དང་། གུག་སྐྱེད་ཀླད་ཀོར་ཚེག་ཚང་ཟུར་ཕྱིན་ལ། །གསང་སྔགས་དག་ཅིང་ཤིན་ཏུ་ཆོ་
གར་བཅས། །ཞེས་བྱ་བ་འདི་གཉིས་གཙོ་བོར་གཞག་གོ། །ཕྱི་རོལ་པ་རྣམས་ཀྱིས་ནི་ཐམས་ཅད་གཙོ་བོར་བཞག་པས། གཙོ་བོ་དང་ཡན་ལག་ཅེས་བྱེ་བྲག་དབྱེར་མེད་པ་ཉིད་ཀྱིས་ཉེས་པར་བཤད་པ་ཡིན་ནོ། །གནས་ཞེས་བྱེ་བྲག་ཏུ་སྨོས་པ་ནི་ཡན་ལག་གི་ནང་ནས་གཅེས་
པར་དགོངས་པའི་ཕྱིར་རོ། །གཞན་ནི་གོ་བར་ཟད་དོ། །གླིང་བུའི་སྒྲ་དང་ཞེས་བྱ་བ་ལ་སོགས་པས་ནི་ཆགས་པ་དང་གནོད་པའི་སྒོ་ནས་གཡེང་བའི་རྒྱུར་འགྱུར་བའི་ཕྱིར་སྤང་བར་དགོངས་པའོ། །མི་མྱུར་ཞེས་བྱ་བ་ནི་བཟླས་བརྗོད་ཟུར་མི་ཕྱིན་པ་དགག་པར་བསྟན་ཏོ། །མི་ངལ་
ཞེས་བྱ་བ་ནི་སེམས་གཞན་དུ་གཡེང་བའི་སྐྱོན་དུ་འགྱུར་བའི་ཕྱིར་རོ། །སྒྲ་ཆེར་མི་འབྱུང་ཞེས་བྱ་བས་ནི་རྒོད་པའི་སྐྱོན་བཟློག་པར་བསྟན་ཏོ། །ཧ་ཅང་ཆུང་བར་མིན་ཞེས་བྱ་བས་ནི་བྱིང་བའི་སྐྱོན་དགག་པར་བསྟན་ཏོ། །སྨྲ་བཞིན་མིན་ཞེས་བྱ་བ་ནི་གསང་སྔགས་ཀྱི་ཚིག་བདེན་པར་བྱིན་
གྱིས་བརླབས་པ་འདོན་པ་ན་ཚིག་གཞན་དང་འདྲེས་ན་དངོས་གྲུབ་ཏུ་མི་འགྱུར་བས་དེ་དགག་པར་བསྟན་ཏོ། །གཞན་དུ་ཡེངས་བཞིན་མིན་ཞེས་བྱ་བ་ནི་ལྷའི་སྐུ་དང་ཟླ་བའི་དཀྱིལ་འཁོར་ལ་ཡི་གེའི་ཕྲེང་བ་བཀོད་པ་དང་། ཡི་གེའི་སྒྲ་ལ་མ་གཏོགས་པར་གཞན་དུ་ཡེངས་པར་
མི་བྱ་བའི་དོན་ཏོ། །གུག་སྐྱེད་ཀླད་ཀོར་ཚེག་རྣམས་ཉམས་པར་མིན། །ཞེས་བྱ་བ་ནི་དམིགས་པ་དང་འདོན་པ་གཉི་ག་ལའོ། །ཇི་ལྟར་ཆུ་ཀླུང་ཉིན་མཚན་རྟག་ཏུ་ནི། །ཞེས་བྱ་བ་ལ་སོགས་པ་ནི་བྱེ་བྲག་ཏུ་སྨྲ་བའི་སྡོམ་པ་དང་། སྡོམ་པ་མ་ཡིན་པ་ཡང་དག་པར་བླངས་པ་ལས་

སྐྱེས་པའི་རྣམ་པར་རིག་བྱེད་མ་ཡིན་པའི་གཟུགས་གནས་པ་དང་འདྲ་བར་འདིར་ཡང་དགེ་བའི་བག་ཆགས་ཀྱི་རྒྱུན་གནས་པ་ཉིད་དུ་བཞེད་དོ། །ལེ་ལོ་ཞེས་བྱ་བ་ནི་དགེ་བ་ལ་སེམས་མངོན་པར་སྤྲོ་བ་མེད་པ་སྟེ། གཉིད་དང་གློས་ཕབ་སྟེ་ཉལ་བ་དང་། བསོད་
སྙོམས་ལ་བརྟེན་ནས་སྙོམ་པའི་དབང་དུ་གྱུར་པའོ། །འདོད་ཆགས་ཞེས་བྱ་བ་ནི་བུད་མེད་ལ་སོགས་པ་ལ་སེམས་མངོན་པར་ཕྱོགས་པའོ། །མི་དགེར་ལྡན་པའི་སེམས་ཞེས་བྱ་བ་ནི་དེ་དག་དང་ཆ་མཐུན་པ་གཞན་རྣམས་དང་ཉེ་བའི་ཉོན་མོངས་པ་ཐམས་ཅད་དོ། །བཟློག་
ནས་ཞེས་བྱ་བ་ནི་སྐབས་འདིར་གཉེན་པོ་ལ་བརྟེན་པར་བྱ་བ་མ་ཡིན་གྱི་དགག་པར་བསྟན་ཏོ། །གསང་སྔགས་ཡི་གེ་མཆོད་ལ་སྦྱར་བར་བྱ། །ཞེས་བྱ་བ་ནི་ཕྱག་རྒྱ་དང་གསང་སྔགས་དང་ཡིད་དང་ཟང་ཟིང་གི་མཆོད་པ་རྣམས་ནི་སྐབས་འདིར་མི་སྲིད་པས་ནན་ཏན་
གྱིས་གུས་པར་བཟླས་བརྗོད་བྱེད་པ་ཉིད་འཕགས་པ་དགྱེས་པའི་མཆོད་པ་ཞེས་གདགས་སོ། །སྣ་རྩེར་བལྟ་ཞིང་ཞེས་བྱ་བ་ནི་མིག་ཟམ་ཟིམ་དུ་བལྟས་ཏེ། སྣའི་རྩེ་མོ་ལ་བལྟ་བར་དམིགས་པ་ཉེ་བར་གཞག་ན། སེམས་གཞན་དུ་མི་གཡེང་ཞེས་བྱ་བའི་ཐ་ཚིག་གོ། །
རྣམ་པར་རྟོག་པ་སྤང་ཞེས་བྱ་བ་ནི་གང་ལ་དམིགས་པའི་ཏིང་ངེ་འཛིན་གྱི་ཡུལ་ལས་སེམས་གཞན་དུ་མ་འཕྲོས་པར་གཞག་པའི་དོན་ཏོ། །ནམ་ཞིག་བསྐྱོད་ཀྱང་རྣམ་པར་མི་གཡོ་བ། །ཞེས་བྱ་བ་ནི་རྣལ་འབྱོར་པ་སེམས་མཉམ་པར་གཞག་པ་དེ་གོམས་པའི་ཤུགས་
ཀྱིས་སྒྲ་ལ་སོགས་པའི་རྐྱེན་ཅི་བྱུང་ཡང་གང་ལ་དམིགས་པའི་ཏིང་ངེ་འཛིན་ལས་མི་གཡོ་བའོ། །དེ་ཚེ་དམིགས་ལ་གནས་པ་ཐོབ་པ་སྟེ། །ཞེས་བྱ་བ་ནི་ཏིང་ངེ་འཛིན་གྱི་མིང་དེ་སྐད་ཅེས་གདགས་པ་ཐོབ་ཅེས་བྱ་བའི་ཐ་ཚིག་གོ། །སེམས་ནི་ལས་སུ་རུང་བར་གྱུར་པ་
དེས། །ཞེས་བྱ་བ་ནི་དེ་ནས་བསྙེན་པ་ལ་འཇུག་པའི་ལས་བྱར་རུང་བའི་དོན་ཏོ། །རྩེ་གཅིག་སེམས་དང་ལྡན་པ་ཞེས་བྱ་བ་ལ་སོགས་པས་ནི་བསམ་གཏན་ཐོབ་པའི་ཕན་ཡོན་བསྟན་ཏོ། །དེ་ཚེ་བཟླས་བརྗོད་ཐོགས་པ་མེད་པར་འགྱུར། །ཞེས་བྱ་བ་ནི་སེམས་ལས་སུ་རུང་བའི་

བཟླས་བརྗོད་རྣམས་བསྙེན་པའི་གྲངས་སུ་ཆུད་དེ། དངོས་གྲུབ་ཀྱི་དོན་ལ་ཆུད་མི་ཟ་ཞེས་པའི་ཐ་ཚིག་གོ། །གཞན་ནི་གོ་བར་ཟད་དོ། །བཅོམ་ལྡན་རྒྱལ་བའི་དབང་པོ་ཡིས། །ཞེས་བྱ་བ་ནི་ལུང་ཤིན་ཏུ་དག་པ་ལས་ཁུངས་ཕྱུང་བའོ། །ཆོས་འདི་ཀུན་ཞེས་བྱ་བ་ནི་ཀུན་ནས་ཉོན་མོངས་
པ་དང་རྣམ་པར་བྱང་བ་ཐམས་ཅད་དོ། །རྩ་བ་སེམས་ཞེས་གསུངས་ཞེས་བྱ་བ་ནི་ཁམས་གསུམ་པའི་སེམས་དང་སེམས་ལས་བྱུང་བ་སྟེ། དེའི་རང་བཞིན་ངོ་བོ་ཉིད་གསུམ་པོ་ཀུན་བརྟགས་པ་དང་། གཞན་གྱི་དབང་དང་། ཡོངས་སུ་གྲུབ་པ་སྟེ། དེར་ཆོས་ཐམས་ཅད་ཀྱི་དེ་ཁོ་ན་འདུས་
པའི་ཕྱིར་རོ། །དེར་ཆོས་ལྷ་མིའི་བདེ་བ་ཞེས་བྱ་བ་ནི་དེ་དག་གིས་ལོངས་སྤྱད་པའོ། །མཐོ་རིས་ཞེས་བྱ་བ་ནི་འགྲོ་བའི་རིས་ཀྱིས་མཐོ་བའོ། །བྱང་གྲོལ་ཞེས་བྱ་བ་ནི་ཕྱོགས་གཅིག་པའི་མྱ་ངན་ལས་འདས་པའོ། །སེམས་རབ་ཏུ་དང་བ་ཞེས་བྱ་བ་ནི་སྒྲིབ་པ་རྣམ་པ་གཉིས་སྤངས་པས་
གནས་གྱུར་ཞེས་བྱ་བའི་ཐ་ཚིག་གོ། །ས་ཆུ་མེ་རླུང་དང་བྲལ་ཞེས་བྱ་བ་ནི་ཆོས་སྐུའི་ངོ་བོ་ཉིད་ཐོབ་པའི་ཕྱིར་རོ། །སྐྱེ་བ་དང་རྒས་པ་དང་འཆི་བ་དང་བྲལ་ཞེས་བྱ་བ་ནི་དེ་ལ་དབང་ཐོབ་པའི་དོན་ཏོ། །སོགས་པ་ཞེས་བྱ་བ་ནི་ན་བ་དང་ཡང་བྲལ་བར་བསྟན་ཏོ། །ཐོག་མ་དང་བར་དང་ཐ་
མར་གནོད་པ་ཀུན་དང་བྲལ་བ་ཞེས་བྱ་བ་ནི་ཆོས་ཀྱི་དབྱིངས་ལ་གནས་པ་དེ་དུས་གསུམ་ལས་འདས་པའི་ཕྱིར་རོ། །རྣམ་པར་གྲོལ་བ་ཞེས་བྱ་བ་ནི་ཁམས་གསུམ་པའི་འཆིང་བའི་རྒྱུ་བཅད་པའི་དོན་ཏོ། །བདེ་ཞིང་ཞི་བར་ཐོབ་བར་འགྱུར། །ཞེས་བྱ་བ་ནི་མི་གནས་པའི་མྱ་ངན་ལས་
འདས་པ་ཐོབ་པ་སྟེ། ཇི་སྐད་དུ། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །འཁོར་བའང་ཞི་བའི་བདག་ཉིད་དེ། །དེ་ཕྱིར་དེ་བཞིན་གཤེགས་བསམ་ཡས། །ཞེས་བཤད་པའི་ཕྱིར་རོ། །གསང་སྔགས་དངོས་གྲུབ་ཀུན་དང་ཐུན་མོང་བ། །ཞེས་
བྱ་བ་ནི། འཇིག་རྟེན་པ་དང་འཇིག་རྟེན་ལས་འདས་པ་གཉིས་ཀས་སྒྲུབ་ཏུ་རུང་བའི་དོན་ཏོ། །བདེ་བ་ཆུང་ཞིང་ཞེས་བྱ་བ་ནི་མྱ་ངན་ལས་འདས་པ་ལ་ལྟོས་ན་མི་བདེ་བར་འགྱུར་ཏེ། རིག་པ་མཆོག་གི་རྒྱུད་ཆེན་པོ་ལས། ཇི་སྐད་དུ། མྱ་ངན་འདས་པ་བདེ་བའི་མཆོག །ཅེས་

གསུངས་པའི་ཕྱིར་རོ། །སྡུག་བསྔལ་ཞེས་བྱ་བ་ནི་འགྱུར་བ་དང་། འདུ་བྱེད་ཀྱི་སྡུག་བསྔལ་དང་མ་བྲལ་བའི་དོན་ཏོ། །བརྒྱ་ཞེས་བྱ་བ་ནི་མང་པོར་མཚོན་པའི་ཐ་ཚིག་གོ། །འབྲེལ་པ་ཞེས་བྱ་བ་ནི་ལྟ་འོག་ནས་འབྱུང་བའི་སྐྱོན་དེ་དག་དངོས་གྲུབ་ཐོབ་པའི་
རིག་སྔགས་འཆང་དང་མ་བྲལ་བའི་དོན་ཏོ། །ཉོན་མོངས་དུག་བཅས་ཞེས་བྱ་བ་ནི་དེ་ཉིད་ན་འདོད་ཆགས་དང་ཞེ་སྡང་དང་གཏི་མུག་གི་ཐ་བ་མ་སྤངས་པའི་ཕྱིར་རོ། །རྣམ་པར་འཇིག་འགྱུར་བ་ཞེས་བྱ་བ་ནི་ཐེར་ཟུག་མ་ཡིན་པར་བསྟན་ཏེ། དོན་དེ་ཉིད་རྡོ་རྗེ་གཙུག་ཏོར་གྱི་རྒྱུད་
ལས་ཀྱང་། །བདེ་བ་དང་ནི་སྡུག་བསྔལ་མཐའ། །འདོད་དང་ཁྲོ་དང་འཇིགས་པ་དང་། །ནད་དང་འཆི་དང་གདོན་དག་གི། །རྒྱུ་ནི་སྔགས་པ་རྣམས་ལ་ཡོད། །ཅེས་ཇི་སྐད་གསུངས་པ་ལྟ་བུའོ། །འདིར་དངོས་གྲུབ་ཀྱི་འབྲས་བུ་སྨད་པ་ཡང་། །དེ་ཉིད་ལ་ཞེན་པའི་བློ་
སྤངས་པས་ཐར་པ་ལ་སེམས་གཞོལ་བར་འགྱུར་བའི་ཕྱིར་རོ། །དང་བའི་སེམས་ཀྱིས་ཐོབ་པར་འགྱུར་བ་ཡིན། །ཞེས་བྱ་བ་ནི་ཐར་པ་འདོད་པ་འབའ་ཞིག་གིས་བསམ་གཏན་ལ་བརྟེན་པར་བྱ་བར་མ་ཟད་ཀྱི། དངོས་གྲུབ་འདོད་པས་ཀྱང་དེ་མི་བསྒོམ་དུ་མི་རུང་བར་བསྟན་ཏོ། །
ཡང་རྒྱུད་དེ་ཉིད་ལས་ཇི་སྐད་དུ། །གསང་སྔགས་བསམ་གཏན་ཞེས་བྱ་བ། །མཆོག་ཏུ་གསང་བ་ཡང་དག་གསུངས། །དྲང་སྲོང་དཀའ་ཐུབ་ཆེན་པོ་ཡང་། །དེ་དག་མེད་ན་མི་འགྲུབ་པོ། །ཞེས་ཇི་སྐད་གསུངས་པ་ལྟ་བུའོ། །འདོད་རྒྱལ་ཞེས་བྱ་བ་ནི་གནམ་བབས་སུ་སྨྲ་བའོ། །
དེ་ལས་ཀྱང་མ་བྱུང་ཞེས་བྱ་བ་ནི་སྐྱེས་བུའི་བྱེད་པ་འབྲས་བུ་དང་བཅས་པར་མཐོང་བའི་ཕྱིར་རོ། །དུས་ཞེས་བྱ་བ་ནི་ཇི་སྐད་དུ། དུས་ནི་འབྱུང་བ་རྣམ་སྨིན་བྱེད། །དུས་ནི་སྐྱེ་དགུ་རྣམས་འཇིག་བྱེད། །དུས་ནི་གཉིད་ལོག་རྣམ་སད་བྱེད། །དུས་ནི་འདའ་བར་དཀའ་བ་ཡིན། །ཞེས་
སྨྲ་བའོ། །དེ་ལས་མིན་ཞེས་བྱ་བ་ནི་ཆོས་ཐམས་ཅད་ཀྱི་སྐྱེ་བའི་རྒྱུ་མ་ཡིན་ཏེ། རྗེས་སུ་འགྲོ་བ་དང་ལྡོག་པར་མི་དམིགས་པའི་ཕྱིར། ནམ་མཁའི་མེ་ཏོག་བཞིན་ནོ། །རང་བཞིན་ཞེས་བྱ་བ་ནི་གྲངས་ཅན་རྣམས་ཀྱིས་བརྟགས་ཏེ། ཆོས་ཐམས་ཅད་ཀྱི་རྒྱུར་གྱུར་པའི་སྙིང་

སྟོབས་དང་རྔུལ་དང་། མུན་པའི་ངོ་བོ་ཉིད་གཅིག་པུ་རྟག་པ་ཁྱབ་པ་ཞིག་དམིགས་པའོ། །དེ་ཡང་མ་ཡིན་ཞེས་བྱ་བར་སྦྱར་ཏེ། དེ་ནམ་མཁའ་ལྟར་རྟག་པ་ཁྱབ་པ་ཞིག་ན་ནི་འགྱུར་དུ་མི་བཏུབ་པས་ཆོས་གང་ལ་ཡང་རྒྱུའི་བྱ་བ་བྱེད་མི་སྲིད་དོ། །འགྱུར་བ་ཞིག་ན་ནི་བདག་ཉིད་
ཐམས་ཅད་ཀྱིས་སམ་ཕྱོགས་གཅིག་གིས་རྒྱུ་བྱེད་ཅེ་ན་གལ་ཏེ་བདག་ཉིད་ཐམས་ཅད་ཀྱིས་ན་ནི་རང་བཞིན་ཆད་པར་འགྱུར་རོ། །འོན་ཏེ་ཕྱོགས་གཅིག་གིས་ནི་མི་རྟག་པ་ཉིད་དུ་ཐལ་བར་འགྱུར་རོ། །དབང་ཕྱུག་ཅེས་བྱ་བ་ནི། ཕྲ་ཞིང་བསམ་གྱིས་མི་ཁྱབ་རབ་ཏུ་
སྲབ་བྱེད་ཀུན་རིག་ཐམས་ཅད་བྱེད། །རྣལ་འབྱོར་གོམས་པས་ཐོབ་པའི་བློ་ཅན་བསམ་གཏན་པ་ཡི་བསམ་གཏན་ཡུམ། །ཉི་མ་ཟླ་བ་ས་ཆུ་མེ་རླུང་ཕྱོགས་དང་ནམ་མཁའི་ལུས་ཅན་ཏེ། །ཞི་བའི་བདེ་དགའ་འགྲུབ་པར་འདོད་པ་རྣམས་ཀྱིས་དབང་ཕྱུག་རྟག་ཏུ་བསྒོམ། །ཞེས་
སྨྲ་བའོ། །མ་ཡིན་ཞེས་བྱ་བ་ནི་དབང་ཕྱུག་ཀྱང་ཕྲ་བ་མ་ཡིན་ཏེ། ས་ལ་སོགས་པའི་ལུས་ཅན་ཡིན་པའི་ཕྱིར། ས་ལ་སོགས་པ་ལྟ་བུ་ཁོ་ནའོ། །གཅིག་ལ་ཕན་ཚུན་འགལ་བའི་ངོ་བོ་ཉིད་ཀྱང་རུང་བ་མ་ཡིན་ལ། དུ་མའི་བདག་ཉིད་ཀྱང་མ་ཡིན་པས་འདི་ས་ལ་
སོགས་པའི་ལུས་ཅན་ཉིད་དུ་ཡང་མི་སྲིད་དོ། །རབ་ཏུ་སྲབ་མོར་བྱེད་པ་ཡང་མ་ཡིན་ཏེ། སྐྱེ་བའི་ལུས་ཅན་ཡིན་པའི་ཕྱིར་སྐྱེས་བུ་ལྟ་བུ་ཁོ་ནའོ། །ཀུན་རིག་པ་ཡང་མ་ཡིན་ཏེ་རབ་ཏུ་སྲབ་མོར་བྱེད་པའི་ཕྱིར། གྲོལ་བའི་བདག་བཞིན་ནོ། །ཐམས་ཅད་བྱེད་པ་ཡང་མ་
ཡིན་ཏེ། ཕྲ་བའི་ཕྱིར་རྡུལ་ཕྲ་རབ་བཞིན་ནོ། །རྟག་པ་ཡང་མ་ཡིན་ཏེ། ས་ལ་སོགས་པའི་ལུས་ཅན་ཡིན་པའི་ཕྱིར་རོ། །ཆོས་ཐམས་ཅད་ཀྱི་རྒྱུ་ཡང་མ་ཡིན་ཏེ། ཅིག་ཅར་མི་བསྐྱེད་པའི་ཕྱིར་རྫ་མཁན་བཞིན་ནོ། །གཟུགས་ལ་སོགས་པ་བསྐྱེད་པ་ཡང་མ་ཡིན་ཏེ། དངོས་
པོ་ཡིན་པའི་ཕྱིར་དབང་ཕྱུག་བཞིན་ནོ། །ཐམས་ཅད་བྱེད་པ་ཡང་མ་ཡིན་ཏེ། བདག་མེད་པའི་ཕྱིར་བུམ་པ་བཞིན་ནོ། །བདག་ཡོད་ན་ནི་སྐྱེས་བུ་བཅིངས་པ་བཞིན་དུ་དབང་ཕྱུག་མ་ཡིན་པ་ཉིད་དུ་ཐལ་བར་འགྱུར་རོ། །རྒྱུ་མེད་པ་ཅན་ཞེས་བྱ་བ་ནི། ཇི་སྐད་པདྨའི་སྡོང་བུ་

ལོ་མ་སྙིང་པོ་དང་། །ཁ་དོག་དབྱིབས་དང་འཇམ་ལ་སོགས་པའི་རྒྱུ་ནི་གང་། །བྱ་ཡི་འདབ་གཤོག་སྣ་ཚོགས་རི་མོར་འབྲི་བ་སུ། །འགྲོ་བ་འདི་དག་ངོ་བོ་ཉིད་ཀྱིས་དེ་བཞིན་ངེས། །ཞེས་སྨྲ་བ་སྟེ། དེའི་ཕྱོགས་གཅིག་པ་ནི་འཇིག་རྟེན་ཉིད་ཀྱིས་གསལ་བར་
ཟད་པས་ཅུང་ཟད་ཀྱང་མི་བརྗོད་དོ། །སྐྱེས་བུ་ཞེས་བྱ་བ་དང་། བདག་ཅེས་བྱ་བ་དང་། ཤེད་བུ་ཞེས་བྱ་བ་ལ་སོགས་པས་ནི་བདག་ཏུ་ལྟ་བ་རྣམས་ཀྱིས་མིང་ཐ་དད་པར་བརྟགས་པ་སྟེ། མ་བྱས་ཞེས་བྱ་བའི་གཏན་ཚིགས་ནི་བཤད་མ་ཐག་པ་རྣམས་སོ། །ལས་ཞེས་བྱ་བ་
ནི། དགེ་བ་དང་མི་དགེ་བ་དང་མི་གཡོ་བའོ། །ཉོན་མོངས་པ་ཞེས་བྱ་བ་ནི་མ་རིག་པ་ལ་སོགས་པའོ། །སེམས་ཅན་བྱུང་ཞེས་བྱ་བ་ནི་འཁོར་བ་ལུགས་བཞིན་དུ་བྱུང་བའི་རྒྱུ་ངེས་པ་དེ་གཉིས་ཡིན་པར་བསྟན་ཏོ། །གཟུགས་ཞེས་བྱ་བ་ནི་ལས་དང་ཉོན་མོངས་པས་བསྐྱེད་
པའི་རེག་པ་དང་ཡུལ་བརྟགས་པས་གཟུགས་སུ་རུང་བའོ། །འབྱུང་བ་ཆེན་པོ་བཞི་དང་ལྡན་ཞེས་བྱ་བ་ནི་གཟུགས་དེ་ཡང་ས་དང་ཆུ་དང་མེ་དང་རླུང་གི་རང་བཞིན་ལས་གཞན་མ་ཡིན་པའི་དོན་ཏོ། །དེ་ནི་བདག་མིན་ཞེས་བྱ་བ་ནི་གཟུགས་དེ་ལ་མུ་སྟེགས་ཅན་གྱིས་བརྟགས་
པའི་བདག་མེད་དོ་ཞེས་བྱ་བའི་ཐ་ཚིག་གོ། །བདག་ཀྱང་གཟུགས་མ་ཡིན་ཞེས་བྱ་བ་ནི་བདག་ཅེས་བྱ་བ་ཀུན་བརྟགས་པ་དེ་གཟུགས་ཀྱི་ངོ་བོ་ཉིད་དམ། གཟུགས་དང་ལྡན་པར་ཡང་ཡོད་པ་མ་ཡིན་པའི་དོན་ཏོ། །གཟུགས་ལ་བདག་མེད་ཅེས་བྱ་བ་ནི་འབྱུང་བའི་ངོ་བོས་
སོ་སོར་བཤིག་གམ། འདུས་པ་ལ་ཡང་བདག་མེད་ཅེས་བྱ་བའི་ཐ་ཚིག་གོ། །བདག་ལ་གཟུགས་མེད་ཅེས་བྱ་བ་ནི་བརྟགས་པའི་ངོ་བོ་དེ་ལ་གཟུགས་ཀྱི་རྫས་མེད་པའི་དོན་ཏོ། །གཟུགས་ནི་སྟོང་པའོ་ཞེས་བྱ་བ་ནི་དེ་ལྟར་གཟུགས་ཀྱི་གྲུབ་པའི་མཐའ་ནི་རྡུལ་ཕྲ་རབ་དག་
ཡིན་ལ། དེ་ཉིད་ཀྱང་ཕྱོགས་ཆས་སོ་སོར་བཤིག་ན། ཐ་མ་མེད་པར་གྲུབ་པས་དོན་དམ་པར་གཟུགས་ཀྱང་གཟུགས་ཀྱི་རང་བཞིན་གྱིས་སྟོང་ཞེས་བྱ་བའི་ཐ་ཚིག་གོ། །ཕུང་པོ་བཞི་ཡང་རིག་པར་གྱིས། །ཞེས་བྱ་བ་ནི་གཟུགས་ལ་ཇི་ལྟར་རྣམ་པ་བཞིར་ཕྱེ་སྟེ་བརྟགས་ན། བདག་

ཡོད་པར་མ་གྱུར་ཅིང་སྟོང་པ་ལྟར་ཕུང་པོ་ལྷག་མ་རྣམས་ལ་ཡང་གོ་བར་བྱ་བའི་དོན་ཏོ། །གཟུགས་ནི་དབུ་བ་དག་དང་འདྲ་བ་སྟེ། །ཞེས་བྱ་བ་ལ་སོགས་པས་ནི་དཔེ་བརྗོད་པ་སྟེ་ཇི་སྐད་དུ། །གཟུགས་ནི་དབུ་བ་རྡོས་པ་འདྲ། །ཚོར་བ་ཆུ་ཡི་ཆུ་བུར་བཞིན། །འདུ་ཤེས་སྨིག་རྒྱུ་ལྟ་བུ་སྟེ། །
འདུ་བྱེད་རྣམས་ནི་ཆུ་ཤིང་འདྲ། །རྣམ་ཤེས་སྒྱུ་མ་ལྟ་བུའོ་ཞེས། །ཉི་མའི་གཉེན་གྱིས་བཀའ་སྩལ་ཏོ། །ཞེས་བཤད་པ་ལྟ་བུའོ། །དེ་ལྟར་མཐོང་ལ་ལྟ་བ་བཟང་པོ་ཡིན། །ཞེས་བྱ་བ་ནི་འདི་ལས་ཆོས་ཐམས་ཅད་དོན་དམ་པར་སྟོང་པ་ཉིད་དུ་བཤད་ལ་ཀུན་རྫོབ་ཏུ་ནི་སྒྱུ་མ་ལྟ་
བུར་རང་སྣང་བར་རྟོགས་པས་དབུ་མའི་ལམ་མ་ནོར་བར་བསྟན་པའི་ཕྱིར་རོ། །གང་ཞིག་གཞན་གྱུར་དེ་ནི་ལྟ་ངན་གསུངས། །ཞེས་བྱ་བ་ནི་ཕྱི་རོལ་པ་ལ་སོགས་པས་བདེན་པ་གཉིས་ཀྱི་དོན་མ་རྟོགས་པ་དང་། ལོག་པར་རྟོགས་པའི་ཕྱིར་རོ། །སེམས་དང་བ་དང་མ་དང་བའི་
སྐབས་ནས་འཕྲོས་ཏེ་ཞར་ལས་འོངས་པ་བཤད་ནས་དཀྱུས་ཆ་ལ་འཇུག་པ་ནི། དང་བའི་ཡིད་ཀྱིས་དངོས་གྲུབ་ཐོབ་པར་འགྱུར། །ཞེས་བྱ་བ་དང་འདིར་འབྲེལ་ཏེ། དེ་ལྟར་ཟློས་པའི་གསང་སྔགས་ཉེ་གྱུར་ན། །མཚན་མོ་ཉལ་བའི་རྨི་ལམ་འདི་རྣམས་མཐོང་། །ཞེས་བྱ་བ་
ལ་སོགས་པ་གསུངས་པས་སྒྲུབ་པའི་དུས་ལ་བབ་པར་ཤེས་པར་བྱ་སྟེ། ཚིག་གི་དོན་གཞན་ནི་གོ་སླ་བས་མ་ཕྱེའོ། །ཐོ་རངས་ཁར་ཞེས་བྱ་བ་ནི་ལྟ་འོག་ཐམས་ཅད་ལ་སྦྱར་རོ། །དེ་ཡང་སྲོད་ལ་ནི་བད་ཀན་གྱི་དུས་ལ་བབ་པས་ལྕི། འཇིང་དང་ནམ་གུང་ལ་ནི་མཁྲིས་པའི་དུས་ལ་
བབ་པས་རྨུགས་ཏེ་མི་གསལ་བས་ལྟས་རྣམས་རྟོགས་པར་མི་འགྱུར་གྱི། ཐོ་རངས་ནི་རླུང་གི་དུས་ལ་བབ་པས་གསལ་ཏེ་རྟོགས་པའི་དོན་ཏོ། །དོན་དེ་ཉིད་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས་ཀྱང་ཇི་སྐད་དུ། ནམ་གྱི་བཞི་ཆ་ལུས་པའི་ཚེ། །གལ་ཏེ་རྨི་ལམ་
བཟང་རྨིས་ན། །ཞེས་གསུངས་པའི་ཕྱིར་རོ། །ལེའུ་ལྔ་པའི་དོན་བཤད་ཟིན་ཏོ།། །།དངོས་གྲུབ་དང་ཉེ་བ་ཞེས་བྱ་བ་ནི་གསང་སྔགས་མངོན་དུ་ཕྱོགས་པ་ལ་བསྙེན་པ་ཁྱད་པར་ཅན་གྱིས་ལྷ་མཉེས་ནས་སྔ་མ་བས་ཀྱང་དངོས་གྲུབ་ཐོབ་པ་དང་ཉེ་བའི་དོན་ཏོ། །ཟློས་ལ་

དགའ་ཞེས་བྱ་བ་ལ་སོགས་པས་ནི་ལྷ་ཉེ་བར་གྱུར་ནས་ལུས་དང་ངག་དང་ཡིད་ཀྱི་ཡོན་ཏན་རྣམས་འབྱུང་བར་བསྟན་ཏེ། ཚིག་གི་དོན་གཞན་ནི་གོ་བར་ཟད་དོ། །བུད་མེད་ཅེས་བྱ་བ་ནི་ལྷ་དང་ལྷ་མ་ཡིན་གྱི་བུ་མོ་བྱད་གཟུགས་ཁྱད་པར་ཅན་རྣམས་སོ། །
འདོད་ལྷ་ཞེས་བྱ་བ་ནི་ལྷ་དང་ལྷ་མ་ཡིན་བྱད་གཟུགས་ཁྱད་པར་ཅན་རྣམས་སོ། །མདངས་འཕྲོག་ཅེས་བྱ་བ་ནི་དེ་དག་གཅིག་ལ་གཅིག་མཐོང་བ་ཙམ་གྱིས་རང་དབང་མེད་པར་འདོད་ཆགས་སྐྱེ་བ་སྟེ། ལྷའི་བུ་མོ་དེ་དག་གཞན་གྱིས་མི་མཐོང་བར་བྱ་བའི་ཕྱིར་གསང་སྔགས་
དང་སྨན་གྱིས་བསྒྲུབས་ཏེ། ལུས་སྦས་པ་རྣམས་སོ། །འདོད་ལ་ལོངས་སྤྱད་ཕྱིར་ནི་འབོད་པར་འགྱུར། །ཞེས་བྱ་བ་ནི་སྒྲུབ་པ་པོ་སྒོ་གསུམ་དག་པས། ལྷའི་བུ་མོ་ལུས་སྦས་པ་དེ་དག་ཀྱང་མངོན་སུམ་དུ་མཐོང་ཞིང་དེ་དག་གིས་ཀྱང་ཉེ་བར་སྤྱོད་པ་རྣམས་ཀྱིས་མཆོད་ཅེས་
བྱ་བའི་ཐ་ཚིག་གོ། །ལུས་ནི་དྲི་མེད་དག་པར་རིག་པ་དང་། །ཞེས་བྱ་བ་ནི་མཚན་མ་དེ་དག་བྱུང་ན། དངོས་གྲུབ་དང་འགལ་བའི་སྐྱོན་མེད་པར་ཁོང་དུ་ཆུད་པར་བྱ་བའི་དོན་ཏོ། །གསོ་སྦྱོང་སྡོམ་པ་དང་ནི་ལྡན་པ་ཡིས། །ཞེས་བྱ་བ་ནི་དེ་ནས་ཉེས་པ་ཐམས་ཅད་བཤགས་ལ་
རང་གི་ལྷའི་གཟུགས་ཀྱི་སྤྱན་སྔར་བྱང་ཆུབ་ཀྱི་སྡོམ་པ་ནོད་ཅེས་བྱ་བའི་ཐ་ཚིག་གོ། །ཉིན་ཞག་གཅིག་གམ་གཉིས་སམ་གསུམ་དུ་ནི། །ཁ་ཟས་སྤངས་ཤིང་སྨྱུང་བར་གནས་པ་ཡིས། །ཞེས་བྱ་བ་ནི་དངོས་གྲུབ་རབ་ལ་སོགས་པ་གསུམ་གྱི་དོན་དུ་ཞག་གྲངས་མང་ཉུང་དུ་
སྨྱུང་བ་བྱ་བར་བསྟན་ཏོ། །གཞན་དག་ན་རེ་སྒྲུབ་པ་པོ་ཉིད་ཀྱི་ཉམས་ཆེ་ཆུང་ལས་བྱུང་བ་ན་རྣམ་པ་གསུམ་དུ་གསུངས་སོ་ཞེའོ། །རང་གི་འབྱོར་པ་ཞེས་བྱ་བ་ནི་ནམ་མཁའ་ལ་འགྲོ་བ་ལ་སོགས་ཏེ་མངོན་པར་མཐོ་བའི་དཔལ་ཐོབ་པར་འགྱུར་རོ། །གཞན་ནི་གོ་བར་ཟད་དོ། །
དེ་ལྟར་ཡན་ལག་ཐམས་ཅད་འདུས་པ་དང་། །ཞེས་བྱ་བ་ནི་བཤད་མ་ཐག་པའི་མི་གཙང་བ་རྣམས་སོ། །ས་ཆུ་མེ་རླུང་ནམ་མཁའ་རྣམས་དང་ལྡན། །ཞེས་བྱ་བ་ནི་དེ་ཉིད་ཀྱང་ཁམས་ལྔའི་རང་བཞིན་ཡིན་པར་བསྟན་ཏོ། །ཇི་བཞིན་ལས་ཀྱི་རྗེས་འབྲངས་མི་ཡི་ལུས། །

ཞེས་བྱ་བ་ནི་སྔོན་གྱི་ལས་བཟང་ངན་གྱི་དབང་གིས་གྲུབ་པའོ། །ཐམས་ཅད་ལྡན་ཞེས་བྱ་བ་ནི་ནང་གྲོལ་ལ་སོགས་པ་དང་འབྲེལ་པར་བསྟན་ཏོ། །མི་ཡི་གཟུགས་ལ་གནས་པ་ཡིས། །བཤང་གཅི་སྣབས་དང་མཆིལ་མ་བད་ཀན་དང་། །ཞེས་བྱ་བ་ནི་བུ་ག་དགུ་ནས་འཛག་
པ་རྣམས་སོ། །འདི་དག་ཟད་པར་བྱ་ཕྱིར་སྨྱུང་བར་གསུངས། །ཞེས་བྱ་བ་ནི་ནང་གྲོལ་དང་། མི་གཙང་བ་དང་ལྡན་པའི་ལུས་དེ་ཐམས་ཅད་སྤང་དུ་མི་རུང་གིས་ཀྱང་བཙོག་པ་དེ་དག་ཆུང་ཞིང་ཉུང་བར་བྱ་བའི་དོན་ཏོ། །དྲི་མ་ཟད་ནས་ཞེས་བྱ་བ་ནི་ཆུང་ཞིང་ཉུང་བའོ། །མི་ཡི་
ལུས་དག་བསྒྲུབས་ན་བདེ་བར་འཇུག །ཅེས་བྱ་བ་ནི་ལུས་དག་སྟེ་དྲི་མ་མེད་ན་དངོས་གྲུབ་ཀྱི་སྣོད་དུ་རུང་ཞེས་བྱ་བའི་དོན་ཏོ། །འདོད་ཆགས་ཀྱིས་ནི་གདུངས་པར་གྱུར་ན་ཡང་། །ཞེས་བྱ་བ་ལ་སོགས་པས་ནི་གོང་དུ་གཉེན་པོ་བཤད་པའི་སྐབས་ནས། འདོད་ཆགས་
ཤས་ཆེ་མི་གཙང་ཤ་ཚིལ་དང་། །པགས་པ་ཀེང་རུས་བལྟ་བས་རྣམ་པར་བཟློག །ཅེས་གསུངས་པ་དེར་མི་གཙང་བ་གང་དང་གང་ཡིན་པ་ཕྱེ་སྟེ། མ་བཤད་པ་ཡང་འདིས་ཞར་ལ་བསྟན་ཏོ། །ཡེ་ཤེས་ཀྱི་མིག་ཅེས་བྱ་བ་ནི་བློ་མ་འཁྲུལ་བའི་ཤེས་རབ་ཀྱིས་བརྟགས་
པའོ། །འདོད་ཆགས་རྩད་ནས་ཡོང་ཡེ་ཞི་གྱུར་ཏེ། །ཞེས་བྱ་བ་ནི་མི་སྡུག་པའི་ཏིང་ངེ་འཛིན་གྱིས་སུན་ཕྱུང་བའི་ཕྱིར་རོ། །དཔེར་ན་ཉི་མས་མུན་ནག་གཏན་ནས་བསལ་བ་བཞིན། །ཞེས་བྱ་བ་ནི་རྣམ་པར་ཐར་པའི་ཏིང་ངེ་འཛིན་གྱི་མཐུས་ཉོན་མོངས་པ་ཟིལ་གྱིས་མནན་ནས་
སྤངས་པའི་དོན་ཏོ། །ཕན་ཡོན་དེ་ཡིས་ཞེས་བྱ་བ་ནི་རྣམ་པར་ཐར་པའི་ཏིང་ངེ་འཛིན་ལ་བརྟེན་པས་ཞེས་བྱ་བའི་ཐ་ཚིག་གོ། །གསང་སྔགས་དེས་བསྙེན་ནས་ཞེས་བྱ་བ་ནི་སྔར་ཉོན་མོངས་པ་གང་དང་གང་བྱུང་བའི་གཉེན་པོ་བསྒོམས་ནས། དེའི་འོག་ཏུ་བསྙེན་པ་ལ་འཇུག་
པར་བསྟན་ཏོ། །རང་གི་ལུས་ལ་ཉེ་བར་རིག་པ་དང་། །ཞེས་བྱ་བ་ནི་ཇི་སྐད་དུ་གསུངས་པའི་ལུས་དང་ངག་དང་ཡིད་ཀྱི་ཡོན་ཏན་གྱིས་བདག་ཉིད་ལ་ཡིད་ཆེས་པ་དང་། དེ་བཞིན་དུ་ཕྱི་རོལ་གྱི་ཡོན་ཏན་ཡང་། གང་ཚེ་མཁའ་ལས་ལྷ་དང་གནོད་སྦྱིན་དང་། །དྲི་ཟ་ལྷ་ཡི་བུ་

མོའི་ལུས་དང་སྒྲ། །མིས་ནི་དག་པའི་ཡིད་ཀྱིས་མཐོང་ཐོས་ན། །དེ་ཚེ་ཤིན་ཏུ་ཉེ་བར་འགྱུར་བ་ཡིན། །ཞེས་བྱ་བ་དག་བྱུང་ཞེས་བྱ་བའི་ཐ་ཚིག་གོ། །ཡར་གྱི་ཚེས་བརྒྱད་དམ་ནི་བཅུ་བཞིའམ། །ཡང་ན་བཅོ་ལྔ་ལ་ནི་ཞེས་བྱ་བ་ནི་ཚེས་གྲངས་དེ་དག་ལ་
སྒྲུབ་པར་བསྟན་ཏོ། །བཟླས་བརྗོད་བྱ་ཞེས་བྱ་བ་ནི་སྒྲུབ་པའི་ནུབ་མོ་མཚན་རངས་པར་བཟླས་པ་ལ་དགོངས་པའི་དོན་ཏོ། །ས་བསྟར་བ་ཞེས་བྱ་བ་ནི་སྒྲུབ་པའི་དཀྱིལ་འཁོར་གྱི་སའོ། །སོགས་པ་ཞེས་བྱ་བ་ནི་དེར་སྤོས་གཙང་མ་སྣ་ཚོགས་ཀྱིས་བསྲེས་པའི་དོན་ཏོ། །བྱུག་ཅེས་
བྱ་བ་ནི་ནུབ་མོ་བསྒྲུབ་ན་དེའི་ནང་པར་ནས་བསྐུ་བར་བསྟན་ཏོ། །རྡོ་རྗེ་འཛིན་པ་ང་ལ་མཆོད། །ཅེས་བྱ་བས་ནི་དེའི་ཤུགས་ཀྱིས་པདྨ་འཛིན་པ་ལ་ཡང་གོ་བར་བྱའོ། །གཞན་ནི་བརྡ་ཕྲད་པར་ཟད་དོ། །ཚོན་རྩི་རྣམས་ཀྱིས་བྲི་བར་བྱ། །ཞེས་བྱ་བ་ནི་སོ་སོའི་ཆོ་ག་ཞིབ་མོ་དག་ལས་སྣ་
ལྔའམ་སྣ་གསུམ་མམ་སྣ་གཅིག་གིས་བྲི་བར་གསུངས་པའོ། །རྡོ་རྗེ་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས་ཇི་སྐད་དུ། རྡོ་རྗེའི་ར་བས་བསྔགས་པ་ཡི། །ལྕགས་ཀྱི་ཕྱེ་མས་ར་བ་བྱ། །ཞེས་གསུངས་སོ། །མེ་དང་ཆུ་དང་རླུང་ཞེས་བྱ་བ་ནི་ཕྱག་ན་རྡོ་རྗེ་དབང་
བསྐུར་བའི་རྒྱུད་ཆེན་པོ་ལས། རྩྭ་དང་མེ་དང་ཆུ་དང་ཐལ་བ་ལ་ལན་བདུན་བསྔགས་པས་ར་བར་འགྱུར་རོ་ཞེས་གསུངས་པའོ། །མདུང་ཐུང་ཞེས་བྱ་བ་ནི་མདུང་ཐུང་གི་རྩེ་མོ་ཕྱི་རོལ་དུ་བསྟན་པ་ཤ་སྟག་བྲི་བའི་དོན་ཏོ། །རིམ་བཞིན་དཀྱིལ་འཁོར་འདིར་ནི་བྲི་བར་བྱ། །ཞེས་བྱ་བ་ནི་
དང་པོར་ལྕགས་ཕྱེ་ལས་རྡོ་རྗེའི་ར་བ་བྲི་བ་ནི་ཕྱི་རིམ་དུ་བྲི་ལ། མདུང་ཐུང་ནི་ནང་དུ་བྲི་བའི་དོན་ཏོ། །སྡང་བའི་བདག་ཉིད་སེམས་ནི་མྱོས་པར་འགྱུར། །ཞེས་བྱ་བ་ནི་དཀྱིལ་འཁོར་དེ་བྲིས་པའི་བྱིན་གྱི་རླབས་ཀྱིས་རྡོ་རྗེ་དང་མེ་ལ་སོགས་པ་དངོས་ཀྱི་ར་བར་མཐོང་བས་རྒོལ་མི་ནུས་
པའི་དོན་ཏོ། །བསྟན་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། དཱུར་བ་སྔོན་པོའི་རྩ་སྟན་ནི། །འཕང་དུ་སོར་བཞི་བྱ་བ་སྟེ། །མཉམ་ཞིང་ཞེང་དུ་མཐོ་གང་བ། །སྲིད་དུ་སོར་ནི་བཅུ་དྲུག་གོ། །ཞེས་གསུངས་པ་ཉིད་བལྟ་བར་བྱའོ། །བདག་ཉིད་བསྲུང་

བར་བྱ་སྟེ་ཞེས་བྱ་བ་ནི་ས་འཛིན་ཙམ་ཞིག་སྨོས་ཀྱི། དངོས་སུ་ནི་རྒྱུད་དེ་ཉིད་ལས་ཇི་སྐད་དུ། བསྐྲད་པ་དང་ནི་འོག་འཆིང་དང་། །སྟེང་ཡང་བཅིང་ཞིང་འཁོར་ཡུག་ཏུ། །མཚམས་གཅད་ཕྱོགས་ཀྱང་བཅིང་བར་བྱ། །རྡོ་རྗེའི་ར་བ་དྲ་བར་བྱ། །རྫས་དང་བདག་དང་ལྷ་རྣམས་བསྲུང་། །
ཞེས་གསུངས་པ་དང་སྦྱར་རོ། །རྫས་བླངས་མྱུར་དུ་བཟླས་བརྗོད་བྱས་ནས་ནི། །ཞེས་བྱ་བ་ནི་དེ་ནས་སྒྲུབ་པའི་རྫས་ལས་ལག་ཏུ་བླངས་ནས་བརྒྱ་རྩ་བརྒྱད་ཙམ་ཞིག་བཟླས་བརྗོད་བྱ་བའི་དོན་ཏོ། །བདུག་པའི་སྦྱིན་སྲེག་སྟོང་བྱ་ཞེས་བྱ་བ་དེའི་འོག་ཏུ་རྫས་ལ་མར་གྱིས་བདུག་པའི་
སྦྱིན་སྲེག་སྟོང་བྱ་བར་བསྟན་ཏོ། །དེ་ནས་དེ་ནི་དྲི་ཆུས་བཀྲུས་ནས་སུ། །ཞེས་བྱ་བ་ནི་སྒྲུབ་པའི་རྫས་དེ་སྦྱིན་སྲེག་གི་དུས་སུ་དྲི་མ་དང་སྣུམ་གྱིས་འབགས་པའི་ཕྱིར་རོ། །བགེགས་མང་རྣམས་ཀྱང་རབ་ཏུ་བསལ་བྱས་ནས། །ཞེས་བྱ་བ་ཡང་རྒྱུད་དེ་ལས། གསང་སྔགས་
དག་གི་ཕྱི་ནང་དུ། །བགེགས་རྣམས་ཐམས་ཅད་བཟློག་པར་བྱ། །ཞེས་གསུངས་སོ། །གཞན་ནི་གོ་བར་ཟད་དོ། །དབྱིབ་ཅེས་བྱ་བ་ནི་རིན་པོ་ཆེ་སྣ་ལྔའོ། །བསྟོད་དང་བཅས་པར་ཞེས་བྱ་བ་ནི་ཚིག་ཏུ་ལྷ་དེའི་ཡོན་ཏན་བརྗོད་པའོ། །རྩེ་གཅིག་སེམས་ཀྱིས་ཞེས་བྱ་བ་ནི་རང་
གི་ལྷ་ཁོ་ན་ལ་དམིགས་པ་ལས་སེམས་གཞན་དུ་མ་ཡེངས་པའོ། །དད་པ་ཞེས་བྱ་བ་ནི་དང་པོ་ནས་ལྷ་དེ་ལ་དད་པའོ། །འབད་པ་ཞེས་བྱ་བ་ནི་སྒྲུབ་པ་པོ་དངོས་གྲུབ་འདོད་པས་སྔར་དཀའ་བ་སྣ་ཚོགས་སྤྱད་པའོ། །རྗེས་སུ་མཐུན་པའི་མཆོག་བསླང་ངོ་། །ཞེས་བྱ་བ་ནི་དང་པོ་ནས་
དངོས་གྲུབ་གང་ལ་དམིགས་པ་དེ་ཉིད་གསོལ་བའི་དོན་ཏོ། །གཞན་ནི་གོ་བར་ཟད་དོ། །སེམས་སྟོབས་མཆོག་དང་ལྡན་པ་ཞེས་བྱ་བ་ནི་གཅིག་ཏུ་དཔའ་བའོ། །འཇིགས་དང་བཅས་པའི་ལས་ཞེས་བྱ་བ་ནི་ཉེན་ཆེན་པོ་ཡོད་པའི་དོན་ཏོ། །ཤ་ཟ་ཞེས་བྱ་བ་ནི་དུར་ཁྲོད་ལ་དབང་
བསྒྱུར་བའི་གདོན་རྣམས་སོ། །ཕུང་བར་བྱེད་ཅེས་བྱ་བ་ནི་གསོད་པའི་དོན་ཏོ། །གཞན་ནི་གོ་སླ་བས་མ་ཕྱེའོ། །རལ་གྲི་བེ་ཅོན་ལག་ན་ཐོགས་པ་ཡིས། །ཉིན་པར་ཐོག་ཐག་ཏུ་ནི་བསྲུང་བར་བྱ། །ཞེས་བྱ་བ་ནི་སྒྲུབ་པ་པོའི་གྲོགས་པོ་མཆོག་གིས་བྱས་པའི་དོན་ཏོ། །གཞན་ནི་གོ་བར་ཟད་དོ། །

འཇིགས་པའི་གཟུགས་ཅན་བགེགས་ནི་སྣ་ཚོགས་འབྱུང་། །ཞེས་བྱ་བ་ནི་ཆོས་ཉིད་ཀྱིས་འབྱུང་སྟེ། དེ་ལ་སྒྲུབ་པ་པོ་ནི་བཟླས་བརྗོད་བྱེད་པ་ལས་མི་བསྐྱོད་པར་འདུག་ལ་གྲོགས་པོ་མཆོག་གིས་ནི་བགེགས་གཞོམ་མོ། །གཙུག་ཏོར་རྒྱལ་པོ་ཞེས་བྱ་བ་ནི་དེའི་
གསང་སྔགས་ཁྱད་པར་དུ་མཐུ་རླབས་ཆེ་བའི་ཕྱིར་རོ། །འབྱེར་བར་འགྱུར་ཞེས་བྱ་བ་ནི་གསང་སྔགས་ཀྱི་གཟི་བརྗིད་ལ་ཉེ་མི་ཕོད་ཅེས་བྱ་བའི་དོན་ཏོ། །ཁྲོ་བོ་བདུད་རྩི་ཐབ་སྦྱོར་དྲག་ཤུལ་ལས་ཅན་སྦྱར། །ཞེས་བྱ་བའི་མཐུ་རླབས་ཀྱང་སྔ་མ་དང་འདྲ་སྟེ། གང་ལ་གོམས་པར་བྱ་
བ་བསྟན་ཏོ། །གང་ཞིག་གསང་སྔགས་ཆོ་ག་ཞིབ་མོ་ལས། །མཐོང་བ་དེ་ནི་དོགས་པ་མེད་པར་འགྲུབ། །ཅེས་བྱ་བ་ནི་དེ་དག་ལས་དངོས་གྲུབ་གང་གསུངས་པ་ཐམས་ཅད་འགྲུབ་ཅེས་བྱ་བའི་ཐ་ཚིག་གོ། །དེ་ཡིས་གསང་སྔགས་ཆོ་ག་མི་ཤེས་ན། །ཞེས་བྱ་བ་ནི་རང་གི་ཆོ་ག་
ཞིབ་མོ་ལས་ལས་འདི་མི་འབྱུང་ན་ཞེས་བྱ་བའི་དོན་ཏོ། །གསང་སྔགས་གཞན་དུ་བསྟན་པའི་ཆོ་ག་ཡིས། །དེ་ལ་རང་གིས་དངོས་གྲུབ་བསླང་ཞེས་བྱ་བ་ནི་གཞན་གྱི་ཆོ་ག་ཞིབ་མོ་དེའི་དངོས་གྲུབ་འབྱུང་བ་རྣམས་བསླངས་ན་སྟེར་རོ་ཞེས་བྱ་བའི་ཐ་ཚིག་གོ། །གཏེར་གྱི་ཕྱོགས་ཞེས་
བྱ་བ་ལ་སོགས་པས་ནི་དེའི་འབྲས་བུ་དངོས་གྲུབ་རྣམས་བསྟན་པ་སྟེ། གཏེར་ལ་སོགས་པ་དེ་དག་གི་མཚན་ཉིད་ནི་འོག་ནས་འཆད་པས་འདིར་མ་ཕྱེའོ། །བསྲུང་བའི་སྟོབས་མེད་ཅེས་བྱ་བ་ནི་དུས་གསུམ་བྱས་ཤིང་མ་ལྕོགས་པའོ། །གསང་སྔགས་ཀྱི་སྟོབས་མེད་ཅེས་བྱ་བ་ནི་
ལྷ་ཉིད་མཐུ་ཞན་པའོ། །དཀའ་ཐུབ་ཀྱི་སྟོབས་མེད་ཅེས་བྱ་བ་ནི་དཀའ་ཐུབ་ཞིག་པའོ། །སེམས་སྟོབས་མེད་ཅེས་བྱ་བ་ནི་སྡར་མའོ། །བློ་ཞན་ཞེས་བྱ་བ་ནི་དང་བླུན་པའོ། །དེ་ནི་མཚན་མོ་རྒྱུ་བ་རྣམས་ཀྱིས་བསད། །ཅེས་བྱ་བ་ནི་ཉེན་ཆེན་པོ་ཡོད་པར་བསྟན་པའི་དོན་ཏོ། །ལེའུ་
དྲུག་པའི་དོན་བཤད་ཟིན་ཏོ།། །།འཚོང་འདོད་ཅེས་བྱ་བ་ནི་སྒྲུབ་པ་པོ་ཁ་ཅིག་ལས་དེ་ལྟ་བུ་ལ་དགའ་བའོ། །མར་གྱི་ངོ་ལ་ཞེས་བྱ་བ་ནི་མར་གྱི་ངོའི་དུས་ཚིགས་གང་ཡང་རུང་བ་ཞེས་བྱ་བའི་ཐ་ཚིག་གོ། །གཞན་ནི་གོ་བར་ཟད་དོ། །མི་ཉུང་ཞེས་བྱ་བ་ནི་སྲང་བརྒྱ་ཡན་ཆད་

དོ། །དེ་ཡང་སྐྱེས་པའི་ཤ་ཞེས་གྲག་གོ། །ཚིག་གི་དོན་གཞན་ནི་གོ་བར་ཟད་དོ། །རབ་ཏུ་བསྒྲིམས་ནས་ཞེས་བྱ་བ་ནི་རང་གི་ལྷ་རྗེས་སུ་དྲན་པ་དང་། མི་སྐྲག་པར་འབད་པའི་དོན་ཏོ། །སྒྲ་ཆེར་འབོད་ཅིང་ཞེས་བྱ་བ་ནི་སྤ་མི་འགོང་བའི་ཚིག་གིས་སྐད་ཆེར་འབོད་པའི་ཐ་ཚིག་
གོ། །ཤར་དང་བྱང་དང་ལྷོ་དང་ནུབ་ཕྱོགས་སུ། །ཞེས་བྱ་བ་ནི་ཤར་ལྷོའི་མཚམས་ནས་བྱང་ཤར་ལོགས་སུ་འགྲོ་བར་བྱའོ། །དེ་ནས་སླར་ལོག་སྟེ་ཤར་ལྷོའི་མཚམས་ནས་ལྷོ་ནུབ་ཀྱི་མཚམས་ལོགས་སུ་འགྲོ་བར་བྱའོ། །མྱུར་དུ་ཞེས་བྱ་བ་ནི་དེར་ལེ་ལོ་མི་བྱེད་ཅིང་དྲག་ཏུ་འགྲོ་
བར་བྱ་བའི་དོན་ཏོ། །བསྐོར་ཞིང་ཞེས་བྱ་བ་ནི་དེ་ནས་མཐའ་བསྐོར་ཏེ་དབུས་སུ་མི་འགྲོ་ཞེས་བྱ་བའི་ཐ་ཚིག་གོ། །ཤིན་ཏུ་བརྗོད་པར་བྱ་ཞེས་བྱ་བ་ནི་གོང་དུ་སྨོས་པའི་ཚིག་གི་དོན་བརྗོད་ཅིང་སྐབས་སྐབས་སུ་མི་སྨྲ་བར་ཉན་ཅིང་འགྲོ་བའི་དོན་ཏོ། །སྔར་ནི་གང་ཞིག་སེམས་
ཀྱིས་བསམས་པའི་དོན། །དེ་ཉིད་སྨྲ་བ་ཞེས་བྱ་བ་ནི་དང་པོ་ནས་གང་ལ་རྣམ་པ་དེ་དང་ཚོང་བྱས་པའི་ཐ་ཚིག་གོ། །གཞན་དུ་སྨྲ་མི་བྱ་ཞེས་བྱ་བ་ནི་སྔར་དངོས་པོ་ཆུང་ངུར་བསམས་ལ། འཕྲལ་ལ་ཁེ་མཐོང་སྟེ་ཆེན་པོར་མི་བཙོང་། སྔར་དངོས་པོ་ཆེན་པོ་ཞིག་བསམས་ལ་དེར་
སྤ་བཀོང་ནས་ཆུང་ངུར་ཡང་མི་བཙོང་ཞེས་བྱ་བའི་དོན་ཏོ། །དེ་ཉོས་པས་ཅིར་བྱ་ཞེ་ན། ཉོ་བའི་གསང་སྔགས་ཀྱིས་ལྷ་ལ་ཡང་རྣམ་པ་གཉིས་ཏེ། འཇིག་རྟེན་ལས་འདས་པའི་ཁྲོ་བོ་ལ་སོགས་པ་དང་། འཇིག་རྟེན་གྱི་མ་མོ་དག་ནི་བྱིན་གྱིས་བརླབས་དག་ལས་བྱུང་བ་ཞེས་བྱ་བ་
སྟེ། །དེའི་རང་བཞིན་གྱིས་ཕན་འདོགས་པའི་དོན་དུ་འབྱུང་ངོ་། །ཤ་ཟའི་རིགས་སུ་སྐྱེས་པའི་སྲིན་པོ་ལ་སོགས་པའི་རྣམ་པར་སྨིན་པའི་གསང་སྔགས་ཞེས་བྱ་སྟེ་དེ་ཉིད་ཟ་བའོ། །གཞན་ནི་གོ་བར་ཟད་དོ། །གསང་སྔགས་མ་བཟླས་པ་ཡིས་བསྟེན་མི་བྱ། །ཞེས་བྱ་བ་
ནི་སྔར་བསྙེན་པ་མ་རྫོགས་པའམ་རྫོགས་ཀྱིས་ཀྱང་ལས་འདི་ལྟ་བུ་བྱོས་ཤིག་ཅེས་ལྷ་ཉིད་ཀྱི་བཀའ་ལུང་མེད་པར་མི་བྱ་བའི་དོན་ཏོ། །སོགས་པ་ཞེས་བྱ་བ་ནི་བདུད་རྩི་ཐབ་སྦྱོར་རོ། །བསྲུང་བ་ངས་གསུངས་སོ་ཞེས་བྱ་བ་ནི་གསང་སྔགས་དེ་དག་ཁྱད་པར་དུ་མཐུ་རླབས་ཆེ་

བའི་ཕྱིར་རོ། །གསང་སྔགས་དྲག་པོ་གང་ཞིག་ཤ་ཟ་བ། །ཞེས་བྱ་བ་ནི་སྲིན་པོ་ལ་སོགས་པའོ། །མེ་ཏོག་མ་ཉམས་པ་ཞེས་བྱ་བ་ནི་མ་རྙིངས་པའོ། །གཞན་ནི་གོ་བར་ཟད་དོ། །ཚེས་གྲངས་དག་ལ་ཞེས་བྱ་བ་ནི་མར་གྱི་ངོའི་དུས་ཚིགས་སོ། །གྲུབ་པ་འདི་
རྣམས་སྟེར་ཞེས་བྱ་བ་ནི་དངོས་གྲུབ་ཀྱི་རྣམ་གྲངས་སོ། །ཡིད་བཞིན་རིན་ཆེན་བཞིན་དུ་གྲུབ་པ་མཆོག །ཅེས་བྱ་བ་ནི་གང་བསམས་པའི་དོན་ཐམས་ཅད་སྒྲུབ་པར་བྱེད་ཅེས་བྱ་བའི་ཐ་ཚིག་གོ། །གྲུབ་འབྲིང་ཞེས་བྱ་བ་ནི་སྡིག་པ་ལྟ་དགོས་པའི་ཉེན་དག་ཡོད་པའི་ཕྱིར་རོ། །གྲུབ་
པ་ཐ་མ་ཞེས་བྱ་བ་ནི་ཉོན་མོངས་པའི་འདམ་དུ་བྱིང་ཞིང་ཕྲག་དོག་ལ་སོགས་པའི་ཉེན་ཆེན་པོ་ཡོད་པའི་དོན་ཏོ། །དུས་གསུམ་དུ་ཞེས་བྱ་བ་ནི་སྔ་དྲོ་དང་གུང་དང་དགོངས་ཀའོ། །གཏོར་མ་སྣ་ཚོགས་པ་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས་བལྟ་བར་བྱ་