Luận tạng Tây Tạng (Tengyur) — Tập 71

།ཨ་ཐ་ཁ་ལུ་ཞེས་ཀྱེ་འམ་ལེགས་སོའི་སྒྲ་ཡོད་པས་བཀྲ་ཤིས་པའི་དེ་ནས་སོ། །བཅོམ་ལྡན་འདས་ནི་རྡོ་རྗེ་ལྟ་བུའི་ཏིང་ངེ་
འཛིན་གྱིས་ལྷན་ཅིག་སྐྱེས་པའི་མ་རིག་པ་བཅོམ་པས་ཉོན་མོངས་པ་གཏན་མི་སྐྱེ་སྟེ། ཉོན་མོངས་པའི་བདུད་བཅོམ་པའོ། །རྒྱུ་ཉོན་མོངས་པ་མེད་ན་འབྲས་བུ་དངོས་པོ་ལ་མངོན་པར་ཞེན་པ་མེད་པས་ལྷའི་བུའི་བདུད་བཅོམ་པའོ། །དངོས་པོའི་མངོན་ཞེན་མེད་པས་བག་ཆགས་ཀྱི་མཚམས་

མི་སྦྱོར་ཏེ་དེས་ཕུང་པོའི་བདུད་བཅོམ་པའོ། །སྡུག་བསྔལ་གྱི་ཕུང་པོ་ཟད་ན་རྣམ་རྟོག་གི་ཁར་མི་ལྟུང་བས་སྐྱེ་ཤི་དང་བྲལ་བས་འཆི་བདག་གི་བདུད་བཅོམ་མོ། །ལྡན་བ་ནི། དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་ཕུན་སུམ་ཚོགས་
ལྡན་པ། །དྲུག་ནི་སྐལ་དང་ལྡན་ཞེས་བཤད། །ཅེས་ཏེ། དབང་ཕྱུག་ནི་སྒྲིབ་པ་ཐམས་ཅད་ཀྱི་དབང་དུ་མ་གྱུར་པའི་རང་དབང་ཆེན་པོ་དང་ལྡན་པའོ། །གཟུགས་བཟང་ནི་མཚན་དང་དཔེ་བྱད་དོ། །དཔལ་ནི་བསོད་ནམས་དང་ཡེ་ཤེས་ཀྱི་ཚོགས་ཏེ། གཞན་གྱིས་བསྟེན་བྱ་མིན་པས་སོ། །
གྲགས་པ་ནི་ཚངས་པའི་འཇིག་རྟེན་ལ་ཐུག་གི་བར་དུ་བཅོམ་ལྡན་འདས་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་སོ་ཞེས་པ་ལ་སོགས་པ་དུ་མ་གྲགས་ཏེ་ཡོན་ཏན་ནོ། །ཡེ་ཤེས་ནི་ཤེས་བྱ་ཇི་སྙེད་པ་དང་།
ཇི་ལྟ་བ་ལག་མཐིལ་གྱི་སྐྱུ་རུ་ར་ལྟར་མཁྱེན་པའོ། །བརྩོན་འགྲུས་ནི་སྐུ་གསུང་ཐུགས་ཀྱི་མཛད་པ་རྒྱུན་མི་འཆད་པ་སྟེ། ཐུགས་རྗེའོ། །དེ་ལ་དབང་ཕྱུག་དང་ཡེ་ཤེས་ནི་ཆོས་ཀྱི་སྐུའོ། །གཟུགས་བཟང་ནི་ལོངས་སྤྱོད་རྫོགས་པའི་སྐུའོ། །དཔལ་དང་གྲགས་པ་ནི་སྤྲུལ་པའི་སྐུའོ། །བརྩོན་
འགྲུས་ནི་གསུམ་ཀའོ། །ཡང་ན་ཕྱིར་མི་ལྡོག་པ་འཁོར་ལོའི་མདོ་ལས། ནམ་མཁའ་འདྲ་བའི་ཆོས་རྣམས་ནི། །ལུས་ཅན་དག་ལ་རབ་སྟོན་ཀྱང་། །དེ་ལ་བསྙེལ་བ་མི་མངའ་བས། །དེ་ཕྱིར་བཅོམ་ལྡན་འདས་ཞེས་བྱ། །ཞེས་གསུངས་སོ། སྐྱེ་བ་གཅིག་གིས་ཐོགས་པའི་བྱང་ཆུབ་
སེམས་དཔའ་ཆེན་པོས་རྒྱུན་མི་འཆད་པར་ལྷའི་བུ་རྣམས་ལ་ཆོས་ཀྱི་དགའ་བའི་རོ་མྱོང་བར་མཛད་པས་དགའ་ལྡན་གྱི་ལྷའི་གནས་ཞེས་བྱ་སྟེ། གནས་ཕུན་སུམ་ཚོགས་པའོ། །གནས་འདི་སྨོས་པས་ནི་རྟོགས་པ་འདིའི་སྒོར་ཞུགས་པའི་རིགས་ཀྱི་བུ་དང་རིགས་ཀྱི་བུ་མོ་རྣམས་ཀྱང་ཇི་སྲིད་
ཆོས་དགའ་བ་ཆེན་པོའི་རིགས་རྒྱུན་མི་འཆད་པར་མྱོང་བར་འགྱུར་བའི་དོན་ཏོ། །འཁོར་གསུངས་པ་བྱང་ཆུབ་ནི་རྣམ་པར་དཀར་བའི་ལམ་རྒྱུ་དང་འབྲས་བུར་བཅས་པའོ། །དེ་ལ་སེམས་དཔའ་ནི་བྱང་ཆུབ་སེམས་དཔའོ། །དེ་ཉིད་ཉན་ཐོས་དང་རང་རྒྱལ་ལ་ཡང་ཡོད་པས་འདིར་ཆེན་པོ་

གསུངས་སོ། །དེ་ལ་ཆེ་བ་རྣམ་པ་བདུན་དང་ལྡན་པས་བྱང་ཆུབ་སེམས་དཔའ་ཆེན་པོའོ། །དེ་ལ་ཆོས་ཆེན་པོ་ནི་རིག་པ་མཆོག་དང་དབང་བསྐུར་བའི་རྒྱུད་ཆེན་པོ་དང་། ཏ་ཐཱ་སཾ་གྲ་ཧ་ལ་སོགས་པའི་གཞུང་རྒྱ་ཆེན་པོ་རྣམས་ལ་དབང་མཛད་པའི་ཕྱིར་རོ། །སེམས་
བསྐྱེད་པ་ཆེན་པོ་ནི་བདེ་བར་གཤེགས་པ་རིགས་ལྔ་དང་གོ་འཕང་མཉམ་པ་ལ་དབང་སྒྱུར་བ་ཐོབ་པས་སོ། །མོས་པ་ཆེན་པོ་ནི་དོན་ཟབ་པ་དང་རྒྱ་ཆེ་བ་ལ་མོས་པའོ། །བསམ་པ་རྒྱ་ཆེ་བ་ལ་མོས་པ་ནི་སེམས་ཅན་ཐམས་ཅད་ལ་ཕན་པ་དང་། བདེ་བ་སྐྱེད་པའི་ཕྱིར་རོ། །ཚོགས་ཆེན་པོ་ནི་
བསོད་ནམས་དང་ཡེ་ཤེས་ཀྱི་ཚོགས་རྒྱུན་མི་འཆད་པས་སོ། །དུས་ཆེན་པོ་ནི་འཁོར་བ་ཇི་སྲིད་པར་གཞན་དོན་ལ་འཇུག་པར་ཞལ་གྱིས་བཞེས་པས་སོ། །ཐོབ་པ་ཆེན་པོ་ནི་ཡང་དག་པར་རྫོགས་པའི་སངས་རྒྱས་ཕྱག་རྒྱ་ཆེན་པོའི་སྐུའོ། །ལྟ་བ་དང་རྟོགས་པ་གཅིག་ཅིང་མཆོག་གཅིག་པ་དང་
འདུན་པ་གཅིག་པས་སྤང་བྱ་སྤང་བ་བར་ཆད་མེད་པའི་ཕྱིར་དགེ་འདུན་ནོ། །དེ་ནི་ཡོན་ཏན་ནོ། །གྲངས་ནི་རྩོད་པར་འགྱུར་བའི་ཕྱིར་མ་གསུངས་མོད་ཀྱི་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་རྒྱུད་དུ་གསུངས་པ་དང་། བྱང་ཆུབ་སེམས་དཔའ་ཆེན་པོ་རྡོ་རྗེའི་རིགས་བྱེ་བ་ཕྲག་
བརྒྱད་ཅུ་དང་། རིན་པོ་ཆེའི་རིགས་དང་། པདྨའི་རིགས་དང་། ལས་ཀྱི་རིགས་དང་། བདེ་བར་གཤེགས་པའི་རིགས་དང་། དེ་ལྟ་བུ་ལ་སོགས་པ་མུ་མཐའ་ཡས་སོ་ཞེས་གསུངས་སོ། །ཞབས་འབྲིང་པ་ལྷའི་ཚོགས་ཞེས་པ་ནི་ཆོས་ཆེ་བར་བྱེད་ཅིང་བསྟན་པ་རྒྱས་པར་བྱེད་པའི་ཕྱིར་
སྟོན་པའི་ཞབས་སུ་འབྲང་བའོ། །དེ་ལ་ཆོས་ལ་མོས་པ་བསྐྱེད་པའི་འཁོར་ནི་ཚངས་པའོ། །རྒོལ་བ་ཚར་གཅོད་པར་བྱེད་པའི་འཁོར་ནི་ཁྱབ་འཇུག་གོ། །བསྟན་པ་འཛིན་པར་བྱེད་པའི་འཁོར་ནི་དབང་ཕྱུག་ཆེན་པོའོ། །སོགས་ཀྱིས་ནི་ཕུལ་དུ་བྱུང་བའི་སྦྱིན་བདག་གི་འཁོར་བརྒྱ་
བྱིན་དང་། གདུལ་བྱ་བཟོད་པའི་འབྲས་བུ་ཚིམ་པར་བྱེད་པའི་འཁོར་མཚེ་མའི་ལྷ་དང་། རྫུ་འཕྲུལ་སྣ་ཚོགས་པ་ལ་དབང་སྒྱུར་བ་འཕྲུལ་དགའི་ལྷ་དང་། འདོད་པ་ལ་གཅིག་ཏུ་ཞེན་པ་དང་བྲལ་བའི་འཁོར་གཞན་འཕྲུལ་དབང་བྱེད་པའི་ལྷ་དང་། འདོད་པ་ལ་ལྷག་པར་ཆགས་པ་དང་

བྲལ་བ་གཟུགས་ཁམས་ཀྱི་ལྷ་རྣམས་དང་། རིགས་གནས་སྟོན་པར་བྱེད་པ་སུམ་ཅུ་རྩ་གསུམ་པའི་ལྷའི་འཁོར་དང་། ཆོས་འཛིན་པའི་གང་ཟག་སྐྱོང་བར་བྱེད་པའི་འཁོར་རྒྱལ་པོ་ཆེན་པོ་འཁོར་དང་བཅས་པའོ། །ཐབས་ཅིག་པ་ནི་གསུམ་སྟེ། སྡུད་པའི་འཁོར་ཕྱག་ན་རྡོ་རྗེ་དང་
སྤོབས་པ་གཅིག་ཏུ་སྦྱར་བའོ། །ཉན་པའི་འཁོར་ནི་གུས་པ་དང་དབྱེར་མི་ཕྱེད་པའོ། །གདུལ་བྱའི་དུས་ལ་མི་ལྡོག་པས་ཐབས་ཅིག་པའོ། །བཞུགས་ཞེས་པ་ཡང་གསུམ་སྟེ། སྐུའི་བཞུགས་པ་ནི་འཆག་པ་དང་། བཞེངས་པ་དང་། སེང་གེ་ལྟ་བུར་གཟིམས་པ་ཞེས་པའོ། །
གསུང་གི་བཞུགས་པ་ནི། གསུང་གཅིག་གིས་ནི་གསུངས་མོད་ཀྱང་། དུ་མ་ཉིད་དུ་སོ་སོར་གོ། །ཞེས་དབང་པོ་རབ་འབྲིང་ཐ་མ་རྒྱུན་མི་འཆད་པའི་ཚུལ་གྱིས་གསུང་དབྱུང་ངོ་། །ཐུགས་ཀྱི་བཞུགས་པ་ནི་གཉིས་ཏེ། འཇིག་རྟེན་པ་དང་མཐུན་པའི་ཐུགས་བསྐྱེད་ནས་ཏིང་ངེ་
འཛིན་གང་ལ་ཞུགས་ན་གྲོག་སྦུར་ལ་སོགས་པ་ཡན་ཆད་ཀྱིས་ཀྱང་བཅོམ་ལྡན་འདས་ཀྱི་ཐུགས་རིག་པར་མཛད་པ་ནི་ནང་དུ་ཡང་དག་འཇོག་གིས་བཞུགས་པའོ། །སྙོམས་པར་འཇུག་པ་ལ་གསུམ་སྟེ། ལྷའི་ཚུལ་དང་མཐུན་པར་བསམ་གཏན་བཞིས་སྙོམས་པར་འཇུག་པ་དང་།
ཚད་མེད་པ་བཞིས་ཚངས་པའི་སྙོམས་པར་འཇུག་པ་དང་། རྣམ་ཐར་གསུམ་གྱིས་འཕགས་པའི་སྙོམས་པར་འཇུག་པའོ། །ཏེ་ཞེས་པས་བཞུགས་པ་ཉིད་ནི་འདས་པ་བསྟན་ཏོ། །འཁོར་མང་པོ་ཚོགས་པ་ནི་མི་མཐུན་པ་ཡོད་ན་གཉེན་པོ་འབྱུང་བའི་ཕྱིར་བར་དུ་གཅོད་པའི་འཁོར་
ཏེ་བདུད་ཀྱང་ཤེས་པར་བྱའོ། །དེས་ན་གདུལ་བྱའི་འཁོར་རོ། །དེ་ནས་བཅོམ་ལྡན་འདས་དགའ་ལྡན་གྱི་གནས་དེ་ན་ཆོས་གསུངས་བའི་དུས་སུ་འདོད་པ་དང་གཟུགས་ཀྱི་ལྷའི་བུ་ཐམས་ཅད་ཚོགས་ཏེ་བཅོམ་ལྡན་འདས་ཀྱི་རྫུ་འཕྲུལ་གྱི་ལམ་བྱིན་གྱིས་བརླབས་པའོ། །དེས་ན་
གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོར་ཇི་སྐད་གསུངས་པ་ལྟར་དགའ་ལྡན་གྱི་ལྷའི་གནས་ནོར་བུ་རིན་པོ་ཆེའི་ཁང་སྒྲོམ་ཆེན་པོ་སྤྲུལ་ནས། ལྷའི་གནས་ཐམས་ཅད་ནས་རིན་པོ་ཆེའི་ཐེམ་སྐས་དུ་མ་བརྟེན་ཏེ། སྐུའི་འོད་ཟེར་རིགས་མི་མཐུན་པ་བྱེ་བ་ཕྲག་བརྒྱད་ཅུ་

རེ་རེ་མངོན་པར་འདུས་བྱས་ནས་སྟོང་གསུམ་གྱི་སྟོང་ཆེན་པོའི་རབ་འབྱམས་ཀྱི་འཇིག་རྟེན་གྱི་ཁམས་ཐམས་ཅད་ཀྱི་ལྷ་ཚོགས་རྣམས་འདིར་ལྷགས་པར་གྱུར་ཏོ་ཞེས་བྱ་བའི་བར་དུའོ། །དེར་གསུངས་པའི་ཆོས་ནི་ཕ་རོལ་ཏུ་ཕྱིན་པ་དྲུག་གི་དོན་གྱི་རྒྱས་པའི་གསང་
སྔགས་འདི་ཁོ་ནའོ། །དེ་ལ་ཕ་རོལ་ཏུ་ཕྱིན་པ་དྲུག་ནི་འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་ནི་གང་བྱང་ཆུབ་སེམས་པའི་ཆོས་ཉིད་ལ་གནས་པའི་བྱང་ཆུབ་སེམས་དཔའ་བྱང་ཆུབ་ཀྱི་སེམས་ལ་བརྟེན་ནས་སྙིང་རྗེ་སྔོན་དུ་བཏང་བའི་སེམས་ཀྱིས་བདོག་པ་ཐམས་ཅད་ཡོངས་སུ་གཏོང་
བ་ལ་ལུས་དང་ངག་དང་ཡིད་ཀྱི་ལས་ཏེ་དེ་ལྟར་བྱས་ན་སྦྱིན་པའི་ཕ་རོལ་ཏུ་ཕྱིན་པའི་མཚན་ཉིད་ནི་རིགས་དང་། སྨོན་ལམ་དང་། བསམ་པ་དང་། དངོས་པོ་དང་། ངོ་བོ་ཉིད་ཀྱིས་བསྟན་པར་རིག་པར་བྱའོ། །འདི་ལྟ་སྟེ་བྱང་ཆུབ་སེམས་དཔའི་ཆོས་ཉིད་ནི་རིགས་སོ། །བྱང་ཆུབ་
ཀྱི་སེམས་ནི་སྨོན་ལམ་མོ། །སྙིང་རྗེ་སྔོན་དུ་གཏོང་བའི་སེམས་ནི་བསམ་པའོ། །བདོག་པ་ཐམས་ཅད་ཡོངས་སུ་གཏོང་བ་ནི་དངོས་པོའོ། །ལུས་དང་ངག་དང་ཡིད་ཀྱི་ལས་ནི་ངོ་བོ་ཉིད་དོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ཡང་དེ་བཞིན་དུ་རིག་པར་བྱའོ། །
འདི་ནི་བྱེ་བྲག་ཡིན་ཏེ། ཚུལ་ཁྲིམས་དང་བཟོད་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམས་ལ་ནི་སྡོམ་པ་ཐམས་ཅད་ཡང་དག་པར་ལེན་པ་དང་རྗེས་སུ་བསྲུང་བ་དང་། གནོད་པར་བྱེད་པ་དང་དུ་ལེན་པ་དང་། སྡུག་བསྔལ་ཇི་མི་སྙམ་པར་འཛིན་པ་དང་། དགེ་བའི་ཆོས་
ཐམས་ཅད་ཡང་དག་པར་སྒྲུབ་པ་ལ་ལུས་དང་ངག་དང་ཡིད་ཀྱི་ལས་སོ་ཞེས་གོ་རིམས་བཞིན་དུ་བརྗོད་པར་བྱའོ། །བསམ་གཏན་གྱི་ཕ་རོལ་ཏུ་ཕྱིན་པ་ལ་ནི་ལུས་དང་ངག་དང་ཡིད་ཀྱི་ལས་ཀྱི་རྣམ་པ་ཐམས་ཅད་དབང་འབྱོར་པ་དང་སེམས་ཀྱི་གནས་རྣམ་པ་ཐམས་ཅད་དང་ལྡན་ནོ། །
ཤེས་རབ་ཀྱི་ཕ་རོལ་ཏུ་ཕྱིན་པ་ལ་ནི་ལུས་དང་ངག་དང་ཡིད་ཀྱི་ལས་ཀྱི་རྣམ་པ་ཐམས་ཅད་དབང་འབྱོར་པ་ལ་གང་རྣམ་པ་ཐམས་ཅད་དུ་ཆོས་རབ་ཏུ་རྣམ་པར་འབྱེད་པའོ་ཞེས་བརྗོད་པར་བྱའོ། །ལྷག་མ་ཐམས་ཅད་ནི་སྦྱིན་པའི་རང་བཞིན་དུ་རིག་པར་བྱའོ། །གང་སྦྱིན་པ་ནི་

ཐམས་ཅད་མཁྱེན་པ་ཉིད་ལས་བརྩམས་པ་དང་། ཐམས་ཅད་མཁྱེན་པ་ཉིད་དུ་འགྱུར་བ་དང་། ཐམས་ཅད་མཁྱེན་པ་ཉིད་དུ་འཛིན་པ་དང་། ཐམས་ཅད་མཁྱེན་པ་ཉིད་ཀྱི་བྱ་བ་བྱེད་པ་སྟེ། དེ་ནི་སྦྱིན་པའི་ཕ་རོལ་ཏུ་ཕྱིན་པ་ཉིད་ཅེས་བྱའོ། །ཚིག་བཞི་པོ་དེ་དག་ནི་གོ་རིམས་བཞིན་
དུ་རྩོམ་པ་དང་བག་ཆགས་དང་ལུས་དང་རྒྱུ་མཐུན་པར་རེག་པར་བྱའོ། །དེ་ལ་རྩོམ་པ་ནི་ཐམས་ཅད་མཁྱེན་པ་ཉིད་ལས་བརྩམས་ཏེ་འབྱུང་བ་དང་། འབྱུང་བ་དེར་ཡོངས་སུ་བསྔོ་བའི་ཕྱིར་རོ། །སྦྱིན་པ་དེ་རྒྱུད་ལ་བག་ཆགས་སུ་བསྒོ་སྟེ་དེ་ཕྱི་མ་ལས་ཐམས་ཅད་མཁྱེན་པ་ཉིད་དུ་འགྱུར་རོ། །གང་གི་ཚེ་
དེ་ཉིད་ཡོངས་སུ་རྫོགས་པར་གྱུར་པ་དེའི་ཚེ་ཆོས་ཀྱི་སྐུ་ཡོངས་སུ་འགྲུབ་པའི་ཚུལ་གྱིས་ཐམས་ཅད་མཁྱེན་པ་ཉིད་ཡོངས་སུ་འཛིན་ཏོ། །དེའི་འོག་ཏུ་ལོངས་སྤྱོད་རྫོགས་པ་དང་སྤྲུལ་པའི་སྐུ་རྒྱུ་མཐུན་པའི་སྒོ་ནས་ཐམས་ཅད་མཁྱེན་པའི་བྱ་བ་བྱེད་དོ། །ཤེས་རབ་ཀྱི་ཕ་རོལ་ཏུ་ཕྱིན་
པའི་བར་ལ་ཡང་དེ་བཞིན་དུ་རིག་པར་བྱའོ། །གོ་རིམས་ཀྱི་འོག་མ་འོག་མ་ལ་བརྟེན་པའི་ཕྱིར་ཏེ། སྦྱིན་པའི་ཕ་རོལ་ཏུ་ཕྱིན་པས་ནི་ནང་དང་ཕྱིའི་དངོས་པོ་ཐམས་ཅད་ཡོངས་སུ་གཏོང་བར་གོམས་པས་ལུས་དང་སྲོག་ལ་མི་ལྟ་བའི་བྱང་ཆུབ་སེམས་དཔའ་ལོངས་སྤྱོད་ཀྱི་ཕུང་པོ་ཆེན་
པོ་ཡང་སྤངས་ནས་ཚུལ་ཁྲིམས་ཡང་དག་པར་འཛིན་པར་བྱེད་དོ། །ཚུལ་ཁྲིམས་རྗེས་སུ་བསྲུང་བ་ནི་གཤེ་ཡང་སླར་གཤེ་བར་མི་བྱེད་དེ་ཞེས་བྱ་བ་ལ་སོགས་པ་རྣམས་ཀྱིས་བཟོད་པར་འགྱུར་རོ། །གྲང་བ་ལ་སོགས་པ་བཟོད་པ་ནི་དེའི་གཞི་ལ་སྦྱོར་བ་མི་ཉམས་པས་བརྩོན་འགྲུས་
བརྩམས་པ་ཡིན་ནོ། །བརྩོན་འགྲུས་བརྩམས་པ་ནི་སྦྱོར་བ་མཐའི་འབྲས་བུ་ཐོབ་པས་བསམ་གཏན་སྒྲུབ་པའོ། །བསམ་གཏན་ཕུན་སུམ་ཚོགས་ཏེ་སེམས་མཉམ་པར་གཞག་པ་ནི་ཡང་དག་པ་ཇི་ལྟ་བ་བཞིན་དུ་ཤེས་པས་འཇིག་རྟེན་ལས་འདས་པའི་ཤེས་རབ་འཐོབ་བོ། །ཡང་གོང་
མ་གོང་མ་ནི་གཞི་ཡིན་པའི་ཕྱིར་རོ། །ཚུལ་ཁྲིམས་ནི་སྦྱིན་པའི་གཞི་ཡིན་ནོ། །དེ་བཞིན་དུ་ཤེས་རབ་ནི་བསམ་གཏན་གྱི་གཞི་ཡིན་པའི་བར་དུའོ། །འདི་ལྟར་ཚུལ་ཁྲིམས་དང་ལྡན་པའི་སྦྱིན་པས་ཕན་བཏགས་པའི་ཚུལ་ཁྲིམས་ཀྱིས་གནོད་པ་མི་བྱེད་པའི་ཕྱིར་སྦྱིན་པ་རྣམ་པར་

དག་པར་འགྱུར། དེ་ལྟར་བྱང་ཆུབ་སེམས་དཔའི་ལེན་པ་པོ་སོ་སོ་དེ་རྣམ་པར་འཚེ་བ་དང་བྲལ་བར་ཡོ་བྱད་ཀྱིས་བདེ་བར་སྦྱོར་བས་ཚུལ་ཁྲིམས་ཀྱི་སྟོབས་ཀྱིས་སྦྱིན་པ་རྣམ་པར་དག་པར་རིག་པར་བྱའོ། །དེ་ལྟར་བཟོད་པ་དང་ལྡན་པ་ནི་གཞན་གནོད་པ་བྱེད་པ་དག་གིས་
བསླབ་པའི་གཞི་མི་འདྲལ་བ་ཚུལ་ཁྲིམས་རྣམ་པར་དག་གོ། །བརྩོན་འགྲུས་བརྩམས་པས་སྤྲོ་བའི་སྟོབས་ཀྱིས་ཆེད་དུ་འཁོར་བ་ཁས་བླངས་པ་ནི་སེམས་ཅན་གྱི་ལོག་པར་སྒྲུབ་པའི་སྡུག་བསྔལ་དེ་བླག་ཏུ་བཟོད་པས་བཟོད་པ་རྣམ་པར་དག་གོ། །བསམ་གཏན་ནི་བདེ་བ་དང་
བཅས་པ་དང་ཡིད་བདེ་བ་དང་བཅས་པར་དགེ་བའི་ཆོས་ཐམས་ཅད་ལ་སྦྱོར་བ་བརྩོན་འགྲུས་རྣམ་པར་དག་གོ། །ཤེས་རབ་དང་ལྡན་པའི་ཆོས་རྣམ་པ་མང་པོ་ལ་རྣམ་པར་བལྟས་ནས་ནང་དུ་ཞི་བར་བྱེད་པ་ནི་ཏིང་ངེ་འཛིན་རྣམ་པར་འཕེལ་བས་བསམ་གཏན་རྣམ་པར་དག་སྟེ། ཤེས་
རབ་མེད་ལ་བསམ་གཏན་མེད། །ཅེས་པའི་ཚིགས་སུ་བཅད་པ་ལས་གསུངས་པའི་ཕྱིར་རོ། །ཇི་ལྟར་རགས་པའི་རིམ་གྱིས་ཀྱང་གོ་རིམས་བཞིན་དུ་རིག་པར་བྱའོ། །སྦྱིན་པ་ནི་ཐམས་ཅད་ཀྱི་ནང་ན་རགས་ཏེ་དེའི་ཕྱིར་ཐོག་མར་རྣམ་པར་གཞག་གོ། །དེའི་འོག་ཏུ་བཟོད་པ་
ལ་སོགས་པས་ཚུལ་ཁྲིམས་རགས་སོ། །དེ་བཞིན་དུ་ཤེས་རབ་པས་བསམ་གཏན་རགས་པའི་བར་དུའོ། །ཤེས་རབ་ནི་ཐམས་ཅད་ཀྱི་ནང་ན་ཕྲ་སྟེ་དེའི་ཕྱིར་ཐམས་ཅད་ཀྱི་ཐ་མར་བཞག་གོ། །ངེས་པའི་ཚིག་ནི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་ཞེས་བྱ་ཞེ་ན། སྦྱིན་
པ་ཆེན་པོ་དང་། སྐྱོན་མེད་པ་དང་། དྲི་མ་མེད་པ་ནི་སྦྱིན་པའི་ཕ་རོལ་ཏུ་ཕྱིན་པ་ཞེས་བྱའོ། །དེ་ལ་སྦྱིན་པ་ཆེན་པོ་ནི་ནང་དང་ཕྱིའི་དངོས་པོ་ཐམས་ཅད་སྦྱིན་པ་དང་ཡུན་རིང་དུ་སྦྱིན་པའི་ཕྱིར་རོ། །སྐྱོན་མེད་པ་ནི་གནོད་པས་ཀུན་ཏུ་ཚོལ་བ་ལ་སོགས་པ་རྣམ་པར་སྤངས་པའི་ཕྱིར་རོ། །
ཇི་སྐད་དུ་འཕགས་པ་བློ་གྲོས་མི་ཟད་པས་བསྟན་པའི་མདོ་ལས་སྦྱིན་པ་མི་ཟད་པ་ལས་བརྩམས་ཏེ་བསྟན་ལ། བཙུན་པ་ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ཀྱི་སྦྱིན་པ་ཡང་མི་ཟད་པ་སྟེ། དེ་ཅིའི་ཕྱིར་ཞེ་ན། ཚད་མེད་པའི་ཕྱིར་རོ། །བཙུན་པ་ཤ་ར་དྭ་ཏིའི་བུ་

བྱང་ཆུབ་སེམས་དཔའ་རྣམས་ཀྱི་སྦྱིན་པ་ཡོངས་སུ་སྦྱང་བ་ཡང་ཚད་མེད་པ་སྟེ། ཚེ་དང་། སྤོབས་པ་དང་། བདེ་བ་དང་། སྟོབས་དང་། ཁ་དོག་ཉེ་བར་བརྟག་པའི་ཕྱིར་ཟས་འདོད་པ་རྣམས་ལ་ནི་ཟས་སྦྱིན་ནོ། །ཉོན་མོངས་པའི་སྲེད་པ་བསལ་བའི་ཕྱིར་བཏུང་བ་འདོད་པ་རྣམས་
ལ་ནི་བཏུང་བ་སྦྱིན་ནོ། །བདེ་བ་དང་འབྱོར་པའི་དངོས་པོ་ཐམས་ཅད་བསྡུས་པའི་ཕྱིར་བཞོན་པ་འདོད་པ་རྣམས་ལ་ནི་བཞོན་པ་སྦྱིན་ནོ། །ངོ་ཚ་ཤེས་པ་དང་ཁྲེལ་ཡོད་པ་དང་། མདོག་གསེར་གྱི་ཁ་དོག་ཡོངས་སུ་སྦྱང་བའི་ཕྱིར་གོས་འདོད་པ་རྣམས་ལ་གོས་ཡོངས་སུ་སྦྱིན་པའོ། །དེ་བཞིན་
གཤེགས་པའི་ལྷའི་སྤྱན་ཡོངས་སུ་རྫོགས་པར་བྱ་བའི་ཕྱིར་མར་མེ་འདོད་པ་རྣམས་ལ་ནི་མར་མེ་ཡོངས་སུ་སྦྱིན་པའོ། །དེ་བཞིན་གཤེགས་པའི་ལྷའི་སྙན་ཡོངས་སུ་དང་བར་བྱ་བའི་ཕྱིར་སིལ་སྙན་འདོད་པ་རྣམས་ལ་ནི་སིལ་སྙན་ཡོངས་སུ་སྦྱིན་པའོ། །ཚུལ་ཁྲིམས་དང་ཐོས་པ་
དང་ཏིང་ངེ་འཛིན་གྱི་དྲིས་བྱུག་པའི་ཕྱིར་སྤོས་དང་བྱུག་པ་འདོད་པ་རྣམས་ལ་ནི་སྤོས་དང་བྱུག་པ་སྦྱིན་པའོ། །གཟུངས་དང་སྤོབས་པ་དང་བྱང་ཆུབ་ཀྱི་ཡན་ལག་གི་མེ་ཏོག་ཐོབ་པར་བྱ་བའི་ཕྱིར་ཕྲེང་བ་འདོད་པ་རྣམས་ལ་ནི་ཕྲེང་བ་སྦྱིན་པར་བྱའོ། །ལུས་ཀྱི་དྲི་ཡིད་དུ་འོང་བ་ཐོབ་པར་བྱ་
བའི་ཕྱིར་ཕྱེ་མ་འདོད་པ་རྣམས་ལ་ཕྱེ་མ་སྦྱིན་པའོ། །སྐྱེས་བུ་ཆེན་པོའི་མཚན་རོ་བྲོ་བ་མཆོག་ཏུ་ཡོངས་སུ་རྫོགས་པར་བྱ་བའི་ཕྱིར་རོ་བྲོ་བ་ཐམས་ཅད་འདོད་པ་རྣམས་ལ་རོ་བྲོ་བ་ཐམས་ཅད་སྦྱིན་པའོ། །སེམས་ཅན་ཐམས་ཅད་ཀྱི་གནས་དང་སྐྱབས་དང་། མགོན་དང་དཔུང་གཉེན་
བྱ་བའི་ཕྱིར་གནས་འདོད་པ་རྣམས་ལ་གནས་སྦྱིན་པར་བྱའོ། །སྒྲིབ་པ་ཐམས་ཅད་རབ་ཏུ་སྤངས་པ་དང་ཚངས་པའི་གནས་པ་དེ་བཞིན་གཤེགས་པའི་གཟིམས་ཆ་ཐོབ་པར་བྱ་བའི་ཕྱིར་མལ་ཆ་འདོད་པ་རྣམས་ལ་མལ་ཆ་སྦྱིན་པར་བྱེད་དོ། །སྟོང་གསུམ་གྱི་སྟོང་ཆེན་པོའི་ས་
ཐམས་ཅད་ཀྱི་བྱང་ཆུབ་ཀྱི་སྙིང་པོ་རྡོ་རྗེའི་གདན་ཐོབ་པར་བྱ་བའི་ཕྱིར་སྟན་འདོད་པ་རྣམས་ལ་སྟན་སྦྱིན་པར་བྱེད་དོ། །བྱང་ཆུབ་ཀྱི་ཡོ་བྱད་ཐམས་ཅད་བཀང་བའི་ཕྱིར་ཡོ་བྱད་འདོད་པ་རྣམས་ལ་ཡོ་བྱད་སྦྱིན་པའོ། །མི་རྒ་མི་འཆི་བའི་བདུད་རྩིས་ཡོངས་སུ་བཀང་བའི་ཕྱིར་སྨན་འདོད་པ་རྣམས་

ལ་སྨན་སྦྱིན་པའོ། །རང་དབང་དང་རང་ཉམས་དང་རང་བྱུང་གི་ཡེ་ཤེས་བསྐང་བའི་ཕྱིར་བྱང་ཆུབ་སེམས་དཔའ་རྣམས་ཀྱི་བྲན་ཕོ་དང་བྲན་མོ་ཡོངས་སུ་བཏང་བའི་སྦྱིན་པའོ་ཞེས་རྒྱ་ཆེར་འབྱུང་བ་ལྟ་བུའོ། །དྲི་མ་མེད་པ་ནི་མི་མཐུན་པའི་ཕྱོགས་བག་ཆགས་དང་
བཅས་པ་སྤངས་པའི་ཕྱིར་རོ། །དམ་པ་རྣམ་པ་འདི་གསུམ་གྱིས་སྦྱིན་པའི་ཕ་རོལ་ཏུ་ཕྱིན་པ་ཞེས་བརྗོད་པ་ཡིན་ཏེ། དམ་པ་རྣམ་གསུམ་ནི་འདྲིས་པ་དང་བཅས་པའི་ངོ་བོ་ཉིད་དམ་པ་དང་ཐབས་དམ་པ་དང་འབྲས་བུ་དམ་པའོ། །འདྲིས་པ་དམ་པ་ནི་ཡུན་རིང་པོ་ནས་སྦྱིན་པར་རིག་
པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡང་དེ་བཞིན་དུ་རིག་པར་བྱའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྐྱོན་མེད་པ་ནི་བདག་ཏུ་སྒྲོ་འདོགས་པ་རྣམ་པར་སྤངས་པའི་ཕྱིར་ཏེ་ཅི་རིགས་སུ་དེ་མི་ཟད་པར་བལྟ་བར་བྱའོ། །ཡང་དམ་པ་རྣམ་པ་བཅུ་གཉིས་དང་ལྡན་པའི་ཕྱིར་ཕ་
རོལ་ཏུ་ཕྱིན་པ་ཞེས་བྱའོ། །དམ་པ་རྣམ་པ་བཅུ་གཉིས་ལ་རྒྱ་ཆེ་བ་དམ་པ་ནི་འཇིག་རྟེན་གྱི་ཕུན་སུམ་ཚོགས་པ་ཐམས་ཅད་མི་འདོད་པ་དང་མཆོག་ཏུ་གྱུར་པའི་ཕྱིར་རོ། །ཡུན་རིང་པོ་དམ་པ་ནི་བསྐལ་པ་གྲངས་མེད་པ་གསུམ་དུ་ཡོངས་སུ་བསྒོམས་པའི་ཕྱིར་རོ། །ཆེད་དུ་བྱ་བ་དམ་པ་ནི་
སེམས་ཅན་གྱི་དོན་བྱ་བའི་ཆེད་ཀྱི་ཕྱིར་རོ། །ཟད་མི་ཤེས་པ་དམ་པ་ནི་བྱང་ཆུབ་ཆེན་པོར་ཡོངས་སུ་བསྔོས་བས་གདུང་བར་མི་འགྱུར་བའི་ཕྱིར་རོ། །རྒྱུན་མི་འཆད་པ་དམ་པ་ནི་བདག་དང་གཞན་མཉམ་པ་ཉིད་དུ་མོས་པའི་ཕྱིར་རོ། །སེམས་ཅན་ཐམས་ཅད་ལ་སྦྱིན་པ་ལ་སོགས་པ་ཕ་
རོལ་ཏུ་ཕྱིན་པ་རྣམས་ཡོངས་སུ་རྫོགས་པར་བྱ་བའི་ཕྱིར་རོ། །ཚིགས་མེད་པ་དམ་པ་ནི་གཞན་གྱི་སྦྱིན་པ་ལ་སོགས་པ་ལ་རྗེས་སུ་ཡི་རང་བ་ཙམ་གྱིས་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར་རོ། །དབང་འབྱོར་པ་དམ་པ་ནི་ནམ་མཁའ་མཛོད་ཀྱི་ཏིང་ངེ་འཛིན་ལ་སོགས་
པས་སྦྱིན་པ་ལ་སོགས་པ་ཡོངས་སུ་རྫོགས་པའི་ཕྱིར་རོ། །ཡོངས་སུ་གཟུང་བ་དམ་པ་ནི་རྣམ་པར་མི་རྟོག་པའི་ཡེ་ཤེས་ཀྱིས་ཡོངས་སུ་གཟུང་བའི་ཕྱིར་རོ། །རྩོམ་པ་དམ་པ་ནི་མོས་པ་སྤྱོད་པའི་ས་ལ་བཟོད་པ་ཆེར་གྱུར་པ་ལའོ། །ཐོབ་པ་དམ་པ་ནི་ས་དང་པོ་ལའོ། །རྒྱུ་

མཐུན་པ་དམ་པ་ནི་དེ་མ་ཡིན་པ་གཞན་བརྒྱད་པོ་དག་ལའོ། །འགྲུབ་པ་དམ་པ་ནི་ས་བཅུ་པ་དང་། དེ་བཞིན་གཤེགས་པའི་ས་ལ་བྱང་ཆུབ་སེམས་དཔའ་འགྲུབ་པ་དང་སངས་རྒྱས་འགྲུབ་པའི་ཕྱིར་རོ། །ཡང་དམ་པ་རྣམས་ཀྱིས་སྤྱད་པ་དང་བགྲོད་པའི་ཕྱིར་ཕ་རོལ་ཏུ་ཕྱིན་པ་རྣམས་ཏེ།
སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སྤྱད་པ་དང་བགྲོད་ཅེས་པའི་ཐ་ཚིག་གོ། །ཡང་ཤེས་བྱའི་ཕ་རོལ་ཏུ་སོན་པས་ཕ་རོལ་ཏུ་ཕྱིན་པ་སྟེ། སངས་རྒྱས་ཉིད་ལ་གནས་ཞེས་པའི་ཐ་ཚིག་གོ། །ཡང་བདག་དང་གཞན་མཆོག་ཏུ་གནོད་པ་ལས་སྒྲོལ་བར་བྱེད་པའི་ཕ་རོལ་
ཏུ་ཕྱིན་པ་རྣམས་ཏེ། བདག་དང་གཞན་སྡུག་བསྔལ་གྱི་རྒྱ་མཚོ་ལས་བཟླ་བར་བྱེད་ཅེས་པའི་ཐ་ཚིག་གོ། །འདི་ནི་རེ་ཞིག་ཐུན་མོང་གི་ངེས་ཚིག་གོ། །སོ་སོར་ངེས་པའི་ཚིག་ནི་སྦྱིན་བདག་གི་དབུལ་བ་སེལ་བ་དང་། ལེན་པ་པོ་རྣམས་ཀྱི་གདུང་བ་སེལ་བའི་ཕྱིར་སྦྱིན་པའོ། །
དབང་པོ་ཞི་བ་ཐོབ་པ་དང་འགྲོ་བ་བཟང་པོར་སྦྱོར་བ་དང་། གསལ་བའི་གནས་ཡིན་པས་ཚུལ་ཁྲིམས་ཏེ། གོ་རིམས་བཞིན་དུ་དབང་པོ་རྣམས་ཀྱི་སྒོ་སྡོམ་པར་བྱེད་པ་དང་བདེ་འགྲོར་འགྲོ་བའི་རྒྱུར་གྱུར་པ་དང་འགྱོད་པ་མེད་པ་ལ་སོགས་པའི་རིམ་གྱིས་མྱ་ངན་ལས་འདས་པའི་
བར་གྱི་གནས་ཡིན་པའི་ཕྱིར་རོ། །ཁྲོ་བའི་ན་ཚ་སེལ་བ་དང་རྨ་འབྱིན་པའི་སེམས་འོངས་པ་སེལ་བ་དང་། །ཞི་བ་བརྗོད་པའི་བཟོད་པའོ། །རྨ་འབྱིན་པ་སེམས་པ་ནི་གང་གིས་གནོད་པ་བྱེད་པ་རྣམས་ལ་ལན་དུ་གནོད་པ་སྟེ་དེ་འོངས་པ་འདིས་འབྲལ་བར་བྱེད་པ་ནི་སེལ་བར་རིག་པར་
བྱའོ། །རྨ་འབྱིན་པ་ནི་འདི་དག་ལས་ཤར་གཉེར་བ་ཡོད་པས་རྨ་འབྱིན་པ་ཅན་ཏེ་དེ་དག་བདག་ལ་མི་འཇིགས་པ་སྒྲོགས་པས་བདེ་བ་ནི་བདེ་བ་སྒྲོགས་པར་རིག་པར་བྱའོ། །སེལ་བ་འཕེལ་བར་སྤྱོད་པས་བརྩོན་འགྲུས་ཏེ་དེ་སེལ་བའི་ཕྱིར་སྤྱོད་པ་ནི་ཡང་དག་པར་སྤོང་བ་གཉིས་ཀྱིས་མི་
དགེ་བའི་ཆོས་དང་བྲལ་བར་བྱེད་པའོ། །འཕེལ་བའི་ཕྱིར་སྤྱོད་པ་ནི་ཡང་དག་པར་སྤོང་བ་གཉིས་ཀྱིས་དགེ་བའི་ཆོས་ཡང་དག་པར་སྒྲུབ་པའོ། །འཛིན་པ་དང་སྡོམ་པ་དང་འདུལ་བ་དང་ཐོབ་པར་བྱེད་པས་བསམ་གཏན་ཏེ། དེ་ལ་འཛིན་པ་ནི་དམིགས་པ་ལ་སེམས་འཛིན་པའོ། །སྡོམ་

པ་ནི་རྣམ་པར་གཡེང་བ་ལས་སེམས་ཡང་དག་པར་སྡོམ་པའོ། །འདུལ་བ་ནི་ཀུན་ནས་དཀྲིས་པ་རྣམས་རྣམ་པར་གནོན་པའོ། །ཐོབ་པར་བྱེད་པ་ནི་དབང་འབྱོར་པ་ཐོབ་པར་བྱེད་པར་རིག་པར་བྱའོ། །གཞན་གྱིས་སྨྲས་པ་ཤེས་པ་དང་སོ་སོ་རང་གིས་ཤེས་པ་དང་།
རྣམ་པར་ཤེས་པ་དང་། ཞི་བ་ཐོབ་པ་དང་། རབ་ཏུ་ཞི་བ་ཐོབ་པ་དང་། ཡོན་ཏན་མཆོག་ཏུ་སྦྱིན་པས་ཤེས་རབ་སྟེ་དེ་ལ་གཞན་གྱི་སྨྲས་པ་ལས་བྱུང་བའི་ཚུལ་བཞིན་ཡིད་ལ་བྱེད་པ་དང་མཚུངས་པར་ལྡན་པའི་ཤེས་རབ་བོ། །སོ་སོ་རང་གིས་ཤེས་པ་ནི་འཇིག་རྟེན་ལས་འདས་པའོ། །
རྣམ་པར་ཤེས་པ་ནི་འཇིག་རྟེན་ལས་འདས་པའི་རྗེས་ལས་ཐོབ་པའོ། །ཞི་བ་ཐོབ་པར་བྱ་བའི་ཕྱིར་ཤེས་པ་ནི་བསྒོམ་པའི་ལམ་ལ་གཉེན་པོར་གྱུར་པའོ། །ཡོན་ཏན་མཆོག་ཏུ་ཕྱིན་པར་བྱ་བའི་ཕྱིར་ཤེས་པ་ནི་ཡོན་ཏན་ཁྱད་པར་ཅན་མངོན་པར་སྒྲུབ་པའི་ཤེས་རབ་ཏུ་རིག་པར་བྱའོ། །བསྒོམ་
པ་ནི་རྣམ་པ་ལྔ་སྟེ། ཕུང་པོ་ལ་གནས་པ་ནས་དབང་འབྱོར་པ་ལ་གནས་པའི་བར་དུའོ། །འདིར་ཚིགས་སུ་བཅད་པ། ཕུང་པོ་གནས་པ་བསྒོམ་པ་སྟེ། །ཡིད་ལ་བྱེད་པ་བསམ་པ་ཡིན། །ཐབས་དང་དབང་འབྱོར་དེ་བཞིན་ཏེ། །དེ་དག་ཐམས་ཅད་བརྗོད་པ་ཡིན། །ཇི་སྐད་དུ། རྒྱུ་
དང་རྣམ་སྨིན་སྨོན་ལམ་དང་། །སོ་སོར་རྟོག་པ་ཕུང་པོ་འདྲ། །ཞེས་བཤད་པ་ལྟ་བུའོ། །དེ་ལ་ཕུང་པོ་ལ་རྣམ་པ་བཞི་སྟེ། དེ་ལ་རྒྱུ་ལ་གནས་པ་ནི་ཤེས་རབ་ཀྱི་སྟོབས་ཀྱིས་ཕ་རོལ་ཏུ་ཕྱིན་པ་རྣམས་ལ་ནན་ཏན་གྱིས་གོམས་པར་བྱེད་པའོ། །རྣམ་པར་སྨིན་པ་ལ་གནས་པ་ནི་གང་ཕུན་སུམ་
ཚོགས་པའི་སྟོབས་ཀྱིས་སོ། །སྨོན་ལམ་ལ་གནས་པ་ནི་གང་སྔོན་གྱི་སྨོན་ལམ་གྱི་སྟོབས་ཀྱིས་སོ། །སོ་སོར་རྟོག་པའི་སྟོབས་ཀྱིས་གནས་པ་ནི་ཤེས་རབ་ཀྱི་སྟོབས་ཀྱིས་ཕ་རོལ་ཏུ་ཕྱིན་པ་རྣམས་ལ་ནན་ཏན་གྱིས་གོམས་པར་བྱེད་པའོ། །ཡིད་ལ་བྱེད་པ་ལ་གནས་པ་ནི་བཞི་སྟེ།
མོས་པ་ཡིད་ལ་བྱེད་པ་བསྒོམ་པ་ནི་གང་ལ་ཕ་རོལ་ཏུ་ཕྱིན་པ་ཐམས་ཅད་དང་ལྡན་པའི་མདོ་སྡེ་ལ་མོས་པ་བསྒོམ་པའོ། །རོ་མྱོང་བ་ཡིད་ལ་བྱེད་པས་བསྒོམ་པ་ནི་ཕ་རོལ་ཏུ་ཕྱིན་པ་ཐོབ་པ་རྣམས་ལ་ཡོན་ཏན་མཐོང་བའི་ཚུལ་གྱིས་རོ་མྱང་བར་བྱེད་པའོ། །རྗེས་སུ་ཡི་རང་བ་ཡིད་ལ་བྱེད་པས་

བསྒོམ་པ་ནི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་ཀྱི་སྦྱིན་པ་ལ་སོགས་པ་ལ་རྗེས་སུ་ཡི་རང་བའོ། །མངོན་པར་དགའ་བ་ཡིད་ལ་བྱེད་པས་བསྒོམ་པ་ནི་བདག་དང་སེམས་ཅན་ཐམས་ཅད་ཀྱི་མ་འོངས་པའི་ཕ་རོལ་ཏུ་ཕྱིན་པའི་ཁྱད་པར་ལ་མངོན་པར་དགའ་བའོ། །བསམ་
པ་ལ་གནས་པ་ནི་ཕ་རོལ་ཏུ་ཕྱིན་པའི་བསྒོམ་པ་རྣམ་པ་དྲུག་སྟེ། མི་ངོམས་པའི་བསམ་པ་དང་། ཡངས་པའི་བསམ་པ་དང་། དགའ་བའི་བསམ་པ་དང་། ཕན་འདོགས་པའི་བསམ་པ་དང་། གོས་པ་མེད་པའི་བསམ་པ་དང་། དགེ་བའི་བསམ་པའོ། །དེ་ལ་བྱང་ཆུབ་སེམས་
དཔའ་སྦྱིན་པ་ལ་མི་ངོམས་པའི་བསམ་པ་ནི་བྱང་ཆུབ་སེམས་དཔའ་གཅིག་ཅིག་གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་ཡོངས་སུ་གང་བ་དང་ལུས་གངྒཱའི་ཀླུང་གཅིག་ལ་སྦྱིན་པར་བྱེད་ཅེས་སོ། །དེ་བཞིན་དུ་སྐད་ཅིག་རེ་རེ་ལ་གངྒཱའི་ཀླུང་གི་བྱེ་མ་སྙེད་ཀྱི་བསྐལ་
པར་སྦྱིན་པར་བྱེད་ཅིང་སེམས་ཅན་གཅིག་ལ་ཇི་ལྟ་བ་བཞིན་དུ་སེམས་ཅན་གྱི་ཁམས་ཇི་སྙེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡོངས་སུ་སྨིན་པར་བྱེད་ལ། རྣམ་གྲངས་འདིས་དེ་ལ་སྦྱིན་པས་མི་ངོམས་པ་ཉིད་ནི་བྱང་ཆུབ་སེམས་དཔའ་སེམས་དཔའ་ཉིད་དེ། རྣམ་པ་
འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པ་ལ་བྱང་ཆུབ་སེམས་དཔའི་བསམ་པ་མི་ངོམས་པ་ཡིན་ནོ། །བྱང་ཆུབ་ཀྱི་སྙིང་པོ་ལ་འདུག་གི་བར་དུ་བྱང་ཆུབ་སེམས་དཔའ་རྣམས་རྣམ་པ་དེ་ལྟ་བུར་སྦྱིན་པ་གཅིག་ནས་གཅིག་ཏུ་བརྒྱུད་པ་སྐད་ཅིག་ཙམ་ཡང་ཉམས་པར་མི་བྱེད་ཅིང་རྒྱུན་མི་
གཅོད་དེ། རྣམ་པ་འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པ་ལ་བྱང་ཆུབ་སེམས་དཔའི་ཡངས་པའི་བསམ་པའོ། །དེ་ལྟར་སྦྱིན་པས་སེམས་ཅན་དེ་དག་རྗེས་སུ་འཛིན་པའི་བྱང་ཆུབ་སེམས་དཔའ་ནི་ཤིན་ཏུ་དགའ་བ་ཡིན་གྱི་སྦྱིན་པ་དེས་ཡོངས་སུ་གཟུང་བའི་སེམས་ཅན་
དེ་དག་ནི་དེ་ལྟ་མ་ཡིན་ཏེ། རྣམ་པ་འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པ་ལ་བྱང་ཆུབ་སེམས་དཔའི་དགའ་བའི་བསམ་པའོ། །གང་དག་ལ་དེ་ལྟར་སྦྱིན་པས་ཕན་འདོགས་པའི་སེམས་ཅན་དེ་དག་ནི་བདག་ལ་ཕན་འདོགས་པར་བྱང་ཆུབ་སེམས་དཔའ་མཐོང་གི་བདག་གིས་ནི་

མ་ཡིན་ཏེ། དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྟན་པའི་ཕྱིར་རོ། །རྣམ་པ་འདི་ལྟ་བུའི་བསམ་པ་གང་ཡིན་པ་དེ་འདི་ནི་སྦྱིན་པ་ལ་བྱང་ཆུབ་སེམས་དཔའ་ཕན་འདོགས་པའི་བསམ་པའོ། །བྱང་ཆུབ་སེམས་དཔའ་ནི་སེམས་ཅན་རྣམས་ལ་དེ་
ལྟར་སྦྱིན་པ་ལས་བྱུང་བའི་བསོད་ནམས་ཡངས་པ་མངོན་པར་འདུ་བྱས་ཀྱང་ལན་དུ་ཕན་འདོགས་པའམ་རྣམ་པར་སྨིན་པ་མི་འདོད་དེ་རྣམ་པ་འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པའི་ཕ་རོལ་ཏུ་ཕྱིན་པ་བསྒོམ་པ་ལ་བྱང་ཆུབ་སེམས་དཔའི་གོས་པ་མེད་པའི་བསམ་པའོ། །བྱང་ཆུབ་སེམས་
དཔའི་སྦྱིན་པའི་ཕུང་པོ་སྤངས་པའི་རྣམ་པར་སྨིན་པ་དེ་ལྟ་བུའང་སེམས་ཅན་རྣམས་ཀྱི་ཡིན་པར་མངོན་པར་དགའ་བར་བྱེད་ཀྱི་བདག་ལ་ནི་དེ་ལྟ་མ་ཡིན་ཏེ། སེམས་ཅན་ཐམས་ཅད་དང་ཐུན་མོང་དུ་བྱས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །རྣམ་པ་
འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པའི་ཕ་རོལ་ཏུ་ཕྱིན་པ་བསྒོམ་པ་དང་བྱང་ཆུབ་སེམས་དཔའི་དགེ་བའི་བསམ་པའོ། །དེ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པའི་བར་ལ་བྱང་ཆུབ་སེམས་དཔའ་མི་ངོམས་པའི་བསམ་པ་ནི་
གང་བྱང་ཆུབ་སེམས་དཔའ་ལུས་གངྒཱའི་ཀླུང་གི་བྱེ་མ་སྙེད་དུ་གྱུར་ཞིང་དེའི་ཚེའི་ཚད་བསྐལ་པ་གངྒཱའི་ཀླུང་གི་བྱེ་མ་སྙེད་དུ་གྱུར་ལ། རྒྱུན་དུ་ཡོ་བྱད་ཐམས་ཅད་ཀྱིས་ཕོངས་པར་གྱུར་ཅིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མེས་རབ་ཏུ་གང་བ་ན་སྤྱོད་ལམ་བཞི་བྱེད་ཀྱང་། སྐད་
ཅིག་གཅིག་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནས་སྐད་ཅིག་གཅིག་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལ་བསྒོམ་ཞིང་རྣམ་གྲངས་འདིས་ཚུལ་ཁྲིམས་ཀྱི་ཕུང་པོ་ཇི་སྙེད་པ་དང་། ཤེས་རབ་ཀྱི་ཕུང་པོ་ཇི་སྙེད་པ་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་འཚང་རྒྱ་བའི་ཚུལ་ཁྲིམས་ཀྱི་ཕུང་པོ་ནས་ཤེས་རབ་ཀྱི་ཕུང་པོ་དེ་བསྒོམ་ཡང་བྱང་ཆུབ་སེམས་དཔའ་དེ་མི་ངོམས་པའོ། །བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་

བསྒོམ་པའི་བར་དུ་བསྒོམ་ལ་བྱང་ཆུབ་སེམས་དཔའ་ཡངས་པའི་བསམ་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་དེས་སེམས་ཅན་རྗེས་སུ་འཛིན་པའི་བྱང་ཆུབ་སེམས་དཔའ་ནི་རབ་ཏུ་དགའ་བ་ཡིན་གྱི་རྗེས་སུ་གཟུང་བའི་སེམས་
ཅན་དེ་དག་ནི་དེ་ལྟར་མ་ཡིན་ཏེ། རྣམ་པ་དེ་ལྟ་བུའི་བསམ་པ་གང་ཡིན་པ་འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་བསྒོམ་པ་ནི་བྱང་ཆུབ་སེམས་དཔའ་དགའ་བའི་བསམ་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་
རབ་ཀྱི་ཕ་རོལ་ཏུ་ཕྱིན་པའི་བར་དུ་བསྒོམས་ནས་གང་དག་ལ་ཕན་འདོགས་པའི་སེམས་ཅན་དེ་དག་ནི་བདག་ལ་ཤིན་ཏུ་ཕན་འདོགས་པར་བྱང་ཆུབ་སེམས་དཔའ་མཐོང་གི་བདག་ནི་མ་ཡིན་ཏེ། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྟོན་པའི་ཕྱིར་རོ། །རྣམ་པ་
འདི་ལྟ་བུའི་བསམ་པ་གང་ཡང་ཡིན་པ་འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་བསྒོམ་པ་ལ་བྱང་ཆུབ་སེམས་དཔའ་ཕན་འདོགས་པའི་བསམ་པའོ། །དེ་ལ་བྱང་ཆུབ་སེམས་དཔའ་ནི་དེ་ལྟར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལས་
བྱུང་བ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལས་བྱུང་བའི་བསོད་ནམས་མང་པོ་མངོན་པར་འདུ་བྱས་ཀྱང་དེ་ལ་ལན་དུ་ཕན་འདོགས་པའམ་རྣམ་པར་སྨིན་པ་ལ་འདོད་པ་མེད་དེ། འདི་ལྟ་བུའི་བསམ་པ་གང་ཡིན་པ་འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་
བར་གྱི་བསྒོམ་པ་ལ་གོས་པ་མེད་པའི་བསམ་པའོ། །དེ་ལ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་བསྒོམ་པ་ལས་བྱུང་བ་ནས་ཤེས་རབ་ཀྱི་བར་གྱི་བསོད་ནམས་ཀྱི་ཕུང་པོའི་རྣམ་པར་སྨིན་པའི་འབྲས་བུ་ཡང་སེམས་ཅན་རྣམས་ཀྱི་ཡིན་པར་མངོན་པར་དགའ་བར་
བྱེད་ཀྱི་བདག་ལ་ནི་མ་ཡིན་ཏེ། སེམས་ཅན་ཐམས་ཅད་དང་ཐུན་མོང་དུ་བྱས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བའོ། །རྣམ་པ་འདི་ལྟ་བུའི་བསམ་པ་གང་ཡིན་པ་འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་

པའི་བར་དུ་བསྒོམ་པ་ལ་བྱང་ཆུབ་སེམས་དཔའི་དགེ་བའི་བསམ་པའོ། །ཐབས་ལ་གནས་ཏེ་ཕ་རོལ་ཏུ་ཕྱིན་པ་བསྒོམ་པ་གང་ཞེ་ན། རྣམ་པ་གསུམ་སྟེ། སོ་སོར་རྟོག་པའི་ཕྱིར་རྣམ་པར་མི་རྟོག་པའི་ཡེ་ཤེས་ཀྱི་འཁོར་གསུམ་ཡོངས་སུ་དག་པ་སྟེ་ཐབས་དེ་
ནི་ཡིད་ལ་བྱེད་པ་ཐམས་ཅད་མངོན་པར་གྲུབ་པའི་ཕྱིར་རོ། །དབང་འབྱོར་པ་ལ་གནས་ཏེ་ཕ་རོལ་ཏུ་ཕྱིན་པ་བསྒོམ་པ་ནི་རྣམ་པ་གསུམ་སྟེ། ལུས་ལ་དབང་འབྱོར་པ་དང་། སྤྱོད་པ་ལ་དབང་འབྱོར་པ་དང་། བཤད་པ་ལ་དབང་འབྱོར་པའོ། །ལུས་ལ་དབང་འབྱོར་པ་ནི་དེ་བཞིན་
གཤེགས་པའི་སྐུ་གཉིས་སུ་བལྟ་བར་བྱ་སྟེ། རང་བཞིན་དང་ལོངས་སྤྱོད་རྫོགས་པའོ། །དེ་ལ་སྤྱོད་པ་ལ་དབང་འབྱོར་པ་ནི་སྤྲུལ་པའི་སྐུར་བལྟ་བར་བྱ་སྟེ། དེས་སེམས་ཅན་ཐམས་ཅད་ལ་སྤྱོད་པ་ཀུན་དུ་སྟོན་པའོ། །བཤད་པ་ལ་དབང་འབྱོར་པ་ནི་ཕ་རོལ་ཏུ་ཕྱིན་པ་དྲུག་རྣམ་པ་
ཐམས་ཅད་དུ་བཤད་པ་ལ་ཐོགས་པ་མེད་པའོ། །རབ་ཏུ་དབྱེ་བ་ནི་རྟོན་པ་བཅོ་བརྒྱད་ཀྱིས་ཕ་རོལ་ཏུ་ཕྱིན་པ་དྲུག་རབ་ཏུ་དབྱེ་བར་བལྟའོ། །རྟོན་པ་བཅོ་བརྒྱད་ནི་ལུས་རྟོན་པ་དང་སེམས་རྟོན་པ་དང་། དགེ་བ་རྟོན་པ་དང་། བདེ་འགྲོ་རྟོན་པ་དང་། བྱང་ཆུབ་རྟོན་པ་དང་། སྙིང་རྗེ་
རྟོན་པ་དང་། སེམས་ཅན་ཡོངས་སུ་མི་གཏོང་བར་རྟོན་པ་དང་། དམན་པའི་སེམས་ཡོངས་སུ་འདོར་བར་རྟོན་པ་དང་། མི་སྐྱེ་བའི་ཆོས་ལ་བཟོད་པ་རྟོན་པ་དང་། དགེ་བའི་རྩ་བ་སྦྱོར་བ་ལ་རྟོན་པ་དང་། དགེ་བའི་རྩ་བ་ཡང་དག་པར་སྒྲུབ་པ་རྟོན་པ་དང་། དགེ་བའི་རྩ་བ་མི་
ཟད་པར་རྟོན་པ་དང་། དགེ་བའི་རྩ་བ་ལ་ཡོངས་སུ་མི་སྐྱོ་བར་རྟོན་པ་དང་། བསམ་པའི་དོན་ཐམས་ཅད་འབྱོར་པར་རྟོན་པ་དང་། ཚོགས་སྡུད་པར་རྟོན་པ་དང་། ས་ལ་འཇུག་པ་རྟོན་པ་དང་། སངས་རྒྱས་ཀྱི་ཆོས་ཡང་དག་པར་སྒྲུབ་པ་རྟོན་པ་དང་། སངས་རྒྱས་ཀྱི་སྒྲུབ་པ་
རྟོན་པ་སྟེ་སྦྱིན་པ་ལ་སོགས་པ་རྣམ་པ་གསུམ་ཐ་དད་པས་གསུམ་གསུམ་གྱིས་གོ་རིམས་བཞིན་དུ་བསྡུས་པར་རིག་པར་བྱའོ། །དེ་ལ་སྦྱིན་པ་རྣམ་པ་གསུམ་ནི་ཟང་ཟིང་གི་སྦྱིན་པ་དང་། མི་འཇིགས་པའི་སྦྱིན་པ་དང་། ཆོས་ཀྱི་སྦྱིན་པའོ། །ཚུལ་ཁྲིམས་ལ་རྣམ་པ་གསུམ་སྟེ་སྡོམ་

པའི་ཚུལ་ཁྲིམས་དང་། དགེ་བ་ཆོས་སྡུད་པའི་ཚུལ་ཁྲིམས་དང་། སེམས་ཅན་དོན་བྱེད་པའི་ཚུལ་ཁྲིམས་སོ། །བཟོད་པ་རྣམ་པ་གསུམ་ནི་གནོད་པ་བྱེད་པ་ལ་ཇི་མི་སྙམ་པའི་བཟོད་པ་དང་། སྡུག་བསྔལ་དང་དུ་ལེན་པའི་བཟོད་པ་དང་། ཆོས་ལ་ངེས་པར་སེམས་པའི་
བཟོད་པའོ། །བརྩོན་འགྲུས་རྣམ་པ་གསུམ་ནི་གོ་ཆའི་བརྩོན་འགྲུས་དང་། སྦྱོར་བའི་བརྩོན་འགྲུས་དང་། སེམས་ཅན་དོན་བྱ་བའི་བརྩོན་འགྲུས་སོ། །བསམ་གཏན་རྣམ་པ་གསུམ་ནི་མཐོང་བའི་ཆོས་ལ་བདེ་བར་གནས་པར་འགྱུར་བའི་བསམ་གཏན་དང་། མངོན་པར་ཤེས་
པ་མངོན་པར་གསལ་བའི་བསམ་གཏན་དང་། སེམས་ཅན་གྱི་དོན་བྱ་བའི་བསམ་གཏན་ནོ། །ཤེས་རབ་རྣམ་པ་གསུམ་ནི་ཀུན་རྫོབ་ལ་དམིགས་པ་དང་། དོན་དམ་པ་ལ་དམིགས་པ་དང་། སེམས་ཅན་གྱི་དོན་ལ་དམིགས་པའོ། །དེ་ལ་ཟང་ཟིང་གི་སྦྱིན་པ་ནི་ལུས་ལ་རྟོན་པ་
ཏེ་བཟའ་བ་དང་བཏུང་བ་ལ་སོགས་པའི་ཡོ་བྱད་རྣམས་ཀྱིས་ལེན་པ་པོ་ལ་ཕན་འདོགས་པའི་ཕྱིར་རོ། །མི་འཇིགས་པ་སྦྱིན་པ་ནི་སེམས་ལ་རྟོན་པ་སྟེ། ཡིད་མི་བདེ་བའི་བྱེ་བྲག་དང་བྲལ་བར་བྱས་པས་སེམས་ཀྱི་དབུགས་ཉེ་བར་སྒྲུབ་པའི་ཕྱིར་རོ། །གཞན་ཡང་དེ་བཞིན་དུ་སྦྱར་
བར་བྱའོ། །དམན་པའི་སེམས་ནི་བྱང་ཆུབ་སེམས་དཔའ་འཁོར་བའི་སྡུག་བསྔལ་གྱིས་ཡོངས་སུ་སྐྱོ་བས་ཉན་ཐོས་དང་རང་སངས་རྒྱས་ཀྱི་སེམས་ཏེ། དེ་ཡོངས་སུ་འདོར་བ་རྟོན་པ་ནི་སྡུག་བསྔལ་དང་དུ་ལེན་པའི་བཟོད་པར་རིག་པར་བྱའོ། །དགེ་བའི་རྩ་བ་མི་ཟད་པ་ནི་
སེམས་ཅན་ཐམས་ཅད་ཀྱི་དོན་བྱ་བ་ལྷག་པར་བྱེད་པས་འཁོར་བ་ཇི་སྲིད་པ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡང་ཡོངས་སུ་མི་གཏོང་བས་ཏེ། དེ་རྟོན་པ་ནི་སེམས་ཅན་གྱི་དོན་བྱ་བའི་བརྩོན་འགྲུས་སུ་རིག་པར་བྱའོ། །ཚོགས་སྡུད་པ་ནི་ཐོབ་པ་ལ་
བརྟེན་ནས་གདུལ་བྱ་རྣམས་མཉམ་པར་གཞག་པར་བྱ་བ་དང་། སེམས་མཉམ་པར་གཞག་པར་བྱ་བའི་ཕྱིར་གདམས་པ་དང་། རྗེས་སུ་བསྟན་པ་རབ་ཏུ་སྦྱིན་པ་སྟེ་དེ་རྟོན་པ་ནི་སེམས་ཅན་གྱི་དོན་བྱ་བའི་བསམ་གཏན་ནོ། །ས་ལ་འཇུག་པ་ནི་ཆོས་ལ་མོས་པ་སྔོན་དུ་བཏང་བའི་

བཤད་པ་གང་གིས་ཚོགས་ཡོངས་སུ་རྫོགས་པར་བྱས་ནས་རབ་ཏུ་དགའ་བའི་ས་ལ་འཇུག་པ་སྟེ་དེ་སྟོན་པར་ནི་ཀུན་རྫོབ་ཀྱི་བདེན་པ་ལ་དམིགས་པའོ། །ལྷག་མ་ནི་ལེགས་པར་སྦྱར་བའི་ཕྱིར་སྦྱར་བར་མ་བྱས་སོ། །རབ་ཏུ་དབྱེ་བ་ནི་སྦྱིན་པ་བདུན་ཏེ། རྩ་བའི་
སྦྱིན་པ་ནི་རིགས་ཀྱི་གནས་སྐབས་པའི་བྱང་ཆུབ་སེམས་དཔའི་སྦྱིན་པའི་ཕ་རོལ་ཏུ་ཕྱིན་པ་སྟེ་རིགས་ཙམ་ལ་བརྟེན་ནས་སྦྱིན་པའི་ཕྱིར་རོ། །བླངས་པའི་སྦྱིན་པ་ནི་སེམས་བསྐྱེད་པའི་གནས་སྐབས་པ་སྟེ་སྨོན་ལམ་ཡང་དག་པར་བླངས་པ་ལ་བརྟེན་ནས་སྦྱིན་པའི་ཕྱིར་རོ། །རྗེས་སུ་འཛིན་
པའི་སྦྱིན་པ་ནི་བདག་དང་གཞན་དོན་སྒྲུབ་པའི་གནས་སྐབས་པའོ། །འཛིན་པ་ངེས་པ་མེད་པའི་སྦྱིན་པ་ནི་དེ་ཁོ་ནའི་དོན་ལ་ཡོངས་སུ་རྟོགས་པ་གནས་སྐབས་པའི་སྟེ། སྦྱིན་བདག་ལ་གནས་པ་རྣམ་པར་རྟོག་པ་ལ་མངོན་པར་ཞེན་པའི་འཛིན་པ་མེད་པའི་ཕྱིར་རོ། །ཡོངས་སུ་འཛིན་པ་
མེད་པའི་སྦྱིན་པ་ནི་མཐུན་པའི་གནས་སྐབས་པ་ནི། ཕ་རོལ་གྱི་ཡོ་བྱད་ཡོངས་སུ་འཛིན་པ་མེད་པའི་ནམ་མཁའ་མཛོད་ལ་སོགས་པའི་ཏིང་ངེ་འཛིན་རྣམས་ཀྱིས་ནམ་མཁའ་ལས་ལག་པ་བརྐྱང་ནས་ཇི་ལྟར་འདོད་པ་བཞིན་དུ་རིན་པོ་ཆེ་ལ་སོགས་པའི་ཆར་འབེབས་པའི་ཕྱིར་རོ། །སོ་
སོར་རིག་པའི་སྦྱིན་པ་ནི་ཡོངས་སུ་སྨིན་པའི་གནས་སྐབས་པ་སྟེ། འདུལ་བ་ཇི་ལྟ་བ་བཞིན་དུ་མཐུན་པར་བྱ་བའི་ཕྱིར་རོ། །སྦྱིན་པ་ཆེན་པོའི་ཆེན་པོ་ནི་བྱང་ཆུབ་མཆོག་གི་གནས་སྐབས་པའི་སྟེ་བླ་ན་མེད་པའི་ཕྱིར་རོ། །དེ་བཞིན་དུ་ཤེས་རབ་ཀྱི་བར་དུ་ཅི་རིགས་སུ་སྦྱར་བར་རིག་པར་
བྱའོ། །བསྡུས་པ་ནི་སྦྱིན་པ་ལ་སོགས་པས་བྱང་ཆུབ་སེམས་དཔའི་སས་བསྡུས་པའི་ཕྱིར་ཏེ་དེ་ལ་ཕ་རོལ་ཏུ་ཕྱིན་པ་རྣམས་ཀྱི་རིགས་བསྡུས་པ་འདི་ནི་དཔེ་ཙམ་མོ། །སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་ནི་རིགས་ཀྱིས་བསྡུས་པར་ཤེས་པར་བྱའོ། །སེམས་བསྐྱེད་པ་བསྡུས་
པ་ནི་ཁྱད་པར་དུ་འཕགས་པའི་སེམས་བསྐྱེད་པས་བསྡུས་པའི་ཕྱིར་རོ། །སེམས་བསྐྱེད་པ་ནི་རྣམ་པ་གཉིས་ཏེ། ཁྱད་པར་ཅན་མ་ཡིན་པ་དང་། ཁྱད་པར་དུ་འཕགས་པའོ། །དེ་ལ་ཁྱད་པར་ཅན་མ་ཡིན་པ་ནི། ཀྱེ་མའོ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་

པར་རྫོགས་པར་འཚང་རྒྱ་བར་ཤོག་ཅིག་སྙམ་པའོ། །ཁྱད་པར་དུ་འཕགས་པ་ནི་དེ་ལྟར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་ཤོག་ཤིག་སྙམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུའོ། །ཁྱད་པར་དུ་འཕགས་པའི་སེམས་བསྐྱེད་པ་འདི་ནི་ཕ་རོལ་ཏུ་ཕྱིན་པ་རྣམས་
བསྡུས་པར་རིག་པར་བྱ་སྟེ། དེ་དག་གི་རྒྱུ་ཡིན་པའི་ཕྱིར་རོ། །བདག་དང་གཞན་གྱི་དོན་བསྡུས་པ་གང་སྦྱིན་པའི་ཕུང་པོ་ཡོངས་སུ་རྫོགས་པ་འདི་དག་ནི་བདག་གི་དོན་ཏོ། །གང་གཞན་ལ་ཡོ་བྱད་ཉེ་བར་བསྒྲུབས་པས་རྗེས་སུ་འཛིན་པ་འདི་ནི་གཞན་གྱི་དོན་ཏོ། །ལྷག་མ་
རྣམས་ཀྱིས་བསྡུས་པ་ཡང་དེ་བཞིན་དུ་རིག་པར་བྱའོ། །དོན་དམ་པ་ཆོས་ཀྱི་དབྱིངས་ལས་བརྩམས་པ་ནི་དེ་བཞིན་ཉིད་ཀྱི་སྦྱིན་པ་ལ་སོགས་པ་སྤྱིའི་མཚན་ཉིད་ཡིན་པའི་ཕྱིར་རོ། །ཡེ་ཤེས་ཀྱི་ཚོགས་བསག་པ་ནི་ཐམས་ཅད་མཁྱེན་པའི་སྣོད་དུ་བསྒྲུབ་པའི་ཕྱིར་རོ། །ཡེ་ཤེས་
ཡོངས་སུ་འཛིན་པ་ལས་བརྩམས་པ་ནི་ཐམས་ཅད་མཁྱེན་པ་ཉིད་ཡོངས་སུ་བསྒྲུབ་པའི་ཕྱིར་རོ། །ཡེ་ཤེས་ཀྱི་རྗེས་སུ་འཛིན་པ་ལས་བརྩམས་པ་ནི་ལྔ་པོ་དག་ཤེས་རབ་ཀྱི་ཕ་རོལ་ཏུ་ཕྱིན་པའི་རྗེས་སུ་མཐུན་པའི་ཕྱིར་རོ། །ཡེ་ཤེས་ཀྱི་མཚན་ཉིད་ལས་བརྩམས་པ་ནི་ཤེས་རབ་
ཀྱི་ཕ་རོལ་ཏུ་ཕྱིན་པ་ཡང་དག་པའི་ཡེ་ཤེས་ཀྱི་ངོ་བོ་ཉིད་ཡིན་པའི་ཕྱིར་རོ། །དེ་ལྟར་ན་དེ་བཞིན་ཉིད་དང་ཡང་དག་པའི་ཡེ་ཤེས་ཀྱི་ངོ་བོ་ཉིད་དེ་ནི་དམ་པ་ནི་སྦྱིན་པ་ལ་སོགས་པས་བསྡུས་པར་རིག་པར་བྱའོ། །དཔེ་བརྗོད་པ་འདིས་བསྡུས་པ་ལྷག་མ་རྣམས་བསྟན་པར་བྱའོ། །མི་
མཐུན་པའི་ཕྱོགས་སེར་སྣ་དང་འཆལ་པའི་ཚུལ་ཁྲིམས་དང་ཁྲོ་བ་དང་ལེ་ལོ་དང་རྣམ་པར་གཡེང་བ་དང་འཆལ་པའི་ཤེས་རབ་སྟེ། སྦྱིན་པ་ལ་སོགས་པའི་གོ་རིམས་བཞིན་ནོ། །ཕ་རོལ་ཏུ་ཕྱིན་པ་རྣམས་ཀྱིས་བསྡུས་པའི་ཕྱིར་སྦྱིན་པའི་ཆོས་ཇི་སྙེད་པ་དེ་དག་གི་མི་མཐུན་པའི་ཕྱོགས་
གང་ཡིན་པ་དང་། ཤེས་བྱའི་སྒྲིབ་པ་དེ་ཡང་དག་པའི་མི་མཐུན་པའི་ཕྱོགས་སུ་རིག་པར་བྱའོ། །ཕན་ཡོན་ནི་འབྲས་བུ་རྣམ་པ་ལྔའི་སྐབས་སུ་དཔག་ཏུ་མེད་པར་རིག་པར་བྱའོ། །དེ་ཡང་བསྡུས་ན་འདི་དག་གི་རང་གི་མི་མཐུན་པའི་ཕྱོགས་སྤང་བ་བྲལ་བའི་འབྲས་བུ་དང་། མཐོང་

བའི་ཆོས་ལ་བདག་གཞན་རྗེས་སུ་འཛིན་པ་སྐྱེས་བུ་བྱེད་པའི་འབྲས་བུ་དང་། ཕྱི་མ་ལ་གོང་ནས་གོང་དུ་ཁྱད་པར་དུ་འཕགས་པ་མཆོག་དམ་པ་འབྱུང་བའི་རྒྱུ་མཐུན་པའི་འབྲས་བུ་དང་། བྱང་ཆུབ་ཆེན་པོ་དབང་གི་འབྲས་བུ་དང་། ལོངས་སྤྱོད་ཆེན་པོ་དང་བདེ་འགྲོར་འགྲོ་
བ་དང་ཁོ་ན་མེད་པ་དང་། དབྱེ་བ་མེད་པ་དང་མི་བདེ་བ་མེད་པ་དང་ཡིད་བདེ་བ་མང་བ་དང་། སེམས་ཅན་ལ་དབང་བ་དང་ལུས་ལ་གནོད་པ་མེད་པ་དང་དབང་ཆེ་བར་གྲགས་པ་ནི་གོ་རིམས་བཞིན་དུ་སྦྱིན་པ་ལ་སོགས་པའི་རྣམ་པར་སྨིན་པར་རིག་པར་བྱའོ། །གཅིག་ལ་གཅིག་རྣམ་པར་
ངེས་པ་ནི་རྣམ་པ་གསུམ་སྟེ། སྦྱོར་བ་ལས་གྱུར་པ་དང་། དབྱེ་བ་ལས་གྱུར་པ་དང་། རབ་ཏུ་ཕྱེ་ནས་བསྟན་པ་ལས་གྱུར་པའོ། །དེ་ལ་སྦྱོར་བ་ལས་གྱུར་པ་ནི་སྦྱིན་པ་ལ་སོགས་པ་ཐམས་ཅད་འདུས་པར་དམིགས་ཏེ་འདི་ལྟ་སྟེ་ནང་དང་ཕྱིའི་དངོས་པོ་ཡོངས་སུ་གཏོང་བའི་སྦྱིན་པ་ལ་
སྦྱོར་བའོ། །དེ་ལ་གང་ཡོངས་སུ་གཏོང་བ་དེ་ནི་སྦྱིན་པའི་ཕ་རོལ་ཏུ་ཕྱིན་པའོ། །དེ་ལ་བྱམས་པའི་སེམས་དང་ལྡན་པ་ནི་གང་གཞན་ལ་ཀུན་ནས་མནར་སེམས་དང་གནོད་པ་དང་རྣམ་པར་འཚེ་བ་སྡོམ་པ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །དེ་ཉིད་ལ་གང་ཉེ་བར་བསྐོར་
བ་དང་ཕོངས་པ་དང་སྐྱོ་བ་ལ་ཇི་མི་སྙམ་པ་དེ་ནི་བཟོད་པའི་ཕ་རོལ་ཏུ་ཕྱིན་པའོ། །དེ་ཉིད་ལ་གང་ཕྱིར་ཞིང་སེམས་སྤྲོ་བ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །དེ་ཉིད་ལ་གང་སེམས་རྩེ་གཅིག་པ་སྟེ་དགེ་བ་ལས་ཕྱི་རོལ་དུ་མི་འཕྲོ་བ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པའོ། །
དེ་ཉིད་ལ་རྒྱུ་དང་འབྲས་བུ་ཇི་ལྟ་བ་བཞིན་དུ་ལེགས་པར་གཟུང་བ་དང་ལྟ་བ་མཆོག་ཏུ་འཛིན་པ་མེད་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལ་ཡང་ཅི་རིགས་སུ་སྦྱར་བར་བྱ་སྟེ། མི་འཇིགས་པ་སྦྱིན་པ་ནི་ཐམས་ཅད་དུ་སྦྱིན་པ་ཡིན་
པའི་ཕྱིར་རོ། །དེ་རབ་ཏུ་དབྱེ་བ་ལས་གྱུར་པ་ནི་ངོ་བོ་ཉིད་ཀྱིས་རབ་ཏུ་དབྱེ་བ་དང་། རྗེས་སུ་སྦྱོར་བས་རབ་ཏུ་དབྱེ་བ་དང་། བསྐྱེད་པས་རབ་ཏུ་དབྱེ་བའོ། །དེ་ལ་སོགས་པའི་ངོ་བོ་ཉིད་ནི་རྣམ་པར་གཏོང་བ་དང་སྡོམ་པ་དང་ཇི་མི་སྙམ་པ་དང་མངོན་པར་སྤྲོ་བ་དང་སེམས་གནས་པ་དང་རབ་

ཏུ་རྣམ་པར་དབྱེ་བ་སྟེ་གོ་རིམས་བཞིན་ནོ། །དེ་ལ་སྦྱིན་པ་ལ་སོགས་པ་ལ་སྦྱོར་བ་ནི་དེ་ལ་གནས་པའི་ཕ་རོལ་ཏུ་ཕྱིན་པ་རྣམས་རྗེས་སུ་འཇུག་པ་སྟེ་སྔ་མ་བཞིན་ནོ། །དེ་ལ་སྦྱིན་པ་ལ་སོགས་པའི་རྗེས་སུ་སྦྱོར་བ་ནི་འཛིན་དུ་འཇུག་པ་དང་། བསྔགས་པ་བརྗོད་པ་དང་། རབ་ཏུ་དགའ་
བའོ། །དེ་ལ་སྦྱིན་པ་ལ་སོགས་པ་བསྐྱེད་པ་ནི་གཞན་གྱི་སེམས་ཀྱི་རྒྱུད་ལ་འཇོག་པའོ། །དེ་ལ་སྦྱིན་པའི་ཕ་རོལ་ཏུ་ཕྱིན་པ་ནི་ཟང་ཟིང་གི་སྦྱིན་པའོ། །དེ་མ་ཡིན་པའི་གཞན་ལྔ་ནི་མི་འཇིགས་པའི་སྦྱིན་པའོ། །ཐམས་ཅད་ནི་དམ་པའི་ཆོས་ཀྱི་སྦྱིན་པ་སྟེ་གཞན་གྱི་སེམས་རྒྱུད་ལ་
བསྐྱེད་པའི་ཕྱིར་རོ། །དེ་ལས་རབ་ཏུ་ཕྱེ་ནས་བསྟན་པ་ལས་གྱུར་པ་ནི་གཅིག་ནས་རྟོགས་པ་ལ་སོགས་པ་སྟེ། འདི་ལྟ་སྟེ་སྦྱིན་པའི་ཕ་རོལ་ཏུ་ཕྱིན་པ་གང་ཡིན་པ་དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡང་དེ་ཡིན་ནམ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་སྦྱིན་པའི་ཕ་རོལ་ཏུ་ཕྱིན་པ་ཡང་དེ་
ཡིན་ནམ་ཞེ་ན། ཚིག་འོག་མ་དང་སྦྱོར་བ་སྟེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་སྦྱིན་པའི་ཕ་རོལ་ཏུ་ཕྱིན་པ་ཡང་དེའོ། །སྦྱིན་པའི་ཕ་རོལ་ཏུ་ཕྱིན་པ་ཡིན་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་མ་ཡིན་པ་ཡང་ཡོད་དེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་མ་ཟིན་པའི་
སྦྱིན་པའི་ཕ་རོལ་ཏུ་ཕྱིན་པའོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་སྦྱིན་པའི་ཕ་རོལ་ཏུ་ཕྱིན་པའི་ཚིག་འོག་མ་དང་སྦྱོར་བ་རྣམས་དང་སྦྱར་བར་བྱའོ། །སྦྱིན་པ་གང་ཡིན་པ་དེ་ཐམས་ཅད་སྦྱིན་པའི་ཕ་རོལ་ཏུ་ཕྱིན་པ་ཡིན་ནམ་ཕ་རོལ་ཏུ་ཕྱིན་པ་དེ་ཐམས་ཅད་སྦྱིན་པ་ཡིན་
ནམ་ཞེ་ན། མུ་གསུམ་དུ་འགྱུར་ཏེ་སྦྱིན་པ་ཡིན་ལ་ཕ་རོལ་ཏུ་ཕྱིན་པ་མ་ཡིན་པ་ནི་བྱང་ཆུབ་ཆེན་པོར་ཡོངས་སུ་མ་བསྔོས་པའི་སྦྱིན་པའོ། །སྦྱིན་པ་མ་ཡིན་པ་ལ་ཕ་རོལ་ཏུ་ཕྱིན་པ་ཡིན་པ་ཡང་ཡོད་དེ་བཤད་པ་མ་གཏོགས་པའི་ཆོས་རྣམས་སོ། །དེ་བཞིན་དུ་ཤེས་རབ་ཀྱི་ཕ་
རོལ་ཏུ་ཕྱིན་པའི་བར་ལ་བརྩམས་ཏེ་རེ་རེ་ལ་མུ་གསུམ་གསུམ་དུ་སྦྱར་བར་བྱའོ། །སྦྱིན་པ་ཀུན་དུ་སྤྱོད་པ་གང་ཡིན་པ་དེ་དག་ཐམས་ཅད་སྦྱིན་པའི་ཕ་རོལ་ཏུ་ཕྱིན་པའི་རྒྱུ་ལས་བྱུང་བའི་བསོད་ནམས་བསྐྱེད་དམ་ཞེ་ན་མུ་བཞིར་འགྱུར་ཏེ། མུ་དང་པོ་ནི་བྱང་ཆུབ་ཆེན་པོར་ཡོངས་སུ་མ་

བསྔོས་པའི་སྦྱིན་པ་སྤྱོད་པའོ། །མུ་གཉིས་པ་ནི་སྦྱིན་པའི་ཕ་རོལ་ཏུ་ཕྱིན་པ་ལ་ཡང་དག་པར་འཛིན་དུ་འཇུག་པ་དང་། བསྔགས་པ་བརྗོད་པ་དང་། ཡིད་རབ་ཏུ་དགའ་བས་སོ། །མུ་གསུམ་པ་ནི་བྱང་ཆུབ་ཆེན་པོར་ཡོངས་སུ་བསྔོས་པའི་སྦྱིན་པས་
སོ། །མུ་བཞི་པ་ནི་རྣམ་པ་འདི་དག་མ་རྟོགས་པའོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལས་བརྩམས་ཏེ་རེ་རེ་ལ་ཡང་མུ་བཞི་བཞིར་སྦྱར་བར་བྱའོ། །ཕ་རོལ་ཏུ་ཕྱིན་པ་དེ་དག་ཀྱང་བསྡུ་བའི་དངོས་པོ་བཞི་ཡིན་ཏེ་སྦྱིན་པ་དེ་ཉིད་དོ། །ཚུལ་ཁྲིམས་དང་བཟོད་པ་ནི་ངག་
སྙན་པའོ། །བརྩོན་འགྲུས་དང་བསམ་གཏན་ནི་དོན་མཐུན་པའོ། །ཤེས་རབ་ནི་དོན་དཔྱོད་པའོ། །སྡོམ་པ་གསུམ་ཡང་ཡིན་ཏེ། དང་པོ་བཞི་སྡོམ་པའི་ཚུལ་ཁྲིམས་དང་། བསམ་གཏན་ནི་སེམས་ཅན་དོན་བྱེད་དོ། །ཤེས་རབ་ནི་དགེ་བའི་ཆོས་སྡུད་དོ། །བསླབ་པ་
གསུམ་ཡང་དེ་ཉིད་དོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡང་དེ་ཉིད་ཡིན་ཏེ་ལམ་གཉིས་ཀྱི་སྐབས་སུ་བཤད་དོ། །ལམ་གཉིས་ཀྱང་ཚོགས་ལམ་དང་སྦྱོར་ལམ་ནི་འཇིག་རྟེན་པའོ། །མཐོང་ལམ་དང་སྒོམ་ལམ་ནི་འཇིག་རྟེན་ལས་འདས་པ་ཡིན་ཏེ། དེ་དག་
རྒྱས་པར་ཕྱེ་སྟེ་བསྟན་པ་ནི་ཐབས་ཉམས་སུ་བླང་བའི་རིམ་པའོ། །དེ་ལྟར་ཐབས་ཀྱི་ཁྱད་པར་དང་ཐེག་པ་འོག་མ་ལས་ཁྱད་པར་དགུས་འཕགས་ཏེ་གང་ཞེ་ན་དམིགས་པའི་ཁྱད་པར་ནི་ཤེས་བྱ་ཇི་སྙེད་པ་དང་ཇི་ལྟ་བ་ལ་དམིགས་པའོ། །ཉེ་བར་བསྟན་པའི་ཁྱད་པར་ནི་བསྐལ་པ་
གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་རྫོགས་པར་བྱེད་པའོ། །རབ་ཏུ་རྟོགས་པའི་ཁྱད་པར་ནི་སོ་སོར་རང་གིས་རིག་པའི་ཡེ་ཤེས་ཀྱིས་གང་ཟག་དང་ཆོས་བདག་མེད་པར་རྟོགས་པའོ། །ཁས་ལེན་པའི་ཁྱད་པར་ནི་བདག་དང་སེམས་ཅན་ཐམས་ཅད་མཉམ་པ་ཉིད་དུ་
ཁས་ལེན་པའོ། །ངེས་པར་འབྱུང་བའི་ཁྱད་པར་ནི་ས་བཅུ་དག་གིས་ངེས་པར་འབྱུང་བའོ། །ཡོངས་སུ་འཛིན་པའི་ཁྱད་པར་ནི་མི་གནས་པའི་མྱ་ངན་ལས་འདས་པར་ཡོངས་སུ་འཛིན་པའོ། །གནས་དང་གཡོག་འཁོར་གྱི་ཁྱད་པར་ནི་སངས་རྒྱས་ཀྱི་ཞིང་ཡོངས་སུ་སྦྱང་བ་དང་གདུལ་

བྱ་ཉེ་བར་སྡུད་པའོ། །བཙུན་པ་ཉེ་བར་སྐྱེས་པའི་ཁྱད་པར་ནི་སངས་རྒྱས་ཀྱི་གདུང་རིས་སུ་སྐྱེས་པའོ། །སྐྱེ་བའི་ཁྱད་པར་ནི་སྨོན་ལམ་གྱི་དབང་གིས་སྲིད་པ་ཐམས་ཅད་དུ་སྐྱེ་བའོ། །དྲུག་པོ་དེ་དག་དང་ལྡན་པའི་ཆོས་ཀྱང་རྣམ་པ་གཉིས་སུ་བཤད་དེ། སྒྲུབ་པའི་ཆོས་དང་། འབྲས་
བུའི་ཆོས་སོ། །སྒྲུབ་པའི་ཆོས་ནི་འཕགས་པའི་ལམ་ཡན་ལག་བརྒྱད་པ་སྟེ་དེ་ཉིད་འདིར་ཡོངས་སུ་ཤེས་པའོ། །འདུས་བྱས་དང་འདུས་མ་བྱས་ཀྱི་བྱེ་བྲག་གིས་འབྲས་བུའི་ཆོས་ཀྱང་རྣམ་པ་གཉིས་སུའོ། །དེ་ལ་འདུས་བྱས་ནི་དགེ་སྦྱོང་གི་འབྲས་བུ་བཞི་སྟེ་རྣམ་པར་གྲོལ་
བའི་ལམ་གྱི་རང་བཞིན་ནོ། །འདུས་མ་བྱས་ནི་ཉོན་མོངས་པ་སྤངས་པའི་མཚན་ཉིད་མྱ་ངན་ལས་འདས་པའོ། །བསྟན་བཅོས་ལས་ནི་འདུས་བྱས་དང་འདུས་མ་བྱས་ཀྱི་རང་བཞིན་དགེ་སྦྱོང་གི་འབྲས་བུར་རྣམ་པར་གཞག་མོད་ཀྱི་འོན་ཀྱང་མྱ་ངན་ལས་འདས་པར་ལོགས་
ཤིག་ཏུ་བཤད་པས་བ་ལང་དང་། གླང་ཞེས་བྱ་བའི་ཚུལ་དུ་འདུས་བྱས་ཉིད་དུ་གཟུང་ངོ་། །ཡང་ན་ཡོངས་སུ་དག་པའི་དེ་བཞིན་ཉིད་གང་ཡིན་པ་འདིར་མྱ་ངན་ལས་འདས་པར་འདོད་དེ་དེ་ལ་ཉོན་མོངས་པའི་ཕྱིར་རོ། །འབྲས་བུ་འདི་བརྗོད་པ་ནི་ཉན་ཐོས་དང་རང་སངས་
རྒྱས་རྣམས་ལམ་འདི་ཉིད་ཀྱི་གང་ཟག་དང་ཆོས་ལ་བདག་མེད་པའི་ཚུལ་དུ་བསྒྲུབས་ན་འབྲས་བུ་རྙེད་པར་འགྱུར་རོ་ཞེས་གོ་རིམས་བཞིན་དུ་བསྟན་པའི་ཕྱིར་རོ། །དེ་ཡང་དེ་ཁོ་ན་མ་ནོར་བའི་རང་བཞིན་རྟོགས་པ་ནི་ཡང་དག་པའི་ལྟ་བའོ། །དེ་ཉིད་ལ་ཚུལ་བཞིན་དུ་རྟོག་ཅིང་
དཔྱོད་པ་ནི་ཡང་དག་པའི་རྟོག་པའོ། །དེ་ཡང་གཞན་དག་ལ་མ་ནོར་བའི་རང་བཞིན་དུ་འཆད་ཅིང་བརྫུན་ལ་སོགས་པའི་ཉེས་པ་སྤངས་པའི་ཚིག་ནི་ཡང་དག་པའི་ངག་གོ། །དེ་ནས་སྲོག་གཅོད་པ་ལ་སོགས་པའི་ཉེས་པ་སྤངས་ཤིང་ལུས་ཀྱི་ལས་ཡོངས་སུ་དག་པ་ནི་ཡང་
དག་པའི་མཐའོ། །དེ་ནས་ཚུལ་འཆོས་པ་དང་གཞོགས་སློང་ལ་སོགས་པ་ལོག་པར་འཚོ་བའི་ཉེས་པ་སྤངས་ཤིང་ཡོངས་སུ་དག་པའི་ལུས་དང་ངག་གི་ལས་ཡོངས་སུ་སྤྱོད་པ་ནི་ཡང་དག་པའི་འཚོ་བའོ། །ཉེས་པ་ལྷག་མ་རྣམས་སྤངས་པའི་ཕྱིར་མངོན་པར་སྤྲོ་བ་ནི་ཡང་

དག་པའི་རྩོལ་བའོ། །དེ་ཁོ་ན་ཉིད་མི་བརྗེད་པ་ནི་ཡང་དག་པའི་དྲན་པའོ། །གོང་ནས་གོང་དུ་ཡོན་ཏན་གྱི་ཁྱད་པར་རྣམས་མངོན་པར་བསྒྲུབ་པའི་ཕྱིར་རྟག་ཏུ་མཉམ་པར་གཞག་པ་ནི་ཡང་དག་པའི་ཏིང་ངེ་འཛིན་ཏོ། །ལམ་ལ་སྙོམས་པར་ཞུགས་པ་ལས་
ཡང་དག་པའི་ལྟ་བ་ལ་སོགས་པ་ཇི་ལྟར་འབྱུང་ན་རྒྱུ་གང་གིས་འཕགས་པའི་ལམ་ཡན་ལག་བརྒྱད་པར་འགྱུར་ཞེ་ན། འདི་ལ་ངེས་པ་མེད་དེ་འཇིག་རྟེན་ལས་འདས་པའི་ལམ་གྱི་གནས་སྐབས་ན་རྣལ་འབྱོར་པ་དེ་ལྟ་བུའི་སོ་སོ་རང་གིས་རིག་པའི་དེ་ཁོ་ན་མྱོང་བར་ཡང་འགྱུར་ཞིང་
གནས་གྱུར་པར་ཡང་ཐོབ་པ་ལ། དེ་ལས་ལངས་པའི་ཚེ་ན་ཡང་དག་པའི་ངག་ལ་སོགས་པ་ལ་འཇུག་སྟེ་ལོག་པའི་ངག་ལ་སོགས་པ་ལ་ནི་མི་འཇུག་གོ། །དེས་ན་རྒྱུ་ལ་འབྲས་བུར་བཏགས་ཏེ་ཡང་དག་པའི་ལྟ་བ་ལ་སོགས་པ་ཡན་ལག་བརྒྱད་ནི་རྣམ་པར་དག་པའི་རྒྱུར་གྱུར་
པས་དེ་ལམ་ཡན་ལག་བརྒྱད་པ་ཞེས་བྱ་སྟེ། དེའི་ཚེ་ན་དེའི་ཚིག་ཀྱང་མི་སྨྲ་ལ་གོས་ལ་སོགས་པ་ཡང་མི་ཚོལ་བས་དེའི་གནས་སྐབས་ན་ཡན་ལག་བརྒྱད་མི་འབྱུང་སྟེ་འགལ་བའི་ཕྱིར་རོ། །དེ་ལ་ཡང་དག་པའི་ལྟ་བ་ནི་ཡོངས་སུ་གཅོད་པའི་ཡན་ལག་སྟེ། དེས་ཇི་ལྟར་མྱོང་
བའི་དེ་ཁོ་ན་ངེས་པར་འཛིན་པའི་ཕྱིར་རོ། །ཡང་དག་པའི་རྟོག་པ་ནི་གཞན་གོ་བར་བྱེད་པའི་ཡན་ལག་སྟེ། དེ་ཇི་ལྟར་རྟོགས་པའི་དེ་ཁོ་ན་རྣམ་པར་གཞག་ནས་ཚིག་ཏུ་འདོན་པའི་ཕྱིར་རོ། །ཡང་དག་པའི་ངག་དང་། ལས་ཀྱི་མཐའ་དང་འཚོ་བ་ནི་གཞན་ཡིད་ཆེས་པར་བྱེད་པའི་ཡན་
ལག་སྟེ། དེ་དག་གོ་རིམས་བཞིན་དུ་རྣལ་འབྱོར་གྱི་ལྟ་བ་དང་། ཚུལ་ཁྲིམས་དང་ཡོ་བྱད་བསྙུངས་པ་རྣམ་པར་དག་པ་གཞན་ཡིད་ཆེས་པར་འགྱུར་ཏེ། འདྲི་བའི་ལན་ཡང་དག་པར་ལྡོན་པས་ཡང་དག་པའི་ངག་གི་ལྟ་བ་རྣམ་པར་དག་པར་ཡིད་ཆེས་སོ། །ཡང་དག་པའི་
ལས་ཀྱི་མཐའ་བྱ་བ་མ་ཡིན་པ་མི་བྱེད་པའི་ཚུལ་ཁྲིམས་རྣམ་པར་དག་པར་རོ། །ཡང་དག་པའི་འཚོ་བས་གོས་ལ་སོགས་པ་ཆོས་བཞིན་ཚོལ་བས་ཡོ་བྱད་བསྙུངས་པར་རྣམ་པར་དག་པར་རོ། །འདི་དག་ནི་གོ་རིམས་བཞིན་ངག་དང་ལུས་དང་། གཉིས་ཀའི་ལས་ཀྱི་རང་བཞིན་

ནོ། །ཡང་དག་པའི་རྩོལ་བ་ནི་ཉན་ཐོས་དང་བྱང་ཆུབ་སེམས་དཔའ་གཉི་གའི་ཉོན་མོངས་པའི་སྒྲིབ་པ་རྣམ་པར་སྦྱོང་བས་སྒྲིབ་པ་རྣམ་པར་སྦྱོང་བའི་ཡན་ལག་གོ། །ཡང་དག་པའི་དྲན་པ་ནི་བྱིང་བ་དང་རྒོད་པ་དང་ཉེ་བའི་ཉོན་མོངས་པའི་སྒྲིབ་པ་རྣམ་པར་སྦྱོང་བའི་ཡན་ལག་སྟེ།
དྲན་པ་ཉེ་བར་གཞག་པས་ཡང་དག་པའི་མཚན་མར་རྟོག་པས་བྱིང་བ་དང་རྒོད་པ་ལ་སོགས་པའི་སྐབས་མེད་པའི་ཕྱིར་རོ། །ཡང་དག་པའི་ཏིང་ངེ་འཛིན་ནི་ཡོན་ཏན་གྱི་ཁྱད་པར་མངོན་པར་བསྒྲུབ་པ་ལ་སྒྲིབ་པ་རྣམ་པར་སྦྱོང་བའི་ཡན་ལག་སྟེ། དེས་མངོན་པར་ཤེས་པ་ལ་སོགས་པ་
ཡོན་ཏན་མངོན་པར་བསྒྲུབ་པའི་ཕྱིར་རོ། །སྟོན་པར་མཛད་དོ་ཞེས་པ་ནི་དབང་པོ་རྣོན་པོས་མགོ་སྨོས་པས་གོ་བ་དང་། རྟུལ་པོས་ཤིན་ཏུ་རྒྱས་པས་ཀྱང་རྟོགས་པར་དཀའ་བས་འབྲིང་པོའི་དབང་དུ་བྱས་པའི་ཕྱིར་རོ། །ལྡེམ་པོར་དགོངས་པ་བཞི་དང་བཞིས་ཆོས་ཐམས་ཅད་སྟོན་ཏོ། །
དེ་ནི་གཞུག་པ་ལ་ལྡེམ་པོར་དགོངས་པ་དང་། མཚན་ཉིད་ལ་ལྡེམ་པོར་དགོངས་པ་དང་། གཉེན་པོ་ལ་ལྡེམ་པོར་དགོངས་པ་དང་། བསྒྱུར་བ་ལ་ལྡེམ་པོར་དགོངས་པ་དང་། མཉམ་པ་ཉིད་ལ་དགོངས་པ་དང་། དོན་གཞན་ལ་དགོངས་པ་དང་། དུས་གཞན་ལ་དགོངས་པ་དང་།
གང་ཟག་གཞན་ལ་དགོངས་པའོ། །ད་ནི་མ་འོངས་པའི་སློབ་དཔོན་དང་སློབ་མ་ཆོས་ལ་འཇུག་པའི་ཚུལ་སྦྱར་བའི་ཕྱིར་ཆོས་ལ་འཇུག་པའི་ཚུལ་གསུངས་པ། ཉིན་མཚན་དུ་བསམ་པ་ནི་ཐོས་པའི་དོན་བསམ་པ་ཉིད་དོ། །རྗེས་སུ་དཔྱད་པ་ནི་ཐོས་པའོ། །བསྒོམ་པ་ནི་བསམ་པའི་
དོན་བསྒོམ་པ་ཉིད་དོ། །དགའ་བ་ཆེན་པོ་ནི་ཤེས་རབ་གསུམ་ལ་བར་ཆད་དང་བྲལ་བའོ། །ད་ནི་ཤེས་རབ་རྣམ་པ་གསུམ་དང་བྲལ་བའི་འཇིག་རྟེན་གྱི་དངོས་པོ་ཐམས་ཅད་མི་རྟག་ཅིང་སླུ་བ་དང་བཅས་པར་གསུངས་པ། དེ་ནས་ལྷའི་འཁོར་དེ་ཉིད་ཀྱི་ནང་ནས་ཞེས་བྱ་བ་ལ་སོགས་
པའོ། །ཡང་དག་པའི་ལམ་ལ་འདྲེན་པ་པོ་དགོས་པར་བསྟན་པའི་ཕྱིར། །དེ་ནས་གནས་མཆོག་དེ་ན་ཞེས་པ་ལ་སོགས་པ་གསུངས་སོ། །ཉམ་ང་བ་མ་རྟོགས་ན་ཡང་དག་པ་ལ་ཡིད་མི་ཆེས་པར་བསྟན་པའི་ཕྱིར་དེ་ནས་ལྷའི་བུ་ལ་སོགས་པ་གསུངས་སོ། །ལམ་ཐམས་ཅད་ཀྱི་

གཞི་སྐྱབས་སུ་འགྲོ་བ་ཡིན་པར་བསྟན་པའི་ཕྱིར་དེ་ནས་ལྷའི་བུ་ནོར་བུའི་སྙིང་པོ་དྲི་མ་མེད་པ་དེ་བརྒྱལ་བ་སངས་ཏེ་ཞེས་པ་ལ་སོགས་པ་གསུངས་སོ། །སྐྱབས་སུ་སོང་བའི་སློབ་མ་ལ་དབུགས་དབྱུང་བའི་ཕྱིར་ཕན་ཡོན་བཤད་པ་ནི་ལྷའི་དབང་པོ་ལ་སོགས་པས་
གསུངས་སོ། །དེ་དག་ནི་དོན་གྱི་སྒོ་ནས་གླེང་བསླང་བའོ། །ད་ནི་ཚིག་གི་སྒོ་ནས་གླེང་བསླང་བའི་ཕྱིར་དེ་ནས་ལྷའི་དབང་པོ་བརྒྱ་བྱིན་གྱིས་དམན་པའི་ཚིག་གིས་ཞེས་པ་ལ་སོགས་པ་གསུངས་སོ། །ལྷའི་དབང་པོ་ཞེས་པ་ལ་སོགས་པ་ནི་ལྷའི་བུ་ལ་སོགས་པའི་ལེ་ལོའི་འགྱོད་པ་
བསལ་བའི་ཕྱིར་ལས་རྒྱུ་འབྲས་ཀྱི་འབྲེལ་པ་གསུངས་པའོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་ནོར་བུའི་སྙིང་པོ་དྲི་མ་མེད་པའི་གཏམ་ངན་ཐོས་ནས་ཞེས་བྱ་བ་ལ་སོགས་པས་ནི་རྗེས་འཇུག་གི་ཉམས་སུ་བླང་བ་ཞུས་པ་ནས་ཀྱིས་བསྟན་ཏོ། །གུས་པའི་རྩོལ་བ་དང་བྲལ་ན་
ཡང་དག་པའི་ལམ་རྙེད་པར་མི་འགྱུར་བའི་ཕྱིར་དེ་ནས་ལྷའི་དབང་པོ་ལ་སོགས་པས་ཆོས་ལ་གུས་པ་བསྟན་ཏོ། །ཞུས་པའི་དོན་ནི་རྒྱས་པ་དང་བསྡུས་པའོ། །དང་པོ་ནི་དོན་ངེས་པར་ཐོབ་པ་དང་། དོན་ལ་བར་ཆད་བསལ་བ་དང་། ལུས་ཅན་ཐམས་ཅད་འཇུག་ཏུ་རུང་བར་བྱིན་
གྱིས་བརླབ་ཏུ་གསོལ་བ་དང་། ཁྱད་པར་གྱི་རྐྱེན་བསལ་བ་དང་། ཤིན་ཏུ་བག་ཚ་བའི་འབྲས་བུ་གཉིས་དང་བྲལ་བར་མཛད་པ་དང་། འཁོར་བ་ལས་བསྒྲལ་བ་དང་། རང་གི་དོན་དང་། གཞན་གྱི་དོན་དང་། ཐུན་མོང་གི་དོན་ཡོད་པར་གསོལ་བ་གདབ་པ་སྟེ། རེ་བ་
འཕེལ་བར་མཛད་དུ་གསོལ་ཞེས་པ་ལ་སོགས་པའི་ཚིག་བཅུ་གཅིག་དང་རིམ་པར་སྦྱར་རོ། །བསྡུས་པ་ལ་གཉིས་ཏེ། མཐོང་བའི་ཆོས་ཀྱི་དོན་དང་། ལན་གྲངས་གཞན་གྱིའོ། །མ་འོངས་པའི་སྟོན་པ་ང་ལོ་བདེ་བ་ལ་སྦྱར་བའི་ཕྱིར་བཅོམ་ལྡན་འདས་ཀྱིས་གསུངས་པའི་
ཚུལ་ནི། ཤཱཀྱ་ཐུབ་པ་སྔོན་དུ་མི་བརྗོད་པར་བཅོམ་ལྡན་འདས་སྔོན་དུ་གསུངས་པ་ནི་བདུད་བཅོམ་པ་དང་དབང་ཕྱུག་གི་ཡོན་ཏན་དྲུག་དང་ལྡན་པ་དེ་ནི་མུ་སྟེགས་པ་ལ་སོགས་པ་གཞན་ལ་མེད་པ་དང་། ཕྱི་རབས་ཀྱང་རང་གི་བླ་མའི་གནས་ལ་སོགས་པ་ཡོན་ཏན་སྔོན་དུ་བཏང་

ནས་བརྗོད་པ་ལ་གཞུག་པའི་ཕྱིར་རོ། །ཤཱཀྱ་ནི་རིགས་ལ་མངོན་པར་ཞེན་པ་རྣམས་འཇུག་པའི་རིགས་སྨོས་ཏེ། རྒྱལ་རིགས་ཕྱོགས་གཅིག་གི་མིང་ངོ་། །ཐུབ་པ་དང་རྒྱལ་བ་དང་འདྲེན་པ་ལ་སོགས་པ་ནི་སངས་རྒྱས་ཀྱི་ཡོན་ཏན་གྱི་མིང་གི་རྣམ་གྲངས་སོ། །ཐུགས་སུ་ཆུད་པ་
ནི་གཉིས་ཏེ། རང་དོན་དུ་དང་། གཞན་དོན་དུ་བཤད་པར་གསོལ་བ་བཏབ་པར་རོ། །རྣམ་པ་ཀུན་དུ་ནི་ཡུལ་དང་དུས་དང་གནས་སྐབས་སོ། །རྣམ་པར་གཟིགས་པ་ནི་ཕན་པ་དང་བདེ་བའོ། །ཏིང་ངེ་འཛིན་ནི་ཞི་གནས་དང་ལྷག་མཐོང་སྟེ། སྟོང་པ་དང་ཡེ་ཤེས་སུ་མཉམ་པར་
གྱུར་པའོ། །སྙོམས་པར་ཞུགས་པ་ནི་དེ་ཉིད་མངོན་སུམ་དུ་བྱས་པའོ། །མདོར་ན་དབྱིངས་དང་རིག་པ་དབྱེར་མེད་པ་ནི་ཏིང་ངེ་འཛིན་ཏེ་ཆོས་ཀྱི་སྐུ་ཡིན་ལ། སྙོམས་པར་ཞུགས་པ་ནི་དེ་ཉམས་སུ་མྱོང་བ་སྟེ་ལོངས་སྐུའོ། །གལ་ཏེ་སངས་རྒྱས་ནི་རྟག་ཏུ་མཉམ་པར་གཞག་པ་མ་ཡིན་
ནམ་ཅིའི་ཕྱིར་སྐབས་འདི་ཁོ་ན་མཉམ་པར་གཞག་ཅེས་སྨོས། ཡང་ན་ཤཱཀྱ་ཐུབ་པ་སྤྲུལ་པའི་སྐུ་ཡིན་པས་རྟག་ཏུ་མཉམ་པར་གཞག་པ་མི་མངའ་བ་ཡིན་ནམ་ཞེ་ན། མ་ཡིན་ཏེ། གདུལ་བྱ་ཉིད་ལ་དེ་ལྟར་སྣང་བ་དང་མ་འོངས་པ་ནི་འཆད་པ་པོ་བསམས་བཞིན་དུ་སྨྲ་བར་བྱའོ་ཞེས་གདམས་
པའོ། །ཞུགས་མ་ཐག་པ་ནི་གཞན་ཅིས་ཀྱང་བར་མ་ཆོད་པར་སྣོད་གཉིས་དང་འཚམ་པར་འབྱུང་བ་སྟེ་དེ་ཡང་ཟབ་པ་དང་རྒྱ་ཆེ་བ་ཐུགས་སུ་ཆུད་པ་ཕ་རོལ་ཏུ་ཕྱིན་པ་དྲུག་གི་མཚན་ཉིད་ལ་མོས་པ་དང་། གཏིང་དཔག་དཀའ་བ་ཐུགས་སུ་ཆུད་པ་རྡོ་རྗེ་ཐེག་པ་ལ་ཞུགས་པའོ། །དེ་རེ་རེ་ལའང་
ཞུགས་པ་དང་ཞུགས་པ་བསྟན་པའོ། །དང་པོ་ནི་མོས་པ་སྤྱོད་པ་ལ་སོགས་པ་ལ་གསུང་གི་སྒོ་ནས་འབྱུང་ངོ་། །གཉིས་པ་ས་ཆེན་པོ་ལ་རབ་ཏུ་བཞུགས་པ་རྣམས་ལ་འོད་ཟེར་གྱི་སྒོ་ནས་སོ། །རྣམ་པ་ཀུན་དུ་ཞེས་བྱ་བ་ནི་ཡེ་ཤེས་ཀྱི་སྐུ་ལ་བརྟེན་ནས་རིག་པའི་གནས་ལྔའི་སྣང་བ་རྒྱ་ཆེན་
པོས་ཁྱབ་པས་གདུལ་བྱ་ཚིམ་པར་མཛད་དོ། །དེ་ལ་སྒྲ་རིག་པ་ནི་བྱཱ་ཀ་ར་ཎ་སྟེ་དོན་གསལ་བར་བྱེད་དོ། །གཏན་ཚིགས་རིག་པ་ནི་ཚད་མ་སྟེ་རྒོལ་བ་ཚར་གཅོད་དོ། །གསོ་བ་རིག་པས་ནི་ལུས་གནས་པར་བྱེད་དོ། །བཟོ་རིག་པས་ནི་འཚོ་བ་མི་ཉམས་པ་དང་ཡིད་སྐྱོ་བ་མེད་པར་བྱེད་དོ། །

རྟོགས་པ་རིག་པས་ལམ་གོམས་ན་ཉོན་མོངས་པ་བཅོམ་ཞིང་ཡེ་ཤེས་སྐྱེད་པར་བྱེད་དོ། །ལམ་དེ་ཡང་དབང་པོ་རབ་འབྲིང་ཐ་མའི་བྱེ་བྲག་གིས་ཚར་གཅད་པ་དང་རྗེས་སུ་བཟུང་བའི་བྱེ་བྲག་གིས་རྣམ་པ་ཐ་དད་དོ། །དབུའི་གཙུག་ཏོར་ནི་འབྱུང་གནས་སོ། །ལྷ་རྣམས་
རྡོ་རྗེ་ཐེག་པ་ལ་གུས་པར་གཟུད་པའི་ཕྱིར་རོ། །ཕྱོགས་བཅུ་ཀུན་དུ་སྣང་བར་བྱས་པ་ནི་གཉིས་ཏེ། ཀུན་རྫོབ་ཏུ་སྟོང་པ་ཉིད་མི་རྟོག་པའི་ཡེ་ཤེས་ཀྱི་འོད་ཟེར་གྱིས་ནི་ཕྱོགས་བཅུའི་སངས་རྒྱས་ཀྱི་ཞིང་དུ་ས་བཅུའི་བྱང་ཆུབ་སེམས་དཔའ་ལ་སོགས་པ་གང་ཡང་མི་གསལ་བ་མེད་པར་བྱས་སོ། །
དོན་དམ་པའི་སྔགས་ཀྱི་ཕྲེང་བས་ནི་གདུལ་དཀའ་བ་གང་ཡང་མི་འདུལ་བ་མེད་པར་བྱས་སོ། །གདུགས་ལྟ་བུ་ནི་ཆར་དང་ཚད་པ་ལས་སྐྱོབ་པ་ལྟར་འཁོར་བའི་ཆུ་ལས་སྐྱོབ་པར་འགྱུར་བ་དང་། ཕྱིན་ཅི་ལོག་གི་གདུང་བ་སེལ་བར་འགྱུར་བས་སྔགས་རྣམས་ཀྱང་གདུགས་ཀྱི་ཚུལ་དུ་སྣང་
བའོ། །འཛུམ་པ་མཛད་པ་ནི་འཁོར་སྤོབས་པ་བསྐྱེད་པ་དང་ཆོས་འདི་རྙེད་པར་དཀའ་བ་དང་ཐབས་ཆེན་པོ་ཐོབ་པ་ཉིད་ཀྱི་ཕྱིར་རོ། །གཟིགས་པ་ནི་བྱམས་པ་ཆེན་པོ་དང་སྙིང་རྗེ་ཆེན་པོས་གདུལ་བྱ་ལ་གཟིགས་པའོ། །བཀའ་སྩལ་པ་ནི་ཐོག་མ་དང་བར་དང་ཐ་མར་དགེ་བའི་ཚུལ་གྱིས་
སོ། །ད་ནི་གདམས་ངག་གི་སྣོད་དུ་རུང་བར་བྱ་བའི་ཕྱིར་སེམས་བསྐྱེད་པ་གསུངས་སོ། །དེ་ལ་སྤྲོ་བ་བསྐྱེད་པའི་ཡན་ལག་ཏུ་རྟོགས་པ་འདིའི་མཚན་གསུངས་པ། ཀུན་ནས་སྒོར་འཇུག་པ་ནི་རྣམ་པར་སྣང་མཛད་ཆེན་པོའི་ཞལ་ནས་གསུངས་པའི་སྔགས་དང་རྒྱུད་དང་ཕྱག་རྒྱའོ། །འཇུག་
པ་ནི་ཐོས་པ་དང་སྒྲུབ་པའོ། །སྔགས་འདི་ཉིད་བཅོམ་ལྡན་འདས་ཀྱི་དབུའི་གཙུག་ཏོར་ནས་འོད་ཟེར་གྱི་ཚུལ་དུ་བྱུང་སྟེ། གདུལ་བྱ་ཚིམ་པར་བྱ་བའི་ཕྱིར་རོ། །དྲི་མ་མེད་པ་ནི་ཕྲིན་ལས་ཀྱི་མིང་སྟེ། འདིར་ཞུགས་པ་ཙམ་གྱིས་བསྐལ་པ་དུ་མའི་སྒྲིབ་པ་ཐམས་ཅད་སེལ་བར་བྱེད་པས་སོ། །
སྣང་བ་ནི་དབང་པོ་རབ་འབྲིང་ཐ་མ་ཐམས་ཅད་ཀྱི་སྤྱོད་ཡུལ་དུ་གྱུར་པའོ། །དེ་བཞིན་གཤེགས་པ་ཐམས་ཅད་ནི་རིགས་ལྔའོ། །དེ་བཞིན་ནི་ཞི་བའམ་མྱ་ངན་ལས་འདས་པ་སྟེ་མི་སླུ་བས་དེ་བཞིན་ཁོ་ནའོ། །དེ་ཁོང་དུ་ཆུད་པ་ནི་གཤེགས་པའོ། །དེ་ཁོང་དུ་ཆུད་ཅིང་རྟོགས་ན་མངོན་པར་

རྫོགས་པར་སངས་རྒྱས་པའི་ཕྱིར་རོ་ཞེས་ཀུན་ལ་སྦྱར་རོ། །ཡང་དེ་བཞིན་ནི་རྣམ་ཐར་སྒོ་གསུམ་མོ། །ཡང་ན་བདེན་པ་བཞིའོ། །ཡང་ན་བདེན་པ་དང་སྟོང་པ་དང་ཉེ་བར་ཞི་བ་དང་ཤེས་རབ་པོ། །ཡང་ན་སངས་རྒྱས་ཀྱི་ཆོས་ཐམས་ཅད་དོ། །དེ་དག་ཐུགས་སུ་ཆུད་པས་ཞེས་ཀུན་ལ་སྦྱར་རོ། །ཡང་ན་དེ་བཞིན་ནི་ཕ་རོལ་ཏུ་ཕྱིན་
པ་དྲུག་གོ། །དེས་སངས་རྒྱས་སུ་གཤེགས་པའོ། །ཡང་ན་ས་བཅུའོ། །ཡང་ན་འཕགས་པའི་ལམ་ཡན་ལག་བརྒྱད་དོ། །ཡང་ན་ཚོགས་གཉིས་སོ། །ཡང་ན་བརྩོན་འགྲུས་ཆེན་པོའོ། །ཡང་ན་དེ་བཞིན་ནི་བསྐལ་པ་གྲངས་མེད་པ་གསུམ་དུ་རྟ་དང་གླང་པོ་ལ་སོགས་པ་དང་། བུ་དང་
བུ་མོ་ལ་སོགས་པ་དང་། མགོ་དང་ཤ་རུས་རྐང་ལག་དུ་མ་བཏང་ཡང་གཏན་པ་མེད་པས་ནོར་ལྷ་དང་དབང་ཕྱུག་དང་། ཚངས་པ་དང་། སེར་སྐྱ་དང་། གཟིགས་ཟན་དང་། རྐང་མིག་དང་། འཕེལ་བ་དང་། རྒྱལ་དཔོག་གི་བུ་ལ་སོགས་པར་མི་འོང་སྟེ་དེ་ཁོ་ན་ལྟར་སངས་
རྒྱས་སུ་གཤེགས་པའོ། །ཡང་ན་ཐུགས་རྗེ་དང་བྱམས་པས་གཞན་དོན་གྱི་སྨོན་ལམ་བཞིན་ནོ། །དེ་ལྟར་སངས་རྒྱས་པའོ། །ཡང་ན་བསམ་གཏན་བཞི་ལ་བརྟེན་ནས་སྐྱེས་པ་རྡོ་རྗེ་ལྟ་བུའི་ཏིང་ངེ་འཛིན་གྱིས་སྲིད་རྩེའི་ཉོན་མོངས་པ་སྤངས་ནས་ཕྱིར་མི་ལོག་པ་སྟེ་མུ་སྟེགས་པས་སྤོང་
མི་ཤེས་པས་འཁོར་བར་ཕྱིར་ལྡོག་པ་ལྟ་བུ་མ་ཡིན་པ་དེ་བཞིན་ནོ། །དེས་མྱ་ངན་ལས་འདས་པའི་གྲོང་ཁྱེར་དུ་གཤེགས་པའོ། །ཡང་ན་སྔ་རབས་འདས་པ་རྣམས་ཀྱང་སྐལ་བ་དང་ལྡན་པ་རྣམས་མྱ་ངན་ལས་འདས་པའི་ལམ་ཇི་ལྟ་བ་བཞིན་བཞག་ནས་རང་མྱ་ངན་ལས་འདས་པ་ལྟར་
འདིར་ཡང་དེ་བཞིན་མཛད་དམ་གཤེགས་པས་སོ། །ཡང་ན་ལས་དང་ཉོན་མོངས་པ་དང་། ཤེས་བྱའི་སྒྲིབ་པ་སྤོང་བ་ལ་མུ་སྟེགས་བྱེད་པ་དག་གིས་མི་ནུས་པའོ། །དེས་ན་མྱ་ངན་ལས་འདས་པའོ། །ཡང་ན་གསུམ་པོ་དེ་སྤངས་ནས་ལས་དང་ཉོན་མོངས་པའི་དབང་གིས་མི་སྐྱེ་སྟེ་ཐོགས་པ་མེད་པའི་
ཡེ་ཤེས་ལ་དབང་ནས་མྱ་ངན་ལས་འདས་པའོ། །ཡང་ན་ཕུང་པོ་དེ་རྣམ་རྟོག་དང་སྤྲོས་པར་བཅས་པ་སྤངས་ནས་དེ་དག་སླར་མི་འབྱུང་བས་མྱ་ངན་ལས་འདས་པའོ། །ཡང་ན་དེ་བཞིན་ཉིད་ཐོབ་པ་མེད་པར་ཐོབ་པའོ། །ཡང་ན་དེ་བཞིན་ཉིད་རྟོགས་པའོ། །ཡང་ན་དེ་བཞིན་ཉིད་

གསུང་བས་ཏེ་ས་སྟེངས་སྒྲོགས་ཞེས་པ་དང་འདྲའོ། །ཡང་ན་འཁོར་བ་དང་མྱ་ངན་ལས་འདས་པ་བདེན་པ་གཉིས་སུ་བསྡུས་ནས་ཐུགས་སུ་ཆུད་པས་དམིགས་བཅས་དང་དམིགས་མེད་ཀྱི་ཚུལ་དུ་གནས་པས་དེ་གསུངས་པའོ། །ཡང་ན་དེ་བཞིན་ཉིད་ངར་འཛིན་པ་དང་བདག་
འཛིན་པ་དང་སྒྲིབ་པ་དང་རྣམ་རྟོག་དང་སྤྲོས་པ་སྟེ། འཁོར་བའི་སྡུག་བསྔལ་གྱི་རྒྱུ་དྲུངས་ཕྱུང་ནས་ཡོན་ཏན་རིན་ཆེན་མི་ཟད་པའི་གཏེར་བླ་ན་མེད་པ་བསམ་གྱིས་མི་ཁྱབ་པ་རྨད་དུ་བྱུང་བ་ལ་ལུས་ཉེ་བར་སྒྲུབ་པ་མཛད་ནས་གཞན་དོན་འདི་བྱ་ཞེས་རྟོག་ཚོམ་མེད་པར་འཁོར་བ་ཇི་སྲིད་དུ་སྨོན་ལམ་
གྱི་ཤུགས་ཀྱིས་དགའ་ལྡན་གྱི་གནས་ན་བཞུགས་པ་དང་། ལྷུམས་སུ་འཕོ་འཇུག་གནས་པ་དང་། བལྟམས་པ་དང་། གཞོན་ནུ་རོལ་པ་དང་། བཙུན་མོའི་འཁོར་དང་། མངོན་པར་འབྱུང་བ་དང་། དཀའ་བ་སྤྱོད་པ་དང་། བྱང་ཆུབ་སྙིང་པོར་གཤེགས་པ་དང་། བདུད་འདུལ་བ་
དང་། མངོན་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདས་པ་ལ་སོགས་པ་མཛད་པ་གཞལ་དུ་མེད་པ་ལ་འཇུག་བཞིན་སྐྱེ་འགག་མེད་པའི་མྱ་ངན་ལས་འདས་པ་ཆོས་ཀྱི་སྐུར་གཤེགས་པའོ། །ཡང་ན་ཕྱིར་མི་ལྡོག་པའི་འཁོར་ལོ་ལས།
ཇི་ལྟར་བྱིས་པས་རྣམ་བརྟགས་པ། །དེ་དག་བྱང་ཆུབ་མི་རྙེད་དེ། །ཆོས་ཀུན་བཙལ་ན་རྙེད་མེད་པ། །རྟོགས་པས་དེ་བཞིན་གཤེགས་ཞེས་བྱ། །ཞེས་སོ། །སྙིང་པོ་ནི་ཨོཾ་དང་ཧཱུཾ་བཞིའི་ཧཱུཾ་དང་པོ་གསུམ་ནི་དེ་དག་གི་སྐུ་བྱིན་གྱིས་བརླབ་པའི་སྔགས་སོ། །ཨཾ་བཾ་སཾ་ཛཾ་ཞེས་ཡི་གེ་
བཞི་པོ་ནི་རིག་པའི་ལྷ་མོ་དང་བྱང་ཆུབ་སེམས་དཔའ་ཐམས་ཅད་ཀྱི་སྙིང་པོའོ། །དམ་ཚིག་ལ་རྣམ་པར་བལྟ་བ་ནི་གོང་ནས་གོང་དུ་རྟོགས་པ་འཕེལ་བར་བྱེད་པ་སྟེ་རིག་སྔགས་ཀྱི་ངོ་བོ་ཉིད་དོ། །དོན་གྱི་གཟུངས་ནི་ཤེས་རབ་དང་སྙིང་རྗེ་དབྱེར་མེད་པ་ཡིན་ཏེ། ཚིག་གི་གཟུངས་
ཀྱིས་ཀྱང་དེ་ལ་སྦྱོར་བར་བྱེད་དོ། །ཡང་དག་པའི་དོན་ངོ་ཤེས་ཤིང་དེ་ལ་འཇུག་པའི་བར་དུ་གཅོད་པ་ལས་སྐྱོབ་པས་སོ། །འདི་ཡང་མནྠ་ཏྲ་ནཱནྠ་མནྟྲའི་སྒྲས་རང་དོན་མ་ལུས་པ་ཐོབ་ཅིང་གཞན་དོན་ཤུགས་ཀྱིས་འབྱུང་བ་དང་། མན་ཛྙཱ་ན་མ་མི་ཏྲ་ན་ཨརྠ་མནྟྲ་དཀྱིལ་འཁོར་ལ་

སོགས་པའི་ངོ་བོ་ཙམ་དུ་ཡོད་པ་དང་། ཨ་ནུ་ཨ་བ་བོ་དྷ་ན་ཏྲ་ན་ཨཪྠ་མནྟྲ་སྟེ་ཐམས་ཅད་གཉིས་སུ་མེད་པར་རྟོགས་པར་འགྱུར་བའོ། །དོན་གསུམ་པོ་དེ་གང་གིས་མཚོན་པ་ནི་ཕྱག་རྒྱ་སྟེ་གསང་སྔགས་སོ། །དེ་ལྟར་ན་རིག་སྔགས་དང་གཟུངས་སྔགས་དང་གསང་སྔགས་གསུམ་དང་ལྡན་པ་ནི་རྟོགས་པ་
འདིའི་ངོ་བོ་ཉིད་དོ། །གངྒཱའི་ཀླུང་ལ་སོགས་པས་ནི་སྔགས་ལ་ཇི་ལྟར་ཡི་རང་བ་ལྟར་སྔགས་ལ་ཞུགས་པར་སེམས་བསྐྱེད་མ་ཐག་གི་བྱང་ཆུབ་སེམས་དཔའ་ལ་ཡང་ཡི་རང་ཞིང་བསྔགས་པ་བརྗོད་དོ། །མཐོང་བ་ནི་སྔགས་བཞུགས་པའི་ས་ཆ་དང་སྐུ་གདུང་མཆོད་རྟེན་ལ་སོགས་པའོ། །
ཐོས་པ་ནི་བརྗོད་པའོ། །སྡིག་པ་དང་སྒྲིབ་པ་ནི་རྒྱུ་སྟེ་དེའི་འབྲས་བུ་ནད་དང་གནོད་པ་བྱེད་པ་སྟེ། མཐོང་བའི་ཆོས་སོ། །ངན་སོང་གསུམ་སྤོང་སྟེ་མ་འོངས་པའི་དུས་སོ། །སྡིག་པ་དང་སྒྲིབ་པ་འཇིག་པ་དང་། མཉམ་པར་མི་སྐྱེ་བར་བྱེད་པའི་གཞན་དོན་ཏེ་ཐོས་པ་དང་མ་ཐོས་པས་སོ། །
ད་ནི་ཕན་ཡོན་དཔེ་ལྔའི་སྒོ་ནས་འཇུག་པའི་གོ་རིམས་ཀྱི་ཁྱད་པར་གསུངས་པ། དད་པའི་མེས་ལས་ཀྱི་སྒྲིབ་པ་མཐའ་དག་སེལ་བ་དང་། སྙིང་རྗེའི་ཆུ་རྒྱུན་གྱིས་ཉོན་མོངས་པའི་ནད་སེལ་བ་དང་། ཐོས་པའི་ཤེས་རབ་ཀྱིས་ལྟ་བ་ངན་པའི་དྲི་མའི་ཚོགས་སེལ་བ་དང་། བསམ་པའི་ཉི་མས་མ་རིག་
པའི་མུན་པ་མཐའ་དག་སེལ་བ་དང་། བསྒོམ་པའི་ཤེས་རབ་ཀྱིས་ཡེ་ཤེས་ཀྱི་ཆུ་རྒྱུན་ཆེན་པོར་འཇུག་པ་སྟེ་དཔེར་ན་ལ་སོགས་པ་དང་རིམ་པ་བཞིན་སྦྱར་རོ། །མི་རྣམས་ཚེ་བཟློག་པ་ནི་ཁྱད་པར་གྱི་ལས་སོ། །ཉོན་ཅིག་ཅེས་སྣོད་ཞབས་རྡོལ་བ་ལྟར་བརྗེད་ངས་པ་དང་། སྣོད་ཁ་བུབ་ལྟར་
དོན་མི་རྟོགས་པ་དང་། སྣོད་མི་གཙང་བ་ལྟར་དོན་ལེགས་པར་མི་འཛིན་པ་སྤོང་ཞེས་གུས་པ་ལ་སྦྱར་རོ། །དེ་ལ་སྔགས་ནི་ན་མཿཞེས་པ་ནས་བྷ་ཡ་ཧ་ར་ཎི་ཞེས་པ་ཡན་ཆད་རྩ་བ་སྟེ་ཐུན་མོང་གི་སྔགས་སོ། །ཧཱུཾ་ཧཱུཾ་ཧཱུཾ་མྲྀ་ཏྱུ་དཎྜ་དྷ་རེ་ཞེས་པ་ནས་གཟུངས་ཀྱི་སྔགས་སོ། །སརྦ་ཏ་ཐཱ་ག་ཏོཥྞཱི་ཥ་
བི་ལོ་ཀི་ཏེ་སྭཱ་ཧཱ། ཞེས་པ་ནས་རིག་པའི་སྔགས་སོ། །རྗེས་སུ་སྟོན་ཅིག་ཅེས་པ་ནི་བླ་མ་དང་སློབ་མའི་འབྲེལ་པ་ལུང་ནོད་པའི་ཆོ་གའོ། །ཡུན་རིང་པོ་ལ་སོགས་པ་ནི་དེའི་ཕན་ཡོན་ཏེ་ཕན་པ་ནི་འཁོར་ལོས་སྒྱུར་བའི་རྒྱལ་པོ་ལ་སོགས་པ་མི་དང་། རྒྱལ་ཆེན་བཞི་ནས་ཚངས་པའི་འཇིག་རྟེན་

ལ་ཐུག་པའི་ལྷའོ། །བདེ་བ་ནི་བྱང་ཆུབ་ཆེན་པོའོ། །ཀུན་ནས་ལ་སོགས་པས་ཚ་ཚ་གཅིག་པའི་ཆོ་ག་བཤད་དོ། །དེ་ནས་ཉི་མ་ཤར་བ་ལ་སོགས་པས་ནི་ལུང་ནོད་པ་དང་ཆོ་ག་ལ་འཇུག་པ་ཐམས་ཅད་ཀྱི་ཐུན་མོང་དང་དངོས་གཞིའོ། །མཆོད་རྟེན་བརྒྱ་རྩ་བརྒྱད་ལ་
སོགས་པས་ཚ་ཚ་བརྒྱ་པའི་ཆོ་གའོ། །ཨོཾ་ན་མཿསྟྲཻ་ཡ་དྷི་ལ་སོགས་པ་འདི་ནི་གསང་སྔགས་སོ། །སྔགས་གོང་འོག་གཉིས་འབྲེལ་པ་ནི་དོན་གྱི་གཞུང་གཅིག་ཏུ་བསྒྲུབ་པའོ། །དེ་ཡང་འདི་ལྟར་ཡིན་ཏེ། དང་པོར་ན་མཿསརྦ་ཏ་ཐཱ་ག་ཏཱ་ནཱཾ་ཞེས་དེ་བཞིན་གཤེགས་པ་ཐམས་ཅད་ལ་ཕྱག་
འཚལ་ཞེས་གསུངས་པ་ནི་སྔགས་འདི་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཡིན་པས་སོ། །ཨོཾ་ནི་ཡི་གེའི་ཤུགས་ཀྱིས་དང་པོར་བཀྲ་ཤིས་དོན་གྱི་ཕྱིར་ཕྱག་འཚལ་ཞེས་བྱ་སྟེ། འཇིག་རྟེན་དང་འཇིག་རྟེན་ལས་འདས་པའི་བཀྲ་ཤིས་པའི་མངའ་
ཐམས་ཅད་ཀྱི་གཙོ་བོ་ཡིན་པའི་ཕྱིར་རོ། །དེས་ཡི་གེ་ཐམས་ཅད་བྱིན་གྱིས་བརླབས་ནས་སྔགས་སུ་གྱུར་པར་གདོན་མི་ཟ་བའི་ཕྱིར། དང་པོར་གདགས་དགོས་པ་ཁོ་ནའོ། །དེ་ལ་སྔགས་འདིའི་ཡོན་ཏན་གྱི་ཆེ་བའི་དཔེ་ནི། ཡི་གེའི་སྒོ་ནས་བརྗོད་པ་གཉིས་ཁོ་ན་སྟེ། མ་ཧཱ་ཙིནྟ་མ་ཎི་ཛྭཱ་
ལ་ན་ཡིད་བཞིན་གྱི་ནོར་བུ་འབར་བ་ཆེན་པོ་ཞེས་པ་སྟེ། །དེ་ནི་རང་དང་གཞན་གྱི་དོན་རྒྱུན་མི་ཆད་པ་འབྱུང་བ་དང་ལྡན་པའི་དཔེའོ། །དེས་ནི་ཡེ་ཤེས་བསྟན་ཏོ། །སཱ་ག་ར་གམྦྷཱི་ར་ཞེས་པས་རྒྱ་མཚོ་ཟབ་མོ་ཞེས་པ་སྟེ་རིག་སྔགས་འདིར་འཇུག་པའི་གང་ཟག་གི་རིགས་ལ་གོ་རིམས་མེད། ལུས་
ཅན་ཐམས་ཅད་འཇུག་ཏུ་རུང་བ་དང་བསྐལ་པ་དུ་མའི་མི་དགེ་བའི་དྲི་མ་དག་པར་བྱེད་པ་དག་འདིར་ཞུགས་པ་ལ་བྱང་ཆུབ་ཀྱི་མྱུ་གུ་མྱུར་དུ་བསྐྱེད་པའི་དོན་ནོ། །དེས་ནི་ཐུགས་རྗེའོ། །ཡོན་ཏན་དེ་ལྟ་བུ་དང་ལྡན་པའི་སྔགས་ཀྱི་ལུགས་ལ་གསོལ་བ་གདབ་པ་ཡང་གཉིས་ཏེ། སྐྱེ་བ་
འདི་དང་སྐྱེ་བ་དུ་མའི་དོན་དུའོ། །དང་པོ་ལ་དགུ་སྟེ། ཨཱ་ཀཱཪྵ་ཡ་ཨཱ་ཀཱཪྵ་ཡ་ཞེས་པས་སྔགས་འདི་ཐོས་པ་དང་མཐོང་བ་ཙམ་གྱིས་ལམ་འདི་ལ་དྲོངས་ཤིག་དྲོངས་ཤིག་ཅེས་པ་དང་པོའོ། །གཉིས་པ་ནི། ཨཱ་ཡུནྡྷ་ར་ཨཱ་ཡུནྡྷ་ར་ཞེས་པ་སྟེ། ཞུགས་པའི་གང་ཟག་རྣམས་ཚེ་

ཟུང་ཅིག་ཚེ་ཟུང་ཅིག་པའོ། །གསུམ་པ་ནི་ཡོན་ཏན་དང་ལོངས་སྤྱོད་དང་ལྡན་དགོས་པས་སནྡྷ་ར་སནྡྷ་ར་ཞེས་ཏེ་ལུས་དང་སེམས་ཀྱི་རྒྱན་ཤིན་ཏུ་ཟུང་ཤིག་ཤིན་ཏུ་ཟུང་ཤིག་ཅེས་པའོ། །བཞི་པ་ནི་ཚེ་རིང་ན་ཡང་ལུས་ཅན་གྱི་གནོད་པ་ཐམས་ཅད་བསལ་བའི་ཕྱིར། ཀྵ་ཎ་ཀྵ་ཎ། ཀྵི་ཎི་ཀྵི་ཎི།
ཀྵུ་ཎུ་ཀྵུ་ཎུ། ཞེས་ཏེ་སྲུངས་ཤིག་སྲུངས་ཤིག །སྐྱོབས་ཤིག་སྐྱོབས་ཤིག །ཚོས་ཤིག་ཚོས་ཤིག །ཅེས་པའོ། །ལྔ་པ་ནི་གནོད་པ་མེད་པ་ཡང་ལམ་ལོག་པ་ལ་འཇུག་པ་བསལ་བའི་ཕྱིར། སརྦ་ཏ་ཐཱ་ག་ཏཱ་ས་མ་ཡེ་ཏིཥྛ་ཏིཥྛ་ཞེས་པ་སྟེ། དེ་བཞིན་གཤེགས་པ་ཐམས་ཅད་ཀྱི་
དམ་ཚིག་ལ་ཞོག་ཞོག་ཅེས་པའོ། །དྲུག་པ་ནི་བདག་གཞན་གྱི་བརྩོན་འགྲུས་བསྐྱེད་པའི་ཕྱིར། མ་ཧཱ་བྷུ་བ་ན་སཱ་ག་ར་སཾ་ཤོ་དྷ་ཡ་མ་མ་སརྦ་སཏྭ་ཤྩ་ཞེས་ཏེ། བདག་དང་སེམས་ཅན་ཐམས་ཅད་ས་ཆེན་པོ་དང་། རྒྱ་མཚོ་ལྟར་སྦྱོངས་ཞེས་པའོ། །འདིས་ནི་སྨོན་པའི་སེམས་གཞི་ཆེན་པོ་
ལྟ་བུ་དང་འཇུག་པའི་སེམས་རྒྱ་མཚོ་ལྟ་བུ་བསྐྱེད་ཅེས་སྐུལ་བའོ། །བདུན་པ་ནི་རང་དོན་ལ་དམིགས་པ་བསྐྱེད་པའི་ཕྱིར། བྷ་ག་ཝ་ཏེ་སརྦ་པཱ་པཾ་བི་མ་ལེ་ཛ་ཡ་ཛ་ཡ། ཛ་ཡ་ལབྡྷེ་ཞེས་ཏེ། བཅོམ་ལྡན་འདས་མ་སྡིག་པའི་དྲི་མ་ཐམས་ཅད་ལས་གྲོལ་ཞིང་རྒྱལ་ཞིང་རྒྱལ་བས་བདག་
རྒྱལ་བ་མཛོད་ཅེས་བྱ་བས་སེམས་བསྐྱེད་པའི་མཐུ་ལ་དམིགས་པའོ། །བརྒྱད་པ་གཞན་དོན་ལ་དམིགས་པ་ནི། སྥུ་ཊ་སྥུ་ཊ། སྥོ་ཊ་ཡ་སྥོ་ཊ་ཡ། ཞེས་པ་སྟེ་སོལ་སོལ། ངེས་པར་སོལ་ངེས་པར་སོལ། །ཞེས་བྱ་བས་ཀུན་ནས་ལྡང་བ་དང་བག་ལ་ཉལ་བ་ཐམས་ཅད་སོལ་ཞེས་བྱའོ། །
དགུ་པ་ནི་རང་གཞན་གཉིས་ཀའི་སྟེ། བྷི་ག་ཏ། ཨཱ་ཝ་ར་ཎ་བྷ་ཡ་ཧ་རེ་ཎ་ཞེས་ཏེ་རྣམ་པར་འགལ་བའི་སྒྲིབ་པས་འཇིགས་པ་འཕྲོགས་ཞེས་བྱ་བས་བརྩོན་འགྲུས་ཀྱི་ཕན་ཡོན་བསྟན་ཏོ། །ད་ནི་སྐྱེ་བ་དུ་མའི་དོན་དུ་གསོལ་བ་གདབ་པར་བྱ་བ་ནི་གཉིས་ཁོ་ན་སྟེ། དམིགས་པའི་
གཞི་དང་དེ་ལས་བྱུང་བའི་ཕྲིན་ལས་སོ། །དམིགས་པའི་གཞི་ལ་དྲུག་ཁོ་ན་སྟེ། ས་བོན་ལ་དམིགས་པ་དང་། སྐུ་ལ་དམིགས་པ་དང་། ཕྱག་རྒྱ་ལ་དམིགས་པ་དང་། རྒྱན་ལ་དམིགས་པ་དང་། ལྷ་ལ་དམིགས་པ་དང་། སྔགས་ལ་དམིགས་པའོ། །དེ་ལ་ས་བོན་ལ་དམིགས་

པ་ནི་ཧཱུཾ་སྟེ། དུས་གསུམ་གྱི་སངས་རྒྱས་ཐམས་ཅད་ཀྱི་ས་བོན་ཡིན་པས་གསུམ་མོ། །ཧཱུཾ་ཡིག་གིས་འབྲས་བུ་ཡེ་ཤེས་ལྔ་མཚོན་ནུས་པའི་ཕྱིར་རོ། །དེའི་ཕྲིན་ལས་ནི་མྲྀ་ཏྱུ་དཎྜ་དྷ་རེ་ཨ་བྷ་ཡ་བྲ་ཏེ་ཞེས་པས་འཆི་བདག་གི་དབྱུག་པས་མི་འཇིགས་པ་སྩོལ་ཞེས་ཏེ་
མཚན་མོ་ཉལ་བ་འམ་འགྲོ་བ་ལ་སོགས་པ་དང་ཐུན་དང་ཐུན་མཚམས་སུ་ལུས་ངག་ཡིད་གསུམ་གྱི་གནས་སུ་པདྨ་དང་ཟླ་བའི་དཀྱིལ་འཁོར་ལ་གནས་པའི་ཧཱུཾ་ཡིག་ཁ་དོག་གསུམ་ལ་དམིགས་པས་དུས་མ་ཡིན་པར་འཆི་བ་ལས་སྐྱོབ་པའོ། །སྐུ་ལ་དམིགས་པ་ནི་ཨུཥྞཱི་ཥ་བྱ་བ་ལོ་ཀི་ཏེ། ས་
མནྟ་མུ་ཁེ། ས་མནྟ་བྱ་བ་ལོ་ཀི་ཏེ། མ་ཧཱ་མཱ་ཡེ། མ་ཧཱ་པཱ་ཤ་དྷ་རེ། ཨ་མོ་གྷ་བི་མ་ལེ་ཞེས་པས་གཙུག་ཏོར་རྣམ་པར་གཟིགས་མ། ཀུན་ནས་སྒོར་འཇུག་མ། ཀུན་ནས་རྣམ་པར་གཟིགས་མ། སྒྱུ་མ་ཆེན་མོ། ཞགས་པ་ཆེན་མོ་འཆང་མ། དོན་ཡོད་མའི་དྲི་མ་བྲལ་མ་
ཞེས་ཏེ་དང་པོ་ནི་འབྱུང་ཁུངས་ཀྱི་མིང་ངོ་། །གཉིས་པ་ནི་ངོ་བོ་ཉིད་ཀྱི་མིང་ངོ་། །གསུམ་པ་ནི་ཡོན་ཏན་གྱི་མིང