Luận tạng Tây Tạng (Tengyur) — Tập 68

ོ་ཤལ་ཆུན། །ཡིད་འོང་མེ་ཏོག་འབར་བ་
ཡིས། །དཀྱིལ་འཁོར་འདི་ལ་བྱིན་གྱིས་རློབས། །ཤེས་རབ་ཕ་རོལ་ཕྱིན་པའི་རྟགས། །རིན་ཆེན་མཆོག་གསུམ་མཚན་བརྗོད་པའི། །གསུང་དབྱངས་དྲུག་ཅུ་ལྡན་དྲིལ་འདིས། །དཀྱིལ་འཁོར་འདི་ལ་བྱིན་གྱིས་རློབས། །མཚན་མའི་བག་ཆགས་ཀུན་སེལ་བའི། །དུས་གསུམ་སངས་

རྒྱས་ཐམས་ཅད་ལ། །རྒྱལ་ཆེན་བཞིས་ཕུལ་མཆོད་མཆོག་གིས། །དཀྱིལ་འཁོར་འདི་ལ་བྱིན་གྱིས་རློབས། །ཆོས་རྣམས་གཟུགས་བརྙན་འདྲ་བ་ཡི། །རང་བཞིན་དག་པས་རྟོག་པ་མེད། །མ་རྨོངས་སྟོན་པའི་མེ་ལོང་འདིས། །དཀྱིལ་འཁོར་འདི་ལ་བྱིན་གྱིས་རློབས། །ཞི་བའི་མཐའ་ལ་མི་
གནས་ཤིང་། །འཇིག་རྟེན་ཀུན་དང་མཐུན་འཇུག་རྟགས། །ཐབས་དང་ཤེས་རབ་ཉི་ཟླ་འདིས། །དཀྱིལ་འཁོར་འདི་ལ་བྱིན་གྱིས་རློབས། །གཞན་ཡང་མཆོད་པའི་རྒྱན་འོས་དང་། །ལྷ་བཤོས་ཕྱོགས་ཀྱི་གཏོར་མ་ཡིས། །རྒྱུ་དྲུག་འགྲོ་ཚིམ་བྱེད་མཐུ་ཡིས། །དཀྱིལ་འཁོར་འདི་ལ་བྱིན་གྱིས་
རློབས། །གཉིས་པ་བདག་ཞུགས་ཆོ་འཕྲུལ་གྱིས། །ཆེ་བའི་དོན་ཐབས་བསྟན་པས་འཛིན། །ཏིང་ངེ་འཛིན་དང་བྱིན་གྱིས་བརླབ། །དབང་བསྐུར་མཆོད་པའི་ཆོ་འཕྲུལ་ལོ། །བདག་ཉིད་དང་པོ་རྣལ་འདུག་དང་། །ཏིང་འཛིན་ཞུགས་པ་རྣམ་གཉིས་སོ། །བདག་ཤར་སྒོར་འདུག་འཛིན་པ་ལ། །དམ་
བཅའ་དབང་ཐོབ་སྙིང་རྗེ་ཡིས། །ཐབས་དང་ཤེས་རབ་དོན་བྱེད་པར། །འཕགས་པ་ཀུན་མཁྱེན་སྤྱན་དྲངས་ལ། །ཨོཾ་ཨཱཿཧཱུཾ་སྭཱ་ཧཱ་ལྔ་ཡིས། །བྱིན་གྱིས་བརླབས་ལ་སྭས་དབང་བསྐུར། །ཕྱག་རྒྱའི་གོ་ཆ་ཧཾ་གི་བགོ། །ཏུཥྱ་ཧོཿདང་སནྡྷི་ཏིཥྛ་དང་། །ཡ་ཐཱ་བཛྲ་སཏྭ་ཏིཥྛ་ཏཾ་ཨ་ཧཾ་བཾ། །དགོངས་པས་གྲུབ་
པ་ཞུགས་དང་བསྐྱེད། །དེ་ནས་ཁྲོ་བོས་བགེགས་མཚམས་བཅད། །ཞུགས་པས་དེ་བཞིན་ཉིད་ཀུན་སྣང་། །རྒྱུ་ལས་འབྱུང་བ་རིམ་ལ་བསྐྱེད། །དེ་སྟེང་གཞལ་ཡས་ཁང་རྒྱན་ལྡན། །ནང་དུ་གདན་དག་བསྐྱེད་པའི་སྟེང་། །འཁོར་ལོ་ཡིད་འོང་གྲུ་ཆད་དང་། །སྒོ་དང་སྒོ་ཁང་བྱ་དང་བཅས། །སེམས་ཅན་
པདྨ་ཉི་ཟླའི་གདན། །ཅི་རིགས་པར་ནི་མཛེས་པར་བྱ། །དེ་སྟེང་སེམས་ཉིད་དག་པ་ཡིས། །རྒྱུ་ལས་ཆོས་ཉིད་མངོན་བྱང་ཆུབ། །དེ་གཟུགས་ཟླ་བ་ཡིག་འབྲུ་དང་། །ཕྱག་མཚན་དང་ནི་སྐུ་རྫོགས་པ། །འབྲས་བུ་དང་ནི་བསྐྱེད་པ་ལྔ། །སྟོང་པའི་ཆོ་འཕྲུལ་ལྔ་རྒྱུ་ལྔ། །ཆོས་ཉིད་རྒྱུ་ལས་རྣམ་སྣང་
མངོན་བྱང་ཆུབ། །གཟུགས་བརྙན་ཟླ་བ་མི་བསྐྱོད་མངོན་བྱང་ཆུབ། །ཡིག་འབྲུ་རིན་ཆེན་འབྱུང་ལྡན་མངོན་བྱང་ཆུབ། །ཕྱག་མཚན་སྣང་བ་མཐའ་ཡས་མངོན་བྱང་ཆུབ། །གཟུགས་སྐུ་དོན་ཡོད་གྲུབ་པ་མངོན་བྱང་ཆུབ། །སྣང་སྟོན་སྲ་བརྟན་སྲེག་བྱེད་དང་། །གྱེས་འཛིན་ཤུགས་བསྐྱོད་ཟད་

པར་ལྔ། །ནམ་མཁའ་ས་མེ་ཆུ་རླུང་གི། །དེ་ཡི་བྱིན་རླབས་ཐམས་ཅད་མངོན་བྱང་ཆུབ། །རྒྱུ་ལས་བག་ཆགས་གནས་གྱུར་ཆོས་དབྱིངས་བསྐྱེད། །ཟླ་བ་ཀུན་གཞི་གནས་གྱུར་མེ་ལོང་བསྐྱེད། །ཡིག་འབྲུ་ཉོན་མོངས་གནས་གྱུར་མཉམ་སེམས་བསྐྱེད། །ཕྱག་མཚན་ཡིད་
གྱུར་སོ་སོར་རྟོག་སེམས་བསྐྱེད། །སྐུ་ནི་སྒོ་ལྔ་བྱ་བ་ནན་ཏན་བསྐྱེད། །རྟག་ཆད་གཟུང་འཛིན་བདག་གཞན་བྱ་བ་གྲུབ། །ཆོས་ཉིད་རྒྱུ་ལས་རྣམ་སྣང་མངོན་བསྟན་པས། །བསམ་གཏན་ཚུལ་ཏེ་སངས་རྒྱས་རྗེས་དྲན་སྐུ། །ཨོཾ་ཙིཏྟ་པྲ་ཏི་བེ་དྷཾ་ཀ་རོ་ཡཱ་མི། ཨེ་མའོ། །དོན་དམ་རང་བཞིན་སྤྲོས་མེད་
སེམས་ཀྱི་དབྱིངས། །རྒྱལ་བ་རྒྱལ་མཚོའི་ཐུགས་དང་ཡེ་ནས་མཉམ། །མངོན་པར་བྱང་ཆུབ་ནམ་མཁའི་མཚན་ཉིད་དེ། །ཆོས་ཀྱི་དབྱིངས་ཉིད་མི་གནས་ཇི་བཞིན་དང་། །གཟུགས་བརྙན་ཟླ་བ་མི་བསྐྱོད་མངོན་བསྟན་པས། །ཡེ་ཤེས་ཚུལ་ཏེ་དགེ་འདུན་རྗེས་དྲན་སྐུ། །ཨོཾ་བི་དྷི་ཙིཏྟ་ཙནྡྲ་ཨུཏྤཱ་ད་
ཡཱ་མི། ཨེ་མའོ། །བསོད་ནམས་ཡེ་ཤེས་ཚོགས་ཆེན་ཡོངས་རྫོགས་པ། །ཟླ་བ་ཉ་བ་བཞིན་དུ་སྣང་བ་སྟེ། །ཀུན་དུ་བཟང་པོ་ཡེ་ནས་དག་པའི་དོན། །མངོན་པར་བྱང་ཆུབ་རང་བཞིན་འོད་ཀྱང་གསལ། །ཡིག་འབྲུ་རིན་ཆེན་འབྱུང་ལྡན་མངོན་བསྟན་པས། །སྦྱིན་པའི་ཚུལ་ཏེ་གཏོང་བ་རྗེས་དྲན་སྐུ། །
ཨོཾ་ཧཱུཾ་སྭཱ་ཨཿཧ་ཏིཥྛ་ཨེ་མ་ཧོ། །མ་རིག་སེལ་ཅིང་ཡང་དག་རིག་བསྐྱེད་པ། །གསུང་གི་རང་བཞིན་ཆེ་བའི་བྱིན་རླབས་ཏེ། །གསང་བ་བསྒྲུབ་པའི་མཆོག་ཏུ་བསྔགས་པས་ན། །དོན་གྱི་སྙིང་པོ་སྤྲོས་མེད་བྱང་ཆུབ་དབྱིངས། །ཕྱག་མཚན་སོ་སོ་མཐའ་ཡས་མངོན་བསྟན་པས། །ཚུལ་ཁྲིམས་ཚུལ་
དེ་གཉིས་རྟོག་ཆོས་དྲན་སྐུ། །ཙཀྲ་བཛྲ་རཏྣ་པདྨ་ཀརྨ་སྭཱ་བྷཱ་ཝ་ཨཱཏྨ་ཀོ྅ཧཾ། ཨེ་མའོ། །དུས་གསུམ་སངས་རྒྱས་ཐམས་ཅད་ཀྱི། །ཐུགས་ཉིད་ཡེ་ཤེས་ལྔ་ཡི་རྟགས་སུ་སྣང་། །མི་གཡོ་མི་ལྡོག་མཆོག་གི་རང་བཞིན་པས། །ཇི་བཞིན་མཉམ་པས་བྱང་ཆུབ་ཆེན་པོའི་ངང་། །སྐུར་གྱུར་གཟུགས་
ལས་དོན་ཡོད་སྐུར་སྟོན་པས། །བརྩོན་འགྲུས་ཚུལ་ཏེ་ལྷ་རྗེས་དྲན་པའི་སྐུ། །ཨོཾ་ཧཱུཾ་སྭ་ཨཱཿཧ་ཡ་ཐ་སཏྭ་ཏིཥྛ་ཏཾ་ཨ་ཧཾ། ཨེ་མའོ། །དེ་བཞིན་གཤེགས་པ་ཐམས་ཅད་ཀྱི། །མ་སྐྱེས་ཡེ་ཤེས་མཉམ་པ་ཉིད། །ཐབས་ལ་མཁས་དང་ཐུགས་རྗེ་ཡི། །དེ་ཉིད་ཕྱག་རྒྱ་ཆེན་པོར་སྣང་། །སྔགས་ནི་

སངས་རྒྱས་ཀུན་གྱིས་གསུངས། །ཚིགས་བཅད་དོན་གྲུབ་རྟོག་ཚད་གསོལ། །དེ་བཞིན་གཤེགས་པ་ཐམས་ཅད་ཀྱིས། །དགྱེས་པའི་ཕྱག་ནི་སྤྱི་བོར་གཞག །བྱིན་གྱིས་བརླབ་ཕྱིར་ཨོཾ་ཨཱཿཧཱུཾ། །དབང་བསྐུར་སྭ་འབར་རིན་པོ་ཆེ། །ཡོངས་སུ་གྲུབ་དང་གཞན་དབང་དང་། །ཀུན་བརྟགས་པ་ནི་ཐམས་
ཅད་ལའོ། །ཡོངས་སུ་གྲུབ་པ་ཞེས་པ་ནི། །རྣམ་སྣང་མཛད་ཆེན་དེ་ཉིད་དོ། །གཞན་དབང་རྗེས་སུ་བསྟན་པ་ནི། །སངས་རྒྱས་མང་པོས་སྔགས་གསུངས་རྟོགས། །ཀུན་བརྟགས་ཞེས་སུ་བསྟན་པ་ནི། །འོག་མིན་གནས་དང་རི་རབ་ཟོམ། །རྡོ་རྗེ་གདན་ལ་སོགས་སྟོན་པའོ། །འཁོར་རྣམས་
ཐམས་ཅད་སྒོ་མདུན་བསྐྱེད། །འབྲས་བུ་ལྔ་ནི་ཡོངས་སུ་གྲུབ། །བསྐྱེད་པ་གཞན་དབང་ཡིན་པར་བཤད། །སྟོན་པའི་ཆོ་འཕྲུལ་ཀུན་བརྟགས་སོ། །སྙན་གསན་གསོལ་སྤྱན་དྲང་ལ་གཞུག །དམ་ཚིག་ཕྱག་འཚལ་མཆོད་བསྟོད་ཆོས། །བྱང་ཆུབ་སྡོམ་གོ་བྱིན་རླབས་དང་། །མཚམས་བཅད་
དམ་ཚིག་དབོག་རིག་བྱ། །ཕྱོགས་བཅུའི་འཇིག་རྟེན་རབ་འབྱམས་ན། །རྒྱལ་བ་གང་བཞུགས་འཁོར་དང་བཅས། །མགོན་པོ་དམ་ཅན་ཇི་སྙེད་པོ། །ཐམས་ཅད་ཀུན་ནས་དགོངས་སུ་གསོལ། །གཉིས་མེད་རྣམ་དག་དབྱིངས་མཆོག་ན། །མཉམ་ཉིད་གནས་པ་དེ་བཞིན་གཤེགས། །བསྐུལ་
བའི་ས་ལ་བཞེངས་ནས་ཀྱང་། །སེམས་ཅན་དོན་ལ་རབ་བརྩོན་པའི། །རྒྱལ་བ་སངས་རྒྱས་བཅོམ་ལྡན་འདས། །བྱང་ཆུབ་སེམས་དཔའ་ལྕམ་དྲལ་དང་། །ཁྲོ་བོ་ཁྲོ་མོ་ལ་སོགས་ཀུན། །རྒྱུད་ལྔའི་སེམས་ཅན་སྦྱང་བ་དང་། །ཁྱད་པར་བདག་དང་ཡོན་བདག་དང་། །དཀྱིལ་འཁོར་འདི་ལ་བྱིན་
རློབ་དོན། །རང་བཞིན་རྫོགས་ཆེན་བཞུགས་གནས་ནས། །ཏིང་འཛིན་གཟུགས་བརྙན་གཞལ་ཡས་འདིར། །ཐུགས་རྗེས་བྱོན་དགོངས་སྤྱན་འདྲེན་སྤྱོན། །ཨེ་ཧྱེ་ཧི་བུདྡྷ་དྷཱ་ཏྭཱི་ཤྭ་རི་བོ་དྷི་སཏྭ་སརྦ་ས་མཱ་ཛཿ། ཆོས་དབྱིངས་ནམ་མཁའི་དཀྱིལ་འཁོར་ཡངས་པ་ན། །རྒྱལ་བའི་བཞུགས་
གནས་ཁྱད་པར་ཅན། །རབ་འབྱམས་མཆོད་པའི་བཀླུབས་ཤིང་ནི། །ཉི་ཟླ་པད་སོགས་གདན་སྟེང་ནས། །མི་མཇེད་འཛམ་གླིང་འཇིག་རྟེན་འདིར། །བཀྲ་ཤིས་དཔལ་མཆོག་གཞལ་ཡས་ཁང་། །བླ་མེད་མཆོད་པའི་རྒྱན་བཤམས་ནས། །འགྲོ་བའི་དོན་ཕྱིར་སྤྱན་འདྲེན་ན། །དུས་གསུམ་

གཤེགས་པའི་འཇིག་རྟེན་སྒྲོན། །ཐུགས་རྗེ་དམ་ཅན་སྨོན་ལམ་གྱིས། །སེམས་ཅན་དོན་ཕྱིར་ཆོས་སྐུ་ལས། །གཟུགས་སྐུ་ལོངས་སྤྱོད་རྫོགས་སྐུར་སྣང་། །ཐུགས་རྗེས་སྤྲུལ་སྐུར་གཤེགས་པ་བཞིན། །དཀྱིལ་འཁོར་མ་ཉམས་དམ་པ་འདིར། །བྱིན་གྱིས་རླབས་ཀྱིས་གཤེགས་
སུ་གསོལ། །དཀྱིལ་འཁོར་གང་ལྷགས་ལྷ་ཚོགས་ཀུན། །ཚོམ་ཚོམ་མཚམས་བསྡེབས་སྤྱན་དྲངས་ལ། །སྟོབས་བཅུའི་རྩལ་འཆང་མི་ཡི་སེང་གེ་སྤྱོན། །གཏི་མུག་མུན་སེལ་འཇིག་རྟེན་སྒྲོན་མ་སྤྱོན། །ཉོན་མོངས་ནད་སེལ་སྨན་པའི་རྒྱལ་པོ་སྤྱོན། །བདུད་རིགས་ཕམ་མཛད་ཐར་པའི་
ལམ་སྟོན་སྤྱོན། །དབང་མཛད་རྒྱལ་པོ་འདིར་སྤྱོན་མཆོད་པ་བཞེས། །དཀྱིལ་འཁོར་ལྷ་ཚོགས་མ་ལུས་གནས་འདིར་སྤྱོན། །ཨེ་མ་སངས་རྒྱས་ཐམས་ཅད་ཀྱི། །ཡང་དག་སྤྱན་འདྲེན་བསྟན་པའི་བདག །གང་ཕྱིར་བདག་གིས་སྤྱན་དྲངས་པས། །དཀྱིལ་འཁོར་འདི་ལ་བརྟན་པར་གྱུར། །ཨེ་
མ་སངས་རྒྱས་ཐམས་ཅད་ཀྱི། །རིན་ཆེན་ཞགས་པ་དམ་པོའི་བདག །རྡུལ་ཕྲན་བཞུགས་པ་ཐམས་ཅད་ཀུན། །སླར་ཡང་བདག་གིས་དྲང་བར་བགྱི། །ཨེ་མ་སངས་རྒྱས་ཐམས་ཅད་ཀྱི། །པདྨ་ལྕགས་སྒྲོག་དམ་པའི་བདག །བཅིངས་པ་ཀུན་ལས་གྲོལ་བ་རྣམས། །སེམས་ཅན་དོན་དུ་བཅིང་བར་
འདོད། །ཨེ་མ་སངས་རྒྱས་ཐམས་ཅད་ཀྱི། །རྒྱ་གྲམ་དྲིལ་བུ་དབབ་བརྟན་བདག །ཀུན་གྱི་ཆོས་བདག་གྱུར་པ་ཡང་། །བྲན་དུ་ཡང་ནི་གྱུར་ཅིང་ཞུགས། །ཛཿཧཱུཾ་བཾ་ཧོཿཨེ་ཧྱེ་ཧི་བྷ་ག་བཱན། མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿས་མ་ཡ་ཛཿཧཱུཾ། ཨོཾ་ལ་སོགས་པའི་ལྷ་རྣམས་སྔགས། །རྟིང་ལ་ཨ་ཀ་ཛས་
བརྒྱན་ཅིང་། །སོ་སོར་སྐུ་གསུང་ཐུགས་ཀྱི་ལྷ། །མ་ལུས་པ་རྣམས་སྤྱན་དྲང་ངོ་། །མདོར་ན་འཇིག་རྟེན་ཁམས་རྣམས་སུ། །སེམས་ཅན་རྣམས་ཀྱི་དོན་གྱི་ཕྱིར། །ཇི་ལྟར་འདུལ་བ་སྣ་ཚོགས་ཀྱིས། །རྡོ་རྗེ་རིན་ཆེན་པདྨོ་དང་། །རྒྱ་གྲམ་འཁོར་ལོ་བསྐོར་དུ་གསོལ། །མགོན་པོ་ཐུགས་རྗེ་ཆེར་ལྡན་པ། །
ཐམས་ཅད་ཀུན་མཁྱེན་རྒྱུད་རིག་པས། །འདུལ་བའི་ཐབས་ནི་སྣ་ཚོགས་ཀྱིས། །འགྲོ་བའི་དོན་རྣམས་མཛད་དུ་གསོལ། །གཏོར་མ་ལས་རྣམས་ཀུན་གྱི་མཆོག །ལས་ཀྱི་སྣ་ལ་བསྟན་པ་ནི། །ཤར་དུ་བསྟན་པ་བསྲུང་བ་ལ། །ལྷོར་ནི་སྲིད་པ་མཉམ་པ་ཡིན། །ནུབ་ཏུ་ཀླུ་གདུག་བཟློག་པའོ། །

བྱང་ནས་ལས་ལ་གཞུག་པའོ། །དེ་ནས་སོ་སོར་སྲུང་མཚམས་གཅད། །ཨེ་ཧྱེ་ཧིས་བོས་ལས་ལ་གཞུག །བྱིན་གྱིས་བརླབ་བྱས་མཆོད་བསྟོད་ཅིང་། །སྨོན་ལམ་གདབ་ཅིང་སླར་གཏིང་གཏོང་། །ལག་པའི་ཕྱག་རྒྱ་བཅས་ནས་ནི། །སྙིང་པོ་འཇུག་ལ་གདགས་པ་ནི། །བཛྲ་སཏྭ་ས་མ་ཡཾ་ཀརྨ། །གདགས་
ཤིང་དབྱངས་དང་སྦྱར་བའོ། །ཐུགས་བརྩེ་ཕན་པའི་དགོངས་པ་ཅན། །ཇི་ལྟར་ཕྲིན་ལས་བཅོལ་བ་བཞིན། །འཁོར་བ་ཡུན་རིང་དེ་སྲིད་དུ། །དོན་རྣམས་མཛད་ཅིང་བརྟན་པོར་ནི། །ལག་པའི་ཕྱག་རྒྱ་བཅས་ནས་ནི། །སྙིང་པོ་འཇུག་ལ་གདགས་པ་ནི། །ཛཿཧཱུཾ་བཾ་ཧོཿས་མ་ཡ་སྟྭཾ་ས་མ་ཡ་ཧོཿས་མ་ཡ་སྟྭཾ་ཏིཥྛ་བཛྲ་
ཨཱ་གཙྪ་ཛཿ། །ཨོཾ་ན་མཿསརྦ་ཏ་ཐཱ་ག་ཏ་པཱ་ད་བནྡ་ན་ཀ་རོ་མི། ཨོཾ་སརྦ་ཏ་ཐཱ་ག་ཏ་པཱུ་ཛ་པཱ་ཤ་ཨཱཏྨ་ནཱཾ་ནིརྱཱ་ཏ་ཡཱ་མི། ཨོཾ་སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏིཥྛ་སྭ་མཾ། ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀཱ་ཡ། ཨཱཏྨ་ནཱཾ་ནིརྱཱ་ཏ་ཡཱ་མི། ཨོཾ་ན་མཿསརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། ཨོཾ་ན་མཿསརྦ་ཏ་ཐཱ་ག་ཏ་པཱུ་ཛ་
པྲ་བརྟ་ན་ཡ་ཨཱཏྨ་ནཱཾ་ནིརྱཱ་ཏ་ཡཱ་མི། ཨོཾ་སརྦ་ཏ་ཐཱ་ག་ཏ་བཛྲ་དྷརྨ་པྲ་བརྟ་ཡ་མཱཾ། ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨ་ཎེ། ཨཱཏྨ་ནཱཾ་ནིརྱཱ་ཏ་ཡཱ་མི། ཨོཾ་སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཱཾ། དེ་ནས་མཆོད་པའི་རིམ་པ་ནི། །དང་པོ་སྦྱིན་སྲེག་ལས་བཞི་སྟེ། །དེ་ནས་ལྷག་པའི་མཆོད་སྐྱབས་གསོལ། །དེ་ནས་ཐུན་མོང་མཆོད་
རྣམ་ལྔ། །དེ་ནས་བསྟོད་པའི་མཆོད་པའོ། །དེ་ནས་མཆོད་སྤྲིན་བྱ་བ་བཤད། །དེ་ཀུན་ངག་ཡིད་གདུངས་དབྱངས་མཆོད། །མཆོད་པའི་དང་པོ་འདི་ཡིན་ནོ། །དེ་འོག་རྫས་ཀྱི་མཆོད་པ་ལ། །སྦྱིན་སྲེག་མཆོད་སྦྱིན་རྣམས་ཀྱི་མཆོག །སྡེབ་སྦྱོར་མཆོག་ནི་ཉི་མའི་ལྷ། །མི་ཡི་མཆོག་ནི་རྒྱལ་པོ་སྟེ། །རྒྱ་
མཚོ་ཆུ་བོ་རྣམས་ཀྱི་མཆོག །ཟླ་བ་རྒྱུ་སྐར་རྣམས་ཀྱི་གཙོ། །ཉི་མ་སྣང་བྱེད་རྣམས་ཀྱི་གཙོ། །བསྒྲུབ་པའི་མཆོག་ནི་གསང་སྔགས་ཏེ། །ལས་ཀྱི་མཆོག་ནི་རྣམ་བཞིའོ། །གནས་ཀྱི་མཆོག་ནི་དཀྱིལ་འཁོར་བཞི། །སྟེང་དང་འོག་དང་ཐད་ཀར་ཡང་། །འགྲོ་བའི་འགྲོ་བ་ཇི་སྙེད་པ། །ལྷ་དང་བཅས་པའི་
འཇིག་རྟེན་ན། །སྨྲ་བའི་མཆོག་ནི་རྫོགས་སངས་རྒྱས། །བསྟན་པའི་མཆོག་ནི་རྫོགས་ཆེན་པོ། །རྡོ་རྗེ་རྒྱུད་དུ་བསྔགས་པ་ཡིན། །བཟླས་པའི་མདུན་དང་བར་སྐབས་དང་། །དེ་བཞིན་བཟླས་པའི་འོག་ཏུ་ཡང་། །སྔགས་པས་སྦྱིན་སྲེག་བྱ་བ་ནི། །ཐམས་ཅད་དུ་ཡང་བསྔགས་པ་ཡིན། །སྦྱིན་སྲེག་

བྱས་ནས་བཟླས་བྱ་བ། །དང་པོར་ཤིན་ཏུ་འདོད་པ་ཡིན། །བཟླས་དང་སྦྱིན་སྲེག་འབྲེལ་པ་ནི། །དེ་ནི་བར་དུ་འདོད་པ་ཡིན། །བཟླས་པའི་མཇུག་གི་སྦྱིན་སྲེག་གང་། །དེ་ནས་ཤིན་ཏུ་གཙོ་བར་བཤད། །དང་པོས་བུ་ལོན་རྟོག་པ་བསལ། །བར་དུ་ལྷ་རྣམས་ཚིམ་བྱའི་ཕྱིར། །ཐ་མས་
ལྷག་ཆད་བསྐངས་པའི་དོན། །བཾ་གྱིས་ཚོགས་ཀྱི་དཀྱིལ་འཁོར་མཆོག །གསལ་བའི་གཟི་བརྗིད་འཚེར་བ་ལ། །དང་བྱམས་ཡིད་ཀྱིས་མཆོད་སྦྱིན་བྱ། །ལས་རྣམས་བརྩམ་པར་བྱས་ནས་ནི། །གཏུམ་ཆེན་རྔམ་པོའང་ལྷན་ནེར་འགྱུར། །ལྷ་རྣམས་དཀར་པོ་བྱམས་དང་ལྡན། །ཟླུམ་པོ་དཀྱིལ་
འཁོར་རྩིབས་བརྒྱད་པར། །ལྷ་རྣམས་འཁོར་བཅས་བརྒྱན་པར་བཞུགས། །ཧོ་མ་མཆོག་ཟླུམ་གདེངས་པ་ལ། །རྡོ་རྗེ་པདྨས་རབ་བརྒྱན་ཏེ། །ཕུར་པ་དཀར་པོ་དྲུག་བཏབ་པར། །ཡིད་ལ་ཤིན་ཏུ་གསལ་བྱས་ཏེ། །བྱིན་ཟ་དགེ་བ་རབ་སྦར་བསྟན། །ཡམ་ཤིང་དཀར་པོ་རྣམས་ཀྱི་མེ། །རབ་སྦར་རྡོ་རྗེ་
ཁྲོ་བོ་ཡི། །ངང་བྱམས་གཞག་སྟེ་སྙོམས་ཞུགས་ལ། །ཏིལ་བསྲེགས་བཞིན་དུ་སྡིག་བསྲེགས་ཤིང་། །ཆེ་གེ་སརྦ་པཱ་པཾ་ད་ཧ་ན་ཧཱུཾ་ཕཊ་ཛྭ་ལ་རཾ། །ཤར་ལྷོ་ཁ་ཁྱེར་དེ་ཉིད་ལ། །དམ་ཚིག་ཉིད་ཀྱི་རཾ་སྤྲོས་ཏེ། །ཞལ་གཅིག་ཕྱག་བཞི་ཟླ་དཀར་བཞིན། །ཞི་བའི་ལུས་དང་ལྟ་བའི་ཐབས། །སྐྱིན་
ཆེན་དཀར་པོའི་གདན་བཞུགས་བསམ། །ཡེ་ཤེས་ཨགྣེའི་ཐུགས་དམ་བསྐུལ། །ཨོཾ་ན་མོ་བཛྲ་པཱ་ཎ་ཡེ། ན་མོ་ཛྙཱ་ན་ཨགྣ་ཡེ་དེ་བ་ཛྭ་ལ་རཾ། ལན་གསུམ་བརྗོད་པས་ཞལ་ཕྱོགས་ཤིང་། །སྤྱན་གཟིགས་ཐུགས་དགོངས་དེ་ཉིད་ལ། །དམ་ཚིག་པ་ཡི་ལྕགས་ཀྱུ་བཅས། །གཉིས་མིན་དབྱིངས་
ལས་བསྐུལ་པ་ཡི། །ཡེ་ཤེས་དྲང་སྲོང་ཆེན་པོ་ཉིད། །སྔོན་གྱི་སྨོན་ལམ་ཐུགས་རྗེ་ཡིས། །བྱིན་གྱིས་བརླབ་ཕྱིར་གཤེགས་སུ་གསོལ། །ཛཿཧཱུཾ་བཾ་ཧོཿཨེ་ཧྱི་ཧེ། ཨོཾ་བཛྲ་ཧ་རི་བི་ག །པ་ཏ་ཙི་བ་ལོ་ཀེ་ཏི། ཡ་ཤ་དེ་ཧི་དེ་བ་བཏ་ཡེ་སྭཱ་ཧཱ། ན་མོ་བཛྲ་པཱ་ཎ་སྱེ། ཨོཾ་ཛྙཱ་ན་ཨགྣ་ཡེ། ཀི་ལི་ཀི་ལི།
དནྟེ་ལ་པོ་ཏྲ། ཨི་ཧ་ཨི་ཧ་ཨཱ་གཙྪ་ཧཱུཾ་ཏ་ཤ་ནཱ་ཡ་སྭཱ་ཧཱ། ཡེ་ཤེས་མེ་ལྷ་བྱོན་ནས་ནི། །དམ་ཚིག་བསྐྱེད་དང་གཅིག་གྱུར་ནས། །མདུན་དུ་བཞུགས་པ་དེ་ཉིད་ལ། །གཉིས་མེད་དྲང་སྲོང་ཨགྣེ་ལ། །བདུག་སྤོས་ཆུར་བྱས་བསང་བ་ནི། །སྟོང་གསུམ་ཀུན་དུ་དྲི་མཆོག་འབྱུང་འགྱུར་བའི། །སྤོས་

ལྔ་སྨན་སྦྱར་ཆུ་གཙང་རྒྱལ་བའི་ཁྲུས། །ཡེ་ཤེས་སྤྲིན་ཕུང་མཁའ་ལས་ཆེར་འབེབས་པས། །མི་གཙང་དྲི་མའི་ཚོགས་ཀུན་དག་གྱུར་ཅིག །སྭ་བྷཱ་བ་སརྦ་དྷརྨཱཿཤུདྡྷོ྅ཧཾ། དག་པ་ཉིད་དུ་བྱས་ནས་ཀྱང་། །མཆོད་པ་ལྔ་ཡིས་མཆོད་དེ་གཞག །གཉིས་མིན་དྲང་སྲོང་ཨགྣེ་ལ། །བདུག་སྤོས་མེ་
ཏོག་མེ་དྲི་བཤོས། །ཡོན་བདག་དོན་དུ་འབུལ་ལགས་ན། །ཐུགས་རྗེས་དགོངས་ནས་བཞེས་སུ་གསོལ། །ཨོཾ་ན་མོ་ཛྙཱ་ན་ས་མ་ཡ་སཏྭ་ཨགྣ་ཡེ་དྷཱུ་པེ་པུཥྤེ་ཨཱ་ལོ་ཀེ་གནྡྷེ། ཨཱ་ཧ་ར་སརྦ་དྷརྨཱཿཔཱུ་ཛ་པཉྩ་སྭཱ་ཧཱ། དེ་ནས་མཆོད་བསྟོད་ཤིང་རྟ་ལ། །བཞུགས་པ་ཉིད་དུ་བྱ་བའམ། །ཁ་ཁྱེར་
བཞག་ལ་ལས་མཆོད་བསྟོད། །དེ་ནས་མེ་ཡི་དངོས་ཉིད་པའི། །རང་བཞིན་རྣམ་རྒྱལ་ཁྲོ་བོ་ཕྱོགས། །དེ་ལ་སོགས་པ་གོང་ཉིད་དུ། །སྤྱན་དྲངས་མདུན་དུ་གསོལ་བསྒོམས་ལ། །ཏིང་འཛིན་གསལ་བས་དེ་ཉིད་སྦྱང་། །རྣམ་པར་རྒྱལ་བ་བོས་ནས་ནི། །གཟུགས་བརྙན་ཤར་གཡས་སམ་
དཔྲལ་བའི། །རྣམ་རྒྱལ་དེ་ཡི་ལུས་གཉིས་གཅིག །དེ་ཉིད་ན་ནི་བཞུགས་པར་བསམ། །དད་པ་དང་ནི་དམ་ཚིག་གིས། །ཚུར་གཤེགས་ཁམས་གསུམ་རྣམ་རྒྱལ་གཙོ། །འབར་བའི་ནང་དུ་བཞུགས་ནས་ནི། །སྲེག་བླུགས་ཞལ་ཟས་བ་གེས་མེ་སྦྱངས། །ཛཿཧཱུཾ་བཾ་ཧོཿཨེ་ཧྱེ་ཧི། ཨོཾ་ཏྲེེ་
ལོཀྱ་བི་ཛ་ཡ་ས་མ་ཏི་མུ་དྲ་ཧཱུཾ་ཕཊ། ཨཱ་གཙྪ། དེ་ལྟར་སྤྱན་དྲངས་དེ་ཉིད་ཀྱིས། །གདན་མཆོག་དམ་པ་བསྟབ་པ་ནི། །མེ་ཏོག་ལག་ཏུ་ཐོགས་ནས་ནི། །མྱ་ངན་མི་འདའ་ཐུགས་རྗེའི་ངང་། །ཉོན་མོངས་མི་སྤོང་གོས་པ་མེད། །མ་ཆགས་རང་བཞིན་དག་པས་ན། །པདྨའི་གདན་ལ་བཞུགས་
སུ་གསོལ། །པདྨ་ཀ་མ་ལ་ཡེ་སྟྭཾ། དེ་ལྟར་གདན་ལ་བཞུགས་པ་ཡང་། །ཡང་དག་ཉིད་དུ་དག་མོད་ཀྱི། །དྲི་མའི་མཚན་མ་མེད་མོད་ཀྱང་། །འཇིག་རྟེན་སྲིད་ཞུའི་ཚུལ་གྱིས་སུ། །ཕྱག་དང་ཞལ་ནི་བསིལ་མཛོད་ཅིག །ཨཱ་ཧ་ར་བི་ཤུདྡྷེ་སྭ་བྷཱ་བ། དེ་ནས་མཆོད་པ་འབུལ་བ་ནི། །ཁྲོ་བོ་ཁམས་གསུམ་རྣམ་རྒྱལ་
གྱིས། །ཆེ་གེ་མོ་ཡི་སྡིག་བཤགས་ནས། །དཀྱིལ་འཁོར་ཆེན་པོའི་དབང་བསྐུར་ཏེ། །ཡང་དག་ཉིད་དུ་སྒྲུབ་པ་ལ། །བར་ཆད་བྱེད་པའི་ལོག་རྟོག་ནི། །གནོད་སྦྱིན་སྐར་མ་གདོང་ལ་སོགས། །ཆད་པས་བཅད་ཅིང་བཀའ་ཕབ་སྟེ། །བཀའ་འམ་སྔགས་ཀྱི་ཚིག་ཙམ་གྱིས། །ཞི་བ་

ལ་སོགས་རྣམ་བཞི་ནི། །བྲན་བཞིན་དུ་ནི་བྱེད་པར་འགྱུར། །དེ་ཕྱིར་དང་པོ་ཁྲོ་བོ་མཆོད། །དེ་ཕྱིར་རྣམ་པར་རྒྱལ་སོགས་ལ། །མར་ཁུ་ཤག་ཏེའུ་ཤུ་ཙེའུ་འདི། །ཡོན་བདག་དོན་དུ་འབུལ་ལགས་ན། །ཐུགས་རྗེས་དགོངས་ལ་བཞེས་དུ་གསོལ། །སྙིང་གའི་ཐད་ནས་དབུལ་
བར་བྱ། །ཨོཾ་ཏྲཻ་ལོཀྱ་བི་ཛ་ཡ་ཀྲོ་དྷ་ཡ་དཱི་བྱ་དཱི་བྱ་ན་པཱུ་ཛ་ཡེ་སྭཱ་ཧཱ། ལག་གཡས་མཐེབ་སྲིན་ཉི་མ་ཨ། །ཐབས་དང་ཤེས་རབ་ལྡན་པ་ཡིས། །བླངས་ཏེ་སྐུ་གསུང་ཐུགས་མཉེས་ཕྱིར། །མཆོད་པའི་གནས་དང་མཆོད་རྫས་དང་། །མཆོད་མཁན་ཉིད་ལས་བྱང་ཆུབ་སེམས། །དཀར་པོ་ཤེལ་དག་
བྱུང་བ་ཡིས། །གང་ལ་དམིགས་པ་དེར་བསྟིམས་པས། །ལས་དང་ཉོན་མོངས་བག་ཆགས་ཞི། །ཁྲོ་རྒྱལ་ཁམས་གསུམ་རྣམ་རྒྱལ་ལ། །མངར་གསུམ་འོ་ཐུག་ནས་ཀྱི་ཐུག །འབྲས་བུ་ལག་པན་འབྲས་ཡོས་དང་། །འབྲུ་སྣ་ལྔ་ལ་སོགས་པ་འབུལ། །བདུག་སྤོས་མེ་ཏོག་མེ་དྲི་བཤོས། །ཨོཾ་
ཏྲཻ་ལོཀྱ་བི་ཛ་ཡ་ཀྲོ་དྷ་ཡ་དྷཱུ་པེ་པུཥྤེ་ཨཱ་ལོ་ཀེ་གནྡྷེ་ཨཱ་ཧ་ར་སརྦ་དྷརྨཱཿཔཱུ་ཛ་པཉྩ་སྭཱ་ཧཱ། ཨ་དཱི་བྱ་དཱི་བྱ་ཏི་ཡེ་སྭཱ་ཧཱ། དེ་ནས་བསྟོད་པའི་མཆོད་པ་ནི། །རྡོ་རྗེ་དྲིལ་བུ་དབྱངས་ལྡན་ལ། །སྐུ་ཡི་འགྱིང་འགྱུར་དང་བཅས་པར། །ཞི་རྒྱས་གཉིས་ལས་རྡོར་དྲིལ་ནང་། །དབང་དྲག་རྡོར་དྲིལ་ཕྱིར་བསྐོར་གསིལ། །ཡེ་ཤེས་
བསྐལ་པའི་མེ་ལྟར་འབར་བའི་འོད། །མ་རིག་འདོད་པའི་བདུད་ཁམས་ཐམས་ཅད་སྲེག །སྤྲིན་གཉིས་འཐིབས་བཞིན་ཁྲོ་གཉེར་བརྗིད་པའི་ཞལ། །ཞེ་སྡང་གཤིན་རྗེའི་འཇིག་རྟེན་ཐམས་ཅད་འཇོམས། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོ་བགེགས་ཀྱི་
མཐའ་གནོན་པའི། །ཁྲོ་བོའི་རྒྱལ་པོ་དུག་གསུམ་འཇོམས་མཛད་པ། །ཁམས་གསུམ་སེམས་ཅན་ངན་འགྲོ་ལས་སྒྲོལ་བ། །མདོག་སྔོ་རྡོ་རྗེ་པདྨ་ཞགས་པ་བསྣམས། ཁམས་གསུམ་རྣམ་རྒྱལ་ཆེ་ལ་ཕྱག་འཚལ་བསྟོད། །ཁྲོ་བོ་ཁམས་གསུམ་རྣམ་རྒྱལ་སོགས། །མེ་ཉིད་སྦྱང་བའི་ལས་
མཛོད་བཞུགས། །ཏིཥྛ་བཛྲ། ཁྲོ་བོ་ཁམས་གསུམ་རྣམ་རྒྱལ་གྱིས། །བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པར་བྱ། །བཀུག་ནས་རྡོ་རྗེ་ཕུར་པས་གདབ། །དུམ་བུར་བྱས་ལ་ཚོགས་ལ་བསྟབས། །ཨོཾ་ཏྲཻ་ལོཀྱ་བི་ཛ་ཡ་ཀཱི་ལི་ཨ་མྲྀ་ཏ་པཉྩ་པཱུ་ཛ་སྭཱ་ཧཱ། བདེ་གཤེགས་

ཁྲོ་ཆེན་རྣམ་པར་རྒྱལ། །ཐུགས་རྗེ་ཆེ་དང་བདག་འབྲེལ་པས། །གཞལ་ཡས་ཉིད་དུ་བཞུགས་ནས་ཀྱང་། །མེ་ཉིད་སྦྱང་བའི་ལས་བཅོལ་བའོ། །དེ་ནས་ལག་གཡས་ཁ་ཕར་བསྟན། །གཡོན་པ་ཚུར་བསྟན་མཁྲིག་མ་བསྣོལ། །མཐེབ་གཉིས་མཐིལ་གཞག་སོར་བརྒྱད་བསྐྱོད། །ཨོཾ་ཀཱི་ལི་ཀཱི་
ལ་བཛྲ་བི་མ་ལ་རཽ་ཏྲི་པྲ་ཀྲྀ་ཏི། མ་ཧཱ་ཀྲོ་དྷ་བཛྲ་ཡ་ན་ཛ་ཧ་གྲྀཧྞ་ཏ་ཧཱུཾ་ཕཊ། སྦྱོང་བའི་ལས་ནི་ལྷ་ཚོགས་ཀྱིས། །མདུན་དུ་བྱ་བར་ཡང་དག་བཤད། །དེ་ནས་དཀོན་མཆོག་གསུམ་པོ་སྟེ། །སྦྱར་དང་སྤྱན་དྲང་གདན་དག་དང་། །མཆོད་པ་ལ་སོགས་རྣམ་རྒྱལ་བཞིན། །མགོན་པོ་ཐུགས་རྗེ་ཆེར་ལྡན་པ། །
ཐམས་ཅད་མཁྱེན་པའི་སྟོན་པ་པོ། །བསོད་ནམས་རྒྱ་མཚོ་ཡོན་ཏན་གཞི། །དེ་བཞིན་གཤེགས་ལ་ཕྱག་འཚལ་བསྟོད། །དག་པས་འདོད་ཆགས་བྲལ་བའི་རྒྱུ། །དགེ་བས་ངན་འགྲོ་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་བསྟོད། །གྲོལ་ནས་གྲོལ་
བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་གཞི། །དགེ་འདུན་ལ་ཡང་ཕྱག་འཚལ་བསྟོད། །བླ་མེད་དཀོན་མཆོག་གསུམ་པོ་ཡིས། །ཞི་བ་ལ་སོགས་གྲུབ་པར་གསོལ། །བདེ་བར་གཤེགས་སོ་དཀོན་མཆོག་གསུམ། །ཁྱོད་ཀྱིས་བྱམས་པའི་ལས་
ཀུན་མཛད། །དང་བའི་ཡིད་ཀྱིས་བསྐྱེད་པ་ཡི། །གཞལ་ཡས་ཉིད་དུ་གཤེགས་སུ་གསོལ། །ཨོཾ་བཛྲ་བེ་གཱ་ཀྲ་མ་ཡ་ཧི་ག་ཛ། མེ་ལྷ་གཉིས་ནི་སྤྱན་དྲང་བའི། །མདུན་དུ་ཀཱི་ལིས་མེ་ཉིད་སྦྱོང་། །དེ་ནས་གཡས་པའི་མཐེ་བོ་ཡིས། །མཐེའུ་ཆུང་མདུང་ཚུགས་གཡབས་ནས་ནི། །དད་པ་དང་ནི་
དམ་ཚིག་གིས། །ཚུར་གཤེགས་ཞེས་ནི་བོས་ནས་ནི། །ཛཿཧཱུཾ་བཾ་ཧོཿཨེ་ཧྱེ་ཧི། མ་ཧཱ་བྷཱུ་ཏ་དེ་བ་རི་ཥི། དྭི་ཛ་ས་ཏ་མ་ནི། ཧི་ཏྭ་ཨ་ཧུ་ཏི་མ་ཧཱ་རཾ། ཨསྨི་སནྣི་ཧི་ཏོ་བྷ་བ། ཨགྣ་ཡེ་ཨཱ་གཙྪ། ཧ་བྱ་ཀ་བྱ་བ་ཧ་ནཱ་ཡ་སྭཱ་ཧཱ། དེ་ནས་བཞུགས་པར་བྱ་བ་ནི། །ལྷ་ཡི་དྲང་སྲོང་ཀུན་དང་ནི། །སྲེག་སྦྱིན་
བཏབ་པར་ཁས་འཆེས་པ། །ཐུགས་རྗེ་དམ་ཚིག་བརྟན་པ་ནི། །པདྨའི་གདན་ལ་བཞུགས་སུ་གསོལ། །ཨགྣ་ཡེ་ས་མ་ཡ་སྟྭཾ་ཏིཥྛ། སྭ་བྷཱ་ཝ་བི་ག་ཏ་བི་ཛ་ལོ་ཧི་ཏ་ཨཱ་ཀཱ་ཤ་དཱི་པ་ཡ་ཤུདྡྷེ་སྭཱ་ཧཱ། ཕྱག་ཞལ་བསིལ་བ་བྱས་ནས་ནི། །གཉིས་མིན་དྲང་སྲོང་མེ་ལྷ་ལ། །ཤག་ཏེའུ་ལ་སོགས་

བདུན་གསུམ་དབུལ། །ཨོཾ་རཾ་རཾ་ཨགྣ་ཡེ་ཧ་བྱ་ཀ་བྱ་དཱི་བྱ་དཱི་བྱ་ན་ཡ་པཱུ་ཛ་སྭཱ་ཧཱ། དྷུ་པེ་པུཥྤེ་ཨཱ་ལོ་ཀེ་གྷནྡྷེ་པཱུ་ཛ་པཉྩ་སྭཱ་ཧཱ། དེ་ནས་རྡོ་རྗེ་དྲིལ་བུར་བཅས། །འགྱིང་འགྱུར་བཅས་ལ་བསྟོད་པ་ནི། །ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་
པོ་ཡོངས་ལ་བསྐྱབ་པའི་ཕྱིར། །ཐུགས་རྗེའི་དབང་གིས་སྐུ་སྤྲུལ་ལ། །རིག་པར་གྲུབ་པའི་དྲང་སྲོང་མཆོག །ཉོན་མོངས་སྲེག་པའི་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱིས་སྤྲུལ་པའི་ཐེག་པ་བཅིབས། །བགྲད་
ཕྲེང་འཛིན་ཅིང་རིག་སྔགས་གསུང་། །བདུད་རྩི་བཅུད་ལྡན་གྷུནྡེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཨགྣེ་ཆེན་པོའི་ཐུགས་
དམ་བཞིན། །མེ་ཉིད་ཡེ་ཤེས་མེར་བྱིན་རློབས། །ལས་ཀྱི་ལྷ་རྣམས་མཆོད་པ་ཡི། །སྲེག་རྫས་སྟོབས་པའི་ལས་མཛོད་བཞུགས། །ཤིང་རྟ་གཅིག་ལ་བཞུགས་གསོལ་ལ། །ཕྱོགས་མཚམས་ལྷ་ལ་བསྐོར་ཞིང་མཆོད། །ཨགྣ་ཡེ་གིང་ཀ་ར་པཱུ་ཛ་ཏིཥྛ། ལས་ཀྱི་ལྷ་རྣམས་
མཆོད་པ་ཡི། །མེ་སྦྱང་སྤྱན་དྲང་གདན་དབུལ་བསིལ། །ལས་བརྟན་ཕྱག་མཆོད་བསྟོད་དང་དགུ། །ནང་སྟོན་མཆོད་རྟེན་ཆོས་ཉིད་མཁའ། །ཆོས་དབྱིངས་ཡེ་ཤེས་རྣམ་དག་སྐུ། །བྱང་ཆུབ་མཆོག་གི་ཕྱག་རྒྱ་མཛད། །ཕྱག་འཚལ་རྣམ་པར་སྣང་མཛད་ལའོ། །སྲ་བརྟན་རྡོ་རྗེ་
གཟུགས་བརྙན་ས། །མེ་ལོང་ཡེ་ཤེས་ཐུགས་ཀྱི་སྐུ། །ས་གནོན་ཆེན་པོའི་ཕྱག་རྒྱ་མཛད། །ཕྱག་འཚལ་སེམས་དཔའ་མི་བསྐྱོད་ལའོ། །སྲེག་བྱེད་རིན་ཆེན་ཡིག་འབྲུ་མེ། །མཉམ་ཉིད་ཡེ་ཤེས་ཡོན་ཏན་སྐུ། །མཆོད་སྦྱིན་ཆེན་པོའི་ཕྱག་རྒྱ་མཛད། །ཕྱག་འཚལ་འབྱུང་
ལྡན་དཔལ་ཁྱོད་ལའོ། །དགྱེས་འཛིན་པདྨ་ཕྱག་འཚལ་ཆུ། །ཀུན་རྟོག་ཡེ་ཤེས་གསུང་གི་སྐུ། །ཆོས་སྒྲོགས་ཆེན་པོ་ཕྱག་རྒྱ་མཛད། །ཕྱག་འཚལ་སྣང་བ་མཐའ་ཡས་ལའོ། །ཤག་བསྐྱོད་རྒྱ་གྲམ་སྐུ་སྟེ་རླུང་། །ནན་ཏན་ཡེ་ཤེས་ཕྲིན་ལས་སྐུ། །སྐྱབས་མཛད་ཆེན་པོའི་

ཕྱག་རྒྱ་མཛད། །ཕྱག་འཚལ་དོན་ཡོད་གྲུབ་པ་ལའོ། །བཾ་གྱི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་འབྲེལ་བསྡམས་བསྐྱོད། །བཅིངས་འགྱུར་བསྐྱོད་པས་ཕྱོགས་བཅུར་གཡོ། །ཐམས་ཅད་གཡོ་བ་མེད་པར་འགྱུར། །ཤཱནྟིཾ་ཀུ་རུ་སྭཱ་ཧཱ། དངུལ་ལམ་དཀར་པོའི་ཤིང་རྣམས་ལ། །
མགོ་བོ་རྒྱ་མདུད་རྩེ་ཟླུམ་པོ། །ངོས་སུ་ལྷ་རྣམས་འཁོར་བཅས་བསྒོམ། །བཏབ་ན་གདུག་རྩུབ་ཞི་བར་འགྱུར། །ཀཱི་ལི་ཀཱི་ལི་ཤཱནྟིཾ་ཀུ་རུ་སྭཱ་ཧཱ། ལྷ་མོ་རྣམས་ཀྱི་དཀྱིལ་འཁོར་དུ། །ལྷ་ཡི་གྲུབ་པ་བསྒོམ་བྱ་སྟེ། །བྱམས་བཅས་ཞི་བའི་ཐོ་བ་ཡིས། །བརྡུངས་པས་གདུག་རྩུབ་
ཞི་བར་འགྱུར། །ཤམྦ་ཏ་ཤཱནྟིཾ་ཀུ་རུ་སྭཱ་ཧཱ། དངུལ་ཕྱེ་འབྲས་ཆན་དཀར་པོ་ལ། །འོ་མས་སྦྱར་བའི་གཏོར་མ་ཡིས། །ཐམས་ཅད་མ་ལུས་ཞི་བསྐོངས་ནས། །གཏོར་མས་གདུག་རྩུབ་ཞི་བར་འགྱུར། །སྥ་ར་ན་ཤཱནྟིཾ་ཀུ་རུ་སྭཱ་ཧཱ། ལས་རྣམས་བྱ་བའི་དོན་བསྟན་པའི། །བདག་ཉིད་བྱམས་
པ་ཆེན་པོ་ཅན། །དཀྱིལ་འཁོར་ཧོམ་ཁུང་མཆོད་རྫས་ཚོགས། །དཀར་པོ་ཉིད་དུ་བསྒོམ་པར་བྱ། །ལྷ་རྣམས་ཐམས་ཅད་དཀར་པོ་སྟེ། །སྐུ་ཡི་གཟི་འབར་ཡོན་ཏན་བརྗིད། །ཐམས་ཅད་ཀུན་ཀྱང་འཚེར་ཞིང་ཞི། །བྱམས་པར་བཅས་པའི་ལག་པ་ནས། །གཏོང་བ་ཐམས་ཅད་བྱང་ཆུབ་
སེམས། །རྒྱུན་མི་འཆད་པར་ཀུན་ཁྱབ་སྒོམ། །དྲང་བ་ཞི་འགྱུར་ཕུར་བུ་རྒྱས། །བརྡུངས་པས་དབང་མཛད་གཏོར་མ་དྲག །དེ་ནི་སྤྱི་ཡི་ལས་སུ་གསུངས། །ཕྱོགས་བཅུ་གདུག་པ་མ་ལུས་ཀུན། །གདུག་པའི་སེམས་ནི་རབ་བོར་ཏེ། །ལྷན་ནེ་དཀར་པོའི་འོག་ཏུ་འགྱུར། །བདེ་ལྡན་བྱང་
ཆུབ་འོད་འཕྲོ་འབར། །འཇིག་རྟེན་གསུམ་དང་འདས་གཏུམ་ལ། །འབྲུ་ལྔ་བྱམས་ལྡན་བྱས་ནས་ནི། །གསོལ་བ་གདབ་པར་བྱ་བ་ནི། །ལྷ་དང་ལྷ་མིན་གནོད་སྦྱིན་དྲི་ཟ་གྲུལ། །ལྟོ་འཕྱེ་དང་ནི་ནམ་མཁའ་ལྡིང་དང་འདབ། །ལུས་སྲུལ་སྲིན་པོ་གདོན་གྱི་རིགས་རྣམས་དང་། །སའམ་མཁའ་ལ་གནས་
པའི་རྫུ་འཕྲུལ་ཅན། །བུ་སྨད་གཡོག་འཁོར་ཚོགས་དང་བཅས་པ་རྣམས། །དེ་རྣམས་སྡུག་བསྔལ་ཞི་བར་བྱ་བའི་ཕྱིར། །དད་བྱམས་ཡིད་ཀྱིས་ལྷ་རྣམས་མཆོད་བྱས་ཏེ། །ལྷ་ཡིས་བྱིན་བརླབས་སྤྲུལ་པའི་འཕྲོ་འདུ་ཡིས། །ལས་དང་ཉོན་མོངས་སྡུག་བསྔལ་ཞི་གྱུར་ཅིག །ན་མཿས་མནྟ་བུདྡྷཱ་ནཱཾ།

ཨོཾ་ཨཱཿམ་ཧཱ་ཤཱནྟིཾ་ཀ་ར་ཤཱནྟིཾ་ཀ་ར་པྲ་ཤ་མ་དྷརྨ་ནིརྫ་ཏ། ཨ་བྷཱ་བ་དྷརྨ་སཏྭ། བྲ་བ་ཏ་ཤཱནྟིཾ། ཤི་བཾ་ཀུ་རུ་སྭཱ་ཧཱ། དེ་བ་ཤཱནྟིཾ་ཀུ་རུ་སྭཱ་ཧཱ། ནཱ་ག་ཤཱནྟིཾ་ཀུ་རུ་སྭཱ་ཧཱ། རཱཀྵ་ས་ཤཱནྟིཾ་ཀུ་རུ་སྭཱ་ཧཱ། ཡཀྵ་ཤཱནྟིཾ་ཀུ་རུ་སྭཱ་ཧཱ། གྲ་ཧ་ཤཱནྟིཾ་ཀུ་རུ་སྭཱ་ཧཱ། མི་ཙི་མི་ཙི་ཤཱནྟིཾ་ཀུ་རུ་སྭཱ་ཧཱ། གུང་ཨིང་ཤཱནྟིཾ་ཀུ་རུ་སྭཱ་ཧཱ།
ར་ཏང་ར་ཏང་པྲ་ཏང་པྲ་ཏང་ཤཱནྟིཾ་ཀུ་རུ་སྭཱ་ཧཱ། ཀ་རཱ་ལན་བི་ར་ལན་ཤཱནྟིཾ་ཀུ་རུ་སྭཱ་ཧཱ། བི་ཧ་ས་ནན་ཤཱནྟིཾ་ཀུ་རུ་སྭཱ་ཧཱ། ཨི་བ་ནན་ཤཱནྟིཾ་ཀུ་རུ་སྭཱ་ཧཱ། ན་མོ་ཤཱནྟིཾ་ཀུ་རུ་སྭཱ་ཧཱ། ཨ་ནྲྀ་སུ་དུ་པྲེ་ཏྲི་ཤཱནྟིཾ་ཀུ་རུ་སྭཱ་ཧཱ། གུང་ཀ་རི་ཀུང་ག་རི་ཤཱནྟིཾ་ཀུ་རུ་སྭཱ་ཧཱ། མི་ཙི་མི་ཙི་ར་ར་སྲཾ་སྲཾ། གཾ་གཾ་གུཾ་གུཾ། ཨཾ་ཨཾ་ཨིཾ་ཨིཾ་ཨ་ཨ་ར་ལན་
ཤཱནྟིཾ་ཀུ་རུ་སྭཱ་ཧཱ། ཤི་དུར་ན་མྱེ་ཏྲེ་ཤཱནྟིཾ་ཀུ་རུ་སྭཱ་ཧཱ། དེ་ནས་ལས་སྦྱར་རྣམ་རྒྱལ་ཐབས། །ཕྱག་མཚན་ནམ་མཁར་ཕྱར་ནས་ཀྱང་། །གཏི་མུག་རྡོ་རྗེ་འཁོར་བཅས་པས། །འཇིག་རྟེན་ཁམས་ནི་རབ་འབྱམས་ཀུན། །སྐད་ཅིག་ཡུད་ལ་ཞི་མཛད་དེ། །ཞི་བར་གྱུར་པས་དབྱིངས་སུ་རོལ། །བདེ་བར་གཤེགས་
སོ་བཅོམ་ལྡན་འདས། །དད་པའི་ཡིད་ཀྱིས་བསྐྱེད་པ་ཡི། །གཞལ་ཡས་ཉིད་དུ་རེ་ཞིག་གཤེགས། །སླར་ཡང་འགྲོ་བའི་དོན་ལ་དགོངས། །དེ་བཞིན་ལྷ་ཚོགས་མང་པོ་ཀུན། །གོ་རིམས་དེ་བཞིན་ལས་བྱའོ། །མེ་ཡི་ཚོགས་ཀྱི་དཀྱིལ་འཁོར་མཆོག །གསལ་བའི་གཟི་བརྗིད་འཚེར་བ་ལ། །
སྙིང་རྗེ་དགའ་བས་མཆོད་བྱས་ནས། །ལས་རྣམས་བརྩམ་པར་བྱས་ནས་ནི། །ཚེ་དང་ལོངས་སྤྱོད་དཔལ་འཕེལ་འགྱུར། །པུཥྚིཾ་ཀུ་རུ་སྭཱ་ཧཱ། ཡ་ཡི་ཚོགས་ཀྱི་དཀྱིལ་འཁོར་མཆོག །གསལ་བའི་གཟི་བརྗིད་འཚེ་བ་ལ། །དགའ་ཆགས་ཡིད་ཀྱིས་མཆོད་སྦྱིན་བྱ། །ལས་རྣམས་བརྩམ་པར་
བྱས་ནས་ནི། །ཐམས་ཅད་མ་ལུས་དབང་དུ་འགྱུར། །ཨེ་ཡི་ཚོགས་ཀྱི་དཀྱིལ་འཁོར་མཆོག །གསལ་བའི་གཟི་བརྗིད་འཚེར་བ་ལ། །བཏང་སྙོམས་ཁྲོས་པས་མཆོད་སྦྱིན་བྱ། །ལས་རྣམས་བརྩམ་པར་བྱས་ནས་ནི། །ཐམས་ཅད་མ་ལུས་བརླག་པར་འགྱུར། །གཞན་ཡང་རྒྱུད་
ལས་བྱུང་བའི་ལས། །སྡིག་པ་སྲེག་དང་ཚེ་འཕེལ་ཧོམ། །སྲུང་དང་རོ་སྲེག་སྒྲུབ་པ་ཀུན། །ཆ་ཤས་ཙམ་དུ་བསྟན་པ་ནི། །ཧཱུཾ་གི་ཚོགས་ཀྱི་དཀྱིལ་འཁོར་མཆོག །ཡེ་ཤེས་ཚོགས་ཀྱི་དཀྱིལ་འཁོར་མཆོག །ཧཾ་གི་ཚོགས་ཀྱི་དཀྱིལ་འཁོར་མཆོག །རཾ་གྱི་ཚོགས་ཀྱི་དཀྱིལ་འཁོར་

མཆོག །དཀྱིལ་འཁོར་ཧོམ་གྱི་ཚད་བསྟན་པ། །གསུང་གསུམ་དཀྱིལ་འཁོར་ཐ་མ་འབྲིང་། །རབ་ནི་བཅུ་གཉིས་དགུ་དང་བདུན། །ཁྲུ་གང་ཐམས་ཅད་སྒོ་གང་བྱ། །ཡན་ལག་ཐམས་ཅད་ཚད་བསྟན་པ། །དེ་ཁྲུ་གང་ནས་བརྩམས་ནས་ནི། །ཇི་སྲིད་དཔག་ཚད་ཐུག་གི་བར། །འདུལ་
བའི་དབང་གི་ཁྱད་པར་གྱིས། །ཡང་ན་ཚད་ལ་ངེས་པ་མེད། །ཧོམ་ཁུང་ཐ་མ་འབྲིང་དང་རབ། །ཁྲུ་གང་ཁྲུ་དོ་ཁྲུ་གསུམ་ནི། །འབྱོར་པའི་དབང་བྱ་པད་ཟླ་ཁམ། །གྲུ་གསུམ་དང་ནི་འཁོར་ལོ་རྩིབས། །བརྒྱད་པའི་སྟེང་དུ་ཟླ་བའི་འོད། །དཀར་པོ་དགོད་དེ་དབུས་རྡོ་རྗེ། །རྩེ་ལྔ་ཤར་རོ་རིན་ཆེན་ལྷོ། །
ནུབ་ཏུ་པདྨ་བྱང་རྒྱ་གྲམ། །དེ་སྟེང་ཁ་འཁོར་སོར་བཞི་རྡོ་རྗེ་ར། །སེམས་དཔའ་སེམས་དཔའ་པདྨ་དང་ཁོང་ཡོན། །འཇིག་རྟེན་པ་ནི་ཅི་རིགས་མཛེས་པར་བྱ། །ནུབ་ཕྱོགས་འདུག་སྟེ་ཞི་ལས་བྱ། །བྲམ་ཟེའི་ཁྱིམ་དུ་ཡང་དག་བཤད། །ལྷོ་ཕྱོགས་རྒྱས་པ་ནུབ་ཏུ་དབང་། །བྱང་དུ་དྲག་པོ་
ཧོམ་དུ་བཤད། །དཀྱིལ་འཁོར་དྲུག་གམ་ཡང་ན་ནི། །གྲོང་ཁྱེར་ཕྱི་རོལ་རྗེའུ་རིགས་དང་། །རྒྱལ་རིགས་སྨད་འཚོང་དམངས་མའི་ཁྱིམ། །སྔགས་པ་ནུབ་དང་ལྷོ་ཤར་བྱང་། །འདུག་ལ་མཆོད་པའི་དོན་དག་ནི། །གང་གི་གཙོ་དང་ཐབས་དང་ནི། །ཤེས་རབ་ཚུལ་དུ་ལྡན་པའི་
དོན། །ཧོམ་ཁུང་དག་གི་བྱེ་བྲག་ཀྱང་། །དེ་ཅི་རིགས་པར་བྱ་བ་བཤད། །དེ་ལ་སོགས་པ་གཙོ་ཡུམ་ནི། །ཁུང་གི་མཐིལ་དུ་ལྷག་པར་དགོད། །མེ་འོད་ངོས་ལ་རྡོ་རྗེ་ཁ། །འཁོར་རྣམས་ཕྱི་རོལ་ཡང་དག་དགོད། །རོ་སྲེག་མཎྜལ་ཁྲུ་བཅུ་གཉིས། །ཁྲུ་བཞི་པ་ན་ཁྲུ་དོ་ཟབས། །བརྐོ་
བའི་དབུས་སུ་འཁོར་ལོ་ནི། །རྩིབས་བརྒྱད་པ་ལའང་བྱང་ཆུབ་ཀྱི། །མཆོད་རྟེན་ཀུན་རིག་ཕྱག་རྒྱ་སོགས། །རིགས་བཞི་དང་ནི་ཡུམ་བཞིའོ། །དེ་མཐའ་རྡོ་རྗེ་རྩེ་ལྔས་བསྐོར། །ཁ་ལ་མེ་འོང་བྲི་བར་བྱ། །དེ་མཐའ་པདྨ་པདྨ་ལ། །སེམས་དཔའ་བསྐལ་བཟང་ལ་སོགས་རྣམས། །བྲི་
བྱ་གྲོ་ལ་ལྷ་མོ་བྲི། །འཇིག་རྟེན་པ་ཡི་ལྷ་རྣམས་ཀྱང་། །ཕྱི་རིམ་ཕྱོགས་ཕྱོགས་དག་ཏུ་བྲི། །གཞུང་དང་འགལ་བྱས་ཉེས་སྡིག་བཤད། །སྡིག་པ་ཆེན་པོ་སྐུར་བཏབ་ཡིན། །སྟོན་པའི་བསྟན་དང་དགེ་བའི་ལས། །ཕ་མ་མཁན་པོ་སློབ་དཔོན་དང་། །མཆེད་དང་ལྕམ་དྲལ་

རྣམ་ལྔ་ཡིན། །དགེ་བ་མི་དགེ་མི་དགེ་དགེ། །རྒྱལ་བའི་ཆོས་ལ་སྐུར་བཏབ་ཡིན། །སྡིག་ཅན་དེ་ནི་མི་ཐར་ཞེས། །རྣམ་པར་འབྱེད་པའི་ཐུབ་པས་གསུངས། །དཀྱིལ་འཁོར་འཇུག་འབྱུང་བྱེད་པའི་ཕྱིར། །རི་མོའམ་ཡང་ནི་དེ་བཞིན་གཞན། །ཅི་བགྱི་ཚད་མེད་བཞི་བསྒོམས་ཏེ། །ཤ་
དང་ཆང་དང་སྒོག་བཙོང་དང་། །རྐུ་དང་བུད་མེད་སྤྱད་བྱས་ན། །དེ་ནི་ཡན་ལག་སྐུར་བཏབ་ཡིན། །དེ་ལས་བཤགས་པ་བྱར་ཡོད་ཐབས། །ཇི་བཞིན་དམ་ལ་གནས་བྱས་སམ། །ཐེག་ཆེན་སྡེ་ལ་མཆོད་བྱེད་ན། །སྡིག་ཅན་དེ་ནི་མྱུར་དུ་གྲོལ། །ཕ་མ་གསད་དང་འཕྲོག་བཅོམ་དང་། །ཆོས་ཀྱི་
མཁན་པོ་གསད་པ་དང་། །དམ་ཚིག་ལུང་དང་ཤེས་རབ་རྒྱུད། །མན་ངག་དབང་གི་སློབ་དཔོན་གསུམ། །སྙིང་ནས་སྨད་ཅིང་གསད་པ་དང་། །ཐེག་ཆེན་སྡེ་ལ་གནས་པ་ཡི། །མཆེད་དང་ལྕམ་དྲལ་དབྱེན་བྱས་ཤིང་། །དམ་ལས་ལོག་ཅིང་འཁུས་པ་ནི། །དེ་ནི་མཚམས་མེད་ལྔ་ཞེས་བྱ། །དེ་ཀུན་
དཀྱིལ་འཁོར་འདི་འདྲ་བར། །ལས་བཞི་སྡིག་བསྲེག་བྱས་བཅུག་ན། །སྡིག་ཅན་དེ་ཡང་མྱུར་དུ་འགྲོལ། །སྔགས་དང་ཕྱག་རྒྱ་ཡིག་འབྲུ་རྣམས། །ལྷག་དང་ཆད་པར་བྱས་པ་ནི། །དེ་དང་ཉེ་བའི་སྡིག་པ་ཡིན། །ཅི་ཕྱིར་དབྱིངས་དང་རྣམ་ཐར་གྱི། །སྒོ་རྣམས་གཞན་དུ་གྱུར་པས་ན། །བསྐལ་པར་
བརྗོད་ཀྱང་དངོས་གྲུབ་ནི། །ཐོབ་པར་མི་འགྱུར་དཔའ་བོས་གསུངས། །ཤེས་བྱའི་སྡིག་པ་ཐམས་ཅད་ནི། །མི་ཤེས་སྡིག་ལས་བཅུར་འགྱུར་ཆེ། །ཤེས་བྱའི་སྡིག་བཤགས་ཐམས་ཅད་ལ། །འབུམ་ལྔ་དག་གིས་འབྱང་ངོ་ཞེས། །ཚ་ཚ་བསྐོར་བ་ཕྱག་དང་ནི། །སྲོག་འདོན་མདོ་སྡེ་ལྔ་དག་ལས། །འབུམ་
འབུམ་དག་ཏུ་གསུངས་པ་ཡིན། །དེ་ནས་སྡོམ་པ་གནས་པ་ཡིན། །མཚམས་མེད་ལྔ་ལ་སོགས་པ་ཡི། །སྡིག་ཅན་དེ་དག་རྣམས་དང་ནི། །སྐད་ཅིག་ཡུད་ཙམ་སྨྲ་མི་བྱ། །ཤེས་ནས་དམ་ཚིག་གང་ཉམས་པའི། །དེ་ཡི་སྡིག་པ་བརྗོད་མི་ལང་། །གསོ་ལ་ཉེ་བར་མི་བརྩོན་ན། །དེ་དག་དང་ཡང་སྨྲ་
མི་བྱ། །སྐད་ཅིག་ཡུད་ཙམ་སྨྲས་པས་ཀྱང་། །དོན་གྱི་དངོས་པོ་གང་ཡིན་སྤངས། །དམག་ལ་སོགས་དོན་གཅིག་པ་བཞིན། །དེ་ཡི་བཤགས་པ་རྒྱུད་ལྔས་སོ། །བུས་འགྲོས་ཐལ་འབུད་ཚེར་ལྕག་དང་། །འགྲེང་ཕྱག་སྲོག་སྡོམ་དག་གིས་སོ། །ལྷག་དང་ཆད་པའི་ཁ་བསྐོང་ནི། །དཀྱིལ་འཁོར་བདག་པོ་

མཉེས་པ་དང་། །ཚེ་རབས་སློབ་དཔོན་ཕ་མ་དང་། །སློབ་མའི་སྡིག་ཞི་དབང་བསྐུར་དང་། །མཐའ་ཡས་སེམས་ཅན་དོན་བྱས་པས། །དེ་ཡི་སྡིག་པ་ངེས་འབྱང་ངོ་། །ཧོ་མ་བཞི་ཡི་གཙོ་བོ་གང་། །སྲེག་རྫས་བདུན་གསུམ་ཉི་ཤུ་གཅིག །མཉེས་པར་བྱ་ཕྱིར་དབུལ་བར་བྱ། །དེ་ནས་ཚེ་རབས་སློབ་དཔོན་དོན། །
དཀོན་མཆོག་གསུམ་ལ་བདུན་གསུམ་གསུམ། །དབུལ་བ་ཉིད་དུ་བྱ་བར་བཤད། །ཚེ་རབས་ཕ་མའི་དོན་གྱི་ཕྱིར། །རིགས་ཀྱི་གཙོ་བོ་རྣམས་ལའོ། །དེ་ནས་སློབ་མ་རིམ་གྱིས་ནི། །བགེགས་བསལ་ཕྱིར་ནི་སྤོས་ཆུས་བཀྲུ། །དེ་ནས་གཡོན་ཕྱོགས་ཙོག་པུར་གཞག །ལག་གཡས་སློབ་དཔོན་
ལག་གཡོན་གྱི། །བྱམས་པར་བྱས་པས་བཟུང་ནས་ནི། །གཙོ་བོ་དག་གི་སྔགས་བདུན་བཟླས། །དེ་ནས་སྡིག་པ་ཟད་བྱའི་ཕྱིར། །རིགས་ཡུམ་ལྔ་ལ་བདུན་བདུན་ནོ། །དེ་ཡིས་དབང་བསྐུར་བསྲུང་བར་འགྱུར། །མཐའ་ཡས་སེམས་ཅན་དོན་སླད་དུ། །ལྷ་རྣམས་ཀུན་ལ་དབུལ་བར་བྱ། །དེ་དག་བཀྲ་
ཤིས་བྱ་བའི་ཕྱིར། །ཡུམ་བཞི་གཟུངས་ཀྱིས་བྱ་བ་ནི། །སངས་རྒྱས་སྤྱན་ནི་ཚིམ་བྱེད་མ། །དབང་པོ་ཞི་བ་ཟླ་བ་འདྲ། །བསྟོད་ཚིག་གིས་བསྐུལ་སྔགས་བརྗོད་བྱ། །དེ་ནས་བཤགས་པ་གུས་པར་བྱ། །དེ་ནས་སྔགས་པས་ཁ་ཕྱོགས་ནས། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ།
དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱན་སརྦ་ཏ་ཐཱ་ག་ཏ། བཛྲ་མཱ་མེ་མུཉྩ་བཛྲཱི་བྷ་བ། མ་ཧཱ་ས་མ་ཡ་སཏྭ་ཨཱཿ རིགས་ལྡན་དབྱེ་ཞིང་བརྗོད་ནས་ནི། །སྐར་མ་རབ་རིབ་མར་མེ་དང་།
སྒྱུ་མ་ཟིལ་པ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུར། །འདུས་བྱས་ཆོས་ཀྱང་དེ་ལྟར་བལྟ། །དེ་ལྟར་བསྡུ་བ་བྱས་ནས་གཞག །དེ་ནས་དཀྱིལ་འཁོར་ཆེན་པོ་ལ། །བལྟས་ཏེ་ལྷག་པའི་མཆོད་པ་དབུལ། །ཨེ་མ་བདག་ཉིད་སློབ་བཅས་པའི། །དྲི་ཞིམ་ངོ་བོ་ཐམས་ཅད་ཀུན། །སྔོན་འདས་
དབྱིངས་ཀྱི་དྷཱུ་པར་ནི། །བྱིན་རླབས་མཆོད་འབུལ་བཞེས་སུ་གསོལ། །དེ་བི་པུཥྤེ་པཱུ་ཛ་ཧོ། །ཨེ་མ་བདག་ཉིད་སློབ་བཅས་པའི། །གསལ་དྲོ་ངོ་བོ་ཐམས་ཅད་ཀུན། །བྱོན་མ་རག་སྟོན་ཨཱ་ལོ་ཀེར། །བྱིན་རློབས་མཆོད་འབུལ་བཞེས་སུ་གསོལ། །དེ་བི་ཨཱ་ལོ་ཀེ་པཱུ་ཛ་ཧོ། །ཨེ་མ་བདག་ཉིད་སློབ་བཅས་པའི། །རླན་

བཅས་དྲི་ཞིམ་ཐམས་ཅད་ཀུན། །མ་བྱོན་ཀུན་གྱི་གནས་དེར་ནི། །བྱིན་རློབས་མཆོད་འབུལ་བཞེས་སུ་གསོལ། །དེ་བི་གནྡྷི་པཱུ་ཛ་ཧོ། །དེ་ལྟར་མཆོད་ནས་སྐྱབས་གསོལ་བ། །དཀྱིལ་འཁོར་སངས་རྒྱས་རྟེན་ཉིད་དེ། །རྣམ་དག་སྐུ་ལས་ཏིང་འཛིན་དག་པའི་སྐུ། །སྤྲུལ་སྐུ་ཕྱག་རྒྱ་མཚོན་པའི་ལྷ་ཚོགས་ཀྱི། །
གྲགས་པས་འཇིག་རྟེན་གསུམ་བཀང་ལྷམ་མེ་བ། །མགོན་པོ་མཆོག་ཉིད་ལ་ནི་སྐྱབས་སུ་མཆི། །སྨྲ་བསམ་བརྗོད་མེད་གསུང་གི་སྤྲུལ་པའི་ཚོགས། །མཚན་ཉིད་སོ་སོ་ཡེ་ཤེས་ཀུན་སྟོན་པ། །དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ། །དམ་ཆོས་མདོ་སྡེ་བཞི་ལ་སྐྱབས་སུ་མཆི། །རབ་ཏུ་
ལམ་སྟོར་འཁོར་བར་མིག་ཟུམ་པའི། །འགྲོ་བ་སྐྱབས་མེད་ཀུན་གྱི་ཕ་མ་མཛད། །ཕྲིན་ལས་བཞི་ཡིས་རྩེ་གཅིག་དོན་མཛད་གཙོ། །ཐེག་ཆེན་དགེ་འདུན་ཚོགས་ལ་སྐྱབས་སུ་མཆི། །དེ་ནས་དཀྱིལ་འཁོར་ལྷ་ཚོགས་ལ། །གུས་དང་བཅས་པས་ཕྱག་བྱས་མཆོད། །གཙང་ཞིང་གཙང་མར་བཤམ་
པའི་རྫས། །ཁྲུས་བྱས་གདུགས་ཏོག་མེ་དྲི་བཤོས། །དཀྱིལ་འཁོར་ལྷ་ཚོགས་རྣམས་ལ་འབུལ། །ཐུགས་རྗེས་དགོངས་ནས་བཞེས་སུ་གསོལ། །ན་མཿས་མནྟ་བུདྡྷཱ་ནཱཾ། ག་གན་ས་མ་ཡེ་སྭཱ་ཧཱ། ཨོཾ་བི་ཤྭ་བི་ཤུདྡྷེ་སྭཱ་ཧཱ། ན་མཿས་མནྟ་བུདྡྷཱ་ནཱཾ། དྷརྨ་ཏྭཱ་ནུ་ག་ཏེ་སྭཱ་ཧཱ། ན་མཿས་མནྟ་བུདྡྷཱ་ནཱཾ། མ་ཧཱ་མཻ་ཏྲེ་བྱུཏྐ་ཊེ་སྭཱ་ཧཱ། ན་མཿས་
མནྟ་བུདྡྷཱ་ནཱཾ། ད་རྩེ་སྥ་ར་ཎ་ཨ་ག་ས་ག་ནཻ་དྷ་རཱ་ཡ་སྭཱ་ཧཱ། ན་མཿས་མནྟ་བུདྡྷཱ་ནཱཾ། བི་ཤུདྡྷེ་གནྡྷོདྦྷ་བ་ཡ་སྭཱ་ཧཱ། ན་མཿས་མནྟ་བུདྡྷཱ་ནཱཾ། ཨ་ར་ར་སྭ་ར་ར་ཀ་ར་ར་བ་ལིཾ་ཏེ་མ་ནི་སྭཱ་ཧཱ། སྣང་སྟོང་མཆོད་རྟེན་ཆོས་ཉིད་མཁའ། །ཆོས་དབྱིངས་ཡེ་ཤེས་རྣམ་དག་སྐུ། །བྱང་ཆུབ་མཆོག་གི་ཕྱག་རྒྱ་མཛད། །ཕྱག་འཚལ་རྣམ་
པར་སྣང་མཛད་ལའོ། །དེ་ལྟའི་ཡོན་ཏན་བཅས་པ་ལ། །རྡོ་རྗེ་སེམས་དཔའ་བྱམས་པའི་མཆོད། །སྤོས་ཀྱི་སྤྲིན་ལྡིང་བདུག་པ་འཕྲོ། །གཙུག་ཏོར་རྒྱལ་བ་གདུགས་ཀྱིས་ཁེབས། །བྱམས་པའི་ཐབས་དང་ཤེས་རབ་ཀྱིས། །བཛྲ་དྷཱུ་པེ་མཆོད་པས་རོལ། །རིན་ཆེན་འབྱུང་ལྡན་སྙིང་རྗེའི་མཆོད། །ཨུཏྤལ་
མཐིང་ག་མེ་ཏོག་ཐོད། །རིན་ཆེན་ཟླ་གམ་འོད་དུ་སྦྱོར། །སྙིང་རྗེ་ཐབས་དང་ཤེས་རབ་ཀྱིས། །རཏྣ་པུཥྤེ་མཆོད་པས་རོལ། །སྣང་བ་མཐའ་ཡས་དག་པའི་མཆོད། །དཔལ་གྱི་སྒྲོན་མ་ཕྱག་ན་བསྣམས། །ཆོས་ཀྱི་རྒྱལ་མཚན་རབ་འབར་འཛུགས། །དགའ་བ་ཐབས་དང་ཤེས་རབ་ཀྱིས། །པདྨ་

ཨཱ་ལོ་མཆོད་པས་རོལ། །དོན་ཡོད་གྲུབ་པས་བཏང་སྙོམས་མཆོད། །ཙནྡན་བདུད་རྩི་ཆར་འབེབས་མ། །དཀྱིལ་འཁོར་གཙང་མའི་ཐིག་ལེར་འབེབས། །སྤོས་སྤར་ཐབས་དང་ཤེས་རབ་ཀྱིས། །ཀརྨ་གནྡྷེ་མཆོད་པས་རོལ། །དེ་ལྟར་རིགས་ལ་ཉེ་བའི་གཟུགས། །མཆོད་པ་ཕུལ་བའི་ལན་དག་ཏུ། །
རྣམ་པར་སྣང་མཛད་ཆེན་པོ་ཡིས། །རྡོ་རྗེ་སེམས་དཔའ་རྟོགས་པའི་ཡུལ། །དུང་མདོག་སྒེག་མོ་རྡོ་རྗེ་འཛིན། །སེམས་དཔའ་དཀར་པོའི་ཡེ་ཤེས་འབེབས། །མེ་ལོང་ལྟ་བུའི་ཡེ་ཤེས་ལ། །བཛྲ་ལཱ་སྱ་མཆོད་པས་རོལ། །རིན་ཆེན་འབྱུང་ལྡན་མཉམ་པའི་ཡུལ། །ཡིད་བཞིན་རིན་ཆེན་གཙུག་འབར་མ། །འཇམ་
དཔལ་རྣོན་པོའི་དངོས་གྲུབ་འཛིན། །མཉམ་པ་ཉིད་ཀྱི་ཡེ་ཤེས་ལ། །རཏྣ་མཱ་ལེ་མཆོད་པས་རོལ། །སྣང་བ་མཐའ་ཡས་མཁྱེན་པའི་ཡུལ། །པདྨ་དབྱངས་མཁན་རྨ་བྱའི་མགྲིན། །སྤྱིན་རས་གཟིགས་ཀྱི་ཤེས་རབ་བསྐྱེད། །སོ་སོར་རྟོག་པའི་ཡེ་ཤེས་ལ། །པདྨ་གཱི་ཏི་མཆོད་པས་རོལ། །དོན་ཡོད་གྲུབ་པ་ལས་ཀྱི་
ཡུལ། །གར་མཁན་འགྱིང་མ་གཟི་དང་ལྡན། །ལས་ཀྱི་འཁོར་ལོ་རྣམ་པར་བསྒྱུར། །བྱ་བ་ནན་ཏན་ཡེ་ཤེས་ལ། །ཀརྨ་ནིརྟི་མཆོད་པས་རོལ། །དེ་ལྟར་གཟུངས་ཀྱིས་མཆོད་བྱས་ནས། །རིགས་བཞི་ཚད་མེད་བསྡུ་བ་བཞིས། །མཆོད་ཕྱིར་དཔལ་གྱིས་གསུངས་པའོ། །སྦྱིན་པ་ཕུན་སུམ་ཚོགས་པའི་རྟགས། །བྱམས་པ་ཆེན་པོའི་ངོ་བོ་
ཉིད། །དཔའ་བར་འགྲོ་བ་རྣམ་དག་ལ། །བཛྲ་ཨཾ་གུ་ཤ་ཡི་མཆོད་པས་རོལ། །དོན་མཐུན་ཕུན་སུམ་ཚོགས་པའི་རྟགས། །སྙིང་རྗེ་ཆེན་པོའི་ངོ་བོ་ཉིད། །རིན་ཆེན་ཕྱག་རྒྱ་ཤེས་པ་ལ། །རཏྣ་པཱ་ཤའི་མཆོད་པས་རོལ། །དོན་སྤྱོད་ཕུན་སུམ་ཚོགས་པའི་རྟགས། །དགའ་བ་ཆེན་པོའི་ངོ་བོ་ཉིད། །ཤེས་རབ་སྒྲོན་མ་མཛད་པ་ལ། །པདྨ་སྥོ་
ཊའི་མཆོད་པས་རོལ། །སྙན་པ་ཕུན་སུམ་ཚོགས་པའི་རྟགས། །བཏང་སྙོམས་ཆེན་པོའི་ངོ་བོ་ཉིད། །མཆོད་རྟེན་ཆེན་མོ་ཀུན་རིག་ལ། །ཀརྨ་གནྡྷེའི་མཆོད་པས་རོལ། །དེ་ལྟར་ཚད་མེད་མཆོད་བྱས་ནས། །རིགས་རྣམས་བྱིན་གྱིས་རློབ་པས་མཆོད། །ཞེ་སྡང་མ་སྐྱེས་རྡོ་རྗེ་དམ་ཚིག་མ། །ཡེ་ཤེས་མེ་ལོང་ཕ་རོལ་ཕྱིན་པའི་ངང་། །
གཉིས་མེད་རྒྱས་འདེབས་དྲིན་ལན་ཕྱག་རྒྱ་མ། །སཏྭ་བཛྲ་དབྱིངས་ཕྱུག་མཆོད་པས་རོལ། །ང་རྒྱལ་བདག་མེད་རིན་ཆེན་དམ་ཚིག་མ། །ཡེ་ཤེས་མཉམ་ཉིད་ཕ་རོལ་ཕྱིན་པའི་ངང་། །མི་འགྱུར་རྨོངས་མེད་དྲིན་ལན་ཕྱག་རྒྱ་མ། །རཏྣ་བཛྲ་དབྱིངས་ཕྱུག་མཆོད་པས་རོལ། །འདོད་ཆགས་མི་དམིགས་ཆོས་ཀྱི་དམ་ཚིག་མ། །ཡེ་ཤེས་

ཀུན་རྟོག་ཕ་རོལ་ཕྱིན་པའི་ངང་། །མི་རྟོག་ཟ་བྱེད་དྲིན་ལན་ཕྱག་རྒྱ་མ། །པདྨ་བཛྲི་དབྱིངས་ཕྱུག་མཆོད་པས་རོལ། །ཕྲག་དོག་མ་གྲུབ་རྒྱ་གྲམ་དམ་ཚིག་མ། །ཡེ་ཤེས་ནན་ཏན་ཕ་རོལ་ཕྱིན་པའི་ངང་། །མི་སྐྱེ་ཚེ་འཕེལ་དྲིན་ལན་ཕྱག་རྒྱ་མ། །ཀརྨ་བཛྲི་དབྱིངས་ཕྱུག་མཆོད་པས་རོལ། །དེ་ལྟར་བྱིན་
རླབས་མཆོད་བྱས་ནས། །རྒྱན་གྱི་མཆོད་པར་གསུངས་པ་ནི། །བདེ་གཤེགས་རྒྱལ་བ་འཁོར་བཅས་ནི། །མཆོད་གནས་དམ་པ་དཔལ་གྱི་ཞིང་། །ཡིད་དུ་འོང་བའི་མཆོད་སྦྱིན་དང་། །རོལ་མོ་སིལ་སྙན་འཕན་གདུགས་དང་། །བླ་རེ་རྒྱལ་མཚན་ལྷབ་ལྷུབ་དང་། །མེ་ཏོག་ཕྲེང་དང་བདུག་སྤོས་སོགས། །མར་མེ་
བྱུག་པ་ལ་སོགས་པའི། །མཆོད་སྤྲིན་སྣ་ཚོགས་ཕྱོགས་བཅུར་སྤྲུལ། །མཆོད་སྤྲིན་རིག་སྔགས་བདེན་པ་དང་། །ནམ་མཁའ་མཛོད་སྔགས་ཏིང་འཛིན་མཐུས། །སངས་རྒྱས་ཞིང་ཁམས་རབ་འབྱམས་སུ། །མཆོད་སྤྲིན་སྣ་ཚོགས་བཀླུབས་གྱུར་ཅིག །ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ། བཛྲ་ས་ར་པྲ་
མརྡྷ་ནི་ཏ་ཐཱ་ག་ཏཱ་ཡ། ཨརྷ་ཏེ་སམྱཾཀ་སཾ་བུདྡྷཱ་ཡ། ཏདྱ་ཐཱ། ཨོཾ་བཛྲེ་བཛྲེ་མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བཱི་རྱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་ས་མནྟོ་བ་སཾ་གྲ་མ་ཎ་བཛྲེ། སརྦ་ཀརྨ་ཨཱ་བ་ར་ཎ་བི་ཤྭ་དྷ་ནི་བཛྲེ་སྭཱ་ཧཱ། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། དེ་ནས་ཡུམ་
ལྔ་ལ་བརྟེན་མཆོད། །ཤེས་རབ་དབྱིངས་ཕྱུག་རིགས་ཡུམ་ལྔ། །ཕྱག་རྒྱའི་ཚོགས་ལ་བྱིན་རློབ་ཅིང་། །ཐམས་ཅད་འབྱུང་བའི་གཞིར་གྱུར་མས། །འགྲོ་བའི་དོན་རྣམས་མཛད་དུ་གསོལ། །ཤེས་རབ་དབྱིངས་མ་རིགས་ཀྱི་ཡུམ་ལྔ་སྟེ། །ཆོས་དབྱིངས་ཡེ་ཤེས་མཁའ་སོགས་གསལ་བ་ལ། །གསང་ཆེན་
བདེ་བའི་ལོངས་སྤྱོད་རྫོགས་པའི་ངང་། །ཐབས་ལྟར་རོལ་ཅིང་བརྟན་པར་བཞུགས་སུ་གསོལ། །ཡུམ་རྣམས་དག་ལ་མཆོད་ཐབས་ནི། །སྒྲུབ་མཆོད་བཅུ་དྲུག་གཞུང་བཞིན་བྱ། །བཅོམ་ལྡན་རྣམ་སྣང་མཛད་ཆེན་གྱི། །ཆོས་དབྱིངས་ཡེ་ཤེས་ཆེན་པོའི་ཡུལ། །ཡུམ་ཆེན་བུདྡྷ་ལོ་ཙ་ན། །ཐམས་ཅད་ཟད་པར་མཁས་
དབང་བསྐུར། །བདེ་གཤེགས་ཀུན་གྱི་ཡུམ་ཆེན་མོ། །ཕྱག་འཚལ་ཀུན་དུ་བཟང་མོ་ལའོ། །བཅོམ་ལྡན་རྡོ་རྗེ་སེམས་དཔའ་ཡི། །མེ་ལོང་ཡེ་ཤེས་ཆེན་པོའི་ཡུལ། །ཡུམ་ཆེན་བཛྲ་ལོ་ཙ་ན། །ཐམས་ཅད་ཟད་པར་སས་དབང་བསྐུར། །རྡོ་རྗེ་རིགས་གཙོ་མང་པོའི་ཡུམ། །ཕྱག་འཚལ་སངས་རྒྱས་སྤྱན་ཁྱོད་ལའོ། །

བཅོམ་ལྡན་རིན་ཆེན་འབྱུང་ལྡན་གྱི། །མཉམ་ཉིད་ཡེ་ཤེས་ཆེན་པོའི་ཡུལ། །ཡུམ་ཆེན་རཏྣ་ལོ་ཙ་ན། །ཐམས་ཅད་ཟད་པར་མེས་དབང་བསྐུར། །རིན་ཆེན་རིགས་གཙོ་མང་པོའི་ཡུམ། །ཕྱག་འཚལ་ན་བཟའ་དཀར་མོ་ལའོ། །བཅོམ་ལྡན་སྣང་བ་མཐའ་ཡས་ཀྱི། །ཀུན་རྟོག་ཡེ་ཤེས་ཆེན་པོའི་ཡུལ། །
ཡུམ་ཆེན་པདྨ་ལོ་ཙ་ན། །ཐམས་ཅད་ཟད་པར་ཆུས་དབང་བསྐུར། །པདྨ་རིགས་གཙོ་མང་པོའི་ཡུམ། །ཕྱག་འཚལ་མཱ་མ་ཀཱི་ལའོ། །བཅོམ་ལྡན་དོན་ཡོད་གྲུབ་པ་ཡི། །ནན་ཏན་ཡེ་ཤེས་ཆེན་པོའི་ཡུལ། །ཡུམ་ཆེན་ཀརྨ་ལོ་ཙ་ན། །ཐམས་ཅད་ཟད་པར་རླུང་དབང་བསྐུར། །ལས་ཀྱི་རིགས་གཙོ་མང་པོའི་
ཡུམ། །ཕྱག་འཚལ་དམ་ཚིག་སྒྲོལ་མ་ལའོ། །དེ་ནས་སེམས་དཔའ་བཅུ་དྲུག་ཀྱང་། །ཅི་རིགས་པའམ་ཡང་ན་ནི། །མཚན་བརྒྱ་རྩ་བརྒྱད་པ་ཡིས་མཆོད། །དེ་ནས་ལཱ་སྱ་ལ་སོགས་བརྒྱད། །ཕྱི་ནང་གཉིས་ཀྱི་ལྷ་མོ་དམ་ཚིག་མ། །ཕྱག་རྒྱ་བཞི་ཡི་ཡེ་ཤེས་གསལ་བ་ལ། །རོལ་པ་ཆེན་པོས་མཆོད་པས་གཙོ་
བོ་ཡིས། །དགོངས་པ་སྐོངས་ལ་འགྲོ་བའི་དོན་རྣམས་མཛོད། །ཡེ་ཤེས་དུས་བཞི་གཟུངས་ཉེ་གཟུངས། །སྤྲུལ་སྐུ་འཁོར་བར་མི་ལྡོག་ཅིང་། །མྱ་ངན་འདས་ལ་མི་ཆགས་པའི། །དོན་རྣམས་མཛད་ཅིང་བརྟན་པོར་བཞུགས། །རྡོ་རྗེ་སྒེག་མོ་བྱང་ཆུབ་སེམས་ཀྱི་ངང་། །མཆོག་སྦྱིན་སྨོན་བྱེད་གཟི་བརྗིད་འབར་ཅིང་སྡུད། །
མདོག་དཀར་གསེར་གྱི་ཁུ་ཚུར་དཀུར་བརྟེན་ཏེ། །ཕྱག་འཚལ་རྡོ་རྗེ་སྨོན་བྱེད་སྒེག་མོ་ལའོ། །རིན་ཆེན་དཔལ་ཕྲེང་གཟུངས་དང་ཏིང་ངེ་འཛིན། །ཡིད་བཞིན་མཆོག་འབྱུང་གཟི་བརྗིད་འབར་ཞིང་སྐོང་། །སྔོ་བསངས་རིན་ཆེན་ཕྲེང་བས་རེ་འདོད་སྐོང་། །ཕྱག་འཚལ་བདུད་རྩི་ཆར་འབེབས་ཕྲེང་བ་ལའོ། །པདྨ་དབྱངས་
མཁན་གསུང་རབ་རྒྱ་མཚོར་སྒྲོགས། །སྙན་པས་ཡིད་འཕྲོག་གཟི་བརྗིད་འབར་ལྡན་སྐོང་། །མདོག་དམར་གསེར་གྱི་པི་ཝང་ཕྱག་ན་བསྣམས། །ཕྱག་འཚལ་ཐབས་ཀྱི་ཡིད་འཕྲོག་གཱི་ཏི་ལའོ། །ལས་ཀྱི་གར་མཁན་ཕྲིན་ལས་རྒྱ་མཚོ་སྒྲོལ། །གཟུགས་མཛེས་བསྐྱོད་པས་རོལ་མོ་ཕྱོགས་བཅུར་མཛད། །མདོག་
ལྗང་སྣ་ཚོགས་སྐུར་སྟོན་གཟི་བརྗིད་འབར། །ཕྱག་འཚལ་བའང་མཛེས་སྤྱོད་ནི་རྟི་ལའོ། །སྤོས་ཀྱི་སྤྲིན་ལྡང་བདུག་པ་འཕྲོ། །ཀུན་དུ་ཚིམ་བྱེད་དྲི་བསུང་ཚིམ། །མཐིང་སྐྱ་གསེར་གྱི་སྤོས་ཕོར་བསྣམས། །ཕྱག་འཚལ་རྣམ་དག་བདུག་པ་ལའོ། །ལྟ་མཛེས་རིན་ཆེན་ཕུང་པོ་འགྲོ། །བྱང་ཆུབ་ཡན་ལག་མེ་ཏོག་

བརྒྱན། །མཐོན་མཐིང་མེ་ཏོག་གཞོང་བུ་བསྣམས། །ཕྱག་འཚལ་སྐྱོན་མེད་མེ་ཏོག་ལའོ། །འོད་གསལ་འཕྲོ་བས་ཀུན་དུ་ཁྱབ། །གཏི་མུག་འཐིབས་པོ་སེལ་མཛད་པ། །དམར་སྐྱ་ཆོས་ཀྱི་མར་མེ་བསྣམས། །ཕྱག་འཚལ་སྒྲོན་འབར་མར་མེ་ལའོ། །ཙནྡན་བདུད་རྩི་ཆར་འབེབས་མ། །
བདུད་རྩི་བསིལ་དྲོ་འཇམ་པའི་དབྱིངས། །ལྗང་སྔོན་དུང་ཕོར་ཕྱག་ན་བསྣམས། །ཕྱག་འཚལ་རེག་བྱ་དྲི་ཆུ་ལའོ། །རྫུ་འཕྲུལ་ཆེ་བའི་བསྐལ་བཟང་དང་། །ཕྱོགས་སྐྱོང་བཅུ་དང་བཀྲ་ཤིས་བརྒྱད། །རྡོ་རྗེ་ལྕགས་ཀྱུ་འགུགས་བྱེད་དང་། །རིན་ཆེན་ཞགས་པ་གསོལ་ཀ་དང་། །པདྨ་ལྕགས་སྒྲོག་ཕོ་ཉའི་ལས། །རྒྱ་གྲམ་
དྲིལ་བུ་ཤེས་རབ་མཆོག །དཔེ་མེད་རྒྱལ་སྲས་རང་རྒྱལ་དང་། །དགྲ་བཅོམ་རྒྱལ་ཆེན་ལྷ་ཆེན་དང་། །ལྷ་ཀླུ་གནོད་སྦྱིན་དྲི་ཟ་དང་། །ལྷ་མ་ཡིན་དང་ནམ་མཁའ་ལྡིང་། །མི་འམ་ཅི་དང་ལྟོ་འཕྱེ་ཆེ། །ས་བདག་གཟའ་སྐར་རིག་འཛིན་དང་། །སྲིན་པོ་ལོག་འདྲེན་ཤ་ཟ་དང་། །རྒྱུད་དྲུག་དག་གི་མཐུ་ཅན་སོགས། །ཐམས་ཅད་ཅི་རིགས་པ་
ཡིས་མཆོད། །དཀྱིལ་འཁོར་བདག་པོ་དེ་ཉིད་ཀྱིས། །དཀྱིལ་འཁོར་ལྷ་ཡི་ཏིང་འཛིན་ཞུགས། །ལྕེ་ཐོག་ཨ་ལས་ཟླ་དཀྱིལ་སྟེང་། །ཨོཾ་བསྒོམས་རྡོ་རྗེ་ཡེ་ཤེས་བསམས། །རྡོ་རྗེ་ལྕགས་ཀྱུ་བསྒོམས་ནས་ནི། །ཆོས་ཀྱི་ཕྱག་རྒྱ་ཅན་གྱིས་ནི། །སློབ་མ་དེ་ལ་བཤད་པར་བྱ། །ཨོཾ་དྷརྨ་ཧཱུཾ་དྷརྨ་ཏྲཱཾ་དྷརྨ་ཧྲཱིཿདྷརྨ་ཨཱཿདྷརྨ། ས་མ་ཡ་སྟྭཾ་དྷརྨ།
ཨ་ན་ཡ་ས་དྷརྨ། ཨ་ཧཾ་སུ་ཁཾ་དྷརྨ། སཱ་དྷུ་སཱ་དྷུ་དྷརྨ། སུ་པ་ཧ་སྭཱ་དྷརྨ། རུ་པུ་ཧོ་དེ་དྷརྨ། ཨ་ཐ་པྲ་བ་ཏི་དྷརྨ། ཧ་ཧ་ཧཱུཾ་ཧ་དྷརྨ། སརྦ་ཀ་རི་དྷརྨ། དུཿཁ་ཙྪེ་ད་དྷརྨ། བུདྡྷ་བོ་དྷི་དྷརྨ། པྲ་ཏི་ཤཔྡ་དྷརྨ། སུ་བ་ཤི་སྟྭཾ་དྷརྨ། ནི་བ་ཡ་དྷརྨ། ཤ་ཏྲཱཾ་བྷཀྵ་དྷརྨ། སརྦ་སིདྡྷི་དྷརྨ། མ་ཧཱ་ར་ཏཱི་དྷརྨ། རཱུ་པ་ཤོ་བྷེ་དྷརྨ། ཤཱུ་རོད་ཏྲ་པཻ་དྷརྨ། སརྦ་པུ་ཛེ་
དྷརྨ། པྲ་ཧ་ད་ནི་དྷརྨ། པུ་ཏེ་དྷརྨ། ཙ་ཀྲི་དྷརྨ། སུ་གནྡྷ་ནི་དྷརྨ། ཨ་ཡ་ཧི་ཛ་ཛ་དྷརྨ། ཨ་ཡ་ཧི་ཧཱུཾ་ཧཱུཾ་དྷརྨ། མེ་སྥོ་ཊ་བཾ་བཾ་དྷརྨ། གྷཎྜ་ཨ་ཨ་དྷརྨ། དེ་ལྟར་ལྷ་ཚོགས་སྐུ་གསུང་ཐུགས། །དཀྱིལ་འཁོར་གང་ཡིན་ཐམས་ཅད་ཀྱི། །སོ་སོའི་སྙིང་པོ་ཐ་མར་ནི། །དྷརྨས་བཏགས་ལ་བརྗོད་པས་ནི། །ལྷ་རྣམས་ཐུགས་དགོངས་
དངོས་གྲུབ་སྩོལ། །ཀུན་རྫོབ་དང་ནི་དོན་དམ་གྱི། །བྱང་ཆུབ་སེམས་ནི་བསྐྱེད་པར་བྱ། །སྡོམ་པ་ཡི་ནི་དམ་ཚིག་དང་། །དག་པའི་ཆོས་རྣམས་སྡུད་པ་དང་། །སེམས་ཅན་དོན་བྱེད་བཅས་པ་ཡི། །རྣམ་པ་གསུམ་དང་ལྡན་པར་བཤད། །རྡོ་རྗེ་གོ་ཆའི་ཕྱག་རྒྱ་བཅས། །ཨོཾ་བཛྲ་ཀ་བ་ཙ་རཀྵ་ཨ་དྷི་ཏིཥྛ་ཧཾ། དེ་ནས་སྐུ་གསུང་

ཐུགས་བྱིན་བརླབ། །ཀཱ་ཡ་ཨོཾ་ཝཱཀྐ་ཨཱཿཙིཏྟ་ཧཱུཾ། འཁོར་ལོ་ཕྱག་རྒྱ་ཏིང་འཛིན་སྔགས། །བར་དུ་གཅོད་པ་བསལ་བར་བྱ། །ཨོཾ་ཛྙཱ་ན་ཙཀྲ་ཕཊ། ང་ཡིས་བཤད་ཕོག་ཐམས་ཅད་ནི། །དམ་པས་གསུངས་པའི་ཚིག་ཡིན་པས། །ཁྱོད་ཀྱང་དེ་ལས་མ་འདའ་ཤིག །ཨོཾ་བཛྲ་ས་མ་ཡ་ཧཾ་ཐ། བྱང་ཆུབ་རིགས་ཅན་ཉིད་དུ་ནི། །
སྔགས་འདི་བརྗོད་པར་གྱུར་པའོ། །ཨོཾ་བོ་དྷི་ཙིཏྟ་ཨ་ས་མེ་མ་ཧཱ་ས་མ་ཡ་སྭཱ་ཧཱ། ཧཱུཾ་ཧཱུཾ་ཧཱུཾ། གསུམ་པ་དཀྱིལ་འཁོར་འཇུག་གཞུག་པ། །སློབ་དཔོན་ཞུགས་དང་སློབ་མ་འཇུག །བཤགས་པ་ལྷག་ཆད་ཁ་བསྐང་བ། །མཐུན་པར་སླར་གཤེགས་གསོལ་དང་ལྔ། །ལས་བཞི་མཆོད་ནས་བདག་ཉིད་ཀྱིས། །དཀྱིལ་འཁོར་སེམས་
ཀྱིས་ནམ་མཁའ་ལ། །བཏེག་ནས་བྱང་ཆུབ་སེམས་ཀྱིས་ནི། །ཞུགས་པ་ཉིད་དུ་ཐུབ་པས་གསུངས། །བདུག་སྤོས་ལག་ཏུ་ཐོགས་ནས་སུ། །བློ་གྲོས་ལྡན་པས་ལྷ་རྣམས་ལ། །གུས་པས་གསོལ་བ་ལེགས་པར་གདབ། །དེ་འོག་སྒོ་བཞི་དབྱེ་བར་བཤད། །ཞུགས་ལ་གཉིས་སུ་མེད་བསྒོམས་ལ། །འགྲོ་བ་དྲན་པའི་ལས་
བྱའོ། །བཅོམ་ལྡན་ནམ་མཁའི་སངས་རྒྱས་ཀུན། །ཐུགས་རྗེ་ཆེན་པོ་མཐུ་ལྡན་ལགས། །བདག་ཉིད་རབ་ཏུ་བསྒྲལ་བའི་ཕྱིར། །རང་བཞིན་ཏིང་འཛིན་གཟུགས་བརྙན་ལྷས། །བདག་ལ་དབང་མཆོག་དེང་སྩོལ་ཅིག །དཀྱིལ་འཁོར་ལ་ནི་འཁོར་ལོ་བཤད། །དེ་ཉིད་དམ་ཚིག་ཡིན་པར་བཤད། །སངས་རྒྱས་བཀའ་ཡི་དཀྱིལ་འཁོར་དུ། །
བདག་ཉིད་དད་པས་འཇུག་ལགས་ན། །དཀྱིལ་འཁོར་བཅས་པའི་ལྷ་རྣམས་ཀྱིས། །བདག་ལ་བྱིན་གྱིས་བརླབ་ཏུ་གསོལ། །བདེ་བར་གཤེགས་སོ་བཅོམ་ལྡན་འདས། །བསོད་ནམས་ཅན་དུ་བདག་ཉིད་གྱུར། །སྔོན་གྱི་ལས་ཀྱི་འབྲེལ་པ་ལགས། །ཐུགས་རྗེས་སྲས་སུ་དགོངས་པར་མཛོད། །ཨཱཏྨ་ཀོ྅ཧཾ་མཎྜལ་སརྦ་ཨཱ་བེ་ཤ་
སྭ་བྷཱ་ཝ། །རྡོ་རྗེ་མཛུབ་སོགས་ལེགས་པར་ནི། །སྦྱར་ལ་བཀན་ཏེ་བསྡམས་ནས་སུ། །ཁྲོས་ནས་རབ་ཏུ་དབྱེ་བ་ནི། །སྒོ་དབྱེ་བ་ཡི་མཚན་ཉིད་དོ། །གནས་རབ་སྒོ་བཞི་ཞེ་སྡང་དང་། །ང་རྒྱལ་འདོད་ཆགས་ཕྲག་དོག་བཞིས། །སྔོན་མེད་དུས་ནས་བཅད་ལགས་ན། །ཚད་མེད་བསྡུ་རྒྱས་རིགས་བཞི་ཡི། །ཐུགས་རྗེ་ཐབས་ལས་སྤྲུལ་
པ་ཡི། །ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུ་ཕྱག་རྒྱ་མཆོག་ཉིད་ཀྱིས། །དེང་ཉིད་ཐར་སྒོ་དབྱེ་རུ་གསོལ། །ཨོཾ་བཛྲ་རཏྣ་པདྨ་ཀརྨ་ཀྲོ་དྷ་གྷ་ཊོཏྶ་མ་ཡ་ཙ་ཏུར། པྲ་བེ་ཤ་བི་ཀྲན་སྨཱ་ར་ཎ་ས་མ་ཡ་ཧཱུཾ་ཕཊ། དེ་ནས། བདག་ཉིད་རྡོ་རྗེ་རིན་ཆེན་དང་། །པདྨ་རྒྱ་གྲམ་ཤུགས་ཀྱིས་ནི། །རབ་ཏུ་བརྒལ་ཏེ་ཞུགས་ནས་ནི། །

གཉིས་སུ་མེད་པར་སངས་རྒྱས་འགྱུར། །སྙིང་རྗེ་སློབ་མ་ལ་སོགས་ལ། །ལྷ་མོ་སྤྲུལ་སྲས་བསྒོམ་བྱས་དྲང་། །དེ་ནས་སྔགས་གཡོག་དག་གིས་ནི། །སློབ་མའི་ལས་རྣམས་བརྩོན་བྱ་བ། །ཕྱག་འཚལ་གསོལ་འཇུག་ཁྲུས་བཀྲ་ཤིས། །དམ་བཅའ་
མེ་ཏོག་དོར་མིག་དབྱེ། །སློབ་དཔོན་ལན་སྩལ་ལྷས་དབང་བསྐུར། །དམ་ཚིག་དབོག་དང་དབང་བསྐུར་དང་། །སྨོན་ལམ་ལྷ་ངོ་བསྟན་ཡུལ་དབུལ། །དགེ་བའི་རྩ་བ་བསྔོ་བའོ། །དེ་ནས་ཤར་སྒོ་དག་ཏུ་ནི། །བདུག་སྤོས་ལག་ཏུ་ཐོགས་ནས་སུ། །ཤར་ཕྱོགས་མངོན་
དགའི་ཕོ་བྲང་འདིའི། །བཅོམ་ལྡན་རྡོ་རྗེ་སེམས་དཔའ་ལ། །སྐལ་ལྡན་རྒྱལ་སྲས་དག་པ་ཞིག །ངག་ཡིད་དང་བས་གུས་ཕྱག་འཚལ། །ལྷོ་ཕྱོགས་དཔལ་ལྡན་ཕོ་བྲང་འདིའི། །བཅོམ་ལྡན་རིན་ཆེན་འབྱུང་ལྡན་ལ། །སྐལ་ལྡན་རྒྱལ་སྲས་དག་པ་ཞིག །ངག་ཡིད་
དང་བས་གུས་ཕྱག་འཚལ། །ནུབ་ཕྱོགས་བདེ་ལྡན་ཕོ་བྲང་འདིའི། །བཅོམ་ལྡན་སྣང་བ་མཐའ་ཡས་ལ། །སྐལ་ལྡན་རྒྱལ་སྲས་དག་པ་ཞིག །ངག་ཡིད་དང་བས་གུས་ཕྱག་འཚལ། །བྱང་ཕྱོགས་གསེར་མདོག་ཕོ་བྲང་འདིའི། །བཅོམ་ལྡན་དོན་ཡོད་གྲུབ་པ་ལ། །སྐལ་
ལྡན་རྒྱལ་སྲས་དག་པ་ཞིག །ངག་ཡིད་དང་བས་གུས་ཕྱག་འཚལ། །བཅོམ་ལྡན་སྙིང་པོའི་ཕོ་བྲང་འདིའི། །བཅོམ་ལྡན་རྣམ་པར་སྣང་མཛད་ལ། །སྐལ་ལྡན་རྒྱལ་སྲས་དག་པ་ཞིག །ངག་ཡིད་དང་བས་གུས་ཕྱག་འཚལ། །བདག་ནི་དམ་ཚིག་རྡོ་རྗེ་སྟེ། །རྡོ་རྗེ་སེམས་དཔའ་
ཡིན་པའི་ཕྱིར། །རྡོ་རྗེ་བླ་ན་མེད་པ་འདི། །དི་རིང་བདག་ལ་དབབ་ཏུ་གསོལ། །བདག་ནི་དམ་ཚིག་རིན་ཆེན་ཏེ། །རིན་ཆེན་འབྱུང་ལྡན་ཡིན་པའི་ཕྱིར། །རིན་ཆེན་བླ་ན་མེད་པ་འདི། །དི་རིང་བདག་ལ་དབབ་ཏུ་གསོལ། །བདག་ནི་དམ་ཚིག་པདྨོ་སྟེ། །སྣང་བ་མཐའ་ཡས་
ཡིན་པའི་ཕྱིར། །པདྨོ་བླ་ན་མེད་པ་འདི། །དི་རིང་བདག་ལ་དབབ་ཏུ་གསོལ། །བདག་ནི་དམ་ཚིག་རྒྱ་གྲམ་སྟེ། །དོན་ཡོད་གྲུབ་པ་ཡིན་པའི་ཕྱིར། །རྒྱ་གྲམ་བླ་ན་མེད་པ་འདི། །དི་རིང་བདག་ལ་དབབ་ཏུ་གསོལ། །བདག་ནི་དམ་ཚིག་འཁོར་ལོ་སྟེ། །རྣམ་པར་སྣང་

མཛད་ཡིན་པར་གྲགས། །འཁོར་ལོ་བླ་ན་མེད་པ་འདི། །དི་རིང་བདག་ལ་དབབ་ཏུ་གསོལ། །ཤར་ཕྱོགས་མངོན་དགའི་ཕོ་བྲང་འདིར། །བླ་མེད་བྱང་ཆུབ་སེམས་བསྐྱེད་དེ། །དངོས་གྲུབ་དམ་པ་སྒྲུབ་པའི་ཕྱིར། །བདག་གིས་དད་པས་འཇུག་པར་བགྱི། །ལྷོ་ཕྱོགས་དཔལ་
ལྡན་ཕོ་བྲང་འདིར། །བླ་མེད་བྱང་ཆུབ་སེམས་བསྐྱེད་དེ། །དངོས་གྲུབ་དམ་པ་སྒྲུབ་པའི་ཕྱིར། །བདག་གིས་དད་པས་འཇུག་པར་བགྱི། །ནུབ་ཕྱོགས་བདེ་ལྡན་ཕོ་བྲང་འདིར། །བླ་མེད་བྱང་ཆུབ་སེམས་བསྐྱེད་དེ། །དངོས་གྲུབ་དམ་པ་སྒྲུབ་པའི་ཕྱིར། །བདག་གིས་དད་པས་
འཇུག་པར་བགྱི། །བྱང་ཕྱོགས་རྣམ་དག་ཕོ་བྲང་འདིར། །བླ་མེད་བྱང་ཆུབ་སེམས་བསྐྱེད་དེ། །དངོས་གྲུབ་དམ་པ་སྒྲུབ་པའི་ཕྱིར། །བདག་གིས་དད་པས་འཇུག་པར་བགྱི། །བཅོམ་ལྡན་སྙིང་པོའི་ཕོ་བྲང་འདིར། །བླ་མེད་བྱང་ཆུབ་སེམས་བསྐྱེད་དེ། །དངོས་གྲུབ་དམ་པ་སྒྲུབ་པའི་
ཕྱིར། །བདག་གིས་སློབ་མ་གཞུག་པར་བགྱི། །ཕྱོགས་བཅུ་རྣམས་སུ་ལྟ་བའི་ཕྱིར། །མཐའ་ལས་འདས་པ་གནས་པར་བགྱི། །རྡོ་རྗེ་སེམས་དཔའ་མེ་ལོང་ཡུལ། །ཀུན་བཟང་ཕྱག་རྒྱའི་བུམ་པ་སྟེ། །གཉིས་མིན་བྱང་ཆུབ་སེམས་རྟགས་ཆུས། །ཞེ་སྡང་རྣམ་སྨིན་
དག་གྱུར་ཅིག །རིན་ཆེན་འབྱུང་ལྡན་མཉམ་ཤེས་ཡུལ། །ན་བཟའི་ཕྱག་རྒྱའི་བུམ་པ་སྟེ། །གཉིས་མིན་བྱང་ཆུབ་སེམས་རྟགས་ཆུས། །ང་རྒྱལ་རྣམ་སྨིན་དག་གྱུར་ཅིག །སྣང་བ་མཐའ་ཡས་ཀུན་རྟོག་ཡུལ། །མཱ་མའི་ཕྱག་རྒྱ་བུམ་པ་སྟེ། །གཉིས་མིན་བྱང་ཆུབ་
སེམས་རྟགས་ཆུས། །འདོད་ཆགས་རྣམ་སྨིན་དག་གྱུར་ཅིག །དོན་གྲུབ་ནན་ཏན་ཡེ་ཤེས་ཡུལ། །སྒྲོལ་མའི་ཕྱག་རྒྱ་བུམ་པ་སྟེ། །གཉིས་མིན་བྱང་ཆུབ་སེམས་རྟགས་ཆུས། །ཕྲག་དོག་རྣམ་སྨིན་དག་གྱུར་ཅིག །རྣམ་སྣང་ཆོས་དབྱིངས་ཡེ་ཤེས་ཡུལ། །སྤྱན་གྱི་
ཕྱག་རྒྱ་བུམ་པ་སྟེ། །གཉིས་མིན་བྱང་ཆུབ་སེམས་རྟགས་ཆུས། །གཏི་མུག་རྣམ་སྨིན་དག་གྱུར་ཅིག །མི་འཁྲུགས་རྒྱལ་པོ་སྲིད་དང་གཏི་མུག་རྣམ་སྦྱོང་བ། །མགོན་པོ་ཡོན་ཏན་མཐའ་དག་རྫོགས་པའི་བཀྲ་ཤིས་དང་། །དགེ་མཉམ་བསམ་སེམས་ལྡན་པའི་བཀྲ་ཤིས་

གང་ཡིན་པ། །བཀྲ་ཤིས་དེས་ནི་དིང་འདིར་ཞི་བྱེད་ལེགས་གྱུར་ཅིག །སངས་རྒྱས་ཀུན་གྱི་ཡོན་ཏན་རྒྱན་གྱིས་བརྒྱན་བྱས་ཤིང་། །ཡང་དག་འབྱོར་བའི་སྦྱིན་པས་སྦྱིན་མཛད་མི་སླུ་བ། །རིན་ཆེན་འབྱུང་ལྡན་ཞེས་བྱའི་བཀྲ་ཤིས་གང་ཡིན་པ། །བཀྲ་ཤིས་
དེས་ཀྱང་དིང་འདིར་ཞི་བྱེད་ལེགས་གྱུར་ཅིག །བསམ་གཏན་དམ་པ་ཏིང་འཛིན་ཕ་རོལ་ཕྱིན་པའི་གནས། །ཡེ་ཤེས་པདྨའི་སྟེང་བཞུགས་དཔག་མེད་ཚེ་ལྡན་ཞིང་། །ཚེ་གྲངས་མེད་པར་བྱིན་གྱིས་བརླབས་པའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་ཞི་བྱེད་ལེགས་
གྱུར་ཅིག །སེམས་ཅན་དོན་ཕྱིར་ལས་ལ་ཐུགས་ནི་སྦྱོར་མཛད་ཅིང་། །འགྲོ་བ་ཐམས་ཅད་བཅིངས་པ་བཅིངས་ལས་གྲོལ་གྱུར་པ། །ཐུབ་མཆོག་དོན་ཡོད་གྲུབ་པའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་ཞི་བྱེད་ལེགས་གྱུར་ཅིག །རྣམ་པར་སྣང་མཛད་
ཡེ་ཤེས་དམ་པ་མཚོ་ཆེན་ལྡན། །ཟླ་བ་ཉ་འདྲ་སྐུ་མངའ་སྲིད་པའི་མཐར་འབྱིན་པ། །དགོངས་པ་མཐའ་དག་རྫོགས་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་དེང་འདིར་ཞི་བྱེད་ལེགས་གྱུར་ཤོག །ཡན་མཾ་ག་ལན། ཤུ་བྷ་ཤ་མནྟོ། ས་ཡ་ཛི་ན་ཏ་ཀ་ཤ་སྱེ་ཨ་
ཀྵོ་བྷྱ་རཱ་ཛ། བི་ཤི་ན་ཏ་སྱེ། སརྦ་ཀུན། མཾ་ག་ལ་སྱེ། ནཾ་མཾ་ག་ལ་ད། བྷ་བ་ཏུ་ཤཱནྟེ། ཀ་ས་པྲཛྙ་སྟ་བནྟུ་ཏྱཾ། ཡ་མཾ་ག་ལན། མ་ནི་ཀུ་ལན་ཧི་ན་བུ་ཧ་ར། པ་བ་ཤུ་ཤ་ཤ་ཙི་ན་སེ་ཏ་ནོ་ཏོ་ནེ། ཁ་ལ་ན་པི་པི་པུ་ཏི་ན། ཏན་མཾ་ག་ལན། ཏན་མཾ་གཱ་ལན་བྷ་བ་ཏུ་ཤཱནྟེ།
ཀ་ར་ན་བད་ཧྱཾ་ཡན་མཾ་ག་ལན། ཨ་ག་ནི། ཨཱ་ཡུར་བྱིད་ཏ་ས་སྱེ། མ་ནེ་བུ་ར་ཏ་ལི་ཡས་སྱེ། གཱརྣ་བཛྲ། པ་རི་ག་ཏེ་སྱེ། ཏ་ཐུ་ག་ཏེ་སྨི། ཏན་མཾ་ག་ལན། བྷ་བ་ཏུ་ཤཱནྟེ། ཀར་ནརྱ་ཕཊ་ཏྲཾ། ཡན་མཾ་ག་ལན། མ་མ་མུ་ནེ་པ་ར་ཤ་སྱེ། ཨ་མོ་གྷ་སིདྡྷི་ས་ཏྭ་ཏྭ་ར་གར་མ་ན་ནེ། བྷུ་
ན་ཤ་བ་ན། ཤ་ཏ་ལེ་སྱེ་ཡོ་ཙི་ཏ་མན་ས་ས་སྱེ་མུ་ན་ས་སྱེ། བནྡྷ་བྷ་བྷ་མྱེ་བྱ། ཏན་མཾ་ག་ལན། བྷ་བ་ཏུ་ཤཱནྟེ། རྣ་ཏ་ཏྱཾ། ཡན་མཾ་ག་ལན། ས་ཀ་ལ་མཱ་ཏོར་ཏ་ས་སྱེ། བཻ་རོ་ཙ་ན་སྱེ། བེ་ར་ཏ་ཉི་རྣ། མ་ཧཱ་ར་རྣ་བ་སྱེ། མ་ཧཱ་ར་རྣ་བྷུ་ར་ར་རྣ། ཙ་ཏྲ་བྷུ་ཤེ་ཧེ་བནྟ་ཀ་སྱེ། ཏན་མཾ་ག་ལན།

བྷ་བ་ཏུ་ཤཱནྟེ་ཀ་ར་ཏ་བནྟྱཾ། དེ་ལ་དེ་བཞིན་གཤེགས་གཙོ་དང་། །ཆོས་རྣམས་ཀུན་ལ་དབང་བསྐུར་རོ། །རྡོ་རྗེ་རིགས་གཙོ་ཆེན་པོ་དང་། །ཁམས་གསུམ་བདག་པོར་དབང་བསྐུར་རོ། །རིན་ཆེན་རིགས་གཙོ་ཆེན་པོ་དང་། །ལྷ་མིས་མཆོད་པར་དབང་བསྐུར་རོ། །པདྨའི་
རིགས་གཙོ་ཆེན་པོ་དང་། །ཆོས་ཀྱི་རྒྱལ་པོར་དབང་བསྐུར་རོ། །ལས་ཀྱི་རིགས་གཙོ་ཆེན་པོ་དང་། །ལས་བཞིས་གཞན་དོན་སྤྱོད་དབང་བསྐུར། །བཀྲ་ཤིས་བརྗོད་པའི་བྱིན་རླབས་ཀྱིས། །འཇིག་རྟེན་དག་ཏུ་མི་རྣམས་ཀུན། །གྲགས་པ་རྣམ་སྤེལ་བགེགས་ཀྱང་
མེད། །སེམས་ཉིད་བདེ་འགྲོ་ངེས་བྱེད་ལ། །མཐར་ཡང་ངེས་པ་ཁོ་ནར་ནི། །ཞི་བའི་འབྲས་བུ་ཐོབ་པར་འགྱུར། །དེ་ནས་དམ་བཅའ་བྱ་བ་ནི། །དཔའ་བོ་ཆེན་པོ་རྒྱུད་དག་པའི། །སྡོམ་པ་ལེགས་པར་བླང་བར་བྱ། །དེ་ལ་སྡོམ་པའི་ཡོན་ཏན་ནི། །དང་པོ་སྡོམ་པས་རྒྱུད་
གཉིས་སྦྱོང་། །ཐ་མའི་སྡོམ་པས་ལྷ་མིན་སྦྱོང་། །རྡོ་རྗེ་རིན་ཆེན་པདྨོ་ཡི། །སྡོམ་པ་ཡིས་ནི་ངན་འགྲོ་སྦྱོང་། །དེ་བས་སྡོམ་པ་མནོས་པ་མཆོག །དེ་འོག་དམ་བཅའ་ཡང་དག་བྱ། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །
དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་བརྟན་པར་བཟུང་། །དེ་ནི་སྤྱི་ཡི་ཚུལ་ཁྲིམས་སོ། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་
པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ནི་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བ། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་གཟུང་བར་བགྱི། །ལས་ཀྱི་རིགས་
མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །སངས་རྒྱས་ཆོས་དང་དགེ་འདུན་དང་། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤོང་ངོ་། །

སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །དེ་ནས་ཤར་སྒོར་གནས་པ་དེ། །ན་བཟའ་སྟོད་སྨད་དར་དམར་དཀྲི། །རྡོ་རྗེ་འཛིན་མའི་ཕྱག་རྒྱར་འཆར། །བཅུག་ལ་ལག་ཏུ་རིན་ཆེན་དང་། །མེ་ཏོག་ཕྲེང་བ་ལ་སོགས་ཐོགས། །གདོང་
གཡོགས་དར་དཀར་གྱིས་གཡོགས་ནས། །ཨ་ས་མེ་ཏྲི་ས་མེ་མ་ཧཱ་ས་མ་ཡ་ཧཱུཾ། ཨོཾ་བཛྲ་ཨ་བ་ཏིཥྛ་ཧཱུཾ། ཨོཾ་བཛྲ་ས་མ་ཡ་ཧཱུཾ། སྔོན་གྱི་ཚེ་རབས་གྲངས་མེད་ནས། །དགེ་བའི་ལས་ཀྱིས་བསྙེན་པའི་ལྷ། །ལྷག་པའི་ལྷ་ནི་གང་ཡིན་པ། །ད་ལྟ་ཉིད་དུ་འབབ་པར་ཤོག །སངས་རྒྱས་དངོས་གྲུབ་
ཐོབ་བྱའི་ཕྱིར། །བདག་ལ་ཐུགས་བརྩེར་དགོངས་ནས་ཀྱང་། །འགྲོ་ལ་ཕན་པའི་གཙེ་ཆེན་གྱིས། །སྨན་པར་དགོངས་ནས་བཞེས་སུ་གསོལ། །ཨོཾ་བཛྲ་པྲ་ཏི་གྲྀཧྞ་ཧཱུཾ། ཨོཾ་བཛྲ་པྲ་ཏཱིཙྪ་ས་མ་ཡ་སྟྭཾ། བོ་དྷི་ཙིཏྟ་པཱུ་ཛ་ཧོ། མེ་ཏོག་རིན་ཆེན་ལ་སོགས་པ། །གང་ལ་བབ་པ་རིགས་ཀྱི་ལྷ། །
གཙོ་བོ་རིགས་དེ་བསྒྲུབས་ན་ནི། །དངོས་གྲུབ་མྱུར་སྟེར་ཐེ་ཚོམ་མེད། །དེ་ནས་ལྕགས་ཀྱུའི་ཕྱག་རྒྱ་ཡིས། །རིན་ཆེན་ལྷར་བཅས་བླངས་ནས་ནི། །སློབ་མའི་སྤྱིར་བཞག་ཐིམ་གྱུར་ནས། །མི་གཉིས་གཅིག་པའི་ལྟར་བསམས་ནས། །ཨོཾ་ས་མ་ཡ་ཧྲྀ་ད་ཡ་མེ། ཨོཾ་ཨཱཿཧཱུཾ། ཨ་བྷི་
ཥིཉྩ་ཨཱཿ ད་ནི་དད་པ་རབ་ཏུ་བསྐྱེད། །དཀྱིལ་འཁོར་བཟང་པོ་འདི་ལ་ལྟོས། །ཁྱོད་ནི་ཐེག་ཆེན་འདི་ཉིད་ལ། །གསང་བ་ཆེན་པོའི་སྣོད་དུ་གྱུར། །རྙེད་པ་མཉམ་མེད་དི་རིང་རྙེད། །ཐོབ་པ་མཉམ་མེད་དི་རིང་ཐོབ། །དམ་ཚིག་གོང་འོག་མ་འདའ་ཞིག །བླ་མེད་བྱང་ཆུབ་ཆེན་པོ་འཐོབ། །ཨོཾ་
བཛྲཱ་ཧ་སྱོདྒྷ་ཊ་ཡ་ཧཱུཾ། ཨོཾ་བཛྲ་པྲ་བེ་ཤ་ཧཱུཾ་ཕཊ། སློབ་དཔོན་ལན་གཉིས་དབྱངས་སྦྱར་ཏེ། །རྡོ་རྗེ་ཕྱག་རྒྱ་ལེགས་བཅས་ལ། །ང་ནི་དམ་ཚིག་རྡོ་རྗེ་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་འདི། །དི་རིང་ཁྱོད་ལ་སྦྱིན་པར་བྱ། །ཨོཾ་བཛྲ་ས་མ་ཡ་ཨ་བྷི་ཥིཉྩ་ཨ་
ཨ། ང་ནི་དམ་ཚིག་རིན་ཆེན་ཏེ། །རིན་ཆེན་འབྱུང་ལྡན་ཡིན་པར་གྲགས། །རིན་ཆེན་ཡེ་ཤེས་བླ་མེད་འདི། །དི་རིང་ཁྱོད་ལ་སྦྱིན་པར་བྱ། །ཨོཾ་རཏྣ་ས་མ་ཡ་ཨ་བྷི་ཥིཉྩ་ཨ་ཨ། ང་ནི་དམ་ཚིག་པདྨོ་སྟེ། །སྣང་བ་མཐའ་ཡས་ཡིན་པར་གྲགས། །པདྨོ་ཡེ་ཤེས་བླ་མེད་འདི། །དི་རིང་ཁྱོད་ལ་སྦྱིན་པར་བྱ། །ཨོཾ་པདྨ་

ས་མ་ཡ་ཨ་བྷི་ཥིཉྩ་ཨ་ཨ། ང་ནི་དམ་ཚིག་རྒྱ་གྲམ་སྟེ། །དོན་ཡོད་གྲུབ་པ་ཡིན་པར་གྲགས། །རྒྱ་གྲམ་ཡེ་ཤེས་བླ་མེད་འདི། །དི་རིང་ཁྱོད་ལ་སྦྱིན་པར་བྱ། །ཨོཾ་ཀརྨ་ས་མ་ཡ་ཨ་བྷི་ཥིཉྩ་ཨ་ཨ། ང་ནི་དམ་ཚིག་འཁོར་ལོ་སྟེ། །སྙིང་པོའི་འཁོར་ལོ་ཡིན་པར་གྲགས། །འཁོར་ལོ་ཡེ་ཤེས་བླ་མེད་འདི། །
དི་རིང་ཁྱོད་ལ་སྦྱིན་པར་བྱ། །ཨོཾ་ཙཀྲ་ས་མ་ཡ་ཨ་བྷི་ཥིཉྩ་ཨ་ཨ། ཨ་བྷི་ཥིཉྩ་ཨ་ཨ་ས་མ་ཡ་ཧྲཱིཿཐ། འདི་ནི་ཁྱོད་ཀྱི་དམྱལ་བའི་ཆུ། །དམ་ལས་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩི་ཆུ་འདིས་འགྲུབ། །ཅི་སྟེ་དམ་ཚིག་འདས་ན་ནི། །དེ་མ་ཐག་ཏུ་བཀས་
ནས་གཤེགས། །རྡོ་རྗེ་འཛིན་རྒྱལ་ཁྲོས་ནས་ཀྱང་། །བདུན་བརྒྱུད་རིགས་ནི་བརླག་པར་མཛད། །དེ་བས་རྟག་ཏུ་བུ་ཁྱོད་ཀྱིས། །རྒྱལ་བས་གསུངས་པའི་དམ་ཚིག་དང་། །སྡོམ་པ་དང་ནི་བླ་མའི་བཀའ། །ཤིན་ཏུ་མོས་པས་བསྲུང་བར་བྱ། །མ་བྱིན་པར་ཡང་བླང་
མི་བྱ། །བརྫུན་དང་འདོད་ལ་སྤྱོད་པ་རྣམས། །དངོས་གྲུབ་འདོད་པས་བྱ་བ་མིན། །ཆང་ནི་བཏུང་བར་མི་བྱ་ཞིང་། །ཤ་ལ་སོགས་པ་བཟའ་མི་བྱ། །སེམས་ཅན་གནོད་པའི་སྦྱོར་བ་ནི། །ནམ་ཡང་བྱ་བ་མ་ཡིན་ཏེ། །དཀོན་མཆོག་གསུམ་ནི་ཡོང་མི་སྤང་། །དུས་ཀུན་དུ་ན་
བྱང་ཆུབ་སེམས། །སྙིང་པོ་སྔགས་དང་ཕྱག་རྒྱ་དང་། །ལྷ་དང་བླ་མ་དེ་བཞིན་ནོ། །སྡིག་ལ་སོགས་པ་གང་ཡིན་དང་། །བླ་མའི་བཀའ་ལས་འདའ་མི་བྱ། །ལྷ་ལ་ཕུལ་བའི་རྙིང་པ་དང་། །དེ་ཡི་གྲིབ་མ་འགོམ་མི་བྱ། །ཕྱག་རྒྱའི་གཟུགས་ལ་འང་དེ་བཞིན་ནོ། །སྔགས་
དང་ལྷ་ལ་སྨད་མི་བྱ། །གདོན་གྱི་ལས་སོགས་བྱ་བ་མིན། །མུ་སྟེགས་ཅན་ལའང་སྨད་མི་བྱ། །མདོར་ན་ཡིད་གཉིས་དོགས་མི་བྱ། །བདག་གི་དེ་ཉིད་སྔགས་དང་ནི། །ཐམས་ཅད་འདྲ་བས་དེ་བཞིན་ནོ། །དེ་ནས་དབང་མཆོག་བསྐུར་བ་ནི། །པཤྩི་མ་ཡི་
ཕྱོགས་དག་ཏུ། །ཁྲུ་གང་བ་ཡི་དཀྱིལ་འཁོར་ལ། །པདྨ་འདབ་མ་བརྒྱད་པ་བྲི། །ཚོན་ནི་དམར་པོས་ལེགས་བྲིས་ལ། །བཀྲ་ཤིས་བརྒྱད་ཀྱི་ཕྱག་རྒྱ་དགོད། །དབུ་རྒྱན་ཅོད་པན་མེ་ཏོག་ཕྲེང་། །ཕྱག་རྒྱ་བཞི་དང་རིན་ཆེན་བདུན། །གསེར་བྱས་ཐུར་

མ་འཁོར་མེ་ལོང་། །དུང་དང་བཀྲ་ཤིས་རས་ཐོགས་གཞག །བདུག་སྤོས་རས་སར་གདུགས་ཤམ་ཅན། །རྔ་ཡབ་བསིལ་ཡབ་ཞོ་ཕོར་གང་། །བུམ་པ་བཞི་སོགས་མི་རེས་གཟུང་། །མཆོད་པ་ལ་སོགས་བཀྲ་ཤིས་བརྗོད། །
ཨོཾ་བྷྲྀ་ཏ་བྷྲྀ་ཏ་སརྦ་ཨཱ་བ་ར་ཎ་ནི་ཧཱུཾ་ཕཊ། ཨོཾ་ཏྲ་ཊ་ཏྲ་ཊ་སརྦ་ཨཱ་བ་ར་ཎ་ནི་ཧཱུཾ་ཕཊ། བི་དྲ་བ་བི་དྲ་བ་སརྦ་ཨ་པ་ཡ་ཏང་དྭ་ན་ཧཱུཾ་ཕཊ། སྐུ་གསུང་ཐུགས་སུ་བྱིན་གྱིས་བརླབ། །དེ་ནས་ཐུར་མ་མེ་ལོང་དུང་། །འཁོར་ལོ་རྩ་བའི་ཡིག་འབྲུས་བསྐུར། །ཕྲེང་བ་
བུམ་པ་ཉན་པ་དང་། །གསང་སྔགས་ཕྱག་རྒྱ་ཅོད་པན་དང་། །འཁོར་བསྒྱུར་མིང་དབང་དབུ་རྒྱན་དང་། །ལས་དང་བཅུའོ་གཟུངས་རྗེའོ། །བཅུ་གསུམ་པ་ནི་ནོར་དབང་བསྐུར། །འཁོར་ལོ་རིན་ཆེན་བསྟབས་པས་ནི། །ས་བཅུ་ཀུན་ལ་དབང་བ་
དང་། །ཐེག་པ་མཐའ་དག་སྟོན་པ་ཡི། །ཆོས་ཀྱི་རྒྱལ་པོ་ཆེན་པོར་ཤོག །གླང་པོ་རིན་ཆེན་བསྟབས་པས་ནི། །ཐེག་པ་ཀུན་གྱི་དོན་རྟོགས་ནས། །སྟོབས་བཅུ་ཀུན་ལ་དབང་ཐོབ་ཅིང་། །བྱང་ཆུབ་འབྲས་བུ་ཐོབ་པར་ཤོག །རྟ་མཆོག་རིན་ཆེན་
བསྟབས་པས་ནི། །རྫུ་འཕྲུལ་རྐང་བཞིའི་དབང་ཐོབ་ནས། །ཉོན་མོངས་རྒྱ་མཚོ་རྒལ་བ་ཡི། །ཐར་པའི་འབྲས་བུ་ཐོབ་པར་ཤོག །ནོར་བུ་རིན་ཆེན་བསྟབས་པས་ནི། །འཇིག་རྟེན་དག་ཏུ་དེ་བཞིན་གཤེགས། །དཔེ་བྱད་མཚན་གྱིས་བརྒྱན་པ་ཡི། །
གསེར་གྱི་སྐུ་མདོག་ཐོབ་པར་ཤོག །དམག་མི་རིན་ཆེན་བསྟབས་པས་ནི། །མི་འཇིགས་བཞི་ཡི་དབང་ཐོབ་ནས། །ཕས་ཀྱི་རྒོལ་བ་ཚར་གཅོད་པའི། །གོ་ཆ་ཆེན་པོ་བགོས་པར་ཤོག །བློན་པོ་རིན་ཆེན་བསྟབས་པས་ནི། །སུམ་ཅུ་རྩ་གསུམ་
དབང་ཕྱུག་རྗེ། །རྫུ་འཕྲུལ་ཆེན་པོའི་བརྒྱ་བྱིན་གྱི། །ལྷ་ཡི་རྒྱལ་པོ་ཐོབ་པར་ཤོག །བཙུན་མོ་རིན་ཆེན་བསྟབས་པས་ནི། །ཤེས་རབ་ཡུམ་གྱི་དབང་ཐོབ་ཅིང་། །སྐྱེ་འགག་མེད་པའི་དོན་རྟོགས་ནས། །བླ་མེད་འབྲས་བུ་ཐོབ་པར་ཤོག །དེ་

བཞིན་གཤེགས་པས་བྱིན་གྱིས་བརླབས་པ་ཡི། །ཉོན་མོངས་སེལ་བའི་གྲུབ་རྫས་དཔའ་བོ་འདིས། །བར་ཆོད་བགེགས་ཀྱི་ཚོགས་རྣམས་རྣམ་འཇིག་ཅིང་། །སྐྱེ་འགྲུབ་མཆོག་ཐོབ་དེང་འདིར་བཀྲ་ཤིས་ཤོག །ཇི་ལྟར་ལྷ་ཡི་དབང་པོ་བརྒྱ་བྱིན་གྱིས། །བྱིན་
གྱིས་བརླབས་པའི་རྩ་མཆོག་པུ་ཏ་ན། །དཱུར་བའི་གདན་ལ་བཞུགས་ནས་བདུད་བཏུལ་ལྟར། །དེང་འདིར་བཀྲ་ཤིས་ཕུན་སུམ་ཚོགས་པར་ཤོག །ཇི་ལྟར་སྔོན་གྱི་དྲང་སྲོང་ཨ་ག་སྟས། །བྱིན་གྱིས་བརླབས་པའི་ཕྱུགས་ཀྱི་དངོས་གྲུབ་འདི། །ཁྱིམ་བདག་དབང་ཕྱུག་
ཆེ་ལ་བྱིན་པ་ཡིས། །སྐྱེ་དགུའི་གསོས་གྱུར་བཅུད་ལྡན་བཀྲ་ཤིས་ཤོག །རྡོ་རྗེ་དང་ནི་རིན་ཆེན་ཆུ་སྐྱེས་དང་། །དེ་བཞིན་ལས་ཀྱི་སེམས་དཔའ་དབང་བསྐུར་བའི། །ལི་ཁྲིས་འཇིག་རྟེན་གསུམ་པོ་དབང་བསྡུས་ཤིང་། །དངོས་གྲུབ་མཆོག་ཐོབ་དིང་འདིར་བཀྲ་ཤིས་ཤོག །
ཇི་ལྟར་བཅོམ་ལྡན་འདས་ཀྱིས་ཆོས་ཀྱི་དུང་། །ན་ར་ཡ་ནར་དུང་སྒྲ་བསྒྲགས་པ་ལྟར། །བུ་ཁྱོད་དམ་པའི་ཆོས་སྒྲ་རབ་སྒྲོགས་ཤིང་། །འགྲོ་བ་འདྲེན་མཛད་དེང་འདིར་བཀྲ་ཤིས་ཤོག །ཆོས་རྣམས་ཐམས་ཅད་གཟུགས་བརྙན་ལྟ་བུ་སྟ། །སྨིག་རྒྱུ་ལྟ་བུར་ཡང་དག་
རྟོགས་པའི་མཐུས། །མ་རིག་མུན་སེལ་ཡེ་ཤེས་ཐོབ་གྱུར་ནས། །དངོས་གྲུབ་མཆོག་ཐོབ་དེང་འདིར་བཀྲ་ཤིས་ཤོག །ཇི་ལྟར་གླང་པོ་ཆེན་པོ་ཨ་ག་ཏའི། །གིའུ་ཝང་སྲོག་གི་དབང་པོར་གྱུར་པ་ལྟར། །དེ་བཞིན་བུ་ཁྱོད་ཚེ་སྲོག་འཛིན་གྱུར་ནས། །དངོས་གྲུབ་
མཆོག་ཐོབ་དེང་འདིར་བཀྲ་ཤིས་ཤོག །ཇི་ལྟར་རྒྱུ་དང་ས་བོན་ཆུང་བ་ལས། །འབྲས་བུ་ཆེར་སྨིན་ཤིང་ཐོག་བིལ་བ་ལྟར། །དེ་བཞིན་བསོད་ནམས་རྒྱུ་ཚོགས་ཆུང་ངུ་ལས། །འབྲས་བུ་བླ་མེད་བྱང་ཆུབ་ཐོབ་པར་ཤོག །གཙུག་ཏོར་སྤྱན་ལྗགས་གོ་ཆས་བསྐུར། །
ལག་གཉིས་བཅིངས་ཏེ་གུང་གཤིབས་བསྒྲེང་། །མཛུབ་གཉིས་བཀུག་སྦྱར་གཙུག་ཏོར་རོ། །ན་མཿས་མནྟ་བུདྡྷཱ་ནཱཾ་ཧཱུཾ་ཧཱུཾ་ཧཱུཾ། ལག་གཉིས་བཅིངས་ཏེ་གུང་སྲིན་ལག །བརྐྱང་སྟེ་མཐེ་བོ་ནང་བཅུག་མིག །ན་མཿས་མནྟ་བུདྡྷཱ་ནཱཾ། ག་ག་ན་བ་ར་ལ་ཀྵ་ཎ། གུ་རུ་ན་མ་

ཡ་ཏ་ཐཱ་ག་ཏ་ཙཀྵུ་སྭཱ་ཧཱ། ལག་གཉིས་ཐལ་མོ་ཁོང་སྟོང་སྦྱར། །མཛུབ་གཉིས་དཀྲིས་ལ་སྲིན་ལག་གཏུགས། །མཐེ་བོ་གཉིས་གཤིབས་ལྗགས་སུ་བཤད། །ན་མཿས་མནྟ་བུ་དྡྷཱ་ནཱཾ། ཏ་ཐཱ་ག་ཏ་ཛི་ཧྭ་སརྦ་དྷརྨཱ་པྲ་ཏི་ཏིཥྛ། ལག་པ་གཉིས་
ནི་ཁོང་སྟོང་སྦྱར། །མཛུབ་གཉིས་ངོས་ནས་དཀྲིས་པ་ནི། །གོ་ཆའི་ཕྱག་རྒྱ་ཞེས་སུ་བཤད། །ན་མཿས་མནྟ་བུདྡྷཱ་ནཱཾ། པྲ་ཙཎྜ་བཛྲ་ལ་བི་ཡུ་ར་ཧཱུཾ། དེ་ནས་སློབ་མའི་ཐོག་དག་ཏུ། །གདུགས་མཛེས་གསེར་གྱི་ཡུ་བ་ཅན། །ཐེག་ཆེན་ཆོས་ཀྱི་ངོ་བོ་སྟེ། །ཉོན་མོངས་
གདུང་བ་སེལ་བྱེད་པའི། །དབང་མཆོག་དམ་པ་བསྐུར་བར་བྱ། །སུམ་ཅུ་རྩ་ལྔས་ལེགས་དབང་བསྐུར། །དེ་ནས་དགེ་པ་སྒོ་བཞི་ནས། །སྒྲ་ཡི་རྗེས་སུ་ལེགས་སྦྱར་ཞིང་། །བློ་དང་ལྡན་པས་སྨོན་ལམ་གདབ། །ཤར་ཕྱོགས་སྒོ་ལ་པཱུ་རྦས་བསྡུ། །སྔོན་དང་ཐོག་མ་ཕུར་པས་བསྡུ། །
དེ་མཐུན་རྡོ་རྗེ་སེམས་ལ་སོགས། །སྒྲིབ་གཉིས་བྱང་བས་ཚོགས་གཉིས་རྫོགས། །དེ་བཞིན་སློབ་མ་ཚོགས་རྫོགས་ནས། །མེ་ལོང་ཡེ་ཤེས་ཐོབ་པར་ཤོག །ལྷོ་སྒོ་དཀྵི་ཎས་བསྡུའོ། །སྦྱིན་གནས་ལ་ཡང་དཀྵི་ཎ་བསྡུའོ། །ནུབ་སྒོ་པཤྩི་མས་བསྡུའོ། །ཕྱི་མ་མ་འོངས་པཤྩི་
བསྡུ། །བྱང་སྒོ་ཨུཏྟ་ར་ཡིས་བསྡུ། །ཐུགས་རྗེ་གཟུངས་ལ་ཨུཏྟ་རས་བསྡུ། །གོང་གི་རིགས་དང་ཡེ་ཤེས་དྲང་། །སྔོན་གྱི་སྨོན་ལམ་སྟོན་བསྟན་པ། །དྲི་མ་མེད་པའི་དཔེ་བཞིན་ནོ། །དཀྱིལ་འཁོར་རང་བཞིན་ལྷ་དག་ཀྱང་། །ཅི་རིགས་པར་ནི་བསྟན་པར་བྱ། །ཏནྟྲ་རྒྱ་
མཚོ་དབྱིངས་ཀྱི་གཏིང་རུམ་ནས། །དོན་མཆོག་ཆ་ཤས་བཏུས་པའི་ཉིང་ཁུ་སྟེ། །སྦྱོར་བའི་ལམ་རྒྱུད་ཕྱོགས་འགྲོལ་འབྲེལ་པ་ཡི། །མཆོག་ཐོབ་རྣམ་སྣང་མཛད་ཀྱི་ཞལ་མཐོང་ཤོག། །།རྒྱ་གར་གྱི་མཁན་པོ་སྠི་ར་མ་ཏི་ས་ཡོ་གའི་གཞུང་རྒྱུད་ཕྱི་ནང་ལས་ངེས་དོན་
མདོར་བསྡུས་ཏེ་མཛད་པ། རྒྱན་དམ་པའི་ལེའུ་བམ་པོ་གཅིག་ཏུ་བྱས་པ་རྫོགས་སོ།། །།ཅོག་རོ་ཀླུའི་རྒྱལ་མཚན་གྱིས་སྐད་ཕྱི་མོ་དང་གཏུགས་པའོ།། །།