Luận tạng Tây Tạng (Tengyur) — Tập 58

དང་། དེ་བཞིན་གཤེགས་པ་ཐམས་ཅད་མགུ་བར་བྱེད་པ་མོ་རྣམས་ཀྱི་རིག་པ་བརྗོད་པར་བྱ་སྟེ། དེ་ལྟ་བུས་འགྲུབ་པར་འགྱུར་རོ། །དེ་ནས་འདོད་པའི་ལྷའམ་དཀྱིལ་འཁོར་ཡང་རུང་སྟེ་དེའི་ཕྱག་རྒྱ་རྣམ་པ་བཞི་བཅིངས་ནས་སྔ་མ་བཞིན་དུ་མཆོད་པར་བྱའོ། །དེ་ལྟར་ན་འདི་ནི་མཆོད་པ་
ཆེན་པོ་རྣམ་པ་བཞི་ཡིན་ནོ། །བཛྲ་རཏྣ་ཞེས་བརྗོད་ཅིང་། རྡོ་རྗེ་སྙིང་པོའི་ཕྱག་རྒྱ་ཆེན་པོ་བཅིངས་ཏེ། དབང་མོ་ཆེན་མོ་དང་། སྣང་བ་ཆེན་མོ་དང་། རིན་ཆེན་ཆར་འབེབས་ཆེན་མོ་དང་། དགའ་ཞིང་མགུ་བ་ཆེན་མོའི་རིག་པ་བརྗོད་པ་དེ་ལྟ་བུས་རྡོ་རྗེ་རིན་ཆེན་རྣལ་འབྱོར་པས་འགྲུབ་པར་
འགྱུར་རོ། །དེ་བཞིན་དུ་འདོད་པའི་ལྷའམ་དཀྱིལ་འཁོར་ཡང་རུང་། དེའི་ཕྱག་རྒྱ་བཞི་བཅིངས་ཏེ། སྔ་མ་བཞིན་དུ་མཆོད་པ་བྱའོ། །རྣམ་པ་བཞི་པོ་འདི་ནི་དབང་བསྐུར་བའི་མཆོད་པ་ཡིན་ནོ། །དེ་བཞིན་དུ་བཛྲ་དྷརྨྨཱ་ཞེས་བརྗོད་ཅིང་། རྡོ་རྗེ་ཆོས་ཀྱི་ཕྱག་རྒྱ་ཆེན་པོ་བཅིངས་ནས།

ཡེ་ཤེས་ཆེན་མོའི་གླུ་མ་དང་། དབྱངས་ཆེན་མོའི་རྗེས་སུ་འབྲང་མ་དང་། དཀྱིལ་འཁོར་ཐམས་ཅད་དུ་འཇུག་མ་དང་། སྔགས་སྟོང་དུ་ཟློས་པ་རྣམས་ཀྱི་རིག་པ་བརྗོད་པ་དེ་ལྟ་བུས་འགྲུབ་པར་འགྱུར་རོ། །དེ་ནས་དེ་བཞིན་དུ་འདོད་པའི་ལྷའམ་དཀྱིལ་འཁོར་བ་ཡང་རུང་། དེ་རྣམས་ཀྱིས་མཆོད་
པ་བྱས་ཏེ། རྣམ་པ་འདི་བཞི་ནི་ཆོས་ཀྱི་མཚོན་པའོ། །དེ་ནས་བཛྲ་ཀརྨྨཱ་ཞེས་བརྗོད་ཅིང་། རྡོ་རྗེ་ལས་ཀྱི་ཕྱག་རྒྱ་ཆེན་པོ་བཅིངས་ཏེ། སེམས་ཅན་ཆེན་མོ་དང་། བྱང་ཆུབ་ཀྱི་ཡན་ལག་མ་དང་། །མིག་ལྡན་མ་དང་། དྲི་ལྡན་མ་རྣམས་ཀྱི་རིག་པ་བརྗོད་པར་བྱའོ། །རྡོ་རྗེ་ལས་ཀྱི་རྣལ་འབྱོར་དེ་
ལྟ་བུས་འགྲུབ་པར་འགྱུར་རོ། །དེ་ནས་དེ་རྣམས་སྔ་མ་བཞིན་རང་འདོད་པའི་ལྷའམ། དཀྱིལ་འཁོར་ལ་མཆོད་པ་བྱའོ། །རྣམ་པ་བཞི་པོ་འདི་ནི་ལས་ཀྱི་མཆོད་པའོ། །དེ་ལྟར་མཆོད་པ་རྣམ་པ་བཞི་པོ་རྣམས་ཀྱིས་རྡོ་རྗེ་སེམས་དཔའ་ལ་སོགས་པའི་སྦྱོར་བ་བཞིས་མཆོད་པ་ཆེན་པོ་ལ་སོགས་པ་
རྣམ་པ་བཞི་རྫོགས་པ་ལས་བྱས་ནས་ཐུན་བཞིའི་སྦྱོར་བས་བྱང་ཆུབ་ཏུ་སེམས་བསྐྱེད་པ་ལ་སོགས་པའི་ལས་བྱས་ཏེ། དེ་བཞིན་གཤེགས་པའི་རིགས་ཀྱི་རྣལ་འབྱོར་པས་དེ་ལྟར་བདག་ཉིད་མཆོད་ནས། དེ་བཞིན་གཤེགས་པ་ཐམས་ཅད་ལ་ཕྱག་བཞི་བྱས་ཏེ། ཕྱག་རྒྱ་ཆེན་པོ་ལ་སོགས་པ་
བསྒོམ་པར་བྱའོ། །དེ་ལ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །མ་རུངས་སེམས་ཅན་ཞེས་བྱ་བ་ནི་སྡིག་པ་ཆེན་པོ་བྱེད་པའོ། །དེ་དག་ལ་གནོད་པར་བྱ་བའི་ཕྱིར། སྡུག་བསྔལ་བ་ལས་བཏོན་ནས་སྡིག་པ་ལས་བཟློག་པའོ། །དེའི་དོན་དུ་ཅུང་ཟད་ཅིག་བྱང་ཆུབ་ཏུ་སེམས་བསྐྱེད་པ་ལ་
སོགས་པ་རྡོ་རྗེའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རྣམ་པ་བཞི་ལས་ཀྱི་མཚན་ཉིད་ཀྱི་དགོས་པའི་བྱ་བ་གང་བྱེད་པ་དེ་ཁྲོ་བོའི་རིགས་ཀྱི་རྣལ་འབྱོར་པས། ལས་ཀྱི་རིགས་ཀྱི་རྣམ་པ་བཞི་པོ་འདི་རྡོ་རྗེའི་རིགས་ཀྱི་དངོས་གྲུབ་ཐམས་ཅད་རབ་ཏུ་སྦྱིན་པར་བྱེད་པ་ཡིན་ནོ། །འདི་
སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། དེ་ནས་རྡོ་རྗེ་ཁྲོ་བོའི་སྒེག་མོ་ལ་སོགས་པའི་མཆོད་པ་རྣམ་པ་བརྒྱད་ཀྱིས་བདག་ཉིད་ཡང་དག་པར་མཆོད་

ལ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ལས་བཤད་པའི་མཆོད་པ་རྣམས་དེ་ལས་བཤད་པའི་ཆོ་གས་སྤྲུལ་ལ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་རྣལ་འབྱོར་
ཆེན་པོ་བཅིངས་ཏེ། རང་གི་མཆོད་པ་རྣམ་པ་བཞིའི་རིག་པ་བརྗོད་པར་བྱའོ། །དེ་ལྟར་རིན་ཆེན་ཧཱུཾ་མཛད་དང་། ལས་ཀྱི་ཧཱུཾ་མཛད་རྣམས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་པོ་བཅིངས་ཏེ། ལས་དང་པོ་པ་རྣམས་ཀྱིས་རིག་པ་བརྗོད་ཅིང་
བརྟན་པར་བྱས་ལ། ཕྱིས་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་བཤད་པའི་དེའི་ལས་ཀྱི་ཕྱག་རྒྱ་ཇི་ལྟ་བ་བཞིན་དུ་བཅིངས་ཏེ། ལས་དང་པོ་པ་རྣམས་ཀྱིས་མ་རུངས་པའི་སེམས་ཅན་ལ་གནོད་པ་ལ་སོགས་པ་དེ་རྣམས་ཀྱིས་ནམ་མཁའི་ཁམས་ཐམས་
ཅད་བཀང་ནས་རང་གི་ལྷའམ། དཀྱིལ་འཁོར་པ་སྔ་མ་བཞིན་མཆོད་པར་བྱའོ། །དེ་ལྟར་འདིར་ཡང་མཆོད་པ་རྣམ་པ་བཞིས་ལས་ཀྱི་དཀྱིལ་འཁོར་ཐམས་ཅད་ཡང་དག་པར་མཆོད་ལ་ཕྱག་བཞི་བྱས་ཏེ། རང་གི་ཁྲོ་བོའི་ལྷའི་ཕྱག་རྒྱ་ཆེན་པོ་ལ་སོགས་པ་བསྒོམ་པར་བྱའོ། །དེ་ལ་ཞེས་
བྱ་བ་ལ་སོགས་པ་ནི་སྔ་མ་བཞིན་ནོ། །འཇིགས་པས་གཟིར་ལ་མི་འཇིགས་སྦྱིན། །ཞེས་བྱ་བ་ནི་འཆི་བ་ལ་སོགས་པའི་རིག་པའི་འཇིགས་པས་གཟིར་བ་རྣམས་འཆི་བ་ལ་སོགས་པ་བསལ་ཏེ། དབུགས་འབྱིན་པར་བྱེད་པའོ། །ཇི་བཞིན་པར་ནི་འདུལ་དེ་བཞིན། །ཞེས་བྱ་བ་ནི་འགྲོ་
བ་འདུལ་བ་ལ་སོགས་པའི་ཏིང་ངེ་འཛིན་གྱིས་གདུལ་བྱ་རྣམས་དེའི་ངོ་བོར་བསྐྱེད་པ་ཇི་བཞིན་པའི་འདུལ་བའོ། །འདི་ནི་པདྨོའི་རིགས་ཀྱི་ལས། །ཞེས་བྱ་བ་ནི་མི་འཇིགས་པ་སྦྱིན་པ་ལ་སོགས་པ་གང་ཡིན་པ་དེས་ཇི་ལྟ་བ་བཞིན་དུ་འདུལ་བར་བྱེད་པ་འདི་ནི་པདྨའི་རིགས་ཀྱི་རྣལ་འབྱོར་པའི་ལས་
ཀྱི་བྱ་བ་ཡིན་ནོ། །འདིས་ལས་ཅི་ཞིག་བྱེད་ཅེ་ན། སངས་རྒྱས་དངོས་གྲུབ་རབ་སྦྱིན་བྱའོ། །ཞེས་བྱ་བ་སྨོས་ཏེ། འཇིག་རྟེན་དབང་ཕྱུག་ཉིད་སྟེར་བར་བྱེད་དོ་ཞེས་བྱ་བའི་དོན་ཏོ། །དེ་ཉིད་ཀྱིས་བཅོམ་ལྡན་འདས་བྱང་ཆུབ་སེམས་དཔའ་དེ་བཞིན་གཤེགས་ཞེས་གསུངས་པས་སོ། །

དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་ཉིད་འཇིག་རྟེན་དབང་ཕྱུག་གི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། པདྨའི་སྒེག་མོ་ལ་སོགས་པའི་མཆོད་པ་བརྒྱད་ཀྱིས་བདག་ཉིད་ཡང་དག་པར་མཆོད་དེ།
པདྨའི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་ཆོ་གས་དཀྱིལ་འཁོར་གྱི་ལྷ་རྣམས་སྤྲུལ་ལ། འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། རང་གི་མཆོད་པ་རྣམ་པ་བཞིས་རིག་པ་བརྗོད་པར་བྱའོ། །དེ་བཞིན་དུ་གཙུག་ཕུད་སངས་རྒྱས་དང་། ཏིང་ངེ་འཛིན་པདྨ་དང་། པདྨ་དོན་
ཡོད་དབང་ཕྱུག་གི་ཕྱག་རྒྱ་ཆེན་པོ་བཅིངས་ཏེ། ལས་ཀྱི་ཕྱག་རྒྱ་དཀྱིལ་འཁོར་ཆེན་པོ་ལས་བཤད་པའི་རང་གི་རིགས་ཀྱི་ལྷ་མོ་རྣམ་པ་བཞིའི་རིག་པ་བརྗོད་ཅིང་། དེ་ནས་དེ་རྣམས་ཀྱི་ལས་ཀྱི་ཕྱག་རྒྱ་རྣམས་ཀྱིས་རང་གི་ལྷའམ། དཀྱིལ་འཁོར་ལ་མཆོད་པ་བྱས་ནས། མི་འཇིགས་པའི་
སྦྱིན་པ་ལ་སོགས་པས་སེམས་ཅན་གྱི་ཁམས་ཚིམ་པར་བྱའོ། །དེ་ལྟར་མཆོད་པ་རྣམ་པ་བཅུ་དྲུག་གིས་ཡང་དག་པར་མཆོད་དེ། ཕྱག་བཞི་བྱས་ནས། རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། སྔ་མ་བཞིན་དུ་བསྒོམ་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་
ནོ། །དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་ནོར་བུའི་རིགས་ཀྱི་གཟུགས་སུ་བསྐྱེད་དེ་དབང་བསྐུར་ནས། དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་ཐམས་ཅད་སྔ་མ་བཞིན་དུ་རིན་པོ་ཆེ་ལ་སོགས་པ་དང་། གཟུང་བ་དང་འཛིན་པའི་
རྣམ་པར་རྟོག་པ་སྤངས་པའི་ནོར་ནི་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་མངོན་པར་འདོད་པའི་དོན་ཐམས་ཅད་དང་། རེ་བ་ཐམས་ཅད་རྫོགས་པར་བྱེད་པ་ཡིན་ནོ། །དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་རྣམས་ལ་དབང་བསྐུར་བ་ལ་
སོགས་པ་འདི་དག་བསྟན་པ་ནི། སངས་རྒྱས་དབང་བསྐུར་དེ་བཞིན་དུ། ཞེས་བྱ་བ་སྨོས་ཏེ། འདི་ནི་ནོར་བུའི་རིགས་ཀྱི་ལས་སོ། །དེས་ཅི་ཞིག་བྱེད་ཅེ་ན། ལས་ཀྱི་དོན་ཀུན་གྲུབ་བྱེད་པའོ། །ཞེས་བྱ་བ་སྨོས་ཏེ། དོན་ཡང་ཡིན་ལ་ཀུན་ཡང་ཡིན་པས་ན་དོན་ཀུན་ཏེ། ནོར་བུའི་

རིགས་ཀྱིའོ། །དེ་རྫོགས་ཤིང་གྲུབ་པར་བྱེད་པ་ནི་ནོར་བུའི་རིགས་ཀྱི་རྣལ་འབྱོར་པས་ནོར་བུའི་རིགས་གྲུབ་པར་བྱེད་དོ་ཞེས་བྱ་བའི་ཐ་ཚིག་གོ། །དེའི་དོན་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་
པ་ལ་སོགས་པའི་རང་གི་ལྷའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། རིན་ཆེན་སྒེག་མོ་ལ་སོགས་པའི་མཆོད་པ་བརྒྱད་ཀྱིས་བདག་ཉིད་ཡང་དག་པར་ཇི་ལྟ་བ་བཞིན་དུ་མཆོད་ལ། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ཆོ་གས་ནོར་བུའི་རིགས་
ཀྱི་ལས་ཀྱི་དཀྱིལ་འཁོར་གྱི་ལྷ་རྣམས་སྤྲུལ་པར་བྱའོ། །དེ་ནས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་རང་གི་ལྷ་མོ་བཞི་རིགས་རྣམ་པ་བཞི་བརྗོད་པར་བྱའོ། །དེ་ལྟར་
རིན་ཆེན་ལྟ་བ་དང་། རིན་ཆེན་པདྨ་དང་། རིན་ཆེན་ཆར་འབེབས་ཀྱི་ཕྱག་རྒྱ་ཆེན་པོ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་ལྷ་མོ་བཞིའི་རིག་པ་རྣམས་བརྗོད་ཅིང་། དེ་རྣམས་ཀྱིས་དེ་བཞིན་དུ་དབང་བསྐུར་བ་བྱིན་པ་ལས་རེ་བ་ཐམས་ཅད་ཡོངས་སུ་རྫོགས་པའི་ལས་ནི་
སངས་རྒྱས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ལ་ནམ་མཁའི་ཁམས་ཐམས་ཅད་ཁྱབ་པར་བསྒྲུབས་ནས་ལས་ཀྱི་ཕྱག་རྒྱ་དེ་རྣམས་ཀྱིས་སྔ་མ་བཞིན་དུ་རང་གི་ལྷའམ། དཀྱིལ་འཁོར་གྱི་ལྷ་རྣམས་མཆོད་པར་བྱའོ། །དེ་ལྟར་མཆོད་པ་རྣམ་པ་བཅུ་དྲུག་གིས་ཡང་དག་
པར་མཆོད་དེ། ཕྱག་བཞི་བྱས་ནས། རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། སྔ་མ་བཞིན་དུ་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་ཀྱི་ཚོགས་ཡོངས་སུ་རྫོགས་པར་བསྟན་ནས།
ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ཐུན་མོང་དུ་བསྒྲུབ་པ་དང་དངོས་གྲུབ་ཀྱི་ཁྱད་པར་དུ་འགྱུར་བ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ལ་

སོགས་པ་ནི་གོ་སླའོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། དེ་རྣམས་ཀྱི་ཆོས་ཉིད་བསྐྱེད་པའི་རྒྱུར་གྱུར་པ་ནྱ་གྲོ་དྷ་ལ་སོགས་པའི་ས་བོན་བཞིན་དུ་དེ་ཉིད་ཀྱི་ཕྱག་རྒྱའོ། །དེར་ངེས་པའི་ཡེ་ཤེས་དེའི་དངོས་གྲུབ་ནི་ཕྱག་རྒྱ་ཆེན་པོ་ལ་
སོགས་པའི་སྒྲུབ་པ་སྟོན་པར་བྱེད་པའི་རྒྱུད་དོ། །འདི་གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེའོ། །དེ་ལ་ཞེས་བྱ་བ་ལ་སོགས་པ་ནི་གོ་སླའོ། །རྡོ་རྗེ་སེམས་དཔའི་ཏིང་ངེ་འཛིན། །ཞེས་བྱ་བ་ལ། རང་གི་སྙིང་གའི་སེམས་དཔའི་རྡོ་རྗེ་ལ་དམིགས་པའི་ཐུགས་རྩེ་གཅིག་པའོ། །ནིའི་སྒྲ་ནི་ངེས་
པར་གཟུང་བ་སྟེ། རྡོ་རྗེ་སེམས་དཔའི་ཏིང་འཛིན་ནི། །སངས་རྒྱས་རྣམས་ཀྱི་ཆོས་ཉིད་དགོངས། །ཞེས་བྱ་བའོ། །རྣམ་པར་སྣང་མཛད་ལ་སོགས་པ་ནས་དོན་ཡོད་གྲུབ་པའི་མཐར་ཐུག་པ་ནི་དེ་བཞིན་གཤེགས་པ་བསྐྱེད་པའི་རྒྱུར་གྱུར་པར་བཤད་དོ། །ཅིའི་ཕྱིར་ཞེ་ན། འདི་ནི་སངས་རྒྱས་སངས་
རྒྱས་ཉིད། །ཅེས་བྱ་བ་སྨོས་ཏེ། གང་གི་ཕྱིར་སངས་རྒྱས་བཅོམ་ལྡན་འདས་འདི་ནི་སངས་རྒྱས་ཉིད་ཀྱི་རྒྱུ་ཡིན་ནོ་ཞེས་བྱ་བའི་ཐ་ཚིག་གོ། །འདི་ཉིད་ཀྱང་གང་ལས་ཤེ་ན། གཞན་ལས་སངས་རྒྱས་འགྱུར་བ་མེད། །ཅེས་བྱ་བ་སྨོས་ཏེ། གང་གི་ཕྱིར་རྡོ་རྗེ་སེམས་དཔའི་ཏིང་ངེ་འཛིན་ནི་སངས་
རྒྱས་སུ་འགྱུར་གྱི་གཞན་དུ་མི་འགྱུར་བ་དེའི་ཕྱིར། རྡོ་རྗེ་སེམས་དཔའི་ཏིང་འཛིན་ནི། །སངས་རྒྱས་རྣམས་ཀྱི་ཆོས་ཉིད་དགོངས། །ཞེས་བྱའོ། །ཁ་ཅིག་ན་རེ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི། ཕྱག་རྒྱ་ཆེན་པོའི་རྣམ་པར་སེམས་རྩེ་གཅིག་པ་ནི་རྡོ་རྗེ་སེམས་དཔའི་ཏིང་ངེ་འཛིན་ཉིད་དེ། སངས་
རྒྱས་ཉིད་ཀྱི་རྒྱུ་ཡིན་ནོ་ཞེའོ། །གཞན་དག་ནི་འདི་མ་ཡིན་ཏེ། གང་གི་ཕྱིར། བདག་ཉིད་ཆེན་པོ་གང་གང་གི །ཕྱག་རྒྱ་གང་དང་གང་བཅིངས་པའི། །བཟླས་པའི་སྙིང་པོའི་དོན་དུ་ནི། །དེར་ནི་བདག་ཉིད་བསྒོམ་པར་བྱའོ། །ཞེས་བཅོམ་ལྡན་འདས་ཀྱིས་སྔར་གསུངས་པ་ཡིན་ནོ། །ཡང་
དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱི་ཕྱག་རྒྱའི་རྒྱུད་ལས། དེ་བཞིན་གཤེགས་པ་དྲན་བྱེད་ཅིང་། །སངས་རྒྱས་ཕྱག་རྒྱ་བཅིངས་ནས་ནི། །སངས་རྒྱས་བྱང་ཆུབ་བསྟན་པ་ཡང་། །བསྒྲུབས་ན་མྱུར་དུ་འགྲུབ་པར་འགྱུར་རོ། །ཞེས་དེ་མ་ཐག་འཆད་པར་འགྱུར་རོ། །གཞན་ཡང་

ཕྱག་རྒྱ་ཆེན་པོ་ལ་སོགས་པའི་རང་གི་ལྷའི་ཕྱག་རྒྱ་བཞིས་རང་གི་ལྷའི་ང་རྒྱལ་ཉིད་ཀྱིས་བསྒྲུབ་པར་བྱའོ་ཞེས་བྱ་བ་ནི། ཕྱག་རྒྱ་ཐམས་ཅད་བཅིངས་ནས་ནི། །བདག་ཉིད་དེ་ཡི་མདུན་དུ་ཡང་། །སངས་རྒྱས་རྗེས་སུ་དྲན་པ་བསྒོམ། །དེ་ནས་དེ་མ་ཐག་ཏུ་འགྲུབ། །ཅེས་
འཆད་པར་འགྱུར་བ་དེ་བས་ན་རང་གི་ལྷའི་ཕྱག་རྒྱ་བཅིངས་ཏེ། རང་གི་ལྷའི་གཟུགས་ཉིད་དུ་བསྒོམ་པར་བྱའོ། །ངེས་པ་ཁོ་ནར་རྡོ་རྗེ་སེམས་དཔའི་ཕྱག་རྒྱ་ཆེན་པོའི་རྣམ་པར་སེམས་རྩེ་གཅིག་པར་མི་བྱའོ། །དེ་བཞིན་གཤེགས་པའི་ཕྱག་རྒྱ་བསྒོམ་པ་རྣམས་ཀྱིས་རང་གི་སྙིང་གའི་སེམས་
དཔའི་རྡོ་རྗེ་ལ་རྡོ་རྗེ་སེམས་དཔའ་ཞེས་བྱ་བ་སེམས་དཔའི་རྡོ་རྗེ་རྣམ་པ་ཁོ་ན་ཡིན་པར་ཐེ་ཚོམ་མི་བྱའོ། །འདི་སྐད་དུ་ཡང་། དེ་ཉིད་བཅོམ་ལྡན་སེམས་དཔའ་ཆེ། །ཐམས་ཅད་སེམས་དེ་ཉིད་བདག་གོ། །སྐུ་དང་གསུང་ཐུགས་རྡོ་རྗེ་ནི། །སེམས་དཔའ་བརྟན་པར་རང་བྱུང་གི། །སེམས་དཔའ་
ཀུན་གྱི་མཆོག་སེམས་དཔའ། །རྡོ་རྗེ་སྙིང་གར་རབ་བསྒོམས་ནས། །རྡོ་རྗེ་སེམས་དཔའ་ཞེས་གྲགས་ཏེ། །འདི་ལ་རྡོ་རྗེ་རབ་ཏུ་གནས། །ཞེས་གསུངས་སོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་
ཕྱག་རྒྱ་ཆེན་པོ་བཅིང་བའམ་དམ་ཚིག་དང་ཆོས་དང་ལས་ཀྱི་ཕྱག་རྒྱ་ཆེན་པོ་བཅིངས་ནས། རང་གི་སྙིང་གའི་ཟླ་བར་ཧཱུཾ་ལས་རྡོ་རྗེ་རྩེ་ལྔ་པ་རྣམ་པར་བསམས་ཏེ། དེའི་དབུས་སུ་སྙིང་པོ་བཀོད་ལ། ཐུགས་ཀའི་སེམས་དཔའི་བདག་ཉིད་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་
བསྒོམ་པར་བྱའོ། །ཕྱག་རྒྱ་ཆེན་པོ་བསྒོམས་ནས་ནི། །དངོས་གྲུབ་ཐམས་ཅད་བསྒྲུབ་པར་བྱ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་བསྒྲུབ་པར་འདོད་པའི་རྣལ་འབྱོར་པ་རྣམས་ཀྱིས་ཇི་ལྟ་བ་བཞིན་དུ་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་
ཕྱག་རྒྱ་བཅིངས་ནས་དེ་བསྒྲུབ་པར་བྱའོ། །རྡོ་རྗེ་སེམས་དཔའ་ལ་སོགས་པའི་རང་གི་ལྷའི་སྐུའི་གསང་བ་བསྒོམས་ནས་ཡང་དང་ཡང་མངོན་དུ་བྱས་ཏེ། བཟླས་པ་དོན་དུ་གཉེར་བས་བསྒྲུབ་པར་བྱའོ། །ཅིའི་ཕྱིར་ཞེ་ན། གང་གི་ཕྱིར། འདིར་ནི་དེ་བཞིན་གཤེགས་རིགས་ཀྱི། །ཞེས་བྱ་

བ་སྨོས་ཏེ། ཇི་སྐད་དུ་བཤད་པ་དེ་དག་གིའོ། །ཆོས་ཉིད་དངོས་གྲུབ་དམ་པ་ཐོབ། །ཅེས་བྱ་བ་ལ་ཡང་ཞེས་བྱ་བའི་སྒྲ་ནི་དེ་བཞིན་གཤེགས་པ་རྣམས་དང་། རིགས་ཐམས་ཅད་ཀྱང་གི་ཆོས་ཉིད་འདི་ཡིན་ནོ་ཞེས་བཤད་དོ། །ཕྱག་རྒྱ་ཆེན་པོའི་ཚུལ་གྱིས་ནི། །དམ་ཚིག་མཆོག་ནི་
བཅིངས་ནས་ཀྱང་། །ལས་རྣམས་ཐམས་ཅད་བསྒྲུབས་ནས་ནི། །ཞེས་བྱ་བ་ལ། རྡོ་རྗེ་རིགས་སུ་བཤད་པའི་དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོ་ཐམས་ཅད་ནི་དམ་ཚིག་གི་ཕྱག་རྒྱའི་ངོ་བོ་ཡིན་པའི་ཕྱིར་རོ་ཞེས་བཤད་ཟིན་ཏོ། །དེ་རྣམས་ནི་སངས་རྒྱས་རྣམས་
ཀྱི་དམ་ཚིག་མཆོག་སྟེ། དམ་ཚིག་དང་། ཆོས་དང་། ལས་དང་ཕྱག་རྒྱ་ཆེན་པོ་རྣམས་ཀྱིས། སངས་རྒྱས་ལ་སོགས་པའི་ལས་རྣམས་ཐམས་ཅད་བསྒྲུབ་ཅིང་རྫོགས་པར་བྱེད་པའོ། །ཇི་ལྟར་བསྒྲུབ་པ་ཡིན་ཞེ་ན། ཕྱག་རྒྱ་ཆེན་པོའི་ཚུལ་གྱིས་ནི། །ཞེས་བྱ་བ་སྨོས་ཏེ། ཕྱག་རྒྱ་ཆེན་པོའི་
སྦྱོར་བ་ནི་ཕྱག་རྒྱ་ཆེན་པོའི་ཚུལ་ལོ། །དངོས་གྲུབ་ཀུན་སྦྱོར་སངས་རྒྱས་ཀྱི། །བཀས་ནི་སེམས་ཅན་ཀུན་དོན་དུ། །ཕྱག་རྒྱ་ཆེན་པོ་བསྒྲུབས་ན་ནི། །ཚེ་འདི་ཉིད་ལ་སངས་རྒྱས་འགྲུབ། །ཅེས་སྔར་བསྟན་ཟིན་པའི་ཕྱག་རྒྱ་ཆེན་པོའི་རྒྱུར་གྱུར་པ་དེས། རྡོ་རྗེའི་དངོས་གྲུབ་དང་། རྡོ་རྗེའི་རིགས་ཀྱི་
དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། རྡོ་རྗེ་ཆེན་པོའི་རིགས་ཀྱི་སྦྱོར་བས་ཕྱག་རྒྱ་ཆེན་པོའི་དངོས་གྲུབ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་དངོས་གྲུབ་གང་དང་གང་བསྒྲུབ་པར་འདོད་པ་དེ་དང་དེ་ཉིད་ཀྱི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ། ཕྱག་
རྒྱ་ཆེན་པོ་བསྒོམ་པའི་སྦྱོར་བ་ཉིད་ཀྱིས་བསྒོམ་ཞིང་བསྒྲུབ་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་སྟོན་པ་ནི། ཆོས་ཀྱི་ཕྱག་རྒྱའོ། །པདྨའི་རིགས་ཀྱི་ཕྱག་རྒྱ་རྣམ་པ་བཞིའི་ཕྱག་རྒྱར་སྦྱོར་བ་ནི། ཆོས་ཀྱི་ཕྱག་རྒྱའི་ཚུལ་ལོ། །སྔར་བཤད་པའི་འགྲོ་བ་འདུལ་བའི་ཕྱག་རྒྱ་ཆེན་
པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་བསྒོམ་པའི་ཚུལ་གྱིས་དེས་ཆོས་ཀྱི་ཕྱག་རྒྱ་རྗོད་པར་བྱེད་ཅིང་སྒོམ་པར་བྱེད་ཅེས་བྱ་བའི་ཐ་ཚིག་གོ། །གང་གིས་འགྲུབ་པར་འགྱུར་ཞེ་ན། རྡོ་རྗེ་ཆོས་ཀྱི་ལས་རྣམས་ནི། །ཆོས་ཉིད་དུ་ནི་འདིས་གྲུབ་བོ། །ཞེས་བྱ་བ་སྨོས་ཏེ། ཆོས་ཀྱི་

ཕྱག་རྒྱ་བསྒོམ་པའི་སྦྱོར་བ་འདི་ཉིད་ཀྱིས་སོ། །གང་གི་ཚེ་ཕྱག་རྒྱ་ཆེན་པོ་ལ་སོགས་པའི་རང་བཞིན་གྱིས་འཕགས་པ་སྤྱན་རས་གཟིགས་དབང་ཕྱུག་གིས་ཆོས་ཀྱི་ཕྱག་རྒྱ་དངོས་སུ་བརྗོད་པ་དེའི་ཚེ། ཅིའི་ཕྱིར་ཆོས་ཀྱི་ཕྱག་རྒྱ་བསྒོམ་པའི་སྦྱོར་བ་དེས་ཆོས་ཀྱི་ཕྱག་རྒྱ་ལ་
འཇུག་པར་འགྱུར་ཞེ་ན། རྡོ་རྗེ་ཆོས་ཀྱི་ཆོས་རྣམས་ནི། །ཆོས་ཉིད་དུ་ནི་འདིས་འགྲུབ་བོ། །ཞེས་བྱ་བ་སྨོས་ཏེ། གང་གི་ཕྱིར་ཆོས་འདི་བསྐྱེད་པའི་རྒྱུ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་ཆོས་ནི་འཕགས་པ་སྤྱན་རས་གཟིགས་དབང་ཕྱུག་ཡིན་པའི་ཕྱིར་རོ། །འདི་སྐད་སྟོན་པ་ཡིན་ཏེ། རྡོ་རྗེ་པདྨའི་རིགས་ཀྱི་ཕྱག་རྒྱ་ཆེན་
པོ་ལ་སོགས་པའི་རྣམ་པ་བཞི་སྒྱུ་མ་ལྟ་བུར་རང་བཞིན་གྱིས་རྣམ་པར་དག་པར་བསྒོམ་པར་བྱ་བ་ཡིན་ནོ། །དབང་བསྐུར་བ་ལ་སོགས་པའི་ངོ་བོས་སེམས་ཅན་ཐམས་ཅད་ཀྱི་རེ་བ་ཡོངས་སུ་རྫོགས་པར་བྱེད་པའི་ལས་སྟོན་པའི་ཕྱག་རྒྱ་ནི་ལས་ཀྱི་ཕྱག་རྒྱ་སྟེ། ནོར་བུའི་རིགས་ཀྱི་ཕྱག་རྒྱ་ཆེན་
པོ་ལ་སོགས་པ་ཕྱག་རྒྱ་ཐམས་ཅད་དོ། །དེའི་སྦྱོར་བས་ནོར་བུའི་རིགས་ཀྱི་ཕྱག་རྒྱ་ཆེན་པོ་ལ་སོགས་པ་བསྒྲུབ་པའི་རྒྱུད་སྟོན་པ་དེ་ནི་ལས་ཀྱི་ཕྱག་རྒྱའི་ཚུལ་གྱིས་ཏེ། རྡོ་རྗེ་ནོར་བུ་ཆེན་པོ་རྩེ་མོ་བཅུ་གཉིས་སྟོན་པའི་ལས་ནི། ལས་ཀྱི་རྡོ་རྗེ་སྙིང་གར་གཞག །ཆོས་ཉིད་འདི་དག་བསྒོམས་ནས་
ནི། །ཞེས་བྱ་བ་ལ་དོན་ཐམས་ཅད་གྲུབ་པ་ལ་སོགས་པ་ཐོབ་པར་འགྱུར་རོ། །ཅི་འདྲ་བ་ཞིག་ཅེ་ན། ལས་རྣམས་ཀུན་ནི་ཐོབ་པར་འགྱུར། །ཞེས་བྱ་བ་སྨོས་ཏེ། ལས་ཐམས་ཅད་པ་ནི་ནོར་བུའི་རིགས་ཀྱི་ཕྱག་རྒྱ་ཆེན་པོ་ལ་སོགས་པ་དངོས་གྲུབ་དེས་ནི་ལས་ཐམས་ཅད་ཐོབ་པར་འགྱུར་བའོ། །
འདི་སྐད་སྟོན་པ་ཡིན་ཏེ། སྔར་བཤད་པའི་ནོར་བུའི་རིགས་ཀྱི་ཕྱག་རྒྱ་ཆེན་པོ་ལ་སོགས་པའི་སྦྱོར་བ་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཡི་གེ་དབྱངས་ཡིག་གསུམ་པ་དང་ལྡན་པས་བཅོམ་ལྡན་འདས་ནོར་བུ་མཆོད་པ་དང་ཆོས་ཀྱི་ཡི་གེ་ལས་རྡོ་རྗེ་ནོར་བུ་མཚན་མའི་སྣ་ཚོགས་རྡོ་རྗེ་
སྙིང་གར་སྤྲུལ་ལ། དེའི་སྟེང་དུ་བཟླས་པའི་ཡི་གེ་རྣམ་པར་བསམས་ནས་དེ་ཉིད་བརྗོད་ཅིང་ནོར་བུའི་རིགས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་སམ་ཕྱག་རྒྱ་ཆེན་པོ་ལ་སོགས་པའི་བསྒྲུབ་པའི་སྦྱོར་བ་བྱའོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་

རྒྱ་ནི་ཕྱག་རྒྱ་ཆེན་པོ་རྡོ་རྗེ་རིགས་ཀྱི་ཕྱག་རྒྱ་ནི་དམ་ཚིག་གི་ཕྱག་རྒྱའོ། །པདྨའི་རིགས་ཀྱི་ཕྱག་རྒྱ་ནི་ཆོས་ཀྱི་ཕྱག་རྒྱའོ། །ནོར་བུའི་རིགས་ཐམས་ཅད་ཀྱི་ཕྱག་རྒྱ་ནི་ལས་ཀྱི་ཕྱག་རྒྱའོ་ཞེས་གྲགས་པ་ཉིད་ཡན་ལག་ཏུ་བྱ་བ་ཡིན་ནོ། །དེ་ཡན་ལག་ཏུ་བྱས་པར་གྱུར་པ་ན་ཕྱག་རྒྱ་ལྷག་མ་རྣམས་ནི་ཆོས་ཉིད་
དུ་གྱུར་པས་དངོས་གྲུབ་ཏུ་འགྱུར་བ་ཡིན་ནོ། །དེ་བཞིན་དུ་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཆོས་ཉིད་ཐམས་ཅད་བསྟན་ནས་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་སྒྲུབ་པ་ན། སྒྲུབ་པ་པོ་ལ་ངེས་པ་
བསྐྱེད་ནས་འཇུག་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའི་དངོས་གྲུབ་ཀྱི་རྒྱུད་འདི་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་རྣམས་ནི་ཡེ་ཤེས་
ཀྱི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཡེ་ཤེས་སོ། །དེ་སྒྲུབ་པའི་ཕྱིར་སྒོམ་པའི་ཕྱག་རྒྱ་དེས་དངོས་གྲུབ་ཀྱི་ཡེ་ཤེས་ཀྱི་དངོས་གྲུབ་དེ་སྟོན་པར་བྱེད་པ་ནི་རྒྱུད་དོ། །གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་
རྡོ་རྗེ་སེམས་དཔའི་ཏིང་ངེ་འཛིན་ལ་བརྟེན་པའོ། །སྦྱོར་བ་གང་གིས་ཤེ་ན། ཟླ་བ་རྡོ་རྗེའི་ཚུལ་གྱིས་ཏེ། །ཞེས་བྱ་བ་ལ་སོགས་པ་སྨོས་ཏེ། ཟླ་བ་རྡོ་རྗེའི་ཚུལ་ནི་སེམས་དཔའ་རྡོ་རྗེའི་རྣམ་པར་བསྒོམ་པའོ། །ཟླ་བ་རྡོ་རྗེའི་ཚུལ་གྱིས་ནི། །རྡོ་རྗེ་སེམས་དཔའི་ཏིང་ངེ་འཛིན་ལ་གནས་པའི་རྣལ་འབྱོར་
པས་སོ། །ཇི་ལྟར་དེ་གཉིས་ཁ་དོག་ཤེས། །ཞེས་བྱ་བ་ནི་རྡོ་རྗེ་དང་ཟླ་བ་གཉིས་ཀྱིའོ། །དེ་ལྟར་འཇིག་རྟེན་དེས་ཞེས་བྱ་བ་ནི་རྣལ་འབྱོར་པས་སོ། །ཤེས་ཏེ་ཞེས་བྱ་བ་ནི་བསྒོམ་པའི་ཤེས་པས་སོ། །དེ་ཉིད་བཤད་པ་ནི། དག་ལ་དག་དང་ཞེས་བྱ་བ་ལ་སོགས་པའོ། །དག་པ་ནི་ཤེལ་དང་
འདྲ་བ་དྲི་མ་མེད་པའོ། །ཤེལ་དང་འདྲ་བའི་ཟླ་བ་རྡོ་རྗེ་མཐོང་བ་ནི་དག་པ་སྟེ། རྣལ་འབྱོར་པའི་སེམས་ཀྱིས་ཤེས་བྱ་ཤེས་པའོ། །དཀར་བ་ནི་ཟླ་བ་རྡོ་རྗེ་ཁ་དོག་དཀར་པོ་མཐོང་བའོ། །འོད་གསལ་བ་ནི་ལས་ཀྱི་སྒྲིབ་པ་སྤངས་པ་དང་། སྡིག་པའི་མན་པ་དང་བྲལ་བའི་སྣང་བ་དང་བཅས་

པའོ་ཞེས་བྱ་བའི་དོན་ཏོ། །དམར་པོ་ནི་ཆགས་པས་ཟིལ་གྱིས་མནན་པས་ཟླ་བ་རྡོ་རྗེ་དམར་པོ་མཐོང་བའོ། །རབ་དམར་ཁྲོ་ཞེས་བྱ་བ་ནི་ཤིན་ཏུ་དམར་བའོ། །ཤེས་ནས་ཁ་དོག་ཇི་བཞིན་པ། །དེ་ཡི་བདག་ཉིད་ཉིད་དུ་འགྱུར། །ཇི་སྐད་བཤད་པའི་ཁ་དོག་དེ་དག་གི་ནང་ནས་ཅི་འདྲ་
བ་ཟླ་བ་རྡོ་རྗེའི་གཟུགས་སུ་མཐོང་བ་དེ་འདྲ་བ་ཉིད་འགྲོ་བའི་སེམས་སུ་ཤེས་པར་བྱ་བའོ། །རྣམ་པར་སྣང་མཛད་ལ་སོགས་པའི་རྣལ་འབྱོར་པར་གང་གི་ཚེ་རང་དང་གཞན་དག་གི་དགོས་པ་ཤེས་པར་འདོད་པ་དེའི་ཚེ་ཇི་ལྟ་བ་བཞིན་དུ་བདག་དང་གནས་བསྲུང་བ་དང་། སྔ་མ་བཞིན་དུ་དེ་བཞིན་གཤེགས་པ་
ཐམས་ཅད་ཀྱི་རྣལ་འབྱོར་བྱས་ནས། མཆོད་པ་ཐམས་ཅད་ཀྱིས་ཡང་དག་པར་མཆོད་ལ། ཕྱག་བཞི་བྱས་ནས་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་ཟླ་བར་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་རྣམ་པར་བསམས་ཏེ། ཆོས་ཐམས་ཅད་གཟུགས་བརྙན་དང་མཚུངས་པ་བདེན་པ་གང་ཡིན་པ་དང་། སྒྲ་
བརྙན་དང་མཚུངས་པ་བདེན་པ་གང་ཡིན་པ་དེས་བཅོམ་ལྡན་འདས་རྡོ་རྗེ་སེམས་དཔའ་ལ་སོགས་པའི་འབྲས་བུ་ནི་མཐོང་བ་དང་འདི་དག་གི་འབྲས་བུ་གྲུབ་པར་གྱུར་ཅིག་ཅེས་བདེན་པའི་བྱིན་གྱིས་བརླབས་ནས། ཨོཾ་སརྦྦ་ཏ་ཐཱ་ག་ཏ་མ་ཧཱ་ཡོ་གི་ཤྭ་ར་ཧཱུཾ་ཞེས་བྱ་བ་ལ་སོགས་པ་དེ་བཞིན་གཤེགས་པ་རང་རང་གི་
སྔགས་སམ་སྤྱིའི་སྙིང་པོ་རྡོ་རྗེའི་ཚིག་གིས་བརྗོད་ཅིང་། རང་གི་སྙིང་གར་ཟླ་བ་རྡོ་རྗེ་བསྒོམས་ན་ངེས་པར་ཐམས་ཅད་ཀྱིས་མཐོང་ཞིང་ཐོས་པར་འགྱུར་རོ། །ཟླ་བའི་དཀྱིལ་འཁོར་འོད་བཅས་པ། །ཕྱག་རྒྱ་ཆེན་པོ་བཅིངས་ནས་ནི། །ཞེས་བྱ་བ་ལ་སོགས་པ་ནི་རྡོ་རྗེ་སེམས་དཔའ་ལ་སོགས་པ་ནས་
རྡོ་རྗེ་འབེབས་པའི་མཐར་ཐུག་པའི་ཕྱག་རྒྱ་ཆེན་པོ་རྣམས་ཀྱི་ནང་ནས་ཕྱག་རྒྱ་ཆེན་པོ་གང་ཡང་རུང་བ་བཅིངས་ཏེ། དེའི་རྣམ་པར་སེམས་རྩེ་གཅིག་ཏུ་བྱས་ནས་བསྒྲུབ་པར་བྱའོ། །ཟླ་བ་དཀྱིལ་འཁོར་དང་བཅས་པའི། །ཞེས་བྱ་བ་ནི་ཟླ་བའི་དཀྱིལ་འཁོར་དང་མཚུངས་པའི་འོད་གང་ལ་མངའ་བ་
དེ་ནི་ཟླ་བའི་དཀྱིལ་འཁོར་གྱི་འོད་ཅན་ནོ། །རང་གི་ལུས་ལ་ཇི་ལྟར་ཤེས། །ཞེས་བྱ་བ་ནི་ཇི་ལྟར་ཤེས་པ་དེ་ལྟར་འགྲོ་བའི་ཡིད་ཤེས་པའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་ལ། དེ་བཞིན་གཤེགས་པའི་རིགས་ཀྱི་རྣལ་འབྱོར་པས་གང་གི་ཚེ་རང་དང་གཞན་གྱི་

དགོས་པ་ཤེས་པར་འདོད་པ་དེའི་ཚེ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རང་གི་སྙིང་གའི་ཟླ་བར་སྔ་མ་བཞིན་དུ་རྡོ་རྗེའི་རྣམ་པར་བསམས་ཏེ། རྡོ་རྗེའི་དབུས་སུ་སྙིང་པོ་བཀོད་ལ་དེ་ཉིད་བརྗོད་ཅིང་སྔ་མ་བཞིན་དུ་བདེན་པའི་བྱིན་རླབས་བྱས་ནས། རང་གི་ལྷའི་གཟུགས་སུ་བསྒོམས་ན་ངེས་པར་ཐམས་ཅད་
ཀྱིས་མཐོང་ཞིང་ཐོས་པར་འགྱུར་རོ། །ཁྲོས་པར་གྱུར་ན་དཀྱིལ་འཁོར་ནི། །ཞེས་བྱ་བ་ནི་དེ་ལ་ནམ་མཁའ་ནི་རབ་ཏུ་གྲགས་པའོ། །རས་སམ་རྩིག་པའམ་ལུགས་སུ་བླུགས་པ་ལ་སོགས་པ་ཕྱོགས་གཞན་དག་ཏུའོ། །དེ་ལ་ཁྲོས་པར་དཀྱིལ་འཁོར་ནི། །ཞེས་བྱ་བ་ནི་ཁྲོ་བའི་ལྷའི་ཉམས་མངོན་དུ་བྱེད་པ་ནི་ཁྲོ་བོ་
སྟེ། ཁྲོ་བོའི་རྣལ་འབྱོར་པས་དེས་ཁྲོ་བོ་དེ་བདག་ཉིད་དུ་གྱུར་པ་ནམ་མཁའ་ལ་སོགས་པ་ལ་དཀྱིལ་འཁོར་དཀར་པོ་ལ་སོགས་པར་མཐོང་བར་གྱུར་ཏེ། ཁྲོ་བའི་ཏིང་ངེ་འཛིན་གྱི་མཐུས་དེ་ལྟ་བུས་ཡིད་ཀྱིས་ཤེས་ཤིང་རང་དང་གཞན་གྱི་ཡིད་ཤེས་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འཇིག་
རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཇི་ལྟ་བ་བཞིན་དུ་མཆོད་པ་དང་ཕྱག་བཞི་བྱས་ཏེ། ཕྱག་རྒྱ་ཆེན་པོ་ལ་སོགས་པ་བཅིངས་ནས། རང་གི་སྙིང་གར་རྡོ་རྗེ་ལ་སྙིང་པོ་བཀོད་ཅིང་དེ་ཉིད་བརྗོད་པར་བྱའོ། །བདེན་པའི་བྱིན་
གྱི་རླབས་ཀྱིས་སྔ་མ་བཞིན་དུ་རང་གི་ལྷའི་ངོ་བོ་ཇི་སྲིད་ནམ་མཁའ་ལ་སོགས་པར་མཚན་མ་སྟོན་པར་གྱུར་པའི་ཟླ་བའི་དཀྱིལ་འཁོར་ལ་སོགས་པའི་གཟུགས་སུ་མཐོང་བ་དང་། སྒྲ་ཐོས་པར་འགྱུར་བ་དེ་སྲིད་ཀྱི་བར་དུ་བསྒོམ་པར་བྱའོ། །ནམ་མཁའི་ས་ཕྱོགས་ཕྲ་མོའམ། །ཞེས་བྱ་བ་ནི་རྡོ་རྗེ་ཕྲ་མོའོ། །ཡི་གེ་
ཕྲེང་བ་མཐོང་གྱུར་ན། །ཞེས་བྱ་བ་ནི་མངོན་པར་འདོད་པའི་དངོས་པོ་སྟོན་པར་བྱེད་པའི་ཡི་གེ་ཕྲེང་བ་བྲིས་པ་ནམ་མཁའ་ལ་སོགས་པར་བསྒོམ་པའི་ཤེས་པས་མཐོང་བར་གྱུར་པས་མདོར་ན་ཁ་དོག་ཅི་འདྲ་བར་ཤེས་པ་དེ་འདྲར་དེ་སེམས་ཤེས་ཞེས་བྱའོ། །འདི་སྐད་དུ་སྟོན་པ་ཡིན་ཏེ། སྔ་མ་བཞིན་དུ་
འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་ཉིད་འཇིག་རྟེན་དབང་ཕྱུག་གི་རྣལ་འབྱོར་བྱས་ཏེ་ཆོ་ག་ཐམས་ཅད་རྗེས་སུ་སྤྱད་ལ་རང་གི་སྙིང་གར་རྡོ་རྗེ་པདྨ་དེའི་སྟེང་དུ་སྙིང་པོ་བཀོད་ལ། དེ་ཉིད་བརྗོད་ཅིང་བདེན་པའི་བྱིན་གྱིས་བརླབས་པར་བྱས་ནས་རང་ཉིད་འཇིག་རྟེན་དབང་ཕྱུག་ཏུ་བསྒོམ་པར་

བྱའོ། །དེ་ནས་རྡོ་རྗེ་ཕྲ་མོའམ་ཡི་གེ་ཕྲེང་བ་ཁ་དོག་ཅི་འདྲ་བར་མཐོང་བ་དེ་བཞིན་དུ་དེའི་འབྲས་བུ་ཤེས་པར་འགྱུར་རོ། །འཇིག་རྟེན་ཡང་ཡིན་ལ་ཀུན་ཀྱང་འདི་ཡིན་པས་ན་འཇིག་རྟེན་ཀུན་ཏེ། བཅོམ་ལྡན་འདས་ནམ་མཁའི་སྙིང་པོའོ། །བལྟས་ནས་ཀྱང་ནི་བསྒོམས་ནས་
ཀྱང་ངོ་། །ཅི་འདྲ་བ་ཞིག་ཅེ་ན། ཇི་ལྟ་བུར་ནི་སྣང་འགྱུར་ཞིང་། །ཞེས་བྱ་བ་སྨོས་ཏེ། རང་གི་ལྷའི་སྐུ་མདོག་དང་དབྱིབས་ཅི་འདྲ་བ་དེ་འདྲ་ཉིད་དུ་དེ་བསྒོམ་པར་བྱའོ། །མཐོང་བར་འགྱུར་བ་དེ་འདྲ་བར། །འགྲོ་བའི་སེམས་ནི་ཤེས་པར་བྱ། །ཞེས་བྱ་བ་ནི་རྣལ་འབྱོར་པས་རང་གི་ལྷའི་གཟུགས་
ཁ་དོག་དཀར་པོ་ལ་སོགས་པའི་རང་བཞིན་དུ་ཅི་འདྲ་བར་བསྒོམས་ནས། འགྲོ་བའི་སེམས་ཀྱང་དེ་དང་འདྲ་བ་ཉིད་དུ་བསྒོམས་པའི་སྟོབས་ཀྱིས་མཐོང་བར་འགྱུར་རོ། །དེ་བཞིན་དུ་མཐོང་བ་དེའི་འབྲས་བུ་ཤེས་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། ནོར་བུའི་རིགས་ཀྱི་རྣལ་འབྱོར་
སྔ་མ་བཞིན་དུ་བྱས་ནས་ཆོ་ག་ཐམས་ཅད་རྗེས་སུ་སྤྱད་དེ། རང་གི་སྙིང་གར་རྡོ་རྗེ་ཆེན་པོའི་དབུས་སུ་བཟླས་པའི་སྙིང་པོ་ཡིད་ཀྱིས་བྲིས་ཏེ། ཆོས་ཐམས་ཅད་གཟུགས་བརྙན་དང་མཚུངས་པའི་བདེན་པ་གང་ཡིན་པ་དང་སྒྲ་བརྙན་དང་མཚུངས་པའི་བདེན་པ་གང་ཡིན་པ་དེས་འབྲས་བུ་འདི་བཅོམ་ལྡན་
འདས་ནམ་མཁའི་སྙིང་པོ་དང་འདྲ་བར་གྱུར་ཅིག་ཅེས་བྱ་བའི་བདེན་པའི་བྱིན་རླབས་བྱས་ནས། ཇི་ལྟར་བྲིས་པའི་བཟླས་པ་བརྗོད་ཅིང་རང་གི་ལྷ་བསྒོམ་པ་དེས་ཐམས་ཅད་ཀྱིས་མཐོང་བར་འགྱུར་རོ། །དེ་ཉིད་ནི་སྙོམས་ཞུགས་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས་ནོར་བུའི་རིགས་ཀྱི་
མཐར་ཐུག་པའི་དངོས་གྲུབ་ཀྱི་ཡེ་ཤེས་བསྒོམས་པ་ལས་བྱུང་བའི་ལུས་ཀྱི་སོ་སོར་སྣང་བའི་གཟུགས་ཀྱིས་འགྲོ་བར་བྱེད་པས་འགྲོ་བར་སྟོན་པ་དང་། འོང་བར་བྱེད་པས་འོང་བར་རབ་ཏུ་སྟོན་པའོ། །འཆགས་པ་ལའང་ཞེས་བྱ་བ་ནི་ཇི་ལྟར་མཐོང་བའི་རྣལ་འབྱོར་དེས་དེ་ལྟར་འབྲས་བུ་བརྟགས་
པ་ནི་འབྲས་བུ་ཐོབ་པའོ། །སྙོམས་པར་ཞུགས་ཏེ་བསམས་ན་ནི། །ཞེས་བྱ་བ་ནི་རྣལ་འབྱོར་པས་ཇི་ལྟར་འདོད་པའི་དངོས་པོ་བསྒོམ་པའོ། །སེམས་ཅན་གང་དང་གང་ཡིན་པ། །ཞེས་བྱ་བ་ནི་རྣམ་པར་སྣང་མཛད་ལ་སོགས་པ་མོས་པ་ནི་སེམས་ཅན་དེ་དང་དེ་ནི་རྣམ་པར་སྣང་མཛད་ལ་སོགས་

པའོ། །དེ་བཞིན་དུ་བཤད་མ་ཐག་པའི་སྙོམས་པར་འཇུག་པའི་རྣམ་པ་དེས་སེམས་ཅན་ཐམས་ཅད་ཀྱི་སེམས་རྣམས་རྟོགས་ཤིང་ཁོང་དུ་ཆུད་པར་འགྱུར་རོ། །འདི་སྐད་སྟོན་པ་ཡིན་ཏེ། དཀར་པོ་ལ་སོགས་པའི་གཟུགས་འབའ་ཞིག་སྟོན་པ་ནི་མ་ཡིན་གྱི་ཇི་སྐད་བཤད་པའི་སྙོམས་པར་འཇུག་པ་སྔོན་
དུ་བྱས་པས་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་ཀྱང་ཤེས་པར་འགྱུར་རོ། །དེ་ལྟར་རང་དང་གཞན་དག་ཕྱག་རྒྱ་ཆེན་པོ་ལ་སོགས་པ་བསྒྲུབས་ནས་སྐལ་བ་དང་ལྡན་པ་དང་། སྐལ་བ་དང་མི་ལྡན་པ་ཆོས་སུ་བརྟག་པའི་ཡེ་ཤེས་དང་། དངོས་པོ་ཐམས་ཅད་ལ་ཐེ་ཚོམ་སེལ་བའི་
ཡེ་ཤེས་མཁྱེན་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཡེ་ཤེས་ཀྱི་ཕྱག་རྒྱའི་དངོས་གྲུབ་ཀྱི་རྒྱུད་བསྟན་ནས། ད་ནི་ཕྱག་རྒྱ་ཆེན་པོ་ལ་སོགས་པ་བསྒོམས་ནས་ཀྱང་། གང་གི་ཚེ་མཚན་མ་ཐོབ་པར་གྱུར་པ་དེའི་འགྲུབ་པར་འགྱུར་རོ་ཞེས་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་ཕྱག་རྒྱ་ཆེན་པོ་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། ཇི་སྐད་དུ་བཤད་པའི་དངོས་གྲུབ་དེ་དག་སྟོན་པའི་ཡེ་ཤེས་ནི་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱི་ཡེ་ཤེས་
སོ། །དེའི་ཆོ་ག་རྒྱས་པ་ནི་དེ་བཞིན་གཤེགས་པ་ལ་སོགས་པ་ཐ་དད་པས་བྱེ་བྲག་རྒྱས་པའོ། །དེ་སྟོན་པར་བྱེད་པའི་རྒྱུད་དོ། །གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །དེ་ལ་ཞེས་བྱ་བ་ལ་སོགས་པ་ནི་གོ་སླའོ། །སེམས་དཔའི་བྱིན་གྱིས་བརླབས་ཚུལ་གྱིས། །ཞེས་བྱ་
བ་ནི་སེམས་དཔའི་རྡོ་རྗེ་རབ་ཏུ་སྣང་བའོ། །དེས་སེམས་དཔར་བྱིན་གྱིས་བརླབས་པའི་སྦྱོར་བས་སངས་རྒྱས་དངོས་གྲུབ་ཐོབ་པར་ཞེས་བྱ་བར་སྦྱར་རོ། །གང་ལས་སྐྱེ་བར་འགྱུར་ཞེ་ན། སངས་རྒྱས་གཟུགས་སུ་བདག་བསྒོམས་ན། །ཞེས་བྱ་བ་ལ་སོགས་པ་སྨོས་ཏེ། རྣམ་པར་སྣང་མཛད་ལ་སོགས་
པ་དེ་བཞིན་གཤེགས་པ་རྣམས་སོ། །བདག་ཉིད་བསྒོམས་པའི་རྣམ་པར་སྣང་མཛད་གང་ཡིན་པ་དེ་བདག་ཡིན་ནོ་ཞེས་བྱ་བ་ནས། དོན་ཡོད་གྲུབ་པ་གང་ཡིན་པ་དེ་བདག་ཡིན་ནོ་ཞེས་ང་རྒྱལ་བསྐྱེད་པར་བྱའོ། །སེམས་དཔར་བྱིན་གྱིས་བརླབས་པའི་སྦྱོར་བ་བསྒོམ་པ་གང་ཡིན་པ་དེ་བསྐྱེད་

པའོ། །ཡེ་ཤེས་ནི་ཚུལ་དེ་ཡིས་ཞེས་བྱ་བ་ནི་སེམས་དཔར་སྦྱོར་བའི་བྱིན་གྱིས་རློབ་པའི་སྦྱོར་བ་ཉིད། ཡེ་ཤེས་ཀྱི་ནི་ཚུལ་དེ་ཡིས། །ཞེས་བྱ་བ་སྨོས་ཏེ། ཚུལ་ནི་ཏིང་ངེ་འཛིན་གྱི་ཚུལ་ལོ་ཞེས་བསྟན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དེ་བཞིན་གཤེགས་
པའི་རྣལ་འབྱོར་བསྒོམ་པའི་རྣལ་འབྱོར་པས། བསྒོམ་པའི་བདག་ཉིད་ཀྱི་ཡེ་ཤེས་ཀྱིས་གང་གི་ཚེ་སྙིང་གར་སེམས་དཔའི་རྡོ་རྗེ་ཉིན་རེ་བཞིན་ཐུན་བཞིའི་མཐོང་བར་གྱུར་པ་དེའི་ཚེ། མཚན་ཐོག་ཐག་དེ་བཞིན་གཤེགས་པའི་བདག་ཉིད་དུ་བསྒོམས་ནས་སངས་རྒྱས་ཉིད་མངོན་སུམ་དུ་བྱེད་པར་
འགྱུར་རོ། །དེའི་ཕྱིར། སངས་རྒྱས་དངོས་གྲུབ་ཐོབ་པར་འགྱུར། །ཞེས་བྱ་བ་གསུངས་སོ། །ནམ་མཁའ་ནི་གྲགས་པར་ཟད་དོ། །ཕྱོགས་གཞན་དུ་བཤད་ཟིན་ཏོ། །སེར་སྐྱའི་འོད་ཀྱི་དཀྱིལ་འཁོར་ནི་ཟླ་བའི་དཀྱིལ་འཁོར་སེར་སྐྱར་མཐོང་བ་ཡིན་ཏེ། འབའ་ཞིག་མཐོང་བ་ནི་མ་ཡིན་
ནོ། །ཇི་ལྟ་བུ་ཞེ་ན། སེམས་དཔའ་ཉིད་ཀྱི་ཕྱག་རྒྱ་ཉིད། །མངོན་སུམ་ཉིད་དུ་མཐོང་གྱུར་ནའོ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ། རྣལ་འབྱོར་པ་བསྒོམ་པ་ལ་སོགས་པ་ན།
སེམས་དཔའ་རང་ཉིད་ཀྱི་ཕྱག་རྒྱ་སྟེ། རྡོ་རྗེ་སེམས་དཔའ་ལ་སོགས་པ་ཇི་སྐད་དུ་བཤད་པའི་སེམས་དཔའ་དེ་ཉིད་ཀྱི་ཕྱག་རྒྱས་རྡོ་རྗེ་སེམས་དཔའ་ཉིད་ལ་སོགས་པའི་གཟུགས་སུ་རྣལ་འབྱོར་པ་བདག་ཉིད་མངོན་སུམ་དུ་མཐོང་བར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་སེམས་
དཔའ་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། ཇི་སྐད་དུ་བཤད་པའི་ཚུལ་གྱིས་རྡོ་རྗེ་སེམས་དཔའ་ལ་སོགས་པ་བསྒོམས་ནས་ཉིན་རེ་ཞིང་ཐུན་བཞིའི་སྦྱོར་བས་ནམ་མཁའི་ཕྱོགས་སུ་ཟླ་བའི་དཀྱིལ་འཁོར་སེར་སྐྱའི་གཟུགས་སུ་ངོ་བོ་ཇི་སྲིད་བདག་ཉིད་མཐོང་བར་གྱུར་པ་དེའི་ཚེ། ཇི་ལྟ་བ་
བཞིན་དུ་མཚན་ཐོག་ཐག་བཟླས་ཤིང་བསྒོམས་ན་འགྲུབ་པར་འགྱུར་རོ། །དེ་ལྟ་བུ་ཡི་དབྱིབས་གྱུར་པ། ཞེས་བྱ་བ་ནི་སེར་སྐྱའི་འོད་ཀྱིས་དཀྱིལ་འཁོར་དུ་སྣང་བ་གྲུབ་པས་ན་དབུས་སུ་སྔོ་བསངས་ནི་ཨུཏྤ་ལ་སྔོན་པོ་ལྟ་བུའོ། །སྣང་བ་ནི་ཞེས་བྱ་བ་ནི་མངོན་པ་དང་མཐོང་བ་ཞེས་བྱ་བའི་

ཐ་ཚིག་གོ། །རྡོ་རྗེ་རིགས་ཀྱི་རྣལ་འབྱོར་པ་འདི་དངོས་གྲུབ་ཀྱི་ཡེ་ཤེས་སོ། །རྡོ་རྗེ་རིགས་ཀྱི་མཆོག་གི་དངོས་གྲུབ་ནི་དམ་ཚིག་གོ། །ཅི་སྟེ་འདོད་ན་མྱུར་དུ་ཐོབ། །ཅེས་བྱ་བ་ནི་གལ་ཏེ་རྡོ་རྗེ་རིགས་ཀྱི་རྣལ་འབྱོར་པ་སྒྲུབ་པར་འདོད་ནས། དེ་སྲིད་པ་ནི་མཁའ་འདྲ་ཡི། །ཞེས་བྱ་བ་ནི་རྡོ་རྗེ་རིགས་ཀྱི་རྣལ་འབྱོར་
པ་བསྒོམས་པའི་སྟོབས་ཀྱིས་ནམ་མཁའ་དང་འདྲ་བའི་ཁ་དོག་སྔོན་པོའི་དཀྱིལ་འཁོར་མཐོང་བ་གང་ཡིན་པ་དེ་ལྟ་བུ་པདྨའི་རིགས་ཀྱི་རྣལ་འབྱོར་པས་གང་གི་ཚེ་ནམ་མཁའ་ལ་པདྨ་སྔོན་པོའི་ཁ་དོག་ཅན་གྱི་དཀྱིལ་འཁོར་བསྒོམས་པའི་སྟོབས་ཀྱིས་མཐོང་བ་དེའི་ཚེ། པདྨ་ཆེན་པོའི་རིགས་རིག་པའི། །དངོས་གྲུབ་
ཏུ་ནི་ལེགས་པར་འགྱུར། །ཞེས་བྱ་བ་དེ་ཤེས་པར་བྱའོ། །ནམ་མཁའ་འམ་ནི་ཕྱོགས་གཞན་ན། །ཞེས་བྱ་བ་ནི་ནོར་བུའི་རིགས་ཀྱི་རྣལ་འབྱོར་པའི་བསྒོམ་པའི་ཡེ་ཤེས་ཀྱིས་སེར་སྐྱའི་དཀྱིལ་འཁོར་དེ་ཉིད་སྟོན་ཀའི་ནམ་མཁའ་དྲི་མ་མེད་པ་ལས་འོད་ཟེར་གྱི་དཀྱིལ་འཁོར་འཕྲོ་ཞིང་གཡོ་བར་མཐོང་བ་ན། མཐོང་
ན་མྱུར་དུ་དངོས་གྲུབ་ཐོབ། །ཅེས་བྱའོ། །ད་ནི་ཇི་སྐད་དུ་བཤད་པའི་དེ་བཞིན་གཤེགས་པ་ལ་སོགས་པའི་རྣལ་འབྱོར་པ་རྣམས་ཀྱིས་དངོས་གྲུབ་ཀྱི་ཡེ་ཤེས་འདི་འབའ་ཞིག་མ་ཡིན་གྱི་གཞན་ཡང་ཡིན་ནོ་ཞེས་བསྟན་པར་བྱ་བའོ་ཞེས། རྡོ་རྗེ་སེམས་སོགས་སེམས་དཔའ་རྣམས། །ཞེས་བྱ་བ་ལ་སོགས་པ་སྨོས་ཏེ།
རྡོ་རྗེ་སེམས་དཔའ་དང་པོར་བྱ་བ་གང་ཡིན་པ་དེ་ནི་རྡོ་རྗེ་སེམས་དཔའ་ལ་སོགས་པའོ། །དེ་གང་ཡིན་ཞེ་ན། རྡོ་རྗེ་རྒྱལ་པོ་ནས་བརྩམས་ནས་རྡོ་རྗེ་འབེབས་པའི་མཐར་ཐུག་པའི་སེམས་དཔའོ། །ཁྱད་པར་ཇི་ལྟ་བུ་ཞིག་ཅེ་ན། ཟླ་བའི་དཀྱིལ་འཁོར་འོད་བཅས་ཏེ། ཟླ་བའི་དཀྱིལ་འཁོར་དང་མཚུངས་པའི་འོད་ཀྱི་དཀྱིལ་
འཁོར་རོ། །ཟླ་བའི་དཀྱིལ་འཁོར་དང་བཅས་པ་གང་ཡིན་པ་དེ་ནི་སྔར་བསྟན་ཟིན་ཏོ། །ནམ་མཁའ་འམ་ནི་ཕྱོགས་གཞན་དུ་བདག་ཉིད་ཇི་ལྟ་བུ་ཞེ་ན། མི་བརྟན་པའི་གཟུགས་ཀྱི་སྣང་བ་ཙམ་གྲུབ་པའི་དུས་སུ་མདུན་དུ་མཐོང་བ་ཡིན་ལ། དངོས་གྲུབ་ཀྱི་དུས་སུ་ནི་དཀྱིལ་འཁོར་གྲགས་པའི་ཁ་དོག་དང་
དབྱིབས་ཅན་གྱི་རང་བཞིན་གྱི་གཟུགས་བྱོན་ནས་སྒྲུབ་པ་པོ་ལ་བདག་ཉིད་སྟོན་པར་འགྱུར་རོ། །དེ་ནས་སྐད་ཅིག་མ་དེ་ཉིད་ལ་རྣལ་འབྱོར་པ་འདི་རྡོ་རྗེ་འཆང་ཆེན་པོ་ལ་སོགས་པའི་དངོས་གྲུབ་འགྲུབ་པར་འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དངོས་གྲུབ་ཀྱི་ཡེ་ཤེས་ཀྱི་རྒྱུད་བསྟན་ནས།

ད་ནི་ཕྱག་རྒྱ་ཆེན་པོ་ལ་སོགས་པའི་བསྒོམས་པ་ནས་མཚན་མ་ཐོབ་པར་གྱུར་པ་མངོན་པར་ཤེས་པ་ལྔ་བསྒྲུབ་པར་བྱའོ་ཞེས་བྱ་བ་ནི། དེ་ནས་ཞེས་བྱ་བ་ལ་སོགས་པ་མངོན་པར་ཤེས་པའི་དངོས་གྲུབ་ཀྱི་ཡེ་ཤེས་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་
རིགས་ཀྱང་ཡིན་པས་ན། དེའི་མངོན་པར་ཤེས་པའི་དངོས་གྲུབ་རྫོགས་པའོ། །དེའི་ཡེ་ཤེས་དེ་སྟོན་པའི་རྒྱུད་དོ། །གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་སྙིང་གའི་ཟླ་བའི་རྡོ་རྗེའི་རྣམ་པར་སེམས་རྩེ་གཅིག་པ་ནི་རྡོ་རྗེ་སེམས་
དཔའི་ཏིང་ངེ་འཛིན་ཏོ། །དེ་ལ་གནས་ཞེས་བྱ་བ་ནི་རྡོ་རྗེ་སེམས་དཔའི་ཏིང་ངེ་འཛིན་ལ་གནས་ནས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ལྔའི་རྣལ་འབྱོར་པས་སྤྱི་གཙུག་ནས་བརྩམས་ཏེ། རྐང་མཐིལ་གྱི་བར་དུ་ལུས་ཐམས་ཅད་ལ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་
པའི་གཟུགས་དང་། རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་རྣམས་ཀྱང་བློས་བསྒོམས་ན་མཐོང་བ་ཡིན་ནོ། །དེ་བཞིན་ལུས་ལས་ཞེས་བྱ་བ་ནི་རང་གི་ལུས་ལ་བྱུང་བ་ཁོ་ནའོ། །འདི་སྐད་སྟོན་པ་ཡིན་ཏེ། མཚན་མ་ཐོབ་པའི་དེ་བཞིན་གཤེགས་པའི་རྣལ་འབྱོར་པས་སེམས་དཔའི་
རྡོ་རྗེ་ཏིང་ངེ་འཛིན་མངོན་དུ་བྱས་ནས། དེ་བཞིན་གཤེགས་པའི་ཕྱག་རྒྱ་ཆེན་པོ་ལ་སོགས་པ་མངོན་དུ་བྱས་ཏེ། དེའི་ཚེ་རང་གི་དེ་བཞིན་གཤེགས་པའི་སྐུ་ལ་དེ་བཞིན་གཤེགས་པའི་གཟུགས་བསྒོམས་ནས། ཡིད་ཀྱིས་ལེགས་པའི་སྦྱོར་བ་སྔ་མ་བཞིན་དུ་བཅུག་ལ་བ་སྤུའི་ཁུང་བུ་རེ་རེར་རྡོ་རྗེ་སེམས་དཔའ་
ལ་སོགས་པ་བྱང་ཆུབ་སེམས་དཔའ་རྣམས་བཞུགས་པར་བསྒོམ་པར་བྱའོ། །དེ་ནས་བརྟན་པར་གྱུར་པ་དང་རང་གི་ལུས་ལས་སྐུ་རྣམས་ཕྱུང་ནས། ནམ་མཁའ་ལ་སོགས་པར་སྤྲོས་པ་དེ་ལྟ་བུས་དེ་བཞིན་གཤེགས་པའི་རྣལ་འབྱོར་པའི་མངོན་པར་ཤེས་པའི་དངོས་གྲུབ་ཏུ་འགྱུར་བ་ཡིན་ནོ། །རྡོ་རྗེ་
སེམས་དཔའ་ཕྱག་རྒྱ་ཆེ། །ཞེས་བྱ་བ་ལ། རྡོ་རྗེ་སེམས་དཔའ་ནི་རྡོ་རྗེ་སེམས་དཔའ་ནས་བརྩམས་ནས། རྡོ་རྗེ་འབེབས་པའི་མཐར་ཐུག་པ་དེ་དག་གི་ཕྱག་རྒྱ་རྣམ་པ་བཞིའི་ཕྱག་རྒྱ་དེ་ཉིད་ཇི་སྐད་བཤད་པའི་ཚུལ་གྱིས་བཅིང་བའོ། །ནི་ཞེས་བྱ་བའི་སྒྲ་ནི་ངེས་པར་གཟུང་བའོ། །རབ་མཉམ་

གཞག་པས་བཅིངས་ནས་ནི། །ཞེས་བྱ་བ་ལ། རབ་ཏུ་མཉམ་པར་གཞག་པ་ནི་མཚན་མ་ཐོབ་པས་སེམས་གཡེང་བ་མེད་པའོ། །མངོན་ཤེས་ལྔ་ནི་ཐོབ་པར་འགྱུར། །ཞེས་བྱ་བ་ནི་མངོན་པར་ཤེས་པ་རྣམས་ནི་མངོན་ཤེས་ཏེ། ལྷའི་མིག་ལ་སོགས་པའི་ངོ་བོར་ངེས་པའི་ཡེ་ཤེས་དེ་ཐོབ་
པ་ནི་རྙེད་པའོ། །ཇི་ལྟར་ཐོབ་པར་འགྱུར་ཞེ་ན། སྒྲུབ་པའི་ཆོ་ག་འདི་ཡིས་ནི། །ཞེས་བྱ་བ་སྨོས་ཏེ། དེ་མ་ཐག་ཏུ་འཆད་པར་འགྱུར་བའི་རྣལ་འབྱོར་པ་སྒྲུབ་པ་པོའི་ཆོ་ག་འདིས་སོ། །དེ་ལ་འདི་ནི་འཕྲུལ་གྱི་སྤྱན་གྱི་ཡེ་ཤེས་བཤད་དོ་ཞེས་བྱ་བ་ནི་བློ་ལ་གནས་པས་ན་འདིའོ། །ཕྱག་རྒྱ་ཆེན་པོ་མཉམ་གཞག་
སྟེ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་ཕྱག་རྒྱ་ཇི་སྐད་དུ་བཤད་པ་བཅིངས་ཏེ་བརྟན་པར་བྱས་པའོ། །མིག་གི་རྣམ་ཤེས་བསྐྱེད་ནས་ཀྱང་། །ཞེས་བྱ་བ་ནི་སྒོམ་པ་པོས་སོ། །ཇི་ལྟར་ཞེ་ན། ཡི་གེ་ཨོཾ་གྱིས་དེ་བཞིན་གཤེགས་པ་ཐམས་ཅད་ཀྱི་ལྷའི་
སྤྱན་བཀུག་ནས་རང་གི་མིག་ལ་བཞག་སྟེ། དེ་ནས་དེ་བཞིན་གཤེགས་པའི་ལྷའི་སྤྱན་རང་གི་མིག་དང་གཅིག་ཏུ་གྱུར་པར་བསམ་པར་བྱའོ། །དེ་ནས་ཅིར་འགྱུར་ཞེ་ན། གང་ཡང་རུང་བ་དེ་བསམས་ན། །ཞེས་བྱ་བ་སྨོས་ཏེ། གཟུགས་གང་ཅི་ཡང་རུང་བ་འཇིག་རྟེན་གྱི་ཁམས་གཞན་ན་གནས་པ་
རྣམས་ཤིན་ཏུ་རིང་བ་དང་། དེ་ལས་ཀྱང་ཆེས་ཤིན་ཏུ་རིང་བ་རྣམས་ཀྱང་སྣང་བ་དང་བཅས་པའི་མདུན་ཕྱོགས་ན་གནས་པ་བཞིན་དུ་མཐོང་བར་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ནི་སྔ་མ་བཞིན་ནོ། །ཡི་གེ་ཨས་དེ་བཞིན་གཤེགས་པ་ལ་སོགས་པའི་ལྷའི་སྙན་བཀུག་ནས་རང་
གི་རྣ་བ་དང་ལྷན་ཅིག་ཏུ་གྱུར་པར་བསམ་པར་བྱའོ། །དེས་ཅིར་འགྱུར་ཞེ་ན། དེས་ནི་དགོས་པ་གང་བསམས་པ། །ཤིན་ཏུ་རིང་ན་གནས་པའང་ཐོས། །ཞེས་བྱ་བ་སྨོས་ཏེ། དེས་འཇིག་རྟེན་གྱི་ཁམས་གཞན་ན་གནས་པའི་སྒྲའི་ངོ་བོ་ཅི་ཡང་རུང་བ་ཡང་རྣལ་འབྱོར་པ་ལ་དགོས་པས་ཐོས་པར་འདོད་
ན་ཉེ་བའི་ཡུལ་ན་གནས་པ་བཞིན་དུ་བསམས་ན་དེས་ཐོས་པར་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །ཡིད་ཀྱི་རྣམ་ཤེས་བསྐྱེད་ནས་ཀྱང་། །ཞེས་བྱ་བ་ནི་ཡི་གེ་ཧཱུཾ་གིས་དེ་བཞིན་གཤེགས་པ་ཐམས་ཅད་ཀྱི་ཡིད་ཀྱི་རྣམ་པར་ཤེས་པའི་རང་བཞིན་

རྡོ་རྗེ་སེམས་དཔའ་དང་། དེ་བཞིན་གཤེགས་པ་ཐམས་ཅད་ཀྱི་ཐུགས་ལས་སེམས་དཔའི་རྡོ་རྗེའི་གཟུགས་ཅན་གྱི་ཡིད་བཀུག་སྟེ། རང་གི་སྙིང་གར་གནས་པའི་སེམས་དཔའི་རྡོ་རྗེ་ལ་བཅུག་ནས་གཅིག་ཏུ་གྱུར་པར་བསམ་པར་བྱའོ། །དེས་ཅིར་འགྱུར་ཞེ་ན། སེམས་ཅན་གང་ལ་དེས་
བརྟགས་ན། །དེ་ཡི་སེམས་ནི་དེས་ཤེས་འགྱུར། །ཞེས་བྱ་བ་སྨོས་ཏེ། ཡིད་ཀྱི་རྣམ་པར་ཤེས་པ་དེ་སེམས་དཔའ་རྡོ་རྗེའི་གཟུགས་སུ་སེམས་ཅན་གང་གི་སེམས་ཤེས་པར་འདོད་པའི་སེམས་ཅན་དེ་ལ་བསམ་པར་བྱའོ། །དེ་ནས་སེམས་ཅན་དེའི་སེམས་རྣལ་འབྱོར་པས་ཤེས་པར་འགྱུར་རོ། །འདི་
སྐད་སྟོན་པ་ཡིན་ཏེ། ཡེ་ཤེས་ཀྱི་རྡོ་རྗེ་རང་གི་སྙིང་གར་རབ་ཏུ་བཞག་ལ་འདི་སྐད་བརྗོད་པར་བྱའོ། །ཆོས་ཐམས་ཅད་སྒྱུ་མ་ལྟ་བུའི་བདེན་པ་གང་ཡིན་པའི་བདེན་པ་དེས་བཅོམ་ལྡན་འདས་རྡོ་རྗེ་སེམས་དཔའ་དང་མཚུངས་པར་སེམས་ཅན་དེའི་སེམས་ཀྱང་དེ་དང་འདྲ་བ་དེ་ལྟ་བུའི་རྣམ་པར་ཤེས་པ་བདག་
ལ་སྐྱེ་བར་གྱུར་ཅིག་ཅེས་བྱའོ། །དེ་ནས་དེའི་སྙིང་གར་ཡེ་ཤེས་ཀྱི་རྡོ་རྗེ་ཉིད་རྣམ་པར་བསྒོམས་པ་དེས་གཞན་གྱི་སེམས་ཤེས་པ་རྣལ་འབྱོར་པ་ལ་སྐྱེ་བར་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །བདག་གམ་ཡང་ན་གཞན་ཡང་རུང་། །ཞེས་
བྱ་བ་ནི་གོ་སླའོ། །ཡིད་ཀྱིས་བལྟས་ནས་གར་སྐྱེས་པ། །ཞེས་བྱ་བ་ནི་སེམས་དཔྱད་ན་བདག་གང་ནས་འདིར་འོངས་པ་དང་། སེམས་ཅན་གང་ནས་འདིར་འོངས་པ་དང་། གཞན་གྱི་སྐྱེ་བ་ཤེས་པའོ། །དེས་ཅིར་འགྱུར་ཞེ་ན། གར་སྐྱེས་པའི་གཟུགས་ནི་དེའི་ཤེས་པར་འགྱུར། །ཞེས་བྱ་བ་སྨོས་སོ། །
གང་ནས་ཤི་འཕོས་ནས་འདིར་སྐྱེས་པར་གྱུར་པ་དེ་རྣལ་འབྱོར་པས་སྔོན་གྱི་གནས་རྗེས་སུ་དྲན་པའི་ཤེས་པ་བསྒྲུབས་པས་རང་དང་གཞན་གྱི་སྐྱེ་བའི་གནས་གང་ནས་འོངས་པ་ཤེས་པ་ཡིན་ནོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། འགྲོ་བ་དྲུག་གི་འཁོར་ལོའི་དཀྱིལ་འཁོར་སྙིང་གར་
ཡིད་ཀྱིས་བྲིས་ལ་བཅོམ་ལྡན་འདས་ཆོས་ཐམས་ཅད་དང་རྨི་ལམ་མཚུངས་པའི་བདེན་པ་གང་ཡིན་པའི་བདེན་པ་དེས་སྐྱེ་བ་གང་ནས་བདག་གམ་གཞན་འདིར་སྐྱེས་པའི་སེམས་ཅན་སྣང་བར་གྱུར་ཅིག་ཅེས་སྨོན་ལམ་བཏབ་ནས་རང་གི་ལྷ་བསྒོམས་ན་དེའི་རྗེས་ལ་སྔོན་གྱི་གནས་རྗེས་སུ་དྲན་པའི་ཤེས་པ་

སྐྱེ་བར་འགྱུར་རོ། །ཕྱག་རྒྱ་ཆེན་པོ་བཅིངས་ནས་ཀྱང་། །ཞེས་བྱ་བ་ནི་སྔ་མ་བཞིན་ནོ། །རྫུ་འཕྲུལ་གང་དང་གང་འདོད་པ། །ཞེས་བྱ་བ་ནི་རྫུ་འཕྲུལ་ནི་རྣམ་པར་འཕྲུལ་ལོ། །སེམས་ཀྱི་རྫུ་འཕྲུལ་ནི་བདག་ཉིད་ཆེན་པོའི་མཐུ་ཡིན་ནོ་ཞེས་བྱ་བའི་དོན་ཏོ། །ནམ་མཁའ་ལ་འགྲོ་བ་དང་། མི་སྣང་བ་དང་།
གཟུགས་སུ་སྟོན་པ་དང་། རིང་ནས་མྱུར་དུ་འོང་བ་ལ་སོགས་པ་དེ་ལྟ་བུ་རྣམས་ཀྱི་ནང་ནས་གང་ཡང་རུང་བའི་རྫུ་འཕྲུལ་ཞིག་མངོན་དུ་བྱས་ཏེ་སྟོན་པར་འདོད་པའམ། ཡུལ་གང་དང་གང་དུ་སྒྲིབ་པ་དང་བཅས་པ་དང་སྒྲིབ་པ་མེད་པའི་ནམ་མཁའ་ལ་སོགས་པ་དེ་དང་དེར་འགྲོ་བ་རྣལ་འབྱོར་པས་སྟོན་པར་
འགྱུར་རོ། །གང་གིས་ཤེ་ན། སེམས་རྩེ་གཅིག་པའི་སྟོབས་ཀྱིས་སོ། །འདི་སྐད་སྟོན་པ་ཡིན་ཏེ། ཇི་སྐད་དུ་བཤད་པའི་ཚུལ་གྱིས་དེ་བཞིན་གཤེགས་པའི་རིགས་ལ་སོགས་པའི་རང་གི་ལྷའི་ཕྱག་རྒྱ་བཅིངས་ཏེ། རྣལ་འབྱོར་པས་མཚན་མ་ཐོབ་ནས་ནམ་མཁའི་ཕྱོགས་ཀྱི་གནས་སུ་ཡི་གེ་ལྃ་
ལས་ཟད་པར་ས་བསྒོམས་ལ་འཆགས་པ་ལ་སོགས་པ་བསྟན་པར་བྱའོ། །ཡི་གེ་བྃ་ལས་རི་བོ་ལ་སོགས་པའི་ཕྱོགས་སུ་ཟད་པར་ཆུ་བསྒོམས་ལ་འོག་ཏུ་འཛུལ་བ་དང་གྱེན་དུ་འབྱུང་བར་བྱའོ། །རྃ་ལས་ཕྱོགས་བཅུར་ཟད་པར་མེ་བསྒོམས་ལ་འབར་བར་བྱའོ། །ཡི་གེ་ཡྃ་ལས་རླུང་གི་ཕུང་པོ་བསྒོམས་
ཏེ་ནམ་མཁའ་ལ་ཁྱེར་བར་བྱའོ། །ཁྃ་ལས་ཟད་པར་ནམ་མཁའ་བསྒོམས་ལ་རྩིག་པ་ལས་ཀྱང་ཐལ། ར་བ་ལས་ཀྱང་ཐལ་ནས་འགྲོ་བ་དང་འོང་བ་ལུས་ཐོགས་པ་མེད་པས་མི་སྣང་བར་འགྱུར་རོ། །ཡི་གེ་ཧྲི་ལས་གཟུགས་ཐམས་ཅད་བསྟན་པར་བྱའོ། །དེ་ལ་དང་པོ་ལས་དང་རྗེས་སུ་མཐུན་པའི་ཡི་གེ་
དང་བཟླས་པའི་སྔགས་དང་ལྷན་ཅིག་སྦྱང་བས་རྫུ་འཕྲུལ་མཐའ་དག་སྟོན་པར་འགྱུར་རོ། །ཁམས་གསུམ་རྣམ་རྒྱལ་མཆོག་ཏུ་ནི། །ཞེས་བྱ་བ་རྡོ་རྗེ་རིགས་ཀྱི་ཕྱག་རྒྱ་རྣམ་པ་བཞི་ཡང་ཁམས་གསུམ་རྣམ་པར་རྒྱལ་བའི་ཕྱག་རྒྱ་མཆོག་ཡིན་ཏེ། རྡོ་རྗེ་རིགས་ཀྱི་ཕྱག་རྒྱ་ཐམས་ཅད་ནི་ཁམས་གསུམ་
རྣམ་པར་རྒྱལ་བ་ཞེས་བཤད་པས། མཉམ་པར་གཞག་པས་བཅིངས་ནས་ཀྱང་། །ཞེས་བྱ་བ་ནི་མཚན་མ་ཐོབ་པ་གཡེང་བ་མེད་པའི་སེམས་སོ། །མངོན་པར་ཤེས་པ་ལྔ་ཐོབ་པོ། །ཞེས་བྱ་བ་ནི་ཇི་སྐད་བཤད་པ་ཉིད་དོ། །ཇི་ལྟར་བྱ་ཞེ་ན། ཆོ་ག་འདིས་ནི་སྒྲུབ་པ་པོ། །ཞེས་བྱ་བ་སྨོས་ཏེ། ཆོ་ག་

གང་གིས་ཤེ་ན། ཁྲོས་ནས་དགོས་པ་ཐམས་ཅད་ནི། །ཞེས་བྱ་བ་སྨོས་ཏེ། དེ་བཞིན་གཤེགས་པའི་རིགས་སུ་བཤད་པའི་མངོན་པར་ཤེས་པ་ལྔ་བསྐྱེད་པར་བྱས་ནས་ཞེས་བྱ་བས་ལན་འདེབས་པ་ཡིན་ནོ། །ཇི་ལྟར་ཞེ་ན། ལྟག་འོག་གོ་རིམས་ཇི་བཞིན་བྱ། །ཞེས་བྱ་བ་སྨོས་
ཏེ། འདི་ཉིད་རྣམ་པར་འགྲེལ་པ་ནི། །འཕྲུལ་གྱི་མིག་ལ་སོགས་ཚུལ་གྱིས། །ཞེས་བྱའོ། །དེར་ཅིར་འགྱུར་ཞེ་ན། མངོན་ཤེས་ཀུན་དུ་སྐད་ཅིག་འགྱུར། །ཞེས་བྱ་བ་སྨོས་སོ། །འགྲོ་བ་སེམས་ཅན་གྱི་ཁམས་སོ། །དེ་འདིས་འདུལ་བས་ན་འགྲོ་བ་འདུལ་བ་སྟེ་པདྨའི་རིགས་སོ། །དེའི་ཕྱག་
རྒྱ་ནི་འགྲོ་བ་འདུལ་བ་ལ་སོགས་པ་ནས་པདྨ་འབེབས་པའི་མཐར་ཐུག་པའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་དོ། །དེའི་མཆོག་ནི་དམ་པར་གྱུར་པ་སྟེ། འགྲོ་བ་འདུལ་བའི་ཕྱག་རྒྱ་མཆོག་དེ་བཅིངས་ནས་ཞེས་བྱ་བར་སྦྱར་རོ། །ཇི་ལྟར་བྱ་ཞེ་ན། རབ་མཉམ་བཞག་པས་ཞེས་
བྱ་བ་སྨོས་ཏེ། དེ་བཅིངས་པས་ཅི་ཞིག་ཐོབ་ཅེ་ན། མངོན་པར་ཤེས་པ་ལྔ་ཐོབ་པོ་ཞེས་བྱ་བ་སྨོས་ཏེ། ཇི་ལྟར་བཤད་པའི་མངོན་པར་ཤེས་པ་ལྔ་ཐོབ་པོ། །ཅི་ལྟར་ཐོབ་ཅེ་ན། ཆོ་ག་འདིས་ནི་སྒྲུབ་པ་པོ། །ཞེས་བྱ་བ་ནི་དེ་མ་ཐག་ཏུ་འཆད་པར་འགྱུར་བའི་དོན་གྱིས་སོ། །དེ་ཉིད་བསྟན་པ་ནི།
ལྟག་འོག་གོ་རིམས་ཇི་བཞིན་དུ། །ཆོ་ག་བཞིན་དུ་འདོད་པས་ཆགས། །ཞེས་བྱ་བ་སྨོས་ཏེ། རང་བཞིན་གྱིས་རྣམ་པར་དག་པའི་ཆོས་རྟོག་པས་སྲིད་པའི་འདོད་པས་དེ་དང་དེ་ལ་ཆགས་ཤིང་ཤིན་ཏུ་ཆགས་པས་བསྒོམས་པ་དེའི་ཕྱིར་འདོད་པས་ཆགས་པ་སྟེ། ཐབས་དང་ཤེས་རབ་ཀྱི་རང་བཞིན་གྱིས་
འཇིག་རྟེན་དབང་ཕྱུག་གི་ཆགས་པ་ཡིན་ནོ་ཞེས་བྱ་བའི་དོན་ཏོ། །ཆོ་ག་བཞིན་དུ་ནི་ཕྱག་རྒྱ་ཆེན་པོ་ལ་སོགས་པའོ། །འདོད་པས་ཆགས་པ་ནི་ཕྱག་རྒྱ་ཆེན་པོ་ལ་སོགས་པའི་སྦྱོར་བ་དེས་སོ། །འཕྲུལ་གྱི་མིག་ནི་ཡེ་ཤེས་ལ་སོགས་པ་སྔར་བཤད་པའི་གོ་རིམས་གང་དང་གང་ཡིན་པ་དེའི་གོ་རིམས་བཞིན་
དུའོ། །འདི་ཉིད་རྣམ་པར་འགྲེལ་པ་ནི། །འཕྲུལ་གྱི་མིག་ལ་སོགས་ཚུལ་གྱིས། །ཞེས་བྱ་བ་སྨོས་ཏེ། དེས་ཅིར་འགྱུར་ཞེ་ན། མངོན་ཤེས་ཐམས་ཅད་ཐོབ་པར་འགྱུར། །ཞེས་བྱ་བ་སྨོས་སོ། །དེའི་དོན་ཀུན་ནི་འཇིག་རྟེན་དང་འཇིག་རྟེན་ལས་འདས་པ་རྣམས་སོ། །གྲུབ་པ་ནི་རྫོགས་པའོ། །

འདི་ཡོད་པ་ལས་བྱུང་བ་ནི་དོན་ཐམས་ཅད་གྲུབ་པའི་ནོར་བུའི་རིགས་སོ། །དོན་ཐམས་ཅད་གྲུབ་པར་གྱུར་པས་མཛེས་པ་འདི་ནི་ཕྱག་རྒྱ་ཆེན་པོ་ལ་སོགས་པའི་དོན་ཐམས་ཅད་གྲུབ་པའི་ཕྱག་རྒྱའོ། །ཕྱག་རྒྱ་དེ་རབ་ཏུ་མཉམ་པར་བཞག་པས་བཅིངས་པ་ནི་མཚན་མ་ཐོབ་པའོ། །མངོན་པར་ཤེས་པ་
ལྔ་ཐོབ་བོ། །ཞེས་བྱ་བ་ནི་སྔར་བཤད་ཟིན་ཏོ། །ཆོ་ག་འདི་ནི་སྒྲུབ་པའོ། །ཞེས་བྱ་བ་ནི་དེ་མ་ཐག་ཏུ་འཆང་བར་འགྱུར་བའོ། །ཆོ་ག་དེ་གང་ཡིན་ཞེ་ན། སངས་རྒྱས་རྣམས་ནི་མཆོད་བྱས་ནས། །ཞེས་བྱ་བ་སྨོས་ཏེ། སངས་རྒྱས་རྣམས་ལ་མཆོད་པ་ནི་སངས་རྒྱས་རྣམས་ལ་མཆོད་པ་སྟེ།
ནམ་མཁའི་ཁམས་དང་མཉམ་པར་ནོར་བུའི་རིགས་གཟུགས་བརྙན་ཙམ་དུ་བསྒོམ་པ་འདི་ནི་སངས་རྒྱས་རྣམས་མཆོད་པའོ། །དེ་བྱེད་པ་ནི་ཤིན་ཏུ་མངོན་དུ་བྱེད་པའོ། །ནོར་བུའི་རིགས་ཀྱི་ཕྱག་རྒྱ་ཆེན་པོ་ལ་སོགས་པའི་གོ་རིམས་བཞིན་དུ་བསྒོམས་པའི་ཚུལ་གྱིས་སོ། །དེ་བཞིན་གཤེགས་པའི་རིགས་
སུ་བཤད་པའི་ཚུལ་དེས་ལྷའི་མིག་གིས་ཡེ་ཤེས་ལ་སོགས་པའི་བསྐྱེད་པའི་ཚུལ་གྱིས་ལྷའི་མིག་ལ་སོགས་པ་མངོན་པར་ཤེས་པ་ལྔའི་རང་བཞིན་ནོར་བུའི་རིགས་ཀྱི་རྣལ་འབྱོར་པས་མཐོང་ཞིང་ཐོས་པས་མངོན་དུ་བྱེད་དོ་ཞེས་བྱ་བའི་དོན་ཏོ། །དེ་ལྟར་མཚན་མ་ཐོབ་པས་མངོན་པར་ཤེས་པ་བསྒྲུབ་པ་
བསྟན་ནས། ད་ནི་མནའ་དོར་བའི་བརྟུལ་ཞུགས་ལ་རྗེས་སུ་འཇུག་པའི་ཕྱག་རྒྱ་ཆེན་པོ་ལ་སོགས་པ་འགྲུབ་པར་འགྱུར་རོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བདེན་པའི་དངོས་གྲུབ་ཀྱི་རྒྱུད་འདི་གསུངས་
སོ། །མནའ་དོར་ནས་བདེན་པ་ཡོངས་སུ་སྐྱོང་ཞིང་བསྲུང་བ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་འགྲུབ་པའོ། །དེ་སྟོན་པར་བྱེད་པའི་རྒྱུད་དེ་ཕྱག་ན་རྡོ་རྗེས་གསུངས་པ་ཡིན་ནོ། །བདེན་པ་ནི་ཕྱིན་ཅི་མ་ལོག་པའོ། །རྗེས་སུ་བསྐོར་བའི་ངང་ཚུལ་གང་ལ་མངའ་བ་དེ་ནི་བདེན་པའི་རྗེས་སུ་འཇུག་
པའོ། །དེས་བདེན་པའི་རྗེས་སུ་འཇུག་པ་དང་། ཚིག་གིས་མནའ་ནི་འདོར་བྱེད་ཅིང་། །ཞེས་བྱ་བའི་མནའ་དོར་བའོ། །བདེ་བ་ཆེན་པོ་བསྲུངས་ན་ནི། །ཞེས་བྱ་བ་ལ་སྒྲུབ་ཅིང་ནན་ཏན་དུ་བྱེད་པས་ན་བསྲུང་བའོ། །བདེན་པ་ཡང་ཡིན་ལ་ཆེན་པོ་ཡང་དེ་ཡིན་པས་ན་དེ་ནི་དེ་བཞིན་གཤེགས་པའི་

མཐུའོ། །དེས་ཅིར་འགྱུར་ཞེ་ན། མྱུར་དུ་སངས་རྒྱས་ཉིད་དང་དེ་བཞིན་གཤེགས་པ་ཉིད་ཐོབ་བོ་ཞེས་བྱ་བ་སྨོས་སོ། །འདི་སྐད་སྟོན་པ་ཡིན་ཏེ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་ནང་ནས་གང་ཡང་རུང་བའི་དེ་བཞིན་གཤེགས་པ་བསྒྲུབ་པར་འདོད་ན་
དཀྱིལ་འཁོར་དུ་འཇུག་པར་བྱའོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་པའི་ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་དུ་འགྲུབ་པ་ཡང་ཐོབ་ན་དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་རྡོ་རྗེ་ཡེ་ཤེས་བསྐྱེད་པར་བྱས་ཀྱིས། ཁྱོད་ཀྱིས་དཀྱིལ་
འཁོར་ཆེན་པོ་མ་མཐོང་བ་རྣམས་ལ་མ་སྨྲ་ཤིག །དམ་ཚིག་ཉམས་པར་གྱུར་ཏ་རེ། །འདི་ནི་ཁྱོད་ཀྱི་རྡོ་རྗེའི་དམ་ཚིག་ཡིན་གྱིས། གལ་ཏེ་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །
དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ཨུ་ད་ཀ་ཋ། དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས་ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་སྨྲས་ལ། སློབ་
དཔོན་ནམ་བཅོམ་ལྡན་འདས་ལས་ངེས་པར་མངོན་པར་འདོད་པའམ་དངོས་གྲུབ་བླངས་ལ། དེ་སྔ་མ་བཞིན་དུ་ནན་ཏན་བྱས་ན་དེ་ལྟ་བུས་དམ་ཚིག་གི་དཀྱིལ་འཁོར་དུ་བླངས་པ་དེ་སྔ་མ་བཞིན་ནན་ཏན་བྱས་ན་དེ་ལྟ་བུས་འགྲུབ་པར་འགྱུར་རོ། །དམ་ཚིག་གི་དཀྱིལ་འཁོར་དུ་འཇུག་པའི་མནའ་བསྒགས་པས་
ཅི་ཞིག་བྱེད་ཅེ་ན། དེ་བཞིན་གཤེགས་པའི་རིགས་བྱུང་བ། །ཞེས་བྱ་བ་སྨོས་ཏེ། དེ་བཞིན་གཤེགས་པ་རྣམས་ཀྱི་རིགས་ནི་རྡོ་རྗེ་སེམས་དཔའ་ནས་བརྩམས་ནས། རྡོ་རྗེ་འབེབས་པའི་མཐར་ཐུག་པ་འབྱུང་ཞིང་བསྐྱེད་པའོ། །སྔ་མ་བཞིན་དུ་དཀྱིལ་འཁོར་དུ་ཞུགས་ཏེ། མངོན་པར་འདོད་
པའི་དོན་གྱིས་དངོས་གྲུབ་བཅོམ་ལྡན་འདས་སམ། སློབ་དཔོན་གྱི་མདུན་དུ་མནའ་དོར་ལ་ཇི་ལྟ་བ་བཞིན་དུ་ནན་ཏན་དུ་བྱའོ། །རྡོ་རྗེ་འཛིན་གྱིས་མནའ་དོར་ཞིང་། །ཞེས་བྱ་བ་ལ་སོགས་པ་ལ། རྡོ་རྗེ་རིགས་ཀྱི་རྣལ་འབྱོར་པས་རྡོ་རྗེའི་རིགས་ལས་གསུངས་པའི་དངོས་གྲུབ་སྒྲུབ་པར་འདོད་པས་

སྔ་མ་བཞིན་དུ་རྡོ་རྗེའི་རིགས་ཀྱི་དཀྱིལ་འཁོར་གྱི་རྡོ་རྗེ་གཟུངས་ཀྱི་ཕྱག་རྒྱ་བཅིངས་ནས། མནའ་འདོར་ལ་སྔ་མ་བཞིན་དུ་མངོན་པར་འདོད་པའི་དངོས་གྲུབ་དེ་ལྟ་བུས་རྡོ་རྗེའི་རིགས་ལས་བཤད་པའི་དངོས་གྲུབ་ཐོབ་པར་འགྱུར་རོ། །དམ་པའི་ཆོས་ལ་མནའ་དོར་ཞིང་། །ཞེས་བྱ་བ་ནི་དམ་པའི་ཆོས་
ནི་པདྨའི་རིགས་ཏེ། དེའི་མནའ་དོར་བ་བསྲུང་བར་བྱའོ། །འདི་སྐད་སྟོན་པ་ཡིན་ཏེ། པདྨའི་རིགས་ལས་བཤད་པའི་དངོས་གྲུབ་བསྒྲུབ་པར་འདོད་པས་པདྨ་རིགས་ཀྱི་དཀྱིལ་འཁོར་དུ་ཞུགས་ཏེ། མནའ་དོར་ནས་སྔ་མ་བཞིན་ནོ། །ནན་ཏན་དུ་བྱས་པ་དེ་ལྟ་བུས་པདྨའི་རིགས་ཀྱི་དངོས་གྲུབ་
ཏུ་འགྱུར་རོ། །སངས་རྒྱས་མཆོད་ལ་མནའ་དོར་ཞིང་། །ཞེས་བྱ་བ་ནི་སངས་རྒྱས་མཆོད་པ་ནི་ནོར་བུའི་རིགས་སོ། །དེའི་མནའ་ཤིན་ཏུ་དོར་བས་སངས་རྒྱས་ལ་མཆོད་པའི་མནར་འགྱུར་བས་དེ་བསྲུང་བར་ཡང་བྱའོ། །ཡང་སྔ་མ་བཞིན་དུ་ནོར་བུའི་རིགས་ཀྱི་དཀྱིལ་འཁོར་དུ་ཞུགས་ཏེ། དེ་ལས་
བཤད་པའི་གཟུགས་བྱས་ནས། སྔ་མ་བཞིན་བསྒྲུབ་པར་བྱས་པ་དེ་ལྟ་བུས་ནོར་བུའི་རིགས་ལས་བཤད་པའི་དངོས་གྲུབ་ཐོབ་པར་འགྱུར་རོ། །དེ་བས་ན། དབང་བསྐུར་བ་ནི་ཐོབ་པར་འགྱུར། །ཞེས་བཅོམ་ལྡན་འདས་སངས་རྒྱས་མཆོད་པས་གསུངས་སོ། །སངས་རྒྱས་མཆོད་པ་
ནི་བཅོམ་ལྡན་འདས་ནམ་མཁའི་སྙིང་པོའོ་ཞེས་བྱ་བའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་མནའི་དངོས་གྲུབ་ཀྱི་རྒྱུད་བསྟན་ནས། ད་ནི་ས་མ་ཡ་སྟྭཾ་ཞེས་བྱ་བ་ལ་སོགས་པས་ཕྱག་རྒྱ་ཐམས་ཅད་ཀྱི་དངོས་གྲུབ་དེ་ཁོ་ན་ཉིད་བསྐུལ་བའི་སྙིང་པོ་ཟློས་ཤིང་ཕྱག་རྒྱ་ཆེན་པོ་ལ་སོགས་
པའི་ཕྱག་རྒྱ་ཐམས་ཅད་བཅིང་བར་བྱ་བའི་ཆོ་ག་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་གི་དེ་ཁོ་ན་ཉིད་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ནི་ཇི་སྐད་དུ་བཤད་པའོ། །རིགས་ནི་དེ་
བཞིན་གཤེགས་པ་དང་། རྡོ་རྗེ་དང་པདྨ་དང་། ནོར་བུའི་རིགས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་དེ་དག་གི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་སྟེ། ཕྱག་རྒྱ་ཆེན་པོ་ལ་སོགས་པའི་རྣམ་པ་བཞིའོ། །དེ་སྐད་དུ་ཡང་། ཕྱག་རྒྱ་དམ་ཚིག་

ཅེས་སུ་གྲགས། །ཞེས་གསུངས་སོ། །དེ་ཁོ་ན་ཉིད་ནི་ཀུན་རྫོབ་ཀྱི་བདེན་པའི་ངོ་བོའམ་དེ་ཁོ་ན་ཉིད་དེ། དེ་སྟོན་པར་བྱེད་པའི་སྙིང་པོ་ལ་ཡང་དམ་ཚིག་གི་དེ་ཁོ་ན་ཉིད་ཅེས་བྱའོ། །དེའི་དངོས་གྲུབ་ཀྱི་ཕྱག་རྒྱ་བཅིངས་པ་གྲུབ་པའོ། །དེ་སྟོན་པར་བྱེད་པའི་རྒྱུད་ནི་
བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བསྟན་པའོ། །ས་མ་ཡ་སྟྭཾ་ཞེས་བྱ་བ་ནི་བརྗོད་པས་དེ་ཁོ་ན་ཉིད་བསྐུལ་བའི་སྙིང་པོ་གསུངས་པ་ཟློས་པའོ། །ཕྱག་རྒྱ་ཀུན་ནི་དམ་ཚིག་དང་། ཆོས་དང་ལས་དང་། ཕྱག་རྒྱ་ཆེན་པོ་རྣམས་སོ། །རིགས་རྣམས་ལའང་ཞེས་བྱ་བ་ནི་དེ་བཞིན་གཤེགས་
པ་ཐམས་ཅད་ཀྱི་སྟེ། དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། ནོར་བུའི་རིགས་ལ་ཡང་ངོ་། །ཉིད་ཀྱིས་བཅིངས་ནས་བརྟན་པར་འགྱུར། །ཞེས་བྱ་བ་ནི་དེ་ཁོ་ན་ཉིད་བསྐུལ་བས་མཉེས་པར་གྱུར་པས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་རང་ཉིད་ཀྱིས་བཅིངས་པས་ན་དེ་ཁོ་ན་
ཉིད་བསྐུལ་བའི་དུས་སུ་ཇི་ལྟར་མངོན་པར་འདོད་པའི་དངོས་གྲུབ་སྒྲུབ་པ་དབང་དུ་བྱེད་པར་འགྱུར་རོ། །དེ་ནས་ཕྱིས་བསྒྲུབ་པ་བྱའོ། །དེའི་རྗེས་ལ་དེ་ཁོ་ན་ཉིད་བསྐུལ་བའི་དུས་ཕྱིས་དེའི་འོག་ཏུ་མ་བསྒྲུབས་པར་ཡང་དེ་ཁོ་ན་ཉིད་བསྐུལ་བར་གྱུར་ཏོ། །འདི་སྐད་སྟོན་པ་ཡིན་ཏེ། ས་མ་ཡ་སྟྭཾ་བརྗོད་ཅིང་། ཐོག་
མ་ཁོ་ན་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ལ་ཕྱིས་སྔགས་བཟླས་པར་བྱའོ། །དེ་སྐད་དུ་ཡང་དེ་ཁོ་ན་ཉིད་བསྡུས་པའི་རྒྱུད་ཆེན་པོ་སྟོང་ཕྲག་བརྒྱ་པ་ལས་ས་མ་ཡ་སྟྭཾ་ཞེས་བརྗོད་པས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་བཅིང་པར་བྱའོ་ཞེས་གསུངས་སོ། །དེ་ལྟར་དེ་བཞིན་
གཤེགས་པ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་བཅིངས་པའི་སྤྱིའི་སྙིང་པོ་བཤད་ནས། དེ་བཞིན་གཤེགས་པའི་རིགས་ཀྱི་ཕྱག་རྒྱ་རྣམས་ཀྱི་བྱེ་བྲག་གི་སྙིང་པོ་ནི་ཞེས་བྱ་བ་ལ་སོགས་པ་གསུངས་སོ། །སུ་ར་ཏ་སྟྭཾ་ཞེས་བརྗོད་ན་ཞེས་བྱ་བ་ནི་བག་ཆགས་དང་བཅས་པའི་ཉོན་མོངས་
པ་སྤངས་པའི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ལས་བྱུང་བ་ཟག་པ་མེད་པའི་བདེ་བ་ཡང་ཡིད་བདེ་བའི་རང་བཞིན་རྒྱུན་མི་འཆད་པའི་དེ་བཞིན་གཤེགས་པ་ལྔའི་ཡེ་ཤེས་ནི་བདག་ཡིན་ནོ་ཞེས་བྱ་བའི་དོན་ཏོ། །དེ་སྐད་དུ་ཡང་། ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་

ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཅེས་གསུངས་སོ། །བརྗོད་ན་ཞེས་བྱ་བ་ནི་གོ་སླའོ། །ཕྱག་རྒྱ་ཀུན་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་དེ། རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་
རྣམས་སོ། །མ་བསྒྲུབས་པར་ཡང་ཞེས་བྱ་བ་ནི། སུ་ར་ཏ་སྟྭཾ་ཞེས་བྱ་བའི་སྙིང་པོས་མ་བསྒྲུབས་ན་ཡང་ཉིད་ཀྱིས་བཅིང་བས་བརྟན་པར་འགྱུར་ཞེས་བྱ་སྟེ། ཅིའི་ཕྱིར་ཞེ་ན། དེ་ཉིད་བསྐུལ་བས་བདག་ཉིད་ཆེའི། །ཞེས་བྱ་བ་སྨོས་ཏེ། རྣམ་པར་སྣང་མཛད་ཆེན་པོའིའོ། །དམ་ཚིག་
ཀྱང་ཡིན་ལ་ཆེན་པོ་ཡང་ཡིན་པས་ན་དམ་ཚིག་ཆེན་པོ་སྟེ། ཐོག་མ་དང་ཐ་མ་མེད་པའི་རྡོ་རྗེ་འཆང་ཆེན་པོ་ནི་རྣམ་པར་སྣང་མཛད་ཆེན་པོ་སྟེ། དེ་ཁོ་ན་ཉིད་ནི་རབ་ཏུ་དགའ་བ་ཉིད་དང་། ཀུན་ཏུ་བཟང་པོ་ཉིད་དོ། །དེ་སྐད་དུ་ཡང་། དམ་ཚིག་ཆེན་པོའི་དེ་ཁོ་ན་ཉིད་སྨྲས་པ། རབ་དགའ་ཀུན་དུ་བཟང་
པོའོ། །ཞེས་གསུངས་སོ། །ཧཱུཾ་ཞེས་བྱ་བ་གཅིག་ཙམ་གྱིས། །ཞེས་བྱ་བ་ནི་རྡོ་རྗེའི་རིགས་ཐམས་ཅད་ཀྱི་ཕྱག་རྒྱ་ཡི་གེ་ཧཱུཾ་བརྗོད་པས་སློབ་དཔོན་རང་ཉིད་ཀྱིས་བཅིངས་པའམ། སློབ་མ་ལ་གདམས་ངག་བྱིན་ནས་ཧཱུཾ་ཞེས་བརྗོད་ཅིང་ཕྱག་རྒྱ་འཆིང་དུ་གཞུག་པར་བྱའོ། །པདྨའི་རིགས་
ལས་སརྦྦ་ཤུདྡྷ་ཞེས་བརྗོད་ཅིང་། སློབ་དཔོན་བདག་ཉིད་ཀྱིས་ཕྱག་རྒྱ་ཆེན་པོ་བཅིངས་པའམ། སློབ་མ་ལ་གདམས་ངག་བྱིན་ནས་འཆིང་དུ་གཞུག་པར་བྱའོ། །དེ་ལྟར་བྱས་པས་ཅི་ཞིག་ཏུ་འགྱུར་ཞེ་ན། བུད་མེད་ཆགས་ལ་སོགས་ལྡན་ལ། །ཐམས་ཅད་དུ་ནི་གྲོལ་མི་འགྱུར། །ཞེས་
བྱ་བ་སྨོས་ཏེ། ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ནི་བུད་མེད་དོ། །དེ་རྣམས་དང་མཉམ་པར་སྦྱོར་ཞིང་རྣལ་འབྱོར་པས་འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་ལ་སོགས་པ་རྣམས་ལ་ཕྱག་རྒྱ་བཅིངས་པ་ལྷག་པར་མོས་པའོ། །སོགས་པ་
སྨོས་པས་ནི་སྟོང་པ་ཉིད་བཅུ་དྲུག་དང་། ཕ་རོལ་ཏུ་ཕྱིན་པ་བཅུ་དྲུག་དང་། བྱང་ཆུབ་སེམས་དཔའི་ས་བཅུ་དང་། སྟོབས་དང་མི་འཇིགས་པ་ལ་སོགས་པའི་ཆོས་ཀྱི་སྐུའི་ངོ་བོ་གཟུང་བར་བྱའོ་ཞེས་བྱ་བའི་དོན་དུ་བུད་མེད་དང་པོར་བྱས་པ་གང་ཡིན་པ་འདི་ནི་བུད་མེད་ལ་ཆགས་པའོ། །

ལྡན་པ་ནི་ཤིན་ཏུ་རྣལ་འབྱོར་གྱི་རང་བཞིན་ཆོས་ཀྱི་སྐུའི་ཏིང་ངེ་འཛིན་ཏོ། །དེ་ནི་རྣམ་པར་གྲོལ་བའི་ཏིང་ངེ་འཛིན་དང་ལྡན་པ་དང་བྲལ་བར་མི་འགྱུར་རོ། །དེ་ཉིད་ལ་སེམས་རྩེ་གཅིག་པ་དང་ལྡན་པའི་རྣལ་འབྱོར་པས་ཤིན་ཏུ་རྣལ་འབྱོར་གྱི་ངོ་བོ་ལ་ཉེ་བར་གནས་སོ་ཞེས་བྱ་བའི་
ཐ་ཚིག་གོ། །ནོར་བུ་ཆེན་པོའི་རིགས་ཀྱི་རྣལ་འབྱོར་པས། ཨོཾ་ཞེས་བརྗོད་པས་ཕྱག་རྒྱ་ཐམས་ཅད་བཅིང་བ་འགྲུབ་པར་འགྱུར་ཏེ་མ་ལུས་ཤིང་ལུས་པ་མེད་པའི་ཁམས་གསུམ་པའི་འཇིག་རྟེན་ཐམས་ཅད་ཀྱི་མཆོད་པ་དང་། དབང་བསྐུར་བ་ལ་སོགས་པའི་ངོ་བོ་གང་ཡིན་པ་དེ་མཆོག་ཏུ་གྱུར་པས་ན་དམ་
པའོ། །རང་བྱུང་བ་ཉིད་ནི་སངས་རྒྱས་བཅོམ་ལྡན་འདས་སོ། །མཆོད་པ་ཐམས་ཅད་གྲུབ་ཅིང་རྫོགས་པར་འགྱུར་རོ་ཞེས་བྱ་བའི་དོན་ཏོ། །རིགས་ཐམས་ཅད་ནི་དེ་བཞིན་གཤེགས་པ་ལ་སོགས་པ་ཐམས་ཅད་དོ། །དམ་ཚིག་ནི་དེ་ཁོ་ན་ཉིད་ཀྱི་དངོས་གྲུབ་སྟེ། དེ་ཉིད་ཀྱི་ཕྱག་རྒྱ་དེས་སེམས་ཅན་
གྱི་ཁམས་ལ་རྒྱས་འདེབས་པ་དེའི་ཆོ་ག་རྒྱས་པའོ། །བཤད་མ་ཐག་པ་སྟོན་པར་བྱེད་པའི་སྒྲའི་ཚོགས་ལ་རྒྱུད་ཅེས་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་དེ་ཁོ་ན་ཉིད་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་རང་གི་ལྷའི་རྣལ་འབྱོར་བྱས་ལ་རས་རིས་ལ་སོགས་པ་རྣམས་ལ་
ཡང་རང་གི་ལྷ་སྤྱན་དྲངས་ཏེ། ཟུང་དུ་འཇུག་པའི་རྣལ་འབྱོར་སྒོམ་པར་བྱེད་ཅིང་རང་གི་ལྷ་རྗེས་སུ་དྲན་པས་ཕྱག་རྒྱ་ཆེན་པོ་ལ་སོགས་པ་ཐམས་ཅད་ཉིས་འགྱུར་གྱི་དངོས་གྲུབ་ཏུ་འགྱུར་རོ་ཞེས་བྱ་བའི་ཆོ་ག་འདིས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་ནས། དེ་བཞིན་གཤེགས་པ་ཐམས་
ཅད་ཀྱི་རིགས་ཀྱིས་དངོས་གྲུབ་ཀྱི་ཕྱག་རྒྱའི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པ་ནས། དོན་ཡོད་པར་གྲུབ་པའི་མཐར་ཐུག་པ་ལྔའོ། །རིགས་ནི་དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། ནོར་བུའི་རིགས་སོ། །དེ་དག་གི་དངོས་
གྲུབ་ནི་རྫོགས་པ་སྟེ། དེའི་ཕྱག་རྒྱ་ནི་བསྒོམ་པ་ཡིད་ཀྱི་ཕྱག་རྒྱ་ཞེས་བྱ་བའི་དོན་ཏོ། །སངས་རྒྱས་ཕྱག་རྒྱ་བཅིངས་ནས་ནི། །ཞེས་བྱ་བ་ལ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་ཀྱིས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་པའོ། །དེ་བཞིན་གཤེགས་པ་

དྲན་བྱེད་ཅིང་། །ཞེས་བྱ་བ་ནི་རང་གི་དེ་བཞིན་གཤེགས་པའི་མདུན་དུ་བདག་ཉིད་ཀྱིས་བསྒོམས་ན། རྣལ་འབྱོར་པ་འགྲུབ་པར་འགྱུར་རོ། །ཅི་ཞིག་བྱས་ན་འགྲུབ་པར་འགྱུར་ཞེ་ན། བསྒྲུབས་ནས་ཞེས་བྱ་བ་སྨོས་ཏེ། དེ་སྔར་བཤད་པའི་བསྒོམ་པའི་སྦྱོར་བས་མྱུར་དུ་འགྲུབ་པར་འགྱུར་བའོ། །
ཅི་ཞིག་བསྒྲུབས་ནས་ཤེ་ན། སངས་རྒྱས་བྱང་ཆུབ་བརྟན་པ་ཡང་། །ཞེས་བྱ་བ་སྨོས་ཏེ། མི་བརྟན་པའི་དངོས་པོ་ཙམ་གཅོད་པར་ཟད་ཀྱི། རིག་པ་འཛིན་པའི་དངོས་གྲུབ་ལ་སོགས་པ་བསྒྲུབས་ཀྱང་འགྲུབ་པར་འགྱུར་རོ། །མི་འགྱུར་བའི་དངོས་པོས་སངས་རྒྱས་དང་བྱང་ཆུབ་སེམས་དཔའ་རྣམས་
ཀྱང་འགྲུབ་པར་འགྱུར་རོ། །དེའི་ཕྱིར་གདོན་མི་ཟ་བའི་ངོ་བོ་ཉིད་དུ་འགྲུབ་པར་འགྱུར་ཏེ། ངེས་པར་སྐྱེས་པའི་སྒྲུབ་པ་པོས་དངོས་གྲུབ་འགྲུབ་པར་འགྱུར་ཞེས་བསྟན་པ་ཡིན་ནོ་ཞེས་རྡོ་རྗེ་སེམས་དཔའ་ལ་མངའ་བའི་ཕྱག་རྒྱ་ཆེན་པོ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ། དེ་བཞིན་གཤེགས་པའི་
རིགས་ཀྱི་རྡོ་རྗེ་སེམས་དཔའ་ལ་སོགས་པའི་དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོའི་ངོ་བོ་ཕྱག་རྒྱ་རྣམ་པ་བཞིའོ། །དེ་བཅིངས་པ་ནི་སྔར་བཤད་པའི་ཚུལ་གྱིས་རྣམ་པ་ཐམས་ཅད་ཀྱི་མཆོག་དང་ལྡན་པ་ཡོངས་སུ་རྫོགས་པའོ། །ཡང་དང་ཡང་མངོན་དུ་བྱས་ནས་མདུན་དུ་རྡོ་རྗེ་
སེམས་དཔའ་ཡོངས་སུ་བསྒོམས་པས་ཤིན་ཏུ་མྱུར་བར་དངོས་གྲུབ་ཏུ་འགྱུར་རོ་ཞེས་བྱ་བ་ནི། རྣལ་འབྱོར་གཅིག་ལ་ལྟོས་ནས། ཟུང་འཇུག་གི་རྣལ་འབྱོར་གྱིས་མྱུར་དུ་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་
པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་བྱས་ཏེ། ཆོ་ག་ཐམས་ཅད་རྗེས་སུ་སྤྱད་ལ། རས་ལ་སོགས་པ་ལ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་ལྷ་རྣམས་བསྒོམས་ཏེ། བསྡུ་བ་ལ་སོགས་པའི་ཆོ་གས་རབ་ཏུ་བཞག་སྟེ། མཆོད་པ་ཐམས་ཅད་ཀྱིས་
ཆོ་ག་བཞིན་དུ་ཡང་དག་པར་མཆོད་ལ། ཕྱག་རྒྱ་བཞི་བྱས་ནས་བསྒོམས་ལ། དེས་རྣལ་འབྱོར་གཅིག་ལ་ལྟོས་ནས་མྱུར་དུ་འགྲུབ་པར་འགྱུར་རོ་ཞེས་ཐམས་ཅད་དུ་ཤེས་པར་བྱའོ། །རྡོ་རྗེའི་རིགས་ནི་རྡོ་རྗེ་ཧཱུཾ་མཛད་ལ་སོགས་པའི་སྔར་བཤད་པའི་ཚུལ་གྱིས་ཕྱག་རྒྱ་ཆེན་པོ་དང་། དམ་ཚིག་དང་།

ཆོས་དང་། ལས་ཀྱི་ཕྱག་རྒྱ་རྣམས་བྲི་བར་བྱའོ། །གང་གི་ཏིང་ངེ་འཛིན་བྱས་ནས་ཤེ་ན། རྡོ་རྗེ་སེམས་དཔའི་ཏིང་ངེ་འཛིན་གྱིས་ཞེས་བྱ་བ་སྨོས་ཏེ། རང་གི་ཁྲོ་བོ་བསྒོམས་པ་ནི། །རྡོ་རྗེ་སེམས་དཔའི་ཏིང་ངེ་འཛིན་ཏེ། རྡོ་རྗེ་སེམས་དཔའི་ཏིང་ངེ་འཛིན་དེས་རང་གི་ལྷའི་ཕྱག་རྒྱ་བཅིངས་ཏེ།
དེ་བཞིན་གཤེགས་པའི་རིགས་ཀྱི་སྔར་བཤད་པའི་ཆོ་གས་རང་གི་ཁྲོ་བོ་བསྡུ་བ་ལ་སོགས་པའི་ཆོ་གས་མདུན་དུ་རབ་ཏུ་བཞག་ལ་རང་གི་ལྷའི་རང་བཞིན་གྱིས་རྡོ་རྗེ་སེམས་དཔའ་བསྒོམ་པར་བྱའོ། །ཉིས་རིམ་དུ་ནི་དངོས་གྲུབ་ཐོབ། །ཅེས་བྱ་བ་ནི་གང་གི་ཚེ་བདག་ཉིད་ཀྱིས་རྣལ་འབྱོར་གཅིག་བསྒོམས་པ་ན་ལོ་གཅིག་
གིས་འགྲུབ་པར་འགྱུར་བ་དེ་ཟུང་གི་རྣལ་འབྱོར་གྱིས་ཟླ་བ་དྲུག་གིས་འགྲུབ་པར་འགྱུར་རོ། །ཆོས་ཀྱི་ཕྱག་རྒྱ་བཅིངས་ནས་ཀྱང་། །ཞེས་བྱ་བ་ལ་སོགས་པ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་ཉིད་འཇིག་རྟེན་དབང་ཕྱུག་གི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་
དེ། སྔ་མ་བཞིན་དུ་བསྡུ་བ་ལ་སོགས་པའི་ཆོ་གས་འཇིག་རྟེན་དབང་ཕྱུག་མདུན་གྱི་རས་རིས་ལ་སོགས་པ་ལ་བཀོད་དེ། དེའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ། དེ་ཉིད་མདུན་དུ་བདག་གིས་བསྒོམས་ལ། དེ་མངོན་དུ་བྱས་ན་དངོས་གྲུབ་ཉིས་འགྱུར་དུ་འགྱུར་རོ། །ནོར་བུའི་རིགས་ཀྱི་
ཕྱག་རྒྱ་རྣམ་པ་བཞི་ནི་ལས་ཀྱི་ཕྱག་རྒྱ་ཞེས་བྱའོ། །དེ་བཅིང་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་བཅིང་བར་བྱའོ། །རྡོ་རྗེ་སྙིང་པོའི་ཏིང་འཛིན་གྱིས། །ཞེས་བྱ་བ་ནི་རང་གི་ལྷ་བསྒོམ་པ་དེ་ནི་རྡོ་རྗེ་སྙིང་པོའི་ཏིང་ངེ་འཛིན་ཡིན་ཏེ། དངོས་གྲུབ་ཉིས་འགྱུར་དུ་
འགྱུར་རོ། །ཇི་ལྟ་བ་ནི་ཞེ་ན། རྡོ་རྗེ་སྙིང་པོ་བསྒོམས་ནས་ནི། ཞེས་བྱ་བ་སྨོས་ཏེ། སྔ་མ་བཞིན་དུ་བསྡུ་བ་ལ་སོགས་པས་བཅོམ་ལྡན་འདས་རྡོ་རྗེ་སྙིང་པོའི་མདུན་དུ་བཞག་ལ་བསྒོམ་པར་བྱའོ། །དེ་ལྟར་ཟུང་གི་རྣལ་འབྱོར་རྒྱས་པ་ལ་དགའ་བའི་སེམས་ཅན་རྗེས་སུ་གཟུང་བའི་ཕྱིར། རང་གི་ལྷ་
རྗེས་སུ་དྲན་པའི་བསྒྲུབ་པ་བཤད་ནས། ད་ནི་ཕྱག་རྒྱ་ཆེན་པོ་ལ་སོགས་པའི་རང་གི་ལྷའི་ཕྱག་རྒྱ་རྣམ་པ་བཞི་པོ་ནི་རང་གི་ལྷའི་ང་རྒྱལ་གྱིས་སྙིང་པོ་བརྗོད་ཅིང་བསྒྲུབ་པར་བྱའོ་ཞེས་བྱ་བའི་ངེས་པ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཐམས་

ཅད་ཀྱི་དངོས་གྲུབ་སྒྲུབ་པའི་རྒྱུད་གསུངས་པའོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་སྔ་མ་བཞིན་ནོ། །དེ་དག་ནི་དངོས་གྲུབ་ཐམས་ཅད་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ཀྱི་དངོས་གྲུབ་བོ། །དེ་བསྒྲུབ་པ་ནི་བསྐྱེད་པའོ། །བདག་ཉིད་དམ་
ཚིག་མདུན་དུ་ཡང་། །སངས་རྒྱས་རྗེས་སུ་དྲན་པར་བསྒོམ། །ཞེས་བྱ་བ་ནི་སྔར་བཤད་པའི་ཚུལ་གྱིས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཇི་ལྟ་བ་བཞིན་དུ་བསྡུ་བ་ལ་སོགས་པ་མདུན་དུ་བཞག་ལ་
རང་གི་དེ་བཞིན་གཤེགས་པ་ཕྱག་རྒྱ་ཆེན་པོ་བཅིངས་ཏེ། དེའི་སྔགས་བརྗོད་ཅིང་། བདག་ཉིད་དམ་མདུན་དུ་བཞག་ན་དེ་བཞིན་གཤེགས་པ་བསྒོམ་པར་བྱའོ། །དེ་ནས་དེ་མ་ཐག་ཏུ་འགྲུབ། །ཅེས་བྱ་བ་ནི་གང་གི་ཚེ་དེ་ལྟར་བསྒོམས་ནས་མཚན་མ་ཐོབ་པར་གྱུར་པ་དེའི་ཚེ། སྔར་བཤད་པའི་ཆོ་
གས་མངོན་པར་ཤེས་པ་ལྔར་འགྱུར་རོ། །དེ་ནས་མཚན་ཐོག་ཐག་བསྒོམས་ནས་དེའི་རྗེས་ལ་བདག་ཉིད་དམ་མདུན་དུ་དེ་བཞིན་གཤེགས་པ་མངོན་སུམ་ལྟ་བུར་མཐོང་བར་འགྱུར་རོ། །དེ་ནས་སྐད་ཅིག་དེ་ཉིད་ལ་དེ་བཞིན་གཤེགས་པར་འགྱུར་རོ། །འདོད་པས་བདག་ཅེས་བསྒོམས་ནས་ཀྱང་། །
ཕྱག་རྒྱ་ཐམས་ཅད་བསྒྲུབས་ན་ནི། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་ཕྱག་རྒྱ་རྣམ་པ་བཞི་པོ་བསྒྲུབས་པས་ཀྱང་འདོད་པའི་བདག་ཉིད་བྱང་ཆུབ་ཀྱི་སེམས་ཆེན་པོ་བདག་ཡིན་ནོ་ཞེས་རྣམ་པར་སྣང་མཛད་ཆེན་པོའི་ང་རྒྱལ་བསྐྱེད་པར་བྱའོ། །རྡོ་རྗེ་
སེམས་དཔའི་ཚུལ་གྱིས་ནི། །ཞེས་བྱ་བ་ནི་རྡོ་རྗེ་བཟླས་པའི་ཚིག་གིས་བརྗོད་པའོ། །དེ་ནི་འདི་སྐད་སྟོན་པ་ཡིན་ཏེ། བཟླས་པའི་སྙིང་པོ་མེད་ན་ཕྱག་རྒྱའི་དངོས་གྲུབ་ཏུ་མི་འགྱུར་རོ་ཞེས་བྱ་བ་ཡིན་ནོ། །དངོས་གྲུབ་ཀུན་གྱི་མཆོག་གྲུབ་བོ། །ཞེས་བྱ་བ་ནི་དངོས་གྲུབ་ཀྱང་ཡིན་ལ་ཐམས་ཅད་
ཀྱང་དེ་ཡིན་པས་ན་དངོས་གྲུབ་ཐམས་ཅད་དེ་ཕྱག་རྒྱ་ཆེན་པོ་ལ་སོགས་པའི་ངོ་བོའི་དངོས་གྲུབ་ཐམས་ཅད་དོ། །དེ་འདི་རྣམས་ཀྱི་མཆོག་ཏུ་བསྒྲུབ་པས་ན་དམ་པའི་བསྒྲུབ་པའོ། །བདག་ཉིད་ཀྱིས་ནི་རྡོ་རྗེའི་དབྱིབས། །ཞེས་བྱ་བ་ནི་རྡོ་རྗེ་དག་གི་དབྱིབས་ནི་རྡོ་རྗེའི་དབྱིབས་ཏེ། རྡོ་རྗེ་ཧཱུཾ་མཛད་ལ་སོགས་

པ་རྡོ་རྗེ་རིགས་ཀྱི་ངོ་བོའི་བདག་ཉིད་ཀྱིས་ཞེས་བྱ་བ་ནི་བདག་ཉིད་ནི་བདག་ཉིད་རྣམས་ཏེ། རྡོ་རྗེ་ཧཱུཾ་མཛད་ལ་སོགས་པའི་ངོ་བོ་བསྒོམས་པས་ཡང་ནས་ཡང་མངོན་དུ་བྱས་ནས། དེའི་ང་རྒྱལ་བསྐྱེད་དེ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བར་བྱའོ་ཞེས་བྱ་བར་
སྦྱར་རོ། །ཇི་ལྟར་བཅིངས་ཤེ་ན། མཉམ་པར་བཞག་པས་སོ། །དེའི་ཕྱིར། དེ་མ་ཐག་ཏུ་འགྲུབ་པར་འགྱུར། །ཞེས་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེའི་རིགས་ཀྱི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱག་རྒྱ་ཆེན་པོ་ལ་སོགས་པ་དེའི་ང་རྒྱལ་གྱིས་
བཅིངས་ཏེ། རང་གི་སྙིང་པོ་བརྗོད་ཅིང་ཉིན་རེ་བཞིན་ཐུན་བཞིའི་སྦྱོང་བས་ཇི་སྲིད་བདག་ཉིད་རྡོ་རྗེ་ཧཱུཾ་མཛད་ཀྱི་གཟུགས་སུ་ཉིན་རེ་བཞིན་མངོན་སུམ་ལྟ་བུར་བདག་ཉིད་ཀྱིས་མངོན་སུམ་