Luận tạng Tây Tạng (Tengyur) — Tập 58

རྒྱ་ཆེན་པོ་ནས་རྡོ་རྗེ་འབེབས་པའི་ཕྱག་རྒྱ་ཆེན་པོའི་བར་དུ་བཅིངས་ཏེ་བསྒོམ་པར་བྱའོ། །སྔ་མ་བཞིན་དུ་ཇི་སྲིད་དུ་རང་གི་སེམས་དཔའི་ཕྱག་རྒྱ་བདག་ཉིད་མངོན་སུམ་ལྟ་བུར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །ཕྱག་རྒྱ་ཆེན་པོ་བཅིངས་
ནས་ཇི་ལྟར་སེམས་དཔའི་སྦྱོར་བ་བསྒོམ་པར་བྱ་ཞེ་ན། དེ་ཉིད་ཆེན་པོ་བརྗོད་བྱ་སྟེ། །ཞེས་བྱ་བ་སྨོས་ཏེ། རྡོ་རྗེ་སེམས་དཔའ་ནས་རྡོ་རྗེ་འབེབས་པའི་བར་དུ་ཨོཾ་བཛྲ་སཏྭ་ཧཱུཾ་ཞེས་བྱ་བ་ནས། ཨོཾ་བཛྲ་ཨཱ་བེ་ཤ་ཨཿཞེས་བྱ་བའི་བར་དུ་རྡོ་རྗེ་སེམས་དཔའ་ལ་སོགས་པའི་སྔགས་བརྗོད་པར་བྱའོ་
ཞེས་བྱ་བའི་དོན་ཏོ། །དེ་ནས་རང་གི་ལུས་ལ་ལྷ་ཐམས་ཅད་ཀྱི་རང་བཞིན་བདག་ཡིན་ནོ་ཞེས་བསམ་པར་བྱའོ། །རང་གི་ལུས་ལས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྣམ་པར་སྣང་མཛད་ནས་རྡོ་རྗེ་འབེབས་པའི་བར་དུ་སྤྲུལ་ལ། རིག་པའི་རྒྱལ་པོ་དང་། ཁྲོ་
བོའི་ཚོགས་དང་། ཕོ་ཉ་དང་། བྲན་དང་། བཙུན་མོ་ལ་སོགས་པ་དང་། སེམས་ཅན་དང་། སྣོད་ཀྱི་འཇིག་རྟེན་ཐམས་ཅད་སྤྲུལ་ནས། རྣམ་པར་སྣང་མཛད་ལ་སོགས་པའི་གཟུགས་ནི་བདག་ཡིན་ནོ་ཞེས་ཚིག་རེ་རེར་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་ནས་བསྒོམ་པར་བྱའོ། །
བསྒོམས་པའི་ལས་ཀྱི་འབྲས་བུ་གང་ཡིན་ཞེ་ན། ཅི་སྟེ་འདོད་ན་བདག་ཉིད་དེས། །དེས་བྱ་གཟི་ཅན་དགེ་བ་ཡི། །གོ་འཕང་ཚེ་འདི་ཉིད་ལ་ཐོབ། །མི་འདོད་དངོས་གྲུབ་གོང་མ་བཞིན། །ཞེས་བྱ་བ་སྨོས་ཏེ། སྒྲུབ་པ་པོ་གང་ཡིན་པས་ཚེ་འདི་ཉིད་ལའོ། །གཟི་ཅན་ཞེས་བྱ་བ་ནི་འོད་

ཟེར་ཅན་ནོ། །བྱང་ཆུབ་པའི་རང་བཞིན་ཅན་གྱི་སེམས་དཔའ་ལ་སོགས་པའོ། །གོ་འཕང་ནི་རྡོ་རྗེ་འཆང་ཆེན་པོའི་རང་བཞིན་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེ་ལྟར་བསྒོམ་པར་མི་འདོད་ན་གོང་དུ་བཤད་པའི་རྡོ་རྗེ་སེམས་དཔའ་ལ་སོགས་པའི་གཟུགས་ཉིད་འབའ་ཞིག་བསྒོམ་པ་དེའི་ཚེ། དེ་
བསྒོམས་པས་འགྲུབ་པར་འགྱུར་ཏེ། རྫུ་འཕྲུལ་ཆེ་སྟོབས་གཟུགས་མཆོག་རྣམས། །རྡོ་རྗེ་སེམས་སོགས་འདྲ་བར་འགྱུར། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ཉིད་དུ་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ལས་བཤད་པའི་རྡོ་རྗེ་སེམས་དཔའི་
རྣལ་འབྱོར་བྱ་བ་ནས། རྡོ་རྗེ་འབེབས་པའི་རྣལ་འབྱོར་བྱ་བའི་བར་ཇི་སྲིད་བདག་ཉིད་ཀྱིས་མངོན་སུམ་དུ་མཐོང་བར་གྱུར་གྱི་བར་དུ་བསྒོམ་པར་བྱའོ། །དེ་ནས་བརྟན་པ་དང་གཡོ་བའི་དངོས་པོ་ཐམས་ཅད་རང་གི་ལུས་ལས་སྤྲུལ་ཏེ། དེའི་རང་བཞིན་བདག་ཡིན་ནོ་ཞེས་ང་རྒྱལ་བསྐྱེད་ནས་
ཇི་སྲིད་དུ་བརྟན་པ་དང་གཡོ་བའི་དངོས་པོར་བདག་ཉིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་པར་བསྒོམས་ན་རྡོ་རྗེ་འཆང་ཆེན་པོར་འགྱུར་རོ། །དེ་ལྟར་འགྱུར་བ་ཇི་ལྟར་ཤེས་ཤེ་ན། གཅིག་གི་ངོ་བོ་བརྟན་པར་བྱས་ཏེ། ཕྱི་ནས་ཚིག་རེར་
ཐམས་ཅད་བདག་ཡིན་པར་ཞེས་བྱ་བ་སྨོས་ཏེ་བསྒོམས་པས་སོ། །བརྟན་པར་གྱུར་ནས་སྤྲོ་བར་བྱ། །བརྟན་པར་མ་གྱུར་དེ་མི་སྤྲོ། །ཞེས་གསུངས་སོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དམ་ཚིག་འཛིན་པའི་ཕྱག་རྒྱ་ནི་དམ་ཚིག་གི་ཕྱག་རྒྱ་སྟེ། རྣམ་པར་སྣང་མཛད་ལ་སོགས་
པ་སྟོན་པའོ། །དེའི་དམ་པའི་དངོས་གྲུབ་ནི་དེ་རྣམས་ཀྱི་དམ་ཚིག་གི་ཕྱག་རྒྱ་དང་བྱང་ཆུབ་སེམས་དཔའ་ཉིད་ཐོབ་བོ་ཞེས་བྱ་བའི་དོན་ཏོ། །ཇི་ལྟར་རྡོ་རྗེ་འཛིན་གྲུབ་པ་ནི་རྣམ་པར་སྣང་མཛད་ཆེན་པོ་དང་། དེ་བཞིན་ཉིད་དང་། རྡོ་རྗེ་འཆང་ཆེན་པོའི་རྡོ་རྗེ་འཛིན་ཆེན་པོའོ། །དངོས་གྲུབ་ནི་དེ་བཞིན་ཉིད་
དུ་རོ་གཅིག་པར་གྱུར་པའོ། །དེ་ལྟར་བདག་ཅེས་བསྒོམས་ནས་ནི། །ཞེས་བྱ་བ་ནི་ཡང་དང་ཡང་མངོན་དུ་བྱས་པའོ། །སངས་རྒྱས་དང་ནི་གཟི་ཆེན་ཐོབ། །ཅེས་བྱ་བ་ནི་རྡོ་རྗེ་འཆང་ཆེན་པོ་ཉིད་ཐོབ་པའོ། །མི་འདོད་དངོས་གྲུབ་གོང་མ་བཞིན། །ཞེས་བྱ་བ་ནི་སྔར་བཤད་པ་བཞིན་ནོ། །འདི་སྐད་

སྟོན་པ་ཡིན་ཏེ། སྔ་མ་བཞིན་དུ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རྣལ་འབྱོར་རམ། རྡོ་རྗེ་སེམས་དཔའ་ལ་སོགས་པ་རྣམས་ཀྱི་རྣལ་འབྱོར་བྱས་ཏེ། གཟུགས་བརྙན་ལ་སོགས་པ་དང་མཚུངས་པར་བདག་ཉིད་བསྒོམ་པར་བྱའོ། །རང་གི་དམ་ཚིག་གི་ཕྱག་རྒྱ་བཅིངས་ཏེ།
རང་གི་སྙིང་པོ་དང་སྔགས་བརྗོད་ཅིང་སྔ་མ་བཞིན་དུ་དེ་བཞིན་གཤེགས་པའམ། རྡོ་རྗེ་སེམས་དཔའ་ལ་སོགས་པ་གཟུགས་བརྙན་དང་མཚུངས་པར་བདག་ཉིད་མངོན་སུམ་ལྟ་བུར་མཐོང་བ་དེ་སྲིད་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་སྤྲོ་བ་དང་བསྡུ་བའི་སྦྱོར་བས་ཇི་སྲིད་ཐམས་ཅད་ཀྱི་རང་བཞིན་ནམ།
རྡོ་རྗེ་སེམས་དཔའ་ལ་སོགས་པའི་རང་བཞིན་ནམ་མཁའ་ལ་མངོན་སུམ་དུ་མཐོང་བར་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ནས་དེ་བཞིན་གཤེགས་པའམ། རྡོ་རྗེ་འཆང་བར་བདག་ཉིད་འགྱུར་རོ། །ཆོས་ཀྱི་ཕྱག་རྒྱ་དམ་པའི་དངོས་གྲུབ་ནི་སངས་རྒྱས་དང་བྱང་ཆུབ་སེམས་
དཔའ་ཉིད་ཐོབ་པའོ། །ཆོས་རྣམས་ཐམས་ཅད་རང་བཞིན་གྱིས། །དག་ཅེས་བརྗོད་ན་ངེས་པར་ཡང་། །ཞེས་བྱ་བ་ནི་དོན་དམ་པར་ན་དངོས་པོ་མེད་པའི་རང་བཞིན་ཡིན་ནོ་ཞེས་བྱ་བའི་བཛྲ་ཛྙཱ་ན་ནས་གརྦྷ་ཨ་ཨཿཞེས་བྱ་བའི་བར་གྱི་ཆོས་ཀྱི་ཡི་གེའི་ངོ་བོ་བརྗོད་ཅིང་སྨྲས་པའོ། །ཅི་ཙམ་ཞིག་རང་བཞིན་གྱིས་
དག་པར་འགྱུར་ཞེ་ན། ཆོས་ཐམས་ཅད་ཅེས་བྱ་བ་སྨོས་ཏེ། འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་དོ། །རང་བཞིན་གྱིས་དག་པ་ནི་སྟོང་པ་ཉིད་དོ། །ཆོས་ཀྱི་ཡི་གེའི་ངོ་བོ་བརྗོད་པ་ནི་སྨྲས་པའོ། །སངས་རྒྱས་སམ་བྱང་ཆུབ་སེམས་དཔའ་ཐོབ་པར་འགྱུར་རོ། །སྔ་མ་བཞིན་དུ་དེ་བཞིན་གཤེགས་
པའི་རྣལ་འབྱོར་རམ། རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། སྔ་མ་བཞིན་དུ་ལྕེ་ལ་བཛྲ་ཛྙཱ་ན་ལ་སོགས་པ་ཆོས་ཀྱི་ཡི་གེ་རྣམ་པར་བསམ་པར་བྱའོ། །ཕྱིས་རང་གི་སྙིང་གར་རྡོ་རྗེ་རྩེ་ལྔ་པ་དེ་རྣམ་པར་བཀོད་ན། དེ་རྡོ་རྗེའི་ཚིག་གིས་བརྗོད་ཅིང་། དེ་བཞིན་གཤེགས་པ་དང་། རྡོ་རྗེ་
སེམས་དཔའ་ལ་སོགས་པའི་གཟུགས་བརྙན་སྣང་བ་ཙམ་གྱིས་རྣམ་པར་དག་པར་བདག་ཉིད་བསྒོམས་ཏེ། ཇི་སྲིད་དུ་དེའི་ངོ་བོར་བདག་ཉིད་མངོན་སུམ་དུ་མཐོང་བར་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་ཇི་སྲིད་དུ་སྤྲོ་བ་དང་བསྡུ་བའི་སྦྱོར་བས་ནམ་མཁའི་ཁམས་ཐམས་ཅད་

དུ་དེ་བཞིན་གཤེགས་པའི་བདག་ཉིད་དམ། རྡོ་རྗེ་སེམས་དཔའ་ལ་སོགས་པའི་བདག་ཉིད་དུ་མཐོང་བར་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་དེ་བཞིན་དུ་བསྒྲུབས་ན་དེ་བཞིན་གཤེགས་པའམ། ལས་ཀྱི་ཕྱག་རྒྱ་རྣམས་ཀྱི་དམ་པའི་དངོས་གྲུབ་ནི་ལས་ཀྱི་ཕྱག་རྒྱ་ནི་དམ་པའི་དངོས་གྲུབ་བོ། །ཐམས་
ཅད་ཀྱི་ནི་ཀུན་དག་པར། །ཞེས་བྱ་བ་ནི་སྦྱོར་བ་དང་། ཡོངས་སུ་སྦྱོང་བ་དང་། སོ་སོར་རྟོག་པ་དང་། སྒྲུབ་པ་ལྷུར་ལེན་པའི་བརྩོན་འགྲུས་ཀྱི་མཚན་ཉིད་དང་། སེམས་ཅན་གྱི་དོན་དུ་སངས་རྒྱས་ཀྱི་སྤྲུལ་པའི་མཛད་པའི་སྒེག་མོ་ལ་སོགས་པའི་མཆོད་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་
པའི་མཆོད་པ་བཅུ་དྲུག་གི་མཚན་ཉིད་དོ། །ལས་རྣམས་ཐམས་ཅད་སྦྱངས་ནས་ནི། །ཞེས་བྱ་བ་ནི་རང་བཞིན་གྱིས་འོད་གསལ་བའི་བརྩོན་འགྲུས་ཀྱི་ཕ་རོལ་ཏུ་ཕྱིན་པས་ཐམས་ཅད་རྣམ་པར་སྦྱངས་པའོ། །དེའི་ཕྱིར་ཀུན་ནས་ཀུན་དུ་རྣམ་པར་དག་པའི་ཕྱིར་ལས་རྣམས་ཐམས་ཅད་ཇི་ལྟ་བ་བཞིན་དུ་ཡོངས་སུ་
སྦྱོར་བའི་ལས་ཐམས་ཅད་རང་བཞིན་གྱིས་འོད་གསལ་བའི་སྒྱུ་མ་དང་མཚུངས་པར་བསྒོམས་པའོ། །བསྒོམས་པས་ཅིར་འགྱུར་ཞེ་ན། སངས་རྒྱས་གཟི་ཆེན་ཐོབ་ཅེས་བྱ་བ་སྨོས་ཏེ། འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་རྣལ་འབྱོར་རམ།
དེའི་རིགས་ཀྱི་རྣལ་འབྱོར་བྱས་ལ། སྒེག་མོ་ལ་སོགས་པ་རྣམས་དང་། ལས་ཀྱི་དཀྱིལ་འཁོར་ལས་གསུངས་པའི་མཆོད་པ་རྣམས་ཀྱིས་ཡང་དག་པར་མཆོད་ལ། དེའི་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་གར་སྣ་ཚོགས་རྡོ་རྗེ་རྣམ་པར་བསམས་ནས། དེའི་སྟེང་དུ་སྙིང་པོའམ་སྔགས་རང་གི་ཡིད་ཀྱིས་
བྲིས་ལ། དེའི་སྙིང་པོའམ་སྔགས་རྡོ་རྗེའི་ཚིག་གིས་བརྗོད་ཅིང་། རང་བཞིན་གྱིས་འོད་གསལ་བའི་སྣང་བརྙན་ཙམ་དུ་དེ་བཞིན་གཤེགས་པའམ། རྡོ་རྗེ་སེམས་དཔའ་ལ་སོགས་པའི་རང་བཞིན་དུ་ཇི་སྲིད་བདག་ཉིད་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་ཐམས་ཅད་
ཀུན་དུ་ཁྱབ་པར་རྣམ་པར་བསམས་ལ། སྔ་མ་བཞིན་དུ་ང་རྒྱལ་བསྐྱེད་དེ། ཇི་སྲིད་དུ་དེའི་གཟུགས་སུ་བདག་ཉིད་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ན་དེ་དེ་བཞིན་གཤེགས་པའམ་རྡོ་རྗེ་འཆང་བར་འགྱུར་རོ། །དེ་བཞིན་གཤེགས་པའི་རིགས་ཀྱི་དམ་པའི་

དངོས་གྲུབ་རྣམས་ནི་དེ་བཞིན་གཤེགས་པའི་རིགས་ཀྱི་དངོས་གྲུབ་དམ་པའོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པ་དང་། དེའི་རིགས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་ལས་ཀྱི་ཕྱག་རྒྱ་རྣམས་ཀྱི་དམ་པའི་
དངོས་གྲུབ་ནི་བཤད་མ་ཐག་པ་ཡིན་ནོ་ཞེས་བྱ་བའི་དོན་ཏོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །ཕྱག་ན་རྡོ་རྗེ་ནི་རྡོ་རྗེ་ཧཱུཾ་མཛད་དོ། །རང་གི་རིགས་ནི་རྡོ་རྗེའི་རིགས་སོ། །དམ་པའི་དངོས་གྲུབ་ནི་རང་གི་རིགས་ཀྱི་དམ་པའི་དངོས་གྲུབ་སྟེ་སྔ་མ་བཞིན། དངོས་གྲུབ་ཀུན་སྦྱོར་སངས་རྒྱས་ཀྱི། །
ཞེས་བྱ་བ་ནི་ཁམས་གསུམ་དུ་སྐྱེས་པའི་སེམས་ཅན་ཐམས་ཅད་ཀྱང་འཇིག་པའི་བསྐལ་པའི་མེ་ལ་སོགས་པ་རྣམས་ཀྱིས་གནོད་པར་གྱུར་པའི་གདུལ་བྱའི་དབང་གིས་སངས་རྒྱས་རྣམས་ཀྱི་བཀས་ནི་སངས་རྒྱས་ཀྱིས་རྡོ་རྗེ་ཧཱུཾ་མཛད་ལ་བཀའ་སྩལ་པ་གང་ཡིན་པ་དེ་ནི་སངས་རྒྱས་ཀྱི་བཀའོ། །དེའི་ཕྱིར་
སངས་རྒྱས་ཀྱིས་བཀའ་སྩལ་པའི་རྒྱུ་ཡིས་སོ། །སེམས་ཅན་ཀུན་གྱི་དོན་དུ་ཞེས་བྱ་བ་ནི་སེམས་ཅན་ཡང་ཡིན་ལ་ཀུན་ཡང་ཡིན་པས་ན་སེམས་ཅན་ཀུན་དོན་ནོ། །ལྷ་ཆེན་པོ་ལ་སོགས་པ་བཙན་ཐབས་ཀྱིས་སྒྲུབ་པ་དང་། བཀུག་ནས་གཡུལ་བཤམས་པ་དང་། རྩོད་པས་བསྒྲུབ་པ་སྟེ། དེ་དག་གི་དོན་
ནི་སེམས་ཅན་ཀུན་གྱི་དོན་ཡིན་པ་དེའི་ཕྱིར་སེམས་ཅན་ཀུན་གྱི་དོན་ཏེ། སངས་རྒྱས་དང་བྱང་ཆུབ་སེམས་དཔའ་བསྐྱེད་པའི་དོན་ཏོ་ཞེས་བྱ་བའི་ཐ་ཚིག་གོ། །དངོས་གྲུབ་ཀུན་སྦྱོར་ཞེས་བྱ་བ་ནི་དངོས་གྲུབ་ཀྱང་ཡིན་ལ་ཀུན་སྦྱོར་ཡང་དེ་ཡིན་པས་ན་དངོས་གྲུབ་ཀུན་སྦྱོར་ཏེ། རྡོ་རྗེ་ཧཱུཾ་མཛད་དང་ཁྲོ་བོ་རྡོ་རྗེ་སེམས་
དཔའ་ནས་བརྩམས་ཏེ། རྡོ་རྗེའི་རིགས་ཐམས་ཅད་ཀྱི་དངོས་གྲུབ་པོ། །དེའི་ཀུན་དུ་སྦྱོར་བ་ནི་དངོས་གྲུབ་ཐམས་ཅད་ཀྱི་རབ་ཏུ་སྦྱོར་བའོ། །ཕྱག་རྒྱ་ཆེན་པོ་སོ་སོར་བཅིངས་ནས་སེམས་ཅན་གྱི་ཁམས་ཐམས་ཅད་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེའི་རིགས་ཀྱི་གཟུགས་སུ་སྤྲུལ་ཅིང་བསྐྱེད་ནས་བདག་
ཉིད་བྱ་བ་བྱས་སོ་ཞེས་ལྷག་པར་མོས་པ་དེས་བསྒྲུབས་ལ། རྡོ་རྗེ་ཧཱུཾ་མཛད་དང་། དེའི་རིགས་ཀྱི་ཕྱག་རྒྱ་ཆེན་པོའི་རང་བཞིན་དུ་བདག་ཉིད་བསྐྱེད་པའོ། །དེའི་རང་བཞིན་དུ་ཡང་དང་ཡང་དུ་མོས་པས། ཚེ་འདི་ཉིད་ལ་སངས་རྒྱས་འགྲུབ། །ཅེས་བྱ་བ་ནི་ཚེ་འདི་ཉིད་ནི་མཐོང་བའི་ཆོས་ལ་གདོན་མི་ཟ་བ་

ཉིད་དུ་རྡོ་རྗེ་འཆང་ཆེན་པོ་ཐོབ་པོ་ཞེས་བཅོམ་ལྡན་འདས་ཕྱག་ན་རྡོ་རྗེས་གསུངས་སོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་དཔལ་རྡོ་རྗེ་ཧཱུཾ་མཛད་ཀྱི་རྣལ་འབྱོར་རམ། ཁྲོ་བོ་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་དེ་
ཉིད་དང་དེ་ལས་བཤད་པའི་རྣལ་འབྱོར་ཆེན་པོ་བྱས་ལ། སྒེག་མོ་ལ་སོགས་པའི་མཆོད་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་བདག་ཉིད་ཡང་དག་པར་མཆོད་ལ་དེ་བཞིན་གཤེགས་པ་ཐམས་ཅད་ལ་ཕྱག་བཞི་བྱས་ཏེ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་
བཅིངས་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཕྱུང་ནས་ཕྱོགས་བཅུ་ཐམས་ཅད་དུ་རྡོ་རྗེ་ཧཱུཾ་མཛད་སྤྲུལ་པར་ལྟ་སྟེ། ཡན་ལག་ཐམས་ཅད་ལས་ཧཱུཾ་ཞེས་བྱ་བས་སངས་རྒྱས་ཧཱུཾ་མཛད་བསྐུལ་ཏེ། རང་གི་རྡོ་རྗེ་ལས་རང་གི་རྡོ་རྗེའི་རིགས་སྤྲུལ་ནས་བསྐལ་པའི་རླུང་གིས་བསྐྱོད་
པའི་བསྐལ་པའི་མེ་ལྟ་བུ་རྡོ་རྗེ་འབར་བའི་ཀུན་ནས་འཁྲུག་པའི་འོད་ཟེར་གྱིས་གདུག་པ་ཐམས་ཅད་འདུལ་བ་དང་། ཞི་བ་ཐམས་ཅད་རྗེས་སུ་གཟུང་བའི་ཕྱིར་ནམ་མཁའི་ཁམས་ཐམས་ཅད་དུ་ཁྱབ་པའི་སེམས་ཅན་གདུག་པ་ཅན་ཐམས་ཅད་བཏུལ་ནས། ཐམས་ཅད་དེ་བཞིན་གཤེགས་པ་ལ་
སོགས་པར་གྱུར་ནས། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་རང་བཞིན་དུ་རྣམ་པར་བསམས་ཏེ། སརྦྦ་བཛྲ་ཀུ་ལ་སྭ་བྷཱ་བ་ཨ་ཧཾ་ཞེས་ང་རྒྱལ་བསྐྱེད་ནས་བྱ་བ་བྱས་པ་ཉིད་ཀྱིས་རྡོ་རྗེ་ཧཱུཾ་མཛད་བདག་ཉིད་བསྒོམ་པར་བྱ་བའམ། ཡང་ན་ཁྲོ་བོ་རྡོ་རྗེ་སེམས་དཔའི་ཕྱག་
རྒྱ་ཆེན་པོར་བཅིངས་ཏེ། སྒྲུབ་པ་པོ་དེ་ཁྲོ་བོ་རྡོ་རྗེ་སེམས་དཔའ་ལ་སོགས་པའི་བདག་ཉིད་ཀྱིས། སརྦྦ་བཛྲ་ཀུ་ལ་སྭ་བྷཱ་བ་ཨ་ཧཾ་ཞེས་ང་རྒྱལ་བསྐྱེད་ཅིང་བསྒོམ་པར་བྱའོ། །དེ་ལྟར་ན་ཚེ་འདི་ཉིད་ལ་སངས་རྒྱས་སུ་འགྲུབ་པར་འགྱུར་རོ། །སྔ་མ་བཞིན་དུ་གང་ཡང་རུང་བའི་གཟུགས་ཤིག་བསྟན་
པར་བྱས་པས་དེ་བཞིན་གཤེགས་པ་ཐམས་ཅད་ཀྱི་འབྲས་བུར་གྱུར་པ་དེ་བཞིན་དུ་ཐམས་ཅད་དུ་ཡང་ཤེས་པར་བྱའོ། །དམ་ཚིག་གི་ཕྱག་རྒྱ་དམ་པའི་དངོས་གྲུབ་ནི་དམ་ཚིག་གི་ཕྱག་རྒྱ་རྣམས་ཀྱི་དངོས་གྲུབ་སྟེ། དེ་སྟོན་པར་བྱེད་པའི་རྒྱུད་ལ་དེ་སྐད་ཅེས་བྱའོ། །ཕྱག་རྒྱ་ཆེན་པོའི་ཚུལ་དུ་

ནི། །ཇི་ལྟར་རྡོ་རྗེ་འཛིན་གྲུབ་པ། །དེ་བཞིན་བདག་ཅེས་བསྒོམས་ནས་ནི། །ཞེས་བྱ་བ་ལ། ཇི་ལྟར་རྡོ་རྗེ་འཛིན་པ་ནི་ཐོག་མ་མེད་པའི་ཆོས་ཀྱི་དབྱིངས་མངོན་སུམ་དུ་བྱས་པའི་གཉིས་སུ་མེད་པའི་ཡེ་ཤེས་ཀྱི་རང་བཞིན་དངོས་གྲུབ་བསྒྲུབ་པ་དེ་ལྟ་བུ་ནི་བདག་ཡིན་ནོ་ཞེས་
བསྒོམ་པར་བྱའོ། །ཇི་ལྟར་བསྒོམ་པར་བྱ་ཞེ་ན། ཕྱག་རྒྱ་ཆེན་པོའི་ཚུལ་དུ་ནི། །ཞེས་བྱ་བ་སྨོས་ཏེ། ཕྱག་རྒྱ་ཆེན་པོ་རྣམས་ལ་རབ་ཏུ་སྦྱོར་བ་ནི་ཕྱག་རྒྱ་ཆེན་པོའི་ཚུལ་ཏེ་དེ་ཡང་སྔར་བཤད་ཟིན་ཏོ། །ཕྱག་རྒྱ་ཆེན་པོའི་ཚུལ་དུ་བསྒོམ་པ་དེས་ཅི་ཞིག་ཏུ་འགྱུར་ཞེ་ན། སྐད་ཅིག་གིས་ནི་གཟི་
ཅན་ཐོབ། །ཅེས་བྱ་བ་སྨོས་ཏེ། འདི་སྐད་དུ་སྟོན་པ་ཡིན་ཏེ། སྔ་མ་བཞིན་དུ་རྣལ་འབྱོར་ཆེན་པོ་བྱས་ལ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། རང་གི་སྙིང་གའི་ཟླ་བ་ལ་གནས་པའི་རྡོ་རྗེ་རྩེ་ལྔ་པའི་དབུས་སུ་སྙིང་པོ་ཡིད་ཀྱིས་བྲིས་ཏེ། དེ་ཉིད་བརྗོད་ཅིང་གཟུགས་བརྙན་དང་མཚུངས་པར་
སྔ་མ་བཞིན་དུ་བདག་ཉིད་བསྒོམ་པར་བྱའོ། །དེ་ནས་དེ་ལྟར་ནམ་མཁའི་ཁམས་ཀྱི་ངོ་བོའི་རྡོ་རྗེའི་རིགས་ཀྱི་ངོ་བོ་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་པ་གང་ཡིན་པ་དེ་མངོན་སུམ་དུ་མཐོང་བར་འགྱུར་ཏེ། དེས་སྐད་ཅིག་དེ་ཉིད་ལ་
རྡོ་རྗེ་འཆང་ཆེན་པོར་འགྱུར་རོ། །དེ་ནས་ཞེས་བྱ་བ་ནི་སྔ་མ་བཞིན་ནོ། །ཡི་གེ་མེད་པའི་ཆོས་རྣམས་ལ། །རབ་ཏུ་སྤྲོ་བ་ཡོད་མིན་ཏེ། །ཞེས་བྱ་བ་ནི་ཡི་གེ་ཨ་ལ་སོགས་པ་དེ་རྣམས་མིང་འདོགས་ན་ཡི་གེ་མེད་པའི་ཆོས་རྣམས་ལའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་རང་བཞིན་གྱིས་རྣམ་པར་དག་
པ་དེའི་སེམས་དང་སེམས་ལས་བྱུང་བའོ། །ཅིའི་ཕྱིར་ཡི་གེ་མེད་པ་ཡིན་ཞེ་ན། བཤད་མ་ཐག་པའི་ཕྱིར་དེ་རྣམས་ཀྱི་རྣམ་པར་རྟོག་པའི་སྤྲོས་པ་ཡོད་པ་མ་ཡིན་པས་གཉིས་སུ་མེད་པའི་ཕྱིར་རོ་ཞེས་བྱ་བའི་དོན་ཏོ། །ཆོས་མཆོག་འདི་ནི་བསྟན་བྱེད་ཅིང་། །ཞེས་བྱ་བ་ནི་འདི་ཉིད་སྨྲས་པ་ཡིན་ཏེ།
སངས་རྒྱས་དང་རྡོ་རྗེ་འཛིན་པ་ལ་སོགས་པའི་ཆོས་ཀྱི་ཡི་གེ་ཧཱུཾ་བརྗོད་པའོ། །གང་གི་ཚེ་བརྗོད་ཅེ་ན། ཆོས་ཀྱི་མཆོག་བསྒོམས་ན་ཞེས་བྱ་བ་སྨོས་ཏེ། ཡི་གེ་ཧཱུཾ་ལ་སོགས་པའི་ཆོས་ཀྱི་ཕྱག་རྒྱ་མཆོག །ཡང་དང་ཡང་མངོན་དུ་བྱས་ན་གཟི་བརྗིད་ཅན་དུ་འགྱུར་རོ་ཞེས་བྱ་བ་ནི་འབྲས་བུ་གསུངས་

པའོ། །སྔ་མ་བཞིན་དུ་ཐམས་ཅད་བྱས་ལ། ཆོས་ཀྱི་ཕྱག་རྒྱ་ལྕེ་ལ་ཡིད་ཀྱིས་བྲིས་ནས་རྡོ་རྗེ་རྩེ་ལྔ་པ་དཀར་པོ་ལྕེ་ལ་རྣམ་པར་བསམ་པར་བྱའོ། །རང་གི་སྙིང་གའི་རྡོ་རྗེ་ལ་ཡང་དེ་མངོན་པར་བྲིས་ལ་དེ་ཉིད་བརྗོད་ཅིང་གཟུགས་བརྙན་དང་མཚུངས་པའི་རྡོ་རྗེ་རིགས་ཀྱི་རང་བཞིན་བདག་ཉིད་
ཀྱི་ཕྱག་རྒྱ་ཆེན་པོའི་སྦྱོར་བས་བསྒོམ་པར་བྱའོ། །སྔ་མ་བཞིན་དུ་མཚན་ཐོག་ཐག་བསྒོམས་ན་དེའི་རྗེས་ལ་རྡོ་རྗེ་འཆང་ཆེན་པོར་འགྱུར་རོ་ཞེས་བྱ་བའི་ཐ་ཚིག་གོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དགེ་བའམ་ཡང་ན་མི་དགེ་བ། །གང་གིས་ལས་རྣམས་བྱས་པ་ནི། །ཞེས་
བྱ་བ། སངས་རྒྱས་ལ་སོགས་པ་ལ་ཕུལ་བ་ལ་ཞི་བའི་ལས་ཀྱི་སྦྱོར་བ་འདི་ནི་དགེ་བའི་ལས་སོ། །རྣམ་པར་འཚེ་བ་ནི་མི་དགེ་བའི་ལས་སོ། །ཁྲོ་བ་ནི་མི་དགེ་བའི་ལས་ཉིད་དུ་གྲགས་པའི་ཕྱིར་འཇིག་རྟེན་ལས་གྲགས་པ་དེ་ལྟར་བརྗོད་པར་བྱའོ། །འདི་ལྟར་དགེ་བ་དང་མི་དགེ་བས་ཅུང་ཟད་
བྱེད་པ་དེ་དག་ཐམས་ཅད་རྣལ་འབྱོར་པས་དེ་བཞིན་གཤེགས་པ་རྣམས་ལ་དབུལ་བར་བྱའོ། །ཕུལ་བས་ཅི་ཞིག་ཏུ་འགྱུར་ཞེ་ན། སྐད་ཅིག་གིས་ནི་གཟི་ཅན་འགྱུར། །ཞེས་བྱ་བ་སྨོས་ཏེ། དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་གང་གི་ཁྲོ་བོའི་རྣལ་འབྱོར་དང་རྣལ་
འབྱོར་ཆེན་པོ་བྱས་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། རང་གི་ཁྲོ་བོའི་ལས་ཀྱི་ཕྱག་རྒྱ་ཇི་ལྟ་བ་བཞིན་དུ་བཅིངས་ནས་རང་གི་སྙིང་གར་སྣ་ཚོགས་རྡོ་རྗེ་ལ་སྔགས་ཟློས་ཤིང་ཡིད་ཀྱིས་བཀོད་ལ། དེ་ཉིད་བརྗོད་ཅིང་ནམ་མཁའི་ཁམས་ཐམས་ཅད་དུ་སྔ་མ་བཞིན་དུ་རྡོ་རྗེའི་རིགས་
ཀྱིས་བཀང་ནས་ལྷ་ཆེན་པོ་ལ་སོགས་པའི་གདུག་པ་ཐམས་ཅད་འདུལ་བ་དང་། ཞི་བ་རྣམས་རྗེས་སུ་གཟུང་བ་ལ་སོགས་པ་དེ་རྣམ་པར་བསམས་ཏེ། དེ་རང་རང་གི་དེ་བཞིན་གཤེགས་པ་ཐམས་ཅད་ཀྱི་རང་བཞིན་དུ་བྱས་ནས། བདག་གིས་གདུག་པ་གདུལ་བ་ལ་སོགས་པའི་ལས་འདི་མཛོད་
ཅིག་ཅེས་གསོལ་བ་བཏབ་ནས། དེ་ལྟར་དེ་རྣམས་ལ་དགེ་བ་དང་མི་དགེ་བའི་ལས་རྣམས་ཕུལ་བར་བསྒོམ་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ལ་བསྒྲུབས་ན་ཇི་སྲིད་མངོན་སུམ་དུ་མཐོང་བ་དེ་སྲིད་ཀྱི་བར་དུ་བསྒོམས་ན། དེ་སྐད་ཅིག་གིས་གཟི་བརྗིད་ཅན་དུ་འགྱུར་རོ། །

འདོད་ཆགས་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཆོས་ལ་བདག་མེད་མཁས་པ་ཡིས། །འདིར་གོམས་པ་འདི་ཆགས་པའོ། །ཞེས་བཤད་དོ། །དེ་དག་པ་ནི་དྲི་མ་ཐམས་ཅད་དང་བྲལ་བའོ། །འདི་ལྟར་འདི་དག་པ་ཡིན་ཞེ་ན། ངོ་བོ་ཉིད་ཀྱིས་ཞེས་བྱ་བ་སྨོས་ཏེ། ངོ་བོ་ཉིད་ནི་
སྒྲོ་འདོགས་པ་མེད་པ་གཉུག་མའི་བདག་ཉིད་གཟུང་བ་དང་འཛིན་པའི་རྣམ་པར་རྟོག་པ་སྤངས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་ཉིད་དམིགས་པ་མེད་པའི་ཐུགས་རྗེ་ཆེན་པོའོ་ཞེས་བྱ་བའི་ཐ་ཚིག་གོ། །དེ་ལས་བྱུང་བ་ནི་འཕགས་པ་སྤྱན་རས་གཟིགས་དབང་ཕྱུག་ནི་འདོད་ཆགས་
ཏེ། དེ་ལྟར་གྱུར་པའི་འདོད་ཆགས་དེ་ལ་མུ་སྟེགས་ཅན་གྱིས་སྨད་པར་གྱུར་པའོ། །དེ་ལ་མྱ་ངན་ལས་འདས་པའི་རྒྱུད་ལ་འཇུག་པའི་ཐབས་ཀྱིས་ལས་དང་ལྡན་པ་དེ་ལ་སྤྱིར་མུ་སྟེགས་ཞེས་བརྗོད་དོ། །སངས་རྒྱས་པའི་ཐེག་པ་ཆེན་པོ་སྤོང་བའི་ལམ་གཞན་འདི་ནི་མུ་སྟེགས་ཏེ། དེ་གང་ལ་ཡོད་
པ་དེ་ནི་མུ་སྟེགས་ཅན་ནོ། །དེ་ཡོད་པས་ན་ཉན་ཐོས་དང་རང་སངས་རྒྱས་ཀྱི་ཐེག་པའོ། །འཇིག་རྟེན་པའི་ལམ་ལ་ཞུགས་པ་འདི་བདེན་སྙམ་དུ་རྨོངས་པའི་མུ་སྟེགས་ཅན་གྱིས་སྨོད་པའོ། །དེ་ལ་ཆགས་པའི་ཆོས་འདི་ནི། །ཞེས་བྱ་བ་ནི་དེ་ལྟ་བུར་གྱུར་པ་དེ་གཉི་གའི་བདག་ཉིད་དག་པའི་འདོད་
ཆགས་དེ་ལ་ཤིན་ཏུ་ཆགས་པས་ཡང་དང་ཡང་མངོན་དུ་བྱས་པ་འདི་ནི་ཐེག་པ་ཆེན་པོ་སྟེ། རྡོ་རྗེ་ཐེག་པའི་རང་བཞིན་ནོ། །ནི་ཞེས་བྱ་བའི་སྒྲ་ནི་ངེས་པར་གཟུང་བ་སྟེ། འདི་ཁོ་ན་ཐེག་པ་ཆེན་པོའི་ཆོས་ཡིན་ནོ་ཞེས་རིམ་པ་བཞིན་དུ་སྦྱར་བར་བྱའོ། །གང་གི་ཕྱིར་ཆོས་འདི་རྣལ་འབྱོར་པ་སངས་རྒྱས་
དང་བྱང་ཆུབ་སེམས་དཔའ་ཉིད་ཀྱི་དངོས་གྲུབ་འགྲུབ་པའི་ཕྱིར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འགྲོ་བ་འདུལ་བའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་དེ་དང་དེ་ལས་བཤད་པའི་རྣལ་འབྱོར་ཆེན་པོ་བྱས་ལ། པདྨའི་སྒེག་
མོ་ལ་སོགས་པ་དང་། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་བདག་ཉིད་ཡང་དག་པར་མཆོད་ལ། ཕྱག་བཞིས་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ་འགྲོ་བ་འདུལ་བའི་ཕྱག་རྒྱ་ཆེན་པོའམ། སངས་རྒྱས་པདྨ་ལ་སོགས་པ་དེའི་

རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་བདག་ལ་ཆགས་པའི་རང་བཞིན་གྱི་སྣང་བརྙན་ཙམ་འཕགས་པ་སྤྱན་རས་གཟིགས་དབང་ཕྱུག་ཏུ་བདག་ཉིད་བསམས་ཏེ། རང་གི་སྙིང་གའི་པདྨ་རྡོ་རྗེ་ལ་སྔགས་བཟླས་ཤིང་བཀོད་དོ། །ནམ་མཁའ་ཐམས་ཅད་པདྨའི་རིགས་ཀྱིས་དགང་བར་
བསམས་ལ་རང་གི་སྔགས་བརྗོད་པར་བྱའོ། །འཇིག་རྟེན་དབང་ཕྱུག་ཏུ་བདག་ཉིད་བསྒོམས་ནས་ཇི་སྲིད་བདག་ཉིད་དེའི་གཟུགས་སུ་མངོན་སུམ་ལྟ་བུར་མཐོང་བར་གྱུར་པ་དེ་ཉིད་ཀྱི་བར་དུ་བསྒོམ་པར་བྱའོ། །དེ་ནས་པདྨའི་རིགས་ཀྱི་ངོ་བོས་ཐམས་ཅད་དུ་ཁྱབ་པར་ཇི་སྲིད་བདག་ཉིད་ཀྱིས་མཐོང་
བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེའི་རྗེས་ལ་སྔ་མ་བཞིན་ཡང་དང་ཡང་དུ་བསྒྲུབས་ན་འཕགས་པ་སྤྱན་རས་གཟིགས་དབང་ཕྱུག་ཉིད་དུ་འགྱུར་རོ། །དེ་ནས་ཞེས་བྱ་བ་ལ་སོགས་པ་ནི་བཤད་ཟིན་ཏོ། །ཏིང་འཛིན་བརྟན་པའི་ཚུལ་གྱིས་ནི། །བྱམས་པ་ཆེན་པོ་བསྒོམས་ནས་
ཀྱང་། །ཞེས་བྱ་བ་ལ། བསྒོམས་པས་ནི་ཡང་དང་ཡང་མངོན་དུ་བྱས་པའོ། །ཅི་ཞིག་གོམས་པར་བྱེད་ཅེ་ན། ཅི་ལྟར་བྱ་ཞེ་ན། ཏིང་འཛིན་བརྟན་པའི་ཚུལ་གྱིས་ནི། །ཞེས་བྱ་བ་སྨོས་ཏེ། ཏིང་ངེ་འཛིན་ནི་སེམས་རྩེ་གཅིག་པའོ། །དེ་ཉིད་བརྟན་པའི་ཚུལ་གྱིས་ནི་མི་ཤིགས་
བའི་སྦྱོར་བའོ། །ཏིང་ངེ་འཛིན་བརྟན་པར་གྱུར་ནས་སྤྲོ་བར་བྱའོ། །བྱམས་པ་ཆེན་པོ་དེ་ཕྱོགས་བཅུར་བཀང་བར་ཇི་ལྟར་བྱ་ཞེ་ན། ཆོ་ག་བཞིན་ལྡན་ཁྱབ་བྱས་ནས། །ཞེས་བྱ་བ་སྨོས་ཏེ། བྱམས་པ་བསྒོམ་པའི་མན་ངག་གིས་ཏེ། སྔར་བཤད་པའི་མན་ངག་གིས་སྤྲོ་བར་བྱའོ་ཞེས་བྱ་
བའི་དོན་ཏོ། །ལྡན་ཞེས་བྱ་བ་ནི་ཏིང་ངེ་འཛིན་བཟང་པོ་དང་ལྡན་པའི་ཐ་ཚིག་གོ། །བསྒོམས་པ་དེས་ཅིར་འགྱུར་ཞེ་ན། སྐད་ཅིག་གིས་ནི་གཟི་ཅན་ཐོབ། །ཅེས་བྱ་བ་སྨོས་སོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འཇིག་རྟེན་དབང་ཕྱུག་གི་སྦྱོར་བས་རྣལ་འབྱོར་ཆེན་པོ་བྱས་ཏེ། མཆོད་
པ་དང་ཕྱག་བྱ་བ་རྗེས་སུ་སྤྱད་ལ། རང་གི་དམ་ཚིག་གི་ཕྱག་རྒྱས་བཅིངས་ཏེ། རང་གི་སྙིང་གའི་ཟླ་བ་ལ་གནས་པའི་རྡོ་རྗེ་པདྨ་ལ་སྙིང་པོ་བཀོད་པ་ཉིད་བརྗོད་ཅིང་། སེམས་ཅན་གྱི་ཁམས་ཐམས་ཅད་ལ་བྱམས་པ་ཆེན་པོ་སྤྲོས་ཏེ། པདྨའི་རིགས་ཀྱི་གཟུགས་སུ་རྣམ་པར་བསམས་ལ། རང་

བཞིན་གྱིས་རྣམ་པར་དག་པའི་སྣང་བརྙན་ཙམ་དུ་བདག་ཉིད་སྔ་མ་བཞིན་དུ་བསམ་པར་བྱའོ། །དེ་ནས་མཚན་ཐོག་ཐག་བསྒོམས་ལ་དེའི་རྗེས་ལ་ནམ་མཁའ་ཐམས་ཅད་པདྨའི་རིགས་ཀྱིས་ཡོངས་སུ་གང་བར་མཐོང་བར་འགྱུར་རོ། །དེ་ནས་ཞེས་བྱ་བ་ནི་སྔ་མ་བཞིན་
དུ་ལ་སོགས་པ་བཞིན་ནོ། །འདོད་ཆགས་ངོ་བོ་ཉིད་ཀྱིས་དག །ཅེས་བྱ་བ་ནི་ངོ་བོ་ཉིད་ཀྱིས་དག་པ་ནི་གཟུང་བ་དང་འཛིན་པའི་རྣམ་པར་རྟོག་པ་སྤངས་ནས་ངོ་བོ་ཉིད་ཀྱིས་དག་པའོ། །ངོ་བོ་ཉིད་ཀྱིས་དག་པ་དེ་གང་ཡིན་ཞེ་ན། འདོད་ཆགས་ཞེས་བྱ་བ་སྨོས་ཏེ། འདོད་པ་གང་ཡིན་པ་དེ་ཆགས་པ་
ཡང་ཡིན་པས་ན་དེ་འདོད་ཆགས་སོ། །ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱ་བའི་མཐར་ཐུག་པའི་ཆགས་པ་ཆོས་བདག་མེད་པའི་ཆགས་པ་ཞེས་བྱ་བའི་དོན་ཏོ། །སྨྲ་བར་གྱུར་པ་ཞེས་བྱ་བ་ནི་ཇི་ལྟ་བའི་ཡི་གེ་ཧྲཱིཿལ་སོགས་པ་པདྨའི་རིགས་ཀྱིས་ཆོས་ཀྱི་ཡི་གེ་བརྗོད་པའོ། །
ཅི་ཞིག་སྨྲ་ཞེ་ན། ཚུལ་འདི་ནི་ཞེས་བྱ་བ་སྨོས་ཏེ། ཆོས་བདག་མེད་པ་ལ་ཤིན་ཏུ་ཆགས་པ་ནི་ཡང་དག་པར་རྫོགས་པའི་སངས་རྒྱས་ཐོབ་པའི་རྒྱུ་ཡིན་པའི་ཕྱིར་ཚུལ་ཡིན་ཏེ། སྨྲ་བར་གྱུར་པའི་ཚུལ་འདི་ཞེས་བྱ་བའོ། །དེ་ལྟར་འདི་སྨྲས་པས་ཅི་ཞིག་ཏུ་འགྱུར་ཞེ་ན། འདོད་ཆགས་ཕ་རོལ་ཕྱིན་
རྙེད་དེ། །སྐད་ཅིག་གིས་ནི་གཟི་ཅན་ཐོབ། །ཅེས་བྱ་བ་སྨོས་ཏེ། འདོད་ཆགས་ཀྱི་ཕ་རོལ་ཏུ་སོན་པས་ན་འདོད་ཆགས་ཀྱི་ཕ་རོལ་ཏུ་ཕྱིན་པ་སྟེ། ཆོས་བདག་མེད་པ་མངོན་དུ་བྱ་བ་དེ་ཐོབ་པས་ན་འདོད་ཆགས་ཀྱི་ཕ་རོལ་ཏུ་ཕྱིན་པ་རྙེད་པར་གྱུར་པའོ། །སྐད་ཅིག་མ་དེ་ཉིད་ལ་འཕགས་པ་སྤྱན་རས་
གཟིགས་དབང་ཕྱུག་ཏུ་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་ཉིད་ཀྱིས་འཇིག་རྟེན་དབང་ཕྱུག་གི་རྣལ་འབྱོར་དང་རྣལ་འབྱོར་ཆེན་པོ་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ལྕེ་ལ་རྡོ་རྗེ་དཀར་པོ་རྣམ་
པར་བསམས་ཏེ། ཡི་གེ་ཧི་ལ་སོགས་པའི་ཆོས་ཀྱི་ཡི་གེ་ལྕེའི་དབུས་སུ་དགོད་པར་བྱའོ། །ཡང་སྙིང་གའི་རྡོ་རྗེ་པདྨ་ཉི་མ་ཉིད་ལ་ཆོས་ཀྱི་ཡི་གེ་རྣམ་པར་བསམས་ལ། དེ་བརྗོད་ཅིང་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱ་བས། རང་གི་ལྷའི་གཟུགས་སྣང་

བརྙན་ཙམ་དུ་བསམས་ལ། པདྨའི་རིགས་ཀྱིས་ནམ་མཁའི་ཁམས་ཐམས་ཅད་གང་བར་སྔ་མ་བཞིན་དུ་བསྒོམས་ན་གདོན་མི་ཟ་བར་འཇིག་རྟེན་དབང་ཕྱུག་ཏུ་འགྱུར་རོ། །དེ་ནས་ལས་ཀྱི་ཕྱག་རྒྱ་དམ་པའི་དངོས་གྲུབ་ཀྱི་རྒྱུད་ཅེས་བྱ་བ་ལ་སོགས་པ་ནི་སྔ་མ་བཞིན་ནོ། །བདག་གིས་བལྷ་དང་རེག་པ་
དང་། །ཞེས་བྱ་བ་ནི་སེམས་ཅན་འགའ་ཞིག་གིས་འཕགས་པ་སྤྱན་རས་གཟིགས་དབང་ཕྱུག་ཇི་ལྟ་བ་བཞིན་དུ་མཐོང་བ་ཙམ་གྱིས་སྡིག་པ་ཐམས་ཅད་དང་བྲལ་བར་འགྱུར་རོ། །འཕགས་པ་ནོར་བཟངས་བཞིན་དུ་འགའ་ཞིག་གིས་རེག་པ་ཙམ་གྱིས་སམ། འགའ་ཞིག་གིས་མཚན་ཉན་པ་
ཙམ་གྱིས་སམ། དྲན་པ་ཙམ་གྱིས་ཀྱང་གསོད་པ་དང་། འཆིང་བ་ལ་སོགས་པ་སྡུག་བསྔལ་དང་བྲལ་བར་འགྱུར་རོ། །དེ་ནས་བདག་ཉིད་སེམས་ཅན་ཐམས་ཅད་དུ་འགྱུར་བ་ཡིན་ནོ་ཞེས་བསྒོམ་པར་བྱའོ། །བསྒོམས་པས་ཅི་ཞིག་བྱེད་ཅེ་ན། །སྡུག་བསྔལ་ཀུན་གྱི་མཐར་བྱེད་འགྱུར། །
ཞེས་བྱ་བ་སྨོས་ཏེ། སྡུག་བསྔལ་ཡང་ཡིན་ལ་ཀུན་ཡང་དེ་ཡིན་པས་ན་སྡུག་བསྔལ་ཀུན་ཏེ། སེམས་ཅན་རྣམས་ཀྱི་གདུང་བར་བྱེད་པའི་ངོ་བོ་དེ་དག་སེལ་བར་བྱེད་པ་དེའི་ཕྱིར་སྡུག་བསྔལ་ཀུན་གྱིས་མཐར་བྱེད་པ་བཞིན་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་དེ་སྐད་
བཤད་པ་བཞིན་དུ་གནས་པར་འདོད་ན་བདག་དེ་ལྟ་བུར་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རང་ཉིད་སྤྱན་རས་གཟིགས་དབང་ཕྱུག་གི་རྣལ་འབྱོར་གྱིས་ཐམས་ཅད་རྗེས་སུ་སྤྱད་པའི་ཕྱིར་རང་གི་ལས་ཀྱི་ཕྱག་རྒྱ་བཅིངས་ཏེ། སྙིང་གའི་ཟླ་བ་ལ་ཧྲཱིཿལས་སྣ་ཚོགས་པདྨ་རྒྱ་གྲམ་རྣམ་
པར་བསམས་ལ་དེའི་སྟེང་དུ་བཟླས་པའི་སྙིང་པོ་བཀོད་དེ། ཟློས་ཤིང་ཕྱོགས་བཅུར་འཇིག་རྟེན་དབང་པོའི་གཟུགས་ཀྱིས་སེམས་ཅན་གྱི་ཁམས་ཐམས་ཅད་ཀྱི་སྡུག་བསྔལ་བསལ་ནས་པདྨའི་རིགས་ཀྱི་ངོ་བོར་རྣམ་པར་བསམས་ཏེ། སརྦྦ་ཨི་བ་ཨ་ཧཾ་ཞེས་ང་རྒྱལ་བསྐྱེད་ནས་རང་
བཞིན་གྱིས་འོད་གསལ་བའི་སྣང་བརྙན་ཙམ་དེའི་རང་བཞིན་བདག་ཡིན་ནོ་ཞེས་བསྒོམ་པར་བྱས་ལ། སྔ་མ་བཞིན་དུ་བསྒྲུབས་ན་དེའི་རྗེས་ལ་སྐད་ཅིག་དེ་ཉིད་ལ་འཕགས་པ་སྤྱན་རས་གཟིགས་དབང་ཕྱུག་ཏུ་འགྱུར་རོ། །ནོར་བུའི་རིགས་ཀྱི་དོན་ཐམས་ཅད་གྲུབ་པ་ལ་

སོགས་པ་ནས་རིན་ཆེན་འབེབས་པའི་མཐར་ཐུག་པའི་དམ་པའི་དངོས་གྲུབ་དེའི་ཕྱག་རྒྱ་ཆེན་པོ་ལ་སོགས་པའི་འབྲས་བུ་འགྲུབ་པ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལ་ཞེས་བྱ་བ་ནི་དམིགས་ཀྱིས་དགར་བའོ། །ཕྱག་རྒྱ་ཆེན་པོའི་དམ་པའི་དངོས་གྲུབ་དེ་སྟོན་པར་
བྱེད་པའི་སྒྲའི་ཚོགས་ལ་ཡང་རྒྱུད་ཅེས་བྱའོ། །སངས་རྒྱས་ཀུན་དབང་བདག་གྱུར་ཞེས་བྱ་བ་ནི་སངས་རྒྱས་ཀུན་གྱིས་དབང་བསྐུར་བའི་ནོར་བུའི་རིགས་སོ། །དེ་བདག་གོ་ཞེས་བྱ་བ་བསྒོམས་པ་ནི་བདག་འགྱུར་ཞེས་བྱ་བའི་དོན་ཏོ། །ཇི་ལྟ་བ་བཞིན་དུ་བྱ་ཞེ་ན། རྡོ་རྗེ་སྙིང་པོ་ཇི་བཞིན་དུ། །ཞེས་
བྱ་བ་སྨོས་ཏེ། ཇི་ལྟར་ནོར་བུའི་རིགས་ཀྱི་སྙིང་པོ་བསྒོམས་པ་དེ་བཞིན་དུ་བདག་ཉིད་ཀྱང་བྱའོ་ཞེས་བྱ་བ་ནི་ཇི་བཞིན་དུའོ། །བསྒོམ་པར་བྱ་བ་རྣམ་བསྒོམས་ན། །ཞེས་བྱ་བ་ནི་ནོར་བུའི་རིགས་དེ་ཡང་དང་ཡང་མངོན་དུ་བྱས་པའོ། །ན་ཞེས་བྱ་བའི་སྒྲ་ནི་ངེས་པར་གཟུང་བ་སྟེ། ཡང་དང་ཡང་མངོན་དུ་
བྱས་པའོ། །ཅི་ཞིག་ཏུ་འགྱུར་ཞེ་ན། སྐད་ཅིག་གིས་ནི་གཟི་ཅན་ཐོབ། །ཅེས་བྱ་བ་སྨོས་སོ། །དེའི་དོན་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་འདོད་པའི་ལྷའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ་
རིན་ཆེན་སྒེག་མོ་ལ་སོགས་པ་རྣམས་དང་། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་བདག་ཉིད་ཡང་དག་པར་མཆོད་དེ། དེ་བཞིན་གཤེགས་པ་ཐམས་ཅད་ལ་ཕྱག་བཞི་བྱས་ཏེ་ལངས་ལ་རང་གི་ལྟ་བའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་པོ་
བརྗོད་ཅིང་དེ་བཞིན་གཤེགས་པ་ལ་སོགས་པས་སེམས་ཅན་གྱི་ཁམས་ཐམས་ཅད་ནོར་བུའི་རིགས་ཀྱི་དབང་བསྐུར་བས་དབང་བསྐུར་ཏེ། ནོར་བུའི་རིགས་ཀྱི་རང་བཞིན་དུ་རྣམ་པར་བསམས་ཏེ། ལྷ་ཐམས་ཅད་ནམ་མཁའ་དང་མཚུངས་པའི་སྣང་བརྙན་ཙམ་ནི་བདག་ཡིན་ནོ་ཞེས་ང་རྒྱལ་བསྐྱེད་
དེ། ཇི་སྲིད་བདག་ཉིད་རང་གི་ལྷའི་རང་བཞིན་དུ་མངོན་སུམ་ལྟ་བུར་གྱུར་པ་དེ་སྲིད་ཀྱི་བར་དུ་བསྒོམས་ན་བདག་ཉིད་དེའི་རང་བཞིན་དུ་མཐོང་བར་འགྱུར་རོ། །དེ་ནས་ནོར་བུའི་རིགས་ཐམས་ཅད་དུ་སོང་བར་ཇི་སྲིད་དུ་མངོན་སུམ་ལྟ་བུར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་

ཐོག་ཐག་བསྒོམས་ན་དེའི་རྗེས་ལ་མངོན་སུམ་དུ་མཐོང་བར་གྱུར་པ་དང་། དེ་ནས་སྐད་ཅིག་དེ་ཉིད་ལ་རྡོ་རྗེ་སྙིང་པོར་འགྱུར་རོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །ཡོངས་སུ་རྫོགས་པར་བྱེད་འགྱུར་ཞིང་། །ཞེས་བྱ་བ་ནི་བདག་ཉིད་གྱུར་ཅིང་བསྒོམས་པའོ། །ཅི་ལྟར་འགྱུར་
ཞིང་ཞེ་ན། སེམས་ཅན་ཀུན་གྱི་རེ་བ་ཀུན། །ཡོངས་སུ་རྫོགས་པར་བྱེད་པའོ། །ཞེས་བྱ་བ་སྨོས་སོ། །ཅི་འདྲ་བ་ཞིག་ཅེ་ན། ནམ་མཁའི་སྙིང་པོ་འདྲ་བ་ནི། །ཞེས་བྱ་བ་སྨོས་སོ། །དེ་བཞིན་དུ་འཕགས་པ་ནམ་མཁའི་སྙིང་པོས་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་
པར་བྱེད་པ་དེ་བཞིན་དུ་འདིར་ཡང་འགྱུར་རོ་ཞེས་བྱ་བའི་དོན་ཏོ། །དེ་ལྟར་བསྒྲུབས་པས་ཅི་ཞིག་ཐོབ་པར་འགྱུར་ཞེ་ན། སྐད་ཅིག་གིས་ནི་གཟི་ཅན་ཐོབ། །ཅེས་བྱ་བ་སྨོས་ཏེ། སྐད་ཅིག་མ་དེ་ཉིད་ལ་རྡོ་རྗེ་སྙིང་པོ་ཐོབ་པར་འགྱུར་རོ་ཞེས་བྱ་བའི་དོན་ཏོ། །སྔ་མ་བཞིན་དུ་ཐམས་ཅད་བྱས་ནས་
དམ་ཚིག་གི་ཕྱག་རྒྱ་བཅིངས་ནས། རང་གི་སྙིང་གའི་རྡོ་རྗེ་རྒྱ་གྲམ་གྱི་དབུས་སུ་བཟླས་པའི་སྙིང་པོ་ཡིད་ཀྱིས་བྲིས་ཏེ། དེ་ཉིད་བརྗོད་ཅིང་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱིས་དེ་བཞིན་གཤེགས་པ་ལ་སོགས་པ་ཐམས་ཅད་དང་། སེམས་ཅན་གྱི་ཁམས་ཐམས་ཅད་ལ་དབང་བསྐུར་ནས་
ནོར་བུའི་རིགས་ཀྱི་རང་བཞིན་དུ་བསམས་ཏེ། ནམ་མཁའ་དང་མཚུངས་པའི་སོ་སོར་སྣང་བ་ནི་བདག་ཡིན་ནོ་ཞེས་ནོར་བུའི་རིགས་ཐམས་ཅད་ཀྱིས་ང་རྒྱལ་བསྐྱེད་པར་བྱའོ། །དེ་བཞིན་དུ་རྣམ་པར་བསྒོམས་ནས་དེ་ནས་ནམ་མཁའ་ཐམས་ཅད་ནོར་བུའི་རང་བཞིན་དུ་མཐོང་ན། དེ་ནས་སྐད་ཅིག་དེ་ཉིད་
ལ་རྡོ་རྗེ་སྙིང་པོ་དང་འདྲ་བར་འགྱུར་རོ། །དེ་ནས་ཞེས་བྱ་བ་ལ་སོགས་པ་སྔར་བཤད་ཟིན་ཏོ། །བདག་ཉིད་ཀྱང་ཞེས་བྱ་བ་ནི་ནོར་བུའི་རིགས་ཟློས་པ་ནི་ནོར་བུའི་རིགས་ཀྱི་བདག་ཉིད་ཀྱི་ནོར་སྦྱིན་ནོ། །ཀྱང་ཞེས་བྱ་བ་ནི་ངེས་པར་གཟུང་བ་སྟེ། དེའི་བདག་ཁོ་ནའི་ནོར་སྤངས་ནས་སེམས་ཅན་རྣམས་
ལ་གཏོང་བ་དེ་དང་དེ་དག་གི་རང་བཞིན་དུ་མོས་པ་དེའི་ཕྱིར། ནོར་སྦྱིན་དག་ཏུ་དགའ་བྱེད་ཅིང་། །ཞེས་བྱ་བ་ལ་རབ་ཏུ་དགའ་བྱེད་ནི་ཤིན་ཏུ་དགའ་བར་བྱེད་པའི་རང་བཞིན་ནོ། །ཅི་ཞིག་བྱེད་ཅིང་ཞེ་ན། ཆོས་འབྱུང་བའི་ཆོས་ཀྱི་རང་བཞིན་གྱིས་ཆོས་ཀྱི་ཕྱག་རྒྱ་ནི་ཡི་གེ་ཏྲ་ལ་སོགས་པའི་རང་

བཞིན་བརྗོད་པའོ། །གཟི་ཅན་ཚེ་འདི་ཉིད་ལ་ཐོབ། །ཅེས་བྱ་བ་ནི་རྡོ་རྗེ་སྙིང་པོ་ཐོབ་པར་འགྱུར་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་རྣལ་འབྱོར་དང་རྣལ་འབྱོར་ཆེན་པོ་བྱས་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ།
ཕྱག་བྱས་ཏེ་སྔ་མ་བཞིན་དུ་རང་གི་ལྕེ་ལ་ཆོས་ཀྱི་ཡི་གེ་རྣམ་པར་བསམས་ཏེ། དེ་ཉིད་ལས་རང་གི་སྙིང་གར་སྣ་ཚོགས་རྡོ་རྗེ་རྣམ་པར་བསམས་ཏེ། དེ་ཉིད་བརྗོད་ཅིང་ནམ་མཁའ་དང་མཉམ་པའི་སྣང་བརྙན་ཙམ་ནི་བདག་ཡིན་ནོ་ཞེས་བསྒོམས་ནས་སངས་རྒྱས་ཐམས་ཅད་ལ་སོགས་པ་དང་། སེམས་ཅན་གྱི་
ཁམས་ཐམས་ཅད་རང་གི་རང་བཞིན་དུ་བྱས་ནས། །དེའི་རྗེས་ལ་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་པར་བྱའོ། །དེ་ནས་ཡི་གེ་ཏྲ་ལ་སོགས་པའི་རང་གི་ཆོས་ཀྱི་ཕྱག་རྒྱ་ཟློས་ཤིང་སྔ་མ་བཞིན་དུ་བསྒྲུབས་ནས་རྡོ་རྗེ་སྙིང་པོ་ཐོབ་པར་འགྱུར་རོ། །དེ་ནས་ལས་ཀྱི་ཕྱག་རྒྱ་དམ་པའི་དངོས་གྲུབ་ཀྱི་
རྒྱུད་ཅེས་བྱ་བ་ལ་སོགས་པ་ནི་བཤད་ཟིན་ཏོ། །འཇིག་རྟེན་དང་འཇིག་རྟེན་ལས་འདས་པའི་ནོར་སྤངས་པ་ནི་དབུལ་པོའོ། །དེའི་དབུལ་པོ་རྣམས་ལ་ཕན་པའི་ཕྱིར། ནོར་བུའི་རིགས་ཐོབ་པ་ནི་བསམ་པ་ཐམས་ཅད་རྫོགས་པའོ། །ནོར་ནི་ནོར་བུའི་རིགས་ཏེ། དེ་བསྒྲུབ་པ་ནི་དེ་མངོན་དུ་
བྱེད་པའོ། །དེ་བསྒོམས་པས་དེ་ལ་གཞོལ་ཞིང་དེ་ལ་ཕྱོགས་པའོ། །བརྩོན་པ་དང་ལྡན་པ་ནི་བསྒོམ་པའི་འབད་པ་དང་ལྡན་པ་སྟེ། འབད་པ་དང་ལྡན་པ་དེས་གཟི་བརྗིད་ཅན་དུ་གྱུར་པ་ཐོབ་ཅིང་འགྲོ་བའོ། །ཅི་སྟེ་ཡང་། མི་འདོད་དངོས་གྲུབ་གོང་མ་བཞིན། །ཞེས་བྱ་བ་ནི་ཐམས་ཅད་དུ་སྦྱོར་བར་ཤེས་
པར་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་རྣལ་འབྱོར་དང་། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས་རང་གི་སྙིང་གར་སྣ་ཚོགས་རྡོ་རྗེ་རྣམ་པར་བསམས་ཏེ། རང་གི་ལྷའི་ལས་ཀྱི་ཕྱག་རྒྱ་བཅིངས་ནས་སྙིང་པོ་སྣ་ཚོགས་རྡོ་རྗེའི་དབུས་སུ་ཡིད་
ཀྱིས་བྲིས་ལ། དེ་ཉིད་བརྗོད་ཅིང་རང་བཞིན་གྱིས་འོད་གསལ་བ་སྒྱུ་མ་དང་མཚུངས་པར་བདག་ཉིད་བསམས་ཏེ། དེ་བཞིན་གཤེགས་པ་ལ་སོགས་པ་ཐམས་ཅད་དང་སེམས་ཅན་གྱི་ཁམས་ཐམས་ཅད་ལ་ནོར་བུའི་རིགས་ཀྱི་དབང་བསྐུར་བས་དབང་བསྐུར་ཏེ་ནོར་བུའི་རིགས་ཀྱི་ངོ་བོར་བསྒོམ་

པར་བྱའོ། །དེའི་རྗེས་ལ་ཐམས་ཅད་ནི་བདག་ཡིན་ནོ་ཞེས་ང་རྒྱལ་བསྐྱེད་ཅིང་བསྒོམས་ལ་དེ་ནས་སྔ་མ་བཞིན་དུ་བསྒྲུབས་ན་ནམ་མཁའི་སྙིང་པོར་འགྱུར་རོ། །རིགས་ཐམས་ཅད་ནི་ཇི་སྐད་དུ་བཤད་པའོ། །དེ་དག་གི་ཕྱག་རྒྱ་རྣམས་ནི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་
ལས་ཀྱི་ཕྱག་རྒྱ་རྣམས་སོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དངོས་གྲུབ་དམ་པ་ཐོབ་པ་ནི་རྙེད་པའོ། །དེའི་ཆོ་ག་རྒྱས་པ་ནི་ཇི་སྐད་དུ་བཤད་པའི་ཕྱག་རྒྱ་ཆེན་པོ་ལ་སོགས་པའི་བསྒྲུབ་པ་བྱེ་བྲག་ཏུ་རྒྱས་པ་དེ་སྟོན་པར་བྱེད་པའི་དམ་ཚིག་ནི་རྒྱུད་དོ། །དེ་ལྟར་དེ་བཞིན་
གཤེགས་པའི་རིགས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་ཆོས་དང་། ལས་ཀྱི་ཕྱག་རྒྱ་རྣམས་ཀྱིས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་དངོས་གྲུབ་ཏུ་འགྱུར་བ་བསྟན་ནས། ད་ནི་དམ་ཚིག་གི་དངོས་གྲུབ་རྣམ་པར་གཞག་པ་ནི་ཕྱག་རྒྱ་ཆེན་པོ་ལ་སོགས་པ་བསྒོམ་པའི་
བྱ་བའི་དོན་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ལ་སོགས་པ་སྟེ། དེ་ནས་ཀྱི་སྒྲ་ནི་དེ་མ་ཐག་པ་བརྗོད་པ་སྟེ། ཡང་ཞེས་བྱ་བ་ནི་ཟློས་པའི་དོན་ཏེ། ཕྱག་རྒྱ་ཆེན་པོ་ལ་སོགས་པ་སྒོམ་པ་ལ་ལྟོས་པའོ། །དེ་བཞིན་གཤེགས་པ་
ཐམས་ཅད་ནི་ཇི་སྐད་དུ་བཤད་པའོ། །དེ་བཞིན་གཤེགས་པ་ནི་ལྔའོ། །དེ་བཞིན་གཤེགས་པའི་རིགས་དང་། རྡོ་རྗེ་དང་། པདྨ་དང་ནོར་བུའི་རིགས་རྣམས་སོ། །དེ་བཞིན་གཤེགས་པ་ཐམས་ཅད་ཀྱང་དེ་ཡིན་ལ། རིགས་ཀྱང་དེ་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་
སོ། །དེའི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་སྟེ། གང་གིས་འདོད་པ་སྙོམས་ཞུགས་པ། །དེ་འདོད་པས་ནི་སྦྱོར་བར་བྱེད། ཅེས་བྱ་བ་ནི་མི་འདའ་བའི་དོན་གྱིས་དམ་ཚིག་སྟེ། དངོས་གྲུབ་དེས་ཕྱག་རྒྱ་ཆེན་པོ་ལ་སོགས་པ་བསྐྱེད་པའོ། །དེ་སྟོན་པར་བྱེད་པའི་རྒྱུད་
ལ་ཡང་དེ་སྐད་ཅེས་བྱའོ། །དེ་ལ་ཞེས་བྱ་བ་ནི་དམིགས་ཀྱིས་དགར་བའོ། །རེ་ཞིག་དེ་བཞིན་གཤེགས་པ་ཐམས་ཅད་ཀྱིས་དམ་ཚིག་གི་དངོས་གྲུབ་ཀྱི་རྒྱུད་གསུངས་པ་སྟེ། འདི་ཞེས་བྱ་བ་ཕྱིས་འཆད་པར་འགྱུར་བ་བློ་ལ་གནས་པའོ། །གང་གིས་ཞེས་བྱ་བ་ནི་དེ་བཞིན་གཤེགས་པའི་རྣལ་

འབྱོར་པས་རྡོ་རྗེ་སེམས་དཔའ་ལ་སོགས་པ་བསྒོམ་པའི་འདོད་པ་ལ་སྙོམས་པར་འཇུག་པའོ། །རྡོ་རྗེ་སེམས་དཔའ་ལ་སོགས་པའི་རྣམ་པར་རྩེ་གཅིག་པ་ནི། དེ་ལ་འདོད་པ་སྦྱོར་བར་བྱེད། །ཅེས་བྱའོ། །དེའི་རྣལ་འབྱོར་པས་འདོད་པ་ལ་སྙོམས་པར་འཇུག་པ་ནི་རྡོ་རྗེ་སེམས་དཔའ་ལ་སོགས་པ་ཡིན་
གྱི། རྡོ་རྗེ་ཧཱུཾ་མཛད་ལ་སོགས་པ་ཁྲོ་བོའི་ཡང་མ་ཡིན་ལ། དེ་བཞིན་གཤེགས་པའི་ཡང་མ་ཡིན་ཞིང་འགྲོ་བ་འདུལ་བ་ལ་སོགས་པ་མ་ཡིན་ནོ། །དེ་སྐད་དུ་ཇི་ལྟར་ཤེས་ཤེ་ན། འདོད་པའི་སྒྲས་ནི་རྡོ་རྗེ་སེམས་དཔའ་ལ་སོགས་པ་བརྗོད་པ་ཡིན་ཏེ། ཆོས་ཀྱི་འདོད་པ་ཡིད་འོང་བ། །འདོད་ཆགས་དམ་ཚིག་ཅེས་སུ་བརྗོད། །
ཅེས་འབྱུང་བའི་ཕྱིར། དེ་བཞིན་གཤེགས་པའི་རིགས་ནི་འདོད་ཆགས་ཀྱི་སྒྲས་བསྟན་ཏོ། །དེ་ལྟར་ན། སངས་རྒྱས་ཕྱག་རྒྱ་ཆེན་པོ་ནི། །ཞེས་བྱ་བ་ནི་སངས་རྒྱས་ཀྱི་ཕྱག་རྒྱ་ཆེན་པོ་སྟེ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཞིའོ། །ཡེ་ཤེས་ནི་དེར་ངེས་པའོ། །དེའི་དམ་ཚིག་ནི་བསྐྱེད་པའི་རྒྱུར་གྱུར་པ་ལས་མི་འདའ་བའི་ཕྱིར་རོ་
ཞེས་བྱ་བའི་དོན་ཏོ། །བཤད་པ་ནི་བསྟན་པའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྣམ་པར་སྣང་མཛད་ལ་སོགས་པ་སྔར་བཤད་པའི་ཚུལ་གྱིས་དེ་བཞིན་གཤེགས་པའི་ཕྱག་རྒྱ་བཅིངས་ལ། རང་གི་སྙིང་གར་ཡིད་ཀྱིས་རྡོ་རྗེ་སེམས་དཔའ་ལ་སོགས་པ་ངེས་པར་བྱས་ལ། དེ་བསྒོམ་པ་ལ་དགའ་བའི་སེམས་ཅན་གྱི་ཁམས་རྣམས་བྱང་
ཆུབ་ཏུ་སེམས་བསྐྱེད་དེ་རྣམ་པར་སྦྱངས་ནས་བྱ་བ་བྱས་པ་ནི་བདག་ཡིན་ནོ་ཞེས་བསམས་ནས། རྣམ་པར་སྣང་མཛད་ལ་སོགས་པའི་གཟུགས་སུ་བདག་ཉིད་བསྒོམ་པར་བྱའོ། །དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །དེ་བཞིན་གཤེགས་པ་རྣམས་ཀྱི་རིགས་ནི་དེ་བཞིན་གཤེགས་པ་ལས་སྐྱེས་པའི་རིགས་ཏེ། འདི་རྡོ་རྗེ་སེམས་
དཔའ་ནས་བརྩམས་ནས་རྡོ་རྗེ་འབེབས་པའི་མཐར་ཐུག་པའོ། །དེའི་དམ་ཚིག་གི་དངོས་གྲུབ་ཀྱི་རྒྱུད་བཤད་པ་ནི་སྟོན་པའོ། །འདོད་པ་རྣམས་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པ་ལ་འདོད་པར་བྱ་བ་དེ་སྐད་བཤད་དོ། །འདོད་པ་ནི་བཅོམ་ལྡན་འདས་དེ་ཉིད་སེམས་དཔའ་སྟེ་ཞེས་འབྱུང་བས།
དེ་དག་ལ་ཆགས་པ་དང་མ་བྲལ་བ་དང་། མངོན་དུ་ཕྱོགས་པ་དང་། ཤིན་ཏུ་སྲེད་པའོ། །རྣལ་འབྱོར་པས་དེ་དག་ལ་ཤིན་ཏུ་ཆགས་པ་བསྒོམ་པའོ་ཞེས་བྱ་བའི་དོན་ཏོ། །དམ་ཚིག་ཤིན་ཏུ་ཚུལ་ཆེན་འདི། །ཞེས་བྱ་བ་ནི་ཐམས་ཅད་སོང་བས་ན་ཚུལ་ཆེན་ནོ། །གང་གི་རིགས་ལས་ཤེ་ན། དེ་བཞིན་གཤེགས་པའི་

རིགས་ཞེས་བྱ་བ་སྨོས་སོ། །ཅིར་འགྱུར་ཞེ་ན། དག་པ་ཞེས་བྱ་བ་སྨོས་ཏེ། ཆགས་པ་ལ་སོགས་སྤངས་པའོ། །དེ་ཉིད་ཀྱི་ཕྱིར་འདི་ལ། རྒྱལ་བས་ཀྱང་ནི་འདའ་མི་མཛད། །ཅེས་བྱའོ། །དེ་བཞིན་གཤེགས་པ་རྣམས་ཀྱི་རང་བཞིན་དུ་གྱུར་པའི་ཕྱིར་དེ་བཞིན་གཤེགས་པ་ཐམས་ཅད་
ཀྱང་སྒོམ་པ་དང་འདའ་བར་མི་མཛད་དོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པའི་རིགས་ཀྱི་རྣལ་འབྱོར་པ་རྣམས་ཀྱིས་སྔར་བཤད་པའི་ཚུལ་གྱིས་རང་གི་ཕྱག་རྒྱ་བཅིངས་ཏེ། རང་གི་ལྷ་ལ་ཤིན་ཏུ་ཆགས་པའི་སྒོམ་པས་བསྒོམ་པར་བྱའོ། །
དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །རྡོ་རྗེ་ཧཱུཾ་མཛད་ནས་བརྩམས་ནས་ཁྲོ་བོ་རྡོ་རྗེ་འབེབས་པའི་མཐར་ཐུག་པ་ནི་འདིར་རྡོ་རྗེའི་རིགས་སོ། །དེའི་དམ་ཚིག་ནི་རང་གི་ལྷའི་དེའི་བདག་ཉིད་དུ་བསྒོམ་པར་མོས་པའི་རྣལ་འབྱོར་པ་དེས་དངོས་གྲུབ་ཀྱི་སྦྱོར་བ་དེ་ལ་མངོན་པར་དགའ་བས་རང་གི་
ཁྲོ་བོའི་ཕྱག་རྒྱ་ཆེན་པོར་བསྐྱེད་ལ། དེ་སྟོན་པར་བྱེད་པའི་རྒྱུད་བཤད་པའོ། །སེམས་ཅན་དོན་དུ་ཁྲོ་མིན་ཡང་། །ཞེས་བྱ་བ་ནི་འདི་ལ་ཁྲོ་བ་མི་མངའ་ཡང་ཁྲོ་བོའི་རྣལ་འབྱོར་པས་སེམས་ཅན་དང་སེམས་ཅན་མ་ཡིན་པ་ལ་གནོད་པ་རྣམས་ལ་ཁྲོ་བ་ལྟ་བུར་གྱུར་པ་ཡིན་ཡང་དེ་ལ་
ཉོན་མོངས་པ་མི་མངའོ་ཞེས་བྱ་བའི་དོན་ཏོ། །དེའི་ཁྲོ་བོ་མ་ཡིན་པ་ཡང་རྡོ་རྗེ་ཧཱུཾ་མཛད་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་ཁྲོ་བོའི་རྣལ་འབྱོར་པའོ། །ཡང་གི་སྒྲ་ནི་ངེས་པར་གཟུང་བའོ། །ཞེ་སྡང་མི་མངའ་བ་ཡིན་ཡང་སེམས་ཅན་གདུག་ཅིང་མ་རུང་བ་རྣམས་
གདུལ་བའི་ཕྱིར། རང་རང་གི་རྒྱུད་ལ་ཡོད་པའི་འདོད་ཆགས་ལ་སོགས་པའི་ཉོན་མོངས་པ་འཇོམས་པའི་སེམས་ཅན་གྱི་དོན་དུའོ། །ཁྲོ་བོ་ཆེན་པོ་རབ་ཏུ་སྟོན། །ཞེས་བྱ་བ་ནི་ཆོས་བདག་མེད་པ་ལས་བྱུང་བས་སེམས་ཅན་དང་སེམས་ཅན་མ་ཡིན་པ་ལ་གནོད་པ་རབ་ཏུ་སྟོན་པ་ནི་ཁྲོ་བོ་ཆེན་པོ་
རབ་ཏུ་སྟོན་པ་སྟེ། རྡོ་རྗེའི་རིགས་ཀྱི་ནམ་མཁའ་ཁྱབ་པར་བསྒོམས་པ་ནི་ཆེན་པོ་ཞེས་བྱ་བའི་དོན་ཏོ། །འདི་གང་གི་རིགས་ལ་དམ་ཚིག་ཡིན་ཞེ་ན། རྡོ་རྗེའི་རིགས་ནི་ཆེན་པོ་ཡིས། །ཞེས་བྱ་བ་སྨོས་ཏེ། རྡོ་རྗེ་ཆེན་པོ་དང་། བྱང་ཆུབ་ཀྱི་སེམས་ཆེན་པོ་བསྐྱེད་པའི་རྡོ་རྗེ་རྩེ་ལྔ་པ་འབར་

བའི་རྡོ་རྗེ་ཆེན་པོའི་རིགས་ནི་དེ་ལས་བྱུང་བ་སྟེ། རྡོ་རྗེ་ཧཱུཾ་མཛད་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་རྡོ་རྗེའི་རིགས་ཐམས་ཅད་ཀྱི་རྡོ་རྗེ་ཆེན་པོའི་རིགས་ཏེ། འདིའི་སྒྲ་ནི་ངེས་པར་གཟུང་བའོ། །དམ་ཚིག་འདི་ནི་འདའ་བར་དཀའ། །ཞེས་བྱ་བའོ། །
འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་ཧཱུཾ་མཛད་ཀྱི་རྣལ་འབྱོར་དང་། རྣལ་འབྱོར་ཆེན་པོའམ། དེའི་རིགས་ཀྱི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཆོས་བདག་མེད་པའི་རྣལ་འབྱོར་ཆེན་པོའི་རིགས་ལས་བྱུང་བའི་རྡོ་རྗེ་རིགས་ཀྱིས་ནམ་མཁའི་ཁམས་ཐམས་ཅད་
བཀང་ལ། སྒྱུ་མ་ལྟ་བུ་ཐམས་ཅད་དུ་ཁྱབ་པའི་རིགས་སུ་བདག་ཉིད་ཀྱིས་ཤིན་ཏུ་རྩེ་གཅིག་པར་བསྒོམ་པར་བྱའོ་ཞེས་བྱ་བའི་སྒྲ་ནི་སྔ་མ་བཞིན་ནོ། །འདི་ཞེས་བྱ་བ་ནི་པདྨའི་རིགས་ཐུགས་ལ་གནས་པ་གསུངས་སོ། །རང་བཞིན་དག་པར་ཤེས་ནས་ཀྱང་། །ཞེས་བྱ་བ་ནི་དེ་བཞིན་
ཉིད་དེ་རྣམ་པར་ཤེས་པའོ། །ཆོས་ཐམས་ཅད་རང་བཞིན་གྱིས་རྣམ་པར་དག་པ་སྣང་བརྙན་ཙམ་སྟེ། གདོད་མ་ནས་མ་སྐྱེས་པའི་ཕྱིར་རོ་ཞེས་ཐོས་པ་དང་། བསམ་པའི་ཤེས་པ་དག་གིས་ངེས་པར་བྱའོ་ཞེས་བྱ་བའི་དོན་ཏོ། །གང་དང་གང་འགྲོ་བ་འདུལ་བ་ནས་པདྨ་འབེབས་པའི་མཐར་ཐུག་
བསྒོམ་པའི་མཚན་ཉིད་ཅན་དེ་དང་དེ་ནི་པདྨའི་རིགས་ཀྱི་དགོས་པ་བྱེད་པ་སྟེ། པདྨའི་རིགས་ཀྱི་རྣལ་འབྱོར་པ་དེས་འགྲོ་བ་འདུལ་བ་སྒོམ་པ་ལ་སོགས་པ་དེ་དང་དེའི་དགོས་པ་འདི་ནི་པདྨའི་རིགས་ཆེན་པོའི་དམ་ཚིག་འདའ་བར་དཀའ་བ་སྟེ། པདྨའི་རིགས་ཆེན་པོ་སྟེ། བསྐྱེད་པའི་རྒྱུར་གྱུར་
པ་ལས་འདའ་བར་དཀའ་བའོ། །ཡང་གི་སྒྲ་ནི་དེ་བཞིན་གཤེགས་པ་ལ་སོགས་པའི་རིགས་ལ་ལྟོས་ནས་བརྗོད་པ་ཡིན་ནོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བ་ལ་སོགས་པ་པདྨའི་རིགས་ཀྱི་རྣལ་འབྱོར་དང་རྣལ་འབྱོར་ཆེན་པོ་བྱས་ལ། མཆོད་པ་
ཐམས་ཅད་ཀྱིས་ཡང་དག་པར་མཆོད་ལ། ཕྱག་བྱས་ནས་རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཆོས་ཐམས་ཅད་བདག་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པདྨ་ལས་བྱུང་བ་ཐམས་ཅད་དུ་ཁྱབ་པའི་རིགས་ཀྱི་རང་བཞིན་སྣང་བརྙན་ཙམ་དུ་བདག་ཉིད་རྣམ་

པར་བསམས་ཏེ། སེམས་ཅན་གྱི་ཁམས་ཐམས་ཅད་ཀྱང་རང་གི་རང་བཞིན་དུ་བྱས་ནས་བྱ་བ་བྱས་པ་ཡིན་ནོ་ཞེས་སེམས་རྩེ་གཅིག་པས་རང་གི་ལྷ་བསྒོམ་པར་བྱའོ། །དེ་ལ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །མང་ཡང་རུང་ཞེས་བྱ་བ་ནི་ཕྱི་རོལ་གྱི་རྫས་དང་། བསྒོམས་
པ་ལས་བྱུང་བའི་ནོར་བུའི་རིགས་ཀྱི་རང་བཞིན་དུ་རྫས་རྣམས་སོ། །མང་ཡང་རུང་བ་ཞེས་བྱ་བ་ནི་ཕྱི་རོལ་གྱི་རྫས་སམ་བསྒོམས་པ་ལས་བྱུང་བའི་ནོར་བུའི་རིགས་ཀྱི་རང་བཞིན་ཐམས་ཅད་དུ་སོང་བ་ནི། ཇི་ཙམ་ནུས་པ་ཉིད་དུ་ནི། །བྱིས་པས་ཉི་མ་མ་སྟོངས་པར། །བྱ་བ་འདི་ནི་དམ་ཚིག་
ཡིན། །ཞེས་བྱ་བ་ནི་ནོར་བུའི་རིགས་ཀྱི་རྣལ་འབྱོར་པའི་བྱ་བའོ། །སྦྱིན་པ་ནི་གང་གང་སྦྱིན་པས་ཉི་མ་མ་སྟོངས་པར་ནོར་བུའི་རིགས་ཀྱི་རྣལ་འབྱོར་པས་ཅིའི་ཕྱིར་བྱེད་ཅེ་ན། གང་གི་ཕྱིར་ནོར་བུའི་རིགས་བསྐྱེད་པ་ནི་སྦྱིན་པའི་རིགས་བཞིན་ཡིན་པ་འདིའི་དམ་ཚིག་ཡིན་པས་རྒྱུ་དེའི་ཕྱིར་
རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པ་ལ་སོགས་པ་ནོར་བུའི་རིགས་ཀྱི་རྣལ་འབྱོར་དང་། རྣལ་འབྱོར་ཆེན་པོ་བྱས་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བཞི་བྱས་ཏེ། རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ནོས་ནོར་བུའི་
རིགས་ཀྱི་ལྷ་རྣམས་ཀྱི་གཟུགས་སུ་ཇི་ཙམ་པར་བསྒོམས་ཏེ། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཕྱོགས་གཅིག་གམ་མཐའ་དག་ལ་དབང་སྒྱུར་བ་སྦྱིན་པས་རབ་ཏུ་མགུ་ཞིང་ཚིམ་ནས་ནོར་བུའི་རིགས་ཀྱི་གཟུགས་སུ་བསམ་པར་བྱའོ། །དེ་ནས་ཐམས་
ཅད་ནི་བདག་ཡིན་ནོ་ཞེས་ང་རྒྱལ་བསྐྱེད་དེ། ནམ་མཁའ་དང་མཚུངས་པའི་སྣང་བརྙན་ཙམ་དུ་བདག་ཉིད་དབྱེ་བ་མེད་པའི་སེམས་ཀྱིས་བསྒོམས་ཏེ། ཉིན་རེ་ཞིང་ཐུན་བཞིའི་སྦྱོར་བས་ཉུང་བའམ་ཆེས་ཉུང་བའམ། མང་བ་ལས་ཀྱང་ཆེས་མང་བའི་ཕྱི་རོལ་གྱི་དངོས་པོ་སྦྱིན་པར་བྱའོ། །
དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དམ་ཚིག་ལ་རྗེས་སུ་གནས་པའི་དངོས་གྲུབ་བསྟན་ནས། ད་ནི་དེ་དག་ཉིད་དངོས་པོ་ལ་མངོན་པར་ཞེན་པ་སྤངས་ཏེ། གཟུགས་བརྙན་ཙམ་དུ་ཕྱག་རྒྱ་ཆེན་པོ་ལ་སོགས་པ་བསྒོམ་པར་བྱའོ་ཞེས་བྱ་བའི་དོན་བསྟན་པའི་

ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །དེ་བཞིན་གཤེགས་པ་ཐམས་ཅད་ཀྱི་རིགས་རྣམས་ཀྱི་ཆོས་ནི། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཆོས་སོ། །ཐོག་མ་དང་ཐ་མ་མེད་པའི་ཆོས་ཀྱི་
དབྱིངས་དེ་ཉིད་ཀྱི་ཕྱག་རྒྱས་དེ་བསྒོམ་པར་དགའ་བའི་སེམས་ཅན་གྱི་ཁམས་ལ་རྒྱས་འདེབས་པའོ། །དེའི་ཡེ་ཤེས་ཀྱིས་དེའི་དངོས་གྲུབ་ཀྱི་ཕྱག་རྒྱ་ཆེན་པོ་ལ་སོགས་པ་བསྐྱེད་པ་དེ་སྟོན་པར་བྱེད་པའི་རྒྱུད་གསུངས་པར་མཛད་པའོ། །དེ་ལ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །སངས་རྒྱས་
ཆོས་ཞེས་གྲགས་སོ་ཞེས། །བརྗོད་ན་ཆོས་ཉིད་ཡི་གེ་ནི། ཞེས་བྱ་བ་ནི་སངས་རྒྱས་བཅོམ་ལྡན་འདས་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་མཚན་ཉིད་ནི་ཆོས་ཡིན་ནོ་ཞེས་བསྒྲགས་ཤིང་སྟོན་ཏོ། །དེ་སྐད་དུ་ཡང་རྒྱུད་འདི་ལས། །ཐོག་མཐའ་མེད་པའི་སེམས་དཔའ་ནི། །ནམ་མཁའི་
སྐྱེ་བ་མཚན་ལྡན་ཕྱིར། །ཀུན་དུ་བཟང་པོ་ཀུན་བདག་ཉིད། །འདོད་པ་ཀུན་གྱི་འགྲོ་བའི་བདག །དེ་ཉིད་བཅོམ་ལྡན་སེམས་དཔའ་ཡི། །འདོད་པ་ཀུན་གྱི་དེ་བཞིན་གཤེགས། །ཞེས་འཆད་པར་འགྱུར་རོ། །འདི་ནི་ཐོག་མ་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་གྱི་དོན་དམ་པར་སངས་
རྒྱས་ཡིན་གྱི། གཟུགས་ཀྱི་སྐུའི་རང་བཞིན་ནི་མ་ཡིན་ནོ་ཞེས་བཤད་པ་ཡིན་ཏེ། དོན་དམ་པར་གཟུགས་མེད་པའི་ཕྱིར་རོ། །བརྗོད་ན་ཆོས་ཉིད་ཡི་གེ་ནི། །ཞེས་བྱ་བ་ནི་དེ་བཞིན་དུ་ཐོས་པ་དང་། བསམ་པའི་ཤེས་པ་དག་གིས་ངེས་པའོ། །ཁྱད་པར་ཇི་ལྟ་བུ་ཞིག་ཅེ་ན། སངས་རྒྱས་ཆོས་ནི་
ཕྱག་རྒྱ་ཆེར། །ཡེ་ཤེས་མཆོག་གི་ཚུལ་ཡིན་ནོ། །ཞེས་བྱ་བ་སྨོས་ཏེ། སངས་རྒྱས་ཀྱི་ཆོས་ནི་སངས་རྒྱས་ཀྱི་ཆོས་ཏེ་བཤད་མ་ཐག་པའོ། །ཕྱག་རྒྱ་ཡང་ཡིན་ལ་ཆེན་པོ་ཡང་དེ་ཡིན་པས་ན་ཕྱག་རྒྱ་ཆེན་པོ་སྟེ། དམ་ཚིག་དང་། ཆོས་དང་། ལས་དང་ཕྱག་རྒྱ་ཆེན་པོའོ། །དེའི་ཡེ་ཤེས་
ནི་གཟུགས་བརྙན་དང་འདྲ་བར་ངེས་པའོ། །དེའི་མཆོག་ནི་དམ་པའོ། །ཚུལ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་ཡེ་ཤེས་ཐོས་པ་དང་བསམས་པའི་བདག་ཉིད་དོ། །འདི་སྐད་སྟོན་པ་ཡིན་ཏེ། ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་ནི་སངས་རྒྱས་ཡིན་ནོ་ཞེས་

ངེས་པར་བསྐྱེད་ནས་གཟུགས་བརྙན་དང་འདྲ་བའི་ཕྱག་རྒྱ་ཆེན་པོ་ལ་སོགས་པ་དེ་བཞིན་གཤེགས་པའི་ཕྱག་རྒྱ་རྣམ་པ་བཞི་རྫས་སུ་མངོན་པར་ཞེན་པ་མེད་པར་བསྒོམ་པའོ། །དེ་བཞིན་གཤེགས་པའི་རིགས་ཀྱི་རྡོ་རྗེ་སེམས་དཔའ་ལ་སོགས་པའི་ཆོས་ཀྱི་དངོས་གྲུབ་ནི་དེ་བཞིན་གཤེགས་པའི་
རིགས་ཀྱི་དངོས་གྲུབ་བོ། །འདོད་ཆགས་ཞེས་བྱ་བ་ནི་དམིགས་པ་མེད་པའི་ཐུགས་རྗེ་ཆེན་པོའི་མཚན་ཉིད་ཅན་གྱི་བྱང་ཆུབ་སེམས་ཀྱི་རང་བཞིན་གྱི་ཆགས་པ་ལས་དངོས་སུ་དག་པའི་ཆོས་གཞན་མེད་པ་ཡིན་ཏེ། བག་ཆགས་དང་བཅས་པའི་ཉོན་མོངས་པ་སྤངས་པའི་གཟུང་བ་དང་འཛིན་པའི་
རྣམ་པར་རྟོག་པ་ཤིན་ཏུ་མེད་པའི་ཕྱིར་རོ། །འདི་ལས་ཅི་ཞིག་བྱེད་ཅེ་ན། བདེ་བ་ཐམས་ཅད་རབ་སྦྱིན་བྱེད། །ཅེས་བྱ་བ་སྨོས་ཏེ། བདེ་བ་ཡང་ཡིན་ལ། ཐམས་ཅད་ཀྱང་ཡིན་པས་ན་འཇིག་རྟེན་དང་འཇིག་རྟེན་ལས་འདས་པའི་བདེ་བ་དེ་ཐམས་ཅད་རབ་ཏུ་སྟེར་བས་ན་བདེ་བ་ཐམས་ཅད་རབ་
སྦྱིན་བྱེད་དོ། །གང་གི་ཕྱིར་དེ་མངོན་དུ་བྱས་པས་འཇིག་རྟེན་པ་དང་རིག་པ་འཛིན་པའི་དངོས་གྲུབ་ལ་སོགས་པའི་བདེ་བ་ཐམས་ཅད་དང་། འཇིག་རྟེན་ལས་འདས་པས་རབ་ཏུ་དགའ་བ་ལ་སོགས་པ་ཐོབ་པ་མངོན་དུ་བྱས་པ་ནི་བདེ་བ་ཐམས་ཅད་རབ་ཏུ་སྦྱིན་པའོ། །འདིར་རང་གི་རིགས་ཀྱི་ཆོས་
ཡིན་ཞེ་ན། དེ་བཞིན་གཤེགས་པའི་རིགས་ཀྱི་ནི། །ཞེས་བྱ་བ་སྨོས་ཏེ། ནའི་སྒྲས་ནི་རིགས་གཞན་གྱི་རྣལ་འབྱོར་པ་རྣམས་ཀྱང་སྟོན་པར་འགྱུར་བ་ཡིན་ནོ། །དངོས་གྲུབ་བྱེད་པ་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བྱེད་པའོ། །ཆོས་ཀྱི་དངོས་ནི་དམ་པའོ། །འདི་
སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པ་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིངས་ཏེ། ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་གྱི་དེ་བཞིན་གཤེགས་པའི་རིགས་ཡིན་ནོ་
ཞེས་ངེས་པ་བསྐྱེད་ནས་ཕྱག་རྒྱ་ཆེན་པོ་ལ་སོགས་པའི་བསྒོམ་པའི་གཟུགས་བརྙན་དང་མཚུངས་པའོ། །དེ་ལ་ཞེས་བྱ་བ་ནི་སྔ་མ་བཞིན་ནོ། །ཧཱུཾ་མཛད་ལ་སོགས་པའི་གཟུགས་ནི་སངས་རྒྱས་ཀྱི་བཀའ་འམ་སྦྱོང་བའི་དོན་ཏེ། འདི་ལྟར་ལྷ་ཆེན་པོ་ལ་སོགས་པ་རྣམ་པར་སྦྱོང་བའི་ཕྱིར་རོ། །དང་

ཞེས་བྱ་བ་ནི་བསྡུ་བའི་དོན་ཏེ། ཡོངས་སུ་སྦྱོང་བའི་ཕྱིར་རོ། །སེམས་ཅན་དྲང་བར་བྱ་བའི་ཕྱིར། །ཞེས་བྱ་བ་ནི་འདི་ལྟར་ཡོངས་སུ་སྦྱོང་བའི་དོན་གྱི་ཕྱིར་དང་། དེ་བཞིན་དུ་སྲིན་པོ་ལ་སོགས་པ་རྣམས་ཀྱིས་སེམས་ཅན་ལ་རྣམ་པར་རྩེ་བར་བྱེད་པ་ལས་བསྐྱབ་པའི་ཕྱིར་རོ། །
དེ་ལྟར་ཁྲོས་པར་མ་གྱུར་ཀྱང་། །ཞེས་བྱ་བ་ནི་ཁྲོ་བ་མེད་པ་ཉིད་དང་། ཕན་པའི་སེམས་དང་ལྡན་པ་ཉིད་ཡིན་ནོ་ཞེས་བྱ་བའི་དོན་ཏོ། །མ་རུངས་པ་རྣམས་ཇི་སྐད་བཤད་པས་ཐལ་བར་བྱེད་པས་བསྡུས་བྱས་པའོ། །དངོས་གྲུབ་ཐོབ་ཅེས་བྱ་བ་ནི་རྡོ་རྗེ་འཛིན་པ་ཉིད་ཐོབ་པོ་ཞེས་བྱ་བའི་ཐ་ཚིག་
གོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་ཧཱུཾ་མཛད་ཀྱི་རྣལ་འབྱོར་རམ། ཁྲོ་བོ་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་དང་། རྣལ་འབྱོར་ཆེན་པོ་བྱས་ལ་སྔར་བཤད་པའི་ཆོ་ག་ཐམས་ཅད་རྗེས་སུ་སྤྱད་ནས། རྡོ་རྗེའི་རིགས་ཐམས་ཅད་སྤྲུལ་ཏེ། དེ་བཞིན་གཤེགས་པ་
ལ་གསོལ་བ་བཏབ་ནས་ཧཱུཾ་མཛད་ཀྱི་རྡོ་རྗེས་སེམས་ཅན་གྱི་ཁམས་ཐམས་ཅད་སྣང་བ་མེད་པར་བྱས་ནས་རྡོ་རྗེའི་རིགས་ཀྱི་གཟུགས་སུ་བསམས་ཏེ། གཟུགས་བརྙན་དང་མཚུངས་པར་བྱས་ཏེ། དེ་ནས་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་དེ་བསྒོམ་པར་བྱའོ། །དེ་ལ་ཞེས་བྱ་བ་
ལ་སོགས་པ་ནི་བཤད་ཟིན་ཏོ། །པདྨོ་ཆུ་ཡིས་ཆགས་པ་ཞེས་བྱ་བ་ནི་མ་རེག་པའོ། །གང་གིས་མ་ཆགས་པ་ཞེ་ན། ཆུའི་ཉེས་པ་ངེས་སོ། །དེ་གང་ལ་མ་ཆགས་ཤེ་ན། པདྨོ་ཞེས་བྱ་བ་སྨོས་ཏེ། ཇི་ལྟར་པདྨོ་དམར་པོ་ཆུ་ལས་སྐྱེས་ཀྱང་ཆུའི་ཉེས་པའི་སྐྱོན་གྱིས་གོས་པར་མི་འགྱུར་
བའི་རང་བཞིན་ཡིན་པ་དེ་བཞིན་དུ་མི་དམིགས་པའི་ཐུགས་རྗེ་ཆེན་པོས་ཆགས་པས་བྱང་ཆུབ་སེམས་དཔའ་རྣམས་འཁོར་བར་སྐྱེས་ཀྱང་འཁོར་བའི་གཟུང་བ་དང་འཛིན་པའི་རྣམ་པར་རྟོག་པས་གོས་པར་མི་འགྱུར་བའི་ཕྱིར། འདོད་པས་མི་ཆགས་ཞེས་གསུངས་སོ། །སྨྲ་ཞིང་
དགོས་མིན་བྱེད་ཀྱང་ནི་ཐོས་པ་དང་བསམ་པ་ཤེས་པར་ངེས་པར་གཟུང་བའོ། །དགོས་མིན་བྱེད་ཀྱང་ཞེས་བྱ་བ་ནི་བསྒོམ་པའི་ཤེས་པས་ཆོས་ཐམས་ཅད་རང་བཞིན་གྱིས་རྣམ་པར་དག་པའི་གཟུགས་བརྙན་དང་མཚུངས་པའོ་ཞེས་ངེས་པར་བཟུང་ནས། མི་དམིགས་པའི་ཐུགས་རྗེ་

ཆེན་པོས་དེ་བཞིན་གཤེགས་པ་དང་། སེམས་ཅན་གྱི་ཁམས་ཐམས་ཅད་ལ་ཆགས་པའི་པདྨ་ཆེན་པོ་ལས་པདྨའི་རིགས་ཀྱི་གཟུགས་སུ་སྤྲུལ་ནས་བྱེད་པའོ། །ཅིའི་ཕྱིར་དགོས་མིན་བྱེད་ཅེ་ན། གང་གི་ཕྱིར་སྔར་བཤད་པ་གང་ཡིན་པ་དང་། འགྲོ་བ་འདུལ་བ་ལ་སོགས་པའི་གཟུགས་
ཀྱི་སྦྱོར་བས་འདིས་རང་དང་གཞན་གྱི་རྒྱུད་ལ་བྱེད་པར་འགྱུར་བ་དང་། སྔར་ཅུང་ཟད་ཀྱང་མ་བྱས་པ་ཞིག་མཛད་པས་ན། དགོས་མིན་བྱེད་པ་ཞེས་བརྗོད་དོ། །སྡིག་པས་གོས་པར་མི་འགྱུར་རོ། །ཞེས་བྱ་བ་ནི་དེ་ལྟར་པདྨའི་རང་བཞིན་རྣམ་པར་དག་པ་གཟུགས་བརྙན་དང་མཚུངས་
པར་ངེས་པ་བཟུང་ནས་བསྒོམས་པས་ངེས་པའི་ཤེས་པས་འདོད་ཆགས་ལ་སོགས་པའི་ཉོན་མོངས་པ་དང་། ཉེ་བའི་ཉོན་མོངས་པའི་དངོས་པོར་གཟུང་བའི་མངོན་པར་ཞེན་པས་གོས་པར་མི་འགྱུར་རོ། །སྔ་མ་བཞིན་དུ་པདྨའི་རིགས་ཀྱི་རྣལ་འབྱོར་བྱས་ནས་ཆོ་ག་ཐམས་ཅད་རྗེས་
སུ་སྤྱད་ལ། གཟུགས་བརྙན་དང་མཚུངས་པའི་ཆོས་བདག་མེད་པའི་ཐུགས་རྗེ་ཆེན་པོའི་ཆགས་པས་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ནམ་མཁའ་དང་མཚུངས་པ་བདག་ཉིད་ཀྱི་རང་བཞིན་དུ་བསམས་ནས་པདྨའི་རིགས་ཀྱི་ངོ་བོ་བསྒོམ་པར་བྱའོ། །
དེ་ནས་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་ནས་བདག་ཡིན་ནོ་ཞེས་བསྒོམ་པར་བྱའོ། །སྦྱིན་པ་དང་ཞེས་བྱ་བ་ནི་སྦྱིན་པའི་ཕ་རོལ་ཏུ་ཕྱིན་པའི་ནོར་བུའི་རིགས་ལས་བྱུང་བ་ནི་ནོར་བུའི་རིགས་ཀྱི་སྦྱིན་པ་ཡིན་པ་དེའི་ཕྱིར་དེ་ལས་གྱུར་པ་ནི། སྦྱིན་དང་མཉམ་པའི་ཆོས་མེད་དེ། །
སྒྲུབ་པར་བྱེད་ཅེས་སྨྲ་བ་ནི། །ཞེས་བྱ་བ་ལ། ཕྱི་རོལ་དང་ནང་དུ་བཅས་པའི་དངོས་པོ་ཡོངས་སུ་གཏོང་བའི་སྒྲུབ་པར་བྱེད་པ་ནི་ཆེས་ཤིན་ཏུ་ཆུང་བ་དང་ཤིན་ཏུ་ཕྱིན་པའི་རིམ་གྱིས་དེ་ལ་ཕྱི་རོལ་གྱི་དངོས་པོ་ཡོངས་སུ་གཏོང་བའི་སྦྱིན་པའི་རང་བཞིན་དང་། ནམ་མཁའ་དང་མཉམ་པའི་ཡེ་
ཤེས་བསྒོམ་པའི་འདུས་བྱས་དང་འདུས་མ་བྱས་ཀྱི་དངོས་པོ་ཐམས་ཅད་ཡོངས་སུ་གཏོང་བས་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་ནོར་བུའི་རིགས་ཀྱི་གཟུགས་སུ་བསྐྱེད་དེ། བདག་ཉིད་ཐམས་ཅད་ཀྱང་གཟུགས་བརྙན་དང་མཚུངས་པའོ་ཞེས་བསྒོམ་པའི་

ཡེ་ཤེས་ཀྱིས་ངེས་པར་གཟུང་བ་ནི་ནང་གི་དངོས་པོ་ཡོངས་སུ་གཏོང་བ་ཞེས་བྱའོ། །དེ་ལྟར་སྒྲུབ་པར་བྱེད་ཅིང་ཅིའི་ཕྱིར་སྨྲ་ཞེ་ན། གང་གི་ཕྱིར། ནོར་བུའི་རིགས་ནི་ཆེན་པོའི་ཆོས། །ཞེས་བྱ་བ་སྨོས་ཏེ་ནོར་བུའི་རིགས་ཀྱི་སྒྲུབ་པ་པོས་ཆོས་གཞན་གང་ཡིན་པ་འདི་ཡང་
ནོར་བུའི་རིགས་ཀྱི་ཚུལ་འདིས་བསྐྱེད་པར་བྱའོ། །མི་འདོད་དངོས་གྲུབ་གོང་མ་བཞིན། །ཞེས་བྱ་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ནོར་བུའི་རིགས་ཀྱི་ཆོ་ག་ཐམས་ཅད་རྗེས་སུ་སྤྱད་ལ་ཉིན་རེ་ཞིང་ཐུན་བཞིའི་སྦྱོར་བས་ཕྱི་རོལ་གྱི་དངོས་པོ་ཡོད་ན་ཅི་རིགས་པར་ཡོངས་སུ་གཏང་བར་
བྱ་བ་དང་། དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་ནམ་མཁའ་དང་མཚུངས་པར་བསམས་ཏེ། ནམ་མཁའ་དང་མཉམ་པའི་ཡེ་ཤེས་ནོར་བུ་ཆེན་པོའི་རང་བཞིན་སྤྲུལ་ལ་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་དེ། གཟུགས་བརྙན་དང་མཚུངས་པར་བསྒོམ་པར་
བྱའོ། །དེ་ལྟར་དངོས་པོར་འཛིན་པའི་མངོན་པར་ཞེན་པ་སྤངས་ནས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཆོས་ཀྱི་དངོས་གྲུབ་ཀྱི་རྒྱུད་བསྟན་ནས། ད་ནི་ལས་ཀྱི་དཀྱིལ་འཁོར་ལས་གསུངས་པའི་མཆོད་པ་རྣམ་པ་བཅུ་དྲུག་བྱས་ལ། ཕྱག་རྒྱ་ཆེན་པོ་ལ་སོགས་པའི་སྒྲུབ་པ་པོས་
སེམས་ཅན་ཐམས་ཅད་ཀྱི་དོན་བྱེད་པའི་མཚན་ཉིད་དང་། དེ་བཞིན་གཤེགས་པ་ཐམས་ཅད་མཆོད་པའི་མཚན་ཉིད་ཀྱིས་ནམ་མཁའི་ཁམས་ཐམས་ཅད་དུ་སྤྲོས་པའི་ལས་བསྒོམ་པར་བྱའོ་ཞེས་བྱ་བའི་ཆོ་ག་རབ་ཏུ་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་
པོ་ཕྱག་ན་རྡོ་རྗེས་ཞེས་བྱ་བ་ལ་དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །དེ་བཞིན་གཤེགས་པ་ནི་ཐམས་ཅད་ཀྱི་རིགས་དེ་བཞིན་གཤེགས་པ་ཐམས་ཅད་ཀྱི་རིགས་སོ། །དེ་དག་གི་ལས་ནི་མཆོད་པ་བཅུ་དྲུག་བསྒོམས་པས་སེམས་ཅན་གྱི་ཁམས་ཐམས་ཅད་ལས་སངས་རྒྱས་ཐམས་
ཅད་སྟེར་བ་དེའི་དངོས་གྲུབ་བསྐྱེད་པ་སྟེ། དེ་སྟོན་པར་བྱེད་པའི་རྒྱུད་དེ་གསུངས་ཤིང་བཤད་པའོ། །དེ་ལ་ཞེས་བྱ་བ་ནི་བཤད་ཟིན་ཏོ། །དེ་བཞིན་གཤེགས་པའི་རྣལ་འབྱོར་ལས་ཀྱི་དངོས་གྲུབ་ཀྱི་རྒྱུད་ནི་འདི་ཡིན་ཏེ། སེམས་ཅན་ཐམས་ཅད་སངས་རྒྱས་དང་བྱང་ཆུབ་སེམས་དཔའ་འདི་

རྣམས་སུ་ཞེས་བྱ་བ་ནི་དེ་བཞིན་གཤེགས་པའི་ཕྱག་རྒྱའི་སྒྲུབ་པ་པོས་མཆོད་པ་རྣམ་པ་བཅུ་དྲུག་སྤྲུལ་ན། འགའ་ཞིག་སངས་རྒྱས་ལ་དབུལ་བ་དང་། འགའ་ཞིག་སེམས་ཅན་རྣམས་དང་། བྱང་ཆུབ་སེམས་དཔའ་ལ་ཡིད་ཀྱིས་དབུལ་བར་བྱའོ། །ཇི་བཞིན་པར་ནི་བཏུལ་ནས་ནི། །
ལས་ཀྱི་ཕྱག་རྒྱ་མཆོག་སྒྲུབ་སྦྱིན། །ཞེས་བྱ་བ་ནི་སངས་རྒྱས་ཉིད་དང་། བྱང་ཆུབ་སེམས་དཔའ་ཉིད་ཀྱི་དངོས་གྲུབ་མི་སྒོམ་པ་གང་ཡིན་པ་དེ་དག་འགའ་ཞིག་སངས་རྒྱས་སུ་འགྱུར་བ་དང་། འགའ་ཞིག་ཉན་ཐོས་ཀྱི་ཐེག་པ་བསྒོམས་པས་རྒྱུན་དུ་ཞུགས་པ་དང་། ལན་ཅིག་ཕྱིར་
འོང་བ་དང་། ཕྱིར་མི་འོང་བ་དང་། དགྲ་བཅོམ་པའི་འབྲས་བུ་ཐོབ་པར་འགྱུར་རོ། །ཐེག་པ་གསུམ་མི་སྒོམ་པ་གང་ཡིན་པ་དེ་དག་ནི་དབང་ཕྱུག་ཆེན་པོ་ལ་སོགས་པའི་འབྲས་བུ་འདི་ཇི་ལྟ་བ་བཞིན་དུ་ཐོབ་པར་འགྱུར་རོ། །ལས་ཀྱི་ཕྱག་རྒྱ་ནི་དེ་བཞིན་གཤེགས་པ་ཐམས་ཅད་ཀྱི་
ཕྱག་རྒྱ་ཆེན་པོ་ལ་སོགས་པའོ། །མཆོག་ནི་ཆོས་ཀྱི་དབྱིངས་བསྒོམ་པ་རྣམས་ནི་མཆོག་གོ། །གྲུབ་པ་ནི་བསྐྱེད་པ་ལ་སོགས་པ་དེའི་ཕྱིར། འདི་ལས་ཀྱི་ཕྱག་རྒྱ་མཆོག་སྒྲུབ་སྦྱིན་ཞེས་བྱའོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་
གས་དེ་བཞིན་གཤེགས་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། སྒེག་མོ་ལ་སོགས་པའི་མཆོད་པ་བརྒྱད་ཀྱིས་བདག་ཉིད་ཡང་དག་པར་མཆོད་དེ། ཕྱག་བྱས་ནས། འོག་མིན་ནས་བབས་ཏེ། རྩེ་མོ་རྡོ་རྗེ་ནོར་བུ་ཆེན་པོ་ལས་བྱས་པའི་ཁང་བུ་
བརྩེགས་པར་དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་བསྐོར་ཞིང་དེ་བཞིན་གཤེགས་པ་ཐམས་ཅད་ཀྱི་སེང་གེའི་གདན་ལ་ཞལ་ཀུན་དུ་བསྟན་ཏེ། བཞུགས་ནས་རྡོ་རྗེ་སེམས་དཔའ་སྤྲུལ་ལ། ཨོཾ་སརྦྦ་ཏ་ཐཱ་ག་ཏ་བཛྲ་དྷཱ་ཏུ་ཨ་ནུཏྟ་ར་པཱུ་ཛ་སྥ་ར་ཎ་ཀརྨྨ་ས་མ་ཡེ་ཧཱུཾ། ཞེས་
བྱ་བ་འདིས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ཏེ་རང་གི་མཆོད་པ་སྤྲུལ་ལ། སེམས་ཅན་ཐམས་ཅད་ཀྱི་དོན་བྱེད་པ་མཐའ་ཡས་པར་རབ་ཏུ་སྤྲུལ་ནས། ནམ་མཁའ་གང་བར་བསམ་པར་བྱའོ། །དེ་ནས་མི་བསྐྱོད་པའི་ཕྱག་རྒྱ་ཆེན་པོ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་

བཛྲ་སཏྭ་ཨ་ནུཏྟཱ་ར་པཱུ་ཛ་སྥ་ར་ཎ་ཀརྨྨ་ས་མ་ཡེ་ཧཱུཾ་ཞེས་བྱ་བ་འདིས་རྡོ་རྗེ་སེམས་དཔའ་དང་བཅས་པའི་རང་གི་རིགས་ཀྱི་མཆོད་པ་སྤྲུལ་ནས། དེ་རྣམས་ཀྱིས་སེམས་ཅན་ཐམས་ཅད་ཀྱི་དོན་བྱས་ཏེ། ནམ་མཁའི་ཁམས་གང་བར་བསམ་པར་བྱའོ། །དེ་ནས་
རིན་ཆེན་འབྱུང་ལྡན་གྱི་ཕྱག་རྒྱ་ཆེན་པོ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་རཏྞ་ཨ་ནུཏྟཱ་ར་པཱུ་ཛ་སྥ་ར་ཎ་ཀརྨྨ་ས་མ་ཡེ་ཧཱུཾ། ཞེས་བྱ་བ་འདིས་རྡོ་རྗེ་རིན་ཆེན་དང་བཅས་པས་རང་གི་མཆོད་པ་སྤྲུལ་ནས་སྔ་མ་བཞིན་དུ་ཐམས་ཅད་བསམ་པར་བྱའོ། །དེ་ནས་འོད་དཔག་ཏུ་མེད་པའི་ཕྱག་རྒྱ་ཆེན་པོ་
བཅིངས་ཏེ། ཨོཾ་སརྦྦ་ཏ་ཐཱ་ག་ཏ་བཛྲ་དྷརྨྨ་ཨ་ནུཏྟཱ་ར་པཱུ་ཛ་སྥ་ར་ཎ་ཀརྨྨ་ས་མ་ཡེ་ཧཱུཾ། ཞེས་བྱ་བ་འདིས་རྡོ་རྗེ་ཆོས་དང་བཅས་པའི་ལས་ཀྱི་མཆོད་པ་སྤྲུལ་ནས་སྔ་མ་བཞིན་དུ་ཐམས་ཅད་བསམ་པར་བྱའོ། །ཡང་དོན་ཡོད་གྲུབ་པའི་ཕྱག་རྒྱ་ཆེན་པོ་བཅིངས་ཏེ། དེ་བཞིན་གཤེགས་པ་ཐམས་
ཅད་ཀྱི་སྙིང་པོ་རྣམས་ཀྱིས་བྱང་ཆུབ་སེམས་དཔའ་ཆེན་པོ་རྡོ་རྗེ་ལས་བཤད་པའི་རང་གི་མཆོད་པ་སྤྲུལ་ནས་དེས་སངས་རྒྱས་ཐམས་ཅད་ཀྱི་སྤྲུལ་པ་མཛད་ནས། ནམ་མཁའ་གང་བར་བསམ་པར་བྱའོ། །དེ་ལྟར་མཆོད་པ་སྤྲོ་བ་བྱས་ནས། རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་
བཅིངས་ཏེ། འདི་ལྟར་བསྒོམ་པར་བྱའོ། །བདག་ནི་མགོན་པོ་རྣམ་པར་སྣང་མཛད་དེ། བདག་གི་རྡོ་རྗེ་སེམས་དཔའ་དང་། རྡོ་རྗེ་རིན་ཆེན་དང་། རྡོ་རྗེ་ཆོས་དང་། རྡོ་རྗེ་ལས་རྣམས་ཀྱི་མཆོད་པའི་འཁོར་ལོས་སྒྱུར་བར་བདག་གིས་སྤྲུལ་པར་བྱའོ། །མཆོད་པ་ཐམས་ཅད་དང་བཅས་པ་
ནི་བདག་ཡིན་ནོ་ཞེས་ང་རྒྱལ་བསྐྱེད་པར་བྱས་ནས། རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་བཅིངས་ནས་རང་གི་གནས་སུ་བཞག་སྟེ། བདག་ཉིད་རྡོ་རྗེ་སེམས་དཔའ་བསམས་ཏེ། མཆོད་པ་ཆེན་པོ་རྣམ་པ་བཞིས་བཅོམ་ལྡན་འདས་རྣམ་པར་སྣང་མཛད་ནས་བརྩམས་ནས།
དོན་ཐམས་ཅད་གྲུབ་པའི་བར་དུ་མཆོད་པར་བྱའོ། །ལས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་སརྦྦ་ཨཱཏྨ་ནིརྱ་ཏ་ན་པཱུ་ཛ་སྥ་ར་ཎ་ཀརྨྨཱ་བཛྲི་ཨ། ཞེས་བྱ་བའི་སྙིང་པོ་འདིས་རྡོ་རྗེ་སེམས་དཔའི་བདག་ཉིད་དུ་བསྒོམས་

ནས། རབ་ཏུ་དགའ་ཞིང་བདེ་བའི་སྦྱོར་བ་བྱའོ། །དེ་ནས་དེས་བྱང་ཆུབ་ཏུ་སེམས་བསྐྱེད་པ་ལ་སོགས་པའི་མཆོད་པས་བཅོམ་ལྡན་འདས་ལ་མཆོད་པར་བསམ་པར་བྱའོ། །ལས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་རྒྱལ་པོའི་ལས་ཀྱི་ཕྱག་རྒྱ་བཅིངས་ཏེ། རྡོ་རྗེ་རྒྱལ་པོ་བདག་ཡིན་ནོ་
ཞེས་ང་རྒྱལ་བསྐྱེད་ནས། ཨོཾ་སརྦྦ་ཏ་ཐཱ་ག་ཏ་སརྦྦ་ཨཱཏྨ་ནིརྱ་ཏ་ན་ཨཱ་ཀཪྵ་ཎ་པཱུ་ཛ་སྥ་ར་ཎ་ཀརྨ་ཨ་གྲི་ཛཿ་ཞེས་བརྗོད་ཅིང་། དེ་བཞིན་གཤེགས་པ་ཐམས་ཅད་འགུགས་པ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་སྤྱན་འདྲེན་པ་ཞེས་བྱ་བ་དེས་དེ་མཆོད་པར་བྱའོ། །ཡང་རྡོ་རྗེ་
ཆགས་པའི་ཕྱག་རྒྱ་བཅིངས་ཏེ། དེའི་ང་རྒྱལ་མངོན་དུ་བྱས་ནས། ཨོཾ་སརྦྦ་ཏ་ཐཱ་ག་ཏ་སརྦྦ་ཨཱཏྨ་ནིརྱ་ཏ་ན་ཨ་ནུ་རཱ་ག་ན་པཱུ་ཛ་སྥ་ར་ཎ་ཀརྨྨ་བ་ནི་ཧཱུཾ་ཧོ། ཞེས་བརྗོད་ཅིང་། དེ་བཞིན་གཤེགས་པ་ཐམས་ཅད་རྗེས་སུ་ཆགས་པས་ཐམས་ཅད་དུ་སོང་ནས་དེ་བཞིན་གཤེགས་པ་ཐམས་ཅད་མཉེས་
པར་བྱེད་པ་ཡིན་ནོ། །རྡོ་རྗེ་ལེགས་པའི་ཕྱག་རྒྱ་བཅིངས་ཏེ། དེའི་ང་རྒྱལ་བསྐྱེད་ནས། ཨོཾ་སརྦྦ་ཏ་ཐཱ་ག་ཏ་སརྦྦ་ཨཱཏྨ་ནིརྱ་ཏ་ན་སཱ་དྷཱུ་ཀཱ་ར་པཱུ་ཛ་སྥ་ར་ཎ་ཀརྨྨ་ཏུཥྚི་ཨ། ཞེས་བྱ་བས་དེ་བཞིན་གཤེགས་པ་ཐམས་ཅད་མཉེས་པར་བྱེད་པས་ཐམས་ཅད་དུ་ཁྱབ་པས། དེ་བཞིན་གཤེགས་པ་
ཐམས་ཅད་ཀྱི་ལེགས་པར་བྱེད་པ་མོས་པར་མཉེས་པར་བྱེད་པ་ཡིན་ནོ། །རྡོ་རྗེ་རིན་ཆེན་གྱི་ཕྱག་རྒྱ་བཅིངས་ཏེ། ཨོཾ་ན་མཿསརྦྦ་ཏ་ཐཱ་ག་ཏ་ཀཱ་ཡ་ཨ་བྷི་ཥེ་ཀ་རཏྣ་བྷྱོ་བཛྲ་ནི་ཨོཾ། ཞེས་བྱ་བས་དབང་མོ་ཆེན་མོའི་ཚུལ་གྱིས་ཐམས་ཅད་ཁྱབ་པས། དེ་བཞིན་གཤེགས་པ་ཐམས་ཅད་ལ་
དབང་བསྐུར་བའི་མཆོད་པ་བྱེད་པ་ཡིན་ནོ། །རྡོ་རྗེ་ཉི་མའི་ཕྱག་རྒྱ་བཅིངས་ཏེ། ཨོཾ་ན་མཿསརྦྦ་ཏ་ཐཱ་ག་ཏ་སཱུརྱ་བྷྱོ་བཛྲ། ཏེ་ཛ་ཛ་ལ་ཧི་ཞེས་བྱ་བས་སྣང་བ་ཆེན་པོ་ཐམས་ཅད་དུ་ཁྱབ་པས་དེ་བཞིན་གཤེགས་པ་ཐམས་ཅད་ལ་འོད་ཀྱི་སྣང་བ་བྱེད་པའོ། །རྡོ་རྗེ་དཔལ་གྱི་ཕྱག་རྒྱ་བཅིངས་ཏེ།
ཨོཾ་ན་མཿསརྦྦ་ཏ་ཐཱ་ག་ཏ་ཨ་ཏ་པ་རི་པུ་ར་ནི་ཙིནྟ་མ་ཎི་དྷྭ་ཙྪ་གྲི་བྷྱོ་བཛྲ་དྷྭ་ཙི་གྲི་ཧཾ། ཞེས་བྱ་བ་རྡོ་རྗེ་རིན་པོ་ཆེའི་ཆར་གྱིས་ཐམས་ཅད་དུ་ཁྱབ་པས་དེ་བཞིན་གཤེགས་པ་ཐམས་ཅད་ལ་སྦྱིན་པའི་ཕ་རོལ་ཏུ་ཕྱིན་པའི་མཆོད་པ་བྱེད་པའོ། །རྡོ་རྗེ་བཞད་པའི་ཕྱག་རྒྱ་བཅིངས་ལ། ཨོཾ་ན་མཿསརྦ་

ཏ་ཐཱ་ག་ཏ་མ་ཧཱ་པྲ་ཏི་པྲ་མོ་དྷྱ་ཀ་རེ་བྷྱོ་བཛྲ་ཧ་ས་ཧ་ཞེས་བྱ་བས་དགའ་ཞིང་མགུ་བ་ཆེན་པོ་ཐམས་ཅད་དུ་ཁྱབ་པས་དེ་བཞིན་གཤེགས་པ་འཛུམ་པ་རྨད་དུ་བྱུང་བ་ལས་འཇོག་པའོ། །རྡོ་རྗེ་ཆོས་ཀྱི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་བཛྲ་དྷརྨྨཱ་ས་མཱ་དྷི་བྷི་སྟུ་ནོ་ནི་མ་ཧཱ་དྷརྨྨཱ་ཨ་
གྲི་ཧྲི་ཞེས་བྱ་བས་ཆོས་ཀྱི་ཡེ་ཤེས་ཆེན་པོའི་སྲུང་མ་ཐམས་ཅད་དུ་སོང་བས་དེ་བཞིན་གཤེགས་པ་ལ་སོགས་པས་སེམས་ཅན་གྱི་ཁམས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་ལས་འཇོག་པའོ། །རྡོ་རྗེ་རྣོན་པོའི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་པྲཛྙཱ་པཱ་ར་མི་ཏ་
ན་ཧ་རེ་སྟུ་ནོ་མི་མ་ཧཱ་གྷོ་ཥ་ནུ་གྷེ་དྷཾ་ཞེས་བྱ་བས་དབྱངས་ཆེན་པོའི་རྗེས་སུ་འབྲང་བ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ལ་ཉོན་མོངས་པ་དང་། ཉེ་བའི་ཉོན་མོངས་པ་གཅོད་པ་ཡིན་ནོ། །རྡོ་རྗེ་རྒྱུའི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་ཙཀྲ་ཨ་ཀཱ་པ་རི་པུ་ར་ཨ་ཧེ་སརྦྦ་སཱུ་ཏྲ་ན་ཏ་
ཨ་སྟུ་ནོ་མི་སརྦྦ་མཎྜ་ལེ་ཧཱུཾ། ཞེས་བྱ་བས་དཀྱིལ་འཁོར་ཐམས་ཅད་ལ་འཇུག་པ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་འཇུག་པ་ཡིན་ནོ། །རྡོ་རྗེ་གསུངས་པའི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་སནྡྷ་བྷི་ཤ་བུདྡྷ་སཾ་གཱི་ཏི་བྷི་ར་གེ་ཡན་སྟུན་ནོ་མི་
བཛྲ་བཱ་ཛེ་བཾ་ཞེས་བྱ་བས་རྗེས་སུ་བརྗོད་པ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ལ་སྤྲོས་པ་མེད་པའི་ཆོས་བརྗོད་པ་ངེས་པར་སྦྱོར་བ་ཡིན་ནོ། །རྡོ་རྗེ་ལས་ཀྱི་ཕྱག་རྒྱ་བཅིངས་ཏེ། དེའི་ང་རྒྱལ་བསྐྱེད་ནས། ཨོཾ་སརྦྦ་ཏ་ཐཱ་ག་ཏ་དྷཱུ་པ་མེ་གྷ་སྥ་ར་ཎ་པཱུ་ཛ་ཀརྨྨཱ་ཀ་ར་ཀ་ར་ཞེས་བྱ་བས་སེམས་
ཅན་ཆེན་མོ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ལ་བདུག་པ་མ་ལུས་ཤིང་ལུས་པ་མེད་པའི་མཆོད་པས་ཡང་དག་པར་མཆོད་པ་བྱེད་དོ། །རྡོ་རྗེ་བསྲུང་བའི་ཕྱག་རྒྱ་བཅིངས་ལ། དེའི་ང་རྒྱལ་བསྐྱེད་དེ། ཨོཾ་སརྦྦ་ཏ་ཐཱ་ག་ཏ་པུཥྤ་པཱུ་ཛ་པྲཱ་ཀ་ར་ཀི་རི་ཀི་རི་ཞེས་བྱ་བས་བྱང་ཆུབ་ཀྱི་ཡན་ལག་
ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ལ་མེ་ཏོག་ལ་སོགས་པ་གོ་ཆའི་མཆོད་པ་ཐམས་ཅད་ཀྱིས་ཡང་དག་པར་མཆོད་པར་བྱའོ། །རྡོ་རྗེ་གནོད་སྦྱིན་གྱི་ཕྱག་རྒྱ་བཅིངས་ལ། དེའི་ང་རྒྱལ་བསྐྱེད་ནས། ཨོཾ་སརྦྦ་ཏ་ཐཱ་ག་ཏ་ཨཱ་ལོ་ཀེ་ཛྭ་ལ་སྥ་ར་ཎ་པཱུ་ཛ་ཀརྨྨཱ་ཀ་ར་ཀ་ར་ཞེས་བྱ་བས་

མིག་ལྡན་མ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་བསྲུང་བ་ཡོངས་སུ་བསྐྱང་བའི་སོ་སོར་རྟོག་པའི་མར་མེ་ལ་སོགས་པའི་མཆོད་པས་མཆོད་པར་བྱའོ། །རྡོ་རྗེ་ཁུ་ཚུར་གྱི་ལས་ཀྱི་ཕྱག་རྒྱ་བཅིངས་ནས། དེའི་ང་རྒྱལ་གྱིས། ཨོཾ་སརྦྦ་ཏ་ཐཱ་ག་ཏ་གནྡྷ་ས་མུ་དྲ་སྥ་ར་
ཎ་ཀརྨྨཱ་ཀུ་རུ་ཀུ་རུ་ཞེས་བརྗོད་ཅིང་། དྲི་ལྡན་མ་ཐམས་ཅད་དུ་སོང་བས་ནམ་མཁའི་ཁམས་ཐམས་ཅད་བཀང་སྟེ། དེ་བཞིན་གཤེགས་པ་ཐམས་ཅད་ལ་སྒྲུབ་པ་ནན་ཏན་དུ་བྱེད་པའི་བརྩོན་འགྲུས་ཀྱི་དྲིས་མཆོད་པར་བྱའོ། །ལས་ཀྱི་དཀྱིལ་འཁོར་ཐམས་ཅད་ལས་གསུངས་པའི་རང་
བཞིན་ལྷའི་ལས་ཀྱི་ཕྱག་རྒྱ་བཅིངས་ཏེ། དེ་ཉིད་ལས་སྐྱེས་པའི་ང་རྒྱལ་བསྐྱེད་པ་ཡིན་པར་ཤེས་པར་བྱའོ། །དེ་ལྟར་མཆོད་པ་ཆེན་པོ་དང་། དབང་བསྐུར་བ་དང་། ཆོས་དང་། ལས་ཀྱི་མཆོད་པ་རྣམས་ཀྱིས་སངས་རྒྱས་ཉིད་ལ་སོགས་པའི་མཆོད་པ་འདིས་སེམས་ཅན་
ཐམས་ཅད་ཀྱི་དོན་བྱེད་པ་དང་། དེ་བཞིན་གཤེགས་པ་ཐམས་ཅད་ཡང་དག་པར་མཆོད་ལ་ཕྱིས་ཕྱག་བྱས་ཏེ། རྣམ་པར་སྣང་མཛད་ལ་སོགས་པའི་ཕྱག་རྒྱ་བཅིངས་ཏེ་བསྒོམ་པར་བྱའོ། །དེ་ལ་ཞེས་བྱ་བ་ལ་སོགས་པ་ནི་གོ་སླའོ། །དུས་བཞི་ཡི་ནི་ཚུལ་དག་ཏུ། །ཞེས་བྱ་
བ་ལ། མཆོད་པ་ཆེན་པོ་དང་། དབང་བསྐུར་བ་དང་། ཆོས་དང་། ལས་ཀྱི་མཆོད་པ་རྣམ་པ་བཞི་པོའི་མཆོད་པ་རྣམས་ཀྱིས་སོ། །རྣམ་པ་བཞི་པོའི་མཆོད་པ་དེ་རྣམས་ཀྱིས་ལས་རྣམས་བསྒྲུབ་པར་བྱའོ་ཞེས་བྱ་བའི་དོན་ཏོ། །ཇི་ལྟར་ཞེ་ན། དུས་བཞི་ཡི་ནི་ཚུལ་དག་ཏུ། །ཞེས་
བྱ་བ་སྨོས་ཏེ། རྡོ་རྗེ་སེམས་དཔའ་དང་། རྡོ་རྗེ་རིན་ཆེན་དང་། རྡོ་རྗེ་ཆོས་དང་། རྡོ་རྗེ་ལས་རྣམ་པ་བཞི་པོའི་ཚུལ་གྱིས་རྣམ་པ་བཞི་པོ་དེ་ལ་སྦྱོར་བ་རྒྱུ་དེའི་ཕྱིར་རོ་ཞེས་བྱ་བའི་དོན་ཏོ། །རྣམ་པ་བཞི་བྱས་ནས་ཞེས་བྱ་བར་སྦྱར་རོ། །ཇི་སྐད་དུ་བཤད་པའི་མཆོད་པ་ཆེན་པོ་ལ་སོགས་པའི་
མཆོད་པ་རྣམ་པ་བཞི་བྱས་ནས་ལས་རྣམས་བྱའོ་ཞེས་བྱ་བའི་དོན་ཏོ། །ཇི་ལྟར་བྱས་ནས་ཤེ་ན། དུས་བཞི་ཡི་ནི་ཚུལ་དག་ཏུ། །ཞེས་བྱ་བ་སྨོས་ཏེ། ནངས་པར་གྱི་ཐུན་མཚམས་དང་། ཉི་མ་ཕྱེད་དང་། དགོངས་ཀ་དང་། མཚན་ཕྱེད་ཀྱི་དུས་སུ་མཆོད་པ་བྱེད་པས་ན་དུས་

བཞིའི་ནི་ཚུལ་དག་གོ། །དུས་བཞི་རུ་སྦྱོར་བ་རྣམ་པ་བཞིས་ལས་རྣམས་བྱས་ཏེ། ལས་ནི་མཆོད་པ་ཆེན་པོ་ལ་སོགས་པའོ། །བསྒྲུབ་པར་བྱ་བ་ནི་རྫོགས་པར་བྱ་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པའི་སྦྱོར་བས་རྡོ་རྗེ་དབྱིངས་ཀྱི་
དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་ཆེན་པོ་བྱས་ཏེ། སྒེག་མོ་ལ་སོགས་པ་མཆོད་པ་རྣམ་པ་བརྒྱད་ཀྱིས་བདག་ཉིད་ཡང་དག་པར་མཆོད་ལ། སྔ་མ་བཞིན་དུ་དེ་བཞིན་གཤེགས་པའི་རྣལ་འབྱོར་ཡང་མངོན་དུ་བྱའོ། །རྡོ་རྗེ་སེམས་དཔའ་
དང་། རྡོ་རྗེ་རིན་ཆེན་དང་། རྡོ་རྗེ་ཆོས་དང་། རྡོ་རྗེ་ལས་ཀྱི་རང་བཞིན་འཁོར་ལོས་སྒྱུར་བ་རྣམ་པ་བཞི་དགའ་ཞིང་བདེ་མ་ལ་སོགས་པའི་རིག་པའི་ལྷ་མོར་བསྒྱུར་ཞིང་སྤྲུལ་ནས་བྱང་ཆུབ་ཏུ་སེམས་བསྐྱེད་པ་ལ་སོགས་པའི་ལས་ཀྱི་ནམ་མཁའི་ཁམས་ཐམས་ཅད་གང་བར་གནས་པར་
བསམ་པར་བྱའོ། །དེ་ནས་བཛྲ་སཏྭ་ཞེས་བརྗོད་ཅིང་། རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ། དེ་བཞིན་གཤེགས་པ་ཐམས་ཅད་དགའ་ཞིང་བདེ་བ་དང་། དེ་བཞིན་གཤེགས་པ་ཐམས་ཅད་སྤྱན་འདྲེན་མ་དང་། དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་བྱེད་པ་
མོ་