Luận tạng Tây Tạng (Tengyur) — Tập 57

ྱའོ། །དེ་ནས་བདག་ལ་བྱིན་གྱིས་བརླབ་པ་ལ་སོགས་པ་དང་། ཇི་ལྟར་འདོད་པའི་བཟླས་པ་བྱའོ། །རྡོ་རྗེ་ཧཱུཾ་མཛད་ནི་བདག་ཡིན་ནོ་ཞེས་བརྗོད་ནས། སླར་ཡང་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ།
རྣམ་པར་སྣང་མཛད་ཀྱི་གནས་དེ་ཉིད་དུ། ཨོཾ་བཛྲ་ཛྭ་ལ་ཨགྣ་པྲ་དཱིཔྟ། ཨཱ་ཀཪྵ་ཡ། སརྦ་ཏ་ཐཱ་ག་ཏཾ་མ་ཧཱ་བཛྲ་ས་མ་ཡ་ཧཱུཾ་ཛ་ཨ་ཞེས་བྱ་བའི་སྔགས་ཀྱིས་རྣམ་པར་སྣང་མཛད་ཀྱི་རྡོ་རྗེ་རྩེ་ལྔ་པ་བསམ་པར་བྱའོ། །དེ་ནས་བཛྲོ྅ཧཾ་ཞེས་བྱ་བས་རྡོ་རྗེའི་བདག་ཉིད་བསྒོམ་པར་བྱའོ། །དེ་ཉིད་བཛྲ་དྷཱ་དུ་ར་ཧཾ་ཞེས་བྱ་
བས་རྣམ་པར་སྣང་མཛད་བསྒོམ་པར་བྱ་བ་ནས། དེ་བཞིན་དུ་ཁྲོ་བོ་རྡོ་རྗེ་འབེབས་པའི་ཕྱག་རྒྱ་ཆེན་པོ་བཅིངས་ལ། ཨོཾ་བཛྲ་ཨཱ་བེ་ཤ་མ་ཧཱ་ཀྲོ་དྷ་ཨཱ་བེ་ཤ་སརྦ་ས་མ་ཡ་ཧཱུཾ་ཨཿཨཿཞེས་བྱ་བས་ཁྲོ་བོ་རྡོ་རྗེ་འབེབས་པའི་རང་བཞིན་རྡོ་རྗེ་དྲིལ་བུའི་གཟུགས་སུ་བསམ་པར་བྱའོ། །དེ་ནས་དྲིལ་བུ་དེ་རྡོ་རྗེ་དྲིལ་བུ་བདག་ཡིན་
ནོ་ཞེས་བསྒོམ་པར་བྱའོ། །ཡང་དེ། བཛྲ་ཨཱ་བེ་ཤ་ཀྲོ་དྷ་ཧཾ་ཞེས་བྱ་བས་ཁྲོ་བོ་རྡོ་རྗེ་འབེབས་པའི་གཟུགས་སུ་བསམ་པར་བྱ་སྟེ། དེ་ལྟར་ན་དཀྱིལ་འཁོར་རྡོ་རྗེ་སྒྲུབ་པར་འགྱུར་བའོ། །དེ་ནས་ཡང་། རྡོ་རྗེ་སློབ་དཔོན་སེམས་དཔའ་ཡི། །རྡོ་རྗེ་ལྕགས་ཀྱུ་བཅིངས་ནས་ནི། །སེ་གོལ་མང་པོ་བརྡབ་བགྱིས་པས།
སངས་རྒྱས་ཐམས་ཅད་བསྡུ་བར་བགྱི། །ཨོཾ་བཛྲ་ས་མ་ཛཿཛཿཧཱུཾ་བཾ་ཧོཿཞེས་བྱ་བས། དེ་མྱུར་དུ་རྡོ་རྗེ་ཁྲོ་བོའི། ཕྱག་རྒྱ་ཆེན་པོ་སྒོམ་བྱེད་ཅིང་། །རྡོ་རྗེ་སེམས་དཔའ་རྡོ་རྗེ་ཆེ། །ཞེས་བྱ་བ་ལ་སོགས་པ་དང་། མིང་བརྒྱ་རྩ་བརྒྱད་དམ་པ་ནི། །ལན་ཅིག་བར་དུ་བརྗོད་པར་བགྱི། །དེ་ནས་ཁྲོ་བོ་རྡོ་རྗེ་ལྕགས་
ཀྱུའི་ལས་ཀྱི་ཕྱག་རྒྱས་དཀྱིལ་འཁོར་གྱི་ལྷ་ཐམས་ཅད་དགུག་པ་དང་། རྡོ་རྗེ་ཞགས་པས་གཞུག་པ་དང་། རྡོ་རྗེ་ལྕགས་སྒྲོག་གིས་བཅིང་བ་དང་། ཁྲོ་བོ་རྡོ་རྗེ་འབེབས་པའི་ལས་ཀྱི་ཕྱག་རྒྱས་དབང་དུ་བྱས་ཏེ། ཁྲོ་བོ་རྡོ་རྗེ་གནོད་སྦྱིན་གྱི་ལས་ཀྱི་ཕྱག་རྒྱས་བསྐྲད་པ་དང་། ར་བ་དང་དྲ་བ་ཡང་བྱས་ནས། རྡོ་རྗེ་

ཁུ་ཚུར་གྱི་ལས་ཀྱི་ཕྱག་རྒྱས་དཀྱིལ་འཁོར་གྱི་སྒོ་བཅིངས་ལ། ཁྲོ་བོ་རྡོ་རྗེ་སྲུང་བ་ལ་སོགས་པ་ཡང་དག་པར་བསྲུངས་ཏེ། ཡི་གེ་ཧཱུཾ་བཞིས་དཀྱིལ་འཁོར་གྱི་ལྷ་རྣམས་ལ་མཆོད་ཡོན་ཕུལ་ནས། རྣམ་པར་སྣང་མཛད་ལ་སོགས་པ་ནས། ཕྱིའི་རྡོ་རྗེ་རིགས་ཀྱི་མཐར་ཐུག་པ་རྣམས་ཕྱག་རྒྱ་བཞིས་
རྒྱས་བཏབ་ལ། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་བར་བྱའོ། །དེ་ལ་རྡོ་རྗེ་དབྱིངས་སུ་བཤད་པའི་རྡོ་རྗེ་རིན་ཆེན་གྱི་ཕྱག་རྒྱས་རྣམ་པར་སྣང་མཛད་དང་། བྱམས་པ་ལ་སོགས་པ་བསྐལ་པ་བཟང་པོ་པ་རྣམས་དང་། ཕྱིའི་རྡོ་རྗེའི་རིགས་རྣམས་དབང་བསྐུར་བར་བྱའོ། །དཔལ་རྡོ་རྗེ་ཧཱུཾ་མཛད་ལ་
སོགས་པ་རྡོ་རྗེའི་རིགས་ཆེན་པོ་རྣམས་སངས་རྒྱས་ཀྱི་སྐུ་ལྔའི་ཕྱག་རྒྱ་དང་། རྡོ་རྗེ་ཏི་རཱིནྟི་རིའི་ཕྱག་རྒྱས་དབང་བསྐུར་རོ། །ཡང་ཕྱག་བཞི་བྱས་ལ་མཆོད་ཡོན་ཕུལ་ནས། ན་བཟའ་ཕུལ་ཏེ། དཀྱིལ་འཁོར་པའི་ལྷ་ཐམས་ཅད་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་དོ། །དེ་ནས་བདག་ཉིད་ཆེན་
པོ་ཡིས། །གསང་བའི་མཆོད་པས་མཆོད་ནས་ནི། །སངས་རྒྱས་དངོས་གྲུབ་ཐོབ་བྱའི་ཕྱིར། །སེམས་ཅན་དོན་ཀུན་གསོལ་བ་གདབ། །ཅེས་བྱ་བ་ཡིན་ནོ། །དེ་ནས་ཕྱི་རོལ་དུ་གཏོར་མ་བྱིན་ལ། ཅི་འདོད་པའི་བསམ་པ་དང་། སྦྱིན་སྲེག་གི་ཆོ་གས་སྦྱིན་སྲེག་བྱ་སྟེ། དེ་བཞིན་གཤེགས་པ་ཐམས་ཅད་
ལ་ཕྱག་གྱིས་ཤིག་ཅེས་བརྗོད་པར་བྱའོ། །བདག་མིང་འདི་ཞེས་བགྱི་བ་ཡིས། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་སྨན་སླད་དུ། །སློབ་མ་རྣམས་ནི་གཞུག་པར་བགྱི། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་འདིར་འཇུག་པ་ལ་སྣོད་དུ་གྱུར་པ་དང་། མ་
གྱུར་པ་འདིར་བརྟག་མི་འཚལ་ལོ་ཞེས་བྱ་བ་ལ་སོགས་པ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་བཤད་ཟིན་པ་དེ་ཉིད་འདིར་བརྗོད་པར་བྱའོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་རྒྱས་པར་བསྟན་ནས། སློབ་མ་རྣམས་གཞུག་པར་བྱ་སྟེ། རྡོ་རྗེ་དང་དྲིལ་བུ་བཟུང་ལ་གོས་སྔོན་པོའི་སྟོད་གཡོགས་དང་། སྨད་
གཡོགས་དང་། ཟེའུ་དག་བཅིང་བ་དེ་བཞིན་དུ་སློབ་མ་ལ་ཇི་སྐད་བཤད་པ་བཞིན་དུ་གོས་སྔོན་པོའི་སྟོད་གཡོགས་དང་། སྨད་གཡོགས་དང་། གདོང་གཡོགས་བཅིངས་ནས། ཇི་སྐད་བཤད་པ་བཞིན་དུ་ཕྱག་བྱ་བའི་ཆོ་ག་རྣམ་པ་བཞི་བྱ་བ་དང་། སྔ་མ་བཞིན་དུ་སྡོམ་པ་གཟུང་བ་དོན་དུ་གཉེར་བས་

སྡོམ་པ་གཟུང་བ་དང་། ཨོཾ་སརྦྦ་ཡོ་ག་ཙིཏྟ་ཨུཏྤཱ་ད་ཡཱ་མི་ཞེས་བྱ་བས་སློབ་མ་རྣམས་བྱང་ཆུབ་ཏུ་སེམས་བསྐྱེད་པ་དང་། ལག་པ་གཡས་པའི་རྡོ་རྗེ་ཁུ་ཚུར་གྱིས་དེའི་སྙིང་གའི་ཕྱོགས་སུ་རྡོ་རྗེ་བཞག་པས། དེའི་སྙིང་ལ་རྡོ་རྗེ་རྩེ་ལྔ་པ་བསྐྱེད་པར་བྱ་སྟེ། སུ་ར་ཏེ་ས་མ་ཡ་སྟྭཾ་ཧོ། བཛྲ་སིདྡྷི་
ཡ་ཐཱ་སུ་ཁཾ་ཞེས་བརྗོད་དོ། །དེ་ནས་རྡོ་རྗེ་ཧཱུཾ་མཛད་དུ་བྱིན་གྱིས་བརླབས་ལ། མེ་ཏོག་ལ་སོགས་པས་མཆོད་དེ། མེ་ཏོག་གི་ཕྲེང་བ་བཏགས་ལ། གདོང་དྲི་ཞིམ་པར་བྱས་ཏེ། ཕྱི་རོལ་ན་གནས་པའི་བུམ་པའི་ཆུས་དབང་བསྐུར་བར་བྱ་སྟེ། དེ་ནས་སློབ་དཔོན་བདག་ཉིད་ཁྲོ་བོ་ཏི་རཱིནྟི་རིའི་ཕྱག་རྒྱ་བཅིངས་ཏེ།
སློབ་མ་ཡང་འཆིང་དུ་བཅུག་ལ། ཨོཾ་བཛྲ་གྲྀཧྞ་བཛྲ་ས་མ་ཡ་ཧཱུཾ་བཾ་ཞེས་བྱ་བའི་སྙིང་པོ་འདིས་འཆིང་དུ་གཞུག་གོ། །དེ་ནས་སློབ་མ་ལས་ཡོན་གྱི་མཆོག་བླངས་ལ། དེ་ནས་ཕྱག་རྒྱ་དེ་ཉིད་ཀྱིས་མེ་ཏོག་གི་ཕྲེང་བ་འཛིན་དུ་བཅུག་སྟེ། ཨོཾ་བཛྲ་ས་མ་ཡ་པྲ་བེ་ཤ་ཡ་མི་ཞེས་བྱ་བའི་སྙིང་པོ་འདི་དང་། རྡོ་རྗེ་
ཤུགས་ཀྱིས་སློབ་མ་དཀྱིལ་འཁོར་དུ་གཞུག་པར་བྱའོ། །དེ་ནས་རྡོ་རྗེ་ལྕགས་ཀྱུའི་ཕྱག་རྒྱ་བཅིངས་ཏེ། ཤར་ཕྱོགས་ཀྱི་སྒོ་ནས་དགུག་པར་བྱ་ཞིང་། དེ་ནས་ལྷོ་ཕྱོགས་ཀྱི་སྒོ་ནས་དེ་བཞིན་དུ་བཅུག་ཅིང་རྡོ་རྗེ་ཞགས་པས་གཞུག་པ་དང་། དེ་ནས་ནུབ་ཕྱོགས་ཀྱི་སྒོ་ནས་དེ་བཞིན་དུ་བཅུག་ལ་རྡོ་རྗེ་
ལྕགས་སྒྲོག་གིས་བཅིང་བ་དང་། ཡང་བྱང་ཕྱོགས་ཀྱི་སྒོ་ནས་དེ་བཞིན་དུ་བཅུག་ལ། ཁྲོ་བོ་རྡོ་རྗེ་འབེབས་པའི་ཕྱག་རྒྱས་དབང་དུ་བྱའོ། །ཡང་ཤར་ཕྱོགས་ཀྱི་སྒོ་ནས་དེ་བཞིན་དུ་བཅུག་ལ། དེ་ནས་དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རིགས་སུ་ཞུགས་ཀྱི་ངས་ཁྱོད་ལ་རྡོ་རྗེའི་ཡེ་ཤེས་བསྐྱེད་
པར་བྱས་ཀྱི་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རིགས་ཀྱི་དངོས་གྲུབ་ཀྱང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱས་ཀྱིས་ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ལ་སྨྲ་བར་མ་བྱེད་ཅིག །ཁྱོད་དམ་ཚིག་ཉམས་པར་གྱུར་
ཏ་རེ། དེ་ནས་སློབ་དཔོན་རང་ཉིད་ཀྱིས་ཁྲོ་བོ་ཏི་རཱིནྟི་རིའི་ཕྱག་རྒྱ་ཁ་ཐུར་དུ་བལྟས་པ་དང་། གྱེན་དུ་བལྟས་པ་བཅིངས་ལ། སློབ་མའི་སྤྱི་བོར་བཞག་སྟེ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་རྡོ་རྗེ་དམ་ཚིག་ཡིན་གྱིས། གལ་ཏེ་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །དེ་ནས་དམ་ཚིག་

གི་ཕྱག་རྒྱ་དེ་ཉིད་དང་། མནའི་སྙིང་པོ་འདི་ལན་ཅིག་བཟླས་པའི་ཆུ་སློབ་མ་དེ་ཉིད་འཐུང་དུ་བཅུག་ལ་འདི་སྐད་ཅེས་བརྗོད་པར་བྱའོ། །དེ་ལ་མནའི་སྙིང་པོ་ནི་འདི་ཡིན་ཏེ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ནས་
གཤེགས། །ཨོཾ་བཛྲ་ཨུ་ད་ཀ་ཋཿ། དེ་ནས་སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེང་ནས་བརྩམས་ཏེ། ཁྱོད་ཀྱིས་ཕྱག་ན་རྡོ་རྗེ་ནི་ང་ཡིན་གྱི་ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །ཁྱོད་ཡ་ང་བ་མ་སྤང་བར་འཆི་བའི་དུས་བྱས་ནས།
སེམས་ཅན་དམྱལ་བར་ལྷུང་བར་གྱུར་ཏ་རེ་ཞེས་བརྗོད་དོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་སྨྲོས་ཤིག་ཅེས་བརྗོད་པར་བྱའོ། །དེ་ནས་རྡོ་རྗེ་སློབ་དཔོན་གྱིས་མྱུར་དུ་ཁྲོ་བོ་ཏི་རཱིནྟི་རིའི་ཕྱག་རྒྱ་བཅིངས་ཏེ། འདི་སྐད་ཅེས་བརྗོད་དུ་
གཞུག་གོ། །འདི་ནི་རྡོ་རྗེའི་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་འབབ་པར་ཤོག །ཨོཾ་བཛྲ་ཨཱ་བེ་ཤ་ཨཿཞེས་བྱ་བ་དང་། ཡང་གཡོན་པའི་ཁྲོ་བོའི་ཁུ་ཚུར་གྱིས་གཡས་པའི་སེམས་མ་རྡོ་རྗེ་མ་དྲལ་ཞིང་ཧཱུཾ་ཨཿཨཿཨཿཞེས་བྱ་བ་ལན་བརྒྱའི་
བར་དུ་བརྗོད་པར་བྱའོ། །ཡང་དྲིལ་བུ་དང་བཅས་པས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ནས། གཡོན་པས་དེའི་རྐང་པ་གཡས་པ་མནན་ནས། སུཾ་བཛྲ་ཨཱ་བེ་ཤ་ཡ་ཧཱུཾ་སུཾ་ཞེས་དབབ་པར་བྱ་ཞིང་། དེ་ནས་དེའི་ལུས་ལ་བཅོམ་ལྡན་འདས་རྡོ་རྗེ་ཧཱུཾ་མཛད་གཞུག་པར་བྱའོ། །དེ་ནས་དེའི་
ལུས་ལ་ལྷའི་ཡེ་ཤེས་སྐྱེ་བར་འགྱུར་རོ། །དེ་ནས་ཕྲེང་བ་དེ་པྲ་ཏཱིཙྪ་ཛ་ཧོཿཞེས་བྱ་བས་དཀྱིལ་འཁོར་ཆེན་པོར་དོར་བར་བྱའོ། །དེ་ནས་ཕྲེང་བ་དེ་ཨོཾ་པྲ་ཏི་གྲྀཧྞ་སྭ་མི་མཱཾ་སཏྭ་མ་ཧཱ་བ་ལ་ཞེས་བྱ་བའི་སྙིང་པོས་དེའི་མགོ་ལ་བཅིང་བར་བྱའོ། །དེ་ནས། ཨོཾ་སེམས་དཔའི་རྡོ་རྗེ་དེང་ཁྱོད་ཀྱི། །མིག་འབྱེད་པར་ནི་
བརྩོན་པར་མཛད། །རྡོ་རྗེ་མིག་ནི་བླ་མེད་པ། །དེ་རིང་ཉིད་ནི་འབྱེད་པར་ཤོག །ཅེས་བྱ་བ་འདིས་གདོང་གཡོགས་དགྲོལ་བར་བྱའོ། །དེ་ནས་ཧེ་བཛྲ་པ་ཤྱ་ཞེས་བྱ་བས་དཀྱིལ་འཁོར་ཆེན་པོ་བསྟན་པར་བྱའོ། །ཡང་ཁྲོ་བོ་ཏི་རཱིནྟི་རིའི་ཕྱག་རྒྱ་བཅིངས་ཏེ། ཏིཥྛ་བཛྲ་དྲྀ་ཌྷོ་མེ་བྷ་བ། ཤཱ་ཤོ་ཏྭ་མེ་བྷ་བ། ཧྲྀ་ད་

ཡཾ་མེ། ཨ་དྷི་ཏིཥྛ་སརྦ་སིདྡྷིཾ་མེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོཿཞེས་བྱ་བའི་སྙིང་པོ་འདིས། དེ་ནས་དེའི་སྙིང་གར་དགྲོལ་དུ་གཞུག་པར་བྱའོ། །དེ་ནས་ཕྱིའི་དཀྱིལ་འཁོར་ལས་ཁྲུ་དོའི་ཚད་ཙམ་དོར་ལ་ཤར་གྱི་ཕྱོགས་སུ་དབུས་ཀྱི་དཀྱིལ་འཁོར་གྱི་ཕྱེད་ཀྱི་ཚད་ཙམ་གྲུ་བཞི་པ་ནུབ་ཏུ་སྒོ་བཏོད་
པ་དཀྱིལ་འཁོར་གྱི་སྒོ་ལ་ཕྱོགས་པ། ཚོན་སྣ་ལྔས་དཀྱིལ་འཁོར་བྲི་བར་བྱའོ། །དེའི་དབུས་སུ་པདྨ་འདབ་མ་བརྒྱད་པ། དེའི་སྟེང་དུ་རྡོ་རྗེ་རྩེ་ལྔ་པ་འབར་བ་བྲིས་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་པར་བྱའོ། །དེའི་དབུས་སུ་གླང་པོའི་གདན་གྱི་སྟེང་དུ་ཟླ་བའི་དཀྱིལ་འཁོར་ལ།
ལྷ་ཆེན་པོ་དང་། ཨུ་མ་བྲིས་ཏེ། དར་གྱིས་གཡོགས་ནས་གཞག་པར་བྱའོ། །གླང་པོ་ཆེའི་གདན་གྱི་སྟེང་དུ་བླ་རེ་བྲེས་པ་དང་། གཡས་ཕྱོགས་སུ་ཁ་དོག་ལྔ་པ་མེ་ཏོག་གི་ཕྲེང་བས་བརྒྱན་པའི་གདན་དང་། གདུགས་དཀར་པོ་རིན་པོ་ཆེའི་ཏོག་ཅན། གཡོན་དུ་ཁ་དོག་སྣ་ཚོགས་པའི་བ་དན་བཞག་ལ།
གླང་པོ་ཆེའི་གདན་ལ་ཁྲོ་བོ་རྡོ་རྗེ་གནོད་སྦྱིན་དང་། གདུགས་ལ་ཧཱུཾ་མཛད་དང་། བླ་རེ་དང་བ་དན་ལ་ཡི་གེ་ཨོཾ་བཟླས་པར་བྱའོ། །དེ་ནས་སློབ་དཔོན་དུ་དབང་བསྐུར་བར་འོས་པ། རྡོ་རྗེ་ཧཱུཾ་མཛད་དུ་བྱིན་གྱིས་བརླབས་ལ། དེའི་ལུས་ལ་ཁྲོ་བོ་རྡོ་རྗེ་ཧཱུཾ་མཛད་ནས། རྡོ་རྗེ་འབེབས་པའི་བར་དུ་གནས་ཇི་ལྟ་བ་
བཞིན་དུ་དམ་ཚིག་གི་ཕྱག་རྒྱ་བཀོད་ལ་སླར་ཡང་དེ་བཞིན་གཤེགས་པ་ཐམས་ཅད་ཀྱང་ལུས་ལ་བཀོད་ནས། དེ་གླང་པོའི་གདན་ལ་གཡོན་བརྐྱང་བས་བཞག་སྟེ། མཆོད་ཡོན་ཕུལ་ལ། མེ་ཏོག་ལ་སོགས་པ་མཆོད་པ་ཐམས་ཅད་ཀྱིས་མཆོད་ལ། དུང་དང་། རྔ་བོ་ཆེ་དང་། ཟངས་དུང་ལ་
སོགས་པ་རྣམས་རོལ་མོའི་ཕྱག་རྒྱས་བྱིན་གྱིས་བརླབས་ནས་གླུ་ལ་སོགས་པ་བླང་ཞིང་བརྡུང་བར་བྱའོ། །རྡོ་རྗེ་སྒེག་མོ་ལ་སོགས་པས་ཡང་དག་པར་མཆོད་ལ། དེ་ནས་བུམ་པ་གང་བ་དང་། ཨོཾ་བཛྲ་ཨཾ་ཀུ་ཤ་མ་ཧཱ་ཀྲོ་དྷ་ཨཱ་ཀཪྵ་ཡ་སརྦྦ་ས་མ་ཡ་ཧཱུཾ་ཛཿ། ཨོཾ་བཛྲ་ཨ་བྷི་ཥིཉྩ་ཞེས་བྱ་བ་ནས། ཨོཾ་
བཛྲ་ཛྭ་ལ་ཨགྣེ་པྲ་དཱིཔྟ་ཨཱ་ཀཪྵ་ཡ་སརྦྦ་ཏ་ཐཱ་ག་ཏ་མ་ཧཱ་བཛྲ་ས་མ་ཡ་ཧཱུཾ་ཛཿ། ཨོཾ་བཛྲ་ཨ་བྷི་ཥིཉྩ་ཞེས་བྱ་བ་དང་། དེ་ནས་རྣམ་པར་རྒྱལ་བའི་བུམ་པ་ལས། རྡོ་རྗེ་ཁུ་ཚུར་གྱིས་ཆུ་བླངས་ལ་དབང་བསྐུར་ཞིང་འཐུང་དུ་གཞུག་པའི་ཕྱིར་ཡང་སྦྱིན་པར་བྱའོ། །ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི་དྲྀ་ཌྷོ་མེ་བྷ་བ་ཛཿ

ཛཿཧཱུཾ་བཾ་ཧོཿཨོཾ་ཧཱུཾ་ཕཊ། ཨོཾ་བཛྲ་ཨ་བྷི་ཥིཉྩཱ་མི་ཞེས་བྱ་བའི་སྦྱོར་བ་འདིས་ཆུའི་དབང་བསྐུར་བ་སྦྱིན་པར་བྱའོ། །འདི་སྐད་ཀྱང་བརྗོད་དོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩི་ཆུས་འགྲུབ་བོ། །རྡོ་རྗེ་དྲིལ་བུ་ཕྱག་རྒྱ་རྣམས། །
གང་ཞིག་དཀྱིལ་འཁོར་མ་མཐོང་གནས། །གང་ཚེ་སྐྱེ་བོ་འདུས་མ་སྨྲ། །དམ་ཚིག་མེད་པས་དགོད་པར་འགྱུར། །ཞེས་བརྗོད་དོ། །དེ་ནས་སངས་རྒྱས་ལྔའི་ཕྱག་རྒྱས་དབང་བསྐུར་བ་དང་། རྡོ་རྗེ་ཕྲེང་བའི་ཕྱག་རྒྱའི་དབང་གིས་དབང་བསྐུར་བར་གྱུར་ཏེ། སངས་རྒྱས་ལྔའི་དབང་བསྐུར་བར་བལྟ་བར་བྱའོ། །
རྡོ་རྗེ་ཏི་རཱིནྟི་རི་བཅིངས་ནས། སྤྱི་བོ་ནས་བརྩམས་ཏེ། ཕྱོགས་བཞིར་དེའི་དབང་བསྐུར་བའི་ཚུལ་དུ་བྱས་ཏེ། དེ་དཔྲལ་བར་བཞག་ལ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཞེས་བྱ་བ་འདིས་དབང་བསྐུར་བར་བྱའོ། །དེ་ནས་ལག་པ་གཉིས་ཀྱིས་དར་དཔྱངས་བཅིང་བའི་ཚུལ་དུ་བྱས་ལ། བཛྲ་ཏུ་ཥྱ་ཧོ་ཞེས་བྱ་བ་འདིས་
མཐར་མཉམ་པའི་ཐལ་མོས་མཉེས་པར་བྱའོ། །དེ་ནས་དེ་བཞིན་གཤེགས་པའི་སྐུ་ལྔའི་རིན་པོ་ཆེའི་ཅོད་པན་རྡོ་རྗེ་ཕྲེང་བ་དང་བཅས་པ་དང་། དར་དཔྱངས་བཅིངས་པ་སྔོན་དུ་འགྲོ་བའི་དབང་བསྐུར་བས། དེ་བཞིན་གཤེགས་པའི་སྐུ་ལྔ་དང་རིགས་རྣམས་དང་། རྡོ་རྗེ་ཉི་མ་མེ་དང་། རྡོ་རྗེ་རིན་ཆེན་ཡང་
ཅོད་པན་ལ་བཟླས་ཤིང་དབང་བསྐུར་བར་བྱའོ། །དེ་ལ་རྡོ་རྗེ་ཏི་རཱིནྟི་རིའི་ཕྱག་རྒྱ་ནི་འདི་ཡིན་ཏེ། རྡོ་རྗེ་བསྡམས་པ་དམ་བཅིངས་ལ། །ཡིད་ཀྱིས་ཁྲོས་ནས་དབབ་བྱ་བའི། །རྡོ་རྗེ་མཐེ་བོང་དམ་པོ་སྟེ། །རྡོ་རྗེ་ཏི་རཱིནྟ་རིར་བཤད། །དེ་ནས་རྡོ་རྗེ་འབར་བ་དང་། བདག་པོ་དང་། མིང་གི་དབང་བསྐུར་བས་
དབང་བསྐུར་བར་བྱའོ། །ཡི་གེ་ཧཱུཾ་ལས་རྡོ་རྗེ་འབར་བ་དེ་རྡོ་རྗེ་ཧཱུཾ་མཛད་དུ་བསྐྱེད་ལ། རྟག་ཏུ་ཆགས་པས་འདུལ་བྱེད་པ། །རྡོ་རྗེ་ཁྲོ་བོ་སེམས་དཔའ་སྟེ། །གང་གིས་རྡོ་རྗེ་ཉི་མ་མེས། །འཇིག་པར་བྱེད་པ་དམ་པ་ཡིན། །ཞེས་བྱ་བ་དང་དེ་ཁོ་ན་ཉིད་ཀྱིས་རྡོ་རྗེ་སྦྱིན་པར་བྱའོ། །ཡི་གེ་ཨཱཿལས་དྲིལ་བུ་
ཁམས་གསུམ་རྣམ་པར་རྒྱལ་བའི་ལྷ་མོར་བསྐྱེད་ལ། ཆོས་གསུང་བའི་བདག་པོ་ཡིན་ནོ་ཞེས་བརྗོད་ཅིང་དེ་ལ། འདི་ནི་རྡོ་རྗེ་ཆོས་ཡིན་ཏེ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་མཉམ་པར་སྦྱོར་བ་ཡིས། །ཐམས་ཅད་མྱུར་དུ་འགྲུབ་པར་འགྱུར། །

ཞེས་བྱ་བ་དང་། དེ་ནས་དམ་ཚིག་གི་ཕྱག་རྒྱས་ཕྱག་རྒྱ་ཆེན་པོར་བྱིན་གྱིས་བརླབ་བོ། །དེ་ལ་དམ་ཚིག་ནི་འདི་ཡིན་ཏེ། ཐམས་ཅད་ནམ་མཁའི་སྦྱོར་བ་ཡིས། །ཐམས་ཅད་ནམ་མཁའ་ཞེས་སུ་བརྗོད། །རྡོ་རྗེའི་ཕྱག་རྒྱས་རྒྱས་བཏབ་པས། །ཁམས་གསུམ་པ་ཡང་བཟའ་
བར་བྱ། །དེ་ནས་ཡང་དེ་ལ་མེ་ཏོག་མ་དང་། སྒེག་མོ་ལ་སོགས་པས་ཡང་དག་པར་མཆོད་ལ། ཡི་གེ་པྲས་བྱིན་གྱིས་བརླབས་པའི་རིན་པོ་ཆེའི་མིག་ཐུར་བྱིན་ལ། ཨོཾ་བཛྲ་ནེ་ཏྲ་ཨ་བ་ཧ་རཾ་པ་ཏྲ་ལཾ་ཧྲཱིཿཞེས་བརྗོད་ཅིང་། དེས་མིག་སྨན་བྱུགས་པ་བཞིན་དུ་བྱས་ལ། ཇི་ལྟར་མིག་མཁན་རྒྱལ་པོ་ཡིས། །འཇིག་
རྟེན་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཞེས་བྱ་བ་འདི་བརྗོད་དོ། །དེ་ནས་ལས་ཐམས་ཅད་པ་རྡོ་རྗེ་གནོད་སྦྱིན་ཡོངས་སུ་བཟླས་པའི་མེ་ལོང་བྱིན་ལ། ཆོས་ཀྱི་མཚན་ཉིད་བསྟན་པར་བྱ་སྟེ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་
གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །ངོ་བོ་ཉིད་མེད་གནས་མེད་པ། །དེ་ལྟར་ཆོས་ནི་ཤེས་བྱས་ནས། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །དེ་ནས་ཡི་གེ་ཧོཿས་བྱིན་གྱིས་བརླབས་པའི་མདའ་གཞུ་བྱིན་ལ། །
འདིས་དེ་བཞིན་གཤེགས་པ་ཐམས་ཅད་མཉེས་པར་གྱིས་ཤིག་ཅེས་བརྗོད་དེ། ཡི་གེ་ཧོཿས་ཕྱོགས་བཞི་སྟེང་དང་འོག་ཏུ་མདའ་འཕེན་དུ་གཞུག་པར་བྱའོ། །ཡང་ཨ་བཛྲ་སཏྭ་ཞེས་མེ་ལོང་ལ་བཟླས་ལ། དེ་བཞིན་དུ་སྔགས་བརྗོད་ཅིང་མེ་ལོང་བྱིན་ལ་འདི་སྐད་བརྗོད་དོ། །རྡོ་རྗེ་སེམས་དཔའ་མེ་ལོང་
བཞིན། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་བཞིན་ནི། །བུ་ཁྱོད་ཀྱི་ནི་སྙིང་ལ་ཞུགས། །གང་འདི་དེ་བཞིན་གཤེགས་པ་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་འདི་ཡིན་ནོ་ཞེས་ཤེས་པར་བྱའོ། །བཛྲ་ཧེ་ཏུ་མཾ་ཞེས་བྱ་བས་འཁོར་ལོ་རྩིབས་བརྒྱད་པ་བྱིན་གྱིས་
བརླབས་ལ། རྐང་པ་གཉིས་ཀྱི་བར་དུ་བཞག་སྟེ། བཛྲ་བྷ་ཥ་རཾ་ཞེས་བྱ་བས་དུང་བྱིན་གྱིས་བརླབས་ཏེ། དེའི་ལག་པར་བྱིན་ལ་འདི་སྐད་ཅེས་བརྗོད་དེ། དེང་ནས་བརྩམས་ཏེ་བྱང་ཆུབ་སེམས་བསྐྱེད་པ་དང་བཅས་པས་ཆོས་ཀྱི་འཁོར་ལོ་སྐོར་ཅིག། །ཆོས་ཀྱི་དུང་ནི་བླ་མེད་པས། །མ་ལུས་ཀུན་དུ་གང་

བར་གྱིས། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱོད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ནས་སངས་རྒྱས་ལ། །ཕན་ཐོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང་། །ཁྱོད་ལ་ཀུན་དུ་སྲུང་བར་
བྱེད། །ཅེས་བྱ་བ་དང་། དེ་ནས་དེ་བཞིན་གཤེགས་པ་ཐམས་ཅད་ཀྱི་ང་རྒྱལ་གྱིས། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །རྗེས་སུ་གནང་བའི་ཁྱད་པར་ནི། རྡོ་རྗེ་ཧཱུཾ་མཛད་ཀྱི་ཕྱག་
རྒྱ་ཆེན་པོ་བཅིངས་ཏེ། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཁྲོ་བོའི་འཁོར་ལོ་རབ་ཏུ་བསྐོར། །ཞེས་བྱ་བས་ཁྲོ་བོའི་རྗེས་སུ་གནང་བ་བྱིན་ནས། གཟེངས་བསྟོད་པ་དང་། ལུང་བསྟན་པར་བྱའོ། །དེ་ནས། འདོད་
ཆགས་བྲལ་བ་ལྟ་བུའི་སྡིག །སྡིག་ལས་ལྷག་པ་གཞན་མེད་དོ། །ཞེས་གསང་བའི་ཡེ་ཤེས་བསླབ་པ་དང་། རྡོ་རྗེ་ཧཱུཾ་མཛད་ཀྱི་སྔགས་བྱིན་ལ། དེའི་ཕྱག་རྒྱ་བཞིར་ཡེ་ཤེས་མནའི་སྙིང་པོ་བྱིན་ནས་བསླབ་པར་བྱའོ། །དེ་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་ལ་སོགས་པ་སློབ་མའི་ཐུན་མོང་
གི་ཆོ་ག་རྒྱས་པ་ནི། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བཤད་པ་ཉིད་ཀྱིས་ཤེས་པར་བྱའོ། །སློབ་མས་དབང་བསྐུར་བ་ཐོབ་ནས། སློབ་དཔོན་ལ་འདུད་ཅིང་ཕྱག་བྱ་སྟེ། ཡོན་གྱི་མཆོག་ཕུལ་ནས་སྔགས་བླངས་ཏེ། འབྱོར་པ་དང་ལྡན་པས་རྒྱུན་མི་འཆད་པར་ཡོན་དབུལ་བར་བྱའོ། །རྡོ་རྗེ་ཐལ་མོ་
བསྐོར་ནས་སློབ་དཔོན་ལ་འདུད་ཅིང་ཕྱག་བྱས་ཏེ། དེས་མེ་ཏོག་ཀྱང་གཟུང་བར་བྱའོ། །སློབ་མ་འཇུག་པའི་ཆོ་ག་རྒྱས་པའོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་དང་། སློབ་མ་འཇུག་པའི་ཆོས་རྒྱས་པར་བསྟན་ནས། ད་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་དམ་
ཚིག་དང་དབང་བསྐུར་བ་ཐམས་ཅད་ཐོབ་པས་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོར་གསུངས་པའི་དངོས་གྲུབ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཡེ་ཤེས་རྣམས་བསྐྱེད་དེ། །ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་དབྱིངས་ནི་ཞེས་བྱ་བ་ནི། རྡོ་རྗེ་ཧཱུཾ་མཛད་ཀྱི་སྦྱོར་

བ་བྱས་ལ། རང་གི་སྙིང་གའི་ཟླ་བ་ལ་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་འབར་བ་བསམས་ལ། རྡོ་རྗེ་ཧཱུཾ་མཛད་ཀྱི་བདག་ཉིད་ཇི་སྲིད་དུ་སྙིང་གར་རྡོ་རྗེ་འབར་བ་ཟླ་བ་གཉིས་ཀྱི་བར་དུ་བསྒོམས་ལ། དེ་ནས་དེ་ལས་ནམ་མཁའི་ཁམས་གང་བར་བསྒོམས་ཏེ། སྐྱོ་བར་གྱུར་ན་ཡང་བསྡུ་བར་
བྱ་སྟེ། རང་གི་ལུས་ལ་བཅུག་ལ། བཛྲཱ་དྷི་ཏིཥྛ་ཞེས་བྱ་བ་བརྗོད་ནས་ལྡང་བར་བྱའོ། །དེ་ལྟར་ཇི་སྲིད་དུ་ཟླ་བ་དྲུག་གི་བར་དེ་སྲིད་དུ་བསྒོམས་ནས། དེ་ནས་མཚན་ཐོག་ཐག་ནམ་མཁའི་ཁམས་གང་བར་བསྒོམས་ཏེ། དེ་ནས་འགྲོ་བ་ཐམས་ཅད་རྡོ་རྗེ་ཧཱུཾ་མཛད་ཀྱི་དབབ་པ་ཕབ་པས་རྡོ་རྗེ་ཧཱུཾ་མཛད་དུ་
འགྱུར་རོ། །དཔྲལ་བར་རྡོ་རྗེ་རིན་ཆེན་ཡང་། །དེ་བཞིན་དུ་ནི་བསམ་བྱས་ནས། །ཞེས་བྱ་བ་ནི་རིན་ཆེན་ཧཱུཾ་མཛད་ཀྱི་རྣལ་འབྱོར་དུ་བྱས་ལ། དཔྲལ་བའི་ཕྱོགས་སུ་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་འབར་བའི་ཕྲེང་བ་འཁྲུགས་པའི་འོད་ཅན་གྱི་རྡོ་རྗེ་རིན་ཆེན་དེ་བཞིན་དུ་བསམས་ནས། སྔ་མ་བཞིན་དུ་
དཔྲལ་བའི་རྡོ་རྗེ་རིན་ཆེན་ཧཱུཾ་མཛད་དུ་བསྒོམ་པར་བྱའོ། །མཐར་མཚན་ཐོག་ཐག་བྱས་པས་འགྲུབ་པར་འགྱུར་རོ། །དེ་ནས་དེས་ནམ་མཁའི་ཁམས་ཐམས་ཅད་དང་མཉམ་པར་སོང་བས་སེམས་ཅན་གྱི་ཁམས་ཐམས་ཅད་སངས་རྒྱས་དང་མཉམ་པ་ལ་སོགས་པའི་རིན་ཆེན་ཧཱུཾ་མཛད་དུ་བསྐྱེད་པས་
དབང་དུ་བྱེད་དོ། །རྡོ་རྗེ་པདྨོ་མགུལ་དུ་བསམ། །ཞེས་བྱ་བ་ནི། ཆོས་ཀྱི་ཧཱུཾ་མཛད་ཀྱི་རྣལ་འབྱོར་བྱས་ལ། ཡི་གེ་ཧྲིཿལས་རང་གི་ལྐོག་མའི་ཕྱོགས་སུ་རྡོ་རྗེ་པདྨའི་འོད་ཟེར་འབར་བའི་ཕྲེང་བ་འཁྲུགས་པ་བསྐྱེད་ནས་དེ་བཞིན་དུ་བསྒོམ་པར་བྱའོ། །དེ་ནས་མཚན་ཐོག་ཐག་དེ་བཞིན་དུ་བྱས་པས་འགྲུབ་
པར་འགྱུར་རོ། །དེ་ནས་སེམས་ཅན་གྱི་ཁམས་ཐམས་ཅད་ཆོས་ཀྱི་ཧཱུཾ་མཛད་དུ་བྱས་པའི་ལྟ་བས་བལྟས་པས་རླག་པར་བྱེད་དོ། །རྡོ་རྗེ་ཐམས་ཅད་སྤྱི་བོར་གཞག །ཅེས་བྱ་བ་ནི། ལས་ཀྱི་ཧཱུཾ་མཛད་ཀྱི་རྣལ་འབྱོར་བྱས་ལ། རང་གི་མགོ་བོར་ཡི་གེ་ཨ་ལས་སྣ་ཚོགས་རྡོ་རྗེ་འབར་བའི་འོད་ཟེར་གྱི་
ཕྲེང་བ་འཁྲུགས་པར་བསྐྱེད་དེ། ཟླ་བ་གཉིས་ཀྱི་བར་དུ་བསྒོམས་ལ། དེ་ནས་སྤྲོ་བ་དང་བསྡུ་བའི་སྦྱོར་བ་ཟླ་བ་གཅིག་བྱས་ལ། དེ་ནས་མཚན་ཐོག་ཐག་བསྒོམས་པས་འགྲུབ་པར་འགྱུར་རོ། །དེས་སེམས་ཅན་གྱི་ཁམས་ཐམས་ཅད་ལས་ཀྱི་ཧཱུཾ་མཛད་དུ་བྱས་པས་གནོད་པའི་འཇིགས་པ་ཐམས་ཅད་

ལས་བསྲུང་བར་འགྱུར་རོ། །དེ་བཞིན་དུ། རྡོ་རྗེ་ལྕགས་ཀྱུ་བྲིས་ནས་ནི། །ཞེས་བྱ་བ་ནི། ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་ཆོ་གས་རང་ཉིད་རྡོ་རྗེ་ཁྲོ་བོའི་རྣལ་འབྱོར་བྱས་ལ། ལག་པ་གཡས་པའི་མཛུབ་མོ་ལ་ཡི་གེ་ཧཱུཾ་ལས་ལྕགས་ཀྱུ་བསམས་ཏེ། ཁམས་
གསུམ་རྣམ་པར་རྒྱལ་བའི་ཕྱག་རྒྱ་བཅིངས་ནས། སྔགས་ཀྱིས་བསྐུལ་ཞིང་ཟླ་བ་གཉིས་བསྒོམས་ནས། སྤྲོ་བ་དང་བསྡུ་བའི་སྦྱོར་བས་ཟླ་བ་གཅིག་རྡོ་རྗེ་ལྕགས་ཀྱུ་བསྒོམ་མོ། །དེ་ནས་མཚན་ཐོག་ཐག་དེ་བཞིན་དུ་བྱས་ན་འགྲུབ་པར་འགྱུར་རོ། །དེས་སོར་མོ་དེ་བསྐུལ་ཞིང་འགུགས་པའི་
བསམ་པས་ལྷ་ཐམས་ཅད་འགུགས་པར་འགྱུར་རོ། །རང་གི་རྐང་མཐིལ་དབུས་སུ་ནི། །རྡོ་རྗེ་ལྕགས་ཀྱུ་བྲིས་ནས་ནི། །ཞེས་བྱ་བ་ནི། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ་གཟུགས་བརྙན་མནན་ན། ལྷ་ཐམས་ཅད་ངེས་པར་འགུགས་པར་འགྱུར་རོ། །རྡོ་རྗེ་ལྕགས་ཀྱུ་ཉིད་ཕྱག་རྒྱ། །ལེགས་
པར་ཕྱེ་སྟེ་བཞག་ནས་སུ། །ཞེས་བྱ་བ་ནི་རང་གི་ལྷའི་རྣལ་འབྱོར་བྱས་ནས། ཟླ་བ་གསུམ་བསྒོམས་ཏེ། མཚན་ཐོག་ཐག་བསྒོམས་པ་དེས། ཨུ་མ་ལ་སོགས་པའི་བུད་མེད་རྣམས་བཀུག་པའི་ནང་ནས། གཅིག་ཆུང་མར་བསྒྲུབས་ན་འདོད་པ་བཞིན་དུ་འགྲུབ་པར་འགྱུར་རོ། །ལྕགས་ཀྱུས་བཀུག་
ལ་ཡིད་ཀྱིས་ནང་དུ་བཅུག་ན་རང་ཉིད་བརྟན་པར་འགྱུར་ཏེ། དེས་བུད་མེད་རྣམས་བཀུག་པར་འགྱུར་རོ། །རྡོ་རྗེ་ལྕགས་ཀྱུ་གཞག་པ་ནི། །མཇུག་དོ་ཉིད་དུ་དེ་བཞིན་ཏེ། །ཞེས་བྱ་བ་ནི། གསང་བའི་གནས་ཀྱི་མཇུག་དོ་ནི་སྣམ་ལོགས་སོ། །དེ་ལ་ཡི་གེ་ཧཱུཾ་ལས་ལྕགས་ཀྱུ་བསྐྱེད་ལ། སྔ་མ་བཞིན་དུ་
ཆོ་ག་ཐམས་ཅད་རྗེས་སུ་སྤྱད་ལ། མཚན་ཐོག་ཐག་བཟླས་ཤིང་བསྒྲུབ་པར་བྱའོ། །དེ་ནས་ལྷའི་གཟུགས་བརྙན་བྱས་ལ། གཟུགས་བརྙན་དེ་ལ་མནན་ཏེ། བཟླས་ཤིང་བསྒྲུབ་པ་བྱས་ན། ལྷ་དེ་འོངས་ནས་བཀའ་བཞིན་དུ་བྱེད་པར་འགྱུར་རོ། །དེ་ནས་ཕྱག་རྒྱ་བཞིའི་ཡེ་ཤེས་བསླབ་པར་བྱའོ་
ཞེས་བྱ་བ་ནི་ལུས་དང་། ངག་དང་། ལྟ་བ་དང་ཡིད་ཀྱི་དབྱེ་བའི་ཕྱག་རྒྱ་རྣམ་པ་བཞི་སྟེ། དེའི་ཡེ་ཤེས་བསླབ་པར་བྱའོ། །གཡོན་བརྐྱང་བར་ནི་གནས་ནས་སུ། །ཞེས་བྱ་བ་ནི། གཡོན་བརྐྱང་བའི་མཚན་ཉིད་ནི་བཤད་ཟིན་ཏོ། །དེའི་གནས་པས་འདུག་པའོ། །རྡོ་རྗེ་དབབ་པའི་ཚུལ་གྱིས་ཏེ། །

ཞེས་བྱ་བ་ནི་སེམས་བརྟན་པོར་འགྲུབ་པར་གྱུར་ནས། ཕྱིས་ཐམས་ཅད་རྡོ་རྗེ་ཁྲོ་བོའི་བདག་ཉིད་བསམས་པས་འབར་བར་འགྱུར་རོ། །འདི་སྐད་སྟོན་པ་ཡིན་ཏེ། རྡོ་རྗེ་ཧཱུཾ་མཛད་ཀྱི་རྣལ་འབྱོར་བྱས་ནས་སྐུ་ཕྱག་རྒྱའི་སྙིང་པོ་བཟླས་ནས། ཟླ་བ་གཉིས་རྡོ་རྗེ་ཧཱུཾ་མཛད་ཀྱི་བདག་ཉིད་དུ་
བསྒོམས་ལ། དེ་ནས་སྤྲོ་བ་དང་བསྡུ་བའི་རྣལ་འབྱོར་ཟླ་བ་གཅིག་ཏུ་བྱས་ནས། དེའི་མཐར་མཚན་ཐོག་ཐག་བསྒོམ་པ་བྱས་ན། དེའི་དངོས་གྲུབ་འགྲུབ་པར་འགྱུར་རོ། །རྡོ་རྗེ་ཧཱུཾ་མཛད་ཀྱི་སྐུའི་འོད་ཟེར་འབར་བའི་ཕྲེང་བ་འཁྲུགས་པའི་ཡིད་ཀྱིས་རང་གི་ལུས་ལས་ཕྱུང་ལ། བསྒྲུབ་པར་བྱ་བའི་
ལུས་བཀང་ལ། །ཁྲོ་བོ་རྡོ་རྗེ་ཧཱུཾ་མཛད་དོ། །ཞེས་ངག་གིས་བརྗོད་ན། ཐམས་ཅད་ལ་འབབ་པར་འགྱུར་རོ། །རྡོ་རྗེ་ངག་ནི་ལེགས་པར་སྨྲ། །ཞེས་བྱ་བ་ནི། རྡོ་རྗེ་ངག་གིས་རྡོ་རྗེ་དབྱངས་སུ་བརྗོད་པ་ནི། རྡོ་རྗེ་ངག་ནི་མཚན་ཉིད་དོ། །དེས་བརྗོད་པ་དང་བཟླས་པ་ཕྱིན་ཅི་མ་ལོག་པ་ནི་ལེགས་
པའོ། །ཧཱུཾ་ཞེས་བྱ་བ་བཞི་ལྡན་པ། །སངས་རྒྱས་ཀུན་གྱི་སྙིང་པོ་ཡིས། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱིའོ། །རྡོ་རྗེ་ཧཱུཾ་མཛད་མིང་དུ་བྱས་པའི་སྙིང་པོར་བཤད་པ་གང་ཡིན་པ་དེ་ནི་རྡོ་རྗེ་ངག་ཏུ་བརྗོད་པ་ཡིན་ནོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་ཧཱུཾ་
མཛད་ཀྱི་རྣལ་འབྱོར་བྱས་ནས་ཟླ་བ་གསུམ་དུ་ངག་གིས་ཕྱག་རྒྱའི་སྙིང་པོ་བཟླས་ཏེ། མཚན་ཐོག་ཐག་ཏུ་བསྒོམ་པ་བྱས་ལ། དེ་ནས་རྡོ་རྗེ་ཧཱུཾ་མཛད་ཀྱི་སྐུ་ཞལ་བཞི་པ། ཕྱག་བརྒྱད་པ། ཕྱག་ན་ལྕགས་ཀྱུ་དང་ཞགས་པ་ལ་སོགས་པ་བསྣམས་པ་རང་གི་ཞལ་བཞི་ལས་སྤྲུལ་ལ། ཧཱུཾ་བཞི་བརྗོད་ཅིང་
བསྒྲུབ་པར་བྱ་བ་དྲངས་ན། རང་གི་དབང་དུ་བྱེད་པར་འགྱུར་རོ། །རྡོ་རྗེ་ཁྲོ་བོའི་ལྷ་མཆོག་གིས། །ཞེས་བྱ་བ་ནི། བཞིན་འགྱུར་བའི་ཁྲོ་གཉེར་བཅུམས་ནས་ཁྲོ་བོའི་ལྟ་སྟངས་བཞིས་བལྟས་པ་ནི། རྡོ་རྗེ་ཁྲོ་བོ་ལྷ་མཆོག་སྟེ། །རྡོ་རྗེ་ཧཱུཾ་མཛད་ཀྱི་རྣལ་འབྱོར་པར་ཐམས་ཅད་གསོད་པར་བྱེད་དོ། །དེའི་
དོན་ནི་འདི་ཡིན་ཏེ། རང་ཉིད་རྡོ་རྗེ་ཧཱུཾ་མཛད་དུ་བྱས་ལ་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཡེ་ཤེས་སེམས་དཔའ་དང་གཅིག་ཏུ་གྱུར་པར་བསྒོམས་ནས། ཡི་གེ་ཧཱུཾ་ལས་མིག་ཏུ་རྡོ་རྗེ་འབར་བ་གཉིས་བསྐྱེད་ལ། ལྟ་བའི་ཕྱག་རྒྱའི་སྙིང་པོ་བཟླས་ཏེ། ཟླ་བ་གཉིས་བསྒོམས་ལ། དེ་ནས་སྤྲོ་བ་དང་།

བསྡུ་བ་ཡང་བྱས་ལ་ཟླ་བ་གཅིག་བསྒོམས་ཏེ། དེའི་མཚན་ཐོག་ཐག་བསྒོམས་ན་འགྲུབ་པར་འགྱུར་རོ། །དེ་ནས་རང་གི་མིག་ལས་བྱུང་བའི་རྡོ་རྗེ་དེ་བསྒྲུབ་པར་བྱ་བའི་ལུས་ལ་རྡོ་རྗེ་ཧཱུཾ་མཛད་ཞུགས་པར་བསྒོམས་ན་ཐལ་བར་བྱས་པར་འགྱུར་རོ། །ཡིད་ཀྱིས་ནི་ཡིད་ཀྱི་ཆོས་ཀྱི་བདག་གམ་ཕ་རོལ་པོ་
རྣམས་ཀྱི་ལུས་ལ་གོ་ཆ་བསྐོན་པར་བྱའོ། །ཇི་ལྟར་བསྐོན་ཞེ་ན། ཆོ་ག་ཆེན་པོའི་སྦྱོར་བས་ནི། །ཞེས་བྱ་བ་སྨོས་ཏེ། རང་ངམ་གཞན་ལ་གོ་ཆ་བསྐོན་ནས། ཨོཾ་མ་ནོ་དྲྀ་ཌྷོ་མེ་ཞེས་བྱ་བ་ལ་སོགས་པ་རྡོ་རྗེ་ཧཱུཾ་མཛད་ཀྱི་རྣལ་འབྱོར་བྱས་ནས། བདག་གམ་གཞན་ལ་རྡོ་རྗེ་གོ་ཆའི་ཕྱག་རྒྱ་བསྐྱེད་པ་ནི།
སེམས་ཀྱི་ཆོས་ཡིན་ནོ་ཞེས་བྱ་བའི་དོན་ཏོ། །སྦྱོར་བ་འདི་ཡང་སྔ་མ་བཞིན་དུ་བྱའོ། །དེ་ནས་སེམས་ཅན་ཐམས་ཅད་རྒྱས་གདབ་པའི་ཕྱག་རྒྱའི་ཡེ་ཤེས་བསླབ་པར་བྱའོ་ཞེས་བྱ་བ་ནི། སེམས་ཅན་ཐམས་ཅད་རྒྱས་གདབ་པ་སྟེ། རྡོ་རྗེ་ཧཱུཾ་མཛད་དུ་གྱུར་པའི་ཡེ་ཤེས་ནི། གཟུགས་བརྙན་བྱས་ལ་དེ་
དང་བསྒྲུབ་པར་བྱ་བ་དེ་ལྷན་ཅིག་ཏུ་གྱུར་པར་མོས་པ་ནི་ཕྱག་རྒྱ་སྟེ། དེས་ངེས་པའི་ཡེ་ཤེས་དེ་བསླབ་པ་ནི་བསྟན་པའོ། །རྡོ་རྗེ་ཁྲོ་བོ་མཉམ་བཞག་ནས། །ཞེས་བྱ་བ་ནི། བདག་ཉིད་རྡོ་རྗེ་ཧཱུཾ་མཛད་དུ་བསྒོམས་ལ། བཅོམ་ལྡན་འདས་རྡོ་རྗེ་ཧཱུཾ་མཛད་དེ་རང་གི་ལུས་ལ་དགུག་པ་དང་། གཞུག་པ་དང་།
བཅིང་བ་དང་། དབང་དུ་བྱས་ནས། དེ་དང་ལྷན་ཅིག་ཏུ་གྱུར་པར་མོས་པ་ནི་རྡོ་རྗེ་ཁྲོ་བོ་མཉམ་པར་གཞག་པའོ། །གང་དང་གང་ལ་ཀུན་དུ་ཞུགས་པ་ནི་རང་གི་ལྷའི་གཟུགས་བརྙན་གྱིས་སེམས་ཅན་གང་དང་གང་ལ་བསྐྱེད་པས་འགྲུབ་པར་འགྱུར་ཏེ་སྔ་མ་བཞིན་ནོ། །རྡོ་རྗེ་ཧཱུཾ་ཞེས་བཟླས་པ་ཡིས། །ཞེས་བྱ་
བ་ནི། ཨོཾ་སུཾ་བྷ་ནི་སུཾ་བྷ་ཧཱུཾ་ཞེས་བྱ་བ་ལ་སོགས་པའི་ཡི་གེ་ཧཱུཾ་བཞིས་བཟླས་པ་དང་ལྡན་པ་ནི་ཕྱག་རྒྱར་འགྱུར་ཏེ། རྡོ་རྗེ་ཧཱུཾ་མཛད་ཀྱི་གཟུགས་བརྙན་གྱིས་རྡོ་རྗེ་ཧཱུཾ་མཛད་དུ་བྱེད་པར་འགྱུར་རོ་ཞེས་བྱ་བའི་དོན་ཏོ། །དེ་སྐད་དུ་ཡང་། རྡོ་རྗེ་སྦྱོར་བ་འདི་དང་ནི། །རྡོ་རྗེ་རྣལ་འབྱོར་ཕྱག་རྒྱ་ཡིས། །སེམས་
ཅན་གང་ལ་ཡོངས་སུ་ཆགས། །དེ་ཡི་ཉོན་མོངས་རྣམ་པར་ཉམས། །ཞེས་གསུངས་པ་ཡིན་ནོ། །སྒྲ་ཆེན་དུང་ནི་བརྗོད་བྱ་བ། །ཊཀྐི་ཧཱུཾ་ཕཊ་ཁྲོས་ནས་སུ། །ཞེས་བྱ་བ་ནི། ཡང་དག་པར་བརྗོད་པར་བྱ་བས་ན་བརྗོད་པར་བྱ་བ་སྟེ། གསལ་བར་བརྗོད་ཅེས་བྱ་བའི་དོན་ཏོ། །དེ་ཇི་ལྟར་བརྗོད་ཅེ་ན།

སྒྲ་ཆེན་དུང་ཞེས་བྱ་བ་སྨོས་ཏེ། ཁྲོ་བོའི་ངག་གིས་གང་ལ་རྡོ་རྗེ་ཧཱུཾ་མཛད་ལ་སོགས་པས་འགུགས་པའོ། །རྡོ་རྗེ་འབར་བས་དེ་མངོན་བཀུག །རྡོ་རྗེ་ཁྲོ་བོའི་ཏིང་འཛིན་གཅིག །ཅེས་བྱ་བ་ནི། བཅོམ་ལྡན་འདས་ཁྲོ་བོ་འདོད་པས་མངོན་སུམ་དུ་བཀུག་ཅེས་བྱ་བའི་དོན་ཏོ། །འཆིང་བར་
འགྱུར་ཞེས་བྱ་བ་ནི་འགྲོ་བའི་དོན་ཡིན་པའི་ཕྱིར་རོ། །འདི་སྐད་སྟོན་པ་ཡིན་ཏེ། བཅོམ་ལྡན་འདས་འདོད་པའི་རྒྱལ་པོས་བཀུག་ནས། རྣལ་འབྱོར་པ་རང་གི་ལུས་ལ་སོགས་པ་རྣམས་ལ་འདིར་འཇུག་པར་འགྱུར་ཏེ། དེས་ན་བཅུག་པ་དེས་དེའི་སྡུག་བསྔལ་ཐམས་ཅད་ཞི་བར་འགྱུར་རོ། །དེ་སྐད་དུ་
ཡང་། སྒྲ་ཆེན་དུང་ནི་བརྗོད་བྱ་བ། །ཊཀྐི་ཧཱུཾ་ཕཊ་ལན་ཅིག་བརྗོད། །གང་ཡིན་དེ་ལ་བཅུག་པ་ནི། །ཀུན་ནས་ཉོན་མོངས་ཞི་ཞིང་གཡོ། །ཞེས་གསུངས་སོ། །རྡོ་རྗེ་ལྟ་བས་བལྟས་པ་ནི། །ཞེས་བྱ་བ་ནི། རྡོ་རྗེ་ལྟ་བའི་མཚན་ཉིད་ནི་བཤད་ཟིན་ཏོ། །དེ་ཡིས་བལྟས་པ་ནི་གཟིགས་པའོ། །
རྡོ་རྗེ་ཁྲོ་བོའི་ཏིང་འཛིན་གྱིས། །ཞེས་བྱ་བ་ནི། རྡོ་རྗེ་ཧཱུཾ་མཛད་ལ་སོགས་པའི་ཏིང་ངེ་འཛིན་ཏོ། །སེམས་ཅན་གང་དང་གང་ཡིན་པ། །ཞེས་བྱ་བ་ནི། བསྒྲུབ་པར་བྱ་བའི་ལུས་སུ་བལྟ་བར་བྱའོ། །དེ་དང་དེ་ནི་འཆི་བར་འགྱུར། །ཞེས་བྱ་བ་ནི། སེམས་ཅན་དེ་དང་དེ་ལ་རྣལ་འབྱོར་པས། ལོག་པར་
ལྟ་བའི་ལམ་དང་བྲལ་ནས། བལྟས་པས་འཆི་བར་འགྱུར་ཞེས་བྱ་བ་ནི། ཉམས་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། བསྒྲུབ་པར་བྱ་བའི་ལུས་ལ་རྡོ་རྗེ་ཧཱུཾ་མཛད་ལ་སོགས་པའི་སྐུའི་གཟུགས་བརྙན་དུ་བསྐྱེད་ནས། བསྒྲུབ་པར་བྱ་བའི་ལུས་ལ་འདོད་པའི་རྒྱལ་པོ་བཀུག་སྟེ་བཅུག་ནས།
རྣལ་འབྱོར་པས་རྡོ་རྗེ་ལྟ་བས་བལྟས་པའི་བསྒྲུབ་པར་བྱ་བ་དེ་དང་དེས་བྱིན་གྱིས་བརླབས་པ་འགྲུབ་པར་འགྱུར་རོ། །དེས་འདིའི་སྡུག་བསྔལ་ཞི་བར་འགྱུར་ཏེ། རང་བཞིན་གྱིས་རྣམ་པར་དག་པའི་ཡེ་ཤེས་སྐྱེ་བའི་ཕྱིར་རོ། །དེ་སྐད་དུ་ཡང་། སེམས་ཅན་གང་གི་རྒྱུད་ལ་ཡང་། །རྡོ་རྗེ་ལྟ་བས་བལྟས་
ན་ནི། །རྡོ་རྗེ་རྣལ་འབྱོར་སྤྱན་ཆེན་པོས། །དེ་ཡི་སྡུག་བསྔལ་ཉམས་པར་འགྱུར། །ཞེས་གསུངས་སོ། །བསོད་སྙོམས་ཡིད་ལ་བསམས་ནས་ནི། །སྙིང་ལ་རྡོ་རྗེ་བསྒོམ་པར་བྱ། །ཞེས་བྱ་བ་ནི། རང་གིས་ཁྲོ་བོ་དེ་ཉིད་ཀྱི་ཏིང་ངེ་འཛིན་གྱིས་གདོན་ལ་སོགས་པ་བསྐྱེད་པ་དེའི་སྡུག་བསྔལ་ཡིད་ལ་

བསམས་ནས། གདོན་ལ་སོགས་པ་དེ་བསད་པ་དང་གཞོམ་པར་བྱའོ་ཞེས་སེམས་བསྐྱེད་དེ། སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་འབར་བ་བསྒྲེང་བ་བསྒོམ་པའོ། །གང་གི་སྙིང་གར་ཞེ་ན། བསྒྲུབ་པར་བྱ་བ་མངོན་པར་འདོད་པ་དེ་དག་མདུན་ན་གནས་པའོ། །འདི་
སྐད་སྟོན་པ་ཡིན་ཏེ། ལུས་དང་ངག་རྡོ་རྗེ་ལྟ་བས་རྒྱས་བཏབ་ནས། བསྒྲུབ་པར་བྱ་བ་གཞན་དག་ཐམས་ཅད་ཡིད་ཀྱིས་མདུན་ན་བཞག་ལ། གདོན་ལ་སོགས་པ་དེ་དག་གིས་བར་དུ་གཅོད་པའི་སྐྱོན་རྡོ་རྗེ་ཐལ་བར་བྱས་པར་བསམ་པར་བྱའོ། །དེའི་སྙིང་གར་བསྲུང་བའི་དོན་དུ་ཇི་སྐད་བཤད་པའི་རྡོ་རྗེ་
བསྒོམས་པ་དེས་དེའི་སྡུག་བསྔལ་ཐམས་ཅད་ཉེ་བར་ཞི་ནས། དེ་བཞིན་གཤེགས་པ་ཉིད་ཀྱི་གདུལ་བྱར་འགྱུར་རོ། །དེ་སྐད་དུ་ཡང་། ཡིད་ཀྱིས་གསོད་པར་བསམས་ནས་ནི། །སྙིང་གར་རྡོ་རྗེ་སྒོམ་པར་བྱེད། །ཡི་གེ་ཧཱུཾ་ནི་གྱུར་པ་ལས། །ཉེ་བའི་སེམས་ཅན་གང་ཡིན་པ། །དེ་ལ་ཕྱག་རྒྱ་
བརྗོད་པ་ཡིས། །དེ་ཡི་འཇིགས་པ་ཐམས་ཅད་ལས། །རྡོ་རྗེ་ཊཀྐིའི་ཕྱག་རྒྱ་ཡིས། །འདི་ནི་ཕྱིར་མི་ལྡོག་པར་འགྱུར། །ཞེས་གསུངས་སོ། །སེམས་ཅན་གང་ལ་གང་དག་གིས། །ཡིད་ཀྱིས་རྒྱས་ནི་འདེབས་པ་འདི། །ཞེས་བྱ་བ་ནི། གང་གིས་ལུས་དང་ངག་དང་ལྟ་བ་དང་། ཡིད་ཀྱི་ཕྱག་
རྒྱའི་ཏིང་ངེ་འཛིན་གྱི་ལུས་ལ། ཡིད་ཀྱིས་རྒྱས་འདེབས་པ་འདིས་ནི་རྣལ་འབྱོར་པས་ཤིན་ཏུ་བསྒོམས་པའོ། །ཕྱག་རྒྱ་འདི་ནི་ཇི་སྐད་བཤད་པའི་ཕྱག་རྒྱ་བཞི་པོ་རྣམས་སོ། །ཤིན་ཏུའི་དོན་ནི་ཁྱད་པར་དུ་གྱུར་པ་དང་མྱུར་བ་ཉིད་དོ། །ལས་རྣམས་ཐམས་ཅད་ཇི་སྐད་དུ་གསུངས་པའི་ཕྱག་རྒྱ་
བཞིས་བསྒྲུབ་པར་བྱའོ། །ལས་འདི་རྣམས་ཇི་ལྟར་བསྒྲུབ་པར་བྱ་ཞེ་ན། ཕྱག་རྒྱ་རེ་རེས་ཀྱང་ལས་བཞི་རྣམས་ལ་ཕྱག་རྒྱའི་སྙིང་པོ་བཞི་སྦྱར་རོ་ཞེས་བྱ་བ་ནི། འདི་སྐད་སྟོན་པ་ཡིན་ཏེ། གང་གི་ཚེ་ཡིད་ཀྱི་ཕྱག་རྒྱས་ཕ་རོལ་གྱི་གདུག་པ་འཇོམས་ཤིང་བསྲུང་བར་བྱ་བར་འདོད་པ་དེའི་ཚེ། དེ་དང་
འབྲེལ་པའི་ལས་འགྲུབ་པར་འགྱུར་བ་ནི། ཇི་སྐད་བཤད་པའི་སྙིང་པོ་བསྒོམ་ཞིང་བཟླས་པས་སོ། །དེ་བཞིན་དུ་གང་གི་ཚེ་ལྟ་བ་དང་ངག་དང་ལུས་ཀྱི་ཕྱག་རྒྱའི་ལས་བསྒྲུབ་པར་བྱ་བར་འདོད་པ་དེའི་ཚེ། དེ་དང་འབྲེལ་པའི་ལས་སྒྲུབ་པར་བྱེད་པས་ན། ཇི་སྐད་དུ་བཤད་པའི་ཕྱག་རྒྱ་བསྒོམས་

ནས། སྙིང་པོ་བཞི་བཟླས་པར་བྱའོ། །ཕྱག་རྒྱ་འདི་རྣམས་ཀྱི་ལས་བྱེད་པར་འདོད་པས་ན། རྣལ་འབྱོར་པས་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་ཏུ་རང་གི་ཁྲོ་བོའི་རྣལ་འབྱོར་གྱིས་ཇི་སྐད་གསུངས་པའི་སྙིང་པོ་བཞི་བཟླས་ཤིང་བསྒོམ་པར་བྱས་ནས། མཐར་
མཚན་ཐོག་ཐག་བསྒོམ་པར་བྱས་ན་ལས་ཐམས་ཅད་འགྲུབ་པར་བྱེད་པར་འགྱུར་རོ། །དེ་ནས་གསང་བའི་ཁྲོ་བོའི་ཕྱག་རྒྱའི་ཡེ་ཤེས་སློབ་བོ་ཞེས་བྱ་བ་ནི། རྣལ་འབྱོར་པའི་བསྒོམས་པའི་སྟོབས་ལས་བྱུང་བའི་ཁྲོ་བོ་ནི་གསང་བའི་ཁྲོ་བོའོ། །དེ་ཉིད་གཞན་ལ་རྒྱས་འདེབས་པས་ན།
གསང་བའི་ཁྲོ་བོའི་ཕྱག་རྒྱའོ། །དེའི་ཡེ་ཤེས་བསླབ་པ་ནི་བསྟན་པའོ། །ཡན་ལག་ཀུན་གྱིས་འཁྱུད་ནས་ནི། །ཞེས་བྱ་བ་ནི། ཡིད་ཀྱིས་དེ་ལ་རྗེས་སུ་ཞུགས་ནས། ཡན་ལག་གི་ཆ་ཤས་ཐམས་ཅད་བཀང་བའོ། །ཧཱུཾ་ཞེས་གང་ལ་སྦྱར་བྱ་བ། །ཞེས་བྱ་བ་ནི། ཡི་གེ་ཧཱུཾ་
བརྗོད་ཅིང་ངོ་། །དབང་པོ་གཉིས་ནི་སྤྲད་གྱུར་ལ། །ཞེས་བྱ་བ་ནི། ལྷ་དང་སྒྲུབ་པ་པོའི་དབང་པོ་གཉིས་ནི་དབང་པོ་གཉིས་ཏེ། དེ་གཅིག་ཏུ་གྱུར་པའོ། །དབང་པོ་གཉིས་སྤྲད་པ་ནི་དབང་པོ་གཉིས་སྤྲད་པ་སྟེ། ཡེ་ཤེས་སེམས་དཔའ་དང་གཅིག་ཏུ་གྱུར་པར་མོས་པར་བྱ་ཞེས་བྱ་བའི་དོན་
ཏོ། །དེ་ཡི་སྲོག་ནི་མ་རུངས་འགྱུར། །ཞེས་བྱ་བ་ནི། བསྒྲུབ་པར་བྱ་བ་དེའི་སྡུག་བསྔལ་ངེས་པར་བཅོམ་ནས། བདག་ཉིད་ལྷ་མོར་གྱུར་པར་མཐོང་བའོ། །དེ་སྐད་དུ་ཡང་། དབང་པོ་གཉིས་ནི་སྙོམས་འཇུག་པས། །ཡན་ལག་ཀུན་ལ་ཡོངས་སུ་འཁྱུད། །གང་ཞིག་ཧཱུཾ་ནི་སྦྱོར་བྱེད་
པས། །དེ་ཡི་སྡུག་བསྔལ་ཉམས་པར་འགྱུར། །རྡོ་རྗེ་ཁྲོ་བོ་རབ་དྲག་འཛིན། །རྟག་ཏུ་བདག་ཉིད་བསྒོམ་པར་བྱ། །དེ་ནི་ཁྲོ་བོའི་སྐུ་གང་ཡིན། །གཅིག་ཏུ་བདག་ནི་གསང་བ་མཚུངས། །སངས་རྒྱས་བྱང་ཆུབ་སེམས་དཔའ་འང་རུང་། །བདག་ཉིད་དང་ནི་མཚུངས་པ་རུ། །ལུས་ནི་ཡང་
དག་སྦྱོར་བས་ན། །དབང་གཉིས་སྙོམས་འཇུག་བརྗོད་པར་བྱ། །སངས་རྒྱས་སམ། བྱང་ཆུབ་སེམས་དཔའ་འམ། རྡོ་རྗེ་ཁྲོ་བོའམ། སེམས་ཅན་གཞན་དེའི་ལུས་གང་ཡིན་པ་དང་། བདག་གི་ལུས་གང་ཡིན་པ་དང་མཚུངས་པའི་ཤེས་པ་གང་ཡིན་པ་འདི་ནི་དབང་པོ་གཉིས་སྙོམས་

པར་འཇུག་པ་ཞེས་བྱ་སྟེ། ཡང་ན་རྣམ་པར་བསྒོམ་པ་ཡིས། །ཇི་སྐད་བཤད་བཞིན་ཡན་ལག་འཁྱུད། །རྡོ་རྗེ་སེམས་དཔའ་རྒྱལ་པོ་ཆེ། །དཔུང་པ་དམ་པོར་བསྡམ་པར་བྱ། །ཡན་ལག་ཀུན་ལ་ཡོངས་འཁྱུད་པས། །སངས་རྒྱས་བྱང་ཆུབ་འགྲུབ་པར་འགྱུར། །དབང་པོ་གཉིས་ནི་
སྙོམས་འཇུག་པ། །འདོད་པའི་འདོད་ཆགས་རྟག་མི་བྱ། །འདི་དང་མཚུངས་པར་བསྒོམ་པ་ནི། །མཚུངས་པ་ཉིད་ནི་དབང་པོ་ཡིན། །ཞེས་གསུངས་སོ། །ཧཱུཾ་ཞེས་བྱ་བར་ལྡན་པ་ཡིས། །མཆུ་སྤྲད་སོས་ནི་མཆུ་བཟུང་ནས། །ཞེས་བྱ་བ་ནི། གང་གིས་སེམས་ཅན་འགུགས་པར་འདོད་པའི་
ཡིད་ཀྱིས་རང་གི་སོ་ཡིས་མཆུ་བཟུང་ནས་མཆུ་སྤྲད་པར་བྱའོ། །སྦྱོར་བ་གང་གིས་ཤེ་ན། ཧཱུཾ་ཞེས་བྱ་བར་ལྡན་པ་ཡིས། །ཞེས་བྱ་བ་སྨོས་ཏེ། ཁྲོ་བོའི་སྦྱོར་བ་ལ་དབང་པོ་གཉིས་སྙོམས་པར་འཇུག་པ་ཞེས་སོ། །དེ་ཡིས་དབང་པོ་གཉིས་སྙོམས་པར་འཇུག་པ་ནི། ཧཱུཾ་མཛད་ཀྱི་སྦྱོར་བས་
བསྒྲུབ་པར་བྱ་བ་དང་། མཆུ་སྤྲད་ནས་སོ་ཡིས་མཆུ་བཟུང་བར་བསྒོམས་ཤིང་བཟླས་པ་བྱས་ཏེ། སྒྲུབ་པ་པོའི་གདོང་དེ་ལ་མངོན་དུ་ཕྱོགས་ཞེས་བྱ་བའི་ཐ་ཚིག་སྟེ། མདུན་དུ་འགྲོ་བའི་དོན་གྱི་ཕྱིར་རོ། །འདི་སྐད་སྟོན་པ་ཡིན་ཏེ། དཔལ་རྡོ་རྗེ་ཧཱུཾ་མཛད་ལ་སོགས་པའི་ཁྲོ་བོའི་རྣལ་འབྱོར་བྱས་ནས་
གནོད་སྦྱིན་མོ་ལ་སོགས་པའི་སེམས་ཅན་མདུན་དུ་གནས་པར་བདག་གིས་ཡིད་ལ་བསམས་ལ། ཡིད་ཀྱིས་སེམས་ཅན་དེ་ལ་འཁྱུད་པའི་སྦྱོར་བས་མཆུ་སྤྲད་ནས། སོས་མཆུ་བཟུང་བས་མཆོག་ཏུ་ཡིད་བདེ་བ་དང་དགའ་བ་ཐོབ་པས་བཀུག་ནས་བཀའ་བསྒོས་ན་རྣལ་འབྱོར་མ་དེའི་དབང་
དུ་འགྱུར་རོ། །ཧཱུཾ་ཞེས་སྦྱོར་བ་གང་ཡིན་པ། །དེ་ནི་བདེ་བ་མྱོང་བར་འགྱུར། །ཞེས་བྱ་བ་ནི། ཁྲོ་བོ་གང་ཡང་རུང་བ་ཞིག་གི་སྙོམས་པར་འཇུག་པ་བྱས་ནས། ཡི་གེ་ཧཱུཾ་ཞེས་བྱ་བའི་སྔགས་སྦྱར་ཞིང་ཡི་གེ་ཧོཿས་བདེ་བ་རྗེས་སུ་མྱོང་བ་བསྐུལ་ནས། དབང་པོ་གཉིས་སྙོམས་པར་འཇུག་པ་
འདིས་བསྒྲུབ་པར་བྱ་བ་གང་ཡིན་པ་དེ་དབང་དུ་གྱུར་ནས། དེ་ནི་སྒྲུབ་པ་པོ་དང་བྲལ་ན་སྡུག་བསྔལ་ཐོབ་པའོ། །ཁྲོ་བོ་འདོད་པའི་རྒྱལ་པོའི་སྦྱོར་བ་བྱས་ལ། བཅོམ་ལྡན་འདས་ཁྲོ་བོ་འདོད་པའི་རྒྱལ་པོ་ཇི་སྐད་བཤད་པའི་ཞལ་བཞི་ཕྱག་བརྒྱད་པའི་གཟུགས་ཅན་དང་གཅིག་ཏུ་གྱུར་པར་

བསྒོམས་ནས། ཧཱུཾ་ཧོཿཞེས་བྱ་བའི་སྔགས་བརྗོད་པས་སྔར་བཤད་པའི་འཇུག་པའི་སྦྱོར་བས་བཅུག་ལ། བསྒྲུབ་པར་བྱ་བ་དང་། ལྷན་ཅིག་ཏུ་གྱུར་པར་བདག་གིས་བསམས་པས། བསྒྲུབ་པར་བྱ་བའི་ལུས་ལ་ཉེ་བར་རྗེས་སུ་མྱོང་བར་འགྱུར་ཞིང་བསྒྲུབ་པར་བྱ་བ་མཆོག་ཏུ་བདེ་བ་
དང་ཡིད་བདེ་བ་ཐོབ་པའོ། །སྒྲུབ་པ་པོ་སྐད་ཅིག་ཙམ་ཡང་ཡོངས་སུ་མི་སྤོང་བ་གང་ཡིན་པ་དེས་སྤང་ན་སྡུག་བསྔལ་ཐོབ་པར་འགྱུར་རོ། །ཧཱུཾ་ཞེས་བྱ་བར་གང་སྦྱོར་ཞིང་། །ཞེས་བྱ་བ་ནི། ཡི་གེ་ཧཱུཾ་གིས་ཡན་ལག་ཐམས་ཅད་བཙིར་བར་བྱའོ། །རྣལ་འབྱོར་པས་བསྒྲུབ་པར་བྱ་བའི་ལུས་དང་
རང་གི་ལྷ་གཅིག་ཏུ་གྱུར་པར་བྱའོ། །དབང་པོ་གཉིས་ནི་སྤྲད་ནས་ཀྱང་། །ཞེས་བྱ་བ་ནི་སྔ་མ་བཞིན་ནོ། །བསྒྲུབ་པར་བྱ་བ་དེའི་ལུས་ལ་ཐམས་ཅད་དུ་འཇིགས་པ་ཐམས་ཅད་ལས་བསྲུང་བར་འགྱུར་རོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། རྡོ་རྗེ་ཧཱུཾ་མཛད་ལ་སོགས་པའི་ཁྲོ་བོ་
གང་ཡང་རུང་བའི་རྣལ་འབྱོར་བྱས་ལ། བུད་མེད་དམ་སྐྱེས་པའི་ལུས་ཀྱི་གསང་བའི་གནས་ནས་ཞུགས་པར་ཡིད་ཀྱིས་བསམས་ལ། དེའི་ལུས་ལ་ཞུགས་ནས་མཉམ་པར་སྤྲོས་ལ། སྔ་མ་བཞིན་དུ་ཟླ་བ་གསུམ་དུ་བསྒོམས་ནས། གསང་བའི་ཁྲོ་བོའི་ཡེ་ཤེས་བསྒྲུབ་པ་དེས་ལས་
རྣམས་བྱེད་པར་འགྱུར་རོ། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་དངོས་གྲུབ་ནི། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་དུ་བཤད་པའི་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བསྐྱེད་དེ་བསྒྲུབ་པར་བྱའོ་ཞེས་བྱ་བ་དང་། སྒྲུབ་པ་པོ་
རྣམས་འབྲས་བུ་ལ་སྤྲོ་བ་སྐྱེད་པར་བསྟན་པའི་ཕྱིར། དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་དམ་ཚིག་གི་དེ་ཁོ་ན་ཉིད་ཀྱི་ཕྱག་རྒྱའི་ཡེ་ཤེས་བསླབ་པའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་གསུངས་ཏེ། དངོས་གྲུབ་ཀྱི་ཡེ་ཤེས་བསླབ་པ་བསྟན་
པའི་རྗེས་ཐོགས་ལ་ཞེས་བྱ་བའི་ཐ་ཚིག་གོ། །འདི་རྣམ་པར་རྒྱལ་བས་ན་རྒྱལ་བ་སྟེ། འཇིག་རྟེན་གསུམ་ལས་རྒྱལ་བས་ན་རྒྱལ་བའོ། །འཇིག་རྟེན་གསུམ་ལས་རྣམ་པར་རྒྱལ་བ་དེའི་དཀྱིལ་འཁོར་ཆེན་པོ་ནི། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་

པོའོ། །དེའི་དམ་ཚིག་ནི་ཕྱག་རྒྱ་ཆེན་པོ་དང་། དམ་ཚིག་དང་ཆོས་དང་ལས་ཀྱི་ཕྱག་རྒྱ་རྣམས་སོ། །དེ་ཉིད་ཀུན་རྫོབ་གྱི་བདེན་པའི་ངོ་བོས་ཕྱིན་ཅི་མ་ལོག་པས་ན། དེ་ཁོ་ན་ཉིད་དོ། །སེམས་ཅན་གྱི་ཁམས་ལ་རྒྱས་འདེབས་པ་དེས་ན། དེ་ཁོ་ན་ཉིད་ཀྱི་ཕྱག་རྒྱའོ། །དེར་ངེས་པའི་
ཡེ་ཤེས་དེ་བསླབ་པར་བྱའོ། །རྡོ་རྗེ་དབྱིངས་ཀྱི་ཚུལ་གྱིས་ནི། །སངས་རྒྱས་རྗེས་སུ་དྲན་བྱས་ན། །ཞེས་བྱ་བ་ནི། ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི་ཞེས་བྱ་བ་ནས། ཨོཾ་ཡ་ཐཱ་སརྦྦ་ཏ་ཐཱ་ག་ཏསྟ་ཐ་ཨ་ཧཾ་ཞེས་བྱ་བའི་བར་དུ་བྱས་ནས། རྡོ་རྗེ་དབྱིངས་ཀྱི་སྦྱོར་བ་གང་ཡིན་པ་དེས། སངས་རྒྱས་
རྒྱས་རྗེས་སུ་དྲན་པ་བསྒོམས་པས་རྣམ་པར་སྣང་མཛད་བསྒོམ་པར་བྱའོ། །རྣལ་འབྱོར་པ་གང་གིས་སེམས་ཅན་ལ་ཕན་པའི་ཕྱིར་བསྒོམ་པ་བྱས་པ་དེ་ཉིད་ཀྱིས་དེས་ནི་སངས་རྒྱས་ཐོབ་པར་འགྱུར་རོ། །དབང་ཕྱུག་དང་ནི་ཨུ་མ་ཡང་། །ཞེས་བྱ་བ་ལ་སོགས་པས་ནི། བཅོམ་ལྡན་
འདས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་བསྟན་ཏོ། །ས་ལ་བྲིས་ཏེ་དེ་ལྟར་མནན། །ཞེས་བྱ་བ་ནི་རས་སམ། སྤང་ལེབ་བམ། རྩིག་པ་ལ་བྲིས་པའམ། ཤིང་ངམ་རྫས་ལས་བླུགས་པའི་གཟུགས་བརྙན་བྱས་པ་ས་ལ་བཞག་སྟེ། ཇི་ལྟ་བའི་བཅོམ་ལྡན་འདས་རྡོ་རྗེ་ཧཱུཾ་
མཛད་ཀྱི་ཧཱུཾ་ཞེས་བྱ་བ་དང་། ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ཏེ། ཁྲོ་བོ་འདོད་པའི་རྒྱལ་པོས་བཀུག་པ་དང་། བསད་པ་དང་། ཚེ་སྦྱིན་པའི་ཕྱག་རྒྱས་གསོ་བ་དང་། ཁྲོ་བོའི་ཞབས་ཀྱིས་འདྲེན་པས་ཨོཾ་བཛྲ་ཨཾ་ཀུ་ཤ་ཧོཿཞེས་བྱ་བས་དགུག་པ་དང་། ཨོཾ་
བཛྲ་ཨ་བྷི་ཤེ་ཧཱུཾ་ན་བ་ཏྲཾ་ཏྲཏ་ཅེས་བྱ་བས་གཟིར་བ་དང་། ཨོཾ་བུདྡྷ་མཻ་ཏྲི་བཛྲ་རཀྵ་ཧཾ་ཞེས་བྱ་བས་བབས་པའི་སྡུག་བསྔལ་བ་དང་། ཨོཾ་བཛྲ་ས་མ་ཡ་གྲྀ་ཧྞ་བནྡྷ་ས་མ་ཡ་ཞེས་བྱ་བ་ལ་སོགས་པའི་སྔགས་ཀྱིས་ཁྲོ་བོ་ཏི་རཱིནྟི་རིས་བཅིངས་ཏེ། དམ་ཚིག་ལ་འཇུག་པ་དང་། རྡོ་རྗེ་འདི་
ནི་རྡོ་རྗེ་ཆེ། །སངས་རྒྱས་ཀུན་གྱི་བྱིན་གྱིས་བརླབས། །རྡོ་རྗེ་འདི་ལས་འདས་ན་ནི། །རིགས་རྣམས་མྱུར་དུ་ཐལ་བར་རློག །ཨོཾ་ཧ་ན་ས་མ་ཡ་ཧཱུཾ་ཕཊ་ཅེས་བྱ་བ་ནི། དམ་ཚིག་གི་ཕྱག་རྒྱ་གཉིས་པ་བསྟན་ནས། ལྷ་ལ་སོགས་པ་དགུག་པ་དང་། རྡོ་རྗེ་ཧེ་རུ་ཀའི་ཕྱག་རྒྱས་རང་

གི་ཆུང་མ་དང་བཅས་པའི་ལས་ལ་སྦྱར་ལ། དེ་བཞིན་དུ་སྔགས་ཀྱང་བརྗོད་པར་བྱའོ། །ཇི་ལྟར་བྲིས་པའི་གོ་རིམས་བཞིན། །ཞེས་བྱ་བ་ནི། དེ་བཞིན་དུ་ཞེས་བྱ་བའི་སྒྲའི་དོན་ཏོ། །ཨུཏྤལ་ཆེར་སྔོ་འཚེར་བའི་མདོག །རྡོ་རྗེ་ཧཱུཾ་ཞེས་བྱ་བར་འདུས། །མཆེ་བ་ཅུང་
ཟད་ཕྱུང་བའི་ཞལ། །ཁྲོ་དང་བཅས་པས་འཛུམ་པ་སྟེ། །གཡོན་བརྐྱང་ཚུལ་དུ་གནས་པ་ཡི། །འབར་བའི་ཕྲེང་བས་འཁྲིགས་པའི་འོད། །གཡོན་པའི་ཞབས་ཀྱི་མཐིལ་གྱིས་ནི། །དབང་ཕྱུག་ཆེན་པོ་མནན་པར་བྱས། །གཡས་པའི་ཞབས་ཀྱིས་ཨུ་མ་ཡི། །ནུ་མའི་སྟེང་དུ་གནས་
པར་ནི། །བྲི་བའི་ཆོ་གར་བསྟན་པའི་མཚན་ཉིད་དེས་བདག་ཉིད་རྡོ་རྗེ་ཧཱུཾ་མཛད་དུ་བསྒོམས་ཏེ། སེམས་ཅན་རྒྱས་བཏབ་ལ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་བསྒྲུབ་པར་བྱ་སྟེ། དེའི་རང་བཞིན་དུ་བདག་ཉིད་རྫོགས་པར་བྱའོ། །དེའི་དངོས་གྲུབ་གང་ཞིག་ཏུ་འགྱུར་ཞེ་ན། དེ་ནི་འཇིག་རྟེན་
གསུམ་ལས་རྒྱལ། །ཞེས་བྱ་བ་སྨོས་པས་འབྲས་བུ་བསྟན་ཏོ། །ཇི་ལྟར་རི་མོ་བྲིས་པ་བཞིན། །འབར་བས་བསྐོར་བའི་དབུས་བཞུགས་པ། །ཞེས་བྱ་བ་ནི་ཁྲོ་བོ་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་དུ་བྲི་བའི་ཆོ་ག་བསྟན་པ་བཞིན་དུ་བསྒོམ་པར་བྱའོ་ཞེས་བསྟན་ཏོ། །
དེ་ལ་སྐུ་རྡོ་རྗེ་ནི་ཇི་སྐད་བཤད་པའི་མཚན་ཉིད་དོ། །གསུང་རྡོ་རྗེ་ནི་ཁྲོ་བོའི་ངག་དང་རང་གི་སྔགས་ཟློས་པའོ། །ཐུགས་རྡོ་རྗེ་ནི་རང་གི་སྙིང་གའི་ཟླ་བར་འབར་བའི་རྡོ་རྗེར་མོས་པའོ། །སྐུ་གསུང་ཐུགས་ཀྱི་རྡོ་རྗེ་བསྡམས་ནས་སེམས་དཔའི་ཕྱག་རྒྱ་སྟེ། ཁྲོ་བོ་རྡོ་རྗེ་སེམས་དཔའ་ལ་སོགས་པའི་སེམས་
དཔའི་ཕྱག་རྒྱ་ཆེན་པོ་བཅིང་བར་བྱའོ། །དེ་ལྟར་རྡོ་རྗེ་རིགས་ཀྱི་ཕྱག་རྒྱ་ཆེན་པོའི་མཚན་ཉིད་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བྲི་བའི་ཆོ་ག་བསྟན་ཟིན་ཏོ། །སངས་རྒྱས་རྗེས་སུ་དྲན་བསྒྲུབས་པས། །མྱུར་དུ་སངས་རྒྱས་ཉིད་ཐོབ་བོ། །ཞེས་བྱ་བ་ནི་རྣམ་པར་སྣང་
མཛད་ཀྱི་ཕྱག་རྒྱ་ཆེན་པོ་བཅིངས་ནས་གང་གི་ཚེ། རྣམ་པར་སྣང་མཛད་ཀྱི་རང་བཞིན་དུ་བསྒོམས་ནས་འགྲུབ་པ་དེའི་ཚེ་འགྲུབ་པར་འགྱུར་ཏེ། དེ་ལྟ་བུ་ནི་སངས་རྒྱས་རྗེས་སུ་དྲན་པས་འགྲུབ་པའོ། །མྱུར་དུ་ཞེས་བྱ་བ་ནི་ལུས་དེ་ཉིད་དང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་

རྫོགས་པར་སངས་རྒྱས་པ་དེས་འགྲུབ་བོ། །འཇིག་རྟེན་གསུམ་ལས་རྒྱལ་བཅིངས་ནས། །ཞེས་བྱ་བ་ནི་དཔལ་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཆེན་པོ་བཅིངས་ནས་དེ་བསྒོམས་ཏེ། སྔགས་དང་ཕྱག་རྒྱས་དངོས་གྲུབ་བསྒྲུབས་ན། ཁམས་གསུམ་རྣམ་པར་རྒྱལ་བ་བསྒོམ་པ་
འགྲུབ་པར་འགྱུར་རོ། །དེ་ཡང་། རྡོ་རྗེ་ཚེ་དང་ཀུན་དུ་འགྲོ། །ཞེས་བྱ་བ་སྨོས་ཏེ། རྡོ་རྗེ་ཚེ་ནི་རྡོ་རྗེ་ཚེ་སྟེ། བཅོམ་ལྡན་འདས་རྡོ་རྗེ་ཧཱུཾ་མཛད་དོ། །ཕྲིན་ལས་འབའ་ཞིག་གིས་མཚུངས་པ་ནི་མ་ཡིན་ཏེ། སྐུ་ཚེ་ཡང་དེ་དང་འདྲ་བའོ། །ཀུན་དུ་འགྲོ་ཞེས་བྱ་བ་ནི་རྫུ་འཕྲུལ་ཡང་དེ་དང་འདྲ་ཞེས་བྱ་
བའི་དོན་ཏོ། །རྡོ་རྗེ་དབང་གི་རྒྱལ་པོར་འགྱུར། །ཞེས་བྱ་བ་ནི་རིན་ཆེན་ཧཱུཾ་མཛད་ཀྱི་ཕྱག་རྒྱ་ཆེན་པོ་གྲུབ་པས་རྒྱལ་པོ་ཉིད་གྲུབ་པར་འགྱུར་རོ། །ཆོས་བཟང་ལྡན་པས་འཇིག་རྟེན་དབང་། །ཞེས་བྱ་བ་ནི་ཆོས་ཀྱི་ཧཱུཾ་མཛད་ཀྱི་ཕྱག་རྒྱ་ཆེན་པོ་གྲུབ་པས་འཇིག་རྟེན་དབང་ཕྱུག་ཏུ་འགྱུར་རོ། །ལས་ཀྱི་
རྡོ་རྗེ་ཁྲོ་བོ་ཆེ། །རྡོ་རྗེ་ལས་ནི་བྱེད་པར་འགྱུར། །ཞེས་བྱ་བ་ནི་ལས་ཀྱི་ཧཱུཾ་མཛད་ཀྱི་ཕྱག་རྒྱ་ཆེན་པོ་དང་ཁྲོ་བོ་ཆེན་པོ་རྡོ་རྗེ་ལས་ཀྱི་སྦྱོར་བས་གྲུབ་པར་གྱུར་ནས་རྡོ་རྗེ་ལྟར་མི་ཕྱེད་པའི་ལས་དེ་བྱེད་པར་འགྱུར་རོ། །སེམས་དཔའ་ཁྲོ་བོ་རབ་ཏུ་བསྟན། །ཞེས་བྱ་བ་ནི་ཁྲོ་བོ་རྡོ་རྗེ་སེམས་དཔའི་ཕྱག་
རྒྱ་ཆེན་པོ་དང་། ཁྲོ་བོ་སེམས་དཔའི་སྔགས་ཀྱིས་གྲུབ་པར་གྱུར་ནས། དེ་རབ་ཏུ་བརྟན་པའི་འབྲས་བུ་ཆེན་པོར་འགྱུར་རོ། །ཁྲོ་བོ་རྡོ་རྗེ་རྒྱལ་པོའི་ཕྱག་རྒྱ་ཆེན་པོ་དང་། ཁྲོ་བོ་ལྕགས་ཀྱུས་ཡང་དག་དགུག །ཅེས་བྱའོ། །ཁྲོ་བོ་རྡོ་རྗེ་ཆགས་པའི་ཕྱག་རྒྱ་ཆེན་པོ་དང་། རྡོ་རྗེ་ཆགས་པས་
ཆགས་པར་བྱེད་པའོ། །ཁྲོ་བོ་རྡོ་རྗེ་ལེགས་པའི་ཕྱག་རྒྱ་ཆེན་པོ་དང་། ལེགས་པར་དགའ་བ་སྟེར་བར་བྱེད་པའོ། །ཁྲོ་བོ་རྡོ་རྗེ་རིན་ཆེན་གྱི་ཕྱག་རྒྱ་ཆེན་པོ་དང་། ཁྲོ་གཉེར་དེས་རང་དང་གཞན་གྱི་རྒྱུད་དུ་གཏོགས་པའི་འདོད་ཆགས་ལ་སོགས་པ་བཅོམ་ནས་ཁམས་གསུམ་དུ་གཏོགས་པའི་
རྫས་རྣམས་འབར་བའི་ལྟ་བས་བཀུག་ཅིང་བཞག་པ་ནི་མ་རུངས་པར་བྱེད་པའོ། །ཁྲོ་བོ་རྡོ་རྗེ་ཉི་མ་ནི་ཕྱག་རྒྱ་ཆེན་པོ་ཁྲོ་བོའི་གཟི་བརྗིད་ཉི་མ་དང་མཚུངས་པར་སྟེར་བར་བྱེད་དོ། །ཁྲོ་བོ་རྡོ་རྗེ་དབལ་གྱི་ཕྱག་རྒྱ་ཆེན་པོ་དང་དཔལ་གྱི་ཁྲོ་བོས་ཁམས་གསུམ་པར་གཏོགས་པའི་སྟོབས་དང་མི་

འཇིགས་པ་ལ་སོགས་པའི་དོན་རྣམས་བཀུག་པར་འགྱུར་རོ། །ཁྲོ་བོ་རྡོ་རྗེ་བཞད་པའི་ཕྱག་རྒྱ་ཆེན་པོ་དང་། ཧ་ཧ་དགོད་པས་གདུག་པ་དང་རང་གི་རྒྱུད་དུ་གཏོགས་པའི་ཉོན་མོངས་པ་རྣམས་ཀྱིས་བདུད་བྱེད་དོ། །ཁྲོ་བོ་རྡོ་རྗེ་ཆོས་ཀྱི་ཕྱག་རྒྱ་ཆེན་པོ་དང་། ཁྲོ་བོ་ཆོས་ཀྱི་
རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་མཚན་ཉིད་ཀྱི་ཆོས་ཆེན་པོ་རྣམས་བསྡུས་ནས་བསྒྲུབས་ཏེ། བཅིང་བའི་སྦྱོར་བ་བསྒོམ་པར་བྱའོ། །ཁྲོ་བོ་རྡོ་རྗེ་རྣོན་པོའི་ཕྱག་རྒྱ་ཆེན་པོ་དང་། རྡོ་རྗེ་རལ་གྲིས་འདོད་ཆགས་ལ་སོགས་པ་དང་། ཕྱི་རོལ་གྱི་དགྲ་རྣམས་གཅོད་པར་བྱེད་དོ། །
ཁྲོ་བོ་རྡོ་རྗེ་རྒྱུའི་ཕྱག་རྒྱ་ཆེན་པོ་དང་། རྒྱུའི་ཁྲོ་བོས་རང་དང་གཞན་དཀྱིལ་འཁོར་དུ་འཇུག་ཅིང་སྡུག་བསྔལ་འཕྲོག་པར་བྱེད་པའོ། །ཁྲོ་བོ་རྡོ་རྗེ་བསྲུང་བའི་ཕྱག་རྒྱ་ཆེན་པོ་དང་། ཁྲོ་བོ་སྨྲ་བས་སྤྲོས་པ་དང་བཅས་པའི་ཆོས་སུ་གཏོགས་པའི་རྣམ་པར་རྟོག་པ་འཕྲོག་པར་བྱེད་དོ། །ཁྲོ་བོ་རྡོ་རྗེ་ལས་ཀྱི་
ཕྱག་རྒྱ་ཆེན་པོ་དང་། ལས་ཀྱི་ཁྲོ་བོའི་སྔགས་ཀྱིས་ལས་བཟང་པོ་རབ་ཏུ་བྱེད་དོ། །ཁྲོ་བོ་རྡོ་རྗེ་བསྲུང་བའི་ཕྱག་རྒྱ་ཆེན་པོ་དང་། ཁྲོ་བོ་བསྲུང་བའི་སྔགས་དེས་སྲུང་བར་བྱེད་དོ། །ཁྲོ་བོ་རྡོ་རྗེ་གནོད་སྦྱིན་གྱི་ཕྱག་རྒྱ་ཆེན་པོ་དང་། ཁྲོ་བོ་རྡོ་རྗེ་གནོད་སྦྱིན་གྱིས་འདོད་ཆགས་ལ་སོགས་པ་དང་། ཕྱི་
རོལ་དགྲ་རྣམས་ཟ་བར་བྱེད་དོ། །ཁྲོ་བོ་རྡོ་རྗེ་ཁུ་ཚུར་གྱི་ཕྱག་རྒྱ་ཆེན་པོ་དང་། ཁྲོ་བོ་ཁུ་ཚུར་གྱིས་དངོས་གྲུབ་ཐམས་ཅད་སྟེར་བར་བྱེད་དོ། །རྡོ་རྗེ་སེམས་མ་ལ་སོགས་པའི་ནི་ཁྲོ་བོ་རྡོ་རྗེ་སེམས་དཔའ་དང་། ཁྲོ་གཉེར་དང་། ཆོས་དང་། ཁྲོ་བོ་ལས་ཀྱི་ཕྱག་རྒྱ་ཆེན་པོ་རྣམས་ཀྱི་འབྲས་བུ་གང་ཡིན་པ་དེ་
ཉིད་ཀྱི་ཡང་ཡིན་ནོ། །རྡོ་རྗེ་སྒེག་མོ་ལ་སོགས་པ་ནས་རྡོ་རྗེ་འབེབས་པའི་བར་དུ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གསུངས་པའི་འབྲས་བུ་ཉིད་ཡིན་ནོ། །དེ་ལྟར་ཕྱག་རྒྱ་ཆེན་པོ་བསྟན་ནས། ད་ནི་དམ་ཚིག་གི་ཕྱག་རྒྱའི་མཚན་ཉིད་ནི་དེ་ནས་ཞེས་བྱ་བ་ལ་སོགས་པ་སྨོས་ཏེ། རྡོ་རྗེ་ནི་རྡོ་རྗེ་
ཧཱུཾ་མཛད་ལ་སོགས་པའི་དམ་ཚིག་འཛིན་པའི་ཕྱག་རྒྱ་ནི་དམ་ཚིག་གི་ཕྱག་རྒྱ་ཡིན་ནོ། །དེ་དག་བཅིང་བ་ནི་བཅིང་བའི་མཚན་ཉིད་བཤད་པའོ། །རྡོ་རྗེ་གཉིས་ལས་བྱུང་བ་ནི། །དམ་ཚིག་མཆོག་ཏུ་གྲགས་པ་ཡིན། །ཞེས་བྱ་བ་ནི། རྡོ་རྗེ་གཉིས་ནི་རྡོ་རྗེ་ཁུ་ཚུར་གཉིས་ཏེ། དེ་ལས་བྱུང་བ་ནི་

སྐྱེས་པའོ། །དམ་ཚིག་མཆོག་ནི་དམ་ཚིག་གི་ཕྱག་རྒྱའོ། །གྲགས་པ་ནི་བཤད་པའོ། །དེ་དག་གི་དམ་ཚིག་མཆོག་བཅིང་བ་བཤད་པའོ། །ཁྱད་པར་ཅི་ལྟ་བུ་ཞིག་ཅེ་ན། ཁྲོ་བོའི་བཅིང་བ་ཞེས་བྱ་བ་སྨོས་ཏེ། ཁྲོས་ནས་བཅིང་བ་ནི་ཁྲོ་བོའི་བཅིང་བ་སྟེ། ཁྲོ་བོས་བཅིངས་པས་ན་ཁྲོ་བོའི་
བཅིང་བའོ། །བླ་ན་མེད་ཅེས་བྱ་བ་ནི་ཀུན་ནས་མཆོག་ཏུ་གྱུར་པའོ། །ལག་ངར་རྡོ་རྗེར་བྱས་ནས་སུ། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ཏེ། གཡོན་པའི་རྡོ་རྗེ་ཁུ་ཚུར་སྙིང་གའི་གཡས་ཕྱོགས་སུ་ཁ་ཐུར་དུ་བསྟན་ལ་བཟུང་ནས། གཡས་པའི་རྡོ་རྗེ་ཁུ་ཚུར་གཡོན་པའི་མཁྲིག་མའི་སྟེང་དུ་བཞག་
ནས་ཁ་ཐུར་དུ་བསྟན་ཏེ་སྙིང་གར་གཡོན་ཕྱོགས་སུ་གཞག་པ་འདི་ནི་ལག་ངར་རྡོ་རྗེར་བྱས་པའོ། །ལག་ངར་རྡོ་རྗེར་བྱས་པ་དེ་ཉིད་ཀྱིས། །མཐེའུ་ཆུང་ལྕགས་ཀྱུར་བཅིང་བར་བྱ། །ཞེས་བྱ་བ་ནི་མཐེའུ་ཆུང་གཉིས་ལྕགས་ཀྱུར་བྱས་ལ། ཕན་ཚུན་ལུ་གུ་རྒྱུད་དུ་སྦྲེལ་བར་བྱས་པ་ནི་མཐེའུ་ཆུང་ལྕགས་
ཀྱུར་བཅིང་བར་བྱས་པ་ཁམས་གསུམ་རྣམ་པར་རྒྱལ་བའི་ཕྱག་རྒྱར་འགྱུར་རོ། །ཅི་དེ་ཙམ་གྱིས་སམ་ཞེ་ན་མ་ཡིན་ཏེ། མཛུབ་མོ་གཉིས་ཀྱིས་བསྡིགས་པ་ན། །ཞེས་བྱ་བ་སྨོས་ཏེ། མཛུབ་མོ་གཉིས་བསྒྲེངས་ནས་གང་གི་ཚེ་བསྡིགས་པ་ཡིན་པ་དེའི་ཚེ་འཇིག་རྟེན་གསུམ་ལས་རྣམ་པར་
རྒྱལ་བ་ཞེས་བྱ་བར་བལྟ་བར་བྱའོ། །འདི་སྐད་སྟོན་པ་ཡིན་ཏེ། གཡོན་པའི་རྡོ་རྗེ་ཁུ་ཚུར་སྙིང་གར་ཁ་ཐུར་དུ་བསྟན་པའི་མཁྲིག་མ་གཡས་པའི་རྡོ་རྗེ་ཁུ་ཚུར་ཁ་ཐུར་དུ་བསྟན་པའི་མཁྲིག་མ་བཞག་སྟེ། མཐེའུ་ཆུང་གཉིས་ལུ་གུ་རྒྱུད་དུ་སྦྲེལ་ནས་མཛུབ་མོ་བསྒྲེངས་ཏེ་སྡིགས་མཛུབ་ཏུ་བྱས་
ནས་འཛིན་པ་ནི། རྣམ་པར་སྣང་མཛད་དང་། རྡོ་རྗེ་ཧཱུཾ་མཛད་དང་། རིན་པོ་ཆེ་དང་། ཆོས་དང་། ལས་ཀྱི་ཧཱུཾ་མཛད་རྣམས་ཀྱི་དམ་ཚིག་གི་ཕྱག་རྒྱ་འཇིག་རྟེན་གསུམ་ལས་རྣམ་པར་རྒྱལ་བ་ཞེས་བྱ་བ་འདི་ཉིད་ཀྱང་ཡིན་ལ་ཕྱིས་ཀྱང་བཤད་པར་བྱའོ། །དེ་བཞིན་མཛུབ་མོ་ངོས་སྦྱར་ཏེ། ཞེས་བྱ་བ་ནི། ཁམས་
གསུམ་རྣམ་པར་རྒྱལ་བའི་ཕྱག་རྒྱ་དེ་ཉིད་མཛུབ་མོ་གཉིས་ཕན་ཚུན་ལྟོ་སྦྱར་ནས་རྡོ་རྗེ་སེམས་མའི་གནས་སུ་རྡོ་རྗེ་སེམས་མའི་ཕྱག་རྒྱར་འགྱུར་རོ། །ནོར་བུ་འདྲ་བར་རབ་ཏུ་དགུག །ཅེས་བྱ་བ་ནི་དེ་ཉིད་ཀྱིས་ཞེས་དབང་དུ་བྱེད་པ་དང་སྦྱར་རོ། །མཛུབ་མོ་གཉིས་པོ་དེ་ཉིད་ཀྱི་ནོར་བུ་འདྲ་བར་བྱས་ནས་རྡོ་རྗེ་རིན་ཆེན་མའི་

གནས་སུ་རྡོ་རྗེ་རིན་ཆེན་མར་འགྱུར་རོ། །གུང་མོ་མཉམ་བསྒྲེང་པདྨར་བྱ། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱའི་མཛུབ་མོ་དང་གུང་མོ་བསྒྲེངས་ནས། རྒྱབ་ཀྱི་ཆ་ཕན་ཚུན་དུ་སེན་མོ་སྦྱར་ཏེ་པདྨའི་འདབ་མ་འདྲ་བར་བྱས་ནས། རྡོ་རྗེ་ཆོས་མའི་གནས་
སུ་རྡོ་རྗེ་ཆོས་མར་འགྱུར་རོ། །གུང་མོ་མཛུབ་མོ་གཉི་གར་བསྡིགས། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ། ཇི་སྐད་བཤད་པའི་གཡོན་པའི་མཛུབ་མོ་དང་གུང་མོ་བསྒྲེངས་ཏེ་ཕན་ཚུན་སྦྱར་ནས་གཡས་པའི་མཛུབ་མོ་དང་། གུང་མོ་ཡང་སྦྱར་བར་བྱ་བ་ནི་རྡོ་རྗེ་
ལས་མའི་གནས་སུ་རྡོ་རྗེ་ལས་མའི་དམ་ཚིག་གི་ཕྱག་རྒྱར་འགྱུར་རོ། །མཛུབ་མོ་གཉི་ག་རྡོ་རྗེར་བྱ། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཉིད་མཛུབ་མོ་གཉིས་ཁ་སྦྱར་ནས་ཁབ་ལྟར་བྱས་པ་ནི། ཁྲོ་བོ་རྡོ་རྗེ་སེམས་དཔའིའོ། །གཡས་པ་ལྕགས་ཀྱུར་དགུག་པར་བྱ། །ཞེས་
བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཉིད་ཀྱི་གཡས་པའི་མཛུབ་མོ་བསྐུམས་ནས་ལྕགས་ཀྱུ་ལྟར་བྱས་པ་ནི་ཁྲོ་བོ་རྡོ་རྗེ་རྒྱལ་པོའིའོ། །དེ་ཉིད་ཧཱུཾ་ཞེས་བྱ་བར་འདུད། །ཅེས་བྱ་བ་ནི་ཁྲོ་བོ་རྡོ་རྗེ་རྒྱལ་པོའི་ཕྱག་རྒྱ་ལས་གཡས་པའི་མཛུབ་མོའི་ལྕགས་ཀྱུས་གཡོན་པའི་ལྕགས་ཀྱུ་འདྲེན་པ་ནི་ཁྲོ་བོ་
རྡོ་རྗེ་ཆགས་པའིའོ། །ལེགས་པ་བཞིན་པ་དེ་བཞིན་ཏེ། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཉིད་ཀྱིས་མཛུབ་མོ་དང་། མཐེ་བོས་སེ་གོལ་བརྡེབས་པ་ནི་ཁྲོ་བོ་རྡོ་རྗེ་ལེགས་པའིའོ། །མཛུབ་གཉིས་དཔྲལ་བར་ཉེ་བར་བཞག །ཅེས་བྱ་བ་ནི་ཁམས་གསུམ་རྣམ་པར་རྒྱལ་བའི་
ཕྱག་རྒྱ་མཛུབ་མོའི་རྩེ་མོ་གཉིས་མཛོད་སྤུར་གཞག་པ་ནི་ཁྲོ་བོ་ཁྲོ་གཉེར་གྱིའོ། །སྙིང་གར་མཛུབ་མོ་ཉི་མ་བསྐོར། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱས་སྙིང་གའི་ཕྱོགས་སུ་བཞག་ནས་ཉི་མའི་དཀྱིལ་འཁོར་ལྟར་བསྐོར་བ་ནི་ཁྲོ་བོ་རྡོ་རྗེ་ཉི་མའིའོ། །ལག་ངར་བརྐྱང་སྟེ་སྤྱི་
བོར་གཞག །ཅེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཉིད་ལས་ལག་ངར་གཉིས་བརྐྱང་སྟེ་སྤྱི་བོར་གཞག་པ་ནི་ཁྲོ་བོ་རྡོ་རྗེ་དབལ་གྱིའོ། །མཛུབ་མོ་ཁ་ནས་དགོད་ལྟར་བྱ། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཉིད་ལས་མཛུབ་མོའི་རྩེ་མོ་གཉིས་ཁར་གཞག་

པའི་ཚུལ་དུ་བྱེད་པ་ནི་ཁྲོ་བོ་རྡོ་རྗེ་བཞད་པའིའོ། །མཛུབ་མོའི་སེན་མོ་སྦྱར་བར་བྱ། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཉིད་ལས་མཛུབ་མོ་གཉིས་ཀྱི་སེན་མོ་སྦྱར་བ་ནི་ཁྲོ་བོ་རྡོ་རྗེ་ཆོས་ཀྱིའོ། །གཡས་པས་རལ་གྲི་བཅངས་པའོ། །ཞེས་བྱ་བ་ནི་ཁམས་གསུམ་རྣམ་པར་
རྒྱལ་བའི་ཕྱག་རྒྱ་ཉིད་ལས་གཡས་པའི་མཛུབ་མོ་རྡོ་རྗེ་ཁུ་ཚུར་གྱི་སྦྱོར་བ་ལས་རལ་གྲི་འཛིན་པའི་ཚུལ་དུ་བྱེད་པ་ནི་ཁྲོ་བོ་རྡོ་རྗེ་རྣོན་པོའིའོ། །གུང་མཛུབ་མཉམ་བསྒྲེང་འཁོར་ལོ་ཡི། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཉིད་ལས། གུང་མོ་དང་མཛུབ་མོར་བཅས་པ་བསྒྲེངས་ནས།
རྡོ་རྗེ་ཐལ་མོའི་ཚུལ་གྱིས་དེའི་དབུས་མ་བཅིངས་པ་ནི་ཁྲོ་བོ་རྡོ་རྗེ་རྒྱུའིའོ། །ཁ་ཡི་ནང་ནས་དབྱུང་བར་བྱ། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ལས། ཚིག་འབྱིན་པའི་ཚུལ་གྱིས་ཁའི་ཕྱོགས་སུ་གྱེན་དུ་འདྲེན་པ་ནི་ཁྲོ་བོ་རྡོ་རྗེ་སྨྲ་བའིའོ། །མཛུབ་མོ་གུང་མོ་རྡོ་རྗེར་བྱ། །
ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ལས། གཡས་པའི་གུང་མོ་དང་མཛུབ་མོ་གཉིས་སྦྱར་ནས་བསྒྲེང་སྟེ། གཡོན་པའི་མཛུབ་མོ་དང་གུང་མོ་གཉིས་ཁབ་ལྟར་བྱས་པ་ནི་ཁྲོ་བོ་རྡོ་རྗེ་ལས་ཀྱིའོ། །མཛུབ་མོ་གཉིས་ནི་མགུལ་པར་བསྐོར། །ཞེས་བྱ་བ་ནི་ཁམས་
གསུམ་རྣམ་པར་རྒྱལ་བའི་ཕྱག་རྒྱ་ཉིད་ལས་མཛུབ་མོ་གཉིས་ཀྱི་མགྲིན་པ་རྐམ་པའི་ཚུལ་དུ་འཛིན་པ་ནི་ཁྲོ་བོ་རྡོ་རྗེ་སྲུང་བའིའོ། །མཛུབ་མོ་གཉིས་ནི་མཆེ་བ་ཆེ། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཉིད་ལས། མཛུབ་མོ་གཉིས་བརྐྱང་ནས་མཆེ་བའི་ཚུལ་དུ་ཁར་
འཛིན་པ་ནི་ཁྲོ་བོ་རྡོ་རྗེ་གནོད་སྦྱིན་གྱིའོ། །མཛུབ་མོ་བཀུག་པ་རྡོ་རྗེ་བཅིངས། །ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ལས། གཡས་པའི་མཛུབ་མོ་རང་གི་མཐེ་བོའི་རྒྱབ་སྦྱར་ལ། གཡོན་པའི་མཛུབ་མོའི་ཡང་དེ་བཞིན་དུ་བྱས་པ་ནི། ཁྲོ་བོ་རྡོ་རྗེ་ཁུ་ཚུར་གྱི་དམ་ཚིག་གི་
ཕྱག་རྒྱའོ། །རྡོ་རྗེ་སྒེག་མོ་ལ་སོགས་པ། །སེམས་མའི་ཕྱག་རྒྱ་དེ་ཉིད་ཧཱུཾ། །ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་སྒེག་མོ་ལ་སོགས་པའི་དམ་ཚིག་གི་ཕྱག་རྒྱ་བསྟན་པ་གང་ཡིན་པ་དེ་ཉིད་ཀྱིས་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོར་ཡང་། མཛུབ་མོ་

གཉིས་ཀྱི་སྡིགས་མཛུབ་བཅིང་བའི་སྦྱོར་བས་དམ་ཚིག་ཕྱག་རྒྱར་འགྱུར་ཏེ། རྡོ་རྗེ་བསྡམས་པ་དེ་ཉིད་བཅིངས་ལ། དེ་ནས། སྙིང་གར་མཐེ་བོ་བསྙམས་ལ་གཞག །རབ་ཏུ་བརྐྱང་བ་ཕྲེང་བའོ། །ཐལ་མོ་སྦྱར་ཏེ་ཁ་ནས་དབྱུང་། །གར་ལས་ཐལ་སྦྱར་སྤྱི་བོར་གཞག །
རྡོ་རྗེ་བཅིང་བ་ཐུར་དུ་བླུགས། །རང་གི་ཐལ་སྦྱར་གྱེན་དུ་གཏོར། །རྡོ་རྗེ་བསྙམས་ཏེ་རབ་ཏུ་བསྡམ། །རབ་ཏུ་བརྐྱང་ནས་བྱུང་བའོ། །མཛུབ་མོ་གཅིག་ཏུ་བཀུག་པ་དང་། །མཐེ་བོང་གཉིས་ནི་མདུད་པ་དང་། །མཐེ་བོང་མཛུབ་མོ་གདུ་བུར་བཅིང་། །རྡོ་རྗེ་བཅིང་བ་མཛུབ་མོར་བསྡམ། །ཞེས་བྱ་
བའོ་ཞེས་ཆོས་ཀྱི་ཕྱག་རྒྱ་སྟེ། ཧཱུཾ་ཞེས་བྱ་བར་ལྷན་ཅིག་གོ། །ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཉིད་དུ་སྒེག་མོ་ལ་སོགས་པའི་ཆོས་ཀྱི་ཕྱག་རྒྱ་གསུངས་པ་གང་ཡིན་པ་དེ་ཉིད་འདིར་ཡང་ཡི་གེ་ཧཱུཾ་དང་བཅས་པས་སྒེག་མོ་ལ་སོགས་པའི་ཕྱག་རྒྱར་འགྱུར་ཏེ། དེས་ན་དེ་ཡང་མ་
ཧཱ་རཱ་ཏི་ཧཱུཾ། རཱུ་པ་ཤོ་པེ་ཧཱུཾ། ཤྲོ་ཏ་སཽ་ཁྱ་ཧཱུཾ། སརྦྦ་པཱུ་ཛ་ཧཱུཾ། པྲ་ཧ་ལ་ད་ནི་ཧཱུཾ། ཕ་ལ་ག་མི་ཧཱུཾ། སུ་ཏེ་ཛྭ་གྲི་ཧཱུཾ། སུ་གནྡྷི་གི་ཧཱུཾ། ཨ་ཡ་ཧི་ཛཿཧཱུཾ། ཨ་ཧི་ཧཱུཾ་ཧཱུཾ་ཧཱུཾ། ཧེ་སྥོ་ཊ་བཾ་ཧཱུཾ། གྷཎྜ་ཨཿཨཱཿཧཱུཾ་ཞེས་བྱ་བ་དང་། རྡོ་རྗེ་སེམས་མ་ལ་སོགས་པའི་ཡང་ཧཱུཾ་ཏྲཱཾ་ཧྲཱིཿཨཿཞེས་བྱ་བར་
བལྟ་བར་བྱའོ། །རྡོ་རྗེ་རྣམས་ཀྱི་དམ་ཚིག་སྟེ། ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་དེའི་ལས་ཀྱི་ཕྱག་རྒྱར་འགྱུར་ཏེ། རྡོ་རྗེ་རིགས་ནི་ཆེན་པོ་ཡི། །ལས་ཀྱི་ཕྱག་རྒྱ་མདོར་བསྡུས་ནས། །ཞེས་བྱ་བ་ནི་མདོར་བསྡུས་པའི་སྡོམ་པའོ། །ཁྲོ་བོའི་ཁུ་ཚུར་གཉིས་སུ་
བཤད། །ཅེས་བྱ་བ་ནི་བཅོམ་ལྡན་འདས་ཁྲོ་བོ་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་དེ་གཉིས་སུ་བྱས་པའི་རྡོ་རྗེ་ཁུ་ཚུར་གཉིས་སུ་འགྱུར་ཏེ། དེ་ནས་རྡོ་རྗེ་འགྱིང་བ་ལ་སོགས་པའི་ཚུལ་གྱིས་སྦྱོར་བར་བྱའོ། །དེའི་དོན་ནི་འདི་ཡིན་ཏེ་བཅོམ་ལྡན་འདས་རྡོ་རྗེ་སེམས་དཔའི་རྡོ་རྗེ་བསྙེམས་པའི་
ཚུལ་དུ་བྱས་ལ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་དེའི་ལས་ཀྱི་ཕྱག་རྒྱར་གསུངས་སོ། །སོགས་པ་སྨོས་པ་ནི་རྡོ་རྗེ་ལྕགས་ཀྱུ་འཛིན་པས་གནས་པ་ལ་སོགས་པ་གར་ཡིན་པ་དེ་ནི་རྡོ་རྗེ་འགྱིང་བ་ལ་སོགས་པའི་ཚུལ་གྱིས་སོ། །ཚུལ་ནི་རྡོ་རྗེ་བསྙེམས་པ་ལ་སོགས་པའི་ཚུལ་གྱིས་

རྡོ་རྗེ་བསྙེམས་མ་ལ་སོགས་པའི་ལས་ཀྱི་ཕྱག་རྒྱའི་སྦྱོར་བས་སོ། །བཤད་ཅེས་བྱ་བ་ནི་བསྟན་པས་སོ། །ཇི་ལྟར་བཤད་ཅེ་ན། གང་དང་གང་གི་ཕྱག་རྒྱ་རྣམས། །ལས་ཀྱི་ཕྱོགས་ནི་གང་དུ་བ། །དེ་དང་དེར་ནི་བསྒྱུར་ནས་ཀྱང་། །ཕྱག་རྒྱ་དེར་ནི་སྦྱར་བར་བྱ། །ཞེས་གསུངས་སོ། །
རྡོ་རྗེ་སེམས་དཔའ་ལ་སོགས་པ་གང་དང་གང་གི་ལས་ཀྱི་ཕྱག་རྒྱ་གང་དང་གང་དག་བཤད་པའི་གནས་དེ་དང་དེ་རྣམས་སུ་ལས་ཀྱི་ཕྱག་རྒྱ་ཕྱོགས་དེ་དང་དེ་རྣམས་སུ་བྱའོ། །ཇི་ལྟར་འགྱུར་ཞེ་ན། ལས་ཞེས་བྱ་བ་སྨོས་ཏེ། བྱང་ཆུབ་ཏུ་སེམས་བསྐྱེད་པ་ལ་སོགས་པའི་ལས་རྣམས་བསྐྱེད་
པའི་རྒྱུ་ཡིན་ནོ་ཞེས་བྱ་བའི་དོན་ཏོ། །དེ་དང་དེར་ནི་བསྒྱུར་ནས་ཀྱང་། །ཞེས་བྱ་བ་ནི་དེ་དང་དེ་ཉིད་དུ་གར་གྱི་སྦྱོར་བ་དེ་བྱའོ། །འདི་སྐད་སྟོན་པ་ཡིན་ཏེ། ལས་ཀྱི་ཕྱག་རྒྱ་ཐམས་ཅད་ནི། །རྡོ་རྗེ་ཁུ་ཚུར་གཉིས་ལས་འབྱུང་སྟེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བཅིང་བའི་མཚན་
ཉིད་གསུངས་པ་ལས། ཁྱད་པར་ནི་འདི་ཡོད་དེ། ལངས་ནས་གར་བྱ་བ་ལས་འབྱུང་བའོ། །དེ་ལ་རྡོ་རྗེ་དབྱིངས་སུ་གསུངས་པའི་ཕྱག་རྒྱ་ནི་འདི་ཡིན་ཏེ། གཡོན་པའི་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་ཆེ། །སངས་རྒྱས་བྱང་
ཆུབ་སྦྱིན་བྱེད་པའི། །བསྒྱིངས་བཅས་གསོར་བ་གཉིས་ཀ་ཡིས། །ལྕགས་ཀྱུ་འཛིན་ལྟར་གནས་པ་དང་། །མདའ་འཕང་པ་ཡི་ཚུལ་དང་ནི། །ལེགས་སོ་ཞེས་པ་སྙིང་གར་གཞག །དབང་བསྐུར་བ་ནི་རྡོ་རྗེ་གཉིས། །སྙིང་གར་ཉི་མ་བརྟན་པར་བྱ། །གཡོན་པ་ལ་ནི་གྲུ་མོ་གཟུགས། །
དེ་བཞིན་ཁ་ཕྱོགས་བསྐོར་བར་བྱ། །གཡས་པ་ཡིས་ནི་གཡོན་པ་དབྱེ། །སྙིང་གར་གཡོན་པ་རལ་གྲི་མདུད། །མགལ་མེའི་འཁོར་ལོ་བསྐོར་བ་དང་། །རྡོ་རྗེ་གཉིས་ཀ་ཁ་ནས་དབྱུང་། །རྡོ་རྗེ་གར་བསྐོར་བཀྲོལ་བ་ཡི། །ཐལ་མོ་དགྲམ་པ་སྤྱི་བོར་གཞག །གོ་ཆ་མཐེའུ་ཆུང་
མཆེ་བ་དང་། །ཁུ་ཚུར་གཉིས་ནི་མནན་པའོ། །རྡོ་རྗེ་འགྱིང་བའི་ཚུལ་གྱིས་ནི། །བསམ་པ་གཡོས་པས་འདུད་པར་བྱ། །རྡོ་རྗེ་བཅིང་དང་ཁ་ནས་དབྱུང་། །རྡོ་རྗེ་གར་ནི་བསྐོར་བ་ཡིན། །རྡོ་རྗེ་ཁུ་ཚུར་ཚུལ་གྱིས་ནི། །བདུག་པ་ལ་སོགས་དེ་བཞིན་སྦྱིན། །སངས་རྒྱས་ཀུན་ལ་

མཆོད་པ་ཡི། །ཕྱག་རྒྱའི་མཆོད་པ་བྱེད་པ་པོ། །མཛུབ་མོ་ལྕགས་ཀྱུ་བཅིང་བ་ནི། །མཐེ་ཆུང་ལས་ཏེ་ལྕགས་ཀྱུ་ཆེ། །མཁྲིག་མ་མདུད་པ་མཛུབ་གཉིས་གདབ། །རྒྱབ་གཉིས་ཀྱང་ནི་བསྙམས་ཏེ་མནན། །ཞེས་བྱ་བ་ལས། འདིར་ཁྱད་པར་ནི་འདི་ཡིན་པར་བལྟ་བར་བྱ་སྟེ།
རྡོ་རྗེ་ཧཱུཾ་མཛད་དང་། ཁྲོ་བོ་རྡོ་རྗེ་སེམས་དཔའ་དང་། རྡོ་རྗེ་སེམས་མ་རྣམས་ནི་རྡོ་རྗེ་བསྙེམས་མ་ལས་ལག་པ་གཉིས་ཀ་འདེགས་པའི་ཚུལ་དུ་བྱེད་པའོ། །རིན་ཆེན་ཧཱུཾ་མཛད་དང་། ཁྲོ་བོ་རྡོ་རྗེ་ཁྲོ་གཉེར་དང་། རྡོ་རྗེ་རིན་ཆེན་མ་རྣམས་ནི་རྡོ་རྗེ་གཉིས་དབང་བསྐུར་བའི་ཚུལ་དུ་བྱེད་པའོ། །ཆོས་ཀྱི་ཧཱུཾ་
མཛད་དང་། ཁྲོ་བོ་རྡོ་རྗེ་ཆོས་དང་། རྡོ་རྗེ་ཆོས་མ་རྣམས་ནི་གཡས་པས་གཡོན་པ་འབྱེད་པའི་ཚུལ་དུ་བྱེད་པའོ། །ལས་ཀྱི་ཧཱུཾ་མཛད་དང་། ཁྲོ་བོ་རྡོ་རྗེ་ལས་དང་། རྡོ་རྗེ་ལས་མ་རྣམས་ནི་རྡོ་རྗེ་གར་བསྐོར་བ་བཀྲོལ་བའི་ཐལ་མོ་སྦྱར་བ་སྤྱི་གཙུག་ཏུ་གཞག་པ་ནི་ལས་ཀྱི་ཕྱག་རྒྱར་འགྱུར་རོ། །དེ་ལ་གཞན་
དག་ནི་མི་བསྐྱོད་པ་ལ་སོགས་པའི་ལས་ཀྱི་ཕྱག་རྒྱ་ཉིད་རྡོ་རྗེ་ཧཱུཾ་མཛད་ལ་སོགས་པ་རྣམས་ཀྱིར་ཡང་འགྱུར་ཏེ། གང་གི་ཕྱིར་དེ་མི་བསྐྱོད་པ་ལ་སོགས་པའི་གནས་ན་གནས་པའི་ཕྱིར་རོ་ཞེས་ཟེར་རོ། །དེ་ནི་མི་རིགས་ཏེ། གང་གི་ཕྱིར་དེ་མི་བསྐྱོད་པ་ལ་སོགས་པའི་གནས་ལ་གནས་སུ་ཟིན་ཀྱང་། འཁོར་
ལོས་སྒྱུར་བ་ཡིན་པའི་ཕྱིར། མི་བསྐྱོད་པ་ལ་སོགས་པའི་རང་བཞིན་ནི་མ་ཡིན་ནོ། །དེ་ཉིད་རྡོ་རྗེ་འཁོར་ལོས་སྒྱུར་བའི་ལས་ཀྱི་ཕྱག་རྒྱ་ཡིན་པའི་ཕྱིར། དེ་བཞིན་གཤེགས་པའི་ལས་ཀྱི་ཕྱག་རྒྱར་རྣམ་པར་མི་གཞག་པའོ། །ཇི་ལྟར་འགྲོ་བ་འདུལ་བ་དང་། དོན་ཐམས་ཅད་གྲུབ་པར་ནི་མི་
བསྐྱོད་པའི་གནས་ན་གནས་པ་ཡང་། འཁོར་ལོས་སྒྱུར་བའི་རང་བཞིན་ཡིན་པས་འཁོར་ལོས་སྒྱུར་བའི་ཕྱག་རྒྱ་ཡིན་པ་བཞིན་ནོ། །དཔལ་མཆོག་དང་པོ་ལ་སོགས་པའི་རྒྱུད་རྣམས་ལ། རྡོ་རྗེ་སེམས་དཔའ་ལ་སོགས་པའི་ལས་ཀྱི་ཕྱག་རྒྱ་ཁོ་ན་རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་
གསུངས་པས། ཡིད་གཉིས་མི་བྱའོ། །དེ་ལྟར་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོར་གསུངས་པའི་དངོས་གྲུབ་སྒྲུབ་པའི་ཕྱག་རྒྱ་རྣམས་བསྟན་ནས། ད་ནི་རྡོ་རྗེ་སེམས་དཔའ་ལ་སོགས་པ་ནས། ཁྲོ་བོ་རྡོ་རྗེ་འབེབས་པའི་བར་དུ་ཁྲོ་བོ་ཐམས་ཅད་ཀྱི་བཟླས་པ་བྱེད་པ་ན་

ཡང་། དཔལ་རྡོ་རྗེ་ཧཱུཾ་མཛད་དུ་བྱས་ལ་ལས་རྣམས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར་དེ་ནས་འདིར་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལ་སོགས་པ་སྤྱིའི་ཕྱག་རྒྱ་བཅིང་བ་བཤད་དོ་ཞེས་བྱ་བ་སྨོས་ཏེ་སྤྱི་ནི་ཁྲོ་བོའི་ལྷ་ཐམས་ཅད་ཀྱི་ཐུན་མོང་ངོ་། །འཇིག་
རྟེན་གསུམ་རྒྱལ་ཕྱག་རྒྱ་ནི། །ཇི་སྐད་དུ་བཤད་པའི་མཚན་ཉིད་དོ། །རྡོ་རྗེ་མཛུབ་མོའི་དམ་ཚིག་གོ། །ཞེས་བྱ་བ་ནི་རྡོ་རྗེ་ཧཱུཾ་མཛད་བཞི་པོ་དེའི་རྡོ་རྗེ་མཛུབ་མོའི་དམ་ཚིག་གོ། །དེ་ཉིད་འཆད་པ་འདི། རྡོ་རྗེ་ཧཱུཾ་ཞེས་སྔགས་ཀྱིས་ཏེ། །ཞེས་བྱའོ། །དེ་ཡང་འདི་སྐད་སྟོན་པ་ཡིན་ཏེ། རྡོ་རྗེ་ཧཱུཾ་མཛད་
ཀྱི་སྔགས་དང་། ཁམས་གསུམ་རྣམ་པར་རྒྱལ་བའི་ཕྱག་རྒྱ་གང་ཡིན་པ་དེས་འདི་དང་གང་ཡང་རུང་བའི་སྔགས་བཟླས་པའི་སྦྱོར་བས་སྒྲུབ་པ་པོ་མངོན་པར་འདོད་པའི་ལས་ཐམས་ཅད་སྒྲུབ་པར་བྱེད་དོ། །མཐེའུ་ཆུང་མཛུབ་མོ་ལྕགས་ཀྱུར་བཅས། །ཞེས་བྱ་བ་ནི། གཡོན་པའི་རྡོ་རྗེ་ཁུ་ཚུར་མདུན་དུ་
ཁ་ཐུར་དུ་བསྟན་ལ། དེའི་སྟེང་དུ་གཡས་པ་གན་རྐྱལ་དུ་བཞག་སྟེ་མཐེའུ་ཆུང་གཉིས་ལྕགས་སྒྲོག་ཏུ་བྱས་ལ། སྡིགས་མཛུབ་གཉིས་པ་བཅིང་བ་ནི་ཁྲོ་བོ་འདོད་པའི་རྒྱལ་པོའི་ཕྱག་རྒྱར་འགྱུར་ཏེ། ཧཱུཾ་ཊཀྐི་ཛཿཞེས་བྱ་བ་འདི་དང་། ལྷ་ཆེན་པོ་ལ་སོགས་པའི་འཇིག་རྟེན་པའི་འཁོར་ཐམས་ཅད་དགུག་
པར་བྱའོ། །ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ལ། བདག་ཉིད་རྡོ་རྗེ་ཧཱུཾ་མཛད་དུ་བསྐྱེད་པར་བྱའོ་ཞེས་བལྟ་བར་བྱའོ། །རིག་པ་དམ་པ་ཐམས་ཅད་ཀྱི། །འཇིག་རྟེན་གསུམ་ལས་རྒྱལ་ཞེས་བཤད། །ཅེས་བྱ་བ་ནི་རིག་པ་དམ་པ་ཐམས་ཅད་ནི། རྣམ་པར་སྣང་མཛད་དང་།
རྡོ་རྗེ་ཧཱུཾ་མཛད་དང་། རིན་ཆེན་ཧཱུཾ་མཛད་དང་། ཆོས་ཀྱི་ཧཱུཾ་མཛད་དང་། ལས་ཀྱི་ཧཱུཾ་མཛད་དོ། །དེ་དག་ལས་ཁམས་གསུམ་རྣམ་པར་རྒྱལ་བའི་ཕྱག་རྒྱའི་མཆོག་ཏུ་བཤད་ཅེས་བྱ་བའི་དོན་ཏོ། །གཞན་དག་ནི་རིག་པ་དམ་པའི་ཕྱག་རྒྱ་ཐམས་ཅད་བསྐྱེད་པའི་རྒྱུ་ནི་ཁམས་གསུམ་རྣམ་པར་རྒྱལ་བར་
བཤད་དོ་ཞེས་སེམས་ན་དེ་ཡང་མི་རིགས་ཏེ། གཞན་དག་ནི། དེ་བཞིན་མཛུབ་མོ་ངེས་སྦྱར་ལ། །ཞེས་བྱ་བ་ལ་སོགས་པ་གང་ཡིན་པ་འདི་ཉིད་ཀྱིས་གཙོ་བོར་བཤད་དོ་ཞེས་ཟེར་རོ། །ཐམས་ཅད་ཀྱང་ནི་གནོན་པ་སྟེ། །ཞེས་བྱ་བ་ནི་ལྷ་ཆེན་པོ་ལ་སོགས་པའོ། །འདི་སྐད་སྟོན་པ་ཡིན་ཏེ།

འདོད་པའི་རྒྱལ་པོས་ཁམས་གསུམ་པ་བཀུག་ནས་ཁམས་གསུམ་རྣམ་པར་རྒྱལ་བ་བཅིངས་ཏེ། ཧཱུཾ་ཞེས་བྱ་བས་མནན་པར་བྱའོ། །དེ་བཞིན་ལས་རྣམས་ཐམས་ཅད་བྱེད། །ཅེས་བྱ་བ་ནི་ཇི་ལྟར་ཁམས་གསུམ་རྣམ་པར་རྒྱལ་བས་མནན་པ་དེ་བཞིན་དུ་ལས་ཐམས་ཅད་ཀྱང་
བྱ་སྟེ། དེ་སྐད་དུ་ཡང་། འཇིག་རྟེན་དང་འཇིག་རྟེན་ལས་འདས་པའི་རྡོ་རྗེའི་རྒྱུད་ལས། ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ལ། ལས་བརྒྱ་རྩ་བརྒྱད་བསྒྲུབ་པར་བྱའོ། །འདི་ལྟ་སྟེ། གནོན་པས་འདུལ་བ་རྣམས་ལ་གནོན་པ་དང་བསླང་བས་འདུལ་བ་རྣམས་ལ་སློང་བ་དང་། བཏང་
བས་འདུལ་བ་རྣམས་ལ་བཏང་བ་དང་། བཀུག་པས་འདུལ་བ་རྣམས་ལ་འགུགས་པར་བྱེད་དོ་ཞེས་བྱ་བ་ལ་སོགས་པ་གསུངས་སོ། །རྡོ་རྗེ་མཛུབ་མོ་གཉིས་ལེགས་པར། །རབ་མཉམ་བཞག་ལ་བསྙམས་ནས་ནི། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་ཀྱི་མཛུབ་མོ་གཉིས་བསླངས་ཏེ་བརྐྱང་ནས་རྩེ་
མོ་སྦྱར་ལ་འོག་ཏུ་བསྟན་ལ་འདེགས་པ་ནི་རྡོ་རྗེ་སློང་བའི་ཕྱག་རྒྱའོ། །རྡོ་རྗེ་མཛུབ་གཉིས་ལེགས་པར་ཡང་། །རྡོ་རྗེ་བཅིང་བས་བཅིངས་ནས་ནི། །ཞེས་བྱ་བ་ནི་ཁུ་ཚུར་གཉིས་ཀྱི་མཛུབ་མོ་གཉིས་ལྕགས་སྒྲོག་ཏུ་སྦྲེལ་ལ་བསྒྱུར་ཏེ། སྤྱི་གཙུག་ཏུ་གཞག་པ་ནི་རྒྱལ་མཚན་གྱི་ཕྱག་རྒྱའོ། །
རྡོ་རྗེ་བཅིང་བ་དམ་བྱས་ཏེ། །མཐེ་བོ་བསྙམས་ལ་ནང་དུ་གཞུག །ཅེས་བྱ་བ་ནི་རྡོ་རྗེ་བསྡམས་པ་བཅིངས་ལ། མཐེ་བོ་བསྙམས་ལ་ནང་དུ་གཞུག་པ་ནི་དམ་ཚིག་གི་རྡོ་རྗེ་ཁུ་ཚུར་གྱི་ཚུལ་གྱིས་མཛུབ་མོ་གཉིས་ཀྱིས་རང་གི་མཐེ་བོའི་རྒྱབ་ཏུ་མནན་ནས། ཕྱག་གཡོན་པས་དྲངས་ཏེ། གཡས་
ཀྱི་ཕྱོགས་སུ་བསྒྲུབ་པར་བྱ་བ་འགུགས་པར་སེམས་པ་འདི་ནི་ཁྲོ་བོའི་ཞབས་འོག་ཏུ་འགུགས་པའི་ཕྱག་རྒྱའོ། །འཇིག་རྟེན་གསུམ་རྒྱལ་བཅིངས་ནས་ནི། །གང་གི་གཟུགས་ལ་རྐང་གཡོན་པས། །ཞེས་བྱ་བ་ནི་ཇི་སྐད་དུ་བཤད་པའི་འཇིག་རྟེན་གསུམ་ལས་རྣམ་པར་རྒྱལ་བ་དེ་བཅིངས་ཏེ།
ལྷ་ཆེན་པོ་ལ་སོགས་པ་བསྒྲུབ་པར་བྱ་བའི་གཟུགས་བརྙན་མནན་ནས། ཨོཾ་བཛྲ་ཨ་ཀྲ་མ་ཧོ་ཞེས་བྱ་བ་དེས་ཅི་འདོད་པའི་ཁྲོ་བོའི་བཟླས་པ་བྱས་ལ། ཟླ་བ་ཕྱེད་སྦྱོར་བ་བྱས་ནས་བསྒྲུབ་པ་བྱས་ན་འགྲུབ་པར་འགྱུར་རོ། །རྡོ་རྗེ་ཕྱག་རྒྱ་གཉིས་བཅིངས་ཏེ། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་ཤིང་ལྗོན་

པ་གཉིས་སུ་བསམས་ཏེ། བསྒྲུབ་པར་བྱ་བ་ལ་བསྣུན་པར་བསམས་ན། རྡོ་རྗེ་ཁུ་ཚུར་དེ་གཉིས་གཅིག་ལ་གཅིག་བསྡམས་ནས། ཨོཾ་བཛྲ་ཨཱ་བེ་ཤ་ཧ་པ་ཏྲཾ་ཏ་ཊ་ཞེས་བརྗོད་པ་དེས་ལྷ་ཆེན་པོ་ལ་སོགས་པ་སེམས་ཅན་ཐམས་ཅད་དབབ་པར་བྱའོ། །དེ་ནས་དེ་རང་གི་ངང་གིས་བདག་ཉིད་ལ་དབབ་
པར་འགྱུར་རོ། །རྡོ་རྗེའི་ཕྱག་རྒྱ་གཉིས་བཅིངས་ཏེ། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ཏེ། མཛུབ་མོ་གཉིས་གོ་ཆ་འཆིང་བའི་ཚུལ་དུ་ཕྱག་བྱའོ། །ཨོཾ་བུདྡྷ་མཻ་ཏྲི་བཛྲ་རཀྵ་ཧཾ། ཞེས་བརྗོད་པ་དེས་ལྷ་ཆེན་པོ་ལ་སོགས་པའི་སེམས་ཅན་རྣམས་སྡུག་བསྔལ་བསལ་བར་བྱ་སྟེ། རང་ངམ་
གཞན་ལ་འདིས་བསྲུང་བ་ནི་འབྲས་བུ་ཡིན་ནོ། །རྡོ་རྗེ་མཐིལ་དུ་བཅིངས་ནས་སུ། །ཞེས་བྱ་བ་ནི་རྡོ་རྗེ་ལག་མཐིལ་དུ་བཅིངས་ནས། མཐེ་བོ་གཉིས་ཀྱིས་ཁྲོས་ནས་དགབ་པར་བྱ་བ་དེ་ཉིད་ཀྱིས་རྡོ་རྗེའི་རིགས་ཆེན་པོ་རྣམས་འགྲུབ་པར་འགྱུར་རོ། །འདི་ཉིད་བཅིངས་པས་འཇིག་རྟེན་གསུམ་གྱི་
འཁོར་ལོ་མ་ལུས་པའི་དམ་ཚིག་འཛིན་པའི་ལས་ཀྱི་དུས་སུའམ། ཨོཾ་བཛྲ