Luận tạng Tây Tạng (Tengyur) — Tập 50

ས་དག་ཏུ། །སྤྲུལ་པ་ཆོས་ཀྱི་སྐུ་དང་ནི། །ལོངས་སྤྱོད་བདེ་ཆེན་གནས་ཞེས་བྱ། །ལྟེ་བར་དྲུག་ཅུ་རྩ་བཞི་ལ། །གསལ་བྱེད་ཡི་གེ་ཉིས་ལྡབ་དགོད། །སྙིང་གར་སྡེ་ཚན་
མང་པོ་བརྒྱད། །མགྲིན་པར་ཨཱ་ལི་བཅུ་དྲུག་དགོད། དུང་ཁང་གི་ནི་གནས་དག་ཏུ། །ཨཱ་ལི་གཉིས་ནི་བཟླས་པར་བྱ། །བདེ་ཆེན་གྱི་ནི་གནས་དག་ཏུ། །ཨ་ཝ་དྷཱུ་ཏཱི་དབུས་སུ་རྒྱུག །ལ་ལ་ནཱ་དང་ར་ས་ནཱ། །གཡས་དང་གཡོན་དུ་རྒྱུག་པ་ཡིན། །དེ་རྣམས་ནང་ན་རྡོ་རྗེ་རླུང་། །ཕྲ་མོ་
དག་ནི་གནས་པ་ཡིན། །དེ་ལ་རྟེན་གྱི་བྱང་ཆུབ་སེམས། །ཉི་མའི་ཟེར་བཞིན་ཁྱབ་པར་གནས། །བདེ་ཆེན་ཚངས་པའི་མཐོངས་ཁུང་ནས། །རྡོ་རྗེ་ནོར་བུ་མཐར་ཐུག་པར། །ཤིན་ཏུ་ཁྱབ་པར་རྒྱས་པ་ཡིན། །གཏུམ་མོ་སྦར་བའི་སྟོབས་ཀྱིས་ནི། །དེ་ཉིད་གསལ་བ་རྒྱས་པ་དང་། །བྱང་
ཆུབ་སེམས་ཀྱང་ཤིན་ཏུ་གསལ། །དེ་ལ་བརྟེན་པའི་བྱང་ཆུབ་སེམས། །མི་འགྱུར་སྟོབས་འཛིན་ས་ལེགས་ལ། །བདེ་ཆེན་འཁོར་ལོའི་གནས་དག་ཏུ། །དགའ་བ་སྐྱེས་པ་བུམ་པའི་དབང་། །འབྲས་བུ་ཡང་ནི་བསྟན་པ་ཡིན། །ལ་ལ་དག་གི་བཞེད་ཀྱིས་ནི། །རྩ་དང་རླུང་དང་བརྟེན་
པ་ལ། །བཤད་ཚུལ་བཞི་ཡིས་བུམ་པའི་དབང་། །དངོས་སུ་དགའ་བའི་དོན་ལ་ཡང་། །དགའ་བདེ་བཞི་ཡི་དོན་ཚང་བས། །བུམ་པའི་དབང་བཞི་དེ་ལ་སྦྱར། །མགྲིན་པ་ལོངས་སྤྱོད་འཁོར་ལོ་ལ། །རྩ་རླུང་རྟེན་དང་བརྟེན་པ་ལ། །ཤེས་པའི་དབང་ནི་ཚུལ་བཞིན་བཤད། །དེ་ནི་མཆོག་
དགའ་སྐྱེ་བའི་ས། །མཆོག་དགའ་ཉིད་དང་དགའ་བཞི་ཚང་། །གསང་བའི་དབང་བཞི་དེ་ལ་སྦྱར། །སྙིང་ག་ཆོས་ཀྱི་འཁོར་ལོ་ལ། །ཁྱད་པར་དགའ་བ་བསྐྱེད་པའི་ས། །རླུང་སོགས་ཤེས་རབ་ཡེ་ཤེས་དབང་། །ཁྱད་པར་དགའ་བ་དེ་ལ་ཡང་། །དགའ་བཞི་སྐྱེད་པའི་རིམ་པ་ལ། །ཤེས་རབ་
ཡེ་ཤེས་དོན་ཤེས་བྱ། །ལྟེ་བ་སྤྲུལ་པའི་འཁོར་ལོ་ལ། །ལྷན་ཅིག་སྐྱེས་པ་དགའ་བའི་ས། །མཐར་ཐུག་བཞི་ཡི་དབང་འདི་ཡིན། །དེ་ཡི་གཞུང་ལུགས་གཉིས་པོ་ཡང་། །མན་ངག་རིམ་པར་སྦྱར་བར་བྱ། །བཞི་པ་དེ་ལའང་གཉིས་སུ་བསྟན། །རྟེན་བཅས་དང་ནི་རྟེན་མེད་དོ། །རྟེན་

བཅས་ལ་ཡང་གཉིས་སུ་བསྟན། །སྤྲོས་བཅས་དང་ནི་སྤྲོས་མེད་དོ། །རྟེན་བཅས་གཏུམ་མོ་ཉིད་ལ་བརྟེན། །སྤྲོས་བཅས་ཀུན་དུ་བཟང་མོའི་མཁའ། །རྣམ་དག་ཀློང་དཀྱིལ་བསྟན་པའི་ཕྱིར། །ཡེ་ཤེས་ཐབས་ཀྱིས་མཚོན་བྱེད་ནི། །མན་ངག་སྤྲོས་ཏེ་བསྟན་པས་སུ། །
མཁའ་དབྱིངས་རྣམ་དག་རྟོགས་པར་འགྱུར། །སྤྲོས་མེད་མན་ངག་བསྟན་པ་ནི། །གོང་གི་མན་ངག་དེ་དག་ཀུན། །འདི་ཡིས་རྟོགས་པ་སྤང་བྱ་ཡིན། །དངོས་པོ་གནས་པའི་གནས་ལུགས་ནི། །རང་གི་བྱང་ཆུབ་སེམས་ཉིད་ནི། །དཀར་པོ་ལ་སོགས་མ་ཡིན་ཞིང་། །མཚོན་བྱེད་ཀུན་གྱིས་
མཚོན་དུ་མེད། །ཤས་བརྗོད་ཀུན་ལས་འདས་པས་ན། །གང་དུ་ཡང་ནི་བསམ་དུ་མེད། །ཡེངས་སུ་ཡང་ནི་རྡུལ་ཙམ་མེད། །ཆོས་རྣམས་ཡེ་ནས་སྐྱེ་མེད་ལ། །སྐྱེ་བ་མེད་ཅེས་སྒྲོ་མི་འདོགས། །ཆོས་སུ་སྣང་བ་འཁྲུལ་པའི་སེམས། །སེམས་ཉིད་ཡེ་ནས་སྐྱེ་མེད་ལ། །སྐྱེ་བ་མེད་ཅེས་
སྒྲོ་མི་འདོགས། །བླུན་པོ་གང་ཞིག་མི་ཤེས་པས། །དཔེར་ན་ནམ་མཁའ་འདི་མེད་ཅེས། །སྒྲོ་འདོགས་འབྱེས་པས་རྟོགས་མི་འགྱུར། །རྣལ་འབྱོར་མཁས་པ་རྣམས་ཀྱིས་སུ། །སྐྱེ་བ་མེད་ལ་སོགས་པ་རུ། །ཡེ་ཉིད་ནས་སུ་སྒྲོ་མི་འདོགས། །དེ་ལྟ་བུ་ཡི་དོན་ཉིད་ལ། །ཐེ་ཚོམ་མེད་
པར་གཏན་ལ་དབབ། །དེ་ནས་རྣལ་འབྱོར་གདེང་གྱུར་པས། །བསམ་མེད་ཡེངས་མེད་ཙམ་དུ་ནི། །བསྒོམ་པས་མན་ངག་རྟོགས་པར་འགྱུར། །དེ་ལྟར་རྟོགས་པས་རྫོགས་རིམ་གྱི། །དབང་གི་མན་ངག་མཐར་ཐུག་ཡིན། །རབ་ཏུ་གནས་པའི་རྫོགས་རིམ་ཡང་། །རྣལ་འབྱོར་མཁས་
པས་སྦྱོར་ཤེས་བྱའོ། །མི་མཁས་པས་ནི་དུག་ཏུ་འགྱུར། །དེ་ཡང་དུས་སྐབས་བཞི་རུ་ནི། །རིམ་པ་བཞིན་དུ་རྟོགས་པར་བྱའོ། །དང་པོ་བྱ་བའི་དུས་དག་ནི། །སྔོན་དུ་འགྲོ་བ་རྫོགས་བྱས་ལ། །ནམ་མཁར་གནས་པ་དེ་དག་ལ། །སྔོན་གྱི་བཞིན་དུ་གསོལ་བ་གདབ། །ཆོ་ག་ཡན་ལག་རྫོགས་
བྱས་ནས། །དག་པ་ལ་སོགས་བྱས་པ་ལ། །དང་པོ་དེ་ལ་ནུས་པ་གཞུག །ནུས་མཐུ་བསྐྱེད་པའི་ཆོ་ག་ནི། །བྱས་ནས་དེ་ལ་ཚོགས་བསག་གོ། །དེ་ནས་དུས་ནི་གཉིས་པ་རུ། །ཕྲ་མོ་འཐོབ་པའི་རྣལ་འབྱོར་གྱིས། །སྙིང་གའི་ཕོ་བྲང་གནས་དག་ཏུ། །དེ་དང་དེ་ནི་ཐ་མི་དད། །དེ་ཉིད་

ལ་ནི་དེ་ཉིད་ཀྱིས། །དེ་ཉིད་དུ་ནི་ཅུང་ཞིག་ཏུ། །དེ་ཡི་དེ་ཡི་ཐབས་ཀྱིས་སུ། །དེ་ལྟ་དེ་ལྟར་རྫོགས་པར་བྱ། །དུས་ནི་གསུམ་པ་དག་ལ་ནི། །ཡེ་ཤེས་ཐོབ་པའི་རྣལ་འབྱོར་པས། །འཁོར་ལོ་རྟེན་གྱི་གནས་དག་ཏུ། །དེ་ཉིད་དེ་ལྟར་གནས་པ་ན། །དེ་ཉིད་ལ་ནི་དེ་ཉིད་དོ། །དེ་ཉིད་ཐབས་
ཀྱི་སྦྱོར་བས་སུ། །དེ་དེ་མན་ངག་རྫོགས་པར་ཐོབ། །དུས་ནི་བཞི་པ་དག་ལ་ཡང་། །རྣམ་རྒྱུད་སྟོབས་ཀྱི་སྤྱོད་ཡུལ་ཡིན། །དེ་ལྟར་རབ་གནས་རྫོགས་རིམ་བྱ། །རྡོ་རྗེ་ནོར་བུའི་རྩ་བ་རུ། །དགའ་བ་སྐྱེས་པ་བུམ་པའི་དབང་། །གསང་བའི་ཕོ་བྲང་གནས་དག་ཏུ། །མཆོག་དགའ་
སྐྱེས་པ་གསང་བའི་དབང་། །ཁྱད་པར་དགའ་བའི་གནས་དག་ཏུ། །ཁྱད་པར་དགའ་བ་སྐྱེས་པ་ནི། །ཤེས་རབ་ཡེ་ཤེས་དབང་ཉིད་དོ། །རིན་ཆེན་ཕོ་བྲང་གནས་དག་ཏུ། །ལྷན་ཅིག་དགའ་བ་སྐྱེས་པ་ནི། །དབང་ནི་བཞི་པར་ཤེས་པར་བྱ། །དེ་ལ་རྫོགས་རིམ་ལས་ཀྱི་རིམ། །
ཕྲེང་བ་ལྟ་བུར་བརྒྱུད་དེ་འོངས། །དེ་དག་དྲག་པོའི་ལས་སོགས་རྣམས། །རིན་ཆེན་ཕྲེང་བ་ལྟར་བརྒྱུད་འདི། །སྲོག་ལུས་རྫས་རྣམས་འབུལ་བྱེད་པའི། །རིན་ཆེན་ལྟ་བུའི་གང་ཟག་ལ། །བཙའ་དཀའ་དམ་བཞག་བྱས་ཏེ་གཏད། །དེ་ལྟར་མི་བྱེད་རྨོངས་པས་སུ། །དམ་མེད་
རྨོངས་པའི་ལག་ཤོར་ན། །དུས་མིན་ཤི་ནས་དམྱལ་བར་ལྟུང་། །དེ་ནས་ནན་ཏན་བསྐྱེད་དེ་བཙའ། །བདག་གིས་སེམས་ཅན་གདོན་པའི་ཕྱིར། །མན་ངག་རིན་ཆེན་འདི་བྱས་པས། །བདག་དང་འགྲོ་བའི་སེམས་ཅན་རྣམས། །ཕྱག་རྒྱ་མཆོག་ནི་ཐོབ་པར་ཤོག །ལས་ཀྱི་རིམ་པ་
མུ་ཏིག་ཕྲེང་བ་ཞེས་བྱ་བ་སློབ་དཔོན་བྷ་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་རྡོ་རྗེ་སློབ་དཔོན་བཱིརྱ་གུ་པ་སཱུ་ཏྲའི་ཞལ་སྔ་ནས་དང་། ལོ་ཙཱ་བ་དགེ་སློང་གཞོན་ནུ་ཚུལ་ཁྲིམས་ཀྱིས་བསྒྱུར་ཅིང་ཞུས་ཏེ། དུར་ཁྲོད་ནགས་ཚལ་དུ་བརྒྱུད་པའི་སློབ་དཔོན་ལ་ཤིན་ཏུ་གསང་ཞིང་
ཞུས་པའི་དོན་ལགས་སོ།། ༄། །ཕྱག་ན་རྡོ་རྗེ་ལྕེ་དབབ་ཀྱི་འགྲེལ་པ་མུ་ཏིག་གི་ཕྲེང་བ་བཞུགས། ༄༅༅། །ཕྱག་ན་རྡོ་རྗེ་ལྕེ་དབབ་ཀྱི་འགྲེལ་པ་མུ་ཏིག་གི་ཕྲེང་བ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དང་ལ་བསྙེན་པའི་རིམ་པ་ནི། །མཎྜལ་

འདོམ་གང་གྲུ་བཞི་པ། །བ་ཡི་རྣམ་ལྔས་བྱི་དོར་བྱ། །དབུས་སུ་ལྔ་ལྡན་སྦྲུལ་དགུ་དགོད། །མདུན་དུ་བུམ་པ་བཟེད་ཞལ་དང་། །མཆོད་པ་རྣམ་ལྔ་བཅས་པར་དགོད། །འཁར་སོགས་སྣོད་ནི་མཛེས་པ་རུ། །འོ་མ་དང་བཅས་སྨན་རྣམས་ཀྱིས། །བཀང་སྟེ་མདུན་
དུ་བཞག་པའོ། །ཞེས་པ་ནི། འོ་མའི་ནང་དུ་ཀླུ་སྨན་སྣ་ཚོགས་པ་བླུགས་ལ་གཞག་པའོ། །དེ་སྟེང་གཞག་པའི་རྫས་རྣམས་ནི། །རྫས་གོང་དུ་བསགས་པ་དེ་རྣམས་ལ་བྱའོ། །རྫས་དེ་རྣམས་གང་ལ་དབུལ་བར་བསྟན་པའི་ཕྱིར། ཤིན་ཏུ་གསལ་བྱེད་གདན་སྟེངས་སུ། །ལྔ་ལྡན་
མཐའ་ཡས་སྦྲུལ་དགུ་པ། །ཞེས་བྱ་བ་ནི་མདུན་དུ་རྒྱ་མཚོ་ཆེན་པོ་བསམས་པའི་ནང་དུ། ཕུཿལས་ཀླུ་མཐའ་ཡས་སྐུ་མདོག་སེར་པོ། ཕྱག་གཉིས་ཐུགས་ཀར་ཐལ་མོ་སྦྱར་བ། དབུ་ལ་སྦྲུལ་མགོ་དགུ་ཡོད་པ། སྦྲུལ་འཁྱིལ་པ་ལྔའི་སྟེང་ན་བཞུགས་པར་བསམ་མོ། །ཧཱུཾ་ལས་ཕྱག་ན་རྡོ་རྗེ་ཆུ་
ལས་ཉ་ལྡང་པའི་ཚུལ་དུ་དཀྲོངས་ཀྱིས་བསྐྱེད་དོ། །སྐུ་མདོག་མཐིང་ག །དབུ་སྐྲ་ཐོར་ཚུགས་གཅིག་ཏུ་བཅིངས་པ། ཞལ་བགྲད་པ་མཆེ་བ་གཙིགས་པ། སྤྱན་བཟློག་པ། ཟས་སུ་སྦྲུལ་ཟ་བ། རྒྱན་ཐམས་ཅད་ཀྱིས་བརྒྱན་པ། ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པར་བསམས་
ལ། ཛཿཧཱུཾ་བཾ་ཧོཿས། ཡེ་ཤེས་སེམས་དཔའ་སྤྱན་དྲང་། དགུག་གཞུག་བཅིང་བསྟིམ། དེ་ལ་མཆོད་པའི་ཡན་ལག་དང་། མཆོད་པ་རྣམ་པ་ལྔས་མཆོད་བསྟོད། ཨོཾ་ཨཱཿཧཱུཾ་གསུམ་གྱིས་གནས་གསུམ་བྱིན་གྱིས་བརླབས། དེ་ནས་ཀླུ་ལ་མཆོད་པའི་ཕྱིར། རྩི་སྨན་མཆོད་ཅིང་
མདུན་གནས་པའོ་ཞེས་འབྱུང་སྟེ། གོང་དུ་བསྐྱེད་པའི་ཀླུ་ལ་ཡེ་ཤེས་སེམས་དཔའ་དགུག་གཞུག་བཅིང་བསྟིམས་ལ་མཆོད་པ་རྣམ་པ་ལྔས་མཆོད་དོ། །དེ་ནས་སྔགས་བརྗོད་ཅིང་འོ་མ་དང་བཅས་རྩི་སྨན་གྱིས་མཆོད་དོ། །ཀླུའི་ནད་དང་གདུག་རྩུབ་ཐམས་ཅད་དང་བྲལ་བར་གྱུར་ཅིག་
ཅེས་བརྗོད་ཅིང་བསྟོད་དོ། །དེ་ནས་སྔགས་འདི་བདུན་འབུམ་དུ་བཟླས་སོ། །ཨོཾ་བཛྲ་ཉི་མ་ས་བླ་ན་ཀླད་པ་ནཾ། ཀུ་ན་ཞི། ཙིཏྟ་ཀུ་ལི་ནཾ། ཙི་ཏྲ་མུ་ཏྲ་བཟློག་བྱེར། དུས་བཞིའི་མཆོད་པ་རྒྱུན་དུ་བྱའོ། །ཀླུ་ཡི་གཏོར་མ་དུས་བཞིར་བཏང་། མཐའ་མ་རྟགས་བྱུང་བ་དང་། ལས་ཀྱི་མཐའ་བརྟུལ་

བར་བྱ་བའི་ཕྱིར། །བདག་རྣལ་འབྱོར་པ་སྡང་མིག་ཏུ་བལྟ་ཞིང་། ཞེས་པ་ནི། བདག་ཕྱག་ན་རྡོ་རྗེའི་ང་རྒྱལ་དུ་གནས་ལ། མདུན་དུ་གྲུ་གསུམ་མཐིང་ནག་བྲུས་ལ། ངར་ཕྱེ་ལ་སོགས་པའི་རྫས་ལ་ལིངྒ་བྱས་ལ། །མིང་རུས་གྲོ་གའམ་ཤིང་ཤུན་ལ་བྲིས་ལ་གཞུག་གོ། །དེ་སྦལ་པ་
ནག་པོ་དང་ལྟོ་སྦྱར་ལ་ཚོན་སྐུད་ཀྱིས་དཀྲིས་ལ་གྲུ་གསུམ་དུ་གཞུག་གོ། །དེའི་བླ་དགུག་པར་བསྟན་པར་བྱ་བའི་ཕྱིར། ཡང་ལྕགས་ཀྱུའི་ཕྱག་རྒྱ་བཅས་ལ་གོང་གི་ལིངྒ་ལ་བསྟིམ་མོ་ཞེས་པ་ནི་གོ་སླའོ། །སྔགས་ནི་ཨོཾ་བཛྲ་ཉི་མ་ས་བླ་ནའི་རྟིང་ལ་བཛྲ་ཨཾ་ཀུ་ཤ་ཛཿཞེས་པས་དགུག་
པའོ། །དེ་ནས་དགྲ་བགེགས་བསྒྲལ་བ་བསྟན་པར་བྱ་བའི་ཕྱིར། སེང་ལྡེང་གི་ཕུར་པས་གདབ་ཅིང་བྲུབ་པར་བྱ་ཞེས་པ་ནི། ལག་ཏུ་ཉུངས་ཀར་བླངས་ལ། ཉི་མ་ས་བླ་ནའི་རྟིང་ལ་ཆེ་གེ་མོ་མཱ་ར་ཡ་རྦད་ཅེས་བཟླས་ཤིང་། གྲུ་གསུམ་དུ་ཉུངས་ཀར་བྲབ་བོ། །སེང་ལྡེང་གི་ཕུར་པས་
དྲིལ་ཞིང་། ཉི་མ་ས་བླ་ནའི་རྟིང་ལ། ཨོཾ་བཛྲ་ཀཱི་ལི་ཀཱི་ལ་ཡ། ཆེ་གེ་མོ་མཱ་ར་ཡ་སརྦ་བིགྷྣཱན་བཾ་ཧཱུཾ་ཕཊ། ཅེས་ཕུར་པས་གདབ་བོ། །རྣམ་པར་ཤེས་པའི་ཚོགས་བརྒྱད་ལ། དེ་ནས་ཐལ་མོ་བརྡབ་ཅིང་ནད་དང་གདོན་བགེགས་ཐམས་ཅད་བརླག་པར་བསམ་མོ་ཞེས་པ་ནི། ཐལ་མོ་བརྡབ་
ཅིང་གདོན་བགེགས་སྟོང་ཕྲག་བརྒྱད་ཅུ། སྐུ་ལ་བསྔོ་བའི་དགྲ་ཐམས་ཅད་དང་། རྣམ་པར་ཤེས་པ་དབང་དུ་བསྡུས་ཤིང་ལུས་རྡུལ་ཕྲན་དུ་རློགས་ཤིག་ཅེས་བརྗོད་དོ། །དེ་ནས་ལས་ཀྱི་མཐའ་བརྟུལ་བར་བྱ་བའི་ཕྱིར། བསྲེག་མནན་བསྐྱར་བ་ཉམས་དང་སྦྱར། །ཞེས་འབྱུང་
སྟེ། ཐབ་ཁུང་རྙིང་པའམ་སར་པར་གདུག་པ་ཅན་གྱི་ཤིང་ལ་མེ་བཏང་ལ། སྦྱིན་སྲེག་བྱ་བ་དང་། མནན་པ་བསྐྱར་བ་ཀུན་མན་ངག་བཞིན་དུ་ཤེས་པར་བྱའོ། །བསྙེན་པའི་རིམ་པ་བསྟན་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །བསྟོད་པ་ནི། ལྕང་ལོ་
ཅན་གྱི་གནས་མཆོག་དམ་པ་ནས། །རིག་སྔགས་གསང་སྔགས་ཀུན་གྱི་བདག་པོ་སྟེ། །ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པ། །བཅོམ་ལྡན་རྡོ་རྗེ་བསྣམས་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་མཐའ་ཡས་ནི། །སྐུ་མདོག་ལྗང་གུ་སྣ་ཚོགས་མདོག །

ཕྱག་གཉིས་ཐལ་སྦྱར་རིན་ཆེན་འཛིན། །སྦྲུལ་མགོ་དགུ་ཡི་བཙུན་མོ་ཡིས། །མགུལ་ནས་འཁྱུད་པའི་འཁོར་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །བདུད་རྩི་ཟིལ་དངར་སྨན་གྱིས་མཆོད། །ཀླུ་ཡི་གདུག་རྩུབ་ཞི་གྱུར་ཅིག །ཨོཾ་ནཱ་ག་བཛྲ་པུཥྤེ་ཧཱུཾ། ཨོཾ་
ནཱ་གེ་བཛྲ་དྷཱུ་པེ་ཧཱུཾ། ཨོཾ་ནཱ་ག་བཛྲ་ཨཱ་ལོ་ཀེ་ཧྲཱིཿ། ཨོཾ་ནཱ་ག་བཛྲ་གནྡྷེ་གཾ། ཨོཾ་ནཱ་ག་བཛྲ་ནཻ་བི་དྱེ་ཧཱུཾ། ཨོཾ་ནཱ་ག་བཛྲ་བོ་དྷ་ཀ་རེ་ཧཱུཾ། བསྟོད་པ་དང་མཆོད་པའི་རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །སེར་བ་དབབ་པར་འདོད་ན། མཎྜལ་གྲུ་བཞི་པ་ཅིག་
བྱས་ལ། དེའི་སྟེང་དུ་ལྔ་ལྡན་མཐའ་ཡས་སྦྲུལ་རྒྱུ་བའི་གཟུགས་དང་། བཟེད་ཞལ་དང་། མཆོད་པ་རྣམ་པ་ལྔ་དང་། དུག་རྫས་སྣ་ཚོགས་དང་། ཡུངས་ཀར་ལ་སོགས་པའི་རྫས་དང་། དྲི་མི་ཞིམ་པ་སྣ་ཚོགས་བསག་གོ། །རབས་ཆད་ཀྱི་ཐོད་པ་མཚན་ངན་ཅིག་གི་ནང་དུ། ཚིལ་
དང་། ཁྱི་ནག་དང་། བོང་བུ་ནག་པོ་དང་། རྟ་ནག་པོ་དང་། དེ་རྣམས་ཀྱི་ཁྲག་བླུགས་སོ། །ཐོད་པའི་ཕྱི་རོལ་དུ་ཡང་བསྐུའོ། །ཚིལ་ཆེན་དང་། ཁྲག་ཕྱེད་ཕྱེད་དོང་ཆུང་དུ་ཡང་བླུགས་ལ། ཟོར་ཐུན་གྱི་རྫས་སུ་གཞག་གོ། །ཐོད་པའི་ནང་དུ་སེར་བ་བྱུང་བའི་ཆུ་ཡང་བླུགས་སོ། །ཐོད་
པ་དེ་ཡུགས་ས་མོའི་དོར་རྟས་དྲིལ་ལ་མཎྜལ་གྱི་བྱང་ཤར་དུ་གྲུ་གསུམ་གྱི་སྟེང་དུ་གཞག་གོ། །འགྲམ་དུ་སེང་ལྡེང་གི་ཕུར་པ་ཅིག་ཀྱང་གཞུག་གོ། །དེ་ནས་ཕྱག་ན་རྡོ་རྗེ་བསྐྱེད་ལ་མཆོད་པ་དང་། བསྟོད་པ་དང་། སྔགས་བཟླས་པ་ཀུན་བསྙེན་པ་ལྟར་བྱའོ། །དེ་ནས་ལས་ལ་སྦྱོར་ཀ་ནི།
མཆོད་བསྟོད་གོང་བཞིན་བྱ། །སྔགས་འདི་བདུན་འབུམ་བཟླས་ཤིང་། ཐོད་པ་དོང་ཆུང་དུ་སེར་རྟའི་ནང་དུ་ཡུངས་ཀར་ལ་སོགས་པའི་ཐུན་བརྡེག་གོ། །ཉི་མ་ས་བླ་ན་སེར་བ་ཕོབ། ཀླད་པ་ནན་སེར་བ་ཕོབ། ཀུན་ཞི་སེར་བ་ཕོབ། ཙིཏྟ་ཀུ་ལི་ནན་སེར་བ་ཕོབ། །ཙི་ཏྲ་མུ་ཏྲ་སེར་བ་ཕོབ།
བཟློག་བྱེར་སེར་བ་ཕོབ། ནཱ་ག་ཧྲིལ་ཧྲིལ་སེར་བ་ཕོབ། །ནཱ་ག་ཕྲོམ་སེར་བ་ཕོབ། ནཱ་ག་ཕོབ་སེར་བ་ཕོབ་ཅེས་བཟླས་སོ། །སྔགས་དེ་རྣམས་ཡི་གེར་བྲིས་པ་ཐོད་པར་གཞུག་གོ། །དེ་ནས་སྐབས་སྐབས་སུ་གཏོར་མ་གཏོང་ངོ་། །དེ་ནས་ཐོད་པ་ཁྱེར་ལ་ཡུལ་གྱི་ཆུ་མིག་གམ། ལྷ་

ཐོའི་རྩར་སོང་ལ་གསེར་སྐྱེམས་གཏང་། །ལྷ་འདྲེ་ལ་དམོད་བཙུགས་ལ་ཐོད་པ་གཞག་གོ། །འགྲམ་དུ་ཕྱག་ན་རྡོ་རྗེར་བྱིན་གྱིས་བརླབས་ལ་གཟུགས་སོ། །དེ་ནས་དོང་ཆུང་གི་ཁྲག་དུམ་ཀ་ཡང་གཏོར་རོ། །དེ་ནས་དོང་ཆུང་གི་ཁྲག་ལ་ཁྲག་དུམ་ཀ་ཡང་བསྣན་ལ། གོང་བཞིན་ཟོར་སྒྲུབ་ཞག་
ལྔའམ་དྲུག་ཏུ་བྱའོ། །དེ་ནས་རྟག་ཏུ་སྔས་སུ་བཅུག་ལ་ཐུན་བརྡེག་གོ། །དེ་ནས་དགྲའི་ཡུལ་དུ་ཕྱིན་ལ། ཞིང་ཐོག་དང་སེར་རྟའི་ཐོག་ཏུ་ཟོར་འཕང་ངོ་། །ཐུན་བརྡེག་གོ། །ཡུལ་འདིར་སྔགས་བཟླས་ཤིང་སེར་བ་ཕོབ་བྱའོ། །སེར་བ་དབབ་པའི་རིམ་པའོ།། །།བཅོམ་ལྡན་འདས་རྡོ་རྗེ་
འཛིན་ལ་ཕྱག་འཚལ་ལོ། །སེར་བ་བསྲུང་བར་འདོད་ན་མཎྜལ་མཆོད་པ་གོང་བཞིན་དུ་བྱས་ནས། ཐལ་ཆེན་དང་། སྐེ་ཚེ་དང་། ཕུར་པ་རྣམས་བསགས་ལ། ལག་ན་རྡོ་རྗེར་བྱིན་གྱིས་བརླབས་ལ། ཉི་མ་ས་བླའི་རྟིང་ལ་བཛྲ་པྲ་བེ་ཤ་ཡ་ཕཊ། ས་འདི་སྲུངས་ཤིག་བྱེར་ཡ་ཞེས་
འབུམ་ཙམ་བཟླས་སོ། །སྐབས་སུ་གཏོར་མ་གཏང་ངོ་། །ཐལ་ཆེན་དང་སྐེ་ཚེ་རས་ཀྱི་ཁུང་དུ་ཕུར་ལ་ཕུར་པའི་སྐེ་ལ་གདགས་སོ། །ཕུར་པ་ཁྱེར་ལ་ཡུལ་ཕྱོགས་བཞི་མཚམས་བརྒྱད་དུ་ལྷ་མ་སྲིན་སྡེ་བརྒྱད་ལ་ཕུར་པ་བཏབ་པར་དམིགས་ལ་ཐོ་གཟུགས་སོ། །དེ་ནས་སེར་བ་བྱུང་ན།
སེར་བ་འོང་བའི་ཕྱོགས་སུ་ཐལ་ཆེན་དང་སྐེ་ཚེ་འཕང་ཞིང་སྔགས་བཟླས། གཡས་གཡོན་དུ་མཛུབ་རིས་བྱས་ལ་བསྲུང་ངོ་། །དེས་ཀྱང་མ་ཐུབ་ན། རང་གི་ལག་པ་གཡས་གཡོན་དུ། བསྲུང་བའི་ཞིང་ཡུལ་བསམས་ལ། ཐལ་མོ་ཁ་སྦུབ་སྟེ། སེར་བ་ཕ་རི་ལ་འཕངས་པར་བསམ་
མོ། །སྔགས་ནི་ཉི་མ་ས་བླ་ནའི་རྟིང་ལ། བཛྲ་པྲ་བེ་ཤ་ཡ་ཕཊ། ས་འདི་སྲུངས་ཤིག་བྱེར་ཡ་བྱའོ། །དེས་སེར་བ་ཐུབ་པར་འགྱུར་རོ། །སེར་བ་བསྲུང་བའི་རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །ཆར་དབབ་པར་འདོད་ན། ཀླུའི་རྟེན་ས་ཆུ་མིག་གི་བགབ་
ནི་དམའ་བར་སྦྲ་ཕུབ་ལ་མཎྜལ་བྱ། ཕྱག་ན་རྡོ་རྗེ་དང་ལྔ་ལྡན་སྦྲུལ་དགུ་པ་མཆོད་པ་དང་། བསྟོད་པ་བྱས་ལ་གཟུངས་གདོན། ཀླུ་མཆོད་བྱའོ། །ཆུ་གཏོར་གཏང་། དེ་ནས་མདུན་དུ་གྲུ་གསུམ་བྲུས་ལ། བག་ཕྱེ་ལས་ཀླུའི་གཟུགས་བྱས་ལ་གཞུག་གོ། །དེ་ནས་བདག་ཉིད་ཕྱག་ན་རྡོ་

རྗེའི་ང་རྒྱལ་བྱས་ལ། སེང་ལྡེང་གི་ཕུར་པ་ཐོགས་ལ། ཉི་མ་ས་བླ་ནའི་རྟིང་ལ། ནཱ་ག་ཧྲིལ་ཧྲིལ། ནཱ་ག་ཕྲོམ་ཕྲོམ། ནཱ་ག་ཕོབ། ཆར་པ་ཕོབ་ཅེས་མང་དུ་བཟླས་སོ། །ཀླུའི་སྤྱི་བོར་ཕུར་པ་བཏབ་ལ་ཆར་པ་ཕོབ་ཅེས་བྱའོ། །དེ་ནས་གཏོར་མ་གཏང་། དེ་ནས་དོང་
སས་བཀབ་ལ་ཆར་པ་ཕོབ་ཅེས་བྱའོ། །དུས་དུས་བསླང་ཞེས་བྱ་བ་ནི། ཞག་རེ་ལོན་ཞིང་ཆུ་མིག་ལ་ཡར་ཡར་སྦྲ་ཕུབ་ལ་མཎྜལ་དང་། དེ་ལྟར་ནུབ་རེ་རེ་ཞིང་རེ་རེ་བྱའོ། །ཞག་བདུན་པ་ལ་ཆུ་མིག་གི་ཐོག་ཏུ་སྦྲ་ཕུབ་ལ་མཎྜལ་དང་མཆོད་བསྟོད་ལ་སོགས་པ་གོང་བཞིན་དུ་བྱས་ལ།
ཀླུའི་གཟུགས་ལ་སྔགས་བཟླས་ལ་ཕུར་པ་གདབ་པོ། །ཞག་བདུན་དུ་བྱའོ། །ཆར་དབབ་བའི་རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །ཀླུ་བཟློག་པར་འདོད་ན། མཎྜལ་བྱ་བ་དང་། བསྐྱེད་པ་དང་། མཆོད་པ་དང་། བསྟོད་པ་ཀུན་གོང་བཞིན་དུ་བྱས་ལ། མདུན་
དུ་དོང་གྲུ་གསུམ་བྲུས་ལ། དོང་གི་ནང་དུ་བག་ཕྱེ་ལས་ཀླུའི་གཟུགས་བྱས་ལ་གཞུག་གོ། །རྫས་ནི་ཚིལ་ཆེན་དང་། གླ་རྩི་དང་། ཚོན་སྐུད་སྣ་ལྔ་ལས་སྔགས་མདུད་བྱས་པ་དང་། སེང་ལྡེང་གི་ཕུར་པ་དང་། དེ་རྣམས་ལ་ལྷར་བསྐྱེད་པ་དང་། མཆོད་བསྟོད་བྱས་ལ་སྔགས་འདི་བཟླས་
སོ། །ཉི་མ་ས་བླ་ན་ཀླད་པ་ནཾ། ཀུ་ན་ཞི་ཙིཏྟ་ཀུ་ལི་ནཾ། ཙི་ཏྲ་མུ་ཏྲ་བཟློག་བྱེར། ནཱ་ག་ཤིག་ནཱ་ག་བྱེར། ནཱ་ག་ནཾ། ནཱ་ག་མགོ་ནཾ། ནཱ་ག་ཧ་ན་ཧ་ན། ནཱ་ག་ཧ་ན་ཧ་ན་མཱ་ར་ཡ་རྦད་ནཾ་ཞེས་གྲངས་མང་དུ་བཟླས་ལ། ཚིལ་ཆེན་ན་སར་བསྐུ། གླ་རྩི་ལུས་ཀུན་དུ་བསྐུ། སྔགས་མདུད་ལུས་ལ་གདགས། མདུན་
དུ་དོང་གྲུ་གསུམ་བྲུས་ལ། བག་ཕྱེ་ལས་ཀླུའི་གཟུགས་བྱས་ཏེ་བཅུག་ལ། དེ་ལ་བདག་ལ་གནོད་པའི་ཀླུ་དགུག་གཞུག་བྱ། བདག་ཉིད་ཕྱག་ན་རྡོ་རྗེར་བསྐྱེད་ལ་ཕུར་པ་དྲིལ་ཞིང་སྔགས་བཟླས་ལ། སེང་ལྡེང་གི་ཕུར་པ་ཀླུ་ལ་གདབ་བོ། དེ་ནས་ཀླུའི་གཟུགས་དེའི་ཐོད་པར་བཅུག་ལ།
ལྷ་ཁང་གི་ཐེམ་པའི་འོག་ཏུ་མནན་ནོ། །དུས་ཐམས་ཅད་དུ་ལྷའི་ང་རྒྱལ་དུ་བྱས་ལ་བཟླས་པ་བྱའོ། །བསྲུང་བའི་ཆོ་ག་བླ་ན་མེད་པའི་དིས་ཅི་འདྲ་བ་ཡང་ཐུབ་བོ། །ཀླུ་བཟློག་པའི་རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །ས་བདག་གནོད་པ་བཟློག་པར་འདོད་

ན་བསྙེན་པ་གོང་བཞིན་དུ་བྱ། མཎྜལ་དང་མཆོད་པ་ཀུན་བྱས་ལ། མདུན་དུ་དོང་གྲུ་གསུམ་བྲུས་ལ་ནང་དུ་བག་ཕྱེ་ལས་ས་བདག་གི་གཟུགས་བྱས་ལ། ཚོན་སྐུད་ཀྱིས་སྐེ་ནས་བཏགས་ལ་གཞུག །རྫས་ལ་ཚིལ་ཆེན་དང་། ཚོན་སྐུད་སྣ་ལྔ་ལས་སྔགས་མདུད་བྱས་ལ། གླ་རྩི་དང་། སེང་
ལྡང་གི་ཕུར་པ་ལ་སྔགས་འདི་བདུན་འབུམ་བཟླས། །སྐབས་སུ་གཏོར་མ་གཏང་། ཉི་མ་ས་བླ་ནའི་རྟིང་ལ། ས་དོམ་ནག་པོ་སོད། ས་དོམ་ནག་པོ་སོད། ས་དོམ་ནག་པོ་ནན། ས་དོམ་ནག་པོ་ནན་ཞེས་བཟླས་ལ། ཚིལ་ཆེན་ན་སར་བསྐུ། སྔགས་མདུད་ལུས་ལ་གདགས་ལ། གླ་
རྩིས་ལུས་ཀུན་དུ་བཀྲུ། སེང་ལྡེང་གི་ཕུར་པ་ལ་སྔགས་འདི་བདུན་འབུམ་བཟླས་ལ། ས་བདག་གི་སྙིང་གར་གདབ། ས་བདག་ཐོད་པར་བཅུག་ལ་མཆོད་རྟེན་གྱི་འོག་ཏུ་མནན། དུས་ཐམས་ཅད་དུ་གོང་བཞིན་དུ་བྱའོ། །ས་བདག་བཟློག་པའི་རིམ་པའོ།། །།བཅོམ་ལྡན་འདས་
རྡོ་རྗེ་འཛིན་ལ་ཕྱག་འཚལ་ལོ། །བདུད་དང་མ་མོ་དང་། བཙན་དང་འབྱུང་པོ་ཕལ་པའི་གནོད་པ་བཟློག་པར་འདོད་ན། སྔོན་དུ་བསྙེན་པ་བྱས་ལ། ཡང་མཎྜལ་དང་། ལྷ་བསྐྱེད་པ་དང་། མཆོད་པ་དང་། བསྟོད་པ་ཀུན་བྱས་ལ། མདུན་དུ་དོང་གྲུ་གསུམ་བྲུས་ལ། ངར་ཟན་ལས་འབྱུང་པོའི་གཟུགས་བྱས་ལ། ཚོན་
སྐུད་ཀྱིས་སྐེ་ནས་བཏགས་ལ་ནང་དུ་གཞུག་གོ། །གནོད་པའི་འབྱུང་པོ་དེ་ལ་དགུག་གཞུག་བྱས་ལ། བདག་ཉིད་ལྷའི་ང་རྒྱལ་དུ་གནས་ཏེ། ཕུར་པ་དང་ཡུངས་ཀར་ལ་སྔགས་འདི་བཟླས་ལ། འབྱུང་པོ་ལ་ཡུངས་ཀར་གྱི་ཐུན་བརྡེག །ཉི་མ་ས་བླ་ནའི་རྟིང་ལ་ཕྱུག་ཙི་ཕཊ། ཙི་ག་ཕྱུ་ཕཊ། ལྕེ་བ་ཏི་ཕཊ་ཅེས་ནུས་ཚད་
བཟླས་ལ། །འབྱུང་པོའི་གཟུགས་ཐོད་པར་བཅུག་ལ། མཆོད་རྟེན་གྱི་འོག་ཏུ་མནན་ནོ། །སྐྲང་འབུར་བྱུང་བ་ལ་ཡང་གདབ་བོ། །བདུད་དང་མ་མོ་དང་བཙན་དང་། འབྱུང་པོ་ཐམས་ཅད་བཟློག་པའི་རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །ཀུན་དུ་བསྲུང་བ་
འདི་ཁྱད་པར་དུ་རྒྱལ་པོ་ལ་བྱའོ། །བསྙེན་པ་གོང་དུ་བྱས་ལ། མཎྜལ་དང་། ལྷ་བསྐྱེད་པ་དང་། མཆོད་བསྟོད་བྱས་ལ། མདུན་དུ་དོང་གྲུ་གསུམ་དུ། ངར་ཟན་ལས་རྒྱལ་པོའི་གཟུགས་བྱས་ལ་བཅུག་ལ་ཚོན་སྐུད་ཀྱིས་སྐེ་ནས་གདགས་སོ། །དེ་ནས་ཕུར་པ་དང་། ཉུངས་ཀར་

དང་། ཉུངས་ནག་དང་། སྐེ་ཚེ་དང་། ཐལ་ཆེན་ལ་སྔགས་འདི་བཟླས་པ་མང་དུ་བྱའོ། །སྐྲ་སྤྱི་བོར་བཅིངས་ལ། ཉི་མ་ས་བླ་ནའི་རྟིང་ལ། ཨེ་པ་ཀ་ར་ཙེ། དི་ནཱ་ག་བར་མ་པ་ལ་སེ་ཏོ་ཡེ་ཞེས་བཟླས་ལ། གཟུགས་ལ་ཡུངས་ཀར་ལ་སོགས་པའི་ཐུན་བརྡེག་གོ། །སྙིང་
གར་ཕུར་པ་བཏབ་པ་ཐོད་པར་བཅུག་ལ། ཅེ་ཏིའི་འོག་ཏུ་མནན་ནོ། །རྒྱལ་པོ་བཟློག་པའི་རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །ཀུན་དུ་སྲུང་བར་བྱེད་ན། བཅའ་གཞི་གོང་དང་འདྲ། སྐྲ་སྤྱི་བོར་བཅིངས་ལ། སྔགས་འདི་བཟླས། ཉི་མ་ས་བླ་ནའི་རྟིང་ལ།
ཨེ་པ་ཀ་ར་ཙེ། དི་ནཱ་ག་བར་མ། པ་ལ་སེ་ཏོ་ཡེ། ཤིག་བྱེར་ནན། གོ་ནན། ཧ་ན་ཧ་ན་མཱ་ར་ཡ་རྦད་ནན་ཞེས་མང་དུ་བཟླས་ལ། །ཐུན་དང་མནན་པ་ཀུན་གོང་བཞིན་བྱའོ། །ཐམས་ཅད་བསྲུང་བའི་རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །འགོང་པོས་གནོད་ན་འདི་ལྟར་བྱ་སྟེ།
སྔོན་དུ་བསྙེན་པ་བྱས་ལ། མདུན་དུ་དོང་གྲུ་གསུམ་བྲུས་ལ། དོང་གི་ནང་དུ་ངར་ཟན་ལྔ་བཅུག་ལ་ཚོན་སྐུད་ཀྱིས་སྐེ་ནས་བཏགས་ལ་གཞག་གོ། །གང་གནོད་པའི་འགོང་པོ་བྲིས་ལ་ལུས་ལ་གཞུག །དེ་ནས་མཎྜལ་བྱས་ལ། ལྷ་བསྐྱེད་པ་དང་། མཆོད་བསྟོད་བྱས་ལ་སྔགས་བཟླས་སོ། །ཉི་མ་ས་
བླ་ནའི་རྟིང་ལ། མགོ་སྟེ་ས་སྟེ་ནན་ཞེས་མང་དུ་བཟླས་ལ་ཐུན་བརྡེག་གོ། །ཕུར་པ་བཏབ་ལ་ཐོད་པར་གཞུག །རབ་གནས་བྱས་པའི་མཆོད་རྟེན་འོག་ཏུ་མནན་ནོ། །ཕྱག་ན་རྡོ་རྗེའི་ང་རྒྱལ་དང་སྟང་སྟབས་ཀྱིས་མཚམས་བཅད་དོ། །འགོང་པོ་ཐམས་ཅད་བཟློག་པའི་རིམ་པའོ།། །།བཅོམ་
ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །ཀུན་དུ་བསྲུང་བ་ཞེས་བྱ་བ། སྔགས་པ་གཞན་གྱི་སྦོད་གཏོང་བསྲུང་བར་འདོད་ན། སྔོན་དུ་བསྙེན་པ་བྱས་ལ། དེ་ནས་མཎྜལ་བྱ་བ་དང་། བཟེད་ཞལ་དང་། མཆོད་པ་བཤམ་པ་དང་། མཎྜལ་གྱི་སྟེང་དུ་མཆོད་རྟེན་ནག་པོ་ཁོང་སྟོང་བརྩིགས་
པའི་ནང་དུ་ཁོའི་གཟུགས་བག་ཟན་ལས་བྱས་ལ། མིང་རུས་བཅུག་ལ་གཞག་གོ། །བུམ་པའི་ནང་དུ་ཕྱག་ན་རྡོ་རྗེ་བག་ཟན་ལས་བྱས་ལ་གཞུག་གོ། །རྡོ་རྗེས་དེའི་ལུས་འགེམས་པར་བསམ་མོ། །མཆོད་རྟེན་གྱི་འོག་ཏུ་དོང་གྲུ་གསུམ་བྲུས་ལ། དེའི་ནང་དུ་ཡང་ཁོའི་གཟུགས་

དང་། མིང་རུས་བཅུག་ལ། སྦྲུལ་དང་སྦལ་པ་གཉིས་ཀྱི་ལྟོ་བར་བཅུག་ལ། ཀླུ་ལྔ་ལྡན་སྦྲུལ་དགུ་པས་ཟ་བར་བསམ་མོ། །དེ་ཐོད་པར་བཅུག་ལ་གྲུ་གསུམ་དུ་གཞུག །ལན་ཅིག་གཞུང་བཞིན་དུ་མནན་པར་བྱའོ། །བདག་རང་ཕྱག་ན་རྡོ་རྗེར་བསམས་ལ། ཕུར་པ་འདྲིལ་ཞིང་སྔགས་
བཟླས་པས། ཁོའི་སྲུང་མ་བདག་གི་བཀའ་ཉན་ཅིང་ལས་བྱེད་པར་བསམ་མོ། །བདག་གིས་རྦད་པས་ཁོ་རང་གི་སྲོག་གཅོད་པར་བསམ་མོ། །དེ་ནས་ཐུན་རྫས་དང་ཕུར་པ་རྣམས་བསགས་ལ། ལྷ་བསྐྱེད་པ་དང་། མཆོད་བསྟོད་དང་། སྔགས་ནི་ཉི་མ་ས་བླ་ནའི་རྟིང་ལ། བར་
མ་མ་ཧཱ་ཨཱཿཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་འགྲུབ་ཚད་བཟླས། བསྐོར་བ་ཕྱིན་ཅི་ལོག་ཏུ་བྱ། ཐུན་བརྡེག །མནན་ཟོར་གྱི་མཐའ་བརྟུལ་ལོ། །སྦོད་གཏོང་ཐམས་ཅད་བཟློག་པའི་རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །མདུན་དུ་འབྲུབ་ཁུང་གྲུ་གསུམ་
དུ། །དགྲ་དང་བགེགས་ཀྱི་ལིངྒ་གཞུག །དགྲ་ཡི་ལིངྒ་རྐང་རྗེས་དང་། །དྲི་མ་ཕྱི་ས་གཅིན་ལས་བྱའོ། །རབས་ཆད་ཐོད་པར་བཅུག་ནས་ནི། །ཐོད་པ་ཡུགས་སའི་ཞབས་མས་དྲིལ། །དེ་ཡང་རེ་བའི་སྟེང་དུ་གཞག །འགྲམ་དུ་དུག་རྫས་སྣ་ཚོགས་དང་། །དྲག་པོའི་རྫས་རྣམས་བཞག་
ནས་ནི། །སྐབས་སུ་དུག་ཐུན་རྫས་ཐུན་བརྡེག །དེ་ཡི་འགྲམ་དུ་མཎྜལ་ཏེ། །བཟེད་ཞལ་མཆོད་པ་རྣམ་ལྔ་བཤམ། །བདག་ཉིད་ཕྱག་ན་རྡོ་རྗེ་དང་། །ལྔ་ལྡན་བསྐྱེད་ཅིང་སྤྱན་དྲངས་དང་། །མཆོད་དང་བསྟོད་དང་གསོལ་བ་གདབ། །དེ་ནས་སྔགས་ཀྱི་བཟླས་བརྗོད་ནི། །ཉི་མ་ས་བླ་ནཾ། ཀླད་
པ་ནཾ། ཀུན་ཞི་ཙིཏྟ་ཀུ་ལི་ནཾ། ཙི་ཏྲ་མུ་ཏྲ་བཟློག་བྱེར། ཐུམ་རིལ་རྦད་ཆེ་གེ་མོ་མཱ་ར་ཡ་ཛཿརྦད་ནཾ། འབུམ་མམ་སུམ་འབུམ་བཟླས་ལ། སྐབས་སྐབས་སུ་ཨག་ཚེ་བ་ན་མར་ཐུན་བརྡེག་གོ། །དེ་ལྟར་བྱས་ནས་ཐོད་པ་ཁྱེར་ལ། ལམ་རྒྱ་གྲམ་མམ། མཆོད་རྟེན་དང་། དུར་ཁྲོད་དམ། གོང་
གསུམ་མམ།ཆུ་མིག་གམ། ལ་བཙས་སམ། ཆུ་གླིང་ལ་མནན་པ་གཞུང་བཞིན་དུ་བྱའོ། །དགྲ་དང་བགེགས་ཀྱི་ལིངྒ་བཅའ་བའི་རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །དགྲ་གསད་པའི་རིམ་པ་ནི་དང་པོར་བདག་རྣལ་འབྱོར་པའི་མདུན་དུ་མཛུབ་

གང་པའི་འབྲུབ་ཁུང་གྲུ་གསུམ་བྲུས་ཏེ། དུར་ཁྲོད་ཀྱི་སོལ་བས་ནག་པོར་བྱུག་གོ །དེའི་ནང་དུ་དགྲ་བོའི་རྐང་རྗེས་ཀྱི་ས་དང་། བག་ཕྱེ་ལས་ལིངྒ་བྱས་ལ། མིང་བྱང་བཅུག་ལ་གྲུ་གསུམ་དུ་གཞུག །དེའི་ཁར་གཡམ་པ་སྔོན་པོ་ཅིག་ལ། །ཡུང་བ་སེར་
པོས་རི་རབ་དང་། རྡོ་རྗེ་རྒྱ་གྲམ་གྱི་གཟུགས་བྲིས་ལ། ཁ་བཅད་ལ་གཞག་གོ། །འགྲམ་དུ་བཟེད་ཞལ་དང་མཆོད་པ་རྣམ་ལྔ་བཤམས་ལ། བདག་ཉིད་ཕྱག་ན་རྡོ་རྗེ་དང་། མདུན་དུ་ལྔ་ལྡན་བསྐྱེད་ཅིང་སྤྱན་དྲངས། མཆོད་པ་དང་། བསྟོད་པ་དང་། གསོལ་བ་གདབ། གུ་གུལ་དག་
གིས་ལྷ་དང་དབྲལ། ཐུན་གྱི་རྫས་རྣམས་བསགས་ནས་ནི། དྲག་པོའི་སྔགས་ནི་བཟླས་བརྗོད་བྱའོ། །ཉི་མ་ས་བླ་ནཾ། ཀླད་པ་ནཾ་ཀུ་ན་ཞི། ཙིཏྟ་ཀུ་ལི་ནཾ། ཙི་ཏྲ་མུ་ཏྲ་བཟློག་བྱེར། ཐུམ་རིལ་རྦད་ཆེ་གེ་མོ་མཱ་ར་ཡ་ཛཿརྦད་ནཾ་ཞེས་འབུམ་བཟླས། དེ་ནས་ལིངྒའི་མགོ་བཅད་ལ། །མགོ་དང་
ལིངྒ་སར་པ་གཉིས། །རབས་ཆད་ཐོད་པའི་ནང་དུ་གཞུག །མནན་པ་སྒྲུབ་པ་ཚུལ་བཞིན་བྱ། །ལྷ་འདྲེ་གནས་པའི་ས་རུ་གཞུག །ལིངྒའི་ལུས་དང་གསར་པ་གཉིས། །རལ་གྲིས་གཏུབས་ལ་དྲག་པོའི་རྫས་དང་གདུག་པ་ཅན་གྱི་ཤིང་ལ་སྦྱིན་སྲེག་ཚུལ་བཞིན་དུ་བྱའོ། །དགྲ་ལ་བྱ་བའི་
རིམ་པའོ།། །།བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །སྦྱིན་སྲེག་བྱེད་ན་སླ་ང་འམ་ཐབ་ཁུང་རྙིང་པ་རུ། །བརྒྱའམ་ཡང་ན་ལྔ་བཞི་གཅིག །བསྐྱར་ཞིང་ལས་ལ་སྦྱར་བར་བྱ། །གདུག་པའི་རྫས་ནི་སྣ་ཚོགས་དང་། །མར་ནག་ཚིལ་ཆེན་སྐེ་ཚེ་དང་། །ཏིལ་དང་མིང་
བྱང་སྤེལ་ཏེ་བསྲེག །མེ་ལྷ་བསྐྱེད་ལ་སྦྱིན་སྲེག་དབུལ། །སྔགས་ནི་ཉི་མ་ས་བླ་ནའི་རྟིང་ལ་ཆེ་གེ་མོ་རཀྵ་ཤཱནྟིཾ་ཀུ་རུ་མཱ་ར་ཡ་རྦད་ཅེས་པས། དུག་སྣ་ཚོགས་དང་། དྲི་མི་ཞིམ་པ་སྣ་ཚོགས་དང་། དྲག་པོའི་རྫས་སྣ་ཚོགས་དང་། མར་ནག་ལ་སོགས་པས་སྦྱིན་སྲེག་བྱའོ། །ཏིང་ངེ་འཛིན་དགྲ་
བགེགས་གང་ཡིན་པར་མོས་པར་བྱས་ལ། །རྫས་རེ་དང་སྔགས་རེ་བསྟུན་ཞིང་སྦྱིན་སྲེག་བྱའོ་ཕྱག་ན་རྡོ་རྗེ་དང་། ལྔ་ལྡན་བསྐྱེད་པ་དང་། སྤྱན་དྲངས་པ་དང་། མཆོད་པ་དང་། བསྟོད་པ་བྱས་ལ། དེ་ནས་མེ་ལྷ་བསྐྱེད་ལ་སྦྱིན་སྲེག་བྱའོ། །དྲག་པོ་དང་ཞི་བའི་སྦྱིན་སྲེག་གི་རིམ་པའོ།། །།

བཅོམ་ལྡན་འདས་རྡོ་རྗེ་འཛིན་ལ་ཕྱག་འཚལ་ལོ། །གྲུ་གསུམ་ཉིས་འགྱུར་བྲིས་ལ་ནང་ཐལ་བ་འཇམ་པོས་བྱུག །ཁ་རྩང་དམར་གྱིས་བསྐོར། ཉི་མ་ས་བླ་ན་ལ་སོགས་པ་ལ་འདི་གདགས་སོ། །ཤིག་བྱེར་ནན། མགོ་ནན། ཧ་ན་ཧ་ན་མཱ་ར་ཡ་རྦད་ནན། སྦལ་པའམ། སྦྲུལ་ལྟ་བུའི་རྗེས་
བྱུང་ན་འགོང་པོ་ཡིན། བོང་བུའི་རྗེས་བྱུང་ན་འགོང་པོ་ཡིན། །ཨུ་མ་པའི་བཤགས་པ་འདྲ་བ་བྱུང་ན་རྒྱལ་པོ་ཡིན། ཤིང་ལོ་ལྟ་བུའི་རྗེས་སམ་རལ་པ་བསྙིགས་པ་ལྟ་བུའི་རྗེས་བྱུང་ན་བདུད་ཡིན། མདའ་མང་པོ་བཞག་པ་འདྲ་བའི་རྗེས་བྱུང་ན་བཙན་ཡིན། ཕུག་རོན་གྱི་བྱ་བྲའི་རྗེས་འདྲ་
བའམ། ལྕགས་ཐག་སྤྲེལ་བའི་རྗེས་བྱུང་ན་མ་མོ་ཡིན། དེ་རྣམས་གང་བྱུང་བ་དང་ལས་ལ་སྦྱར་རོ། །རྡོ་རྗེ་ལྕེ་དབབ་ཀྱི་འགྲེལ་པ་མུ་ཏིག་གི་ཕྲེང་བ་ཞེས་བྱ་བའི་རིམ་པ། རྒྱ་གར་གྱི་མཁན་པོ་རྒྱལ་བུ་སྤྲིན་གྱི་ཤུགས་ཅན་གྱིས་མཛད་པ་རྫོགས་སོ།། །།སླད་ཀྱི་པཎྜི་ཏ་ཛ་ཡཱ་ཀ་ར་
དང་། ལོ་ཙཱ་བ་མར་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། བྷ་ག་བཱན་ཛི་ཧྲཱཾ་བེ་ཤ་མནྟྲ་ཧྲྀ་ད་ཡཾ། བཛྲ་པཱ་ཎི་སཱ་དྷ་ནཱཾ་ནཱ་མ། བོད་སྐད་དུ། བཅོམ་ལྡན་འདས་ཕྱག་ན་རྡོ་རྗེ་ལྕེ་དབབ་ཀྱི་གསང་བའི་ཡང་བཀོལ་གྱི་སྒྲུབ་པའི་
ཐབས་ཞེས་བྱ་བ། བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །གཡས་བསྐུམ་གཡོན་བརྐྱང་གར་དགུས་ནི། །རི་བོང་འཛིན་ལ་གར་གྱིས་བཞུགས། །རིག་སྔགས་གསང་སྔགས་ཀུན་གྱི་གཙོ། །རྡོ་རྗེ་འཆང་ལ་ཕྱག་འཚལ་ནས། །དེ་ནས་བླ་མའི་བཀའ་
དྲིན་གྱིས། ཇི་ལྟར་རིམ་པས་སྒྲུབ་པའི་ཐབས། །བདག་ནི་བླ་མའི་རྗེས་དྲན་པས། །དེ་ཡི་སྒྲུབ་ཐབས་ཆོ་ག་བཤད། །དང་པོར་རྣལ་འབྱོར་སྣོད་ལྡན་གྱིས། །རྡོ་རྗེ་འཛིན་པ་བསྒྲུབ་འདོད་པས། །དུར་ཁྲོད་དབེན་པའི་གནས་ཕྱོགས་སུ། །རོ་གསུམ་མེད་པའི་ས་ལ་ནི། །མཎྜལ་
དཀྱིལ་འཁོར་ལེགས་བྱས་ལ། །མེ་ཏོག་སྔོན་པོས་མཛེས་བྱས་ལ། །མདུན་དུ་རྟེན་ལ་སོགས་པ་དགྲམ། །ཕྱི་ཡི་མཆོད་པ་རྣམ་ལྔ་དང་། །ནང་གི་བདུད་རྩི་གཏོར་མར་བཅས། །ཤ་ཆང་ཟས་ཀྱི་ལོངས་སྤྱོད་བཤམ། །རྣལ་འབྱོར་གནས་བཅས་ཤེས་རབ་ཅན། །ཁྲུས་བྱ་

ཉེ་རེག་འཐོར་འཐུང་བསང་གཏོར་བྱའོ། །བདེ་བའི་སྟན་ལ་རབ་འདུག་ནས། །རྡོ་རྗེ་རྒྱལ་པོའི་སྐྱིལ་ཀྲུང་བཅའ། །ཡན་ལག་བདུན་དང་ལྡན་པ་ཡིས། །སེམས་བསྐྱེད་སྔོན་དུ་འགྲོ་བར་བྱ། །དེ་ནས་རང་གི་སྙིང་གར་ཟླ་བའི་དཀྱིལ་འཁོར་ལ་གནས་པའི་ས་བོན་
གྱིས། །བླ་མ་དང་གོས་སྔོན་ཅན། སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་ལ། ས་བོན་ལས་བྱུང་བའི་མཆོད་པའི་བྱེ་བྲག་གིས། གདན་དབུལ་བ་དང་། ཕྱག་བཙལ་བ་དང་། ཉེ་རེག་དང་། འཐོར་འཐུང་བསང་གཏོར་དབུལ་བ་དང་། མཆོད་པ་ལ་སོགས་
ཏེ་ཡན་ལག་བདུན་པ་བྱའོ། །བླ་མ་དང་ནི་གོས་སྔོན་ཅན། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་པ་སྣ་ཚོགས་པ་དང་། མེ་ཏོག་ལ་སོགས་པ་ཕུལ་ལ། སེམས་ཅན་ཐམས་ཅད་སྡུག་བསྔལ་ལས་བསྐྱབ་པའི་ཕྱིར། བདག་གིས་
སྡིག་པ་མ་ལུས་པར་ནི་བཤགས་པར་བགྱི། དེ་ནས་བླ་མ་དང་ནི་གོས་སྔོན་ཅན། སངས་རྒྱས་དང་བྱང་ཆུབ་སེམས་དཔའི་ཚོགས་དང་ནི། སློབ་དང་མི་སློབ་ལ་སོགས་སེམས་ཅན་རྣམས་ཀྱི་དོན་དུ། བསོད་ནམས་ཀུན་ལ་རྗེས་ཡི་རང་། དཀོན་མཆོག་གསུམ་ལ་སྐྱབས་སོང་ཞིང་། །བྱང་
ཆུབ་ཏུ་ནི་དེ་དག་བསྔོ། །ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་སོ། །ཚངས་པའི་གནས་བཞི་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ།
དེའི་མཚན་ཉིད་བྲལ་བས་སྟོང་། །རྒྱུ་མེད་པས་ན་མཚན་མ་མེད། །རང་བཞིན་གྱིས་ན་དངོས་པོ་རྣམས། །སྨོན་པ་དང་བྲལ་བསྒོམ་པར་བྱའོ། །དེ་ནས་སྟོང་པའི་རང་བཞིན་ལས། །འོད་ཀྱི་ཕུང་པོར་བདག་རང་ཉིད། །དེ་ནས་ཨེ་དང་ཡཾ་རཾ་བཾ་ལཾ་སུཾ་ཧཱུཾ་རྣམས་ཡོངས་སུ་གྱུར་པ་ལས།
གྲུ་གསུམ་པ་དང་། གཞུའི་དབྱིབས་དང་། གྲུ་གསུམ་པ་དང་། ཟླུམ་པོ་དང་། གྲུ་བཞི་དང་། ནག་པོ་དང་། སྔོ་སྐྱ་དང་། དམར་པོ་དང་། སྔོན་པོ་དང་། སེར་པོ་བསམ་པར་བྱའོ། །འབྱུང་བ་ལྔའི་དཀྱིལ་འཁོར་གོང་ནས་གོང་དུ་བསམ་པར་བྱའོ། །དེའི་སྟེང་དུ་སུཾ་གྱི་ཡི་གེ་ལས་བྱུང་བའི་ཟུར་

བཞི་རིན་པོ་ཆེའི་རང་བཞིན་ཅན། རྭ་བརྒྱད་ཀྱིས་ཉེ་བར་མཛེས་པའི་སྟེང་དུ། ཨོཾ་མེ་དཱི་ནཱི་བཛྲཱི་བྷ་བ་བཛྲ་བནྡྷ་ཧཱུཾ། ཨོཾ་བཛྲ་པྲཱ་ཀཱ་ར་ཧཱུཾ་བཾ་ཧཱུཾ། ཨོཾ་བཛྲ་པཉྩ་ར་ཧཱུཾ་ཡཾ་ཧཱུཾ། ཨོཾ་བཛྲ་བི་ཏཱ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛྭཱ་ལ་ཏྲཾ་སཾ་ཏྲཾ། ཨོཾ་བཛྲ་ཛྭཱ་ལ་ཨ་ན་ལཱ་རྐ་ཧཱུཾ་རཾ་ཧཱུཾ་སྔགས། དེ་རྣམས་ཀྱིས་རྡོ་རྗེའི་ས་
གཞི་ལ་སོགས་དྲུག་མངོན་དུ་གྱུར་ཏོ། །དེའི་ནང་དུ་བྷྲཱུཾ་དང་། ཙ་དང་པཾ་དང་ཨ་ཉིད་དོ། །དེ་སྟེང་ཟླ་བ་རྡོ་རྗེ་བསམ། །དེ་ཡི་ལྟེ་བར་ཧཱུཾ་གིས་མཚན། །ཧཱུཾ་སྔོན་འོད་ཟེར་ལྔར་ལྡན་པ། །རྡོ་རྗེ་ཡོངས་སུ་གྱུར་པ་ལས། །སྐུ་མདོག་མཐིང་ནག་ཞལ་གཅིག་པ། །རབ་ཏུ་ཁྲོས་པས་བརྐྱང་བསྐུམ་
སྟེ། །བཅུ་དྲུག་ལོ་ལོན་ཤ་ཚུགས་ཅན། །སྤྱན་གསུམ་མེ་ལྟར་འབར་བ་ལ། །ཤིན་ཏུ་ཁྲོས་པའི་ལྟ་སྟངས་ཅན། །བསྣུན་པའི་ཚུལ་གྱིས་ལེགས་བཟུང་ཞིང་། །དྲིལ་བུ་སྡིགས་མཛུབ་ཐུགས་ཀར་བསྒྲེང་། །སྟོད་གཡོགས་ན་བཟའ་སྔོན་པོ་ལ། །སྨད་གཡོགས་སྟག་གི་ཤམ་ཐབས་
ཅན། །ཉི་མའི་འོད་ཅན་ཟླ་བའི་མདངས། །ཧ་ཧའི་འོ་དོད་ཆེན་པོ་ཡིས། །ལོག་འདྲེན་ལ་སོགས་སྐྲག་པར་མཛད། །འཇིགས་བྱེད་ཁྲོ་བོའི་བདག་པོར་ནི། །བདག་ཉིད་རྣམ་པར་བསྒོམ་པར་བྱ། །ཞེས་བྱ་བ་ནི་སྐུའི་མཚན་ཉིད་དོ། །ཟས་སུ་སྦྲུལ་ཟ་བ་དང་རྒྱན་ཐམས་ཅད་ཀྱིས་བརྒྱན་
པའོ། །དེ་ནས་རང་གི་སྙིང་གར་ཟླ་བའི་དཀྱིལ་འཁོར་ལ་ས་བོན་བཀོད་ལ། ཡེ་ཤེས་སེམས་དཔའ་སྤྱན་དྲང་བར་བྱའོ། །བཞུགས་སུ་གསོལ་བ་དང་། ཕྱག་བཙལ་ཞིང་བསྟོད་པ་དང་མཆོད་པ་ལ་སོགས་པ་བྱའོ། །ཨོཾ་བཛྲ་ཧྲཱི་ཏྲི་ཧ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨརྒྷས་ཞལ་བསིལ་བའོ། །ཨོཾ་བཛྲ་པུཥྤ་པཱུ་ཛ་མེ་
གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མེ་ཏོག་དབུལ་བའོ། །ཨོཾ་བཛྲ་དྷཱུ་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བདུག་སྤོས་ཤངས་སུའོ། །ཨོཾ་བཛྲ་དཱི་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མར་མེ་སྤྱན་ལའོ། །ཨོཾ་བཛྲ་གནྡྷ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དྲི་ཐུགས་ཀར་རོ། །
ཨོཾ་བཛྲ་ནཻ་བི་དྱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞལ་ཟས་ཞལ་དུའོ། །ཨོཾ་བཛྲ་ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སིལ་སྙན་སྙན་དུའོ། །ཛཿཧཱུཾ་བཾ་ཧོཿས། དགུག་པ་དང་། གཞུག་པ་དང་། བཅིང་བ་དང་། དབང་དུ་བྱའོ། །ཡང་ལུས་དང་ངག་དང་སེམས་བྱིན་གྱིས་

བརླབ་པར་བྱའོ། །མགོ་བོ་དང་ལྐོག་མ་དང་། སྙིང་གར་པདྨ་དང་། ཟླ་བའི་དཀྱིལ་འཁོར་ལ། སྐུ་དང་གསུང་དང་ཐུགས་ཀྱི་སྙིང་པོ་ཇི་ལྟ་བར་བཀོད་ལ། དཀར་པོ་དང་སྔོན་པོ་ལ་སོགས་པ་བསམ་མོ། །དེ་ནས་སྤྱི་བོ་དང་། མགྲིན་པ་དང་། སྙིང་གར་པདྨ་དང་།
ཟླ་བ་ལ་སོགས་པ། རིམ་པ་ཇི་ལྟ་བ་བཞིན་དུ་དམིགས་ལ། གསང་སྔགས་བཟླས་པར་བྱ་བ་ནི་འདི་ཡིན་ཏེ། ཉི་མ་ས་བླ་ན་ཀླད་པ་ནཾ། ཀུ་ན་ཞི། ཙིཏྟ་ཀུ་ལི་ནཾ། ཙི་ཏྲ་མུ་ཏྲ་ཡཀྵ་ཏྲ་བཟློག་བྱེར། གསལ་པོར་དམིགས་ལ་བཟླས་པ་བྱ། སྐྱོ་བའམ་དུབ་པར་གྱུར་ན། གསང་སྔགས་ཡིད་ཀྱིས་
བཟླས་པར་བྱ་སྟེ། སྔགས་ཀྱི་སྐྱོན་སྤངས་ཏེ། མི་གསལ་བ་ལ་སོགས་པའི་རྣམ་པར་རྟོག་པ་སྤང་བར་བྱའོ། །བཟླས་པས་སྐྱོ་ན་ཡེ་ཤེས་ཀྱི་འཁོར་ལོ་བཏོན་ལ། མཆོད་པ་དང་། བསྟོད་པ་དང་། བཟོད་གསོལ་བྱ། དེ་ནས་ཨོཾ་ཨཱཿཧཱུཾ། ས་མ་ཡ་མུཿས། ཡེ་ཤེས་ཀྱི་འཁོར་ལོ་གཤེགས་སུ་
གསོལ། དེ་ནས་མི་དམིགས་པར་བསྒོམ་པར་བྱའོ། །ལྡང་བར་འདོད་ན། ཡི་གེ་བརྒྱ་པའི་སྔགས་བརྗོད་ལ། ལྡང་བར་བྱའོ། །ཕྱག་ན་རྡོ་རྗེ་ལྕེ་དབབ་ཀྱི་སྒྲུབ་ཐབས། གསང་བའི་ཡང་བཀོལ་གྱི་ཆོ་ག་བཀོད་པ་ཡི། བདག་གིས་སྒྲུབ་ཐབས་འདི་བཀོད་པས། བདག་དང་
སེམས་ཅན་ཐམས་ཅད་ཀྱི། །བྱང་ཆུབ་ཏུ་ནི་དེ་དག་བསྔོ། །རྒྱལ་པོ་སྤྲིན་གྱི་ཤུགས་ཅན་གྱིས་མཛད་པ་རྫོགས་སོ།། །།སླད་ཀྱི་བླ་མ་ཛ་ཡཱ་ཀ་ར་དང་། མར་པ་ལོ་ཙཱས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།ན་མོ་བུདྡྷཱ་ཡ། བཛྲ་བཛྲ་ཧཱུཾ་ཐཱ། རྡོ་རྗེ་ལྕེ་དབབ་པའི་སྔགས་ནི། ཉི་མ་ས་བླ་ན། ཀླད་པ་
ནཾ། ཀུ་ན་ཞི། ཙིཏྟ་ཀུ་ལི་ནཾ། ཙི་ཏྲ་མུ་ཏྲ་ཡཀྵ་ཏྲ་བཟློག་བྱེར། ནཱ་ག་ཤིག ནཱ་ག་བྱེར། ནཱ་ག་ནཾ། ནཱ་ག་མགོ་ནཾ། ནཱ་ག་ཧ་ན་ཧ་ན་མཱ་ར་ཡ་རྦད་ནཾ། ཚིལ་ཆེན་དང་། ཚོན་སྐུད་རྣམ་ལྔ་ལ་སྔགས་མདུད་བྱས་པ་དང་། གླ་རྩི་དང་སེང་ལྡེང་གི་ཕུར་པ་ལ་སྔགས་བཟླས་ལ་བསྲུང་ངོ་། །ས་དོམ་ནག་པོ་སོད།
ས་དོམ་ནག་པོ་སོད། ས་དོམ་ནག་པོ་ནན། །ས་དོམ་ནག་པོ་ནན། ཞེས་གོང་བཞིན་ནོ། །སེར་བ་སྲུང་ན། ཐལ་ཆེན་དང་། སྐེ་ཚེ་དང་། རྩང་དང་། ཐོ་དང་། མཛུབ་རིས་ཀྱིས་བསྲུང་ངོ་། །སྔགས་འདི་གདགས་སོ། །ས་འདི་སྲུངས་ཤིག་བྱེར་ཡ་བྱའོ། །ཕྱུ་ག་ཙི་ཕཊ། ཙི་ག་ཕྱུ་ཕཊ། ལྕེ་བ་

ཏི་ཕཊ། ཐུཾ་རིལ་རྦད། ཆེ་གེ་མོ་མཱ་ར་ཡ་རྦད་ནཾ། ནཱ་ག་ཧྲིལ་ཧྲིལ། ནཱ་ག་ཕྲོམ། ནཱ་ག་ཕོབ། ཕུར་པ་དང་ཚིལ་ཆེན་དང་། ཁྱི་དང་བོང་བུ་དང་རྟ་རྣམས་ཀུན་ནག་པོའི་ཁྲག་དང་། ཐོད་པ་མཚན་ངན་ཅིག་དང་། དོར་རྟ་དང་། ཆུ་དངོས་དང་། དེ་རྣམས་ལ་བྱའོ། །ལིངྒ་དང་། གཟུགས་ལ་བརྟེན་
ལ་བྱའོ། །ཆར་པ་འབེབས་ན། རྟེན་ས་རུ་སྦྲ་ཕུབ་ལ་གཟུངས་གདོན། སྔགས་གོང་མ་བཟླས། ཀླུ་མཆོད་དང་། ཆབ་གཏོར་བྱ། དུས་དུས་སུ་བསླང་། ཞག་བདུན་བྱའོ། །འདིས་ཀྱང་བསྲུང་། ཨེཿབ་གཿར་ཚེ་འདི་ན་བ་གཿབར་མ། པ་ལཿས་ཏ་ཡེ། མགོ་སྟེ་ས་སྟེ། བར་མ་ཧཱ་ཨཿ
ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ཅི་མང་དུ་བཟླས་སོ། །རང་ཕྱག་ན་རྡོ་རྗེ་བསྒོམ་ཤེས་ན་རབ། མ་ཤེས་ན་རང་ཏམ། མང་དུ་བཟླས་ན་གང་ཡང་རུང་བ་ཐུབ་བོ། །ཕྱག་ན་རྡོ་རྗེ་ཀླུ་འདུལ་བའི་དྲག་སྔགས་བསྒོམ་དུ་མེད་པའོ། །ཐེ་ཚོམ་ཡིད་གཉིས་རྐྱེན་གྱི་རྒྱུ་བསྙེན་པ་དང་སྒྲུབ་པ་ཟབ་མོ་རྫོགས་
སོ།། །།དེ་ཡང་བྱ་བའི་དུས་ནི། སྔགས་ཀྱི་ནུས་པ་བསྐྱེད། ཉམས་རྟགས་བྱུང་བ་དང་། ལས་མཐའ་བསྡུས་ཏེ། མནན་པ་ལ་སོགས་གཞན་དང་མཐུན། སྦྱིན་སྲེག་གི་རིམ་པ་ལ། རྫས་ནི་ཞི་རྒྱས་གཞན་དང་མཐུན། །གདུག་པའི་རྫས་ནི་སྣ་ཚོགས་དང་། །མར་ནག་ཚིལ་ཆེན་སྐེ་
ཚེ་དང་། །ཏིལ་དང་མིང་བྱང་སྤེལ་ཏེ་བསྲེག །སླ་ངའམ་ཐབ་ཁུང་རྙིང་པ་རུ། །བརྒྱའམ་ཡང་ན་ལྔ་བཞི་གཅིག །བསྐྱར་ཞིང་ལས་ལ་སྦྱར་བ་དང་། །སྔགས་ཀྱི་མཐར་ནི་རཀྵ་ཤཱནྟིཾ་གདགས་པར་བྱ། །སྤྱན་དྲངས་མཆོད་དང་བསྟོད་པ་ནི། །གཞན་ཡང་དཀྱུས་ལས་ཤེས་པར་བྱ། །
ཉམ་ཆུང་སྣོད་མེད་ཐེ་ཚོམ་རང་འཕུང་འགྱུར། །ཉམས་ལྡན་མ་ཡེངས་བསྒྲུབས་བྱས་ནས། །བླ་མ་དམ་པ་རྣམས་ཀྱི་ཞབས་ལ་གཏུགས། ཨ་ཏི། གུ་ཧེ། ཞར་ལ་འདི་ཡང་མཆོད་པ་སྟེ། །འཁར་སོགས་སྣོད་ནི་མཛེས་པ་རུ། །འོ་མ་དང་བཅས་སྨན་རྣམས་ཀྱིས། །བཀང་སྟེ་མདུན་དུ་བཞག་
པའོ། །དེ་སྟེང་བཞག་པའི་རྫས་རྣམས་ནི། །ཤིན་ཏུ་གསལ་བྱེད་གདན་སྟེངས་སུ། །ལྔ་ལྡན་མཐའ་ཡས་སྦྲུལ་དགུ་པ། །རྩི་སྨན་མཆོད་ཅིང་མདུན་གནས་པའོ། །བསྲེག་མནན་བསྐྱལ་བ་ཉམས་དང་སྦྱར། །བདག་རྣལ་འབྱོར་པ་སྡང་མིག་གིས་ལྟ་ཞིང་། ཡུངས་ཀར་གྱིས་བྲབ་

པའོ། །གྲུ་གསུམ་དུ་བྲུབ་བོ། །དེ་ནས་སྔགས་གདབ་བོ། །དེ་ནས་ཐལ་མོ་བརྡབ་ཅིང་ནད་དང་གདོན་བགེགས་ཐམས་ཅད་བརླག་པར་བསམ་མོ། །ཡང་ཡང་ལྕགས་ཀྱུའི་ཕྱག་རྒྱ་བཅས་ཏེ་གོང་གི་མི་ལ་བསྟིམ་མོ། །དེ་ནས་ཕུར་པ་གདབ་ཅིང་བྲུབ་པར་བྱའོ། །ཨ་
ཏི་ཨེའི་ཚོགས་ཀྱི་རིམ་པ་ལ། དང་པོ་བདག་རྣལ་འབྱོར་པའི་མདུན་དུ་མཛུབ་གང་བའི་བྲུབ་ཁུང་གྲུ་གསུམ་བྲུས་ཏེ། དེའི་ནང་དུ་མིང་བྱང་བུ་ལ་བྲིས་ལ་གཞག །དེའི་ཁ་རུ་གཡམ་པ་སྔོན་པོ་ཅིག་ལ་ཡུང་བ་སེར་པོས་རི་རབ་དང་རྡོ་རྗེ་རྒྱ་གྲམ་གྱི་གཟུགས་བྲིས་ལ་བཞག །མ་གྲུབ་བྱས་ན་ལྟས་
ངན་འབྱུང་། །ཀུན་ལ་ཡོད་ན་ངོ་མཚར་ཆུང་། །ལྕེ་དབབ་པའི་བྱ་ཐབས་རྫོགས་སོ།། །།རྟེན་འབྲེལ་གྱི་མཐུས་བསྲུང་བའི་ཐབས་ནི། རྨ་བྱའི་མཁྲིས་པ་དང་། ཀ་ར་བསྲེ་ལ་བསྐུ། སའི་བདུད་རྩི་ལོ་ལྔ་བརྒྱ་ལོན་པ་ཡན་ཆོད་བསྐུའོ། །སྤོས་གུ་གུལ་ནག་པོ་དང་། གླ་རྩི་དང་། མུ་ཟི་དང་།
ལྡོང་རོས་དང་། དྲི་ཆེན་དང་ཆ་མཉམ་དུ་སྦྱར་ཏེ། སྦྲང་རྩིས་སྦྲུས་ཏེ་དུད་པ་བཏང་ངོ་། །སྨན་གྱི་ནུས་པ་ནི་འབྲས་བུ་གསུམ་དང་། བུས་པ་སྐྱེས་མ་ཐག་པའི་རང་འབྱུང་དང་བསྲེས་ཏེ། དྲི་ཆུས་སྦྲུས་པའི་རི་ལུ་ཁར་གཞག་གོ། །སྨན་གྱི་མཆོག་གིས་བསྲུང་བ་ནི། ཨ་རུ་ར་རྣམ་པར་
རྒྱལ་བ་བཅངས་པས་བསྲུང་བའོ། །ས་བདག་གི་ནད་ཐུབ་བོ།། །།ཉི་མ་ས་བླ་ན་ལ་སོགས་པ་ལ་འདི་གདགས་སོ། །ཤིག་བྱེར་ནན། མགོ་ནན། ཧ་ན་ཧ་ན་མཱ་ར་ཡ་རྦད་ནན། ཞེས་བཟླས་ཤིང་བསྲུང་བ་བྱའོ། །རྟེན་འབྲེལ་གྱི་མཐུས་བསྲུང་བ་རྫོགས་སོ།། ༄། །ལག་ན་རྡོ་རྗེ་ལྕེ་
དབབ་ཀྱི་སྔོན་འགྲོའི་ལག་ལེན་རྣལ་འབྱོར་སྤྱོད་ལམ་བརྒྱད་པ་བཞུགས། ༄༅༅། །བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །རྣལ་འབྱོར་པ་རྣམས་རྒྱུན་དུ་བྱ་བའི་ཆོ་ག་ནི། ཐུན་མོང་གི་སྤྱོད་ལམ་བརྒྱད་ཀྱིས་བསྟན་ཏེ། ཁྲུས་དང་། མཆོད་པའི་རྣལ་འབྱོར་དང་། ཟས་
དང་། སྐོམ་དང་། གཏོར་མ་དང་། སྒོམ་པ་བཟླས་བརྗོད་ཀྱི་སྤྱོད་ལམ་བརྒྱད་དོ། །དང་པོ་ཁྲུས་ཀྱི་རྣལ་འབྱོར་ནི། །རང་ཉིད་བསྐྱེད་པའི་རིམ་བསྒོམས་ཏེ། །རིན་ཆེན་བུམ་པ་མཛེས་པ་རུ། །ཆུ་གཙང་སྲོག་ཆགས་མེད་པ་དང་། །ཙནྡན་ལ་སོགས་དྲིས་སུ་དགང་། །བདག་གི་ཐུགས་ཀའི་ས་

བོན་གྱིས། །བུམ་པ་སྦྱངས་ཏེ་བྷྲཱུཾ་གྱིས་བསྐྱེད། །དེ་རུ་ལྷ་བསྐྱེད་ཡེ་ཤེས་བསྟིམ། །མཆོད་བྱས་སྔགས་ནི་བཟླས་ནས་སུ། །གྲངས་ནི་ཐིམ་ནས་འོད་དུ་ཞུ། །རང་གི་ཐུགས་ཀའི་ས་བོན་གྱི། །ཡི་གེ་པཾ་བསྒོམ་པདྨར་གྱུར། །དེ་ཉིད་ནམ་མཁའི་སྟེང་ཕྱོགས་བསམ། །དེ་སྟེང་སངས་
རྒྱས་སྤྱན་ལ་སོགས། །རྫུས་སྐྱེས་བུམ་པ་ཐོགས་པ་བསམ། །རང་བཞིན་དཀྱིལ་འཁོར་ལྷ་མོ་ཡང་། །བདུད་རྩི་བུམ་པ་ཐོགས་ནས་སུ། །བཀྲ་ཤིས་རྡོ་རྗེ་གླུ་ལེན་ཅིང་། །བདུད་རྩི་དཀར་པོ་དྲི་མེད་ཀྱིས། །རང་གི་སྤྱི་བོར་བླུགས་པར་བསམ། །དྲི་མེད་དག་ནས་མི་བསྐྱོད་འགྱུར། །དེ་ནི་
དུས་ཆེན་ཁྱད་པར་དུ། །རྒྱུན་དུ་འགྲུབ་ན་བསོད་ནམས་ཆེ། །དེ་ནི་ཁྲུས་ཀྱི་རྣལ་འབྱོར་རྒྱས་པའོ། །དེ་ལས་བསྡུས་པ་འདོད་པ་ལ། །རང་ཉིད་སྟོང་པའི་ངང་ལས་ནི། །ས་བོན་ལས་ནི་ལྷར་བསྐྱེད་དེ། །ཁྲུས་ཀྱི་བུམ་པ་དག་ལ་ཡང་། །སྔགས་བཏབ་སྦྱངས་ཏེ་བདུད་རྩིར་གྱུར། །ཐུགས་
ཀའི་ཧཱུཾ་ལས་འོད་ཟེར་འཕྲོས། །རང་བཞིན་དཀྱིལ་འཁོར་ལྷ་ལ་ཕོག །ལྷ་མོ་བུམ་པ་ཐོགས་པ་ཡིས། །བདུད་རྩིའི་ཆུ་བླུགས་སྒྲིབ་པ་དག །དེ་ལས་ཤིན་ཏུ་བསྡུས་པ་ནི། །སྐད་ཅིག་རྫུས་སྐྱེས་ལྷ་རུ་བསམ། །ཐུགས་ཀའི་ཧཱུཾ་ལས་འོད་ཟེར་འཕྲོས། །ཆུ་ལ་ཕོག་པས་བདུད་རྩིར་གྱུར། །ལྷ་མོ་
བུམ་པ་ཐོགས་པ་ཡིས། །ཁྲུས་བྱས་དྲི་མ་དག་པར་འགྱུར། །དེ་དག་ཀུན་གྱི་སྔོན་དུ་ནི། །སེམས་བསྐྱེད་པ་དང་ལྡན་བྱས་ཏེ། །བདག་དང་སེམས་ཅན་ཐམས་ཅད་ཀུན། །ཕྱག་རྒྱའི་དངོས་གྲུབ་ཐོབ་བྱའི་ཕྱིར། །བདག་གིས་ཁྲུས་ནི་འདི་བྱའོ། །མཐར་སྨོན་པ་ཡི་བྱང་ཆུབ་སེམས། །ཕྱག་
རྒྱའི་མཆོག་ཏུ་བསྔོ་བར་བྱའོ། །དེ་རྣམས་སྔགས་དང་ཕྱག་རྒྱ་ནི། །ཨོཾ་བཛྲ་སྣཱ་ན་ཧཱུཾ་ཕཊ། ཕྱག་རྒྱ་རྡོ་རྗེ་ཁུ་ཚུར་གཉིས། །མཐེ་བོང་བསྒྲེང་སྟེ་སྤྱི་བོར་བཞག །ཡང་ན་རྒྱུད་གཞན་སོ་སོ་ཡི། །སྔགས་དང་ཕྱག་རྒྱ་དག་གིས་བྱ། །དབང་བསྐུར་ཁྲུས་དང་ལྡན་པ་ཡིན། །དེ་ནས་མཆོད་པའི་རྣལ་
འབྱོར་བསྟན། །ས་གཞི་སྐྱོན་སྤངས་ཡོན་ཏན་ལྡན། །བ་ཡི་རྣམ་ལྔར་ལྡན་པ་ཡིས། །མཎྜལ་ཡིད་འོང་མཛེས་པར་བྱ། །ཚད་ལྡན་དབྱིབས་ལྡན་དེ་ལ་ནི། །དང་པོར་དྲི་ལྡན་ཆུ་ཡིས་ནི། །བྱུགས་ཚེ་ཉི་ཟླའི་གདན་དུ་བསམ། །དེ་སྟེང་མེ་ཏོག་འགྲེམས་པའི་ཚེ། །པདྨ་དག་ཏུ་གྱུར་པར་བསམ། །

དེ་གསུམ་སྔགས་དང་བརྗོད་པར་བྱ། །མཆོད་པ་དྲི་མེད་བཤམས་ནས་ཀྱང་། །རང་ཉིད་ཆོ་གས་ལྷར་བསྐྱེད་དེ། །རང་གི་ཐུགས་ཀྱི་ས་བོན་ལས། །འོད་འཕྲོས་ཐུགས་ཀའི་ལྷ་ཡང་གསལ། །པདྨའི་སྟེང་དུ་གཟུགས་བརྙན་ཤར། །དེ་ནས་སྔགས་དང་ཕྱག་རྒྱ་
དང་། །ཏིང་འཛིན་ལྡན་པའི་འོད་ཟེར་གྱིས། །ཡེ་ཤེས་ལྷ་ནི་སྤྱན་དྲངས་ཏེ། །གཟུགས་བརྙན་ཉིད་ལ་བསྟིམ་པར་བྱ། །ཡང་ན་འོད་ཟེར་འཕྲོས་པས་སུ། །བླ་མ་སྤྱན་དྲངས་སྒྲིབ་པ་སྦྱང་། །མི་བསྐྱོད་གྱུར་ནས་དབུ་ལ་བཞུགས། །དང་པོ་ཕྱག་ནི་བཙལ་བྱ་སྟེ། །དེ་ནས་མཆོད་པ་
རྒྱས་པར་དབུལ། །དེ་ཡང་དང་པོ་བླ་མ་ལ། །དེ་ནས་དཀྱིལ་འཁོར་ལྷ་ལ་དབུལ། །མཆོད་པ་དབུལ་བའི་དབུལ་ས་ཡང་། །དང་པོ་མེ་ཏོག་གདན་བསམ་སྟེ། །ཞབས་གཉིས་ལ་ནི་དབུལ་བར་བྱ། །དེ་ནས་ཞལ་བསིལ་གདོང་དང་ཕྱག །འཐོར་འཐུང་ཞལ་གྱི་ནང་དུ་དབུལ། །ཉེ་རེག་
ཐུགས་ཀར་བྱུག་པར་བྱ། །ཡོན་ནི་ཞབས་ཀྱི་དྲུང་དུ་དབུལ། །སྐུ་ཁྲུས་དབུ་ལ་དབུལ་བར་བྱ། །བདུག་སྤོས་ཤངས་ལ་དབུལ་བར་བྱ། །མེ་ཏོག་དབུ་ལ་དབུལ་བར་བྱ། །ལྷ་བཤོས་ལྗགས་ལ་དབུལ་བར་བྱ། །སིལ་སྙན་སྙན་ལ་དབུལ་བར་བྱ། །རིན་ཆེན་མཛོད་སྤུར་དབུལ་བར་
བྱ། །གདུགས་དང་རྒྱལ་མཚན་ལ་སོགས་པ། །སྐུ་ཉིད་ལ་ནི་དབུལ་བར་བྱ། །དེ་ནི་ཕྱི་ཡི་མཆོད་པའོ། །ནང་གི་མཆོད་པ་འདི་ལྟ་སྟེ། །སྒེག་མོ་ལ་སོགས་ལྷ་མོ་རྣམས། །སྤྲུལ་ལ་མཆོད་པ་དབུལ་བར་བྱ། །གསང་བའི་མཆོད་པ་བདུད་རྩི་ཡིས། །ལྷ་རྣམས་དགྱེས་པ་
བསྐྱེད་པར་བསམ། །དེ་འོག་རྩ་བའི་ལྟུང་བ་རྣམས། །རང་གི་བློ་ལ་བགྲང་བསྔོ་བྱ། །ཉེས་པ་གང་བྱུང་དེ་ལ་ནི། །ཆེད་དུ་གཏང་དེ་བཤགས་པ་བྱ། །དང་པོར་བསམ་པ་གཙོར་བྱས་ཏེ། །ཚིག་གིས་ཀྱང་ནི་བཤགས་པ་བྱ། །དེ་འོག་ཡི་གེ་བརྒྱ་པས་སྦྱངས། །དེ་ནས་འཇིག་
རྟེན་འདས་པ་དང་། །འཇིག་རྟེན་པ་ཡི་དགེ་བ་ལ། །དགའ་བ་བསྐྱེད་དེ་རྗེས་ཡི་རང་། །དེ་འོག་བླ་མ་དཀྱིལ་འཁོར་དང་། །སངས་རྒྱས་བྱང་ཆུབ་སེམས་དཔའ་ལ། །མྱ་ངན་མི་འདའ་གསོལ་བ་གདབ། །དེ་ནས་ཆོས་ཀྱི་འཁོར་ལོ་ནི། །བསྐོར་བར་ཡང་ནི་གསོལ་བ་གདབ། །དེ་ནས་

བླ་མ་སངས་རྒྱས་དང་། །བྱང་ཆུབ་སེམས་དཔའ་དག་ལ་ཡང་། །སྐྱབས་སུ་མཆི་ཞིང་ལུས་ཀྱང་དབུལ། །དེ་འོག་སྡོམ་པ་གཟུང་བར་བྱ། །རོལ་མོ་སིལ་སྙན་ལྡན་པ་ཡིས། །རྡོ་རྗེ་སྔགས་ནི་མགུར་བཅས་ནས། །ཉི་ཤུ་རྩ་གཅིག་བདུན་གསུམ་གྱིས། །ལྷ་རྣམས་ལ་ནི་བསྐོར་བར་
བྱ། །དེ་འོག་མཆོད་སོགས་དགེ་བ་རྣམས། །བྱང་ཆུབ་ཆེན་པོར་བསྔོ་བར་བྱ། །ཡེ་ཤེས་གཤེགས་ནས་ཏིང་འཛིན་བསྡུ། །དེ་ནས་ཅི་བདེར་དོན་གཞན་བྱ། །དེ་ནི་མཆོད་པ་རྒྱས་པའི་ཚད། །དེ་ལས་བསྡུས་པ་འདོད་པ་རྣམས། །མཎྜལ་དངོས་སམ་ཡིད་ཀྱིས་བསམ། །རང་
ཉིད་སྟོང་པའི་ངང་ལས་ནི། །ས་བོན་ལས་ནི་ལྷར་བསྐྱེད་དེ། །ཡེ་ཤེས་དཀྱིལ་འཁོར་སྤྱན་དྲངས་ཏེ། །རྫས་རྣམས་དངོས་སུ་མ་འབྱོར་ཡང་། །སྔགས་དང་ཕྱག་རྒྱ་ཏིང་འཛིན་གྱིས། །མཆོད་པ་རྣམ་ལྔ་གསང་མཆོད་ཙམ། །ཡིད་ཀྱིས་བཤགས་པ་ལ་སོགས་བྱ། །ཤིན་ཏུ་བསྡུས་
པ་འདོད་པ་ལ། །རང་ཉིད་སྐད་ཅིག་ལྷར་བསམས་ཏེ། །བླ་མ་ཡི་དམ་ལྷ་ལ་སོགས། །རྫུས་སྐྱེས་ཚུལ་དུ་མདུན་དུ་བསམ། །བསམ་པས་བདུད་རྩི་མཆོད་པ་དང་། །སྡིག་པ་བཤགས་དང་དགེ་རྩ་བསྔོ། །འདི་ནི་ཤིན་ཏུ་བསྡུས་པའོ། །ཟས་ཀྱི་རྣལ་འབྱོར་བསྟན་པ་ནི། །རང་ཉིད་
ཆོ་གས་ལྷར་བསྐྱེད་ལ། །ལྟེ་བའི་འོག་ཏུ་རླུང་བསམས་ཏེ། །དེ་སྟེང་འབྱུང་བ་མེ་བསམ་མོ། །རླུང་གི་མེ་ལྕེས་སྙིང་གར་སླེབས། །སྙིང་གའི་དཀྱིལ་འཁོར་ལྷ་གསལ་ཏེ། །འོད་ཀྱི་ཁང་པའི་ནང་ན་འབར། །ལྕེ་ནི་ཧཱུཾ་ལས་རྡོ་རྗེར་བསམ། །ཡར་རྐན་པཾ་ལས་པདྨ་བསམ། །དེ་ཉིད་ཐབས་
དང་ཤེས་རབ་ལྡན། །ཡང་ན་ཁ་ནི་དགང་གཟར་བསམ། །ལག་པ་བླུགས་གཟར་ཉིད་དུ་བསམ། །ཟས་རྣམས་བྱིན་གྱིས་བརླབ་པ་ནི། །སྣོད་ནི་ཨ་ལས་ཀ་པཱ་ལ། །རྫས་ནི་བདུད་རྩིའི་ཡི་གེ་ཡིས། །བདུད་རྩི་རྣམ་པ་ལྔ་རུ་བསམ། །དེ་འོག་རཾ་དང་ཡཾ་ལས་ནི། །མེ་དང་རླུང་གི་དཀྱིལ་
འཁོར་ནི། །གྲུ་གསུམ་ཟླ་གམ་བ་དན་ཅན། །ཐོད་པའི་ནང་གི་ཡི་གེ་གསུམ། །མུ་ཏིག་བསྟར་ལ་བརྒྱུས་པ་བཞིན། །དེ་སྟེང་རྡོ་རྗེའི་ལྟེ་བ་ལ། །ཡི་གེ་ཧཱུཾ་གིས་མཚན་པར་བསམ། །དེ་སྟེང་ཟླ་བའི་དཀྱིལ་འཁོར་ལ། །ཡི་གེ་ཨོཾ་གྱིས་མཚན་པར་བསམ། །ཡི་གེ་ཧཱུཾ་གི་འོད་ཟེར་གྱིས། །

བ་དན་བསྐྱོད་པས་རླུང་བྱུང་སྟེ། །རླུང་གིས་མེ་སྦར་བདུད་རྩི་བཞུ། །ཧཱུཾ་གིས་བསྡུས་ཤིང་ཨཱཿས་སུ་ཞུ། །ཨོཾ་གྱིས་ཁ་དོག་དཀར་པོར་བསྒྱུར། །སླར་ཡང་གྱེན་དུ་སྤྲོས་པས་སུ། །སྟེང་གི་ཨོཾ་བསྐུལ་འོད་ཟེར་འཕྲོས། །རང་བཞིན་ལྷ་ཡི་མཛོད་སྤུར་ཕོག །གཉིས་མེད་
རོལ་པས་བྱང་སེམས་ཕབ། །དང་པོར་ཨོཾ་ཕོག་ཟླ་བ་ཞུ། །དམ་ཚིག་དང་འདྲེས་རྡོ་རྗེ་ཕབ། །ཆ་གཉིས་གཅིག་འདྲེས་རྡོ་རྗེར་ཞུ། །བདུད་རྩི་དྲི་མེད་དཀར་པོ་དེས། །སྙིང་གའི་ལྷ་ལ་མཆོད་བྱས་ཏེ། །སྦྱིན་སྲེག་ཚུལ་དུ་བཟའ་བར་བྱ། །ཟས་ཀྱི་རྣལ་འབྱོར་རྒྱས་པའོ། །རང་ཉིད་ལྷག་
པའི་ལྷར་བསམས་ཏེ། །སྙིང་གར་ལྷ་ཡི་རྣལ་འབྱོར་བསམ། །ཟས་རྣམས་བྱིན་གྱིས་བརླབ་པ་ནི། །པདྨ་མཛེས་པའི་སྣོད་དག་ཏུ། །བདུད་རྩི་རྣམ་པ་ལྔ་བསམས་ཏེ། །ལག་པ་གཡོན་པའི་ཟླ་སྟེང་ནས། །ཨོཾ་ལས་འོད་འཕྲོས་བདུད་རྩི་བསྲེགས། །གཡས་ཀྱི་ཉི་མའི་སྟེང་ནས་ནི། །
ཨཱཿལས་འོད་འཕྲོས་བདུད་རྩི་སྤེལ། །གཉིས་ཀ་ལས་ནི་ཧཱུཾ་འཕྲོས་ཏེ། །བདུད་རྩི་རྣམས་ནི་འོད་དུ་འབར། །ཧོ་ལས་འོད་འཕྲོས་བདུད་རྩི་ཞུ། །དེ་ནས་ཐུགས་ཀའི་ལྷ་མཆོད་དོ། །དེ་ནི་བསྡུས་པའི་རྣལ་འབྱོར་རོ། །སྐད་ཅིག་རྫུས་སྐྱེས་རྣལ་འབྱོར་གྱིས། །བདག་དང་ཐུགས་ཀའི་ལྷ་
གཉིས་གསལ། །ཐུགས་ཀའི་ཧཱུཾ་ལས་འོད་འཕྲོས་པས། །ཟས་ལ་སོགས་པ་བདུད་རྩིར་བཞུ། །སླར་ཡང་ཡེ་ཤེས་བདུད་རྩི་འབབ། །ཆ་གཉིས་འདྲེས་པའི་བདུད་རྩི་དེ། །ཐུགས་ཀའི་ལྷ་ལ་མཆོད་པར་བྱ། །ཤིན་ཏུ་བསྡུས་པའི་རྣལ་འབྱོར་རོ། །བཏུང་བའི་རྣལ་འབྱོར་བསྟན་པ་ནི། །
རང་ཉིད་བསྐྱེད་པ་ལ་སོགས་ནི། །ཟས་ཀྱི་རྣལ་འབྱོར་ཉིད་དང་མཐུན། །བཏུང་བ་བྱིན་གྱིས་བརླབ་པ་ནི། །སྣོད་ནི་ཨ་ལས་ཀ་པཱ་ལ། །བྱིན་གྱིས་བརླབས་ནས་དེ་ནང་དུ། །བྱང་ཆུབ་སེམས་ཀྱི་ས་བོན་བསམ། །ཐུགས་ཀའི་ཡི་གེའི་ས་བོན་ལས། །ཧ་འཕྲོས་པས་ནི་རྣམ་རྟོག་སྦྱངས། །
ཧྲཱིཿས་ནི་འོད་འབར་རོ་རྣམས་སྦྱངས། །ཧོས་ནི་དྲི་མེད་བདུད་རྩིར་བཞུ། །ལག་པ་གཡོན་གྱི་མཐེ་བོང་ནི། །ཧཱུཾ་གིས་ས་གཞི་བྱིན་གྱིས་བརླབས། །སྲིན་ལག་གསུམ་ལས་རི་རབ་ཏུ། །བྱིན་གྱིས་བརླབས་པའི་བང་རིམ་ལས། །ཡི་གེ་མཾ་ལས་འོད་འཕྲོས་ཏེ། །དེ་བཞིན་གཤེགས་པའི་སྨིན་

མཚམས་ཕོག །ཡབ་ཡུམ་གཉིས་མེད་སྦྱོར་བ་ལས། །བྱང་ཆུབ་སེམས་ཀྱི་བདུད་རྩི་བབ། །ཡང་ན་ཡུམ་ཆེན་མཱ་མ་ཀཱི། །བདུད་རྩི་ཐོགས་པ་དཔག་མེད་བྱུང་། །དམ་ཚིག་བདུད་རྩིའི་ནང་དུ་བྱོ། །ཆ་གཉིས་གཅིག་ཏུ་འདྲེས་པ་ཡི། །བདུད་རྩི་རི་རབ་དག་གིས་བསྲུབས། །རི་
རབ་ཉིད་ཀྱང་འོད་དུ་ཞུ། །བདུད་རྩི་དྲི་མེད་དཀར་པོ་དེས། །ཐུགས་ཀའི་དཀྱིལ་འཁོར་ལྷ་རྣམས་ལ། །སྦྱིན་སྲེག་ཚུལ་ལམ་མཆོད་པ་ཡི། །ཚུལ་གྱིས་འཐུངས་པས་བདེ་བ་བསྐྱེད་པར་འགྱུར་བའམ། །ཡང་ན་བདུད་རྩིའི་མཆོད་པ་ནི། །ཕྱི་རོལ་མཎྜལ་སྣོད་སྟེང་དུ། །ཆོས་
འབྱུང་གྲུ་གསུམ་བྲི་བར་བྱ། །མེ་ཏོག་ཚོམ་བུ་དགོད་པར་བྱ། །རྫོགས་པའི་རྣལ་འབྱོར་ཏིང་འཛིན་གྱིས། །ཡེ་ཤེས་དཀྱིལ་འཁོར་སྤྱན་དྲངས་ཏེ། །པདྨའི་སྟེང་དུ་བཞུགས་བསམས་ལ། །སོ་སོའི་རྩ་བའི་སྔགས་ཀྱིས་ནི། །བདུད་རྩིའི་འཐོར་འཐུང་མཆོད་པ་དབུལ། །ཐབས་དང་
ཤེས་རབ་དང་ལྡན་པས། །རྡོ་རྗེའི་གླུ་ནི་ཕྲ་མོ་ཡིས། །ལན་གསུམ་སྐུ་གསུང་ཐུགས་ལ་མཆོད། །དེ་ནས་ཐུགས་ཀའི་དཀྱིལ་འཁོར་མཆོད། །དེ་ནི་རྒྱས་པའི་རྣལ་འབྱོར་རོ། །བསྡུས་དང་ཤིན་ཏུ་བསྡུས་པ་གཉིས། །ཟས་ཀྱི་རྣལ་འབྱོར་ཉིད་དང་མཐུན། །གཏོར་མའི་རྣལ་འབྱོར་བསྟན་
པ་ནི། །རང་ཉིད་བསྐྱེད་རིམ་ཚུལ་བསྒོམས་ལ། །གཏོར་མ་བྱིན་གྱིས་བརླབ་པ་ནི། །ཟས་ཀྱི་རྣལ་འབྱོར་ཉིད་དང་མཐུན། །མཆོད་པར་བྱ་བའི་མགྲོན་རྣམས་ནི། །འཇིག་རྟེན་འདས་དང་འཇིག་རྟེན་པ། །མདུན་དུ་པཾ་ལས་པདྨར་བསྐྱེད། །འདབ་བརྒྱད་སྟེང་དུ་དུར་ཁྲོད་བརྒྱད། །དབུས་
ཀྱི་ལྟེ་བར་ཨེ་ལས་ནི། །དར་མོ་ད་ཡའི་ཆོས་འབྱུང་བསམ། །དེ་ནས་འཇིག་རྟེན་འདས་པར་བསྐྱེད། །ཕྱི་རོལ་དུར་ཁྲོད་བརྒྱད་ལ་ནི། །འཇིག་རྟེན་པ་ཡི་འཁོར་རྣམས་བསྐྱེད། །རང་བཞིན་དཀྱིལ་འཁོར་རྣམ་གཉིས་ཀྱང་། །སྤྱན་དྲངས་དམ་ཚིག་དག་ལ་བསྟིམ། །སོ་སོའི་
སྔགས་དང་ཕྱག་རྒྱ་ཡིས། །གཏོར་མ་བསྟབས་ཤིང་ཕྲིན་ལས་བཅོལ། །སིལ་སྙན་རྡོ་རྗེ་མགུར་གླུར་ལྡན། །མཆོད་ཅིང་བསྟོད་ནས་གཤེགས་སུ་གསོལ། །ཏིང་འཛིན་བསྡུས་ཏེ་དགེ་རྩ་བསྔོ། །དེ་ནི་རྣལ་འབྱོར་རྒྱས་པའོ། །བསྡུས་པ་སྟོང་ཉིད་ངང་ལས་ནི། །ས་བོན་ལས་ནི་ལྷར་

བསྐྱེད་དེ། །གཏོར་མ་བྱིན་གྱིས་བརླབ་པ་ནི། །ཟས་ཀྱི་རྣལ་འབྱོར་འབྲིང་དང་མཐུན། །ཤིན་ཏུ་བསྡུས་པའི་རྣལ་འབྱོར་ནི། །སྐད་ཅིག་རྫུས་སྐྱེས་ལྷར་བསྐྱེད་ལ། །གཏོར་མ་སོ་སོའི་ས་བོན་གྱིས། །སྦྱང་བ་བྱས་ཏེ་གོང་དང་མཐུན། །དེ་རྣམས་གཏོར་མའི་
རྣལ་འབྱོར་རོ། །དེ་ནས་སྤྱོད་ལམ་རྣལ་འབྱོར་ནི། །ནང་པར་ལངས་པའི་ཚེ་ན་ནི། །བདག་རང་ཡི་དམ་ལྷར་བསམས་ཏེ། །འགྲོ་བ་ཕོ་རྣམས་ཐམས་ཅད་ནི། །བདེ་གཤེགས་སྤྲུལ་པ་ཉིད་དུ་བལྟ། །འགྲོ་བ་མོ་རྣམས་ཐམས་ཅད་ནི། །བདེ་གཤེགས་ཡུལ་གྱི་ལྷ་མོར་བལྟ། །སྣོད་
ཀྱི་འཇིག་རྟེན་འདི་དག་ཀུན། །ལྷ་ཡི་གཞལ་ཡས་ཉིད་དུ་བལྟ། །ཐམས་ཅད་སྒྱུ་མའི་རང་བཞིན་དུ། །ཐབས་དང་ཤེས་རབ་རོལ་པས་སྤྱོད། །ཉོན་མོངས་དྲག་པོ་ལངས་ཙམ་ན། །གང་དང་གང་འདུལ་གཉེན་པོར་བསྟེན། །འགྲོ་བ་སེམས་ཅན་དོན་བྱ་སྙམ། །འདུག་ན་བྱང་ཆུབ་སྙིང་
པོར་འཇུག །ནུབ་མོ་ཉལ་བའི་ཚེ་ན་ནི། །ཆོས་ཉིད་སྟོང་པའི་ངང་ལས་ཉལ། །དགེ་བའི་བསམ་པས་ཉལ་བར་བྱའོ། །བསྡུས་པའི་སྤྱོད་ལམ་བྱ་བ་ནི། །དང་པོ་ནང་པར་ལངས་ཚེ་དང་། །ཉིན་མོ་ཐུན་མཚམས་བཞི་རྣམས་དང་། །ནུབ་མོ་ཉལ་བའི་དུས་དག་ཏུ། །རྣལ་འབྱོར་པ་ཉིད་གོང་
བཞིན་བྱ། །ཤིན་ཏུ་བསྡུས་པའི་སྤྱོད་ལམ་ནི། །དང་པོར་ནང་པར་ལངས་དུས་དང་། །ནུབ་མོ་ཉལ་བའི་དུས་དག་ཏུ། །སྤྱོད་ལམ་གོང་བཞིན་དྲན་པར་བྱ། །རྣལ་འབྱོར་དེ་རྣམས་ཀུན་ལ་ཡང་། །སྔོན་དུ་བྱང་ཆུབ་སེམས་བསྐྱེད་ཅིང་། །ཐ་མ་དགེ་བ་བྱང་ཆུབ་བསྔོ། །དེ་ལྟར་རྒྱུན་
དུ་བྱས་པ་ཡི། །དགེ་བའི་མཐུ་ཡི་བྱིན་རླབས་ཀྱིས། །ཕྱག་རྒྱ་མཆོག་གི་གྲོགས་འགྱུར་ཞིང་། །ཐུན་མོང་དངོས་གྲུབ་ཐོབ་པར་འགྱུར། །དངོས་གྲུབ་རྣམ་གཉིས་མ་ཐོབ་ཀྱང་། །ལྷ་དང་མི་ཡི་རིགས་སྐྱེ་ཞིང་། །བསོད་ནམས་ལྷུན་གྲུབ་ཐོབ་པར་འགྱུར། །བསྒོམ་དང་བཟླས་པའི་
བསྡུས་རྒྱས་ནི། །རྒྱུད་དང་སྒྲུབ་ཐབས་ལ་སོགས་སུ། །བླ་མའི་ཞལ་གྱི་མན་ངག་གིས། །ཤེས་པར་བྱས་ཏེ་ཉམས་སུ་བླང་། །སྒོམ་པ་བསྟན་པའི་རིམ་པ་ཡང་། །བླ་མ་འཆད་པའི་རྒྱུད་ཤེས་པས། །སློབ་མ་ཉིད་ཀྱིས་ཤེས་པར་བྱ། །རིན་ཆེན་ལྟ་བུའི་གང་ཟག་ལ། །རྫོགས་

པའི་མན་ངག་རིམ་པ་བསྟན། །དེ་ལས་གཞན་པའི་སློབ་མ་ལ། །བསྐྱེད་པའི་རིམ་པའི་མན་ངག་བསྟན། །དེ་ལ་བསྟན་ནས་ཕྱི་དུས་སུ། །རྫོགས་པའི་རིམ་པ་བསྟན་དུ་རུང་། །དེ་ལས་གཞན་པ་ཁ་ཅིག་ལ། །ཟབ་མོའི་དོན་རྣམས་མི་བསྟན་པར། །མི་ཟད་དབྱིངས་ཀྱི་ཆོས་རྣམས་
བསྟན། །དེ་རྣམས་གསུམ་གྱི་འབྲས་བུ་ནི། །སྐྱེ་བ་འདི་ལ་འབྱུང་བ་དང་། །སྐྱེ་བ་བདུན་ལ་འབྱུང་བའོ། །འཇིག་རྟེན་གསུམ་གྱི་ལས་ཀྱིས་ནི། །ཐུན་མོང་དངོས་གྲུབ་ཁོ་ན་འགྲུབ། །དཔེར་ན་སྟོན་གྱི་མེ་ཏོག་བཞིན། །འབྲས་བུ་དག་ལ་སྤྲོ་བསྐྱེད་ལ། །བརྩོན་འགྲུས་ཆེན་པོའི་གོ་ཆ་
གྱོན། །ལེ་ལོ་སྤངས་ཤིང་ཉིན་མཚན་དུ། །རྣལ་འབྱོར་དག་ནི་ཆགས་མི་བྱ། །སྙོམ་ལས་ལེ་ལོས་ཆགས་གྱུར་ནས། །བདེ་གཤེགས་བཀའ་ལས་འདས་པ་ན། །རྩ་བའི་རབ་འབྲིང་ཐ་མ་ལ། །ཐ་མས་ཉམས་པའི་ཆར་འགྱུར་བས། །ཉམས་པ་སྦྱང་ཞིང་སླར་གསོ་བ། །བླ་མ་
མཆོད་པའི་དུས་སུ་ནི། །ཡི་གེ་བརྒྱ་པའི་ཆོ་ག་ཡིས། །སྦྱངས་པས་སླར་ནི་སོར་ཆུད་འགྱུར། །འདི་དང་མི་ལྡན་སྔགས་པ་ནི། །གླང་ཆེན་མྱོས་འདྲ་ཇི་བཞིན་ནོ། །འདི་དང་ལྡན་པའི་སྔགས་པ་ནི། །སེང་ཕྲུག་སེང་གེའི་གདུང་འཚོབ་འདྲ། །དེ་ལ་ནན་ཏན་ཆེར་བསྐྱེད་ཅིག །ཕྱག་ན་རྡོ་
རྗེ་ལྕེ་དབབ་ཀྱི་སྔོན་དུ་འགྲོ་བའི་ཡན་ལག །རྣལ་འབྱོར་གྱི་སྤྱོད་ལམ་བརྒྱད་པ་ཞེས་བྱ་བ། སློབ་དཔོན་རྒྱལ་བུ་སྤྲིན་གྱི་ཤུགས་ཅན་གྱིས་མཛད་པ་རྫོགས་སོ།། །།སློབ་དཔོན་རྒྱལ་བུ་སྤྲིན་གྱི་ཤུགས་ཅན་གྱིས་རྒྱུད་དང་མི་འགལ་བར་མཛད་པའོ། །ཛ་ཡཱ་ཀ་ར་དང་། མར་པ་ལོ་
ཙཱ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄། །གསང་བའི་བདག་པོ་ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས་བཞུགས། ༄༅༅། །གསང་བའི་བདག་པོ་ལག་ན་རྡོ་རྗེ་གོས་སྔོན་ཅན་ལ་ཕྱག་འཚལ་ལོ། །ཕྱག་ན་རྡོ་རྗེ་གོས་སྔོན་པོ་ཅན་བསྒྲུབ་པར་འདོད་པའི་རྣལ་འབྱོར་
པས། དང་པོར་ཁྲུས་བྱས་སྟན་བདེ་བ་ལ་འདུག་སྟེ། ཡན་ལག་བདུན་དང་ལྡན་པའི་སེམས་བསྐྱེད་པར་བྱའོ། །རང་གི་སྙིང་གར་ཉི་མ་དང་ཟླ་བ་ལ་གནས་པའི་ས་བོན་གྱིས་གོས་སྔོན་པོ་ཅན་དང་། སངས་རྒྱས་དང་བྱང་ཆུབ་སེམས་དཔའ་ལ་སོགས་པ་སྤྱན་དྲངས་ཏེ། ས་བོན་ལས་

བྱུང་བའི་མཆོད་པས་མཆོད་དོ། །དེ་ནས་འདི་སྐད་དུ། དཔལ་ཕྱག་ན་རྡོ་རྗེ་དང་། སངས་རྒྱས་དང་བྱང་ཆུབ་སེམས་དཔའ་ལ་སོགས་པ་ཕྱོགས་བཅུ་ན་བཞུགས་སོ་འཚལ་ལ། །བདག་ལུས་ངག་ཡིད་ཀྱི་སྒོ་ནས་ཕྱག་འཚལ་ཞིང་སྐྱབས་སུ་གསོལ་ལོ། །མཆོད་པ་བླ་
ན་མེད་པ་འདོད་པའི་ཡོན་ཏན་གྱི་ཆར་དག་པའི་སེམས་ཀྱིས་སྤྲུལ་ཞིང་མཆིས་ན། ཐུགས་རྗེའི་དབང་གིས་བཞེས་སུ་གསོལ། ཐོག་མ་མེད་པའི་དུས་ནས་དུག་གསུམ་གྱི་དབང་གིས་སྡིག་པ་ཅི་བགྱིས་པ་རྣམས་སོ་སོར་བཤགས་ཤིང་སླན་ཆད་ཀྱང་སྡོམ་པར་བགྱིད་དོ། །བདེ་བར་
གཤེགས་པ་གང་དག་བསྐུལ་བའི་ས་ལ་བཞུགས་པ་རྣམས་ལ། ཆོས་ཀྱི་འཁོར་ལོ་བསྐོར་བར་བསྐུལ་བར་བགྱིའོ། །བདེ་བར་གཤེགས་པ་གང་དག་མྱ་ངན་ལས་འདའ་བར་བཞེད་པ་རྣམས་ལ་འཁོར་བ་ཇི་སྲིད་པར་མྱ་ངན་ལས་མི་འདའ་བར་གསོལ་བ་འདེབས་སོ། །དགེ་བའི་རྩ་བ་དེ་དག་ཐམས་ཅད་ཀྱང་བླ་ན་
མེད་པའི་བྱང་ཆུབ་ཏུ་བསྔོ་བར་བགྱིའོ། །ཇི་ལྟར་དུས་གསུམ་སངས་རྒྱས་རྣམས་ཀྱི་ཐུགས་བྱང་ཆུབ་ཏུ་སེམས་བསྐྱེད་ཅིང་དངོས་པོ་ཐམས་ཅད་དང་བྲལ་བ། སྟོང་པ་ཉིད་ཀྱི་རང་བཞིན་དུ་ཐུགས་བསྐྱེད་པ་བཞིན། བདག་གིས་ཀྱང་སེམས་བསྐྱེད་པར་བགྱིའོ། །གཞན་ཡང་བདག་གིས་
འཕགས་པ་རྣམས་ལ་ལུས་ཕུལ་ཏེ། སེམས་ཅན་ཐམས་ཅད་མྱ་ངན་ལས་འདའ་བར་བགྱིའོ། །དེ་ནས་རྒྱུ་བ་དང་མི་རྒྱུ་བའི་དངོས་པོ་ཐམས་ཅད་སྟོང་པ་ཉིད་དུ་བསམ་པར་བྱའོ། །དེའི་ངང་ལས་ཡཾ་ལས་རླུང་གི་དཀྱིལ་འཁོར་གྱི་སྟེང་དུ་ཟླ་བ་དང་ཉི་མའོ། །དེའི་སྟེང་དུ་ཧཱུཾ་སྔོན་པོ་ལས་བྱུང་
བའི་རྡོ་རྗེ་ཡོངས་སུ་གྱུར་པ་ལས་བྱུང་བའི་གོས་སྔོན་ཅན་གྱི་གཟུགས་སུ་གྱུར་པར་བྱའོ། །དེ་ནས་ཡུངས་ཀར་ཕྱོགས་སུ་གཏོར་བར་བྱ་ཞིང་། ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ། ཅེས་བརྗོད་ཅིང་བསྐྲད་པར་བྱའོ། །ལྕགས་ཀྱུའི་ཕྱག་རྒྱ་བཅས་ཏེ། ས་བོན་ལས་འོད་ཟེར་སྤྲོས་ཏེ་སྤྱན་དྲང་
བར་བྱའོ། །གཟུངས་ཀྱི་མཇུག་ལ། ཨོཾ་ན་མཿས་མ་ཡ་མཎྜལ་མ་དེ། ཨཱ་གཙྪ་ཡ་ཨཱ་གཙྪ་ཡ། པྲ་བེ་ཤ་ཡ་པྲ་བེ་ཤ་ཡ། ཨཱ་བ་ལོ་ཀཱ་ཡ་ཨཱ་བ་ལོ་ཀཱ་ཡ་ཧཱུཾ་སྭཱ་ཧཱ། ཞེས་བྱ་བ་བཏགས་ཏེ་སྤྱན་དྲང་བར་བྱའོ། །དེ་ནས་དེ་ལ་མཆོད་པ་དབུལ་བར་བྱའོ། །ཧྲཱི་ཏི་ཧ་ཞེས་པས་ཨརྒྷ་ཡིའོ། །ཨོཾ་

བཛྲ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། ཞེས་པས་མེ་ཏོག་དབུ་ལ་དབུལ་ལོ། །ཨོཾ་བཛྲ་དྷཱུ་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། ཞེས་པས་བདུག་པ་མདུན་དུའོ། །ཨོཾ་བཛྲ་དཱི་པཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། ཞེས་པས་མར་མེ་སྤྱན་ལའོ། །ཨོཾ་བཛྲ་གྷནྡྷེ་པཱུ་ཛ་མེ་
གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། ཞེས་པས་དྲི་ཐུགས་ཀར་རོ། །ཨོཾ་བཛྲ་ནཻ་བི་དྱེ་པཱུ་ཛ་མེགྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། ཞེས་པས་ཞལ་ཟས་ཞལ་དུའོ། །ཨོཾ་བཛྲ་གཱི་ཏི་གྷཎྚ་གྷཎྚ་སྭཱ་ཧཱ། ཞེས་པས་སིལ་སྙན་སྙན་ལའོ། །དེ་ནས་བསྟོད་དོ། །ཨོཾ་བཛྲ་ས་མ་ཡ་སྟྭཾ། ཞེས་པས་གཉིས་སུ་
མེད་པར་བྱའོ། །དེ་ནས་དབང་བསྐུར་བར་བྱའོ། །དེ་ནས་རང་གི་སྙིང་གར་རཾ་ལས་བྱུང་བའི་ཉི་མའི་སྟེང་དུ། རང་གི་ས་བོན་ལ་བཟླས་པར་བྱ་བའི་ཡི་གེས་བསྐོར་བར་བྱའོ། །བློས་དམིགས་པར་བྱ་སྟེ། སྔགས་བཟླས་པར་བྱའོ། །སྔགས་ནི་འདི་ཡིན་ཏེ། ཏདྱ་ཐཱ། བྷོ་བྷོ་བན་ནཱ་གཱ་
དྷི་པ་ཏ་ཡེ། ཨི་དན་ནཱི་ལཱཾ་བ་ར་དྷ་ར་ཤ་རཱི་རཾ། བཛྲ་པཱ་ཎི་ཧྲྀ་ད་ཡཾ། ཡཿས་མཱ་ཏི་ཀྲ་མཱ་ཏི། །ཨུཏྶཱ་ད་ནཾ། བྷ་བི་ཤུདྡྷེ། ཏདྱ་ཐཱ། བུདྡྷྱ་བུདྡྷྱ། བི་བུདྡྷ། མ་ཏི་པྲཱཔྟ། ཧ་ར་ཧ་ར། ནཱ་གཱ་ནཱཾ། པྲ་ཧ་ར་པྲ་ཧ་ར། ནཱ་གཱ་ནཱཾ། ཙྪིནྡ་ཙྪིནྡ། ནཱ་ག་ཧྲྀ་ད་ཡ་ནི། བྷིནྡ་བྷིནྡ། ནཱ་ག་ད་མཱ་
ནི། བི་སི་མཱ་ད་ནཱ་ག་ཤ་རཱི་ར་ཎི། བི་སྥོ་ཊ་ཡ། ནཱ་ག་ན་ཡ་ནཱ་ནི། ཏདྱ་ཐཱ། ནཱ་ག་བི་དཱ་ར་ཎཱ་ཡ་ཧཱུཾ་ཕཊ། ནཱ་གོ་ཏྶ་ད་ནཱ་ཡ་ཧཱུཾ་ཕཊ། ནཱི་ལཱཾ་བ་ས་སྟ་ནཱ་ཡ་ཧཱུཾ་ཕཊ། ཨ་པྲ་ཏི་ཧ་ཏ་པ་ལ་པ་རཱ་ཀྲ་མཱ་ཡ་ཧཱུཾ་ཕཊ། ཀྲིཏྟཱནྟཱ་ཡ་ཕཊ། ཀྲིཏྟཱནྟཱ་རཱུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཏྲཱ་ས་ནཱ་ཡ་ཕཊ། ཀུཥྨཎྜོཏྶཱ་ད་ནཱ་ཡ་ཕཊ། པྲེ་ཏ་
པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པསྨཱ་ར་བི་ནཱ་ཤ་ཀ་རཱ་ཡ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། བྷ་ཀྵ་ཡ་བྷ་ཀྵ་ཡ། སརྦ་བིགྷྣཱ་བི་ནཱ་ཤ་ཀ་རཱ་ཡ་ཕཊ། སརྦྦ་ཤ་ཏྲཱུཾ་སཾ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱཾ་བ་ར་དྷ་ར་བཛྲ་པཱ་ཎི་ར་ཛྙཱ་པ་ཡ་ཏི་སྭཱ་ཧཱ། ཞེས་བཟླས་པར་བྱའོ། །གལ་ཏེ་གཏོང་བར་
འདོད་ན། བཟོད་པར་གསོལ་བ་དང་། དགེ་བའི་རྩ་བ་བསྔོ་ཞིང་། སྨོན་ལམ་གདབ་བོ། །དེ་ནས་ཨོཾ་ཨཱཿཧཱུཾ་མུཿཞེས་པས་ཡེ་ཤེས་ཀྱི་ལྷ་གཤེགས་སུ་གསོལ། དེ་ནས་ཐམས་ཅད་མི་དམིགས་པར་བསྒོམ་པར་བྱའོ། །ཡི་གེ་བརྒྱ་པའི་གསང་སྔགས་བརྗོད་པར་བྱའོ། །བླ་མ་ལ་གུས་པ་

དང་། ཤེས་རབ་དང་། སྙིང་རྗེ་དང་ལྡན་ཞིང་། ཁྱད་པར་དུ་གང་ལ་དད་པ་ཆེར་ཡོད་པ་དེ་ལ་མྱུར་དུ་འགྲུབ་པར་འགྱུར་རོ། །གསང་བ་པའི་བདག་པོ་ལག་ན་རྡོ་རྗེའི་སྒྲུབ་ཐབས། སློབ་དཔོན་ཆེན་པོ་ནག་པོ་ཞབས་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ།
ཙཎྜ་བཛྲ་ཀྲོ་དྷ་དེ་བ་པཉྩ་ནཱ་མ་མཎྜལ་བི་དྷིཿ། བོད་སྐད་དུ། རྡོ་རྗེ་ཁྲོ་བོ་གཏུམ་པོ་ལྷ་ལྔ་པ་ཞེས་བྱ་བའི་དཀྱིལ་འཁོར་གྱི་ཆོ་ག །བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ལོ། །གཏུམ་པོ་ཁྲོས་པས་ཞེ་སྡང་འཇོམས། །སྟོང་ཉིད་སྙིང་རྗེ་དབྱེར་མེད་པ། །རྡོ་རྗེ་འཆང་ལ་རབ་བཏུད་
ནས། །དེ་ཡི་དཀྱིལ་འཁོར་ཆོ་ག་བཤད། །དུར་ཁྲོད་ལ་སོགས་གནས་ཆེན་དུ། །གཟའ་སྐར་དུས་ཚེས་བཟང་པོ་ལ། །བསྙེན་པ་རྫོགས་པའི་སློབ་དཔོན་གྱིས། །ས་བརྟག་པ་དང་བསླང་བ་དང་། །མེ་ཏོག་སྔོན་པོ་ལྔ་དོར་ཞིང་། །བྱིན་དང་མ་བྱིན་ལྟས་ཀྱང་བརྟག །ཕན་ཚུན་མང་
ཉུང་ཨུཏྤལ་ཁ། །ཨོཾ་བཛྲ་པཱ་ཎི་པུཥྤ་པཱུ་ཛ་ཧཱུཾ། །སྔགས་དེར་བསྐྱར་ཞིང་མེད་དང་མཚུངས། །བཙོ་མ་གསེར་མདོག་རིན་ཆེན་ལ། །རྔན་པ་བྱིན་ལ་བརྐོ་བར་བྱ། །ས་སྦྱང་བ་དང་བསྲུང་བྱ་སྟེ། །དྲི་ཡི་ཐིག་ལེ་མེ་ཏོག་ཁར། །དམ་ཚིག་ལྷ་མོ་བསྐྱེད་བྱས་ལ། །ཡེ་ཤེས་ལྷ་མོ་
དགུག་གཞུག་བསྟིམ། །ས་ཡི་ཆོ་ག་རྫོགས་བྱས་ལ། །དེ་ནས་ལྷ་ཡི་སྟ་གོན་ནི། །མཎྜལ་ཡིད་འོང་དྲི་མེད་ཁར། །དྲི་ཡི་ཐིག་ལེ་མེ་ཏོག་ལྔ། །ཨོཾ་ཧཱུཾ་ཏྲཱཾ་ཧྲཱིཿཁཾ་དག་ལས། །དམ་ཚིག་འཁོར་ལོ་བསྐྱེད་བྱས་ཏེ། །ཡེ་ཤེས་འཁོར་ལོ་སྤྱན་དྲངས་ལ། །མཆོད་གཏོར་བསྟོད་པས་
མཉེས་བྱས་ལ། །བདུག་པ་ལག་ཐོགས་པུས་བཙུགས་ཏེ། །དྲིལ་བུའི་སྒྲ་སྒྲོགས་ལྔ་ལྡན་ཧཱུཾ། །དེ་ནས་གསོལ་བ་གདབ་བྱ་བ། །བཅོམ་ལྡན་རྡོ་རྗེ་འཛིན་པའི་མཆོག །རིག་སྔགས་རྒྱལ་པོ་དགེ་བའི་མགོན། །གཟུངས་སྔགས་གསང་སྔགས་ཀུན་གྱི་གཙོ། །གསང་བའི་
བདག་པོ་ཕྱག་འཚལ་ལོ། །ཐུགས་རྗེའི་བདག་ཉིད་ཅན་རྣམས་ཀྱི། །དཀྱིལ་འཁོར་བདག་ཉིད་འདྲི་བར་འཚལ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་མཉེས་པར་མཆོད་ཕྱིར་དུ། །བཅོམ་ལྡན་བདག་ཉིད་གུས་པ་ལ། །དེ་ཡི་གནང་བར་མཛད་པའི་རིགས། །སངས་

རྒྱས་འགྲོ་དོན་བྱས་དོན་གསོལ། །བྱང་ཆུབ་སེམས་དང་གསང་སྔགས་ལྷ། །འཇིག་རྟེན་སྐྱོང་དང་མཐུ་ཆེན་དང་། །ཡང་དག་རྡོ་རྗེའི་སྤྱན་མངའ་བའི། །སེམས་ཅན་བསྟན་ལ་དགའ་རྣམས་ལ། །བདག་མིང་འདི་ཞེས་བྱ་བ་ཡིས། །རྡོ་རྗེ་གཏུམ་པོའི་དཀྱིལ་འཁོར་ནི། །ཡོ་བྱད་ཅི་
འབྱོར་བས་བྲི་ན། །དེང་བདག་སློབ་མར་བཅས་པ་ལ། །ཐུགས་ནི་བརྩེ་བར་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པ་མཛད་དུ་གསོལ། །དེ་ལྟར་ལན་གསུམ་གསོལ་བཏབ་ནས། །ར་བ་དྲ་བས་མཚམས་བཅད་དོ། །ཧཱུཾ་ཉོན་ཅིག་བགེགས་
དང་ལོག་འདྲེན་ཚོགས། །ང་ནི་བཅོམ་ལྡན་གཏུམ་པོ་ཡིན། །ང་ཡི་བཀའ་ལས་མ་འདའ་ཞིག །ང་ཡི་བཀའ་ལས་འདའ་བྱེད་ན། །རྡོ་རྗེ་ཁྲོ་བོས་མགོ་འགེམས་སོ། །མ་འདུག་སོང་ཤིག་ལོག་འདྲེན་ཚོགས། །ཨོཾ་སུཾ་བྷ་ནི་སུཾ་བྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་
ཧོ། བྷ་ག་བཱན་བཛྲ་པཱ་ཎི་ཧཱུཾ། །ཨཱརྱ་ཏེ་ཙར་ཧི་ན་ཧཱུཾ་ཕཊ། དེ་ནས་བུམ་པའི་སྟ་གོན་ནི། །གསེར་ལ་སོགས་པའི་བུམ་པ་ནི། །ལྟོ་བ་ཆེ་ལ་མགྲིན་པ་རིང་། །སྐྱོན་ལ་སོགས་པ་དང་བྲལ་བས། །ལས་ཀྱི་བུམ་པ་མ་གཏོགས་པ། །ཡོན་ཏན་ལྡན་པས་ལྷ་གྲངས་བསྟུན། །ནས་དང་
གྲོ་དང་སོ་བ་འབྲས། །ཏིལ་དང་ལན་ཚྭ་བུ་རམ་དང་། །མར་དང་སྦྲང་རྩི་རྣམ་པ་ལྔ། །གསེར་དངུལ་ཟངས་ལྕགས་མུ་ཏིག་དང་། །བྱཱ་གྷྲ་སིང་ཧ་ཧ་ས་དེ་བ་དང་། །ཀཎྜ་ཀ་རི་ནི་དྲ་སྨན་ལྔ་དང་། །དྲི་ཆེན་དྲི་ཆུ་དམར་ཟིལ་མདངས། །མི་རྟ་ཁྱི་བྱ་གླང་པོའི་ཤ །དམར་སེར་འོ་མ་གཞོན་ནུའི་ཆུས། །
ཕྱེད་མཐོ་ཙམ་དུ་དགང་བར་བྱ། །ཁ་ཚར་མ་ཉམས་རས་ཀྱིས་བཅིངས། །འབྲས་བུ་ཅན་གྱིས་ཁ་བརྒྱན་ཏེ། །དྲིས་བདུག་མཎྜལ་ཁར་བཞག་ལ། །མི་དམིགས་བྷྲཱུཾ་བཾ་བདུད་རྩི་ཡི། །རྒྱ་མཚོའི་དབུས་སུ་རི་རབ་ཆེ། །སྤྲིན་སྒྲ་བསྣོལ་བས་སྣ་ཚོགས་སྒྲ། །ལྟེ་བར་བྷྲཱུཾ་ལས་གཞལ་ཡས་
ཁང་། །བཾ་ལས་ཆུ་སྐྱེས་དམ་ཚིག་བསྐྱེད། །ཡེ་ཤེས་འཁོར་ལོ་སྤྱན་དྲངས་ལ། །ཕྱག་རྒྱ་བཞི་ཡིས་གཉིས་མེད་བསྟིམ། །སྐུ་གསུང་ཐུགས་སུ་བྱིན་གྱིས་བརླབ། །སྤྱན་ལ་སོགས་པས་དབང་བསྐུར་རོ། །མཆོད་དང་གཏོར་མས་བསྟོད་བྱས་ལ། །གཟུངས་ཐག་ལྡན་པས་

བསྙེན་པ་འབུམ། །དེ་ནས་སློབ་མའི་སྟ་གོན་ནི། །རྡོ་རྗེ་སློབ་མ་ཁྲུས་བྱས་ལ། །སློབ་མ་སྒོ་ཡི་དྲུང་གནས་ནས། །དགའ་ཆེན་ཁྱོད་བདག་སྟོན་པ་པོ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །
དམ་ཚིག་དེ་ནི་སྩལ་དུ་གསོལ། །བྱང་ཆུབ་སེམས་ནི་སྩལ་དུ་གསོལ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ནི་སྩལ་དུ་གསོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་འཇུག་པར་འཚལ། །དེ་ལྟར་ལན་གསུམ་གསོལ་བཏབ་ནས། །
སློབ་དཔོན་གཙོ་བོའི་ཏིང་འཛིན་ཞུགས། །ཚིགས་བཅད་འདིས་ནི་གསང་སྔགས་སྦྱིན། །བུ་ཚུར་ཐེག་པ་ཆེན་པོ་ཡི། །གསང་སྔགས་ཚུལ་སྤྱོད་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །དུས་གསུམ་འབྱུང་བའི་སངས་རྒྱས་རྣམས། །སྐུ་གསུང་
ཐུགས་ཀྱི་རྡོ་རྗེ་དང་། །རྡོ་རྗེ་གསང་སྔགས་རབ་བསྒོམས་པས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བསྐྱེད། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །
འཇིག་རྟེན་རྗེས་འཇུག་པར་རྟོགས་ནས། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །དེ་ནས་སྐྱབས་འགྲོ་སྡིག་བཤགས་བྱ། །བླ་མ་རྡོ་རྗེ་སློབ་དཔོན་གྱི། །མཉམ་ཉིད་ཐུགས་ལ་ཕྱག་འཚལ་ལོ། །སྤྲུལ་པའི་སྐུ་
ལ་ཕྱག་འཚལ་ལོ། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོར་གནས་པས། །གསང་བའི་བདག་པོ་ཕྱག་འཚལ་ལོ། །སངས་རྒྱས་ཆོས་དང་དགེ་འདུན་གསུམ། །བྱང་ཆུབ་སེམས་དཔའི་ཚོགས་རྣམས་ལ། །བདག་ཡིད་དང་བས་ཕྱག་འཚལ་ལོ། །བདག་
གིས་ཐོག་མཐའ་མེད་པ་ནས། །སྡིག་པ་བགྱིས་པ་མ་ལུས་ཀུན། །བཅོམ་ལྡན་ཕྱག་ན་རྡོ་རྗེ་ཡི། །སྤྱན་སྔར་ད་ལྟར་མཐོལ་ཞིང་བཤགས། །བླ་མ་དཀོན་མཆོག་གསུམ་པོ་དང་། །གསང་སྔགས་ཀུན་བདག་རྡོ་རྗེ་ཅན། །དེ་རིགས་འཛིན་པའི་རྣལ་འབྱོར་ཀུན། །དགེ་བ་མཛད་ལ་

རྗེས་ཡི་རང་། །བཅོམ་ལྡན་ཕྱག་ན་རྡོ་རྗེ་ནི། །དུས་གསུམ་བདེ་གཤེགས་ཐམས་ཅད་ཀྱི། །གསང་སྔགས་བདག་པོར་དབང་བསྐུར་ལ། །གསང་སྔགས་འཁོར་ལོ་བསྐོར་བར་བསྐུལ། །སྐྱོན་བྲལ་མཐུ་ལྡན་ཁྱེད་རྣམས་ལ། །སྐྱེ་རྒ་ན་འཆི་མི་མངའ་ཡང་། །འགྲོ་བའི་དོན་དུ་
སྐུ་སྤྲུལ་ལ། །མཐུན་འཇུག་མྱ་ངན་མི་འདའ་གསོལ། །བདག་གིས་དགེ་བ་ཅི་བསགས་ཀུན། །གཅིག་ཏུ་བསྡུས་ཏེ་བསྡོམས་ནས་སུ། །བླ་མེད་བྱང་ཆུབ་ཐོབ་བྱའི་ཕྱིར། །སེམས་ཅན་ཀུན་གྱི་དོན་དུ་བསྔོ། །བྱང་ཆུབ་མཆོག་ཏུ་སེམས་བསྐྱེད་པ། །བླ་མ་རྡོ་རྗེ་སློབ་དཔོན་དང་། །
བཅོམ་ལྡན་ཕྱག་ན་རྡོ་རྗེ་ཉིད། །སངས་རྒྱས་བྱང་ཆུབ་སེམས་དཔའི་མཆོག །ཀུན་ནས་དང་བས་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །དུས་འདི་ནས་སུ་བཟུང་ནས་སུ། །བྱང་ཆུབ་སྙིང་པོར་གནས་ཀྱི་བར། །སེམས་ཅན་ཀུན་གྱི་དོན་གྱི་ཕྱིར། །བླ་ན་
མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །འགྲོ་བ་སེམས་ཅན་ཐམས་ཅད་ལ། །ཕ་མ་སྤུན་དང་མིང་སྲིང་སེམས། །བུ་ཕོ་བུ་མོའི་སེམས་བསྐྱེད་དེ། །མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་དགྲོལ་བར་བགྱི། །དབུགས་མ་ཕྱུང་བ་
དབུགས་དབྱུང་བགྱི། །སྲིད་པ་ཆགས་པ་ཞི་ལ་སྒྲོལ། །སྦྱིན་པའི་ཕ་རོལ་ཕྱིན་པ་བཏང་། །ཚུལ་ཁྲིམས་ཕ་རོལ་ཕྱིན་པ་བསྲུང་། །བཟོད་པའི་ཕ་རོལ་ཏུ་ཕྱིན་པ་བསྒོམ། །བརྩོན་འགྲུས་ཕ་རོལ་ཕྱིན་པ་སྤྱད། །བསམ་གཏན་ཕ་རོལ་ཕྱིན་པར་གནས། །ཤེས་རབ་ཕ་རོལ་ཕྱིན་པར་ཕྱིན། །
ཕ་རོལ་ཕྱིན་པ་འདི་དྲུག་པོ། །མཐར་གྱིས་བསླབ་དང་མཐར་གྱིས་སྤྱོད། །མཐར་གྱིས་བསྒྲུབ་ལ་ནན་ཏན་བྱ། །དེ་ནས་སྡོམ་པ་དཔོག་བྱ་བ། །སྲོག་ཆགས་རྣམས་ནི་གསད་མི་བྱ། །མ་བྱིན་པ་ཡང་བླང་མི་བྱ། །འདོད་པ་དག་ནི་སྤྱད་མི་བྱ། །བརྫུན་པ་དག་ཀྱང་ཡང་མི་སྨྲ། །ཉེས་པ་ཀུན་
གྱི་རྩ་བ་ཡིན། །ཆང་ནི་མྱོས་པར་བཏུང་མ་ཡིན། །སེམས་ཅན་གདུལ་བྱ་མ་གཏོགས་པ། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་མཉེས་བྱས་ཤིང་། །རྣལ་འབྱོར་ཅན་ལ་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་དག་དང་། །ཡིད་ཀྱི་

རྣམ་པ་གསུམ་དག་ནི། །ཅི་ནུས་པ་ཡིས་རྗེས་སུ་བསྲུང་། །སེམས་ཅན་དོན་ལ་རྒྱབ་ཕྱོགས་མིན། །ཐེག་པ་དམན་ལ་དོར་མི་བྱ། །འཁོར་བ་དག་ཀྱང་ཡོང་མི་སྤང་། །རྟག་ཏུ་མྱ་ངན་འདའ་མི་ཆགས། །ལྷ་དང་ལྷ་མིན་གསང་བ་པ། །དེ་ལ་བརྙས་པར་མི་བྱ་ཞིང་། །
ཕྱག་རྒྱ་བཞོན་པ་མཚོན་ཆ་དང་། །མཚན་མ་བགོམ་པར་མི་བྱའོ། །བླ་མ་ལ་གུས་བཀའ་མི་འདའ། །སྟོང་ཉིད་སྙིང་རྗེ་རབ་བསྒོམ་ཞིང་། །མདོར་ན་རྩ་བ་ཡན་ལག་གི །དམ་ཚིག་ཉིན་མཚན་གྲངས་ཀྱིས་བསྲུང་། །དེ་ནས་བླ་མས་གསུངས་པ་ཡི། །སྡོམ་པ་ལེགས་པར་བསྲུང་
བར་བྱ། །ཚུལ་ཁྲིམས་ཞེས་བྱ་སོགས་པ་ནས། །དུས་འདི་ནས་ནི་བཟུང་ནས་ནི། །ཇི་སྲིད་སྙིང་པོ་བྱང་ཆུབ་བར། །བདག་ནི་རབ་ཏུ་སྡོམ་པར་བགྱིད། །དེ་ནས་སློབ་མའི་གནས་གསུམ་དུ། །རྡོ་རྗེ་ཁུ་ཚུར་དྲི་ཡི་ཆུས། །ཐིག་ལེ་ཉི་ཟླ་པད་སྟེངས་སུ། །ཡི་གེ་གསུམ་གྱི་སྦྱོར་བ་
ལས། །སྐུ་གསུང་ཐུགས་ཀྱིས་བྱིན་གྱིས་བརླབས། །ལས་ཀྱི་ཆུ་ཡིས་གཏོར་ཞིང་བསྲུང་། །ཨོཾ་བཛྲ་ཨུ་ད་ཀ་ཧཱུཾ་ཕཊ། མཆོད་པ་ལྔ་ཡིས་ལེགས་མཆོད་དེ། །སྤྱི་བོར་མེ་ཏོག་སྤོས་བྱིན་ལ། །མར་མེ་དྲི་ནི་སྙིང་གར་རོ། །དྲིལ་བུ་དཀྲོལ་ཞིང་བཤོས་གཙང་མདུན། །དེ་ནས་ཚིགས་
བཅད་སྔགས་འདིས་སྦྱིན། །དུས་འདི་ནས་ནི་བཟུང་ནས་སུ། །འཁོར་བའི་ཉེས་པས་མ་གོས་པ