Luận tạng Tây Tạng (Tengyur) — Tập 9

ཱུཾ་ཧཱུཾ་ཕཊ་སྭཱ་ཧཱ། ཞེས་བྱ་བའམ། ཨོཾ་ཨཱཿཧྲཱི་ཧཱུཾ། ཞེས་པའི་སྔགས་དེ་དག་གིས་གདབ་པར་བྱའོ། །མཆོད་རྟེན་རེ་རེ་ཡང་ཀྱཻ་རྡོ་རྗེ་རེ་རེར་བསམས་ལ། དེ་རེ་རེ་ལ་ཡང་ཀྱཻ་རྡོ་རྗེ་དུ་མ་འཕྲོ་བ་དང་། འདུ་བྱས་པ་ལས་བདག་དང་
གཞན་གྱི་དོན་རྫོགས་པར་བསམ་མོ། །དེ་ནས་རྟེན་འབྲེལ་གྱི་སྙིང་པོས་རབ་ཏུ་གནས་པ་དང་མཇུག་བསྡུ་བར་བྱའོ། །མཆོད་རྟེན་གྱི་ཆོ་ག་ཞེས་བྱ་བ་སློབ་དཔོན་ཆེན་པོ་ནག་པོ་ཞབས་ཀྱིས་མཛད་པ་རྫོགས་སོ།། །།སྒྲ་པ་ཆེན་པོ་རྒྱལ་བའི་སྙན་བཟང་པོ་ལས་མཉན་ཏེ།
ལོ་ཙ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་དཔལ་ཐར་པ་གླིང་གི་གཙུག་ལག་ཁང་ཆེན་པོར་ལེགས་པར་བསྒྱུར་བའོ།། ༄༅༅། །རྒྱ་གར་སྐད་དུ། མྲྀ་ཏྱུ་བི་དྷི་ནཱ་མ། བོད་སྐད་དུ། གཤིན་གྱི་ཆོ་ག་ཞེས་བྱ་བ། ཀྱཻའི་རྡོ་རྗེ་ལ་ཕྱག་འཚལ་ལོ། །
གང་ཟག་གང་ཕྱིར་ཤི་འཕོས་ཏེ། ཀྱེ་རྡོ་རྗེའི་ལུགས་ཀྱིས་བདུན་ཚིག་བྱེད་པར་འདོད་ན། གོས་ལ་སོགས་པའི་རྟགས་གཅིག་ལ་རྟེན་བྱ་བའམ། ཡང་ན་མིང་ཤོག་བུ་ལ་བྲིའོ། །མཎྜལ་དང་མཆོད་པ་དང་གཏོར་མ་ཡང་གཞུང་ལྟར་བཤམ་མོ། །དེ་ནས་རང་ལྷག་པའི་ལྷར་
བསྒོམས་ལ། ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ། མཆོད་པའི་ཁྱད་པར་གྱིས་མཆོད་ལ། བསྟོད་པས་བསྟོད་དེ། མཁའ་འགྲོ་མ་རྣམས་ལ་གཏོར་མ་བསྔོས་ལ་འདོད་པའི་དོན་ལ་གསོལ་བ་གདབ་པོ། །དེ་ནས་རང་གི་སྙིང་གའི་ས་བོན་གྱི་འོད་ཟེར་གྱིས། ཚེ་འཕོས་
པའི་སེམས་ཡི་གེ་ཨ་ཐུང་གི་གཟུགས་སུ་འོད་ཟེར་གྱི་ལྕགས་ཀྱུས་བཀུག་ནས། རྟེན་གང་ཡིན་པ་ལ་བསྟིམ་མོ། །རྣམ་སྨིན་གྱི་ལུས་གང་ཡིན་པ་དེར་བསམས་ལ། རང་གི་སྙིང་གའི་ས་བོན་ལས་འོད་ཟེར་འཕྲོས་ཏེ། བསྒྲུབ་བྱའི་སྙིང་གར་ཐིམ་པས་ལས་དང་ཉོན་མོངས་
པ་ཐམས་ཅད་སྦྱངས་ཏེ། ལུས་ཤེལ་ལྟ་བུར་བསམ་མོ། །དེ་ནས་མཁའ་འགྲོ་མ་དང་བཅས་པའི་ཡེ་ཤེས་ཀྱི་དཀྱིལ་འཁོར་དང་རིག་པའི་ལྷ་མོ་རྣམས་ཀྱི་ཕྱག་ན་བསྣམས་པའི་བུམ་པའི་བདུད་རྩིའི་ཆུ་རྒྱུན་གྱིས་དབང་བསྐུར་ཏེ། བཀྲུས་པས། བསྒྲུབ་བྱའི་སྒྲིབ་པའི་

བག་ཆགས་ཐམས་ཅད་བྱང་བར་བསམ་མོ། །དེ་ནས་བཟླས་པ་བྱས་ཏེ། བདག་གི་སྙིང་གའི་ཡི་གེ་ལས་བཟླས་པའི་ཡི་གེའི་ཕྲེང་བ་སྦྲུལ་འཁྱིལ་བའི་ཚུལ་དུ་བསྐོར་བར་བསམས་ལ། དེའི་ཕྲེང་སྔགས་གང་ཡིན་པ་བཟླས་པས་སྔགས་ཀྱི་ཕྲེང་བ་ལས་འོད་ཟེར་
འཕྲོས་པས། བསྒྲུབ་བྱའི་སྙིང་གར་ཐིམ་པས། ལུས་ངག་ཡིད་གསུམ་གྱི་སྒྲིབ་པའི་དྲི་མ་ཐམས་ཅད་བྱང་བར་བསམ་ཞིང་བཟླས་པར་བྱའོ། །དེ་ནས་སྨོན་ལམ་གདབ་ཅིང་དགེ་བའི་རྩ་བར་བསྒྱུར་རོ། །དེ་ནས་བསྒྲུབ་བྱའི་ཤེས་པ་ཨ་ཐུང་ངུ་སྟེ། ཡཾ་གི་རླུང་གི་དཀྱིལ་འཁོར་གྱིས་
བཏེག་ནས་ནམ་མཁར་བཞུགས་པའི་གཙོ་བོའི་ཐུགས་ཀར་ཐིམ་པར་བསམས་ཏེ། གནས་བཏང་བའོ། །གལ་ཏེ་རྟེན་མེད་པར་གྱུར་ན། གང་ཡིན་པའི་རྣམ་སྨིན་གྱི་ལུས་དེ་ཉིད་མངོན་སུམ་དང་འདྲ་བར་བསམས་ལ་མངོན་རྟོགས་སྔར་བཞིན་བྱའོ། །དེ་ལྟར་ཞག་བདུན་པ་ཐམས་
ཅད་ལ་བྱའོ། །གཤིན་གྱི་ཆོ་ག་ཞེས་བྱ་བ་སློབ་དཔོན་ཆེན་པོ་ནག་པོ་ཞབས་ཀྱིས་མཛད་པ་རྫོགས་སོ།། །།པཎྜི་ཏ་ཆེན་པོ་རྒྱལ་བའི་སྙན་ལས་ལེགས་པར་མཉན་ཏེ། ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་དཔལ་ཐར་པ་གླིང་གི་གཙུག་ལག་ཁང་ཆེན་
པོར་ལེགས་པར་བསྒྱུར་བའོ།། ༄༅༅། །རྒྱ་གར་སྐད་དུ། ཤྲཱི་ཧེ་རུ་ཀ་བྷཱུ་ཏ་ནཱ་མ་མཎྜ་ལ་ནོ་པི་ཀཱ། བོད་སྐད་དུ། དཔལ་ཧེ་རུ་ཀ་འབྱུང་བ་ཞེས་བྱ་བའི་དཀྱིལ་འཁོར་གྱི་ཆོ་ག །དཔལ་ཧེ་རུ་ཀ་ལ་ཕྱག་འཚལ་ལོ། །ཞབས་ནི་ཡོངས་སུ་བསྐྱོད་པས་ཤིན་ཏུ་བཟློག་པར་
དཀའ་བའི་དབའ་རླབས་ཡོངས་སུ་བགྲོད་པ་བཞིན། །ཕྱག་རྣམས་རྣམ་པར་བསྐྱོད་པའི་རྣམ་རྒྱས་རླབས་ཀྱི་གར་ནི་ཤིན་ཏུ་དག་པའི་རླབས། །ཕྱག་གི་གླང་པོ་ལ་སོགས་ཆུ་ན་རྒྱུ་བ་བཞིན་ཏེ་གྱེན་གྱི་དབུ་སྐྲ་མེ་དང་མཚུངས། །དབུ་མའི་ཕྲེང་ལྟར་བཞད་ཅིང་ཆུ་གཏེར་དྲི་མེད་ཁྲག་འཐུང་ཁྱེད་
ཀྱི་སྐུས་ནི་སྲུང་གྱུར་ཅིག །དཔལ་ལྡན་ཁྲག་འཐུང་ཀུན་མཁྱེན་རིག་པར་བཅས། །སྙིང་རྗེ་གཅིག་ཅིང་སྐྱོན་རྣམས་མ་ལུས་སྤངས། །ལྷན་ཅིག་སྐྱེས་དངོས་སྤྱི་བོས་བཏུད་བྱས་ཏེ། །དེ་ཡི་བསྡུས་པའི་དཀྱིལ་འཁོར་བརྗོད་པར་བྱ། །དཀྱིལ་འཁོར་ཆེན་པོའི་ལས་ནི་མ་གཏོགས་

པར། །དངོས་གྲུབ་བླ་མེད་མཆོག་ནི་མི་རིགས་ཏེ། །དབང་དང་རབ་གནས་བཟླས་དང་སྒྲུབ་པ་སོགས། །དེ་བས་འདོད་པས་ཆོ་ག་ལ་བརྩོན་བྱ། །དཀྱིལ་འཁོར་ཏིང་འཛིན་ཕྱག་རྒྱ་སྔགས་དང་ནི། །བྱ་བ་གདན་དང་བཟླས་པ་སྦྱིན་སྲེག་དང་། །མཆོད་པ་ལས་སུ་ལྡན་པ་སྡུད་པ་སྟེ། །དེ་ཉིད་
དག་ནི་རྣམ་པ་བཅུ་ཡིན་ནོ། །སློབ་དཔོན་དེ་ཉིད་བཅུ་རྣམས་ཤེས། །སྔགས་དང་རྒྱུད་ཀྱི་སྦྱོར་བ་རིག །མཚན་ཉིད་ཀུན་དང་ཡང་དག་ལྡན། །བསྟན་བཅོས་དོན་ནི་ཀུན་རིག་ཅིང་། །དབང་རྣམས་ཀུན་གྱིས་དབང་བསྐུར་ཅིང་། །བླ་མའི་བཀའ་ཐོབ་ཡོན་ཏན་ལྡན། །དམ་ཚིག་ལྡན་ཞིང་
སྡོམ་པར་ལྡན། །བརྟན་ཞིང་ཐེག་པ་གསུམ་ལྡན་རིག །འཇིག་རྟེན་ཆོས་ཀྱིས་མི་འཕྲོགས་ལ། །བཟོད་ལྡན་སྙིང་རྗེའི་བདག་ཉིད་ཅན། །བཟླས་པ་ལ་བརྩོན་སེར་སྣ་བྲལ། །དད་དང་བྱམས་ལ་ཡང་དག་གཞོལ། །ཆོ་ག་ཡོངས་སུ་རྫོགས་པ་ཡིས། །དཀྱིལ་འཁོར་བྱ་བ་བརྩམ་པ་
སྟེ། །བསོད་ནམས་ལ་སོགས་འབྲེལ་ཕྱིར་དང་། །དད་པའི་ཕྱིར་ཡང་བྱ་བ་སྟེ། །རྟག་པར་དཀྱིལ་འཁོར་སྨོད་པ་དང་། །ཆོ་ག་དམན་པར་མི་བྱའོ། །སྐྱེ་བ་འདིར་ཡང་སྡུག་བསྔལ་ཆེ། །འཇིག་རྟེན་ཕ་རོལ་འཇིགས་པ་ཆེ། །དེ་བས་ནན་ཏན་ཐམས་ཅད་ཀྱིས། །དངོས་གྲུབ་འདོད་པས་
བྱ་བ་ཉིད། །ཆོ་ག་བདག་ཉིད་ནུས་པ་ཡིས། །རྒྱུད་ལས་གསུངས་པའི་གཞུང་དེ་ཉིད། །དེ་ལྟར་བྱས་པའི་བསོད་ནམས་ཀྱིས། །བལྟ་བས་མི་མཐོང་སྐྱེ་བར་འགྱུར། །དཀྱིལ་འཁོར་མངོན་པར་མཆོད་པ་ཡིས། །དེས་ནི་མྱུར་བར་སྐྱེ་བར་འགྱུར། །དེ་ལ་དང་པོར་འདི་ལྟར་སློབ་དཔོན་
བཀྲ་ཤིས་པར་འདོད་པས་སློབ་མ་ལ་སོགས་པས་དཀྱིལ་འཁོར་སྔོན་དུ་སོང་བས་ལན་གཉིས་ལན་གསུམ་དུ་གསོལ་བ་བཏབ་པའམ། བདག་ཉིད་བསོད་ནམས་འདོད་པས་དཀྱིལ་འཁོར་གྱི་ཆོ་གའི་ཡིད་ཀྱིས་དང་པོར་རེ་ཞིག་སྔོན་དུ་བསྙེན་པ་བྱའོ། །དེ་ལ་དགེ་ཞིང་རྗེས་སུ་མཐུན་པ་
བར་ཆད་མེད་པའི་གནས་སུ་ཀྱེའི་རྡོ་རྗེའི་རྣལ་འབྱོར་གྱིས་དམིགས་ཤིང་རྣལ་འབྱོར་པས་ཏིང་ངེ་འཛིན་གསུམ་བྱས་ལ་འཁོར་ལོས་སྒྱུར་བའི་རྒྱལ་པོའི་སྔགས་དང་། རང་གི་ལྷག་པའི་ལྷ་ཉིད་ཀྱི་སྔགས་འབུམ་བཟླས་པར་བྱ་ཞིང་། གཞན་དག་གི་སྔགས་ནི་ཁྲི་བཟླས་

པར་བྱའོ། །ཡང་ན་བདག་པོའི་སྣང་བས་དེ་ལ་མོས་པས་ཀྱང་དཀྱིལ་འཁོར་བྱའོ། །སྔོན་དུ་བསྙེན་པའོ། །རི་ཕུག་དང་ནི་ཆུ་འགྲམ་དང་། །དུར་ཁྲོད་སྐྱེ་བོས་དབེན་དང་ནགས། །འབབ་ཆུས་གང་བ་འབའ་ཞིག་ཏུ། །དངོས་གྲུབ་མྱུར་བར་གདོན་མི་ཟ། །
གྲོང་ཁྱེར་ཁྱིམ་དང་ལྷས་དང་ནི། །གཙུག་ལག་ཁང་གི་ཁྱིམ་གནས་སུ། །ཡུན་རིངས་ཀྱིས་ནི་དངོས་གྲུབ་དག །འགྲུབ་ཅེས་དེ་ཉིད་རིག་པས་གསུངས། །གནས་ནི་རྣམ་པར་བསྟན་པའོ། །ཉི་མ་བཟང་ཞིང་སྐར་བཟང་ལ། །ཐོ་རངས་དུས་སུ་བློ་ལྡན་གྱིས། །ས་ཡི་མཚན་ཉིད་ཕ་
རོལ་སོན། །ས་ནི་ཡང་དག་བརྟག་པར་བྱ། །ཙིན་ཙ་ཡུང་བ་བཏུ་བར་རམ། །ཀ་རཉྫ་དང་དོན་འགྲུབ་ཀོ་བི་ད་ར་དང་། ཀརྞི་ཀས་ནི་མཉམ་བཀང་རིགས་ཀྱི་རི། །རུས་སྦལ་གླང་པོའི་རྒྱབ་འདྲའི་ས་ནི་སྤང་བར་བྱ། །ཤར་ཕྱོགས་པི་པི་ལིང་གི་ཤིང་དང་ནི། །ལྷོ་ཕྱོགས་བླག་ཤ་བ་ཡི་
ཤིང་དང་ལྡན། །ནུབ་ཕྱོགས་ནྱ་གྲོ་དྷ་ཡི་ཤིང་དང་ལྡན། །བྱང་གི་ཕྱོགས་ན་བ་ཀུ་ལེ་དང་ལྡན། །མེ་ཡི་མཚམས་ནི་ཀ་ཀུ་བྷེ་དང་ལྡན། །པ་ལཱ་ཤ་ནི་བདེན་བྲལ་དག་དུ་བརྗོད། །རླུང་གི་ཕྱོགས་སུ་ཤལ་མ་ལི་ཤིང་སྟེ། །དབང་ལྡན་དུ་ནི་ཨུ་དུམྺཱ་རའོ། །མྱ་ངན་མེད་དང་ཀནྡ་སུ་ཁ་ནིམ་པ་གྲུ་ཌ་ཤིང་། ཏ་མ་ལ་དང་མ་
ཙོ་ཀུ་ཙ་ཨ་མྲ་བལ་བོ་སེའུ། ཆུ་དང་དབང་པོའི་ཕྱོགས་སུ་ཆུ་མིག་དང་ལྡན་ཤིས་པའི་ས། །གྲུ་བཞིའི་མཚན་ཉིད་ས་ནི་རྣམ་པར་བརྟག་པར་བྱ། །དེར་ནི་གད་པ་གྲུ་བཞི་རྣམ་པར་བརྐོས་བྱས་ནས། །དེ་ལ་བརྐོས་པའི་ས་ཡིས་ཤིན་ཏུ་གང་བར་བྱ་བ་སྟེ། །གལ་ཏེ་དོང་སྟེ་ཁེངས་པར་མ་གྱུར་
ཤིས་པ་མ་ཡིན་ཞིང་། །ས་ལ་སོགས་པ་ལྷག་པར་གྱུར་ན་ཤིན་ཏུ་བསྔགས་པ་ཡིན་ནོ། །ས་ཡོངས་སུ་བརྟག་པའོ། །ཙིན་ཙ་ལ་སོགས་ལྡན་པ་ཡིས། །གལ་ཏེ་དཀྱིལ་འཁོར་བརྩམས་གྱུར་ན། །འཐབ་མོ་མྱ་ངན་ནོར་ཉམས་པ། །ཡོན་བདག་དག་ལ་མྱུར་དུ་འགྲུབ། །རུས་སྦལ་གླང་རྒྱབ་
ཡང་ན་གཞོང་། །འཆི་དང་ནད་དང་ཡང་ན་རྒུད། །དེ་ཕྱིར་དེ་འདྲའི་གནས་སུ་ནི། །བློ་ལྡན་དཀྱིལ་འཁོར་བརྩམ་མི་བྱ། །ཨ་ཤོ་ཀ་སོགས་མཉམ་ལྡན་པའི། །དཀར་པོའི་ས་ནི་ཤིན་ཏུ་ཤིས། །བྱང་ཤར་དག་ནི་ཆུ་མིག་ཏུ། །འགྱུར་ན་དངོས་གྲུབ་བླ་ན་མེད། །ཁུང་བུ་བརྐོས་

པའི་སས་མ་ཁེངས། །ཐམས་ཅད་ཀུན་ནི་ཉམས་པར་འགྱུར། །བརྐོས་པའི་སས་ནི་ཁུང་བཀང་ན། །ཐམས་ཅད་དག་ནི་འབྱུང་བར་འགྱུར། །ས་ཡི་མཚན་ཉིད་དོ། །དེ་ལ་རབ་ཏུ་བསྔགས་པའི་སའི་དབུས་སུ་སྟན་བདེ་ཞིང་མཐོ་བ་ལ་འདུག་སྟེ། གཙང་སྦྲ་དང་། དྲི་ཞིམ་པ་དང་།
ལུས་ཇི་སྙེད་པའི་གོས་ཀྱིས་བརྒྱན་པ་དང་། ཅོད་པན་བཅིངས་པ་བྱས་ནས། ཡོ་བྱད་ཐམས་ཅད་མཉེས་པར་བཞག་སྟེ། སྲུང་བ་དང་བཟླས་པ་བྱ་ཞིང་རྡོ་རྗེ་དང་དྲིལ་བུ་ལག་ཏུ་བླངས་ལ། སྔགས་པ་མཉམ་པར་གཞག་པས་གཏོར་མ་དང་མཆོད་པ་བྱིན་ལ་ཐོ་རངས་ཀྱི་དུས་སུ་ཏིང་ངེ་
འཛིན་གསུམ་བྱ་སྟེ། འཆད་པར་འགྱུར་བའི་ཆོ་གའམ་བདུག་པའི་སྦྱིན་སྲེག་གིས་བགེགས་བསལ་ཞིང་ཕུར་བུས་གདབ་ཅིང་རྡོ་རྗེ་ར་བ་དང་། རྡོ་རྗེའི་གུར་ལ་སོགས་པ་ཡང་རྣམ་པར་བསྒོམས་ཏེ། སློབ་མ་བསྲུང་བའི་དོན་དུ་ཞི་བའི་སྦྱིན་སྲེག་བྱའོ། །དེའི་རྗེས་ལ་གཏོར་མ་རྒྱ་ཆེན་
པོ་མན་ངག་ཇི་ལྟ་བས་སྦྱངས་ལ་རྔའི་སྒྲ་དང་བཅས་པས་ཕྱོགས་ཀུན་གྱི་འཇིག་རྟེན་སྐྱོང་བ་རྣམས་ལ་དབུལ་ལོ། །དེ་ནས་ཕྱི་དེ་ཉིན་པར་སྔ་དྲོའི་དུས་སུ་སྔགས་པས་ལྷ་ཉིད་ཀྱི་རྣལ་འབྱོར་བྱ་སྟེ། ལས་ཐམས་ཅད་པའི་སྔགས་ཀྱིས་བསྔགས་པའི་ཆུས་ཡང་དག་པར་གཏོར་ལ་འཆད་
པའི་འགྱུར་བའི་མཚན་ཉིད་ཀྱིས་སའི་ལྷ་མོ་ཡིད་ཀྱིས་སྤྱན་དྲངས་ནས་མཆོད་པ་ལྔས་ཡང་དག་པར་མཆོད་ནས། ལྷ་མོ་ཁྱོད་ནི་ཞེས་བྱ་བ་ལ་སོགས་པའི་ཚིགས་སུ་བཅད་པས་གསོལ་བ་བཏབ་ཅིང་། ཨོཾ་ཏིཥྛ་བཛྲ་ཧཱུཾ། ཞེས་པའི་སྔགས་ཀྱིས་ནམ་མཁའི་དཀྱིལ་དུ་དགོད་པར་བྱའོ། །
པུས་མོའི་ཚད་ཙམ་ས་ལ་ནི། །ལས་ཀྱི་རྡོ་རྗེས་བརྐོ་བར་བྱ། །བ་སུའི་ཀླུ་ནི་མཉམ་དམིགས་ལ། །དེ་ནས་ཤིན་ཏུ་ཡོངས་སུ་སྦྱངས། །སྟོན་ཟླ་འབྲིང་དང་ཐ་ཆུངས་ལ། །ཉི་ཤར་དབང་ལྡན་ཕྱོགས་སུ་དགོད། །ཀླུ་ནི་ལྷོ་རུ་ཁ་བལྟས་ཉལ། །གཡོན་ལོགས་སུ་ནི་ཤིན་ཏུ་གནས། །
དགུན་ཟླ་ར་འབྲིང་ཐ་ཆུངས་ལ། །གཤིན་རྗེ་རུ་ནི་མགོ་གནས་ཏེ། །ནུབ་ཏུ་ཁ་ཕྱོགས་མི་ཚུལ་ནི། །རོ་སྟོད་ཡིན་ཏེ་ཀླུ་ཡི་ཚུལ། །དཔྱིད་ཀྱི་ར་བ་འབྲིང་དང་ཐ། །ཟླ་བར་བྱང་ཕྱོགས་ཁ་བལྟ་བ། །ནུབ་ཏུ་མགོ་བལྟ་ཉལ་བ་ནི། །བ་སུའི་ཀླུ་ནི་སྟོབས་པོ་ཆེ། །དབྱར་ཟླ་ར་འབྲིང་ཐུ་ཆུངས་

ལ། །ཀླུ་ནི་གཞོགས་ཀྱིས་ཉལ་བ་སྟེ། །བྱང་དུ་མགོ་བསྟན་ཤར་དུ་ནི། །དུས་རྣམས་ཀུན་དུ་ཁ་བལྟའོ། །ཀླུ་འདིའི་རྒྱབ་ཀྱི་སྨད་དུ་ནི། །གལ་ཏེ་ཀུན་དུ་བརྐོས་གྱུར་ན། །ཡོན་བདག་འདོད་པའི་དངོས་གྲུབ་ནི། །འབྱུང་བར་འདི་ལ་ཐེ་ཚོམ་མེད། །གལ་ཏེ་
མགོ་བོར་བརྐོས་གྱུར་ན། །ཕ་མ་སྤུན་དང་རྩ་ལག་དང་། །བུ་དང་ཚ་བོ་སྟོབས་ལ་སོགས། །རྟག་ཏུ་བརླག་པར་འགྱུར་བ་ཡིན། །གལ་ཏེ་རྒྱབ་ཀྱི་ལུས་ལ་བརྐོས། །གནས་རྣམས་ཉམས་དང་ཡང་ན་འཆི། །ཡུན་ནི་རིང་བར་སྔ་མའི་ཆས། །བ་གླང་མ་ཧེ་ལ་སོགས་
བརླག །ཀླུ་གནས་ཡང་དག་ཤེས་བྱ་སྟེ། །སྨད་ཀྱི་ཆ་འདིར་བརྐོ་བར་བྱ། །བསྐོར་བས་ཡོངས་སུ་བགྲོད་བྱས་ལ། །ས་ཡི་གྲགས་ལྡན་མ་ལ་བལྟ། །བློ་ལྡན་མཁས་པས་བརྟག་བྱས་ལ། །དེ་ནས་ཟུག་རྔུ་བསལ་བྱས་ལ། །གལ་ཏེ་ཟུག་རྔུ་དེ་མ་བསལ། །ཉེས་པ་དག་
ནི་སྐྱེད་པར་འགྱུར། །རུས་པ་ཡན་ལག་རྫོགས་དང་མཉམ་ཆུད་ན། །ཟུག་རྔུ་སོལ་བའི་ཟུག་རྔུས་འཇིགས་པ་སྟོན། །ཐལ་བས་ནོར་ཉམས་འཆི་དང་མི་རུས་དང་། །སྦྲུལ་སོགས་ཟུག་རྔུས་ཀྱང་ནི་གནོད་པར་འགྱུར། །རྡོ་བ་རྡུལ་དང་གྱོ་མོ་སེན་མོ་སྐྲ་དང་ཀྲེ་ཏའི་ཤིང་། །སོ་
ཕག་དྲི་མ་སྣུམ་པ་ཚེར་མ་ལ་སོགས་བཅས། །འཆིང་དང་བསྣུན་པ་ལ་སོགས་མང་པོའི་ཟུག་རྔུ་འབྱུང་། །ཟུག་རྔུ་ལེགས་བསལ་དེས་ནི་ཉོན་མོངས་མ་ལུས་སེལ། །པུས་མོ་ཙམ་ནི་བརྐོས་ནས་སུ། །ས་ནི་དག་པར་མ་གྱུར་ན། །སླར་ཡང་སྔགས་པས་རྐེད་པ་ཙམ། །ཡོངས་
སུ་དག་ཅིང་བརྐོ་བར་བྱ། །རྒྱུན་མི་ཆད་པའི་ཟུག་རྔུ་འདི། །གལ་ཏེ་འབྱུང་བར་གྱུར་པ་ན། །ལག་པས་བཀབ་སྟེ་སྔགས་བཟླས་པས། །དེ་ཉིད་ཀྱིས་ནི་དག་པར་འགྱུར། །སྔགས་ནི་ཨོཾ་ཧ་ན་ཧ་ན་ཀྲོ་དྷ་ཧཱུྃ་ཕཊ། །དེ་ནས་ཡི་གེ་ཧཱུྃ་གིས་བསྔགས་པའི་བདུད་རྩི་ལྔ་དང་བསྲེས་པའི་
ཆུ་ས་འཇིམ་པ་བྱས་པས་ཡང་དག་པར་བྱ་ཞིང་། ལས་ཐམས་ཅད་པའི་སྔགས་ཀྱིས་བཟླས་པའི་ཆུས་བསང་བ་བྱ་ཞིང་། འབྲུ་དང་རིན་པོ་ཆེ་དང་སྨན་རྣམས་དབུས་སུ་བརྟན་པར་གཞུག་ཅིང་ས་གཞི་དེ་ཤིན་ཏུ་མཉམ་པར་བྱའོ། །རང་གི་ཁྱིམ་དང་བ་ལང་ལྷས།

གཙུག་ལག་ཁང་དང་ཁང་ཤུལ་དང་། འབབ་ཤུལ་རྒྱ་མཚོ་འཇུག་ངོགས་སུ། །སྦྱང་དང་བརྐོ་བ་སོགས་མི་བྱ། །ལག་པ་བརྐྱངས་ཏེ་སྔགས་བཟླས་པས། །དེ་ཡིས་ས་ནི་སྦྱང་བར་གསུངས། །དེ་ཡིས་ས་ནི་སྦྱང་འགྱུར་ཏེ། །རང་གི་སེམས་ནི་ཡོངས་སུ་དག །སྔགས་
ནི་ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། དེ་ནས་སྒོ་བཞི་དང་རྟ་བབས་སུ་ལྡན་པའི་ཁང་བུ་བརྩེགས་པའི་ནང་དུ་ཆུད་པའི་བླ་རེ་བྲེ་བ་དང་། རྔ་མ་དཀར་པོ་དང་། ལྗོན་ཤིང་དང་། འཕན་དང་ལོ་མས་ཀུན་དུ་ཁྱབ་པར་བྱ་ཞིང་ཁྱད་པར་འཕགས་པའི་དར་གྱིས་ལེགས་པར་བརྒྱན་ཅིང་། དྲི་ཞིམ་པོ་དང་
མེ་ཏོག་གི་ཕྲེང་བས་རྣམ་པར་བཀྲ་བའི་གོས་ཀྱིས་ཡན་ལག་བརྒྱན་པའི་རང་བཞིན་གྱིས་སྦྱངས་པ་དང་། དྲི་ཡིས་ཉེ་བར་བྱུགས་པ་དང་། ཟུར་བཞིར་རྣམ་པར་གནས་པའི་སྤོས་དྲི་ཞིམ་པོའི་སྣོད་བྱས་ལ་སླར་ཡང་སྦྱིན་སྲེག་ལ་སོགས་པ་བྱའོ། །དེ་བཞིན་དུ་སའི་ལྷ་མོ་ནམ་མཁའི་
ཕྱོགས་སུ་རྣམ་པར་གནས་པར་བསམ་པར་བྱའོ། །ས་སྦྱང་བའི་ཆོ་གའོ། །དེའི་རྗེས་ལ་རྡོ་རྗེ་སློབ་དཔོན་གྲོགས་བཟང་པོ་དང་། ཤིན་ཏུ་ལེགས་པར་བསྡམས་པའི་དཀྱིལ་འཁོར་གྱི་ས་ལ་སྟན་བདེ་བ་ལ་འདུག་སྟེ། གཏོར་མ་དང་མཆོད་པ་ལ་སོགས་པ་ཕུལ་ལ། རང་འདོད་པའི་ལྷའི་
དཀྱིལ་འཁོར་རྣམ་པར་བསྒོམ་ཞིང་བགེགས་བསྐྲད་པར་བྱ་བའི་ཕྱིར་ལས་ཐམས་ཅད་པའི་སྔགས་ཀྱིས་བཟླས་པའི་དྲིའི་ཆུས་དཀྱིལ་འཁོར་གྱི་ས་ལ་ཡོངས་སུ་གཏོར་བར་བྱའོ། །དེ་ནས་ཨོཾ་བྷཱུ་ཁྃ་ཞེས་བྱ་བའི་སྔགས་ཀྱིས་ནམ་མཁའི་རང་བཞིན་དུ་བྱའོ། །ཧཱུྃ་ལྃ་ཧཱུྃ། ཞེས་བྱ་བས་རྡོ་རྗེ་
རྡུལ་ཕྲན་གྱི་རང་བཞིན་དུ་ས་གཞི་བསྒོམ་པར་བྱའོ། །ཨོཾ་མེ་དཱི་ནི་བཛྲ་བྷ་བ་བཛྲ་སཏྭ་ཧཱུྃ་ཞེས་བྱ་བ་འདིས་བྱིན་གྱིས་བརླབ་པར་བྱའོ། །འདི་ནི་མན་ངག་གིས་ས་སྦྱང་བའོ། །འདི་ནི་ནང་གི་སྦྱང་བའི་ཆོ་ག་འོ།། །།དེའི་རྗེས་ལ་སློབ་དཔོན་གྱིས་མེ་ཏོག་དྲི་ཞིམ་པོས་དགྲམ་པ་བྱས་ནས་དཀྱིལ་འཁོར་
གྱིས་གཞིའི་དབུས་སུ་འདུག་སྟེ་ལག་ཏུ་རྡོ་རྗེ་དང་དྲིལ་བུ་བཟུང་ལ། དེ་བཞིན་གཤེགས་པ་ཐམས་ཅད་ཀྱིས་བདག་ཉིད་ཀྱི་ཏིང་ངེ་འཛིན་གསུམ་གྱི་རྣལ་འབྱོར་དང་ལྡན་པ་ལ་རྡོ་རྗེ་དང་དྲིལ་བུ་འཛིན་པའི་སློབ་མས་ཕྱོགས་བཞི་ན་རྣམ་པར་གནས་པའི་དཀར་མོ་ལ་སོགས་པའི་རྣལ་འབྱོར་མ་

བཞིར་བསྒོམས་ལ། ཚིགས་སུ་བཅད་པ་བཞིས་གསོལ་བ་གདབ་པར་བྱ་སྟེ། ཞི་བ་དེ་བཞིན་གཤེགས་པ་ཀུན། །དེ་བཞིན་གཤེགས་པ་ཀུན་གྱི་གནས། །ཆོས་རྣམས་མཆོག་ནི་བདག་མེད་པའི། །དཀྱིལ་འཁོར་མཆོག་ནི་བཤད་དུ་གསོལ། །མཚན་
ཉིད་ཐམས་ཅད་ཡང་དག་རྫོགས། །མཚན་མིན་ཐམས་ཅད་ཡང་དག་སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་མཆོག་ནི་བཤད་དུ་གསོལ། །ཞི་བ་མཆོག་ནི་ཆོས་ལས་འབྱུང་། །ཡེ་ཤེས་སྤྱོད་པ་རྣམ་པར་སྤྱོད། །ཀུན་དུ་བཟང་པོ་གསུང་གི་མཆོག །ཁ་ལོ་སྒྱུར་བས་དཀྱིལ་
འཁོར་གསུངས། །སེམས་ཅན་ཀུན་གྱི་ཐུགས་ཆེན་པོ། །རང་བཞིན་དག་ཅིང་དྲི་མ་བྲལ། །ཀུན་དུ་བཟང་པོ་ཐུགས་ཀྱི་མཆོག །དཀྱིལ་འཁོར་ཁ་ལོ་སྒྱུར་བས་གསུངས། །དེ་ནས་སྔགས་པས་གསོལ་བ་བཏབ་པ་དང་དུ་བླངས་ལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་
ཀྱི་ང་རྒྱལ་བསྐྱེད་པར་བྱ་སྟེ། བདག་ཉིད་སངས་རྒྱས་བྱང་ཆུབ་སེམས། །བདག་ཉིད་དོན་ཡོད་རྡོ་རྗེ་ཆོས། །རྡོ་རྗེ་ཉི་མ་ཉིད་ཀྱང་བདག །བདག་ཉིད་སངས་རྒྱས་ཐམས་ཅད་དོ། །ཞེས་བྱ་བས་སོ། །དེའི་རྗེས་ལ་ཧཱུྃ་བཛྲོད་ཏིཥྛ་ཞེས་བྱ་བའི་སྔགས་འདིས་བསྒོམས་པའི་དཀྱིལ་འཁོར་གྱི་
འཁོར་ལོ་གཤེགས་སུ་གསོལ་ཏེ། ནམ་མཁའི་དཀྱིལ་དུ་དགོད་པར་བྱའོ། །དེ་ནས་སེམས་ཅན་གྱི་ཁམས་ཉོན་མོངས་པའི་མུན་པས་གཡོགས་པ་ཤིན་ཏུ་སྙིང་རྗེ་བའི་ཡིད་ཀྱིས་ཉོན་མོངས་པ་ལ་རབ་ཏུ་ཁྲོས་ཏེ་དེ་ནས་ལྡང་བར་བྱའོ། །ཊ་ཡིག་རི་བོང་མིག་གཡོན་ལ། །མ་ཡིག་ཉི་མ་
གཡས་ལ་འཛིན། །སྣ་ཚོགས་འཇིག་རྟེན་དག་ལ་གཟིགས། །ཀུན་ནས་རྡོ་རྗེའི་ལྟ་སྟངས་ཀྱིས། །རྐང་མཐིལ་ནས་ནི་རྡོ་རྗེ་འབར། །དལ་བས་རྡོ་རྗེ་གསོར་བྱ་ཞིང་། །རྡོ་རྗེ་རྒྱ་གྲམ་གོམ་སྟབས་གར། །གནས་རྣམས་སུ་ནི་དྲིལ་བུ་དཀྲོལ། །བྃ་ཧྭྃ་ས་ཡྃ་པྲ་དུཥྚོ་གྷ་ན་ཧཱུྃ། ཁ་ནས་ཧཱུྃ་
ཡིག་སྒྲ་འདོན་ཅིང་། །རབ་སྡང་བསྡིགས་པས་གཞག་པར་བྱ། །སྔགས་པས་གཡས་ནས་བསྐོར་བྱ་ཞིང་། །འཁོར་ལོ་ཡིས་ནི་བསྐོར་བར་བྱའོ། །དེ་ནས་བགེགས་ནི་གཞིལ་བྱའི་ཕྱིར། །ཚིགས་བཅད་འདི་ནི་བརྗོད་པར་བྱ། །ལུས་ངག་སེམས་ལ་གནས་པ་ཡི། །གཟའ་དང་

འབྱུང་པོ་ཤ་ཟ་སོགས། །གང་ཞིག་ལུས་ནི་སྲུལ་པོ་སྟེ། །ཁྱེད་རྣམས་ཀུན་དུ་འགྲོ་བར་བྱོས། །བདེ་ཆེན་ཡེ་ཤེས་ལས་བྱུང་བ། །རྡོ་རྗེ་སེམས་དཔའ་དངོས་ཀྱི་རིགས། །ང་ནི་དཔལ་ལྡན་སྙིང་རྗེའི་སྟོབས། །བསྙུང་བའི་དཀྱིལ་འཁོར་སྦྱོར་བའོ། །གལ་ཏེ་གང་ཞིག་གོམས་བྱེད་ན། །
རྡོ་རྗེ་འབར་བས་ལུས་པོ་ནི། །གསང་བ་གསུམ་སྐྱེས་གཤེགས་པ་དང་། །ཀུན་ནས་ཀུན་དུ་ཕྱེ་མར་བརླག །དེ་ནས་དེ་རྗེས་མ་ལུས་བགེགས། །འཇིགས་པས་བྱེད་པར་བལྟ་བར་བྱ། །བགེགས་བསྐྲད་པའི་མཚན་ཉིད་དང་ཡོངས་སུ་གཟུང་བ་ཞེས་བྱའོ། །དེ་ནས་སྔགས་པས་བགེགས་
ཉེ་བར་ཞི་བར་བྱ་བའི་ཕྱིར། བདུད་རྩི་འཁྱིལ་བའི་སྐུ་ལུས་ཕྱེད་རྣོ་བ་ཤིན་ཏུ་མི་བཟད་པའི་ཉི་མ་ཕྱེད་པའི་འོད་དང་མཚུངས་པ་དབུས་སུ་བསྒོམ་པར་བྱ་སྟེ། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚཱྃ་ཕཊ་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པྃ་ཧཱུྃ་ཧཱུྃ་ཧཱུྃ། བཛྲ་ཀཱི་ལ་ཡ་བཛྲ་དྷ་ར་ཨཱཛྙཱ་པ་ཡ་ཏི་ཀཱ་ཡ་
ཝཱ་ཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ་ཅེས་བྱ་བའི་སྔགས་འདིས་ཕྱོགས་ཐམས་ཅད་དུ་སྤྲོ་བའི་སྦྱོར་བས་བློས་གདབ་པར་བྱའོ། །སླར་ཡང་བགེགས་མ་ལུས་པ་ཞི་བར་བྱ་བའི་ཕྱིར། རང་རང་གི་ཕྱོགས་ན་གནས་པ་བུ་དང་ཞོ་ཤས་འཚོ་བ་དང་འཁོར་དུ་བཅས་པའི་དབང་པོ་ལ་སོགས་པ་ཕྱོགས་
སྐྱོང་བ་དང་། གཞན་ཡང་བགེགས་བྱེད་པ་ནི་དཀྱིལ་འཁོར་གྱི་སའི་དབུས་སུ་གཅིག་པ་ཉིད་དུ་གནས་པར་བལྟས་ལ། བདུད་རྩི་འཁྱིལ་པའི་སྔགས་དེ་ཉིད་ཀྱི་བློས་གདབ་པར་བྱའོ། །ཕུར་བུས་གདབ་པའི་ཆོ་གའོ། །དེ་ནས་བགེགས་མེད་ཅིང་འབར་བ་རྣོན་པའི་རིགས་ཀྱི་འོད་དུ་
དཀྱིལ་འཁོར་གྱི་ས་བལྟས་ལ་ཕུར་བུས་གདབ་པའི་ཕྱི་རོལ་ཏུ་རྡོ་རྗེ་ར་བ་ཞེས་བྱ་བ་སྟེ། རེ་ཕ་དམར་པོ་ཡོངས་སུ་གྱུར་པའི་ཉི་མའི་དཀྱིལ་འཁོར་གྱི་དབུས་ན་གནས་པའི་ཡི་གེ་ཧཱུྃ་ནག་པོ་ཡོངས་སུ་གྱུར་པ་ལས་སྐྱེས་པའི་འོད་ཟེར་ལྔ་དང་ལྡན་པའི་སྣ་ཚོགས་རྡོ་རྗེ་བསྒོམ་པར་བྱ་ཞིང་འོད་ཟེར་གྱི་
ཕྲེང་བ་དེས་རྡོ་རྗེ་ཕྲེང་བ་འབར་བ་འཕྲོས་པས་ཕྱོགས་བཞིར་ཁྱབ་ཅིང་། ཤིན་ཏུ་ཐུག་པར་གྱུར་པས་རྣམ་པར་མཛེས་ཤིང་རྡོ་རྗེ་ར་བ་གྲུ་བཞི་པའོ། །སྟེང་དུ་ཁྱབ་པས་ནི་རྡོ་རྗེའི་གུར་དང་ར་བའི་འོག་ཏུ་ཁྱབ་པས་ནི་ས་གཞི་རྡོ་རྗེའི་རང་བཞིན་ནོ། །ར་བ་དང་གུར་གཉིས་ལས་ཀྱང་ཕྱོགས་ཕྱོགས་སུ་འོད་

ཟེར་སྤྲོས་པས་ཐུག་པར་གྱུར་ཏེ། ཕྱིའི་ཕྱོགས་བཅིང་བ་དང་ཉི་མ་དང་སྣ་ཚོགས་རྡོ་རྗེ་ལས་ཀྱང་ཀུན་ནས་འོད་ཟེར་དུ་གྱུར་པས་ནང་མཚམས་མེད་པར་བྱས་ལ། དེ་ནས་ཕྱི་རོལ་ཐག་རིང་པོར་མཚམས་བཅད་པར་བསྒོམ་པར་བྱའོ། །རྡོ་རྗེའི་གུར་ལ་སོགས་པའི་སྲུང་
བའི་འཁོར་ལོའི་ཆོ་གའོ། །དེ་ནས་བཾ་ཡིག་ལས་སྐྱེས་ཤིང་དེ་ལས་བྱུང་བ་ལུས་ཕྱེད་ལ། གསེར་གྱི་མདོག་ཅན་ཕྱག་ན་རིན་པོ་ཆེའི་བུམ་པ་བསྣམས་པ། ན་བཟའ་བཟང་པོས་བརྒྱན་ཅིང་སའི་ལྷ་མདུན་དུ་བསམས་ལ་ཚིགས་སུ་བཅད་པས་རབ་ཏུ་གནས་པར་བྱས་ཏེ། ཀྱེ་རྡོ་རྗེ་ཁྲོ་བོའི་
མཆོད་པ་ལ། །ལྷ་མོ་ཁྱོད་ནི་དཔང་དུ་གྱུར། །རིན་ཆེན་དུ་མ་འཛིན་པའི་ས། །ཆེ་གེ་མོ་བདག་དཀྱིལ་འཁོར་བྲི། །བསྐུལ་བ་ལན་གསུམ་བར་དུ་ནི། །ས་ལ་བསང་གཏོར་ལ་སོགས་སྦྱིན། །མཆོད་པས་མཉམ་པར་མཆོད་བྱས་ལ། །དེ་ཉིད་དུ་ནི་ཐིམ་པར་བསམ། །དེ་ནས་སློབ་དཔོན་
གྲོགས་དང་བཅས་པས་དཀྱིལ་འཁོར་ལ་དྲི་ཞིམ་པོ་དང་མེ་ཏོག་བཟང་པོས་ཉེ་བར་བྱུག་པ་དང་། གཏོར་བ་བྱས་ལ། ལྷའི་གནས་སུ་བདུད་རྩི་ལྔས་དཀྱིལ་འཁོར་དགུ་དང་། བདག་མེད་མའི་དཀྱིལ་འཁོར་ལ་ནི་དཀྱིལ་འཁོར་བཅོ་ལྔ་བྱས་ལ། ནམ་མཁའ་ལ་གནས་པའི་དཀྱིལ་
འཁོར་བློས་སྤྱན་དྲངས་ཏེ། བདུད་རྩི་ལྔས་ཉེ་བར་བྱུགས་པའི་དཀྱིལ་འཁོར་ལ་མཉམ་པར་དགོད་པར་བྱའོ། །རྡོ་རྗེ་ར་བ་ལ་སོགས་པ་དང་མཚམས་བཅད་པའི་མཐར་ཐུག་པར་བྱས་ལ། ཕྱི་དང་གསང་བའི་མཆོད་པ་རྣམས་ཀྱིས་དཀྱིལ་འཁོར་གྱི་འཁོར་ལོ་དེ་ལ་ཡང་དག་པར་མཆོད་
པ་དང་། བསྟོད་པ་དང་བདུད་རྩི་མྱོང་བ་བྱའོ། །ས་ཡོངས་སུ་བཟུང་བ་དང་སྟ་གོན་ལ་གནས་པའི་དུས་སུ་མཚན་མོ་རོལ་མོ་དང་ཏམྦུ་ར་དང་གླིང་བུ་དང་ལག་རྔ་དང་རྫ་རྔ་ཤིན་ཏུ་སྙན་པའི་རོལ་མོའི་དབྱངས་དང་། གླུ་སྙན་པ་དང་སྐྱེ་བོ་སྒེག་པོ་དག་གིས་གར་གྱི་རྗེས་སུ་འབྲང་བ་དང་། བཀྲ་
ཤིས་ཀྱི་ཁྱད་པར་གྱིས་ཀྱང་དཀྱིལ་འཁོར་གྱི་ཁྱིམ་དུ་དཀྱིལ་འཁོར་མཆོད་པར་བྱའོ། །དེ་ནས་ལེགས་པར་ཡོངས་སུ་བརྟགས་པའི་ཤིན་ཏུ་འཇམ་ཞིང་བདེ་བའི་སྟན་ལ་འདུག་སྟེ། མདུན་གྱི་གཡོན་གྱི་ཆ་རུ་མེ་ཏོག་བཟང་པོ་དང་ཆུས་ཡོངས་སུ་བཀང་ཞིང་ཡོངས་སུ་བཟླས་པའི་འཐོར་

འཐུང་གི་སྣོད་གཞག་པར་བྱ་ཞིང་། ཏིང་ངེ་འཛིན་གསུམ་གྱི་རྣལ་འབྱོར་དང་ལྡན་པའི་རྣལ་འབྱོར་པས་བུམ་པ་སྟ་གོན་ལ་གནས་པར་བྱ་སྟེ། དེ་ལ་ནག་པོ་མ་ཡིན་པ་དང་། ཁ་འདབ་ཡངས་པ་དང་། མགྲིན་པ་རིང་བ་དང་། ནང་ཡངས་པ་ཤིན་ཏུ་ལེགས་པར་བཀྲུས་ལ་སྤོས་
ཀྱིས་བདུག་ཅིང་ནས་དང་། ནས་སོ་བ་དང་། སྲན་མ་མ་ཤ་དང་། འབྲས་ཀྱི་སོ་བ་དང་། ཏིལ་དང་འབྲུ་ལྔ་དང་། བྲི་ཧ་ཏི་དང་། ཀཎྜ་ཀ་རི་དང་སྭེ་ཏ་ཨ་པ་ར་ཛི་ཏ་དང་། ལྷར་བཅས་དང་ལྡན་པའི་སྨན་ལྔ་དང་། གུར་གུམ་དང་། ཨ་ག་རུ་དང་། འགྲན་ཏི་ཀ་དང་། ཙནྡན་དང་པ་ཏྲྃ་ག་སྟེ་དྲི་ལྔ་དང་།
གསེར་དང་། དངུལ་དང་། ཟངས་དང་། མུ་ཏིག་དང་། བྱུ་རུ་དང་། མཐིང་ཤིང་སྟེ་རིན་ཆེན་ལྔ་དང་ལྡན་པ། གླང་པོ་ཆེ་དང་། རྟ་དང་བ་གླང་དང་བོང་བུ་ལ་སོགས་པས་མ་བགྲོད་པའི་ཆུ་ཀླུང་ལ་སོགས་པ་ནས་ཤིན་ཏུ་བཤམས་ལ་ཆུ་བླངས་ལ་སྣོད་གཞན་དང་རེག་པར་མི་བྱའོ། །
ཨོཾ་ཏཔྟེ་ཏཔྟེ་མ་ཧཱ་ཏཔྟེ་སྭཱ་ཧཱ། ཞེས་བྱ་བས་མཎྜལ་གྱི་ཆུ་རུ་བྱས་ནས་ཆུས་ཡོངས་སུ་བཀང་བ་ལ་ཙུ་ཏ་ཛ་དང་ཛམྦུ་ཀ་དང་། བིལ་བ་དང་། ཏ་མ་ལུ་སྟེ་ཁ་རྒྱན་ལྔ་གཟུགས་ཤིང་གོས་སར་པ་ཟུང་གིས་མགྲིན་པ་དཀྲི་བར་བྱས་ཏེ། ཆོས་འབྱུང་ལ་གནས་པའི་རང་གི་ལྷའི་མཚན་མས་
མཚན་པར་བྱ་ཞིང་། ཡི་གེ་བྃ་གྱིས་རིན་པོ་ཆེའི་རང་བཞིན་དུ་བྱས་པར་བསམས་ལ། འཕན་དང་གདུགས་དང་ལྡན་པར་བྱ་ཞིང་བསྒོམས་པའི་དཀྱིལ་འཁོར་གྱི་བདག་པོ་སྟེང་དུ་དགོད་ཅིང་མེ་ཏོག་ཕྲེང་བས་དཀྲིས་པའི་རྡོ་རྗེས་སྦྲེལ་ལ། རྣམ་པར་རྒྱལ་བའི་བུམ་པ་དང་རྗེས་སུ་
མཐུན་པའི་སྟན་གཞག་ཅིང་མེ་ཏོག་གིས་དཀྲིས་པའི་རྡོ་རྗེ་ལག་པ་གཡོན་གྱིས་བླངས་ལ། གཡས་པས་ནི་ཕྲེང་བ་བླངས་ལ་སྔགས་པས་ཡི་གེ་གསུམ་གྱི་བར་དུ་བཅུག་པའི་ལྷ་རང་གི་སྔགས་ལན་བརྒྱ་རྩ་བརྒྱད་ཀྱིས་མངོན་པར་བསྔགས་པར་བྱའོ། །དེ་བཞིན་དུ་དཀྱིལ་
འཁོར་གྱི་བུམ་པ་གཞན་ལས་ཅུང་ཟད་དམན་པའི་ཚད་ཀྱིས་ཏེ། ཆོ་ག་ཡང་དེ་བཞིན་དུ་བྱ་ཞིང་ལྷ་རང་རང་གི་མཚན་མས་མཚན་པ་དང་། རྗེས་སུ་མཐུན་པའི་གདན་ལྡན་པར་བསྒོམས་ལ་དཀྱིལ་འཁོར་གྱི་ས་ལ་དཀྱིལ་འཁོར་གྱི་ལྷ་བྱིན་གྱིས་བརླབས་པའི་ཡི་གེ་གསུམ་གྱི་བར་དུ་ཆུད་པའི་དཀྱིལ་འཁོར་གྱི་

ལྷའི་སྔགས་ཀྱིས་ལན་བདུན་གྱི་བར་དུ་མངོན་པར་བསྔགས་པར་བྱའོ། །དེ་ནས་ཞབས་བསིལ་ལ་སོགས་པ་ཕུལ་ཏེ། མཆོད་པ་རྣམ་པ་ལྔས་མཆོད་ཅིང་དྲིལ་བུ་དཀྲོལ་ལ་བསྟོད་པར་བྱའོ། །དེ་བཞིན་དུ་བུམ་པ་གཞན་ཡང་ཆོ་ག་བྱ་སྟེ། སེམས་ཅན་
རྣམས་གསང་བའི་དོན་དུ་གྷསྨ་རཱི་བསྐྱེད་ལ། ཡི་གེ་གསུམ་གྱི་བར་དུ་ཆུད་པའི་ལས་ཐམས་ཅད་པའི་སྔགས་ཀྱིས་ལན་བརྒྱ་རྩ་བརྒྱད་ཀྱི་བར་དུ་མངོན་པར་བསྔགས་པར་བྱས་ལ། དེ་བཞིན་དུ་ཞབས་བསིལ་དང་། བསྟོད་པ་ལ་སོགས་པ་བྱའོ། །དེའི་འོག་ཏུ་བགེགས་ཉེ་
བར་ཞི་བར་བྱ་བའི་ཕྱིར་གཏོར་མ་སྦྱིན་པར་བྱའོ། །དེ་ལ་བུམ་པ་སྟ་གོན་ལ་གནས་པ་འདི་ཉིན་གཅིག་བཞིན་དུ་དུས་གསུམ་དུ་ཆོ་ག་བྱའོ། །གཞན་དག་ན་རེ་ཤར་ཕྱོགས་ལ་སོགས་པའི་སྒོར་བུམ་པ་བརྒྱད་དང་ལྡན་པ་སྟེ། རྒྱལ་བ་དང་། བཀྲ་ཤིས་དང་། གྲུབ་པ་དང་།
བསྲུང་བ་དང་། རྒྱལ་བ་དང་། ཞི་བ་དང་། རྫུ་འཕྲུལ་དང་། གྲུབ་པའི་མིང་དང་ལྡན་པ་སྟེ། ཨོཾ་སུྃ་ཀྵུྃ་ཡུྃ་ཧཱུྃ་ཕཊ་སྭཱ་ཧཱ། ཞེས་བྱ་བའི་སྔགས་འདིས་ལན་བདུན་དུ་བསྔགས་ལ་དེ་བཞིན་དུ་ལྷག་པར་གནས་པར་བྱའོ་ཞེས་ཟེར་རོ། །བདག་མེད་མའི་དཀྱིལ་འཁོར་ལ་ནི་ལྷ་མོ་རྣམས་
ཀྱི་བུམ་པ་བཅོ་ལྔ་ལ་དེ་བཞིན་དུ་གྲི་གུག་གིས་མཚན་པར་བསྒོམ་ཞིང་། རང་རང་གི་སྔགས་ཀྱིས་མངོན་པར་བསྔགས་པར་བྱ་ཞིང་ལྷག་མ་ནི་སྔ་མ་བཞིན་ནོ། །བུམ་པ་ལྷག་པར་གནས་པའི་ཆོ་གའོ། །དེ་ནས་ཐལ་མོ་སྦྱར་ལ་ལུས་བཏུད་དེ་མེ་ཏོག་བཟང་པོ་བཟུང་ལ། ཨོཾ་སརྦ་
ཏ་ཐཱ་ག་ཏ་སུ་ལ་ལི་ཏི། བི་ལ་ས་ན་མི་ཏེར་ནཱ་མ་མི་བྷ་ག་བཱན་ཏྃ། ཛཿཧཱུྃ་བྃ་ཧོཿ། པྲ་ཏཱིཙྪ་ཀུ་སུ་མཱཉྫ་ལིན་ནཱ་ཐ་ཧོཿ། ཞེས་བརྗོད་ལ་མེ་ཏོག་དོར་ལ་དཀྱིལ་འཁོར་གྱི་འཁོར་ལོ་མཆོད་པར་བྱའོ། །དེ་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ལག་པ་གཡས་པ་བརྐྱང་སྟེ།
སྔགས་པས་སྤོས་བཟངས་ཀྱིས་གཡབ་པར་བྱ་ཞིང་ལྕེ་ལ་ཧཱུྃ་ཡིག་ལས་སྐྱེས་པའི་རྡོ་རྗེ་ཕྲ་མོ་བསམ་པར་བྱས་ལ། དཀྱིལ་འཁོར་གྱི་བདག་པོ་དང་གཞན་ཡང་བསྐུལ་བར་བྱ་སྟེ། བཅོམ་ལྡན་ཁྲོ་བོ་རྡོ་རྗེ་མཆོག །རིག་པའི་རྒྱལ་པོ་ཕྱག་འཚལ་བསྟོད། །སྙིང་རྗེའི་བདག་

ཉིད་དཀྱིལ་འཁོར་ནི། །མགོན་པོ་བདག་ནི་འདྲི་བར་འཚལ། །སློབ་མ་རྣམས་ནི་བསྐྱབ་པ་དང་། །ཁྱད་རྣམས་ལ་ཡང་མཆོད་པའི་ཕྱིར། །དེ་ལ་བདག་དང་བཅོམ་ལྡན་ཀྱེ། །བཀའ་དྲིན་བདག་ནི་མཛད་པའི་རིགས། །སངས་རྒྱས་འགྲོ་ལ་འཁོར་ལོ་བསྐོར། །འབྲས་
བུ་ལ་གནས་བྱང་ཆུབ་སེམས། །གཞན་ཡང་སྔགས་ཀྱི་ལྷ་ཉིད་དང་། །འཇིག་རྟེན་སྐྱོང་བའི་ལྷ་དག་དང་། །རྫོགས་སངས་བསྟན་ལ་རབ་ཞུགས་པའི། །འབྱུང་པོ་བསྟན་པ་ལ་མོས་རྣམས། །ཡང་དག་རྡོ་རྗེའི་སྤྱན་གྱིས་ནི། །བདག་ཅག་རྣམས་ལ་དགོངས་སུ་
གསོལ། །ཆེ་གེ་མོ་དག་རྡོ་རྗེ་ཆེ། །ཀྱེ་རྡོར་འབྱུང་བའི་དཀྱིལ་འཁོར་ནི། །ཅི་ནུས་པ་ཡིས་ཆོ་ག་ཡི། །འགྲོ་བ་སྦྱང་ཕྱིར་འབྲི་བར་འཚལ། །སློབ་མ་དང་བཅས་དེ་དག་ལ། །བརྩེ་བས་ཡོངས་སུ་བཟུང་ནས་ནི། །དཀྱིལ་འཁོར་དང་བཅས་ཐམས་ཅད་ལ། །མྱུར་བ་རུ་ནི་སྒྲུབ་
པར་རིགས། །ཞེས་ལན་གསུམ་གྱི་བར་དུ་གསོལ་བར་བྱ་ཞིང་མཆོད་ལ་བསྟོད་པར་བྱའོ། །ལྷ་ལྷག་པར་གནས་པར་བྱ་བའི་ཆོ་གའོ། །དེ་ནས་སྔགས་པས་དཀྱིལ་འཁོར་གྱི་ས་ལས་འཕགས་ཏེ་སློབ་མ་ཡང་དག་པར་བསྲུངས་ཏེ་ལྷག་པར་གནས་པར་བྱ་སྟེ། ཡོན་ཏན་
བདེ་གཤེགས་དད་དང་ལྡན། །རིགས་ལྡན་ང་རྒྱལ་བྲལ་བ་དང་། །ཁ་དོག་གཟུགས་དང་ལང་ཚོར་ལྡན། །དོན་འདོད་བརྩོན་འགྲུས་ཁྱད་པར་འཕགས། །བྱས་གཟོ་བཟོ་མཁས་ཤེས་རབ་ལྡན། །ལེགས་བཀྲུས་མེ་ཏོག་ཕྲེང་གིས་བརྒྱན། །གཟུགས་བྲལ་ཡོན་ཏན་མེད་
པའང་རུང་། །དམན་པའང་ལྷག་པར་གནས་པར་བྱ། །དཀྱིལ་འཁོར་ཆོ་གར་འཁོར་རྣམ་བཞི། །དེ་དག་རྗེས་སུ་གནང་བ་ཉིད། །རང་རང་བསླབ་པ་དང་ལྡན་ཞིང་། །ཐེག་ཆེན་ལ་ནི་མོས་པའི་བདག །ལ་ལ་སྔགས་ནི་གྲུབ་དོན་དུ། །དཀྱིལ་འཁོར་འདིར་ནི་འཇུག་
པར་བྱེད། །དེ་ལས་གཞན་པ་བསོད་ནམས་འདོད། །འཇིག་རྟེན་ཕ་རོལ་འདོད་པ་གཞན། །འཇིག་རྟེན་ཕ་རོལ་བསྟན་པ་ན། །ངེས་པར་དད་པར་བྱེད་པ་ནི། །བློ་ལྡན་དཀྱིལ་འཁོར་གཞུག་བྱ་ཡི། །སྐྱེ་བོ་འདི་ཡི་བློ་ཡིས་མིན། །སྐྱེ་བ་འདི་ཡི་བློ་ཡིས་ནི། །དེ་བཞིན་

འཇིག་རྟེན་ཕ་རོལ་མིན། །འཇིག་རྟེན་ཕ་རོལ་འདོད་པའི་མི། །འདི་ཡི་འབྲས་བུ་ཞར་འབྱུང་ཉིད། །འདི་དག་མ་ལུས་བར་བརྗོད་ནས། །སློབ་མ་སྙིང་ལ་འཇུག་སྒོར་བྱ། །རྡོ་རྗེའི་ལམ་ནས་བྱུང་ནས་ནི། །རང་རིག་པདྨའི་དབུས་ན་གནས། །མ་ལུས་སྙིང་གར་ཞུགས་ནས་
ནི། །ཞུ་གྱུར་དེ་བཞིན་གཤེགས་པ་ཡིས། །བཀྲུ་བར་བསྒོམ་བྱ་སྔགས་མཆོག་གིས། །དཀྱིལ་འཁོར་སྒོ་ནས་གསོལ་གདབ་པ། །སེམས་ཅན་རྣམས་ལ་ཕན་མཛད་པའི། །བརྩོན་ཆེན་བདག་ནི་སྟོན་པ་ཁྱོད། །འཁོར་བའི་རྒྱ་མཚོ་མི་བཟད་ལས། །བདེ་ཆེན་ཁྱོད་ཀྱིས་དྲང་དུ་གསོལ། །
ཐེག་ཆེན་ཁྱོད་ཀྱིས་དྲང་དུ་གསོལ། །ཐེག་བརྟན་བྱང་ཆུབ་ཆེན་པོ་ནི། །མགོན་པོ་ཆེན་པོ་བདག་ལ་སྩོལ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་པོ་བདག་ལ་སྩོལ། །ཐར་པ་ཆེན་པོའི་གྲོང་
མཆོག་ཏུ། །མགོན་པོ་བདག་ནི་གཞུག་ཏུ་གསོལ། །ཞེས་སློབ་མས་གསོལ་བ་གདབ་པར་བྱའོ། །གུས་ཤིང་ཁྱད་འཕགས་དུལ་བ་ཡིས། །སློབ་མས་ལན་གསུམ་གསོལ་ནས་ནི། །གཙོ་གྱུར་སློབ་མ་བཀུག་བྱས་ལ། །བླ་མས་ཚིག་འདི་བརྗོད་པར་བྱ། །ཐེག་ཆེན་འདི་ནི་བརྩེ་བ་སྟེ། །
སྔགས་ཀྱི་སྤྱོད་པ་ཆོ་གའི་གཞུང་། །ཐེག་ཆེན་སྣོད་ནི་ཁྱེད་རྣམས་ལ། །དེ་ནི་ཡང་དག་བཤད་པར་བྱ། །དུས་གསུམ་འབྱུང་བའི་སངས་རྒྱས་ནི། །སྐུ་གསུང་ཐུགས་ཀྱི་རྡོ་རྗེ་ཅན། །རྡོ་རྗེ་གསང་སྔགས་མཐུ་སྟོབས་ཀྱིས། །ཡེ་ཤེས་མཚུངས་པ་མེད་པ་བརྙེས། །མཚུངས་མེད་སྔགས་
ཀྱིས་སྦྱོར་བ་ཡིས། །བདུད་ཀྱི་སྡེ་ཆེན་མི་བཟད་པ། །དཔའ་བོ་ཤཱཀྱ་སེང་གེ་སོགས། །གང་ཞིག་གིས་ནི་སྟོབས་ཆེན་བཅོམ། །འཇིག་རྟེན་རྗེས་འཇུག་ལ་འགྲོ་བ། །ཕྱིར་མི་ལྡོག་པའི་འཁོར་ལོ་བསྐོར། །དེ་བས་བརྩེ་བློས་འདི་དག་ནི། །ཀུན་མཁྱེན་ཐོབ་བྱའི་ཕྱིར་དུ་གྱིས། །ཞེས་
འདི་དག་བརྗོད་ལ། སྡིག་པ་བཤགས་པ་ལ་སོགས་པ་བྱས་ནས། །གསུམ་ལ་སྐྱབས་སུ་འགྲོ་བ་ལ་སོགས་པ་རྒྱས་པར་བྱའོ། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་སྡོམ་པ་ནི། །དུས་འདི་ནས་ནི་གཟུང་བར་བགྱི། །

བསླབ་པའི་ཚུལ་ཁྲིམས་རྣམ་གསུམ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་ནི། །བདག་གིས་བརྟན་པར་རབ་ཏུ་གཟུང་། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །རིན་ཆེན་རིགས་ཆེན་བསྐྱེད་བྱའི་ཕྱིར། །སློབ་དཔོན་དག་
ཀྱང་གཟུང་བར་བགྱི། །དམ་པར་བྱས་ལ་ཉིན་བཞིན་དུ། །སྦྱིན་པ་རྣམ་བཞི་རབ་ཏུ་སྦྱིན། །རིན་ཆེན་རིགས་ཆེན་ལ་སྦྱོར་བའི། །དམ་ཚིག་དག་ཀྱང་ཡིད་དུ་འོང་། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་རབ་ཏུ་གཟུང་། །པདྨའི་རིགས་མཆོག་དག་པ་ལ། །བྱང་ཆུབ་ཆེན་པོ་ལས་བྱུང་བ། །
སྡོམ་པ་ཐམས་ཅད་ལྡན་པར་ནི། །དེ་ཉིད་ཀྱིས་ནི་རབ་ཏུ་གཟུང་། །ལས་ནི་ཆེན་པོ་རིགས་འབྱུང་ཕྱིར། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །སེམས་ཅན་ཀུན་གྱི་དོན་གྱི་རྒྱུས། །སྡོམ་པ་ཐམས་ཅད་གཟུང་བར་བགྱི། །
མ་བསྒྲལ་བ་ནི་བསྒྲལ་བྱ་ཞིང་། །མ་གྲོལ་བ་དག་རྣམ་གྲོལ་བགྱི། །དབུགས་མ་ཕྱིན་པ་དབུགས་ཕྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་ལན་གཉིས་ལན་གསུམ་མོ། །འབྱོར་པ་མ་ཡིན་པ་ལ་ནི། །སྡིག་པ་ཐམས་ཅད་སོ་སོར་བཤགས། །དཀོན་མཆོག་གསུམ་ལ་
སྐྱབས་སུ་མཆི། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་བྱ་བ་འདིས་གསུམ་ལ་སྐྱབས་སུ་འགྲོ་བ་ལ་སོགས་པ་སྦྱིན་ནོ། །དེ་ནས་སློབ་དཔོན་གྱིས་སློབ་མ་རྣམས་ཀྱི་སྙིང་ག་དང་སྤྱི་གཙུག་དང་མགྲིན་པ་རྣམས་སུ་བདག་མེད་མ་དང་མཁའ་སྤྱོད་མ་
དང་ས་སྤྱོད་མ་རྣམས་བསྒོམ་ཞིང་ལག་པ་གཡས་པས་རྡོ་རྗེའི་རྩེ་མོ་ནས་བཟུང་ལ་ཡི་གེ་གསུམ་པའི་སྔགས་བརྗོད་ཅིང་སྙིང་ག་ལ་སོགས་པར་རེག་པར་བྱའོ། །སྤྱི་བོར་ནི་མེ་ཏོག་གཞག་ཅིང་སྤོས་དང་མར་མེ་ཡང་མདུན་དུ་སྟེ། དྲི་ནི་སྙིང་གར་སྦྱིན་པར་བྱའོ། །དེ་ནས་པ་ཊོ་དང་ཨུ་དུམྺར་
དང་ཨ་ཤྭཏྠ་ལ་སོགས་པ་འོ་མ་ཅན་གྱི་ཤིང་ལས་སྐྱེས་པ་སོར་བཅུ་གཉིས་པ་སྲིན་གྱིས་མ་ཟོས་ཤིང་མ་ཚིག་པ། འགྱེལ་བ་མ་ཡིན་པ། རྨ་མེད་པ་མི་ཡོ་བ་ལ་དྲི་ཆུས་བསྐུས་ཏེ། རྩེ་མོར་མེ་ཏོག་གི་ཕྲེང་བ་བཅིངས་ལ། ཨོཾ་ཨ་ཛི་ཧྭཱ་སྃ་བརྟ་ནི་ཧཱུྃ་ཕཊ་ཅེས་བྱ་བས་སོ། །ཤིང་ལ་ལ་ནི་

བདུན་ཡོངས་སུ་བཟླས་ནས་དེ་ལ་སྦྱིན་པར་བྱའོ། །དེ་ནས་སློབ་མས་ཤར་རམ་བྱང་དུ་བལྟས་ལ། བ་གླང་གི་པགས་པ་ཙམ་གྱི་སའི་ཆ་ལྕི་བས་ཉེ་བར་བྱུགས་ལ་བླ་མའི་བཀས་རྩེ་མོ་ནས་ཟོས་ཏེ་སོ་ཤིང་དོར་བར་བྱའོ། །སོ་ཤིང་ཇི་ལྟར་བོར་ཏེ་ལྷུང་བ་དེ་ཁ་ཚུར་ཕྱོགས་པ་
དེ་དེ་ལྟ་ན་ནི། དེ་ནི་དངོས་གྲུབ་མཆོག་ཏུ་ཤེས། །གང་ཞིག་སྨྲ་བ་མཁས་པར་འགྱུར། །ཤར་དུ་དེ་བཞིན་དངོས་གྲུབ་ནི། །འབྲིང་པོ་རུ་ནི་རབ་ཏུ་གྲགས། །བྱང་དུ་དེ་བཞིན་དངོས་གྲུབ་ནི། །འཇིག་རྟེན་པ་དང་དུད་འགྲོ་ཡིན། །སོ་ཤིང་བོར་བར་གྱུར་པ་ན། །གལ་ཏེ་ཐུར་དུ་ཁ་བལྟས་ན། །དེ་
ནི་སྟེང་འོག་དངོས་གྲུབ་སྟེ། །ཕྱི་རོལ་ལྷུང་ན་དངོས་གྲུབ་མེད། །དེ་ནས་ཨོཾ་ཧྲཱི་བི་ཤུདྡྷ་སརྦ་དྷརྨཱཿཔཱ་པཾ་ནི་ཙ་སྱ། སཾ་ཤོ་དྷ་ཡ་སརྦ་བི་ཀལྤཱཾ་ཨ་པ་ན་ཡ་ཧཱུྃ་ཞེས་བྱ་བའི་སྔགས་འདིས་མངོན་པར་བསྔགས་པའི་ཆུ་ཁྱོར་བ་གསུམ་བླུད་པར་བྱའོ། །དེ་ནས་ལས་ཐམས་ཅད་པའི་སྔགས་ཀྱིས་བཟླས་པའི་
སྐུད་པ་གསུམ་བསྒྲིལ་ལ་མདུད་པ་གསུམ་དོར་བས་སློབ་མ་རྣམས་བསྲུང་བའི་དོན་དུ་ལག་པ་གཡས་པ་ལ་བཅིང་བར་བྱའོ། །དེའི་རྗེས་ལ་ལས་ཐམས་ཅད་པའི་སྔགས་ཀྱིས་བཟླས་པའི། ཀུ་ཤ་གཅིག་སྔས་ཀྱི་དོན་དུ་སྦྱིན་པར་བྱ་ཞིང་། དེ་བཞིན་དུ་གཞན་ཡང་ཀུ་ཤ་མང་པོ་སྟན་གྱི་
དོན་དུ་སྦྱིན་པར་བྱའོ། །དེ་ནས་ཆོས་བཤད་ལ་ཉན་དུ་གཞུག་གོ། །ཀུན་མཁྱེན་འཇིག་རྟེན་འབྱུང་བ་ནི། །བརྒྱ་ལམ་དག་ན་འབྱུང་འགྱུར་ཏེ། །ཨུ་དུམྺཱ་རའི་མེ་ཏོག་བཞིན། །བརྒྱ་ལམ་དག་ན་འབྱུང་བར་འགྱུར། །སྔགས་ནི་ཐེག་པར་སྦྱོང་བ་ནི། །དེ་བས་ཀྱང་ནི་འབྱུང་བར་དཀོན། །གང་
གིས་སེམས་ཅན་མཚུངས་མེད་དོན། །མི་ལྡོག་ནུས་པར་སྤྱད་པར་གྱིས། །བསྐལ་པ་བྱེ་བ་དུ་མ་རུ། །གང་གིས་སྔོན་གྱི་སྡིག་བྱས་པ། །དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད་ཟད་པར་འགྱུར། །གསང་སྔགས་ཐེག་པ་གནས་ནས་ནི། །སྐྱོབ་པའི་སྔགས་ནི་
བཟླས་པ་ཡིས། །གོ་འཕང་བླ་ན་མེད་འགྱུར་ཞིང་། །དཔག་མེད་གྲགས་པ་སྨོས་ཅི་དགོས། །སྡུག་བསྔལ་ཐམས་ཅད་འབྱུང་བ་ཡི། །དེ་རྣམས་ཀྱིས་ནི་ངན་འགྲོ་གཅོད། །གང་ཞིག་སྤྱོད་མཆོག་འདི་ཡིས་ནི། །བློ་ནི་ཤིན་ཏུ་དྲི་མ་མེད། །དེ་ནས་བདག་ཉིད་ཆེ་ཁྱོད་ཀྱིས། །མཚུངས་པ་

མེད་པའི་རྙེད་པ་རྙེད། །རྒྱལ་བ་སྲས་བཅས་ཐམས་ཅད་ཀྱིས། །གང་ཞིག་ཁྱེད་རྣམས་བསྟན་པ་འདིར། །ཐམས་ཅད་ཡོངས་སུ་གཟུང་གནས་པས། །བདག་ཉིད་ཆེན་པོ་རྣམས་སུ་སྐྱེ། །དེ་བས་ཁྱེད་རྣམས་ཐེག་ཆེན་ལ། །ལེགས་པ་ཉིད་དུ་སྐྱེ་བར་འགྱུར། །དཔལ་ལྡན་ལམ་མཆོག་འདི་
ཡིས་ནི། །ཐེག་པ་མཆོག་ཏུ་འབྱུང་བར་བྱེད། །གང་ཞིག་ཁྱེད་རྣམས་བགྲོད་འགྱུར་བ། །དེ་བཞིན་གཤེགས་པ་ཉིད་འགྱུར་ཏེ། །ཡོད་དང་མེད་ལས་འདས་པས་ན། །ནམ་མཁའ་ལྟ་བུའི་དྲི་མ་བྲལ། །ཟབ་ཅིང་རྟོག་གེ་བ་རྣམས་ཀྱིས། །བརྟག་པར་མི་ནུས་གནས་དང་བྲལ། །སྤྲོས་
པ་རྣམས་དང་བྲལ་བ་དེ། །སྤྲོས་པ་རྣམས་ཀྱིས་རྣམ་པར་སྤྲོས། །ཐེག་ཆེན་གཞུང་ལ་གནས་པ་ཡིས། །འདི་འདྲ་བ་ཡིས་ཆོས་ཐོབ་འགྱུར། །ཞེས་པས་སོ། །དེ་ནས་དགེ་བའི་བསམ་པས་ལངས་སུ་བཅུག་ལ་དེས་རང་གི་གནས་སུ་དཀྱིལ་འཁོར་བྲི་བར་བྱ་ཡིས་རྨི་ལམ་དུ་ཇི་ལྟར་མཐོང་བ་
བརྗོད་པར་རིགས་སོ་ཞེས་བརྗོད་ལ་ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་བྱ་བའི་ལས་ཐམས་ཅད་པའི་སྔགས་འདིས་མངོན་པར་བསྲུངས་ལ་དེ་ལ་ཉལ་དུ་གཞུག་གོ། །སློབ་མ་ལྷག་པར་གནས་པའོ། །དེ་ནས་རྡོ་རྗེ་སློབ་དཔོན་གྱིས་ཐམས་ཅད་རྫོགས་ནས་ལས་ཐམས་ཅད་པའི་
སྔགས་སམ། རྩ་བའི་སྔགས་ཇི་སྲིད་འདོད་པའི་བར་དུ་བཟླས་ལ་སེང་གེའི་ཉལ་ཐབས་སུ་བྱས་ཏེ། ཉལ་བར་བྱའོ། །དེ་ནས་ཐོ་རངས་དེའི་མཚན་མ་མཐོང་བའི་རྨི་ལམ་དྲི་བར་བྱའོ། །དགེ་བ་འམ་མི་དགེ་བ་ཐོས་ནས་ཚམ་ཚོམ་མེད་པར་སྨྲ། རྨི་ལམ་སངས་རྒྱས་མཐོང་བ་དང་། །སྐུ་
གཟུགས་མཆོད་རྟེན་མཐོང་བ་དང་། ཆོས་ཉན་པ་དང་དེ་ཡི་གྲོགས། །དགེ་སློང་དགེ་འདུན་མཐོང་བ་དང་། །ལྷ་ཁང་སངས་རྒྱས་སྲས་དང་དགེ་སློང་མ། །རི་བོ་སྐྱེད་མོས་ཚལ་ལ་འཛིན་དང་རྟེན། །འབབ་ཆུ་ལྟེང་ཀ་ཞོ་ཡི་ཚོགས་རྣམས་དང་། །རི་དགས་རྒྱལ་དང་ཨེ་ན་ཡ་རྣམས་
བསྔགས། །འཁོར་ལོ་ཡིས་མཚན་ཁྱད་འཕགས་བྱ་རྣམས་དང་། །རྨི་ལམ་རྟག་ཏུ་བསམ་གཏན་འཇུག་མཐོང་དང་། །ཆུ་དང་རི་བོ་བཟང་ལ་གནས་པ་དང་། །ཁྱད་འཕགས་ནམ་མཁའ་ལ་གནས་འཕགས་བསམ་ཞིང་། །དགེ་བསྙེན་རྣམས་དང་རྒྱལ་པོ་བརྩོན་ལྡན་དང་། །སྔགས་

པ་དབང་ཕྱུག་ན་ཆུང་བཟང་མོ་དང་། །ཕ་མ་བླ་མ་མཐོ་རིས་སོང་བ་དང་། །ལྷ་མོ་མཆོག་དང་གསང་བ་དམ་པ་དང་། །སྒྲུབ་མཆོག་ཡོན་ཏན་ལྡན་དང་བྲམ་ཟེ་དང་། །རྒྱལ་བའི་དཀྱིལ་འཁོར་འདུས་པ་ཆེན་པོ་དང་། །གོས་ཀྱིས་བརྒྱན་དང་མེ་ཏོག་རྒྱས་པ་དང་། །སྦྱིན་སྲེག་
བྱེད་དང་འབྲས་བུ་མེ་ཏོག་དང་། །རྒྱལ་པོར་དབང་བསྐུར་རྒྱལ་སྲིད་ཐོབ་པ་དང་། །གཡུལ་ལས་རྒྱལ་དང་བདག་ཉིད་རྐུན་པོ་བསད། །རྒྱ་མཚོར་བྱིང་ལས་ཐར་བར་གྱུར་པ་དང་། །ངམ་གྲོག་བགྲོད་པར་དཀའ་ལས་ཐར་པའོ། །དེ་དག་ལ་སོགས་པའི་རྨི་ལམ་གྱི་མཚན་མ་དགེ་བ་
དང་། དེ་ལས་མི་མཐུན་པ་ནི་མི་དགེ་བ་ཞེས་བརྗོད་དོ། །དགེ་བ་ལས་ནི་དངོས་གྲུབ་དང་མི་དགེ་བ་ལས་ནི་དངོས་གྲུབ་མ་ཡིན་པར་སྔགས་པས་ཤེས་ནས་གང་མི་དགེ་བ་མཐོང་བ་དེ་ལྟ་ན་ནི་བགེགས་མཐར་བྱེད་ཀྱི་སྔགས་བཟླ་བར་བྱ་ཞིང་། ཆོས་ཐམས་ཅད་ནི་རྨི་ལམ་ལྟ་བུ་དང་རྨི་ལམ་ལྟ་
བུས་ཐོབ་པར་ཉེ་བར་བཟུང་ནས་དེ་ལ་མོས་ཤིང་དངོས་གྲུབ་ཀྱི་ཕྱིར་རྨི་ལམ་ངན་པ་ཉེ་བར་ཞི་བར་བསྒོམ་མོ། །དེ་ནས་རྣལ་འབྱོར་པས་ཀྱེ་རྡོ་རྗེའི་ཏིང་ངེ་འཛིན་གསུམ་བྱ་སྟེ། ལྷག་པར་གནས་གཞུག་པའི་ཆེད་དང་། ལྷའི་དཀྱིལ་འཁོར་གཤེགས་སུ་གསོལ་བའི་དོན་དུ་ནམ་མཁའ་ལ་དགོང་པར་བྱས་ལ། དུར་ཁྲོད་ནས་རྙེད་
པའམ་དམ་ཚིག་དང་ལྡན་པས་བཀལ་བའི་སར་པ་ལ་དཀར་པོ་དང་སེར་པོ་དང་དམར་པོ་དང་ལྗང་གུ་དང་ནག་པོ་དང་དྲི་དང་ཁ་དོག་བཟང་བ་སྒྲུབ་པའི་ཕྱེ་མས་བསྲེས་པས་སོ་སོར་བཙོས་པ་ལ། བྷྲཱུྃ་ཨཱྃ་ཛཱྀྃ་ཁྃ་ཧཱུྃ། ཡི་གེ་ལས་གྲུབ་པ་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་།
འོད་དཔག་མེད་དང་། དོན་ཡོད་གྲུབ་པ་དང་། མི་བསྐྱོད་པའི་རང་བཞིན་དང་། མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་ནན་ཏན་དང་། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ཡེ་ཤེས་ཀྱི་བདག་ཉིད་ལ་མེ་ལོང་ལ་སོགས་པ་ཡང་སོ་སོའི་ཡེ་ཤེས་བཞིའི་རྗེས་སུ་
འབྲངས་པས་ཉི་ཤུ་རྩ་ལྔས་ཕྱེ་བའི་ཐིག་སྐུད་རིམ་བཞིན་དུ་ལག་པར་གཞག་ལ་བསྒྲིལ་བར་བྱ་ཏེ། དེ་ནས་རང་གི་ཕྱོགས་ན་རྣམ་པར་གནས་པའི་དེ་བཞིན་གཤེགས་པ་ཐམས་ཅད་འདུས་པར་གྱུར་པ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔར་བལྟས་ལ། དེ་རྣམས་

ཀྱི་ཐུགས་ཀར་ཡང་ཡི་གེ་བྷྲཱུཾ་ལ་སོགས་པའི་ས་བོན་ལས་གྲུབ་པའི་ཡེ་ཤེས་ཀྱི་ཐིག་སྐུད་འོད་ཟེར་གྱི་རང་བཞིན་བལྟས་ལ། ཨོཾ་ཨ་ཤྭ་ཤྭ་ཏ་བཛྲ། སཱུ་ཏྲ་མེ་པྲ་ཡཙྪ་མ་ཧཱ་མཎྜ་ལ་སཱུ་ཏྲ་ཡ་ན་ཧཱུྃ་ཞེས་བྱ་བ་འདིས་རྣམ་པར་སྣང་མཛད་ལ་གསོལ་བ་གདབ་པར་བྱའོ། །དེ་བཞིན་དུ་མཚན་སྤོས་ལ་རིན་
ཆེན་འབྱུང་ལྡན་ལ་སོགས་པ་ལ་གསོལ་བ་གདབ་པར་བྱའོ། །དེ་ནས་ཀྱེ་རྡོ་རྗེའི་རྣལ་འབྱོར་གྱིས་དེ་ལྟར་གནས་པར་བྱས་ནས། སློབ་དཔོན་གྱིས་མིག་གཉིས་ལ་ཛ་ཡིག་ལས་ཉི་ཟླ་བསྒོམ་པར་བྱ་སྟེ། རབ་ཏུ་འབར་ཞིང་བསྐྱོད་པའི་མིག་ལ་མིག་གི་རྫི་མ་འབར་པའི་ལྟ་སྟངས་ཀྱིས་ལྕགས་
ཀྱུས་བཀུག་ཅིང་སྤྱན་དྲངས་པའི་ཡེ་ཤེས་ཀྱི་ཐིག་བཅོམ་ལྡན་འདས་ཀྱིས་བསྐུལ་ཞིང་བཏང་བར་མོས་ཏེ། ཐིག་སྐུད་ལག་ཏུ་བཞག་ལ་རང་རང་གི་ཁ་དོག་གི་ནང་དུ་རྣམ་པར་བཅུག་སྟེ། གྷསྨ་རཱིའི་རྣལ་འབྱོར་དང་ལྡན་པའི་སློབ་མ་དང་སྟབས་གཅིག་ཏུ་ཐིག་འཛིན་པས་ཕན་ཚུན་གནས་ཏེ།
ཆོས་ཐམས་ཅད་ནི་ཕན་ཚུན་གནས་པ། ཆོས་ཐམས་ཅད་ནི་གཅིག་ནས་གཅིག་ཏུ་གནས་པ། ཆོས་ཐམས་ཅད་ནི་ཤིན་ཏུ་རབ་ཏུ་གནས་པ་སྟེ། ཧཱུྃ་ཞེས་བྱ་བ་འདི་བརྗོད་ཅིང་ཐིག་སྐུད་བསྒྲིལ་བར་བྱའོ། །དེ་ནས་ཡང་ཇི་ལྟར་བསྒྲིལ་བར་བྱས་ཤིང་གཅིག་ཏུ་གྱུར་པའི་ཐིག་སྐུད་ཁྲུ་རུ་ནི་
དཀྱིལ་འཁོར་གྱི་ཉིས་འགྱུར་དུ་འགྱུར་ལ། ཕྲ་སྦོམ་ནི་སྒོའི་ཉི་ཤུ་ཆའོ། །དེ་ནས་སྔགས་པས་དྲིའི་ཆུས་བསྲེས་པའི་བདུད་རྩི་རྣམ་པ་ལྔས་གཤེར་བར་བྱས་ལ། དེའི་སྙིང་པོར་ཡི་གེ་གསུམ་ཆུད་པར་བྱས་ཏེ་དྲིས་ཉེ་བར་བྱུགས་པའི་གསེར་ལ་སོགས་པའི་སྣོད་དུ་གཞག་ཅིང་མཆོད་པ་རྣམ་པ་
ལྔས་མཆོད་ལ་ལག་ཏུ་གཞག་སྟེ་ཡི་གེ་ཧཱུྃ་གི་བཟླས་པས་ཡོངས་སུ་བསྲུང་བར་བྱའོ། །དེ་ནས་ཡང་སྔགས་པས་དཀྱིལ་འཁོར་གྱི་ས་ལ་དྲིས་ཉེ་བར་བྱུགས་ཤིང་མེ་ཏོག་བཀྲམ་ལ། ནམ་མཁའི་དཀྱིལ་ན་བཞུགས་པའི་ཀྱེའི་རྡོ་རྗེའི་དཀྱིལ་འཁོར་མངོན་པར་དམིགས་ལ། བསང་གཏོར་
ལ་སོགས་པ་ཕུལ་ལ་མཆོད་པ་དབུལ་བར་བྱ་སྟེ། དེ་ནས་རྣལ་འབྱོར་བ་བདག་ཉིད་ཀྱེ་རྡོ་རྗེའི་རྣལ་འབྱོར་དང་ལྡན་པས་བྱང་ཕྱོགས་སུ་སྒྲུབ་པ་པོ་གྷསྨ་རཱིའི་གཟུགས་སུ་དམིགས་ལ་མིག་གཡས་གཡོན་དག་ལ་ཡི་གེ་ཛ་ལས་སྐྱེས་པའི་འོད་ཟེར་སེར་པོ་དང་ལྡན་པའི་ཉི་ཟླ་རྣམ་པར་བསམ་

པར་བྱའོ། །དེ་ནས་སྔགས་པ་ནུབ་ཀྱི་ཕྱོགས་སུ་གནས་ཏེ་ཁ་ཤར་དུ་བལྟས་ཏེ། ཁུ་ཚུར་གཡོན་པས་ཐིག་སྐུད་དེ་ལྟེ་བའི་ཐད་ཀར་གཟུང་བར་བྱ་སྟེ། བྱང་ཕྱོགས་ཀྱི་སྒྲུབ་པ་པོས་ཀྱང་དེར་གཟུང་བར་བྱས་ལ་ཛཿཛཿཛཿཞེས་བྱ་བའི་ཛཿཡིག་གསུམ་གྱིས་བསྐུལ་ལ།
བྱང་ཕྱོགས་ཀྱི་སྒྲུབ་པ་པོས་ཀྱང་ཛཿཛཿཛཿཞེས་བྱ་བའི་ཛ་ཡིག་གསུམ་གྱིས་དེ་དགུག་པར་བྱའོ། །དེ་བཞིན་དུ་ཤར་ཕྱོགས་སུ་མངོན་པར་འདུག་ལ་ཁ་ནུབ་ཕྱོགས་སུ་བལྟས་ཏེ་ལྷན་ཅིག་པས། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུྃ་ཞེས་བརྗོད་ལ་རྡོ་རྗེ་དང་བཅས་པའི་ལག་པ་གཡས་པའི་
མཐེབ་མཛུབ་ཀྱིས་ཐིག་བླངས་ལ་སེ་གོལ་གྱི་སྒྲ་བྱ་ཞིང་། ལྟེ་བའི་ཐད་ཀའི་ཕྱོགས་དང་མཉམ་པར་བར་སྣང་ལ་ཕྱོགས་ཐམས་ཅད་མཉམ་པས་ཚངས་ཐིག་གདབ་པར་བྱ་སྟེ། དེ་བཞིན་དུ་འོག་གི་ཐིག་གདབ་པར་བྱའོ། །དེ་ནས་ཡང་། འདིར་ནི་སེམས་ཅན་འགྲོ་དོན་དུ། །ཁྱེད་
རྣམས་ཀྱི་ནི་དུས་ལ་བབ། །ཅེས་བྱ་བའི་ཐིག་གི་སྒྲས་ནམ་མཁའི་ཁམས་ཐམས་ཅད་ན་རྣམ་པར་བཞུགས་པའི་དེ་བཞིན་གཤེགས་པ་ཐམས་ཅད་བསྐུལ་བར་བྱའོ། །དེ་ནས་བསྐོར་བའི་འགྲོས་ཀྱིས་ལྷོ་ཕྱོགས་ནས་འདུག་ལ། བྱང་ཕྱོགས་སུ་ཁ་ཕྱོགས་པ་དང་། སློབ་མ་ནི་
བྱང་ཕྱོགས་འདུག་ལ་ཁ་ལྷོ་རུ་ཕྱོགས་པ་དང་། ལྷན་ཅིག་པས་དེ་བཞིན་དུ་ཚངས་ཐིག་གདབ་པར་བྱ་ཞིང་དེ་བཞིན་དུ་འོག་ཏུ་ཡང་ཐིག་གདབ་པར་བྱའོ། །དེ་ནས་མེའི་མཚམས་ན་འདུག་སྟེ་ཁ་བྱང་དུ་ཕྱོགས་པ་དང་། དབང་ལྡན་གྱི་མཚམས་སུ་འདུག་སྟེ་ཁ་ལྷོར་ཕྱོགས་པ་དང་
ལྷན་ཅིག་པས་ཤར་གྱི་ཆའི་ཐིག་གདབ་པར་བྱའོ། །དེ་ནས་རླུང་གི་ཕྱོགས་སུ་འདུག་སྟེ་ཁ་ལྷོར་ཕྱོགས་པ་དང་། བདེན་བྲལ་མཚམས་སུ་འདུག་སྟེ་ཁ་བྱང་དུ་ཕྱོགས་པ་དང་། ལྷན་ཅིག་པས་ནུབ་ཀྱི་ཆའི་ཐིག་གདབ་པར་བྱའོ། །ཡང་བསྐོར་བའི་འགྲོས་ཀྱིས་རླུང་གི་མཚམས་སུ་
འདུག་ལ་ཁ་ཤར་དུ་ཕྱོགས་པ་དང་དབང་ལྡན་གྱི་མཚམས་སུ་འདུག་སྟེ་ཁ་ནུབ་ཏུ་ཕྱོགས་པ་དང་ལྷན་ཅིག་པས་བྱང་ཕྱོགས་ཀྱི་ཆའི་ཐིག་གདབ་པར་བྱའོ། །དེ་ནས་མེའི་མཚམས་སུ་འདུག་སྟེ་ཁ་ནུབ་ཏུ་ཕྱོགས་པ་དང་། བདེན་བྲལ་གྱི་མཚམས་སུ་འདུག་སྟེ་ཁ་ཤར་དུ་ཕྱོགས་པ་དང་ལྷན་ཅིག་པས་ལྷོ་ཕྱོགས་ཀྱི་ཆའི་

ཐིག་གདབ་པར་བྱའོ། །ཡང་དེ་ཁོ་ན་བཞིན་དུ་འདུག་ལ་རླུང་གི་མཚམས་སུ་འདུག་པས་མཚམས་ཀྱི་ཐིག་གདབ་པར་བྱའོ། །དེ་ནས་བདེན་བྲལ་གྱི་མཚམས་སུ་འདུག་པ་དང་དབང་ལྡན་གྱི་མཚམས་སུ་འདུག་པ་དང་ལྷན་ཅིག་པས་མཚམས་ཀྱི་ཐིག་གདབ་པར་བྱའོ། །དེ་ནས་
ཕྱོགས་བཞིའི་དབུས་མ་ཚངས་ཐིག་གི་གཞོགས་གཉིས་སུ་འཁོར་ལོ་གྲུ་བཞི་པ་ཆ་བརྒྱད་ཀྱི་ཚད་སྒོའི་སའི་ཆའི་ཐིག་གདབ་པར་བྱའོ། །དེ་ནས་རྩ་བའི་ཐིག་གྲུ་བཞི་པའི་ཕྱི་རོལ་དུ་སྒོའི་བཞི་ཆའི་ཚད་ཀྱི་རྡུལ་ཚོན་གྱི་ཐིག་གདབ་པར་བྱའོ། །དེའི་ཕྱི་རོལ་དུ་སྒོའི་ཕྱེད་ཀྱི་ཚད་བི་དྷི་
ཀའི་སའོ། །དེ་ནས་རྡུལ་ཚོན་གྱི་ཐིག་གོ། །དེ་ནས་བི་དྷི་ཀའི་ཚད་ཀྱིས་དྲ་བ་དང་དྲ་བ་ཕྱེད་པ་ཉི་ཟླའི་སྣམ་བུའི་ཐིག་གོ། །དེ་ནས་རྡུལ་ཚོན་གྱི་སའི་ཐིག་གདབ་པར་བྱའོ། །དེ་ནས་སྒོ་བཞི་རྣམས་ཀྱི་གཞོགས་གཉིས་སུ་སོ་སོར་རྡུལ་ཚོན་གྱི་སའི་ཐིག་རྣམ་གསུམ་གདབ་པར་
བྱ་ཞིང་། སྒོའི་ཚད་ལྷའི་སྣམ་བུའི་སའི་ཐིག་གདབ་པར་བྱའོ། །དེ་ནས་སྒོའི་གཞོགས་གཉིས་སུ་རྡུལ་ཚོན་གྱི་སའི་ཚད་ཀྱི་ཆ་དོར་ལ་རྡུལ་ཚོན་གྱི་སའི་ཚད་དུ་རྟ་བབས་དང་ཀ་བའི་ཐིག་གདབ་པར་བྱའོ། །དེ་ལྟར་ཁྲུན་དུ་ནི་སྒོའི་སུམ་འགྱུར་ཏེ་རྟ་བབས་ཀྱི་སྟེང་དུ་ནི་ཇི་ལྟར་
མཛེས་པར་བྲིའོ། །དེ་ནས་ཐིག་སྐུད་དེ་ཉིད་ཉིས་ལྡབ་ཏུ་བྱས་ལ་དཀྱིལ་འཁོར་གྱི་དབུས་སུ་འདུག་སྟེ། དཀྱིལ་འཁོར་ལ་གདབ་པའི་སེང་ལྡེང་གི་ཕུར་པ་ཡོངས་སུ་བཟུང་སྟེ། བརྟན་པར་གདབ་པ་དེ་ལ་ཐིག་སྐུད་བཏགས་ཤིང་། དེའི་བྱང་ཕྱོགས་ཀྱི་སྒྲུབ་པ་པོ་དང་ལྷན་ཅིག་དབང་ལྡན་གྱི་
ཕྱོགས་ནས་བརྩམས་ནས་བསྐོར་བའི་འགྲོས་ཀྱིས་དཀྱིལ་འཁོར་གྱི་ཕྱི་རོལ་ནས་ཕྱི་རོལ་ཟླུམ་པོའི་རྣམ་པ་རྡོ་རྗེའི་ཐིག་གཉིས་གདབ་པར་བྱའོ། །ཡང་ཐིག་སྐུད་དེ་ཉིད་ཉིས་ལྡབ་དུ་བྱས་ཏེ་རང་གིས་དབང་ལྡན་གྱི་ཕྱོགས་ནས་བརྩམས་ནས་བསྐོར་བའི་འགྲོས་ཀྱིས་དཀྱིལ་འཁོར་གྱི་ནང་དུ་
ཟླུམ་པོའི་རྣམ་པ་རྡོ་རྗེའི་ཐིག་གཉིས་དེ་བཞིན་དུ་གདབ་པར་བྱའོ། །དེ་ནས་ཁོར་ཡུག་ཅེས་བྱ་བ་འོད་ཀྱི་དཀྱིལ་འཁོར་གྱི་ཐིག་གཉིས་བསྐོར་བའི་འགྲོས་ཀྱིས་ཕྱོགས་རྣམས་མཉམ་པར་འབྱུང་བར་གདབ་པར་བྱའོ། །བདག་མེད་མའི་དཀྱིལ་འཁོར་ལ་ནི་དཀྱིལ་འཁོར་བརྒྱད་དང་

མཚུངས་པར་ཀ་བ་བརྒྱད་ཀྱི་ཐིག་ལ་དེ་བཞིན་དུ་མཉམ་པའི་ཆར་གདབ་པར་བྱའོ། །ཤར་ཕྱོགས་ཀྱི་ཆའི་འཁོར་ལོའི་ཀ་བ་གདབ་པ་ལ་ནི་ལྷོ་ཕྱོགས་ཀྱི་ཆ་རུ་འདུག་ཅིང་བྱང་དུ་ཁ་ཕྱོགས་པས་གདབ་པར་བྱའོ། །ནུབ་ཕྱོགས་ཀྱི་ཆའི་པདྨའི་ཀ་བའི་ཐིག་ནི་བྱང་ཕྱོགས་ཀྱི་ཆ་
རུ་འདུག་ལ་ཁ་ལྷོར་ཕྱོགས་ཏེའོ། །བྱང་ཕྱོགས་ཀྱི་ཆའི་རལ་གྲིའི་ཀ་བའི་ཐིག་ནི་ནུབ་ཕྱོགས་ཀྱི་ཆར་འདུག་ཅིང་ཁ་ཤར་དུ་ཕྱོགས་པས་སོ། །ལྷོ་ཕྱོགས་ཀྱི་ཆའི་རིན་པོ་ཆེའི་ཀ་བའི་ཐིག་གི་ཤར་ཕྱོགས་ཀྱི་ཆར་འདུག་ཅིང་ཁ་ནུབ་ཏུ་ཕྱོགས་པས་གདབ་པར་བྱའོ། །དེ་ལ་གལ་ཏེ་ཐིག་འདེབས་
པ་ལ་སྦྱོར་བའི་བྱང་གི་སྒྲུབ་པ་པོ་མེད་པ་དེ་ལྟ་ན་ནི་གྲོགས་ལས་མ་གཏོགས་པར་ཡང་རང་གི་ཐིག་སྐུད་ཕུར་བུས་བཏབ་ལ་གདབ་པར་བྱའོ། །ཐིག་འདེབས་པའི་དུས་སུ་ཡང་མཚན་མ་བརྟག་པར་བྱ་སྟེ། མཚན་ངན་དངོས་གྲུབ་མིན་པ་སྟེ། །ཐིག་སྐུད་ཆད་ན་བླ་མ་ཉམས། །དམན་དང་
སྟོངས་པས་ནད་ལ་སོགས། །ཕྱོགས་ལ་རྨོངས་ན་སློབ་མ་འཁྲུལ། །མཚན་མ་དེ་ཡང་ཚངས་ཐིག་གཉིས་བཏབ་པ་ལས་སོ་ཞེས་ཁ་ཅིག་སྨྲའོ། །གཞན་དག་ན་རེ་ཚངས་ཐིག་དང་ཕྱོགས་ཐིག་དང་ཟུར་ཐིག་བཏབ་པ་ལས་སོ་ཟེར་རོ། །ལ་ལ་ན་རེ་ཐིག་ཐམས་ཅད་བཏབ་པ་ལས་སོ་ཞེས་གསུང་ངོ་། །དེའི་རྗེས་ལ་རྩ་བའི་ཐིག་རིང་ནས་
བརྩམས་ནས་སྒོ་དཀྱིལ་དུ་ཐིག་བཞི་ཕྱི་བར་བྱའོ། །དེ་ནས་སོ་སོའི་སྒོ་ལོགས་ན་གནས་པའི་དང་པོའི་རྡུལ་ཚོན་གྱི་རེ་ཁཱ་བཞག་ལ། གསུམ་པའོ། །དེ་ནས་ཡ་ཕུབས་ཀྱི་གཞོགས་གཉིས་ན་གནས་པའི་སྒོའི་ཚད་ཀྱི་རེ་ཁཱ་གཉིས་སོ། །དེ་ནས་བི་དྷི་ཀའི་འོག་ན་གནས་པ་མགྲིན་པ་
གཡས་གཡོན་གྱི་ལོགས་ན་གནས་པའི་སོ་སོའི་རེ་ཁཱ་གཉིས་ཕྱི་བར་བྱའོ། །དེ་ནས་སྒོའི་ཕྱེད་ཀྱི་ཚད་ཁ་ཁྱེར་གྱི་འོག་ན་གནས་པ་སོ་སོའི་རེ་ཁཱ་གཉིས་སོ། །དེ་ནས་བི་དྷི་ཀའི་ཚད་ཕྱོགས་ཀྱི་མཁུར་བའི་གཞོགས་ན་གནས་པ་སོ་སོའི་རེ་ཁཱ་གཉིས་དང་ཁ་ཁྱེར་གྱི་སྟེང་ན་ཡང་ལྷག་མ་
རྡུལ་ཚོན་གྱི་ས་ལ་གནས་པའི་རེ་ཁཱ་བདུན་ཕྱེ་བར་བྱའོ། །དེ་ནས་ཡང་དཀྱིལ་འཁོར་གྱི་ཐིག་གིས་བཏབ་ཅིང་ཅི་ལྟ་བའི་དབྱིབས་ཀྱི་ཚད་ཀྱིས་བརྒྱན་པ་དེ་ནི་ཕྱི་དང་ནང་དུ་ཡང་བསྒོམ་པར་བྱ་སྟེ། ཟུར་བཞི་པ་ལ་སྒོ་བཞི་པ། །རྟ་བབས་བཞི་ཡིས་ཉེ་བར་བརྒྱན། །ཐིག་བཞི་དག་དང་མཉམ་

ལྡན་ཞིང་། །དར་དང་མེ་ཏོག་ཕྲེང་གིས་བརྒྱན། །རེ་ཁཱ་ལྔ་དང་མཉམ་ལྡན་པ། །དཀྱིལ་འཁོར་མཆོག་ལ་བ་དན་རྩེར། །དྲིལ་བུ་རྣམས་ཀྱིས་མཉམ་པར་ལྡན། །མཚམས་ཀྱི་ཆ་ནི་ཐམས་ཅད་དེ། །སྒོ་སོགས་ཀྱི་ནི་མཚམས་རྣམས་སུ། །རིན་པོ་ཆེ་ལ་རྡོ་རྗེས་མཚན། །འཕར་མ་
གཅིག་པ་དག་ཏུ་བྱ། །བདག་མེད་མ་ཡིས་ཡང་དེ་བཞིན། །སླར་ཡང་འཁོར་ལོའི་ནང་དུ་ནི། །ཕྱི་ཡི་འཁོར་ལོའི་ཕྱེད་ཀྱི་ནི། །ཀུན་ནས་ཡོངས་སུ་ཟླུམ་པོ་ལ། །འཁོར་ལོའི་ཀ་བ་སོགས་ཀྱིས་བརྒྱན། །རྡོ་རྗེའི་ཕྲེང་བ་སོགས་ཀྱིས་མཛེས། །རྔ་མ་མེ་ལོང་དག་དང་ལྡན། །བླ་རེ་
ཡིས་ནི་རྣམ་པར་བྲེས། །དེ་ལྟར་ཆོས་ཀྱི་དབྱིངས་ཀྱི་བདག་ཉིད་ཀྱི་དཀྱིལ་འཁོར་ཚོན་ཅན་གྱིས་ཐིག་བཏབ་ལ། ཐིག་སྐུད་ཀྱང་ཡི་གེ་གསུམ་པ་མུཿའི་མཐའ་ཅན་གྱིས་གཤེགས་སུ་གསོལ། །སྣོད་གཙང་མར་གཞག་པར་བྱའོ། །དེ་ནས་རྡོ་རྗེ་སློབ་དཔོན་དཀྱིལ་འཁོར་དུ་འཁོད་དེ། ཡི་གེ་
ཧཱི་ཡིས་མིག་གཡས་གཡོན་ལ་ཉི་ཟླ་དག་བསྐྱེད་ལ་ཁྲོ་བོའི་ལྟ་སྟངས་ཀྱིས་ཀུན་ནས་བལྟ་བར་བྱ་ཞིང་ཡིད་ཀྱིས་སྒོ་བཞི་དབྱེ་བར་བྱའོ། །ཐིག་གདབ་པའི་ཆོ་གའོ། །དེ་ནས་རིན་པོ་ཆེའི་རིགས་དང་ལྕགས་སམ་དུང་གི་གནས་སམ། སཱ་ལི་དང་ཁྲེ་འམ་དུར་ཁྲོད་ཀྱི་སོ་ཕག་དང་སོལ་
བ་དང་མི་རུས་སམ། རྐུན་མོའི་ལོ་མའི་རང་བཞིན་དཀར་པོ་དང་སེར་པོ་དང་དམར་པོ་དང་ལྗང་གུ་དང་ནག་པོའི་ཁ་དོག་རྣམས་ལེགས་པར་བཏགས་ལ་སྤོས་ཀྱིས་བདུགས་ཏེ། སྣོད་གཙང་མར་སོ་སོར་བཞག་ལ། །བྷཱུཾ་ཨཱཾ་ཛྲཱྀཾ་ཁཾ་ཧཱུྃ། ཡི་གེ་བསྐྱེད་ལ་རྡུལ་ཚོན་མདུན་དུ་གཞག་སྟེ། སྔོན་
བཞིན་དུ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་རྣམས་ཀྱིས་འབར་བར་བལྟས་ལ་ལྕགས་ཀྱུས་བཀུག་ཅིང་དེ་རྣམས་ཡེ་ཤེས་ཀྱི་རང་བཞིན་དུ་གཅིག་ཏུ་བྱས་ལ། དེ་རྣམས་འབར་བར་བལྟས་ལ་མངོན་པར་བསྔགས་པར་བྱས་ཏེ། ཨོཾ་
བཛྲ་ཙཱི་ཏྲ་ས་མཱ་ཡ་ཧཱུྃ། ཞེས་བྱ་བའི་སྔགས་ཀྱིས་སོ། །དེ་ནས་བཛྲ་བེེ་ག་ཞེས་བརྗོད་ལ་དཀྱིལ་འཁོར་ལ་གནས་པའི་ཡེ་ཤེས་ཀྱི་ཐིག་ཡིད་ཀྱིས་དོར་ལ་དབུས་སུ་གཞུག་སྟེ། དཀྱིལ་འཁོར་གྱི་ལྟེ་བ་ལ་གནས་པའི་ཕུར་པ་ཡི་གེ་ཧཱུྃ་གིས་བཏོན་ལ། རང་གི་ལག་ན་གནས་པའི་

རྡོ་རྗེའི་སྙིང་པོ་ལ་བསྒོམ་པར་བྱ་ཞིང་ཕུར་བུ་བཏོན་པའི་ཤུལ་དུ་ཚོན་སྣ་ལྔས་མཉམ་པར་བཀང་ལ། དྲིལ་བུའི་སྒྲ་དང་རྡོ་རྗེའི་གླུ་རྣམས་ཀྱིས་མཚན་མ་ངན་པ་སྤང་པའི་ཕྱིར། ཆོས་དབྱིངས་འདི་ནི་རྣམ་པར་དག །སེམས་ཅན་ཁམས་ནི་སྒྲོལ་བ་པོ། །ཀྱེ་
རྡོར་ཞེས་བྱ་རྒྱལ་པོ་ཆེ། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་པར་གྲོལ། །ཞེས། ང་རྒྱལ་བསྐྱེད་ལ་ཐབས་དང་ཤེས་རབ་ཀྱི་བདག་ཉིད་ཀྱི་རྣལ་འབྱོར་པས་ཁུ་ཚུར་གཡོན་པས་སོ་སོར་བླངས་ཏེ་དབང་ལྡན་གྱི་ཕྱོགས་ནས་བརྩམས་ལ། དཀར་
པོ་དང་། སེར་པོ་དང་དམར་པོ་དང་། ལྗང་གུ་དང་། ནག་པོའི་ཁ་དོག་རྣམས་ཕྱི་རོལ་ནས་བརྩམས་ཏེ་བསྐོར་ཞིང་བྲི་བར་བྱའོ། །ཡང་གསུངས་པ། དཀར་པོས་རྡོ་རྗེའི་རང་བཞིན་བསྡུས། །གཞན་ནི་གསེར་གྱིས་སྤྲས་པ་སྟེ། །པདྨ་རཱ་གའི་རང་བཞིན་བསྡུས། །མརྒཏ་ལྟ་བུ་
དེ་བཞིན་ཏེ། །ནང་དུ་ནག་པོ་ཤེས་པར་བྱ། །འདི་ནི་ཚོན་རྩིའི་རིམ་པར་ལྡན། །ཞེས་སོ། །དེ་བཞིན་དུ་ཡང་། ཇི་ལྟར་རེ་ཁཱ་འབབ་པ་ནི། །མཉམ་ལ་མ་ཡོ་མ་ཆད་ཅིང་། །སྒོ་ཡི་ཉི་ཤུའི་ཆ་ཡིས་ནི། །མཚམས་ནི་ནས་ཀྱི་ཚད་དུ་འགྱུར། །དེ་ནས་ཡང་སྔགས་པ་མཉམ་པར་
གཞག་པས་མཚན་མ་ཉེ་བར་བརྟག་པར་བྱ་སྟེ། སྦོམ་པར་ལྷུང་བས་རིམས་སུ་འགྱུར། །དམན་པ་ཡིས་ནི་ནོར་ཉམས་ཤིང་། །ཡོ་བ་གནམ་ཐིག་ཆད་པས་ནི། །བླ་མ་སློབ་མ་འཆི་བར་འགྱུར། །རྡུལ་ཚོན་བསྐོར་བ་མ་ཡིན་པས། །ཕབ་ན་ཡང་དག་འདེབས་པར་འགྱུར། །
དེ་ལས་གཞན་འགྱུར་དགེ་བ་སྟེ། །བླ་མ་སློབ་མ་ཤིན་ཏུ་འཕགས། །དེ་ནས་དབུས་ཀྱི་དཀྱིལ་འཁོར་གྱི་ཐིག་ལ་ཐུག་པར་ཤར་གྱི་སའི་ཆ་ནི་དཀར་པོའོ། །ལྷོའི་སའི་ཆ་ནི་སེར་པོར་བྱའོ། །ནུབ་ཀྱི་སའི་ཆ་ནི་དམར་པོའོ། །བྱང་གི་སའི་ཆ་ནི་ལྗང་གུའོ། །དབུས་ཀྱི་སའི་ཆ་
ནི་ནག་པོའོ། །དེའི་དབུས་སུ་པདྨ་འདབ་མ་བརྒྱད་པ་དམར་པོའི་ཟེའུ་འབྲུ་ལ། ཉི་མའི་དཀྱིལ་འཁོར་ལ་གནས་པའི་ཐོད་པ་དཀར་པོ་ནང་དམར་བ་ཁ་གྱེན་དུ་བལྟས་པའི་དབུས་སུ་སྣ་ཚོགས་རྡོ་རྗེས་མཚན་པ་བྲི་བར་བྱའོ། །ཕྱག་གཉིས་པ་དང་ཕྱག་དྲུག་པའི་ཀྱེ་རྡོ་རྗེ་

རྣམས་ཀྱི་རྡོ་རྗེ་ནག་པོ་འོད་འཕྲོ་བའོ། །ཤར་གྱི་འདབ་མ་ལ་སོགས་པར་རིམ་པ་ཇི་ལྟ་བ་བཞིན་དུ་སྣ་ཚོགས་རྡོ་རྗེ་དང་བྲལ་བའི་ཐོད་པ་སྟེ། ཤར་སྒོའི་པདྨ་ལ་གནས་པའི་ཟླ་བའི་སྟེང་དུ་ཁ་དོག་ནག་པོའི་གྲི་གུག་གོ། །ལྷོ་སྒོར་ནི་བཙོད་ཀྱི་མདོག་གི་རྡེའུ་ཆུང་ངོ་། །ནུབ་ཀྱི་སྒོར་
ནི་གསེར་གྱི་མདོག་ཅན་གྱི་རུས་སྦལ་ལོ། །བྱང་སྒོར་ནི་མརྒཏ་ཀྱི་མདོག་གི་སྦྲུལ་ལོ། །དབང་ལྡན་གྱི་མཚམས་སུ་ནི་ཨིནྡྲ་ནཱི་ལའི་མདོག་གི་སེང་གེའོ། །མེའི་མཚམས་སུ་ནི་ཆུ་ཤེལ་ལྟ་བུའི་དགེ་སློང་ངོ་། །བདེན་བྲལ་མཚམས་སུ་ནི་ནམ་མཁའ་སྔོ་བསངས་ཀྱི་འཁོར་
ལོའོ། །རླུང་གི་མཚམས་སུ་ནི་སྣ་ཚོགས་པའི་མདོག་གི་རྡོ་རྗེ་སྟེ། པདྨ་དམར་པོ་འདབ་མ་བརྒྱད་པའི་ཟེའུ་འབྲུ་ལ་གནས་པའི་ཟླ་བའི་སྟེང་དུ་བྲི་བར་བྱའོ། །མཚན་མ་དེ་དག་ལ་ནི་སླར་ཡང་བདུད་བཞི་པོ་ཚངས་པ་ལ་སོགས་པའི་གདན་མཉམ་པའམ་མི་མཉམ་པར་བྲི་བར་
བྱའོ། །དེ་ནས་བདག་མེད་མའི་དཀྱིལ་འཁོར་བྲི་བར་འདོད་པས་དཀྱིལ་འཁོར་དེའི་སྙིང་པོ་ལ་པདྨ་དམར་པོ་འདབ་བརྒྱད་བྲི་བར་བྱའོ། །དེའི་ཟེའུ་འབྲུ་ལ་ཡང་ཟླ་བའི་སྟེང་དུ་གྲི་གུག་ཁ་དོག་ནག་པོ་བྲི་བར་བྱའོ། །དེ་བཞིན་དུ་ཤར་ལ་སོགས་པའི་པདྨའི་འདབ་མ་རྣམས་ལ་གྲི་
གུག་བཞིའོ། །ཕྱིའི་འཕར་མ་དབང་ལྡན་ལ་སོགས་པའི་མཚམས་རྣམས་སུ་ཡང་བཞིའོ། །ཤར་སྒོ་ལ་སོགས་པར་ཡང་བཞིའོ། །ཤར་ནུབ་ཀྱི་སྒོ་ལ་གནས་པ་ནི་གཞོགས་གཉིས་སུ་གྲི་གུག་གཉིས་པདྨ་ལ་གནས་པའི་ཟླ་བའི་དཀྱིལ་འཁོར་གྱི་སྟེང་དུ་བྲི་བར་བྱའོ། །
ཡང་འདི་དག་ནི་རྡུལ་ཚོན་བྲི་བའི་ལས་ལ་འཇུག་པ་དང་ལྡོག་པའི་དུས་སུ་ཡིད་ཀྱིས་རྡོ་རྗེ་ཐིག་བསལ་བར་བྱ་སྟེ། བཛྲ་བེ་ག་ཞེས་བྱ་བ་བརྗོད་ནས་བྱའོ། །གཞན་དུ་ནི་དམ་ཚིག་ཉམས་པ་ཡིན་ནོ། །དེ་བཞིན་དུ་ཡང་དེ་ཁོ་ན་ཉིད་བསྡུས་པ་ལས། རྡོ་རྗེ་ཐིག་རིས་ཡིད་ཀྱིས་
སྤངས། །གཞན་དུ་ན་ནི་འཇུག་པ་དང་། །ལྡོག་པ་ཡི་ནི་དམ་ཚིག་རྣམས། །དེ་དག་གིས་ནི་ཉམས་པ་ཡིན། །ཞེས་གསུངས་སོ། །དེ་ནས་དཀྱིལ་འཁོར་གྱི་ཕྱོགས་དང་མཚམས་སུ་ཞི་བ་དང་། རོ་ལངས་དང་། རོ་དང་འབྱུང་པོ་ལ་སོགས་པས་བཀྲམ་པའི་དུར་ཁྲོད་བརྒྱད་བྲི་

བར་བྱའོ། །དེ་ལ་ཤར་ཕྱོགས་སུ་ནི་འཚེད་པས་སྦྲེལ་བ་དྲག་ཅིང་གཏུམ་པའི་རི་ཕུག་ཅེས་བྱ་བའི་དུར་ཁྲོད་དོ། །ལྷོ་ཕྱོགས་སུ་ནི་དུམ་བུས་བཀང་བའི་འཇིགས་སུ་རུང་བའོ། །ནུབ་ཕྱོགས་སུ་ནི་བོར་བས་སྦྲེལ་བ་ཀ་རཾ་ཀ་ཀཾ་ངོ་། །བྱང་ཕྱོགས་སུ་ནི་
མདུང་གིས་འབིགས་པས་སྦྲེལ་པ་འབར་བ་སྣ་ཚོགས་སོ། །དབང་ལྡན་མཚམས་སུ་ནི་བཅིངས་པས་སྦྲེལ་བ་ཧ་ཏའི་གད་མོའོ། །མེའི་མཚམས་སུ་ནི་ཕྱེད་བསྲེགས་པ་དཔལ་གྱི་ནགས་ཚལ་ལོ། །བདེན་བྲལ་གྱི་མཚམས་སུ་ནི་དུམ་བུ་ཕྱེད་པས་གང་བ་མུན་པ་མི་བཟད་
པའོ། །རླུང་གི་མཚམས་སུ་ནི་དོང་བརྐོ་བས་གང་བ་ཀཱི་ལི་ཀཱི་ལའི་སྒྲ་སྒྲོགས་པ་བྲི་བར་བྱའོ། །དེ་ནས་ཇི་ལྟ་བ་བཞིན་དུ་ཤིང་གི་རིམ་པ་བྲི་བར་བྱ་སྟེ། ཤྲི་ཤ་དང་། ཙཱུ་ཏ་དང་། ཀ་ཀོ་ལི་དང་། ཨ་ཤྭཏྠ་དང་། པ་ཏ་དང་། ཀ་རཉྫ་དང་། ལ་ཏ་པར་ཀ་ཏི་དང་། ས་རྡུལ་ལོ། །
ཤིང་གི་རྩེ་མོར་ནི་ཤིང་གི་བདག་པོ་འཁོར་དང་བཅས་པ་བྲི་བར་བྱ་སྟེ། དེ་ལ་ཁྲ་གདོང་ཅན་ནི་ཁྲའི་ཚོགས་ཀྱིས་བསྐོར་བའོ། །ཅེ་སྤྱང་གདོང་ནི་འུག་པའི་ཚོགས་ཀྱིས་བསྐོར་བའོ། །ཁྱི་གདོང་ཅན་ནི་ཁྱིའི་ཚོགས་ཀྱིས་བསྐོར་བའོ། །ཕག་གདོང་ཅན་ནི་ཕག་གི་ཚོགས་
ཀྱིས་བསྐོར་བའོ། །བྱི་ལའི་གདོང་ཅན་ནི་ཅེ་སྤྱང་གི་ཚོགས་ཀྱིས་བསྐོར་བའོ། །སྟག་གི་གདོང་ཅན་ནི་སྟག་གི་ཚོགས་ཀྱིས་བསྐོར་བའོ། །བྱ་རྒོད་ཀྱི་གདོང་ཅན་ནི་སྲིན་པོའི་ཚོགས་ཀྱིས་བསྐོར་བའོ། །ཤ་བའི་གདོང་ཅན་ནི་རོ་ལངས་ཀྱི་ཚོགས་ཀྱིས་བསྐོར་བའོ། །
ཤིང་གི་རྩ་བ་རྣམས་སུ་ནི་ཕྱོགས་སྐྱོང་ལ་འཁོར་དང་སྲས་སུ་བཅས་པ་འདུད་ཅིང་ཐལ་མོ་སྦྱར་བ་དང་ལྡན་པའམ་མི་ལྡན་པའང་རུང་བྲི་བར་བྱ་སྟེ། དེ་ལ་དབང་པོ་ནི་སྐུ་མདོག་སེར་པོ་རིན་པོ་ཆེའི་ཅོད་པན་དང་རྡོ་རྗེ་འཛིན་པ་ན་བཟའ་བཟང་པོས་བརྒྱན་ཅིང་གླང་པོ་དཀར་པོ་ལ་བཅིབས་པའོ། །
གཤིན་རྗེ་ནི་སྐུ་མདོག་ནག་པོ་སྤྱན་དམར་བ། སྨིན་མ་དང་སྐྲ་གྱེན་དུ་བརྫེས་པ། དབྱུག་པ་དང་མདུང་འཛིན་ཅིང་མ་ཧེ་ལ་བཅིབས་པའོ། །ཆུ་ལྷ་ནི་སྐུ་མདོག་དཀར་པོ་གདེངས་ཀ་བདུན་དང་ཀླུའི་ཞགས་པ་དང་དུང་འཛིན་པ་ཆུ་སྲིན་ལ་བཅིབས་པའོ། །ནོར་སྦྱིན་ནི་གསེར་གྱི་མདོག་ཅན་

རིན་པོ་ཆེའི་ཅོད་པན་ཅན་ལྕགས་ཀྱུ་དང་དབྱུག་པ་འཛིན་ཞིང་ཤ་ར་བྷ་ལ་བཅིབས་པའོ། །དབང་ལྡན་ནི་སྐུ་མདོག་དཀར་པོ་རལ་བའི་ཅོད་པན་གྱི་རྩེར་ཟླ་བས་མཚན་པ། སྤྱན་གསུམ་པ་ཐོད་པའི་ཕྲེང་བས་བརྒྱན་པ་ཕྱག་བཞི་ལ་རྔེའུ་ཆུང་དང་ཐོད་པ་དང་རྩེ་གསུམ་དང་ཁཊྭཱཾ་ག་འཛིན་པ་ཁྱུ་
མཆོག་ལ་བཅིབས་པའོ། །མེ་ལྷ་ནི་སྐུ་མདོག་དམར་པོ་སྐྲའི་ཐོར་ཚུགས་དང་། མཆོད་ཕྱིར་ཐོགས་པ་ཅན་ཕྱག་བཞི་ལ་མི་འཇིགས་པ་དང་ཕྲེང་བ་དང་མགྲིན་རིངས་དང་། དབྱུ་གུ་འཛིན་པ་ར་ལ་བཅིབས་པའོ། །བདེན་བྲལ་ནི་སྐུ་མདོག་སྔོན་པོ་སྐྲ་སེར་སྐྱ་གྱེན་དུ་འགྲེང་བ་ཐོད་པའི་ཕྲེང་བས་
བརྒྱན་པ་གྲི་དང་ཐོད་པ་འཛིན་པ་རོ་ལ་བཅིབས་པའོ། །རླུང་ལྷ་ནི་དུ་བའི་མདོག་ཅན་རླུང་དར་འཛིན་ཅིང་རིན་པོ་ཆེའི་ཅོད་པན་ཅན་རི་དྭགས་ལ་བཅིབས་པའོ། །དེ་དག་ཀྱང་ལྷ་དང་ཡི་དགས་དང་ཀླུ་དང་གནོད་སྦྱིན་དང་། འབྱུང་པོ་དང་དྲང་སྲོང་དང་སྲིན་པོ་དང་། རླུང་གི་ཚོགས་ཀྱིས་བསྐོར་བ་
བྲི་བར་བྱའོ། །དེའི་གཡོན་ཕྱོགས་རྣམས་སུ་ཀླུ་བརྒྱད་པོ་གདེངས་ཀ་དང་བཅས་པ་བྲི་བར་བྱ་སྟེ། དེ་ལ་བ་སུ་ཀ་ནི་ཟླ་བ་དང་མཚུངས་པའི་སྤྱི་བོ་ན་ཨུཏྤ་ལ་སྔོན་པོ་ཅན་ནོ། །པདྨ་ནི་དུང་དུ་སྟོན་པ་གདེངས་ཀ་ལ་སྐར་མས་མཚན་པའོ། །ཀར་ཀོ་ཊ་ནི་དཱུར་བ་བཞིན་ལྗང་བ་མགྲིན་པར་རི་མོ་
གསུམ་གྱིས་མཚན་པའོ། །ཏཀྵ་ཀ་ནི་མེ་ཏོག་བནྡུ་ཀ་དང་མཚུངས་པ་སྤྱི་བོ་ན་གཡུང་དྲུང་གིས་མཚན་པའོ། །པདྨ་ཆེན་པོ་ནི་ཀུནྡ་དང་མཚུངས་པ་སྤྱི་བོར་མདུང་གིས་མཚན་པའོ། །ཧུ་ལུ་ཧུ་ལུ་ནི་མིག་སྨན་དང་མཚུངས་པ་སྤྱི་བོར་པདྨས་མཚན་པའོ། །རིགས་ལྡན་ནི་དུ་བའི་མདོག་ཅན་
ཟླ་བ་ཕྱེད་པས་མགྲིན་པར་མཚན་པའོ། །དུང་སྐྱོང་ནི་གསེར་གྱི་མདོག་ཅན་མགྲིན་པར་ཟླ་བ་རྒྱས་པས་མཚན་པ་བྲི་བར་བྱའོ། །དེའི་རྒྱབ་ཀྱི་ཆ་རྣམས་སུ་སྤྲིན་བྲི་བར་བྱ་སྟེ། དེ་ལ་སྒྲ་སྒྲོགས་ནི་མདོག་ནག་པོའོ། །འཁྱིལ་པ་ནི་མདོག་སྔོན་པོའོ། །མི་བཟད་པ་ནི་གུར་གུམ་གྱི་མདོག་གོ།
གྷུར་ནི་ཏ་ནི་སྣ་ཚོགས་པའི་མདོག་གོ། །གྷ་ན་ནི་མདོག་དཀར་པོའོ། །རྙིས་པ་ནི་མདོག་སེར་པོའོ། །ཆར་འབབ་པ་ནི་དྲུ་ས་རའི་མདོག་གོ། །ཙནྡན་ནི་མིག་སྨན་གྱི་མདོག་སྟེ་དེ་ལྟར་བྲི་བར་བྱའོ། །གཞན་དག་ཏུ་ནི་འཁོར་ལོ་ཇི་ལྟར་རྗེས་སུ་མཐུན་ཞིང་མཛེས་པར་བརྟག་པར་བྱའོ། །རྡུལ་

ཚོན་དབབ་པའི་ཆོ་གའོ།། །།དཀྱིལ་འཁོར་བྲི་བའི་དུས་སུ་བརྒྱ་ལ་གང་ཞིག་རྩོད་པ་དང་། བགེགས་སློང་བར་བྱེད་པའམ། བདག་ཉིད་བགེགས་བྱེད་པ་དེ་ལྟ་ན་ནི་སྔར་གསུངས་པའི་ཆོ་གས་དབང་པོ་ལ་སོགས་པ་བསྒོམས་པ་ལ་ཕུར་བུ་བཏབ་ཅིང་བགེགས་ཉེ་བར་ཞི་
བར་བྱའོ། །གལ་ཏེ་ཆར་འབབ་ཅིང་བདུད་ཀྱི་བྱེད་པ་དེ་ལྟ་ན་ནི་དུར་ཁྲོད་ཀྱི་རས་ཀྱིས་ཉེ་བར་གཡོགས་ལ་ཀྱེ་རྡོ་རྗེའི་རྣལ་འབྱོར་གྱི་ཁྲོ་བོར་གནས་ཏེ། ཨོཾ་ཨཱརྱ་ཨཱརྱ། ས་མ་སཱ་ན་པྲི་ཡཱ་ཡ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་པའི་སྔགས་ཡོངས་སུ་བཟླ་ཞིང་མིག་གྱེན་དུ་བལྟས་ལ་ཁྲོ་བོའི་མེ་འབར་
བའི་ཕྲེང་བའི་རིགས་ཡང་དག་པར་སྤྲོས་པ་དེས་ནམ་མཁའི་དཀྱིལ་ཁྱབ་ཅིང་སྤྲིན་ཐམས་ཅད་ཐལ་བར་བྱས་པར་བསམ་མོ། །དེ་ནས་མེ་ཞི་བར་འདོད་ན་མེའི་སྟེང་དུ་བྃ་ཡིག་ལས་སྐྱེས་པའི་ཆུའི་དཀྱིལ་འཁོར་དཀར་པོ། དེའི་སྟེང་དུ་པདྨ་སྣ་ཚོགས་འདབ་མའི་ཟེའུ་འབྲུ་ལ་བྷྲཱུཾ་དཀར་པོ་
ལས་སྐྱེས་པའི་འཁོར་ལོ་དཀར་པོ་རྩིབས་བརྒྱད་པའི་དབུས་ན་གནས་པའི་ཡི་གེ་བྷྲཱུྃ་ཡོངས་སུ་གྱུར་པ་ལས་སྟོན་ཀའི་ཟླ་བ་ལ་གནས་པའི་ཐུགས་ཀར་ཡི་གེ་བྷྲཱུྃ་གྱིས་བྱིན་གྱིས་བརླབས་པ། རྒྱ་མཚོ་བཞི་དང་ཆུ་བོ་བཞི་དང་མ་དྲོས་པའི་ཆུ་དང་མཚུངས་པ་རྣམས་ཀྱིས་ཐུགས་ཀའི་
ས་བོན་གྱི་འོད་ཟེར་གྱི་སྤྲིན་གྱི་ཚོགས་ཀྱི་ཕྲེང་བ་ལས་བྱུང་བས་ནམ་མཁའི་དཀྱིལ་མ་ལུས་པ་ཁྱབ་པའི་ཆུའི་རྒྱུན་ཕྱོགས་བཅུར་ཡོངས་སུ་ཁྱབ་པར་བྱེད་པའི་རྣམ་པར་སྣང་མཛད་རྣམ་པར་བསམ་པར་བྱའོ། །གལ་ཏེ་རླུང་ཞི་བར་བྱེད་འདོད་ན། དེ་ལྟ་ན་ནི་རང་གི་ལྷ་ཉིད་ཀྱི་རྣལ་འབྱོར་
རམ་རྡོ་རྗེ་ཧཱུྃ་མཛད་ཀྱི་རྣལ་འབྱོར་གྱིས་ཡི་གེ་ཧཱུྃ་འབུམ་བཟླས་པའི་ལྕི་བ་ས་ལ་མ་ལྷུང་བ་འམ་གྲོག་མཁར་གྱི་སས་རླུང་ལྷའི་གཟུགས་བརྙན་བྱས་ལ། ཡཾ་ཡིག་ལས་བྱུང་བའི་རླུང་ལྷའི་སྐུ་ནམ་མཁའི་དཀྱིལ་དུ་བསྒོམས་ལ་ཡིད་ཀྱིས་བཀུག་ལ་གཟུགས་བརྙན་བྱས་ལ་གཞུག་ཅིང་
བསྡམས་ལ། མི་རུས་ལས་ཕུར་པ་སོར་བཞི་པའི་ཚད་ཀྱིས་བརྒྱ་རྩ་བརྒྱད་བཟླས་ལ་གཟུགས་བརྙན་ལ་གདབ་པར་བྱའོ། །དེ་བཞིན་དུ་ཆུའི་བགེགས་ཞི་བར་བྱ་བའི་ཕྱིར་ཡང་ཆུ་ལ་གདབ་པར་བྱའོ། །ཡང་ན་སྔར་བརྗོད་པའི་རིམ་པས་རྡོ་རྗེ་ར་བ་ལ་སོགས་པ་ས་གཞི་རྡོ་རྗེ་ར་བ་ལ་ཐུག་

པའི་ཆོ་གའི་རྗེས་སུ་འཇུག་པས་ཁྲོ་བོའི་བལྟ་བས་མདུན་དུ་བལྟས་ལ། རྩ་བའི་སྔགས་བཟླ་བར་བྱ་སྟེ། ཨོཾ་ཨཥྚཱ་ན་ནཱ་ཡ། བིཾ་ག་ལོརྡྷྭ་ཀེ་ཤ་བརྟྨ་ནི། ཙ་ཏུ་རྦིཾ་ཤ་ཏི་ནེ་ཏྲཱ་ཡ། ཥོ་ཌ་ཤ་བྷུ་ཛཱ་ཡ། ཀྲྀཥྞ་ཛཱི་མཱུ་ཏ་ཝ་པུ་ཥེ། ཀ་པཱ་ལ་མཱ་ལཱ་ནེ་ཀཱ་དྷ་རི་ཎེ། ཨཱདྷྨ་ཏ་ཀྲཱུ་ར་ཙིཏྟཱ་ཡ། ཨ་རྡྷེནྟུ་དཾཥྚྲཱྀ་
ནི། ཨོཾ་མཱ་ར་ཡ་མཱ་ར་ཡ། ཀཱ་ར་ཡ་ཀཱ་ར་ཡ། གརྫྫ་ཡ་གརྫྫ་ཡ། ཏརྫྫ་ཡ་ཏརྫྫ་ཡ། ཤོ་ཥ་ཡ་ཤོ་ཥ་ཡ། སཔྟ་སཱ་ག་རཱན། བནྡྷ་བནྡྷ། ནཱ་གཱཥྚ་ཀཱན། གྲྀཧྞ་གྲྀཧྞ། ཤ་ཏྲཱུཾ། ཧ་ཧཱ་ཧི་ཧཱི་ཧུ་ཧཱུ། ཧེ་ཧཻ་ཧོ་ཧཽ་ཧཾ་ཧ། ཕཊ་སྭཱ་ཧཱ། ཞེས་བྱ་བས་སོ། །ཡང་ན་བགེགས་ཐམས་ཅད་ཞི་བར་བྱ་
བའི་ཕྱིར་ཨརྒའི་ལོ་མ་དང་དུག་དང་སྐེ་ཚེ་དང་ཙི་ཏྲ་ཀའི་ཁུ་བས་བགེགས་རྣམས་ཀྱི་མིང་བྲིས་ལ། ཨོཾ་ཧེ་བཛྲ་ཛྭ་ར་ཛྭ་ར། ཤ་ཏྲཱུཾ་ནཾ་བྷྲཱུཾ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་བྱ་བའི་སྔགས་ཁྲི་ཡོངས་སུ་བཟླས་ལ། ཁྲོས་པས་འབྲས་ཕུབ་ཀྱི་མེ་ལ་བསྲེག་པར་བྱའོ། །གལ་ཏེ་དེ་ལྟ་ན་ཡང་
བགེགས་མ་ཞི་ན་དེ་ལྟ་ན་ནི་དུག་དང་ཚྭ་དང་སྐེ་ཚེ་དང་དུར་ཁྲོད་ཀྱི་ཐལ་བ་དང་སོལ་བ་དང་བསྣུན་པ་དང་། མི་རུས་ཀྱི་ཕྱེ་མ་དང་སྨྱོ་བྱེད་ཀྱི་ཁུ་བས་བགེགས་ཀྱི་གཟུགས་བརྙན་བྱས་ལ། བོང་བུ་དང་རྔ་མོ་ལ་སོགས་པའི་ལྕི་བ་ལ་དུར་ཁྲོད་ཀྱི་མེ་བཏང་སྟེ། མཚོན་རྣོན་པོས་དུམ་བུར་
བཅད་ལ། ཨོཾ་སརྦ་བིགྷྣཱཾ་མཱ་ར་ཡ་གྷུ་ཞེས་བྱ་བའི་སྔགས་ཀྱིས་ཁྲོས་ཤིང་འགེངས་པའི་ལྟ་སྟངས་དང་གཡོན་བརྐྱང་བའི་གོམ་སྟབས་ཀྱིས་སྔར་བཞིན་དུ་བགེགས་བསྲེག་པར་བྱའོ། །ཡང་ན་ཆོས་ཐམས་ཅད་རྣམ་པར་རྟོག་པ་ཙམ་གྱིས་སློབ་སྟེ་དེའི་རང་བཞིན་དང་བདག་
མེད་པས་བགེགས་ཐམས་ཅད་ཐལ་བར་བྱའོ། །བགེགས་ཞི་བར་བྱ་བའི་ཆོ་གའོ།། །།དེ་ནས་རྡུལ་ཚོན་རྫོགས་པར་གདབ་པར་བྱས་ནས་སློབ་དཔོན་ཁྲུས་དང་དྲི་ཞིམ་པོས་བྱུགས་པ་དང་ལུས་ལ་གོས་བཟང་པོ་དང་ཅོད་པན་དང་མེ་ཏོག་དང་ལྡན་པས་དཀྱིལ་འཁོར་དུ་ཞུགས་ཏེ་
སྟན་ཤིན་ཏུ་འཇམ་ཞིང་མཐོ་བ་ལ་འདུག་ནས་ལྷའི་རྣལ་འབྱོར་དུ་བྱས་ནས། རྡུལ་ཚོན་ལྷག་མ་ཡི་གེ་གསུམ་གྱི་མཐར་ཡི་གེ་མུཿས་གཤེགས་སུ་གསོལ་ལ། རྡུལ་ཚོན་གྱི་སྣོད་ཀྱང་སྐྱེ་བོས་དབེན་པའི་ས་ཕྱོགས་སུ་གཞག་གོ། །དཀྱིལ་འཁོར་གྱི་ཕྱིའི་ས་ལྕི་བས་བྱུགས་ཤིང་

གཏོར་བ་དང་། མེ་ཏོག་གི་ར་བ་དང་ལྡན་པ་དང་། ཁནྚ་བིནྚ་ལ་སོགས་པའི་སྤོས་ཀྱིས་བདུག་པ་དང་། མར་མེའི་ཕྲེང་བ་འབར་བ་དག་ཀྱང་བྱའོ། །དེ་ནས་དཀྱིལ་འཁོར་གྱི་ཕྱི་རོལ་ལམ་ནང་དུ་གདབ་པའི་རྣམ་པར་རྒྱལ་བའི་བུམ་པས་ལི་ཛཾ་ལ་སོགས་པས་གང་བར་
བྱས་ལ་ཤར་གྱི་ཆའམ་ལྷོའི་ཆར་གཞག་པར་བྱའོ། །དཀར་པོ་ལ་སོགས་པའི་བུམ་པ་བཞི་པ་ནི་དཀྱིལ་འཁོར་གྱི་ཕྱི་རོལ་གྱི་ཤར་ལ་སོགས་པའི་ཕྱོགས་སུ་ཇི་ལྟར་རིམ་པ་བཞིན་དུ་གཞག་པར་བྱའོ། །གཞན་ཡང་པུཀྐ་སཱི་ལ་སོགས་པའི་བུམ་པ་ནི་དབང་ལྡན་ལ་སོགས་པའི་
མཚམས་སུ་གཞག་པར་བྱའོ། །ལས་ཐམས་ཅད་པའི་བུམ་པ་ཡང་དཀྱིལ་འཁོར་གྱི་ཤར་སྒོའི་ཕྱོགས་སུ་གཞག་པར་བྱའོ། །སྒོའི་བུམ་པ་བརྒྱད་པོ་ཡང་དཀྱིལ་འཁོར་གྱི་ཁང་པའི་ཤར་སྒོ་ལ་སོགས་པའི་ཕྱོགས་སུ་གཞག་པར་བྱའོ། །བདག་མེད་མའི་དཀྱིལ་འཁོར་ལ་
ཡང་རྣམ་པར་རྒྱལ་བའི་བུམ་པ་སྔ་མ་བཞིན་དུ་དགོད་པར་བྱའོ། །རྡོ་རྗེ་མ་ལ་སོགས་པའི་བུམ་པ་བཅུ་བཞི་པོ་ཡང་གནས་ཇི་ལྟ་བའམ་ཇི་ལྟར་མཛེས་པ་བཞིན་དུ་ཤར་ནས་བརྩམས་ཏེ་དགོད་པར་བྱའོ། །ལྷག་མ་ནི་སྔ་མ་བཞིན་ནོ། །དེ་ནས་ལྷ་མོའི་བུམ་པ་དེ་རྣམས་ནས་ཆུ་ཅུང་ཟད་ཅུང་ཟད་
བླངས་ལ་བདུད་རྩི་ལྔ་དང་ལྡན་པས་པདྨའི་སྣོད་དུ་དགོད་པར་བྱའོ། །བུམ་པ་དགོད་པའི་ཆོ་གའོ། །དེ་ནས་སྔགས་པས་དཀྱིལ་འཁོར་ལ་མངོན་པར་ཕྱོགས་ཏེ་ཡོ་བྱད་བསགས་ལ། རབ་ཏུ་དགའ་བའི་ཡིད་ཀྱིས་ཆོ་ག་བཞིན་དུ་དཀྱིལ་འཁོར་མཆོད་ཅིང་བསྒྲུབ་པར་བྱ་སྟེ། དེ་ལ་རིམ་
པ་ནི་འདི་ཡིན་ཏེ། ཡོད་ན་ལོ་བཅུ་དྲུག་མའི་ཕྱིའི་རིག་མ་འམ་མེད་པར་གྱུར་ན་བསྒོམས་པའི་རིག་མ་དང་ལྷན་ཅིག་ཏིང་ངེ་འཛིན་གསུམ་དང་ལྡན་པའི་རྣལ་འབྱོར་པས་པདྨ་དེའི་སྒྲས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་ཐམས་ཅད་སྤྱན་དྲངས་ལ། རང་གི་སྙིང་གནས་ཞུགས་ཏེ་
ཞུ་བས་རྡོ་རྗེའི་ལམ་ནས་ཤེས་རབ་ཀྱི་པདྨའི་དབུས་སུ་གནས་པར་བསྒོམ་ཞིང་དེ་ནས་ནམ་མཁའི་དཀྱིལ་དུ་སྤྲོ་བའི་སྦྱོར་བས་སྤྲོ་བར་བྱ་སྟེ། སེམས་ཅན་གྱི་དོན་བྱས་ནས། ཡང་བློས་སྤྱན་དྲངས་ནས་དཀྱིལ་འཁོར་གྱི་ཟུར་གྱི་ནམ་མཁའ་ལ་དེ་དགོད་པར་བྱའོ། །དེ་ནས་དེ་དང་ལྷན་

ཅིག་ཏུ་ལྷགས་པའི་བགེགས་ཀྱི་རིགས་ཞལ་བརྒྱད་པའི་ཧཱུཾ་གི་སྒྲས་བསལ་བར་བྱ་ཞིང་རང་གི་དཀྱིལ་འཁོར་ཡང་མངོན་པར་བསྲུང་བར་བྱའོ། །དེ་ནས་བསང་གཏོར་ལ་སོགས་པ་བྱིན་ལ་ཛཿཧཱུྃ་པྃ་ཧོཿཞེས་བྱ་བ་འདིས་ཇི་ལྟར་རིམ་པ་བཞིན་དུ་སྤྱན་དྲངས་ལ་དཀྱིལ་
འཁོར་ལ་གནས་པའི་མཚན་མ་རྣམས་ལ་གཞུག་པ་དང་བཅིང་བ་དང་དབང་དུ་བྱས་ཏེ། དེ་ནས་མིག་དང་ལུས་ལ་སོགས་པ་བྱིན་གྱིས་བརླབ་པ་དང་། ཕུང་པོ་ལ་སོགས་པ་རྣམ་པར་དག་པར་མོས་ཏེ། ཡང་བསང་གཏོར་ལ་སོགས་པ་ཕུལ་ལ་རང་གི་ཐུགས་ཀ་ནས་སྤྲོས་པའི་མཆོད་པའི་
ལྷ་མོ་བརྒྱད་ཀྱིས་ཕྱི་དང་གསང་བའི་མཆོད་པས་ཡང་དག་པར་མཆོད་ལ་ན་བཟའ་གཉིས་ཀྱང་སོ་སོར་ཕུལ། འཁོར་ལོའི་བདག་པོ་ལ་ཚིགས་སུ་བཅད་པ་འདིས་བསྟོད་པར་བྱའོ། །སྣ་ཚོགས་རྣམ་པར་བཀྲ་བའི་དངོས་པོ་རྣམས་ལ་གཟིགས་པར་མོས། །སྣ་ཚོགས་རྣམ་པར་བཀྲ་བའི་
འོ་དང་འཁྱུད་པས་དགྱེས་པ་དང་། །སྣ་ཚོགས་རྣམ་པར་བཀྲ་བའི་བདེ་བའི་སྟོན་མོས་རབ་ཏུ་དད་པ་དང་། །སྣ་ཚོགས་རྣམ་པར་བཀྲ་བའི་སྡོམ་པ་ཆེན་པོ་ཉེ་བར་རབ་ཏུ་སྟོན། །འཇིག་རྟེན་དངོས་པོ་རྣམས་ཀྱི་དམ་ཚིག་རྣམས་ལ་བཞུགས། །རྒྱུ་དང་མི་རྒྱུ་འཇིག་རྟེན་མ་ལུས་བཞེངས་སུ་
གསོལ། །ཁྱོད་ནི་རྣལ་འབྱོར་མ་ཚོགས་དང་བས་ཡོངས་སུ་བསྐོར། །ཁྱོད་ནི་མཆོག་ཐོབ་པ་ཡིས་སེམས་ནི་བདེ་བས་ཁྱབ། །དེར་ནི་རྒྱུ་དང་མི་རྒྱུའི་འཇིག་རྟེན་ཐམས་ཅད་སྦྱོང་། །སྙིང་རྗེའི་ཐུགས་ཀྱིས་སེམས་ཅན་བྱང་ཆུབ་རྣམ་རྟོག་མཛོད། །དཔལ་ལྡན་ཁྲག་འཐུང་རྡོ་རྗེ་ཡིས་ནི་དགྱེས་
པ་ཡིས། །སྒྱུ་མ་རབ་བསླུས་རྡོ་རྗེ་དག་ལ་རབ་ཏུ་འཇུག །ཅེས་པས་སོ། །དེ་ནས་པདྨའི་སྣོད་ཀྱི་བདུད་རྩི་ལྔ་པོ་མན་ངག་ཅི་ལྟ་བས་སྦྱངས་ལ་གཏོར་བར་བྱའོ། །དཀྱིལ་འཁོར་གྱི་ལྷ་དང་གཙོ་བོར་བཅས་པ་བདུད་རྩི་དེས་ངོམས་ཤིང་བདེ་བས་ཚིམ་པར་བསྒོམས་ལ་སོ་སོར་རིམ་པས་
དཀྱིལ་འཁོར་གྱི་བདག་པོའི་སྔགས་ནས་བརྩམས་ཏེ་ལྷ་ཐམས་ཅད་ཀྱི་སྔགས་བཟླས་ལ་དེ་རྣམས་ཡོངས་སུ་དགྱེས་པར་བྱའོ། །དེ་ནས་སྔགས་པས་ཡོད་པར་གྱུར་ན་བྱང་ཆུབ་ཀྱི་སྒྲུབ་པ་པོ་སྐྱེ་བོ་གཞན་དག་འཇུག་པ་བཟློག་པའི་ཕྱིར་དཀྱིལ་འཁོར་དུ་བཀོད་ལ་ཕྱིར་འགྲོ་བར་བྱ་སྟེ།

རྔ་མ་དཀར་པོ་དང་འཕན་དང་རྒྱལ་མཚན་དང་བ་དན་དང་བཅས་པ་གླུ་དང་གར་དང་རོལ་མོའི་སྒྲ་ལ་སོགས་པའི་ས་ཕྱོགས་སུ་སྟན་བདེ་བ་ལ་འདུག་སྟེ་མདུན་དུ་ཟངས་མོ་ཆེའི་ནང་དུ་ཁུར་བ་ལ་སོགས་པ་ཉ་དང་ཤ་དང་ཟན་དང་ཞོ་དང་འོ་མ་དང་སྦྲང་རྩི་དང་ཆང་དང་སཱ་ལི་དང་ཏིལ་
གྱིས་བསྲེས་པ་དང་། སྣ་ཚོགས་པའི་བཟའ་བཅའ་དང་བཏུང་བ་དང་བལྡག་པ་དང་གཞིབ་པའི་རྫས་ཀྱིས་གང་བར་མར་མེ་ལྔ་དང་། བདུད་རྩི་དང་མཆོད་རྫས་དང་གདུགས་དང་རྒྱལ་མཚན་དང་མར་མེའི་ཕྲེང་བ་སྟེ། རྫས་གཞན་གྱིས་ཀྱང་དགང་བར་བྱའོ། །མེད་པར་གྱུར་ན་ནི་ཟན་དང་ཆུ་
ཙམ་གྱིས་ཐམས་ཅད་གང་བར་མོས་པར་བྱས་ལ། མདུན་ན་གནས་པའི་གཏོར་མ་ལ་བལྟ་ཞིང་དེ་ལ་ཆོ་ག་བཞིན་དུ་འབར་བ་ལ་སོགས་པ་དང་ཡེ་ཤེས་ལྔའི་བདག་ཉིད་ཀྱིས་རིམ་པས་སྦྱང་བར་བྱའོ། །དེ་ལ་རིམ་པ་ནི་འདི་ཡིན་ཏེ་བར་སྣང་ལ་ཧཱུྃ་ཡིག་ལས་སྐྱེས་པའི་རྡོ་རྗེ་སྔོན་པོ་རྩེ་མོ་གྱེན་
དུ་བལྟས་བ་བསྒོམས་ལ། དེའི་འོག་ཏུ་ཨ་ཡིག་ལས་སྐྱེས་པའི་ཐོད་པ་དམར་པོ་ཁ་གྱེན་དུ་ཕྱོགས་པའོ། །ཐོད་པ་དེའི་དབུས་སུ་ཨོཾ་གྱིས་བྱིན་གྱིས་བརླབས་པའི་བདུད་རྩི་ལྔའི་གཟུགས་སུ་གྱུར་པར་གཏོར་མ་བལྟའོ། །དེ་ནས་རྡོ་རྗེ་དང་ཐོད་པ་མཉམ་པར་སྦྱོར་བ་ལས་མེ་བྱུང་
སྟེ་མེ་ལོང་ཡེ་ཤེས་དང་། དེས་གདུངས་པ་ནི་མཉམ་པ་ཉིད་ཀྱི་ཡེ་ཤེས་དང་གདུངས་པས་ཞུ་ཞིང་འོད་འབར་བ་ནི་སོ་སོར་རྟོག་པའི་ཡེ་ཤེས་དང་། ཡེ་ཤེས་ཀྱི་རང་བཞིན་དང་ཉི་མའི་དཀྱིལ་འཁོར་དུ་བྱས་པ་ནི་བྱ་བ་ནན་ཏན་གྱི་ཡེ་ཤེས་ཏེ། དེའི་འོད་ཟེར་