Kinh tạng Tây Tạng (Kangyur Đại Học) — 101_གཟུངས་འདུས།_ཝཾ

་མཐོང་ནས་ཡ་མཚན་ཆེར་བཟུང་སྟེ་རབ་ཏུ་དགའ་ནས། ཨ་ལ་ལ་སངས་རྒྱས། ཨ་ལ་ལ་རིག་སྔགས། ཨ་ལ་ལ་ཆོས། འབྲས་བུ་འཕྲལ་དུ་སྟོན་པ་བཅོམ་ལྡན་འདས་དེ་བཞིན་གཤེགས་
པ་ཤཱཀྱ་ཐུབ་པ་ཐུགས་རྗེ་མཆོག་ཏུ་ཆེ་བ་ཡིད་བཞིན་གྱི་ནོར་བུ་ལྟ་བུ་དེ་ལ་ཕྱག་འཚལ་ལོ། །ཕྱག་འཚལ་ལོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་ལྷའི་བུ་དེ་རང་གི་གནས་སུ་སོང་ནས་ལྷའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་སྣ་

ཚོགས་བླངས་ཏེ། ལྷའི་གོས་དང་། སྤུད་པ་དང་། རྒྱན་ཀྱང་བླངས་ནས་གཡོག་འཁོར་ཐམས་ཅད་དང་། ལྷའི་བུ་མོ་དང་། ལྷའི་ཚོགས་དང་། ལྷའི་དབང་པོ་བརྒྱ་བྱིན་ལ་སོགས་པ་དང་། དགའ་ལྡན་གྱི་གནས་སུ་དོང་སྟེ། བཅོམ་ལྡན་
འདས་ག་ལ་བ་དེར་དོང་ནས་ཕྱིན་པ་དང་། བཅོམ་ལྡན་འདས་ལ་མཆོད་པ་ཆེན་པོ་བྱས་ཏེ་ལན་བརྒྱ་སྟོང་དུ་བསྐོར་བ་བྱས་ནས་ཆོས་ཉན་པའི་ཕྱིར་དེ་ཉིད་དུ་བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་རྒྱལ་པོ་ཆེན་པོ་བཞི་དང་། ཚངས་པ་དང་། ཁྱབ་འཇུག་དང་།
དབང་ཕྱུག་ཆེན་པོ་དང་། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སུ་ག་ལས་གང་གིས་ལྷའི་བུ་ནོར་བུའི་སྙིང་པོ་དྲི་མ་མེད་པ་ལ་མི་
བཟད་ཅིང་ཤིན་ཏུ་ཚ་བའི་འབྲས་བུ་རྣམ་པར་སྨིན་པ་རྣམས་འབྱུང་བར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། སྐྱེས་བུ་དམ་པ་དག་ལེགས་སོ་ལེགས་སོ། །སྐྱེས་བུ་དམ་པ་དག་ལེགས་པར་དྲིས་སོ། །དེའི་ཕྱིར་ཉོན་ཅིག་དང་བཤད་པར་བྱའོ། །ལག་ན་རྡོ་རྗེ་སྔོན་
བྱུང་བ་འདས་པའི་དུས་ན་ལྷོ་ཕྱོགས་ཀྱི་རྒྱུད་ན་ཡངས་བ་འཁྱིལ་བ་ཞེས་བྱ་བའི་གྲོང་ཁྱེར་ཡོད་དེ། དེ་ན་བྲམ་ཟེ་དྲི་མ་མེད་པ་ཞེས་བྱ་བ་མཁས་པ་བྱང་བ་གསལ་བ་ཡིད་གཞུངས་པ་གཟུགས་བཟང་ཞིང་མཛེས་པ་བལྟ་ན་སྡུག་པ་མདོག་བཟང་པོ་རྒྱས་པ་མཆོག་དང་ལྡན་པ། དད་པ་དང་
ལྡན་པ། དགེ་བའི་བསམ་པ་ཅན་རིག་པ་སྨྲ་བ་ཞིག་གནས་ཏེ། དེ་རིག་སྔགས་ཀྱི་རྒྱལ་མོ་འདི་རྗེས་སུ་སེམས་ཤིང་སྒོམ་ལ་མང་དུ་བྱེད་དེ། སེམས་ཅན་ཐམས་ཅད་ལ་ཕན་པར་འདོད་དོ། །དེ་ནས་གྲོང་ཁྱེར་དེ་ཉིད་ན་ཁྱིམ་བདག་རབ་སྣང་ཞེས་བྱ་བ་ཕྱུག་པ་ནོར་ཆེ་ལ་ལོངས་སྤྱོད་ཆེ་བ། གཡོག་
འཁོར་མང་བ་ཞིག་གནས་ཏེ། ཁྱིམ་བདག་དེ་ནི་དད་པ་དང་མི་ལྡན་ཞིང་གཞན་མུ་སྟེགས་ཅན་ལ་དད་དོ། །བྲམ་ཟེ་དེ་ནི་ཁྱིམ་བདག་དེ་ལ་ཡང་དང་ཡང་རིག་སྔགས་ཀྱི་རྒྱལ་མོ་འདི་སྙིང་པོ་དང་བཅས་པ་སྒྲོགས་ཀྱང་ཁྱིམ་བདག་དེ་ནི་དེ་ལ་དད་པའི་སེམས་མི་སྐྱེད་ཀྱི་དེ་འདི་སྙམ་དུ་སེམས་ཏེ། ངས་བྲམ་

ཟེ་འདི་དུམ་བུ་དུམ་བུར་གཏུབས་ལ་ཉ་དང་རུས་སྦལ་བསྲེགས་པ་བཞིན་དུ་བོར་ཏེ་ཁ་ངན་སྐྱུགས་ཀྱིས་དགང་ངོ་སྙམ་མོ། །དེས་འདི་སྙམ་དུ་བསམས་མ་ཐག་ཏུ་ཁྱིམ་བདག་དེ་ཤ་བཀྲ་དང་མཛེའི་ནད་ཀྱིས་བཏབ་བོ། །དེ་ནས་འཆི་བའི་དུས་བྱས་ནས་འཆི་ཀར་སྡུག་བསྔལ་གྱི་ཚོར་བ་ཆེན་
པོ་མྱོང་སྟེ། ཤི་ནས་སེམས་ཅན་དམྱལ་བ་ཆེན་པོ་མནར་མེད་པར་སྐྱེས་ཏེ། དེར་བསྐལ་པའི་ཚད་དུ་སྡུག་བསྔལ་གྱི་ཚོར་བ་མྱོང་ངོ་། །དེ་ནས་ཤི་འཕོས་ནས་ཉ་དང་། ཕག་དང་། རུས་སྦལ་གྱི་ནང་དུ་བསྐལ་པར་སྡུག་བསྔལ་མྱོང་ངོ་། །དེ་ནས་འཆི་བའི་དུས་བྱས་ནས་སེམས་
ཅན་དམྱལ་བ་ཐིག་ནག་ཏུ་སྐྱེས་ཏེ། དེར་ཡང་བསྐལ་པའི་ཚད་དུ་སྡུག་བསྔལ་ཆེན་པོ་མྱོང་ངོ་། །དེ་ནས་ཤི་འཕོས་ནས་གྲོང་ཁྱེར་དེ་ཉིད་དུ་དམུས་ལོང་གི་ཁྱིམ་དུ་སྐྱེས་ཏེ་དམུས་ལོང་དུ་གྱུར་ནས་ཕན་ཚུན་དུ་སློང་མོ་ལ་སོང་བ་དང་། གཙུག་ལག་ཁང་ཅིག་ཏུ་ཕྱིན་པ་ན་དེ་ན་དགེ་སློང་
སྙིང་རྗེ་ལ་གནས་པ་ཞིག་འདུག་སྟེ། དེས་དེ་མཐོང་ནས་བྱམས་པས་རྒྱས་པར་བྱས་ཏེ་ཟས་བྱིན་ནོ། །རིག་སྔགས་ཀྱི་རྒྱལ་མོ་འདི་ཡང་བསྒྲགས་སོ། །དམུས་ལོང་དེས་གཟུངས་སྔགས་འདི་ཐོས་པ་དང་ཚེ་རབས་དྲན་པར་གྱུར་ནས་བྲམ་ཟེ་དེ་ཡང་དྲན་ཏེ། རྗེས་སུ་སེམས་ཤིང་ཀྱེ་མའོ་
མི་བཟད་པའི་ལས་བྱས་སོ་སྙམ་ནས་ངོ་ཚ་དང་ཁྲེལ་ཡོད་པར་གྱུར་ཏེ། འཆི་བའི་དུས་བྱས་པ་དང་གཟུངས་སྔགས་འདིའི་མཐུས་སུམ་ཅུ་རྩ་གསུམ་པའི་ལྷའི་ནང་དུ་སྐྱེས་ཏེ། གཞལ་མེད་ཁང་ཆེན་པོའི་ནང་ན་ལྷའི་བུ་མོའི་ཚོགས་ཀྱིས་བསྐོར་ཅིང་ལྷའི་ལོངས་སྤྱོད་ཆེན་པོ་མྱོང་
བར་གྱུར་ཏོ། །དེའི་ཚེ་དེའི་དུས་ན་ཁྱིམ་བདག་དམུས་ལོང་དུ་གྱུར་བ་དེ་གཞན་ཞིག་ཡིན་སྙམ་དུ་ཁྱོད་དོགས་ཤིང་ཐེ་ཚོམ་ཟའམ་ཡིད་གཉིས་སུ་གྱུར་ན་དེ་ལྟར་མི་བལྟ་སྟེ། ལྷའི་བུ་ནོར་བུའི་སྙིང་པོ་དྲི་མ་མེད་པ་འདི་ཉིད་དོ། །ལག་ན་རྡོ་རྗེ་དེ་ལྟ་བས་ན་སྡོམ་པ་གསུམ་གྱིས་བསྡམ་པར་
བྱའོ། །ལག་ན་རྡོ་རྗེ་ལས་དེས་འབྲས་བུ་རྣམ་པར་སྨིན་པ་སྡུག་བསྔལ་གྱི་ཚོར་བ་འདི་ལྟ་བུ་མྱོང་ངོ་། །ལྷའི་བུ་འདིས་བྱང་ཆུབ་སྙིང་པོའི་མཐར་ཐུག་གི་བར་དུ་ལས་ཀྱི་འབྲས་བུ་ཐ་མ་འདི་མྱོང་ངོ་། །ལག་ན་རྡོ་རྗེ་དེའི་ཚེ་དེའི་དུས་ན་བྲམ་ཟེ་དྲི་མ་མེད་པར་གྱུར་བ་དེ་གཞན་ཞིག་ཡིན་

པ་སྙམ་དུ་ཁྱོད་དོགས་ཤིང་ཐེ་ཚོམ་མམ་ཡིད་གཉིས་སུ་གྱུར་ན་དེ་ལྟར་མི་བལྟ་སྟེ། ལག་ན་རྡོ་རྗེ་ཁྱོད་ཉིད་དོ། །དམུས་ལོང་ལ་གཟུངས་སྔགས་འདི་སྒྲོགས་པའི་དགེ་སློང་དེ་ནི་འཇམ་དཔལ་གཞོན་ནུར་གྱུར་བ་འདི་ཉིད་ཡིན་ཏེ། དེའི་ཚེ་དེའི་དུས་ན་དགེ་སློང་དུ་
གྱུར་ཏོ། །དེ་ནས་ལྷའི་འཁོར་མང་པོ་དེས་སྔོན་བྱུང་བ་འདི་ཐོས་ནས་རྨད་དུ་བྱུང་བར་གྱུར། དགའ་བ་ཐོབ་པར་གྱུར་ཏེ། ཅ་ཅོ་དང་ག་ཞའི་སྒྲ་ཆེན་པོ་ཕྱུང་ནས་ཨ་ལ་ལ་དེ་བཞིན་གཤེགས་པའི་དམ་ཚིག་རིག་སྔགས་འདིའི་མཐུ་ནི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའོ་ཞེས་ཆེད་དུ་བརྗོད་
པ་ཆེད་དུ་བརྗོད་དོ། །དེ་ནས་འཁོར་དེ་ལས་ལྷའི་བུ་ཁྲི་ཉིས་སྟོང་ནི་ཕྱིར་མི་ལྡོག་པར་གྱུར་ཏོ། །ལྷའི་བུ་མོ་བྱེ་བ་ཕྲག་འབུམ་ནི་བུད་མེད་ཀྱི་དབང་པོ་དང་བྲལ་ནས་སྐྱེས་པའི་དབང་པོ་བྱུང་སྟེ་ཕྱིར་མི་ལྡོག་པ་ཉིད་ལ་གནས་སོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་
ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་ཀྱི་ཚིག་རིག་སྔགས་ཀྱི་རྒྱལ་མོ་འདི་ནི་མཐུ་ཆེ་བ་ཕན་ཡོན་ཆེར་ལགས་སོ། །བཅོམ་ལྡན་འདས་ཇི་ལྟར་སླད་མའི་ཚེ་སླད་མའི་དུས་ན་སེམས་ཅན་རྣམས་ལ་ཕན་པ་དང་བདེ་བར་འགྱུར་ཞིང་། གང་གིས་
སེམས་ཅན་དམྱལ་བ་དང་། དུད་འགྲོའི་སྐྱེ་གནས་ནས་ཡོངས་སུ་གྲོལ་བར་འགྱུར་བའི་སྒྲུབ་པའི་ཆོ་ག་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་གཟུངས་སྔགས་འདིའི་ཕན་ཡོན་དང་། སྒྲུབ་པའི་ཆོ་ག་འདི་ཉོན་ཅིག །འདི་ལྟར་
ཕྱི་མའི་ཚེ་ཕྱི་མའི་དུས་ན་རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མས་རིག་སྔགས་ཀྱི་རྒྱལ་མོ་འདི་དུས་གཅིག་ཏུ་དྲན་པར་བྱའོ། །རིང་བསྲེལ་གྱི་སྙིང་པོའམ་དེ་བཞིན་གཤེགས་པའི་རིང་བསྲེལ་གྱི་
སྙིང་པོ་ཅན་གྱི་མཆོད་རྟེན་ལ་བསྐོར་བ་བྱའོ། །ཡིད་བཞིན་གྱི་ནོར་བུ་རིན་པོ་ཆེ་འདི་གཉིས་ཀྱང་དུས་གཅིག་ཏུ་དྲན་པར་བྱའོ། །དེས་ནི་གང་གཱའི་ཀླུང་གི་བྱེ་མ་སྙེད་ཁྲག་ཁྲིག་ཕྲག་འབུམ་གྱི་བྱེ་མ་སྙེད་ཀྱི་དེ་བཞིན་གཤེགས་པ་རྣམས་ལ་དགེ་བའི་རྩ་བ་སྐྱེད་པར་འགྱུར་རོ། །བསོད་

ནམས་ཆེན་པོ་དང་ལྡན་པར་འགྱུར་རོ། །མཚམས་མེད་པ་ལྔའི་ལས་ཀྱི་སྒྲིབ་པ་རྣམས་ཀྱང་ཡོངས་སུ་བྱང་བར་འགྱུར་རོ། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་ངན་སོང་རྣམས་ལས་ཡོངས་སུ་ཐར་བར་འགྱུར་རོ། །ཚེ་
རིང་པོར་འགྱུར་རོ། །སྦྲུལ་གྱི་པགས་པ་བརྗེས་པ་བཞིན་དུ་ལུས་བོར་ནས་སྐལ་བ་མཉམ་པའི་ཕྱིར་འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་རོ། །ཕྱིན་ཅད་མངལ་གྱི་གནས་ཀྱི་དྲི་མས་མི་གོས་པར་འགྱུར་རོ། །གང་དང་གང་དུ་སྐྱེ་བ་དེ་དང་དེར་བརྫུས་ཏེ་སྐྱེ་ཞིང་པདྨ་
ལས་སྐྱེ་བར་འགྱུར་རོ། །ཚེ་རབས་ཐམས་ཅད་དུ་ཚེ་རབས་དྲན་པར་འགྱུར་རོ། །རྟག་ཏུ་དེ་བཞིན་གཤེགས་པ་ཐམས་ཅད་ལ་ལྟ་འདོད་པར་འགྱུར་རོ། །བསམ་པ་ཐམས་ཅད་ཡིད་བཞིན་དུ་ཡོངས་སུ་རྫོགས་པར་འགྱུར་རོ། །གལ་ཏེ་ཆོ་ག་བྱ་བར་འདོད་ན་དེས་ཁྲུས་
བྱས་ལ་གོས་སར་པ་བགོས་ཏེ། སྤོས་ཀྱི་དཀྱིལ་འཁོར་གྲུ་བཞི་པ་བྱའོ། །སྙིང་པོའི་རིག་སྔགས་གྲོ་ག་ལ་བྲི་བར་བྱའོ། །མཆོད་རྟེན་ལྔ་གདབ་པར་བྱའོ། །རིག་སྔགས་འདི་ཡང་མཆོད་རྟེན་གྱི་ནང་དུ་གཞུག་པར་བྱའོ། །མཆོད་རྟེན་བཞི་ནི་གྲྭ་བཞིར་གཞག་གོ། །
གཅིག་ནི་དཀྱིལ་འཁོར་གྱི་དབུས་སུ་གཞག་གོ། །ཤིང་བུ་བཙུགས་ཏེ་བ་དན་དམར་པོ་དཔྱང་བར་བྱའོ། །མེ་ཏོག་གིས་གཏོར་རོ། །བུམ་པ་གང་བ་ལྔ་གཞག་གོ། །གྲྭ་བཞིར་ཕོག་པོར་བཞི་ནས་ཏུ་རུ་ཥྐ་དང་། ཨ་ཀ་རུ་དང་། ཙནྡན་དང་། གུ་གུལ་གྱི་བདུག་
པས་བདུག་པར་བྱའོ། །སྤོས་ཀྱི་མཆོད་ཡོན་གྱི་སྣོད་བཞི་གཞག་པར་བྱའོ། །ཡིད་བཞིན་གྱི་ནོར་བུ་རིན་པོ་ཆེ་འདི་གཉིས་ཀྱང་ལན་བརྒྱ་རྩ་བརྒྱད་བཟླས་བརྗོད་བྱའོ། །སྙིང་པོའི་སྔགས་བརྗོད་ཅིང་དཀྱིལ་འཁོར་ལ་བསྐོར་བ་བརྒྱ་རྩ་བརྒྱད་བྱའོ། །ནད་ཀྱིས་བཏབ་པ་དང་། གནོད་
པ་དང་། ནད་ཚབས་ཆེ་བ་དང་། ཚེ་ཟད་པ་དང་། དུས་མ་ཡིན་པར་འཆི་བས་འཇིགས་པ་དང་། རྒྱལ་པོ་དང་། ཕ་རོལ་གྱི་དམག་ཚོགས་ཀྱིས་སྐྲག་པ་དང་། བུ་འདོད་པ་དཀྱིལ་འཁོར་ལ་མངོན་པར་ཕྱོགས་པར་གཞག་གོ། །རྨ་བྱའི་སྒྲོ་ལྔས་བྱབ་པར་བྱའོ། །མཆོད་

རྟེན་གྱི་དཀྱིལ་འཁོར་མཆོད་པར་བྱའོ། །ཆོ་ག་འདི་ལན་ཅིག་བྱས་ན་བསྐལ་པར་བསགས་པའི་ལས་ཀྱི་སྒྲིབ་པ་དང་བྲལ་ནས་སྒྲིབ་པ་མེད་པར་འགྱུར་རོ། །ནད་ཐམས་ཅད་དང་། ཉོན་མོངས་པ་ཐམས་ཅད་དང་། སེམས་ཅན་དམྱལ་བ་དང་། དུད་འགྲོའི་
སྐྱེ་གནས་དང་། གཤིན་རྗེའི་འཇིག་རྟེན་གྱི་ངན་སོང་ཐམས་ཅད་དང་། འཇིགས་པ་ཐམས་ཅད་ལས་ཡོངས་སུ་ཐར་བར་འགྱུར་རོ། །འཇིག་རྟེན་པ་དང་། འཇིག་རྟེན་ལས་འདས་པའི་སྡུག་བསྔལ་དང་། སྒྲིབ་པ་དང་། སྡིག་པ་དང་། གདུག་པ་ཐམས་ཅད་ཚེ་རབས་གཅིག་
ནས་གཅིག་ཏུ་བརྒྱུད་དེ་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་རྣམ་པར་འཇིག་པར་འགྱུར་རོ། །ཚེ་ཟད་པ་ཡང་ཕྱིར་ནུར་ཞིང་ཚེ་རིང་བར་འགྱུར་རོ། །ཡུན་རིང་དུ་ནད་ཀྱིས་བརྙོངས་ཏེ་ཤ་ཟད་པ་ཡང་ལུས་ཡོངས་སུ་རྫོགས་པར་འགྱུར་རོ། །ལུས་ཤིན་ཏུ་ཡོངས་སུ་དག་པར་འགྱུར་
རོ། །བསམ་པ་ཡིད་བཞིན་དུ་ཡོངས་སུ་རྫོགས་པར་འགྱུར་རོ། །ཕྱིན་ཆད་འཆི་བདག་གིས་སྒོའི་སྡུག་བསྔལ་མི་མཐོང་བར་འགྱུར་རོ། །སྦྲུལ་གྱི་པགས་པ་བརྗེས་པ་བཞིན་དུ་ལུས་བོར་ནས་སྐལ་བ་མཉམ་པའི་ཕྱིར་འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་རོ། །གང་དང་
གང་དུ་སྐྱེ་བ་དེ་དང་དེར་པདྨ་ལས་སྐྱེ་བར་འགྱུར་རོ། །ཐམས་ཅད་དུ་རྒྱན་ཐམས་ཅད་ཀྱིས་བརྒྱན་པར་འགྱུར་རོ། །སྐྱེ་བ་ཐམས་ཅད་དུ་ཚེ་རབས་དྲན་པར་འགྱུར་རོ། །འདིའི་བཟླས་བརྗོད་ཀྱི་ཆོ་ག་བཞིན་དུ་ཉིན་གཅིག་བཞིན་དུ་དུས་གསུམ་དུ་ལན་ཉི་ཤུ་རྩ་གཅིག་བཟླས་བརྗོད་བྱས་ན་
དེའི་སྡིག་པའི་སྒྲིབ་པ་དང་། ཉོན་མོངས་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །བཟླས་བརྗོད་ཆོ་ག་བཞིན་དུ་ལོ་གཅིག་ཚང་བར་བྱས་ན་འཇིགས་པ་མེད་པར་ལྟ་བ་ཀུན་ནས་སྒོའི་འོད་ཟེར་ཞེས་བྱ་བའི་ཏིང་ངེ་འཛིན་འཐོབ་བོ། །ཕྱོགས་བཅུའི་སངས་རྒྱས་ཀྱི་ཞིང་ཐམས་
ཅད་དུ་དེ་བཞིན་གཤེགས་པ་ཐམས་ཅད་མཐོང་བར་འགྱུར་རོ། །དྲི་མ་མེད་པ་རྣམ་པར་དག་པ་འབར་བའི་གཟི་བརྗིད་ཅེས་བྱ་བའི་ལུས་ཡོངས་སུ་དག་པ་ཐོབ་པར་འགྱུར་རོ། །ཚེ་རྣམ་པར་དག་པ་ཐོབ་པར་འགྱུར་རོ། །གང་གཱའི་ཀླུང་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་གཉིས་ཀྱི་བྱེ་མ་

སྙེད་ཀྱི་དེ་བཞིན་གཤེགས་པ་རྣམས་ལ་དགེ་བའི་རྩ་བ་སྐྱེད་པར་འགྱུར་རོ། །ཚེ་རབས་གཅིག་ནས་གཅིག་ཏུ་བརྒྱུད་པ་རྣམས་སུ་ཡང་ཤིན་ཏུ་ཡོངས་སུ་དག་པར་འགྱུར་རོ། །སངས་རྒྱས་ཀྱི་ཞིང་གང་དང་གང་དུ་འགྲོ་འདོད་པ་དེར་འགྲོ་བར་འགྱུར་རོ། །སྦྲུལ་གྱི་པགས་པ་བརྗེས་
པ་བཞིན་དུ་ལུས་བོར་ནས་སྐལ་བ་མཉམ་པའི་ཕྱིར་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །འཆི་བདག་གི་སྒོ་མི་མཐོང་ཞིང་རྨི་ལམ་ལྟ་བུར་ཀུན་དུ་ཤེས་སོ། །ཚེས་བརྒྱད་དམ། བཅུ་བཞིའམ། བཅྭ་ལྔ་ལ་ཡིད་བཞིན་གྱི་ནོར་བུ་རིན་པོ་ཆེ་ཆེན་པོའི་གཟུངས་
སྔགས་འདི་གཉིས་ལན་བརྒྱ་རྩ་བརྒྱད་བཟླས་བརྗོད་བྱས་ཤིང་རིང་བསྲེལ་དང་བཅས་པའི་མཆོད་རྟེན་ལ་བསྐོར་བ་བྱས་ན་བཟླས་བརྗོད་བྱས་པ་ཙམ་གྱིས་འཕྲལ་དུ་མཆོད་རྟེན་ལ་སྒྲ་འབྱུང་སྟེ་ལེགས་སོ་ཞེས་བྱ་བ་སྦྱིན་པར་འགྱུར་རོ། །འཕྲལ་དུ་སྡིག་པའི་སྒྲིབ་པ་དང་། ཉོན་མོངས་
པ་ཐམས་ཅད་དང་། འདོད་ཆགས་དང་། ཞེ་སྡང་དང་། གཏི་མུག་གི་དྲི་མ་དང་། སེར་སྣ་དང་། ཕྲག་དོག་དང་བྲལ་བར་འགྱུར་རོ། །ལུས་དྲི་མ་མེད་ཅིང་ཡོངས་སུ་དག་པར་འགྱུར་རོ། །སྐྱེས་པའམ། བུད་མེད་དམ། བྱེའུ་འམ། བུ་མོ་གང་དང་གཏམ་བྱས་པ་དེ་དག་ཐམས་ཅད་ཀྱང་
སྡིག་པ་རྣམས་ལས་གྲོལ་བར་འགྱུར་རོ། །དུད་འགྲོའི་སྐྱེ་གནས་སུ་སོང་བ་ལ་སྨྲས་ན་ཡང་དུད་འགྲོའི་སྐྱེ་གནས་སུ་གཏོགས་པ་ཐམས་ཅད་ལས་ཡོངས་སུ་ཐར་བར་འགྱུར་རོ། །བྱའི་ཚོགས་ཐམས་ཅད་ལ་སྨྲས་ན་ཡང་བྱའི་ཚོགས་ཐམས་ཅད་ཡོངས་སུ་གྲོལ་བར་འགྱུར་རོ། །ཐ་ན་ཁྱི་དང་།
རུས་སྦལ་དང་། སྦྲུལ་དང་། བྱི་ལ་དང་། སྲེ་མོ་དང་། སྲོག་ཆགས་སྣ་ཚོགས་ལ་སྨྲས་ན་ཡང་ཐམས་ཅད་ཡོངས་སུ་གྲོལ་བར་འགྱུར་རོ། །བྱེ་མ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་དུར་ཁྲོད་དུ་གཏོར་ན། གང་གི་རུས་པ་ལ་ཕོག་པ་དེ་དག་སེམས་ཅན་དམྱལ་བ་གང་དང་གང་དུ་སྐྱེས་
པ་དེ་དག་དེ་ནས་ཡོངས་སུ་ཐར་ཏེ་མཐོ་རིས་སུ་སྐྱེ་བར་འགྱུར་རོ། །གང་དག་མཐོ་རིས་སུ་སྐྱེས་པ་དེ་དག་གི་ལུས་ལ་མེ་ཏོག་གི་ཆར་འབབ་པར་འགྱུར་རོ། །གཅན་གཟན་དང་། བྱ་སྣ་ཚོགས་གང་དག་དུར་ཁྲོད་དེར་འགྲོ་བ་དེ་དག་ཐམས་ཅད་ཀྱང་བདེ་འགྲོར་འགྲོ་བར་འགྱུར་རོ། །

རི་ལ་གཏོར་ན་རི་དགས་དང་། བྱ་རྒྱུ་བ་དེ་དག་ཐམས་ཅད་བདེ་འགྲོར་འགྲོ་བར་འགྱུར་རོ། །ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བ་དུས་གསུམ་གྱི་དེ་བཞིན་གཤེགས་པའི་སྙིང་པོ་ལན་བརྒྱ་སྟོང་བཟླས་བརྗོད་བྱས་ན། གལ་ཏེ་མཚམས་
མེད་པ་ལྔ་བྱེད་པ་དག་མནར་མེད་པར་ལྟུང་ནས་གདུང་བས་བསྲེགས་པ་ལས་འཕྲལ་དུ་ཡོངས་སུ་ཐར་བར་འགྱུར་རོ། །ལན་འབུམ་བཟླས་བརྗོད་བྱས་ན། གལ་ཏེ་མགུལ་ནས་ཐག་པས་བཏགས་ཏེ་ཁྲིད་པ་ཡང་གཤིན་རྗེའི་གནས་ནས་འཕྲལ་དུ་ལྡོག་པར་འགྱུར་རོ། །
དེའི་འཇིགས་པ་ཆེན་པོ་ལས་ཡོངས་སུ་གྲོལ་བར་འགྱུར་རོ། །སེམས་ཅན་དམྱལ་བ་ཐམས་ཅད་ཀྱང་རྣམ་པར་ཞི་ཞིང་རྣམ་པར་འཇིག་པར་འགྱུར་ཏེ་ཐེ་ཚོམ་མེད་དོ། །ཆོས་ཀྱི་རྒྱལ་པོ་གཤིན་རྗེ་ཡང་བྲན་བཞིན་དུ་སེམས་ཤིང་འདུག་གོ། །ལུས་བསམ་གཏན་གྱི་ལམ་བཞིན་
ནམ། སྦྲུལ་གྱི་པགས་པ་བརྗེས་པ་བཞིན་དུ་ལུས་བོར་ནས་འཇིག་རྟེན་གྱི་ཁམས་བདེ་བ་ཅན་དུ་མངོན་པར་དགའ་ཞིང་འགྲོ་བར་འགྱུར་རོ། །འཆི་བདག་གི་སྡུག་བསྔལ་མི་མཐོང་བར་འགྱུར་རོ། །འབུམ་བྲིས་ཏེ་མཆོད་རྟེན་གྱི་ནང་དུ་བཅུག་ན། འབུམ་ཚད་ནས་མཆོད་རྟེན་ཐམས་ཅད་
འབར་བར་འགྱུར་རོ། །བདག་ཀྱང་འབར་བར་འགྱུར་རོ། །ངེས་པར་འཕྲལ་དུ་ཕྱིར་མི་ལྡོག་པར་འགྱུར་རོ། །ས་བཅུ་ལ་གནས་པར་འགྱུར་རོ། །གང་གཱའི་ཀླུང་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུའི་བྱེ་མ་སྙེད་ཀྱི་བཅོམ་ལྡན་འདས་དེ་བཞིན་གཤེགས་པ་རྣམས་ལ་དགེ་བའི་རྩ་བ་བསྐྱེད་
ཅིང་ལུང་བསྟན་པ་ཐོབ་པར་འགྱུར་རོ། །དེ་ནས་མཆོད་རྟེན་ཆེན་པོ་གཅིག་གི་ནང་དུ་བཅུག་སྟེ་ཤིང་བུ་བསྒྲེང་བ་བྱས་ན་དུས་གསུམ་གྱི་དེ་བཞིན་གཤེགས་པའི་རིང་བསྲེལ་གྱི་སྙིང་པོ་འབུམ་གྱི་མཆོད་རྟེན་ཞེས་བྱའོ། །གང་དག་དེ་ལས་བྱ་བ་རྣམས་བྱེད་པ་དེ་དག་ཐམས་ཅད་ཀྱང་ཕྱིར་མི་ལྡོག་
པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཐ་ན་དུད་འགྲོའི་སྐྱེ་གནས་སུ་གཏོགས་པ་རྣམས་དང་། གཞན་ཡང་སྲོག་ཆགས་ཀྱི་རིགས་སྣ་ཚོགས་གང་དག་དེར་འདོང་བ་དེ་དག་ཀྱང་ཕྱིར་མི་ལྡོག་

པར་འགྱུར་རོ། །ཐ་ན་གྲིབ་མས་ཕོག་ན་ཡང་ཡོངས་སུ་གྲོལ་བར་འགྱུར་ན་བྱ་བ་མང་དུ་བྱེད་པ་ལྟ་སྨོས་ཀྱང་ཅི་དགོས་ཏེ། འདིའི་ཡོན་ཏན་དང་ཕན་ཡོན་ནི་བརྗོད་པར་མི་ནུས་སོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང་། རྒྱལ་པོ་ཆེན་པོ་བཞི་དང་།
ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། དགའ་ལྡན་གྱི་གནས་ན་གནས་པའི་ལྷའི་བུ་དེ་དག་དང་། བརྒྱ་བྱིན་ལ་སོགས་པ་སུམ་ཅུ་རྩ་གསུམ་གྱི་རིས་ཀྱི་ལྷའི་བུ་རྣམས་དང་། ལྷའི་བུ་ནོར་བུའི་སྙིང་པོ་དྲི་མ་མེད་པ་དང་། དེ་དག་ཐམས་ཅད་
བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་སྔགས་མཐུ་
ཆེན་པོ་འདི་ནི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུར་མཐོང་བ་དང་། ཐོས་པར་དཀའ་བ་ལགས་ཏེ། བཅོམ་ལྡན་འདས་བདག་ཅག་ལྷན་ཅིག་ཚོགས་ནས་སླད་མའི་ཚེ་སླད་མའི་དུས་ན་ཡིད་བཞིན་གྱི་ནོར་བུ་རིན་པོ་ཆེ་འདི་གཟུང་བར་བགྱིའོ། །རྒྱས་པར་བགྱིའོ། །སེམས་ཅན་
ཐམས་ཅད་ལ་བསྒྲག་པར་བགྱིའོ། །འདི་འཛིན་པའི་སེམས་ཅན་ཆེན་པོ་དེའི་སླད་བཞིན་འབྲང་ཞིང་རྟག་ཏུ་རྒྱུན་མི་འཆད་པར་བསྲུང་བ་དང་། བསྐྱབ་པ་དང་། སྦ་བར་བགྱིའོ། །བུ་བཞིན་དུ་ཡོངས་སུ་བསྐྱང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་
པ། གྲོགས་པོ་དག་ལེགས་སོ་ལེགས་སོ། །ཁྱེད་ཀྱིས་དེ་ལྟར་གྱིས་ཤིག །རིག་སྔགས་ཀྱི་རྒྱལ་མོ་ཡིད་བཞིན་གྱི་ནོར་བུ་རིན་པོ་ཆེ་འདི་ངས་ཁྱོད་ལ་གཏད་དོ། །འཕགས་པ་ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བ་དེ་བཞིན་གཤེགས་པ་ཐམས་
ཅད་ཀྱི་སྙིང་པོ་དང་དམ་ཚིག་ལ་རྣམ་པར་ལྟ་བ་ཞེས་བྱ་བའི་གཟུངས་རྫོགས་སྷོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། ཤཱི་ལེནྡྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

༄༅། །རྒྱ་གར་སྐད་དུ། ཨཱརྱསརྦ་དུརྒ་ཏི་པ་རི་ཤོ་དྷ་ནི་ཨུཥྞཱི་ཥ་བི་ཛ་ཡ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ངན་འགྲོ་ཐམས་ཅད་ཡོངས་སུ་སྦྱོང་བ་གཙུག་ཏོར་རྣམ་པར་རྒྱལ་བ་ཞེས་བྱ་བའི་གཟུངས། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་
ལ་ཕྱག་འཚལ་ལོ། །དེ་ནས་ལྷའི་བུ་ཤིན་ཏུ་བརྟན་པ་ཞེས་བྱ་བ་ཞིག་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་ཆོས་བཟངས་ལྷའི་འདུན་ས་ན་གནས་ཏེ། ལྷའི་གཞལ་ཡས་ཁང་ཆེན་པོ་ན་ལྷའི་ལོངས་སྤྱོད་ཆེན་པོ་དང་ལྷའི་བུ་མོའི་ཚོགས་ཆེན་པོས་བསྐོར་ནས་རྩེ་དགའ་ཞིང་དགའ་
མགུར་སྤྱོད་དེ། དེ་ལྷའི་ལོངས་སྤྱོད་མྱོང་བ་ལས་མཚན་མོ་སྒྲ་ཞིག་ཐོས་པ་ལྷའི་བུ་ཤིན་ཏུ་བརྟན་པ་ཞག་བདུན་གྱི་ཉིན་པར་འཆི་བའི་དུས་བྱེད་དེ། དེ་འཆི་བའི་དུས་བྱས་ནས་ཀྱང་འཛམ་བུའི་གླིང་དུ་སྐྱེས་ཏེ། དེར་ཡང་འགྲོ་བ་བདུན་པོ་མྱོང་བར་འགྱུར་རོ། །འགྲོ་བ་བདུན་པོ་
མྱོང་ནས་སེམས་ཅན་དམྱལ་བར་སྐྱེ་བར་འགྱུར་རོ། །བརྒྱ་ལ་ནམ་ཞིག་མིར་སྐྱེས་པར་གྱུར་ན་ཡང་དེར་དེ་དབུལ་པོར་འགྱུར་ཞིང་དམུས་ལོང་དུ་འགྱུར་རོ་ཞེས་དེས་ཐོས་སོ། །དེ་ནས་ལྷའི་བུ་དེས་སྒྲ་དེ་ཐོས་ནས་འཇིགས་སྐྲག་དངངས་ཏེ་སྤུ་ཟིང་ཞེས་བྱེད་པར་གྱུར་ནས། དེ་རིངས་པ་རིངས་པར་
ལྷའི་དབང་པོ་བརྒྱ་བྱིན་ག་ལ་བ་དེར་སོང་སྟེ་ཕྱིན་ནས་དེ་ནས་ལྷའི་དབང་པོ་བརྒྱ་བྱིན་གྱི་རྐང་པ་ལ་ཕྱག་འཚལ་ཏེ། བརྟབས་པར་སྨྲ་ཞིང་དེ་ཀྱི་ཧུད་ཀྱི་ཧུད་ཅེས་སྨྲེ་སྔགས་འདོན་བཞིན་དུ་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ལྷའི་དབང་པོ་གསན་དུ་གསོལ། ལྷའི་
དབང་པོ་བདག་དེང་ལྷའི་བུ་མོའི་ཚོགས་ཀྱིས་བསྐོར་ཏེ། ལྷའི་ལོངས་སྤྱོད་ཀྱི་དགའ་བས་རྩེ་ཞིང་བདེ་བ་མྱོང་བ་ལས་སྒྲ་ཞིག་ཐོས་པ། ལྷའི་བུ་ཤིན་ཏུ་བརྟན་པ་ཞག་བདུན་ན་འཆི་བའི་དུས་བྱེད་པར་འགྱུར་ཏེ་འཛམ་བུའི་གླིང་དུ་སྐྱེ་བར་འགྱུར་རོ། །དེར་ཡང་འགྲོ་བ་བདུན་མྱོང་
ནས་སེམས་ཅན་དམྱལ་བར་སྐྱེ་བར་འགྱུར་རོ། །བརྒྱ་ལ་ནམ་ཞིག་མིར་སྐྱེས་པར་གྱུར་ན་ཡང་དེར་དེ་དབུལ་པོར་འགྱུར་ཞིང་དམུས་ལོང་དུ་འགྱུར་རོ་ཞེས་ཐོས་ན། ལྷའི་དབང་པོ་དེ་ལ་བདག་གིས་ཇི་ལྟར་བསྒྲུབ་པར་བགྱི། དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་ཤིན་ཏུ་

བརྟན་པའི་ཚིག་དེ་ཐོས་ནས་ཤིན་ཏུ་ངོ་མཚར་དུ་འཛིན་པར་འགྱུར་ཏེ། ལྷའི་བུ་འདིས་འགྲོ་བ་བདུན་པོ་གང་དག་མྱོང་བར་འགྱུར་སྙམ་དུ་སེམས་ཤིང་ཅང་མི་སྨྲ་བར་འདུག་པ་དང་། འགྲོ་བ་བདུན་ནི་ཕག་གི་སྐྱེ་གནས་དང་། ཁྱི་དང་། ཝ་དང་། སྤྲེའུ་དང་། སྦྲུལ་གདུག་པ་
དང་། བྱ་རྒོད་དང་། བྱ་ཁྭ་སྟེ། འགྲོ་བ་བདུན་པོ་དེ་དག་ཤིན་ཏུ་མི་གཙང་བ་ཟ་བ་མྱོང་བར་འགྱུར་བ་མཐོང་ངོ་། །དེ་ནས་ལྷའི་དབང་པོ་བརྒྱ་བྱིན་གྱིས་འགྲོ་བ་བདུན་པོ་དེ་དག་མཐོང་ནས་འདི་སྙམ་དུ་ཨེ་མ་ལྷའི་བུ་འདི་སྡུག་བསྔལ་མི་བཟད་པ་ཆེན་པོ་མྱོང་བར་འགྱུར་ན། དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་གཏོགས་པར་དེའི་སྐྱབས་དང་། རྟེན་དང་། དཔུང་གཉེན་དུ་འགྱུར་བ་སུ་ཡོད་སྙམ་དུ་བསམས་སོ། །དེ་ནས་ལྷའི་དབང་པོ་བརྒྱ་བྱིན་ནུབ་མོ་དེའི་སྲོད་ལ་སྤོས་དང་། མེ་ཏོག་
དང་། བདུག་པ་སྣ་ཚོགས་དང་། གོས་དང་། རྒྱན་སྣ་ཚོགས་ལ་སོགས་པ་ཁྱེར་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ལན་བདུན་བསྐོར་བ་བྱས་ཏེ། བཅོམ་ལྡན་
འདས་ཀྱི་སྤྱན་སྔར་འདུག་ནས་ལྷའི་བུ་ཤིན་ཏུ་བརྟན་པའི་འགྲོ་བ་བདུན་པོ་དག་བཅོམ་ལྡན་འདས་ལ་ཞིབ་ཏུ་གསོལ་ཏོ། །ལྷའི་དབང་པོ་བརྒྱ་བྱིན་གྱིས་འགྲོ་བ་བདུན་པོ་དེ་དག་གསོལ་མ་ཐག་ཏུ། དེ་ནས་བཅོམ་ལྡན་འདས་ཀྱི་གཙུག་ཏོར་ནས་འོད་ཟེར་སྣ་ཚོགས་བྱུང་སྟེ།
དེས་ཕྱོགས་བཅུའི་འཇིག་རྟེན་གྱི་ཁམས་ཀྱི་གནས་ཐམས་ཅད་ཀུན་ནས་སྣང་བར་བྱས་ཏེ་སླར་ལོག་ནས་བཅོམ་ལྡན་འདས་ཀྱི་ཞལ་གྱི་སྒོར་ཞུགས་སོ། །དེ་ནས་བཅོམ་ལྡན་འདས་ཀྱིས་འཛུམ་པ་མཛད་ནས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །
ལྷའི་དབང་པོ་གཙུག་ཏོར་རྣམ་པར་རྒྱལ་བ་ཞེས་བྱ་བའི་གཟུངས་དེ་བཞིན་གཤེགས་པས་སྤྱི་བོ་ནས་དབང་བསྐུར་བ། ངན་འགྲོ་ཐམས་ཅད་ཡོངས་སུ་སྦྱོང་བ། སྒྲིབ་པ་དང་། སྡུག་བསྔལ་བར་སྐྱེ་བ་ཐམས་ཅད་འཇིག་པར་བྱེད་པ། སེམས་ཅན་དམྱལ་བ་

དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་ཐམས་ཅད་ཡོངས་སུ་སྦྱོང་བ། བདེ་འགྲོའི་ལམ་དུ་འཇོག་པ་ཡོད་དེ། ལྷའི་དབང་པོ་དེ་ལྟ་བས་ན་གཙུག་ཏོར་རྣམ་པར་རྒྱལ་བ་ཞེས་བྱ་བའི་གཟུངས་ངན་འགྲོ་ཐམས་ཅད་ཡོངས་སུ་
སྦྱོང་བ་ཐོས་མ་ཐག་ཏུ་སྒྲིབ་པར་འགྱུར་བའི་སྡུག་བསྔལ་གྱི་རང་བཞིན་སྣ་ཚོགས་ཤིན་ཏུ་མང་པོ་འཇིག་པར་བྱེད་དོ། །སྐྱེ་བ་ཡོངས་སུ་དག་པའི་རྒྱུད་ཐོབ་པར་འགྱུར་རོ། །ཚེ་རབས་ཐམས་ཅད་དུ་ཡང་ཚེ་རབས་དྲན་པར་འགྱུར་རོ། །སངས་རྒྱས་ཀྱི་ཞིང་ནས་སངས་
རྒྱས་ཀྱི་ཞིང་དུ་འགྲོ་བར་འགྱུར་རོ། །ལྷའི་འཇིག་རྟེན་ནས་ལྷའི་འཇིག་རྟེན་དུ་འགྲོ་བར་འགྱུར་ཏེ། ལྷའི་གནས་སུམ་ཅུ་རྩ་གཉིས་ཀྱི་བར་དུ་འགྲོ་བར་འགྱུར་རོ། །ལྷའི་དབང་པོ་དེ་བརྗོད་མ་ཐག་ཏུ་ཚེ་ཟད་པ་ཡང་ཚེ་ཕྱིར་ནུར་བར་འགྱུར་བའི་ལས་ཐོབ་པར་འགྱུར་རོ། །
ལུས་དང་ངག་དང་ཡིད་ཀྱི་ལས་ཡོངས་སུ་དག་པ་བསགས་པ་བདེ་བར་རེག་པ་ལ་གནས་པས་གནས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱང་དེ་ལ་གཟིགས་སོ། །དེ་དག་དེ་ལ་རྟག་ཏུ་རྒྱུན་མི་འཆད་པར་བསྲུང་བ་དང་། བསྐྱབ་པ་དང་། སྦ་
བ་མཛད་པར་འགྱུར་རོ། །བྱང་ཆུབ་སེམས་དཔའ་ཐམས་ཅད་ཀྱང་དེ་ལ་སེམས་པར་འགྱུར། བརྗོད་པ་ཙམ་གྱིས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་ཡི་དགས་ཀྱི་ཡུལ་ཐམས་ཅད་སྐེམས་པར་འགྱུར། རྣམ་
པར་འཇིག་པར་འགྱུར་རྣམ་པར་འཐོར་བར་འགྱུར། རྣམ་པར་སེལ་བར་འགྱུར། སྟོངས་པར་འགྱུར་རོ། །དེ་ལྟར་དེ་ལ་སངས་རྒྱས་ཀྱི་ཞིང་ཐམས་ཅད་དང་། ལྷའི་གནས་ཐམས་ཅད་དང་། བྱང་ཆུབ་སེམས་དཔའི་གནས་ཐམས་ཅད་ཀྱི་སྒོ་རྣམས་ཕྱེ་བར་འགྱུར་
རོ། །དེ་གང་འདོད་པ་དེར་འཇུག་པར་འགྱུར་རོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་དེ་བཀའ་སྩལ་དུ་གསོལ། སེམས་ཅན་ཐམས་ཅད་ཀྱི་སྲོག་ལ་སྨན་གདགས་པ་བཤད་དུ་

གསོལ། དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་གྱིས་གསོལ་བ་བཏབ་པ་མཁྱེན་ནས་གཟུངས་འདི་དག་བཀའ་སྩལ་ཏོ། །ཨོྃ་ན་མོ་བྷ་ག་ཝ་ཏེ་སརྦ་ཏྲཻ་ལོ་ཀྱ་པྲ་ཏི་བིཥཥྚཱི་ཡ་བུདྡྷཱ་ཡ་ཏེ་ན་མཿ ཏདྱ་ཐཱ། ཨོྃ་བྷྲཱུྃ་བྷྲཱུྃ་བྷྲཱུྃ། ཤོདྷ་ཡ་ཤོདྷ་ཡ། བི་ཤོདྷ་ཡ།
བི་ཤོ་དྷ་ཡ། ཨ་ས་མ་ས་མནྟ། ཨ་བ་བྷཱ་ས་སྥ་ར་ཎ་ག་ཏི། ག་ག་ན་སྭ་བྷཱ་བ་བི་ཤུདྡྷེ། ཨུ་ཥྞཱི་ཥ་བི་ཛ་ཡ་པ་རི་ཤུདྡྷེ། ཨ་བྷི་ཥིཉྩནྟུ་མཱྃ། སརྦ་ཏ་ཐཱ་ག་ཏ་སུ་ག་ཏ་བ་ར་བཱ་ཙ་ན། ཨ་མྲྀ་ཏ། ཨ་བྷི་ཥེ་ཀཻ་ར། མ་ཧཱ་མུ་དྲ། མནྷ་པ་དཻཿཨཱ་ཧ་ར་
ཨཱ་ཧ་ར། མ་མ་ཨཱ་ཡུཿསནྡྷ་ར་ཎི། ཤོ་དྷ་ཡ་ཤོ་དྷ་ཡ། བི་ཤོ་དྷྲ་ཡ་བི་ཤོ་དྷ་ཡ། ག་ག་ན་སྭ་བྷཱ་ཝ་བི་ཤུདྡྷེ། ཨུཥྞཱི་ཥ་བི་ཛ་ཡ་བ་རི་ཤུདྡྷེ། ས་ཧ་སྲ་ར་སྨིས་ཉྩོ་དི་ཏེ། སརྦ་ཏ་ཐཱ་ག་ཏ་ཨ་ཝ་ལོ་ཀི་ནི། ཥཊ་པཱ་ར་མི་ཏཱ་པ་རི་པཱུ་ར་ཎི། སརྦ་ཏེ་ཐཱ་ག་ཏཱ་མཱ་ཏེ་ད་
ཤ་བྷཱུ་མི་བྲ་ཏིཥྛི་ཏེ། སརྦ་ཏ་ཐཱ་ག་ཏཱ་ཧྲྀ་ད་ཡ་ཨ་དྷི་ཥྵཱ་ན་ཨ་དྷི་ཥྛི་ཏེ། མུ་དྲེ་མུ་དྲེ། མ་ཧཱ་མུ་དྲེ། བཛྲ་ཀཱ་ཡ་སཾ་ཧ་ཏི་ན་པ་རི་ཤུདྡྷེ། སརྦ་ཀརྨ་ཨཱ་ཝ་ར་ཎ་བི་ཤུདྡྷེ། པྲ་ཏི་ནི་བརྟ་ཡ། མ་མ་ཨཱ་ཡུ་ར་བི་ཤུདྡྷེ། སརྦ་ཏ་ཐཱ་ག་ཏཱ་ས་མ་ཡ་ཨ་དྷིཥྛཱ་ན་ཨ་དྷི་ཥྛི་ཏེ། ཨོཾ་མུ་
ནེ་མུ་ནི། མ་ཧཱ་མུ་ནེ། བི་མུ་ནི་བི་མུ་ནི། མ་ཧཱ་བི་མུ་ནི། མ་ཏི་མ་ཏི། མ་ཧཱ་མ་ཏི། མ་མ་ཏི། སུ་མ་ཏི། ཏ་ཐཱ་ཏཱ། བྷཱུ་ཏ་ཀོ་ཊི། པ་རི་ཤུདྡྷེ། བི་སྥུ་ཊ། བུདྡྷེ་ཤུདྡྷེ། ཧེ་ཧེ། ཛ་ཡ་ཛ་ཡ། བི་ཛ་ཡ་བི་ཛ་ཡ། སྨ་ར་སྨ་ར། སྥ་ར་སྥ་ར།
སྥཱ་ར་ཡ་སྥཱ་ར་ཡ། སརྦ་བུདྡྷ། ཨ་དྷི་ཥྛ་ན་ཨ་དྷི་ཥྛི་ཏེ། ཤུདྡྷེ། ཤུདྡྷེ། བུདྡྷེ། བུདྡྷེ། བཛྲེ་བཛྲེ། མ་ཧཱ་བཛྲེ། སུ་བཛྲེ། བཛྲ་གརྦྷེ། ཛ་ཡ་གརྦྷེ། བི་ཛ་ཡ་གརྦྷེ། བཛྲ་ཛྭཱ་ལ་གརྦྷེ། བཛྲ་ཨུད་བྷ་བེ། བཛྲ་སཾ་བྷ་བེ། བཛྲེ་བཛྲི་ཎི།
བཛྲེམྦྷ་བ་ཏུ། མ་མ་ཤ་རཱི་རྃ་སརྦ་ས་ཏྭཱ་ནཱཉྩ་ཀཱ་ཡ་པ་རི་ཤུདྡྷིར་བྷ་བ་ཏུ། མ་དཱ་མེ་སརྦ་ག་ཏི་པ་རི་ཤུདྡྷི་ཤྩ། སརྦ་ཏ་ཐཱ་ག་ཏས་མ་ཡ་ཨ་དྷིཥྛཱ་ན་ཨ་དྷིཥྛི་ཏེ། སརྦ་ཏ་ཐཱ་ག་ཏཱ་ཤྩ་མཱཾ་ས་མཱ་སྭཱ་ས་ཡནྟུ། བུདྡྷ། བུདྡྷ། སིད་དྷྱ་སིད་དྷྱ། བོ་དྷ་ཡ་བོ་དྷ་ཡ། བི་བོ་

དྷ་ཡ་བི་བོ་དྷ་ཡ། མོ་ཙ་ཡ་མོ་ཙ་ཡ། བི་མོ་ཙ་ཡ་བི་མེ་ཙ་ཡ། ཤོ་དྷ་ཡ་ཤོ་དྷ་ཡ། བི་ཤོ་དྷ་ཡ་བི་ཤོ་དྷ་ཡ། ས་མནྟ་ན་མོ་ཙ་ཡ་མོ་ཙ་ཡ། ས་མནྟ་ར་སྨི་པ་རི་ཤུདྡྷེ། སརྦ་ཏ་ཐཱ་ག་ཏཱ་ཧྲྀ་ད་ཡ་ཨ་དྷིཥྛ་ན་ཨ་དྷིཥྛི་ཏེ། མུ་དྲེ་མུ་དྲེ། མ་ཧཱ་མུ་དྲེ་མ་
ཧཱ་མུ་དྲཱ་མནྟྲ་པ་དཻཿསྭཱ་ཧཱ། ལྷའི་དབང་པོ་གཙུག་ཏོར་རྣམ་པར་རྒྱལ་བ་ཞེས་བྱ་བའི་གཟུངས་ངན་འགྲོ་ཐམས་ཅད་ཡོངས་སུ་སྦྱོང་བ། སྡིག་པ་དང་། ལས་དང་། སྒྲིབ་པ་ཐམས་ཅད་རྣམ་པར་སྦྱོང་བ། བདེ་འགྲོའི་ལམ་ཐམས་ཅད་དུ་འགྲོ་བ་དང་། ངན་
འགྲོ་ཐམས་ཅད་རྣམ་པར་འཇིག་པར་བྱེད་པ་འདི་ནི་སངས་རྒྱས་བཅོམ་ལྡན་འདས་གང་གཱའི་ཀླུང་འབུམ་ཕྲག་བྱེ་བ་ཕྲག་བརྒྱད་ཅུ་རྩ་བརྒྱད་ཀྱི་བྱེ་མ་སྙེད་དག་གིས་གསུངས་པ། བྱིན་གྱིས་བརླབས་པ་རྗེས་སུ་ཡི་རང་བར་མཛད་པ། དེ་བཞིན་གཤེགས་པ་ཐམས་ཅད་
ཀྱི་ཡེ་ཤེས་ཀྱི་ཕྱག་རྒྱས་བཏབ་པ་སྟེ། སེམས་ཅན་ཐམས་ཅད་བདེ་འགྲོར་འགྲོ་བར་བྱ་བ་དང་། ངན་འགྲོར་ལྷུང་བ་རྣམས་བཟློག་པ་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ལ་སོགས་པ་སྡུག་
བསྔལ་གྱི་གནས་ཐམས་ཅད་དུ་སྡུག་བསྔལ་ཞིང་ཉམ་ང་བར་གྱུར་པ་རྣམས་དང་། སྡུག་བསྔལ་གྱི་རྒྱ་མཚོར་ལྷུང་བའི་སེམས་ཅན་རྣམས་རྣམ་པར་གྲོལ་བར་བྱ་བའི་ཕྱིར་གསུངས་པའོ། །དེ་བཞིན་དུ་སེམས་ཅན་ཚེ་ཐུང་ཞིང་སྐལ་བ་ཆུང་བ། སྨད་པ་དང་།
བསམ་པ་ཉམས་པ་དང་། སེམས་ཅན་ལམ་ལས་ཉམས་པ་རྣམས་ཀྱི་དོན་དུ་གཟུངས་འདི་འཛམ་བུའི་གླིང་དུ་གཞག་གོ། །ལྷའི་དབང་པོ་ཁྱོད་ཀྱིས་གཟུངས་འདི་ཟུང་ལ་ལྷའི་བུ་ཤིན་ཏུ་བརྟན་པ་ལ་སྒྲོགས་ཤིག །བསྒྲགས་ནས་ཀྱང་གདོན་པ་དང་། ཁ་ཏོན་
དུ་བྱ་བ་དང་། བསམ་པ་དང་། བསྒོམ་པ་དང་། དྲན་པར་བྱ་བ་དང་། མཆོད་པ་དང་། གཟུང་བ་དང་། ཀུན་ཆུབ་པར་བྱ་བ་ལ་དེ་སྦྱོར་བར་གྱིས་ཤིག་དང་། དེ་ལྟར་ལྷའི་གནས་ཐམས་ཅད་ན་འཁོད་པའི་ལྷའི་བུ་རྣམས་དང་། འཛམ་བུའི་གླིང་

པའི་སེམས་ཅན་རྣམས་ཀྱི་དོན་དང་། ཕན་པ་དང་། བདེ་བའི་ཕྱིར་གཟུངས་ཀྱི་ཕྱག་རྒྱ་དང་། གསང་སྔགས་འདི་དག་ཁྱོད་ལ་གཏད་དོ། །དེའི་ཕྱིར་ལྷའི་དབང་པོ་ཁྱོད་ཀྱིས་གཟུང་བར་བྱའོ། །ལྷའི་དབང་པོ་གཟུངས་འདི་ཐོས་མ་ཐག་ཏུ་བསྐལ་པ་བརྒྱ་སྟོང་དུ་
བསགས་པའི་ལས་ཀྱི་སྒྲིབ་པ་ཡོངས་སུ་བྱང་བར་འགྱུར་རོ། །སྐྱེ་བར་སྐྱེ་བ་རྣམ་པ་སྣ་ཚོགས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ཡི་དགས་ཀྱི་ཡུལ་དང་། ལྷ་མ་ཡིན་གྱི་རིས་དང་། འདི་ལྟ་སྟེ།
གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། སྲུལ་པོ་དང་། ལུས་སྲུལ་པོ་དང་། བརྗེད་བྱེད་དང་། ཁྱི་དང་། རུས་སྦལ་དང་། སྦྲུལ་དང་། གཅན་གཟན་ཁྲོ་བོ་དང་། བྱ་དང་། སྦྲང་བུ་དང་། སྦྲང་མ་དང་།
སྡིག་སྦྲུལ་དང་། གྲོག་སྦུར་ལ་སོགས་པའི་སྲོག་ཆགས་ཀྱི་རིགས་སུ་ཕྱིས་མི་སྐྱེ་བར་ཤེས་པར་བྱའོ། །གཞན་དུ་ན་དེ་བཞིན་གཤེགས་པ་དང་ཕྲད་པ་དང་། བྱང་ཆུབ་སེམས་དཔའི་རིགས་སུ་སྐྱེ་བ་ནི་མ་གཏོགས་སོ། །དེ་རིགས་ཆེན་པོ་འདི་ལྟ་སྟེ། བྲམ་
ཟེའི་རིགས་ཤིང་སཱ་ལ་ཆེན་པོ་ལྟ་བུའམ། རྒྱལ་རིགས་ཤིང་སཱ་ལ་ཆེན་པོ་ལྟ་བུའམ། ཚོང་དཔོན་གྱི་རིགས་ཤིང་སཱ་ལ་ཆེན་པོ་ལྟ་བུར་སྐྱེའོ་ཞེས་ང་སྨྲའོ། །ལྷའི་དབང་པོ་དེ་ལྟར་ན་གཟུངས་འདིའི་མཐུས་བྱང་ཆུབ་ཀྱི་སྙིང་པོ་ལ་མཐར་ཐུག་གི་བར་དུ་སྐྱེ་བ་ཡོངས་སུ་
དག་པ་ཆེན་པོ་འཐོབ་སྟེ། ལྷའི་དབང་པོ་གཟུངས་འདི་ནི་དེ་ལྟར་མཐུ་ཆེ་སྟེ། ལྷའི་དབང་པོ་གཟུངས་འདི་ནི་དེ་ལྟར་མཐུ་ཆེ་བ། ཕན་ཡོན་ཆེ་བ། མཐུ་སྟོབས་ཆེ་བ། དགེ་ཞིང་ཤིས་པ་ཡིན་ཏེ། ལྷའི་དབང་པོ་སེམས་ཅན་རྣམས་ཀྱི་དོན་གྱི་ཕྱིར་གཙུག་ཏོར་
རྣམ་པར་རྒྱལ་བ་ཞེས་བྱ་བའི་གཟུངས་ངན་འགྲོ་ཐམས་ཅད་ཡོངས་སུ་སྦྱོང་བ་འདི་བཞག་གོ། །འདི་ལྟ་སྟེ། དཔེར་ན་ནོར་བུ་རིན་པོ་ཆེ་ཉི་མའི་སྙིང་པོ་ཤིན་ཏུ་དྲི་མ་མེད་པ་ནམ་མཁའ་ལྟར་ཡོངས་སུ་དག་པ་འོད་གསལ་བ་ནི་འོད་ཟེར་གྱི་སྣང་བས་འབར་ཞིང་འདུག་

གོ། །ལྷའི་དབང་པོ་དེ་བཞིན་དུ་སེམས་ཅན་དེ་ཡང་གོས་པ་མེད་པར་ཤེས་པར་བྱའོ། །འདི་ལྟ་སྟེ། དཔེར་ན་འཛམ་བུ་ཆུ་བོའི་གསེར་ནི་དྲི་མ་མེད་པ་ཤིན་ཏུ་ཡོངས་སུ་དག་པ་ཤིན་ཏུ་མཉེན་པ་ཤིན་ཏུ་སྡུག་པའོ། །ལྷའི་དབང་པོ་དེ་བཞིན་
དུ་སེམས་ཅན་དེ་ཡང་ཤིན་ཏུ་ཡོངས་སུ་དག་པར་རིག་པར་བྱ་སྟེ། ཚེ་རབས་གཞན་དུ་ཡང་དེ་བཞིན་དུ་སྐྱེ་བར་འགྱུར་རོ། །ལྷའི་དབང་པོ་གང་ན་གཟུངས་འདི་རབ་ཏུ་སྟོན་པ་དང་། བྱེ་བྲག་ཏུ་ན་ཡི་གེར་འདྲིར་འཇུག་པ་དང་། འཛིན་པ་དང་། ཀློག་པ་དང་།
འདོན་པ་དང་། ཁ་ཏོན་དུ་བྱེད་པ་དང་། མཆོད་པ་དང་། ཀུན་ཆུབ་པར་བྱེད་པ་དང་། ཉན་པ་དང་། འཛིན་པར་འགྱུར་བ་དེར་འགྲོ་བ་ཐམས་ཅད་ཡོངས་སུ་དག་པར་འགྱུར། སེམས་ཅན་དམྱལ་བ་ཐམས་ཅད་རྒྱུན་ཆད་པར་འགྱུར་རོ། །ལྷའི་དབང་
པོ་གཟུངས་འདི་ཡི་གེར་བྲིས་ཏེ་རྒྱལ་མཚན་གྱི་རྩེ་མོར་གཞག་པར་བྱ། རི་མཐོན་པོའམ། ཁང་པ་མཐོན་པོའམ། མཆོད་རྟེན་གྱི་སྲོག་ཤིང་གི་སྟེང་དུ་གཞག་པར་བྱའོ། །ལྷའི་དབང་པོ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་
བསྙེན་མའམ། དེ་ལས་གཞན་པའི་རིགས་ཀྱི་བུའམ། རིགས་ཀྱི་བུ་མོ་གང་གིས་རྒྱལ་མཚན་གྱི་རྩེ་མོར་གཞག་པ་མཐོང་ངམ། དེ་དང་དེ་ཉེ་བར་གནས་པར་གྱུར་ན། ཐ་ན་དེའི་གྲིབ་མས་ཕོག་གམ། དེའི་རྡུལ་རླུང་གིས་བཏབ་པས་ཕོག་ན་ཡང་ལྷའི་
དབང་པོ་སེམས་ཅན་དེ་ལ་སྡིག་པ་ཐམས་ཅད་དང་། ངན་འགྲོར་འགྲོ་བའི་འཇིགས་པ་ཐམས་ཅད་མི་འབྱུང་ངོ་། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ཡི་དགས་དང་། ལྷ་མ་ཡིན་གྱི་རིས་ཐམས་
ཅད་དུ་མི་སྐྱེ་བར་འགྱུར་རོ། །ལྷའི་དབང་པོ་སེམས་ཅན་དེ་ནི་དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་རིག་པར་བྱའོ། །ལྷའི་དབང་པོ་མཆོད་པ་དང་། རིམ་གྲོ་བྱེད་ཅིང་

མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དང་། སྤོས་དང་། རྒྱན་རྣམས་ཀྱིས་བརྒྱན་པར་བྱེད་པ་དང་། ལམ་གྱི་བཞི་མདོར་མཆོད་རྟེན་བྱས་ཏེ། གཟུངས་འདི་
བཞག་པ་ལ་ཐལ་མོ་སྦྱོར་བའམ་ཕྱག་འཚལ་བའམ། བསྐོར་བ་བྱེད་པ་ལྟ་ཅི་སྨོས་ཏེ། ལྷའི་དབང་པོ་སེམས་ཅན་དེ་ནི་སེམས་ཅན་ཆེན་པོར་རིག་པར་བྱའོ། །དེ་བཞིན་གཤེགས་པའི་སྲས་སུ་རིག་པར་བྱའོ། །ཆོས་ཀྱི་གནས་སུ་རིག་པར་བྱའོ། །དེ་བཞིན་
གཤེགས་པའི་མཆོད་རྟེན་དུ་རིག་པར་བྱའོ། །དེ་ནས་ཆོས་ཀྱི་རྒྱལ་པོ་གཤིན་རྗེ་ནུབ་མོ་ནམ་ལངས་ནས། བཅོམ་ལྡན་འདས་ག་ལ་བ་དེར་སོང་སྟེ། བཅོམ་ལྡན་འདས་ལ་ལྷའི་མེ་ཏོག་དང་། གོས་དང་། རྒྱན་ལ་སོགས་པས་མཆོད་པ་དང་། བསྟི་སྟང་བྱས་
ནས། དེས་བཅོམ་ལྡན་འདས་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ཀྱི་ཞབས་ལ་གཏུགས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་འདི་ནི་མཐུ་ཆེ་ཞིང་ཕན་ཡོན་ཆེ་བ་ལགས་ཏེ། བཅོམ་ལྡན་འདས་བདག་ཀྱང་རྟག་ཏུ་
རྒྱུན་མི་འཆད་པར་སེམས་ཅན་དེའི་སླད་བཞིན་དུ་འབྲང་ཞིང་ཀུན་དུ་བསྲུང་བ་དང་། ཡོངས་སུ་བསྐྱབ་པའི་སླད་དུ་གནས་པར་བགྱིའོ། །སེམས་ཅན་དམྱལ་བ་ཐམས་ཅད་ལས་དེ་བཟློག་པར་བགྱིའོ། །བཅོམ་ལྡན་འདས་བདག་ནི་བྱས་པ་གཟོ་བར་བགྱིད་ཅིང་།
བྱས་པ་མི་གཟོ་བར་མི་བགྱིད་དོ། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་འདིའི་ཆོ་ག་ཞིབ་མོ་དང་། བགྱི་བའི་ཆོ་གའི་ཚུལ་རྒྱས་པར་
བཤད་དུ་གསོལ། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་པོ་དག་ལ་འདི་སྐད་ཅེས་བཀའ་སྩལ་ཏོ། །ཉོན་ཅིག་དང་གཟུངས་འདིའི་བྱ་བའི་ཚུལ་བཤད་པར་བྱའོ། །སེམས་ཅན་ཚེ་ཐུང་བའི་དོན་གྱི་ཕྱིར་རིགས་ཀྱི་བུའམ། རིགས་ཀྱི་བུ་མོས་ཚེས་

བཅྭ་ལྔ་ཟླ་བ་ཉ་བ་ལ་ཁྲུས་བྱས་ཏེ་ལན་སྟོང་རྩ་བརྒྱད་བཟླས་བརྗོད་བྱས་ན། དེས་སེམས་ཅན་ཚེ་ཟད་པ་དེའི་ཚེ་ཕྱིར་ནུར་ནས་ནད་ཐམས་ཅད་དང་བྲལ་བར་འགྱུར་རོ། །སྒྲིབ་པ་ཐམས་ཅད་རྣམ་པར་དག་པ་ཐོབ་པར་འགྱུར་རོ། །སེམས་ཅན་
དམྱལ་བ་ལ་སོགས་པ་ངན་འགྲོ་ཐམས་ཅད་ལས་ཡོངས་སུ་ཐར་བར་འགྱུར་རོ། །ཐ་ན་དུད་འགྲོའི་སྐྱེ་གནས་སུ་སོང་བའི་སྲོག་ཆགས་བྱའི་རྣ་ལམ་དུ་གཟུངས་འདིའི་སྒྲ་བསྒྲགས་པར་བྱ་སྟེ། དེས་ནི་དེའི་ངན་འགྲོའི་ཐ་མ་ཡིན་པར་རིག་པར་བྱའོ། །གང་ཞིག་ནད་ཆེན་
པོས་བཏབ་སྟེ་སྨན་པ་རྣམས་ཀྱིས་བྱེ་བྲག་ཕྱེ་བ་དེ་ཡང་ནད་དེ་ལས་ཡོངས་སུ་ཐར་བར་འགྱུར་རོ། །དེའི་ངན་འགྲོར་སྐྱེ་བ་ཐམས་ཅད་ཀྱང་རྒྱུན་ཆད་པར་འགྱུར་རོ། །ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །དེ་ཉིད་དེའི་མངལ་གྱི་
གནས་ཀྱི་ཐ་མ་ཡིན་པར་རིག་པར་བྱའོ། །གང་དང་གང་དུ་སྐྱེས་པ་དེ་དང་དེར་པདྨའི་སྙིང་པོ་ཁོ་ན་ལས་བརྫུས་ཏེ་སྐྱེ་བར་འགྱུར་རོ། །ཚེ་རབས་ཐམས་ཅད་དུ་ཡང་ཚེ་རབས་དྲན་པར་འགྱུར་རོ། །སེམས་ཅན་སྡིག་པ་བྱེད་པ་གང་དག་ཤི་བའི་དུས་བྱས་པ་དེ་དག་གི་
དོན་དུ་གཟུངས་ཡུངས་ཀར་དག་ལ་ལན་ཉི་ཤུ་རྩ་གཅིག་ཡོངས་སུ་བརྗོད་དེ་དེ་དག་གི་རུས་གོང་རྣམས་ཀྱི་སྟེང་དུ་གཏོར་ན་དེ་དག་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་ནམ། ཡི་དགས་སམ། དེ་ལས་གཞན་ངན་འགྲོ་རྣམས་
སུ་སྐྱེས་བར་གྱུར་ཀྱང་རུང་སྟེ། དེ་དག་གཟུངས་འདིའི་མཐུས་ངན་འགྲོ་དེ་དག་ལས་ཐར་བར་འགྱུར་རོ། །དེ་དག་ལས་ཐར་ནས་ཀྱང་ལྷར་སྐྱེ་བར་འགྱུར་རོ། །སུ་ཞིག་འདི་ཉི་མ་གཅིག་བཞིན་དུ་ལན་ཉི་ཤུ་རྩ་རེ་རེ་ཡོངས་སུ་བརྗོད་པ་དེ་འཇིག་རྟེན་མང་པོའི་
མཆོད་པའི་འོས་སུ་འགྱུར་རོ། །ཚེ་རིང་བར་འགྱུར་རོ། །བདེ་བ་མྱོང་བར་འགྱུར་རོ། །རྟག་ཏུ་སྤྲོ་བ་དང་ལྡན་པ་དང་། མྱ་ངན་ལས་འདས་པ་ཆེན་པོ་ཐོབ་པར་འགྱུར་རོ། །ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །དེ་

ནས་ཀྱང་སངས་རྒྱས་ཀྱི་ཞིང་ཐ་དད་པ་སྣ་ཚོགས་སུ་འགྲོ་བར་འགྱུར་རོ། །དེར་ཡང་དེ་བཞིན་གཤེགས་པ་ཐམས་ཅད་དང་ཕྲད་པར་འགྱུར། དེ་བཞིན་གཤེགས་པ་ཐམས་ཅད་ཀྱིས་ཀྱང་དབུགས་འབྱིན་པར་འགྱུར། དེ་བཞིན་གཤེགས་པ་ཐམས་ཅད་ཀྱིས་ལུང་སྟོན་
པར་འགྱུར་རོ། །སངས་རྒྱས་ཀྱི་ཞིང་ཐམས་ཅད་དུ་ཡང་འཇིག་རྟེན་ལ་སྣང་བར་བྱེད་པར་འགྱུར་རོ། །ལྷའི་དབང་པོ་ཐབས་འདིས་ནི་འགྲོ་བ་ཐམས་ཅད་ཀྱང་སེམས་ཅན་དམྱལ་བ་ལ་སོགས་པའི་འགྲོ་བ་ཐམས་ཅད་ལས་ཡོངས་སུ་ཐར་བར་འགྱུར་རོ། །དེ་དག་གི་
འགྲོ་བ་ཐམས་ཅད་ཀྱང་ཡོངས་སུ་དག་ཅིང་ཚེ་རིང་བར་ཡང་འགྱུར་རོ། །ལྷའི་དབང་པོ་སོང་ལ་ལྷའི་བུ་བློ་གྲོས་ཤིན་ཏུ་བརྟན་པ་ལ་གཟུངས་འདི་རྗེས་སུ་སྟོན་ལ་སྒྲོགས་ཤིག །ལྷའི་དབང་བོ་དེས་ན་ཞག་བདུན་ན་ལྷའི་བུ་ཤིན་ཏུ་བརྟན་པའི་འགྲོ་བ་ཐམས་ཅད་ཡོངས་སུ་དག་ཅིང་ཚེ་
རིང་བར་འགྱུར་རོ། །སྟོབས་ཆེ་བར་འགྱུར་རོ། །དེ་ནས་ལྷའི་དབང་པོ་བརྒྱ་བྱིན་གྱིས་དེ་བཞིན་གཤེགས་པ་ལས་རྗེས་སུ་བསྟན་པ་འདི་བླངས་ཏེ། དེའི་གནས་སུ་ཕྱིན་ནས་ལྷའི་བུ་ཤིན་ཏུ་བརྟན་པ་ལ་གཟུངས་འདི་བྱིན་ནོ། །དེ་ནས་ལྷའི་བུ་དེས་ཉི་མ་བདུན་པའི་
བར་དུ་ཉིན་དྲུག་མཚན་དྲུག་ཏུ་གཟུངས་འདི་ལ་བརྩོན་པར་བྱས་པ་ན་དེའི་བསམ་པ་ཐམས་ཅད་ཕུན་སུམ་ཚོགས་པ་འདི་ལྟ་སྟེ། ངན་འགྲོ་ལས་ནི་ཡོངས་སུ་ཐར། བདེ་འགྲོའི་ལམ་ལ་ཡང་གནས་ཚེ་རིང་བར་ཡང་གྱུར་ནས། ཨ་ལ་ལ་སངས་རྒྱས། ཨ་ལ་ལ་ཆོས། ཨ་ལ་ལ་གཟུངས་འདི་ལྟ་བུ་
འཇིག་རྟེན་དུ་བྱུང་སྟེ། དེས་བདག་འཇིགས་པ་ཆེན་པོ་ལས་ཡོངས་སུ་ཐར་བར་གྱུར་ཏོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །འཕགས་པ་ངན་འགྲོ་ཐམས་ཅད་ཡོངས་སུ་སྦྱོང་བ་གཙུག་ཏོར་རྣམ་པར་རྒྱལ་བ་ཞེས་བྱ་བའི་གཟུངས་རྫོགས་སོ།། །།
རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེནྡྲ་བོ་དྷི་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུག་ཏེ་གཏན་ལ་ཕབ་པ།། ༄༅། །རྒྱ་གར་སྐད་དུ། ཨཱརྱ་སརྦ་ཏ་ཐཱ་ག་ཏོཥྞཱི་ཥ་སི་ཏཱ་ཏ་བ་ཏྲཱ་ནཱ་

མ་ཨ་པ་རཱ་ཛི་ཏཱ་བྲ་ཏྱཾ་གི་ར་མ་ཧཱ་བིདྱཱ་རཱ་ཛྙཱི། །བོད་སྐད་དུ། འཕགས་པ་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བའི་གདུགས་དཀར་པོ་ཅན་ཞེས་བྱ་བ་གཞན་གྱིས་མི་ཐུབ་མ་ཕྱིར་ཟློག་པའི་རིག་སྔགས་ཀྱི་རྒྱལ་མོ་ཆེན་མོའོ། །དཀོན་
མཆོག་གསུམ་ལ་ཕྱག་འཚལ་ལོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྷའི་ཡུལ་སུམ་ཅུ་རྩ་གསུམ་གྱི་གནས་ཆོས་བཟངས་ལྷའི་འདུན་ས་ན། དགེ་
སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའི་དགེ་འདུན་ཆེན་པོ་དང་། ལྷ་རྣམས་ཀྱི་དབང་པོ་བརྒྱ་བྱིན་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་གདན་བཤམས་པ་ཉིད་ལ་བཞུགས་ནས། གཙུག་ཏོར་ལ་རྣམ་པར་གཟིགས་པ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་གཙུག་ཏོར་གྱི་གསེབ་ནས་གསང་སྔགས་ཀྱི་གཞི་འདི་དག་བྱུང་ངོ་། །ན་མོ་བྷ་ག་བ་ཏེ་ཨུཥྞཱི་ཥཱ་ཡ་ཤུདྡྷེ་བི་ར་ཛེ་བི་མ་ལེ་སྭཱ་ཧཱ། བཅོམ་ལྡན་འདས་
གཙུག་ཏོར་ཐོགས་པ་མེད་པ་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བདུན་པོ་རྣམས་ལ་ཕྱག་འཚལ་ལོ། །བྱམས་པ་ལ་སོགས་པ་སངས་རྒྱས་དང་།
བྱང་ཆུབ་སེམས་དཔའ་ཉན་ཐོས་ཀྱི་དགེ་འདུན་དང་བཅས་པ་རྣམས་ལ་ཕྱག་འཚལ་ལོ། །འཇིག་རྟེན་ན་དགྲ་བཅོམ་པ་རྣམས་ལ་ཕྱག་འཚལ་ལོ། །རྒྱུན་དུ་ཞུགས་པ་རྣམས་ལ་ཕྱག་འཚལ་ལོ། །ལན་ཅིག་ཕྱིར་འོང་བ་རྣམས་ལ་ཕྱག་འཚལ་ལོ། །ཕྱིར་
མི་འོང་བ་རྣམས་ལ་ཕྱག་འཚལ་ལོ། །འཇིག་རྟེན་ན་ཡང་དག་པར་སོང་བ་རྣམས་ལ་ཕྱག་འཚལ་ལོ། །ཡང་དག་པར་ཞུགས་པ་རྣམས་ལ་ཕྱག་འཚལ་ལོ། །ལྷའི་དྲང་སྲོང་རྣམས་ལ་ཕྱག་འཚལ་ལོ། །རིག་སྔགས་འཆང་གྲུབ་པའི་དྲང་སྲོང་རྣམས་ལ་ཕྱག་

འཚལ་ལོ། །རིག་སྔགས་འཆང་གྲུབ་པའི་དྲང་སྲོང་དམོད་པའི་མཚོན་ཆ་ཅན་དམོད་པས་ཕན་འདོགས་ནུས་པ་རྣམས་ལ་ཕྱག་འཚལ་ལོ། །ལྷ་ཚངས་པ་ལ་ཕྱག་འཚལ་ལོ། །དབང་པོ་ལ་ཕྱག་འཚལ་ལོ། །བཅོམ་ལྡན་འདས་ལེགས་ལྡན་དྲག་པོ་དཀའ་ཐུབ་
ཟློག་མའི་བདག་པོ་དང་ལྷན་ཅིག་པ་ལ་ཕྱག་འཚལ་ལོ། །ཆུ་ལྷ་ལ་ཕྱག་འཚལ་ལོ། །བཅོམ་ལྡན་འདས་ལེགས་ལྡན་སྲེད་མེད་ཀྱི་བུ་ཕྱག་རྒྱ་ཆེན་པོ་ལྔས་ཕྱག་བྱས་པ་ལ་ཕྱག་འཚལ་ལོ། །བཅོམ་ལྡན་འདས་ལེགས་ལྡན་དགའ་བྱེད་དབང་ཕྱུག་ནག་པོ་ཆེན་པོ་
གྲོང་ཁྱེར་སུམ་བརྩེགས་འཇིག་པར་བྱེད་པ་ཁ་ཆེའི་དུར་ཁྲོད་ཆེན་པོ་ན་གནས་པར་མོས་པ་མ་མོའི་ཚོགས་ཀྱིས་ཕྱག་བྱས་པ་དང་ལྷན་ཅིག་པ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པའི་གདུང་ལ་ཕྱག་འཚལ་ལོ། །བཅོམ་ལྡན་འདས་པདྨའི་
གདུང་ལ་ཕྱག་འཚལ་ལོ། །བཅོམ་ལྡན་འདས་རྡོ་རྗེའི་གདུང་ལ་ཕྱག་འཚལ་ལོ། །བཅོམ་ལྡན་འདས་ནོར་བུའི་གདུང་ལ་ཕྱག་འཚལ་ལོ། །བཅོམ་ལྡན་འདས་རྒྱལ་པོའི་གདུང་ལ་ཕྱག་འཚལ་ལོ། །བཅོམ་ལྡན་འདས་ལས་ཀྱི་གདུང་ལ་ཕྱག་འཚལ་ལོ། །
བཅོམ་ལྡན་འདས་རིན་པོ་ཆེའི་གདུང་ལ་ཕྱག་འཚལ་ལོ། །བཅོམ་ལྡན་འདས་གཞོན་ནུའི་གདུང་ལ་ཕྱག་འཚལ་ལོ། །བཅོམ་ལྡན་འདས་གླང་པོའི་གདུང་ལ་ཕྱག་འཚལ་ལོ། །བཅོམ་ལྡན་འདས་གཏི་མུག་གི་གདུང་ལ་ཕྱག་འཚལ་ལོ། །བཅོམ་ལྡན་འདས་
ཆགས་པའི་གདུང་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔའ་བརྟན་པའི་སྡེ་མཚོན་ཆའི་རྒྱལ་པོ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་འོད་དཔག་མེད་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་བསྐྱོད་པ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

སངས་རྒྱས་རྡོ་རྗེ་འཛིན་པ་རྒྱ་མཚོ་འཇོམས་པ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུརྱའི་འོད་ཀྱི་རྒྱལ་པོ་ལ་ཕྱག་འཚལ་ལོ། །བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཡོད་གྲུབ་པ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སཱ་ལའི་དབང་པོའི་རྒྱལ་པོ་མེ་ཏོག་ཤིན་ཏུ་རྒྱས་པ་ལ་
ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་མཆོག་གི་རྒྱལ་པོ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རྣམ་པར་གཟིགས་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཐམས་ཅད་སྐྱོབ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལོག་པར་དད་སེལ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་གསེར་ཐུབ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་ཟླ་བ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་

པར་རྫོགས་པའི་སངས་རྒྱས་རིན་པོ་ཆེ་ཏོག་གི་རྒྱལ་པོ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་དུ་བཟང་པོ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་རྒྱས་པ་དང་ཨུཏྤ་ལའི་དྲིའི་ཏོག་གི་རྒྱལ་པོ་ལ་ཕྱག་འཚལ་
ལོ། །དེ་རྣམས་ལ་ཕྱག་འཚལ་ནས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་གདུགས་དཀར་པོ་ཅན་ཞེས་བྱ་བ་གཞན་གྱིས་མི་ཐུབ་མ་ཕྱིར་ཟློག་པའི་རིག་སྔགས་ཀྱི་རྒྱལ་མོ་འདི་རབ་ཏུ་བརྗོད་པར་བྱའོ། །འཐབ་པ་
དང་འཐབ་མོ་དང་རྩོད་པ་དང་འགྱེད་པ་ཐམས་ཅད་རབ་ཏུ་འཇོམས་པར་བྱེད་པ། འབྱུང་པོ་དང་གདོན་ཐམས་ཅད་ཟློག་པར་བྱེད་པ། ཕ་རོལ་གྱི་རིག་སྔགས་ཐམས་ཅད་གཅོད་པར་བྱེད་པ། དུས་མ་ཡིན་པར་འཆི་བ་ལས་ཡོངས་སུ་སྐྱོབ་པ། སེམས་ཅན་
བཅིངས་པ་ཐམས་ཅད་ཐར་བར་བྱེད་པ། སྡང་བ་དང་རྨི་ལམ་ངན་པ་ཐམས་ཅད་འཇོམས་པར་བྱེད་པ། གནོད་སྦྱིན་དང་སྲིན་པོའི་གདོན་ཐམས་ཅད་རྣམ་པར་རླག་པར་བྱེད་པ། གདོན་སྟོང་ཕྲག་བརྒྱད་ཅུ་རྩ་བཞི་པོ་རྣམས་རྣམ་པར་འཇོམས་པར་བྱེད་པ། རྒྱུ་
སྐར་ཉི་ཤུ་རྩ་བརྒྱད་རབ་ཏུ་སྒྲུབ་པར་བྱེད་པ། དགྲ་ཐམས་ཅད་ཟློག་པར་བྱེད་པ། གཟའ་ཆེན་པོ་བརྒྱད་རྣམ་པར་རླག་པར་བྱེད་པ། སྡང་བ་དང་དྲག་པོ་དང་རྨི་ལམ་ངན་པ་རྣམས་རྣམ་པར་འཇོམས་པར་བྱེད་པ། དུག་དང་མཚོན་དང་མེ་དང་ཆུ་ལས་སྐྱོབ་པར་
བྱེད་པ། ངན་འགྲོའི་འཇིགས་པ་ཐམས་ཅད་ལས་སྒྲོལ་བ། དུས་མ་ཡིན་པར་འཆི་བ་བརྒྱད་ཀྱི་བར་དུ་ཡོངས་སུ་སྐྱོབ་པར་བྱེད་པ་སྟེ། གཞན་གྱིས་མི་ཐུབ་དྲག་ཤུལ་ཆེ། །སྟོབས་ཆེན་གཟི་བརྗིད་ཆེན་མོ་སྟེ། །གཏུམ་པོ་ཆེན་མོ་དཀར་མོ་ཆེ། །

གསལ་བ་ཆེན་མོ་སྟོབས་ཆེན་མོ། །འབར་བ་ཆེན་མོ་ཕྲེང་བ་ཆེ། །གོས་དཀར་མོ་ནི་ཆེན་མོ་སྟེ། །འཕགས་མ་སྒྲོལ་མ་ཁྲོ་གཉེར་ཅན། །རྡོ་རྗེ་ཕྲེང་བ་རྣམ་བསྒྱིངས་མ། །པདྨའི་སྣང་བ་རྡོ་རྗེའི་མཚན། །གཞན་གྱིས་མི་ཐུབ་
ཕྲེང་བ་ཅན། །རྡོ་རྗེ་ཁར་བསྣམས་འཇོམས་པ་མོ། །ཞི་བའི་ལྷ་རྣམས་ཀྱིས་མཆོད་པ། །གཟུགས་ཞི་དཀར་མོ་ཆེན་མོ་སྟེ། །འབར་བ་དང་ནི་གོས་དཀར་མོ། །འཕགས་མ་སྒྲོལ་མ་སྟོབས་ཆེན་མོ། །འཆི་མེད་རྡོ་རྗེ་ལུ་གུ་རྒྱུད། །རྡོ་རྗེ་
གཞོན་ནུ་རིགས་འཛིན་མ། །ལག་ན་རྡོ་རྗེའི་རྡོ་རྗེ་དང་། །རིག་སྔགས་གསེར་གྱི་ཕྲེང་བ་ཅན། །ལེ་བརྒན་རྩི་དང་རིན་ཆེན་མོ། །རྣམ་པར་སྣང་མཛད་རིགས་ཀྱི་འོད། །དེ་བཞིན་གཤེགས་རིགས་གཙུག་ཏོར་མ། །རྣམ་པར་བསྒྱིངས་མའི་ཕྲེང་
བ་དང་། །རྡོ་རྗེ་གསེར་འོད་ལྟ་བུའི་སྤྱན། །རྡོ་རྗེ་སྒྲོས་དང་དཀར་མོ་དང་། །པདྨའི་སྤྱན་དཔལ་སངས་རྒྱས་སྤྱན། །དེ་བཞིན་རྡོ་རྗེ་ཟླ་བའི་འོད། །དེ་བཞིན་རྡོ་རྗེ་འཛིན་མ་དང་། །རྡོ་རྗེ་ཕྲེང་བ་སྒྱུ་འཕྲུལ་ཆེའི། །ལྷ་མོ་དང་ནི་གསེར་འོད་ཅན། །སྤྱན་
མཛེས་མ་དང་དཀར་མོ་དང་། །པདྨ་ཡི་ནི་སྤྱན་ཅན་དང་། །རྣམ་དུལ་ཞི་བའི་སེམས་དང་ནི། །ཟླ་འོད་བདག་གི་ཡོན་ཏན་ཤེས། །ཕྱག་རྒྱའི་ཚོགས་དེ་དག་དང་། མ་མོའི་ཚོགས་དང་བཅས་པ་ཐམས་ཅད་ཀྱིས་བདག་འཁོར་དང་བཅས་པ་དང་སེམས་ཅན་ཐམས་ཅད་ལ་
བསྲུང་བ་མཛད་དུ་གསོལ། །ཨོྃ་རཾ་ཥི་ག་ཎ་པྲ་ཤཱ་སྟ་སརྦ་ཏ་ཐཱ་ག་ཏོཥྞཱི་ཥ་སི་ཏཱ་ཏ་པ་ཏྲེ་ཧཱུྃ་དྲཱུྃ་ཧྲཱུྃཿཥྚོྃ། ཛམྦྷ་ནི་ཧཱུྃ་དྲཱུྃ་ཧྲཱིཿཥྚོྃ། སྟྭམྦྷ་ནི་ཧཱུྃ་དྲཱུྃ་ཧྲཱིཿཥྚོཾ། མོ་ཧ་ན་ཀ་རཱི་ཧཱུྃ་དྲཱུྃ་ཧྲཱུྃཿཥྚོྃ། པ་ར་བིདྱཱ་ས་མ་བྷ་ཀྵ་ཎ་ཀ་རཱི་ཧཱུྃ་དྲཱྃ་ཧྲཱིཿཥྚོཾ། སརྦ་བ་ར་
བིདྱཱ་ཙྩེད་ན་ཀ་རཱི་ཧཱུྃ་དྲཱིཧྲཱིཿཥྚོྃ། རཱི་ཧཱུྃ་དྲཱུྃ་ཧྲཱིཿཥྚོྃ། སརྦ་དུཥྚ་ནཱཾ་སྟམྦྷ་ན་ཀ་རཱི་ཧཱུྃ་དྲཱུྃ་ཧྲཱིཿཥྚོྃ། སརྦ་ཡཀྵ་རཀྵ་ས་གྲ་ཧཱ་ཎཱཾ་བི་དྷྭནྶ་ན་ཀ་རཱི་ཧཱུྃ་དྲཱུྃ་ཧྲཱིཿཥྚོ། ཙ་ཏུ་རཱ་ཤཱི་ཏཱི་ནཱཾ་གྲ་ཧ་ས་ཧ་སྲཱ་ཎཱཾ་བི་དྷཱ་ནྶ་ན་ཀ་རཱི་ཧཱུྃ་དྲཱུྃ་ཧྲཱིཿཥྚོྃ། ཨཥྚ་བི་ཤཏཱི་ནཱཾ་ནཀྵ་ཏྲཱ་ཏཱ་མྤྲ་སཱ་ད་ན་ཀ་རཱི་ཧཱུྃ་དྲཱུྃ་ཧྲཱིཿཥྚོྃ། ཨཥྚཱ་ནཾ་མ་ཧཱ་གྲ་

ཧཱ་ཎཱ་མྦི་དྷྭ་ནྶ་ན་ཀ་རྣི་ཧཱུྃ་དྲཱུྃ་ཧྲཱིཿཥྚོྃ། རཀྵ་རཀྵ་མཱཾ་སརྦ་ས་ཏྭཱཾ་ཤྩ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་གདུགས་དཀར་མོ་ཅན་རྡོ་རྗེ་གཙུག་ཏོར་ཕྱིར་ཟློག་པ་ཆེན་མོ་ཕྱག་སྟོང་མངའ་བ་ཆེན་མོ། དབུ་སྟོང་མངའ་བ་ཆེན་
མོ། སྤྱན་བྱེ་བ་བརྒྱ་ཕྲག་སྟོང་མངའ་བ་ཆེན་མོ། མི་ཕྱེད་འབར་བའི་མཚན་རྟགས་ཅན། རྡོ་རྗེ་ལྟོ་བ་ཡངས་པ་ཆེན་མོ་ཅན། ས་གསུམ་གྱི་དཀྱིལ་འཁོར་ལ་མངའ་མཛད་མ་ལ་ཕྱག་འཚལ་ལོ། །ཨོྃ་སྭ་སྟིརྦྷ་བནྟུ་མ་མ་ས་པ་རི་བཱ་ར་སྱ་སརྦ་ས་ཏྭཱཾ་ཤྩ་སྭཱ་ཧཱ། རྒྱལ་
པོ་ཡིས་འཇིགས་པ་དང་ཆོམ་རྐུན་གྱིས་འཇིགས་པ་དང་། མེ་ཡིས་འཇིགས་པ་དང་། ཆུ་ཡིས་འཇིགས་པ་དང་། དུག་གིས་འཇིགས་པ་དང་། མཚོན་གྱིས་འཇིགས་པ་དང་། དགྲ་ཡིས་འཇིགས་པ་དང་། ཕ་རོལ་གྱི་འཁྲུལ་འཁོར་གྱིས་འཇིགས་
པ་དང་། མུ་གེ་ཡིས་འཇིགས་པ་དང་། དགྲ་བོ་ཡིས་འཇིགས་པ་དང་། ཐོག་གིས་འཇིགས་པ་དང་། དུས་མ་ཡིན་པར་འཆི་བ་ཡིས་འཇིགས་པ་དང་། ས་གཡོ་བས་འཇིགས་པ་དང་། སྐར་མདའ་ལྟུང་བའི་འཇིགས་པ་དང་། རྒྱལ་པོའི་ཆད་
པས་འཇིགས་པ་དང་། གཅན་གཟན་གཏུམ་པོས་འཇིགས་པ་དང་། ཀླུ་ཡིས་འཇིགས་པ་དང་། གློག་གིས་འཇིགས་པ་དང་། བྱེ་མ་ཚ་མོའི་འཇིགས་པ་དང་། ནམ་མཁའ་ལྡིང་གིས་འཇིགས་པ་དང་། ཡམས་ཀྱི་ནད་དང་། གནོད་པ་དང་།
འགོ་བའི་ནད་དང་། འཁྲུག་པ་ཐམས་ཅད་ཀྱིས་འཇིགས་པ་དང་། གདོན་གྱིས་འཇིགས་པ་དང་། ལྷའི་གདོན་དང་། ཀླུའི་གདོན་དང་། གནོད་སྦྱིན་གྱི་གདོན་དང་། སྲིན་པོའི་གདོན་དང་། དྲི་ཟའི་གདོན་དང་། ལྷ་མ་ཡིན་གྱི་གདོན་དང་།
ནམ་མཁའ་ལྡིང་གི་གདོན་དང་། རླུང་ལྷའི་གདོན་དང་། མིའམ་ཅིའི་གདོན་དང་། ལྟོ་འཕྱེ་ཆེན་པོའི་གདོན་དང་། མིའི་གདོན་དང་། མི་མ་ཡིན་པའི་གདོན་དང་། འབྱུང་པོའི་གདོན་དང་། ཡི་དགས་ཀྱི་གདོན་དང་། ཤ་ཟའི་གདོན་དང་། གྲུལ་

བུམ་གྱི་གདོན་དང་། སྲུལ་པོའི་གདོན་དང་། ལུས་སྲུལ་པོའི་གདོན་དང་། སྐེམ་བྱེད་ཀྱི་གདོན་དང་། སྨྱོ་བྱེད་ཀྱི་གདོན་དང་། གྲིབ་གནོན་གྱི་གདོན་དང་། བརྗེད་བྱེད་ཀྱི་གདོན་དང་། གནོན་པོའི་གདོན་དང་། མཁའ་འགྲོ་མའི་
གདོན་དང་། ལུས་ཆགས་མའི་གདོན་དང་། ནམ་གྲུའི་གདོན་དང་། ཚེར་མ་འདོན་པའི་གདོན་དང་། རེ་ལྡེ་འདོན་པའི་གདོན་དང་། བྱའི་གདོན་དང་། མ་མོ་དགའ་བར་བྱེད་པའི་གདོན་དང་། ཀུན་དུ་འཕྲེང་བར་བྱེད་པའི་གདོན་དང་། འཕྱང་བའི་གདོན་
དང་། མཁའ་འགྲོ་མའི་གདོན་དང་། ལུས་མཁའ་འགྲོ་མའི་གདོན་དང་། ཀ་ཊང་ཀ་ཊའི་ཚོགས་ཅན་གྱི་གདོན་དང་། གདོན་ཐམས་ཅད་དང་། མདངས་འཕྲོག་པ་དང་། མངལ་ཟ་བ་དང་། ཁྲག་འཐུང་བ་དང་། ཞག་ཟ་བ་དང་། ཤ་ཟ་བ་
དང་། ཚིལ་ཟ་བ་དང་། རྐང་ཟ་བ་དང་། བཙས་པ་ཟ་བ་དང་། སྲོག་འཕྲོག་པ་དང་། གཏོར་མ་ཟ་བ་དང་། ཕྲེང་བ་ཟ་བ་དང་། དྲི་ཟ་བ་དང་། མེ་ཏོག་ཟ་བ་དང་། བདུག་པ་ཟ་བ་དང་། འབྲས་བུ་ཟ་བ་དང་། ལོ་ཏོག་ཟ་བ་དང་། བསྲེག་
བྱ་ཟ་བ་དང་། རྣག་འཐུང་བ་དང་། བཤང་བ་ཟ་བ་དང་། གཅིན་འཐུང་བ་དང་། མཆིལ་མ་ཟ་བ་དང་། སྣབས་ཟ་བ་དང་། ངར་སྣབས་ཟ་བ་དང་། སྐྱུགས་པ་ཟ་བ་དང་། ནོམ་བུ་ཟ་བ་དང་། མི་གཙང་བ་ཟ་བ་དང་། སྟོར་ཁུང་ནས་འབབ་པ་འཐུང་
བ་དང་། ནོར་འཕྲོག་པ་དང་། སེམས་འཕྲོག་པ་རྣམས་དང་། དེ་དག་ཐམས་ཅད་དང་གདོན་ཐམས་ཅད་ཀྱིས་བྱས་པའི་རིག་སྔགས་ཐམས་ཅད་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །ཀུན་དུ་རྒྱུས་བྱས་པའི་རིག་སྔགས་རལ་གྲིས་
གཅད་དོ། །རྡོ་རྗེ་ཕུར་བུས་གདབ་བོ། །མཁའ་འགྲོ་དང་མཁའ་འགྲོ་མས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །ཚངས་པས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །བརྒྱ་བྱིན་

གྱིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །སྲེད་མེད་ཀྱི་བུས་བྱས་པའི་རིགས་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །ཕྱུགས་བདག་ཆེན་པོ་དང་དྲག་པོས་བྱས་པའི་རིག་སྔགས་རལ་གྲིས་གཅད་
དོ། །རྡོ་རྗེ་ཕུར་བུས་གདབ་བོ། །ནག་པོ་ཆེན་པོས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །མ་མོའི་ཚོགས་ཀྱིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །མིའི་ཐོད་པ་ཅན་
གྱིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །རི་ཁྲོད་པས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །གཡུང་པོས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་
བོ། །སྐར་མདའ་གདོང་གིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །རྡོ་རྗེ་གཞོན་ནུ་མས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །གཤིན་རྗེ་གཤེད་ཀྱིས་བྱས་པའི་རིག་སྔགས་རལ་
གྲིས་གཅད་དོ། །རྡོ་རྗེ་ཕུར་བུས་གདབ་བོ། །གཤིན་རྗེའི་ཕོ་ཉས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །ཀླུ་མ་རུངས་པས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །མེའི་ལས་ཀྱིས་བྱས་པའི་
རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །ལོག་འདྲེན་གྱིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །གཞོན་ནུས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །རྒྱལ་པོ་ཆེན་
པོ་བཞིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །སྲིང་མོ་བཞིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །ནམ་མཁའ་ལྡིང་ཡང་དག་པས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་

ཕུར་བུས་གདབ་པོ། །རྒྱལ་བར་བྱེད་པ་དང་སྦྲང་རྩིར་བྱེད་པ་དང་གྲུབ་པར་བྱེད་པ་དང་དོན་ཀུན་སྒྲུབ་པས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །བྷྲྀང་གི་རི་ཏི་དང་། དགའ་བྱེད་དབང་ཕྱུག་དང་
སྨིན་དྲུག་གི་བུ་དང་ཟླ་བ་དང་ཉི་མ་དང་ཚོགས་ཀྱི་བདག་པོ་དང་ལྷན་ཅིག་པས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །དགེ་སྦྱོང་གཅེར་བུས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །
དགྲ་བཅོམ་པས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །སྤྱན་རས་གཟིགས་དབང་ཕྱུག་གིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །འདོད་ཆགས་དང་བྲལ་བས་བྱས་བའི་རིག་སྔགས་
རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །གསང་བ་པའི་བདག་པོ་ལག་ན་རྡོ་རྗེས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །གང་དང་གང་དུ་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །
གང་གིས་བྱེད་དུ་བཅུག་པ་དེས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་བོ། །དགེ་སྦྱོང་མགོ་རེག་གིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །ཕོ་ཉ་དང་ཕོ་ཉ་མོ་དང་བྲན་ཕོ་དང་བྲན་མོས་
བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །དྲང་སྲོང་གི་མཆོག་ཐམས་ཅད་ཀྱིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །ལྷའི་ཚོགས་ཐམས་ཅད་ཀྱིས་བྱས་པའི་རིག་སྔགས་རལ་
གྲིས་གཅད་དོ། །རྡོ་རྗེ་ཕུར་བུས་གདབ་པོ། །མི་ཕན་པར་འདོད་པ་ཐམས་ཅད་ཀྱིས་བྱས་པའི་རིག་སྔགས་རལ་གྲིས་གཅད་དོ། །རྡོ་རྗེ་ཕུར་བུས་གདབ་པོ། །ཨོྃ་བཅོམ་ལྡན་འདས་མ་བདག་འཁོར་དང་བཅས་པ་དང་། སེམས་ཅན་ཐམས་ཅད་ཀྱི་

འཇིགས་པ་ཐམས་ཅད་དང་། གནོད་པ་དང་། ནད་འགོ་བ་དང་། འཁྲུག་པ་ཐམས་ཅད་དང་། སྡང་བ་དང་། རབ་ཏུ་སྡང་བ་ཐམས་ཅད་དང་། ཕྱིར་རྒོལ་བའམ། མི་མཛའ་བའམ། མི་ཕན་པར་འདོད་པ་ཐམས་ཅད་ལས་བསྲུང་དུ་གསོལ་བསྲུང་དུ་
གསོལ། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བའི་གདུགས་དཀར་པོ་ཅན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ་མེ་དང་ཉི་མ་ལྟར་འོད་གསལ་ཞིང་དཀར་བ་རྒྱས་པ་མངའ་བ་ཁྱོད་ལ་ཕྱག་འཚལ་ལོ། །
ཨོྃ་ཛྭ་ལ་ཛྭ་ལ། དྷ་ཀ་དྷ་ཀ། ཁཱ་ད་ཁཱ་ད། ད་ར་ད་ར། བི་ད་ར་བི་ད་ར། ཙྪིནྡ་ཙྪིནྡ། བྷིནྡ་བྷིནྡ། ཧཱུྃ་ཧཱུྃ་ཕཊ་ཕཊ་སྭཱ་ཧཱ། སརྦ་དུཥྚཱན་ཧཱུྃ་དྲཱུྃ། སརྦ་དུརླྃ་གྷི་ཏེ་བྷྱཿཕཊ། སརྦ་དུརླི་ཁི་ཏེ་བྷྱཿཕཊ། སརྦ་དུརྩྪ་ཡེ་བྷྱཿཕཊ། སརྦ་དིགྦྷྱཿཕཊ།
སརྦ་དུརྦྷུཀྟེ་བྷྱཿཕཊ། སརྦ་དུ་ཏེ་བྷྱཿཕཊ། སརྦ་ཨ་བདྷུ་ཏེ་བྷྱཿཕཊ། སརྦ་དུསྐྲྀ་ཏེ་བྷྱཿཕཊ། སརྦ་དུཿཔྲེ་ཀྵི་ཏ་བྷྱཿཕཊ། སརྦ་ཛྭ་རེ་བྷྱཿཕཊ། སརྦ་ཨ་པ་སྨཱ་རེ་བྷྱཿཕཊ། སརྦཽ་སྟཱ་ར་ཀེ་བྷྱཿཕཊ། སརྦ་ཌཱ་ཀི་ནཱི་བྷྱཿཕཊ། སརྦ་རེ་བ་ཏི་བྷྱཿཕཊ།
སརྦ་ཀ་ཊ་བཱ་སི་ནཱི་བྷྱཿཕཊ། སརྦ་ཛཱ་མ་ཀེ་བྷྱཿཕཊ། སརྦ་ས་ཀུ་ནཱི་བྷྱཿཕཊ། སརྦ་མཱ་ཏྲཾ་ནནྡི་ཀེ་བྷྱཿཕཊ། སརྦ་ག་རེ་བྷྱཿཕཊ། སརྦ་བྀ་ཥེ་བྷྱཿཕཊ། སརྦ་ཡོ་གེ་བྷྱིཿཕཊ། སརྦ་ཨ་ལམྦ་ཀེ་བྷྱཿཕཊ། སརྦ་བྷ་ཡེ་བྷྱཿཕཊ། སརྦོ་པ་དྲ་བེ་བྷྱཿཕཊ། སརྦོ་
པ་སརྒོ་པཱ་ཡ་སེ་བྷྱཿཕཊ། སརྦ་ཨུ་ཏྲཱ་ས་བྷྱཿཕཊ། སརྦ་པཱ་ཏ་ཀེ་བྷྱཿཕཊ། སརྦ་བྱཱ་དྷི་བྷྱཿཕཊ། སརྦ་ཤྲ་མ་ཎེ་བྷྱཿཕཊ། སརྦ་གྲ་ཧེ་བྷྱཿཕཊ། སརྦ་ཏཱི་རྠི་ཀེ་བྷྱཿཕཊ། སརྦ་པྲ་ཏྱ་རྠི་ཀེ་བྷྱཿཕཊ། སརྦ་པཱ་ཏ་ཀེ་བྷྱཿཕཊ། སརྦོནྨ་དེ་བྷྱཿཕཊ། སརྦ་ཙྪ་ཡེ་
བྷྱཿཕཊ། སརྦ་པིདྱཱ་དྷ་རེ་བྷྱཿཕཊ། ཛ་ཡ་ཀ་ར་མ་དྷུ་ཀ་ར་སི་དྡྷ་ཀ་ར། སརྦ་ཨརྠ་སཱ་དྷ་ཀེ་བྷྱཿཕཊ། སརྦ་བིདྱཱ་ཙཪྻེ་བྷྱཿཕཊ། སརྦ་བིདྱཱ་རཱ་ཛེ་བྷྱཿཕཊ། སརྦ་སཱ་དྷ་ཀེ་བྷྱོ་བིདྱ་ཙཪྻེ་བྷྱཿཕཊ། སརྦ་ཙ་ཏུདྦྷྱོ་བྷ་གི་ནཱི་བྷྱཿཕཊ། བཛྲ་ཀཽ་མཱ་རཱི་ཡེ་བིཧྱཱ་ར་ཛྙཱི་ཡེ་བྷྱཿཕཊ། སརྦ་

བིགྷཾ་བི་ནཱ་ཡ་ཀཱ་ནཱཾ་ཕཊ། པ་ར་དཱ་ཡ་ཕཊ། བར་པི་དྲཱ་བ་ན་ས་རཱ་ཡ་ཕཊ། སརྦ་ཨ་སུ་རེ་བྷྱཿཕཊ། སརྦ་ག་རུ་ཌེ་བྷྱཿཕཊ། སརྦ་མ་ཧོ་ར་གེ་བྷྱཿཕཊ། སརྦ་མཱ་ནུ་ཥྱཱ་མ་ནུ་ཥྱེ་བྷྱཿཕཊ། སརྦ་མཱ་རུ་ཏེ་བྷྱཿཕཊ། སརྦ་པི་སཱ་ཙེ་བྷྱཿཕཊ།
སརྦ་ཀུམྦྷཎྜེ་བྷྱཿཕཊ། བཛྲི་ཤྲྀང་ཁ་ལཱ་ཡ་མནྟ་པྲ་ཏྱངྒི་རླ་བྷྱཿཕཊ། སརྦོ་པེ་སརྒེ་བྷྱཿཕཊ། མ་ཧཱ་པྲ་ཏྱངྒི་རེ་བྷྱཿཕཊ། ཙྪིནྡ་ཙྪིནྡ་ཕཊ། བྷིནྡ་བྷིནྡ་ཕཊ། ཧཱུྃ་ཧཱུྃ་ཕཊ་སྭཱ་ཧཱ། ཧེ་ཧེ་ཕཊ། ཧོ་ཧོ་ཕཊ། ཨ་མོ་གྷཱ་ཡ་ཕཊ། ཨ་པྲ་ཏི་ཧ་ཏཱ་ཡ་ཕཊ། པ་ར་པྲ་དཱ་
ཡ་ཕཊ། ཨ་སུ་ར་བི་དྲཱ་པ་ཎ་ཀ་རཱ་ཡ་ཕཊ། སརྦ་དེ་བེ་བྷྱཿཕཊ། སརྦ་ནཱ་གེ་བྷྱཿཕཊ། སརྦ་ཡཀྵི་བྷྱཿཕཊ། སརྦ་རཱཀྵ་སེ་བྷྱཿཕཊ། སརྦ་གནྡྷ་རྦེ་བྷྱཿཕཊ། སརྦ་ཀིནྣ་རེ་བྷྱཿཕཊ། སརྦ་པྲེ་ཏེ་བྷྱཿཕཊ། སརྦ་བྷཱུ་ཏེ་བྷྱཿཕཊ། སརྦ་ཀུ མྦྷཎྜེ་བྷྱཿཕཊ།
སརྦ་པཱུ་ཏ་ནེ་བྷྱཿཕཊ། སརྦ་ཀ་ཊ་པཱུ་ཏ་ནེ་བྷྱཿཕཊ། སརྦ་སྐནྡྷེ་བྷྱཿཕཊ། སརྦོམྨཱ་དེ་བྷྱཿཕཊ། བཛྲ་ཤཾ་ཀ་ལཱ་ཡ་མ་ཧཱ་པྲ་ཏྱངྒི་ར་རཱ་ཛཱ་ཡ་ཕཊ། གཱ་ལཱ་ཡ་ཕཊ། མ་ཧཱ་ཀཱ་ལཱ་ཡ་ཕཊ། མཱ་ཏྲྀ་གཎཱ་ཡ་ཕཊ། བཻཥྞ་བཱི་ཡེ་ཕཊ། མ་ཧཱ་མཱ་ཏྲྀ་ག་ཎ་ནཱ་མསྐྲྀ་ཏཱ་ཡ་
ཕཊ། མ་ཧེ་ཤྭ་རཱི་ཡེ་ཕཊ། བྲཧྨ་ཎཱི་ཡེ་ཕཊ། ཨགྷཱི་ཡེ་ཕཊ། མ་ཧཱ་ཀཱ་ལི་ཡེ་ཕཊ། ཀཱ་ལ་དཎྜཱི་ཡེ་ཕཊ། ཨིཎྡྲཱི་ཡེ་ཕཊ། རཽ་དྲཱི་ཡེ་ཕཊ། ཙཱ་མུ་ཎྜཱི་ཡེ་ཕཊ། བཱ་རཱ་ཧཱི་ཡེ་ཕཊ། མ་ཧཱ་བཱ་རཱ་ཧཱི་ཡེ་ཕཊ། རཱ་ཏྲཱི་ཡེ་ཕཊ། ཀཱ་ལ་རཱ་ཏྲཱི་ཡེ་ཕཊ། ཡ་མ་དཎྜཱི་ཡེ་ཕཊ།
ཀ་པཱ་ལཱི་ཡེ་ཕཊ། མ་ཧཱ་ཀ་པཱ་ལཱི་ཡེ་ཕཊ། ཀཽ་མཱ་རཱི་ཡེ་ཕཊ། ཡཱ་མཱི་ཡེ་ཕཊ། བཱ་ཡ་བེ་ཕཊ། ཀཽ་བེ་རཱི་ཡེ་ཕཊ། ནཻ་རྀ་ཏཱི་ཡེ་ཕཊ། བཱ་རུ་ཎཱི་ཡེ་ཕཊ། མཱ་རུ་ཏཱི་ཡེ་ཕཊ། མ་ཧཱ་མཱ་རུ་ཏཱི་ཡེ་ཕཊ། སཽ་མྱཻ་ཕཊ། ཨཻ་སཱ་ནཱི་ཡེ་ཕཊ། པཽཀྐ་སཱི་ཡེ་ཕཊ།
ཨ་ཐརྦ་ཎཱི་ཡེ་ཕཊ། ཤ་པ་རཱི་ཡེ་ཕཊ། ཀྲྀ་སྣ་ཤ་པ་རཱི་ཡེ་ཕཊ། ཡ་མ་དཱུ་ཧཱི་ཡེ་ཕཊ། ནི་ས་དི་བཱ་ཙ་རེ་བྷྱཿཕཊ། ཏྲི་སན་བྷྱ་རྩེ་བྷྱཿཕཊ། དྷ་ར་ཎཱི་ཡེ་ཕཊ། ཨ་དྷི་མུཀྐི་ཀསྨཱི་ར་མ་ཧཱ་སྨ་ཤཱ་ན་ནི་བཱ་སི་ནཱི་ཡེ་ཕཊ། ཨི་ཏི་བྷྱཿསརྦ་བྷ་ཡེ་བྷྱཿསརྦ་དོ་ཥེ་བྷྱཿཕཊ། ཨོྃ་

ཥྚོཾ་བནྡྷ་བནྡྷ་སརྦ་དུཥྠཱ་ན་རཀྵ་རཀྵ་མཱྃ་སརྦ་ས་ཏྲཱཾ་ཤྩ་སྭཱ་ཧཱ། གང་སུ་དག་བདག་འཁོར་དང་བཅས་པ་དང་། སེམས་ཅན་ཐམས་ཅད་ལ་སྡང་བ་སྡང་བའི་སེམས་དང་ལྡན་པ་རྣམས་དང་། དྲག་ཤུལ་དྲག་ཤུལ་གྱི་སེམས་དང་ལྡན་པ་རྣམས་དང་། སྡིག་པ་སྡིག་
པའི་སེམས་དང་ལྡན་པ་རྣམས་དང་། འཁྲུག་པ་འཁྲུག་པའི་སེམས་དང་ལྡན་པ་རྣམས་དང་། མི་མཛའ་བ་མི་མཛའ་བའི་སེམས་དང་ལྡན་པ་དེ་རྣམས་ལས་བདག་འཁོར་དང་བཅས་པ་དང་། སེམས་ཅན་ཐམས་ཅད་ལ་བསྲུང་བ་མཛད་དུ་གསོལ།
ལོ་བརྒྱ་འཚོ་བར་གྱུར་ཅིག །སྟོན་བརྒྱ་མཐོང་བར་ཤོག་ཤིག །གང་སུ་དག་གནོད་སྦྱིན་གྱི་གདོན་རྣམས་དང་། མདངས་འཕྲོག་པ་རྣམས་དང་། མངལ་ཟ་བ་རྣམས་དང་། ཁྲག་འཐུང་བ་རྣམས་དང་། ཞག་ཟ་བ་རྣམས་དང་། ཤ་ཟ་བ་རྣམས་དང་།
ཚིལ་ཟ་བ་རྣམས་དང་། རྐང་ཟ་བ་རྣམས་དང་། བཙས་པ་ཟ་བ་རྣམས་དང་། སྲོག་འཕྲོག་པ་རྣམས་དང་། གཏོར་མ་ཟ་བ་རྣམས་དང་། ཕྲེང་བ་ཟ་བ་རྣམས་དང་། དྲི་ཟ་བ་རྣམས་དང་། མེ་ཏོག་ཟ་བ་རྣམས་དང་། བདུག་པ་ཟ་བ་རྣམས་དང་། འབྲས་བུ་ཟ་བ་
རྣམས་དང་། ལོ་ཏོག་ཟ་བ་རྣམས་དང་། བསྲེག་བྱ་ཟ་བ་རྣམས་དང་། ནོར་འཕྲོག་པ་རྣམས་དང་། སེམས་འཕྲོག་པ་རྣམས་དང་། རྣག་ཟ་བ་རྣམས་དང་། བཤང་བ་ཟ་བ་རྣམས་དང་། གཅིན་འཐུང་བ་རྣམས་དང་། མཆིལ་མ་འཐུང་བ་རྣམས་དང་།
སྣབས་ཟ་བ་རྣམས་དང་། ངར་སྣབས་ཟ་བ་རྣམས་དང་། སྐྱུགས་པ་ཟ་བ་རྣམས་དང་། ནོམ་བུ་ཟ་བ་རྣམས་དང་། མི་གཙང་བ་ཟ་བ་རྣམས་དང་། སྟོར་ཁུང་ནས་འབབ་པ་འཐུང་བ་རྣམས་དང་། སྡིག་པའི་སེམས་དང་ལྡན་པ་རྣམས་དང་། སྡང་
བའི་སེམས་དང་ལྡན་པ་རྣམས་དང་། དྲག་ཤུལ་གྱི་སེམས་དང་ལྡན་པ་རྣམས་དང་། ལྷའི་གདོན་རྣམས་དང་། ཀླུའི་གདོན་རྣམས་དང་། གནོད་སྦྱིན་གྱི་གདོན་རྣམས་དང་། སྲིན་པོའི་གདོན་རྣམས་དང་། དྲི་ཟའི་གདོན་རྣམས་དང་། ལྷ་མ་ཡིན་གྱི་གདོན་

རྣམས་དང་། ནམ་མཁའ་ལྡིང་གི་གདོན་རྣམས་དང་། མིའམ་ཅིའི་གདོན་རྣམས་དང་། ལྟོ་འཕྱེ་ཆེན་པོའི་གདོན་རྣམས་དང་། མིའི་གདོན་རྣམས་དང་། མི་མ་ཡིན་པའི་གདོན་རྣམས་དང་། རླུང་ལྷའི་གདོན་རྣམས་དང་། ཡི་དགས་
ཀྱི་གདོན་རྣམས་དང་། ཤ་ཟའི་གདོན་རྣམས་དང་། འབྱུང་པོའི་གདོན་རྣམས་དང་། གྲུལ་བུམ་གྱི་གདོན་རྣམས་དང་། སྲུལ་པོའི་གདོན་རྣམས་དང་། ལུས་སྲུལ་པོའི་གདོན་རྣམས་དང་། སྐེམ་བྱེད་ཀྱི་གདོན་རྣམས་དང་། སྨྱོ་བྱེད་ཀྱི་གདོན་རྣམས་དང་
གྲིབ་གནོན་གྱི་གདོན་རྣམས་དང་། བརྗེད་བྱེད་ཀྱི་གདོན་རྣམས་དང་། གནོན་པོའི་གདོན་རྣམས་དང་། མཁའ་འགྲོ་མའི་གདོན་རྣམས་དང་། ནམ་གྲུའི་གདོན་རྣམས་དང་། ཀུན་དུ་བྲེ་བའི་གདོན་རྣམས་དང་། ཚེར་མ་འདོན་པའི་གདོན་རྣམས་དང་། བྱའི་
གདོན་རྣམས་དང་། མ་མོ་དགའ་བར་བྱེད་པའི་གདོན་རྣམས་དང་། བུམ་པ་ལྟ་བུའི་གདོན་རྣམས་དང་། འཕྱང་བའི་གདོན་རྣམས་དང་། ལུས་མཁའ་འགྲོ་མའི་གདོན་རྣམས་དང་། ཀ་ཊང་ཀ་ཊའི་ཚོགས་ཅན་གྱི་གདོན་རྣམས་དང་གདོན་ཐམས་ཅད་བསལ་དུ་
གསོལ། །རིམས་ཉིན་གཅིག་པ་རྣམས་དང་། ཉིན་གཉིས་པ་རྣམས་དང་། ཉིན་གསུམ་པ་རྣམས་དང་། ཉིན་བཞི་པ་རྣམས་དང་། ཉིན་བདུན་པ་རྣམས་དང་། ཟླ་བ་ཕྱེད་པ་རྣམས་དང་། ཟླ་བ་གཅིག་པ་རྣམས་དང་། ཉིན་མོ་པ་རྣམས་དང་། ཉི་མ་ཕྱེད་པ་རྣམས་
དང་། ཡུད་ཙམ་པ་རྣམས་དང་། རྟག་པའི་རིམས་རྣམས་དང་། རིམས་ལྡང་དུབ་པ་རྣམས་དང་། འབྱུང་པོའི་རིམས་རྣམས་དང་། ཡི་དགས་ཀྱི་རིམས་རྣམས་དང་། ཤ་ཟའི་རིམས་རྣམས་དང་། མིའི་རིམས་རྣམས་དང་། མི་མ་ཡིན་པའི་རིམས་རྣམས་དང་། རྒྱུན་མི་
འཆད་པའི་རིམས་རྣམས་དང་། རླུང་ལས་གྱུར་པ་རྣམས་དང་། མཁྲིས་པ་ལས་གྱུར་པ་རྣམས་དང་། བད་ཀན་ལས་གྱུར་པ་རྣམས་དང་། འདུས་པ་ལས་གྱུར་པ་རྣམས་དང་། རིམས་ཐམས་ཅད་དང་། ཀླད་པ་ན་བ་བདག་དང་སེམས་ཅན་ཐམས་ཅད་ལ་བསལ་དུ་

གསོལ། བདག་དང་སེམས་ཅན་ཐམས་ཅད་ཀྱི་གཞོགས་ཕྱེད་ན་བ་དང་། ཡི་ག་འཆུས་པ་དང་། མིག་ནད་དང་། སྣ་ནད་དང་། ཁ་ནད་དང་། མགུལ་ནད་དང་། སྙིང་ནད་དང་། ལྐོག་མའི་ལྷ་གོར་ན་བ་དང་། རྣ་བ་ན་བ་དང་། སོ་ན་བ་དང་། བྲང་ན་བ་
དང་། སྙིང་ན་བ་དང་། གནད་ན་བ་དང་། རྩིབ་ལོགས་ན་བ་དང་། རྒྱབ་ན་བ་དང་། ལྟོ་ན་བ་དང་། རྐེད་པ་ན་བ་དང་། མདོམས་ན་བ་དང་། གཞང་ན་བ་དང་། སྐྱེ་གནས་ན་བ་དང་། རབ་ཏུ་སྐྱེ་གནས་ན་བ་དང་། བརླ་ན་བ་དང་། བྱིན་པ་ན་བ་དང་། ལག་
པ་ན་བ་དང་། རྐང་པ་ན་བ་དང་། ཡན་ལག་ན་བ་དང་། ཉིང་ལག་ན་བ་བསལ་དུ་གསོལ། །བདག་དང་སེམས་ཅན་ཐམས་ཅད་ལ་འབྱུང་པོ་དང་། ཡི་དགས་དང་། རོ་ལངས་དང་། མཁའ་འགྲོ་མ་དང་། རིམས་དང་། ཤུ་བ་དང་། མིག་སེར་དང་། གཡའ་
བ་དང་། འབྲུམ་བུ་ཕྲ་མོ་དང་། མཛེ་དང་། ཕོལ་མིག་དང་། བས་བལྡགས་དང་། མཆིན་ནད་དང་། མཚན་པར་རྡོལ་བ་དང་། གཡན་པ་དང་། གཞང་འབྲུམ་དང་། མེ་དབལ་དང་། ལྷོག་པ་དང་། སྐེམ་པ་དང་། དབུགས་མི་བདེ་བ་དང་། སྐྲག་པ་དང་། ལུད་
པ་དང་། བརྒྱལ་བ་དང་། དབྱིག་དུག་དང་། དུག་སྦྱར་མ་དང་། དུག་དང་། བྱད་དང་། མེ་དང་། ཆུ་དང་། མི་ངས་དང་འཐབ་མོ་དང་། འཁོན་དང་གནོད་པ་དང་། དུས་མ་ཡིན་པར་འཆི་བ་དང་། སྦྲང་བུ་ཏྲྱཾ་བུ་ཀ་དང་། ཏྲཻ་ལཱ་ཊ་ཀ་དང་། སྡིག་པ་དང་། སྦྲུལ་དང་།
སྲེ་མོ་དང་། སེང་གེ་དང་། སྟག་དང་། དོམ་དང་། དྲེད་དང་། གནག་དང་། ཆུ་སྲིན་དང་། སྤྱང་ཀི་དང་། ཆོམ་པོ་དང་། དེ་དག་ལ་སོགས་པ་སྲོག་འཕྲོག་པར་བྱེད་པ་གཞན་ཐམས་ཅད་ཀྱང་བསལ་དུ་གསོལ། གདུགས་དཀར་པོ་ཅན་རྡོ་རྗེ་གཙུག་ཏོར་ཕྱིར་ཟློག་པ་ཆེན་
མོའི་རིག་སྔགས་ཀྱི་མཐུས་དཔག་ཚད་བཅུ་གཉིས་ཀྱི་ནང་ཚུན་ཆད་དམ། དཔག་ཚད་ལྔ་བརྒྱའི་ནང་ཚུན་ཆད་དུ་རིག་སྔགས་བཅིང་བར་བགྱིའོ། །གཟི་བརྗིད་བཅིང་བར་བགྱིའོ། །རིག་སྔགས་ཐམས་ཅད་བཅིང་བར་བགྱིའོ། །གཞན་གྱི་རིག་སྔགས་བཅིང་བར་བགྱིའོ། །

མཚམས་གཅད་པར་བགྱིའོ། །ས་བཅིང་བར་བགྱིའོ། །ཕྱོགས་བཅུ་བཅིང་བར་བགྱིའོ། །ནམ་མཁའ་བཅིང་བར་བགྱིའོ། །གཞན་གྱི་སྡེ་རབ་ཏུ་རེངས་པར་བགྱིའོ། །ཏདྱ་ཐཱ། ཨོྃ་ཨ་ན་ལེ་ཨ་ན་ལེ། ཨ་ཙ་ལེ་ཨ་ཙ་ལེ། ཁ་ཁ་མེ་ཁ་ཁ་མེ། བི་
ཥ་དེ་བི་ཥ་དེ། བཱི་རེ་བཱི་ར། བཻ་ར་བཻ་ར། སཽ་མེ་སཽ་མེ། ཤཱནྟེ་ཤཱནྟེ། དཱནྟེ་དཱནྟེ། བཛྲ་དྷ་ར་བནྡྷ་བནྡྷ་ནི་བཛྲ་པཱ་ཎི་ཕཊ། ཨོཾ་ཧཱུྃ་ཥྚོཾ་ཕཊ་ཕཊ་སྭཱ་ཧཱ། ཨོཾ་བཛྲ་པཱ་ཎི་བནྡྷ་བནྡྷ་བཛྲ་པཱ་སེ་ན་སརྦ་དུཥྚ་བི་གྷཾ་བི་ནཱ་ཡ་ཀཱ་ན་ཧཱུྃ་ཧཱུྃ་ཕཊ་ཕཊ། ཧཱུྃ་དྲཱུྃ་བནྡྷ་ཕཊ། རཀྵ་རཀྵ་མཱཾ་སརྦ་སཏྭཱཾ་ཤྩ་སྭཱ་ཧཱ། །
གང་གིས་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་གདུགས་དཀར་པོ་ཅན་ཞེས་བྱ་བ་གཞན་གྱིས་མི་ཐུབ་མ་ཕྱིར་ཟློག་པའི་རིག་སྔགས་ཀྱི་རྒྱལ་མོ་ཆེན་མོ་འདི་གྲོ་གའམ། རས་སམ། ཤིང་ཤུན་ལ་བྲིས་ཏེ། ལུས་སམ། མགུལ་དུ་ཐོགས་
པ་བྱས་ནས་བཅང་བར་བྱ། བཀླག་པར་བྱ་སྟེ། དེ་དག་ལ་ཇི་སྲིད་འཚོའི་བར་དུ་དུག་གིས་མི་ཚུགས། མཚོན་གྱིས་མི་ཚུགས། རིམས་ཀྱིས་མི་ཚུགས། ནད་ཀྱིས་མི་ཚུགས། ཚད་པས་མི་ཚུགས། མེ་དང་ཆུས་མི་ཚུགས། བསྒྱུར་བའི་ལས་ཐམས་
ཅད་ཀྱིས་མི་ཚུགས། དབྱིག་དུག་གིས་མི་ཚུགས། དུག་སྦྱར་མས་མི་ཚུགས། བྱད་ཀྱིས་མི་ཚུགས། དུས་མ་ཡིན་པར་འཆི་བའི་དུས་བྱེད་པར་མི་འགྱུར་རོ། །གདོན་ཐམས་ཅད་དང་། བགེགས་དང་ལོག་འདྲེན་ཐམས་ཅད་ཀྱི་ཡིད་དུ་འོང་ཞིང་དགའ་བར་
འགྱུར་རོ། །བསྐལ་པ་བྱེ་བ་སྟོང་ཕྲག་བརྒྱད་ཅུ་རྩ་བཞིར་སྐྱེ་བ་དང་སྐྱེ་བར་ཚེ་རབས་དྲན་པར་འགྱུར་རོ། །རྡོ་རྗེའི་རིགས་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་བཞིའི་རིག་སྔགས་ཀྱི་ལྷས་ཀྱང་རྟག་ཏུ་རྒྱུན་མི་འཆད་པར་མཉམ་པར་བཞག་ནས་དེ་ལ་རྟག་པར་
སྲུང་བ་དང་སྐྱོབ་པ་དང་། སྦེད་པར་བྱེད་དོ། །རྡོ་རྗེ་ཕོ་ཉ་མོ་མངག་གཞུག་བརྒྱད་ཅུ་རྩ་བཞིས་ཀྱང་རྟག་པར་ཡོངས་སུ་སྐྱོང་བར་བྱེད་དེ་དེ་རྣམས་ཀྱི་ཡིད་དུ་འོང་བ་དང་དགའ་བར་འགྱུར་རོ། །ནམ་དུ་ཡང་གནོད་སྦྱིན་ཉིད་དང་། སྲིན་པོ་ཉིད་དང་། འབྱུང་པོ་ཉིད་

དང་། ཡི་དགས་ཉིད་དང་། ཤ་ཟ་ཉིད་དང་། སྲུལ་པོ་ཉིད་དང་། ལུས་སྲུལ་པོ་ཉིད་དང་། མི་དབུལ་པོར་མི་འགྱུར་རོ། །སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་གང་གཱའི་ཀླུང་གི་བྱེ་མ་སྙེད་ཀྱི་བསོད་ནམས་ཀྱི་ཕུང་པོ་དང་ལྡན་
པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་གདུགས་དཀར་པོ་ཅན་ཞེས་བྱ་བ། གཞན་གྱིས་མི་ཐུབ་མ་ཕྱིར་ཟློག་པའི་རིག་སྔགས་ཀྱི་རྒྱལ་མོ་ཆེན་མོ་འདི་འཆང་ན། ཚངས་པར་མི་སྤྱོད་པ་ཡང་། ཚངས་
པར་སྤྱོད་པར་འགྱུར་རོ། །ཐུབ་པར་མ་བྱས་པ་ཡང་ཐུབ་པར་བྱས་པར་འགྱུར་རོ། །མི་གཙང་བ་ཡང་གཙང་བར་བྱས་པར་འགྱུར་རོ། །བསྙེན་གནས་བྱས་པ་ཅན་མ་ཡིན་པ་ཡང་བསྙེན་གནས་བྱས་པ་ཅན་དུ་འགྱུར་རོ། །གང་དག་མཚམས་མེད་པ་
ལྔ་བྱས་པ་དེ་ཡང་སྡིག་པ་མ་ལུས་པར་འབྱང་བར་འགྱུར་རོ། །སྔོན་གྱི་ལས་ཀྱི་སྒྲིབ་པ་ཡང་མ་ལུས་པར་ཟད་པར་འགྱུར་རོ། །བུད་མེད་གང་ལ་ལས་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བའི་གདུགས་དཀར་པོ་ཅན་ཞེས་བྱ་བ་གཞན་
གྱིས་མི་ཐུབ་མ་ཕྱིར་ཟློག་པ་ཆེན་མོའི་རིག་སྔགས་ཀྱི་རྒྱལ་མོ་ཆེན་མོ་འདི་འཆང་ན་བུ་འདོད་པ་དེས་ཀྱང་བུ་རྙེད་དེ། ཚེ་དང་བསོད་ནམས་དང་སྟོབས་དང་། རབ་ཏུ་ལྡན་ནོ། །འདི་ནས་ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་སྟེ། འདོད་
ཆགས་དང་། ཞེ་སྡང་དང་། གཏི་མུག་དང་། ང་རྒྱལ་དང་། རྒྱགས་པ་ཐམས་ཅད་དང་བྲལ་བར་འགྱུར་རོ། །གང་ལ་ལ་ཞིག་གིས་མི་ངས་དང་། བ་ལང་གི་ནད་དང་། ཕྱུགས་ནད་དང་། ཡམས་ཀྱི་ནད་དང་། གནོད་པ་དང་། འགོ་བའི་ནད་དང་།
འཁྲུག་པ་ཐམས་ཅད་དང་། ཕ་རོལ་གྱི་དམག་ཚོགས་འོང་བ་ལ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་མི་ཕམ་པ། དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་གདུགས་དཀར་པོ་ཅན་ཞེས་བྱ་བ་གཞན་གྱིས་མི་ཐུབ་མ་ཕྱིར་

ཟློག་པ་ཆེན་མོ་འདི་རྒྱལ་མཚན་གྱི་རྩེ་མོ་ལ་བཏགས་ཏེ་རིམ་གྲོ་ཆེར་མཆོད་པ