Kinh tạng Tây Tạng (Kangyur Đại Học) — 101_གཟུངས་འདུས།_ཝཾ

་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་འབུམ་ཕྲག་དུ་མ་མཐའ་ཡས་མུ་མེད་པར་
བསྐོར་བ་བྱས་ཏེ། བཅོམ་ལྡན་འདས་ཀྱིས་གནང་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཅི་བགྱི་བཀའ་སྩོལ་ཅིག །དེ་ནས་གསང་བ་པའི་བདག་པོ་ལག་ན་རྡོ་རྗེས་ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་ལ་འདི་སྐད་ཅེས་སྨྲས་སོ། །ཀྱེ་
སྐྱེས་བུ་དམ་པ་དག་དེང་ལ་བདུད་སྡིག་ཅན་དཀོན་མཆོག་གསུམ་ལ་སྐྱབས་སུ་འཛིན་དུ་ཆུག་ཤིག །འདི་དམ་ཚིག་ལ་གནས་པར་གྱིས་ཤིག །གཞན་ཡང་གང་དག་སྡང་བ་གདོན་དང་། བགེགས་དང་ལོག་འདྲེན་ལ་སོགས་པ་དྲག་ཤུལ་ཅན་དྲག་ཤུལ་གྱི་སེམས་དང་

ལྡན་པ། སྡིག་པ་ཅན་སྡིག་པའི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པ་དག་དང་། དེ་བཞིན་གཤེགས་པའི་བསྟན་པ་ལ་མི་འཇུག་པ་དང་། མི་རྟོགས་པ་དང་ཡིད་མི་ཆེས་པ་ཐམས་ཅད་དེ་བཞིན་གཤེགས་པའི་བསྟན་པ་ལ་གནས་པར་
གྱིས་ཤིག་དང་། དེས་སེམས་ཅན་ཐམས་ཅད་ཀྱི་ཡུན་རིང་པོའི་དོན་དང་། ཕན་པ་དང་བདེ་བར་འགྱུར་རོ། །དེ་སྐད་ཅེས་སྨྲས་པ་དང་། ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་གིས་གསང་བ་པའི་བདག་པོ་ལག་ན་རྡོ་རྗེའི་ཚིག་མཉན་ནས་དེ་བཞིན་གཤེགས་པའི་བསྟན་པ་ཡང་བཟུང་སྟེ།
དུས་གཅིག་ཏུ་སྒྲ་སྐད་ཀྱི་ང་རོ་གཅིག་ཏུ་སེང་གེའི་སྒྲ་ཆེན་པོ་ཧཱུྃ་ཞེས་བྱ་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་འགེངས་ཤིང་གསང་སྔགས་ཀྱི་གཞི་དག་སྨྲས་སོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་
འཚལ་ལོ། །ཡང་དག་པར་རྫོགས་པའི་སངས་རྒྱས་ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའི་དགེ་འདུན་དང་བཅས་པ་བདུན་པོ་དག་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །རིག་སྔགས་ཀྱི་རྒྱལ་པོ་
ཆེན་པོ་རྡོ་རྗེའི་ལྕགས་ཀྱུ་ལ་ཕྱག་འཚལ་ལོ། །རྡོ་རྗེའི་ལུ་གུ་རྒྱུད་ལ་ཕྱག་འཚལ་ལོ། །རྡོ་རྗེའི་གནམ་ལྕགས་ལ་ཕྱག་འཚལ་ལོ། །རྡོ་རྗེའི་ཤུགས་ལ་ཕྱག་འཚལ་ལོ། །རྡོ་རྗེ་བེ་ཅོན་ལ་ཕྱག་འཚལ་ལོ། །རྡོ་རྗེ་ཡན་ལག་དམར་ལ་ཕྱག་འཚལ་ལོ། །སྟོབས་པོ་ཆེ་ལ་ཕྱག་
འཚལ་ལོ། །རྡོ་རྗེས་རྣམ་པར་འཇོམས་པ་ལ་ཕྱག་འཚལ་ལོ། །འགྲོ་ལྡིང་བ་ལ་ཕྱག་འཚལ་ལོ། །རྡོ་རྗེ་ཕོ་ཉ་མོ་དྲུག་ཅུ་རྩ་བཞི་ལ་ཕྱག་འཚལ་ལོ། །རྡོ་རྗེའི་ཁྲོ་བོ་རྣམས་ལ་ཕྱག་འཚལ་ལོ། །ཏདྱ་ཐཱ། ཨོྃ་ཏྲ་ཊ་ཏྲ་ཊ། ཏྲོ་ཊ་ཡ་ཏྲོ་ཊ་ཡ། སྥུ་ཊ་སྥུ་ཊ། སྥུ་ཊ་ལ། སྥུ་ཊ་ཡ།
སྤོ་ཊ་ཡ། སྥ་ཊ་ཡ། མོ་ཊ་མོ་ཊ། མོ་ཊ་ཡ་མོ་ཊ་ཡ། གྷཱུརྞྞགྷཱུརྞྞ། གྷཱུརྞཱ་བ་ཡ་གྷཱུརྞྞཱ་པ་ཡ། སརྦ་ས་ཏྭཱ་ནི། ཏྲ་ས་ཏྲ་ས། ཏྲཱ་ས་ཡ་ཏྲཱ་ས་ཡ། བྷྲ་མ་བྷྲ་མ། སྃ་བྷྲཱམ་ཡ་སྃ་བྷྲཱམ་ཡ། སརྦབྷཱུ་ཏཱ་ནི། ཀུ་ཊ་ཡ་ཀུ་ཊ་ཡ། སཾ་ཀུ་ཊ་ཡ་སཾ་ཀུ་ཊ་ཡ། སརྦ་ཤཏྲཱུཾ་ཎཾ། གྟཊ་གྷཊ། སཾ་གྷཊ་ཡ།

སཾ་གྷ་ཊ་ཡ། སརྦ་བྱི་དྱཱ་བཛྲ་བཛྲ། སྥོ་ཊ་ཡ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། ཨུཙྪཱ་ཊ་ཡ་བཛྲ་བཛྲ། ཧ་ན་བཛྲ་བཛྲ། ད་ཧ་བཛྲ་བཛྲ། པ་ཙ་བཛྲ་བཛྲ། མཱ་ཐ་བཛྲ་བཛྲ། ཨུཏྶཱ་ད་ཡ་མ་ཧཱ་བཛྲ་བཛྲ། ཏྷཱ་ར་བཛྲ་པཱ་ཎི་བྲི་ཡ། ཀ་ཧ་ཀ་ཧ། ཧ་ས་ཧ་ས། མ་ཧཱ་ཊཊྚ་ཧ་ས། །ཁ་ཅིག་ཏུ་རྒྱ་
མཚོའི་རླབས་འཁྲུགས་པ་ལྟ་བུར་ཟབ་ཅིང་འཇིགས་སུ་རུང་བའི་ཧཱུྃ་ཞེས་བྱ་བའི་སེང་གེའི་སྒྲས་སྡང་བ་རབ་ཏུ་སྡང་བ་བགེགས་དང་ལོག་འདྲེན་ཀུན་དུ་སྐྲག་པར་བྱེད་པ་དང་། སྡང་བ་ཐམས་ཅད་གཞོམ་དུ་གསོལ། འཇོམས་སུ་སྩལ་དུ་གསོལ། ཧཱུྃ་ཧཱུྃ་ཕཊ། བཛྲ་པར་པྲ་ད་སྥོ་ཊ།
བསྒྲུབ་པར་བྱ་བ་ལྷ་དང་། ལྷ་མ་ཡིན་དང་། ལྟོ་འཕྱེ་ཆེན་པོ་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། མ་མོ་དང་། འབྱུང་པོ་དང་། གདོན་གྱི་ཚོགས་མཐར་འབྱིན་པ། འབྱེར་བར་མཛད་པ། ཧཱུྃ་ཧཱུྃ་ཕཊ་ཧེ་ཧེ་ཕཊ། ཨ་མོ་གྷ་ཕཊ། རྒྱལ་ཆེན་བཞིའི་
རིས་ཀྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་། ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུྃ་ཧཱུྃ་ཕཊ་འབྱེར་བར་བགྱིད་དུ་སྩལ་དུ་གསོལ། ཧཱུྃ་ཧཱུྃ་ཕཊ། སུམ་ཅུ་རྩ་གསུམ་གྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་། ཕྱུགས་དང་། རྩ་
ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུྃ་ཧཱུྃ་ཕཊ། འབྱེར་པར་བགྱིད་དུ་སྩལ་དུ་གསོལ། ཧཱུྃ་ཧཱུྃ་ཕཊ། ལྷའི་དབང་པོ་བརྒྱ་བྱིན་ཁང་ཁྱིམ་དང་བཅས་པ། བུ་དང་ཆུང་མ་དང་། ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུྃ་ཧཱུྃ་
ཕཊ། འཐབ་བྲལ་གྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་། ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུྃ་ཧཱུྃ་ཕཊ། དགའ་ལྡན་གྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་། ཕྱུགས་དང་རྩ་ལག་དང་བཅས་པ་གཡོ་བར་
བགྱིད་དུ་སྩལ་དུ་གསོལ། ཧཱུྃ་ཧཱུྃ་ཕཊ། འཕྲུལ་དགའི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་། ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུྃ་ཧཱུྃ་ཕཊ། གཞན་འཕྲུལ་དབང་བྱེད་ཀྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་། ཕྱུགས་

དང་། རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུྃ་ཧཱུྃ་ཕཊ། དེ་བཞིན་དུ་འོད་གསལ་དང་། ཚངས་རིས་ནས་གནས་གཙང་མའི་རིས་འོག་མིན་གྱི་བར་གྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་། ཕྱུགས་དང་རྩ་ལག་དང་བཅས་པ་གཡོ་
བར་བགྱིད་དུ་སྩལ་དུ་གསོལ། ཧཱུྃ་ཧཱུྃ་ཕཊ། འབྱེར་བར་བགྱིད་དུ་སྩལ་དུ་གསོལ། རིགས་སྔགས་འཆང་གྲུབ་པ་རྣམས་རེངས་པར་མཛད་དུ་གསོལ། རྨུགས་པར་མཛད་དུ་གསོལ། རྨོངས་པར་མཛད་དུ་གསོལ། གཅུ་བར་གསོལ་གཅད་དུ་གསོལ། གཞིག་ཏུ་གསོལ་རྣམ་
པར་གཞིག་ཏུ་གསོལ། མནན་དུ་གསོལ། ཧཱུྃ་ཧཱུྃ་ཕཊ། ཨོྃ་ཁྲོ་བོ་ཁྲོ་བོ་ཆེན་པོ་རྣམ་པར་བཀྲ་བ། སེར་སྐྱ་པོ་ནག་པོ། དམར་པོ་སེར་པོ། མི་ཕམ་པ། རྟག་ཏུ་འབར་བའི་ཁྲོ་བོ། །སུ་རུ་སུ་རུ་སུ་རུ། མུ་རུ་མུ་རུ་མུ་རུ། ཏུ་རུ་ཏུ་རུ་ཏུ་རུ། གྷུ་རུ་གྷུ་རུ་གྷུ་རུ། དྷུ་རུ་དྷུ་རུ་དྷུ་རུ།
ཐ་ར་ཐ་ར་ཐ་ར། བྷ་ར་བྷ་ར། ཧ་ར་ཧ་ར། ཡ་ར་ཡ་ར། མ་ར་མ་ར། ཀུ་ཧུ་ཀུ་ཧུ། ཙི་ལི་ཙི་ལི། མི་ལི་མི་ལི། ལུ་ཊུ་ལུ་ཊུ། སརྦ་ཊཱ་ལཱ་མ་མ་ཧཱུྃ། པུ་ལུ་པུ་ལུ་ལེན་ཏམ། ལོ་ཧ་སི་ལེན་ཏ་མ། མུ་ལུ་ལང་ཁཱ་སེ། ཙུ་ལུ་ཙུ་ལེན་ཏམ། མ་ལུ་ཁུ་བུ་ལེན་ཏམ། མ་ལུ་རུ་བི། ཀུརྦི་བུརྦ།
ལེ་ཎྱུསྤུ་ར་གྷ་ཎྱུ་སྤུ་བི་རི་ཙུ། སུ་རུ་སུ་རུ། མུ་རུ་མུ་རུ། སུ་མུ་སུ་མུ་རུ་ཨ་ཀ་ཊེ་བི་ཀ་ཊེ། ནི་ཀ་ཊེ། ཀ་ཊ་བི་ཀ་ཊེ། ནི་ཀ་ཊེ། ཀ་ཊང་ཀ་ཊེ། ཛ་ཡེ་པི་ཛ་ཡེ། ཛ་ཡན་ཏི། བི་ཛ་ཡན་ཏི། ཏི་མིང་གི་སི། མ་ཧཱ་ཏི་མིང་གི་སི། གྷུ་ཏང་ག་མེ། གྷུ་ཏ་བ་རཱ་ཡ་ཎེ། སྡང་བ་རྣམས་ལ་རྗེས་
སུ་འདོམས་པ། མ་དུལ་བ་རྣམས་འདུལ་བ། དྲག་ཤུལ་ཅན་རྣམས་འབྱེར་བར་མཛད་པ། དཔའ་བོ་རྣམས་ཀྱི་ནང་ན་དཔའ་བ། དེས་པ་རྣམས་ཀྱི་ནང་ན་དེས་པ། མ་གྲུབ་པ་རྣམས་གྲུབ་པར་མཛད་པ། གྲུབ་པ་རྣམས་ཆུད་མི་ཟ་བར་མཛད་པ། སེམས་ཅན་ཐམས་ཅད་ལ་ཕན་
པ་མཛད་པ། དེ་བཞིན་གཤེགས་པ་ཐམས་ཅད་ཀྱིས་མནས་བསྒགས་པ། སངས་རྒྱས་ཐམས་ཅད་ལ་བསྙེན་བཀུར་མཛད་པ། རྡོ་རྗེའི་རིགས་ཀྱི་རིགས་སྔགས་ཐམས་ཅད་ཀྱིས་བྱིན་གྱིས་བརླབས་པ། ཚུར་གཤེགས་ཚུར་གཤེགས། རྡོ་རྗེ་རི་རབ་ཀྱི་རྩེ་མོའི་ཁང་པ་བརྩེགས་

པ་ན་བཅོམ་ལྡན་འདས་ཀྱི་སྤྱན་སྔར་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ཀྱི་མདུན་དུ་དམ་ཚིག་གང་བཅས་པ་དེ་རྗེས་སུ་བསྐྱང་དུ་གསོལ། རྗེས་སུ་བསྐྱང་དུ་
གསོལ། གཤེགས་སུ་གསོལ། མྱུར་དུ་གཤེགས་སུ་གསོལ། བདག་གི་ལས་རྣམས་མྱུར་བ་མྱུར་བར་བསྒྲུབ་ཏུ་གསོལ། སྐྲག་པར་བྱེད་པ། རྡོ་རྗེ་འཛིན་པ་ལག་ན་རྡོ་རྗེ་ལ་ཕྱག་འཚལ་ལོ། །ཧུ་རུ་ཧུ་རུ། གྲུབ་པ་དྲག་པོ་ལག་ན་རྡོ་རྗེ་བཀའ་སྩོལ་ཅིག་སྭཱ་ཧཱ། ཤིན་ཏུ་གྲུབ་
པར་བྱེད་པ་ལ་སྭཱ་ཧཱ། རྡོ་རྗེ་ཆེན་པོ་ལ་སྭཱ་ཧཱ། རྡོ་རྗེ་ཕུར་བ་ལ་སྭཱ་ཧཱ། རྡོ་རྗེ་འཇོམས་པ་ལ་སྭཱ་ཧཱ། རྡོ་རྗེས་བྱིན་གྱིས་བརླབས་པ་ལ་སྭཱ་ཧཱ། རྡོ་རྗེ་ཀཱི་ལི་ཀཱི་ལ་ལ་སྭཱ་ཧཱ། དྲག་པོ་ཀཱི་ལི་ཀཱི་ལ་ལ་སྭཱ་ཧཱ། དམར་པོ་ཀཱི་ལི་ཀཱི་ལ་ལ་སྭཱ་ཧཱ། བྱིས་པ་ཀཱི་ལི་ཀཱི་ལ་ལ་སྭཱ་ཧཱ། སངས་རྒྱས་ཐམས་
ཅད་ཀྱིས་བྱིན་གྱིས་བརླབས་པ་ལ་སྭཱ་ཧཱ། བདག་གི་གནོད་པ་དང་། ནང་འགོ་བ་ཐམས་ཅད་དང་། རིམས་ཐམས་ཅད་མེད་པར་མཛོད་ཅིག་སྭཱ་ཧཱ། དེ་ནས་རྡོ་རྗེ་ཁྲོ་བོ་ཆེན་པོས་འདི་སྐད་སྨྲས་པ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་
ཏེ། ཕྱོགས་དང་ཕྱོགས་མཚམས་ཐམས་ཅད་དང་དེ་བཞིན་དུ་བར་སྣང་ལ་རྡོ་རྗེའི་སྐར་མདའ་ཆེན་པོའི་བེ་ཅོན་འབབ་པར་སྣང་ངོ་། །གནམ་གྲུམ་པའི་སྒྲ་ཆེན་པོ་ཡང་གྲག་གོ། །ཀུན་ནས་ས་ཆེན་པོ་འདི་གྲུམ་པར་ཀུན་དུ་སྣང་ངོ་། །ས་ཆེན་པོའི་སེར་ཀ་དེ་དག་ནས་ཡན་ལག་
བརྒྱད་དང་ལྡན་པའི་ཆུའི་རྒྱུན་གྱེན་དུ་བྱུང་ངོ་། །ཆུའི་རྒྱུན་དེ་དག་གིས་རྣམ་པར་འཇིག་པའི་དུས་ཀྱི་ཆུ་བཞིན་དུས་ཆེན་པོ་ཐམས་ཅད་ཀུན་དུ་གང་བར་སྣང་ངོ་། །གང་དག་སའི་འོག་ན་གནས་པའི་ཀླུ་ཆེན་པོ་དང་། ལྷ་ཆེན་པོ་དང་ལྷ་མ་ཡིན་ཆེན་པོ་དེ་དག་ཐམས་ཅད་ཀྱང་སའི་
འོག་ནས་འཐོན་ཅིང་རི་རབ་ཀྱི་དྲུང་དུ་འཐོན་ཏེ་གྱེན་དུ་བྱུང་ནས་བཅོམ་ལྡན་འདས་ལ་སྐྱབས་སུ་དོང་ངོ་། །དེ་ནས་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པའི་འབྱུང་པོ་དང་། བགེགས་དང་ལོག་འདྲེན་གང་དག་འཁོད་པ་དེ་དག་

ཀྱང་ཀུན་དུ་འབར་རབ་ཏུ་འབར་ཞིང་། ཀུན་དུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་པ་དག་གིས་རང་རང་གི་ལུས་ཀུན་དུ་རྣམ་པར་འཇོམས་པར་ཤེས་ཏེ། དེ་དག་སྡུག་བསྔལ་ནི་བཟད་ཅིང་དྲག་ལ་རྩུབ་པས་ཉེན་ནས་ཧ་ཧ་ཞེས་བྱ་བའི་ངུ་སྐད་འཐོན་ཏེ་ཚིག་འདི་
སྐད་ཅེས་ཀྱང་སྨྲས་སོ། །གསང་བ་པའི་བདག་པོ་བདག་ཅག་སྐད་ཅིག་གིས་སྲོག་ཀྱང་མ་མཆིས་པར་འགྱུར་དུ་བགྱིད་ན་འཇིགས་པ་ཆེན་པོར་ལྷུང་བ་འདི་ལས་ཡོངས་སུ་བསྐྱབ་ཏུ་གསོལ། བགེགས་དང་ལོག་འདྲེན་རྣམས་ཇི་ལྟ་བ་དེ་བཞིན་དུ་གཞན་འཇིག་རྟེན་གྱི་ཁམས་གཞན་
ཐམས་ཅད་ན་གནས་པ་དང་། རི་དང་། ཆུ་བོ་དང་། ལྟེང་ཀ་དང་། རྫིང་དང་། དུར་ཁྲོད་དང་། ཤིང་དང་། ཐིབས་པོ་དང་། ཁྲོན་པ་རྙིང་བ་དང་། བཏུང་ཆུ་དང་། ལམ་གྱི་བཞི་མདོ་དང་། སུམ་མདོ་དང་། གཙུག་ལག་ཁང་ཞིགས་པ་དང་། གནས་དང་། ལྷ་ཁང་ན་
གནས་པ་དག་ཐམས་ཅད་ཀྱིས་ཀྱང་གསང་བ་པའི་བདག་པོ་ལག་ན་རྡོ་རྗེ་འཇིགས་པ་ཆེན་པོར་ལྷུང་པ་འདི་ལས་ཡོངས་སུ་བསྐྱབ་ཏུ་གསོལ། ཡོངས་སུ་བསྐྱབ་ཏུ་གསོལ། ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་བཞིན་དུ་ལྷའི་ཁང་པ་ཐམས་ཅད་གཡོས། རབ་ཏུ་གཡོས་
ཀུན་ཏུ་རབ་ཏུ་གཡོས་ཏེ། མོག་མོག་པོར་གྱུར་ཅིང་འོད་མེད་པར་ཀུན་དུ་སྣང་ངོ་། །བདུད་ཀྱི་ཁྱིམ་ཐམས་ཅད་ཀྱང་ཀུན་དུ་འབར། རབ་ཏུ་འབར་ཞིང་། ཀུན་དུ་རབ་ཏུ་མཆིང་ཅིང་འབར་ཏེ། མེ་ལྕེ་གཅིག་ཏུ་གྱུར་པར་སྣང་ངོ་། །གང་དག་བདུད་ཀྱི་རིས་ཀྱི་ལྷའི་བུ་དེ་དག་
ཐམས་ཅད་ཀྱང་རྡོ་རྗེ་ཁྲོ་བོ་ཆེན་པོས་དངངས་སྐྲག་སྟེ་རང་རང་གི་མགོ་རྡོ་རྗེ་རྣམས་ཀྱིས་རྣམ་པར་འཇོམས་པ་མཐོང་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་གསང་བ་པའི་བདག་པོ་ལག་ན་རྡོ་རྗེ་
ལ་སྐྱབས་སུ་དོང་ངོ་། །བདུད་སྡིག་ཅན་ཡང་ཤིན་ཏུ་སྡུག་བསྔལ་བའི་ཚོར་བས་ཉམ་ཐག་ཅིང་སྐྲག་ལ་ཞུམ་སྟེ་གནོད་པས་དངངས་ནས་སངས་རྒྱས་ལ་སྐྱབས་སུ་སོང་། ཆོས་ལ་སྐྱབས་སུ་སོང་། དགེ་འདུན་ལ་སྐྱབས་སུ་སོང་ངོ་། །གསང་བ་པའི་བདག་པོ་ལག་ན་རྡོ་རྗེ་ལ་

ཕྱག་འཚལ་ཏེ། ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཡོངས་སུ་སྐྱོབས་ཤིག །ཡོངས་སུ་སྐྱོབས་ཤིག །བདག་ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་སངས་རྒྱས་ལ་སྐྱབས་སུ་འགྲོའོ། །ཆོས་ལ་སྐྱབས་སུ་འགྲོའོ། །དགེ་
འདུན་ལ་སྐྱབས་སུ་འགྲོའོ། །སེམས་ཅན་ཐམས་ཅད་ཀྱི་དོན་གྱི་ཕྱིར་པ་ལྟ་བུ་དང་། མ་ལྟ་བུ་དང་། སྤུན་ལྟ་བུ་དང་། གཉེན་ལྟ་བུ་དང་། སྣག་གི་གཉེན་མཚམས་ལྟ་བུར་འགྱུར་བར་བྱང་ཆུབ་ཏུ་སེམས་བསྐྱེད་དོ། །བདག་དེང་ཕྱིན་ཆད་སེམས་ཅན་ཐམས་ཅད་ཀྱི་ཕ་
དང་། མ་དང་། སྤུན་དང་། གཉེན་དང་། སྣག་གི་གཉེན་མཚམས་སུ་འགྱུར་བར་བྱའོ། །ལུས་དང་ངག་དང་། ཡིད་ཀྱི་ལས་ཅུང་ཟད་གང་ཅི་བྱེད་པ་དེ་སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་ཡོངས་སུ་བསྔོའོ། །བདག་དབུགས་ཕྱུང་ནས་
གཞན་ཡང་དབུགས་དབྱུང་ངོ་། །བདག་གྲོལ་ནས་གཞན་ཡང་དགྲོལ་ལོ། །བདག་མྱ་ངན་ལས་འདས་ནས་གཞན་ཡང་མྱ་ངན་ལས་བཟླའོ། །རུས་པ་དང་། རྐང་དང་། ཁྲག་དང་། ཤ་དང་། ཉམས་མཐུ་དང་། སྲོག་གིས་ཀྱང་སེམས་ཅན་ཐམས་ཅད་ལ་རིམ་གྲོར་བྱའོ། །
མཆོད་པར་བྱའོ། །རྗེད་པར་བྱའོ། །སངས་རྒྱས་དང་བྱང་ཆུབ་སེམས་དཔའ་དང་། འཕགས་པ་ཉན་ཐོས་དང་རང་སངས་རྒྱས་དང་། སློབ་དཔོན་དང་། བླ་མའི་གནས་ཐམས་ཅད་ལ་ཡང་བསྙེན་བཀུར་བྱའོ། །བསྟི་སྟང་བྱའོ། །རིམ་གྲོར་བྱའོ། །མཆོད་པར་
བྱའོ། །དེ་ནས་བདུད་སྡིག་ཅན་གྱིས་དཀོན་མཆོག་གསུམ་ལ་སྐྱབས་སུ་འགྲོ་བ་བཟུང་སྟེ། བྱང་ཆུབ་ཀྱི་སེམས་རིན་པོ་ཆེ་བསྐྱེད་པ་དང་། ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ཏེ། དགའ་བ་ཐོབ་ནས་སྒྲ་སྐད་ཀྱི་ང་རོ་གཅིག་ཏུ་འདི་སྐད་ཅེས་སྨྲས་སོ། །གང་
གི་ཕྱིར་ན་བདུད་ཁྱོད་ཀྱིས། །སེམས་ཅན་ཀུན་ལ་བདེ་བའི་ཕྱིར། །བླ་མེད་བྱང་ཆུབ་སེམས་བསྐྱེད་པ། །བདག་ཅག་རྗེས་སུ་ཡི་རང་ངོ་། །རིན་ཆེན་སེམས་འདིས་མི་རིང་བར། །རྣམ་འདྲེན་སངས་རྒྱས་གྱུར་ནས་ནི། །སེམས་ཅན་ཤིན་ཏུ་སྡུག་བསྔལ་ཀུན། །མྱ་ངན་ལས་

ནི་བཟླ་བར་གྱིས། །རྒྱལ་བའི་མཆོག་འདི་ཇི་བཞིན་དུ། །སྐྱེ་དགུ་ཐམས་ཅད་གདུལ་བར་བྱོས། །སྟོབས་པོ་ཆེ་དང་ལྡན་པ་ཡི། །བདུད་བཞི་པོ་དག་གདུལ་བར་གྱིས། །དེ་སྐད་ཅེས་སྨྲས་པ་དང་། ཐམས་ཅད་དང་ལྡན་པའི་འཁོར་ཆེན་པོ་དེ་སངས་རྒྱས་ཀྱི་མཐུས་
རང་རང་གི་ལག་གི་སྙིམ་པ་ན་མེ་ཏོག་གི་ཕུར་མ་ཐོགས་པར་ཤེས་ཏེ། མེ་ཏོག་གི་ཕུར་མ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། གསང་བ་པའི་བདག་པོ་ལག་ན་རྡོ་རྗེ་དང་། ཁྲོ་བོ་ཆེན་
པོ་རྡོ་རྗེའི་ཁྲོ་བོ་དེ་དག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང་། ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་གཏོར་བ་དང་དེ་ཡང་སངས་རྒྱས་ཀྱི་མཐུས་མེ་ཏོག་གི་གཞལ་མེད་ཁང་ཆེན་
པོར་གྱུར་ཏོ། །བདུད་སྡིག་ཅན་ནི་མཆོག་ཏུ་བདེ་བས་ཚིམ་པར་གྱུར་ནས་སངས་རྒྱས་རྗེས་སུ་དྲན་པ་སྒོམ་ཞིང་རང་གི་བསོད་ནམས་ཀྱི་རྣམ་པར་སྨིན་པའི་རྫུ་འཕྲུལ་གྱི་མཐུ་དང་། དེ་བཞིན་གཤེགས་པ་རྗེས་སུ་སེམས་པས་མདུན་དུ་རིན་པོ་ཆེའི་གཞལ་མེད་ཁང་ཆེན་པོ་དཔག་བསམ་
གྱི་ཤིང་དུ་མས་མིག་མངས་རིས་བརྒྱད་དུ་བྲེས་པ། རིན་པོ་ཆེ་དང་། ནོར་བུ་དང་། མུ་ཏིག་དང་། དུང་དང་། མན་ཤེལ་དང་། བྱི་རུ་དང་། མརྒད་དང་། བཻཌཱུརྱ་དང་། ཨནྡ་རྙིལ་དང་། མཐོན་ཀ་ཆེན་པོ་དང་། ཀེ་ཀེ་རུ་དང་། ཀེ་ཀེ་རུ་ཆེན་པོ་དང་། རྡོ་རྗེ་དང་། རྡོ་རྗེ་ཆེན་པོ་དང་།
དུན་ལས་དང་། དུན་ལས་ཆེན་པོ་དང་། འཛམ་བུའི་ཆུ་བོའི་གསེར་གྱི་དྲ་བས་རྣམ་པར་སྤྲས་པ། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དན་བསྒྲེང་བས་ལེགས་པར་བརྒྱན་པ། མེ་ཏོག་གི་ཕྲེང་བས་བཀླུབས་པ། པོག་སྣོད་དུ་མ་ནས་
བདུག་པ་དྲི་ཞིམ་པོའི་ངད་ཀྱི་དྲི་ཞིམ་པར་བྱས་པ། ཕྱེ་མའི་དྲི་ཞིམ་པོའི་བསྒོ་བས་བསྒོས་པས། ལྷའི་བུ་མོ་འབུམ་ཕྲག་དུ་མ་སིལ་སྙན་དང་། ཕེག་རྡོབ་པ་དང་གླུ་ལེན་ཅིང་གར་བྱེད་པ། རྫིང་བུ་ཡན་ལག་བརྒྱད་དང་ལྡན་པའི་ཆུ་ཅན་འབུམ་ཕྲག་དུ་མའི་དབུས་ནས་རིན་པོ་ཆེ་སྣ་

ཚོགས་ཀྱི་པདྨ་དང་། ཀུ་མུ་ད་དང་། པདྨ་དཀར་པོ་དང་། ཨུཏྤལ་དང་། དྲི་མཆོག་བྱུང་བས་མཛེས་པར་བྱས་པའི་ཕྱོགས་དང་ལྡན་པ་བྱུང་ནས། དེ་མཆོག་ཏུ་དགའ་བ་དང་། རངས་པ་དང་། ཡིད་བདེ་བ་སྐྱེས་ཏེ་གུས་པ་ཐམས་ཅད་ཀྱིས་དེ་བླངས་ནས་བདུད་ཀྱི་མཐུ་ཆེན་པོ་དང་། བདུད་
ཀྱི་རྣམ་པར་འཕྲུལ་བ་ཆེན་པོ་དང་། བདུད་ཀྱི་རྫུ་འཕྲུལ་ཆེན་པོས་ལག་པ་གཉིས་ཀ་སྤྱི་བོ་ལ་བླངས་ཏེ། དགེ་བའི་བཤེས་གཉེན་གསང་བ་བའི་བདག་པོ་ལག་ན་རྡོ་རྗེ་ལ་དགའ་བ་དང་། མཆོད་པའི་ཕྱིར་ཕུལ་ཏེ། ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་
དོ། །འཇིག་རྟེན་དག་ལ་དབང་བྱེད་དབང་གིས་འབྱོར་གྱུར་པ། །སྟོབས་བཅུའི་སྲས་རབ་མཆོག་ལྡན་ཁྱོད་ལ་བརྟེན་ནས་སུ། །བྱང་ཆུབ་ཕྱིར་ནི་ཆགས་བྲལ་དྲི་མེད་བྱང་ཆུབ་སེམས། །སེམས་ཅན་བདེ་སྒྲུབ་གཏེར་དང་འདྲ་བ་བདག་གིས་ཐོབ། །བདག་མིག་གཏི་མུག་མུན་པས་
དྲི་ཅན་དྲི་མེད་གྱུར། །སྲིད་པའི་འདོད་ཆགས་རབ་ཏུ་ཞི་ཞིང་སྤྲོས་དང་བྲལ། །མྱ་ངན་ལས་འདས་དྲང་པོའི་ལམ་ནི་བདག་ལ་བསྟན། །སེམས་དམྱལ་མི་བཟད་ཐམས་ཅད་རབ་ཏུ་ཞི་བར་གྱུར། །སྡིག་བྲལ་འཇིག་རྟེན་མགོན་ལ་སྐྱབས་སུ་མ་སོང་བ། །ཀྱེ་མ་དམན་པ་
ཡུན་རིང་ཇི་ལྟ་བསླུས་ཤིག་གུ། །དེ་རིང་ཐུབ་དབང་སྲས་པོ་རྣམས་ལ་བསོད་ནམས་དང་། །དད་དང་སྙིང་རྗེ་ཏིང་འཛིན་ཐོབ་ནས་ངོ་མཚར་གྱུར། །ས་མདོག་གཅིག་པུར་སངས་རྒྱས་མྱུར་དུ་གྲུབ་པར་ཤོག །གཅིག་པུས་འགྲོ་བ་མ་ལུས་མྱ་ངན་བཟླ་བར་བྱ། །སྲིད་པ་གཞན་ན་ཀུན་དུ་
རྒྱུ་རྩེ་བདག་གི་ཡིད། །རང་ཕན་འཇུག་དང་དགེ་བཤེས་བྲལ་བར་མ་གྱུར་ཅིག །དེ་ནས་བདུད་སྡིག་ཅན་གྱིས་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་གསང་བ་པའི་བདག་པོ་ལག་ན་རྡོ་རྗེ་ལ་མངོན་པར་བསྟོད་ནས་ཅང་མི་སྨྲ་བར་གྱུར་ཏོ། །དེ་ནས་གསང་བ་པའི་
བདག་པོ་ལག་ན་རྡོ་རྗེས་ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་སྡང་བ་དང་། གདོན་དང་བགེགས་དང་། ལོག་འདྲེན་དེ་དག་ཐམས་ཅད་གང་གིས་སེམས་ཅན་ཐམས་ཅད་ལས་རྣམ་པར་རྩོམ་པ་ལ་རྣམ་པར་མི་འཚེ་བ་དང་། བགེགས་མི་

བྱེད་པ་དང་། དཀོན་མཆོག་གསུམ་ལ་སྐྱབས་སུ་འགྲོ་བར་འགྱུར་བར་དེ་བཞིན་གཤེགས་པའི་དམ་ཚིག་འཛིན་དུ་ཆུག་ཤིག །རིགས་ཀྱི་བུ་དག་འདི་དག་ལ་མི་འཇིགས་པ་ཡང་བྱིན་ཅིག་དང་། དེ་སེམས་ཅན་ཐམས་ཅད་ཀྱི་དོན་དང་། ཕན་པ་དང་བདེ་བ་དང་།
མྱ་ངན་ལས་འདས་པ་བླ་ན་མེད་པ་ཡང་ཐོབ་པར་འགྱུར་རོ། །དེ་སྐད་ཅེས་སྨྲས་པ་དང་། ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་གིས་གསང་བ་པའི་བདག་པོ་ལག་ན་རྡོ་རྗེ་ལ་ལེགས་སོ། །ཞེས་ཏེ་ཚིག་ལ་མངོན་པར་དགའ་ནས་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་།
ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པ་དེ་དག་ཐམས་ཅད་དང་། སྡང་བ་བགེགས་དང་། ལོག་འདྲེན་དང་། མ་མོ་དང་། ཡི་དགས་དང་། ཤ་ཟ་དང་། འབྱུང་པོ་དང་། གདོན་དང་། བརྗེད་བྱེད་དང་། སྲུལ་པོ་
དང་། ལུས་སྲུལ་པོ་དང་། རོ་ལངས་དང་། མཁའ་འགྲོ་དང་། སྒྲུབ་པ་དང་། སྦྲུལ་འཛིན་བཅས་པ་ལ་སོགས་པ་དེ་དག་ཐམས་ཅད་དང་། གདོན་གྱི་ཚོགས་དེ་དག་ཐམས་ཅད་ཀྱིས་རྡོ་རྗེ་ཆེན་པོ་མང་པོ་འབབ་པས་དཀྲུགས་པའི་མཚོ་ཆེན་པོ་ཟབ་མོ་ཀློང་འཁྱིལ་པ། འུར་འུར་
སྒྲ་འབྱུང་བ་ལྟ་བུར་དྲག་ཅིང་རྒྱུན་རིང་བའི་སྐད་གསང་མཐོན་པོས་འདི་སྐད་ཅེས་སྨྲས་སོ། །སྡང་བ་འབྱུང་པོ་དང་། གདོན་དང་། བགེགས་དང་། ལོག་འདྲེན་ལ་སོགས་པ་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སྡིག་པ་ཅན་སྡིག་པའི་སེམས་དང་ལྡན་པ། སྡང་བ་
ཅན་སྡང་བའི་སེམས་དང་ལྡན་པ་ཁྱེད་ཐམས་ཅད་ཉོན་ཅིག །ཁྱེད་ཀྱིས་དེང་ཕན་ཆད་སེམས་ཅན་གང་དག་དེ་བཞིན་གཤེགས་པའི་བསྟན་པ་ལ་ཞུགས་པ་དག་དང་། དེ་ལ་སོགས་པ་གང་དག་གསང་སྔགས་སྒྲུབ་བམ། ཀློག་པ་དེ་དག་ལ་བགེགས་འབྱུང་བར་མི་བྱ་ཞིང་འཚོ་བར་མི་
བྱ་སྟེ། སྒྲུབ་པ་དང་རྗེས་སུ་མཐུན་པར་སྟོབས་སྦྱིན་པར་བྱའོ། །སེམས་ཅན་གང་དག་དམ་ཚིག་ལ་མ་ཞུགས་པ་དེ་དག་ལ་བསྲུང་བར་བྱ། ཞི་བ་དང་བདེ་ལེགས་སུ་འགྱུར་བ་དང་། ཆད་པ་སྤང་བ་དང་། དུག་གཞིལ་བ་དང་། དུག་གསད་པ་དང་། རིག་སྔགས་འགྲུབ་པ་

སྦྱིན་པར་བྱའོ། །སྦྲང་རྩི་དང་། ཚིགས་མ་དང་། སྒོག་པ་དང་། ཀིའུ་དང་། གཏོར་མ་དང་། འབྱུང་པོ་དང་། མི་བགྲུངས་པ་རྣམས་ཀྱི་ཤ་དང་ཟས་ཟོས་ཀྱང་སྐྱོན་དུ་མི་བཟུང་ཞིང་ཉེས་པར་མི་བརྩིའོ། །དེ་ནས་སྡང་བ་འབྱུང་པོ་དང་། བགེགས་དང་། ལོག་འདྲེན་ལ་སོགས་པ་
ཐམས་ཅད་ཅེས་བྱ་བ་ནས་སྒྲ་སྐད་ཀྱི་ང་རོ་གཅིག་གིས་འདི་སྐད་ཅེས་སྨྲས་སོ། །ཞེས་བྱ་བའི་བར་དུ་སྦྱར་རོ། །རིགས་ཀྱི་བུ་དག་བཀའ་ལུང་ཅི་སྩལ་བ་དེ་བཞིན་དུ་སྦྱར་བར་བགྱིའོ། །དེང་སླན་ཆད་སངས་རྒྱས་བཅོམ་ལྡན་འདས་དང་། ཆོས་དང་དགེ་འདུན་ལ་སྐྱབས་སུ་མཆིའོ། །སེམས་
ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་དང་། སྡང་བ་བགེགས་དང་། ལོག་འདྲེན་དང་། འབྱུང་པོ་དང་། གདོན་གྱི་ཚོགས་དེ་དག་ཐམས་ཅད་ལ་ལེགས་སོ་
ཞེས་བྱ་བ་བྱིན་ཏེ། རིག་སྔགས་ཀྱི་ལས་དང་དམ་ཚིག་དང་། ཕྱག་རྒྱ་ཐམས་ཅད་འཛིན་དུ་བཅུག་གོ། །གསང་བ་པའི་བདག་པོ་ལག་ན་རྡོ་རྗེ་ཡང་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་དེ་ལས་ལངས་སོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་གསང་བ་པའི་བདག་པོ་
ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་གང་ལ་གནས་ནས་ཁྱོད་ཀྱིས་རྫུ་འཕྲུལ་གྱི་ཆོ་འཕྲུལ་འདི་ལྟ་བུ་འདི་བསྟན་པ་དང་། བདུད་སྡིག་ཅན་ཡང་བྱང་ཆུབ་ཏུ་སེམས་བསྐྱེད་པ་དང་། གཞན་ཡང་སྡང་བ་གདོན་དང་། འབྱུང་པོ་དང་། བགེགས་དང་། ལོག་འདྲེན་ཐམས་ཅད་
ཀྱང་དམ་ཚིག་ལ་བཀོད་ཅིང་བྱང་ཆུབ་ཀྱི་སེམས་འཛིན་དུ་བཅུག་པའི་ཏིང་ངེ་འཛིན་འདིའི་མིང་ཅི་ཞེས་བྱ་དེ་སྐད་ཅེས་སྨྲས་པ་དང་། གསང་བ་པའི་བདག་པོ་ལག་ན་རྡོ་རྗེས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་ཏིང་ངེ་འཛིན་འདི་ནི་མིང་དང་ཡི་གེ་དང་
སྒྲ་སྐད་ཀྱིས་རྟོགས་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། གང་མིང་ངམ་གཟུགས་སམ། དབྱིབས་སམ། གནས་སམ། མཉམ་པར་བཞག་པའམ། གཡེངས་པ་ཡང་རུང་སྟེ། ཏིང་ངེ་འཛིན་ཅེས་བྱ་བའི་ཆོས་དེ་གང་ཡང་མེད་དོ། །གང་ལ་མིང་མེད་པ་དང་། གཟུགས་

མེད་པ་དང་། དབྱིབས་མེད་པ་དང་། གནས་མེད་པ་དང་། མཉམ་པར་བཞག་པ་མེད་པ་དང་། གཡེང་བ་མེད་པ་འདི་བཙུན་པ་ཤ་ར་དྭ་ཏིའི་བུ་ཏིང་ངེ་འཛིན་འདི་མིང་ཅི་ཞིག་བྱ་ཞེས་དེ་ལ་ཇི་སྙམ་དུ་སེམས། ཡང་བཙུན་པ་ཤ་ར་དྭ་ཏིའི་བུ་གསལ་བར་བྱེད་པ་འདི་ནི་བདག་
ལ་གསལ་བར་བྱེད་པ་མ་ཡིན་གཞན་ལ་གསལ་བར་བྱེད་པ་མ་ཡིན། གཉིས་ཀ་ལ་ཡང་གསལ་བར་བྱེད་པ་མ་ཡིན་ནོ། །འོན་ཀྱང་གསལ་བར་བྱེད་པར་བཏགས་པ་ཡོད་དོ། །དེ་ལ་གསལ་བར་བྱེད་པ་ནི་གསལ་བར་བྱེད་པའི་བདག་ཉིད་ཀྱིས་སྟོང་པ་དག་ནི་བདག་གིས་སྟོང་།
གཞན་ཡང་གཞན་གྱི་བདག་ཉིད་ཀྱིས་སྟོང་། གཉིས་ཀ་ཡང་གཉིས་ཀའི་བདག་ཉིད་ཀྱིས་སྟོང་སྟེ། ཡང་དག་པ་མ་ཡིན་པ་ཀུན་དུ་བརྟགས་པའི་ཕྱིར་རོ། །འདི་ཅི་ཞེས་བྱ་བའི་ཡི་གེ་གཉིས་ཀྱི་ཚིག་དེ་ཡང་ཚིག་གི་བདག་ཉིད་ཀྱིས་སྟོང་སྟེ་ཡི་གེ་ཡང་ཡི་གེ་མ་ཡིན་ནོ། །དེ་ལྟར་ན་
རྟེན་ཅིང་འབྲེལ་པར་འབྱུང་བའི་དོན་རྟོགས་པར་བྱེད་པ་ཡིན་ནོ། །དོན་དེ་བརྗོད་པ་ན་ཡང་གང་ནས་ཀྱང་མི་འོང་གང་དུ་ཡང་མི་འགྲོ་མོད་ཀྱི་གཞན་གྱི་དབང་ལ་རྟེན་པའི་ཕྱིར་ཡི་གེར་བཏགས་པ་ཡང་ཡོད་དོ། །ཡོངས་སུ་བཏགས་པ་ཡིན་པའི་ཕྱིར་བརྟགས་པ་ཡང་སྟོང་བའོ། །
རྟེན་ཅིང་འབྲེལ་བར་འབྱུང་བའི་ཕྱིར་གཞན་གྱི་དབང་ཉིད་སྟོང་བའོ། །རྒྱུ་དང་རྐྱེན་ལས་བྱུང་བའི་ཕྱིར་རྟེན་ཅིང་འབྲེལ་པར་འབྱུང་བ་ཡང་སྟོང་པའོ། །གློ་བུར་དུ་རྒྱུ་དང་རྐྱེན་གྱིས་བསྐྱེད་པའི་ཕྱིར་འབྱུང་བ་ཡང་འབྱུང་བའི་བདག་ཉིད་ཀྱིས་སྟོང་ངོ་། །དེ་ལ་རྟེན་ཅིང་འབྲེལ་པར་འབྱུང་བ་
ནི་རང་གི་མཚན་ཉིད་ཀྱིས་སྟོང་ངོ་། །རང་གི་མཚན་ཉིད་ཀྱིས་སྟོང་པ་གང་ཡིན་པ་དེ་མཚན་ཉིད་མེད་པའོ། །མཚན་ཉིད་མེད་པ་གང་ཡིན་པ་དེ་དེ་བཞིན་ཉིད་དོ། །དེ་བཞིན་ཉིད་གང་ཡིན་པ་དེ་མ་ནོར་བ་དེ་བཞིན་ཉིད་དོ། །མ་ནོར་བ་དེ་བཞིན་ཉིད་གང་ཡིན་པ་དེ་གཞན་མ་ཡིན་པ་དེ་བཞིན་
ཉིད་དོ། །གཞན་མ་ཡིན་པ་དེ་བཞིན་ཉིད་གང་ཡིན་པ་དེ་ཏིང་ངེ་འཛིན་ཏོ། །ཏིང་ངེ་འཛིན་གང་ཡིན་པ་དེ་རྟོགས་པའོ། །རྟོགས་པ་གང་ཡིན་པ་དེ་སྟོང་པ་ཉིད་དོ། །སྟོང་པ་ཉིད་གང་ཡིན་པ་དེ་ལྷག་མཐོང་ངོ་། །ལྷག་མཐོང་གང་ཡིན་པ་དེ་ཞི་གནས་སོ། །ཞི་གནས་གང་ཡིན་པ་

དེ་རྣམ་པར་ཐར་པའོ། །རྣམ་པར་ཐར་པ་གང་ཡིན་པ་དེ་དབུ་མའི་ལམ་ཡིན་ནོ། །དབུ་མའི་ལམ་གང་ཡིན་པ་དེ་ལ་མཐའ་གཅིག་མེད། མཐའ་གཉིས་མེད། གཟུང་བ་མེད། འཛིན་པ་པོ་མེད། འཛིན་པ་མེད། ཆད་པ་མེད། རྟག་པ་མེད། སྐྱེ་བ་མེད། འགག་པ་མེད།
རྟོག་པ་མེད། རྣམ་པར་རྟོག་པ་མེད། རང་དབང་མེད། གཞན་གྱི་དབང་མེད། འགྲོ་བ་མེད། འོང་བ་མེད། ཀུན་ནས་ཉོན་མོངས་པ་མེད། རྣམ་པར་བྱང་བ་མེད། འདུ་བ་མེད། འབྲལ་བ་མེད་དེ། དེ་ནི་ལྷག་མཐོང་ཡིན་ནོ། །ལྷག་མཐོང་གང་ཡིན་པ་དེ་ལ་ཕུང་པོ་རྣམས་མེད།
ཁམས་རྣམས་མེད། དབང་པོ་རྣམས་མེད། སྐྱེ་མཆེད་རྣམས་མེད། ཡུལ་རྣམས་མེད། ཡུལ་དུ་གདགས་པ་མེད། ལས་མེད་ལས་ཀྱི་འབྲས་བུ་མེད་དོ། །གང་ལ་ལས་མེད་ཅིང་ལས་ཀྱི་འབྲས་བུ་མེད་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །བླ་ན་མེད་པ་ཡང་
དག་པར་རྫོགས་པའི་བྱང་ཆུབ་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པར་སངས་རྒྱས་སོ། །བླ་ན་མེད་པ་ཡང་དག་པར་རྫོགས་པའི་སངས་རྒྱས་གང་ཡིན་པ་དེ་ཆོས་སོ། །ཆོས་གང་ཡིན་པ་དེ་མི་སྐྱེ་མི་འཆིའོ། །མི་སྐྱེ་མི་འཆི་བ་གང་ཡིན་པ་དེ་ནམ་མཁའ་དང་
མཉམ་པ་ཉིད་དུ་ཁོང་དུ་ཆུད་པར་བྱའོ། །བཙུན་པ་ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་ཁྱོད་ཀྱིས་ཏིང་ངེ་འཛིན་བསྟན་པ་བཤད་པ་འདི་ནི་ཤིན་ཏུ་ཟབ་སྟེ། འདི་ལ་ཉན་ཐོས་དང་། རང་སངས་རྒྱས་ཐམས་ཅད་ཀྱི་འགྲོ་བ་ཡང་མེད་ན། འཇིག་རྟེན་པའི་མུ་སྟེགས་ཅན་དང་།
ཕས་ཀྱི་རྒོལ་བ་ཐམས་ཅད་ལྟ་སྨོས་ཀྱང་ཅི་དགོས་ཆོས་ཀྱི་རྣམ་གྲངས་འདི་ནི་དགེ་བའི་རྩ་བ་མ་བསྐྱེད་པ་དང་། མོས་པ་ཆུང་བ་ཐམས་ཅད་ཀྱིས་ཤེས་པར་དཀའ་བ་སྟེ། གཞན་དུ་ན་འདི་དེ་བཞིན་གཤེགས་པའི་སྤྱན་གྱི་ཡུལ་དུ་གྱུར་པ་ནི་མ་གཏོགས་སོ། །དེ་ལ་དེ་བཞིན་གཤེགས་པའི་
སྤྱན་ནི་དམིགས་པ་མེད་པ་གནས་པ་མེད་པའོ། །དེ་སྐད་ཅེས་སྨྲས་པ་དང་། གསང་བ་པའི་བདག་པོ་ལག་ན་རྡོ་རྗེས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་དེ་བཞིན་གཤེགས་པ་ཞེས་བྱ་བ་དེ་ནི་དེ་བཞིན་ཉིད་ཀྱི་མཚན་ཉིད་དོ། །དེ་བཞིན་

ཉིད་ཀྱི་མཚན་ཉིད་གང་ཡིན་པ་དེ་ནི་སྟོང་པ་ཉིད་དོ། །སྟོང་པ་ཉིད་གང་ཡིན་པ་དེ་ལ་དེ་བཞིན་གཤེགས་པ་མེད་དོ། །དེ་བཞིན་གཤེགས་པའི་མཚན་ཉིད་མེད་དོ། །ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་གལ་ཏེ་དེ་བཞིན་གཤེགས་པ་མཚན་ཉིད་མེད་པ་ཡིན་
ན། དེ་ལ་ཇི་ལྟར་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང་དེ་བཞིན་གཤེགས་པ་ཞེས་བསྟན་ཅིང་དཔེ་བྱད་བཟང་པོ་བརྒྱད་ཅུས་སྐུ་ལེགས་པར་བརྒྱན། ཇི་ལྟར་དེ་བཞིན་གཤེགས་པའི་སྐུ་གསུམ་རྣམ་པར་གཞག་པར་བལྟ། ཇི་ལྟར་དེ་བཞིན་གཤེགས་པ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས། གསང་བ་པའི་བདག་པོ་ལག་ན་རྡོ་རྗེས་སྨྲས་པ། བཙུན་པ་ཤ་ར་དྭ་ཏིའི་བུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཞེས་བྱ་བ་དེ་ནི་ཀུན་རྫོབ་ཀྱི་བརྡའི་ཚིག་གོ། །བརྒྱན་ཅེས་བྱ་བ་དེ་ནི་སྤྲོས་པའི་ཡི་གེ་དང་
སྒྲའོ། །དཔེ་བྱད་བཟང་པོ་ཞེས་བྱ་བ་དེ་ནི་སྒྱུ་མ་དང་རྨི་ལམ་གྱི་ངོ་བོ་ཉིད་ཀྱི་མཚན་ཉིད་དོ། །ཡང་དག་པར་རྫོགས་པའི་བྱང་ཆུབ་ཅེས་བྱ་བ་དེ་ནི་ནམ་མཁའི་ངོ་བོ་ཉིད་ཀྱི་མཚན་ཉིད་དོ། །སྐུ་གསུམ་རྣམ་པར་གཞག་པ་ཞེས་བྱ་བ་དེ་ནི་ཚོགས་གཉིས་ཀྱིས་སྤྲུལ་པའི་མཚན་ཉིད་དོ། །བཙུན་
པ་ཤ་ར་དྭ་ཏིའི་བུ་ཡང་འདི་ནི་དེ་བཞིན་གཤེགས་པའི་སྐུའི་གསང་བའི་ཡུལ་ཏེ། དེ་ལ་སྐུའི་གསང་བ་ཞེས་བྱ་བ་དེ་ནི་བསོད་ནམས་ཆེན་པོའི་རྒྱུ་མཐུན་པའི་མཚན་ཉིད་དོ། །བསོད་ནམས་ཀྱི་རྒྱུ་མཐུན་པ་གང་ཡིན་པ་དེ་དེ་བཞིན་གཤེགས་པའི་རྫོགས་པར་ལོངས་སྤྱོད་པའི་སྐུ་སྟེ། འདི་
ཡང་དེ་བཞིན་གཤེགས་པའི་སྐུའི་ཕྲིན་ལས་དང་སྐུའི་གསང་བའོ། །བཙུན་པ་ཤ་ར་དྭ་ཏིའི་བུ་གསུང་ཞེས་བྱ་བ་དེ་ནི་ཀུན་རྫོབ་དང་དོན་དམ་པ་གཉིས་ཀྱི་མཚན་ཉིད་དོ། །ཀུན་རྫོབ་དང་དོན་དམ་པ་གཉིས་ཀྱི་མཚན་ཉིད་གང་ཡིན་པ་དེ་དེ་བཞིན་གཤེགས་པའི་སྤྲུལ་པའི་སྐུའོ། །རྟེན་ཅིང་
འབྲེལ་བར་འབྱུང་བ་ཆད་པ་མེད་པ་དང་། རྟག་པ་མེད་པར་འཇུག་པ་ཐུགས་སུ་ཆུད་པ། ཡིད་ཀྱི་རྣམ་པར་ཤེས་པའི་ལམ་གྱིས་འཇུག་པ། བསམ་གཏན་གོམས་པར་བྱ་བར་ཤེས་པར་བྱ་བ་སྟེ། དམིགས་པ་མེད་པ། ཀུན་ནས་ཉོན་མོངས་པ་དང་། རྣམ་པར་བྱང་བས་

སྟོང་བ། ལུས་ཀྱི་ཡུལ་མ་ཡིན་པ། ངག་གི་སྤྱོད་ཡུལ་མ་ཡིན་པ། ཡིད་ཀྱི་རང་གི་ངོ་བོའི་ཡུལ་མ་ཡིན་པ་གང་ཡིན་པ་དེ་ནི་དེ་བཞིན་གཤེགས་པའི་ཆོས་ཀྱི་སྐུ་ནམ་མཁའི་ཁམས་སུ་ཡང་དག་པར་འདུ་བའོ། །དེ་བཞིན་གཤེགས་པའི་སྐུ་གསུམ་རྣམ་པར་གཞག་པ་ནི་དེ་ལྟར་
བལྟ་བར་བྱའོ། །བཙུན་པ་ཤ་ར་དྭ་ཏིའི་བུ་གཞན་ཡང་དེ་བཞིན་གཤེགས་པའི་སྐུའི་གསང་བ་གང་ཡིན་པ་དེ་ནི་ཆོས་ཀྱི་སྐུའོ། །ཆོས་ཀྱི་སྐུ་གང་ཡིན་པ་དེ་ནི་ཆོས་རྣམས་ཀྱི་དབུ་མའི་ལམ་དུ་བལྟའོ། །དབུ་མའི་ལམ་གང་ཡིན་པ་དེ་ནི་མི་སྐྱེ་མི་འཆི་བ་སྟེ། དེ་བཞིན་གཤེགས་
པ་རྣམས་བྱུང་ཡང་རུང་མ་བྱུང་ཡང་རུང་ཆོས་ཀྱི་སྐུ་འདི་ནི་གནས་པ་ཉིད་དོ། །བཙུན་པ་ཤ་ར་དྭ་ཏིའི་བུ་བསོད་ནམས་ཀྱི་རྒྱུ་མཐུན་པ་ཞེས་བྱ་བ་དེ་ནི་ཕ་རོལ་དུ་ཕྱིན་པ་དག་གི་རྣམ་གྲངས་སུ་གཏོགས་པའོ། །དེ་ལ་ཕ་རོལ་དུ་ཕྱིན་པ་ཞེས་བྱ་བ་དེ་ཡང་བསོད་ནམས་ཀྱི་རྒྱུ་མཐུན་པ་ཉིད་
དུ་བལྟའོ། །དེ་ཅིའི་ཕྱིར་ཞེ་ན། བཙུན་པ་ཤ་ར་དྭ་ཏིའི་བུ་སྦྱིན་པའི་ཕ་རོལ་དུ་ཕྱིན་པ་ཞེས་བྱ་བ་དེ་ནི་ཕྱི་ནང་གི་དངོས་པོ་རྣམ་པ་གཉིས་ཡོངས་སུ་གཏང་བར་བྱ་བའོ། །དེ་ལ་ཕྱི་ཞེས་བྱ་བ་དེ་ནི་ཀུན་རྫོབ་ཀྱི་ཚིག་གོ། །ནང་ཞེས་བྱ་བ་དེ་ནི་དོན་དམ་པའི་ཚིག་གོ། །དེ་ལ་ཕྱི་ཞེས་
བྱ་བ་དེ་ནི་གང་ཟས་འདོད་པ་རྣམས་ལ་ཟས་དང་། སྐོམ་འདོད་པ་རྣམས་དང་། དེ་བཞིན་དུ་བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དང་། གླང་པོ་ཆེ་དང་། རྟ་དང་། ཤིང་རྟ་དང་། ས་དང་། མགོ་དང་། ལག་པ་དང་། རྐང་པ་དང་། མིག་
དང་། ཤ་དང་། ཁྲག་དང་། རྐང་དང་། ཚིལ་དང་། རུས་པའི་བར་དུ་སྦྱིན་པ་སྟེ། དེ་ཡང་ཐབས་ཀྱི་ཕ་རོལ་དུ་ཕྱིན་པས་ཡོངས་སུ་ཟིན་པས་ཡོངས་སུ་བསྔོས་པ་རྣམ་པར་སྨིན་པ་ལ་མི་རེ་བ་དང་། གྱ་ནོམ་པ་དང་། རྒྱ་ཆེ་བ་དང་། རང་གི་བསྟི་སྟང་དུ་བྱས་ཏེ་རྣམ་པ་
ཐམས་ཅད་སེམས་ཅན་ཐམས་ཅད་ལ་སྦྱིན་པ་འདི་ནི་ཕྱིའི་འོ། །ནང་གི་ནི་ཆོས་སྦྱིན་པའོ། །དེ་ཡང་རྣམ་པ་གཉིས་ཏེ། རྟེན་ཅིང་འབྲེལ་པར་འབྱུང་བ་ལ་འཇུག་པར་ཡང་དག་པར་གཞོལ་བ་དང་། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། བཟོད་པའི་གཏམ་

དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྟོབས་དང་། སྨོན་ལམ་དང་། ཡེ་ཤེས་ཀྱི་གཏམ་དང་། སྙིང་རྗེས་ཡོངས་སུ་ཟིན་པ་ཐབས་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བའོ། །གཞན་ཡང་ནང་གི་སྦྱིན་པ་ནི་གང་འདི་
མཐར་འཛིན་པ་དང་། སྐྱེ་བ་དང་འགག་པར་ཡོངས་སུ་རྟོག་པ་དང་། རྣམ་པར་རྟོག་པ་དང་། ཤེས་པ་དང་ཤེས་བྱ་རྣམ་པར་སྤངས་པ་དགའ་བས་ཡོངས་སུ་ཟིན་པ་སྟོབས་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བ་སྟེ། འདི་ནི་ཆོས་ཀྱི་སྦྱིན་པའོ། །གང་འདི་ཉིད་ལ་ལུས་དང་ངག་
དང་། ཡིད་རྒོད་པ་མེད་པ་དང་། ཁེངས་པ་མེད་པ་དང་། ལུས་རྣམ་པར་གཡེང་བ་མེད་པ་དང་། ངག་རྣམ་པར་གཡེང་བ་མེད་པ་དང་། ཡིད་རྣམ་པར་གཡེང་བ་མེད་པར་ཤེས་རབ་ཀྱི་ཕ་རོལ་དུ་ཕྱིན་པས་ཡོངས་སུ་ཟིན་པ། གཅིག་ཏུ་ཉོན་མོངས་པ་མེད་པར་གནས་པ་
བཏང་སྙོམས་ཀྱིས་ཡོངས་སུ་ཟིན་པ། ཐབས་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བ་འདི་ནི་ཚུལ་ཁྲིམས་ཀྱི་ཕ་རོལ་དུ་ཕྱིན་པའོ། །གང་འདི་ཉིད་ལ་རང་གི་ལུས་དང་། སྲོག་ལ་མི་ལྟ་བར་བསོད་ནམས་དང་། བསོད་ནམས་མ་ཡིན་པ་དང་། ཆོས་དང་། ཆོས་མ་
ཡིན་པ་དང་། བདེན་པ་དང་། བདེན་པ་མ་ཡིན་པ་དང་། གཡོ་བ་དང་། མི་གཡོ་བའི་དངོས་པོ་རྣམ་པར་སྤོང་ཞིང་བྱམས་པས་ཡོངས་སུ་ཟིན་པ་ཤེས་རབ་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བ་འདི་ནི་འདིར་བཟོད་པའི་ཕ་རོལ་དུ་ཕྱིན་པའོ། །གང་སྦྱིན་པ་དང་། ཚུལ་
ཁྲིམས་དང་། བཟོད་པ་དང་། ཏིང་ངེ་འཛིན་ཐོབ་པར་བྱ་བའི་ཕྱིར་སེམས་སྤྲོ་ཞིང་རྩོམ་པ་དང་། ཡོངས་སུ་མི་སྐྱོ་བར་རྟག་ཏུ་གནས་པ་མེད་པ་དང་། དེ་དམིགས་པ་མེད་པ་དང་། བྱམས་པས་ཡོངས་སུ་ཟིན་པ་ཡེ་ཤེས་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བ་འདི་ནི་འདིར་
བརྩོན་འགྲུས་ཀྱི་ཕ་རོལ་དུ་ཕྱིན་པའོ། །བཙུན་པ་ཤ་ར་དྭ་ཏིའི་བུ་འདི་ནི་བསོད་ནམས་ཀྱི་ཚོགས་ཏེ། དེ་བཞིན་གཤེགས་པའི་རྫོགས་པར་ལོངས་སྤྱོད་པའི་སྐུའི་གསང་བ་གྲུབ་པར་བྱེད་པའོ། །བཙུན་པ་ཤ་ར་དྭ་ཏིའི་བུ་གཞན་ཡང་ཡེ་ཤེས་ཀྱི་ཚོགས་ནི་གང་ཕ་རོལ་དུ་ཕྱིན་པ་བཞི་

པོ་འདི་དག་ཉིད་རྟོགས་པ་སྟེ། ཕ་རོལ་དུ་ཕྱིན་པ་རྣམས་འབྱེད་པ་དང་། འབྲེལ་པ་དང་གསལ་བར་བྱེད་པ་དང་། དེ་ལ་གཞོལ་ཞིང་མི་རྟག་པ་དང་། བདག་མེད་པ་དང་། སྟོང་པ་དང་། གསོ་བ་དང་། གསོ་བ་དང་། དངོས་པོ་མེད་པ་དང་། དངོས་པོ་ཐམས་ཅད་དངོས་པོ་མེད་
པར་ཡང་དག་པར་སྟོན་ཏོ། །མདོར་བསྡུ་ན་འདོད་ཆགས་དང་། ཞེ་སྡང་དང་། གཏི་མུག་དང་། ཉོན་མོངས་པ་དང་། ཉེ་བའི་ཉོན་མོངས་པ་སེལ་ཅིང་ཆོས་ཀྱི་དབྱིངས་ནམ་མཁའ་མཐའ་ཡས་སྐྱེ་མཆེད་དང་མཉམ་པར་ཡང་དག་པར་སྟོན་ཏེ། དམིགས་པ་དང་བྲལ་བ་འདི་ནི་འདིར་
བསམ་གཏན་གྱི་ཕ་རོལ་དུ་ཕྱིན་པའོ། །དེ་བཞིན་ཉིད་དང་། སྟོང་པ་ཉིད་དང་། མཐའ་ལས་འདས་པ་སྟོང་པ་ཉིད་དང་། ཕྱི་མའི་མཐའ་སྟོང་པ་ཉིད་དང་། ཆོས་ཀྱི་དབྱིངས་ཀྱི་རང་གི་ངོ་བོ་ཉིད་གང་ཡིན་པ་འདི་ནི་འདིར་ཤེས་རབ་ཀྱི་ཕ་རོལ་དུ་ཕྱིན་པའོ། །བཙུན་པ་ཤ་ར་དྭ་ཏིའི་བུ་འདི་ནི་
ཡེ་ཤེས་ཀྱི་ཚོགས་སོ། །བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་དང་། ཚོགས་འདི་གཉིས་ནི་བྱང་ཆུབ་ཀྱི་ཕྱོགས་ཀྱི་ཆོས་དང་ཤེས་པ་དང་། ཤེས་བྱ་མཐའ་དག་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་རྟོགས་པར་བྱེད་པ་སྟེ། བཙུན་པ་
ཤ་ར་དྭ་ཏིའི་བུ་འདི་ནི་དེ་བཞིན་གཤེགས་པའི་སྐུའི་གསང་བ་མདོར་བསྡུས་ཏེ་བསྟན་པའོ། །རྒྱ་ཆེར་རྣམ་པར་དབྱེ་བ་ནི་གལ་ཏེ་དེ་བཞིན་གཤེགས་པ་ཉིད་ཀྱིས་སྐུ་ཚེའི་ཚད་བསྐལ་པར་བཞུགས་ཏེ་བསྟན་ཅིང་བཤད་ཀྱང་མཐར་ཕྱིན་པར་མི་འགྱུར་རོ། །སྐུའི་གསང་བ་ཇི་ལྟ་བ་བཞིན་དུ་
གསུང་གི་གསང་བ་ཡང་དེ་བཞིན་ནོ། །ཐུགས་ཀྱི་གསང་བ་ནི་དེ་བཞིན་གཤེགས་པས་རྣམ་པ་དང་། སོ་སོའི་རྣམ་པ་དང་། ཁ་དོག་དང་། རྟགས་དང་། དབྱིབས་དང་། ངག་གི་རྣམ་པར་རྟོག་པའི་སྤྱོད་ཡུལ་དང་། བྱ་བ་ཐ་དད་པའི་སྦྱོར་བ་རྣམས་ཀྱིས་ཀྱང་བསྟན་པར་མི་
སྤྱོད་མོད་ཀྱི། འོན་ཀྱང་དེ་བཞིན་གཤེགས་པའི་སོ་སོ་རང་གིས་རིག་པ་ནི་ཐུགས་ཀྱི་གསང་བ་ཡིན་པར་ཤེས་པར་བྱའོ། །བཙུན་པ་ཤ་ར་དྭ་ཏིའི་བུ་དེ་ནི་དེའི་ཕྱིར་རྣམ་གྲངས་འདིས་ཀྱང་དེ་ལྟར་རིག་པར་བྱ་སྟེ། བདག་ཅག་ལྟ་བུ་བྱང་ཆུབ་མངོན་པར་རྫོགས་པར་སངས་མ་རྒྱས་

པ་རྣམས་ཀྱིས་བསྟན་པ་ལྟ་སྨོས་ཀྱང་ཅི་དགོས། འོན་ཀྱང་དེ་བཞིན་གཤེགས་པའི་བྱིན་གྱིས་བརླབས་ཀྱིས་སེམས་ཅན་གྱི་ཁམས་མཐའ་ཡས་མུ་མེད་པའི་བསམ་པ་དང་། ལྷག་པའི་བསམ་པ་དང་། མོས་པ་དང་། བློ་གྲོས་དང་། བློ་དང་། རྟོགས་
པ་དང་། མངོན་པར་འདོད་པ་མཐའ་ཡས་མུ་མེད་པ་དང་། སེམས་ཀྱི་རྒྱུན་རྣམ་པ་ཐ་དད་པ་སྣ་ཚོགས་ཀྱི་རྗེས་སུ་འགྲོ་བའི་སྤྱོད་ཡུལ་དང་། སྐྱེ་གནས་སྣ་ཚོགས་དང་། ལྷན་ཅིག་སྐྱེས་པའི་ལས་སྣ་ཚོགས་དང་། མི་ཤེས་པ་དང་མ་རིག་པའི་མུན་པ་དང་། མི་སྣང་བ་
དང་། མུན་ནག་དང་། འགྲོ་བ་ལྔ་དང་། འགྲོ་བ་དྲུག་དང་། ཁམས་གསུམ་པ་ཐོག་མ་དང་། དབུས་དང་། འཇིག་པར་གནས་པ་སྔོན་གྱི་མཐའ་དང་། ཕྱི་མའི་མཐའ་ཡོངས་སུ་མ་ཆད་པར་གནས་པར་དུས་གསུམ་དང་། ཕྱོགས་ལ་མགོ་རྨོངས་པ། སྐྱེ་བ་དང་རྒ་བ་ལ་སོགས་པ་
ན་བ་དང་། ནད་དང་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལ་སོགས་པས་ཉིན་གཅིག་བཞིན་དུ་བཅོམ་པའི་སེམས་ཅན་རྣམས་ཀྱི་སེམས་ཅན་གྱི་ཁམས་མ་རྒལ་བ་བསྒྲལ་བ་དང་། མ་གྲོལ་བ་དགྲོལ་བ་དང་། དབུགས་
མ་ཕྱིན་པ་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་བཟླ་བ་དང་། ཆོས་ཀྱི་རྣམ་གྲངས་འདི་ལ་གཟུད་པ་དང་། གནས་པ་ཐམས་ཅད་གྱུར་པའི་ལམ་ལ་དགོད་པ་དང་། མྱ་ངན་ལས་འདས་པ་ཤིན་དུ་བདེ་བ། དོན་དམ་པ།
ཞི་བ་འཁྲུག་པ་མེད་པ། དགེ་བ་ནད་མེད་པ་དང་། སངས་རྒྱས་བཅོམ་ལྡན་འདས་རྣམས་ཀྱི་སོ་སོ་རང་གི་རིག་པའི་ཡེ་ཤེས་ཀྱི་དབྱིངས་མཉམ་པ་ཉིད་ཀྱིས་མི་མཉམ་པ་དང་མཉམ་པ། རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ལ་སྦྱར་བ་དང་།
ཡང་དག་པར་འཛིན་དུ་འཇུག་པ་དང་། ཡང་དག་པར་གཟེངས་བསྟོད་པ་དང་། ཡང་དག་པར་རབ་ཏུ་དགའ་བར་བྱ་བ་དང་། དགའ་བ་དང་། དང་བ་དང་། མགུ་བའི་ས་ལ་ཡང་དག་པར་གཟུང་པ་དང་། ཆོས་རྟོགས་པའི་ཁྱད་པར་བརྗོད་པ་དང་། རྒྱ་མཚོ་ཆེན་པོ་ལྟར་

འདུལ་བའི་སེམས་ཅན་ཡོངས་སུ་སྨིན་པར་བྱ་བའི་དུས་དང་། ཚོད་ལས་མི་འདའ་བར་བྱ་བ་དང་། དེ་དག་ལ་རྒྱུ་དེའི་དབང་དུ་བྱས་ཏེ་སྐྱེ་བོའི་ཚོགས་ཆེན་པོའི་དོན་དང་། ཕན་པ་དང་བདེ་བ་དང་། ལྷ་དང་མི་རྣམས་ཀྱི་དོན་དང་། ཐེག་པ་ཆེན་པོ་བླ་ན་མེད་པའི་ཆོས་ཀྱི་ཚུལ་གཅིག་
ནས་གཅིག་ཏུ་བརྒྱུད་དེ་གནས་པར་བྱ་བ་དང་། གཅིག་ནས་གཅིག་ཏུ་ལུང་བྱིན་པས་ཐོས་པ་དང་། བསམ་པ་དང་བསྒོམ་པ་ལས་བྱུང་བའི་ཤེས་རབ་དང་། ཡེ་ཤེས་གོམས་པ་རྣལ་འབྱོར་དུ་གྱུར་པའི་རྒྱུད་ཀྱི་རྒྱུན་མི་གཅད་པ་དང་། སྐལ་བ་ཡོད་ལ་ཡོངས་སུ་མ་སྨིན་པ་ཡོངས་
སུ་སྨིན་པར་བྱ་བའི་འོས་སུ་གྱུར་པའི་དོན་གྱི་ཕྱིར་ཕྱོགས་ཙམ་གྱི་སྒོ་གཅིག་མདུན་དུ་བྱས་ཏེ་འཇུག་པར་བྱེད་པ་ཅུང་ཟད་ཅིག་བཤད་པར་བྱའོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཤ་ར་དྭ་ཏིའི་བུ་མཆོག་ཏུ་ངོ་མཚར་དུ་གྱུར་ཅིང་རྨད་དུ་བྱུང་བར་གྱུར་ཏེ་དགའ་བ་ཐོབ་ནས་གསང་བ་
པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ལེགས་སོ་ལེགས་སོ། །གང་གི་ཕྱིར་ཁོ་བོ་ཅག་ལྟ་བུ་ཉི་ཚེ་བའི་ཤེས་པ་དང་ལྡན་པ་གཞན་གྱིས་སྒྲ་བསྒྲགས་པའི་རྗེས་སུ་འགྲོ་བའི་ཉན་ཐོས་རྣམས་ལ་ཆོས་ཟབ་མོའི་ཚིག་གི་དོན་འདི་ལྟ་བུ་གསལ་བར་བྱས་
པ་ནི་རིགས་ཀྱི་བུ་ཁྱོད་ཡང་ལེགས་སོ། །ལག་ན་རྡོ་རྗེས་སྨྲས་པ། བཙུན་པ་ཤ་ར་དྭ་ཏིའི་བུ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །བཙུན་པ་ཤ་ར་དྭ་ཏིའི་བུ་ཏིང་ངེ་འཛིན་འདིའི་མིང་ཅི་ཞེས་བྱ་ཞེས་དེ་སྐད་ཟེར་བ་ནི་ཏིང་ངེ་འཛིན་འདིའི་མིང་རྡོ་རྗེའི་རྣམ་པར་ཐར་པའི་སྒོ་
ཆེན་པོ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཕྱག་གཡས་པ་གསེར་གྱི་ཁ་དོག་ལྟ་བུ་བརྐྱང་སྟེ། ཕྱག་གཡས་པ་འཇམ་ཞིང་མཉེན་ལ་ཤིན་དུ་གཞོན་ཤ་ཆགས་པ་གསང་བ་པའི་བདག་པོ་ལག་ན་རྡོ་རྗེའི་མགོ་ལ་བཞག་སྟེ། ཆེད་དུ་བཀའ་སྩལ་པ་འདི་དག་ཀྱང་ཆེད་
དུ་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ་ཁྱོད་ཀྱིས་གང་མདོ་སྡེ་ཟབ་མོ་འདི་ལྟ་བུ་འདི་གསང་བ་པའི་ཚིག་གི་དོན་བཞིན་དུ་སེམས་ཅན་ཐམས་ཅད་ལ་ལུང་བསྟན་ཅིང་བཤད་དེ་དཀྲོལ་ཞིང་རྣམ་པར་ཕྱེ་བ་ལེགས་སོ་ལེགས་སོ། །བཅོམ་ལྡན་འདས་དེ་བཞིན་

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ལག་ན་རྡོ་རྗེ་ལ་ཇི་ལྟར་ལེགས་སོ་ཞེས་བྱ་བ་བྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་སུ་གཏོགས་པའི་དེ་བཞིན་གཤེགས་པ་ཐམས་ཅད་ཀྱིས་ཀྱང་གསང་བ་པའི་
བདག་པོ་ལག་ན་རྡོ་རྗེའི་མགོ་ལ་ཕྱག་བཞག་སྟེ། ཆེད་དུ་བཀའ་སྩལ་པ་འདི་དག་ཀྱང་ཆེད་དུ་བཀའ་སྩལ་ཅིང་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ཆོས་ཀྱི་རྣམ་གྲངས་འདི་འཇིག་རྟེན་གྱི་ཁམས་མང་པོ་དག་ན་མིང་འཛིན་པ་ཡང་དཀོན་ན་རབ་ཏུ་གསལ་བར་བྱེད་པ་ལྟ་ཅི་སྨོས།
གསང་བ་པའི་བདག་པོ་ལག་ན་རྡོ་རྗེས་ཆོས་ཀྱི་རྣམ་གྲངས་འདི་བཤད་པ་ན་ལྷའི་བུ་གང་གཱའི་ཀླུང་ཚད་མེད་གྲངས་མེད་དཔག་ཏུ་མེད་པའི་བྱེ་མའི་རྡུལ་ཕྲ་རབ་ཀྱི་རྡུལ་ལས་ཤིན་ཏུ་འདས་བསྙེད་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དགེ་སློང་དང་།
དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་རབ་ཏུ་མང་པོ་དག་ནི་མི་སྐྱེ་བའི་ཆོས་ལ་བཟོད་པ་
ཐོབ་པར་གྱུར་ཏོ། །དེ་བས་ཀྱང་ཆེས་མང་བའི་སེམས་ཅན་རྣམས་ནི་ཕྱིར་མི་ལྡོག་པ་ཉིད་དུ་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དང་། དེ་མ་ཡིན་པ་སངས་རྒྱས་ཀྱི་ཞིང་གཞན་
དཔག་ཏུ་མེད་ཅིང་གྲངས་མེད་ལ་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་རྣམ་པ་དྲུག་ཏུ་གཡོས་སོ། །གསང་བ་པའི་བདག་པོ་ལག་ན་རྡོ་རྗེ་ལ་ཡང་ཆོས་ཀྱི་དགའ་པ་དང་། མཆོད་པའི་ཕྱིར་ནམ་མཁའི་དཀྱིལ་ན་རྔ་རྣམས་མ་བརྡུངས་པར་ཀུན་ནས་སྒྲ་བྱུང་ངོ་། །བྱང་ཆུབ་
སེམས་དཔའི་རྫུ་འཕྲུལ་གྱི་གཞལ་མེད་ཁང་གི་ཁང་བ་བརྩེགས་པ་རྣམས་སུ་ཀུན་ནས་སིལ་སྙན་དང་། ཕེག་རྡོབ་པ་དང་། གླུ་དབྱངས་བླངས་པས་ལྷའི་བུ་མོ་རྣམས་གར་བྱེད་དོ། །སྤོས་དང་། བྱུག་པ་དང་། བདུག་པ་དང་། ཕྱི་མ་དང་། གོས་དང་། གདུགས་དང་། རྒྱལ་

མཚན་དང་། བ་དན་དང་། དཔག་བསམ་གྱི་ཤིང་ལྗོན་པ་དང་། རིན་པོ་ཆེ་དང་། མུ་ཏིག་གི་རྒྱན་ཕྲེང་དང་། མེ་ཏོག་པདྨ་དང་། ཀུ་མུ་ད་དང་། ཨུཏྤལ་དང་། དྲི་མཆོག་དང་། སྣ་མའི་མེ་ཏོག་དང་། པ་རི་ཥ་ཀ་དང་། པ་རི་ཥ་ཀ་ཆེན་པོ་དང་། བཏང་བཟུང་དང་། བཏང་བཟུང་
ཆེན་པོ་དང་། མན་དཱ་ར་བ་དང་། མན་དཱ་ར་བ་ཆེན་པོ་དང་། མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་དང་། ཀུན་ནས་སྐྱེས་དང་། ཀུན་ནས་སྐྱེས་ཆེན་པོའི་མེ་ཏོག་གི་ཆར་གྱི་སྤྲིན་ཀུན་ནས་མངོན་པར་བབ་པོ། །སྤོས་ཆུའི་ཆར་གྱི་སྤྲིན་ཡང་མངོན་པར་བབ་པོ། །དེ་ནས་ཚངས་པ་དང་།
ཁྱབ་འཇུག་དང་། དབང་ཕྱུག་ཆེན་པོ་དང་། བརྒྱ་བྱིན་དང་། འཇིག་རྟེན་སྐྱོང་བ་དང་། གནོད་སྦྱིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མ་མོའི་གདོན་གྱི་ཚོགས་དང་། འབྱུང་པོ་དང་། བརྗེད་བྱེད་དང་། སྐེམ་བྱེད་དང་། སྒྲུབ་པ་དང་།
སྦྲུལ་འཛིན་བཅས་དང་། གནོན་པོ་དང་། མ་མོ་དང་། ཡི་དགས་དང་། ཤ་ཟ་དང་། བྲམ་ཟེའི་སྲིན་པོ་དང་། མཁའ་འགྲོ་མ་དང་། ཕྱོགས་དང་ཕྱོགས་མཚམས་དང་། མཁར་དང་རི་དང་། སའི་ལྷ་ལ་སོགས་པ་སྡང་བ་གདོན་བགེགས་དང་། ལོག་འདྲེན་ཐམས་
ཅད་དང་། དེ་མ་ཡིན་པ་གཞན་ཡང་ལྷ་དང་། མི་དང་མི་མ་ཡིན་པ་དག་བླ་གོས་རྣམས་ཕྲག་པ་གཅིག་ཏུ་གཟར་ཏེ་བུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་གང་གིས་བདག་ཅག་གཟིར་ཅིང་ཉེ་བར་གཟིར་བས་རིག་སྔགས་འཆང་ཐམས་ཅད་དངོས་གྲུབ་སྩོལ་བ་དང་། དམ་ཚིག་ཐམས་ཅད་དུ་འཇུག་པ་ལ་ཡང་དག་པར་གནང་བར་བགྱིད་པར་འགྱུར་བ་རང་གི་སྙིང་པོ་འདི་བདག་ཅག་ལ་བསྟན་དུ་གསོལ། དེ་ནས་
བཅོམ་ལྡན་འདས་ཀྱིས་ཚངས་པ་ལ་སོགས་པ་ལྷའི་ཚོགས་དེ་དག་ལ་ལེགས་སོ་ཞེས་བྱ་བ་བྱིན་ཏེ། གྲོགས་པོ་དག་གང་གི་ཕྱིར་ཁྱེད་ཅག་འདི་ལྟར་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་ནི་ལེགས་སོ་ལེགས་སོ། །དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་

ཤིག་དང་། ངས་ཁྱེད་རང་གི་སྙིང་པོ་བསྙན་པར་བྱའོ། །དེ་དག་གིས་ཀྱང་བཅོམ་ལྡན་འདས་ལ་ལེགས་སོ་ལེགས་སོ་ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་ལྷའི་རྔ་བོ་ཆེ་དང་། རྒྱ་མཚོ་དང་། སྤྲིན་ཆེན་པོའི་སྒྲ་ལྟ་བུའི་གསུང་ཚངས་པ་ཆེན་པོའི་སྒྲ་
བས་ལྷག་པ་སྣ་ཚོགས་སྙན་ཅིང་རྒྱ་ཆེ་ལ་ཟབ་པ་ཐོག་མ་དང་། བར་དང་ཐ་མར་དགེ་བ། སེམས་ཅན་ཐམས་ཅད་ཀྱི་སྙིང་དུ་འཐད་པ། གསལ་བ། འཇེབས་པ་དག་པ། མཉེན་པ་སྙན་པ། བརྗོད་པའི་ཚིག་ཁམས་གསུམ་པ་ཐམས་ཅད་ལ་གོ་བར་བྱེད་པ། དེ་བཞིན་གཤེགས་
པའི་སེང་གེའི་སྒྲ་བླ་ན་མེད་པ་དེས་གྲུབ་པའི་གསང་སྔགས་ཀྱི་གཞི་འདི་དག་གསུངས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ཛ་ཡ་ཛ་ཡ། ཛ་ཡ་བ་ཧ། ཙི་ལི་ཙི་ལི། མི་ལི་མི་ལི། ལུ་ཊུ་
ལུ་ཊུ། ཛ་ཡེ་བི་ཛ་ཡེ། ཛ་ཡནྟི། བི་ཛ་ཡནྟི། ཨ་ཛི་ཏེ། ཨ་པ་རཱ་ཛི་ཏེ། ཏདྱ་ཏེ། སརྦ་དུཥྚ་པྲ་དུཥྚ་སྟ་མ་བྷ་ནི། ཛམ་བྷ་ནི། མོ་ཧ་ནི། ཤྭེ་ཏེ་ཀ་རཱ་ལེ། ཀེ་ཡཱུ་རེ། སརྦ་བུདྡྷ་ཨ་དྷིཥྛི་ཏེ། བནྡྷ་རཱ་བཱ་སི་ནི། པརྞ་ཤ་བ་རི། ཤྲི་ཡེ་མ་ཧཱ་ཤྲི་ཡེ་སརྦ་ཨདྡྷཱུ་ཏ་ཡ་ཤྲི་ཏེ།
པདྨ་བ་ཧེ། པདྨ་མཱ་ལི་ནི། བཛྲ་ཨྃ་ཀུ་ཤི། བཛྲ་མཱ་ཏེ། བཛྲ་པཱ་ཏཱ་ལི། ཤཱུ་ལི་ནི། བཛྲ་དྷ་རེ། ཧི་ཧི་ཧི་ཧི། བཛྲ་པཱ་ཎི། ཧེ་ཧེ་ཧེ་ཧེ། བཛྲ་པཱ་ཎི། བཛྲ་ཤཱུ་ལི་ཎི། ཙཀྲ་དྷ་རེ། ཧི་ཧི་བཛྲ་པཱ་ཎི། ཧེ་ཧེ་བཛྲ་པཱ་ཎི། ཧི་ཧི་ཧི་ཧི། ཧེ་ཧེ་ཧེ་ཧེ། བཛྲ་པཱ་ཎི། ཀ་ལ་ཀ་ལ།
བ་ལ་བ་ལ། ར་ལ་ར་ལ། དྷ་མ་དྷ་མ། ས་ར་ས་ར། ཧཱ་ཧཱ་ཧཱ་ཧཱ་ཧཱ། ཙི་ལི་མེ་ལེ། ཚི་ལེ། དི་ལེ། དི་དི་ལ། དི་མི་ལེ། ཛྭ་ལེ། མ་ཧཱ་ཛྭ་ལེ། ཛྭ་ལི་ཏི། པྲ་ཛྭ་ལི་ཏི། ཐ་ར་ཐག་གེ་ཐ་རེ། མུ་ཀུ་ཏི། ཀྵ་མེ། ཀྵ་མ་མེ། གྲུབ་པའི་ཚོགས་ཀྱིས་ཕྱག་བྱས་མ། ལྷ་ཐམས་
ཅད་ཀྱི་སྙིང་ཀུན་དུ་འཇུག་པར་བྱེད་མ། སེམས་ཅན་ཐམས་ཅད་ཀྱི་སྙིང་འབིགས་མ། སྡང་བ་རབ་ཏུ་སྡང་བ་ཐམས་ཅད་ཀྱི་སྙིང་འཇོམས་མ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་རྗེས་སུ་སྐྱོང་མ། བྱང་ཆུབ་སེམས་དཔའ་ཐམས་ཅད་ཀྱི་སྙིང་པོ་ལ་འཇུག་མ་ཚུར་

ཤོག །དམ་ཚིག་རྗེས་སུ་སྐྱོངས་ཤིག །སེམས་ཅན་ཐམས་ཅད་ཀྱི་སྙིང་རྣམས་ཁུག་ལ་དམ་ཚིག་ལ་ཁོད་ཅིག །ཐམས་ཅད་མཁྱེན་པ་ལ་ཕྱག་འཚལ་ལོ་སྭཱ་ཧཱ། འཇིག་རྟེན་མཁྱེན་པ་ཐམས་ཅད་ལ་ཕྱག་འཚལ་ལོ་སྭཱ་ཧཱ། ཏྲ་ཊ་ཏྲ་ཊ། སྥོ་ཊ་ཡ་སྭཱ་ཧཱ། གྱེན་དུ་ལྟ་ལ་སྭཱ་ཧཱ། རྣམ་
པར་ལྟ་ལ་སྭཱ་ཧཱ། ཆུ་སྲིན་ལ་སྭཱ་ཧཱ། མི་ལ་སྭཱ་ཧཱ། ཚངས་པ་ལ་སྭཱ་ཧཱ། ཁྱབ་འཇུག་ལ་སྭཱ་ཧཱ། དྲག་པོ་རྣམས་ལ་སྭཱ་ཧཱ། བརྒྱ་བྱིན་ལ་སྭཱ་ཧཱ། འཇིག་རྟེན་སྐྱོང་བ་རྣམས་ལ་སྭཱ་ཧཱ། ཐམས་ཅད་ལ་སྭཱ་ཧཱ། ལྷ་རྣམས་ལ་སྭཱ་ཧཱ། ནོར་རྣམས་ལ་སྭཱ་ཧཱ། མ་མོ་རྣམས་ལ་སྭཱ་ཧཱ།
མཚུན་རྣམས་ལ་སྭཱ་ཧཱ། བགེགས་དང་ལོག་འདྲེན་ཐམས་ཅད་ལ་སྭཱ་ཧཱ། ས་ལ་སྭཱ་ཧཱ། དབྱངས་ཅན་ལ་སྭཱ་ཧཱ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ཐམས་ཅད་དང་། སྲིན་པོ་ལ་
སོགས་པ་ཁམས་གསུམ་ཐམས་ཅད་དུ་གཏོགས་པའི་སེམས་ཅན་ཐམས་ཅད་ལ་སྭཱ་ཧཱ། ཚུར་ཤོག་ཚུར་ཤོག །དམ་ཚིག་རྗེས་སུ་སྐྱོངས་ཤིག །ཀུ་རུ་ཀུ་རུ། ས་ར་ས་ར། ཏིཥྛ་ཏིཥྛ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཧཱུྃ་ཡཱུྃ་པཱུྃ། ཙཎྜ་ལི། མ་ཏང་གི། ཌོམྤི་ནི། བུཀྐ་
སི། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བདག་ལ་གསང་སྔགས་གཞི་རྣམས་གྲུབ་པར་གྱུར་ཅིག་སྭཱ་ཧཱ། དེ་བཞིན་གཤེགས་པས་རང་གི་སྙིང་པོ་དང་། ལྷ་ཐམས་ཅད་ཀྱི་སྙིང་པོ་འདི་གསུངས་པ་ན་ཐམས་ཅད་དང་ལྡན་པའི་ལྷའི་འཁོར་དེ་འཇིགས།
དངངས་སྐྲག་པར་གྱུར་ནས། ཆུ་ཤིང་གི་ཚལ་རླུང་དྲག་པོ་ཆེན་པོས་བསྐྱོད་དེ་རྩ་བ་བཅད་པ་བཞིན་དུ་གཡོ་ཞིང་འགུལ་ལ་སྙིང་ཚིག་སྟེ། རྡོ་རྗེའི་ཕུར་བུས་བཏབ་པ་བཞིན་དུ་ཟུག་ཅིང་ཞིགས་ལ་འགྲེ་ཞིང་སྐྱབས་བཙལ་བའི་ཕྱིར་འདུ་ཤེས་ཙམ་གྱིས་སངས་རྒྱས་བཅོམ་ལྡན་འདས་
ལ་འབོད་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ལྷའི་འཁོར་འདི་སློང་ཤིག །ངས་དམ་ཚིག་འདི་ཡོངས་སུ་འཛིན་དུ་གཞུག་གོ། །རིག་སྔགས་གྲུབ་པ་འབྱོར་བར་བྱེད་པའི་སྙིང་པོ་ལ་གཞོལ་

བ་བསྒྲགས་སོ། །དེ་སྐད་ཅེས་བཀའ་སྩལ་པ་དང་། གསང་བ་པའི་བདག་པོ་ལག་ན་རྡོ་རྗེ་གསང་བ་པའི་སྙིང་པོ་འདིས་ལྷའི་འཁོར་དེ་དག་ཐམས་ཅད་བསླང་ངོ་། །དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་
པོ་ལ་ཕྱག་འཚལ་ལོ། །ཨོྃ་ཀི་ལི་ཀི་ལ། བཱ་ལ་ཀི་ལི་ཀི་ལཱ་ཡ་སྭཱ་ཧཱ། བཅོམ་ལྡན་འདས་འདི་ནི་བདག་གི་སྙིང་པོ་མཆོག་ཏུ་གསང་བ་ལགས་ཏེ། རིག་སྔགས་ཐམས་ཅད་འགྲུབ་པར་བགྱིད་པ་ལགས་སོ། །དེས་ནི་བདག་ཀྱང་དྲངས་ནས་གཞན་གྱིས་མ་བཏང་བར་མཆིའོ། །དབང་
དུ་མཆིའོ། །དངོས་གྲུབ་སྩལ་བར་བགྱིའོ། །ལུང་བཞིན་བགྱིའོ། །བསྲུང་བར་བགྱིའོ། །དཔལ་བསྐྱེད་པར་བགྱིའོ། །བགེགས་དང་ལོག་འདྲེན་ཐམས་ཅད་རྣམ་པར་བཤིག་གོ། །སེམས་ཅན་ཐམས་ཅད་གདུལ་བར་བགྱིའོ། །འབྱུང་པོ་ཐམས་ཅད་རྣམ་པར་
བཤིག་པར་བགྱིའོ་ནད་ཐམས་ཅད་བསལ་བར་བགྱིའོ། །སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །བཅོམ་ལྡན་འདས་བདག་གི་སྙིང་པོ་མཆོག་ཏུ་གསང་བ་འདི་ནི་འདི་ནས་བསྐལ་པ་གྲངས་མ་མཆིས་པ་གསུམ་དུ་དཀའ་བ་སྤྱོད་པ་ཆེན་པོ་བགྱིད་པ་ན་གནོད་པ་
བགྱིད་པ་བགེགས་དང་ལོག་འདྲེན་ཐམས་ཅད་ཀྱིས་རྣམ་པར་གཙེས་པའི་ཚེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཛིན་མེ་ལྟར་བློས་རྣམ་པར་བསྒྱིངས་ཤིང་རྣམ་པར་རོལ་པ་མངོན་ཤེས་དྲི་ཞིམ་སྣང་དཔལ་
གྱིས་བདག་ལ་བསྲུང་བའི་སླད་དུ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེས་སྙིང་པོ་མཆོག་ཏུ་གསང་བ་འདི་སྨྲས་མ་ཐག་ཏུ་འཁོར་དེ་ཐམས་ཅད་བསམ་གཏན་གྱི་དགའ་བ་དང་བདེ་བས་ཚིམ་པར་གྱུར་ཏེ། གསང་བ་པའི་བདག་པོ་ལག་ན་རྡོ་རྗེའི་དམ་ཚིག་གི་བསྟན་པ་ལ་
གནས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་ཟུང་ཤིག །ཆོངས་ཤིག་ལྷོགས་ཤིག །འཛིན་དུ་ཆུག་ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་

ཡང་དག་པར་རབ་ཏུ་སྟོན་ཅིག་དང་། དེས་སེམས་ཅན་མང་པོ་ལ་ཡུན་རིང་པོར་ཕན་པ་དང་། བདེ་བ་དང་ཐ་མར་དེ་བཞིན་གཤེགས་པའི་ཡེ་ཤེས་བླ་ན་མེད་པ། ཆགས་པ་མེད་པ། སྒྲིབ་པ་མེད་པ་ཐོབ་ཅིང་རྟོགས་པར་འགྱུར་རོ། །སུ་ཆོས་ཀྱི་རྣམ་གྲངས་
འདི་འཆང་བ་དང་། ཀློག་པ་དང་། འཛིན་དུ་འཇུག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དང་། མཆོད་པ་དང་། ཡི་གེར་འདྲི་བ་དང་། ཡི་གེར་འདྲིར་འཇུག་པ་དང་། ཁ་ཏོན་བྱེད་པ་
དང་། ཉན་པ་དང་། སེམས་པ་དེ་རིང་པོར་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །འདི་ནས་ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་ངན་འགྲོ་ལོག་པར་འགྲོ་བར་མི་འགྱུར་རོ། །རིགས་
དམའ་བ་རྣམས་སུ་སྐྱེ་བར་མི་འགྱུར། དབུལ་པོའི་རིགས་རྣམས་སུ་སྐྱེ་བར་མི་འགྱུར་ཏེ། ཤེས་རབ་མེད་པར་ཡང་མ་ཡིན། མ་དུལ་བར་མ་ཡིན། ཚེ་ཐུང་བར་མ་ཡིན་ཞིང་། ཚེ་རབས་ཚེ་རབས་སུ་ཚེ་རབས་དྲན་པར་འགྱུར་རོ། །བྱང་ཆུབ་ཀྱི་སེམས་བརྗེད་
པར་མི་འགྱུར་རོ། །ཐོས་པ་འཛིན་པར་འགྱུར་རོ། །རབ་ཏུ་དབེན་པ་ལ་མངོན་པར་དགའ་བར་འགྱུར་རོ། །འཁོར་ངན་པ་ཅན་མ་ཡིན་པར་འགྱུར་རོ། །ཚིག་གཟུང་བར་འོས་ཤིང་སྙན་པར་འགྱུར་རོ། །སྐལ་བ་བཟང་ཞིང་གཟུགས་བཟང་བར་འགྱུར་རོ། །
ཤེས་རབ་ཆེན་པོ་དང་། སྤོབས་པ་ཆེན་པོ་དང་། དབང་དང་ལྡན་པར་འགྱུར་རོ། །དེ་བཞིན་གཤེགས་པ་ཐམས་ཅད་མཉེས་པར་བྱ་བ་ལ་མཁས་པར་འགྱུར་རོ། །དགེ་བའི་བཤེས་གཉེན་གྱིས་ཡོངས་སུ་ཟིན་པར་འགྱུར་རོ། །སྡིག་པའི་གྲོགས་པོ་ཡོངས་
སུ་སྤོང་བར་འགྱུར་རོ། །ཕ་རོལ་དུ་ཕྱིན་པ་ཡོངས་སུ་རྫོགས་པར་བྱ་བ་ལ་མཁས་པར་འགྱུར་རོ། །སེམས་ཅན་ཐམས་ཅད་ཡོངས་སུ་རྫོགས་པར་བྱ་བ་ལ་མཁས་པར་འགྱུར་རོ། །སངས་རྒྱས་ཀྱི་ཞིང་ཆེ་ཞིང་མཐའ་ཡས་པ་ལ་རྫུ་འཕྲུལ་དང་ལྡན་པར་འགྱུར་

རོ། །ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་དེ་བྱང་ཆུབ་ཀྱི་སེམས་མི་བརྗེད་པར་འགྱུར་རོ། །ཚེ་འདི་ཉིད་ལ་བགེགས་དང་། ལོག་འདྲེན་དང་། རིག་སྔགས་འཆང་གྲུབ་པ་དང་། འབྱུང་པོ་དག་དང་། གདོན་གྱི་ཚོགས་དང་། མ་མོ་དང་།
ཡི་དགས་དང་། ཤ་ཟ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ཀྱིས་མི་ཐུལ་བར་འགྱུར་རོ། །དེའི་ལས་ཀྱི་སྒྲིབ་པ་ཐམས་ཅད་བྱང་བར་འགྱུར་རོ། །
ནད་ཐམས་ཅད་དང་བྲལ་བར་འགྱུར་རོ། །སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་འཆི་བའི་དུས་བྱེད་པར་མི་འགྱུར་རོ། །དེ་ལ་རིག་སྔགས་ཐམས་ཅད་ཀྱང་འགྲུབ་པར་འགྱུར་རོ། །དེ་ལ་ལྷ་ཐམས་ཅད་ཀྱང་སྲུང་ཞིང་སྦེད་པ་དང་ཡོངས་སུ་སྐྱོབ་པར་འགྱུར་རོ། །
དེའི་རྩོམ་པ་ཐམས་ཅད་ཀྱང་སླ་བར་འགྱུར་རོ། །འཇིག་རྟེན་པ་དང་འཇིག་རྟེན་ལས་འདས་པ་དང་། དཀྱིལ་འཁོར་ཐམས་ཅད་ཀྱི་དམ་ཚིག་ལ་ཞུགས་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་
ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའ་ཐམས་ཅད་ཀྱི་མཆོད་པའི་སྤྲིན་དུ་བསྟན་པ་ཞེས་བྱ་བར་ཟུང་ཤིག །དེ་བཞིན་
གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྒྲིབ་པ་མེད་པ་བསྐོར་བ་ཞེས་བྱ་བར་ཡང་ཟུང་ཤིག །དེ་བཞིན་གཤེགས་པའི་ཆོས་ཀྱི་དབྱིངས་ལ་མཁས་པ་ཞེས་བྱ་བར་ཡང་ཟུང་ཤིག །བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བར་ཡང་ཟུང་ཤིག །
བདུད་ཀྱི་ཕྱོགས་འདུལ་བ་ཞེས་བྱ་བར་ཡང་ཟུང་ཤིག །རྟེན་ཅིང་འབྲེལ་པར་འབྱུང་བ་ལ་འཇུག་པ་རབ་ཏུ་རྟོགས་པ་ཞེས་བྱ་བར་ཡང་ཟུང་ཤིག །དམ་པའི་ཆོས་ཀྱི་ཕྱག་རྒྱའི་མཚན་ཉིད་ཅེས་བྱ་བར་ཡང་ཟུང་ཤིག །རིག་སྔགས་དང་། དཀྱིལ་འཁོར་དང་། ཕྱག་རྒྱ་

དང་དམ་ཚིག་ཐམས་ཅད་ལ་རབ་ཏུ་འཇོག་པ་ཞེས་བྱ་བར་ཡང་ཟུང་ཤིག །ལག་ན་རྡོ་རྗེའི་རྣམ་པར་ཐར་པའི་ཏིང་ངེ་འཛིན་གྱི་ཆོ་འཕྲུལ་ཞེས་བྱ་བར་ཡང་ཟུང་ཤིག །རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་ཞེས་བྱ་བར་ཟུང་ཤིག །དེ་ནས་ཚེ་དང་ལྡན་པ་
ཀུན་དགའ་བོས་བཅོམ་ལྡན་འདས་ཀྱིས་གསུངས་པ་ལ་ལེགས་སོ་ཞེས་གསོལ་ཏེ་མངོན་པར་དགའ་ནས་ཅང་མི་སྨྲ་བར་གྱུར་ཏོ། །དེ་ནས་བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་རྡོ་རྗེའི་སྙིང་པོ་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པ་དེ་དག་ཐམས་ཅད་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་
མ་ཡིན་པ་དེ་དག་ཐམས་ཅད་དང་། ཐམས་ཅད་དང་ལྡན་པའི་འཁོར་དེ་བཅོམ་ལྡན་འདས་དང་ལག་ན་རྡོ་རྗེས་གསུངས་པ་ལ་མངོན་པར་བསྟོད་དོ། །འཕགས་པ་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་རྫོགས་སྷོ།། །།རྒྱ་གར་གྱི་
མཁན་པོ་ཤཱེ་ལེནྡྲ་བོ་དྷི་དང་། ཛྙཱ་ན་སིདྡྷི་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། ༄༅། །རྒྱ་གར་སྐད་དུ། ཨཱརྱ་མ་ཧཱ་བ་ལ་ནཱ་མ་
མ་ཧཱ་ཡཱ་ནྭ་སཱུ་ཏྲ། བོད་སྐད་དུ། འཕགས་པ་སྟོབས་པོ་ཆེ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་བཏང་བཟུང་ཆེན་པོ་ན་ཆོས་སྟོན་
ཏེ། དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་སངས་རྒྱས་ཐམས་ཅད་ཀྱིས་བསྟོད་ཅིང་བསྔགས་ཏེ་བཀུར་ནས་མངོན་པར་དགའ་བར་བྱས་པ་ཡང་དེ་ཉིད་དུ་འདུག་པར་གྱུར་ཏོ། །དེ་ནས་སངས་རྒྱས་བཅོམ་ལྡན་འདས་ཀྱི་ཕྱག་གིས་

སེམས་ཅན་རྣམས་དབུགས་འབྱིན་ཅིང་ཤར་ཕྱོགས་ན་མེ་ལྕེ་ཀུན་དུ་འབར་བའི་ཕྲེང་བའི་པདྨའི་གདན་ལ་བཞུགས་སོ། །བཅོམ་ལྡན་འདས་ཀྱི་གཡས་ལོགས་ན་སྟོབས་པོ་ཆེ་ལག་པ་བཞི་པ། ལག་པ་གཅིག་ན་ནི་རྔ་ཡབ་ཐོགས་ལག་པ་གཅིག་གིས་ནི་ཕྱག་
འཚལ། གཡས་པ་ན་ནི་བེ་ཅོན་ཐོགས། གཡོན་པ་ན་ནི་ཞགས་པ་ཐོགས་པ། སྐྲ་ཁམ་པ་གྱེན་དུ་བརྫེས་པ། མིག་དམར་བའོ། །དེའི་འོག་ན་ནི་བཅོམ་ལྡན་འདས་རྡོ་རྗེ་འཛིན་འཁོར་དང་བཅས་པའོ། །གཡས་ན་ནི་རིག་སྔགས་ཀྱི་རྒྱལ་པོ་གནོད་མཛེས་སོ། །གཡོན་
ན་ནི་བདུད་རྩི་ཐབ་སྦྱོར་རོ། །དེ་ནས་སྙིང་པོ་རྣམས་ནི་ཟླ་བ་ཁམ་པ་ལྟ་བུར་གཞག་གོ། །སྙིང་པོ་ནི་ཀི་ལི་ཀི་ལ་དང་། འགྲོ་ལྡིང་བའི་གཟུངས་དང་ལུས་དམར་པོ་དང་། རྡོ་རྗེ་རྣམ་པར་འཇོམས་པ་དང་། རྡོ་རྗེ་རྒྱ་ཆེན་ཏེ། སྙིང་པོའི་མཆོག་གོ། །རིག་སྔགས་ཀྱི་རྒྱལ་པོ་
དྲག་པོ་ཆེན་པོ་དང་ཉེ་བ་ན་ནི་འཕགས་པ་མཱ་མ་ཀཱིའོ། །འཕགས་པ་བདུད་རྩི་ཐབ་སྦྱོར་གྱི་འོག་ན་ནི་རྡོ་རྗེའི་ལྕགས་ཀྱུ་དང་། རྡོ་རྗེ་ལུ་གུ་རྒྱུད་དོ། །སྒོའི་ནང་ལོགས་སུ་ནི་ཁྲོ་བོ་རྡོ་རྗེའི་ཐོ་བ་དང་། རྡོ་རྗེའི་བེ་ཅོན་གཉིས་མངོན་དུ་ཕྱོགས་པར་གཞག་གོ། །གཡོན་ལོགས་སུ་ནི་
བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་འཁོར་དང་བཅས་པའོ། །བཅོམ་ལྡན་འདས་ཀྱི་གཡས་ལོགས་སུ་ནི་གོས་དཀར་མོའོ། །དེའི་འོག་ཏུ་ནི་སྒྲོལ་མ་དང་ཁྲོ་གཉེར་ཅན་ནོ། །གཡོན་དུ་ནི་རིག་སྔགས་ཀྱི་རྒྱལ་པོ་རྟ་མགྲིན་དང་། དེ་དག་ལ་སོགས་
པ་བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱ་ཕྲག་སྟོང་དང་ངོ་། །དེ་བཞིན་དུ་ཤར་ཕྱོགས་སུ་ནི་ཟླ་བ་དང་། ཉི་མ་དང་། ཡུལ་འཁོར་སྲུང་དང་དབང་པོའོ། །མེའི་ཕྱོགས་ན་ནི་མེའི་དྲང་སྲོང་ཆེན་པོ་རྣམས་ཀྱིས་བསྐོར་བའོ། །ལྷོ་ཕྱོགས་སུ་ནི་གཤིན་རྗེ་དང་ཁྱབ་འཇུག་
གོ། །བདེན་བྲལ་གྱི་ཕྱོགས་སུ་ནི་སྲིན་པོའི་བདག་པོ་མ་མོ་རྣམས་ཀྱིས་བསྐོར་བའོ། །ནུབ་ཕྱོགས་སུ་ནི་ཀླུའི་བདག་པོ་ཀླུ་ལ་སོགས་པས་བསྐོར་བའོ། །རླུང་གི་ཕྱོགས་སུ་ནི་རླུང་ལྷ་འཁོར་དང་བཅས་པའོ། །བྱང་ཕྱོགས་སུ་ནི་ལུས་ངན་པོ་འཁོར་དང་བཅས་པའོ། །

དབང་བདག་གི་ཕྱོགས་སུ་ནི་དབང་བདག་ཚོགས་ཀྱིས་བསྐོར་བའོ། །ལྷའི་དབང་པོ་བརྒྱ་བྱིན་དང་། ཁྱབ་འཇུག་དང་། ཚངས་བ་ཆེན་པོ་དང་། དེ་ལ་སོགས་པ་གནས་གཙང་མའི་རིས་ཀྱི་ལྷའི་བུ་ཚད་མེད་གྲངས་མེད་དཔག་ཏུ་མེད་པ་དག་དང་ངོ་། །སངས་རྒྱས་བཅོམ་
ལྡན་འདས་འཁོར་དང་བཅས་ཏེ་སྔ་མ་བཞིན་ནོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་ལག་ན་རྡོ་རྗེ་མདོ་སྡེ་འདི་སྒྲུབ་པ་པོ་འདི་ལ་གསང་སྔགས་ཀྱི་གཞི་འདི་རྒྱ་ཆེར་ཡང་དག་པར་བཤད་པར་བྱའོ། །དཀོན་མཆོག་གསུམ་ལ་ཕྱག་འཚལ་
ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཨོྃ་ཀི་ལི་ཀི་ལ་བཛྲ། ཀི་ལི་ཀི་ལ་ལ་སྭཱ་ཧཱ། སྤྱི་གཙུག་ལ་སྭཱ་ཧཱ། དཔྲལ་བ་ལ་སྭཱ་ཧཱ། མིག་ལ་སྭཱ་ཧཱ། དྲག་ཤུལ་ཅན་ལ་སྭཱ་ཧཱ། ཤིན་ཏུ་དྲག་ཤུལ་ཅན་ལ་སྭཱ་ཧཱ། རྡོ་རྗེ་ཞགས་པ་ལ་སྭཱ་ཧཱ། ལུས་
དམར་པོ་ལ་སྭཱ་ཧཱ། ལག་ན་རྡོ་རྗེ་ལ་སྭཱ་ཧཱ། ལག་ན་ཞགས་པ་ལ་སྭཱ་ཧཱ། ལག་ན་རལ་གྲི་ལ་སྭཱ་ཧཱ། ལག་ན་དགྲ་སྟ་ལ་སྭཱ་ཧཱ། གཞུ་འཛིན་ལ་སྭཱ་ཧཱ། གཏུན་ཤིང་འཛིན་ལ་སྭཱ་ཧཱ། ལག་ན་འཁོར་ལོ་ལ་སྭཱ་ཧཱ། ལག་ན་མདུང་རྩེ་གསུམ་པ་ལ་སྭཱ་ཧཱ། སྙིང་པོ་ལ་སྭཱ་ཧཱ། ཉེ་བའི་
སྙིང་པོ་ལ་སྭཱ་ཧཱ། དྲག་པོ་ཀི་ལི་ཀི་ལ་ལ་སྭཱ་ཧཱ། བྱིས་པ་ཀི་ལི་ཀི་ལ་ལ་སྭཱ་ཧཱ། དམར་པོ་ཀི་ལི་ཀི་ལ་ལ་སྭཱ་ཧཱ། སྟོབས་པོ་ཆེ་ལ་སྭཱ་ཧཱ། རལ་པ་ཅན་ལ་སྭཱ་ཧཱ། གསུས་འཕྱང་པོ་ལ་སྭཱ་ཧཱ། ཁྲོ་བོ་ཆོལ་པ་ལ་སྭཱ་ཧཱ། གཤིན་རྗེ་ལ་སྭཱ་ཧཱ། སྲིན་པོ་ལ་སྭཱ་ཧཱ། སྲིན་པོ་ཡ་མུ་ན་
ལ་སྭཱ་ཧཱ། དྲག་པོ་ཆེན་པོ་ལ་སྭཱ་ཧཱ། སྤྲིན་ལ་སྭཱ་ཧཱ། རི་འཛིན་ལ་སྭཱ་ཧཱ། རི་བཏང་བཟུང་འཛིན་ལ་སྭཱ་ཧཱ། རྡོ་རྗེ་བེ་ཅོན་ལ་སྭཱ་ཧཱ། འཇིགས་བྱེད་ཆེན་པོ་ལ་སྭཱ་ཧཱ། ལུས་འཇིགས་བྱེད་ལ་སྭཱ་ཧཱ། སྡིགས་བྱེད་ལ་སྭཱ་ཧཱ། རྡོ་རྗེའི་ལུ་གུ་རྒྱུད་ལ་སྭཱ་ཧཱ། རྡོ་རྗེའི་གཏན་པ་ལ་སྭཱ་
ཧཱ། རྡོ་རྗེའི་ལུས་ལ་སྭཱ་ཧཱ། འགྲོ་ལྡིང་བ་ལ་སྭཱ་ཧཱ། བདུད་རྩི་ལ་སྭཱ་ཧཱ། དཀའ་ཐུབ་འཛིན་ལ་སྭཱ་ཧཱ། ལྕགས་ཀྱུ་ལ་སྭཱ་ཧཱ། དོན་ཡོད་པ་ལ་སྭཱ་ཧཱ། གཙུག་ཏོར་རྒྱལ་པོ་ལ་སྭཱ་ཧཱ། མདོག་དཀར་ལ་སྭཱ་ཧཱ། སྡོ་བསངས་མདོག་ལ་སྭཱ་ཧཱ། འཕྱང་པོ་ལ་སྭཱ་ཧཱ། གླང་པོ་ཆེ་ལ་སྭཱ་ཧཱ།

བ་ལང་འཕེལ་གྱི་ལག་ལ་སྭཱ་ཧཱ། བདུད་ཀྱི་རྣམ་པར་འཕྲུལ་པ་ལ་སྭཱ་ཧཱ། སྦྲུལ་གྱི་སྐ་རགས་ཅན་ལ་སྭཱ་ཧཱ། རྡོ་རྗེའི་ཕུར་པ་ལ་སྭཱ་ཧཱ། ལག་པ་གཉིས་ཀ་ལ་སྭཱ་ཧཱ། ཨཱ་རྡོ་རྗེ་ལ་སྭཱ་ཧཱ། འབར་བའི་འོད་བྱེད་ལ་སྭཱ་ཧཱ། བློ་གྲོས་བརྟན་པའི་རྡོ་རྗེ་ལ་སྭཱ་ཧཱ། མྱུ་
གུ་ལ་སྭཱ་ཧཱ། འོད་བྱེད་པ་ལ་སྭཱ་ཧཱ། རྡོ་རྗེས་རྣམ་པར་འཇོམས་པ་ལ་སྭཱ་ཧཱ། རྡོ་རྗེའི་དྲ་བ་ལ་སྭཱ་ཧཱ། རྡོ་རྗེ་འཇིགས་བྱེད་ལ་སྭཱ་ཧཱ། རྡོ་རྗེ་ཁུ་ཚུར་ལ་སྭཱ་ཧཱ། སྤྲིན་རྣམ་པར་འཐོར་བ་ལ་སྭཱ་ཧཱ། ཆར་བ་རྟོན་ལ་སྭཱ་ཧཱ། རྡོ་རྗེའི་ལྕགས་ཀྱུ་ལ་སྭཱ་ཧཱ། རྡོ་རྗེའི་སྙིང་པོ་ལ་སྭཱ་ཧཱ། རྡོ་རྗེའི་
ཉེ་བའི་སྙིང་པོ་ལ་སྭཱ་ཧཱ། མཐེ་བོའི་རྒྱལ་པོ་ལ་སྭཱ་ཧཱ། བེ་ཅོན་རྒྱལ་པོ་ལ་སྭཱ་ཧཱ། གོ་ཆའི་རྒྱལ་པོ་ལ་སྭཱ་ཧཱ། ཨོྃ་ངྷྲིྃ ཨོཾ། དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཨོྃ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་
བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ་སྭཱ་ཧཱ། ཨོྃ་ཨ་མྲྀ་ཏེ་ཧཱུྃ་ཕཊ་སྭཱ་ཧཱ། ཡུལ་འཁོར་སྲུང་ལ་སྭཱ་ཧཱ། མིག་མི་བཟང་ལ་སྭཱ་ཧཱ། འཕགས་སྐྱེས་པོ་ལ་སྭཱ་ཧཱ། ལུས་ངན་པོ་ལ་སྭཱ་ཧཱ། དབང་པོ་ལ་སྭཱ་ཧཱ། མེ་ལ་སྭཱ་ཧཱ། དྲང་སྲོང་ཆེན་པོ་ཐམས་ཅད་ལ་སྭཱ་ཧཱ། ཉི་མ་ལ་སྭཱ་ཧཱ། ཟླ་བ་
ལ་སྭཱ་ཧཱ། གཤིན་རྗེ་ལ་སྭཱ་ཧཱ། ཁྱབ་འཇུག་ལ་སྭཱ་ཧཱ། སྲིན་པོའི་བདག་པོ་ལ་སྭཱ་ཧཱ། ཀླུའི་བདག་པོ་ལ་སྭཱ་ཧཱ། རླུང་ལ་སྭཱ་ཧཱ། དབང་བདག་ལ་སྭཱ་ཧཱ། དབང་བདག་གི་ཆུང་མ་ལ་སྭཱ་ཧཱ། བརྒྱ་བྱིན་ལ་སྭཱ་ཧཱ། ནོར་ལྷའི་བུ་ལ་སྭཱ་ཧཱ། རྡོ་རྗེ་ཆེན་པོ་ལ་སྭཱ་ཧཱ། ཚངས་པ་ཆེན་པོ་ལ་སྭཱ་ཧཱ།
ས་ལ་སྭཱ་ཧཱ། དབྱངས་ཅན་ལ་སྭཱ་ཧཱ། ལྷ་མོ་དཔལ་ལ་སྭཱ་ཧཱ། ལྷ་མོ་དཀའ་ཐུབ་ཟློག་ལ་སྭཱ་ཧཱ། རིག་སྔགས་ཆེན་པོ་སྟོབས་པོ་ཆེའི་རིག་སྔགས་ཀྱི་རྒྱལ་པོ་འདིའི་དཀྱིལ་འཁོར་གྱི་གནས་སུ་འཆང་ཞིང་ཡིད་ལ་བྱེད་ན་སྲུང་བ་དང་། སྐྱོབ་པ་དང་། སྦེད་པ་བྱེད་པར་འགྱུར་རོ། །ལས་ཐམས་
ཅད་ཀྱང་འགྲུབ་པར་འགྱུར་རོ། །སངས་རྒྱས་དང་། ཆོས་དང་། དགེ་འདུན་དང་། རང་སངས་རྒྱས་དང་། འཕགས་པ་ཉན་ཐོས་ཀྱི་དགེ་འདུན་ཐམས་ཅད་ལ་ཕྱག་འཚལ་ལོ། །གནས་བརྟན་བློ་གྲོས་ཆེན་པོ་ཤ་ར་དྭ་ཏིའི་བུ་ལ་ཕྱག་འཚལ་ལོ། །བྱམས་པ་ལ་སོགས་པའི་

བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཡང་དག་པར་སོང་བ་རྣམས་ལ་ཕྱག་འཚལ་ལོ། །ཡང་དག་པར་ཞུགས་པ་རྣམས་ལ་ཕྱག་འཚལ་ལོ། །རྡོ་རྗེ་འཛིན་འཁོར་དང་བཅས་པ་ལ་ཕྱག་འཚལ་ལོ། །ཏདྱ་ཐཱ། མུ་ནེ་མུ་ནེ། མ་ཧཱ་མུ་ནེ། ཀི་ལི་ཀི་ལ། མ་ཧཱ་ཀི་
ལི་ཀི་ལ་དྷི་ཀེ། ཀ་ཊ་ཀ་ཊ་ཀ་ཊ། མ་ཧཱ་ཀ་ཊ། ཤ་མ་ཤ་མ་ཤ་མ། མ་ཧཱ་ཤ་མ། ཤཱ་ཏྲི་ཤཱ་ཏྲི་ཤཱ་ཏྲི། ཤཱནྟ་ཤཱནྟ་ཤཱནྟ། དནྟ་དནྟ་དནྟ། དྷཱི་ར་དྷཱི་ར་དྷཱི་ར། མ་ཧཱ་མེ་གྷཱ། དུ་ར་དུ་ར། ཧ་རི་ཧ་རི་ཧ་རི། ཀུཊྚི་ཀུཊྚི་ཀུ་ཊྚི། ཚིནྡ་ཚིནྡ་ཚིནྡ། བྷིནྡྷ་བྷིནྡྷ་བྷིནྡྷ། སརྦ་དུ་ཥྚཱ་ན། གུ་མུ་
གུ་མུ་གུ་མུ། ཧ་ར་ཧ་ར་ཧ་ར། པྲཱ་ཎཱན། ད་མ་ནི་དམ་ནི། ཊ་ཊ་ཊ། ཋ་ཋ་ཋ། ཌཱ་ཌཱ་ཌཱ་ཌཱ་ཌཱ་ཌཱ། ཙ་ཙ་ཙ་ཙ་ཙ་ཙ། པ་ཙ་པ་ཙ་པ་ཙ། ད་ཧ་ད་ཧ་ད་ཧ། ཧཱུྃ་ཧཱུྃ་ཧཱུྃ། ཧེ་ཧེ་ཧེ། ཕཊ་ཕཊ་ཕཊ། ཤ་བ་རི་ཤ་བ་རི་ཤ་བ་རི། མཱ་ཏྃ་གི། །ཙཎྜཱ་ལི། ཧུ་ཧུ་ཧུ། ཛུ་ཧུ་ཛུ་ཧུ་ཛུ་ཧུ། ཧ་ཏཱ་པྲ་
ཏྱརྠི་ན། ཙི་ལི་ཙི་ལི་ཙི་ལི། ཕཊ་ཕཊ་ཕཊ། ཏིཥྛ་ཏིཥྛ་ཏིཥྛ། ཏིཥྛ་ཐི་ཏིཥྛ་ཐི་ཏིཥྛ་ཐི། མཱ་ཏི་ཀྲ་མ་ཐ། མ་ཏྃ་གི། ཧཱུྃ་ཧཱུྃ་ཧཱུྃ། ཧེ་ཧེ་ཧེ། གལ་ཏེ་མི་འདུག་ན་ལག་པ་དང་། རྐང་པ་དང་། ཁ་དང་། མིད་པ་དང་། མིག་དང་། སྙིང་དང་ངག་ཐམས་ཅད་བཅིང་ངོ་། །དབྲོག་གོ། །
ཛྭ་ལ་ཛྭ་ལ་ཛྭ་ལ། དུནྡྷུ་དུནྡྷུ་དུནྡྷུ། བནྡྷུ་བནྡྷུ་བནྡྷུ། ནཱི་ལ་ནཱི་ལ་ནཱི་ལཱང་ག་བཛྲ་དྷཱ་ར། སྟོབས་པོ་ཆེ་ཞེས་བྱ་བའི་སྙིང་པོ་དྲན་པར་གྱིས་ཤིག །ཀོ་ཊི་ཀོ་ཊི་ཀོ་ཊི་ནི། སརྦ་བྷཱུ་ཏཱ་ནི། བཛྲ་མཱ་ལི་བཛྲ་དྷཱ་ར། བཛྲ་ཨ་ཊྚ་ཧཱ་ས། ཙརྟུ་ན་རྟུ། མརྟུ། ཀུ་རུ་ཀུ་རུ། ཧུ་རུ་ཧུ་རུ་ཧུ་རུ། སེམས་ཅན་
ཆེན་པོ་དྲན་པར་གྱིས་ཤིག །ཧཱུྃ་ཧཱུྃ་ཧཱུྃ། ཧེ་ཧེ་ཧེ། ཕཊ་ཕཊ་ཕཊ། ཙཎྜ་ཙཎྜ་ཙཎྜ། མ་ཧཱ་ཙཎྜ། ཧུ་རྟུ་ཧུ་རྟུ་ཧུ་རྟུ། མུ་རུ་མུ་རུ་མུ་རུ། གྲྀཧྣ་གྲྀཧྣ་གྲྀ་ཧྣ། བཛྲ་པཱ་ཎི་ཧ་ན་ཧ་ན། མ་མ་སརྦ་ཤ་ཏྲཱུ་ཎཱན། མཱུརྟི་ནི་ཏཱ་ཌ་ཡ་ཕཊ། ཀུ་རུ་ཀུ་རུ་ཀུ་རུ། ལག་ན་རྡོ་རྗེའི་ལས་དང་འགལ་བར་
མ་བྱེད་ཅིག །དམ་ཚིག་ལས་འགལ་བར་བྱས་ན་དམ་ཚིག་དྲལ་བ་དང་། དེ་བཞིན་གཤེགས་པ་ལ་ཡང་བསླུས་པར་འགྱུར་རོ། །གསང་སྔགས་ཀྱི་གཞི་ནི་འདི་རྣམས་ཡིན་ནོ། །ཙུ་ཙུ་ཙུ། ཧ་ར་ཧ་ར་ཧ་ར། ཕུཊུ་ཕུཊུ་ཕུཊུ། ཏ་པ་ནི་ཏ་པ་ནི་ཏ་པ་ནི། པ་ཙ་ནི་པ་ཙ་ནི་པ་ཙ་ནི།

ལག་ན་རྡོ་རྗེའི་སྙིང་པོ་དེ་བཞིན་གཤེགས་པས་བྱིན་གྱིས་བརླབས་པ་དྲན་པར་གྱིས་ཤིག །ཙི་ལི་ཙི་ལི་ཙི་ལི། ཕུ་ལུ་ཕུ་ལུ་ཕུ་ལུ། ཕུ་ཕུ་ཕུ། བཅོམ་ལྡན་འདས་གལ་ཏེ་བདག་སྙིང་པོ་འདི་དང་འགལ་བར་བགྱིས་ན་དེ་བཞིན་གཤེགས་པས་རབ་ཏུ་གསུངས་པའི་
མཚམས་མེད་པ་ལྔ་དང་ལྡན་པར་གྱུར་ཅིག །དར་ཕུ། ཙར་ཕུ། ནར་ཕུ། རྡོ་རྗེ་འཛིན་འཁོར་དང་བཅས་པ་ལ་ཕྱག་འཚལ་ལོ། །བདག་ལ་གསང་སྔགས་ཀྱི་གཞི་འདི་རྣམས་གྲུབ་པར་གྱུར་ཅིག་སྭཱ་ཧཱ། རྡོ་རྗེ་འཛིན་གཟི་བརྗིད་ཆེན་པོ་ལ་ཕྱག་འཚལ་ལོ་སྭཱ་ཧཱ། ཨོྃ། ཧཱུྃ་ཧཱུྃ། ཕཊ་
ཕཊ་སྭཱ་ཧཱ། དེ་ནས་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་འོད་ཟེར་ཀུན་དུ་འབར་བའི་སྣང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལས་འདས་ནས་བདུད་ཀྱི་ཁྱིམ་ཐམས་ཅད་ཀུན་དུ་འབར། རབ་ཏུ་འབར།
ཀུན་དུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པར་ཀུན་དུ་སྣང་ངོ་། །དེ་ལྟར་གྱུར་པ་དང་། བདུད་སྡིག་ཅན་རལ་གྲི་དང་། འཁོར་ལོ་དང་། གཞུ་དང་། མདའ་ལ་སོགས་པ་དང་། མཚོན་ཆ་རྣམས་ལག་ན་ཐོགས་ཏེ་བགེགས་ཀྱི་རྣམ་པར་འཕྲུལ་པ་དུ་མ་བྱེད་དོ། །
དེ་ནས་སྐད་ཅིག་དེ་ཉིད་ལ་བདུད་སྡིག་ཅན་བདུད་ཀྱི་རིས་ཀྱི་ལྷའི་བུ་ཐམས་ཅད་དང་ལྷན་ཅིག་ཏུ་བདུད་ཀྱི་རྣམ་པར་འཕྲུལ་པ་ཆེན་པོས་བཅོམ་ལྡན་འདས་ག་ལ་བ་དེར་སོང་ངོ་། །དེ་ནས་དེ་ལྟར་གྱུར་པ་དང་། ཁྲོ་བོ་ཆོལ་བ། མདོག་དམར་བ། སྦྲང་རྩི་ལྟར་མིག་དམར་སེར་པོ།
མཆེ་བ་གཙིགས་པ། མི་བཟད་པ། སྐྲ་ཁམ་པ་གྱེན་དུ་བརྫེས་པ། ལག་པ་གཡས་པ་ན་བེ་ཅོན་ཐོགས་པ། ལག་པ་གཡོན་པ་ན་རྡོ་རྗེ་ཐོགས་པ་སྦྲུལ་གྱིས་བརྒྱན་པ། སྟག་ལྤགས་ཀྱི་ཤམ་ཐབས་བགོས་པ། ཤར་ཕྱོགས་སུ་འཇིག་རྟེན་གྱི་ཁམས་གང་གཱའི་ཀླུང་ཉི་
ཤུ་རྩ་གཅིག་གི་བྱེ་མ་སྙེད་འདས་ཤིང་། དེ་བཞིན་དུ་ལྷོ་དང་། ནུབ་དང་། བྱང་གི་ཕྱོགས་སུ་ཡང་ཀུན་དུ་སྣང་ངོ་། །དེ་ནས་བདུད་སྡིག་ཅན་དང་། བགེགས་བྱེ་བ་ཁྲག་ཁྲིག་སྟོང་ཕྲག་བརྒྱ་ཁྲོ་བོ་ཆོལ་པས་འདར་བར་གྱུར་ཏོ། །བདུད་སྡིག་ཅན་ནི་མྱོས་ཤིང་

གཟིར་ཏེ་འཕངས་ནས་སྲོག་ལ་མི་ལྟ་བ་དང་། གསང་བ་པའི་བདག་པོ་ལག་ན་རྡོ་རྗེས་ཞགས་པའི་བཅིང་བ་ལྔས་བཅིངས་སོ། །དེ་ལྟར་གྱུར་པ་དང་། དེའི་ཚེ་འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་སྤོས་དང་།
མེ་ཏོག་དང་། རྒྱལ་མཚན་དང་། བ་དན་སྣ་ཚོགས་ལ་སོགས་པས་བཅོམ་ལྡན་འདས་ལ་ཅི་ནུས་ཀྱིས་མཆོད་ནས་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེ་སངས་རྒྱས་ཐམས་ཅད་ཀྱིས་བསྟོད་
ཅིང་བསྔགས་ཏེ་མངོན་པར་དགའ་བར་བྱས་ནས་བཅོམ་ལྡན་འདས་ཀྱིས་རྗེས་སུ་ཐུགས་རངས་པ་མཛད་པས་སེམས་ཅན་ཐམས་ཅད་ཀྱི་དོན་དང་། ལྷ་དང་། མི་རྣམས་ལ་ཕན་པ་དང་། བདེ་བའི་ཕྱིར་རིག་སྔགས་མཆོག་གི་རྒྱུད་ཆེན་པོའི་ནང་ནས་དོན་འདོད་པ་ཐམས་ཅད་སྦྱིན་པ་
ཞེས་བྱ་བ་སྟོབས་དཔག་ཏུ་མེད་པས་ཕ་རོལ་གནོན་པ་སྟོབས་པོ་ཆེའི་སྟོབས་ཆེན་པོའི་རིག་སྔགས་ཀྱི་རྒྱལ་པོ་ཞེས་བྱ་བའི་གསང་སྔགས་ཀྱི་གཞི་འདི་དག་སྨྲས་སོ། །གང་ལ་ལ་ཞིག་འཛིན་ཏམ། འཆང་ངམ། ཀློག་གམ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་
ཏམ། བསྟི་སྟང་དུ་བྱེད་དམ། བླ་མར་བྱེད་དམ། རིམ་གྲོར་བྱེད་དམ། མཆོད་པ་བྱེད་ན་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །ཕ་རོལ་གྱིས་བྱས་པའི་གསང་སྔགས་ཐམས་ཅད་བཤིག་པ་དང་། བཅོམ་པ་དང་། བསྒྱེལ་བར་ཡང་འགྱུར་རོ། །དེ་ལྟར་
བཅོམ་ལྡན་འདས་རྡོ་རྗེ་འཛིན་གྱིས་རིག་སྔགས་མཆོག་གི་རྒྱུད་ཆེན་པོའི་ནང་ནས་འབྱུང་བ་སྨྲས་སོ། །དེ་ནས་གསང་བ་པའི་བདག་པོ་ལག་ན་རྡོ་རྗེ་བཅོམ་ལྡན་འདས་ཀྱིས་རྗེས་སུ་ཐུགས་རངས་པ་མཛད་པས་དོན་འདོད་པ་ཐམས་ཅད་སྦྱིན་པ་ཞེས་བྱ་བ་སྟོབས་དཔག་ཏུ་མེད་པས་ཕ་རོལ་
གནོན་པ་སྟོབས་པོ་ཆེའི་གསང་སྔགས་ཀྱི་གཞི་འདི་སྨྲས་པ། ཨོྃ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བི་དྷྭནྶཡ། ཛཊི་ལམ་པོ་བྷ་ར། ཨུ་ཙྪུཥྨ་ཀྲོ་དྷ་ཧཱུྃ་ཕཊ་སྭཱ་ཧཱ། དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་

རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཆོས་ཀྱི་རྣམ་གྲངས་འདི་ཐོས་ནས་འཛིན་ཏམ། འཆང་ངམ། ཀློག་གམ། གཞན་དག་ལ་ཡང་རྒྱ་ཆེར་རབ་ཏུ་སྟོན་ཏམ། རིམ་གྲོར་བགྱིད་དམ། མཆོད་པར་བགྱིད་ན་དཀྱིལ་འཁོར་ཐམས་ཅད་དུ་དབང་བསྐུར་
བར་འགྱུར་རོ། །གསང་བ་པའི་བདག་པོ་ལག་ན་རྡོ་རྗེས་ཡ