Kinh tạng Tây Tạng (Kangyur Đại Học) — 101_གཟུངས་འདུས།_ཝཾ

གྷུ་ཌེ། བཛྲ་མཱ་ལཱ་དྷ་རི། ས་ར་ས་ར། ཀ་ལ་ཀ་ལ་པ་རི་ཎི་སྭཱ་ཧཱ། བཅོམ་ལྡན་འདས་གསང་སྔགས་ཀྱི་གཞི་འདི་དག་ནི་སངས་རྒྱས་བྱེ་བ་ཕྲག་དགུ་བཅུ་རྩ་དགུས་གསུངས་པ་སྟེ། སུ་ཞིག་རིག་སྔགས་ཀྱི་རྒྱལ་
མོ་ཆེན་མོ་རྒྱལ་བ་ཅན་འདི་ལས་འདའ་བར་བགྱིད་པ་དེ་དག་ནི་སངས་རྒྱས་བཅོམ་ལྡན་འདས་དེ་དག་ལ་འཁུས་པར་འགྱུར་རོ། །འདི་ལྟ་སྟེ། ལྷའམ། ཀླུའམ། གནོད་སྦྱིན་ནམ། སྲིན་པོའམ། ཡི་དགས་སམ། ཤ་ཟའམ། བརྗེད་བྱེད་
དམ། གསོད་བྱེད་དམ། བྱད་དམ། རོ་ལངས་སམ། བཀྲ་མི་ཤིས་པ་འམ། མ་མོའི་གདོན་ནམ། གོང་མའི་གདོན་ནམ། སྐེམ་བྱེད་དམ། སྐེམ་བྱེད་ཀྱི་གདོན་ནམ། ཟ་བའི་གདོན་དེ་དག་ཐམས་ཅད་རྨུགས་པར་བགྱིས་སོ། །

རེངས་པར་བགྱིས་སོ། །ཏདྱ་ཐཱ། བཛྲེ་བཛྲེ་བཛྲེ། ཧ་ན་བཛྲེ། ནི་ཧ་ན་བཛྲེ། ཁཱ་ད་ཁཱ་ད་བཛྲོ་ཎ། སྥཱ་ཊ་ཡ་སྥཱ་ཊ་ཡ། བཛྲེ་ཎ། ཨེ་དཾ་གྲྀ་ཧ་ན། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། གྲ་ས་གྲ་ས་གྲ་ས། པཱ་ཏ་ཡ། པཱ་ཏ་ཡ། པཱ་ཏ་ཡ། དྷ་ར་དྷ་ར།
བདག་དང་སེམས་ཅན་ཐམས་ཅད་འཇིགས་པ་དང་གནོད་པ་ཐམས་ཅད་དང་། འཐབ་མོ་དང་། འཐབ་པ་དང་། རྩོད་པ་དང་། འགྱེད་པ་ཐམས་ཅད་ལས་སྲུངས་ཤིག་སྲུངས་ཤིག །ཛ་ཡ་ཀཱ་རི། ཛ་ཡི་ཀུ་རུ། ཏ་ར་ཏ་ར་ཏ་ར། མ་ཧཱ་ཏ་ར་ཎེ། སུཊཱེ་
ཀུ་ཊེ་ཀུ་ཊེ། བཛྲ་ཀུ་ཊེ་སྭཱ་ཧཱ། དེ་ནས་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ཏེ། ལག་ན་རྡོ་རྗེ་ལེགས་སོ་ལེགས་སོ། །ལག་ན་རྡོ་རྗེ་སེམས་ཅན་ཆེན་པོ་ཁྱེད་སེམས་ཅན་རྣམས་ལ་ཕན་པ་དང་། བདེ་
བ་དང་། སྙིང་བརྩེ་བའི་ཕྱིར་ཞུགས་པ་ཡང་ལེགས་སོ། །ལག་ན་རྡོ་རྗེ་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་སུའི་ལག་ཏུ་སོང་སྟེ། ལུས་ལ་བཏགས་སམ། གླེགས་བམ་ལ་བྲིས་སམ། གྲོང་ངམ། གྲོང་ཁྱེར་རམ། གྲོང་རྡལ་ལམ། གཙུག་
ལག་ཁང་ངམ། གནས་ཁང་ངམ། འཆགས་ན་སྤྱོད་པར་འགྱུར་བ་དེར་རྒྱལ་པོ་ཆེན་པོ་རྣམ་ཐོས་ཀྱི་བུའི་ཚོགས་ཀྱི་གཡོག་དང་བཅས་པས་གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་དེ་བསྲུང་བར་འགྱུར་རོ། །ཡུལ་དེ་ཕ་རོལ་གྱི་དམག་
ཚོགས་ཀྱིས་གནོད་པར་མི་འགྱུར་རོ། །ས་ཕྱོགས་དེར་མི་ངས་མི་འབྱུང་ངོ་། །དགྲ་མི་འབྱུང་ངོ་། །རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་བྱེ་བ་ཁྲག་ཁྲིག་འབུམ་ཕྱི་བཞིན་འབྲང་བ་དང་ལྷན་ཅིག་དེར་སྲུང་ངོ་། །ཡོངས་སུ་སྐྱོབ་བོ། །ཡོངས་སུ་
འཛིན་ཏོ། །ཞི་བ་དང་བདེ་ལེགས་སུ་འགྱུར་བ་བྱེད་དོ། །ཆད་པ་སྤོང་ངོ་། །མཚོན་ཆ་སྤོང་ངོ་། །དུག་གསོད་དོ། །མི་མཛའ་བ་འགོག་གོ། །མཚམས་གཅོད་དོ། །ས་གཅོད་དོ། །ཏདྱ་ཐཱ། ཏ་བ་ནི་ཏ་བ་ནི། པྲ་ཏ་པ་ནི།

དྷུ་རུ་མེ། དྷུ་རུ་མེ། བུདྡྷ་ཨདྷིཥྛི་ཏེ། མུ་ཁེ། མུ་ཁེ། སུ་མུ་ཁེ། སུ་མུ་ཁེ། པྲ་ལ་པྲ་ལ་ཏེ། ས་མཱ་དྷི་ཏེ། ས་མཱ་དྷི་གརྦྷེ། སམཱ་དྷི་གརྦྷེ། མཱ་ན་སི། ཕུ་རུ་ཕུ་རུ་ཕུ་རུ་དྷུ་རུ། བུདྡྷ་མཱ་ན་སི་ཀེ་སྭཱ་ཧཱ། ལག་ན་
རྡོ་རྗེ་འདི་དག་ནི་དེ་བཞིན་གཤེགས་པའི་སྤྱི་བོ་ནས་དབང་བསྐུར་བའོ། །གསང་བའི་གནས་སོ། །དེ་བཞིན་གཤེགས་པ་ཐམས་ཅད་ཀྱི་གསང་བའོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའོ། །ལག་ན་རྡོ་རྗེ་མིའི་རྒྱལ་པོ་གང་ལ་ལ་
ཞིག་གིས་རིག་སྔགས་ཀྱི་རྒྱལ་མོ་རྒྱལ་བ་ཅན་འདི་གླེགས་བམ་ལ་ལེགས་པར་བྲིས་ཏེ་འཆང་ངམ། ལུས་ལ་བཏགས་ཏེ་འཆང་ཞིང་དེ་ལ་སྤོས་དང་། ཕྲེང་བ་དང་། བྱུག་པ་དང་། མེ་ཏོག་སྣ་ཚོགས་ཀྱི་ལྷབ་ལྷུབ་ཀྱིས་བསྟི་སྟང་དུ་བྱེད། བླ་མར་བྱེད། རི་
མོར་བྱེད། མཆོད་པར་བྱེད་ན། མིའི་རྒྱལ་པོ་དེ་ལ་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་ཕྱི་བཞིན་འབྲང་བ་བྱེ་བ་ཁྲག་ཁྲིག་འབུམ་ཕྲག་དུ་མ་དང་ལྷན་ཅིག་ཏུ་བསྲུང་བར་འགྱུར་རོ། །མིའི་རྒྱལ་པོ་དེ་ལ་ཕྱིར་རྒོལ་བ་དང་། དགྲ་དང་། ཕ་རོལ་གྱི་
དམག་ཚོགས་ཐམས་ཅད་ཀྱིས་གླགས་མི་རྙེད་དོ། །མཐུས་ཡུལ་དེར་འཇུག་པ་དང་བགེགས་འཇུག་ན་ཡང་རྒྱལ་པོ་ཆེན་པོ་རྣམ་ཐོས་ཀྱི་བུ་བགེགས་སྣ་ཚོགས་བརྒྱ་དང་། བགེགས་སྣ་ཚོགས་སྟོང་བྱེད་པར་འགྱུར་རོ། །མིའི་རྒྱལ་པོའི་གང་དང་གང་དུ་འགྲོ་བ་
དེ་དང་དེར་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་རྒྱལ་མཚན་གྱི་རྩེ་མོ་ལ་བཏགས་ཏེ་མདུན་དུ་བཀུར་བར་བྱའོ། །གང་དུ་གཡུལ་ངོར་འཇུག་གམ། དགྲ་ཆེན་པོ་དང་འཐབ་པ་དེར་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་མགུལ་དུ་བཏགས་ཏེ། གཡུལ་ངོར་
ཞུགས་ན་དེར་རྒྱལ་བོ་ཆེན་པོ་རྣམ་ཐོས་ཀྱི་བུས་ཕ་རོལ་གྱི་དམག་ཚོགས་དེ་ཕམ་པར་བྱེད་པར་འགྱུར་རོ། །དེ་ནི་རྒྱལ་བར་བྱེད་པར་འགྱུར་རོ། །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་སུའི་མགུལ་དུ་བཏགས་པ་དེ་རྒྱལ་བར་འགྱུར་རོ། །ལག་

ན་རྡོ་རྗེ་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། རྒྱལ་པོའི་ཕོ་བྲང་འཁོར་གང་དུ་གལ་ཏེ་ནད་འགོ་བ་སྣ་ཚོགས་དང་། མི་ངས་མི་བཟད་པ་ཆེན་པོ་བྱུང་ན། དེར་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་དང་། མེ་ཏོག་
སྣ་ཚོགས་དང་། ཆོ་ག་དང་། གཏོར་མ་དང་། བུམ་པ་བཏུང་བ་སྣ་ཚོགས་ཀྱིས་བཀང་བ་བཞི་ཕྱོགས་བཞིར་བཞག་སྟེ། རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་བཀླགས་ན་དེའི་ཚེ་རྒྱལ་བོ་ཆེན་པོ་རྣམ་ཐོས་ཀྱི་བུ་ཚོགས་ཀྱི་གཡོག་དང་བཅས་ཤིང་།
གནོད་སྦྱིན་བྱེ་བ་ཁྲག་ཁྲིག་འབུམ་ཕྲག་དུ་མ་དང་ལྷན་ཅིག་ཏུ་ནད་འགོ་བ་དང་། མི་ངས་དེ་རབ་ཏུ་ཞི་བར་བྱེད་པར་འགྱུར་རོ། །དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལས་ལྷག་པའི་
རིག་སྔགས་ཆེས་སྟོབས་དང་ལྡན་པའམ། གཟི་བརྗིད་ཆེ་བ་འམ། རྫུ་འཕྲུལ་ཆེ་བའམ། མཐུ་ཆེ་བ་གང་ཡང་མ་མཆིས་སོ། །རིག་སྔགས་ཐམས་ཅད་ཀྱི་མཆོག །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་ཡུལ་གང་དང་གང་དུ་སྤྱོད་པར་
འགྱུར་བའི་གནས་དེ་དང་དེ་དག་ཏུ་སངས་རྒྱས་ཀྱི་མཛད་པ་བྱེད་པར་འགྱུར་རོ། །ཏདྱ་ཐཱ། བཛྲེ་བཛྲེ་བཛྲེ། ཨ་མྲྀ་ཏ་བཛྲོ། ཛྭ་ལི་ཏ་བཛྲ། ཧུ་ཏཱ་ཤ་ནི། བྷཉྫ་བྷཉྫ་བྷཉྫ་བྷཉྫ། ཛམྦྷ། སྟམྦྷ་ཡ། སརྦ་གྲ་ཧཱ་ཎཱཾ། ཧཱུྃ་ཧཱུྃ་ཧཱུྃ།
ཕཊ་ཕཊ་ཕཊ། གྲ་ས་གྲ་ས་གྲ་ས། པ་ཊ་པ་ཊ་པ་ཊ། ཏ་ཊ་ཏ་ཊ་ཏ་ཊ། མུ་རུ་མུ་རུ་མུ་རུ། དྷ་མ་དྷ་མ་དྷ་མ། ཛྭ་ལ་ཛྭ་ལ་ཛྭ་ལ། ཁུ་ཁུ་མེ། ཁུ་ཁུ་མེ། གྷོ་རི་གྷོ་རི་གྷོ་རི། བཛྲ་མཱ་ན་སི། བཛྲ་ཧུ་ཏི། ཧུ་ཏི་རུ། ཕུ་རུ་
ཕུ་རུ། གྲ་ས་གྲ་ས། སརྦ་ཨ་ཧི་ཏི་ཥི་ཎཱཾ། ནཱ་བུ་རུ་ཎི། མུ་མུ་ལེ། བཛྲ་པྲ་དཱི་པཱ་ནི། ཙི་མ་ལེ་ཕུ་སྭཱ་ཧཱ། ཨཱ་ཡུཿཔཱ་ལ་ནི་ཙུ་ཙུ་རེ་སྭཱ་ཧཱ། ཛ་ཡེ་ཛ་ཡེ། ཛ་ཡ་སམྦྷ་བེ་སྭཱ་ཧཱ། ཛ་ཡོཏྟ་མེ་སྭཱ་ཧཱ། ཛ་ཡ་བ་རེ་དེ་སྭཱ་ཧཱ། ཛ་ཡནྟ་རེ་

སྭཱ་ཧཱ། ཛ་ཡ་མཱ་ན་སི་སྭཱ་ཧཱ། ཛ་ཡ་བཛྲ་སྭཱ་ཧཱ། ཨ་ཛི་ཏ་བཛྲཱ་ཡ་སྭཱ་ཧཱ། མ་ཧཱ་བཛྲ་ཧུ་ཏཱ་ཤ་ནཱ་ཡ་སྭཱ་ཧཱ། ཨ་མོ་གྷ་བཛྲ་ཧ་སྟ་ཡ་སྭཱ་ཧཱ། དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས།
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་ཆོས་ཀྱི་རྣམ་གྲངས་འདི་ལ་བསྲུང་བ་སྩལ་བར་བགྱི། ཡོངས་སུ་བསྐྱབ་པ་དང་། ཡོངས་སུ་གཟུང་བ་
དང་། ཆད་པ་སྤོང་བ་དང་། མཚོན་ཆ་སྤོང་བ་དང་། དུག་དགུམ་པ་དང་། མི་མཛའ་བ་དགག་པ་དང་། དུས་མ་ལགས་པར་འགུམ་པ་དགག་པ་དང་། འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་དང་། གཡུལ་
འགྱེད་པ་དང་། ཁྲག་ཁྲུག་དང་། འཇིགས་པ་ཐམས་ཅད་དགག་པར་བགྱིའོ། །མཚམས་དགུམ་པར་བགྱིའོ། །ཏདྱ་ཐཱ། ཛ་ཡེ་ཇེ་ཡེ་ཛ་ཡེ། མ་ཧཱ་ཛ་ཡེ། མི་ལི་མ་ན་སི། ཛྷེ་ཛྷེ་ཛྷེ། མུ་རུ་མུ་རུ། ཏུ་ཊུ་ཏུ་ཊུ། མུ་མུ་ལེ། མཱརྒ་བ་ཏི།
དཱུདྷུ་མེ། བེ་གེ་བེ་ག་དྷཱ་རི་ཎཱི། ཏེ་ཛ་བ་ཏཱི། བདག་དང་སེམས་ཅན་ཐམས་ཅད་འཇིགས་པ་དང་གནོད་པ་ཐམས་ཅད་དང་། དུས་མ་ཡིན་པར་འཆི་བ་ཐམས་ཅད་ལས་སྲུངས་ཤིག་སྲུངས་ཤིག་སྭཱ་ཧཱ། བཅོམ་ལྡན་འདས་གཟུངས་ཀྱི་གསང་སྔགས་ཀྱི་
གཞི་འདི་དག་ནི་སངས་རྒྱས་བྱེ་བ་ཕྲག་དགུ་བཅུ་རྩ་དགུས་གསུངས་པ་བྱིན་གྱིས་བརླབས་པ་ལགས་སོ། །ཏདྱ་ཐཱ། བུདྡྷེ་བུདྡྷེ། བུདྡྷེ་བུདྡྷེ། བུདྡྷ་བ་ཏཱི། བུདྡྷ་ཨ་བ་བྷ་ས་ནི། དྷརྨ་བ་ཏཱི། ས་མ་ཧི་ཏེ། ས་མཱ་དྷི་གརྦྷེ། བུདྡྷ་ཨ་བ་བྷ་ས་ནི། བུདྡྷ་
པ་རི་ཧ་རི། དྷརྨ་ཨ་བ་བྷཱ་ས་ནི་སྭཱ་ཧཱ། སུ་ལ་ལ་ཞིག་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་ལས་འདའ་བར་བགྱིད་པ་དེ་ནི་མགོ་བོ་ཏ་ཀའི་འབྲས་བུ་བཞིན་དུ་ཚལ་པ་བདུན་དུ་འགས་སོ། །སུ་ཞིག་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་འཆང་

ངམ། ཀློག་གམ། མཆོད་པར་བགྱིད་དམ། ཡི་གེར་འདྲིའམ། གླེགས་བམ་ལ་བྲིས་ཏེ། གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། རྒྱལ་པོའི་ཕོ་བྲང་འཁོར་ཏམ། གཙུག་ལག་ཁང་དུ་འཇོག་ན། དེར་བདག་
ཚོགས་ཀྱི་གཡོག་དང་བཅས་ཤིང་། གནོད་སྦྱིན་བྱེ་བ་ཁྲག་ཁྲིག་འབུམ་ཕྲག་དུ་མ་དང་ལྷན་ཅིག་ཏུ་རིག་སྔགས་འཛིན་པ་དེའི་སླད་བཞིན་དུ་འབྲངས་ཏེ་བསྲུང་བར་བགྱིའོ། །དཔག་ཚད་བརྒྱ་སྟོང་ཚུན་ཆད་དུ་མཚམས་དགུམ་པར་བགྱིའོ། །སླར་རྒོལ་བ་
དང་། དགྲ་དང་། གཡུལ་འགྱེད་པ་དང་། འཐབ་པ་དང་། མཚང་འདྲུ་བ་དང་། འཐབ་མོ་དང་། འགྱེད་པ་ཐམས་ཅད་མ་མཆིས་པར་བགྱིའོ། །སླར་བཟློག་པར་བགྱིའོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་རྣམ་ཐོས་ཀྱི་
བུ་ལ་ལེགས་སོ་ཞེས་བྱ་བ་བྱིན་ཏེ། རྒྱལ་པོ་ཆེན་པོ་ལེགས་སོ་ལེགས་སོ། །སེམས་ཅན་ཆེན་པོ་ཁྱོད་འཇིག་རྟེན་ཐམས་ཅད་ལ་ཕན་པ་དང་། སེམས་ཅན་ཐམས་ཅད་ལ་སྙིང་བརྩེ་བ་དང་། བདེ་བ་དང་། བསྟན་པ་བསྲུང་བའི་ཕྱིར་ཞུགས་པ་ཡང་
ལེགས་སོ། །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདིས་གང་ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་བྱས་པ་དེའི་ལུས་ལ་མཚོན་དང་། དུག་དང་། བྱད་དང་། གསོད་བྱེད་དང་། རིམས་དང་། གནོད་
པ་ཐམས་ཅད་ཀྱིས་མི་ཚུགས་པར་འགྱུར་རོ། །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་ནི་དེ་བཞིན་གཤེགས་པའི་ཕྱག་རྒྱས་བཏབ་པའོ། །ལག་ན་རྡོ་རྗེ་ཁྱོད་ཀྱིས་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་ཟུང་ཤིག །ཆོངས་ཤིག །ཀུན་ཆུབ་
པར་གྱིས་ཤིག །ལག་ན་རྡོ་རྗེ་ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་དམ་པའི་ཆོས་རབ་ཏུ་རྣམ་པར་འཇིག་པའི་དུས་ན། སེམས་ཅན་དྲག་ཤུལ་དང་ལྡན་པ། ཤིན་ཏུ་མི་བཟད་པ། མདངས་འཕྲོག་པའི་གནོད་སྦྱིན་དང་། སྲིན་པོ་རྣམས་དང་།

ཆོས་མ་ཡིན་པ་སྤྱོད་པའི་རྒྱལ་བོ་འབྱུང་བར་འགྱུར་རོ། །ཚེ་ཐུང་བ་ཆོས་མ་ཡིན་པས་ཡུལ་འཁོར་སྐྱོང་བ་འབྱུང་བ་དེའི་ཚེ་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་སེམས་མི་མཉམ་པ། སེམས་མི་བཟད་པ་དེ་དག་དང་། སྡང་བ་
དང་། རབ་ཏུ་སྡང་བའི་སེམས་ཅན་ཐམས་ཅད་ཀྱི་དོན་དུ་འགྱུར་ཚར་གཅོད་པར་འགྱུར་རོ། །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇོམས་པར་བྱེད་པ་འདི་ནི། སངས་རྒྱས་བྱེ་བ་ཁྲག་ཁྲིག་འབུམ་ཕྲག་
དུ་མས་གསུངས་པ་བྱིན་གྱིས་བརླབས་པ་དང་ཕྱག་རྒྱས་བཏབ་པའོ། །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་ནི་ལྷ་ཐམས་ཅད་ཀྱིས་ཕྱག་བྱས་པའོ། །དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་
ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་དེའི་ཕྱིར་ཁྱོད་ཀྱིས་དེ་བཞིན་གཤེགས་པའི་སྙིང་པོ་དང་ཕྱག་རྒྱ་ཞེས་བྱ་བར་ཟུང་ཤིག །
བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇོམས་པར་བྱེད་པ་རྒྱལ་བ་ཅན་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། གསང་བ་པའི་བདག་པོ་ལག་ན་རྡོ་རྗེ་དང་། རྒྱལ་པོ་ཆེན་པོ་རྣམ་ཐོས་ཀྱི་བུ་དང་། ལྷ་
དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རྒྱལ་བ་ཅན་ཞེས་བྱ་བའི་གཟུངས་རྫོགས་སོ།། །།
༄༅། །རྒྱ་གར་སྐད་དུ། ཨཱརྱ་མ་ཧཱ་ལ་ཀྵཱི་ཎཱི་སཱུ་ཏྲ། བོད་སྐད་དུ། འཕགས་པ་དཔལ་ཆེན་མོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་

ན། བཅོམ་ལྡན་འདས་བདེ་བ་ཅན་ན་བཞུགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་
འདས་ལ་བསྐོར་བ་ལན་གསུམ་བྱས་ཏེ་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་དཔལ་ཆེན་མོ་ལ་གཟིགས་ནས་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །དཔལ་ཆེན་མོའི་མཚན་བཅུ་གཉིས་པོ་འདི་དགེ་སློང་ངམ། དགེ་
སློང་མའམ། དགེ་བསྙེན་ནམ། དགེ་བསྙེན་མའམ། དེ་མ་ཡིན་པ་གཞན་ཡང་རུང་སྟེ། གང་གིས་ཤེས་པ་དང་། གང་ལ་ལ་འཆང་བ་དང་། ཀློག་པ་དང་། འདྲི་བ་དང་། འདྲིར་འཇུག་པ་དེ་ནི་དབུལ་བ་བོར་ཏེ་ཕྱུག་པོར་འགྱུར་རོ། །དེ་ནས་འབྱུང་པོའི་ཚོགས་
ཐམས་ཅད་ཀྱིས་དེ་ལྟར་གྱུར་ཅིག་ཅེས་ཀུན་ནས་གསོལ་ཏོ། །དེ་ནས་བཅོམ་ལྡན་འདས་ཀྱིས་དཔལ་ཆེན་མོའི་མཚན་བཅུ་གཉིས་པོ་བཀའ་སྩལ་པ་འདི་ལྟ་སྟེ། དཔལ་ལྡན་མ། བཀྲ་ཤིས་མ། པདྨའི་ཕྲེང་བ་ཅན། ནོར་གྱི་བདག་མོ། དཀར་མོ། གྲགས་པ་ཆེན་
མོ། པདྨའི་སྤྱན། བྱེད་པ་མོ། འོད་ཆེན་མོ། ཟས་སྦྱིན་མ། རིན་པོ་ཆེ་རབ་ཏུ་སྦྱིན་མ། དཔལ་ཆེན་མོ། །སྱཱད་ཡ་ཐེ་ད་ནཱ། ཛི་ནི། གྷྲི་ནི། སརྦ་ཨརྠ་སཱ་དྷ་ནི། ཤ་ཤི་ནི་ཨ་ལཀྵྨི་ནི། མེ་ནཱ་ཤ་ཡ་སིདྡྷྱནྟུ་མནྟྲ་པདཱཿསྭཱ་ཧཱ། ཨོཾ་བྷྲྀ་ཀུ་ཊཱི་
པ་ར་མ་སུ་བྷ་གེ་སྭཱ་ཧཱ། ལན་གསུམ་དུ་བརྗོད་པར་བྱ་སྟེ། གང་ལ་ལ་དུས་གསུམ་དུ་འདོན་པ་དེའི་མི་མཐུན་པའི་ཕྱོགས་ཐམས་ཅད་འཇིག་པར་འགྱུར་རོ། །སྐལ་བ་བཟང་པོ་དང་ལྡན་པར་འགྱུར་རོ། །འབྱོར་པ་ཟད་མི་ཤེས་པར་འགྱུར་རོ། །མི་དང་ཕྲད་དུ་
འགྲོ་བའི་ཚེ་བཀླགས་ནས་ཕྲད་པར་བྱས་ན་མི་དེས་དེ་ལ་བུའི་འདུ་ཤེས་སྐྱེད་པར་འགྱུར་ཏེ་དགའ་བར་འགྱུར་ལ་ཇི་སྐད་བསྐོ་བ་བཞིན་བྱེད་དོ། །རྟག་ཏུ་རྒྱུན་མི་འཆད་པར་བཀླགས་ན་ཚངས་པ་དང་བྲམ་ཟེས་དྲག་ཤུལ་གྱི་ལས་བྱས་ཀྱང་མི་ཚུགས་པར་འགྱུར་ལ། སངས་རྒྱས་

མང་པོ་ལ་བསྙེན་བཀུར་བྱས་པར་ཡང་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་
དོ། །འཕགས་པ་དཔལ་ཆེན་མོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅། །དཔལ་གྱི་ལྷ་མོའི་མཚན་བཅུ་གཉིས་པ།
དཀོན་མཆོག་གསུམ་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཕྱག་ན་རྡོ་རྗེ་ལ་ཕྱག་འཚལ་ལོ། །དཔལ་ལྷ་མོ་ཆེན་མོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བདེ་བ་ཅན་
གྱི་འཇིག་རྟེན་ན་བཞུགས་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དེ་ནས་བྱང་
ཆུབ་སེམས་དཔའ་སེམས་དཔའ་ཆེན་པོ་དཔལ་ལྷ་མོ་ཆེན་མོ་ཡང་བཅོམ་ལྡན་འདས་ག་ལ་བ་དེར་སོང་སྟེ་དྲུང་དུ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་དཔལ་ཆེན་མོ་ལ་
གཟིགས་ནས་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །སྤྱན་རས་གཟིགས་དབང་ཕྱུག་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་འམ། སེམས་ཅན་གང་སུ་ཡང་རུང་བས་དཔལ་ཆེན་མོ་འདིའི་མིང་བཅུ་གཉིས་
ཤེས་ཏེ། འཆང་བ་དང་། ཀློག་པ་དང་། སྒྲུབ་པར་བྱེད་པ་དང་། རྗོད་པར་ཡང་བྱེད་ན་དེ་དབུལ་པོ་སྤངས་ནས་ཕྱུག་པོ་ཆེན་པོར་འགྱུར་རོ། །དེ་ནས་འབྱུང་པོའི་ཚོགས་ཐམས་ཅད་ཀྱིས་ཀྱང་དེ་བཞིན་དུ་གྱུར་ཅིག་ཅེས་སྨྲས་སོ། །དཔལ་ལྷ་མོ་ཆེན་མོའི་མིང་

བཅུ་གཉིས་ནི་འདི་ལྟ་སྟེ། བཀྲ་ཤིས་མ། དཔལ་ལྡན་མ། པདྨའི་ཕྲེང་ཐོགས་མ། ནོར་བདག་མ། དཀར་ཤམ་མ། གྲགས་ཆེན་མ། པདྨ་སྤྱན་མངའ་མ། གྲགས་མ། འོད་ཆེན་མ། ཟས་སྦྱིན་མ། རིན་ཆེན་འོད་ལྡན་མ། དཔལ་ཆེན་མོ་མ། སངས་རྒྱས་ཐམས་
ཅད་ལ་ཕྱག་འཚལ་ལོ། །སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དཔལ་ཆེན་མོ་ལ་ཕྱག་འཚལ་ལོ། །འདི་ལྟ་སྟེ། ཛི་ནི། གྷྲི་ཎི། དགོས་པ་ཐམས་ཅད་སྒྲུབ་པར་མཛད་པ། སི་མི་སི་མི། ནི་མི་ནི་མི། བདག་གི་མི་ཤེས་པ་ཐམས་ཅད་བསལ་བར་མཛོད་
ཅིག་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའོ། །དཔལ་གྱི་ལྷ་མོ་ཆེན་མོའི་མཚན་བཅུ་གཉིས་པ་རྫོགས་སོ།། །།
རྒྱ་གར་གྱི་མཁན་པོ་ཛི་ན་མི་ཏྲ་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅། །རྒྱ་གར་སྐད་དུ། ཨཱརྱ་བ་སུ་དྷཱ་རཱ་ནཱ་མདྷཱ་ར་ཎཱི། བོད་སྐད་དུ། འཕགས་པ་ནོར་གྱི་རྒྱུན་ཅེས་བྱ་བའི་གཟུངས།
སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཀཽ་ཤཱམྦཱི་ན་ཚེར་མ་ཅན་ཞེས་བྱ་བའི་ནགས་མཆོག་ཆེན་པོ་ན། དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་། བྱང་
ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཡོན་ཏན་ཐམས་ཅད་དང་ལྡན་པ་རབ་ཏུ་མང་པོ་དང་ཐབས་ཅིག་ཏུ་བཞུགས་ཏེ། དེའི་ཚེ་ཀཽ་ཤཱམྦཱིའི་གྲོང་ཁྱེར་ཆེན་པོ་ན་ཁྱིམ་བདག་ཟླ་བ་བཟང་པོ་ཞེས་བྱ་བ། དབང་པོ་ཉེ་བར་ཞི་བ། ཡིད་ཉེ་བར་ཞི་བ། བུ་ཕོ་དང་། བུ་
མོ་མང་བ། བཟའ་མི་མང་པོ་དང་ལྡན་པ། དད་ཅིང་ཆེར་དད་པ་ཞིག་གནས་པ་དེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་འབུམ་ཕྲག་དུ་མར་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །

ཕྱོགས་གཅིག་ཏུ་འདུག་ནས་ཁྱིམ་བདག་ཟླ་བ་བཟང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་བྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་ཟླ་བ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཁྱོད་ཅི་དང་ཅི་འདོད་པ་དྲིས་ཤིག་དང་། ཁྱོད་
ཀྱིས་ཇི་སྐད་དྲིས་པའི་དྲི་བ་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། ཁྱིམ་བདག་ཟླ་བ་བཟང་པོས་བཅོམ་ལྡན་འདས་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་མཉན་ནས་བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་དབུལ་པོར་གྱུར་པ་ལས་ཇི་ལྟར་དབུལ་བ་མ་མཆིས་པར་འགྱུར་ཞིང་། བྲོ་ནད་ཀྱིས་ཐེབས་ན་ཡང་བྲོ་ནད་མ་མཆིས་པར་འགྱུར་བ་ལགས། དེ་ནས་བཅོམ་ལྡན་འདས་
ཀྱིས་མཁྱེན་བཞིན་དུ་ཁྱིམ་བདག་ཟླ་བ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཁྱོད་ཅིའི་ཕྱིར་དབུལ་པོའི་དོན་དུ་འདྲི། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཁྱིམ་བདག་ཟླ་བ་བཟང་པོས་འདི་སྐད་ཅེས་གསོལ་ཏོ། །བཅོམ་ལྡན་
འདས་བདག་ནི་དབུལ་བ་མང་བ་དང་། གསོ་བ་མང་བ། བུ་ཕོ་དང་། བུ་མོ་མང་བ། བཟའ་མི་མང་པོ་དང་ལྡན་པ་ལགས་ཏེ། དེའི་སླད་དུ་གང་གི་སེམས་ཅན་དབུལ་བོ་རྣམས་ཀྱི་དབུལ་པ་མ་མཆིས་པར་འགྱུར་བ་དང་། བྲོ་ནད་ཀྱིས་ཐེབས་པ་རྣམས་བྲོ་ནད་མ་མཆིས་
པར་འགྱུར་བ་དང་། ནོར་དང་། འབྲུ་དང་། མཛོད་དང་། བང་མཛོད་མང་པོ་དང་ལྡན་པར་འགྱུར་བ་དང་། སྡུག་པ་དང་། ཡིད་དུ་མཆི་བ་དང་། མཐོང་ན་ཡིད་དུ་འཐད་པ་དང་། དབང་ཕྱུག་ཏུ་འགྱུར་བ་དང་། སྦྱིན་བདག་མཛོད་པས་མི་འཚལ་ཞིང་། དབྱིག་དང་། གསེར་

དང་། ནོར་དང་། འབྲུའི་མཛོད་དང་། བང་མཛོད་རྣམས་དང་། ནོར་བུ་དང་། མུ་ཏིག་དང་། རྡོ་རྗེ་དང་། བཻ་ཌཱུརྱ་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དབུལ་བསམ་འཚལ་ཅིང་འབྱོར་བར་འགྱུར་བ་དང་། ཁྱིམ་གྱི་བུ་སྨད་དང་། བཟའ་མི་
རྣམས་བརྟན་པར་འགྱུར་བའི་ཆོས་ཀྱི་རྣམ་གྲངས་དེ་བཅོམ་ལྡན་འདས་ཀྱིས་ལེགས་པར་བཤད་དུ་གསོལ། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་ཁྱིམ་བདག་ཟླ་བ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་འདས་པའི་དུས་བསྐལ་བ་གྲངས་མེད་
པ་འདས་པར་གྱུར་པ་དེའི་ཚེ་དེའི་དུས་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་
རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྡོ་རྗེ་འཆང་རྒྱ་མཚོའི་དབྱངས་ཞེས་བྱ་བ་འཇིག་རྟེན་དུ་བྱུང་སྟེ། རིགས་ཀྱི་བུ་ངས་དེ་བཞིན་གཤེགས་པ་དེ་ལས་ནོར་གྱི་རྒྱུན་ཅེས་བྱ་བའི་གཟུངས་འདི་ཐོས་ཏེ་བཟུང་ཞིང་བཅངས། བཀླགས། ཀུན་ཆུབ་པར་བྱས། རྗེས་སུ་ཡི་རང་
བར་བྱས་ཤིང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་ཏེ། རིགས་ཀྱི་བུ་དེ་ཡང་ངས་དེ་བཤད་པར་བྱའོ། །རིགས་ཀྱི་བུ་གཟུངས་སྔགས་འདིའི་མཐུས་མི་རྣམས་རྣམ་པར་ཐོ་འཚམ་པར་མི་བྱེད་དོ། །མི་མ་ཡིན་པ་རྣམས་རྣམ་པར་ཐོ་འཚམ་པར་མི་བྱེད་དོ། །
གནོད་སྦྱིན་རྣམས་རྣམ་པར་ཐོ་འཚམ་པར་མི་བྱེད་དོ། །སྲིན་པོ་རྣམས་རྣམ་པར་ཐོ་འཚམ་པར་མི་བྱེད་དོ། །ཡི་དགས་རྣམས་རྣམ་པར་ཐོ་འཚམ་པར་མི་བྱེད་དོ། །ཤ་ཟ་རྣམས་རྣམ་པར་ཐོ་འཚམ་པར་མི་བྱེད་དོ། །འབྱུང་པོ་རྣམས་རྣམ་པར་ཐོ་འཚམ་པར་མི་བྱེད་དོ། །གྲུལ་
བུམ་རྣམས་རྣམ་པར་ཐོ་འཚམ་པར་མི་བྱེད་དོ། །བརྗེད་བྱེད་རྣམས་རྣམ་པར་ཐོ་འཚམ་པར་མི་བྱེད་དོ། །གནོན་པོ་རྣམས་རྣམ་པར་ཐོ་འཚམ་པར་མི་བྱེད་དོ། །ལུས་སྲུལ་པོ་རྣམས་རྣམ་པར་ཐོ་འཚམ་པར་མི་བྱེད་དོ། །ལྷ་མ་ཡིན་རྣམས་རྣམ་པར་ཐོ་འཚམ་པར་མི་བྱེད་དོ། །

ཟས་སུ་མི་གཙང་བ་ཟ་བ་རྣམས་དང་། ཟས་སུ་གཅིན་འཐུང་བ་རྣམས་དང་། ཟས་སུ་ཁྲག་འཐུང་བ་རྣམས་དང་། ཟས་སུ་ཤ་ཟ་བ་རྣམས་དང་། ཟས་སུ་རྣག་འཐུང་བ་རྣམས་དང་། ཟས་སུ་ཞག་ཟ་བ་རྣམས་དང་། ཟས་སུ་རྐང་ཟ་བ་རྣམས་དང་། ཟས་སུ་
ངར་སྣབས་ཟ་བ་རྣམས་དང་། ཟས་སུ་སྟོང་ཁུང་ནས་འབབ་པ་ཟ་བ་རྣམས་དང་། ཟས་སུ་དབུགས་རྔུབ་པ་དང་། འབྱུང་བ་ཟ་བའི་བར་རྣམས་རྣམ་པར་འཚེ་བར་མི་འགྱུར་རོ། །རིགས་ཀྱི་བུ་ནོར་གྱི་རྒྱུན་གྱི་གཟུངས་འདི་རིགས་ཀྱི་བུའམ། རིགས་ཀྱི་བུ་མོ་གང་གི་ཁྱིམ་ན་ཡོད་དམ།
སྙིང་ལ་ཡོད་དམ། ལག་ན་ཡོད་དམ། གླེགས་བམ་དུ་ཆུད་དམ། ཐོས་པར་གྱུར་ཏམ། ཀུན་ཆུབ་པར་བྱས་སམ། བཀླགས་སམ། བཟུང་ངམ། རྗེས་སུ་ཡི་རང་བར་བྱས་སམ། གཞན་དག་ལ་རྒྱ་ཆེར་རབ་ཏུ་བསྟན་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་ཡུན་རིང་པོའི་
དོན་དང་། ཕན་པ་དང་། དགེ་བ་དང་། གྲུབ་པ་དང་། བདེ་བ་དང་། ལོ་ལེགས་པར་འགྱུར་རོ། །སུ་ཞིག་དེ་བཞིན་གཤེགས་པ་རྣམས་ལ་མཆོད་པ་བྱས་ཏེ། ནོར་གྱི་རྒྱུན་གྱི་གཟུངས་འདི་ནམ་ཕྱེད་ན་ལན་གཉིས་སམ། ལན་གསུམ་མམ། ལན་བཞི་བཏོན་ན་དེའི་ལྷ་ཡི་རངས་
ཏེ། དེ་བཞིན་གཤེགས་པའི་བསྟན་པ་ལ་དགའ་བ་དང་། ཆོས་གདགས་པ་བྱས་པས་དགའ་བ་དང་། དགེ་འདུན་གདགས་པ་བྱས་པས་དགའ་བ་དང་། ཆོས་སྨྲ་བ་ལ་དགའ་བ་དང་ལྷག་པའི་བསམ་པས་བདག་ཉིད་འོངས་ཏེ་འབྲུའི་ཆར་འབེབས་སོ། །ན་མོ་བཛྲ་དྷ་ར་སཱ་
གར་ནི་རྒྷོ་ཥཱ་ཡ། ཏ་ཐཱ་ག་ཏཱ་ཡ། ཏདྱ་ཐཱ། ཨོཾ་སུ་རཱུ་བེ། བྷ་དྲེ། བྷ་དྲཱ་བ་ཏི། ཨདྒ་ལེ། མངྒ་ལེ། མངྒ་ལ་བ་ཏི། ཨ་ལེ། ཨ་ཙ་ལེ། ཨ་ཙ་ལ་བ་ལེ། ཨུདྒྷ་ཏ་ནི། ཨུདྦྷེ་ད་ནི། བསྱ་བ་ཏི། དཱ་ན་པ་ཏི། དྷ་ནྱ་པ་ཏི། ཤྲཱི་མ་ཏི། པྲ་བྷ་བ་ཏི། ཨ་མ་ལེ། བི་མ་ལེ།
ནིརྨ་ལེ། རུ་རུ། སུ་རཱུ་པེ། སུ་རཱུ་པ་མ་ལེ། བི་མ་ལེ། ཙ་ལེ། ཨརྩ་ནསྟེ། ཨ་ན་ནསྟེ། བི་ན་ནསྟེ། བི་ཤྭ་ཀེ་ཤི། བི་ཤྭ་ནི་ཤི། ཨངྐུ་རེ། མངྐུ་རེ། པྲ་བངྐུ་རེ། བཱི་ར་མེ། བིདྷ་མེ། རི་རི་མེ། དི་དི་མེ། དུ་དུ་མེ། ཁ་ཁ་མེ། ཏ་ཏ་རེ། ཏ་ར་ཏ་ར། ཏཱ་ར་

ཏཱ་ར། བཛྲེ་བཛྲེ་བཛྲེ་བ་མེ། ཊ་ཀེ་ཊ་ཀེ། ཋ་ཀེ་ཋ་ཀེ། ཨུཀྐེ། བུཀྐེ། ཋ་ཀེ་ཋ་ར་ཀེ། ཨ་བརྟ་ནི། བ་ར་ཤ་ན། ཥ་ད་ནི་བཛྲ་དྷཱ་ར་སཱ་ག་ར་ནི་རྒྷོ་ཥཱན། ཏ་ཐཱ་ག་ཏ་མ་ནུ་སྨ་ར། སྨ་ར། སྨ་ར། སརྦ་ཏ་ཐཱ་ག་ཏ། སཏྱ་མ་ནུ་སྨ་ར། དྷརྨ་སཏྱ་མ་ནུ་སྨ་ར། སངྒྷ་སཏྱ་མ་ནུ་
སྨ་ར། ད་ཊ་ད་ཊ། པཱུ་ར་པཱུ་ར། པཱུ་ར་ཡ། བཱུ་ར་ཡ། བཱུ་ར་ཎི། བྷ་ར་བྷ་ར་ཎི། ཨ་མ་ལེ། སུ་མངྒ་ལེ། ཤཱནྟ་མ་ཏི། ཤུ་བྷ་མ་ཏི། མངྒ་ལ་བྷ་ནི། མ་ཧཱ་མ་ཏི། བྷ་དྲ་བ་ཏི། པྲ་བྷ་བ་ཏི། སུ་ཙནྡྲ་མ་ཏི། ཨཱ་གཙྪ་ཨཱ་གཙྪ། ས་མ་ཡ་མ་ནུ་སྨ་ར་སྭཱ་
ཧཱ། ཨཱ་པར་ཎི་མ་ནུ་སྨ་ར་སྭཱ་ཧཱ། པྲ་བྷ་བ་མ་ནུ་སྨ་ར་སྭཱ་ཧཱ། དཱི་དཱི་མ་ནུ་སྨ་ར་སྭཱ་ཧཱ། ཏེ་ཛོ་མ་ནུ་སྨ་ར་སྭཱ་ཧཱ། བི་ཛ་ཡ་མ་ནུ་སྨ་ར་སྭཱ་ཧཱ། ཧྲྀ་ད་ཡ་མ་ནུ་སྨ་ར་སྭཱ་ཧཱ། སརྦ་ས་ཏྭ་བི་ན་ཡ་མ་ནུ་སྨ་ར་སྭཱ་ཧཱ། ཨོཾ་བ་སུ་དྷཱ་རེ་སྭཱ་ཧཱ། ཨོཾ་བ་སུ་ཤྲི་ཡེ་སྭཱ་ཧཱ། ཨོཾ་ཤྲཱི་བ་སུ་སྭཱ་ཧཱ། ཨོཾ་བ་
སུ་སྭཱ་ཧཱ། རིགས་ཀྱི་བུ་འདི་ནི་ནོར་རྒྱུན་ཅེས་བྱ་བའི་གཟུངས་ཏེ། གཟུངས་སྔགས་འདིའི་མཐུས་མུ་གེ་དང་། ནད་དང་། འཆི་ངས་འབྱུང་བར་མི་འགྱུར་རོ། །རིགས་ཀྱི་བུ་སུ་ཞིག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་
མཆོད་པ་བྱས་ཏེ། ནོར་གྱི་རྒྱུན་གྱི་གཟུངས་ཀྱི་གསང་སྔགས་ཀྱི་ཚིག་འདི་དག་ནུབ་གཅིག་བཏོན་ན། དེ་ནས་དངོས་གྲུབ་ཏུ་འགྱུར་རོ། །རྒྱས་པའི་དོན་དུ་བདག་གི་ཁྱིམ་མམ། གཞན་གྱི་ཁྱིམ་མམ། གནས་གཙང་མ་བང་མཛོད་དམ། གནས་གང་དུ་ཡང་རུང་བར་དེ་
བཞིན་གཤེགས་པ་སྤྱན་རས་གཟིགས་དབང་ཕྱུག་དང་། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། གསང་སྔགས་ཀྱི་ལྷའི་ཕྱིར་ཙནྡན་གྱིས་དཀྱིལ་འཁོར་གྲུ་བཞིར་བྱས་ཏེ་ནུབ་གཅིག་བཏོན་ན། རིགས་ཀྱི་བུ་དེའི་ཁྱིམ་ནོར་དང་། འབྲུ་དང་།
གསེར་དངུལ་དང་། ཡོ་བྱད་ཐམས་ཅད་ཀྱི་རྒྱུན་མི་ཆེན་པོའི་མཚན་ཙམ་གྱིས་གང་བར་འགྱུར་རོ། །འཇིགས་པ་དང་། གནོད་པ་ཐམས་ཅད་ཀྱང་མེད་པར་འགྱུར་རོ། །རིགས་ཀྱི་བུ་དེའི་ཕྱིར་ཁྱོད་རབ་ཏུ་བསྒྲིམས་ལ་ནོར་གྱི་རྒྱུན་གྱི་གཟུངས་འདི་ཟུང་ཤིག །

ཆོངས་ཤིག །ལྷོགས་ཤིག །སྟོན་ཅིག །གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག་དང་། དེ་ཁྱོད་ཀྱི་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར་རོ། །བཅོམ་ལྡན་འདས་ལེགས་སོ་ཞེས་གསོལ་ཏེ། ཁྱིམ་བདག་ཟླ་
བ་བཟང་པོས་བཅོམ་ལྡན་འདས་ལས་ནོར་གྱི་རྒྱུན་གྱི་གཟུངས་འདི་ཐོས་ནས་ཚིམ་ཞིང་དགའ་ལ་མགུ་ཞིང་ཡི་རངས་ཏེ་རབ་ཏུ་དགའ་ནས། དགའ་བ་དང་། ཡིད་བདེ་བ་སྐྱེས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་བདག་གིས་ནོར་གྱི་རྒྱུན་ཅེས་བགྱི་བ་བླངས་ལགས། གཟུངས་སུ་ཟིན་ལགས་བཟུང་ལགས། བཀླགས་ལགས། ཀུན་ཆུབ་པར་བགྱིས་ལགས། རྗེས་སུ་ཡི་རང་བར་བགྱིས་ལགས་ཏེ། གཞན་དག་ལ་ཡང་རྒྱ་ཆེར་ཡང་དག་པར་
རབ་ཏུ་བསྟན་པར་བགྱི་ལགས་སོ། །དེའི་སྐད་ཅིག་ཙམ་ལ་ཁྱིམ་བདག་ཟླ་བ་བཟང་པོའི་བང་མཛོད་རྣམས་ཡོངས་སུ་གང་བར་གྱུར་ཏོ། །དེ་ནས་ཁྱིམ་བདག་ཟླ་བ་བཟང་པོས་བཅོམ་ལྡན་འདས་ལ་ལན་འབུམ་ཕྲག་དུ་མར་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་
ལ་ཕྱག་འཚལ་ནས། བཅོམ་ལྡན་འདས་ཀྱི་ཐད་ནས་སོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་སོང་ལ་ཁྱིམ་བདག་ཟླ་བ་བཟང་པོའི་ཁྱིམ་ནོར་དང་། འབྲུས་ཡོངས་སུ་གང་བ་ཕུན་སུམ་ཚོགས་པ་
དང་། མཛོད་ཆེན་པོ་དང་། བང་མཛོད་ཡོངས་སུ་གང་བ་རྣམས་ལ་ལྟོས། དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་ཀཽ་ཤཱམྦྷིའི་གྲོང་ཁྱེར་ཆེན་པོ་ག་ལ་བ་དང་། ཁྱིམ་བདག་ཟླ་བ་བཟང་པོའི་ཁྱིམ་ག་ལ་བ་དེར་སོང་སྟེ་ཕྱིན་ནས་ནང་དུ་
ཞུགས་པ་དང་། ནོར་དང་། འབྲུས་ཡོངས་སུ་གང་བ་ཕུན་སུམ་ཚོགས་པ་དང་། རིན་པོ་ཆེ་ཕུན་སུམ་ཚོགས་པ་དང་། ཡོ་བྱད་ཐམས་ཅད་ཀྱི་མཛོད་ཆེན་པོ་དང་། བང་མཛོད་རྣམས་ཀྱང་ཡོངས་སུ་གང་བར་མཐོང་ངོ་། །མཐོང་ནས་ཀྱང་ཚིམ་ཞིང་དགའ་ལ་མགུ་

ཞིང་ཡི་རངས་ཏེ་རབ་ཏུ་དགའ་ནས་དགའ་བ་དང་། ཡིད་བདེ་བ་སྐྱེས་ཏེ། བཅོམ་ལྡན་འདས་ག་ལ་བ་དེར་སོང་ངོ་། །དེ་ནས་ཚེ་དང་ལྡན་པ་ཀུན་དགའ་བོ་ཡ་མཚན་དུ་འཛིན་ཅིང་། དགའ་བ་དང་། ཡིད་བདེ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་གང་གིས་ཁྱིམ་བདག་ཟླ་བ་བཟང་པོ་ནོར་མང་ཞིང་མཛོད་ཆེན་པོ་དང་། བང་མཛོད་རྣམས་ཀྱང་ནོར་དང་འབྲུ་ཕུན་སུམ་ཚོགས་པའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རིགས་ཀྱི་བུ་ཁྱིམ་བདག་
ཟླ་བ་བཟང་པོ་དད་ཅིང་མཆོག་ཏུ་དད་ཅིང་དགེ་བའི་བསམ་པ་ཅན་དེས་ནོར་གྱི་རྒྱུན་གྱི་གཟུངས་འདི་བཟུང་ཞིང་རབ་ཏུ་བཏོན་ཏེ། བླངས་ཤིང་། བཀླགས། ཀུན་ཆུབ་པར་བྱས། རྗེས་སུ་ཡི་རང་བར་བྱས་ཤིང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པའི་
ཕྱིར་རོ། །ཀུན་དགའ་བོ་དེའི་ཕྱིར་ཁྱོད་ཀྱིས་ཀྱང་ནོར་གྱི་རྒྱུན་གྱི་གཟུངས་འདི་ལོང་ཤིག །ཆོངས་ཤིག །ལྷོགས་ཤིག །སྟོན་ཅིག །ཟུང་ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག་དང་། དེ་ནི་སྐྱེ་བོ་མང་པོ་ལ་ཕན་པ་དང་།
སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་། མི་རྣམས་ཀྱི་དོན་དང་། ཕན་པ་དང་བདེ་བར་འགྱུར་རོ། །ཀུན་དགའ་བོ་སུ་ཞིག་རིག་སྔགས་འདི་ལས་གཞན་དུ་སྨྲ་བ་ནི་ལྷ་དང་བཅས་པ་དང་། བདུད་དང་བཅས་པ་དང་།
ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པ་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ན་ངས་མ་མཐོང་ངོ་། །ལན་གཉིས་སུ་བཏོན་ཏམ། ལན་གསུམ་དུ་བཏོན་ཀྱང་འགལ་བར་བྱེད་པ་དེ་ནི་གནས་མེད་དོ། །ཀུན་དགའ་བོ་གཟུངས་ཀྱི་
གསང་སྔགས་ཀྱི་ཚིག་འདི་དག་ནི་མི་ཕྱེད་པ་ཡིན་ནོ། །ཀུན་དགའ་བོ་འདི་དག་ནི་སེམས་ཅན་དགེ་བའི་རྩ་བ་ཟད་བ་རྣམས་ཀྱི་རྣ་ལམ་དུ་གྲགས་པར་མི་འགྱུར་ན་གླེགས་བམ་ལ་ཡི་གེར་བྲི་བ་དང་ཡིད་ལ་གཟུང་བ་ལྟ་ཅི་སྨོས། དེ་ཅིའི་ཕྱིར་ཞེ་ན། འདི་ནི་དེ་བཞིན་གཤེགས་

པ་ཐམས་ཅད་ཀྱི་བཀའ་སྟེ། གཟུངས་སྔགས་འདི་ནི་སེམས་ཅན་དབུལ་པོ་དང་། ནད་སྣ་ཚོགས་ཀྱིས་གཟིར་བ་དང་། འཇིགས་པ་དང་། སེམས་ཅན་སྡང་བས་གནོད་པར་བྱས་པ་ཐམས་ཅད་ཀྱི་དོན་དུ་དེ་བཞིན་གཤེགས་པ་ཐམས་ཅད་ཀྱིས་གསུངས་པ་
དང་། བཤད་པ་དང་། རྗེས་སུ་ཡི་རང་བ་དང་། རབ་ཏུ་ཕྱེ་བ་དང་། བསྔགས་པ་དང་། བཀྲོལ་བ་དང་། གསལ་བར་མཛད་པ་དང་། བསྐྱེད་པ་དང་། བྱིན་གྱིས་བརླབས་པ་དང་། ཆོས་ཀྱི་ཕྱག་རྒྱས་བཏབ་པ་དང་། བསྟོད་པ་དང་། སྙན་པར་བརྗོད་པ་དང་། གོ་བར་མཛད་
པ་དང་། བསྙད་པའི་ཕྱིར་རོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། དེའི་ཚེ་ཐལ་མོ་སྦྱར་ནས་ཆེད་དུ་བརྗོད་པ་འདི་ཆེད་དུ་བརྗོད་ཅིང་ཚིགས་སུ་བཅད་པ་འདི་དག་གསོལ་ཏོ། །སངས་རྒྱས་བཅོམ་ལྡན་བསམ་གྱིས་མི་ཁྱབ་སྟེ། །སངས་རྒྱས་ཆོས་ཀྱང་བསམ་གྱིས་མི་
ཁྱབ་ལགས། །བསམ་གྱིས་མི་ཁྱབ་པ་ལ་དད་རྣམས་ཀྱི། །རྣམ་པར་སྨིན་པའང་བསམ་གྱིས་མི་ཁྱབ་ལགས། །ཞི་བ་ཅི་ཡང་མཁྱེན་པ་ཐམས་ཅད་མཁྱེན། །ཆོས་ཀྱི་རྒྱལ་པོ་རྒ་ཤི་མི་མངའ་བ། །ཡེ་ཤེས་ཕ་རོལ་བགྲོད་པར་ཕྱིན་གྱུར་བ། །སངས་རྒྱས་དཔའ་བོ་ཁྱོད་ལ་ཕྱག་
འཚལ་ལོ། །དེ་ནས་ཚེ་དང་ལྡན་པ་ཀུན་དགའ་བོ་ཚིམ་ཞིང་དགའ་ལ་མགུ་ཞིང་ཡི་རངས་ནས་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི།
བཅོམ་ལྡན་འདས་ཀྱིས་བཀའ་སྩལ། ཀུན་དགའ་བོ་འདི་ནི་ཁྱིམ་བདག་ཟླ་བ་བཟང་པོས་ཞུས་པ་ཞེས་བྱ་བར་ཟུང་ཤིག །ནོར་དང་། འབྲུ་དང་། རིན་པོ་ཆེ་ཐམས་ཅད་ཀྱི་གཏེར་ཞེས་བྱ་བར་ཡང་ཟུང་ཤིག །དེ་བཞིན་གཤེགས་པ་ཐམས་ཅད་ཀྱིས་བསྔགས་པ་ནོར་གྱི་རྒྱུན་གྱི་གཟུངས་
ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། དགེ་སློང་དེ་དག་དང་། བྱང་ཆུབ་སེམས་དཔའ་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་

འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ནོར་གྱི་རྒྱུན་ཅེས་བྱ་བའི་གཟུངས་རྫོགས་སྷོ།། ༄༅། །རྒྱ་གར་སྐད་དུ། ཨཱརྱ་ཙཀྵུར་བི་ཤོ་དྷ་ནི་ནཱ་མ་བིདྱཱ་
མནྟྲ། བོད་སྐད་དུ། འཕགས་པ་མིག་རྣམ་པར་སྦྱོང་བ་ཞེས་བྱ་བའི་རིག་སྔགས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཤཱཀྱའི་གྲོང་རྡལ་བཟང་པོ་ཞིག་ན་ཤཱཀྱ་
རྣམས་ཀྱི་ནང་ན་བཞུགས་ཏེ། དེའི་ཚེ་སྟ་ཏུ་ས་ཞེས་བྱ་བ་ན་ཤཱཀྱ་བདེ་བ་ཞེས་བྱ་བ་སངས་རྒྱས་ལ་མངོན་པར་དད་པ། ཆོས་དང་། དགེ་འདུན་ལ་མངོན་པར་དད་པ། སངས་རྒྱས་ལ་སྐྱབས་སུ་སོང་། ཆོས་ལ་སྐྱབས་སུ་སོང་། དགེ་འདུན་ལ་སྐྱབས་སུ་སོང་། སངས་རྒྱས་
ལ་གཅིག་ཏུ་ཕྱོགས། ཆོས་ལ་གཅིག་ཏུ་ཕྱོགས། དགེ་འདུན་ལ་གཅིག་ཏུ་ཕྱོགས། སངས་རྒྱས་ལ་ནེམ་ནུར་མེད་ཅིང་ཐེ་ཚོམ་མེད། ཆོས་དང་དགེ་འདུན་དང་། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་ལ་ནེམ་ནུར་མེད་ཅིང་ཐེ་ཚོམ་
མེད་ལ་བདེན་པ་མཐོང་བ། འབྲས་བུ་ཐོབ་པ། མངོན་པར་རྟོགས་པར་གྱུར་པ། མཚོན་ཆ་དང་། དབྱིག་པ་བོར་བ་ཞིག་གནས་པ་དེའི་མིག་ལ་སྣང་བ་དང་། མི་སྣང་བའི་གཟུགས་རྣམས་སྣང་བར་མ་གྱུར་ནས། དེ་སངས་རྒྱས་བཅོམ་ལྡན་འདས་ལ་དད་པ་སྐྱེས་
ཏེ་ཡིད་ལ་བྱེད་ཅིང་། སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་སྣང་བ་མཛད་པ། སྒྲོན་མ་འཛིན་པ། གསལ་བ་འཛིན་པ་ལ་ཕྱག་འཚལ་ལོ། །བདེ་བར་གཤེགས་པ་ཐུགས་རྗེ་ཆེན་པོ་དང་ལྡན་པ། གསལ་བར་
མཛད་དུ་གསོལ། བཅོམ་ལྡན་འདས་བདག་གི་མིག་རྣམ་པར་སྦྱོང་དུ་གསོལ་ཞེས་བྱས་པ་དང་། བཅོམ་ལྡན་འདས་ལྷའི་གནས་པ་ལ་བཞུགས་པ། ལྷའི་སྙན་རྣམ་པར་དག་པ་མི་ལས་འདས་པས་ཤཱཀྱ་བདེ་བས་ཚིག་དེ་སྐད་བརྗོད་པ་གསན་ཏོ། །གསན་ནས་ཀྱང་ཏིང་ངེ་འཛིན་

དེ་ལས་བཞེངས་ཏེ། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་སོང་ལ་མིག་རྣམ་པར་སྦྱོང་བའི་རིག་སྔགས་འདིས་ཤཱཀྱ་བདེ་བ་ལ་བསྲུང་བགྱིས་ཤིག །ཡོངས་སུ་གཟུང་བ་དང་། ཡོངས་སུ་བསྐྱབ་པ་དང་། ཡོངས་སུ་
བསྐྱང་བ་དང་། ཞི་བ་དང་། བདེ་ལེགས་སུ་འགྱུར་བ་དང་། ཆད་པ་སྤང་བ་དང་། མཚོན་ཆ་སྤང་བ་དང་། དུག་གཞིལ་བ་དང་། དུག་གསད་པ་དང་། མཚམས་གཅད་པ་དང་། ས་བཅིང་བགྱིས་ཤིག །དེ་དང་དེ་བཞིན་དུ་འཁོར་བཞི་བོ་དགེ་སློང་རྣམས་
དང་། དགེ་སློང་མ་རྣམས་དང་། དགེ་བསྙེན་རྣམས་དང་། དགེ་བསྙེན་མ་རྣམས་དང་། སེམས་ཅན་གཞན་གྱི་མིག་ཀྱང་རྣམ་པར་སྦྱོངས་ཤིག །མིག་གི་སྦུབས་རྣམ་པར་སྦྱོངས་ཤིག །མིག་གི་སྐྱོན་མེད་པར་གྱིས་ཤིག །ཏདྱ་ཐཱ། ཧི་ལི་མི་ལི། ཀི་ལི་མི་
ལི། ཧི་ལི་ཏེ་མི་ལི། ཧུ་ཡཱ་ཧུ་ཡཱ་ཧཱུ་ཨཱ་མ་ནི། ཧུ་ལུ་ཧུ་ལུ་ཧུ་ལུ་ཧུ་དུ་ཧུ་དུ་ཧུ་དུ། ཙཀྵུར་མེ་བི་ཤོདྷ་ཡ་སྭཱ་ཧཱ། ཀུན་དགའ་བོ་རིག་སྔགས་ཀྱི་རྒྱལ་མོ་མིག་རྣམ་པར་སྦྱོང་བ་འདི་ནི་མིག་གི་སྐྱོན་དང་། རླུང་གི་སྐྱོན་དང་། མཁྲིས་པའི་སྐྱོན་དང་། བད་ཀན་གྱི་སྐྱོན་དང་།
འདུས་པ་ལས་གྱུར་པའི་སྐྱོན་སེལ་ཏེ། ཚུལ་ཁྲིམས་ཀྱི་བདེན་པ་དང་། བརྟུལ་ཞུགས་ཀྱི་བདེན་པ་དང་། དྲང་སྲོང་རྣམས་ཀྱི་བདེན་པ་དང་། རྟེན་ཅིང་འབྲེལ་པར་འབྱུང་བའི་བདེན་པ་དང་། སྡུག་བསྔལ་གྱི་བདེན་པ་དང་། ཀུན་འབྱུང་གི་བདེན་པ་དང་། འགོག་པའི་
བདེན་པ་དང་། ལམ་གྱི་བདེན་པ་དང་། དགྲ་བཅོམ་པ་རྣམས་ཀྱི་བདེན་པ་དང་། རང་སངས་རྒྱས་རྣམས་ཀྱི་བདེན་པ་དང་། སངས་རྒྱས་བཅོམ་ལྡན་འདས་རྣམས་ཀྱི་བདེན་པས་ཤཱཀྱ་བདེ་བའི་མིག་ན་བར་མ་གྱུར་ཅིག །མཆི་མ་འཛག་པར་མ་གྱུར་ཅིག །ཀུན་དུ་མཆི་མ་འཛག་
པར་མ་གྱུར་ཅིག །བདག་དང་སེམས་ཅན་ཐམས་ཅད་ཀྱི་མིག་རྣམ་པར་དག་པར་གྱུར་ཅིག་སྭཱ་ཧཱ། ཀུན་དགའ་བོ་རིག་སྔགས་ཀྱི་རྒྱལ་མོ་མིག་རྣམ་པར་སྦྱོང་བ་འདི་ནི་ཡང་དག་པར་རྫོགས་པའི་སངས་རྒྱས་དྲུག་གིས་གསུངས་བའོ། །ང་ཡང་ད་ལྟ་འཆད་དེ། རྒྱལ་པོ་ཆེན་པོ་བཞི་དང་།

ལྷ་རྣམས་ཀྱི་བདག་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་ཡང་རྗེས་སུ་ཡི་རང་ངོ་། །ཀུན་དགའ་བོ་གང་གིས་རིག་སྔགས་འདི་དུས་གསུམ་དུ་བརྗོད་ན་དེ་ལ་ཐིབས་པོར་འགྱུར་བའམ། རབ་རིབ་བམ། ལིང་ཏོག་གམ། མིག་ནད་སྔོན་པོར་མཐོང་བའམ། མིག་
གི་ཡུལ་གྱི་སྐྱོན་ལྷ་ལས་གྱུར་པ་རྣམས་སམ། ཀླུ་ལས་གྱུར་པ་རྣམས་སམ། དྲི་ཟ་ལས་གྱུར་པ་རྣམས་སམ། གནོད་སྦྱིན་ལས་གྱུར་པ་རྣམས་སམ། སྲིན་པོ་ལས་གྱུར་པ་རྣམས་སམ། ཤ་ཟ་ལས་གྱུར་པ་རྣམས་སམ། བྱད་ལས་གྱུར་པ་རྣམས་སམ། རོ་ལངས་
ལས་གྱུར་པ་རྣམས་སམ། རོ་ལངས་དང་བྱད་ལས་གྱུར་པ་རྣམས་སམ། ཀུན་དུ་རྒྱུ་ལས་གྱུར་པ་རྣམས་སམ། ཀུན་དུ་རྒྱུ་དང་རོ་ལངས་ལས་གྱུར་པ་རྣམས་ཀྱིས་ཚུགས་པར་འགྱུར་བ་ནི་ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་
སྦྱོང་དང་བྲམ་ཟེར་བཅས་པ་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་སྐྱེ་དགུའི་འཇིག་རྟེན་ན་ངས་མ་མཐོང་སྟེ། དེ་ནི་གནས་མེད་དོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏེ། བཅོམ་ལྡན་འདས་དེ་བཞིན་ནོ་ཞེས་གསོལ་ནས། གསང་
སྔགས་ཀྱི་གཞི་འདི་རྣམས་བཟུང་སྟེ་ཀུན་ཆུབ་པར་བྱས་ནས་ཤཱཀྱ་བདེ་བ་ག་ལ་བ་དེར་སོང་སྟེ། བདེ་བ་མིག་རྣམ་པར་སྦྱོང་བའི་གསང་སྔགས་ཀྱི་གཞི་འདི་དག་དེ་བཞིན་གཤེགས་པས་ཁྱོད་ལ་བསྐུར་གྱིས་ཉིན་རེ་ཞིང་དུས་གསུམ་དུ་དྲན་པར་གྱིས་ཤིག་ཅེས་དེ་ལ་རྒྱས་པར་སྨྲས་སོ། །
ཤཱཀྱ་བདེ་བས་ཐོས་མ་ཐག་ཁོ་ནར་མིག་རྣམ་པར་དག་སྟེ། མིག་རྣམ་པར་དག་པས་དྲི་མ་མེད་པའི་མིག་གིས་ཐམས་ཅད་མཐོང་ངོ་། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། ཤཱཀྱ་བདེ་བ་དང་། ལྷ་དང་བཅས་པའི་
འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་མིག་རྣམ་པར་སྦྱོང་བ་ཞེས་བྱ་བའི་རིག་སྔགས་རྫོགས་སྷོ།། །།

༄༅། །རྒྱ་གར་སྐད་དུ། ཨཱརྱ་སརྦ་ཀརྨ་ཨཱ་བ་ར་ཎ་བི་ཤོ་དྷ་ནི་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ལས་ཀྱི་སྒྲིབ་པ་ཐམས་ཅད་རྣམ་པར་སྦྱོང་བ་ཞེས་བྱ་བའི་གཟུངས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་མི་འཁྲུགས་པ་ལ་ཕྱག་འཚལ་ལོ། །ན་མོ་ར་ཏྣ་ཏྲ་ཡཱ་ཡ། ཨོཾ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། བྲ་ཏི་ཧ་ན་པྲ་ཏི་ཧ་ན། སརྦ་ཀརྨ་བ་རཾ་པརཱ་ཎི་མེ་སྭཱ་ཧཱ། གཟུངས་སྔགས་འདིའི་ཆོ་ག་ནི་འདི་ཡིན་
ཏེ། རྟག་ཏུ་བཟླས་བརྗོད་བྱས་ན་ལས་གཅིག་ནས་གཅིག་ཏུ་བརྒྱུད་པ་ཐམས་ཅད་རྣམ་པར་དག་པར་འགྱུར་རོ། །དུས་གསུམ་དུ་བཟླས་བརྗོད་བྱས་ན་མཚམས་མེད་པ་ལྔ་ཡང་བྱང་བར་འགྱུར་རོ། །ལན་ཅིག་བཟླས་བརྗོད་བྱས་ན་ལྟས་ངན་པ་དང་། རྨི་ལམ་
ངན་པ་དང་། བཀྲ་མི་ཤིས་པ་རྣམས་མེད་པར་འགྱུར་རོ། །ལུས་ལ་འཆང་ངམ། གླེགས་བམ་ལ་བྲིས་ནས་མགུལ་དུ་ཐོགས་ཏེ་འཆང་ན། དེ་ལ་དུས་མ་ཡིན་པར་འཆི་བ་རྣམས་གཏན་དུ་འབྱུང་བར་མི་འགྱུར་རོ། །གང་ཞིག་སྙིང་རྗེས་ནོན་ཏེ།
རི་དགས་དང་། བྱ་དང་། མི་དང་། མི་མ་ཡིན་པ་རྣམས་ཀྱང་རུང་སྟེ། འཆི་བའི་ཚེ་རྣ་ཁུང་དུ་བརྗོད་ན་དེ་ངན་སོང་དུ་འགྲོ་བར་མི་འགྱུར་རོ། །ཡང་ན་ཤི་སྟེ། དུས་ལས་འདས་ན་ཤི་འཕོས་པའི་མིང་ནས་སྨོས་ཏེ། དེའི་ཕྱིར་བྱམས་པ་དང་སྙིང་རྗེས་ལན་བརྒྱའམ།
སྟོང་ངམ། འབུམ་དུ་བརྗོད་ན་སེམས་ཅན་དེ་སེམས་ཅན་དམྱལ་བར་སྐྱེས་སུ་ཟིན་ཀྱང་། དེའི་མོད་ལ་ཐར་བར་འགྱུར་རོ། །སའམ། ཏིལ་ལམ། ཡུངས་ཀར་རམ། ཆུ་གང་ཡང་རུང་བ་ལ་བཟླས་བརྗོད་བྱས་ཏེ། ཤི་བའི་ལུས་ལ་གཏོར་རམ། ཁྲུས་བྱས་
ནས་དེའི་འོག་ཏུ་བསྲེག་པའམ། ཡང་ན་མཆོད་རྟེན་གྱི་ནང་དུ་བཅུག་སྟེ་བཞག་ལ། རིག་སྔགས་ཀྱང་བྲིས་ཏེ་མགོ་བོ་ལ་བཏགས་ན་དེས་ངན་སོང་དུ་སྐྱེས་པ་ཡང་ཞག་བདུན་གྱིས་གདོན་མི་ཟ་བར་ཐར་ཏེ། བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་བའམ།

ཡང་ན་རང་གི་སྨོན་ལམ་གྱི་དབང་གིས་སྐྱེ་བར་འགྱུར་རོ། །གང་ཞིག་ཟླ་བ་ཉ་བའི་ཚེ་ཁྲུས་བྱས་ལ་གཙང་མར་བྱས་ཏེ། དུས་གསུམ་དུ་གོས་བརྗེ་ཞིང་། ཁ་ཟས་མི་ཟ་བའམ། ཡང་ན་ཁ་ཟས་དཀར་བག་ཟ་ཞིང་། སྐུ་གདུང་དང་ལྡན་པའི་མཆོད་རྟེན་སྐོར་བཞིན་དུ་གང་
གི་མིང་དང་ལྡན་པས་ལན་འབུམ་བཟླས་བརྗོད་བྱས་ན་དེ་ངན་སོང་ནས་ཐར་ཏེ། གནས་གཙང་མའི་ལྷའི་རིས་སུ་སྐྱེས་ནས། སྒྲུབ་བ་པོའི་ཐད་དུ་འོངས་ཏེ་མཆོད་པ་བྱེད་ཅིང་ལུས་ཀྱང་སྟོན་ལ། ལེགས་སོ་ཞེས་བྱ་བ་ཡང་བྱིན་ནས་ལན་གསུམ་བསྐོར་བ་བྱས་ཏེ་མི་སྣང་བར་འགྱུར་རོ། །
དེའི་མིང་བྲིས་ལ་གཟུངས་སྔགས་བཟླས་བརྗོད་བྱེད་ཅིང་། མཆོད་རྟེན་འབུམ་བྱས་ལ། གདུགས་དང་། རྒྱལ་མཚན་དང་། བ་དན་ལ་སོགས་པས་ལེགས་པར་མཆོད་ནས། རྒྱ་མཚོ་ཆེན་པོའམ། ཡང་ན་ཆུ་ཀླུང་དུ་བཏང་ན། དེས་སེམས་ཅན་དམྱལ་བ་ལ་
སོགས་པ་ནས་ཐར་བར་འགྱུར་རོ། །ཡང་ན་དེ་ལྟར་མཆོད་པ་བྱས་ནས། མཇུག་ཏུ་ལམ་གྱི་བཞི་མདོར་མཆོད་རྟེན་ཆེན་པོ་བྱས་ཏེ། གདུགས་དང་། རྒྱལ་མཚན་དང་། བ་དན་ལ་སོགས་པས་ལེགས་པར་མཆོད་ལ། འཕགས་པའི་དགེ་འདུན་ལ་ཡང་མཆོད་སྟོན་
གསོལ་ནས། ཡོན་ཡང་ཕུལ་ཏེ་ལེགས་པར་མཆོད་ནས། འདི་ཆེ་གེ་མོ་ཞིག་གི་དགེ་བའི་རྩ་བར་གྱུར་ཅིག །འདི་ཁོ་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་གྱུར་ཅིག་ཅེས་ཀྱང་ཤེས་པར་བྱས་ན། དེས་དེ་ཁོ་ན་བཞིན་དུ་སྐྱེས་ནས་ལུས་ཀྱང་སྟོན་ཅིང་། ལེགས་
སོ་ཞེས་བྱ་བ་ཡང་བྱིན་ནས་མི་སྣང་བར་འགྱུར་རོ། །མཚམས་མེད་པ་ལྔ་བྱེད་བྱེད་པའམ། དམ་པའི་ཆོས་སྤོང་བའམ། འཕགས་པ་ལ་སྐུར་བ་བཏབ་པ་ཡང་རུང་སྟེ། འཆི་ཀར་རྩིག་པ་ལ་གཟུངས་འདི་བྲིས་བ་མཐོང་ན་ཡང་། དེའི་ལས་ཀྱི་སྒྲིབ་པ་ཐམས་ཅད་ཟད་
པར་འགྱུར་ན། འདོན་པ་དང་། བཟླས་བརྗོད་བྱེད་པ་ལྟ་ཅི་སྨོས་ཏེ། དེ་བཞིན་གཤེགས་པ་མི་འཁྲུགས་པ་དེ་ཉིད་བྱོན་ནས་འདི་སྐད་དུ་རིགས་ཀྱི་བུ་ཚུར་ངའི་གན་དུ་ཤོག་ཅེས་ཀྱང་གསུང་བར་འགྱུར་རོ། །འཕགས་པ་ལས་ཀྱི་སྒྲིབ་པ་ཐམས་ཅད་རྣམ་པར་སྦྱོང་བའི་

གཟུངས་རྫོགས་སྷོ།། ༄༅༅། །རྒྱ་གར་སྐད་དུ། ཨཱརྱ་སརྦ་ཨནྟ་ར་སཾ་གྲཱ་ས་དྷཱ་ར་ཎི་མནྟྲ། བོད་སྐད་དུ། འཕགས་པ་བར་དུ་གཅོད་པ་ཐམས་ཅད་སེལ་བའི་གཟུངས་སྔགས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་
ལ་ཕྱག་འཚལ་ལོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། ཕྱག་ན་རྡོ་རྗེ་གཟུངས་སྔགས་འདི་སུ་འཛིན་པ་དང་། འཆང་བ་དང་། བཟླས་བརྗོད་བྱེད་པ་དེ་ལ་ནི་དུག་དང་། མཚོན་གྱིས་འཆི་བ་དང་། ལྟོགས་པ་དང་།
མཚོན་བརྒྱབ་པ་དང་། གཅན་གཟན་མ་རུངས་པས་ཟ་བ་དང་། མེས་ཚིག་པ་དང་། ཆུར་འཆི་བ་དང་། འགོ་བའི་རིམས་གཞན་ཡ་ང་བ་དང་། མཛེའི་ནད་དང་། གསོར་མི་རུང་བའི་ནད་ཡ་ང་བ་དང་། གཡང་ལ་ལྷུང་བ་དང་། གཞན་གྱི་བྱད་དང་། ཟས་ཀྱིས་བརྣངས་པ་དང་།
བདག་རང་གིས་གསོད་པ་དང་། དེ་ལྟར་གཤིས་ངན་དུ་འཆི་བ་བཅུ་གསུམ་གྱིས་རྐྱེན་བྱེད་པར་མི་འགྱུར་རོ། །ཕྱག་ན་རྡོ་རྗེ་གཟུངས་སྔགས་འདི་སུ་འཛིན་པ་དང་། འཆང་བ་དང་། བཟླས་བརྗོད་བྱེད་པ་དེ་ལ་ནི་ས་དང་ནམ་མཁའ་ལ་གནས་པའི་བགེགས་དྲེགས་པ་ཅན་མ་རུངས་པ་རྣམས་
ཀྱིས་ཀྱང་གླགས་རྙེད་པར་མི་འགྱུར་རོ། །ཕྱག་ན་རྡོ་རྗེ་གཟུངས་སྔགས་འདི་སུ་འཛིན་པ་དང་། འཆང་བ་དང་། བཟླས་བརྗོད་བྱེད་པ་དེ་ལ་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་ཐམས་ཅད་བྱང་ཞིང་དག་སྟེ། བདེ་བ་ཅན་གྱི་འཇིག་རྟེན་དུ་སྐྱེ་བར་འགྱུར་རོ། །
ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཨ་པྲ་ཏི་ཧ་ཏ་བ་ལ་ཧཱུྃ་ཕཊ། སརྦ་བིགྷ་ནཱཾ་ཨནྟ་རཱ་ཡ་བི་ནཱ་ཤ་ཀ་ར་མཱ་ར་ཡ་ཧཱུྃ་ཕཊ། ཅེས་བརྒྱ་རྩ་བརྒྱད་བརྗོད་ན་འགྲུབ་པའོ། །ངེས་པར་འགྲུབ་པའོ་ཞེས་གསུངས་སོ། །འཕགས་པ་བར་དུ་གཅོད་པ་ཐམས་ཅད་སེལ་བའི་གཟུངས་སྔགས་རྫོགས་སྷོ།། །།
༄༅༅། །རྒྱ་གར་སྐད་དུ། དཀྵི་ཎཱི་པ་རི་ཤོ་དྷ་ནཱི་ནཱ་མ། བོད་སྐད་དུ། ཡོན་ཡོངས་སུ་སྦྱོང་བ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ནས་འོད་ཀྱི་རྒྱལ་པོ་ལ་ཕྱག་འཚལ་ལོ། །

བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་བློ་གྲོས་དང་ལྡན་པའི་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ན་མཿས་མནྟ་བྲ་བྷཱ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྟ་ཏེ་བྷྱཿ། སམྱ་ཀྶཾ་བུདྡྷཱ་ཡ། ན་མོ་མཉྫུ་ཤྲི་ཡེ། ཀུ་མཱ་ར་བྟཱ་ཏཱ་ཡ། བོདྷི་ས་ཏྭ་ཡ། མ་ཧཱ་
ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ནི་རཱ་ལམྤེ་ནི་རཱ་བྷཱ་སེ། ཛ་ཡེ་ཛ་ཡ་ལབྡྷེ། མ་ཧཱ་མཱ་ཏེ་དཀྵེ་དཀྵཱི་ཎཱི་མེ་བརཱི་ཤོདྷཱ་ཡ་སྭཱ་ཧཱ། འདི་ལན་ཅིག་བརྗོད་པས་སྡིག་པ་ཐམས་ཅད་བྱང་བར་འགྱུར་རོ། །ཡོན་མང་པོ་ལ་སྦྱང་བར་ཡང་བྱང་བར་འགྱུར་རོ། །ཡོན་བདག་དེའི་ཡོན་ཡོངས་སུ་འཕེལ་
བར་འགྱུར་ཞིང་ཚོགས་ཐམས་ཅད་རྫོགས་པར་འགྱུར་རོ། །འདི་བརྗོད་པས་བར་དུ་གཅོད་པ་ཐམས་ཅད་ཀྱང་མི་འབྱུང་ངོ་། །འདུལ་བ་ལུང་ལས་རྣམ་པར་ངེས་པའི་མདོ་ལས་བྱུང་བ་ཡོན་ཡོངས་སུ་སྦྱོང་བའི་གཟུངས་རྫོགས་སྷོ།། །།
༄༅། །དེ་ནས་ཡོན་ཡོངས་སུ་སྦྱོང་བའི་གཟུངས། ན་མོ་བྷ་ག་བ་ཏེ། སུ་མེ་རུ་ཀལྤརཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུད་དྷཱ་ཡ། ཏདྱ་ཐཱ། ཨོཾ་ཀལྤེ་ཀལྤེ། མ་ཧཱ་ཀལྤེ། ཀལྤ་པ་རི་ཤོ་དྷ་ནི་སྭཱ་ཧཱ། གཟུངས་འདི་ལན་ཅིག་བཟླས་པས་རི་རབ་ཙམ་གྱི་ཡོན་ཡོངས་སུ་སྦྱོང་བར་
བྱེད་པར་གསུངས་པས། ལན་ལྔ་འམ་དྲུག་ཙམ་བཟླས་སོ། །ཡོན་ཡོངས་སུ་སྦྱོང་བའི་གཟུངས་རྫོགས་སྷོ།། ༄༅། །བཅོམ་ལྡན་འདས་ངན་སོང་ཐམས་ཅད་ཡོངས་སུ་སེལ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ལ་ཕྱག་འཚལ་ལོ། །ཏདྱ་ཐཱ། ཨོཾ་ཤོ་དྷ་ནཾ། བི་ཤོ་དྷ་ནཾ། བི་ཤོ་དྷ་ནེ་མ་མ་སརྦ་པཱ་པི་པི་ཤོ་དྷ་ནེ། ཤུདྡྷེ་བི་ཤུདྡྷེ། སརྦ་ཀརྨ་ཨཱ་བར་ཎ་བི་ཥུདྡྷེ་སྭཱ་ཧཱ། རིགས་ཀྱི་བུའམ་རིགས་ཀྱི་བུ་མོ་གང་གིས་གཟུངས་འདིའི་ཡི་གེའམ། ཚིག་གམ། མིང་ངམ། ཐམས་ཅད་བྱང་ཆུབ་པར་འཛིན་ན། མི་དེ་
བསྐལ་པ་འབུམ་ཕྲག་བཅུ་བཞིར་ཚེ་རབས་དྲན་པར་འགྱུར་རོ། །ལས་ཀྱི་སྒྲིབ་པ་ཐམས་ཅད་ཀྱང་འབྱང་ལ་མྱུར་དུ་ཕྱིར་མི་ལྡོག་པ་ཉིད་ཀྱང་ཐོབ་པར་འགྱུར། བྱང་ཆུབ་ཀྱི་སྙིང་པོའི་བར་དུ་བསོད་ནམས་ཟད་པར་མི་འགྱུར་རོ། །ངན་སོང་ཐམས་ཅད་ཡོངས་སུ་སྦྱོང་བ་ཞེས་བྱ་བའི་གཟུངས་རྫོགས་སྷོ།། །།

༄༅། །རྒྱ་གར་སྐད་དུ། ཨཱརྱ་སརྦ་རོ་ག་པྲ་ཤ་མ་ནི་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ནད་ཐམས་ཅད་རབ་ཏུ་ཞི་བར་བྱེད་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་
ཆོས་ཀྱི་རྣམ་གྲངས་འདི་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་ཡང་དག་པར་སྟོན་ཅིག །ཏདྱ་ཐཱ། ཙི་ལི་མི། ཙི་ལི་མི། པན་ན་ཀོ་ཀི་ལི། ཤྲཱི་མ་ཏི། ཀུཎྜ་ལི་དུནྡུ་
བྷི། ཨིནྡྲ་ནི་མུ་ཁེ་སྭཱ་ཧཱ། འདི་དག་ནི་ཟས་མ་ཞུ་བ་དང་། སྦོས་པ་དང་། ཁྲག་དང་མཁྲིས་པ་འདྲེས་པ་དང་། གཞང་འབྲུམ་གྱིས་བཏབ་པ་དང་། གཞང་ནད་ཅན་དང་། ཟ་ཁུ་དང་། ལུད་པ་ཅན་དང་། རིམས་ནད་ཅན་དང་། ཀླད་
པ་ན་བ་དང་། གཞོགས་ཕྱེད་ན་བ་དང་། ཡི་དགས་ཀྱིས་ཟིན་པའི་གསང་སྔགས་ཀྱི་གཞི་ཡིན་ཏེ། ཀུན་དགའ་བོ་གང་གསང་སྔགས་གཞི་འདི་དག་ལས་འགལ་བར་བྱེད་པ་དེ་ནི་ངས་ལྷ་དང་བཅས་པའི་འཇིག་རྟེན་ན་མ་མཐོང་ངོ་། །ཚེ་ཟད་
པ་ནི་མ་གཏོགས་སོ། །གསང་སྔགས་ཀྱི་གཞི་འདི་དག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་པ་སྟེ། འདི་ལ་སངས་རྒྱས་ནི་སེམས་ཅན་ཐམས་ཅད་ཀྱི་མཆོག་གོ། །འདོད་ཆགས་དང་བྲལ་
བ་ནི་ཆོས་ཐམས་ཅད་ཀྱི་མཆོག་གོ། །དགེ་འདུན་ནི་ཚོགས་ཐམས་ཅད་ཀྱི་མཆོག་གོ། །བདེན་པའི་ཚིག་དང་། བདེན་པའི་ངག་འདིས་བདག་གིས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ལེགས་པར་བདེ་

བར་ཞུ་བར་གྱུར་ཅིག་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ནད་ཐམས་ཅད་རབ་ཏུ་ཞི་བར་བྱེད་པ་ཞེས་བྱ་བའི་
གཟུངས་རྫོགས་སྷོ།། ༄༅། །དཀོན་མཆོག་གསུམ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་
བླ་མའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། བཛྲ་བཛྲ། མ་ཧཱ་བཛྲ། སརྦ་བྷྱ་དྷི་ཧ་ན་ཧ་ན། བཛྲེ་ན་སྭཱ་ཧཱ། འཕགས་པ་ནད་རབ་ཏུ་ཞི་བར་བྱེད་པའི་གཟུངས་རྫོགས་སྷོ།། །།
རྒྱ་གར་སྐད་དུ། ཨཱརྱ་ཛྭ་ར་པྲ་ཤ་མ་ནི་ནཱ་མ་དྷཱ་ར་ཎཱི། བོད་སྐད་དུ། འཕགས་པ་རིམས་ནད་རབ་ཏུ་ཞི་བར་བྱེད་པ་ཞེས་བྱ་བའི་གཟུངས། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་
ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་དུར་ཁྲོད་ཆེན་པོའི་བསིལ་བའི་ཚལ་ན་བཞུགས་ཏེ། དེ་ནས་དགེ་སློང་ཞིག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་
གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་དགེ་སློང་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ན་སེམས་ཅན་རིམས་ནད་ཀྱིས་རྣམ་པར་གཙེས་པ་དག་མཆིས་ན། བཅོམ་ལྡན་འདས་དེ་དག་ལ་
བསྲུང་དུ་གསོལ། དེ་ནས་བཅོམ་ལྡན་འདས་ཀྱིས་སྣམ་ལོགས་སུ་གཟིགས་ཏེ། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཕྱོགས་འདི་ན་མེ་ལྕེ་ཕྲེང་བ་ཞེས་པའི་རིམས་གནས་ཏེ། དེ་སེམས་ཅན་རྣམས་ལ་ཉིན་གཅིག་པ་དང་།

ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པའི་ཚུལ་གྱིས་རྣམ་པར་འཚེ་བར་བྱེད་དེ། དེ་བསྲུང་བའི་གསང་སྔགས་ཀྱི་གཞི་ནི་འདི་དག་ཡིན་ནོ། །ཏདྱ་ཐཱ། ཛྭ་ལ་ནི་ཛྭ་ལ་ནི། པྲ་ཛྭ་ལ་ནི། པྲ་ཏི་པ་ནི། པྲ་ཤ་མ་
ནི། བདག་གི་རིམས་ནད་སོང་ཤིག །མ་འདུག་ཤིག་སྭཱ་ཧཱ། བདེན་པ་དང་བདེན་པའི་ཚིག་གང་གིས་འཇིག་རྟེན་ན་སངས་རྒྱས་བླ་ན་མེད་པ་དང་། འཇིག་རྟེན་ན་ཆོས་དང་། དགེ་འདུན་བླ་ན་མེད་པའི་བདེན་པ་དང་། བདེན་པའི་ཚིག་དེས་བདག་གི་
རིམས་ནད་སོང་མ་འདུག་ཤིག་སྭཱ་ཧཱ། སིདྷྱནྟུ་མནྟྲ་པ་དཻ། ཏ་ར་ཏུ། བིདྱ་ཏཾ་བྲ་ཧྨ་ཨ་ནུ་མོ་ཏེ་སྭཱ་ཧཱ། སྐུད་པ་ནག་པོ་ལ་ལན་ཉི་ཤུ་རྩ་གཅིག་བཟླས་ཏེ་མདུད་པ་ཉི་ཤུ་རྩ་གཅིག་དོར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།
དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རིམས་ནད་རབ་ཏུ་ཞི་བར་བྱེད་པ་ཞེས་བྱ་བའི་གཟུངས་རྫོགས་སྷོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་
ལ་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅། །དཀོན་མཆོག་གསུམ་ལ་ཕྱག་འཚལ་ལོ། །འཕགས་པ་འོད་དཔག་ཏུ་མེད་པ་ལ་
ཕྱག་འཚལ་ལོ། །ཏ་དྱ་ཐཱ། ཨི་ལི་མེ་ཏི་མེ་ལི། ཧ་ནེ་སུ་ཧ་ནེ། ཆེ་གེ་མོ་ཞིག་ཛྭ་ར་བན་དྷཱ་མི། ཨེ་ཀ་ཧི་ཀཾ། ཏྲི་ཧི་ཀཾ་ཙ་ཏུརྩ་ཀཾ། ནི་ཏྱ་ཛྭ་རཾ་སྭཱ་ཧཱ། ཆོ་ག་ནི་འདི་བྲིས་ཏེ་མགུལ་དུ་བཏགས་ན་རིམས་ནད་མེད་པར་བྱེད་དོ། །རིམས་ནད་
ཞི་བའི་གཟུངས་རྫོགས་སྷོ།། ༄༅། །རྒྱ་གར་སྐད་དུ། ཨཱརྱ་ཨཀྵི་རོ་ག་པྲ་ཤ་མ་ནི་སཱུ་ཏྲ། བོད་སྐད་དུ། འཕགས་པ་མིག་ནད་རབ་ཏུ་ཞི་བར་བྱེད་པའི་མདོ། སངས་རྒྱས་

དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་བ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་བཞུགས་ཏེ། དེ་ནས་གནོད་སྦྱིན་གྱི་སྡེ་དཔོན་ཆེན་པོ་ནག་པོ་བཅོམ་ལྡན་འདས་
ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་འདིར་མིག་ནད་དག་བྱུང་ན་དེ་དག་ལ་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་
བ། ནག་པོ་མིག་ནད་ཀྱི་སྔགས་ཀྱི་ཚིག་འདི་དག་ཡོད་དེ། ཏདྱ་ཐཱ། རུ་དྷི་རེ་ཕུཿ། རུ་དྷི་ར་ཨཀྵི་ཕུཿ། རུ་དྷི་ར་པིཾ་ག་ལེ་ཕུཿ། བཱ་ཏེ་ཕུཿ། བ་ཏེ་ལེ་ཕུཿ། ཧནྟེ་ཕུཿ། མཱྃ་ས་དུནྡུ་བྷི་ཕུཿ། པདྨ་ཨཀྵི་ཕུཿ། པདྨ་དཎྜ་ཧི་ར་ཎཱི་ཡེ་
ཕུཿསྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། གནོད་སྦྱིན་གྱི་སྡེ་དཔོན་ཆེན་པོ་ནག་པོ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཆོ་ག་ནི་འདི་ཡིན་ཏེ། སྲད་བུ་དཀར་པོ་ལ་ལན་བདུན་བཟླས་
པ་བྱས་ཏེ་མདུད་པ་བདུན་དོར་རོ། །ཆུ་ལ་ལན་བདུན་བཟླས་པ་བྱས་ལ་ལག་པས་བྱ་བས་ན་མིག་ནད་ཞི་བར་འགྱུར་རོ། །འཕགས་པ་མིག་ནད་རབ་ཏུ་ཞི་བར་བྱེད་པའི་མདོ་རྫོགས་སྷོ།། ༄༅། །དཀོན་
མཆོག་གསུམ་ལ་ཕྱག་འཚལ་ལོ། །ཧེ་བྷ་ག་བཱ་ན། མཉྫུ་ཤྲཱི་ཀུ་མཱ་ར། སརྦ་ཏ་ཐཱ་ག་ཏ། བ་ལ་བི་དྷི་ཛྙ། སརྦ་ཏ་ཐཱ་ག་ཏཱ་ནཱཾ། ནཱ་གཻ་སྟི་ཏིཥྛ། སརྦ་སཏྭཱ་ནཱཾ་སྭཱ་ཧཱ། འབྲུམ་བུའི་ནད་ཞི་བར་བྱེད་པའི་གཟུངས་རྫོགས་སྷོ།། །།
༄༅། །རྒྱ་གར་སྐད་དུ། ཨཱརྱ་ཨརྴ་པྲ་ཤ་མ་ནི་སྭཱ་ཧཱ། བོད་སྐད་དུ། འཕགས་པ་གཞང་འབྲུམ་རབ་ཏུ་ཞི་བར་བྱེད་པའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་

གཅིག་ན། བཅོམ་ལྡན་འདས་རྒྱལ་པོའི་ཁབ་ན། འོད་མའི་ཚལ་བྱ་ཀ་ལན་ད་ཀ་གནས་པའི་ཚལ་ན་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་བཅོ་ལྔའི་གསོ་སྦྱོང་
ཟླ་བ་ཉ་བ་དེ་ཉིད་ཀྱི་ཚེ། དགེ་འདུན་གྱི་མདུན་དུ་གདན་བཤམས་པ་ལ་བཞུགས་སོ། །དེའི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་རྔ་ཡབ་ཐོགས་ཏེ། བཅོམ་ལྡན་འདས་ལ་གཡོབ་ཅིང་འདུག་པར་གྱུར་ཏོ། །དེ་ནས་
ཚེ་དང་ལྡན་པ་ཀུན་དགའ་བོ་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་རྒྱལ་པོའི་ཁབ་འདི་ན་དགེ་སློང་གཞང་འབྲུམ་ཅན་མང་པོ་དག་གཞང་འབྲུམ་གྱི་བྲོ་ནད་ཀྱིས་གཟིར་ཏེ། སྡུག་བསྔལ་མི་བཟད་པ་དྲག་པོ་མི་བདེ་བ་ཡིད་དུ་མི་འོང་བའི་ཚོར་བ་མྱོང་བར་གྱུར་ན། བཙུན་པ་བཅོམ་ལྡན་འདས་དེ་དག་ལ་བདག་གིས་ཇི་ལྟར་
བསྒྲུབ་པར་བགྱི། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་གཞང་འབྲུམ་སེལ་བའི་མདོ་འདི་ལོང་ཤིག །ཀུན་དགའ་བོ་གང་ལ་ལ་ཞིག་གིས་གཞང་
འབྲུམ་སེལ་བའི་མདོའི་མིང་དང་། ཚིག་དང་། ཡི་གེ་ཤེས་ན་དེ་ཇི་སྲིད་འཚོའི་བར་དུ་གཞང་འབྲུམ་གྱི་ནད་ཀྱིས་བཏབ་པར་མི་འགྱུར་རོ། །ཚེ་རབས་བདུན་གྱི་བར་དུ་ཚེ་རབས་དྲན་པར་འགྱུར་རོ། །ཏདྱ་ཐཱ། ཨ་ལནྟེ། ཨ་ལ་མེ། ཤྭ་ལི་ཙི་ནི་ཀུ་
ཤི་སམྦྷ་བ་སྭཱ་ཧཱ། ཀུན་དགའ་བོ་འདི་ལྟ་སྟེ། བྱང་ཕྱོགས་ན་རིའི་རྒྱལ་པོ་གངས་ཞེས་བྱ་བ་དེ་ན་སཱ་ལའི་ཤིང་རྣམ་པར་རྒྱལ་བྱེད་ཅེས་བྱ་བ་དེའི་མེ་ཏོག་གསུམ་ཡོད་དེ། གཅིག་ནི་འཕེལ་བ་ཞེས་བྱ། གཉིས་པ་ནི་འཇམ་པ་ཞེས་བྱ། གསུམ་པ་ནི་

སྐམ་པོ་ཞེས་བྱ་སྟེ། ཇི་ལྟར་དེ་བསྐམས་པ་དེ་བཞིན་དུ་སེམས་ཅན་རྣམས་ཀྱི་རླུང་གི་འབྲུམ་བུ་བསྐམས་པར་གྱུར་ཅིག །མཁྲིས་པའི་འབྲུམ་བུ་བསྐམས་པར་གྱུར་ཅིག །བད་ཀན་གྱི་འབྲུམ་བུ་བསྐམས་པར་གྱུར་ཅིག །མི་གཙང་བའི་འབྲུམ་བུ་བསྐམས་
པར་གྱུར་ཅིག །ཁྲག་གི་འབྲུམ་བུ་བསྐམས་པར་གྱུར་ཅིག །འདུས་པའི་འབྲུམ་བུ་བསྐམས་པར་གྱུར་ཅིག །དེ་བཞིན་དུ་བདག་དང་སེམས་ཅན་ཐམས་ཅད་ཀྱི་བད་ཀན་གྱི་འབྲུམ་བུ་བསྐམས་པར་གྱུར་ཅིག །མི་གཙང་བའི་འབྲུམ་བུ་བསྐམས་པར་
གྱུར་ཅིག །ཁྲག་གི་འབྲུམ་བུ་བསྐམས་པར་གྱུར་ཅིག །འདུས་པའི་འབྲུམ་བུ་བསྐམས་པར་གྱུར་ཅིག །སྣའི་འབྲུམ་བུ་བསྐམས་པར་གྱུར་ཅིག །འཕྱང་བའི་འབྲུམ་བུ་བསྐམས་པར་གྱུར་ཅིག །ཏདྱ་ཐཱ། ཤ་མེ་ཤ་མཱ་ནེ། ཤ་མེ་ཤ་མཱ་
ནེ་སྭཱ་ཧཱ། ན་བར་མ་གྱུར་ཅིག །རེངས་པར་མ་གྱུར་ཅིག །སྒྲ་འབྱུང་བར་མ་གྱུར་ཅིག །འཛག་པར་མ་གྱུར་ཅིག །སྡུག་བསྔལ་བར་མ་གྱུར་ཅིག །རབ་ཏུ་སྡུག་བསྔལ་བར་མ་གྱུར་ཅིག །ཟག་པར་མ་གྱུར་ཅིག །རབ་ཏུ་ཟག་པར་མ་
གྱུར་ཅིག །འདི་ཉིད་དུ་ཟད་པ་དང་། ཡོངས་སུ་ཟད་པ་དང་། མེད་པར་གྱུར་ཅིག །སའི་འོག་ཏུ་སོང་ཤིག །ན་མོ་བྷ་ག་བ་ཏེ། བུད་དྷཱ་ཡ་ས་ཏྱ་བཱ་ཏཱི་ནཾ། སིདྡྷྱནྟུ་མནྟྲ་པ་དཱ་ནི་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།
ཚེ་དང་ལྡན་པ་ཀུན་དགའ་བོ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དེ་ལ་ཆོ་ག་ནི་འདི་ཡིན་ཏེ། བཀླགས་པས་གྲུབ་པ་འདི་སྲད་བུ་དམར་པོ་ལ་ལན་བདུན་བཟླས་པ་བྱས་ལ། མདུད་པ་བདུན་བོར་ཏེ་
མགུལ་དུ་གདགས་སོ། །འཕགས་པ་གཞང་འབྲུམ་རབ་ཏུ་ཞི་བར་བྱེད་པའི་མདོ་རྫོགས་སྷོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་

ལ་ཕབ་པ།། ༄༅། །དཀོན་མཆོག་གསུམ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྲེག་གསོལ་འོད་
ཀྱི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཧུ་རེ་ཧུ་དེ། ཧུ་ཊ་ག་ཧ་ནེ་སྭཱ་ཧཱ། ཆོ་ག་ནི་ལག་པ་ལ་བཟླས་བརྗོད་བྱས་ནས་ལྟོ་མཉེས་ནམ་ཞུ་བའི་ནད་འབྱང་བར་འགྱུར་རོ། །མ་ཞུ་བའི་ནད་འབྱང་བའི་གཟུངས་རྫོགས་སྷོ།། །།
༄༅། །དཀོན་མཆོག་གསུམ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་དུ་གཟིགས་ལ་ཕྱག་འཚལ་ལོ། །ཏདྱ་ཐཱ། དཱི་རི་ཏིཥྛ། ཏསྐ་ར་བདྡྷོ་སི། མ་ཙ་
ལ་མ་ཙ་ལ་སྭཱ་ཧཱ། ལན་བདུན་བརྗོད་དེ་འཕགས་པ་འཇམ་དཔལ་ལ་གསོལ་བ་བཏབ་ན་མི་ཐམས་ཅད་བྱམས་པར་འགྱུར་རོ། །འཕགས་པ་སྡང་བ་ཐམས་ཅད་རབ་ཏུ་ཞི་བར་བྱེད་པ་ཞེས་བྱ་བའི་གཟུངས་རྫོགས་སྷོ།། །།
༄༅། །དཀོན་མཆོག་གསུམ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །ཨོཾ་ཀུ་མཱ་ར་རཱུ་པ་དྷཱ་ར་ཎི་པི་ཤྭ་སམྦྷ་བ་ཨཱགཙྪ་ཨཱགཙྪ། ལ་གྷུ་ལ་གྷུ། བྷྲཱུྃ་བྷྲཱུྃ། ཧཱུྃ་ཧཱུྃ།
ཛི་ན་ཛིཀ་མཉྫུ་ཤྲི་ཡེ། ཏཱ་ར་ཡ་མཱྃ། སརྦ་དུཿཁེ་བྷྱཿཕཊ་ཕཊ། ས་མ་ཡ་ས་མ་ཡ། ཨ་མི་ཏོཏྦྷ་བོ་ཏྦྷ་བ། པཱ་པཾ་མེ་ནཱ་ཤ་ཡ་སྭཱ་ཧཱ། སྡིག་པ་ཐམས་ཅད་རབ་ཏུ་ཞི་བར་བྱེད་པ་ཞེས་བྱ་བའི་གཟུངས་རྫོགས་སྷོ།། །།
༄༅། །རྒྱ་གར་སྐད་དུ། སརྦ་དུཿབ་པྲ་ཤ་མ་ན་ཀ་ར་ནཱ་མ་དྷཱ་ར་ཎཱི། བོད་སྐད་དུ། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པ་ཞེས་བྱ་བའི་གཟུངས། འཇམ་དཔལ་སྨྲ་བའི་སེང་གེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་

ན། བཅོམ་ལྡན་འདས་རྡོ་རྗེའི་གདན་ན་འཁོར་ཐམས་ཅད་ལ་ཆོས་སྟོན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་གསོལ་བ། ཀྱེ་ཀྱེ་བཅོམ་ལྡན་འདས་སེམས་ཅན་རྣམས་ཀྱི་སྡུག་བསྔལ་ཞི་བར་མཛད་དུ་གསོལ་ཞེས་ཞུས་
པ་དང་། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཕྱི་ནང་གསང་བའི་སྡུག་བསྔལ་ཞི་བར་འདོད་པས་འཇམ་དཔལ་སྨྲ་བའི་སེང་གེ་ཟླ་བ་དྲུག་ཏུ་བསྒོམས་པའི་སྦྱོར་བས་ཨཱ་ལི་ཀཱ་ལི་ལས་བྱུང་བའི་སྔགས་
འདི་བརྗོད་དོ། །ན་མོ་རཏྣ་ཏྲ་ཡཱ་ཡ། ན་མོ་མཉྫུ་ནཱ་ཐཱ་ཡ། ན་མོ་ཡ་མཱནྟ་ཀཱ་ཡ། ཏདྱ་ཐཱ། ཨོཾ་མཉྫུ་བྷ་ར། མཉྫུ་གྷོ་ཥ་ཧ་ན། ཧ་ན་ཧ་ན། ད་ཧ་ད་ཧ། པ་ཙ་པ་ཙ། བེ་ཙེ་བེ་ཙེ། བྷི་ཏ་བྷི་ཏ། ཨི་ཕུ་ཏ་ཨི་ཕུ་ཏ། ཧེ་ར་ཏེ་སོཏྟ་
ནི། ན་མཿསོཏྟ་ནི། པྲི་པི་ཤ་ལེ་ཏང་། པྲི་ཏ་ཧ་ས་པྲ་བྷི་ན་ཏ་ཛ་ཡ། ཧཱུྃ་ཧཱུྃ་ཧཱུྃ་ཧཱུྃ། ཧེ་ར་ཏེ་སོཏྟ་ནི་ཧཱུྃ་ཕཊ་སྭཱ་ཧཱ། ཨོཾ་པཱ་གི་ཤྭ་རི་མུྃ། མཉྫུ་གྷོ་ཥ་ཧ་ན། བ་ཏི་སི་དྷོ་ཧ་རི་ནི་སྭཱ་ཧཱ། སྔགས་དེ་ལན་ཅིག་བརྗོད་པས་མི་དེས་ཚེའི་གཟུངས་
ཐོབ་བོ། །བཅུ་བརྗོད་ན་ཤེས་རབ་ཕྱོགས་མེད་དུ་འགྲོལ་ལོ། །བརྒྱ་བརྗོད་ན་འཇིག་རྟེན་གྱི་ཁམས་ཐམས་ཅད་གཡོ་བར་འགྱུར་རོ། །སྟོང་བརྗོད་ན་འདོད་པ་ཐམས་ཅད་ཕུན་སུམ་ཚོགས་སོ། །ཁྲི་བརྗོད་ན་སྡུག་བསྔལ་ཐམས་ཅད་རབ་ཏུ་
ཞིའོ། །འབུམ་བརྗོད་ན་རྫོགས་པའི་སངས་རྒྱས་ཀྱི་ཞལ་མཐོང་ངོ་། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་སོགས་པའི་འཁོར་ཐམས་ཅད་དགའ་ཞིང་མགུ་ནས་
ཐལ་མོ་སྦྱར་ནས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །སྡུག་བསྔལ་ཐམས་ཅད་རབ་ཏུ་ཞི་བར་བྱེད་པ་ཞེས་བྱ་བའི་གཟུངས། བཅོམ་ལྡན་འདས་ཤཱཀྱ་ཐུབ་པའི་ཞལ་ནས་གསུངས་པ་རྫོགས་སྷོ།། །།

༄༅། །དཀོན་མཆོག་གསུམ་ལ་ཕྱག་འཚལ་ལོ། །ཨོཾ་བ་ག་བ་ཙེ། ཛྃ་བྷ་ནི། སྟོཾ་བྷ་ནི། མོ་ཧ་ནི། སརྦ་རོ་ཥ་པྲ་ཤ་མ་ནི་སྭཱ་ཧཱ། ཤར་ཕྱོགས་སུ་བལྟས་ཏེ་འདུག་ལ་སྔགས་འདི་བརྗོད་ཅིང་རང་གི་ལག་པས་ལན་བདུན་གདོང་ལ་
བྱུགས་ནས་ཚོགས་ཀྱི་ནང་དུ་སོང་ན་ཁྲོས་བ་དགའ་བར་འགྱུར་རོ། །ཁྲོ་བ་ཞི་བར་བྱེད་པའི་གཟུངས་རྫོགས་སྷོ།། ༄༅། །འཕགས་པ་ཁྲོས་པ་ཞི་བར་བྱེད་པའི་གཟུངས། དཔལ་ཆེན་
མོ་ལ་ཕྱག་འཚལ་ལོ། །ཀ་ཊེ་བི་ཀ་ཊེ། རོ་ཥ་གྲ་ཤ་མ་ནི་སྭཱ་ཧཱ། གང་ཁྲོས་པའི་མདུན་དུ་བརྗོད་ན་དེའི་ཁྲོས་པ་ཞི་ནས་ངེས་པར་འོང་ངོ་། །འཕགས་པ་ཁྲོས་བ་ཞི་བར་བྱེད་པའི་གཟུངས་རྫོགས་སྷོ།། ༄༅། །དཀོན་
མཆོག་གསུམ་ལ་ཕྱག་འཚལ་ལོ། །ན་མོ་བྷ་ག་བ་ཏེ། ཨུཥྞཱི་ཥཱ་ཡ་དྷ་རེ། རནྟེ་སྭཱ་ཧཱ། མ་བསྒྲུབས་ཀྱང་ལས་ཐམས་ཅད་འགྲུབ་པར་འགྱུར་ཏེ། གིའུ་ཝང་ལ་ལན་བརྒྱ་རྩ་བརྒྱད་བཟླས་ནས་དཔྲལ་བར་ཐིག་ལེ་བྱས་ན་གང་བལྟས་པ་དེ་དགའ་
བར་འགྱུར་རོ། །མིག་རྩི་ལ་ལན་བརྒྱ་རྩ་བརྒྱད་སྔགས་ཏེ་མིག་ལ་བསྐུས་ན་གང་དང་ཕྲད་པར་བྱ་བ་དེ་དགའ་བར་འགྱུར་རོ། །ཆུ་ཁྱོར་གང་ལ་ལན་བདུན་བཟླས་ཏེ་འཐུངས་ན་མ་བསླངས་པར་ཟས་རྙེད་པར་འགྱུར་རོ། །ཚོགས་པའི་ནད་དུ་འགྲོ་ན་བདག་
གི་གོས་ཀྱི་མཐའ་མ་ནས་ལག་པ་གཡོན་པས་བཟུང་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ནས་ཚོགས་པའི་ནང་དུ་གོང་ན་ཚིག་བཙན་པར་འགྱུར་རོ། །ཚིག་བཙན་པའི་གཟུངས་རྫོགས་སྷོ།། ༄༅། །དཀོན་
མཆོག་གསུམ་ལ་ཕྱག་འཚལ་ལོ། །ཏདྱ་ཐཱ། ཨོཾ་ཨ་ལེ་ཀཱ་ལི་ཨ་ལེ་ཀཱ་ལི་མུཙྩི་ཏེ་སྭཱ་ཧཱ། ཁ་ཉི་མ་ལ་བལྟས་ཏེ་ཆུ་ལ་སྔགས་འདི་ལན་བདུན་བཏབ་སྟེ་ཕྱོགས་བཅུར་གཏོར་ན། བདག་བསྲུངས་པར་འགྱུར་རོ། །བདག་སྲུང་

བའི་གཟུངས་རྫོགས་སྷོ།། ༄༅། །དཀོན་མཆོག་གསུམ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེས་གྲངས་
དང་རྒྱུ་སྐར་དང་ཡུད་ཙམ་གྱི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ནཀྵ་ཏྲེ། སརྦ་ཏི་ཐཱི་མཱུ་རྟེ། ན་ཤ་ཏྲ་ནི། མེ་ས་མི་ཏ་དྷ་ནི། བྷ་བནྟུ་སྭཱ་ཧཱ། དེའི་ཆོ་ག་ནི་ཕྱོགས་གང་དུ་འགྲོ་འདོད་ཀྱང་རུང་སྟེ། དེས་ལན་བདུན་བརྗོད་ནས་སོང་ན་དོན་ཐམས་
ཅད་འགྲུབ་པར་འགྱུར་རོ། །དོན་ཐམས་ཅད་འགྲུབ་པའི་གཟུངས་རྫོགས་སྷོ།། ༄༅། །དཀོན་མཆོག་གསུམ་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ། །ཆོས་ལ་
ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ན་མོ་ཧ་རི་དྷི་ཡེ། ཧ་རི་དྷི་ཀུ་མཱ་རི། གཽ་རི། གན་དྷཱ་རི། ཙཎྜ་ལི། མ་ཏཾ་གི། ཀ་ལི་ཀ་ལི། ཆེ་གེ་མོ་ཞིག་གི་མོ་ཧེ་ཧི། ཁ་ར་ཁ་ར། པ་ཙ་པ་ཙ། ཨ་བ་དྷ་ཡ། མཱུར་ཙཱ་ཡ།
ཆེ་གེ་མོ་ཞིག་གི་མེ་ཤ་མ་ནཱ་ཡ་སྭཱ་ཧཱ། ཨོཾ་བྷུར་བྷུ་བཱ། ཛྭ་ལ་ཛྭ་ལ། ཛྭ་ལི་མ་ནཱ་ནི། དེ་བི་སརྦ་སཾ་སྐཱ་ར་ཀ་རི་ཎི་ཛ། ཏ་ལེ་ཏ་ལེ། ཛྭ་ལ་ཛྭ་ལ་སྭཱ་ཧཱ། འདིའི་ཆོ་ག་ནི་བཀླགས་པ་ཙམ་གྱིས་མ་བསྒྲུབས་པར་ལས་ཐམས་ཅད་འགྲུབ་པར་འགྱུར་ཏེ།
ཀླད་ནད་དང་། རིམས་ལྡང་དུ་བ་ཅན་དང་། རོ་ལངས་དང་། གདོན་རྣམས་ཕམ་པར་འགྱུར་རོ། །དྲན་པ་ཙམ་གྱིས་དེ་དག་ཐམས་ཅད་ཀྱིས་བཏང་བར་འགྱུར་རོ། །བཀྲེས་ན་གྲོང་དུ་སོང་སྟེ་ལན་བདུན་བཟླས་བརྗོད་བྱས་ཏེ་གདོང་ལ་བྱུགས་ན་ཟས་
རྙེད་པར་འགྱུར་རོ། །ལྕེ་ལ་བཟླས་བརྗོད་བྱས་ན་ཤགས་འགྱེད་པའི་ཚེ་ལན་ཐེབས་པར་འགྱུར་རོ། །ལོ་མའམ། མེ་ཏོག་གམ། འབྲས་བུ་ལ་བསྔགས་ནས་སུ་ལ་བྱིན་པ་དེ་དགའ་བར་འགྱུར་རོ། །ལས་གྲུབ་པའི་གཟུངས་རྫོགས་སྷོ།། །།

༄༅། །དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཨི་རི་མི་རི། དྷ་དྃ་མེ། བ་ཧུ་ཕ་ལྃ་བྷ་བ་ཏུ་སྭཱ་ཧཱ། གོས་ཕྲུགས་གཅིག་ལ་ལན་སྟོང་བཟླས་བརྗོད་བྱས་ཏེ། མི་
ཡ་རབས་སམ། སློབ་དཔོན་ནམ། གཞན་གང་ཡང་རུང་བ་ཅིག་ལ་བྱིན་ན་ཟླ་བ་ཕྱེད་ཕན་ཆད་ཀྱི་གོས་ཕྲུགས་བརྒྱ་ཐོབ་པར་འགྱུར་རོ། །དེ་བཞིན་དུ་ནོར་ཟས་སམ། རྐང་འགྲོས་གང་ཡང་རུང་བ་རྣམས་ཀྱང་དེ་དང་འདྲའོ། །གོས་བརྒྱ་ཐོབ་པའི་གཟུངས་
རྫོགས་སྷོ།། ༄༅། །དཀོན་མཆོག་གསུམ་ལ་ཕྱག་འཚལ་ལོ། །ཨོཾ་ན་མཿཤ་པ་ར་ན་མ་སྭཱ་ཧཱ། སོ་རྩི་ལ་སྔགས་འདིས་བཏབ་སྟེ་ཁར་བཅུག་ན། གང་ལ་བལྟས་པ་དེ་དག་དགའ་བར་འགྱུར་རོ། །
མི་དགའ་བར་བྱེད་པའི་གཟུངས་རྫོགས་སྷོ།། ༄༅། །འཕགས་པ་ཡིད་དུ་འོང་བ་ཞེས་བྱ་བ། སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། །ན་མོ་བྷ་ག་བ་ཏེ། ཨུཥྞཱི་ཥཱ་ཡ། དྷཱ་རེ་དྷ་ར་ན་ཏི་
ཡེ་སྭཱ་ཧཱ། མ་བསྒྲུབས་ཀྱང་བཀླགས་པས་འགྲུབ་སྟེ། གིའུ་ཝང་ལ་བརྒྱ་རྩ་བརྒྱད་བཟླས་ཏེ་དཔྲལ་བར་ཐིག་ལེ་བྱས་ན་ཀུན་གྱི་ཡིད་དུ་འོང་བར་འགྱུར་རོ། །ཏི་ཙ་ལ་སྔགས་ཏེ་མིག་ལ་བསྐུས་ན་གང་བལྟས་པ་མིག་སྤྲད་མཐུན་ནོ། །ཆུ་ལ་སྔགས་ཏེ་
འཐུངས་ན་གཞན་རྣམས་ཟས་སྟེར་སྙིང་འདོད་དོ། །ཡིད་དུ་འོང་བའི་གཟུངས་རྫོགས་སྷོ།། ༄༅། །དཀོན་མཆོག་གསུམ་ལ་ཕྱག་འཚལ་ལོ། །ཨོཾ་བྷ་ག་བ་ཏི་ཤྲུ་ཏི་སྨྲི་ཏི། བ་ལ་བ་པར་མ་སིདྡྷི་སྭཱ་ཧཱ། ཆོ་ག་ནི་
ཞག་བདུན་གྱི་བར་དུ་ནང་རེ་ཞིང་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་ཆུ་ཁྱོར་གང་ལ་ལན་བདུན་སྔགས་ཀྱིས་བཏབ་སྟེ་འཐུངས་ན། ཉིན་གཅིག་ཀྱང་ཡི་གེ་ཤོ་ལོ་ཀ་སུམ་བརྒྱ་ལོབས་སོ། །ཟླ་བ་གཅིག་གི་བར་དུ་བྱས་ན་མི་འམ་ཅི་དང་འདྲ་བར་

མགྲིན་པ་སྙན་པར་འགྱུར་ཏེ། ཐེ་ཚོམ་ཟ་བར་མི་བྱའོ། །མགྲིན་པ་སྙན་པའི་གཟུངས་རྫོགས་སྷོ།། ༄༅། །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཏཱ་རེ་ཏཱ་རེ་ཏཱ་རཱ་ཡ། བྷ་ག་བ་ཏེ།
བནྡྷ་མོ་ཙ་ནི་སྭཱ་ཧཱ། འཕགས་པའི་སྔགས་དེ་བཟླས་བརྗོད་བྱས་ན་བཅིངས་པ་ལས་གྲོལ་བར་བྱེད་དོ། །བཅིངས་པ་ལས་གྲོལ་བའི་གཟུངས་རྫོགས་སྷོ།། ༄༅། །རྒྱ་གར་སྐད་དུ། ཨ་གྲ་བིདྱཱ་མནྟྲ། བོད་སྐད་
དུ། མཆོག་ཐོབ་པའི་རིག་སྔགས། བཅོམ་ལྡན་འདས་མ་ལྷ་མོ་དུང་ཅན་མ་ལ་ཕྱག་འཚལ་ལོ། །བསྙེན་པོ་རྫོགས་པར་བྱེད་པ་གཟི་བརྗིད་རྒྱས་པར་བྱེད་པ་ལོངས་སྤྱོད་འཕེལ་བར་བྱེད་པ་དབང་ཕྱུག་འཕེལ་བར་བྱེད་པ། འཁོར་འཕེལ་བར་བྱེད་པ།
ཚེ་འཕེལ་བར་བྱེད་པ། དགྲ་ཞི་བར་བྱེད་པ། བགེགས་ཞི་བར་བྱེད་པའོ། །དཀོན་མཆོག་གསུམ་ལ་མཆོད་པ་ཕུལ་ལ། སེམས་བྱམས་པ་ལ་གནས་པས་དུས་གཅིག་ལ་ལན་བརྒྱ་རྩ་བརྒྱད་བརྗོད་པར་བྱའོ། །འདི་ལྟ་སྟེ། ན་མཿསརྦ་ཏ་ཐཱ་ག་
ཏཱ་ནཱཾ། ཏདྱ་ཐཱ། ཨོཾ་ཤདྑི་ནི་དེ་བི། ཨཱ་གཙྪ་ཨཱ་གཙྪ། ཏིཥྵ་དྷ་ནེ། དྷ་ན་ཛ་ཡེ། བྲཱི་བྲཱི། བྲྀདྡྷྲི་ཀ་རི། དྷྲི་དྷྲི། དྷྲྀ་ཏི་ཀ་རཱི་ནཱ་ན། བི་བིདྱཱ། བེ་ཤ་བསྟ། ཨཱ་ཡུརྡྷ་ར་ཎི་ཡུ་ཡུ། ཨཱ་ཡུཥྤཱ་ལ་ནི། ཏ་ཐཱ་ག་ཏཱ་སྨྲར་བོ་དྷི་ཙིཏྟ། མ་ཏཱི་
ལཾ་བོ་ད་ར། དེ་ཧི་མེ་བ་ར་ན་ཤདྑི་ནི་སྭཱ་ཧཱ། བདག་དགེ་བ་འདི་ཉིད་ཀྱིས་སྤྲུལ་པའི་སྐུ་འདི་ཉིད་དུ་མཐོང་བར་གྱུར་ཅིག །སྟོང་པ་ཉིད་ལ་བཟོད་པ་ཐོབ་པར་གྱུར་ཅིག །སྟོང་བ་ཉིད་ཀྱི་དོན་མཐོང་བར་གྱུར་ཅིག །སྟོང་བ་ཉིད་ཀྱི་དོན་བྱེད་པར་གྱུར་
ཅིག །འདི་བརྗོད་པས་བར་དུ་གཅོད་པ་ཐམས་ཅད་ཀྱང་རྣམ་པར་སེལ་བར་འགྱུར་རོ། །འཕགས་པ་མཆོག་ཐོབ་པ་ཞེས་བྱ་བ་རྫོགས་སྷོ།། ༄༅། །རྒྱ་གར་སྐད་དུ། པྲཛྙཱ་བརྡྷ་ནི་ནཱ་མ་དྷཱ་ར་ཎཱི།

བོད་སྐད་དུ། ཤེས་རབ་སྐྱེད་པ་ཞེས་བྱ་བའི་གཟུངས། ཐམས་ཅད་མཁྱེན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བྱང་ཆུབ་སེམས་དཔའ་བློ་ལྡན་ཞེས་བྱ་བ་རི་རབ་ཀྱི་ངོས་ལ་
བཞུགས་ཏེ། རི་རབ་ལ་གནས་པའི་ལྷའི་བུ་ཐམས་ཅད་ཀྱིས་བསྐོར་ནས་མདུན་དུ་བྱས་ཏེ་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གཞོན་ནུའི་གཟུགས་ཅན་གྱིས་ཐལ་མོ་སྦྱར་ཏེ་བྱང་ཆུབ་སེམས་དཔའ་བློ་ལྡན་ལ་གསོལ་བ།
བཅོམ་ལྡན་འདས་སེམས་ཅན་ཤེས་རབ་རྟུལ་པོ། བློ་ཞན་པ། ཡིད་མི་གཞུངས་པ་རྣམས་ཀྱི་སླད་དུ་ཤེས་རབ་སྐྱེད་པ་ཞེས་བགྱི་བའི་གཟུངས་བཤད་དུ་གསོལ། བཤད་པ། ཧཱུྃ་པི་ཙུ་པི་ཙུ་པྲཛྙཱ་བརྡྷ་ནི། ཛྭ་ལ་ཛྭ་ལ་མེ་དྷཱ་བརྡྷ་ནི། དྷི་རི་དྷི་རི། བུདྡྷི་
བརྡྷ་ནི་སྭཱ་ཧཱ། གང་ཞིག་གཟུངས་འདི་འཛིན་པ་དང་། ཀློག་པ་དང་། འདྲི་བ་དང་། འདྲིར་འཇུག་པ་དང་། ཆུང་ངུ་ན་ཡི་གེ་འབྲུ་གཅིག་ཙམ་ཐོས་ན་ཡང་དེའི་ཚེ་འདི་ཉིད་ལ་ཤེས་རབ་ཆེན་པོར་འགྱུར་རོ། །གང་གིས་ཟླ་བ་དྲུག་གི་བར་དུ་ཉིན་རེ་ཞིང་རྩ་བ་
ཁྱོར་གང་ལ་རིག་པ་འདི་ལན་བདུན་བཏབ་སྟེ། ཉི་མ་ཤར་བའི་ཚེ་འཐུངས་ན་ཚིགས་སུ་བཅད་པ་སྟོང་སྟོང་འཛིན་ཏོ། །ལན་ཅིག་འཐུངས་ན་ལ