Kinh tạng Tây Tạng (Kangyur Đại Học) — 101_གཟུངས་འདུས།_ཝཾ

༄༅། །གཟུངས་འདུས་ཝོཾ་བཞུགས་སོ། །

༄༅༅། །རྒྱ་གར་སྐད་དུ། ཨཱརྱ་མ་ཧཱ་བཛྲ་མེ་རུ་ཤི་ཁར་ཀཱུ་ཊ་གཱ་ར་དྷཱ་ར་ཎཱི། བོད་སྐད་དུ། འཕགས་པ་རྡོ་རྗེ་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས། སངས་
རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྡོ་རྗེའི་ལྷུན་པོ་ཆེན་པོའི་རྩེ་མོའི་ཁང་པ་
བརྩེགས་པ་རྡོ་རྗེ་ཆེན་པོའི་ཏིང་ངེ་འཛིན་གྱི་སའི་གནས། རྡོ་རྗེ་ཆེན་པོའི་དཔག་བསམ་གྱི་ཤིང་ལྗོན་པས་ལེགས་པར་བརྒྱན་པ། རྡོ་རྗེ་ཆེན་པོའི་རྫིང་གི་རིན་པོ་ཆེའི་པདྨའི་འོད་ཀྱིས་སྣང་བར་
བྱས་པ། ས་ཕྱོགས་རྡོ་རྗེ་ཆེན་པོའི་བྱེ་མ་བདལ་བ། རྡོ་རྗེ་ཆེན་པོར་བྱིན་གྱིས་བརླབས་པ། འཁོར་གྱི་ཁྱམས་རྡོ་རྗེ་ཆེན་པོ་ལས་བྱས་པ། ལྷའི་དབང་པོ་བརྒྱ་བྱིན་གྱི་རྡོ་རྗེ་ཆེན་པོའི་སེང་གེའི་
ཁྲི་བྱེ་བ་ཁྲག་ཁྲིག་འབུམ་ཕྲག་སྟོང་གིས་རྣམ་པར་མཛེས་པ། ཆོས་བསྟན་པ་དང་ཆོ་འཕྲུལ་ཅན། སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པ། ཆོས་ཐམས་ཅད་

ཀྱི་མཉམ་པ་ཉིད་ལ་འཇུག་པ། ཐམས་ཅད་མཁྱེན་པ་ཉིད་ཀྱིས་ངེས་པར་འབྱུང་བ་ན། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་བཞི་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལས་ཕྱིར་མི་ལྡོག་པ། མཐུ་ཆེན་པོ་ཐོབ་པ། རྡོ་རྗེ་ཆེན་པོའི་རྣམ་པར་ཐར་པའི་ཏིང་ངེ་འཛིན་གྱིས་སངས་རྒྱས་ཀྱི་ཞིང་དུ་རྣམ་པར་འཕྲུལ་པ། ཆོ་འཕྲུལ་ཆེན་པོ་ཀུན་དུ་སྟོན་པ། སེམས་ཀྱི་སྐད་ཅིག་ཐང་ཅིག་ཡུད་ཙམ་གཅིག་ལ་སེམས་ཅན་ཐམས་ཅད་ཀྱི་
སེམས་དང་། སྤྱོད་པའི་རྗེས་སུ་འཇུག་པའི་ཆོས་བསྟན་པ་སྣ་ཚོགས་མཉམ་པ་ཉིད་སྙན་ཅིང་རྒྱ་ཆེ་ལ་ཟབ་པ་དང་། སྤོབས་པ་དང་། ཆོ་འཕྲུལ་དང་ལྡན་པ་སངས་རྒྱས་ཀྱི་ཞིང་དུ་མར་དེ་བཞིན་གཤེགས་པ་ལ་མཆོད་པ་ཆེན་པོའི་སྤྲིན་གྱིས་མཆོད་པ་དང་། རྣམ་པར་
ཐར་པའི་སྒོ་དང་། གཟུངས་དང་། ཏིང་ངེ་འཛིན་དང་དབང་དང་། མངོན་པར་ཤེས་པ་དང་མ་འདྲེས་པ་དང་། བྱང་ཆུབ་ཀྱི་ཡན་ལག་དང་། ལམ་དང་ས་བཅུ་དང་། ཕ་རོལ་དུ་ཕྱིན་པ་དང་། ཐབས་ལ་མཁས་པ་དང་། བསྡུ་བའི་དངོས་པོ་དང་། བྱམས་པ་དང་
སྙིང་རྗེ་དང་། དགའ་བ་དང་བཏང་སྙོམས་དང་། བྱམས་པའི་སྟོབས་དང་དབེན་པ་དང་། ཡོངས་སུ་བྱང་བའི་སེམས་ཀྱི་རྒྱུན་དང་ལྡན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་ཞེས་བྱ་བ་དང་། རྡོ་རྗེ་མིག་དང་རྡོ་རྗེའི་ལུས་
དང་། རྡོ་རྗེའི་བློ་གྲོས་དང་ལག་ན་རྡོ་རྗེ་དང་། རྡོ་རྗེ་འདུས་པ་དང་རྡོ་རྗེས་ཐུ་བོ་ཆེ་དང་། རྡོ་རྗེ་རྣམ་པར་འཕྲུལ་པ་དང་། རྡོ་རྗེ་བརྩེགས་པ་དང་རྡོ་རྗེའི་ཕུང་པོ་དང་། རྡོ་རྗེའི་ང་རོ་དང་རྡོ་རྗེ་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་ཏོག་ཅེས་

བྱ་བ་དང་། དེ་དག་ལ་སོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་བཞི་དང་། ཉན་ཐོས་ཆེན་པོ་རབ་ཏུ་མང་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། སྲིད་པར་ཀུན་དུ་སྦྱོར་བ་ཆད་པ། ཡང་དག་པའི་ཤེས་པས་
སེམས་ཤིན་ཏུ་རྣམ་པར་གྲོལ་བ། རྫུ་འཕྲུལ་གྱི་སྟོབས་དང་། ཆོ་འཕྲུལ་བསམ་གྱིས་མི་ཁྱབ་པས་རྣམ་པར་འཕྲུལ་པའི་མཐུ་ཆེན་པོ་ཐོབ་པ། ལྟ་བ་ཆགས་པ་མེད་པ། ཐམས་ཅད་ཀྱང་དྲི་མ་དང་བྲལ་བ། ཀུན་ནས་ཉོན་མོངས་པའི་བག་ཆགས་ཀྱིས་བོན་ངེས་པར་སྲེག་པ་ཤ་
སྟག་ལ་འདི་ལྟ་སྟེ། ཚེ་དང་ལྡན་པ་ཤ་ར་དྭ་ཏིའི་བུ་དང་། ཚེ་དང་ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་ཀ་པི་ན་དང་། ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་སྐུལ་བྱེད་དང་། ཚེ་དང་ལྡན་པ་དགའ་བྱེད་དང་། ཚེ་དང་ལྡན་
པ་ག་ཡཱ་འོད་སྲུང་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ལྟེང་རྒྱས་འོད་སྲུང་དང་། དེ་དག་ལ་སོགས་པ་ཉན་ཐོས་ཆེན་པོ་རབ་ཏུ་མང་པོ་དང་། ལྷའི་བུ་དབང་ཕྱུག་ཆེན་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་གྲངས་མེད་དཔག་ཏུ་མེད་གཞལ་དུ་མེད་པ་དག་
དང་། མི་མཇེད་ཀྱི་བདག་པོ་ཚངས་པ་དང་། ལྷའི་བུ་ཚངས་པ་བཟང་པོ་ལ་སོགས་པ་ཚངས་རིས་ཀྱི་ལྷའི་བུ་རྣམས་དང་། ལྷའི་བུ་རབ་འཐབ་བྲལ་གཡོག་འཐབ་བྲལ་གྱི་ལྷའི་རིས་ཀྱི་ལྷའི་བུ་དང་བཅས་པ་དང་། ཡོངས་སུ་དགའ་ལྡན་དང་། འཕྲུལ་དགའ་དང་། གཞན་འཕྲུལ་
དབང་བྱེད་དང་། ལྷའི་དབང་པོ་བརྒྱ་བྱིན་ལྷའི་བུ་ཐམས་ཅད་ཀྱི་འཁོར་ཅན་དང་། ལྷ་མ་ཡིན་གྱི་དབང་པོ་ཐགས་ཟངས་རིས་དང་། སྟོབས་ཅན་དང་། རབ་སིམ་དང་། སྒྲ་གཅན་དང་རྣམ་པར་སྣང་བྱེད་དང་། དེ་དག་ལ་སོགས་པ་ལྷ་མ་ཡིན་གྱི་དབང་པོ་ཚད་མེད། གྲངས་མེད་
དཔག་ཏུ་མེད་པ་རྣམས་དང་། ཀླུའི་རྒྱལ་པོ་རྒྱ་མཚོ་དང་། མ་དྲོས་པ་དང་། འཇོག་པོ་དང་། ནོར་རྒྱས་ཀྱི་བུ་དང་། དུང་སྐྱོང་དང་། སྟོབས་ཀྱི་རྒྱུ་དང་། པདྨ་དང་། པདྨ་ཆེན་པོ་དང་། མཐའ་ཡས་དང་། དེ་དག་ལ་སོགས་པ་ཀླུའི་རྒྱལ་པོ་ཚད་མེད་གྲངས་མེད་དཔག་ཏུ་མེད་པ་

དག་དང་། མིའམ་ཅིའི་རྒྱལ་པོ་ལྗོན་པ་མིའམ་ཅིའི་རྒྱལ་པོའི་གཡོག་དུ་མ་ཅན་དང་། དྲི་ཟའི་རྒྱལ་པོ་གཙུག་ཕུད་ལྔ་པ་དྲི་ཟའི་རྒྱལ་པོའི་གཡོག་དུ་མ་ཅན་དང་། རིག་སྔགས་འཆང་གི་རྒྱལ་པོ་དོན་ཐམས་ཅད་གྲུབ་པ་རིག་སྔགས་འཆང་གི་རྒྱལ་པོའི་གཡོག་དུ་
མ་ཅན་དང་། ནམ་མཁའ་ལྡིང་གི་རྒྱལ་པོ་གསེར་མིག་ནམ་མཁའ་ལྡིང་གི་རྒྱལ་པོའི་གཡོག་དུ་མ་ཅན་དང་། གནོད་སྦྱིན་གྱི་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། ནོར་བུ་བཟང་དང་གང་བ་བཟང་དང་། གནོད་སྦྱིན་གྱི་རྒྱལ་པོ་ལྔས་རྩེན་གནོད་སྦྱིན་གྱི་རྒྱལ་པོ་གཡོག་དུ་མ་ཅན་དང་།
འཕྲོག་མ་བུ་ལྔ་བརྒྱའི་གཡོག་ཅན་དང་། འཇིག་རྟེན་གྱི་མ་བདུན་དང་། སྲིང་མོ་བདུན་དང་། དྲང་སྲོང་ཆེན་པོ་བདུན་དང་། བར་སྣང་ལ་རྒྱུ་བའི་རྒྱུ་སྐར་དང་། གཟའི་ལྷ་ཐམས་ཅད་དང་། ཕྱོགས་ཀྱི་ལྷ་རྣམས་དང་། ཕྱོགས་མཚམས་ཀྱི་ལྷ་རྣམས་དང་། སའི་ལྷ་དང་དབྱངས་
ཅན་དང་། འབྱུང་པོ་རྣམས་དང་། བགེགས་རྣམས་དང་། ལོག་འདྲེན་རྣམས་དང་། ཡི་དགས་རྣམས་དང་། འབྱུང་པོ་རྫུ་འཕྲུལ་ཆེན་པོ་རྣམས་དང་། རིའི་རྒྱལ་པོ་ཐམས་ཅད་དང་། འཇིག་རྟེན་སྐྱོང་བ་ཆུ་ལྷ་གཡོག་རྒྱ་མཚོའི་ལྷ་ཐམས་ཅད་དང་བཅས་པ་དང་། འཕགས་
སྐྱེས་པོ་དང་། མིག་མི་བཟང་དང་། ལག་ན་བེ་ཅོན་དང་། བདེན་བྲལ་དང་། མེའི་ལྷ་དང་། རླུང་གི་ལྷ་ཆེན་པོ་བདུན་དང་། དབང་བདག་ཆུང་མ་དང་བཅས་པའི་ཚོགས་བྱེ་བ་ཁྲག་ཁྲིག་འབུམ་ཕྲག་དུ་མའི་འཁོར་ཅན་དང་། སྲིད་མེད་ཀྱི་བུ་གཡོག་དང་བཅས་པ་དང་། བྱིན་པ་
པོ་དང་། ཕྲེང་བ་ཅན་དང་། ལྕགས་ཅན་དང་། ཚོགས་ཀྱི་བདག་པོ་ཆེན་པོ་དང་། སྤྲིན་ཏ་ལ་ལ་དང་། ལོག་འདྲེན་གྱི་དབང་པོ་བགེགས་ལོག་འདྲེན་གྱི་གཡོག་དུ་མ་ཅན་དང་། ཤིང་གསེབ་ཀྱི་ལྷ་དྲུག་ཅུ་དང་། སྲིང་མོ་བཞི་མིང་པོ་དང་བཅས་པ་དང་། མ་བདུན་དང་རྡོ་རྗེ་ལྕགས་
ཀྱུ་ཅན་དང་། རྡོ་རྗེ་ལུ་གུ་རྒྱུད་དང་། རྡོ་རྗེ་ཕོ་ཉ་མོ་དྲུག་ཅུ་རྩ་བཞི་དང་། རྡོ་རྗེའི་སྡེ་དང་། ལག་བཟངས་དང་། གཙུག་གིས་འགྲོ་དང་། རྡོ་རྗེའི་རིགས་ཀྱི་འཁོར་དུ་མ་དང་བཅས་པ་དང་། དེ་མ་ཡིན་པ་གཞན་ཡང་སངས་རྒྱས་དང་། ཆོས་དང་། དགེ་འདུན་ལ་མངོན་པར་དད་

པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། འབྱུང་པོ་དང་། ཡི་དགས་དང་། ཤ་ཟ་དང་། སྨྱོ་བྱེད་དང་། བརྗེད་བྱེད་དང་། སྒྲུབ་པ་དང་། སྦྲུལ་འཛིན་བཅས་དང་གནོན་པོ་ཚད་མེད་
དཔག་ཏུ་མེད་གྲངས་མེད་པ་རྣམས་དང་། ལྷའི་བུ་ཉི་མ་དང་། ལྷའི་བུ་ཟླ་བ་དང་། དུས་ཚིགས་ཀྱི་ལྷ་དང་། ནུབ་ཀའི་ལྷ་དང་། དུས་ཀྱི་ལྷ་ཐམས་ཅད་དང་། གནམ་སའི་ལྷ་རྣམས་དང་ཡང་ཐབས་ཅིག་གོ། །དེ་ལྟར་ཡང་བཅོམ་ལྡན་འདས་དེ་ཆོས་ཀྱི་འཁོར་ལོ་ནི་ཤིན་ཏུ་བསྐོར་སངས་
རྒྱས་ཀྱི་མཛད་པ་ནི་ཤིན་ཏུ་ཡོངས་སུ་མཐར་ཕྱིན། བསོད་ནམས་དང་ཡེ་ཤེས་ཀྱི་ཚོགས་ནི་ཤིན་ཏུ་ཡོངས་སུ་རྫོགས་ཐམས་ཅད་མཁྱེན་པ་ཉིད་དང་། བྱང་ཆུབ་ཆེན་པོ་དང་། ཕ་རོལ་ཏུ་ཕྱིན་པ་དང་། ས་བརྙེས་པས་ནི་ཤིན་ཏུ་ཡོངས་སུ་བཟུང་སྐྱེས་བུ་ཆེན་པོའི་མཚན་འབར་བ་སུམ་ཅུ་
རྩ་གཉིས་ཀྱིས་ནི་སྐུ་བརྒྱན། དཔེ་བྱད་བཟང་པོ་བརྒྱད་ཅུས་ནི་ཡན་ལག་དང་། ཉིང་ལག་ཐམས་ཅད་རྣམ་པར་སྤྲས། སྤྱི་གཙུག་ནི་སེམས་ཅན་ཐམས་ཅད་ཀྱིས་བལྟར་མི་མཐོང་། བདུད་ཀྱི་ཚེར་མ་ཐམས་ཅད་ནི་དཀྲུགས། དེ་ཁོ་ན་ཉིད་མཁྱེན་པ་ཉིད་ནི་རིམ་པར་ཐུགས་སུ་ཆུད།
སྤྱན་རྣམ་པ་ལྔ་ནི་མངའ། རྣམ་པ་ཐམས་ཅད་ཀྱི་མཆོག་དང་ནི་ལྡན། ཐམས་ཅད་མཁྱེན་པའི་ཡེ་ཤེས་དང་ནི་ལྡན། སངས་རྒྱས་ཀྱི་ཆོས་ཐམས་ཅད་དང་ནི་ལྡན། བདུད་དང་ཕས་ཀྱིས་རྒོལ་བ་དང་། ངན་པའི་ཚོགས་ཅན་གྱི་ཚོགས་ཐམས་ཅད་ནི་བཅོམ། བརྗོད་པའི་སྒྲ་དང་།
ཚིགས་སུ་བཅད་པ་ནི་འཕགས། ཁྱུ་མཆོག་དང་སེང་གེའི་སྒྲ་ནི་སྒྲོགས། མ་རིག་པའི་མུན་པ་ནི་ཀུན་ཏུ་བསལ། བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མེད་དཔག་ཏུ་མེད་པར་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་།
ཤེས་རབ་དང་། ཐབས་དང་། སྟོབས་དང་། སྨོན་ལམ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་དང་། དཀའ་བ་སྤྱད་པས་མངོན་པར་གྲུབ་པའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྐུ་བརྒྱན་པས་ནི་མཛེས་ཤིང་རིན་པོ་ཆེ་རྡོ་རྗེའི་པདྨའི་

སྙིང་པོའི་སེང་གེའི་ཁྲི་ལ་ནི་བཞུགས་ཏེ། གདན་རིན་པོ་ཆེ་དང་། རྡོ་རྗེའི་པདྨའི་སེང་གེའི་ཁྲི་རི་རབ་ཙམ་རྡོ་རྗེ་དང་། རིན་པོ་ཆེ་དང་། མུ་ཏིག་དང་ལྡན་པའི་དྲིལ་བུ་གཡེར་ཀའི་དྲ་བ་དུ་མ་སིལ་སིལ་སྒྲ་འབྱུང་བ། རྡོ་རྗེ་དང་རིན་པོ་ཆེ་དུ་མའི་སྟེགས་བུ་ལ་རྩ་བ་ལེགས་པར་བརྟན་པ།
རྡོ་རྗེ་དང་རིན་པོ་ཆེ་དུ་མའི་ཆུ་སྲིན་གྱི་ཁ་ནས་བྱུང་བའི་མུ་ཏིག་དམར་པོའི་ཕྲེང་བ་དང་ལྡན་པའི་སྣམ་རྟེན་དང་བཅས་པ། རིན་པོ་ཆེ་དུ་མའི་པདྨའི་སྙིང་པོ་ལ་ཆགས་པའི་རིན་པོ་ཆེ་ཀེ་ཀེ་རུ་དང་། ཀེ་ཀེ་རུ་ཆེན་པོ་དང་། ཨནྡ་རྙིལ་དང་། མཐོ་ནག་ཆེན་པོ་དང་། དུན་ལས་
དུ་མའི་འོད་ཟེར་འབར་བས་སྣང་བར་གྱུར་པས་ཀུན་དུ་མཛེས་པ། རིན་པོ་ཆེ་དང་། རྡོ་རྗེའི་ཐུར་མས་བརྒྱན་པའི་གདུགས་ཡུ་བས་བསྟོད་པ་བྱེ་བ་ཁྲག་ཁྲིག་འབུམ་ཕྲག་དུ་མས་གྲིབ་མར་བསྒྲིབས་ཤིང་བསྐྱབས་པ། དཔག་བསམ་གྱི་ཤིང་དུ་མས་མཛེས་པར་བྱས་པ་རྒྱ་ཆེ་བ་ལ་བཞུགས་ཏེ།
གསེར་གྱི་རི་བོ་ལྟར་དཔལ་གྱིས་འབར་བ། ཉི་མ་སྟོང་བས་ལྷག་པའི་འོད་ཀྱི་དཀྱིལ་འཁོར་འབྱོར་བས་ས་ཕྱོགས་མཛེས་པར་གྱུར་པ། ཟླ་བ་ཉ་བ་ལྟར་འཇིག་རྟེན་ཀུན་གྱིས་མཐོང་ན་དགའ་བ། དཔག་བསམ་གྱི་ཤིང་ལྗོན་པ་ཆེན་པོ་ལྟར་སངས་རྒྱས་ཀྱི་ཆོས་རྣམས་ཀྱིས་ཡང་དག་
པར་རྒྱས་པར་ཆོས་སྟོན་ཏེ། ཚངས་པར་སྤྱོད་པ་ཐོག་མར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་མ་འདྲེས་པ་ཡོངས་སུ་རྫོགས་པ་ཡོངས་སུ་དག་པ་ཡོངས་སུ་དཀར་བ་ཡང་དག་པར་སྟོན་ཏོ། །དེ་ནས་བཅོམ་ལྡན་འདས་ཀྱི་སྤྱི་གཙུག་གི་མཚམས་ཀྱི་མཛོད་སྤུ་
ནས་སངས་རྒྱས་ཀྱི་ཞིང་ཐམས་ཅད་ཀུན་དུ་སྟོན་པ་ཞེས་བྱ་བའི་འོད་ཟེར་གྱི་དྲ་བ་ཆེན་པོ་བྱུང་སྟེ། འོད་ཟེར་གྱི་དྲ་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བས་གསལ་བར་བྱས་པར་གྱུར་ཏོ། །གང་གཱའི་ཀླུང་གི་བྱེ་མ་ཇི་སྙེད་པ་དང་མཉམ་པའི་སངས་རྒྱས་
ཀྱི་ཞིང་དེ་དག་ཐམས་ཅད་ཀྱང་སྣང་བ་དེས་གསལ་བར་སྣང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཀྱང་སེང་གེའི་ཁྲི་དུ་མ་བཀོད་པའི་ཁང་པ་བརྩེགས་པའི་གཞལ་མེད་ཁང་རྣམས་ན་ཆོས་སྟོན་ཏོ། །ཉན་ཐོས་ཆེན་

པོ་དེ་དག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དག་དང་ཐབས་ཅིག་གོ། །དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་
དང་། ལྟོ་འཕྱེ་ཆེན་པོ་རྣམས་དང་ཡང་ཐབས་ཅིག་གོ། །དེ་དག་ཐམས་ཅད་ཀྱང་རྡོ་རྗེ་ལྷུན་པོ་ཆེན་པོའི་རྩེ་མོ་ཁང་པ་བརྩེགས་པའི་གཟུངས་ཡང་དག་པར་རབ་ཏུ་སྟོན་ཏོ། །དེ་དག་ཐམས་ཅད་ཀྱང་ཀུན་ཏུ་སྣང་ངོ་། །སྐད་ཅིག་དེ་ལ་སེམས་ཅན་དེ་དག་ཐམས་ཅད་བདེ་བ་ཐམས་ཅད་
ཀྱིས་ཚིམ་པར་གྱུར་ཏོ། །འོན་པ་རྣམས་ནི་སྒྲ་ཐོས་སོ། །ལོང་བ་རྣམས་ནི་མིག་ཐོབ་པོ། །སྨྱོན་པ་རྣམས་ནི་དྲན་པ་རྙེད་དོ། །ནད་པ་རྣམས་ནི་སོས་པར་གྱུར་ཏོ། །སྦྲུམ་མ་རྣམས་ནི་བདེ་བར་བཙས་སོ། །སེམས་ཅན་དམྱལ་བ་ཐམས་ཅད་ཀྱི་སྡུག་བསྔལ་རྣམས་ནི་མེད་
པར་གྱུར་ཏོ། །ཡུད་ཙམ་དེ་ལ་དུད་འགྲོའི་སྐྱེ་གནས་དང་། ཡི་དགས་ཀྱི་སྐྱེ་གནས་དང་། གཤིན་རྗེའི་འཇིག་རྟེན་རྣམས་ཀྱི་མིང་ཡང་མི་གྲགས་པར་གྱུར་ཏོ། །འཇིག་རྟེན་གྱི་བར་གང་དག་མུན་པ་མུན་ནག་དང་། མུན་པ་མུན་ནག་ཆེན་པོར་འདུག་པ་དེ་དག་ཐམས་ཅད་ཀྱང་
གསལ་བར་སྣང་བར་གྱུར་ཏོ། །དེར་སེམས་ཅན་གང་དག་སྐྱེས་པ་དེ་དག་ཐམས་ཅད་དང་། སེམས་ཅན་གཞན་འདིར་སྐྱེས་པ་རྣམས་ཀྱང་གཅིག་གིས་གཅིག་ཤེས་སོ། །དེ་ནས་སེམས་ཅན་དེ་དག་ཐམས་ཅད་ཀྱིས་ངོ་མཚར་རྨད་དུ་བྱུང་བའི་ཆོས་ཀྱི་དགའ་བ་ཐོབ་སྟེ། བདེ་བ་མཆོག་
གིས་ཚིམ་པར་གྱུར་ནས་ཀུན་དུ་བལྟས་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་སྟེ། དེ་དག་གིས་གསེར་གྱི་མཆོད་སྡོང་ལྟར་དཔལ་གྱིས་འབར་ཞིང་རང་གི་གཟི་བརྗིད་ཀྱིས་མངོན་པར་འཕགས་པ་དེ་མཐོང་ནས་དེ་ཉིད་ལ་སྐྱབས་སུ་དོང་ངོ་། །
སྐྱབས་སུ་དོང་མ་ཐག་ཏུ་དེ་དག་ཐམས་ཅད་དེ་བཞིན་གཤེགས་པའི་འཁོར་གྱི་དཀྱིལ་འཁོར་དེ་ཉིད་དུ་བདག་སོན་པ་སྙམ་དུ་ཤེས་སོ། །སྣང་བ་དེས་བདུད་ཀྱི་ཁྱིམ་ཐམས་ཅད་ཀུན་དུ་འབར་རབ་ཏུ་འབར་ཀུན་ཏུ་རབ་ཏུ་མཆེད་ཅིང་འབར་ཏེ། མེ་ལྕེ་གཅིག་ཏུ་གྱུར་བར་ཀུན་དུ་སྣང་ངོ་། །

བདུད་ཀྱི་རིས་ཀྱི་ལྷ་དེ་དག་ཀྱང་སྐད་ཅིག་དེ་ལ་ཉམ་ཐག་པའི་སྒྲར་ངུ་ཞིང་སྐྲག་ནས་བྱེར་རོ། །བདུད་སྡིག་ཅན་ཡང་བཞིན་བཟང་པོ་རྙི་རྙི་པོར་གྱུར་ཅིང་ལུས་རྔུལ་ནས་བདུད་ཀྱི་རིས་ཀྱི་ལྷའི་བུ་ཐམས་ཅད་ལ་སྨྲས་པ། གྲོགས་པོ་དག་བདུད་ཀྱི་ཁྱིམ་ཐམས་ཅད་ཀུན་དུ་
འབར། རབ་ཏུ་འབར་ཀུན་དུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པ་དང་། དགེ་སྦྱོང་གཽ་ཏ་མ་རི་རབ་ཀྱི་རྩེ་མོའི་ཁང་པ་བརྩེགས་པ་ན་ཆོས་སྟོན་པ་འདི་ལ་ལྟོས། དེས་བདག་ཅག་ཕུང་ངོ་། །ཐོ་བཙམས་སོ། །ཕྱོགས་གང་དུ་གནས་གཏོལ་མེད་དོ། །ལོངས་ལ་དགེ་སྦྱོང་
གཽ་ཏ་མ་དེའི་གན་དུ་སོང་སྟེ་བདུད་ཀྱི་ཡུལ་འདི་ཐལ་བར་མ་གྱུར་གྱི་བར་དུ་གཞོམ་མོ། །དེ་སྐད་ཅེས་སྨྲས་པ་དང་། བདུད་ཀྱི་རིས་ཀྱི་ལྷའི་བུ་དེ་དག་ཐམས་ཅད་ཀྱིས་རྗེ་བཀའ་བཞིན་འཚལ་ཞེས་སྨྲས་ནས། རང་རང་གི་གནས་སུ་དོང་སྟེ། ལག་ན་མཚོན་ཆ་སྣ་ཚོགས་ཅན་གོ་ཆ་སྣ་
ཚོགས་བགོས་པ། ཆ་བྱད་དང་རྒྱན་སྣ་ཚོགས་ཅན་མཆེ་བ་མི་བཟད་པར་འཇིགས་སུ་རུང་བ་བཞིན་མི་སྡུག་པར་བསྒྱུར་བ་མིག་དང་བཞིན་དང་སྐྲ་ཀུན་དུ་འབར་ཞིང་རབ་ཏུ་འབར་བ་དག་སྐད་ཅིག་དེ་ཉིད་ལ་གཅིག་ཏུ་འདུས་ནས་བདུད་སྡིག་ཅན་ག་ལ་བ་དེར་དོང་སྟེ་ཕྱིན་ནས་བདུད་སྡིག་ཅན་
ལ་འདི་སྐད་ཅེས་སྨྲས་སོ། །བཞེངས་བཞེངས་ཐོག་མར་བཞུད་ལ་ཇི་ཙམ་དུ་དགེ་སྦྱོང་གཽ་ཏ་མ་ཉན་ཐོས་དང་། བྱང་ཆུབ་སེམས་དཔའི་དགེ་འདུན་དང་བཅས་པ་དེ་ཅི་ནས་ཀྱང་ཕྱིས་བདག་ཅག་གི་ཡུལ་དུ་གནོད་པ་ཅུང་ཟད་ཀྱང་མི་བསྐྱེད་པ་དང་། བདག་ཅག་གི་ཡུལ་གནོད་པར་མི་
འགྱུར་བ་དེང་ཉིད་དུ་ཕྱེ་མར་བརླག་གོ། །རྣམ་པར་གཞོམ་མོ། །དེ་ནས་བདུད་སྡིག་ཅན་དགའ་ཞིང་མགུ་སྟེ། ཤིན་ཏུ་དགའ་བས་སྤུའི་ཁུང་བུ་ཁྱབ་ནས་སྐད་ཅིག་དེ་ཉིད་ལ་བདུད་ཀྱི་རིས་ཀྱི་ལྷའི་བུ་ཐམས་ཅད་དང་ལྷན་ཅིག་ཏུ་བདུད་ཀྱི་རྣམ་པར་འཕྲུལ་བ་ཆེན་པོ་དང་བདུད་ཀྱི་སྡེ་
ཆེན་པོས་བར་སྣང་དཔག་ཚད་སྟོང་ཕྲག་བརྒྱད་ཅུ་རྩ་བཞིར་ཁྱབ་པར་བྱས་ཏེ་དུང་དང་རྔ་དང་། རྫ་རྔ་དང་། འཁར་རྔ་དང་། རྒྱུད་གཅིག་པ་དང་། ལྕགས་ཀྱི་སིལ་དཀྲོལ་དང་། རྔ་བོ་ཆེ་བརྡུང་ཞིང་ཧུ་ཧུ་ཞེས་བྱ་བ་དང་། པི་ཙི་ཞེས་བྱ་བ་དང་། ཟུང་ཤིག་ཟུང་ཤིག །སོད་ཅིག་

སོད་ཅིག་ཅེས་བྱ་བའི་སྒྲ་འབྱིན་ཅིང་གཤོལ་དང་། གཏུན་ཤིང་དང་། གཏུན་རྐེད་ཉག་དང་། ཕུར་བུ་དང་། རྡོ་རྗེ་རྩེ་གཅིག་པ་དང་། མདའ་བོ་ཆེ་དང་། མདུང་ཐུང་དང་། རྩེ་གསུམ་པ་དང་། རལ་གྲི་དང་། འཁོར་ལོ་དང་། གཞུ་དང་མདའ་ལ་སོགས་པའི་མཚོན་ཆ་ལག་ན་
ཐོགས་ཤིང་བཅོམ་ལྡན་འདས་ག་ལ་བ་དེར་སོང་སྟེ་སྐད་ཅིག་དེ་ཉིད་ལ་ཨ་ལ་ལ་ཞེས་བྱ་བའི་སྒྲ་ཕྱུང་ནས་བཅོམ་ལྡན་འདས་ལ་མཚོན་ཆ་ཐམས་ཅད་ཀྱི་ཆར་ཕབ་པ་དང་། སངས་རྒྱས་ཀྱི་མཐུས་མཚོན་ཆ་དེ་དག་ཐམས་ཅད་མེ་ཏོག་གི་གདུགས་ཀྱི་སྤྲིན་ཆེན་པོར་གྱུར་པར་སྣང་ངོ་། །
བདུད་ཀྱི་སྒྲ་དེ་དག་ཐམས་ཅད་ཀྱང་སངས་རྒྱས་ཀྱི་སྒྲ་དང་། ཆོས་ཀྱི་སྒྲ་དང་། དགེ་འདུན་གྱི་སྒྲ་དང་། ཡང་དག་པར་བགྲོ་བའི་སྒྲ་རྣམས་སུ་གྲག་གོ། །བདུད་སྡིག་ཅན་ནི་ཞགས་པ་ལྔའི་བཅིངས་བས་བདག་ཉིད་བཅིངས་པར་མཐོང་ངོ་། །དེ་ནས་བདུད་ཀྱི་རིས་ཀྱི་
ལྷའི་བུ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ངོ་མཚར་ཆེན་པོ་དེ་མཐོང་ནས་ངོ་མཚར་དུ་གྱུར་ཅིང་དགའ་བ་ཐོབ་སྟེ་བཅོམ་ལྡན་འདས་དེ་ཉིད་ལ་སྐྱབས་སུ་དོང་ངོ་། །བདུད་སྡིག་ཅན་ནི་བདག་ཉིད་དགྲོལ་བར་འདོད་ན་འགྲོལ་མ་ནུས་ཏེ། དེ་བཞིན་
གཤེགས་པའི་འཁོར་གྱི་ཁྱམས་སུ་བཅོམ་ལྡན་འདས་ཀྱི་སྤྱན་སྔར་ཤིང་རྩ་བ་ནས་བཅད་པ་བཞིན་དུ་རྡོ་རྗེའི་འཁོར་གྱི་ཁྱམས་ཆེན་པོར་འགྱེལ་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་བྱམས་པ་ཆེན་པོའི་ཐུགས་དང་ཐུགས་རྗེ་ཆེན་པོས་བརླན་པའི་སྤྱན་གྱིས་དེ་བཞིན་གཤེགས་
པའི་འཁོར་གྱི་ཁྱམས་ཐམས་ཅད་དུ་གཟིགས་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ་བདུད་སྡིག་ཅན་འཁོར་གྱི་ཁྱམས་འདི་ནས་སློང་ལ་སྟན་ལ་ཞོག་སྟེ། རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་
འཛིན་གྱི་རྣམ་པར་འཕྲུལ་པའི་བྱིན་གྱི་རླབས་བསམ་གྱིས་མི་ཁྱབ་པ་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་གང་གིས། བདུད་ཀྱི་རིས་ཀྱི་ལྷའི་བུ་འདི་དག་དང་། བདུད་སྡིག་ཅན་འདི་སངས་རྒྱས་ལ་སྐྱབས་སུ་འདོང་བ་དང་། གཞན་ཡང་གང་དག་སྡང་

བ་བགེགས་དང་། ལོག་འདྲེན་དང་། ཡི་དགས་དང་། བརྗེད་བྱེད་དང་། འབྱུང་པོ་དང་། གདོན་དང་། མཁའ་འགྲོ་མ་དང་། སྒྲུབ་པ་དང་། སྦྲུལ་འཛིན་བཅས་དང་། གནོན་པོ་དང་། ཟས་སུ་བཙས་པ་ཟ་བ་ལ་སོགས་པ་སྡང་བའི་སེམས་དང་ལྡན་པ།
རབ་ཏུ་སྡང་བའི་སེམས་དང་ལྡན་པ། དེ་བཞིན་གཤེགས་པའི་བསྟན་པ་ལ་མ་གུས་པ། དེ་བཞིན་གཤེགས་པའི་ཆོས་ཉིད་ཁོང་དུ་མ་ཆུད་པ། དེ་དག་ཐམས་ཅད་གང་གིས་འཛུད་པ་དང་། དཀོན་མཆོག་གསུམ་ལ་སྐྱབས་སུ་འགྲོ་བར་བྱེད་པ་ཡང་སྟོན་ཅིག །དེ་ཅིའི་ཕྱིར་ཞེ་ན།
དེས་ངན་འགྲོ་ལོག་པར་ལྟུང་བར་འགྲོ་བའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། གསང་བ་པའི་བདག་པོ་ལག་ན་རྡོ་རྗེས། བཅོམ་ལྡན་འདས་ཀྱི་བཀའ་མ་ཉན་ནས་རིན་པོ་ཆེའི་པདྨའི་རྡོ་རྗེའི་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་
པའི་ལྷ་ང་རིན་པོ་ཆེའི་པདྨའི་སྙིང་པོ་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སེམས་ཅན་ཀུན་གྱི་ཉོན་མོངས་པ། །གཞིག་པའི་
སླད་དུ་འདྲེན་པ་བྱུང་། །ཁྱོད་ནི་བདུད་རྣམས་ཀུན་ལས་རྒྱལ། །འཇིག་རྟེན་རྩ་ལག་གཅིག་བུ་ཁྱོད། །ཐར་པའི་གྲོང་ཁྱེར་འཇུག་པའི་ལམ། །ཡེ་ཤེས་མ་ལུས་ཁྱོད་གཅིག་པུས། །ཡང་དག་བརྙེས་ནས་ཐུགས་རྗེ་ཡིས། །བརླན་པའི་ཐུགས་ཀྱིས་བསྟན་པ་མཛད། །
ཁྱོད་སྔོན་སྦྱིན་དང་ཚུལ་ཁྲིམས་དང་། །བཟོད་དང་བརྩོན་འགྲུས་བསམ་གཏན་དང་། །ཤེས་རབ་ལ་སོགས་ཡོན་ཏན་གྱིས། །བདག་མཛད་སླད་ཀྱིས་སེམས་ཅན་བཙུད། །ཁྱོད་ཀྱིས་ཆོས་རྣམས་སྐྱེ་མེད་པར། །བཤད་ཅིང་དེ་བཞིན་རྣམ་ཕྱེ་ཡང་། །འབྲས་བུར་
དོགས་པ་མ་མཆིས་པ། །ཀྱེ་མ་མགོན་པོ་ཁྱོད་ཀྱིས་བཤད། །འཁོར་ལོ་ཡན་ལག་བཅུ་གཉིས་པ། །ཁྱོད་ཉིད་མཁྱེན་ནས་རབ་ཏུ་བསྐོར། །མུ་སྟེགས་ཅན་དང་བདུད་བཏུལ་ཏེ། །ཆོས་ཀྱི་སྣང་བ་གསལ་བར་མཛད། །ཉོན་མོངས་བྲག་ཆེན་རྣམ་ཀུན་དུ། །ཡེ་ཤེས་རྡོ་རྗེས་

རབ་བཅོམ་ནས། །སུས་ཀྱང་ཐོབ་པར་མ་གྱུར་པའི། །བྱང་ཆུབ་བླ་ན་མེད་པ་བརྙེས། །གང་གི་མཚན་ཡང་རྫོགས་པ་ཡི། །བྱང་ཆུབ་ས་བོན་ཉིད་འགྱུར་བ། །ཁྱོད་ནི་འཇིག་རྟེན་མཆོག་གཅིག་པུ། །དམ་པ་རབ་སྦྱིན་བདག་པོ་ལགས། །ཁྱོད་ནི་མགོན་པོ་ཁྱོད་ནི་ཕ། །
ཁྱོད་སྐྱབས་ཁྱོད་ནི་དཔུང་གཉེན་ལགས། །ཐུགས་རྗེ་ཆེན་པོ་ཡེ་ཤེས་ཉིད། །མྱ་ངན་འདས་གནས་གཅིག་པུ་ཁྱོད། །ཁྱོད་ཉིད་གཤེགས་ནས་སེམས་ཅན་རྣམས། །སེམས་ཅན་དམྱལ་ལས་རྣམ་པར་གྲོལ། །རང་གི་སྐུ་ཡང་ཡོངས་བཏང་ནས། །ཁྱོད་ཀྱིས་སྲོག་ཆགས་
རྣམས་ཀྱང་བསྲུངས། །ལུས་ཅན་ཀུན་གྱིས་མ་ཐོབ་པའི། །ཡེ་ཤེས་ཁྱོད་ཀྱིས་བརྙེས་གྱུར་ནས། །གྲོལ་ཏེ་འཇིག་རྟེན་རྣམས་ཀྱང་འགྲོལ། །ཀྱེ་མ་ཁྱོད་ནི་རྩ་ལག་བཟང་། །མགོན་པོ་ཁྱོད་ཀྱི་འོད་ཟེར་གྱི། །དྲ་བས་འཇིག་རྟེན་ཁམས་རྣམས་ཁྱབ། །མྱ་ངན་འདས་ལས་
ལྷག་པ་བདེ། །ལུས་ཅན་ཀུན་གྱིས་ཐོབ་པར་མཛད། །ཁྱོད་ཀྱི་འོད་ཀྱི་གཟིས་བཅོམ་པས། །གཟའ་རྣམས་ཀུན་དང་དགུང་ཟླ་དང་། །གདུགས་རྣམས་དང་ནི་ཞུགས་རྣམས་དང་། །ནོར་བུ་ལྷ་མེར་མ་གྱུར་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཚུལ་དང་འདྲ་བའི་
ཚིགས་སུ་བཅད་པ་འདི་དག་གིས། བཅོམ་ལྡན་འདས་ལ་མངོན་པར་བསྟོད་ནས། ཡང་རིན་པོ་ཆེའི་པདྨའི་སྙིང་པོ་ལ་འདུག་སྟེ། བཅོམ་ལྡན་འདས་ལེགས་སོ་ཞེས་གསོལ་ནས། རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན། བདུད་ཀྱི་དཀྱིལ་འཁོར་ཐམས་
ཅད་འཇོམས་པར་བྱེད་པ་ཞེས་བྱ་བ་ལ་སྙོམས་པར་ཞུགས་སོ། །གསང་བ་པའི་བདག་པོ་ལག་ན་རྡོ་རྗེས་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་འདི་ལ་སྙོམས་པར་ཞུགས་མ་ཐག་ཏུ། དེ་ནས་དེའི་
ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས། ཀུན་དུ་རབ་ཏུ་གཡོས་ཏེ། ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་

དམའ། མཐའ་མཐོ་ན་དབུས་དམའ། དབུས་མཐོ་ན་ནི་མཐའ་དམའ་བར་གྱུར་ཏོ། །ཕྱོགས་ཐམས་ཅད་དང་ཕྱོགས་མཚམས་ཐམས་ཅད་ཀྱང་དགའ་བ་དང་། ཡིད་བདེ་བ་སྐྱེས་པར་གྱུར་ནས། ལྷམ་མེ། ལྷན་ནེ། ལྷང་ངེའོ། །གསང་བ་པའི་བདག་
པོ་ལག་ན་རྡོ་རྗེའི་ཡན་ལག་དང་ཉིང་ལག་གི་མཚམས་ཐམས་ཅད་ནས་རྡོ་རྗེ་ཀུན་དུ་འབར་བ། རབ་ཏུ་འབར་བ་ཀུན་དུ་རབ་ཏུ་མཆེད་ཅིང་འབར་བ་མེ་ལྕེ་གཅིག་ཏུ་གྱུར་པ་དག་བྱུང་བར་ཀུན་དུ་སྣང་ངོ་རྡོ་རྗེ་འབར་བའི་སྣང་བ་དེས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་
དཔག་ཏུ་མེད་པ་ཇི་སྙེད་པ་དག་ན། སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་
རྫོགས་པ། ཡོངས་སུ་དག་པ། ཡོངས་སུ་བྱང་བ། ཡང་དག་པར་སྟོན་པ། ཉན་ཐོས་ཀྱི་དགེ་འདུན་དང་བཅས་པ། བྱང་ཆུབ་སེམས་དཔའི་དགེ་འདུན་དང་བཅས་པ་དེ་དག་འཁོར་གྱི་ཁྱམས་རྒྱ་ཆེ་ཞིང་རྒྱ་ཆེ་བ་དག་ཀུན་དུ་སྣང་ངོ་། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་
དེ་བཞིན་གཤེགས་པ་དེ་དག་གི་སྤྱན་སྔ་ན། རྡོ་རྗེ་འབར་བའི་སྣང་བ་རྒྱ་ཆེན་པོ་དེས་སྣང་བར་གྱུར་ནས་སངས་རྒྱས་བཅོམ་ལྡན་འདས་དེ་དག་ལ་སོ་སོར་ཞུས་པ། བཅོམ་ལྡན་འདས་སྣང་བ་རྒྱ་ཆེན་པོ་ཀུན་དུ་གདའ་བ་འདི་སུའི་ལགས། དེ་ནས་སངས་རྒྱས་བཅོམ་ལྡན་འདས་དེ་དག་གིས་
སོ་སོའི་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་མི་མཇེད་ཀྱི་འཇིག་རྟེན་གྱི་ཁམས་ན་རི་རབ་ཀྱི་སྟེང་ན་ཆོས་སྟོན་ཏེ། བཅོམ་ལྡན་འདས་ངེས་བདུད་
སྡིག་ཅན་ཞགས་པའི་བཅིང་བ་ལྔས་བཅིངས་ཏེ། བཅོམ་ལྡན་འདས་ཀྱི་སྤྱན་སྔར་འགྱེལ་བ་གཟིགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེ་ཞེས་བྱ་བ་ལ་འདི་སྐད་དུ། གསང་བ་བའི་བདག་པོ་ལག་ན་རྡོ་རྗེ་ཁྱོད་ཀྱིས་རང་གི་རྫུ་འཕྲུལ་

གྱི་རྣམ་པར་འཕྲུལ་པའི་ཆོ་འཕྲུལ་སྟོན་ཅིག་ཅེས་བཀའ་སྩལ་ཏོ། །རིགས་ཀྱི་བུ་དག་འདི་ནི་རྡོ་རྗེས་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། དེའི་རྡོ་རྗེའི་རྣམ་པར་འཕྲུལ་བ་ཆེན་པོའི་བྱིན་གྱིས་བརླབས་སོ། །དེ་སྐད་ཅེས་བཀའ་སྩལ་ཏེ། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་གནང་ནས། རིགས་ཀྱི་བུ་དེ་དག་ཐམས་ཅད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཕྱག་འཚལ་ཏེ། བྱང་ཆུབ་སེམས་དཔའ་སེམས་དཔའ་ཆེན་
པོའི་རྣམ་པར་འཕྲུལ་བའི་ཆོ་འཕྲུལ་བསམ་གྱིས་མི་ཁྱབ་པས། འཇིག་རྟེན་གྱི་ཁམས་མི་མཇེད་འདིར་ལྷགས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་གསང་བའི་བདག་པོ་ལག་ན་རྡོ་རྗེ་ལ་མཆོད་པའི་སྤྲིན་
དང་། གདུགས་ཀྱི་སྤྲིན་དང་། རྒྱན་ཕྲེང་གི་སྤྲིན་དང་། དབུ་རྒྱན་གྱི་སྤྲིན་དང་། མེ་ཏོག་གི་སྤྲིན་དང་། ན་བཟའི་སྤྲིན་ཆེན་པོས་མཆོད་པ་ཆེན་པོ་བྱས་ནས། ནམ་མཁའི་དཀྱིལ་ན་འཁོད་བཞིན་དུ་བཅོམ་ལྡན་འདས་ཤཱཀྱ་ཐུབ་པ་ལ་ལན་བདུན་བསྐོར་བ་བྱས་ཏེ། པུས་མོ་
གཡས་པའི་ལྷ་ང་རིན་པོ་ཆེའི་པདྨའི་རྡོ་རྗེའི་སྟན་ལ་བཙུགས་ནས། བཅོམ་ལྡན་འདས་ལ་ལོགས་སུ་བལྟ་ཞིང་། བཅོམ་ལྡན་འདས་ལ་ཕྱག་འཚལ་བ་དང་། དེ་བཞིན་གཤེགས་པས་གནང་ནས། རང་རང་གི་རིན་པོ་ཆེའི་པདྨའི་རྡོ་རྗེའི་སྟན་དེ་དག་ལ་འཁོད་པར་གྱུར་ཏོ། །དེའི་
ཚེ་ཤར་ཕྱོགས་ལོགས་ན་འཇིག་རྟེན་གྱི་ཁམས་རྡོ་རྗེའི་ཏོག་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ཏེ། འདི་ལྟར་རྡོ་རྗེའི་རི་རབ་ཆེན་པོའི་རྩེ་
མོའི་ཁང་པ་བརྩེགས་པའི་གཟུངས་འདི་ཉིད་ལ་བརྩམས་ཏེ་ཆོས་ཀྱང་སྟོན་ཏོ། །རྡོ་རྗེ་འབར་བའི་སྣང་བ་དེས་ཀྱང་འཇིག་རྟེན་གྱི་ཁམས་ཇི་སྙེད་པ་དེ་དག་ཐམས་ཅད་ཀུན་ནས་སྣང་བར་གྱུར་ཏོ། །དེ་ནས་འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་

སྙིང་པོ་ཞེས་བྱ་བ་དེ་བཞིན་གཤེགས་པ་དེའི་འཁོར་གྱི་ཁྱམས་སུ་འདུས་ཏེ་འདུག་པར་གྱུར་པ་དེས་ངོ་མཚར་དེ་མཐོང་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ཞེས་བྱ་བ་དེ་ལ་ཞུས་པ།
བཅོམ་ལྡན་འདས་རྡོ་རྗེ་འབར་བའི་སྣང་བ་འདི་ལྟ་བུ་གང་གིས་འཇིག་རྟེན་གྱི་ཁམས་འདི་ཐམས་ཅད་སྣང་བར་གྱུར་ཏེ། སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་རྒྱུན་ཆད་ཅིང་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་དང་། གཤིན་རྗེའི་འཇིག་རྟེན་
གྱི་སྡུག་བསྔལ་ཐམས་ཅད་མི་གདའ་བར་གྱུར། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟེ་འཕྱེ་ཆེན་པོ་ལ་སོགས་པ་འཇིག་རྟེན་ན་རྫུ་འཕྲུལ་ཆེ་ཞིང་དབང་ཆེ་བར་གྲགས་པ་ཐམས་ཅད་ཀྱང་ཀུན་ནས་མཆོད་པའི་
སྤྲིན་ཆེན་པོས་དགའ་བ་དང་ཡིད་བདེ་བ་སྐྱེས་ཏེ། ནུབ་ཕྱོགས་སུ་མཆི་བར་གདའ་བ་འདི་སུ་ཡི་ལགས། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་
སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ནུབ་ཕྱོགས་ཀྱི་ལོགས་ན་མི་མཇེད་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རྡོ་རྗེ་ཆེན་པོའི་རི་རབ་ཀྱི་རྩེ་མོའི་ཁང་པ་བརྩེགས་པ་ན་རྡོ་རྗེ་ཆེན་
པོའི་རི་རབ་ཀྱི་རྩེ་མོའི་ཁང་པ་བརྩེགས་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་སྟོན་ཏོ། །བཅོམ་ལྡན་འདས་དེས་སྤྱི་གཙུག་གི་མཚམས་ཀྱི་མཛོད་སྤུ་ནས་འོད་ཟེར་གྱི་དྲ་བ་ཆེན་པོ་ཕྱུང་སྟེ། འོད་ཟེར་གྱི་དྲ་བ་ཆེན་པོ་དེས་འཇིག་རྟེན་གྱི་ཁམས་དེར་བདུད་སྡིག་ཅན་བསྐུལ་མ་ཐག་ཏུ་ཀུན་
དུ་ཁྲོས་ནས་ལྷའི་བུ་ཐམས་ཅད་དང་། གཞན་ཡང་བདུད་ཀྱི་རིས་ཀྱི་ལྷའི་བུ་རྣམས་དང་། དཔུང་གི་ཚོགས་ཆེན་པོ་དང་ལྷན་ཅིག་ཏུ་བཅོམ་ལྡན་འདས་དེ་ལ་གཙོ་བའི་ཕྱིར་ལྷགས་པ་དང་། དེ་ཡང་སངས་རྒྱས་ཀྱི་མཐུས་དེ་བཞིན་གཤེགས་པའི་རྡོ་རྗེའི་འཁོར་གྱི་ཁྱམས་དེ་ཉིད་དུ་ཞགས་པ་

ལྔའི་བཅིང་བས་བཅིངས་པས་བཅོམ་ལྡན་འདས་ཀྱི་སྤྱན་སྔར་འགྱེལ་ཏེ། དེ་ལ་ཐུགས་བརྩེ་བའི་ཕྱིར་བཅོམ་ལྡན་འདས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེ་ལ་སྟོན་ཅིག་པར་བཀའ་ལུང་བྱིན་ནས། གསང་བ་བའི་བདག་པོ་ལག་ན་རྡོ་རྗེ་
དེས་རྡོ་རྗེའི་རྣམ་པར་ཐར་པའི་སྒོ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཡན་ལག་དང་ཉིང་ལག་གི་མཚམས་ཐམས་ཅད་ནས་རྡོ་རྗེ་རྣམས་བསྟན་ཏེ། འདི་ནི་རྡོ་རྗེ་དེ་དག་ཉིད་ཀྱི་རྡོ་རྗེ་འབར་བའི་སྣང་བའོ། །རིགས་ཀྱི་བུ་རྡོ་རྗེ་འབར་བའི་སྣང་བ་དེས་ཀྱང་ཕྱོགས་
བཅུའི་འཇིག་རྟེན་གྱི་ཁམས་ཚད་མེད་གྲངས་མེད་དཔག་ཏུ་མེད་པ་རྣམས་སུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དང་མཉམ་པ་ཇི་སྙེད་པ་སྣང་བར་བྱས་ཏེ། འཇིག་རྟེན་གྱི་ཁམས་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཐམས་ཅད་ཀྱང་བསྐུལ། བྱང་
ཆུབ་སེམས་དཔའ་དེ་དག་གི་འཁོར་གྱི་དཀྱིལ་འཁོར་དེ་དག་ཀྱང་བསྐུལ་བས་ངོ་མཚར་ཐོབ་པར་གྱུར་པ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་སོ་སོར་ཞུས་སོ་རིགས་ཀྱི་བུ་དེ་ཉིད་ཀྱི་མཐུས། བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའི་སྤྱན་སྔ་ན་འདུག་ཅིང་བསྙེན་བཀུར་བྱེད་པ་ཡང་མཐོང་ངོ་། །དེ་སྐད་ཅེས་བཀའ་སྩལ་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་
འཇོམས་པ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་འཇིག་རྟེན་གྱི་ཁམས་མི་མཇེད་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་
བགྱི་བ་དང་། བསྙེན་བཀུར་བགྱི་བ་དང་། གསང་བ་པའི་བདག་པོ་ལག་ན་རྡོ་རྗེ་དེ་ཡང་བལྟ་བར་བགྱི་བའི་སླད་དུ་མཆིའོ། །དེ་སྐད་ཅེས་གསོལ་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པས་བྱང་ཆུབ་

སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེའི་དུས་ལ་བབ་པར་ཤེས་ན་སོང་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་བཅོམ་ལྡན་འདས་དེས་གནང་ནས། བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་དེ་ལ་ལན་བདུན་བསྐོར་བ་བྱས་ཏེ་འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས། ནམ་མཁའི་དཀྱིལ་གྱི་ལམ་ནས་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་
ཕྲག་དགུ་བཅུ་རྩ་དགུ་དང་ལྷན་ཅིག་ཏུ་བྱང་ཆུབ་སེམས་དཔའི་རྣམ་པར་འཕྲུལ་བ་ཆེན་པོ་དང་། བྱང་ཆུབ་སེམས་དཔའི་རྫུ་འཕྲུལ་ཆེན་པོས་འཇིག་རྟེན་གྱི་ཁམས་མི་མཇེད་འདི་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་དེ་དག་ཐམས་ཅད་དང་ལྷན་ཅིག་སྨྲ་བ་ན། བསོད་ནམས་ཀྱི་
ཚོགས་ཆེན་པོ་བསགས་པ་ལས་གྲུབ་པས་བྱིན་པའི་རིན་པོ་ཆེ་དེ་དག་ལས་འོད་ཟེར་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། ལྗང་སྔོན་དང་། ལྗང་སེར་དང་། བཙོད་ཀ་དང་། ཤེལ་དང་། དངུལ་དང་། ནོར་བུ་དང་། མུ་ཏིག་དང་། གསེར་དང་། པདྨ་རཱ་ག་དང་།
རྡོའི་སྙིང་པོ་དང་། ཀེ་ཀེ་རུ་དང་། ཀེ་ཀེ་རུ་ཆེན་པོ་དང་། ཨནྡ་རྙིལ་དང་། མཐོན་ཀ་ཆེན་པོ་དང་། དུན་ལས་དང་། གོ་མུ་ཏ་ར་ཀ་དང་། མུ་ཏིག་དམར་པོའི་ཁ་དོག་ལྟ་བུ་རྣམས་བྱུང་སྟེ། དེ་དག་གིས་ཐམས་ཅད་དང་ལྡན་པའི་འཇིག་རྟེན་གྱི་ཁམས་ལ་ལན་འབུམ་ཕྲག་དུ་མར་བསྐོར་བ་
བྱས་ཏེ་སྟེང་གི་བར་སྣང་ཁྱབ་པར་བྱས་ནས་ལྷའི་སྣང་བས་སྣང་བར་བྱས་ཏེ་འདུས་ནས་འཇའ་ལྟ་བུར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཞབས་མཚན་ཐམས་ཅད་ཕུན་སུམ་ཚོགས་པ། འཇམ་པ་
མཉེན་པ། རབ་ཏུ་གཞོན་པ་ཤ་རྒྱས་པ། སྣུམ་པ། ལོང་བུ་གཉིས་ཀྱི་རྩ་མི་མངོན་པ། པདྨ་གསར་དུ་ཁ་བྱེ་བ་ལྟ་བུ་དང་། དུང་དང་ཉ་དང་། རྡོ་རྗེ་དང་། རྒྱལ་མཚན་དང་། ལྕགས་ཀྱུ་དང་། པདྨ་དང་། ཆུ་སྲིན་མ་ཀ་རའི་མཚན་དང་ལྡན་པ་གཉིས་ལ་ལན་འབུམ་ཕྲག་དུ་མ་བསྐོར་བ་

བྱས་ནས་ནུབ་པར་གྱུར་ཏོ། །ནམ་མཁའི་དཀྱིལ་ན་འོད་ཟེར་རེ་རེའི་རྩེ་མོ་ལས་པདྨ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་ཚད་ཤིང་རྟའི་ཕང་ལོ་ཙམ་པ་རིན་པོ་ཆེ་སྣ་བདུན་གྱི་རྒྱུ་ལས་བྱུང་བ་འདི་ལྟ་སྟེ། གསེར་གྱི་རྒྱུ་ལས་བྱུང་བ་དང་། ཨནྡ་རྙིལ་དང་། དངུལ་དང་། བྱི་རུ་དང་། ཤེལ་དང་། ཀེ་
ཀེ་རུ་དང་། དུན་ལས་ཀྱི་རྒྱུ་ལས་བྱུང་བ་དག་འཐོན་ཏེ། དེ་ལ་གསེར་གྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི་ཨནྡ་རྙིལ་གྱི་རྒྱུ་ལས་བྱུང་བ་དག་གོ། །སྙིང་པོ་ནི་དངུལ་གྱི་རྒྱུ་ལས་བྱུང་བའོ། །ཟེ་བ་ནི་བྱི་རུའི་རྒྱུ་ལས་བྱུང་བའོ། །ཆུ་བ་ནི་ཤེལ་གྱི་རྒྱུ་ལས་བྱུང་བའོ། །ཟེ་འབྲུ་
ནི་ཀེ་ཀེ་རུའི་རྒྱུ་ལས་བྱུང་བའོ། །ཨནྡ་རྙིལ་གྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི་དངུལ་གྱི་རྒྱུ་ལས་བྱུང་བ་དག་གོ། །སྙིང་པོ་ནི་བྱི་རུའི་རྒྱུ་ལས་བྱུང་བའོ། །ཟེ་བ་ནི་ཤེལ་གྱི་རྒྱུ་ལས་བྱུང་བའོ། །ཆུ་བ་ནི་ཀེ་ཀེ་རུའི་རྒྱུ་ལས་བྱུང་བའོ། །ཟེ་འབྲུ་ནི་དུན་ལས་ཀྱི་རྒྱུ་ལས་བྱུང་བའོ། །
དངུལ་གྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི་བྱི་རུའི་རྒྱུ་ལས་བྱུང་བ་དག་གོ། །སྙིང་པོ་ནི་ཤེལ་གྱི་རྒྱུ་ལས་བྱུང་བའོ། །ཟེ་བ་ནི་ཀེ་ཀེ་རུའི་རྒྱུ་ལས་བྱུང་བའོ། །ཆུ་བ་ནི་དུན་ལས་ཀྱི་རྒྱུ་ལས་བྱུང་བའོ། །ཟེ་འབྲུ་ནི་གསེར་གྱི་རྒྱུ་ལས་བྱུང་བའོ། །བྱི་རུའི་རྒྱུ་ལས་བྱུང་བའི་པདྨ་རྣམས་
ཀྱི་འདབ་མ་ནི་ཤེལ་གྱི་རྒྱུ་ལས་བྱུང་བ་དག་གོ། །སྙིང་པོ་ནི་ཀེ་ཀེ་རུའི་རྒྱུ་ལས་བྱུང་བའོ། །ཟེ་བ་ནི་དུན་ལས་ཀྱི་རྒྱུ་ལས་བྱུང་བའོ། །ཆུ་བ་ནི་གསེར་གྱི་རྒྱུ་ལས་བྱུང་བའོ། །ཟེ་འབྲུ་ནི་ཨནྡ་རྙིལ་གྱི་རྒྱུ་ལས་བྱུང་བའོ། །ཤེལ་གྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི་ཀེ་ཀེ་
རུའི་རྒྱུ་ལས་བྱུང་བ་དག་གོ། །སྙིང་པོ་ནི་དུན་ལས་ཀྱི་རྒྱུ་ལས་བྱུང་བའོ། །ཟེ་བ་ནི་གསེར་གྱི་རྒྱུ་ལས་བྱུང་བའོ། །ཆུ་བ་ནི་ཨནྡ་རྙིལ་གྱི་རྒྱུ་ལས་བྱུང་བའོ། །ཟེ་འབྲུ་ནི་དངུལ་གྱི་རྒྱུ་ལས་བྱུང་བའོ། །ཀེ་ཀེ་རུའི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི་དུན་ལས་ཀྱི་རྒྱུ་ལས་བྱུང་
བ་དག་གོ། །སྙིང་པོ་ནི་གསེར་གྱི་རྒྱུ་ལས་བྱུང་བའོ། །ཟེ་བ་ནི་ཨནྡ་རྙིལ་གྱི་རྒྱུ་ལས་བྱུང་བའོ། །ཆུ་བ་ནི་དངུལ་གྱི་རྒྱུ་ལས་བྱུང་བའོ། །ཟེ་འབྲུ་ནི་བྱི་རུའི་རྒྱུ་ལས་བྱུང་བའོ། །དུན་ལས་ཀྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི་གསེར་གྱི་རྒྱུ་ལས་བྱུང་བདག་གོ། །སྙིང་པོ་

ནི་ཨནྡ་རྙིལ་གྱི་རྒྱུ་ལས་བྱུང་བའོ། །ཟེ་བ་ནི་དངུལ་གྱི་རྒྱུ་ལས་བྱུང་བའོ། །ཆུ་བ་ནི་བྱི་རུའི་རྒྱུ་ལས་བྱུང་བའོ། །ཟེ་འབྲུ་ནི་ཤེལ་གྱི་རྒྱུ་ལས་བྱུང་བའོ། །དེ་བཞིན་དུ་སྦྱར་ཏེ། དེ་ལྟར་རིན་པོ་ཆེ་རྣམ་པ་དུ་མའི་རྒྱུ་ལས་བྱུང་བའི་པདྨ་དག་གོ། །རིན་པོ་ཆེའི་པདྨ་རེ་རེ་ལ་ཡང་
ས་བཅུ་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་མཛེས་པའི་སྤྱོད་ལམ་ཕུན་སུམ་ཚོགས་པ་དག་ཏིང་ངེ་འཛིན་ལ་སྙོམས་པར་ཞུགས་སོ། །བྱང་ཆུབ་སེམས་དཔའ་རེ་རེའི་ལྟེ་བ་ནས་ཀྱང་འོད་ཟེར་འབུམ་འབུམ་འབྱུང་ངོ་། །འོད་ཟེར་གྱི་རྩེ་མོ་རེ་རེ་ལས་ཀྱང་
རིན་པོ་ཆེ་ཐམས་ཅད་ཀྱི་རྒྱུ་ལས་བྱུང་བའི་ཁང་པ་བརྩེགས་པ་ནོར་བུ་དང་། རིན་པོ་ཆེ་རྣམ་པ་སྣ་ཚོགས་ཀྱི་སྟེགས་བུས་བསྐོར་བ། ཤེལ་གྱི་རྒྱུ་ལས་བྱུང་བའི་ཟླ་བས་སྤྲས་པའི་ཁང་བྲན་གྱི་རྩེ་མོ་ལ་སེང་གེའི་རྣ་བའི་སྟེང་ན་རིན་པོ་ཆེའི་རྒྱལ་མཚན་དང་། བ་དན་དང་། རྣམ་པར་
རྒྱལ་བའི་བ་དན་དཔྱངས་པས་ནམ་མཁའ་ཀུན་དུ་ཁེབས་པས་པདྨ་རཱ་ག་དང་། ཨནྡ་རྙིལ་དང་། མ་རྒད་དང་། བཻཌཱུརྱ་དང་། རྡོའི་སྙིང་བོ་དང་། སྤུག་དང་། ཀེ་ཀེ་རུ་ལས་བྱས་པའི་ཀ་བ་ཆེན་པོའི་ཀླད་ལ་འཛམ་བུའི་ཆུ་བོའི་གསེར་གྱི་ཤིང་ས་ལ་གཅོད་པ་ལྟ་བུའི་ཚོགས་བཀོད་
པས་རྣམ་པར་སྤྲས་ཏེ། མཛེས་པར་བྱས་པ་དངུལ་ལས་བྱས་པའི་ཕུག་རོན་གྱི་ཕྲེང་གི་མཐའ་མཐར་མུ་ཏིག་དམར་པོ་དང་ལྡན་པ་དྲིལ་བུ་གཡར་ཀའི་དྲ་བ་དཔྱངས་པའི་སྒྲས་སད་པར་གྱུར་ནས་རབ་ཏུ་དགའ་ཞིང་དྲེགས་པའི་ཕུག་རོན་དང་། བྱ་བང་དང་། ནེ་ཙོ་དང་། རི་སྐེགས་
དང་། རྨ་བྱའི་ང་རོ་དག་གིས་ཉམས་དགའ་བ། ཁྱམས་དང་འདུན་ཁང་ཆེན་པོའི་ཉེན་འཁོར་སྟེགས་བུར་བསྐོར་བས་མཛེས་པར་བྱས་པ། རིན་པོ་ཆེ་རྣམ་པ་སྣ་ཚོགས་པ་ལས་བྱས་པའི་སྒོ་ཁང་ཅན་ཤེལ་གྱི་རྒྱུ་ལས་བྱས་པའི་སྟེགས་བུ་དང་ལྡན་པ་བཀྲ་ཤིས་ཀྱི་གསེར་གྱི་
བུམ་པ་དུ་མ་ནས་སྤོས་ཆུ་དྲི་ཞིམ་པོས་ཆག་ཆག་བཏབ་པ། རྫིང་ཆེན་པོའི་འགྲམ་གྱི་ནེའུ་གསིང་མརྒད་ཀྱི་རྒྱུ་ལས་བྱུང་བ། ཀ་ཙ་ལིན་དའི་གོས་ལྟར་རེག་ན་བདེ་བས་མཛེས་པའི་ཕྱོགས་ན་བདེ་བར་ཉལ་བའི་ངང་པ་དང་། ཁྲུང་ཁྲུང་དང་། ངུར་པ་དང་། ཀ་ལན་ད་ཀའི་

ཁྱུ་གནས་པ་གསེར་གྱི་བྱེ་མ་བདལ་བའི་གཏོས་ཆེན་པོ་རིན་པོ་ཆེ་སྣ་བདུན་གྱི་ཐེམ་སྐས་ཀྱི་ཕྲེང་བས་བརྒྱན་པ། ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ། གྲངས་འབུམ་ཕྲག་དུ་མས་ཀུན་ནས་ཡོངས་སུ་བསྐོར་བ་དག་བྱུང་ངོ་། རྫིང་བུ་རེ་རེ་ནས་ཀྱང་རིན་པོ་ཆེའི་པདྨ་བྱེ་
བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་རྩ་དགུ་བྱུང་ངོ་། །རིན་པོ་ཆེའི་པདྨ་རེ་རེའི་སྙིང་པོ་ལ་ཡང་སིལ་སྙན་དང་། ཕེག་རྡོབ་པ་དང་། གླུ་དབྱངས་རྣམས་ཀྱི་སྒྲ་ཕྱུང་བས་ལྷའི་བུ་མོ་དག་གླུ་ལེན་གར་བྱེད་ཅིང་ཡོངས་སུ་སྤྱོད་དོ། །སིལ་སྙན་དང་། ཕེག་རྡོབ་པ་དང་། གླུ་དབྱངས་ཀྱི་
སྒྲ་བྱུང་བ་དེ་དག་ལས་ཀྱང་ཚིགས་སུ་བཅད་པ་འདི་དག་བྱུང་ངོ་། །སྦྱིན་དང་ཚུལ་ཁྲིམས་ཀྱིས་ནི་གང་ཞིག་དཔག་མེད་ཅིང་། །དེ་བཞིན་བཟོད་དང་བརྩོན་འགྲུས་དག་གི་སྟོབས་ལྡན་པ། །བསམ་གཏན་གྱིས་ནི་ཞི་ཞིང་དབང་གིས་ཀུན་འབྱོར་པ། །ཡེ་ཤེས་སྒྲོན་མ་དེ་ལ་
སྐྱབས་སུ་འདོང་བར་གྱིས། །བསམ་གྱིས་མི་ཁྱབ་སྟོབས་དང་སྨོན་ལམ་རྣམས་དང་ལྡན། །ཐབས་དང་བྱང་ཆུབ་ཡན་ལག་ཏིང་འཛིན་རྣམས་ཀྱིས་དག །རྣམ་པར་གྲོལ་བའི་ལམ་དང་སྟོབས་བཅུར་ལྡན་པ་ཡི། །ཐུབ་པ་གང་ཡིན་དེ་ལ་མཆོད་ཕྱིར་འདོང་བར་གྱིས། །
འདམ་རྫབ་ནས་ནི་པདྨ་རྒྱས་པ་ཇི་བཞིན་དུ། །གང་ཞིག་ཉོན་མོངས་འདམ་གྱིས་རྟག་པར་མི་གོས་པ། །འཆི་དང་སྐྱེ་བའི་སྡུག་བསྔལ་རྣམ་པར་བསལ་བ་ཡི། །རྒྱལ་བ་འཇིག་རྟེན་མགོན་པོ་དེ་ལ་ལྟ་ཕྱིར་དང་། །གཅིག་ཀྱང་མི་ལྡན་མིན་པར་གྱུར་པ་གང་ཞིག་གིས། །སྐྱེ་དགུ་
རྣམས་ཀྱི་གཏི་མུག་སྒོ་གླེགས་རྣམས་བཤིག་ཅིང་། །སྐུ་དང་གསུང་དང་ཐུགས་ཀྱི་སྤྱོད་པ་རབ་ཞི་བ། །ཤཱཀྱའི་ཏོག་ལྡན་དེ་ལ་སྐྱབས་སུ་འདོང་བར་གྱིས། །དེ་ལྟར་ཁང་པ་བརྩེགས་པ་དཔག་བསམ་གྱི་ཤིང་ལྗོན་པས་ལེགས་པར་བརྒྱན་པ་རྣམ་པ་སྣ་ཚོགས་བྱེ་བ་ཁྲག་ཁྲིག་འབུམ་
ཕྲག་དུ་མ་ནམ་མཁའི་དཀྱིལ་ན་ཀུན་དུ་སྣང་སྟེ། ཁ་ཅིག་ཏུ་ནི་རིན་པོ་ཆེའི་སྤྲིན་གྱི་ཆར་འབབ་པར་ཀུན་དུ་སྣང་ངོ་། །ཁ་ཅིག་ཏུ་ནི་མེ་ཏོག་གི་གདུགས་ཀྱི་སྤྲིན་གྱི་ཆར། ཁ་ཅིག་ཏུ་ནི་གོ་ཤིར་ཥའི་ཙནྡན་དང་། སྤོས་དང་། བྱུག་པ་དང་། ཕྱེ་མའི་སྤྲིན་གྱི་ཆར། ཁ་ཅིག་ཏུ་ནི་

གོས་ཀྱི་ཕྲེང་བའི་སྤྲིན་གྱི་ཆར། ཁ་ཅིག་ཏུ་ནི་ཀ་ཤི་ཀའི་རས་དང་། དུ་གུ་ལའི་རས་དང་། ཟ་འོག་གི་སྤྲིན་གྱི་ཆར། ཁ་ཅིག་ཏུ་ནི་དཔག་བསམ་གྱི་ཤིང་ལྗོན་པའི་སྤྲིན་གྱི་ཆར། ཁ་ཅིག་ཏུ་ནི་མེ་ཏོག་པདྨ་དང་། ཨུཏྤལ་དང་། ཀུ་མུ་ད་དང་། པདྨ་དཀར་
པོ་དང་། དྲི་མཆོག་དང་། ཨ་ཏི་མུག་ཏ་ཀ་དང་། ཀ་ཙ་ལིན་ད་དང་། མ་ཧཱ་ཀ་ཙ་ལིན་ད་དང་། བཏང་བཟུང་དང་། བཏང་བཟུང་ཆེན་པོ་དང་། མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་དང་། མན་དཱ་ར་བ་དང་། མན་དཱ་ར་བ་ཆེན་པོའི་སྤྲིན་གྱི་ཆར་མངོན་པར་བབ་པོ། །མེ་
ཏོག་གི་ཆར་དེ་དག་ལས་དྲི་གང་བྱུང་བ་དེས་སངས་རྒྱས་ཀྱི་ཞིང་ཚད་མེད་གྲངས་མེད་པ་དག་གང་གཱའི་ཀླུང་གི་བྱེ་མའི་རྡུལ་ཕྲ་རབ་ཀྱི་རྡུལ་དང་མཉམ་པའི་སངས་རྒྱས་ཀྱི་ཞིང་རྣམས་རྒྱས་པར་ཁྱབ་པོ། །འཇིག་རྟེན་གྱི་ཁམས་དེ་དག་ན་སེམས་ཅན་གང་དག་འགྲོ་བ་དྲུག་ཏུ་སྐྱེས་པ་དེ་
དག་ཐམས་ཅད་དྲི་དེས་མཆོག་ཏུ་བདེ་བས་ཚིམ་ཞིང་སེམས་དགའ་བར་གྱུར་ཏེ། སྡུག་བསྔལ་ཐམས་ཅད་དང་བྲལ་ནས་ཕན་ཚུན་འདྲི་བ་དང་། འཇིག་རྟེན་གྱི་ཁམས་མི་མཇེད་དེ་ན་བྱང་ཆུབ་སེམས་དཔའ་རྡོ་རྗེའི་སྙིང་པོ་བྱང་ཆུབ་སེམས་དཔའི་ཆོ་འཕྲུལ་སྣ་ཚོགས་སྟོན་བརྒྱད་
རིང་པོ་ནས་མཐོང་ངོ་། །དེ་དག་གིས་དེ་མཐོང་ནས་ཀྱང་ཕྱག་འཚལ་ལོ། སྐྱེས་བུ་དམ་པ་དེ་ལ་ཕྱག་བཙལ་མ་ཐག་ཏུ་སེམས་ཅན་གང་དག་ངན་འགྲོ་ལོག་པར་ལྟུང་བར་དོང་བ་དེ་དག་ཀྱང་མཆོག་ཏུ་བདེ་བ་དང་། དགའ་བ་དང་། རངས་པ་དང་། དད་པ་ཐོབ་ནས་སྐད་
ཅིག་དེ་ཉིད་ལ་ངན་འགྲོ་ལོག་པར་ལྟུང་བ་ལས་གྲོལ་ཏེ་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེས་ནས་བར་སྣང་ལ་འཁོད་དེ། དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། གསང་བ་པའི་བདག་
པོ་ལག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་མཆོད་པའི་སྤྲིན་ཆེན་པོས་མཆོད་ནས་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ཏེ། དེ་བཞིན་གཤེགས་པའི་རྡོ་རྗེའི་འཁོར་གྱི་ཁྱམས་ཆེན་པོ་ཐམས་ཅད་དང་ལྡན་པ་ལ་

ལན་བདུན་བསྐོར་བ་བྱས་ནས་ལྷ་རྣམས་བར་སྣང་ལས་བབས་ཏེ། བཅོམ་ལྡན་འདས་ཀྱི་སྤྱན་སྔར་རང་རང་གི་རིན་པོ་ཆེའི་གཞལ་མེད་ཁང་གི་ཁང་པ་བརྩེགས་པ་དག་ན་ལྷའི་བུ་མོ་བྱེ་བ་ཁྲག་ཁྲིག་འབུམ་ཕྲག་དུ་མ་དང་ལྷན་ཅིག་ཏུ་སིལ་སྙན་དང་། ཕེག་རྡོབ་བ་དང་། གླུ་དབྱངས་ཀྱི་སྒྲ་
འབྱིན་ཅིང་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །གང་སླད་ངན་འགྲོ་མཆོག་ཏུ་སྡུག་བསྔལ་འཁྲུགས་པ་ཡི། །མིང་ཡང་བདེ་གཤེགས་སྟོབས་ཀྱིས་དེང་དུ་མེད་མཛད་དང་། །བསོད་ནམས་མི་ལྡན་སེམས་ཅན་
རྣམས་ལའང་རྒྱལ་བ་མཆོག །བྱམས་པར་མཛད་པ་ཀྱེ་མ་ངོ་མཚར་རྨད་དུ་བྱུང་། །བདག་ཅག་རྣམས་ཀྱི་རྨོངས་པའི་སྙིང་གིས་བསྒྲུབས་པ་ཡི། །སྡིག་པའི་ལས་གང་ཤིན་ཏུ་བགྱིད་དཀའ་སྣ་ཚོགས་པ། །དེ་དག་ཐུབ་པའི་བྱ་དགའས་དེ་རིང་གློ་བུར་དུ། །སྐད་ཅིག་
ཏུ་ནི་ཇི་ལྟར་རྣམ་པར་ཞིག་པར་གྱུར། །ཇི་ལྟར་གདུགས་ཀྱིས་མུན་པ་མུན་ནག་ཀུན་བཅོམ་དང་། །ཇི་ལྟར་ཞུགས་འབར་བས་ནི་རས་རྣམས་སྲེག་པ་དང་། །བསེར་མས་ཤིང་བལ་ལྟར་ཡང་སྤྲིན་འཐོར་ཇི་བཞིན་དུ། །དེ་ལྟར་འགྲོ་བའི་སྡིག་པ་བདེ་བར་གཤེགས་ཀྱིས་བཅོམ། །
བདེ་གཤེགས་སྲས་པོ་མཐོང་ངམ་ཐོས་སམ་དྲན་གྱུར་ན། །ལྷན་ཅིག་སྐྱེས་དབང་འོད་ཟེར་དྲ་བས་སྡིག་འཕྲོགས་པ། །འགྲོ་བ་ཡོངས་ཀྱི་སྲིད་པའི་སྤྲོས་བ་གཞིག་པ་ཡི། །ཐུགས་དང་རྟག་ཏུ་ལྡན་ཞིང་སྐྱོ་བར་འགྱུར་མི་མངའ། །མིག་དང་མགོ་དང་སྙིང་དང་ཤ་ཁྲག་ཚིལ་རྣམས་
དང་། །སྲོག་དང་སྡུག་དང་བུ་རྣམས་རྩྭ་ལྟར་བོར་ནས་ནི། །མི་མཚུངས་སེམས་ཅན་དོན་ཕྱིར་ཐུགས་རྗེས་ཐུགས་བརླན་པ། །འཇིག་རྟེན་མགོན་སྲས་དེ་དག་རྣམས་ལ་ཕྱག་འཚལ་ལོ། །ཡི་དགས་ལྟོགས་ལ་ཆུ་དང་རོ་བརྒྱའི་ཟས་རྣམས་དང་། །དེ་བཞིན་སྐྱེ་བོའི་ནོར་འདོད་
སྙིང་དང་ལྡན་པ་ལ། །ཐུགས་རྗེ་སྤྱོད་ཅིང་རྣམ་པ་སྣ་ཚོགས་ཚིམ་མཛད་པ། །བྱང་ཆུབ་སེམས་དཔའ་ཁྱུ་མཆོག་དེ་ལ་སྐྱབས་སུ་མཆི། །གང་དག་མནར་མེད་པ་ཡང་རབ་ཏུ་བསིལ་མཛད་པས། །མཆོག་ཏུ་ཚ་བའི་སེམས་ཅན་དམྱལ་བའང་བསིལ་བར་འགྱུར། །རང་བདེ་མི་

གཟིགས་སེམས་ཅན་དོན་བརྩོན་ཐུགས་ལྡན་པ། །འཇིག་རྟེན་མགོན་སྲས་མཉམ་མེད་དེ་ལ་ཕྱག་འཚལ་ལོ། །གང་དག་སྲིད་པར་འཁོར་བའི་སྲིད་པའི་སྐྱོན་ལས་གྲོལ། །སྟོང་བ་གསུང་ཡང་ལས་ཀྱི་འབྲས་བུ་མི་འདོར་ཞིང་། །ཡེ་ཤེས་མེ་ཡིས་རྙོག་པ་
བསྲེགས་ཀྱང་ཐུགས་རྗེས་བརླན། །སྤྱོད་པ་བརྟག་མེད་དབང་ལྡན་དེ་ལ་ཕྱག་འཚལ་ལོ། །ཀྱེ་མ་དཔལ་ལྡན་རྡོ་རྗེའི་སྙིང་པོ་བདེ་གཤེགས་སྲས། །མཚན་གྱིས་མཚན་བཏབ་སྐུ་ལས་འོད་སྟོང་མང་བྱུང་བའི། །དྲི་བ་རྣམས་དང་སྣ་ཚོགས་གླུ་ཡིས་བདག་ཅག་སིམ། །སྐད་ཅིག་གིས་
ནི་དམྱལ་བས་སུམ་ཅུའི་ལྷ་དབང་གྱུར། །བདག་ཅག་རྣམས་ཀྱིས་རྒྱལ་དང་དེ་བཞིན་རྒྱལ་སྲས་དང་། །དེ་དག་རྣམས་ཀྱིས་གསུངས་པ་མཆོག་ཏུ་ཞི་ཆོས་ལ། །གུས་བསྟོད་དགེ་བ་རྒྱ་ཆེན་དེ་རིང་གང་ཐོབ་པ། །དེ་མྱུར་འཇིག་རྟེན་ཐམས་ཅད་བདེ་གཤེགས་ཐོབ་པར་ཤོག །དེ་ལྟར་
ཚུལ་དང་འདྲ་བའི་ཚིགས་སུ་བཅད་པ་རྣམས་ཀྱིས་བཅོམ་ལྡན་འདས་ལ་བསྟོད་ནས། བཅོམ་ལྡན་འདས་ཀྱིས་གནང་སྟེ། དེ་དག་རང་རང་གི་རིན་པོ་ཆེའི་གཞལ་མེད་ཁང་གི་ཁང་པ་བརྩེགས་པ་རྣམས་སུ་འཁོད་དེ་ཆོས་ཉན་པའི་ཕྱིར་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་རྡོ་རྗེའི་སྙིང་བོས་བྱང་ཆུབ་སེམས་དཔའི་རྫུ་འཕྲུལ་གྱི་ཆོ་འཕྲུལ་ཆེན་པོ་འདི་ལྟ་བུ་འདི་བསྟན་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་གསང་བ་པའི་བདག་པོ་ལག་ན་རྡོ་རྗེ་དང་། དེ་
བཞིན་གཤེགས་པའི་རྡོ་རྗེའི་འཁོར་གྱི་ཁྱམས་ཆེན་པོ་ཐམས་ཅད་དང་ལྡན་པ་ལ་མཆོད་པའི་སྤྲིན་ཆེན་པོ་རྣམས་ཀྱིས་མཆོད་ནས་ཏིང་ངེ་འཛིན་དེ་ལས་ལངས་ཏེ་བར་སྣང་ལས་བབས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་ལན་འབུམ་ཕྲག་དུ་མ་མཐའ་ཡས་
མུ་མེད་པར་བསྐོར་བ་བྱས་ནས་པུས་མོ་གཡས་པའི་ལྷ་ང་རིན་པོ་ཆེའི་པདྨའི་སྙིང་པོ་ལ་བཙུགས་ཏེ། བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ལ་བལྟའོ། །རིགས་ཀྱི་བུ་དེ་དག་ཐམས་ཅད་ཀྱང་དགའ་བ་དང་མགུ་བ་སྐྱེས་ནས་དེ་བཞིན་དུ་བཅོམ་ལྡན་འདས་ལ་ད་ལྟའོ། །

བལྟས་ནས་ཀྱང་སྒྲ་སྐད་ཀྱི་ང་རོ་གཅིག་ཏུ་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །དྲན་པའི་གཞུས་འཕངས་པ་ཡི་ཤེས་རབ་མདའ་མང་གིས། །མ་འཕངས་མཐུར་ལྡན་བདུད་བཞི་ཕམ་མཇེད་ཅིང་། །འཇིག་རྟེན་ཉོན་མོངས་ཉེན་
པའི་མུན་པ་བསལ་མཛད་ནས། །བླ་མ་སྤྲིན་མེད་ཟླ་བ་བཞིན་དུ་ལྷང་ངེའོ། །དམ་ཆོས་འོད་མང་གཏི་མུག་བཅོམ་པ་དྲ་བ་ཡིས། །འདུལ་བའི་པདྨའི་གནས་རྣམས་ཁ་ཕྱེ་ནས། །ཡེ་ཤེས་ནམ་མཁའ་ཆེ་ལ་དྲི་མེད་འབར་བའི་གཟུགས། །ཉི་མ་ཇི་བཞིན་གདུང་བར་བགྱི་བའི་
བདུད་སྡེ་གདུངས། །མུ་སྟེགས་ཅན་གྱི་ང་རྒྱལ་མཐའ་དག་ཕམ་མཛད་ཅིང་། །འགྲོ་བའི་འདོད་ཆགས་རབ་གདུང་མ་ལུས་རབ་ཞི་མཛད། །དགེ་བའི་ལོ་ཏོག་རྩི་ཆེན་ཡང་དག་འཕེལ་མཛད་པ། །དགེ་བའི་ཆར་པ་ཕབ་ཅིང་འབྲུག་ལྟར་བསྒྲག་ཏུ་གསོལ། །མགོན་པོ་མུ་
སྟེགས་ཅན་གྱི་ཝ་བརྒྱ་ཕམ་མཛད་ཅིང་། །བདུད་རྣམས་བཅོམ་སྟེ་བྱང་ཆུབ་དམ་པ་རབ་བརྙེས་ནས། །མ་འདྲེས་བསགས་པའི་བདེན་པའི་སྟོབས་ཀྱིས་མཐུ་མངའ་བ། །སྐྱེ་བའི་འཇིགས་ལས་རབ་གྲོལ་སེང་གེ་ཇི་བཞིན་སྒྲོགས། །སྤྱོད་པ་ཟབ་ཅིང་བརྟན་ལ་རྟག་ཏུ་མི་དཔོགས་པ། །
སེམས་ཅན་གནས་གྱུར་སྟོབས་དང་ཏིང་འཛིན་ནོར་བུ་བཀྲམ། །དྲི་མེད་ཆོས་ལྷུན་འདུལ་བའི་རི་བོས་རྣམ་འཛིན་པ། །ཡེ་ཤེས་རྒྱ་མཚོ་མཆོག་ཁྱོད་སྐྱེ་དགུ་མཆོག་གཙོ་བ། །ཚུལ་ཁྲིམས་བཟང་པོའི་རྩ་བ་སྦྱིན་པའི་ཆུས་བཏབ་འཕེལ། །བྱམས་དང་བཟོད་པའི་མེ་ཏོག་ཡལ་ག་
འཁྲུངས་པས་མཛེས། །བྱང་ཆུབ་ཡན་ལག་ལམ་གྱི་འབྲུ་ཆགས་འདོད་བྱས་བསྟེན། །བསོད་ནམས་དཔག་བསམ་ཤིང་ཁྱོད་དེ་རིང་ག་ལས་བྱུང་། །སུམ་ཅུ་རྩ་གཉིས་འབར་བའི་མཚན་གྱིས་ཡན་ལག་བརྒྱན། །དཔེ་བྱད་བཟང་མཆོག་རིན་ཆེན་མན་ཤེལ་གྱིས་བསྐོར་ཅིང་། །ས་
དང་དབང་དང་དམ་མཆོག་ཕུར་པ་བརྟན་བཏབ་པ། །ལྷུན་པོ་བཞིན་དུ་མི་གཡོ་ཁྱོད་ནི་འགྲོ་བར་མཛེས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་བཅོམ་ལྡན་འདས་ལ་ཆལ་དང་འདྲ་

བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས། བཅོམ་ལྡན་འདས་ཀྱིས་གནང་སྟེ། རིན་པོ་ཆེའི་པདྨའི་སྙིང་པོ་ལ་ཕྱོགས་གཅིག་ཏུ་འདུག་གོ། །རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་
འཁོད་དོ། །དེ་བཞིན་དུ་སྦྱར་ཏེ། དེ་ལྟར་ལྷོ་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་བརྩེགས་པ་རྣམ་པར་བསྒྲགས་པའི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དཔལ་འབྱུང་བ་ནས། བྱང་ཆུབ་སེམས་
དཔའ་སེམས་དཔའ་ཆེན་པོ་རྡོ་རྗེའི་ཏོག་ཅེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིགས་ཀྱི་བུ་དེ་དག་དང་ལྷན་ཅིག་ཏུ་རིན་པོ་ཆེའི་
པདྨའི་སྙིང་པོ་ལ་ཕྱོགས་གཅིག་ཏུ་འདུག་པའི་བར་དུའོ། །དེ་བཞིན་དུ་ནུབ་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་ཞེས་བྱ་བ་དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ།
བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང་། རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་བྱང་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཆོས་མཆོག་རང་བཞིན་གྱིས་རྣམ་པར་ངེས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཐམས་ཅད་འབྱུང་བ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་རྒྱལ་མཚན་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་

ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་
དག་ལ་འཁོད་པའི་བར་དུའོ། །དེ་བཞིན་དུ་བྱང་ཤར་གྱི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་མཐའ་ཡས་རབ་གསལ་དབང་ཕྱུག་གི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དཔལ་བརྩེགས་ནས།
བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བརྟན་པ་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་
པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་ཤར་ལྷོའི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་
ཏོག་གི་རྒྱལ་མཚན་གྱི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཐེ་ཚོམ་དང་བྲལ་བ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བཟང་པོ་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་
འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་ལྷོ་ནུབ་ཀྱི་
ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་རྩལ་གྱིས་རྣམ་པར་གནོན་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་པོ་ཆེ་བརྩེགས་པ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེ་བློ་

གྲོས་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་ཆོས་ཉན་པའི་ཕྱིར་བྱང་ཆུབ་སེམས་དཔའ་སེམས་དཔའ་
ཆེན་པོ་དེ་དག་དང་ལྷན་ཅིག་ཏུ་རིན་པོ་ཆེའི་པདྨའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་འོག་གི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིན་ཆེན་པདྨ་ལ་རབ་ཏུ་གནས་པའི་རི་དབང་གི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་པདྨ་བཀོད་པ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་བློ་གྲོས་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་
དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་
པའི་བར་དུའོ། །དེ་བཞིན་དུ་སྟེང་གི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཡུལ་ལས་རྣམ་པར་རྒྱལ་བའི་དཔལ་གྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདུད་ཀྱི་ཚེར་མ་དཀྲུགས་པ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་བདུད་ཀྱི་སྒྲིབ་པ་ལས་རྣམ་པར་རྒྱལ་བ་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་
ཅིང་། རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མི་མཇེད་འདིར་བྱང་ཆུབ་སེམས་དཔའི་རྫུ་འཕྲུལ་གྱི་རྣམ་པར་འཕྲུལ་བ་དུ་མ་བསྟན་

པས་གཞལ་མེད་ཁང་དང་། མེ་ཏོག་གི་སྤྲིན་དང་། རིན་པོ་ཆེའི་སྤྲིན་དང་། བྱེ་མའི་སྤྲིན་དང་། སྤོས་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དན་གྱི་སྤྲིན་དང་། རིན་པོ་ཆེ་སྤུག་དང་། རྡོའི་སྙིང་པོ་དང་། བཻཌཱུརྱ་དང་། ཨནྡ་
རྙིལ་དང་། བྱི་རུ་དང་། མརྒད་དང་། མུ་ཏིག་དམར་པོ་དང་འཛམ་བུའི་ཆུ་བོའི་གསེར་གྱི་སྤྲིན་དང་། དཔག་བསམ་གྱི་ཤིང་ལྗོན་པ་དང་། རིན་པོ་ཆེའི་པདྨ་དུ་མས་ཁེབས་པའི་རྫིང་གིས་ལེགས་པར་བརྒྱན་པར་གྱུར་ཏོ། །འཇིག་རྟེན་གྱི་ཁམས་འདི་ཇི་ལྟ་བ་བཞིན་དུ་ཕྱོགས་བཅུའི་
འཇིག་རྟེན་གྱི་ཁམས་ཚད་མེད་གྲངས་མེད་བསམ་གྱིས་མི་ཁྱབ་ཅིང་དཔག་ཏུ་མེད་པ་གཞལ་དུ་མེད་ཅིང་བརྗོད་དུ་མེད་པར་གཏོགས་པ་གང་གཱའི་ཀླུང་གི་བྱེ་མ་སྙེད་ལས་ཤིན་ཏུ་འདས་པའི་འཇིག་རྟེན་གྱི་ཁམས་དག་ན་གསང་བ་པའི་བདག་པོ་ལག་ན་རྡོ་རྗེའི་རྣམ་པར་ཐར་བའི་སྒོ་ཆེན་པོའི་
ཏིང་ངེ་འཛིན་རྣམ་པར་འཕྲུལ་བའི་བྱིན་གྱི་རླབས་ཀྱིས་དེ་བཞིན་དུ་ལེགས་པར་བརྒྱན་པར་ཀུན་དུ་སྣང་ངོ་། །འཇིག་རྟེན་གྱི་ཁམས་དེ་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་བཞུགས་ཏེ་འཚོ་ཞིང་གཞེས་པ་དེ་དག་ཐམས་ཅད་
དེ་ན་བཞུགས་བཞིན་དུ་ཕྱག་གཡས་པ་གསེར་གྱི་ཁ་དོག་ལྟ་བུ་བརྐྱང་སྟེ། འཇམ་ཞིང་མཉེན་ལ་རབ་ཏུ་གཞོན་ཞིང་པདྨ་དང་ཡལ་ག་གཞོན་ཤ་ཆགས་ཤིང་འཇམ་པའི་སོར་མོའི་ངོས་ཅན་གདུགས་དང་། རྒྱལ་མཚན་དང་། ལྕགས་ཀྱུ་དང་། བུམ་པ་དང་། ཉ་དང་སྒོ་ཁང་
དང་། གཞལ་མེད་ཁང་དང་། དུང་དང་། རྡོ་རྗེ་དང་། པདྨ་དང་། དཔལ་པེའུ་དང་། འཁོར་ལོའི་མཚན་གྱིས་བརྒྱན་པ། ཚེ་རབས་བྱེ་བ་ཁྲག་ཁྲིག་འབུམ་ཕྲག་དུ་མ་ནས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་མཛད་པའི་རྒྱུ་མཐུན་པས་མངོན་པར་གྲུབ་པའི་
དཔེ་བྱད་བཟང་པོས་རྣམ་པར་སྤྲས་པ། སེན་མོ་ཟངས་འདྲ་ཞིང་རྒྱས་ལ་སྣུམ་ཞིང་སྲབ་པའི་ནོར་བུའི་མདངས་ཀྱི་མེ་ཏོག་གི་འོད་ཟེར་གྱིས་མཁྲིག་མ་མཛེས་པར་གྱུར་པ་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་དང་ཡང་དག་པར་མཐུན་པའི་ཕྱག་རྣམས་ཀྱིས་གསང་བ་པའི་

བདག་པོ་ལག་ན་རྡོ་རྗེ་ལ་ཡང་དག་པར་གཟེངས་བསྟོད་པ་དང་། ཡང་དག་པར་དགའ་བར་བྱ་བའི་ཕྱིར་སྤྱི་བོ་ལ་བྱུགས་ནས་དུས་གཅིག་ཏུ་སྒྲ་སྐད་ཀྱི་ང་རོ་གཅིག་གིས་འཇིག་རྟེན་གྱི་ཁམས་ཐམས་ཅད་གོ་བར་མཛད་ཅིང་འདི་སྐད་ཅེས། ཀྱེ་རིགས་ཀྱི་བུ་གང་གི་
ཕྱིར་བདུད་སྡིག་ཅན་དང་གཞན་ཡང་དེ་བཞིན་གཤེགས་པའི་བསྟན་པ་ལ་མ་དད་ཅིང་སྡང་བའི་བགེགས་དང་ལོག་འདྲེན་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སེམས་ཅན་ཐམས་ཅད་ཀྱི་དགེ་བའི་རྩ་བ་གཅོད་པའི་ཕྱིར་ཞུགས་པ་ཐམས་ཅད་ཚར་གཅད་པ་དང་། རྣམ་
པར་གཞིག་པ་དང་། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་དང་པོ་བསྐྱེད་པ་སེམས་ཞུམ་པ་བརྩོན་འགྲུས་བརྟན་པོ་མ་ཡིན་པའི་གོ་ཆ་བགོས་པ་རྣམས་ཀྱང་ཡང་དག་པར་གཟེངས་བསྟོད་པ་དང་། རབ་ཏུ་དགའ་བར་བྱ་བ་ནས་ཁམས་གསུམ་པར་
གཏོགས་པའི་སེམས་ཅན་ཐམས་ཅད་ཀྱི་བར་དག་ཀྱང་མྱ་ངན་ལས་འདས་པ་ཐོབ་པར་བྱ་བ་དང་། སངས་རྒྱས་དང་ཆོས་དང་། དགེ་འདུན་གྱི་རིགས་མི་གཅད་པའི་ཕྱིར་ཁྱོད་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བསོད་ནམས་དང་ཡེ་ཤེས་ཀྱི་ཚོགས་བསམ་གྱིས་
མི་ཁྱབ་པར་བསགས་པ་ཡོངས་སུ་རྫོགས་པས་གྲུབ་པའི་མཚན་དང་དཔེ་བྱད་བཟང་པོས་སྤྲས་པ། ཏིང་ངེ་འཛིན་དང་། དབང་དང་། གཟུངས་དང་། སྟོབས་དང་། བྱང་ཆུབ་ཀྱི་ཡན་ལག་དང་། འཕགས་པའི་ལམ་ཡན་ལག་བརྒྱད་པའི་མཐུས་གྲུབ་པ། སེམས་ཅན་
ཐམས་ཅད་ཀྱི་སྡུག་བསྔལ་དང་། ཉོན་མོངས་པའི་སྒྲིབ་པ་ཉེ་བར་ཞི་བ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་དང་། གཤིན་རྗེའི་འཇིག་རྟེན་དུ་ལྟུང་བའི་འཇིགས་པའི་བདུད་ཀྱི་ཚེར་མ་མ་ལུས་པར་འདོན་པར་ལྷ་དང་། ཀླུ་དང་། གནོད་
སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་པའི་འཁོར་མངོན་པར་དགའ་བ་ཅན་དག་ལ་ངོ་མཚར་རྨད་དུ་བྱུང་བའི་དགའ་བ་དུ་མ་

ཀུན་དུ་བསྐྱེད་པ་ལ་སྙོམས་པར་ཞུགས་པ་ནི་ལེགས་སོ་ལེགས་སོ་ཞེས་བཀའ་སྩལ་ཏོ། །དེ་ལྟར་སངས་རྒྱས་བཅོམ་ལྡན་འདས་དེ་དག་གིས་གསང་བ་པའི་བདག་པོ་ལག་ན་རྡོ་རྗེ་གཟེངས་བསྟོད་དོ། །རབ་ཏུ་དགའ་བར་མཛད་ནས་རང་རང་གི་ཕྱག་བསྐུམ་སྟེ། རང་རང་གི་བྱང་
ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཉན་དུ་གཟུད་པའི་ཕྱིར་འཇིག་རྟེན་གྱི་ཁམས་མི་མཛེད་འདིར་བགྱེའོ། །དེ་དག་གིས་གནང་བས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱིས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་དེ་དག་ལ་ཕྱག་འཚལ་ནས་བྱང་ཆུབ་སེམས་དཔའི་རྣམ་པར་འཕྲུལ་བའི་བྱིན་གྱི་རླབས་ཆེན་པོ་དང་། བྱང་ཆུབ་སེམས་དཔའི་རྫུ་འཕྲུལ་ཆེན་པོས་ཇི་ཙམ་དུ་སྐྱེས་བུ་སྟོབས་དང་ལྡན་པས་ལག་པ་བསྐུམ་པ་ལས་བརྐྱང་བ་དང་། བརྐྱང་བ་ལས་བསྐུམ་པ་ཙམ་གྱི་
སྐད་ཅིག་ཐང་ཅིག་ཡུད་ཙམ་དེ་ལ་འཇིག་རྟེན་གྱི་ཁམས་མི་མཇེད་དེར་ཕྱིན་ནས། བཅོམ་ལྡན་འདས་ཀྱིས་གནང་སྟེ་རིན་པོ་ཆེའི་པདྨའི་སྙིང་པོ་དག་ལ་ཕྱོགས་གཅིག་ཏུ་འཁོད་པའི་བར་དུའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཤཱཀྱ་ཐུབ་པས་དེའི་ཚེ་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ་བདུད་སྡིག་ཅན་འདི་རྡོ་རྗེའི་ཞགས་པས་བཅིངས་པ་འདི་ལས་ཁྲོལ་ལ་ཇི་ནས་ཀྱང་སངས་རྒྱས་ལ་སྐྱབས་སུ་འགྲོ་བར་འགྱུར་
བ་དང་། ཆོས་ལ་སྐྱབས་སུ་འགྲོ་བར་འགྱུར་བ་དང་། དགེ་འདུན་ལ་སྐྱབས་སུ་འགྲོ་བར་འགྱུར་བ་དང་། གཞན་ཡང་གང་དག་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་།
མི་མ་ཡིན་པ་གང་དག་ཇི་ཙམ་དུ་དེ་བཞིན་གཤེགས་པའི་བསྟན་པ་ལ་གནས་པར་འགྱུར་བ་དང་། དེ་བཞིན་གཤེགས་པའི་བསྟན་པ་ལ་ཞུགས་ནས་ཀྱང་ཇི་ནས་ཁོང་དུ་ཆུད་པར་འགྱུར་བ་དེ་ལྟར་གྱིས་ཤིག །དེ་སྐད་ཅེས་བཀའ་སྩལ་པ་དང་། གསང་བ་པའི་བདག་པོ་ལག་ན་རྡོ་

རྗེས་བཅོམ་ལྡན་འདས་ཀྱི་ལྟར་མཉན་ནས་བཅོམ་ལྡན་འདས་ལ་ལེགས་སོ་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཡང་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་
པར་བྱེད་པ་ཞེས་བྱ་བ་ལ་སྙོམས་པར་ཞུགས་སོ། །གསང་བ་པའི་བདག་པོ་ལག་ན་རྡོ་རྗེས་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་ལ་སྙོམས་པར་ཞུགས་མ་ཐག་ཏུ། དེ་ནས་དེའི་ཚེ་སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་ཏེ་འགུལ་རབ་ཏུ་འགུལ། ཀུན་དུ་རབ་ཏུ་འགུལ་ཏོ། །ཆེམ་ཆེ་མ་རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ་མོ། །གསང་བ་པའི་བདག་པོ་ལག་ན་རྡོ་རྗེ་ཡང་མེ་ལྕེ་འབར་བ་གཅིག་ཏུ་གྱུར་ཏེ། འབར་རབ་ཏུ་
འབར། ཀུན་དུ་རབ་ཏུ་མཆེད་ཅིང་འབར་ཏེ། འཇིགས་སུ་རུང་བའི་མཆེ་བ་རྣོན་པོ་དྲག་པོ་གཟངས་ཅན་འཇིགས་པ་ཆེན་པོ་སྐྱེད་པ་གཙིགས་ཏེ། མཆེ་བ་མནན་ནས་མེ་ལྕེ་ཆེན་པོ་ལྟར་སྨ་ར་སེར་ཞིང་འཇིགས་འཇིགས་ལྟར་འདུག་སྟེ། མི་བཟད་པ་རྣ་བ་ལས་འཕྱང་བའི་སྦྲུལ་དུག་
འཐོར་བ་དང་། བ་ལང་རྣ་ལྟ་བུ་དང་། གཟར་བུ་ལྟ་བུ་དང་། སྦྲུལ་ཆེན་པོ་ཁ་གདངས་པའི་ཁ་ནས་བྱུང་བའི་མཆེ་བའི་རྩེ་མོ་ནས་དུག་དྲག་པོ་འབར་བ་འབྱུང་བའི་ཚོགས་ཀྱི་ཕྲེང་བས་བཞིན་དུ་མེ་འབར་བ། ལག་པ་སྟོང་ཕྲག་དུ་མ་ལ་རྡོ་རྗེ་དང་ཞགས་པ་དང་། གཏུན་ཤིང་དང་།
གཏུན་ཤིང་རྐེད་ཉག་དང་། རལ་གྲི་དང་། འཁོར་ལོ་དང་། ལྕགས་སྒྲོག་ལ་སོགས་པ་ཐོགས་པའི་མཚོན་ཆའི་རྩེ་མོ་ལ་མེ་སྟག་རབ་ཏུ་འཕྲོ་བའི་སྣང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཁོངས་སུ་གཏོགས་པའི་གནོད་སྦྱིན་དང་། སྲིན་པོ་དང་། ཡི་
དགས་དང་། ཤ་ཟ་དང་། མ་མོ་དང་། འབྱུང་བོའི་གདོན་དང་། བགེགས་དང་། ལོག་འདྲེན་ལ་སོགས་པ་སྡང་པ་རབ་ཏུ་སྡང་བའི་སེམས་ཅན་སྐྲག་པར་བྱེད་པ་རི་དགས་ཀྱི་དབང་པོའི་པགས་པ་ཁྲག་དང་བཅས་པ་ཤམ་ཐབས་སུ་བགོས་པ། སྦྲུལ་ཆེན་པོའི་ལུས་ཀྱིས་རྒྱ་

གྲམ་དུ་དམ་དུ་བཅིངས་པ། འཇིགས་པ་བས་ཀྱང་འཇིགས་པར་བྱེད་པ། འཆི་བདག་ཀྱང་སྐྲག་པར་བྱེད་པ། ཁམས་གསུམ་པ་ཐམས་ཅད་ཀྱིས་བསྡུས་པ་ལྟ་བུའི་ལུས་དང་ལྡན་པའི་ཁྲོ་བོར་གྱུར་ནས་ལུས་ཀྱི་ཚིགས་ཐམས་ཅད་ལས་ཀྱང་ཁྲོ་བོ་ཁ་དོག་དུ་མ་འདི་ལྟ་སྟེ། ཁ་དོག་
སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ནག་པོ་སྟེ། ཐམས་ཅད་ཀྱང་རྡོ་རྗེའི་རང་བཞིན་ཅན་ཁྲོ་གཉེར་མི་མཉམ་པས་རྣམ་པར་སྤྲས་པའི་གཉེར་མའི་ཁྲོ་གཉེར་ཅན་གྱི་དཔྲལ་བའི་དབྱེས་ནས་མེ་སྟག་ལྟ་བུའི་རྡུལ་གྱི་ཐིགས་པ་རྩུབ་པོ་འཛག་པ་ལས་དུག་འཆང་རྣམ་
པ་སྣ་ཚོགས་ཀུན་དུ་བྱུང་བས་ཡན་ལག་དང་ཉིང་ལག་ཀུན་དུ་དཀྲིས་པའི་མངོན་རྟགས་ཅན་དུ་གྱུར་ཅིང་རྡོ་རྗེ་དྲག་ཤུལ་ཅན་དུ་སྣང་སྟེ། མཆེ་བས་མི་བཟད་པར་འདུག་པའི་ཁ་གདངས་པ་ལས་ཧ་ཧ་ཞེས་གད་མོ་རྟ་གད་འབྱུང་ཞིང་། འཇིག་པའི་དུས་ཀྱི་རླུང་གིས་ཆར་པ་དང་བཅས་པའི་སྤྲིན་
དཀྲུགས་པ་ལས་ཆར་གྱི་རྒྱུན་རགས་པ་འབབ་པས་ཡོངས་སུ་གང་བས་རྒྱ་མཚོ་དཀྲུགས་ནས་རླབས་ཆེན་པོ་གཡོ་བ་དང་། རྟ་རྒོད་མའི་ཁ་ནས་མེ་འབྱུང་བ་ལྟ་བུའི་ཧཱུྃ་ཞེས་བྱ་བ་ཟབ་ཅིང་བརྟན་པས་རྒྱུ་བའི་འབྱུང་པོའི་ཚོགས་འཇིགས་སྐྲག་སྟེ་འབྱེར་ཞིང་འཐོར་ནས་དངངས་ཏེ་སྐྱབས་སུ་
དོང་ཞིང་འདུད་པས་ཉི་མ་སྟོང་བས་འབར་བའི་ལུས་རྣམས་མཐོང་བ་ན། སྣ་སྒར་སྒུར་ཅན་ཞོམ་པ་ལྟ་བུའི་བུ་ག་ཟབ་མོའི་སྦུབས་ཀྱི་ནང་ནས་སྦྲུལ་སྣ་ཚོགས་འཁྱིལ་པའི་གཙུག་གི་ནོར་བུའི་འོད་ཀྱིས་འགྲམ་པ་རྣམ་པར་མཛེས་པ། གློག་སྟོང་འདུས་པ་ལྟར་སེར་ཞིང་དམར་བའི་མིག་གི་འབྲས་
བུའི་འོད་ཟེར་གྱིས་སྐྲའི་ཚོགས་རྩུབ་ཅིང་བཤོར་ལ་གྱེན་དུ་འགྲེང་བའི་རྩེ་མོ་བརྒྱན་ཅིང་འདྲེས་ཏེ་གསལ་བར་གྱུར་པ། སྦྲུལ་གྱི་གདེངས་ཀ་སྟོང་གིས་གདུགས་བྱས་ཤིང་སྦྲུལ་རྣམ་པ་སྣ་ཚོགས་ཀྱི་དོ་ཤལ་དང་། སྐ་རགས་དང་། དཔུང་རྒྱན་དང་། གདུ་བུ་དང་། རྣ་ཆས་ལུས་བརྒྱན་པ།
རྡོ་རྗེ་འབར་བ་དྲི་མ་མེད་ཅིང་དྲག་ཤུལ་ཅན་མི་བཟད་པ་ལག་ན་ཐོགས་པ་མཛུབ་མོ་རྣམས་ལས་ཧཱུྃ་ཞེས་བྱ་བའི་སེང་གེའི་སྒྲ་ཆེན་པོ་དག་གིས་བགེགས་དང་ལོག་འདྲེན་ཐམས་ཅད་ཀུན་དུ་བསྡིགས་པ་དག་འཐོན་ཏེ། གང་དེ་དག་གི་མིག་དང་ཁ་རྣམས་ནས་གནམ་གྲུམ་པ་ལྟ་བུའི་སྒྲ་ཆེན་པོའི་

ཚོགས་ལས་མེ་ལྕེ་ཆེན་པོ་འབར་བའི་ཚོགས་ཀྱི་སྣང་བ་བྱུང་སྟེ། དེས་སྡང་བའི་བགེགས་དང་ལོག་འདྲེན་ལ་སོགས་པ་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སྡིག་པ་ཅན་སྡིག་པའི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པ་རྣམས་
ཚིག་པར་བྱེད། རྨོངས་པར་བྱེད་འཚོག་པར་བྱེད་དེ། མི་བཟད་པ་དྲག་པ་རྩུབ་པ་སྡུག་བསྔལ་བ་ཡིད་དུ་མི་འོང་བའི་ཚོར་བ་མྱོང་བར་བྱེད་དོ། །དེ་དག་ཚོར་བས་ཉེན་པས་དཀོན་མཆོག་གསུམ་ལ་སྐྱབས་སུ་དོང་ངོ་། །དེའི་ཚེ་བདུད་སྡིག་ཅན་གྱིས་བགེགས་དང་ལོག་འདྲེན་དེ་དག་
ཚོར་བ་ཆེན་པོས་ཉེན་ཏེ་དཀོན་མཆོག་གསུམ་ལ་སྐྱབས་སུ་དོང་བ་མཐོང་ནས་འཇིགས་དངངས་སྐྲག་སྟེ་སྐྱབས་མ་རྙེད་ནས་རླུང་དྲག་པོས་བསྐྱོད་པའི་ཤིང་བཞིན་དུ་འདར་རབ་ཏུ་འདར་ཏེ། ངུ་བར་འདོད་ན་ཡང་ངུ་མ་ནུས་ནས་རི་མོ་བཞིན་དུ་ལུས་ཐམས་ཅད་གཡོ་བ་མེད་པར་གྱུར་ཏོ། །
དེ་ནས་གསང་བ་པའི་བདག་པོ་ལག་ན་རྡོ་རྗེ་སངས་རྒྱས་ཀྱི་མཐུས་བདུད་སྡིག་ཅན་འདུལ་བར་བྱེད་དེ། སྡང་བ་དང་། གདོན་དང་། བགེགས་དང་ལོག་འདྲེན་ཐམས་ཅད་དང་། བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ། རྡོ་རྗེའི་རྣམ་པར་ཐར་པའི་སྒོ་ཆེན་པོའི་
ཏིང་ངེ་འཛིན་ལ་སྙོམས་པར་ཞུགས་ཏེ། དེ་ལྟ་བུའི་གཟུགས་སུ་འདུག་པའི་རྐང་པ་གཉིས་ལས་ཁྲོ་བོ་འབར་ཞིང་འཇིགས་འཇིགས་ལྟར་འདུག་པ་དྲག་ཤུལ་གྱི་གཟུགས་ཅན། སེང་གེའི་སྒྲ་ཆེན་པོ་ཧཱུྃ་ཞེས་བྱ་བ་འདི་གཉིས་ཕྱུང་སྟེ། དེ་གཉིས་སྐར་མདའ་བཞིན་དུ་ནམ་མཁའི་
དཀྱིལ་དུ་རྒྱང་རིང་དུ་འཕུར་ཏེ། ནམ་མཁའ་ལ་གནས་པའི་ཤུགས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ཏེ། གསང་བ་པའི་བདག་པོ་ལག་
ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཅི་བགྱི་བཀའ་སྩོལ་ཅིག །དེ་ནས་གསང་བ་བའི་བདག་པོ་ལག་ན་རྡོ་རྗེ་ཅང་མི་སྨྲ་བར་འདུག་སྟེ། ཡང་དཔྲལ་བའི་དཀྱིལ་ནས་རྡོ་རྗེ་ཁྲོ་བོ་འཇིགས་པ་ཆེན་པོའི་གཟུགས་ཅན་མཆེ་བ་མི་བཟད་པ་དྲག་པས་འཇིགས་སུ་རུང་བའི་ཁ་གདངས་

ཏེ། མཆུ་མ་རུངས་པར་བསྒྱུར་བའི་ཁ་ནས་དུས་ཀྱི་ཐ་མ་འཇིག་པའི་ཚེ་རྣམ་པར་འཐོར་བའི་རླུང་དྲག་པོའི་ཤུགས་ཀྱིས་རབ་ཏུ་བསྐྱོད་པའི་སྤྲིན་ནག་པོའི་ཚོགས་རབ་ཏུ་སྒྲོགས་པས་རྣམ་པར་དཀྲུགས་པའི་རྒྱ་མཚོ་ཆེན་པོའི་སྒྲ་དྲག་པོ་ལྟ་བུའི་ཧཱུྃ་ཞེས་བྱ་བའི་སེང་གེའི་སྒྲས་གང་བ། བགེགས་དང་
ལོག་འདྲེན་ཐམས་ཅད་འཇིགས་ནས་འབྲོས་ཤིང་སྒྱིད་ལུག་ནས་ཕྱོགས་བསླད་པར་བྱེད་པ། ལག་པ་དང་རྐང་པ་དང་། སེན་མོ་དང་། མིག་དང་། ཨག་ཚོམ་དང་སྐྲ་ཐམས་ཅད་རྡོ་རྗེ་འབར་བར་སྣང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་
པ། །གཟི་བརྗིད་ཐམས་ཅད་ཀྱི་གཟི་བརྗིད་རྣམས་རང་གི་གཟི་བརྗིད་ཀྱིས་ཟིལ་དུ་རླག་པར་བྱེད་ཅིང་རྒྱང་རིང་དུ་བྱེད་པའི་རྡོ་རྗེ་འབར་བའི་སྣང་བ་དེས་རྒྱུ་སྐར་དང་། གཟའ་དང་སྐར་མ་དང་། ནོར་བུ་རྣམས་ཀྱི་འོད་ལྷམ་མེར་མ་ཡིན། ལྷན་ནེར་མ་ཡིན། ལྷང་ངེར་མ་ཡིན་པར་བྱེད་
པ། གང་ཉི་མ་དང་ཟླ་བ་རྫུ་འཕྲུལ་ཆེ་བ། དབང་ཆེ་བར་གྲགས་པ། མཐུ་ཆེ་བ་ཡང་ལྷམ་མེར་མ་ཡིན། ལྷན་ནེར་མ་ཡིན། ལྷང་ངེར་མ་ཡིན་པར་བྱེད་པ། དེ་བཞིན་གཤེགས་པའི་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོས་བཅུ་ལ་རབ་ཏུ་གནས་པ་
རྣམས་ཀྱི་འོད་མ་གཏོགས་པར་འོད་གཞན་ཐམས་ཅད་མོག་མོག་པོར་བྱེད་པ་གཞན་ཕྱུང་ངོ་། །དེ་ནས་རྡོ་རྗེ་ཁྲོ་བོ་དེས་བཅོམ་ལྡན་འདས་དེ་བཞིན