Kinh tạng Tây Tạng (Kangyur Đại Học) — 093_རྒྱུད་འབུམ།_ཙ

ས་ཀྱི་ཞབས་ལ་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་རྣམ་གྲངས་འདི་གསུངས་པ་ནི་
ལེགས་སོ་ལེགས་སོ། །རིག་པའི་བརྟུལ་ཞུགས་ཐམས་ཅད་དཔྱད་པའི་དོན་དང་། ཕན་པའི་ཕྱིར་དང་། བདེ་བའི་ཕྱིར་དང་། འཇིག་རྟེན་ལ་སྙིང་བརྩེ་བས་བྱང་ཆུབ་སེམས་དཔའི་ཐབས་ལ་མཁས་པ་བསྟན་པ། མྱ་ངན་ལས་འདས་པའི་གྲོང་ཁྱེར་དུ་འགྲོ་བར་

བྱེད་པའི་ཆོས་ལྷག་མ་དང་བཅས་པ་ངེས་པར་བྱང་ཆུབ་ལ་རྒྱུན་དུ་མཆོག་ཏུ་གཞོལ་བ། བྱང་ཆུབ་སེམས་དཔའ་རྣམས་ཀྱིས་རིག་པ་དང་། སྔགས་ཀྱི་སྤྱོད་པ་ཐམས་ཅད་ཀྱི་དོན་སྒྲུབ་པར་བྱེད་པ་བདག་གི་རིག་པ་གསང་ཆེན་འདི་ཉིད་སྐྱེ་བོ་ཐམས་ཅད་རྒྱས་
པར་བྱེད་པར་འགྱུར་བ་མ་འོངས་པའི་དུས་འཇིག་རྟེན་གྱི་བླ་མར་མྱ་ངན་ལས་འདས་པ་ན་དེ་བཞིན་གཤེགས་པ་ཉི་མའི་རིགས་ནུབ་པ་སངས་རྒྱས་དང་བྱང་ཆུབ་སེམས་དཔའ་དང་། རང་སངས་རྒྱས་དང་། འཕགས་པ་ཉན་ཐོས་ཐམས་ཅད་ཀྱིས་སྤངས་ཤིང་ཐམས་ཅད་བོར་ཏེ་མུན་
པར་གྱུར་པ་དང་། སྣོད་ཀྱི་འཇིག་རྟེན་རྣམ་པར་ཞིག་སྟེ་འཕགས་པའི་ལམ་དང་། རིག་པ་དང་། སྔགས་དང་། སྨན་དང་། ནོར་བུ་རིན་པོ་ཆེ་ཐམས་ཅད་དང་བྲལ་བ། སྐྱེ་བོ་ལེགས་པས་ཡོངས་སུ་བཟུང་བའི་སྣང་བ་མེད་པའི་སེམས་ཅན་གྱི་ཁམས་འབྱུང་བར་འགྱུར་ཏེ།
ལེ་ལོ་ཅན་དང་། དྲན་པ་ཉམས་པ་དང་། མ་དད་པ་དང་། མི་སྲུན་པ་དང་། མི་དགེ་བའི་བཤེས་གཉེན་གྱིས་ཡོངས་སུ་ཟིན་པ་སྒྱུ་དང་གཡོ་དང་། བརྫུན་དང་གཡོ་བའི་སྤྱོད་པ་དང་ལྡན་པ་དེ་རྣམས། ཆོས་ཀྱི་རྣམ་གྲངས་འདི་ཐོས་ནས་ཀུན་དུ་སྐྲག་པར་འགྱུར་ཏེ། ལེ་ལོ་
དང་། སྙོམ་ལས་ལ་མངོན་པར་དགའ་ཞིང་དད་པ་མེད་པར་འགྱུར་ཏེ། འདོད་པ་ཚོལ་ཞིང་གསང་སྔགས་ཚོལ་བར་མི་འགྱུར་ཏེ། ལོག་པར་ལྟ་བ་ལ་དགའ་བ་རྣམས་ཀྱང་བསོད་ནམས་མ་ཡིན་པ་མང་པོ་ལ་འཇུག་པར་འགྱུར་ཏེ། དམ་པའི་ཆོས་སྤོང་བར་བྱེད་པ་འབྱུང་
བར་འགྱུར་རོ། །མནར་མེད་པ་ལ་མཆོག་ཏུ་གཞོལ་ཞིང་དྲག་པོའི་ཡང་དྲག་པོར་འགྲོ་བ་སྡུག་བསྔལ་གྱིས་གདུངས་པ་དེ་རྣམས་ཀྱི་དོན་གྱི་ཕྱིར་དང་། དབང་དུ་མ་གྱུར་པ་རྣམས་དབང་དུ་གྱུར་པར་བྱ་བ་དང་། དབང་དུ་གྱུར་པ་རྣམས་ལ་མི་འཇིགས་པ་རབ་ཏུ་སྦྱིན་པ་དང་། ཐབས་
ལ་མཁས་པས་བསྡུ་བའི་སྦྱོར་བ་རིག་པ་དང་། རས་རིས་ཀྱི་ཆོ་ག་ད་ལྟ་གསུངས་པའི་དུས་ལ་བབ་པར་དགོངས་ན་བཅོམ་ལྡན་འདས་གསུང་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་མཆོག་ཏུ་གསང་བ་རིག་པའི་བརྟུལ་ཞུགས་ཀྱི་ཆོ་ག་རབ་འབྱམ་མཆོག་ཏུ་

གསང་བ་འདོད་པའི་དོན་བྱེད་པ་དོན་ཆེན་པོ་རྣམ་པར་འབྱོར་པར་གྱུར་པ་རིག་པ་བདུན་ཅུ་པོ་ཐམས་ཅད་ཀྱི་མཆོག་གི་སྙིང་པོ། རྣམ་པར་རྟོག་པ་མེད་པའི་དུས་དེར་འགྲུབ་པར་འགྱུར་རོ། །དེ་ཡང་སེམས་ཅན་རྣམས་འདུལ་བའི་དོན་གྱི་ཐབས་ལ་མཁས་པས་འཁོར་བར་ཀུན་དུ་
འཇུག་པ་རྣམས་སྐྱོབ་པ། ངེས་པར་བྱང་ཆུབ་ལ་མཆོག་ཏུ་གཞོལ་བར་བྱེད་པ་སངས་རྒྱས་བྱེ་བ་ཕྲག་བདུན་ཅུ་རྩ་དྲུག་གིས་གསུངས་པར་གྱུར་པ། འདི་ལ་རིག་པ་ནི། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེནྡྲ་ཏཱ་རེ་
ཏུཏྟཱ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་ཤིན་ཏུ་རྒྱས་པ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་བཞིན་བཟང་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་
ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་དབུས་ལེགས་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏདྱ་ཐཱ། ཏཱ་རེ་ཏུཏྟ་རེ་ཏུ་རེ་སྭཱ་ཧཱ།
འཕགས་མ་སྒྲོལ་མ་ལེགས་སྤྱོད་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་མཚན་ལེགས་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་
ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏ་རེ་ཏུ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་ལྷོ་ཆུང་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ་ཏུ་རེ་ཏུ་རེ་སྭཱ་ཧཱ། འཕགས་མ་སྒྲོལ་
མ་ལེགས་གནས་མ་ཞེས་བྱ་བའོ། །ན་མོ་རཏྣ་ཏཱ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ། ཏུ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་ཉེ་བར་འདུད་པ་ཞེས་བྱ་བའོ། །ཞེས་པ་འདི་བཅོམ་ལྡན་འདས་བདག་གི་རིག་པ་

ཆེན་པོ་མཆོག་གི་སྙིང་པོ་ཆེན་པོ་དང་མཚུངས་པ་བྱ་བ་ཐམས་ཅད་མཆོག་ཏུ་གྲུབ་པ། སེམས་ཅན་ཐམས་ཅད་ལ་སངས་རྒྱས་བཞིན་དུ་སྐྱེས་པ། སངས་རྒྱས་ཐམས་ཅད་ཀྱིས་རྗེས་སུ་ཡི་རང་བ། འཇིགས་པ་ཆེན་པོ་བརྒྱད་ལས་སྐྱོབ་པ། ལས་ཐམས་
ཅད་བྱེད་པ། བྱང་ཆུབ་ཀྱི་ལམ་སྟོན་པ་པོ། །པདྨའི་རིགས་ཀྱི་རིག་པ། རབ་དང་། འབྲིང་དང་། ཐ་མ་ལ་ཡང་དག་པར་རབ་ཏུ་སྦྱོར་བ། ཤིན་ཏུ་མཛེས་པའི་ལས་ཀྱི་འབྲས་བུ་རྣམ་པར་སྨིན་པ། རབ་ཏུ་སྦྱིན་པ་དང་། བསྟན་པ་ནུབ་པའི་དུས་ཀྱི་ཚེའང་འགྲུབ་པར་འགྱུར་
རོ། །དམ་པའི་ཆོས་ཀྱི་ཚུལ་བསྲུང་བའི་ཆེད་དུ། མཉམ་པར་འཇུག་ཅིང་འགྲུབ་པར་འགྱུར་རོ། །དེ་རྣམས་སྦྱོར་བ་ཆུང་ངུ་ཉིད་ཀྱིས་རྒྱལ་སྲིད་ཆེན་པོ་དང་། ལོངས་སྤྱོད་ཆེན་པོའི་དབང་ཕྱུག་གི་དོན་དེ་རྣམས་འགྲུབ་པར་འགྱུར་རོ། །དེ་རྣམས་ཤིན་ཏུ་མྱུར་བར་དེའི་ཚེ་དེའི་དུས་
སུ་དངོས་གྲུབ་ཐོབ་པར་འགྱུར་རོ། །རས་རིས་ཀྱི་ཆོ་ག་མདོར་བསྡུས་པར་གྱུར་པ་འདི་དེའི་ཚེ་དེའི་དུས་ན་འཇིགས་པ་ཆེན་པོ་དང་། སྙིགས་མ་ལྔའི་སེམས་ཅན་བསོད་ནམས་ཆུང་བ་འབྱུང་བར་འགྱུར་ཏེ། དབང་ཆུང་བར་གྲགས་པ། ཚེ་ཐུང་བ། བརྩོན་འགྲུས་ཞན་པས་རས་རིས་ཀྱི་ཆོ་
ག་ཤིན་ཏུ་རྒྱས་པའི་ལས་བསྒྲུབ་པར་བྱ་བ་ལ་སོགས་པའི་ལས་རྣམས་རབ་ཏུ་བརྩོན་པར་མི་ནུས་ཏེ། དེ་རྣམས་ཀྱི་དོན་དུ་ཆེས་མདོར་བསྡུས་ཏེ་གསུངས་པ་ནི། དང་པོ་རེ་ཞིག་དཔའ་བོའི་རིན་གྱིས་དོག་པ་ཉོས། སྲང་ཚད་ཙམ་མམ་སྲང་ཕྱེད་ཙམ། དཀྱུས་སུ་ཁྲུ་གང་ཙམ་ལ་ཞེང་དུ་ཁྲུ་ཕྱེད་
ཙམ་པའི་རས་ཁ་ཚར་དང་བཅས་པ་ཐ་ག་པས་བཏག་པར་བྱའོ། །ཡང་ན་སླར་ཡང་སྐྲ་དང་བྲལ་བའི་རས་ཀྱི་དུམ་བུ་གསར་པ་སྟེང་འོག་ཏུ་ཇི་ལྟར་འདོད་པ་ཁྲུ་གཉིས་སམ་བཞིའམ། དྲུག་གམ། ལྔའམ། བཅུའམ། བརྒྱད་པའི་རས་ཤིན་ཏུ་དཀར་བ་བླངས་ཏེ། ཇི་ལྟར་འདོད་
པ་བཞིན་དུ་རི་མོ་མཁན་འདྲིར་གཞུག་པར་བྱའོ། །ཙནྡན་དང་ག་པུར་དང་གུར་གུམ་གྱིས་བསྒོས་པའི་མ་འདྲེས་པའི་ཚོན་རྩི་དེ་རྣམས་དང་། རས་ཙནྡན་དང་། གུར་གུམ་དང་། ག་པུར་རྣམས་གཅིག་ཏུ་བྱས་པས་སྲོག་ཆགས་མེད་པའི་ཆུ་རྙོག་མ་མེད་པ་དང་བསྲེས་ཏེ། སྣོད་གསར་པར་

རས་སྦང་དུ་བཅུག་ནས་ཉི་མ་གསུམ་དུ་ལེགས་པར་མནན་ལ་བཞག་གོ། །གཙང་བའི་ཕྱོགས་སུ་སྲུང་བ་བྱས་ཏེ་བདག་ཉིད་ཀྱང་གཙང་མར་བྱས་ནས། དཀར་པོའི་ཕྱོགས་ཀྱི་ཉ་ལ་རས་ཀྱི་སྣོད་ཀྱི་མདུན་དུ་ཁ་ཤར་དུ་ཕྱོགས་པས་ཀུ་ཤའི་ཁྲེས་ལ་ཉེ་བར་འདུག་སྟེ། སྔགས་ཀྱི་ཚིག་འདི་
ལན་སྟོང་ཕྲག་བརྒྱད་བརྗོད་པར་བྱའོ། །ཏདྱ་ཐཱ། ཨོཾ་ཧེ་ཧེ་བྷ་ག་བཱ་ན། བ་ཧུ་རཱུ་པ་དྷ་ར་དི་བྱ་ཙཀྵུ་ཥ། ཨ་བ་ལོ་ཀ་ཡ། ཨ་བ་ལོ་ཀ་ཡ་མཱཾ། ས་མ་ཡ་མ་ནུ་སྨ་ར། ཀུ་མཱ་ར་རཱུ་པ་དྷ་ར་ཎ། མ་ཧཱ་བོ་དྷི་སཏྭ། ཀིཉྩ་ར་ཡ་སི་ཧཱུྃ་ཕཊ་ཕཊ་སྭཱ་ཧཱ། སྔགས་འདི་བཟླས་པ་བྱས་ལ་དེ་
ཉིད་དུ་ཉལ་བར་བྱའོ། །རྨི་ལམ་དུ་གྲུབ་པའམ། མི་འགྲུབ་པར་སྟོན་པར་འགྱུར་རོ། །དེ་ནས་ལངས་ནས་གྲུབ་པའི་མཚན་མའི་རྨི་ལམ་མཐོང་ན། རིང་པོ་མི་ཐོགས་པར། རས་རིས་བྲི་བར་བྱའོ། །གལ་ཏེ་གྲུབ་པའི་མཚན་མའི་རྨི་ལམ་མ་མཐོང་ན་རས་དེ་སྣོད་དེ་ནས་ཕྱུང་སྟེ་ཉི་མ་
ལ་བསྐམ་པར་བྱའོ། །བསྐམས་ནས་སླར་ཡང་སྣོད་གསར་པ་གཞན་ཞིག་ཏུ་ལེགས་པར་སྦས་ལ་སྲུང་བ་བྱས་ཏེ་གཞག་པར་བྱའོ། །དེ་ནས་སླར་ཡང་མཆོག་གི་སྙིང་པོ་དེ་རྣམས་ལས་སྔགས་གང་ཡང་རུང་བ་གཅིག་བཟུང་ནས་ཇི་ལྟར་འདོད་པ་བཞིན་དུ་ཡི་གེ་དྲུག་པོ་རྣམས་ལས་
སླར་ཡང་ཡི་གེ་འབུམ་བཟླས་པར་བྱའོ། །དེ་ནས་ཆེས་མྱུར་བར་རས་རིས་འགྲུབ་པར་འགྱུར་རོ། །དང་པོ་རེ་ཞིག་རས་དེ་བླངས་ནས། ཆོ་འཕྲུལ་གྱི་ཟླ་ཕྱེད་དམ། གཞན་ཡང་དཀར་པོའི་ཉི་མ་དང་། རྒྱུ་སྐར་དགེ་བ་དང་། ཡང་དག་པར་ལྡན་པ། དགེ་བའི་ཚེས་དཀར་
པོའི་གཟའི་རེས་ཀྱི་ཉི་མ་ལ་ཤིན་ཏུ་མཛེས་པའི་དགེ་མཚན་དང་། བཀྲ་ཤིས་ཕུན་སུམ་ཚོགས་པའི་མཚན་མོ་ནམ་ཕྱེད་ཀྱི་དུས་ཀྱི་ཚེ། རི་མོ་མཁན་གསོ་སྦྱོང་ལ་ཉེ་བར་གནས་པས་རས་རིས་དེ་འདྲིར་གཞུག་པར་བྱའོ། །གཙང་མའི་ཕྱོགས་སུ་ག་པུར་གྱི་བདུག་པ་བསྲེགས་ཏེ་
དང་པོ་རེ་ཞིག་འཕགས་པ་སྤྱན་རས་གཟིགས་དབང་ཕྱུག་སྐུ་རྒྱན་ཐམས་ཅད་ཀྱིས་བརྒྱན་པ་བྱས་ཏེ། དབུ་ཟུར་ཕུད་ཅན་སྐྱེས་བུ་ཆེན་པོའི་མཚན་གྱིས་རྣམ་པར་བརྒྱན་པ། གསེར་གྱི་མདོག་ཅན། དར་ལ་སྔོན་པོ་གཡོ་བཞིན་པའི་ཤམ་ཐམས་ཅད་དར་ལ་སྔོན་པོའི་བླ་

གོས་མནབས་པ། སེང་གེའི་ཁྲིལ་སྐྱིལ་ཐུང་ཕྱེད་པས་བཞུགས་ཏེ་ཆོས་འཆད་བཞིན་པ། ཞབས་གཡས་པ་རིན་པོ་ཆེའི་ཞབས་རྟེན་ལ་བཞག་པ། སེང་གེའི་ཁྲི་ལ་བཞུགས་པ། རྣམ་པ་ཐམས་ཅད་ཀྱི་མཆོག་དང་ལྡན་པ། བལྟ་ན་སྡུག་པ་བཞིན་ཅུང་
ཟད་འཛུམ་པ། སྒྲུབ་པ་པོ་ལ་གཟིགས་པར་གྱུར་པ་བྲི་བར་བྱའོ། །གཡས་ཀྱི་གཞོགས་སུ་འཕགས་པ་ཀུན་དུ་བཟང་པོ་པྲི་ཡང་ཀུ་ལྟར་སྔོ་བསངས། རྔ་ཡབ་དཀར་པོ་གཡོབ་བཞིན་པ། ཕྱག་གཡོན་ན་ཡིད་བཞིན་གྱི་ནོར་བུ་བསྣམས་པ། ལུས་ཐམས་ཅད་མཛེས་པ།
རྒྱན་ཐམས་ཅད་ཀྱིས་བརྒྱན་པ། དར་ལ་སྔོན་པོ་གཡོ་བ་དང་བཅས་པའི་ཤམ་ཐབས་མནབས་པ། མུ་ཏིག་གི་དོ་ཤལ་གྱི་མཆོད་ཕྱིར་ཐོགས་པ་ཅན། ཕྱག་གཡོན་པས་པདྨ་དཀར་པོ་བསྣམས་པ། ཕྱག་གཡས་པས་རྔ་ཡབ་དཀར་པོ་གསེར་གྱི་ཡུ་བ་ཅན་བསྣམས་ནས་
གཡོབ་པར་བྱེད་བཞིན་པ་ཞི་བའི་རྣམ་པ་ཅན་སྤྱན་རས་གཟིགས་དབང་ཕྱུག་ལ་བལྟ་བར་གྱུར་པའོ། །དེ་བཞིན་དུ་འཕགས་པ་ཀུན་དུ་བཟང་པོ་པདྨ་དཀར་པོའི་གདན་ལ་བཞུགས་པ་སྟེ་དེ་དག་གཉིས་ཀའང་དེ་ལྟར་མངོན་པར་བྲིའོ། །པདྨའི་སྡོང་བུ་གཅིག་ལས་འཐོན་པའི་
པདྨ་གསུམ་གྱི་དབུ་མ་རྩ་བའི་པདྨའི་ཟེ་འབྲུ་ལ་བྱང་ཆུབ་སེམས་དཔའ་ཆེན་པོའི་སེང་གེའི་ཁྲི་དང་རིན་པོ་ཆེའི་ཞབས་རྟེན་ནོ། །པདྨ་གཞན་ལ་ནི་འཕགས་པ་ཀུན་དུ་བཟང་པོའོ། །པདྨ་གསུམ་པ་ལ་ནི་འཕགས་པ་མཐུ་ཆེན་ཐོབ་བོ། །པདྨའི་སྡོང་བུ་དེ་ནི་མཛེས་པ། རིན་
པོ་ཆེ་མར་གད་ཀྱི་རྣམ་པ་ལ་པདྨའི་མེ་ཏོག་དུ་མ་ཁ་བྱེ་བ་དང་། ཕྱེད་ཙམ་ཁ་བྱེ་བ་དང་། མེ་ཏོག་ཁ་མ་བྱེ་བ་དང་ལྡན་པ། མཚོ་ཆེན་པོ་མ་དྲོས་པ་ལས་བྱུང་བའི་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་མཚོ་ཆེན་པོ་ལས་སྐྱེས་པའི་པདྨའི་སྡོང་བུ་ལ་འཛིན་པ། ཀླུའི་རྒྱལ་
པོ་དེ་གཉིས་ཁ་དོག་དཀར་བ། གདེངས་ཀ་བདུན་གྱིས་བརྒྱན་པ། རྒྱན་ཐམས་ཅད་ཀྱིས་མཛེས་པ། ལུས་ཕྱེད་མིའི་ལུས་ལ་སྦྲུལ་གྱི་གདེངས་ཀས་མཚན་པ། ཕྱེད་སྦྲུལ་གྱི་ལུས་ཅན་འཕགས་པ་སྤྱན་རས་གཟིགས་དབང་ཕྱུག་ལ་ངེས་པར་རྟོག་བཞིན་པ། ཕྱེད་ཆུའི་

ནང་དུ་ནུབ་པ། ནོར་བུ་རིན་པོ་ཆེ་དང་གོས་ཀྱིས་ཉེ་བར་མཛེས་པ་བྲི་བར་བྱའོ། །མཚོ་ཆེན་པོ་དེའི་ཁོར་ཡུག་གི་འོག་ཏུ་རས་རིས་ཀྱི་མཐའི་གྲྭ་གཡས་ཀྱི་གཞོགས་སུ་སྒྲུབ་པ་པོ། འཕགས་པ་སྤྱན་རས་གཟིགས་དབང་ཕྱུག་གི་ཞབས་ཀྱི་དཀྱིལ་འཁོར་ལ་ངེས་པར་རྟོག་
བཞིན་པ་ལག་ན་སྤོས་ཕོར་ཐོགས་པ་ལུས་དང་པུས་མོའི་ལྷ་ང་འདུད་པ། ཆ་བྱད་དང་ཁ་དོག་ཇི་ལྟ་བ་བཞིན་དུ་མངོན་པར་བྲིའོ། །འཕགས་པ་སྤྱན་རས་གཟིགས་དབང་ཕྱུག་གི་སྟེང་དུ། རས་ཀྱི་མཐའ་གཉིས་སུ་ལྷའི་བུ་ཕྲེང་བ་འཛིན་པ་གཉིས་མེ་ཏོག་གི་ཕྲེང་བ་བཟུང་
ནས་ནམ་མཁའ་ལ་ལྡིང་བ། མེ་ཏོག་གི་ཚོགས་ཆེན་པོ་འཐོར་བར་བྱེད་བཞིན་པ། ཤིན་ཏུ་མཛེས་པ་དག་མངོན་པར་བྲིའོ། །རས་རིས་དེའི་ཁོར་ཡུག་ཏུ་ནཱ་ག་གེ་སར་ལ་སོགས་པའི་མེ་ཏོག་རབ་ཏུ་བཀྲམ་པ་བྲི་བར་བྱ་སྟེ། ཇི་ལྟར་འདོད་པའི་གཟུགས་གསུམ་
ལྷག་པར་གནས་པའམ། མངོན་པར་བྲིའོ། །འཕགས་པ་སྤྱན་རས་གཟིགས་དབང་ཕྱུག་ཆོས་སྟོན་པར་མཛད་བཞིན་པ་དང་། འཕགས་པ་ཀུན་དུ་བཟང་པོ་དང་། འཕགས་པ་ཕྱག་ན་རྡོ་རྗེ་ཕྱག་ན་རྔ་ཡབ་ཐོགས་པ་འདྲིར་གཞུག་པར་བྱའོ། །སྒྲུབ་པ་པོ་ཇི་ལྟར་
འདོད་པའི་གཟུགས་གསུམ་པོ་རྣམས་གདོན་མི་ཟ་བར་འདྲིར་གཞུག་པར་བྱ་སྟེ་ཇི་ལྟར་འདོད་པའི་རྣམ་པ་དང་། དབྱིབས་ཇི་ལྟར་གནས་པ་བཞིན་དུའམ། སྒྲུབ་པ་པོ་ཇི་ལྟ་ཇི་ལྟར་འདོད་པ་དེ་ལྟ་དེ་ལྟར་བྲི་བར་བྱའོ། །དབུས་སུ་བྱང་ཆུབ་སེམས་དཔའ་སེམས་དཔའ་ཆེན་པོ།
མཐའ་གཉིས་སུའང་། ཕྱག་ན་རྡོ་རྗེ་དང་། ཀུན་དུ་བཟང་པོ་ཇི་ལྟར་འདོད་པ་བཞིན་དུ་གདོན་མི་ཟ་བར་འདྲིར་གཞུག་པར་བྱའོ། །ཇི་ལྟར་རྙེད་པའི་རས་ཀྱི་དུམ་བུ་མཐོ་གང་ངམ། ཁྲུ་གང་ཙམ་ལ་བདག་ཉིད་དམ། གཞན་གྱིས་སམ། རི་མོ་མཁན་གསོ་སྦྱོང་མེད་
པའམ། དད་པ་ཅན་ནམ། གཙང་མའམ། མི་གཙང་བའམ། ཚུལ་ཁྲིམས་དང་ལྡན་པའམ། ཚུལ་ཁྲིམས་འཆལ་པའང་རུང་སྟེ། རི་མོ་མཁན་གྱིས་འདྲིར་གཞུག་པར་བྱའོ། །སྒྲུབ་པ་པོ་བདག་ཉིད་ནི། གདོན་མི་ཟ་བར་སྔོན་སྤྱད་པ་བྱས་པ། དད་པས་བྱང་

ཆུབ་ཏུ་སེམས་བསྐྱེད་པ་གདོན་མི་ཟ་བར་འགྱུར་བས་ཏེ། དེ་ལྟར་ན་སྔགས་འགྲུབ་པར་འགྱུར་གྱི་གཞན་དུ་སྡིག་པ་བྱེད་པས་ནམ་ཡང་མ་ཡིན་ནོ། །དེ་ལྟར་དད་པར་གྱུར་པ་ཡིས། །སྔགས་ཀྱི་ལྷ་རྣམས་བསྒྲུབ་བྱ་ཞིང་། །དད་པ་དེ་ཡིས་གསང་སྔགས་རྒྱལ། །
འགྲུབ་འགྱུར་འདིར་ནི་གཞན་དུ་མིན། །གང་ཕྱིར་དད་པ་ཐེག་པའི་མཆོག །གང་གིས་འདྲེན་པ་འགྲོ་བར་བྱེད། །དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་སྐྱེ་སྟེ། །ས་བོན་མེ་ཡིས་ཚིག་པ་ལས། །མྱུ་གུ་སྔོན་པོ་ཇི་བཞིན་ནོ། །དད་དང་ལྡན་པའི་མི་རྣམས་ལ། །
སངས་རྒྱས་ལས་རྣམས་འགྲུབ་པར་འགྱུར། །ལྟ་རྣམས་ཀུན་དང་ཁྱད་པར་དུ། །གསང་སྔགས་རྣམས་ནི་ཐམས་ཅད་ནི། །དད་པ་མེད་ན་མི་འགྲུབ་བོ། །འཇིག་རྟེན་པ་ཡི་ལྷ་རྣམས་དང་། །གང་ཡང་འཇིག་རྟེན་འདས་དེ་བཞིན། །དད་དང་ལྡན་པར་བརྗོད་པ་དང་། །རྙོག་པ་བྲལ་
བས་འགྲུབ་པར་འགྱུར། །ཡིད་ནི་བྱང་ཆུབ་དེར་སོན་པས། །དེ་རྣམས་བྱང་ཆུབ་ངེས་པར་འགྲུབ། །གཞན་གྱིས་འགྲུབ་པར་མ་གསུངས་ཏེ། །བསྟན་པ་འདི་ལས་ཟློག་པ་ཡིན། །རས་རིས་ཆུང་དང་ཆེན་པོ་དང་། །བར་མ་ཡོངས་སུ་བསྒྲགས་པ་ཡིན། །ལས་རྣམས་ཐམས་ཅད་སྒྲུབ་
བྱེད་པ། །དེ་ནི་རབ་ཏུ་བཤད་པར་བྱ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལས་བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་ཆོ་ག་ལས་རས་རིས་ཀྱི་ཆོ་ག་རབ་འབྱམ་ལྔ་པ་རྫོགས་སོ།། །།དེ་ནས་ཡང་བཅོམ་ལྡན་འདས་ཤཱཀྱ་
ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། སེམས་ཅན་ཆེན་པོ་ཁྱོད་ཀྱིས་སེམས་ཅན་དེ་རྣམས་ཀྱི་དོན་གྱི་ཕྱིར་བསྟན་པ་གང་ཡིན་པ་དེ་རྣམས་རས་རིས་ཀྱི་ཆོ་ག་རབ་འབྱམ་བཤད་པ་འདི་ཐབས་ཉུང་ངུ་ཉིད་ཀྱིས་འགྲུབ་པར་འགྱུར་
ཏེ་དེ་རྣམས་ཀྱི་དོན་གྱི་ཕྱིར་སྒྲུབ་པར་བྱེད་པ་ཐབས་ཡོན་ཏན་རྒྱས་པ་རབ་ཏུ་དབྱེ་བས་རྣམ་པར་ཕྱེ་བ་ལས་རྣམ་པར་དབྱེ་བ་དེ་ཡང་དག་པར་མཐུན་པར་བཤད་པར་བྱའི། དེ་ལེགས་པར་ཉོན་ལ། ལེགས་པར་ཡིད་ལ་གྱིས་ཤིག་སེམས་ཅན་ཐམས་ཅད་ཀྱི་དོན་གྱི་ཕྱིར་བཤད་པར་བྱའོ། །དེ་

ནས་ཡང་བྱང་ཆུབ་སེམས་དཔས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་འབྱོར་བ་བསྟན་པར་མཛད་ཅིང་སྔགས་ཀྱི་སྤྱོད་པའི་ཡོན་ཏན་སྒྲུབ་པའི་མཐུ་གསལ་བར་མཛད་པ་ལེགས་པར་གསུངས་པ་ནི་ལེགས་སོ། །བཅོམ་ལྡན་འདས་གང་ད་
ལྟ་དེའི་དུས་ལ་བབ་པར་དགོངས་ནས་བདག་ཅག་ལ་ཐུགས་བརྩེ་བའི་སླད་དུ་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཤཱཀྱ་ཐུབ་པས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས་འཛུམ་པ་མཛད་དོ། །དེ་ནས་བཅོམ་ལྡན་འདས་ཤཱཀྱ་ཐུབ་པའི་ཞལ་གྱི་སྒོ་
ནས་འོད་ཟེར་སྔོན་པོ་དང་། སེར་པོ་དང་། དཀར་པོ་དང་། བཙོད་དང་། ཤེལ་གྱི་ཁ་དོག་ལ་སོགས་པ་བྱུང་བར་གྱུར་ཏོ། །འོད་ཟེར་དེ་བྱུང་མ་ཐག་ཏུ་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་སྣང་བར་བྱས་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་
གནས་ཐམས་ཅད་སྤ་བཀོད་པར་མཛད་ནས། རྒྱུ་སྐར་གྱི་འོད་དང་། རིའི་ལྷའི་ཚོགས་ཀྱི་འོད་དང་། གང་དུ་ཟླ་བ་དང་ཉི་མ་འདི་ལྟར་མཐུ་ཆེ་ཞིང་རྫུ་འཕྲུལ་ཆེ་བ་དེ་དག་གི་འོད་ཀྱང་སྤ་བཀོད་པར་མཛད་ནས་དེ་རྣམས་མི་གསལ་ཞིང་འོད་མེད་པར་གྱུར་ཏེ་རྣམ་པར་སྣང་བར་མི་
འགྱུར་ཞིང་སྤ་བཀོང་བར་མཛད་དེ་ནོར་བུ་དང་སྔགས་དང་སྨན་དང་རིན་པོ་ཆེའི་འོད་ཐམས་ཅད་མེད་པར་བྱས་ནས་སླར་ཡང་བཅོམ་ལྡན་འདས་ཤཱཀྱ་ཐུབ་པའི་ཞལ་གྱི་སྒོར་ནུབ་པར་གྱུར་ཏོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་འཁོར་གྱི་དཀྱིལ་
འཁོར་དེ་ཉིད་ན་འདུས་ཤིང་འཁོད་པར་གྱུར་པ་དེ་སྟན་ལས་ལངས་ནས། རིངས་པའི་ཚུལ་གྱིས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་མ་མཆིས་རྐྱེན་མ་མཆིས་པར་
འཛུམ་པ་མི་མཛད་ན། བཅོམ་ལྡན་འདས་འཛུམ་པ་མཛད་པའི་རྒྱུ་གང་ལགས་རྐྱེན་གང་ལགས། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་དེ་དེ་བཞིན་ནོ། །དེ་

དེ་བཞིན་ཏེ། དེ་བཞིན་གཤེགས་པ་ནི་ཇི་སྐད་སྨྲས་པ་དེ་བཞིན་དུ་རྒྱུ་མེད་རྐྱེན་མེད་པར་འཛུམ་པ་མི་མཛད་ཀྱི། རྒྱུ་ཡོད། རྐྱེན་ཡོད་དོ། །གང་ཞིག་མདོ་སྡེའི་དབང་པོ་བཅོམ་ལྡན་འདས་མ་འཕགས་མ་སྒྲོལ་མའི་རྩ་བའི་ཆོ་ག་རིག་པའི་སྤྱོད་པ་རྗེས་སུ་སྒྲུབ་པ་ལས་སྒྲུབ་
པར་བྱེད་པའི་ཐབས་ལ་ཡང་དག་པར་གཞོལ་བ། ཆོས་ཀྱི་སྤྲིན་ལ་བརྟེན་ཅིང་ཡང་དག་པར་རྗེས་སུ་འཇུག་ཅིང་རྗེས་སུ་འབྲང་བར་བྱེད་པར་འགྱུར་བ་དང་། འཛིན་པར་འགྱུར་བ་དང་། ཀློག་པར་འགྱུར་བ་དང་། དད་པར་འགྱུར་བ་དང་། གླེགས་བམ་དུ་བྲི་བར་བྱས་ནས་མཆོད་པར་
འགྱུར་བ་དང་། ཙནྡན་དང་། ཕྱེ་མ་དང་། བྱུག་པ་དང་། བདུག་པ་དང་། ཕྲེང་བ་དང་། གདུགས་དང་། རྒྱལ་མཚན་དང་། བ་དན་རྣམ་པ་སྣ་ཚོགས་པའམ། སིལ་སྙན་གྱི་རྣམ་པའི་ཁྱད་པར་རམ། རོལ་མོ་སྣ་ཚོགས་དང་། ཕེག་རྡོབ་པ་དང་། ཐ་ན་རྗེས་སུ་ཡི་རང་བ་
དང་ལྡན་པའི་སེམས་རྒྱུན་དུ་ཐོབ་པའམ། སྤུ་ཟིང་ཞེས་བྱེད་པ་སྐྱེ་བར་བྱེད་པར་འགྱུར་བའམ། རིག་པའི་མཐུ་དང་ནུས་པ་ཐོས་ནས་དགའ་བ་སྐྱེ་བར་འགྱུར་བའམ། རྗེས་སུ་ཡི་རང་བར་འགྱུར་བའམ། སྤྱོད་པ་སོ་སོར་སྒྲུབ་པར་འགྱུར་བ་དེ་རྣམས་ངས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་བསྟན་ཏེ་དེ་རྣམས་ཐམས་ཅད་སངས་རྒྱས་བཅོམ་ལྡན་འདས་སུ་བྱེད་པར་འགྱུར་རོ། །དེ་ཉིད་ཀྱི་ཕྱིར་རྒྱལ་བ་འཛུམ་པ་མཛད་ཀྱིས་རྣམ་པ་གཞན་དུ་མ་ཡིན་ནོ། །དང་པོ་རེ་ཞིག་དམ་ཚིག་མཐོང་བ། སྔོན་སྤྱད་པ་རྣམས་བྱས་པ། མངོན་པར་དབང་
བསྐུར་ཐོབ་པས། རྟོག་པའི་རྒྱལ་པོ་འདི་ལ་རྩ་བའི་རིག་པའམ། སྙིང་པོའམ། ཉེ་བའི་སྙིང་པོའམ། གཞན་གང་ཡང་རུང་བའི་སྔགས་བཟུང་ནས་ཡི་གེ་གཅིག་པའམ། ཇི་ལྟར་འདོད་པ་བཞིན་ཡང་རུང་སྟེ། དགོན་པ་ཆེན་པོར་སོང་ནས་ལོ་བདུན་དུ་བཟླས་པ་བྱ་སྟེ།
འབྲས་བུ་དང་། ཆུའི་བཟའ་བ་དང་། རྩ་བ་དང་། འདབ་མ་བཟའ་ཞིང་། སྔོན་སྤྱོད་པ་རྣམས་བྱས་པར་འགྱུར་རོ། །དེ་ནས་རིའི་རྩེ་མོར་འཛེགས་ཏེ་རས་རིས་ཀྱི་ཐུ་བོ་ཞལ་ནུབ་དུ་ཕྱོགས་པར་བཞག་ནས། བདག་ཉིད་ཤར་དུ་མངོན་པར་ཕྱོགས་ཏེ། ཀུ་ཤའི་ཁྲེས་ལ་ཉེ་བར་

འདུག་ནས་པདྨ་དཀར་པོ་དང་། ཙནྡན་དཀར་པོ་དང་། གུར་གུམ་གྱིས་མངོན་པར་བཏགས་ཏེ། འབུམ་ཕྲག་གཅིག་བཅོམ་ལྡན་འདས་ཤཱཀྱ་ཐུབ་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་རང་སངས་རྒྱས་དང་། འཕགས་པ་ཉན་ཐོས་རྣམས་
ཀྱི་རས་རིས་ཀྱི་འོག་ནས་དབུལ་བར་བྱའོ། །ག་བུར་གྱི་བདུག་པ་ཡང་ཇི་ལྟར་འབྱོར་པ་བསྲེག་གོ། །ལྷའི་བུ་རྣམས་ལ་ཇི་ལྟར་རྙེད་པའི་མེ་ཏོག་གིས་མཆོད་པ་བྱའོ། །དེ་ནས་ཆོ་འཕྲུལ་གྱི་ཕྱོགས་ཀྱི་དཀར་པོའི་ཉའམ། ཉ་སོ་སོ་ལ་མཚན་མོ་ཕྱེད་ཀྱི་དུས་ཀྱི་ཚེ་རས་རིས་ཀྱི་སྤྱན་
སྔར་མེ་ཐབ་པདྨའི་རྣམ་པ་ལྟ་བུ་བྱས་ནས་ཙནྡན་དཀར་པོའི་ཤིང་གི་མེ་སྦར་ཏེ། གུར་གུམ་དང་ག་པུར་གཅིག་ཏུ་བྱས་ནས་སྲེག་བླུགས་ཇི་ལྟར་འབྱོར་པས་སྟོང་ཕྲག་བརྒྱད་སྦྱིན་སྲེག་བྱས་ཏེ། དེ་ནས་བསྲུང་བ་བྱའོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་ལས་འོད་ཟེར་བྱུང་སྟེ། རས་
རིས་ཀྱི་ཁོར་ཡུག་ཏུ་གཅིག་ཏུ་འབར་བར་གྱུར་པ་འབྱུང་ངོ་། །དེ་ནས་སྒྲུབ་པ་པོ་ཙནྡན་དང་། གུར་གུམ་གྱིས་བཏགས་པའི་པདྨ་དཀར་པོའི་མེ་ཏོག་གིས་མཆོད་ཡོན་དབུལ་ལོ། །དེ་ནས་སྒྲུབ་པ་པོས་རིངས་པའི་ཚུལ་གྱིས་རས་རིས་ལ་བསྐོར་བ་ལན་གསུམ་བྱས་ནས། སངས་རྒྱས་
དང་། བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་འཕགས་པ་ཉན་ཐོས་རྣམས་ལ་ཕྱག་འཚལ་ནས་སྔར་སྒྲུབ་པ་པོས་བྲིས་པའི་རས་མཐའི་ཕྱོགས་ནས་འཇིགས་པ་མེད་པས་རས་རིས་གཟུང་བར་བྱའོ། །དེ་ནས་བཟུང་བ་ཙམ་གྱིས་འཕུར་བར་འགྱུར་ཏེ། སེ་གོལ་
གཏོགས་པ་ཙམ་ལ་ཚངས་པའི་འཇིག་རྟེན་ལས་འདས་ཏེ། བདེ་བ་ཅན་གྱི་འཇིག་རྟེན་གྱི་ཁམས་སུ་ཀུན་དུ་གནས་པར་འགྱུར་རོ། །གང་དུ་བཅོམ་ལྡན་འདས་དེ་བཞིན་གཤེགས་པ་མེ་ཏོག་ཡང་དག་པར་སྐྱེས་པའི་དབང་གིས་རྒྱལ་པོ་དེ་བཞུགས་ཏེ། འཚོ་ཞིང་གཞེས་ལ་ཆོས་
ཀྱང་སྟོན་པར་བྱེད་པ་དང་། བསྐལ་པ་ཆེན་པོ་སྟོང་དུ་རྒ་བ་མེད་པ་དང་། འཆི་བ་མེད་པར་རོལ་པར་འགྱུར་རོ། །བྲིས་སྐུ་གནས་པ་དེ་ཉིད་དུ་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དེ་རྣམས་ཀྱི་བྱིན་གྱིས་བརླབས་

ཀྱང་ཤེས་སོ། །ཞིང་སྟོང་ཕྲག་ཀྱང་འདའ་བར་བྱེད་དོ། །ལུས་སྟོང་ཕྲག་སྟོན་པར་བྱེད་དོ། །རྫུ་འཕྲུལ་གྱི་མཐུ་དུ་མ་ཡང་དག་པར་འབྱིན་པར་བྱེད་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་དགེ་བའི་བཤེས་གཉེན་དུ་འགྱུར་རོ། །ངེས་པར་བྱང་
ཆུབ་ལ་གཞོལ་བར་འགྱུར་རོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་སྡེ་སྣོད། བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་ཆོ་ག་བྲིས་སྐུ་རབ་འབྱམ་ལས། མཆོག་གི་སྒྲུབ་པའི་ཐབས་ཀྱི་ཆོ་ག །ལས་ཀྱི་
འབྲས་བུ་དྲུག་པ་རྫོགས་སོ།། །།དེ་ནས་ཡང་སེམས་དཔའ་ཆེན་པོས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ན་འདུག་པའི་ལྷ་ཚོགས་རྣམས་ལ་བཀའ་སྩལ་པ། གྲོགས་པོ་དག་ཁྱེད་ཅག་ཉོན་ཅིག །ལས་ཆེན་པོ་དང་བཅས་པའི་རིག་པ་འཕགས་མ་སྒྲོལ་མའི་སྤྱོད་
པའི་དཀྱིལ་འཁོར་སྒྲུབ་པར་བྱེད་པའི་ལས་ཀྱི་ཆོ་ག་སྒྲུབ་པ་པོ་སྲུང་བའི་དོན་དུ་གསང་བ་དམ་པ་མཆོག་གི་སྙིང་པོ་དེ་བཞིན་གཤེགས་པ་ཐམས་ཅད་ཀྱིས་གསུངས་པ་རིག་པའི་རྒྱལ་མོ་ཆེན་མོ་གང་གིས་བཟླས་ན་སྔགས་ཐམས་ཅད་བཟླས་པར་འགྱུར་རོ། །ཀྱེ་ཀྱེ་ལྷའི་ཚོགས་རྣམས་
འདི་ནི་འདའ་བར་བྱེད་པ་མ་ཡིན་པའི་རིག་པའི་རྒྱལ་མོ་བྱང་ཆུབ་སེམས་དཔའ་ས་བཅུའི་དབང་ཕྱུག་ཀྱང་རིག་པ་འདིས་འགུགས་ཤིང་། དབང་དུ་བྱེད་ལ་ཡང་དག་པར་འདོད་པར་འགྱུར་བར་བྱེད་ན་དེ་ལས་གཞན་པའི་བྱང་ཆུབ་སེམས་དཔའ་དང་། འཇིག་རྟེན་དང་འཇིག་རྟེན་ལས་འདས་
པ་རྣམས་སྨོས་ཅི་དགོས། སྔགས་ཐམས་ཅད་དང་བགེགས་ཐམས་ཅད་འཇོམས་པར་བྱེད་པ་སྟེ། འདི་ནི་བརྩོན་འགྲུས་ཆེ་བ་དང་། མཐུ་ཆེ་བ་དང་། གཅིག་ཏུ་དཔའ་བ། རིག་པ་ཐམས་ཅད་གཅིག་ཁོ་ནར་སྔགས་ཐམས་ཅད་ཀྱི་མཆོག་ཏུ་བཤད་པ་དང་། གཅིག་ཁོ་ན་རིག་
པའི་རྒྱལ་མོ་འཇིགས་པ་ཆེན་པོ་རྣམས་ལས་མཆོག་ཏུ་བཤད་པ་སྟེ། དེ་གང་ཞེ་ན། ལས་ཆེན་པོ་ཐམས་ཅད་བྱེད་པ། དོན་ཐམས་ཅད་སྒྲུབ་པ། བྱ་བ་ཐམས་ཅད་བྱེད་པ། སྔགས་ཐམས་ཅད་གཅོད་པར་བྱེད་པ། གདུག་པའི་ལས་རྣམས་དང་སྡིག་པ་ཐམས་ཅད་རབ་ཏུ་

འཇོམས་པར་བྱེད་པ། སྔགས་ཐམས་ཅད་སོ་སོར་རྫོགས་པར་བྱེད་པ། དགེ་བར་བྱེད་པ། འཇིག་རྟེན་དང་འཇིག་རྟེན་ལས་འདས་པའི་རིག་པ་དང་། སྔགས་ཐམས་ཅད་ཀྱི་གོང་ནས་གོང་དུ་རབ་ཏུ་འཇུག་པ། ཐོགས་པ་མེད་པ། དེ་བཞིན་གཤེགས་པ་ཐམས་ཅད་ཀྱི་སྙིང་
པོ་ཡང་དག་པར་གྱུར་པ། བསམ་པ་ཐམས་ཅད་ཡོངས་སུ་རྫོགས་པར་བྱེད་པ། དེ་གང་ཞེ་ན། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཏཱ་རེ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། གྲོགས་པོ་དག་འདི་ནི་
མཆོག་ཏུ་གསང་བ་དམ་པ་ལས་ཆེན་པོ་ཐམས་ཅད་བྱེད་པ། རིག་པའི་རྒྱལ་མོ་ཆེན་མོ་སེམས་ཅན་ཐམས་ཅད་ཀྱིས་འདའ་བར་བྱེད་པ་མ་ཡིན་པ། འབྱུང་པོ་ཐམས་ཅད་ཀྱིས་མི་ཚུགས་པ། སངས་རྒྱས་ཐམས་ཅད་ཀྱིས་བཀྲ་ཤིས་པ། རིག་པ་དང་སྔགས་ཐམས་ཅད་ཀྱིས་
བསྒྲུབས་པ། འཇིག་རྟེན་ཐམས་ཅད་ཀྱི་མངའ་བདག །རིག་པའི་དབང་ཕྱུག་ཐམས་ཅད་ཀྱི་དབང་ཕྱུག །རྣམ་པར་སྡང་བ་ཐམས་ཅད་ལ་བྱམས་པའི་བདག་ཉིད། སྐྱེ་བོ་རྣམས་ལ་སྙིང་བརྩེ་བ་དང་། བགེགས་ཐམས་ཅད་རྣམ་པར་འཇོམས་པར་བྱེད་པ་སྟེ། མདོར་ན་ཇི་ལྟ་ཇི་ལྟར་
རབ་ཏུ་སྦྱར་བ་དེ་ལྟ་དེ་ལྟར་རབ་ཏུ་བྱེད་དོ། །མ་བསྒྲུབས་པར་ཡང་ལས་རྣམས་བྱེད་དོ། །རིག་པ་བཟླས་ནས་གང་ལ་རེག་པ་དེ་དབང་དུ་འགྱུར་རོ། །གོས་ལ་མངོན་པར་བསྔགས་ནས་གྱོན་ན་སྐལ་བ་བཟང་པོར་འགྱུར་རོ། །སོ་ཤིང་ལ་མངོན་པར་བསྔགས་ཏེ་ཟོས་ན་སོ་ནད་སེལ་བར་
འགྱུར་རོ། །ཀ་ར་བཱི་ར་དཀར་པོ་ལ་ལན་བདུན་མངོན་པར་བསྔགས་ནས་ཟོས་ན་དོན་དུ་མ་གཉེར་བར་ཡང་ཁ་ཟས་འབྱུང་བར་འགྱུར་རོ། །མིག་གི་ནད་ལ་རྒྱམ་ཚ་ཕྱེ་མར་བྱས་པ་ལ་ལན་བདུན་མངོན་པར་བསྔགས་ནས་མིག་བཀང་ན་མིག་ནད་སེལ་བར་བྱེད་དོ། །རྣ་བའི་ནད་
ལ་གླང་པོ་ཆེའི་རྒྱབ་ནས་འཐོན་པ་འབྲུག་སྒྲོགས་པ་ན་འབྱུང་བའི་ཚི་དྷྲི་ཀ །ཀ་བུ་ཀའི་ལོ་མར་བཏུམས་ཏེ་མེ་ཆུང་ངུས་བཙོ་བར་བྱའོ། །ཚོས་ནས་ཕྱིར་བཙོས་པ་བྱས་ལ་ཆུ་དྲོ་འཇམ་ལ་རྒྱམ་ཚ་དང་སྦྱར་བ་བྱས་ནས་ལན་བདུན་མངོན་པར་བསྔགས་ཏེ་དེས་རྣ་བ་དག་པར་

བྱས་ཏེ་སྐད་ཅིག་དེ་ཉིད་ལ་ཉེ་བར་ཞི་བར་བྱེད་དོ། །བུད་མེད་བུ་འབྱུང་བའི་དུས་སུ་མངལ་འགགས་ནས་གཟེར་བས་ཟིལ་གྱིས་ནོན་པར་གྱུར་ན། ཨ་ཊརླུ་ཥ་ཀའི་རྩ་བ་སྲོག་ཆགས་མེད་པའི་ཆུ་ལ་བཏགས་ནས་ལྟེ་བའི་ཕྱོགས་སུ་བྱུགས་ན་བདེ་བླག་ཏུ་བཙའ་
བར་འགྱུར་རོ། །སྐྱེས་བུ་ཟུག་རྔུས་ཉམས་པའམ། མཚོན་ནང་དུ་ལུས་པ་ལ་མར་རྙིང་པ་ལ་བརྒྱ་རྩ་བརྒྱད་མངོན་པར་བསྔགས་ནས་བླུད་པར་བྱ་བའམ། དེའི་ཕྱོགས་སུ་བྱུགས་ན། དེའི་སྐད་ཅིག་ཉིད་ལ་ཟུག་རྔུ་མེད་པར་འགྱུར་རོ། །མ་ཞུ་བ་དང་། གསུད་པ་དང་།
ཚད་པའི་ནད་ལ་ཁ་རུ་ཚ་དང་། རྒྱམ་ཚ་དང་། ཚྭ་གཞན་གང་ཡང་རུང་བ་ལ་མངོན་པར་བསྔགས་ནས་ཟོས་ན། ནད་དེ་ལས་གྲོལ་བར་འགྱུར་ཏེ་ཉི་མ་དེ་ཉིད་ལ་བདེ་བར་གནས་པར་འགྱུར་རོ། །གཏན་ནད་ཀྱི་ཚད་པའམ། འཕྲལ་གྱི་ཚད་པ་ལ་ཡང་རུང་སྟེ། མ་ཏུ་ལུང་
གའི་རྩ་བ་བཏགས་ནས་སྲོག་ཆགས་མེད་པའི་ཆུ་འཐུང་དུ་གཞུག་སྟེ་གནོད་པ་མེད་པར་དེ་ལས་གྲོལ་བར་འགྱུར་ཏེ། ལན་བདུན་བཟླས་པས་སམ། གཉིས་བཟླས་པས་སོ། །བུད་མེད་མོ་གཤམ་མི་སྐྱེ་བའི་ཆོས་རྣམས་སྐྱེ་བར་འདོད་ན་ཨ་ཤྭགནྡྷའི་རྩ་བའི་མར་དང་ལྷན་ཅིག་
བསྐོལ་ཏེ་བའི་འོ་མས་བསྲེས་ཏེ་ལན་ཉི་ཤུ་རྩ་ལྔ་ཡོངས་སུ་བཟླས་ཏེ། ཟླ་མཚན་གྱི་དུས་སུ་འཐུང་དུ་བཅུག་ནས་ཁྲུས་བྱས་པའི་མཐར་སྐྱེས་པ་གཞན་སྤང་ཞིང་ཁྱིམ་པ་ཡང་འདོད་པས་ལོག་པར་གཡེམ་པ་ཡོངས་སུ་སྤངས་ན། རང་གི་སྐྱེས་པའམ། རང་གི་བདག་པོའི་བུ་
སྐྱེ་བར་འགྱུར་རོ། །ལོ་གསུམ་མམ། ལོ་ལྔ་རབ་ཏུ་སྐྱེས་པའི་དུས་ལས་ལྷག་པའམ། ལོ་དུ་མར་བུ་མ་ཆགས་པའམ་གཞན་གྱི་སྔགས་དང་སྨན་གྱི་ཕྱག་རྒྱས་བཏབ་པ་དང་། གཞན་གྱིས་གདུག་པར་བྱས་པའམ། མངལ་འཛིན་པ་མི་འཛིན་པར་བྱས་པའམ། ནད་
ཀུན་དུ་ལངས་པའམ། སྦྱོར་བ་གཞན་ཀུན་དུ་སྤངས་པའམ། ནད་གཞན་གང་ཡང་རུང་བ་ཅུང་ཟད་ཀྱིས་ཡོངས་སུ་མི་འཛིན་པར་བྱས་པའམ། བརྟན་པ་དང་། གཡོ་བ་དང་། བཅོས་མ་དང་། བཅོས་མ་མ་ཡིན་པ་ལ་སོགས་པའི་དུག་ལ་སོགས་པ་རབ་ཏུ་ཞུགས་

པའམ། རྩ་བ་དང་། སྔགས་དང་། སྨན་དང་། མཛའ་བ་དང་། མི་མཛའ་བའི་སྦྱོར་བ་བྱས་པ་ལ། མར་རྙིང་པ་དང་། རྨ་བྱའི་མདོངས་གཅིག་ཏུ་བྱས་ནས་བཏགས་ལ། ཤ་ཁ་ར་དང་ལྷན་ཅིག་སྦྱར་ཏེ། ལན་ཉི་ཤུ་རྩ་བདུན་མངོན་པར་བསྔགས་ནས། ཨ་རུ་ར་ཙམ་
བཟའ་བར་བྱ་སྟེ། ཉིན་ཞག་བདུན་གྱི་བར་དུ་ཤ་ཁ་ར་དང་ལྡན་པའི་འོ་མ་བསྐོལ་བ་བཏུང་བར་བྱ་ཞིང་ཡང་དང་ཡང་དུ་སྔགས་ཀྱང་བཟླས་སོ། །ཀླད་པ་ན་བ་ལ་བྱ་རོག་གི་གཤོག་པ་ལ་ལན་བདུན་མངོན་པར་བསྔགས་ཏེ་དེས་བྱ་བས་ན་བདེ་བར་གནས་པར་འགྱུར་རོ། །བུད་མེད་ལ་ཆེས་
སྤྱད་པ་ལ་སོགས་པའི་ནད་རྣམས་ལ་ཨ་ལམ་བུ་ཤའི་རྩ་བ་འོ་མ་དང་ལྷན་ཅིག་བཏགས་ནས་ནི་ལི་ཀའི་རྩ་བ་དང་ལྡན་པ་ལ་བརྒྱ་རྩ་བརྒྱད་དུ་མངོན་པར་བཟླས་ནས་འོ་མས་སྐྱོ་མར་སྦྱར་ནས་བཏུང་བར་བྱའོ། །དེ་བཞིན་དུ་རིམས་ཉིན་བཞི་པ་དང་། ཉིན་གཅིག་པ་དང་། ཉིན་གཉིས་
པ་དང་། ཉིན་གསུམ་པ་དང་། རྒྱུན་པ་དང་། རྟག་པའི་རིམས་དང་། རིམས་དྲག་པོ་ལ་སོགས་པ་རྣམས་ལ་འོ་ཐུག་མར་དང་སྦྱར་ལ་བརྒྱ་རྩ་བརྒྱད་མངོན་པར་བསྔགས་ཏེ་འཐུང་དུ་བཅུག་ན་བདེ་བར་གནས་པར་འགྱུར་རོ། །དེ་བཞིན་དུ་མཁའ་འགྲོ་མའི་གདོན་གྱིས་ཟིན་པ་ལ།
བདག་ཉིད་ཀྱི་གདོང་ལ་ལན་བརྒྱ་རྩ་བརྒྱད་མངོན་པར་བསྔགས་ནས་བལྟས་ན་བདེ་བར་གནས་པར་འགྱུར་རོ། །དེ་བཞིན་དུ་མ་མོ་དང་། བྱིས་པ་དང་། སྲུལ་པོ་དང་། རོ་ལངས་དང་། གྲུལ་བུམ་གྱི་གདོན་ལ་སོགས་པ་རྣམས་དང་། མི་ཐམས་ཅད་གདུག་པ་ཅན་དྲག་པོས་
མངོན་པར་ཟིན་པ་ལ་བདག་ཉིད་ཀྱི་ལག་པ་ལ་བརྒྱ་རྩ་བརྒྱད་མངོན་པར་བསྔགས་ཏེ། ཟིན་པ་དེའི་མགོ་བོ་ལ་རེག་ན་བདེ་བར་གནས་པར་འགྱུར་རོ། །ལན་ཅིག་བཟླས་པས་བདག་ཉིད་སྲུང་ངོ་། །གཉིས་བཟླས་པས་གྲོགས་པོ་སྲུང་ངོ་། །གསུམ་བཟླས་པས་ཁྱིམ་སྲུང་
ངོ་། །བཞི་བཟླས་པས་གྲོང་སྲུང་ངོ་། །ལྔ་བཟླས་པས་གྲོང་གི་སྤྱོད་ཡུལ་དུ་གྱུར་པ་སྲུང་བར་འགྱུར་རོ། །དེ་བཞིན་དུ་ཇི་སྲིད་སྟོང་ཕྲག་གི་བར་དུ་བཟླས་པས་དམག་གི་ཚོགས་སྲུང་བ་བྱས་པར་འགྱུར་རོ། །འདི་རྣམས་སམ་གཞན་ཡང་ལས་ཕྲ་མོ་རྣམས་མ་བསྒྲུབས་

པར་ཡང་བྱེད་དོ། །དེ་ནས་སྒྲུབ་པར་འདོད་ན་ཕྲ་མོའི་ལས་རྣམས་མི་བྱ་བར་མཐའ་གཅིག་ཏུ་སོང་ནས་དབེན་པའི་ཕྱོགས་རྒྱ་མཚོར་འགྲོ་བའི་ཆུ་ཀླུང་འབབ་པ་དང་། རྒྱ་མཚོའི་ངོགས་དང་། གང་གཱའི་ཀླུང་གི་ངོགས་དང་། གཞན་ཡང་ཆུ་ཀླུང་ཆེན་པོའི་
ངོགས་ལ་བརྟེན་ནས། ཕྱོགས་གཙང་མ་ཕྱག་དར་བྱས་ནས་ཁྲུས་ལན་གསུམ་བྱ་ཞིང་། གོས་ལན་གསུམ་བརྗེས་ཏེ། སྨྲ་བ་བཅད། སློང་མོའི་ཁ་ཟས་ཟ་ཞིང་། ལོ་མ་དང་། ནས་ཟན་དང་། འོ་མ་དང་འབྲས་བུ་ཟ་ཞིང་འབུམ་ཕྲག་བཅུ་གཅིག་བཟླས་པར་བྱའོ། །
གྲུབ་པའི་མཚན་མ་མཐོང་ན། དེ་ནས་སྒྲུབ་པ་བརྩམ་པར་བྱ་སྟེ་ཕྱོགས་དེ་ཉིད་དུ་རས་རིས་ཐུ་བོ་དེར་བཞག་ལ། རས་རིས་ལ་མཆོད་པ་ཆེན་པོ་བྱས་ནས་གསེར་དངུལ་གྱི་རང་བཞིན་ནམ། ཟངས་དང་སའི་རང་བཞིན་གྱི་མར་མེའི་སྣོད། ཏུ་རུཥྐའི་འབྲུ་མར་གྱིས་བཀང་བའམ།
དྲི་ཞིམ་པོའི་འབྲུ་མར་གྱིས་བཀང་བའམ། བའི་མར་གྱིས་བཀང་བའི་མར་མེའི་སྣོད་དུ་རས་གསར་པ་དུམ་བུར་བྱས་པའི་མར་མེ་འབུམ་ཕྲག་གཅིག་རས་རིས་ལ་དབུལ་བར་བྱའོ། །དེའི་ཁོར་ཡུག་ཏུ་མར་མེའི་ཕྲེང་བ་རྣམས་ཕུལ་མ་ཐག་ཏུ་རས་རིས་ལས་འོད་ཟེར་རྣམས་བྱུང་
མ་ཐག་ཏུ་རས་རིས་ཀུན་ནས་འབར་བའི་ཕྲེང་བར་འགྱུར་རོ། །སྟེང་གི་བར་སྣང་ལ་རྔ་བོ་ཆེའི་སྒྲ་སྒྲོགས་ཤིང་ལེགས་སོ་ཞེས་པ་ཡང་ཐོས་ཏེ། དེ་ནས་རིག་པ་འཛིན་པས་རིངས་པའི་ཚུལ་གྱིས་རས་རིས་ཀྱི་མཐའི་ཟུར་དུ་སྒྲུབ་པ་པོ་སྔར་བྲིས་པར་རས་རིས་ལ་བརྟེན་པ་ལ་མཆོད་ཡོན་ཕུལ་ནས་བསྐོར་
བ་བྱས་ཏེ་སངས་རྒྱས་ཐམས་ཅད་ལ་ཕྱག་བྱས་ལ་གཟུང་བར་བྱའོ། །དེ་ནས་བཟུང་བ་ཙམ་གྱིས་མར་མེ་འཛིན་པ་དེ་རྣམས་ཐམས་ཅད་ཀྱི་ལྷན་ཅིག་ཏུ་འཕུར་བར་འགྱུར་རོ། །གཅིག་གིས་ལྷག་པའི་གཞལ་མེད་ཁང་བརྒྱར་ཡང་འགྲོ་བར་བྱེད་དོ། །ལྷའི་སིལ་སྙན་དང་
སོ་སོར་ཡང་དག་པར་ལྡན་པ་དང་། སྒྲ་སྙན་པའི་གླུ་དབྱངས་སྒྲོགས་ཤིང་གར་བྱེད་པའི་རིག་པ་འཛིན་མ་དེ་རྣམས་ཀྱིས་འཁོར་ཡུག་ཏུ་ཀུན་ཏུ་ཁྱབ་པར་སྣང་བ་སྒྲུབ་པ་པོ་རིག་པ་འཛིན་པའི་རྒྱལ་པོ་ཆེན་པོར་དབང་སྐུར་བར་བྱེད་དོ། །མར་མེ་འཛིན་པ་དེ་རྣམས་ཀྱིས་ལྷན་ཅིག་

རྒ་བ་མེད་ཅིང་འཆི་བ་མེད་པར་རོལ་པར་བྱེད་དོ། །བསྐལ་པ་ཆེན་པོར་གནས་ཤིང་ཉི་མ་འཆར་ཀ་འདྲ་བ་དང་། ལྷའི་རྒྱན་གྱིས་མཛེས་པ་དང་། རྣམ་པར་བཀྲ་བའི་གོས་ཀྱིས་བརྒྱན་པ། དེ་རྣམས་དབང་དུ་བྱས་ནས་མངག་གཞུག་པར་འགྱུར་ཏེ། དེ་རྣམས་དང་ལྷན་ཅིག་སྤྱོད་
པར་གྱུར་ཏེ་ལྷའི་རིག་པ་འཛིན་པ་ཐམས་ཅད་ཀྱང་འདིའི་བྲན་ཉིད་དུ་ཉེ་བར་གནས་པར་འགྱུར་རོ། །རིག་པ་འཛིན་པའི་རྒྱལ་པོ་ཆེན་པོར་འགྱུར་ཞིང་རིང་དུ་འཚོ་ཞིང་གྲུབ་པ་ཐམས་ཅད་ཀྱིས་མི་ཚུགས་པར་འགྱུར་རོ། །སྐད་ཅིག་ཙམ་གྱིས་ཚངས་པའི་འཇིག་རྟེན་དུ་མངོན་པར་འགྲོ་
བར་འགྱུར་རོ། །བརྒྱ་བྱིན་གྱིས་ཀྱང་གྲངས་སུ་མི་འགྲོ་ན་དེ་ལས་གཞན་པའི་རིག་པ་འཛིན་པ་རྣམས་ཀྱིས་ལྟ་ཅི་སྨོས། མཐར་ཡང་འདིས་སངས་རྒྱས་ཉིད་དུ་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་ཀྱང་དགེ་བའི་བཤེས་གཉེན་དུ་འགྱུར་རོ། །ལས་སྒྲུབ་
པའི་ཐབས་གཞན་ཡང་ཡོད་དེ། ཆེས་དཀའ་ཐུབ་བྱས་པ། དེ་ནས་མཐའ་གཅིག་ཏུ་སོང་ནས་ལྷག་པར་གནས་ཏེ་འདུ་འཛི་མེད་ཅིང་འདུ་འཛི་དང་བྲལ་བའི་དགོན་པ་ཆེན་པོར་ཞུགས་ནས། གནས་གང་ན་པདྨའི་མཚོ་ཆེན་པོ་དང་། ཆུ་དང་བཅས་པ། རི་བོ་གཅིག་ལ་
བརྟེན་པའི་རི་བོ་དེའི་རྩེ་མོར་འཛེགས་ཏེ། རིག་པ་རྣམས་ཀྱི་དྲི་དང་མེ་ཏོག་ལ་སོགས་པ་ཕུལ་ནས་དེ་རྣམས་ཇི་ལྟར་འདོད་པ་བཞིན་དུ། འོ་མའམ་ནས་ཟན་དང་། པདྨའི་རྩ་བ་དང་། འབྲས་བུ་བཟའ་ཞིང་འོ་མ་ལས་བྱུང་བ་ཟོས་ཏེ་རིག་པ་འབུམ་ཕྲག་བཅུར་བཟླས་
པ་བྱའོ། །བཟླས་པའི་མཐར་ཡང་སྔར་བསྟན་པའི་ཆོ་ག་དེ་ཉིད་ཀྱིས་རས་རིས་ཀྱི་ཐུ་བོ་བཞག་ནས། པདྨའི་མེ་ཏོག་ལ་ཙནྡན་དཀར་པོ་དང་། གུར་གུམ་གྱིས་བཏགས་ཏེ་སེང་ལྡེང་གི་ཤིང་གི་མེ་སྦར་ནས་སྔར་ཡོངས་སུ་བཏགས་པའི་པདྨས་སྟོང་ཕྲག་སུམ་ཅུ་རྩ་དྲུག་གིས་
སྦྱིན་སྲེག་བྱའོ། །དེ་ནས་སྦྱིན་སྲེག་གི་མཐར། བཅོམ་ལྡན་འདས་ཤཱཀྱ་ཐུབ་པའི་རས་རིས་ལས་འོད་ཟེར་འབྱུང་སྟེ། དེས་སྒྲུབ་པ་པོ་ཀུན་དུ་སྣང་བར་བྱས་ནས་སྤྱི་བོར་ནུབ་པར་འགྱུར་རོ། །རེག་མ་ཐག་ཏུ་སྒྲུབ་པ་པོ་མངོན་པར་ཤེས་པ་ལྔར་འགྱུར་རོ། །བྱང་ཆུབ་

སེམས་དཔའི་ས་ཐོབ་བོ། །ལྷའི་གཟུགས་ཀྱིས་ཇི་ལྟར་འདོད་པ་བཞིན་དུ་རྣམ་པར་རྒྱུ་སྟེ། བསྐལ་པ་སུམ་ཅུ་རྩ་དྲུག་ཏུ་འཚོ་བར་འགྱུར་རོ། །སངས་རྒྱས་ཀྱི་ཞིང་སུམ་ཅུ་རྩ་དྲུག་འདའ་བར་བྱེད་དོ། །དེ་རྣམས་ཀྱི་མཐུ་ཡང་ཡང་དག་པར་
རྗེས་སུ་མཐོང་ངོ་། །སངས་རྒྱས་སུམ་ཅུ་རྩ་དྲུག་མཉེས་པར་བྱེད་དོ། །དེ་རྣམས་ཀྱང་མཆོད་པ་དང་བསྙེན་བཀུར་བས་མངོན་པར་དགའ་བར་འགྱུར་རོ། །མཐར་ཡང་བྱང་ཆུབ་ལ་མཆོག་ཏུ་གཞོལ་བར་འགྱུར་རོ། །བྱང་ཆུབ་སེམས་དཔའ་ཆེན་པོ་དགེ་བའི་
བཤེས་གཉེན་གྱིས་ཡོངས་སུ་ཟིན་པར་འགྱུར་རོ། །ཇི་སྲིད་བྱང་ཆུབ་ཏུ་མྱ་ངན་ལས་འདས་པའི་མཐར་ཐུག་པའི་བར་དུའོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་བཅོམ་ལྡན་འདས་མ་འཕགས་མ་སྒྲོལ་མ་རལ་པ་
གྱེན་དུ་བརྫེས་པའི་རྩ་བའི་ཆོ་ག་ལས། ལས་མཆོག་སྒྲུབ་པའི་ཐབས་ཀྱི་ཆོ་ག་བདུན་པའི་ལེའུ་རབ་འབྱམ་ཡོངས་སུ་རྫོགས་སོ།། །།དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས་སླར་ཡང་སྒྲུབ་པའི་ལས་མཆོག་གསུངས་ཏེ། རྟོག་པའི་རྒྱལ་པོ་འདི་ལ་
རྩ་བའི་རིག་པའི་སྔགས་ཡོངས་སུ་བཟུང་ནས་གང་གཱའི་ཀླུང་དུ་ཞུགས་ནས་གྲུའི་བཞོན་པ་ལ་རབ་ཏུ་གནས་ཏེ། གང་གཱའི་དབུས་སུ་འོ་མ་དང་ཆུ་བཏུང་ཞིང་། སྟོང་ཕྲག་སུམ་ཅུར་ཇི་ལྟར་འདོད་པའི་ཉིན་ཞག་གི་བཟླས་པ་བྱའོ། །དེ་ནས་བཟླས་པའི་མཐར་ཀླུ་ཐམས་
ཅད་མཐོང་ངོ་། །དེ་ནས་སྒྲུབ་པ་བརྩམས་ཏེ་གྲུའི་དབུས་དེ་ཉིད་དུ་མེ་ཐབ་པདྨའི་རྣམ་པ་བྱའོ། །དེ་ནས་ནཱ་ག་གེ་སར་ལ་སོགས་པའི་མེ་ཏོག་རྣམས་ཀྱིས་རས་རིས་ལ་མཆོད་པ་ཆེན་པོ་བྱའོ། །རས་རིས་ཀྱི་ཐུ་བོ་ཞལ་ནུབ་ཏུ་ཕྱོགས་པར་བཞག་སྟེ་བདག་ཉིད་ཤར་དུ་མངོན་པར་
ཕྱོགས་ཏེ་ཀུ་ཤའི་ཁྲེས་ལ་འདུག་ནས། ནཱ་ག་གེ་སར་གྱི་མེ་ཏོག་རེ་རེ་ལ་ལན་བདུན་མངོན་པར་བསྔགས་པ་བྱས་ནས་སེང་ལྡེང་གི་ཤིང་གིས་མེ་སྦར་ཏེ། ཙན་དན་དཀར་པོ་དང་གུར་གུམ་བསྲེས་པའི་ནཱ་ག་གེ་སར་གྱི་མེ་ཏོག་རྣམས་ཀྱིས་སྟོང་ཕྲག་བཅུའི་བར་ཇི་སྲིད་པར་སྦྱིན་སྲེག་

བྱའོ། །གཞན་ཀླུ་རྣམས་མཐོང་བ་ན་ཉེ་བར་བཅིངས་པའི་དངོས་གྲུབ་ཀྱི་རྫས་རྣམས་རབ་ཏུ་ཆགས་པས་བླང་བར་མི་བྱའོ། །གང་ལས་སྦྱིན་སྲེག་གི་མཐར་ཀླུའི་བཞོན་པ་དང་ལྷན་ཅིག་འཕུར་བར་འགྱུར་རོ། །རིག་པ་འཛིན་པ་རྣམས་ཀྱི་རྒྱལ་པོར་འགྱུར་རོ། །ཀླུའི་དབང་པོ་རྒྱལ་
པོ་ཐམས་ཅད་ཀྱང་རྗེས་སུ་འབྲང་ཞིང་བྲན་བཞིན་དུ་གནས་སོ། །བར་གྱི་བསྐལ་པ་སུམ་ཅུར་འཚོ་བར་འགྱུར་རོ། །རང་དབང་དུ་སྤྱོད་པར་འགྱུར་རོ། །འགྲོ་བ་ལ་ཐོགས་པ་མེད་དོ། །འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་མཐོང་སྟེ། དེའི་སྤྱི་བོ་ལ་རེག་
པར་མཛད་དོ། །རེག་པ་ཙམ་གྱིས་མངོན་པར་ཤེས་པ་ལྔར་འགྱུར་རོ། །ངེས་པར་སངས་རྒྱས་ཉིད་དུ་ལྷག་པར་འགྲོ་བར་བྱེད་དོ། །གཞན་ཡང་མཆོག་གི་སྒྲུབ་པའི་ཆོ་གའི་སྒྲུབ་ཐབས་སུ་འགྱུར་བ་ནི་སྔར་བཞིན་དུ་གང་གཱའི་ཀླུང་དུ་ཞུགས་ནས་བིལ་བའི་ཤིང་གི་རང་བཞིན་གྱི་
ཤིང་གཅིག་ཉིད་ཀྱིས་གྲུའི་བཞོན་པ་བྱས་ནས་ཤིན་ཏུ་བརྟན་པ་ལེགས་པར་བྱས་པ་དེར་མངོན་པར་འཛེགས་ནས་བིལ་བའི་ཤིང་གི་རང་བཞིན་གྱི་སྐྱ་བ་དེས་གྲུ་དེའི་རྗེས་སུ་སྒྲུབ་པ་པོ་ཆེས་མཁས་ཤིང་གསལ་བ་ཉིད་ཀྱིས་གཡབ་པར་བྱ་སྟེ། གང་གཱའི་ཀླུང་ཆེན་པོ་ཡོངས་སུ་མི་དོར་བར་
ཀུན་ནས་ཐད་ཀའམ་རྒྱུན་རིངས་སུ་གཡབ་པར་བྱའོ། །དེ་ནས་རྩ་བའི་རིག་པ་བཟུང་ནས་སམ། སྙིང་པོའམ། ཉེ་བའི་སྙིང་པོའམ། ཡི་གེ་གཅིག་པའམ། ཁྲོ་བོའམ། ཕོ་ཉའམ། རིང་དུ་རྗེས་སུ་འབྲང་བའམ། གཞན་གང་ཡང་རུང་བའི་སྔགས་བཟུང་ནས་རས་རིས་
ཀྱི་ཐུ་བོ་དེ་ཉིད་དུ། ཞལ་ནུབ་ཏུ་ཕྱོགས་པར་བཞག་ནས་བདག་ཉིད་དང་པོ་ཞལ་ཤར་དུ་ཕྱོགས་ལ། ཕྱིས་ནི་ཇི་ལྟར་འདོད་པར་བྱའོ། །འོ་མ་དང་། ནས་ཟན་དང་། འབྲས་བུ་བཟའ་བའམ། ཆུའམ། པདྨའི་རྩ་བ་དང་། འབྲས་བུ་བཟའ་ཞིང་། སྨྲ་བ་བཅད་དེ། དུས་
གསུམ་དུ་ཁྲུས་བྱ་ཞིང་། གོས་ལན་གསུམ་བརྗེས་ཏེ། ཤིན་ཏུ་དཀར་བའི་ལས་ཀུན་དུ་སྤྱོད་ཅིང་ཤིན་ཏུ་དཀར་བའི་བློ་དང་ལྡན་པས་དང་པོ་རེ་ཞིག་རས་རིས་ཀྱི་སྤྱན་སྔར་ཇི་ལྟར་ཉེ་བར་བསྟན་པ་བཞིན་དུ་སྔར་ཆོ་ག་མཐོང་བས་རིག་པ་འབུམ་ཕྲག་བཅུ་བཟླས་པར་བྱའོ། །དེ་ནས་གལ་ཏེ་རྩ་

བའི་རིག་པར་འགྱུར་རོ། །དེ་ནས་སྟོང་ཕྲག་དྲུག་ཅུ་བཟླས་པའི་མཐར་གྲུ་རྒྱ་མཚོ་ཆེན་པོར་འགྲོ་བར་འགྱུར་རོ། །དེ་ནས་སྒྲུབ་པའི་ཡོ་བྱད་རྣམས་བསྡུས་ཏེ་སྔར་གནས་དེ་ཉིད་དུ་གཞག་པར་བྱའོ། །དེ་ནས་གྲུའི་བཞོན་པ་རྒྱ་མཚོ་ཆེན་པོར་འགྲོ་བ་ན། འཇིགས་
པར་མི་བྱ་ཞིང་། བཟློག་པར་མི་བྱའོ། །སྒྲུབ་པ་པོའི་དབང་ལས་མ་གཏོགས་པར་བཟློག་པར་ནུས་པ་ཡང་མ་ཡིན་ནོ། །དེ་ནས་དཔག་ཚད་སྟོང་དུ་གནས་པའི་རྒྱ་མཚོ་ཆེན་པོར་ཡང་ཡུད་ཙམ་གྱིས་འཇུག་པར་བྱེད་དོ། །ལམ་ཐུང་ན་ལྟ་ཅི་སྨོས། དེར་ཞུགས་ནས་ཆུའི་སྟེང་དུ་
སྒྲུབ་པའི་ལས་བརྩམ་པར་བྱའོ། །དེ་ནས་མེ་ཐབ་སྔར་གྱི་རྣམ་པའམ་རྫ་མཁན་གྱིས་བྱས་པའི་སའི་སྣོད་དུ་སེང་ལྡེང་གི་མེ་སྦར་ལ་ནཱ་ག་གེ་སར་གྱི་ཟེ་འབྲུ་དང་། མེ་ཏོག་ཙནྡན་དཀར་པོ་དང་། ག་པུར་དང་བསྲེས་པའི་སྲེག་བླུགས་ཆེས་ཉུང་བའམ། ཆེས་མང་བའི་ཚད་ཀྱང་
རུང་སྟེ། སྔར་བཞིན་དུ་རྩ་བའི་རིག་པས་འབུམ་ཕྲག་དྲུག་ཅུ་སྦྱིན་སྲེག་བྱའོ། །སྦྱིན་སྲེག་བྱེད་པ་ན། ལང་ཀའི་གྲོང་ན་གནས་པའི་སྲིན་པོ་གཟུགས་སྣ་ཚོགས་འཛིན་པ་རྣམས་ཧཱ་ཧཱ་ཞེས་སྒྲོགས་པ་དང་། ཀླུའི་གྲོང་ལོངས་སྤྱོད་ལྡན་ན་གནས་པའི་ཀླུའི་རྒྱལ་པོ་རྣམ་པ་སྣ་
ཚོགས་པའི་གཟུགས་འཆང་བ། ཆེས་ཞི་བ་དང་། ཆེས་ཁྲོ་བ་རྣམས་ལངས་ཏེ་ཀླུ་དང་སྲིན་པོ་རྣམས་ཀྱང་འདི་སྐད་ཅེས་སྨྲའོ། །ཁྱེད་བཞེངས་ཤིག་བཞེངས་ཤིག །བདག་ཅག་གི་རྗེ་བོ་མཛོད་ཅིག་ཅེས་སོ། །དེ་བཞིན་དུ་ལྷ་མ་ཡིན་དང་། གནོད་སྦྱིན་དང་ལྷ་དང་། ལྟོ་
འཕྱེ་ཆེན་པོ་དང་། གྲུབ་པ་དང་། མི་མ་ཡིན་པ་ཐམས་ཅད་ཀྱང་རབ་ཏུ་ཆགས་པར་བྱེད་མོད་ཀྱི་ལྡང་བར་མི་བྱའོ། །དེ་ནས་རིག་པ་འཛིན་པས་སྔགས་བཟླ་ཞིང་ལག་པ་གཡོན་པའི་སྡིགས་མཛུབ་ཀྱིས་བསྡིགས་པར་བྱའོ། །དེ་ནས་རྣམ་པར་བྱོལ་ཞིང་ཕན་ཚུན་རབ་ཏུ་འབྲོས་ལ་
འཇིགས་པར་བྱེད་དོ། །དེ་ནས་སྦྱིན་སྲེག་གི་མཐར་གྲུ་དེས་སྒྲུབ་པ་པོ་དེ་ཁྱེར་ནས་སྐད་ཅིག་ལ་འོག་མིན་གྱི་གནས་སུ་འགྲོ་བར་བྱེད་དོ། །འཇིག་རྟེན་གྱི་ཁམས་གཞན་དུའང་འགྲོ་ཞིང་འོང་བར་བྱེད་དོ། །བྱང་ཆུབ་སེམས་དཔའི་སེམས་ཤེས་པར་འགྱུར་རོ། །མངོན་

པར་ཤེས་པ་ལྔ་དང་། རྫུ་འཕྲུལ་ཆེན་པོ་དང་། མཐུ་ཆེན་པོ་དང་ལྡན་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་རྟག་ཏུ་མཐོང་བར་འགྱུར་རོ། །ཀླུ་ཐམས་ཅད་དང་། སྲིན་པོ་ཐམས་ཅད་དང་། གནོད་སྦྱིན་ཐམས་ཅད་དང་། ལྷ་ཐམས་ཅད་དང་།
ལྷ་མ་ཡིན་ཐམས་ཅད་དང་། སེམས་ཅན་ཐམས་ཅད་ཀྱང་འདིའི་དབང་དུ་འགྱུར་ཏེ། བཀའ་བཞིན་བྱེད་པ་ལ་བཞག་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་དང་འཕགས་པ་ཉན་ཐོས་རྣམས་འདིའི་སྔགས་གྲུབ་པ་དེ་རྣམས་ཀྱང་འདི་ལ་
བྱམས་པའི་བདག་ཉིད་དུ་འགྱུར་རོ། །རྗེས་སུ་འདོད་པར་འགྱུར་རོ། །སེམས་ཅན་ཐམས་ཅད་ཀྱིས་མི་ཚུགས་པར་འགྱུར་རོ། །གཞན་ཡང་ལས་ཀྱི་ཆོ་ག་མཆོག་སྒྲུབ་ཐབས་སུ་འགྱུར་བ་ནི་བིལ་བའི་ཤིང་ལ་གྲུ་བོ་ཆེའི་བཞོན་པ་བྱེད་དུ་གཞུག་སྟེ། ཤིང་གཅིག་གི་བཞོན་
པའམ། བསྡུས་པའང་རུང་སྟེ་གནས་ཆེན་པོ་བྱའོ། །གང་གཱའི་དབུས་ཀྱི་གླིང་དེར་གནས་པའི་གྲུའི་བཞོན་པར་སྐྱེས་བུ་བརྒྱ་ཉི་ཤུ་ལག་ན་སྒྲོན་མེ་ཐོགས་པ་རྣམས་གྲུའི་བཞོན་པ་ལ་འཛེགས་ཏེ་གོས་དཀར་པོ་གྱོན་ཞིང་སྲུང་བ་བྱས་པ་རས་རིས་ཀྱི་ཐུ་བོ་སྔར་གྱི་ཆོ་གས་ཀུན་དུ་བཞག་
པའི་སྤྱན་སྔར་གཞག་པར་བྱའོ། །དེ་ནས་རས་རིས་ལ་མཆོད་པ་ཆེན་པོ་བྱས་ནས་ནཱ་ག་གེ་སར་གྱི་ཕྱེ་མ་རྣམས་དང་གུར་གུམ་དང་། ཙནྡན་དཀར་པོ་དང་། ག་པུར་བསྲེས་པ་དང་། སེང་ལྡེང་གི་སྲེག་བླུགས་སྟོང་ཕྲག་སུམ་ཅུ་རྩ་དྲུག་སྦྱིན་སྲེག་བྱའོ། །དེ་ནས་སྦྱིན་སྲེག་གི་མཐར་
གྲུ་དེ་སྐད་ཅིག་ཙམ་གྱིས་ཚངས་པའི་འཇིག་རྟེན་དུ་འགྲོ་ཞིང་འོང་བར་འགྱུར་ཏེ་ཇི་ལྟར་འདོད་པ་བཞིན་དུ་རྣམ་པར་རྒྱུའོ། །འཕགས་པ་སྤྱན་རས་གཟིགས་དབང་ཕྱུག་མཐོང་བར་བྱེད་དོ། །མཐོང་བ་ཙམ་ལས་ཐོབ་པར་འགྱུར་རོ། །མངོན་པར་ཤེས་པ་ལྔ་དང་ཡུན་རིང་དུ་འཚོ་
ཞིང་བསྐལ་པ་ཆེན་པོར་གནས་པར་འགྱུར་རོ། །རིག་པ་འཛིན་པའི་འཁོར་ལོས་སྒྱུར་བའི་རྒྱལ་པོ་ཆེན་པོར་འགྱུར་རོ། །མར་མེ་འཛིན་པ་དེ་རྣམས་ཀྱང་འདིའི་རིག་པ་འཛིན་པ་གྲུབ་པར་འགྱུར་རོ། །ལྷན་ཅིག་སྤྱོད་པ་དེ་རྣམས་དང་། ཐབས་ཅིག་ཏུ་ཇི་ལྟར་

འདོད་པ་བཞིན་དུ་རྣམ་པར་རྒྱུ་ཞིང་། རང་དགར་འགྲོ་བར་འགྱུར་རོ། །སངས་རྒྱས་བཅོམ་ལྡན་འདས་རྣམས་མཆོད་པ་དང་། བསྙེན་བཀུར་གྱིས་མངོན་པར་དགྱེས་པར་འགྱུར་རོ། །མཐར་ཡང་སངས་རྒྱས་ཉིད་དུ་ངེས་པར་འགྱུར་རོ། །གཞན་ཡང་ལས་ཀྱི་
ཆོ་གའི་སྒྲུབ་ཐབས་དམ་པར་གྱུར་པ་ནི། ཆུ་ཀླུང་འགྲམ་མམ་རྒྱ་མཚོའི་ངོགས། །དེ་བཞིན་ཁ་བ་ཅན་གྱི་རིར། །རི་ཡི་རྒྱལ་པོ་འབིགས་བྱེད་དེ། །དེར་ནི་ལས་མཆོག་བསྒྲུབ་པར་བྱ། །ས་ཧྱེ་མ་ལ་ཡ་ཉིད་དང་། །རི་བོ་སྤོས་ཀྱི་ངད་ལྡང་དང་། །བྱ་རྒོད་ཕུང་པོའི་རི་རྒྱལ་དུ། །ལས་ཀྱི་
མཆོག་ནི་བསྒྲུབ་པར་བྱ། །རྒྱ་མཚོ་ཆེན་པོའི་བྲག་དང་ནི། །ཤིང་སོགས་མེ་ཏོག་ལྡན་པ་སྟེ། །རྒྱལ་བས་གསུངས་པའི་སྔགས་རྣམས་ནི། །ཕྱོགས་འདི་རྣམས་སུ་བསྒྲུབ་པར་བྱ། །རྣམ་པར་དབེན་པའི་ཕྱོགས་གཙང་མ། །བས་མཐའི་གྲོང་གི་ཆོས་བཞི་ལ། །མི་སྨྲ་རེག་པ་
སྤངས་ནས་ནི། །རྟག་ཏུ་གཅི་བ་བྱ་བ་ཡིན། །ལུས་ལ་ལྷ་གནས་བཤང་བ་དང་། །བརྟུལ་ཞུགས་ཅན་དག་གཙང་སྦྲ་བྱ། །རེག་ན་གཞོན་ཤ་ཅན་རྣམས་འདོད། །སྲོག་ཆགས་སྤངས་པའི་ས་རྣམས་ནི། །གསུམ་པོ་ཚུལ་བཞིན་བླངས་ནས་ནི། །རྟག་པ་ཁོ་ནར་བཤང་ལམ་ལའོ། །དེ་
བཞིན་གཉིས་ཀའི་མཐར་ལག་པ། །སྔགས་པས་རྟག་ཏུ་ས་དག་ནི། །སྔར་བསྟན་པ་དག་བླངས་ནས་ནི། །ཟློས་བོས་རྟག་ཏུ་རྐང་པ་ཉིད། །གཡས་དང་དེ་ལས་གཞན་པ་ནི། །ཕན་ཚུན་ཉིད་དུ་ཀུན་བཞག་ནས། །འབད་པས་རྐང་པ་བཀྲུ་བར་བྱ། །རྒྱ་ཆེར་སྔར་ནི་བརྗོད་པ་བཞིན། །
སྔགས་ཟློས་པོ་ཡི་གཙང་སྦྲ་ཡང་། །དྲི་ང་མེད་པའི་གཙང་སྦྲ་སྟེ། །རྟག་ཏུ་ཐུབ་པ་ཉིད་ཀྱིས་གསུངས། །འདི་དག་མདོར་བསྡུས་བསྟན་པ་ཡིན། །རྒྱུད་རྣམས་ཀུན་དུ་མཐོང་ངོ་ཞེས། །མངའ་བདག་ཐུབ་པ་ཉིད་ཀྱིས་གསུངས། །དེ་ནས་ཟློས་པོས་ཉེ་རེག་བྱ། །སྡོམ་བརྩོན་དངོས་
གྲུབ་ལས་ལ་དགའ། །སྔར་བརྗོད་པ་ཡི་ཆོ་ག་ཡིས། །ཡིད་ཀྱི་ནང་གི་དག་པ་ཡིན། །གཙང་སྦྲ་རྣམ་པ་ལྔ་རུ་བརྗོད། །སྔགས་པས་སྔགས་རྣམས་ཐམས་ཅད་དུ། །ལུས་ཀྱི་གཙང་སྦྲ་དེ་བཞིན་དུ། །ངག་ཡིད་ཁོ་ནར་རབ་ཏུ་བསྒྲགས། །བཞི་པ་བདེན་པའི་གཙང་སྦྲ་སྟེ། །ཆུ་ནི་

ལྔ་པར་བརྗོད་པར་བྱ། །བདེན་པའི་ཆོས་ནི་ཁྲོ་བ་ཐུལ། །རྒྱུད་ཤེས་བསྟན་བཅོས་མཐོང་བ་དང་། །ཕྲ་མོའི་དེ་ཉིད་དོན་ལ་མཁས། །སྔགས་ཤེས་ལས་ལ་གྲགས་པ་དང་། །རྒྱུ་ཡིས་ནང་ལ་མཁས་པ་སྟེ། །དེ་ལ་དངོས་གྲུབ་རྙེད་མི་དཀའ། །བདེན་པའི་ཆོས་ནི་རྣམ་སྤངས་པའི། །
བརྫུན་པའི་ཚིག་ནི་སྨྲ་མི་བྱ། །བདེན་པ་ཐམས་ཅད་རྣམ་སྤངས་པའི། །མ་རུངས་རབ་ཏུ་མ་རུངས་ཉིད། །རྣམ་པར་སྡང་དང་འཁྲུགས་བཅས་དང་། །རྩུབ་ཅིང་གནད་ནི་འགེམས་པ་དང་། །བདེན་པའི་ཆོས་ནི་རྣམ་པར་ཉམས། །སེམས་ཅན་གཞན་ལ་གདུང་བར་བྱེད། །ཕྲ་མ་
ཉོན་མོངས་ཅན་སེམས་དང་། །ཆོས་རྣམས་ཐམས་ཅད་སྤངས་པ་དང་། །དེ་བཞིན་འཚེ་བའི་བདག་ཉིད་ཅན། །རྟག་ཏུ་ཁྲིམས་འཆལ་ཆོས་མིན་སྤྱོད། །སྔགས་ཟློས་པ་ཡིས་སྤང་བར་བྱ། །དེ་བཞིན་ཉིད་དུ་གྲོང་གི་ཆོས། །ཁྲོ་བ་བརྣབ་སེམས་འབྱུང་བ་ཡི། །འཇིག་རྟེན་ཕ་རོལ་
འཇིགས་པ་རྣམས། །བློ་ལྡན་རང་རྒྱལ་བསེ་རུ་དང་། །སླར་ཡང་རྟག་ཏུ་ཉོན་མོངས་དང་། །སྔོན་གྱི་སངས་རྒྱས་རྣམས་ཀྱིས་སྨད། །དེ་བཞིན་རྟག་ཏུ་བརྫུན་སྨྲ་བ། །འཇིག་རྟེན་དངོས་གྲུབ་འདོད་དོན་གཉེར། །ས་སྟེངས་བརྫུན་སྨྲ་ཉེ་བར་སྨྲ། །མི་བཟད་དམྱལ་བ་ཆེན་པོར་ལྟུང་། །
སྔོན་གྱིས་ཉེས་པ་ལས་དེ་བཞིན། །དགའ་བས་གཤིན་རྗེའི་འཇིག་རྟེན་དུ། །རྟག་ཏུ་སླར་ཡང་དེར་གནས་སོ། །རྟག་ཏུ་བརྫུན་སྨྲས་ཉེར་འཚོ་བ། །མི་བཟད་ངན་འགྲོར་ལྟུང་བར་འགྱུར། །ཐིག་ནག་རབ་ཏུ་ཚ་བ་དང་། །ཡང་སོས་རལ་གྲི་ལོ་མ་དང་། །དེ་བཞིན་ཤལ་མ་ལ་ཡི་
ནགས། །དེར་ནི་བསྐལ་པ་མང་པོར་གནས། །བརྫུན་དུ་སྨྲ་བའི་སྐྱེ་བོ་ནི། །གསང་སྔགས་ལོག་པར་སྨྲ་བ་དང་། །རྨོངས་པས་ལོག་པར་བརྗོད་པ་ཡི། །འབྱུང་པོ་རྣམས་ལ་སླུ་བྱེད་པ། །དེ་ལ་གྲུབ་པ་ག་ལ་ཡོད། །དེ་ཕྱིར་རྨོངས་པ་ལས་འདི་ཡིས། །སྔགས་ཀྱི་དངོས་གྲུབ་
མ་མཐོང་ནས། །སྔགས་པའི་དངོས་གྲུབ་མེད་དོ་ཞེས། །འདི་སྐད་དུ་ནི་ཚིག་སྨྲ་བ། །གང་གིས་སངས་རྒྱས་བསྟན་པ་ནི། །ས་སྟེངས་འདིར་ནི་རབ་སྤངས་པ། །བསྐལ་པ་བྱེ་བ་མང་པོ་ཡིས། །དེ་ཡིས་གྲུབ་པར་ག་ལ་འགྱུར། །དེ་ཕྱིར་འདི་ནི་མི་བཟད་པའི། །འཇིགས་

ཆེན་མནར་མེད་འཚེད་པར་འགྱུར། །ཡང་སོས་དང་ནི་ཐིག་ནག་དང་། །རབ་ཏུ་ཚ་བར་འཚེད་པ་དང་། །སེམས་ཅན་སྡིག་སྦྲུལ་ལ་སོགས་པ། །སྤངས་པའི་ས་ཕྱོགས་འདོད་པར་བྱ། །འབྲས་བུ་མེ་ཏོག་ཡང་དག་ལྡན། །དྲི་མེད་ཆུ་ནི་རབ་བསྔགས་པ། །སྔགས་རིག་པས་ནི་
སྔགས་བསྙེན་བྱ། །ཡུལ་གཞན་རྣམས་སུ་བསྒྲགས་མི་བྱ། །ལྷ་ཡི་གནས་སམ་དུར་ཁྲོད་དམ། །བརྟན་པའི་མཚན་མ་གཅིག་པ་དང་། །རྟགས་གཅིག་དེ་བཞིན་བས་མཐའ་རུ། །སྔགས་རིག་སྔགས་ནི་བསྙེན་པ་བྱ། །བདག་དང་གྲོགས་རྣམས་བསྲུང་བྱས་ནས། །སྔར་
སྤྱད་གསང་སྔགས་ལྡན་པ་དང་། །སྔགས་པས་རྟག་ཏུ་སྔགས་བཟླས་བྱ། །དགོན་པ་ཆེ་མཆོག་ཤིང་ཆེན་དང་། །མེ་ཏོག་འབྲས་བུ་ལ་སོགས་འབྱུང་། །རི་ཡི་རྩེ་དང་ཁུང་བུ་དང་། །ཆུ་ཡི་གནས་ནི་གཙང་མར་བཅས། །འབབ་ཆུ་ཆེ་འགྲམ་ཡིད་འོང་བར། །སྔགས་རིག་པས་
ནི་སྔགས་བསྙེན་བྱ། །སྔགས་ཤེས་ནས་ནི་ངེས་རྟོགས་བྱེད། །ཤར་ཕྱོགས་སུ་ཡང་ཆུ་ཀླུང་ཆེ། །ལུ་ཧི་ཏ་འགྲམ་དགེ་བ་དང་། །དེ་བཞིན་ཀཱ་མ་རུ་པའི་ཡུལ། །གྲོང་མཆོག་འཕེལ་བར་བྱེད་པ་དང་། །དམའ་བ་གང་དུ་འདི་འགྲོ་མཆོག །འདུག་པ་དང་ནི་ཆུ་ཀླུང་མཆོག །གནས་
དེར་རྟག་ཏུ་ཟློས་པ་དང་། །གཙང་མ་བློ་གྲོས་ལྡན་པས་བསྟེན། །སྔོན་དུ་བསྙེན་པའང་དེར་གྱིས་ཤིག །གང་གཱའི་སྒོ་རུ་ལས་རྣམས་ཀུན། །དེ་བཞིན་རྟག་ཏུ་གང་གཱ་དང་། །དུག་ཅན་པ་ནི་ཕྲད་པ་རུ། །རབ་ཏུ་སྦྱོར་བ་ཀུན་ཉིད་དང་། །གཙང་མའི་སྔགས་ཀྱིས་བཟླས་པ་བྱ། །དུར་
ཁྲོད་ཆེ་དང་གཞན་ཉིད་ནི། །ཟློས་པོས་དེར་ནི་རྟག་ཏུ་བཟླས། །དྲི་མེད་ཆུ་དང་འབབ་ཆུ་ནི། །སྲོག་ཆགས་རྣམས་ཀྱིས་སྤངས་པ་རུ། །དེ་ཉིད་ཕྱིར་ནི་ཤིན་ཏུ་ནི། །མཉམ་གཞག་སྔགས་ཀྱིས་བཟླས་པ་བྱ། །དེར་ནི་འཇིག་རྟེན་བསམ་པ་ཡི། །བསོད་ནམས་མིན་པ་ཅུང་ཟད་
མཐོང་། །འོན་ཀྱང་སྔགས་ཀྱིས་ཉེར་བསྟན་པས། །ཅུང་ཟད་དུས་སུ་འདུག་པར་བྱ། །དེ་ནས་གཞན་དུ་འགྲོ་བར་བྱ། །ཟླ་བ་གཟས་ཟིན་དུས་དེར་ནི། །དུས་མ་བབ་ནའང་དུས་ཅུང་ཟད། །དེར་འདུག་བྱ་ཡི་གཞན་དུ་མིན། །གཞན་དུ་སྔགས་རིག་ཅི་ནུས་པས། །

དེ་ནས་མྱུར་དུ་འགྲོ་བར་བྱ། །བདེ་གཤེགས་མཆོད་རྟེན་བཞུགས་པ་ཡི། །ས་སྟེངས་རྣམས་སུ་ཀུན་དུ་འདུག །འཇིག་རྟེན་མུ་སྟེགས་ཐམས་ཅད་ནི། །ལྟ་བ་ངན་པར་ལྷུང་བ་རྣམས། །མུ་སྟེགས་ཅན་གཞན་གནས་རྣམས་ནི། །སྔགས་རིག་པས་ནི་རྟག་ཏུ་སྤངས། །སྔགས་ཤེས་
དེར་ནི་མི་བསྡད་དོ། །སྐྱེས་མཆོག་བློ་གྲོས་རྒྱུ་ངན་པ། །རྒྱལ་བ་མཆོག་གིས་གང་བཞུགས་དང་། །རང་རྒྱལ་བསེ་རུ་ལྟ་བུ་དང་། །བྱང་ཆུབ་སེམས་དཔའ་སྐལ་བ་ཆེ། །རྒྱལ་མཆོག་སྲས་པོ་ཉན་ཐོས་རྣམས། །དེ་རྣམས་ཀུན་བཞུགས་ས་སྟེངས་ཀྱི། །ཡུལ་རྣམས་ཀུན་
དུ་སྔགས་ཤེས་པས། །འབད་པས་སྔོན་དུ་བསྙེན་པ་བྱ། །མཉམ་པར་གཞག་པས་གསང་སྔགས་ནི། །གནས་དེ་རུ་ནི་བཟླས་པར་བྱ། །གསུངས་པའི་གནས་ནི་འདི་རྣམས་སུ། །གསུངས་པའི་ལས་རྣམས་ཐམས་ཅད་དང་། །ལས་ཀྱི་ཆོ་གའི་སྒྲུབ་ཐབས་
རྣམས། །འདི་རྣམས་རྙེད་པར་མ་གྱུར་ན། །གང་ཡང་རུང་བའི་གནས་དེར་ནི། །གཙང་མས་སྔོན་དུ་བསྙེན་པ་བྱ། །དད་ཅིང་མོས་པས་སྒྲུབ་ཐབས་ཀྱི། །ཆོ་ག་མཆོག་གི་ལས་བརྩམ་མོ། །དང་པོ་རེ་ཞིག །བྲིས་སྐུའི་ཐུ་བོ་ཞལ་ནུབ་ཏུ་བསྟན་ནས་བཞག་སྟེ། བདག་
ཉིད་ཤར་དུ་མངོན་པར་ཕྱོགས་ལ་གྲོག་མཁར་གྱི་སའམ། གང་གཱའི་ཀླུང་གི་འགྲམ་གྱི་ས་བླངས་ནས་པུ་ཤེལ་ཙེ་དང་། ཙནྡན་དཀར་པོ་དང་། གུར་གུམ་དང་། ག་པུར་རྣམས་བསྲེས་ལ་རྨ་བྱའི་གཟུགས་བྱས་ཏེ། དེ་བྲིས་སྐུའི་སྤྱན་སྔར་བཞག་ནས་རྩེ་མོ་མ་བཅད་པའི་ཀུ་ཤ་
གཙང་མའི་ཕྱོགས་ནས་བྱུང་བས་འཁོར་ལོའི་རྣམ་པ་བྱས་ནས་བྲིས་སྐུའི་སྤྱན་སྔར་ལག་པ་གཡས་པས་བཟུང་སྟེ། ལག་པ་གཡོན་པས་ནི་རྨ་བྱའོ། །དཀར་པོའི་ཟླ་བ་ཉ་བའི་མཚན་ཕྱེད་ན་བྲིས་སྐུ་ལ་མཆོད་པ་ཆེན་པོ་བྱས་ནས་ག་པུར་གྱི་བདུག་པ་བསྲེགས་པའི་དྲི་དང་ཇི་སྲིད་
ནམ་ལངས་པའི་བར་དེ་སྲིད་དུ་བཟླས་པར་བྱའོ། །དེ་ནས་ཉི་མ་འཆར་བའི་དུས་ཀྱི་ཚེ་དེ་རྨ་བྱའི་རྒྱལ་པོར་འགྱུར་རོ། །འཁོར་ལོ་ཡང་འབར་རོ། །བདག་ཉིད་ལྷའི་ཕྲེང་བ་དང་གོས་འཆང་ཞིང་རྣམ་པར་བརྒྱན་པ་དང་། ཉི་མ་འཆར་ཀ་འདྲ་བར་འདོད་པའི་གཟུགས་ཅན་དུ་

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ཏེ་རས་རིས་ལ་བསྐོར་བ་བྱས་ལ་རས་རིས་བླངས་ནས་རྨ་བྱའི་གདན་དེ་ལ་འདུག་ན་ཡུད་ཙམ་གྱིས་ཚངས་པའི་འཇིག་རྟེན་ལས་འདའ་བར་བྱེད་དོ། །རིག་པ་འཛིན་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་
མས་ཡོངས་སུ་བསྐོར་བའི་རིག་འཛིན་གྱི་རྒྱལ་པོ་འཁོར་ལོས་སྒྱུར་བར་འགྱུར། བསྐལ་པ་དྲུག་ཅུའི་བར་དུ་འཚོ་བར་འགྱུར་རོ། །ཇི་ལྟར་འདོད་པར་འགྲོ་ཞིང་། རབ་ཏུ་སྤྱོད་པར་འགྱུར་རོ། །ཐོགས་པ་མེད་པར་འགྲོའོ། །ལྷའི་ཕུན་སུམ་ཚོགས་པ་དང་ལྡན་པར་འགྱུར་རོ། །
འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་མཐོང་བར་འགྱུར་རོ། །དེ་ཉིད་འདིའི་དགེ་བའི་བཤེས་གཉེན་དུ་འགྱུར་རོ། །མཐར་ཡང་སངས་རྒྱས་ཉིད་ཐོབ་པར་འགྱུར་རོ། །དེ་བཞིན་དུ་དབྱིག་པ་དང་། རིལ་བ་སྤྱི་བླུགས་དང་། མཆོད་ཕྱིར་ཐོགས་དང་། ལྡོང་
རོས་དང་། གི་ཝང་དང་། རལ་གྲི་དང་། ལྕགས་མདའ་དང་། མཚོན་རྩེ་གཅིག་པ་དང་། དགྲ་སྟ་དང་། མཚོན་ཆའི་ཁྱད་པར་རྣམ་པ་སྣ་ཚོགས་པ། སའི་རང་བཞིན་གྱི་ཁྱད་པར་དང་། རྐང་གཉིས་པ་དང་། རྐང་བ་བཞི་པ་དང་། བྱ་དང་། བཞོན་པའི་ཁྱད་པར་སེང་གེ་དང་།
སྟག་དང་། གཟིག་ལ་སོགས་པ་རྣམས་གྲོག་མཁར་གྱི་ས་དྲི་ཞིམ་པོའི་དྲི་ཞིམ་བསྲེས་པ་ལས་བྱས་པའམ། སྟན་དང་། བཞོན་པ་དང་། མལ་ཆ་དང་། གདུགས་དཀར་པོ་དང་། ཅོད་པན་དང་། རྒྱན་གྱི་བྱེ་བྲག་ཐམས་ཅད་དང་། རིན་པོ་ཆེའི་བྱེ་བྲག་ཐམས་ཅད་དང་། རབ་ཏུ་བྱུང་
བའི་ཡོ་བྱད་ཀྱི་བྱེ་བྲག་ཐམས་ཅད་ལ་བགྲང་ཕྲེང་དང་། །མཆིལ་ལྷམ་དང་། ལྷུང་བཟེད་དང་། ཆོས་གོས་དང་། ཁབ་དང་། གྲི་ལ་སོགས་པ་རྒྱལ་གྱི་ལྕགས་ལས་བྱས་པའམ། གཞན་ཡང་གང་ཅུང་ཟད་སེམས་ཅན་གྱི་ཡོ་བྱད་སྣོད་ལ་སོགས་པ་རྒྱལ་གྱི་ལྕགས་
ལས་བྱས་པའམ། གྲོག་མཁར་གྱི་སའམ། ཆུ་ཀླུང་གི་ས་ལས་བྱས་པ་དེ་ཐམས་ཅད་པའི་རྣམ་ལྔས་བཀྲུས་ནས་མངོན་པར་བསང་གཏོར་བྱས་ཏེ་སྔ་མ་བཞིན་དུ་སྦྱོར་བའི་སྔགས་སམ། ཡི་གེ་གཅིག་པའི་སྔགས་སམ། སྔགས་གཞན་གང་ཡང་རུང་བ་བརྒྱ་རྩ་བརྒྱད་མངོན་

པར་བསྔགས་པ་བྱས་ནས་རྟོག་པའི་རྒྱལ་པོ་འདིར་གསུངས་པ་མ་གཏོགས་པ་སྒྲུབ་པའི་ཆོ་གའི་རིག་པ་ཇི་ལྟར་འདོད་པ་དང་། ཇི་ལྟར་མངོན་པར་དགའ་བས་བདག་ཉིད་སྲུང་ཞིང་གྲོགས་པོ་ཡོངས་སུ་བསྐྱབ་པར་བྱས་པ། ཤིན་ཏུ་གསང་ཐུབ་ཅིང་སྔགས་དང་རྒྱུད་ཤེས་པ།
སྔར་བསྟན་པའི་གནས་སུ་བྲིས་སྐུ་ཞལ་ནུབ་ཏུ་བསྟན་ལ་བཞག་སྟེ་བདག་ཉིད་སྔར་བཞིན་དུའོ། །བྲིས་སྐུ་ལ་མཆོད་པ་ཆེན་པོ་བྱས་ནས་གཙོ་བོར་ག་པུར་གྱི་བདུག་པ་བསྲེགས་ཏེ་སྔར་བསྟན་པའི་མཚོན་ཆ་དང་ཡོ་བྱད་དང་སེམས་ཅན་གྱི་ཁྱད་པར་རྣམས་སྔར་བསྟན་པའི་བཅོས་མར་
བྱས་ལ། ཡར་ངོའི་ཟླ་བ་ཉ་བའི་མཚན་མོ་རྫས་དེ་རྣམས་གང་རུང་བླངས་ཏེ་མཚན་མོ་ཇི་སྲིད་དུ་བཟླས་པ་བྱས་ན་ཉི་མ་འཆར་བའི་དུས་ཀྱི་ཚེ་བར་སྐབས་འདིར་བྲིས་སྐུ་ལ་འོད་ཟེར་གྱི་ཕྲེང་བ་ཆེན་པོ་ཀུན་དུ་མཐོང་ངོ་། །གལ་ཏེ་སྒྲུབ་པ་པོ་བཞོན་པའི་ཁྱད་པར་བླངས་པར་གྱུར་ན། དེ་ལ་
ཞོན་ནས་ཇི་ལྟར་འདོད་པར་འགྲོ་བར་འགྱུར་རོ། །གལ་ཏེ་རྒྱན་གྱི་ཁྱད་པར་རམ། མཚོན་ཆའི་ཁྱད་པར་བླངས་པའམ། བཅངས་པས་རིག་པ་འཛིན་པའི་རྒྱལ་པོ་ཆེན་པོར་འགྱུར་རོ། །ཇི་ལྟར་འདོད་པ་བཞིན་འགྲོ་ཞིང་། ལྷའི་ལུས་ཅན་ཉི་མ་ཤར་བ་དང་མཚུངས་པ་འོད་
ཟེར་ཆེན་པོའི་ཕྲེང་བ་དང་ལྡན་པ་གློག་ལྟར་གསལ་བའི་སྐུ། རིག་པ་འཛིན་པ་ཐམས་ཅད་ཀྱི་མངའ་བདག །རིང་དུ་འཚོ་ཞིང་བསྐལ་པ་ཆེན་པོར་གནས་པ་རིག་པ་འཛིན་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ལྷའི་ནོར་བུ་རིན་པོ་ཆེའི་གཞལ་ཡས་ཁང་ན་སྤྱོད་པ།
སྔར་ཡོངས་སུ་བརྟགས་པའི་སའི་རང་བཞིན་གྱི་བཞོན་པ་གང་གིས་གྲུབ་པ་དེ་ཉིད་མཐུ་ཆེན་པོར་འགྱུར་ཏེ། དེ་ཉིད་འདིའི་བཞོན་པ་དང་། དེ་ཉིད་འདིའི་གྲོགས་པོ་སྟེ། གཞན་གྱི་སྔགས་ཀྱི་དངོས་གྲུབ་བཟློག་པར་གྱུར་པ་བདག་གི་སྔགས་ཀྱི་དངོས་གྲུབ་ཀུན་ཏུ་སྦྱར་བར་བྱས་པ།
བྱམས་པའི་བདག་ཉིད་ཅན། ཕན་པར་འདོད་པ་རྟག་ཏུ་རྗེས་སུ་བཅིངས་པ། དེ་ཉིད་འདིའི་མཚོན་ཆ་དང་། རྒྱན་དང་། རིན་པོ་ཆེའི་བྱེ་བྲག་དང་། སྟན་དང་། མལ་ཆ་དང་། སེམས་ཅན་ལ་སོགས་པ་གང་ཡིན་པ་དེ་ཉིད་འདིའི་བསྲུང་བ་དང་། བསྐྱབ་པ་དང་། སྦ་

བ་ཆེན་པོ་རྟག་ཏུ་རྗེས་སུ་འབྲེལ་བར་འགྱུར་རོ། །མཐུ་ཆེན་པོ་དང་བརྩོན་འགྲུས་ཆེན་པོ་དང་། ལུས་ཆེན་པོར་འགྱུར་རོ། །འཕགས་པ་སྤྱན་རས་གཟིགས་མངོན་སུམ་དུ་མཐོང་ཞིང་ལེགས་སོ་ཞེས་བྱ་བ་གནང་སྟེ་སྤྱི་བོར་བྱུགས་ནས་ཇི་སྲིད་བྱང་ཆུབ་སྙིང་
བོ་རྗེས་སུ་ཐོབ་ཀྱི་བར་དུ་དགེ་བའི་བཤེས་གཉེན་མཛད་དེ། སྟོབས་བཅུ་པོ་རྣམས་ངེས་པར་ཀུན་ནས་ཐོབ་སྟེ་མཆོད་པའི་འོས་སུའང་འགྱུར་རོ། །སེམས་ཅན་རྣམས་ཀྱིས་ཟིལ་གྱིས་མི་ནོན་པ་དང་། འབྱུང་པོ་ཐམས་ཅད་ཀྱིས་མི་ཚུགས་པར་འགྱུར་རོ། །ཡང་དག་
པའི་མཐའི་རིགས་རྒྱུན་མི་གཅོད་པ་དང་། ས་ཐོབ་པར་ཡང་འགྱུར་རོ། །སྟོབས་བཅུ་དང་བྱང་ཆུབ་སེམས་དཔའ་ཉིད་དུ་ངེས་པ་དང་ཏིང་ངེ་འཛིན་དུ་འགྱུར་རོ། །མདོར་བསྡུས་ནས་ལས་མཆོག་ཐམས་ཅད་དང་། གནས་མཆོག་ལ་གནས་པས་རས་རིས་མཆོག་གི་སྤྱན་སྔར་
མཆོད་པ་མཆོག་ལ་མངོན་པར་དགའ་བས་ལས་མཆོག་གཞན་ཉིད་བྱའོ། །རིག་པ་འཛིན་པ་ཉིད་ནམ་མཁའ་ལ་འགྲོ་བ་དང་། བྱང་ཆུབ་སེམས་དཔའི་རྗེས་སུ་འཇུག་པ་དང་། མངོན་པར་ཤེས་པ་ལྔ་དང་། ས་རྗེས་སུ་ཐོབ་པར་བྱེད་པ་ཉིད་དང་། ལུས་འདི་ཉིད་
ཀྱིས་འཇིག་རྟེན་གྱི་ཁམས་སུ་ཀུན་དུ་འགྲོ་བ་ཉིད་དང་། སྟོབས་བཅུའི་རྒྱུད་ཡོངས་སུ་རྫོགས་པར་བྱེད་པ་ཉིད་ཀྱི་ཕྱིར་དང་། འཕགས་པ་བྱམས་པ་མངོན་སུམ་དུ་མཐོང་བ་ཉིད་ཀྱི་ཕྱིར་དང་། ཆོས་བསྟན་པ་དོན་ཡོད་པ་ཉིད་ཀྱི་ཕྱིར་དང་། སངས་རྒྱས་ཀྱི་གདུང་རྒྱུན་མི་
གཅོད་པ་ཉིད་ཀྱི་ཕྱིར་དང་། ཐམས་ཅད་མཁྱེན་པའི་ཡེ་ཤེས་ཀུན་དུ་གནོན་ཅིང་རྗེས་སུ་ཐོབ་པར་བྱེད་པ་ཉིད་ཀྱི་ཕྱིར་དང་། ཆོས་ཀྱི་སྤྲིན་རྣམ་པར་འབྱོར་པ་ལ་རྗེས་སུ་འཇུག་པ་ཉིད་ཀྱི་ཕྱིར་དང་། ཉོན་མོངས་པའི་ཡོངས་སུ་གདུང་བ་མེད་ཅིང་བདུད་རྩིའི་ཆར་གྱི་རྒྱུན་གྱིས་
རབ་ཏུ་ཞི་བ་ཉིད་ཀྱི་ཕྱིར་དང་། འཇིག་རྟེན་རྗེས་སུ་འཛིན་པ་ལ་རབ་ཏུ་འཇུག་ཅིང་ནན་ཏན་བྱེད་པ་ཉིད་ཀྱི་ཕྱིར་དང་། དེ་བཞིན་གཤེགས་པའི་ཆོས་ཀྱི་ཚུལ་སྲུང་བ་ཉིད་ཀྱི་ཕྱིར་དང་། དེ་བཞིན་གཤེགས་པའི་གསུང་དོན་ཡོད་པར་བྱེད་པ་ཉིད་ཀྱི་ཕྱིར་དང་། སྔགས་ཀྱི་སྤྱོད་

པའི་སྒྲུབ་པའི་ཐབས་ཀྱི་ཆོ་ག་རབ་ཏུ་སྒོམ་པ་ཉིད་ཀྱི་ཕྱིར་དང་། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་དང་། འཕགས་པ་ཉན་ཐོས་བདག་ཉིད་ཆེན་པོ་རྣམས་འབྱུང་བ་ཉིད་ཀྱི་ཕྱིར། རྟོག་པའི་རྒྱལ་པོ་འདི་བསྒྲུབ་པར་བྱ་སྟེ། སྔགས་
ཀྱི་མཐུ་རབ་འབྱམ་དང་ལྡན་པ་རས་རིས་ཐུ་བོ་སྤྱན་སྔ་དང་ཉེ་བར་འདུག་ནས་འཇིག་རྟེན་པ་དང་། འཇིག་རྟེན་ལས་འདས་པ་ཐམས་ཅད་ཀྱི་སྔགས་ཀྱི་ཆོ་ག་དང་། རྒྱུད་ཐམས་ཅད་དུ་རྣམ་པ་སྣ་ཚོགས་པའི་ལམ་སྟེ། མདོར་ན་འདིར་རྟོག་པ་གཞན་དུ་གསུངས་པའི་ལས་རྣམས་ཀྱིས་
ཀྱང་རས་རིས་ཀྱི་རྒྱལ་པོ་འདི་བསྒྲུབ་པར་བྱ་སྟེ། མྱུར་དུ་དེ་རྣམས་ཀྱི་དངོས་གྲུབ་ཏུ་འགྱུར་ཏེ་གང་ངས་བསྟན་པ་དེ་དག་གདོན་མི་ཟ་བར་འགྲུབ་པར་འགྱུར་རོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་བཅོམ་ལྡན་འདས་མ་འཕགས་མ་སྒྲོལ་
མ་རལ་པ་གྱེན་བརྫེས་ཀྱི་རྩ་བའི་ཆོ་ག་ལས། རས་རིས་མཆོག་གི་སྒྲུབ་པའི་ལེའུ་སྟེ་བརྒྱད་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་སླར་ཡང་འཁོར་གྱི་དཀྱིལ་འཁོར་ཆེན་པོ་དེ་ལ་གཟིགས་ནས་བྱང་ཆུབ་སེམས་དཔའ་ཆེན་པོ་ལ་བཀའ་སྩལ་པ། སེམས་
དཔའ་ཆེན་པོ་ཁྱོད་ཀྱི་རས་རིས་ཀྱི་ཆོ་ག་བར་མའི་ལས་ཀྱི་ཆོ་གའི་སྒྲུབ་ཐབས་བར་མ་ཡོད་དོ། །དེ་མདོར་བསྡུས་ནས་བཤད་པར་བྱ་ཡིས། ལེགས་པར་ཡིད་ལ་གྱིས་ཤིག་དང་བཤད་པར་བྱའོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་
དབང་ཕྱུག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྟོན་པ་འཇིག་རྟེན་ལ་ཐུགས་བརྩེ་བ་ཅན། སེམས་ཅན་ཐམས་ཅད་ལ་ཕན་པར་དགྱེས་པ། བདག་ཅག་ལ་ཐུགས་བརྩེ་བའི་དོན་དང་། མ་འོངས་པའི་སྐྱེ་བོ་རྣམས་ལ་གཟིགས་ནས་
གང་དེའི་དུས་ལ་བབ་པར་དགོངས་ན་དེ་གསུང་དུ་གསོལ། དེ་སྐད་ཅེས་གསོལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་ཉོན་ཅིག །དང་པོ་རེ་ཞིག་

ཚུལ་ཁྲིམས་དང་བརྟུལ་ཞུགས་དང་། གཙང་སྦྲའི་ཀུན་དུ་སྤྱོད་པ་དང་། ངེས་པར་སྡོམ་པ་དང་། བཟླས་པ་དང་། སྦྱིན་སྲེག་དང་། བསམ་གཏན་དང་། ཆོ་ག་དང་། གང་དུ་རབ་ཏུ་གནས་པ་སྟེ། སེམས་ཅན་ཐམས་ཅད་ཀྱི་སྤྱོད་པ་སྒྲུབ་པའི་ལས་
འབྲས་བུ་དང་བཅས་ཤིང་དོན་མེད་པར་མི་འགྱུར་བ་དང་། སྔགས་ཐམས་ཅད་ཀྱི་རབ་ཏུ་སྦྱོར་བའི་དངོས་གྲུབ་འགྲུབ་པར་འགྱུར་བ་དེ་གང་ཞེ་ན། དེ་ངས་བཤད་ཀྱིས་སེམས་དཔའ་ཆེན་པོ་ཉོན་ཅིག །དང་པོ་རེ་ཞིག་རིག་པའི་བརྟུལ་ཞུགས་དང་། ཚུལ་ཁྲིམས་ཡང་
དག་པར་བླང་བ་དང་པོ་ཉིད་དུ་ཡང་དག་པར་བླངས་ཏེ། དང་པོ་རེ་ཞིག་དཀྱིལ་འཁོར་གྱི་སློབ་དཔོན་གྱིས་ཉེ་བར་བསྟན་པའི་དམ་ཚིག་ལ་ཡང་དག་པར་རྗེས་སུ་འཇུག་པར་བྱའོ། །ཁྱོད་ཀྱིས་རྟོག་པའི་རྒྱལ་པོ་གསུངས་པ། སྔར་ངེས་པར་བསྟན་པ་གསལ་བ། ཡིད་གཞུངས་
པ་དང་ལྡན་པ། སློབ་དཔོན་དུ་དབང་བསྐུར་བ་ཐོབ་པ། ཁྱོད་ཀྱིས་བསྟན་པའི་ཆོ་ག་ཤེས་པ། མཁས་པ། གསལ་བ། ཆོས་དང་ལྡན་པ། བདེན་པར་སྨྲ་བ། སྤྲོ་བ་ཆེ་བ། བྱས་པ་གཟོ་བ། བརྟན་པ། སེམས་བཟང་པ། ཧ་ཅང་མི་རྒན་ཅིང་ཧ་ཅང་མི་གཞོན་པ། རྙེད་
པ་དང་། བཀུར་སྟི་ཐམས་ཅད་ལ་འདོད་པ་མེད་པ། ཚངས་པར་སྤྱོད་པ། སྙིང་རྗེ་དང་ལྡན་པ། རྙེད་པ་ཙམ་གྱིས་སམ་ལོངས་སྤྱོད་རྒྱུར་རམ། རྗེས་སུ་ཆགས་པའི་རྒྱུར་ཡང་བརྫུན་མི་སྨྲ་ན། ཤིན་ཏུ་ཆུང་ངུ་ཙམ་ཉིད་དང་། རྙེད་པ་དང་། རྨོངས་པའི་རྣམ་པ་ལྟ་སྨོས། དམ་
བཅས་པ་བརྟན་པ་དང་། འབྱུང་པོ་ཐམས་ཅད་ལ་མཉམ་པ་ཉིད་དུ་སྙིང་བརྩེ་བ་དང་ལྡན་པ་དང་། སྦྱིན་པ་དང་ཚུལ་ཁྲིམས་དང་། སྔར་སྤྱད་པ་བྱས་པ་ཁྱོད་ཀྱི་གསང་བའི་རིག་པ་དང་། སྔགས་རྗེས་སུ་ཟློས་པ་དང་། རིག་པ་སྔོན་དུ་བསྙེན་པ་བྱས་པ་ཁྱོད་ཀྱི་དཀྱིལ་འཁོར་དུ་
ཡང་དག་པར་ཞུགས་པ། འཇིག་རྟེན་ཤེས་པ། ཡང་དག་པར་རྗེས་སུ་འཛིན་པར་བྱེད་པ། འབྲས་བུ་དང་ལྡན་ཞིང་མཁས་པ། ལེགས་པ་ལ་རབ་ཏུ་ཞུགས་པ། མི་འཇིགས་ཤིང་མི་གནོད་ལ། ཆགས་པ་མེད་པ། དཔའ་བ། བརྩོན་འགྲུས་བརྟན་པ།

ནད་མེད་པ་སྟེ། ནད་གང་གིས་ལས་སུ་མི་རུང་བའི་ངང་ཚུལ་ཅན་དང་། རིགས་ཆེ་ཞིང་མཐོ་བར་རབ་ཏུ་སྐྱེས་པ་ཞེས་པ། ཡོན་ཏན་འདི་རྣམས་དང་ལྡན་པ་ནི་དཀྱིལ་འཁོར་གྱི་སློབ་དཔོན་དུ་འགྱུར་ཏེ། སྒྲུབ་པ་པོ་ཡང་དེ་དང་འདྲ་བའམ། ཡན་ལག་ཅུང་ཟད་མ་རྫོགས་
པའོ། །དེ་ལྟ་བུའི་དཀྱིལ་འཁོར་གྱི་སློབ་དཔོན་ལ་མཆོད་པ་བྱས་ནས་འདིའི་དོན་དུ་གསོལ་བ་གདབ་པར་བྱ་སྟེ། སློབ་དཔོན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་རིག་པ་དང་སྔགས་དང་བཅོམ་ལྡན་འདས་མ་དེའི་དཀྱིལ་འཁོར་གྱི་དམ་ཚིག་ལ་རྗེས་སུ་འཇུག་
པར་འཚལ་ན་བདག་ཅག་ལ་རྗེས་སུ་བརྩེ་བའི་དོན་དང་། ཕན་པའི་ཐུགས་བསྐྱེད་ནས་དེ་སློབ་དཔོན་གྱིས་གསུང་དུ་གསོལ། དེ་ནས་དཀྱིལ་འཁོར་གྱི་སློབ་དཔོན་གྱིས་སྔར་བསྟན་པའི་ཆོ་གས་སློབ་མ་ཇི་ལྟ་བ་བཞིན་རིམ་གྱིས་བརྟགས་ནས་གཞུག་པར་བྱ་ཞིང་སྔར་བཞིན་དུ་
མངོན་པར་དབང་བསྐུར་བ་བྱིན་ནས་རིག་པ་དང་སྔགས་བྱིན་ལ་རིམ་པ་ཇི་ལྟ་བར་དམ་ཚིག་བསྟན་པར་བྱའོ། །གསང་ཆེན་དང་། ཕྱག་རྒྱ་དང་། རྒྱུད་དང་། སྔགས་དང་ལས་རྣམས་ཀྱང་དུས་རིང་མོ་ཉིད་ནས་ཡོངས་སུ་བརྟགས་ཏེ། བསམ་པ་ཤེས་ནས་རྒྱུད་དང་སྔགས་ལ་སོགས་
པ་དང་། ལས་རྣམས་ཐམས་ཅད་བསྟན་པར་བྱའོ། །གཞན་དུ་མ་ཡིན་ནོ་ཞེས་པའི་ཆོ་ག་འདི་རབ་ཏུ་བསྒྲགས་སོ། །དེ་ནས་སློབ་མས་དཀྱིལ་འཁོར་གྱི་སློབ་དཔོན་ལ་ཇི་ལྟར་ནུས་པས་གང་གིས་སློབ་དཔོན་དགྱེས་པའམ་བདག་ཉིད་དང་ལོངས་སྤྱོད་ཀྱང་དབུལ་བར་བྱའོ། །
དེ་ནས་དཀྱིལ་འཁོར་གྱི་སློབ་དཔོན་དེས་བུའི་འདུ་ཤེས་ཉེ་བར་གཞག་པར་བྱའོ། །བུ་བཞིན་དུ་བསྐྱང་བར་བྱའོ། །མ་བཞིན་ལོངས་སྤྱོད་ཀྱིས་ཉེ་བར་བསྡུ་བར་བྱའོ། །དེ་ནས་སྒྲུབ་པ་པོ་དེས་རིག་པ་དང་སྔགས་གང་ཡང་རུང་བ་ཞིག་བཟུང་ནས་མཐའ་གཅིག་ཏུ་སོང་སྟེ། སྔར་
བསྟན་པའི་གནས་རྒྱ་ཆེར་གོང་མ་བཞིན་དུ་སྦྱར་བས་རིག་པ་ལ་སོགས་པ་དེ་རྣམས་ཉིད་ཀྱིས་སྤྱན་དྲང་བ་དང་། གཤེགས་སུ་གསོལ་བ་དང་། མར་མེ་དང་། དྲི་དང་། བདུག་པ་དང་། གཏོར་མ་དང་། ལྷ་བཤོས་དག་དཀྱིལ་འཁོར་དུ་གསུངས་པའི་ཆོ་ག་ཉིད་ཀྱིས་

རྒྱས་པར་བྱས་ཏེ་སྤྱན་དྲངས་ནས་གདན་ཕུལ་བ་ཐུན་མཚམས་གསུམ་དུ་ཁྲུས་གསུམ་བྱ་ཞིང་གོས་ལན་གསུམ་བརྗེས་ཏེ་ཉི་མ་སོ་སོ་ལ་བཟླས་པ་བྱའོ། །དེ་ལ་ཐུན་མཚམས་ཀྱི་དུས་ཞེས་བྱ་བ་ནི་མཚན་མོའི་མཐའ་ནས་བརྩམས་ཏེ་ཇི་སྲིད་ཉི་མ་འཆར་བའི་དུས་
ཙམ་གྱི་བར་འདི་ལ་དང་པོར་བཤད་དོ། །ཉི་མ་གུང་ནི་ཉི་མ་ཤར་བའི་མཐར་དུས་ཙམ་གྱི་ཚད་ཀྱི་མཚམས་ཉི་མའི་དཀྱིལ་འཁོར་ནམ་མཁའ་ལ་ཡང་དག་པར་བརྟེན་པ་ནི་ཆོ་ག་ཤེས་པས་གུང་གི་ཐུན་མཚམས་སུ་ཤེས་པར་བྱའོ། །ནུབ་པའི་དུས་སུ་ཡང་ལྷག་མ་བཞི་ཆ་ཙམ་
ཐུན་མཚམས་གསུམ་པར་བརྗོད་པར་བྱའོ། །སློབ་དཔོན་མཁས་པ་བཤེས་གཉེན་ཅན། །ཚུལ་ཁྲིམས་བརྟུལ་ཞུགས་ཡང་དག་ལྡན། །ཆེན་པོའི་རིགས་སུ་འཁྲུངས་པ་དང་། །ཀུན་ནས་བརྩོན་འགྲུས་བརྟན་པ་ནི། །སྔགས་དང་རྒྱུད་སོགས་ཡང་དག་ལྡན། །བྱ་བ་ཀུན་
ལ་བློ་གྲོས་བྱང་། །ཕྲ་ཞིང་མཁས་ལ་ཚད་ཤེས་པ། །ཆོས་ཀྱི་དབྱིངས་ནི་རྟག་ཏུ་འཛིན། །སྤྲོ་བ་ཆེ་ཞིང་གཟི་བརྗིད་ལྡན། །འཇིག་རྟེན་ཆོས་ལ་ལྟོས་པ་མེད། །ཐུབ་པ་མཆོག་གི་ཆོས་ལ་དད། །འཇིག་རྟེན་པ་རྣམས་དོར་བ་དང་། །བཟླས་པ་བྱ་ཞིང་རྣམ་དབེན་བྱས། །སྔོན་
དུ་བསྙེན་པ་རྗེས་བརྟེན་པ། །བྱང་ཆུབ་སེམས་དཔའི་གསང་སྔགས་ཤེས། །དེ་ལས་གཞན་པའི་རྐྱེན་རྣམས་མཐོང་། །སངས་རྒྱས་ཀྱིས་གསུངས་གསང་སྔགས་དང་། །འཇིག་རྟེན་པ་ཡི་རབ་སྦྱོར་ཤེས། །སྲུང་བ་བྱས་ཤིང་མཐུ་བརྟན་པ། །གཙང་སྦྲའི་ཀུན་སྤྱོད་ལ་རྟག་དགའ། །
སངས་རྒྱས་ཉེ་བསྟན་ལམ་ལ་ནི། །ཀུན་ནས་རྗེས་སུ་འཇུག་པ་དང་། །གསང་སྔགས་རྒྱལ་བས་གསུངས་པ་ཡིན། །གསང་སྔགས་ཟློས་ལ་རྟག་ཏུ་བརྩོན། །རྟག་ཏུ་མཐོང་ཆོས་འབྲས་བུ་དང་། །འཇིག་རྟེན་ཕ་རོལ་དེ་བཞིན་ཉིད། །སྡིག་པ་ཀུན་ལ་འཇིགས་པ་དང་། །ཕྲ་
མོ་ཙམ་ལའང་དེ་བཞིན་ནོ། །གཙང་ཞིང་མཁས་ལ་ལེ་ལོ་མེད། །ཡིད་གཞུངས་བལྟ་ན་སྡུག་པ་དང་། །སྟོབས་བཅུ་པས་བཤད་སྔགས་གང་དང་། །དེ་བཞིན་ཁོ་ནར་རྒྱལ་སྲས་དང་། །འཇིག་རྟེན་པ་ཡི་སྔགས་གང་ཉིད། །རྡོ་རྗེ་པདྨའི་རིགས་དག་ལའང་། །དེ་ལ་རྟག་ཏུ་

ངལ་བར་བྱས། །གཞུང་དང་བསྟན་བཅོས་དོན་འཛིན་པ། །ནད་མེད་ནུས་པ་མེད་མིན་པ། །རྒ་དང་ནད་ནི་རྣམ་པར་སྤངས། །དེ་བཞིན་བཤེས་གཉེན་ཅན་སྔགས་གྲུབ། །ཀུན་ནས་མྱུར་དུ་བྱེད་པ་དང་། །མཐའ་ཡི་རིང་མིན་ཞིང་དེ་བཞིན། །ཚངས་པར་སྤྱོད་ཅིང་ཤེས་
རབ་ཆེ། །ཁྱད་པར་དུ་ནི་ཤེས་པ་དང་། །གཅིག་ཏུ་འདུ་འཛི་མེད་པ་དང་། །དཔའ་ཞིང་དབང་བསྐུར་ཐོབ་པ་དང་། །དེ་འདིར་བྱང་ཆུབ་ཕ་རོལ་སོན། །སྲིད་པ་ཞི་བར་བྱེད་ལ་བརྩོན། །དེ་བཞིན་ཉིད་དུ་རིག་སྔགས་བྱ། །མཐུ་ཆེན་འཇིག་རྟེན་ཤེས་པ་དང་། །
འགྲོ་བ་སེམས་ཅན་རྗེས་སེམས་པ། །དཔལ་ཉིད་དང་ནི་རབ་ཏུ་ལྡན། །སྦྱིན་དང་འབྱུང་པོ་ཕན་ལ་དགའ། །དེ་བཞིན་ཁྱད་འཕགས་སློབ་དཔོན་ལ། །རྟག་ཏུ་གསོལ་བ་གདབ་པར་བྱ། །དེས་ནི་དཀྱིལ་འཁོར་བྲིས་པ་ཡི། །སྔགས་ཀྱི་དངོས་གྲུབ་སྟེར་བར་བྱེད། །དེ་ཉིད་
ཀྱིས་ནི་དབང་བསྐུར་གྱིས། །འབྲས་བུ་ཆེན་པོ་སྦྱིན་པར་འགྱུར། །དངོས་གྲུབ་འདོད་པའི་སློབ་མས་ཀྱང་། །ཐུབ་པ་བཞིན་དུ་རྟག་ཏུ་མཆོད། །དེ་ཡི་གསུང་ནི་མི་འགོམ་པ། །སློབ་མས་འབད་པས་བྱ་བ་ཡིན། །ཇི་ལྟར་འབྱོར་ཅིང་བདོག་པ་ཡི། །ལོངས་སྤྱོད་དེ་
ལ་དབུལ་བར་བྱ། །ཉུང་ངུ་ཙམ་མམ་མང་ཡང་རུང་། །གང་གིས་མཉེས་པར་འགྱུར་བ་དང་། །ལུས་ནི་འཚོ་བའི་རྒྱུ་ཡི་ཕྱིར། །ཕ་ལ་ནོར་ནི་སྟེར་བ་ལྟར། །དེ་བཞིན་སློབ་མ་ཆོས་ཤེས་པས། །སློབ་དཔོན་ལ་ནི་ནོར་དབུལ་བྱ། །མཐའ་ཡི་དབང་ཕྱུག་དངོས་གྲུབ་
ཐོབ། །ཚེ་དང་དེ་བཞིན་ནད་མེད་དང་། །རྒྱས་པའི་འགྲོ་བ་ཐོབ་པར་འགྱུར། །སློབ་མས་བླ་མ་དེ་མཆོད་ན། །དེ་ཡི་སྔགས་རྣམས་འགྲུབ་པར་འགྱུར། །ལམ་དང་ཆོ་ག་ཉེར་མཐོང་དང་། །བསྙེན་པ་ལས་ཀྱང་བརྟེན་པ་ལས། །དེ་བཞིན་རི་མོར་བྱས་
མཆོད་ལས། །སངས་རྒྱས་ཐམས་ཅད་དགྱེས་པར་འགྱུར། །དེ་བཞིན་རྒྱལ་མཆོག་སྲས་རྣམས་དང་། །ལྷ་རྣམས་ཐམས་ཅད་དགྱེས་པར་འགྱུར། །བླ་མ་རྟག་ཏུ་བསྙེན་བཀུར་ན། །བླ་མ་སྔགས་རྣམས་མཐོང་བ་ཡིས། །འདི་དག་ཐམས་ཅད་བརྟན་པར་

འགྱུར། །སྒྲུབ་པོས་སྔོན་དང་ཐོག་མར་ནི། །དམ་ཚིག་ལ་ནི་རྗེས་འཇུག་བྱ། །དམན་ནམ་དེ་དག་མཉམ་ཡང་རུང་། །གལ་ཏེ་ཆེས་མཆོག་གྱུར་པ་ཡང་། །རྨོངས་པའམ་ལྷག་པར་ཁྲོ་བ་ཡིས། །རྟག་ཏུ་བླ་མ་བརྙས་མི་བྱ། །དེས་ཀྱང་
རྒྱུད་འདིར་དེ་ལ་ནི། །མན་ངག་རྟག་ཏུ་སྦྱིན་པར་བྱ། །གང་ཚེ་སྔགས་ཀྱི་དངོས་གྲུབ་བྱིན། །འདིས་ནི་སེར་སྣ་བྱས་པ་མིན། །སྔར་བསྟན་སློབ་མ་དེ་ལ་ནི། །མན་ངག་རྟག་ཏུ་སྦྱིན་པར་བྱ། །གང་ཚེ་སྔགས་ཀྱི་དངོས་གྲུབ་བྱིན། །ལུས་ཅན་ཞེན་པ་འཕེལ་བྱེད་
པའི། །མིག་ནི་གང་ལ་ཡོད་གྱུར་པ། །དེ་ཉིད་སློབ་མ་ཉིད་བྱའོ། །སློབ་དཔོན་ནམ་ནི་སློབ་མའི་རྒྱུར། །ཕན་ཚུན་རྗེས་སུ་འཇུག་བྱེད་པ། །གང་དུ་ཞེན་པའི་རྒྱུན་སྐྱོང་བ། །འཇམ་པོའི་རྒྱུན་ནི་འཛིན་པ་སྟེ། །དེ་ལ་སྔགས་ནི་སྦྱིན་པར་བྱ། །སློབ་དཔོན་དེ་བཞིན་
སློབ་མ་ནི། །སློབ་མ་བླ་མར་མཐོང་བ་ལ། །རྟག་ཏུ་སྤྲོ་བར་འགྱུར་བའམ། །གཉིས་ཀས་དངོས་གྲུབ་ཡང་དག་འབྱོར། །དེ་ལ་རྟག་ཏུ་ལམ་ཉིད་དང་། །སྔགས་ཀྱི་སྤྱོད་པ་རྗེས་བསྟན་བྱ། །གཉིས་ཀས་ཕ་དང་བུར་ཤེས་པས། །སྔགས་ནི་འབྲས་བཅས་
རྗེས་འཇུག་པ། །བརྟན་དང་དགའ་བ་དེ་བཞིན་ཐོབ། །རྟག་ཏུ་སློབ་མས་བླ་མ་ནི། །རབ་ཏུ་འབད་པས་བསྲུང་བར་བྱ། །བུ་ནི་བདག་ཉིད་ཆེན་པོ་རྣམས། །སངས་རྒྱས་ཆོས་རྒྱུན་མི་འཆད་འགྱུར། །དེ་མེད་མགོན་མེད་དེ་རྣམས་ལ། །ཇི་སྐད་གསུངས་པའི་
སྔགས་རྣམས་སྦྱིན། །སེམས་ཅན་བཀྲེན་དང་མ་ནིང་ལའང་། །ཐམས་ཅད་ལ་ནི་ཁྱད་པར་དུ། །སྔགས་ཀྱི་སྤྱོད་པ་ཁྱད་པར་འཕགས། །ཐ་མ་མཆོག་དང་བར་མ་ལ། །དུས་རྣམས་ཀུན་ཏུ་བྱ་བའོ། །ཡོངས་སུ་ཐོབ་པའི་ཆོས་རྣམས་ལ། །རྗེས་སུ་གཟུང་
བའི་རྒྱུན་བྱའོ། །འགྲོ་བ་བློ་གྲོས་ངེས་པ་ཡི། །འདོད་པ་རྣམས་ལའང་རབ་སྦྱིན་བྱ། །དེ་ཕྱིར་ཇི་ལྟར་འདོད་པའི་སྔགས། །སློབ་མ་ཉིད་ཀྱིས་བླང་བར་བྱ། །དེ་ཉིད་ཀྱིས་ནི་ཉེར་བསྟན་པས། །ལམ་ཉིད་ཡིན་ནོ་གཞན་དུ་མིན། །དངོས་གྲུབ་འདོད་པས་གང་དེ་ལ། །

ཕ་ནི་ཕ་རོལ་སོང་བ་ན། །ཕ་བཞིན་མགོ་བོས་ཕྱག་བྱས་ཏེ