Kinh tạng Tây Tạng (Kangyur Đại Học) — 088_རྒྱུད་འབུམ།_ན

ི་རིག་སྔགས་འཆང་རྣམས་དང་། །མ་ལ་ཡ་ཡི་རི་བོ་ལ། །གནས་ཤིང་རྒྱན་འབར་ཐོགས་རྣམས་དང་། །ཁྱབ་འཇུག་ལྷ་ཆེན་ལ་སོགས་པ། །ལྷ་ཡི་བདག་པོ་རྣམས་དང་ནི། །ལག་ན་རྡོ་རྗེ་ལ་སོགས་པ། །བྱང་ཆུབ་སེམས་དཔའ་སྟོབས་ཆེན་རྣམས། །ནོར་བུའི་དཔུང་རྒྱན་རྣ་ཆ་དང་། །

རྒྱན་རྣམས་རབ་ཏུ་གཡོ་བའི་ལུས། །རབ་ཏུ་བསྐྱོད་དེ་ལངས་ནས་ནི། །སྡིག་བྲལ་མངའ་བདག་རྒྱལ་བ་ལ། །ཕྱག་འཚལ་ཐལ་མོ་སྦྱར་བྱས་ནས། །ཀུན་གྱིས་ས་ཡི་དབང་ཕྱུག་པོ། །ཐུབ་མཆོག་དམ་པ་དེ་ལ་ནི། །མཚན་བརྒྱ་རྩ་བརྒྱད་དག་གིས་བསྟོད། །མཉམ་ཉིད་ཆོས་དེ་དེ་བཞིན་
ཉིད། །ཤིན་ཏུ་རྟོགས་པ་ལམ་མེ་བ། །དུལ་བ་བརྟན་པ་དྲི་མ་སེལ། །དྲི་མ་མེད་པ་སྐྱོན་བྲལ་བ། །ཐུབ་པ་སངས་རྒྱས་ཤིན་ཏུ་ཞི། །འཇིག་རྟེན་མགོན་པོ་སྐྱེ་དགུའི་བདག །དེ་བཞིན་གཤེགས་པ་ཉོན་མོངས་ཐུལ། །དེ་བཞིན་རྒྱལ་བ་རྡུལ་བསལ་བ། །སྟོན་པ་སྟོན་མཛད་བརྟན་པ་སྟེ། །
སྡིག་པ་མེད་པ་རྡུལ་དང་བྲལ། །འཇིག་རྟེན་མགོན་པོ་སྣང་མཛད་པ། །དག་པ་ཞི་བ་ཟས་གཙང་སྲས། །ཉོན་མོངས་རབ་བཅོམ་ཕན་འདོགས་པ། །སྟོན་པ་པོ་སྟེ་དྲི་མ་སེལ། །སྤྱོད་ཚུལ་དྲི་མེད་ཚུལ་བཟང་བ། །ཟབ་པ་རྣམ་པར་གནོན་པ་བརྟན། །བཙན་པོ་ཐུགས་བརྩེ་རྣམ་པར་རྒྱལ། །
མགོན་པོ་དེ་བཞིན་མགོན་མཛད་པ། །ཞི་བའི་བདག་ཉིད་ཞེ་སྡང་བྲལ། །བཅིངས་པ་ལས་གྲོལ་ངེས་པར་གྲོལ། །འཇིག་རྟེན་ཀུན་མཆོག་འཁྲ་བའི་ས། །བདག་གིར་མི་འཛིན་དྲི་མ་མེད། །ཉོན་མོངས་སེལ་བ་དཔལ་དང་ལྡན། །དཔལ་མཛད་དེ་བཞིན་ཕན་པ་མཛད། །མཉམ་པ་མེད་པ་དཔེ་མེད་
པ། །ཁྱབ་བདག་ཉོན་མོངས་ལས་རྣམས་སྤོང་། །ཁེངས་པ་མེད་པ་དམན་པ་མེད། །མཉམ་པ་དེ་བཞིན་མི་མཉམ་མཉམ། །སྣང་བ་བརྙེས་པ་སྣང་བྱེད་མེད། །འཇིག་རྟེན་སྣང་མཛད་སྡིག་མེད་པ། །སྒྲིབ་པ་ཐམས་ཅད་སྤངས་པ་སྟེ། །འཇིག་རྟེན་ཀུན་ལ་ཕན་པར་བརྩོན། །དཔའ་བོ་ཞི་བ་ཞི་མཛད་
པ། །ཉོན་མོངས་དགྲ་རྣམས་ཟད་པར་མཛད། །མངའ་བདག་ཐབས་མཁྱེན་ཐབས་ཆེ་བ། །སེམས་ཅན་ཀུན་གྱི་འཁྲ་ས་ལགས། །དོན་ཡོད་རྙེད་དཀའ་བློ་དང་ལྡན། །རྡོ་རྗེའི་དཀྱིལ་འཁོར་ཐུབ་པར་དཀའ། །སྐྱོབ་པ་འཇིགས་སེལ་ཚངས་པ་སྟེ། །དེ་བཞིན་སངས་རྒྱས་ཆོས་འཛིན་པ། །དཔའ་
བོ་ཆེན་པོ་འཇིགས་པ་མེད། །གཟུགས་བཟང་མཚན་རྣམས་གསལ་བ་སྟེ། །སུམ་ཅུ་རྩ་གཉིས་མཚན་མངའ་བ། །ཆོས་ཀྱི་ལོངས་སྤྱོད་རྒྱ་མཚོ་ལགས། །དཔེ་བྱད་བཟང་པོ་བཀོད་པ་ཡིས། །སྤྲས་པའི་བདག་ཉིད་ཡ་མཚན་སྟོན། །དཀའ་བ་མེད་པའི་སྟོན་པ་པོ། །དེ་བཞིན་དེས་པ་བདེ་སྦྱིན་པ། །

མཐུ་ཅན་ཡངས་པ་རྒྱ་ཆེ་བ། །བདུད་བཞིའི་སྟོབས་རྣམས་སེལ་མཛད་པ། །བརྩོན་ཆེན་སྤྲོ་བ་ཆེ་བ་སྟེ། །དགྱེས་པ་ཆེན་པོ་སྟོབས་པོ་ཆེ། །མཐུ་བརྙེས་བརྟན་པ་ཆེན་པོ་སྟེ། །གནས་ལྡན་དབང་གིས་དར་བ་ལགས། །གསལ་བ་གསུང་ལྡན་དཔེ་མེད་པ། །དགེ་བ་
སྟོང་པ་ཉིད་ཀྱིས་རྒྱལ། །རབ་ཏུ་ཞི་བ་མུན་པ་མེད། །བློ་གྲོས་ཆེན་པོ་ཆོས་འཛིན་པ། །ཕུན་སུམ་ཚོགས་ལྡན་ས་ཆེན་བརྙེས། །འདོད་པ་རྣམས་ནི་འདུལ་མཛད་པ། །དཔལ་མཛད་དཔལ་མངའ་དཔལ་དང་ལྡན། །དཔལ་གྱི་ལོངས་སྤྱོད་ཤིན་ཏུ་རྒྱས། །བཅོམ་ལྡན་ལེགས་བསྒོས་བསྒོ་
བར་མཛད། །གསུང་ལྡན་བཀྲ་ཤིས་རྒྱལ་བའི་གནས། །མཉམ་ཉིད་མཉམ་པ་ཉིད་མཁྱེན་པ། །མཉམ་པ་ཉིད་ཀྱི་མཚན་དཔག་མེད། །རབ་ཏུ་དགྱེས་ལ་ལོངས་སྤྱོད་གསལ། །གཞི་བཅས་སེམས་པ་མཉམ་པ་ལགས། །བློ་དག་བློ་ལྡན་དྲི་མ་སྤངས། །གནས་ཆེན་བརྟན་པར་ལྡན་པ་སྟེ། །
རྒྱས་པར་ལོངས་སྤྱོད་དྲི་མ་མེད། །ཐུབ་པ་ཐུགས་རྗེའི་རྒྱན་མངའ་བ། །སྐལ་བ་བཟང་པོ་འཇིགས་པའི་སྐྱབས། །དེ་བཞིན་འཇིགས་མེད་ཉོན་མོངས་སེལ། །དྲི་མེད་སྐྱོན་བྲལ་ལོངས་སྤྱོད་ཅན། །སྣ་ཚོགས་འོད་ལྡན་དཀྱིལ་འཁོར་མཛེས། །སྐུ་བཟང་དགེ་བའི་རིམ་པ་མཆོག །ཐུགས་རྗེའི་འོད་
ལྡན་འོད་བཟང་བ། །མི་གནས་ལོངས་སྤྱོད་དམ་པ་ལགས། །ཆོས་ཀྱི་རྒྱུ་སྟེ་ཡོན་ཏན་གནས། །རྗེད་འོས་མཆོག་གནས་ལོངས་སྤྱོད་ཆེ། །ནམ་མཁའ་མཚན་ཏེ་རྣམ་དག་བློ། །རིན་ཆེན་གཟུགས་འདྲ་བཀྲ་ཤིས་པ། །ཁྱུ་མཆོག་ཆེ་སྤྱན་བ་རྫི་མ། །རྒྱལ་བ་སྐྱོན་བསལ་ཤེས་རབ་ཅན། །ཤེས་
རབ་ཐབས་དང་ལྡན་པ་སྟེ། །འཇིག་རྟེན་མི་དགེ་ཀུན་ལས་འདས། །དག་པར་ལོངས་སྤྱོད་བརྟན་པ་ཅན། །ས་དང་སྟོབས་དང་ཡེ་ཤེས་བཟོད། །ཕ་རོལ་ཕྱིན་པ་ཀུན་ལ་མངའ། །ཏིང་འཛིན་མཉམ་པར་ལོངས་སྤྱོད་པ། །རྣམ་ཐར་སྒོ་ལ་མངོན་སུམ་པ། །གཏོང་བ་སངས་རྒྱས་ཀུན་དང་མཉམ། །
ཆོས་ཆེན་བདེ་བར་འཆར་བ་ལགས། །ཐམས་ཅད་མཁྱེན་པའི་ཡུལ་ལས་འདས། །སྤྱོད་ཡུལ་སྒྲིབ་པ་མི་མངའ་བ། །བྱང་ཆུབ་སེམས་དཔའི་དབང་པོ་རྒྱལ། །དམ་པའི་དོན་ཏེ་ཚུལ་ཆེ་བ། །ཤེས་བྱའི་ཡུལ་རྣམས་མཐའ་དག་ལ། །སྒྲིབ་པ་མེད་པར་འཆར་བ་བརྙེས། །རིགས་ཆེན་མཐུན་པར་

སྐྱེས་པ་སྟེ། །དེ་བཞིན་གཤེགས་པའི་དགེ་བའི་གནས། །ཁྱད་པར་བརྙེས་པ་མཉམ་ཉིད་བརྙེས། །མི་མཉམ་སངས་རྒྱས་ཀུན་དང་མཉམ། །དོན་ཆེན་ཤིན་ཏུ་མཐར་ཕྱིན་པ། །ཉོན་མོངས་བྲལ་བ་ཐུབ་པར་དཀའ། །དགེ་སྦྱོང་སྡིག་པ་སྦྱོང་མཛད་པ། །གནོད་པ་མེད་པར་བདེ་བར་
འབྱིན། །བློ་རྒྱ་ཆེ་བ་ཐམས་ཅད་མཁྱེན། །ཐོས་པའི་མཚོན་ཆ་མ་ལུས་གསན། །དཀོན་པ་བདེ་བ་ཐོབ་འགྱུར་བ། །མཉམ་པ་ཁྱད་པར་ཡུལ་དང་ལྡན། །འཇིག་རྟེན་ཐམས་ཅད་དར་མཛད་མགོན། །ཞི་གནས་མཚོན་ཆ་ཐུབ་པར་དཀའ། །བསམ་གྱིས་མི་ཁྱབ་བསམ་ཡས་ཡུལ། །
དཔེ་མེད་པ་སྟེ་དཔེར་བྱ་བ། །འོད་བཟང་རབ་དགྱེས་དཔལ་དང་ལྡན། །ལེགས་གསུང་བློ་ཡི་སྟོབས་ཀྱིས་འབྱུང་། །མཁས་པ་ཞལ་བཟང་བདེ་སྦྱིན་པ། །རབ་དགྱེས་འདས་པའི་སྤྱོད་ཡུལ་ཅན། །གསུང་བ་ཆེན་པོ་ཡེ་ཤེས་ཆེ། །གནས་ཆེན་བཀྲ་ཤིས་ཆེན་པོ་སྟེ། །མཆོད་པར་གྱུར་པ་
ཡུལ་ལས་འདས། །བྱ་བའི་མཚན་ཉིད་མེད་པ་པོ། །སངས་རྒྱས་ཡུལ་དུ་སྐྱེས་པ་སྟེ། །ཤེས་བྱའི་སྤྱོད་ཡུལ་རྒྱ་ཆེ་བ། །ཀུན་མཁྱེན་ལོངས་སྤྱོད་འབྲས་བུ་ཅན། །འཇིག་རྟེན་དབང་འདས་སྤྱོད་ཡུལ་བ། །ཀུན་མཁྱེན་ཡུལ་གྱི་སྣང་བ་སྟེ། །ཐབས་མངའ་ཕུན་སུམ་ཚོགས་ལྡན་པ། །རྫུ་
འཕྲུལ་རོལ་པའི་ཐབས་དང་ལྡན། །ཆོས་ཀྱི་གར་ཐབས་སྟོན་པ་པོ། །རབ་སྟོན་ཡོན་ཏན་སྒྱུར་མཛད་པ། །སྤྱོད་པ་མ་ལུས་འདུལ་བར་མཛད། །ཡོངས་སུ་རྫོགས་པ་རྣམ་པར་ད་ག །སངས་རྒྱས་སྤྱོད་ཡུལ་རྣམ་སངས་རྒྱས། །བགེགས་བྱེད་མ་ལེགས་བྱེད་པ་བཅོམ། །བདུད་ཀྱི་དྲེགས་པ་
སེལ་བར་མཛད། །གཡུལ་ངོར་རྣམ་པར་རྒྱལ་བ་བརྙེས། །དཔའ་བོ་ཆེན་པོ་ཕམ་མེད་སྟོབས། །ཐེག་པ་ཆེན་པོའི་ཤིང་རྟ་བཅིབས། །བློ་ཆེན་བརྒལ་བར་དཀའ་བ་ཡི། །ཉོན་མོངས་རྒྱ་མཚོའི་ཕ་རོལ་གཤེགས། །ཐེག་པ་ཆེན་པོའི་ཚུལ་ལ་གནས། །ཐེག་པ་མཆོག་ལ་ལོངས་སྤྱོད་པ། །
ཉན་ཐོས་འདས་པའི་སྤྱོད་ཡུལ་ཅན། །རང་རྒྱལ་ལས་ཀྱང་འདས་པ་སྟེ། །སངས་རྒྱས་ས་ཡི་འབྲས་བུར་གནས། །གོང་ནས་གོང་དུ་ཁྱད་པར་མཁྱེན། །ཁྱོད་ནི་ནམ་མཁའི་གནས་ན་བཞུགས། །བདེ་འབྱུང་ས་དང་ཞིང་རྣམས་ཀྱི། །མཚོ་ཆེན་དག་ལ་ལོངས་པར་སྤྱོད། །སངས་རྒྱས་དབང་པོ་

རྒྱས་པ་ལ། །མཚན་བརྒྱ་རྩ་བརྒྱད་ཀྱིས་བསྟོད་ནས། །དེ་ལ་ལྷ་སོགས་ཚོགས་རྣམས་ཀྱིས། །ཕྱག་བྱས་མགོ་སྨད་ཕྱོགས་གཅིག་འཁོད། །དེ་ནས་དཀྱིལ་འཁོར་ཆེན་པོ་ན། །གནས་པ་མ་ལུས་ཆེམ་མེར་འཁོད། །ཐོད་དུ་རྡོ་རྗེའི་ཐོད་འཆིང་བ། །ལངས་ནས་ཅོད་པན་རབ་ཏུ་གཡོས། །
དཀྱིལ་འཁོར་མཐོན་པོ་ཐམས་ཅད་དུ། །སྐད་བེར་ཆེན་པོས་ཡོངས་བཀང་ནས། །ནོར་བུའི་རྒྱན་ནི་རྣམ་གཡོ་ཞིང་། །ཧ་ཧ་གྲགས་པའི་སྒྲ་སྒྲོགས་ཏེ། །ཀྱེ་མ་སངས་རྒྱས་ཡོན་ཏན་ཆེ། །བསྐལ་པ་གྲངས་མེད་གསུམ་བསགས་པ། །བྱང་ཆུབ་སེམས་སོགས་མཆོག་རྣམས་ཀྱིས། །མཚན་བརྒྱ་རྩ་བརྒྱད་
ལེགས་པར་བརྗོད། །ཀྱེ་མ་རྙེད་དང་བདེ་འབྱུང་བ། །མཚན་བརྒྱ་རྩ་བརྒྱད་ཐོས་ནས་ཀྱང་། །གང་ཞིག་ཀློག་ཅིང་རྒྱལ་ལ་བསྟོད། །འབྲས་བུ་ཆེན་པོ་འགྲུབ་པར་འགྱུར། །མཚན་བརྒྱ་རྩ་བརྒྱད་སྔགས་བཅས་པ། །བཅོམ་ལྡན་འདས་དྲུང་བརྗོད་ན་ནི། །སྒྲིབ་དང་ཀུན་ནས་ཉོན་མོངས་དང་། །སྡིག་པ་ཐམས་
ཅད་དག་པ་འཐོབ། །མཚན་བརྒྱ་རྩ་བརྒྱད་མཆོག་བཏོན་ན། །སྒྲིབ་པ་ཀུན་ལས་ངེས་གྲོལ་ཞིང་། །ཉོན་མོངས་མཐའ་དག་རྣམ་པར་སྤོང་། །ཤེས་རབ་ཆེན་པོ་ཉིད་དུ་འགྱུར། །དེ་ནི་ལོངས་སྤྱོད་ཆེན་པོ་དང་། །བདེ་བ་ལས་ཀྱང་ཉམས་མི་འགྱུར། །དེ་ནི་ཚེ་རབས་ཐམས་ཅད་དུ། །བློ་ལྡན་ཚེ་རབས་དྲན་
པར་འགྱུར། །དེ་ནས་རྡོ་རྗེའི་ཐོད་འཆིང་བ། །ཡོན་ཏན་མཐའ་ཡས་སྲས་དེ་ལ། །བཅོམ་ལྡན་བདུད་ལས་རྒྱལ་བ་ཡིས། །མངོན་སུམ་གཟིགས་ནས་བཀའ་སྩལ་པ། །རྒྱལ་བའི་ས་འདི་ཞི་བ་སྟེ། །ང་རྒྱལ་ལ་སོགས་ཉོན་མོངས་འཇོམས། །འཇིག་རྟེན་བདེ་བ་ཀུན་ལས་འདས། །དེ་བཞིན་གཤེགས་བདེ་
མངོན་དུ་ཕྱོགས། །གཞན་གྱིས་མི་ཚུགས་གཟུངས་དང་ནི། །མཚན་བརྒྱ་རྩ་བརྒྱད་ཉན་བྱེད་པ། །དེ་དག་རྣམ་དག་བདག་ཉིད་དེ། །སེམས་ཅན་ཀུན་ལ་བདེ་འདོད་པ། །ལན་ཅིག་ཐོས་པ་ཙམ་གྱིས་ཀྱང་། །དེ་དག་ས་ཆེན་འབྲས་བུར་གནས། །རིང་པོར་མི་ཐོགས་དགའ་འགྱུར་ན། །འཆང་སོགས་ལྟ་ལ་
ཅི་ཞིག་སྨོས། །དེ་ཕྱིར་རྟག་ཏུ་རབ་བསྒྲིམས་ལ། །གཏན་དུ་བདེ་བ་འདོད་པ་ཡིས། །ཡོན་ཏན་རྒྱ་མཚོ་ལྡན་པའི་གཟུངས། །མཉན་པར་བྱ་ཞིང་བཅང་བར་བྱ། །གང་ཞིག་ནང་པར་ལངས་ནས་བརྗོད། །བདག་ཉིད་ཀྱིས་ཀྱང་བཏོན་ན་ནི། །དེ་ཡི་དོན་ཀུན་འགྲུབ་འགྱུར་ལ། །གནོད་པ་དང་ཡང་ཕྲད་མི་འགྱུར། །

འདི་ནི་ཡོན་ཏན་ཀུན་གྱི་སྣོད། །དགེ་བ་ཕུན་སུམ་ཚོགས་སྦྱིན་པ། །ཀུན་མཁྱེན་བླ་མེད་འབྲས་བུའི་མཆོག །བདེ་འབྱུང་ཐོབ་པར་བྱེད་པ་ཡིན། །འབྲས་བུ་འབྱོར་པ་ཅི་ཡང་རུང་། །ཐོབ་པར་མི་འགྱུར་དོགས་པ་མེད། །ཀུན་མཁྱེན་གོ་འཕང་ཐོབ་གྱུར་ནས། །དཔེ་མེད་གནས་སུ་འགྲོ་བར་འགྱུར། །
དེ་ནི་དགེ་ཞིང་འབྲས་བུར་ལྡན། །སངས་རྒྱས་ས་ཡི་འབྲས་བུ་སྦྱིན། །ཡིད་དུ་འོང་ཞིང་ཡོན་ཏན་ལྡན། །སྙིང་རྗེ་དྲི་མ་མེད་སྦྱིན་པ། །འདི་ནི་མཉམ་པ་ཉིད་ཀྱི་མདོ། །འཇིག་རྟེན་ཀུན་ནས་དགའ་བ་སྟེ། །འཇིག་རྟེན་ཀུན་གྱི་བདེ་བ་འབྱུང་། །འདི་དང་འདྲ་བ་གང་ཡང་མེད། །སྟོན་པ་སངས་རྒྱས་བཅོམ་
ལྡན་འདས་ཀྱི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ་རྫོགས་སོ།། །།དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་པོ་ལ་ཕྱག་འཚལ་ལོ། །ཏདྱ་ཐཱ། མུ་ནི་མུ་ནི་མ་ཧཱ་མུ་ན་ཡེ་སྭཱ་ཧཱ། ལན་གཅིག་བཟླས་བརྗོད་བྱས་ན་བསྐལ་པ་བྱེ་བ་བརྒྱ་
ཕྲག་བརྒྱད་ཁྲིའི་བར་དུ་སྡིག་པ་བྱས་པ་གང་ཡིན་པ་དེ་དག་ཐམས་ཅད་འབྱང་བར་འགྱུར་རོ། །འཕགས་པ་ཤཱཀྱ་ཐུབ་པའི་སྙིང་པོའི་གཟུངས་རྫོགས་སོ།། །།དཀོན་མཆོག་གསུམ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཕགས་
པ་རྣམ་པར་སྣང་མཛད་འོད་ཀྱི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །ཏདྱ་ཐཱ། ཀ་ལ་ཀ་ལ། ཀི་ལི་ཀི་ལི། བི་རི་བི་རི། ཧུ་རུ་ཧུ་རུ། བཻ་རོ་ཙ་ན་རསྨི་སཉྩོ་དི་ཏེ་ཨཱ་གཙྪ། ཨཱརྱ་ཨཱ་ཀཱ་ཤ་གརྦྷ་མ་ཧཱ་ཀཱ་རུ་ཎི་ཀཱ་པཱུ་ར་ཡ་ཧ་ཤཱ་ན།
དྷཱ་ར་ཡ་བུདྡྷེ་བིཤྩ་ཡ་ན། ཙ་ར་ཙ་ར། ཙི་རི་ཙི་རི་སྭཱ་ཧཱ། བཏོན་པས་འགྲུབ་སྟེ། མཚོན་ཆ་དང་། མེ་དང་། ཆུ་དང་། དུག་དང་། དུག་སྦྱར་མ་དང་། བྱད་སྟེམས་རྣམས་ཀྱིས་མི་ཚུགས་སོ། །རྒྱལ་པོ་དང་། ཆོམ་རྐུན་ལ་སོགས་པ་ཐམས་ཅད་ཀྱིས་གླགས་མི་རྙེད་དོ། །གང་དུ་བྲིས་ཏེ་བཞག་པ་དེར་
ཡམས་ཀྱི་ནད་དང་། གནོད་པ་དང་། འགོ་བའི་ནད་ཐམས་ཅད་མི་འབྱུང་བར་འགྱུར་རོ། །དྲི་མ་མེད་པའི་འོད་ཅེས་བྱ་བའི་ཏིང་ངེ་འཛིན་ཀྱང་འཐོབ་པར་འགྱུར་རོ། །འཕགས་པ་རྣམ་པར་སྣང་མཛད་ཀྱི་སྙིང་པོ་ཞེས་བྱ་བའི་གཟུངས་རྫོགས་སོ།། །།ཟླ་བའི་འོད་དེ་བཞིན་གཤེགས་པ་དགྲ་བཅོམ་

པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །ཏདྱ་ཐཱ། ཙནྡྲེ་ཙནྡྲེ། སུ་ཙནྡྲེ། མ་ཏི་ཙནྡྲ་ཙནྡྲ་ཀི་ར་ཎ། སི་རི་སི་རི། བུདྡྷཱ་ངྷིཥྛི་ཏེ། ཀི་ལི་ཀི་ལི། དྷརྨཱ་དྷིཥྛི་ཏེ། ཀི་ལི་ཀི་ལི། སཾ་གྷཱ་དྷིཥྛི་ཏེ་སྭཱ་ཧཱ། རིགས་ཀྱི་བུའམ་རིགས་ཀྱི་བུ་མོ་གང་གིས་རྟག་ཏུ་ནང་པར་ལངས་ཏེ། ཟླ་བའི་
འོད་དེ་བཞིན་གཤེགས་པའི་མཚན་དྲན་པར་བྱེད་པ་དེ་ནི་བསྐལ་པ་བཞི་ཁྲིར་ཚེ་རབས་དྲན་པར་འགྱུར་ཏེ། དེ་ནི་ངན་སོང་དུ་ལྟུང་བར་མི་འགྱུར་རོ། །ཟླ་བའི་འོད་ཀྱི་མཚན་རྗེས་སུ་དྲན་པས་ཡོན་ཏན་དེ་རྣམས་ཐོབ་པར་འགྱུར་རོ། །ཟླ་བའི་འོད་ཀྱི་མཚན་རྗེས་སུ་དྲན་པ་རྫོགས་སོ།། །།ནམཿསརྦ་
ཏ་ཐཱ་ག་ཏ་ཧྲྀ་ད་ཡ། ཨ་ནུ་ག་ཏེ་ཨོཾ་ཀུ་རུཾ་གི་ནི་སྭཱ་ཧཱ། འདི་ལན་ཅིག་བཟླས་པས་ཀྱང་བསྐལ་པ་འབུམ་ཕྲག་བརྒྱད་སྟོང་དུ་བསགས་པའི་ལས་ཀྱི་སྒྲིབ་པ་ཡང་ཟད་པར་འགྱུར་རོ། །དེ་བཞིན་གཤེགས་པ་སྤྱིའི་སྙིང་པོ་རྗེས་སུ་དྲན་པ་རྫོགས་སོ།། །།སངས་རྒྱས་རིན་ཆེན་གཙུག་ཏོར་ཅན་ལ་
ཕྱག་འཚལ་ལོ། །ན་མོ་རཏྣ་ཤི་ཁི་ནེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྷཱ་ཡ། ཏདྱ་ཐཱ། རཏྣེ་རཏྣེ་རཏྣ་ཤི་ཁི་ནེ་སྭཱ་ཧཱ། འཆི་བའི་ཚེ་དྲན་ན་ངན་སོང་ཀུན་ལས་རྣམ་པར་གྲོལ་བར་འགྱུར། །འཆི་འཕོས་ནས་ཀྱང་སུམ་ཅུ་རྩ་གསུམ་གནམ་གྱི་ལྷར་སྐྱེའོ། །སངས་རྒྱས་རིན་ཆེན་གཙུག་ཏོར་ཅན་གྱི་
མཚན་རྗེས་སུ་དྲན་པ་རྫོགས་སོ།། ༄༅༅། །རྒྱ་གར་སྐད་དུ། པཱུ་ཛ་མེ་གྷ་ནཱ་མ་དྷཱ་ར་ཎཱི། བོད་སྐད་དུ། མཆོད་པའི་སྤྲིན་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ན་མོ་བྷ་ག་བ་ཏེ། བཛྲ་སཱ་ར་པྲ་མརྡ་ནི། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ།
ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲེ། སརྦ་ཀརྨྨ་ཨཱ་བར་ཎ་བི་ཤོ་དྷ་ན་བཛྲེ་སྭཱ་ཧཱ། གཟུངས་སྔགས་འདིའི་ཆོ་ག་ནི་འདི་ཡིན་ཏེ། དྲན་པ་ཙམ་གྱི་མོད་ལ་ཕྱོགས་བཅུ་དག་ན་བཞུགས་པའི་སངས་རྒྱས་བཅོམ་ལྡན་འདས་གང་གཱའི་
ཀླུང་གི་བྱེ་མའི་རྡུལ་ཕྲ་རབ་སྙེད་ལ་མཆོད་པ་བྱས་པར་འགྱུར་ཞིང་ཞབས་ལ་ཕྱག་བྱས་པར་འགྱུར་རོ། །མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་བ་དང་། བྱུག་པ་དང་། ཕྱེ་མ་དང་། གདུགས་དང་། རྒྱལ་མཚན་དང་། བ་དན་ཐམས་ཅད་དང་། གདན་དང་། གདིང་བ་དང་། ན་བཟའ་དང་། སྤྱན་གཟིགས་

དང་། བཤོས་གཙང་བ་ལ་སོགས་པ་དང་། རྒྱན་དང་། ལྷབ་ལྷུབ་ཐམས་ཅད་ཀྱིས་མཆོད་པར་འགྱུར་རོ། །སྡིག་པ་ཐམས་ཅད་དང་བྲལ་བར་འགྱུར་ཞིང་དགེ་བའི་རྩ་བ་ཐམས་ཅད་དང་ལྡན་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཐོང་བས་ཡང་དག་པར་དབུགས་འབྱིན་
པར་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ཐམས་ཅད་དང་། ལག་ན་རྡོ་རྗེ་ལ་སོགས་པ་གསང་བ་པའི་བདག་པོ་དང་བཅས་པ་རྣམས་དང་། རྒྱལ་པོ་ཆེན་པོ་བཞི་པོ་རྣམས་ཕྱི་བཞིན་ཡང་དག་པར་འབྲང་ཞིང་
སྲུང་བ་དང་། སྐྱོབ་པ་དང་། སྦེད་པར་བྱེད་དོ། །འདི་ནས་ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། ཡོན་ཏན་གྱི་ཁྱད་པར་འདི་དག་ནི་མ་བསྒྲུབས་པར་ལན་ཅིག་དྲན་པ་ཙམ་གྱིས་ཐོབ་པར་འགྱུར་རོ། །མཆོད་པའི་སྤྲིན་ཞེས་བྱ་བའི་གཟུངས་རྫོགས་སོ།། །།ཨོཾ་ན་
མོ་བྷ་ག་བ་ཏེ་རཏྣ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོྃ་རཏྣེ་རཏྣེ་མ་ཧཱ་རཏྣེ་རཏྣ་བི་ཛ་ཡེ་སྭཱ་ཧཱ། ཞེས་ལན་བརྒྱད་བརྗོད་པས་ཕྱག་བྱའོ།། །།ན་མཿསརྦ་བུདྡྷ་བོ་ངྷི་ས་ཏྭཱ་ནཱཾ། སརྦ་ཏྲ་སཾ་ཀུ་སུ་མི་དཱ་བྷི་ཛྙཱ་རཱ་སི་ནི་ན་མོ་སྟུ་ཏེ་སྭཱ་ཧཱ། ཞེས་ལན་བརྒྱད་བརྗོད་པས་བསྟོད་པའོ།། །།
ཨོྃ་སརྦ་ཏ་ཐཱ་ག་ཏ་པཱུ་ཛ་མེ་གྷ་པྲ་ས་ར་ས་མཱུ་ཧེ་སྥ་ར་ཎ་ཨི་མཾ་ག་ག་ན་ཀཾ་ཧཱུྃ་ཞེས་པས་མཆོད་པ་བྱིན་གྱིས་བརླབ་པོ།། །།ན་མཿསརྦ་བུདྡྷ་བོ་ངྷི་ས་ཏྭཱ་ནཱཾ། སརྦ་ཐཱ་ཨུཏྒ་ཏེ་སྥ་ར་ན་ཨི་མཾ་ག་ག་ན་ཁཾ་ས་མནྟ་སྭཱ་ཧཱ། ཞེས་ལན་བརྒྱད་བརྗོད་པས་མཆོད་པའི་སྤྲིན་འབྱུང་ངོ་།། །།ན་མཿསརྦ་བུདྡྷ་བོ་ངྷི་
སཏྭེ་བྷྱཿ། སརྦ་བི་ཏ་པཱུ་ར་པཱུ་ར། ཨ་བརྟཱ་ཨ་བྷ་ཡེ་སྭཱ་ཧཱ། ཞེས་བརྗོད་པས་དེ་བཞིན་གཤེགས་པ་རྣམས་ལ་མཆོད་པ་དང་ཉེ་གནས་དང་ཞབས་ལ་སྤྱི་བོས་ཕྱག་བྱས་པར་འགྱུར་རོ།། །།དཀོན་མཆོག་གསུམ་ལ་ཕྱག་འཚལ་ལོ། །ཨོྃ་སྨ་ར་སྨ་ར། བི་སྨ་ན་སྐ་ར་མ་ཧཱ་ཛ་བ་ཧཱུྃ་ཞེས་བརྗོད་ཅིང་རིན་པོ་ཆེ་
བརྡར་བས་རིན་པོ་ཆེའི་གདུགས་དང་རྒྱལ་མཚན་ལ་སོགས་པའི་ཆར་དཔག་ཏུ་མེད་པ་ནམ་མཁའི་ཁམས་གང་བར་བསམ་ལ་དབུལ་ལོ། །རིན་པོ་ཆེ་བརྡར་བའི་གཟུངས་རྫོགས་སོ།། །།དཀོན་མཆོག་གསུམ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་

པའི་སངས་རྒྱས་པདྨའི་སྤྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ལ་ཕྱག་འཚལ་ལོ། །ཏདྱ་ཐཱ། ཨོྃ་ཏ་ར་ཏ་ར། ཏི་རི་ཏི་རི། ཏུ་རུ་ཏུ་རུ། ཀ་ལ་ཀ་ལ། ཀི་ལི་ཀི་ལི། ཀུ་ལུ་ཀུ་ལུ། བྷ་ར་བྷ་ར། བྷི་རི་བྷི་རི། བྷུ་རུ་བྷུ་རུ། བྷ་ཡ་བྷ་ཡ།
ཀུ་རུ་ཀུ་རུ། སརྦ་ཀརྨ་ཨཱ་བར་ཎ་ཛ་ནི་མེ་ཤ་པྲ་བྷ་ཡ་སྭཱ་ཧཱ། ཛྭ་ལ་ནི་བི་དྷ་ནི་བཻ་སྭཱ་ཧཱ། ཀུ་རུ་པཉྩ་ལི་སྭཱ་ཧཱ། སཱ་ག་ར་སཾ་བི་རེ་སྭཱ་ཧཱ། སརྦ་ཏ་ཐཱ་ག་ཏ་ཨ་དྷིཥྛི་ཏེ་སྭཱ་ཧཱ། གཟུངས་འདིའི་ཆོ་ག་ནི་འདི་ཡིན་ཏེ། ནང་པར་ལངས་ནས་ལན་བརྒྱ་རྩ་བརྒྱད་བཟླས་བརྗོད་བྱས་ན་ཞག་ཉི་ཤུ་རྩ་གཅིག་ལོན་པའི་ཚེ་
ལས་ཀྱི་སྒྲིབ་པ་ཐམས་ཅད་ཟད་པར་འགྱུར་རོ། །སྤྱན་ལྔ་ཡང་རྣམ་པར་དག་པར་འགྱུར་རོ། །དེ་ལ་མིག་ནད་འབྱུང་བར་མི་འགྱུར་རོ། །ལུས་ལ་ནད་འབྱུང་བར་མི་འགྱུར་རོ། །ཡིད་ཀྱི་ཉེས་པ་འབྱུང་བར་མི་འགྱུར་རོ། །སྤྱན་ལྔ་ཡང་རྣམ་པར་དག་པར་འགྱུར་རོ། །དེ་བཞིན་དུ་ཡིད་རྣམ་པར་དག་
པ་ལྔ་ཡང་ཐོབ་པར་འགྱུར་རོ། །ཚེ་རབས་ཐམས་ཅད་དུ་སངས་རྒྱས་འབྱུང་བ་དང་ཕྲད་པར་འགྱུར་རོ། །བྱང་ཆུབ་ཀྱི་སྙིང་པོ་ལ་གནས་ཀྱི་བར་དུ་སངས་རྒྱས་མཐོང་བ་དང་། ཆོས་ཐོས་པ་དང་། དགེ་འདུན་ལ་བསྙེན་བཀུར་བྱེད་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་དང་འབྲལ་བར་མི་
འགྱུར་རོ། །ལུས་མཛེས་པར་འགྱུར་རོ། །སེམས་དང་བར་འགྱུར་རོ། །འཕགས་པ་པདྨའི་སྤྱན་ཞེས་བྱ་བའི་གཟུངས་རྫོགས་སོ།། ༄༅། །རྒྱ་གར་སྐད་དུ། སུ་རཱུ་པ་ནཱ་མ་དྷཱ་ར་ཎཱི། བོད་སྐད་དུ། སུ་རཱུ་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་
ལོ། །ནམཿསུ་རཱུ་པཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་སུ་རུ་སུ་རུ། པྲ་སུ་རུ་པྲ་སུ་རུ། ཏ་ར་ཏ་ར། བྷ་ར་བྷ་ར། སཾ་བྷ་ར་སཾ་བྷ་ར། སྨ་ར་སྨ་ར། སནྟརྤ་ཡ་སནྟརྤ་ཡ། སརྦ་པྲེ་ཏཱ་ནཱཾ་སྭཱ་ཧཱ། གཟུངས་འདིས་ཆུ་དང་བཅས་པའི་ཟན་ལ་ལན་བདུན་ཡོངས་སུ་བཟླས་ཏེ་ལག་པ་གཡོན་པས་སེ་གོལ་
གྱི་སྒྲ་ལན་གསུམ་དུ་བྱས་ནས་ཡི་དགས་ཐམས་ཅད་ལ་དབེན་པའི་ས་ཕྱོགས་སུ་སྦྱིན་པར་བྱ་ཞིང་། འདི་སྐད་ཀྱང་བརྗོད་པར་བྱ་སྟེ། སྐབས་ཚོལ་བ་དང་གླགས་ལྟ་བ་རྣམས་དེངས་ཤིག །འཇིག་རྟེན་གྱི་ཁམས་ཐམས་ཅད་ན་གནས་པའི་ཡི་དགས་རྣམས་ལ་བཟའ་བ་འདི་བདག་གིས་སྦྱིན་པར་བགྱིའོ་ཞེས་པའོ། །

ཟས་མ་ཟོས་པའི་སྔོན་རོལ་ཉིད་དུ་སྦྱིན་པར་བྱའོ། །དེ་ལྟར་ན་ཡི་དགས་ཐམས་ཅད་ལ་འབྲས་བྲེ་བོ་ཆེ་རེ་རེའི་བཟའ་བ་སོ་སོར་བྱིན་པར་འགྱུར་རོ། །དེ་ལྟར་བྱས་ན་སྐྱེ་བ་ནས་སྐྱེ་བར་ཡང་ཉམ་ཆུང་བར་མི་འགྱུར་རོ། །དབུལ་པོར་མི་འགྱུར་རོ། །སྟོབས་ཆེ་བ་དང་། མཛེས་པ་དང་། མཐོང་ན་དགའ་བ་དང་། ཕྱུག་
ཅིང་ལོངས་སྤྱོད་ཆེ་བར་འགྱུར་རོ། །ཚེ་རིང་ཞིང་ནད་མེད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཤི་འཕོས་ནས་ཀྱང་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་རོ། །གཟུགས་ལེགས་ཞེས་བྱ་བའི་གཟུངས་རྫོགས་
སོ།། ༄༅། །རྒྱ་གར་སྐད་དུ། ཨཱརྱ་ཨཥྚ་མ་ཧཱ་བྷ་ཡ་ཏཱ་རཱ་ནི་ནཱ་མདྷཱ་ར་ཎཱི། བོད་སྐད་དུ། འཕགས་པ་འཇིགས་པ་ཆེན་པོ་བརྒྱད་ལས་སྒྲོལ་བ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་བཞིན་གཤེགས་པ་ཡོན་ཏན་འབྱུང་གནས་ལ་
ཕྱག་འཚལ་ལོ། །དེ་བཞིན་གཤེགས་པ་ཀུན་ནས་སྤོས་དྲི་ལ་ཕྱག་འཚལ་ལོ། །དེ་བཞིན་གཤེགས་པ་གཞན་གྱིས་མི་ཐུབ་པའི་རྩལ་དང་ལྡན་པ་ལ་ཕྱག་འཚལ་ལོ། །དེ་བཞིན་གཤེགས་པ་སྒྲིབ་པ་ཐམས་ཅད་རྣམ་པར་སེལ་བ་ལ་ཕྱག་འཚལ་ལོ། །དེ་བཞིན་གཤེགས་པ་ཟླ་བ་མཆོག་ལ་ཕྱག་འཚལ་
ལོ། །དེ་བཞིན་གཤེགས་པ་ཞི་བའི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཟླ་བའི་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་འཇིགས་པ་མེད་པར་བྱེད་པ་ལ་ཕྱག་འཚལ་ལོ། །ཏདྱ་ཐཱ། དྷ་རེ་དྷ་རེ། དྷཱ་རེ་དྷཱ་ར་ཎཱི། ར་ན་ཀོ་ཏེ་ཨ་བྷ་
ཡཱ་ཀལྤེ། ཀལྤེ་ནི་ག་ཎི། ཨ་ནནྟ་ཀལྤེ། ཨ་མྲྀ་ཏ་ཀལྤེ། ཧུ་ཏཱ་ཤ་རེ། ཨ་ནནྟ་མུ་ཁེ། ཨ་ནནྟ་ཙཀྵུ་ས་མུཏྒ་ཏེ། ཨོྃ་བྷ་སྭཱ་ཧཱ། རིགས་ཀྱི་བུ་གཟུངས་ཀྱི་གསང་སྔགས་འདི་དག་ནི་སེམས་ཅན་ངན་སོང་དུ་འགྲོ་བ་རྣམས་ཀྱི་དོན་གྱི་ཕྱིར། སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་དག་གིས་
གསུངས་པ་དང་། བྱིན་གྱིས་བརླབས་པ་དང་། རྗེས་སུ་ཡི་རང་བ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་གང་ལ་ལ་གཟུངས་འདི་འཛིན་པར་བྱེད་པ་དེ་འཇིགས་པ་བརྒྱད་པོ་སེམས་ཅན་དམྱལ་བའི་འཇིགས་པ་མཐའ་ཡས་པ་དང་། དུད་འགྲོའི་སྐྱེ་གནས་ཀྱི་འཇིགས་པ་མཐའ་ཡས་པ་དང་། གཤིན་རྗེའི་

འཇིག་རྟེན་གྱི་འཇིགས་པ་མཐའ་ཡས་པ་དང་། ཡི་དགས་ཀྱི་འཇིགས་པ་མཐའ་ཡས་པ་དང་། བགྲོད་དཀའ་བའི་འཇིགས་པ་མཐའ་ཡས་པ་དང་། སྐྱེ་བའི་འཇིགས་པ་མཐའ་ཡས་པ་དང་། ནད་ཀྱི་འཇིགས་པ་མཐའ་ཡས་པ་དང་། འཆི་བའི་འཇིགས་པ་མཐའ་ཡས་
པ་དག་ལས་ཡང་དག་པར་འདའ་བར་འགྱུར་རོ། །ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་ཀྱིས་དགོངས་པར་འགྱུར་རོ། །སེམས་རྣམ་པར་གཡེང་བ་མེད་པར་འཆི་བའི་དུས་བྱེད་ཅིང་། སངས་རྒྱས་རྣམས་ཀྱི་སྤྱན་སྔར་སྐྱེ་བར་འགྱུར། ཟད་མི་ཤེས་པའི་ལུས་ཐོབ་པར་འགྱུར།
སྤྲུལ་པའི་ལུས་ཀྱང་ཐོབ་པར་འགྱུར་རོ། །ནམཿསརྦ་བིདྱཱ། སིད་དྷྱྷ་ན་ཏུ་མེ་མན་ཏྲ་པཱ་ད་སྭཱ་ཧཱ། འཕགས་པ་འཇིགས་པ་ཆེན་པོ་བརྒྱད་ལས་སྒྲོལ་བ་ཞེས་བྱ་བའི་གཟུངས་རྫོགས་སོ།། ༄༅། །རྒྱ་གར་སྐད་དུ། ཨཱརྱ་བི་ཤེ་ཥ་བ་ཏི་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ཁྱད་པར་ཅན་
ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་སྦྲུལ་གྱི་ལོའི་དགུན་ཟླ་ར་བའི་ཚེས་ཉི་ཤུ་ལ་ཡུལ་ཕུག་རོན་ཅན་ན། གྲོང་ཁྱེར་སིཉྩོ་ཞེས་བྱ་བའི་གཙུག་ལག་ཁང་ན་བཞུགས་ཏེ།
དེའི་ཚེ་དགེ་སློང་ཚེ་བརྗོད་ཅེས་བྱ་བ་དོན་ཅིག་གི་ཕྱིར་གྲོང་ཁྱེར་གནས་སོང་ཞེས་བྱ་བར་སོང་སྟེ། དགེ་སློང་དེ་རྒྱ་ཡུལ་གྱི་གྲོང་ཁྱེར་ནས་དཔག་ཚད་བརྒྱའི་ལམ་དུ་ཕྱིན་པ་དང་། དགེ་སློང་དེས་བར་དེར་མི་ལུས་ཆེན་པོ་ཁྲུན་དུ་མཐོ་སུམ་ཅུ་ཡོད་པ། བཞིན་མཐོ་བཞི་པ་ཞིག་རྒྱང་རིང་པོ་ནས་མཐོང་
ངོ་། །མཐོང་ནས་ཀྱང་དགེ་སློང་ཚེ་བརྗོད་དེས་མི་དེ་ལྟ་བུ་དེ་ལ་འདི་སྙམ་དུ་བསམས་ཏེ། ཀྱེ་མ་མི་འདི་ནི་ལུས་ཆེ་སྟེ། འདི་ནི་འཇམ་དཔལ་གཞོན་ནུར་གྱུར་པ་ཡིན་དུ་ངེས་སོ་སྙམ་ནས། དེས་པུས་མོ་གཉིས་ཀའི་ལྷ་ང་ས་ལ་བཙུགས་ཏེ། མི་ལུས་ཆེན་པོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།
མི་ལུས་ཆེན་པོ་དེ་ལ་འདི་སྐད་ཅེས་སྨྲས་སོ། །ཇི་ཁྱོད་འཇམ་དཔལ་གཞོན་ནུར་གྱུར་པ་སྟེ། འདི་ན་གདའ་འམ། འཇམ་དཔལ་གྱིས་སྨྲས་པ། དགེ་སློང་དེ་དེ་བཞིན་ནོ། །དགེ་སློང་དེས་སྨྲས་པ། འཇམ་དཔལ་ཁྱོད་ཅིའི་སླད་དུ་འདི་ན་གདའ། འཇམ་དཔལ་གཞོན་ནུར་གྱུར་པས་སྨྲས་པ། དགེ་སློང་འཛམ་

བུའི་གླིང་འདིར་སེམས་ཅན་རྣམས་ལ་ནད་རྣམ་པ་སྣ་ཚོགས་འབྱུང་སྟེ། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་རྣམས་རིའི་རྒྱལ་པོ་རི་རབ་ཀྱི་ངོས་གཅིག་ལ་གནས་སོ། །དེས་ཉི་ཟླའི་འོད་ཀྱང་མི་མངོན། ཉི་མ་དང་། ཟླ་བ་དང་། གཟའ་དང་། རྒྱུ་སྐར་རྣམས་ཀྱང་ནམ་མཁའི་བར་
སྐབས་ན་མི་སྣང་ངོ་། །དེའི་ཚེ་ལྷ་དང་། ལྷ་མ་ཡིན་ཀྱང་གཡུལ་འགྱེད་དེ། གཡུལ་བཀྱེ་བ་དང་། ལྷ་རྣམས་ནི་ཕམ། ལྷ་མ་ཡིན་རྣམས་ནི་རྒྱལ་ཏེ། དེའི་ཚེ་འབྱུང་པོ་དང་། ཡི་དགས་རྣམས་བུད་མེད་ཀྱི་གཟུགས་ཀྱིས་སེམས་ཅན་རྣམས་ལ་ནད་གཏོང་སྟེ། འདི་ལྟ་སྟེ། ལྐོག་མའི་ལྷ་གོར་དང་། འབྲུམ་
ཕྲན་དང་། མེ་དབལ་དང་། ལྟོ་ན་བ་དང་། རིམས་ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་དང་། ཀླད་པ་ན་བ་དང་། ཕོལ་མིག་དང་། གཡན་པ་དང་།
ཚད་པ་དང་། མིག་ནད་ལ་སོགས་པ་ཉེ་བར་སྒྲུབ་བོ། །འདི་ལྟ་སྟེ། ཆར་ཆེས་པ་དང་། ཐན་པ་དང་། དུས་མ་ཡིན་པའི་ཆར་གྱིས་ལོ་ཏོག་ཕུན་སུམ་ཚོགས་པའི་འོངས་འཕྲོག་སེམས་ཅན་རྣམས་ཀྱི་མདངས་འཕྲོག །ཚེ་དང་། སྟོབས་དང་། མདོག་དང་། གཟུགས་འཕྲོག་སྟེ། དེའི་ཚེ་འཛམ་བུའི་གླིང་ན་
སེམས་ཅན་ཐམས་ཅད་ནད་སྣ་ཚོགས་ཀྱིས་ཡོངས་སུ་ཉེན་ཏོ། །གཏུམ་པོ་སེང་གེ་དང་། སྤྱང་ཀི་དང་། སྟག་དང་། སྦྲུལ་ལ་སོགས་པའི་གཟུགས་ཀྱིས་སེམས་ཅན་རྣམས་ཀྱི་མདངས་འཕྲོག་སྟེ། འཛམ་བུའི་གླིང་གི་སེམས་ཅན་རྣམས་ལ་དུས་མ་ཡིན་པར་ཆུད་ཟ་བ་ཉེ་བར་གནས་པས་སེམས་ཅན་རྣམས་ནད་
ལས་ཐར་བར་བྱ་བ་ཡང་དཀའ་སྟེ། འཛམ་བུའི་གླིང་འདིར་སེམས་ཅན་རྒན་པ་དང་། བར་མ་དང་། གཞོན་པ་དག་ལས་དཀྲིགས་ཕྲག་སུམ་ཅུ་འཆི་བར་འགྱུར་རོ། །དེའི་ཕྱིར་ང་དགེ་སློང་ཁྱོད་ཀྱི་གན་དུ་འོངས་ཀྱིས། ཁྱོད་ཀྱིས་འཛམ་བུའི་གླིང་གི་སེམས་ཅན་ཐམས་ཅད་ལ་ཆོས་ཀྱི་རྣམ་གྲངས་
འདི་སྒྲོགས་ཤིག །དེ་ཅིའི་ཕྱིར་ཞེ་ན། འཛམ་བུའི་གླིང་པའི་སེམས་ཅན་ཐམས་ཅད་ནི་འདི་སྙམ་དུ་བདག་ཅག་ཇི་ལྟར་སྡུག་བསྔལ་གྱིས་བཅིངས་པ་ཐམས་ཅད་ལས་ཐར་བར་འགྱུར་སྙམ་དུ་རེ་བའི་ཕྱིར་རོ། །དེ་ལྟ་བས་ན་དགེ་སློང་ཁྱོད་ཀྱིས་སེམས་ཅན་ཐམས་ཅད་ལ་མདོ་འདི་སྒྲོགས་ཏེ། སེམས་

ཅན་ཐམས་ཅད་ལ་དགེ་བའི་རྩ་བ་བསྐྱེད་པའི་ཕྱིར་ནན་ཏན་གྱིས་ཤིག །དཀོན་མཆོག་གསུམ་ལ་རྟག་པར་རྒྱུན་དུ་དད་པར་གྱིས་ཤིག །ལྷ་རྗེད་ཅིག །དེ་བཞིན་གཤེགས་པའི་མཆོད་རྟེན་རྣམས་སམ། སྐུ་གཟུགས་རྣམས་ལ་སྤོས་དང་། མེ་ཏོག་དང་། བདུག་པ་རྣམས་
ཀྱིས་མཆོད་པར་གྱིས་ཤིག །ཁྱད་པར་ཅན་གྱི་གཟུངས་ཀྱང་ལྷོགས་ཤིག །ཉི་མ་བདུན་ཡན་ལག་བརྒྱད་དང་ལྡན་པའི་གསོ་སྦྱོང་ལ་ཉེ་བར་གནས་པར་གྱིས་ཤིག །བཅོམ་ལྡན་འདས་དེ་བཞིན་གཤེགས་པ་བློ་ཡངས་ཟབ་མོ་འབྲུག་བསྒྲགས་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ།
བི་པུ་ལ་གརྫི་ཏེ། བི་པུ་ལ་སྭཱ་རེ། བི་པུ་ལ་ཡོ་ནི་ཤེ། ཨ་ན་ལ་སེ། ཨ་ན་ལ་སམ་བྷ་བེ། ཨ་ན་ལ་ས་ག་ཏིཾ་ག་ཏེ་སྭཱ་ཧཱ། དེ་བཞིན་གཤེགས་པ་སྒྲིབ་པ་ཐམས་ཅད་རྣམ་པར་སེལ་བ་ལ་ཕྱག་འཚལ་ལོ། །ཏདྱ་ཐཱ། ཧེ་མ་ཧེ་མ། ཧ་མ་ཧ་མ་སྭཱ་ཧཱ། དེ་བཞིན་གཤེགས་པ་འོད་དཔག་མེད་ལ་ཕྱག་འཚལ་ལོ། །
ཏདྱ་ཐཱ། ཨ་མི་ཏོདྦྷ་བེ། ཨ་མི་ཏ་སཾ་བྷ་བྷ་བེ། ཨ་མི་ཏ་བི་ཀྲཱནྟེ། ཨ་མི་ཏ་པི་ཀྲཱནྟི་ཀ་རེ། ཨ་མི་ཏ་ག་ག་ན་ཀཱིརྟི་ཀ་རེ་སྭཱ་ཧཱ། དེ་བཞིན་གཤེགས་པ་ཡོན་ཏན་འབྱུང་གནས་ལ་ཕྱག་འཚལ་ལོ། །ཏདྱ་ཐཱ། ག་ག་ན་ས་ཨཱ་ཀ་ར། ག་ག་ན་སཾ་བྷ་བི། ག་ག་ན་ཀཱིརྟེ་ཀ་རེ་སྭཱ་ཧཱ། དེ་བཞིན་གཤེགས་པ་ཀུན་ནས་
སྤོས་མཆོག་ལ་ཕྱག་འཚལ་ལོ། །ཏདྱ་ཐཱ། ས་མ་ས་མེ་སྭཱ་ཧཱ། དེ་བཞིན་གཤེགས་པ་གཞན་གྱིས་མི་ཐུབ་པའི་རྒྱལ་མཚན་གྱིས་འབྲུག་བསྒྲགས་གཤེགས་པ་ལ་ཕྱག་འཚལ་ལོ། །ཏདྱ་ཐཱ། ཨ་ས་མ་ས་མེ་སྭཱ་ཧཱ། དེ་བཞིན་གཤེགས་པ་ང་རྒྱལ་གནོན་ལ་ཕྱག་འཚལ་ལོ། །
ཏདྱ་ཐཱ། མ་ན་བི་ཤུདྡྷེ། པདྨེ་ཤྭ་རེ། པདྨ་སཾ་བྷ་བེ། ཀིང་ཀ་རེ། ཧི་ཏྃ་ཀ་རཱི་ཡེ་སྭཱ་ཧཱ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲིབ་པ་ཐམས་ཅད་རྣམ་
པར་སེལ་བ་ལ་ཕྱག་འཚལ་ལོ། །ཏདྱ་ཐཱ། ཤྭེ་ཏ་ཀ་ར་བྷེ་ཛྭ་ལི་ནེ་སྭཱ་ཧཱ། ཛཾ་བྷ་ནེ། སྟྃ་བྷ་ནེ། མོ་ཧ་ནེ་སྭཱ་ཧཱ། པཽཎྚ་རི་ཀཱ་ཡ་སྭཱ་ཧཱ། ཧོ་མེ་དྷརྨེ། དྷརྨཱ་ཙནྟཱ་ཡེ་སྭཱ་ཧཱ། དྷ་རེ་བྷི་དྷ་རེ། ཀ་ལ་བིངྐ་རུ་ཏ་ཡཻ་སྭཱ་ཧཱ། ཤཱནྟེ་ཀཱནྣེ་ནི་རྦཱ་པ་ཎྱེ་སྭཱ་ཧཱ། དྷུ་རུ་དྷུ་རུ། བི་དུ་རུ་དྷི་ཡེ་སྭཱ་ཧཱ།

བི་མ་ལ་པྲ་ཙུནྡཱ་ཡཻ་སྭཱ་ཧཱ། ཨ་བ་ལོ་ཀི་ཏ། བི་ལོ་ཀི་ཏཱ་ཡཻ་སྭཱ་ཧཱ། ཨཱཛྙཱ་ན་པི་དྷ་མ་ནྱཻ་སྭཱ་ཧཱ། པདྨ་སྭ་རེ། པདྨ་སྃ་བྷ་བེ། ཀིང་ཀ་རེ་ཧི་ཏང་ཀ་རཱི་ཡེ་སྭཱ་ཧཱ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ཙནྡྲ་པྲ་བྷེ། ཙནྡྲ་ན་
གརྦྷེ། ཙནྡྲ་ན་ཙཱུརྞེ། ཀེ་ཀཻ་ལ་ས་བ་ཏི། སརྦ་བུདྡྷ། ཨ་དྷིཥྛི་ཏ་ཨ་ནུ་མོ་དི་ཏེ་སྭཱ་ཧཱ། བྱང་ཆུབ་སེམས་དཔའ་འཕགས་པ་འཇམ་དཔལ་ལ་ཕྱག་འཚལ་ལོ། །ཏདྱ་ཐཱ། ཛ་ཡེ་ཛ་ཡེ། ཛ་ཡ་ལ་བྷེ། ཛ་ཡམ་ཧཱ་མ་ཧེ་སྭཱ་ཧཱ། བྱང་ཆུབ་སེམས་དཔའ་སེམས་དཔའ་ཆེན་
པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཏདྱ་ཐཱ། ག་ག་ན་ཨརྱེ། ག་ག་ན་ས་མུངྒ་ཏེ། ག་ག་ན་བི་ཀྲཱནྟ། བི་ཀྲཱནྟ། ཨེ་ཛི་མེ་ཛི། པདྨོ་ཛི་སྭཱ་ཧཱ། བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ལོ། །ཏདྱ་ཐཱ། ཧེ་བྷ་དྲེ། མ་ཧཱ་བྷ་དྲེ། ཨ་
ཏི་བྷ་དྲེ། ས་མནྟ་བྷ་དྲེ། བི་ག་ཏ་རཱ་ཛ་སེ། མ་ཧཱ་བི་ག་ཏ་རཱ་ཛ་སེ། ཨ་ཏི་བི་ག་ཏ་རཱ་ཛ་སེ། ཧེ་མ་བ་ཏི། ཀརྨ་ཨཱ་བ་ར་ཎ་བི་ཤོ་དྷ་ནེ་སྭཱ་ཧཱ། བྱང་ཆུབ་སེམས་དཔའ་འཕགས་པ་བྱམས་པ་ལ་ཕྱག་འཚལ་ལོ། །ཏདྱ་ཐཱ། མཻ་ཏྲི་མཻ་ཏྲི། མཻ་ཏྲི་མ་ན་སེ་སྭཱ་ཧཱ། བྱང་ཆུབ་སེམས་དཔའ་འཕགས་
པ་ནམ་མཁའི་སྙིང་པོ་ལ་ཕྱག་འཚལ་ལོ། །ཏདྱ་ཐཱ། གརྦྷེ། གརྦྷེ། གརྦྷ་བི་ཤོ་དྷ་ནེ་སྭཱ་ཧཱ། བྱང་ཆུབ་སེམས་དཔའ་འཕགས་པ་བློ་གྲོས་མི་ཟད་པ་ལ་ཕྱག་འཚལ་ལོ། །ཏདྱ་ཐཱ། ཨཀྵ་ཡེ་ནུ། ཨཀྵ་ཡེ་ཕུ། ཨཀྵ་ཡ་ཀརྨ་བི་ཤོ་དྷ་ནེ་ཕུ་སྭཱ་ཧཱ། བྱང་ཆུབ་སེམས་དཔའ་དྲི་མ་མེད་
པར་གྲགས་པ་ལ་ཕྱག་འཚལ་ལོ། །ཏདྱ་ཐཱ། ཀཱིརྟི་ཏཱ། སརྦ་ཛི་ནཻ། ཨ་བྷི་ཀཱིརྟི་ཏཱ། སརྦ་ཛི་ནཻ། བཛྲཱ་ཀ་རེ། བཛྲ་སྃ་བྷ་བེ། བཛྲ་བེ་དཱ་ཀཱ་རེ་སྭཱ་ཧཱ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་ཕྱག་འཚལ་ལོ། །ཏདྱ་ཐཱ། སརྦཱ་པ་ར་ཎ་བི་སྐྃ་བྷི་ནྱཻ་སྭཱ་ཧཱ། དྷཱ་ཏུ་བི་
ཀ་ར་ཎྱཻ་སྭཱ་ཧཱ། མེ་གྷ་བི་སྥོ་ཊ་མེ་སྭཱ་ཧཱ། ཨ་པ་རཱ་ཛི་ཏ་ཀཱ་ཡཻ་སྭཱ་ཧཱ། བ་ལ་ད་ད་ནྱཻ་སྭཱ་ཧཱ། བོ་དྷྱང་ད་ད་ནྱཻ་སྭཱ་ཧཱ། ཀརྨ་ནི་རྦྷ་བི་ཏ་ཀཱ་ཡཻ་སྭཱ་ཧཱ། ཨེ་ཀཱ་རཱ་མཱ་ཡཻ་སྭཱ་ཧཱ། ཡོ་ག་ཙཱ་རཱ་ཡཻ་སྭཱ་ཧཱ། སརྦ་བུདྡྷཱ་བྷི་ཥིཀྟཱ་ཡཻ་སྭཱ་ཧཱ། བྲཧྨོ་པ་ཀུ་ཏཱ་ཡཻ་སྭཱ་ཧཱ། སརྦ་དྷརྨཱ་བྷི་ཥི་ཀྟཱ་ཡཻ་སྭཱ་ཧཱ། སརྦ་བུདྡྷཱ་

བྷི་ཥིཀྟཱ་ཡཻ་སྭཱ་ཧཱ། ཨེ་ཀ་ཤྲིང་གཱ་ཡཻ་སྭཱ་ཧཱ། ཨ་ཤྲིང་གྲཱ་ཡཻ་སྭཱ་ཧཱ། བྷཱུ་ཏཱ་ཡཻ་སྭཱ་ཧཱ། ཨ་སྃ་བྷཱུ་ཏཱ་ཡཻ་སྭཱ་ཧཱ། སརྦ་དུཿཁོ་པྲ་ཤ་མ་ནྱཻ་སྭཱ་ཧཱ། ཟླ་འོད་གཞོན་ནུར་གྱུར་པ་ལ་ཕྱག་འཚལ་ལོ། །ཏདྱ་ཐཱ། ཙནྡྲ་པྲ་བྷེ། སུ་པྲ་བྷེ། པྲ་བྷཱ་ཀ་རེ། པྲ་བྷོཏྒ་ཏེ། པྲ་བྷོཏྒ་ཏེ། པྲ་བྷ་བ་ཏི། པྲ་བྷ་བ་ཏི། དྷརྨ་བི་ཤུདྡྷེ།
ཀརྨཱ་བི་ཤུད་དྷིརྦྷ་བ་ཏུ་མེ་སྭཱ་ཧཱ། ཚེ་བརྗོད་གང་ལ་ལ་ཞིག་རིག་སྔགས་འདིས་ཉིན་ཞག་བདུན་དུ་ཉིན་ལན་བདུན་མཚན་ལན་བདུན་དུ་བྱབ་པ་བྱས་ན། དེས་ལས་ཀྱི་སྒྲིབ་པ་མ་ལུས་པར་རྣམ་པར་དག་པར་འགྱུར་རོ། །དགེ་སློང་བདུན་ལ་ཟན་སྦྱིན་ནོ། །མེ་ལས་མེ་སྤེལ་བར་བྱའོ། །མཚན་མོ་མར་
མེ་ཐོགས་ཏེ་མཆོད་རྟེན་ལ་བསྟི་སྟང་དུ་བྱས་ལ་བསྐོར་བར་བྱའོ། །དམ་པའི་ཆོས་བྲི་བ་དང་བཀླག་པ་ལ་བརྩོན་པར་བྱའོ། །གལ་ཏེ་ཡམས་ཀྱི་ནད་ཆེར་བྱུང་ན་ཁྱིམ་ནས་ཁྱིམ་དང་། གྲོང་ནས་གྲོང་དང་། གྲོང་ཁྱེར་ནས་གྲོང་ཁྱེར་དུ་གན་དྷ་ར་སའི་བདུག་པ་དང་གཏོར་མ་དང་། ལྷ་བཤོས་ཀྱིས་
མཆོད་པར་བྱའོ། །ནད་པ་གང་ཡིན་པ་དེས་ཀྱང་ཆོ་ག་འདི་བཞིན་བྱས་ན་དེ་མྱུར་དུ་ནད་ལས་ཐར་བར་འགྱུར་རོ། །དེ་ནས་ཡང་འཇམ་དཔལ་གཞོན་ནུར་གྱུར་པས་དགེ་སློང་ཚེ་བརྗོད་ལ་འདི་སྐད་ཅེས་སྨྲས་སོ། །དགེ་སློང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་ཆོས་ཀྱི་རྣམ་གྲངས་
འདི་འཛིན་ཏམ། ཀློག་གམ། ཡི་གེར་འདྲིའམ། ཡི་གེར་འདྲིར་འཇུག་གམ། གཞན་དག་ལ་ཡང་རྒྱ་ཆེར་ཡང་དག་པར་སྟོན་ན་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ཡང་འཇམ་དཔལ་གཞོན་ནུར་གྱུར་པས་དགེ་སློང་ཚེ་བརྗོད་ལ་འདི་སྐད་ཅེས་
སྨྲས་སོ། །ཆོས་ཀྱི་རྣམ་གྲངས་འདི་ཅི་ནས་སྐྱེ་བོ་ཐམས་ཅད་ཀྱི་རྣ་ལམ་དུ་གྲག་པར་འགྱུར་བར་ཡུལ་ནས་ཡུལ་དང་། གྲོང་ཁྱེར་ནས་གྲོང་ཁྱེར་དང་། གྲོང་ནས་གྲོང་དུ་བསྐུར་བར་བྱའོ། །ཡང་འཇམ་དཔལ་གཞོན་ནུར་གྱུར་པས་དགེ་སློང་ཚེ་བརྗོད་ལ་འདི་སྐད་ཅེས་སྨྲས་སོ། །ཚེ་བརྗོད་རིགས་ཀྱི་
བུའམ་རིགས་ཀྱི་བུ་མོ་གང་ལ་ལས་ཆོས་ཀྱི་རྣམ་གྲངས་འདི་ལན་གཅིག་བཀླགས་ན་དེ་བདག་ཉིད་ཐར་བར་འགྱུར་རོ། །སུས་ལན་གཉིས་བཀླགས་ན་དེ་བུ་དང་ཆུང་མ་དང་ལྷན་ཅིག་ཐར་བར་འགྱུར་རོ། །སུས་ལན་གསུམ་བཀླགས་ན་དེ་རྩ་ལག་གི་ཚོགས་ཀྱི་སྐྱེ་བོ་དང་བཅས་ཏེ་ཐར་བར་འགྱུར་རོ། །

སུས་ལན་བཞི་བཀླགས་ན། དེ་ཡུལ་འཁོར་ཐམས་ཅད་ཀྱང་ཐར་བར་འགྱུར་རོ། །སུས་ལན་ལྔ་བཀླགས་ན། དེ་ཉེ་འཁོར་གྱི་རྒྱལ་པོ་དང་བཅས་པ་ཐར་བར་འགྱུར་རོ། །ཡང་འཇམ་དཔལ་གཞོན་ནུར་གྱུར་པས། དགེ་སློང་ཚེ་བརྗོད་ལ་འདི་སྐད་ཅེས་སྨྲས་སོ། །
ཆོས་ཀྱི་རྣམ་གྲངས་འདི་མྱུར་དུ་ཡུལ་གཞན་དག་ཏུ་བསྐུར་བར་བྱ་སྟེ། དེར་ཡང་ཡོན་ཏན་འདི་དག་འབྱུང་བར་འགྱུར་རོ། །ཚེ་བརྗོད་གང་གིས་ཆོས་ཀྱི་རྣམ་གྲངས་འདི་ཐོས་ལ་མི་འཛིན་ཏམ། མི་ཀློག་གམ། ཡི་གེར་མི་འདྲིའམ། ཡི་གེར་འདྲིར་མི་འཇུག་གམ། ཀུན་
ཆུབ་པར་མི་བྱེད་དམ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་མི་སྟོན་ཏམ། ཡུལ་གཞན་དུ་མི་འབྱིན་ཏམ། སེམས་ཅན་ཐམས་ཅད་དང་ཐུན་མོང་དུ་བྱས་ཏེ་མི་ཉན་ཏམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་མི་སྔོ་ན་མཚམས་མེད་པ་
ལྔ་བྱེད་པ་རྣམས་ཀྱི་འགྲོ་བ་ཅི་འདྲ་བ་དེ་འདྲ་བར་མངོན་པར་འགྲུབ་སྟེ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱིས་སྨད་པའོ། །ཡང་འཇམ་དཔལ་གཞོན་ནུར་གྱུར་པས་དགེ་སློང་ཚེ་བརྗོད་ལ་འདི་སྐད་ཅེས་སྨྲས་སོ། །ཚེ་བརྗོད་སུ་ཞིག་འདི་ཚད་མར་མི་བྱེད་པ་དེ་ནི་ངས་
ཐོག་མ་ཉིད་དུ་དད་པར་བྱས་པ་མ་ཡིན་ནོ། །འདི་ལྟར་འཛམ་བུ་གླིང་པའི་སེམས་ཅན་ཐམས་ཅད་བདེ་བར་འགྱུར་བར་བྱ་བའི་ཕྱིར། ང་རིའི་རྒྱལ་པོ་རི་རབ་ལ་སོང་སྟེ། ལྷ་དང་། དྲི་ཟ་རྣམས་ལ་རྗེས་སུ་བསྟན་པ་དང་མཐུན་པར་སྦྱར་བར་བྱ་བའི་ཕྱིར་ནན་ཏན་བྱའོ། །དེ་སྐད་
ཅེས་སྨྲས་ནས། འཇམ་དཔལ་གཞོན་ནུར་གྱུར་པ་དེ་ཉིད་དུ་མི་སྣང་བར་གྱུར་ཏོ། །དགེ་སློང་ཚེ་བརྗོད་ཀྱིས་ཀྱང་། འཇམ་དཔལ་གཞོན་ནུར་གྱུར་པས་སྨྲས་པ་ལ་མངོན་པར་བསྟོད་དེ་བཟུང་ནས་སོང་ངོ་། །འཕགས་པ་ཁྱད་པར་ཅན་ཞེས་བྱ་བའི་གཟུངས་རྫོགས་
སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་མཱུ་ལ་ཏནྟྲ། བོད་སྐད་དུ། འཕགས་པ་འཇམ་དཔལ་གྱི་རྩ་བའི་རྒྱུད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གནས་གཙང་མའི་སྟེང་གི་
ནམ་མཁའི་དཀྱིལ་ན། བྱང་ཆུབ་སེམས་དཔའ་འདུས་པའི་འཁོར་གྱི་ཚོགས་སོ་སོ་ཐ་དད་པ་བསམ་གྱིས་མི་ཁྱབ་པ་ངོ་མཚར་རྨད་དུ་བྱུང་བ། སོ་སོར་རབ་ཏུ་གནས་པ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་གནས་གཙང་མའི་རིས་ཀྱི་ལྷའི་བུ་རྣམས་ལ་བཀའ་སྩལ་པ། ལྷའི་
བུ་དག་ཁྱེད་ཅག་ཉོན་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པའི་ཆོ་འཕྲུལ་གྱི་སྤྱོད་པ་བསམ་གྱིས་མི་ཁྱབ་པ་ངོ་མཚར་རྨད་དུ་བྱུང་བའི་ཏིང་ངེ་འཛིན་གྱི་བྱེ་བྲག་དང་། རྫུ་འཕྲུལ་དང་། རྣམ་པར་ཐར་པའི་དཀྱིལ་འཁོར་བྱང་ཆུབ་སེམས་དཔའི་རྣམ་པར་འཕྲུལ་པ་
དང་། བྱང་ཆུབ་སེམས་དཔའ་ཐམས་ཅད་ཀྱི་ཉེ་བར་འཚོ་བ། ཚེ་དང་ནད་མེད་པ་དང་དབང་ཕྱུག་དང་། ཡིད་ལ་བསམ་པ་ཡོངས་སུ་རྫོགས་པར་བྱེད་པའི་སྔགས་ཀྱི་གཞི་དག་སེམས་ཅན་རྣམས་ལ་ཕན་པའི་ཕྱིར་བཤད་པར་བྱ་སྟེ། དེ་ཤིན་དུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་བཤད་པར་
བྱའོ། །དེ་ནས་གནས་གཙང་མའི་རིས་ཀྱི་ལྷའི་བུ་དེ་དག་གིས་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ལེགས་སོ་ཞེས་གསོལ་ཏེ། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཏིང་ངེ་འཛིན་གྱི་ཁྱད་པར་དང་། ས་ཆེན་པོ་ཐོབ་པར་བྱ་བ་དང་། རྡོ་རྗེའི་གདན་གནོན་པ་དང་། བདུད་གདུལ་བ་དང་།
ཆོས་ཀྱི་འཁོར་ལོ་བསྐོར་བ་དང་། ཉན་ཐོས་དང་རང་སངས་རྒྱས་ཐམས་ཅད་ཀྱི་ངེས་པར་འབྱུང་བ་དང་། ལྷ་རྣམས་དང་མི་རྣམས་སུ་སྐྱེ་བར་བྱ་བ་དང་། སྡུག་བསྔལ་དང་། དབུལ་བ་དང་། ནད་ཐམས་ཅད་ཞི་བར་བྱེད་པ། ལོངས་སྤྱོད་ཀྱིས་ཕྱུག་པ་འདྲེན་པར་བྱེད་པ། འཇིག་རྟེན་དང་འཇིག་རྟེན་
ལས་འདས་པའི་སྔགས་ཀྱི་སྤྱོད་པས་ཕོངས་པར་མི་བྱེད་པ། རེ་བ་ཐམས་ཅད་ཡོངས་སུ་རྫོགས་པར་བྱེད་པ་དེ་བཞིན་གཤེགས་པ་ཐམས་ཅད་ཀྱི་གསུང་འབྲས་བུ་མེད་པར་བྱེད་པ་མ་ཡིན་པ། བཅོམ་ལྡན་འདས་ཀྱིས་བྱམས་པའི་ཐུགས་དང་། ཕན་པའི་ཐུགས་དང་བདག་དང་སེམས་ཅན་ཐམས་

ཅད་ལ་ཐུགས་བརྩེ་བ་ཉེ་བར་བཟུང་ནས་བཅོམ་ལྡན་འདས་དེ་བཤད་དུ་གསོལ། དེ་ནས་བཅོམ་ལྡན་འདས་ཤཱཀྱ་ཐུབ་པས་ཐམས་ཅད་དང་ལྡན་པའི་འཁོར་རྣམས་དང་གནས་གཙང་མའི་གནས་ལ་སངས་རྒྱས་ཀྱི་སྤྱན་གྱིས་གཟིགས་ནས། དག་པའི་ཡུལ་ལ་འོད་རྣམ་པར་སྤྲོས་ཏེ། ཡུལ་རྣམ་པར་འཇིགས་པ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་མཛོད་སྤུ་ནས་མེ་ཏོག་ཀུན་ཏུ་སྐྱེས་པ་ཞེས་བྱ་བ་དང་། བྱང་ཆུབ་སེམས་དཔའ་ཡང་དག་པར་བསྐུལ་བ་ཞེས་བྱ་བའི་འོད་ཕྱུང་སྟེ། འོད་བྱེ་བ་ཁྲག་ཁྲིག་ཕྲག་བརྒྱ་སྟོང་དུ་མའི་འཁོར་གྱིས་བཅོམ་
ལྡན་འདས་ལ་ལན་གསུམ་བསྐོར་བ་བྱས་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སོང་ནས། བྱང་ཤར་གྱི་ཕྱོགས་སུ་བརྒྱ་སྟོང་གི་གང་གཱའི་ཀླུང་གི་འཇིག་རྟེན་གྱི་ཁམས་འདས་ནས། མེ་ཏོག་དང་ལྡན་པ་ཞེས་བྱ་བའི་འཇིག་རྟེན་གྱི་ཁམས་སུ་རྗེས་སུ་ཞུགས་ཏེ། གང་ན་མེ་
ཏོག་ཀུན་དུ་སྐྱེས་པའི་རྒྱལ་པོའི་དབང་པོ་ཞེས་བྱ་བའི་དེ་བཞིན་གཤེགས་པ་བཞུགས་པར་རོ། །དེར་ཡང་འཇམ་དཔལ་གཞོན་ནུར་གྱུར་པ་སྔོན་གྱི་སྨོན་ལམ་གྱི་དབང་གིས་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱོད་པ་དང་ལྡན་པ་རྣམས་དང་ལྷན་ཅིག་གནས་པར་གྱུར་ཏོ། །འཇམ་དཔལ་
གཞོན་ནུར་གྱུར་པས་འོད་ཟེར་གྱི་སྣང་བ་དེ་མཐོང་ནས། བཞིན་ཅུང་ཟད་འཛུམ་པ་དང་ལྡན་པར་གྱུར་ནས་བྱང་ཆུབ་སེམས་དཔའི་ཚོགས་དེ་དག་ལ་སྨྲས་པ། རྒྱལ་བའི་སྲས་དག་འོད་འདི་ནི་ང་ལ་ཡང་དག་པར་བསྐུལ་བའི་ཕྱིར་འོངས་པ་ཡིན་གྱིས། ཁྱེད་ཅག་གཡེང་བ་མེད་པར་གྱིས་ཤིག་
ཅེས་སྨྲས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་མིག་མི་འཛུམས་ཤིང་ཁ་བྱེ་བས། འོད་གང་ན་བ་དེ་ལོགས་སུ་མངོན་དུ་བལྟས་ནས་འདུག་གོ། །དེ་ནས་བསྐུལ་བའི་འོད་དེས་མེ་ཏོག་དང་ལྡན་པ་ཞེས་བྱ་བའི་འཇིག་རྟེན་གྱི་ཁམས་སྣང་བ་ཆེན་
པོས་སྣང་བར་བྱས་ཏེ། མེ་ཏོག་ཀུན་དུ་སྐྱེས་པ་རྒྱལ་པོའི་དབང་པོ་དེ་བཞིན་གཤེགས་པ་ལ་ལན་གསུམ་བསྐོར་བ་བྱས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པའི་སྤྱི་བོར་ནུབ་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ།

བཅོམ་ལྡན་འདས་མེ་ཏོག་ཀུན་དུ་ཡང་དག་པར་སྐྱེས་པ་རྒྱལ་པོའི་དབང་པོ་དེ་བཞིན་གཤེགས་པ་ལ་ལན་གསུམ་བསྐོར་བ་བྱས་ཏེ། སྤྱི་བོས་ཕྱག་འཚལ་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་མེ་ཏོག་ཀུན་དུ་སྐྱེས་པ་རྒྱལ་པོའི་དབང་པོ་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བདག་ལ་དགོངས་ཏེ། བཅོམ་ལྡན་འདས་བདག་ནི་བཅོམ་ལྡན་འདས་ཤཱཀྱ་ཐུབ་པ་ལ་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བ་དང་། སྔགས་ཐམས་ཅད་ཀྱི་སྤྱོད་
པ་དང་། སྒྲུབ་ཐབས་དང་། དཀྱིལ་འཁོར་དང་། ཆོ་ག་དང་། གསང་བ་དང་། ཆོ་ག་ཞིབ་མོ་དང་། ཆོ་གའི་ངོ་བོ་དང་། དེ་བཞིན་གཤེགས་པ་ཐམས་ཅད་ཀྱི་ཐུགས་དང་། གསང་བ་དང་། ཕྱག་རྒྱ་དང་། དབང་བསྐུར་བ་བསྟན་པ་དང་། སེམས་ཅན་ཐམས་ཅད་ཀྱི་བསམ་པ་ཐམས་ཅད་
ཡོངས་སུ་རྫོགས་པར་བྱ་བའི་ཕྱིར། མི་མཇེད་ཀྱི་འཇིག་རྟེན་གྱི་ཁམས་འདི་ནས་མཆི་བར་འཚལ་ལོ། །དེ་སྐད་ཅེས་བཅོམ་ལྡན་འདས་མེ་ཏོག་ཀུན་དུ་སྐྱེས་པ་རྒྱལ་པོའི་དབང་པོ་དེ་བཞིན་གཤེགས་པ་ལ་གསོལ་པ་དང་། འཇམ་དཔལ་གཞོན་ནུར་གྱུར་པ་ཏིང་ངེ་འཛིན་གང་ལ་སྙོམས་པར་ཞུགས་པ་ན།
ཕྱོགས་བཞི་མཐའ་ཡས་མུ་མེད་པ་སྟེང་དང་འོག་དང་ཐད་ཀ་ཐམས་ཅད་དང་ལྡན་པའི་ཕྱོགས་སངས་རྒྱས་བཅོམ་ལྡན་འདས་རྣམས་ཀྱིས་ཡང་དག་པར་གང་བར་གྱུར་ཏོ། །འཇིག་རྟེན་གྱི་ཁམས་དེ་དང་བཅོམ་ལྡན་འདས་དང་བཅས་པས། རྒྱལ་བའི་སྲས་ལེགས་སོ་ལེགས་སོ། །འདི་ལྟ་བུའི་ཏིང་ངེ་འཛིན་
གྱི་ཁྱད་པར་ལ་སྙོམས་པར་ཞུགས་པ་ནི། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མི་ནུས། བྱང་ཆུབ་སེམས་དཔའ་སྤྱོད་པ་ལ་ཞུགས་པ་དང་། ས་བཅུ་ལ་གནས་པ་དག་གིས་ཀྱང་སྙོམས་པར་ཞུགས་པར་མི་ནུས་སོ། །དེ་ནས་བཅོམ་ལྡན་འདས་མེ་ཏོག་ཀུན་དུ་ཡང་དག་པར་སྐྱེས་
པ་རྒྱལ་པོའི་དབང་པོ་དེ་བཞིན་གཤེགས་པ་སངས་རྒྱས་བཅོམ་ལྡན་འདས་དེ་རྣམས་དང་ལྷན་ཅིག་ཏུ་ཡང་དག་པར་བགྲོས་ཏེ། འཇམ་དཔལ་གཞོན་ནུར་གྱུར་པ་འདིའི་སྙིང་པོ་མཆོག་ཏུ་གསང་བ། དོན་ཐམས་ཅད་སྒྲུབ་པའི་སྙིང་པོ་གསུངས་པ་ནི་ཡི་གེ་གཅིག་པ་ཞེས་བྱ་བ་མཆོག་ཏུ་གསང་བ།

སེམས་ཅན་ཐམས་ཅད་ཀྱི་ལས་ཐམས་ཅད་བྱེད་པ་སྔགས་ཀྱི་སྤྱོད་པ་ཁྱད་པར་ཅན་བཟང་པོ་ཡང་སྒྲུབ་པར་བྱེད་པའོ། །དེ་ནས་བཅོམ་ལྡན་འདས་མེ་ཏོག་ཡང་དག་པར་སྐྱེས་པ་རྒྱལ་པོའི་དབང་པོ་དེ་བཞིན་གཤེགས་པ་ཡུད་ཙམ་ཞིག་ཅང་མི་གསུང་བར་གྱུར་ཏེ། ཐམས་ཅད་དང་ལྡན་པའི་འཇིག་རྟེན་
ཐམས་ཅད་ལ་སངས་རྒྱས་ཀྱི་སྤྱན་གྱིས་གཟིགས་ཏེ། སངས་རྒྱས་བཅོམ་ལྡན་འདས་དེ་དག་ལ་ཡང་ཡང་དག་པར་དགོངས་ནས། བྱམས་པའི་ཐུགས་ཀྱིས་སྔགས་གསུངས་སོ། །ན་མཿསརྦ་བུདྡྷཱ་ནཱཾ་ཨཾ་མཾ། འདི་ནི་འཇམ་དཔལ་གྱི་སྙིང་པོ་མཆོག་ཡིན་ཏེ་ལས་ཐམས་ཅད་བྱེད་པའོ། །དེ་ནས་
འཇམ་དཔལ་གཞོན་ནུར་གྱུར་པ་ཏིང་ངེ་འཛིན་དེ་ལས་ལངས་ནས། དཔེར་ན་སྐྱེས་བུ་སྟོབས་དང་ལྡན་པ་ལག་པ་བསྐུམ་པ་ལས་བརྐྱང་བ་དང་། བརྐྱང་བ་ལས་བསྐུམ་པའམ་སེལ་གོལ་གཏོགས་པ་ཙམ་མམ། མིག་འབྱེད་འཛུམས་ཙམ་ལ་རྫུ་འཕྲུལ་གྱི་སྟོབས་ཀྱི་ཤུགས་བློ་ཏིང་ངེ་འཛིན་ཅེས་བྱ་བའི་
ཏིང་ངེ་འཛིན་གྱི་ཁྱད་པར་རྣམ་པར་འཕྲུལ་པ་ཞེས་བྱ་བ་ལ་སྙོམས་པར་ཞུགས་ཏེ། མི་མཇེད་ཀྱི་འཇིག་རྟེན་གྱི་ཁམས་སུ་ཆས་ཏེ་སླར་འཁོད་ནས། སྟེང་གི་ནམ་མཁའི་དཀྱིལ་ན་ནོར་བུ་རིན་པོ་ཆེ་རབ་ཏུ་གནས་པའི་གནས་གཙང་མའི་རིས་ཀྱི་ལྷ་རྣམས་གནས་སུ་འདུག་སྟེ། གནས་གཙང་མའི་
གནས་དེ་ཐམས་ཅད་འོད་ཆེན་པོའི་སྣང་བས་གསལ་བར་བྱས་ཏེ། འོད་ཀྱི་རིན་པོ་ཆེས་རབ་ཏུ་བརྒྱན་ཅིང་གསལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །འཇམ་དཔལ་གཞོན་ནུར་གྱུར་པ་སྙོམས་པར་ཞུགས་མ་ཐག་ཏུ་རིན་པོ་ཆེ་རྣམ་པ་ཐ་དད་པ་དུ་མའི་ཁང་པ་བརྩེགས་པ་དང་།
རིན་པོ་ཆེའི་གདུགས་དང་དཔག་ཚད་བརྒྱ་སྟོང་ཕྲག་དུ་མ་རྒྱ་ཆེ་བའི་ལྷའི་གོས་དང་། དར་མང་པོའི་ཚོགས་ཀྱིས་ཉེ་བར་མཛེས་པར་བྱས་པའི་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་གཞོན་ནུར་གྱུར་པ་དེའི་དུས་ལ་བབ་པར་ཤེས་ན་སོང་ཤིག །
འོན་ཀྱང་ངའི་བཀས་བཅོམ་ལྡན་འདས་ཤཱཀྱ་ཐུབ་པ་ལ་གནོད་པ་ཉུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། བདེ་བ་ལ་རེག་པར་གནས་སམ་ཞེས་ཞུ་བར་བྱའོ། །དེ་ནས་བཅོམ་ལྡན་འདས་མེ་ཏོག་ཡང་དག་པར་སྐྱེས་པ་རྒྱལ་པོའི་དབང་པོ་དེ་བཞིན་གཤེགས་པས་འཇམ་

དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞན་ཡང་གཞོན་ནུ་གང་གཱའི་ཀླུང་བརྒྱ་སྟོང་གི་བྱེ་མ་སྙེད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཁྱོད་ཀྱི་སྔགས་ཀྱི་སྤྱོད་པ་དང་། དཀྱིལ་འཁོར་དང་ཆོ་ག་ཞིབ་མོ་དང་
གསང་བ་དང་། དབང་བསྐུར་བ་དང་ཕྱག་རྒྱའི་ཚོགས་དང་ཆོ་ག་དང་སྦྱིན་སྲེག་དང་། བཟླས་པ་དང་བརྟུལ་ཞུགས་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་སེམས་ཅན་ཐམས་ཅད་དགའ་བར་བྱེད་པ། འོད་རིན་པོ་ཆེའི་ཚོགས་ཀྱིས་རབ་འབྱམ་འདས་པ་དང་ད་ལྟར་བྱུང་བ་དང་མ་འོངས་
པའི་ཤེས་པ་རྒྱལ་པོའི་དབང་ཕྱུག་ལུང་སྟོན་པར་བྱེད་པ། སྔགས་བཟླ་བ་ཡུལ་གྱི་མཐར་འགྲོ་བར་བྱེད་པ་མི་སྣང་བར་བྱེད་པ་དང་། དུས་དང་དམ་ཚིག་རབ་འབྱམ་གྱི་ཚོགས་ཐམས་ཅད་དང་། འཇིག་རྟེན་པ་མ་ལུས་པ་དང་། འཇིག་རྟེན་ལས་འདས་པའི་སངས་རྒྱས་དང་། བྱང་ཆུབ་སེམས་
དཔའ་དང་འཕགས་པ་ཉན་ཐོས་དང་རང་སངས་རྒྱས་ཀྱི་ངེས་པར་འབྱུང་བའི་སྤྱོད་པ་མཐར་ཐུག་པ་གསུངས་པ་དང་། གསུང་བ་དང་། གསུང་བར་འགྱུར་བ་ཡིན་ཏེ། དེ་ལྟར་རྗེས་སུ་ཡི་རང་བ་ཉིད་དེ། འཇམ་དཔལ་གཞོན་ནུར་གྱུར་པ་དེའི་དུས་ལ་བབ་པར་ཤེས་ན་སོང་ཤིག །ཤཱཀྱ་ཐུབ་པའི་སྤྱན་སྔར་
མངོན་སུམ་དུ་ཆོས་ཀྱི་རྣམ་གྲངས་འདི་ཐོས་པར་འགྱུར་ཏེ། ཁྱོད་ཀྱང་སྟོན་པར་འགྱུར་རོ། །འདིར་ཡང་གསུངས་པ། ན་མཿསརྦ་ཏ་ཐཱ་ག་ཏཱ་ནཱཾ། ཨ་ཙིན་ཏྱ་ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཨོཾ་སྨ་ར་སྨ་ར་ཨ་པྲ་ཏི་ཧ་ཏ་ཤཱ་ས་ན་ཀུ་མཱ་ར་རཱུ་པ་ཧ་རི་ཎ། ཨོཾ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འདི་ནི་འཇམ་དཔལ་གཞོན་ནུར་གྱུར་
པའི་རྩ་བའི་སྔགས་སོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་སྟེ། དེ་བཞིན་གཤེགས་པ་ཐམས་ཅད་ཀྱིས་གསུངས་ལ། གསུང་ཞིང་གསུང་བར་འགྱུར་ལ། ཁྱོད་ཀྱང་མི་མཇེད་ཀྱི་འཇིག་རྟེན་གྱི་ཁམས་སུ་སོང་ནས། དབྱེ་བ་དང་རྣམ་པར་དབྱེ་བ་རྒྱ་ཆེར་སྟོན་པར་འགྱུར་ཏེ། དེ་བཞིན་
གཤེགས་པ་ཤཱཀྱ་ཐུབ་པ་ཞེས་བྱ་བས་ཀྱང་ལས་ཐམས་ཅད་བྱེད་པ་འདི་རྗེས་སུ་གནང་བར་འགྱུར་རོ། །འདིར་སྙིང་པོ་མཆོག་ཏུ་གྱུར་པ་ནི། ཨོཾ་བཱ་ཀྱེ་དཾ་ན་མཿ། འདིར་ཉེ་བའི་སྙིང་པོ་ནི་བཱ་ཀྱེ་ཧཱུཾ། དེ་ནས་འཇམ་དཔལ་གཞོན་ནུར་གྱུར་པ་བཅོམ་ལྡན་འདས་མེ་ཏོག་ཡང་དག་པར་སྐྱེས་པ་རྒྱལ་པོའི་

དབང་པོ་དེ་བཞིན་གཤེགས་པས་གནང་ནས། བཀོད་པ་ཐམས་ཅད་ཀྱི་རྒྱན་བྱང་ཆུབ་སེམས་དཔའི་སྤྱོད་པ་དང་རྒྱུ་མཐུན་པ། བྱང་ཆུབ་ཀྱི་སྙིང་པོ་ཐོབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་ཤཱཀྱ་ཐུབ་པ་ལ་མཆོད་པ་བྱ་བའི་ཕྱིར་ལྷའི་མེ་ཏོག་རྣམ་པར་བཀོད་པ་དང་། རྒྱལ་
མཚན་དང་བ་དན་དང་ཕྲེང་བའི་ཚོགས་དང་། རིན་པོ་ཆེའི་དྲིལ་བུའི་དྲ་བས་འབྲེལ་པ་སྙན་པའི་སྒྲ་སྒྲོགས་པ། ཕྱིར་མི་ལྡོག་པའི་བྱང་ཆུབ་སེམས་དཔའི་ས་ཐོབ་པར་བྱེད་པ། ལྷའི་དྲི་དང་བྱུག་པ་དང་ཕྲེང་བ་དང་ཕྱེ་མའི་ཆར་འབབ་པར་མངོན་པར་སྤྲུལ་ཏོ། །དེ་ནས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་
བྱང་ཆུབ་སེམས་དཔའི་ངོ་མཚར་རྨད་དུ་བྱུང་བའི་ཆོ་འཕྲུལ་གྱི་རྣམ་པར་འཕྲུལ་པ་མཐོང་ནས། བ་སྤུ་ལྡང་ཞིང་གནས་གཡོ་བ་མཐོང་ནས་སྙིང་འདར་ཞིང་དངངས་ཏེ། ཅི་བདག་ཅག་གི་འབྱོར་པ་ཉམས་པར་མ་གྱུར་ཏམ་ཞེས་ཕན་ཚུན་དུ་རིངས་པར་འགྲོ་ཞིང་སྐད་མཐོན་པོས་སྨྲ་བ་རྩོམ་པར་བྱེད་དེ། འདི་སྐད་
དུ་བཅོམ་ལྡན་འདས་ཡོངས་སུ་བསྐྱབ་ཏུ་གསོལ། །ཤཱཀྱ་ཐུབ་པ་ཡོངས་སུ་བསྐྱབ་ཏུ་གསོལ་ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་གནས་གཙང་མའི་འཁོར་རྣམས་ལ་བཀའ་སྩལ་པ། གྲོགས་པོ་དག་མ་འཇིགས་ཤིག་མ་འཇིགས་ཤིག །བྱང་ཆུབ་སེམས་
དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་འདི་ནི་མེ་ཏོག་ཡང་དག་པར་སྐྱེས་པའི་རྒྱལ་པོ་དེ་བཞིན་གཤེགས་པ་དེའི་སྤྱན་སྔ་ནས་ང་ལ་བལྟ་བ་དང་། ཕྱག་བྱ་བ་དང་བསྙེན་བཀུར་བྱ་བ་དང་། དོན་ཆེན་པོའི་སྤྱོད་པ་དང་སྔགས་ཀྱི་ཚིག་དང་། རྒྱ་ཆེ་ཞིང་རྨད་དུ་བྱུང་བའི་ཆོས་ཀྱི་ཚིག་སྟོན་པའི་
ཕྱིར་འོངས་པ་ཡིན་ནོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ཤཱཀྱ་ཐུབ་པ་ལ་ལན་གསུམ་བསྐོར་བ་བྱས་ཏེ། མིག་མི་འཛུམས་པར་བཅོམ་ལྡན་འདས་ལ་བལྟ་ཞིང་ཞབས་གཉིས་ལ་བཏུད་དེ། ཚིག་འབྲུ་འདི་དག་གིས་བཅོམ་ལྡན་འདས་ལ་བསྟོད་པ། །སྐྱེས་བུ་བསྐྱེད་པ་ཁྱོད་
ཕྱག་འཚལ། །སྐྱེས་མཆོག་ཁྱོད་ལ་ཕྱག་འཚལ་ལོ། །སྐྱེས་བུ་གཙོ་བོ་ཁྱོད་ཕྱག་འཚལ། །སྤྱོད་པ་ཐམས་ཅད་དོན་སྒྲུབ་པ། །སྐྱེས་བུ་སེང་གེ་ཁྱོད་ཕྱག་འཚལ། །ཕུང་ཁྲོལ་ཐམས་ཅད་ཟློག་བྱེད་པ། །དཔའ་བོ་ཆེན་པོ་ཁྱོད་ཕྱག་འཚལ། །ངན་འགྲོ་ཐམས་ཅད་འཇིག་བྱེད་པ། །སྐྱེས་བུ་པད་

དཀར་ཁྱོད་ཕྱག་འཚལ། །ཀུན་ནས་བསོད་ནམས་དྲི་ལྡན་པ། །སྐྱེས་བུ་པདྨ་ཁྱོད་ཕྱག་འཚལ། །སྲིད་གསུམ་འདམ་ནི་རྣམ་དག་བྱེད། །རྣམ་གྲོལ་ཁྱོད་ལ་ཕྱག་འཚལ་ལོ། །སྡུག་བསྔལ་མ་ལུས་རྣམ་གྲོལ་བྱེད། །ཞི་གྱུར་ཁྱོད་ལ་ཕྱག་འཚལ་ལོ། །ཐམས་ཅད་ལྡན་པ་
ལེགས་འདུལ་བྱེད། །ཐམས་ཅད་གྲུབ་པ་ཁྱོད་ཕྱག་འཚལ། །སྔགས་ཀྱི་སྤྱོད་པའི་དོན་སྒྲུབ་བྱེད། །བཀྲ་ཤིས་ཁྱོད་ལ་ཕྱག་འཚལ་ལོ། །བཀྲ་ཤིས་ཀུན་གྱི་བཀྲ་ཤིས་པ། །སངས་རྒྱས་ཀུན་ལ་ཁྱོད་ཕྱག་འཚལ། །ཆོས་ཀུན་རྣམ་པར་རྟོགས་མཛད་པ། །ཆོས་ཐམས་ཅད་ཀྱི་དེ་བཞིན་
ཉིད་སྤྲོས་པ་མེད་པའི་ངོ་བོ་ལ་ཡང་དག་པར་རྗེས་སུ་ཞུགས་ཤིང་སྟོན་པར་བྱེད་པའི་དེ་བཞིན་གཤེགས་པ་ཁྱོད་ལ་ཕྱག་འཚལ་ལོ། །ཤེས་པ་དང་ཤེས་བྱའི་དངོས་པོ་ཐམས་ཅད་དང་། འདུས་བྱས་དང་འདུས་མ་བྱས་དང་། ཐེག་པ་གསུམ་གྱི་ལམ་དང་། མྱ་ངན་ལས་འདས་པའི་ལམ་ལ་འཇོག་
པར་བྱེད་པ་དང་། གནས་པར་བྱེད་པ་ཐམས་ཅད་མཁྱེན་པ་ཁྱོད་ལ་ཕྱག་འཚལ་ལོ་ཞེས་ཚིག་འབྲུ་འདི་དག་བརྗོད་པའི་བསྟོད་པའི་ཚིག་གིས་བཅོམ་ལྡན་འདས་ལ་མངོན་སུམ་དུ་བསྟོད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ནས་གང་གཱའི་ཀླུང་བརྒྱ་ཕྲག་སྟོང་གི་བྱེ་མ་སྙེད་ཀྱི་འཇིག་
རྟེན་གྱི་ཁམས་འདས་ནས། བྱང་ཤར་གྱི་ཕྱོགས་མཚམས་ན་མེ་ཏོག་ཡང་དག་པར་སྐྱེས་པ་ཞེས་བྱ་བའི་སངས་རྒྱས་ཀྱི་ཞིང་མཆིས་ཏེ། དེ་ན་མེ་ཏོག་དང་ལྡན་པ་ཞེས་བྱ་བའི་འཇིག་རྟེན་གྱི་ཁམས་ན་གང་དུ་བཅོམ་ལྡན་འདས་མེ་ཏོག་ཡང་དག་པར་སྐྱེས་པ་དབང་པོའི་རྒྱལ་པོ་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་དེ་ཆོས་སྟོན་ཏེ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ་ཚིག་འབྲུ་
བཟང་པོ། །མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་དཀར་བ་ཚངས་པར་སྤྱོད་པ་ཡང་དག་པར་སྟོན་ཏོ། །དེ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །སྔགས་ཀྱི་སྤྱོད་པ་དང་བྱང་ཆུབ་སེམས་དཔའི་སྡེ་སྣོད་དང་། ལམ་གསུམ་གྱི་སྤྱོད་པའི་

ལམ་སྒྲུབ་པར་བྱེད་པ། སྐྱོབ་པ་དང་གནས་དང་སྐྱབས་དང་དཔུང་གཉེན་དང་། བདེ་བ་དང་ཤིན་ཏུ་མཐར་ཐུག་པ་དང་ཤིན་ཏུ་ཡོངས་སུ་མཐར་ཕྱིན་པར་བྱེད་པ་སེམས་ཅན་རྣམས་ལ་སྟོན་ཏེ། བཅོམ་ལྡན་འདས་དེ་ཉིད་ཀྱིས་རྗེས་སུ་གནང་ནས། བཅོམ་ལྡན་འདས་ཀྱི་ཞབས་དྲུང་འདིར་མཆིས་སོ། །བཅོམ་
ལྡན་འདས་མེ་ཏོག་ཡང་དག་པར་སྐྱེས་པ་རྒྱལ་པོའི་དབང་པོ་དེ་ཡང་། བཅོམ་ལྡན་འདས་ལ་གནོད་པ་ཉུང་ངམ། བསྐྱོད་པ་ཡང་ངམ། བདེ་བ་ལ་རེག་པར་གནས་སམ་ཞེས་འདྲིའོ། །འདི་སྐད་ཀྱང་གསུང་སྟེ། གང་དུ་འདི་ལྟ་བུའི་སྙིགས་མ་ལྔའི་དུས་སུ་སངས་རྒྱས་བཅོམ་ལྡན་འདས་ཤཱཀྱ་ཐུབ་
པ་འབྱུང་བ་ནི་ངོ་མཚར་ཏོ་ཞེས་སོ། །དེ་ཡང་ལམ་གསུམ་དང་བྱང་གྲོལ་དང་མིར་སྐྱེ་བ་ཐོབ་པ་ཉིད་ཀྱི་ཆོས་སྟོན་པར་བྱེད་དོ། །གང་དུའང་སེམས་ཅན་གྱི་རིས་སྐལ་བ་མེད་པ་དང་། སྲིད་པ་གསུམ་ཡང་དག་འཇོམས་པར་བྱེད་པའི་ལམ་དང་གཏན་ཏུ་གྲུབ་པ་དང་བདེ་བ་དང་། མཐུན་པའི་མྱ་ངན་
ལས་འདས་པ་ལ་སེམས་ཅན་རྣམས་དགོད་པར་བྱེད་པའི་བཅོམ་ལྡན་འདས་ཤཱཀྱ་ཐུབ་པའི་བརྩོན་འགྲུས་ནི་ངོ་མཚར་ཏོ། །བཅོམ་ལྡན་འདས་བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་ཀྱི་ཐུགས་ནི། སངས་རྒྱས་བཅོམ་ལྡན་འདས་ཀྱིས་མཁྱེན་པར་འགྱུར་གྱི། བདག་གིས་ཅི་
ཞིག་འཚལ་བ་རྔོ་ཐོགས། དབང་ཕྱུག་གིས་རྣམ་པར་འཕྲུལ་པ་བསམ་གྱིས་མི་ཁྱབ་པ། རྨད་དུ་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྣམ་པར་འཕྲུལ་པ་ཤེས་པར་རམ། འཚལ་བར་རམ། ཐུགས་ཀྱི་སྤྱད་པ་སྤྱོད་པའི་རྗེས་སུ་འཇུག་པའི་སྒྲུབ་པ་དང་།
སྤྱོད་པ་འཚལ་བར་རམ་མདོར་ན་བསྐལ་པ་བྱེ་བ་ཁྲི་ཕྲག་བརྒྱ་སྟོང་གི་བར་དུའང་བསྟན་པར་མི་ནུས་སོ། །གང་ཡང་དེ་བཞིན་གཤེགས་པ་རྣམས་ཀྱིས་དེ་བཞིན་གཤེགས་པའི་མཛད་པ་བསྡུས་པའམ། ཐ་དད་མ་ལུས་པའི་ངོ་བོ་འདི་ནི་ཆོས་འདུས་མ་བྱས་སུ་བལྟ་བར་བྱ་སྟེ། མཐོང་བས་
སྤང་བར་བྱ་བ་ལ་བརྟེན་པའམ། ཡོན་ཏན་ནི་བཅོམ་ལྡན་འདས་དེ་བཞིན་གཤེགས་པ་ཁོ་ནས་མཁྱེན་པ་ཡིན་གྱི་བདག་གིས་ནི་མ་ལགས་སོ། །དེ་ནས་འཇམ་དཔལ་གཞོན་ནུར་གྱུར་པས་རང་གི་རྫུ་འཕྲུལ་གྱི་རྣམ་པར་འཕྲུལ་པས་རིན་པོ་ཆེའི་པདྨ་སྤྲུལ་པ་ལ་བཅོམ་ལྡན་འདས་ཤཱཀྱ་ཐུབ་པ་

ལ་བལྟ་ཞིང་འདུག་གོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་དེ་བཞིན་གཤེགས་པ་དང་རྗེས་སུ་མཐུན་པའི་གཏམ་རྣམ་པ་སྣ་ཚོགས་སྔོན་དུ་འགྲོ་བ་མཛད་ནས་ཆོས་བསྟན་པ་དང་རྗེས་སུ་མཐུན་
པ་དང་། བྱང་ཆུབ་སེམས་དཔའི་སྤྱོད་པ་སྒྲུབ་པ་དང་རྗེས་སུ་མཐུན་པས་ཚངས་པའི་དབྱངས་དང་། ཀ་ལ་པིང་ཀའི་སྐད་དང་འབྲུག་སྒྲ་དང་། རྔ་བོ་ཆེའི་སྒྲ་སྐད་ཀྱི་གསུང་གི་དབྱངས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་གཞོན་ནུར་གྱུར་པ་ཁྱོད་ལེགས་པར་འོངས་
སམ། །སེམས་དཔའ་ཆེན་པོའི་སྤྱོད་པ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་བསྒྲུབ་པས་བྱང་ཆུབ་སེམས་དཔའ་ཐམས་ཅད་ཀྱི་དོན་ཐོབ་པར་བྱེད་པ། སྔགས་ཐམས་ཅད་ཀྱི་ཚིག་དང་གསང་བ་དང་བཅས་པ་དང་། དབང་བསྐུར་བ་དང་ཕྱག་རྒྱ་དང་། དཀྱིལ་འཁོར་དང་ཆོ་ག་དང་།
དབང་བསྐུར་བ་དང་ཚེ་དང་ནད་མེད་པ་དང་། དབང་ཕྱུག་དང་བསམ་པ་ཐམས་ཅད་ཡོངས་སུ་རྫོགས་པར་བྱེད་པ། སྒྲུབ་པའི་ཐབས་ཐམས་ཅད་དང་ལྡན་པ་རྒྱུད་ཤེས་པ་དང་། ཤེས་བྱ་དང་དུས་དང་མི་སྣང་བ་དང་། རྒྱལ་པོའི་ཞིང་དུ་གྱུར་པ་འདས་པ་དང་མ་འོངས་པ་དང་ད་ལྟར་བྱུང་བ་ཤེས་པར་
བྱེད་པ་མདོར་ན་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ། རང་གི་ཡོན་ཏན་དང་མཐུན་པའི་སྔགས་ཀྱི་སྤྱོད་པ་རྗེས་སུ་འཇུག་པ། སེམས་ཅན་གཞན་དགའ་བར་བྱེད་པ་མི་སྣང་བར་འགྲོ་བ། ནམ་མཁའ་ལ་འགྲོ་བ། ཆུ་ལ་མི་ནུབ་པར་འགྲོ་བ། ཡིད་གཞུངས་
པར་བྱེད་པ། འགུགས་པར་བྱེད་པ། ས་འོག་ཏུ་འཇུག་པ། མངོན་དུ་སྤྱོད་པར་བྱེད་པ། འདོད་པ་ཐམས་ཅད་ཐོབ་པར་བྱེད་པ། གནོད་སྦྱིན་དང་། གནོད་སྦྱིན་མོ་ཐམས་ཅད་དང་། མངག་གཞུག་པ་དང་ཤ་ཟ་དང་འབྱུང་པོ་ཐམས་ཅད་འགུགས་པར་བྱེད་པ། བྱིས་པ་དང་། རྒན་པོ་དང་གཞོན་
ནུ་གནས་ཅི་ལྟ་བ་བཞིན་འཇོག་པར་བྱེད་པ། མདོར་ན་ལས་ཐམས་ཅད་བྱེད་པ་སྟེ། ཡིད་ལ་རེ་བ་ཐམས་ཅད་རྫོགས་པར་བྱེད་པ། མངོན་སྤྱོད་དང་རྒྱས་པ་དང་། ཞི་བའི་ལས་དག་རབ་ཏུ་བྱེད་པ་ཇི་ལྟ་ཇི་ལྟར་རབ་ཏུ་སྦྱར་བ་དེ་ལྟ་དེ་ལྟར་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ། བསྐལ་པ་

ཆེན་པོའི་རིན་པོ་ཆེའི་ལེའུ་རབ་འབྱམ་འདི་ངས་ཀྱང་རྗེས་སུ་གནང་ཞིང་སངས་རྒྱས་ཐམས་ཅད་ཀྱིས་ཀྱང་གསུངས་ཏེ། སེམས་ཅན་དག་པའི་རང་གི་སྔགས་སྤྱོད་པའི་དོན་གྱི་ཆོས་ཀྱི་མཛོད། སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། ལྷ་དང་མི་རྣམས་དང་། སེམས་ཅན་ཐམས་
ཅད་ཀྱི་དོན་དུ་བསྟན་པའི་ཕྱིར་རོ། །དེ་ནས་འཇམ་དཔལ་གཞོན་ནུར་གྱུར་པ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་འོད་ཀྱི་སྣང་བ་བཀོད་པའི་རྒྱན་ཡང་དག་པར་བསྐུལ་བ་ཞེས་བྱ་བ་བྱང་ཆུབ་སེམས་དཔའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་དག་པའི་སེམས་ཅན་གྱི་འོད་
ཀྱི་སྣང་བས་གང་གཱའི་ཀླུང་གི་བྱེ་མ་སྙེད་དུ་མའི་འཇིག་རྟེན་གྱི་ཁམས་ཀྱི་སངས་རྒྱས་ཀྱི་ཞིང་། འོག་མིན་གྱི་གནས་ཀྱི་བར་དང་། མནར་མེད་པའི་དམྱལ་བ་ཆེན་པོའི་བར་དུ་ཁྱབ་པར་བྱས་ཏེ། སེམས་ཅན་གང་སུ་དག་ཤིན་ཏུ་སྡུག་བསྔལ་བ་དེ་དག་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་
གྱུར་ཏོ། །ཉན་ཐོས་དང་རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་དང་། སངས་རྒྱས་བཅོམ་ལྡན་འདས་རྣམས་ཡང་དག་པར་བསྐུལ་ནས། འོད་དེ་ཡང་འཇམ་དཔལ་གཞོན་ནུར་གྱུར་པའི་སྤྱི་བོའི་གཙུག་ཏུ་ནུབ་པར་གྱུར་ཏོ། །འདིར་གང་དག་ཤར་ཕྱོགས་ན་རྣམ་
པར་གནས་པའི་སངས་རྒྱས་ཀྱི་ཞིང་དེར་འོད་ཟེར་རླུང་གི་དཀྱིལ་འཁོར་གྱི་རེག་པའི་བྱ་བས་སངས་རྒྱས་བཅོམ་ལྡན་འདས་རྣམས་ཡང་དག་པར་བསྐུལ་ཏེ། དེ་བཞིན་གཤེགས་པ་འོད་ཟེར་གྱི་ཟླ་བ་དྲི་སྣང་བའི་དཔལ་ཞེས་བྱ་བ་དང་། དེ་བཞིན་གཤེགས་པ་སྨན་གྱི་ལྷ་བཻ་ཌཱུརྱའི་འོད་དང་། དེ་བཞིན་
གཤེགས་པ་དཔལ་ཀུན་ཏུ་སྣང་བ་ཞེས་བྱ་བ་དང་། དེ་བཞིན་གཤེགས་པ་རྒྱལ་པོ་ཡང་དག་པར་འཕགས་པ་ཞེས་བྱ་བ་དང་། དེ་བཞིན་གཤེགས་པ་སཱ་ལའི་དབང་པོའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་འཇིག་རྟེན་གྱི་དབང་པོའི་རྒྱལ་པོ་ཞེས་བྱ་བ་དང་། དེ་བཞིན་
གཤེགས་པ་ཚེ་དཔག་ཏུ་མེད་པ་ཡེ་ཤེས་རྣམ་པར་ངེས་པའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་སྣང་བ་མཐའ་ཡས་དབང་པོའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་སྣང་བའི་འོད་ཀྱི་རྒྱལ་པོ་ཞེས་བྱ་བ་དང་། དེ་དག་ལ་སོགས་པ་སངས་རྒྱས་བཅོམ་

ལྡན་འདས་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ། མཐའ་ཡས་མུ་མེད་པའི་འཇིག་རྟེན་གྱི་ཁམས་དག་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འདུས་པ་དག་ལ་མི་མཇེད་ཀྱི་འཇིག་
རྟེན་གྱི་ཁམས་ཀྱི་གནས་གཙང་མའི་ཁང་བཟངས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། འཇམ་དཔལ་གཞོན་ནུར་གྱུར་པ་ལྷན་ཅིག་ཏུ་བྱང་ཆུབ་སེམས་དཔའི་སྤྱོད་པ་སྟོན་པ་དང་། སྔགས་ཀྱི་ཚིག་གི་དོན་གྱི་ལེའུ་
རབ་འབྱམ་སྟོན་ཏེ། དེ་བཞིན་དུ་ལྷོ་དང་། ནུབ་དང་བྱང་གི་ཕྱོགས་དང་ཕྱོགས་མཚམས་དང་སྟེང་དང་འོག་དང་ཐད་ཀ་ཐམས་ཅད་དང་ལྡན་པའི་སངས་རྒྱས་ཀྱི་ཞིང་སྣང་བར་བྱས་ཏེ། སངས་རྒྱས་ཀྱི་ཞིང་ཐམས་ཅད་དུ་བདུད་ཀྱི་གནས་ཐམས་ཅད་སྤ་གོང་བར་བྱས་ནས་བྱང་ཆུབ་སེམས་
དཔའི་ཚོགས་ཐམས་ཅད་ཀྱིས་ཡོངས་སུ་བསྐོར་ཅིང་། ཉན་ཐོས་ཀྱི་དགེ་འདུན་དང་བཅས་པས་མདུན་གྱིས་བལྟས་ཏེ། གནས་གཙང་མའི་གནས་སུ་སངས་རྒྱས་ཀྱི་འཕྲུལ་པ་དང་བྱང་ཆུབ་སེམས་དཔའི་བདག་ཉིད་ཆེན་པོ་བལྟ་བར་འདོད་པ་དང་། སྔགས་ཀྱི་སྤྱོད་པ་བསྒྲུབ་པ་དང་། ཏིང་ངེ་
འཛིན་གྱི་ཁྱད་པར་དང་། ལེའུའི་ཚོགས་དང་དེ་བཞིན་གཤེགས་པའི་བསྟན་པ་ཐོགས་པ་མེད་པ། གསལ་བར་འདོད་པས་ཆས་པ་ནི་འདི་ལྟ་སྟེ། ལག་བཟང་དང་། རིན་ཆེན་བཟང་པོ་དང་། བརྟུལ་ཞུགས་བཟང་པོ་དང་། སྤྱན་མཛེས་དང་། བཟང་དགའ་དང་། ཆོས་
བཟང་དང་། དོན་ཐམས་ཅད་གྲུབ་པ་དང་། ཐམས་ཅད་དུ་འཕགས་པ་དང་། ཆོས་འཕགས་དང་། རིན་ཆེན་འཕགས་དང་། རིན་ཆེན་དཔལ་དང་། ལྷུན་པོའི་དཔལ་དང་། བསམ་གྱིས་མི་ཁྱབ་པའི་དཔལ་དང་། འོད་བྱེད་དཔལ་དང་། འོད་དཔལ་དང་། དོན་
ཐམས་ཅད་ཀྱི་དཔལ་དང་། ཐམས་ཅད་ཕྱག་ན་རིན་པོ་ཆེ་དང་། ཕྱག་ན་གཙུག་གི་རིན་པོ་ཆེ་དང་། ཕྱག་ན་ལྷུན་པོའི་རྒྱལ་མཚན་དང་། རྣམ་པར་སྣང་མཛད་སྙིང་པོ་དང་། རིན་ཆེན་སྙིང་པོ་དང་། ཡེ་ཤེས་སྙིང་པོ་དང་། བསམ་གྱིས་མི་ཁྱབ་པའི་དོན་གྱི་སྙིང་པོ་དང་། ཆོས་

འཕགས་ཀྱི་སྙིང་པོ་དང་། རྒྱལ་མཚན་གྱི་ཏོག་དང་། ཏོག་བཟང་དང་། མཐའ་ཡས་ཏོག་དང་། དྲི་མ་མེད་པའི་ཏོག་དང་། མཐའ་དག་གི་ཏོག་དང་། ནམ་མཁའི་ཏོག་དང་། རིན་པོ་ཆེའི་ཏོག་དང་། འབྲུག་སྒྲ་དང་རྔ་བོ་ཆེའི་སྐད་ཀྱི་རྒྱལ་པོ་དང་། མཐའ་ཡས་པར་སྣང་བའི་ཡེ་
ཤེས་ཀྱི་རྒྱལ་པོ་དང་། མུན་པ་མུན་ནག་ཐམས་ཅད་འཇོམས་པའི་རྒྱལ་པོ་དང་། གནོད་པ་ཐམས་ཅད་རྣམ་པར་འཇིག་པའི་རྒྱལ་པོ་དང་། སྤྱོད་པ་ཐམས་ཅད་ཀྱི་ཡུལ་ཤེས་པའི་རྒྱལ་པོ་དང་། འཇིག་རྟེན་གྱི་དབང་པོའི་རྒྱལ་པོ་དང་། མངོན་པར་རྟོགས་པའི་དབང་པོའི་རྒྱལ་
པོ་དང་། རྣམ་པར་འཇོམས་པར་བྱེད་པའི་རྒྱལ་པོ་དང་། ངེས་པར་གཡོ་བར་བྱེད་པའི་རྒྱལ་པོ་དང་། ཉི་མའི་རྒྱལ་པོ་དང་། དངོས་པོ་མེད་པ་ཡང་དག་པར་འཕགས་པའི་རྒྱལ་པོ་དང་། དངོས་པོ་མེད་པའི་ངོ་བོ་ཉིད་ཡང་དག་པར་འཕགས་པའི་རྒྱལ་པོ་དང་། མི་མཐུན་
པའི་ཕྱོགས་མེད་པའི་རྒྱལ་པོ་དང་། རང་བཞིན་གྱི་འོད་དང་། བསོད་ནམས་འོད་དང་། འཇིག་རྟེན་འོད་དང་། དཔག་མེད་འོད་དང་། མཐའ་ཡས་འོད་དང་། སྤྱན་བཟང་འོད་དང་། འབྱུང་མེད་འོད་དང་། དོན་གྱི་འོད་དང་། མི་ཚུགས་པ་དང་། བཟོད་པར་དཀའ་བ་དང་།
ལས་མེད་དང་། འོག་མིན་དང་། དྲི་མེད་དང་། མེ་དང་། འོད་དང་། བློ་དང་། རྟོགས་པ་དང་། བདེ་བ་དང་། བདེ་བའི་མུ་ཁྱུད་དང་། མུ་ཁྱུད་ཏོག་དང་། འདོད་པའི་ལྷ་དང་། ལྷ་དང་ལྷ་ཡུལ་ན་ཡོད་པ་དང་། ལྟེ་བ་དང་། རྒྱས་པ་དང་། འཇིག་རྟེན་ཞི་བ་དང་། ཉེ་བར་འདོད་
པ་དང་། རྔ་བོ་ཆེ་དང་། གྲུབ་པ་དང་། དཀར་པོ་དང་། གྲགས་བཟང་དང་། བཟོད་པར་དཀའ་བ་དང་། རྙེད་པར་དཀའ་བ་དང་། གདུལ་བར་དཀའ་བ་དང་། བསྙེན་པར་དཀའ་བ་དང་། རིང་དུ་སོང་བ་དང་། རིང་བའི་དོན་དང་། རིང་བ་ལ་གནས་པ་དང་། མཐོ་བ་དང་།
ཤིན་ཏུ་མཐོ་བ་དང་། སྲིན་བུ་མེ་ཁྱེར་དང་། ཀུན་ཏུ་སྣང་བ་དང་། སྣང་མེད་དང་། ཁྱུ་མཆོག་དང་། ཀུན་ནས་འོད་དང་། ཤིན་ཏུ་ཡིད་དུ་འོང་བ་དང་། ཡིད་བཟང་དང་། ལྷ་ཆེན་པོ་དང་། དྲི་མེད་བཟང་པོ་དང་། དྲི་མ་མཐར་བྱེད་དང་། དུལ་བ་དང་། ཞི་ལྡན་དང་། མཚན་

བཟང་དང་། རྒྱལ་མཚན་དཀར་པོ་དང་། ཚད་ལྡན་དང་། ཅི་སྨྲ་དང་། ཐ་ཆུངས་དང་། སེལ་བྱེད་དང་། འཚོ་བ་དང་། ལེགས་སྐྱེས་དང་། དུ་བའི་ཏོག་དང་། རྒྱལ་མཚན་ཏོག་དང་། དཀར་བའི་ཏོག་དང་། ཏོག་བཟང་དང་། ནོར་ལྷའི་ཏོག་དང་། ནོར་
ལྷའི་བུ་དང་། མེས་པོ་དང་། ཕ་དང་། མཐར་བྱེད་དང་། འཇིག་རྟེན་གྲགས་པ་དང་། ཀུན་ནས་གྲགས་པ་དང་། གྲགས་པ་ཆེན་པོ་དང་། དཔལ་ལྡན་དང་། ཕམ་བྱེད་དང་། འོད་བྱེད་དང་། མངག་གཞུག་པ་དང་། ཞི་བྱེད་དང་། འཇིག་རྟེན་བྱེད་དང་། ལྷ་བྱེད་དང་། མཐོ་རིས་བྱེད་
དང་། མར་མེ་མཛད་དང་། འབྱུང་པོ་མཐར་བྱེད་དང་། དོན་ཐམས་ཅད་མཛད་དང་། གྲུབ་མཛད་དང་། གསལ་མཛད་དང་། སྣང་བར་མཛད་པ་དང་། རྔ་བོ་ཆེའི་སྒྲ་དང་། སྐད་ཀྱི་སྒྲ་དང་། སྒྲ་སྙན་དང་། མཐའ་ཡས་པའི་སྒྲ་དང་། ཏོག་གི་སྒྲ་དང་། ངན་སྤོང་གི་བུ་དང་།
གསེར་ཐུབ་དང་། འཁོར་བ་འཇིག་དང་། འོད་སྲུང་དང་། གཙུག་ཏོར་ཅན་དང་། ཐམས་ཅད་སྐྱོ་བ་དང་། རྣམ་པར་གཟིགས་དང་། ཤཱཀྱ་ཐུབ་པ་དང་། འདི་དག་དང་། གཞན་ཡང་སངས་རྒྱས་བཅོམ་ལྡན་འདས་མང་པོ་དག་གིས་གནས་གཙང་མའི་གཞལ་མེད་ཁང་སྣང་བར་
བྱས་ཏེ་པདྨའི་གདན་དག་ལ་བཞུགས་པར་གྱུར་ཏོ། །བྱང་ཆུབ་སེམས་དཔའི་ཚོགས་ཀྱང་དེ་ལྟ་བུའི་ཚུལ་དུ་ལྷགས་པར་གྱུར་ཏེ། འདི་ལྟ་སྟེ། ཕྱག་ན་རིན་ཆེན་དང་། ཕྱག་ན་རྡོ་རྗེ་དང་། མཉམ་པའི་ཕྱག་དང་། ནམ་མཁའི་ཕྱག་དང་། མཐའ་ཡས་ཕྱག་དང་། སའི་ཕྱག་དང་།
སྣང་བའི་ཕྱག་དང་། དྲི་མེད་བཟང་པོ་དང་། བཟང་བརྩེགས་དང་། རབ་མང་བརྩེགས་དང་། ནོར་བུ་བརྩེགས་དང་། རིན་ཆེན་བརྩེགས་དང་། རིན་ཆེན་ཕྱག་དང་། ཀུན་ནས་ཕྱག་དང་། དྲི་ལྡན་ཕྱག་དང་། ལེགས་འགྲོ་དང་། དྲི་མེད་འགྲོས་དང་། འཇིག་རྟེན་འགྲོས་
དང་། མཛེས་པའི་འགྲོས་དང་། མཐའ་ཡས་འགྲོས་དང་། གྲགས་པ་མཐའ་ཡས་དང་། གྲགས་པ་བཟང་པོ་དང་། གྲགས་པའི་དྲི་མ་བྲལ་དང་། གྲགས་པའི་འགྲོ་བ་དང་། གྲགས་པ་དྲི་མ་མེད་པ་དང་། གྲགས་པ་དང་། གྲགས་པ་འདྲེན་པ་དང་། མགོན་པོ་དང་།

མགོན་པོར་གྱུར་པ་དང་། ཀུན་ནས་མགོན་པོ་དང་། རྒྱུན་ཤེས་ཀྱི་བུ་དང་། མཐའ་ཡས་རྒྱུན་ཤེས་ཀྱི་བུ་དང་། ཀུན་ནས་རྒྱུན་ཤེས་ཀྱི་བུ་དང་། བྱམས་པའི་བུ་དང་། བྱམས་པ་བཟང་པོའི་བུ་དང་། བྱམས་པའི་བུ་མ་ཡིན་པ་དང་། དུས་གསུམ་རྒྱུན་ཤེས་ཀྱི་བུ་དང་། རྒྱུན་
ཤེས་ཀྱི་བུ་འབྲས་བུ་དང་བཅས་པ་དང་། རྒྱུན་ཤེས་ཀྱི་བུ་དཀོན་མཆོག་གསུམ་དང་། རྒྱུན་ཤེས་ཀྱི་བུ་སྐྱབས་གསུམ་དང་། རྒྱུན་ཤེས་ཀྱི་བུ་ཐེག་པ་གསུམ་དང་། རྣམ་པར་འཕྲུལ་པ་དང་ལྡན་པ་དང་། ཡིད་འོང་བཟང་པོ་དང་། གསུང་སྙན་ལྡན་དང་། ཆོས་ཀྱི་དབང་ཕྱུག་དང་།
དངོས་མེད་དབང་ཕྱུག་དང་། འཇིག་རྟེན་དབང་ཕྱུག་དང་། སྤྱན་རས་གཟིགས་དབང་ཕྱུག་དང་། ལེགས་གཟིགས་དབང་ཕྱུག་དང་། རྣམ་གཟིགས་དབང་ཕྱུག་དང་། འཇིག་རྟེན་མཆོད་འོས་དང་། ལེགས་མཆོད་དང་། སྒྲ་སྒྲོགས་དབང་ཕྱུག་དང་། རྔ་ཆེན་དབང་ཕྱུག་
དང་། སྣ་ཚོགས་སྒྲའི་དབང་ཕྱུག་དང་། རྣམ་འཇིག་དབང་ཕྱུག་དང་། མཐོན་ཀ་བཟང་པོ་དང་། སྐུ་མཛེས་དང་། གྲགས་ལྡན་དང་། ཉི་མའི་འོད་དང་། ཁྱབ་འཇུག་བདག་པོ་དང་། བདག་པོའི་ངང་ཚུལ་དང་། ནམ་མཁའ་དང་། ནམ་མཁའི་སྙིང་པོ་དང་། དོན་ཐམས་
ཅད་ཀྱི་སྙིང་པོ་དང་། ཐམས་ཅད་འབྱུང་བ་དང་། ངན་སོང་སྤོང་བ་དང་། ཕྱིར་མི་ལྡོག་པ་དང་། ཆོས་མ་ཡིན་པ་གཅོད་པར་བྱེད་པ་དང་། དེ་དག་དང་། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ལྷན་ཅིག་བཅོམ་ལྡན་འདས་ཤཱཀྱ་ཐུབ་པ་གནས་གཙང་མའི་
གཞལ་མེད་ཁང་ན་བཞུགས་སོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་ཀྱི་གཟུགས་འཆང་བ་རྣམས་ཏེ། སྤྱོད་པ་མཐའ་ཡས་པའི་དོན། འཇིག་རྟེན་སྒྲུབ་པའི་དོན། སེམས་ཅན་ཐམས་ཅད་ཀྱི་བསམ་པ་ཕྱིར་མི་ལྡོག་པའི་ལམ་ལ་དགོད་པས་བསམ་
གྱིས་མི་ཁྱབ་པའི་རིག་པའི་ཚིག་དང་། སྔགས་ཀྱི་ཚིག་དང་། གཟུངས་དང་། སྨན་གྱི་ཆ་བྱད་འཛིན་པ་དང་། འདབ་ཆགས་ཀྱི་ཚོགས་རྣམ་པ་སྣ་ཚོགས་དང་། གནོད་སྦྱིན་དང་། སྲིན་པོ་དང་། ནོར་བུ་དང་། སྔགས་དང་། རིན་པོ་ཆེའི་རྒྱལ་པོ་དང་། སེམས་ཅན་ཐམས་

ཅད་ཀྱི་ལུས་ཀྱི་གྲངས་སུ་རྗེས་སུ་ཡང་དག་པར་འཇུག་པའི་སྤྱོད་པ་ཐམས་ཅད་ཀྱི་རྗེས་སུ་འཇུག་པ་དང་། སེམས་ཅན་གྱི་བསམ་པ་ཅི་ལྟར་འདུལ་བར་བྱེད་པ་དེ་བཞིན་དུ་བྱེད་པ་རྣམས་དང་། དེ་དང་རྗེས་སུ་མཐུན་པའི་མིང་དང་འབྲེལ་བ་རྣམས་དང་། རིག་པའི་རྒྱལ་པོའི་ཉེ་
བར་བསྟན་པ་དང་། ཆོས་ཅི་ལྟ་བ་བཞིན་དུ་རྟོག་པ་ལས་ངེས་པར་འབྱུང་བ་དང་། དེ་བཞིན་གཤེགས་པ་དང་། པདྨ་དང་། རྡོ་རྗེའི་རིགས་དང་། འཇིག་རྟེན་དང་འཇིག་རྟེན་ལས་འདས་པའི་རིགས་ཀྱི་རྗེས་སུ་ཞུགས་པ། དམ་ཚིག་ལས་མི་འདའ་ཞིང་ཚིག་གིས་ལམ་ལ་
འཇོག་པར་བྱེད་པ། དཀོན་མཆོག་གསུམ་གྱི་གདུང་རྒྱུན་མི་གཅོད་པར་བྱེད་པ་ཡིན་ཏེ། འདི་ལྟ་སྟེ། གཙུག་ཏོར་དང་། མངོན་པར་འཕགས་པ་དང་། མངོན་པར་མཐོ་བ་དང་། གདུགས་དཀར་པོ་དང་། འདབ་མ་མཐའ་ཡས་དང་། འདབ་མ་བརྒྱ་པ་དང་། རྒྱལ་
བའི་གཙུག་ཏོར་དང་། འཇིག་རྟེན་མཐོན་པོ་དང་། རྣམ་པར་རྒྱལ་བའི་གཙུག་ཏོར་དང་། མངོན་པར་འཕགས་པའི་གཙུག་ཏོར་དང་། པདྨའི་འོད་དང་། མེ་ཏོག་པདྨའི་འོད་དང་། མེ་ཏོག་ཀ་ཏ་ཀའི་འོད་དང་། འོད་དཀར་པོ་དང་། བཀོད་པའི་གཙུག་ཏོར་དང་།
གསེར་གྱི་ཕུང་པོ་དང་། དཀར་པོའི་ཕུང་པོ་དང་། གཟི་བརྗིད་ཕུང་པོ་དང་། ནོར་བུའི་ཕུང་པོ་དང་། ཀུན་ནས་ཕུང་པོ་དང་། རྣམ་པར་གྲགས་པའི་ཕུང་པོ་དང་། འབྱུང་བའི་ཕུང་པོ་དང་། བདེན་པའི་ཕུང་པོ་དང་། དངོས་པོ་མེད་པའི་ངོ་བོའི་ཕུང་པོ་དང་། དེ་ཁོ་ན་ཉིད་
ཀྱི་ཕུང་པོ་དང་། དེ་དག་དང་གཞན་ཡང་གཙུག་ཏོར་གྱི་རྒྱལ་པོ་ཆོས་ཀྱི་དབྱིངས་མཐའ་ཡས་པ་ལ་རབ་ཏུ་ཞུགས་པ། སེམས་ཅན་གྱི་བསམ་པ་རབ་ཏུ་རྫོགས་པར་བྱེད་པ་རྒྱལ་བ་ཐམས་ཅད་ཀྱི་སྙིང་པོ་དང་ལྡན་པ་གཙུག་ཏོར་ཀྱི་རྒྱལ་མོ་བསྐལ་པ་བྱེ་བ་ཁྲི་ཕྲག་བརྒྱ་སྟོང་གི་བར་དུ་ཡང་
བགྲང་ཞིང་མཐར་ཐུག་པར་མི་ནུས་སོ། །སྟོབས་དང་ཕ་རོལ་གནོན་པ་བསམ་གྱིས་མི་ཁྱབ་པའི་བདག་ཉིད་ཀྱང་བསྟན་པར་མི་ནུས་སོ། །མདོར་བསྟན་པར་བྱ་སྟེ་བརྗོད་པ་ནི་རིག་པའི་རྒྱལ་མོའི་འདུས་པ་བརྗོད་པར་བྱ་སྟེ། འདི་ལྟ་སྟེ་མཛོད་སྤུ་དང་སྨིན་མ་དང་སྤྱན་དང་རྫི་མ་དང་།

རྣ་བ་དང་མགྲིན་པ་དང་། མི་འཇིགས་པ་དང་སྙིང་རྗེ་དང་བྱམས་པ་དང་། བརྩེ་བ་དང་ཤེས་རབ་དང་འོད་ཟེར་དང་སེམས་པ་དང་། འོད་དང་དྲི་མ་མེད་པ་དང་སྒྲིབ་པ་དང་། མཆོག་སྦྱིན་ཐམས་ཅད་དང་། དེ་དག་དང་གཞན་ཡང་རིག་པའི་རྒྱལ་མོ་མཐའ་ཡས་མུ་མེད་པ་དག་
དེ་བཞིན་གཤེགས་པའི་སྐུ་ལས་སྤྲོས་པ་དག་ནི་འདི་ལྟ་སྟེ། དེ་བཞིན་གཤེགས་པའི་སྣོད་དང་། དེ་བཞིན་གཤེགས་པའི་ཆོས་ཀྱི་འཁོར་ལོ་དང་། དེ་བཞིན་གཤེགས་པའི་གཟིམས་མལ་དང་། དེ་བཞིན་གཤེགས་པའི་སྣང་བ་དང་། དེ་བཞིན་གཤེགས་པའི་གསུང་
དང་། དེ་བཞིན་གཤེགས་པའི་ཞལ་དང་། དེ་བཞིན་གཤེགས་པའི་བརླ་དང་། དེ་བཞིན་གཤེགས་པའི་རྒྱལ་མཚན་དང་། དེ་བཞིན་གཤེགས་པའི་ཏོག་དང་། དེ་བཞིན་གཤེགས་པའི་ཕྱག་མཚན་དང་། དེ་དག་དང་གཞན་ཡང་དེ་བཞིན་གཤེགས་པའི་སྔགས་
བརྗོད་པ་རིག་པའི་རྒྱལ་པོ་དང་། རྒྱལ་མོ་དང་མངག་གཞུག་པ་དང་། བྲན་ཕོ་དང་། བྲན་མོ་དང་། ཕོ་ཉ་དང་། ཕོ་ཉ་མོ་དང་། གནོད་སྦྱིན་དང་། གནོད་སྦྱིན་མོ་དང་། སེམས་ཅན་དང་། སེམས་ཅན་མ་ཡིན་པ་དང་། ཏིང་ངེ་འཛིན་གྱི་ཁྱད་པར་རྒྱུ་མཐུན་པ་ལས་བྱུང་
བའི་རྒྱན་གྱི་ཚོགས་ཀྱི་ཁྱད་པར་དང་། འཁོར་བརྒྱ་སྟོང་བྱེ་བ་ཁྲག་ཁྲིག་དཔག་ཏུ་མེད་པ་དང་། རིག་པའི་རྒྱལ་པོ་རིག་པའི་ཚོགས་ཐམས་ཅད་ཀྱི་གོང་ནས་གོང་དུ་ཡོངས་སུ་གནས་པ་དེ་དག་ཀྱང་གནས་གཙང་མའི་གཞལ་མེད་ཁང་དེར་གནས་པར་གྱུར་ཏོ། །རིག་པའི་
རྒྱལ་པོ་པདྨའི་རིགས་ཀྱང་འདི་ལྟ་སྟེ། བཅོམ་ལྡན་འདས་ཕྱག་བཅུ་གཉིས་པ་དང་། ཕྱག་དྲུག་པ་དང་། ཕྱག་བཞི་པ་དང་། ཧཱ་ལ་ཧཱ་ལ་དང་། དོན་ཡོད་ཞགས་པ་དང་། རྟ་མགྲིན་དཀར་པོ་དང་། མགྲིན་པ་མཐའ་ཡས་དང་། མགྲིན་སྔོན་དང་། མགྲིན་བཟང་
དང་། །མགུལ་བཟང་དང་། མགུལ་དཀར་དང་། མགུལ་སྔོན་དང་། འཇིག་རྟེན་མགུལ་པ་དང་། རྣམ་པར་ལྟ་བ་དང་། ལྟ་བ་དང་། ཀུན་ཏུ་ལྟ་བ་དང་། དབང་ཕྱུག་དང་། འོད་ཟེར་སྟོང་ལྡན་དང་། ཡིད་དང་། ཡིད་ལས་བྱུང་བ་དང་། རྣམ་པར་གྲགས་པའི་

ཡིད་དང་། པདྨ་དང་། ཕྱག་ན་པདྨ་དང་། ཡིད་ལ་བསམ་པ་དང་། དབུགས་འབྱིན་དང་། རབ་ཏུ་རྒོད་པ་དང་། སྐྲ་བཟང་དང་། སྐྲ་མཐར་བྱེད་དང་། རྒྱུ་སྐར་དང་། རྒྱུ་སྐར་གྱི་རྒྱལ་པོ་དང་། ཞི་བ་དང་། བསྐལ་པ་བཟང་པོ་དང་། འདུལ་བྱེད་མཆོག་
སྟེ།