Kinh tạng Tây Tạng (Kangyur Đại Học) — 088_རྒྱུད་འབུམ།_ན

༄༅། །རྒྱུད་འབུམ་ན་པ་བཞུགས་སོ།།

༄༅༅། །རྒྱ་གར་སྐད་དུ། ཨཱརྱ་སརྦ་ཏ་ཐཱ་ག་ཏཱ་དྷིཥྛཱ་ན་ཧྲྀ་དཱ་ཡ་གུ་ཧྱ་དྷཱ་ཏུ་ཀ་རཎྜ་ནཱ་མ་དྷཱ་ར་ཎཱི་མ་ཡཱ་ན་སཱུ་ཏྲ། བོད་སྐད་དུ། འཕགས་པ་དེ་བཞིན་གཤེགས་པ་ཐམས་ཅད་
ཀྱི་བྱིན་གྱིས་བརླབས་ཀྱི་སྙིང་པོ་གསང་བ་རིང་བསྲེལ་གྱི་ཟ་མ་ཏོག་ཅེས་བྱ་བའི་གཟུངས་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་མ་ག་དྷཱ་ན་དྲི་མ་མེད་པའི་ཀུན་དགའ་ར་བ་དང་རིན་པོ་ཆེ་སྣ་བདུན་གྱི་རྫིང་ན་བྱང་ཆུབ་སེམས་དཔའི་དགེ་འདུན་ཆེན་པོ་དང་།
ཉན་ཐོས་ཀྱི་དགེ་འདུན་ཆེན་པོ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་།
མི་མ་ཡིན་པ་བྱེ་བ་མང་པོ་རྣམས་དང་། ཡུལ་གྱི་མི་འབུམ་ཕྲག་དུ་མ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བྱས་ནས་ཐབས་ཅིག་ཏུ་བཞུགས་སོ། །དེ་ནས་འཁོར་གྱི་ནང་དེ་ན་བྲམ་ཟེ་

ཆེན་པོ་ཤིང་སཱ་ལ་ཆེན་པོ་ལྟ་བུ་མཁས་པ། མཛངས་པ། གསལ་བ་ཡིད་གཞུངས་པ། མཐོང་ན་དགའ་བ། དགེ་བ་བཅུའི་ལས་ཀྱི་ལམ་ཡོངས་སུ་བཟུང་བ། དྲི་མེད་ལེགས་སྣང་ཞེས་བྱ་བ་ཞིག་ཡོད་དེ། དེ་ཡང་གཅིག་ཏུ་དཀོན་མཆོག་
གསུམ་ལ་དད་ཅིང་གུས་ལ་ཕྱག་བྱེད་པའི་དགེ་བའི་བསམས་པ་དང་ལྡན་པ། ཞིབ་མོ་བརྟགས་པ། སེམས་ཅན་ཐམས་ཅད་དང་དགེ་བའི་དོན་ལ་བརྩོན་པ། ནོར་ཆེ་བ། ལོངས་སྤྱོད་ཆེ་བ། ཕྱུག་པ། རྫས་མང་བ། ཡོ་བྱད་ཕུན་སུམ་ཚོགས་པ་ཡིན་
ནོ། །དེ་ནས་བྲམ་ཟེ་ཆེན་པོ་དྲི་མེད་ལེགས་སྣང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་ཡང་བཅོམ་ལྡན་འདས་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ལ་མེ་ཏོག་དང་། བདུག་པས་མངོན་པར་མཆོད་དོ། །ན་བཟའ་རིན་འབུམ་རི་བ་
ཡང་གསོལ། བཅོམ་ལྡན་འདས་ལ་མུ་ཏིག་གི་དོ་ཤལ་འབུམ་རི་བ་ཡང་གསོལ་ནས་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་འདུག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྲས་ཚོགས་
ཀྱི་འཁོར་དང་བཅས་པ། བདག་གི་སྡུམ་པར་གདུགས་ཚོད་ལ་སྤྱན་འདྲེན་ན་དེའི་སླད་དུ་བཅོམ་ལྡན་འདས་ཀྱིས་གནང་བར་མཛད་པར་ཅི་གནང་། དེ་ནས་བཅོམ་ལྡན་འདས་ཀྱིས་བྲམ་ཟེ་ཆེན་པོ་དྲི་མེད་ལེགས་སྣང་གིས་སྤྱན་དྲངས་པར་ཐུགས་སུ་ཆུད་ནས་ཅང་མི་
གསུང་བར་གྱུར་པས་གནང་ངོ་། །དེ་ནས་བྲམ་ཟེ་ཆེན་པོ་དྲི་མེད་ལེགས་སྣང་བཅོམ་ལྡན་འདས་ཀྱི་སྤྱན་སྔ་ནས་ཅང་མི་གསུང་བས་གནང་བར་རིག་ནས་དེས་རིངས་པ་རིངས་པར་རང་གི་ཁྱིམ་དུ་སོང་སྟེ། དེ་ཉིད་ཀྱི་མཚན་མོ་འདས་པ་དང་། ཞལ་ཟས་དང་། ཡོ་

བྱད་དང་། ཞལ་ཟས་རོ་བརྒྱ་པ། མང་པོ་བཤམས་ནས་བཀོད་པ་ཆེན་པོས་བཀྲ་ཤིས་ཀྱི་གཞལ་མེད་ཁང་དང་། གཞལ་མེད་ཁང་ཆེན་པོ་སྣ་ཚོགས་དང་། མེ་ཏོག་དང་། བདུག་པ་ཁྱེར་ཏེ། འཁོར་མང་པོ་དང་། སིལ་སྙན་དང་། ཕེག་རྡོབ་པས་བཅོམ་ལྡན་
འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་དུས་ལ་བབ་པར་གསོལ་ཏོ། །དེ་ནས་བཅོམ་ལྡན་འདས་ལ་བྲམ་ཟེ་ཆེན་པོ་དྲི་མེད་ལེགས་སྣང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ནི་གཤེགས་པའི་དུས་ལགས་ཏེ། བཅོམ་ལྡན་འདས་
གཤེགས་པའི་དུས་ཀྱི་ཚོད་ལ་བབ་ན་བདག་ལ་གནང་བར་མཛད་པར་ཅི་གནང་། དེ་ནས་བཅོམ་ལྡན་འདས་ཀྱིས་བྲམ་ཟེ་ཆེན་པོ་དྲི་མེད་ལེགས་སྣང་དབུགས་ཕྱུང་ནས་ཉིད་ཀྱི་འཁོར་ལ་གཟིགས་ཏེ་བཀའ་སྩལ་པ། འཁོར་ཇི་ལྟར་ལྷགས་པ་ཐམས་ཅད་དེང་དོན་ཆེན་པོ་
མཛད་པར་འགྱུར་གྱིས་ཚུར་ཤེག །དེ་ནས་བཅོམ་ལྡན་འདས་གདན་དེ་ལས་བཞེངས་ནས། བཅོམ་ལྡན་འདས་གདན་དེ་ལས་བཞེངས་མ་ཐག་ཏུ་བཅོམ་ལྡན་འདས་ཀྱི་སྐུ་ལས་འོད་ཟེར་ཐ་དད་པ་སྣ་ཚོགས་བྱུང་སྟེ། འོད་ཟེར་གྱི་སྣང་བ་དེས་ཕྱོགས་བཅུའི་སངས་རྒྱས་ཀྱི་ཞིང་
ཐམས་ཅད་སྣང་བར་བྱས་ནས་དེ་བཞིན་གཤེགས་པ་ཐམས་ཅད་ལ་ཡང་དག་པར་བསྐུལ་ཏེ། གཟིགས་ནས་གཤེགས་པར་ཤེས་སོ། །དེ་ནས་བྲམ་ཟེ་ཆེན་པོ་དྲི་མེད་ལེགས་སྣང་གིས་མཆོད་པ་དང་། བཀུར་སྟི་ཆེན་པོས་མཆོད་ཅིང་བཅོམ་ལྡན་འདས་ཀྱི་གཤེགས་ཤུལ་
མཛེས་པ་ཆེར་བྱས་སོ། །འཁོར་མང་པོ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། དབང་ཕྱུག་
ཆེན་པོ་དང་། སྲེད་མེད་ཀྱི་བུ་དང་། རྒྱལ་པོ་ཆེན་པོ་བཞིས་ཀྱང་གཤེགས་ཤུལ་མཛེས་པར་བྱས་སོ། །དེ་ནས་བཅོམ་ལྡན་འདས་དང་ཧ་ཅང་མི་རིང་བའི་ལམ་གྱི་བར་གྱི་ནང་ཞིག་ན་སྐྱེད་མོས་ཚལ་བདེ་བྱེད་ཅེས་བྱ་བ་ཞིག་ཡོད་དོ། །སྐྱེད་མོས་ཚལ་དེའི་ནང་ན་མཆོད་རྟེན་

རྙིང་པ་ཆེན་པོ་ཞིག་ཡོད་དེ། ཞིག་པ། ཚེར་མས་གང་བ་རྩྭ་དང་། ཤིང་དང་། གྱོ་མོས་ཀུན་ཏུ་གང་བ་ཕྱག་དར་གྱི་ཕུང་པོ་ལྟ་བུ་ཞིག་ཡོད་དོ། །དེ་ནས་བཅོམ་ལྡན་འདས་དེའི་དྲུང་དུ་གཤེགས་པ་དང་། མཆོད་རྟེན་རྙིང་པ་ཕྱག་དར་གྱི་ཕུང་པོ་ལྟ་
བུ་དེ་ཡང་ཀུན་ནས་འབར་ཞིང་འོད་ཟེར་འབར་བ་ཁ་དོག་སྣ་ཚོགས་པ་དག་བྱུང་ངོ་། །ཕྱག་དར་དང་གྱོ་མོའི་ཕུང་པོ་དེ་ལས་ཀྱང་ལེགས་སོ་ཞེས་བྱ་བའི་སྒྲ་བྱུང་ངོ་། །དེ་བཞིན་གཤེགས་པ་ཤཱཀྱ་ཐུབ་པ་ལེགས་སོ་ལེགས་སོ། །དེང་ནི་གཤེགས་པའི་ལྟས་བཟང་པོའོ། །
བྲམ་ཟེ་ཆེན་པོ་དེ་བཞིན་གཤེགས་པ་སྤྱན་དྲངས་པ་ན་ཡང་ཁྱོད་ལེགས་སོ། །དེང་ཁྱོད་ལ་དོན་ཆེན་པོ་མཛད་པར་འགྱུར་རོ། །དེ་ནས་བཅོམ་ལྡན་འདས་དེ་བཞིན་གཤེགས་པས་མཆོད་རྟེན་རྙིང་པ་ཕྱག་དར་གྱི་ཕུང་པོ་ལྟ་བུ་དེ་ལ་ཡན་ལག་ལྔས་ཕྱག་མཛད་ནས་ལན་གསུམ་
བསྐོར་བ་མཛད་ནས། ཉིད་ཀྱི་སྐུ་ལས་ན་བཟའ་གསིལ་ནས་མཆོད་རྟེན་རྙིང་པ་ཕྱག་དར་གྱི་ཕུང་པོ་ལྟ་བུ་དེ་ལ་གསོལ་ཏེ། བཅོམ་ལྡན་འདས་ཀྱིས་མཆི་མ་བྱུང་བ་ཆེན་པོ་ཕྱུང་བས་བཤུམས་པ་མཛད་ནས། བཅོམ་ལྡན་འདས་ཀྱིས་འཛུམ་པ་བསྟན་ཏོ། །འཛུམ་པ་བསྟན་པ་དེས་
ཕྱོགས་བཅུའི་དེ་བཞིན་གཤེགས་པ་ཐམས་ཅད་ལག་མཐིལ་ན་བཞུགས་པ་བཞིན་དུ་མཐོང་ངོ་། །དེ་བཞིན་གཤེགས་པ་དེ་དག་ཐམས་ཅད་ཀྱིས་ཀྱང་འོད་ཟེར་བཀྱེ་སྟེ། མཆོད་རྟེན་རྙིང་པའི་ཕུང་པོ་ཆེན་པོ་དེར་ཞུགས་སོ། །དེ་ནས་འཁོར་མང་པོ་འདུས་པ་དེ་དག་ཡ་མཚན་ཆེན་པོར་
གྱུར་ཅིང་ཡིད་ཆེས་ཏེ་འཁོད་པར་གྱུར་ཏོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལུས་ནི་འདར། སྙིང་ནི་འགུལ། རྡོ་རྗེ་ནི་གསོར་ཞིང་རིངས་པ་རིངས་པར་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་
ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཤུམས་པའི་སྔ་ལྟས་ཆེན་པོ་གདའ་བ་གང་གིས་ན་བཅོམ་ལྡན་འདས་ཀྱི་སྤྱན་མཆི་མས་གང་བར་བསྟན་པའི་སྔ་ལྟས་གདའ་བ་བཅོམ་ལྡན་འདས་ཅི་ལགས། ཅིའི་སླད་དུ་བཅོམ་ལྡན་འདས་ཀྱིས་འཁོར་

འདིའི་ནང་དུ་ཞུ་བ་འདི་སྐབས་དབྱེ་བར་ཅི་གནང་། དེ་ནས་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་རིང་བསྲེལ་གྱི་ཕུང་པོ་དེ་བཞིན་གཤེགས་པའི་མཆོད་རྟེན་དེ་བཞིན་གཤེགས་པ་བྱེ་བ་ཏིལ་གྱི་གང་
བུ་སྙེད་ཐམས་ཅད་ཀྱི་སྙིང་པོའི་གཟུངས་ཀྱི་ཕྱག་རྒྱའི་མཆོད་རྟེན་གྱི་ཆོས་ཀྱི་རྣམ་གྲངས་ཡོད་དེ། ལག་ན་རྡོ་རྗེ་ཆོས་ཀྱི་རྣམ་གྲངས་འདི་གང་ན་གནས་པ་དེར། དེ་བཞིན་གཤེགས་པ་འབུམ་ཕྲག་བྱེ་བ་ཏིལ་གྱི་གང་བུ་སྙེད་གནས་ཤིང་དེ་བཞིན་གཤེགས་པ་ཁར་ཡས་ཁར་ཡས་ཞེས་བྱ་བ་སྙེད་
ཀྱི་སྐུ་གདུང་རིང་བསྲེལ་རྣམས་གནས་སོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གནས་སོ། །དེ་བཞིན་གཤེགས་པ་འབུམ་ཕྲག་བྱེ་བ་ཏིལ་གྱི་གང་བུ་སྙེད་དགུ་བཅུ་རྩ་དགུའི་གཙུག་ཏོར་དང་། སྤྱི་བོ་ཡང་དེ་བཞིན་དུ་གནས་སོ། །ལག་ན་རྡོ་རྗེ་གང་ན་ཆོས་ཀྱི་རྣམ་གྲངས་འདི་གནས་
པ་དེ་ནི་དེ་བཞིན་གཤེགས་པའི་མཆོད་རྟེན་དུ་ལུང་བསྟན་ཏོ། །ལག་ན་རྡོ་རྗེ་ཆོས་ཀྱི་རྣམ་གྲངས་འདི་ནི་འདི་ལྟར་ཕན་ཡོན་ཆེ་ཞིང་མཐུ་ཆེ་བ་ཡིན་ནོ། །ལག་ན་རྡོ་རྗེ་ཆོས་ཀྱི་རྣམ་གྲངས་འདི་ནི་ཕན་ཡོན་ཆེ་བ་ཡིན་ནོ། །ལག་ན་རྡོ་རྗེ་ཆོས་ཀྱི་རྣམ་གྲངས་འདི་ནི་བཀྲ་ཤིས་ཐམས་ཅད་
རྫོགས་པར་བྱེད་པ་ཡིན་ནོ། །དེ་ནས་བཅོམ་ལྡན་འདས་ལས་འཁོར་མང་པོ་འདུས་པ་དེ་དག་གིས་ཆོས་ཀྱི་རྣམ་གྲངས་འདི་ཐོས་ནས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་ལ། དེ་ནས་ཉེ་བའི་ཉོན་མོངས་པ་དང་བྲལ་ལོ། །ཁ་ཅིག་གིས་ནི་རྒྱུན་དུ་ཞུགས་པའི་འབྲས་
བུ་ཐོབ་བོ། །ཁ་ཅིག་གིས་ནི་དགྲ་བཅོམ་པ་ཉིད་ཐོབ་བོ། །ཁ་ཅིག་གིས་ནི་རང་བྱང་ཆུབ་ཀྱི་འབྲས་བུའོ། །ཁ་ཅིག་གིས་ནི་ཕྱིར་མི་འོང་བའི་འབྲས་བུའོ། །ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུའོ། །ཁ་ཅིག་གིས་ནི་བྱང་ཆུབ་སེམས་དཔའི་ས་ལ་གནས་སོ། །
ཁ་ཅིག་གིས་ནི་བྱང་ཆུབ་ཏུ་ལུང་བསྟན་པ་ཐོབ་བོ། །ཁ་ཅིག་གིས་ནི་ས་དང་པོའོ། །ཁ་ཅིག་གིས་ནི་ས་གཉིས་པའོ། །ཁ་ཅིག་གིས་ནི་ས་གསུམ་པའོ། །ཁ་ཅིག་གིས་ནི་ས་བཞི་པའོ། །ཁ་ཅིག་གིས་ནི་ས་ལྔ་པའོ། །ཁ་ཅིག་གིས་ནི་ས་དྲུག་པའོ། །ཁ་ཅིག་གིས་ནི་

ས་བདུན་པའོ། །ཁ་ཅིག་གིས་ནི་ས་བརྒྱད་པའོ། །ཁ་ཅིག་གིས་ནི་ས་དགུ་པའོ། །ཁ་ཅིག་གིས་ནི་ས་བཅུ་པ་ལ་གནས་པར་གྱུར་ཏོ། །ཁ་ཅིག་གིས་ནི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་སོ། །བྲམ་ཟེ་ཆེན་པོ་དེ་ཡང་མངོན་པར་ཤེས་པ་ལྔ་ཐོབ་ཅིང་དྲི་མ་
དང་བྲལ་བ་དང་། སེར་སྣ་དང་། ཕྲག་དོག་དང་བྲལ་བར་གྱུར་ཏོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་ཆོ་འཕྲུལ་ཆེན་པོ་འདི་ལྟ་བུ་མཐོང་ནས་ངོ་མཚར་དང་རྨད་དུ་བྱུང་བ་ཆེན་པོར་གྱུར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་
རྣམ་གྲངས་ཀྱི་མཚན་ཐོས་པས་ཀྱང་ཕན་ཡོན་གྱི་ཡོན་ཏན་གྱིས་བརྒྱན་པ་འདི་ལྟ་བུ་ཐོབ་ན། བཅོམ་ལྡན་འདས་གང་གི་སླད་དུ་ཕུ་དུད་དང་། བཀུར་སྟི་ཤིན་ཏུ་མང་པོ་བགྱིད་པར་འགྱུར་བ་ལྟ་ཅི་སྨོས་ཏེ། བཅོམ་ལྡན་འདས་དེ་བསོད་ནམས་ཀྱི་ཕུང་པོ་ཇི་ལྟ་བུ་ཡང་མཐོང་བར་འགྱུར།
བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཉོན་ཅིག །རིགས་ཀྱི་བུའམ་རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལས་ཆོས་ཀྱི་རྣམ་གྲངས་འདི་འདྲི་བར་བྱེད་ན། ལག་ན་རྡོ་རྗེ་དེས་དེ་བཞིན་གཤེགས་པ་འབུམ་
ཕྲག་བྱེ་བ་ཁྲག་ཁྲིག་ཏིལ་གྱི་གང་བུ་སྙེད་དགུ་བཅུ་རྩ་དགུའི་བསོད་ནམས་ཀྱི་ཕུང་པོ་དང་། དགེ་བའི་རྩ་བ་བསྐྱེད་པ་དང་ལྡན་པར་འགྱུར་ཞིང་། དེ་བཞིན་གཤེགས་པ་དེ་རྣམས་ཀྱིས་རྗེས་སུ་བཟུང་བར་འགྱུར་རོ། །གང་ཞིག་ཀློག་པར་བྱེད་པ་དེ་དག་ཀྱང་དེ་བཞིན་གཤེགས་པ་
ཐམས་ཅད་ཀྱིས་གསུངས་པའི་མདོ་སྡེ་རྣམས་བཅང་བར་འགྱུར་རོ། །གང་ཞིག་ཆོས་ཀྱི་རྣམ་གྲངས་འདི་ལྟ་བུ་འཛིན་པ་དེ་དག་ཕྱོགས་བཅུའི་དེ་བཞིན་གཤེགས་པ་འབུམ་ཕྲག་བྱེ་བ་ཁྲག་ཁྲིག་ཏིལ་གྱི་གང་བུ་སྙེད་དགུ་བཅུ་རྩ་དགུ་དང་། ཕྱོགས་རེ་རེའི་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གཟུང་བར་འགྱུར་ཞིང་། ཉིན་གཅིག་བཞིན་གཟིགས་པར་འགྱུར་རོ། །གང་དག་ཆོས་ཀྱི་རྣམ་གྲངས་འདི་ལ་མཆོད་པ་བྱེད་པ་དང་། ཁོང་དུ་ཆུད་པར་བྱེད་པ་དང་། མེ་ཏོག་དང་། བདུག་པ་དང་། དྲི་དང་། མེ་ཏོག་

ཕྲེང་རྒྱུད་དང་། བྱུག་པ་དང་། ན་བཟའ་དང་། ལྷབ་ལྷུབ་དང་། རྒྱན་གྱིས་མཆོད་པ་བྱེད་པའི་རིགས་ཀྱི་བུའམ། རིགས་ཀྱི་བུ་མོའམ། དགེ་བསྙེན་ནམ། དགེ་བསྙེན་མ་དེས་ཕྱོགས་བཅུ་དང་། ཕྱོགས་རེ་རེའི་དེ་བཞིན་གཤེགས་པ་འབུམ་ཕྲག་བྱེ་བ་ཁྲག་ཁྲིག་ཏིལ་
གྱི་གང་བུ་སྙེད་དགུ་བཅུ་རྩ་དགུ་ལ་ལྷ་རྫས་ཀྱི་མེ་ཏོག་དང་། བདུག་པ་དང་། དྲི་དང་། མེ་ཏོག་ཕྲེང་རྒྱུད་དང་། བྱུག་པ་དང་། ན་བཟའ་དང་། ལྷབ་ལྷུབ་དང་། རྒྱན་གྱིས་མཆོད་པར་འགྱུར་རོ། །ཕྱོགས་རེ་རེའི་དེ་བཞིན་གཤེགས་པ་ལ་དེ་བཞིན་གཤེགས་པ་མཆོད་
པའི་སྤྲིན་རིན་པོ་ཆེ་སྣ་བདུན་ལས་བྱས་པའི་རི་རབ་ཆེན་པོ་ཙམ་གྱི་ཕུང་པོའི་ཡོན་ཏན་བྱུང་བ་འབྱུང་བར་འགྱུར་རོ། །དེ་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་
མ་ཡིན་པ་དེ་རྣམས་དང་། སེམས་ཅན་གྱི་ཚོགས་ཆེན་པོ་དེ་རྣམས་ཀྱང་ཡ་མཚན་དུ་གྱུར་ནས་གཅིག་ལ་གཅིག་འདི་སྐད་དུ་མཆོད་རྟེན་རྙིང་པ་ཕྱག་དར་དང་། གྱོ་མོའི་ཕུང་པོ་དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་གྱིས་བརླབས་ནས་འདི་ནི་རྫུ་འཕྲུལ་གྱི་ཆོ་འཕྲུལ་ཆེན་པོ་
སྟོན་པས་མཐུ་ཆེ་བ་ཡིན་ནོ་ཞེས་ཟེར་རོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་སུས་ཕྱག་དར་གྱི་ཕུང་པོར་བགྱིས་པ་ལས་རིན་པོ་ཆེའི་མཆོད་རྟེན་དུ་གདའ་བར་བགྱིས། བཅོམ་ལྡན་འདས་ཀྱིས་བཀའ་
སྩལ་པ། ལག་ན་རྡོ་རྗེ་འདི་ཕྱག་དར་གྱི་ཕུང་པོ་མ་ཡིན་གྱི་འདི་ནི་རིན་པོ་ཆེ་སྣ་བདུན་ལས་བྱས་པའི་རིན་པོ་ཆེའི་མཆོད་རྟེན་ཆེན་པོ་ཡིན་ནོ། །ལག་ན་རྡོ་རྗེ་འོན་ཀྱང་སེམས་ཅན་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པ་སྟོན་པས་ནུབ་པར་གྱུར་གྱི། སངས་རྒྱས་རྣམས་ཀྱི་དེ་བཞིན་གཤེགས་པའི་
རིང་བསྲེལ་གྱི་སྙིང་པོའི་མཆོད་རྟེན་རྣམས་ནི་འཇིག་པའམ། འགྱེས་པར་མི་འགྱུར་ཏེ། དེ་བཞིན་གཤེགས་པའི་རྡོ་རྗེའི་སྙིང་པོའི་སྐུ་ཇི་ལྟར་འགྱེས་པར་འགྱུར། འོན་ཀྱང་སེམས་ཅན་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པར་སྣང་བ་ལས་ཀྱང་ནུབ་པར་གྱུར་ཏོ། །ལག་ན་རྡོ་རྗེ་གཞན་

ཡང་ཕྱི་མའི་དུས་ཕྱི་མའི་ཚེ། སྡིག་པ་ཀུན་ཏུ་སྤྱོད་པ་དང་། སྡིག་པ་ཅན་དང་། དམྱལ་བ་ལ་གཞོལ་བ་ཤིན་ཏུ་ཚབས་ཆེར་འབྱུང་བར་འགྱུར། སངས་རྒྱས་མ་ཡིན། ཆོས་མ་ཡིན། དགེ་འདུན་ཚོལ་བ་མ་ཡིན་ཞིང་དགེ་བའི་རྩ་བ་དག་ཀྱང་བསྐྱེད་པར་མི་བྱེད་དེ་རྒྱུ་དེ་
དང་། རྐྱེན་དེས་དམ་པའི་ཆོས་ནུབ་བོ། །ལག་ན་རྡོ་རྗེ་དེའི་ཕྱིར་ངའི་མིག་གཉིས་མཆི་མས་གང་ལ་དེ་བཞིན་གཤེགས་པ་ཐམས་ཅད་ཀྱང་མཆི་མ་བྱུང་ངོ་། །དམ་པའི་ཆོས་ཀྱི་རྣམ་གྲངས་འདི་ལྟ་བུ་ནི་ནུབ་པར་འགྱུར་གྱི། དེ་བཞིན་གཤེགས་པའི་མཆོད་རྟེན་ནི་མ་གཏོགས་ཏེ།
དེ་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་འགྱུར་རོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཞིག་ཆོས་ཀྱི་རྣམ་གྲངས་འདི་བྲིས་ཏེ་མཆོད་རྟེན་གྱི་ནང་དུ་འཇོག་ན་དགེ་བའི་རྩ་བ་
ཅི་ཞིག་སྐྱེ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་གང་ཞིག་ཆོས་ཀྱི་རྣམ་གྲངས་འདི་བྲིས་ཏེ་མཆོད་རྟེན་གྱི་ནང་དུ་བཞག་པ་དེ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྙིང་པོ་རིང་བསྲེལ་གྱི་མཆོད་རྟེན་དུ་འགྱུར་རོ། །དེ་བཞིན་གཤེགས་པ་ཐམས་ཅད་
ཀྱི་གཟུངས་ཀྱི་སྙིང་པོ་གསང་བས་བྱིན་གྱིས་བརླབས་པའི་མཆོད་རྟེན་དུ་འགྱུར་རོ། །དེ་བཞིན་གཤེགས་པ་ཏིལ་གྱི་གང་བུ་སྙེད་དགུ་བཅུ་རྩ་དགུའི་མཆོད་རྟེན་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་དང་། སྤྱན་གྱི་མཆོད་རྟེན་དུ་བྱིན་གྱིས་བརླབས་པར་
འགྱུར་རོ། །གང་ཞིག་སངས་རྒྱས་ཀྱི་གཟུགས་བརྙན་ནམ། མཆོད་རྟེན་ཐམས་ཅད་ཀྱི་ནང་དུ་འཇོག་པར་བྱེད་ན་དེ་བཞིན་གཤེགས་པའི་གཟུགས་བརྙན་རིན་པོ་ཆེ་སྣ་བདུན་གྱི་རང་བཞིན་དུ་བྱིན་གྱིས་བརླབས་པར་འགྱུར་རོ། །འཁོར་ལོའི་ཕྲེང་བ་དང་། དྲིལ་བུ་གཡེར་ཀའི་
དྲ་བར་སྦྲེལ་བ་དང་བཅས་པ་དང་། བཀྲ་ཤིས་དང་། ཆར་ཀབ་ཀྱི་གཟུགས་དང་། དྲིལ་བུར་བཅས་པ་རིན་པོ་ཆེ་སྣ་བདུན་གྱི་རང་བཞིན་དུ་བྱིན་གྱིས་བརླབས་པར་འགྱུར་རོ། །དེ་བཞིན་གཤེགས་པ་ཐམས་ཅད་དང་། ཆོས་ཀྱི་རྣམ་གྲངས་འདིའི་མཐུ་དང་བྱིན་གྱིས་བརླབས་དང་།

བདེན་པ་དང་། དམ་ཚིག་གིས་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་བྱིན་གྱིས་བརླབས་པར་འགྱུར་རོ། །སེམས་ཅན་གང་དག་མཆོད་རྟེན་དེ་ལ་ཕུ་དུད་དང་། བསྟི་སྟང་བྱེད་པ་དེ་དག་ངེས་པར་ཕྱིར་མི་ལྡོག་པར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་འཚང་རྒྱ་བར་འགྱུར་རོ། །ཕྱག་འཚལ་བ་གཅིག་དང་། བསྐོར་བ་བྱེད་པ་གཅིག་གིས་མནར་མེད་པ་ཐུག་པ་ལ་སོགས་པ་རྣམས་ལས་ཡོངས་སུ་ཐར་བར་འགྱུར་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །
གནས་གང་ན་མཆོད་རྟེན་ནམ་གཟུགས་བརྙན་འདི་ལྟ་བུ་གནས་པའི་ས་ཕྱོགས་དེ་ཡང་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །ཕྱོགས་དེར་ཀླུ་མི་སྲུན་པས་ཀྱང་མི་ཚུགས་པར་འགྱུར། སད་དང་སེར་བས་ཀྱང་མི་ཚུགས་པར་འགྱུར། གནས་དེར་
སྲོག་ཆགས་མི་སྲུན་པའམ་གདུག་པས་ཀྱང་མི་ཚུགས་པར་འགྱུར། གཅན་གཟན་གྱིས་ཀྱང་མི་ཚུགས་པར་འགྱུར། བྱ་མི་སྲུན་པ་དང་། ནེ་ཙོ་དང་། རི་སྐེགས་དང་། བྱི་བ་དང་། སྲེ་མོ་དང་། ཤ་སྦྲང་དང་། སྦྲང་བུ་དང་། བྱེ་བ་དང་། སྦྲང་མ་མཆུ་གསུམ་པ་དང་། མཆུ་རིངས་དང་།
རྟ་བླའི་འཇིགས་པའང་མི་འབྱུང་བར་འགྱུར། སྦྲུལ་གདུག་པས་ཀྱང་མི་ཚུགས་པར་འགྱུར་རོ། །ཕྱོགས་དེར་ཡམས་ཀྱི་ནད་དང་། ནད་འགོ་བ་དང་། འཁྲུག་པའང་མི་འབྱུང་བར་འགྱུར། གནོད་སྦྱིན་དང་། སྲིན་པོ་དང་། འབྱུང་པོ་དང་། ཡི་དགས་དང་། འདྲེ་དང་།
བརྗེད་བྱེད་ཀྱི་འཇིགས་པ་ཡང་མི་འབྱུང་བར་འགྱུར། གདོན་ཐམས་ཅད་ཀྱིས་ཀྱང་མི་ཚུགས་པར་འགྱུར། རིམས་ཐམས་ཅད་ཀྱིས་ཀྱང་མི་ཚུགས་པར་འགྱུར། ནད་ཐམས་ཅད་དང་། འབྲས་དང་། ཕོལ་མིག་དང་། ལྷོག་པ་དང་། མཚན་བར་རྡོལ་བ་དང་། རྐང་ཤུ་དང་།
གཡན་པ་དང་། མཛེས་ཀྱང་མི་ཚུགས་པར་འགྱུར་ཞིང་མཆོད་རྟེན་དེ་མཐོང་བ་ཙམ་གྱིས་ཐམས་ཅད་འབྱང་བར་འགྱུར་རོ། །ཕྱོགས་དེར་བ་ལང་གི་ནད་དང་། ཕྱུགས་ནད་དང་། དུད་འགྲོའི་སྐྱེ་གནས་རྣམ་པ་མང་པོ་གཞན་དག་གི་ནད་དང་། སྐྱེས་པ་དང་། བུད་མེད་དང་། ཁྱེའུ་དང་།

བུ་མོའི་ནད་ཀྱིས་ཀྱང་ནམ་ཡང་ཚུགས་པར་མི་འགྱུར་རོ། །དུས་མ་ཡིན་པར་འཆི་བས་ཀྱང་དུས་མ་ཡིན་པར་འཆི་བར་མི་འགྱུར། དུག་གིས་མ་ཡིན། མཚོན་གྱིས་མ་ཡིན་ཞིང་མེ་དང་། ཆུས་ཀྱང་ནམ་ཡང་མི་ཚུགས་པར་འགྱུར། ཕ་རོལ་གྱི་དམག་ཚོགས་ཀྱི་
འཇིགས་པས་མ་ཡིན། ལོ་ཉེས་ཀྱི་འཇིགས་པས་ཀྱང་ནམ་ཡང་མི་ཚུགས་པར་འགྱུར། རྒྱལ་པོ་ཆེན་པོའི་དམག་གི་འཇིགས་པ་ཡང་མི་འབྱུང་བར་འགྱུར་རོ། །རྒྱལ་པོ་ཆེན་པོ་བཞིའང་རྟག་ཏུ་རྒྱུན་མི་ཆད་པར་ས་ཕྱོགས་དེར་སྲུང་བར་བྱེད། ཡོངས་སུ་སྐྱོང་བར་བྱེད་དོ། །གནོད་
སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་པོ་དེ་དག་ཀྱང་རྟག་ཏུ་རྒྱུན་མི་ཆད་པར་སྲུང་བ་དང་། སྐྱོབ་པ་དང་། སྦེད་པ་བྱེད་པར་འགྱུར་རོ། །རྒྱུ་སྐར་ཉི་ཤུ་རྩ་བརྒྱད་དང་། ཟླ་བ་དང་། ཉི་མ་དང་། མཇུག་རིངས་ཆེན་པོའང་ཉིན་མཚན་མཐུན་པར་བྱེད་པར་འགྱུར་རོ། །ཀླུའི་རྒྱལ་པོ་ཐམས་
ཅད་ཀྱང་རྟག་ཏུ་རྒྱུན་མི་འཆད་པར་མདངས་མི་འཕྲོག་ཅིང་ལེགས་པ་ཁོ་ནར་ཆར་གྱི་རྒྱུན་འབེབས་པར་འགྱུར་རོ། །ལྷ་ཐམས་ཅད་ཀྱང་མཆོད་རྟེན་ཆེན་པོ་དེ་ལ་ཕྱག་འཚལ་བ་དང་། བཀུར་སྟི་བྱ་བ་དང་། མཆོད་པ་བྱ་བའི་ཕྱིར་གནས་སུམ་ཅུ་རྩ་གཉིས་ནས་དུས་གསུམ་དུ་འོང་ངོ་། །ཡུལ་
ན་གནས་པ་ཐམས་ཅད་ཀྱང་མཆོད་རྟེན་དང་། གཟུགས་བརྙན་དེའི་དྲུང་དུ་དུས་གསུམ་དུ་འོང་ངོ་། །སྟོད་པར་བྱེད། སྐོར་བ་བྱེད་པར་འགྱུར་རོ། །ལྷ་རྣམས་ཀྱི་དབང་པོ་བརྒྱ་བྱིན་ཀྱང་ལྷའི་བུ་མོ་དང་། ལྷའི་ཚོགས་རྣམས་དང་ལྷན་ཅིག་རྟག་ཏུ་རྒྱུན་མི་འཆད་པར་མཆོད་རྟེན་ནམ།
གཟུགས་བརྙན་དེའི་དྲུང་དུ་ཉིན་མཚན་དུས་གསུམ་དུ་འོང་སྟེ། ཕྱག་འཚལ་བ་དང་། མཆོད་པ་ལ་འོང་ངོ་། །དེ་བཞིན་གཤེགས་པ་ཐམས་ཅད་ཀྱང་རྟག་པར་དགོངས་པ་དང་། བྱིན་གྱི་རློབ་པར་འགྱུར་རོ། །མཆོད་རྟེན་དང་། གཟུགས་བརྙན་ཇི་ལྟ་ཇི་ལྟ་བུ་ལས་བྱེད་པའི་
སའིའམ། རྡོའིའམ། ཤིང་གིའམ། དངུལ་གྱིའམ། གསེར་གྱིའམ། ཟངས་ཀྱིར་བྱེད་པ་དང་། ཆོས་ཀྱི་རྣམ་གྲངས་འདི་ཡང་བྲིས་ཏེ། དེའི་ནང་དུ་བཞག་ན་བཞག་མ་ཐག་ཙམ་གྱིས་རིན་པོ་ཆེ་སྣ་བདུན་གྱི་རང་བཞིན་དུ་བྱིན་གྱིས་བརླབས་པར་འགྱུར་རོ། །འཕང་དང་། ཐེམ་

སྐས་དང་། ཁ་རན་དང་། འཁོར་ལོའི་ཕྲེང་བ་དང་། བཀྲ་ཤིས་དང་། གདུགས་དང་། དྲིལ་བུ་འཕྱང་བ་དང་། བ་དན་དང་། དྲིལ་བུ་གཡེར་ཀའི་དྲ་བ་ཐམས་ཅད་ཀྱང་རིན་པོ་ཆེ་སྣ་བདུན་གྱི་རང་བཞིན་དུ་འགྱུར་རོ། །ཕྱོགས་བཞི་ཀུན་ན་ཡང་དེ་བཞིན་གཤེགས་པའི་
གཟུགས་བརྙན་གནས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པའི་མཆོད་རྟེན་རིན་པོ་ཆེ་དང་། སྐུ་གདུང་གི་སྙིང་པོའི་མཆོད་རྟེན་དང་། མཆོད་གནས་སུ་འགྱུར་རོ། །སྐུ་གཟུགས་དང་། མཆོད་རྟེན་དེ་འོག་
མིན་གྱི་གནས་ཀྱི་ལྷས་ཀྱང་ཡོངས་སུ་བསྐྱང་བ་དང་། མཆོད་པས་ཡོངས་སུ་གཟུང་བར་འགྱུར་རོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ཡོན་ཏན་གྱི་ཁྱད་པར་འདི་ལྟ་བུར་
འགྱུར། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཀྱིས་སྙིང་པོ་གསང་བ་རིང་བསྲེལ་གྱི་ཟ་མ་ཏོག་གི་ཕྱག་རྒྱའི་གཟུངས་ཡིན་ཏེ། ལག་ན་རྡོ་རྗེ་དེས་ན་མཐུ་འདི་ནི་ཡོན་ཏན་གྱི་ཁྱད་པར་འདི་ལྟ་བུར་བྱིན་གྱི་རླབས་ཀྱིས་བྱིན་གྱིས་
བརླབས་པ་ཡིན་ནོ། །རྡོ་རྗེ་འཛིན་གྱིས་གསོལ་པ། བཅོམ་ལྡན་འདས་རིན་པོ་ཆེའི་ཟ་མ་ཏོག་གི་ཕྱག་རྒྱའི་གཟུངས་ཀྱི་ཆོས་ཀྱི་རྣམ་གྲངས་བཤད་པར་ཅི་གནང་། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཉོན་ཅིག་དེ་བཞིན་གཤེགས་པ་འདས་པ་དང་། མ་བྱོན་པ་
དང་། ད་ལྟར་བྱུང་བ་དང་། གང་དག་ཡོངས་སུ་མྱ་ངན་ལས་འདས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱི་དེ་བཞིན་གཤེགས་པའི་སྐུ་ནི་གསུམ་སྟེ། ཆོས་ཀྱི་སྐུ་དང་། ལོངས་སྤྱོད་རྫོགས་པའི་སྐུ་དང་། དེ་བཞིན་དུ་སྤྲུལ་པའི་སྐུ་སྟེ། དུས་གསུམ་པ་ཐམས་ཅད་ཀྱི་རིང་
བསྲེལ་གྱི་ཟ་མ་ཏོག་གི་ཕྱག་རྒྱའི་གཟུངས་ཀྱི་ཆོས་ཀྱི་རྣམ་གྲངས་ཡིན་ནོ། །ན་མ་སྟྲཻ་ཡ་དྷཱི་ཀཱ་ནཱཾ། སརྦྦ་ཏ་ཐཱ་ག་ཏཱ་ནཱཾ། ཨོཾ་བྷུ་བི་བྷ་བཱན་བ་རེ་བ་ཙ་ཊཽ། ཙུ་ལུ་ཙུ་ལུ། དྷ་ར་དྷ་ར། སརྦྦ་ཏ་ཐཱ་ག་ཏཱ། དྷཱ་ཏུ་དྷ་རེ། པདྨ་གརྦྷེ། ཛ་ཡ་བ་རེ། ཨ་ཙ་ལེ། སྨ་ར་ཏ་ཐཱ་ག་ཏ། དྷརྨྨ་ཙཀྲ། པྲ་བརྟ་ན། བཛྲ་བོ་དྷི་

མཎྜ་ཨ་ལཾ་ཀཱ་ར། ཨ་ལཾ་ཀྲྀ་ཏེ། སརྦྦ་ཏ་ཐཱ་ག་ཏ། ཨ་དྷིཥྛི་ཏེ། བོ་དྷ་ཡ་བོ་དྷ་ཡ། བོ་དྷ་ནི་བོ་དྷ་ནི། བུདྷྱ་བུདྡྷྱ། སྃ་བོ་དྷ་ནི་སྃ་བོ་དྷ་ཡ། ཙ་ལ་ཙ་ལ། ཙ་ལནྟུ་སརྦྦ་ཨཱ་བ་ར་ཎཱ་ནི། སརྦ་པཱ་པྃ་བི་ག་ཏེ། ཧུ་རུ་ཧུ་རུ། སརྦྦ་ཤོ་ཀ་བི་ག་ཏེ། སརྦ་ཏ་ཐཱ་ག་ཏ་ཧྲྀ་ད་ཡ།
བཛྲི་ཎི། སམྦྷ་བ་སམྦྷ་བ། སརྦ་ཏ་ཐཱ་ག་ཏ་གུ་ཧྱེ། ངྷཱ་ར་ཎི་མུ་དྲེ། བུད་དྷེ། །སུ་བུད་དྷེ། སརྦ་ཏ་ཐཱ་ག་ཏ་ཨ་དྷིཥྛི་ཏེ། དྷཱ་ཏུ་གརྦྷེ་སྭཱ་ཧཱ། ས་མ་ཡ་ཨ་དྷིཥྛི་ཏེ་སྭཱ་ཧཱ། སརྦ་ཏ་ཐཱ་ག་ཏ་ཧྲྀ་ད་ཡ། དྷཱ་ཏུ་མུ་དྲེ་སྭཱ་ཧཱ། སུ་པྲ་ཏིཥྛི་ཏ་སྟཱུཔེ་ཏ་ཐཱ་ག་ཏ་ཨ་དྷིཥྛི་ཏེ། ཧཱུྃ་ཧཱུྃ་སྭཱ་ཧཱ། ཨོཾ་
སརྦ་ཏ་ཐཱ་ག་ཏ་ཨུཥྞཱི་ཥ་དྷཱ་ཏུ་མུ་དྲཱ་ཎི་སརྦ་ཏ་ཐཱ་ག་ཏ་དྷརྨ་དྷཱ་ཏུ་བི་བྷཱུ་ཥི་ཏ་ཨ་དྷིཥྛི་ཏེ་ཧུ་རུ་ཧུ་རུ། ཧཱུྃ་ཧཱུྃ་སྭཱ་ཧཱ། བཅོམ་ལྡན་འདས་ཀྱིས་རིང་བསྲེལ་གྱི་ཟ་མ་ཏོག་གི་ཕྱག་རྒྱའི་གཟུངས་འདི་བཤད་མ་ཐག་ཏུ་ཕྱོགས་བཅུ་དང་། ཕྱོགས་རེ་རེ་ཀུན་ནས་དེ་བཞིན་གཤེགས་པ་འབུམ་ཕྲག་བྱེ་བ་
ཁྲག་ཁྲིག་ཏིལ་གྱི་གང་བུ་སྙེད་དགུ་བཅུ་རྩ་དགུ་གཤེགས་ནས། བཅོམ་ལྡན་འདས་ཤཱཀྱ་ཐུབ་པ་ལ་ཤཱཀྱ་ཐུབ་པས་སེམས་ཅན་ཐམས་ཅད་ཀྱི་དོན་དུ་འཛམ་བུའི་གླིང་དུ་ཆོས་ཀྱི་རྣམ་གྲངས་འདི་ལྟ་བུའི་ཆོས་ཀྱི་གཏེར་བཞག་པ་དང་། རིང་བསྲེལ་གྱི་སྙིང་པོའི་མཆོད་རྟེན་བྱིན་གྱིས་
བརླབས་པ་ལེགས་སོ། །ལེགས་སོ་ཞེས་བྱ་བ་བྱིན་ནོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་དང་། བྱིན་གྱིས་བརླབས་པ་ཡིན་ནོ། །གང་ན་རིང་བསྲེལ་གྱི་ཕྱག་རྒྱའི་གཟུངས་འདི་སྟོན་པར་བྱེད་དམ། མཆོད་རྟེན་གྱི་ནང་དུ་འཇོག་གམ། གཟུགས་བརྙན་
གྱི་ནང་དུ་འཇོག་པར་བྱེད་པ་དེར། དེ་བཞིན་གཤེགས་པ་རྣམས་ཀྱང་གཅིག་ཏུ་རྟག་ཏུ་རྒྱུན་མི་འཆད་པར་རྗེས་སུ་འབྲང་ཞིང་བཞུགས་པར་འགྱུར་རོ། །ཐམས་ཅད་དུ་དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་གྱིས་བརླབས་པར་འགྱུར་རོ། །དེ་ནས་གཟུངས་བཤད་པ་དང་།
ཇི་ཙམ་ན་མཆོད་རྟེན་རྙིང་པ་ཕྱག་དར་གྱི་ཕུང་པོ་ལྟ་བུ་དེ་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དུ་མངོན་པར་འཕགས་ཤིང་འཕང་དང་། ལེགས་པར་རྣམ་པར་འབྱེས་པ་དང་། འཁོར་ལོའི་ཕྲེང་བ་དང་། བཀྲ་ཤིས་དང་བཅས་པར་གྱུར་ཏོ། །བཅོམ་ལྡན་འདས་དགྱེས་ནས་དེ་

སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དེ་དག་དང་། ལྷ་དང་། མིར་བཅས་པའི་འཇིག་རྟེན་བཅོམ་ལྡན་
འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །འཕགས་པ་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱི་སྙིང་པོ་གསང་བའི་རིང་བསྲེལ་གྱི་ཟ་མ་ཏོག་ཅེས་བྱ་བའི་གཟུངས་ཐེག་པ་ཆེན་པོའི་མདོ་རྫོགས་སོ།། །།པཎྜི་ཏ་བིདྱཱ་ཀ་ར་པྲ་བྷ་ཝ་དང་།
ལོ་ཙྪ་བ་གཙང་དེ་ཝེནྡྲ་རཀྵིཏས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། བོ་དྷི་མཎྜ་སྱ་ཡཀྵཱ་ལངྐཱ་ར་ནཱ་མ་དྷཱ་ར་ཎཱི། རྒྱ་ནག་སྐད་དུ། ཕུ་ཐི་ཋ་དྲ་ཨཱི་ཊཱ་ང་ཡནྲ་ཐོ་ལོ་ནི། བོད་སྐད་དུ། བྱང་ཆུབ་སྙིང་པོའི་
རྒྱན་འབུམ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ཝཱ་རཱ་ཎ་སཱིའི་གྲོང་ཁྱེར་ཆེན་པོའི་སྐྱེད་མོས་ཚལ་རྒྱ་ཆེན་པོ་ན། དགེ་སློང་གི་དགེ་འདུན་ཆེན་པོ་ལྔ་སྟོང་
ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ་ཤ་སྟག་དང་། བྱང་ཆུབ་སེམས་དཔའ་སེམས་དཔའ་ཆེན་པོའི་ཚོགས་ལྔ་བརྒྱ་བཅས་དང་ཐབས་ཅིག་ཏུ་བཞུགས་
སོ། །དེའི་ཚེ་བཅོམ་ལྡན་འདས་ཀྱིས་དཀར་པོའི་ཕྱོགས་ཀྱི་ཟླ་བ་ཉ་བས་ཚེས་པའི་དུས་གཅིག་ན་འཁོར་རྣམ་པ་བཞི་ལ་ཆོས་སྟོན་ཅིང་མཆོག་ཏུ་དགའ་བས་ཚིམ་པར་བྱས་སོ། །ཡང་འཁོར་དེར་སེམས་ཅན་ཚད་མེད་པ་བྱེ་བ་ཁྲག་ཁྲིག་བརྒྱ་སྟོང་མང་པོ་འདུས་པ་འདི་ལྟ་སྟེ། རྒྱལ་རིགས་
དང་། བྲམ་ཟེའི་རིགས་དང་། རིག་བྱེད་སྨྲ་བ་རྣམས་དང་། གཅེར་བུ་པ་དང་། ཡ་མཚན་ཅན་གཞན་དག་རྟོག་གེ་པ་མང་པོ་དང་། སྒྱུ་རྩལ་ཤེས་རིགས་དང་། དུར་ཁྲོད་པ་དང་། ཚེམ་བུ་པ་དང་། གླང་རུའི་བརྟུལ་ཞུགས་ཅན་དང་། རི་སུལ་ན་གནས་པའི་བརྟུལ་ཞུགས་ཅན་དང་།

དབང་ཕྱུག་པའི་ཚོགས་ཐམས་ཅད་དང་ཐབས་ཅིག་གོ། །དེ་ལ་འདུས་པའི་ཚོགས་དེར་གང་ཟག་འགའ་ཞིག་ལྟ་བ་ལོག་པས་བསླད་དེ་ལམ་གོལ་བ་དང་ཐེ་ཚོམ་གྱི་དྲ་བར་ཆུད་པ་རྣམས་བཅོམ་ལྡན་འདས་ཀྱིས་ཐུགས་བརྩེ་བ་ཆེན་པོས་གང་ཇི་ལྟ་ཇི་སྙེད་ཞུས་པའི་དོན་
ལེགས་པར་རབ་ཏུ་སྟོན་ཅིང་ཐེ་ཙོམ་མ་ལུས་པ་བསལ་བར་མཛད་དོ། །གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་ཚོགས་ཀྱིས་མདུན་ནས་བལྟས་
ཤིང་ཡོངས་སུ་བསྐོར་ཏེ། ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷའི་བུའི་འཁོར་མང་པོ་དང་བཅས་བཅོམ་ལྡན་འདས་ཀྱི་དྲུང་དུ་ཉེ་བར་ལྷགས་སོ། །དེ་བཞིན་དུ་མི་མཇེད་ཀྱི་བདག་པོ་ཚངས་པ་ཚངས་རིས་ཀྱི་ལྷའི་བུ་མང་པོའི་འཁོར་དང་བཅས་པ་དང་། ལྷའི་བུ་ཉི་མ་
དང་། ལྷའི་བུ་ཟླ་བ་དང་། ལྷའི་བུ་སྟོབས་བཟང་དང་། གནོད་སྦྱིན་ནོར་བུ་བཟང་པོ་དང་། གང་བ་བཟང་པོ་ལ་སོགས་པ་གནོད་སྦྱིན་གྱི་སྡེ་དཔོན་ཆེན་པོ་རྣམས་དང་། དབང་ཕྱུག་དང་། ཁྱབ་འཇུག་དང་། གཤིན་རྗེ་དང་། ཆུ་ལྷ་དང་། ལུས་ངན་དང་། རྒྱལ་པོ་ཆེན་པོ་
བཞི་དང་། དཔལ་གྱི་ལྷ་མོ་དང་། དབྱངས་ཅན་མ་དང་། འཕྲོག་མ་དང་། དུང་སྐྱོང་མ་དང་། མེ་ཏོག་སོ་མ་དང་། འཕྲོག་མའི་བུ་ལྔ་བརྒྱ་རྣམས་ཀྱང་རང་རང་གི་འཁོར་དང་བཅས་པ་དང་། ཀླུའི་རྒྱལ་པོ་རྒྱ་མཚོ་དང་། ཀླུའི་རྒྱལ་པོ་དགའ་བོ་དང་། ཀླུའི་རྒྱལ་པོ་ཉེ་དགའ་ལ་
སོགས་པའི་ཀླུའི་རྒྱལ་པོ་ཆེན་པོ་རྣམས་སོ་སོའི་ཀླུའི་རིགས་ཀྱི་འཁོར་བྱེ་བ་ཁྲག་ཁྲིག་བརྒྱ་སྟོང་རབ་ཏུ་མང་པོས་བསྐོར་བ་དང་། མིའམ་ཅིའི་རྒྱལ་པོ་དང་། ལྟོ་འཕྱེ་ཆེན་པོའི་རྒྱལ་པོ་རྣམས་ཀྱང་རང་རང་གི་འཁོར་གྲངས་སུ་མེད་པས་ཡོངས་སུ་བསྐོར་ཞིང་བཅོམ་ལྡན་འདས་ཀྱི་དྲུང་དུ་ལྷགས་ཏེ། ཕྱག་
འཚལ་བ་དང་། མཆོད་པ་དང་། བཀུར་སྟི་དང་། རིམ་གྲོ་བྱེད་ཅིང་ཆོས་མཉན་ཏོ། །དེའི་ཚེ་དེའི་དུས་ན་པ་ཐ་རིའི་གྲོང་ཁྱེར་ན་གནས་པའི་བྲམ་ཟེ་ཆེན་པོ་བི་ཎུ་དཏྟ་ཞེས་བྱ་བ་ཕྱུག་པ་དབྱིག་ནོར་སྣ་ཚོགས་ཕུན་སུམ་ཚོགས་པ་དང་ལྡན་པ། ལོངས་སྤྱོད་རྣམ་ཐོས་ཀྱི་བུ་དང་འགྲན་བཟོད་པ།

མང་དུ་ཐོས་པ། ཤེས་རབ་ཆེ་བ། དབང་པོ་རྣོ་བ། རྣམ་དཔྱོད་ཡངས་པ། དགེ་བའི་ཆོས་ལ་དགའ་བ། དད་པ་བརྟན་པ། དཀོན་མཆོག་གསུམ་ལ་སྐྱབས་སུ་སོང་བའི་དགེ་བསྙེན་ཐམས་ཅད་ཀྱི་ཁྱུ་མཆོག་ཏུ་གྱུར་པ་ལ་བུ་མེད་པ་ཞིག་ཡོད་དོ། །ལན་ཅིག་བྲམ་ཟེ་ཆེན་པོ་དེས་འདི་སྙམ་
དུ་སེམས་པར་གྱུར་ཏེ། བདག་ལོངས་སྤྱོད་འདི་ཙམ་ཆེ་ཞིང་རིགས་འདི་ལྟར་བཙུན་པ་ལ་བུ་མེད་པ་ཅི་ལྟར་རུང་། བྲམ་ཟེའི་རིགས་ཤིང་སྦལ་ཆེན་པོ་ལྟ་བུ་འདི་རྒྱུན་ཆད་ན་ཅི་ལྟར་རུང་། བདག་གསོན་ཀྱང་དོན་རེ་ཆུང་ངོ་སྙམ་དུ་བསམ་ཞིང་ཉིན་མཚན་མང་པོར་སྡུག་བསྔལ་བར་གྱུར་ཏོ། །ཡང་ལན་
ཅིག་འདི་ལྟར་སེམས་པར་གྱུར་ཏེ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་ནི་བདག་གི་ཕ་ཡིན་ནོ། །བདག་ནི་སངས་རྒྱས་ཀྱི་བུ་ཡིན་ནོ། །ཡང་དག་པ་དམ་པའི་ཆོས་ནི་བདག་གི་མ་ཡིན་ནོ། །འཕགས་པའི་དགེ་འདུན་གྱི་ཚོགས་ནི་བདག་གི་ཕུ་ནུ་ཡིན་ནོ། །སྐྱེ་བ་འདིར་སྟེས་
བཟང་པོས་བཀྲ་ཤིས་པའི་དཔལ་གྱི་འབྱོར་པ་འདི་ལྟ་བུ་རྙེད་ན། སྐྱེ་བ་ཕྱི་མར་ཡང་དོན་ལྡན་དུ་བྱ་བར་བྱེད་པའི་ཕྱིར། ཆོས་གང་གཅིག་ལ་བསླབས་པས་དཀར་པོའི་ཆོས་ཀྱི་དགེ་བའི་རྩ་བ་ཐམས་ཅད་འདུས་ཤིང་ཚེགས་ཆུང་ངུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བར་བྱ་སྟེ།
དཀོན་མཆོག་གསུམ་གྱི་གདུང་ཡུན་རིང་དུ་རྒྱུན་མི་འཆད་པར་གྱུར་པ་དང་། དགེ་བའི་ལས་གང་གི་རྒྱུ་རྐྱེན་ལ་བརྟེན་ནས་བུ་ཚ་རིགས་རྒྱུད་འཕེལ་བར་བྱེད་པའི་ཐབས་ཅིའི་ཕྱིར་བདག་གིས་བཅོམ་ལྡན་འདས་ལ་མི་ཞུ། ད་ནི་བཅོམ་ལྡན་འདས་ལ་ཞུའོ་སྙམ་དུ་བསམས་སོ། །དེ་ནས་བྲམ་ཟེ་ཆེན་པོ་
བི་ཎུ་དཏྟ་དེས་བཅོམ་ལྡན་འདས་ཀྱི་སྤྱན་སྔར་དོང་ནས། བཅོམ་ལྡན་འདས་ལ་ཕྱག་འཚལ་ཞིང་ལན་གསུམ་བསྐོར་བ་བྱས་ཏེ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སྟོན་པ་བཅོམ་ལྡན་འདས་ཆོས་གང་གཅིག་ལ་བསླབས་ན་དཀར་པོའི་ཆོས་ཀྱི་དགེ་བའི་རྩ་བ་
ཐམས་ཅད་འདུས་པར་གྱུར་ཅིང་ཚེགས་ཆུང་ངུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྙེད་པར་འགྱུར་བ་དང་། དཀོན་མཆོག་གསུམ་གྱི་གདུང་རྒྱུན་མི་འཆད་པར་འགྱུར་བ་དང་། བུ་ཚ་རིགས་རྒྱུད་འཕེལ་བར་འགྱུར་བའི་ཐབས་ཤིག་བཅོམ་ལྡན་འདས་ཀྱིས་བསྟན་དུ་གསོལ། དེ་སྐད་ཅེས་

གསོལ་བ་དང་། བཅོམ་ལྡན་འདས་ཀྱིས་བྲམ་ཟེ་བི་ཎུ་དཏྟ་ལ་འདི་སྐད་ཅེས་བཀའ་སྩལ་ཏོ། །ལེགས་སོ་ལེགས་སོ། །བྲམ་ཟེ་ཆེན་པོ་ཁྱོད་ཀྱིས་དོན་ལེགས་པ་འདི་འདྲ་ང་ལ་དྲིས་པ་ནི་ཤིན་ཏུ་ལེགས་སོ། །བྲམ་ཟེ་ཆེན་པོ་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་
དངངས་ཁྱོད་ལ་བཤད་དོ། །བྲམ་ཟེ་ཆེན་པོ་རྟོག་པའི་རྒྱལ་བོ་ཆེན་པོ་བྱང་ཆུབ་སྙིང་པོའི་རྒྱན་འབུམ་ཞེས་བྱ་བའི་གཟུངས་ཡོད་དེ། གཟུངས་དེ་ནི་དཀར་པོའི་ཆོས་ཀྱི་དགེ་བའི་རྩ་བ་ཐམས་ཅད་སྐྲུན་པར་བྱེད། སྐྱེད་པར་བྱེད། ཡོངས་སུ་རྫོགས་པར་བྱེད། རེ་བ་ཐམས་ཅད་སྐོང་བར་བྱེད་པ་སྟེ།
ངས་རྗེས་སུ་དྲན་པ་སྔོན་འདས་པའི་དུས་ན་པ་ཐ་རིའི་གྲོང་ཁྱེར་གྱི་ཤར་སྒོའི་ཕྱི་རོལ་དུ་སྐྱེད་མོས་ཚལ་ཆེན་པོ་ཞིག་ཡོད་དེ། སྐྱེད་ཚལ་དེའི་མིང་ནི་ཨ་སུ་རི་ཞེས་བྱ་བའོ། །དེ་ན་གཉུག་མར་གནས་པའི་སྲིན་པོའི་བུ་མོ་ཞིག་ཡོད་དེ། མིང་ནི་ལྷ་མིན་མཛེས་མ་ཞེས་བྱའོ། །སྲིན་མོ་དེ་རང་བཞིན་ངན་པ་
གདུག་རྩུབ་ཆེ་བ། ཁོར་ཡུག་དཔག་ཚད་སྟོང་གི་ནང་རོལ་ན་གནས་པའི་ཁྱེའུ་དང་བུ་མོ་རྣམས་ཀྱི་མདངས་འཕྲོག་ཅིང་བཅུད་བརྐུས། སྲོག་ཀྱང་ཕྲོགས་པར་བྱས་པས། པ་ཐ་རིའི་གྲོང་ཁྱེར་ན་གནས་པའི་སྐྱེ་བོ་ཕོ་མོ་ཕལ་ཆེར་སྲིན་མོ་དེའི་གནོད་པས་གཙེས་པས་སྡུག་བསྔལ་བར་གྱུར། ཡུན་རིང་དུ་
འཇིགས་པ་དང་ལྡན་པར་གྱུར། ཉམ་ང་བས་ཉེན་པར་གྱུར་ཏོ། །དེ་ནས་དུས་གཅིག་ན་དེ་དག་ཕན་ཚུན་དུ་བལྟས་ཤིང་ཐབས་ཅི་འདྲ་ཞིག་གིས་སྡུག་བསྔལ་འདི་ལས་གྲོལ་བར་འགྱུར་ཞེས་བགྲོས་སོ། །དེའི་ཚེ་སྐྱེ་བོའི་ཚོགས་འདུས་པའི་ཁྲོད་ན་རྒན་རབས་རྒྱུས་ཡོད་པ་འགའ་ཞིག་གིས། སྐྱེ་བོ་དེ་དག་ལ་
འདི་སྐད་ཅེས་སྨྲས་སོ། །གྲོགས་པོ་དག་ཉོན་ཅིག །ད་ལྟ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་དམ་པའི་རྒྱལ་མཚན་ཞེས་བྱ་བ་འཇིག་རྟེན་དུ་བྱུང་ནས་འཚོ་ཞིང་གཞེས་བཞིན་བཞུགས་ཏེ། དེའི་དྲུང་དུ་མཇལ་ཏེ་འདྲི་བར་རིགས་སོ། །སངས་རྒྱས་
བཅོམ་ལྡན་འདས་དེ་ཉིད་ཀྱིས། ཁྱེད་ཅག་གི་མགོན་པོ་དང་སྐྱབས་སུ་འགྱུར་ལ་འཇིགས་པ་དང་སྡུག་བསྔལ་ཐམས་ཅད་བསལ་བར་མཛད་པར་འགྱུར་རོ། །དེ་སྐད་ཅེས་སྨྲས་པ་དང་། སྐྱེ་བོ་དེ་དག་གིས་དེ་བཞིན་གཤེགས་པ་དེ་ཡུལ་ཕྱོགས་གང་ན་བཞུགས་ཞེས་དྲིས་པས། རྒན་རབས་དག་

གིས་ལན་བཏབ་པ། དེ་བཞིན་གཤེགས་པ་དེ་དུས་སྐབས་ད་ལྟ་ན་ལྔ་ལེན་གྱི་ལྗོངས་ན་བཞུགས་ཟེར་རོ། །སླར་དྲིས་པ། བཞིན་བཟང་དག་དེ་བཞིན་གཤེགས་པ་དེ་དང་མཇལ་བའི་ཐབས་བསྟན་དུ་གསོལ། སྨྲས་པ། ཁྱེད་ཅག་སླར་ལོག་ལ། དབེན་ཞིང་གཙང་བའི་གནས་ཤིག་
བཙལ་ཏེ་ས་ཕྱོགས་དེར་བ་ལྕི་བསྲེས་པའི་ས་གཙང་གི་དཀྱིལ་འཁོར་གྲུ་བཞི་མཐའ་ལོགས་ཆ་མཉམ་པ་བཞེངས། སྤོས་འདམ་དང་བ་བྱུང་ལྔས་བྱུག་ལ། མེ་ཏོག་སྣ་ཚོགས་གཅལ་དུ་བཀྲམ་ནས་བདུག་པའི་སྤོས་ཕོར་བཞི་དང་། དྲི་བཟང་གི་ཆབ་ཀྱི་བུམ་པ་བཞི་དང་། ཞལ་ཟས་སྡེར་
མ་བཞི་གཞག་པར་བྱའོ། །མར་མེ་བཞི་བུད་པར་བྱའོ། །དབུས་སུ་དྲི་བཟང་གི་ཆུས་གང་བའི་བུམ་པ་དམར་སེར་ཅིག་བཀོད་ལ། དེའི་ཁར་སོ་ཤིང་གཅིག་གཞག་པར་བྱའོ། །དེ་ནས་དེ་བཞིན་གཤེགས་པ་དེ་ལ་མངོན་པར་དད་པས་དམིགས་ཏེ། བཅོམ་ལྡན་འདས་བདག་ཅག་རྣམས་
ལ་ཐུགས་བརྩེ་བའི་སླད་དུ། སང་ཉིན་བསོད་སྙོམས་ཀྱི་དུས་ལ་བབ་པ་ན་གནས་འདི་ཉིད་དུ་གཤེགས་པར་ཅི་གནང་ཞེས་གསོལ་བ་གདབ་པར་བྱའོ། །དེ་བཞིན་གཤེགས་པ་དེ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སེམས་ཅན་ཐམས་ཅད་ཀྱི་བསམ་པ་དང་། མོས་པ་
དང་། བྱ་བ་སྤྱོད་པ་ཇི་ལྟ་ཇི་སྙེད་ཐམས་ཅད་ཡོངས་སུ་མཁྱེན་ཅིང་གཟིགས་པ་སྟེ། སེམས་ཅན་དམྱལ་བ་དང་། ཡི་དགས་དང་། དུད་འགྲོའི་སྐྱེ་གནས་སུ་ལྟུང་བ་རྣམས་ཀྱང་ཐབས་མཁས་པས་ཐར་བར་མཛད། ཕན་པ་དང་བདེ་བའི་ཐབས་སྟོན་པར་འགྱུར་རོ། །དེ་ལྟར་བྱས་པས་དེ་
བཞིན་གཤེགས་པ་དེས་མངོན་པར་མཁྱེན་ཅིང་གཟིགས་ནས། རྫུ་འཕྲུལ་ཐོགས་པ་མེད་པའི་སྟོབས་ཀྱིས་འཁོར་དང་བཅས་པ་ཁྱེད་ཅག་གི་བསྟི་གནས་སུ་འབྱོན་པར་འགྱུར་རོ། །དེ་སྐད་ཅེས་སྨྲས་པ་དང་། སྐྱེ་བོ་དེ་རྣམས་ཀྱིས་ཐོས་པ་ཇི་ལྟ་བ་བཞིན་བློ་ལ་བཟུང་ནས་སླར་ལོག་སྟེ་འདུ་འཛིས་
དབེན་ཞིང་གཙང་ལ་མཐོ་ཞིང་ངོས་ཡངས་པའི་གནས་ཤིག་བཙལ་ནས། བ་ལྕི་བསྲེས་པའི་ས་གཙང་གི་དཀྱིལ་འཁོར་བཤམས་ཏེ། མེ་ཏོག་སྣ་ཚོགས་བཀྲམ། དཀྱིལ་འཁོར་གྱི་རྒྱན་བུམ་པ་བཟང་པོ་དང་བཟའ་བཏུང་གཙང་མ་སྣ་ཚོགས་དང་བྱུག་པ་དང་བདུག་སྤོས་དང་མར་མེ་རྣམས་

བཀོད་ནས་སྙན་པའི་རོལ་མོ་སྣ་ཚོགས་ཀྱང་དཀྲོལ། དབུས་སུ་རིན་པོ་ཆེ་སྣ་ཚོགས་ཀྱིས་བརྒྱན་པའི་གསེར་གྱི་བུམ་པ་དམར་སེར་དྲི་བཟང་གི་ཆུས་བཀང་བ་སོ་ཤིང་དང་བཅས་པ་བཞག་ལ། ཐམས་ཅད་ཡིད་མཐུན། མོས་པ་མཐུན། སྤྱོད་ལམ་མཐུན་པར་དད་
པས་ཀུན་ནས་བསླང་བའི་དབྱངས་སྙན་ལ་སྐད་གསང་མཐོན་པོས་མགྲིན་གཅིག་ཏུ་འདི་སྐད་ཅེས་གསོལ་བ་བཏབ་བོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་དམ་པའི་རྒྱལ་མཚན་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ། །
སེམས་ཅན་ཐམས་ཅད་ལ་བརྩེ་བ་དང་སྐྱོབ་པའི་བདག་ཉིད་ཅན། ཐུབ་པ་ཆེན་པོ་སངས་རྒྱས་བཅོམ་ལྡན་འདས་ཁྱེད་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ། །ཆོས་ཉིད་བསམ་མི་ཁྱབ་ཅིང་རྨད་དུ་བྱུང་བའི་བདག་ཉིད་ཆེན་པོ་སངས་རྒྱས་བཅོམ་ལྡན་འདས་ཁྱེད་ལ་ཕྱག་འཚལ་ལོ་
མཆོད་དོ་སྐྱབས་སུ་མཆིའོ། །བདག་ཅག་མགོན་མེད་སྐྱབས་མེད་ཅིང་སྡུག་བསྔལ་གྱི་འདམ་དུ་བྱིངས་པའི་སེམས་ཅན་རྣམས་ལ་རྗེས་སུ་བརྩེ་བའི་སླད་དུ། སང་བསོད་སྙོམས་ཀྱི་དུས་ཚོད་ལ་གནས་འདིར་གཤེགས་སུ་གསོལ་ལོ། །གཤེགས་ཤིང་བཞུགས་ནས་ཀྱང་བདག་ཅག་གིས་ལེགས་
པར་སྦྱར་བའི་མཆོད་པ་རྣམས་བཞེས་ལ་བདག་ཅག་ལ་སོགས་པ་སེམས་ཅན་ཐམས་ཅད་ཀྱི་མགོན་དང་སྐྱབས་དང་དཔུང་གཉེན་མཛད་དུ་གསོལ། ཕན་པ་དང་བདེ་བ་དང་། རྣམ་པར་གྲོལ་བའི་ལམ་བསྟན་དུ་གསོལ། འཇིགས་པ་ཐམས་ཅད་དང་། གནོད་པ་ཐམས་ཅད་དང་། ཉམ་
ང་བ་ཐམས་ཅད་བསལ་དུ་གསོལ། དེ་ལྟར་གསོལ་བ་བཏབ་མ་ཐག་ཏུ་ས་རྣམ་པ་དྲུག་ཏུ་གཡོས་སོ། །བུམ་པ་ཡང་འགུལ་ཞིང་ས་ལ་འགྱིལ་ཏོ། །བུམ་ཆུ་ས་ལ་ཕོས་ཏེ་པདྨའི་རྫིང་བུ་ཆེན་པོར་གྱུར་ཏོ། །དེ་ཡང་ལྷའི་ཆུ་དང་མཉམ་པ། དྲི་བཟང་འཐུལ་བ། གཙང་བ། ཧ་ཅང་མི་གྲང་ཧ་
ཅང་མི་དྲོ་ཡིད་དུ་འོང་བ། ཡན་ལག་བརྒྱད་དང་ལྡན་པ་རྫིང་བུ་ཡོངས་སུ་གང་བའི་གཏིང་གསེར་གྱི་བྱེ་མ་བརྡལ་བ། ཨུཏྤ་ལ་དང་པདྨ་དང་པདྨ་དམར་པོ་དང་། པུཎྜ་རཱི་ཀ་ལ་སོགས་པ་རིན་པོ་ཆེའི་མེ་ཏོག་སྣ་ཚོགས་ཀྱིས་ཁེབས་པ། དབུས་སུ་གསེར་གྱི་ས་གཞིའི་གླིང་ཆེན་པོ། ཕྱོགས་

བཞིར་རིན་པོ་ཆེ་སྣ་ཚོགས་ཀྱི་ཐེམ་སྐས་དང་ལམ་བཞི་ཡོད་པ། དཀྱིལ་ན་སོ་ཤིང་གནས་འགྱུར་བའི་རིན་པོ་ཆེའི་ལྗོན་ཤིང་སྲིད་དུ་དཔག་ཚད་བརྒྱད་ཡོད་ལ་ཆུ་ཞེང་གབ་པ། རྩ་བ་དང་སྡོང་པོ་དང་ཡལ་ག་དང་ལོ་འདབ་དང་མེ་ཏོག་དང་འབྲས་བུ་རྣམས་རིན་པོ་ཆེ་སྣ་བདུན་ལས་གྲུབ་པ། གནས་
དེ་ཤིན་ཏུ་གཙང་ཞིང་ཐ་གྲུ་ཡངས་པ་ལོགས་བཞིའི་ངོས་རེ་ལ་དཔག་ཚད་བཅུ་གཉིས་རེ་ཡོད་པའི་དཀྱིལ་འཁོར་ངོ་མཚར་རྨད་དུ་བྱུང་བ། སྐྱེ་བོ་ཐམས་ཅད་ཀྱི་ཡིད་དུ་འོང་བ་བལྟ་ན་སྡུག་པ་ཕྱོགས་མཚམས་རྣམས་སུ་ཆུ་སྐྱེས་ཐང་སྐྱེས་ཀྱི་མེ་ཏོག་སྣ་ཚོགས་དང་། ཏ་མ་ལའི་ཤིང་དང་། ཙམྤ་ཀའི་
ཤིང་དང་། ཀུ་ཤུའི་ཤིང་དང་། མྱ་ངན་མེད་དང་། ཨ་ཏི་མུཀྟ་ཀ་དང་། སུ་མ་ནཱ་དང་། ཀ་དམྤའི་ཤིང་དང་། ནྱ་གྲོ་དྷ་དང་ནྱ་གྲོ་དྷ་ཆེན་པོ་དང་། ག་བུར་གྱི་ཤིང་དང་། སེ་རྒོད་ཚེར་མ་ཅན་གྱི་ཤིང་དང་། ཤུག་པ་དང་། ཡུ་ཏི་ཀ་དང་ཏིནྟུ་ཀའི་ཤིང་ལ་སོགས་པའི་ལྗོན་པའི་ཕྲེང་བས་བརྒྱན་
པ། དེ་རྣམས་ཀྱི་སྟེང་ན་ནེ་ཙོ་དང་རྨ་བྱ་དང་ཀ་ལ་པིངྐ་དང་ཤང་ཤང་ཏེའུ་ལ་སོགས་པ་བཀྲ་ཤིས་པའི་བྱ་སྣ་ཚོགས་གསེར་གྱི་མཆུ་དང་གསེར་གྱི་གཙུག་ཕུད་ཅན། སྤུ་དང་གཤོག་སྒྲོ་ཐམས་ཅད་རིན་པོ་ཆེ་སྣ་བདུན་ལས་གྲུབ་པ། སྙན་ཅིང་འཇེབས་པའི་སྐད་སྣ་མང་པོ་སྒྲོགས་པ། དེ་ཐམས་
ཅད་ཀྱང་དེ་བཞིན་གཤེགས་པ་འོད་ཟེར་དམ་པའི་རྒྱལ་མཚན་གྱི་སྔོན་གྱི་སྨོན་ལམ་གྱི་མཐུ་དང་། བྱང་ཆུབ་སྙིང་པོའི་རྒྱན་འབུམ་གྱི་གཟུངས་སྔགས་རིག་པའི་བྱིན་རླབས་ལས་བྱུང་བ་ཤ་སྟག་གོ། །དེ་ནས་པ་ཐ་རིའི་གྲོང་ཁྱེར་གྱི་སྐྱེ་བོའི་ཚོགས་ཐམས་ཅད་ཤིན་ཏུ་ངོ་མཚར་བར་གྱུར་ནས་ཕན་
ཚུན་དུ་གཅིག་གིས་གཅིག་ལ་འདི་སྐད་ཅེས་འདྲི་མོལ་བྱེད་དོ། །ཨེ་མའོ་ངོ་མཚར་ཆེའོ། །གྲོགས་པོ་དག་འདི་ལྟ་བུའི་ཆོ་འཕྲུལ་ཆེན་པོ་སྔོན་ཆད་མཐོང་མ་མྱོང་ཐོས་མ་མྱོང་བ་འཕྲལ་དུ་བྱུང་བ་འདི་སུ་ཞིག་གི་མཐུ་ཡིན། རྫུ་འཕྲུལ་ཆེན་པོ་འདི་སུས་བསྟན་པ་ཡིན། གོར་མ་ཆག་པར་ཛམྦུ་གླིང་འདིར་
བཀྲ་ཤིས་པ་དང་ཕན་པ་དང་བདེ་བ་ཕུན་སུམ་ཚོགས་པ་འབྱུང་བར་འགྱུར་རམ་ཟེར་ཏོ། །དེའི་ཚེ་རྒན་རབས་དག་གིས་སྐྱེ་བོའི་ཚོགས་དེ་དག་ལ་འདི་སྐད་ཅེས་སྨྲས་སོ། །ཆོ་འཕྲུལ་ཆེན་པོ་འདི་ནི་གདོན་མི་ཟ་བར་དེ་བཞིན་གཤེགས་པ་འོད་ཟེར་དམ་པའི་རྒྱལ་མཚན་གྱི་མཐུ་ཡིན་ནོ། །དེ་བཞིན་

གཤེགས་པ་དེས་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཁྱེད་ཅག་གི་བསྟི་གནས་ལ་གཤེགས་པའི་ལྟས་སུ་རྫུ་འཕྲུལ་འདི་བསྟན་པ་ཡིན་ནོ། །བདག་ཅག་སོ་སོའི་གནས་སུ་ལོག་ལ་རང་རང་གི་ནུས་ཚད་ལ་དཔག་པའི་ཞལ་ཟས་བཟང་པོའི་བྱེ་བྲག་མང་པོ་བཤམས་ཏེ་
སང་ཉིན་དེ་བཞིན་གཤེགས་པ་དེ་ལ་གདུགས་ཚོད་འབུལ་ཞིང་མཆོད་པ་དང་བསྙེན་བཀུར་བྱའོ། །དེ་ནས་སྐྱེ་བོ་དེ་དག་ཐམས་ཅད་རིངས་པ་རིངས་པར་རང་རང་གི་ཁྱིམ་དུ་སོང་ནས་མཚན་མོའི་རིང་དེ་ལ་དྲི་ཞིམ་ལ་རོ་བདའ་བའི་ཞལ་ཟས་བཟའ་བཏུང་སྣ་ཚོགས་སྦྱར་ཞིང་དྲི་ཞིམ་པོའི་མེ་ཏོག་དང་། དྲིའི་བྱུག་པ་
དང་བདུག་སྤོས་དང་ཕྱེ་མ་ཕུར་མ་དང་གདུགས་དང་རྒྱལ་མཚན་དང་བ་དན་ལ་སོགས་པ་དང་། རོལ་མོ་ཕེག་རྡོབ་པའི་བྱེ་བྲག་མང་པོ་བཤམས་ནས་ལམ་རྣམས་སུ་ཉེ་བར་ལྷགས་ཏེ་དེ་བཞིན་གཤེགས་པ་བསྒུགས་སོ། །དེའི་ཚེ་བཅོམ་ལྡན་འདས་འོད་ཟེར་དམ་པའི་རྒྱལ་མཚན་དེས་ལྔ་ལེན་གྱི་ལྗོངས་སུ་འཁོར་
མང་པོ་ལེ་ཆོས་སྟོན་ཅིང་བཞུགས་པའི་སྐབས་ཤིག་གློ་བུར་དུ་རིན་པོ་ཆེ་སྣ་བདུན་གྱིས་སྤུད་པའི་བུམ་པ་སོ་ཤིང་དང་བཅས་པ་ཅིག་བཅོམ་ལྡན་འདས་ཀྱི་སྤྱན་སྔར་བྱུང་བར་གྱུར་ཏོ། །དེ་ནས་བཅོམ་ལྡན་འདས་འོད་ཟེར་དམ་པའི་རྒྱལ་མཚན་གྱིས་བུམ་པ་སོ་ཤིང་དང་བཅས་པ་གཟིགས་ནས་འཛུམ་པ་མཛད་དོ། །ཞལ་
འཛུམ་པ་མཛད་ནས་ཀྱང་རྩིབས་སྟོང་འཁོར་ལོས་མཚན་པའི་ཕྱག་གསེར་གྱི་མདོག་ཅན་བརྐྱང་སྟེ་བུམ་པ་སོ་ཤིང་དང་བཅས་པ་ཕྱག་ཏུ་བཞེས་ལ་ཅང་མི་གསུང་བར་བཞུགས་སོ། །དེའི་ཚེ་འཁོར་འདུས་པ་ཐམས་ཅད་ཀྱིས་ངོ་མཚར་དུ་གྱུར་ནས། ཨེ་མ་བཀྲ་ཤིས་པའི་མཚན་མ་འདི་ལྟ་བུ་ཕྱོགས་གང་ནས་བྱུང་།
ཡུལ་ཕྱོགས་གང་ཞིག་ཏུ་བཅོམ་ལྡན་འདས་གདན་འདྲེན་པའི་མཚན་མ་ཞིག་ཡིན་སྙམ་ཟེར་ཏོ། །དེའི་ཚེ་འཁོར་གྱི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་དག་དམ་པའི་བློ་གྲོས་ཞེས་བྱ་བ་ཞིག་འདུས་པར་གྱུར་ཏེ་སྟན་ལས་ལངས་ནས་བཅོམ་ལྡན་འདས་ཀྱི་ཐད་དུ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་
ཕྱག་འཚལ་ཞིང་གཡས་སྐོར་དུ་ལན་གསུམ་བསྐོར་བ་བྱས་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཀྲ་ཤིས་པའི་མཚན་མ་འདི་ཕྱོགས་གང་ནས་བྱུང་། བུམ་པ་སོ་ཤིང་དང་བཅས་པའི་རྒྱུ་མཚན་ཅི་ལགས། བཅོམ་ལྡན་འདས་ཀྱིས་བཤད་དུ་གསོལ་ཞེས་གསོལ་པ་

དང་། བཅོམ་ལྡན་འདས་ཀྱིས་བཀའ་སྩལ་པ། བུམ་པ་སོ་ཤིང་དང་བཅས་པ་འདི་པ་ཐ་རིའི་གྲོང་ཁྱེར་ཆེན་པོ་ནས་འོངས་པ་སྟེ་ས་ཕྱོགས་དེ་རང་སྤྱན་འདྲེན་པའི་ཕྱིར་རོ། །རྣམ་དག་དམ་པའི་བློ་གྲོས་ཁྱོད་འཁོར་རྣམས་ལ་འདི་སྐད་དུ། ངའི་ཕྱག་ཕྱིར་བསོད་སྙོམས་ལ་འགྲོ་བར་འདོད་པ་རྣམས་
ཚུལ་ཤིང་ལོངས་ཤིག་ཅེས་འགྲེམས་ཤིག །སང་སྔ་བར་པ་ཐ་རིའི་གྲོང་ཁྱེར་ཆེན་པོར་རྫུ་འཕྲུལ་གྱིས་འགྲོའོ་ཞེས་གསུངས་སོ། །དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་དག་དམ་པའི་བློ་གྲོས་ཀྱིས་ཚུལ་ཤིང་བཟུང་ནས་འདུས་པའི་འཁོར་
བྱང་ཆུབ་སེམས་དཔའ་དང་ཉན་ཐོས་ཀྱི་ཚོགས་ཐམས་ཅད་ལ་བྲིམ་ཞིང་། རྫུ་འཕྲུལ་ཆེན་པོ་དང་ལྡན་པས་རྫུ་འཕྲུལ་གྱི་ཡུལ་ལ་འཇུག་ནུས་པ་རྣམས་ཚུལ་ཤིང་ལོངས་ཤིག་བཅོམ་ལྡན་འདས་ཀྱིས་སང་སྔ་བར་པ་ཐ་རིའི་གྲོང་ཁྱེར་ཆེན་པོར་བསོད་སྙོམས་ལ་ཆའོ། །བྱང་ཆུབ་སེམས་དཔའ་
རྣམ་དག་དམ་པའི་བློ་གྲོས་ཀྱིས་དེ་ལྟར་ཚུལ་ཤིང་བྲི་མས་ཚར་ནས་སླར་བཅོམ་ལྡན་འདས་ལ་གསོལ་ཞིང་བཅོམ་ལྡན་འདས་གདན་འདྲེན་པར་བསྐུལ་ཏོ། །དེ་ནས་དེའི་སང་ཞོགས་སྔ་བར་དེ་བཞིན་གཤེགས་པ་འོད་ཟེར་དམ་པའི་རྒྱལ་མཚན་གྱིས་ཆོས་གོས་གསུམ་ལེགས་པར་གསོལ་ནས། དཔལ་
དང་གཟི་བརྗིད་ཀྱི་རྒྱན་མཆོག་ཏུ་འབར་ཞིང་། འདུས་པའི་འཁོར་མང་པོ་དང་བཅས་རྫུ་འཕྲུལ་ཆེན་པོ་རྣམ་པར་རོལ་བའི་སྟོབས་ཀྱིས་བར་སྣང་ལ་འཕགས་ཏེ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོའི་
འཁོར་གྱི་ཚོགས་མང་བོས་རོལ་མོ་དང་སིལ་སྙན་སྣ་ཚོགས་དཀྲོལ་ཞིང་བདུག་སྤོས་དང་། མེ་ཏོག་དང་བྱུག་པ་དང་ཕྱེ་མ་ཕུར་མ་དང་ན་བཟའ་དང་རྒྱན་ལ་སོགས་པའི་མཆོད་པའི་བྱེ་བྲག་སྣ་ཚོགས་ཀྱིས་མཆོད་པས་ཡོངས་སུ་བསྐོར་བཞིན་པར་ནམ་མཁའི་ལམ་ནས་ཡུད་ཙམ་གཅིག་ལ་པ་ཐ་
རིའི་གྲོང་ཁྱེར་ཆེན་པོར་ཕེབས་ཏེ། བཅོམ་ལྡན་འདས་ཀྱིས་སྤྲུལ་བའི་དཀྱིལ་འཁོར་ཆེན་པོའི་དབུས་སུ་པདྨའི་སྙིང་པོ་སེང་གེའི་ཁྲི་ལ་བཞུགས་སོ། །འཁོར་ཐམས་ཅད་ཀྱང་རང་རང་གི་སྤྲུལ་པའི་པདྨའི་ཁྱིམ་གྱི་ཐེག་པ་དང་བཅས་འདུས་ཏེ་འཁོད་པར་གྱུར་ཏོ། །དེ་ནས་པ་ཐ་རིའི་གྲོང་ཁྱེར་གྱི་སྐྱེ་

བོ་ཐམས་ཅད་རབ་ཏུ་དགའ་ཞིང་མགུ་ནས། རང་རང་གི་ལེགས་པར་བཤམས་པའི་མཆོད་པ་སྣ་ཚོགས་ཀྱིས་བཅོམ་ལྡན་འདས་དང་། འཁོར་བྱང་ཆུབ་སེམས་དཔའ་ཉན་ཐོས་ཀྱི་ཚོགས་དང་བཅས་པ་དང་། ལྷ་ཀླུ་སྡེ་བརྒྱད་ཀྱི་ཚོགས་ཐམས་ཅད་ལ་མཆོད་
པ་བྱེད་དོ། །གདུགས་ཚོད་ཀྱི་དུས་ལ་བབས་པ་ན། ཁ་དོག་དྲི་རོ་ཕུན་སུམ་ཚོགས་པའི་ཞལ་ཟས་སྣ་ཚོགས་འབུལ་ཞིང་བྲིམ་སྟེ། ཅི་བདེ་བར་ཚིམ་པར་བྱས་སོ། །བཅོམ་ལྡན་འདས་འཁོར་དང་བཅས་པས་གདུགས་ཚོད་ལེགས་པར་བཞེས་ནས་བཀྲུ་བཤལ་མཛད་དེ། སྤྱོད་ལམ་དག་
པར་མཛད་ལ་འཁོར་རྣམས་ཀྱིས་བཅོམ་ལྡན་འདས་ལ་བསྐོར་བ་ལན་གསུམ་བྱས་ནས་གྲལ་སྟན་ལ་གོ་རིམས་འཚམ་པར་འཁོད་དོ། །དེ་ནས་པ་ཐ་རིའི་གྲོང་ཁྱེར་གྱི་སྐྱེ་བོ་དེ་དག་ཐམས་ཅད་སླར་ཡང་བཅོམ་ལྡན་འདས་ལ་ཕྱག་དང་བསྐོར་བ་བྱས་ནས་དོན་གྱི་རྒྱུ་ལས་བརྩམས་ཏེ། སྔ་མའི་
གནས་ཚུལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསན་དུ་གསོལ། གྲོང་ཁྱེར་འདིའི་ཤར་སྒོའི་ཕྱི་རོལ་ན་ཨ་སུ་རི་ཞེས་བྱ་བའི་སྐྱེད་ཚལ་ཞིག་ཡོད་དོ། །གྲོང་ཁྱེར་དེའི་ནང་ན་སྲིན་པོའི་བུ་མོ་ལྷ་མིན་མཛེས་མ་ཞེས་བྱ་བ་རང་བཞིན་ངན་པ་གདུག་རྩུབ་ཆེ་བ་ཁྲོ་ཞིང་གཏུམ་པ་གཅིག་
གནས་ཏེ། རྒྱུན་པར་ཁྱེའུ་བུ་མོ་རྣམས་ཀྱི་མདངས་དང་གཟི་བརྗིད་འཕྲོག་ཅིང་སྲོག་ཀྱང་འཕྲོག་པར་བྱེད་པས་བདག་ཅག་རྣམས་ཉིན་མཚན་མེད་པར་འཇིགས་པས་ཉེན་ཏེ་སྡུག་བསྔལ་ཞིང་བདེ་བའི་གོ་སྐབས་ཅུང་ཟད་ཀྱང་མི་ཐོབ་བོ། །བཅོམ་ལྡན་འདས་ཀྱིས་ཐུགས་བརྩེ་བ་ཆེན་
པོས་དགོངས་ལ་སྡུག་བསྔལ་འདི་བསལ་བའི་ཐབས་བསྟན་དུ་གསོལ། བདེ་བར་གཤེགས་པས་བསྟན་དུ་གསོལ་ཞེས་གསོལ་བ་བཏབ་བོ། །དེ་ལྟར་གསོལ་བ་བཏབ་པས་དེ་བཞིན་གཤེགས་པ་འོད་ཟེར་དམ་པའི་རྒྱལ་མཚན་དེས། སྐྱེ་བོའི་ཚོགས་དེ་དག་ལ་བརྩེ་བའི་དགོངས་པས་ཞལ་
གྱིས་བཞེས་ཏེ་ཅང་མི་གསུང་བར་གནང་ནས་ཞལ་འཛུམ་པ་མཛད་དོ། །འཛུམ་པ་མཛད་པས་ཞལ་གྱི་སྒོ་ནས་འོད་ཟེར་ཁ་དོག་བརྒྱ་སྟོང་དུ་འཕྲོས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཡོངས་སུ་ཁེངས་པས་སེམས་ཅན་ཐམས་ཅད་དབུགས་ཕྱུང་བར་མཛད་ཅིང་ཁྱད་པར་

ཨ་སུ་རིའི་སྐྱེད་མོས་ཚལ་དེ་རྫུ་འཕྲུལ་གྱི་འོད་ཟེར་མེའི་ཕུང་པོས་བསྲེག་ཀུན་ཏུ་རབ་ཏུ་སྲེག་གོ། །དེར་གནས་པའི་སྲིན་པོའི་བུ་མོ་འཁོར་ཁྲི་ཕྲག་མང་པོ་དང་བཅས་ཚོམ་བུ་ཚོམ་བུར་ཕྲལ་ནས་ཕྱོགས་བཞིར་འཐོར་ཞིང་རྒྱུག་གོ། །སྐད་ཆེན་པོས་ངུ་ཞིང་ཆོ་ངེ་འདེབས། ཀྱེ་མ་ཀྱི་ཧུད་བདག་ཅག་རྣམས་
སུ་ལ་སྐྱབས་སུ་འགྲོ། སུ་ཞིག་གིས་སྡུག་བསྔལ་འདི་ལས་སྐྱོབ་ནུས་ཟེར་ཞིང་འོ་དོད་འབོད་དེ་ངུ་བར་གྱུར་ཏོ། །དེ་ནས་བར་སྣང་ན་གནས་པའི་ལྷ་རྣམས་ཀྱིས་དེ་དག་ལ་འདི་སྐད་ཅེས་སྨྲས་སོ། །ཁྱོད་རྣམས་དེ་བཞིན་གཤེགས་པ་འོད་ཟེར་དམ་པའི་རྒྱལ་མཚན་གྱི་དྲུང་དུ་སོང་ལ་ཕྱག་འཚལ་
ཞིང་སྐྱབས་སུ་སོང་ན་སྡུག་བསྔལ་འདི་ལས་ཐར་བར་གྱུར་ཏེ་བདེ་བ་དང་ཡིད་བདེ་བ་འཐོབ་པར་འགྱུར་རོ་ཞེས་སྨྲས་སོ། །དེ་ནས་ལྷ་མིན་མཛེས་མ་འཁོར་ཁྲི་ཕྲག་མང་པོ་དང་བཅས་རིངས་པ་རིངས་པར་པ་ཐ་རིའི་གྲོང་ཁྱེར་གྱི་སྤྲུལ་བའི་དཀྱིལ་འཁོར་ག་ལ་བ་དེར་ཕྱིན་ནས་བཅོམ་ལྡན་འདས་འོད་
ཟེར་དམ་པའི་རྒྱལ་མཚན་གྱི་ཞབས་ལ་མགོ་བོས་ཕྱག་འཚལ་ཞིང་། བཅོམ་ལྡན་འདས་བདག་ཅག་རྣམས་བསྐྱབ་ཏུ་གསོལ། འཇིག་རྟེན་མགོན་པོ་བསྐྱབ་ཏུ་གསོལ། བདེ་བར་གཤེགས་པ་བསྐྱབ་ཏུ་གསོལ། དེང་ཕྱིན་ཆད་བདག་ཅག་གིས་སེམས་ཅན་ལ་གནོད་པ་མི་བགྱིད་དོ། །
སེམས་ཅན་ལ་འཚེ་བར་མི་བགྱིད་དོ་ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་ཅང་མི་གསུང་བར་དགོངས་པས་ཞལ་གྱིས་བཞེས་ནས། བྱང་ཆུབ་སྙིང་པོའི་རྒྱན་འབུམ་རྣམ་པར་རོལ་པའི་རྫུ་འཕྲུལ་གྱི་བྱིན་རླབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་ལངས་ཏེ་
བྱང་ཆུབ་སྙིང་པོའི་རྒྱན་འབུམ་གྱི་གཟུངས་གསུངས་སོ། །དེའི་ཚེ་ཏིང་ངེ་འཛིན་གྱི་སྟོབས་དང་གཟུངས་སྔགས་ཀྱི་མཐུས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དང་དེ་ན་བཞུགས་པའི་སངས་རྒྱས་ཐམས་ཅད་ལྷམ་མེ་ལྷམ་མེར་མངོན་སུམ་དུ་སྣང་བར་གྱུར་ཏོ། །སངས་རྒྱས་དེ་དག་
ཐམས་ཅད་ཀྱིས་རང་རང་གི་འཁོར་རྣམས་ལ་ཆོས་སྟོན་པ་ཡང་ལྷང་ལྷང་ཐོས་པར་གྱུར་ཏོ། །དེ་བཞིན་གཤེགས་པ་དེ་དག་ཐམས་ཅད་ཀྱིས་བཅོམ་ལྡན་འདས་འོད་ཟེར་དམ་པའི་རྒྱལ་མཚན་གྱིས་བྱང་ཆུབ་སྙིང་པོའི་རྒྱན་འབུམ་གྱི་གཟུངས་གསུངས་པ་ལ་རྗེས་སུ་ཡི་རངས་ནས་སོ་སོའི་ཞིང་ན་བཞུགས་

བཞིན་མགྲིན་གཅིག་དབྱངས་གཅིག་གིས་ལེགས་སོ་ལེགས་སོ། །དེ་བཞིན་གཤེགས་པ་འོད་ཟེར་དམ་པའི་རྒྱལ་མཚན་ཁྱེད་ཀྱིས་རྟོག་པའི་རྒྱལ་པོ་བྱང་ཆུབ་སྙིང་པོའི་རྒྱན་འབུམ་གྱི་གཟུངས་གསུངས་པ་ལེགས་སོ་ལེགས་སོ། །ལེགས་པར་གསུངས་སོ་ཞེས་
གསུངས་སོ། །དེ་ནས་སྲིན་མོ་ལྷ་མིན་མཛེས་མ་འཁོར་དང་བཅས་པ་བཏུལ་ཞིང་དགེ་བ་བཅུའི་ལམ་ལ་འགོད། སྐྱེ་བོའི་ཚོགས་གྲངས་མེད་པ་མང་པོ་ཡང་ཕྱིར་མི་ལྡོག་པའི་ས་ལ་འགོད་དོ། །དེ་ནས་གྲོང་ཁྱེར་དེ་ཉིད་རིན་པོ་ཆེ་སྣ་བདུན་ལས་གྲུབ་པར་གྱུར་ཏེ། རིན་པོ་ཆེ་སྣ་བདུན་གྱི་ཆར་
ཡང་བབས་སོ། །ཛམྦུ་གླིང་གི་སྐྱེ་རྒུ་ཐམས་ཅད་ཀྱང་སྡུག་བསྔལ་མེད་པའི་བདེ་བ་ཕུན་སུམ་ཚོགས་པ་ལ་ལོངས་སྤྱོད་པར་གྱུར་ཏོ། །བྲམ་ཟེ་ཆེན་པོ་ང་དེའི་དུས་ན་བྲམ་ཟེའི་ཁྱེའུ་ལོ་བདུན་ལོན་པ་ཞིག་སྟེ། གཟུངས་སྔགས་འདི་ཐོས་པས་དེ་བཞིན་གཤེགས་པ་དེའི་བསྟན་པ་ལ་རྣམ་པར་
དག་པའི་དད་པ་ཐོབ་ཅིང་ད་ལྟ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྙེས་པ་ཡིན་ནོ། །བྲམ་ཟེ་ཆེན་པོ་ཁྱོད་ཀྱིས་ཐེ་ཚོམ་དང་ཡིད་གཉིས་མ་བྱེད་ཅིག །བྲམ་ཟེ་ཆེན་པོ་ཁྱོད་དེའི་ཚེ་དེའི་དུས་ན་སྲིན་མོ་ལྷ་མིན་མཛེས་མ་ཞེས་བྱ་བར་གྱུར་ཏོ། །དེའི་དུས་དགེ་བའི་སེམས་མ་
བཟུང་ཞིང་སེམས་ཅན་མང་པོ་ལ་གནོད་པ་བྱས་པའི་འབྲས་བུ་བསྐལ་པ་གྲངས་མེད་དུ་མར་ངན་སོང་མྱུལ་སྡུག་བསྔལ་དཔག་ཏུ་མེད་པ་མྱོངས་སོ། །མཐར་དེ་བཞིན་གཤེགས་པ་དེ་ལ་སྐྱབས་སུ་སོང་ཞིང་བསླབ་པ་བཟུང་བས་ད་ལྟ་བྲམ་ཟེ་ཤིང་སཱ་ལ་ཆེན་པོ་ལྟ་བུར་སྐྱེས་ཤིང་ཤེས་རབ་ཆེ་ལ་ལོངས་
སྤྱོད་ཕུན་སུམ་ཚོགས་པ་དང་ལྡན་པར་གྱུར། འོན་ཀྱང་ལས་ཀྱི་ལྷག་མས་བུ་ཚ་མེད་པར་གྱུར་པའོ། །བྲམ་ཟེ་ཆེན་པོ་དེའི་དུས་ཀྱི་པ་ཐ་རིའི་གྲོང་ཁྱེར་ན་གནས་པ་སྐྱེ་བོ་དེ་དག་ནི། ད་ལྟ་ངའི་འཁོར་དུ་བྱུང་བའི་ལྷ་ཀླུ་གནོད་སྦྱིན་དྲི་ཟ་ལྷ་མིན་མཁའ་ལྡིང་མིའམ་ཅི་ལ་སོགས་པའི་འདུས་པའི་
ཚོམས་ཆེན་པོ་འདི་དག་གོ། །བྲམ་ཟེ་ཆེན་པོ་ཁྱོད་དེའི་ཚེ་དེའི་དུས་ཀྱི་ལྷ་མིན་མཛེས་མའི་འཁོར་ཁྲི་ཕྲག་མང་པོ་དེ་དག་ད་ལྟ་གཞན་སུ་དག་ཡིན་ནམ་སྙམ་པའི་ཡིད་གཉིས་དང་། ནེམ་ནུར་བྱེད་ན་བྲམ་ཟེ་ཆེན་པོ་དེ་ལྟར་མ་བྱེད་ཅིག །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ཀྱི་ལྷ་མིན་

མཛེས་མའི་འཁོར་ཁྲི་ཕྲག་མང་པོ་ནི། ད་ལྟ་ངའི་འཁོར་འདུས་པ་ཆེན་པོའི་ནང་དུ་བྱུང་བའི་བྲམ་ཟེ་དང་། རྒྱལ་རིགས་དང་། རིག་བྱེད་སྨྲ་བ་རྣམས་དང་། གཅེར་བུ་པ་དང་། རྟོག་གེ་པ་གཞན་དག་སྒྱུ་རྩལ་ཤེས་རིགས་དང་། དུར་ཁྲོད་ན་གནས་པའི་བརྟུལ་ཞུགས་ཅན་དང་། ཚེམ་
བུ་པ་དང་། གླང་རུའི་བརྟུལ་ཞུགས་ཅན་དང་། རི་སུལ་ན་གནས་པའི་བརྟུལ་ཞུགས་ཅན་འདི་དག་གོ། །དེ་བཞིན་གཤེགས་པ་ཤཱཀྱ་ཐུབ་པས་དེ་དག་གི་སྔོན་གྱི་སྦྱོར་བ་རྣམས་དེ་ལྟར་བཤད་ནས་ཅང་མི་གསུང་བར་བཞུགས་སོ། །དེ་ནས་འཁོར་འདུས་པ་ཆེན་པོ་དེ་དག་གིས་སྔོན་གྱི་སྦྱོར་བའི་
རྒྱུ་རྐྱེན་དེ་ལྟ་བུ་ཐོས་ནས་ཤིན་ཏུ་ངོ་མཚར་བར་གྱུར་ཏེ་དགའ་ཞིང་མགུ་ནས། བདུག་སྤོས་དང་མེ་ཏོག་དང་བྱུག་པ་དང་ཕྱེ་མ་ཕུར་མ་དང་། མེ་ཏོག་གི་ཕྲེང་བ་དང་ན་བཟའ་དང་། རྒྱལ་མཚན་དང་བ་དན་ལ་སོགས་པའི་མཆོད་པའི་བྱེ་བྲག་སྣ་ཚོགས་བསྣམས་ནས་བཅོམ་ལྡན་འདས་ལ་མཆོད་ཅིང་
གཡས་སྐོར་དུ་བསྐོར་བ་ལན་གསུམ་བྱས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཞིང་ཐལ་མོ་སྦྱར་བ་བཏུད་ནས་ཚིག་གཅིག་གིས་མཐུན་པར་གསོལ་བ། བཅོམ་ལྡན་འདས་བདག་ཅག་ལ་སོགས་པའི་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ། རྟོག་པའི་རྒྱལ་པོ་
བྱང་ཆུབ་སྙིང་པོའི་རྒྱན་འབུམ་གྱི་གཟུངས་བཤད་དུ་གསོལ། བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ། རིག་པའི་རྒྱལ་པོ་དེ་ནི་སེམས་ཅན་ཐམས་ཅད་ཀྱི་དམིགས་བུ་དང་སྒྲོན་མེར་གྱུར་པ་སྟེ། ཁྱད་པར་དུ་ཡང་མ་འོངས་པའི་དུས་ལྔ་བརྒྱའི་ཐ་མ་ལ་བབས་
པའི་ཚེ་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པའོ། །དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་ཅང་མི་གསུང་བར་གནང་ནས། ཞལ་འཛུམ་པ་མཛད་དོ། །ཞལ་འཛུམ་པ་མཛད་པས་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་རྣམ་པ་སྣ་ཚོགས་འཕྲོས།
ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་གསལ་བར་བྱས་ཏེ། དེ་དག་ན་བཞུགས་པའི་སངས་རྒྱས་ཐམས་ཅད་མངོན་སུམ་དུ་ལྷམ་མེ་ལྷམ་མེར་སྣང་བར་གྱུར་ཏོ། །དེ་དག་གི་ཆོས་བཤད་པ་ཡང་ལྷང་ངེ་ལྷང་ངེར་ཐོས་པར་གྱུར་ཏོ། །གནས་དེ་ཉིད་རིན་པོ་ཆེའི་ལྗོན་ཤིང་རྩ་བ་སྡོང་པོ་ཡལ་ག་ལོ་འདབ་མེ་ཏོག་

འབྲས་བུ་རྣམས་རིན་པོ་ཆེ་སྣ་བདུན་ལས་གྲུབ་པ་ཡིད་དུ་འོང་བའི་ལྷའི་ཤིང་ཤ་སྟག་གི་ཚལ་ཆེན་པོས་ཕྱོགས་མཚམས་བརྒྱན་པར་གྱུར་ཏོ། །ཛམྦུ་གླིང་གི་སེམས་ཅན་ཐམས་ཅད་ཀྱང་ལྷའི་བདེ་བ་ལ་ལོངས་སྤྱོད་པར་གྱུར་པ་ལ་སོགས་པའི་རྨད་དུ་བྱུང་བའི་རྫུ་འཕྲུལ་གྱི་རྣམ་པར་རོལ་པའི་
བྱིན་རླབས་ཀྱི་སྣང་བ་འཇིག་རྟེན་འདི་ན་མངོན་སུམ་དུ་གྱུར་ཏོ། །དེའི་ཚེ་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པས་ཚུལ་དེ་དག་མཐོང་ནས་དགའ་བས་འཛུམ་པ་མཛད་ཅིང་། བཅོམ་ལྡན་འདས་ཀྱི་སྤྱན་སྔར་མཆིས་ཏེ་ཕྱག་འཚལ་ཞིང་ལན་གསུམ་བསྐོར་བ་བྱས་ནས་ཐལ་མོ་སྦྱར་བ་བཏུད་དེ་བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་ཐམས་ཅད་ལ་ཕན་པ་དང་བདེ་བ་རྒྱ་ཆེན་པོ་རྒྱུན་མི་འཆད་པ་འབྱུང་བའི་ཕྱིར་རྟོག་པའི་རྒྱལ་པོ་བྱང་ཆུབ་སྙིང་པོའི་རྒྱན་འབུམ་གྱི་གཟུངས་བཤད་དུ་གསོལ། བདེ་བར་གཤེགས་པས་བཤད་དུ་གསོལ་ཞེས་གསོལ་པ་དང་། བཅོམ་ལྡན་
འདས་ཀྱིས་ཅང་མི་གསུང་བར་ཞལ་གྱིས་བཞེས་ནས་སངས་རྒྱས་ཐམས་ཅད་ལ་ཉེ་བར་བལྟ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཏིང་ངེ་འཛིན་དེའི་མཐུས་ཕྱོགས་བཅུའི་སངས་རྒྱས་ཐམས་ཅད་ཀྱི་ཞིང་ཁམས་མ་ལུས་པར་མངོན་སུམ་དུ་སྣང་བར་གྱུར་ཏེ།
སངས་རྒྱས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ཐམས་ཅད་མདའ་འབེན་གཅིག་གིས་ཙམ་དུ་ཉེ་བར་གྱུར་ཏོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་མགྲིན་གཅིག་དབྱངས་གཅིག་གིས་འདི་སྐད་དུ་ལེགས་སོ་ལེགས་སོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཁྱོད་
ཀྱིས་རྟོག་པའི་རྒྱལ་པོ་འདི་གསུང་བར་བརྩམས་པ་ཤིན་ཏུ་ལེགས་སོ། །ལེགས་པར་གསུངས་ཤིག །རྟོག་པའི་རྒྱལ་པོ་འདི་འདས་པའི་སངས་རྒྱས་ཐམས་ཅད་ཀྱིས་གསུངས་ཞིང་བྱིན་གྱིས་བརླབས་པའོ། །ད་ལྟར་དེ་བཞིན་གཤེགས་པ་ཤཱཀྱ་ཐུབ་པ་ཁྱེད་ཀྱིས་གསུངས་པའི་དུས་ལ་བབ་བོ། །བདག་ཅག་
ཐམས་ཅད་ཀྱང་རྗེས་སུ་ཡི་རང་ངོ་ཞེས་གསུངས་སོ། །དེ་ནས་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པས་ལྷུང་བཟེད་གཅིག་བསྣམས་ནས་བཅོམ་ལྡན་འདས་ཀྱིས་གསུངས་པའི་ཆོས་ཀྱི་དབྱིངས་ཐམས་ཅད་དེར་བསྡུས་ཏེ་བཅོམ་ལྡན་འདས་ལ་ཕུལ་ཏོ། །བཅོམ་ལྡན་འདས་ཀྱི་ཕྱག་

གསེར་གྱི་མདོག་ཅན་བརྐྱང་ནས་ཕྱག་ཏུ་བཞེས་ལ་མདུན་གྱི་ནམ་མཁར་པོར་ཏོ། །དེ་ནས་ལྷུང་བཟེད་དེས་ནམ་མཁའི་དབྱིངས་ཀྱི་ཁྱོན་གང་བའི་དེ་བཞིན་གཤེགས་པའི་སྐུར་གྱུར་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཡོངས་སུ་གང་བར་གྱུར་ནས་དེ་དག་ཐམས་ཅད་ཀྱང་
མགྲིན་གཅིག་དབྱངས་གཅིག་གིས་བཅོམ་ལྡན་འདས་ཤཱཀྱ་ཐུབ་པ་ལེགས་སོ་ལེགས་སོ་ཞེས་གསུངས་ཤིང་། དེ་དག་ཐམས་ཅད་རེ་རེའི་སྤྱན་སྔར་བཅོམ་ལྡན་འདས་ཤཱཀྱ་ཐུབ་པ་འཁོར་གྱི་ཚོགས་དང་བཅས་པ་དང་། ཤཱཀྱ་ཐུབ་པ་སོ་སོའི་མདུན་དུ་བྱང་ཆུབ་སེམས་དཔའ་འཇམ་དཔལ་ལྷུང་བཟེད་འབུལ་
བཞིན་པ་རེ་རེ་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ངོ་མཚར་རྨད་དུ་བྱུང་བའི་རྫུ་འཕྲུལ་ཆེན་པོ་དེ་བཞིན་གཤེགས་པ་ཐམས་ཅད་འུབས་ཀྱིས་འདུས་ཤིང་རྣམ་
པར་སྤྲོས་པ་འདི་སུའི་དོན་དུ་ཡིན། འདིའི་རྒྱུ་གང་། རྐྱེན་གང་། ཅིའི་ཕྱིར་འོད་ཟེར་འགྱེད་ལ་རྣམ་པར་འཕྲུལ་བ་འདི་བསྟན། འཇམ་དཔལ་གྱིས་སྨྲས་པ། ཅི་ཕྱག་ན་རྡོ་རྗེ་ཁྱེད་ཀྱིས་འོད་ཀྱི་སྣང་བ་དང་རྫུ་འཕྲུལ་གྱི་རྒྱུ་རྐྱེན་མི་ཤེས་སམ། ཕྱག་ན་རྡོ་རྗེས་སྨྲས་པ། འཇམ་དཔལ་མི་ཤེས་སོ། །དེ་བཞིན་གཤེགས་
པ་ཐམས་ཅད་འདུས་པ་དང་རྣམ་པར་སྤྲོས་པའི་རྫུ་འཕྲུལ་ཆེན་པོ་འདི་འདྲ་བདག་གིས་སྔོན་ཆད་མ་མཐོང་མ་ཐོས་ཤིང་དེ་རིང་བདག་ལ་ཐོག་མར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས། རྡོ་རྗེ་གསོར་ཞིང་བཅོམ་ལྡན་འདས་ལ་བསྐོར་བ་ལན་གསུམ་བྱས་ནས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །ཆོས་གང་ཞིག་བསྟན་པར་བརྩམས་པས་དེང་འདིར་སྔོན་ཆད་མཐོང་མ་མྱོང་ཐོས་མ་མྱོང་བའི་རྫུ་འཕྲུལ་ངོ་མཚར་རྨད་དུ་བྱུང་བ་འདི་ལྟ་བུ་ཞིག་སྟོན། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་རེ་ཞིག་སྒུག་ཅིག །སྐད་ཅིག་ཡུད་ཙམ་ན་མངོན་སུམ་དུ་འགྱུར་རོ་ཞེས་གསུངས་
མ་ཐག་རིན་པོ་ཆེ་སྣ་བདུན་ལས་གྲུབ་པའི་མཆོད་རྟེན་དཔངས་སུ་དཔག་ཚད་བདུན་སྟོང་དང་རྒྱར་དཔག་ཚད་ལྔ་སྟོང་ཡོད་པ་ཞིག་ས་བརྟོལ་ཏེ་བྱུང་བར་གྱུར་ཏོ། །མཆོད་རྟེན་དེ་ནི་ལྷའི་རིན་པོ་ཆེའི་རྒྱན་གྱིས་སྦུད་པ་འོད་ཟེར་སྣ་ཚོགས་འཕྲོ་བ། ལྷ་རྫས་ཀྱི་གོས་ཀྱི་དར་དཔྱངས་འཕྱང་བ། ནོར་བུ་རིན་པོ་ཆེ་མུ་ཏིག་གི་དྲ་བས་

ཁེབས་ཅིང་རིན་པོ་ཆེའི་ཕྱང་འཕྲུལ་དང་། གསེར་གྱི་དྲིལ་བུ་དང་དྲིལ་བུའི་གཡེར་ཁ་ལས་སྙན་པའི་སྒྲ་སྐད་སྣ་ཚོགས་བྱུང་བའོ། །དེའི་ཚེ་བར་སྣང་ནས་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དུ་མས་ལག་ན་མཆོད་པའི་ཡོ་བྱད་སྣ་ཚོགས་ཐོགས་པ་བབས་ཏེ། རིན་པོ་ཆེའི་མཆོད་རྟེན་དེ་ལ་
མཆོད་པ་དང་ཕྱག་དང་བསྐོར་བ་བྱེད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་མཆོད་རྟེན་དེའི་སྒོ་ཕྱེད་པར་བསྒོས་སོ། །སྒོ་ཕྱེད་པར་བསྒོས་པ་དང་བྱང་ཆུབ་སེམས་དཔའ་ཕྱག་ན་རྡོ་རྗེ་སྐུ་ལས་ཡེ་ཤེས་ཀྱི་མེའི་ཕུང་པོ་རབ་ཏུ་འབར་བ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ལག་
ན་རྡོ་རྗེ་གསོར་ཞིང་ཞལ་ཁྲོ་གཉེར་བསྡུས་པའི་ཉམས་ཅན། འཇིགས་སུ་རུང་བའི་དཔའ་བྱད་དང་ལྡན་པ་དེས་རིན་པོ་ཆེའི་མཆོད་རྟེན་དེའི་དྲུང་དུ་སོང་ནས་ཕྱག་གཡས་པ་བརྐྱང་སྟེ་མཆོད་རྟེན་དེའི་སྒོ་འཕར་རབ་ཏུ་ཕྱེའོ། །ཕྱེད་པ་དང་དེའི་ནང་ན་ཛམྦུ་ཆུ་བོའི་གསེར་ལས་གྲུབ་པའི་སེང་གེའི་ཁྲི་རིན་པོ་ཆེ་སྣ་
བདུན་གྱིས་སྤ་བ་ལྷ་རྫས་ཀྱི་གོས་སྣ་ཚོགས་ཀྱིས་ཁེབས་དང་ལྡན་པའི་སྟན་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤིན་ཏུ་རྒྱས་པའི་གསེར་ཞལ་མཆོག་ཏུ་དཔའ་བའི་འོད་ཟེར་རྒྱལ་མཚན་གྱི་ཏོག་ཅེས་བྱ་བ་བསམ་གཏན་ལ་སྙོམས་པར་ཞུགས་བཞིན་པ་
སྣང་བར་གྱུར་ཏོ། །དེ་ནས་སངས་རྒྱས་ཤིན་ཏུ་རྒྱས་པའི་གསེར་ཞལ་མཆོག་ཏུ་དཔའ་བའི་འོད་ཟེར་རྒྱལ་མཚན་གྱི་ཏོག་དེས་འདི་སྐད་ཅེས་བསྔགས་པ་མཛད་དོ། །བཅོམ་ལྡན་འདས་ཤཱཀྱ་ཐུབ་པ་ལེགས་སོ་ལེགས་སོ། །དེ་བཞིན་གཤེགས་པ་ཤཱཀྱ་ཐུབ་པ་ཁྱེད་ཀྱིས་འདི་ལྟ་བུའི་ངོ་མཚར་ཆེ་བའི་རྫུ་འཕྲུལ་
བསྟན་ཅིང་དེ་བཞིན་གཤེགས་པ་ཐམས་ཅད་འདུས་པ་དང་སྤྲོས་པར་མཛད་ཅིང་། དོན་དམ་པར་ཆོས་ཐམས་ཅད་འདུ་འབྲལ་ཡོང་ཡེ་མི་མངའ་བཞིན་འཇིག་རྟེན་འདི་ན་རྫུ་འཕྲུལ་ངོ་མཚར་འདི་ལྟ་བུ་བསྟན་པ་འདི་ནི། སྔོན་གྱི་སངས་རྒྱས་རྣམས་ལ་ཡང་མ་བྱུང་ངོ་། །ད་ལྟ་བཅོམ་ལྡན་འདས་ཤཱཀྱ་ཐུབ་པ་ཁྱེད་
ཀྱིས་རྟོག་པའི་རྒྱལ་པོ་བྱང་ཆུབ་སྙིང་པོའི་རྒྱན་འབུམ་གྱི་གཟུངས་བཤད་དུ་གསོལ། བཅོམ་ལྡན་འདས་ཁྱེད་ཀྱིས་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་རྗེས་སུ་བརྩེ་བས་དེ་བཞིན་གཤེགས་པ་ཐམས་ཅད་ཀྱི་སྐུ་མངོན་སུམ་དུ་སྣང་བའི་རྣམ་པར་རོལ་པའི་རྫུ་འཕྲུལ་བསྟན་པ་དང་ངའི་མཆོད་རྟེན་ས་

སྟེང་དུ་བྱུང་བའི་རྒྱུ་རྐྱེན་འདི་ཉིད་ཀྱང་བྱང་ཆུབ་སྙིང་པོའི་རྒྱན་འབུམ་གྱི་གཟུངས་ཀྱི་མཐུ་དང་བྱིན་རླབས་ལས་བྱུང་བ་ལགས་པས་བཅོམ་ལྡན་འདས་ཀྱིས་བྱང་ཆུབ་སྙིང་པོའི་རྒྱན་འབུམ་གྱི་གཟུངས་འཆད་པའི་དུས་ལ་བབ་བོ། །དེ་སྐད་ཅེས་གསུངས་པ་དང་། བཅོམ་ལྡན་འདས་ཤཱཀྱ་ཐུབ་པས་དེ་བཞིན་གཤེགས་
པ་ཤིན་ཏུ་རྒྱས་པའི་གསེར་ཞལ་མཆོག་ཏུ་དཔའ་བའི་འོད་ཟེར་རྒྱལ་མཚན་གྱི་ཏོག་གིས་བསྐུལ་བ་དང་དུ་བཞེས་ནས། རྟོག་པའི་རྒྱལ་པོ་བྱང་ཆུབ་སྙིང་པོའི་རྒྱན་འབུམ་ཞེས་བྱ་བའི་གཟུངས་འདི་གསུངས་སོ། །ཨོཾ་ན་མོ་བྷ་ག་བ་ཏེ། བི་པུ་ལ་བ་དན་ཀཱཉྩ་ནོ་ཏ་ཀྵིཔྟ། པྲ་བྷཱ་ས་ཀེ་ཏུ་མཱུརྡྷ་ནེ། ཏ་ཐཱ་ག་ཏཱ་ཡ།
ཨརྷ་ཏེ་སམྱཀྶཾ་བུདྡྷ་ཡ། ན་མོ་བྷ་ག་བཱ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྷཱ་ཡ། ཏདྱ་ཐཱ། བོ་དྷི་བོ་དྷི། བོ་དྷི་ནི་བོ་དྷི་ནི། སརྦ་ཏ་ཐཱ་ག་ཏ་གོ་ཙ་རེ། དྷ་ར་དྷ་ར། ཧ་ར་ཧ་ར། པྲ་ཧ་ར་པྲ་ཧ་ར། མ་ཧཱ་བོ་དྷི་ཙིཏྟ་དྷ་རེ། ཙུ་ལུ་ཙུ་ལུ། ཥ་ཊ་རསྨི་ས་ཧྩོ་དི་ཏེ། སརྦ་ཏ་ཐཱ་ག་ཏ་བྷྲིཥིཀྟེ། གུ་ཎེ་
གུ་ཎ་བ་ཏེ། སརྦ་བུདྡྷ་གུ་ཎཱ་བ་བྷཱ་སེ། མི་ལི་མི་ལི། ག་ག་ན་ཏ་ལེ། པྲ་ཏིཥྛི་ཏེ། སརྦ་ཏ་ཐཱ་ག་ཏ་ཨ་དྷིཥྛི་ཏེ། ན་བྷ་སྟ་ལེ། ཤ་མེ་ཤ་མེ། པྲ་ཤ་མེ་པྲ་ཤ་མེ། སརྦ་པཱ་པཾ་པྲ་ཤ་མ་ཎ། སརྦ་པཱ་པཾ་བི་ཤོ་དྷ་ནེ། ཧུ་ལུ་ཧུ་ལུ། མ་ཧཱ་བོ་དྷི་མཱརྒ་སཾ་པྲ་ཏིཥྛི་ཏེ། སརྦ་ཏ་ཐཱ་ག་ཏ། སུ་པྲ་ཏིཥྛི་ཏེ་ཤུདྡྷེ་
སྭཱ་ཧཱ། རྩ་བའི་སྔགས་སོ། །དེ་ལྟར་བཅོམ་ལྡན་འདས་ཀྱིས་རྟོག་པའི་རྒྱལ་པོ་ཆེན་པོ་བྱང་ཆུབ་སྙིང་པོའི་རྒྱན་འབུམ་གྱི་གཟུངས་འདི་གསུངས་མ་ཐག་ཏུ། ཕྱོགས་བཅུ་ན་བཞུགས་པའི་སངས་རྒྱས་ཐམས་ཅད་ཀྱིས་ལེགས་སོ་ལེགས་སོ། །ལེགས་པར་གསུངས་སོ་ཞེས་བསྔགས་པ་མཛད་དོ། །
སྤྲུལ་པའི་སངས་རྒྱས་དེ་དག་ཐམས་ཅད་ཀྱིས་ཀྱང་ལེགས་སོ་ལེགས་སོ། །དེ་བཞིན་གཤེགས་པ་ཤཱཀྱ་ཐུབ་པ་ཁྱེད་ཀྱིས་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་གཟུངས་ཀྱི་རྒྱལ་པོ་འདི་གསུངས་པ་ལེགས་སོ་ལེགས་པར་གསུངས་སོ་ཞེས་མཐུན་པར་བསྔགས་པ་མཛད་མ་ཐག་ཏུ་ས་ཆེན་པོ་
འདི་རྣམ་པ་དྲུག་ཏུ་གཡོས་སོ། །ལྷས་མེ་ཏོག་སྣ་ཚོགས་ཀྱི་ཆར་ཕབས་སོ། །དེ་བཞིན་དུ་བྱུག་པ་དང་ཕྱེ་མ་ཕུར་མ་དང་། ན་བཟའ་དང་ནོར་བུ་རིན་པོ་ཆེའི་རྒྱན་སྣ་ཚོགས་དང་། དབུ་རྒྱན་དང་ཕྱག་གདུབ་དང་དོ་ཤལ་དང་སྐ་རགས་ལ་སོགས་པ་བསྣམས་ནས་མཆོད་ཅིང་སྙན་ཅིང་འཇེབས་པའི་གླུ་ལེན། རོལ་མོ་

སྣ་ཚོགས་དཀྲོལ། མེ་ཏོག་གི་ཆར་དེ་ཡང་འདི་ལྟ་སྟེ། ཨུཏྤ་ལ་དང་པདྨ་དམར་པོ་དང་པདྨ་ལེ་བརྒན་རྩི་དང་བུཎྜ་རཱི་ག་དང་། མནྡཱ་ར་བ་དང་མནྡཱ་ར་བ་ཆེན་པོ་དང་། མེ་ཏོག་རོ་ཙ་དང་མཉྫུ་ཀ་དང་མཉྫུ་ཀ་ཆེན་པོ་དང་སུ་མ་ནཱ་དང་། ཝཱ་ཪྴི་ཀ་དང་ཙམྤ་ཀ་དང་སཽ་གནྡྷི་ཀ་ལ་སོགས་
པའི་མེ་ཏོག་སྣ་ཚོགས་ཀྱི་ཆར་བབས་ཤིང་བཅོམ་ལྡན་འདས་ལ་མཆོད་པ་དང་བསྟོད་བསྔགས་བྱས་སོ། །དེ་ལྟར་བཅོམ་ལྡན་འདས་ཀྱིས་འདུས་པའི་འཁོར་ཚོགས་ཆེན་པོའི་ནང་། གཟུངས་ཀྱི་རྒྱལ་པོ་འདི་གསུངས་པས་ལ་ལ་ནི་རང་སངས་རྒྱས་ཀྱི་བྱང་ཆུབ་ཐོབ་པར་གྱུར་ཏོ། །ལ་ལ་ནི་དགྲ་བཅོམ་
པའི་འབྲས་བུ་ཐོབ་པར་གྱུར་ཏོ། །ལ་ལས་ཕྱིར་མི་འོང་བའི་འབྲས་བུ། ལ་ལས་ལན་ཅིག་ཕྱིར་འོང་བའི་འབྲས་བུ། ལ་ལས་རྒྱུན་ཏུ་ཞུགས་པའི་འབྲས་བུ་ཐོབ་པར་གྱུར་ཏོ། །འགའ་ཞིག་ནི་བྱང་ཆུབ་ཏུ་སེམས་བསྐྱེད་དོ། །འགའ་ཞིག་ཕྱིར་མི་ལྡོག་པའི་ས་ལ་གནས་པར་གྱུར་ཏོ། །འགའ་ཞིག་བླ་ན་མེད་པའི་
བྱང་ཆུབ་ཏུ་ལུང་བསྟན་ཐོབ་པོ། །སེམས་ཅན་ལ་ལས་ལྷར་སྐྱེ་བའི་འབྲས་བུ་ཐོབ་བོ། །སེམས་ཅན་དམྱལ་བར་སྐྱེས་པ་རྣམས་ནི་སྡུག་བསྔལ་ཐམས་ཅད་ལས་ཐར་བར་གྱུར་ཏོ། །གཤིན་རྗེའི་འཇིག་རྟེན་དུ་ལྟུང་བ་དང་ཡི་དགས་དང་དུད་འགྲོའི་སྐྱེ་གནས་སུ་སོང་བ་ཐམས་ཅད་ཀྱང་སོ་སོའི་སྐྱེ་གནས་ཀྱི་
སྡུག་བསྔལ་ལས་གྲོལ་ཏེ་མིའི་ལུས་ཐོབ་ནས་བྱང་ཆུབ་ཀྱི་ལམ་ལ་ཞུགས་པར་གྱུར་ཏོ། །དེ་ལྟར་ཛམྦུ་གླིང་འདིར་ངོ་མཚར་བའི་རྫུ་འཕྲུལ་བྱུང་ཞིང་སེམས་ཅན་ཐམས་ཅད་ཕན་པ་དང་བདེ་བ་ཕུན་སུམ་ཚོགས་པ་ཐོབ་པར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གསང་བདག་ཕྱག་
ན་རྡོ་རྗེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་རྟོག་པའི་རྒྱལ་པོ་འདི་ནི་ཤིན་ཏུ་རྙེད་པར་དཀའ་བའོ། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། རིགས་ཀྱི་
བུའམ་རིགས་ཀྱི་བུ་མོ་གང་ལ་ལ་ཞིག་གིས་གཟུངས་འདི་འཆང་བ་དང་། ཀློག་པོ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་དག་པར་རབ་ཏུ་སྟོན་པར་བྱེད་པ་དང་ཚུལ་བཞིན་དུ་ཡིད་ལ་བྱེད་པ་དེའི་བསོད་ནམས་ཀྱི་ཕུང་པོའི་ཚད་ནི་ཇི་ཙམ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་

པ། ལེགས་སོ་ལེགས་སོ། །གསང་བའི་བདག་པོ་ལག་ན་རྡོ་རྗེ་ཁྱོད་ཀྱིས་དོན་འདི་འདྲི་བ་ནི་ཤིན་ཏུ་ལེགས་སོ། །དྲི་བ་འདི་ནི་མཆོག་གོ། །དམ་པའོ། །འོན་ཀྱང་ཁྱོད་སོང་ནས་འཇམ་དཔལ་གཞོན་ནུར་གྱུར་པ་ལ་དྲིས་ཤིག་དང་དེས་ཁྱོད་ལ་ལེགས་པར་སྟོན་པར་འགྱུར་རོ། །དེ་སྐད་ཅེས་གསུངས་པ་
དང་། ཕྱག་ན་རྡོ་རྗེས་བྱང་ཆུབ་སེམས་དཔའ་འཇམ་དཔལ་གྱི་ཐད་དུ་ཕྱིན་ནས་གཡས་སྐོར་དུ་བསྐོར་བ་བྱས་ཏེ་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །སྐྱེས་བུ་གང་ལ་ལ་ཞིག་གིས། བྱང་ཆུབ་སྙིང་པོའི་རྒྱན་འབུམ་གྱི་གཟུངས་འདི་འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་།
གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་བྱེད་པ་དེའི་བསོད་ནམས་ཀྱི་ཕུང་པོའི་ཚད་ནི་ཇི་ཙམ་ཞིག་ལགས། འཇམ་དཔལ་གཞོན་ནུར་གྱུར་པས་སྨྲས་པ། ཕྱག་ན་རྡོ་རྗེ་ལེགས་པར་ཉོན་ཅིག །དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཇི་སྙེད་ཡོད་པའི་ས་གཞི་རི་དང་ཐང་དང་།
ལ་དང་སྒང་ཆེ་ཆུང་ཐམས་ཅད་བརྒྱ་ཆ་སྟོང་ཆ་ཐ་ན་སྤུ་ཙམ་གྱི་བར་གཤག་ཅིང་ཕྱེ་ཡང་རྡུལ་ཕྲ་རབ་ཀྱིས་མ་ཁྱབ་པའི་གནས་ཤིག་མཐོང་བར་མི་འགྱུར་རོ། །དེ་བཞིན་དུ་ངས་ལྷའི་མིག་གིས་བལྟས་པས། དེ་བཞིན་གཤེགས་པའི་སྐུའི་ཆ་ཐམས་ཅད་ཀྱང་རིང་བསྲེལ་གྱིས་ཁྱབ་པ་
སྟེ། དེ་བཞིན་གཤེགས་པའི་ཆོས་ཀྱི་སྐུའི་ཆ་ཐམས་ཅད་ཆོས་ཀྱི་དབྱིངས་ཀྱི་རིང་བསྲེལ་དང་། རུས་པའི་རིང་བསྲེལ་དང་། ཤའི་རིང་བསྲེལ་དང་། ཡུངས་འབྲུ་ལྟ་བུའི་རིང་བསྲེལ་གྱིས་སྟོངས་པའི་གནས་ཤིག་ངས་མ་མཐོང་ངོ་། །ཕྱག་ན་རྡོ་རྗེ་མངོན་པར་ཤེས་པ་དང་རྫུ་འཕྲུལ་གྱི་
རྩལ་དང་ལྡན་པའི་སྐྱེ་བོ་ཞིག་གིས་དེའི་གྲངས་ཇི་ཙམ་བགྲང་བར་ནུས་ན། ཕྱག་ན་རྡོ་རྗེ་སྐྱེ་བོ་དེ་བློ་གྲོས་དང་ཤེས་རྩལ་ཕུན་སུམ་ཚོགས་པ་ཞིག་ལགས་སམ། ཕྱག་ན་རྡོ་རྗེས་སྨྲས་པ། དེ་དེ་བཞིན་ནོ། །འཇམ་དཔལ་དེ་དེ་བཞིན་ཏེ། སྐྱེ་བོ་དེ་ནི་བློ་གྲོས་དང་ཤེས་རྩལ་ཕུན་སུམ་ཚོགས་པ་ངོ་
མཚར་དུ་གྱུར་པ་ཞིག་གོ། །འཇམ་དཔལ་གྱིས་སྨྲས་པ། ཕྱག་ན་རྡོ་རྗེ་ཉོན་ཅིག་རྡུལ་ཕྲ་རབ་དེ་དག་དང་རིང་བསྲེལ་དེ་ལྟ་བུའི་གྲངས་དང་ཚད་ནི་བགྲང་བ་དང་དཔག་པར་རུང་གིས། ཕྱག་ན་རྡོ་རྗེ་རྡུལ་ཕྲ་རབ་དང་། རིང་བསྲེལ་དེ་དག་གི་གྲངས་རྣམས་དེ་ལྟར་བགྲང་བ་དང་དཔག་པ་ཇི་ལྟ་བ་བཞིན་དུ། དེ་

བཞིན་གཤེགས་པས་བསྐལ་བའམ། བསྐལ་བ་ལས་ལྷག་གམ། བསྐལ་པ་སྟོང་དུ་བཞུགས་ཏེ་གསུངས་ཀྱང་། རྟོག་པའི་རྒྱལ་པོ་བྱང་ཆུབ་སྙིང་པོའི་རྒྱན་འབུམ་གྱི་གཟུངས་ཀྱི་ཕན་ཡོན་བསོད་ནམས་ཀྱི་ཕུང་པོའི་ཚད་ནི་དཔེའི་སྒོ་ནས་ཀྱང་རྫོགས་པར་བསྟན་པར་མི་ནུས་
སོ། །ཕྱག་ན་རྡོ་རྗེ་རྟོག་པའི་རྒྱལ་པོ་བྱང་ཆུབ་སྙིང་པོའི་རྒྱན་འབུམ་ཞེས་བྱ་བའི་གཟུངས་འདི་ནི་དེ་ལྟ་བུའི་ཡོན་ཏན་ཕུན་སུམ་ཚོགས་པ་དང་ལྡན་པའོ། །གང་ཞིག་གཟུངས་འདི་འཆང་བ་དང་ཀློག་པ་དང་། ཀུན་ཆུབ་པར་བྱད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་བསྟན་པ་དང་། ཚུལ་
བཞིན་ཡིད་ལ་བྱེད་པ་ལྟ་ཞོག །གླེགས་བམ་ལ་བྲིས་ཏེ་མཆོད་པ་བཀུར་སྟི་ཙམ་བྱེད་པའི་སྐྱེ་བོས་ཀྱང་ཚད་མེད་གྲངས་མེད་དཔག་གིས་མི་ལངས་པའི་བསོད་ནམས་ཀྱི་ཕུང་པོ་ཟད་མི་ཤེས་པ་འཐོབ་པར་འགྱུར་རོ། །དེ་ནས་འཁོར་དེར་འདུས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་
ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ཐམས་ཅད་འཇམ་དཔལ་གཞོན་ནུར་གྱུར་པའི་ཚིག་དེ་ཐོས་ནས་མ་ལུས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ས་ལ་གནས་པར་གྱུར་ཏོ། །ལ་ལས་ནི་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་གྱུར་ཏོ། །དེ་ནས་ཐམས་ཅད་ཀྱིས་མགྲིན་གཅིག་ཏུ་ཨ་ལ་ལ་ལེགས་པར་བཤད་དོ་ཞེས་བསྔགས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ