Kinh tạng Tây Tạng (Kangyur Đại Học) — 088_རྒྱུད་འབུམ།_ན

་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ་སྐྱབས་སུ་
མཆིའོ། །ངོ་མཚར་རྨད་དུ་བྱུང་བའི་རྫུ་འཕྲུལ་ལ་དབང་བསྒྱུར་བ་སངས་རྒྱས་བཅོམ་ལྡན་འདས་ལ་ཕྱག་འཚལ་ལོ་སྐྱབས་སུ་མཆིའོ། །བསམ་གྱིས་མི་ཁྱབ་པའི་མཛད་པ་དང་ཕྲིན་ལས་ཀྱི་བདག་ཉིད་སངས་རྒྱས་བཅོམ་ལྡན་འདས་ལ་ཕྱག་འཚལ་ལོ་སྐྱབས་སུ་མཆིའོ་ཞེས་ཆེད་དུ་བརྗོད་དོ། །དེ་
ནས་གསང་བའི་བདག་པོ་ཕྱག་ན་རྡོ་རྗེས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟ་བུར་བྱང་ཆུབ་རྒྱན་འབུམ་གྱི་གཟུངས་འདི་ལ་བརྟེན་ནས་དགེ་བའི་རྩ་བ་ཐམས་ཅད་བསྐྲུན་པ་དང་བསྐྱེད་པར་མཛད། འཇམ་དཔལ་གྱིས་སྨྲས་པ། ཕྱག་ན་རྡོ་རྗེ་

ཚུལ་འདི་ནི་བཅོམ་ལྡན་འདས་ལ་གསོལ་བར་རིགས་སོ། །བཅོམ་ལྡན་འདས་ཀྱིས་ཚུལ་འདི་མ་ལུས་པར་མཁྱེན་ཏོ། །དེ་ནས་གསང་བའི་བདག་པོ་ཕྱག་ན་རྡོ་རྗེས་བཅོམ་ལྡན་འདས་ཀྱི་གན་དུ་ཕྱིན་ནས་བཅོམ་ལྡན་འདས་ལ་བསྐོར་བ་ལན་གསུམ་བྱས་ཏེ་འདི་སྐད་ཅེས་གསོལ་ཏོ། །
བཅོམ་ལྡན་འདས་ཚུལ་ཇི་ལྟ་བུར་བྱང་ཆུབ་རྒྱན་འབུམ་གྱི་གཟུངས་འདི་ལ་བརྟེན་ནས་དགེ་བའི་རྩ་བ་ཐམས་ཅད་བསྐྲུན་པར་མཛད་བསྐྱེད་པར་མཛད། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཁྱོད་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག །ལག་ན་རྡོ་རྗེ་གཟུངས་
འདི་ལ་བརྟེན་ནས་དགེ་བའི་རྩ་བ་ཐམས་ཅད་བསྐྲུན་པ་དང་སྐྱེད་པར་བྱེད་པའི་ཐབས་ངས་ཁྱོད་ལ་བཤད་དོ། །འདི་ལྟ་སྟེ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས།
ལུས་དང་ཡན་ལག་བཀྲུས་ཤིང་གོས་གསར་གཙང་མ་གོན་ཏེ། བ་ལྕི་དང་དྲི་བཟང་བསྲེས་པའི་ས་གཙང་གིས་མཎྜལ་གྲུ་བཞི་པ་བྱས་ལ། བ་བྱུང་ལྔ་དང་དྲི་བཟང་གི་ཆུས་ལེགས་པར་ཆག་ཆག་གདབ། མེ་ཏོག་ལེགས་པར་བཀྲམ་ཞིང་མཆོད་པ་ཡང་བཤམ། གཟུངས་འདིས་བྱིན་གྱིས་
བརླབས་པའི་ཆུས་སངས་རྒྱས་ཀྱི་སྐུ་གཟུགས་ལ་ཁྲུས་བྱ། དེ་བཞིན་དུ་གཟུངས་འདིས་བྱིན་གྱིས་བརླབས་པའི་ཙནྡན་དཀར་པོའི་ཕྱེ་མ་སྦྱར་བའི་གུར་གུམ་གྱིས་བྱུག །དེ་ནས་ཅི་འབྱོར་པའི་མཆོད་པ་འབུལ་ཞིང་བསྐོར་བ་དང་ཕྱག་བྱས་ནས་སྐུ་གཟུགས་ཀྱི་སྤྱན་སྔར་འདུག་ལ་གཟུངས་སྔགས་ལན་
ཅིག་བརྗོད་ཅིང་མར་མེ་གཅིག་བུད་པར་བྱའོ། །ལག་ན་རྡོ་རྗེ་དགེ་བའི་རྩ་བ་བསྐྲུན་པ་དང་བསྐྱེད་པའི་ངས་དཔེ་གཅིག་སྟོན་གྱིས་ཉོན་ཅིག །དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གནས་པའི་ཀླུའི་རྒྱལ་པོ་ཆེན་པོ་ཐམས་ཅད་ཀྱིས་སོ་སོ་ནས་ཆར་གྱི་ཐིགས་པ་རྡུལ་ཕྲ་རབ་ཙམ་
པའི་ཆར་ཆེན་པོ་འབེབས་པར་བྱས་ཏེ། དེ་ལ་མི་རྫུ་འཕྲུལ་གྱི་སྟོབས་ཆེན་པོ་དང་ལྡན་པ་ཞིག་ཡོད་ལ། མི་དེས་ཆར་དེའི་ཐིགས་པ་རེ་རེ་ནས་བགྲངས་པས་དེའི་གྲངས་དང་ཚད་རྟོགས་ནུས་ཀྱིས། དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མའམ།

གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་སྔར་བསྟན་པ་ལྟར་མཆོད་པ་དང་ཕྱག་བྱས་པ་ལ་སོགས་པའི་ཕན་ཡོན་གྱི་གྲངས་དང་ཚད་ནི་དེ་བཞིན་གཤེགས་པས་བསྐལ་བའམ། བསྐལ་པ་ལས་ལྷག་གམ། བསྐལ་པ་བརྒྱ་སྟོང་གི་བར་བཞུགས་ཏེ་ཆར་
གྱི་ཐིགས་པ་བགྲངས་པ་ཇི་ལྟ་བུར་གསུངས་ཀྱང་རྫོགས་པར་མི་འགྱུར་རོ། །ལག་ན་རྡོ་རྗེ་གོང་དུ་བསྟན་པའི་སྐུ་གཟུགས་ལ་ཁྲུས་གསོལ་བ་ཙམ་གྱི་བསོད་ནམས་ཀྱི་ཚད་ནི་དེ་བཞིན་གཤེགས་པ་ཐམས་ཅད་ཀྱིས་མི་མཁྱེན་ཏོ། །ལག་ན་རྡོ་རྗེ་གཞན་ཡང་དགེ་བའི་རྩ་བ་བསྐྲུན་པ་དང་བསྐྱེད་པར་
བྱ་བ་དང་། བསམ་པའི་དོན་འགྲུབ་པར་བྱེད་པའི་ལས་ཚོགས་ཀྱི་རྟེན་འབྲེལ་གྲུབ་པའི་ཚུལ་མདོ་ཙམ་ཞིག་བཤད་ཀྱིས་ཉོན་ཅིག །ལག་ན་རྡོ་རྗེ་གང་ལ་ལ་ཞིག་གིས་བྱང་ཆུབ་སྙིང་པོའི་རྒྱན་འབུམ་གྱི་གཟུངས་འདི་གྲོ་ག་ལ་བྲིས་ཏེ། ཕྱག་མཚན་གྱི་རྡོ་རྗེའི་ནང་དུ་བཅུག་པའམ། སྐུ་གཟུགས་
ཀྱི་ནང་བཅུག་པའམ། ཁོག་པར་བྲིས་པའམ། ལྷ་ཁང་གི་གནྡྷོ་ལའི་ནང་བཅུག་པའམ། མཆོད་རྟེན་གྱི་ནང་བཅུག་ན། དེས་མཆོད་རྟེན་གཅིག་བྱས་པས་འབུམ་བྱས་པར་འགྱུར་རོ། །མཆོད་རྟེན་དེ་སྙེད་བཞེངས་པའི་བསོད་ནམས་ཐོབ་པར་འགྱུར་རོ། །དགེ་སློང་ངམ། དགེ་སློང་
མའམ། དགེ་བསྙེན་ནམ། དགེ་བསྙེན་མའམ། གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་གཟུངས་འདི་བྲིས་ཏེ་ལམ་གྱི་བཞི་མདོའམ། རི་མཐོན་པོའི་སྤོའམ། ཆུ་ཆེན་པོའི་འགྲམ་མམ། གྲོང་ཁྱེར་གྱི་སྒོའམ། ཐེག་ལམ་ཆེན་པོར་མཆོད་རྟེན་ཆེན་པོ་
གཅིག་བྱས་ལ་ཆར་ཁེབས་སམ་གདུགས་ཀྱི་ནང་དུ་གཟུངས་འདི་བཅུག་ན། རིགས་ཀྱི་བུའམ་རིགས་ཀྱི་བུ་མོ་དེས་ངས་སྔར་དཔེ་དྲངས་ཏེ་བསྟན་པ་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་གྲངས་དང་མཉམ་པའི་ཆོས་ཀྱི་སྐུའི་རིང་བསྲེལ་དང་། ཆོས་ཀྱི་
དབྱིངས་ཀྱི་རིང་བསྲེལ་དང་། རུས་པའི་རིང་བསྲེལ་དང་། ཤའི་རིང་བསྲེལ་དེ་དག་ཐམས་ཅད་ལ་མཆོད་རྟེན་བྱས་པའི་བསོད་ནམས་ཐོབ་པར་འགྱུར་རོ། །མཆོད་རྟེན་ཞེས་བྱ་བ་ནི་སངས་རྒྱས་ཐམས་ཅད་ཀྱི་བཞུགས་གནས་དཀྱིལ་འཁོར་ཡིན་ནོ། །མཆོད་རྟེན་ཞེས་བྱ་བ་ནི་སངས་རྒྱས་

ཐམས་ཅད་ཀྱི་སྤྲུལ་པའི་སྐུའི་སྐུ་གདུང་གི་བང་སོ་ཡིན་ནོ། །དེ་བཞིན་གཤེགས་པ་ཡང་དག་པའི་གསུང་དང་ལྡན་པས་དེ་ལྟར་གསུངས་སོ། །ལག་ན་རྡོ་རྗེ་གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས། དེ་ལྟ་བུའི་མཆོད་རྟེན་དེ་དག་ལ་མེ་ཏོག་དང་བདུག་སྤོས་ལ་སོགས་པ་མཆོད་པའི་
ཡོ་བྱད་ཅི་འབྱོར་པས་མཆོད་པ་བྱེད་པའམ། ཐལ་མོ་སྦྱར་ནས་ཕྱག་འཚལ་བའམ། ལན་གཅིག་ཙམ་བསྐོར་བ་བྱས་ཀྱང་། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་ཀྱང་རུང་སྟེ་དེའི་བསྐྲུན་པ་དང་བསྐྱེད་པའི་
བསོད་ནམས་ཀྱི་ཕུང་པོ་ནི་གཞལ་དུ་མེད་ཅིང་བགྲངས་སུ་མ་མཆིས་པའོ། །སྡིག་པ་དང་སྒྲིབ་པ་ཐམས་ཅད་ནི་ཡོངས་སུ་དག་པར་འགྱུར་རོ། །དམྱལ་བ་དང་ཡི་དགས་དང་དུད་འགྲོའི་སྐྱེ་གནས་ནི་རྒྱུན་འཆད་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་
འགྱུར་རོ། །མཆོད་རྟེན་འབའ་ཞིག་མཆོད་པར་གྱུར་པ་མ་ཡིན་གྱི། སངས་རྒྱས་དཀོན་མཆོག་དང་། ཆོས་དཀོན་མཆོག་དང་། དགེ་འདུན་དཀོན་མཆོག་རྣམས་ལ་ཡང་ལྷ་རྫས་ཀྱི་མཆོད་པའི་ཡོ་བྱད་དེ་དག་གིས་མཆོད་པ་བྱས་པར་འགྱུར་རོ། །ཕྱིར་མི་ལྡོག་པའི་རྟགས་དང་མཚན་མའི་རྒྱན་
གྱི་ཏིང་ངེ་འཛིན་ཐོབ་པར་འགྱུར་རོ། །བྱང་ཆུབ་སྙིང་པོ་ལ་མཆིས་ཀྱི་བར་དུ་ལུས་རྣམས་པར་དག་པ་ཐོབ་པར་འགྱུར་རོ། །དགེ་བའི་རྩ་བ་ནི་ནམ་ཡང་ཆུད་མི་ཟ་བར་འགྱུར་རོ། །སླར་ཡང་མངལ་དུ་སྐྱེ་བར་མི་འགྱུར་རོ། །ལག་ན་རྡོ་རྗེ་གཟུངས་སྔགས་འདི་ནི་ཤིན་ཏུ་རྙེད་པར་དཀའ་བ་ཡིན་ནོ། །ལག་
ན་རྡོ་རྗེ་སྐྱེ་བོ་གང་ལ་ལ་ཞིག་གིས་ལྡེར་བཟོའམ། ཐང་ཀར་བྲིས་པའམ། ཤིང་ངམ་རིན་པོ་ཆེའི་རིགས་ཀྱི་རྡོ་ལ་བརྐོས་སམ། དྲི་བཟང་གི་སྨན་འདམ་ལས་བྱས་པའམ། ཟངས་བཏུལ་མའམ། གསེར་དངུལ་ཟངས་ཏེ་ལྕགས་གསུམ་བསྲེས་པའམ། ལྕགས་སམ། དངུལ་
འབའ་ཞིག་གམ། གསེར་རྐྱང་ངམ། དེ་དག་གང་ཡང་རུང་བས་མཆོད་རྟེན་ནམ་སྐུ་གཟུགས་བྱས་ལ། རྒྱ་ཤོག་གམ། དར་དཀར་པོ་ལ་གཟུངས་སྔགས་འདི་བྲིས་ནས་མཆོད་རྟེན་ནམ་སྐུ་གཟུགས་ཀྱི་ནང་དུ་བཅུག་སྟེ། ཕྱག་དང་། མཆོད་པ་དང་། བཀུར་སྟི་རིམ་གྲོ་བྱེད་ན།

ལག་ན་རྡོ་རྗེ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། གཞན་ཡང་རིགས་ཀྱི་བུའམ་རིགས་ཀྱི་བུ་མོ་དེའི་བསོད་ནམས་ཀྱི་ཚད་ནི་དེ་བཞིན་གཤེགས་པའི་འོད་ཟེར་གྱིས་གཞལ། དེ་བཞིན་གཤེགས་པའི་མཁྱེན་པས་དཔག །
དེ་བཞིན་གཤེགས་པའི་སངས་རྒྱས་ཀྱི་སྤྱན་གྱིས་གཟིགས་པས་སྔར་བསྟན་པའི་རིང་བསྲེལ་གྱི་གྲངས་ཇི་སྙེད་པ་དང་། རྒྱ་མཚོ་ཆེན་པོའི་ཆུ་ཐིགས་ཇི་ཙམ་གྱི་གྲངས་དང་མཉམ་པའི་མཆོད་རྟེན་དང་སྐུ་གཟུགས་བྱས་པ་དང་། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་
མའམ། གཞན་ཡང་རིགས་ཀྱི་བུའམ་རིགས་ཀྱི་བུ་མོ་དེས་མཆོད་རྟེན་ནམ་སྐུ་གཟུགས་གཟུངས་འདིས་སྙིང་པོ་ཅན་གཅིག་ལ་ཕྱག་བྱ་བ་དང་མཆོད་པ་བྱས་པར་མི་འགྱུར་ལ། མཆོད་རྟེན་དེ་སྙེད་དང་། སྐུ་གཟུགས་དེ་སྙེད་པ་ཕྱག་དང་མཆོད་པ་བྱས་པའི་བསོད་ནམས་ཀྱི་འབྲས་བུ་ཐོབ་པར་
འགྱུར་རོ། །དེ་ནས་བྱང་ཆུབ་སེམས་དཔའ་གསང་བའི་བདག་པོ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྟོག་པའི་རྒྱལ་པོ་ཆེན་པོ་འདི་ནི་དཔལ་དང་གཟི་བརྗིད་ཆེན་པོ་དང་ལྡན་པ་ལགས་སོ། །བཀྲ་ཤིས་དང་ཕན་ཡོན་ཆེན་པོ་དང་ལྡན་པ་ལགས་
སོ། །རྫུ་འཕྲུལ་དང་ནུས་སྟོབས་ཆེན་པོ་དང་ལྡན་པ་ལགས་སོ། །གཟུངས་སྔགས་འདིའི་མིང་ཙམ་འཛིན་པས་ཀྱང་དགེ་བའི་རྩ་བ་དཔག་ཏུ་མེད་པ་བསྐྱེད་ཅིང་བསོད་ནམས་དཔག་ཏུ་མེད་པ་ཐོབ་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་དགེ་སློང་ངམ། དགེ་
སློང་མའམ། དགེ་བསྙེན་ནམ། དགེ་བསྙེན་མ་ལ་སོགས་པ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསོད་ནམས་ཀྱི་ཚོགས་ཆེན་པོ་ཡོངས་སུ་རྫོགས་པར་ཀུན་ནས་བསླངས་པས། འདས་པ་དང་མ་འོངས་པ་དང་ད་ལྟར་བཞུགས་པའི་སངས་རྒྱས་ཐམས་ཅད་ལ་ཕྱག་དང་མཆོད་
པ་དང་བསྙེན་བཀུར་བྱེད་པར་འདོད་པར་གྱུར་ཚེ། རིགས་ཀྱི་བུའམ་རིགས་ཀྱི་བུ་མོ་དེས་རྟོག་པའི་རྒྱལ་པོ་འདི་ཡི་གེར་བྲིས་ནས་ཟ་མ་ཏོག་ཏུ་བཅུག་ལ། ཉིན་རེ་བཞིན་དྲི་བཟང་གི་ཆུས་ཁྲུས་འབུལ་བ་དང་། མཆོད་པ་དང་ཕྱག་དང་བསྐོར་བ་བྱེད་ན། དགེ་སློང་ངམ། དགེ་སློང་མའམ། དགེ་

བསྙེན་ནམ། དགེ་བསྙེན་མ་ལ་སོགས་པ་རིགས་ཀྱི་བུའམ་རིགས་ཀྱི་བུ་མོ་དེ་ནི། འདས་པ་དང་མ་འོངས་པ་དང་ད་ལྟར་བཞུགས་པའི་སངས་རྒྱས་སྔར་བསྟན་པའི་དཔེས་བསྡུས་པ་ཐམས་ཅད་ལ་སྤྱོད་ལམ་རྣམ་པ་བཞི་ཡིས་བར་མ་ཆད་པར་བསྙེན་བཀུར་བྱས་པར་འགྱུར་རོ། །རིགས་ཀྱི་བུའམ་
རིགས་ཀྱི་བུ་མོ་དེ་ལ་དུས་གསུམ་གྱི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར། དེ་བཞིན་གཤེགས་པ་དེ་དག་ཐམས་ཅད་ཀྱིས་ལུང་སྟོན་པར་འགྱུར། དེ་དག་ཐམས་ཅད་ཀྱིས་དབུགས་དབྱུང་བར་འགྱུར་རོ། །སྐྱེ་བོ་དེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ལས་ཕྱིར་མི་ལྡོག་པའི་ས་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དང་། གསང་བའི་བདག་པོ་ཕྱག་ན་རྡོ་རྗེ་དང་། རྒྱལ་པོ་ཆེན་པོ་སྡེ་བཞི་རྣམས་ལ་བཀའ་སྩལ་པ། དེ་རིང་ངས་རྒྱལ་བའི་སྲས་པོ་ཁྱེད་ཅག་ལ་གཟུངས་
སྔགས་རྟོག་པའི་རྒྱལ་པོ་འདི་ཡོངས་སུ་གཏད་དོ། །རྟོག་པའི་རྒྱལ་པོ་འདི་མ་འོངས་པའི་དུས་ལྔ་བརྒྱའི་ཐ་མར་འཇིག་རྟེན་དུ་སྣུབས་པར་མ་བྱེད་ཅིག །ལེགས་པར་བསྲུང་བ་དང་སྦ་བར་བྱོས་ཤིག །གཟུངས་སྔགས་འདི་འཆང་བའི་སྐྱེ་བོ་རྣམས་ལེགས་པར་བསྲུང་བ་དང་བསྐྱབ་པ་དང་སྦ་
བར་མཛོད་ཅིག །ཕྱག་རྒྱ་ཇི་ལྟ་བ་བཞིན་དང་ཆོ་ག་ཚུལ་བཞིན་དུ་ཉམས་སུ་ལེན་པ་རྣམས་ལ་བྱིན་གྱིས་རློབས་ཤིག །འདོད་པ་རྣམས་བསྒྲུབ་པར་བྱོས་ཤིག །དེ་སྐད་ཅེས་བཀའ་སྩལ་པ་དང་། དེ་ནས་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དང་། གསང་བའི་བདག་
པོ་ཕྱག་ན་རྡོ་རྗེ་དང་། རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་སྟན་ལས་ལངས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་བཅོམ་ལྡན་འདས་ཀྱི་བཀའ་ཡང་དག་པར་ནོས་
སོ། །རྟོག་པའི་རྒྱལ་པོ་ཆེན་པོ་འདི་འཆང་བའི་སྐྱེས་བུ་ཆེན་པོ་དེ་བདག་ཅག་གིས་བསྲུང་བ་དང་བསྐྱབ་པ་དང་སྦེད་པར་བྱེད་ཅིང་། དེའི་འབྱོར་པ་ཐམས་ཅད་ཕུན་སུམ་ཚོགས་པར་བྱེད་དོ། །མགོན་མེད་པ་སྐྱབས་མེད་པར་གྱུར་པ་རྣམས་ཀྱང་དབུགས་དབྱུང་ཞིང་མགོ་འདྲེན་པར་བགྱིད་ཅིང་།

བྱང་ཆུབ་སྙིང་པོ་ལ་བཞུགས་ཤིང་ཆོས་ཀྱི་འཁོར་ལོ་བསྐོར་བར་གྱུར་པའི་བར་རྣམ་པ་ཐམས་ཅད་དུ་བསྲུང་བ་དང་བསྐྱབ་པར་བགྱིད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དང་། གསང་བའི་བདག་པོ་ཕྱག་ན་རྡོ་རྗེ་དང་
རྒྱལ་པོ་ཆེན་པོ་སྡེ་བཞི་ལ་ལེགས་སོ་ཞེས་བྱ་བ་བྱིན་ནས་ལེགས་སོ་ལེགས་སོ། །ཁྱོད་ཅག་གིས་དམ་བཅས་པ་དེ་བཞིན་དུ་བྱོས་ཤིག །དེ་ནས་བཅོམ་ལྡན་འདས་ཀྱིས་འཁོར་འདུས་པ་ཆེན་པོ་ལ་ཐུན་མོང་དུ་བཀའ་སྩལ་པ། གཟུངས་སྔགས་འདི་ནི་ལས་ཐམས་ཅད་གྲུབ་པར་བྱེད་པ། དངོས་
གྲུབ་ཐམས་ཅད་སྟེར་བ། སྡིག་པ་དང་སྒྲིབ་པ་ཐམས་ཅད་ཞི་བར་མཛད་པ། དོན་ཐམས་ཅད་ཐོགས་པ་མེད་པར་འགྲུབ་པར་མཛད་པ་སྟེ། ལུས་དག་པར་བཀྲུས་ལ་གོས་གསར་གཙང་མ་གོན་ནས་ཉིན་རེ་བཞིན་བརྒྱ་རྩ་བརྒྱད་བཟླས་བརྗོད་བྱེད་ན། དེ་བཞིན་གཤེགས་པ་ཐམས་ཅད་ཀྱི་
ཞལ་མཐོང་བར་འགྱུར་རོ། །ཚེ་ལོ་བརྒྱ་ཐུབ་པར་འགྱུར་རོ། །ནད་ཐམས་ཅད་རིང་དུ་སྤང་བར་འགྱུར་རོ། །འཕགས་པའི་ས་ལ་གནས་པ་ཐམས་ཅད་ཀྱིས་སྐྱོབ་པར་འགྱུར་རོ། །གསང་བའི་བདག་པོ་ལག་ན་རྡོ་རྗེ་དང་རྒྱལ་པོ་ཆེན་པོ་སྡེ་བཞི་འཁོར་དང་བཅས་པས་རྟག་ཏུ་བསྲུང་ཞིང་སྐྱོང་བ་དང་
སྦ་བར་ཡང་བྱེད་དོ། །འདི་ནས་ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །སྐྱེ་ཞིང་སྐྱེ་བར་རིན་པོ་ཆེའི་པདྨ་ལས་རྫུས་ཏེ་སྐྱེ་བར་འགྱུར་ཞིང་། མངལ་གྱི་སྐྱེ་གནས་ཡོངས་སུ་སྤང་བ་ཡིན་ནོ། །སྐྱེ་བ་ཐམས་ཅད་དུ་ཚེ་རབས་དྲན་པར་འགྱུར་རོ། །ལན་ཉི་ཤུ་རྩ་
གཅིག་བཟླས་ན་དམྱལ་བར་ལྟུང་ངེས་ཀྱི་སྡིག་པའི་ལས་ཐམས་ཅད་ཡོངས་སུ་བྱང་བར་འགྱུར་རོ། །ནམ་ཡང་ངན་སོང་དུ་ལྷུང་བར་མི་འགྱུར་རོ། །དགྲ་ཐམས་ཅད་དབང་དུ་འགྱུར་རོ། །ལན་བདུན་བཟླས་ན་རྩོད་པ་ལས་རྒྱལ་བར་འགྱུར་རོ། །དཀར་པོའི་ཕྱོགས་ཀྱི་ཚེས་བཅོ་ལྔ་ལ་ཉིན་མཚན་
ཐོག་ཐག་གཅིག་ཏུ་སྨྱུང་བར་གནས་ཤིང་། ཁྲུས་བྱས་ལ་གོས་གསར་གཙང་མ་གྱོན་ནས་སྐུ་གཟུགས་ཀྱི་མདུན་དུ་སྐྱིལ་མོ་ཀྲུང་བཅས་ཏེ་འདུག་ལ། མེ་ཏོག་དང་། བདུག་སྤོས་དང་། མར་མེ་ལ་སོགས་པས་མཆོད་ནས། བྱང་ཆུབ་སྙིང་པོའི་རྒྱན་འབུམ་གྱི་གཟུངས་འདི་ལན་སྟོང་དུ་

བཟླས་བརྗོད་བྱས་ཚེ། བཟླས་པ་ཟིན་པ་དང་། དེ་བཞིན་གཤེགས་པ་ཤཱཀྱ་ཐུབ་པའི་ཞལ་མཐོང་བར་འགྱུར་རོ། །དེ་བཞིན་གཤེགས་པས་ཕྱག་གསེར་གྱི་མདོག་ཅན་བརྐྱང་ནས་སྒྲུབ་པ་པོའི་སྤྱི་བོར་བཞག་སྟེ་དབུགས་དབྱུང་བར་མཛད་ཅིང་ལེགས་སོ་ལེགས་སོ། །རིག་པ་འཛིན་
པ་ཆེན་པོ། སྐྱེས་བུ་ཆེན་པོ་ཁྱོད་ཀྱིས་བསྒྲུབ་པའི་བྱང་ཆུབ་སྙིང་པོའི་རྒྱན་འབུམ་གྱི་གཟུངས་ལེགས་པར་གྲུབ་བོ། །རིག་པ་འཛིན་པ་ཆེན་པོ་ཁྱོད་སྙིང་སྟོབས་ཆེན་པོའོ། །འབད་རྩོལ་ཆེན་པོས་དཀའ་ཐུབ་བྱས་ཏེ་དགེ་བའི་རྩ་བ་དཔག་ཏུ་མེད་པ་ཐོབ་བོ། །གང་འདོད་པའི་
སངས་རྒྱས་ཀྱི་ཞིང་དུ་བགྲོད་པར་གྱིས་ཤིག་ཅེས་གསུང་བར་འགྱུར་རོ། །དེ་ལྟར་གསུངས་མ་ཐག་ཏུ་རིག་པ་འཛིན་པ་དེའི་ལུས་ལ་འོད་ཟེར་གྱི་ཕུང་པོ་ཆེན་པོ་འབར་བར་འགྱུར་རོ། །དེ་ནས་སྔགས་ཀྱི་རྒྱུད་ཐམས་ཅད་ལས་ཇི་སྙེད་གསུངས་པའི་དངོས་གྲུབ་ཐམས་ཅད་མ་ལུས་པར་གྲུབ་པར་
འགྱུར་རོ། །བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །རིག་པ་འཛིན་པ་དེས་སྔོན་མཚམས་མེད་པ་ལྔའི་ལས་བྱས་པ་ཡིན་ཀྱང་དེའི་སྡིག་པ་དང་སྒྲིབ་པ་ཐམས་ཅད་ཉིན་མཚན་ཐོག་ཐག་གཅིག་ལ་སྨྱུང་བ་བྱས་ཞིང་བཟླས་བརྗོད་བྱེད་པ་དེས་ཡོངས་སུ་བྱང་བར་འགྱུར་རོ། །དངོས་
གྲུབ་ཐམས་ཅད་ཚེ་འདི་ཉིད་ལ་ཐོབ་པར་འགྱུར་རོ། །ཟླ་བའི་དམར་ཕྱོགས་ཀྱི་ཚེས་བཅུ་བཞི་ལ་ལུས་ལེགས་པར་བཀྲུས་ལ་གོས་གསར་གཙང་མ་གོན་ནས་ཉིན་མཚན་ཐོག་ཐག་གཅིག་སྨྱུང་བ་བྱས་ཤིང་སྐུ་གདུང་དང་བཅས་པའི་མཆོད་རྟེན་གྱི་དྲུང་དུ་ཟངས་ཀྱི་སྣོད་གཅིག་ཡུངས་ཀར་གྱིས་གང་བར་
བྱས་ཏེ། གཟུངས་སྔགས་འདི་ལན་སྟོང་བཟླས་བརྗོད་བྱས་པས་བྱིན་གྱིས་བརླབས་ནས་ལས་སྦྱོར་གྱི་དུས་སུ་ཀླུ་གནས་པའི་རྫིང་བུར་ཡུངས་ཀར་དེ་སྤར་གང་བླུགས་ན། ཀླུ་དེ་དག་དགའ་ཞིང་རིག་པ་འཛིན་པ་དེའི་དབང་དུ་འགྱུར། ཀླུའི་ཕོ་བྲང་དུ་གདན་འདྲེན་ནས་ཞབས་ལ་ཕྱག་བགྱིད་ནས་འདོད་པ་
ཐམས་ཅད་སྟེར་བར་འགྱུར། གང་དུ་གནས་པའི་ས་ཕྱོགས་སུ་ཕྱི་བཞིན་འབྲངས་ལ་བཀའ་ནོད་པར་འགྱུར་རོ། །ཡུངས་ཀར་དེ་ཕྱོགས་བཞིར་གཏོར་ན་རྫི་ཆར་དྲག་པོ་བཟློག་གོ། །ཤ་སྦྲང་དང་། ནེ་ཙོ་དང་། ཁུ་བྱུག་དང་། ཆ་ག་པ་ལ་སོགས་པའི་སྲོག་ཆགས་མ་རུངས་པ་ཐམས་ཅད་

ཀྱི་ཁ་བཅིང་བར་འགྱུར་རོ། །ཡུངས་ཀར་མེ་ལ་བཏབ་ན་མེ་མི་སྦར་རོ། །ཆུ་ཀླུང་ལ་བཏབ་ན་ཆུ་རྒྱུན་འཆད་དོ། །ཚོང་པའི་ནོར་རྫས་ལ་བཏབ་ན་ཆོམ་རྐུན་གྱིས་མི་ཁྱེར། སྒྲིབ་ཤིང་དུ་ཡང་འགྱུར་རོ། །རྒྱལ་པོའི་ཕོ་བྲང་གི་སྒོ་ལ་གཏོར་ན་རྒྱལ་པོ་དང་། བཙུན་མོ་
དང་། བློན་པོ་འཁོར་དང་བཅས་པ་དགའ་བར་འགྱུར་རོ། །ཉ་མ་ཕོ་མོའི་ཚོགས་ལ་གཏོར་ན་ཐམས་ཅད་བདག་ལ་མཆོད་པ་དང་བཀུར་སྟི་བྱེད་པར་འགྱུར་རོ། །ཕ་རོལ་གྱི་དམག་ཚོགས་ལ་གཏོར་ན་དགྲ་ཐམས་ཅད་བཅིངས་པར་འགྱུར་རོ། །ལམ་དུ་ཞུགས་ཚེ་འཕྲང་སྒོར་གཏོར་ན་སྲུང་མིས་
མི་མཐོང་ངོ་། །ཞིང་ལ་གཏོར་ན་སྲོག་ཆགས་མ་རུངས་པའི་ཁ་བཅིངས་པར་འགྱུར་རོ། །ཐན་པ་བྱུང་ཚེ་ཀླུ་གནས་པའི་ཆུར་བླུགས་ན་གྲུ་ཆར་འབབ་པར་འགྱུར་རོ། །སེར་བ་དང་རྫི་ཆར་དྲག་པོ་བབས་ཚེ་བར་སྣང་ལ་གཏོར་ན་མོད་ལ་ཞི་བར་འགྱུར་རོ། །དགྲའི་ཁྱིམ་ལ་གཏོར་ན་འཁོན་ཡོངས་སུ་
ཞི་བར་འགྱུར་ཏེ་ཕྱིན་ཆད་མཛའ་བཤེས་སུ་འགྱུར་རོ། །གྲོང་ཁྱེར་གྱི་སྒོ་ལ་གཏོར་ན་དེའི་ནང་གནས་ཀྱི་སེམས་ཅན་གང་དག་གནོད་པས་གཙེས་པ་ཐམས་ཅད་གནོད་པ་དང་བྲལ་བར་འགྱུར་རོ། །གནོད་སྦྱིན་དང་སྲིན་པོ་རྣམས་ནི་ཕྱོགས་སུ་བྱེར་བར་འགྱུར་རོ། །གཡུལ་སྤྲད་པའི་
ཚེ་ཕ་རོལ་པོའི་ཕྱོགས་སུ་གཏོར་ན་དགྲ་བོ་ཕམ་ཞིང་རང་ཕྱོགས་པ་རྒྱལ་བར་འགྱུར་རོ། །གཤགས་འགྱེད་པའམ་རྩོད་པ་བྱེད་ཚེ་ཁར་བཅུག་ན་ངག་བཙན་ཞིང་ཆོས་ཕྱོགས་ཐོབ་པར་འགྱུར་རོ། །ཆུ་ལ་བླུགས་ནས་ནད་ཀྱིས་ཟིན་པ་དག་ལ་འཐུང་དུ་བཅུག་ན་ནད་དེ་ཞི་བར་འགྱུར་རོ། །གདོན་
ཀྱིས་ཟིན་པ་རྣམས་ལ་ཡུངས་ཀར་དང་ཀར་བསྲེས་པས་བདུགས་ན་གདོན་ཐམས་ཅད་ལས་ཐར་བར་འགྱུར་རོ། །བ་ལང་ལ་སོགས་པ་ཕྱུགས་ཀྱི་རིམས་དང་། ཁྱེའུ་དང་བུ་མོའི་རིམས་ངན་ཐམས་ཅད་ལ་ཡུངས་ཀར་ས་དང་བསྲེས་ནས་ལམ་གྱི་བཞི་མདོར་བསྲེགས་ན་རིམས་ནད་ཐམས་ཅད་ཞི་
བར་འགྱུར་རོ། །གཙུག་ཕུད་ཀྱི་ནང་དུ་བཅུག་ན་གང་དུ་ཕྱིན་སར་སྐྱེ་བོ་ཐམས་ཅད་དགའ་ཞིང་མགུ་ནས་བདག་ལ་མཆོད་པ་དང་བཀུར་སྟི་བྱེད་པར་འགྱུར་རོ། །ཅི་ཟེར་བ་མཉན་པར་འགྱུར་རོ། །གཞན་ཡང་རིག་པ་འཛིན་པས་ཚེས་བཅུ་བཞིའི་མཚན་མོའི་ཆ་ནས་བརྩམས་ཏེ་ལག་པ་གཉིས་

ཀྱིས་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པའི་སྐུ་གཟུགས་ཀྱི་ཞབས་ལ་འཇུས་ཤིང་ཕྱི་ཉིན་ཚེས་བཅོ་ལྔའི་ཐོ་རངས་ཀྱི་བར་དུ། བར་མི་ཆད་པར་བཟླས་བརྗོད་བྱས་ན། བྱང་ཆུབ་སེམས་དཔའ་འཇམ་དཔལ་སྒྲུབ་པ་པོའི་མདུན་དུ་འོངས་ནས་འདོད་པ་ཐམས་ཅད་སྩོལ་བར་འགྱུར་རོ། །
བྱང་ཆུབ་སེམས་དཔའ་ལག་ན་རྡོ་རྗེའི་ཞབས་ལ་འཇུས་ཤིང་། གཟུངས་འདི་ལན་སྟོང་རྩ་བརྒྱད་བཟླས་ཏེ་བྱིན་གྱིས་བརླབས་པའི་གུ་གུལ་དང་ཞུན་མར་སྦྱར་བས་བདུག་པ་ཕུལ་ན། བྱང་ཆུབ་སེམས་དཔའ་ལག་ན་རྡོ་རྗེ་དེའི་མདུན་དུ་ལུས་སྣང་བར་བྱས་ཏེ། འདོད་པ་ཐམས་ཅད་སྩོལ་བར་
བྱེད། ལས་ཐམས་ཅད་གྲུབ་པར་བྱེད། བུ་བཞིན་དུ་སྐྱོང་ཞིང་གསང་སྔགས་ཀྱི་རྒྱུད་ཡོངས་སུ་གཏད་པར་བྱེད་དོ། །གནོད་སྦྱིན་ནོར་བུ་བཟང་པོ་ལ་འཇུས་ཤིང་བཟླས་བརྗོད་སྟོང་རྩ་བརྒྱད་བྱས་ན་ནོར་གྱི་ཕུང་པོ་རྒྱ་ཆེན་པོ་དང་བཅས་ལུས་སྣང་བར་བྱས་ཏེ་ནོར་ཆེན་པོ་སྟེར་བར་འགྱུར་རོ། །རྣམ་
ཐོས་ཀྱི་བུའི་མགོ་ལ་བཞག་སྟེ། ཨ་ཀ་རུ་ནག་པོའི་དུད་པས་བདུག་ཅིང་ལན་སྟོང་རྩ་བརྒྱད་བཟླས་ན་གསེར་སྲང་སྟོང་རྙེད་པར་འགྱུར་རོ། །དཔལ་གྱི་ལྷ་མོའི་གདོང་ལ་བལྟ་ཞིང་སྟོང་རྩ་བརྒྱད་བཟླས་ན་ཡང་གསེར་སྲང་སྟོང་རྙེད་པར་འགྱུར་རོ། །གཞན་ཡང་ཚོན་སྣ་ལྔས་གནོད་སྦྱིན་གྱི་གཟུགས་
བྲིས་ལ་ལན་སྟོང་དང་ཉི་ཤུ་བཟླ་ཞིང་སརྫ་ར་ཛའི་སྤོས་ཀྱིས་བདུགས་ན་གནོད་སྦྱིན་མོ་མདུན་དུ་བྱུང་ནས་མངགས་གཞུག་ཏུ་ཁས་བླངས་ཏེ། ཅི་བཅོལ་བའི་ལས་རྣམ་པ་བརྒྱའམ་སྟོང་ཡང་རུང་སྟེ་མ་ལུས་པར་གྲུབ་པར་བྱེད་དོ། །ད་ནི་རས་བྲིས་ཀྱི་ཆོ་ག་བཤད་པར་བྱ་སྟེ། རས་བྲིས་ལ་བརྟེན་ནས་
ལས་ཐམས་ཅད་སྒྲུབ་པའི་ཐབས་ལ། ཁ་ཚར་མ་ཉམས་ཤིང་ལོངས་མ་སྤྱད་པའི་རས་གཙང་མ་སྲིད་དུ་ཁྲུ་བཞི་ཡོད་པ་ཞིག་ལྤགས་པ་ལས་བྱུང་བ་མིན་པའི་སྦྱིན་གཙང་མས་བཏུལ་ཞིང་ལེགས་པར་བརྡར་བ་ལ་བཟོ་བོ་གསོ་སྦྱོང་ཡན་ལག་བརྒྱད་པ་ལ་གནས་ཤིང་གཙང་སྦྲ་དང་ལྡན་པས་བྲི་
བར་བྱ་སྟེ། དབུས་སུ་ཤཱཀྱ་ཐུབ་པ་རིན་པོ་ཆེ་སྣ་ཚོགས་ཀྱིས་བརྒྱན་པའི་བྱང་ཆུབ་ལྗོན་ཤིང་གི་དྲུང་ན་སེང་གེའི་ཁྲི་ལ་བཞུགས་པ་བྲི་བར་བྱའོ། །དེའི་སྟེང་ན་དེ་བཞིན་གཤེགས་པ་འོད་ཟེར་དམ་པའི་རྒྱལ་མཚན་ཆོས་འཆད་ཀྱི་ཕྱག་རྒྱ་ཅན་བྲི་བར་བྱའོ། །གཡས་སུ་འཕགས་པ་འཇམ་

དཔལ་གཞོན་ནུར་གྱུར་པ་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། པདྨའི་གདན་ལ་པུས་མོ་བཙུགས་ཏེ་ལག་པ་གཉིས་ཀྱིས་ལྷུང་བཟེད་བཟུང་ནས་བཅོམ་ལྡན་འདས་ལ་འབུལ་བའི་རྣམ་པ་ཅན་བྲི་བར་བྱའོ། །གཡོན་ན་འཕགས་པ་གསང་བའི་བདག་པོ་ལག་ན་
རྡོ་རྗེ་ཁྲོ་འཛུམ་བརྗིད་བག་ཅན་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་ལག་ན་རྡོ་རྗེ་གསོར་བའི་ཚུལ་གྱིས་བསྣམས་པ། པདྨའི་གདན་ལ་པུས་མོ་གཉིས་བཙུགས་ནས་བཅོམ་ལྡན་འདས་ལ་བལྟ་བ་བྲི་བར་བྱའོ། །འཕགས་པ་འཇམ་དཔལ་གྱི་རྒྱབ་ཏུ་རིན་པོ་ཆེའི་མཆོད་རྟེན་མཐོ་ཞིང་ཡངས་
པ་བྲི་བར་བྱའོ། །དེའི་ནང་ན་དེ་བཞིན་གཤེགས་པ་ཤིན་ཏུ་རྒྱས་པའི་གསེར་ཞལ་མཆོག་ཏུ་དཔའ་བའི་འོད་ཟེར་རྒྱལ་མཚན་གྱི་ཏོག་སེང་གེའི་གདན་ལ་བཞུགས་ཤིང་དབུགས་དབྱུང་མཛད་པའི་རྣམ་པ་ཅན་བྲི་བར་བྱའོ། །ལག་ན་རྡོ་རྗེའི་རྒྱབ་ཏུ་བྱང་ཆུབ་སྙིང་པོའི་རྒྱན་འབུམ་གྱི་གླེགས་བམ་
རིན་པོ་ཆེ་སྣ་ཚོགས་ཀྱིས་སྤ་བའི་རིན་པོ་ཆེའི་ཟ་མ་ཏོག་གི་ནང་དུ་བཅུག་པ་མཐའ་འཇགས་སུ་སངས་རྒྱས་ཀྱི་སྐུ་གཟུགས་བྲིས་པ་སེང་གེའི་ཁྲི་ལ་བཞག་པ་བྲི་བར་བྱའོ། །དེའི་འོག་ཏུ་རྡོ་རྗེ་ཕོ་ཉ་ཁྲོ་བོའི་གཟུགས་ཅན་བྲི་བར་བྱའོ། །མཆོད་རྟེན་གྱི་འོག་ཏུ་དཔལ་གྱི་ལྷ་མོ་བྲི་བར་བྱའོ། །ཤཱཀྱ་ཐུབ་
པའི་འོག་ཏུ་རྒྱལ་པོ་ཆེན་པོ་བཞི་རིན་པོ་ཆེའི་གོ་ཆ་གྱོན་པ་དཔལ་ཞིང་བརྗིད་པའི་ཉམས་ཅན་བྲི་བར་བྱའོ། །དེའི་འོག་ཏུ་སྒྲུབ་པ་པོ་ལག་པ་གཡོན་པ་ན་སྤོས་སྣོད་ཐོགས་པ་གཡས་པས་བགྲང་ཕྲེང་བསྣམས་པ་བཅོམ་ལྡན་འདས་ཀྱི་ཞལ་ལ་བལྟ་བ་བྲི་བར་བྱའོ། །དེ་ལྟར་བྲིས་སྐུ་བསྒྲུབས་པ་ཙམ་
གྱིས་དམ་པའི་ཆོས་སྤངས་པ་དང་། འཕགས་པ་ལ་སྐུར་པ་བཏབ་པ་དང་མཚམས་མེད་པ་ལྔའི་ལས་བྱས་པ་ལ་སོགས་པ་ངན་སོང་གསུམ་དུ་ལྟུང་བར་གྱུར་པའི་ལས་ཐམས་ཅད་ཡོངས་སུ་བྱང་བར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །
རས་བྲིས་བསྒྲུབས་པ་ཙམ་གྱི་ཕན་ཡོན་དེ་ལྟར་ན་དེའི་མདུན་དུ་སྒྲུབ་པ་བྱེད་པའི་ཕན་ཡོན་སྨོས་ཀྱང་ཅི་དགོས་ཏེ་དེ་བཞིན་གཤེགས་པ་དང་སྐལ་བ་མཉམ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སྙིང་པོའི་རྒྱན་འབུམ་གྱི་དཀྱིལ་འཁོར་གྱི་ཆོ་ག་འདི་བཤད་དོ། །འདིའི་དཀྱིལ་འཁོར་

བཞེངས་པར་འདོད་པས་གཙུག་ལག་ཁང་ངམ། ལྷའི་ཁང་པའམ། རི་སུལ་ལ་སོགས་དབེན་ཞིང་གཙང་ལ་ཡིད་དུ་འོང་བའི་གནས་སུ་རྒྱུད་ནས་གསུངས་པའི་ཆོ་ག་བཞིན་ས་བླངས་ལ། གཟུངས་སྔགས་ཀྱིས་བྱིན་གྱིས་བརླབས་པའི་ས་གཙང་དང་བ་ལྕི་བསྲེས་པས་ཁོར་ཡུག་ཏུ་ཁྲུ་བཅུ་
དྲུག་ཡོད་པའི་སྟེགས་བུ་བྱས་ལ། དེར་གཙང་སྦྲ་དང་ལྡན་པས་དཀྱིལ་འཁོར་གྲུ་བཞི་སྒོ་བཞི་པ་རྟ་བབས་བཞི་དང་ལྡན་པ་བྲི་བར་བྱའོ། །དེའི་དབུས་སུ་དེ་བཞིན་གཤེགས་པའི་སྐུ་གཟུགས་དང་། གྲྭ་བཞིར་རྒྱལ་པོ་ཆེན་པོ་བཞི་བྲི་བར་བྱའོ། །སྒོ་བཞིའི་ནང་རིན་པོ་ཆེའི་ལྗོན་ཤིང་བྲིས་ལ་
དེ་དག་གི་དྲུང་ན་ལྷ་མོ་བཞི་བྲི་བར་བྱ་སྟེ། ཤར་སྒོར་ནི་ལྷ་མོ་དཔལ་མོའོ། །ལྷོ་སྒོར་དབྱངས་ཅན་མའོ། །ནུབ་སྒོར་དུང་ཅན་མའོ། །བྱང་སྒོར་མེ་ཏོག་སོ་མའོ། །དེ་ལྟར་དཀྱིལ་འཁོར་བྲིས་ནས་ངོས་ལ་འབྲས་མ་གྲུགས་པ་དང་ཡུངས་ཀར་དང་དུས་ཀྱི་མེ་ཏོག་བཀྲམ་པར་བྱའོ། །དྲི་བཟང་གི་བྱུག་པ་དང་
ཕྱེ་མ་ཕུར་མ་ཡང་བཤམ་མོ། །ཟུར་བཞིར་དྲི་བཟང་གི་ཆུས་གང་བའི་བུམ་པ་བཞི་གཞག་པར་བྱའོ། །ཞལ་ཟས་བཟའ་བཏུང་བཟང་པོ་སྡེར་མ་བཞི་ཡང་བཀོད་པར་བྱའོ། །སྒོ་བཞིར་བདུག་སྤོས་ཀྱི་པོག་ཕོར་བཞི་གཞག་པར་བྱའོ། །མེ་ཏོག་སྣ་ཚོགས་ཀྱི་ཆུན་པོ་དང་དཀར་གསུམ་གྱི་གཏོར་མ་ཡང་
བཤམ་པར་བྱའོ། །ཡང་ཟུར་བཞིར་མར་མེ་བཞི་བུད་པར་བྱའོ། །རིག་པ་འཛིན་པ་ཁ་ཤར་དུ་བལྟས་ཏེ་བཟླས་བརྗོད་བྱ་བར་བྱ་ཞིང་། མཚན་གྱི་ཐུན་ཐ་མ་ལ་ལུས་བསྲུང་བ་དང་མཚམས་བཅིང་བ་སོགས་བྱས་ནས་དཀྱིལ་འཁོར་དུ་འཇུག་པར་བྱ་ལ། དཀྱིལ་འཁོར་དུ་ཞུགས་པ་ཙམ་གྱིས་སྡིག་པ་དང་
སྒྲིབ་པ་ཐམས་ཅད་བྱང་བར་འགྱུར་རོ། །དངོས་གྲུབ་ཐམས་ཅད་བདེ་བླག་ཐོབ་པའི་སྐལ་བ་ཅན་དུ་འགྱུར་རོ། །བསོད་ནམས་ཀྱི་ཕུང་པོ་དཔག་ཏུ་མེད་པ་དང་ལྡན་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་རྟག་ཏུ་དགོངས་པར་འགྱུར་རོ། །འབྱུང་པོ་ཐམས་ཅད་
ཀྱིས་གནོད་པར་མི་འགྱུར་རོ། །ལྷ་ཐམས་ཅད་ཀྱིས་བསྲུང་བ་དང་བསྐྱབ་པ་དང་སྦ་བར་བྱེད་ཅིང་སྒྲུབ་པའི་སྟོང་གྲོགས་བྱེད་པར་འགྱུར་རོ། །དཀྱིལ་འཁོར་དུ་ཞུགས་པ་ཙམ་གྱིས་ཕྱིར་མི་ལྡོག་པའི་ས་ལ་གནས་པར་འགྱུར་རོ། །ཨོཾ་སརྦ་ཏ་ཐཱ་ག་ཏ་བྱཱ་བ་ལོ་ཀི་ཏེ། ཛ་ཡ་ཛ་ཡ་སྭཱ་ཧཱ། སྙིང་པོའོ། །

ཨོཾ་ཧུ་རུ་ཧུ་རུ་ཛ་ཡ་མུ་ཁེ་སྭཱ་ཧཱ། ཉེ་བའི་སྙིང་པོའོ། །ཨོཾ་ཛ་ལེ་ནི་ཛ་ཡེ་སྭཱ་ཧཱ། ཉེ་རེགས་ཀྱི་སྔགས་སོ། །ཨོཾ་ས་མནྟ་པཱུར་ཎ་ཛ་ཡེ་སྭཱ་ཧཱ། མཚམས་བཅིང་བའི་སྔགས་སོ། །ཨོཾ་མཎྜ་ལ་ཛ་ཡེ་སྭཱ་ཧཱ། དཀྱིལ་འཁོར་གྱི་མཚམས་བཅིང་བའི་སྐབས་ཀྱི་སྔགས་སོ། །ཨོཾ་སི་རཱི་
མི་རཱི་ཛ་ཡེ་སྭཱ་ཧཱ། གཏོར་མའི་སྔགས་སོ། །ཨོཾ་ས་ཝ་སནྡྷ་རི་མི་རི་ཛ་ཡེ་སྭཱ་ཧཱ། སྤྱན་འདྲེན་པའི་སྔགས་སོ། །ཨོཾ་བུདྡྷ་ཀུ་སུ་མཾ་སྭཱ་ཧཱ། མེ་ཏོག་འབུལ་བའི་སྔགས་སོ། །ཨོཾ་ཛ་ཡ་ཡནྟི་སྭཱ་ཧཱ། བདུག་སྤོས་འབུལ་བའི་སྔགས་སོ། །ཨོཾ་བི་ཛ་ཡ་ག་པཱི་སྭཱ་ཧཱ། དབང་བསྐུར་བའི་སྔགས་སོ། །
ཨོཾ་ཏ་ཐཱ་ག་ཏ་ཛ་ཡ་སྭཱ་ཧཱ། གཙུག་ཏོར་བཅིང་བའི་སྔགས་སོ། །ཨོཾ་ཛ་ཡ་ཨུ་རི་ཏི་སྭཱ་ཧཱ། གོས་བྱིན་གྱིས་བརླབས་པའི་སྔགས་སོ། །ཨོཾ་གུ་རུ་དྷ་རི་སྭཱ་ཧཱ། སློབ་མ་བསྲུང་ཞིང་རྗེས་སུ་འཛིན་པའི་སྔགས་སོ། །ཨོཾ་དྷ་ར་དྷ་ར་མི་རི་ཛ་ཡེ་སྭཱ་ཧཱ། སླར་གཤེགས་སུ་གསོལ་བའི་སྔགས་སོ། །ཨོཾ་
སུ་སམྦྷ་ཝ་ཛ་ཡེ་སྭཱ་ཧཱ། ཕྲེང་བ་བྱིན་གྱིས་བརླབས་པའི་སྔགས་སོ། །ཨོཾ་སུ་ན་རི་ཛ་ཡ་ཡེ་སྭཱ་ཧཱ། གདན་འབུལ་བའི་སྔགས་སོ། །ཨོཾ་སུ་རི་ཛ་ཡེ་སྭཱ་ཧཱ། བགེགས་བཅིང་བའི་སྔགས་སོ། །ཨོཾ་པྲ་ཝ་རཱ་ཛ་ཡེ་སིདྡྷི་སྭཱ་ཧཱ། དེ་བཞིན་གཤེགས་པ་ཐམས་ཅད་སྤྱན་འདྲེན་པའི་སྔགས་སོ། །ཨོཾ་
རཀྵ་ནི་ཛ་ཡེ་སྭཱ་ཧཱ། ལུས་བསྲུང་བའི་སྔགས་སོ། །ཨོཾ་ཛ་ཡ་དི་པི་ནི་སྭཱ་ཧཱ། མར་མེ་འབུལ་བའི་སྔགས་སོ། །ཨོཾ་མ་ལེ་བིམ་ལ་ཛ་ཡེ་སྭཱ་ཧཱ། སྦྱིན་སྲེག་གི་སྔགས་སོ། །ཨོཾ་ས་ར་ས་ར་ཛ་ཡེ་སིདྡྷི་སྭཱ་ཧཱ། ཡང་དེ་བཞིན་གཤེགས་པ་ཐམས་ཅད་སྤྱན་འདྲེན་པའི་སྔགས་སོ། །དེ་ནས་བཅོམ་ལྡན་
འདས་ཀྱིས་འདི་སྐད་ཅེས་བཀའ་སྩལ་ཏོ། །ད་ནི་སྙིང་པོ་དང་ཉེ་བའི་སྙིང་པོའི་སྒྲུབ་ཐབས་བཤད་པར་བྱ་སྟེ། སྙིང་པོ་འབུམ་བཟླས་ན་རིག་པ་འཛིན་པའི་འཁོར་ལོས་སྒྱུར་བ་ཐོབ་པར་འགྱུར་རོ། །ལྡོང་རོས་ཟངས་ཀྱི་སྣོད་དུ་བཞག་ལ་སྙིང་པོ་སྟོང་བཟླས་པས་བརླབས་ནས་དཔྲལ་བར་ཐིག་ལེ་བྱས་ན་ནམ་
མཁའ་ལ་འགྲོ་ཞིང་ལྷ་སྲིན་སྡེ་བརྒྱད་ཐམས་ཅད་ཀྱི་ཁྱིམ་སྒོ་ངང་གིས་ཕྱེ་བར་འགྱུར་ཏེ་སྒྲུབ་པ་པོས་ཅི་དགར་འཇུག་པ་དང་བགྲོད་པར་འགྱུར་རོ། །སོ་བཱིར་མིག་སྨན་ལ་འབུམ་བཟླས་ནས་མིག་ལ་བྱུགས་ན་ཨནྟ་ན་འཐོབ་པར་གྱུར་ལ་འབྱུང་པོ་ཐམས་ཅད་ཀྱི་ཁྱིམ་དུ་རང་དབང་གིས་འཇུག་ནུས་པར་འགྱུར་རོ། །

གཞན་ཡང་ཁྲི་བཟླས་ན་དེ་བཞིན་གཤེགས་པ་ཐམས་ཅད་ཀྱི་ཞལ་མཐོང་བར་འགྱུར་རོ། །མཆོད་རྟེན་གྱི་སྲོག་ཤིང་གི་རྩེ་མོའི་གདུགས་ལ་ལན་སྟོང་རྩ་བརྒྱད་བཟླས་ནས་བཏེག་བྱས་ན་དེ་བཞིན་གཤེགས་པ་ཐམས་ཅད་ཀྱི་རིང་བསྲེལ་མ་ལུས་པར་བཞུགས་པའི་མཆོད་རྟེན་ཆེན་པོའི་རང་
བཞིན་དུ་འགྱུར་རོ། །འཇམ་དཔལ་གྱི་ཕྱག་མཚན་ལྷུང་བཟེད་བླངས་ནས་དེ་ལ་སྔགས་སྟོང་རྩ་བརྒྱད་བཟླས་ལའོ་ཐུག་གིས་གང་བར་བྱས། སླར་འཇམ་དཔལ་གྱི་ཕྱག་ལ་འཇོག་སྟེ་གདུགས་ཚོད་འབུལ་ན་བསོད་སྙོམས་པ་སྟོང་ཡང་ཚིམ་པར་འགྱུར་རོ། །གཞན་ཡང་རྒྱུད་གཞན་དག་ནས་གསུངས་
པའི་ལས་ཚོགས་ཐམས་ཅད་ཀྱང་གཟུངས་སྔགས་འདིས་བྱིན་གྱིས་བརླབས་ན་འདོད་པ་ཐམས་ཅད་འབད་མེད་དུ་འགྲུབ་པར་འགྱུར་རོ། །ད་ནི་ཕྱག་རྒྱའི་རིམ་པ་བཤད་པར་བྱ་སྟེ། ལག་པ་གཉིས་ཐལ་མོ་གན་རྐྱལ་དུ་བྱས་ལ་སྙིང་གའི་ཐད་དུ་ཐལ་མོ་གཡས་པའི་མཐིལ་ན་གཡོན་པ་ཡང་གན་རྐྱལ་དུ་
བཟེད་དེ་བཞག་པ་ནི་བྱང་ཆུབ་སྙིང་པོའི་རྒྱན་འབུམ་གྱི་གཟུངས་ཀྱི་རྩ་བའི་ཕྱག་རྒྱའོ། །ཕྱག་རྒྱ་འདི་བཅིང་བ་ཙམ་གྱིས་སྡིག་པ་ཐམས་ཅད་བྱང་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་དབུགས་དབྱུང་བར་མཛད་པར་འགྱུར་རོ། །ཕྱག་རྒྱ་དེས་དེ་བཞིན་གཤེགས་པ་ཐམས་ཅད་
བསྐུལ་བར་འགྱུར་ཞིང་། དེ་བཞིན་གཤེགས་པ་ཐམས་ཅད་ཀྱིས་རྗེས་སུ་འཛིན་པར་འགྱུར་རོ། །ཕྱག་རྒྱ་དེ་ཉིད་ལས་ལག་པ་གཡས་པ་བཏེག་སྟེ་ཕྱག་རྒྱ་གཞན་གང་དགོས་སུ་བསྒྱུར་བས་ཕྱག་རྒྱ་ཐམས་ཅད་བྱུང་བར་གྱུར་ཏེ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་འགྱུར་རོ། །
ཕྱག་རྒྱ་དེ་ཉིད་ལས་ལག་པ་གཡས་པ་བསྒྱུར་ནས་ལྟེ་བར་བཞག་པའི་མཐེབ་ཆེན་དང་མཛུབ་མོ་གཉིས་ཕན་ཚུན་དུ་སྦྱར་བ་ནི་ཕྱག་རྒྱ་ལས་ཐམས་ཅད་པའི་ཕྱག་རྒྱ་སྟེ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཤིང་ལས་ཀྱི་སྒྲིབ་པ་ཐམས་ཅད་ཡོངས་སུ་བྱང་བར་འགྱུར་རོ། །དེ་ནས་བྱང་
ཆུབ་སེམས་དཔའ་འཇམ་དཔལ་གཞོན་ནུར་གྱུར་པས་གཟུངས་འདི་བསྲུང་ཞིང་མཚམས་སྦྱོར་བའི་གཟུངས་སྔགས་འདི་སྨྲས་སོ། །ན་མོ་མཉྫུ་ཤྲཱི་ཡ་ཡེ། ཀུ་མཱ་ར་བྷཱུ་ཏ་ཡེ། ཏདྱ་ཐཱ། ཛ་ཡེ། བི་ཛ་ཡེ། ཛ་ཡ་ཤྲཱི། ཛིཥྚི། ཧཱུྃ་སྭཱ་ཧཱ། སྒྲུབ་པ་པོས་ཐོག་མར་འཇུག་པའི་སྐབས་དང་། ལས་

ལ་སྦྱོར་བའི་སྐབས་རྣམས་སུ་སྔགས་འདི་ལན་བདུན་བཟླས་ན་སྒྲིབ་པ་དང་བགེགས་མེད་པར་འགྱུར་ཞིང་མྱུར་དུ་གྲུབ་པར་འགྱུར་རོ། །དེ་ནས་གསང་བའི་བདག་པོ་ཕྱག་ན་རྡོ་རྗེས་རིག་པ་ཆེན་པོའི་གཟུངས་འདི་སྨྲས་སོ། །ཏདྱ་ཐཱ། བཛྲ་མུཥྚི། ཧ་ན་ད་ཧ་པ་ཙ་བཛྲ་ཧཱུྃ་ཧཱུྃ་ཕཊ་སྭཱ་ཧཱ། སྔགས་
འདི་ཡུངས་ཀར་ལ་ལན་བདུན་བཏབ་ནས་ཕྱོགས་བཞིར་གཏོར་ན་མཚམས་བཅིང་གི་མཆོག་ཏུ་འགྱུར་རོ། །དེ་ནས་རྒྱལ་པོ་ཆེན་པོ་བཞིས་སྔགས་འདི་སྨྲས་སོ། །ཏདྱ་ཐཱ། དྷྲི་ཏི་ཧྲི་མྲི་ས་ར་པྲ་ས་ར་བི་རི་བི་རི་སྭཱ་ཧཱ། སྔགས་འདི་ཡུངས་ཀར་དང་བཅས་པའི་ཆུ་ལ་ལན་ཉི་ཤུ་རྩ་གཅིག་བཟླས་ལ་སྤྱི་བོ་ནས་
བླུགས་ན་གནོད་བྱེད་འབྱུང་པོ་ཐམས་ཅད་དབང་དུ་གྱུར་ནས་སྒྲུབ་པ་པོའི་རྐང་པར་མགོ་བོས་ཕྱག་འཚལ་ནས་རང་གནས་སུ་གདེངས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ངས་མདོ་འདི་བཤད་པ་ནི་བསོད་ནམས་ཞན་པ་དང་། མ་དང་ཕ་
དང་། ལྟ་བ་ལོག་པ་དང་། ཐེ་ཚོམ་ཟ་བ་དང་། མཚམས་མེད་པ་བྱེད་པ་དང་། ཚེ་ཐུང་བ་དང་། སེམས་ཅན་དམྱལ་བ་དང་། བྱོལ་སོང་དང་། གཤིན་རྗེའི་འཇིག་རྟེན་དང་། མཚམས་མེད་པར་འགྲོ་བའི་སེམས་ཅན་དེ་ལྟ་བུ་དག་གི་ཕྱིར་གཟུངས་འདི་བཤད་དོ། །ཀུན་དགའ་བོ་ཕྱི་མའི་དུས་ཕྱི་མའི་ཚེ་ཁྱིམ་ན་
གནས་པ་དང་། དགེ་སློང་ལས་ཕལ་ཆེར་གཟུངས་འདི་མི་ཀློག་པ་དང་། མཆོད་པར་མི་བྱེད་པ་རྣམས་ཇི་ལྟར་ཁྱིམ་པ་རྣམས་སྡུག་བསྔལ་བར་བཤད་པ་དེ་བཞིན་དུ་རབ་ཏུ་བྱུང་བ་རྣམས་ཀྱང་སྡུག་བསྔལ་བར་འགྱུར་རོ། །དེ་སྟེ་དེ་བཞིན་དུ་སངས་རྒྱས་མཆོད་ཅིང་འདི་ལ་བརྟེན་པས་མཆོད་རྟེན་གཅིག་
བྱས་ན་ཆོས་ཀྱིས་བརྒྱན་པ་བརྒྱད་ཁྲི་བཞི་སྟོང་རྣམས་ཀྱང་མཆོད་པར་འགྱུར་རོ། །གཞན་ཡང་བསོད་ནམས་ཀྱི་ཕུང་པོ་དཔག་ཏུ་མེད་པར་འགྱུར་རོ། །སྡོང་པོས་བརྒྱན་པ་བཀླགས་ཤིང་ཁ་ཏོན་དུ་བྱས་པར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་དུ་ཡང་ཞུགས་པར་འགྱུར་རོ། །
བཅོམ་ལྡན་འདས་ཀྱིས་མདོ་སྡེ་འདི་བཀའ་སྩལ་ནས། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དང་། གསང་བའི་བདག་པོ་ཆེན་པོ་ཕྱག་ན་རྡོ་རྗེ་དང་། རྒྱལ་པོ་ཆེན་པོ་བཞི་དང་། བྲམ་ཟེ་བི་ཎུདཏྟ་དང་། ལྷ་དང་ཀླུ་ལ་སོགས་པའི་སྡེ་བརྒྱད་མི་དང་མི་མ་ཡིན་པ་ཐམས་ཅད་རྗེས་སུ་ཡི་རངས་ནས། བཅོམ་

ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བྱང་ཆུབ་སྙིང་པོའི་རྒྱན་འབུམ་ཞེས་བྱ་བའི་གཟུངས་རྫོགས་སོ།། །།ཐང་གུར་གྱི་དུས་ཐེ་ཙིན་ཞི་ཧུང་ལུ་ཁིང་གོ་ས་ཅན་རྒྱ་གར་བྱང་ཕྱོགས་ཀྱི་མཁན་པོ་སྡེ་སྣོད་གསུམ་པ་རིག་འཛིན་དོན་ཡོད་རྡོ་རྗེས་བཀའ་ཡིས་བསྐུལ་བ་དང་དུ་བླངས་ཏེ།
རྒྱ་གར་གྱི་དཔེ་ལས་རྒྱ་ནག་ཏུ་བསྒྱུར་བར་མཛད་པ་ལས་ད་ལྟ་ཆེན་པོ་ཆིང་གུར་གྱི་ལོ་ཙཱ་ར་སྒྲོ་བཏགས་པ་བོད་ཡིག་གི་སློབ་གྲྭའི་མི་བཟང་ཇིང་གིར་རིགས་ལས་རིམ་པ་དང་པོའི་ཐའི་ཇི་མགོན་པོ་སྐྱབས་ཀྱིས་ཐོབ་ཆིན་ཝང་གིས་གཟུངས་བསྡུས་གསར་བ་བཞེངས་སྐབས་འཕྲོས་དོན་ལས་བརྩམས་ཏེ་བསྐུལ་བ་ལྟར། རང་
གནས་ཉིད་དགའི་སྐྱེད་ཚལ་དུ་བསྒྱུར་བ་ལགས་ཤིང་། ལེགས་སྦྱར་གྱི་སྒྲ་ལ་མ་བྱང་བས་སྔགས་ཚིག་གི་ལྕི་ཡང་སོགས་ལ་རྟོག་དཔྱོད་བྱེད་པའི་ངལ་བ་སྤངས་ཏེ་སྔ་རབས་པ་དག་གི་མདོ་གཞན་གྱི་ཡི་གེ་ཇི་ལྟར་ངོ་སྤྲོད་གནང་བ་སོར་བཞག་ཀུན་དགའ་བོའི་ཚིག་ལྷུག་ཅིག་ནི་རྒྱ་ནག་མར་མི་སྣང་ཡང་བོད་མར་ཡོད་པས་ཆད་
དམ་སྙམ་པས་བོད་མ་ནས་ཚུར་བསབས། དེ་ཡང་གཞུང་གི་བཀའ་འགྱུར་བར་མར་དགའ་བོ་ཞེས་པ་འདུག་ཀྱང་། བྲིས་མ་འགའ་ཞིག་ན་ཀུན་དགའ་བོས་སྣང་བ་འཐད་དམ་སྙམ་དུ་སེམས་པ་ལྟར་བྲིས་པ་ལ། བཛྲ་ཨཱ་ཡུ་ཥེའི་སྔགས་ནི་རྒྱ་ནག་གི་དཔེ་ཆ་ན་མེད་ཅིང་། བོད་དཔེར་ཡོད་ཀྱང་སྙིང་པོ་དང་ཉེ་སྙིང་གི་རྗེས་ལ་བྱུང་
མོད། རང་ཚུགས་ཀྱི་མིང་མི་གསལ་བས་རེ་ཞིག་གཞག་ཏེ། ཁིའན་ལུང་གནམ་ལོ་བརྒྱད་པ་ཟླ་༤་ཚེས་༡་ལ་རྫོགས་པར་བསྒྲུབས་སོ། །དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག། །།འོག་གི་བྱང་ཆུབ་
སྙིང་པོའི་རྒྱན་འབུམ་འདི་ཡང་འདི་ལས་ཟུར་ཕྱུང་ཞིག་ཡིན་འདུག་པས་ལོགས་སུ་བྲི་མ་དགོས་ཀྱང་། སྔར་གྱི་རྣམས་སུ་གོང་མ་མ་རྙེད་པའི་སྐབས་སུ་བྲིས་འདུག་པ་ལྟར་བཞག་གོ། ༄༅༅། །རྒྱ་གར་སྐད་དུ། བོ་དྷི་གརྦྷཱ་ལངྐཱར་ལཀྵ་དྷ་ར་ཎཱི། བོད་སྐད་དུ། བྱང་ཆུབ་ཀྱི་སྙིང་པོའི་རྒྱན་འབུམ་གྱི་
གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཨོཾ་ན་མོ་བྷ་ག་བ་ཏེ་བི་བུ་ལ་བ་ད་ན་ཀཱཉྩ་ནོཏ་ཀྵིཔྟ། པྲ་བྷཱ་ས་ཀེ་ཏུ་མུརྡྷ་ནེ། ཏ་ཐཱ་ག་ཏཱ་ཡ། ཨཌྷ་ཏེ་སམྱཀྶཾ་བུད་ངྷཱ་ཡ། ན་མོ་བྷ་ག་བ་ཏེ་ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུད་ངྷཱ་ཡ། ཏདྱ་ཐཱ། བོ་དྷི་བོ་དྷི། བོ་དྷ་ནི་

བོ་དྷ་ནི། སརྦ་ཏ་ཐཱ་ག་ཏ་གོ་ཙ་རི། དྷ་ར་དྷ་ར། ཧ་ར་ཧ་ར། པྲ་ཧ་ར་པྲ་ཧ་ར། མ་ཧཱ་བོ་དྷི་ཙིཏྟ་དྷཱ་རེ། ཙུ་ལུ་ཙུ་ལུ། ཤ་ཏ་ར་སྨི་སཉྩོ་དི་ཏེ། སརྦ་ཏ་ཐཱ་ག་ཏཱ་བི་ཥིཀྟེ། གུ་ཎི་གུ་ཎ་པ་ཏེ། སརྦ་བུདྡྷ་གུ་ཎཱ་བ་བྷཱ་སེ། མི་ལི་མི་ལི། ག་ག་ན་ཏ་ལེ། སརྦ་ཏ་ཐཱ་ག་ཏ་ངྷཱིཥྛི་ཏེ། ན་བྷ་སྟ་ལེ། ཤ་མེ་ཤ་མེ། པྲ་ཤ་མེ་པྲ་ཤ་མེ། སརྦ་པཱ་པཾ་པྲ་ཤ་
མ་ནེ། སརྦ་པཱ་པཾ་བི་ཤོ་དྷ་ནེ། ཧུ་ལུ་ཧུ་ལུ། མ་ཧཱ་བོ་དྷི་མཱརྒ་སྃ་པྲ་ཏིཥྛི་ཏེ། སརྦ་ཏ་ཐཱ་ག་ཏ་སུ་པྲ་ཏིཥྛི་ཏེ་ཤུད་དྷེ་སྭཱ་ཧཱ། རྩ་བའི་སྔགས་སོ། །ཨོཾ་སརྦ་ཏ་ཐཱ་ག་ཏ་བྱ་བ་ལོ་ཀི་ཏེ། ཛ་ཡ་ཛ་ཡ་སྭཱ་ཧཱ། སྙིང་པོའོ། །ཨོཾ་ཧུ་ལུ་ཧུ་ལུ། ཛ་ཡ་མུ་ཁེ་སྭཱ་ཧའ། ཉེ་བའི་སྙིང་པོའོ། །ཨོཾ་བཛྲ་ཨ་ཡུ་ཥེ་སྭཱ་ཧཱ། དགེ་སློང་ངམ་དགེ་སློང་མའམ། དགེ་བསྙེན་
ནམ་དགེ་བསྙེན་མའམ། གཞན་ཡང་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་གཟུངས་འདི་བྲིས་ཏེ། མཆོད་རྟེན་བྱས་ལ་མཆོད་རྟེན་དེའི་ནང་དུ་གཟུངས་འདི་བཅུག་ན། དེས་མཆོད་རྟེན་གཅིག་བྱས་ན་འབུམ་བྱས་པར་འགྱུར་རོ། །ལྷ་རྫས་ཀྱི་མེ་ཏོག་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་།
གདུགས་དང་། རྒྱལ་མཚན་དང་། བ་དན་ལ་སོགས་པས་ཀྱང་མཆོད་པར་འགྱུར་ཏེ། མཆོད་རྟེན་འབའ་ཞིག་མཆོད་པ་མ་ཡིན་གྱི། སངས་རྒྱས་དཀོན་མཆོག་དང་། ཆོས་དཀོན་མཆོག་དང་། དགེ་འདུན་དཀོན་མཆོག་རྣམས་ལའང་མཆོད་པའི་ཡོ་བྱད་དེ་དག་གིས་མཆོད་པར་འགྱུར་རོ། །དགའ་བོ་ངས་མདོ་འདི་
བཤད་པ་ནི་བསོད་ནམས་ཞན་པ་དང་། མ་དད་པ་དང་། ལྟ་བ་ལོག་པ་དང་། ཐེ་ཚོམ་ཟ་བ་དང་། མཚམས་མེད་པ་བྱེད་པ་དང་། ཚེ་ཐུང་བ་དང་། སེམས་ཅན་དམྱལ་བ་དང་། བྱོལ་སོང་དང་། གཤིན་རྗེའི་འཇིག་རྟེན་དང་། མཚམས་མེད་པར་འགྲོ་བའི་སེམས་ཅན་དེ་ལྟ་བུ་དག་གི་ཕྱིར་གཟུངས་འདི་བཤད་དོ། །དགའ་
བོ་ཕྱི་མའི་དུས་ཕྱི་མའི་ཚེ་ཁྱིམ་ན་གནས་པ་དང་། དགེ་སློང་ལས་ཕལ་ཆེར་གཟུངས་འདི་མི་ཀློག་པ་དང་། མཆོད་པར་མི་བྱེད་པ་རྣམས་ཇི་ལྟར་ཁྱིམ་པ་རྣམས་སྡུག་བསྔལ་བར་བཤད་པ་དེ་བཞིན་དུ་རབ་ཏུ་བྱུང་བ་རྣམས་ཀྱང་སྡུག་བསྔལ་བར་འགྱུར་རོ། །དེ་སྟེ་དེ་བཞིན་དུ་སངས་རྒྱས་མཆོད་ཅིང་འདི་ལས་ཉན་པས་
མཆོད་རྟེན་གཅིག་བྱས་ན་ཆོས་ཀྱིས་བརྒྱན་པ་བརྒྱད་ཁྲི་བཞི་སྟོང་རྣམས་ཀྱང་མཆོད་པར་འགྱུར་རོ། །གཞན་ཡང་བསོད་ནམས་ཀྱི་ཕུང་པོ་དཔག་ཏུ་མེད་པར་འགྱུར་རོ། །སྡོང་པོས་བརྒྱན་པ་བཀླགས་ཤིང་ཁ་ཏོན་དུ་བྱས་པར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་དུ་ཡང་ཞུགས་པར་

འགྱུར་རོ། །བྱང་ཆུབ་ཀྱི་སྙིང་པོའི་རྒྱན་འབུམ་ལས་བཏུས་པ་འབུམ་གྱི་གཟུངས་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་ར་སྨི་བི་མ་ལ་བི་ཤུདྡྷེ་པྲ་བྷ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་འོད་ཟེར་དྲི་མ་མེད་པ་རྣམ་པར་དག་པའི་འོད་ཅེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་
དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོང་ཁྱེར་ཆེན་པོ་སེར་སྐྱའི་གནས་ཀྱི་ཕོ་བྲང་གི་འཁོར་གྱི་ཁྱམས་ཆེན་པོ་ན་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་ཅིག་ཏུ་བཞུགས་པ་ལ་འདི་ལྟ་སྟེ།
བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་དང་། ལག་ན་རྡོ་རྗེ་དང་། འཕགས་པ་སྤྱན་རས་གཟིགས་ཀྱི་དབང་ཕྱུག་དང་། འཇམ་དཔལ་དང་། ཤེས་རབ་འོད་དང་། བྱམས་པ་ལ་སོགས་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ་རྣམས་དང་། ལྷ་དང་། ཀླུ་དང་།
གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ལ་སོགས་པ་གྲངས་མེད་པས་བཅོམ་ལྡན་འདས་ལ་ཞེ་སར་བྱས། རི་མོར་བྱས། བཀུར་སྟིར་བྱས་ཏེ། ཡོངས་སུ་བསྐོར་བ་ལ་ཆོས་སྟོན་ཅིང་བཞུགས་སོ། །དེའི་ཚེ་སེར་སྐྱའི་གྲོང་ཁྱེར་ན་གནས་པ་བྲམ་
ཟེ་ཆེན་པོ་སེར་སྐྱའི་ཟླ་བ་ཞེས་བྱ་བ་བཅོམ་ལྡན་འདས་ཀྱི་བསྟན་པ་ལ་ཡིད་མི་ཆེས་ཤིང་ལོག་པར་ལྟ་བ་ཞིག་གནས་པ་དེ་དུས་གཞན་ཞིག་གི་ཚེ་གཞན་ཞིག་གི་རྨི་ལྟས་སུ་རྨིས་ཏེ། བསྟན་པ་བྲམ་ཟེ་ཆེན་པོ་ཁྱོད་ད་སྟེ་ཞག་བདུན་ན་འཆི་བའི་དུས་བྱེད་པར་འགྱུར་རོ་ཞེས་ཟེར་བ་ཐོས་ནས། བྲམ་ཟེ་དེ་ཤིན་ཏུ་ཡང་མི་དགའ་སྟེ། འཇིགས་སྐྲག་ནས་
ཡིད་ལ་བསམ་པ། ད་བདག་གིས་སྲོག་གི་སྐྱབས་སུ་ལ་བཙལ་བར་བྱ། ཡང་དགེ་སྦྱོང་གཽ་ཏ་མ་ཐམས་ཅད་མཁྱེན་པ་རྫུ་འཕྲུལ་དང་ལྡན་པ་ཞིག་ཡིན་ནོ་ཞེས་གྲགས་ན། བདག་དེའི་གན་དུ་སོང་སྟེ། དེ་ཐམས་ཅད་མཁྱེན་པ་ཡིན་ཡང་དག་ནང་འཇིགས་པས་ཉམ་ཐག་པར་འགྱུར་བའི་སྐྱབས་མཛད་པའི་ཕྱིར་ཆོས་སྟོན་གོར་མ་ཆག་གོ་སྙམ་བསམས་
ནས། བཅོམ་ལྡན་འདས་ཀྱི་གན་དུ་སོང་བ་དང་། རྒྱང་རིང་པོ་ནས་བཅོམ་ལྡན་འདས་འཁོར་མང་པོ་དང་ཐབས་ཅིག་ཏུ་བཞུགས་པ་མཐོང་ནས། བཅོམ་ལྡན་འདས་ལ་ཞུ་བར་མ་སྤོབས་ཏེ་སེམས་ཤིང་འདུག་པ་ལ། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་དུས་གསུམ་མཁྱེན་པ། ཐམས་ཅད་གཟིགས་

པ། སྒྲིབ་པ་མི་མངའ་བས་བྲམ་ཟེ་དེའི་བསམ་པ་མཁྱེན་ནས་བྱམས་པའི་ཐུགས་ཀྱིས་བརྩེ་བར་དགོངས་ཏེ། བཀའ་སྩལ་པ། བྲམ་ཟེ་ཆེན་པོ་ཁྱོད་ད་སྟེ་ཞག་བདུན་ན་འཆི་བའི་དུས་བྱས་ནས་ངན་སོང་ངན་འགྲོ་མནར་མེད་པའི་སེམས་ཅན་དམྱལ་བར་སྐྱེ་བར་འགྱུར་རོ། །
དེ་ནས་ཡང་རིམ་གྱིས་སེམས་ཅན་དམྱལ་བ་ཆེན་པོ་བཅུ་དྲུག་ཏུ་ཁ་བརྒྱུད་དེ་སྐྱེ་བར་འགྱུར་རོ། །དེ་ལས་ཐར་ནས་ཀྱང་རིགས་ངན་ཤན་པའི་ལུས་སུ་སྐྱེ་བར་འགྱུར་རོ། །དེ་ནས་ཤི་འཕོས་ནས་ཡང་ཕག་གི་ལུས་སུ་སྐྱེ་བར་འགྱུར་ཏེ། རྟག་ཏུ་ངན་སྐྱུགས་མི་གཙང་བ་ཟ་ཞིང་འདམ་
རྫབ་ཀྱི་ནང་དུ་ཡང་ཡུན་རིང་དུ་གནས་ཏེ། རྒྱུན་དུ་སྡུག་བསྔལ་མྱོང་བར་འགྱུར་རོ། །དེ་ནས་གལ་ཏེ་མིའི་ལུས་ཐོབ་ན་ཡང་ཤིན་ཏུ་དབུལ་བ་དང་། མི་གཙང་བ་དང་། དྲི་ང་བ་དང་། མདོག་མི་སྡུག་ཅིང་གནག་པ་དང་། ལུས་རིད་ཅིང་ཉམ་ཆུང་བ་དང་། མཛེ་ནད་ཅན་དུ་འགྱུར་
ཏེ། སྐྱེ་བོ་ཡོངས་ལ་མི་སྡུག་ཅིང་རྟག་ཏུ་བཀྲེས་པས་ཉམ་ཐག་པ། སྐྱེ་བོ་ཡོངས་ཀྱིས་སྨད་པ། རྟག་པར་བརྡེག་བཙོག་བྱ་ཞིང་ཤིན་ཏུ་སྡུག་བསྔལ་བར་འགྱུར་རོ་ཞེས་བཀའ་སྩལ་པ་དེ་ཐོས་ནས། བྲམ་ཟེ་དེ་ཤིན་ཏུ་འཇིགས་སྐྲག་སྟེ། ཡིད་གདུངས་པས་དུས་ནས་བཅོམ་ལྡན་
འདས་ཀྱི་ཞབས་ལ་མགོ་བོས་ཕྱག་འཚལ་ཏེ་གསོལ་པ། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམས་ནི་སེམས་ཅན་ཐམས་ཅད་ཀྱི་མགོན་དང་། སྐྱབས་མཛད་པ་ལགས་ན། བདག་ནི་སྡིག་པའི་ལས་ཐམས་ཅད་འཆགས་ཏེ། དེང་སླན་ཆད་བཅོམ་ལྡན་
འདས་ཀྱི་བཀའ་བཞིན་དུ་བགྱིད་ན་བདག་ངན་སོང་ངན་འགྲོ་སེམས་ཅན་དམྱལ་བར་སྐྱེ་བའི་སྡུག་བསྔལ་ལས་སྐྱབས་མཛད་པར་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ་ཁྱོད་སོང་ལ་གྲོང་ཁྱེར་སེར་སྐྱའི་ལམ་གྱི་སུམ་
མདོ་ན་མཆོད་རྟེན་རིང་བསྲེལ་ཅན་རྙིང་པ་རལ་བ་ཞིག་ཡོད་པ་དེ་སླར་བརྩིགས་ཏེ། མཆོད་རྟེན་གྱི་རྩེ་མོར་སྲོག་ཤིང་བཙུགས་ལ། གསང་སྔགས་ཡི་གེར་བྲིས་པ་དེའི་ནང་དུ་བཅུག་སྟེ་མཆོད་པ་བྱས་ནས་གསང་སྔགས་ལན་བདུན་བཏོན་ན་ཁྱོད་ཀྱི་ཚེ་ཡང་ཕྱིར་ནུར་ཏེ་འཕེལ་བར་

འགྱུར་ལ། འཆི་བའི་དུས་བྱས་ནས་ཀྱང་བདེ་འགྲོ་མཐོ་རིས་ཀྱི་གནས་ལོངས་སྤྱོད་ཆེ་བ་རྣམས་སུ་སྐྱེ་སྟེ། བསྐལ་པ་སྟོང་ཕྲག་བརྒྱའི་བར་དུ་བདེ་བའི་ལོངས་སྤྱོད་ཀྱང་ཕྱིར་འཕེལ་ཞིང་རྒྱས་པར་འགྱུར། དེ་ནས་ཀྱང་དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་
ཡོངས་སུ་དག་པར་སྐྱེ་བར་འགྱུར་ཏེ། བསྐལ་པ་བརྒྱ་སྟོང་དུ་མར་བདེ་བ་ཆེན་པོ་མྱོང་བར་འགྱུར་རོ། །དེ་ནས་ཡང་ཤི་འཕོས་ནས་རྒྱལ་ཆེན་རིས་བཞིའི་ལྷ་རྣམས་ཀྱི་གནས་སུ་སྐྱེ་བར་འགྱུར་རོ། །དེར་ཡང་བསྐལ་པ་ཆེན་པོ་སྟོང་ཕྲག་བརྒྱའི་བར་དུ་བདེ་བའི་ལོངས་སྤྱོད་མི་ཟད་པ་མྱོང་
བར་འགྱུར་རོ། །ཚེ་རབས་གང་དུ་སྐྱེས་པའི་གནས་ཀུན་ཏུ་ཡང་ཡིད་གཞུངས་ཤིང་ཚེའི་བར་ཆད་མེད་པ་དང་། ལས་ཀྱི་སྒྲིབ་པ་ཐམས་ཅད་ཟད་ནས་ནམ་དུ་ཡང་སེམས་ཅན་དམྱལ་བར་ལྟུང་བར་མི་འགྱུར་རོ། །རྟག་ཏུ་ཡང་དག་པར་རྫོགས་པའི་སངས་རྒྱས་འབྱུང་བ་རྣམས་དང་
ཕྲད་ཅིང་རྗེས་སུ་དགོངས་པར་མཛད་དོ། །བྲམ་ཟེ་ཆེན་པོ་གཞན་ཡང་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཚེ་ཐུང་བའམ་ནད་མང་བ་ཞིག་ཡོད་ན་དེས་མཆོད་རྟེན་རྙིང་པ་བཅོས་སམ།
གསར་དུ་བརྩིགས་ཀྱང་རུང་སྟེ། གསང་སྔགས་འདི་བྲིས་ལ་ནང་དུ་བཞུགས་ནས་དཀྱིལ་འཁོར་བྱི་དོར་བྱས་ཏེ་མཆོད་ན་དེ་དག་གི་ཡོན་ཏན་ནི་ཚེ་ཟད་པ་ཡང་ཚེ་སླར་ནུར་ཞིང་རིང་བ་དང་། ནད་ཀྱིས་བཏབ་ཅིང་སྡུག་བསྔལ་བ་ཡང་ནད་དོ་ཅོག་ལས་ཐར་བ་དང་། ནམ་དུ་ཡང་ངན་སོང་ངན་
འགྲོ་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེ་བར་མི་འགྱུར་ཏེ། དེ་དག་གི་སྒྲ་རྣ་ལམ་དུ་ཡང་གྲག་པར་མི་འགྱུར་ན་དེ་དག་ཏུ་སྐྱེ་བ་ལྟ་ཅི་སྨོས། དེ་ནས་བྲམ་ཟེ་དེས་དེ་སྐུད་ཐོས་ནས་ཤིན་ཏུ་ཡི་རངས་ཏེ། མཆོད་རྟེན་ཞིག་པ་བཅོས་པར་
བསམས་ནས་དེ་འཁོར་དེ་ནས་ལངས་ཏེ་སོང་ངོ་། །དེའི་ཚེ་འཁོར་དེ་ཉིད་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ཞེས་བྱ་བ་ཞིག་སྟན་ལས་ལངས་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་

གསང་སྔགས་ཀྱི་ཆོ་ག་འདི་ཇི་ལྟ་བུར་བགྱིས་ན་ཡོན་ཏན་དང་། ལེགས་པ་དང་། དགེ་བའི་རྩ་བ་བསྐྱེད་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གསང་སྔགས་ཆེན་པོ་རྣམས་ཀྱི་ཡང་མཆོག་བདག་ཉིད་ཆེ་བ་དྲི་
མ་མེད་ཅིང་རྣམ་པར་དག་པའི་འོད་ཅེས་བྱ་བ་འདི་དཀྱིལ་འཁོར་ཆེན་པོའི་ཆོ་ག་བཞིན་བྱས་ན་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་རླབས་ཀྱིས་སེམས་ཅན་ཐམས་ཅད་ཀྱི་ཕན་པ་དང་བདེ་བར་འགྱུར་རོ། །ལ་ལ་ཞིག་གིས་གསང་སྔགས་འདི་ཐོས་ན་མཚམས་མེད་པ་ལྔ་བྱས་པའི་
སྡིག་པ་ཡང་མ་ལུས་པར་འབྱང་བར་འགྱུར་རོ། །སེར་སྣ་དང་། བརྣབ་སེམས་དང་། ཕྲག་དོག་ལ་སོགས་པ་མི་དགེ་བའི་རྩ་བ་ཐམས་ཅད་ཀྱང་འབྱང་བར་འགྱུར་ཏེ། ཚེ་ཟད་པ་ལས་ཀྱང་ཚེ་རིང་དུ་ནུར་བ་དང་། བཀྲ་ཤིས་དང་། ལེགས་པ་ཕུན་སུམ་ཚོགས་པ་ཐམས་ཅད་
འགྲུབ་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས་བཅོམ་ལྡན་འདས་ལ་གསོལ་པ། བཅོམ་ལྡན་འདས་བཅོམ་ལྡན་འདས་ཀྱིས་སེམས་ཅན་ཐམས་ཅད་ཀྱི་སྲོག་གི་སྐྱབས་མཛད་
པ་དང་། ལས་ཀྱི་སྒྲིབ་པ་ཐམས་ཅད་བསལ་བའི་སླད་དུ་བཅོམ་ལྡན་འདས་ཀྱིས་གསང་སྔགས་ཀྱི་ཆོ་ག་འདི་ཐམས་ཅད་དང་ལྡན་པའི་འཁོར་ལ་བཀའ་སྩལ་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གནང་སྟེ། བཅོམ་ལྡན་འདས་ཀྱི་དབུའི་གཙུག་
ཏོར་གྱི་སྟེང་ནས་འོད་ཟེར་གྱི་སྣང་བ་ཆེན་པོ་བྱུང་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་འོད་ཀྱིས་ཁྱབ་པར་མཛད་དེ། དེ་བཞིན་གཤེགས་པ་ཐམས་ཅད་ལ་ཡང་མཁྱེན་པར་མཛད་ནས་འོད་ཟེར་དེ་དག་སླར་འདུས་ཏེ། བཅོམ་ལྡན་འདས་ཀྱི་དབུའི་
གཙུག་ཏོར་དུ་ནུབ་བོ། །དེ་ནས་བཅོམ་ལྡན་འདས་དགྱེས་ཤིང་བྱ་ཀ་ལ་པིངྐའི་གསུང་དབྱངས་ཀྱིས་གསང་སྔགས་བཀའ་སྩལ་པ། ནམཿ ས་པྟཱ་ནཱན། སྃ་མྱ་ཀ་སྃ་བུདྡྷ་ཀོ་ཊཱི་ནཱན་པ་རི་ཤུངྡྷེ་མ་ན་སི། ཨ་བྷྱཱ་རྩི་ཏ་པ། ཊིཥྛ་ཏུ་ནཱན། ན་མོ་བྷ་ག་བ་ཏེ། ཨ་མྲྀ་ཏ་ཨཱ་ཡུ་ཥ་སྱ།

ཏ་ཐཱ་ག་ཏ་སྱ། ཨོྃ་སརྦ་ཏ་ཐཱ་ག་ཏ་ཤུདྡྷི། ཨཱ་ཡུར་བི་ཤོ་དྷ་ནེ། སཾ་ཧ་ར། མྃ་ཧ་ར། སརྦ་ཏ་ཐཱ་ག་ཏ་བཱིརྱ་བ་ལེ་ན་པྲ་ཏི་སྃ་ཧ་ར། ཨ་ཡུཿསཱ་ར་སཱ་ར། སརྦ་ཏ་ཐའ་ག་ཏ་སམ་ཡ། བོ་དྷ་ཡ་བོ་དྷ་ཡ་མ་མ་སརྦ་པཱ་པཾ་ཨཱ་བ་ར་ཎ་བི་ཤུདྡྷེ།
བི་ག་ཏ་མ་ལྃ། ཚ་ར་སུ་བུདྡྷ་བུདྡྷེ་ཧུ་རུ་ཧུ་རུ་སྭཱ་ཧཱ། འདི་ནི་རྩ་བའི་སྔགས་ཏེ། གང་ལ་ལ་འདིའི་ཆོ་ག་བྱེད་པར་འདོད་ན་ཚེས་བརྒྱད་དང་བཅུ་གསུམ་དང་བཅུ་བཞི་དང་བཅྭ་ལྔ་རྣམས་གང་ཡང་རུང་བ་ལ་མཆོད་རྟེན་རིང་བསྲེལ་ཅན་ལ་ལན་བདུན་ཅུ་རྩ་བདུན་བསྐོར་ལ། གསང་སྔགས་
འདི་ལན་བདུན་ཅུ་རྩ་བདུན་བཟླས་བརྗོད་བྱས་ཏེ། ཁྲུས་བྱས་ལ་དཀྱིལ་འཁོར་བྱས་ནས་གསང་སྔགས་ཀྱི་ཡི་གེ་བདུན་ཅུ་རྩ་བདུན་བྲིས་ཏེ། དེའི་ཚེ་གསང་སྔགས་འདོན་པ་དང་། ཡི་གེར་འདྲི་བ་ཡང་ཁྲུས་བྱས་ལ་གོས་གཙང་མ་གྱོན་ཏེ། ལུས་སྤོས་ཀྱིས་བྱུགས་ནས་ཁ་ཟས་
གཙང་མ་ཟོས་ལ། མེ་ཏོག་དང་། བདུག་པས་མཆོད་དེ། དེ་ལ་རིན་པོ་ཆེ་སྣ་བདུན་ཡང་ཡོན་དུ་ཕུལ་ལམ། ཡང་ན་བདག་གི་ཉམས་ཀྱིས་ཅི་འབྱོར་པར་ཕུལ་ཡང་རུང་སྟེ། སེམས་མགུ་བར་བྱའོ། །ཆོས་བཙུན་པར་བྱ་བའི་ཕྱིར་བསྟི་སྟང་དང་། རི་མོ་ཆེར་བྱའོ། །གསང་སྔགས་
ཀྱི་ཡི་གེ་ལ་ཡང་དཀོན་ཞིང་རིན་པོ་ཆེར་འདུ་ཤེས་བཞག་སྟེ། མཆོད་རྟེན་ཆེ་ཆུང་ཇི་ཙམ་ནུས་པ་བདུན་ཅུ་རྩ་བདུན་གདབ་པར་བྱ་ཞིང་། དེ་རེ་རེའི་ནང་དུ་གསང་སྔགས་བཅུག་སྟེ། སེམས་རྩེ་གཅིག་ཏུ་མཆོད་པ་ཆེན་པོ་བྱས་ན་ཚེ་ཟད་པ་ལས་ཚེ་སླར་ནུར་ཏེ་ཚེ་རིང་བར་འགྱུར་རོ། །སྔོན་
གྱི་ལས་ཀྱི་སྒྲིབ་པ་ཚེ་རབས་གྲངས་མེད་པའི་སྡིག་པ་ཐམས་ཅད་བྱང་ནས་ནམ་དུ་ཡང་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ཀྱི་སྐྱེ་གནས་ཐམས་ཅད་དུ་སྐྱེ་བར་མི་འགྱུར་རོ། །གང་དུ་སྐྱེ་བའི་གནས་ཐམས་ཅད་དུ་ཡང་སྔོན་གྱི་ཚེ་རབས་རྗེས་སུ་དྲན་པར་འགྱུར།
ཡིད་ལ་བསམ་པ་ཐམས་ཅད་ཀྱང་དེ་བཞིན་དུ་འགྲུབ་པར་འགྱུར། དེ་བཞིན་གཤེགས་པ་འབུམ་ཕྲག་བདུན་ཅུ་རྩ་བདུན་སྙེད་ལ་དགེ་བའི་རྩ་བ་བསྐྱེད་པར་འགྱུར། ནད་དང་སྡུག་བསྔལ་ཐམས་ཅད་ལས་ཐར་བར་འགྱུར་རོ། །གང་ལ་ལ་ཞིག་ནད་ཚབས་པོ་ཆེས་བཏབ་སྟེ། འཆི་བའི་

དུས་བྱེད་པ་ལ་ཐུག་ན་དཀྱིལ་འཁོར་གྲུ་བཞི་པར་བྱས་ལ། དེའི་སྟེང་དུ་ཚོན་སྣ་ལྔས་རི་མོར་བྲིས་ཏེ། དབུས་ཀྱི་ཆར་ནི་འཁོར་ལོ་དང་། རྡོ་རྗེ་དང་། དུང་དང་། མདུང་རྩེ་གསུམ་པ་དང་། གཡུང་དྲུང་རིས་དང་། པདྨོ་རྣམས་བྲིའོ། །གྲྭ་བཞིར་ཡང་པདྨོ་རེ་རེ་
བྲིས་ཏེ་དེའི་སྟེང་དུ་སྤོས་ཆུས་བཀང་བའི་བུམ་པ་རེ་རེ་གྲྭ་བཞིར་བཞག་གོ། །བདུག་སྤོས་ཀྱི་སྣོད་བཀང་བ་སྤོས་སྣ་ཚོགས་འཐུལ་བ་ཡང་གཞག་གོ། །ཁ་དོག་སྣ་ལྔའི་སྣོད་དུ་ཁ་ཟས་སྣ་ཚོགས་དང་། ཟས་དཀར་གསུམ་དང་འབྲས་ཆན་དུ་སྦྱར་བ་བཞག །ཡང་དྲིའི་ཆུ་དང་། མེ་ཏོག་
དང་། འབྲས་སམ། འབྲུའི་སྣོད་བཀང་བ་ཕོར་བུ་རེ་རེ་བླུགས་པ་དང་། ཡང་ཁ་ཟས་སྣ་ཚོགས་སྦྱར་བའི་གཏོར་མ་སྤོས་ཆུ་བུམ་པ་གང་དང་སྦྱར་ཏེ། དཀྱིལ་འཁོར་གྱི་སྟེང་དུ་གཞག་གོ། །གཏོར་མ་དེ་དང་འབྲས་ཀྱི་དྲུང་དུ་ཉེ་བར་ཚོགས་ཀྱི་བདག་པོའི་གཟུགས་བྲིས་ལ་དེའི་སྤྱི་བོའི་
སྟེང་དུ་མར་མེ་གཞག་གོ། །དེ་ནས་དཀྱིལ་འཁོར་གྱི་ནུབ་ཕྱོགས་སུ་ནད་པ་བཞག་ལ། དཀྱིལ་འཁོར་གྱི་ནང་དུ་ཁ་བསྟན་པའི་ནད་པའི་མདུན་དུ་ཡང་མཆོད་པའི་བཤོས་བཞག་སྟེ་དབུལ་དུ་གཞུག་གོ། །དེ་ནས་སྔགས་མཁན་གཙང་སྦྲ་ཆེར་བྱས་ཏེ། ནད་པ་དེ་ལ་གསང་སྔགས་
བདུན་ཅུ་རྩ་བདུན་གྱིས་བཏབ་སྟེ། ཆོ་ག་འདི་ལྟར་བྱས་ན་ནད་པ་ཚེ་ཟད་དེ་འཆི་བའི་དུས་བྱེད་དུ་ཉེ་བ་ཞག་བདུན་ནས་དྲན་པ་ཉམས་ཤིང་འཁྲུལ་བར་འགྱུར་བ་ཡང་ཚེ་སླར་ནུར་ཞིང་ཚེ་རིང་པོར་འགྱུར་རོ། །རྨི་ལམ་གྱི་སྡུག་བསྔལ་ཡང་མྱོང་བར་མི་འགྱུར་རོ། །གང་ལ་ལ་ཞིག་གིས་
གཙང་སྦྲ་ཆེར་བྱས་ཏེ། ཉིན་གཅིག་བཞིན་རྟག་པར་གསང་སྔགས་ལན་རེ་རེ་ཇི་སྲིད་འཚོའི་བར་དུ་བཏོན་ན་དེ་འཆི་བའི་དུས་བྱས་ནས་ལོངས་སྤྱོད་དང་། བདེ་བ་མི་ཟད་པའི་གནས་སུ་སྐྱེ་བར་འགྱུར་རོ། །རྟག་པར་དུས་ཐམས་ཅད་དུ་བཟླས་བརྗོད་བྱས་ན་སངས་རྒྱས་བཞུགས་པའི་
ཞིང་དུ་སྐྱེ་བར་འགྱུར་ཞིང་། ཚེ་རབས་རྗེས་སུ་དྲན་པར་ཡང་འགྱུར་རོ། །དུས་མ་ཡིན་པའི་འཆི་བ་དང་། །སྒྲིབ་པ་ཐམས་ཅད་བྱང་བར་འགྱུར་རོ། །ཡང་གང་ལ་ལ་ཞིག་གིས་མི་ཤི་བའི་ཆེད་དུ་ཕན་པར་འདོད་པས་སེམས་ཐག་པ་ནས་གསང་སྔགས་ལན་བདུན་ཅུ་རྩ་བདུན་བཟླས་

བརྗོད་བྱས་ན་ཤི་བ་དེ་ངན་སོང་གི་གནས་སུ་ལྟུང་ན་ཡང་དེའི་མོད་ལ་ལས་ཀྱི་སྒྲིབ་པ་རྣམས་ཟད་ནས་མཐོ་རིས་ཀྱི་ལྷའི་གནས་སུ་སྐྱེ་ཞིང་བདེ་བ་མྱོང་བར་འགྱུར་རོ། །ཡང་གང་ལ་ལ་ཞིག་གིས་གསང་སྔགས་ཡི་གེར་བྲི་བ་གཞན་གྱི་མིང་ནས་སྨོས་ཏེ། མཆོད་རྟེན་གྱི་ནང་དུ་
བཅུག་ལ་ནན་ཏན་དུ་མཆོད་པ་བྱས་ན་ཤི་བ་གང་ཡིན་པ་དེ་ངན་སོང་གི་གནས་ནས་ཐར་ཏེ་མཐོ་རིས་སུ་སྐྱེ་བར་འགྱུར་རོ། །ཡང་ན་དགའ་ལྡན་གྱི་ལྷའི་རིས་སུ་སྐྱེ་བར་འགྱུར་ཏེ། སངས་རྒྱས་ཀྱི་བྱིན་གྱི་རླབས་ཀྱིས་ངན་སོང་དུ་ལྟུང་བར་མི་འགྱུར་རོ། །རིགས་ཀྱི་བུའམ་རིགས་
ཀྱི་བུ་མོ་གང་ལ་ལ་ཞིག་གིས་མཆོད་རྟེན་དེ་ལ་བསྐོར་བ་བྱས་སམ། ཕྱག་བྱས་སམ། མཆོད་པ་ཕུལ་ཡང་རུང་སྟེ། དེ་བཞིན་གཤེགས་པའི་བྱིན་གྱི་རླབས་ཀྱིས་བླ་ན་མེད་པའི་བྱང་ཆུབ་ཀྱི་ལམ་ལས་ཕྱིར་མི་ལྡོག་པར་ཡང་འགྱུར་རོ། །སྔོན་གྱི་ལས་ཀྱི་སྒྲིབ་པ་རྣམས་ཀྱང་
མ་ལུས་པར་འབྱང་བར་འགྱུར་རོ། །ཐ་ན་བྱ་དང་རི་དགས་ལ་སོགས་ཏེ་གང་དག་ལ་མཆོད་རྟེན་དེའི་གྲིབ་མ་ཕོག་པ་དེ་དག་ཀྱང་ནམ་ཡང་དུད་འགྲོ་ལ་སོགས་པ་ངན་སོང་གི་གནས་སུ་སྐྱེ་བར་མི་འགྱུར་རོ། །གང་ལ་ལ་མཚམས་མེད་པ་ལྔའི་སྡིག་པ་ཆེན་པོ་དང་ལྡན་པ་ཡང་མཆོད་
རྟེན་དེ་ལ་རེག་གམ། དེའི་གྲིབ་མས་ཕོག་ཀྱང་རུང་སྟེ། དེའི་སྡིག་པ་ཐམས་ཅད་བྱང་ཞིང་ཟད་པར་འགྱུར་རོ། །མཆོད་རྟེན་དེའི་གནས་ན་འབྱུང་པོ་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་ལ་སོགས་པ་ལུས་ལ་འཇུག་ཅིང་གནོད་པ་དང་། གཅན་
གཟན་ཁྲོ་བོ་དང་། ཐོག་འབབ་པ་དང་། སྡིག་སྦྲུལ་ཁ་གདུག་པ་དང་། སྦྱར་དུག་ལ་སོགས་པ་ཐམས་ཅད་ཀྱིས་ཀྱང་མི་ཚུགས་ཤིང་མེད་པར་འགྱུར་རོ། །གཞན་ཡང་ཕ་རོལ་ཀྱི་དམག་ཚོགས་དང་། མཚོན་དང་། མེ་དང་། ཆུ་དང་། སེར་བ་དང་། མུ་གེ་དང་། དུས་མ་
ཡིན་པར་འཆི་བ་དང་། རྨི་ལམ་ངན་པ་དང་། བཀྲ་མི་ཤིས་པ་དང་། སྡུག་བསྔལ་གྱི་གནོད་པ་ཐམས་ཅད་མེད་པར་འགྱུར་རོ། །ཡུལ་དེར་ལྟས་ངན་ཞིག་བྱུང་ན་ཡང་མཆོད་རྟེན་དང་། སངས་རྒྱས་ཀྱི་བྱིན་གྱི་རླབས་ཀྱིས་འོད་ཟེར་ཆེན་པོ་བྱུང་བས། ལྟས་ངན་དང་། བཀྲ་མི་ཤིས་

པ་ཐམས་ཅད་ཟློག་པར་འགྱུར་རོ། །གང་གཞན་ཞིག་བསམ་པ་ངན་པས་དམག་དང་། ཆོམ་རྐུན་གྱི་གནོད་པ་བྱ་བར་སེམས་སམ། དགྲ་རྒོལ་བ་ཞིག་བྱུང་ན་ཡང་གནས་དེར་མཆོད་རྟེན་དེ་ལ་འོད་ཟེར་ཆེན་པོ་འབྱུང་སྟེ། དེ་བཞིན་གཤེགས་པའི་རྫུ་འཕྲུལ་གྱིས་
མེ་ལྕེ་ཀུན་ཏུ་འབར་བས་བསྐོར་བའི་ནང་ནས་དམག་གི་དཔུང་དང་། མཚོན་ཆའི་ཆར་མངོན་པར་བསྟན་པས་ཕ་རོལ་གྱི་དམག་ཚོགས་ཐམས་ཅད་ཞི་ཞིང་ཕྱིར་ལྡོག་པར་འགྱུར་རོ། །ལྷ་རྣམས་ཀྱིས་ཀྱང་བསྲུང་བ་དང་། བསྐྱབ་པ་བྱས་ཏེ། ཕྱོགས་བཞིར་དཔག་ཚད་
བརྒྱ་ཚུན་ཆད་དུ་མཚམས་བཅད་དེ་བསྲུངས་པས་དེའི་ནང་དུ་འཁྲུག་པ་དང་། ནད་འགོ་བ་དང་། ཕྱུགས་ནད་ཐམས་ཅད་མི་འབྱུང་ངོ་། །འཐབ་ཅིང་རྩོད་པ་མི་འབྱུང་། ཆོས་མ་ཡིན་པར་སྤྱོད་པ་མེད་པར་འགྱུར་རོ། །འདི་ལ་གསང་སྔགས་གཞན་གྱིས་བཅད་པ་
དང་། མནན་པར་མི་ནུས་ཏེ། གསང་སྔགས་ཐམས་ཅད་ཀྱི་རྩ་བ་ཡིན་པའི་ཕྱིར་རོ། །ཡང་མཆོད་རྟེན་དེའི་སྲོག་ཤིང་གི་གསང་སྔགས་བཤད་པ། ཨོྃ་སརྦ་ཏ་ཐཱ་ག་ཏ་བི་པུ་ལ་ཡཥྚི། མ་ཎི་ཀ་ན་ཀ་རཱ་ཛ་ཏ། བི་པུ་ཥི་ཏ་ཡཥྚི་དྷུ་རུ་དྷུ་རུ། ས་མནྟེ་པི་ལོ་ཀི་ཏེ། ས་
རས་ར། མ་མ་སརྦ་པཱ་པ་བི་ཤོ་དྷ་ནི། སཾ་བོ་དྷ་ནི། པྲ་བར་ཡཥྚི། པ་རི་མ་ཎི་དུཥྚ་ཧུ་རུ་ཙི་ར་མ་ལ་བི་ཤུདྡྷེ་ཧཱུྃ་ཧཱུྃ་སྭཱ་ཧཱ། རིགས་ཀྱི་བུ་ཅི་ནས་ཀྱང་གསང་སྔགས་འདི་ནན་ཏན་དུ་དགུ་བཅུ་རྩ་དགུར་ཡི་གེར་བྲིས་ཏེ། མཆོད་རྟེན་གྱི་སྲོག་ཤིང་གི་ངོས་བཞིར་གཞུག་གོ། །
དེ་ཡང་ཆོ་གའི་གཞུང་འདི་ཉིད་ཀྱང་བྲིས་ཏེ་སྲོག་ཤིང་གི་ནང་དུ་གཞུག་གོ། །ཆོ་ག་དེ་ལྟར་བྱས་ན་མཆོད་རྟེན་དགུ་ཁྲི་དགུ་སྟོང་གི་སྲོག་ཤིང་བཙུགས་པ་དང་འདྲ་འོ། །དེའི་གོང་དུ་ཡང་མཆོད་རྟེན་རིང་བསྲེལ་ཅན་དགུ་ཁྲི་དགུ་སྟོང་བཞེངས་པ་དང་འདྲ་འོ། །དེའི་ཡང་
གོང་དུ་རིན་པོ་ཆེ་སྣ་བདུན་གྱི་མཆོད་རྟེན་དགུ་ཁྲི་དགུ་སྟོང་བྱས་པར་འགྱུར་རོ། །དེའི་ཡང་གོང་དུ་དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་ཆོས་བཟང་ལྷའི་མདུན་ས་དང་འདྲ་བའི་གཙུག་ལག་ཁང་གི་མཆོད་རྟེན་དགུ་ཁྲི་དགུ་སྟོང་བརྩིགས་པ་དང་འདྲ་འོ། །ཡང་

གང་ལ་ལ་ཞིག་གིས་འཇིམ་པ་ལས་མཆོད་རྟེན་ཆུང་ངུ་ཞིག་བྱས་ཏེ། དེའི་ནང་དུ་གསང་སྔགས་འདི་དག་བཅུག་ན་ཡང་རིན་པོ་ཆེ་སྣ་བདུན་གྱི་མཆོད་རྟེན་དགུ་ཁྲི་དགུ་སྟོང་བརྩིགས་པ་དང་འདྲ་འོ། །ཡང་གང་ལ་ལ་ཞིག་གིས་མཆོད་རྟེན་འདི་ལ་བསྐོར་བ་བྱས་སམ། ཕྱག་
བྱས་སམ། ཐལ་མོ་སྦྱར་རམ། མེ་ཏོག་ཕུལ་ལམ། བྱུག་པ་དང་། བདུག་སྤོས་ཕུལ་ལམ། དྲིལ་བུ་དང་། བ་དན་དང་། གདུགས་འགའ་ཞིག་ཕུལ་ན་ཡང་དེ་བཞིན་གཤེགས་པ་དགུ་ཁྲི་དགུ་སྟོང་གི་མཆོད་རྟེན་ལ་ཕུལ་བའི་བསོད་ནམས་དང་མཉམ་པ་ཡིན་
ནོ། །དགེ་བའི་རྩ་བ་ཐམས་ཅད་ཡོངས་སུ་རྫོགས་པའི་དཔལ་དང་། མཐུ་སྟོབས་རྒྱ་ཆེན་པོ་ཐོབ་པར་འགྱུར་ཏེ། ཐ་ན་བྱ་དང་སྦྲང་མ་ལ་སོགས་པ་མཆོད་རྟེན་དེའི་གྲིབ་མས་ཕོག་ན་ཡང་དེ་བཞིན་གཤེགས་པས་མཁྱེན་ཅིང་རྗེས་སུ་དགོངས་པར་མཛད་དོ། །བླ་ན་མེད་པ་
ཡང་དག་པར་རྫོགས་པའི་བྱང་ཆུབ་འཐོབ་ཅིང་ཕྱིར་མི་ལྡོག་པའི་ས་ལ་གནས་པར་ཡང་འགྱུར་རོ། །ཡང་གང་ལ་ལ་ཞིག་གིས་མཆོད་རྟེན་འདི་ལྟ་བུ་རྨི་ལམ་དུ་རྨིས་སམ། རྒྱང་ནས་མཐོང་ངམ། དྲིལ་བུའི་སྒྲ་ཐོས་སམ། མཆོད་རྟེན་བཞེངས་པ་རྣ་བར་གཏམ་ཐོས་པ་
དེ་དག་ཀྱང་མཚམས་མེད་པ་ལྔ་ལ་སོགས་ཏེ། སྡིག་པ་དང་། སྒྲིབ་པ་ཐམས་ཅད་བྱང་སྟེ། རྟག་ཏུ་དེ་བཞིན་གཤེགས་པ་རྣམས་ཀྱིས་བསྲུང་བ་དང་། རྗེས་སུ་དགོངས་པ་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་ཡོངས་སུ་དག་པ་ཐོབ་པར་
འགྱུར་རོ། །གསང་སྔགས་འདི་ནི་མཆོད་རྟེན་གྱི་སྲོག་ཤིང་གི་གསང་སྔགས་ཞེས་བྱའོ། །ཡང་རིགས་ཀྱི་བུ་དེ་བཞིན་གཤེགས་པའི་མཆོད་རྟེན་བྱ་བའི་གསང་སྔགས་དེ་དག་གི་སྙིང་པོ་ནི་འདི་ཡིན་ནོ། །ཨོྃ་སརྦ་ཏ་ཐཱ་ག་ཏ། མ་ལ་བི་ཤོ་དྷ་ནི། རུ་དྷ་བ་ལེ་པྲ་ཏི་སཾ་སྐཱ་ར། ཏ་
ཐཱ་ག་ཏ་དྷཱ་ཏུ་དྷ་རེ། དྷ་ར་དྷ་ར། སནྡྷ་ར་སནྡྷ་ར། སརྦ་ཏ་ཐཱ་ག་ཏ་ཨ་དྷིཥྛ་ན་ཨ་དྷིཥྛི་ཏེ་སྭཱ་ཧཱ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། གང་ལ་ལ་ཞིག་གིས་མཆོད་རྟེན་བདག་ཉིད་ཀྱིས་བྱས་སམ། གཞན་བྱེད་དུ་བཅུག་གམ། མཆོད་

རྟེན་རྙིང་པ་བཅོས་ལེགས་བྱས་ཀྱང་རུང་། ས་འཇིམ་ལས་མཆོད་རྟེན་ཆུང་ངུ་བྱས་སམ། སོ་ཕག་གམ། རྡོ་བ་ལས་བྱས་ཀྱང་རུང་སྟེ། དང་པོ་གསང་སྔགས་ཀྱི་སྙིང་པོ་སྟོང་རྩ་བརྒྱད་ཚད་དུ་བཟླས་བརྗོད་བྱས་ཏེ། དེའི་འོག་ཏུ་མཆོད་རྟེན་སེན་མོ་གང་ཙམ་གྱིས་
ལ་བྱས་སམ། ཁྲུ་གང་གི་ཚད་དུ་བྱས་སམ། དཔག་ཚད་གཅིག་ཙམ་གྱི་ཚད་དུ་བྱས་ན་ཡང་རུང་སྟེ། གསང་སྔགས་ཀྱི་མཐུ་དང་། སེམས་རྩེ་གཅིག་ཏུ་བྱས་པའི་སྟོབས་ཀྱིས་མཆོད་རྟེན་དེ་ལ་ཡང་སྤོས་ཀྱི་ངད་ལྡང་སྟེ། ཙནྡནདང་། ག་བུར་དང་། གླ་རྩི་དང་། གུར་
གུམ་ལ་སོགས་པའི་དྲི་བྲོའམ། ལྷའི་སྤོས་དྲི་ཞིམ་པོའི་ངད་ལྡང་བར་འགྱུར་རོ། །བདག་དང་གཞན་མཆོད་རྟེན་གྱི་ལས་བྱེད་པ་དང་། བཟླས་བརྗོད་བྱེད་པ་དེ་བསམ་པ་ཐམས་ཅད་ཀྱང་ཡིད་བཞིན་དུ་འགྲུབ་པར་འགྱུར་རོ། །དགེ་བའི་རྩ་བ་རྒྱ་ཆེན་པོ་བསགས་པར་
འགྱུར་ཏེ། ཡོན་ཏན་དང་། ལེགས་པ་ཕུན་སུམ་ཚོགས་པ་ཡང་འཐོབ་པར་འགྱུར། ཚེ་ཐུང་བའི་ལས་ཤིག་ཡོད་ན་ཡང་ཚེ་ནུར་ཞིང་རིང་བར་འགྱུར། ནམ་འཆི་བའི་དུས་བྱེད་པ་ན་ཡང་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུའི་ཞལ་མཐོང་ཞིང་། དེ་
བཞིན་གཤེགས་པ་དེ་དག་གིས་རྗེས་སུ་དགོངས་ཏེ། སྐྱེ་གནས་ཕྱི་མར་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར་ཞིང་མངོན་སུམ་དུ་ལུང་སྟོན་པར་འགྱུར། དེར་ཡང་ཚེ་ལོ་བྱེ་བ་ཁྲག་ཁྲིག་བརྒྱ་སྟོང་ཐུབ་པར་འགྱུར་ཏེ། སྔོན་གྱི་གནས་རྗེས་སུ་དྲན་པ་དང་། ལྷའི་
མིག་དང་། ལྷའི་རྣ་བ་རྣམ་པར་དག་པ་འཐོབ་ཅིང་། ཕ་རོལ་གྱི་སེམས་ཤེས་པ་དང་། འཆི་འཕོ་བ་དང་། སྐྱེ་བ་ཤེས་པ་འཐོབ་བོ། །ལུས་ལས་ཙནྡན་གྱི་དྲིའི་ངད་འབྱུང་ཞིང་ཁ་ནས་ཨུཏྤ་ལའི་བསུང་ལྡང་བར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་
ལམ་ཐོབ་ནས་ཕྱིར་མི་ལྡོག་པའི་ས་ཡང་ཐོབ་པར་འགྱུར་རོ། །ཡང་དྲིའི་བྱུག་པ་ཡུངས་འབྲུ་ཙམ་ཡང་རུང་སྟེ། གསང་སྔགས་བཟླས་ནས་མཆོད་རྟེན་ལ་བསྐུས་ན་ཡང་དེ་དག་གི་ཡོན་ཏན་དང་། ལེགས་པ་སྔར་བཤད་པ་བཞིན་དུ་ཐོབ་པར་འགྱུར་རོ། །ཡང་དགེ་སློང་དང་།

དགེ་སློང་མ་དང་། དགེ་བསྙེན་དང་། དགེ་བསྙེན་མ་གང་ལ་ལ་ཞིག་གིས་བདག་ཉིད་གཙང་བར་བྱས་ཏེ། གསང་སྔགས་ཀྱི་ཚིག་འདི་དག་དཀོན་པ་དང་། རིན་པོ་ཆེར་འདུ་ཤེས་པས་གཟུང་ན་དེ་དེ་བཞིན་གཤེགས་པ་དང་འདྲ་བར་དད་པར་བྱ་སྟེ། གསང་སྔགས་རྣམས་ལ་
གུས་པ་བསྐྱེད་ནས་ཡི་གེར་བྲི་བར་བྱ་སྟེ། གོང་དུ་བཤད་པ་བཞིན་དུ་གསང་སྔགས་དང་ཕྱག་རྒྱ་ཆོ་ག་བཞིན་དུ་བྲིས་ནས་མཆོད་རྟེན་གྱི་སྲོག་ཤིང་གི་རྩ་བར་སྙིང་པོ་བཅུག་སྟེ། མཆོད་རྟེན་བྱས་ན་དེ་དགེ་བའི་རྩ་བ་རྒྱ་ཆེན་པོ་བསགས་པར་འགྱུར་ཏེ། ཡོན་ཏན་དང་ལེགས་
པ་ཐམས་ཅད་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་གསང་སྔགས་ཀྱི་ཕྱག་རྒྱའི་ཆོ་ག་འདི་དག་བཤད་པའི་ཚེ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་རྗེས་སུ་ཐུགས་རངས་པར་མཛད་ནས་གསུངས་པ། ཡང་
དག་པར་རྫོགས་པའི་སངས་རྒྱས་ཤཱཀྱ་ཐུབ་པས་སེམས་ཅན་མཉམ་པར་དགོངས་ཤིང་། ཐམས་ཅད་ཆོས་ཀྱི་དབྱིངས་ལ་བཀོད་ནས་གསང་སྔགས་ཆེན་པོའི་ཕྱག་རྒྱའི་ཆོ་གའི་བྱིན་གྱི་རླབས་འཐོབ་པར་བསྟན་པ་ནི་ལེགས་སོ་ལེགས་སོ། །ཤིན་ཏུ་ཡང་ལེགས་ཏེ། དགེ་བའི་
རྩ་བ་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་ཅིང་ཕྱིར་མི་ལྡོག་པར་ཡང་འགྱུར་རོ། །དེ་ནས་འཁོར་གྱི་དཀྱིལ་འཁོར་དེ་ཉིད་ན། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། དྲི་ཟ་དང་། ལྷ་མ་ཡིན་དང་། མིའམ་ཅི་དང་། ལྟོ་འཕྱེ་ཆེན་པོ་འདུས་
པ་རྣམས་དང་། བྱང་ཆུབ་སེམས་དཔའ་ལག་ན་རྡོ་རྗེ་དང་། རྒྱལ་པོ་ཆེན་པོ་བཞི་དང་། འཇིག་རྟེན་སྐྱོང་བའི་མེས་པོ་ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། བརྒྱ་བྱིན་དང་། གཤིན་རྗེ་དང་། ཆུ་ལྷ་དང་། ཀུ་བེ་ར་དང་། དེ་དག་ལ་སོགས་པ་རྫུ་འཕྲུལ་
ཆེ་བའི་ལྷ་དེ་དག་གིས་བཅོམ་ལྡན་འདས་ཀྱིས་གསུངས་པ་དེ་ཐོས་ནས་བདག་ཅག་རང་རང་གི་སྤྱོད་ཡུལ་ལ་སྐྱོ་ཞིང་ཡིད་བྱུང་བར་གྱུར་ཏེ། མཐར་གྱིས་ཡོན་ཏན་ཆེན་པོ་ཐོབ་པར་འདོད་པའི་ཕྱིར་གཅིག་ལ་གཅིག་བོས་ཏེ་སྨྲས་པ། ཀྱེ་མ་ཡང་དག་པར་རྫོགས་པའི་སངས་རྒྱས་འབྱུང་བ་ནི་

ཤིན་ཏུ་ཡང་རྙེད་པར་དཀའོ། །དེའི་བསྟན་པ་དམ་པའི་ཆོས་ཐོས་པ་ཡང་ཤིན་ཏུ་རྙེད་པར་དཀའ་གསང་སྔགས་དང་ཕྱག་རྒྱའི་ཚོགས་ཡང་དག་པར་རྫོགས་པའི་སངས་རྒྱས་ཀྱི་བསྟན་པ་ཐོས་པ་ཡང་ཤིན་ཏུ་རྙེད་པར་དཀའ་སྟེ། འདི་ནི་ཤིན་ཏུ་ངོ་མཚར་ཏོ་ཞེས་
སྨྲས་སོ། །དེ་ནས་དེའི་ཚེ་བྲམ་ཟེ་སེར་སྐྱའི་ཟླ་བ་ཞེས་བྱ་བ་བཅོམ་ལྡན་འདས་ལས་དེ་ལྟ་བུའི་གསང་སྔགས་དང་ཆོ་གའི་ཡོན་ཏན་ཆེན་པོ་དེ་དག་ཐོས་ཤིང་ཐོབ་ནས་སེམས་ཀྱི་སྒྲིབ་པའི་རྡུལ་དང་རྙོག་པ་རྣམས་དང་བར་གྱུར། འཆི་བའི་འཇིགས་པ་དང་། སྡིག་པ་དང་། ལས་ཀྱི་སྒྲིབ་
པ་ཐམས་ཅད་ཀྱང་དག་པར་གྱུར། ཚེ་ཡང་ཕྱིར་ནུར་ཏེ་རིང་བར་གྱུར་ནས་དགའ་མགུ་ཡི་རངས་ཏེ་ཡིད་བདེ་བ་ཆེན་པོ་ཐོབ་པར་གྱུར་ཏོ། །དེ་ནས་འབྱུང་པོའི་ཚོགས་ཐམས་ཅད་ཀྱང་སེམས་དང་ཞིང་རྗེས་སུ་ཡི་རང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་
སྒྲིབ་པ་ཐམས་ཅད་རྣམ་པར་སེལ་བས་དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་འཁོར་དེར་རིན་པོ་ཆེའི་ཁང་པ་བརྩེགས་པ་ནོར་བུ་སྣ་ཚོགས་ཀྱིས་སྤྲས་པ་ཞིག་མངོན་པར་སྤྲུལ་ནས། ཆོས་ལ་དགའ་བའི་ཕྱིར་བཅོམ་ལྡན་འདས་ལ་ཕུལ་ཏེ། ལན་གསུམ་བསྐོར་བ་བྱས་ནས་
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་གསང་སྔགས་དང་། ཕྱག་རྒྱ་དང་། དཀྱིལ་འཁོར་གྱི་ཆོ་ག་ཤིན་ཏུ་རྙེད་པར་དཀའ་བ་སེམས་ཅན་ཐམས་ཅད་ལ་ཕན་པ་དང་བདེ་བ་རྣམས་ཀྱི་མཆོག་འཛམ་བུའི་
གླིང་གི་སེམས་ཅན་སྒྲིབ་པ་ཆེ་བ་རྣམས་ཀྱི་དོན་དུ་བཤད་དེ། དགེ་བའི་རྩ་བ་བསྐྱེད་ཅིང་ཚེ་རིང་བ་དང་། སྡུག་བསྔལ་གྱི་ཕུང་པོ་ཐམས་ཅད་ལས་ཐར་བར་མཛད་པ་ལགས་ན། དེ་འདིར་བདག་ཅག་བྱང་ཆུབ་སེམས་དཔའ་རྣམས་ཀྱིས་ཀྱང་སངས་རྒྱས་བཅོམ་ལྡན་འདས་ཐམས་ཅད་
ལ་གསོལ་ཏེ། དེ་བཞིན་གཤེགས་པའི་སྤྱན་སྔར་ཡང་དག་པའི་ཡེ་ཤེས་ཆུབ་པར་བགྱིད་པའི་ཕྱག་རྒྱ་དང་། གསང་སྔགས་ཀྱི་ཚིག་བཤད་པར་འཚལ་ལོ། །ན་མོ་བྷ་ག་བ་ཏེ། ན་བ་ན་བ་ཊཱི་ནཱཾ། སཾ་མྱཀ་སཾ་བུདྡྷ་ཀོ་ཊི་ནི་ཡུ་ཏ་ཤ་ཏ་ས་ཧ་སྲཱ་ཎཱཾ། ནམཿསརྦ་ནི་བ་ར་ཎ་བི་སྐམྦི་ནི་

བོ་དྷི་ས་ཏྭཱ་ཡ། ཨོཾ་ཏུ་རུ་ཏུ་རུ་མ་མ་སརྦ་ཨཱ་བ་ར་ཎ་བི་ཤོ་དྷ་ནི། སརྦ་ཏ་ཐཱ་ག་ཏ་ཨཱ་ཡུར་བ་ལཱ་ནི། བི་པུ་ལ་ནི་ར་མ་ལེ། སརྦ་སིདྡྷི་ན་མ་སྐྲྀ་ཏྭཱ། བ་ར་བ་ར། སརྦ་སཏྭཱ་ཨ་བ་ལོ་ཀི་ནི། ཨོྃ་སརྦ་ནི་བཱ་ར་ཎ། བི་སྐམ་བི་ཎི། མ་མ་སརྦ་པཱ་པ་བི་ཤོ་དྷ་ནི་ཀུ་རུ་སྭཱ་ཧཱ། བཅོམ་
ལྡན་འདས་བདག་གི་གསང་སྔགས་འདི་ནི་སངས་རྒྱས་བྱེ་བ་ཕྲག་དགུ་བཅུ་རྩ་དགུས་བཤད་པ་ལགས་ཏེ། གང་ལ་ལ་ཞིག་གིས་མ་ཡེངས་པའི་སེམས་ཀྱིས་རྩེ་གཅིག་ཏུ་བྱས་ཏེ། སྐད་ཅིག་གཅིག་བཏོན་ན་ཡང་སྡིག་པ་ཐམས་ཅད་བྱང་བར་འགྱུར་རོ། །ཡང་གང་ལ་ལ་
ཞིག་གིས་གསང་སྔགས་འདི་ཆོ་ག་བཞིན་དུ་དགུ་བཅུ་རྩ་དགུ་ཡི་གེར་བྲིས་ཏེ་མཆོད་རྟེན་གྱི་ནང་དུ་བཅུག་ན་མཆོད་རྟེན་དེ་ལ། ལ་ལ་ཞིག་གིས་ཕྱག་བྱས་སམ། ཚིག་སྙན་པས་བསྟོད་དམ། སྤོས་དང་། མེ་ཏོག་དང་། བྱུག་པ་དང་། མར་མེ་འབུལ་ན་རིགས་ཀྱི་བུ་དེ་དེའི་
ཚེ་འདི་ཉིད་ལ་སྡིག་པ་ཐམས་ཅད་བྱང་ཞིང་ལས་ཀྱི་སྒྲིབ་པ་ཐམས་ཅད་བསལ་ཏེ། བསམ་པ་ཐམས་ཅད་ཡིད་བཞིན་དུ་གྲུབ་པར་འགྱུར། སངས་རྒྱས་བཅོམ་ལྡན་འདས་བརྒྱ་སྟོང་གྲངས་མེད་པ་གང་གཱའི་ཀླུང་གི་བྱེ་མ་སྙེད་ལ་མཆོད་ཅིང་བསྙེན་བཀུར་བྱས་པ་དང་འདྲ་བར་འགྱུར་
རོ། །དེ་བཞིན་དུ་མཆོད་རྟེན་རིང་བསྲེལ་གྱི་སྙིང་པོ་ཅན་བརྒྱ་སྟོང་བྱེ་བ་ཁྲག་ཁྲིག་གང་གཱའི་ཀླུང་གི་བྱེ་མ་སྙེད་ལ་མཆོད་པ་བྱས་པར་འགྱུར་རོ། །དེའི་དགེ་བའི་རྩ་བ་རྒྱ་ཆེན་པོ་སོགས་པར་འགྱུར་རོ། །ཡང་དགེ་སྦྱོང་གང་ཞིག་གིས་ཚེས་བརྒྱད་དང་། བཅུ་བཞི་དང་བཅོ་ལྔ་གང་ཡང་
རུང་བ་ལ་ཁྲུས་དང་གཙང་སྦྲ་བྱས་ཏེ། གོས་གཙང་མ་གྱོན་ལ་ཞག་གཅིག་སྨྱུང་བའམ། ཡང་ན་ཟས་དཀར་གསུམ་ཟོས་ཏེ། མཆོད་རྟེན་ལ་བསྐོར་ཞིང་གསང་སྔགས་འདི་ལན་བརྒྱ་རྩ་བརྒྱད་བཟླས་བརྗོད་བྱས་ན་བསྐལ་པ་བརྒྱ་སྟོང་དུ་བསགས་པའི་ལས་ཀྱི་སྒྲིབ་པ་ཐམས་ཅད་དང་། མཚམས་
མེད་པ་ལྔ་བྱས་པ་ཡང་ཡོངས་སུ་འབྱང་བར་འགྱུར། གཞན་ཡང་ལས་དང་ཉོན་མོངས་པའི་སྒྲིབ་པ་ཐམས་ཅད་རྣམ་པར་དག་པར་གྱུར་ནས། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་བདག་ཉིད་ཀྱི་ལུས་མངོན་པར་བསྟན་ཏེ། བསམ་པ་ཐམས་ཅད་དངོས་གྲུབ་ཏུ་སྦྱིན་པར་མཛད་

ཅིང་། ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་ཞལ་ཡང་མཐོང་བར་འགྱུར་རོ། །དེ་བཞིན་དུ་གང་ལ་ལ་ཞིག་གིས་ཉིས་བརྒྱ་རྩ་བརྒྱད་བཏོན་ན་ཏིང་ངེ་འཛིན་ཐོབ་པར་འགྱུར་རོ། །གང་གིས་སུམ་བརྒྱ་རྩ་བརྒྱད་བཏོན་ན་སྒྲིབ་པ་ཐམས་ཅད་བྱང་སྟེ། ཕྱིར་མི་
ལྡོག་པའི་ས་ལ་གནས་པར་འགྱུར་རོ། །ཡང་གང་གིས་བཞི་བརྒྱ་རྩ་བརྒྱད་བཏོན་ན་རྒྱལ་ཆེན་རིས་བཞིའི་རྒྱལ་པོ་ཆེན་པོ་དག་ཀྱང་ཉེ་བར་འོངས་ནས་ལུས་མངོན་པར་བསྟན་ཏེ། བསྲུང་བ་དང་། སྐྱབས་པར་བྱེད་ཅིང་ཤེས་རབ་ཀྱི་སྟོབས་ཀྱང་བསྐྱེད་ནས་བསོད་ནམས་ཐམས་ཅད་ཉེ་བར་
བསྒྲུབ་བོ། །གང་གིས་ལྔ་བརྒྱ་རྩ་བརྒྱད་བཏོན་ན་དགེ་བའི་རྩ་བ་དེ་ཉིད་ཀྱིས་འདུས་མ་བྱས་ཀྱི་ལམ་ལ་གནས་པ་ཐོབ་བོ། །ཡང་གང་གིས་དྲུག་བརྒྱ་རྩ་བརྒྱད་བཏོན་ན་རིག་སྔགས་འཆང་དུ་འགྱུར་ཏེ། ནམ་མཁའ་ལ་རིག་འཛིན་གྱི་གནས་སུ་འགྲོ་བར་འགྱུར་རོ། །ཡང་གང་གིས་
བདུན་བརྒྱ་རྩ་བརྒྱད་ཚང་བར་བཏོན་ན་ལེགས་པའི་ཡོན་ཏན་ཐམས་ཅད་དང་ལྡན་པར་འགྱུར་རོ། །ཡང་གང་གིས་བརྒྱད་བརྒྱ་རྩ་བརྒྱད་བཏོན་ན་གཞན་གྱིས་བསྒོ་བ་མེད་པའི་རང་དབང་འཐོབ་སྟེ། སེམས་རྣམ་པར་དག་པར་འགྱུར་རོ། །ཡང་གང་གིས་དགུ་བརྒྱ་རྩ་བརྒྱད་དུ་བཏོན་ན་
ཕུང་པོ་ལྔ་རྣམ་པར་དག་པར་འགྱུར་རོ། །ཡང་གང་གིས་སྟོང་རྩ་བརྒྱད་དུ་བཏོན་ན་རྒྱུན་དུ་ཞུགས་པའི་འབྲས་བུ་འཐོབ་བོ། །གང་གིས་ཉིས་སྟོང་ཚང་བར་བཏོན་ན་ལན་ཅིག་ཕྱིར་འོང་བའི་འབྲས་བུ་འཐོབ་བོ། །གང་གིས་སུམ་སྟོང་ཚང་བར་བཏོན་ན་ཕྱིར་མི་འོང་བའི་འབྲས་བུ་འཐོབ་
བོ། །གང་གིས་བཞི་སྟོང་ཚང་བར་བཏོན་ན་དགྲ་བཅོམ་པའི་འབྲས་བུ་ཐོབ་པར་འགྱུར་རོ། །གང་གིས་ལྔ་སྟོང་ཚང་བར་བཏོན་ན་རང་སངས་རྒྱས་ཀྱིས་འཐོབ་པར་འགྱུར་རོ། །གང་གིས་དྲུག་སྟོང་ཚང་བར་བཏོན་ན་བྱང་ཆུབ་སེམས་དཔའི་རྫུ་འཕྲུལ་གྱི་གནས་འཐོབ་པར་འགྱུར་
རོ། །ཡང་གང་གིས་བདུན་སྟོང་ཚང་བར་བཏོན་ན་བྱང་ཆུབ་སེམས་དཔའི་ས་དང་པོ་འཐོབ་པར་འགྱུར་རོ། །ཡང་གང་གིས་བརྒྱད་སྟོང་ཚང་བར་བཏོན་ན་བྱང་ཆུབ་སེམས་དཔའི་ས་ལྔ་པ་གནོན་པར་འགྱུར་རོ། །ཡང་གང་གིས་དགུ་སྟོང་ཚང་བར་བཏོན་ན་རིག་སྔགས་དང་། གསང་

སྔགས་རྣམས་ཀྱི་བདག་པོ་གསང་བ་པའི་ལུས་ཐོབ་པར་འགྱུར་རོ། །ཡང་གང་གིས་ཁྲི་ཚང་བར་བཏོན་ན་བྱང་ཆུབ་སེམས་དཔའི་ས་བརྒྱད་པ་མི་གཡོ་བ་གནོན་པར་འགྱུར་རོ། །ཡང་གང་གིས་ཉི་ཁྲི་ཚང་བར་བཏོན་ན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་སྐུ་
ཐོབ་པར་འགྱུར་ཏེ། སེང་གེའི་སྒྲ་ཆེན་པོ་སྒྲོགས་པར་འགྱུར་རོ། །ཡང་གང་ལ་ལ་ཞིག་གིས་ཕ་མའི་དོན་གྱི་ཕྱིར་བསོད་ནམས་ཀྱི་ལས་བྱ་བར་འདོད་ན། མཆོད་རྟེན་རྙིང་པ་རིང་བསྲེལ་ཅན་ཞིག་རལ་དུ་གྱུར་པ་གསོས་ལ་བཅོས་ལེགས་བྱས་ཏེ། གཡས་ཕྱོགས་སུ་བསྐོར་བ་བྱེད་
ཅིང་སྔགས་ལན་བརྒྱ་རྩ་བརྒྱད་ཚང་གི་བར་དུ་བསྐོར་བ་བྱས་ན་བསམ་པ་ཐམས་ཅད་ཡིད་བཞིན་དུ་འགྲུབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ། །
རིགས་ཀྱི་བུ་ཁྱོད་ཀྱིས་ངའི་གྲོགས་བྱས་ཏེ། དེ་བཞིན་གཤེགས་པའི་གསང་སྔགས་ཀྱི་ཆོ་ག་ཚུལ་བཞིན་དུ་བཤད་པ་དེ་ཁོ་ན་བཞིན་ནོ། །དེ་ནས་གནོད་སྦྱིན་ཐམས་ཅད་ཀྱི་རྒྱལ་པོ་གསང་བ་པའི་བདག་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་གསང་སྔགས་
ཀྱི་རྒྱལ་པོ་གསང་སྔགས་ཀྱི་ཆོ་ག་འདི་དག་དེ་བཞིན་གཤེགས་པ་རྣམས་དང་འདྲ་བ། དེ་བཞིན་གཤེགས་པའི་ཆོས་ཀྱི་སྐུ་ལས་བྱུང་བ་ལགས་ན། བཅོམ་ལྡན་འདས་སྙིང་པོ་དམ་པ་འདི་དག་འཛམ་བུ་གླིང་ན་གནས་པའི་སེམས་ཅན་རྣམས་ཀྱི་ལས་ཀྱི་སྒྲིབ་པ་དང་། སྡིག་པ་ཐམས་
ཅད་བསལ་ནས་དེ་ཕྱིན་ཆད་བཅོམ་ལྡན་འདས་ཀྱི་བསྟན་པ་ལ་འཇུག་པར་འགྱུར་རོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ལ་བཀའ་སྩལ་པ། གསང་བ་པའི་བདག་པོ་གསང་སྔགས་ཀྱི་ཆོ་ག་འདི་དག་ནི་མ་འོངས་པའི་དུས་ན་ཡང་དེ་བཞིན་
གཤེགས་པ་འཇིག་རྟེན་ན་བཞུགས་པ་དང་འདྲ་བ་ཡིན་ནོ། །ངས་ཆོ་ག་ཇི་སྐད་བསྟན་པ་བཞིན་