Kinh tạng Tây Tạng (Kangyur Đại Học) — 088_རྒྱུད་འབུམ།_ན

ཙམ་གྱིས་འཕུར་ཏེ། སེ་གོལ་གཏོགས་པ་ཙམ་གྱིས་ཚངས་པའི་འཇིག་རྟེན་དུ་ཕྱིན་པར་འགྱུར་ཏེ། མེ་ཏོག་ཅན་གྱི་འཇིག་རྟེན་གྱི་ཁམས་སུ་རབ་ཏུ་གནས་པར་འགྱུར་
ཏེ། གང་དུ་བཅོམ་ལྡན་འདས་མེ་ཏོག་ཡང་དག་པར་སྐྱེས་པའི་རྒྱལ་པོའི་དབང་པོ་དེ་བཞིན་གཤེགས་པ་དེ་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །འཕགས་པ་འཇམ་དཔལ་ཡང་མངོན་དུ་མཐོང་ངོ་། །ཆོས་ཀྱང་ཐོས་སོ། །བྱང་ཆུབ་སེམས་དཔའ་དུ་མ་དག་ཀྱང་
མཐོང་ཞིང་། དེ་དག་ལ་བསྙེན་བཀུར་ཡང་བྱེད་དེ་བསྐལ་པ་ཆེན་པོ་སྟོང་དུ་རྒ་བ་དང་འཆི་བ་མེད་ཅིང་གནས་པར་འགྱུར་རོ། །རས་རིས་ཀྱང་དེ་ན་གནས་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དེ་དག་གིས་བྱིན་གྱིས་
བརླབས་པར་ཡང་ཡང་དག་པར་ཤེས་སོ། །སངས་རྒྱས་ཀྱི་ཞིང་སྟོང་ཡང་འདའ་བར་བྱེད་དོ། །ལུས་སྟོང་ཡང་སྟོན་པར་བྱེད་དོ། །རྫུ་འཕྲུལ་གྱི་མཐུ་དུ་མ་ཡང་འབྱིན་པར་བྱེད་དོ། །འཕགས་པ་འཇམ་དཔལ་ཡང་དགེ་བའི་བཤེས་གཉེན་དུ་འགྱུར་རོ། །ངེས་པར་བྱང་

ཆུབ་ལ་གཞོལ་བར་འགྱུར་རོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་རྒྱ་ཆེ་བའི་མདོ་ལས། འཕགས་པ་འཇམ་དཔལ་གྱི་རྩ་བའི་ཆོ་ག་ཞིབ་མོ་རབ་འབྱམ་སྒྲུབ་པའི་ཐབས་མཆོག་གི་ལས་ཀྱི་ལེའུ་བརྒྱད་པ་ལས་དང་པོ་རྫོགས་སོ།། །།དེ་ནས་བཅོམ་ལྡན་འདས་
ཤཱཀྱ་ཐུབ་པས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་གྱི་ལྷ་འདུས་པ་རྣམས་ལ་བཀའ་སྩལ་པ། གྲོགས་པོ་དག་ཁྱེད་ཅག་ཉོན་ཅིག །འཇམ་དཔལ་གཞོན་ནུར་གྱུར་པའི་སྤྱོད་པའི་དཀྱིལ་འཁོར་སྔགས་སྒྲུབ་པའི་ཐབས་ཀྱི་ལས་བྱེད་པ། སྒྲུབ་པ་པོ་བསྲུང་བའི་ཕྱིར། མཆོག་ཏུ་
གསང་བ་དམ་པ་སྙིང་པོ་དམ་པ་དེ་བཞིན་གཤེགས་པ་ཐམས་ཅད་ཀྱིས་གསུངས་པ་རིག་པའི་རྒྱལ་པོ་ཆེན་པོ་བཟླས་པ་གང་གིས་སྔགས་ཐམས་ཅད་བཟླས་པར་འགྱུར་ཏེ། ཀྱེ་ལྷའི་ཚོགས་དག་འདི་ནི་འདའ་བར་བྱ་བ་མ་ཡིན་ཏེ། རིག་པའི་རྒྱལ་པོ་འདི་ནི་འཇམ་དཔལ་གཞོན་ནུར་གྱུར་པ་
ཡང་རིག་པའི་རྒྱལ་པོ་འདིས་འགུགས་ཤིང་དབང་དུ་བྱེད་ལ། འབྱོར་པ་མེད་པར་བྱེད་ན་བྱང་ཆུབ་སེམས་དཔའ་གཞན་ལྟ་སྨོས་ཀྱང་ཅི་དགོས། འཇིག་རྟེན་དང་འཇིག་རྟེན་ལས་འདས་པའི་སྔགས་ཐམས་ཅད་དང་། བགེགས་ཐམས་ཅད་ཀྱང་འཇིག་པར་བྱེད་དེ། འདི་ནི་སྟོབས་
ཆེ་བ་དང་མཐུ་ཆེ་བ་དང་དཔའ་བོ་གཅིག་པ་དང་སྔགས་ཐམས་ཅད་ཀྱི་མཆོག་གཅིག་ཏུ་བསྟན་པ་དང་། ཡི་གེ་གཅིག་པ་རྣམས་ཀྱི་ནང་ན་གཅིག་པར་བསྟན་པ་དང་། ཡི་གེ་གཅིག་གིས་དོན་ཐམས་ཅད་སྒྲུབ་པར་བྱེད་པ། བྱ་བ་ཐམས་ཅད་བྱེད་པ། སྔགས་ཐམས་ཅད་གཅོད་པར་
བྱེད་པ། མ་རུངས་པའི་ལས་རྣམས་ཀྱི་སྡིག་པ་ཐམས་ཅད་རབ་ཏུ་འཇིག་པར་བྱེད་པ། སྔགས་ཐམས་ཅད་ཡོངས་སུ་རྫོགས་པར་བྱེད་པ། དགེ་བར་བྱེད་པ་དང་། འཇིག་རྟེན་དང་འཇིག་རྟེན་ལས་འདས་པའི་སྔགས་རྣམས་ཀྱི་གོང་ནས་གོང་དུ་འདུག་པ། ཐོགས་པ་མེད་པ་དེ་བཞིན་
གཤེགས་པ་ཐམས་ཅད་ཀྱི་སྙིང་པོ་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དེ་གང་ཞེ་ན། ཨོཾ་ནྠཱི་གྲོགས་པོ་དག་འདི་ཉིད་ནི་མཆོག་ཏུ་གསང་བ་དམ་པ་ལས་ཐམས་ཅད་བྱེད་པ། ཡི་གེ་གཅིག་པ་ཞེས་བྱ་བ་རིག་པའི་རྒྱལ་པོ་འདའ་བར་བྱ་བ་མ་ཡིན་པ། སེམས་ཅན་

ཐམས་ཅད་ཀྱིས་ཐུབ་པར་དཀའ་བ་འབྱུང་པོ་ཐམས་ཅད་ཀྱི་བཀྲ་ཤིས་པ། སངས་རྒྱས་ཐམས་ཅད་སྒྲུབ་པར་བྱེད་པ། སྔགས་ཐམས་ཅད་ཀྱི་མངའ་བདག་འཇིག་རྟེན་ཐམས་ཅད་ཀྱི་དབང་ཕྱུག །རྣམ་པར་སྡང་བ་རྣམས་ལ་བྱམས་པའི་བདག་ཉིད་དང་སྐྱེ་བོ་ཐམས་
ཅད་ལ་སྙིང་བརྩེ་བར་བྱེད་པ། བགེགས་ཐམས་ཅད་འཇིག་པར་བྱེད་པ་སྟེ། མདོར་ན་ཅི་ལྟ་ཅི་ལྟར་རབ་ཏུ་སྦྱར་བ་དེ་ལྟ་དེ་ལྟར་ལས་བྱེད་དེ། བསྒྲུབས་པ་མེད་ཀྱང་ལས་འགྲུབ་པར་འགྱུར་རོ། །སྔགས་འདི་བཟླས་ལ་རེག་པས་དེ་དབང་དུ་འགྱུར་རོ། །གོས་ལ་བསྔགས་ནས་
གྱོན་ན་སྐལ་བ་བཟང་པོར་འགྱུར་རོ། །སོ་ཤིང་ལ་བསྔགས་ན་སོ་ནད་ཉེ་བར་ཞི་བར་འགྱུར་རོ། །ཀ་ར་བཱི་ར་དཀར་པོའི་སོ་ཤིང་ལ། ལན་བདུན་བསྔགས་ཏེ་ཟོས་ན་དོན་དུ་མ་གཉེར་བར་ཡང་ཁ་ཟས་འབྱུང་བར་འགྱུར་རོ། །མིག་གི་ནད་ལ་རྒྱམ་ཚྭ་བཏགས་ཏེ་ལན་བདུན་མངོན་
པར་བསྔགས་ལ་མིག་བཀང་ན་མིག་གི་ནད་སེལ་ཏོ། །རྣ་བའི་ནད་ལ་འབྲུག་སྒྲོགས་པ་ལས་སྐྱེས་པའི་རྩྭ་ཚ་ཏྲི་ཀ་ཞེས་བྱ་བ། གླང་པོ་ཆེའི་རྒྱབ་ཏུ་རེག་པར་བྱས་ལ། རང་གི་ལོ་མའི་ནང་དུ་བཏུམས་ནས་མེ་ཆུང་བ་ལ་བསྲེགས་ཏེ་ཤིན་ཏུ་འཇམ་པར་བྱས་ལ། རྒྱམ་ཚྭའི་ཕྱེ་མ་ཆུ་
དྲོ་འཇམ་ཙམ་དང་སྤྲུས་ཏེ་ལན་བདུན་བསྔགས་པས་རྣ་བ་བཀང་བ་དང་། སྐད་ཅིག་དེ་ཉིད་ལ་རྣ་བ་ན་བ་ཉེ་བར་ཞི་བར་འགྱུར་རོ། །བུད་མེད་བུ་འབྱུང་བའི་དུས་སུ་མངལ་ནས་མཐོན་ཏེ། ན་ཞིང་ཉམ་ཐག་པ་ལ་ནི་ཤིང་ཨཱ་ཌཱ་རུ་ཤ་ཀའི་རྩ་བ་སྲོག་ཆགས་མེད་པའི་ཆུ་ལ་བཏགས་ཏེ་ལྟེ་བའི་
ཕྱོགས་སུ་བསྐུས་ན་ཉེ་བར་ཞི་བར་འགྱུར་རོ། །མཚོན་ནང་དུ་ལུས་པའི་སྐྱེས་བུ་ལ་ནི་མར་རྙིང་པ་ལ་ལན་བརྒྱ་རྩ་བརྒྱད་མངོན་པར་བསྔགས་ཏེ། བཏུང་བའམ་བྱུགས་ན་ཕྱོགས་དེ་ནས་དེའི་སྐད་ཅིག་ལ་ཟུག་རྔུ་མེད་པར་འགྱུར་རོ། །མ་ཞུ་བ་དང་གསུད་པ་དང་། འཁྲུ་བའི་ནད་ལ་ནི་
ལན་ཚྭ་ནག་པོ་འམ་རྒྱམ་ཚྭ་འམ་ཚྭ་གཞན་གང་ཡང་རུང་བ་ལ་ལན་བདུན་བསྔགས་ཏེ་ཟོས་ན་ནད་དེ་ལས་གྲོལ་བར་འགྱུར་ཏེ། དེ་ཉིད་ཀྱི་ཉིན་པར་བདེ་ལེགས་སུ་འགྱུར་རོ། །ལྡན་པའི་ནད་ཀྱི་ཚད་པས་འཁྲུ་བ་འམ། འཁྲུ་བ་ལ་ནི་མ་དུ་ལུང་གའི་རྩ་བ་བཏགས་ཏེ། ལན་གཅིག་གམ་

གཉིས་བཟླས་པ་བྱས་ནས་སྲོག་ཆགས་མེད་པའི་ཆུ་དང་འཐུངས་ན་གནོད་པ་མེད་པར་དེ་ལས་གྲོལ་བར་འགྱུར་རོ། །བུད་མེད་མོ་ཤམ་བུ་མི་སྐྱེ་བ་སྐྱེ་བར་འདོད་ན། ཨ་ཤྭ་གན་དྷའི་རྩ་བ་མར་བཟང་པོ་དང་ལྷན་ཅིག་བསྐོལ་ལ། བའི་འོ་མ་དང་ལྷན་ཅིག་བསྐོལ་ཏེ་བའི་འོ་མ་དང་བསྲེས་
ལ་ལན་ཉི་ཤུ་རྩ་ལྔར་བཟླས་ལ་ཟླ་མཚན་གྱི་དུས་སུ་བླུད་ལ་ཁྲུས་བྱས་པའི་འོག་ཏུ་ཁྱིམ་བདག་གཞན་གྱི་ཆུང་མ་སྤངས་ཤིང་འདོད་པས་ལོག་པར་གཡེམ་པ་སྤངས་པས། རང་གི་ཆུང་མ་ལ་མངོན་པར་སོང་ན་རང་གི་ཁྱོ་དང་འདྲ་བའི་བུ་སྐྱེ་བར་འགྱུར་རོ། །ལོ་གསུམ་མམ་ལོ་ལྔའི་བར་དུ་བུ་
བཙའ་བའི་དུས་སུ་ཁྲག་འབྱུང་བ་འམ། ལོ་དུ་མའི་བར་དུ་བུ་མ་ཆགས་པ་འམ། གཞན་གྱི་སྔགས་རྒྱུད་དང་སྨན་དང་གཞན་གྱི་ཕྱག་རྒྱས་བཅིངས་པ་དང་། གཞན་གྱིས་མ་རུངས་པར་བྱས་པའམ། བུ་ཟླ་བ་མ་ཚང་བར་བྱུང་བ་འམ། ནད་ལས་ཡང་དག་པར་བྱུང་བ་འམ།
གཞན་གྱི་སྦྱོར་བས་ཡང་དག་པར་བྱུང་བ་འམ། གཞན་གང་ཡང་རུང་བ་ཅུང་ཟད་གཞན་གྱིས་བྱས་པའི་ནད་དང་། གནས་པ་དང་འགྲོ་བ་དང་བཅོས་མ་དང་། བཅོས་མ་མ་ཡིན་པའི་དབྱིག་དུག་ལ་སོགས་པ་བྱིན་པ་འམ་རྩ་བ་དང་སྨན་དང་སྔགས་ཐམས་ཅད་
དང་། མཛའ་བ་དང་མི་མཛའ་བས་སྦྱོར་བ་བྱས་པ་ལ་ལན་ཉི་ཤུ་རྩ་བདུན་བསྔགས་ཏེ། མར་རྙིང་པ་ལ་རྨ་བྱའི་སྒྲོ་ཟླ་བ་འདྲ་བ་དང་བསྲེས་ཏེ་བཏགས་ལ་དེ་ནས་ཤིན་ཏུ་ཞིབ་པར་བྱས་ལ་ཤ་ཁ་ར་དང་ལྷན་ཅིག་སྦྱར་ཏེ། ཨ་རུ་ར་ཙམ་བཟའ་བར་བྱའོ། །ཞག་བདུན་གྱི་བར་དུ་
ཁ་ར་དང་ལྡན་པའི་བསྐོལ་བ་བཏུང་བར་བྱ་སྟེ། ཡང་དང་ཡང་དུ་སྔགས་ཀྱང་བཟླ་བར་བྱའོ། །མགོ་བོའི་ནད་ལ་ནི་ཁྭའི་གཤོག་པ་ལ་ལན་བདུན་བསྔགས་ཏེ་བྱབས་ན་བདེ་ལེགས་སུ་འགྱུར་རོ། །བུད་མེད་ལ་སྤྱད་དྲགས་པ་ལ་སོགས་པའི་ནད་ནི་ཤིང་ཨ་ལ་མ་བུ་སའི་རྩ་
བའི་ལོ་མ་དང་ལྷན་ཅིག་བཏགས་ནས། སྨན་ནི་ལི་ཀའི་རྩ་བ་དང་ལྡན་པ་ལ་བརྒྱ་རྩ་བརྒྱད་བསྔགས་ཏེ་འོ་མ་དེ་དང་བསྲེས་ལ་བཏུང་བར་བྱའོ། །དེ་བཞིན་དུ་རིམས་ཉིན་གཅིག་པ་དང་ཉིན་གཉིས་པ་དང་ཉིན་གསུམ་པ་དང་ཉིན་བཞི་པ་དང་། ཐེར་ཟུག་པའི་རིམས་དང་།

རྟག་པའི་རིམས་དང་རིམས་མི་བཟད་པ་ལ་སོགས་པ་ལ་འོ་ཐུག་མར་དང་ལྡན་པ་ལ་བརྒྱ་རྩ་བརྒྱད་མངོན་པར་བསྔགས་ཏེ་བླུད་པ་བྱས་ན་བདེ་བར་གནས་པར་འགྱུར་རོ། །དེ་བཞིན་དུ་མཁའ་འགྲོ་མའི་གདོན་གྱིས་ཟིན་པ་དག་ལ་ནི། བདག་ཉིད་ཀྱི་གདོང་ལ་ལན་
བརྒྱ་རྩ་བརྒྱད་མངོན་པར་བསྔགས་ཏེ་ནད་པ་ལ་བལྟས་ན་བདེ་བར་གནས་པར་འགྱུར་རོ། །དེ་བཞིན་དུ་མ་མོ་དང་བྱིས་པ་དང་ལུས་སྲུལ་པོ་དང་རོ་ལངས་དང་གཞོན་ནུའི་གདོན་ལ་སོགས་པ་མི་མ་ཡིན་པའི་མི་བཟད་པའི་གདོན་ཐམས་ཅད་ཀྱིས་ཟིན་པ་ལ་ནི། བདག་ཉིད་ཀྱི་ལག་པ་ལ་ལན་
བརྒྱ་རྩ་བརྒྱད་མངོན་པར་བསྔགས་པ་བྱས་ནས་གདོན་གྱིས་ཟིན་པའི་མགོ་ལ་རེག་པར་བྱས་ན་བདེ་བར་གནས་པར་འགྱུར་རོ། །ལན་ཅིག་བཟླས་པས་བདག་ཉིད་བསྲུང་བར་འགྱུར་རོ། །ལན་གཉིས་བཟླས་པས་གྲོགས་པོ་བསྲུང་བར་འགྱུར་རོ། །ལན་གསུམ་བཟླས་པས་ཁྱིམ་བསྲུང་
བར་འགྱུར་རོ། །ལན་བཞི་བཟླས་པས་ནི་གྲོང་བསྲུང་བར་འགྱུར་རོ། །ལན་ལྔ་བཟླས་པས་ནི་གྲོང་གི་སྤྱོད་ཡུལ་གྱི་འགྲོ་བ་བསྲུང་བར་འགྱུར་རོ། །དེ་བཞིན་དུ་ལན་སྟོང་གི་བར་དུ་བཟླས་ན་དམག་གི་ཚོགས་བསྲུང་བ་བྱས་པར་ཡང་འགྱུར་རོ། །དེ་དག་དང་གཞན་ཡང་མ་བསྒྲུབས་པར་ལས་
ཐམས་ཅད་བྱེད་པར་འགྱུར་རོ། །ཅི་སྟེ་སྒྲུབ་པར་འདོད་ན་ནི་ལས་ཕྲན་ཚེགས་རྣམས་བྱ་བ་མ་ཡིན་ཏེ། གཅིག་པུ་དབེན་པའི་གནས་སུ་སོང་ནས་རྒྱ་མཚོར་འབབ་པའི་ཆུ་བོ་འབྱུང་བའི་གནས་དང་། རྒྱ་མཚོའི་ངོགས་དང་ཆུ་བོ་གང་གཱའི་ངོགས་དང་། གཞན་གང་ཡང་རུང་བའི་ཆུ་
བོ་ཆེན་པོའི་ངོགས་ལ་བརྟེན་ནས། གཙང་མའི་གནས་སུ་ལོ་མའི་སྤྱིལ་པོ་བྱས་ཏེ། ཁྲུས་ལན་གསུམ་བྱ་ཞིང་གོས་ལན་གསུམ་བརྗེས་ལ། ཐུབ་པར་གནས་ཤིང་སློང་མོའི་ཁ་ཟས་བཟའ་བའམ་ཚོད་རྔད་དམ། ཁྱོར་གང་ཙམ་མམ་འོ་མ་འམ། འབྲས་བུ་ཟ་ཞིང་བཟླས་པ་སུམ་
འབུམ་བྱས་ཏེ། གྲུབ་པའི་མཚན་མ་མཐོང་ན་དེ་ནས་སྒྲུབ་པ་བརྩམ་པར་བྱའོ། །ཕྱོགས་དེ་ཉིད་དུ་རས་རིས་ཆེན་པོ་བཞག་ལ། རས་རིས་ལ་མཆོད་པ་ཆེན་པོ་བྱས་ཏེ། མར་མེའི་སྣོད་གསེར་རམ་དངུལ་ལམ་ཟངས་སམ་སའི་རང་བཞིན་ལ། ཤིང་དུ་རུ་སྐའི་འབྲུ་མར་གྱིས་བཀང་བའམ་དྲི་

ཞིམ་པོའི་འབྲུ་མར་གྱིས་བཀང་བ་འམ་བའི་མར་གྱིས་ཡོངས་སུ་བཀང་བའི་མར་མེ་རས་ཀྱི་དུམ་བུ་སར་པའི་སྙིང་པོ་བྱས་ཏེ་རས་རིས་ཀྱི་མདུན་དུ་འབུམ་ཕྲག་གཅིག་གི་མར་མེ་དབུལ་བར་བྱའོ། །ཁོ་ར་ཁོར་ཡུག་ཏུ་མར་མེའི་ཕྲེང་བ་ཕུལ་མ་ཐག་ཏུ་རས་རིས་ལས་འོད་འབྱུང་སྟེ། འོད་བྱུང་མ་ཐག་ཏུ་
རས་རིས་ཀྱི་ཁོ་ར་ཁོར་ཡུག་ཏུ་འོད་འབར་བའི་ཕྲེང་བས་ཀུན་ནས་ཁྱབ་པར་འགྱུར་རོ། །སྟེང་གི་ནམ་མཁའ་བར་སྣང་ལས་རྔ་བོ་ཆེའི་སྒྲ་སྒྲོགས་ཤིང་ལེགས་སོ་ཞེས་བྱ་བའི་སྒྲ་ཡང་ཐོས་ཏེ། དེ་ནས་རིག་པ་འཛིན་པས་རིངས་པའི་ཚུལ་གྱིས་སྒྲུབ་པ་པོས་རས་རིས་ཀྱི་མཐའ་ལ་སྔར་བྲིས་པའི་
རས་རིས་ཀྱི་མཐའ་ནས་མཆོད་ཡོན་གསོལ། ལན་གསུམ་བསྐོར་བ་བྱས་ཏེ་སངས་རྒྱས་ཐམས་ཅད་ལ་ཕྱག་འཚལ་ནས་གཟུང་བར་བྱའོ། །དེ་ནས་དེ་བཟུང་བ་ཙམ་གྱིས་མར་མེ་ཐམས་ཅད་འཛིན་པའི་སེམས་ཅན་རྣམས་གཅིག་གིས་ལྷག་པའི་གཞལ་མེད་ཁང་འབུམ་དང་ལྷན་
ཅིག་འཕུར་བར་འགྱུར་རོ། །ལྷའི་སིལ་སྙན་དང་ཡང་དག་པར་ལྡན་པ་དང་། གླུ་སྙན་པའི་སྒྲ་ལ་སོགས་པ་དང་ལྡན་པ་དང་། གར་དང་ལྡན་པའི་རིག་པ་འཛིན་མ་འཁོར་ཡུག་ཏུ་ཁྱབ་པ་དག་གིས་མར་མེ་ཐོགས་པ་དང་ལྷན་ཅིག་སྒྲུབ་པ་པོ་རིག་པ་འཛིན་པའི་འཁོར་ལོས་སྒྱུར་
བའི་རྒྱལ་པོར་དབང་སྐུར་བར་བྱེད་དོ། །རྒ་བ་དང་འཆི་བ་མེད་པས་རོལ་པར་འགྱུར་ཞིང་། བསྐལ་པ་ཆེན་པོར་གནས་ཤིང་ཉི་མ་དང་འདྲ་བ་དང་། ལྷའི་ཡན་ལག་ལྟ་བུར་མཛེས་པ་དང་། གོས་རྣམ་པ་སྣ་ཚོགས་ཀྱིས་བརྒྱན་པ་དང་། འཁོར་དེ་དག་དང་ཡང་འདི་ལྷན་ཅིག་ཏུ་
སྤྱད་པར་འགྱུར་རོ། །རིག་པ་འཛིན་པ་ཐམས་ཅད་ཀྱང་འདིའི་བྲན་བཞིན་དུ་ཉེ་བར་གནས་པར་འགྱུར་ཏེ། རིག་པ་འཛིན་པའི་འཁོར་ལོས་སྒྱུར་བར་འགྱུར་རོ། །རིང་དུ་འཚོ་བ་དང་གྲུབ་པ་ཐམས་ཅད་ཀྱིས་མི་ཚུགས་པར་འགྱུར་རོ། །རིག་པ་འཛིན་པ་རྣམས་ཀྱི་བུ་མོ་རྣམས་ལ་
མཆོག་ཏུ་ཡིད་དུ་འོང་བར་འགྱུར་རོ། །རྫས་ཐམས་ཅད་ལ་དབང་དུ་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་རྣམས་རྒྱལ་མཚན་གྱི་རྩེ་མོ་ལ་བཞུགས་པར་འགྱུར་རོ། །སྐད་ཅིག་གིས་ཚངས་པའི་འཇིག་རྟེན་དུ་འགྲོ་ཞིང་བརྒྱ་བྱིན་ལ་ཡང་བགྲང་བ་མེད་ན། རིག་པ་འཛིན་

པ་གཞན་ལྟ་ཅི་སྨོས། འདི་ནི་མཐར་ཡང་སངས་རྒྱས་ཉིད་དུ་འགྱུར་ཞིང་། འཕགས་པ་འཇམ་དཔལ་ཡང་འདིའི་དགེ་བའི་བཤེས་གཉེན་དུ་འགྱུར་རོ། །གཞན་ཡང་ལས་ཀྱི་སྒྲུབ་པ་པོ་ཡོད་དེ། དེ་ནས་ཤིན་ཏུ་བརྩོན་པས་གཅིག་པུ་དབེན་པ། སྐྱེ་བོ་མེད་
ལ་འདྲེས་པ་མེད་ཅིང་འདྲེས་པ་དང་བྲལ་བས་དགོན་པ་ཆེན་པོར་ཞུགས་ཏེ། གནས་གང་དུ་པདྨ་ཆེན་པོ་ཡོད་པའི་མཚོ་དང་ལྡན་པའི་རིའི་རྩེ་མོ་གཅིག་ཏུ་བརྟེན་ནས། རིའི་རྩེ་མོ་དེའི་སྟེང་དུ་འཛེགས་ཏེ། རིག་པའི་རྒྱལ་པོ་ཡི་གེ་གཅིག་པ་འཇམ་དཔལ་གྱི་ཆོ་ག་ལས་བཤད་
པའམ། དེ་བཞིན་གཤེགས་པའམ། གཞན་བྱང་ཆུབ་སེམས་དཔས་བཤད་པའམ། གང་ཡང་རུང་བའི་སྔགས་འདོད་པ་དེ་དག་བཟུང་སྟེ། པདྨའི་རྩ་བའམ་འོ་མའི་ཁ་ཟས་ཀྱིས་འཚོ་ཞིང་། རིག་པ་འབུམ་ཕྲག་སུམ་ཅུ་རྩ་དྲུག་བཟླས་ལ། བཟླས་པའི་མཐར་ཆོ་ག་དེ་
ཉིད་ཀྱིས་སྔར་བསྟན་པའི་རས་རིས་ཀྱི་རི་མོ་ཆེན་པོ་རབ་ཏུ་བཞག་སྟེ། མེ་ཏོག་པདྨ་ལ་ཙནྡན་དཀར་པོ་དང་། གུར་གུམ་གྱིས་བཏགས་ལ་སེང་ལྡེང་གི་ཤིང་གི་མེ་སྦར་ཏེ། སྔར་ཡོངས་སུ་བཏགས་པའི་མེ་ཏོག་གིས་སྟོང་ཕྲག་དྲུག་ཅུ་རྩ་དྲུག་གི་སྦྱིན་སྲེག་བྱའོ། །དེ་ནས་སྦྱིན་
སྲེག་གི་མཐར་བཅོམ་ལྡན་འདས་ཤཱཀྱ་ཐུབ་པའི་རས་རིས་ལས་འོད་ཟེར་འབྱུང་ངོ་། །དེ་ནས་སྒྲུབ་པ་པོ་སྣང་བར་བྱས་ཏེ། སྤྱི་བོར་ཞུགས་པར་འགྱུར་ལ་དེས་རེག་མ་ཐག་ཏུ་སྒྲུབ་པ་པོས་མངོན་པར་ཤེས་པ་ལྔ་ཐོབ་པར་འགྱུར་རོ། །བྱང་ཆུབ་སེམས་དཔའི་ས་ཐོབ་པར་འགྱུར། ལྷའི་
ལུས་ཀྱིས་ཅི་ལྟར་འདོད་པ་བཞིན་དུ་འགྲོ་བར་འགྱུར། བསྐལ་པ་སུམ་ཅུ་རྩ་དྲུག་གི་བར་དུ་འཚོ་བར་འགྱུར། སངས་རྒྱས་ཀྱི་ཞིང་སུམ་ཅུ་རྩ་དྲུག་གནོན་པར་འགྱུར། དེ་དག་གི་མཐུ་ཡང་དག་པར་རྗེས་སུ་མཐོང་བར་འགྱུར། སངས་རྒྱས་སུམ་ཅུ་རྩ་དྲུག་གི་གསུང་རབ་འཛིན་པར་
འགྱུར། དེ་ལ་མཆོད་ཅིང་བསྙེན་བཀུར་བ་ལ་མངོན་པར་དགའ་བར་འགྱུར། མཐར་ཡང་བྱང་ཆུབ་ལ་གཞོལ་བར་འགྱུར། འཕགས་པ་འཇམ་དཔལ་གྱིས་བྱང་ཆུབ་ཀྱི་མཐར་ཐུག་པ། མྱ་ངན་ལས་འདས་ཀྱི་བར་དུ་དགེ་བའི་བཤེས་གཉེན་དུ་ཡོངས་སུ་འཛིན་པར་འགྱུར་རོ། །བྱང་

ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་འཕགས་པ་འཇམ་དཔལ་གྱི་རྩ་བའི་ཆོ་ག་དགུ་པའི་ལེའུ་རབ་འབྱམ་ལས། གཉིས་པ་སྒྲུབ་པའི་ཐབས་དམ་པའི་ལས་ཀྱི་ལེའུ་རབ་འབྱམ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་སྒྲུབ་པའི་
ལས་དམ་པ་གཞན་ཡང་གསུངས་ཏེ། ཆོ་གའི་རྒྱལ་པོ་འདི་ལས་གང་ཡང་རུང་བའི་སྔགས་བཟུང་ནས། གང་གཱའི་ཀླུང་ཆེན་པོར་ཞུགས་ཏེ། དཀྱིལ་དུ་གྲུའི་བཞོན་པ་ལ་འདུག་སྟེ། འོ་མ་དང་སྦྱར་བའི་འབྲས་ཆན་ཟ་ཞིང་ཅི་ལྟར་འདོད་པའི་ཉི་མ་ལ་བཟླས་པ་སུམ་འབུམ་བྱའོ། །
དེ་ནས་བཟླས་པའི་ཐ་མ་ལ་ཀླུ་ཐམས་ཅད་མཐོང་སྟེ། དེ་ནས་བསྒྲུབ་པ་བརྩམ་པར་བྱའོ། །གྲུའི་སྟེང་དེ་ཉིད་ཀྱི་ནང་དུ་མེ་ཐབ་པདྨའི་རྣམ་པ་འདྲ་བ་བྱས་ནས། མེ་ཏོག་ནཱ་ག་གེ་སར་དག་གིས་རས་རིས་ལ་མཆོད་པ་ཆེན་པོ་བྱས་ཏེ། རས་རིས་ཆེན་པོ་ནུབ་དུ་བསྟན་པས་བཞག་ལ།
བདག་ཉིད་ཤར་དུ་བལྟས་ནས་ཀུ་ཤའི་ཁྲེས་ལ་འདུག་སྟེ། མེ་ཏོག་ནཱ་ག་གེ་སར་རེ་རེ་ལ་ཡང་ལན་བདུན་བདུན་བསྔགས་པ་བྱས་ནས། ཤིང་སེང་ལྡེང་གིས་མེ་སྦར་བ་ལ་སྦྱིན་སྲེག་བྱ་སྟེ། ཙནྡན་དཀར་པོ་དང་གུར་གུམ་དང་བསྲེས་པའི་མེ་ཏོག་ནཱ་ག་གེ་སར་གྱིས་ལན་སྟོང་ཕྲག་སུམ་
ཅུ་རྩ་དྲུག་གི་བར་དུ་བྱ་སྟེ། གཞན་གྱིས་ནི་མ་ཡིན་ནོ། །ཀླུ་རྣམས་མཐོང་བ་ཡང་དོན་ཡོད་པ་ཡིན་ཏེ། གྲུབ་པའི་རྫས་རྣམས་ལ་རབ་ཏུ་ཆགས་པས་བླང་བར་མི་བྱ་སྟེ། གྲུབ་པའི་རྫས་རྣམས་ལ་ཆགས་པས་ལེན་པར་མི་བྱེད་ན། དེས་ན་སྦྱིན་སྲེག་རྫོགས་པ་དང་གྲུའི་བཞོན་པ་
དང་བཅས་པར་འཕུར་བར་འགྱུར་ཏེ། རིག་པ་འཛིན་པའི་འཁོར་ལོས་སྒྱུར་བར་འགྱུར་ལ། ཀླུའི་རྒྱལ་པོའི་དབང་པོ་ཐམས་ཅད་ཀྱང་སུ་འབྲང་ཞིང་བྲན་བཞིན་དུ་གནས་པར་འགྱུར་རོ། །བར་གྱི་བསྐལ་པ་སུམ་ཅུར་འཚོ་བར་འགྱུར་རོ། །འདི་རང་དབང་དུའང་
སྤྱོད་པར་འགྱུར་རོ། །འགྲོ་བ་ལ་ཐོགས་པ་མེད་པར་འགྱུར་རོ། །འཕགས་པ་འཇམ་དཔལ་མངོན་སུམ་དུ་མཐོང་བར་འགྱུར་རོ། །སྤྱི་བོ་ལ་ཕྱག་གིས་རེག་པར་མཛད་དེ། རེག་པ་ཙམ་གྱིས་མངོན་པར་ཤེས་པ་ལྔ་ཐོབ་པར་འགྱུར་རོ། །ངེས་པར་སངས་རྒྱས་ཉིད་ཀྱང་

འཐོབ་པར་འགྱུར་རོ། །ལས་ཀྱི་མཆོག་གཞན་ཡང་བསྟན་པ་ནི་བིལ་བའི་ཤིང་གཅིག་གི་རང་བཞིན་ལས་གྲུའི་བཞོན་པ་ཤིན་དུ་བརྟན་པ་དང་། ལེགས་པར་བྱས་ཏེ་དེ་ལ་ཞོན་ནས་གང་གཱའི་ཀླུང་ཆེན་པོར་ཞུགས་ཏེ། བིལ་བའི་ཤིང་ལས་རླུང་ཡོར་བྱས་ཏེ། དེ་ཉིད་
ཀྱིས་གྲུ་དེ་རླུང་ཡོར་འཛིན་པ་མཁས་པ་གསལ་བ་དེས་ཕྱག་པར་བྱའོ། །གང་གཱའི་ཀླུང་ཆེན་པོ་མི་དོར་བར་ཡོངས་སུ་ཐད་ཀའམ། ཆུར་ཕྱག་པར་བྱའོ། །དེ་ནས་གཞན་གང་ཡང་རུང་བའི་སྔགས་རྩ་བའི་སྔགས་སམ། འབྲུ་དྲུག་པའམ། འབྲུ་གསུམ་པའམ། འབྲུ་བརྒྱད་པའམ་འབྲུ་
གཅིག་པའམ། ཁྲོ་བོའམ་ཕོ་ཉའམ། འཁོར་གྱི་སྔགས་བཟུང་ནས། དང་པོར་རས་རིས་ཆེན་པོ་དེ་ཉིད་ནུབ་ཏུ་བལྟས་པས་བཞག་ལ། སྒྲུབ་པ་པོ་ཤར་དུ་བལྟ་བར་བྱའོ། །དེ་ནས་ཅི་ལྟར་འདོད་པའི་འོ་མ་དང་། ནས་ཆན་ཁྱོར་གང་ངམ་འབྲས་བུའི་ཁ་ཟས་སམ། ཆུ་དང་རྩ་
བ་དང་། འབྲས་བུའི་ཁ་ཟས་ཀྱིས་འཚོ་ལ་མི་སྨྲ་བའི་དཀའ་ཐུབ་དང་། དུས་གསུམ་དུ་ཁྲུས་བྱ་ཞིང་གོས་ལན་གསུམ་བརྗེས་ནས་དགེ་བའི་ལས་བཟང་པོ་ཡང་དག་པར་སྤྱོད་པ་དང་། བློ་དགེ་བ་བཟང་པོ་དང་ལྡན་པའོ། །དང་པོར་རེ་ཞིག་རས་རིས་ཀྱི་མདུན་དུ་སྔར་ཅི་ལྟར་བསྟན་པའི་སྔར་
བཤད་པའི་ཆོ་གས་རིག་པ་འབུམ་ཕྲག་དྲུག་ཅུ་བཟླའོ། །བཟླས་པ་ཟིན་པ་ན་གྲུ་དེ་རྒྱ་མཚོ་ཆེན་པོར་འགྲོ་བར་འགྱུར་རོ། །སྒྲུབ་པ་པོའི་ཡོ་བྱད་ཡང་དག་པར་བླངས་ཏེ་སྔར་གྱི་གནས་སུ་གཞག་པར་བྱའོ། །དེ་ནས་གྲུའི་བཞོན་པ་རྒྱ་མཚོ་ཆེན་པོར་འགྲོ་བ་ན་འཇིགས་པར་མི་བྱ་སྟེ་བཟློག་
པར་ཡང་མི་བྱའོ། །སྒྲུབ་པ་པོ་མ་གཏོགས་པས་ཟློག་པར་ནུས་པ་ཡང་མ་ཡིན་ནོ། །དེ་ནས་དཔག་ཚད་སྟོང་དུ་གནས་པའི་རྒྱ་མཚོ་ཆེན་པོར་ཡང་ཡུད་ཙམ་གྱིས་འཇུག་པར་འགྱུར་ན། ལམ་ཐུང་ངུ་ལྟ་སྨོས་ཀྱང་ཅི་དགོས། རྒྱ་མཚོ་ཆེན་པོ་དེར་ཕྱིན་པ་ན་སྒྲུབ་པ་པོས་བསྒྲུབ་པའི་
ལས་བརྩམ་པར་བྱའོ། །དེ་ནས་སེང་ལྡེང་གི་ཤིང་གི་མེ་སྦར་ལ། སྔར་བྱས་པའི་མེ་ཐབ་བམ། རྫ་མཁན་གྱིས་བྱས་པའི་སའི་སྣོད་ལ། མེ་ཏོག་ནཱ་ག་གེ་སར་ཙནྡན་དཀར་པོ་དང་ག་པུར་གྱིས་བསྲེས་པའི་སྲེག་བླུགས་ཀྱིས་ཤིན་ཏུ་ཉུང་བའམ་རབ་ཏུ་མང་བ་ཡང་རུང་འབུམ་ཕྲག་

དྲུག་ཅུ་སྦྱིན་སྲེག་བྱའོ། །སྦྱིན་སྲེག་བྱེད་པ་ན་ཡང་ལང་ཀའི་གྲོང་ཁྱེར་ན་གནས་པའི་སྲིན་པོ་གཟུགས་དང་ཆ་བྱད་མང་པོ་འཛིན་པ་ཧ་ཧ་ཞེས་བྱ་བའི་སྒྲ་སྒྲོགས་པ་དང་། ཀླུའི་གྲོང་ཁྱེར་གདེངས་ཀ་དང་ལྡན་པ་ན་གནས་པའི་རྒྱལ་པོ་རྣམས་ལངས་པར་འགྱུར་ཏེ། ཆ་བྱད་རྣམ་པ་སྣ་
ཚོགས་འཛིན་པ་རབ་ཏུ་དྲག་པ་དང་། རབ་ཏུ་ཞི་བའི་ཀླུ་དེ་རྣམས་དང་། སྲིན་པོ་དེ་རྣམས་འདི་སྐད་དུ་ཁྱེད་བཞེངས་ཤིག་བཞེངས་ཤིག །བདག་ཅག་གི་བདག་པོ་མཛད་དུ་གསོལ་ཞེས་བརྗོད་དོ། །དེ་བཞིན་དུ་ལྷ་མ་ཡིན་དང་གནོད་སྦྱིན་དང་། ལྷ་དང་ལྟོ་འཕྱེ་ཆེན་པོ་དང་གྲུབ་པ་དང་མི་མ་ཡིན་
པ་ཐམས་ཅད་ཀྱང་རབ་ཏུ་ཆགས་པར་བྱེད་ན་ལྡང་བར་མི་བྱ། འཇིགས་པར་མི་བྱའོ། །དེ་ནས་རིག་པ་འཛིན་པས་སྔགས་ཟློ་ཞིང་། ལག་པ་གཡོན་པའི་མཛུབ་མོས་སྡིགས་མཛུབ་བྱས་ན། དེ་ནས་ཕན་ཚུན་དུ་འགྲོ་བ་དང་འབྱོར་བ་དང་འབྲོས་པར་བྱེད་དོ། །དེ་ནས་སྦྱིན་སྲེག་
ཟིན་པ་ན་གྲུ་དེ་སྒྲུབ་པ་པོ་དེས་བླངས་ན་སྐད་ཅིག་གིས་འོག་མིན་དུ་འགྲོ་བར་འགྱུར་རོ། །འཇིག་རྟེན་གྱི་ཁམས་གཞན་དུ་ཡང་འགྲོ་བ་དང་འོང་བར་འགྱུར་རོ། །བྱང་ཆུབ་སེམས་དཔའི་སེམས་དང་མཐུ་མཉམ་པར་འགྱུར། མངོན་པར་ཤེས་པ་ལྔ་དང་རྫུ་འཕྲུལ་ཆེན་པོ་དང་མཐུ་
ཆེན་པོ་དང་ལྡན་པར་འགྱུར་རོ། །འདིས་འཕགས་པ་འཇམ་དཔལ་ཡང་རྟག་ཏུ་མཐོང་བར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་དང་། རང་སངས་རྒྱས་དང་འཕགས་པ་ཉན་ཐོས་མ་གཏོགས་པ། ཀླུའི་རྒྱལ་པོ་ཐམས་ཅད་དང་སྲིན་པོ་ཐམས་ཅད་
དང་གནོད་སྦྱིན་ཐམས་ཅད་དང་། ལྷ་ཐམས་ཅད་དང་ལྷ་མ་ཡིན་ཐམས་ཅད་དང་། སེམས་ཅན་ཐམས་ཅད་ཀྱང་འདིའི་བཀའ་བཞིན་བྱེད་ཅིང་དབང་དུ་འགྱུར་རོ། །འདིའི་སྔགས་གྲུབ་པ་དེ་དག་ལ་ཡང་བྱམས་པའི་བདག་ཉིད་དུ་འགྱུར་ཞིང་རྗེས་སུ་དགའ་བར་འགྱུར་རོ། །
སེམས་ཅན་ཐམས་ཅད་ཀྱིས་ཀྱང་མི་ཐུབ་པའི་བར་དུ་འགྱུར་རོ། །གཞན་ཡང་ལས་སྒྲུབ་པའི་ཐབས་དམ་པ་ཡོད་དེ། ཤིང་བིལ་བ་ཆེན་པོ་ལས་གྲུའི་བཞོན་པ་བྱས་ལ་ཡང་ཤིང་གཅིག་གི་ཤིང་གི་ཚོགས་ལས་གནས་ཆེན་པོ་བྱས་ཏེ། གང་གཱའི་དབུས་ཀྱི་གླིང་

དེར་གྲུའི་བཞོན་པའི་གནས་བྱས་ལ། དེར་ཡང་གྲུའི་བཞོན་པ་ལ་ཞོན་པའི་སྐྱེས་བུ་བརྒྱ་ཉི་ཤུ་རྣམས་མར་མེ་ལག་ན་ཐོགས་པ། གོས་དཀར་པོ་བགོས་པ་སྲུང་བ་བྱས་པ། ཆོ་ག་སྔ་མས་ཡང་དག་པར་བཞག་པའི་རས་རིས་མདུན་དུ་གཞག་པར་བྱ་སྟེ། དེ་ནས་རས་རིས་
ལ་མཆོད་པ་ཆེན་པོ་བྱས་ནས། ནཱ་ག་གེ་སར་གྱི་ཕྱེ་མ་ཙནྡན་དཀར་པོ་དང་གུར་གུམ་དང་ག་པུར་གྱིས་བསྲེས་པའི་སྲེག་བླུགས་ཀྱིས་སེང་ལྡེང་གི་མེ་ལ་སྟོང་ཕྲག་སུམ་ཅུ་རྩ་དྲུག་སྦྱིན་སྲེག་བྱའོ། །དེ་ནས་སྦྱིན་སྲེག་ཟིན་པ་ན། སྐད་ཅིག་གིས་ཚངས་པའི་འཇིག་རྟེན་དུ་འགྲོ་བ་དང་འོང་བར་
འགྱུར་རོ། །ཅི་ལྟར་འདོད་པ་བཞིན་དུ་རྣམ་པར་རྒྱུ་བར་བྱེད་དོ། །འཕགས་པ་འཇམ་དཔལ་གཞོན་ནུར་གྱུར་པ་མངོན་སུམ་དུ་མཐོང་བར་འགྱུར་ཏེ། མཐོང་བ་ཙམ་གྱིས་ས་ཐོབ་པར་ཡང་འགྱུར་རོ། །མངོན་པར་ཤེས་པ་ལྔ་འཐོབ་པ་དང་ཡུན་རིང་དུ་འཚོ་ཞིང་བསྐལ་པ་ཆེན་པོར་
གནས་པར་ཡང་འགྱུར་རོ། །རིག་པ་འཛིན་པའི་འཁོར་ལོས་སྒྱུར་བར་ཡང་འགྱུར་རོ། །མར་མེ་འཛིན་པ་དེ་དག་ཀྱང་རིག་པ་འཛིན་པ་འདིའི་གྲོགས་པོར་འགྱུར་ཏེ། དེ་དག་དང་ལྷན་ཅིག་ཅི་ལྟར་འདོད་པ་བཞིན་དུ་རྒྱུ་ཞིང་རང་དབང་དུ་འགྲོ་བར་ཡང་འགྱུར་རོ། །སངས་རྒྱས་བཅོམ་
ལྡན་འདས་རྣམས་ལ་མཆོད་པ་དང་བསྙེན་བཀུར་བྱེད་པར་མངོན་པར་དགའ་བར་འགྱུར་ཞིང་། འཕྲལ་ཡང་སངས་རྒྱས་ཉིད་དུ་ངེས་པར་འགྱུར་རོ། །གཞན་ཡང་སྒྲུབ་པའི་ཐབས་ཀྱི་ལས་དམ་པ་ཡོད་དེ། ཆུ་ཀླུང་རྒྱ་མཚོའི་འགྲམ་དག་གམ། །དེ་བཞིན་རི་བོ་ཁ་བ་ཅན། །རི་ཡི་
རྒྱལ་པོ་འབིགས་བྱེད་ལ། །ལས་ཀྱི་མཆོག་ནི་བསྒྲུབ་པར་བྱ། །མ་ལ་ཡ་རི་ས་ཧ་དང་། །སྤོས་ཀྱི་ངད་ལྡང་ཨར་བུ་དང་། །རི་ཡི་རྒྱལ་པོ་སུམ་བརྩེགས་ལ། །ལས་ཀྱི་མཆོག་ནི་བསྒྲུབ་པར་བྱ། །དེ་བཞིན་རྒྱ་མཚོ་ཆེན་པོ་དང་། །རི་ནི་ཤིང་ལྡན་མེ་ཏོག་ཡོད། །འདི་དག་གི་
ནི་ཕྱོགས་དག་ཏུ། །སྔགས་གྲུབ་པར་ནི་རྒྱལ་བས་གསུངས། །གཙང་ཞིང་བས་མཐའ་དབེན་ཕྱོགས་སུ། །གྲོང་གི་ཆོས་ནི་རྣམ་པར་སྤངས། །དེ་བཞིན་རི་ཡི་ཚང་ཚིང་དུ། །སྔགས་ཀྱི་རྒྱལ་པོ་ཐམས་ཅད་འགྲུབ། །བས་མཐའི་གནས་མལ་ཉམས་དགའ་དང་། །རྒྱལ་བས་

དེ་བཞིན་བསྔགས་པ་དང་། །མ་རུངས་སེམས་ཅན་ཐམས་ཅད་ལ། །སྔགས་ཀྱི་རྒྱལ་པོ་ཐམས་ཅད་འགྲུབ། །ཆོས་ལྡན་རྒྱལ་པོ་ཡོད་པ་དང་། །གཙང་སྦྲ་སྤྱོད་པའི་སྐྱེ་བོ་ཡོད། །ཕ་དང་མ་ལ་གུས་པ་དང་། །བྲམ་ཟེའི་རིགས་ནི་ཡོད་པ་ཡི། །གནས་དེར་ལྷ་རྣམས་འགྲུབ་འགྱུར་
ཏེ། །གཞན་དུ་འགྲུབ་པ་མ་ཡིན་ནོ། །ཆུ་བོ་གང་གཱའི་འགྲམ་དང་ནི། །དེ་བཞིན་ལེགས་མཛེས་ཡ་མུ་ན། །སིནྡུ་ནར་མ་དཱ་ནང་དང་། །ཟླ་བའི་ཆ་ནི་གཙང་ངོགས་དང་། །དེ་བཞིན་ཀཱ་བའི་ས་ར་སྭད། །ཆུ་བོ་ཆེན་པོ་སཱི་ཏ་རྣམས། །འདི་དག་གྲུབ་པའི་ཞིང་དུ་ནི། །སྟོབས་བཅུ་ལྡན་
སྲས་རྣམས་ཀྱིས་བཤད། །སྟོབས་བཅུ་ལྡན་པས་བཤད་པའི་ཞིང་། །བྱང་ཕྱོགས་ཡོད་པའི་རི་དག་དང་། །ཁ་ཆེ་དང་ནི་རྒྱ་ཡུལ་དང་། །བལ་པོ་དེ་བཞིན་མང་ཡུལ་དང་། །རྒྱ་ཡུལ་ཆེ་དང་ལི་ཡུལ་དག །དེ་དག་མ་ལུས་གྲུབ་པའི་ཞིང་། །བྱང་ཕྱོགས་ལ་ནི་གནས་པ་དང་། །ནས་དང་
གྲོ་ལ་སྤྱོད་པ་དང་། །རི་དང་ཆུ་བོ་དག་ལ་ཡང་། །བསོད་ནམས་ཡུལ་དུ་བསྟན་པ་ཡིན། །སེམས་ཅན་སྙིང་རྗེ་ལྡན་གང་གནས། །དེ་དག་ལ་ནི་ངེས་འགྲུབ་འགྱུར། །དཔལ་གྱི་རི་བོའི་རི་ཆེན་ནི། །ལྷོ་ཡི་ཕྱོགས་ན་ཡང་དག་གནས། །དཔལ་ལྡན་འབྲས་ཕུང་མཆོད་རྟེན་ནི། །རྒྱལ་
བའི་རིང་བསྲེལ་གནས་པའི་ས། །ཐམས་ཅད་དོན་གྱི་གནས་དག་ལ། །དེར་ནི་སྔགས་རྣམས་མྱུར་དུ་འགྲུབ། །མཆོད་རྟེན་ཆེན་པོ་རྡོ་རྗེ་གདན། །ཆོས་ཀྱི་འཁོར་ལོ་རབ་བསྐོར་དང་། །ཐུབ་མཆོག་ཞི་བར་རབ་གཤེགས་པ། །དེར་ཡང་གྲུབ་པར་རབ་ཏུ་སྣང་། །ལྷ་ལས་བབས་
པའི་མཆོད་རྟེན་དང་། །ནཻ་ཀ་ཤ་དང་ཆོ་འཕྲུལ་བསྟན། །གྲོང་མཆོག་སེར་སྐྱ་ཞེས་བྱ་དང་། །ནགས་ཚལ་ལུམ་བི་ནིར་འཁྲུངས་ལ། །སྔགས་ཀྱི་རྒྱལ་པོ་འགྲུབ་འགྱུར་ཞེས། །རྒྱལ་བས་རབ་བསྔགས་བརྗོད་པ་ཡིན། །བྱ་རྒོད་ཕུང་པོའི་རི་དང་ནི། །དེ་བཞིན་ས་སྟེང་
བསིལ་བའི་ཚལ། །གྲོང་མཆོག་མེ་ཏོག་ཅེས་བྱ་དང་། །རྟག་ཏུ་དེ་བཞིན་ག་ཤ་དང་། །བཅོམ་བརླག་ཀ་ནྱ་ཀུབ་ཛ་དང་། །ས་སྟེང་གྲོང་ནི་འཕགས་རྒྱལ་དང་། །དེ་བཞིན་ཡངས་པ་ཅན་མཆོད་རྟེན། །མི་ཐི་ལ་ཡི་གྲོང་ཁྱེར་ས། །གྲོང་དང་གྲོང་ཁྱེར་མཆོག་དག་ནི། །

གང་གཞན་སྐྱེ་བོ་ཡང་དག་འབྱུང་། །རབ་བསྔགས་བསོད་ནམས་ཡུལ་དག་ནི། །དེ་དག་ལ་ནི་བསྒྲུབ་པ་བྱ། །དེ་དང་གཞན་ཡང་ཡུལ་དག་དང་། །གྲོང་དང་ལྗོངས་དང་རི་བོར་དང་། །གནས་དང་གྲོང་མཆོག་གཙོ་བོ་ནི། །བསོད་ནམས་གནས་ལ་རབ་བརྟེན་ནས། །
དེར་ནི་སློང་མོས་རྗེས་འཚོ་ཞིང་། །བཟླས་དང་སྦྱིན་སྲེག་དགའ་བ་དང་། །གནས་ཁང་བླ་གབ་མེད་པ་དང་། །རྟག་ཏུ་ཁྱིམ་ནི་སྟོང་པ་ལ། །སྔགས་རྣམས་ལས་ནི་ཐམས་ཅད་ལ། །ཐོག་མ་ཉིད་དུ་བྱ་བ་ཡིན། །སྔགས་པས་རྟག་ཏུ་ཡུལ་དབུས་སུ། །སྔགས་བཟླས་མངོན་པར་འདོད་
པས་བྱ། །བཟླས་ལ་རབ་ཞུགས་རྟག་ཏུ་བརྩོན། །སྔགས་རིག་གཏོང་བ་དག་ལ་གོམས། །ཚུལ་ཁྲིམས་སྤྱོད་ཅིང་ཤིན་ཏུ་དབེན། །འབྱུང་པོ་ཀུན་ལ་ཕན་པར་དགའ། །སྔགས་སྤྱོད་པ་ལ་དགའ་བ་ཡི། །སྡོམ་བརྩོན་གྱིས་ནི་སྔགས་བཟླས་བྱ། །གཙང་ཞིང་གཙང་སྦྲ་ཡོད་ཕྱོགས་
དང་། །ཀླ་ཀློ་རྐུན་མ་རྣམ་པར་སྤངས། །སེམས་ཅན་སྡིག་སྦྲུལ་ལ་སོགས་པ། །སྤངས་པའི་ས་ཕྱོགས་འདོད་པ་ཡིས། །འབྲས་བུ་མེ་ཏོག་ཡང་དག་ལྡན། །དྲི་མེད་རབ་བསྔགས་ཆུ་ཡོད་པར། །སྔགས་རིགས་སྔགས་ནི་བརྟེན་བྱས་ན། །སྦྱོར་བ་ཐམས་ཅད་རབ་ཏུ་འགྲུབ། །གཞན་
ཡང་དུར་ཁྲོད་ཆེན་པོ་ནི། །དེར་ནི་བཟླས་པ་རྟག་ཏུ་བྱ། །དྲི་མེད་ཆུ་དང་འབབ་ཆུ་ནི། །སྲོག་ཆགས་དག་ཀྱང་རྣམ་པར་སྤངས། །དེར་ནི་དེ་ཉིད་བཟླ་བྱ་སྟེ། །མཉམ་པར་བཞག་པས་སྔགས་བཟླས་བྱ། །འཇིག་རྟེན་སྤྱོད་པའི་བསོད་ནམས་མིན། །དེར་ནི་ཅུང་ཟད་མི་མཐོང་སྟེ། །
འོན་ཀྱང་སྔགས་ནི་བསྟན་པ་ཡིས། །ཅུང་ཟད་དུས་ནི་བསྟན་པའོ། །དམ་ཚིག་ཚོགས་པའི་རྒྱུ་ལྡན་ན། །དེ་ལས་གཞན་དུའང་འགྲོ་བྱ་སྟེ། །དེར་ནི་དམ་ཚིག་ཐོབ་བསྟེན་པ། །ཅུང་ཟད་དུས་ཏེ་གཞན་དུ་མིན། །དེ་ནས་གཞན་དུའང་མྱུར་དུ་ནི། །སྔགས་རིག་པས་ནི་ཅི་ནུས་འགྲོ། །
བདེ་གཤེགས་མཆོད་རྟེན་བཞུགས་པ་ཡི། །ས་སྟེང་དག་ལ་རྟག་ཏུ་བསྟེན། །འཇིག་རྟེན་མུ་སྟེགས་ཐམས་ཅད་ནི། །ལྟ་བ་ལོག་པར་ལྟུང་བ་དང་། །གཞན་ཡང་སྟེགས་སུ་གྱུར་པ་རྣམས། །སྔགས་རིག་པས་ནི་རྟག་ཏུ་སྤང་། །རྒྱུ་ངན་འགྲོ་བ་ངན་ཡོད་པར། །སྔགས་རིག་

པས་ནི་དེར་མི་བསྟེན། །གང་དུ་རྒྱལ་བ་མཆོག་བཞུགས་དང་། །ས་སྟེང་བསེ་རུ་རང་རྒྱལ་དང་། །བྱང་ཆུབ་སེམས་དཔའ་སྐལ་བ་ཆེ། །ཉན་ཐོས་རྒྱལ་བའི་སྲས་དག་ནི། །དེ་དག་གནས་པའི་ཕྱོགས་དག་ཏུ། །ཟློས་པ་སྔགས་རིག་ལྡན་པས་བསྟེན། །འབད་པས་སྔ་མ་ཉིད་དུ་ནི། །
གནས་དེ་ལ་ནི་རྟག་ཏུ་སྤྱོད། །སྔགས་ཤེས་ཆོ་ག་མཐོང་བ་ཡིས། །ཡང་དང་ཡང་དུ་སྔགས་ཟློས་བྱ། །ལུས་ཅན་སྡིག་པ་མ་ལུས་དག །བཟླས་དང་སྦྱིན་སྲེག་དག་གིས་སེལ། །དེ་བས་འབད་པ་ཀུན་གྱིས་ནི། །མཉམ་བཞག་སྔགས་ནི་བཟླ་བར་བྱ། །ལས་ཐམས་ཅད་ལ་
གནས་འདི་དག་གསུངས་པ་ལས་སྒྲུབ་པ་མཆོག་གི་ལས་ཀྱི་ཐབས་སྒྲུབ་པ་ལ་གནས་འདི་དག་མ་རྙེད་ན། གང་ཡང་རུང་བའི་གནས་དེ་དག་ཏུ་གཙང་སྦྲ་བྱས་ཏེ་སྔོན་དུ་བསྙེན་པ་བྱས་ལ། དད་ཅིང་མོས་པས་སྒྲུབ་པའི་ཐབས་ཀྱི་ལམ་དམ་པ་བརྩམ་པར་བྱ་སྟེ། དང་པོར་རེ་ཞིག་རས་
རིས་ཆེན་པོ་ནུབ་ཏུ་བལྟས་པས་བཞག་སྟེ། བདག་ཉིད་ཤར་དུ་བལྟས་ལ། གྲོག་མཁར་གྱི་སའམ། གང་གཱའི་ཀླུང་གི་ངོགས་ན་ཡོད་པའི་ས་བླངས་ཏེ། རྩྭ་ཨུ་ཤི་ར་དང་ཙནྡན་དཀར་པོ་དང་གུར་གུམ་དང་ག་པུར་ལ་སོགས་པས་བསྲེ་བ་བྱ་སྟེ། རྨ་བྱའི་གཟུགས་བྱས་ལ་
རས་རིས་དེའི་མདུན་དུ་བཞག་གོ། །ཀུ་ཤའི་རྩེ་མོ་མ་ཉམས་པས་ཕྱོགས་གཙང་མར་སྐྱེས་པ་འཁོར་ལོའི་གཟུགས་སུ་བྱས་ཏེ། རས་རིས་ཀྱི་མདུན་དུ་ལག་པ་གཡས་པས་བཟུང་ཞིང་། ལག་པ་གཡོན་པས་རྨ་བྱ་བཟུང་ལ། ཡར་ངོའི་ཟླ་བ་ཉ་བའི་མཚན་མོར་རས་རིས་ལ་མཆོད་
པ་ཆེན་པོ་བྱས་ཏེ། ག་པུར་དང་ཙནྡན་གྱི་དུད་པ་བསྲེགས་ལ། ནམ་ལངས་ཀྱི་བར་དུ་བཟླས་པ་བྱས་ན། དེ་ནས་ཉི་མ་ཤར་བའི་དུས་སུ་ལྷའི་རང་བཞིན་གྱི་རྨ་བྱ་ནི་རྨ་བྱ་ཆེན་པོའི་རྒྱལ་མོར་འགྱུར་རོ། །འཁོར་ལོ་ནི་ཀུན་དུ་འབར་བར་འགྱུར་ཞིང་། བདག་ཉིད་ཀྱང་ལྷའི་ལུས་སུ་འགྱུར་
རོ། །དེ་ནས་ལྷའི་ཕྲེང་བ་དང་གོས་དང་རྒྱན་གྱིས་བརྒྱན་པར་འགྱུར་རོ། །ཉི་མ་ཤར་བ་དང་འདྲ་བའི་འདོད་པའི་གཟུགས་མཛེས་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ལ་ཕྱག་བྱས་ནས། རས་རིས་ལ་གཡས་ཕྱོགས་སུ་བསྐོར་བ་བྱས་ལ། རས་རིས་བླངས་ཏེ་རྨ་བྱའི་སྟན་

དེ་ལ་འདུག་ན་ཡུད་ཙམ་གྱིས་ཚངས་པའི་འཇིག་རྟེན་གནོན་པར་འགྱུར་རོ། །རིག་པ་འཛིན་པ་བྱེ་བ་ཁྲི་ཕྲག་བརྒྱ་སྟོང་གི་འཁོར་དུ་མ་དང་ལྡན་པའི་རིག་པ་འཛིན་པའི་འཁོར་ལོས་སྒྱུར་བར་འགྱུར་རོ། །བར་གྱི་བསྐལ་པ་དྲུག་ཅུར་འཚོ་བར་འགྱུར་རོ། །ཅི་ལྟར་འདོད་པར་
འགྲོ་ཞིང་སྤྱོད་པར་འགྱུར་རོ། །འགྲོ་བ་ལ་ཐོགས་པ་མེད་པ་དང་ལྷའི་ཕུན་སུམ་ཚོགས་པ་དང་ལྡན་པར་འགྱུར་རོ། །འཕགས་པ་འཇམ་དཔལ་ཡང་མངོན་སུམ་དུ་འགྱུར་ཞིང་། དེ་ཉིད་འདིའི་དགེ་བའི་བཤེས་གཉེན་དུ་འགྱུར་རོ། མཐར་ཡང་སངས་རྒྱས་ཉིད་ཐོབ་པར་འགྱུར་རོ། །
དེ་བཞིན་དུ་དབྱུག་པ་དང་། སྤྱི་བླུགས་དང་ཚངས་སྐུད་དང་ལྡོང་རོས་དང་གི་ཝང་དང་རལ་གྲི་དང་། ལྕགས་མདའ་དང་མཚོན་རྩེ་གཅིག་པ་དང་དགྲ་སྟ་དང་། མཚོན་རྣམ་པ་སྣ་ཚོགས་ཀྱི་ཁྱད་པར་སའི་རང་བཞིན་ནམ། རྐང་གཉིས་དང་རྐང་བཞི་དང་བྱ་དང་བཞོན་པའི་བྱེ་བྲག་སེང་
གེ་དང་སྟག་དང་དོམ་ལ་སོགས་པའམ། གྲོག་མཁར་གྱི་སའི་རང་བཞིན་ལ་དྲི་ཞིམ་པོའི་དྲིས་བསྲེས་པ་ལས། གདན་དང་བཞོན་པ་དང་གནས་མལ་དང་། གདུགས་དཀར་པོ་དང་ཅོད་པན་དང་རྒྱན་གྱི་བྱེ་བྲག་ཐམས་ཅད་དང་རིན་པོ་ཆེའི་བྱེ་བྲག་ཐམས་ཅད་དང་། རབ་
ཏུ་བྱུང་བའི་ཡོ་བྱད་ཀྱི་བྱེ་བྲག་ཕྲེང་བ་དང་ལྷམ་དང་ཤིང་ལྷམ་དང་། ལྷུང་བཟེད་དང་ཆོས་གོས་དང་ཁར་གསིལ་དང་ཁབ་དང་། གྲི་ལ་སོགས་པ་ལྕགས་ཁྱད་པར་ཅན་གྱི་རང་བཞིན་ནམ། གཞན་ཡང་གང་ཅུང་ཟད་སེམས་ཅན་གྱི་ཡོ་བྱད་སྣོད་ལ་སོགས་པ། ལྕགས་བཟང་པོའི་
རང་བཞིན་ནམ། གྲོག་མཁར་གྱི་སའམ། ཆུ་བོའི་ངོགས་ཀྱི་ས་ལས་བྱས་པ་དེ་དག་ཐམས་ཅད་པའི་རྣམ་ལྔས་བཀྲུས་པའམ། ཆུས་གཏོར་བ་ཙམ་བྱས་ལ་སྔ་མ་བཞིན་དུ་ཡོངས་སུ་དག་པར་བྱེད་པའི་སྔགས་སམ། ཡི་གེ་གཅིག་པའི་སྔགས་སམ། གཞན་གང་ཡང་རུང་
བའི་སྔགས་ཆོ་གའི་རྒྱལ་པོ་སྒྲུབ་པའི་ཐབས་ཀྱི་སྔགས་མ་གཏོགས་པས་ལན་བརྒྱ་རྩ་བརྒྱད་མངོན་པར་བསྔགས་པ་བྱས་ཏེ། ཅི་ལྟར་འདོད་པར་བདག་ཉིད་བསྲུང་བ་བྱས་པ་དང་གྲོགས་པོ་ཡང་ཡོངས་སུ་བསྐྱབ་པ་བྱས་པ་དང་ཤིན་ཏུ་གསང་བའི་སྔགས་དང་རྒྱུད་ཤེས་པ་སྔར་བསྟན་

པའི་གནས་དག་ཏུ་རས་རིས་ནུབ་ཏུ་བལྟས་པས་གཞག་ལ། བདག་ཉིད་སྔ་མ་བཞིན་དུ་བྱས་ཏེ། རས་རིས་ལ་མཆོད་པ་ཆེན་པོ་བྱས་ནས་རས་རིས་ཆེན་པོ་ལ་ག་པུར་གྱི་བདུག་པས་བདུགས་ཏེ། སྔར་བསྟན་པའི་མཚོན་དང་ཡོ་བྱད་དང་སེམས་ཅན་གྱི་ཁྱད་པར་སྔར་བསྟན་པའི་བཅོས་
མར་བྱས་པ་ལ། ཡར་ངོའི་ཟླ་བ་ཉ་བའི་མཚན་མོ་གོང་མའི་རྫས་གང་ཡང་རུང་བ་དེ་དག་བླངས་ཏེ། མཚན་མོ་ཉི་མ་ཤར་བའི་དུས་ཀྱི་བར་དུ་བཟླ་བར་བྱའོ། །བར་འདིར་འོད་ཆེན་པོའི་ཕྲེང་བ་རས་རིས་ལ་ཡང་དག་པར་མཐོང་ལ། གལ་ཏེ་བཞོན་པའི་ཁྱད་པར་སྒྲུབ་པ་པོས་
གཟུང་བར་གྱུར་ན་ནི། དེ་ལ་ཞོན་ནས་ཅི་ལྟར་འདོད་པར་འགྲོ་བར་འགྱུར་རོ། །གལ་ཏེ་རྒྱན་གྱི་ཁྱད་པར་རམ་ཚོན་གྱི་ཁྱད་པར་དེ་བླངས་པས་དེ་བཅངས་ན། རིག་པ་འཛིན་པའི་འཁོར་ལོ་འཛིན་པར་འགྱུར་ཏེ། ཅི་ལྟར་འདོད་པར་འགྲོ་ཞིང་ལྷའི་གཟུགས་དང་ལྡན་པ་དང་། ཉི་མ་ཤར་
བ་དང་འདྲ་བར་འགྱུར་བ་དང་འོད་ཀྱི་ཕྲེང་བ་ཆེན་པོ་དང་ལྡན་པ་དང་། ལུས་ཤིན་ཏུ་གསལ་བར་འགྱུར་བ་དང་རིག་པ་འཛིན་པ་ཐམས་ཅད་ཀྱི་མངའ་བདག་ཏུ་འགྱུར་རོ། །རིང་དུ་འཚོ་ཞིང་བསྐལ་པ་ཆེན་པོར་གནས་པ་དང་རིག་པ་འཛིན་པ་བྱེ་བ་ཁྲི་ཕྲག་བརྒྱ་སྟོང་གི་འཁོར་དུ་མ་
དང་ལྡན་པ་དང་། ལྷའི་ནོར་བུ་རིན་པོ་ཆེའི་གཞལ་མེད་ཁང་ལ་སྤྱོད་པ་དང་བཞོན་པ་གང་སྔར་ཡོངས་སུ་བརྟགས་པ་སའི་རང་བཞིན་གྲུབ་ན། དེ་ཉིད་འདིར་མཐུ་ཆེན་པོ་དང་ལྡན་པར་འགྱུར་ཏེ་བཞོན་པ་དེ་ཉིད་འདིའི་གྲོགས་པོར་འགྱུར་བ་དང་གཞན་གྱི་སྔགས་འགུགས་པར་བྱེད་པ་
གྲུབ་པ་རྣམས་ཀྱི་བརྟེན་པའི་གནས་སུ་གྱུར་པ། བདག་གི་སྔགས་ཀྱི་གྲུབ་པ་ལ་ཡང་དག་པར་སྦྱོར་བར་བྱེད་པ། བྱམས་པའི་བདག་ཉིད་དང་ཕན་པར་འདོད་པས་རབ་ཏུ་འབྲེལ་བ་གང་འདི་ཉིད་ཀྱི་མཚོན་དང་རྒྱན་དང་རིན་པོ་ཆེའི་ཁྱད་པར་དང་། སྟན་དང་གནས་མལ་དང་སེམས་
ཅན་ལ་སོགས་པ་ཉིད་འདི་ལ་སྲུང་བ་ཆེན་པོ་ཉིད་དང་སྦ་བ་དང་སྦེད་པ་ལ་རྟག་ཏུ་འབྲང་བར་འགྱུར་རོ་མཐུ་ཆེན་པོ་དང་བརྩོན་འགྲུས་ཆེན་པོ་དང་ལུས་ཆེན་པོ་དང་ལྡན་པར་འགྱུར་རོ། །འཇམ་དཔལ་གཞོན་ནུར་གྱུར་པ་མངོན་སུམ་དུ་མཐོང་བར་འགྱུར་ཞིང་ལེགས་སོ་ཞེས་བྱ་བ་ཡང་

སྦྱིན་པར་མཛད་ལ། སྤྱི་བོ་ལ་རེག་པར་མཛད་ཅིང་བྱང་ཆུབ་ཀྱི་སྙིང་པོ་ཐོབ་ཀྱི་བར་དུ་དགེ་བའི་བཤེས་གཉེན་དུ་སྒྲུབ་པར་མཛད་དོ། །སྟོབས་བཅུ་ཉིད་ཀྱང་ངེས་པར་ཐོབ་པར་མཛད་ཅིང་། སེམས་ཅན་ཐམས་ཅད་ཟིལ་གྱིས་གནོན་ཅིང་མཆོད་པར་ཡང་འགྱུར་རོ། །འབྱུང་པོ་
ཐམས་ཅད་ཀྱིས་མི་ཚུགས་པར་འགྱུར་རོ། །ཡང་དག་པའི་རྒྱུད་ཀྱི་མཐའ་གཅོད་པ་མེད་པར་འགྱུར་བ་དང་ས་ཐོབ་པར་འགྱུར་བ་དང་སྟོབས་བཅུ་དང་། བྱང་ཆུབ་སེམས་དཔའི་ས་ངེས་པར་ཐོབ་པར་འགྱུར་ཏེ། མདོར་ན་ལས་དམ་པ་ཐམས་ཅད་གནས་དམ་པ་དག་ཏུ་གནས་ནས། རས་
རིས་དམ་པ་དག་གི་མདུན་དུ་མཆོད་པ་དམ་པ་ལ་མངོན་པར་དགའ་བས་ལས་དམ་པ་གཞན་དག་ཁོ་ན་བྱའོ། །རིག་པ་འཛིན་པ་ཉིད་དུ་ནམ་མཁའ་ལ་འགྲོ་བ་དང་། བྱང་ཆུབ་སེམས་དཔའི་རྗེས་སུ་ཞུགས་པ་དང་མངོན་པར་ཤེས་པ་ལྔ་ཉིད་དང་ས་དང་སྔགས་ཐོབ་པ་ཉིད་དང་ལུས་འདི་ཉིད་
ཀྱིས་འཇིག་རྟེན་གྱི་ཁམས་དག་ཏུ་འགྲོ་བ་ཉིད་དང་སྟོབས་བཅུའི་རྒྱུད་ཡོངས་སུ་རྫོགས་པར་བྱ་བའི་ཕྱིར་དང་། འཕགས་པ་འཇམ་དཔལ་མངོན་སུམ་དུ་མཐོང་བ་ཉིད་ཀྱི་ཕྱིར་དང་འབྲས་བུ་ཡོད་པར་མཐོང་བའི་ཆོས་སྟོན་པ་མཉན་པའི་ཕྱིར་དང་། སངས་རྒྱས་ཀྱི་གདུང་རྒྱུན་མི་གཅད་པའི་
ཕྱིར་དང་། ཐམས་ཅད་མཁྱེན་པའི་ཡེ་ཤེས་མཐར་གྱིས་རྗེས་སུ་ཐོབ་པ་ཉིད་ཀྱི་ཕྱིར་དང་། ཆོས་ཀྱི་སྤྲིན་ལས་བྱུང་བའི་སྔགས་བཟང་པོ་ལ་འཇུག་པ་ཉིད་ཀྱི་ཕྱིར་དང་། ཉོན་མོངས་པ་བསྐམ་པ་དང་བདུད་རྩིའི་ཆར་གྱིས་ཉོན་མོངས་པ་ཞི་བར་བྱ་བའི་ཕྱིར་དང་། འཇིག་རྟེན་རྗེས་སུ་གཟུང་
བ་ལ་རབ་ཏུ་འཇུག་པར་རྗེས་སུ་སྒྲུབ་པ་ཉིད་ཀྱི་ཕྱིར་དང་། དེ་བཞིན་དུ་ཆོས་ཀྱི་ཚུལ་གཟུང་བའི་ཕྱིར་དང་། དེ་བཞིན་གཤེགས་པའི་གསུང་དོན་ཡོད་པར་བྱ་བའི་ཕྱིར་དང་། སྔགས་ཀྱི་ཐབས་ཀྱི་སྒྲུབ་པའི་ཆོ་ག་རབ་ཏུ་གསང་བ་ཉིད་ཀྱི་ཕྱིར་དང་། སངས་རྒྱས་དང་བྱང་ཆུབ་
སེམས་དཔའ་ཐམས་ཅད་དང་རང་སངས་རྒྱས་དང་འཕགས་པ་ཉན་ཐོས་ཀྱི་བདག་ཉིད་ཆེན་པོ་འབྱུང་བ་ཉིད་ཀྱི་ཕྱིར། ཆོ་གའི་རྒྱལ་པོ་རབ་འབྱམ་སྔགས་ཀྱི་མཐུ་དང་རབ་ཏུ་རྣམ་པར་ལྡན་པ་འདི་རས་རིས་ཆེན་པོའི་མདུན་དུ་ཉེ་བར་གནས་ལ་བསྒྲུབ་པར་བྱ་སྟེ། འཇིག་རྟེན་དང་འཇིག་རྟེན་

ལས་འདས་པའི་སྔགས་ཀྱི་ཆོ་ག་དང་། སྔགས་རྒྱུད་ཐམས་ཅད་ཀྱི་ཆོ་གའི་ལམ་གྱི་སྟེ། མདོར་ན་འདིར་ཆོ་ག་གཞན་དུ་གསུངས་པའི་ལས་ཀྱིས་ཀྱང་ཆོ་གའི་རྒྱལ་པོ་འདི་བསྒྲུབ་པར་བྱ་སྟེ། མྱུར་དུ་དེ་དག་གི་སྔགས་རྣམས་འགྲུབ་པར་འགྱུར་ཏེ། གང་ངས་བསྟན་པ་དེ་དག་ངེས་པར་འགྲུབ་
པར་འགྱུར་རོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། འཕགས་པ་འཇམ་དཔལ་གྱི་རྩ་བའི་ཆོ་ག་བཅུ་པ་རས་རིས་ཆེན་པོའི་ཆོ་གའི་ལེའུ་རབ་འབྱམ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་ཡང་གནས་གཙང་
མའི་གཞལ་མེད་ཁང་ལ་གཟིགས་ནས། འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱི་རས་རིས་བར་མའི་ཆོ་ག་གཞན་སྒྲུབ་པའི་ཐབས་ཀྱི་ཆོ་ག་ཡོད་དེ། མདོར་བསྡུས་ནས་བཤད་ཀྱིས་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །
དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་ལ་ཐུགས་བརྩེ་བ་དང་སྟོན་པ་སེམས་ཅན་ཐམས་ཅད་ལ་ཕན་པར་དགྱེས་པ་དང་། བདག་ཅག་ལ་ཐུགས་བརྩེ་བའི་ཕྱིར་དང་། མ་འོངས་པའི་སྐྱེ་བོ་རྣམས་ལ་
གཟིགས་ནས། དེའི་དུས་ལ་བབ་པར་མཁྱེན་ན་དེ་བཤད་དུ་གསོལ། དེ་སྐད་ཅེས་གསོལ་པ་དང་། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཉོན་ཅིག་དང་པོར་རེ་ཞིག་ཚུལ་ཁྲིམས་དང་བརྟུལ་ཞུགས་དང་། གཙང་སྦྲའི་སྤྱོད་པ་དང་
ངེས་པར་སྡོམ་པ་དང་བཟླས་པ་དང་། སྦྱིན་སྲེག་དང་བསམ་གཏན་དང་ཆོ་ག་གང་དུ་ལེགས་པར་རབ་ཏུ་གནས་པ་ལ་སྔགས་ཐམས་ཅད་ཀྱི་སྤྱོད་པ་སྒྲུབ་པའི་ལས་འབྲས་བུ་དང་བཅས་ཤིང་དོན་ཡོད་པར་འགྱུར་ཏེ། སྔགས་ཐམས་ཅད་ཀྱི་སྦྱོར་བ་འགྲུབ་པར་འགྱུར་རོ། །ངས་བཤད་
པ་དེ་གང་ཞེ་ན། གཞོན་ནུ་ཉོན་ཅིག །དང་པོར་རེ་ཞིག་རིག་པ་དང་བརྟུལ་ཞུགས་དང་། ཚུལ་ཁྲིམས་ཀྱི་ཡི་དམ་དང་པོ་ཉིད་དུ་བླང་བར་བྱས་ལ། དང་པོ་རེ་ཞིག་དཀྱིལ་འཁོར་གྱི་སློབ་དཔོན་གྱིས་བསྟན་པའི་དམ་ཚིག་ཁྱོད་ཀྱི་ཆོ་གའི་རྒྱལ་པོར་བསྟན་ཅིང་སྔར་བཤད་པ་

ལ་རྗེས་སུ་འཇུག་པར་བྱའོ། །བློ་གསལ་བ་ཡིད་གཞུངས་པ་དང་ལྡན་པ། སློབ་དཔོན་དུ་དབང་བསྐུར་བ་ཁྱོད་ཀྱིས་བསྟན་པའི་ཆོ་ག་ཤེས་པ། དགེ་བ་གསལ་བའི་ཆོས་དང་ལྡན་པ། བདེན་པར་སྨྲ་བ་སྤྲོ་བ་ཆེན་པོ་དང་ལྡན་པ་བྱས་པ་གཟོ་བ། ཡིད་གཞུངས་
པ་དང་ལྡན་པ། འདྲིས་བརྟེན་པ་ཧ་ཅང་མི་རྒན་ཧ་ཅང་མི་གཞོན་པ་རྙེད་པ་དང་། བཀུར་སྟི་ལ་ཆགས་པ་མེད་པ་ཚངས་པར་སྤྱོད་པ། སྙིང་རྗེ་དང་ལྡན་པ་རྙེད་པ་ཙམ་མམ། ལོངས་སྤྱོད་ཀྱི་རྒྱུ་ཙམ་མམ། རྗེས་སུ་ཆགས་པའི་རྒྱུར་ཡང་རྫུན་མི་སྨྲ་ན་ཅུང་ཟད་ཙམ་མམ།
ཆགས་པའམ་རྨོངས་པ་ཙམ་གྱིས་རྣམ་པར་ལྟ་སྨོས་ཀྱང་ཅི་དགོས། དམ་བཅས་པ་བརྟན་པ་དང་སེམས་ཅན་ཐམས་ཅད་ལ་སེམས་མཉམ་པ་དང་། སྙིང་རྗེ་དང་ལྡན་པ་དང་ཚུལ་ཁྲིམས་དང་ལྡན་པ་དང་། སྔོན་དུ་སྤྱད་པ་བྱས་པ་དང་ཁྱོད་ཀྱི་གསང་བའི་སྔགས་རྗེས་སུ་
ཟློས་པ་དང་སྔ་མ་ཉིད་དུ་རིག་པ་གོམས་པར་བྱས་པ་དང་། ཁྱོད་ཀྱི་དཀྱིལ་འཁོར་ལ་མཐར་གྱིས་ཡང་དག་པར་ཞུགས་པ་དང་། འཇིག་རྟེན་ཤེས་པ་དང་ཆོ་ག་ཤེས་པ་དང་ཡང་དག་པར་རྗེས་སུ་འཛིན་པར་བྱེད་པ་དང་། འབྲས་བུ་དང་ལྡན་ཞིང་མཁས་པ་དང་ལེགས་པ་ལ་
རབ་ཏུ་ཞུགས་པ་དང་གཟུགས་མཛེས་པ་དང་འདོད་པ་མེད་པ་དང་། ཆགས་པ་མེད་པ་དང་དཔའ་བ་དང་བརྩོན་འགྲུས་བརྟན་པ་དང་ནད་མེད་པ་སྟེ། ནད་གང་གིས་ལས་མི་ནུས་པའི་ངང་ཚུལ་ཅན་གྱི་ནད་མེད་པ་དང་རིགས་མཐོན་པོར་སྐྱེ་བའོ། །ཡོན་ཏན་དེ་དག་དང་ལྡན་
ན་ནི་དཀྱིལ་འཁོར་གྱི་སློབ་དཔོན་དུ་འགྱུར་ལ། སྒྲུབ་པ་པོ་ཡང་དེ་དང་མཉམ་པ་སྟེ། ཡན་ལག་ལྷག་པའམ་མ་ཚང་བ་ཅུང་ཟད་ཀྱང་མེད་པའོ། །དེ་ལྟ་བུའི་དཀྱིལ་འཁོར་གྱི་སློབ་དཔོན་ལ་མཆོད་པ་བྱས་ཤིང་དོན་དུ་གཉེར་བར་བྱས་ཏེ། སློབ་དཔོན་དང་ལྷན་ཅིག་བྱང་
ཆུབ་སེམས་དཔའ་ཆེན་པོ་འཕགས་པ་འཇམ་དཔལ་གཞོན་ནུར་གྱུར་པའི་དམ་ཚིག་ལ་རྗེས་སུ་འཇུག་པར་འཚལ་ན། སློབ་དཔོན་གྱིས་བདག་ལ་ཐུགས་བརྩེ་བའི་སླད་དུ། ཕན་པའི་ཐུགས་དང་བརྩེ་བའི་ཐུགས་ཀྱིས་དེ་བཤད་དུ་གསོལ། དེ་ནས་དཀྱིལ་འཁོར་གྱི་

སློབ་དཔོན་དེས་སྔར་བསྟན་པའི་ཆོ་གས་སློབ་མ་ལ་སྔ་མ་ཅི་ལྟ་བུ་བཞིན་དུ་བརྟགས་ནས་རབ་ཏུ་གཞུག་པར་བྱ་སྟེ། སྔར་ཅི་ལྟར་དབང་བསྐུར་བ་བཞིན་དུ་ཕྱིས་ཀྱང་སྦྱིན་པར་བྱའོ། །གོ་རིམས་ཅི་ལྟ་བ་བཞིན་དུ་དམ་ཚིག་བསྟན་ཏེ། གསང་བའི་ཕྱག་རྒྱ་དང་རྒྱུད་དང་སྔགས་དང་ལས་
ཀྱང་དུས་རིང་པོ་ཉིད་ནས་ངེས་པར་བརྟགས་ཏེ། བསམ་པ་ཤེས་ནས་བསྟན་པར་བྱ་སྟེ། སྔགས་ལ་སོགས་པའི་ལས་རྣམས་ཀྱང་ཐམས་ཅད་དུ་གཞན་དུ་མ་ཡིན་ནོ་ཞེས་ཆོ་ག་འདི་ལྟར་བསྟན་པ་ཡིན་ནོ། །དེ་ནས་སློབ་མས་དཀྱིལ་འཁོར་གྱི་སློབ་དཔོན་ལ་ཅི་ནུས་པས། གང་
གིས་སློབ་དཔོན་དགྱེས་པ་བདག་དང་ལོངས་སྤྱོད་རབ་ཏུ་དབུལ་བར་བྱའོ། །དེ་ནས་དཀྱིལ་འཁོར་གྱི་སློབ་དཔོན་དེས་བུའི་འདུ་ཤེས་ཉེ་བར་གཞག་པར་བྱ་སྟེ། བུ་བཞིན་དུ་བསྒྲུབ་པར་བྱ་ཞིང་མ་བཞིན་དུ་ཡང་ལོངས་སྤྱོད་ཀྱིས་ཉེ་བར་བསྡུ་བར་བྱའོ། །དེ་ནས་སྒྲུབ་པ་པོ་དེས་
སྔགས་གང་ཡང་རུང་བ་བཟུང་སྟེ། གཅིག་པུ་དབེན་པར་སོང་ནས་སྔར་བསྟན་པ་གོང་མ་བཞིན་དུ་རྒྱ་ཆེར་སྦྱར་ཏེ། དེ་དག་ཉིད་ཀྱིས་སྔགས་དག་གིས་ནི་སྤྱན་དྲང་བ་དང་གཤེགས་སུ་གསོལ་བ་དང་། མར་མེ་དང་དྲི་དང་བདུག་པ་དང་གཏོར་མ་དང་ལྷ་བཤོས་དཀྱིལ་
འཁོར་ལ་གསུངས་པ་ཉིད་ཀྱི་ཆོ་གས་རྒྱ་ཆེར་བྱ་སྟེ། སྤྱན་དྲངས་ནས་གདན་དང་མཆོད་ཡོན་ཕུལ་ལ། དུས་མཚམས་གསུམ་དུ་ཁྲུས་ལན་གསུམ་བྱ་ཞིང་། གོས་ལན་གསུམ་བརྗེ་ཞིང་ཉིན་རེ་བཞིན་དུ་བཟླས་པ་བྱའོ། །དེ་ལ་དུས་གསུམ་ཞེས་བྱ་བ་ནི་མཚན་མོའི་མཐའ་
ནས་བརྩམས་པ་ཡིན་ཏེ། ཟུང་ཙམ་ནས་ཉི་མ་འཆར་བའི་བར་འདིར་དང་པོའི་དུས་སུ་བརྗོད་དོ། །ཉི་མ་གུང་ནི་ཉི་མ་གཉི་གའི་གུང་ཙམ་གྱི་ཚད་དུ་ནམ་མཁའ་ལ་གནས་པའི་ཉི་མའི་དཀྱིལ་འཁོར་ལ་ནི་ཉི་མ་གུང་གི་དུས་ཞེས་བརྗོད་དོ། །ཉི་མ་ནུབ་པའི་དུས་སུ་ལྷག་མ་ཟུང་
ཙམ་ལུས་པའི་དུས་གསུམ་པ་ཞེས་བརྗོད་དོ། །ཚུལ་ཁྲིམས་བརྟུལ་ཞུགས་ཡང་དག་ལྡན། །སློབ་དཔོན་མཁས་པ་ཆེན་པོ་དང་། །མཐོན་པོའི་རིགས་སུ་སྐྱེས་པ་དང་། །རྣམ་པ་ཀུན་དུ་བརྩོན་འགྲུས་བརྟན། །སྔགས་རྒྱུད་དག་ལ་མངོན་བརྩོན་དང་། །བྱ་བ་ཀུན་ལ་བློ་གྲོས་

དགེ། །ཞིབ་ཅིང་མཁས་ལ་ཆོག་ཤེས་དང་། །ཆོས་ཀྱི་དབྱིངས་ནི་རྟག་ཏུ་འཛིན། །སྤྲོ་བ་ཆེ་ཞིང་གཟི་བརྗིད་ཆེ། །འཇིག་རྟེན་ཆོས་ལ་ལྟོས་པ་མེད། །ཐུབ་མཆོག་ཆོས་ལ་དད་པ་དང་། །འཇིག་རྟེན་ན་ནི་ཡོངས་སུ་བསྔགས། །དབེན་པ་ཤེས་ཤིང་བཟླས་པ་བྱེད། །
སྔོན་དུ་བསྙེན་པས་རྗེས་བསྙེན་བྱེད། །འཇམ་པའི་དབྱངས་ཀྱི་སྔགས་ཤེས་ཤིང་། །མཐོང་བས་ངེས་འཛིན་དེ་མཆོག་བྱེད། །སངས་རྒྱས་གསུངས་པའི་སྔགས་རྣམས་ལ། །འཇིག་རྟེན་པ་ཡི་སྦྱོར་བ་ཤེས། །སྲུང་བྱེད་མཐུ་ནི་བརྟན་པ་དང་། །རྟག་ཏུ་གཙང་སྦྲའི་སྤྱོད་ལ་དགའ། །
སངས་རྒྱས་བསྟན་པའི་ལམ་ལ་ནི། །ཐམས་ཅད་དུ་ནི་འཇུག་པར་བྱེད། །རབ་བསྔགས་རྒྱལ་བས་བསྟོད་པ་ཡི། །སྔགས་ཟློས་པ་ལ་བརྩོན་པར་བྱེད། །ལས་འབྲས་དག་ལ་རྟག་ཡིད་ཆེས། །འཇིག་རྟེན་ཕ་རོལ་དེ་བཞིན་ནོ། །སྡིག་པ་ཀུན་ལ་འཇིགས་བྱེད་པ། །ཤིན་ཏུ་
ཕྲ་བའང་དེ་བཞིན་ནོ། །གཙང་ཞིང་གྲིམས་དང་ལེ་ལོ་མེད། །ཡིད་གཞུངས་བལྟ་ན་སྡུག་པ་དང་། །སྟོབས་བཅུ་ལྡན་པས་སྔགས་བཤད་དང་། །དེ་བཞིན་རྒྱལ་བའི་སྲས་དང་ནི། །གང་དག་འཇིག་རྟེན་སྔགས་དག་དང་། །རྡོ་རྗེ་པདྨའི་རིགས་དག་གིས། །དེ་ལ་རྟག་ཏུ་བརྩོན་བྱེད་
དང་། །གཞུང་དང་བསྟན་བཅོས་དོན་ཀློག་པ། །ནད་མེད་པ་དང་སྟོབས་ལྡན་དང་། །རྒན་དང་གཞོན་པ་རྣམ་པར་སྤངས། །སྔགས་གྲུབ་དེ་བཞིན་ཤེས་ཉེན་ཅན། །ཀུན་ནས་མྱུར་དུ་བྱེད་པ་དང་། །ལས་མཐའ་མི་རིང་ང་རྒྱལ་ཆུང་། །ཟུར་ཙམ་གྱིས་གོ་ཁྱད་པར་ཅན། །ཚངས་པར་
སྤྱོད་ཅིང་ཤེས་རབ་ཆེ། །གཅིག་པུ་འདྲེ་བར་མི་བྱེད་དང་། །འཇམ་དཔལ་གྱིས་གསུངས་རྒྱུད་དག་ལ། །དབང་བསྐུར་ཐོབ་ཅིང་དཔའ་བ་དང་། །བཟླས་པའི་མཐར་བྱས་ལྡན་པ་དང་། །དེ་བཞིན་རིག་པ་གོམས་བྱས་དང་། །སེམས་དཔའ་ཆེ་ཞིང་འཇིག་རྟེན་ཤེས། །འགྲོ་བའི་དེ་ཉིད་
རྗེས་སེམས་དང་། །ལེགས་པའི་ལམ་ཉིད་རབ་སྦྱར་བྱེད། །སྦྱིན་བྱེད་འབྱུང་པོ་ཕན་ལ་དགའ། །ཁྱད་པར་ཅན་དེའི་སློབ་དཔོན་ལ། །རྟག་ཏུ་དོན་དུ་གཉེར་བར་བྱ། །དཀྱིལ་འཁོར་དེ་ནི་བྲིས་པ་ལ། །སྔགས་རྣམས་གྲུབ་པ་སྟེར་བར་འགྱུར། །དེ་ཉིད་ཀྱིས་ནི་དབང་བསྐུར་ན། །འབྲས་བུ་ཆེན་

པོ་སྟེར་བར་འགྱུར། །གྲུབ་པ་འདོད་པའི་སློབ་མས་ཀྱང་། །ཐུབ་མཆོག་དེ་ནི་རྟག་ཏུ་མཆོད། །དེ་ཡི་བཀའ་ནི་མི་འགོམ་པར། །སློབ་མས་འབད་ནས་བྱ་བ་ཡིན། །ཅི་ལྟར་འབྱོར་པ་ཡོད་པ་བཞིན། །ལོངས་སྤྱོད་དེ་ལ་སྦྱིན་པར་བྱ། །ཉུང་བའང་ཡང་ན་མང་བའང་རུང་། །གང་
གིས་དགའ་བ་ཐོབ་འགྱུར་བ། །ལུས་དང་སྲོག་གི་དོན་ཕྱིར་ནི། །ནོར་ནི་ཅི་ལྟར་སྦྱིན་པ་བཞིན། །སློབ་མ་ཆོས་རིག་དེ་བཞིན་དུ། །སློབ་དཔོན་ཕྱིར་ནི་ནོར་སྦྱིན་ན། །ཚེ་དང་ནད་མེད་དེ་བཞིན་དུ། །གྲགས་པ་ཐོབ་པར་འགྱུར་བ་ཡིན། །སློབ་མས་བླ་མ་དེ་མཆོད་ན། །དག་པའི་འགྲོ་
བ་ཐོབ་པར་འགྱུར། །ལམ་ནི་སྣ་ཚོགས་ཉེར་བསྟན་པས། །དེ་ལ་སྔགས་ནི་འགྲུབ་པར་འགྱུར། །དེ་ལ་བསྟེན་དང་བསྙེན་བཀུར་བྱས། །རི་མོ་བྱས་དང་མཆོད་པས་ནི། །སངས་རྒྱས་རྣམས་དང་དེ་བཞིན་དུ། །རྒྱལ་བའི་སྲས་རྣམས་མཉེས་པར་འགྱུར། །བླ་མ་རྟག་ཏུ་བསྙེན་བཀུར་
ན། །ལྷ་རྣམས་ཐམས་ཅད་དགའ་བར་འགྱུར། །བླ་མ་སྔགས་རྣམས་མཐོང་བ་ཡིས། །དེ་ལྟར་ཐམས་ཅད་བསྟན་པ་ཡིན། །སྒྲུབ་པ་པོས་ནི་དང་པོར་ཡང་། །དམ་ཚིག་ལ་ནི་འཇུག་པར་བྱ། །དམའ་བའམ་དེ་དང་མཉམ་པའང་རུང་། །གལ་ཏེ་ཁྱད་པར་གྱུར་ན་ཡང་། །རྨོངས་
པའམ་ལྷག་པ་ཡིན་ཡང་རུང་། །རྟག་ཏུ་བླ་མ་བརྙས་མི་བྱ། །ཅི་ལྟར་དེ་ཉིད་རྗེས་མཐོང་ལ། །སྔགས་འགྲུབ་པ་ལ་བྱ་བ་ཡིན། །སྔར་བསྟན་པ་ཡི་སློབ་མ་ཡིས། །དེ་ལ་ཕྲག་དོག་བྱ་བ་མིན། །ལུས་ཅན་བརྩེ་བ་འཕེལ་བྱེད་པའི། །མིག་ནི་གང་ལ་ཡོད་གྱུར་པ། །དེ་ནི་
སློབ་མ་ཉིད་བྱ་སྟེ། །སློབ་དཔོན་རྒྱུར་ཡང་བྱ་བ་ཡིན། །གང་དུ་ཕན་ཚུན་རྒྱུད་ལ་ནི། །བརྩེ་བའི་ཕྲེང་བ་ཡོད་པ་དང་། །བརྩེ་བའི་རྒྱུད་ནི་འཛིན་པ་ལ། །དེ་ལ་སྔགས་ནི་སྦྱིན་པར་བྱ། །སློབ་དཔོན་ལ་ནི་སློབ་མ་འམ། །བླ་མས་སློབ་མ་མཐོང་བའང་རུང་། །རྟག་ཏུ་སྤྲོ་བར་འགྱུར་
བ་ལ། །གཉི་ག་ལ་ནི་གྲུབ་པ་གནས། །དེ་དག་ལ་ནི་རྟག་ཏུ་ཡང་། །སྔགས་སྤྱོད་ལམ་ནི་བསྟན་པར་བྱ། །གཉི་གས་ཕ་དང་བུར་ཤེས་ལ། །སྔགས་ནི་འབྲས་བཅས་གནས་པ་ཡིན། །སློབ་མ་བླ་མས་རྟག་ཏུ་ནི། །བརྟན་དང་དགའ་བ་དེ་བཞིན་ཐོབ། །བུ་ནི་ཆོས་དང་རྗེས་མཐུན་

ལ། །འབད་པས་རྟག་ཏུ་བསྲུང་བར་བྱ། །དེ་དག་ལ་ནི་སངས་རྒྱས་ཆོས། །རྟག་ཏུ་རྒྱུན་མི་ཆད་པར་འགྱུར། །གལ་ཏེ་དེ་མེད་མགོན་བྲལ་ལ། །སྔགས་རྣམས་ཅི་སྐད་གསུངས་པ་བཞིན། །སེམས་ཅན་དབུལ་པོ་རྣམས་ལ་ནི། །ཁྱད་པར་དུ་ཡང་སྔགས་བྱིན་ན། །
སེམས་ཅན་ཀུན་ལའང་སྦྱིན་པ་བས། །སྔགས་ཀྱི་སྤྱོད་པ་ཁྱད་པར་འཕགས། །མཆོག་དང་བར་མ་ཐ་མ་ནི། །དུས་རྣམས་ཀུན་དུ་བྱ་བ་སྟེ། །རྟག་ཏུ་སེམས་ཅན་ཀུན་ལ་ནི། །རྗེས་སུ་གཟུང་བའི་ཕྱིར་བྱའོ། །འགྲོ་བའམ་སྐྱེ་གནས་རྣམ་བརྟགས་ནས། །འདོད་པ་དག་ལ་སྦྱིན་པར་བྱ། །
དེ་ནི་ཅི་ལྟར་འདོད་པའི་སྔགས། །སློབ་མས་དེ་ལ་བླང་བར་བྱ། །དེ་ཉིད་ཀྱིས་བསྟན་ལམ་ཡིན་ཏེ། །གཞན་དུ་དེ་ལྟ་མ་ཡིན་ནོ། །འཇིག་རྟེན་ཕ་རོལ་པ་ལ་ནི། །གྲུབ་པ་དེ་ལས་བསླང་བར་བྱ། །ཕ་བཞིན་མགོ་བོས་ཕྱག་བྱས་ནས། །དེ་ནས་ཅི་ལྟར་འདོད་བཞིན་འགྲོ། །དེ་ནས་གཅིག་
པུ་འགྲོ་བྱས་ནས། །མཉམ་པར་བཞག་སྟེ་བཟླས་པ་བྱ། །སློང་མོ་སློང་བས་རྗེས་འཚོ་ཞིང་། །ཐུབ་པ་དུས་གསུམ་ཟློས་པར་བྱེད། །སྔར་ནི་ཅི་ལྟར་བསྟན་པ་བཞིན། །ལམ་དུ་རབ་ཏུ་འཇུག་པར་བྱེད། །དེ་ལ་རྗེས་འཇུག་བསྟེན་པ་དང་། །འདུག་པ་དང་ནི་གནས་པའོ། །དབེན་པ་
ཆེན་པོ་རི་རྩེ་དང་། །དེ་བཞིན་ཆུ་བོའི་ངོགས་གཙང་དང་། །བ་ལང་གནས་དང་མཚོ་ཆེན་དང་། །དབེན་པ་སྐྱེ་བོ་རྣམ་སྤངས་དང་། །ལྷ་ཁང་སྟོང་དང་ཤིང་དང་ནི། །མཚན་གཅིག་རི་ནི་མཐོན་པོ་དང་། །རྒྱ་མཚོ་ཆེ་ངོགས་དགའ་བ་དང་། །གླིང་རྣམས་ཆེན་པོ་དག་དང་ནི། །རྣམ་པ་སྣ་ཚོགས་
སྔར་བསྟན་པའི། །ཡུལ་ནི་ཡིད་དུ་འོང་བ་དང་། །འདི་དག་ལས་ནི་ཕྱོགས་གཞན་དུ། །མཉམ་བཞག་སྔགས་ནི་བཟླ་བར་བྱ། །གྲོགས་པོ་མཚན་ཉིད་ལྡན་པ་ནི། །སྔགས་དོན་ལུགས་དང་ཚད་མར་ལྡན། །ཟུར་གྱི་རྣམ་པ་དེ་ཉིད་ཤེས། །བདག་དང་དེ་ཡང་འདྲ་བའོ། །དཔའ་
ཞིང་གཡུལ་ལས་རྣམ་རྒྱལ་དང་། །སྙིང་སྟོབས་ཆེ་ཞིང་བཟོད་དང་ལྡན། །རྒྱལ་བས་གསུངས་པའི་བསྟན་པ་དང་། །སྔགས་ཀྱི་སྤྱོད་པ་ལ་དད་ཅིང་། །སྔགས་པའི་མཚན་ཉིད་དང་ལྡན་ལ། །བཟོད་དང་ལྡན་པའི་གྲོགས་པོ་ལ། །དེ་ལ་འབད་པ་མེད་པར་ནི། །སྔགས་ཀྱི་ལས་

རྣམས་འགྲུབ་པར་འགྱུར། །ཐོ་རངས་མལ་ནས་ལངས་ནས་ནི། །མཚོ་ཆེན་ལས་བྱུང་ཆུ་བོ་ལས། །བྱུང་ཆུ་སྲོག་ཆགས་སྐྱོན་མེད་པའི། །བཟང་པོས་ཁྲུས་ནི་རབ་ཏུ་བྱ། །ས་དང་ལྕི་བ་ཕྱེ་མ་ཡིས། །སྔགས་ཤེས་པས་ནི་ལུས་དྲིལ་བྱ། །སྔགས་ཀྱིས་དེ་བཞིན་དག་བྱས་པའི། །
དྲི་མེད་གཙང་སྦྲར་བྱས་པའི་ཆུས། །སྔགས་ལྡན་བདག་ཉིད་ཁྲུས་བྱ་ཞིང་། །ཧ་ཅང་རིང་བར་འདུག་མི་བྱ། །དེ་ནས་ལངས་ནས་ཆུ་ངོགས་འདུག །ས་དག་གིས་ཀྱང་ལག་གཉིས་བཀྲུ། །བདུན་དང་བདུན་དང་ཡང་བདུན་ནི། །ཉི་ཤུ་རྩ་གཅིག་བར་དུ་འོ། །དེ་བཞིན་དུ་ཡང་ཉེ་རེག་
བྱ། །སོ་ཤིང་དག་ཀྱང་ཡང་དག་བྱེད། །སོ་ཤིང་རྣམ་པར་བོར་ནས་ནི། །དེ་ནས་སྐྱོབ་ལ་ཕྱག་ཀྱང་བྱ། །འཇིག་རྟེན་མགོན་ལ་ཕྱག་འཚལ་ནས། །མཆོད་པ་ཡིད་དུ་འོང་བར་བྱ། །རྣམ་པ་སྣ་ཚོགས་མཆོད་བསྟོད་དང་། །ཡང་དག་བསྟོད་པ་ཡང་ཡང་བྱ། །དྲི་ཞིམ་མེ་ཏོག་
དེ་བཞིན་དུ། །སྟོན་ལ་ཟློས་པས་མཆོད་ཡོན་དབུལ། །སངས་རྒྱས་རྣམས་དང་དེའི་སློབ་ལ། །སྤྱི་བོས་རབ་ཏུ་ཕྱག་འཚལ་ལོ། །འཇིག་རྟེན་མགོན་པོ་དེ་དག་གི། །མདུན་དུ་སྡིག་པ་བཤགས་པར་བྱ། །རས་རིས་བར་མའི་མདུན་དུ་ནི། །བདག་ཉིད་དག་ཀྱང་དབུལ་
བར་བྱ། །ཀུ་ཤའི་ཁྲེས་ནི་བྱས་པ་དེར། །ལེགས་པར་མཉམ་གཞག་འདུག་ནས་ནི། །དེས་ནི་ཕྲེང་བ་ཐོགས་ནས་སུ། །འབད་པས་བཟླས་པ་བྱ་བ་ཡིན། །ཅི་ལྟར་རྙེད་པའི་སྔགས་ཀྱིས་བྱ། །དེ་ཚེ་སྔགས་གཞན་བཟླས་མི་བྱ། །ཧ་ཅང་ངན་པ་སྤང་བྱ་སྟེ། །ཧ་ཅང་
བཟང་པོའང་དེ་བཞིན་ནོ། །བར་མ་བར་མའི་ལས་དག་ལ། །སྡོམ་ཆེན་སྔགས་ནི་རྟག་ཏུ་བཟླ། །ཧ་ཅང་སྐད་མཐོན་འབད་པས་སྤང་། །ཚིག་ནི་དམའ་བའང་མ་ཡིན་ནོ། །བར་མ་དབུས་ཀྱི་ཡུལ་དག་ཏུ། །རྗེས་མཐུན་རྒྱལ་བས་བསྔགས་པའོ། །ཧ་ཅང་སྐད་མཐོ་དམའ་བའང་
མིན། །བར་མས་རྟག་ཏུ་བཟླས་པ་བྱ། །སངས་རྒྱས་སྔ་མ་ཀུན་གྱིས་ནི། །ཚིག་ནི་ལེགས་ལྡན་ཡིན་ཞེས་གསུངས། །རྟག་ཏུ་གཞན་གྱི་རྣ་ལམ་དང་། །གཞན་གྱི་དྲུང་དུ་མི་བཟླ་འོ། །དབེན་པའི་ཕྱོགས་སུའང་བདག་རིག་པས། །སྔགས་ཀྱང་བར་མ་བཟླ་བར་བྱ། །

དེ་ལྟར་སྔགས་བཟླས་རབ་སྦྱར་ན། །སྔགས་ནི་གང་ཡང་མྱུར་དུ་འགྲུབ། །བར་མའི་སྔགས་ནི་འགྲུབ་འདོད་ན། །ཡང་དང་ཡང་དུ་བཟླས་པ་བྱ། །དེ་བས་བཟླས་པ་རྣམ་བྲལ་དང་། །སྔགས་ཀྱི་དེ་ཉིད་དོན་ལེགས་ཐོས། །དབེན་ཞིང་གདུང་བ་མེད་པར་ནི། །
ཟློས་པས་སྔགས་ནི་བཟླ་བར་བྱ། །མཚན་མོ་ཡི་ནི་བཞི་ཆ་དང་། །དེ་ཕྱེད་དེ་བཞིན་ཕྱེད་ཉིད་དང་། །སྐྱ་རེངས་དམར་པོ་ཟུང་ཙམ་ལ། །ཉི་མའི་དཀྱིལ་འཁོར་འཆར་བ་ན། །དང་པོའི་བར་མ་ཉིད་དུ་ནི། །ཐུབ་པ་མཆོག་གིས་གསུངས་པ་ཡིན། །ཟུང་ཙམ་ཁྲུ་ནི་བཞི་པ་སྟེ། །བར་མར་
ཡོངས་སུ་བསྒྲགས་པ་ཡིན། །དེ་ནས་ཉི་མ་ཕྱེད་ཤར་ན། །སྔགས་བཟླས་དེ་ཚེ་སྤང་བར་བྱ། །སྔགས་བཟླས་དེ་ཚེ་བཏང་བ་ན། །སྡོམ་བརྩོན་མཆོད་ཡོན་སླར་གཤེགས་གསོལ། །དེ་ཚེ་བཏང་བའི་ལྷག་དུས་ལ། །ཐུབ་པའི་བསྟན་ལ་དགེ་བ་བྱ། །དམ་ཆོས་བཀླག་
ལ་སོགས་པ་ནི། །ཤེས་རབ་ཕ་རོལ་ཕྱིན་ལ་སོགས། །གླེགས་བམ་ས་བཅུ་ཞེས་བྱ་བ། །མཆོད་དང་བཀླག་པ་རྟག་ཏུ་བྱ། །དེ་ནས་དུས་ལ་བབ་གྱུར་ན། །རང་སྔགས་སྔགས་ཀྱི་མགོན་པོ་དང་། །ཐུབ་པ་མཆོག་ལ་ཕྱག་འཚལ་ནས། །དེ་ནས་འཚོ་བའི་དོན་དུ་འགྲོ། །དུས་
གསུམ་སྤྱོད་དང་དེ་བཞིན་ལྡན། །དུས་སུ་ཟས་སྤྱོད་དབང་པོ་ཐུལ། །ཆོས་ཅན་སྒྲུབ་ལ་བརྩོན་པ་དང་། །སངས་རྒྱས་བསྟན་ལ་རབ་ཏུ་དད། །མི་སྨྲ་གྲོང་གི་ནང་དུ་འདུག །རྟག་ཏུ་གཙང་སྦྲ་སྤྱོད་ལ་དགའ། །ཆོས་ལྡན་སེམས་ཅན་ཁྱིམ་དུ་ནི། །སློང་དུས་རྟག་ཟློས་
བྱེད་ཅིང་འདུག །སྲོག་ཆགས་མེད་ཆོས་གྲུབ་པ་ཡི། །ཟས་ནི་གཙང་བར་གྲགས་པ་དང་། །ཡང་དག་ལྟ་བའི་ཁྱིམ་དག་དང་། །སངས་རྒྱས་བསྟན་ལ་དད་པ་ཡི། །དེ་འདྲའི་ཁྱིམ་ལ་རྟག་ཏུ་ནི། །སློང་བའི་དོན་དུ་སློང་མོ་བླང་། །ཅི་ལྟར་དཔའ་བོས་གོ་བགོས་
ཏེ། །ཉམ་ངའི་གཡུལ་དུ་འཇུག་པ་ན། །རྟག་ཏུ་དགྲ་ནི་འཇོམས་བྱེད་དེ། །དགྲ་ཡིས་འཇོམས་ཀྱང་མི་ནུས་པ། །དེ་བཞིན་སྔགས་པ་རྟག་གྲོང་དུ། །སློང་མོའི་འཚོ་བས་འཇུག་པ་ན། །གཟུགས་སྒྲ་ལ་སོགས་བཟང་པོ་ནི། །དེ་ལྟར་མཐོང་བས་ཆགས་གྱུར་ན། །

འདོད་ཆགས་ཞི་བའི་དོན་གྱི་ཕྱིར། །དགེ་བ་མི་གཙང་བསྒོམ་པར་བྱ། །ལང་ཚོའི་རྣམ་པས་བརྒྱན་པ་ཡི། །བུད་མེད་གཟུགས་ནི་མཐོང་བ་ན། །མི་གཙང་དྲི་ངན་བསྒོམ་བྱ་ཞིང་། །ཤིན་ཏུ་སྨད་པ་རྣག་དང་གཅིན། །སྲིན་བུས་ཟོས་དང་དུར་ཁྲོད་གནས། །ལུས་
ནི་མི་རྟག་སྡུག་བསྔལ་ཡིན། །བྱིས་པ་སྔགས་ལ་རྨོངས་པ་ཡིས། །འགྲོ་བ་ལྔ་པོ་དག་ཏུ་འཁོར། །ལས་ཀྱི་སྐུད་པས་བཅིངས་ནས་ནི། །ཡུན་རིང་དུས་སུ་མྱ་ངན་བྱེད། །མི་ཤེས་སྒྲིབ་པས་རྨོངས་པས་ན། །དམུས་ལོང་སྡུག་བསྔལ་རྒྱུ་ཡང་ཡིན། །གང་དུ་བློ་ནི་
ཕྱིན་ཅི་ལོག །སྐྱེ་བོ་ཆགས་པས་ཕོངས་པར་འགྱུར། །རྣམ་པ་སྣ་ཚོགས་ལས་གར་གྱི། །རྣམ་པ་དུ་མར་ཆགས་བྱེད་པས། །ཡུན་རིང་རེས་ཀྱིས་གནས་ནས་ནི། །འགྲོ་དང་འོང་བར་སྤྱོད་པར་བྱེད། །གར་བྱེད་བཞིན་དུ་སྤྱོད་པ་ཡིས། །བྲན་བཞིན་དུ་ནི་གཏོང་
བར་བྱེད། །མི་གཙང་དགའ་བའི་སེམས་ཅན་གང་། །ཡུན་རིང་ལམ་དུ་ཕོངས་པར་འགྱུར། །འཁོར་བའི་རྒྱ་མཚོའི་ཆུ་འབྱུང་བ། །ཟོ་ཆུན་གྱི་ནི་རྣམ་པ་བཞིན། །འགྲོ་བ་དེ་དག་མི་བཟད་པའི། །སྡུག་བསྔལ་ཆུ་ཡིས་ཁྱབ་པ་ཡིན། །སངས་རྒྱས་ཀྱིས་ནི་བུད་
མེད་དག །མ་འདྲེས་སྡུག་བསྔལ་རྩ་བར་གསུངས། །ཉན་ཐོས་བྱང་ཆུབ་སེམས་དཔའ་དང་། །རང་རྒྱལ་ཐུབ་པས་དེ་བཞིན་གསུངས། །འཁོར་བའི་རྒྱ་མཚོ་མི་འཁྲུགས་པ། །རྒྱ་མཚོ་འདི་ནི་སྐམ་པར་དཀའ། །བུད་མེད་སེམས་ཀྱིས་བསླུས་པས་ན། །གང་
དུ་སེམས་ཅན་བྱིང་གྱུར་ནས། །དམྱལ་བ་དུད་འགྲོའི་འཇིག་རྟེན་དང་། །ཡི་དགས་འཇིག་རྟེན་ལྷ་མ་ཡིན། །དེ་བཞིན་མི་ཡི་འཇིག་རྟེན་དང་། །ལྷ་ཡི་འགྲོ་བའི་འགྲོ་བར་འགྲོ། །བུད་མེད་ཆགས་པས་བསླུ་པས་ན། །ཀུན་ནས་ཡོངས་སུ་འཁོར་འགྱུར་ཞིང་། །
འདམ་ཆེན་ནང་དུ་འབྱིང་འགྱུར་ལ། །འཁོར་བའི་རྒྱ་མཚོ་བཙོན་ར་ཡིན། །བུད་མེད་ཆགས་པའི་བླུན་པོའི་མི། །རུལ་བའི་རོ་ལ་ཝ་བཞིན་ནོ། །གང་དུ་མི་ནི་ཆགས་བྱེད་པ། །ཤིན་ཏུ་མི་བཟད་སྡུག་བསྔལ་བཟོད། །དཀར་པོའི་ཆོས་ནི་དེས་ཉམས་བྱེད། །སངས་རྒྱས་

བསྟན་ལ་ཞུགས་པས་ནི། །སྡུག་བསྔལ་འཁོར་བའི་རྒྱ་མཚོ་ཉིད། །ཐམས་ཅད་ཡོངས་སུ་ཟློག་བྱེད་ཅིང་། །སྔགས་ཟློས་དགའ་ཞིང་བརྩོན་པ་དང་། །གྲགས་པ་ཆེ་ཞིང་ཆགས་དང་བྲལ། །གཟི་བརྗིད་ལྡན་ཞིང་ཀུན་དང་མཛའ། །དེ་དག་ལ་ནི་སྡུག་བསྔལ་མེད། །
ཡང་དག་སྡོམ་དང་ཚངས་བདེན་ཤེས། །བླ་མ་ལྷ་ལ་མཆོད་བྱེད་དང་། །མ་དང་ཕ་ལ་གུས་པ་རྣམས། །དེ་དག་ལ་ནི་སྡུག་བསྔལ་མེད། །དམ་པའི་དོན་ལ་བརྟེན་ན་ནི། །མི་རྟག་སྡུག་བསྔལ་སྟོང་པ་དང་། །དེ་བཞིན་དབྱིག་དུག་ཟུག་རྔུ་བཞིན། །ཟློས་པས་བུད་མེད་ལུས་བསམ་བྱ། །
བློ་ངན་ཕུང་པོའི་ལྕགས་ཀྱུས་ཟིན། །འཁོར་བ་ལས་ནི་འབྱུང་མི་ནུས། །རྟག་ཏུ་བུད་མེད་ཆགས་གྱུར་པ། །དེ་ལ་གྲུབ་པ་ཡོད་མ་ཡིན། །ཟློས་པ་འདི་ལ་ཚུལ་ཁྲིམས་ཉམས། །དེ་ལ་གྲུབ་པ་མཆོག་མེད་ཅིང་། །གྲུབ་པ་འབྲིང་ཡང་ཡོད་མེད་དེ། །གྲུབ་པ་ཐ་མའང་ཡོད་མ་
ཡིན། །ཚུལ་ཁྲིམས་འཆལ་ལ་ཐུབ་དབང་གིས། །སྔགས་གྲུབ་པར་ནི་མ་གསུངས་ཏེ། །མྱ་ངན་འདས་གྲོང་འགྲོ་བ་ཡི། །ཡུལ་དང་ཕྱོགས་ཀྱང་མ་ཡིན་ནོ། །བྱིས་པ་ངན་པ་འདི་ལ་ནི། །སྔགས་གྲུབ་པ་ནི་ག་ལ་ཡོད། །སྐྱེ་བོ་ཚུལ་ཁྲིམས་འཆལ་འདི་ལ། །དེ་ལ་བདེ་
འགྲོ་ག་ལ་ཡོད། །མཐོ་རིས་སུ་ཡང་མི་འགྱུར་ཞིང་། །བདེ་བ་མཆོག་ཏུའང་མི་འགྱུར་ན། །རྒྱལ་བས་གསུངས་པའི་སྔགས་རྣམས་ནི། །འགྲུབ་པར་འགྱུར་བ་སྨོས་ཅི་དགོས། །ཏ་ལའི་ཤིང་གི་མགོ་བོ་ནི། །གང་ཚེ་བཅད་པར་གྱུར་པ་ན་འང་། །སྔོན་པོ་ཉིད་ཀྱི་སྐལ་མེད་ན། །
མྱུ་གུ་ནམ་ཞིག་འབྱུང་བར་འགྱུར། །དེ་བཞིན་སྔགས་གྲུབ་རྨོངས་པ་དང་། །ཚུལ་ཁྲིམས་ཉམས་ཤིང་སྡིག་ལས་བྱེད། །རྟག་ཏུ་བུད་མེད་ཆགས་པ་ལ། །འདིར་ནི་རབ་ཏུ་བསྟན་པ་ཡིན། །མི་དགེའི་བཤེས་གཉེན་བསྟེན་པ་ལ། །སྔགས་ཀྱི་རྒྱལ་པོ་ག་ལ་འགྲུབ། །
དེ་བས་དུལ་དང་རྟག་བཟླས་བྱེད། །བུད་མེད་སྐྱོན་ནི་རྣམ་སྤྱོད་ལ། །དེ་ལ་ཆགས་པ་རྣམ་སྤང་བ། །དེ་ལ་གྲུབ་པར་བརྗོད་པ་ཡིན། །བྱིས་པ་བུད་མེད་ལ་བརྒྱལ་བ། །གཞན་ལ་གྲུབ་པ་བསྟེན་པ་མིན། །བློ་ལྡན་གཡེང་བ་མེད་ལ་དགའ། །གཙང་ཞིང་མ་ཆགས་

ཤེས་ཉེན་ཅན། །རིགས་མཐོ་བརྟན་དང་དཔའ་བ་དང་། །བརྩེར་ལྡན་མཐོང་ན་དགའ་བ་དང་། །ཆོས་དང་ཆོས་མིན་རྣམ་དཔྱོད་ཤེས། །དེ་ལ་གྲུབ་པ་རྙེད་མི་དཀའ། །དེ་ལྟར་སྔགས་ཤེས་ཞུགས་པ་ནི། །གྲོང་དུ་སློང་ཕྱིར་རབ་ཏུ་འཇུག །སྔར་ནི་བརྟགས་པའི་གནས་དག་
ཏུ། །ཅི་ལྟར་འདོད་བཞིན་སོང་ནས་ནི། །བློ་ལྡན་དག་པས་བསླང་བའི་སྣོད། །གཙང་བའི་ཕྱོགས་སུ་ཡང་དག་གཞག །ཕྱི་རོལ་སོང་ནས་རྐང་གཉིས་བཀྲུ། །དེ་ནས་ཡང་ནི་ཡན་ལག་སྟེ། །དེ་ཚེ་སྲོག་ཆགས་མེད་པའི་ཆུས། །ལག་པ་གཡས་པས་བྱིན་པ་གཡས། །
ལག་པ་གཡོན་པས་བྱིན་པ་གཡོན། །ཡང་ན་གཉི་ག་དུས་གཅིག་བཀྲུ། །ས་ནི་ལག་གཡོན་ཡང་བཞག་ནས། །སྔར་ནི་ཡང་དག་བཞག་པ་ཡི། །བདུག་པ་གཙང་མའི་ས་དག་གིས། །ལག་པ་གཉིས་ནི་རབ་ཏུ་བཀྲུ། །དེ་ནས་སྔགས་ཀྱི་དག་བྱས་པའི། །དྲི་མེད་
གཙང་སྦྲ་དག་སྣོད་ལ། །བ་ནི་སེར་སྐྱས་བོར་བ་ཡི། །ལྕི་བ་སར་པ་བླང་བར་བྱ། །སྲོག་ཆགས་མེད་པའི་ཆུར་སྦྱར་བས། །སྟོན་པ་ལ་ནི་དཀྱིལ་འཁོར་བྱ། །དང་པོ་ཐུབ་པ་མཆོག་ལ་ནི། །ཁོར་ཡུག་ཁྲུ་གང་ཙམ་དུ་བྱ། །གཉིས་པ་རང་སྔགས་མགོན་པོ་ལ། །གསུམ་
པ་རང་རིག་ལྷ་ལའོ། །སྔགས་པ་བཟླས་པ་གང་བྱེད་པ། །རྟག་ཏུ་འང་དེ་ཉིད་བྱ་བ་ཡིན། །ཡང་ནི་སེམས་ཅན་ཐམས་ཅད་ཀྱི། །ལོངས་སྤྱོད་ཕྱིར་ནི་བསྟན་པ་ཡིན། །གཡས་སུ་འཇིག་རྟེན་མགོན་པོ་ཡི། །དཀྱིལ་འཁོར་འདི་ནི་རྟག་ཏུ་བྱ། །དཀོན་མཆོག་གསུམ་གྱི་
དཀྱིལ་འཁོར་ནི། །གྲུ་བཞི་དག་ཏུ་བྱ་བ་ཡིན། །གཉིས་པ་རང་སངས་རྒྱས་རྣམས་ལ། །གསུམ་པ་སྟོབས་བཅུ་ལྡན་པའི་སྲས། །དཀྱིལ་འཁོར་བདུན་པོ་འདི་དག་ནི། །ཀུན་ནས་གྲུ་བཞིར་བྱ་བ་ཡིན། །ཁྲུ་གང་ངམ་ནི་ཁྲུ་ཕྱེད་དུ། །ཉིན་རེ་ཞིང་ནི་བྱ་བ་ཡིན། །སྡིག་པ་
འཇིག་བྱེད་བཟླས་པ་ནི། །དབེན་པའི་ཕྱོགས་སུ་ཉིན་རེ་བྱ། །སྔགས་པ་དེ་ནས་ལངས་ནས་ནི། །འབད་པས་ལག་གཉིས་རབ་ཏུ་བཀྲུ། །གཙང་བའི་ཆུ་ཡིས་ཉེ་རེག་བྱ། །དག་ཅིང་སྲོག་ཆགས་སྤངས་པ་ཡི། །དྲི་མེད་གཙང་སྦྲས་འབད་ནས་ནི། །གཙང་བའི་སྣོད་

ནི་དེ་ཚེ་བླང་། །མཚོ་ཆེན་དང་ནི་འབབ་ཆུ་འམ། །ཆུ་མིག་ཆུ་བོ་ལ་གནས་དང་། །གཙང་བའི་ཕྱོགས་ནས་བྱུང་བ་ཡི། །སེམས་ཅན་དག་པ་ལག་བླངས་ལ། །གཉིས་སམ་གསུམ་དུ་རྟག་ཏུ་ཡང་། །སྔགས་པས་ཉེ་རེག་བྱ་བ་ཡིན། །དེ་ནས་ཆུས་རེག་གདོང་
དང་ནི། །དེ་བཞིན་དུ་ནི་རྣ་ཁུང་དག །མིག་དང་སྣ་དང་ལག་གཉིས་དང་། །སྤྱི་བོ་ལྟེ་བའི་ཕྱོགས་རེག་བྱ། །དགེ་བ་སྤྱོད་པས་ལན་ལྔའམ་བདུན། །ཆོ་ག་ཇི་བཞིན་ཐམས་ཅད་བྱ། །གཙང་སྦྲའི་སྤྱོད་པ་ལེགས་ལྡན་པས། །ཟློས་པ་གཙང་བར་གྱུར་པ་ཡིས། །སློང་སྣོད་ཡང་
དག་བླངས་ནས་ནི། །ཆུ་ཡི་གཞིར་ནི་འགྲོ་བར་བྱ། །གང་དུ་ཆུ་ཡི་རྒྱུན་འབབ་གནས། །དེ་བཞིན་དུ་ནི་ཆུ་མིག་དང་། །ཆུ་བོ་རབ་ཏུ་འབབ་པ་ལ། །རྟག་ཏུ་ཟས་ནི་བཀྲུ་བར་བྱ། །གཙུག་ལག་ཁང་ངམ་གནས་ཁང་དུ། །དེ་ནས་ལངས་ནས་འགྲོ་བར་བྱ། །གང་དུ་སྔོན་ནི་
བརྟེན་པ་དང་། །གང་དུ་གནས་པ་དེར་འགྲོ་བྱ། །དེ་ནས་ཟློས་པས་ལྷུང་བཟེད་དེ། །སོང་ནས་ཕྱོགས་ནི་དེར་གཞག་བྱ། །དེ་ནས་ཉེ་རེག་མྱུར་བྱས་ནས། །དེ་བཞིན་ཡང་ནི་ལྷུང་བཟེད་བླངས། །ལྷུང་བཟེད་ས་འམ་ལོ་མ་འམ། །དངུལ་དང་གསེར་གྱི་སྣོད་དང་ནི། །ཟངས་
མ་ཤིང་ཤུན་དག་ཀྱང་རུང་། །སྟོན་པ་ལ་ནི་དབུལ་བར་བྱ། །སྟོན་པ་ལ་ནི་བཤོས་ཕུལ་ནས། །རང་སྔགས་སྔགས་ཀྱི་རྒྱལ་པོ་འང་བརྗོད། །འགྲོན་གཅིག་སྡུག་བསྔལ་གྱུར་འོངས་ནས། །ཅི་ནུས་པར་ནི་སྦྱིན་པ་བྱ། །རྣམ་པ་ཀུན་དུ་ཁ་ཟས་ནི། །ཧ་ཅང་མང་བ་སྦྱིན་མི་བྱ། །
སྔགས་རིག་ལུས་གདུང་མི་བྱ་སྟེ། །རྣམ་པ་ཀུན་དུ་ཅི་རིགས་བྱ། །ལྟོ་བའི་ཚད་ཙམ་གཞག་བྱས་ཏེ། །ལྷག་མའི་ཟས་ནི་རྟག་ཏུ་སྦྱིན། །བཀྲེས་དང་སྐོམ་པས་ཉེན་གྱུར་ན། །སྔགས་ཀྱི་དོན་ལ་རྟེན་མི་ནུས། །ཁ་ཟས་མང་དང་ཉུང་ཟོས་ན། །སྔགས་རྣམས་མཉེས་པར་མི་
ནུས་སོ། །དེ་ཉིད་ཕྱིར་ན་ཐུབ་དབང་གིས། །སེམས་ཅན་ཟས་ཀྱིས་གནས་པའོ་ཞེས། །ལུས་ཅན་རྣམས་ལ་གསུངས་པ་སྟེ། །གང་གིས་མི་རྣམས་འཚོ་བ་དང་། །ལྷ་དང་ལྷ་མིན་དྲི་ཟ་དང་། །ཀླུ་དང་གནོད་སྦྱིན་མི་འམ་ཅི། །སྲིན་པོ་ཡི་དགས་ཤ་ཟ་དང་། །འབྱུང་པོ་སྐར་མ་

གཟའ་རྣམས་དག །གང་ཞིག་ཁ་ཟས་མི་ཟ་བ། །དེ་ནི་གང་ཡང་ཡོད་མ་ཡིན། །རགས་པའི་ཟས་ནི་གང་ཡིན་པ། །ཁམ་གྱི་ཟས་སུ་རྣམ་པར་བསྒྲགས། །སེམས་ཅན་ཕྲ་བའི་ཟས་ཅན་ཡང་། །དེ་བཞིན་གཤེགས་པ་ཉིད་ཀྱིས་གསུངས། །བསམ་གཏན་ཟས་ཅན་རྣམས་ལ་
ནི། །གཟུགས་ཀྱི་ཁམས་ན་སྤྱོད་པའོ། །གཟུགས་མེད་ཁམས་ཀྱི་ལྷ་དག་ནི། །ཏིང་འཛིན་འབྲས་བུ་ལ་སྤྱོད་པའོ། །སྲིད་པ་བར་མའི་སེམས་ཅན་རྣམས། །དྲི་ཡི་ཟས་སུ་རབ་ཏུ་བསྒྲགས། །དེ་བཞིན་འདོད་ཁམས་སེམས་ཅན་དག །སྣ་ཚོགས་ཟས་ལ་སྤྱོད་པ་ཡིན། །དེ་ཉིད་
ཕྱིར་ནི་ཐུབ་དབང་གིས། །ལས་ཀྱི་རྒྱུ་ཡིས་གསུངས་པ་ནི། །སེམས་ཅན་ཟས་ཀྱིས་གནས་པ་ཞེས། །ཐམས་ཅད་ལ་ནི་རབ་ཏུ་བསྒྲགས། །ཟློས་ལ་རྟག་ཏུ་བརྩོན་པས་ནི། །ཟས་ཀྱི་ཚོད་རིག་བྱ་བ་ཡིན། །གང་ཕྱིར་སྔགས་བརྟེན་ནུས་པ་ནི། །ཁ་ཟས་ལ་ནི་རབ་ཏུ་གནས། །
སྤྱོད་པ་ཡོངས་སུ་དག་པ་དང་། །དགེ་ཞིང་ཚངས་པར་སྤྱོད་པ་དང་། །ཁ་ཟས་ཚོད་ནི་རིག་པ་ལ། །དེ་ལ་གྲུབ་པ་རྙེད་མི་དཀའ། །ཅི་ལྟར་ཤིང་རྟའི་ཤིང་རྟ་པས། །མིག་ནི་ཡོངས་སུ་བསྐུས་པ་ནི། །ཡུན་རིང་དུས་སུ་བརྟེན་ཕྱིར་དང་། །ཁལ་ནི་འདེགས་པར་བྱ་ཕྱིར་རོ། །དེ་
བཞིན་སྔགས་པ་སྔགས་ཤེས་པས། །ཁ་ཟས་གནས་ཕྱིར་འཛིན་བྱེད་དང་། །ལུས་ཀྱང་ཚིམ་པར་བྱ་བའི་ཕྱིར། །ཟློས་པས་རྟག་ཏུ་གསོ་བར་བྱ། །སྔགས་རྣམས་བསྒྲུབ་པའི་ཕྱིར་དང་ནི། །བྱང་ཆུབ་ཚོགས་ནི་བྱ་བའི་ཕྱིར། །དེ་བཞིན་དུ་ནི་སྔགས་བཟླ་བ། །མི་ཡི་འཇིག་རྟེན་
བསྲུང་བྱ་བའོ། །དེ་ཉིད་ཕྱིར་ན་ཐུབ་མཆོག་ནི། །འོད་སྲུང་ཞེས་བྱ་སྔོན་བྱུང་བ། །དེ་ཚེ་དེ་དུས་ས་སྟེང་འདིར། །འོད་ཆེན་ལྡན་པ་དེས་གསུངས་པ། །འབྱུང་པོ་རྣམས་ལ་ལེགས་དོན་དུ། །སྔགས་འདི་རབ་ཏུ་གསུངས་པ་ནི། །འཇིག་རྟེན་མ་ལུས་སྡུག་བསྔལ་དང་། །དམན་
དང་དབུལ་དང་སྐྱོ་བ་དང་། །འབད་རྩོལ་དག་ལ་ཉོན་མོངས་པ། །དེ་དག་དོན་ཕྱིར་གསུངས་པ་ནི། །འབྱུང་པོ་རྣམས་ལ་ལེགས་དོན་དང་། །དེ་བཞིན་གནས་པར་འདོད་པ་ཡང་། །འབྱུང་པོ་རྣམས་ལ་ཟས་དོན་དུ། །སྔགས་མཆོག་འདི་ནི་གསུངས་པ་ཡིན། །ཉན་ཐོས་དག་

ནི་ཐམས་ཅད་དང་། །བྱང་ཆུབ་ལ་གནས་ཐམས་ཅད་ཉོན། །བདག་གིས་སྔགས་འདི་རབ་བརྗོད་ཀྱིས། །ནད་རྣམས་འཇིག་བྱེད་ཟུང་ཤིག་དང་། །གང་ཡང་བཀྲེས་ནད་ཀྱིས་ཉེན་དང་། །གང་ཡང་སེམས་ཅན་སྐོམ་པ་རྣམས། །ཀུན་གྱི་སྡུག་བསྔལ་ཉེར་ཞིའི་
ཕྱིར། །འབྱོར་པ་འདོད་རྣམས་རབ་ཉོན་ཅིག །འོད་སྲུང་འོད་ནི་ཆེན་པོ་པ། །ཐུབ་པ་མཆོག་གིས་དེ་སྐད་གསུངས། །ཉན་ཐོས་རྣམས་ནི་ཡིད་དགའ་ནས། །ཁྱབ་བདག་ལ་ནི་གསོལ་བ་འདེབས། །ཆོས་མཁྱེན་སྔགས་ནི་བཤད་དུ་གསོལ། །ཆོས་ཀྱི་རྒྱལ་པོ་ཐུབ་པ་ཆེ། །
སེམས་ཅན་བརྩེ་བའི་མཆོག་གྱུར་པ། །དུས་ནི་རབ་ཏུ་ཉེ་བར་གནས། །དེ་སྐད་གསོལ་ནས་ཐུབ་མཆོག་གིས། །ཀ་ལ་པིང་ཀའི་སྒྲ་སྐད་དང་། །རྔ་བོ་ཆེ་ཡི་སྒྲ་སྐད་དང་། །ཚངས་དབྱངས་སྟོབས་ནི་ཆེན་པོ་དང་། །ཚངས་ཤེས་རྒྱལ་བ་སྔོན་འདྲེན་པས། །འབྱུང་པོའི་ཚོགས་
ནི་གང་སུ་དག །འདིར་ལྷགས་གྱུར་པ་ཀུན་ཉོན་ཅིག །རྐང་མེད་དང་ནི་རྐང་མངས་དང་། །རྐང་གཉིས་པ་དང་རྐང་བཞི་པ། །མདོར་ན་སེམས་ཅན་ཀུན་གྱི་ཕྱིར། །བདེ་འབྱུང་སྔགས་ནི་བཤད་པར་བྱ། །འདས་དང་མ་འོངས་ད་ལྟར་གྱི། །སེམས་ཅན་གང་དག་འདིར་
ལྷགས་པ། །འབྱོར་པ་འདོད་རྣམས་ད་ཉོན་ཅིག །མདོར་ན་བདག་གིས་རབ་བཤད་བྱ། །ན་མཿསརྦ་བུད་དྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། ཨོྃ་ག་ག་ནེ་ག་ག་ན་གཉྫ་ཨཱ་ན་ཡ་སརྦཾ་ལ་ཧུ་ལ་ཧུ་ས་མ་ཡ་མ་ནུ་སྨ་ར། ཨཱ་ཀརྵ་ཎི། མཱ་བི་ལཾ་བ་མཱ་བི་ལཾ་བ། ཡ་
ཐེ་པེ་སྟཾ་མེ་སཾ་པ་དཱ་ཡ་སྭཱ་ཧཱ། བཅོམ་ལྡན་འདས་འོད་སྲུང་གིས་དེ་སྐད་ཅེས་གསུངས་ནས་ཅང་མི་གསུང་བར་གྱུར་ཏོ། །ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གིས། བར་དེར་རིག་པའི་སྔགས་ཀྱི་ཚིག་རྒྱ་ཆེར་གསུངས་པ་ན། ནམ་མཁའ་
དེ་ཐམས་ཅད་ཆེན་པོ་ལ་འོས་པའི་ཟས་ཀྱི་སྤྲིན་གྱིས་ཡོངས་སུ་ཁེངས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་ནམ་མཁའི་དཀྱིལ་ཀུན་དུ་ཟས་ཀྱི་སྤྲིན་གྱིས་ཁྱབ་པར་སྣང་བར་གྱུར་ཏོ། །སེམས་ཅན་གྱི་བསམ་པ་ཅི་ལྟར་མངོན་

པར་འདོད་པའི་བཟའ་བ་དང་ཅི་ལྟར་འདོད་པའི་ཟས་དེ་དག་ལ་ཆར་བཞིན་དུ་བབ་པར་གྱུར་ཏོ། །ཅི་ལྟར་འདོད་པའི་ཟས་དང་བཟའ་བའི་བྱ་བ་ནི་བཀྲེས་པའི་སྡུག་བསྔལ་ཞི་བའི་དོན་དང་། སྐོམ་པ་རྣམས་ཀྱིས་བཏུང་བར་བྱ་བ་ནི། ཡན་ལག་བརྒྱད་དང་ལྡན་པའི་ཆུའི་རྒྱུན་ཡིད་ལ་
འདོད་པ་བཞིན་དུ་དེར་བབ་པར་གྱུར་ཏོ། །དེའི་ཚེ་དེའི་དུས་ཀྱི་སྐད་ཅིག་དེ་ཉིད་ལ་བཀྲེས་པའི་ནད་ཐམས་ཅད་རབ་ཏུ་ཞི་བ་དང་སྐོམ་པ་ཐམས་ཅད་དང་བྲལ་བར་གྱུར་ཏོ། །ཐམས་ཅད་དང་ལྡན་པའི་འཁོར་དེ་ཡང་ངོ་མཚར་དང་རབ་ཏུ་དགའ་བ་ཐོབ་པར་གྱུར་ནས། བཅོམ་ལྡན་
འདས་ཀྱིས་གསུངས་པ་ལ་མངོན་པར་བསྟོད་དེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ཏེ་དེ་ཉིད་དུ་མི་སྣང་བར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་འོད་སྲུང་ཡང་དེ་བཞིན་གཤེགས་པའི་གནས་སུ་རྣམ་པར་
བཞུགས་སོ། །བཅོམ་ལྡན་འདས་ཤཱཀྱ་ཐུབ་པ་ངས་ཀྱང་དེའི་ཚེ་དེ་ལྟར་བཤད་ཅིང་རྗེས་སུ་ཡི་རང་བར་བྱས་སོ། །སྔགས་ཀྱི་རྒྱལ་པོའི་མཆོག་འདི་ལ་སེམས་ཅན་ཐམས་ཅད་ཀྱི་དོན་དུ་བཀྲེས་པ་དང་སྐོམ་པ་སེལ་བའི་ཕྱིར་དང་། སྔགས་ཐམས་ཅད་ཟློས་པ་དག་ལ་ཡང་
ཁྱད་པར་དུ་སེལ་བར་འགྱུར་རོ། །དང་པོར་རེ་ཞིག་ཟློས་པས་སྔགས་འདི་བསྒྲུབ་པར་བྱ་སྟེ། གལ་ཏེ་བསོད་སྙོམས་ལ་འགྲོ་བར་སྤྲོ་བ་མེད་ན། རིའི་རྩེ་མོར་འཛེག་སྟེ་འབུམ་ཕྲག་བདུན་བཟླ་བར་བྱ་ཞིང་། ཟས་དཀར་གསུམ་མམ་འོ་མའི་ཟས་བཟའ་ཞིང་རིའི་རྩེ་མོ་
དེ་ཉིད་དུ་འཕགས་པ་འཇམ་དཔལ་གྱི་རས་རིས་བར་མ་གོང་མ་བཞིན་བཞག་སྟེ། མཆོད་པ་ཆེན་པོ་བྱས་ནས་ཤིན་ཏུ་རྒྱ་ཆེ་བའི་གཏོར་མ་ཕུལ་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་འདི་ཉིད་ཀྱིས་གསུངས་པའི་སྔགས་ཀྱིས་སེང་ལྡེང་གི་ཡམ་ཤིང་གི་
མེ་རབ་ཏུ་སྦར་ཏེ། ཤིང་ཨུ་དུམ་བཱ་རའི་ཡམ་ཤིང་ལ་མར་དང་སྦྲང་རྩིས་བཏགས་པའི་ཤིང་རློན་མཐོ་གང་ཙམ་མམ། བིལ་བའི་འབྲས་བུའི་ཡམ་ཤིང་སྟོང་རྩ་བརྒྱད་ཀྱིས་སྦྱིན་སྲེག་བྱའོ། །དེ་ནས་ནམ་ཕྱེད་ཀྱི་དུས་མཚམས་སུ་སྤྲིན་ནག་པོ་ཆེན་པོ་དང་རླུང་གི་དཀྱིལ་འཁོར་

བྱུང་ན་འཇིགས་པར་མི་བྱ། ལངས་ཏེ་གཞན་དུ་འགྲོ་བར་མི་བྱ་ཞིང་། འཕགས་པ་འཇམ་དཔལ་གྱི་ཡི་གེ་བརྒྱད་ཀྱི་སྙིང་པོས་བདག་ཉིད་བསྲུང་བ་དང་། དཀྱིལ་འཁོར་བཅིང་བ་དང་གྲོགས་བསྲུང་བ་ཡང་བྱས་ན། སྔ་མ་ལྟ་བུའི་སྤྲིན་ནག་པོ་ཆེན་པོ་དེ་དང་
རླུང་ནག་པོ་དེ་ཡང་མི་སྣང་བར་འགྱུར་ཏེ། བུད་མེད་ཡང་རྒྱན་ཐམས་ཅད་ཀྱིས་བརྒྱན་པ། འོད་ཀྱི་དཀྱིལ་འཁོར་གྱིས་ཕྱོགས་ཐམས་ཅད་སྣང་བར་བྱས་ཏེ་སྒྲུབ་པ་པོའི་མདུན་དུ་འདུག་ནས་སྨྲ་བ་ནི། ཀྱེ་སེམས་ཅན་ཆེན་པོ་ལོངས་ཤིག །ཁྱོད་ནི་གྲུབ་པ་ཡིན་ནོ་ཞེས་སོ། །
དེ་ནས་སྒྲུབ་པ་པོས་སྣ་མའི་མེ་ཏོག་གིས་བསྲེས་པའི་དྲི་ཞིམ་པོའི་ཆུས་མཆོད་ཡོན་སྦྱིན་ནོ། །དེ་ནས་དེ་ཉིད་དུ་མི་སྣང་བར་གྱུར་ཏོ། །གང་དེའི་ཉིན་མོ་ནས་བདག་ཉིད་དང་གྲོགས་པོ་ཉི་ཤུ་རྩ་ལྔའམ། ཡང་ན་ཅི་འདོད་པའི་གྲོགས་པོ་དག་ལ་ཅི་འདོད་པའི་ཁ་ཟས་དང་ཅི་ལྟར་
འདོད་པའི་ཡོ་བྱད་རྣམས་ཡང་དག་པར་སྟེར་བར་བྱེད་དོ། །དེ་ནས་སྒྲུབ་པ་པོས་རས་རིས་ལ་གཤེགས་སུ་གསོལ་བའི་མཆོད་ཡོན་དབུལ་ཏེ། ལན་གསུམ་བསྐོར་བ་བྱས་ནས་རས་རིས་བླངས་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་བྱས་ནས།
སྔར་བསྟན་པའི་སྒྲུབ་པའི་ཐབས་ཅི་ལྟ་བུའི་གནས་དགོན་པ་ཆེན་པོའམ། རིའི་རྩེ་མོའམ་མི་མེད་པའི་གནས་སུ་འགྲོ་བར་བྱའོ། །དེར་ལོ་མའི་སྤྱིལ་པོ་བྱས་ཏེ་བདག་ཉིད་དང་གྲོགས་པོ་གཉི་གར་བཅས་ཏེ་རབ་ཏུ་གནས་པར་བྱའོ། །དེར་གནས་པ་དང་གནས་དེ་ལ་ནམ་མཁའ་
ལ་འགྲོ་བ་ལ་སོགས་པའི་ལས་བྱས་ཏེ། དེ་ནས་སྒྲུབ་པ་པོས་སྔ་མ་བཞིན་དུ་ཀུ་ཤའི་ཁྲེས་ལ་འདུག་ནས། རས་རིས་བར་མ་སྔ་མ་བཞིན་དུ་བཞག་སྟེ། སེང་ལྡེང་གི་ཡམ་ཤིང་གིས་མེ་རབ་ཏུ་སྦར་ལ། དུས་གསུམ་དུ་མེ་ཏོག་པདྨ་དཀར་པོ་ཞོ་དང་སྦྲང་རྩི་དང་མར་
གྱིས་བཏགས་པ་སྟོང་རྩ་བརྒྱད་ཉི་མ་ཉི་ཤུ་རྩ་གཅིག་གི་བར་དུ་སྦྱིན་སྲེག་བྱའོ། །དེ་ནས་མཚན་ཕྱེད་ཀྱི་དུས་སུ་སྦྱིན་སྲེག་གི་མཐར་འཕགས་པ་འཇམ་དཔལ་མངོན་སུམ་དུ་མཐོང་བར་འགྱུར་རོ། །འདོད་པའི་མཆོག་སྩོལ་བར་ཡང་འགྱུར་རོ། །ནམ་མཁའ་ལ་འགྲོ་

བ་དང་མི་སྣང་བ་དང་བྱང་ཆུབ་སེམས་དཔའི་ས་དང་རང་སངས་རྒྱས་ཉིད་དམ་ཉན་ཐོས་ཉིད་དམ། ཚེ་རིང་བ་ཉིད་དམ་རྒྱལ་སྲིད་ཆེན་པོ་དང་། ལོངས་སྤྱོད་ཆེན་པོ་ཉིད་དམ་རྒྱལ་པོ་དགའ་བ་ཉིད་དམ། འཕགས་པ་འཇམ་དཔལ་དང་ལྷན་ཅིག་རྗེས་སུ་སྤྱོད་པར་འགྱུར་ཏེ་
མདོར་ན་གང་འདོད་པ་དེ་ཐམས་ཅད་སྩོལ་བར་འགྱུར་རོ། །གང་དོན་དུ་གཉེར་བ་དེ་ཡང་རྗེས་སུ་སྩོལ་བར་འགྱུར་རོ། །གྲུབ་པའི་རྫས་ཐམས་ཅད་ཀྱང་འགྲུབ་པར་འགྱུར་རོ། །སེམས་ཅན་ཆེན་པོ་རྣམས་ཀྱང་འགུགས་པར་བྱེད་པར་འགྱུར་རོ། །མདོར་ན་ཇི་ལྟ་ཇི་ལྟར་བརྗོད་
པ་དེ་ཐམས་ཅད་བྱེད་པར་འགྱུར་རོ། །སྔོན་གྱི་ལས་ཀྱི་ཉེས་པ་ཡང་ཡང་དག་པར་སྦྱོང་བར་བྱེད་དོ་ཞེས་བཅོམ་ལྡན་འདས་ཤཱཀྱ་ཐུབ་པས་གསུངས་སོ། །གཞན་ཡང་ལས་ཀྱི་ཐབས་བར་མ་སྒྲུབ་པ་ཡང་ཡོད་དེ་དང་པོར་རེ་ཞིག་དེ་ལྟར་ཁྱད་པར་དུ་གྱུར་པའི་གནས་སམ་གཙང་བའི་
ས་ཕྱོགས་སམ། ཆུ་བོའམ་ཆུ་གླིང་གི་ངོགས་སུ་སྔ་མ་བཞིན་དུ་ཐམས་ཅད་བྱ་སྟེ། རས་རིས་ནུབ་ཏུ་བསྟན་ཏེ་བཞག་ལ་བདག་ཀྱང་ཤར་དུ་མངོན་པར་ཕྱོགས་པར་བྱས་ནས་ཀུ་ཤའི་ཁྲ