Kinh tạng Tây Tạng (Kangyur Đại Học) — 078_རྒྱུད་འབུམ།_ཁ

འོ།། །།
དེ་ནས་རྣམ་པར་སྣང་མཛད་ཀྱི། །མཚན་ཉིད་བཤད་ཀྱིས་ལྷ་མོ་ཉོན། །གཟུགས་ལས་འདས་པའི་ཡེ་ཤེས་གང་། །དེ་ནི་ཡེ་ཤེས་ཆེན་པོར་བརྗོད། །རྣམ་པར་སྣང་བཞིན་པ་དེ་བཞིན། །སེམས་དཔའ་ཆེན་པོའི་མིང་ཅན་ནོ། །སྤུ་ཁུང་རྩེ་མོ་ཐམས་ཅད་ལས། །དེ་རྣམས་ངེས་འཐོན་སྟོབས་ཆེན་
པོ། །དེ་རྣམས་བུ་གར་རབ་ཞུགས་པ། །འཁོར་ལོ་བཞི་ཡི་མཚོ་སྐྱེས་སོན། །ཇི་ལྟར་མར་ལ་མར་ཞུགས་པ། །དེ་བཞིན་དུ་ནི་ཁམས་ལ་ཞུགས། །གཡོ་བ་འགོག་པར་བྱས་པ་ཡིས། །དེ་འདྲར་ཐམས་ཅད་མཐོང་བར་འགྱུར། །གང་མཐོང་བ་ནི་དེ་མཐོང་ཉིད། །གདོང་གིས་གདོང་ནི་བལྟ་བར་གྱིས། །
མི་དང་མི་མོ་ལྷ་སོགས་ཀྱི། །གཟུགས་ནི་པདྨའི་འདབ་ཆུ་བཞིན། །སྲོག་ཆེན་པོ་དེར་ཤེས་བྱ་སྟེ། །ཤི་བའི་ལུས་ལས་ངེས་པར་འཐོན། །ཨོཾ་གྱི་ཡི་གེ་ཡིད་ལ་བྱ། །དབུགས་རྒྱུ་བ་ཡིས་མཚོན་པར་བྱ། །བདག་ཉིད་ཀྱིས་ནི་ཧཱུྃ་ཡིག་སྤྲོ། །གསོར་བ་ཡི་ནི་རྣལ་འབྱོར་ལྡན། །སེམས་ལ་ཨོཾ་
གྱི་ཡི་གེར་འགྱུར། །ལུས་ལ་གནས་པར་མཚོན་པར་བྱ། །ཧཾ་ཡིག་མཆོག་གི་དང་པོ་ཡིས། །ཡེ་ཤེས་དངོས་པོ་རྣམས་སུ་སྤྲུལ། །ཆོས་ཀྱི་དབྱིངས་རྣམས་ཀྱི་དབུས་སུ། །རྣམ་སྣང་མཛད་ཀྱི་བསྒོམ་པའོ། །བདུད་རྩིའི་རྒྱུན་འཛག་པ་རྣམས་ཀྱིས། །སྔགས་པ་

ལ་ནི་འབར་བར་བྱ། །བྱེ་བ་སྟོང་ཕྲག་གྲངས་ཀྱི་ནི། །རྣལ་འབྱོར་མ་ལ་འདོད་སྤྱོད་འགྱུར། །འདོད་པ་རྣམས་ཀྱིས་མི་འཕོ་སྟེ། །འདོད་ན་བདེ་བ་རྣམ་པར་སྤྲོ། །དེ་ཚེ་རྣལ་འབྱོར་མ་མཉེས་ནས། །དངོས་གྲུབ་ཐམས་ཅད་སྟེར་བར་བྱེད། །སྡུག་དང་མི་སྡུག་
རྣམ་དཔྱོད་པ། །རྣལ་འབྱོར་མ་ལ་མི་བྱའོ། །མྱུར་བར་སྟོང་ཕྲག་རྣམས་ཀྱི་གཟུགས། །རྣམ་པར་སྣང་མཛད་དུ་བསྒྲུབ་བྱ། །སྣ་ཚོགས་དུ་མའི་སྐད་ཀྱིས་ཆོས། །དེ་རྣམས་ལུས་རིས་ཅན་གྱིས་ཉན། །རྣམ་སྣང་མཛད་དང་མི་བསྐྱོད་དང་། །རིན་ཆེན་དབང་དང་ཨཱ་རོ་
ལིཀ། །དོན་ཡོད་རྡོ་རྗེ་སེམས་དཔའ་དང་། །རྒྱུ་ཡི་རྡོ་རྗེ་འཆང་ལ་སོགས། །ཤེས་རབ་ཕ་རོལ་ཕྱིན་སོགས་ཀྱང་། །དེ་རྣམས་རྣལ་འབྱོར་མ་ལས་རིག །འགྲོ་དྲུག་གྲོལ་བར་བྱེད་ཉིད་དང་། །བདེ་འགྲོ་རྣམས་སུ་འཇུག་པ་པོ། །བློ་ལྡན་སོ་སོར་སེམས་ཅན་དོན། །
གཉིས་མེད་དངོས་པོར་བྱེད་པར་འགྱུར། །མི་ཤེས་ཉོན་མོངས་གཞོམ་དོན་དུ། །ཚུལ་འདི་ཡང་ནི་བསྒོམ་པར་བྱ། །ཁམས་ཐམས་ཅད་ཀྱི་ཏིལ་མར་ནི། །དོགས་པ་མེད་པས་བྱ་བ་ཡིན། །རྣམ་སྣང་སྦྱོར་བས་བཏུང་བྱ་འམ། །བྱུག་པ་ཡང་དེ་ཉིད་ཀྱིས་བྱའོ། །དེ་ཡིས་སྣ་ནས་
སྦྱིན་པར་བྱ། །རྡོ་རྗེའི་ལམ་དུ་རྟག་ཏུའོ། །རྡོ་རྗེ་འཆང་གི་གཟུགས་སུ་འགྱུར། །རྣལ་འབྱོར་མ་རྣམས་ཀྱི་ཡིད་འོང་། །གཉིས་པ་ཐམས་ཅད་ཀུན་སྦྱོར་ལས། །རྣལ་འབྱོར་མས་འདོད་ཐར་པ་སྩོལ། །བཅོམ་ལྡན་ཐམས་ཅད་དག་པའི་སྐུ། །རབ་གྲོལ་མཛད་པས་འདི་གསུངས་སོ། །ཞེས་བྱ་
བ་ནི་རྣམ་པར་སྣང་མཛད་ཀྱི་ཆོ་ག་སྟེ་རབ་ཏུ་བྱེད་པ་ཉི་ཤུ་རྩ་གསུམ་པའོ།། །།དེ་ནས་གསང་ཆེན་བཤད་བྱ་སྟེ། །མདོར་བསྡུས་པ་ཡིས་རྒྱས་པར་མིན། །རྡོ་རྗེ་སེམས་དཔའི་རབ་སྦྱོར་བས། །གནས་ཐམས་ཅད་དུ་ཡང་དག་བཞུགས། །རྡོ་རྗེ་མི་ཕྱེད་ཡེ་ཤེས་ཏེ། །སེམས་དཔའ་སྙིང་པོ་སྟོན་
པའོ། །སྟོང་ཉིད་སྙིང་རྗེ་དབྱེར་མེད་པ། །རྡོ་རྗེ་སེམས་དཔར་རབ་ཏུ་གྲགས། །ཟླ་བ་རྡོ་རྗེའི་རབ་སྦྱོར་བས། །གནས་རྣམས་བགྲོད་པ་བསྟན་པར་བྱ། །པུལླཱི་ར་ལས་ལྟེ་བར་འབབ། །ཛཱ་ལན་དྷ་རར་ཡང་དག་གནས། །ཨོ་ཌྱན་དུ་ནི་ཀུན་དུ་སྤྱོད་པ་འགྲུབ། །ཨར་བུ་དར་ནི་བཟའ་དང་བཏུང་ཅན་ནོ། །

གོ་དཱ་བ་རའི་གནས་སུ་རོལ་བ་སྟེ། །རཱ་མེ་ཤྭ་རིར་རྒྱལ་དང་ཕམ་པའོ། །དེ་བཱི་ཀོ་ཊིར་རྗེས་སུ་འཛིན་པ་སྟེ། །མཱ་ལ་ཝ་རུ་རྣལ་འབྱོར་མ་ཡི་གཙོ། །ཀཱ་མ་རཱུ་པར་ཚིག་ནི་འགྲུབ་པའོ། །ཨོ་ཌིར་མངོན་སུམ་དངོས་གྲུབ་སྟེར་བ་སྟེ། །ཏྲི་ཤ་ཀུ་ནར་དབང་པོ་རྣམས་ཀྱི་ནི། །མྱུར་དུ་དངོས་
གྲུབ་རབ་ཏུ་འཇུག་པའོ། །ཀོ་ས་ལ་རུ་རྣལ་འབྱོར་དངོས་གྲུབ་སྟེ། །ཀ་ལིང་ཀ་རུ་ཕྲ་མོའི་དངོས་གྲུབ་སྐྱེ། །ལམ་པ་ཀ་རུ་རྟག་པར་འགྲུབ་པར་འགྱུར། །ཀཱཉྩི་རུ་ནི་བསད་པའི་དངོས་གྲུབ་བོ། །ཧི་མ་ལ་ཡར་མཐུན་པར་འགྲུབ་པ་སྟེ། །པྲེ་ཏ་པུ་རིར་རང་གི་ལྟ་བའོ། །གྲི་ཧ་དེ་བ་ཏཱར་ནི་བཀས་གནང་བ། །
ལྷན་སྐྱེས་འཕོ་མེད་སཽ་རཱ་ཥྚ་རུ། །གསེར་གླིང་དུ་ནི་རང་གི་དོན་འགྲུབ་བོ། །ནཱ་ག་རར་ནི་གནས་ཀྱི་དངོས་གྲུབ་སྟེར། །སིན་དྷུ་ར་རུ་སྟོབས་འགྲུབ་དེ་བཞིན་དུ། །མ་རུལ་འཆི་བ་མེད་པའི་དངོས་གྲུབ་བོ། །ཀུ་ལུ་ཏར་ནི་རང་བཞིན་དངོས་གྲུབ་ཏུ། །དེ་ཉིད་རྣལ་འབྱོར་རྣམས་ལ་སྐྱེ་བའོ། །རྡོ་རྗེ་སེམས་
དཔའ་རྟག་བསྒོམས་ནས། །ཐམས་ཅད་དངོས་གྲུབ་འགྲོ་བར་བྱོས། །གནས་སོགས་རྣལ་འབྱོར་མ་དབུས་སུ། །ཁམས་སུ་གྱུར་པའི་རོ་ཆེན་པོ། །གསང་བའི་ཚིག་ཏུ་ཤེས་པར་བྱ། །མཆོག་ནི་ལྷན་ཅིག་སྐྱེས་པར་དྲན། །དགྱེས་པ་ཡེ་ཤེས་ཤེས་བྱ་སྟེ། །ཐམས་ཅད་བདག་ཉིད་ཡོན་ཏན་གནས། །
རྟག་བཞུགས་གཉིས་མེད་རྣམ་པ་སྟེ། །སེམས་ཅན་འཇིག་རྟེན་ལས་ལ་ནི། །རྣལ་འབྱོར་ལྡན་པ་རྣམས་ཀྱི་ཡང་། །རྡོ་རྗེ་སེམས་དཔའ་བདག་ཉིད་ཀྱིས། །ནཱ་དའི་དབུས་ལས་ཡང་དག་བྱུང་། །དེ་ཉིད་དུ་ནི་ཐིམ་ནས་འགྲོ། །གནས་པར་དེ་ནི་མངོན་པར་བརྗོད། །དེ་ལྟར་ཐམས་ཅད་ཆོ་ག་བཞིན། །དཔའ་
བོ་མཆོག་རྣམས་ཀྱིས་ཤེས་བྱ། །དེ་ཉིད་ཉི་ཤུ་རྩ་བཞིའི་བདག །དེ་ནི་ནུས་པར་རབ་ཏུ་བཤད། །སྐྱེས་པ་དང་ནི་སྐྱེ་བཞིན་པའི། །ནུས་པ་ཐམས་ཅད་རབ་འཇུག་གིས། །དངོས་མེད་མ་ཡིན་པའི་གཟུགས་ཀྱིས། །དབྱངས་དང་ཕྱི་མོ་གསུམ་སྤངས་པ། །ཐིག་ལེའི་གཟུགས་ནི་སེམས་དཔའ་
ཆེ། །རྡོ་རྗེ་སེམས་དཔར་རབ་ཏུ་གྲགས། །དཔའ་བོ་ཐམས་ཅད་མཉམ་སྦྱོར་ལས། །རྣལ་འབྱོར་མ་རྣམས་ཀུན་གྱི་གཙོ། །སྒྱུ་མའི་གནས་ཀྱི་དངོས་གྲུབ་ནི། །འཇུག་མཛད་བཅོམ་ལྡན་གྱིས་འདི་གསུངས། །ཞེས་བྱ་བ་ནི་གནས་ཐམས་ཅད་ཀྱི་བདག་ཉིད་ཅན་གྱི་རབ་ཏུ་བྱེད་པ་སྟེ་ཉི་ཤུ་

རྩ་བཞི་པའོ།། །།དེ་ལྟར་དཔའ་བོ་གཙོ་བོ་ཡི། །ལས་ཀྱི་ཚོགས་རྣམས་ཤེས་པར་བྱ། །ཉི་ཤུ་བཞི་བདག་ཉིད་ཉམས་དགའ། །ཐམས་ཅད་གསང་ཆེན་གྱིས་གནས་སུ། །གསང་ཆེན་རྒྱས་པར་བཤད་པ་ཅན། །ཀུན་སྤྱོད་ཆོ་ག་བཤད་པར་བྱ། །སྔོན་བཤད་ཁམས་ཀྱི་འདུ་ཤེས་
ནི། །གསུམ་གསུམ་དུ་ནི་བཤད་པ་ཡིན། །ཉི་ཤུ་རྩ་བཞི་གསུམ་རྣམས་ཅན། །དེ་རྣམས་བརྒྱད་བརྒྱད་ཤེས་པར་བྱ། །དཔའ་བོ་ཉི་ཤུ་བཞི་རྣམས་ཀྱི། །རེ་རེའི་ཉི་ཤུ་རྩ་བཞི་སྟེ། །ཟླུམ་པའི་རྣམ་པའི་རྣལ་འབྱོར་དུ། །ཐིག་ལེ་ཉིད་ནི་གཞག་པར་བྱ། །དེ་རྣམས་དཀྱིལ་འཁོར་ཕྱི་རོལ་དུ། །བསྐོར་
བས་ཏིང་འཛིན་རྡོ་རྗེར་འགྱུར། །ཤར་ལ་སོགས་པ་རིམ་བཞིན་དུ། །རྡོ་རྗེ་འཁོར་ལོ་སོགས་པར་འཕྲོ། །དཀྱིལ་འཁོར་དུ་ནི་ལྷ་ཐམས་ཅད། །རྣལ་འབྱོར་མ་ཀུན་ཤེས་པར་བྱ། །བདུན་ཅུ་དྲུག་ལྷག་པའི་ལྔ་བརྒྱ། །ཉིན་ཞག་རྣམས་སུ་ཡོངས་འཕོ་བྱ། །རེ་རེ་ཡི་ནི་སྲོག་འགྱུར་བ། །སུམ་ཅུ་རྩ་བདུན་
ཕྱེད་བཅས་པའོ། །ཉི་ཁྲི་བརྒྱ་ཕྲག་བཅུ་དྲུག་ནི། །ཉིན་ཞག་ལ་ནི་ཤེས་པར་བྱ། །ལུས་ཅན་ཀུན་གྱི་རང་བསམ་པ། །དེ་རྣམས་ཀྱི་དུས་རབ་ཏུ་འཇུག །རྣལ་འབྱོར་དེ་དངོས་བསྒོམ་རྣམས་ལ། །སངས་རྒྱས་བསམ་པ་རབ་ཏུ་བསྐོར། །འདི་རྣམས་ཀུན་ཉིད་དཔའ་བོ་རྣམས། །གནས་སོགས་ཉི་ཤུ་བཞི་ཅན་
ལ། །ཐིམ་དང་ལོངས་སྤྱོད་བདག་བྱེད་པས། །དུས་དང་དུས་ཚོད་ཟ་བར་བྱེད། །འདི་ལྟའི་ཆོ་གའི་བྱ་བ་ཡིས། །ཀུན་དུ་གནས་པ་བདག་མ་ཡིན། །རྣལ་འབྱོར་མ་ཚོགས་དང་དཔའ་བོ། །དེ་ནི་བདག་དང་བདག་གི་རིམ་བཞིན་ནོ། །སངས་རྒྱས་འཇིག་རྟེན་ཐམས་ཅད་དུ། །བདག་དང་བདག་གི་སྤྱོད་ཡུལ་
མེད། །ཡིད་ཆེས་ཙམ་དུ་མྱང་འདས་པ། །གཞུང་སྨྲ་བ་ལ་བསྟན་པའོ། །དེ་ཁོ་ན་ཉིད་མ་རིག་པ་ཡིས་འཇིག་རྟེན་རྨོངས། །དེ་ཁོ་ན་ཉིད་རྣམ་པར་སྤངས་པས་དངོས་གྲུབ་མིན། །རྣལ་འབྱོར་རྣམས་ལ་རྒྱུད་རྒྱལ་དུ། །དེ་དང་དེ་ཡི་མཆོག་ཡེ་ཤེས། །འོད་གསལ་སྒྱུ་མ་བདག་གིས་ནི། །སྒྱུ་མའི་འཇིག་རྟེན་ལ་
བཤད་དོ། །ཀྱེ་ལྷན་ཅིག་སྐྱེས་པའི་རང་བཞིན་གཅིག་པུར་བསྟན། །ལྷ་དང་ལྷ་མིན་ས་གསུམ་འཇོམས་ལ་འདུད། །དབང་པོ་དང་ནི་འཇིག་རྟེན་པ་ཡིས་མི་ཤེས་ཏེ། །མཆོག་ཏུ་བདེ་བ་ཆེན་པོའི་གླུ་ཡིས་མཆོད་པར་གྱིས། །ལས་ཐམས་ཅད་པའི་གཟུགས་སུ་བསྒོམ་པར་བྱོས། །སྲིད་དང་མྱ་ངན་འདས་པར་

སྟོན་པ་ཅི། །སྒྱུ་མ་གཏི་མུག་གིས་ནི་རི་མོར་གནས། །སེམས་ཅན་ཐེག་པ་ད་དུང་ཉམས་བྱེད་ཅི། །དེ་ལྟར་ཡོངས་སུ་དགྱེས་པའི་མགུར། །བཅོམ་ལྡན་རང་ཉིད་ཀྱིས་གསུངས་སོ། །དེ་ཉིད་དཀྱིལ་འཁོར་རྣམས་དང་ནི། །བྱང་ཆུབ་དུས་སུ་བླང་བར་གྱིས། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་
དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་དེ་ཁོ་ན་ཉིད་ཉི་ཤུ་རྩ་ལྔའི་བདག་ཉིད་རྒྱུད་ཐམས་ཅད་ཀྱི་དོན་སྟོན་པ་པོ་གསང་ཆེན་ཐམས་ཅད་པ་ཞེས་བྱ་བའི་ལེའུ་སྟེ་ལྔ་བཅུ་པའོ།། །།
དེ་ནས་རྣལ་འབྱོར་མ་དཔའ་བོ། །རྣམ་པ་དུ་མའི་འཁོར་གྱིས་ཀྱང་། །རྡོ་རྗེ་མཁའ་འགྲོ་ཁྱབ་པའི་བདག །བཅོམ་ལྡན་བདག་པོ་ལ་བསྟོད་པ། །ཁྱོད་ནི་འདོད་ཆགས་ཆེན་པོའི་ཚུལ། །དངོས་དང་དངོས་མེད་རང་བཞིན་ཅན། །དག་པའི་རང་བཞིན་གྱི་ནི་གཟུགས། །ཆོས་རྣམས་བསྟན་པས་ཚིམ་པར་འགྱུར། །ཆོས་
དང་ཆོས་མིན་པ་ཡི་གཟུགས། །ཆོས་དང་ཆོས་པ་ཁྱོད་གཉིས་མེད། །བདག་གིས་སྤྲུལ་པའི་དངོས་པོ་ཡིས། །འཇིག་རྟེན་ཀུན་གྱིའང་དོན་ཅན་ཏེ། །བདག་ཉིད་ཆེན་པོ་སྟེར་བ་པོ། །སངས་རྒྱས་འཇིག་རྟེན་འཇུག་བྱེད་པ། །ཁྱོད་ཀྱིས་དམ་ཚིག་བསྟན་པ་སྟེ། །གཞན་མིན་དམ་ཚིག་ཉིད་ལས་བྱུང་། །བདག་
གིས་བསོད་ནམས་རྗེས་བསྒོམས་པས། །བྱང་ཆུབ་མཆོག་ཏུ་ཡིད་བསྒྲུབས་སོ། །སྟོན་པ་མཆོག་ཏུ་བདེ་ལ་བཞུགས། །དེ་ཡིས་སེམས་ཅན་དོན་མཛད་པའོ། །ཧཱུྃ་གི་ཡི་གེའི་སྒྲ་སྒྲོགས་པས། །ང་རྒྱལ་ཅན་གྱི་བགེགས་སྐྲག་འགྱུར། །ཁྱོད་ཀྱིས་ཉེ་བར་བསྟེན་པས་ནི། །དེ་རྣམས་ལ་ནི་སྐྱེ་
འཆི་མེད། །བདེ་བའི་རྒྱལ་པོ་ཉིད་དུ་རྩེན། །བྱང་ཆུབ་ཀྱི་ནི་ཡིད་དུ་བགྲོད། །ཁྱོད་དང་ཐབས་ཅིག་འདྲེས་པར་འགྱུར། །གོང་བུ་གཅིག་པུ་གཉིས་མེད་བཞུགས། །དེ་ལྟར་བསྟོད་པས་རྡོ་རྗེ་ཆེ། །མཆོད་པ་བཞི་ནི་རབ་སྟོན་མཛད། །དཀྱིལ་འཁོར་བདག་དང་གཉིས་མེད་ཉིད། །མཆོད་པ་རྣམས་ནི་
གཉིས་མེད་བྱེད། །ཕྱི་དང་ནང་བདག་ཉིད་ཅན་རྫས། །གཉིས་པ་ཡི་ནི་མཆོད་པར་དྲན། །བཟའ་དང་བཏུང་སོགས་ལ་རོལ་པ། །གཉིས་མེད་མཆོད་པ་གསུམ་པའོ། །བཞི་པ་ཆོས་དང་རྣལ་འབྱོར་དག །འཛིན་པ་ཡི་ནི་མཆོད་པའོ། །དེ་ལྟའི་མཆོད་པ་ལ་བརྟེན་ནས། །ཐམས་ཅད་བྱས་པས་ལས་རྒྱལ་

པོར། །འགྱུར་རོ་རྡོ་རྗེ་མཁའ་འགྲོ་ནི། །གྲུ་གསུམ་དུ་ནི་མཉེས་བྱ་སྟེ། །སྔོན་དུ་དཀྱིལ་འཁོར་བྱས་ནས་ནི། །ལག་པ་གཡོན་པས་ཐམས་ཅད་དུ། །པདྨ་ཡི་ནི་བསྐོར་ནས་སྣོད། །སྔགས་པ་རྣམས་ཀྱིས་གཟུང་བར་བྱ། །སྔོན་དུ་རྣལ་འབྱོར་མ་ལ་ནི། །སྐྲ་གྲོལ་བ་ཡིས་གཏོར་མ་སྦྱིན། །རྣལ་འབྱོར་མ་ཀུན་ཆུ་སྐྱེས་ནི། །
ཁ་ཡིས་བཟུང་ནས་དཀྲུག་པར་བྱ། །དེ་ཡི་ལག་པར་སོན་པའི་དཔལ། །གང་སུ་ཡིས་ཀྱང་དབྲོག་མི་ནུས། །ཇི་ལྟར་བདེ་བས་བདེ་བ་གཟུང་། །རྫོགས་པའི་སངས་རྒྱས་མཆོག་མཉེས་བྱ། །རྟག་ཏུ་དམ་ཚིག་བསྐྱང་བར་བྱ། །སྤུན་གྱི་སྤྱོད་པའང་བསྟེན་པར་བྱ། །སྙིང་རྗེའི་མཆོག་དབང་གྱུར་བྱ་ཞིང་། །དབང་པོ་རྣམས་ནི་མི་རྟག་
པར། །བསྒོམ་བྱ་སྣང་བ་མེད་པ་ཡི། །རང་བཞིན་དབང་དུ་གྱུར་པར་གནས། །རྡོ་རྗེ་པདྨ་སྙོམས་འཇུག་པས། །ཕྱག་རྒྱ་ནང་གི་བདག་ཉིད་མཆོག །སྟོང་ཉིད་གཉིས་མེད་རྣལ་འབྱོར་པས། །དངོས་པོ་ཐམས་ཅད་སྤང་བར་བྱ། །དོན་དམ་ཅན་དེ་ཉིད་འདིར་བྱ། །རྟག་ཏུ་བྱང་ཆུབ་སེམས་དྲན་བྱ། །མན་ངག་གཅིག་ནི་བསྒོམས་
པ་ཡིས། །མན་ངག་ཐམས་ཅད་མཚོན་པར་བྱ། །ཇི་ལྟར་ས་གཅིག་ཐོབ་པ་ཡིས། །ས་ཐམས་ཅད་ནི་འཐོབ་པར་འགྱུར། །དེ་བཞིན་མན་ངག་ཐམས་ཅད་ཀྱང་། །མན་ངག་གཅིག་གིས་འཐོབ་པར་འགྱུར། །བྱིས་པ་རྣམས་དང་རྒན་པོ་དང་། །རྣལ་འབྱོར་མ་རྣམས་ཐམས་ཅད་དུ། །མཉམ་པའི་མཆོད་པའི་ཆོ་
ག་ཡིས། །མཁས་པ་ཡིས་ནི་བྱ་བ་ཡིན། །མི་མཉམ་པ་ཡིས་དངོས་གྲུབ་འཇོམས། །དམྱལ་བ་སོགས་པར་ལྟུང་བར་འགྱུར། །རྒན་པོ་ཡོན་ཏན་ཀུན་གནས་པ། །དེ་རྣམས་མཉེས་པས་བྱང་ཆུབ་སྟེར། །ཁྱད་པར་མཆོད་པ་ཉིད་ནི་འདིར། །བྱིས་པ་རྣམས་དང་དེ་བཞིན་ཡང་། །གཉིས་བཅས་རྣལ་འབྱོར་
པ་རྣམས་ཀྱིས། །མེ་ཏོག་བསྐོར་བ་ལ་སོགས་བྱ། །ཀུན་དུ་སྨོད་པའི་ངག་མི་བྱ། །འདོད་དང་འདོད་མིན་སྦྱོར་བྲལ་བྱ། །མ་བྱིན་པར་ཡང་བླང་བྱ་ཞིང་། །རྟག་ཏུ་སྲོག་ཆགས་གསད་པར་བྱ། །སེམས་ཅན་རྣམས་ལ་བརྫུན་སྨྲ་ཞིང་། །མ་སོགས་རྣལ་འབྱོར་མ་ལ་བགྲོད། །འཁོར་ལོ་མཆོད་པ་རྒྱུན་དུ་བྱ། །བཟའ་བྱ་ལྔ་ལ་
སོགས་པ་སྦྱིན། །དེ་ཡི་བསོད་ནམས་ཀྱིས་འཐོབ་པ། །དུས་ཐམས་ཅད་དུ་བགེགས་མེད་དང་། །གྲུབ་པའི་རྣལ་འབྱོར་མ་མཐོང་བས། །བསམ་པ་གཞན་ནི་རབ་ཏུ་འཇུག །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་

པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་བསྟོད་པ་དང་མཆོད་པ་བཞི་ལ་སོགས་པ་གཉིས་སུ་མེད་པའི་དམ་ཚིག་བསྟན་པའི་ལེའུ་ཞེས་བྱ་བ་སྟེ་ལྔ་བཅུ་རྩ་གཅིག་པའོ།། །།རྒྱུད་འདི་རབ་ཏུ་བྱུང་བ་ནི། །མ་བྱུང་
འབྱུང་བར་མི་འགྱུར་རོ། །མཚན་ཉིད་ཐམས་ཅད་ཡོངས་སུ་རྫོགས། །མཚན་ཉིད་མེད་པ་ཐམས་ཅད་སྤངས། །སུམ་ཅུ་བདུན་བདག་ཉིད་རྣལ་འབྱོར། །གཉིས་མེད་མཁའ་འགྲོ་རྒྱ་མཚོ་དང་། །གཉིས་མེད་རྩ་རྒྱུད་རྒྱུད་ཆེན་པོ། །འདུས་པའི་རྣམ་པའི་གཟུགས་ཅན་ཏེ། །སངས་རྒྱས་བྱང་ཆུབ་སེམས་
རྣམས་ཀྱི། །དུས་ཐམས་ཅད་དུ་ཞལ་ན་གནས། །ཡི་གེ་ཀུན་གྱི་ཟ་མ་ཏོག །འབུམ་ཕྲག་སུམ་ཅུ་དྲུག་དང་པོ། །མཁའ་འགྲོ་རྒྱ་མཚོ་རབ་བཤད་དེ། །ཆེན་པོ་ཆུང་ངུར་གསུངས་པའོ། །རི་རབ་ཀྱི་ནི་རྡུལ་ཚད་ཀྱི། །མཁའ་འགྲོ་ཐམས་ཅད་ཀྱིས་གསུངས་སོ། །མཐའ་ཡས་ཤིང་
ནི་མུ་མེད་ཉིད། །རྩོད་པའི་དུས་ཀྱི་སའི་ནང་དུ། །བཅོམ་ལྡན་མཐའ་ཡས་པས་འདི་གསུངས། །ཤཱཀྱ་སེང་གེས་གསུངས་པའི་རྒྱུད། །རྣལ་འབྱོར་ཕ་རོལ་སོན་པའོ། །ཉན་པ་སྟོན་པ་རང་ཉིད་དེ། །འཆད་པོ་སྐྱེ་བོ་གཞན་ཀྱང་ངོ་། །ལེགས་པར་གསུངས་དང་
འཆད་འགྱུར་བ། །དེའི་རང་བཞིན་དུའང་བགྲོད་པར་འགྱུར། །བསྡུ་བ་མཛད་པ་སོགས་རྣམས་ཀྱིས། །བདག་ལས་བགྲོད་པ་དེ་ཐོབ་བོ། །མ་མོ་ཐམས་ཅད་འདུས་རྣམས་ཀྱིས། །རྡོ་རྗེའི་གནས་རྣམས་སུ་བསྡུས་སོ། །གཅིག་ལ་གཅིག་གིས་བཞེད་པ་ནི། །གསོལ་
བ་འདེབས་ཤིང་གསོལ་འདེབས་མཛད། །བཅོམ་ལྡན་འདས་ཀྱིས་གསུངས་པ་ཡི། །ཚིག་འདི་ལ་ནི་མངོན་པར་དགའ། །སྡིག་པ་རྣམས་ལས་གྲོལ་བར་འགྲོ། །སྲིད་པ་ལས་ནི་འགྲོ་བར་བྱོས། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །
རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་རྒྱ་མཚོ་དྲུག་ལ་སོགས་པ་ལ་རྣལ་འབྱོར་དང་ཡེ་ཤེས་དང་སྡོམ་པ་དང་བྱ་བ་དང་དེ་ཁོ་ན་ཉིད་རྒྱ་མཚོར་གྱུར་པ་དང་མཁའ་འགྲོ་རྒྱ་མཚོ་

ལས་འདི་རྣམས་དང་མི་མཉམ་པའི་རྒྱུད་ཀྱི་རྒྱལ་པོ་ཆེན་པོ་ཞེས་བྱ་བ་རྫོགས་སོ།། །།དཔལ་བལ་ཡུལ་གྲུབ་པའི་གནས་མཆོག་ཆེན་པོ་ཡུ་ཏུང་ལྷུན་གྱིས་གྲུབ་པའི་གཙུག་ལག་ཁང་ཆེན་པོར་རྒྱ་གར་གྱི་པཎྜི་ཏ་ཆེན་པོ་རྡོ་རྗེ་སློབ་དཔོན་རྟོག་གེ་པ་རྣམས་ཀྱི་གཙུག་གི་ནོར་བུ་དུས་
དེང་སང་འགྲན་ཟླ་མེད་པ། སྙིང་རྗེ་ཆེན་པོས་ཐུགས་བརླན་པའི་ངང་ཚུལ་ཅན། ཕྱོགས་སྣ་ཚོགས་ནས་འདུས་པའི་སྐྱེ་འགྲོ་རྣམས་ལ་ཆོས་དང་ཟང་ཟིང་གི་ཆར་གྱིས་ཚིམ་པར་མཛད་པ། དཔལ་རྡོ་རྗེ་ཕག་མོའི་ཞབས་ཀྱི་ཆུ་སྐྱེས་ཀྱི་རྡུལ་ལ་རེག་པ་ཤཱཀྱའི་
སྲས་པོ་རྒྱལ་བའི་སྡེའི་ཞལ་སྔ་ནས་དང་། བོད་ཀྱི་ལོ་ཙྪ་བ་ཤཱཀྱའི་དགེ་སློང་དྷརྨ་ཡོན་ཏན་གྱིས་མཉན་ཅིང་བསྒྱུར་བའོ།། །།ཕྱིས་གང་ཟག་ཆོས་ཀྱི་སྤྱན་ཅན་དཔལ་མཆོག་དང་པོའི་རྡོ་རྗེའི་བཀའི་ཚུལ་དང་ཡང་བསྟུན་ཏེ་ཞུ་གཏུགས་ལེགས་
པར་བྱས་སོ། །མཁའ་མཉམ་བདེ་རྫོགས་སྣ་ཚོགས་སྤྲུལ་པ་སངས་རྒྱས་རྣམས་ཀྱི་སྐུ། །དེས་གསུངས་དྲི་མེད་སྣ་ཚོགས་གདུལ་བྱའི་བསམ་དབང་གིས། །གསུང་གཅིག་གིས་ཀྱང་སྣ་ཚོགས་དོན་མང་སྟོན་པས་དཔྱད་པ་དཀའ། །དེ་ལྟར་ཡིན་ཡང་ཇི་ལྟར་
མི་བདག་ཤིང་རྟ་ཆེར་ཞུགས་ནས། །གཡུལ་ངོར་འཇུག་དུས་རྐང་གིས་བགྲོད་རྣམས་འཐབ་པར་མི་བརྩོན་ནམ། །དེ་བཞིན་སྔོན་གྱི་མཁས་པ་ཆེན་པོ་རྣམས་ཀྱི་རྗེས་འབྲངས་པས། །ཁོ་བོས་གཞན་དོན་ནུས་པ་མིན་ནའང་ཕན་པའི་བསམ་པས་བསྒྱུར། །འདི་ལ་གཞུང་དང་བླ་མའི་མ་ཡིན་རང་གི་བློ་
གྲོས་སྐྱོན་གྱིས་ནི། །སྒྲ་དོན་འགལ་བར་གྱུར་པ་བཅོམ་ལྡན་དཔའ་བོ་རྣལ་འབྱོར་མ་རྣམས་དང་། །མཁའ་འགྲོའི་ཚོགས་དང་བསྟན་དགའི་ལྷ་རྣམས་མཁས་པ་རྣམས་ཀྱིས་བཟོད་པར་རིགས། །འདི་ལས་ཐོབ་པའི་དགེ་བ་དྲི་མེད་ཅུང་ཟད་དེས། །འགྲོ་ཀུན་རྡོ་རྗེ་འཆང་གི་གོ་འཕང་
ཐོབ་གྱུར་ཅིག །བདག་གིས་སྲོལ་བཏོད་ཙམ་འདི་ལ། །སྒྲ་དོན་འཇུག་པ་མཁྱེན་རྣམས་ཀྱི། །སྐད་གཉིས་སྨྲ་བས་གཟིགས་པ་ན། །སྐྱོན་དུ་གྱུར་སྣང་བཅོས་པར་ཞུ། །ཕྲག་དོག་སྒོ་ནས་མི་འཕྱ་ཞིང་། །རྗེས་སུ་ཡི་རང་བ་ཡང་མཛོད། །རྫོགས་སོ།། །།

༄༅༅། །རྒྱ་གར་སྐད་དུ། ཤྲཱི་མ་ཧཱ་སམྦ་རོ་ད་ཡ་ཏནྟྲ་རཱ་ཛཱ་ནཱ་མ། བོད་སྐད་དུ། དཔལ་བདེ་མཆོག་འབྱུང་བ་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ། དཔལ་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་
པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་བཙུན་མོའི་བྷ་ག་རྣམས་ལ་བཞུགས་ཏེ། འཕགས་པ་དགའ་བོ་ལ་སོགས་པ་འདོད་ཆགས་དང་བྲལ་བ་རྣམས་ཀྱིས་བསྐོར་ཅིང་། འཕགས་པ་སྤྱན་རས་གཟིགས་ཀྱི་དབང་ཕྱུག་ལ་སོགས་པ་རྣལ་འབྱོར་ཀྱི་དབང་ཕྱུག་བྱེ་བ་ཕྲག་
བརྒྱད་ཅུའི་དབུས་སུ་ཕྱག་ན་རྡོ་རྗེ་ལ་གཟིགས་ནས་འཛུམ་པ་མཛད་པ་དང་། ཕྱག་ན་རྡོ་རྗེ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། ལག་པ་ཐལ་མོ་སྦྱར་ནས་བཅོམ་ལྡན་འདས་ལ་གསོལ་བ་བཏབ་པ། ཀྱེ་རྣམ་པ་
ཀུན་མཆོག་སྡོམ་པ་ཡི། །བསྐྱེད་པའི་རྣལ་འབྱོར་མཚན་ཉིད་དང་། །རྫོགས་པ་ཡང་ནི་ཇི་ལྟར་ལགས། །བཅོམ་ལྡན་ལྷ་ལས་མཉན་པར་འཚལ། །རླུང་དང་མེ་དང་ཆུ་དང་ས། །དེ་བཞིན་ནམ་མཁའ་ཇི་ལྟར་ལགས། །རྣམ་པ་ལྔ་ནི་ཇི་ལྟར་ལྷ། །གཙོ་བོ་ཡུལ་དྲུག་དེ་བཞིན་ཅི། །ཕྱི་དང་
ནང་དུ་གནས་པ་ཡི། །སྐུ་གསུམ་བྱིན་རླབས་ཇི་ལྟ་བུ། །ལྷ་ཡི་སྐུ་ནི་ཇི་ལྟར་ལགས། །གཙོ་བོས་དེ་བཞིན་ལྷ་མོ་གསུངས། །ཟླ་བ་ཉི་མ་ཅི་ཞིག་ལྷ། །ལམ་ལྔ་པོ་ནི་ཇི་ལྟར་ལགས། །ལུས་ཀྱི་རང་བཞིན་ཇི་ལྟ་བུ། །དེ་བཞིན་རྩ་ཡི་གཟུགས་ནི་ཅི། །རྩ་ཡི་གྲངས་ཀྱི་ཚད་ནི་དུ། །དེ་བཞིན་
ལུས་ཀྱི་གོང་བུ་ཅི། །སྦས་པའི་དམ་ཚིག་གི་ནི་བརྡ། །གཙོ་བོས་བདག་ལ་བཤད་དུ་གསོལ། །ཕྱི་དང་ནང་གི་བདག་ཉིད་ཀྱི། །གནས་ལ་སོགས་པའི་བརྡ་དུ་ཞིག །ཇི་ལྟར་ས་ལ་སོགས་པ་འཐོབ། །མཚན་མ་ཇི་ལྟར་མཐོང་བར་འགྱུར། །ཁྱོད་ཀྱི་ལས་ནི་བཅུ་གཉིས་གང་། །སྔགས་ཀྱི་
བཟླས་པ་ཇི་ལྟར་འགྱུར། །བགྲང་ཕྲེང་དག་ནི་ཇི་ལྟར་རིགས། །བཟླས་པའི་གྲངས་ནི་དུ་ཞིག་ལགས། །ལྷ་ཡི་རྣམ་པའི་རྣལ་འབྱོར་ཅི། །དཀྱིལ་འཁོར་བྲི་བ་དུ་ཞིག་མཆིས། །སྔགས་ཀྱི་དངོས་གྲུབ་ཅི་ཞིག་ལྷ། །གཞོན་ནུ་མ་ཡི་མཆོད་པ་ཅི། །བྱ་དང་བྱ་མིན་ཉི་མ་གང་། །གཙོ་བོ་

མྱོས་བྱེད་གཏོར་མ་ཅི། །བདུད་རྩི་ལྔ་སོགས་ཇི་ལྟར་ལྷ། །ལྕགས་ཀྱུ་ལྔ་སོགས་ཇི་ལྟར་འགྱུར། །དཀྱིལ་འཁོར་བྲི་བ་བཤད་དུ་གསོལ། །ཐིག་གདབ་པ་ནི་ཇི་ལྟར་འགྱུར། །ཇི་ལྟར་ས་ནི་ཡོངས་སུ་སྦྱང་། །སྲུང་བའི་འཁོར་ལོ་ཇི་ལྟར་འགྱུར། །སློབ་དཔོན་གྱི་ནི་བྱ་བ་གང་། །ཇི་
ལྟར་སློབ་མ་ཡོངས་སུ་གཟུང་། །དབང་བསྐུར་བ་ཡི་གྲངས་ནི་དུ། །བཞི་པ་ཡང་ནི་ཇི་ལྟར་འགྱུར། །དུས་ཀྱི་ངེས་པ་ཇི་ལྟ་བུ། །དེ་བཞིན་འཆི་བ་བླུ་བ་གང་། །དུས་བཞིའི་མིང་ནི་དུ་ཞིག་མཆིས། །གླིང་བཞི་པ་ནི་ཇི་ལྟར་ལགས། །དུས་དང་དུས་མིན་དངོས་གྲུབ་ཅི། །སྤྱོད་པ་ཇི་ལྟར་སྤྱད་
པར་བགྱི། །རྣལ་འབྱོར་མ་ཡི་རྒྱུད་ནི་དུ། །རྣལ་འབྱོར་རྒྱུད་ནི་ཇི་ལྟར་འགྱུར། །མདོ་སྡེའི་གྲངས་ནི་ཇི་ལྟ་བུ། །དེ་བཞིན་ཕ་རོལ་ཕྱིན་པ་དུ། །རབ་གནས་སྦྱིན་སྲེག་མཆོད་སྦྱིན་དང་། །སྔགས་ཀྱི་དངོས་གྲུབ་ཇི་ལྟར་འགྱུར། །བཅུད་ཀྱིས་ལེན་ནི་ཇི་ལྟར་ལྷ། །མྱོས་བྱེད་བཏུང་བ་ཇི་ལྟར་
འགྱུར། །གསང་སྔགས་ཇི་ལྟར་འབྱུང་འགྱུར་ལྷ། །སྔགས་བཏུ་བ་ནི་ཇི་ལྟར་འགྱུར། །ཚར་གཅད་པ་ནི་ཅི་ཞིག་ལྷ། །གཙོ་བོ་རྗེས་གཟུང་ཇི་ལྟ་བུ། །བཅོམ་ལྡན་དེ་ཉིད་རྣམས་ནི་ཅི། །སྟོང་པ་ཉིད་དང་སྙིང་རྗེ་གང་། །སྟོང་པ་ཉིད་ཀྱི་རང་བཞིན་ཅི། །ཇི་ལྟར་དེ་བཞིན་ཉིད་རང་བཞིན། །
ཆོས་རྣམས་ཐམས་ཅད་ཡོངས་ཤེས་པའི། །སྒོམ་པའི་མཚན་ཉིད་གཙོ་བོས་གསུངས། །དཔལ་བདེ་མཆོག་འབྱུང་བའི་རྒྱུད་ལས་ཞུས་པའི་ལེའུ་སྟེ་དང་པོའོ།། །།བཅོམ་ལྡན་འདས་ཀྱིས་བཀའ་སྩལ་པ། ཕྱག་ན་རྡོ་རྗེ་གསང་བ་འབྱུང་བ་འདི་ཞུས་པ་ལེགས་སོ་ལེགས་
སོ། །དེ་ནས་དེའི་ཕྱིར་སྐྱེད་པ་ཡི། །རིམ་པའི་སྒོམ་པ་ཡང་དག་བཤད། །སྣ་ཚོགས་ལས་ཀྱི་རང་བཞིན་གྱིས། །སྐྱེ་གནས་བཞི་པོ་རྣམས་སུ་འགྱུར། །སྒོང་སྐྱེས་མངལ་ནས་སྐྱེས་པ་དང་། །དྲོད་གཤེར་དང་ནི་རྫུས་སྐྱེས་རྣམས། །ངང་པ་ཁྲུང་ཁྲུང་རྨ་བྱ་དང་། །ནེ་ཙོ་བཞད་སོགས་
སྒོང་སྐྱེས་ཏེ། །གླང་པོ་མ་ཧེ་བ་ལང་རྟ། །བོང་བུ་མི་སོགས་མངལ་ནས་སྐྱེས། །སྲིན་བུ་འབུ་དང་ཕྱེ་མ་ལེབ། །ཉ་ལ་སོགས་པ་དྲོད་གཤེར་སྐྱེས། །ལྷ་དང་དམྱལ་བའི་སེམས་ཅན་རྣམས། །དེ་བཞིན་བར་དོའི་སྲིད་པ་དང་། །བསྐལ་པ་དང་པོ་པ་ལ་སོགས། །འདི་རྣམས་རྫུས་

སྐྱེས་སེམས་ཅན་ནོ། །ཤར་གྱི་ལུས་འཕགས་བ་ལང་སྤྱོད། །དེ་བཞིན་བྱང་གི་སྒྲ་མི་སྙན། །གླིང་གསུམ་པོ་ཡི་མི་རྣམས་ནི། །ལོངས་སྤྱོད་ཆེན་པོས་ཡང་དག་འཚོ། །བླུན་རྨོངས་བྱེ་བྲག་མི་ཕྱེད་ཅིང་། །རྟོག་མེད་རྣམ་པར་དཔྱོད་མེད་པའོ། །འཛམ་བུ་གླིང་དུ་ལེགས་
སྐྱེས་པ། །ལས་ཀྱི་ས་པར་རབ་ཏུ་གྲགས། །ལེགས་བྱས་ཉེས་པར་བྱས་པའི་ལས། །མཆོག་དང་འབྲིང་དང་ཐ་མ་རྣམས། །སྐྱེ་བ་སྔོན་གྱི་རྣམ་སྨིན་འདིར། །སྐྱེ་བོ་རྣམས་ལ་སྣང་བར་འགྱུར། །རྒྱགས་དང་སེར་སྣ་གདུག་སེམས་རྣམས། །གཡོ་སྒྱུ་མངོན་པའི་ང་རྒྱལ་དང་། །
ཆགས་སྡང་གཏི་མུག་ལ་སོགས་ཀྱིས། །རིམས་དང་ནད་ལ་སོགས་པས་གཟིར། །འཛམ་བུ་གླིང་པའི་གཙོ་བོ་མཆོག །ཡུལ་དབུས་སུ་ནི་སྐྱེས་པ་སྟེ། །སྔོན་གྱི་དགེ་བ་ལ་ལྟོས་ནས། །དབང་པོ་རྣོ་འབྲིང་རྟུལ་པོར་འགྱུར། །མི་རུ་སྐྱེས་པ་འབྲས་བུའི་དམ་པ་དང་པོ་སྟེ། །རང་
གི་ཁྱིམ་ནས་ངེས་འབྱུང་རྙེད་པ་གཉིས་པ་ཡིན། །རབ་ཏུ་བྱུང་ནས་དགེ་བ་སྒྲུབ་པ་གསུམ་པ་སྟེ། །རྩེ་གཅིག་ཡིད་ནི་ཐོབ་པར་གྱུར་པ་བཞི་པར་གསུངས། །སྒྱུ་མ་ལྟ་བུའི་ཏིང་ངེ་འཛིན། །མི་རྣམས་ཀྱིས་རབ་མི་ཤེས་ཏེ། །ཐོག་མེད་དུས་ཀྱི་ཉོན་མོངས་ཀྱི། །བག་ཆགས་རབ་ཏུ་
བསགས་བྱས་པས། །དེ་ཕྱིར་སྔོན་བྱས་ལས་ཀྱིས་ནི། །སྐྱེ་དང་འཆི་བ་ཡང་དག་འབྱུང་། །ཚོགས་པ་མ་རྙེད་དེ་སྲིད་དུ། །ཞག་བདུན་བར་དོའི་སྲིད་པར་གནས། །སྲིད་པ་བར་དོའི་སེམས་ཅན་ནི། །འགྲོན་པོའི་བགྲོད་པ་ཇི་བཞིན་དུ། །འདི་ལྟར་ལས་ཀྱི་ཞགས་པ་ཡིས། །
འགྲོ་བ་དྲུག་ཏུ་རབ་ཏུ་སྐྱེ། །ཕ་མའི་ཀུན་དུ་སྦྱོར་སོགས་ནི། །སྲེད་པའི་སྐྱེ་བོས་མཐོང་གྱུར་ནས། །རྟ་ལ་ཞོན་བཞིན་རྣམ་ཤེས་ནི། །རླུང་གི་བཞོན་པ་ཞོན་ནས་སུ། །སྐད་ཅིག་ཐང་ཅིག་ཉིད་ལ་ནི། །ཤིན་ཏུ་མྱུར་བར་འོངས་གྱུར་ནས། །ཤིན་ཏུ་དགའ་དང་བཅས་སྟོབས་ཀྱིས། །ཁ་
ཡི་ལམ་ནས་འཇུག་པར་འགྱུར། །རྩ་ནི་སྟོང་ཕྲག་བདུན་ཅུ་གཉིས། །རབ་བསྐུལ་དེ་ཡི་སྐད་ཅིག་ལ། །ཨཱ་ལི་ཀཱ་ལི་ཞུ་བྱས་པས། །མཆོག་ཏུ་དགའ་བ་ཡང་དག་འཐོབ། །ཁུ་བ་ཁྲག་དེའི་དབུས་སུ་ནི། །ཐིག་ལེའི་གཟུགས་ཀྱིས་ཡང་དག་གནས། །དང་པོའི་རྣམ་པ་ནུར་ནུར་པོ། །

མེར་མེར་པོ་ནི་གཉིས་པ་ཡིན། །ལྟར་ལྟར་པོར་སྐྱེས་གསུམ་པ་སྟེ། །དེ་བཞིན་བཞི་པ་གོར་གོར་པོ། །རླུང་རྣམས་ཀྱིས་ནི་བསྐུལ་ཙམ་གྱིས། །ཤ་ཡི་རྣམ་པ་ལྟ་བུར་འགྱུར། །ཟླ་བ་ལྔར་གྱུར་ས་བོན་ལས། །ཡན་ལག་ལྔ་ནི་རབ་ཏུ་སྐྱེ། །ཟླ་བ་བདུན་ན་སྐྲ་དང་སྤུ། །སེན་མོ་རྟགས་ནི་
སྐྱེ་བར་འགྱུར། །ཟླ་བ་བརྒྱད་ན་དབང་པོ་དང་། །ལུས་ཀྱི་ཡན་ལག་འབྱུང་བར་འགྱུར། །ཟླ་བ་དགུ་ན་ཡང་དག་རྫོགས། །ཟླ་བ་བཅུ་ན་སེམས་དང་ལྡན། །ནུར་ནུར་རང་བཞིན་མི་བསྐྱོད་པ། །མེར་མེར་པོ་ནི་རིན་ཆེན་འབྱུང་། །འོད་དཔག་མེད་མགོན་ལྟར་ལྟར་པོ། །གོར་གོར་
པོ་ནི་དོན་ཡོད་གྲུབ། །མཁྲང་གྱུར་རྣམ་པར་སྣང་མཛད་དེ། །རྣམ་པ་ལྔར་ནི་བསྟན་པ་ཡིན། །དྲི་ཆུ་ཁྲག་ནི་མི་བསྐྱོད་པ། །ས་བོན་རང་བཞིན་འོད་དཔག་མེད། །གོང་བུ་རིན་ཆེན་འབྱུང་ལྡན་ཏེ། །རོ་གཅིག་འདྲེས་པ་རྣམ་སྣང་བཞུགས། །སྐྱེ་གནས་དབུས་སུ་རྩ་གཉིས་ཏེ། །གཡས་དང་
གཡོན་ན་དེ་བཞིན་གནས། །གཡོན་ནས་ཁུ་བ་ཞེས་བཤད་དེ། །གཡས་ནས་དེ་བཞིན་ཁྲག་ཡིན་ནོ། །དེ་དག་གཅིག་ཏུ་འདུས་གྱུར་པ། །ཆོས་ཀྱི་དབྱིངས་ཀྱི་རང་བཞིན་ནོ། །ལས་ཀྱི་ས་བོན་དབང་ཐོབ་པས། །རླུང་གིས་ཡང་དག་བསྒྱུར་ནས་སུ། །ཆོས་ཀྱི་འབྱུང་གནས་སྒོ་རུ་
ནི། །གདོང་ནི་ངེས་པར་ཕྱོགས་པར་འགྱུར། །དཀུ་གཡས་སུ་ནི་བརྟེན་ནས་སུ། །ཙོག་པུར་མངོན་པར་ཕྱོགས་ཏེ་གནས། །དཀུ་གཡོན་ཡང་དག་བརྟེན་ནས་ནི། །ཤེས་རབ་ལྟོར་ནི་མངོན་ཕྱོགས་འགྱུར། །མཁས་པས་ས་བོན་ལྟུང་བའི་རིམ། །དུས་ཀྱི་སྐད་ཅིག་ཡང་དག་མཚོན། །
གཡས་ན་རླུང་ནི་རྒྱུ་བ་གང་། །ཐམས་ཅད་དུ་ནི་སྐྱེས་བུར་འགྱུར། །གཡོན་ནས་རླུང་ནི་རྒྱུ་བ་གང་། །ངེས་པར་བུད་མེད་རྣམས་སུ་འགྱུར། །གཉིས་ཀའི་དབུས་རྒྱུའི་ས་བོན་གང་། །རྟག་ཏུ་མ་ནིང་འགྱུར་བའོ། །ཆུ་ཁམས་ཕ་ཡིར་ཤེས་པར་བྱ། །མེ་ཡི་ཁམས་ནི་མ་ཡིའོ། །པགས་
པ་ཤ་དང་ཁྲག་རྣམས་ནི། །མ་ལས་སྐྱེས་ཞེས་བཤད་པ་སྟེ། །རྒྱུས་པ་རྐང་དང་ཁུ་བ་རྣམས། །ཕ་ལས་སྐྱེས་ཞེས་བཤད་པ་ཡིན། །དྲུག་པོ་འདི་དག་བསྡུས་པའི་ལུས། །རྡོ་རྗེ་སེམས་དཔས་གང་གསུངས་པ། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་ཤེས་དེ་བཞིན་

ཏེ། །སངས་རྒྱས་ལྔ་ཡི་རང་བཞིན་དུ། །ཕུང་པོ་ངེས་པར་སྐྱེ་བ་ཡིན། །སྲིད་པ་སྐྱེད་པའི་རིམ་ཤེས་པས། །རྫོགས་པའི་སངས་རྒྱས་ཐོབ་བྱའི་ཕྱིར། །འདི་ནི་ཕུང་པོ་ཡོངས་མཁྱེན་པའི། །དེ་ཉིད་གསུངས་པ་རྣམས་ཀྱིས་བཤད། །འདི་ནི་སྐྱེད་པའི་རིམ་པ་ངེས་
པར་བསྟན་པའི་རིམ་པར་དབྱེ་བ་སྟེ་གཉིས་པའོ།། །།དེ་ནས་གང་ཞིག་ཤེས་ཙམ་གྱིས། །མྱུར་དུ་དངོས་གྲུབ་ཐོབ་འགྱུར་བའི། །རྫོགས་པའི་རིམ་པའི་བསྒོམ་པ་ནི། །ཡང་དག་རབ་ཏུ་བཤད་པར་བྱ། །ལུས་ཀྱི་དཀྱིལ་འཁོར་ལ་བརྟེན་ནས། །ཆོས་དང་ལོངས་
སྤྱོད་རྫོགས་པའི་སྐུ། །རྫོགས་པའི་བྱང་ཆུབ་རིམ་བསྒྲུབས་པས། །ལུས་ཀྱི་དཀྱིལ་འཁོར་ཞེས་གསུངས་སོ། །དབང་པོ་དམན་པས་སྐྱེད་རིམ་གྱི། །དཀྱིལ་འཁོར་བསྒོམ་ཞིང་བསམ་པར་བྱ། །དབང་པོ་རྣོན་པོས་སྐད་ཅིག་གི། །རྣམ་པས་སེམས་ཙམ་དཀྱིལ་འཁོར་བསམ། །
སྐད་ཅིག་རྣམ་པའི་རྣལ་འབྱོར་གྱིས། །རྫོགས་པའི་རིམ་པ་བསྒོམ་པ་ནི། །ཁམས་གསུམ་གཞལ་ཡས་ཁང་བདག་ཉིད། །སྲོག་ཆགས་རྣམས་ནི་དཀྱིལ་འཁོར་པ། །དེ་དབུས་སྐད་ཅིག་རྣམ་པ་ཡིས། །དཀྱིལ་འཁོར་བདག་པོ་རྣལ་འབྱོར་བའོ། །ཨོཾ་ཨཱཿཧཱུྃ་གི་སྔགས་ཀྱིས་
ནི། །སྐུ་གསུང་ཐུགས་ཀྱི་དཀྱིལ་འཁོར་ཏེ། །མཐོ་རིས་ས་སྟེངས་ས་འོག་ཏུ། །སྐད་ཅིག་གིས་ནི་སྐུ་གཅིག་འགྱུར། །སྐད་ཅིག་རྣམ་པས་རྣལ་འབྱོར་ཏེ། །སྐད་ཅིག་རྣམ་པས་གསང་སྔགས་འདོན། །དབང་པོ་ཀུན་དང་མཉམ་སྦྱོར་བ། །མཁའ་འགྲོ་དྲ་བའི་བདེ་བ་མཆོག །
ཁམས་བཞི་པ་དང་ཕུང་པོ་ལྔ། །དེ་བཞིན་ཡུལ་དྲུག་བདག་ཉིད་ནི། །ཁྲག་འཐུང་ལྷ་མོའི་ཡེ་ཤེས་ཏེ། །དེ་ལ་ཐ་དད་མི་བརྟག་གོ། །དཀྱིལ་འཁོར་དེ་བཞིན་ཉིད་རྒྱས་བཏབ། །དེ་བཞིན་མཁའ་མཉམ་སྟོང་པ་ཉིད། །སྣ་ཚོགས་དེ་བཞིན་ཉིད་བདག་མེད། །ཐབས་ནི་སྙིང་
རྗེའི་སྟོབས་ཡིན་ཏེ། །ཟུང་དུ་འཇུག་པ་རྣམ་རྟོག་བྲལ། །དཀྱིལ་འཁོར་སྙིང་པོ་མཆོག་ཡིན་ནོ། །རྣམ་པར་མི་རྟོག་སྦྱོར་བསམས་ཀྱང་། །དེ་ཚེ་མི་རྟོག་བསམ་མི་ཁྱབ། །དེ་ཡང་རྣམ་པ་ཀུན་གྱི་མཆོག །བདེ་བའི་དབང་པོ་རྣམ་པ་མེད། །དེ་ཉིད་དངོས་དང་དངོས་མིན་བདག །

རྟག་ཏུ་སྲིད་པས་འབྱུང་བར་མཛད། །སྣ་ཚོགས་སྤྲོས་པའི་རྟོག་པ་མེད། །རྟག་ཏུ་འབྱུང་བ་བདེ་བ་ཆེ། །སྐྱེ་བ་མེད་པའི་རང་བཞིན་གྱིས། །དེ་ལས་སྐྱེ་བ་ཡང་དག་འབྱུང་། །བེམས་པོ་མིན་ཕྱིར་བདག་ཉིད་རིག །མི་ཤེས་རྣམ་པར་མི་མཐོང་བས། །གཟུགས་མེད་གང་དུའང་མི་
གནས་ཤིང་། །འགྱུར་བ་མེད་ཕྱིར་བརྟན་པའོ། །ཀུན་རྫོབ་སྐྱེ་བ་འབྱུང་བས་ན། །ཆད་པ་མིན་ཕྱིར་དངོས་མེད་མིན། །ལྷན་ཅིག་སྐྱེས་དགའི་རང་དངོས་སུ། །ཆོས་རྣམས་ཐམས་ཅད་ལྷན་ཅིག་སྐྱེས། །བདག་བྱིན་བརླབ་པ་རང་འབྱུང་བ། །མི་ཤིགས་འཇིག་པ་མེད་པ་སྟེ། །སྐྱེ་
བ་མེད་པའི་རོ་མྱོང་བས། །སྒོམ་པ་ཡང་ནི་དེ་ཉིད་དེ། །སྟོང་ཉིད་སོ་སོར་རྟོགས་པས་ན། །བསམ་གཏན་ཤེས་རབ་ཏུ་ཡང་འགྱུར། །ཆོས་ཀུན་ཡོངས་སུ་ཤེས་པ་ཡི། །སྒོམ་པ་དེ་ཉིད་སྒོམ་མེད་པའོ། །རྫོགས་པའི་བྱང་ཆུབ་བདེ་བ་ཆེ། །ཕྱག་རྒྱ་ཆེན་པོ་མཆོག་དེ་བཞིན། །
དེ་ཉིད་ཆོས་ལ་འཇུག་པའི་ཕྱིར། །དེ་རྣམས་དབྱེ་བས་རབ་བསྟན་པ། །བླ་མ་དམ་པའི་མན་ངག་གིས། །གསལ་བར་འགྱུར་གྱི་གཞན་དུ་མིན། །སངས་རྒྱས་ཀུན་གྱི་སྡོམ་པ་ནི། །ཨེ་བྃ་ཡི་གེ་ལ་རབ་གནས། །སྐུ་དང་གསུང་དང་ཐུགས་ཀྱི་ལས། །རྣམ་ཀུན་མཆོག་གི་སྡོམ་
པའོ། །སྡོམ་པ་བྱང་ཆུབ་བདེ་མཆོག་སྟེ། །བལྟར་མེད་བརྗོད་དུ་མེད་པའོ། །སངས་རྒྱས་ཀུན་གྱི་གསང་བ་ནི། །འདུས་པ་བདེ་བའི་མཆོག་ཡིན་ཏེ། །བདག་བྱིན་བརླབ་པའི་རིམ་པ་འདི། །བླ་མའི་དྲིན་གྱིས་གསལ་བར་འགྱུར། །འདི་ནི་རྫོགས་པའི་རིམ་པ་ངེས་པར་བསྟན་པའི་
རིམ་པར་ཕྱེ་བ་སྟེ་གསུམ་པའོ།། །།དེ་ནས་དེ་ཕྱིར་འབྱུང་བ་བཞིའི། །མཚན་ཉིད་ཡང་དག་བཤད་པར་བྱ། །དངོས་པོ་དག་ནི་མ་ལུས་གང་། །དེ་ནི་འབྱུང་བའི་རང་བཞིན་ཏེ། །ས་དེ་ལ་ནི་དངོས་པོ་བརྟེན། །མེས་ནི་ཐམས་ཅད་འཚེད་པར་བྱེད། །ཆུ་ཡིས་འཇིག་
པར་བྱེད་པ་སྟེ། །རླུང་གིས་ལྷན་ཅིག་སྐྱོད་པར་བྱེད། །ནམ་མཁའ་ཡུལ་གྱིས་སྟོང་པར་གནས། །དེར་ནི་ཐམས་ཅད་དེ་ལས་སྐྱེ། །གང་དུ་གཅིག་ནི་གནས་པ་དེར། །བཞི་པོ་ཀུན་ཀྱང་ཉེ་བར་གནས། །རྩྭ་ཤིང་ལྗོན་པ་འཁྲིལ་ཤིང་སོགས། །བེམས་པོ་ལྟ་བུའི་རྣམ་ཤེས་ཙམ། །

གང་དག་འགྲོ་དྲུག་སེམས་ཅན་རྣམས། །ཚིགས་དང་ཚིགས་ནི་ཐམས་ཅད་དུ། །རྣམ་ཤེས་བཅས་པ་ལྟ་བུར་གནས། །དེ་ལྟར་སྲིད་པའི་དངོས་པོ་ཀུན། །བློ་དང་ལྡན་པས་ཤེས་པར་བྱ། །སེམས་ཅན་རྣམས་ནི་འཆི་བ་ན། །ཡན་ལག་ཉིང་ལག་ཐམས་
ཅད་ཀྱི། །རླུང་ནི་ཐམས་ཅད་བསྐྱོད་པར་འགྱུར། །སྐད་ཅིག་དེ་ལ་མེ་དྲོད་འདོར། །ཆུ་ནི་རྟག་ཏུ་སྐམས་གྱུར་ནས། །དེ་ནས་ཚོར་བ་མེད་པར་འགྱུར། །ལུས་ལ་སོགས་པའི་ས་ཁམས་ཀྱི། །སྲ་བ་ཉིད་ཙམ་གནས་པར་འགྱུར། །སྐྱེ་བ་དང་ནི་འཆི་བ་དག །ཐམས་ཅད་
དུ་ནི་འབྱུང་བར་འགྲོ། །ལྷ་དང་ལྷ་མིན་མི་རྣམས་ནི། །འབྱུང་བ་མེད་པར་སྐྱེ་མི་འགྱུར། །ལྷ་ཡི་འཇིག་རྟེན་སྐྱོང་ལ་སོགས། །ཐམས་ཅད་ལ་ནི་ལྷན་ཅིག་གནས། །རིག་བྱེད་གྲུབ་མཐའ་ཐམས་ཅད་ཀྱི། །རྟག་ཏུ་འདོད་ཅིང་བསྒོམ་པ་སྟེ། །གང་ཕྱིར་ཐམས་ཅད་ཀུན་དུ་
འགྲོ། །ས་སྟེངས་སྐྱེས་བུ་ཀུན་ལ་གནས། །འབྱུང་བ་བཞི་པོ་གཙོ་བོ་མཆོག །བསྟན་བཅོས་ཀུན་ལས་ཡང་དག་བཤད། །རླུང་ནི་སྲོག་ཏུ་ཡང་དག་བལྟ། །མེ་ནི་འཚོ་བའི་མཚན་ཉིད་དེ། །ཆུ་ནི་བདུད་རྩིའི་ངོ་བོ་ཉིད། །ས་ནི་ཞིང་ཙམ་ཉིད་དུ་གནས། །དེ་ལ་རྟག་ཏུ་གནས་
པའི་ལྷ། །རྣམ་ཤེས་མཆོག་གི་དབང་ཕྱུག་སྟེ། །ལྷ་ལྔ་ཡི་ནི་རྣམ་པ་རུ། །རྣམ་ཤེས་དེ་ནི་ཡོངས་སུ་འགྱུར། །གཟུགས་དང་ཚོར་བ་འདུ་ཤེས་དང་། །དེ་བཞིན་འདུ་བྱེད་རྣམ་པར་ཤེས། །མེ་ལོང་ལྟ་བུ་མཉམ་ཉིད་དང་། །སོ་སོར་ཀུན་དུ་རྟོག་པ་དང་། །དེ་བཞིན་བྱ་བ་གྲུབ་པ་དང་། །
ཆོས་དབྱིངས་ཤིན་ཏུ་རྣམ་དག་སྟེ། །ཡེ་ཤེས་འདི་དག་རབ་ཏུ་གནས། །རྣམ་སྣང་མཛད་དང་རིན་ཆེན་འབྱུང་། །འོད་དཔག་མེད་དང་དོན་ཡོད་གྲུབ། །དེ་བཞིན་མི་བསྐྱོད་པ་ཉིད་དེ། །རྣམ་ལྔ་རོ་གཅིག་རྫོགས་བྱང་ཆུབ། །གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱ་ཆོས་དེ་
བཞིན། །ཡུལ་དྲུག་ཏུ་ནི་ཤེས་བྱ་སྟེ། །འདི་དག་རྣམ་པར་དག་པར་བཤད། །ཁམས་ནི་བཅྭ་བརྒྱད་ཤེས་བྱ་སྟེ། །དེ་དག་ཕུང་པོའི་རང་བཞིན་ཉིད། །ཡི་གེ་མཆོག་ནི་བསྒོམ་པར་བྱ། །སངས་རྒྱས་འབྲས་བུ་འཐོབ་བྱའི་ཕྱིར། །མིག་ལ་སོགས་པ་བསྒོམ་བྱ་སྟེ། །མིག་གི་དབང་

པོའི་རྣམ་ཤེས་ནི། །ཐུགས་ཀྱི་རྡོ་རྗེའི་རྣམ་འཕྲུལ་ཡིན། །ངོ་བོ་ཉིད་གསུམ་རྣམ་དག་དོན། །འོད་གསལ་བ་ཡི་གོ་འཕང་འགྱུར། །སྒྲ་དང་རྣ་བ་རྣམ་ཤེས་ནི། །དམིགས་པ་མེད་པའི་ངོ་བོ་ཉིད། །སྣ་དང་དྲི་དང་རྣམ་ཤེས་ཀྱང་། །དེ་བཞིན་རྣམ་དག་ཤེས་པར་བྱ། །རོ་དང་ལྕེ་
དང་རྣམ་ཤེས་ནི། །དོན་དམ་ཉིད་དུ་རྣམ་པར་དག །ལུས་དང་རེག་བྱ་རྣམ་ཤེས་ཀྱང་། །སྒྱུ་མ་ལྟ་བུའི་ངོ་བོར་སྐྱེས། །ཡིད་དང་ཆོས་དང་ཡིད་རྣམ་ཤེས། །སྙིང་པོ་ཉིད་དུ་རྣམ་པར་དག །རྣམ་ཤེས་དྲུག་ནི་ཀུན་གཞི་རུ། །འཇུག་པས་དེ་བཞིན་གཤེགས་པ་ཡིན། །འོད་གསལ་
བ་ཡི་གོ་འཕང་ཐོབ། །ཧེ་རུ་ཀ་དཔལ་ཡང་དག་གནས། །ཡུལ་དང་ཡུལ་ཅན་སྦྱོར་བ་ཡིས། །རྣམ་རྟོག་མེད་པའི་གོ་འཕང་འགྱུར། །རྣམ་པ་ཀུན་གྱི་མཆོག་གནས་པས། །ཡུལ་ནི་རྣམ་དག་ཤེས་པར་བྱ། །སངས་རྒྱས་ཆོས་དང་དགེ་འདུན་ཏེ། །གཅིག་ལ་དེ་བཞིན་
གསུམ་དུ་བརྟགས། །སྐྱབས་གསུམ་དང་ནི་དེ་ཉིད་གསུམ། །སྐུ་གསུམ་རྣམ་པར་གྲོལ་བ་གསུམ། །ཞལ་གསུམ་ཡིག་གསུམ་ལྷ་གསུམ་སྟེ། །ཁམས་གསུམ་པ་ཡི་རང་བཞིན་ཉིད། དཀྱིལ་འཁོར་གསུམ་དང་རྣལ་འབྱོར་གསུམ། །ལམ་གསུམ་དུ་ནི་བསྟན་པ་སྟེ། །
དམ་ཚིག་གསུམ་དང་དགེ་བ་གསུམ། །དེ་བཞིན་སྐུ་དང་གསུང་དང་ཐུགས། །ཤེས་རབ་དང་ནི་ཐབས་ཉིད་དང་། །དེ་ཡི་སྦྱོར་བ་གསུམ་པ་སྟེ། །ཆོས་ཀྱི་འབྱུང་གནས་རང་བཞིན་གྱིས། །ཇི་ལྟར་གསང་གསུམ་མཐོང་བ་དང་། །འཁོར་གསུམ་མི་དམིགས་སྦྱོར་བ་ཡིས། །
སྔགས་གསུམ་གྱི་ནི་རང་བཞིན་ཉིད། །ཕྱི་དང་ནང་གི་བདག་ཉིད་ཀྱི། །རྩ་གསུམ་གྱི་ནི་རང་གི་དངོས། །ཕྱི་རོལ་འཇིག་རྟེན་པ་ཡི་ཆོས། །ལྷ་ལ་སོགས་པའི་བདག་ཉིད་ནང་། །ཕྱི་ནང་དག་པ་ཉིད་ཀྱི་ཕྱིར། །རྣལ་འབྱོར་པས་ནི་སངས་རྒྱས་འཐོབ། །ཆོས་ཀྱི་དབྱིངས་ཀྱི་རང་བཞིན་
དུ། །ལྷ་ནི་མངོན་སུམ་དམིགས་པར་བྱ། །རྣམ་པ་ཀུན་གྱི་མཆོག་རང་བཞིན། །ལྷ་མོར་ཡོངས་སུ་བརྟག་པར་བྱ། །དང་པོའི་ལྷ་ཡི་རང་བཞིན་དུ། །རྡོ་རྗེ་སེམས་དཔའ་རྣམ་པར་བཞུགས། །གནས་དང་ཞིང་ལ་སོགས་པའི་བརྡ། །དཔའ་བོ་རྣལ་འབྱོར་མའི་འདུས་པ། །དེ་

བཞིན་གཉིས་མེད་མཉམ་སྦྱོར་ལ། །ལྷ་རྣམས་ཡང་དག་འཕྲོ་བ་སྟེ། །ཚད་མེད་ལྷ་ནི་འཕྲོ་བ་ལས། །དཀྱིལ་འཁོར་ཚད་ཅན་རྣམ་པར་བརྟག །ལྷ་ཡི་རྣལ་འབྱོར་བསམ་མི་ཁྱབ། །སངས་རྒྱས་རོལ་པའང་བསམ་མི་ཁྱབ། །མཁའ་འགྲོ་དྲ་བའི་
གཟུགས་ཀྱིས་ནི། །ཧེ་རུ་ཀ་དཔལ་ཡང་དག་སྦྱོར། །དེ་དག་མི་ཕྱེད་ངོ་བོ་ཉིད། །བསྒོམ་པར་ང་ཡིས་བཤད་པ་ཡིན། །དེ་དག་ཐམས་ཅད་གཉིས་མེད་ཐོབ། །གཟུང་དང་འཛིན་དང་རྣམ་བྲལ་བ། །རགས་པ་སྒྲ་ཞེས་བཤད་པ་སྟེ། །ཕྲ་བ་སེམས་ཀྱི་རང་བཞིན་འགྱུར། །བསམ་
དང་བྲལ་བའི་དེ་ཉིད་ནི། །གོ་འཕང་མཆོག་ཅེས་ཡོངས་སུ་གྲགས། །འདི་ནི་འབྱུང་བ་བཞི་དང་རྣམ་པ་ལྔ་དང་། ཡུལ་དྲུག་ལྷའི་རྣམ་པར་དག་པ་རིམ་པར་ཕྱེ་བ་སྟེ་བཞི་པའོ།། །།དེ་ནས་ཟླ་བ་ཉི་མ་ཡི། །རབ་ཏུ་དབྱེ་བ་ཡང་དག་བཤད། །གཡས་
དང་གཡོན་དུ་སྦྱོར་བ་ཡིས། །རིམ་པ་ཇི་བཞིན་རྒྱུ་བ་སྟེ། །གཡོན་དུ་རྐན་ནས་བཟུང་ནས་ནི། །ལྟེ་བའི་དཀྱིལ་འཁོར་རབ་འཇུག་པའི། །ཟླ་བའི་རྩ་ནི་འོག་བལྟས་པར། །ཨཱ་ལི་ཟླ་བར་ཡང་དག་འབབ། །གཡས་སུ་ལྟེ་བ་ནས་བཟུང་ནས། །རྐན་གྱི་གནས་སུ་རབ་འཇུག་
པའི། །ཉི་མའི་རྩ་ནི་སྟེང་བལྟས་ཏེ། །ཀཱ་ལི་ཉི་མར་རྟག་ཏུ་འབབ། །སྣ་ཡི་སྒོ་ནི་གཉིས་པོ་ནས། །རྩ་གཉིས་རྒྱུ་བའི་མཚན་ཉིད་ནི། །རྩ་གཡོན་འཇུག་པའི་ལམ་ཡིན་ཏེ། །གཡས་པ་འབྱུང་བའི་ལམ་ཡིན་ནོ། །ཉི་ཤར་ནས་བརྩམས་ཇི་སྲིད་དེ། །ནུབ་ཀྱི་བར་ནི་ཉིན་མོ་
སྟེ། །ནུབ་པ་ནས་བརྩམས་ཇི་སྲིད་དེ། །ཤར་བའི་བར་ནི་མཚན་མོར་འགྱུར། །ཉིན་དང་མཚན་མོ་ཞག་ཡིན་ཏེ། །མེལ་ཚེ་ཐུན་ཞེས་བརྗོད་པ་ཡིན། །ཐུན་བཞི་ཉིན་མོར་ཤེས་བྱ་སྟེ། །དེ་བཞིན་མཚན་མོའང་ཐུན་བཞིའོ། །ཞག་གཅིག་ལ་ནི་འཕོ་བ་ཡི། །ཡན་ལག་
བཅུ་དྲུག་རྣམས་ཡིན་ཏེ། །ཐུན་ནི་ཕྱེད་ཕྱེད་རྟག་ཏུ་རླུང་། །སྣ་ཡི་བུ་གར་ཡང་དག་རྒྱུ། །ཡར་ངོའི་ཚེས་གཅིག་ནས་བཟུང་ནས། །ཉིན་ཞག་གསུམ་གྱི་ཐུན་ཕྱེད་ལ། །ཟླ་བའི་རླུང་ནི་རྒྱུ་བ་སྟེ། །དེ་ནས་ཞག་གསུམ་ཉི་མའི་རླུང་། །གོ་རིམས་འདིས་ནི་ཇི་སྲིད་དུ། །ཡར་ཚེས་

བཅྭ་ལྔའི་བར་དུའོ། །མར་ངོའི་ཚེས་གཅིག་ནས་བཟུང་ན། །ཉིན་ཞག་གསུམ་གྱི་སྔ་དྲོ་ནི། །ཉི་མའི་རླུང་དུ་གྲགས་པ་རྒྱུ། །དེ་བཞིན་ཚེས་ནི་བཅྭ་ལྔའི་བར། །ཐུན་རེ་ཡི་ནི་བཞི་ཆ་རྣམས། །ཆུ་ཚོད་དུ་ནི་བརྗོད་པས་ན། །ཉིན་ཞག་གཅིག་ལ་རྩ་རྣམས་ནི། །སུམ་ཅུ་རྩ་
གཉིས་ཤེས་པར་བྱ། །ཉིན་ཞག་གཅིག་ལ་དབྱུག་གུ་ཡི། །དྲུག་ཅུ་རྩ་བཞིའི་ཚད་ཀྱིས་ནི། །རྩ་དང་ཆུ་ཚོད་ཕྱེད་དབྱུག་གུ། །ཐུན་གྱི་བརྒྱད་ཆ་ཞེས་སུ་བཤད། །སྣ་སྒོའི་རླུང་ནི་འབྱུང་འཇུག་ལ། །དབུགས་གཅིག་ཏུ་ནི་རབ་ཏུ་གྲགས། །རླུང་གི་སྦྱོར་བ་ལ་མཁས་པས། །
དབུགས་དྲུག་སྲོག་ཏུ་ཤེས་པར་བྱ། །སྲོག་ནི་ལྔ་བཅུ་ཐམ་པ་དང་། །དབུགས་གསུམ་རྐང་པའང་དེ་དང་ལྡན། །ཉི་མ་བྱང་དུ་རྒྱུ་དུས་ཀྱི། །ཉི་མ་དང་པོའི་དབྱུག་གུ་ཡིན། །ཉི་མ་ལྷོར་ནི་རྒྱུ་དུས་ཀྱི། །མཚན་མོ་ཡང་ནི་དེ་བཞིན་འགྱུར། །དབྱུག་གུ་རེ་རེའི་འཕེལ་འགྲིབ་ནི། །
དུས་ཀྱི་དབྱེ་བས་ཤེས་པར་བྱ། །དབུགས་ནི་དྲག་པོ་བཞི་ཆར་བཅས། །འཕོ་བ་སོ་སོའི་འཕེལ་འགྲིབ་ཡིན། །དབུགས་ཀྱི་སུམ་ཆ་དེའི་བཞི་ཆའི། །དྲུག་ཆས་ཉི་མ་རེ་རེར་འགྱུར། །ཐུན་ནི་ཕྱེད་ཕྱེད་རྒྱུ་བ་ལས། །ཕྱིན་ཅི་ལོག་ཏུ་འཕོས་གྱུར་ན། །རྩོད་པ་ལ་སོགས་ངེས་
འགྱུར་བས། །མཁས་པས་འདི་དག་ཡང་དག་བརྟག །ཉི་མ་གཅིག་གཉིས་གསུམ་དང་བཞི། །ལྔ་དང་དྲུག་ཏུ་གང་ཚེ་རླུང་། །ཕྱིན་ཅི་ལོག་ཏུ་རྟག་རྒྱུ་ན། །དེ་ཚེ་རྩོད་པ་ཆེན་པོར་འགྱུར། །ཟླ་ཕྱེད་རྟག་ཏུ་ལོག་པར་རྒྱུ། །ནད་ནི་ཆེན་པོ་ཡང་དག་འབྱུང་། །ཟླ་བ་གཅིག་ཏུ་ལོག་
པར་རྒྱུ། །སྙིང་སྡུག་གཉེན་ནི་བརླག་པར་འགྱུར། །ཕྱེད་དང་གཉིས་སུ་ལོག་པར་རྒྱུ། །ཟླ་བ་དྲུག་ན་འཆི་བར་འགྱུར། །ཐུན་མོང་དུས་སུ་ཤེས་པར་བྱ། །གཞན་ཡང་ཁྱད་པར་བཤད་བྱ་སྟེ། །མཉམ་པོ་བདུན་དུ་ཉི་མ་སོང་། །གང་ཚེ་སྐྱེ་བའི་ཉིན་ཟླ་བ། །དེ་ཚེ་རྒྱས་པ་ཞེས་བྱའི་དུས། །
འཆི་བའི་ངེས་པའི་དུས་ཡིན་ནོ། །མི་ནི་ཁྱིམ་གང་ལས་སྐྱེས་པ། །གང་ཞིག་གཞན་ཡང་བདུན་དེའི་ཕྱིར། །དེར་ནི་ཉི་མ་མཉམ་བདུན་སོང་། །མཉམ་པོ་བདུན་ཞེས་བྱ་བར་བཤད། །ཉི་མའི་ལམ་ནས་ཐམས་ཅད་དུ། །རླུང་ནི་རྟག་ཏུ་རྒྱུ་བ་དག །རྒྱུན་མི་འཆད་པར་ཡང་དང་ཡང་། །

མཁས་པས་དུས་ནི་མཚོན་པར་བྱ། །དུས་ཀྱི་སྐད་ཅིག་གང་ལ་རླུང་། །བགྲོད་པ་གཞན་དུ་འཇུག་འགྱུར་ན། །དུས་དེའི་སྐད་ཅིག་རྫོགས་པ་ན། །འཆི་འགྱུར་འདི་ལ་ཐེ་ཚོམ་མེད། །ཉིན་ཕྱེད་དང་པོར་བྱས་ཏེ་ཉི་མ་རྫོགས་དང་དེ་བཞིན་ཉིན་ཞག་གཅིག་གི་བར། །དེ་
ལས་ཞག་གཉིས་ཞག་གསུམ་དང་ནི་དེ་བཞིན་ཞག་ནི་བཞི་ཡི་བར་དག་ཏུ། །རླུང་ནི་གང་ཞིག་རྩ་ལ་བརྟེན་ཏེ་གཡོན་པ་མིན་པའི་ཉི་མའི་ལམ་ནས་རྒྱུ། །དེ་ལས་ས་དང་ཉི་མ་ཕྱོགས་དང་བཀྲ་ཤིས་དྲུག་བཞི་འདི་དག་ཤེས་པར་བྱ། །ལྔ་ནས་ཉི་ཤུ་རྩ་ལྔར་ཉིན་ཞག་འདི་དག་ལྔ་ལྔར་
སྤེལ་བས་བགྲོད་པར་འགྱུར། །དེ་ལས་རེ་རེས་སྤེལ་བས་བཅུ་ནི་སུམ་འགྱུར་ཇི་སྲིད་གསུམ་གྱིས་ལྷག་པའི་བར། །དེ་ལས་རྒྱས་པའི་དུས་སུ་གསུམ་མིག་ཟླ་བའི་ལོ་དང་དྲུག་གསུམ་ཟུང་ཟླའི་ཟླ། །ལྷག་མ་ཚེས་དང་ཕྱོགས་མདའ་ཡོན་ཏན་ཟུང་དང་ཟླ་བའི་ཞག་ཏུ་འཚོ་བ་
ཡིན། །རེའུ་མིག་སུམ་ཅུ་བདུན་བཅས་པའི། །འཁོར་ལོ་རིམ་གསུམ་བྲིས་ནས་ནི། །ཚེ་དང་སྲོག་གི་རླུང་དག་དང་། །ཉིན་ཞག་མཚན་མ་རིམ་བཞིན་བྲི། །ཞག་ལྔ་ནས་ནི་ཉི་ཤུ་ལྔའི། །བར་བར་གྱི་ནི་ཉིན་ཞག་ལ། །གྲངས་ནི་བཅུ་དྲུག་མ་བཤད་གང་། །དེ་རྣམས་
ཚང་བར་བརྗོད་པར་བྱ། །ཞག་ནི་དྲུག་བདུན་བརྒྱད་དགུ་ཡི། །རིམ་པས་གལ་ཏེ་རླུང་རྒྱུ་ན། །ཡོན་ཏན་ལྡན་ཡང་ཉིན་ཞག་ནི། །ཉེར་བཞིས་མ་ཚང་ལོ་གསུམ་ནའོ། །དྲག་པོ་ཉི་མ་ཡན་ལག་སའི། །ཞག་ནི་རིམ་པས་རྒྱུ་ན་ནི། །ཡོན་ཏན་ལྡན་པའང་ཉིན་ཞག་ནི། །ཉེར་
བཞིས་མ་ཚང་ལོ་གཉིས་ནའོ། །ཞག་ནི་བཅུ་དྲུག་དེ་བཞིན་དུ། །བཅུ་བདུན་དང་ནི་བཅྭ་བརྒྱད་དང་། །བཅུ་དགུ་ཡི་ནི་རིམ་པ་ཡིས། །རླུང་རྒྱུ་ཡོན་ཏན་ཅན་ཡང་ཞག །བཅུ་གཉིས་གཉིས་འགྱུར་མ་ཚང་བའི། །ལོ་གཅིག་ན་ནི་སྐྱབས་མེད་གང་། །དེ་ནི་གཤིན་རྗེའི་གྲོང་ཁྱེར་
དུ། །ཐེ་ཚོམ་མེད་པར་འགྲོ་བར་འགྱུར། །ཉི་མ་ཉི་ཤུ་གཅིག་གཉིས་གསུམ། །ཉེར་བཞིའི་རིམ་པས་རླུང་རྒྱུ་ན། །ཡོན་ཏན་ལྡན་པའང་ཞག་དྲུག་ནི། །མ་ཚང་ཟླ་བ་དྲུག་ན་འཆི། །རེའུ་མིག་སུམ་ཅུ་གཉིས་ལྡན་པའི། །རིམ་གཉིས་འཁོར་ལོ་བྲིས་ནས་ནི། །དེར་ནི་ཚེ་

དང་ཡན་ལག་རླུང་། །གྲངས་ཀྱི་མཚན་མ་རིམ་བཞིན་བྲི། །འཆི་བའི་རྟགས་ནི་འདི་དག་ཀུན། །རྣམ་པ་ཐམས་ཅད་ཤེས་བྱས་ནས། །བློ་ལྡན་འཆི་བ་བླུ་བ་ཡིས། །གལ་ཏེ་བརྟེན་པའི་གོ་འཕང་འདོད། །རྩ་ནི་ཡང་དག་སྦྱང་བྱས་པས། །དེ་སྲིད་རླུང་ནི་སྦྱང་འགྱུར་ཏེ། །
སོ་སོའི་རིམ་བཞིན་རྣལ་འབྱོར་པས། །ཡང་དང་ཡང་དུ་མནན་པར་བྱ། །གཡོན་པའི་བུ་གར་བཅུག་ནས་ནི། །རྩ་ནི་བསྡམས་ནས་མནན་བྱ་ཞིང་། །དེ་བཞིན་དུ་ནི་གཡས་པར་རླུང་། །བཀུག་སྟེ་དལ་བུས་མནན་པར་བྱ། །སེམས་ཅན་རྣམས་ཀྱི་ཞག་གཅིག་ལ། །རྒྱུ་བའི་
དབུགས་ཀྱི་གྲངས་ཀྱི་ཚུལ། །བརྒྱ་ཕྲག་དྲུག་གིས་ལྷག་པ་ཡི། །སྟོང་ཕྲག་ཉི་ཤུ་རྩ་གཅིག་གོ། །དབང་ཆེན་གྱིས་ནི་རྒྱལ་སྲིད་དེ། །ཆུས་ནི་དོན་རྣམས་ཡང་དག་འབྱུང་། །མེ་ཡི་རླུང་ནི་རྣམ་རྒྱུ་བས། །བཀྲེས་སྐོམ་དུབ་དང་སྡུག་བསྔལ་ནད། །བྱ་བ་ཐམས་ཅད་ཉམས་འགྱུར་
ཞེས། །རྡོ་རྗེ་འཛིན་པ་མཆོག་གིས་གསུངས། །རླུང་གིས་རྩོད་དང་སྐྱོ་དང་རྨོངས། །ནོར་ཉམས་ཉོན་ནི་མོངས་པར་བྱེད། །དབང་ཆེན་ནོར་དང་འབྲུ་ལ་སོགས། །རྙེད་པ་ཐོབ་དང་སྡུད་བྱེད་པའོ། །ཆུ་ཡི་རླུང་ནི་རྣམ་རྒྱུ་བས། །འདོད་པའི་དངོས་གྲུབ་ཀུན་བྱེད་པས། །དེ་ཡི་
སྦྱོར་བ་མཆོག་གཙོ་བོར། །རྡོ་རྗེ་སེམས་དཔས་གང་གསུངས་པའོ། །རླུང་ནི་བཅོམ་ལྡན་ཧེ་རུ་ཀའི། །རང་བཞིན་ཉིད་དེ་གསུམ་དུ་འགྱུར། །གཡོན་པ་ཤེས་རབ་རང་བཞིན་ཏེ། །གཡས་པ་སྙིང་རྗེའི་བདག་ཉིད་དོ། །གཉིས་པོ་མི་ཕྱེད་སྦྱོར་བ་ཡང་། །གཉི་གནས་ནི་རྣམ་
པར་རྒྱུ། །དེ་བས་དེ་ཉིད་རིག་པས་དེར། །དགེ་མི་དགེ་སོགས་ཤེས་པར་བྱ། །དུག་སོགས་གཞོམ་དང་ལྷག་མ་ནི། །བཀྲ་ཤིས་དཔལ་ནི་བསྐྱེད་པ་ལ། །ཤེས་རབ་བདག་ཉིད་རབ་ཏུ་བསྔགས། །རྟག་ཏུ་དཔལ་ལྡན་སྙིང་རྗེའི་སྟོབས། །གཡུལ་བཤམ་རོལ་རྩེད་སྟོན་མོ་
དང་། །གཅད་པ་དང་ནི་དབུག་པ་དང་། །བསྲེག་དང་བཙོ་བའི་ལས་ལ་ནི། །སྙིང་རྗེའི་བདག་ཉིད་རབ་ཏུ་བསྔགས། །གཞན་ཡང་གཉིས་བདག་རྡོ་རྗེ་ཅན། །ཐེ་ཙོམ་འགྱུར་བར་ཤེས་བྱ་སྟེ། །དགེ་དང་མི་དགེ་ངེས་མེད་པར། །རླུང་རིག་པས་ནི་འདིར་མཚོན་བྱ། །མགོན་པོ་

ཇི་སྟེ་ཨཱ་ལིར་རྒྱུ། །འགའ་ཞིག་ཀཱ་ལིར་གནས་འདྲི་འམ། །ཀཱ་ལིའི་རྒྱུ་ལ་ཨཱ་ལིར་གནས། །དེ་ཡི་འདོད་དོན་ཉམས་པར་འགྱུར། །གང་ནས་མགོན་པོ་དེ་རྒྱུ་བ། །དེར་གནས་འགའ་ཞིག་འདྲི་བྱེད་ན། །དེ་ཡི་དོན་ཀུན་ཡང་དག་འགྲུབ། །གཉི་གར་གནས་
ལས་ཐེ་ཚོམ་འགྱུར། །རླུང་གི་བདག་ཉིད་ཀྱིས་མགོན་པོའི། །སྐུ་གསུམ་པོར་ཡང་ཤེས་པར་བྱ། །འཇུག་པ་ཆོས་ཀྱི་སྐུ་ཡིན་ཏེ། །གནས་པ་ལོངས་སྤྱོད་རྫོགས་པའི་སྐུ། །འབྱུང་བ་སྤྲུལ་པའི་སྐུ་ཞེས་བཤད། །འདི་དག་སྐུ་ནི་གསུམ་པོར་བཞེད། །འདྲི་བ་པོའམ་རང་
གིའང་རུང་། །ཆོས་སྐུས་ཐམས་ཅད་དགེ་བ་སྟེ། །ལོངས་སྤྱོད་རྫོགས་པས་ཐེ་ཚོམ་འགྱུར། །སྤྲུལ་པས་འཐབ་མོར་སྟོན་པའོ། །རྣལ་འབྱོར་པ་ཡི་སྲོག་རྩོལ་ནི། །སངས་རྒྱས་ལྔ་ཡི་ངོ་བོ་ར་གནས། །གཡོན་དང་གཡས་ཀྱི་གནས་གང་ན། །རིམ་པ་ཇི་བཞིན་རྣམ་
པར་རྒྱུ། །གཡས་ནས་རྣམ་པར་རྒྱུ་བའི་འོད། །མེ་ཡི་དཀྱིལ་འཁོར་ཉིད་ཡིན་ཏེ། །ནགས་ཀྱི་མེ་ཏོག་ལྟ་བུའི་མདོག །དེ་ནི་འོད་དཔག་མེད་པའི་ལྷ། །གཡོན་ནས་རྣམ་པར་རྒྱུ་བའི་འོད། །རྟག་ཏུ་རླུང་གི་དཀྱིལ་འཁོར་ཏེ། །ཁ་དོག་ལྗང་གུ་ལྟར་སྣང་བ། །ལྷ་ནི་དོན་
ཡོད་མཆོག་ཡིན་ནོ། །གཉི་ག་ནས་ནི་རྒྱུ་བའི་འོད། །གསེར་གྱི་འོད་ལྟར་སྣང་བ་སྟེ། །དབང་ཆེན་དཀྱིལ་འཁོར་གྱི་ནི་རླུང་། །རྟག་ཏུ་རིན་ཆེན་འབྱུང་ལྡན་རྒྱུ། །འོག་ནས་དལ་བར་རབ་རྒྱུ་བ། །ཀུནྡ་ཟླ་བ་ལྟ་བུར་དཀར། །ཆུ་ཡི་དཀྱིལ་འཁོར་རྒྱུ་བ་སྟེ། །འོད་ཆེན་རྡོ་རྗེ་
མགོན་པོའོ། །ལུས་ཀུན་ལ་ནི་རྗེས་འགྲོའི་རླུང་། །སེམས་ཀུན་རབ་ཏུ་འཇུག་བྱེད་པ། །མགོན་པོ་རྣམ་པར་སྣང་མཛད་ནི། །འབྱུང་བར་རབ་ཏུ་གྲགས་པ་ཡིན། །རྣལ་འབྱོར་མ་ནི་མཉམ་གཞག་པས། །འཇུག་པའི་རླུང་ནི་བགྲང་བར་བྱ། །ཇི་སྲིད་འབུམ་ལ་སོགས་པའི་
གྲངས། །སྒྲ་དང་བྲལ་བར་རྟག་ཏུ་བཟླ། །སྒྲུབ་པོས་སྒྲ་དང་བྲལ་བར་ནི། །འབུམ་བཟླས་ཡོངས་སུ་རྫོགས་པ་ན། །ཚེ་ཉམས་པ་ཡང་ལོ་ལྔ་རུ། །འཚོ་བར་འདིར་ནི་ཐེ་ཚོམ་མེད། །རྟག་ཏུ་ནང་པར་ལངས་ནས་རླུང་། །སྟོང་ཕྲག་གཅིག་ཏུ་བགྲང་བྱ་སྟེ། །དེ་བས་རླུང་གི་རྣལ་འབྱོར་

ལ། །རྟག་ཏུ་མཉམ་གཞག་གནས་པར་བྱ། །ཡང་ན་བུམ་པའི་རྣལ་འབྱོར་གྱིས། །རྟག་ཏུ་འཆི་བདག་ལས་རྒྱལ་བྱ། །བདག་ཉིད་རིག་པས་རྐང་མཐིལ་བར། །ཀུན་དུ་རླུང་གིས་དགང་བྱ་སྟེ། །བུམ་པ་ཅན་ལ་བརྟན་བྱས་ནས། །དབྱེ་བ་གསུམ་གྱིས་གཞོམ་པར་བཤད། །
ཐ་མ་སུམ་ཅུ་རྩ་དྲུག་ཙམ། །དེ་ཡི་ཉིས་འགྱུར་འབྲིང་དེ་བཞིན། །སུམ་འགྱུར་ཆེན་པོར་ཤེས་བྱ་སྟེ། །བུམ་པ་ཅན་དེས་རྒྱལ་བར་བྱ། །བུམ་པ་ཅན་སྔར་ཤེས་བྱས་ནས། །བདག་ཉིད་སྐྱིལ་མོ་ཀྲུང་བཅས་ཏེ། །ལག་པ་ལན་གསུམ་མཉེས་ནས་ནི། །དེ་ནས་ལན་དྲུག་སེ་གོལ་
བརྡབ། །ཇི་སྲིད་སུམ་ཅུ་རྩ་དྲུག་བར། །དེ་སྲིད་བུམ་པ་ཅན་གྱིས་བྱ། །སུམ་འགྱུར་ཆེན་པོས་གཞོམ་པ་ནི། །བརྒྱ་ལས་རྩ་བརྒྱད་ལྷག་པས་སོ། །བརྟན་པའི་གོ་འཕང་འདོད་པས་ནི། །བརྩོན་པས་དེ་ཉིད་ཀྱིས་རྒྱལ་བྱ། །བུམ་པའི་སྦྱོར་བས་རྒྱལ་བས་ན། །འཆི་བདག་
ལས་ནི་རིང་དུ་འཇུག །བུམ་པ་ཅན་ནི་ཤེས་བྱས་ནས། །འགོག་ལ་བརྟན་པར་གནས་པ་ན། །དེ་ལ་བསྐལ་པ་སྟོང་དུ་ཡང་། །འཆི་བདག་ཉེ་བར་འོང་མི་འགྱུར། །སྙིང་གི་ཆུ་སྐྱེས་དབུས་སོན་རླུང་། །ཧཱུྃ་ཡིག་དཀར་པོའི་རྣམ་པར་ནི། །གང་གིས་མཉམ་པར་གཞག་བསམས་
ན། །དེ་ལ་ཡུལ་སོགས་དམིགས་མི་འགྱུར། །རླུང་གིས་འཁོར་བའི་སྟེང་དུ་འགྲོ། །མྱ་ངན་འདས་པའི་འོག་ཏུ་བགྲོད། །སྙིང་ག་ཡི་ནི་ཆུ་སྐྱེས་ལ། །མི་གནས་མྱ་ངན་འདས་པར་གནས། །སྟེང་དང་འོག་ཏུ་རྒྱུ་བའི་རླུང་། །ཁ་སྦྱར་དུ་ནི་ཡིད་ཀྱིས་བྱས། །དེ་ཡི་སྦྱོར་བས་
གོམས་བྱེད་ན། །དེས་ནི་བརྟན་པའི་གོ་འཕང་འཐོབ། །རླུང་གི་རྣལ་འབྱོར་མི་ཤེས་པའམ། །གང་ཞིག་ཤེས་ཀྱང་མི་བྱེད་པ། །དེ་ནི་འཁོར་བའི་སྡུག་བསྔལ་ཚོགས། །དུ་མས་གཙེས་པའི་སྲིན་བུར་འགྱུར། །གང་ཞིག་འགྲོ་དང་འོང་བའི་རླུང་། །བློ་དང་ལྡན་པས་
བརྟག་བྱ་སྟེ། །རླུང་གིས་ཐམས་ཅད་བྱིན་གྱིས་བརླབས། །རླུང་ནི་ཀུན་དུ་འགྲོ་འགྱུར་བའོ། །འདི་ནི་ཟླ་བ་དང་ཉི་མའི་མན་ངག་གི་རིམ་པར་ཕྱེ་བ་སྟེ་ལྔ་པའོ།། །།དེ་ནས་ལམ་ལྔ་བཟང་པོ་མཆོག །རྣམ་པར་ངེས་པར་རབ་བཤད་བྱ། །བདག་

གཞན་དོན་ནི་ཕུན་ཚོགས་པའི། །སྒྲུབ་པོས་དགེ་དང་མི་དགེ་བརྟག །མེ་དང་རླུང་ནི་ཉིད་དག་དང་། །དེ་བཞིན་དབང་ཆེན་དང་ནི་ཆུའི། །དཀྱིལ་འཁོར་ཡང་དག་རྒྱུ་བ་ལས། །ཞི་དང་རྒྱས་དང་དབང་དང་དགུག །དེ་བཞིན་བསད་དང་བསྐྲད་པ་ཡི། །
མཚན་ཉིད་མཁས་པས་བརྟག་པར་བྱ། །དེ་ཡི་སྦྱོར་བ་མི་ཤེས་པ། །དེ་ནི་ངལ་བ་དོན་མེད་འགྱུར། །མེས་ནི་འཆི་བར་འགྱུར་བ་སྟེ། །རླུང་གིས་ནོར་རྣམས་ཉམས་པར་འགྱུར། །དབང་ཆེན་གྱིས་ནི་རྒྱལ་སྲིད་འགྱུར། །ཆུས་ནི་ནོར་དང་འབྲུ་རྣམས་སྟེར། །གཡས་པ་
ནས་ནི་རྒྱུ་བའི་ཁམས། །བྱིན་ཟའི་དཀྱིལ་འཁོར་ཉིད་ཡིན་ཏེ། །ཁ་དོག་དམར་ཞིང་གསལ་བ་ནི། །པདྨའི་མགོན་པོའི་འབྱུང་བའོ། །གཡོན་པ་ནས་ནི་རྒྱུ་བའི་ཁམས། །རླུང་གི་དཀྱིལ་འཁོར་ཉིད་ཡིན་ཏེ། །ཁ་དོག་ལྗང་ཞིང་གསལ་བ་ནི། །ལས་ཀྱི་མགོན་པོའི་
འབྱུང་བའོ། །གཉི་ག་ནས་ནི་རྒྱུ་བའི་ཁམས། །གསེར་གྱི་མདོག་ལྟར་གསལ་བ་ནི། །དབང་ཆེན་དཀྱིལ་འཁོར་ཉིད་ཡིན་ཏེ། །རིན་ཆེན་མགོན་པོའི་རྒྱུ་བའོ། །དལ་ཞིང་རྒྱུ་བ་མེད་པའི་ཁམས། །ཆུ་ཡི་དཀྱིལ་འཁོར་ཉིད་ཡིན་ཏེ། །དག་པའི་ཤེལ་ལྟར་སྣང་བ་
ནི། །རྡོ་རྗེ་མགོན་པོའི་རྒྱུ་བའོ། །ཁམས་རྣམས་ཀུན་ནི་ཡང་དག་བསྡུས། །རྟེན་དང་བརྟེན་པའང་ཡང་དག་འཛིན། །རྣམ་སྣང་མཛད་ནི་རླུང་ཆེན་ཏེ། །འཆི་བའི་ལུས་ལས་རྣམ་པར་རྒྱུ། །རླུང་གི་དེ་ཉིད་མི་ཤེས་པར། །ལས་དང་ལས་མིན་མི་འགྲུབ་སྟེ། །རླུང་
ནི་ཐམས་ཅད་བགྲོད་འགྱུར་བས། །རྟོག་གེ་པ་ཡིས་མི་ཤེས་སོ། །རླུང་གི་དེ་ཉིད་སྔོན་འགྲོ་བས། །སྔགས་ཀྱི་དེ་ཉིད་བསྒྲུབ་པར་བྱ། །སེམས་ཅན་རྣམས་ཀྱི་སྲོག་གྱུར་པ། །རླུང་ཞེས་བྱ་བ་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །སངས་རྒྱས་གོ་འཕང་
འཐོབ་བྱེད་པ། །རྒྱུད་རྣམས་ཀུན་གྱི་གསང་བ་སྟེ། །བྱང་ཆུབ་རྒྱུ་ཡི་ཐབས་ཡིན་ནོ། །འདི་ནི་ལམ་ལྔ་ངེས་པར་བསྟན་པའི་རིམ་པར་ཕྱེ་བ་སྟེ་དྲུག་པའོ།། །།དེ་ནས་རྩ་ཡི་འཁོར་ལོ་ནི། །རིམ་པ་བཞིན་དུ་རབ་བཤད་བྱ། །ལུས་ཀྱི་རྗེས་སུ་འགྲོ་བའི་རྩ། །

སྟོང་ཕྲག་བདུན་ཅུ་རྩ་གཉིས་འགྱུར། །རྩ་རྣམས་དང་ནི་ཉེ་བའི་རྩ། །དེ་དག་གནས་ལ་བརྟེན་པ་སྟེ། །བརྒྱ་ལས་ཉི་ཤུ་ལྷག་པའི་རྩ། །གཙོ་བོ་ཞེས་ནི་བྱ་བར་བརྗོད། །རྩ་ཡི་གནས་དང་ཡུལ་རྣམས་ནི། །ཉི་ཤུ་རྩ་བཞིའི་གྲངས་ཡིན་ཏེ། །དེ་རྣམས་དབུས་ཀྱི་རྩ་གསུམ་
གང་། །ཐམས་ཅད་ཁྱབ་ཅིང་བརྟེན་པའོ། །མགོར་ནི་པུལླཱི་ར་ཡིན་ཏེ། །སོ་དང་སེན་མོ་འབབ་པར་གནས། །སྤྱི་གཙུག་ཛཱ་ལན་དྷ་ར་སྟེ། །སྐྲ་དང་སྤུ་ནི་འབབ་པར་གནས། །ཨོ་ཌྱན་རྣ་བ་གཡས་པའི་རྩ། །པགས་པ་དང་ནི་དྲི་མ་འབབ། །མགོ་རྒྱབ་ཨར་བུ་ད་ཡིན་
ཏེ། །ཤ་ནི་ཡང་དག་འབབ་པའི་རྩ། །གོ་དཱ་བ་རཱི་རྣ་བ་གཡོན། །རྒྱུས་པ་ཡང་དག་འབབ་པའི་རྩ། །སྨིན་དབུས་ར་མེ་ཤྭ་རཱི་སྟེ། །རྟག་ཏུ་རུས་པ་འབབ་པའོ། །མིག་ནི་དེ་བི་ཀོ་ཊིར་གནས། །མཆིན་པ་འབབ་པའི་རྩ་ཡིན་ནོ། །མཱ་ལ་བ་ནི་དཔུང་པ་གཉིས། །སྙིང་ལ་འབབ་
པའི་རྩ་གནས་སོ། །མཆན་ཁུང་ཀཱ་མ་རཱུ་པ་སྟེ། །རྟག་ཏུ་མིག་ནི་འབབ་པའོ། །ནུ་མ་གཉིས་ནི་ཨོ་ཌི་སྟེ། །རྟག་ཏུ་མཁྲིས་པ་འབབ་པའི་རྩ། །ཏྲི་ཤ་ཀུ་ནི་ལྟེ་བ་སྟེ། །རྩ་ནི་གློ་བ་འབབ་པས་གནས། །སྣ་རྩེ་ཀོ་ས་ལ་ཡིན་ཏེ། །རྒྱུ་མའི་ཕྲེང་བ་འབབ་པས་གནས། །ཁ་ནི་ཀ་
ལིང་ག་ཡིན་ཏེ། །རྟག་ཏུ་གཉེ་མ་འབབ་པས་གནས། །མགྲིན་པ་ལམ་པཱ་ཀ་ཡིན་ཏེ། །རྟག་ཏུ་ལྟོ་བ་འབབ་པའི་རྩ། །ཀཱཉྩི་སྙིང་གའི་གནས་ཡིན་ཏེ། །བཤང་བ་འབབ་པའི་རྩ་ཡིན་ནོ། །མདོམས་བར་ཧི་མ་ལ་ཡ་སྟེ། །མཆོག་མའི་མཚམས་ནི་འབབ་པའི་རྩ། །ཏྲེ་ཏ་བུ་
རི་མཚན་མ་སྟེ། །བད་ཀན་འབབ་པའི་རྩ་ཡིན་ནོ། །གྲི་ཧ་དེ་བ་ཏཱ་བཤང་ལམ་སྟེ། །རྟག་ཏུ་རྣག་ནི་འབབ་པའོ། །བརླ་གཉིས་སཽ་རཱཥྚ་ཡིན་ཏེ། །རྟག་ཏུ་ཁྲག་ནི་འབབ་པའོ། །བྱིན་པ་གཉིས་ནི་གསེར་གླིང་གནས། །རྡུལ་འབབ་པ་ཡི་རྩ་ཡིན་ནོ། །རྐང་པའི་སོར་མོ་ན་ག་ར། །རྟག་
ཏུ་ཚིལ་འབབ་རྩར་ཤེས་བྱ། །རྐང་པའི་བོལ་ནི་སིན་དྷུ་སྟེ། །མཆི་མ་འབབ་པའི་གཟུགས་ཅན་མ། །མ་རུ་དེ་ཤ་མཐེ་བོང་སྟེ། །རྟག་ཏུ་མཆིལ་མ་འབབ་པས་གནས། །ཀུལླུ་ཏ་ནི་པུས་མོ་སྟེ། །རྟག་ཏུ་སྣ་ཆུ་འབབ་པས་གནས། །དེ་དག་དབུས་ན་གནས་པའི་རྩ། །ལ་ལ་

ནཱར་ནི་གཅི་བ་འབབ། །གཡས་སུ་ཁྲག་ནི་འབབ་པའི་རྩ། །ར་ས་ནཱ་ཞེས་གྲགས་པ་ཡིན། །དབུས་ཀྱི་ཆར་ནི་ཡང་དག་འཇུག །སྙིང་གའི་ཆུ་སྐྱེས་དབུས་སོན་པ། །ཆུ་ཤིང་སྙེ་མའི་མེ་ཏོག་བཞིན། །འཕྱང་བ་ཁ་ནི་ཐུར་དུ་བལྟས། །ཏིལ་གྱི་མར་མེ་ལྟར་
འབར་ཞིང་། །བྱང་ཆུབ་སེམས་ནི་མཉམ་འབབ་དེ། །ཨ་བ་དྷཱུ་ཏཱིར་ཤེས་བྱ་སྟེ། །ལྷན་ཅིག་སྐྱེས་པ་སྟེར་བྱེད་པའོ། །ལ་ལ་ནཱ་ལ་སོགས་པའི་རྩ། །རྩ་རྣམས་ཀུན་གྱི་གཙོ་བོ་སྟེ། །དེ་བས་འདིར་ནི་གཞན་བསྟེན་པ། །གང་གཱ་སིན་དྷུར་གཞན་འཇུག་བཞིན། །གཅིག་
གྱུར་ཁ་ཁ་མུ་ཁ་སྟེ། །དེ་ཉིད་སྐྱེ་གནས་གཞན་མ་ཡིན། །ལོངས་སྤྱོད་རྫོགས་སྐུའི་རང་བཞིན་གྱིས། །ལུས་ལ་བརྟེན་པར་ཤེས་པར་བྱ། །བུད་མེད་རྣམས་ལའང་གཙོ་བོ་གསུམ། །ལ་ལ་ནཱ་སོགས་རྩ་རྣམས་ཡིན། །ཤེས་རབ་རང་བཞིན་ལ་ལ་ནཱ། །ར་ས་ནཱ་ནི་ཐབས་
སུ་གནས། །དབུས་ནས་ཨ་བ་དྷཱུ་ཏཱི་ནི། །གཟུང་དང་འཛིན་པ་རྣམ་སྤངས་པའོ། །ལོངས་སྤྱོད་རྫོགས་སྐུ་ལ་ལ་ནཱ། །ར་ས་ནཱ་ནི་སྤྲུལ་པའི་སྐུ། །ཨ་བ་དྷཱུ་ཏཱི་ཆོས་སྐུ་སྟེ། །སྐུ་གསུམ་པོར་ནི་བཤད་པ་ཡིན། །རྩ་རྣམས་དེ་དག་ཐམས་ཅད་ནི། །ལུས་ནི་དགེ་བར་བྱེད་པ་
སྟེ། །དེ་ཡི་ཚོགས་ལས་ཡང་དག་བྱུང་། །གོང་བུ་ལྷ་ཡི་བདག་ཉིད་དོ། །གཟུགས་ལས་འདས་པ་གོང་བུར་འགྱུར། །གོང་བུ་ལས་འདས་ལྷ་ཉིད་དེ། །དེ་ཕྱིར་བསམ་མི་ཁྱབ་སྦྱོར་བས། །དེ་བཞིན་ཉིད་བདག་ཀུན་དུ་འགྲོ། །སྒྲུབ་པོས་ཆོ་ག་གང་གང་གིས། །གོང་བུ་
ལས་འདས་གོ་འཕང་གནས། །དེས་ནི་དེ་ཡི་བདག་ཉིད་དུ། །གྱུར་པས་སངས་རྒྱས་ཉིད་འཐོབ་འགྱུར། །འདི་ནི་རྩའི་འཁོར་ལོའི་ཐབས་རིམ་པར་ཕྱེ་བ་སྟེ་བདུན་པའོ།། །།དེ་ནས་གང་ཞིག་ཤེས་ཙམ་གྱིས། །མྱུར་དུ་དངོས་གྲུབ་འགྱུར་བ་ཡི། །དམ་
ཚིག་རྣམས་ཀྱང་རིམ་པ་བཞིན། །ཡང་དག་པར་ནི་བཤད་པར་བྱ། །རང་གི་ཁྱིམ་མམ་གསང་བའི་གནས། །དབེན་ཞིང་ཡིད་ནི་དགའ་བ་དང་། །རི་བོ་ཚང་ཚིང་རི་སུལ་དང་། །རྒྱ་མཚོ་ཆེན་པོའི་འགྲམ་དང་ནི། །མ་མོའི་ཁྱིམ་དང་དུར་ཁྲོད་དམ། །ཆུ་བོ་འདུས་པའི་དབུས་

སུ་ནི། །བླ་མེད་འབྲས་བུ་འདོད་པ་ཡིས། །དཀྱིལ་འཁོར་ཡང་དག་བྲི་བར་བྱ། །ཡོན་བདག་དད་པ་ཆེན་པོ་ཡིས། །ཞིང་སྐྱེས་གནས་སྐྱེས་སྔགས་སྐྱེས་མའི། །རྣལ་འབྱོར་མ་དང་རྣལ་འབྱོར་པ། །སློབ་དཔོན་ལྷ་ཀུན་སྤྱན་དྲང་བྱ། །ཁྱིམ་པའམ་ནི་དགེ་ཚུལ་ལམ། །དེ་བཞིན་
དགེ་སློང་སློབ་དཔོན་དེ། །སློབ་དཔོན་ཁ་ཅིག་འཇིག་རྟེན་པ། །བསྟན་ལ་གནས་པའི་དགེ་སློང་ངམ། །ཁ་ཅིག་ཡོན་ཏན་ལྡན་པའམ། །དེ་བཞིན་མངོན་ཤེས་ཐོབ་པའང་རུང་། །འདི་རྣམས་ནང་ན་ཡོན་བདག་ནི། །གང་ལ་དད་པས་གཙོ་མཆོག་བྱ། །སློབ་དཔོན་སྔོན་དུ་འགྲོ་
བ་ཡིས། །དཀྱིལ་འཁོར་དགེ་བ་བྲི་བྱས་ཏེ། །སློབ་དཔོན་དབང་བསྐུར་ཡོན་ཏན་ལྡན། འཇིག་རྟེན་རྣམས་ཀྱིས་མ་སྨད་ཅིང་། །མི་དགེ་བཅུ་ཡོངས་སྤངས་པ་ནི། །ཚོགས་ཀྱི་འཁོར་ལོའི་གཙོ་བོར་བྱ། །རྟག་ཏུ་ཡོན་བདག་བློ་ལྡན་གྱིས། །སྙིང་རྗེ་མེད་ཅིང་ཁྲོ་དང་
གདུག །ཁེངས་དང་བརྐམ་ཆགས་བདག་ཉིད་བསྟོད། །མཉམ་པར་མ་བཞག་གིས་མི་བྱ། །གང་ཞིག་ཁྱིམ་གནས་ལོངས་སྤྱོད་བསྟེན། །གཤོལ་འཛུགས་དང་ནི་ཚོང་པ་དང་། །རྨོངས་པས་དམ་ཆོས་འཚོང་བ་ནི། །ཚོགས་ཀྱི་འཁོར་ལོའི་གཙོ་བོར་མིན། །འདི་ལྟར་ཡོན་
ཏན་ཀུན་ལྡན་ཞིང་། །ཐམས་ཅད་མཁྱེན་པའི་རྒྱལ་མཚན་འཛིན། །དུལ་ཞིང་བརྩོན་འགྲུས་ཡང་དག་ལྡན། །སྲེད་པ་མེད་ཅིང་ང་རྒྱལ་མེད། །རྟག་ཏུ་སེམས་ཅན་བསྟེན་པར་ནི། །ལྟོས་བཅས་རྒྱན་གྱིས་བརྒྱན་པ་དང་། །ཐོད་པའི་རྒྱན་ལ་དགའ་བ་དང་། །རྡོ་རྗེ་དྲིལ་བུ་མཉམ་
ལྡན་པའི། །མཁས་པས་གཡོན་གྱི་ཕྱོགས་སུ་ནི། །གཡོན་པའང་རབ་ཏུ་གཞག་པར་བྱ། །འདི་ལྟར་ཡོན་ཏན་ལྡན་སློབ་དཔོན། །ལས་རྣམས་ཀུན་ལ་རབ་ཏུ་བསྔགས། །རིམ་པ་ཇི་བཞིན་སློབ་དཔོན་དང་། །ལྷ་རྣམས་སྤྱན་དྲང་བྱོན་པ་ལ། །ཇི་ལྟར་རྙེད་པའི་དྲི་ཆུ་ཡིས། །
ཞབས་བཀྲུ་བས་ནི་གཙང་བྱས་ནས། །ས་ཡོངས་བརྟགས་པའི་གནས་སུ་ནི། །སློབ་དཔོན་སྔོན་དུ་འགྲོ་བ་ཡིས། །རྒན་དང་གཞོན་པའི་དབྱེ་བ་བཞིན། །ཞུགས་ནས་གདན་ལ་གནས་པར་བྱ། །སྐལ་བ་མེད་དང་ང་རྒྱལ་ཅན། །དེ་བཞིན་བླ་མ་སྨོད་པ་དང་། །དམ་ཚིག་མ་

མཐོང་རང་གི་བུ། །དེ་བཞིན་སྐྱེས་པ་བུད་མེད་རྣམས། །སྒྲུབ་པོ་དངོས་གྲུབ་འདོད་པ་ཡིས། །དམ་ཚིག་དེར་ནི་གཞུག་མི་བྱ། །གལ་ཏེ་ཕྱུགས་ནི་དེ་རྣམས་ཞུགས། །དངོས་གྲུབ་རིང་དུ་འཇུག་པར་འགྱུར། །དམ་ཚིག་སྨད་པས་ལུས་སེམས་ནི། །སྡུག་བསྔལ་
དེ་བཞིན་གནས་ཉམས་དང་། །དཔལ་ལས་རིང་ཞིང་སྣ་ཚོགས་པའི། །སྡུག་བསྔལ་གྱིས་ནི་ཉེར་འཚེར་འགྱུར། །དེ་ལྟར་ཤེས་ནས་སྤང་བྱ་སྟེ། །མཆོད་པའི་སྤྱོད་ཡུལ་ཅན་རྣམས་བསྡུ། །རྒན་དང་གཞོན་པའི་རིམ་བཞིན་དུ། །མེ་ཏོག་བདུག་པ་མར་མེ་དང་། །ཙནྡན་དྲིས་
ནི་ཁྱད་པར་དུ། །བློ་དང་ལྡན་པས་རྟག་མཆོད་བྱ། །གདུགས་དང་རྒྱལ་མཚན་གྱིས་བརྒྱན་པའི། །གཏོར་མ་སློབ་དཔོན་གྱིས་རབ་བརྟག །ལྷ་ནི་བསྙེན་ཕྱིར་མཆོད་བྱ་ཞིང་། །ཡོན་བདག་ཡིད་ལ་འདོད་པ་ཡི། །གང་ཞིག་ཞི་དང་རྒྱས་པའི་ལས། །དངོས་
གྲུབ་དོན་དུ་བྲིས་ནས་ནི། །གང་གང་མངོན་པར་འདོད་པ་ཡི། །ལས་དེ་བྱིན་གྱིས་བརླབ་པར་བྱ། །སྦྲང་ཆང་བུར་ཆང་ཁུར་བའི་ཆང་། །ཇི་ལྟར་རྙེད་པ་དབུལ་བར་བྱ། །གཙང་ཞིང་དུལ་དང་དཔའ་བའི་སེམས། །སྲེད་དང་གཏི་མུག་རྣམ་པར་སྤངས། །ཐམས་ཅད་མཚུངས་
པར་ལྟ་བ་ནི། །ལས་ཀྱི་རྡོ་རྗེར་རབ་ཏུ་བརྟག །བཟའ་དང་བཅའ་དང་དེ་བཞིན་བཏུང་། །སོ་རྩི་དང་ནི་ཡོན་དེ་བཞིན། །དཀྱིལ་འཁོར་གྱི་ནི་མདུན་ཉིད་དུ། །ཡོན་བདག་གིས་ནི་དབུལ་བྱ་ཞིང་། །ཕྱི་ནས་ལས་ཀྱི་རྡོ་རྗེ་ནི། །མཁས་པས་རྫས་རྣམས་ཡོངས་སུ་སྤྱད། །ཐོག་མར་
ལྕགས་ཀྱུ་མཉམ་ལྡན་པའི། །དམ་ཚིག་ཡོངས་སུ་སྤྱད་པར་བྱ། །དེ་ནས་ཐམས་ཅད་ཡོངས་རྫོགས་པར། །སློབ་དཔོན་གྱིས་ནི་བྱིན་གྱིས་བརླབ། །གནས་དང་ཉེ་གནས་ཞིང་དང་ནི། །འདུས་དང་དུར་ཁྲོད་གནས་པའོ། །དཔའ་མོའི་དབང་ཕྱུག་མ་ཀུན་ལ། །བདག་ནི་
གུས་པས་ཕྱག་འཚལ་ལོ། །ལྷ་མོ་རྣམས་ཀྱི་ཚད་མ་དམ་ཚིག་ཚད་མ་དང་། །དེས་བཤད་གསུང་ནི་མཆོག་ཏུ་ཚད་མར་གྱུར་པ་སྟེ། །བདེན་པར་གྱུར་པ་དེས་ན་ལྷ་མོ་རྣམས་ཀྱིས་འདིར། །བདག་ནི་རྗེས་སུ་གཟུང་བའི་རྒྱུར་ནི་འགྱུར་བར་ཤོག །གཞན་ཡང་དཀྱིལ་འཁོར་

མདུན་དུ་ནི། །སྙིང་གར་ཐལ་མོ་རབ་སྦྱར་ཏེ། །ཡོན་བདག་གིས་ཀྱང་སྨོན་ལམ་ནི། །ཡོངས་སུ་བསྔོ་བ་ཉིད་དུ་བྱ། །སྲིད་དང་ཞི་བ་མཉམ་པར་ཆགས་པ་བཅོམ་ཞིང་ཡང་དག་རྟོག་པ་འཇོམས། །ཁྱེད་ཀྱི་དངོས་པོ་ཐམས་ཅད་མཁའ་དང་མཉམ་པའི་བདག་ཉིད་
གཟིགས་པར་ལྡན། །མགོན་པོ་ཐུགས་རྗེ་ཆུ་ཡི་ལྗིད་ཀྱིས་བརླན་པར་གྱུར་པའི་ཐུགས་ཀྱི་ཆུས། །བདག་ལ་མཛོད་ཅིག་ལྷ་མོ་རྣམས་ཀྱིས་ཤིན་ཏུ་རྗེས་བརྩེར་མཛད་དུ་གསོལ། །རྣལ་འབྱོར་བདུད་རྩི་རོ་གཅིག་གསོལ་བས་ཐུགས་ནི་རྣམ་པར་དག་པ་སྟེ། །གནས་ལ་
སོགས་པའི་ཡུལ་དུ་བགྲོད་པས་སྐུ་ནི་རྣམ་པར་དག་པ་ཡི། །དཔལ་ལྡན་གནས་ཀྱི་དབུས་ཀྱི་དཀྱིལ་འཁོར་འཁོར་ལོ་མཆོག་གི་མགོན་པོ་ནི། །བླ་མ་མཆོག་ལ་རྟག་ཏུ་མགོ་བོས་བཏུད་དེ་གུས་པས་ཕྱག་འཚལ་ལོ། །དཔའ་བོ་ཀུན་གྱི་སྐུ་ནི་རྟག་ཏུ་མཛེས་པ་སྟེ། །ལྷ་མོ་
རྣམས་ཀྱི་རིན་ཆེན་སྐུ་ཡིས་འཁྱུད་པས་བརྒྱན། །འཁོར་ལོར་གནས་མགོན་ལྷན་ཅིག་སྐྱེས་དགའ་དྲི་མེད་པའི། །རྣལ་འབྱོར་སྙིང་པོ་བདེ་མཆོག་ལ་ཡང་རྟག་ཕྱག་འཚལ། །སངས་རྒྱས་ཀུན་མཁྱེན་ཤིན་ཏུ་རྣམ་པར་དག་པའི་གནས། །ལྷ་མོ་རྣམས་ནི་ལྷན་ཅིག་སྐྱེས་
པའི་གནས་ཀྱིས་མཛེས། །འདྲེན་པ་ལྷན་ཅིག་སྐྱེས་པའི་དགའ་བ་འབྱུང་བ་སྟེ། །དྲི་མེད་ལྷན་ཅིག་སྐྱེས་པ་མཆོག་ལ་བདག་ཕྱག་འཚལ། །ཚིགས་བཅད་གསུམ་གྱིས་ཡང་དག་བསྟོད། །ཇི་ལྟར་བདེ་བར་ཕྱག་ཀྱང་བཙལ། །ཡིད་སྤྲོ་ཇི་ལྟར་བདེ་བར་ནི། །ཅ་ཅོའི་
སྤྲོ་བ་ཆེན་པོ་ཡིས། །མེ་ཏོག་ཕྲེང་བ་ས་རྣམ་བརྒྱན་ཅིང་། །སྣ་ཚོགས་མེ་ཏོག་གིས་མཆོད་ལུས། །ཆང་གི་སྟོན་མོའི་དགའ་བཅས་པས། །རྡོ་རྗེའི་གླུས་ནི་དགང་བར་བྱ། །མཆོག་ཏུ་དགའ་བས་གར་བྱ་ཞིང་། །གནས་ཀྱི་མཚན་མའི་སྟངས་སྟབས་གར། །ཕྱག་རྒྱ་སྔགས་
ཀྱིས་གར་བྱའོ། །དེར་ནི་པ་ཊ་ཧ་སོགས་དང་། །ཅང་ཏེའུ་དང་ནི་བཀྲ་ཤིས་རྔ། །རྔ་རིངས་ལ་སོགས་སྣ་ཚོགས་པའི། །རོལ་མོ་ཡིད་འོང་བསྒྲག་པར་བྱ། །ཧེ་རུ་ཀ་བཅས་དཔའ་བོ་དང་། །རྣལ་འབྱོར་མ་མཆོག་གཡོན་པ་སྟེ། །དེ་རྗེས་ཚོགས་ཀྱི་གཙོ་བོ་ཡིས། །ཡོན་བདག་

གི་ནི་དགེ་བ་བསམ། །རྣལ་འབྱོར་རྣལ་འབྱོར་མ་འདུས་པས། །སྐད་ཅིག་ཤིས་པ་བརྗོད་པ་སྦྱིན། །བདེ་བ་ཕུན་ཚོགས་ལྡན་པ་དང་། །ནད་མེད་པ་དང་དགེ་བའི་སེམས། །འདོད་དང་གྲོལ་སོགས་ཡང་དག་འཐོབ། །དངོས་གྲུབ་ཕུན་སུམ་ཚོགས་པར་འགྱུར། །
དཀྱིལ་འཁོར་རྣམ་པར་སྤྲོས་པ་ནི། །ཆོ་ག་བཤད་བཞིན་བསྡུ་བར་བྱ། །ལྷག་མའི་གཏོར་མ་བསྡུས་ནས་ནི། །འབྱུང་པོ་འཚོལ་བ་རྣམས་ལ་སྦྱིན། །གནས་དང་ཞིང་གནས་རྣལ་འབྱོར་མའི། །ཚོགས་ལ་དྲི་ཞིམ་ཚིམ་པར་བྱ། །སྤྱན་དྲངས་དཔའ་བོ་ཐམས་ཅད་ནི། །བདེ་བ་
ཆེན་པོར་གཤེགས་སུ་གསོལ། །འདི་ནི་དམ་ཚིག་གི་བརྡའི་ཆོ་ག་རིམ་པར་ཕྱེ་བ་སྟེ་བརྒྱད་པའོ།། །།དེ་ནས་ལག་པ་གཡོན་པའི་བརྡ། །ཅུང་ཟད་ཙམ་ནི་བཤད་བྱ་སྟེ། །སྒྲུབ་པོས་གང་ཞིག་ཤེས་ཙམ་གྱིས། །མྱུར་དུ་དངོས་གྲུབ་འགྱུར་བའོ། །གང་
ཞིག་སོར་མོ་གཅིག་སྟོན་པ། །དེ་ལ་གཉིས་བསྟན་ལེགས་འོངས་ལན། །གང་ཞིག་གཡོན་པའི་སོར་མོ་བསྡམས། །བདེ་འམ་ཞེས་པའི་རྒྱར་ཤེས་བྱ། །གང་ཞིག་མིང་མེད་སྟོན་བྱེད་པ། །དེ་ལ་མཐེའུ་ཆུང་བསྟན་པར་བྱ། །གང་ཞིག་གུང་མོ་སྟོན་བྱེད་པ། །དེ་ལ་མཐེ་བོ་བསྟན་
པར་བྱ། །གང་ཞིག་སྲིན་ལག་སྟོན་བྱེད་པ། །དེ་ལ་མགྲིན་པ་རབ་བསྟན་བྱ། །གང་ཞིག་བ་ཏི་ས་སྟོན་པ། །དེ་ལ་རྩེ་གསུམ་བསྟན་པར་བྱ། །གང་ཞིག་ནུ་མ་སྟོན་བྱེད་པ། །དེ་ལ་སྐྲ་མཚམས་བསྟན་པར་བྱ། །གང་ཞིག་སོ་ནི་སྟོན་བྱེད་པ། །དེ་ལ་འཁོར་ལོ་བསྟན་པར་བྱ། །
གང་ཞིག་ཁྲོ་གཉེར་སྟོན་བྱེད་པ། །དེ་ལ་གཙུག་ཕུད་བསྟན་པར་བྱ། །གང་ཞིག་དཔྲལ་བ་སྟོན་བྱེད་པ། །དེ་ལ་རོལ་པ་བསྟན་པར་བྱ། །བུད་མེད་གང་ཞིག་གཡོན་ནས་འགྲོ། །རྣལ་འབྱོར་མ་རྟག་གཡོན་ནས་ཏེ། །སྐད་ནི་ཆེན་པོས་རབ་ཏུ་སྨྲ། །གཡོན་པའི་ལྟ་བས་རྣམ་
ལྟ་ཞིང་། །བུད་མེད་རྣམས་ལ་དགར་སྨྲ་བ། །དེ་ནི་དམ་ཚིག་ལྡན་ཤེས་བྱ། །བུད་མེད་རྣམས་ལ་གསོལ་བཏབ་ན། །རིགས་ཀྱི་ས་བོན་རབ་སྨྲ་ཞིང་། །རིགས་ཀྱི་བྱ་བ་མི་འདོར་ལ། །རང་གི་རིགས་ཀྱི་རིག་པ་ཟློས། །གང་ཞིག་རིག་པ་རྣམ་པར་འདྲི། །ལག་པ་གཡོན་པས་

རང་གི་མགོར། །མགོ་ལ་འཕྲུག་པར་བྱེད་པ་དང་། །སྒྲུབ་པ་པོས་ནི་ཁྱད་པར་དུ། །དེ་ཡི་རང་རིག་དྲན་པར་འགྱུར། །མཁུར་བའམ་ནི་ཀོས་ཀོ་འམ། །སྣ་དག་ཏུ་ནི་སོར་མོ་སྟོན། །ཟུར་གྱིས་ལྟ་བས་དུས་རྟག་ཏུ། །རང་གི་རིགས་ལ་རྣམ་པར་བལྟ། །བདེན་འབྱུང་
འགྲོ་བའི་རྣལ་འབྱོར་མ། །རྙེད་དཀའ་ངེས་པར་དམ་ཚིག་ཅན། །རང་གི་ཁྱིམ་དུ་ཐོད་པ་དང་། །དགྲ་སྟ་རལ་གྲི་རྒྱལ་མཚན་དང་། །འཁོར་ལོ་དང་ནི་རྔ་ཡབ་དུང་། །རྩེ་གསུམ་བྲིས་ནས་དགའ་བྱེད་ཅིང་། །རྟག་ཏུ་ཤ་དང་ཆང་ལ་དགའ། །འཇིགས་དང་ངོ་ཚ་འཇོམས་བྱེད་
གང་། །མཁའ་འགྲོ་མའི་རིགས་ཡང་དག་འབྱུང་། །ལྷན་ཅིག་སྐྱེས་མ་ཞེས་བྱར་བཤད། །ཡུལ་དང་ཡུལ་དུ་མངོན་པར་སྐྱེ། །སྒྲུབ་པོ་རྣམས་ཀྱིས་རྟག་ཏུ་བསྟེན། །གནས་དང་ཉེ་བའི་གནས་དང་ནི། །དེ་བཞིན་ཞིང་དང་ཉེ་བའི་ཞིང་། །ཚན་དྷོ་ཉེ་བའི་ཚན་དྷོ་ཧ། །
འདུས་པ་ཉེ་བའི་འདུས་པ་དང་། །དུར་ཁྲོད་ཉེ་བའི་དུར་ཁྲོད་དེ། །འཛམ་བུའི་གླིང་ན་ཡང་དག་གནས། །གནས་ནི་པུལླཱི་རར་གྲགས་ཏེ། །དེ་བཞིན་ཛཱ་ལན་དྷ་རའང་གནས། །ཨུ་ཌྱན་དེ་བཞིན་གནས་ཡིན་ཏེ། །དེ་བཞིན་ཨར་བུ་ད་ཡང་གནས། །ཉེ་གནས་གོ་ད་
བ་རཱི་སྟེ། །དེ་བཞིན་རཱ་མེ་ཤྭ་རིའི་མིང་། །དེ་བི་ཀོ་ཊིར་མངོན་བརྗོད་དང་། །མཱ་ལ་བ་ཡང་ཉེ་བའི་གནས། །ཞིང་ནི་ཀཱ་མ་རཱུའི་མིང་ཅན་ཏེ། །ཨོ་དྲིར་མངོན་པར་བརྗོད་པའང་ཞིང་། །ཉེ་ཞིང་ཏྲི་ཤ་ཀུ་ནི་སྟེ། །ཀོ་ས་ལཱ་ཡང་ཉེ་བའི་ཞིང་། །ཀ་ལིང་ག་དང་ལམ་པཱ་ཀའང་། །
དེ་བཞིན་ཚན་དྷོ་ཧ་ཡིན་ཏེ། །ཀཱཉྩི་ཧི་མ་ལ་ཡ་ནི། །ཁྱད་པར་ཉེ་བའི་ཚན་དྷོ་ཧའོ། །འདུས་པ་པྲེ་ཏ་བ་སི་ནི། །གྲི་ཧ་དེ་བ་ཡང་དེ་བཞིན། །སཽ་རཱཥྚ་དང་གསེར་གླིང་གང་། །ཉེ་བའི་འདུས་པ་གཉིས་ཡིན་ནོ། །པ་ཏིལ་པུ་ཏྲ་དུར་ཁྲོད་དེ། །སིན་དྷུའང་དེ་བཞིན་དུར་
ཁྲོད་དོ། །མ་རུ་ཀུ་ལུ་ཏཱ་གཉིས་ནི། །ཉེ་བའི་དུར་ཁྲོད་གནས་སུ་བཤད། །དེ་ལྟར་ཕྱི་རོལ་གནས་སུ་གྲགས། །ནང་གི་གནས་ཉིད་ལུས་སུ་བརྗོད། །རང་ལུས་རྩ་ཡི་གཟུགས་ལ་འདིར། །གནས་ཀྱི་མིང་དུ་རབ་ཏུ་གྲགས། །དེ་གཟུགས་ལྷ་ཡི་རྣམ་པ་སྟེ། །དེ་ནས་

ནང་གི་བདག་ཏུ་གནས། །དེ་ཕྱིར་དེ་ཡི་གོང་བུའི་གནས། །ལུས་འདི་སངས་རྒྱས་ཀུན་མཚུངས་པའོ། །གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ས་ཡིན་ཏེ། །ཉེ་བའི་ཞིང་ནི་འོད་འཕྲོ་བ། །མངོན་དུ་གྱུར་པ་ཚན་
དྷོར་ཤེས། །ཉེ་བའི་ཚན་དྷོ་སྦྱང་དཀའ་བའོ། །འདུས་པ་རིང་དུ་སོང་བ་སྟེ། །མི་གཡོ་བར་གྲགས་ཉེ་འདུས་པ། །དུར་ཁྲོད་དེ་བཞིན་ལེགས་བློ་གྲོས། །ཉེ་བའི་དུར་ཁྲོད་ཆོས་ཀྱི་སྤྲིན། །གནས་སོགས་ས་ཡི་རྣམ་དག་པ། །རིམ་པ་ཇི་བཞིན་བཤད་པ་ཡིན། །གནས་དང་ཉེ་
གནས་སོགས་བསྟེན་པས། །མི་རྣམས་དྲི་མ་མེད་པར་འགྱུར། །བློ་ལྡན་རྣམ་རྟོག་མེད་པ་ནི། །རྒྱུ་ཞིང་མཚན་མ་ཡང་དག་བརྟག །སྣ་ཚོགས་གཟུགས་དང་འཇིགས་གཟུགས་མ། །དྲག་ཅིང་མི་བཟད་དགོད་བརྟགས་ལ། །རང་འདོད་ལྷ་ཡི་རྣལ་འབྱོར་གྱིས། །ཧཱུྃ་གི་སྒྲ་
ནི་བསྒྲགས་པར་བྱ། །ཐེ་ཚོམ་ཐམས་ཅད་རྣམ་སྤངས་ནས། །སྒྲུབ་པོས་སེང་གེ་བཞིན་དུ་སྤྱད། །མཐོང་ངམ་རེག་ལ་ཐོས་པས་ཀྱང་། །མྱུར་དུ་དངོས་གྲུབ་རབ་འགྲོ་འགྱུར། །འདི་ནི་བརྡ་དང་གནས་ལ་སོགས་པའི་བརྡས་ས་རྣམས་ངེས་པར་བསྟན་པའི་རིམ་པར་ཕྱེ་བ་སྟེ་
དགུ་པའོ།། །།དེ་ནས་གང་ཞིག་བྲིས་ཙམ་གྱིས། །སྒྲུབ་པོས་དངོས་གྲུབ་ཐོབ་འགྱུར་བའི། །ཞི་བ་ལ་སོགས་རབ་སྦྱོར་བ། །ཡང་དག་རབ་ཏུ་བཤད་པར་བྱ། །གུར་གུམ་ཙནྡན་བསྲེས་པས་གང་། །ཡར་ངོ་ཡི་ནི་ཚེས་ལ་བྲི། །འཁོར་ལོ་རྩིབས་དྲུག་
བྲིས་ནས་ནི། །ཡི་གེ་བདུན་པའི་སྔགས་སྦྱར་ཞིང་། །ཕྱི་རོལ་རྡོ་རྗེའི་ཕྲེང་བས་བསྐོར། །དབུས་སུ་མིང་ནི་རྣམ་སྤེལ་བའོ། །དར་རམ་རས་ནི་གཙང་མ་འམ། །ཡང་ན་ཁམ་ཕོར་ཁ་སྦྱར་ལ། །གསང་སྟེ་ལས་ནི་བྲིས་ནས་ཀྱང་། །སྲད་བུ་དཀར་པོས་དཀྲི་བར་བྱ། །ཁ་
དོག་དཀར་པོས་ཤར་བལྟས་ཏེ། །མེ་ཏོག་དཀར་པོས་མཆོད་པར་བྱ། །མདུན་དུ་ཟླ་བའི་དཀྱིལ་འཁོར་གྱི་སྟེང་དུ་བསྒྲུབ་བྱ་གནས་པར་བལྟས་ལ། བུམ་པ་དཀར་པོ་ཟླ་བའི་བདུད་རྩིའི་ཆུས་གང་བས་དབང་བསྐུར་བར་བྱའོ། །ཐེ་ཚོམ་མེད་པས་ཐུན་གསུམ་དུ། །ཡི་གེ་བདུན་

པའི་སྔགས་བཟླས་ན། །དེ་མ་ཐག་ཏུ་ཞི་བ་དང་། །བདེ་ལེགས་སྐྱིད་དང་ཚེ་རིང་འགྱུར། །རིམས་ནད་དུག་དང་འཚེ་བ་ལ། །ལག་པ་གཡོན་པར་བསྒོམ་བྱ་སྟེ། །འཁོར་ལོ་ཙནྡན་གྱིས་བྲིས་ལ། །མེ་ཏོག་བདུག་པ་མཆོད་པར་བྱ། །བསྒྲུབ་བྱ་ཤར་དུ་ཁ་བསྟན་ཏེ། །མཁས་
པ་ཡིས་ནི་སྦྱར་བྱ་བ། །གཏོར་མ་ཆུ་དང་དེ་བཞིན་མེ། །དེ་ཡི་དབུས་སུ་དཱུར་བའམ། །རྨ་བྱའི་སྒྲོ་འམ་ཀུ་ཤའི་ཆུས། །ཁྱད་པར་དུ་ནི་དེ་ལ་བྱབ། །གསང་སྔགས་འདི་ནི་གཙོ་བོ་མཆོག །ཞི་སོགས་ཆོ་ག་རིམ་བཞིན་བྱེད། །གུར་གུམ་དྲི་བཟང་བསྲེས་པ་ཡིས། །རྒྱས་པའི་
འཁོར་ལོ་བྲི་བྱ་སྟེ། །སྭཱ་ཧཱའི་ཡི་གེ་དང་སྤེལ་བར། །ཁམ་ཕོར་གཉིས་ལ་བྲིས་ནས་ནི། །སྲད་བུ་སེར་པོས་དཀྲི་བྱས་ལ། །མར་དང་སྦྲང་རྩིའི་ནང་དུ་གཞུག །བྱང་དུ་ཁ་བལྟས་ཐུན་གསུམ་དུ། །ཁ་དོག་སེར་པོར་བསྒོམ་བྱས་ལ། །ཟླ་བའི་དཀྱིལ་འཁོར་སེར་པོ་ལ། །བསྒྲུབ་
བྱ་གནས་པར་མཁས་པས་བསམ། །བདུད་རྩི་སེར་པོས་དབང་བསྐུར་ཞིང་། །མེ་ཏོག་སེར་པོས་མཆོད་པར་བྱ། །རྣམ་པར་མི་རྟོག་སེམས་ཀྱིས་ནི། །རྒྱས་པའི་བསམ་པས་བཟླ་བྱ་སྟེ། །ཆེ་གེ་མོ་བཽཥྚི་ཀཾ་ཀུ་རུ་སྭཱ་ཧཱ། །བཽ་ཥཊ་སྔགས་ཀྱིས་སྤེལ་བར་བྱ། །ནོར་དང་འབྲུ་
རྣམས་འཕེལ་བ་དང་། །དཔལ་དང་བཀྲ་ཤིས་མཉམ་པར་འཇུག །ལས་ཀྱི་སྦྱོར་བ་འདི་ཡིས་ནི། །རྒྱས་པར་འགྱུར་ཏེ་གཞན་དུ་མིན། །ཙནྡན་དམར་དང་སེན་རྩི་དང་། །མིང་མེད་ཀྱི་ནི་ཁྲག་བསྲེས་ཏེ། །རས་སམ་གྲོ་གའི་འདབ་མ་འམ། །ཁམ་ཕོར་སོ་ནི་མ་
བཏང་བཟུང་། །ཡི་གེ་ཧོཿདང་སྤེལ་བ་ཡིས། །འཁོར་ལོ་གཉིས་ནི་མཉམ་པར་བྲི། །སྲད་བུ་དམར་པོས་བཅིངས་ནས་ནི། །མེ་ཏོག་དམར་པོས་མཆོད་པར་བྱ། །མར་དང་སྦྲང་རྩིའི་དབུས་གཞག་ལ། །ནུབ་ཀྱི་ཕྱོགས་སུ་ཁ་བལྟས་ཏེ། །ཁ་དོག་དམར་པོར་བསྒོམ་བྱས་
ལ། །དཀྱིལ་འཁོར་དམར་པོ་ལ་གནས་པའི། །བསྒྲུབ་བྱ་ཆགས་པར་རྣམ་པར་བསམ། །རྟག་ཏུ་ཡིག་བདུན་འབྱུང་བ་ནི། །རྒྱུན་མི་འཆད་པར་བཟླས་བྱ་སྟེ། །མྱོས་པར་འགྱུར་བས་ཞབས་དྲུང་ལྷུང་། །དེ་ནི་གྲུབ་པར་རྣམ་པར་བསམ། །གལ་ཏེ་དབང་དུ་འོང་བར་མ་

གྱུར་ན་མར་དང་སྦྲང་རྩི་དང་བྲལ་བའི་འཁྲུལ་འཁོར་སེང་ལྡེང་གི་འདབ་མ་ལ་གདུང་བར་བྱས་ན། གང་སུ་ཡང་རུང་བ་སྐལ་བ་ངན་པ་ཡང་སྐལ་བ་བཟང་པོར་འགྱུར་ཏེ་གཞན་དུ་མ་ཡིན་ནོ། །དུར་ཁྲོད་ཀྱི་རས་སམ། ཟླ་མཚན་འཛག་པའི་རས་ལ། རྒྱ་སྐྱེགས་ཀྱི་ཁུ་
བ་དང་ལྡན་པས་ཡི་གེ་ཛཿཧྲཱི་དང་སྤེལ་བའི་འཁྲུལ་འཁོར་བྲི་བའམ། ཁམ་ཕོར་རམ། བུད་མེད་ཀྱི་ཐོད་པ་ལ་གྲུབ་པའི་འཁོར་ལོ་བྲིས་ལ་སྲད་བུ་དམར་པོས་དཀྲིས་ཏེ། །མེ་ཏོག་དམར་པོས་མཆོད་ལ་བསྒྲུབ་བྱའི་སྙིང་ག་ནས་ལྕགས་ཀྱུས་དབུག་ཅིང་མགྲིན་པ་ནས་ཞགས་
པས་བཅིང་བར་བྱའོ། །གང་གིས་དེ་ལྟར་བསམས་ཀྱང་བསྒྲུབ་བྱ་ནམ་ཡང་འོང་བར་མ་གྱུར་ན་སེང་ལྡེང་གི་ཤིང་ལས་མེ་སྦར་ལ་བསྲོས་པས་འཁྲུལ་འཁོར་ཚར་གཅད་པར་བྱ་ཞིང་ཆེ་གེ་མོ་ཨཱ་ཀརྵ་ཡ་ཧྲཱིཿཛཿཞེས་བྱ་བ་དེས་བསྒྲུབ་བྱ་སྐད་ཅིག་ཙམ་དེ་ཉིད་ལ་དགུག་པར་བྱ་
སྟེ། རྐང་པས་དགུག་པ་བླ་ན་མེད་པའོ། །དེ་ནས་གཞན་ཡང་མནན་པ་ཡི། །ཆོ་ག་བླ་མེད་བཤད་པར་བྱ། །རི་མོ་བརྒྱད་བརྒྱད་མཉམ་སྦྱར་བས། །རེའུ་མིག་བཞི་བཅུ་རྩ་དགུ་སྟེ། །མཁས་པས་དེ་ཡི་བར་གྱི་ནི། །རེའུ་མིག་བཅུ་གསུམ་སྟོང་པར་བྱ། །ཟུར་དང་ཟུར་དུ་རེའུ་མིག་
དགུ། །གྲྭ་བཞི་ལ་ནི་ཡང་དག་གནས། །གྲྭ་བཞི་ཀུན་གྱི་དབུས་ཀྱི་ནི། །རེའུ་མིག་སྟོང་པ་ཉིད་བྱས་ལ། །དུར་ཁྲོད་རས་ལ་ཞལ་བཞི་པའི། །སྔགས་ནི་ཡང་དག་སྦྱར་ཏེ་བྲི། །ཡུང་བ་ལྡོང་རོས་བསྲེས་པའི་ཆུས། །འཁོར་ལོ་གཉིས་ལ་བསྒྲུབ་བྱའི་མིང་། །ཡི་གེ་ལྃ་དང་སྤེལ་ཏེ་བྲི། །
རི་རབ་ཟུར་བརྒྱད་གནས་བྲིས་པའི། །ཁམ་ཕོར་ཁ་སྦྱར་ཉིད་དུ་བྱ། །རི་རབ་སྟེང་དུ་དབང་ཆེན་གྱི། །དཀྱིལ་འཁོར་དབུས་སུ་ལྃ་གྱིས་ནི། །མཚན་ཅིང་སྣ་ཚོགས་རྡོ་རྗེ་ཡིས། །སྟེང་ནས་མནན་པར་རྣམ་པར་བསྒོམ། །ས