Kinh tạng Tây Tạng (Kangyur Đại Học) — 078_རྒྱུད་འབུམ།_ཁ

ཉམ་པར་བྱེད། །དངོས་གྲུབ་ཆེན་པོ་སྒྱུ་མ་ཀུན། །དབང་ཕྱུག་ཐམས་ཅད་རབ་གྲུབ་པའོ། །རིག་པ་རྣམ་པར་འཕྲོ་བྱེད་པ། །འབྱུང་པོའི་གདོན་རྣམས་འགུགས་པར་བྱེད། །ཧི་མ་བནྟ་སྱེ་ཨུཏྟ་རེ་ཎ་བྷ་བཙྪི་བོ་ན་མ། མ་ཧཱ་མ་སོ། སོ་བ་
ཨི་ཨ་དྷ་མ་སི་ཧྃ་བེ་ཧི་མ་སེ་ཧི་མ་སེ་ཧི་བ་ཏི་བུཛྫ་ཨི། ཨི་སོ། ནི་དོ། མ་ཧི། ནཱི་ཏོ། ཀུམྦྷ་ཀཎྜ། སིནྣ་དོ། སཱ་ག་ར་ས་སཏྱ་པ་ཌ་བེ་སིནྣ་སིནྣ་དྃ། བནྔྷཱ་མི། ཀུ་རུར་སསྶ་བི་ཌ་ལ་ས། ཏུཎྜ་བནྡྷ་མེ། ཛཱ་བ་སུ་ར་ཨུ་ད་ནི། ཛ་བ་ར་བི་པ་བྷ་ཨ་དྷི་ཨ་ཧ་ཏོ་བརྞྞ་ཨ་ནུ་བ་ད་ན་སཱ་དྷུ་ན། མ་
མ་རི་ཨ་སརྦྦ་སི་དྷ་ན་སྭཱ་ཧཱ། བཅོམ་ལྡན་འདས་རྡོ་རྗེ་འཛིན་པ་རྡོ་རྗེ་སེམས་དཔའ་དེ་བཞིན་གཤེགས་པས་བཀའ་སྩལ་ཏོ། །འདིས་ལན་བདུན་དུ་མངོན་པར་བརྗོད་པས་བསྔགས་པ་བྱས་ཏེ། ཁྱིམ་གྱི་ཐོག་དུ་གཞག་ན་རྗོད་པར་བྱེད་པར་འགྱུར་རོ། །བ་ས་ཧ་ཏོ་ལ་ཨི་མི་ཛྙ་ཨ། བ་ས་
བ་ཛ་ན་མོ་ཧི་ཨ། ཨེ་ས་བིཛྫ་ཙ་ཧ་ཨིན་མནྟ་ཨི་ཨིནྡྷ་ན། ཧ་ཨ་བཱ་ཨི་ཛ་བེ་ན་དིཎྞ་ཎི། དྷ་ཏམྤ་ཧི་མ་ཧཱ་སྭ་བ་ཨ་ན་ནེ་བཱ་དྷོ་སི། རཱ་ཛ་ཀུ་ལ་ཁཎྜ། ཌ་ཎི་ཌ། ཛེ་བཱ་ཨི་བ་དྷ། ཏ་དྷི་ཎ་ཏ་ཎ། ན་མཿསིདྷ་ན། ན་མཿཔུ་པ་ཛ་ཛ་པཱ་ད་ན། མ་ས་ཝ་རཱ་ཎེ། ཏདྱད་རེ་མ་ཧཱ་དཎྜེ་ད་ཧ་ཧེ་དུན་ཧེ་ཧེ་
སྭཱ་ཧཱ། འདིས་བྱེ་མ་ལ་ལན་བདུན་དུ་བསྔགས་པ་བྱས་ཏེ། འབྲུ་རྣམས་ལ་བཏབ་ན་ཅེ་སྤྱང་ལ་སོགས་པའི་སྲོག་ཆགས་རྣམས་ཀྱིས་མི་ཟ་ཞིང་སྤྲིན་རྣམ་པར་ཟློག་པར་བྱེད། རཏྣ་ར་ཏི། ཨོཾ་ཨ་ལ་ལ་བར་ཙུ་ལི་ལ་ཙོར་བརྒྷ་ཀ་ན་ད་ས་བཱ་མུ་ཧ་བནྔྷཱ་མི་སྭཱ་ཧཱ། ཤིང་བུ་སོར་བཞི་པ་
ལ་ལན་བདུན་དུ་བཟླས་ཏེ། རྣ་བ་གཡས་པ་ལ་བཏགས་ན་ཆོམ་རྐུན་རྣམས་རེངས་པར་བྱེད་དོ། །ཨི་ད་སི། ཨ་ཏི་ཎི་ཛ་ཧ་ཨ་ཀ་ལི་ལོ་ཧི་དི། པིངྒ་ལེ། མ་མེ་ག་བྷ་ན་ཨི། ཨ་ཧཾ་སི་ལ་ཨུ་ས་རི་མི་ཨ་བ་ར་བྷ་ཎ་ཨི། ཨ་ཧཾ་བཱ་ད་ཨུ་སཱ་ར་མི་ཨ་བ་ར་བྷ་ཎ་མི་ཨ་ཧམ་དུ་ཧ་མི་བྷི་ཏོ་བཛྫ་
པ། མི་ལོ་ལོ་ཀ་ལི་ལོ་ཧི་དི་པངྒ་ལི་ཧཱུྃ་ཕཊ། གླང་གི་རྭ་ཡིས་བྲུས་པའི་ས་དབུས་མ་བླངས་ལ་སྔགས་འདིས་ལན་བདུན་དུ་མངོན་པར་བཏབ་སྟེ། ནགས་ཁྲོད་དང་འཇིགས་པའི་ལམ་དང་། རྒྱལ་པོས་བཀྲབས་པ་ལ་སོགས་པ་ཐམས་ཅད་ཀྱིས་གནོད་པ་བྱེད་པར་མི་འགྱུར་ཏེ། བ་གླང་

གི་གདོང་པ་ཅན་དུ་བྱས་ནས་ཆོ་ག་འདི་བྱ་སྟེ། ས་དེ་ལག་པར་གཞག་ལ། སེར་བ་འབབ་པ་ལ་སོགས་པ་ལ་བཏབ་ན། ལྡོག་པར་འགྱུར་ཏེ་འདི་ཡི་ཆོ་ག་འདིའོ། །ཨོཾ་ཛཾ་པི་ལི་ཨ་བ་ཨ་བིཛྫི་སུ་ཏི་ཐ་ད་སི། ཨི་སུ་བྷ་དེ་སུ་བྷ་དེ་ཨོ། སོ་ཎ་ཨོ་ཨ་ཙ་ལ་ཧི་སུཎྞ་པ་ད་ནེ། ཨི་སི་ལ་བ་ད་བ་
ར་ཥ་བཛྫ་ཧི་སྭཱ་ཧཱ། སྣོད་བཟང་པོར་ཆུ་བླུགས་ཏེ། རྗེས་སུ་མཐུན་པའི་གནས་སུ་འདུག་སྟེ། ལན་བདུན་དུ་བསྔགས་ནས་ཆུ་དེ་ནམ་མཁའ་ལ་གཏོར་ན། སེར་བ་དང་རླུང་འབབ་པ་ལ་སོགས་པ་རེངས་པར་བྱེད་དོ། །ན་ཨ་མོ་དྷེ། བྷ་ག་བ་ཏི། ཀི་བྷི་ཀུ་རེ་ཎ་ཤ་ཏྲ་ཡ། ཐ་མ་ཀེ་ཧ་ཐ་ཀ་རལ་པཱ་
ཀེ། ནི་ཏ་སྃ་རུ་བི་ཏི་བྷ་ཏུ་ཡ། རུ་ཛ་རི་ཊ་རམ་ཊ་ཀུ་ཀེ་ཏོ་ལི་ཊ་ལུ་ཡ། ལུ་ཏཾ་ཧིཥྛ་ལེ་ཀ་སི་ར་ལེ་ལོ་ཏི་གྲ་ལེ་བྷི་ཥི་ཥ་ལེ་ཎ་སི་མུ་ལེ་ཁ་ཨ་ཡ་ཐེ་སརྦྦ་ཧ་དེ་སྲ་ན་བྷུ་ཛ་ཀུ་བྷ་ན་སུ་ཐེ་ར་ཥ་ཡ་ན་པ་ཡ་ར་ཏི་ཥུ་དྷ་ཡ་ན་ཤོ་པ་དྱ་ཏི་ཏ་ཀ་སུ་ས་ལ་ཀ་ཁ་སེ་སིདྡྷ་བ་ཧཱ་ལ་ས་ཧི་པ་ཎ་སྭཱ་ཧཱ། ཆུ་ལ་ལན་བདུན་བསྔགས་
ནས་ཁ་གདོང་བཀྲུས་ན་ཐམས་ཅད་འགྲུབ་པར་བྱེད་དོ། །རིམ་པ་བཞིན་དུ་ཧེ་རུ་ཀ་དང་འདབ་མ་རྣམས་ལ་མཁའ་འགྲོ་མ་རྣམས་བཀོད་དེ། དབུགས་མི་འབྱུང་བར་སྦྱར་བ་ལས། །འགྲུབ་པར་འདི་ལ་ཐེ་ཚོམ་མེད། །ཡང་ནི་རྣལ་འབྱོར་པ་རྣམས་འདིར། །པདྨ་ལ་ནི་རབ་བསམས་ཏེ། །
ཡིད་ནི་རླབས་མེད་པར་བྱས་ཏེ། །སྔགས་ནི་ཕོ་ཉ་མོར་སྦྱར་ན། །དེ་ཡིས་རྟག་ཏུ་འགྲུབ་འགྱུར་བ། །འདི་ལ་སྔགས་པ་ཐེ་ཚོམ་མེད། །དཔལ་རྡོ་རྗེ་མཁའ་འགྲོ་མའི་རྒྱུད་ཆེན་པོ་ལས་ལེའུ་གསུམ་པའོ།། །།དེ་ནས་གཞན་ཡང་བཤད་བྱ་བ། །རབ་ཏུ་རྟོགས་བྱའི་
དཔའ་བོ་དྲུག །དཔའ་མོ་དྲུག་དང་མཉམ་སྦྱོར་ཕྱིར། །གནས་རྣམས་རེ་རེ་ཡི་གེ་སྟེ། །དང་པོ་སྙིང་ག་ཉིད་དུའོ། །མགོ་བོ་ལ་ནི་གཉིས་པར་བརྗོད། །སྤྱི་གཙུག་ལ་ནི་གསུམ་པ་སྦྱིན། །དཔུང་པ་གོ་ཆ་བཞི་པ་ཉིད། །མིག་དག་ལ་ནི་ལྔ་པ་ཡིན། །དྲུག་པ་ཐམས་ཅད་ལ་ནི་བརྗོད། །
དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་བཞི་པའོ།། །།དེ་ནས་གཞན་ཡང་བཤད་བྱ་བ། །མཁའ་འགྲོ་མ་རྣམས་ཉེར་འདུས་མཆོག །གང་དུ་མཉེས་པར་འགྱུར་བ་ཡི། །མཁའ་འགྲོ་མ་ཀུན་རབ་སྡོམ་པའོ། །ཡི་དགས་གནས་བཞིར་རབ་སྦྱར་རམ། །ཡང་ན་རྒྱ་མཚོའི་

འགྲམ་དུ་འམ། །ལམ་གྱི་བཞི་མདོར་རབ་བསྒྲུབ་ཅིང་། །མཆོག་རྣམས་ཐམས་ཅད་བསྒྲུབ་པར་བྱ། །རི་བོ་ཕུག་དང་ནགས་ཚལ་དང་། །དེ་བཞིན་ཤིང་གཅིག་ཏུ་བརྗོད་པར། །མཚན་མོ་འཇིགས་པའི་གཟུགས་ཀྱིས་རབ་བསྒྲུབས་ནས། །རྣལ་འབྱོར་བླ་ན་མེད་པ་སྐྱེ་བར་འགྱུར། །དེར་ནི་རྟག་
ཏུ་མཁའ་འགྲོ་མ་རྣམས་དང་། །ལྷན་ཅིག་འདུག་པར་སྒྲུབ་པོ་ཐེ་ཚོམ་མེད། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་ལྔ་པའོ།། །།སྔར་སྤྱོད་ཆོ་གའི་རིམ་པ་རྣམས། །རབ་ཏུ་བཤད་ཀྱིས་ལྷ་མོ་ཉོན། །དཀའ་ཐུབ་རྣལ་འབྱོར་པས་མི་བྱ། །གཞན་པ་ཀུན་དང་གནས་མི་བྱ། །ལུས་ལ་
མཆོག་ཏུའང་མཆོད་མི་བྱ། །བརྙས་པ་ཉིད་དུའང་མི་བྱ་སྟེ། །སྣ་ཚོགས་རང་བཞིན་མེད་མཉམ་ལྟ། །གསེག་མ་སོལ་བས་བསྒོས་བྱ་ཞིང་། །ཐལ་བས་འབད་དེ་བརྒྱན་པར་བྱ། །བཟའ་དང་བཟའ་མིན་ལ་སོགས་ལ། །སྔགས་པས་ཀུན་དུ་རྟོག་མི་བྱ། །མེ་ཏོག་རྙེད་རྙེད་ཐམས་ཅད་ཀྱིས། །རྟག་
ཏུ་ཕྲེང་བ་ཉིད་དུ་བྱ། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་དྲུག་པའོ།། །།དེ་ནས་གོ་ཆ་རྣམས་ཀྱི་ནི། །ལས་ཀྱི་ཚོགས་རྣམས་བཤད་བྱ་བ། །འཇིག་རྟེན་གསུམ་ན་བཅུད་ཡོད་གང་། །སྨྱོ་བྱེད་འབྲས་སྐྱེས་ལ་བསྲེས་ན། །དེ་ལ་སྐད་ཅིག་གིས་ཀུན་གྲུབ། །གོ་ཆ་བཟླས་བཞིན་འགྲོ་
བྱེད་ན། །ལྷ་རྣམས་ཀྱིས་ཀྱང་མི་མཐོང་ཞིང་། །ཆོམ་རྐུན་སྟག་སོགས་ཀྱིས་མི་འཇིགས། །གོ་ཆ་བཟློས་བཞིན་དུ་རྒྱལ་པོའི་གྲོང་དུ་བྱིན་གྱིས་བརླབས་ཏེ། ཞུགས་ན་མི་མཐོང་བར་ཡང་འདོད་པ་དེ་བླངས་ནས་སླར་ཡོད་པ་དང་། གོ་ཆ་བཟློས་བཞིན་བཟླས་པས་གང་ལ་རེག་ན་དེ་མདུད་བཞིན་དུ་
རེངས་པར་འགྱུར་རོ། །སུམ་ཅུ་རྩ་གསུམ་པས་ཀྱང་མི་གཡོས་སོ། །སྔགས་བཟླས་པའི་རྐང་པས་བསྣུན་ན་ནི་སླར་གྲོལ་བར་འགྱུར་རོ། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་བདུན་པའོ།། །།དེ་ནས་རྩ་བའི་སྔགས་ཀྱི་ལས་བཤད་དེ། ཤ་ལྔ་ལས་གཟུགས་བརྙན་གྱི་
རབ་ཏུ་སྦྱོར་བ་ལས་ལས་ཐམས་ཅད་བྱེད་པ་ཡིན་ཏེ། ལྷ་དང་ལྷ་མ་ཡིན་དང་། ཀླུ་དང་གནོད་སྦྱིན་ཐམས་ཅད་དང་། དྲི་ཟ་ཐམས་ཅད་དང་། ལྷའི་སྐྱེ་གནས་ཐམས་ཅད་དྲན་པ་ཉིད་ཀྱིས་མཆིའོ། །སྤྲིན་རྣམས་སྐྲག་པར་བྱེད་པ་དང་། ཆར་འབེབས་པར་བྱེད་པ་དང་། ཟློག་པར་བྱེད་པ་དང་། རྒྱ་མཚོ་

སྐེམས་པར་བྱེད་པ་དང་། ཆུ་བོ་རྒྱུན་ཕྱོགས་ལས་ཟློག་པར་བྱེད་པ་དང་། དབང་པོ་ཟློག་པར་བྱེད་པས་དུར་ཁྲོད་ཀྱི་སོལ་བ་ལ་ཇི་ཙམ་འདོད་པ་བཟླས་ནས་གང་ལ་བསྣུན་ན། དེ་དེའི་སྐད་ཅིག་མ་ཉིད་ལ་ལྟུང་ངོ་། །དུར་ཁྲོད་ཀྱི་སོལ་བ་ལ་ཡོངས་སུ་བཟླས་ཏེ། གང་ལ་བསྣུན་ན་དེ་དེའི་སྐད་ཅིག་
ཉིད་ལ་ཤ་ཟས་འཛིན་ནོ། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་བརྒྱད་པའོ།། །།དེ་ནས་གཞན་ཡང་བཤད་བྱ་བ། །མཁའ་འགྲོ་མ་ཡི་སྤྱོད་པ་སྟེ། །དཔའ་བོའི་དཔའ་དང་ཆ་བླངས་མ། །གང་གིས་ཕོ་ཉར་ཤེས་བྱས་ཏེ། །དཔའ་བོས་མཛེས་མ་སྤྱད་པར་བྱ། །ས་ནི་
རྟེན་དུ་བྱས་ནས་ནི། །དམ་པའི་སྤྱོད་པའི་བཟླས་བརྗོད་བྱ། །རིམ་ལས་བཟློག་པའི་ལྡང་ཚུལ་དང་། །ཁ་ཡི་རང་བཞིན་འཇིགས་བག་ཅན། །རྟག་ཏུ་སྨྱོན་མ་བསུས་པའི་གདོང་། །ཆོས་ཀྱི་རིམ་པ་མྱུར་ཤེས་པ། །མཁའ་འགྲོ་མ་ཡི་རྣམ་སྤྱོད་ཡིན། །རི་མོ་གསུམ་པོ་ཡོངས་ཟླུམ་པོར། །
རིམ་དང་རིམ་བཟློག་ཇི་བཞིན་ཤེས། །འགྲོ་དང་འོང་བས་མཁའ་འགྲོ་མའི། །མཚན་མ་ཀུན་གྱི་མཚན་ཉིད་དོ། །དགྲོལ་ལས་བཞིན་གྱི་གཉེར་མ་ཅན། །ཇི་ཞིག་གིས་ནི་སླར་ལྡོག་བྱེད། །དེ་ལས་རྡོ་རྗེའི་དགུག་པ་གསལ། །དེ་དབྱངས་ཀོ་ཀི་ལ་ཡི་སྐད། །རྣལ་འབྱོར་དམ་པ་དེ་ལྟའི་དངོས། །
ཤེས་པར་བྱས་ན་དངོས་གྲུབ་སྟེར། །དེ་ལ་མཚན་ཉིད་བསམ་བྱས་ན། །དེ་ཡིས་དེ་ཡི་དངོས་པོར་འགྱུར། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་དགུ་པའོ།། །།དངོས་གྲུབ་ཀུན་ནི་རབ་སྟེར་བ། །ང་ཡིས་བཤད་ཀྱིས་ལྷ་མོ་ཉོན། །ལུས་ངག་སེམས་ལ་རྟག་ཏུ་ནི། །ཡིད་ཀྱི་རྡུལ་
དང་བྲལ་བར་བྱ། །མཁའ་འགྲོ་ཀུན་དང་མཉམ་སྦྱོར་བའི། །ལུས་ཀྱི་དཀྱིལ་འཁོར་རྣམ་བསམ་པར། །གང་དུའང་ཕོ་ཉ་མོ་གནས་མིན། །ཡོངས་སུ་བསྒོམས་པས་འོང་མིན་གྱི། །དད་པ་ཙམ་གྱིས་གཟུང་བྱ་སྟེ། །མིག་དང་ལག་པས་མ་ཡིན་ནོ། །གསང་བ་འདི་གསལ་མི་བྱ་ཞིང་། །རབ་ཏུ་
འབད་དེ་སྦ་བར་བྱ། །རྣལ་འབྱོར་མ་རྣམས་ཀུན་བསྡུས་ལྟ། །དེ་ཕྱིར་ལུས་ཉིད་དུ་མི་བལྟ། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་བཅུ་པའོ།། །།དེ་ནས་གཞན་ཡང་བཤད་བྱ་བ། །དམ་ཚིག་སྤྱོད་པའི་སྤྱོད་ཡུལ་ཏེ། །དམ་ཚིག་རབ་བསྲུངས་རབ་འགྲུབ་སྟེ། །དམ་

ཚིག་ལས་ནི་སྔགས་པར་གནས། །རྟག་ཏུ་འབྲས་སྐྱེས་སྟོབས་བརྟེན་ཅིང་། །རྣལ་འབྱོར་མ་རྣམས་སྨད་མི་བྱ། །རྗེས་སུ་འཇུག་རྣམས་མི་བཟློག་གོ། །དམ་ཅན་མི་རྣམས་ལ་མི་སྨད། །བརྩོན་ལྡན་རྣམས་ལ་གནོད་མི་བྱ། །འདི་རྣམས་དང་ལྡན་ཅིག་བདེར་བྱ། །གྲོལ་བར་འདོད་པ་དེ་དོན་དུ། །
དམ་ཚིག་རྣམས་ནི་སྤྱད་པར་བྱ། །སངས་རྒྱས་རྣམས་ཀྱིས་གསུངས་པ་ལ། །ཅུང་ཟད་ཙམ་ཡང་སྨད་མི་བྱ། །ཁྲོས་ཏེ་རབ་སྦྱོར་འགའ་མི་བྱ། །སྔགས་ལ་སྦྱར་བར་མི་བྱའོ། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་བཅུ་གཅིག་པའོ།། །།རྡོ་རྗེ་མཁའ་འགྲོ་སྒྲུབ་པའི་ཐབས། །
ང་ཡིས་བཤད་ཀྱིས་ལྷ་མོ་ཉོན། །དང་པོར་བསྒོམ་བྱ་རོ་ཉིད་དེ། །ཆོས་དབྱིངས་དག་ཏུ་རིག་པར་བྱ། །དེ་ཡི་སྟེང་ནུས་རྣལ་འབྱོར་པ། །གོ་འཕང་མཆོག་ནི་བསྒོམ་བྱས་ཏེ། །དེ་ཉིད་དུ་ནི་རྣམ་པར་དགོད། །རང་གི་སྙིང་གའི་ཟླ་དབུས་སུ། །འོད་ལས་ལྷ་མོ་ཀུན་ཕྱུང་བ། །ཕྱག་འཚལ་མཆོད་
སོགས་འདི་ལྟར་གསུངས། །དང་པོར་སྙིང་གར་ཟླ་དབུས་སུ། །ཡི་གེ་ཨ་ཡིས་ཟླ་དཀྱིལ་འཁོར། །རྣམ་པར་བསམས་ལ་དེ་སྟེང་དུ། །ཡི་གེ་ཧཱུྃ་ནི་རྣམ་པར་བསྒོམ། །དེ་ནས་བྱམས་པའི་སེམས་བྱས་ཏེ། །དེ་ནས་རེ་ཞིག་དཀྱིལ་འཁོར་བྲི། །གྲུ་བཞི་པ་ལ་སྒོ་བཞི་པ། །ཁ་ཁྱེར་རྡོ་རྗེས་
ངེས་པར་མཚན། །སྐུད་པ་བཞི་དང་ཡང་དག་ལྡན། །འཕན་གྱི་ཕྲེང་བ་ཤིན་ཏུ་མཛེས། །དཀྱིལ་འཁོར་ཀུན་གྱི་གྲྭ་རྣམས་དང་། །སྒོ་ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་པོ་ཆེས་མཚན་པར། །དཀྱིལ་འཁོར་ཕྱི་རིམ་ཐིག་གདབ་བོ། །ཤེས་རབ་ཅན་གྱིས་ཐིག་གདབ་བོ། །འཁོར་
ལོའི་ཕྲེང་བས་རྣམ་པར་མཛེས། །དེ་ནང་དུ་ཡང་པདྨ་ནི། །མདོག་དཀར་རབ་ཏུ་མཛེས་པ་བྲི། །གཞན་ཡང་དེ་ཡི་སྟེང་དུ་ནི། །མདོག་དམར་པདྨ་འོད་དང་ལྡན། །པདྨའི་ཕྲེང་བས་བསྐོར་བས་སོ། །སྔགས་པས་དེ་ཡི་ནང་དུ་ཡང་། །རྡོ་རྗེ་ཕྲེང་བ་འཁྲིགས་པར་བྲི། །ཡང་ན་པད་ཆེན་འདབ་བརྒྱད་
པ། །ཨིནྡྲ་ནཱི་ལའི་འོད་མཉམ་པའོ། །དེ་དབུས་དཀྱིལ་འཁོར་ལྔས་བརྒྱན་པར། །གཡས་ན་རྡོ་རྗེ་གཙོ་བོ་བཞུགས། །རི་རབ་རི་ཡི་སྟེང་དུ་ནི། །སྣ་ཚོགས་གཟུགས་ཅན་ཡིད་འོང་བ། །སངས་རྒྱས་བྱང་ཆུབ་སེམས་དཔའ་རྣམས། །ཐམས་ཅད་བདག་ལ་དགོངས་སུ་གསོལ། །བདག་མིང་ཆེ་གེ་མོ་ཞེས་

པ། །དུས་འདི་ནས་ནི་བཟུང་ནས་ནི། །ཇི་སྲིད་བྱང་ཆུབ་མ་ཐོབ་པར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །
སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་སོ་སོར་གཟུང་། །སངས་རྒྱས་རྣལ་འབྱོར་སྡོམ་པ་ལ། །སངས་རྒྱས་ཆོས་དང་དགེ་འདུན་ལ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་དག །
ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་རྣལ་འབྱོར་ལ། །དམ་ཚིག་ཡིད་དུ་འོང་བ་ནི། །ཉིན་རེ་ཞིང་ནི་ཡང་དང་ཡང་། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་
ཐེག་པ་གསུམ། །དམ་པའི་ཆོས་རྣམས་སོ་སོར་གཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སེམས་ཅན་
ཀུན་གྱི་དོན་གྱི་ཕྱིར། །སྡོམ་པ་ཐམས་ཅད་གཟུང་བགྱི་ཞིང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་བདག་གིས་དབྱུང་། །སེམས་ཅན་མྱ་ངན་འདས་ལ་དགོད། །ཨོཾ་སྭ་བྷཱ་བ་ཤུདྡྷཱཿསརྦྦ་དྷརྨྨཱཿསྭ་བྷཱ་བ་ཤུདྡྷོ྅ཧཾ། དེ་ནས་ཐམས་ཅད་བདག་
མེད་པ་གནས་གཞི་དང་ངན་པར་བྲལ་བར་བལྟས་ཏེ། དེ་ཉིད་བཅོམ་ལྡན་རྡོ་རྗེ་ཅན། །རྡོ་རྗེ་སེམས་དཔའ་དེ་བཞིན་གཤེགས། །ཁ་དོག་སྔོན་པོ་དྲག་པོ་ཆེ། །ཐོད་པའི་ཕྲེང་བས་རྣམ་པར་བརྒྱན། །ཕྱག་བཞི་པ་ལ་ཞལ་བཞི་པ། །སྤྱན་གསུམ་གྱིས་ནི་རྣམ་པར་མཛེས། །ཡི་དགས་ཆེན་པོ་གདན་
དུ་མཛད། །ཉི་མ་ལ་བཞུགས་གར་བཅས་མཛད། །ཐོད་པ་དང་ནི་ཁ་ཊྭཱཾ་ག །གཞུ་དང་དེ་བཞིན་གཞན་མདའོ། །དེ་ལྟའི་ཆོ་གའི་རིམ་པ་འདི། །ཡེ་ཤེས་ཀྱི་ནི་རྣམ་པར་བསྒོམ། །ཤར་དུ་དཀར་པོ་སྔོ་མདངས་ཅན། །གཡོན་ན་ཁ་ཊྭཱཾ་ག་དྲིལ་བུ། །རྡོ་རྗེ་ཐོད་པ་དེ་བཞིན་གཞན། །བྱང་ན་དམར་པོའམ་

ཅུང་ཟད་སེར། །གཡོན་ན་ཁ་ཊྭཱཾ་ག་ཞགས་པ། །ཕྱག་གཡས་ཅང་ཏེའུ་ཐོད་པ་ཉིད། །ནུབ་ན་དམར་བའམ་ཅུང་ཟད་སེར། །འབད་པས་མདའ་དང་གཞུ་འཛིན་ཅིང་། །ཐོད་པ་སྣ་ཚོགས་པདྨ་དག །གཡས་དང་གཡོན་གྱི་ཕྱག་ནའོ། །ལྷོ་ན་དཀར་བའམ་སེར་བའམ། །གཡོན་ཕྱག་རྩེ་གསུམ་
རིན་པོ་ཆེ། །གཡས་ན་དེ་བཞིན་ཐོད་པའོ། །གླང་པོ་དང་ནི་ཅེ་སྤྱང་དང་། །མི་དང་བ་ལང་ཉིད་དག་ནི། །ཐོད་པ་རྣམས་ན་ཆོ་ག་བཞིན། །དང་པོར་ལྟུང་བར་བྱེད་མ་ཉིད། །གཉིས་པ་གསོད་མར་བྱེད་མ་སྟེ། །གསུམ་པ་འགུགས་མར་བྱེད་མའོ། །བཞི་པ་གར་གྱི་དབང་ཕྱུག་མའོ། །རིག་མ་དེ་
དག་དབུ་སྐྲ་ནི། །གྱེན་དུ་འབར་ཞིང་རྒྱན་རྣམས་ཀྱིས། །བརྒྱན་ནས་གར་མཛད་བཞུགས་པའོ། །མཚམས་བཞིར་གནས་པའི་ཐོད་པར་ནི། །སངས་རྒྱས་གཟུགས་ལྔས་ཉེ་བར་བརྒྱན། །བཏུང་བ་མཆོག་དང་ཡང་དག་ལྡན། །དང་པོར་ཡི་གེར་ཡང་དག་ལྡན། །སྐད་ཅིག་ལས་ནི་
འབར་བར་བསམ། །ལྷ་མོ་དེ་ལྟར་བསྒོམ་བྱས་ནས། །འབྲས་བུ་ནོར་གྱི་དངོས་གྲུབ་འཐོབ། །རིག་པ་ཆེན་པོ་སྦྱོར་འགྲུབ་པ། །ཡང་དག་མངོན་སུམ་རབ་ཏུ་བསྒོམ། །མི་སྣང་བར་གནས་ཐམས་ཅད་བདག །རྣལ་འབྱོར་པས་ནི་ཡུད་ཀྱིས་མཐོང་། །ལྷ་མཆོག་ལས་སྐྱེས་བུ་མོ་རྣམས། །སངས་
རྒྱས་ཀུན་ལ་འཕྲོགས་ནས་སྤྱོད། །རྡོ་རྗེ་གསུམ་གྱི་གནས་བཞུགས་པའི། །སངས་རྒྱས་གང་གཱའི་བྱེ་མཉམ་རྣམས། །རང་ལག་སྐྱུ་རུ་ར་བཞག་བཞིན། །རྡོ་རྗེ་མིག་གིས་མཐོང་བར་འགྱུར། །གང་གཱའི་བྱེ་མཉམ་སངས་རྒྱས་ཞིང་། །སྐུ་གསུང་ཐུགས་རྣམས་ཀྱིས་མཚན་པའི། །སེམས་དངོས་
གར་མཁན་དངོས་པོ་ནི། །ཐམས་ཅད་བདག་ཉིད་དུ་མཐོང་འགྱུར། །རྒྱུད་དང་སྔགས་རྣམས་རྣམ་བསྒོམས་པ། །ཡི་གེ་ཕྱིན་ཅི་ལོག་ཏུ་སྦྱར། །མཆོག་ཏུ་གསང་བ་འདི་དག་ནི། །ཁྱོད་ལ་ལེགས་པར་བཤད་པ་ཡིན། །མཁའ་འགྲོ་མ་ཀུན་མཉམ་སྦྱོར་བའི། །རྡོ་རྗེ་མཁའ་འགྲོ་བདེ་བའི་མཆོག །
རྡོ་རྗེ་སེམས་དཔའ་དེ་བཞིན་གཤེགས། །བཅོམ་ལྡན་རྡོ་རྗེས་དེ་སྐད་གསུངས། །འདི་དག་ནི་རྡོ་རྗེ་མཁའ་འགྲོའི་རྒྱུད་ཆེན་པོ་ལས། རྡོ་རྗེ་མཁའ་འགྲོ་ཆེན་པོ་བཞེངས་པའི་ལེའུ་སྟེ་བཅུ་གཉིས་པའོ།། །།དེ་ནས་དངོས་གྲུབ་ཀུན་སྟེར་བ། །གང་གིས་དངོས་གྲུབ་མྱུར་བྱེད་ཅིང་། །ཐེ་

ཚོམ་མེད་པར་བསྐྱེད་པ་ཡི། །མཁའ་འགྲོ་མ་ཡི་སྙིང་པོ་བཤད། །མཚན་མ་གཉིས་ལ་སྔགས་མཉམ་སྦྱར། །དཔའ་བོ་མཁའ་འགྲོ་མ་གཉིས་མེད། །རབ་ཏུ་སྦྱོར་བའི་དོན་འདི་དག །རྣལ་འབྱོར་མ་ལ་རབ་ཏུ་བསྒྲུབ། །དེ་ལས་འགྲུབ་པར་རབ་ཏུ་གྲགས། །ལྷ་དང་
ལྷ་མིན་མིར་བཅས་རྣམས། །བསྒྲུབ་བྱ་རྣམས་ནི་མྱུར་བར་འདིས། །ཇི་བཞིན་རྟག་ཏུ་ཉེ་བ་དང་། །རིང་ཡང་དེ་བཞིན་མྱུར་བསྐྱེད་དེ། །འདི་དག་ཉེ་བར་འགྱུར་བ་ནི། །དེ་ཡི་གཟུགས་སྐུ་འགུགས་པར་བྱེད། །པདྨའི་ལྟེ་བར་རབ་གནས་ལ། །དབུགས་ཀྱི་བརྡ་ཡིས་བསྒོམ་པར་བྱ། །
དེར་ནི་སྣ་ཚོགས་སྐུ་བསམས་ཏེ། །སྣ་ཚོགས་སྐུ་ལ་མཆོད་བྱ་ཞིང་། །བྱང་ཆུབ་སེམས་ནི་རྟོགས་བྱས་ནས། །བདག་ཉིད་རབ་ཏུ་སྦྱར་བར་བྱ། །མཁའ་འགྲོ་མ་དང་མཉམ་སྦྱོར་བ། །དེ་ལ་མཁའ་བཞིན་གནས་པར་བྱ། །འབྱུང་གནས་ཐམས་ཅད་དེ་ལྟ་ཉིད། །དེར་ནི་མཁའ་འགྲོ་མ་ཀུན་
ནོ། །གནས་སོགས་འབྱུང་གནས་མཁའ་འགྲོ་མ། །ཡུལ་རྣམས་ཀུན་ལ་གནས་པ་ཡིན། །ཡུལ་ཡུལ་དུ་ནི་སྐྱེས་ལྡན་མ། །རང་སྐྱེའི་གནས་སུ་ཡང་དག་བཤད། །དཀྱིལ་འཁོར་ལ་ཞུགས་མཁའ་འགྲོ་མ། །དེ་ནས་མཚན་མོ་ཤར་ནས་བཟའ། །དེ་ཡིས་མཉམ་པར་རབ་སྦྱར་ནས། །
སྔགས་པས་རྟག་ཏུ་རབ་བསྒྲུབ་བྱ། །དེར་ནི་རོལ་པ་ཆེན་སྤྱོད་ཅིང་། །ཐམས་ཅད་སྒྱུ་མ་ལྟ་བུར་བསྒྲུབ། །དམ་ཚིག་རང་བཞིན་དུ་བྱས་ནས། །དེ་ལ་སྡོམ་པ་རབ་སྐྱེ་བ། །སྣང་མེད་དགའ་བར་རང་རིག་པའོ། །དེ་དག་ནི་དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་བཅུ་གསུམ་
པའོ།། །།དེ་ནས་ཡང་དག་བཤད་བྱ་བ། །མ་མོའི་དཀྱིལ་འཁོར་དགེ་བ་དང་། །ལྷ་རྣམས་ཀུན་གྱི་སྒྲུབ་ཐབས་ཀུན། །ཕོ་ཉ་རྣམས་ཀྱི་ཁྱད་པར་དང་། །འབྱུང་པོ་གདོན་དང་རིག་པ་ཆེ། །ལུས་སྲུལ་པོ་ནི་གང་ཞིག་དང་། །དེ་བཞིན་སྔགས་ཀྱི་ཕྲེང་བ་དང་། །དེ་ལྟར་བཤད་ཀྱིས་ལྷ་མོ་
ཉོན། །གྲུ་བཞི་པ་ལ་སྒོ་བཞི་པ། །སྒོ་སྐྱོང་རྣམས་དང་ཡང་དག་ལྡན། །དངོས་གྲུབ་ཡོན་ཏན་ཀུན་གྱི་གཞི། །དཀྱིལ་འཁོར་མཛེས་པར་བྲི་བར་བྱ། །འདོད་པའི་ཡོན་ཏན་ལྔ་དང་ལྡན། །ཉེ་བར་སྤྱོད་པ་ལྔ་ཡིས་བརྒྱན། །རི་མོ་མཁན་ནི་དམ་ཚིག་ཅན། །སྒྲུབ་པོ་མཆོག་གིས་འདྲི་རུ་

གཞུག །རོ་ལ་དཀྲིས་པའི་རས་དག་གམ། །ཡང་ན་མཚོན་གྱིས་བཏབ་པའི་ཟས། །འབྱུང་པོ་དག་གི་རས་དག་ནི། །བ་གླང་ཀོ་བ་ཙམ་ཞིག་ལ། །ནག་པོའི་བརྒྱད་དམ་བཅུ་བཞི་ལ། །འབྱུང་པོ་རྣམས་ཀྱི་དཀྱིལ་འཁོར་བསྒྲུབ། །དེ་ནས་འབུམ་གཅིག་བཟླས་བྱིན་ན། །མདུན་དུ་མངོན་སུམ་ཉིད་དུ་འགྱུར། །ཚངས་པ་
མོ་དང་ཤིས་བྱེད་མ། །གཞོན་ནུ་མ་དང་ཕག་མོ་དང་། །དབང་པོ་མ་དང་རྒན་བྱད་མ། །ཚོགས་ཀྱི་དབང་ཕྱུག་མ་དང་ནི། །བྱིན་ཟ་ཡི་ནི་བདག་ཅན་མའོ། །རིམ་པ་གཉིས་པ་དག་ལ་ནི། །ཚངས་དང་གཤིན་རྗེ་ཆུ་ལྷ་དང་། །ནོར་སྦྱིན་དང་ནི་ཡི་དགས་དང་། །བྱིན་ཟ་དང་ནི་དབང་ལྡན་དང་། །བདེན་བྲལ་དེ་བཞིན་
རླུང་ལྷའོ། །རིམ་པ་གསུམ་པ་དག་ལ་ནི། །ཉི་མ་དང་ནི་ཟླ་བ་དང་། །མིག་དམར་དང་ནི་གཟའ་ལག་དང་། །ཕུར་བུ་དང་ནི་པ་བ་སངས། །སྤེན་པ་སྒྲ་གཅན་འཛིན་དག་གོ། །རིམ་པ་བཞི་ལ་སྒོ་བཞིར་ནི། །ཚངས་དང་ཁྱབ་འཇུག་དེ་བཞིན་དུ། །དྲག་པོ་དང་ནི་ཀརྟི་ཀ། །ས་དང་ཆུ་དང་མེ་དང་རླུང་། །འབྱུང་བ་
ཆེན་པོ་བཞི་རྣམས་སོ། །རིམ་པ་དང་པོའི་དབུས་ཉིད་ཀྱི། །ཕྱོགས་བཞི་དང་པོར་མཁའ་འགྲོ་མ། །མར་མེ་མ་དང་མཛེས་པ་མོ། །འཇིགས་བྱེད་མ་དང་དེ་བཞིན་དུ། །དབུས་སུ་ཁྱབ་བདག་ཉིད་གནས་སོ། །ཡང་དག་མཐའ་ལས་མཐར་འགྱུར་བའི། །རང་བཞིན་གྱིས་ནི་ཆོ་ག་བཞིན། །རྣལ་འབྱོར་པས་ནི་
བསྒྲུབ་པར་བྱ། །དཀྱིལ་འཁོར་ཆེན་པོའི་སྦྱོར་བ་ཡིས། །ཕྱི་ཡི་དཀྱིལ་འཁོར་དེ་བཞིན་བྲི། །དབུས་སུ་ཡོངས་སུ་ཟླུམ་པོ་རུ། །རི་མོ་ཤིན་ཏུ་མཛེས་པས་བསྐོར། །ལྟེ་བ་སྦས་པའི་སྤྱོད་ཡུལ་ཅན། །པདྨ་འདབ་བརྒྱད་བྲི་བར་བྱ། །དེ་དབུས་ཁྲོ་བོ་ཆེན་པོ་ནི། །ཞལ་གཅིག་པ་ལ་ཕྱག་བཞི་པ། །མཆེ་བ་
ཅུང་ཟད་གཙིགས་པ་ཅན། །ཅུང་ཟད་བཞད་པའི་ཞལ་དང་ལྡན། །ཁ་དོག་སྔོན་པོ་གཙིགས་པ་ཆེ། །ཐོད་པའི་ཕྲེང་བས་རྣམ་པར་བརྒྱན། །རོ་གཅིག་གར་ལྡན་ཉི་མར་བཞུགས། །ལྷ་རྣམས་འཇིགས་པར་མཛད་པ་པོ། །སྟག་གི་པགས་པའི་སྨད་དཀྲིས་ཅན། །སྤྱན་གསུམ་གཟུགས་མཆོག་དང་
ལྡན་པ། །རྡོ་རྗེ་འབར་བ་ཕྱག་གཡས་ན། །འཕན་ལྕེ་གསུམ་པ་གཡོན་ནའོ། །མདའ་གཞུ་དེ་བཞིན་གཡས་གཡོན་ཕྱག །མཁའ་འགྲོ་མ་ནི་ཤར་དུ་བྲི། །ལྷོ་རུ་འཇིགས་བྱེད་མ་ཉིད་དེ། །ནུབ་ཏུ་ལྷ་མོ་མཛེས་མའོ། །བྱང་དུ་མར་མེ་མ་དགོད་དོ། །ཡི་གེ་ཧྲཱིཿལས་བྱུང་བ་ཡི། །ཕག་མོ་ཞལ་གཅིག་

ཕྱག་བཞི་མ། །མདའ་གཞུ་དང་ནི་དེ་བཞིན་དུ། །རྒྱལ་མཚན་དང་ནི་ཐོད་པ་ཉིད། །ཁ་དོག་སྔོན་མོ་འཇིགས་ཆེན་མོ། །ཕག་གི་གདོང་པས་འཇིགས་པར་མཛད། །ཡི་གེ་ཕཊ་ལས་ཤིས་བྱེད་མ། །ཁ་དོག་དམར་མོ་ཕྱག་བཞི་མ། །ཐོད་པ་དང་ནི་ལྕགས་ཀྱུ་ཉིད། །དེ་བཞིན་ཁ་ཊྭཱཾ་ཅང་ཏེའུ། །ཡི་གེ་ཧ་ལས་
གཞོན་ནུ་མ། །ཁ་དོག་སེར་མོ་ཕྱག་བཞི་མ། །རྩེ་གསུམ་དང་ནི་འཕན་ལྕེ་གསུམ། །དེ་བཞིན་གཞུ་དང་མདའ་ཉིད་དོ། །ཧོ་ཡིག་ལས་ནི་རྒན་བྱད་མ། །ཁ་དོག་ནག་མོ་ཕྱག་བཞི་མ། །ཁ་ཊྭཱཾ་ག་དང་ཐོད་པ་ཉིད། །དེ་བཞིན་རལ་གྲི་ཅང་ཏེའུ། །བྃ་ཡིག་ལས་བྱུང་ཚངས་པ་མོ། །ཁ་དོག་དཀར་མོ་ཕྱག་བཞི་མ། །པདྨ་དང་ནི་
ཐོད་པ་ཉིད། །དེ་བཞིན་གཞན་ན་གཞུ་དང་མདའ། །གྷ་ཡིག་ལས་བྱུང་ཚོགས་དབང་མོ། །སྔོ་བསངས་མདོག་ལ་ཕྱག་བཞི་མ། །རྩེ་གསུམ་དེ་བཞིན་ཐོད་པ་དང་། །བགྲང་ཕྲེང་དང་ནི་ལ་དུའོ། །པྃ་ཡིག་ལས་ནི་ཁྱབ་འཇུག་མ། །ཁ་དོག་སྔོན་མོ་ཕྱག་བཞི་མ། །དབྱུག་ཏོ་དང་ནི་ཐོད་པ་འཛིན། །དེ་བཞིན་
ཞགས་པ་རལ་གྲི་བཞིན། །ཡི་གེ་ལས་བྱུང་དབང་པོ་མ། །ཁ་དོག་སེར་མོ་ཕྱག་བཞི་མ། །རྡོ་རྗེ་གསལ་ཤིང་ཐོད་པ་དང་། །སྡིགས་མཛུབ་དང་ནི་ཞགས་པའོ། །ཀུན་ཀྱང་དབུ་སྐྲ་གྱེན་དུ་འབར། །སྣ་ཚོགས་རྒྱན་གྱིས་རྣམ་པར་བརྒྱན། །སྤྱན་གསུམ་དང་ནི་རོ་ལ་ཞོན། །སྟག་གི་པགས་པའི་སྨད་དཀྲིས་ཅན། །
ཤར་གྱི་སྒོ་ནི་ཚངས་པ་བྲི། །ཁ་དོག་དཀར་པོ་ཞལ་བཞི་པ། །ཐོད་པ་དང་ནི་བགྲང་ཕྲེང་དང་། །གནྡྷ་དང་ནི་པདྨའོ། །བྱང་དུ་དེ་བཞིན་ཁྱབ་འཇུག་སྟེ། །ཁ་དོག་ནག་པོ་ལག་བཞི་པ། །རལ་གྲི་དེ་བཞིན་འཁོར་ལོ་དང་། །ཐོད་པ་དང་ནི་དབྱུག་པའོ། །ལྷོ་རུ་དྲག་མོ་བྲི་བྱ་སྟེ། །དུ་བའི་མདོག་ལ་ལག་
བཞི་པ། །རྩེ་གསུམ་ཉིད་དང་ཀ་པཱ་ལ། །དེ་བཞིན་ཞགས་པ་བགྲང་ཕྲེང་འཛིན། །ནུབ་ཏུ་ཀརྟི་ཀ་བྲི་སྟེ། །ཁ་དོག་སེར་པོ་ལག་བཞི་པ། །དཔའ་བོ་གསལ་ཤིང་དབྱུག་པ་དང་། །དེ་བཞིན་ཐོད་པ་བགྲང་ཕྲེང་འཛིན། །དབང་ལྡན་ཁྱུ་མཆོག་ལ་ཞོན་པ། །ཁ་དོག་དཀར་པོ་ལག་བཞི་པ། །ཐོད་
པ་དང་ནི་རྩེ་གསུམ་འཛིན། །དེ་བཞིན་གཞན་ནི་ཐལ་མོ་སྦྱར། །གླང་པོ་ཞོན་པ་དབང་པོ་སྟེ། །ཁ་དོག་སེར་པོ་ལག་བཞི་པ། །རྡོ་རྗེ་དང་ནི་ཐོད་པ་འཛིན། །གཞན་ནི་ཐལ་མོ་ཁ་སྦྱར་བྱེད། །ར་སྐྱེས་ཞོན་པ་མེ་ཕྱོགས་འཛིན། །ཁ་དོག་དམར་པོ་ལག་བཞི་པ། །མེ་ཐབ་དང་ནི་ཐོད་པར་

ལྡན། །སྐྲག་ནས་གཞན་ནི་ཐལ་མོ་སྦྱར། །གཤིན་རྗེ་མ་ཧེ་ལ་ཞོན་པ། །ཁ་དོག་ནག་པོ་ལག་བཞི་པ། །དབྱུག་པ་དང་ནི་ཐོད་པ་འཛིན། །དེ་བཞིན་སྐྲག་ནས་ཐལ་མོ་བྱེད། །བདེན་བྲལ་དང་ནི་ཁྱི་ལ་ཞོན། །ཁ་དོག་ལྗང་གུ་ལག་བཞི་པ། །རལ་གྲི་ཉིད་དང་ཐོད་པ་འཛིན། །སྐྲག་ནས་གཞན་དག་ཐལ་མོ་སྦྱོར། །
ཆུ་ཡི་ཕྱོགས་ནི་ཆུ་སྲིན་ཞོན། །ཁ་དོག་དཀར་པོ་ལག་བཞི་པ། །ཞགས་པ་དང་ནི་ཐོད་པར་ལྡན། །གཞན་དག་ཐལ་མོ་ཁ་སྦྱོར་བྱེད། །རླུང་ནི་རི་དགས་ཞོན་པ་སྟེ། །དུ་བའི་མདོག་ཅན་ལག་བཞི་པ། །བ་དན་དང་ནི་ཐོད་པར་ལྡན། །དེ་བཞིན་གཞན་ནི་ཐལ་མོ་སྦྱོར། །ནོར་སྦྱིན་ན་ནི་གཏེར་ལ་ཞོན། །ཁ་དོག་སེར་
པོ་ལག་བཞི་པ། །རིན་པོ་ཆེ་དང་ཐོད་པར་ལྡན། །གཞན་དག་ཐལ་མོ་སྦྱར་བའོ། །གཟའ་དང་རྒྱུ་སྐར་ཐམས་ཅད་ནི། །སོ་སོའི་དཀྱིལ་འཁོར་ལ་བསམ་བྱ། །རང་གི་དམ་ཚིག་ལས་བྱུང་བ། །སྟོབས་པོ་ཆེ་ལ་རྫུ་འཕྲུལ་ལྡན། །མ་མོ་ཀུན་གྱི་ཡང་མ་མོ། །དེ་བཞིན་རིག་པར་གྱུར་པའི་མཆོག །ཉོན་ཅིག་ལྷ་མོ་ཆེ་
ཆེན་མོ། །གཏོར་མ་རེ་རེས་གཟུང་བར་བྱ། །དངོས་གྲུབ་ཐམས་ཅད་རབ་སྟེར་བའི། །རྟག་ཏུ་རྣལ་འབྱོར་གར་སྤྱོད་ན། །དེ་ལ་འབད་པས་ཁུར་བྱེད་པའི། །ཕོ་ཉའི་སྒྲུབ་ཐབས་རབ་བཤད་པ། །རྒྱུད་རྣམས་ཀུན་ནས་རྙེད་དཀའ་བའི། །དེ་ཡིས་ལྡན་བྱས་དངོས་གྲུབ་འགྱུར། །རྣལ་འབྱོར་གཅིག་པས་རྟག་
གནས་པས། །འཁོར་བའི་སྐྱོན་དང་ངེས་པར་གྲོལ། །ཕོ་ཉ་མོར་ཆགས་རྟག་པར་གྲོལ། །མཆོག་གི་རིམ་པས་སྤྱད་པར་བྱ། །བསྙེན་བཀུར་ཙམ་ནི་བྱ་མིན་གྱི། །སྐྱེ་གནས་དམན་པའང་དགའ་བདེའི་གནས། །མ་དང་སྲིང་མོ་བུ་མོ་དང་། །ཆུང་མ་ཡང་ནི་ཕོ་ཉར་གནས། །འཇིག་རྟེན་ལ་རྟག་གཡོན་པས་
སྤྱོད། །རྐང་པ་གཡོན་པ་སྔོན་དུ་འདོར། །ལག་པ་གཡོན་པས་ཡོངས་སུ་བསྒྱུར། །གཡོན་པ་དང་པོར་མཆོད་པར་བྱ། །གཡོན་པ་ཕྱོགས་ཀྱིས་བསྒྱུར་བྱ་ཞིང་། །གཡོན་པས་འབད་པས་ཚིམ་པར་བྱེད། །དཔལ་རྡོ་རྗེ་མཁའ་འགྲོའི་སྙིང་པོའི་རྒྱུད་ཆེན་པོ་ལས་ལེའུ་བཅུ་བཞི་
པའོ།། །།དཔལ་རྡོ་རྗེ་མཁའ་འགྲོའི་རྒྱུད་ཕྱི་མ་སྙིང་པོ་བསྡུས་པ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཆེན་པོ་མཆོག་གི་དབང་ཕྱུག་གི་ཞལ་སྔ་ནས་དང་། བོད་ཀྱི་དགེ་སློང་ཤཱཀྱ་བརྩོན་འགྲུས་ཀྱིས་གྲོམ་པ་རུ་ལག་རྒྱང་ཕུའི་ལྷ་རི་མོའི་མགུལ་གྱི་དབེན་གནས་སུ་བསྒྱུར་བའོ།། །།

༄༅༅། །རྒྱ་གར་སྐད་དུ། ཤྲཱི་ཌཱ་ཀཱརྞྞ་བ་མ་ཧཱ་ཡོ་གི་ནཱི་ཏནྟྲ་རཱ་ཛ་ནཱ་མ། བོད་སྐད་དུ། དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ཞེས་བྱ་བ། ཨོཾ་སངས་རྒྱས་དཔའ་བོ་ལ་ཕྱག་འཚལ་ལོ། །བཅོམ་ལྡན་འདས་གསུང་གི་མངའ་བདག་ལ་ཕྱག་འཚལ་ལོ། །འདི་
སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དཔའ་བོ་ཆེན་པོའི་དབང་ཕྱུག །དེ་བཞིན་གཤེགས་པ་ཐམས་ཅད་ཀྱི་དཔའ་བོའི་སྐུ་དང་གསུང་དང་ཐུགས་ཀྱི་རྣལ་འབྱོར་མ་རྣམས་ཀྱི། བྷ་ག་རྣམས་སུ་རྩེན་པ་དང་ལྡན་པར་གྱུར་ཏོ། །དེར་དཔའ་བོ་ཆེན་པོའི་དབང་ཕྱུག་གིས་བཀའ་
སྩལ་པ། བདེ་བ་ཆེན་པོའི་ཏིང་འཛིན་གྱིས། །དབང་པོའི་དྲ་བ་བདག་གིས་མཐོང་། །འཁོར་བ་དང་ནི་ངེས་འབྱུང་གིས། །མྱ་ངན་འདས་པ་སོ་སོར་བསྐྱེད། །དེ་ཡི་དབུས་སུ་སྐུ་ཆེན་པོ། །བདག་གི་དབང་པོ་ཡིས་རིག་གོ། །དཔའ་བོ་རང་གི་རང་བཞིན་ནི། །ཡེ་ཤེས་རྒྱ་མཚོར་མཉན་པར་
བགྱི། །རྣལ་འབྱོར་མ་འཁོར་ལོ་དབུས་སུ། །ཕག་མོ་བདག་ནི་འདྲི་བའོ། །དབང་པོའི་དྲ་བ་ཅི་རུ་བཤད། །བདག་གིས་གང་དུ་བཤད་པར་བྱ། །མཐོང་བ་དང་ནི་ཆེན་པོའི་སྒྲ། །བདེ་བ་ཟ་བ་དེ་བཞིན་ཅི། །ཏིང་འཛིན་མིང་ཅི་དེ་ལ་ནི། །བྱུང་བ་ཉམས་པར་བྱས་པ་དང་། །འཁོར་བ་ཡང་
དག་བྱུང་བ་ནི། །གང་དུ་ཐིམ་པར་འགྱུར་བ་ཡིན། །བཅོམ་ལྡན་མྱ་ངན་འདས་པའི་མིང་། །ཇི་ལྟར་སླར་ཡང་ཡོངས་སུ་བསྐྱེད། །སྐུ་བརྗོད་པ་ནི་གསུང་བར་མཛོད། །ཉིད་ཀྱི་དབང་པོས་རིག་པ་ནི། །བདེ་བ་ཆེན་པོར་བཞུགས་གྱུར་པའི། །བདག་གི་བདག་པོས་གསུང་བར་མཛོད། །
དཔའ་བོའི་དབང་ཕྱུག་ཆེན་པོས་བཀའ་སྩལ་པ། ཕག་མོ་ལྷ་རྫས་པདྨ་ཅན། །ལྷ་མོ་རྩེ་གཅིག་ཡིད་ཀྱིས་ཉོན། །སྔོན་དུ་སྤྱོད་པའི་མཚན་ཉིད་ནི། །མདོར་བསྡུས་པ་ཡིས་བཤད་པར་བྱ། །དབང་པོ་འཇིག་རྟེན་མཆོག་ཆོས་བཤད། །དྲ་བ་དེ་ལ་ཡིད་རོལ་པའོ། །བདག་གི་ང་རྒྱལ་ཙམ་
གྱིས་ནི། །དམ་ཚིག་མཆོག་གང་བྱུང་བའོ། །དེ་ཕྱིར་ཡེ་ཤེས་ཆེ་མཐོང་སྟེ། །ཐབས་ཆེན་བདེ་ལ་བཞུགས་པས་སོ། །གང་དུ་དབང་པོ་རྣམས་ཀྱིས་ཟ། །དེ་ཡིས་ང་ཡི་མིང་སྔོན་སོང་། །དེ་ཚེ་ཏིང་ངེ་འཛིན་ཙམ་དུ། །ཐུབ་པ་སྐྱེས་མཆོག་རྣམས་ཀྱིས་གསུངས། །ཡང་དག་ལྷག་རྟོགས་ཡེ་ཤེས་ནི། །

སངས་རྒྱས་རྣམས་ཀྱི་ལྷ་དབང་པོས། །དེ་རྣམས་སུ་བྱུང་བའི་སྦྱོར་བས། །མཁའ་འགྲོ་མཆོག་མང་གིས་བྱས་སོ། །བདེ་དང་མི་བདེ་གཉིས་ཉམས་ལས། །སླར་ཡང་འདིར་ནི་བྱུང་བ་སྟེ། །སྒྲ་ཡི་གཟུགས་ལས་བྱུང་ཞིང་ཐོན། །དམ་ཚིག་སྤྱོད་པའི་སྤྱོད་ཡུལ་ལོ། །སེམས་གསུམ་རྣམས་ཀྱི་དབྱེ་བ་
ཡིས། །གྲུབ་མོ་ཁྱོད་ཀྱིས་ཤེས་པར་གྱིས། །འདི་ཡིས་རང་བྱུང་བཅོམ་ལྡན་འདས། །དཔའ་བོ་མཁའ་འགྲོ་དྲ་བའི་སྡོམ། །བྱུང་དང་འབྱུང་བའི་དུས་སུ་ནི། །ཡོངས་སུ་གསལ་བ་འོད་གསལ་བའོ། །དེ་ཕྱིར་འཇིག་རྟེན་འཁོར་བར་བྱེད། །དེ་ནི་འཁོར་བར་ཡོངས་སུ་བརྗོད། །འདིར་
ནི་སྒྱུ་མ་སྐྱེས་དེ་བཞིན། །དེ་ནི་ཐིམ་པའི་དངོས་པོའང་མེད། །མྱང་འདས་གཞན་པའི་རྫས་ཡོད་ཡིན། །འཁོར་བ་ཡི་ནི་ཕྱི་རོལ་སོན། །སྲིད་པའི་རྩེ་མོ་གང་འཛིན་པ། །དེ་ཕྱིར་མྱ་ངན་འདས་པར་བརྗོད། །གཟུགས་ནི་སྒྱུ་མ་ལྟ་བུའི་སྐུ། །དེ་ཡི་གནས་ལ་རྣམ་པར་འཕྲོ། །བདག་ཆེན་ཡེ་ཤེས་
གཟུགས་ཀྱི་ནི། །དབང་པོས་གསལ་བར་རིག་པ་སྟེ། །ལྷ་དང་སྦྱིན་བྱེད་ལ་སོགས་པས། །མི་མཐོང་མཁའ་ལ་འགྲོ་བའི་གཟུགས། །ལྷ་ཁྱོད་ཀྱིས་ནི་གསུང་རྣམས་ཀྱི། །ཡེ་ཤེས་ཆེན་པོའི་རོས་བདག་ཚིམ། །དེ་རིང་བདག་ལ་ཐེ་ཚོམ་མཆིས། །དཔའ་བོ་རྣམས་ཀྱི་རང་བཞིན་ཅི། །
བཅོམ་ལྡན་འདས་ཀྱིས་བཀའ་སྩལ་པ། །དཔའ་རྣམས་ཐམས་ཅད་རང་བཞིན་ཏེ། །རང་བཞིན་དེ་རྣམས་ཆོས་ཅན་ནོ། །འདིར་ནི་འདོད་པའི་དུས་བརྗོད་དེ། །འདོད་པ་སེམས་ལས་ཡོངས་སུ་བྱུང་། །འདོད་དང་སེམས་གཉིས་དག་ལས་ནི། །བྱུང་བ་གཟུགས་ནི་གཙོ་བོའོ། །འཇིག་རྟེན་
གསུམ་དུ་རྙེད་དཀའ་བ། །ཐོག་མ་དབུས་མཐར་ཡང་དག་གནས། །གང་ཞིག་མཐའ་མ་རྣམས་ཀྱི་སེམས། །སེམས་དེ་རོ་མཉམ་གྱུར་པའོ། །དཀྱིལ་འཁོར་ཆེན་པོའི་སྦྱོར་བ་ལས། །མཁའ་འགྲོ་དེ་ནི་དེ་ཕྱིར་བྱུང་། །རྡོ་རྗེ་མཁའ་འགྲོ་བདག་ཉིད་ཆེ། །ས་གསུམ་པོ་ནི་བསྒྲུབ་པར་
བྱ། །གང་ཚེ་སྔོན་དུ་ཡང་དག་བྱུང་། །འགྲོ་བའི་གཙོ་བོ་ཚངས་པའོ། །གནས་དང་དེ་བཞིན་ཇི་ལྟར་སྟོང་། །མགོན་པོ་སེམས་ཅན་རྣམ་གྲོལ་བྱེད། །དེ་ཚེ་འཇིག་རྟེན་ཁམས་གཞན་གྱིས། །ཆུང་ངུ་འདིར་ནི་བསྐུལ་བའོ། །གསོན་གསོན་བྱང་ཆུབ་སྤྲོས་སོན་པའི། །སེམས་ཅན་བསྒྲལ་བའི་

སེམས་མེད་པ། །སྒྱུ་མའི་རང་བཞིན་ཁྱོད་བཞུགས་ནས། །ཁམས་གསུམ་མ་ལུས་བསྒྲལ་བར་མཛོད། །ཡོན་ཏན་དག་འདི་ཐོས་ནས་ནི། །སེམས་ཅན་གྲོལ་བྱེད་འདི་ལྟར་བསྒོམ། །དེ་བཞིན་གཤེགས་པ་ཀུན་རྣམ་པ། །འགྲོ་བའི་གཙོ་བོ་ཧེ་རུ་ཀ། །དཔལ་ནི་སྔོན་དུ་མངོན་
བརྗོད་པས། །རྟེན་ལ་སོགས་པ་བསྐྱེད་པ་སྟེ། །གླུ་དང་རོལ་མོ་དྲི་ཟ་དང་། །གཞན་རྣམས་གང་རྣམས་དེ་རྣམས་དང་། །འགྲོ་བའི་སྡེ་དང་ལས་དང་ནི། །དེ་ཡི་རྒྱུན་ལས་ཡོངས་སུ་བྱུང་། །དེ་ལ་སོགས་པ་མཐའ་མེད་དང་། །སྟོང་ཕྲག་སུམ་ཅུ་རྩ་གསུམ་མོ། །གསང་བ་མཆོག་གི་དགྱེས་པ་
ན། །ཐམས་ཅད་བདག་ཉིད་རྟག་ཏུ་བཞུགས། །དེ་ཉིད་རྣམ་པ་བཅུ་དྲུག་དང་། །སྐྱེ་བ་དང་ནི་ཐིམ་པའི་རྒྱུ། །རྣལ་འབྱོར་རྣལ་འབྱོར་མའི་དེ་ཉིད། །ཟླ་བའི་དབྱེ་བས་འགྲོ་བའོ། །དགའ་བ་རྟག་ཏུ་ཤེས་བྱས་ནས། །ཚེས་གཅིག་ཟླ་བ་འཕེལ་བས་སོ། །ནག་པོ་སོགས་དང་དཀར་མཐར་
ཡང་། །ཐུང་ངུ་དེ་བཞིན་འདིར་ཤེས་བྱ། །འདི་སྐད་ཐོས་པ་བདག་གི་ངག །གསང་བའི་འདོད་པ་ཐམས་ཅད་སྟེར། །དེ་བཞིན་འདིར་བདག་ཐེ་ཚོམ་མཆིས། །གསང་བ་ལ་སོགས་གསུང་ནི་ཅི། །བདག་གི་བདག་པོས་གསུང་བར་མཛོད། །སེམས་ཅན་རྣམས་ཀྱི་དོན་བྱེད་པ། །ལྷ་མོ་ཆེན་མོ་
བདག་དགའོ། །སེམས་ཅན་ཀུན་གྱི་དགོས་པའི་རྒྱུར། །མདོར་བསྡུས་བདག་གིས་བཤད་བྱ་སྟེ། །རྩེ་གཅིག་པ་ཡི་སེམས་ཀྱིས་ཉོན། །གསང་བ་ཁམས་ཐམས་ཅད་ཀྱི་མཐའ། །དབང་པོའི་གནས་ནི་མཆོག་ཡིན་ལ། །རྣམ་ཤེས་ཕུན་ཚོགས་དེ་རྣམས་སུ། །དགྱེས་པ་ནམ་མཁའ་ལས་
བྱུང་བའོ། །ཐམས་ཅད་བདག་ཉིད་ཁམས་གསུམ་གྱི། །ཁྱབ་བྱའི་གཟུགས་སུ་ཡང་དག་སོན། །རྟག་བཞུགས་གཉིས་སུ་མེད་པའི་ཆོས། །སྒྱུ་མ་རྨི་ལམ་ལྟ་བུ་མཆོག །ཡང་ན་བདག་མེད་བཅུ་དྲུག་དང་། །ཁྱད་པར་དུ་ཡང་སྙིང་རྗེའོ། །དེ་ཡི་རྣམ་པ་ཡེ་ཤེས་ཆེ། །དེ་ཁོ་ན་ཉིད་
ཀུན་དུ་སོན། །འདིར་ནི་སྐྱེ་བར་གོ་བྱ་བ། །རྣལ་འབྱོར་རྗེས་སུ་རྣལ་འབྱོར་རོ། །ཐིམ་པ་སྒྲུབ་པ་གཉིས་དང་ནི། །དེ་བཞིན་བསྙེན་པ་གཉིས་ཀྱང་ངོ་། །རྣལ་འབྱོར་ཐིག་ལེར་བཤད་པ་སྟེ། །ཕྲ་མོའི་རྣལ་འབྱོར་རྣལ་འབྱོར་མའོ། །དུས་ཀྱིས་ཕྱེད་དང་ཟླ་བ་ཡི། །རྫོགས་ལྡན་

གསུམ་གཉིས་རྩོད་དུས་སོན། །འདི་ཡི་རྡོ་རྗེའི་ཞལ་བཞི་པོ། །དགའ་བ་བརྒྱད་གཉིས་སུ་འགྱུར་ཏེ། །ཆ་ཤས་བཅུ་དྲུག་རྣམ་ལྡན་པའི། །ཕྱོགས་ཀྱི་དབྱེ་བས་འགྲོ་བའོ། །ཐུང་ངུ་ཉི་མའི་རྒྱུ་བ་ཡིས། །དེ་བཞིན་དུ་ནི་ཆ་ཤས་ཟ། །བུད་མེད་ཀུན་གྱི་སྒྱུ་མའི་རྒྱ། །གཉིས་
མེད་ཡེ་ཤེས་བླ་ན་མེད། །བྱང་ཆུབ་སེམས་འོད་ཆེན་པོར་ནི། །རྣལ་འབྱོར་ཆེན་པོ་ངེས་པར་འགྲོ། །སྟོང་ཉིད་སྙིང་རྗེ་དབྱེར་མེད་དེ། །དངོས་རྣམས་ནམ་མཁའི་མེ་ཏོག་བཞིན། །སད་པ་ན་ཡང་ཉམས་པ་སྟེ། །དེ་གནས་ཀུན་དུ་གནས་མིན་པའོ། །རྨི་ལམ་ཡུལ་མེད་ལས་བྱུང་བ། །
དབང་པོ་ཀུན་ལས་བྱུང་བ་མེད། །གཉིད་ལོག་པ་ཡི་སྟོབས་ཀྱིས་ནི། །ས་གསུམ་པོ་ནི་བཟའ་བར་བྱ། །གཉིད་མཐུག་སྐྱེས་པའི་དུས་དེ་ལྟར། །སད་མེད་གཉིད་མེད་རྨི་ལམ་མེད། །འདས་པའི་བདེ་བའི་དུས་རྣམས་སུ། །སངས་རྒྱས་ཉིད་ཀྱང་ལྷག་པར་གནས། །མཁའ་འགྲོ་ཀུན་
དངོས་སེམས་དཔའ་ནི། །རྡོ་རྗེ་མཁའ་འགྲོ་མཆོག་ཏུ་བདེ། །ལས་ཀྱི་ཡུལ་ནི་བསྙེན་བྱས་ན། །སུམ་ཅུ་རྩ་གསུམ་དུ་ལྟུང་ངོ་། །མ་རིག་པས་བསླང་ངེས་པར་ནི། །འགྲོ་བ་དམྱལ་སོགས་འཇིགས་པ་ཆེ། །དེ་ཕྱིར་སངས་རྒྱས་ཆོས་དགེ་འདུན། །རྫུ་འཕྲུལ་ཆེ་འདིར་རྗེས་ཆགས་
བྱ། །ཇི་ལྟར་བཅོམ་ལྡན་འདས་བདག་པོ། །མཁའ་འགྲོ་མ་ཀུན་གྱི་ནི་མིང་། །དེ་ནི་བདག་ལ་སེམས་པས་གསུངས། །མཁའ་འགྲོ་ཀུན་ལ་བདག་མཆོག་ཏུ། །གསང་བ་དེར་ནི་བཏུད་བྱས་ནས། །ཕག་མོ་ལྷ་རྫས་རྣལ་འབྱོར་མ། །གཉིས་མེད་ཚིག་གིས་ཇི་ལྟར་ཞེས། །དེ་བཞིན་
ཡང་ནས་ཡང་དུ་དྲིས། །མཁའ་འགྲོ་མའི་བདག་པོས་བཀའ་སྩལ་པ། ཕྲ་མོའི་རྣམ་པ་ར་གསུམ་སྟེ། །རྣམ་པར་ཤེས་པ་གསུམ་གྱི་རྒྱུ། །དེ་ཕྱིར་ཕྲ་མོར་རིག་བྱ་སྟེ། །རྩ་འབྱུང་བ་ནི་བདག་ཉིད་ཆེ། །སུམ་ཅུ་རྩ་བདུན་རྣལ་འབྱོར་མ། །རེ་རེ་ལ་ནི་དེ་ཡོངས་ལྡན། །མཁའ་
འགྲོ་མ་ཀུན་དེར་བཤད་དེ། །གཞན་ཡང་དེ་ལྟར་ངོ་མཚར་ཆེ། །མིང་མདོར་བསྟན་པའི་རྒྱ་མཚོ་འདིར། །དེ་ཀུན་ཇི་ལྟ་བཞིན་བཤད་བྱ། །ཟླ་བ་འོ་མ་སྣུམ་པ་མོ། །འཇམ་མ་འདོད་མ་ཀུན་སྦྱིན་མ། །མ་དང་སྲིང་མོ་བུ་མོ་དང་། །སྲིང་མོའི་བུ་མོ་ནེ་ནེ་མོ། །གཉེན་མོ་ཕ་ཡི་མ་དང་ནི། །ཞང་

པོ་ཡི་ཡང་ཆུང་མ་དང་། །པད་ཅན་དུང་ཅན་སྣ་ཚོགས་མ། །གླང་པོ་མ་དང་མྱོས་བརླབས་མ། །གཟུགས་མ་སྒྲ་མ་དྲི་མ་དང་། །རོ་མ་རེག་མ་ཡིད་མ་དང་། །ཆོས་དབྱིངས་མ་དང་ཚོགས་ཅན་མ། །གཉིད་མ་ལེ་ལོ་མ་གཞན་གནོན། །རློམ་པ་མོ་དང་སྒེག་མོ་དང་། །
བཟང་ཞལ་མ་དང་དྲག་མོ་མ། །འཐུང་མ་ཟ་མ་འཇིགས་པ་མོ། །ཧ་ཧ་སྒྲོགས་མ་དུར་ཁྲོད་མ། །བཅོམ་ལྡན་དགྱེས་མར་རྟག་ཏུ་བཤད། །སུམ་ཅུ་རྩ་བདུན་རྣལ་འབྱོར་མ། །ལས་ཀྱི་ཆོ་ག་བླངས་པ་ཡིས། །གཞན་གྱི་མིང་ཡང་ཤེས་པར་བྱ། །གང་ཞིག་གང་གིར་
མངོན་བརྗོད་པའི། །རྩ་དེ་འདིར་ནི་བརྗོད་པའོ། །དེ་རྣམས་སེམས་དཔའ་བདེ་རང་བཞིན། །མཐར་གྱུར་མཆོག་ཏུ་ཞི་བའོ། །རྡོ་རྗེ་མཁའ་འགྲོའི་དངོས་པོ་ཡང་། །མཆོག་ཏུ་ཟག་མེད་རྣལ་འབྱོར་ལྡན། །མདོག་དང་ཕྱག་སོགས་རྣམ་པ་རུ། །སྲིད་པའི་འཁོར་ལོར་ཡང་དག་
བྱུང་། །གནས་དང་ཉེ་བའི་གནས་སོགས་འདིར། །པུལླི་ར་སོགས་དབུས་སུའོ། །གང་ཞིག་གང་གི་ལྷའི་བདག་པོ། །དེ་ནི་དེ་དང་དེས་རྒྱས་གདབ། །ཉིད་དང་བདག་ཏུ་རྩེན་གྱུར་པའི། །བདེ་བ་ཀུན་དང་ཡང་དག་ལྡན། །འདི་ཡིས་རང་བྱུང་བཅོམ་ལྡན་འདས། །གཅིག་པུ་དེ་
བཞིན་དང་པོའི་ལྷ། །མཁའ་འགྲོ་མ་ཀུན་བདེ་སྟེར་བའི། །བཅོམ་ལྡན་རྡོ་རྗེས་འདི་གསུངས་སོ། །ནམ་མཁའ་ཐོག་མ་ཐ་མ་མེད། །གང་འདྲར་མཆོག་ཏུ་འདུ་ཤེས་པ། །དེ་འདྲར་བདག་ནི་རིག་པ་སྟེ། །སྣང་མེད་པར་ཡང་ཡོངས་སུ་གསལ། །དེར་ནི་འབྱུང་བའང་ཡོད་
མིན་ཏེ། །འཇིག་རྟེན་པ་ཡི་ཐ་སྙད་མཆོག །ཇི་ལྟར་མཁའ་ལས་མེ་བྱུང་བ། །བླ་མེད་མེ་འདིར་དེ་བཞིན་ནོ། །རོ་བྲོ་བ་ནི་གཅིག་དངོས་ལ། །དེ་ཡི་ནང་ན་དངོས་མང་པོ། །གཅིག་དང་དུ་མའི་རང་བཞིན་འདིས། །ཐམས་ཅད་རོ་སྟེ་རོའི་ཁྱབ་བདག །ཕོ་ཉ་རྣམས་ཀྱི་བདག་པོ་
ཡིས། །ས་གསུམ་པོ་ནི་མཆོག་ཏུ་ཟ། །ཐབས་དང་ཤེས་རབ་སྙིང་རྗེ་ཆེ། །ལྷ་ཡི་བདག་པོ་གཞན་མེད་དོ། །འདོད་ཆགས་མ་ཡིན་ཆགས་བྲལ་མིན། །དབུ་མར་ཡང་ནི་མི་དམིགས་སོ། །དེ་ལྟར་བརྟག་ཤེས་རྣལ་འབྱོར་པས། །འདོད་བྱ་ཀུན་ལ་ལོངས་སྤྱད་བྱ། །རྟག་ཏུ་ནང་

དུ་གྱུར་བྱས་ནས། །ཁ་དོག་རྣམས་ནི་ཞལ་ལས་བྱུང་། །རྟག་ཏུ་ལུས་ཀྱིས་སྦྱིན་པ་སྟེ། །སེམས་ལས་བྱུང་བ་སྤང་བར་བྱ། །དེ་ལྟར་འདོད་ཆགས་སྒྱུ་མཐའ་ལ། །རོལ་པ་མཆོག་གི་གོ་འཕང་ངོ་། །འདོད་ཆགས་བྲལ་བ་དགའ་བ་གསུམ། །སྤངས་པ་དབུ་མ་ཟག་པ་མེད། །གཟུང་བར་བྱ་བ་
མིན་པ་སྟེ། །དངོས་པོའི་རང་བཞིན་འདོད་ཆགས་མིན། །བྲལ་བའི་དགའ་བ་ཉམས་པ་སྟེ། །དེ་ལའང་དགའ་བར་མི་བྱའོ། །དེ་གཉིས་དབུས་ན་གནས་པ་ཡིས། །ཆོས་དེ་ལ་ཡང་དགའ་དམིགས་མེད། །དབྱེ་བ་མེད་པ་ཡི་ནི་ཆོས། །རྡོ་རྗེ་ལ་ནི་དགའ་བར་གྱིས། །ལྷ་ཡི་རྣམ་པའི་རྣལ་
འབྱོར་བ་དག །སྐད་ཅིག་མངོན་སུམ་བྱེད་པའོ། །ལུགས་མ་ལ་སོགས་རྣལ་འབྱོར་གྱིས། །རྣམ་པར་བྱས་པའི་དབྱིབས་སུ་འགྱུར། །སྟོང་ཉིད་རང་བཞིན་གཟུགས་རྣལ་འབྱོར། །རང་བྱིན་རླབས་པའི་མཚན་ཉིད་དོ། །བདག་བྱིན་རླབས་དང་བྲལ་རྣལ་འབྱོར། །སྦུན་སྐོགས་དུམ་
བུ་བཞིན་ཤེས་བྱ། །འདི་འདྲའི་མཚན་ཉིད་མཆོག་གྱུར་པ། །སྐྱེ་བོ་ཕྱུགས་རྣམས་ཀྱིས་མི་ཤེས། །དེ་ཕྱིར་སྒྱུ་འཕྲུལ་འདི་བསྒོམས་ན། །བྱང་ཆུབ་བླ་ན་མེད་པ་འཐོབ། །སྐྱེ་བ་འདི་ལ་གླེན་པ་ཉིད། །ཤེས་རབ་སྙན་དངགས་སྐྱེས་བུར་འགྱུར། །འདི་འདྲའི་ཡོན་ཏན་ཚོགས་ལྡན་
པས། །རྨི་ལམ་དང་ནི་མཉམ་པར་ལྟོས། །རྣལ་འབྱོར་རྣལ་འབྱོར་མའི་རྒྱུད་དུ། །འགྲོ་སྟེ་དེ་ཕྱིར་འཇིག་རྟེན་པའོ། །མངོན་སུམ་རང་ཉིད་སྔགས་ཀྱི་སྐུ། །འཁོར་ལོ་གསུམ་རྣམས་ཉིས་འགྱུར་རོ། །གཅིག་ལ་འཁོར་ལོ་གསུམ་བཤད་དེ། །གཉིས་པ་ཉིས་འགྱུར་དུ་ནི་
འདོད། །འཁོར་ལོ་གསུམ་པོ་ཐབས་ཤེས་རབ། །སྙོམས་པར་འཇུག་པར་འཆད་པའོ། །དེ་ནི་ཉིས་འགྱུར་ཤེས་བྱ་སྟེ། །འཁོར་ལོ་ཉིས་འགྱུར་དེས་བཤད་དོ། །ཁམས་གསུམ་གྱི་ནི་གནས་ཆེན་པོ། །དཀྱིལ་འཁོར་འཁོར་ལོ་བསྒོམ་པའོ། །དཔའ་བོ་ཐམས་ཅད་མཉམ་སྦྱོར་བ། །
རྡོ་རྗེ་སེམས་དཔའ་བདེ་བའི་མཆོག །དེ་བཞིན་གཤེགས་པ་དཔའ་དབང་ཆེ། །བཅོམ་ལྡན་རྡོ་རྗེས་འདི་གསུངས་སོ། །ཆོས་དང་ཆོས་མིན་གང་དུ་ནུབ། །བྱང་ཆུབ་དེར་ནི་སེམས་གཟུང་གིས། །གྲུབ་པ་ལྷ་དང་ལྷ་མ་ཡིན། །དབང་པོ་དང་ནི་ཡུལ་དང་ནི། །ཁམས་དང་སྐྱེ་མཆེད་

ཐམས་ཅད་ནི། །སྐྱེ་བ་དང་ནི་འགག་པ་སྟེ། །རྨོངས་པ་འཆིང་ཞིང་མཁས་པ་ནི། །ཡོངས་སུ་ཤེས་པས་གྲོལ་བའོ། །སེམས་འདི་རང་ཉིད་མངོན་སུམ་དུ། །ཁམས་གསུམ་དུ་ནི་རྣམ་པར་གནས། །བདག་དང་མཆོག་ཁྱོད་གཉིས་མེད་ལས། །ཚོགས་པའི་
གཙོ་བོ་བྱུང་བའོ། །སྤྱོད་ལམ་ལ་སོགས་བྱེ་བྲག་ཆོས། །མདོ་སྡེ་རྣམ་ཤེས་དབུ་མ་པ། །མོས་པའི་སེམས་ཅན་རྣམས་བཤད་དེ། །བདེན་པ་མ་ཡིན་རྫུན་པ་མིན། །ཕྱག་ནི་བཅུ་གཉིས་དང་ལྡན་ཏེ། །དེ་བཞིན་ཞལ་ནི་བཞི་པའོ། །ཁ་དོག་ནམ་མཁའ་སྔོན་པོ་ལ། །སྤྱན་གསུམ་
བརྐྱང་བསྐུམ་ལྡན་པ་སྟེ། །འཕྲོག་བྱེད་དཀར་མོ་མཉམ་པར་མནན། །གཞན་ནི་འབུམ་ཚོ་སྟོང་ཕྲག་གི། །གང་དང་གང་གི་རྒྱུད་ཀྱི་ནི། །ཕྱི་དང་གསང་བ་ནང་བདག་ཉིད། །དེ་དང་དེ་ཡི་གཟུགས་ངེས་པར། །ལྷ་ནི་ཧེ་རུ་ཀའི་བདག་ཉིད། །རྒྱུད་དང་རྒྱུད་ཀྱི་ནང་མཆོག་ཏུ། །དབྱེ་བ་
མོས་པའི་དབང་གིས་ཏེ། །མིང་ནི་དེ་འདྲར་ཤེས་པར་བྱ། །འོན་ཀྱང་ཧེ་རུ་ཀ་བསྲེས་པའོ། །ཁ་དོག་དེ་དང་འདྲར་ཤེས་བྱ། །བཞུགས་ཚུལ་ཧེ་རུ་ཀའི་རྣམ་པ། །ས་ནི་བཅུ་གཉིས་རྣམས་ཀྱི་རྒྱུ། །དེ་ཡིས་ཧེ་རུ་ཀ་དང་འདྲ། །རྡོ་རྗེ་མཁའ་འགྲོ་དེ་བཞིན་གཤེགས། །དཔའ་བོ་
ཐམས་ཅད་མཉམ་སྦྱོར་བ། །རྡོ་རྗེ་སེམས་དཔའ་བདེ་བའི་མཆོག །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས། ཡེ་ཤེས་ཀྱི་རྒྱ་མཚོ་ལ་འཇུག་པ་སྟེ་འདི་ནི་ལེའུ་དང་པོའོ།། །།ཕག་མོ་ལྷ་
རྫས་རྣལ་འབྱོར་མས། །སླར་ཡང་རྡོ་རྗེ་མཆོད་བྱས་ཏེ། །བཅོམ་ལྡན་བདག་པོས་བསྟན་པར་མཛོད། །ཕག་མོ་ཅི་ཡིས་ཡོངས་སུ་བྱུང་། །སྐྱེད་པ་གང་གིས་བསྐྱེད་པ་ཡིན། །རང་བཞིན་ཇི་ལྟར་དུ་ནི་འདོད། །བདག་བྱུང་བ་ཡི་རྒྱུ་མཚན་ཅི། །འདིར་ནི་དགོས་པ་ཇི་ལྟར་ཡིན། །
དབང་པོ་དང་ནི་ཡུལ་ཐམས་ཅད། །ལྟེ་བའི་དཀྱིལ་འཁོར་དུ་རབ་ཞུགས། །སྤྱི་བོའི་རྡོ་རྗེ་གུར་དུ་ནི། །སྟེང་དུ་ཁ་བལྟས་རླུང་འབབ་བོ། །འདོད་ཆགས་ཉི་མའི་དབུས་སུ་ནི། །སྐད་ཅིག་གིས་ནི་སྤྲུལ་ཐིམ་གྱུར། །དེར་སྐྱེས་པ་ཡི་ཕག་མོ་ནི། །བྷ་ག་ལིངྒ་ཡིད་ལས་བྱུང་། །

བདེ་བ་ཆེན་པོའི་རང་བཞིན་ཁམས། །དེ་རྣམས་ལས་ནི་སྔོན་དུ་སྐྱེས། །རང་བཞིན་བདག་མེད་གཅིག་པུ་སྟེ། །མཁའ་མཉམ་རྣལ་འབྱོར་གཟུགས་ཅན་ནོ། །རྒྱུ་མཚན་སྐྱེ་བོ་སྒྲོལ་བ་དང་། །སྙིང་རྗེའི་གཟུགས་རང་བཞིན་དུ་བྱུང་། །འདིར་ནི་དགོས་པ་གཉིས་རིག་སྟེ། །ཕྱག་རྒྱ་སྦྱོར་
བ་རབ་སྒྲུབ་པའོ། །ཁྱོད་ནི་ལྷ་མོའི་བདག་པོ་སྟེ། །ཀུན་དུ་སྤྱོད་པ་མང་སྤྱོད་པའོ། །སྔགས་ཀྱི་ཕྲེང་བ་བརྗེ་བྱས་ནས། །ཨ་ཡིག་ལ་སོགས་དེའི་ཁྱབ་བདག །ཡང་ན་ཕག་མོའི་རྩ་བ་དང་། །གོ་ཆའི་སྔགས་རྣམས་ཀྱིས་ལྡན་ཏེ། །ཡི་གེ་རེ་རེའི་སྔགས་ཀྱི་ནི། །སྤྱོད་པ་སྡོམ་པར་
སོན་པའོ། །རྣལ་འབྱོར་མ་མཆོག་སྐྱེ་བ་ནི། །རྩ་ཡི་མཆོག་གི་གྲོང་དུ་སྟེ། །སྟོང་ཕྲག་བདུན་ཅུ་རྩ་གཉིས་ཀྱི། །དབུས་མ་ཨ་བ་དྷཱུ་ཏཱིའོ། །དབུ་མ་འདི་ལྟར་ཐམས་ཅད་ཀྱི། །ཁྱབ་བྱེད་དུ་ནི་རྣམ་པར་གནས། །དེ་ཕྱིར་ཕག་མོ་གཙོ་མོ་ཡི། །གོ་འཕང་མཆོག་བཞིན་ཤེས་པར་བྱ། །
རྡོ་རྗེ་ལ་སོགས་མིང་ཐོག་མར། །ཨ་རྡོ་རྗེ་དང་ཀ་རྡོ་རྗེ། །སྔགས་མཐར་དེ་ལ་སོགས་པ་སྟེ། །ཡང་ན་སོ་སོ་ཐ་དད་དུའོ། །གང་གིས་དུས་སུ་སྔགས་ཟློས་པ། །དེའི་དུས་རྣམས་སུ་རྣལ་འབྱོར་ལྡན། །ལྟེ་བ་སྤྱི་བོ་སྙིང་གྱེན་དུ། །འདི་ལྟར་འགྲོ་དང་འོང་བ་མེད། །དཔའ་བོ་རྣལ་འབྱོར་
མ་གཙོ་མོ། །དེ་ནི་བདག་ཉིད་རྣམ་པར་འཕྲོ། །རང་གི་འཁོར་ལྡན་རྣལ་འབྱོར་མ། །ཞིང་དང་ཞིང་རྣམས་སུ་ནི་འགྲོ། །ལྷ་མོ་ཁྱོད་ནི་བདག་པོ་སྟེ། །ང་དང་ལྷན་ཅིག་ཁ་སྦྱོར་རོ། །དུས་དང་དུས་ནི་མ་ཡིན་པར། །ནམ་མཁའི་བུ་གའི་ནང་འདུག་ནས། །དེ་བཞིན་སྐྱེ་གནས་ལམ་
འཐོན་ནས། །འཆི་བ་མེད་པའི་ས་བོན་འཛག །དེར་ནི་འཕོ་མེད་ཡེ་ཤེས་བྱ། །ཧིག་ཕྱེད་ཡི་གེས་བསྒོམ་བྱ་སྟེ། །མི་མོ་སྐྱེས་བུའི་དུས་སུ་ཡང་། །མཆོག་ཏུ་ཟག་མེད་མངོན་པར་བྱ། །དེ་བྱུང་བ་ཡི་རིག་མ་ཆེ། །སྒོམ་པའི་བདག་ཉིད་ཀྱིས་བྲིའོ། །ཐོག་མར་རྣམ་སྣང་མགོན་པོ་
སྟེ། །རི་མོ་གསུམ་བསྐོར་ལྟེ་འོག་གནས། །ལངས་ནས་མགྲིན་པའི་བར་དུ་འགྲོ། །ས་གསུམ་སྒྲོན་མ་ལྟ་བུར་སོན། །གཞན་པའི་སྔགས་ནི་ས་མཐའ་འདྲ། །དེ་ལས་ཟླ་འབབ་གཡོན་ནས་སོ། །སྔགས་འདི་ཐིག་ལེས་བརྒྱན་པ་སྟེ། །སྔགས་ནི་རྣལ་འབྱོར་མ་བསྐྱེད་པའོ། །

སླར་ཡང་ས་བོན་གཉིས་པ་བརྗོད། །གཡས་པ་ཉི་མ་བསྐྱེད་པ་སྟེ། །ལོགས་སུ་གཉིས་ཕྱེ་མགོར་ཐིག་ལེ། །ཡ་སྡེའི་མཐའ་ཡི་ས་བོན་ནི། །བྱང་ཆུབ་སེམས་ཆེན་འབབ་ལམ་མོ། །འདི་ནི་ཕག་མོའི་ས་བོན་ཡིན། །ཨཱ་ཡི་ཡི་གེས་མཐར་བརྒྱན་པ། །བཅུ་
དྲུག་ཟླ་ཕྱེད་ཉི་མས་བརྒྱན། །ཡ་སྡེའི་དང་པོའི་ས་བོན་ནི། །སྦྱོར་བས་ས་གསུམ་རླུང་ཡོན་ཏན། །དབྱངས་ཀྱི་བཅུ་གསུམ་པས་རྒྱས་གདབ། །དཀར་པོའི་ཕྱོགས་ཀྱིས་མགོ་བོར་བརྒྱན། །ཐིག་ལེ་དང་ནི་བཅས་པ་འབར། །དགའ་བ་བཞི་པོ་དག་པའོ། །པ་སྡེའི་མཐའ་མ་བདེ་
བའི་གཟུགས། །ཨོ་ཡི་ཡི་གེ་ཞོན་ལྡན་པ། །མགོ་བོར་ཟླ་ཕྱེད་ཉི་མས་མནན། །ས་ཡི་ཕ་རོལ་གཞོམ་མེད་པས། །ཉི་མ་ཡི་ནི་གདན་ལ་གནས། །དབྱངས་ཀྱི་བཞི་པ་རྣ་དྲུང་བཟུང་། །མགོ་བོར་ཟླ་ཕྱེད་ཐིག་ལེས་བརྒྱན། །འདོད་ཆགས་མཐའ་ཡི་རང་བཞིན་ནོ། །ཡེ་ཤེས་ས་
བོན་ཉིས་འགྱུར་དབྱེ། །སྤྲོ་བ་དང་ནི་བསྡུ་བས་སྐྱེས། །འོག་དང་སྟེང་དུ་གནས་པ་ཡིས། །མགོན་པོ་ལོངས་སྤྱོད་རྫོགས་འཛིན་པ། །སྙིང་ག་དང་ནི་ཆུ་སྐྱེས་སུ། །དོན་གྱི་ཆོ་ག་ཡོངས་རྫོགས་པའོ། །ཡོངས་སུ་སྐྲག་བྱེད་མ་ས་བོན། །པ་མཐའི་ཡི་གེ་བཟུང་ནས་ནི། །སླར་ཡང་དེ་
བཞིན་བརྗོད་པར་བྱ། །ཨོ་ཌྱན་འབར་བ་འཛིན་གྲོང་གི། །བུ་གར་གཏུམ་མོ་སྦོར་བའོ། །བྱང་ཆུབ་སེམས་ཀྱིས་ས་གསུམ་འགེངས། །དེ་ལྟར་བཤད་པའི་སྔགས་གང་ནི། །རིམ་པས་ཡི་གེ་རྣམས་མི་མཐུན། །རྣལ་འབྱོར་མ་ཡི་མིང་ལྡན་པར། །ལས་དུས་དེ་ལྟར་རྟོགས་པར་
བྱ། །རེ་རེའི་ཆེ་བའི་བདག་ཉིད་ནི། །ཡི་གེ་ཡི་ནི་གྲངས་ཀྱིས་སོ། །བདག་ཉིད་ཆེན་པོ་རྣམ་པར་འཕྲོ། །བྱང་ཆུབ་ཆ་ཤས་ཆ་རྒྱུའོ། །ཐོག་མར་རྣམ་སྣང་ཕྱག་འཚལ་བ། །ཆོས་ཀྱི་དབྱིངས་ནི་བྱ་བའི་གཟུགས། །ཏ་སྡེའི་ལྔ་པའི་ཡི་གེ་ནི། །ལྔ་པ་ཡི་ནི་སྡེ་ཚན་ནོ། །རྣལ་
འབྱོར་མ་གཟུགས་ནམ་མཁའ་བརྟེན། །པ་མཐའི་ས་བོན་ཨོ་དབྱངས་ལྡན། །གཏི་མུག་འཇོམས་པར་བྱེད་མ་སྟེ། །རྣལ་འབྱོར་མའི་ཚོགས་སྤྲོ་བའོ། །དེ་ཡི་བཞི་པའི་ས་བོན་ནོ། །ས་གསུམ་དུ་ནི་ཁྱབ་པ་ཡི། །རྣལ་འབྱོར་མ་ནི་སྤྲོ་བའོ། །ཐོག་མའི་སྡེ་ཡི་གསུམ་པ་སྟེ། །

འགྲོ་བ་དྲུག་པོ་ཉམས་བྱེད་པའི། །མཁའ་འགྲོ་མ་ཡི་འཁོར་ལོ་སྤྲོ། །ཡ་སྡེའི་མཐའ་མའི་ས་བོན་ནི། །བྱང་ཆུབ་སེམས་ཀྱི་རང་བཞིན་ནོ། །ལྔ་པའི་སྡེ་ཡི་ཐོག་མ་སྟེ། །དེ་བཞིན་ཉིད་ཀྱི་ས་བོན་ཏེ། །ཨི་ཡི་དབྱངས་ཀྱིས་མགོ་ལ་རེག །ཆུ་ཡི་ཡི་གེ་ཡོངས་བསྔགས་པ། །ཐམས་
ཅད་བྱེད་པའི་རང་བཞིན་ནོ། །ཙ་སྡེའི་དབུས་གནས་བཟུང་ནས་ནི། །ཉི་མ་ཡི་ནི་གདན་ལྡན་པ། །ལས་ཀྱི་དུས་སུ་ཁྱད་པར་ལྡན། །ཕག་མོ་ཡི་ནི་ས་བོན་ནི། །ཨ་ཡི་ཡི་གེ་རྣ་བར་རེག །ས་གསུམ་ཡེ་ཤེས་རང་བཞིན་མཉམ། །མེ་ཡི་ས་བོན་དབྱངས་གཉིས་ལྡན། །འཁོར་བའི་
ལས་ཀྱི་རང་བཞིན་ནོ། །ས་མཐའི་མགོ་ལ་ཨཱི་དབྱངས་རེག །རྟག་ཏུ་ཚངས་པའི་རང་བཞིན་བལྟ། །དབྱངས་ཀྱི་གཉིས་པ་བཟུང་ནས་ནི། །དེ་ལྟར་མཁའ་འགྲོ་མ་ཡི་གཟུགས། །སེམས་ཅན་སྒྲོལ་བར་བྱེད་པའོ། །ཡ་ཡིག་གནས་པ་ར་དང་ལྡན། །སླར་ཡང་ཨཱི་ཡི་དབྱངས་སྦྱར་རོ། །
ཁམས་གསུམ་རྣལ་འབྱོར་མ་སྤྲོའོ། །དྲུག་པའི་སྡེ་ཡི་དང་པོ་ནི། །རྣལ་འབྱོར་མ་སྔགས་ཀུན་རང་བཞིན། །ར་གནས་པ་ནི་ཨ་དབྱངས་ལྡན། །སྡང་བའི་སེམས་ཅན་གསོད་བྱེད་འགྱུར། །ཛ་ཡི་ཡི་གེ་ཡོངས་བཟུང་སྟེ། །ཨི་ཡི་དབྱངས་དང་ཡང་དག་ལྡན། །སྒྱུ་མའི་རང་བཞིན་
ཡོངས་ལྡན་པའོ། །སོ་ཡི་ས་བོན་རྣ་བ་ལ། །ཨི་ཡི་དབྱངས་ཀྱིས་རེག་པས་དབྱེ། །ཀླུ་ཡི་སྔགས་ནི་སྦྱར་བྱས་ཏེ། །ཏྲེ་ཡི་གེ་ས་གསུམ་ཀུན། །ཡེ་ཤེས་ཀྱི་ནི་ཁྱད་པར་སྔགས། །ལ་ཡི་ཡི་གེ་ཨོ་དང་ལྡན། །འཇིག་རྟེན་རྣམས་ཀྱི་རྟེན་ཡིན་ཏེ། །བྱང་ཆུབ་བྱེད་པའི་ཆོས་
ཡིན་ནོ། །ཐོག་མའི་ཀ་ནི་ཡ་སྟན་ལྡན། །འཆི་དང་ལྷན་སྐྱེས་དབྱེ་བ་མེད། །པ་ཡི་སྡེ་ཡི་མཐའ་མ་ལ། །ཨ་ཡི་ཡི་གེའི་དབྱངས་སྦྱར་བྱ། །ས་གསུམ་གྱི་ནི་མ་རང་བཞིན། །ཏ་ཡིག་ཨེ་ཡི་ཡི་གེས་བརྒྱན། །བདེ་བ་འཛིན་པར་བྱེད་པའོ། །སླར་ཡང་པ་སྡེའི་མཐའ་མ་སྟེ། །ཚད་
མེད་པ་ཡི་ལྷན་སྐྱེས་ཀྱི། །དབུས་ན་བཞུགས་པའི་རང་བཞིན་ནོ། །ས་ཡི་མཐའ་མ་ཨཱ་དང་ལྡན། །རྡོར་སེམས་ཡེ་ཤེས་གཞོམ་མེད་པའོ། །ཡ་སྡེའི་མཐའ་མ་ཨི་དབྱངས་ལྡན། །མི་ཤེས་རང་བཞིན་འཇོམས་བྱེད་པའོ། །ཏྱེ་སྔགས་ཆོས་དབྱིངས་རང་བཞིན་ཏེ། །ཐམས་ཅད་རང་བཞིན་

དུ་ཁྱབ་པའོ། །བུ་ག་རྣམས་ནས་འཛག་པ་ས། །འབབ་པའི་ས་བོན་ཉི་མ་ལྡན། །ཆུ་སྲིན་དབང་པོ་ཡི་ནི་སྔགས། །བ་སྡེ་བཞི་པའི་ས་བོན་ནི། །ཨཱུ་དབྱངས་སྟན་དང་ལྡན་པ་སྟེ། །འཁོར་བའི་འཇིགས་པ་ཉམས་བྱེད་པའོ། །ཏ་ཡི་སྔགས་ཀྱིས་དགྲ་ཉམས་བྱེད། །
སླར་ཡང་པ་སྡེའི་བཞི་པ་ནི། །སྒྲ་ཆེན་པོ་ནི་སྒྲོགས་པའོ། །རླུང་གི་ས་བོན་ཨཱ་ཡིག་རེག །སྔགས་ནི་ནོར་བུར་འབབ་བཞིན་པའོ། །ཆུ་ཡི་ས་བོན་རྣར་བཟུང་བ། །སྒྱུ་མ་ཡི་ནི་རང་བཞིན་ནོ། །ས་ཡི་ཕ་རོལ་ཨེ་ཡིག་ལྡན། །ས་གསུམ་གྱི་ནི་འཁྲུལ་འཇོམས་རྒྱུ། །པ་སྡེའི་
མཐའ་མ་རྐང་རང་བཞིན། །ས་ཡི་ཕ་རོལ་ཨཱ་དང་ལྡན། །ངོ་མཚར་ཆེ་བ་ཡི་ནི་ཆོས། །ཡ་ཡི་སྡེ་ཡི་མཐའ་མ་ནི། །པདྨའི་ས་བོན་མཆོག་ཡིག་གོ། །ཙ་ཡི་དབུས་མའི་ས་བོན་ནི། །ར་ནི་མགོ་ལ་གནས་པ་སྟེ། །ཨེ་ཡིག་གིས་ནི་ཕྱེ་བ་ནི། །ལྷ་དང་ལྷ་མིན་རང་བཞིན་ནོ། །དེ་
ལྟར་སྔགས་ཚིག་དྲུག་པོ་སྟེ། །རྣལ་འབྱོར་མ་ཡི་ཚོགས་སྤྲོ་བ། །ལས་ཀུན་རང་བཞིན་འཁོར་ལོའོ། །སྙིང་རྗེའི་འདོད་པར་གྱུར་པ་ཡི། །དེ་ཁོ་ན་ཉིད་ཚིག་རྒྱ་ཆེ། །རྣལ་འབྱོར་ཐམས་ཅད་རབ་འགེངས་པའི། །བཅོམ་ལྡན་མཁའ་འགྲོས་འདི་གསུངས་སོ། །འཁྲུལ་འཁོར་
འཁོར་ལོ་བཤད་བྱ་སྟེ། །ཁྱོད་ཀྱི་འཁྲུལ་འཁོར་ཆུང་རྒྱ་ཆེ། །ཀུན་ནས་ཡོངས་སུ་ཟླུམ་པོར་ནི། །རི་མོ་བཅུ་གསུམ་བྲི་བར་བྱ། །ལྷ་མོ་དུམ་བུ་བཅུ་གཉིས་འགྱུར། །སུམ་ཅུ་རྩ་དྲུག་རྩིབས་ཀྱིས་བརྒྱན། །རྩིབས་རེ་རེ་ལའང་ཡི་གེ་ནི། །རིམ་པས་ཡོངས་སུ་གསལ་བར་སྦྱིན། །
ལྷག་མ་ཉི་ཤུ་བཞི་ཡི་གེ། །ཐམས་ཅད་ལྟེ་བའི་སྙིང་པོ་ལའོ། །དེ་རྣམས་ཀྱིས་ནི་བསྐྱེད་པའི་རྩ། །སྟོང་ཕྲག་བདུན་ཅུ་རྩ་གཉིས་སོ། །སོ་སོ་རེ་རེ་ཡི་ནི་འཁོར། །ནོར་དང་མདའ་དང་ཟླ་བའོ། །ཀུན་ལ་ལྷག་པས་དམན་པ་ནི། །ནོར་དང་རིག་བྱེད་ཚོགས་པའོ། །དེར་གནས་པ་ལ་
འཁྲུལ་འཁོར་བཏུ། །ལས་གཅིག་ཇི་ལྟར་མོས་པའོ། །རྣམ་པར་ཤེས་པའི་བཞོན་པ་ནི། །རྩ་ཐམས་ཅད་དུ་འཆར་དུས་སུ། །དེར་ནི་དབང་པོ་དང་ནི་ཡུལ། །ལས་ཀྱི་དུས་སུ་གསད་པར་བྱ། །ཡིད་ཅེས་བྱ་བ་བསྐྲད་བྱ་ཞིང་། །སེམས་ནི་དབང་དུ་བྱ་བ་སྟེ། །ཁམས་དང་སྐྱེ་

མཆེད་གཞན་དེ་བཞིན། །ཞི་བ་དང་ནི་རྒྱས་པར་བྱ། །ཕུང་པོ་ཀུན་དང་དེ་བཞིན་སྲོག །དགུག་པ་དང་ནི་སྡང་བའོ། །ལུས་དང་ངག་དང་དེ་བཞིན་སེམས། །དེ་རྣམས་རེངས་པར་བྱ་བའོ། །ལས་གཞན་ཇི་ལྟར་རིགས་པ་ཡིས། །བརྒྱད་ཀྱིས་ལྷག་པའི་བརྒྱ་ཡང་ངོ་། །ཡང་ན་ས་བོན་
ཅི་འདྲ་བ། །དེ་ཡི་ཚད་དང་མཉམ་ལས་སོ། །དེ་དུས་བདག་ཉིད་ཆེ་བ་ཡིས། །ཡི་གེས་བསྐྱེད་དང་འཇོམས་པའོ། །ཕག་མོ་རྡོ་རྗེ་གཙོ་མོ་ཡི། །འཁྲུལ་འཁོར་གཉིས་པ་བཤད་བྱ་སྟེ། །ཡ་སྡེའི་མཐའ་ཡི་ས་བོན་ནི། །བྱང་ཆུབ་ས་བོན་རང་བཞིན་ནོ། །ལྕེ་གཉིས་ཡི་གེ་ར་
ཡིག་ལྡན། །རྣལ་འབྱོར་མ་སྔགས་ཨཱ་ཡིག་དགང་། །ས་གནས་པ་ནི་མི་གཡོ་བའོ། །ན་ཡི་ཡི་གེ་ཨེ་དང་ལྡན། །སེམས་ཅན་ཀུན་སྤྲུལ་རྒྱུ་མཚན་ནོ། །ཐོག་གནས་དབྱངས་ནི་ཐོག་མའི་མགོན། །ལྕེ་གཉིས་ཨེ་དབྱངས་མགོ་ལ་རེག །ས་གསུམ་ཁམས་ཀྱི་རང་བཞིན་
ནོ། །ཏ་ཡི་ཡི་གེ་ཨེ་དང་ལྡན། །ལྔ་པ་ཡི་ནི་ཐོག་མ་སྟེ། །རྣལ་འབྱོར་མ་ཡི་རང་བཞིན་ནོ། །ཡ་སྡེའི་བཞིར་གནས་པའི་ས་བོན། །ཀུན་གྱི་གཙོ་མོའི་རང་བཞིན་ནོ། །བརྒྱད་པའི་སྡེ་ཡི་ཐོག་ས་བོན། །སྟོང་པ་ཡིས་ནི་བརྒྱན་པ་སྟེ། །ཁུ་བའི་ཁམས་ཀྱི་ངོ་བོ་ཉིད། །གཉིས་པར་
གནས་པའི་ཐོག་མ་ནི། །ཀེང་རུས་ཐིག་ལེ་འཛིན་པའོ། །ཡ་སྡེའི་གཉིས་པའི་ས་བོན་ནི། །ཨི་ཡི་དབྱངས་དང་ལྡན་པ་སྟེ། །རྡོ་རྗེ་སྙིང་གནས་མགོན་པོའོ། །ཏ་མཐའ་ཨེ་ཡི་ཡི་གེས་བརྒྱན། །སྐྱེ་གནས་ལ་ནི་སྤྲས་པའོ། །ཏ་ཡིག་ཉི་མ་དང་ལྡན་པ། །རིམས་འཇོམས་པ་ཡི་
རྒྱལ་པོའོ། །བྷ་ནི་ཉི་ལྡན་ཨ་ཡིག་བརྒྱན། །ལྟེ་བའི་ཐབ་ཏུ་གནས་པའོ། །པ་སྡེའི་མཐའ་མ་གནས་རང་བཞིན། །ཊ་མཐའ་ཨི་ཡིས་བརྒྱན་པ་ནི། །འགུགས་པ་ཡི་ནི་རང་བཞིན་ནོ། །བི་ཤོ་ཥ་ཥི་སྔགས་བཞི་སྟེ། །དགའ་བ་བཞི་ཡི་རང་བཞིན་གྱིས། །གཏེར་ཆེན་པོ་ཡི་ས་
བོན་ནོ། །ར་ཡིག་ཨོ་ཡི་ཡི་གེས་བརྒྱན། །རྩ་དྲག་པོ་ཡི་རང་བཞིན་ནོ། །ཤ་ཡི་གཉིས་པའི་ས་བོན་ནི། །སྙིང་པོ་ཡི་ནི་གཟུགས་སུའོ། །ཎི་ཡིག་རང་བཞིན་གྱིས་བཟུང་བ། །རྣལ་འབྱོར་མ་ཡི་དེ་ཉིད་དོ། །ཀ་ཡིག་ར་ཡིག་ཨོ་ཡིག་ལྡན། །དབུ་མ་བརྐྱང་མ་རོ་རང་བཞིན། །ཏ་པའི་

བར་གནས་གཟུང་བར་བྱ། །རྣལ་འབྱོར་མ་ཡི་ཚོགས་ཀྱི་ནི། །རྐང་པ་བརྒྱད་པ་བསྒྲུབ་རང་བཞིན། །ཏ་སྡེའི་མཐའ་མ་ཨི་ཡིག་བརྒྱན། །ཐོད་པའི་དབུས་ཀྱི་རྩ་རང་བཞིན། །ཀ་རུ་མངོན་བརྗོད་གཟུང་བར་བྱ། །དེ་ཡིས་ལས་རྣམས་ཟད་པར་བྱེད། །ར་ཡིག་
ཨ་ཡི་ཡི་གེས་གཟུང་། །མགོ་བོའི་དབུས་ནས་སྒྲ་ཆེན་འཛག །ས་ཡི་ས་བོན་ཨི་ཡིག་ལྡན། །གྲུ་གསུམ་གྱི་ནི་དབུས་སུའོ། །ཏ་ཡི་མཐའ་མ་ཨིས་བརྒྱན་པ། །སྤྲུལ་པའི་སྟེང་དང་འོག་ཏུའོ། །ཏ་ཡིག་ར་ཡིག་ཨཱ་ཡིག་སྦྱར། །ཆོས་ཀྱི་དབྱིངས་ནི་གྲུ་གསུམ་སྟེ། །དེ་ཕྱིར་
ས་གསུམ་སྐྱེད་པའོ། །ས་གཟུང་དབུས་མ་བཅས་ས་བོན། །ན་ཡིག་ཨི་དང་ལྡན་རང་བཞིན། །པ་སྡེའི་མཐའ་མ་ཨ་ཡིས་བརྒྱན། །སྒྱུ་མའི་ངོ་བོ་པདྨའི་རྩ། །ར་གང་གནས་པ་རྣ་རང་བཞིན། །ཊ་སྡེའི་མཐའ་མ་ཨི་དང་ལྡན། །མ་ལུས་དབྱེར་མེད་སེམས་ཅན་གྱི། །ཁམས་
འཛིན་པ་ཡི་མགོན་པོའོ། །དེ་ལྟར་སྔགས་ཚིག་བཅུ་བརྗོད་དེ། །དུས་བཞི་ཡི་ནི་ཚད་ཅན་ནོ། །རྣལ་འབྱོར་མ་ཀུན་ལས་ཀྱི་ནི། །འཁོར་ལོས་སྒྱུར་བ་ལོངས་སྤྱོད་པ། །དུས་ཀྱི་གཟུགས་ཀྱི་རང་བཞིན་ཅན། །བཅོམ་ལྡན་ལྷ་ཡིས་འདི་གསུངས་སོ། །མཁའ་འགྲོ་མ་གནས་འདུ་བ་ནི། །
འཁོར་ལོ་འཁོར་ལོར་ཤེས་པའོ། །ཉི་ཁྲི་བརྒྱ་ཕྲག་བཅུ་དྲུག་གི། །ཡེ་ཤེས་ལས་ནི་དེ་བཞིན་བྱེད། །ཡོན་པོར་སྨྲ་བ་རྣམས་ཀྱི་ནི། །དེའི་རྡུལ་གྲངས་ལས་སྐྱེས་པར་འདོད། །བསྒྲུབ་པར་བྱ་བའི་མིང་བཟུང་ནས། །ཕྱི་ནས་བློ་ལྡན་གྱིས་སྔགས་སྦྱར། །སྔོན་དུ་པ་ལ་ར་སྟན་ནོ། །
ཐོག་མ་ཡི་ནི་ཆོས་གཟུགས་སོ། །དེ་ཡི་བཞི་པར་གནས་པ་ལ། །ཨེ་ཡི་ཡི་གེས་རྣར་བརྒྱན་པ། །རྣལ་འབྱོར་མ་རྣམས་ཀྱི་སྔགས་སོ། །ཏ་སྡེའི་དབུས་གནས་ཅི་འདོད་སྟེར། །ན་ཡིག་ཨི་ཡི་ཡི་གེ་ལྡན། །སྣ་ཚོགས་སྤྲུལ་པ་བྱེད་པའོ། །པ་ཡིག་སྤྲོས་པ་དང་བཅས་པའོ། །
ར་ཡི་ཡི་གེ་ཨ་དང་ལྡན། །རྣལ་འབྱོར་མ་ཡི་འཁོར་ལོས་སྒྱུར། །ཙ་སྡེའི་དབུས་གནས་ས་བོན་གཟུང་། །གང་ལྟ་དེ་ལྟའི་རང་བཞིན་ནོ། །རླུང་བསགས་པ་ནི་ཨེ་ཡིག་ལྡན། །ཨ་ཧཾ་ཡི་གེའི་རང་བཞིན་ནོ། །ཡ་ཡི་སྡེ་ཡི་མཐའ་མ་ལ། །དབྱངས་ཀྱི་གསུམ་པས་མགོ་ལ་བརྒྱན། །

སྣ་ཚོགས་ཡེ་ཤེས་སྔགས་རང་བཞིན། །ཛ་ཡི་ས་བོན་མཐའ་མེད་པར། །འབར་བར་འགྱུར་བ་ཡི་ནི་གཟུགས། །ཡི་གེ་ཡ་ནི་ཨེ་ཡིག་ལྡན། །ཐེག་པ་ཀུན་གྱི་ལྟ་བའི་གཟུགས། །ཙ་སྡེའི་གསུམ་པའི་ས་བོན་ནི། །རྣལ་འབྱོར་མ་ཡི་གཟུགས་ཞེས་བྱ། །པ་མཐའ་དེ་ཡི་བཞི་པ་
ལའོ། །སྔགས་ཐམས་ཅད་ཀྱི་བླ་མའོ། །ཏ་སྡེའི་མཐའ་མ་དབྱངས་གསུམ་ལྡན། །མ་ལུས་སེམས་ཅན་འབོད་པའི་གཟུགས། །དྲོ་བའི་གསུམ་པ་ཏ་སྟན་ཅན། །འགྲོ་དང་མི་འགྲོ་བཅས་འགྲོ་སྒྲོལ། །དེ་བཞིན་མྦྷའི་ཡི་གེ་བཟུང་། །ས་ནི་བཅུ་བཞི་པའི་གཟུགས་སོ། །ནི་
སྔགས་རྣལ་འབྱོར་མ་རྣམས་ཀྱི། །བརྡ་ཡིས་སུ་ནི་འཇུག་པའོ། །པ་སྡེའི་མཐའ་མ་ཨོ་ཡིག་རེག །སྣ་ཚོགས་མི་ཤེས་འཛིན་པའོ། །ས་མཐའ་རྡོར་སེམས་རང་བཞིན་ནོ། །ནི་ཡི་ཡི་གེ་ཆོས་དང་ནི། །ཆོས་མིན་སུན་འབྱིན་པ་ཡིན་ནོ། །ཡ་ཡི་སྡེ་ཡི་མཐའ་མ་ནི། །རྣལ་
འབྱོར་མ་སྟེ་ནམ་མཁའི་གཟུགས། །ཛ་ཡིག་ར་ཡིག་སྟན་ཅན་ནི། །ཁུ་བའི་རང་བཞིན་ཤར་བའོ། །སླར་ཡང་རླུང་གི་མཐའ་མ་ནི། །ཨ་ཡི་ཡི་གེས་གཟི་བསྐྱེད་པ། །ཚངས་པ་པདྨ་ཡི་ནི་གཟུགས། །ར་ཡིག་ཨ་ཡིག་ཡི་གེ་ལྡན། །འགྱུར་བ་མེད་པའི་རང་བཞིན་ནོ། །ས་མཐའ་
དབྱངས་གསུམ་མགོ་ལ་གནས། །རྣལ་འབྱོར་མ་རྣམས་འབབ་པའི་གཟུགས། །མ་ནི་དབུས་མ་དེ་ཉིད་གཟུགས། །ས་མཐའ་ཨ་ཡིས་བཀང་བ་སྟེ། །རྣལ་འབྱོར་མ་གཟུགས་ཀྱི་ཁར་བརྗོད། །ཡ་ཡིག་ཨོ་ཡི་ཅོད་པན་གནས། །ལྷན་ཅིག་སྐྱེས་པའི་རང་བཞིན་ནོ། །ཀ་སྡེའི་
དབུས་གནས་དབྱངས་གསུམ་བརྒྱན། །དེ་ཉིད་མེད་པའི་རང་བཞིན་ནོ། །ནི་ཡི་ཡི་གེ་རང་བཞིན་མེད། །གཉིས་པ་ཡི་ནི་ཐོག་མ་ལ། །ཨ་ཡི་ཡི་གེ་གསལ་བར་བྱེད། །འདོད་པའི་ཁམས་ཀྱི་རང་བཞིན་ནོ། །པ་སྡེའི་མཐའ་མ་ཨེ་དང་ལྡན། །ཐམས་ཅད་སྒྱུ་མའི་རང་བཞིན་ནོ། །
པ་ཡི་ས་བོན་མཐར་ཤ་སྟེ། །ཡ་སྡེའི་མཐའ་ཡིག་སྟན་ཅན་ནི། །ཁུ་བ་དང་ནི་རླུང་དབྱེར་མེད། །ཨི་དབྱངས་མགོར་བརྒྱན་མེ་ས་བོན། །གྲུབ་པ་སྒྱུ་མའི་རང་བཞིན་ནོ། །ཀ་ཡི་གཉིས་པའི་ས་བོན་ནི། །ནམ་མཁའ་རྣལ་འབྱོར་མ་ཡི་གཟུགས། །ས་བོན་དེ་ཡི་མཐའི་ཡི་གེ། །

ཨེ་ཡི་ཡི་གེས་རྣར་བརྒྱན་པ། །དཔའ་བོ་གཅིག་པུ་མི་བསྐྱོད་པའོ། །དེ་ལྟར་འཁོར་ལོ་མཁའ་རང་བཞིན། །དེ་ལྟར་རྐང་པ་དགུ་པོ་ནི། །རྣལ་འབྱོར་མ་ཚོགས་ཡི་གེ་སྟེ། །ཁམས་གསུམ་གྱི་ནི་སྔགས་རང་བཞིན། །སྔགས་ཀུན་སྤྱོད་པའི་སྦྱོར་བདག་ཉིད། །
མཁའ་འགྲོའི་དམ་ཚིག་ལ་བཞུགས་ནས། །དངོས་གྲུབ་ཐམས་ཅད་རབ་སྩོལ་བའི། །བཅོམ་ལྡན་ལྷ་ཡིས་འདི་གསུངས་སོ། །འཁོར་ལོ་གསུམ་པའི་ནུས་པ་ཡིས། །ཇི་ལྟར་འདོད་པའི་ལས་བྱའོ། །རྣལ་འབྱོར་རྣམས་ཀྱི་ལས་དུས་སུ། །སྒྱུ་མས་ཐམས་ཅད་རྨོངས་པར་བྱ། །
རྡོ་རྗེ་མ་བདག་སླར་ལངས་ནས། །འཁོར་ལོ་གཞན་གྱི་རྣལ་འབྱོར་ལྡན། །མཆོག་ཏུ་མི་འགྱུར་གཙོ་བོ་ལ། །བདག་མེད་མ་ཡིས་དམ་འཁྱུད་དོ། །ཏ་ཡི་སྔགས་ཀྱིས་གཉིས་པ་སྦྱོར། །དྱ་གནས་མེ་དང་རླུང་ས་བོན། །བདེ་བ་ཆེན་པོའི་འདོད་ཆགས་ཆེ། །དེ་ཡི་གཉིས་པའི་ས་
བོན་ནི། །ཨཱ་ཡི་ཡི་གེས་དགང་བའོ། །འབྱུང་བ་ཆེན་པོ་བཞི་རང་བཞིན། །པ་ཡིག་ར་ཡིག་ཨོ་ཡིག་སྦྱར། །གསུམ་པོ་རླུང་གི་རང་བཞིན་ནོ། །ཏ་ཡི་ཡི་གེ་ཨྃ་ཡིག་ལྡན། །སླར་ཡང་རྣམ་ཤེས་ས་བོན་ནོ། །ཀ་ཡི་སྡེ་ཡི་དབུས་གནས་པ། །ཨེ་ཡི་ཡི་གེས་རྣམ་པར་བརྒྱན། །
རྣལ་འབྱོར་མའི་ཕྱག་རྒྱ་རང་བཞིན། །སླར་ལ་ཡང་ནི་བརྗོད་པར་བྱའོ། །ཚིག་འདི་ཐབས་ཤེས་དབྱེར་མེད་དངོས། །ས་མཐའ་དང་ནི་ན་ཡི་སྔགས། །སླར་ལ་ཡང་ནི་བརྗོད་པར་བྱ། །སྐྱེད་ཅིང་སྡུད་པར་བྱེད་གཟུགས་སོ། །པ་ར་ཨཱ་ཡིག་ས་བོན་གཅིག །དོན་དམ་པ་ཡི་ཡི་
གེའོ། །ཊ་མཐའ་ཨཱ་ཡི་ཡི་གེ་ལྡན། །གཞོམ་དུ་མེད་ལས་སྐྱེས་པའོ། །ཏ་ཡི་མཐའ་མ་ཀུན་འཇོམས་པའོ། །ཀ་ཀ་དང་ནི་ཎི་གནས་ལ། །དབྱངས་གསུམ་སྦྱར་ཞིང་ཐིག་ལེ་སྦྱིན། །རྣལ་འབྱོར་མ་ཀུན་འབོད་པའོ། །དེ་བཞིན་དུ་ནི་ཁ་ཁ་དང་། །གསུམ་པ་ཎ་རུ་གནས་པ་ཨི། །
དུབ་པ་སེལ་བར་བྱེད་པའི་རྒྱུ། །དྷུ་ན་ཡི་ནི་སྔགས་ཀྱི་ཚིག །ལན་གཉིས་སུ་ནི་བརྗོད་པར་བྱ། །རྟོག་པ་ཐམས་ཅད་འཇོམས་པར་བྱེད། །ཡ་སྡེའི་མཐའ་མ་ཡི་ནི་སྔགས། །རྡོ་རྗེའི་བུ་གར་བརྒྱན་པའོ། །ཙ་སྡེའི་དབུས་གནས་ས་བོན་ནི། །ར་ཡི་སྟན་ལ་ཡོངས་སུ་གནས། །གཏི་མུག་

ཟ་བར་བྱེད་པའོ། །ས་མཐའ་གཞོམ་མེད་དབུས་མའོ། །ཤ་སྡེའི་གསུམ་པ་ཧ་སྟན་ཅན། །ཨེ་ཡི་ཡི་གེ་རྣ་བར་བརྒྱན། །སྣ་ཚོགས་མཁའ་འགྲོ་མ་ཡི་གཟུགས། །འབོད་པར་བྱེད་པ་ཡི་ནི་སྔགས། །ཤོ་ཥ་ཡ་ཡི་སྔགས་ཀྱི་ཚིག །ལན་གཉིས་སུ་ནི་བརྗོད་པར་བྱ། །ཡེ་
ཤེས་ཅན་རློམ་ང་རྒྱལ་འཇོམས། །བྱང་ཆུབ་བྱང་ཆུབ་མེད་དེ་ཉིད། །དེ་ལྟར་རྐང་པ་བཅུ་གཉིས་ནི། །ས་དང་རྣལ་འབྱོར་ལས་རང་བཞིན། །བཅུ་གཉིས་ས་རྣམས་ཁྱབ་བདག་གི། །བཅོམ་ལྡན་ལྷ་ཡིས་འདི་གསུངས་སོ། །ཡི་གེ་རྣམས་ཀྱི་གནས་སོགས་ཀྱི། །བརྡ་ཡིས་དེ་ཉིད་ཕ་
རོལ་འགྲོ། །བདག་ལས་སེམས་ཅན་ཐམས་ཅད་སྐྱེས། །སེམས་ཅན་ལས་ཀྱང་བདག་བྱུང་ངོ་། །བདག་དེ་རྟག་ཏུ་མེད་གྱུར་ནས། །སྒྱུ་མ་རྨི་ལམ་དེ་བཞིན་གཤེགས། །འཁྲུལ་འཁོར་འདི་ནི་སྟོབས་ཆེ་སྟེ། །ལས་རྣམས་ཇི་ལྟ་བར་ནི་བྱུང་། །རྡོ་རྗེ་མཁའ་འགྲོའི་མཚན་ཉིད་
དུ། །དུས་འདིར་ཐམས་ཅད་འགྱུར་བའོ། །འཁོར་ལོ་ལྔ་པ་འདི་རྣམས་སུ། །མྱ་ངན་འདས་པའང་བརྗོད་པར་བྱ། །ལྷ་སོགས་ཐམས་ཅད་རྒྱུན་དུ་གསོད། །དེ་རྣམས་ཐམས་ཅད་རྟག་ཏུ་འགྲོལ། །བཀའ་སྩལ་པ། ཀ་ཡི་གཉིས་པའི་ས་བོན་ནི། །རྣལ་འབྱོར་མའི་ཚོགས་དེ་
ཉིད་དོ། །ཊ་བཟུང་པ་མཐའི་སྟན་ཅན་ཏེ། །ཨྃ་གིས་ཅོད་པན་བརྒྱན་པར་བྱ། །དེ་ལ་ཨ་ཡི་ཡི་གེས་དགང་། །འགྲོ་བ་དྲུག་གི་རང་བཞིན་ནོ། །ཀ་སྡེའི་དབུས་གནས་ས་བོན་ནི། །དུག་གིས་རེག་པ་འཕྲོག་པར་བྱེད། །ཀ་ཡི་ས་བོན་སྟོང་རང་བཞིན། །ན་ཡི་མཐའ་མ་ཨཱ་ཡིག་
ལྡན། །མེ་འབར་བ་ཡིས་དབང་ལྡན་ཏེ། །འཛིན་པ་ཡི་ནི་ས་བོན་ནི། །བསྐྱོད་པའི་ཁྱབ་བདག་ཆེན་པོའོ། །ཏ་ཡི་སྡེ་ཡི་བཞི་པ་ནི། །ཨཱ་ཡི་དབྱངས་ཀྱིས་བརྒྱན་པའོ། །སྲིད་པ་དང་བྲལ་བ་ཡི་གཟུགས། །ཉི་མ་ཨེ་ཡིག་ལྡན་རོ་ལངས། །ཏ་མཐའི་ས་བོན་གཟུང་བར་བྱ། །
དབྱངས་ཀྱི་གསུམ་པས་མགོ་ལ་བརྒྱན། །ས་གསུམ་ཐམས་ཅད་གསོད་པའོ། །པ་སྡེ་མཐའ་ཡི་ས་བོན་ནི། །ཡིད་ཀྱི་སྨྲ་བ་རྟོག་མེད་བྱེད། །ས་མཐའིཨཱ་ཡི་ངག་ལྡན་པ། །ཐར་པའི་བཤེས་ནི་རྟོག་པའོ། །མ་གཉིས་ཧ་གཉིས་བརྗོད་པར་བྱ། །རྨོངས་པའི་རང་བཞིན་འཕྲོག་

ཅིང་འཕྲོག །པ་ཡི་ས་བོན་ཨི་ཡིག་བརྒྱན། །ཕ་ནགས་ཀུན་ཉམས་གཟུང་དེ་ཉིད། །ཤ་ཡི་ཡི་གེས་ཨི་དང་ལྡན། །སེང་གེ་ཟ་བ་ཡི་ནི་སྔགས། །ཏའི་སྔགས་སླར་ཡང་འཆི་མེད་སྐྱེ། །པ་མཐའ་ཨི་ཡི་ཡི་གེས་དགང་། །ཐིག་ལེས་ཅོད་པན་ལ་རེག་
པའོ། །རྒྱ་ལ་འཆི་བ་རྟོག་པ་ཡིན། །ས་ཡིག་དབྱངས་གཉིས་བརྗོད་ཕྱིར་བརྒྱན། །སྔོན་དུ་འཕྲོག་པར་བྱེད་པའོ། །ཤ་གནས་ས་བོན་དུར་ཁྲོད་དེ། །ཏ་མཐའ་ཨི་དང་ལྡན་པ་ནི། །ཐམས་ཅད་རང་བཞིན་མེད་པའོ། །པ་སྡེའི་མཐའ་མ་ཨཱི་དབྱངས་ལྡན། །སྡང་བའི་ཡིད་
ནི་འཛིན་ཆེན་པོ། །ན་ཡིག་ཨུ་སྟན་རྟོག་ཀུན་སེལ། །ཤ་སྡེའི་གཉིས་པའི་ས་བོན་ནི། །ཨཱ་ཡིག་མགོར་རེག་ཐིག་ལེ་གནས། །བྱང་ཆུབ་སྒྲུབ་པ་ཡི་ནི་སྔགས། །ཐུར་དུ་སེལ་བའི་རླུང་གིས་སོ། །ཏ་དང་ར་ཡི་ཡི་གེ་གཉིས། །ས་ནི་འཇིགས་པར་བྱེད་སྔགས་སོ། །པ་ར་ཨཱ་ཡི་ས་
བོན་གཅིག །སུམ་ཅུ་རྩ་གསུམ་སྐྱོ་དུབ་འཇོམས། །ཡ་སྡེའི་མཐའ་མ་རི་མནན་པ། །ཡེ་ཤེས་ཀྱི་ནི་དག་བྱེད་དོ། །ཎ་ཡི་འགྲམ་གནས་ས་བོན་ནི། །ཨི་ཡིས་རྣ་བར་བརྒྱན་པའོ། །རྣལ་འབྱོར་པ་ཡི་མི་ཤེས་འཇོམས། །ས་ཡིག་ཨེ་ཡི་ཡི་གེས་དགང་། །དབུགས་འཆད་པ་
ནི་ཉམས་པར་བྱེད། །ན་སྔགས་དབྱངས་གསུམ་མགོ་ལ་བརྒྱན། །ཆོས་དང་ཆོས་མིན་སྤོང་རང་བཞིན། །དྷ་ཡིག་ཡ་དང་སྦྱར་བ་སྟེ། །བསམ་གཏན་སྔགས་ཀྱི་རང་བཞིན་ནོ། །ཏ་སྡེའི་མཐའ་མ་གཟུང་བྱ་སྟེ། །གྲོང་ཁྱེར་ལྟར་སྣང་དངོས་པོ་མེད། །ཡ་སྡེའི་གཉིས་པའི་ས་བོན་ནི། །
གཏི་མུག་རང་བཞིན་འབར་བའོ། །ས་ཡིག་ཨི་ཡི་ཡི་གེས་དབྱེ། །སེང་གེ་མ་ཧེ་འཇོམས་པའོ། །ཉི་མར་ཡང་ནི་གནས་པ་ནི། །རྣལ་འབྱོར་མ་ཀུན་རྒྱལ་པོའོ། །པ་སྡེའི་མཐའ་མ་ཨཱ་དབྱངས་བརྒྱན། །སྒྱུ་མར་སེམས་ཅན་ཀུན་དེས་འཛིན། །འཛིན་པའི་ས་བོན་ཨ་ཡིག་
བརྒྱན། །དེ་ཁོ་ན་ཡི་ཡེ་ཤེས་ཐོབ། །དེ་ལྟར་རྐང་པ་བཅུ་བཞི་པོ། །སེམས་ཅན་ཀུན་གྱིས་མི་ཤེས་གསོད། །དམ་པའི་སྔགས་དངོས་གཟུགས་བདག་ཉིད། །འབྱིན་ཅིང་སྡུད་པར་བྱེད་པ་པོ། །འབྱུང་པོ་ཐམས་ཅད་འཇིགས་བྱེད་པ། །བཅོམ་ལྡན་ལྷ་ཡིས་འདི་གསུངས་སོ། །

འཁོར་ལོའི་རྣམ་པའི་གཟུགས་བདག་ཉིད། །ཕག་མོའི་ཐུགས་ཀར་བརྒྱན་པ་སྟེ། །སྟོང་ཉིད་སྙིང་རྗེ་དབྱེར་མེད་པས། །གསོད་པ་དང་ནི་མི་གསོད་པའོ། །ཀ་སྡེའི་དབུས་ན་ར་སྟན་ཅན། །གསུམ་དེའི་མགོ་ལ་ཐིག་ལེ་སྦྱིན། །ཐེག་པ་མཆོག་གི་ཆོས་ཅན་ནོ། །ཏ་སྡེའི་གཉིས་
པའི་ཡི་གེ་ནི། །ཨི་ཡི་དབྱངས་དང་ལྡན་པའོ། །མུ་སྟེགས་རྣལ་འབྱོར་ཉམས་བྱེད་པའོ། །ཏ་ཡིག་རྟོགས་པར་བྱེད་པའོ། །ཏ་སྡེའི་བཞིར་གནས་ཨཱ་དང་ལྡན། །བྱང་ཆུབ་མཐའ་མེད་འཛིན་པའོ། །ར་གནས་པ་ལ་དབྱངས་གསུམ་བརྒྱན། །རྣལ་འབྱོར་མ་ཀུན་འཆད་པའོ། །
ན་སྔགས་ཨི་ཡིག་གིས་བརྒྱན་པའོ། །རྣལ་འབྱོར་མ་རྣམས་ཀྱི་ལམ་མོ། །སུམྦྷ་ན་ཡི་ཚིག་རྐང་སྟེ། །ལན་གཉིས་སུ་ནི་བརྗོད་པར་བྱ། །ཚིག་དྲུག་རྟོགས་པའི་དེ་ཉིད་དོ། །དེ་བཞིན་དུ་ནི་སུམྦྷའི་སྔགས། །རྣལ་འབྱོར་མ་ཡི་མཆོད་རང་བཞིན། །ཧ་ནའི་སྔགས་ནི་ལན་གཉིས་བརྗོད། །
སྡང་བའི་ཐེག་པ་ཉམས་པར་བྱེད། །པ་ར་ཨཱ་ཡི་ཡི་གེ་གཅིག །དབང་པོ་རང་རང་ངོ་བོ་གཞན། །ཎ་ཨ་ཨྃ་གི་ཡི་གེས་དགང་། །ས་བོན་འདི་ནི་ཡོན་ཏན་སྔགས། །ས་ཡིག་རྩ་ཀུན་འཛག་པའོ། །བ་ཡིག་ར་ཡི་ཡིག་བརྒྱན་རི། །པ་གནས་ནམ་མཁའ་ལ་འཇུག་པའོ། །ས་ཡི་ཡིག་
གནས་ཀུན་གྱི་གཟུགས། །ཡ་སྡེའི་མཐའ་མ་ཨཱ་ཡིས་དགང་། །རླུང་ནི་སྲོག་གི་ཡེ་ཤེས་སོ། །ན་ཡིག་ཨཱ་ཡི་ཡི་གེས་དགང་། །བྱང་ཆུབ་གང་དུའང་མི་རྟོག་པའོ། །ཐིག་ལེ་མགོ་ལ་བལྟ་བར་བྱ། །བ་སྡེའི་མཐའ་མ་སྦྲང་ཆེན་གཟུགས། །ས་མཐའ་ཨཱ་ཡིས་དགང་བར་བྱ། །རྣལ་
འབྱོར་མ་ཡི་ཚོགས་སྲོག་གོ། །པ་མཐའ་ཨ་དང་ལྡན་པ་ལ། །ཨྃ་གི་ཅོད་པན་བརྒྱན་པའོ། །ཆོས་ཀུན་གྱི་ནི་སྤྲིན་རང་བཞིན། །ས་ཡིག་དམ་ཆོས་མི་ཤེས་གསོད། །ཙྪེ་སྔགས་བྱང་ཆུབ་སེམས་དཔའོ། །སོང་བ་འཁོར་བར་སྐྱེ་བ་མེད། །ཏ་སྡེའི་དབུས་གནས་ས་བོན་ནི། །
ང་ནི་དོན་མེད་པ་སྣང་བའོ། །ན་ལ་ཨི་དང་ལྡན་པ་སྟེ། །འཇིག་རྟེན་མ་ལུས་འཆིང་བ་ཉིད། །ཀྲོ་སྔགས་གནོན་པས་འཁོར་བ་གཅོད། །དྷ་ཡི་ས་བོན་འགྲོ་ཀུན་འཇོམས། །སྤྲོས་པ་མེད་པར་བྱེད་པའོ། །མཱུ་ཡི་ཡི་གེ་ས་བོན་ནི། །རྨོངས་པའི་འཇིག་རྟེན་ཀུན་གྱི་ལས། །དེ་ལྟར་

ཕྱེད་བཅས་ཚིག་བཅུ་བཞི། །རྩ་ཡི་འཁོར་ལོ་ཡི་ནི་མཐའོ། །བུམ་པ་ཅན་ལ་སོགས་པའི་ལས། །རྣལ་འབྱོར་གང་དང་གང་འདོད་བྱེད། །འཁོར་ལོ་དྲུག་གི་རབ་སྦྱོར་བས། །ཅི་འདོད་ལས་ཀྱི་རང་བཞིན་ཏེ། །བདག་པོ་སྦྱོར་བ་འགྲུབ་ནུས་ཅན། །བཅོམ་ལྡན་
འདས་ཀྱིས་འདི་གསུངས་སོ། །གཙུག་ཏོར་ལ་སོགས་སྐྱེ་གནས་མཐར། །ལུས་ངག་སེམས་ཤེས་ནམ་མཁའ་ལས། །ལུགས་འབྱུང་ལུགས་ལས་བཟློག་པ་ཡིས། །དེ་ཉིད་བྱང་ཆུབ་རྣམས་ཤེས་བྱ། །འདིར་ནི་ཐབས་ཀྱི་ཆ་དང་ནི། །ཤེས་རབ་ཀྱི་ཡང་ཆ་རུ་བརྗོད། །
ཡང་ན་ཡི་གེ་རེ་རེ་ཡི། །བར་བར་དུ་སྟེ་སླར་ཡང་ནི། །དྷི་སྔགས་ལྷན་སྐྱེས་རང་བཞིན་ཏེ། །འཁོར་ལོ་ཡི་ནི་ཁྱད་པར་གྱི། །ཉེ་བའི་ལས་རྣམས་བྱེད་པའོ། །དཾ་ཥྚྲ་ཀ་རཱ་ལི་ཡི་སྔགས། །འགྲོ་བ་རྣམས་ཀྱི་ལས་རང་བཞིན། །མ་སྔགས་ཧཱ་སྔགས་མུ་དྲེའི་སྔགས། །རྣ་བ་ཡི་ནི་
རང་བཞིན་ནོ། །ཤྲཱི་ཧེ་རུ་ཀ་དེ་བ་སྱ་གྲ་མ་ཧི་ཥིའི། །སྔགས་ཚིག་སྣ་ཡི་རང་བཞིན་ནོ། །ས་ཧ་སྲ་ཤི་རེ་ཡི་སྔགས། །དབྱངས་ཀྱི་བདག་པོ་ཡི་ནི་གཟུགས། །ས་ཧ་སྲ་བཱ་ཧ་བེ་ཡི། །སྔགས་ཀྱི་ཡི་གེ་ལུས་ཀྱི་གཟུགས། །ཤ་ཏ་སའི་སྔགས་འཁོར་ལོ་གཅིག །མཁའ་འགྲོ་
མའི་སྔགས་འཆི་བ་དང་། །སྐྱེ་བ་ཡི་ནི་རང་བཞིན་ནོ། །གཉིས་མེད་རྣམ་པའི་ཆོས་ལས་ནི། །གཉིས་སུ་སེམས་ཅན་འཛིན་པ་སྟེ། །ཤེས་རབ་ལ་ནི་བདེ་སྟེར་བ། །བཅོམ་ལྡན་བླ་མས་འདི་གསུངས་སོ། །ཉན་ཐོས་ལ་སོགས་མུ་སྟེགས་རྣམས། །མི་ཤེས་པ་ཡི་ཕྱུགས་
ཐམས་ཅད། །དེ་རྣམས་ཡེ་ཤེས་འཐོབ་བྱའི་ཕྱིར། །ཚུལ་ལུགས་འདི་ནི་བསྟན་པའོ། །ཧ་སྲཱ་ན་ནེ་ཡི་ནི་སྔགས། །ཡུལ་གྱི་གཟུགས་ལ་རེག་པའོ། །ཛྭ་ལི་ཏ་ཏེ་ཛ་སེའི་སྔགས། །སྔགས་ཀྱི་ཚིག་ནི་ཡིད་ཀྱི་ཡུལ། །ཛྭ་ལ་མུ་ཁིའི་ཚིག་ལུས་ཡུལ། །པིང་ག་ལོ་ཙ་ན་ཡི་
སྔགས། །མིག་གི་རྣམ་པར་ཤེས་པའོ། །བཛྲ་ཤ་རཱི་རེའི་སྔགས་ཚིག །ལུས་ཀྱི་རྣམ་པར་ཤེས་པའོ། །བཛྲཱ་ས་ནེ་ཡི་ནི་སྔགས། །སྣ་ཡི་ཡུལ་ལ་རེག་པའོ། །མི་ལི་ཏེ་ཡི་སྔགས་ཀྱི་ཚིག །སྣ་ཡི་རྣམ་པར་ཤེས་པའོ། །ཙི་ལི་ཏེ་ཡི་སྔགས་ཀྱི་ཚིག །དབྱངས་ཀྱི་

བདག་པོ་ཡི་ནི་ཡུལ། །ཧེ་སྔགས་གཉིས་བརྗོད་སྒྲ་ཡི་ཡུལ། །སྒྲ་དང་དབྱངས་གཉིས་ཀྱི་རྣམ་ཤེས། །དེ་ལྟར་སྔགས་ཚིག་ཕྱེད་བཅས་བདུན། །འཆི་དང་སྐྱེ་བ་ཀུན་གྱི་གཟུགས། །ཕག་མོ་ལ་ནི་བདེ་དགའ་བའི། །བཅོམ་ལྡན་བདག་པོས་འདི་གསུངས་ཏེ། །བོ་ལ་
ཀཀྐོལ་སྦྱོར་བདག་ཉིད། །ཡུལ་དང་དབང་པོ་སོགས་གསོད་པའོ། །སེམས་ཅན་གང་དང་གང་རྣམས་ཀྱི། །ཡུལ་གྱི་ཆུ་སྐྱེས་ལས་སྐྱེས་ཏེ། །སེམས་ཅན་དེ་དང་དེ་རྣམས་ཀྱི། །རང་རང་ལས་རྣམས་ཀྱིས་གསོད་པའོ། །ཡུལ་ལ་སོགས་པ་འཇོམས་པས་ན། །ཤེས་རབ་
འཁོར་ལོ་དེ་བཤད་དོ། །རྒྱུད་དང་རྒྱུད་རྣམས་ཀྱི་ནི་ལས། །སྒྲུབ་པའི་སྙིང་པོའི་ཡེ་ཤེས་སོ། །ས་མཐའ་དྲུག་པའི་དབྱངས་སྟན་ཅན། །ཟླ་དུམ་ཐིག་ལེས་མགོ་ལ་བརྒྱན། །ལན་གཉིས་སུ་ནི་བརྗོད་པར་བྱ། །རྡོ་རྗེ་སེམས་དཔའ་གསང་བའི་གཟུགས། །ཁ་གཉིས་དྷུ་གཉིས་
མུ་རུ་གཉིས། །ལས་རྣམས་ཀྱི་ནི་དངོས་པོ་སྟེ། །སྲོག་དང་མཉམ་དུ་གནས་པའོ། །ཨ་དྭཱི་ཏེ་མ་ཧཱ་ཡོ་གི་ནཱི། །པ་ཐི་ཏ་སིདྡྷེའི་སྔགས་ཀྱི་ཚིག །དེ་ཡང་ལུས་མཐའ་ཡི་ནི་གཟུགས། །དྲེ་ངྷྃ་ཚིག་གཉིས་གྲྃ་ཚིག་གཉིས། །ཧེ་ཡི་ཚིག་གཉིས་ཧ་ཚིག་གཉིས། །ཁྲོ་བཅུའི་ཡི་གེ་
གཤིན་རྗེ་ནི། །མཐར་བྱེད་ལ་སོགས་ཀྱིར་གོ་བྱ། །པ་སྡེའི་བཞི་པའི་ས་བོན་ལ། །ཨཱི་ཡིག་མགོ་ལ་རེག་པའོ། །མེ་སའི་སྔགས་ནི་ཚིག་ཀུན་ཏེ། །མཁའ་འགྲོ་མ་ཡི་རང་བཞིན་ནོ། །དེ་ལྟར་སྔགས་ཚིག་བཅུ་གཉིས་ནི། །རྟེན་འབྲེལ་བཅུ་གཉིས་སླུ་བ་སྟེ། །སྟོན་པ་དམ་
ཚིག་ཆེན་པོ་གཙོ། །བཅོམ་ལྡན་འདས་ཀྱིས་འདི་གསུངས་སོ། །རྟེན་འབྲེལ་ཡན་ལག་བཅུ་གཉིས་ཀྱི། །ལས་ཀྱིས་ལྷན་ཅིག་རྨུགས་བྱེད་པའོ། །ཕོ་ཉ་རྣམས་བསྐྱེད་པའི་ཡི་གེ། །འཁོར་ལོའི་རྣམ་པའི་རང་བཞིན་ཅན། །འཁོར་ལོ་ཡི་གེ་མིན་དེ་ལྟར། །ཕོ་ཉའི་རང་བཞིན་
མེད་པའོ། །རྣམ་སྨིན་དེ་ལས་རྣམ་སྐྱེས་པ། །སོ་སོའི་མིང་དུ་འདུ་ཤེས་ཏེ། །འཇམ་རྡོར་ལ་སོགས་དངོས་པོ་ཡིས། །ཨ་བ་དྷཱུ་ཏཱིའི་མཚན་ཉིད་བྱ། །ཧཱ་ས་ཧཱ་དཔའ་བོ་གཅིག་སྔགས་ཚིག །དེ་བཞིན་གཤེགས་དྲུག་ས་བོན་ཏེ། །ཡོན་ཏན་མཐའ་མེད་འཆད་པའོ། །ཧཱ་ཡི་ས་

བོན་ཡི་གེ་བཞི། །ཧོ་གཅིག་ཧོ་གཉིས་བརྗོད་པར་བྱ། །ཡི་གེ་བདུན་པོ་ལྤགས་སོགས་ཁམས། །ཏྲཻ་ལོ་ཀྱ་བི་ནཱ་ཤའི་སྔགས། །སྡང་བ་ལ་ནི་གོ་ཆའོ། །ཤ་ཏ་ས་ཧ་སྲ་ཀོ་ཊི། །ཏ་ཐཱ་ག་ཏ་པ་རི་བཱ་རེ། །ས་མཐའ་ཨཱུ་ཡི་དབྱངས་ཀྱིས་སྤྲས། །ཟླ་བའི་དུམ་བུ་
ཐིག་ལེས་བརྒྱན། །དེ་ལྟར་སྔགས་ཀུན་ཉེར་སྡུད་པའོ། །ཧ་ཨཱུ་ཨཾ་སྔགས་ཀྱི་རང་བཞིན། །དེ་ལྟར་སྔགས་ཀྱི་ཚིག་ནི་བཞི། །རྣལ་འབྱོར་མ་སྐྱེད་དངོས་གྲུབ་འགྱུར། །བཀས་གནང་དངོས་གྲུབ་རབ་འཇུག་པ། །བཅོམ་ལྡན་དཔའ་བོས་འདི་གསུངས་སོ། །མཁའ་འགྲོ་
སྡོམ་པ་མངོན་བརྗོད་དང་། །གཞན་ཡང་རྣལ་འབྱོར་མའི་རྒྱུད་དང་། །རྣལ་འབྱོར་རྒྱུད་རྣམས་སུ་གསུངས་པའི། །ལས་ཀྱི་ཚོགས་ཀྱི་དངོས་གྲུབ་སྟེར། །བཀས་གནང་འཁོར་ལོའི་རབ་སྦྱོར་བས། །འགྲུབ་འགྱུར་སྦྱོར་བ་གཞན་གྱིས་མིན། །སླར་ཡང་ས་མཐའ་དབྱངས་ལྔ་
པའི། །དྲུང་ན་གནས་པའི་སྟན་ཅན་ལ། །ཟླ་དུམ་ཐིག་ལེས་བརྒྱན་པའོ། །ཆོ་གས་དེ་ཁོ་ནའི་ས་བོན། །པ་དྲུང་གནས་པ་རྣལ་འབྱོར་མའི། །ཚོགས་ནི་སྐྱེད་པར་བྱེད་པའོ། །ཊ་ཡིག་འབར་བར་བྱེད་པའི་སྔགས། །སིང་ཧ་རུ་པེ་ཁཿསྔགས་ཚིག །བགེགས་ཀྱི་གཙོ་བོ་རླག་
བྱེད་པའོ། །ག་ཛ་རཱུ་པེ་གཿཡི་སྔགས། །སེམས་ཅན་ཀུན་གྱི་བགེགས་བྱེད་པའོ། །ཏྲཻ་ལོ་ཀྱོ་ད་རེ་ཡི་ཚིག །རབ་མཆོག་ཕོ་ཉ་ཀུན་སྐྱེད་པའོ། །ས་མུ་དྲ་མེ་ཁ་ལེ་གྲ་ཧ་གཉིས་ཀྱི་ཚིག །རྒྱ་མཚོ་ལྟ་བུའི་སྐ་རགས་སྤྲས། །དེ་ནི་སྔགས་ཀྱི་སྐ་རགས་སོགས། །ཧཱུྃ་དང་ཕཊ་ཀྱི་ཡི་གེ་ནི། །མཁའ་འགྲོ་
མ་ཡི་ཁྱབ་བདག་གོ །བཱི་རཱ་དྭཱི་ཏེ་ཧཱུྃ་སྔགས་ཚིག །ཐབས་དང་ཤེས་རབ་གཉིས་མེད་ལས། །ཐ་མལ་འདུས་བྱས་སྐྱེས་པའོ། །དེ་ལྟར་རྐང་པ་བདུན་སྔགས་ཏེ། །ཡེ་ཤེས་ས་ཡི་རང་བཞིན་གྱི། །བཅོམ་ལྡན་རྡོ་རྗེས་འདི་གསུངས་ཏེ། །སེམས་ཅན་ལས་ལས་གྲུབ་པའི་མཐར།