Kinh tạng Tây Tạng (Kangyur Đại Học) — 062_མདོ་སྡེ།_ཚ

ེད་པ་རྣམས་ཀྱི་སྐྱབས་ཡིན་ནོ། །སྐྱེས་བུ་དམ་པ་དག་ནི་འཁོར་བའི་རྒྱ་མཚོར་ཞུགས་པ་རྣམས་ཀྱི་གནས་ཡིན་ནོ། །སྐྱེས་བུ་དམ་པ་དག་ནི་རྟེན་མེད་པ་རྣམས་ཀྱི་རྟེན་ཡིན་ནོ། །སྐྱེས་བུ་དམ་པ་དག་ནི་མུན་པ་མུན་ནག་ཏུ་ཞུགས་པ་རྣམས་ཀྱི་སྣང་བར་བྱེད་པ་ཡིན་ནོ། །སྐྱེས་བུ་
དམ་པ་དག་ནི་ལམ་ངན་པར་ཞུགས་པ་རྣམས་ཀྱི་འདྲེན་པ་ཡིན་ནོ། །སྐྱེས་བུ་དམ་པ་དག་ནི་ཆོས་སྨྲ་བ་རྣམས་ཀྱི་ཡོངས་སུ་འདྲེན་པ་ཡིན་ནོ། །སྐྱེས་བུ་དམ་པ་དག་ནི་བཟོད་པ་དང་དུལ་བའི་རྣལ་འབྱོར་དང་ལྡན་པས་ཐ་བའི་ཉེས་པ་དང་། གནོད་སེམས་དང་། གནོང་བ་འཆབ་པ་དང་། ཁྲོ་
བའི་ཡོངས་སུ་གདུང་བ་ཐམས་ཅད་དང་བྲལ་བ་ཡིན་ཏེ། དེ་ལྟ་བས་ན་སྐྱེས་བུ་དམ་པ་དག་དེ་འདྲ་བའི་ཆོས་ལ་གནས་པས་ནི་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་ནམ་མཁའ་མཛོད་ཀྱིས་སྨྲས་པ། ནམ་མཁའ་དཔག་ཏུ་མེད་པ་བཞིན་དུ་བྱམས་པ་སྒོམ་པའི་
རྣལ་འབྱོར་དང་ལྡན་པ། སྙིང་རྗེ་ཆེན་པོ་ལ་གནས་པ་རྒྱུན་མི་འཆད་པ། དབང་པོ་རྟག་ཏུ་དགའ་ཞིང་དགོད་པ། འདོད་པའི་དགའ་བ་ཐམས་ཅད་ལ་བཏང་སྙོམས་སུ་གཏོང་བ། སྦྱིན་པ་ནམ་མཁའ་དང་མཚུངས་པ། ཚུལ་ཁྲིམས་ནམ་མཁའ་དང་མཚུངས་པ། བཟོད་པ་ནམ་མཁའ་
དང་མཚུངས་པ། བརྩོན་འགྲུས་ནམ་མཁའ་དང་མཚུངས་པ། བསམ་གཏན་ནམ་མཁའ་དང་མཚུངས་པ། ཤེས་རབ་ནམ་མཁའ་དང་མཚུངས་པས་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོས་སྒྱུར་བས་

སྨྲས་པ། སེམས་བསྐྱེད་པ་གང་ལས་བདུད་སྡིག་ཅན་གྱིས་གླགས་རྙེད་པར་འགྱུར་བ་དང་། དེ་བཞིན་གཤེགས་པ་མཉེས་པར་མི་འགྱུར་བ་དང་། ལྷ་མི་དགའ་བར་འགྱུར་བ་དང་། བདག་གི་དགེ་བའི་ཕྱོགས་ཡོངས་སུ་འབྲི་བར་འགྱུར་བའི་སེམས་བསྐྱེད་པ་དེ་དག་ནི་བྱང་ཆུབ་
སེམས་དཔས་མི་བསྐྱེད་པར་བྱའི། སེམས་བསྐྱེད་པ་གང་ལས་བདུད་སྡིག་ཅན་གྱིས་གླགས་རྙེད་པར་མི་འགྱུར་བ་དང་། དེ་བཞིན་གཤེགས་པ་མཉེས་པར་འགྱུར་བ་དང་། ལྷ་དག་དགའ་བར་འགྱུར་བ་དང་། བདག་གི་དགེ་བའི་ཕྱོགས་ཡོངས་སུ་འབྲི་བར་མི་འགྱུར་བའི་སེམས་བསྐྱེད་པ་
དེ་དག་ནི་བསྐྱེད་པར་བྱ་སྟེ། དེ་དེ་ལྟར་ཞུགས་ན་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་སྐོར་བར་འགྱུར་རོ། །དེ་ཅིའི་ཕྱིར་ཞེ་ན། དེ་ལྟར་བྱང་ཆུབ་སེམས་དཔའ་དེས་སེམས་བསྐྱེད་མ་ཐག་ཏུ་རྒྱུ་དང་དམིགས་པའི་རྐྱེན་མ་སྐྱེས་པའི་ཕྱིར་ཆོས་ཐམས་ཅད་མ་སྐྱེས་པ་དང་། དེ་བཞིན་
གཤེགས་པའི་བྱང་ཆུབ་ཀྱང་མ་སྐྱེས་པ་ལས་རྟོགས་པར་འགྱུར་ལ། བྱང་ཆུབ་ཇི་ལྟ་བར་ཆོས་ཀྱི་འཁོར་ལོས་སྒྱུར་བ་ཡང་དེ་བཞིན་དུ་ཤེས་ཏེ། སེམས་ཀྱི་བསམ་པའི་གོ་ཆ་དེ་དག་གིས་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་དཔའ་ཚིག་གི་རབ་ཏུ་ཐ་དད་པ་ཐམས་
ཅད་ལ་སྤོབས་པས་སྨྲས་པ། སྐྱེས་བུ་དམ་པ་དག་བྱང་ཆུབ་ནི་ཐམས་ཅད་ཀྱི་རྗེས་སུ་སོང་བ་སྟེ། ཀུན་ནས་ཉོན་མོངས་པའི་རྗེས་སུ་སོང་བ། རྣམ་པར་བྱང་བའི་རྗེས་སུ་སོང་བ། འདུས་བྱས་ཀྱི་རྗེས་སུ་སོང་བ། འདུས་མ་བྱས་ཀྱི་རྗེས་སུ་སོང་བ། ཟག་པ་དང་བཅས་པའི་རྗེས་སུ་སོང་
བ། ཟག་པ་མེད་པའི་རྗེས་སུ་སོང་བ། ཁ་ན་མ་ཐོ་བ་དང་བཅས་པའི་རྗེས་སུ་སོང་བ། ཁ་ན་མ་ཐོ་བ་མེད་པའི་རྗེས་སུ་སོང་བ། དགེ་བའི་རྩ་བའི་རྗེས་སུ་སོང་བ། མི་དགེ་བའི་རྩ་བའི་རྗེས་སུ་སོང་བ། འཇིག་རྟེན་གྱི་ཆོས་ཀྱི་རྗེས་སུ་སོང་བ། འཇིག་རྟེན་ལས་འདས་པའི་ཆོས་ཀྱི་རྗེས་
སུ་སོང་བ། འཁོར་བའི་རྗེས་སུ་སོང་བ། མྱ་ངན་ལས་འདས་པའི་རྗེས་སུ་སོང་བ། ཆད་པ་དང་རྟག་པའི་རྗེས་སུ་སོང་བ། ཕུང་པོ་དང་། ཁམས་དང་། སྐྱེ་མཆེད་ཀྱི་རྗེས་སུ་སོང་བ་སྟེ། སྐྱེས་བུ་དམ་པ་དག་བྱང་ཆུབ་ནི་ས་དང་ཆུ་དང་། མེ་དང་། རླུང་དང་། ནམ་མཁའི་རྗེས་

སུ་སོང་བའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་འདི་ལྟ་བུའི་རང་བཞིན་ཏེ། རང་བཞིན་སྟོང་པ་ཉིད་དོ། །དེ་དག་ནི་བརྗོད་པ་གང་དང་གང་གིས་བརྗོད་པར་བྱ་བའི་རྣམ་པ་དེ་ཐམས་ཅད་སྟོང་པ་ཉིད་སྨོས་པར་བྱེད་པའོ། །འདི་ལྟ་སྟེ་དཔེར་ན། ནམ་མཁའི་དབྱིངས་ནི་ཐམས་
ཅད་ཀྱི་རྗེས་སུ་སོང་ངོ་། །དེ་བཞིན་དུ་བྱང་ཆུབ་ཀྱང་ཐམས་ཅད་ཀྱི་རྗེས་སུ་སོང་སྟེ། སྐྱེས་བུ་དམ་པ་དག་བྱང་ཆུབ་སེམས་དཔའ་དེ་ལྟ་བུའི་ཡེ་ཤེས་ལ་མོས་པ་ནི་དམིགས་པ་ཐམས་ཅད་ལ་སྤོབས་པ་འབྱུང་ཞིང་དེ་ནི་ཚིག་གི་རབ་ཏུ་ཐ་དད་པ་ཤེས་པ་ཐམས་ཅད་ཀྱང་འཐོབ་པར་
འགྱུར་ཏེ། ཚུལ་གཅིག་ལ་འཇུག་པ་དེས་ཐམས་ཅད་མཁྱེན་པ་རྟོགས་སོ། །བྱང་ཆུབ་སེམས་དཔའ་སྤོབས་པའི་ཕུང་པོས་སྨྲས་པ། ཀྱེ་གྲོགས་པོ་དག་བརྗོད་པ་ཐམས་ཅད་ནི་བརྗོད་དུ་མེད་པ་སྟེ། སྒྲ་ཐམས་ཅད་བསྙད་དུ་མེད་པའོ། །བྱང་ཆུབ་སེམས་དཔའ་ཡེ་
ཤེས་དེ་ལ་མོས་པ་ནི་སེམས་མི་གཡོ་བར་འདུག་པ་ཡིན་ཏེ། སྙན་པར་སྨྲས་པ་དང་། མི་སྙན་པར་སྨྲས་པ་ལ་དགའ་བ་དང་ཞུམ་པ་མེད་དོ། །འདི་ལྟ་སྟེ། དཔེར་ན་རི་ལྷུན་པོའི་ཕུང་པོ་ལ་རླུང་བབ་པ་ལས་སླར་ལོག་ན་རི་ལྷུན་པོ་ནི་གཡོ་བའང་མེད། རབ་ཏུ་གཡོ་བའང་མེད་དོ། །
རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་དེ་འདྲ་བའི་ཡེ་ཤེས་རྟོགས་པས་ཐམས་ཅད་ཀྱི་སྒྲ་དང་བརྗོད་པ་ཀུན་བཟོད་དེ། གཡོ་བར་མི་བྱེད། རབ་ཏུ་གཡོ་བར་མི་བྱེད་ཅིང་ཕ་རོལ་མུ་སྟེགས་ཅན་གྱི་སྨྲ་བ་གང་ལ་ཡང་ཆགས་པར་མི་འགྱུར། དེ་བཞིན་གཤེགས་པའི་བཀའ་དང་། མུ་
སྟེགས་ཅན་གྱི་ཚིག་ཀྱང་ཆོས་མཉམ་པ་ཉིད་དུ་མཐོང་། མཉམ་པ་ཉིད་ལའང་འགལ་བར་མི་བྱེད། མུ་སྟེགས་ཅན་ཐམས་ཅད་ཀྱི་སྤོབས་པ་ཐམས་ཅད་ཀྱང་ཟད་པའི་ཆོས་སུ་མཐོང་། ཟད་པའི་ཆོས་ཀྱི་ཆོས་ལ་ང་རྒྱལ་ཆེན་པོར་ཡང་མི་བྱེད་དེ། སྐྱེས་བུ་དམ་པ་དག་བྱང་ཆུབ་
སེམས་དཔའ་དེ་འདྲ་བའི་ཡེ་ཤེས་ལ་མོས་པ་ནི་མྱུར་དུ་ཐམས་ཅད་མཁྱེན་པ་ཐོབ་པར་འགྱུར་རོ། །བྱང་ཆུབ་སེམས་དཔའ་བློ་གྲོས་རྒྱ་མཚོས་སྨྲས་པ། སྐྱེས་བུ་དམ་པ་དག་བྱང་ཆུབ་སེམས་དཔས་ཐོས་པ་ཐམས་ཅད་གཟུང་བའི་ཕྱིར་བློ་གྲོས་རྒྱ་མཚོ་ལ་སེམས་འཇུག་པ་རྟོགས་པར་

བྱའོ། །ཆོས་ཉིད་ལ་སྣ་ཚོགས་མེད་པའི་ཕྱིར་དེས་ཆོས་རོ་གཅིག་པ་ལ་མོས་པར་བྱའོ། །རྟེན་ཅིང་འབྲེལ་པར་འབྱུང་བ་དང་མི་འགལ་བའི་ཕྱིར་དེས་ཆོས་ཉིད་ལ་བརྟག་པར་བྱའོ། །ཐོག་མ་ནས་མ་སྐྱེས་པའི་ཕྱིར་ཆོས་གང་ཡང་མ་བྲི་བ་དང་མ་འཕེལ་བར་བྱའོ། །
བསོད་ནམས་མི་ཟད་པའི་ཕྱིར་སེམས་ཅན་ཐམས་ཅད་ཉེ་བར་འཚོ་བའི་དགེ་བའི་རྩ་བ་བསྐྱེད་པར་བྱའོ། །ཆད་པ་དང་རྟག་པ་ལས་དབེན་པའི་ཕྱིར་དེས་མཐའ་གཉིས་རྟོགས་པར་བྱའོ། །སེམས་ཀྱི་སྒོམ་པ་ཚད་མེད་པའི་ཕྱིར་དེས་ཆོས་ཐམས་ཅད་ལ་བརྟག་པར་བྱའོ། །ཆོས་ཡང་དག་
པར་མི་བརྗེད་པའི་ཕྱིར་བདག་གི་དྲན་པའི་སྟོབས་བསྐྱེད་པ་ཡང་ཡོངས་སུ་གཞག་པར་བྱའོ། །སེམས་ཅན་ཐམས་ཅད་ལ་སྙོམས་པར་ཆོས་འཆད་པའི་ཕྱིར་དེས་སྙེམས་པ་ཐམས་ཅད་ཡང་དག་པར་བཅོམ་པ་ཡོངས་སུ་རྫོགས་པར་བྱའོ། །སངས་རྒྱས་ཀྱི་ཆོས་མ་འདྲེས་པ་ལྷུར་
བྱེད་པའི་ཕྱིར་མི་དགེ་བའི་ཆོས་ཐམས་ཅད་དང་མི་འགྲོགས་པར་བྱའོ། །སྐྱེས་བུ་དམ་པ་དག་དྲན་པའི་ཡེ་ཤེས་ཀྱི་གོ་ཆ་དེས་ནི་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་དཔའ་ལྷུན་པོ་ཆེན་པོས་སྨྲས་པ་འདི་ལྟ་སྟེ། སངས་རྒྱས་ཀྱི་ཡེ་ཤེས་དེ་ནི་འཇིག་རྟེན་ཐམས་
ཅད་ལས་མངོན་པར་འཕགས་པའི་ཡེ་ཤེས་ཏེ། དེ་ནི་ཚད་ཡོད་པའི་སྤྱོད་པས་རྟོགས་པར་མི་ནུས་སོ། །དེ་བས་ན་བསམ་པ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། ཐོས་པ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། དད་པ་འཇིག་རྟེན་ཐམས་ཅད་
ལས་མངོན་པར་འཕགས་པ་དང་། སྦྱིན་པ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། དེ་བཞིན་དུ་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། བསོད་
ནམས་རི་རབ་ལྷུན་པོ་བཞིན་དུ་མངོན་པར་འཕགས་པས་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་དཔའ་མཐོང་ན་དགའ་བས་སྨྲས་པ། སྐྱེས་བུ་དམ་པ་དག་གང་གི་ཚེ་ན་བྱང་ཆུབ་སེམས་དཔའ་བདག་གི་གཟུགས་ཀྱི་སེམས་ཡོངས་སུ་དག་པས་གཟུགས་སུ་

སྣང་བ་ཡིད་དུ་མི་འོང་བ་གང་ཡང་མིག་གིས་མཐོང་ཞིང་སྣང་བར་མི་འགྱུར། བདག་གི་རྣ་བའི་སེམས་ཡོངས་སུ་དག་པས་སྒྲ་ཡིད་དུ་མི་འོང་བ་གང་ཡང་རྣ་བས་ཐོས་ཤིང་གྲག་པར་མི་འགྱུར། དེ་བཞིན་དུ་དྲི་ཡང་མ་ཡིན། རོ་ཡང་མ་ཡིན། རེག་ཀྱང་མ་ཡིན། རང་གི་ཡུལ་གྱི་སེམས་
ཡོངས་སུ་དག་པས་ཆོས་ཡིད་དུ་མི་འོང་བ་གང་ཡང་ཡིད་ལ་སྣང་བར་མི་འགྱུར། རང་གི་སེམས་ཡོངས་སུ་དག་པས་ཡིད་དགའ་བ་དང་། མི་དགའ་བ་དང་། མ་འབྲེལ་ཅིང་སེམས་ཅན་གང་ཡང་སངས་རྒྱས་ཀྱི་ཆོས་ཀྱི་སྣོད་མ་ཡིན་པར་མ་མཐོང་སྟེ། གང་ལོག་པར་ངེས་པ་དེ་དག་
ཀྱང་སངས་རྒྱས་ཀྱི་ཆོས་ཀྱི་སྣོད་དུ་འགྱུར་བར་མཐོང་ཞིང་། གང་བདག་ཤིན་ཏུ་དགའ་བར་གྱུར་པའི་དངོས་པོ་དེ་དགའ་ཞིང་ཡོངས་སུ་གཏོང་ལ་བྱིན་ནས་ཀྱང་མི་འགྱོད་པ་ཡིན་ཏེ། དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་
སེམས་དཔའ་རབ་དུ་དགའ་བའི་རྒྱལ་པོས་སྨྲས་པ། གང་གི་ཚེ་ན་སྤྱོས་པ་དང་། བརྒྱད་པ་དང་། སྨད་པ་དང་། བརྙས་པ་དང་། བརྡེགས་པ་དང་། ཚར་བཅད་ན་བྱང་ཆུབ་སེམས་དཔའ་རབ་ཏུ་དགའ་བ་སྐྱེད་ཅིང་གང་ཟག་དེ་ལ་ཡང་དགེ་བའི་བཤེས་གཉེན་དུ་འདུ་ཤེས་
སྐྱེད་ལ། བཟོད་པར་བྱེད། བཟོད་པའི་མཐུ་སྟོན་ཅིང་རབ་ཏུ་དགའ་བ་སྐྱེས་ནས་སྤྱོ་བར་བྱེད་པ་འདི་སུ། གང་ལ་སྤྱོ་བར་བྱ་ཞེས་དེ་ཆོས་ཉིད་ཀྱི་རྗེས་སུ་འཇུག་པར་བྱེད། ནང་གི་སྟོང་པ་ཉིད་ལ་མོས་ཤིང་ཕྱིའི་སྟོང་པ་ཉིད་ལ་ཐེ་ཙོམ་མེད་པས་བདག་ཏུ་ལྟ་བའང་མི་སྐྱེད་ཅིང་བཟོད་ལ།
རྐང་པ་དང་ལག་པ་ཡོངས་སུ་གཏོང་བ་དང་། མིག་དང་མགོ་ཡོངས་སུ་གཏོང་བ་དང་། ཆུང་མ་དང་། བུ་ཕོ་དང་བུ་མོ་ཡོངས་སུ་གཏོང་བ་དང་། རྒྱལ་སྲིད་ཡོངས་སུ་གཏོང་བས་རབ་ཏུ་དགའ་བ་ཡིན། ལུས་དང་སྲོག་ཡོངས་སུ་གཏོང་བས་དགའ་བ་ཡིན་ཏེ། འཁོར་ལོས་
སྒྱུར་བའི་རྒྱལ་སྲིད་ཐོབ་པས་དགའ་བ་མ་ཡིན་གྱི། ལེགས་པར་བཤད་པ་ཚིགས་སུ་བཅད་པ་གཅིག་ཐོས་པས་ཤིན་ཏུ་དགའ་བ་ཡིན། བརྒྱ་བྱིན་ཐོབ་པས་དགའ་བ་མ་ཡིན་གྱི། གཞན་ཆོས་འཆད་པ་ལ་ཤིན་ཏུ་དགའ་བ་ཡིན། ཚངས་པ་ཐོབ་པས་དགའ་བ་མ་ཡིན་གྱི།

སེམས་ཅན་གཅིག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཞག་ན་རབ་ཏུ་དགའ་བ་ཡིན། སྟོང་གསུམ་རིན་པོ་ཆེས་བཀང་བས་དགའ་བ་མ་ཡིན་གྱི། དེ་བཞིན་གཤེགས་པ་མཐོང་བས་རབ་ཏུ་དགའ་བ་ཡིན་ཏེ། དེ་ནི་གཞར་ཡང་དབང་པོ་ཉམས་པར་མི་འགྱུར་
ཞིང་དགའ་བར་གྱུར་ནས་བྱང་ཆུབ་ཀྱི་ཕྱོགས་ཀྱི་ཆོས་རྣམས་དགའ་ཞིང་མགུ་བའི་སྤྱོད་པ་འདིས་སྒྲུབ་པར་བྱེད་པ་ནི་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་དཔའ་མཐའ་ཡས་མཐོང་བས་སྨྲས་པ། སྐྱེས་བུ་དམ་པ་དག་གང་གི་ཚེ་ན་བྱང་ཆུབ་སེམས་དཔའ་ཆོས་ཐམས་
ཅད་མཐོང་མོད་ཀྱི། བདག་ཏུ་ལྟ་བར་ཡང་མི་ལྟུང་། སངས་རྒྱས་ཀྱི་ཆོས་ཐམས་ཅད་ཤེས་མོད་ཀྱི། རྣམ་པར་རྟོག་པ་སྤྱོད་པ་ཡང་མ་ཡིན། སངས་རྒྱས་ཐམས་ཅད་མཐོང་མོད་ཀྱི། གཟུགས་ལ་དམིགས་པའི་འདུ་ཤེས་ཀྱང་མི་སྐྱེད། སེམས་ཅན་ཐམས་ཅད་མཐོང་མོད་ཀྱི་སེམས་
ཅན་དུ་འདུ་ཤེས་ཀྱང་མི་སྐྱེད། ལས་ཀྱི་རྣམ་པར་སྨིན་པ་ཡོངས་སུ་དག་པའི་ཕྱིར་ཤའི་མིག་གསལ་བར་གྱུར་པ་ཡིན། མངོན་པར་ཤེས་པ་ཐོབ་པས་ལྷའི་མིག་དང་ལྡན་པ་ཡིན། ཉོན་མོངས་པ་ཐམས་ཅད་དང་བྲལ་བས་ཤེས་རབ་ཀྱི་མིག་རྟོགས་པར་ཁོང་དུ་ཆུད་པ་ཡིན། སངས་
རྒྱས་ཀྱི་ཆོས་མ་འདྲེས་པ་སྒྲུབ་པས་སངས་རྒྱས་ཀྱི་སྤྱན་ལ་མོས་པ་ཡིན། སྟོབས་བཅུ་ཡོངས་སུ་རྫོགས་པས་ཆོས་ཀྱི་སྤྱན་སྣང་བ་ཐོབ་པ་ཡིན་ཏེ། རིགས་ཀྱི་བུ་དེ་འདྲ་བའི་ཡེ་ཤེས་མཐོང་བ་ཡོངས་སུ་རྫོགས་པས་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་དཔའ་
མཐའ་ཡས་དམིགས་པར་གནས་པས་སྨྲས་པ། བྱང་ཆུབ་ནི་ཐམས་ཅད་དམིགས་པ་སྟེ། ཐམས་ཅད་མཁྱེན་པའི་ཡེ་ཤེས་སྒྲུབ་པར་འགྱུར་རོ། །དེ་ཅིའི་ཕྱིར་ཞེ་ན། དམིགས་པ་ཐམས་ཅད་ནི་ནང་ན་ཡང་མི་གནས། ཕྱི་རོལ་ན་ཡང་མི་གནས། དབུས་ན་ཡང་མི་གནས་པར་བརྟག་པར་བྱའོ། །
བྱང་ཆུབ་སེམས་དཔའ་དམིགས་པ་ལ་མི་གནས་པ་ནི་ཉོན་མོངས་པ་ལ་དམིགས་པ་དང་། ལས་ལ་དམིགས་པ་དང་། བདུད་ལ་དམིགས་པས་ཉམས་པར་མི་འགྱུར་ཏེ། ལས་དང་། ཉོན་མོངས་པ་དང་། བདུད་ལ་དམིགས་པ་ལས་འདས་པའི་བྱང་ཆུབ་སེམས་དཔའ་ཐམས་ཅད་མཁྱེན་པ་རྟོགས་

སོ། །བྱང་ཆུབ་སེམས་དཔའ་བདུད་ཀྱི་ལྟ་བ་ཡང་དག་པར་འཇོམས་པས་སྨྲས་པ། རིགས་ཀྱི་བུ་བདག་ཏུ་ལྟ་བ་ནི་བདག་ཏུ་ལྟ་བ་ལས་ལྡང་ཞིང་བྱུང་བ་ཡིན། བདུད་ཀྱི་ལས་ནི་ལྟ་བ་ལས་ལྡང་ཞིང་བྱུང་བ་སྟེ། བདག་ཏུ་ལྟ་བ་ཡོངས་སུ་ཤེས་ན་ལྟ་བ་འབྱུང་བར་མི་བྱེད་དོ། །ལྟ་བ་ཡོངས་སུ་ཤེས་ན་ཕུང་
པོ་འབྱུང་བར་མི་བྱེད་དོ། །ཕུང་པོ་ཡོངས་སུ་ཤེས་ན་བདུད་མི་མཐོང་ངོ་། །བདུད་ཀྱི་ཡུལ་ལས་འདའ་བར་བྱ་བའི་ཕྱིར་སྒྲིབ་པ་མེད་པའི་རྣམ་པར་ཐར་པ་ལ་རེག་པར་འགྱུར་རོ། །བྱང་ཆུབ་སེམས་དཔའ་སྒྲིབ་པ་མེད་པའི་རྣམ་པར་ཐར་པ་ཐོབ་ན་ཐམས་ཅད་མཁྱེན་པ་རྟོགས་སོ། །བྱང་ཆུབ་
སེམས་དཔའ་མྱ་ངན་མེད་སྦྱིན་གྱིས་སྨྲས་པ། ལས་ཉེས་པ་བྱེད་པ་ནི་ཕྱིས་འགྱོད་པར་འགྱུར། ལས་ལེགས་པར་བྱེད་པ་ནི་ཕྱིས་མྱ་ངན་བྱེད་པར་མི་འགྱུར་རོ། །དེ་བས་ན་བྱང་ཆུབ་སེམས་དཔས་ལས་ལེགས་པ་བྱེད་པ། ལས་མི་སྨད་པ་བྱེད་པ། ལས་མི་འགྱོད་པ་བྱེད་པ། ལས་
ཁ་ན་མ་ཐོ་བ་མེད་པ་བྱེད་པར་བྱའོ། །སེམས་ཅན་མྱ་ངན་གྱི་ཟུག་རྔུས་ཟུག་པ་རྣམས་ཀྱང་མྱ་ངན་ཞི་བར་བྱ་བ་དང་། ཟུག་རྔུ་དང་བྲལ་བར་བྱ་བའི་ཕྱིར་ཆོས་བཤད་པར་བྱ་སྟེ། དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཐམས་ཅད་མཁྱེན་པ་རྟོགས་སོ། །བྱང་ཆུབ་སེམས་དཔའ་དོན་
ཐམས་ཅད་གྲུབ་པས་སྨྲས་པ། རིགས་ཀྱི་བུ་དག་སྐྱེས་བུ་གང་ཟག་ཚུལ་ཁྲིམས་དང་ལྡན་པའི་སེམས་ཀྱི་སྨོན་པ་འགྲུབ། སྨོན་ལམ་འགྲུབ་པར་འགྱུར་ལ། ཚུལ་ཁྲིམས་ཀྱི་རྩ་བ་ལ་ཡང་བག་བྱེད་པ་རྟེན། བག་བྱེད་པའི་རྩ་བ་ལ་ཡང་བྱང་ཆུབ་ཀྱི་ཕྱོགས་ཀྱི་ཆོས་རྣམས་རྟེན།
བྱང་ཆུབ་ཀྱི་ཕྱོགས་ཀྱི་ཆོས་ཀྱི་རྩ་བ་ལ་ཡང་ཐམས་ཅད་མཁྱེན་པ་རྟེན་ཏོ། །དེ་བས་ན་བྱང་ཆུབ་སེམས་དཔའ་བག་བྱེད་པ་དང་། བྱང་ཆུབ་ཀྱི་ཕྱོགས་ཀྱི་ཆོས་ལ་རྟེན་པ་ནི་ཐམས་ཅད་མཁྱེན་པ་རྟོགས་སོ། །ལྷའི་བུ་ཀུན་ནས་མེ་ཏོག་གིས་སྨྲས་པ། རིགས་ཀྱི་བུ་དག་འདི་ལྟ་སྟེ།
དཔེར་ན་ཤིང་མེ་ཏོག་གིས་བརྒྱན་པ་ནི་འགྲོ་བ་མང་པོའི་ཉེ་བར་འཚོ་བ་ཡིན་ནོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་ཆོས་ཀྱི་མེ་ཏོག་རྒྱས་པ་ནི་འགྲོ་བ་མང་པོའི་ཉེ་བར་འཚོ་བ་ཡིན་ནོ། །རིགས་ཀྱི་བུ་དག་འདི་ལྟ་སྟེ། དཔེར་

ན་ལྷ་རྣམས་ཀྱི་ཤིང་པ་རི་ཡ་ཏྲ་ཀ་ཀོ་བ་དི་ར་མེ་ཏོག་རྒྱས་ན་སུམ་ཅུ་རྩ་གསུམ་གྱི་ལྷའི་བུ་རྣམས་མངོན་པར་འདུ་བར་འགྱུར་རོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་ཆོས་ཀྱི་མེ་ཏོག་རྒྱས་ན་ལྷ་དང་བཅས་པའི་འཇིག་རྟེན་
མངོན་པར་འདུ་བར་འགྱུར་རོ། །རིགས་ཀྱི་བུ་དག་འདི་ལྟ་སྟེ། དཔེར་ན་ལྷའི་ནོར་བུ་རིན་པོ་ཆེ་སྐྱོན་ཐམས་ཅད་དང་བྲལ་ལ་ཡོན་ཏན་ཐམས་ཅད་དང་ལྡན་པ་དེ་བཞིན་དུ། རིགས་ཀྱི་བུ་བྱང་ཆུབ་སེམས་དཔའ་བསམ་པ་ཡོངས་སུ་དག་པ་སྐྱོན་ཐམས་ཅད་དང་བྲལ་ལ་ཡོན་ཏན་ཐམས་ཅད་དང་
ལྡན་པས་ཐམས་ཅད་མཁྱེན་པ་རྟོགས་སོ། །ལྷའི་བུ་མེ་ཏོག་འོད་ཟེར་ཅན་གྱིས་སྨྲས་པ། རིགས་ཀྱི་བུ་འདི་ལྟ་སྟེ། དཔེར་ན་ཉི་མའི་འོད་ཟེར་བཏང་ན་མུན་པ་བསལ་ཅིང་གཟུགས་ཀྱི་རྣམ་པ་ཐམས་ཅད་སྣང་བར་འགྱུར་རོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་ཤེས་
རབ་ཀྱི་སྣང་བའི་འོད་ཟེར་དང་ལྡན་པ་ཡང་གང་གི་ཚེ་ན་ཆོས་ཀྱི་སྣང་བ་གཏོང་བ་དེའི་ཚེ། མ་རིག་པ་དང་གླེན་པའི་མུན་པས་བསྒྲིབས་པའི་སེམས་ཅན་རྣམས་ལ་སྣང་བ་ཆེན་པོ་བྱེད་ཅིང་ཆོས་ཀྱི་རང་བཞིན་ཡང་སྟོན་ཏེ། མུན་པས་ནི་སྣང་བ་ཟིལ་གྱིས་ནོན་པར་མི་འགྱུར་གྱི། སྣང་
བས་ནི་ལམ་རྟོགས་པར་ནུས་པས་བྱང་ཆུབ་སེམས་དཔའ་ལམ་ལ་གནས་ན་སེམས་ཅན་ལམ་ངན་པར་ཞུགས་པའི་རྣམས་ལ་ཡང་དག་པའི་ལམ་སྟོན་ཏེ། བྱང་ཆུབ་སེམས་དཔའ་ལམ་ལ་གནས་ན་ཐམས་ཅད་མཁྱེན་པ་རྟོགས་སོ། །ལྷའི་བུ་མེ་ཏོག་མན་དཱ་ར་བའི་དྲིས་སྨྲས་པ། །
རིགས་ཀྱི་བུ་དག་འདི་ལྟ་སྟེ་དཔེར་ན། མེ་ཏོག་མན་དཱ་ར་བའི་ཁོ་ར་ཁོར་ཡུག་དཔག་ཚད་གཅིག་ཏུ་དྲིས་ཁྱབ་པར་བྱེད་དེ། དྲི་དེ་ཡང་རྣམ་པར་རྟོག་པ་མེད་དོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་གཏོང་བ་དང་། ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་
དང་། ཤེས་རབ་ལ་གནས་པ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཆོས་ཀྱི་དྲིས་ཁྱབ་པར་བྱེད་དེ། དྲི་དེ་ཡང་ཉོན་མོངས་པའི་ནད་ཐམས་ཅད་སེལ་བར་བྱེད་དོ། །དེ་བས་ན་བྱང་ཆུབ་སེམས་དཔའ་ཆོས་ཀྱི་དྲི་དང་ལྡན་ན་ཐམས་ཅད་མཁྱེན་པ་རྟོགས་སོ། །ལྷའི་བུ་ཆོས་ལ་གནས་

པ་རྟག་ཏུ་བརྩོན་པས་སྨྲས་པ། ཀྱེ་གྲོགས་པོ་དག་བྱང་ཆུབ་སེམས་དཔའ་བརྩོན་པས་བྱང་ཆུབ་པར་འགྱུར་གྱི། མི་བརྩོན་པས་ནི་མ་ཡིན་ནོ། །དེ་བས་ན་བྱང་ཆུབ་སེམས་དཔའ་རྟག་པར་བརྩོན་ཞིང་དགེ་བའི་རྩ་བ་ལ་ཆོག་མི་ཤེས་པར་བྱའོ། །དེས་ཆོས་བརྒྱད་ལ་བརྩོན་པར་བྱའོ། །བརྒྱད་པོ་གང་
ཞེ་ན། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་གི་སྦྱོར་བ་ལ་བརྩོན་པར་བྱ་བ་དང་ཚངས་པའི་གནས་བཞི་བསྒྲུབ་པ་ལ་མངོན་པར་ཤེས་པ་ལྔ་ཤེས་ཤིང་རྟོགས་པར་ཁོང་དུ་ཆུད་པའི་ཡེ་ཤེས་དང་། བསྡུ་བའི་དངོས་པོ་བཞིས་སེམས་ཅན་ཡོངས་སུ་སྨིན་པར་བྱེད་པ་སྟེ། བཞི་པོ་གང་ཞེ་ན། སྦྱིན་པ་དང་།
ཚིག་འཇམ་པོ་དང་། དོན་སྤྱད་པ་དང་། དོན་མཚུངས་པར་བྱ་བ་དག་དང་། རྣམ་པར་ཐར་པའི་སྒོ་གསུམ་ལ་བཟོད་པ་ཐོབ་པ་དང་། གཞན་སངས་རྒྱས་ཀྱི་ཆོས་ལ་གཞོག་པ་དང་། བདག་བྱང་ཆུབ་ཀྱི་སེམས་མི་གཏོང་བ་དང་། ཐབས་མཁས་པས་སྔོ་བར་བྱེད་པ་དང་། གུས་པར་བྱས་ཤིང་དམ་
པའི་ཆོས་ཡོངས་སུ་འཛིན་པ་སྟེ། ཆོས་བརྒྱད་པོ་དེ་དག་ལ་བརྩོན་པའི་བྱང་ཆུབ་སེམས་དཔས་ཐམས་ཅད་མཁྱེན་པ་རྟོགས་སོ། །དེ་ནས་འཇམ་དཔལ་གཞོན་ནུར་གྱུར་པས་སྐྱེས་བུ་དམ་པ་དེ་དག་དང་། ལྷའི་བུ་དེ་དག་ལ་འདི་སྐད་ཅེས་སྨྲས་སོ། །ཀྱེ་གྲོགས་པོ་དག་བྱང་ཆུབ་སེམས་
དཔའ་གང་མ་འབྲེལ་པ་དང་། མི་བརྩོན་པ་དེས་ཐམས་ཅད་མཁྱེན་པ་རྟོགས་སོ། །དེ་ཅིའི་ཕྱིར་ཞེ་ན། མ་འབྲེལ་ཅེས་བྱ་བ་ནི་ཁམས་གསུམ་དང་ངོ་། །མི་བརྩོན་ཞེས་བྱ་བ་ནི་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་ཐམས་ཅད་ལའོ། །མ་འབྲེལ་ཅེས་བྱ་བ་ནི་ནང་
དང་ངོ་། །མི་བརྩོན་ཞེས་བྱ་བ་ནི་ཕྱི་ལའོ། །མ་འབྲེལ་ཅེས་བྱ་བ་ནི་ཉན་ཐོས་ཀྱི་ས་དང་ངོ་། །མི་བརྩོན་ཞེས་བྱ་བ་ནི་རང་སངས་རྒྱས་ཀྱི་ས་ལའོ། །མ་འབྲེལ་ཅེས་བྱ་བ་ནི་འཁོར་བ་ན་སྤྱོད་པའི་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང་ངོ་། །མི་བརྩོན་ཞེས་བྱ་བ་ནི་བྱིས་པ་ལྟ་བུ་སོ་
སོའི་སྐྱེ་བོའི་ཆོས་ཐམས་ཅད་ལའོ། །མ་འབྲེལ་ཅེས་བྱ་བ་ནི་མིང་དང་ངོ་། །མི་བརྩོན་ཞེས་བྱ་བ་ནི་གཟུགས་ལའོ། །མ་འབྲེལ་ཅེས་བྱ་བ་ནི་རྒྱུ་དང་ངོ་། །མི་བརྩོན་ཞེས་བྱ་བ་ནི་འབྲས་བུ་ལའོ། །མ་འབྲེལ་ཅེས་བྱ་བ་ནི་ལྟ་བའི་རྣམ་པ་དང་ངོ་། །མི་བརྩོན་ཞེས་བྱ་བ་ནི་ལྟ་བ་དང་

བྲལ་བ་ལའོ། །མ་འབྲེལ་ཅེས་བྱ་བ་ནི་ཆགས་པ་དང་ངོ་། །མི་བརྩོན་ཞེས་བྱ་བ་ནི་ཁོང་ཁྲོ་བ་ལའོ། །མ་འབྲེལ་ཅེས་བྱ་བ་ནི་ངར་འཛིན་པ་དང་ངོ་། །མི་བརྩོན་ཞེས་བྱ་བ་ནི་བདག་གིར་འཛིན་པ་ལའོ། །མ་འབྲེལ་ཅེས་བྱ་བ་ནི་སེར་སྣ་དང་ངོ་། །མི་བརྩོན་ཞེས་བྱ་བ་ནི་སྦྱིན་
པའི་སྙེམས་པ་ལའོ། །མ་འབྲེལ་ཅེས་བྱ་བ་ནི་ངང་ཚུལ་ངན་པ་དང་ངོ་། །མི་བརྩོན་ཞེས་བྱ་བ་ནི་ཚུལ་ཁྲིམས་སྙེམས་པ་ལའོ། །མ་འབྲེལ་ཅེས་བྱ་བ་ནི་གནོད་སེམས་དང་ངོ་། །མི་བརྩོན་ཞེས་བྱ་བ་ནི་བཟོད་པའི་སྙེམས་པ་ལའོ། །མ་འབྲེལ་ཅེས་བྱ་བ་ནི་ལེ་ལོ་དང་ངོ་། །མི་བརྩོན་ཞེས་
བྱ་བ་ནི་བརྩོན་འགྲུས་སྙེམས་པ་ལའོ། །མ་འབྲེལ་ཅེས་བྱ་བ་ནི་དྲན་པ་ཉམས་པ་དང་ངོ་། །མི་བརྩོན་ཞེས་བྱ་བ་ནི་བསམ་གཏན་སྙེམས་པ་ལའོ། །མ་འབྲེལ་ཅེས་བྱ་བ་ནི་ཤེས་རབ་འཆལ་པ་དང་ངོ་། །མི་བརྩོན་ཞེས་བྱ་བ་ནི་ཤེས་རབ་སྙེམས་པ་ལའོ། །མ་འབྲེལ་ཅེས་བྱ་བ་ནི་དགེ་
བ་དང་ངོ་། །མི་བརྩོན་ཞེས་བྱ་བ་ནི་དགེ་བའི་རྩ་བ་སྒྲོ་འདོགས་པ་ལའོ། །མ་འབྲེལ་ཅེས་བྱ་བ་ནི་འཇིག་རྟེན་གྱི་ཆོས་དང་ངོ་། །མི་བརྩོན་ཞེས་བྱ་བ་ནི་འཇིག་རྟེན་ལས་འདས་པའི་ཆོས་མངོན་པར་བྱ་བར་ཆགས་པ་ལའོ། །མ་འབྲེལ་ཅེས་བྱ་བ་ནི་འདུས་བྱས་དང་ངོ་། །མི་བརྩོན་ཞེས་
བྱ་བ་ནི་འདུས་མ་བྱས་པའི་ཆོས་ལ་ཡོངས་སུ་རྟོག་པ་ལའོ། །མ་འབྲེལ་ཅེས་བྱ་བ་ནི་ཁ་ན་མ་ཐོ་བ་དང་བཅས་པ་དང་ངོ་། །མི་བརྩོན་ཞེས་བྱ་བ་ནི་ཁ་ན་མ་ཐོ་བ་མེད་པའི་ཆོས་སྒྲོ་འདོགས་པ་ལའོ། །མ་འབྲེལ་ཅེས་བྱ་བ་ནི་ཟག་པ་དང་བཅས་པ་དང་ངོ་། །མི་བརྩོན་ཞེས་བྱ་བ་ནི་ཟག་པ་
མེད་པའི་ཟད་པའི་ཆོས་སུ་སྙེམས་པ་ལའོ། །ཀྱེ་གྲོགས་པོ་དག་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་འབྲེལ་པ་དང་། མ་འབྲེལ་པར་ལྟ་བ་དང་བྲལ་བས་ཐམས་ཅད་མཁྱེན་པ་རྟོགས་མོད་ཀྱི། ཡང་ཀྱེ་གྲོགས་པོ་དག་ཐམས་ཅད་མཁྱེན་པ་ནི་མི་རྟོགས་
སོ། །དེ་ཅིའི་ཕྱིར་ཞེ་ན། བྱེད་པས་ཐམས་ཅད་མཁྱེན་པ་རྟོགས་པར་མི་འགྱུར་རོ། །དེ་ཅིའི་ཕྱིར་ཞེ་ན། བྱེད་པ་དང་བྲལ་བ་ནི་ཐམས་ཅད་མཁྱེན་པ་ཡིན་ཏེ། ཐམས་ཅད་མཁྱེན་པ་ལ་རྟོགས་པར་བྱེད་པ་སུ་ཡང་མེད་དོ། །ཐམས་ཅད་མཁྱེན་པ་ནི་གཟུགས་ཀྱིས་ཀྱང་མི་རྟོགས་

ཚོར་བས་མ་ཡིན་འདུ་ཤེས་ཀྱིས་ཀྱང་མ་ཡིན། འདུ་བྱེད་ཀྱིས་ཀྱང་མ་ཡིན། རྣམ་པར་ཤེས་པས་མི་རྟོགས་སོ། །ཐམས་ཅད་མཁྱེན་པ་ནི་ཆོས་ཀྱིས་ཀྱང་མི་རྟོགས། ཆོས་མ་ཡིན་པས་ཀྱང་མི་རྟོགས་སོ། །ཐམས་ཅད་མཁྱེན་པ་ནི་སྦྱིན་པས་ཀྱང་མི་རྟོགས་སོ། །དེ་ཅིའི་ཕྱིར་ཞེ་ན།
སྦྱིན་པ་ཉིད་ཐམས་ཅད་མཁྱེན་པའོ། །ཐམས་ཅད་མཁྱེན་པ་ནི་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱིས་ཀྱང་མི་རྟོགས་སོ། །དེ་ཅིའི་ཕྱིར་ཞེ་ན། ཤེས་རབ་ཉིད་ཐམས་ཅད་མཁྱེན་པའོ། །ཡང་ཀྱེ་གྲོགས་པོ་དག་
ཐམས་ཅད་མཁྱེན་པ་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་ནོ། །དེ་ཅིའི་ཕྱིར་ཞེ་ན། ཀྱེ་གྲོགས་པོ་དག་ཐམས་ཅད་མཁྱེན་པ་ནི་དུས་གསུམ་ལས་འདས་པའི་ཕྱིར་རོ། །ཡང་ཀྱེ་གྲོགས་པོ་དག་ཐམས་ཅད་མཁྱེན་པ་ནི་མིག་གི་རྣམ་པར་ཤེས་པས་
རྣམ་པར་ཤེས་པར་བྱ་བ་མ་ཡིན་ནོ། །ཀྱེ་གྲོགས་པོ་དག་ཐམས་ཅད་མཁྱེན་པ་ནི་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཀྱེ་གྲོགས་པོ་དག་ཐམས་ཅད་མཁྱེན་པ་ནི་ཡུལ་ཐམས་ཅད་
ལས་འདས་པའོ། །ཀྱེ་གྲོགས་པོ་དག་ཐམས་ཅད་མཁྱེན་པ་རྟོགས་པར་འདོད་པས་ཐམས་ཅད་མཁྱེན་པ་ཇི་ལྟར་གནས་པ་དེ་བཞིན་དུ་གནས་པར་བྱའོ། །སྨྲས་པ། ཐམས་ཅད་མཁྱེན་པ་ཇི་ལྟར་གནས་པ་ལགས། སྨྲས་པ། གང་ཆོས་ཐམས་ཅད་ལ་མི་གནས་པ་དེ་
ནི་ཐམས་ཅད་མཁྱེན་པའོ། །ཆོས་ཐམས་ཅད་ལ་མཉམ་པ་ཉིད་དེ་ནི་ཐམས་ཅད་མཁྱེན་པ་སྟེ། སོ་སོའི་སྐྱེ་བོའི་ས་མཉམ་པ་ཉིད་དང་། སངས་རྒྱས་ཀྱི་ཆོས་སུ་མཉམ་ཞིང་དེ་ལྟར་ཆོས་ཐམས་ཅད་མཉམ་པ་དེ་ནི་ཐམས་ཅད་མཁྱེན་པའོ། །བྱང་ཆུབ་སེམས་དཔས་འབྱུང་བ་ཆེན་
པོ་བཞི་ལས་བྱུང་བའི་ལུས་དེ་ཉིད་མ་གཏོགས་པར་གཞན་དུ་ཐམས་ཅད་མཁྱེན་པ་བཙལ་བར་མི་བྱའོ། །དེ་ཅིའི་ཕྱིར་ཞེ་ན། ལུས་དེ་ནི་དངོས་པོ་མེད་པའོ། །ལུས་ཞེས་བྱ་བ་དེ་ནི་དགེ་བ་དང་མི་དགེ་བའི་ཆོས་ལ་ལྷུན་གྱིས་གྲུབ་པའོ། །ལུས་ཞེས་བྱ་བ་དེ་ནི་བདག་མ་ཡིན་པ་དང་

བདག་མེད་པའོ། །ལུས་ཞེས་བྱ་བ་དེ་ནི་མ་བྱུང་བ་ཡང་དག་པར་མ་བྱུང་བ་སྟེ། དེ་ལ་གདགས་པ་མེད་དོ། །གང་དེ་ལ་གདགས་པ་དེ་ཡང་མ་བྱུང་བའོ། །གང་དེ་མཐོང་བ་དེའང་མ་བྱུང་བའོ། །གང་མ་བྱུང་བ་དེ་ནི་ཡང་དག་པར་མ་བྱུང་བའོ། །གང་ཡང་དག་པར་
མ་བྱུང་བ་དེ་ནི་མི་ཤེས་པ་དང་མི་རྟོགས་པའོ། །གང་མི་ཤེས་པ་དང་མི་རྟོགས་པ་དེ་ནི་ཐམས་ཅད་མཁྱེན་པའོ། །བསྟན་པ་འདི་བསྟན་པའི་ཚེ་ལྷའི་བུ་ཉིས་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷའི་བུ་ཁྲི་ཉིས་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་སེམས་སྐྱེས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པའི་ཕུང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཚུར་སྤྱོན། དེ་བཞིན་གཤེགས་པའི་སྤྱན་སྔར་དོང་ལ། བྱང་ཆུབ་སེམས་དཔས་ཇི་ལྟ་བུར་བྱ་བ་དེ་བཞིན་
གཤེགས་པ་ལ། མངོན་སུམ་དུ་ཞུའོ། །དེ་ནས་འཇམ་དཔལ་གཞོན་ནུར་གྱུར་པས་སའི་ཕྱོགས་དེ་ཉིད་དུ། བཅོམ་ལྡན་འདས་ཤཱཀྱ་ཐུབ་པའི་ཁ་དོག་དང་། དབྱིབས་དང་། ཆུ་ཞེང་འདྲ་བའི་དེ་བཞིན་གཤེགས་པ་ཞིག་མངོན་པར་སྤྲུལ་ཏོ། །དེ་ནས་འཇམ་དཔལ་གཞོན་ནུར་གྱུར་
པས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པའི་ཕུང་པོ་ལ་འདི་སྐད་ཅེས་སྨྲས་སོ། །རིགས་ཀྱི་བུ་བྱང་ཆུབ་སེམས་དཔས་ཇི་ལྟ་བུར་བྱ་བ་དེ་བཞིན་གཤེགས་པ་མངོན་དུ་བཞུགས་པ་འདི་ལ་ཞུས་ཤིག །དེ་ནས་སྤྲུལ་པའི་དེ་བཞིན་གཤེགས་པ་དེ་ལ་བྱང་ཆུབ་སེམས་
དཔའ་སེམས་དཔའ་ཆེན་པོ་སྤོབས་པའི་ཕུང་པོས་བཅོམ་ལྡན་འདས་བྱང་ཆུབ་སེམས་དཔས་ཇི་ལྟ་བུར་བགྱི་ཞེས་དེ་སྐད་གསོལ་པ་དང་། དེས་བཀའ་སྩལ་པ། ང་ཅི་འདྲ་བ་ལྟར་བྱང་ཆུབ་སེམས་དཔས་ཀྱང་དེ་བཞིན་དུ་བྱའོ། །གསོལ་པ། འོ་ན་བཅོམ་ལྡན་འདས་ཇི་འདྲ།
བཅོམ་ལྡན་འདས་དེས་བཀའ་སྩལ་པ། སྦྱིན་པ་མ་སྤྱད། ཚུལ་ཁྲིམས་མ་སྤྱད། བཟོད་པ་མ་སྤྱད། བརྩོན་འགྲུས་མ་སྤྱད། བསམ་གཏན་མ་སྤྱད། ཤེས་རབ་མ་སྤྱད། འདོད་པའི་ཁམས་སུ་མ་སྤྱད། གཟུགས་ཀྱི་ཁམས་སུ་མ་སྤྱད། གཟུགས་མེད་པའི་ཁམས་སུ་མ་སྤྱད། ལུས་ཀྱིས་མ་

སྤྱད། ངག་གིས་མ་སྤྱད། ཡིད་ཀྱིས་མ་སྤྱད་པ་སྟེ། ཐམས་ཅད་དུ་མ་སྤྱད་ཅིང་མ་ཞུགས་པའོ། །རིགས་ཀྱི་བུ་དེ་ཇི་སྙམ་དུ་སེམས། ཇི་སྤྲུལ་པས་སྤྱད་དམ། གསོལ་པ། བཅོམ་ལྡན་འདས་སྤྲུལ་པས་མ་སྤྱད་དོ། །བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔས་དེ་ལྟར་བྱའོ། །
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པའི་ཕུང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དེ་བཞིན་གཤེགས་པ་འདི་སྤྲུལ་པ་མ་ཡིན་གྲང་། དེས་སྨྲས་པ། རིགས་ཀྱི་བུ་ཆོས་ཐམས་ཅད་ནི་སྤྲུལ་པའི་རང་བཞིན་དུ་ངེས་ཏེ།
སྒྱུ་མའི་མཚན་ཉིད་ལས་མི་ལྡོག་གོ། །སྨྲས་པ། འཇམ་དཔལ་དེ་བཞིན་ནོ། །ཆོས་ཐམས་ཅད་ནི་སྤྲུལ་པའི་རང་བཞིན་ཅན་ཏེ། སྒྱུ་མའི་མཚན་ཉིད་ལས་མི་ལྡོག་གོ། །སྨྲས་པ། ཆོས་ཐམས་ཅད་སྤྲུལ་པའི་རང་བཞིན་ཅན་ཡིན་ན། ཁྱོད་ཅིའི་ཕྱིར་དེ་བཞིན་གཤེགས་པ་འདི་སྤྲུལ་པ་མ་ཡིན་
གྲང་སྙམ་དུ་བྱེད་པར་གྱུར། སྨྲས་པ། སུས་སྤྲུལ། སྨྲས་པ། བདག་གིས་ལས་ཀྱི་རྣམ་པར་སྨིན་པ་ཡོངས་སུ་དག་པས་སྤྲུལ་གྱིས། འདི་ལ་རང་བཞིན་གྱིས་བདག་གམ། སེམས་ཅན་ནམ། སྲོག་གམ། གང་ཟག་དག་སངས་རྒྱས་སུ་གནས་པའམ། སོ་སོའི་སྐྱེ་བོར་
གནས་པ་ནི་མ་ཡིན་ནོ། །དེ་ནས་དེ་བཞིན་གཤེགས་པའི་སྐུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པའི་ཕུང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གང་ལ་བསླབས་ནས་བྱང་ཆུབ་ཐོབ་པར་གྱུར། བཀའ་སྩལ་པ། རིགས་ཀྱི་བུ་མི་སློབ་པ་ནི་
བྱང་ཆུབ་སེམས་དཔའི་སློབ་པའོ། །མི་སྡོམ་པ་ནི་བྱང་ཆུབ་སེམས་དཔའི་སློབ་པའོ། །མི་འཇིགས་པ་ནི་བྱང་ཆུབ་སེམས་དཔའི་སློབ་པའོ། །མི་རྟོག་པ་ནི་བྱང་ཆུབ་སེམས་དཔའི་སློབ་པའོ། །མི་དཔྱོད་པ་ནི་བྱང་ཆུབ་སེམས་དཔའི་སློབ་པའོ། །རིགས་ཀྱི་བུ་གནས་མེད་པ་དང་།
མི་སྙེམས་པ་དང་། མ་སྤྲོས་པ་དང་། མི་ལེན་པ་དང་། མི་གཏོང་བ་དང་། མི་རྒྱུ་བ་དང་། ཡི་གེ་མེད་པ་དང་། མི་སྐྱེ་བ་དང་། མི་འགག་པ་དང་། མ་འོངས་པ་དང་། མ་སོང་བ་དང་། མི་གནས་པ་དང་། མཚན་མ་མེད་པ་དང་། དངོས་པོ་མེད་པ་དང་། མི་དམིགས་

དང་། འདུ་ཤེས་ཐམས་ཅད་དང་བྲལ་བ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སློབ་པ་སྟེ། གང་དེ་ལྟར་སློབ་པ་དེ་དག་ནི་ཡང་དག་པར་སློབ་པའོ། །གང་དེ་ལྟར་སློབ་པ་དེ་དག་ནི་གང་ལའང་ཞེ་སྡང་བ་མེད་དོ། །གང་དེ་ལྟར་སློབ་པ་དེ་དག་ནི་གང་དུའང་
ཆགས་པ་མེད་དོ། །གང་དེ་ལྟར་སློབ་པ་དེ་དག་ནི་གང་དུ་ཡང་ཞེན་པ་མེད་དོ། །གང་ལས་ཀྱང་གྲོལ་བ་མེད་དོ། །གང་དེ་ལྟར་སློབ་པ་དེ་དག་ནི་གང་དུ་ཡང་འདོད་ཆགས་པ་མེད་དོ། །གང་ནས་ཀྱང་འདོད་ཆགས་དང་བྲལ་བ་མེད་དོ། །ཞེ་སྡང་མེད་དོ། །གཏི་མུག་མེད་དོ། །གང་དེ་ལྟར་
སློབ་པ་དེ་དག་ནི་སློབ་འདོད་པ་ཞེས་བྱའོ། །གང་སློབ་འདོད་པ་དེ་དག་ནི་འགྲོ་བ་གང་དུ་ཡང་མི་འགྲོའོ། །མི་འོང་ངོ་། །དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ང་ཇི་ལྟ་
བ་བཞིན་དུ་འཁོར་བ་ཡང་མེད། མྱ་ངན་ལས་འདའ་བ་ཡང་མེད། གཏོང་བ་ཡང་མེད། ལེན་པ་ཡང་མེད། ཚུལ་ཁྲིམས་ཀྱང་མེད། ངང་ཚུལ་ངན་པ་ཡང་མེད། བཟོད་པ་ཡང་མེད། གནོད་སེམས་ཀྱང་མེད། བརྩོན་འགྲུས་ཀྱང་མེད། ལེ་ལོ་ཡང་མེད། བསམ་
གཏན་ཡང་མེད། གཡེང་བ་ཡང་མེད། ཤེས་རབ་ཀྱང་མེད། ཤེས་རབ་འཆལ་པ་ཡང་མེད། སློབ་པ་ཡང་མེད། མི་སློབ་པ་ཡང་མེད། སྤྱོད་པ་ཡང་མེད། མི་སྤྱོད་པ་ཡང་མེད་ཅིང་། ང་ཇི་ལྟ་བ་བཞིན་དུ་ཐོབ་པ་ཡང་མེད། མ་ཐོབ་པ་ཡང་མེད། མངོན་པར་བྱ་བ་ཡང་
མེད། བྱང་ཆུབ་ཀྱང་མེད། སངས་རྒྱས་ཀྱི་ཆོས་རྣམས་ཀྱང་མེད། བདག་ཏུ་འདུ་ཤེས་པ་ཡང་མེད། སེམས་ཅན་དུ་འདུ་ཤེས་པ་ཡང་མེད། སྲོག་ཏུ་འདུ་ཤེས་པ་ཡང་མེད། གང་ཟག་ཏུ་འདུ་ཤེས་པ་ཡང་མེད། ཆོས་སུ་འདུ་ཤེས་པ་ཡང་མེད། འདུ་ཤེས་པ་ཉིད་ཀྱང་མེད། འདུ་ཤེས་
མེད་པའང་མ་ཡིན་པར་ངའི་རྗེས་སུ་བསླབ་པར་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་ཐམས་ཅད་ནི་སྒྱུ་མའི་མཚན་ཉིད་ཀྱི་རང་བཞིན་ཡིན་པ་དང་། ཐ་དད་པར་གྱུར་པ་མེད་པས་མི་འགྱུར་བའོ། །རིགས་ཀྱི་བུ་ཆོས་ཐམས་ཅད་ནི་སོ་སོ་ཐ་དད་པ་མེད་པས་གཉིས་སུ་མེད་པའོ།

རིགས་ཀྱི་བུ་ཆོས་ཐམས་ཅད་ནི་མིག་གི་ལམ་ལས་འདས་པས་བལྟར་མི་སྣང་བའོ། །རིགས་ཀྱི་བུ་ཆོས་ཐམས་ཅད་ནི་ཁྱད་པར་མེད་པའི་ཕྱིར་མཉམ་པའོ། །རིགས་ཀྱི་བུ་ཆོས་ཐམས་ཅད་ནི་གཡོ་བ་མེད་ཅིང་བྱེད་པ་མེད་པའི་ཕྱིར་གླེན་པ་སྟེ། དེ་དག་ལ་གདགས་པ་མེད་དོ། །གདགས་པ་
མེད་པའི་ཆོས་རྣམས་ནི་ཤིན་ཏུ་མ་སྐྱེས་པའོ། །གང་དེ་ལྟར་མོས་པ་དེ་དག་ནི་གྲོལ་བས་མི་སྙེམས། སྤྱོད་པས་མི་སྙེམས། བྱང་ཆུབ་ཀྱིས་མི་སྙེམས་སོ། །རིགས་ཀྱི་བུ་དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནི་འདི་འདྲ་བའི་སློབ་པ་དང་། སྤྱོད་པ་བཤད་པའི་
ཚེ་མི་འཇིགས། མི་དངང་། སྐྲག་པར་མི་འགྱུར་ཏེ། དེ་ནི་བྱང་ཆུབ་སེམས་དཔའ་ཞེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་ནམ་མཁའི་དབྱིངས་ནི་མེས་མི་འཇིགས། རླུང་གིས་མི་འཇིགས། ཆར་པས་མི་འཇིགས། ཐན་པས་མི་འཇིགས། རྡུལ་གྱིས་མི་འཇིགས།
དུ་བས་མི་འཇིགས། སྤྲིན་གྱི་ཕུང་པོས་མི་འཇིགས། གློག་གིས་མི་འཇིགས་སོ། །དེ་ཅིའི་ཕྱིར་ཞེ་ན། ནམ་མཁའི་དབྱིངས་ནི་གཟུང་དུ་མེད་པའི་ཕྱིར་རོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔས་ཀྱང་ཆོས་ཐམས་ཅད་ཀྱིས་མི་འཇིགས་པར་བྱའོ། །བདེ་བ་དང་
སྡུག་བསྔལ་བ་ཐམས་ཅད་ལ་མི་བསམ་པར་བྱ་སྟེ། བྱང་ཆུབ་སེམས་དཔའ་སེམས་ནམ་མཁའ་དང་མཚུངས་པས་བདུད་ཀྱི་སྡེ་ལས་རྒྱལ་བར་ནུས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནུས་སོ། །སེམས་ཅན་རྣམས་
ཀྱི་དོན་བྱེད་ནུས་སོ། །དེ་ནས་དེ་བཞིན་གཤེགས་པ་སྤྲུལ་པ་དེས་དེ་སྐད་གསུངས་ནས། དེ་ཉིད་དུ་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སྤོབས་པའི་ཕུང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དེ་བཞིན་གཤེགས་པ་
དེ་གར་གཤེགས། སྨྲས་པ། གང་ནས་གཤེགས་པར་རོ། །སྨྲས་པ། འོ་ན་དེ་གང་ནས་གཤེགས། སྨྲས་པ། གང་དུ་གཤེགས་པ་ནས་སོ། །སྨྲས་པ། འཇམ་དཔལ་སྤྲུལ་པ་ནི་སོང་བ་ཡང་མེད། འོང་བ་ཡང་མེད་དོ། །སྨྲས་པ། རིགས་ཀྱི་བུ་ཇི་ལྟར་སྤྲུལ་པ་སོང་

བ་ཡང་མེད། འོང་བ་ཡང་མེད་པ་དེ་བཞིན་དུ་ཆོས་ཐམས་ཅད་ཀྱང་དེའི་འགྲོས་ཅན་ཉིད་དོ། །སེམས་ཅན་ཐམས་ཅད་ཀྱང་དེའི་འགྲོས་ཅན་ཉིད་དོ། །སྨྲས་པ། འཇམ་དཔལ་ཆོས་ཐམས་ཅད་ཇི་ལྟ་བུའི་འགྲོས་ཅན་ལགས། སྨྲས་པ། རང་བཞིན་གནས་པའི་འགྲོས་ཅན་ནོ། །
སྨྲས་པ། ཡང་སེམས་ཅན་ཐམས་ཅད་ཇི་ལྟ་བུའི་འགྲོས་ཅན་ལགས། སྨྲས་པ། ལས་ཀྱི་རྣམ་པར་སྨིན་པ་ཇི་ལྟ་བུའི་འགྲོས་ཅན་པ་དེ་བཞིན་ནོ། །སྨྲས་པ། འཇམ་དཔལ་འོ་ན་ཆོས་ཐམས་ཅད་ལས་ཀྱི་རྣམ་པར་སྨིན་པ་མ་མཆིས་པ་མ་ལགས་སམ། སྨྲས་པ། རིགས་ཀྱི་བུ་ཆོས་ཉིད་
ལ་ནི་ལས་ཀྱི་རྣམ་པར་སྨིན་པ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་ཆོས་ཉིད་ཀྱི་རྗེས་སུ་འཇུག་པའི་ཕྱིར་རོ། །སྨྲས་པ། འོ་ན་ཇི་ལྟར་ན་ལས་ཀྱི་རྣམ་པར་སྨིན་པ་ཇི་ལྟ་བུའི་འགྲོས་ཅན་པ་དེ་བཞིན་པ་ལགས། སྨྲས་པ། ལས་དེ་ཇི་ལྟ་བ་རྣམ་པར་སྨིན་པ་ཡང་དེ་བཞིན། དེའི་
འགྲོ་བ་ཡང་དེ་བཞིན་ནོ། །སྨྲས་པ། འཇམ་དཔལ་ལས་ཇི་ལྟ་བུ་ལགས། རྣམ་པར་སྨིན་པ་ཇི་ལྟ་བུ་ལགས། འགྲོ་བ་ཇི་ལྟ་བུ་ལགས། སྨྲས་པ། དེ་བཞིན་ཉིད་ཇི་ལྟ་བར་ལས་ཀྱང་དེ་བཞིན། རྣམ་པར་སྨིན་པ་ཡང་དེ་བཞིན། འགྲོ་བ་ཡང་དེ་བཞིན་ནོ། །སྨྲས་པ།
འཇམ་དཔལ་དེ་བཞིན་ཉིད་ལ་ནི་ལས་ཀྱང་མ་མཆིས། རྣམ་པར་སྨིན་པ་ཡང་མ་མཆིས། འགྲོ་བ་ཡང་མ་མཆིས་སོ། །སྨྲས་པ། རིགས་ཀྱི་བུ་ཇི་ལྟར་དེ་བཞིན་ཉིད་ལ་ལས་ཀྱང་མེད། རྣམ་པར་སྨིན་པ་ཡང་མེད། འགྲོ་བ་ཡང་མེད་པ་ལྟར་ལས་ཀྱི་རྣམ་པར་སྨིན་པའི་འགྲོ་བ་
ཡང་དེ་བཞིན་དུ་ཤེས་པར་བྱའོ། །ལས་ཀྱི་རྣམ་པར་སྨིན་པའི་འགྲོ་བ་ནི་འོང་བ་མེད་པ་ཅན་འགྲོ་བ་མེད་པ་ཅན་ཡིན་ཏེ། དེ་ནི་དེ་བཞིན་ཉིད་ཀྱི་འགྲོས་ལས་འདའ་བར་མི་འགྱུར་རོ། །བསྟན་པ་འདི་བསྟན་པའི་ཚེ་སངས་རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་
པ་དགའ་བོ་དང་། ཉན་ཐོས་ཆེན་པོ་གཞན་དག་ཀྱང་། བཅོམ་ལྡན་འདས་ཤཱཀྱ་ཐུབ་པའི་སྤྱན་སྔ་ན་བསྟན་པ་འདི་ལ་ཉན་ཏོ།། །།བམ་པོ་གཉིས་པ། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཉིད་ནི་

གཅིག་པ་ཁོ་ན་ལགས་ན། སྐྱེས་བུ་དམ་པ་སྐྱེས་བུ་ཆེན་པོ་དེ་དག་བརྗོད་པ་སྣ་ཚོགས་ཀྱིས་སྟོན་ཀྱང་ཆོས་ཉིད་དང་ཡང་མི་འགལ་བར་བགྱིད་པ་ངོ་མཚར་ཏོ། །བཅོམ་ལྡན་འདས་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེ་བར་འགྱུར། བཅོམ་ལྡན་
འདས་ཀྱིས་བཀའ་སྩལ་པ། ཤཱ་རིའི་བུ་བྱང་ཆུབ་སེམས་དཔའ་དག་ནི་དེ་ལྟར་མ་ཆགས་པའི་སློབ་པ་ལ་སློབ་ཅིང་མི་ཆགས་བཞིན་དུ་སྟོན་ཏེ། ཤཱ་རིའི་བུ་ས་བོན་ཇི་ལྟ་བ་བཞིན་སྐྱེད་ཀྱང་དེ་བཞིན་ནོ། །ཤཱ་རིའི་བུ་དེ་དང་འདྲ་བར་བྱང་ཆུབ་སེམས་དཔའ་རྣམས་ཀྱི་བསླབ་པ་ཇི་ལྟ་བ་དེ་
བཞིན་དུ་དེ་དག་གི་ཡེ་ཤེས་སོ། །དེ་བཞིན་དུ་དེ་དག་གི་སྟོན་པའོ། །ཤཱ་རིའི་བུ་ཁྱོད་ཀྱིས་བསླབ་པ་ཇི་ལྟ་བུ་ལ་བསླབས་པ་ཁྱོད་ཀྱི་ཡེ་ཤེས་ཀྱང་དེ་བཞིན་ནོ། །སྤོབས་པ་ཡང་དེ་དང་འདྲ་བར་ཁྱོད་ཀྱིས་ཐོབ་བོ། །བྱང་ཆུབ་སེམས་དཔའ་འོད་བཀོད་པས་གསོལ་པ། བཅོམ་ལྡན་འདས་
ཉན་ཐོས་ཀྱི་བསླབ་པ་ཇི་ལྟ་བུ་ལགས། བྱང་ཆུབ་སེམས་དཔའི་བསླབ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉན་ཐོས་ཀྱི་བསླབ་པ་ནི་ཚད་ཡོད་པ། བྱང་ཆུབ་སེམས་དཔའི་བསླབ་པ་ནི་ཚད་མེད་པ་སྟེ། རིགས་ཀྱི་བུ་ཇི་ལྟར་ཉན་ཐོས་ཀྱི་
བསླབ་པ་ཚད་ཡོད་ལ་ཆགས་པ་དང་བཅས་པ་དེ་བཞིན་དུ་དེའི་ཡེ་ཤེས་ཀྱང་ཚད་ཡོད་ལ་ཆགས་པ་དང་བཅས་པའོ། །རིགས་ཀྱི་བུ་ཇི་ལྟར་བྱང་ཆུབ་སེམས་དཔའི་བསླབ་པ་ཚད་མེད་ལ་ཆགས་པ་མེད་པ་དེ་བཞིན་དུ་དེའི་ཡེ་ཤེས་ཀྱང་ཚད་མེད་ལ་ཆགས་པ་མེད་པའོ། །དེ་ནས་བཅོམ་
ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་བཀོད་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་འདི་ནས་སུ་ཡང་ཆོས་ཉན་པ་མི་སྤོང་བར་བགྱི་ན། སྐྱེས་བུ་དམ་པ་དེ་དག་འདིར་མཆི་བར་མཚན་མ་ཞིག་མཛད་དུ་གསོལ། དེ་ཅིའི་སླད་དུ་ཞེ་ན།
འཇམ་དཔལ་གཞོན་ནུར་གྱུར་པ་ནི་ཟབ་མོ་ལ་མོས་པས་དེའི་ཆོས་བཤད་པ་ཡང་ཟབ་མོ་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་འོང་བར་བྱ་བའི་ཕྱིར་མཚན་མ་མཛད་དོ། །དེ་ནས་འཇམ་དཔལ་གཞོན་ནུར་གྱུར་པ་སྐྱེས་བུ་དམ་པ་ཉི་ཤུ་རྩ་ལྔ་པོ་

དེ་དག་དང་འགྲོགས། ལྷའི་འཁོར་དེ་དག་དང་འགྲོགས་ཏེ། བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་བཀོད་པས་འཇམ་
དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཅིའི་ཕྱིར་དེ་བཞིན་གཤེགས་པའི་འཁོར་ནས་བྱུང་ལ་ཕྱོགས་གཅིག་ཏུ་སོང་སྟེ་ཆོས་སྟོན། སྨྲས་པ། རིགས་ཀྱི་བུ་སངས་རྒྱས་བཅོམ་ལྡན་འདས་དག་ནི་མཉེས་པར་དཀའ་སྟེ། གཏམ་ཐམས་ཅད་ཀྱིས་མཉེས་པར་མི་
ནུས་སོ། །སྨྲས་པ། འཇམ་དཔལ་གཏམ་ཇི་ལྟ་བུས་དེ་བཞིན་གཤེགས་པ་མཉེས་པར་འགྱུར། སྨྲས་པ། བཅོམ་ལྡན་འདས་ཉིད་མཁྱེན་ཏེ་ཐུགས་སུ་ཆུད་མོད་ཀྱི། བདག་ཇི་ལྟར་སྤོབས་པ་དེ་བཞིན་དུ་སྟོན་ཏོ། །རིགས་ཀྱི་བུ་གཏམ་གང་ཆོས་ཀྱི་དབྱིངས་དང་ཡང་མི་འགལ། དེ་བཞིན་
ཉིད་དང་ཡང་མི་འགལ། ཡང་དག་པའི་མཐའ་དང་ཡང་མི་འགལ་བ་དེ་འདྲ་བའི་གཏམ་གྱིས་དེ་བཞིན་གཤེགས་པ་མཉེས་པར་འགྱུར་རོ། །གཏམ་གང་འཐབ་པ་མེད་པ། རྩོད་པ་མེད་པ། རྩོམ་པ་མེད་པ། ཀླན་ཀ་མེད་པ། སྒྲོ་འདོགས་པ་མེད་པ། དེ་འདྲ་བའི་གཏམ་གྱིས་དེ་བཞིན་
གཤེགས་པ་མཉེས་པར་འགྱུར་རོ། །གཏམ་གང་བདག་ལ་སྒྲོ་མི་འདོགས། གཞན་ལ་སྒྲོ་མི་འདོགས། ཆོས་ལ་སྒྲོ་མི་འདོགས། ཆོས་མ་ཡིན་པ་ལ་སྒྲོ་མི་འདོགས། འཁོར་བ་ལ་སྒྲོ་མི་འདོགས། མྱ་ངན་ལས་འདའ་བ་ལ་སྒྲོ་མི་འདོགས་པ་དེ་འདྲ་བའི་གཏམ་གྱིས་དེ་བཞིན་གཤེགས་
པ་མཉེས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ནས་ལེགས་སོ་ལེགས་སོ། །འཇམ་དཔལ་ཁྱོད་ཀྱི་ཚིག་འདི་ལེགས་པར་བཤད་པ་ཡིན་ཏེ། འདི་འདྲ་བའི་གཏམ་གྱིས་དེ་བཞིན་གཤེགས་པ་མཉེས་པར་འགྱུར་
མོད་ཀྱི། འཇམ་དཔལ་གཏམ་གང་སྤྲོས་པ་ཐམས་ཅད་ལས་འདས་པ། ཧ་ཅང་ཡང་མི་ཞིབ་པ། ཧ་ཅང་ཡང་མི་རྩིང་བ། མཚན་མ་མེད་པའི་གཏམ་དེ་བརྗོད་ན་ཏིང་ངེ་འཛིན་ཀྱང་མི་གཏོང་། རྟག་ཏུ་ཤིན་ཏུ་སེམས་མཉམ་པར་ཡང་གཞོག་ཅིང་སྟོན་པར་བྱེད་ལ་ཆོས་གང་ཡང་འཕེལ་བའམ།

འབྲི་བར་ཡང་མི་མཐོང་བ་དེ་འདྲ་བའི་གཏམ་གྱིས་དེ་བཞིན་གཤེགས་པ་མཉེས་པར་འགྱུར་རོ། །སྟོན་པ་འདི་བསྟན་པའི་ཚེ་བྱང་ཆུབ་སེམས་དཔའ་བརྒྱད་སྟོང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །འཁོར་དེ་ནས་ལྷའི་བུ་སྔོན་སྤྱོད་པ་དང་ལྡན་པས་བྱང་ཆུབ་ཀྱི་སེམས་རབ་ཏུ་སྟོར་བ་ཉིས་
བརྒྱ་འདི་སྙམ་དུ་གྱུར་ཏེ། སངས་རྒྱས་ཀྱི་ཆོས་ཀྱང་དེ་ལྟར་ཚད་མེད་པ་བྱང་ཆུབ་སེམས་དཔའི་བསླབ་པ་ཡང་དེ་ལྟར་ཤིན་ཏུ་བསླབ་དཀའ་བ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་དེ་ཙམ་དུ་བསྒྲུབ་དཀའ་བ་ཡིན་ན་བདག་ཅག་གིས་སློབ་པ་འདི་བསླབ་མི་ནུས་ཀྱིས། གང་བདག་ཅག་ནི་ཉན་
ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པས་ཡོངས་སུ་མྱ་ངན་ལས་འདའ་བར་བྱའོ་སྙམ་མོ། །དེ་ནས་བཅོམ་ལྡན་འདས་ཀྱིས་ལྷའི་བུ་དེ་དག་གི་སེམས་ཀྱི་རྟོག་པ་ཐུགས་ཀྱིས་མཁྱེན་ནས། ཀྱེ་མའོ་ལྷའི་བུ་འདི་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བའི་
སྐལ་བ་ཡོད་དོ་ཞེས་ལྷའི་བུ་དེ་དག་གདུལ་བའི་དབང་གི་ཕྱིར་འཁོར་གྱི་ཕྱི་རོལ་དུ་ཁྱིམ་བདག་གཅིག་མངོན་པར་སྤྲུལ་ནས་ཁྱིམ་བདག་དེས་ལྷུང་བཟེད་ཁ་ཟས་རོ་བརྒྱས་གང་བ་ཞིག་ལག་པ་གཡས་པ་ན་ཐོགས་པར་གྱུར་ཏོ། །དེ་ནས་ཁྱིམ་བདག་དེ་བཅོམ་ལྡན་འདས་ག་ལ་བ་དེར་སོང་
ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལྷུང་བཟེད་ཁ་ཟས་ཀྱིས་བཀང་བ་དེ་བཅོམ་ལྡན་འདས་ལ་ཕུལ་ནས། བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་ཞལ་ཟས་འདི་བཞེས་པར་གསོལ་ཞེས་དེ་སྐད་གསོལ་པ་དང་། བཅོམ་ལྡན་འདས་ཀྱིས་ལྷུང་
བཟེད་ཟས་ཀྱིས་བཀང་བ་དེ་བཞེས་སོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཞལ་ཟས་འདི་ལས་བདག་ལ་མ་སྩལ་བར་གསོལ་ན་ནི་
བཅོམ་ལྡན་འདས་བྱས་པ་གཟོ་བ་མི་མཛད་པར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུ་འདི་སྙམ་དུ་གྱུར་ཏེ། ཀྱེ་མའོ་འཇམ་དཔལ་གཞོན་ནུར་གྱུར་པས་སྔོན་བཅོམ་ལྡན་འདས་ལ་ཇི་ལྟ་བུ་ཞིག་ཏུ་ཕན་བཏགས་ན་དེའི་ཕྱིར་ད་བྱས་པ་གཟོ་བ་མེད་པས་རྒོལ་སྙམ་མོ། །དེ་ནས་བཅོམ་ལྡན་འདས་

ཀྱིས་ཚེ་དང་ལྡན་པ་ཤཱ་རིའི་བུའི་སེམས་ཀྱི་རྟོག་པ་མཁྱེན་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་དེ་བཞིན་གཤེགས་པ་དུས་མཁྱེན་ཏེ། ཁྱོད་ལ་བཀའ་སྩོལ་གྱིས་སྡོད་ཅིག །དེས་བཅོམ་ལྡན་འདས་ཀྱིས་ལྷུང་བཟེད་དེ་ས་ཆེན་པོའི་ནང་དུ་བཏང་བ་
དང་། བཏང་མ་ཐག་ཏུ་འོག་གི་ཕྱོགས་ཀྱི་སངས་རྒྱས་ཀྱི་ཞིང་གང་དང་གང་དག་ན་སངས་རྒྱས་བཅོམ་ལྡན་འདས་རྣམས་བཞུགས་ཤིང་འཚོ་གཞེས་པའི་ཡང་དག་པར་རྫོགས་པའི་སངས་རྒྱས་དེ་དག་གི་སྤྱན་སྔར་ལྷུང་བཟེད་དེ་སོང་ངོ་། །དེ་ནས་ལྷུང་བཟེད་དེ་འོག་གི་ཕྱོགས་ཀྱི་ཆ་སངས་རྒྱས་ཀྱི་ཞིང་གང་གཱའི་
ཀླུང་གི་བྱེ་མ་སྙེད་འདས་ནས་འཇིག་རྟེན་གྱི་ཁམས་སྣང་བ་དང་ལྡན་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་རྒྱལ་པོ་ཞེས་བྱ་བ་བཞུགས་པའི་སངས་རྒྱས་ཀྱི་ཞིང་དེ་ན་ལྷུང་བཟེད་དེ་མ་བཟུང་བར་བར་སྣང་ལ་འདུག་པར་གྱུར་ཏོ། །སངས་
རྒྱས་བཅོམ་ལྡན་འདས་དེ་དག་ལ་ཡང་བདག་བདག་གི་བསྙེན་བཀུར་བྱེད་པ་དག་གིས་བཅོམ་ལྡན་འདས་ལྷུང་བཟེད་འདི་ག་ལས་མཆིས་ཞེས་ཞུས་ནས་སངས་རྒྱས་བཅོམ་ལྡན་འདས་དེ་དག་གིས་ཀྱང་སྟེང་གི་ཕྱོགས་ཀྱི་ཆ་འཇིག་རྟེན་གྱི་ཁམས་མི་མཇེད་ཅེས་བྱ་བ་ནས་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་དྲུང་ནས་འོངས་ཏེ། བྱང་ཆུབ་སེམས་དཔའ་གཞན་དག་གདུལ་བའི་ཕྱིར་བཏང་བ་ཡིན་ནོ་ཞེས་བསྟན་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་
རིའི་བུ་ལྷུང་བཟེད་དེ་ཕྱུང་ཤིག །གང་ན་འདུག་པ་ག་ལ་ན་འདུག་པ་དེའང་ཚོལ་ཅིག །དེ་ནས་ཚེ་དང་ལྡན་པ་ཤཱ་རིའི་བུ་ཏིང་ངེ་འཛིན་སྟོང་ཕྲག་བཅུ་ལ་ཞུགས་ནས། བདག་གི་ཤེས་རབ་ཀྱི་སྟོབས་དང་། སངས་རྒྱས་ཀྱི་མཐུས་སངས་རྒྱས་ཀྱི་ཞིང་སྟོང་ཕྲག་བཅུར་སོང་ཡང་ལྷུང་བཟེད་དེའི་
གནས་སམ་གཞི་ཡང་མ་མཐོང་ནས་དེ་སླར་བཅོམ་ལྡན་འདས་ཀྱི་སྤྱན་སྔར་འདུག་གོ། །འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ལྷུང་བཟེད་དེའི་གནས་སམ་གཞི་ཡང་མ་མཐོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽང་གལ་གྱི་བུ་ཆེན་པོ་ལ་འདི་

སྐད་ཅེས་བཀའ་སྩལ་ཏོ། །མཽང་གལ་གྱི་བུ་ཁྱོད་ཀྱིས་ལྷུང་བཟེད་དེ་ཚོལ་ཅིག །དེ་ནས་ཚེ་དང་ལྡན་པ་མཽང་གལ་གྱི་བུ་ཆེན་པོས་ཏིང་ངེ་འཛིན་སྟོང་ཕྲག་བཅུ་ལ་ཞུགས་ནས་སངས་རྒྱས་ཀྱི་མཐུ་དང་། བདག་གི་རྫུ་འཕྲུལ་གྱི་སྟོབས་ཀྱིས་འོག་གི་ཕྱོགས་ཀྱི་ཆ་སངས་རྒྱས་ཀྱི་ཞིང་སྟོང་ཕྲག་བཅུར་
སོང་ཡང་ལྷུང་བཟེད་དེའི་གནས་སམ་གཞིའང་མ་མཐོང་ནས་དེ་སླར་ཡང་བཅོམ་ལྡན་འདས་ཀྱི་སྤྱན་སྔར་འདུག་གོ། །འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ལྷུང་བཟེད་དེའི་གནས་སམ་གཞིའང་མ་མཐོང་ངོ་། །དེ་ནས་བཅོམ་ལྡན་འདས་
ཀྱིས་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར་ཁྱོད་ཀྱིས་ལྷུང་བཟེད་དེ་ཚོལ་ཅིག །དེ་ནས་ཚེ་དང་ལྡན་པ་རབ་འབྱོར་གྱིས་ཏིང་ངེ་འཛིན་སྟོང་ཕྲག་བཅུ་གཉིས་ལ་ཞུགས་ནས་སངས་རྒྱས་ཀྱི་མཐུ་དང་། བདག་གི་རྫུ་འཕྲུལ་གྱི་སྟོབས་ཀྱིས་འོག་གི་ཕྱོགས་ཀྱི་ཆ་སངས་རྒྱས་ཀྱི་ཞིང་
སྟོང་ཕྲག་བཅུ་གཉིས་སུ་སོང་ཡང་ལྷུང་བཟེད་དེ་མ་མཐོང་ནས་དེ་སླར་བཅོམ་ལྡན་འདས་ཀྱི་སྤྱན་སྔར་འདུག་གོ། །འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ལྷུང་བཟེད་དེའི་གནས་སམ་གཞིའང་མ་མཐོང་ངོ་། །དེ་བཞིན་ཉིད་དུ་ཉན་ཐོས་ཆེན་པོ་ལྔ་
བརྒྱ་ཙམ་བདག་བདག་གི་རྫུ་འཕྲུལ་གྱི་སྟོབས་དང་། ལྷའི་མིག་གིས་ལྷུང་བཟེད་དེ་བཙལ་ཀྱང་མ་རྙེད་དོ། །དེ་ནས་ཚེ་དང་ལྡན་པ་རབ་འབྱོར་གྱིས་བྱང་ཆུབ་སེམས་དཔའ་བྱམས་པ་ལ་འདི་སྐད་ཅེས་སྨྲས་སོ། །བྱམས་པ་ཁྱོད་ནི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་སྐྱེ་བ་གཅིག་གིས་ཐོགས་པར་ལུང་བསྟན་ན། ལྷུང་བཟེད་དེ་གང་ན་འདུག་གལ་ན་འདུག་ཚོལ་ཅིག་ཅེས་དེ་སྐད་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་བདག་ནི་དེ་བཞིན་
གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་གཅིག་གིས་ཐོགས་པར་ལུང་བསྟན་མོད་ཀྱི། བདག་གིས་ནི་ཏིང་ངེ་འཛིན་དེ་དག་གི་མིང་ཡང་མ་འཚལ་ཏེ། འཇམ་དཔལ་གཞོན་ནུར་གྱུར་པ་ནི་ཏིང་ངེ་འཛིན་དེ་དག་ལ་མཉམ་པར་ཡང་གཞོག །ལྡང་བར་ཡང་བགྱིད་དོ། །ཡང་བཙུན་པ་རབ་

འབྱོར་བདག་གིས་བྱང་ཆུབ་ཐོབ་པ་ན་འཇམ་དཔལ་གཞོན་ནུར་གྱུར་པ་དང་འདྲ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་དེ་བཞིན་གཤེགས་པ་ཇི་ལྟར་གོམ་པ་འདོར། ཇི་ལྟར་འཇོག་པར་མཛད་ཅེས་གོམ་པ་གཅིག་འདོར་ཞིང་འཇོག་པ་ཡང་མི་ཤེས་པའི་དུས་དང་ཚེ་ཡང་མཆིས་པར་
འགྱུར་རོ། །དེ་བས་ན་བཙུན་པ་རབ་འབྱོར་འཇམ་དཔལ་ཉིད་ལ་གསོལ་ཅིག་དང་། དེས་ནི་ལྷུང་བཟེད་དེ་ཚོར་བ་དང་འབྱིན་པར་ནུས་སོ། །དེ་ནས་བཅོམ་ལྡན་འདས་ལ་གནས་བརྟན་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ཅི་ནས་ཀྱང་ལྷུང་བཟེད་དེ་ཕྱུང་
སྟེ། བཅོམ་ལྡན་འདས་ཀྱི་སྤྱན་སྔར་དབུལ་བར་བསྒོར་གསོལ། དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ལྷུང་བཟེད་དེ་ཕྱུང་ཤིག །ལྷུང་བཟེད་དེ་གང་ན་འདུག་པ་དང་། ག་ལ་ན་འདུག་པ་ཡང་ཤེས་པར་གྱིས་ཤིག །དེ་ནས་འཇམ་དཔལ་གཞོན་ནུར་
གྱུར་པ་འདི་སྙམ་དུ་གྱུར་ཏེ། གང་བདག་ནི་སྟན་ལས་ཀྱང་མི་ལྡང་ཞིང་འཁོར་འདི་ནས་མི་སྣང་བར་ཡང་མ་གྱུར་པར་ལྷུང་བཟེད་དེ་དབྱུང་ངོ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པ་ཀུན་གྱི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་སྟེ། འོག་གི་ས་ཆེན་པོ་ལ་ལག་པ་གཡས་པ་བརྐྱང་ངོ་། །དེ་ནས་
འཇམ་དཔལ་གཞོན་ནུར་གྱུར་པའི་ལག་པ་དེ་སངས་རྒྱས་ཀྱི་ཞིང་གང་དང་གང་དག་ན། སངས་རྒྱས་བཅོམ་ལྡན་འདས་མངོན་དུ་གྱུར་པ་དེ་དང་དེ་དག་ཏུ་ལག་པ་དེ་སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ཞིང་སོང་ནས། ལག་པ་དེ་ལས་བཅོམ་ལྡན་འདས་ལ་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྙུང་བ་མ་མཆིས་སམ། འོ་མ་བརྒྱལ་ཏམ། བཞེངས་པ་ཡང་ངམ། སོ་བཞིན་ནམ། མཐུ་མངའ་འམ། བདེ་བ་ལ་རེག་པར་གནས་སམ་ཞེས་གསུང་ངོ་ཞེས་ཟེར་བའི་སྒྲ་ཕྱུང་ངོ་། །དེ་ནས་ལག་པའི་སྤུའི་ཁུང་བུ་ཐམས་ཅད་ནས་འོད་
ཟེར་བྱེ་བ་བརྒྱ་སྟོང་བྱུང་སྟེ། འོད་ཟེར་ཐམས་ཅད་ལས་མེ་ཏོག་པད་མ་བརྒྱ་སྟོང་བྱུང་ཞིང་པད་མ་དེ་ཐམས་ཅད་ཀྱི་སྙིང་པོ་དག་ལ་དེ་བཞིན་གཤེགས་པའི་སྐུ་དག་བཞུགས་པར་སྣང་ངོ་། །དེ་བཞིན་གཤེགས་པའི་སྐུ་དེ་དག་ཐམས་ཅད་ཀྱང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་བསྔགས་

པ་བརྗོད་དོ། །ལག་པ་དེ་སངས་རྒྱས་ཀྱི་ཞིང་གང་དང་གང་དུ་འགྲོ་བའི་སངས་རྒྱས་ཀྱི་ཞིང་དེ་དག་ཐམས་ཅད་ཀྱང་རྣམ་པ་དྲུག་ཏུ་རབ་ཏུ་གཡོས་སོ། །སངས་རྒྱས་ཀྱི་ཞིང་དེ་དག་ཐམས་ཅད་སྣང་བ་ཆེན་པོས་ཀྱང་ཁྱབ་པར་གྱུར་ཏོ། །སངས་རྒྱས་ཀྱི་ཞིང་དེ་དག་ཐམས་ཅད་གདུགས་དང་། རྒྱལ་མཚན་དང་།
བ་དན་གྱིས་ཀྱང་བརྒྱན་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པའི་ལག་པ་གཡས་པ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་ཐམས་ཅད་ལས་འདས་ནས། སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་ཞབས་ལ་ཕྱག་འཚལ་ཞིང་སྙུང་བ་ཆུང་ངམ་ཞེས་བྱ་བའི་
སྒྲ་འབྱིན་བཞིན་དུ་བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེའི་སངས་རྒྱས་ཀྱི་ཞིང་སྣང་བ་དང་ལྡན་པའི་འཇིག་རྟེན་གྱི་ཁམས་སུ་ཕྱིན་པར་གྱུར་ནས་བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེའི་ཞབས་ལ་ཕྱག་འཚལ་ནས། བཅོམ་ལྡན་འདས་ལ་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྙུང་བ་མ་མཆིས་སམ། འོ་མ་བརྒྱལ་ཏམ། བཞེངས་པ་ཡང་ངམ། སོ་བཞིན་ནམ། མཐུ་མངའ་འམ། བདེ་བ་ལ་རེག་པར་གནས་སམ་ཞེས་གསུང་ངོ་ཞེས་སྒྲ་ཕྱུང་ངོ་། །ལག་པ་དེ་ལས་ཀྱང་འོད་ཟེར་བརྒྱ་སྟོང་
བྱུང་ངོ་། །མེ་ཏོག་པད་མ་བརྒྱ་སྟོང་ཡང་བྱུང་བར་གྱུར་ཏེ། འོད་ཟེར་དེ་དག་དེ་བཞིན་གཤེགས་པའི་འོད་ཟེར་དེ་དག་དང་ཡང་མ་འདྲེས་པར་གྱུར་ཏོ། །དེ་ནས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེ་ལ་བསྙེན་བཀུར་བྱེད་པ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཀྱི་དཔལ་ཞེས་བྱ་བ་དེས་དེ་
བཞིན་གཤེགས་པ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལག་པ་དེ་ལས་འོད་ཟེར་བྱེ་བ་བརྒྱ་སྟོང་འདི་དག་ཀྱང་བྱུང་ཞིང་མེ་ཏོག་པད་མ་བརྒྱ་སྟོང་ཡང་བྱུང་བར་གྱུར་ལ། པད་མ་ཐམས་ཅད་ལ་དེ་བཞིན་གཤེགས་པའི་སྐུ་དག་བཞུགས་ཤིང་བཅོམ་ལྡན་འདས་ཤཱཀྱ་ཐུབ་པའི་བསྔགས་པ་རྗོད་
པར་གྱུར་པའི་ལག་པ་འདི་ལྟར་བལྟ་ན་སྡུག་པ། འདི་ལྟར་དགའ་བར་བགྱིད་པ་དེ་སུའི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་ཀྱི་དཔལ་ལ་འདི་སྐད་ཅེས་བཀའ་སྩལ་ཏོ། །འོད་ཀྱི་དཔལ་སྟེང་གི་ཕྱོགས་ཀྱི་ཆ་སངས་རྒྱས་ཀྱི་ཞིང་འདི་ནས་

སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་སོ་འཚོ་གཞེས་སོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་
འཇམ་དཔལ་གཞོན་ནུར་གྱུར་པ་ཞེས་བྱ་བ་བསམ་གྱིས་མི་ཁྱབ་པའི་གོ་ཆ་བགོས་པ། མངོན་པར་ཤེས་པ་དང་། སྟོབས་དང་། ཕ་རོལ་ཏུ་ཕྱིན་པ་ཐམས་ཅད་ཐོབ་པ་ཞིག་ཡོད་དེ། འཇམ་དཔལ་གཞོན་ནུར་གྱུར་པ་དེས་ལྷུང་བཟེད་འདི་བླང་བའི་ཕྱིར་སྟན་ལས་མ་ལངས་བཞིན་དུ་ལག་པ་འདི་བཏང་ངོ་། །དེ་ནས་
དེ་བཞིན་གཤེགས་པ་འོད་ཟེར་གྱི་རྒྱལ་པོའི་སངས་རྒྱས་ཀྱི་ཞིང་དེ་ནས་བྱང་ཆུབ་སེམས་དཔའ་དེ་དག་ཡོངས་སུ་སྐོམ་པར་གྱུར་ནས། བཅོམ་ལྡན་འདས་བདག་ཅག་ནི་འཇིག་རྟེན་གྱི་ཁམས་མི་མཇེད་པ་དེ་དང་། དེ་བཞིན་གཤེགས་པ་ཤཱཀྱ་ཐུབ་པ་དེ་དང་། འཇམ་དཔལ་གཞོན་ནུར་གྱུར་པ་དེ་བལྟ་བར་འཚལ་
ལོ་ཞེས་དེ་སྐད་གསོལ་ཏོ། །དེ་ནས་དེ་བཞིན་གཤེགས་པ་འོད་ཟེར་གྱི་རྒྱལ་པོས་སྨིན་མཚམས་ཀྱི་མཛོད་སྤུ་ནས་འོད་ཕྱུང་ནས། འོད་དེས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་པོ་དེ་དག་ཐམས་ཅད་བརྟོལ་ཏེ། ཐམས་ཅད་ཡོད་པའི་འཇིག་རྟེན་གྱི་ཁམས་སྣང་བ་ཆེན་པོས་ཁྱབ་
པར་གྱུར་ཏོ། །སེམས་ཅན་གང་དག་གི་ལུས་ལ་འོད་དེས་ཕོག་པར་གྱུར་པ་དེ་དག་ཐམས་ཅད་ནི་འཁོར་ལོས་སྒྱུར་བའི་བདེ་བ་དང་ལྡན་པར་གྱུར་ཏོ། །རྣལ་འབྱོར་སྤྱོད་པ་གང་དག་གི་ལུས་ལ་འོད་དེས་ཕོག་པར་གྱུར་པ་དེ་དག་ཐམས་ཅད་ནི་འབྲས་བུ་ཐོབ་པར་གྱུར་ཏོ། །སློབ་པ་གང་དག་གི་ལུས་ལ་འོད་དེས་ཕོག་པར་
གྱུར་པ་དེ་དག་ཐམས་ཅད་ནི་རྣམ་པར་ཐར་པ་བརྒྱད་ལ་བསམ་གཏན་བྱེད་པའི་དགྲ་བཅོམ་པར་གྱུར་ཏོ། །བྱང་ཆུབ་སེམས་དཔའ་གང་དག་གི་ལུས་ལ་འོད་དེས་ཕོག་པར་གྱུར་པ་དེ་དག་ཐམས་ཅད་ནི་ཏིང་ངེ་འཛིན་ཉི་མ་ལྟ་བུའི་སྒྲོན་མ་ཞེས་བྱ་བ་ཐོབ་པར་གྱུར་ཏོ། །འདི་ལྟ་སྟེ། དེ་བཞིན་གཤེགས་པ་འོད་
ཟེར་གྱི་རྒྱལ་པོ་དེའི་སངས་རྒྱས་ཀྱི་ཞིང་དེ་ནས་བྱང་ཆུབ་སེམས་དཔའ་དེ་དག་གིས་འཇིག་རྟེན་གྱི་ཁམས་མི་མཇེད་པ་འདི་དང་། བཅོམ་ལྡན་འདས་ཤཱཀྱ་ཐུབ་པ་དང་། འཇམ་དཔལ་གཞོན་ནུར་གྱུར་པ་དང་། ཉན་ཐོས་ཀྱི་དགེ་འདུན་ཐམས་ཅད་མཐོང་བར་གྱུར་ཏོ། །དེ་ནས་བྱང་ཆུབ་སེམས་

དཔའ་སེམས་དཔའ་ཆེན་པོ་འོད་ཀྱི་དཔལ་གྱིས་འཇིག་རྟེན་གྱི་ཁམས་མི་མཇེད་པ་འདི་མཐོང་ནས་ངུ་ཞིང་མཆི་མ་ཕྱུང་སྟེ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་སྟེ། དཔེར་ན་རིན་ཐང་མ་མཆིས་པའི་ནོར་བུ་རིན་པོ་ཆེ་བཻ་དཱུརྱ་འདམ་དུ་སྩལ་བར་གྱུར་པ་དེ་བཞིན་དུ། བཅོམ་ལྡན་
འདས་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཁམས་མི་མཇེད་པར་སྐྱེས་པ་དེ་དག་ལ་བལྟ་བར་བགྱིའོ། །དེ་བཞིན་གཤེགས་པ་འོད་ཟེར་གྱི་རྒྱལ་པོས་བཀའ་སྩལ་པ། རིགས་ཀྱི་བུ་ཁྱོད་དེ་སྐད་མ་ཟེར་ཅིག །དེ་ཅིའི་ཕྱིར་ཞེ་ན། གང་འཇིག་རྟེན་གྱི་ཁམས་འདིར་
བསྐལ་པ་བཅུར་བསམ་གཏན་ལ་གནས་ཤིང་སྤྱོད་པ་བས་གང་འཇིག་རྟེན་གྱི་ཁམས་མི་མཇེད་པར་སྔ་དྲོ་གཅིག་སེམས་ཅན་ཐམས་ཅད་ལ་བྱམས་པའི་སེམས་བསྐྱེད་ན་དེ་བས་འདིའི་བསོད་ནམས་ཤིན་ཏུ་མང་དུ་འཕེལ་ལོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་
དཔའ་ཆེན་པོ་གང་མི་མཇེད་ཀྱི་འཇིག་རྟེན་གྱི་ཁམས་ན་དམ་པའི་ཆོས་སྲུང་བ་དེ་དག་ནི་ལས་ཀྱི་སྒྲིབ་པ་དང་། ཉོན་མོངས་པ་ཐམས་ཅད་བྱང་བར་འགྱུར་རོ། །དེ་ནས་འཇིག་རྟེན་གྱི་ཁམས་མི་མཇེད་པ་འདི་ན་བྱང་ཆུབ་སེམས་དཔའ་གང་དག་འོད་དེས་རེག་པར་གྱུར་པ་དེ་དག་གིས་བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་དགའ་ཞིང་རབ་ཏུ་མགུ་བར་བགྱིད་པ་ཉོན་མོངས་པ་ཐམས་ཅད་རབ་ཏུ་སྤོང་བར་བགྱིད་པའི་འོད་ཟེར་འདི་སུའི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་ལ་འདི་སྐད་
ཅེས་བཀའ་སྩལ་ཏོ། །རིགས་ཀྱི་བུ་འོག་གི་ཕྱོགས་ཀྱི་ཆ་འདི་ནས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་འདས་པ་དང་། འཇིག་རྟེན་གྱི་ཁམས་སྣང་བ་དང་ལྡན་པ་ཞེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
འོད་ཟེར་གྱི་རྒྱལ་པོ་ཞེས་བྱ་བ་ད་ལྟར་བཞུགས་ཤིང་འཚོ་གཞེས་པ་ཞིག་ཡོད་དེ། དེ་བཞིན་གཤེགས་པ་དེས་སྨིན་མཚམས་ཀྱི་མཛོད་སྤུ་ནས་འོད་བཏང་བ་དང་། འོད་དེས་འཇིག་རྟེན་གྱི་ཁམས་མི་མཇེད་པ་འདི་སྣང་བར་བྱས་སོ། །དེ་ནས་བཅོམ་ལྡན་འདས་ལ་བྱང་ཆུབ་

སེམས་དཔའ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་སྣང་བ་དང་ལྡན་པ་དེ་དང་། དེ་བཞིན་གཤེགས་པ་འོད་ཟེར་གྱི་རྒྱལ་པོ་དེ་བལྟ་བར་འཚལ་ལོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་ཞབས་ཀྱི་
མཐིལ་འཁོར་ལོའི་རྩིབས་སྟོང་ཡོད་པ་གཉིས་ལས་འོད་ཟེར་གང་གིས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་པོ་དེ་དག་ཐམས་ཅད་ལས་འདས་ཤིང་བརྟོལ་ནས་འཇིག་རྟེན་གྱི་ཁམས་སྣང་བ་དང་ལྡན་པ་དེ་ཐམས་ཅད་འོད་ཟེར་དེ་དག་གིས་ཁྱབ་པར་འགྱུར་བ་དེ་འདྲ་བའི་
འོད་ཟེར་འོག་ཏུ་བཏང་ནས་བྱང་ཆུབ་སེམས་དཔའ་གང་དག་གི་ལུས་ལ་འོད་ཟེར་དེས་ཕོག་པར་གྱུར་པ་དེ་ཐམས་ཅད་ཏིང་ངེ་འཛིན་རི་རབ་ལྷུན་པོ་ལྟ་བུའི་སྒྲོན་མ་ཞེས་བྱ་བ་ཐོབ་པར་གྱུར་ཏོ། །སངས་རྒྱས་ཀྱི་ཞིང་དེ་ཡང་སངས་རྒྱས་ཀྱི་ཞིང་འདི་ནས་སྣང་བར་གྱུར་ཏོ། །སངས་རྒྱས་ཀྱི་ཞིང་
འདི་ཡང་སངས་རྒྱས་ཀྱི་ཞིང་དེ་ནས་སྣང་བར་གྱུར་ཏོ། །འདི་ལྟ་སྟེ། དཔེར་ན་འཛམ་བུའི་གླིང་འདི་ནས་ཉི་མ་དང་ཟླ་བ་སྣང་བ་དེ་བཞིན་དུ་བྱང་ཆུབ་སེམས་དཔའ་དེ་དག་གིས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་མཐོང་བར་གྱུར་ཏོ། །བྱང་ཆུབ་སེམས་དཔའ་འདི་དག་གིས་ཀྱང་བཅོམ་
ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེ་མཐོང་བར་གྱུར་ཏོ། །འདི་ལྟ་སྟེ། དཔེར་ན་ལྷའི་བུ་དག་རི་རབ་ལྷུན་པོའི་སྤྱི་བོ་ལ་གནས་ཤིང་འཛམ་བུའི་གླིང་དུ་ལྟ་བ་དེ་བཞིན་དུ་བྱང་ཆུབ་སེམས་དཔའ་དག་འཇིག་རྟེན་གྱི་ཁམས་འདི་ནས་བཅོམ་ལྡན་འདས་དེ་བཞིན་གཤེགས་པ་
འོད་ཟེར་གྱི་རྒྱལ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་དེ་དག་མཐོང་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པའི་ལག་པ་གཡས་པ་དེས་དེ་བཞིན་གཤེགས་པ་འོད་ཟེར་གྱི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་སྣང་བ་དང་ལྡན་
པ་དེ་ནས་ནམ་མཁའི་སྟེང་གི་ལམ་ལས་ལྷུང་བཟེད་དེ་བཟུང་ནས་བྱང་ཆུབ་སེམས་དཔའ་བྱེ་བ་ཕྲག་ཁྲག་ཁྲིག་བརྒྱ་སྟོང་དུ་མས་བསྐོར་ཅིང་མདུན་དུ་བདར་ཏེ་སྟེང་དུ་ཕྱུང་བར་གྱུར་ཏོ། །གང་དང་གང་དག་ནས་ལག་པ་དེ་ཕྱུང་བར་གྱུར་པའི་སངས་རྒྱས་ཀྱི་ཞིང་དེ་དང་དེ་དག་ཏུ་འོད་ཟེར་དེ་དག་

ནུབ་པར་གྱུར་ཏོ། །མེ་ཏོག་པད་མ་དེ་དག་ཀྱང་མི་སྣང་བར་གྱུར་ཏོ། །འདི་ལྟ་སྟེ། འཇམ་དཔལ་གཞོན་ནུར་གྱུར་པའི་ལག་པ་གཡས་པ་དེས་ལྷུང་བཟེད་དེ་བླངས་ནས་འཇིག་རྟེན་གྱི་ཁམས་མི་མཇེད་པ་འདིར་ཕྱིན་པར་གྱུར་ཏེ། བཅོམ་ལྡན་འདས་ཤཱཀྱ་ཐུབ་པའི་སྤྱན་སྔར་ལྷུང་བཟེད་དེ་
ནམ་མཁའ་ལ་འཕངས་ནས་བཅོམ་ལྡན་འདས་ཀྱི་ཞབས་ལ་འཇམ་དཔལ་གཞོན་ནུར་གྱུར་པས་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷུང་བཟེད་བླངས་པ་འདི་ལགས་ཀྱིས་དེ་བཞིན་གཤེགས་པས་བཞེས་སུ་གསོལ། བཅོམ་
ལྡན་འདས་ཀྱིས་ཀྱང་ལྷུང་བཟེད་དེ་བཞེས་སོ། །དེ་ནས་བྱང་ཆུབ་སེམས་དཔའ་གང་འཇམ་དཔལ་གཞོན་ནུར་གྱུར་པའི་ལག་པ་དང་ལྷན་ཅིག་ཏུ་འཇིག་རྟེན་གྱི་ཁམས་མི་མཇེད་པ་འདིར་འོངས་པ་དེ་དག་གིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བདག་བདག་གི་དེ་བཞིན་
གཤེགས་པའི་མཚན་ནས་བརྗོད་དེ། བཅོམ་ལྡན་འདས་དེ་བཞིན་གཤེགས་པ་ཆེ་གེ་མོ་ཞིག་བཅོམ་ལྡན་འདས་ལ་སྙུང་བ་མ་མཆིས་སམ། འོ་མ་བརྒྱལ་ཏམ། བཞེངས་པ་ཡང་ངམ། སོ་བཞིན་ནམ། མཐུ་མངའ་འམ། བདེ་བ་ལ་རེག་པར་གནས་སམ་ཞེས་གསུང་ངོ་ཞེས་དེ་སྐད་
གསོལ་ཏེ། སངས་རྒྱས་ཀྱིས་གནང་ནས་བདག་བདག་གི་སྟན་ལ་འཁོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། དེ་བས་ན་ཤཱ་རིའི་བུ་ང་ལ་སྔོན་འཇམ་དཔལ་གཞོན་ནུར་གྱུར་པས་གང་ཕན་བཏགས་པ་དེའི་ཕྱིར་ད་བྱས་པ་མི་གཟོ་བས་རྒོལ་བར་གྱུར་
པ་བཤད་ཀྱིས་ཉོན་ཅིག། ཤཱ་རིའི་བུ་སྔོན་འདས་པའི་དུས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་དེའི་ཕ་རོལ་གྱིའང་ཕ་རོལ་དུ་གྱུར་པ་དེའི་ཚེ། དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་ཐུབ་པའི་རྒྱལ་མཚན་ཞེས་བྱ་བ་འཇིག་རྟེན་
གྱི་ཁམས་མི་སྨོད་པ་དང་ལྡན་པ་ཞེས་བྱ་བའི་འཇིག་རྟེན་དུ་སྐྱེས་པར་གྱུར་ཏེ། ཤཱ་རིའི་བུ་དེ་བཞིན་གཤེགས་པ་དེའི་ཉན་ཐོས་ཀྱི་ཚོགས་ནི་བརྒྱད་ཁྲི་བཞི་སྟོང་བྱང་ཆུབ་སེམས་དཔའ་ནི་ཁྲི་ཉིས་སྟོང་དུ་གྱུར་ཏེ། དེ་བཞིན་གཤེགས་པ་དེ་ཐེག་པ་གསུམ་པོ་ཉིད་ལས་བརྩམས་ཏེ་ཆོས་འཆད་ཅིང་།

ཐེག་པ་གསུམ་བཤད་པ་དང་། ཕ་རོལ་ཏུ་ཕྱིན་པ་དྲུག་དང་། ཐབས་མཁས་པ་བཤད་པའི་ཕྱིར་དེ་བཞིན་གཤེགས་པ་དེ་སྐྱེས་པར་གྱུར་ཏོ། །ཤཱ་རིའི་བུ་ཡང་དེའི་ཚེ་དེའི་དུས་ན་དགེ་སློང་ཆོས་སྨྲ་བ་ཡེ་ཤེས་རྒྱལ་པོ་ཞེས་བྱ་བ་ཞིག་བྱུང་སྟེ། དེ་ནང་པར་ཤམ་ཐབས་
བགོས། ཆོས་གོས་དང་། ལྷུང་བཟེད་ཁྱེར་ཏེ་བསོད་སྙོམས་ཀྱི་ཕྱིར་རྒྱལ་པོའི་ཕོ་བྲང་རྒྱ་ཆེན་པོ་དང་ལྡན་པ་ཞེས་བྱ་བར་སོང་བ་ལས། དེ་དེ་ནས་ཟས་རོ་བརྒྱ་དང་ལྡན་པའི་བཟའ་བ་མང་པོ་ཁྱེར་ཏེ་བྱུང་བར་གྱུར་ཏོ། །ཡང་དེའི་ཚེ་ན་ཚོང་དཔོན་གྱི་བུ་དྲི་མ་མེད་པའི་དཔུང་པ་ཞེས་བྱ་བ་མ་
མའི་པང་པ་ན་འདུག་པར་གྱུར་པ་ལས་ཁྱེའུ་དེས་དགེ་སློང་དེ་རྒྱང་མ་ནས་འོང་བ་མཐོང་ངོ་མཐོང་ནས་མ་མའི་པང་པ་ནས་བབས་ཏེ། དགེ་སློང་དེ་ག་ལ་བ་དེར་བརྒྱུགས་ནས་བཟའ་བ་བསླངས་པ་ལས། དགེ་སློང་དེས་དེ་ལ་མོད་ཀ་གཅིག་བྱིན་པ་དང་། དེ་བཟའ་བ་དེས་བརྙོགས་ནས་དགེ་སློང་
དེའི་ཕྱི་བཞིན་དུ་འབྲང་བར་གྱུར་པ་ལས། དེ་རིམ་གྱིས་དེ་བཞིན་གཤེགས་པ་མི་ཐུབ་པའི་རྒྱལ་མཚན་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པ་དེའི་ཞབས་ལ་མགོ་བོས་ཕྱག་འཚལ་ཏེ་སྤྱན་སྔར་འདུག་གོ། །དེ་ནས་དགེ་སློང་ཡེ་ཤེས་རྒྱལ་པོས་བསོད་སྙོམས་ཅི་རྙེད་པ་ཁྱེའུ་དེ་ལ་
བྱིན་ནས། ཀྱེ་ཁྱེའུ་བསོད་སྙོམས་འདི་དེ་བཞིན་གཤེགས་པ་ལ་གསོལ་ཅིག་ཅེས་བྱས་སོ། །དེ་ནས་ཁྱེའུ་དེས་བསོད་སྙོམས་དེ་བླངས་ཏེ། བཅོམ་ལྡན་འདས་དེའི་ལྷུང་བཟེད་བཀང་ཡང་བསོད་སྙོམས་དེ་ཡོངས་སུ་ཟད་པར་མ་གྱུར་ཏོ། །ཤཱ་རིའི་བུ་འདི་ལྟ་སྟེ་བསོད་སྙོམས་གཅིག་པོ་
དེ་ལས་ཁྱེའུ་དེས་ཉན་ཐོས་བརྒྱད་ཁྲི་བཞི་སྟོང་པོ་དེ་དག་དང་། བྱང་ཆུབ་སེམས་དཔའ་ཁྲི་ཉིས་སྟོང་པོ་དེ་དག་དང་། བཅོམ་ལྡན་འདས་དེ་བཞིན་གཤེགས་པ་མི་ཐུབ་པའི་རྒྱལ་མཚན་དེ་ཞོས་པར་བྱས་ཤིང་བསྟབས་ཀྱང་བསོད་སྙོམས་དེ་ཡོངས་སུ་ཟད་པར་མ་གྱུར་ཏོ། །དེ་ནས་ཁྱེའུ་
དེ་དགའ་མགུ་རངས་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་སྤྱན་སྔར་འདུག་སྟེ། ཚིགས་སུ་བཅད་པ་འདི་དག་སྨྲས་སོ། །དགེ་སློང་དགེ་འདུན་ཞོས་བྱས་ཀྱང་། །ལྷུང་བཟེད་ནམ་ཡང་མ་ཟད་པས། །སྦྱིན་གནས་བསོད་ནམས་ཞིང་གྱུར་པ། །

བདག་གིས་ངེས་པར་མཆོད་པར་གྱུར། །འཇིག་རྟེན་མགོན་པོ་ཞོས་བྱས་ཀྱང་། །འབྲས་ཅན་ཟད་པར་མ་གྱུར་པས། །སངས་རྒྱས་ལ་ནི་ཕུལ་གྱུར་ན། །སྦྱིན་པ་མི་ཟད་ཐེ་ཙོམ་མེད། །ཇི་ལྟར་འབྲས་ཅན་མི་ཟད་ཅིང་། །ཕྱི་ཕྱིར་འཕེལ་བར་འགྱུར་བ་ལྟར། །སངས་རྒྱས་
དག་ལ་གང་གུས་པའི། །དགེ་བ་དག་ནི་དེ་བཞིན་འཕེལ། །ཤཱ་རིའི་བུ་དེ་ལྟ་སྟེ། ཁྱེའུ་དེས་བསོད་སྙོམས་གཅིག་པོ་དེ་ལས་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ཉི་མ་བདུན་དུ་ཞོས་པར་གསོལ་ནས་སངས་རྒྱས་ཀྱི་མཐུ་དང་། ཁྱེའུ་དེའི་སེམས་ཀྱི་བསམ་པ་
དད་པས་ཟས་དེ་ཡོངས་སུ་ཟད་པར་མ་གྱུར་ཏོ། །དེ་ནས་དགེ་སློང་ཡེ་ཤེས་རྒྱལ་པོས་ཁྱེའུ་དེ་སངས་རྒྱས་ལ་སྐྱབས་སུ་བཏང་། ཆོས་ལ་སྐྱབས་སུ་བཏང་། དགེ་འདུན་ལ་སྐྱབས་སུ་བཏང་ངོ་། །ཁྲིམས་ཀྱང་ཕོག་གོ། །ཉེས་པ་ཡང་མཐོལ་དུ་བཅུག་གོ། །རྗེས་སུ་ཡི་རང་བར་
བྱ་བ་དག་ཀྱང་རྗེས་སུ་ཡི་རང་བར་བྱེད་དུ་བཅུག་གོ། །གསོལ་བ་གདབ་པར་བྱ་བ་དག་ཀྱང་གསོལ་བ་འདེབས་སུ་བཅུག་ནས་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་དུ་བཅུག་གོ། །ཤཱ་རིའི་བུ་དེ་ལྟ་སྟེ། ཁྱེའུ་དེའི་ཕ་དང་མ་ཁྱེའུ་དེ་ཚོལ་ཞིང་དེ་བཞིན་
གཤེགས་པ་མི་ཐུབ་པའི་རྒྱལ་མཚན་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་སྤྱན་སྔར་འདུག་གོ། །དེ་ནས་ཁྱེའུ་དེས་ཕ་མ་དེ་དག་གི་རྐང་པ་ལ་ཕྱག་འཚལ་ནས་ཚིགས་སུ་བཅད་པ་འདི་དག་སྨྲས་སོ། །ལུས་ཅན་ཀུན་ལ་བདེ་བའི་
ཕྱིར། །བདག་ནི་བྱང་ཆུབ་རབ་ཞུགས་ཀྱིས། །ཁྱེད་ཀྱང་ལེགས་པར་གནས་པར་གྱིས། །དལ་འབྱོར་ཤིན་ཏུ་དཀོན་པའོ། །སངས་རྒྱས་སྐུ་ནི་འབར་བ་དང་། །མཚན་དག་གིས་ཀྱང་བརྒྱན་ལ་ལྟོས། །ཡེ་ཤེས་ཀྱིས་ནི་ཕ་རོལ་ཕྱིན། །བྱང་ཆུབ་དེ་ལ་སུ་མི་སྨོན། །
དེ་བཞིན་གཤེགས་པ་ཤིན་ཏུ་དཀོན། །བདག་ནི་ཁྱིམ་ནས་ཁྱིམ་མེད་པར། །འདི་ཉིད་དུ་ནི་རབ་ཏུ་འབྱུང་། །ཁྱེད་ཅག་གཉིས་ཀྱིས་གནང་བར་མཛོད། །ཕ་དང་མས་སྨྲས་པ། བདག་ཅག་གཉིས་ནི་ཁྱོད་འདོད་ཀྱིས། །བྱང་ཆུབ་རབ་ལ་སྨོན་པར་བགྱིད། །རབ་ཏུ་

འབྱུང་བར་བགྱི་བའི་ཕྱིར། །བུ་ཁྱོད་ཀྱི་ནི་རྗེས་སུ་སློབ། །ཤཱ་རིའི་བུ་དེ་ལྟ་སྟེ། ཁྱེའུ་དེ་དང་། ཁྱེའུ་དེའི་ཕ་མ་དང་། གང་བྱང་ཆུབ་ཏུ་སེམས་བསྐྱེད་པའི་སྲོག་ཆགས་ལྔ་བརྒྱ་ཙམ་པོ་དེ་དག་ཐམས་ཅད་རབ་ཏུ་བྱུང་ངོ་། །ཤཱ་རིའི་བུ་དེའི་ཚེ་དེའི་དུས་ན་དགེ་སློང་
ཆོས་སྨྲ་བ་ཡེ་ཤེས་རྒྱལ་པོ་ཞེས་བྱ་བ་དེ་གཞན་ཡིན་སྙམ་དུ་ཤཱ་རིའི་བུ་ཁྱོད་དེ་ལྟར་མ་ལྟ་ཤིག །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པ་འདི་དེའི་ཚེ་དེའི་དུས་ན་དགེ་སློང་ཆོས་སྨྲ་བ་ཡེ་ཤེས་རྒྱལ་པོ་ཞེས་བྱ་བར་གྱུར་ཏོ། །ཤཱ་རིའི་བུ་དེའི་ཚེ་དེའི་དུས་ན་ཚོང་དཔོན་གྱི་བུ་དྲི་མ་
མེད་པའི་དཔུང་པ་ཞེས་བྱ་བ་དེ་གཞན་ཡིན་པ་སྙམ་དུ་ཐེ་ཙོམ་མམ། ཡིད་གཉིས་སམ། སོམ་ཉི་ཟ་ན། ཤཱ་རིའི་བུ་ཁྱོད་དེ་ལྟར་མ་ལྟ་ཤིག །དེ་ཅིའི་ཕྱིར་ཞེ་ན། ང་ནི་དེའི་ཚེ་དེའི་དུས་ན་ཚོང་དཔོན་གྱི་བུ་དྲི་མ་མེད་པའི་དཔུང་པ་ཞེས་བྱ་བ་དེར་གྱུར་ཏེ། ཤཱ་རིའི་བུ་འཇམ་དཔལ་གཞོན་
ནུར་གྱུར་པས་ང་ལ་བསོད་སྙོམས་བྱིན་ནས་བྱང་ཆུབ་ཏུ་སེམས་སྐྱེད་དུ་བཅུག་སྟེ། དེ་ནི་ངས་བྱང་ཆུབ་ཀྱི་ཕྱིར་ཐོག་མ་སེམས་བསྐྱེད་པ་ཡིན་ཏེ། ཤཱ་རིའི་བུ་རྣམ་གྲངས་དེས་ཀྱང་འདི་ལྟར་ཤེས་པར་བྱའོ། །དེ་བཞིན་གཤེགས་པ་སངས་རྒྱས་ཀྱི་ཆེ་བ་ཉིད་དང་། སྟོབས་བཅུ་དང་།
མི་འཇིགས་པ་དང་། ཡེ་ཤེས་ཆགས་པ་མེད་པ་དང་། ཅིའང་རུང་སྟེ། དེ་ཐམས་ཅད་འཇམ་དཔལ་གཞོན་ནུར་གྱུར་པས་བྱེད་དུ་བཅུག་པ་ལས་གྱུར་པར་བལྟའོ། །དེ་ཅིའི་ཕྱིར་ཞེ་ན། སེམས་བསྐྱེད་པ་དེ་ལས་ཐམས་ཅད་མཁྱེན་པ་ཐོབ་པའི་ཕྱིར་རོ། །ཤཱ་རིའི་བུ་ངས་ནི་
ཕྱོགས་བཅུ་ན་ང་བདག་ཅི་ལྟ་བ་དེ་དང་འདྲ་བའི་དེ་བཞིན་གཤེགས་པ་གང་འཇམ་དཔལ་གཞོན་ནུར་གྱུར་པས་བྱང་ཆུབ་ལ་བཞག་པ་ཤཱཀྱ་ཐུབ་པ་ཞེས་བྱ་བ་དཔག་ཏུ་མེད་གྲངས་མེད་པ་དང་། དེ་བཞིན་དུ་ཏི་ཤ་ཞེས་བྱ་བ་དང་། རྒྱལ་བ་ཞེས་བྱ་བ་དང་། གཙུག་ལྡན་ཞེས་
བྱ་བ་དང་། མར་མེ་མཛད་ཅེས་བྱ་བ་དག་མཐོང་སྟེ། གང་འཇམ་དཔལ་གཞོན་ནུར་གྱུར་པས་བྱང་ཆུབ་ལ་བཞག་ནས་ད་ལྟར་ཆོས་ཀྱི་འཁོར་ལོ་བསྐོར་བའི་དེ་བཞིན་གཤེགས་པ་དེ་དག་གི་མཚན་ཀྱང་བསྐལ་པའམ། བསྐལ་པའི་ལྷག་མ་མ་ལུས་པར་བརྗོད་པར་གྱུར་ན་གང་

བྱང་ཆུབ་སེམས་དཔའི་སྤྱད་པ་སྤྱོད་པ་དག་ལྟ་ཅི་སྨོས། གང་དགའ་ལྡན་གྱི་གནས་ན་གནས་པ་དག་ལྟ་ཅི་སྨོས། གང་སྐྱེ་བ་དག་ལྟ་ཅི་སྨོས། གང་ཁྱིམ་ནས་འབྱུང་བ་དག་ལྟ་ཅི་སྨོས། གང་དཀའ་བ་སྤྱོད་པ་དག་ལྟ་ཅི་སྨོས། གང་བྱང་ཆུབ་ཀྱི་སྙིང་པོ་ལ་འདུག་པ་དག་ལྟ་ཅི་སྨོས་ཏེ། ཤཱ་རིའི་
བུ་རྣམ་གྲངས་དེས་ཀྱང་འདི་ལྟར་རིག་པར་བྱ་སྟེ། གང་དག་བྱང་ཆུབ་སེམས་དཔའ་རྣམས་ཀྱི་མའོ། །སྐྱེད་པའོ། །ཐུགས་རྗེ་བའོ། །བྱེད་དུ་འཇུག་པའོ་ཞེས་ཡང་དག་པར་སྨྲ་ཞིང་སྟོན་པ་ནི་འཇམ་དཔལ་གཞོན་ནུར་གྱུར་པ་ཉིད་ལ་དེ་དག་སྨྲ་ཞིང་སྟོན་ཏེ། ཤཱ་རིའི་བུ་རྒྱུ་དེ་དང་རྐྱེན་དེ་ཡིན་ཏེ།
སྔོན་ཕན་བཏགས་པའི་ཕྱིར་འཇམ་དཔལ་གཞོན་ནུར་གྱུར་པ་ང་ལ་བྱས་པ་མི་གཟོ་བས་རྒོལ་ལོ། །དེ་ནས་ལྷའི་བུ་ཉིས་བརྒྱ་པོ་དག་འདི་སྙམ་དུ་གྱུར་ཏེ། ཆོས་ཐམས་ཅད་ནི་རྒྱུའི་རྗེས་སུ་འགྲོ་བའོ། །རྐྱེན་ལ་རག་ལས་པའོ། །སྲེད་པའི་རྩ་བ་ཅན་ནོ། །སྨོན་ལམ་གྱིས་ཐོག་དྲངས་པ་ཅན་
ཡིན་ཏེ། བཅོམ་ལྡན་འདས་འདི་ཡང་གཞན་གྱིས་བྱེད་དུ་བཅུག་པ་ཡིན་ན་དེ་བཞིན་གཤེགས་པ་མངོན་པར་བཞུགས་བཞིན་དུ་བདག་ཅག་དམན་པ་ལ་སེམས་པ་དེ་ནི་མི་རིགས་སོ་སྙམ་མོ། །དེ་ནས་ལྷའི་བུ་ཉིས་བརྒྱ་པོ་དེ་དག་ལྷག་པའི་བསམ་པས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་སེམས་བསྐྱེད་དོ། །འདིར་ལག་པ་བརྐྱང་ཞིང་རྫུ་འཕྲུལ་བསྟན་པའི་ཆོ་འཕྲུལ་འཇམ་དཔལ་གཞོན་ནུར་གྱུར་པས་བསྟན་ཅིང་ལྷུང་བཟེད་བླངས་པ་དང་། འདི་ལ་སྔོན་བྱུང་བའི་ཆོས་བསྟན་པ་བསྟན་པའི་ཚེ་འོག་གི་སངས་རྒྱས་ཀྱི་ཞིང་དང་། འདི་ནས་སེམས་ཅན་
གྲངས་ལས་འདས་པས་བྱང་ཆུབ་ཏུ་སེམས་བསྐྱེད་དོ། །ཕྱོགས་བཅུའི་སངས་རྒྱས་ཀྱི་ཞིང་དཔག་ཏུ་མེད་པ་ནས་ཀྱང་འཇམ་དཔལ་གཞོན་ནུར་གྱུར་པ་ལ་མཆོད་པའི་ལས་བྱ་བ་དང་། ཆོས་ཀྱི་གཡོག་བྱ་བའི་ཕྱིར་སངས་རྒྱས་བཅོམ་ལྡན་འདས་རྣམས་ཀྱིས་རིན་པོ་ཆེའི་གདུགས་བསྐུར་བར་གྱུར་ཏེ།
རིན་པོ་ཆེའི་གདུགས་དེ་དག་གིས་ཀྱང་འཇིག་རྟེན་གྱི་ཁམས་འདི་ཁེབས་པར་གྱུར་ཏོ། །རིན་པོ་ཆེའི་གདུགས་དེ་ལས་ཀྱང་དེ་བཞིན་ནོ། །ཇི་ལྟར་དེ་བཞིན་གཤེགས་པ་ཤཱཀྱ་ཐུབ་པས་གསུངས་པ་བཞིན་ཏེ། བདག་ཅག་ཐམས་ཅད་ཀྱང་འཇམ་དཔལ་གཞོན་ནུར་གྱུར་པས་བྱང་ཆུབ་

ལ་བཀོད་དོ་ཞེས་དེ་སྐད་ཟེར་བའི་སྒྲ་བྱུང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་མྱུར་དུ་མྱ་ངན་ལས་འདའ་བར་འདོད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །དེ་ཅིའི་
ཕྱིར་ཞེ་ན། ཤཱ་རིའི་བུ་སེམས་ཅན་གང་འཁོར་བས་སྐྲག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེད་ཅིང་། ཉན་ཐོས་ཀྱི་ཐེག་པ་ལ་གནས་ལ་ཉན་ཐོས་སུ་འགྱུར་བར་བྱའོ་སྙམ་དུ་སེམས་པ་དེ་དག་ནི་ད་དུང་དུའང་འཁོར་བ་ན་འཁོར་བར་གྱུར་ལ། བྱང་ཆུབ་
སེམས་དཔའ་གཞན་བརྩོན་འགྲུས་དང་ལྡན་པ་ཡང་དག་པར་རྫོགས་པའི་བྱང་ཆུབ་ལ་གནས་པ་དག་གིས་ནི་ཐམས་ཅད་མཁྱེན་པ་ཐོབ་པར་ངས་མཐོང་ངོ་། །དེ་ཅིའི་ཕྱིར་ཞེ་ན། །ཤཱ་རིའི་བུ་སྔོན་འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཐམས་ཅད་ཟིལ་གྱིས་གནོན་པ་ཞེས་བྱ་བ་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བར་གྱུར་ཏེ། ཤཱ་རིའི་
བུ་དེ་བཞིན་གཤེགས་པ་དེའི་ཉན་ཐོས་ནི་བྱེ་བ་ཕྲག་བརྒྱ་ཡོད་པར་གྱུར་ཏོ། །ཚེའི་ཚད་ནི་ལོ་འབུམ་ཐུབ་པར་གྱུར་ཏོ། །ཤཱ་རིའི་བུ་དེ་བཞིན་གཤེགས་པ་དེའི་ཉན་ཐོས་ཀྱི་མཆོག་ཤེས་རབ་དང་ལྡན་པ་ནི་དགེ་སློང་མངོན་པར་འཕགས་པ་ཞེས་བྱ་བ་ཞིག་བྱུང་ངོ་། །ཉན་ཐོས་ཀྱི་མཆོག་
གཉིས་པ་རྫུ་འཕྲུལ་དང་ལྡན་པའི་མཆོག་ནི་ཤུགས་ཆེན་པོ་ཞེས་བྱ་བ་ཞིག་བྱུང་ངོ་། །དེ་ལྟ་སྟེ། ཤཱ་རིའི་བུ་དེ་བཞིན་གཤེགས་པ་དེ་སྔ་དྲོའི་དུས་ཀྱི་ཚེ་ཤམ་ཐབས་མནབས་ཆོས་གོས་དང་། ལྷུང་བཟེད་བསྣམས་ཏེ། དགེ་སློང་གི་དགེ་འདུན་གྱིས་མདུན་དུ་བདར་ནས་རྒྱལ་པོའི་
ཕོ་བྲང་གྲགས་ལྡན་ཞེས་བྱ་བར་བསོད་སྙོམས་ཀྱི་ཕྱིར་གཤེགས་སོ། །དེའི་ཚེ་ན་དེ་བཞིན་གཤེགས་པའི་གཡས་ཕྱོགས་ནས་ནི་ཉན་ཐོས་ཤེས་རབ་དང་ལྡན་པའི་མཆོག་འགྲོའོ། །གཡོན་ཕྱོགས་ནས་ནི་ཉན་ཐོས་རྫུ་འཕྲུལ་དང་ལྡན་པའི་མཆོག་འགྲོའོ། །རྒྱབ་ནས་ནི་

མང་དུ་ཐོས་པ་འགྲོའོ། །མདུན་ནས་ནི་བ