Kinh tạng Tây Tạng (Kangyur Đại Học) — 062_མདོ་སྡེ།_ཚ

ག་བྱང་ཆུབ་ཀྱི་ཡན་ལག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི་ཆོས་ཐམས་ཅད་མཉམ་པ་ཉིད་དུ་རྟོགས་པ་གང་ཡིན་པའོ། །བདག་ནི་བཏང་སྙོམས་ཡང་དག་
བྱང་ཆུབ་ཀྱི་ཡན་ལག་ལ་གནས་ཀྱིས། གཞན་དག་ཀྱང་བཏང་སྙོམས་ཡང་དག་བྱང་ཆུབ་ཀྱི་ཡན་ལག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི་འཕགས་པའི་ཆོས་ལ་ཡང་རྗེས་སུ་ཆགས་པར་མི་བྱེད། འཕགས་པ་
མ་ཡིན་པའི་ཆོས་ལ་ཡང་ཁོང་ཁྲོ་བར་མི་བྱེད་པ་གང་ཡིན་པའོ། །བདག་ནི་ཡང་དག་པའི་ལྟ་བ་ལ་གནས་ཀྱིས། གཞན་དག་ཀྱང་ཡང་དག་པའི་ལྟ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་ལྟ་བ་ནི་མི་འགྱུར་བ་ལ་འཇུག་པ་གང་ཡིན་པ་སྟེ།
འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་
ལྟ་སྟེ། བདག་ནི་ཡང་དག་པའི་རྟོག་པ་ལ་གནས་ཀྱིས། གཞན་དག་ཀྱང་ཡང་དག་པའི་རྟོག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་རྟོག་པ་ནི་ཀུན་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་སྤོང་བ་གང་ཡིན་པའོ། །བདག་ནི་

ཡང་དག་པའི་ངག་ལ་གནས་ཀྱིས། གཞན་དག་ཀྱང་ཡང་དག་པའི་ངག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་ངག་ནི་ཡི་གེ་དང་། སྐད་དང་དབྱངས་ཐམས་ཅད་ལ་ངག་གི་ལམ་དུ་འདུ་ཤེས་པ་གང་ཡིན་པའོ། །བདག་ནི་ཡང་དག་པའི་ལས་ཀྱི་
མཐའ་ལ་གནས་ཀྱིས། གཞན་དག་ཀྱང་ཡང་དག་པའི་ལས་ཀྱི་མཐའ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་ལས་ཀྱི་མཐའ་ནི་ཆོས་ཐམས་ཅད་ལ་ལས་ཀྱི་རྣམ་པར་སྨིན་པ་མེད་པ་ལ་འཇུག་པ་གང་ཡིན་པའོ། །བདག་ནི་ཡང་དག་པའི་འཚོ་བ་ལ་
གནས་ཀྱིས། གཞན་དག་ཀྱང་ཡང་དག་པའི་འཚོ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་འཚོ་བ་ནི་ཚོལ་བ་ཐམས་ཅད་ཀྱི་རྒྱུན་བཅད་པ་གང་ཡིན་པའོ། །བདག་ནི་ཡང་དག་པའི་རྩོལ་བ་ལ་གནས་ཀྱིས། གཞན་དག་ཀྱང་ཡང་དག་པའི་རྩོལ་
བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་རྩོལ་བ་ནི་ཚུ་རོལ་གྱི་མུ་ཡོངས་སུ་སྤངས་ཤིང་ཕ་རོལ་གྱི་འགྲམ་དུ་འགྲོ་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་
བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཡང་དག་པའི་དྲན་པ་ལ་གནས་ཀྱིས། གཞན་དག་ཀྱང་ཡང་དག་པའི་དྲན་པ་
ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་དྲན་པ་ནི་རློམ་སེམས་ངོ་བོ་ཉིད་མེད་པའི་ཕྱིར་ཆོས་ཐམས་ཅད་ལ་དྲན་པ་མེད་ཅིང་ཡིད་ལ་བྱེད་པ་མེད་པ་གང་ཡིན་པའོ། །བདག་ནི་ཡང་དག་པའི་ཏིང་ངེ་འཛིན་ལ་གནས་ཀྱིས། གཞན་དག་ཀྱང་ཡང་དག་པའི་
ཏིང་ངེ་འཛིན་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་ཏིང་ངེ་འཛིན་ནི་སེམས་མེད་པའི་སྙོམས་པར་འཇུག་པ་གང་ཡིན་པའོ། །བདག་ནི་བྱང་ཆུབ་ཀྱི་སེམས་ལ་གནས་ཀྱིས། གཞན་དག་ཀྱང་བྱང་ཆུབ་ཀྱི་སེམས་ལ་དགོད་དོ་ཞེས་དབུགས་

འབྱིན་པ་རྙེད་པར་འགྱུར་ཏེ། དེ་ལ་བྱང་ཆུབ་ཀྱི་སེམས་ནི་བསམ་གྱིས་མི་ཁྱབ་པའི་ཡེ་ཤེས་མངོན་པར་སྒྲུབ་པ་གང་ཡིན་པའོ། །བདག་ནི་བྱང་ཆུབ་སེམས་དཔའི་བསླབ་པ་ལ་གནས་ཀྱིས། གཞན་དག་ཀྱང་བྱང་ཆུབ་སེམས་དཔའི་བསླབ་པ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་བྱང་ཆུབ་སེམས་དཔའི་བསླབ་པ་ནི་བསླབ་པ་ཐམས་ཅད་ལས་ཡང་དག་པར་འདའ་བ་གང་ཡིན་པའོ། །བདག་ནི་ཉོན་མོངས་པ་དང་དབྱེར་མེད་པའི་ཡེ་ཤེས་ལ་གནས་ཀྱིས། གཞན་དག་ཀྱང་ཉོན་མོངས་པ་དང་དབྱེར་མེད་པའི་ཡེ་
ཤེས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཉོན་མོངས་པ་དང་དབྱེར་མེད་པའི་ཡེ་ཤེས་ནི་ཉོན་མོངས་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ཡེ་ཤེས་ནི་ཉོན་མོངས་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། ཉོན་མོངས་པའི་རང་བཞིན་ལས་
ཡེ་ཤེས་གཞན་མེད་པས་ཉོན་མོངས་པའི་རང་བཞིན་ཉིད་ཡེ་ཤེས་སོ། །ཉོན་མོངས་པའི་རང་བཞིན་གྱི་ཡེ་ཤེས་དེས་ཆོས་ཐམས་ཅད་ཤེས་ཏེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་
དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སྦྱིན་པའི་ཕ་རོལ་ཏུ་ཕྱིན་པ་ལ་གནས་ཀྱིས། གཞན་དག་ཀྱང་སྦྱིན་པའི་ཕ་རོལ་ཏུ་ཕྱིན་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་སྦྱིན་པའི་ཕ་རོལ་ཏུ་ཕྱིན་པ་ནི་སེམས་ཅན་སེར་སྣ་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། །བདག་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གནས་ཀྱིས། གཞན་དག་ཀྱང་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི་ཚུལ་ཁྲིམས་འཆལ་བའི་སེམས་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། །བདག་ནི་བཟོད་པའི་ཕ་རོལ་ཏུ་ཕྱིན་པ་ལ་གནས་ཀྱིས། གཞན་དག་ཀྱང་བཟོད་པའི་ཕ་རོལ་ཏུ་ཕྱིན་པ་ལ་དགོད་དོ་ཞེས་

དབུགས་འབྱིན་པ་རྙེད་པར་འགྱུར་ཏེ། དེ་ལ་བཟོད་པའི་ཕ་རོལ་ཏུ་ཕྱིན་པ་ནི་གནོད་སེམས་ཀྱི་སེམས་དང་ལྡན་པའི་སེམས་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། །བདག་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་གནས་ཀྱིས། གཞན་དག་ཀྱང་བརྩོན་འགྲུས་ཀྱི་ཕ་རོལ་ཏུ་ཕྱིན་
པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་སེམས་ཅན་ལེ་ལོ་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། །བདག་ནི་བསམ་གཏན་གྱི་ཕ་རོལ་ཏུ་ཕྱིན་པ་ལ་གནས་ཀྱིས། གཞན་དག་ཀྱང་བསམ་གཏན་གྱི་ཕ་རོལ་ཏུ་ཕྱིན་པ་
ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསམ་གཏན་གྱི་ཕ་རོལ་ཏུ་ཕྱིན་པ་ནི་སེམས་རྣམ་པར་གཡེངས་པའི་སེམས་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་
དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ཀྱིས། གཞན་དག་
ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཤེས་རབ་འཆལ་པའི་སེམས་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། །བདག་ནི་དམ་པའི་ཆོས་ཡོངས་སུ་གཟུང་བ་ལ་གནས་ཀྱིས། གཞན་
དག་ཀྱང་དམ་པའི་ཆོས་ཡོངས་སུ་གཟུང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དམ་པའི་ཆོས་ཡོངས་སུ་གཟུང་བ་ནི་བྱང་ཆུབ་སེམས་དཔའ་རྣམས་ཡོངས་སུ་འཛིན་པ་གང་ཡིན་པའོ། །བདག་ནི་བསོད་ནམས་ཀྱི་ཚོགས་ལ་གནས་ཀྱིས། གཞན་དག་ཀྱང་
བསོད་ནམས་ཀྱི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསོད་ནམས་ཀྱི་ཚོགས་ནི་བྱང་ཆུབ་སེམས་དཔའ་རྣམས་ལ་རྙེད་པ་དང་བཀུར་སྟི་འབུལ་བ་དང་། ཕྱོགས་དང་ཕྱོགས་མཚམས་སུ་གྲགས་པའི་སྒྲ་དང་ཚིགས་སུ་བཅད་པ་འབྱིན་པ་གང་ཡིན་པའོ། །

བདག་ནི་ཡེ་ཤེས་ཀྱི་ཚོགས་ལ་གནས་ཀྱིས། གཞན་དག་ཀྱང་ཡེ་ཤེས་ཀྱི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡེ་ཤེས་ཀྱི་ཚོགས་ནི་བྱང་ཆུབ་སེམས་དཔའ་རྣམས་ཡེ་ཤེས་ཀྱི་ཚོགས་ཀྱིས་བརྟན་པ་དང་། གོས་དང་། ཟས་དང་།
མལ་ཆ་དང་། ན་བའི་གསོས་སྨན་གྱིས་བརྟན་པ་གང་ཡིན་པའོ། །བདག་ནི་ཞི་གནས་ཀྱི་ཚོགས་ལ་གནས་ཀྱིས། གཞན་དག་ཀྱང་ཞི་གནས་ཀྱི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཞི་གནས་ཀྱི་ཚོགས་ནི་ཆོས་ཐམས་ཅད་མཉམ་པ་ཉིད་དུ་
འཇུག་པ་ལ་རློམ་སེམས་མེད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་
ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ལྷག་མཐོང་གི་ཚོགས་ལ་གནས་ཀྱིས། གཞན་དག་ཀྱང་ལྷག་མཐོང་གི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལྷག་མཐོང་གི་ཚོགས་ནི་ཆོས་ཐམས་ཅད་
ལ་མཐའ་དང་དབུང་མེད་པར་འཇུག་པ་གང་ཡིན་པའོ། །བདག་ནི་ཚུལ་ཁྲིམས་ལ་གནས་ཀྱིས། གཞན་དག་ཀྱང་ཚུལ་ཁྲིམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་ནི་ལུས་དང་ངག་དང་ཡིད་ཀྱི་ལས་ཡོངས་སུ་དག་པ་གང་ཡིན་པའོ། །
བདག་ནི་བཟོད་པ་ལ་གནས་ཀྱིས། གཞན་དག་ཀྱང་བཟོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཟོད་པ་ནི་ལས་ཀྱི་རྣམ་པར་སྨིན་པ་ལ་ཡིད་ཆེས་པ་གང་ཡིན་པའོ། །བདག་ནི་བརྩོན་འགྲུས་ལ་གནས་ཀྱིས། གཞན་དག་ཀྱང་བརྩོན་འགྲུས་
ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྩོན་འགྲུས་ནི་སེམས་ཅན་ཐམས་ཅད་བསོད་ནམས་ཀྱི་ཚོགས་ལ་གཟུད་པར་བྱ་བ་ལ་ཡོངས་སུ་སྐྱོ་བ་མེད་པ་གང་ཡིན་པའོ། །བདག་ནི་བསམ་གཏན་ལ་གནས་ཀྱིས། གཞན་དག་ཀྱང་བསམ་གཏན་ལ་དགོད་དོ་

ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསམ་གཏན་ནི་དམིགས་པ་ཐམས་ཅད་ལ་གནས་པ་མེད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་
ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཤེས་རབ་ལ་གནས་ཀྱིས། གཞན་དག་ཀྱང་ཤེས་རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཤེས་རབ་
ནི་ཆོས་ཐམས་ཅད་མངོན་སུམ་དུ་གྱུར་པ་གང་ཡིན་པའོ། །བདག་ནི་སངས་རྒྱས་ཀྱི་ཆོས་ཐམས་ཅད་བསྡུ་བ་ལ་གནས་ཀྱིས། གཞན་དག་ཀྱང་སངས་རྒྱས་ཀྱི་ཆོས་ཐམས་ཅད་བསྡུ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་ཀྱི་ཆོས་ཐམས་ཅད་བསྡུ་བ་ནི་
བསམ་པས་བསྡུས་པའི་བྱང་ཆུབ་ཀྱི་སེམས་གང་ཡིན་པའོ། །བདག་ནི་ཆོས་སྨྲ་བ་ལ་གནས་ཀྱིས། གཞན་དག་ཀྱང་ཆོས་སྨྲ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་སྨྲ་བ་ནི་དེ་བཞིན་གཤེགས་པས་གནང་བ་བརྗོད་པ་གང་ཡིན་པའོ། །བདག་
ནི་དྲན་པ་ལ་གནས་ཀྱིས། གཞན་དག་ཀྱང་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དྲན་པ་ནི་མི་བརྗེད་པའི་ཆོས་ལ་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་
སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་བློ་གྲོས་ལ་གནས་ཀྱིས། གཞན་དག་ཀྱང་བློ་གྲོས་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་བློ་གྲོས་ནི་ཆོས་ཀྱི་མཚམས་སྦྱོར་བ་ཁོང་དུ་ཆུད་པ་གང་ཡིན་པའོ། །བདག་ནི་བརྟན་པ་ལ་གནས་ཀྱིས། གཞན་དག་ཀྱང་བརྟན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྟན་པ་ནི་སྤྱོད་པ་དང་ཆོ་ག་

ཕུན་སུམ་ཚོགས་པ་གང་ཡིན་པའོ། །བདག་ནི་རྟོགས་པ་ལ་གནས་ཀྱིས། གཞན་དག་ཀྱང་རྟོགས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རྟོགས་པ་ནི་དོན་རྟོགས་པ་ལ་འཇུག་པ་གང་ཡིན་པའོ། །བདག་ནི་ཡང་དག་པའི་རྣམ་པར་གྲོལ་
བ་ལ་གནས་ཀྱིས། གཞན་དག་ཀྱང་ཡང་དག་པའི་རྣམ་པར་གྲོལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་རྣམ་པར་གྲོལ་བ་ནི་ཆོས་གང་ཡང་ཐོབ་པ་མེད་པ་གང་ཡིན་པའོ། །བདག་ནི་ཀུན་ནས་ལྡང་བ་རྣམ་པར་གནོན་པ་ལ་གནས་ཀྱིས། གཞན་
དག་ཀྱང་ཀུན་ནས་ལྡང་བ་རྣམ་པར་གནོན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཀུན་ནས་ལྡང་བ་རྣམ་པར་གནོན་པ་ནི་ཉེས་པའི་རྡུལ་འཆགས་པ་དང་། ཕྱིན་ཅད་མི་དགེ་བའི་ཆོས་རྣམས་སྡོམ་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་
པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཆོ་ག་
ལ་གནས་ཀྱིས། གཞན་དག་ཀྱང་ཆོ་ག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོ་ག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ལ་སྒྲུབ་པ་གང་ཡིན་པའོ། །བདག་ནི་བྱ་བ་ལ་གནས་ཀྱིས། གཞན་དག་ཀྱང་བྱ་བ་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་བྱ་བ་ནི་སྟོང་པ་ཉིད་ལ་ཡང་མོས་ལ། ལས་ཀྱི་རྣམ་པར་སྨིན་པ་ལ་ཡང་ཡིད་ཆེས་པ་གང་ཡིན་པའོ། །བདག་ནི་སྡིག་པ་འདོད་པ་དང་བྲལ་བ་ལ་གནས་ཀྱིས། གཞན་དག་ཀྱང་སྡིག་པ་འདོད་པ་དང་བྲལ་བ་ལ་དགོད་དོ་ཞེས་དབུགས་འབྱིན་པ་རྙེད་
པར་འགྱུར་ཏེ། དེ་ལ་སྡིག་པ་འདོད་པ་དང་བྲལ་བ་ནི་རྙེད་པ་དང་བཀུར་སྟི་དང་ཚིགས་སུ་བཅད་པ་ལས་སྡིག་པ་མི་འདོད་པ་གང་ཡིན་པའོ། །བདག་ནི་བདག་ལ་མི་སྟོད་གཞན་ལ་མི་སྨོད་པ་ལ་གནས་ཀྱིས། གཞན་དག་ཀྱང་བདག་ལ་མི་སྟོད་གཞན་ལ་མི་སྨོད་པ་ལ་དགོད་དོ་ཞེས་

དབུགས་འབྱིན་པ་རྙེད་པར་འགྱུར་ཏེ། དེ་ལ་བདག་ལ་མི་སྟོད་གཞན་ལ་མི་སྨོད་པ་ནི། བདག་ལ་ཡོན་ཏན་ཡོད་པར་སྒྲོ་མི་འདོགས་པ་གང་ཡིན་པ་འདི་ནི་བདག་ལ་མི་སྟོད་པའོ། །གཞན་གྱི་ཡོན་ཏན་ཡང་དག་པ་ཆུད་མི་གཟོན་པ་གང་ཡིན་པ་འདི་ནི་གཞན་ལ་མི་སྨོད་པའོ། །བདག་ནི་
ཡང་དག་པ་ལ་གནས་ཀྱིས། གཞན་དག་ཀྱང་ཡང་དག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པ་ནི་ཆོས་ཐམས་ཅད་ལ་འདུ་ཤེས་མེད་པ་དང་། འདུ་ཤེས་ལ་རློམ་སེམས་མེད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་
དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་བག་ཆགས་ཀྱི་
མཚམས་སྦྱོར་བ་ལེགས་པར་འཇོམས་པ་ལ་གནས་ཀྱིས། གཞན་དག་ཀྱང་བག་ཆགས་ཀྱི་མཚམས་སྦྱོར་བ་ལེགས་པར་འཇོམས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བག་ཆགས་ཀྱི་མཚམས་སྦྱོར་བ་ལེགས་པར་འཇོམས་པ་ནི་སྔོན་གྱི་བྱིས་པའི་སྤྱོད་
པ་ལ་སྨོད་པ་དང་། ཉན་ཐོས་དང་རང་སངས་རྒྱས་ཀྱི་ས་ལ་འདོད་པ་མེད་པ་གང་ཡིན་པའོ། །བདག་ནི་རྗེས་སུ་ཆགས་པ་དང་། ཁོང་ཁྲོ་བ་སྤོང་བ་ལ་གནས་ཀྱིས། གཞན་དག་ཀྱང་རྗེས་སུ་ཆགས་པ་དང་། ཁོང་ཁྲོ་བ་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་
འགྱུར་ཏེ། དེ་ལ་རྗེས་སུ་ཆགས་པ་དང་ཁོང་ཁྲོ་བ་སྤོང་བ་ནི་མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པ་དང་། དགེ་བའི་ཆོས་སྐྱེས་པ་རྣམས་ཆུད་མི་གཟོན་པ་གང་ཡིན་པའོ། །བདག་ནི་མཉམ་པ་ལ་གནས་ཀྱིས། གཞན་དག་ཀྱང་མཉམ་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་མཉམ་པ་ནི་འཕགས་པའི་བདེན་པ་རྟོགས་པ་གང་ཡིན་པའོ། །བདག་ནི་དྲང་བ་ལ་གནས་ཀྱིས། གཞན་དག་ཀྱང་དྲང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དྲང་བ་ནི་འཕགས་པའི་ལམ་ལ་རྟོག་པ་མེད་པ་གང་ཡིན་

པའོ། །བདག་ནི་བཞིན་ཁྲོ་གཉེར་མེད་པ་ལ་གནས་ཀྱིས། གཞན་དག་ཀྱང་བཞིན་ཁྲོ་གཉེར་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཞིན་ཁྲོ་གཉེར་མེད་པ་ནི་ཞེ་སྡང་དང་བྲལ་བ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་
དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་གསོང་པོར་སྨྲ་བ་ལ་
གནས་ཀྱིས། གཞན་དག་ཀྱང་གསོང་པོར་སྨྲ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གསོང་པོར་སྨྲ་བ་ནི་ཚུར་ཤོག་ལེགས་པར་འོངས་སམ་ཞེས་རྗོད་ཅིང་ལྡང་བའི་ཟོ་བདོག་ཡང་བ་གང་ཡིན་པའོ། །བདག་ནི་ཡེ་ཤེས་མཐའ་ཡས་པ་ལ་གནས་ཀྱིས། གཞན་
དག་ཀྱང་ཡེ་ཤེས་མཐའ་ཡས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡེ་ཤེས་མཐའ་ཡས་པ་ནི་ཕྱོགས་བཅུའི་འཇིག་རྟེན་རབ་འབྱམ་ཐམས་ཅད་དུ་འཇིག་རྟེན་དང་འཇིག་རྟེན་ལས་འདས་པའི་ལས་དང་བཟོའི་གནས་ལ་ཡེ་ཤེས་ལྷུན་གྱིས་གྲུབ་པ་གང་ཡིན་པའོ། །
བདག་ནི་ལས་ཀྱི་རྣམ་པར་སྨིན་པ་ལ་ནེམ་ནུར་མེད་པར་གནས་ཀྱིས། གཞན་དག་ཀྱང་ལས་ཀྱི་རྣམ་པར་སྨིན་པ་ལ་ནེམ་ནུར་མེད་པར་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལས་ཀྱི་རྣམ་པར་སྨིན་པ་ལ་ནེམ་ནུར་མེད་པ་ནི་རྟག་པ་དང་ཆད་པ་ཡོངས་སུ་སྤངས་པ་
གང་ཡིན་པའོ། །བདག་ནི་བརྗོད་དུ་མེད་པ་ལ་གནས་ཀྱིས། གཞན་དག་ཀྱང་བརྗོད་དུ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྗོད་དུ་མེད་པ་ནི་སེམས་དང་། ཡིད་དང་རྣམ་པར་ཤེས་པ་རྣམས་ཡིད་ལ་བྱེད་པ་མེད་ཅིང་སྒྲོ་འདོགས་པ་མེད་
པ་གང་ཡིན་པའོ། །བདག་ནི་ཆོས་ཀྱི་དབྱིངས་ཤེས་པ་ལ་གནས་ཀྱིས། གཞན་དག་ཀྱང་ཆོས་ཀྱི་དབྱིངས་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཀྱི་དབྱིངས་ཤེས་པ་ནི་ཆོས་ཐམས་ཅད་ཆོས་ཀྱི་དབྱིངས་དབྱེར་མེད་པ་གཉིས་སུ་མེད་

པར་ཤེས་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་
འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སྤོང་བ་ལ་གནས་ཀྱིས། གཞན་དག་ཀྱང་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོང་བ་ནི་དམིགས་པ་དག་ལ་མེད་པའི་འདུ་ཤེས་གང་ཡིན་པ་དང་། རློམ་སེམས་གང་ཡིན་པའོ། །བདག་ནི་སྒྲིབ་
པ་མེད་པའི་ཡེ་ཤེས་ལ་གནས་ཀྱིས། གཞན་དག་ཀྱང་སྒྲིབ་པ་མེད་པའི་ཡེ་ཤེས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྒྲིབ་པ་མེད་པའི་ཡེ་ཤེས་ནི་མཐའ་དང་མཐའ་མེད་པ་རྣམ་པར་དག་པ་གང་ཡིན་པའོ། །བདག་ནི་ཚིག་གི་མཚམས་སྦྱར་བ་ཤེས་པ་ལ་
གནས་ཀྱིས། གཞན་དག་ཀྱང་ཚིག་གི་མཚམས་སྦྱར་བ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚིག་གི་མཚམས་སྦྱར་བ་ཤེས་པ་ནི་སྨོན་ལམ་གྱི་ཁྱད་པར་ཡང་དག་པར་འབྱུང་བས་དགེ་བའི་རྩ་བ་ཡོངས་སུ་བསྔོ་བ་གང་ཡིན་པའོ། །བདག་ནི་དེས་
པ་ལ་གནས་ཀྱིས། གཞན་དག་ཀྱང་དེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེས་པ་ནི་སེམས་ཅན་ཐམས་ཅད་ལ་ཕན་པའི་གཞི་གང་ཡིན་པའོ། །བདག་ནི་བདུད་ཀྱི་ལས་དང་བྲལ་བ་ལ་གནས་ཀྱིས། གཞན་དག་ཀྱང་བདུད་ཀྱི་ལས་དང་བྲལ་བ་ལ་
དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདུད་ཀྱི་ལས་དང་བྲལ་བ་ནི་ལྟ་བར་གྱུར་པ་ཡོངས་སུ་ཤེས་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་
དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སངས་རྒྱས་ལ་སྐྱབས་སུ་སོང་གིས། གཞན་དག་ཀྱང་སངས་རྒྱས་ལ་སྐྱབས་སུ་འགྲོ་བ་ལ་དགོད་དོ་ཞེས་

དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་ལ་སྐྱབས་སུ་འགྲོ་བ་ནི་དེ་བཞིན་གཤེགས་པའི་བསླབ་པ་ལས་མི་འདའ་བ་གང་ཡིན་པའོ། །བདག་ནི་ཆོས་ལ་སྐྱབས་སུ་སོང་གིས། གཞན་དག་ཀྱང་ཆོས་ལ་སྐྱབས་སུ་འགྲོ་བ་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་ཆོས་ལ་སྐྱབས་སུ་འགྲོ་བ་ནི་ཆོས་མི་སྤོང་བ་གང་ཡིན་པའོ། །བདག་ནི་དགེ་འདུན་ལ་སྐྱབས་སུ་སོང་གིས། གཞན་དག་ཀྱང་དགེ་འདུན་ལ་སྐྱབས་སུ་འགྲོ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དགེ་འདུན་ལ་སྐྱབས་སུ་
འགྲོ་བ་ནི་སངས་རྒྱས་ཀྱི་ཚུལ་ཁྲིམས་ལ་ལྟ་བ་གང་ཡིན་པའོ། །བདག་ནི་ང་རྒྱལ་མེད་པ་ལ་གནས་ཀྱིས། གཞན་དག་ཀྱང་ང་རྒྱལ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ང་རྒྱལ་མེད་པ་ནི་སེམས་ཅན་ལ་ཤིན་ཏུ་གུས་པ་གང་ཡིན་པའོ། །བདག་
ནི་ཁོན་དུ་འཛིན་པ་མེད་པ་ལ་གནས་ཀྱིས། གཞན་དག་ཀྱང་ཁོན་དུ་འཛིན་པ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁོན་དུ་འཛིན་པ་མེད་པ་ནི་སེམས་ཀྱི་ཡོངས་སུ་གདུང་བ་ཉེ་བར་ཞི་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་
དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཚུལ་འཆོས་པ་མེད་པ་
ལ་གནས་ཀྱིས། གཞན་དག་ཀྱང་ཚུལ་འཆོས་པ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་འཆོས་པ་མེད་པ་ནི་ཟང་ཟིང་མེད་པའི་སེམས་ཀྱིས་གཞན་ལ་ཕན་འདོགས་པ་གང་ཡིན་པའོ། །བདག་ནི་ཁ་གསག་མེད་པ་ལ་གནས་ཀྱིས། གཞན་དག་
ཀྱང་ཁ་གསག་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁ་གསག་མེད་པ་ནི་སེམས་ཅན་ཡོངས་སུ་སྨིན་པར་བྱེད་པས་ཡོངས་སུ་ལེན་པ་གཏོང་བ་གང་ཡིན་པའོ། །བདག་ནི་ཐོབ་ཀྱིས་འཇལ་བ་མེད་པ་ལ་གནས་ཀྱིས། གཞན་དག་ཀྱང་ཐོབ་ཀྱིས་

འཇལ་བ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཐོབ་ཀྱིས་འཇལ་བ་མེད་པ་ནི་འཕགས་པའི་རིགས་ཡང་དག་པར་བླངས་པ་ཡོངས་སུ་རྫོགས་པར་བྱེད་ཅིང་སྦྱངས་པའི་ཡོན་ཏན་དང་ཡོ་བྱད་བསྙུངས་པ་གང་ཡིན་པའོ། །བདག་ནི་འཚོ་བ་ཡོངས་སུ་
དག་པ་ལ་གནས་ཀྱིས། གཞན་དག་ཀྱང་འཚོ་བ་ཡོངས་སུ་དག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འཚོ་བ་ཡོངས་སུ་དག་པ་ནི་དམ་པའི་ཆོས་ཡོངས་སུ་གཟུང་བར་བྱ་བའི་ཕྱིར་སྡུག་བསྔལ་གྱི་ཡོ་བྱད་གང་མི་ལེན་པ་དེ་ཅི་ཡང་མེད་པ་དང་།
བདེ་བའི་ཡོ་བྱད་གང་མི་གཏོང་བ་དེ་ཅི་ཡང་མེད་པའོ། །བདག་ནི་གཅིག་པུར་དགའ་བ་ལ་གནས་ཀྱིས། གཞན་དག་ཀྱང་གཅིག་པུར་དགའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གཅིག་པུར་དགའ་བ་ནི་འདུ་འཛི་ཡོངས་སུ་སྤོང་བར་དགའ་བ་གང་
ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ།། །།བམ་པོ་གསུམ་པ། འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་
ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཆོས་ཀྱི་ཀུན་དགའ་ལ་དགའ་བ་ལ་གནས་ཀྱིས། གཞན་དག་ཀྱང་ཆོས་ཀྱི་ཀུན་དགའ་ལ་དགའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཀྱི་ཀུན་དགའ་ལ་དགའ་བ་ནི་ཁམས་གསུམ་
གྱིས་མི་སྐྲག་པ་དང་། བྱང་ཆུབ་ཀྱི་སེམས་ཆུད་མི་ཟ་བ་གང་ཡིན་པའོ། །བདག་ནི་མནར་སེམས་ཀྱི་དངོས་པོ་དགུ་སྤོང་བ་ལ་གནས་ཀྱིས། གཞན་དག་ཀྱང་མནར་སེམས་ཀྱི་དངོས་པོ་དགུ་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མནར་སེམས་
ཀྱི་དངོས་པོ་དགུ་སྤོང་བ་ནི་སེམས་ཅན་གྱི་གནས་དགུ་ཡོངས་སུ་ཤེས་པ་གང་ཡིན་པའོ། །བདག་ནི་སེམས་ཞི་བ་ཉིད་ལ་གནས་ཀྱིས། གཞན་དག་ཀྱང་སེམས་ཞི་བ་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཞི་བ་ཉིད་ནི་སེམས་ཀྱི་ཡོངས་སུ་

གདུང་བ་མེད་པ་གང་ཡིན་པའོ། །བདག་ནི་ཞི་གནས་ཀྱི་ཚོགས་ཡོངས་སུ་ཚོལ་བ་ལ་གནས་ཀྱིས། གཞན་དག་ཀྱང་ཞི་གནས་ཀྱི་ཚོགས་ཡོངས་སུ་ཚོལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཞི་གནས་ཀྱི་ཚོགས་ཡོངས་སུ་ཚོལ་བ་ནི་སེམས་
ལས་སུ་རུང་བ་གང་ཡིན་པའོ། །བདག་ནི་ཚུལ་ཁྲིམས་ལྷོད་པ་མེད་པ་ལ་གནས་ཀྱིས། གཞན་དག་ཀྱང་ཚུལ་ཁྲིམས་ལྷོད་པ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་ལྷོད་པ་མེད་པ་ནི་ཆོ་ག་དང་། ཚུལ་ཁྲིམས་དང་། ལྟ་བ་ཉམས་
པ་རྣམས་ལས་ཡང་དག་པར་འདའ་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་
དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ལྷ་དང་མི་ལ་མི་སླུ་བར་གནས་ཀྱིས། གཞན་དག་ཀྱང་ལྷ་དང་མི་ལ་མི་སླུ་བར་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལྷ་དང་མི་ལ་མི་སླུ་བ་ནི་བྱང་ཆུབ་ཀྱི་སེམས་
ཡོངས་སུ་མི་གཏོང་བ་གང་ཡིན་པའོ། །བདག་ནི་སྦྱོར་བ་ལ་གནས་ཀྱིས། གཞན་དག་ཀྱང་སྦྱོར་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྦྱོར་བ་ནི་སེམས་ཅན་ཐམས་ཅད་ལ་ཕན་པའི་དངོས་པོ་སྔོན་དུ་འགྲོ་བའི་རྗེས་སུ་བསྟན་པ་གང་ཡིན་པའོ། །
བདག་ནི་སེམས་དམུ་རྒོད་མ་ཡིན་པ་ལ་གནས་ཀྱིས། གཞན་དག་ཀྱང་སེམས་དམུ་རྒོད་མ་ཡིན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་དམུ་རྒོད་མ་ཡིན་པ་ནི་དུལ་བ་དང་ཅང་ཤེས་ཀྱི་སེམས་གང་ཡིན་པའོ། །བདག་ནི་སེམས་ཅན་
ཐམས་ཅད་ཀྱི་སློབ་མར་ཁས་ལེན་པ་ལ་གནས་ཀྱིས། གཞན་དག་ཀྱང་སེམས་ཅན་ཐམས་ཅད་ཀྱི་སློབ་མར་ཁས་ལེན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཅན་ཐམས་ཅད་ཀྱི་སློབ་མར་ཁས་ལེན་པ་ནི་བྱ་བ་ཅི་ཡོད་པ་ལ་བདག་ཉིད་

བྱེད་པ་གང་ཡིན་པའོ། །བདག་ནི་སྦྱིན་གནས་རྣམས་ལ་འདུད་པ་དང་། ཕྱག་བྱ་བ་ལ་གནས་ཀྱིས། གཞན་དག་ཀྱང་སྦྱིན་གནས་རྣམས་ལ་འདུད་པ་དང་ཕྱག་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྦྱིན་གནས་རྣམས་ལ་འདུད་པ་དང་ཕྱག་བྱ་བ་
ནི་སེམས་ཅན་ཐམས་ཅད་ལ་ང་རྒྱལ་མེད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་
རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་དམ་པའི་ཆོས་ཡོངས་སུ་ཚོལ་བ་ལ་གནས་ཀྱིས། གཞན་དག་ཀྱང་དམ་པའི་ཆོས་ཡོངས་སུ་ཚོལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དམ་པའི་ཆོས་ཡོངས་
སུ་ཚོལ་བ་ནི་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་སྐྱོ་བ་མེད་པ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བ་དང་། ཚུལ་ཁྲིམས་དང་ཐོས་པའི་ཚོགས་སོགས་པ་དང་། ཆོས་ཡོངས་སུ་ཚོལ་བ་ལ་བརྩོན་ཞིང་སྦྱིན་པ་མི་ལེན། སེར་སྣ་མི་གཏོང་། ཚུལ་ཁྲིམས་
མི་ལེན། འཆལ་པའི་ཚུལ་ཁྲིམས་མི་གཏོང་། བཟོད་པ་མི་ལེན། གནོད་སེམས་མི་གཏོང་། བརྩོན་འགྲུས་མི་ལེན། ལེ་ལོ་མི་གཏོང་། བསམ་གཏན་མི་ལེན། རྣམ་པར་རྟོག་པ་དང་རྣམ་པར་དཔྱོད་པ་མི་གཏོང་། ཤེས་རབ་མི་ལེན། འཆལ་པའི་ཤེས་རབ་མི་
གཏོང་། དགེ་བ་མི་ལེན་ཅིང་མི་དགེ་བ་མི་གཏོང་བ་གང་ཡིན་པའོ། །བདག་ནི་ཆོས་ལ་གུས་པ་དང་བཅས་པ་ལ་གནས་ཀྱིས། གཞན་དག་ཀྱང་ཆོས་ལ་གུས་པ་དང་བཅས་པ་ལ་དགོད་དོ་ཞེས་དབུགས་འབྱིན་པ་རྙེད་པ་འགྱུར་ཏེ། དེ་ལ་ཆོས་ལ་གུས་པ་དང་བཅས་པ་ནི་ཆོས་
རྣམས་ལ་ནན་ཏན་བྱེད་པ་གང་ཡིན་པའོ། །བདག་ནི་ཆོས་སྨྲ་བ་ལ་གུས་པ་དང་བཅས་པ་ལ་གནས་ཀྱིས། གཞན་དག་ཀྱང་ཆོས་སྨྲ་བ་ལ་གུས་པ་དང་བཅས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་སྨྲ་བ་ལ་གུས་པ་དང་བཅས་པ་ནི་ཆོས་སྨྲ་

བ་ལ་སྟོན་པར་འདུ་ཤེས་པ་གང་ཡིན་པའོ། །བདག་ནི་ཚིག་རྩུབ་པོ་མེད་པ་ལ་གནས་ཀྱིས། གཞན་དག་ཀྱང་ཚིག་རྩུབ་པོ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚིག་རྩུབ་པོ་མེད་པ་ནི་ཕན་འདོགས་པའི་ཚིག་གང་ཡིན་པའོ། །བདག་
ནི་གནོད་སེམས་མེད་པ་ལ་གནས་ཀྱིས། གཞན་དག་ཀྱང་གནོད་སེམས་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གནོད་སེམས་མེད་པ་ནི་ལས་བྱ་བ་ལ་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་
དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སྦྱིན་པ་ལ་གནས་ཀྱིས། གཞན་དག་ཀྱང་སྦྱིན་པ་
ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྦྱིན་པ་ནི་ཆོས་ཇི་ལྟ་བ་བཞིན་དུ་སྟོན་པ་གང་ཡིན་པའོ། །བདག་ནི་སྙན་པར་སྨྲ་བ་ལ་གནས་ཀྱིས། གཞན་དག་ཀྱང་སྙན་པར་སྨྲ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྙན་པར་སྨྲ་བ་ནི་
ཟང་ཟིང་མེད་པའི་སེམས་ཀྱིས། ཆོས་སྟོན་པ་གང་ཡིན་པའོ། །བདག་ནི་དོན་སྤྱོད་པ་ལ་གནས་ཀྱིས། གཞན་དག་ཀྱང་དོན་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དོན་སྤྱོད་པ་ནི་གཞན་ལ་ལུང་འབོགས་པ་དང་། ཁ་ཏོན་འདོན་དུ་འཇུག་པ་ལ་
སྐྱོ་བ་མེད་པ་གང་ཡིན་པའོ། །བདག་ནི་དོན་འཐུན་པ་ལ་གནས་ཀྱིས། གཞན་དག་ཀྱང་དོན་འཐུན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དོན་འཐུན་པ་ནི་སྦྱིན་པ་བྱིན་ནས་ཐེག་པ་ཆེན་པོ་ལ་དགོད་པ་གང་ཡིན་པའོ། །བདག་ནི་བྱང་ཆུབ་ཀྱི་སེམས་
ལ་གནས་ཀྱིས། གཞན་དག་ཀྱང་བྱང་ཆུབ་ཀྱི་སེམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཆུད་མི་ཟ་ཞིང་གནས་པར་བྱ་བའི་ཕྱིར་འདུན་པ་སྐྱེད་པ་དང་། འབད་པ་དང་། བརྩོན་འགྲུས་

རྩོམ་པ་དང་། སེམས་རབ་ཏུ་འཛིན་པ་དང་། ཡང་དག་པར་འཇོག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་
ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་དོན་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་དོན་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་
ཏེ། དེ་ལ་དོན་སོ་སོ་ཡང་དག་པར་རིག་པ་ནི་ཆོས་ཀྱི་ཚུལ་ཡང་དག་པ་ཇི་ལྟ་བ་བཞིན་དུ་རྟོགས་པ་གང་ཡིན་པའོ། །བདག་ནི་ཆོས་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་ཆོས་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ།
དེ་ལ་ཆོས་སོ་སོ་ཡང་དག་པར་རིག་པ་ནི་སངས་རྒྱས་ཀྱི་ཆོས་ཐམས་ཅད་ལ་འཇུག་པའི་ཡེ་ཤེས་གང་ཡིན་པའོ། །བདག་ནི་ངེས་པའི་ཚིག་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་ངེས་པའི་ཚིག་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་
རྙེད་པར་འགྱུར་ཏེ། དེ་ལ་ངེས་པའི་ཚིག་སོ་སོ་ཡང་དག་པར་རིག་པ་ནི་སྐད་བསྒྲགས་པ་ཐམས་ཅད་ལ་འཇུག་པའི་ཡེ་ཤེས་གང་ཡིན་པའོ། །བདག་ནི་སྤོབས་པ་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་སྤོབས་པ་སོ་སོ་ཡང་དག་པར་རིག་པ་ལ་
དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོབས་པ་སོ་སོ་ཡང་དག་པར་རིག་པ་ནི་སངས་རྒྱས་ཀྱི་ཆོས་ཐམས་ཅད་ལ་ཚིག་རབ་ཏུ་དབྱེ་བ་ལ་མཁས་པའི་ཤེས་པ་གང་ཡིན་པའོ། །བདག་ནི་སྤོབས་པ་ལ་གནས་ཀྱིས། གཞན་དག་ཀྱང་སྤོབས་པ་ལ་དགོད་དོ་
ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོབས་པ་ནི་སངས་རྒྱས་ཀྱི་ཆོས་ཐམས་ཅད་ལ་བྱིན་གྱིས་རློབ་ཅིང་སྟོན་པ་ཤེས་པ་གང་ཡིན་པ་སྟེ། དེ་ནི་ཚིག་གཅིག་བཟུང་ནས་ཕྱི་མའི་མཐའི་མུའི་བསྐལ་པར་བྱིན་གྱིས་རློབ་ཅིང་སྟོན་ཀྱང་མི་ལྡང་བ་གང་ཡིན་པ་སྟེ། འཇམ་

དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ།
ལྔ་གང་ཞེ་ན། འདི་ལྟ་སྟེ། བདག་ནི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་གྱི་ཀུན་ནས་ཉོན་མོངས་པ་བཟོད་པ་ལ་གནས་ཀྱིས། གཞན་དག་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་གྱི་ཀུན་ནས་ཉོན་མོངས་པ་བཟོད་པ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་ཀུན་ནས་ཉོན་མོངས་པ་ནི་ལུས་ལ་གནོད་པ་དང་། སེམས་ལ་གནོད་པ་གང་ཡིན་པའོ། །བདག་ནི་ཕོངས་པ་མེད་པ་ལ་གནས་ཀྱིས། གཞན་དག་ཀྱང་ཕོངས་པ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ།
དེ་ལ་ཕོངས་པ་མེད་པ་ནི་དགེ་བའི་རྩ་བ་རྣམས་ཆུད་མི་ཟ་བ་གང་ཡིན་པའོ། །བདག་ནི་སེམས་མི་འཁྲུགས་པ་ལ་གནས་ཀྱིས། གཞན་དག་ཀྱང་སེམས་མི་འཁྲུགས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་མི་འཁྲུགས་པ་ནི་དགེ་བའི་
རྩ་བ་ཐམས་ཅད་ཆུད་མི་ཟ་བ་གང་ཡིན་པའོ། །བདག་ནི་བརྩོན་འགྲུས་ལ་གནས་ཀྱིས། གཞན་དག་ཀྱང་བརྩོན་འགྲུས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྩོན་འགྲུས་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་པ་དང་། མི་དགེ་
བའི་ཆོས་ཐམས་ཅད་སྤོང་བ་གང་ཡིན་པའོ། །བདག་ནི་སེམས་ཅན་ལ་དམིགས་པའི་བྱམས་པ་ལ་གནས་ཀྱིས། གཞན་དག་ཀྱང་སེམས་ཅན་ལ་དམིགས་པའི་བྱམས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཅན་ལ་དམིགས་པའི་བྱམས་
པ་ནི་སེམས་ཅན་ཐམས་ཅད་ལ་སེམས་སྙོམས་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་

དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཁོང་ཁྲོ་བ་མེད་པའི་སེམས་ལ་གནས་ཀྱིས། གཞན་དག་ཀྱང་ཁོང་ཁྲོ་བ་མེད་པའི་སེམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁོང་ཁྲོ་བ་མེད་པའི་
སེམས་ནི་སེམས་ཅན་ཐམས་ཅད་སྲུང་བ་གང་ཡིན་པའོ། །བདག་ནི་སྤོང་བ་ལ་གནས་ཀྱིས། གཞན་དག་ཀྱང་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོང་བ་ནི་དུས་གསུམ་གྱི་ཆོས་ཐམས་ཅད་ལ་མཉམ་པ་ཉིད་དུ་འཇུག་པ་གང་ཡིན་པའོ། །བདག་ནི་
ཆོས་ལ་དམིགས་པའི་བྱམས་པ་ལ་གནས་ཀྱིས། གཞན་དག་ཀྱང་ཆོས་ལ་དམིགས་པའི་བྱམས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ལ་དམིགས་པའི་བྱམས་པ་ནི་ཆོས་ཐམས་ཅད་ལ་མི་དམིགས་ཤིང་མི་དམིགས་པ་ལ་ཡང་རློམ་སེམས་མེད་པའོ། །
བདག་ནི་དང་པོའི་བསོད་ནམས་ཀྱི་ཚོགས་ལ་གནས་ཀྱིས། གཞན་དག་ཀྱང་དང་པོའི་བསོད་ནམས་ཀྱི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དང་པོའི་བསོད་ནམས་ཀྱི་ཚོགས་ནི་བྱང་ཆུབ་ཀྱི་སེམས་མི་གཏོང་བ་དང་། བྱང་ཆུབ་སེམས་དཔའི་སྤྱོད་པའི་
རྗེས་སུ་འཇུག་པ་གང་ཡིན་པའོ། །དེ་ལ་བྱང་ཆུབ་སེམས་དཔའི་སྤྱོད་པའི་རྗེས་སུ་འཇུག་པ་ནི་སེམས་ཅན་ཐམས་ཅད་ལ་སེམས་སྙོམས་པས་ཡང་དག་པར་བསྡུས་པའི་བྱམས་པ་དང་། སེར་སྣའི་སེམས་ཚར་གཅོད་པ་དང་། འཆལ་པའི་ཚུལ་ཁྲིམས་སེལ་བ་དང་། གནོད་
སེམས་སྤོང་བ་དང་། ལེ་ལོ་སེལ་བ་དང་། རྣམ་པར་གཡེང་བ་ཀུན་དུ་སྤྱོད་པ་མེད་པ་དང་། འཆལ་པའི་ཤེས་རབ་སྤོང་བ་དང་། བསྡུ་བའི་དངོས་པོ་བཞིས་སེམས་ཅན་ཡོངས་སུ་སྨིན་པར་བྱེད་པ་དང་། སེམས་ཅན་ཐམས་ཅད་ལ་སེམས་ས་དང་མཚུངས་པ་དང་། ཐེག་
པ་དམན་པ་ལ་མོས་པ་མེད་པ་དང་། སྙིང་རྗེ་ཆེན་པོས་སེམས་ཅན་ཐམས་ཅད་ཀྱི་དགེ་བའི་རྩ་བ་བྱ་བ་ལ་བརྩོན་ཞིང་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་

དང་། དམ་པའི་ཆོས་ཡོངས་སུ་འཛིན་ཅིང་ཤེས་རབ་ཀྱི་རྩ་བ་ལས་བྱུང་བའི་བསླབ་པ་དང་། བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་ལ་མངོན་པར་བརྩོན་པ་གང་ཡིན་པའོ། །བདག་ནི་ངོ་མཚར་གྱི་འདུ་ཤེས་ལ་གནས་ཀྱིས། གཞན་དག་ཀྱང་ངོ་
མཚར་གྱི་འདུ་ཤེས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ངོ་མཚར་གྱི་འདུ་ཤེས་ནི་ཆོས་ཐམས་ཅད་ལ་གཉིས་སུ་མེད་པའི་འདུ་ཤེས་དང་། སྤྱོད་པ་ཐམས་ཅད་ལ་བདག་གིར་སྤྱོད་པར་འདུ་ཤེས་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་
བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་བཟོད་པ་དང་དེས་པ་ལ་གནས་
ཀྱིས། གཞན་དག་ཀྱང་བཟོད་པ་དང་དེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཟོད་པ་དང་དེས་པ་ནི་ངན་དུ་བརྗོད་པ་དང་ངན་དུ་སྨྲས་པའི་ཚིག་གི་ལམ་ལ་ཁོང་ཁྲོ་བའི་སེམས་མེད་པ་གང་ཡིན་པའོ། །བདག་ནི་སེམས་ཞི་བ་ལ་གནས་ཀྱིས། གཞན་
དག་ཀྱང་སེམས་ཞི་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཞི་བ་ནི་ལྟུང་བ་གླེང་བ་མེད་པའོ། །བདག་ནི་ཆོས་ཐམས་ཅད་དངོས་པོ་མེད་པ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་དངོས་པོ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་
པར་འགྱུར་ཏེ། དེ་ལ་ཆོས་ཐམས་ཅད་དངོས་པོ་མེད་པ་ཞེས་བྱ་བ་དེ་ནི་དངོས་པོའི་ཚིག་གོ། །དེ་ཅིའི་ཕྱིར་ཞེ་ན། དངོས་པོའི་རང་བཞིན་ལས་དངོས་པོ་མེད་པ་གཞན་མ་ཡིན་ཏེ། དངོས་པོའི་རང་བཞིན་ཉིད་དངོས་པོ་མེད་པ་སྟེ། དངོས་པོའི་རང་བཞིན་དངོས་པོ་མེད་
པ་ཤེས་པ་དེས་ཆོས་ཐམས་ཅད་དངོས་པོ་མེད་པའོ། །བདག་ནི་ཆོས་གནས་པ་ཉིད་ལ་གནས་ཀྱིས། གཞན་དག་ཀྱང་ཆོས་གནས་པ་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་གནས་པ་ཉིད་ནི་ཆོས་ཐམས་ཅད་གཡོ་བ་མེད་པ་གང་ཡིན་པའོ། །

བདག་ནི་ཆོས་ལ་གནས་ཀྱིས། གཞན་དག་ཀྱང་ཆོས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ནི་ཐ་མི་དད་ཅིང་མི་གནས་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །
འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཡེ་ཤེས་ཀྱིས་ཉོན་མོངས་པ་རྣམས་གཞོམ་པ་ཡང་མ་ཡིན། ཡེ་ཤེས་ཀྱིས་ཉོན་མོངས་པ་རྣམས་མི་གཞོམ་པ་ཡང་མ་ཡིན་ནོ་ཞེས་
བྱ་བ་ལ་ཞུགས་ཀྱིས། གཞན་དག་ཀྱང་ཡེ་ཤེས་ཀྱིས་ཉོན་མོངས་པ་རྣམས་གཞོམ་པ་ཡང་མ་ཡིན། ཡེ་ཤེས་ཀྱིས་ཉོན་མོངས་པ་རྣམས་མི་གཞོམ་པ་ཡང་མ་ཡིན་ནོ་ཞེས་བྱ་བ་ལ་གཟུད་དོ་ཞེས་དབུགས་འབྱིན་པ་རྙེད་པར་འགྱུར་རོ། །དེ་ཅིའི་ཕྱིར་ཞེ་ན། ཉོན་མོངས་པའི་རང་བཞིན་ལས་ཡེ་ཤེས་གཞན་མ་ཡིན་
པའི་ཕྱིར་ཏེ། ཉོན་མོངས་པའི་རང་བཞིན་ལས་ཡེ་ཤེས་གཞན་མེད་པས་ཉོན་མོངས་པའི་རང་བཞིན་ཉིད་ཡེ་ཤེས་ཡིན་ཏེ། ཡེ་ཤེས་དེས་ཡེ་ཤེས་དེ་ཉིད་བཙལ་བར་མི་བྱའོ། །དཔེར་ན་མཛུབ་མོའི་རྩེ་མོ་དེ་ཉིད་ཀྱིས་མཛུབ་མོའི་རྩེ་མོ་དེ་ཉིད་ལ་རེག་པར་མི་རུང་བ་དེ་ལྟར་ཡེ་ཤེས་དེ་ཉིད་ཀྱིས་ཡེ་ཤེས་དེ་ཉིད་
བཙལ་བར་མི་བྱའོ། །བདག་ནི་དེ་བཞིན་གཤེགས་པ་རྟག་པ་ཡང་མ་ཡིན། དེ་བཞིན་གཤེགས་པ་མི་རྟག་པ་ཡང་མ་ཡིན་ནོ་ཞེས་བྱ་བ་ལ་ཞུགས་ཀྱིས། གཞན་དག་ཀྱང་དེ་བཞིན་གཤེགས་པ་རྟག་པ་ཡང་མ་ཡིན། དེ་བཞིན་གཤེགས་པ་མི་རྟག་པ་ཡང་མ་ཡིན་ནོ་ཞེས་བྱ་བ་
ལ་གཟུད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་རྟག་པ་ཡང་མ་ཡིན། མི་རྟག་པ་ཡང་མ་ཡིན་ཞེས་བྱ་བ་ནི་རློམ་སེམས་ཀྱི་ངོ་བོ་ཉིད་མེད་པའི་ཕྱིར་རོ། །བདག་ནི་དེ་བཞིན་གཤེགས་པ་བསམ་གྱིས་མི་ཁྱབ་པའོ་ཞེས་བྱ་བའི་ཡེ་ཤེས་འདི་ལ་ཞུགས་ཀྱིས།
གཞན་དག་ཀྱང་དེ་བཞིན་གཤེགས་པ་བསམ་གྱིས་མི་ཁྱབ་པའོ་ཞེས་བྱ་བའི་ཡེ་ཤེས་འདི་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་བསམ་གྱིས་མི་ཁྱབ་པ་ནི་སེམས་ཅན་གདུལ་བ་ཇི་ལྟ་བ་དང་། བསམ་པ་ཇི་ལྟ་བ་དེ་བཞིན་དུ་རྣམ་པར་གཞག་པ་ལས་

མི་འདའ་བ་གང་ཡིན་པའོ། །བདག་ནི་གཟུགས་མཚན་ཉིད་མེད་དོ་ཞེས་བྱ་བ་ལ་ཞུགས་ཀྱིས། གཞན་དག་ཀྱང་གཟུགས་མཚན་ཉིད་མེད་དོ་ཞེས་བྱ་བ་ལ་གཟུད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ཅིའི་ཕྱིར་ཞེ་ན། གཟུགས་ནི་མཚན་
ཉིད་མེད་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། གཟུགས་ཀྱི་རང་བཞིན་ལས་མཚན་ཉིད་མེད་པ་གཞན་མེད་པས་གཟུགས་ཀྱི་རང་བཞིན་ཉིད་མཚན་ཉིད་མེད་པ་སྟེ། གཟུགས་ཀྱི་རང་བཞིན་གྱི་མཚན་ཉིད་མེད་པ་ཤེས་པ་དེས་ཆོས་ཐམས་ཅད་མཚན་ཉིད་མེད་
པའོ། །བདག་ནི་ཐབས་མཁས་པ་ལ་གནས་ཀྱིས། གཞན་དག་ཀྱང་ཐབས་མཁས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཐབས་མཁས་པ་ནི་ཆོས་ཐམས་ཅད་ཡང་དག་པར་སྡུད་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་
བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་བསོད་ནམས་ཀྱི་ཚོགས་
མི་ཟད་པ་ལ་གནས་ཀྱིས། གཞན་དག་ཀྱང་བསོད་ནམས་ཀྱི་ཚོགས་མི་ཟད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསོད་ནམས་ཀྱི་ཚོགས་མི་ཟད་པ་ནི་དགེ་བའི་རྩ་བ་བྱང་ཆུབ་ཏུ་བསྔོས་པ་གང་ཡིན་པའོ། །བདག་ནི་ཡེ་ཤེས་ཀྱི་ཚོགས་ལ་གནས་
ཀྱིས། གཞན་དག་ཀྱང་ཡེ་ཤེས་ཀྱི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡེ་ཤེས་ཀྱི་ཚོགས་ནི་སྟོང་པ་ཉིད་ལ་མོས་པ་གང་ཡིན་པའོ། །བདག་ནི་ཤེས་རབ་ཀྱི་རྩ་བ་ལས་བྱུང་བའི་ལས་ལ་གནས་ཀྱིས། གཞན་དག་ཀྱང་ཤེས་རབ་ཀྱི་རྩ་བ་
ལས་བྱུང་བའི་ལས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཤེས་རབ་ཀྱི་རྩ་བ་ལས་བྱུང་བའི་ལས་ནི་བདག་ཉིད་ཆོས་དཀར་པོ་ལ་གནས་པ་གང་ཡིན་པའོ། །ཡང་ཤེས་རབ་ཀྱི་རྩ་བ་ལས་བྱུང་བའི་ལས་ནི་གཞན་ཤེས་རབ་ལ་དགོད་པ་གང་ཡིན་པའོ། །བདག་

ནི་ཏིང་ངེ་འཛིན་ལ་གནས་ཀྱིས། གཞན་དག་ཀྱང་ཏིང་ངེ་འཛིན་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཏིང་ངེ་འཛིན་ནི་སེམས་མེད་པའི་སྙོམས་པར་འཇུག་པ་གང་ཡིན་པའོ། །བདག་ནི་སོ་སོ་ཡང་དག་པར་རྟོག་པ་ལ་གནས་ཀྱིས། གཞན་དག་ཀྱང་
སོ་སོ་ཡང་དག་པར་རྟོག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སོ་སོ་ཡང་དག་པར་རྟོག་པ་ནི་ལས་དང་བྱ་བ་ལ་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་
བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་དབུ་མའི་ལམ་ཤེས་པ་ལ་གནས་ཀྱིས། གཞན་དག་ཀྱང་དབུ་མའི་ལམ་ཤེས་
པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དབུ་མའི་ལམ་ནི་མཐའ་རྣམ་པར་དག་པ་ཤེས་པ་གང་ཡིན་པའོ། །དེ་ཅིའི་ཕྱིར་ཞེ་ན། མཐའི་རང་བཞིན་ལས་དབུ་མའི་ལམ་གཞན་མ་ཡིན་པའི་ཕྱིར་ཏེ། མཐའི་རང་བཞིན་ལས་དབུ་མའི་ལམ་གཞན་
མེད་པས་མཐའི་རང་བཞིན་ཉིད་དབུ་མའི་ལམ་མོ། །བདག་ནི་ཆོས་ཐམས་ཅད་རྟག་པའོ་ཞེས་བྱ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་རྟག་པའོ་ཞེས་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་རྟག་པ་ནི་མཐའ་
དང་དབུང་མེད་པའི་ཕྱིར་རོ། །ཆོས་ཐམས་ཅད་མཐའ་དང་དབུང་མེད་པ་ནི་འདུས་བྱས་ཀྱི་རང་བཞིན་ལས་གཞན་མ་ཡིན་པའི་ཕྱིར་ཏེ། འདུས་བྱས་ཀྱི་རང་བཞིན་ལས་མཐའ་དང་དབུང་མེད་པ་གཞན་མེད་པས་འདུས་བྱས་ཀྱི་རང་བཞིན་ཉིད་མཐའ་དང་དབུང་མེད་པའོ། །མཐའ་
དང་དབུང་མེད་པ་གང་ཡིན་པ་དེ་ནི་རྟག་པ་བརྟན་པ་ཐེར་ཟུག་པའོ། །བདག་ནི་སངས་རྒྱས་ལ་མཆོད་པ་བྱེ་བྲག་ཏུ་མངོན་པར་འཕགས་པ་ལ་གནས་ཀྱིས། གཞན་དག་ཀྱང་སངས་རྒྱས་ལ་མཆོད་པ་བྱེ་བྲག་ཏུ་མངོན་པར་འཕགས་པ་ལ་དགོད་དོ་ཞེས་དབུགས་འབྱིན་

པ་རྙེད་པར་འགྱུར་ཏེ། དེ་ལ་སངས་རྒྱས་ལ་མཆོད་པ་བྱེ་བྲག་ཏུ་མངོན་པར་འཕགས་པ་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་བསྙེན་ཅིང་བསྟེན་པ་དང་། བསྙེན་བཀུར་བྱེད་ཅིང་རྙེད་པ་དང་བཀུར་སྟི་བྱས་ཏེ། ཅི་ནུས་ཀྱིས་ཐེག་པ་ཆེན་པོ་ཡང་དག་
པར་སྐྱེད་ཅིང་སྦྱིན་པ་གང་ཡིན་པའོ། །བདག་ནི་ཆོས་ཐམས་ཅད་འདུས་མ་བྱས་སོ་ཞེས་བྱ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་འདུས་མ་བྱས་སོ་ཞེས་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་འདུས་མ་བྱས་ཞེས་བྱ་བ་དེ་ནི་
འདུས་བྱས་ཀྱི་ཚིག་གོ། །དེ་ཅིའི་ཕྱིར་ཞེ་ན། འདུས་བྱས་ཀྱི་རང་བཞིན་ལས་འདུས་མ་བྱས་གཞན་མ་ཡིན་པའི་ཕྱིར་ཏེ། འདུས་བྱས་ཀྱི་རང་བཞིན་ལས་འདུས་མ་བྱས་གཞན་མེད་པས་འདུས་བྱས་ཀྱི་རང་བཞིན་ཉིད་འདུས་མ་བྱས་ཏེ། འདུས་བྱས་ཀྱི་རང་བཞིན་འདུས་མ་བྱས་
ཤེས་པ་དེས་ཆོས་ཐམས་ཅད་འདུས་མ་བྱས་པའོ། །བདག་ནི་ཆོས་ཐམས་ཅད་སྟོང་ངོ་ཞེས་བྱ་བ་ལ་ཞུགས་ཀྱིས། གཞན་དག་ཀྱང་ཆོས་ཐམས་ཅད་སྟོང་ངོ་ཞེས་བྱ་བ་ལ་གཟུད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྟོང་པ་ཉིད་ནི་ལྟ་བར་གྱུར་པ་གང་ཡིན་པའོ། །
དེ་ཅིའི་ཕྱིར་ཞེ་ན། སྟོང་པ་ཉིད་ནི་ལྟ་བར་གྱུར་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། ལྟ་བར་གྱུར་པའི་རང་བཞིན་ལས་སྟོང་པ་ཉིད་གཞན་མེད་པས་ལྟ་བར་གྱུར་པའི་རང་བཞིན་ཉིད་སྟོང་པ་ཉིད་དོ། །ལྟ་བར་གྱུར་པའི་རང་བཞིན་སྟོང་པ་ཉིད་ཤེས་པ་དེས་ཆོས་ཐམས་ཅད་
སྟོང་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་
ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཆོས་ཐམས་ཅད་མཐོང་བར་དཀའ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་མཐོང་བར་དཀའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་མཐོང་བར་དཀའ་བ་ནི་རྒྱུ་དང་རྐྱེན་གྱི་རང་བཞིན་ཡིན་

པའི་ཕྱིར་རོ། །བདག་ནི་ཆོས་ཐམས་ཅད་རྟོགས་པར་དཀའ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་རྟོགས་པར་དཀའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་རྟོགས་པར་དཀའ་བ་ནི་དམིགས་པ་དང་ཡིད་ལ་བྱེད་པའི་རང་
བཞིན་མ་ཡིན་པའི་ཕྱིར་རོ། །བདག་ནི་ཆོས་ཐམས་ཅད་རིག་པར་དཀའ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་རིག་པར་དཀའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་རིག་པར་དཀའ་བ་ནི་ཤེས་པ་དང་། ཤེས་བྱ་མཉམ་
པ་ཉིད་དུ་རྟོགས་པའི་ཕྱིར་རོ། །བདག་ནི་ཆོས་ཐམས་ཅད་རྙོག་པ་མེད་པ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་རྙོག་པ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་རྙོག་པ་མེད་པ་ནི་ཤིན་ཏུ་རྣམ་པར་དག་པའི་ཕྱིར་རོ། །
བདག་ནི་ཆོས་ཐམས་ཅད་མི་ཟད་པ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་མི་ཟད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་མི་ཟད་པ་ནི་དཔེ་དང་དཔེར་བྱ་བའི་ངོ་བོ་ཉིད་མ་ཡིན་པའི་ཕྱིར་ཏེ། འཇམ་དཔལ་དབུགས་
འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ།
བདག་ནི་ཆོས་ཐམས་ཅད་མི་ཕྱེད་པ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་མི་ཕྱེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་མི་ཕྱེད་པ་ནི་ཆོས་ཐམས་ཅད་ཆོས་ཀྱི་དབྱིངས་དང་དབྱེར་མེད་པའི་ཕྱིར་དུས་གསུམ་མཉམ་པ་ཉིད་དུ་འཇུག་པ་
གང་ཡིན་པའོ། །བདག་ནི་འཕགས་པའི་བདེན་པ་བཞི་མི་ཕྱེད་པ་ལ་གནས་ཀྱིས། གཞན་དག་ཀྱང་འཕགས་པའི་བདེན་པ་བཞི་མི་ཕྱེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འཕགས་པའི་བདེན་པ་བཞི་མི་ཕྱེད་པ་ནི་ནང་རྣམ་པར་དག་པ་

གང་ཡིན་པའོ། །བདག་ནི་མ་རིག་པ་དང་འདུ་བྱེད་མི་ཕྱེད་པ་ཤེས་པ་ལ་གནས་ཀྱིས། གཞན་དག་ཀྱང་མ་རིག་པ་དང་འདུ་བྱེད་མི་ཕྱེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ཅིའི་ཕྱིར་ཞེ་ན། མ་རིག་པ་ནི་འདུ་བྱེད་ཀྱི་རང་བཞིན་ལས་གཞན་མ་
ཡིན་པའི་ཕྱིར་རོ། །གལ་ཏེ་འདུ་བྱེད་རྣམས་ལས་མ་རིག་པ་གཞན་ཡིན་དུ་ཟིན་ན་འདུ་བྱེད་རྣམས་རྒྱུ་མེད་པ་ཅན་དུ་འགྱུར་རོ། །ཇི་སྟེ་མ་རིག་པ་ལས་འདུ་བྱེད་རྣམས་གཞན་མ་ཡིན་ན་དེ་ལྟ་ན་ནི་ཤིན་ཏུ་རྣམ་པར་དག་པའི་ཕྱིར་རྒྱུ་དང་འབྲས་བུ་འགྲོགས་པར་འགྱུར་རོ། །བདག་ནི་ཆོས་
ཐམས་ཅད་མི་རྟག་པའོ་ཞེས་བྱ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་མི་རྟག་པའོ་ཞེས་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ཅིའི་ཕྱིར་ཞེ་ན། མི་རྟག་པ་ཉིད་ནི་རྟག་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། རྟག་པའི་རང་བཞིན་ལས་
མི་རྟག་པ་གཞན་མེད་པས་རྟག་པའི་རང་བཞིན་ཉིད་མི་རྟག་པའོ། །བདག་ནི་དེ་བཞིན་གཤེགས་པ་མ་སྐྱེས་མ་འགགས་པའོ་ཞེས་བྱ་བ་ལ་གནས་ཀྱིས། གཞན་དག་ཀྱང་དེ་བཞིན་གཤེགས་པ་མ་སྐྱེས་མ་འགགས་པའོ་ཞེས་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་
ཏེ། དེ་ལ་དེ་བཞིན་གཤེགས་པ་མ་སྐྱེས་མ་འགགས་པ་སྟེ་གཉེན་པོ་མེད་པའི་ཕྱིར་རོ། །འདི་ལྟ་སྟེ། དཔེར་ན་ནམ་མཁའ་ནི་མ་སྐྱེས་པ་མ་འགགས་པ་མཐའ་དང་དབུང་མེད་པ་ཡིན་མོད་ཀྱི། འོན་ཀྱང་དམིགས་པའི་དབང་གིས་འདི་ནི་ཁབ་ཀྱི་བུ་གུའོ། །འདི་ནི་བུམ་པའི་
ནང་ངོ་། །འདི་ནི་ནམ་མཁའ་ཚད་མེད་པའོ་ཞེས་རབ་འབྲིང་དང་ཐ་མར་སྣང་ཡང་མ་སྐྱེས་མ་འགགས་པའི་ཕྱིར་ནམ་མཁའ་ལ་རབ་འབྲིང་དང་ཐ་མ་མེད་དོ། །ནམ་མཁའ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་ཏེ། དེ་མི་རྟོག་ཅིང་ལྷུན་གྱིས་
གྲུབ་པར་བྱ་བ་འདི་ལྟ་བུ་འདི་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་མ་སྐྱེས་མ་འགགས་པ་མཐའ་དང་དབུང་མེད་པ་ཡིན་མོད་ཀྱི། འོན་ཀྱང་སེམས་ཅན་གྱི་བསམ་པའི་དབང་གིས་སེམས་ཅན་གྱི་

བསམ་པ་རབ་འབྲིང་ཐ་མ་རྣམས་ལ་འདི་ནི་ཉན་ཐོས་ཀྱི་ཐེག་པའོ། །འདི་ནི་རང་སངས་རྒྱས་ཀྱི་ཐེག་པའོ། །འདི་ནི་སེམས་ཅན་ཐམས་ཅད་ཀྱི་གོ་སྐབས་ཡོད་པ་ཐེག་པ་ཆེན་པོ་ཞེས་བྱ་བ་ཐ་དད་པ་འབྱུང་སྟེ། དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་
མ་འདྲེས་པའི་ཆོས་དང་ལྡན་པའི་ཕྱིར་དེ་མི་རྟོག་ཅིང་ལྷུན་གྱིས་གྲུབ་པར་བྱ་བ་འདི་ལྟ་བུ་འདི་འབྱུང་ངོ་། །འཇམ་དཔལ་འདི་ལྟ་སྟེ། དཔེར་ན་ཉི་མའི་འོད་ནི་གནས་དང་དམིགས་པའི་དབང་གིས་གྲིབ་མ་སྣ་ཚོགས་སུ་འགྱུར་ཡང་ཉི་མའི་འོད་ནི་མ་འདྲེས་པའི་ཆོས་དང་ལྡན་པའི་ཕྱིར་མི་རྟོག་རྣམ་
པར་མི་རྟོག་གོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སེམས་ཅན་རྣམས་ཀྱི་བསམ་པ་དང་དམིགས་པའི་དབང་གིས་ཡེ་ཤེས་ཐ་དད་པ་སྣ་ཚོགས་སུ་འགྱུར་ཏེ། དེ་བཞིན་གཤེགས་པ་ནི་མི་རྟོག་རྣམ་པར་མི་
རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་དེ་མི་རྟོག་ཅིང་ལྷུན་གྱིས་གྲུབ་པར་བྱ་བ་འདི་ལྟ་བུ་འདི་འབྱུང་ངོ་། །འདི་ལ་ཐེག་པའམ་ཐེག་པ་མ་ཡིན་པ་ནི་གང་ཡང་མེད་དེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་
ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་སེལ་
བ་ལ་གནས་ཀྱིས། གཞན་དག་ཀྱང་སེམས་ཅན་གྱི་ཀུན་ནས་ཉོན་མོངས་པ་སེལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཀུན་ནས་ཉོན་མོངས་པ་ནི་ལུས་ལ་གནོད་པ་དང་སེམས་ལ་གནོད་པའོ། །བདག་ནི་ཆོས་སྣང་བའི་སྒོའི་ཤེས་རབ་ལ་གནས་ཀྱིས། གཞན་དག་
ཀྱང་ཆོས་སྣང་བའི་སྒོའི་ཤེས་རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། འཇམ་དཔལ་དེ་ལ་ཆོས་སྣང་བའི་སྒོའི་ཤེས་རབ་ནི་ཆོས་བཞིས་འབྱུང་བར་འགྱུར་རོ། །བཞི་གང་ཞེ་ན། འདི་ལྟ་སྟེ། དད་པ་དང་། བག་ཡོད་པ་དང་། བསམ་པ་དང་། ལྷག་

པའི་བསམ་པ་སྟེ། འཇམ་དཔལ་ཆོས་བཞི་པོ་དེ་དག་གིས་བྱང་ཆུབ་སེམས་དཔའ་རྣམས་ཀྱི་ཆོས་སྣང་བའི་སྒོའི་ཤེས་རབ་འབྱུང་བར་འགྱུར་ཏེ། ཆོས་སྣང་བའི་སྒོའི་ཤེས་རབ་ཀྱིས་བྱང་ཆུབ་སེམས་དཔའ་རྣམས་ཀྱི་ངན་སོང་ངན་འགྲོ་ལོག་པར་ལྟུང་བ་ཐམས་ཅད་གཅོད་པར་
འགྱུར་རོ། །བདག་ནི་ཡེ་ཤེས་སྣང་བའི་སྒོའི་ཤེས་རབ་ལ་གནས་ཀྱིས། གཞན་དག་ཀྱང་ཡེ་ཤེས་སྣང་བའི་སྒོའི་ཤེས་རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། འཇམ་དཔལ་དེ་ལ་ཡེ་ཤེས་སྣང་བའི་སྒོའི་ཤེས་རབ་ནི་ཆོས་བཞིས་འབྱུང་བར་འགྱུར་རོ། །བཞི་གང་ཞེ་ན།
འདི་ལྟ་སྟེ། བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་དང་། སྟོང་པ་ཉིད་ལ་མོས་པ་དང་། སེམས་ཅན་རྣམས་བྱང་ཆུབ་ཀྱི་སེམས་ལ་གཞོག་པ་སྟེ། འཇམ་དཔལ་ཆོས་བཞི་པོ་དེ་དག་གིས་བྱང་ཆུབ་སེམས་དཔའ་རྣམས་ཀྱི་ཡེ་ཤེས་སྣང་བའི་སྒོའི་ཤེས་རབ་འབྱུང་བར་
འགྱུར་ཏེ། ཡེ་ཤེས་སྣང་བའི་སྒོའི་ཤེས་རབ་ཀྱིས་བདུད་ཀྱི་ཞགས་པ་དང་། བདུད་ཀྱི་ལས་ཐམས་ཅད་གཅོད་པར་འགྱུར་རོ། །བདག་ནི་སྦྱིན་པའི་བསམ་པ་མི་ཟད་པར་སྦྱོར་བའི་ཤེས་རབ་ལ་གནས་ཀྱིས། གཞན་དག་ཀྱང་སྦྱིན་པའི་བསམ་པ་མི་ཟད་པར་སྦྱོར་བའི་ཤེས་རབ་
ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། འཇམ་དཔལ་དེ་ལ་སྦྱིན་པའི་བསམ་པ་མི་ཟད་པར་སྦྱོར་བའི་ཤེས་རབ་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་སེར་སྣ་ཅན་ཡོངས་སུ་སྨིན་པར་བྱེད་པར་འགྱུར་བའོ། །བདག་ནི་ཚུལ་ཁྲིམས་ཀྱི་བསམ་པ་མི་ཟད་པར་
སྦྱོར་བའི་ཤེས་རབ་ལ་གནས་ཀྱིས། གཞན་དག་ཀྱང་ཚུལ་ཁྲིམས་ཀྱི་བསམ་པ་མི་ཟད་པར་སྦྱོར་བའི་ཤེས་རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། འཇམ་དཔལ་དེ་ལ་ཚུལ་ཁྲིམས་ཀྱི་བསམ་པ་མི་ཟད་པར་སྦྱོར་བའི་ཤེས་རབ་ནི་བྱང་ཆུབ་སེམས་དཔའ་རྣམས་
ཀྱི་སེམས་ཅན་ཚུལ་ཁྲིམས་འཆལ་པ་ཡོངས་སུ་སྨིན་པར་བྱེད་པར་འགྱུར་བ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་

བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ནང་དུ་ཡང་དག་འཇོག་ལ་གནས་ཀྱིས། གཞན་དག་ཀྱང་ནང་དུ་ཡང་དག་འཇོག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ནང་དུ་ཡང་དག་
འཇོག་ནི་ལུས་དང་སེམས་དབེན་ཞིང་དགེ་བའི་རྩ་བ་བརྩམ་པ་ཐམས་ཅད་ལ་ཞུམ་པ་མེད་པ་གང་ཡིན་པའོ། །བདག་ནི་འདུས་བྱས་ཀྱི་ཆོས་ཉིད་ལ་གནས་ཀྱིས། གཞན་དག་ཀྱང་འདུས་བྱས་ཀྱི་ཆོས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འདུས་བྱས་ཀྱི་
ཆོས་ཉིད་ནི་ཆོས་ཐམས་ཅད་སྟོང་པ་མ་ཡིན། མི་སྟོང་པ་མ་ཡིན། སྒྲོ་བཏགས་པ་མ་ཡིན། སྒྲོ་མ་བཏགས་པ་མ་ཡིན། ལྷག་པར་བྱེད་པ་མ་ཡིན། ལྷག་པར་མི་བྱེད་པ་མ་ཡིན། དངོས་པོ་མ་ཡིན། དངོས་པོ་མེད་པ་མ་ཡིན། འདུས་བྱས་མ་ཡིན། འདུས་མ་བྱས་མ་ཡིན།
མཚན་ཉིད་མ་ཡིན། མཚན་ཉིད་མེད་པ་མ་ཡིན། གནས་མ་ཡིན། གནས་མེད་པ་མ་ཡིན། གཉིས་མ་ཡིན། གཉིས་སུ་མེད་པ་མ་ཡིན། གདེག་པ་མ་ཡིན། གཞོག་པ་མ་ཡིན། ལེན་པ་མ་ཡིན། གཏོང་བ་མ་ཡིན་པ་སྟེ། དེ་ལྟར་འཇུག་པ་གང་ཡིན་པ་དེ་ནི་འདུས་
བྱས་ཀྱི་ཆོས་ཉིད་ཅེས་བྱའོ། །བདག་ནི་འདུས་མ་བྱས་ཀྱི་ཆོས་ཉིད་ལ་གནས་ཀྱིས། གཞན་དག་ཀྱང་འདུས་མ་བྱས་ཀྱི་ཆོས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འདུས་མ་བྱས་ཀྱི་ཆོས་ཉིད་ཅེས་བྱ་བ་ནི་ཆོས་དེ་དག་ཉིད་ལ་དབྱེར་མེད་པ། རློམ་སེམས་མེད་པ། སྒྲོ་
མི་འདོགས་པ། མི་རྟོག་རྣམ་པར་མི་རྟོག་པ་གང་ཡིན་པ་སྟེ། དེ་ནི་འདུས་མ་བྱས་ཀྱི་ཆོས་ཉིད་ཅེས་བྱའོ། །བདག་ནི་ཡང་དག་པར་མཐོང་བ་ལ་གནས་ཀྱིས། གཞན་དག་ཀྱང་ཡང་དག་པར་མཐོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པར་
མཐོང་བ་ནི་གཉིས་དང་གཉིས་སུ་མེད་པ་ལ་མཚན་ཉིད་མེད་པར་འཇུག་པ་གང་ཡིན་པ་སྟེ། དེ་ཅིའི་ཕྱིར་ཞེ་ན། གཉིས་ཀྱི་རང་བཞིན་ལས་གཉིས་སུ་མེད་པ་གཞན་མ་ཡིན་པའི་ཕྱིར་ཏེ། གཉིས་ཀྱི་རང་བཞིན་ལས་གཉིས་སུ་མེད་པ་གཞན་མེད་པས་གཉིས་ཀྱི་རང་བཞིན་ཉིད་གཉིས་

སུ་མེད་པ་སྟེ། དེ་ལྟར་འཇུག་པ་གང་ཡིན་པ་དེ་ནི་ཡང་དག་པར་མཐོང་བ་ཞེས་བྱའོ། །བདག་ནི་ཞེ་སྡང་མེད་པ་ལ་གནས་ཀྱིས། གཞན་དག་ཀྱང་ཞེ་སྡང་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཞེ་སྡང་མེད་པ་ནི་སེམས་ཅན་ཐམས་
ཅད་ལ་ཕན་པའི་དངོས་པོ་དང་། ལས་ཀྱི་བྱ་བ་ལ་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་
སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཕ་རོལ་ཏུ་ཕྱིན་པའི་ལམ་གྱི་ཚུལ་ལ་འཇུག་པ་ལ་གནས་ཀྱིས། གཞན་དག་ཀྱང་ཕ་རོལ་ཏུ་ཕྱིན་པའི་ལམ་གྱི་ཚུལ་ལ་འཇུག་པ་ལ་དགོད་དོ་ཞེས་དབུགས་འབྱིན་པ་རྙེད་པར་
འགྱུར་ཏེ། དེ་ལ་ཕ་རོལ་ཏུ་ཕྱིན་པའི་ལམ་གྱི་ཚུལ་ལ་འཇུག་པ་ནི་ཐབས་མཁས་པས་ཡང་དག་པར་ཟིན་པའི་ཤེས་རབ་གང་ཡིན་པའོ། །བདག་ནི་སངས་རྒྱས་ཀྱི་རིགས་སུ་སྐྱེས་པ་ཡིན་གྱིས། གཞན་དག་ཀྱང་སངས་རྒྱས་ཀྱི་རིགས་སུ་སྐྱེ་བ་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་སངས་རྒྱས་ཀྱི་རིགས་སུ་སྐྱེ་བ་ནི་བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་གང་ཡིན་པའོ། །བདག་ནི་བྱང་ཆུབ་ཀྱི་སེམས་ལ་གནས་ཀྱིས། གཞན་དག་ཀྱང་བྱང་ཆུབ་ཀྱི་སེམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་
ཏེ། དེ་ལ་བྱང་ཆུབ་ཀྱི་སེམས་ནི་བྱམས་པ་ཆེན་པོ་དང་སྙིང་རྗེ་ཆེན་པོ་གང་ཡིན་པ་སྟེ། དེ་ཅིའི་ཕྱིར་ཞེ་ན། ཆོས་ཐམས་ཅད་ཀྱི་རྗེས་སུ་སོང་བའི་ཕྱིར་རོ། །བདག་ནི་ཆོས་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་ཆོས་སོ་སོ་ཡང་དག་པར་རིག་པ་ལ་དགོད་དོ་
ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་སོ་སོ་ཡང་དག་པར་རིག་པ་ནི་ཆོས་ཐམས་ཅད་ཀྱི་ཆོས་རབ་ཏུ་དབྱེ་བ་བསྟན་པ་གང་ཡིན་པའོ། །བདག་ནི་དོན་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་དོན་སོ་སོ་ཡང་དག་པར་རིག་པ་ལ་དགོད་དོ་ཞེས་

དབུགས་འབྱིན་པ་རྙེད་པར་འགྱུར་ཏེ། དེ་ལ་དོན་སོ་སོ་ཡང་དག་པར་རིག་པ་ནི་ཆོས་ཐམས་ཅད་ཀྱི་རབ་ཏུ་དབྱེ་བ་བསྟན་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་
དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ངེས་པའི་ཚིག་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་ངེས་པའི་ཚིག་སོ་སོ་ཡང་དག་པར་
རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ངེས་པའི་ཚིག་སོ་སོ་ཡང་དག་པར་རིག་པ་ནི་ཆོས་རྣམས་ལ་ཀུན་རྫོབ་ཤེས་པ་དང་དབྱེར་མེད་པ་གང་ཡིན་པའོ། །བདག་ནི་སྤོབས་པ་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་
སྤོབས་པ་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོབས་པ་སོ་སོ་ཡང་དག་པར་རིག་པ་ནི་ཆོས་ཐམས་ཅད་ཀྱི་དོན་དམ་པ་ལ་མཁས་པའི་ཡེ་ཤེས་གང་ཡིན་པའོ། །བདག་ནི་དྲན་པ་ལ་གནས་ཀྱིས། གཞན་དག་ཀྱང་དྲན་པ་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དྲན་པ་ནི་མི་བརྗེད་པའི་ཆོས་ཉིད་དོ། །བདག་ནི་བློ་གྲོས་ལ་གནས་ཀྱིས། གཞན་དག་ཀྱང་བློ་གྲོས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བློ་གྲོས་ནི་ཤིན་ཏུ་རྣམ་པར་ངེས་པའི་ཡེ་ཤེས་གང་ཡིན་པའོ། །
བདག་ནི་བརྟན་པ་ལ་གནས་ཀྱིས། གཞན་དག་ཀྱང་བརྟན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྟན་པ་ནི་སྡོམ་པ་ལ་སྤྱོད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་
སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་རྟོགས་པ་ལ་གནས་ཀྱིས། གཞན་དག་ཀྱང་རྟོགས་པ་ལ་དགོད་དོ་ཞེས་

དབུགས་འབྱིན་པ་རྙེད་པར་འགྱུར་ཏེ། དེ་ལ་རྟོགས་པ་ནི་མདོ་ལས་འབྱུང་བའི་དགོངས་པ་ཁོང་དུ་ཆུད་པ་གང་ཡིན་པའོ། །བདག་ནི་ཤེས་རབ་ལ་གནས་ཀྱིས། གཞན་དག་ཀྱང་ཤེས་རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཤེས་རབ་ནི་
འདུས་བྱས་དང་། འདུས་མ་བྱས་ཀྱི་ཆོས་རྣམས་ལ་དབྱེར་མེད་པར་མཁས་པ་གང་ཡིན་པའོ། །བདག་ནི་ཚོགས་ལ་གནས་ཀྱིས། གཞན་དག་ཀྱང་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚོགས་ནི་ཕ་རོལ་ཏུ་ཕྱིན་པ་ལྔའོ། །བདག་ནི་ཡོངས་སུ་
གཅོད་པ་ལ་གནས་ཀྱིས། གཞན་དག་ཀྱང་ཡོངས་སུ་གཅོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡོངས་སུ་གཅོད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །བདག་ནི་ཐབས་མཁས་པ་ལ་གནས་ཀྱིས། གཞན་དག་ཀྱང་ཐབས་མཁས་པ་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཐབས་མཁས་པ་ནི་ཆོས་ཐམས་ཅད་ཡང་དག་པར་སྡུད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་
ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་འདུ་འཛིར་སྤྱོད་པ་ལ་གནས་ཀྱིས། གཞན་དག་ཀྱང་འདུ་འཛིར་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་
ལ་འདུ་འཛིར་སྤྱོད་པ་ནི་ཕ་རོལ་ཏུ་ཕྱིན་པ་ལྔ་གང་ཡིན་པའོ། །བདག་ནི་འདུ་འཛི་མེད་པར་སྤྱོད་པ་ལ་གནས་ཀྱིས། གཞན་དག་ཀྱང་འདུ་འཛི་མེད་པར་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། །དེ་ལ་འདུ་འཛི་མེད་པར་སྤྱོད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་གང་
ཡིན་པའོ། །བདག་ནི་ཟག་པ་དང་བཅས་པའི་སྤྱོད་པ་ལ་གནས་ཀྱིས། གཞན་དག་ཀྱང་ཟག་པ་དང་བཅས་པའི་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཟག་པ་དང་བཅས་པའི་སྤྱོད་པ་ནི་གང་ལ་རློམ་སེམས་འཇུག་པའོ། །བདག་ནི་ཟག་པ་མེད་

པའི་སྤྱོད་པ་ལ་གནས་ཀྱིས། གཞན་དག་ཀྱང་ཟག་པ་མེད་པའི་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཟག་པ་མེད་པའི་སྤྱོད་པ་ནི་གང་ལ་རློམ་སེམས་ཀྱི་རྒྱུ་བ་མེད་པའོ། །བདག་ནི་ཚད་ཡོད་པར་བྱས་པའི་སྤྱོད་པ་ལ་གནས་ཀྱིས། གཞན་
དག་ཀྱང་ཚད་ཡོད་པར་བྱས་པའི་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚད་ཡོད་པར་བྱས་པའི་སྤྱོད་པ་ནི་མཚན་མའི་གནས་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་
སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཚད་མེད་པར་བྱས་པའི་སྤྱོད་པ་ལ་གནས་ཀྱིས། གཞན་དག་ཀྱང་ཚད་མེད་
པར་བྱས་པའི་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚད་མེད་པར་བྱས་པའི་སྤྱོད་པ་ནི་མཚན་མ་མེད་པའི་གནས་གང་ཡིན་པའོ། །བདག་ནི་ཚད་ཡོད་པར་བྱས་པ་ཤེས་པ་ལ་གནས་ཀྱིས། གཞན་དག་ཀྱང་ཚད་ཡོད་པར་བྱས་པ་ཤེས་པ་ལ་དགོད་དོ་
ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚད་ཡོད་པར་བྱས་པ་ཤེས་པ་ནི་ཕུང་པོ་དང་། ཁམས་དང་། སྐྱེ་མཆེད་དང་། རྟེན་ཅིང་འབྲེལ་པར་འབྱུང་བ་དང་། གནས་དང་གནས་མ་ཡིན་པ་རྣམ་པར་དཔྱོད་པ་ལ་མཁས་པ་གང་ཡིན་པའོ། །བདག་ནི་ཚད་མེད་པར་
བྱས་པ་ཤེས་པ་ལ་གནས་ཀྱིས། གཞན་དག་ཀྱང་ཚད་མེད་པར་བྱས་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚད་མེད་པར་བྱས་པ་ཤེས་པ་ནི་གང་ལ་རློམ་སེམས་ཀྱི་རྒྱུ་བ་མེད་པའོ། །བདག་ནི་ཡོངས་སུ་ཆད་པ་ལ་གནས་ཀྱིས། གཞན་
དག་ཀྱང་ཡོངས་སུ་ཆད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡོངས་སུ་ཆད་པ་ནི་ཕ་རོལ་ཏུ་ཕྱིན་པ་ལྔའོ། །བདག་ནི་ཡོངས་སུ་མ་ཆད་པ་ལ་གནས་ཀྱིས། གཞན་དག་ཀྱང་ཡོངས་སུ་མ་ཆད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ།

དེ་ལ་ཡོངས་སུ་མ་ཆད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་
བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་རང་གི་སེམས་འདུལ་བ་ལ་གནས་ཀྱིས། གཞན་དག་ཀྱང་རང་གི་སེམས་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རང་གི་སེམས་
འདུལ་བ་ནི་བདག་མེད་པའི་ཆོས་ལ་སོ་སོར་རྟོག་པ་གང་ཡིན་པའོ། །བདག་ནི་ལུས་དང་སེམས་འདུལ་བ་ལ་གནས་ཀྱིས། གཞན་དག་ཀྱང་ལུས་དང་སེམས་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལུས་དང་སེམས་འདུལ་བ་ནི་སེམས་ཅན་ཐམས་
ཅད་སྨིན་པར་བྱ་བ་ལ་ཡོངས་སུ་མི་སྐྱོ་བ་གང་ཡིན་པའོ། །བདག་ནི་བསམ་པ་རྣམ་པར་སྦྱོང་བ་ལ་གནས་ཀྱིས། གཞན་དག་ཀྱང་བསམ་པ་རྣམ་པར་སྦྱོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསམ་པ་རྣམ་པར་སྦྱོང་བ་ནི་སེམས་ཅན་ཐམས་ཅད་ལ་རྣམ་
པར་དཔྱད་པ་གང་ཡིན་པའོ། །བདག་ནི་སེམས་ཅན་ཐམས་ཅད་ལ་རྣམ་པར་དཔྱད་པ་ལ་གནས་ཀྱིས། གཞན་དག་ཀྱང་སེམས་ཅན་ཐམས་ཅད་ལ་རྣམ་པར་དཔྱད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཅན་ཐམས་ཅད་ལ་རྣམ་པར་དཔྱད་
པ་ནི་སེམས་ཅན་ཐམས་ཅད་ལ་སེམས་མཉམ་པ་ཉིད་གང་ཡིན་པའོ། །བདག་ནི་ཚོགས་དག་ལ་གནས་ཀྱིས། གཞན་དག་ཀྱང་ཚོགས་དག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚོགས་ནི་ཕ་རོལ་ཏུ་ཕྱིན་པ་ལྔ་གང་ཡིན་པ་སྟེ། འཇམ་དཔལ་དབུགས་
འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ།

བདག་ནི་ལུས་འདུལ་བ་ལ་གནས་ཀྱིས། གཞན་དག་ཀྱང་ལུས་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལུས་འདུལ་བ་ནི་ལུས་ཀྱི་ལས་ཀྱི་ཉེས་པ་རྣམ་པ་གསུམ་ཡོངས་སུ་སྤངས་པ་གང་ཡིན་པའོ། །བདག་ནི་ངག་འདུལ་བ་ལ་གནས་ཀྱིས།
གཞན་དག་ཀྱང་ངག་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ངག་འདུལ་བ་ནི་ངག་གི་ལས་ཀྱི་ཉེས་པ་རྣམ་པ་བཞི་ཡོངས་སུ་སྤངས་པ་གང་ཡིན་པའོ། །བདག་ནི་ཡིད་འདུལ་བ་ལ་གནས་ཀྱིས། གཞན་དག་ཀྱང་ཡིད་འདུལ་བ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་ཡིད་འདུལ་བ་ནི་ཡིད་ཀྱི་ལས་ཀྱི་ཉེས་པ་རྣམ་པ་གསུམ་ཡོངས་སུ་སྤངས་པ་གང་ཡིན་པའོ། །བདག་ནི་སེར་སྣའི་སེམས་འདུལ་བ་ལ་གནས་ཀྱིས། གཞན་དག་ཀྱང་སེར་སྣའི་སེམས་འདུལ་བ་ལ་དགོད་དོ་ཞེས་དབུགས་འབྱིན་པ