Kinh tạng Tây Tạng (Kangyur Đại Học) — 050_མདོ་སྡེ།_ཆ

ེ་བར་བསྒྲུབས་པ་ཆོས་དཀོན་མཆོག་གི་མཛོད་འདི་མི་འཆད་ཅིང་རབ་ཏུ་མི་སྟོན་གཞན་དག་ལ་རྒྱས་
པར་མི་བྱེད་ན་ཀུན་དགའ་བོ་དེས་སྟོན་པ་ལ་བསྙེན་བཀུར་བྱས་པ་མ་ཡིན་ལ། ངའི་དམ་པའི་ཆོས་ཡོངས་སུ་བཟུང་བ་མ་ཡིན་ནོ། །ཀུན་དགའ་བོ་དེ་བས་ན་བསྐལ་པ་གྲངས་མེད་པ་བྱེ་བར་བསྒྲུབས་པ་ཆོས་དཀོན་མཆོག་གི་མཛོད་འདི་ཁྱོད་ལ་གཏད་ཀྱིས་ཅི་ནས་ཀྱང་རྒྱུན་མི་འཆད་པ་དང་། དགེ་
བའི་ལམ་འདི་རྒྱུན་དུ་འབྱུང་བར་གཞན་དག་ལ་རྒྱ་ཆེར་རབ་ཏུ་སྟོན་ཅིག །སྐྱེས་བུ་ཐ་མ་པར་མ་གྱུར་ཅིག། །།བམ་པོ་དྲུག་པ་སྟེ་ཐ་མ། ཀུན་དགའ་བོ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་ཆོས་འདི་དག་ལ་བདག་ཀྱང་
སྒྲུབ་ལ། གཞན་ལ་ཡང་འཆད་ཅིང་རབ་ཏུ་སྟོན་ན། ཀུན་དགའ་བོ་དེ་ལ་ངས་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་འདི་ལས་ཆ་ཤས་སྦྱིན་ཞིང་སྐལ་བ་བཞག་གོ། །ཀུན་དགའ་བོ་དེ་བས་ན་བསྐལ་པ་གྲངས་མེད་པ་བྱེ་བར་བསྒྲུབས་པའི་བྱང་ཆུབ་འདི་གང་
མ་འོངས་པའི་སེམས་ཅན་དེ་རྣམས་ཀྱི་དོན་དུ་ཁྱོད་ལ་ལན་གཉིས་སུ་ཡང་གཏད་ཀྱིས། སེམས་ཅན་དེ་དག་ཆོས་དཀོན་མཆོག་གི་མཛོད་དེ་ལྟ་བུ་མ་ཐོས་པས་ཡོངས་སུ་ཉམས་པར་གྱུར་ཏ་རེ། ཀུན་དགའ་བོ་ཆོས་དཀོན་མཆོག་གི་མཛོད་འདི་ལྟ་བུ་མ་ཐོས་པ་ལས་སེམས་ཅན་མང་པོ་དག་

ཡོངས་སུ་ཉམས་པར་འགྱུར་རོ། །ཀུན་དགའ་བོ་ངས་དོན་འདིའི་དབང་ལ་བརྟེན་ནས་བསྐལ་པ་གྲངས་མེད་པ་བྱེ་བར་བསྒྲུབས་པའི་སངས་རྒྱས་ཀྱི་བྱང་ཆུབ་འདི་ཁྱོད་ལ་གཏད་ཀྱིས་སེམས་ཅན་དེ་དག་ཆོས་དཀོན་མཆོག་གི་མཛོད་འདི་ལྟ་བུ་ལས་ཡོངས་སུ་མ་ཉམས་པར་
གྱིས་ཤིག །ཀུན་དགའ་བོ་འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཏེ་དེའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་བུ་གཅིག་པ་ཞིག་ཡོད་པ་བྱེས་སུ་སོང་སྟེ། དེ་བྱེས་སུ་
སོང་བའི་འོག་ཏུ་རྒྱལ་པོ་རྒྱལ་རིགས་དེ་ན་བར་གྱུར་ལ་དེ་ན་བར་གྱུར་པ་དང་། རིན་པོ་ཆེའི་མཛོད་མང་པོ་རིན་པོ་ཆེ་ལ་མཁས་པ་གཏམས་པ་འཆང་བ་རྣམས་ཀྱི་ལག་ཏུ་གཏད་དེ། ཁྱིམ་བདག་རྣམས་ངའི་བུ་བྱེས་སུ་སོང་བ་ནམ་དེ་བྱེས་ནས་སླར་ལོག་པར་གྱུར་ལ་རྒྱལ་པོར་ཡང་བཅུག་པར་
གྱུར་པ་དེ་ན་ཁྱེད་ཀྱིས་རིན་པོ་ཆེའི་མཛོད་མང་པོ་འདི་ཁྱོད་ཀྱི་ཕ་འཆི་བའི་དུས་བྱེད་པ་ན་བཞག་པ་ཡིན་ནོ་ཞེས་བྱོས་ལ། རིན་པོ་ཆེའི་མཛོད་མང་པོ་འདི་དེ་ལ་བྱིན་ཅིག་ཅེས་དེ་སྐད་ཀྱང་སྨྲས་ནས་དེ་ལྟར་རྒྱལ་པོ་དེས་ཤིན་ཏུ་ལེགས་པར་གཏམས་ཏེ་འཆི་བའི་དུས་བྱས་ལ་དེ་འཆི་བའི་དུས་བྱས་
པའི་འོག་ཏུ་རྒྱལ་པོའི་བུ་དེ་བྱེས་ནས་སླར་ལོག་སྟེ་རྒྱལ་པོར་ཡང་བཅུག་ལ་གསེར་གྱིས་བསྒྱུར་བ་དང་། ཁྱིམ་བདག་དེ་དག་ལ་སོ་སོར་བཞག་པ་རྒྱལ་པོའི་བུ་རྒྱལ་སྲིད་ཀྱི་དབང་ཕྱུག་ཐོབ་པ་རྒྱལ་སྲིད་ལ་གནས་པ་དེ་ལ་རིན་པོ་ཆེའི་མཛོད་མ་བྱིན་ན། ཀུན་དགའ་བོ་དེ་ཇི་སྙམ་དུ་སེམས།
གསེར་གྱིས་བསྒྱུར་བའམ། ཁྱིམ་བདག་དེ་དག་རྒྱལ་པོ་དེ་ལ་ཉེས་པར་བྱེད་པ་ཡིན་ནམ། གསོལ་པ། བཅོམ་ལྡན་འདས་དེ་ལྟ་ལགས་སོ། །བདེ་བར་གཤེགས་པ་དེ་ལྟ་ལགས་སོ། །བཀའ་སྩལ་པ། ཀུན་དགའ་བོ་དོན་ཤེས་པར་བྱ་བའི་ཕྱིར་ངས་ཁྱོད་ལ་དཔེ་བསྟན་པ་དེ་ལ་
དོན་དུ་ལྟ་བ་གང་ཞེ་ན། ཀུན་དགའ་བོ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་རྒྱལ་པོ་ཆེན་པོའི་ཚིག་བླ་དགས་སོ། །ཀུན་དགའ་བོ་བུ་གཅིག་པ་ཞེས་བྱ་བ་དེ་ནི་མ་འོངས་པའི་རིགས་ཀྱི་

བུ་དང་། རིགས་ཀྱི་བུ་མོ་དད་པ་རྣམས་ཀྱི་ཚིག་བླ་དགས་སོ། །ཀུན་དགའ་བོ་བྱེས་སུ་སོང་ཞེས་བྱ་བ་དེ་ནི་འགྲོ་བ་ལྔ་རྣམས་ཀྱི་ཚིག་བླ་དགས་སོ། །ཀུན་དགའ་བོ་ནད་པ་ཞེས་བྱ་བ་དེ་ནི་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ཚིག་བླ་དགས་སོ། །ཀུན་དགའ་བོ་
རིན་པོ་ཆེའི་མཛོད་མང་པོ་ཞེས་བྱ་བ་དེ་ནི་བྱང་ཆུབ་ཀྱི་ཕྱོགས་སུམ་ཅུ་རྩ་བདུན་གྱི་ཆོས་རྣམས་ཀྱི་ཚིག་བླ་དགས་སོ། །ཀུན་དགའ་བོ་ཁྱིམ་བདག་ཅེས་བྱ་བ་དེ་ནི་དགྲ་བཅོམ་པ་རྣམས་ཀྱི་ཚིག་བླ་དགས་སོ། །ཀུན་དགའ་བོ་དཔེར་ན་རྒྱལ་པོ་དེ་འཆི་བའི་དུས་བྱེད་པ་ན་ནོར་འཇོག་པ་དེ་བཞིན་
དུ། ཀུན་དགའ་བོ་ངའི་ཆོས་དཀོན་མཆོག་གི་མཛོད་བསྐལ་པ་གྲངས་མེད་པ་བྱེ་བར་བསྒྲུབས་པ་མ་འོངས་པའི་རིགས་ཀྱི་བུ་དང་། རིགས་ཀྱི་བུ་མོ་དེ་དག་གི་དོན་དུ་ཁྱོད་ལ་གཏད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་སེམས་ཅན་གང་དག་ངས་ཡོངས་སུ་སྨིན་པར་བྱས་པ་དེ་དག་མི་དགེ་
བའི་ལས་ཀྱི་ལམ་འགའ་ཞིག་གིས་སེམས་ཅན་དམྱལ་བ་དང་། དུད་འགྲོ་དང་། གཤིན་རྗེའི་འཇིག་རྟེན་དུ་སྐྱེས་ཏེ། དེ་དག་ང་འདས་པའི་འོག་ཏུ་དེ་ནས་ཤི་འཕོས་ནས་མིར་འགྱུར་བ་ཐོབ་སྟེ། དབང་པོ་རྣམས་རྒྱས་པའི་རྒྱུ་དང་ཡོངས་སུ་སྨིན་པའི་རྒྱུས་ངའི་བསྟན་པ་འདི་ལ་དད་པར་འགྱུར་
བ་དག་ཡོད་དེ། དེ་ལ་ཁ་ཅིག་ནི་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་རོ། །ཁ་ཅིག་ནི་ཁྱིམ་ན་གནས་པར་འགྱུར་རོ། །དེ་ལ་ཁ་ཅིག་ནི་རྒྱུན་དུ་ཞུགས་པའི་འབྲས་བུ་ཐོབ་པར་འགྱུར་རོ། །ཁ་ཅིག་ནི་ལན་ཅིག་ཕྱིར་འོང་བའི་འབྲས་བུ་དང་། ཁ་ཅིག་ནི་ཕྱིར་མི་
འོང་བའི་འབྲས་བུ་དང་། ཁ་ཅིག་ནི་དགྲ་བཅོམ་པ་མངོན་སུམ་དུ་བྱེད་པར་འགྱུར་རོ། །ཁ་ཅིག་ནི་སློབ་པའི་ས་ནས་འཆི་བའི་དུས་བྱེད་པར་འགྱུར་རོ། །ཁ་ཅིག་ནི་སངས་རྒྱས་ཀྱི་སར་ལྷག་པའི་བསམ་པས་སེམས་སྐྱེད་པར་འགྱུར་རོ། །ཁ་ཅིག་ནི་ལྷ་དང་མིར་སྐྱེ་བར་བྱ་བའི་ཕྱིར་དགེ་བའི་
རྩ་བ་སྐྱེད་པར་འགྱུར་ཏེ། དེ་ལྟར་རྙེད་པ་དེ་དང་དེ་དག་དང་ལྡན་པར་འགྱུར་རོ། །ཁ་ཅིག་ནི་སེམས་དང་བ་གཅིག་ཐོབ་པར་འགྱུར་ཏེ་འཇིག་རྟེན་གྱི་ཡབ་དེས་བདག་ཅག་ལ་ལེགས་པར་གཏད་དོ་སྙམ་ནས་དེ་དག་རྒྱ་ཆེར་རབ་ཏུ་དད་པར་འགྱུར་ཞིང་དང་བ་སྐྱེད་པར་བྱེད་དོ། །ཀུན་དགའ་བོ་འདི་ལྟར་

དེ་དག་གིས་ཆོས་དཀོན་མཆོག་འདི་མཉན་པར་བྱ་བའི་ཕྱིར་ངས་ཆོས་དཀོན་མཆོག་གི་མཛོད་འདི་ཁྱོད་ལ་གཏད་དོ། །ཀུན་དགའ་བོ་ཁྱོད་ཀྱིས་གལ་ཏེ་ངའི་ཆོས་དཀོན་མཆོག་གི་མཛོད་འདི་རིགས་ཀྱི་བུ་དང་། རིགས་ཀྱི་བུ་མོ་དད་པ་དེ་དག་ཉན་དུ་མ་བཙུད་ན། དེ་ལྟ་ན་ནི་ཀུན་དགའ་བོ་
ཁྱོད་དེ་བཞིན་གཤེགས་པ་ལ་ཉེས་པ་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་རིགས་ཀྱི་བུ་དང་རིགས་ཀྱི་བུ་མོ་དེ་དག་ཆོས་དཀོན་མཆོག་འདི་ལྟ་བུ་ཐོས་ནས་ཁ་ཅིག་གིས་ནི་ཁྱད་པར་ཐོབ་པར་འགྱུར། ཁ་ཅིག་གིས་ནི་རབ་ཏུ་དགའ་ཞིང་མགུ་བར་འགྱུར། ཁ་ཅིག་ནི་ཆོས་ཀྱི་
ཤུགས་ཀྱིས་མཆི་མ་འབྱུང་ཞིང་སྤུ་ཟིང་ཞེས་བྱེད་པར་འགྱུར་རོ། །ཀུན་དགའ་བོ་གང་དག་ཆོས་ཀྱི་རྣམ་གྲངས་འདི་ལྟ་བུ་ཐོས་ནས་ངའི་ཡོན་ཏན་རྗེས་སུ་དྲན་ཞིང་ཆོས་ཀྱི་ཤུགས་ཀྱིས་མཆི་མ་འབྱུང་ལ་སྤུ་ཟིང་ཞེས་བྱེད་པར་འགྱུར་ན། ཀུན་དགའ་བོ་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ནི་
མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ་དགེ་སློང་གང་དག་ཆོས་ཀྱི་རྣམ་གྲངས་འདི་ལྟ་བུ་འཛིན་ལ་རིགས་ཀྱི་བུ་དང་རིགས་ཀྱི་བུ་མོ་དད་པ་ཆོས་འདོད་པ་རྣམས་འོངས་ཤིང་ལྷགས་པ་དག་ལ་ཆོས་མི་འཆད་ཅིང་རབ་ཏུ་མི་སྟོན་ན་དེ་དག་དེ་བཞིན་
གཤེགས་པ་ལ་ཉེས་པ་བྱེད་པ་ཡིན་ནོ། །ཀུན་དགའ་བོ་གང་དག་རིགས་ཀྱི་བུ་དང་རིགས་ཀྱི་བུ་མོ་ཆོས་དོན་དུ་གཉེར་ཅིང་ཉན་པར་འདོད་དེ་ཉན་པ་རྣམས་ཆོས་ཉན་པ་ལས་ཉམས་པར་བྱེད་ན། དེ་དག་དེ་ལྟར་སྣོད་དུ་གྱུར་པ་རྣམས་ལ་མི་འཆད་པས་བདག་གི་རྒྱུད་ལ་དགེ་བའི་རྩ་བ་ཉམས་པ་
དང་། གཞན་གྱི་རྒྱུད་ལ་དགེ་བའི་རྩ་བ་ཡོངས་སུ་ཉམས་པར་བྱེད་པ་ལ་ཞུགས་པ་ཡིན་ནོ། །དེ་ཅིའི་ཕྱིར་ཞེ་ན། དེ་དག་ནི་གང་ལ་ཆོས་བཤད་པར་བྱ་བ་དང་། གང་ལ་མི་བཤད་པ་མི་ཤེས་སོ། །ཀུན་དགའ་བོ་དེ་བས་ན་དོན་དེ་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །
ཀུན་དགའ་བོ་འདི་ལྟ་སྟེ་དཔེར་ན། ཚོང་པ་བྱིས་པའི་རང་བཞིན་ཅན་ལ་ལ་ཞིག་རིན་པོ་ཆེ་མང་པོ་ཁྱེར་ཏེ་འོང་བ་དེ་བྱེས་ནས་འོངས་ཏེ་འབྲོག་དགོན་པ་ཆེན་པོ་ཆོམ་རྐུན་ཡོད་པ་དེར་ཟོང་དེ་དག་བཀྲམ་སྟེ་རྐུན་པོའི་ཚོགས་རྣམས་བོས་ནས། ཀྱེ་མི་དག་ཟོང་འདི་དག་ཇི་ཙམ་དུ་བཟང་ཇི་ཙམ་དུ་མཛེས་པ་

ལྟོས་ཏེ། མི་ཁྱོད་ངའི་ཟོང་འདི་དག་ཉོས་ཤིག་ཅེས་ཟེར་ལ། ཀུན་དགའ་བོ་འབྲོག་དགོན་པ་དེར་ཆོམ་རྐུན་དེ་དག་གིས་ཚོང་པ་བྱིས་པའི་རང་བཞིན་ཅན་དེ་དབྱུག་པས་སྣད་པར་བརྡེགས་ནས་རིན་པོ་ཆེ་ཐམས་ཅད་ཕྲོགས་ན་ཀུན་དགའ་བོ་དེ་ཇི་སྙམ་དུ་སེམས། འབྲོག་དགོན་པ་དེར་ཟོང་བཀྲམ་ནས་ཆོམ་
རྐུན་འབོད་པའི་ཚོང་པ་དེ་ཆོས་དང་རྗེས་སུ་འཐུན་པ་ཡིན་ནམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཚོང་པ་དེ་ཆོམ་རྐུན་མཆིས་པའི་འབྲོག་དགོན་པར་ཟོང་འགྲེམས་པ་ཡང་ཆོས་དང་འཐུན་པ་མ་
ལགས་ན་ཟོང་རྣམས་བཀྲམ་ནས་ཆོམ་རྐུན་འབོད་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་འདི་ལྟར་བགྱིད་ན་ནི་ཆོས་དང་རྗེས་སུ་འཐུན་པ་ལགས་ཏེ། གལ་ཏེ་ཚོང་པ་དེ་ཟོང་དེ་དག་ལེགས་པར་སྦས་ནས་མདའ་གཞུ་ཐོགས་ཤིང་གོ་ཆ་བཟང་པོ་བགོས་ཏེ། འབྲོག་དགོན་པ་དེ་ནས་
ལེགས་པར་འབྱུང་ན་དེ་ཆོས་དང་རྗེས་སུ་འཐུན་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཅི་སྟེ་ཚོང་པ་བྱིས་པའི་རང་བཞིན་ཅན་དེ་ནོར་གྱི་ཕུང་པོ་མང་པོ་དང་རིན་པོ་ཆེ་མང་པོ་ཁྱེར་ཏེ་
བྱེས་ནས་སླར་ལོག་སྟེ། གྲོང་དང་། གྲོང་ཁྱེར་དང་། གྲོང་འདབ་དང་། ཡུལ་འཁོར་དང་། ཕོ་བྲང་འཁོར་དུ་འོངས་ཏེ། ཟོང་དེ་བཀྲམ་ལ་དེར་ཟོང་བཀྲམ་པའི་རིན་པོ་ཆེ་རིན་ཐང་ཆེན་པོ་དེ་དག་ཉོ་བའི་སྐྱེས་བུ་མཁས་པ་ཤེས་རབ་དང་ལྡན་པ་ཟོང་འདོད་པ་རྣམས་ལྷགས་པ་དང་། དེ་ནས་ཚོང་
པ་དེ་ཟོང་འདོད་པའི་སྐྱེས་བུ་ལྷགས་པ་དེ་དག་ལ་མདའ་གཞུ་ཐོགས་ཏེ་ཐབ་མོ་རྒོལ་ན། ཀུན་དགའ་བོ་དེ་ཇི་སྙམ་དུ་སེམས། སྐྱེས་བུ་དེ་དེ་ལྟར་བྱེད་ན་ཆོས་དང་རྗེས་སུ་འཐུན་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཅོམ་
ལྡན་འདས་ཚོང་པ་དེས་འདི་ལྟར་བགྱི་ཞིང་ཟོང་འཚལ་བའི་སྐྱེས་བུ་དེ་དག་ལ་སྐྱེས་བུ་ཁྱེད་ཚུར་ཤོག་ཟོང་གི་བྱེ་བྲག་བཟང་པོ་མང་པོ་འདི་དག་ལ་ཇི་ཙམ་དུ་བཟང་བ་དང་ཇི་ཙམ་དུ་མཛེས་པ་ལྟོས་ལ་ཉོས་ཤིག་དང་། རིན་ཆུང་ངུར་སྦྱིན་ནོ་ཞེས་དེ་སྐད་སྨྲ་ཞིང་བཅོམ་ལྡན་འདས་ཚོང་པ་དེས་དེ་ལྟར་བགྱི་བའི་

རིགས་ཏེ། དེ་ལྟར་བགྱིས་ན་དེ་ཆོས་དང་རྗེས་སུ་འཐུན་གྱི། ཚོང་དུས་སུ་ཟོང་བཀྲམ་ནས་གོ་བགོས་ཏེ་མཆིས་པ་ནི་མི་རིགས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་འདི་ལ་དགེ་སློང་ཁ་ཅིག་ཆོས་དཀོན་མཆོག་གི་མཛོད་མང་པོ་འདི་ལྟ་སྟེ། མདོའི་སྡེ་དང་། དབྱངས་
ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་།
གཏན་ལ་བབ་པར་བསྟན་པའི་སྡེ་རྣམས་ཀུན་ཆུབ་པར་བྱས་ནས་གང་ན་ཆོས་དཀོན་མཆོག་གི་མཛོད་འདིའི་སྣོད་དུ་གྱུར་ཅིང་ལེན་པར་བྱེད་པ་གང་དག་གིས་ཐོས་ནས་ཁྱད་པར་ཐོབ་པར་འགྱུར་ཞིང་དགའ་བ་དང་། མཆོག་ཏུ་དགའ་བ་ཆེན་པོ་རྙེད་པར་འགྱུར་བ་དང་། དེའི་དགེ་བའི་རྩ་བས་མྱ་
ངན་ལས་འདའ་བར་འགྱུར་བ་ཡོད་པ་དེར་དེ་དག་མི་འཆད་ཀྱི་དེ་དག་གང་ན་ཆོས་དཀོན་མཆོག་འདིའི་སྣོད་དུ་མ་གྱུར་ཅིང་ཐོས་ནས་དང་བར་མི་འགྱུར། དད་པར་མི་འགྱུར། མོས་པར་མི་འགྱུར་གྱི་སྤོང་བར་འགྱུར་བ་དང་། དེའི་མི་དགེ་བའི་རྩ་བ་ངན་སོང་གསུམ་དུ་འགྱུར་བ་ཡོད་པ་དེར་འཆད་
དེ། ཀུན་དགའ་བོ་འདི་ལྟ་སྟེ་དཔེར་ན། ཚོང་པ་བྱིས་པའི་རང་བཞིན་ཅན་དེ་གང་དུ་ཟོང་དེ་བཀྲམ་པའི་རིགས་པ་དེར་མི་འགྲེམས་པར་གང་དུ་དགྲམ་པར་མི་བྱ་བ་དེར་འགྲེམས་ཏེ། གང་དག་ལ་སྦྱིན་པའི་རིགས་པ་དེ་དག་ལ་ནི་མི་སྟེར། གང་དག་ལ་སྦྱིན་པའི་མི་རིགས་པ་དེ་དག་ལ་སྟེར་བ་དེ་བཞིན་
དུ་ཀུན་དགའ་བོ་གང་དག་རིགས་ཀྱི་བུ་དང་རིགས་ཀྱི་བུ་མོ་མངོན་པར་དད་པ། ཆོས་དང་ལྡན་པ། ཆོས་འདོད་པ། ཉན་འདོད་པ། སྒྲུབ་འདོད་པ། སྣོད་དུ་གྱུར་པ་ལྷགས་པ་རྣམས་ལ་ཆོས་མི་འཆད་པར་དེ་གང་ལ་བཤད་པའི་མི་རིགས་པ་དེ་དག་ལ་འཆད་ཅིང་། གང་ལ་བཤད་པའི་རིགས་པ་
དེ་དག་ལ་མི་འཆད་པ་དག་ཀྱང་ངས་དེ་ལྟ་བུ་ཡིན་པར་མཐོང་ངོ་། །ཀུན་དགའ་བོ་དེ་ལྟ་བས་ན་གང་དག་སྣོད་དུ་གྱུར་པ་དང་བ་ཉན་འདོད་པ་མྱ་ངན་ལས་འདའ་བ་དོན་དུ་གཉེར་བ་དེ་དག་ལ་ཆོས་བཤད་པར་བྱའོ། །གང་དག་སྣོད་དུ་མ་གྱུར་པ། མ་དད་པ། གླགས་ཚོལ་བ། ཚུལ་ཁྲིམས་འཆལ་

པ། སྡིག་པའི་ཆོས་ཅན། འཕྱས་ཚོལ་བའི་བསམ་པ་ཅན། ཆོས་སྤོང་བ་དམ་པའི་ཆོས་དང་འགལ་བར་གནས་པ་གཏམ་དུ་བྱེད་ཀྱི་རྗེས་སུ་འཐུན་པའི་ཆོས་མི་འཆད་པ་དེ་དག་ལ་མི་བཤད་དོ་ཞེས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། མི་བླུན་པོ་དེ་དག་གིས་ཐོས་ནས་རྒྱ་ཆེར་མ་
རུང་བར་གྱུར་ཏ་རེ་ཞེས་ཀུན་དགའ་བོ་ཁྱོད་དེ་ལྟར་བསླབ་པར་བྱའོ། །ཀུན་དགའ་བོ་ཁྱོད་སྐྱོ་བར་མ་བྱེད་ཅིག །ཀུན་དགའ་བོ་དགེ་སློང་དོན་དུ་གཉེར་བ་རྣམས་ལ་ཆོས་གུས་པར་འཆད་ཅིང་། དེ་ཡང་གུས་པར་ཉན་ན་ཀུན་དགའ་བོ་དེ་གཉི་ག་ཡང་བསོད་ནམས་རྒྱ་ཆེར་སྐྱེད་ཅིང་། བསོད་ནམས་
ཚད་མེད་གྲངས་མེད་པར་སྐྱེད་དོ། །ཀུན་དགའ་བོ་དེ་ཇི་སྙམ་དུ་སེམས། སའི་ཁམས་དང་སེམས་ཅན་གྱི་ཁམས་གང་མང་། གསོལ་པ། བཅོམ་ལྡན་འདས་ཇི་ལྟར་བཅོམ་ལྡན་འདས་ཀྱིས་བཤད་པའི་དོན་བདག་གིས་འཚལ་བ་ལྟར་ན་བཅོམ་ལྡན་འདས་སེམས་ཅན་གྱི་ཁམས་ཆེས་
མང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཇི་སྐད་སྨྲ་བ་དེ་བཞིན་ཏེ། ཀུན་དགའ་བོ་སེམས་ཅན་གྱི་ཁམས་ཆེས་མང་གི་སའི་ཁམས་ནི་མ་ཡིན་ནོ། །ཀུན་དགའ་བོ་སེམས་ཅན་གྱི་ཁམས་ཆེས་མང་གི་ཆུའི་ཁམས་ནི་མ་ཡིན་ནོ། །མེའི་ཁམས་ནི་མ་
ཡིན་ནོ། །ཀུན་དགའ་བོ་ཡོངས་སུ་བརྟགས་པ་བཟུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་དུ་མངོན་པས་མངོན་པ་ཀུན་ཏུ་སྣང་བར་གྱུར་པའམ། ཀུན་ཏུ་སྣང་བར་མ་གྱུར་པ་གང་དག་ཡོད་པ་དེ་དག་ཐམས་ཅད་སྐད་ཅིག་གཅིག་དང་། ཐང་ཅིག་གཅིག་
དང་། ཡུད་ཙམ་གཅིག་ལ་མིའི་ལུས་ཐོབ་པར་གྱུར་ཏེ། དེ་དག་མིའི་ལུས་ཐོབ་ནས་སྐད་ཅིག་གཅིག་དང་། ཐང་ཅིག་གཅིག་དང་། ཡུད་ཙམ་གཅིག་ལ་རང་བྱང་ཆུབ་ཐོབ་པར་གྱུར་པ་དང་། ཀུན་དགའ་བོ་ཡོངས་སུ་བརྟག་པ་བཟུང་སྟེ། འཇིག་རྟེན་གྱི་ཁམས་མཐའ་ཡས་དཔག་
ཏུ་མེད་པ་དག་ན་སའི་ཁམས་ཇི་སྙེད་ཡོད་པ་སའི་ཕུང་པོ་གང་གི་མཐའ་མི་མངོན་པའི་སའི་ཕུང་པོ་དེ་ལ་རྡུལ་ཕྲ་རབ་ཀྱི་རྡུལ་ཇི་སྙེད་ཡོད་པའི་སའི་རྡུལ་དེ་ཐམས་ཅད་སྙེད་ཀྱི་མིར་གྱུར་ལ། ཀུན་དགའ་བོ་མིར་གྱུར་པ་དེ་དག་ཀྱང་སྐད་ཅིག་ཐང་ཅིག་ཡུད་ཙམ་གཅིག་ལ་སྔ་ཕྱི་མེད་པར་རང་བྱང་

ཆུབ་ཐོབ་པར་གྱུར་པ་དང་། ཀུན་དགའ་བོ་ཡོངས་སུ་བརྟག་པ་བཟུང་སྟེ། འཇིག་རྟེན་གྱི་ཁམས་མཐའ་ཡས་དཔག་ཏུ་མེད་པ་ན་གང་རིའི་རྒྱལ་པོ་རི་རབ་རྣམས་དང་། རིའི་རྒྱལ་པོ་ཁོར་ཡུག་དང་། ཁོར་ཡུག་ཆེན་པོ་རྣམས་དང་། གངས་རི་དང་། སྤོས་ཀྱི་ངད་ལྡང་
དང་། དེ་ལས་གཞན་པ་རི་ནག་པོ་རྣམས་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རྩྭ་དང་། ཤིང་དང་ལོ་མ་དང་ཤིང་ལྗོན་པ་དང་ནགས་དང་ཤིང་གེལ་པ་དང་སྨན་དང་ནགས་ཚལ་ཇི་སྙེད་ཡོད་པ་དེ་དག་ལ་རྡུལ་ཕྲ་རབ་ཀྱི་རྡུལ་ཇི་སྙེད་ཡོད་པ། ཡོད་པའི་དངོས་པོ་
འམ། བརྟག་པར་བལྟ་བར་བྱ་བར་སྣང་བ་དེ་དག་ཐམས་ཅད་ཀྱང་མིར་གྱུར་ལ། ཀུན་དགའ་བོ་མིར་གྱུར་པ་དེ་དག་ཀྱང་སྐད་ཅིག་དང་ཐང་ཅིག་དང་ཡུད་ཙམ་གཅིག་ལ་སྔ་ཕྱི་མེད་པར་རང་བྱང་ཆུབ་ཐོབ་པར་གྱུར་ཏེ། ཀུན་དགའ་བོ་རང་སངས་རྒྱས་དེ་དག་ཀྱང་ཇི་སྲིད་དུ་འཁོར་བའི་སྔོན་གྱི་
མཐའ་མི་མངོན་པ་དེ་སྲིད་དུ་ཡུན་རིང་དུ་གནས་པར་གྱུར་པ་དེ་དག་ལ་སེམས་ཅན་གྱི་ཁམས་དེར་མ་གཏོགས་པའི་ཁྱིམ་བདག་གཅིག་ཅིག་བྱུང་བ་དེ་ཡང་ཇི་སྲིད་འཁོར་བའི་སྔོན་གྱི་མཐའ་མི་མངོན་པ་དེ་སྲིད་དུ་གནས་པར་གྱུར་ཏེ། དེ་ནས་ཁྱིམ་བདག་དེ་ཚེའི་ཚད་དེ་ལྟ་བུས་རང་སངས་རྒྱས་རྣམས་
ལ་ན་བཟའ་དང་། བཤོས་དང་། གཟིམས་ཆ་དང་། ན་བའི་གསོས་སྨན་དང་། བདེ་བར་སྦྱར་བ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པ་དང་། ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་ཡང་རིན་པོ་ཆེ་སྣ་བདུན་ལས་བྱས་ནས་ལྷ་དང་མིའི་
གདུགས་དང་། རྒྱལ་མཚན་དང་། བ་དན་རྣམས་དང་། མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། ཕྱེ་མ་དང་། ན་བཟའ་དང་། གླུ་གར་དང་། སིལ་སྙན་རྣམས་ཀྱིས་ལྷ་དང་མི་རྣམས་མཆོད་པ་བྱེད་བསྟི་སྟང་བྱེད། བླ་མར་བྱེད། རིམ་གྲོར་བྱེད། རྗེད་པར་བྱེད། གསོལ་བར་བྱེད་ན། ཀུན་དགའ་བོ་
དེ་ཇི་སྙམ་དུ་སེམས། གཞི་དེ་ལས་ཁྱིམ་བདག་དེ་བསོད་ནམས་མང་དུ་སྐྱེད་དམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བཤད་པའི་དོན་ཇི་ལྟར་བདག་གིས་འཚལ་བ་ལྟར་ན་ཅང་ཤེས་

གཅིག་ལ་བསྟི་སྟང་བགྱིས་པ་ཡང་བསོད་ནམས་མང་དུ་སྐྱེད་དེ། གྲངས་མ་མཆིས། བསམ་གྱིས་མི་ཁྱབ་མཚུངས་པ་མ་མཆིས་ན། རང་སངས་རྒྱས་ཀྱི་ཚོགས་འདི་ལྟ་བུ་འདི་ལ་བསྟི་སྟང་བགྱིས་པ་ལྟ་སྨོས་ཀྱང་ཅི་འཚལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་
བཀའ་སྩལ་ཏོ། །ཀུན་དགའ་བོ་ཁྱོད་ལ་བསྒོའོ། །ཁྱོད་ཀྱིས་ཁོང་དུ་ཆུད་པར་བྱའོ། །རང་སངས་རྒྱས་ཚུལ་ཁྲིམས་དང་ལྡན། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པ་དེ་དག་ཐམས་ཅད་ཁྱིམ་བདག་དེའི་སྦྱིན་པ་སྦྱོང་བར་བྱེད་པ་བས།
ཀུན་དགའ་བོ་གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཅིག་འཇིག་རྟེན་དུ་བྱུང་སྟེ། བྱུང་ནས་ཀྱང་ཁྱིམ་བདག་དེས་ཕུལ་བའི་ན་བཟའ་དང་བཤོས་དང་། གཟིམས་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཡོངས་སུ་སྤྱད་དེ། ཡོངས་སུ་སྤྱད་ནས་ཀྱང་ཁྱིམ་བདག་
དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་མཐོང་བ་མ་གཏོགས་པར་ཆོས་ཀྱང་མི་འཆད་ཀྱང་། ཀུན་དགའ་བོ་དེ་བཞིན་གཤེགས་པ་དེ་རང་བཞིན་གྱི་སྤྱོད་ལམ་སྟོན་པ་ཙམ་གྱིས་སྦྱིན་པ་རབ་ཏུ་མང་པོ་དེ་སྦྱོང་བར་མཛད་ཀྱི། ཇི་ལྟར་དེ་བཞིན་གཤེགས་པ་རང་བཞིན་
གྱི་སྤྱོད་ལམ་སྟོན་པ་དེས་སྦྱིན་པ་སྦྱོང་བར་མཛད་པ་དེ་ལྟར་རང་སངས་རྒྱས་ཚུལ་ཁྲིམས་ཀྱི་ཕུང་པོ་དང་ལྡན་ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པ་ཐམས་ཅད་ཀྱིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་སྦྱིན་
པ་སྦྱོང་བར་མི་བྱེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་དེ་བཞིན་གཤེགས་པའི་སྤྱོད་ལམ་ཡང་ཡོན་ཏན་ཚད་མེད། གྲངས་མེད། བསམ་གྱིས་མི་ཁྱབ་པ་གང་གི་མཐའ་རྟོགས་པར་སླ་བ་མ་ཡིན་པ་དེ་སྙེད་དང་ལྡན་ན་སངས་རྒྱས་ཀྱི་ཡོན་ཏན་གཞན་རྣམས་ལྟ་ཅི་སྨོས། ཀུན་དགའ་བོ་རང་སངས་རྒྱས་རྣམས་ལ་
ཡོན་ཕུལ་བ་ཡང་ཡོད། ཡོན་དེ་ཚད་མེད། དཔག་ཏུ་མེད་པར་འགྱུར་བ་ཡང་ཡོད། ཀུན་དགའ་བོ་ཚད་མེད་དཔག་ཏུ་མེད་ཅིང་དཔག་ཡས་པའི་ཁྱད་པར་ཡང་ཡོད། ཐ་དད་དུ་བྱ་བ་ཡང་ཡོད་དོ། །ཀུན་དགའ་བོ་ཡོན་དེ་ཡོད་དེ། དེ་མེད་པ་མ་ཡིན་ནོ། །ཀུན་དགའ་བོ་ང་ལྟ་བུ་ལ་གནས། ང་ལྟ་བུ་ལ་བརྟེན་ཏེ་ཡོན་ཕུལ་

ན་ཡོན་དེའི་དཔེ་བྱ་བར་ཡང་སླ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་ཡོན་དེ་ཚད་མེད། གྲངས་མེད། བསམ་གྱིས་མི་ཁྱབ་མཚུངས་པ་མེད། དཔག་ཏུ་མེད་ཅིང་ཟད་མི་ཤེས་པའི་ཕྱིར་རོ། །ཀུན་དགའ་བོ་འདི་ལྟ་སྟེ་དཔེར་ན། མི་འགའ་ཞིག་ཁེའི་ཕྱིར་སོང་ལ་དེ་ནས་ཁེ་རྙེད་དེ་སླར་
འོངས་པ་དེ་བཞིན་དུ་ཀུན་དགའ་བོ་རང་སངས་རྒྱས་ལ་ཡོན་ཕུལ་བ་ཡང་ངས་དེ་དང་འདྲ་བར་མཐོང་ངོ་། །ང་ལྟ་བུ་ལ་གནས་ཏེ་ང་ལྟ་བུ་ལ་ཡོན་ཕུལ་བ་ལ་བརྩམས་ནས། ཀུན་དགའ་བོ་དོན་དེ་ཉིད་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱ་སྟེ། འདི་ལྟར་འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་
ཤེས་པར་འགྱུར་རོ། །ཀུན་དགའ་བོ་འདི་ལྟ་སྟེ་དཔེར་ན་མི་ལ་ལ་ཞིག་རི་མོ་འདྲི་བ་ལས་དེས་རི་མོ་དེ་མ་ལེགས་པར་བྲིས་ལ་མ་ལེགས་པར་བྲིས་ནས་ཆུང་ཟད་ཆུང་ཟད་ཙམ་ཕྱིས་ཀྱང་། ཀུན་དགའ་བོ་རི་མོ་དེ་ལ་སྡུག་པ་ཡོད་མོད་ཀྱི་དེ་བས་གཞན་ཆེས་སྡུག་པ་དག་ཡོད་དོ། །ཀུན་དགའ་བོ་དེ་བཞིན་དུ་རང་སངས་
རྒྱས་ཐམས་ཅད་པས་ང་ལྟ་བུ་དག་ལ་བརྩམས་པའི་ཡོན་རྒྱས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་ཡེ་ཤེས་གང་གིས་རང་སངས་རྒྱས་ཞེས་བྱ་བའི་གྲངས་སུ་འགྲོ་བའི་རང་སངས་རྒྱས་ཀྱི་ཡེ་ཤེས་ནི་འདི་ལས་བྱུང་ངོ་། །དེ་བཞིན་གཤེགས་པ་ནི་ཆོས་ཐམས་ཅད་མཁྱེན་པ་ལ་ཁྱད་པར་དུ་མཁས་
པའོ། །ཀུན་དགའ་བོ་དེ་ཇི་སྙམ་དུ་སེམས། གང་དེ་བཞིན་གཤེགས་པ་ལ་ཇི་སྲིད་འཚོའི་བར་དུ་ན་བཟའ་དང་། བཤོས་དང་། གཟིམས་ཆ་དང་། ན་བའི་གསོས་སྨན་དང་། ཡོ་བྱད་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན་བསོད་ནམས་མང་དུ་སྐྱེད་དམ། གསོལ་པ།
བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། གང་དེ་བཞིན་གཤེགས་པ་ལ་ཇི་སྲིད་འཚོའི་བར་དུ་བསྟི་སྟང་བགྱིད་པ་དེ་བསོད་ནམས་མང་དུ་སྐྱེད་དོ། །བཅོམ་ལྡན་འདས་དེ་བཞིན་གཤེགས་པ་ལ་སེམས་དང་བས་སེམས་གཅིག་བསྐྱེད་པ་ཡང་གཞི་དེ་ལས་
བསོད་ནམས་མང་དུ་སྐྱེད་དེ། དཔག་ཏུ་མ་མཆིས། བསམ་གྱིས་མི་ཁྱབ། གྲངས་མ་མཆིས་ན། གང་དེ་བཞིན་གཤེགས་པ་ལ་ཇི་སྲིད་འཚོའི་བར་དུ་བསྟི་སྟང་བགྱིད། བླ་མར་བགྱིད། རིམ་གྲོར་བགྱིད། མཆོད་པར་བགྱིད་པ་ལྟ་སྨོས་ཀྱང་ཅི་འཚལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་

པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་གང་དེ་བཞིན་གཤེགས་པ་གཅིག་ལ་ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་ཀྱིས་བསྟི་སྟང་བྱེད་པ་ལྟ་ཞོག་ལ། གཉིས་སམ། གསུམ་མམ། བཞིའམ། ལྔའམ། བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུའམ། བརྒྱ་
འམ། སྟོང་ངམ། བྱེ་བའམ། བྱེ་བ་བརྒྱའམ། བྱེ་བ་སྟོང་ངམ། བྱེ་བ་བརྒྱ་སྟོང་ངམ། བྱེ་བ་ཁྲག་ཁྲིག་བརྒྱ་སྟོང་ངམ། ཀུན་དགའ་བོ་འཛམ་བུའི་གླིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཡོངས་སུ་གང་བར་གྱུར་པ་དང་། གླིང་བཞི་པ་ཆེན་པོའི་འཇིག་རྟེན་གྱི་
ཁམས་དང་། སྟོང་གཉིས་པའི་འཇིག་རྟེན་གྱི་ཁམས་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་ན་ཟླ་བ་བྱེ་བ་བརྒྱ་རྣམས་དང་། ཉི་མ་བྱེ་བ་བརྒྱ་རྣམས་དང་། རི་རབ་བྱེ་བ་བརྒྱ་རྣམས་དང་། རི་ཁོར་ཡུག་བྱེ་བ་བརྒྱ་རྣམས་དང་། རྒྱ་མཚོ་ཆེན་པོ་བྱེ་བ་བརྒྱ་རྣམས་དང་། འཛམ་བུའི་གླིང་བྱེ་བ་
བརྒྱ་རྣམས་དང་། ཤར་གྱི་ལུས་འཕགས་བྱེ་བ་བརྒྱ་རྣམས་དང་། བྱང་གི་སྒྲ་མི་སྙན་བྱེ་བ་བརྒྱ་རྣམས་དང་། ནུབ་ཀྱི་བ་ལང་སྤྱོད་བྱེ་བ་བརྒྱ་རྣམས་ཏེ། གླིང་བརྒྱད་ཁྲིས་བསྐོར་བ་རྣམས་དང་། གླིང་བཞི་པ་ཆེན་པོ་བྱེ་བ་བརྒྱ་རྣམས་དང་། རྒྱལ་ཆེན་བཞི་པ་བྱེ་བ་བརྒྱ་རྣམས་དང་། སུམ་ཅུ་རྩ་གསུམ་དང་། འཐབ་
བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་བྱེ་བ་བརྒྱ་རྣམས་དང་། ཚངས་རིས་བྱེ་བ་བརྒྱ་རྣམས་ནས་འོག་མིན་བྱེ་བ་བརྒྱ་རྣམས་ཀྱི་བར་འདི་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱ་སྟེ། དེ་ཐམས་ཅད་འདི་ལྟ་སྟེ་དཔེར་ན། བུ་རམ་ཤིང་སྟུག་པོའམ། འབྲས་
ཀྱི་ཞིང་སྟུག་པོའམ། ཏིལ་གྱི་ཞིང་སྟུག་པོའམ། འདམ་བུ་མདའ་རྒྱུ་སྟུག་པོའམ། འོད་མ་སྟུག་པོའམ། འདམ་བུ་སྟུག་པོའམ། སེང་ལྡེང་སྟུག་པོའམ། རྩྭ་ཀུ་ཤ་སྟུག་པོ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀུན་ཏུ་གང་བར་གྱུར་ལ་ཐ་ན་ཡོངས་
སུ་བརྟག་པ་བཟུང་སྟེ་སངས་རྒྱས་བཅོམ་ལྡན་འདས་དེ་དག་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བཞུགས་པར་གྱུར་ལ། དེར་ཁྱིམ་བདག་གཅིག་ཅིག་བྱུང་སྟེ། ཁྱིམ་བདག་དེ་ཡང་དེ་སྲིད་དུ་གནས་པར་གྱུར་པ་དེས་སངས་རྒྱས་བཅོམ་ལྡན་འདས་དེ་དག་ལ་ཇི་སྲིད་འཚོའི་བར་དུ་ན་བཟའ་དང་། བཤོས་དང་།

གཟིམས་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པ་དང་། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་རྣམས་ཀྱི་སྐུ་གདུང་ལ་ཡང་སྐུ་གདུང་གི་མཆོད་པ་རིན་པོ་ཆེ་སྣ་བདུན་གྱི་
མཆོད་རྟེན་བྱས་ནས་ལྷའི་གདུགས་དང་། རྒྱལ་མཚན་དང་། བ་དན་ལ་སོགས་པ་དང་། སྤོས་དང་བྱུག་པ་ཐམས་ཅད་དང་། མེ་ཏོག་དང་ཕྲེང་བ་དང་ཨུད་པ་ལ་དང་པད་མ་དང་ཀུ་མུ་ཏ་དང་པད་མ་དཀར་པོ་ཐམས་ཅད་དང་། གླུ་དབྱངས་ཐམས་ཅད་དང་། རོལ་མོའི་སྒྲ་ཐམས་ཅད་དང་། ལྷ་དང་
མིའི་མཆོད་པ་བཟང་པོ་མེ་ཏོག་ནས་སིལ་སྙན་དང་ཕེག་རྡོབ་པའི་བར་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན། ཀུན་དགའ་བོ་དེ་ཇི་སྙམ་དུ་སེམས། གཞི་དེ་ལས་ཁྱིམ་བདག་དེ་བསོད་ནམས་མང་དུ་སྐྱེད་དམ། གསོལ་པ། བཅོམ་ལྡན་འདས་དེ་བཞིན་
གཤེགས་པ་གཅིག་ལ་ཁྱིམ་བདག་དེས་བཤོས་གསོལ་ན་ཡང་བསོད་ནམས་མང་དུ་སྐྱེད་དེ། དཔག་ཏུ་མ་མཆིས་གྲངས་མ་མཆིས་ན་དེ་བཞིན་གཤེགས་པའི་ཚོགས་དེ་སྙེད་ཅིག་བསྐལ་པ་དེ་སྙེད་དུ་བཞུགས་པ་ལ་བསྟི་སྟང་བགྱིད། བླ་མར་བགྱིད། རིམ་གྲོར་བགྱིད། མཆོད་པར་བགྱིད་པ་དང་།
ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་ལ་དེ་ལྟ་བུའི་བསྟི་སྟང་བགྱིད་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་དེ་བཞིན་གཤེགས་པའི་ཚོགས་དེ་ལྟ་བུ་ལ་དེ་ལྟ་བུའི་བསྟི་སྟང་བགྱིས་པ་ཁྱིམ་བདག་དེ་གཞི་དེ་ལས་བསོད་ནམས་འདི་སྙེད་ཅིག་སྐྱེད་དོ་ཞེས་བསོད་ནམས་ཀྱི་ཕུང་པོ་དེ་དཔེས་
བསྟན་དུ་མི་ནུས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ལ་བསྒོའོ། །ཀུན་དགའ་བོ་ཁྱོད་ཀྱི་ཁོང་དུ་ཆུད་པར་བྱའོ། །ཁྱིམ་བདག་གང་གིས་དེ་བཞིན་གཤེགས་པ་དེ་སྙེད་ཅིག་བསྐལ་པ་དེ་
སྙེད་དུ་བཞུགས་པ་ལ་བསྟི་སྟང་བྱས། བླ་མར་བྱས། རིམ་གྲོར་བྱས། མཆོད་པར་བྱས་པ་དང་། ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་ལ་དེ་ལྟ་བུའི་བསྟི་སྟང་བྱས་པའི་བསོད་ནམས་བསྐྱེད་པ་བས། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་དད་པ་རབ་ཏུ་མང་བ། ལྷག་པའི་

བསམ་པས་ཞུགས་པ། སངས་རྒྱས་བཅོམ་ལྡན་འདས་ཀྱི་བྱང་ཆུབ་ལ་མི་རྟོག་པར་མངོན་པར་དད་ཅིང་ཡིད་ཆེས་ལ། མོས་པ་གང་གིས་ཆོས་ཐམས་ཅད་མི་རྟག་པའམ། སྡུག་བསྔལ་བའམ། སྟོང་པའམ། བདག་མེད་པའོ་ཞེས་ལེགས་པར་གསུངས་པའི་ཆོས་ལ་ཡང་དག་པར་
ཞུགས་ཤིང་ཚིག་ཏུ་སྨྲ་ན། ཀུན་དགའ་བོ་འདི་ནི་དེ་བས་བསོད་ནམས་ཆེས་མང་དུ་སྐྱེད་དོ། །ཀུན་དགའ་བོ་གང་བླ་ན་མེད་པའི་ཆོས་དཀོན་མཆོག་འདི་ལྟ་བུ་བསྟི་སྟང་དུ་བྱས་ཏེ་གཞན་ལ་འཆད་དམ། རབ་ཏུ་སྟོན་ན་བསོད་ནམས་ཇི་ཙམ་དུ་རྒྱ་ཆེར་སྐྱེད་པ་དང་། ཇི་ཙམ་དུ་ཚད་མེད་པ་དང་།
ཇི་ཙམ་དུ་གྲངས་མེད་པ་དང་། ཇི་ཙམ་དུ་བསམ་གྱིས་མི་ཁྱབ་པ་དང་། ཇི་ཙམ་དུ་མཚུངས་པ་མེད་པ་དང་། ཇི་ཙམ་དུ་དཔག་ཏུ་མེད་པའི་བསོད་ནམས་སྐྱེད་པ་ལ་ལྟོས། དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་དེ་ལས་གཞན་པའི་སྦྱིན་པ་རྣམས་ནི་ཟག་པ་དང་བཅས་ཤིང་ཉོན་མོངས་པ་དང་
བཅས་པ་སྟེ། འཁོར་བར་རྒྱུ་བ་ཡིན་ལ། ཀུན་དགའ་བོ་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་ཟང་ཟིང་མེད་པ་བླ་ན་མེད་པ་འདི་ནི་འཁོར་བའི་རྒྱུན་གཅོད་པར་འགྱུར་བའི་ཕྱིར་རོ། །ཀུན་དགའ་བོ་ཆོས་དཀོན་མཆོག་བླ་ན་མེད་པ་འདི་ཐོས་ན་སེམས་ཅན་སྐྱེ་
བའི་ཆོས་ཅན་རྣམས་སྐྱེ་བ་ལས་ཡོངས་སུ་ཐར་བར་འགྱུར། སེམས་ཅན་ན་བའི་ཆོས་ཅན་དང་། འཆི་བའི་ཆོས་ཅན་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པའི་ཆོས་ཅན་རྣམས་འཁྲུག་པའི་བར་ལས་ཡོངས་སུ་ཐར་བར་འགྱུར་རོ། །
ཀུན་དགའ་བོ་དོན་གྱི་གཞི་འདི་མཐོང་ནས་གང་ཆོས་གུས་པར་འཆད་པ་དང་། གང་ཆོས་གུས་པར་ཉན་པ་གཉིས་ནི་བསོད་ནམས་མང་དུ་སྐྱེད་དོ་ཞེས་ང་སྨྲའོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་
བོ་ལྷག་པའི་བསམ་པས་ཞུགས་ཤིང་ཡང་དག་པར་བསྒྲུབ་པར་འདོད་པས་སངས་རྒྱས་བཅོམ་ལྡན་འདས་ཀྱི་བསྟན་པ་ལ་མི་རྟོག་པར་མངོན་པར་དད་ཅིང་མོས་ནས་ཆོས་ལེགས་པར་གསུངས་པ་ཡིན་པ་དང་། དགེ་འདུན་ལེགས་པར་ཞུགས་པ་ཡིན་པ་དང་། འདུ་བྱེད་ཐམས་ཅད་མི་རྟག་པའམ་

སྡུག་བསྔལ་བའམ། ཞི་བའམ། སྟོང་པའམ། བདག་མེད་པ་ཡིན་པར་ཡིད་ཆེས་ན། ཀུན་དགའ་བོ་འདི་ནི་དེ་བས་ཆེས་བསོད་ནམས་མང་དུ་སྐྱེད་དེ་ཚིག་ཙམ་མ་ཡིན་ནོ། །ཀུན་དགའ་བོ་གང་ལ་ལ་ཞིག་གིས་རུ་ཤིང་བཞིན་དུ་བྱས། ཡིད་ལ་བྱས། སེམས་ཐམས་ཅད་ཀྱིས་
བསམས་ནས་རྣ་བླགས་ཏེ་ཆོས་ཉན་པ་དང་། མཉན་ནས་ཀྱང་ཐ་ན་སེ་གོལ་གཏོགས་པ་ཙམ་ཡང་མི་རྟག་པའམ། སྡུག་བསྔལ་བའམ། སྟོང་པའམ། བདག་མེད་པར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ན། ཀུན་དགའ་བོ་དེ་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་སེམས་ཅན་གྱི་ཁམས་
ཡོད་པའི་སེམས་ཅན་ཇི་སྙེད་པ་ཐམས་ཅད་ནི་ཆེས་མང་གི། སའི་ཁམས་མ་ཡིན། ཆུའི་ཁམས་མ་ཡིན། མེའི་ཁམས་མ་ཡིན། རླུང་གི་ཁམས་མ་ཡིན་ནོ་ཞེས་དེ་སྐད་བྱ་བ་དེ་དག་ཐམས་ཅད་ཡོངས་སུ་བརྟག་པ་བཟུང་སྟེ། སྐད་ཅིག་དང་། ཐང་ཅིག་དང་། ཡུད་ཙམ་ཅིག་ལ་སྔ་ཕྱི་མེད་པར་མིར་གྱུར་
ལ། སྐད་ཅིག་དང་། ཐང་ཅིག་དང་། ཡུད་ཙམ་ཅིག་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཁྱིམ་བདག་གཅིག་ཅིག་ཀྱང་བྱུང་ལ། སངས་རྒྱས་བཅོམ་ལྡན་འདས་དེ་དག་ཇི་ཙམ་དུ་འཁོར་བའི་སྔོན་གྱི་མཐའ་མི་མངོན་པ་དེ་སྲིད་དུ་ཡུན་རིང་དུ་བཞུགས་
ཏེ། ཁྱིམ་བདག་དེ་ཡང་བསྐལ་པ་དེ་སྲིད་དུ་གནས་པར་གྱུར་ལ། དེས་སངས་རྒྱས་བཅོམ་ལྡན་འདས་དེ་སྙེད་ལ་ན་བཟའ་དང་། བཤོས་དང་། གཟིམས་ཆ་དང་། ན་བའི་གསོས་སྨན་དང་། ཡོ་བྱད་དང་། བདེ་བར་སྦྱར་བ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པ་དང་།
ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་རིན་པོ་ཆེ་སྣ་བདུན་ལས་བྱས་ཏེ། ལྷའི་གདུགས་དང་། རྒྱལ་མཚན་དང་། བ་དན་རྣམས་དང་། མེ་ཏོག་དང་། ཕྲེང་བ་དང་། སྤོས་དང་། བྱུག་པ་ཐམས་ཅད་དང་། བདོག་པ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་
པར་བྱེད་ན། ཀུན་དགའ་བོ་དེ་ཇི་སྙམ་དུ་སེམས། ཁྱིམ་བདག་དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ། བཅོམ་ལྡན་འདས་ཁྱིམ་བདག་དེས་དེ་བཞིན་གཤེགས་པ་གཅིག་མཉེས་པར་བགྱིས། བསྟི་སྟང་བགྱིས། བླ་མར་བགྱིས། རིམ་གྲོར་བགྱིས། མཆོད་པར་བགྱིས་ན་ཡང་གཞི་དེ་ལས་བསོད་

ནམས་མང་དུ་སྐྱེད་དེ། བསོད་ནམས་ཚད་མ་མཆིས། གྲངས་མ་མཆིས། བསམ་གྱིས་མི་ཁྱབ། མཚུངས་པ་མ་མཆིས། དཔག་ཏུ་མ་མཆིས་པ་སྐྱེད་པར་འགྱུར་ན། དེ་བཞིན་གཤེགས་པའི་ཚོགས་དེ་ལྟ་བུ་ལ་བསྐལ་པ་དེ་སྙེད་དུ་བསྟི་སྟང་བགྱིས། བླ་མར་བགྱིས། རིམ་གྲོར་བགྱིས། མཆོད་པར་བགྱིས་པ་ལྟ་
སྨོས་ཀྱང་ཅི་འཚལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེ་དེ་བཞིན་ནོ། །ཁྱོད་ཇི་སྐད་ཟེར་བ་བཞིན་ཏེ། དེ་བསོད་ནམས་ཚད་མེད་པ་སྐྱེད་དོ། །ཀུན་དགའ་བོ་དེ་བས་ན་ཁྱོད་ལ་བསྒོའོ། །ཁྱོད་ཀྱིས་ཁོང་དུ་ཆུད་པར་
བྱའོ། །གང་ཁྱིམ་བདག་དེས་དེ་བཞིན་གཤེགས་པ་དེ་སྙེད་ཅིག་ལ་བདེ་བའི་ཡོ་བྱད་ཐམས་ཅད་ཀྱིས་བསྐལ་པ་དེ་སྙེད་དུ་བསྟི་སྟང་བྱས། བླ་མར་བྱས། རིམ་གྲོར་བྱས་པས་བསོད་ནམས་བསྐྱེད་བས། གང་གིས་རུ་ཤིང་བཞིན་དུ་བྱས། ཡིད་ལ་བྱས། སེམས་ཐམས་ཅད་ཀྱིས་བསམས་ཏེ། རྣ་བླགས་སེམས་རྩེ་
གཅིག་ཏུ་བྱས་ནས་ཆོས་ཉན་ཅིང་སེ་གོལ་གཏོགས་པ་ཙམ་ཡང་འདུ་བྱེད་ཐམས་ཅད་མི་རྟག་པའམ། སྡུག་བསྔལ་བའམ། ཞི་བའམ། སྟོང་པའམ། བདག་མེད་པའོ་ཞེས་ཡིད་ལ་བྱེད་ན་འདི་དེ་བས་བསོད་ནམས་ཆེས་མང་དུ་སྐྱེད་དེ། ཀུན་དགའ་བོ་གང་ཆོས་གུས་པར་འཆད་པ་དང་། གང་ཆོས་གུས་པར་ཉན་
པ་ནི་བསོད་ནམས་ཆེས་མང་དུ་སྐྱེད་དོ། །ཀུན་དགའ་བོ་ངས་འདི་ལ་དགོངས་ནས་འདི་སྐད་དུ། རྣམ་པ་གཉིས་ཀྱི་དོན་གྱི་ཕྱིར། །སངས་རྒྱས་བཤད་པ་མཉན་པར་བྱ། །ཟག་པ་རྣམས་ཀྱང་ཟད་པར་འགྱུར། །བྱང་ཆུབ་ཉེ་བར་གྱུར་པར་འདོད། །གང་ཞིག་ཆོས་རྣམས་འཆད་པ་དང་། །དྲང་སྲོང་རྒྱལ་མཚན་གང་འཛིན་
པ། །གཉི་ག་བསོད་ནམས་ལྡན་པར་འགྱུར། །ཆོས་ནི་དྲང་སྲོང་རྒྱལ་མཚན་ཡིན་ཞེས་བཤད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་ཆོས་གུས་པར་འཆད་པ་དང་། གང་ཆོས་གུས་པར་ཉན་པ་འདི་གཉིས་ནི་བདུད་དང་ལྷན་ཅིག་ཏུ་གཡུལ་འདྲེ་བའོ། །
དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟ་སྟེ་དགེ་བའི་བཤེས་གཉེན་ཉིད་དང་། དགེ་བའི་གྲོགས་སུ་གྱུར་པ་ཉིད་དང་། དགེ་བའི་བཤེས་གཉེན་དང་ལྡན་པ་འདི་ནི་ཚངས་པར་སྤྱོད་པ་ཡོངས་སུ་རྫོགས་པར་བྱེད་པའོ། །དེ་ཅིའི་ཕྱིར་ཞེ་ན། ཀུན་དགའ་བོ་དགེ་བའི་བཤེས་གཉེན་ལ་བརྟེན་ནས་སེམས་ཅན་སྐྱེ་བའི་ཆོས་ཅན་

རྣམས་སྐྱེ་བ་ལས་ཡོངས་སུ་ཐར་བར་འགྱུར་བ་ནས་སེམས་ཅན་འཁྲུག་པའི་ཆོས་ཅན་རྣམས་འཁྲུག་པ་ལས་ཡོངས་སུ་ཐར་བར་འགྱུར་རོ། །ཀུན་དགའ་བོ་ངས་ཉན་ཐོས་རྣམས་ལ་ཡང་དག་པའི་ལྟ་བ་འབྱུང་བའི་རྒྱུ་གཉིས་དང་། རྐྱེན་གཉིས་ནི་འདི་ལྟ་སྟེ། གཞན་གྱི་སྒྲ་དང་། སོ་སོ་རང་གིས་ཚུལ་
བཞིན་ཡིད་ལ་བྱེད་པའོ་ཞེས་གསུངས་པ་ཡང་དེ་ཡིན་ཏེ། ཀུན་དགའ་བོ་དེ་དག་ལས་གཞན་གྱི་སྒྲ་ནི་སངས་རྒྱས་བཅོམ་ལྡན་འདས་རྣམས་ལས་བྱུང་བར་རིག་པར་བྱའོ། །གང་སོ་སོ་རང་གི་ཚུལ་བཞིན་ཡིད་ལ་བྱེད་པ་དེ་ཡང་སངས་རྒྱས་བཅོམ་ལྡན་འདས་ཉིད་ལས་བྱུང་བར་རིག་པར་བྱའོ། །དེ་ཅིའི་ཕྱིར་ཞེ་
ན། ཀུན་དགའ་བོ་འདི་ལྟར་བྱིས་པ་སོ་སོའི་སྐྱེ་བོ་རྣམས་ལ་སོ་སོ་རང་གི་ཚུལ་བཞིན་ཡིད་ལ་བྱེད་པ་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། སངས་རྒྱས་རྣམས་མ་བྱུང་ན། བྱིས་པ་སོ་སོའི་སྐྱེ་བོ་རྣམས་ཅི་ཞིག་ཡིད་ལ་བྱ་བ་མི་ཤེས་ཀྱི་ཆོས་འདི་དག་ཡིད་ལ་བྱའོ་ཞེས་དེ་བཞིན་གཤེགས་པ་ཉིད་ཀྱིས་བསྟན་པའི་
ཕྱིར་རོ། །ཀུན་དགའ་བོ་ངས་དོན་གྱི་གཞི་འདི་མཐོང་ནས་སོ་སོ་རང་གི་ཚུལ་བཞིན་ཡིད་ལ་བྱེད་པ་དེ་ཡང་སངས་རྒྱས་བཅོམ་ལྡན་འདས་རྣམས་ལས་བྱུང་བར་རིག་པར་བྱའོ་ཞེས་དེ་སྐད་བཤད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྐྱེས་བུ་དམ་པ་རྣམས་
ནི་མཐོང་ན་ལེགས། །ཐེ་ཚོམ་རྣམས་ནི་གཅོད་ཅིང་སེལ་བར་བྱེད། །བྱིས་པ་རྣམས་ཀྱང་རབ་ཏུ་མཁས་པར་བྱེད། །དེ་བས་མཁས་པ་རྣམས་ནི་མཐོང་ན་ལེགས། །འཕགས་པ་རྣམས་ནི་མཐོང་ན་བདེ། །དམ་པ་རྣམས་དང་འགྲོགས་པའང་བདེ། །བྱིས་པ་རྣམས་ནི་མ་མཐོང་ན། །དམ་པ་རྣམས་ལ་རྟག་ཏུ་བདེ། །ཀུན་
དགའ་བོ་འདི་ལྟ་སྟེ། དགེ་བའི་བཤེས་གཉེན་དང་། དགེ་བའི་གྲོགས་སུ་གྱུར་པ་དང་། དགེ་བའི་བཤེས་གཉེན་གྱ་གྱུ་མེད་པ་ཉིད་ནི་ཚངས་པར་སྤྱོད་པ་འདི་རྫོགས་པར་བྱེད་པའོ་ཞེས་བྱ་བ་ཡང་ངས་འདི་ལ་དགོངས་ཏེ་ཚིག་དེ་སྐད་སྨྲས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་དགེ་བའི་བཤེས་གཉེན་ལ་བརྟེན་ནས་
སེམས་དགེ་བར་འགྱུར་རོ། །སེམས་དགེ་བས་བསམ་པ་དགེ་བར་འགྱུར། སྦྱོར་བ་དགེ་བར་འགྱུར། དགེ་བའི་ཆོས་ལ་སེམས་དང་བར་འགྱུར། དགེ་བའི་ཆོས་ལ་ཉེ་བར་གནས་པར་འགྱུར། སངས་རྒྱས་བཅོམ་ལྡན་འདས་རྣམས་ལ་ཤེས་ནས་དད་པར་འགྱུར། ཆོས་ལ་ཤེས་ནས་དད་པར་འགྱུར། དགེ་འདུན་ལ་ཤེས་

ནས་དད་པར་འགྱུར། འཕགས་པ་དགྱེས་པའི་ཚུལ་ཁྲིམས་རང་དབང་ཅན་མཁས་བས་བསྔགས་པ། མྱ་ངན་ལས་འདའ་བར་འགྱུར་བ་རྣམས་ཐོབ་པར་འགྱུར་རོ། །ཀུན་དགའ་བོ་འདི་ལྟ་སྟེ་དཔེར་ན་ཆར་རབ་ཏུ་བབ་ན་ཤང་ཤོང་རྣམས་ཡོངས་སུ་གང་བར་བྱེད་དོ། །ཤང་ཤོང་རྣམས་ཡོངས་སུ་གང་ནས་ཆུ་བྲན་རྣམས་
བྲུག་པར་བྱེད་དོ། །ཆུ་བྲན་རྣམས་བྲུགས་ནས་ཀླུང་ཆེན་པོ་རྣམས་བྲུག་པར་བྱེད་དོ། །ཀླུང་ཆེན་པོ་བྲུགས་པ་རྣམས་ཀྱིས་མཚོ་ཆེན་པོ་རྒྱ་མཚོ་ཡོངས་སུ་གང་བར་འགྱུར་རོ། །ཀུན་དགའ་བོ་དེ་བཞིན་དུ་དགེ་བའི་བཤེས་གཉེན་དང་། དགེ་བའི་གྲོགས་སུ་གྱུར་པ་དང་། དགེ་བ་དང་རབ་ཏུ་ལྡན་པ་དང་། དགེ་བ་གཙོ་བོར་
གྱུར་པ་དང་། དགེ་བའི་སེམས་ཉིད་ལ་བརྟེན་ནས་དགེ་བའི་རྩ་བའི་སྟོབས་བསྐྱེད་པ་ཐོབ་པ་རྣམས་ནི་རྗེས་སུ་འཐུན་པའི་ཆོས་ཀྱི་བར་དུ་བསྒྲུབས་པས་རབ་ཏུ་མཐར་ཐུག་པ་དང་། རབ་ཏུ་དྲི་མ་མེད་པ་དང་། རབ་ཏུ་ཚངས་པར་སྤྱོད་པ་དང་། རབ་ཏུ་མཐར་ཕྱིན་པར་འགྱུར་རོ། །ཀུན་དགའ་བོ་ཕྱི་རོལ་གྱི་དངོས་པོར་གྱུར་པ་འདི་དག་
ཀྱང་དུས་ལ་བབ་ན་སྐྱེ་བར་འགྱུར་བ་དང་། མེ་ཏོག་དང་། ཡལ་ག་དང་། འབྲས་བུ་འབྱིན་པ་ལ་ལྟོས། ཀུན་དགའ་བོ་འདི་ལྟར་ཕྱི་རོལ་གྱི་དངོས་པོ་འདི་དག་ཀྱང་སླུ་བར་མི་བྱེད་ན་ཁྱེད་ཀྱི་ལེགས་པར་སྤྱད་པ་མི་སླུ་བ་ལྟ་ཅི་སྨོས་ཏེ་དེ་ནི་གནས་མེད་དོ། །ཀུན་དགའ་བོ་ལེགས་པར་སྤྱད་པ་ནི་སུ་ལ་ཡང་མི་སླུའོ། །ལེགས་པར་སྤྱད་པ་
སྤྱོད་ཅིག །ཀུན་དགའ་བོ་ང་ཡང་ལེགས་པར་སྤྱད་པས་མ་བསླུས་སོ། །ཀུན་དགའ་བོ་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ལེགས་པར་སྤྱད་པ་གང་ཡིན་པ་དེ་དག་སྤྱད་དེ་ལེགས་པར་སྤྱད་པ་དེས་ང་མ་བསླུས་སོ། །ཀུན་དགའ་བོ་དེ་བཞིན་གཤེགས་པ་ལམ་གང་ནས་གཤེགས་པ་དེ་ན་གང་ས་མཐོན་དམན་དང་།
ངམ་གྲོག་དང་། གཡང་ས་དང་། སྟོར་ཁུང་དང་། ཤོང་ཁུང་དང་། སྡོང་དུམ་དང་། ཚེར་མ་སྟུག་པོ་དེ་དག་ཐམས་ཅད་འདུད་ཅིང་མེད་པར་འགྱུར་བ་དང་། ས་དམའ་བ་མཐོན་པོར་འགྱུར་བ་དང་། མཐོན་པོ་དམའ་བར་འགྱུར་བ་དང་། ཤིང་རྣམས་རབ་ཏུ་འདུད་པ་དང་། ཤིང་གི་ལྷ་རྣམས་ཕྱག་འཚལ་བ་དང་། ཚོང་དུས་དང་། སྲང་དག་
ན་སྐྱེ་བོ་གང་དག་འཁོད་པ་དེ་དག་དེ་བཞིན་གཤེགས་པ་བཞུད་པའི་རྗེས་སུ་འབྲང་སྟེ་དེ་བཞིན་གཤེགས་པ་འདས་ནས་དེ་དག་སླར་རང་རང་གི་གནས་ན་འཁོད་པ་ལ་ལྟོས། ཀུན་དགའ་བོ་སྔོན་སངས་རྒྱས་བཅོམ་ལྡན་འདས་རྣམས་དང་། རང་སངས་རྒྱས་རྣམས་དང་། དགྲ་བཅོམ་པ་རྣམས་དང་། བྱང་ཆུབ་སེམས་

དཔའ་རྣམས་དང་། དགེ་བའི་བཤེས་གཉེན་ཡིད་དུ་འོང་བ་རྣམས་དང་། དགེ་སྦྱོང་དང་། བྲམ་ཟེ་རྒན་པ་རྣམས་ལ་རྟག་ཏུ་གུས་པ་དང་། འདུད་པ་དང་། ཕྱག་འཚལ་བའི་ལེགས་པར་སྤྱད་པའི་རྒྱུ་འཐུན་པ་ལ་ལྟོས། ཀུན་དགའ་བོ་ཕྱི་རོལ་གྱི་དངོས་པོ་སེམས་མེད་པ་ཡང་དེ་བཞིན་གཤེགས་པ་ལ་འདུད་
ཅིང་ཕྱག་འཚལ་བ་དང་། མཐོ་བར་འགྱུར་བ་དང་། དངོས་པོ་གང་དག་དམའ་བར་འོས་པའམ། མཐོ་བར་འོས་པ་དེ་དག་དེ་བཞིན་གཤེགས་པ་མཐོང་མ་ཐག་ཏུ་དམའ་བ་དང་མཐོ་བར་འགྱུར་བ་ལེགས་པར་སྤྱད་པའི་ཁྱད་པར་ལ་ལྟོས། འདི་ལ་མི་བླུན་པོ་ཁ་ཅིག་ནི་ང་རྒྱལ་གྱི་ཟིལ་གྱིས་ནོན། ང་རྒྱལ་གྱིས་བསླད། ང་རྒྱལ་
གྱིས་སེམས་ཡོངས་སུ་གདུངས་ནས་སུ་ལ་ཡང་མི་འདུད་དོ། །ཀུན་དགའ་བོ་དེ་བཞིན་གཤེགས་པའི་ཕྱག་དྲ་བར་འབྲེལ་བ་དང་། ཞབས་དྲ་བར་འབྲེལ་བ་དེ་དག་ཐམས་ཅད་ཀྱང་ལེགས་པར་སྤྱད་པ་ལས་གྱུར་པ་ལ་ལྟོས། ཀུན་དགའ་བོ་གང་ངས་སྔོན་སྦྱིན་པ་དང་། ཚིག་སྙན་པ་དང་། དོན་སྤྱད་པ་དང་། དོན་འཐུན་
པས་སེམས་ཅན་རྣམས་བསྡུས་པ་སྔོན་གྱི་ལེགས་པར་སྤྱད་པ་དེ་དག་ལ་ལྟོས། ཀུན་དགའ་བོ་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་འདི་ནི་ངའི་མ་ཡིན། འདི་ནི་ངའི་ཕ་ཡིན། འདི་ནི་ཕུ་ནུ་བོ། འདི་ནི་སྲིང་མོ། འདི་ནི་ཉེ་དུ། འདི་ནི་མཛའ་བོ། །འདི་ནི་མི་མཛའ་བ་ཡིན་ནོ་སྙམ་པ་དེ་ལྟ་བུར་མ་གྱུར་གྱི། ཀུན་དགའ་
བོ་ང་ནི་སེམས་ཅན་ཐམས་ཅད་ལ་སེམས་རོ་གཅིག་པ་དང་། སེམས་མཉམ་ཞིང་སེམས་མི་མཉམ་པ་མེད་པ་དང་། བདག་གི་སེམས་སུ་གྱུར་ཏོ། །ཀུན་དགའ་བོ་ཡུན་རིང་པོ་འདི་ན་གང་ངས་སྦྱིན་པ་དང་། ཚིག་སྙན་པ་དང་། དོན་སྤྱད་པ་དང་། དོན་འཐུན་པས་མ་བཟུང་བའི་སེམས་ཅན་དེ་ནི་རྙེད་པར་སླ་བ་མ་ཡིན་
ན་བྱིས་པ་སོ་སོའི་སྐྱེ་བོ་རྣམས་ནི་དེ་ལྟར་བཟུང་བར་མི་ཤེས་སོ། །ཇི་ལྟར་འཁོར་བའི་སྔོན་གྱི་མཐའ་མི་མངོན་པ་བཞིན་དུ་བྱིས་པ་སོ་སོའི་སྐྱེ་བོ་རྣམས་ཀྱིས་བདེ་བ་མྱོང་སྟེ། ཀུན་དགའ་བོ་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་རང་གིས་བསོད་ནམས་མངོན་པར་འདུས་བྱས་པས་བདེ་བ་མྱོང་བར་གྱུར་པ་དེ་བས་ནི་གང་
ངས་སེམས་ཅན་གཅིག་ལ་བདེ་བར་སྦྱར་ཞིང་བསྒྲུབས་པ་འདི་ཆེས་མང་སྟེ། ངས་སེམས་ཅན་རྣམས་ལ་བདེ་བར་སྦྱར་བ་བསྒྲུབས་པ་ཙམ་ནི་སེམས་ཅན་དེ་དག་གིས་རང་གིས་བསོད་ནམས་མངོན་པར་འདུས་བྱས་པས་བདེ་བ་མ་མྱོང་ངོ་། །ཀུན་དགའ་བོ་འོན་ཀྱང་བདེ་བར་སྦྱོར་བ་དེ་དག་ཐམས་ཅད་ནི་མི་རྟག་པ་

སྟེ་འགྱུར་བའི་ཆོས་ཅན་ནོ། །གང་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བྱིས་པ་སོ་སོའི་སྐྱེ་བོ་རྣམས་ལ་བདེ་བར་སྦྱོར་བ་ཐམས་ཅད་ཉེ་བར་སྦྱར་བ་དེ་དག་ཐམས་ཅད་ནི་ལམ་འདི་ལ་དགོད་པའི་ཕྱིར་ཡོངས་སུ་སྨིན་པར་འགྱུར་བ་ཤ་སྟག་གོ། །ད་ལྟར་བདེ་བ་གང་གིས་ངས་ཁྱེད་བདེ་བར་བྱས་པ་འདུས་མ་
བྱས་པའི་བདེ་བ། འཕགས་པ་ཟག་པ་མེད་པའི་བདེ་བ། དེ་དག་ནི་ནམས་ཀྱང་ཕྱིས་ཡོངས་སུ་མི་འགྱུར་ཞིང་ཆུད་ཟ་བར་མི་འགྱུར་རོ། །ཀུན་དགའ་བོ་དེ་བས་ན་འཕགས་པའི་ཡེ་ཤེས་ཀྱིས་བྱ་བ་བྱོས་ཤིག །ཀུན་དགའ་བོ་ཡེ་ཤེས་ཀྱི་བྱ་བས་བྱ་བ་བྱོས་ཤིག །ངས་ནི་བྱས་ཟིན་ཏོ། །ཀུན་དགའ་བོ་སྤྱོད་པ་གཞན་
ཡང་ཐ་ན་སེམས་དད་པ་གཅིག་བསྐྱེད་པའི་དགེ་བའི་རྩ་བའི་རྣམ་པར་སྨིན་པ་ངས་བཤད་ཟིན་ཏོ། །ཀུན་དགའ་བོ་སེམས་ཅན་དགེ་བའི་རྩ་བ་བྱས་པ། དགེ་བའི་རྩ་བ་བསྐྱེད་པ། མྱ་ངན་ལས་འདས་པའི་ས་བོན་བསྐྱེད་པ་དག་ཀྱང་ཡོད་དོ། །ཀུན་དགའ་བོ་སེམས་ཅན་གང་དག་གིས་དེ་བཞིན་གཤེགས་པ་ཡང་
དག་པར་རྗེས་སུ་དྲན་ནས་ང་འདི་ལྟ་བུར་ཟད་ཅིང་ཡོངས་སུ་ཉམས་པ་ཐོས་ན་དགའ་བ་ཙམ་མམ་དད་པ་ཙམ་གྱིས་མཆི་མ་འབྱུང་བ་དག་ཀྱང་ཡོད་དོ། །ཀུན་དགའ་བོ་དེ་བཞིན་གཤེགས་པ་རྗེས་སུ་དྲན་ནས་ཤུགས་རིང་པོ་འབྱིན་པའི་སེམས་ཅན་དག་ཀྱང་ཡོད། སྤུ་ཟིང་ཞེས་བྱེད་པ་དག་ཀྱང་ཡོད་དེ། སེམས་ཅན་
དེ་དག་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་མི་འགྲོ་ཞིང་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གཞོལ་བ་དག་གོ། །ཀུན་དགའ་བོ་དེ་བཞིན་དུ་གང་ལ་ལ་ང་རྗེས་སུ་དྲན་ནས་ཆོས་ཀྱི་ཤུགས་ཀྱིས་མཆི་མ་འབྱུང་བའམ། སྤུ་ཟིང་ཞེས་བྱེད་པའམ།
ཤུགས་རིང་དུ་འབྱིན་པར་འགྱུར་བའི་སེམས་ཅན་དེ་དག་ཐམས་ཅད་ནི་ཀུན་དགའ་བོ་དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་མི་འགྲོའོ། །ལོག་པར་ལྟུང་བ་ཐམས་ཅད་དུ་མི་འགྲོའོ། །ཀུན་དགའ་བོ་དེ་བས་ན་བག་ཡོད་པ་ལ་བརྩོན་པར་གྱིས་ཤིག །ཀུན་དགའ་བོ་སངས་རྒྱས་བཅོམ་ལྡན་འདས་
རྣམས་ཀྱི་བྱང་ཆུབ་ནི་བག་ཡོད་པས་ཐོབ་ཅིང་དེ་ལས་གཞན་པའི་དགེ་བ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱང་བག་ཡོད་པས་ཐོབ་བོ། །ཀུན་དགའ་བོ་གང་འདོམས་པ་པོས་བྱ་བ་དང་། གང་དོན་འདོད་པ་དང་། ཕན་པ་དང་བདེ་བ་འདོད་པ་དང་། ཕན་པར་དགའ་བ་དང་། སྙིང་རྗེ་ཅན་དང་། སྙིང་བརྩེ་བ་ཅན་གྱིས་སྙིང་

བརྩེ་བའི་ཕྱིར་བྱ་བ་དེ་དག་ངས་བྱས་ཀྱིས། ད་ནི་ཁྱེད་ཀྱིས་ཅི་ནས་ཀྱང་དགེ་བའི་ལམ་རྒྱུན་ཆད་པར་མི་འགྱུར་བ་དང་། དམ་པའི་ཆོས་ཀྱི་ཚུལ་ནུབ་པར་མི་འགྱུར་བར་གྱིས་ཤིག །ཀུན་དགའ་བོ་ཅི་ནས་ཀྱང་དམ་པའི་ཆོས་ཀྱི་ཚུལ་འདི་ཡུན་རིང་དུ་གནས་པར་འགྱུར་བ་དང་། ལྷ་དང་མི་རྣམས་ལ་ཡངས་ཤིང་རྒྱ་
ཆེར་འགྱུར་བར་གྱིས་ཤིག །ཀུན་དགའ་བོ་ཆོས་དཀོན་མཆོག་གི་མཛོད་འདི་ཅི་ནས་ཀྱང་རབ་ཏུ་མི་འཇིག་པར་བྱ་བའི་ཕྱིར་ངས་ཁྱོད་ལ་གཏད་དོ། །འདི་ནི་ངས་རྗེས་སུ་བསྟན་པའོ། །འདི་ནི་ངའི་རྗེས་སུ་བསྟན་པའོ། །དམ་པའི་ཆོས་ཡོངས་སུ་གཏད་པ་ཞེས་བྱ་བའི་ལེའུ་སྟེ་བཅུ་གཉིས་པ་རྫོགས་སོ།། །།
དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཇི་ལྟར་བསྒྲུབ་པར་བགྱི། བཅོམ་ལྡན་འདས་བདག་གིས་ཇི་ལྟར་བསྒྲུབས་ན་དམ་པའི་ཆོས་ཀྱི་ཚུལ་འདི་ཡུན་རིང་དུ་གནས་པ་དང་། ལྷ་དང་མི་རྣམས་ལ་ཡངས་ཤིང་རྒྱ་ཆེ་བར་འགྱུར། བཅོམ་ལྡན་
འདས་ཆོས་ཀྱི་ཚུལ་འདི་བདག་གིས་ཇི་ལྟར་ཡང་དག་པར་བསྡུ་བར་བགྱི། ཇི་ལྟར་རབ་ཏུ་བསྟན་པར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ང་ཡོངས་སུ་མྱ་ངན་ལས་འདས་པའི་འོག་ཏུ་དགེ་སློང་གནས་བརྟན་དག་འདུས་ནས་ཆོས་
དང་འདུལ་བ་ཡང་དག་པར་སྡུད་པར་བྱེད་དེ། དེ་ལ་ཀུན་དགའ་བོ་གནས་བརྟན་འོད་སྲུང་ཆེན་པོ་ལ་སོགས་པ་དགེ་སློང་གནས་བརྟན་དག་ཁྱོད་ལ་འདི་སྐད་འདྲིའོ། །ཀུན་དགའ་བོ་དེ་བཞིན་གཤེགས་པས་བསྟན་པ་ཆེན་པོ་དག་གང་དུ་གསུངས། གླེང་གཞི་ཆེན་པོའི་རྣམ་གྲངས་དག་གང་དུ། མཉམ་པར་བཞག་པ་ཆེན་
པོ་གང་དུ། ལྔ་པ་དང་གསུམ་པ་གང་དུ། ལྷས་ཞུས་པ་དག་གང་དུ། བརྒྱ་བྱིན་གྱིས་ཞུས་པ་དག་གང་དུ། ལྷ་ཡུལ་ནས་བབས་པ་གང་དུ། ཚངས་པའི་དྲི་བ་གང་དུ་གསུངས་ཞེས། ཀུན་དགའ་བོ་དགེ་སློང་དེ་དག་རྣམ་གྲངས་དེ་དག་གིས་ཁྱོད་ལ་དེ་སྐད་འདྲི་བར་འགྱུར་རོ། །ཀུན་དགའ་བོ་དེ་བཞིན་གཤེགས་པས་མདོའི་སྡེ་
དག་གང་དུ་གསུངས། དབྱངས་ཀྱིས་བསྙད་པའི་སྡེ་དང་། ལུང་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་།

གཏན་ལ་དབབ་པར་བསྟན་པའི་སྡེ་དག་གང་དུ་གསུངས། ཀུན་དགའ་བོ་དེ་བཞིན་གཤེགས་པས་ཉན་ཐོས་ཀྱི་སྡེ་སྣོད་གང་དུ་གསུངས། རང་སངས་རྒྱས་ཀྱི་སྡེ་སྣོད་གང་དུ་གསུངས། ཐེག་པ་ཆེན་པོ་བྱང་ཆུབ་སེམས་དཔའི་སྡེ་སྣོད་གང་དུ་གསུངས་ཞེས། ཀུན་དགའ་བོ་དེ་ན་དགེ་སློང་དེ་དག་
གིས་ཁྱོད་ལ་དེ་སྐད་དྲིས་པ་དང་འདི་སྐད་ལུང་སྟོན་ཅིག །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དང་པོ་མངོན་པར་རྫོགས་པར་སངས་རྒྱས་ནས་ཡུལ་མ་ག་དྷཱ་ན་བྱང་ཆུབ་ཀྱི་སྙིང་པོ་ལ་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་
རི་ག་ཡཱ་ལ་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་མ་ག་དྷཱ་ན་ར་རྫིའི་ཤིང་ནྱ་གྲོ་དྷའི་དྲུང་ན་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་བཱ་རཱ་ཎ་སཱི་ན་དྲང་སྲོང་ལྷུང་བ་རི་དགས་ཀྱི་ནགས་ན་བཞུགས།
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་དང་ལུས་འཕགས་རི་ཡངས་པའི་སྟེང་ན་དབང་པོའི་བྲག་ཕུག་ན་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་
ཀ་གནས་པ་ན་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དྲང་སྲོང་གི་རིའི་ངོས་སྲིན་བུའི་བྲག་ལ་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་
བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ཡངས་པ་ཅན་ན་ཤིང་ཨ་མྲས་སྐྱོངས་མའི་ཚལ་དང་། སྤྲེའུ་རྫིང་གི་འགྲམ་ན་ཁང་པ་བརྩེགས་པའི་གནས་ན་བཞུགས། དེ་བཞིན་དུ་ཡུལ་ཙམ་པ་ན་གརྒས་བརྐོས་པའི་རྫིང་གི་འགྲམ་ན་བཞུགས། དེ་བཞིན་དུ་ག་ཡཱ་ན་
ག་ཡཱ་མགོའི་རི་ལ་བཞུགས། དེ་བཞིན་དུ་ཡུལ་ཀོའུ་ཤཱམ་བཱི་ན། སྒྲས་མངོན་གྱི་ཀུན་དགའ་ར་བ་ན་བཞུགས། ཡུལ་གནས་བཅས་ན་ནག་པོའི་ཀུན་དགའ་ར་བ་ན་བཞུགས། སྐྱ་སྣར་གྱི་བུ་ན་བུ་མང་པོ་པའི་མཆོད་རྟེན་གྱི་དྲུང་ན་བཞུགས། ཡུལ་བཅོམ་བརླག་ན་བྱ་གག་གི་ཀུན་དགའ་ར་བ་ན་བཞུགས། འདི་

སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཀུ་ཤའི་གྲོང་ཁྱེར་ན་གྱད་རྣམས་ཉེ་བར་གནས་པ་ཤིང་སཱ་ལའི་ཚལ་ན་བཞུགས་སོ། །ཞེས་ཀུན་དགའ་བོ་རྣམ་གྲངས་དེ་དག་གིས་གང་དང་གང་དུ་དེ་བཞིན་གཤེགས་པས་ཆོས་བཤད་པ་དང་། འཁོར་གང་དང་གང་དང་། དུས་
ཚིགས་གང་དང་གང་དུ་དང་། དོན་གང་ལ་བརྟེན་པ་དང་། གང་ཟག་གང་ལས་བརྩམས་པ་དང་། ཡེ་ཤེས་གང་དང་གང་བསྟན་པའི་ཕྱིར་རྣམ་གྲངས་གང་དང་གང་གིས་གསུངས་པ་དང་། དོན་དང་ཚིག་དང་ཡི་གེ་གང་དང་གང་དག་གིས་རྣམ་གྲངས་གང་དང་གང་གསུངས་པ་དེ་ལ་ཁྱོད་ཀྱིས་གླེང་གཞི་
དང་བཅས་པ་དང་། རྒྱུ་དང་བཅས་པ་དང་། རྐྱེན་དང་བཅས་པ་དང་། དོན་བཟང་པོ་དང་། ཚིག་འབྲུ་བཟང་པོར་རྒྱས་པར་སྟོན་ཅིག །མདོ་སྡེའི་མཇུག་ཏུ་ཡང་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཐམས་ཅད་དང་ལྡན་པའི་འཁོར་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་
པར་བསྟོད་དོ་ཞེས་བྲིས་ཤིག །ཀུན་དགའ་བོ་ཆོས་ཀྱི་ཚུལ་འདི་དེ་ལྟར་ཡང་དག་པར་བསྡུ་བར་བྱའོ། །དེ་ལྟར་རྣམ་པར་དབྱེ་བར་བྱའོ། །དེ་ལྟར་རབ་ཏུ་བསྟན་པར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། འདི་སྐད་བདག་གིས་ཐོས་
པ་དུས་གཅིག་ན། བཅོམ་ལྡན་འདས་ཞེས་བྱ་བའི་ཚིག་དེ་སྐད་ཅེས་གསུངས་མ་ཐག་ཏུ། དེ་ནས་དེའི་ཚེ་འཇིགས་ཤིང་སྤུ་ཟིང་ཞེས་བྱེད་པ་དང་བཅས་པའི་ས་གཡོས་པ་ཆེན་པོ་འཇིག་རྟེན་དུ་བྱུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་དེའི་ཚེ་རྣམ་པ་དྲུག་ཏུ་
གཡོ། རབ་ཏུ་གཡོ། ཀུན་ཏུ་རབ་ཏུ་གཡོ། ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག །འགུལ་རབ་ཏུ་འགུལ། ཀུན་ཏུ་རབ་ཏུ་འགུལ། འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར། འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ།
ཤར་ཕྱོགས་དམའ་ན་ནུབ་ཕྱོགས་མཐོ། ནུབ་ཕྱོགས་དམའ་ན་ཤར་ཕྱོགས་མཐོ། ལྷོ་ཕྱོགས་དམའ་ན་བྱང་ཕྱོགས་མཐོ། བྱང་ཕྱོགས་དམའ་ན་ལྷོ་ཕྱོགས་མཐོ། མཐའ་དམའ་ན་དབུས་མཐོ། དབུས་དམའ་ན་མཐའ་མཐོ་བར་གྱུར་ཏོ། །དེའི་ཚེ་ལྷ་དང་། ཀླུ་དང་།

གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་དང་མི་དང་། མི་མ་ཡིན་པ་དཔག་ཏུ་མེད་པ་དག་རབ་ཏུ་ངུ་སྟེ་མཆི་མ་བྱུང་ཞིང་ཚིག་འདི་སྐད་དུ། བཅོམ་ལྡན་འདས་ཡོངས་སུ་མྱ་ངན་
ལས་འདའ་བ་ཧ་ཅང་མྱུར་ཆེས་སོ། །བདེ་བར་གཤེགས་པ་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མི་སྣང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མ་མཆིས་ཤིང་ལོང་བར་འགྱུར་བ་ཧ་ཅང་མྱུར་ཆེས་སོ་ཞེས་ཟེར་རོ། །ཚེ་དང་ལྡན་པ་ཀུན་དགའ་བོ་
ཡང་རབ་ཏུ་ངུ་ཞིང་མཆི་མ་བྱུང་ནས། བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །བདེ་བར་གཤེགས་པ་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མི་སྣང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མ་མཆིས་ཤིང་ལོང་བར་འགྱུར་
བ་ཧ་ཅང་མྱུར་ཆེས་སོ། །འཇིག་རྟེན་ཡོངས་སུ་འདྲེན་པ་མ་མཆིས་པར་འགྱུར་བ་ཧ་ཅང་མྱུར་ཆེས་སོ་ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཐོང་མྱ་ངན་མ་བྱེད། སྨྲེ་སྔགས་མ་འདོན། ཀུན་དགའ་བོ་གང་སྐྱེས་ཤིང་བྱུང་བ། བྱས་པ།
འདུས་བྱས་པ། བསམས་པ། རྟེན་ཅིང་འབྲེལ་བར་འབྱུང་བ། རབ་ཏུ་འཇིག་པའི་ཆོས་ཅན་དེ་དག་རབ་ཏུ་མི་འཇིག་པར་ག་ལ་འགྱུར་ཏེ། དེ་ནི་གནས་མེད་དོ། །ཀུན་དགའ་བོ་ཁྱོད་ཀྱིས་ང་ལ་ཡུན་རིང་དུ་བྱམས་པའི་ལུས་ཀྱི་ལས་དང་། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཕན་པ་དང་།
བདེ་བ་དང་། གཉིས་སུ་མེད་པ་དང་། ཁོ་ན་མེད་པ་དང་། ཚད་མེད་པ་དང་། གནོད་པ་མེད་པས་བསྙེན་བཀུར་བྱས་སོ། །ཀུན་དགའ་བོ་ཁྱོད་མཐུ་ཆེ་བ་དང་། གཟི་ཆེ་བ་དང་། རྒྱ་ཆེ་བ་དང་། བདུད་རྩི་ལྟ་བུ་དང་། བདུད་རྩིའི་ཀླས་པ་དང་། བདུད་རྩིའི་མཐས་གཏུགས་པར་འགྱུར་རོ། །ཀུན་དགའ་བོ་དེ་བས་ན་
ཚངས་པ་མཚུངས་པར་སྤྱོད་པ་རྣམས་ལ་བྱམས་པའི་ལུས་དང་ངག་དང་ཡིད་ཀྱི་ལས་ཀྱིས་གནས་པར་བྱའོ་ཞེས་ཀུན་དགའ་བོ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ལས་གཞན་པའི་ཚངས་པར་སྤྱོད་པ་རྣམས་ལ་ཡང་ཁྱོད་ཀྱིས་དེ་ལྟར་བསྙེན་བཀུར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་ང་ཡོངས་སུ་མྱ་

ངན་ལས་འདས་ནས་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་ཟད་པའི་དུས། འཇིག་པའི་དུས། དགེ་སློང་ཚུལ་ཁྲིམས་དང་ལྡན་པ་ཡོངས་སུ་ཟད་ཅིང་ཡོངས་སུ་ཉམས་པར་འགྱུར་བའི་དུས། ཚུལ་ཁྲིམས་དང་མི་ལྡན་པའི་ཕྱོགས་མངོན་པར་འཕེལ་བའི་དུས། དམ་པའི་ཆོས་ཡོངས་སུ་ཉམས་པར་
འགྱུར་བའི་དུས། ཆོས་མ་ཡིན་པའི་ཕྱོགས་ཤས་ཆེ་བར་འགྱུར་བའི་དུས། དམ་པའི་ཆོས་སྤོང་བའི་དུས། རྒྱལ་པོ་འཁྲུག་པའི་དུས། སེམས་ཅན་རྣམ་པར་འཇིག་པའི་དུས། ཆོས་དང་འབྲལ་བའི་དུས། དགེ་སློང་དང་འབྲལ་བའི་དུས། འཁྲུགས་པའི་དུས་དེ་ལྟ་བུར་གྱུར་པ་དེ་ན། ཀུན་དགའ་བོ་དགེ་
སློང་ཕལ་ཆེར་ལུས་མ་བསྒོམས་པ་དང་། སེམས་དང་ཚུལ་ཁྲིམས་མ་བསྒོམས་པ་དང་། ཤེས་རབ་མ་བསྒོམས་པར་འགྱུར་ཏེ། དེ་ལུས་མ་བསྒོམས་པ་ནས་ཤེས་རབ་མ་བསྒོམས་པའི་བར་དུ་གྱུར་པས་གནས་དྲུག་ལ་ཆགས་པར་འགྱུར་ཏེ། དྲུག་གང་ཞེ་ན། འདི་ལྟ་སྟེ། ལྷུང་བཟེད་ལ་ཆགས་པ་དང་།
ཆོས་གོས་ལ་ཆགས་པ་དང་། བསོད་སྙོམས་ལ་ཆགས་པ་དང་། མལ་སྟན་ལ་ཆགས་པ་དང་། ན་བའི་གསོས་སྨན་དང་། ཡོ་བྱད་ལ་ཆགས་པ་དང་། སྣོད་བཟང་པོ་ལ་ཆགས་པར་འགྱུར་རོ། །དེ་དག་ལྷུང་བཟེད་ཀྱི་ཕྱིར་འཐབ་མོར་གྱུར། ཤགས་སུ་གྱུར་ནས་གཅིག་ལ་གཅིག་ཁའི་མཚོན་མདུང་ཐུང་གིས་
རྩོད་ཅིང་འགྱེད་པར་འགྱུར། གཅིག་ལ་གཅིག་མི་སྙན་པ་སྒྲོགས་པར་འགྱུར། གཅིག་ལ་གཅིག་ཞེ་སྡང་བར་འགྱུར་རོ། །དེ་བཞིན་དུ་ཆོས་གོས་དང་། བསོད་སྙོམས་དང་། ན་བའི་གསོས་སྨན་དང་། ཡོ་བྱད་ཀྱི་ཕྱིར་གཅིག་ལ་གཅིག་ཞེ་སྡང་བའི་བར་དུ་འགྱུར་རོ། །གཅིག་ལ་གཅིག་ཀུན་ནས་མནར་
སེམས་དང་ལྡན་པ་དང་། ཐ་བའི་སེམས་དང་ལྡན་པ་དང་། མ་དད་པའི་སེམས་དང་ལྡན་པ་དང་། ཞེ་འགྲས་པ་དང་། རྣམ་པར་ཀུན་ནས་མནར་སེམས་དང་། མ་དད་པའི་སེམས་དང་ལྡན་པར་འགྱུར་རོ། །ཀུན་དགའ་བོ་དེ་ལྟ་བས་ན་སྣང་བའམ། དབེན་པའམ། ཕྲ་བའམ། རགས་པའམ། བསམ་པའམ། སྦྱོར་
བ་ན་ཡང་རུང་། ཚངས་པ་མཚུངས་པར་སྤྱོད་པ་རྣམས་ལ་བྱམས་པའི་ལུས་ཀྱི་ལས་ཀྱིས་གནས་པར་བྱའོ། །བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཀྱིས་ཚངས་པ་མཚུངས་པར་སྤྱོད་པ་རྣམས་ལ་གནས་པར་བྱའོ་ཞེས་ཀུན་དགའ་བོ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན།

ཀུན་དགའ་བོ་འདི་ལྟར་འཁྲུག་པ་ཆེན་པོའི་དུས་དེ་ལྟ་བུར་གྱུར་ཅིང་། ཚེ་སྙིགས་མ་དང་། ལྟ་བ་སྙིགས་མ་དང་། ཉོན་མོངས་པ་སྙིགས་མ་དང་། དུས་སྙིགས་མ་དང་། སེམས་ཅན་སྙིགས་མ་དང་། ཞིང་སྙིགས་མར་གྱུར་པ་དེའི་ཚེ་ཁྱིམ་པ་རྣམས་ཀྱང་སྡུག་བསྔལ་བར་གྱུར་ཏེ་སྡུག་བསྔལ་དུ་ཉེ་བར་ལྟུང་། སྡུག་བསྔལ་
གྱིས་གཙེས། མུ་གེས་གཙེས། ནད་ཀྱིས་གཙེས། འཆི་བས་གཙེས། ཆོམ་རྐུན་གྱིས་གཙེས། ཆར་མི་འབབ་པ་དང་ཧ་ཅང་ཆར་ཆེས་པས་གཙེས། དུས་དང་བྱེ་བས་གཙེས་ཤིང་འཚེ་བ་རྣམ་པ་སྣ་ཚོགས་དེ་དག་དང་གཞན་དག་གིས་ཀྱང་གཙེས་པར་འགྱུར་ཏེ། ཀུན་དགའ་བོ་བྲམ་ཟེ་དང་ཁྱིམ་བདག་དེ་དག་དེ་ལྟར་
སྡུག་བསྔལ་བར་གྱུར་ཅིང་སྡུག་བསྔལ་དང་ལྡན་པས་དད་པར་འགྱུར་རོ། །མངོན་པར་དད་ཅིང་རྣམ་པར་མི་རྟོག་པ་མེད་པས་སངས་རྒྱས་ལ་ཤེས་ནས་དད། ཆོས་དང་དགེ་འདུན་ལ་ཤེས་ནས་དད་པར་འགྱུར་རོ། །དེ་དག་སངས་རྒྱས་ལ་དམིགས་པའི་སེམས་དང་། ཆོས་ལ་དམིགས་པའི་སེམས་དང་། དགེ་འདུན་ལ་
དམིགས་པའི་སེམས་ཀྱིས་ཁ་ཅིག་ནི་གང་ཟག་ལ་དགའ་བས་སྦྱིན་པ་དག་སྦྱིན་པར་འགྱུར་རོ། །བསོད་ནམས་དག་བྱེད་པར་འགྱུར་རོ། །གསོ་སྦྱོང་འཛིན་པར་འགྱུར་རོ། །ཁ་ཅིག་ནི་བསླབ་པའི་གཞི་རྣམས་འཛིན་པར་འགྱུར། ལུང་ནོད་པར་འགྱུར། ཁ་ཏོན་བྱེད་པར་འགྱུར། ཆོས་ཀྱང་ཉན་པར་འགྱུར་རོ། །མཉན་
ནས་ཀྱང་སྒྲུབ་པར་བྱེད་ཅིང་དགའ་བ་དང་དད་པ་དང་མཆོག་ཏུ་དགའ་བ་ཐོབ་པར་འགྱུར་ཏེ། དེ་དགེ་བའི་རྩ་བ་རྣམས་ཀྱང་སྐྱེད་པར་འགྱུར་རོ། །དེ་དག་དགེ་བའི་རྩ་བ་དང་ལྡན་པར་གྱུར་པས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར་རོ། །ཀུན་དགའ་བོ་འདི་ལྟར་དད་པས་ཁྱིམ་
ནས་ཁྱིམ་མེད་པར་རབ་ཏུ་བྱུང་ཡང་ངན་སོང་དུ་འགྲོ་བར་འགྱུར་བ་དང་། ཁྱིམ་པ་ཁྱིམ་ན་གནས་པ་སྡུག་བསྔལ་བར་གྱུར་ཅིང་སྡུག་བསྔལ་གྱིས་ཉམ་ཐག་པ་རྣམས་སེམས་དད་པའི་དགེ་བའི་རྩ་བས་བདེ་འགྲོར་འགྲོ་བར་འགྱུར་བ་དུས་དེ་ཇི་ཙམ་དུ་ལོག་པར་གྱུར་པ་ལ་ལྟོས། ཀུན་དགའ་བོ་དེ་བས་ན་ལུས་དང་ངག་དང་ཡིད་
སྡོམ་པས་བསྡམ་པར་བྱ་ཞིང་སེམས་དད་པ་དང་། དགའ་བའི་སྟོབས་སུ་འགྱུར་བ་དང་། དད་པ་དང་། དྲང་བ་དང་། ལྷག་པའི་བསམ་པ་ཕུན་སུམ་ཚོགས་པ་དང་། ལུས་ཀྱི་ལས་ལེགས་པར་བརྟགས་པ་དང་། ངག་གི་ལས་ལེགས་པར་བརྟགས་པ་དང་། ཡིད་ཀྱི་ལས་ལེགས་པར་བརྟགས་པར་གྱིས་ཤིག །དེ་ཅིའི་ཕྱིར་ཞེ་ན། ཀུན་དགའ་

བོ་རན་པར་མི་སྨྲ་བའི་གང་ཟག་གི་ཉེས་དམིགས་ལྔ་སྟེ། ལྔ་གང་ཞེ་ན། བརྫུན་གྱི་ཚིག་སྨྲ་བ་དང་། ངག་རྩུབ་པོ་དང་། ཕྲ་མའི་ཚིག་སྨྲ་བ་དང་། ཚིག་ཀྱལ་པ་དང་། བརྣབ་སེམས་ཅན་དུ་འགྱུར་ཞིང་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེ་བར་འགྱུར་བའོ། །ཀུན་
དགའ་བོ་རན་པར་སྨྲ་བའི་གང་ཟག་གི་ཕན་ཡོན་ལྔ་སྟེ། ལྔ་གང་ཞེ་ན། བརྫུན་གྱི་ཚིག་མི་སྨྲ་བ་དང་། ངག་རྩུབ་པོ་མེད་པ་དང་། ཕྲ་མ་མེད་པ་དང་། ཚིག་ཀྱལ་པ་མེད་པ་དང་། བརྣབ་སེམས་མེད་པར་འགྱུར་ཞིང་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར་བ་སྟེ་ལྔ་པོ་འདི་དག་གོ །
ཀུན་དགའ་བོ་གང་ཟག་འཐབ་མོ་བྱེད་པ་དང་། མཚང་འདྲུ་བ་དང་། རྩོད་པ་དང་། ཤགས་འགྱེད་པ་དང་། ཐ་བའི་སེམས་དང་། གནོད་སེམས་ཅན་དང་། སེམས་མ་དད་པ་ལ་ཉེས་དམིགས་འདི་ལྔ་འབྱུང་ངོ་། །ལྔ་གང་ཞེ་ན། འདི་ལ་གང་ཟག་འཐབ་མོ་བྱེད་པ་ནས་སེམས་མ་དད་པའི་བར་དུ་བརྫུན་གྱི་ཚིག་སྨྲ་བ་
དང་། ཕྲ་མ་བྱེད་པ་དང་། ཚུལ་ཁྲིམས་དང་ལྡན་པ་རྣམས་ལ་དང་བའི་སེམས་མི་སྐྱེད་པ་དང་། ཉིན་མཚན་དུ་སྡུག་བསྔལ་བ་དང་ཡིད་མི་བདེ་བ་མྱོང་བར་འགྱུར་ཞིང་ལུས་ཞིག་ནས་ཀྱང་སེམས་ཅན་དམྱལ་བར་སྐྱེ་བ་སྟེ་ལྔ་པོ་འདི་དག་གོ། །ཀུན་དགའ་བོ་གང་ཟག་བྱམས་པས་གནས་པ་ལ་ཕན་ཡོན་བཅུ་གཅིག་
ཡོད་དེ། བཅུ་གཅིག་གང་ཞེ་ན། ཀུན་དགའ་བོ་འདི་ལ་གང་ཟག་བྱམས་པས་གནས་པ་ནི་བདེ་བར་གཉིད་ལོག་པ་དང་། བདེ་བར་སད་པ་དང་། རྨི་ལམ་ངན་པ་མི་རྨི་བ་དང་། མི་དང་མི་མ་ཡིན་པ་རྣམས་དགའ་བར་འགྱུར་བ་དང་། ལྷ་རྣམས་བསྲུང་བར་འགྱུར་བ་དང་། དེ་ལ་དུག་གིས་མི་ཚུགས་པ་དང་། དེ་
ལ་མེས་མི་ཚུགས་པ་དང་། དེ་ལ་མཚོན་གྱིས་མི་ཚུགས་པ་དང་། ཆུས་འཆི་བའི་དུས་མི་བྱེད་པ་དང་། གོས་དང་ཟས་དང་མལ་ཆ་དང་ན་བའི་གསོས་སྨན་དང་། ཡོ་བྱད་རྣམས་རྙེད་པ་དང་། མིའི་ཆོས་བླ་མ་མ་རྟོགས་པས་ལུས་ཞིག་ནས་ཚངས་པའི་འཇིག་རྟེན་དུ་སྐྱེ་བར་འགྱུར་བ་སྟེ། ཀུན་དགའ་བོ་བྱམས་
པས་གནས་པའི་གང་ཟག་གི་ཕན་ཡོན་བཅུ་གཅིག་པོ་འདི་དག་གོ། །ཀུན་དགའ་བོ་དེ་བས་ན་ད་ལྟ་དང་ང་འདས་པའི་འོག་ཏུ་བདག་གླིང་དུ་གྱུར་པ་དང་། བདག་སྐྱབས་སུ་གྱུར་པ་དང་། ཆོས་གླིང་དུ་གྱུར་པ་དང་། ཆོས་སྐྱབས་སུ་གྱུར་པ་དང་། གཞན་གླིང་མ་ཡིན་པ་དང་། གཞན་སྐྱབས་མ་ཡིན་པར་གནས་

པར་གྱིས་ཤིག །ཀུན་དགའ་བོ་ཇི་ལྟར་ན་དགེ་སློང་བདག་གླིང་དུ་གྱུར་པ་ནས་གཞན་གླིང་མ་ཡིན་པ་དང་། གཞན་སྐྱབས་མ་ཡིན་པའི་བར་དུ་གནས་ཤེ་ན། ཀུན་དགའ་བོ་འདི་ལ་དགེ་སློང་བརྟུན་པ་ཤེས་བཞིན་ཅན་དྲན་པ་དང་ལྡན་པས་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་རྣམ་པར་བསལ་
ནས་ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །བརྟུན་པ་ཤེས་བཞིན་ཅན་དྲན་པ་དང་ལྡན་པས་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་རྣམ་པར་བསལ་ནས་ནང་གི་ཚོར་བ་རྣམས་དང་སེམས་དང་ཆོས་ཀྱི་རྗེས་སུ་ལྟ་ཞིང་གནས་སོ། །ཀུན་དགའ་བོ་དེ་ལྟར་ན་དགེ་སློང་བདག་གླིང་དང་བདག་
སྐྱབས་ཡིན་པར་གནས་ཀྱི། གཞན་གླིང་དང་གཞན་སྐྱབས་མ་ཡིན་པར་གནས་པའོ། །ཀུན་དགའ་བོ་དེ་བས་ན་སྟོན་པས་ཉན་ཐོས་རྣམས་ལ་བྱ་བ་གང་ཡིན་པ་དེ་ངས་བྱས་ཟིན་གྱིས་ད་ཁྱོད་ཀྱིས་གྱིས་ཤིག །ཀུན་དགའ་བོ་དགོན་པ་དང་། ཤིང་དྲུང་དང་། ཁང་སྟོང་དང་། བླ་གབ་མེད་པ་འདི་དག་ཏུ་བསམ་
གཏན་གྱིས་ཤིག །ཀུན་དགའ་བོ་བག་མེད་པར་མ་བྱེད་ཅིག །ཕྱིས་འགྱོད་པར་གྱུར་ཏ་རེ། འདི་ནི་ངས་རྗེས་སུ་བསྟན་པའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཀུན་ཤེས་ཟུག་རྔུ་འབྱིན་པ་ཡི། །ལམ་ནི་ང་ཡིས་ཡང་དག་བསྟན། །དེ་བཞིན་གཤེགས་རྣམས་
སྟོན་པ་སྟེ། །དེ་ནི་ཁྱེད་ཀྱིས་བརྩམ་པར་བྱ། །ལྟ་བ་རྣམ་དག་འགྱུར་བ་ཡི། །ལམ་གཞན་མེད་དེ་མཆོག་འདི་ཡིན། །བསྒྲུབས་ན་བདུད་ཀྱིས་བཅིངས་པ་དག །བཅད་ནས་རབ་ཏུ་ཐར་བར་འགྱུར། །སངས་རྒྱས་ཀྱིས་ནི་བཤད་པ་བཞིན། །གང་དག་གིས་ནི་འདི་རིག་པ། །སྟོན་པའི་བསྟན་པ་བྱེད་པ་དག །སྡུག་བསྔལ་མཐའ་མར་
འབྱིན་པར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། དགེ་སློང་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།
སྙིང་རྗེ་ཆེན་པོའི་ཆོས་ཀྱི་རྣམ་གྲངས་ལས་བསྟན་པའི་ལེའུ་སྟེ་བཅུ་གསུམ་པ་རྫོགས་སོ།། །།སྙིང་རྗེ་ཆེན་པོའི་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། ཤཱི་ལེན་དྲ་བོ་དྷི་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་ཀ་རུ་ཎཱ་པུཎྜ་རཱི་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྙིང་རྗེ་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་
གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་དྲུག་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་
ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ་བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་
ཏུ་སོན་པ་ཤ་སྟག་དང་ཐབས་ཅིག་ཏུ་བཞུགས་ཏེ་གང་ཟག་གཅིག་མ་གཏོགས་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། །བྱམས་པ་ལ་སོགས་པ་གཟུངས་དང་། བཟོད་པ་དང་། ཏིང་ངེ་འཛིན་ཐོབ་པ། སྟོང་པ་ཉིད་ལ་གནས་པ། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ས་
ཡ་ཕྲག་བརྒྱད་དང་ཡང་ཐབས་ཅིག་གོ། །མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷའི་བུ་འབུམ་ཕྲག་མང་པོ་དང་ཡང་ཐབས་ཅིག་གོ། །ལྷའི་བུ་གཞན་འཕྲུལ་དང་། གཞན་འཕྲུལ་གྱི་ལྷའི་བུ་ས་ཡ་ཕྲག་བརྒྱད་དང་ཡང་ཐབས་ཅིག་གོ། །ལྷའི་བུ་འཕྲུལ་དགའ་དང་། འཕྲུལ་
དགའི་ལྷའི་བུ་ས་ཡ་ཕྲག་བདུན་དང་ཡང་ཐབས་ཅིག་གོ། །ལྷའི་བུ་ཡོངས་སུ་དགའ་ལྡན་དང་། ཡོངས་སུ་དགའ་ལྡན་ལྷའི་བུ་ས་ཡ་ཕྲག་དྲུག་དང་ཡང་ཐབས་ཅིག་གོ། །ལྷའི་བུ་རབ་འཐབ་བྲལ་དང་། རབ་འཐབ་བྲལ་གྱི་ལྷའི་བུ་ས་ཡ་ཕྲག་བདུན་དང་། ཉི་འབུམ་དང་ཡང་ཐབས་ཅིག་གོ། །
ལྷའི་དབང་པོ་བརྒྱ་བྱིན་དང་། སུམ་ཅུ་རྩ་གསུམ་པའི་ལྷའི་བུ་ས་ཡ་ཕྲག་བརྒྱད་དང་ཡང་ཐབས་ཅིག་གོ། །རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་འབུམ་གྱིས་ཡོངས་སུ་བསྐོར་བ་དང་ཡང་ཐབས་ཅིག་གོ། །མིག་མི་བཟང་ཀླུ་འབུམ་གྱིས་ཡོངས་སུ་བསྐོར་བ་དང་ཡང་ཐབས་ཅིག་གོ། །འཕགས་སྐྱེས་

པོ་གྲུལ་བུམ་འབུམ་གྱིས་ཡོངས་སུ་བསྐོར་བ་དང་ཡང་ཐབས་ཅིག་གོ། །ཡུལ་འཁོར་སྲུང་དྲི་ཟ་འབུམ་གྱིས་ཡོངས་སུ་བསྐོར་བ་དང་ཡང་ཐབས་ཅིག་གོ། །ཀླུའི་རྒྱལ་པོ་དགའ་བོ་དང་། ཉེ་དགའ་བོ་ཀླུའི་རྒྱལ་པོ་སྟོང་གིས་ཡོངས་སུ་བསྐོར་བ་དང་། དེ་དག་ལ་སོགས་པ་ཐེག་པ་ཆེན་པོ་ལ་ཡང་
དག་པར་ཞུགས་པ། ཕ་རོལ་ཏུ་ཕྱིན་པ་དྲུག་ལ་སྤྱོད་པ། ཕྱིན་ཅི་ལོག་བཞིའི་ཆོས་སྣང་ཞིང་གསལ་བར་རྟོགས་པར་ཁོང་དུ་ཆུད་པ་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཏིང་ངེ་འཛིན་སྣ་ཚོགས་རབ་ཏུ་འཐོབ་པར་འགྱུར་བ་དང་། གང་གིས་ཉན་ཐོས་དང་། རང་སངས་
རྒྱས་ཀྱིས་ལས་ཡང་དག་པར་འདའ་བར་འགྱུར་བ་དང་། ཏིང་ངེ་འཛིན་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བའི་འཕགས་པའི་བདེན་པ་བཞི་ཡང་དག་པར་རབ་ཏུ་རྟོགས་པར་བྱ་བའི་ཕྱིར་ཆོས་སྟོན་པ་ཤ་སྟག་གིས་ཡོངས་སུ་བསྐོར་ཅིང་མདུན་གྱིས་བལྟས་ཏེ་
བཞུགས་སོ། །དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། བྱང་ཆུབ་སེམས་དཔའ་མཐོང་བ་དོན་ཡོད་དང་། བྱང་ཆུབ་སེམས་དཔའ་ཆུ་ལྷ་དང་། བྱང་ཆུབ་སེམས་དཔའ་སེང་གེའི་བློ་གྲོས་དང་། བྱང་ཆུབ་སེམས་དཔའ་རྣམ་པར་སྣང་བྱེད་བློ་གྲོས་དང་། དེ་དག་ལ་
སོགས་པ་བྱང་ཆུབ་སེམས་དཔའ་ཁྲི་ལྷན་ཅིག་ཏུ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་ནས་ཤར་ལྷོའི་ཕྱོགས་ལོགས་སུ་མངོན་པར་ཕྱོགས་ཏེ་རབ་ཏུ་དགའ་ཞིང་རབ་ཏུ་དང་བའི་ཡིད་ཀྱིས་བལྟས་ནས་ཚིག་འདི་
སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་ཆོ་འཕྲུལ་ཆེན་པོ་དག་བསྟན་ནས། སེམས་ཅན་རྣམས་ལས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དག་གི་དགེ་བའི་རྩ་བ་ཡོངས་སུ་
སྨིན་པར་མཛད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་བཀོད་པ་ནི་ངོ་མཚར་ཏེ་ཕྱག་འཚལ་ལོ་ཕྱག་འཚལ་ལོ་ཞེས་ཀྱང་སྨྲས་སོ། །དེ་ནས་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་

གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་མཐོང་བ་དོན་ཡོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་བློ་གྲོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བྱེད་བློ་གྲོས་དང་། དེ་དག་ལ་སོགས་པ་བྱང་ཆུབ་
སེམས་དཔའ་ཁྲིས་བཅོམ་ལྡན་འདས་ཀྱི་ཆོས་བསྟན་པ་བཅད་ནས་ལྷན་ཅིག་ཏུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་བ་བཏུད་ནས་ཤར་ལྷོའི་ཕྱོགས་ལོགས་སུ་མངོན་པར་ཕྱོགས་ཏེ་རབ་ཏུ་དགའ་ཞིང་རབ་ཏུ་དང་བའི་
ཡིད་ཀྱིས་བལྟས་ནས་ཚིག་འདི་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་མངོན་པར་རྫོགས་པར་སངས་རྒྱས་ནས། རིང་པོ་མ་ལོན་པར་ཆོ་འཕྲུལ་ཆེན་པོ་དག་བསྟན་ནས། སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དགེ་བའི་རྩ་བ་དག་
ལ་ཡོངས་སུ་སྨིན་པར་མཛད་པ་ནི་ངོ་མཚར་ཏེ་ཕྱག་འཚལ་ལོ་ཕྱག་འཚལ་ལོ་ཞེས་མཆི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་ཤུལ་ནི་ཇི་སྲིད་ཅིག་ན་བཞུགས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་ནས་ནི་ཡུན་ཇི་སྲིད་ཅིག་ལགས། གང་ན་དེ་བཞིན་གཤེགས་པ་པད་མ་དམ་པ་ཞེས་བགྱི་བ་བཞུགས་པའི་འཇིག་རྟེན་གྱི་ཁམས་དེའི་མིང་ཅི་ཞེས་བགྱི། འཇིག་རྟེན་གྱི་ཁམས་དེའི་བཀོད་པ་ནི་ཇི་ལྟ་བུ་ཞིག་གིས་བརྒྱན་པ་ལགས། ཅིའི་སླད་དུ་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པས་ཆོ་འཕྲུལ་ཆེན་པོ་རྣམ་པ་དེ་ལྟ་བུ་དག་བསྟན་པ་མཛད། རྐྱེན་གང་གིས་ན་བྱང་ཆུབ་སེམས་དཔའ་ཁ་ཅིག་གིས་ནི་ཕྱོགས་བཅུའི་འཇིག་རྟེན་གྱི་ཁམས་བགྲང་བ་ལས་ཡང་དག་པར་འདས་པ་གཞན་དག་ན་བཞུགས་པའི་

སངས་རྒྱས་བཅོམ་ལྡན་འདས་རྣམས་མཐོང་ཞིང་། སངས་རྒྱས་བཅོམ་ལྡན་འདས་དེ་དག་གིས་ཆོ་འཕྲུལ་གང་དག་རྣམ་པར་བསྟན་པ་དེ་དག་ཀྱང་མཐོང་ལ་བདག་ཅག་གིས་མི་མཐོང་བར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རིན་
པོ་ཆེ་རྣམ་པར་སྣང་བྱེད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་པོ་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་དོན་དུ་དེ་བཞིན་གཤེགས་པ་པད་མ་དམ་པས་བྱང་ཆུབ་ཐོབ་པའི་ཆོ་འཕྲུལ་
རྣམ་པར་བསྟན་པར་བྱ་བ་དང་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་དྲི་བའི་ཕྱིར་དེ་བཞིན་གཤེགས་པ་ལ་དོན་དེ་ལྟ་བུ་ཡོངས་སུ་ཞུ་བར་སེམས་པ་ནི་ཁྱོད་ཀྱི་སྤོབས་པ་དགེ་བ་ཡིན་ཏེ་ཁྱོད་ཀྱིས་ཡོངས་སུ་ཞུས་པ་ལེགས་