Kinh tạng Tây Tạng (Kangyur Đại Học) — 050_མདོ་སྡེ།_ཆ

ས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་རྣམ་པར་དག་པའི་སེམས་ཅན་དེ་དག་ཐམས་ཅད་ནི་ཀུན་དགའ་བོ་ང་སྔོན་བྱང་ཆུབ་སེམས་དཔར་གྱུར་པ་ན་བྱང་ཆུབ་སེམས་

དཔའི་སྤྱད་པ་སྤྱོད་པའི་ཚེ་ཡོངས་སུ་སྨིན་པར་བྱས་པ་དག་གོ། །ཀུན་དགའ་བོ་དགེ་འདུན་ལ་ཕུལ་བའི་ཡོན་ནི་བར་དུ་ཡོངས་སུ་ཟད་པ་དང་མཐར་འགྱུར་བ་ཡོད། ཡོན་གང་དག་ཕྱོགས་བཞིའི་དགེ་འདུན་ལ་ཕུལ་བའི་ཡོན་དེ་དག་ཀྱང་བར་དུ་ཡོངས་སུ་ཟད་པ་དང་མཐར་འགྱུར་
བ་ཡོད། ཀུན་དགའ་བོ་ཡོན་གང་དག་རང་སངས་རྒྱས་ལ་ཕུལ་བའི་ཡོན་དེ་དག་ཀྱང་བར་དུ་ཡོངས་སུ་ཟད་པ་དང་མཐར་འགྱུར་བ་ཡོད་ཀྱི། ཀུན་དགའ་བོ་དེ་བཞིན་གཤེགས་པ་ལ་ཡོན་གང་དག་ཕུལ་བ་དེ་དག་ནི་བར་དུ་ཡོངས་སུ་ཟད་པ་དང་མཐར་འགྱུར་བ་མེད་དོ། །ཀུན་དགའ་བོ་ཡོན་དེ་དག་
ཐམས་ཅད་ཀྱི་འབྲས་བུ་ནི་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ་དེ་བཞིན་གཤེགས་པ་བཞུགས་པ་དེ་ལ་མངོན་སུམ་དུ་བསྟི་སྟང་བྱེད་པ་ལྟ་ཡང་ཞོག །ཡོངས་སུ་མྱ་ངན་ལས་འདས་པའི་སྐུ་གདུང་ལ་སྐུ་གདུང་གི་མཆོད་པ་བྱེད་པ་ལྟ་ཡང་ཞོག་སྟེ། ཀུན་
དགའ་བོ་སངས་རྒྱས་ལ་དམིགས་པའི་སེམས་ཀྱིས་མེ་ཏོག་གཅིག་ནམ་མཁའ་ལ་འདོར་ན་དེའི་དགེ་བའི་རྩ་བ་ནི་ངས་དེ་བཞིན་གཤེགས་པའི་སངས་རྒྱས་ཀྱི་ཡེ་ཤེས་ཀྱིས་ཀྱང་ཚད་གཟུང་བའམ་བསྟན་པར་སླ་བ་མ་ཡིན་ནོ། །ཀུན་དགའ་བོ་གལ་ཏེ་དེས་སངས་རྒྱས་ལ་དམིགས་པའི་སེམས་ཀྱིས་
ནམ་མཁའ་ལ་མེ་ཏོག་གཅིག་བོར་བའི་དགེ་བའི་རྩ་བ་བྱས་པ་དེ་ཡོངས་སུ་བརྟག་པ་བཟུང་སྟེ། གལ་ཏེ་འཁོར་བ་ན་ཇི་སྲིད་དུ་སྔོན་གྱི་མཐའ་མི་མངོན་པའི་བསྐལ་པ་དེ་སྲིད་དུ་ཀུན་ཏུ་རྒྱུག་ཅིང་འཁོར་ཡང་དེ་བཞིན་གཤེགས་པ་ལ་མེ་ཏོག་གཅིག་ཕུལ་བ་དེའི་རྣམ་པར་སྨིན་པ་ནི་ཚངས་པ་ཉིད་དམ་བརྒྱ་བྱིན་
ཉིད་དམ་འཁོར་ལོས་སྒྱུར་བའི་རྒྱལ་སྲིད་ཀྱིས་མཐར་ཕྱིན་པར་སླ་བ་མ་ཡིན་གྱི། ཀུན་དགའ་བོ་གཞན་དུ་ན་དགེ་བའི་རྩ་བ་དེའི་འབྲས་བུ་ནི་མྱ་ངན་ལས་འདས་པ་ཡིན་ཏེ། མྱ་ངན་ལས་འདའ་བ་ལ་གཞོལ་ཞིང་ཐ་མ་མྱ་ངན་ལས་འདའ་བར་ང་སྨྲའོ། །དེ་ཅིའི་ཕྱིར་ཞེ་ན། ཀུན་དགའ་བོ་སངས་རྒྱས་
བཅོམ་ལྡན་འདས་ལ་མེ་ཏོག་གཅིག་ཕུལ་བའི་རྣམ་པར་སྨིན་པ་གང་མྱ་ངན་ལས་འདའ་བའི་མཐར་ཐུག་པར་འགྱུར་བ་མ་གཏོགས་པར་མཐའ་རྟོགས་པར་སླ་བ་མ་ཡིན་ཏེ། དེ་ལྟར་རྫུ་འཕྲུལ་ཆེ། དེ་ལྟར་ཕན་ཡོན་ཆེ། དེ་ལྟར་གཟི་བརྗིད་ཆེ། དེ་ལྟར་རྒྱ་ཆེའོ། །ཀུན་དགའ་བོ་གང་དེ་ལྟ་བུའི་རྣམ་པར་སྨིན་

པར་འགྱུར་བ་དེ་བཞིན་གཤེགས་པ་ལ་ཡོན་ཕུལ་བ་དེ་ལྟར་དཔག་ཏུ་མེད་དོ། །དེ་བཞིན་གཤེགས་པ་ལ་ཐ་ན་སེམས་དང་བ་གཅིག་བསྐྱེད་པ་ཡང་ཤིན་ཏུ་མཐར་ཐུག་པ་དང་། ཤིན་ཏུ་གྲུབ་པ་དང་། བདེ་བ་དང་། ཤིན་ཏུ་མུར་ཐུག་པ་དང་། ཤིན་ཏུ་ཚངས་པར་སྤྱོད་པར་ང་སྨྲའོ། །ཀུན་
དགའ་བོ་དེ་བས་ན་རིགས་ཀྱི་བུའམ་རིགས་ཀྱི་བུ་མོ་འཁོར་ལོས་སྒྱུར་བའི་རྒྱལ་སྲིད་འདོད་པས་དེ་ལྟར་སངས་རྒྱས་བཅོམ་ལྡན་འདས་ལ་བསྟི་སྟང་བྱ། བླ་མར་བྱ། རིམ་གྲོར་བྱ། མཆོད་པར་བྱའོ། །རིགས་ཀྱི་བུའམ་རིགས་ཀྱི་བུ་མོ་བརྒྱ་བྱིན་ཐོབ་པར་འདོད་པ་དང་། ཚངས་པ་དང་། རྒྱལ་ཆེན་
བཞིའི་རིས་ཀྱི་ལྷ་རྣམས་ཀྱི་བདག་པོ་བྱེད་པར་འདོད་པ་དང་། སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་
དང་། ལྟོ་འཕྱེ་ཆེན་པོ་དང་། མིའམ་མི་མ་ཡིན་པའམ། འཇིག་རྟེན་ཐམས་ཅད་ཀྱི་འཇིག་རྟེན་གྱི་བདག་པོ་ཐོབ་པར་འདོད་པས་སངས་རྒྱས་བཅོམ་ལྡན་འདས་ལ་བསྟི་སྟང་བྱ། བླ་མར་བྱ། རིམ་གྲོར་བྱ། མཆོད་པར་བྱའོ། །རིགས་ཀྱི་བུའམ་རིགས་ཀྱི་བུ་མོ་ཉན་ཐོས་ཀྱི་ས་ཐོབ་པར་འདོད་
པའམ། རང་སངས་རྒྱས་ཀྱི་ས་ཐོབ་པར་འདོད་པའམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་པས་སངས་རྒྱས་བཅོམ་ལྡན་འདས་ལ་བསྟི་སྟང་བྱ། བླ་མར་བྱ། རིམ་གྲོར་བྱ། མཆོད་པར་བྱའོ། །ཀུན་དགའ་བོ་ངས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་གཉེར་བ་ན། སངས་རྒྱས་མང་པོ། སངས་རྒྱས་བརྒྱ་ཕྲག་མང་པོ། སངས་རྒྱས་སྟོང་ཕྲག་མང་པོ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་རྣམས་ལ་འདི་ལྟ་སྟེ། ན་བཟའ་དང་། བཤོས་དང་། གཟིམས་ཆ་དང་། སྙུན་གསོས་ཀྱི་སྨན་དང་། ཡོ་བྱད་རྣམས་དང་། གདན་དང་།
འཆག་ས་དང་། གཙུག་ལག་ཁང་དང་། མེ་ཏོག་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་རྣམས་ཀྱིས་བསྟི་སྟང་བྱས། བླ་མར་བྱས། རིམ་གྲོར་བྱས། མཆོད་པར་བྱས་སོ། །སངས་རྒྱས་བཅོམ་ལྡན་

འདས་དེ་དག་ཡོངས་སུ་མྱ་ངན་ལས་འདས་ནས་ཀྱང་མཆོད་རྟེན་བྱས་ནས་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་བརྒྱ་སྟོང་དང་། གླུ་དང་། གར་དང་། སིལ་སྙན་དང་། ཕེག་རྡོབ་པ་བརྒྱ་སྟོང་རྣམས་ཀྱིས་བསྟི་སྟང་བྱས། བླ་མར་བྱས། རིམ་
གྲོར་བྱས་ཏེ་མཆོད་ཅིང་རྗེད་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་ལ་བརྟེན་ནས་སེམས་ཅན་ཐམས་ཅད་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་དང་ཕན་པ་དང་བདེ་བ་དང་། མ་རྒལ་བ་རྣམས་བསྒྲལ་བ་དང་། མ་གྲོལ་བ་རྣམས་དགྲོལ་བ་དང་།
དབུགས་མ་ཕྱིན་པ་རྣམས་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བའི་ཕྱིར་བྱས་སོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལ་ངས་མེ་ཏོག་ཨུད་པ་ལ་ལྔ་གཏོར་
ཏེ། དེ་ན་ངས་མི་སྐྱེ་བའི་ཆོས་ལ་བཟོད་པ་ཐོབ་བོ། །ཀུན་དགའ་བོ་ངས་དགེ་བའི་རྩ་བ་ཐོབ་པ་དེ་ལས་དགེ་བའི་རྣམ་པར་སྨིན་པའི་ཕྱོགས་ཙམ་ཞིག་མྱོང་ངོ་། །གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལ་མེ་ཏོག་ཨུད་པ་ལ་དེ་ལྔ་གཏོར་བའི་
དགེ་བའི་རྩ་བའི་རྣམ་པར་སྨིན་པ་དེ་ལས་ཕྱོགས་ཙམ་ཞིག་ཉན་པར་འདོད་དམ། གསོལ་པ། བཅོམ་ལྡན་འདས་འཚལ་ལོ། །བདེ་བར་གཤེགས་པ་འཚལ་ལོ། །བཅོམ་ལྡན་འདས་ཀྱིས་གང་མར་མེ་མཛད་ལ་དགེ་བའི་རྩ་བ་བསྐྲུན་པའི་ཕྱོགས་ཙམ་ཞིག་བཤད་ཅིང་བསྟན་པའི་དུས་
ལགས་ཏེ། བཅོམ་ལྡན་འདས་དུས་ལ་བབ་བོ། །བདེ་བར་གཤེགས་པ་དུས་ལ་བབ་བོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཕྱག་གཡས་པ་གསེར་གྱི་ཁ་དོག་ཅན་བརྐྱང་བ་དང་ཕྱག་གི་མཐེའུ་ཆུང་ལས་ལྷའི་མེ་ཏོག་ཨུད་པ་ལའི་བསུང་བྱུང་བར་གྱུར་ཏོ། །དེ་ནས་སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་གང་ན་ཟླ་བ་དང་ཉི་མ་བྱེ་བ་ཕྲག་བརྒྱ་རྒྱུ་བའི་སངས་རྒྱས་ཀྱི་ཞིང་དེ་དག་ཐམས་ཅད་ལྷའི་མེ་ཏོག་ཨུད་པ་ལའི་བསུང་གིས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་འདི་ལྟ་བུ་ངོ་མཚར་རྨད་དུ་བྱུང་བའི་ཆོས་ལྷ་དང་མི་དང་ལྷ་མ་ཡིན་དུ་བཅས་པའི་

འཇིག་རྟེན་ལ་བསྟན་ཅིང་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོའི་རྣམ་པར་སྨིན་པ་ཕྱོགས་ཙམ་ཞིག་བསྟན་ཏེ། སངས་རྒྱས་ལ་དགེ་བའི་རྩ་བ་བསྐྱེད་པ་ཆུད་མི་ཟ་བ་ཡང་བསྟན་ནས། དེའི་ཚེ་ཚིགས་སུ་བཅད་པ་འདི་དག་གསུངས་སོ། །དེ་ལྟར་སངས་རྒྱས་བསམ་མི་ཁྱབ། །
སངས་རྒྱས་ཆོས་ཀྱང་བསམ་མི་ཁྱབ། །བསམ་མི་ཁྱབ་ལ་དད་བྱས་ན། །དེ་ཡི་རྣམ་སྨིན་བསམ་མི་ཁྱབ། །འདུ་ཤེས་ཡོད་དང་མེད་པ་ཡི། །སེམས་ཅན་ཐམས་ཅད་ཇི་སྙེད་པ། །བསྐལ་པ་བྱེ་བ་བརྒྱ་མང་དུ། །ཀུན་གྱིས་མཆོད་པ་བྱས་པ་དང་། །རང་སངས་རྒྱས་པ་གང་དག་དང་། །
ཟག་པ་མེད་པའི་དགྲ་བཅོམ་པ། །བསྐལ་པ་བྱེ་བ་བསམ་ཡས་པར། །དེ་དག་ཐམས་ཅད་མཆོད་པ་བས། །རྫོགས་པའི་སངས་རྒྱས་བཞུགས་པའམ། །ཡོངས་སུ་མྱ་ངན་འདས་པ་ལ། །གང་གིས་ཐལ་སྦྱར་གཅིག་བྱས་པ། །བསོད་ནམས་འདི་ནི་ཁྱད་པར་འཕགས། །སངས་རྒྱས་ཚུལ་
ཁྲིམས་མ་ཞིག་ཅིང་། །ཏིང་ངེ་འཛིན་ལ་དབང་དུ་གྱུར། །ཆོས་རྣམས་ཀུན་ལ་ཐེ་ཚོམ་མེད། །སངས་རྒྱས་སྤྱན་གྱིས་མཁྱེན་པ་ཡིན། །གང་ཞིག་བདེ་གཤེགས་དེ་ལ་ཡུད་ཙམ་མམ། །ཉིན་དང་མཚན་མོ་བྱམས་པ་སྒོམ་བྱེད་ན། །གང་ཞིག་བསོད་ནམས་དེ་དང་མཉམ་འགྱུར་བ། །
ཁམས་གསུམ་དག་ན་དེ་འདྲའི་མཆོད་པ་མེད། །བསྐལ་པ་གྲངས་མེད་འདས་པའི་དུས་དག་ན། །ལྷ་བས་ལྷག་པའི་ལྷར་གྱུར་འོད་མཛད་པ། །འཇིག་རྟེན་སློབ་དཔོན་གྱུར་པའི་སངས་རྒྱས་ལ། །ལས་དགེ་མི་ཉུང་བ་དག་ངས་བྱས་པ། །བསྐལ་པ་གྲངས་མེད་ཀུན་ཏུ་རྒྱུག་པ་ན། །བསོད་ནམས་
དེ་ནི་ཟད་པར་མ་གྱུར་གྱི། །དེ་ཉིད་ང་ཡི་རྒྱུར་ནི་གྱུར་པ་སྟེ། །དེ་ཡིས་བྱང་ཆུབ་དམ་པ་ངས་ཐོབ་བོ། །འཇིག་རྟེན་ཀུན་ལ་སྙིང་ནི་བརྩེ་བའི་ཕྱིར། །སངས་རྒྱས་བརྒྱ་དང་སངས་རྒྱས་བྱེ་བ་སྟོང་། །གང་ལ་ཚེ་རབས་སྔ་མར་མཆོད་བྱས་པ། །མི་མཆོག་དེ་དག་ང་ནི་མཁྱེན་གྱུར་པས། །སངས་རྒྱས་
དེ་དག་སྨོད་པར་ཡོང་མི་མཛད། །འདི་ལྟར་ང་ཡིས་བཟོད་པ་མ་ཐོབ་པས། །དགེ་བ་སྤྱོད་ཀྱང་མ་འོངས་དུས་དག་ན། །འདི་ལྟར་འགྱུར་ཞེས་ལུང་བསྟན་མ་མཛད་དོ། །གང་ཚེ་མར་མེ་མཛད་འདྲེན་ངས་མཐོང་བ། །དེ་ན་ང་ཡིས་ཨུད་པལ་ལྔ་གཏོར་ཅིང་། །རྣམ་པར་འདྲེན་ལ་རལ་པ་བཏིང་བ་དང་། །

མི་སྐྱེའི་བཟོད་པ་ཐོབ་པར་གྱུར་པ་ན། །མར་མེ་མཛད་པ་བར་སྣང་གནས་པ་ཡིས། །བསྐལ་པ་གྲངས་མེད་འདས་ན་ཤཱཀྱའི་རྗེ། །ཤཱཀ་རིགས་རང་བྱུང་རྒྱལ་བར་འགྱུར་རོ་ཞེས། །དེ་ནས་འདྲེན་པས་ང་ནི་ལུང་བསྟན་ཏོ། །ང་ནི་བྱང་ཆུབ་དམ་པ་འདོད་པ་ན། །དེ་ནས་
དུས་རིང་ཀུན་དུ་རྒྱུག་པའི་ཚེ། །ངས་ནི་དགེ་བ་དུ་མ་བྱས་པ་དང་། །སེམས་ཅན་དོན་ཕྱིར་སྡུག་བསྔལ་མྱོང་གྱུར་པ། །བསོད་ནམས་དེ་ཡི་ཚད་ནི་ཆུང་ཟད་ཀྱང་། །འཇིག་རྟེན་རྣམ་འདྲེན་རྣམས་ཀྱིས་མ་བསྟན་ཏོ། །སྐྱེ་དགུ་མགོན་མེད་སྡུག་བསྔལ་གྱུར་མཐོང་ནས། །སྔན་ཆད་ངས་ནི་བྱིན་པ་
གང་ཡིན་པ། །སྤྱད་པ་སྤྱོད་ཚེ་བདེ་གཤེགས་འོད་མཛད་པ། །སངས་རྒྱས་དཔའ་བོ་གང་དག་ངས་མཆོད་ཅིང་། །ང་ཡི་སྔོན་མཐའི་སྤྱོད་པ་གཟིགས་གྱུར་པ། །ཉིན་དང་མཚན་དུ་དེ་དག་མཚན་བརྗོད་དོ། །གཉིས་གསུམ་ལྔའམ་བཅུའམ་ཉི་ཤུ་འམ། །སུམ་ཅུའམ་དེ་ལས་བཏུས་ནས་
མཚན་བརྗོད་དོ། །འཇིག་རྟེན་དོན་ཕྱིར་སྤྱད་པ་སྤྱོད་པ་ན། །སངས་རྒྱས་གཙོ་བོ་ངས་སྔོན་གང་མཆོད་པ། །ཇི་ལྟར་ང་ཡིས་སྡུག་བསྔལ་ཆེན་པོ་མང་། །དུ་མ་འཁོར་བར་བླངས་ནས་མ་བཏང་ལྟར། །སངས་རྒྱས་གང་དག་དཀའ་བ་འདི་འདྲ་སྤྱད། །དེ་འདྲའི་སངས་རྒྱས་གཞན་ནི་
བྱུང་མ་གྱུར། །ལེགས་པར་གསུངས་པ་མང་པོ་ཚོལ་བའི་ཚེ། །མགོ་བོ་བརྒྱ་དང་མགོ་བོ་བྱེ་བ་སྟོང་། །འཁོར་བའི་ཚེ་ནི་སྔོན་ཆད་ངས་བཏང་ཞིང་། །ཡུལ་འཁོར་རྒྱལ་སྲིད་སྤངས་ནས་རབ་ཏུ་བྱུང་། །ཆོས་མཆོག་འདི་ནི་ཡོངས་སུ་ཚོལ་བའི་ཚེ། །སྦྱིན་དང་ཚུལ་ཁྲིམས་དང་ནི་དུལ་བས་
འཕགས། །བརྩོན་འགྲུས་ཀྱིས་ནི་བྱང་ཆུབ་དམ་པ་རྟོགས། །བསྐལ་པ་དཔག་མེད་ང་ནི་དེ་ལྟར་གྱུར། །སངས་རྒྱས་མཐུ་ཆེན་བསམ་གྱིས་མི་ཁྱབ་པ། །ཡོན་ཏན་ཀུན་དང་ལྡན་ཞིང་མངོན་པར་འཕགས། །ཆོས་མཆོག་བསམ་གྱིས་མི་ཁྱབ་ལེགས་པར་བཤད། །བསམ་གྱིས་མི་
ཁྱབ་ལམ་ཡང་བརྗོད་པ་མཛད། །ཡོན་གྱི་བསོད་ནམས་ཀྱི་ལེའུ་སྟེ་བཅུ་པ་རྫོགས་སོ།། །།བམ་པོ་ལྔ་པ། དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་

རྫོགས་པའི་སངས་རྒྱས་མར་མེ་མཛད་ཀྱི་ཚུ་རོལ་ན་དེ་བཞིན་གཤེགས་པ་པད་མའི་བླ་མ་ཞེས་བྱ་བ་ངས་མཉེས་པར་བྱས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་འདོད་པའི་ཕྱིར། བཅོམ་ལྡན་འདས་དེ་ལ་ངས་གསེར་གྱི་མེ་ཏོག་གཏོར་ཏོ། །དེའི་ཚུ་རོལ་ན་དེ་བཞིན་
གཤེགས་པ་ཐམས་ཅད་ཟིལ་གྱིས་གནོན་པ་ཞེས་བྱ་བ་མཉེས་པར་བྱས་ཏེ། རྣམ་པ་ཐམས་ཅད་མཁྱེན་པ་འདི་ཉིད་འདོད་པའི་ཕྱིར་བཅོམ་ལྡན་འདས་དེ་ལ་ཡང་ངས་དངུལ་གྱི་མེ་ཏོག་གཏོར་ཏོ། །དེའི་ཚུ་རོལ་ན་དེ་བཞིན་གཤེགས་པ་ཤིན་ཏུ་མཐོར་བཞུད་ཅེས་བྱ་བ་མཉེས་པར་བྱས་ཏེ།
གྲངས་མེད་པ་འདི་ཉིད་ཀྱི་དོན་དུ་བཅོམ་ལྡན་འདས་དེ་ལ་ཡང་ངས་གསེར་སྙིམ་པ་གང་གཏོར་ཏོ། །ཤིན་ཏུ་མཐོར་བཞུད་དེའི་ཚུ་རོལ་ན་དེ་བཞིན་གཤེགས་པ་གྲགས་པ་བླ་མ་ཞེས་བྱ་བ་མཉེས་པར་བྱས་ཏེ། ངེས་པར་རྟོགས་པའི་ཡེ་ཤེས་འདི་ཉིད་ཀྱི་དོན་དུ་དེ་བཞིན་གཤེགས་པ་དེ་ལ་ངས་
རིན་པོ་ཆེ་སྙིམ་པ་གང་གཏོར་ཏོ། །དེ་བཞིན་གཤེགས་པ་གྲགས་པ་བླ་མའི་ཚུ་རོལ་ན་ང་དང་མིང་འཐུན་པ་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བྱུང་སྟེ། འཕགས་པའི་ལམ་འདི་ཉིད་ཀྱི་ཕྱིར་དེ་ལ་ཡང་ངས་མེ་ཏོག་སིལ་མས་གཏོར་ཏོ། །དེ་བཞིན་གཤེགས་པ་ཤཱཀྱ་ཐུབ་པའི་
ཚུ་རོལ་ན་དེ་བཞིན་གཤེགས་པ་སྐར་རྒྱལ་ཞེས་བྱ་བ་མཉེས་པར་བྱས་ཏེ། ངེས་པར་རྟོགས་པའི་ཡེ་ཤེས་འདི་ཉིད་ཀྱི་དོན་དུ་བཅོམ་ལྡན་འདས་དེ་ལ་ཡང་ངས་ཙན་དན་དམར་པོའི་ཕྱེ་མས་གཏོར་ཏོ། །དེ་བཞིན་གཤེགས་པ་སྐར་རྒྱལ་གྱི་ཚུ་རོལ་ན་དེ་བཞིན་གཤེགས་པ་རྒྱས་པ་ཞེས་
བྱ་བ་མཉེས་པར་བྱས་ཏེ། བཅོམ་ལྡན་འདས་དེ་ལ་ཡང་ངས་མིག་མི་འཛུམས་ཤིང་སེམས་མངོན་པར་དང་བས་ཉིན་ཞག་བདུན་དུ་ཚིགས་སུ་བཅད་པ་གཅིག་གིས་མངོན་པར་བསྟོད་དོ། །དེ་བཞིན་གཤེགས་པ་རྒྱས་པའི་ཚུ་རོལ་ན་དེ་བཞིན་གཤེགས་པ་རྣམ་པར་གཟིགས་ཞེས་
བྱ་བ་མཉེས་པར་བྱས་ཏེ། བཅོམ་ལྡན་འདས་དེ་ལ་ཡང་ངས་མོན་སྲན་སྡེའུ་སྙིམ་པ་གང་གཏོར་ཏོ། །རྣམ་པར་གཟིགས་ཀྱི་ཚུ་རོལ་ན་དེ་བཞིན་གཤེགས་པ་གཙུག་ཏོར་ཅན་ཞེས་བྱ་བ་མཉེས་པར་བྱས་ཏེ། བཅོམ་ལྡན་འདས་དེ་ལ་ཡང་ངས་ན་བཟའ་རིན་པོ་ཆེ་གསོལ་ཏོ། །གཙུག་

ཏོར་ཅན་གྱི་འོག་ཏུ་དེ་བཞིན་གཤེགས་པ་ཐམས་ཅད་སྐྱོབ་ཅེས་བྱ་བ་མཉེས་པར་བྱས་ཏེ། བཅོམ་ལྡན་འདས་དེ་ལ་ཡང་ངས་བཤོས་བཟང་པོ་གསོལ་ཏོ། །ཀུན་དགའ་བོ་བསྐལ་པ་བཟང་པོ་འདི་ལ་དེ་བཞིན་གཤེགས་པ་འཁོར་བ་འཇིག་བྱུང་སྟེ། ཡེ་ཤེས་རང་
བྱུང་འདི་ཉིད་ཀྱི་དོན་དུ་དེའི་ཞབས་འབྲིང་ན་ངས་ཚངས་པར་སྤྱོད་པ་སྤྱད་དོ། །འཁོར་བ་འཇིག་གི་འོག་ཏུ་དེ་བཞིན་གཤེགས་པ་གསེར་ཐུབ་ཅེས་བྱ་བ་བྱུང་སྟེ། དེའི་ཞབས་འབྲིང་ན་ཡང་ངས་ཚངས་པར་སྤྱོད་པ་སྤྱད་དོ། །གསེར་ཐུབ་ཀྱི་ཚུ་རོལ་ན་དེ་བཞིན་གཤེགས་པ་འོད་སྲུང་ཞེས་
བྱ་བ་བྱུང་སྟེ། འོད་སྲུང་གི་ཞབས་འབྲིང་ན་ཡང་ངས་ཚངས་པར་སྤྱོད་པ་སྤྱད་དེ་ཐམས་ཅད་ལ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་འདོད་པའི་ཕྱིར་བྱས་སོ། །དེ་ལྟར་ང་རྒལ་ནས་མ་རྒལ་བ་རྣམས་སྒྲོལ་ཞིང་གྲོལ་ནས་མ་གྲོལ་བ་རྣམས་འགྲོལ་བ་ནས་ཡོངས་སུ་མྱ་ངན་
ལས་འདས་ནས་ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བྱེད་དོ། །ཀུན་དགའ་བོ་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་འདོད་པའི་ཕྱིར་འདི་ལྟར་སངས་རྒྱས་བཅོམ་ལྡན་འདས་འདི་དག་དང་། དཔག་ཏུ་མེད་གྲངས་མེད་པ་
གཞན་རྣམས་ལ་ཡང་བསྟི་སྟང་བྱས། བླ་མར་བྱས། རིམ་གྲོར་བྱས། མཆོད་པར་བྱས་ཏེ། སངས་རྒྱས་མང་པོ་ཇི་སྙེད་ལ་བསྙེན་བཀུར་བྱས་པ་དང་། དེ་བཞིན་གཤེགས་པ་ཡོན་ཏན་མང་པོ་ཇི་སྙེད་དང་ལྡན་པ་ལ་ལྟོས། ཀུན་དགའ་བོ་རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་
པར་བྱ་སྟེ། དེ་བཞིན་གཤེགས་པ་ལ་དགེ་བའི་རྩ་བ་གང་ཇི་ཙམ་དུ་ཆུང་བ་བསྐྱེད་པ་ཡང་དེ་ལྟར་རྫུ་འཕྲུལ་ཆེ་བ་དང་། དེ་ལྟར་ཕན་ཡོན་ཆེ་བ་དང་། དེ་ལྟར་གཟི་ཆེ་བ་དང་། དེ་ལྟར་རྒྱ་ཆེ་བར་འགྱུར་རོ། །ཀུན་དགའ་བོ་དེ་བཞིན་གཤེགས་པ་བསམ་གྱིས་མི་ཁྱབ་པ་རྣམས་ལ་ངས་དགེ་བའི་རྩ་
བ་བསྐྱེད་དེ། དེའི་རྣམ་པར་སྨིན་པ་ཡང་བསམ་གྱིས་མི་ཁྱབ་པར་ཤེས་པར་བྱའོ། །ཀུན་དགའ་བོ་དེ་ལྟར་དེ་བཞིན་གཤེགས་པ་རྣམས་ལ་མཉམ་པ་མེད་པ་དང་མི་འཐུན་པ་མེད་པ་དང་། མཐའ་ཡས་པའི་ཡོན་ཕུལ་བས་རྣམ་པར་སྨིན་པ་ཡང་མཐའ་ཡས་པར་ཤེས་པར་བྱའོ། །

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ང་སྔོན་བྱང་ཆུབ་སྤྱད་པ་སྤྱོད་པ་ན། །མར་མེ་མཛད་པ་རྐང་གཉིས་མཆོག་མཉེས་བྱས། །དེ་ལ་ང་ཡིས་ཨུད་པལ་ལྔ་གཏོར་ཏེ། །དེ་ནས་འདྲེན་པས་ང་ལ་ལུང་བསྟན་ཏོ། །དེ་ཡི་འོག་ཏུ་རྒྱལ་བ་པད་མའི་
བླ། །བྱུང་སྟེ་དེ་ཡང་ང་ཡིས་མཉེས་པར་བྱས། །བྱང་ཆུབ་དམ་པ་འདི་ནི་འདོད་པས་ན། །གསེར་གྱི་མེ་ཏོག་རྣམས་ཀྱིས་རྒྱལ་དེ་མཆོད། །དེ་ཡི་འོག་ཏུ་འདྲེན་པ་བྱུང་བ་ནི། །ཐམས་ཅད་ཟིལ་གནོན་ཡོན་ཏན་ཀུན་དང་ལྡན། །ཤིན་ཏུ་མཐོར་བཞུད་གྲགས་པའི་བླ་མ་དང་། །ཤཱཀྱ་
ཁྱུ་མཆོག་སྐར་རྒྱལ་དེ་བཞིན་རྒྱས། །སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་འདྲེན་པ་གསེར་ཐུབ་དང་། །བྱང་ཆུབ་དམ་པ་ཡོངས་སུ་ཚོལ་བ་ན། །སངས་རྒྱས་འོད་སྲུང་དེ་བཞིན་ངས་མཆོད་དོ། །བྱང་ཆུབ་མཆོག་འདི་ཡོངས་སུ་ཚོལ་བ་
ན། །སེམས་ཅན་དོན་ཕྱིར་སྙིང་རྗེ་བསྐྱེད་ནས་སུ། །སྤྱོད་མཆོག་སྤྱད་ཚེ་གང་དག་ངས་མཆོད་པ། །འདས་པའི་འདྲེན་པ་གཞན་དང་དེ་དག་གོ། །སངས་རྒྱས་བྱེ་བ་ཕྲག་སྟོང་དེ་དག་མཆོད། །ཚོགས་རྣམས་ཐམས་ཅད་ཡོངས་སུ་རྫོགས་བྱས་ནས། །མྱ་ངན་མེད་ཞི་བྱང་ཆུབ་ངས་ཐོབ་སྟེ།
དཔུང་བཅས་བཞོན་པར་བཅས་པའི་བདུད་བཏུལ་ནས། །ཆོས་ཀྱི་འཁོར་ལོ་ང་ཡིས་རབ་ཏུ་བསྐོར། །སྲོག་ཆགས་ཕན་ཕྱིར་ཆོས་རྣམས་རབ་ཏུ་བཤད། །ལྷ་དང་ཀླུ་དང་མི་དང་མིའམ་ཅི། །སངས་རྒྱས་བྱང་ཆུབ་མཆོག་ལ་ངས་བཀོད་དེ། །བདེ་ཞིང་ཞི་བའི་ལམ་དག་ངས་བསྟན་ནོ། །མ་བྱོན་
སངས་རྒྱས་དེ་བཞིན་ཉན་ཐོས་གང་། །སྡུག་བསྔལ་ཀུན་ལས་གང་ཞིག་ཐར་འདོད་པ། །མཁས་པ་དེ་དག་ང་ཡི་ཡོན་ཏན་སློབས། །དགེ་བའི་རྩ་བ་སྐྱེད་པའི་ལེའུ་སྟེ་བཅུ་གཅིག་པ་རྫོགས་སོ།། །།དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་
བཀའ་སྩལ་པ། ཀུན་དགའ་བོ་ང་བྱང་ཆུབ་ཐོབ་པའི་ཡོན་ཏན་གྱི་ཕན་ཡོན་ལྟ་ཞོག་ལ། ཀུན་དགའ་བོ་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་གང་ཡོན་ཏན་གྱི་ཆོས་རྣམས་བྱུང་བ་དེ་དག་ཀྱང་རང་སངས་རྒྱས་རྣམས་ལ་ཡང་མེད་ན་ཉན་ཐོས་རྣམས་སམ། དེ་ལས་གཞན་པའི་སེམས་ཅན་རྣམས་ལ་

ལྟ་ཅི་སྨོས། ཀུན་དགའ་བོ་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཇི་ཙམ་དུ་དཀའ་བ་སྤྱད་པ་དེ་དག་ཐམས་ཅད་ཁྱེད་ཀྱི་དོན་དུ་སྤྱད་དོ། །ངས་རྒྱལ་སྲིད་དང་སྡུག་པ་དག་ཀྱང་ཡོངས་སུ་བཏང་ཞིང་བུ་ཕོ་དང་། བུ་མོ་དང་། ཆུང་མ་དང་། སླས་དང་། བདག་གི་སྲོག་དང་། ཤ་
དང་། ཁྲག་དང་། རུས་པ་དང་། རྐང་དང་། རྣ་བ་དང་། སྣ་དང་། ལག་པ་དང་། རྐང་པ་དང་། མགོ་དག་ཀྱང་ངས་ཡོངས་སུ་བཏང་བ་དང་། སྡུག་བསྔལ་མི་བཟད་པ་རྩུབ་ཅིང་དྲག་པའི་ཚོར་བ་རྣམ་པ་དུ་མ་མྱོང་བ་དེ་དག་ཐམས་ཅད་ཀྱང་ཁྱེད་ཀྱི་ཕྱིར་རོ། །ཀུན་དགའ་བོ་ང་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་དོན་དུ་གཉེར་བ་ན་གང་བྱ་དཀའ་བ་དང་ཡོངས་སུ་བཏང་བ་བྱས་པ་དང་། སེམས་ཅན་རྣམས་ཀྱི་དོན་དུ་ངས་སྡུག་བསྔལ་གང་དག་མྱོང་བ་དེ་དག་ཐམས་ཅད་ཀུན་དགའ་བོ་གལ་ཏེ་བརྗོད་ན་བདེན་པར་ཡིད་ཆེས་པར་མི་འགྱུར་ན་ཚིག་ཏུ་སྨྲ་བ་ལྟ་ཅི་སྨོས། ཀུན་དགའ་བོ་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཁྱེད་ཀྱི་དོན་དུ་སྡུག་བསྔལ་མི་བཟད་པ་རྩུབ་ཅིང་དྲག་པའི་ཚོར་བ་འདི་ལྟ་བུ་དག་མྱོང་ངོ་ཞེས་དེ་སྐད་བཤད་ན་དེ་བཞིན་གཤེགས་པ་དེས་བདག་ཅག་གི་ཕྱིར་
རབ་ཏུ་དཀའ་བ་སྤྱད་དོ་ཞེས་གལ་ཏེ་བྱིས་པ་སོ་སོའི་སྐྱེ་བོ་དག་ཚིག་བཞི་པ་གཅིག་གི་སྙིང་རྗེ་སྐྱེད་ན། ཀུན་དགའ་བོ་སེམས་བསྐྱེད་པ་དེའི་འབྲས་བུ་ཡང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བར་ང་སྨྲ་ན། ཀུན་དགའ་བོ་ང་ལ་དགེ་བའི་རྩ་བ་སྐྱེད་པ་ལྟ་ཅི་སྨོས་
ཀུན་དགའ་བོ་འདི་ལ་སྐྱེས་བུ་བླུན་པོ་མ་དད་པ་རྒྱུད་ཉམས་པ། མུན་པ་མཐའ་ཡས་པས་ཁེབས་པ་ཁ་ཅིག་ནི་ངའི་བྱང་ཆུབ་སེམས་དཔའི་སྤྱོད་པ་བཤད་ན་ཚིག་བཞི་པ་གཅིག་གི་སྙིང་རྗེའམ། ཕན་པའི་དངོས་པོའམ། སེམས་དང་བ་ཡང་མི་སྐྱེད་དོ། །གང་དག་བླ་ན་མེད་པའི་མྱ་ངན་ལས་
འདའ་བ་བསྒྲུབ་པའི་ཕྱིར་ཁྱད་པར་དུ་འཕགས་པར་འགྱུར་བ་དང་། བྱང་ཆུབ་སེམས་དཔའི་སྤྱད་པ་སྤྱོད་པ་ན་སྙིང་རྗེ་ཆེན་པོ་རྙེད་པས་གང་དག་ཐོབ་པར་གྱུར་པ་ཡོན་ཏན་གྱི་ཆོས་དེ་དག་རང་སངས་རྒྱས་རྣམས་ལ་ཡང་མེད་ན་ཉན་ཐོས་རྣམས་ལ་ལྟ་ག་ལ་ཡོད། སོ་སོའི་སྐྱེ་བོ་རྣམས་ལ་ལྟ་ག་ལ་

ཡོད། ཀུན་དགའ་བོ་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྙིང་རྗེ་ཆེན་པོ་རྙེད་པས་གང་དག་ཐོབ་པའི་ཆོས་དེ་དག་ཀུན་དགའ་བོ་གལ་ཏེ་རང་སངས་རྒྱས་རྣམས་ལ་ཡོད་པར་གྱུར་ན་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་
འགྱུར་བ་ཞིག་ན། གང་གི་ཕྱིར་ཆོས་དེ་དག་བྱམས་པ་ཆེན་པོ་དང་། སྙིང་རྗེ་ཆེན་པོས་ཟིན་པས་དེའི་ཕྱིར་རང་སངས་རྒྱས་རྣམས་ལ་མེད་དོ། །དེའི་ཕྱིར་དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་བཅུ་དང་ལྡན་པ། མི་འཇིགས་པ་བཞི་ཐོབ་
པ། བྱམས་པ་ཆེན་པོ་དང་སྙིང་རྗེ་ཆེན་པོ་དང་ལྡན་པར་མི་འགྱུར་རོ། །ཀུན་དགའ་བོ་ངས་མངོན་པར་དྲན་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བ་ཅི་བྱ་བ་ཚོལ་ཞིང་འཁོར་བས་ཡིད་རྟག་ཏུ་སྐྲག་ལ་སེམས་ཅན་རྣམས་ལ་སྙིང་རྗེ་ཆེན་པོས་ཡོངས་སུ་བསྒོས་པའི་ཡིད་དུ་གྱུར་པ་ན་རྨི་ལམ་
འདི་ལྟ་བུ་རྨིས་པ་དྲན་ཏེ། རིའི་རྒྱལ་པོ་རི་རབ་ཀྱི་སྡེང་ཆེ་ཞིང་ཡངས་པ་ཞིག་ན་བདག་འདུག་སྟེ། དེ་ན་སེམས་ཅན་གང་དག་འཇིག་རྟེན་གྱི་བར་ན་བཀོད་པ། སེམས་ཅན་དམྱལ་བ་ཆེན་པོར་སྐྱེས་པ་དེ་དག་སེམས་ཅན་དམྱལ་བའི་སྲུངས་མ་རྣམས་ཀྱིས་ཚར་ཆོད་ཅིང་ལུས་འབར་བ་དང་། ཀུན་ཏུ་
འབར་བ་དང་། མེར་གྱུར་པ་དང་། ཤིན་ཏུ་སྡུག་བསྔལ་མི་བཟད་པ་རྩུབ་ཅིང་དྲག་པ་སྲོག་འཕྲོག་པའི་ཚོར་བ་མྱོང་བར་གྱུར་ནས་ང་ག་ལ་བ་དེར་ལྷགས་སོ། །ལྷགས་ནས་ང་ལ་ཐལ་མོ་སྦྱར་ཏེ་ཕྱག་འཚལ་ནས་འདི་སྐད་ཅེས་གྲོགས་པོ་ཁྱེད་ནི་བདེ་བའི་ཚོར་བ་མྱོང་། བདག་ཅག་ནི་སྡུག་བསྔལ་
ཞིང་སེམས་ཅན་དམྱལ་བའི་ཚོར་བ་མི་བཟད་པའི་ནང་ན་མཆིས་ཏེ། ཤིན་ཏུ་སྡུག་བསྔལ་མི་བཟད་པ་རྩུབ་ཅིང་དྲག་པ་སྲོག་འཕྲོག་པའི་ཚོར་བ་མྱོང་ཞིང་། མགོན་མ་མཆིས། སྐྱབས་མ་མཆིས། དཔུང་གཉེན་མ་མཆིས་སོ། །སྐྱེས་བུ་དམ་པ་ཁྱོད་བཞེད་ན་ནི་བདག་ཅག་སྡུག་བསྔལ་འདི་
ལྟ་བུ་འདི་ལས་ཁྱོད་ཀྱིས་ཡོངས་སུ་ཐར་བར་མཛད་སྤྱོད་དོ་ཞེས་ཟེར་རོ། །ཀུན་དགའ་བོ་ང་རྨི་ལམ་དེ་ཉིད་ན་ངུ་ཞིང་མིག་གཉིས་ནས་འདི་ལྟ་སྟེ་དཔེར་ན། གང་གཱའི་ཀླུང་ཆེན་པོ་ལྟ་བུའི་མཆི་མ་བྱུང་སྟེ། ངས་སེམས་ཅན་དམྱལ་བའི་སེམས་ཅན་དེ་དག་ལ་དེ་ལྟ་བུའི་སྙིང་རྗེ་ཆེན་པོ་སྐྱེས་ནས་

སེམས་ཅན་དམྱལ་བའི་སེམས་ཅན་དེ་དག་ལ་གྲོགས་པོ་དག་དེ་ལྟར་མ་འཇིགས་ཤིག །ངས་ཁྱེད་སྡུག་བསྔལ་ཆེན་པོ་འདི་ལྟ་བུ་འདི་ལས་ཡོངས་སུ་ཐར་བར་བྱའོ་ཞེས་དབུགས་ཕྱུང་ངོ་། །ཀུན་དགའ་བོ་ངས་རྨི་ལམ་ཉིད་ན་སེམས་ཅན་དམྱལ་བ་པའི་སེམས་ཅན་དེ་དག་གཅིག་ཏུ་
བསོགས་ནས་ལག་པ་གཡས་པས་མགོ་ལ་བྱུགས་སོ། །ཀུན་དགའ་བོ་སེམས་ཅན་དམྱལ་བ་པའི་སེམས་ཅན་དེ་དག་གི་སྤྱི་བོར་ལག་པ་གཡས་པ་བཞག་མ་ཐག་པ་དང་། སེམས་ཅན་ཁྱེད་ངས་ཐར་བར་བྱས་མ་འཇིགས་ཤིག་ཅེས་ངས་དེ་སྐད་སྨྲས་མ་ཐག་ཏུ་སེམས་ཅན་དམྱལ་བ་པའི་
མེ་དེ་ཞི་བར་གྱུར་ཏོ། །སེམས་ཅན་དམྱལ་བ་པའི་སེམས་ཅན་དེ་དག་ཀྱང་སྐད་ཅིག་དེ་ཉིད་དང་། ཡུད་ཙམ་དེ་ཉིད་ལ་བདེ་བའི་ཚོར་བ་མྱོང་བར་གྱུར་ཏོ། །ཀུན་དགའ་བོ་ང་གཉིད་ཀྱིས་ལོག་པ་དེ་ཉིད་ལས་སད་མ་ཐག་ཏུ་མཆི་མ་དེ་གོས་ལས་བཙིར་ནས་བསགས་སོ། །ཀུན་དགའ་བོ་
ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་སྙིང་རྗེ་ཆེན་པོའི་ཆོས་དེ་ལྟ་བུ་དང་ལྡན་ན། ད་ལྟ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ལྟ་ཅི་སྨོས། ཀུན་དགའ་བོ་རྣམ་གྲངས་འདིས་ཁྱོད་ཀྱིས་འདི་ལྟར་རིག་པར་བྱ་སྟེ། ང་བྱང་ཆུབ་སེམས་
དཔའི་སྤྱད་པ་སྤྱོད་པ་ན་ཆོས་གང་དག་བྱུང་བ་དེ་དག་རང་སངས་རྒྱས་རྣམས་ལ་ཡང་མེད་ན་ཉན་ཐོས་རྣམས་དང་བྱིས་པ་སོ་སོའི་སྐྱེ་བོ་རྣམས་ལ་ལྟ་ག་ལ་ཡོད། ཀུན་དགའ་བོ་དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་རྣམས་ལ་སྙིང་རྗེ་ཆེན་པོ་ཇི་ཙམ་ཞིག་
དང་ལྡན་པ་ཚིག་ཏུ་བརྗོད་པས་ཀྱང་མཐར་ཕྱིན་པར་སླ་བ་མ་ཡིན་པ་དེ་ལྟ་བུའི་སེམས་ཅན་རྣམས་ལ་ཕན་པའི་དངོས་པོའི་སེམས་དང་ལྡན་པར་གྱུར་པ་ལ་ལྟོས། ཀུན་དགའ་བོ་སྔོན་བྱུང་བ་འདས་པའི་དུས་ན་ཚོང་པ་མང་པོ་རིན་པོ་ཆེའི་ཕྱིར་རྒྱ་མཚོ་ཆེན་པོར་ཞུགས་པ་དང་། དེ་དག་གི་གྲུ་
ཆེན་པོ་ནོར་གྱིས་གང་བ་རྒྱ་མཚོ་ཆེན་པོ་དེ་ཉིད་དུ་ཞིག་པར་གྱུར་ཏོ། །དེ་ནས་ཚོང་པ་དེ་དག་གྲུ་ཞིག་པས་འཇིགས་སྐྲག་མི་དགའ་བར་གྱུར་ནས་སྲོག་གི་ཕྱིར་ཁ་ཅིག་ནི་སྤང་ལེབ་ལ་རྟེན་ཏེ་རྒལ། ཁ་ཅིག་ནི་ལག་པས་རྐྱལ། ཁ་ཅིག་ནི་འཆི་བའི་དུས་བྱས་སོ། །དེའི་ཚེ་ཡང་ཚོང་པ་

མང་པོ་དེའི་ནང་ན་གང་དེད་དཔོན་དུ་གྱུར་པ་དེ་རྒྱ་མཚོ་ཆེན་པོ་ལ་རྐྱལ་པས་རྐྱལ་ལོ། །དེའི་ཚེ་ཡང་ཚོང་པ་ལྔ་ཞིག་རྒྱ་མཚོ་ཆེན་པོས་ཁྱེར་བ་དེ་དག་དེད་དཔོན་དེ་ལ་ཀྱེ་དེད་དཔོན་མི་འཇིགས་པ་སྩོལ་ཅིག་ཅེས་འབོད་དོ། །ཀུན་དགའ་བོ་དེ་སྐད་ཅེས་སྨྲས་པ་དང་། དེད་དཔོན་དེས་ཚོང་པ་དེ་
དག་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་ཁྱེད་མ་འཇིགས་ཤིག །ངས་ཁྱེད་རྒྱ་མཚོ་ཆེན་པོ་འདི་ལས་བདེ་བར་གདོན་ནོ། །ཀུན་དགའ་བོ་དེའི་ཚེ་དེད་དཔོན་དེའི་ལུས་ལ་མཚོན་རྣོན་པོ་ཞིག་ཀྱང་འཆང་སྟེ། དེ་འདི་སྙམ་དུ་རྒྱ་མཚོ་ཆེན་པོ་འདི་མི་རོ་དང་ལྷན་ཅིག་མི་གནས་པས་ངེས་
པར་བདག་གིས་བདག་གི་ལུས་སྲོག་དང་ཕྲལ་ཏེ་ཚོང་པ་འདི་དག་རྒྱ་མཚོ་ཆེན་པོ་འདི་ལས་གདོན་ནོ་སྙམ་དུ་བསམས་ནས། དེས་ཚོང་པ་དེ་དག་བདག་གི་ལུས་ལ་ཤིན་ཏུ་ལེགས་པར་ཁ་ཅིག་ནི་རྒྱབ་ཏུ་ཞོན། ཁ་ཅིག་ནི་ཕྲག་པ་ལ་ཞོན། ཁ་ཅིག་ནི་བརླ་ལ་བཅར་ཏེ། རྩོལ་བ་ཆེན་
པོ་བསྐྱེད་ནས་ལུས་དང་སེམས་ལ་སོ་སོར་བརྟག་པའི་མཐུ་བསྐྱེད་དེ་ཚོང་པ་དེ་དག་ལ་མི་འཇིགས་པ་བྱིན་ནས་སྙིང་རྗེ་ཆེན་པོས་ཡོངས་སུ་བསྒོས་པའི་སེམས་ཀྱིས་མཚོན་རྣོན་པོས་བདག་གི་སྲོག་བཅད་པ་དང་། དེ་མྱུར་བ་ཉིད་དུ་འཆི་བའི་དུས་བྱས་སོ། །དེ་ནས་དེ་མ་ཐག་ཏུ་རོ་དེ་
རྒྱ་མཚོ་ཆེན་པོའི་ནང་ནས་སྐམ་ལ་བྱུང་ངོ་། །དེ་ནས་ཚོང་པ་ལྔ་པོ་དེ་དག་བདེ་ཞིང་དོན་གྲུབ་ནས་རྒྱ་མཚོ་ཆེན་པོ་ལས་རྒལ་ཏེ་སླར་འཛམ་བུ་གླིང་དུ་བདེ་བར་ལྷགས་པར་གྱུར་ཏོ། །ཀུན་དགའ་བོ་དེའི་ཚེ་དེའི་དུས་ན་དེད་དཔོན་དེ་གཞན་ཞིག་ཡིན་པ་སྙམ་དུ་ཁྱོད་ཐེ་ཚོམ་འམ་ཡིད་གཉིས་ཟ་ན་ཀུན་དགའ་
བོ་ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཀུན་དགའ་བོ་ང་ཉིད་དེའི་ཚེ་དེའི་དུས་ན་དེད་དཔོན་དུ་གྱུར་ཏོ། །ཀུན་དགའ་བོ་དགེ་སློང་ལྔ་སྡེ་ནི་དེའི་ཚེ་དེའི་དུས་ན་ཚོང་པ་ལྔ་པོར་གྱུར་ཏེ། ཀུན་དགའ་བོ་དེའི་ཚེ་ཡང་དགེ་སློང་ལྔ་པོ་རྒྱ་མཚོ་ཆེན་པོ་ལས་བསྒྲལ་ཏོ། །ད་ཡང་ངས་
འཁོར་བའི་རྒྱ་མཚོ་ཆེན་པོ་ལས་བསྒྲལ་ཏེ་མྱ་ངན་ལས་འདས་པ་འཇིགས་པ་མེད་ཅིང་ཞི་བ་ལ་བཀོད་དོ། །ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དཀའ་བ་ཇི་སྙེད་བྱེད་པ་དང་། ཡོན་ཏན་ཚད་མེད་པ་ཇི་སྙེད་དང་ལྡན་པ་ལ་ལྟོས། ཀུན་དགའ་བོ་རྣམ་གྲངས་

འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། བྱང་ཆུབ་སེམས་དཔའ་རྣམས་ཅི་འདྲ་བའི་ཡོན་ཏན་འདི་ལྟ་བུ་དག་རང་སངས་རྒྱས་རྣམས་ལ་མེད་དོ། །ཀུན་དགའ་བོ་གལ་ཏེ་རང་སངས་རྒྱས་རྣམས་ལ་ངའི་ཆོས་རྣམས་ཡོད་དུ་ཟིན་ན་དེ་དག་ཀྱང་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བ་ཞིག་ན་གང་གི་ཕྱིར་དེ་དག་ལ་ཆོས་འདི་དག་མེད་པ་དེའི་ཕྱིར་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱའོ། །ཀུན་དགའ་བོ་དེ་ལྟར་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ནི་དཀའ་བ་བྱེད་ཅིང་། སྙིང་རྗེ་ཆེ་ལ་སེམས་ཅན་ཐམས་ཅད་ལ་སྙིང་བརྩེ་བའོ། །དེ་ལ་མི་བླུན་པོ་ཁ་ཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་བླ་ན་མེད་པའི་ཡོངས་སུ་མྱ་ངན་ལས་འདའ་བའི་ས་བོན་མངོན་སུམ་དུ་བྱ་བའི་ཕྱིར་སེམས་དང་བ་འགའ་ཡང་ང་ལ་མི་
སྐྱེད་དོ། །ཀུན་དགའ་བོ་ཉི་ཚེ་བ་བྱེད་པ་ནི་ཉི་ཚེ་བ་སྒྲུབ་ལ། ཡོངས་སུ་རྫོགས་པ་བྱེད་པ་ནི་ཡོངས་སུ་རྫོགས་པ་སྒྲུབ་བོ། །ཀུན་དགའ་བོ་ངའི་སྤྱོད་པ་གཞན་དག་ཀྱང་བསྟན་ཏེ། ཀུན་དགའ་བོ་ཐ་ན་སེམས་དང་བ་གཅིག་བསྐྱེད་པའི་དགེ་བའི་རྩ་བ་དང་ལྡན་པ་བསྐྱེད་པ་ཡང་དོན་མེད་པར་
མི་འགྱུར་ན་གོང་མ་དག་ལྟ་ཅི་སྨོས། ཀུན་དགའ་བོ་གང་དེ་བཞིན་གཤེགས་པ་ལ་བཞག་པའི་དགེ་བའི་རྩ་བ་གང་ཡིན་པ་ཐ་ན་སངས་རྒྱས་ལ་དམིགས་པའི་སེམས་གཅིག་བསྐྱེད་ན་ཀུན་དགའ་བོ་དེ་དག་ཐམས་ཅད་ཀྱང་བདུད་རྩི་དང་མཚུངས་ཤིང་ཐ་མ་བདུད་རྩིར་འགྱུར་བར་ང་སྨྲའོ། །ཀུན་
དགའ་བོ་དེ་བཞིན་གཤེགས་པ་ནི་རྣམ་པ་ཐམས་ཅད་ཀྱིས་རྗེས་སུ་དྲན་པར་བྱ་སྟེ། ཀུན་དགའ་བོ་དྲན་པ་ལས་ཀྱང་དེ་བཞིན་གཤེགས་པ་དྲན་པར་བྱའོ། །ཀུན་དགའ་བོ་དགེ་བའི་རྩ་བ་ལས་ཀྱང་དེ་བཞིན་གཤེགས་པ་དྲན་པར་བྱའོ། །ཀུན་དགའ་བོ་རིགས་ལས་ཀྱང་དེ་བཞིན་གཤེགས་
པ་དྲན་པར་བྱའོ། །ང་ནི་འདྲ་བའི་ཕྱིར་ཉི་མའི་རིགས་ཏེ་གང་བུ་རམ་ཤིང་པའི་རིགས་སུ་སྐྱེས་པ་ནོར་མང་པོ་ཕུན་སུམ་ཚོགས་པའོ། །ཉི་མའི་རིགས་ཀྱིས་མུན་པ་མུན་ནག་དང་བྲལ་བ་སྣང་བ་བྱེད་པ་འོད་བྱེད་པའོ། །ཀུན་དགའ་བོ་ང་ནི་ཤཱཀྱ་ཡིན་ཏེ། དེ་ནི་རིགས་ཆེ་བའི་ཚིག་བླ་དགས་སོ། །ཀུན་

དགའ་བོ་དེ་བཞིན་གཤེགས་པ་ནི་རུས་དང་། ཆོ་རིགས་དང་། རིགས་དང་། ནོར་དང་། གཟུགས་དང་། ཡུལ་དང་། མཚན་དང་དཔེ་བྱད་བཟང་པོ་དང་། སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པས་མངོན་པར་འཕགས་སོ། །ཀུན་དགའ་བོ་དེ་བཞིན་
གཤེགས་པ་ཡོན་ཏན་ཐམས་ཅད་ཀྱིས་མངོན་པར་འཕགས་ཤིང་རིགས་ཕུན་སུམ་ཚོགས་སོ། །ཀུན་དགའ་བོ་རོ་མྱོང་བ་ལས་ཀྱང་དེ་བཞིན་གཤེགས་པ་རྗེས་སུ་དྲན་པར་བྱའོ། །ཀུན་དགའ་བོ་དོན་ཡོད་པ་དང་། སྔོན་གྱི་སྦྱོར་བ་ཕུན་སུམ་ཚོགས་པ་དང་། སྨོན་ལམ་ཕུན་སུམ་
ཚོགས་པ་དང་། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། སྤྱོད་ལམ་དང་། སྤྱོད་པ་དང་། སྒྲུབ་པ་ལས་ཀྱང་དེ་བཞིན་
གཤེགས་པ་རྗེས་སུ་དྲན་པར་བྱ་ན་སངས་རྒྱས་ཀྱི་ཡོན་ཏན་ཐམས་ཅད་ཀྱིས་ལྟ་ཅི་སྨོས། ཀུན་དགའ་བོ་རྣམ་པ་གང་དང་གང་དག་གིས་དེ་བཞིན་གཤེགས་པ་རྗེས་སུ་དྲན་པར་འགྱུར་བའི་རྣམ་པ་དེ་དང་དེ་དག་གིས་རྫུ་འཕྲུལ་ཆེ་ཕན་ཡོན་ཆེ་གཟི་ཆེ་རྒྱ་ཆེ། བདུད་རྩི་དང་མཚུངས་
ཏེ། བདུད་རྩིས་ཀླས་ཤིང་བདུད་རྩིས་མཐས་གཏུགས་པར་འགྱུར་རོ། །ཀུན་དགའ་བོ་ང་སྔོན་བྱང་ཆུབ་སེམས་དཔར་གྱུར་པའི་རྒྱུད་ལ་ཡོད་པའི་སྦྱིན་པའི་ཕ་རོལ་ཏུ་ཕྱིན་པའི་ས་གང་ཡིན་པ་དེའི་ཡོན་ཏན་རྣམས་ངས་སངས་རྒྱས་ཀྱི་ཡེ་ཤེས་ཀྱིས་ཀྱང་མཐའ་རྟོགས་པར་མི་ནུས་ན་གང་
ངའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པར་གྱུར་པ་ལྟ་ཅི་སྨོས། བྱང་ཆུབ་སེམས་དཔའི་ཡོན་ཏན་དེ་ལས་གཞན་པ་དག་
ཡོད་པ་ལྟ་ཅི་སྨོས། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པ་ན། བྱང་ཆུབ་སེམས་དཔའི་ཡོན་ཏན་ཡོད་པ་དེ་དག་གི་མཐའ་ཡང་ངས་སངས་རྒྱས་ཀྱི་ཡེ་ཤེས་ཀྱིས་རྟོགས་པར་སླ་བ་མ་ཡིན་ན་ལུང་བསྟན་པ་ལྟ་ཅི་སྨོས། སངས་རྒྱས་ཀྱི་ཡོན་ཏན་ཐམས་ཅད་

ལྟ་ཅི་སྨོས་ཏེ། དེ་དག་གི་མཐའ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་རྟོགས་པར་སླ་བ་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཡོན་ཏན་དཔག་ཏུ་མེད་པའི་ཕྱིར་རོ། །ཀུན་དགའ་བོ་ངས་དོན་
གྱི་དབང་འདི་མཐོང་ནས་གང་དག་ཁ་ཅིག་ངའི་བྱང་ཆུབ་སེམས་དཔའི་སྤྱོད་པའི་ཡོན་ཏན་རྣམས་རྗེས་སུ་དྲན་ཞིང་སེམས་དང་བ་ཡང་སྐྱེད་ན། ཀུན་དགའ་བོ་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདས་པར་ང་དེ་སྐད་སྨྲའོ། །ཀུན་དགའ་བོ་
དེ་བས་ན་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་དགའ་བོ་ཁྱོད་དང་ལྷ་དང་བཅས་པའི་འཇིག་རྟེན་གྱི་དོན་ཆེན་པོ་ངས་བྱས་ཟིན་ཏེ་ཕན་ཆེན་པོ་ནི་བཏགས། བླ་ན་མེད་པའི་གྲུབ་པ་དང་བདེ་བ་འདི་ལྟ་སྟེ། མྱ་ངན་ལས་འདའ་བ་ཐོབ་པར་བྱ་བའི་ལམ་ནི་བསྟན། བསྒྲུབ་པ་ནི་བཤད་ཟིན་གྱིས་
ད་ཁྱེད་བག་ཡོད་པ་ལ་བརྩོན་པར་གྱིས་ཤིག །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་དོ་མོད་ཀྱི་ནམ་གྱི་གུང་ཐུན་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་དགེ་སློང་དག་ཚུར་ཤོག །དེང་དུ་ངས་ཁྱེད་མཐོང་བའི་
ཐ་མ་དང་རྗེས་སུ་བསྟན་པའི་ཐ་མར་འགྱུར། དེང་དུ་ང་དང་ཁྱེད་མཐོང་བ་ཐ་མ་དང་ཕྲད་པ་ཐ་མར་འགྱུར་ཏེ། དགེ་སློང་ཁྱེད་ཀྱིས་ཕྱིས་ང་མི་མཐོང་ངས་ཀྱང་ཁྱེད་མི་མཐོང་ངོ་། །དེ་བས་ན་དགེ་སློང་དག་མྱ་ངན་མ་བྱེད། སྨྲེ་སྔགས་མ་འདོན་ཅིག །དགེ་སློང་དག་སྡུག་པ་དང་ཡིད་དུ་འོང་བ་ཐམས་ཅད་དང་
ཐ་དད་དུ་འགྱུར་ཞིང་འགྱེས་ཏེ་འབྱེ་བར་འགྱུར་འབྲལ་བར་འགྱུར་རོ། །དགེ་སློང་དག་གང་སྐྱེས་པ། བྱུང་བ་བརྟགས་པ། འདུས་བྱས་པ། མངོན་པར་བསམས་པ། རྟེན་ཅིང་འབྲེལ་བར་བྱུང་བ། རབ་ཏུ་འཇིག་པའི་ཆོས་ཅན་འདི་དག་འཇིག་པར་མི་འགྱུར་བའི་གནས་ག་ལ་ཡོད་དེ་དེ་ནི་
གནས་མེད་དོ། །དགེ་སློང་དག་ཇི་ལྟར་རིང་དུ་གནས་ཀྱང་ཚེ་ཕྱི་མར་ངེས་པར་འགྲོ་དགོས་སོ། །དགེ་སློང་དག་སྐྱེས་པ་ནི་མི་འཆི་བ་མེད་དོ། །འདུ་བྱེད་དུ་གྱུར་པ་རྣམས་ལ་ནི་རྟག་པའམ། བརྟན་པའམ། ཐེར་ཟུག་གམ། མི་འགྱུར་བའི་ཆོས་ཅན་མ་ཡིན་ནོ། །དགེ་སློང་དག་སྐྱེས་པ་

དང་འཆི་བ་ནི་སྡུག་བསྔལ་ལོ། །དགེ་སློང་དག་གང་དག་ཡོངས་སུ་མྱ་ངན་ལས་འདས་པ་དེ་དག་ནི་བདེ་བའོ། །མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་བརྩོན་པ་གྱིས་ཤིག །འབད་པ་གྱིས་ཤིག །བརྩལ་
བགྱིས་ཤིག །དགེ་སློང་དག་སངས་རྒྱས་བཅོམ་ལྡན་འདས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། གང་དེ་ལས་གཞན་པའི་དགེ་བའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ནི་བག་ཡོད་པས་ཐོབ་ཀྱིས། བག་ཡོད་པ་ལ་བརྩོན་པར་གྱིས་ཤིག །དགེ་སློང་དག་འདི་ནི་ཁྱེད་ལ་རྗེས་
སུ་བསྟན་པའོ། །དེའི་ཚེ་འཁོར་དེ་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་
བ་ཇི་སྙེད་འདུས་པར་གྱུར་པ་དེ་དག་ཐམས་ཅད་ཀྱིས་བཅོམ་ལྡན་འདས་ལ་གདམས་པ་དང་རྗེས་སུ་བསྟན་པ་འདི་ལྟ་བུ་འདི་ཐོས་ནས་སྡུག་བསྔལ་ཞིང་ཡིད་མི་བདེ་སྟེ། སྡུག་བསྔལ་དང་ཡིད་མི་བདེ་བ་མཆོག་དང་ལྡན་པར་གྱུར། མྱ་ངན་གྱི་ཟུག་རྔུ་ཆེན་པོས་ཟུག་པར་གྱུར་ནས་ངུ་ཞིང་མཆི་མ་བྱུང་བར་
གྱུར་ཏེ། བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །བདེ་བར་གཤེགས་པ་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མི་སྣང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མེད་ཅིང་ལོང་བར་འགྱུར་བ་ཧ་ཅང་མྱུར་
ཆེས་སོ། །སེམས་ཅན་རིན་པོ་ཆེ་འདི་ལྟ་བུ་དང་འབྲལ་བ་དང་། འབྱེ་བ་དང་། ཐ་དད་དུ་འགྱུར་བ་ཧ་ཅང་མྱུར་ཆེས་སོ་ཞེས་ཆོ་ངེ་ཆེན་པོ་བཏོན་ནོ། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ལ་མིག་མི་འཛུམས་པར་ལྟ་སྟེ་བལྟས་ཤིང་བརྟགས་ནས་བཅོམ་ལྡན་འདས་ལས་
ཚིག་དེ་སྐད་ཐོས་པ་དང་ངུ་ཞིང་སྨྲེ་སྔགས་འདོན་ཏེ། ཇི་ལྟར་ལངས་པ་ཉིད་ལས་ཤིང་བཅད་པ་བསྒྱེལ་བ་བཞིན་དུ་ས་ལ་འགྱེལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཐོང་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་

དགའ་བོ་སྡུག་པ་དང་ཡིད་དུ་འོང་བ་ཐམས་ཅད་དང་ཐ་དད་དུ་འགྱུར་ཞིང་འགྱེས་ཏེ་འབྱེ་བ་དང་འབྲལ་བར་འགྱུར་རོ། །གང་བྱུང་བ། འདུས་བྱས་པ། མངོན་པར་བསམས་པ། རྟེན་ཅིང་འབྲེལ་བར་འབྱུང་བ་དེ་དག་མི་འཇིག་པ་དེ་ག་ལ་ཡོད་དེ་དེ་ནི་གནས་མེད་དོ་ཞེས་ངས་
ཐོག་མ་ནས་མ་བསྟན་ཏམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །གང་སེམས་ཅན་རིན་པོ་ཆེ་སེམས་ཅན་ཁ་ལོ་སྒྱུར་བ། སེམས་ཅན་ཡོངས་སུ་འདྲེན་པ། སེམས་ཅན་ཐམས་ཅད་ལ་གཅེས་པ།
སེམས་ཅན་ཐམས་ཅད་རྟོན་པ། སྟོན་པ་དེ་ལྟ་བུ་དང་བདག་འགྱེས་ཤིང་འབྱེ་འབྲལ་ན། བཅོམ་ལྡན་འདས་ཅིའི་སླད་དུ་མྱ་ངན་མི་བགྱིད། བདེ་བར་གཤེགས་པ་བདག་ཅིའི་སླད་དུ་སྨྲེ་སྔགས་མི་འདོན། བཅོམ་ལྡན་འདས་འདི་ལྟར་འཇིག་རྟེན་གྱི་མགོན་པོ་ཐུགས་རྗེ་ཆེན་པོ་འཇིག་རྟེན་
ཐམས་ཅད་ལ་ཕན་ཞིང་ཐུགས་བརྩེ་བ་མིག་རིན་པོ་ཆེ་སྣང་བ་མཛད་པ་དང་བདག་འབྲལ་བར་འགྱུར་ན་ཅིའི་སླད་དུ་བདག་མྱ་ངན་མི་བགྱིད། སྨྲེ་སྔགས་མི་འདོན། བཅོམ་ལྡན་འདས་བདག་གི་སྙིང་ཚལ་བ་བརྒྱར་མ་གས་པ་ངོ་མཚར་ཏོ། །བཅོམ་ལྡན་འདས་བདག་མཆིས་པ་འདི་ཉིད་
དུ་འགུམ་པའི་དུས་མ་བགྱིས་པ་ངོ་མཚར་ཏོ། །བཅོམ་ལྡན་འདས་གང་བདག་མཆིས་པ་འདི་ཉིད་དུ་འདི་ལྟ་སྟེ་དཔེར་ན། ཕུབ་མ་སྤར་གང་བཞིན་དུ་རྣམ་པ་དུ་མར་མ་ཞིགས་པ་ངོ་མཚར་ཏོ། །བཅོམ་ལྡན་འདས་བདག་ནི་བཅོམ་ལྡན་འདས་ཀྱི་བྱིན་གྱི་རླབས་ཀྱིས་འགུམ་པའི་དུས་མ་བགྱིས་
སོ་སྙམ་བགྱིད་དོ། །བཅོམ་ལྡན་འདས་འདི་ལྟར་སེམས་ཅན་རིན་པོ་ཆེ་འཇིག་རྟེན་ཡོངས་སུ་འདྲེན་པ། འཇིག་རྟེན་ལ་ཕན་ཞིང་ཐུགས་བརྩེ་བ་དེ་ལྟ་བུ་སང་སླན་ཆད་བཞུགས་པ་མི་མཐོང་ན་ཅིའི་སླད་དུ་མྱ་ངན་མི་བགྱིད། སྨྲེ་སྔགས་མི་འདོན། དེ་ནས་སངས་རྒྱས་བཅོམ་ལྡན་
འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ལ་ང་སྡུག་གམ། གསོལ་པ། བཅོམ་ལྡན་འདས་བདག་ལ་སྡུག་གོ། །བདེ་བར་གཤེགས་པ་བདག་ལ་སྡུག་གོ། །བཀའ་སྩལ་པ། ཀུན་དགའ་བོ་ཁྱོད་ལ་ང་ཇི་ཙམ་དུ་སྡུག །གསོལ་

པ། བཅོམ་ལྡན་འདས་དག་གི་ལས་ཀྱིས་བསྟན་པར་སླ་བ་མ་ལགས་པ་དང་། བཅོམ་ལྡན་འདས་དཔེས་བསྟན་པར་ཡང་སླ་བ་མ་ལགས་པ་དེ་ཙམ་དུ་བཅོམ་ལྡན་འདས་བདག་ལ་སྡུག་གོ། །བདེ་བར་གཤེགས་པ་བདག་ལ་སྡུག་གོ། །བཅོམ་ལྡན་འདས་བདག་གི་ལུས་དང་སྲོག་བཅོམ་ལྡན་
འདས་ཀྱི་དོན་དུ་ཡོངས་སུ་བཏང་ཡང་བདག་མི་དགའ་བར་མི་འགྱུར་བ་དེ་ལྟ་བུར་བཅོམ་ལྡན་འདས་བདག་ལ་སྡུག་གོ། །བདེ་བར་གཤེགས་པ་བདག་ལ་སྡུག་གོ། །བཅོམ་ལྡན་འདས་བདག་ལ་དེ་ལྟར་སྡུག་པ་དང་བདེ་བར་གཤེགས་པ་བདག་ལ་དེ་ལྟར་སྡུག་པར་བཅོམ་ལྡན་འདས་དེ་བཞིན་གཤེགས་
པ་ཉིད་ཀྱིས་མཁྱེན་ནོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་གལ་ཏེ་ཁྱོད་ལ་ང་སྡུག་ན་ལག་པ་གཡས་པ་ང་ལ་བྱིན་དེ་ནས་ཚེ་དང་ལྡན་པ་ཀུན་དགའ་བོས་ལག་པ་གཡས་པ་ཕུལ་ལོ། །
དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོའི་ལག་པ་ཉིད་ཀྱི་ཕྱག་གཡས་པ་གསེར་གྱི་ཁ་དོག་ཅན་རྒྱ་སྐྱེགས་ཀྱི་ཁུ་བ་རབ་ཏུ་བཟང་པོས་ཁ་བསྒྱུར་བ་ལྟ་བུར་འཇམ་ཞིང་རབ་ཏུ་གཞོན་པས་བཟུང་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་
བོ་གལ་ཏེ་ཁྱོད་ལ་ང་སྡུག་ན་སྡུག་པའི་བྱ་བ་བྱོས། དེ་ལ་ང་ལ་སྡུག་པར་འཛིན་པའི་བྱ་བ་གང་ཞེ་ན། ཀུན་དགའ་བོ་བསྐལ་པ་གྲངས་མེད་པ་བྱེ་བར་བསྒྲུབས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། བླ་ན་མེད་པའི་ཆོས་དཀོན་མཆོག་གི་མཛོད་འདི་ཁྱོད་ལ་བཅོལ་ཅིང་
གཏད་ཀྱིས་ཅི་ནས་ཀྱང་ང་དང་འཐུན་པར་གྱིས་ཤིག །འཐུན་པར་བྱས་ནས་ཀྱང་ཡངས་ཤིང་རྒྱས་པར་གྱིས་ཤིག །རྒྱུན་མ་ཆད་པར་གྱིས་ཤིག །སྐྱེས་བུ་ཐ་མ་པར་མ་གྱུར་ཅིག །ཀུན་དགའ་བོ་དེ་བཞིན་གཤེགས་པས་གསུངས་པའི་ཆོས་འདུལ་བ་འདི་རྣམ་པར་འཕེལ་བ་དང་།
ཡོངས་སུ་མི་ཉམས་པ་དང་། ཀུན་ཏུ་སྲུང་ཞིང་སྦ་བ་དང་། ཆུད་མི་ཟོས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱ་སྟེ་འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་རོ། །ཀུན་དགའ་བོ་འདི་ལྟ་སྟེ་དཔེར་ན། ཚོང་དཔོན་ནམ་ཁྱིམ་བདག་ཕྱུག་པོ་ནོར་ཆེ་བ། ལོངས་

སྤྱོད་ཆེ་བ། བང་མཛོད་མང་བ། བདག་དབང་བ་མང་བ། རྫས་དང་ཡོ་བྱད་མང་བ། རིགས་ཕུན་སུམ་ཚོགས་པ། རུས་ཕུན་སུམ་ཚོགས་པ། རིགས་བཙུན་པའི་རིགས་ལས་བུ་གཅིག་པ་ཞིག་སྐྱེས་ཏེ། དེ་སྐྱེས་མ་ཐག་ཏུ་དབང་པོ་རྣམས་རྒྱས་པར་བྱ་བའི་ཕྱིར་ཡི་གེ་དང་།
གྲངས་དང་རྩིས་དང་། ལག་རྩིས་དང་། དེ་ལས་གཞན་པའི་བཟོ་དཀའ་བ་དང་། སྒྱུ་རྩལ་དཀའ་བ་དག་སློབ་བོ། །དེ་ལ་བསླབས་ནས་ཐ་མར་ཚོང་དཔོན་ནམ་ཁྱིམ་བདག་དེ་འདི་སྐད་དུ་བུ་ཁྱོད་ལ་ངས་ཇི་ཙམ་དུ་བྱ་བ་དེ་དག་ངས་བྱས་ཟིན། ཡི་གེ་དང་གྲངས་དང་རྩིས་དང་ལག་རྩིས་དང་བཟོ་དཀའ་
བ་དང་། སྒྱུ་རྩལ་དཀའ་བ་དག་ཀྱང་ལོབས་ཟིན་ཏེ་འདི་ནི་ངའི་དུས་ཐ་མ་ཡིན་པས་བདག་དབང་བ་ཐམས་ཅད་ངས་ཁྱོད་ལ་གཏད་ཀྱིས་གནས་གསུམ་ལ་སློབ་ཅིང་ཚོང་དཔོན་གྱི་ཁྱིམ་འདི་ན་གནས་པར་བྱོས་ཤིག །གསུམ་གང་ཞེ་ན། འདུན་པ་དང་། བརྩོན་འགྲུས་དང་། བག་ཡོད་
པའོ་ཞེས་སྨྲས་ཏེ། དེ་ལྟར་ཚོང་དཔོན་ནམ་ཁྱིམ་བདག་དེས་བུ་གཅིག་པ་དེ་ལ་ཤིན་ཏུ་ལེགས་པར་གཏམས་ནས་འཆི་བའི་དུས་བྱས་ལ་དེའི་བུ་གཅིག་པ་དེ་བག་མེད་པར་སྤྱོད་པས་ལོངས་སྤྱོད་མ་རྙེད་པ་ནི་མི་རྙེད། ཕ་མེས་ཀྱི་ལོངས་སྤྱོད་རྙེད་པ་དག་ནི་ཡོངས་སུ་ཟད་ཅིང་མེད་པར་གྱུར་ན།
ཀུན་དགའ་བོ་དེ་ཇི་སྙམ་དུ་སེམས། ཚོང་དཔོན་གྱི་བུའམ། ཁྱིམ་བདག་གི་བུ་དེས་ཕའི་ལུང་བཞིན་དུ་བྱས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། ཀུན་དགའ་བོ་ཕ་དེས་བུ་དེ་ལ་བུའི་བྱ་བ་ཅུང་ཟད་བྱས་
སམ། གསོལ་པ། བཅོམ་ལྡན་འདས་བགྱིས་སོ། །བདེ་བར་གཤེགས་པ་བགྱིས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་དེ་བཞིན་གཤེགས་པ་ཡང་འཇིག་རྟེན་ཐམས་ཅད་ཀྱི་ཡབ་སྟེ་ཁྱེད་ལ་བུ་གཅིག་བཞིན་དུ་དབུགས་འབྱིན་ཏོ། །ཀུན་དགའ་བོ་འདི་ནི་ངའི་དུས་ཐ་
མ་སྟེ། འདི་ནི་ངའི་རྗེས་སུ་བསྟན་པ་ཐ་མ་ཡིན་གྱིས་ཅི་ནས་ཀྱང་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་ངའི་ཆོས་དཀོན་མཆོག་གི་མཛོད་དང་། ཆོས་དཀོན་མཆོག་གི་སྣོད་དང་། ཆོས་ཀྱི་ནོར་བླ་ན་མེད་པ་འདི་གནས་གསུམ་གྱིས་བཞག་ནས་གནས་པར་གྱིས་

ཤིག །གསུམ་གང་ཞེ་ན། འདུན་པ་དང་། བརྩོན་འགྲུས་དང་། བག་ཡོད་པའོ། །ཁྱེད་གནས་འདི་གསུམ་གྱིས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པའི་ཆོས་དཀོན་མཆོག་གི་མཛོད་འདི་ལ་གནས་ན་དགེ་བའི་རྩ་བ་མ་ཐོབ་པ་རྣམས་ཐོབ་པར་འགྱུར་རོ། །
དགེ་བའི་ཆོས་ཐོབ་པ་རྣམས་ཡོངས་སུ་མི་ཉམས་པར་འགྱུར་རོ། །གལ་ཏེ་ཁྱེད་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལ་གནས་གསུམ་གྱིས་མི་གནས་ན་དགེ་བའི་ཆོས་མ་ཐོབ་པ་རྣམས་ཁྱེད་ཀྱིས་ཐོབ་པར་མི་འགྱུར་ལ་
དགེ་བའི་ཆོས་ཐོབ་པ་རྣམས་ཀྱང་ཡོངས་སུ་ཉམས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ང་འཇིག་རྟེན་གྱི་ཡབ། འཇིག་རྟེན་གྱི་མགོན་པོ། དོན་བཞེད་པ། ཕན་པར་བཞེད་པ། བདེ་བར་བཞེད་པ། གྲུབ་པ་དང་བདེ་བ་བཞེད་པ། ཕན་བཞེད་པ། ཐུགས་བརྩེ་བ་
ཅན། ཐུགས་རྗེ་དང་ལྡན་པས་གང་བྱ་བ་དེ་ནི་ངས་བྱས་ཟིན་གྱིས་ད་ཁྱོད་ཀྱིས་བྱོས་ཤིག །ཀུན་དགའ་བོ་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ནི་གནས་གསུམ་གྱིས་མེད་པར་འགྱུར་རོ། །གསུམ་གང་ཞེ་ན།
མ་དད་པ་དང་། མི་སྒྲུབ་པ་དང་། མི་སྟོན་པའོ། །ཀུན་དགའ་བོ་དེ་བས་ན་དམ་པའི་ཆོས་དཀོན་མཆོག་གི་མཛོད་འདི་བསྲུང་བའི་ཕྱིར་མངོན་པར་དད་པ་དང་། བསྒྲུབ་པ་དང་། བསྟན་པ་ལ་འདུན་པ་དང་། བརྩོན་འགྲུས་དང་། བག་ཡོད་པ་ལ་བརྩོན་པར་གྱིས་ཤིག །དེ་ལྟར་བྱས་ན་
ཆོས་ཀྱི་རྗེ་འཇིག་རྟེན་གྱི་ཡབ་ངའི་བྱ་བ་ཁྱེད་བུ་རྣམས་ཀྱིས་བྱས་པར་འགྱུར་རོ། །ཀུན་དགའ་བོ་དེ་བས་ན་བླ་ན་མེད་པའི་ཆོས་དཀོན་མཆོག་གི་མཛོད་འདི་རྒྱ་ཆེར་ཡོངས་སུ་གཏད་པའི་ཕྱིར་ཁྱོད་ལ་དཔེ་བསྟན་པར་བྱ་སྟེ། འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་
ཏེ། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བདག་ཅག་གི་དོན་དུ་ཡོངས་སུ་མྱ་ངན་ལས་འདའ་བའི་ཚེ་ཕྱག་གཡས་པས་ཚེ་དང་ལྡན་པ་ཀུན་དགའ་བོའི་ལག་པ་ནས་བཟུང་སྟེ་བསྐལ་པ་གྲངས་མེད་པ་བྱེ་བ་ཁྲག་

ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡོངས་སུ་གཏད་དོ་སྙམ་ནས་དེ་དག་རྒྱ་ཆེར་ཡོངས་སུ་དགའ་བ་དང་མགུ་བར་འགྱུར་རོ། །ཀུན་དགའ་བོ་འདི་ལྟ་སྟེ་དཔེར་ན། དེད་དཔོན་བྱེས་སུ་སོང་བས་གང་བདག་གི་བྱ་བ་ཅུང་ཟད་ཅི་
ཡོད་པ་དང་། འདྲོན་པ་ཐམས་ཅད་ཀྱི་གང་བྱ་བ་ཅུང་ཟད་ཅི་ཡོད་པ་དེ་དག་བྱས་ཟིན་པར་གྱུར་ན་ཀུན་དགའ་བོ་དེ་ཇི་སྙམ་དུ་སེམས། དེད་དཔོན་དེ་བདག་གི་ཁྱིམ་དུ་འོང་ངམ། འོན་ཏེ་བྱེས་དེ་ཉིད་ན་འདུག་གམ། གསོལ་པ། བཅོམ་ལྡན་འདས་སླར་ཁྱིམ་དུ་མཆིའི་མི་མཆི་བ་མ་མཆིས་སོ། །ཀུན་
དགའ་བོ་དེ་བཞིན་དུ་དེ་བཞིན་གཤེགས་པ་འཇིག་རྟེན་གྱི་ཡབ། འཇིག་རྟེན་གྱི་མགོན་པོ། འཇིག་རྟེན་གྱི་ཡོངས་སུ་འདྲེན་པ། དེད་དཔོན་ཆེན་པོས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སངས་རྒྱས་ཀྱི་ཡེ་ཤེས་ཀྱིས་གང་བྱ་བ་དེ་དག་
ཐམས་ཅད་བྱས་ཟིན་ཏེ་དེ་ལ་སངས་རྒྱས་ཀྱི་བྱ་བ་གང་ཕྱིས་བྱ་དགོས་པ་ཅུང་ཟད་ཀྱང་མེད་དོ། །ད་ལྟ་སངས་རྒྱས་ཀྱིས་གདུལ་བའི་སེམས་ཅན་གང་མ་དུལ་བའམ་མ་ཞི་བ་འགའ་ཡང་མེད་དོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་
ནི་གནས་གསུམ་ཡོངས་སུ་མ་རྫོགས་ཡོངས་སུ་མ་བརྙེས་པར་ཡོངས་སུ་མྱ་ངན་ལས་མི་འདའི། གང་གི་ཚེ་གནས་དེ་གསུམ་མཛད་ཅིང་ཡོངས་སུ་རྫོགས་ལ་ཡོངས་སུ་བརྙེས་པར་གྱུར་པ་དེའི་ཚེ་ན་གདོད་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ། །གསུམ་གང་ཞེ་ན། བྱང་ཆུབ་
སེམས་དཔའ་གང་དེ་བཞིན་གཤེགས་པའི་བསྟན་པ་ནུབ་པའི་འོག་ཏུ་བསྐལ་པའམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་བརྒྱ་སྟོང་ངམ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ན་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཕྱིར་མི་ལྡོག་པའི་
ཆོས་ལ་གནས་པར་མ་གྱུར་ལ། གལ་ཏེ་སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱིར་མི་ལྡོག་པ་ཉིད་དུ་དབང་པོ་ཡོངས་སུ་མ་སྨིན་པ་གཟིགས་ནས་དེའི་ཚེ་གང་ཟག་དེ་ཡོངས་སུ་སྨིན་པར་བྱ་བའི་ཕྱིར་བྱང་ཆུབ་སེམས་དཔའ་ཕྱིར་མི་ལྡོག་པའི་ཆོས་ཉིད་མ་ཐོབ་ཀྱི་བར་དུ་རྫུ་འཕྲུལ་

གྱི་སྐུ་བྱིན་གྱིས་རློབ་སྟེ། དེའི་ཚེ་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ནས་གདོད་དེ་བཞིན་གཤེགས་པ་རྣམས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའོ། །དེ་བས་ན་ངས་ད་ནི་བྱང་ཆུབ་སེམས་དཔའ་བྱམས་པ་
ལ་སོགས་པ་བྱེ་བ་ཁྲག་ཁྲིག་བརྒྱ་སྟོང་མང་པོ་དག་ཕྱིར་མི་ལྡོག་པའི་ཆོས་ཉིད་ལ་ལུང་བསྟན་ཅིང་བཀོད་དེ་ངའི་བྱ་བ་འདི་དག་སེམས་ཅན་རྣམས་ལ་ཐུགས་བརྩེ་བའི་ཕྱིར་བྱས་ཟིན་ནོ། །ཀུན་དགའ་བོ་གཞན་ཡང་སངས་རྒྱས་ཀྱིས་མངོན་དུ་འདུལ་བ་ཐམས་ཅད་དུལ་བར་མ་གྱུར་གྱི་བར་དུ་དེ་
བཞིན་གཤེགས་པ་ཡོངས་སུ་མྱ་ངན་ལས་མི་འདའོ། །གང་གི་ཚེ་སངས་རྒྱས་བཅོམ་ལྡན་འདས་བསྐལ་པ་སྟོང་ཕྲག་མང་པོ་ཞིག་ན་སངས་རྒྱས་བཅོམ་ལྡན་འདས་གཞན་རྣམས་འབྱུང་བ་དང་། འཇིག་རྟེན་གྱི་ཁམས་དེའམ། གཞན་དག་ཏུ་འགྲོ་བ་ལྔའི་ནང་ན་གང་ཡང་རུང་བའི་
འགྲོ་བར་སྐྱེས་པའི་གང་ཟག་ཀྱང་སངས་རྒྱས་ཀྱིས་འདུལ་བར་མཁྱེན་ལ། གང་ཟག་དེ་ལོ་གཅིག་གམ་ལོ་བརྒྱའམ་ལོ་སྟོང་ངམ་ལོ་བྱེ་བ་ཁྲག་ཁྲིག་བརྒྱ་སྟོང་ངམ་བསྐལ་པ་ལས་ལྷག་པ་ན་གང་ཟག་དེ་ངས་འདུལ་བར་འགྱུར་གྱི་ཉན་ཐོས་ཀྱིས་མ་ཡིན། རང་སངས་རྒྱས་ཀྱིས་མ་ཡིན་པར་
མཁྱེན་པར་འགྱུར་བ་དེའི་ཚེ་སངས་རྒྱས་ཀྱི་ཡེ་ཤེས་ཀྱིས་མཁྱེན་ནས་གང་ཟག་དེ་ལ་ཐུགས་བརྩེ་བའི་ཕྱིར། གང་ཟག་དེ་ཡོངས་སུ་སྨིན་པར་གྱུར་གྱི་བར་དུ་རྫུ་འཕྲུལ་གྱི་སྐུ་བྱིན་གྱིས་བརླབས་ནས་དེའི་འོག་ཏུ་གདོད་འདུལ་ཏེ། ཀུན་དགའ་བོ་འདི་ནི་གང་བྱས་ནས་ཕྱིས་སངས་རྒྱས་བཅོམ་
ལྡན་འདས་རྣམས་ཡོངས་སུ་མྱ་ངན་ལས་འདའ་བར་འགྱུར་བ་དེ་བཞིན་གཤེགས་པ་རྣམས་ཀྱི་མཛད་པ་གཉིས་པའོ། །ཀུན་དགའ་བོ་གཞན་ཡང་དེ་བཞིན་གཤེགས་པའི་མདོ་སྡེའམ། འདུལ་བའམ། མ་མོ་སངས་རྒྱས་ཀྱི་བསྟན་པའི་གསུང་རབ་ལས་དགོས་པ་འགའ་ཞིག་
མངོན་སུམ་དུ་ཞུ་བའམ་བྱ་བ་ཡོད་ལ། དེ་ཡང་ཉན་ཐོས་སློབ་པའམ་མི་སློབ་པ་དག་གིས་ཀྱང་ཤེས་པའམ། ཡང་དག་པར་བསྡུ་བའམ། བསྟན་པར་མི་ནུས་ལ། གལ་ཏེ་སངས་རྒྱས་རྣམས་ཀྱི་དགེ་སློང་གི་དགེ་འདུན་དེ་ལས་དགེ་སློང་གཅིག་ཙམ་ཡང་དེ་བཞིན་གཤེགས་པ་ལ་

གནོད་པར་འགྱུར་དུ་འོང་ངོ་ཞེས་དེ་བཞིན་གཤེགས་པ་ལ་གུས་པར་ཞུ་ནུས་པ་མེད་པར་གྱུར་པ་དེ་ན་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་སངས་རྒྱས་ཀྱི་ཡེ་ཤེས་ཀྱིས་དགེ་སློང་སྤྲུལ་པ་སྤྲུལ་པར་མཛད་དེ། སྤྲུལ་པ་དེ་དེ་བཞིན་གཤེགས་པ་ལ་
བཅོམ་ལྡན་འདས་བགྱི་བ་འདི་ལྟ་བུ་ཞིག་འདི་ལྟར་བྱུང་ན་འདི་ཇི་ལྟར་བགྱི་ཞེས་ཡོངས་སུ་ཞུའོ། །དེ་བཞིན་གཤེགས་པས་སྤྲུལ་པ་དེ་ལ། དགེ་སློང་བྱ་བ་དེ་འདི་ལྟར་བྱོས་ཤིག །འདི་བྱས་ནས་འདི་ལྟར་བྱོས་ཤིག་ཅེས་དེ་སྐད་ཅེས་བཀའ་སྩལ་ཏོ། །གང་ཡོངས་སུ་མ་རྫོགས་པར་
དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་བའི་གནས་གསུམ་པོ་དེ་དག་དེ་བཞིན་གཤེགས་པས་ངེས་པར་མཛད་དགོས་པ་དེ་དག་ཐམས་ཅད་ངས་བྱས་ཤིང་ཡོངས་སུ་རྫོགས་ཏེ། འདི་ལ་ངས་ཉན་ཐོས་རྣམས་ལ་བསླབ་པའི་འདུལ་བ་དང་སོ་སོར་ཐར་པ་ནི་བཅས།
ངས་ལམ་ནི་བསྟན། དེ་བྱེད་པ་ཡང་དག་པར་སྡུག་བསྔལ་ཟད་པར་འགྱུར་བ་ངེས་པར་འབྱིན་པའི་ལམ་ནི་བསྙད་ཟིན་ཏེ་ཕྱིས་བྱ་དགོས་པའི་ལྷག་མ་ཅི་ཡང་མེད་དོ། །ཀུན་དགའ་བོ་དེ་ལྟ་བས་ན་ཁྱེད་ཀྱིས་མ་བཅས་པ་ནི་མི་བཅའ། བཅས་པ་ནི་མི་གཞིག་སྟེ། ཀུན་དགའ་བོ་
བསླབ་པ་ཇི་ལྟར་བཅས་པ་བཞིན་དུ་སློབས་ཤིག །ཀུན་དགའ་བོ་འདི་ནི་ཁྱེད་ཀྱིས་བྱ་བ་ཡིན་གྱིས་བག་ཡོད་པ་དང་། བག་ཡོད་པ་ལ་དགའ་བར་གྱིས་ཤིག །འདི་ནི་ངའི་རྗེས་སུ་བསྟན་པ་ཡིན་གྱིས་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་དགའ་བོ་དོ་མོད་
ཀྱི་ཐུན་ཐ་མ་ལ་ང་ཡོངས་སུ་མྱ་ངན་ལས་འདའ་སྟེ། ཀུན་དགའ་བོ་རང་གི་ཡུལ་དང་། རང་གི་སྤྱོད་ཡུལ་དུ་འགྲོའོ། །སླར་འཇིག་རྟེན་འདིར་མི་འོང་ངོ་འཇིག་རྟེན་ཕ་རོལ་ཏུ་ཡང་མི་འགྲོའོ། །ཕྱིན་ཅད་ཁྱེད་ཀྱིས་ང་མི་མཐོང་ངས་ཀྱང་ཁྱེད་མི་མཐོང་ངོ་། །ཀུན་དགའ་བོ་ཕུང་པོའི་
ལྷག་མ་མེད་པར་མྱ་ངན་ལས་འདའ་བའི་དབྱིངས་ཞི་བ། བསིལ་བ་རྡུལ་མེད་པ། རྡུལ་དང་བྲལ་བ། སྡུག་བསྔལ་ཐམས་ཅད་རྣམ་པར་ཞི་བ། ཡིད་དུ་འོང་བའི་མྱ་ངན་ལས་འདས་པ། གང་ན་སྐྱེ་བ་ཡང་མེད། རྒ་བ་ཡང་མེད། འཆི་བ་ཡང་མེད། མྱ་ངན་ཡང་མེད། སྨྲེ་སྔགས་

འདོན་པ་ཡང་མེད། སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་ཡང་མེད། གནོད་པ་ཡང་མེད། མི་མཛའ་བ་དང་ཕྲད་པ་ཡང་མེད། མཛའ་བ་དང་འབྲལ་བ་ཡང་མེད་ཅིང་གང་དུ་སངས་རྒྱས་དང་སངས་རྒྱས་ཀྱི་ཉན་ཐོས་ཀྱི་ཚོགས་གང་གཱའི་ཀླུང་གི་བྱེ་མ་སྙེད་བཞུད་ཟིན་པ་དང་
བཞུད་པ་དང་བཞུད་པར་འགྱུར་བ་དེ་ལ་ང་དགའོ། །ཀུན་དགའ་བོ་སེམས་ཅན་རྣམས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་མི་དགའ་བ་དང་། དེ་དག་མྱ་ངན་ལས་འདས་པ་ཐོབ་པའི་ས་བོན་དུ་འགྱུར་བ་ཐར་པའི་རྗེས་སུ་འཐུན་པ་དང་ལྡན་པའི་སེམས་བསྐྱེད་པ་
གཅིག་ཀྱང་མི་སྐྱེད་པ་ལ་ལྟོས། ཀུན་དགའ་བོ་བྱིས་པ་སོ་སོའི་སྐྱེ་བོ་ལ་སྟོབས་ག་ལ་ཡོད། ཀུན་དགའ་བོ་བྱིས་པ་སོ་སོའི་སྐྱེ་བོ་ཐམས་ཅད་ནི་སྟོབས་མེད་ཅིང་སྟོབས་ཆུང་བ་སྟེ། ཀུན་དགའ་བོ་བྱིས་པ་སོ་སོའི་སྐྱེ་བོ་འདི་དག་ཐམས་ཅད་ནི་རྩྭ་དང་ཕུབ་མ་དང་སོག་མ་དང་མཚུངས་
པར་སྣང་ངོ་། །ཀུན་དགའ་བོ་བྱིས་པ་སོ་སོའི་སྐྱེ་བོ་དག་ནི་མྱ་ངན་ལས་འདས་པའི་ས་བོན་དུ་འགྱུར་བ་ཐར་པའི་རྗེས་སུ་འཐུན་པ་དང་ལྡན་པའི་སེམས་བསྐྱེད་པ་གཅིག་ཀྱང་མི་བསྐྱེད་པ་དག་སྟེ་དེ་དག་ལ་སྟོབས་ག་ལ་ཡོད། དབུགས་དབྱུང་བ་ལྟ་ག་ལ་ཡོད། ཀུན་དགའ་བོ་བྱིས་པ་
སོ་སོའི་སྐྱེ་བོ་རྣམས་ལ་ཚུལ་ཁྲིམས་ཀྱི་སྟོབས་མེད། ཏིང་ངེ་འཛིན་གྱི་སྟོབས་མེད། ཤེས་རབ་ཀྱི་སྟོབས་མེད་དོ། །ཀུན་དགའ་བོ་ང་ནི་སངས་རྒྱས་ཀྱི་སྟོབས་དཔག་ཏུ་མེད་པ་དང་། གྲངས་མེད་པ་དང་། བསམ་གྱིས་མི་ཁྱབ་པ་དང་། གཞལ་དུ་མེད་པ་དང་། ཚད་མེད་པ་དང་
ལྡན་ཞིང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་སྟོབས་རྣམས་དང་ལྡན་ལ། ངོ་ཚ་ཤེས་པའི་སྟོབས་དང་། ཁྲེལ་ཡོད་པའི་སྟོབས་དང་། ཡང་དག་པར་འགྲུབ་པའི་སྟོབས་དང་། ཡེ་ཤེས་ཀྱི་སྟོབས་དང་།
སྤོང་བའི་སྟོབས་དང་། བསོད་ནམས་ཀྱི་སྟོབས་དང་། ཤེས་རབ་ཀྱི་སྟོབས་དང་། དབང་པོའི་སྟོབས་དང་། བྱིན་གྱི་རླབས་ཀྱི་སྟོབས་དང་། སྟོབས་བཅུ་དང་ལྡན་པ་སྟེ། ཀུན་དགའ་བོ་འོན་ཀྱང་ང་མྱ་ངན་ལས་འདས་པའི་དབྱིངས་དེ་ལ་དགའོ། །དེ་ལ་བྱིས་པ་མུན་ནག་གི་སྒོར་གྱུར་

པ། མི་ཤེས་པའི་ཆོས་དང་ལྡན་པ། འཁོར་བ་ན་རྒྱུ་བ། བཅིང་བས་བཅིངས་པ་ལ་དགའ་བ་དེ་དག་ནི་མྱ་ངན་ལས་འདས་པའི་ས་བོན་དུ་འགྱུར་བ་རྗེས་སུ་འཐུན་པའི་སེམས་གཅིག་ཀྱང་མི་སྐྱེད་དོ། །ཀུན་དགའ་བོ་ཕྱི་མའི་དུས་ཕྱི་མའི་ཚེ་དེ་བཞིན་གཤེགས་པ་ཡོངས་
སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་བསྟོད་ཅིང་བཞག་སྟེ་བཤད་པ་དེ་དག་དེ་བཞིན་གཤེགས་པ་འདས་པའི་འོག་ཏུ་དེ་དག་དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་ཉན་ནོ། །ཐོས་ནས་གལ་ཏེ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་
འདི་མ་ཐོབ་ཀྱང་ངའི་ཆོས་རིན་པོ་ཆེའི་སྣོད་འདི་ལ་འཇུག་པར་འགྱུར་བ་དག་ཡོད་དེ། ཀུན་དགའ་བོ་དོན་འདི་ཉིད་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་འདྲོན་པ་མང་པོ་དག་འབྲོག་དགོན་པ་ཆེན་པོ་ལས་འདས་ཏེ། ཆོམ་
རྐུན་གྱི་ལམ་འཇིགས་པ་དང་བཅས་པ་ལས་འདས་ནས་འཇིགས་པ་མེད་པའི་གྲོང་ཁྱེར་དུ་ཕྱིན་པ་དེའི་ནང་ནས་མི་གཅིག་ཅིག་འདྲོན་པ་མང་པོ་དེ་དང་བྲལ་ཞིང་འཁྱམས་པར་གྱུར་ལ་དེ་འདྲོན་པ་མང་པོ་དེའི་རྗེས་བཞིན་དུ་འགྲོ་ཞིང་འདྲོན་པ་མང་པོ་ལམ་གང་ནས་དོང་བའི་རྗེས་བཞིན་དུ་སྡུག་བསྔལ་
བ་དང་། ཉོན་མོངས་པ་དང་། ཚེགས་ཆེན་པོས་སོང་ནས་འདྲོན་པ་མང་པོ་དང་ཕྲད་པར་གྱུར་པ་དེ་བཞིན་དུ་ཀུན་དགའ་བོ་གང་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ད་ལྟར་མདོ་སྡེ་འདི་ལྟ་བུ་དག་བཤད་པ་དེ་ལ་མ་འོངས་
པའི་དུས་ན་རིགས་ཀྱི་བུའམ་རིགས་ཀྱི་བུ་མོ་དག་མདོ་སྡེ་འདི་ལྟ་བུ་དག་ཐོས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་འདི་སྒྲས་གོ་བར་འགྱུར་བ་དག་ཡོད་པས་ངས་དམ་པའི་ཆོས་ཀྱི་གྲོང་ཁྱེར་འདི་བཞག་གོ། །དེ་དག་ལྷགས་ནས་ངའི་དམ་པའི་ཆོས་ཀྱི་གྲོང་ཁྱེར་འདིར་
གནས་པར་བྱེད་ཅིང་ངའི་དམ་པའི་ཆོས་ཀྱི་མཛོད་འདི་སྲུང་བར་བྱེད་ཡང་དག་པར་སྟོན་པར་ཡང་བྱེད་དོ། །ཀུན་དགའ་བོ་གང་ཟག་གཅིག་གི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་གཏད་ན་ཡང་ཁྱོད་ཀྱིས་ལེགས་པར་གཟུང་དགོས་ན་སེམས་ཅན་བརྒྱ་སྟོང་དཔག་ཏུ་མེད་པ་

རྣམས་ཀྱི་ཕྱིར་གཏད་པ་ལྟ་ཅི་སྨོས། ཀུན་དགའ་བོ་དེ་བས་ན་བསྐལ་པ་གྲངས་མེད་པ་བྱེ་བར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་དང་། དམ་པའི་ཆོས་དཀོན་མཆོག་གི་མཛོད་འདི་ཁྱོད་ལ་གཏད་ཀྱིས་ཅི་ནས་ཀྱང་འཁོར་བཞི་པོ་དད་པ་རྣམས་ལ་རྗེས་སུ་འཐུན་
པར་བྱ་བ་དང་། འཇུག་པ་དང་། བཤད་པ་དང་། གདགས་པ་དང་། དགྲོལ་བ་དང་། རྣམ་པར་དབྱེ་བ་དང་། གསལ་བར་བྱོས་ཤིག །སྐྱེས་བུ་ཐ་མ་པར་མ་གྱུར་ཅིག །ཀུན་དགའ་བོ་གང་མདོ་སྡེ་འདི་ལྟ་བུ་དག་མ་ཐོས་པས་ཡོངས་སུ་ཉམས་པར་འགྱུར་བའི་སེམས་ཅན་དག་ཡོད་
དོ། །ཀུན་དགའ་བོ་དེ་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཏེ་དེའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་ཚོང་དཔོན་ནམ་ཁྱིམ་བདག་ཕྱུག་པ། ནོར་ཆེ་བ། ལོངས་སྤྱོད་ཆེ་བ། བདག་དབང་བ་མང་བ། རྫས་དང་ཡོ་བྱད་མང་
བ། ནོར་དང་འབྲུ་མང་བ། བདག་དབང་བའི་སྐྱེ་བོ་མང་བ། མཛོད་དང་བང་བ་མང་བ་ཞིག་ཡོད་པ་དེའི་བུ་གཅིག་པ་ཞིག་བྱེས་སུ་སོང་བར་གྱུར་ལ་ཚོང་དཔོན་ནམ་ཁྱིམ་བདག་དེ་ཡང་ན་ཞིང་མི་བདེ་ལ་ཤིན་ཏུ་སྡུག་བསྔལ་བར་གྱུར་ཏེ་དེ་འཆི་བའི་དུས་ལ་བབ་པའི་ཚེ། ཁྱིམ་བདག་གཞན་ཞིག་ལ་ནོར་
བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། གསེར་དང་། དངུལ་མང་པོ་དང་། རིན་པོ་ཆེ་མང་པོ་རྣམས་བཞག་སྟེ། དེས་རིན་པོ་ཆེ་དེ་དག་བཞག་ནས་ཚོང་དཔོན་ནམ་ཁྱིམ་བདག་དེ་ལ་འདི་སྐད་ཅེས་ཁྱེད་ཤེས་པར་གྱིས་ཤིག །ཁོ་བོའི་བུ་གཅིག་པ་
དེ་ནི་བྱེས་སུ་སོང་། ཁོ་བོ་ནི་ད་ལྟ་ན་ཞིང་མི་བདེ་སྟེ། རིང་པོར་མི་ཐོགས་པར་ཁོ་བོ་འཆི་བའི་དུས་བྱེད་པར་འགྱུར་གྱིས། རིན་པོ་ཆེ་དང་བང་མཛོད་མང་པོ་འདི་དག་བུ་གཅིག་པ་དེའི་ཕྱིར་ཁྱོད་ཀྱི་ལག་ཏུ་གཞག་གོ། །ནམ་བདག་གི་བུ་གཅིག་པ་དེ་བྱེས་དེ་ནས་འོངས་ཏེ། དེ་བག་
ཡོད་ལ་བག་ཡོད་པའི་ཆོས་ལ་གནས་པར་གྱུར་པ་དེ་ན་རིན་པོ་ཆེ་འདི་རྣམས་བྱིན་ཅིག །བྱིན་ནས་ཀྱང་འདི་སྐད་དུ་གཞོན་ནུ་ཁྱོད་ཀྱི་ཕ་འཆི་ཀར་རིན་པོ་ཆེ་མང་པོ་འདི་དག་ཁྱོད་ཀྱི་ཕྱིར་ང་ལ་བཞག་སྟེ་ཁྱོད་ཀྱི་ཕའི་ནོར་གྱི་ཚོགས་འདི་བདག་གི་ལོངས་སྤྱོད་ཡིན་གྱིས་ཁྱེར་ལ་བག་ཡོད་པར་

བསྲུངས་ཏེ་ཅི་ནས་ཀྱང་ཆུད་མ་ཟོས་པར་གྱིས་ཞེས་བསྒོ་ཤིག་ཅེས་སྨྲས་ལ། དེ་ནས་ཚོང་དཔོན་ནམ་ཁྱིམ་བདག་དེས་ཚོང་དཔོན་ཅིག་ཤོས་ལས་རིན་པོ་ཆེའི་མཛོད་མང་པོ་བཞག་པ་བླངས་ནས་ཚོང་དཔོན་གྱི་བུ་བྱེས་ནས་འོངས་པ་ལ་རིན་པོ་ཆེའི་མཛོད་བཞག་པ་དེ་མ་བྱིན་ན་ཀུན་དགའ་
བོ་དེ་ཇི་སྙམ་དུ་སེམས། དེ་ལ་སུས་ཉེས་པར་འགྱུར། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཚོང་དཔོན་དེའི་རིན་པོ་ཆེ་མང་པོ་བཞག་པ་བླངས་ནས་ཚོང་དཔོན་གྱི་བུ་དེ་ལ་མ་སྩལ་བས་
བཞག་པ་འཆང་བའི་ཁྱིམ་བདག་དེས་ནོངས་པར་འགྱུར་རོ། །བཀའ་སྩལ་པ། ཀུན་དགའ་བོ་དོན་དེ་ཤེས་པར་བྱ་བའི་ཕྱིར་ངས་དཔེ་བསྟན་པ་དེ་ལ་དོན་དུ་ལྟ་བ་གང་ཞེ་ན། ཀུན་དགའ་བོ་ཁྱིམ་བདག་ཅེས་བྱ་བ་དེ་ནི་དེ་བཞིན་གཤེགས་པའི་ཚིག་བླ་དགས་སོ། །ཀུན་དགའ་བོ་འཆི་
བའི་དུས་ཀྱི་ཚེ་ཞེས་བྱ་བ་དེ་ནི་དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པའི་དབྱིངས་ཀྱི་ཚིག་བླ་དགས་སོ། །ཀུན་དགའ་བོ་བུ་གཅིག་པ་ཞེས་བྱ་བ་དེ་ནི་མ་འོངས་པའི་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྣམས་ཀྱི་ཚིག་བླ་དགས་སོ། །ཀུན་དགའ་བོ་བྱེས་སུ་སོང་
བ་ཞེས་བྱ་བ་དེ་ནི་འགྲོ་བ་ལྔའི་འཁོར་བར་སྐྱེ་བའི་ཚིག་བླ་དགས་སོ། །ཀུན་དགའ་བོ་རིན་པོ་ཆེའི་མཛོད་ཆེན་པོ་ཞེས་བྱ་བ་དེ་ནི་བསྐལ་པ་གྲངས་མེད་པ་བྱེ་བར་བསྒྲུབས་པ་ཆོས་དཀོན་མཆོག་འདིའི་ཚིག་བླ་དགས་སོ། །ཀུན་དགའ་བོ་བཞག་པ་འཆང་བ་ཞེས་བྱ་བ་དེ་ནི་ཁྱེད་ལྟ་བུ་དམ་པའི་
ཆོས་ཀྱི་གྲོང་ཁྱེར་འདི་སྐྱོང་བ་ཉན་ཐོས་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚིག་བླ་དགས་སོ། །ཀུན་དགའ་བོ་དེ་ལྟར་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་ཆེན་པོ་འདི་མ་འོངས་པའི་རིགས་ཀྱི་བུའམ་རིགས་ཀྱི་བུ་
མོ་རྣམས་ཀྱི་དོན་དུ་ཁྱོད་དང་། འོད་སྲུང་ཆེན་པོ་དང་། བྱང་ཆུབ་སེམས་དཔའ་བྱམས་པ་ལ་སོགས་པ་ལ་གཏད་ཀྱིས་མ་འོངས་པ་ན་ངའི་བུ་དད་པ་དང་ལྡན་ཞིང་མངོན་པར་དང་བ་རྣམས་ལ་ཅི་ནས་ཀྱང་རྗེས་སུ་འཐུན་པ་དང་རྗེས་སུ་བསྟན་པས་དམ་པའི་ཆོས་དཀོན་མཆོག་གི་མཛོད་འདི་

བྱིན་ཅིག །དེ་ཅིའི་ཕྱིར་ཞེ་ན། ཀུན་དགའ་བོ་ང་སྔོན་བྱང་ཆུབ་སེམས་དཔར་གྱུར་པ་ན་ཡོངས་སུ་སྨིན་པར་བྱས་པའི་སེམས་ཅན་དག་ཡོད་དེ་དེ་དག་ད་ལྟ་ཉེས་པར་བྱས་ཤིང་ཉེས་པར་སྤྱད་པས་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་དུ་དོང་ངོ་། །
དེ་དག་དེ་བཞིན་གཤེགས་པ་འདས་པའི་འོག་ཏུ་དེ་ནས་ཤི་འཕོས་ནས་མིར་སྐྱེ་བར་འགྱུར་རོ། །དེ་དག་དབང་པོ་རྒྱས་ཤིང་ཡོངས་སུ་སྨིན་པའི་རྒྱུས་ངའི་བསྟན་པ་འདི་ལ་ཚེགས་ཆུང་ངུས་དད་པར་འགྱུར་ཏེ། དེ་ལ་ཁ་ཅིག་ནི་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་རོ། །ཁ་ཅིག་ནི་
ཁྱིམ་ན་གནས་པར་འགྱུར་རོ། །དེ་དག་ངའི་མདོ་སྡེ་འདི་ལྟ་བུ་ཐོས་ནས་ཁྱད་པར་དུ་འགྲོ་བར་འགྱུར་ཏེ། དེ་དག་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའམ། ཐེག་པ་ཆེན་པོས་ཡོངས་སུ་མྱ་ངན་ལས་འདའ་བར་འགྱུར་རོ། །ཀུན་དགའ་བོ་བསྐལ་པ་གྲངས་མེད་པ་བྱེ་བ་
ཁྲག་ཁྲིག་བརྒྱ་སྟོང་དུ་བསྒྲུབས་པ་དམ་པའི་ཆོས་དཀོན་མཆོག་གི་མཛོད་འདི་འདི་ལྟར་རིགས་ཀྱི་བུ་རྣམས་ཀྱིས་མཉན་པར་བྱ་བའི་ཕྱིར་དེ་དག་གི་དོན་དུ་ཁྱོད་ཀྱི་ལག་ཏུ་གཏད་པས་གཏད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་སེམས་ཅན་དེ་དག་ནི་དགེ་བའི་ལམ་འདི་ལྟ་བུ་དག་མ་
ཐོས་པ་ལས་ཡོངས་སུ་ཉམས་པར་འགྱུར་རོ། །ཀུན་དགའ་བོ་དེ་བས་ན་ཅི་ནས་ཀྱང་དེ་དག་འདི་ལྟ་བུ་ཐོས་པ་ལས་ཉམས་པར་མི་འགྱུར་བར་བྱ་བའི་ཕྱིར་མ་འོངས་པ་དེ་དག་ཁྱོད་ལ་གཏད་དོ། །ཀུན་དགའ་བོ་འདི་ལ་སྐྱེས་བུ་མཁས་པ་ཁ་ཅིག་ནི་དཔེས་སྨྲས་པའི་དོན་ཤེས་པར་འགྱུར་ཏེ། དེའི་
ཕྱིར་དོན་འདི་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོས་དཀོར་པ་དང་མངན་རྣམས་ལ་མཛོད་དང་བང་བ་ཐམས་ཅད་གཏད་དེ། ཀྱེ་མི་ཁྱེད་དགེ་སྦྱོང་དང་། བྲམ་ཟེ་དང་། བཀྲེན་པ་དང་། འདྲོན་པ་དང་།
སྡུག་ཕོངས་པ་སློང་བ་ཟས་འདོད་པ་རྣམས་ལ་ཟས་དང་། སྐོམ་འདོད་པ་རྣམས་ལ་སྐོམ་དང་། བཞོན་པ་དང་གོས་དང་མེ་ཏོག་དང་སྤོས་དང་ཕྲེང་བ་དང་བྱུག་པ་དང་མལ་ཆ་དང་། གནས་དང་རྒྱབ་རྟེན་དང་། འཚོ་བའི་ཡོ་བྱད་གང་ཡང་རུང་བ་རྣམས་སྦྱིན་པ་བྱིན་ཅིག་ཅེས་དེས་དེ་སྐད་དུ་བསྒོ་

ཞིང་གཏམས་པ་ལས། དེ་ལ་དཀོར་པ་དང་མངན་རྣམས་ལ་མཛོད་དང་བང་བ་དེ་ཕྱེ་ཡང་སྦྱིན་པ་དེ་སྦྱིན་པར་མི་བྱེད་ན། ཀུན་དགའ་བོ་དེ་ཇི་སྙམ་དུ་སེམས་དེ་ལ་སུས་ཉེས་པར་འགྱུར། གསོལ་པ། བཙུན་པ་བཅོམ་ལྡན་འདས་དཀོར་པ་དང་མངན་དེ་དག་གིས་ནོངས་པར་འགྱུར་
གྱི། འཁོར་ལོས་སྒྱུར་བའི་རྒྱལ་པོས་ནི་མ་ནོངས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་ཆོས་ཀྱི་རྒྱལ་པོ་ངས་ཆོས་ཀྱི་བང་མཛོད་ཆེན་པོ་འདི་རབ་ཏུ་བསགས་ནས་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་འདི་མངོན་པར་རྫོགས་པར་སངས་
རྒྱས་ནས་ཡངས་ཤིང་རྒྱ་ཆེ་བར་བྱས་ཏེ་ལྷ་དང་མི་རྣམས་ལ་རྣམ་པར་ཕྱེ་ཞིང་རབ་ཏུ་བསྟན་ནོ། །གང་ངས་བསྟན་པའི་ཆོས་དེ་ཁྱོད་ལ་ཡང་རྣམ་པར་ཕྱེ་སྟེ་སྦྱིན་གྱིས་བྱིས་པ་སོ་སོའི་སྐྱེ་བོ་དང་། དགེ་སྦྱོང་དང་བྲམ་ཟེ་དང་། ཁྱིམ་བདག་དད་པ་དོན་ཡོད་པ། ཆོས་འདོད་པ་རྣམས་ཉན་དུ་ཆུག་ཤིག །
ཀུན་དགའ་བོ་གལ་ཏེ་ངའི་ཆོས་དཀོན་མཆོག་གི་མཛོད་འདི་རྣམ་པར་ཕྱེ་ཞིང་ཡང་དག་པར་རབ་ཏུ་བསྟན་ཏེ་ཁྱོད་ཀྱི་ལག་ཏུ་གཏད་པ་དེ་བྲམ་ཟེ་དང་ཁྱིམ་བདག་དད་པ་རྣམས་ལ་མ་བསྟན། བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་དོན་དུ་གཉེར་ཅིང་འདུན་པ་དང་དད་པ་དང་ལྡན་ཞིང་དང་བ་རྣམས་
ལ་མི་སྟོན་ན། དེ་ལྟ་ན་ནི་ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་ཉེས་པ་བྱས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་ང་ནི་རྒྱལ་པོ་སྟེ་བླ་ན་མེད་པའི་ཆོས་ཀྱི་རྒྱལ་པོ། ཆོས་ཀྱི་འཁོར་ལོས་སྒྱུར་བ། ཆོས་དཀོན་མཆོག་གི་མཛོད་རྒྱ་ཆེན་པོ་མང་པོ་དང་ལྡན་པ། ཡོན་
ཏན་གྱི་བང་མཛོད་མང་པོ་དང་ལྡན་པ། བྱང་ཆུབ་ཀྱི་ཕྱོགས་མང་པོའི་བདག་པོ། བྱང་ཆུབ་ཀྱི་ཡན་ལག་རིན་པོ་ཆེ་སྣ་བདུན་དང་ལྡན་པ། སྟོབས་བཅུ་དང་མི་འཇིགས་པ་བཞིའི་དབང་ཐོབ་པ་ཆོས་ཐམས་ཅད་ལ་དབང་སྒྱུར་བའོ། །འདི་ལྟ་སྟེ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་ཆོས་
ཀྱི་བང་མཛོད་ཇི་སྲིད་འཛིན་གྱི་བར་དུ་བྲམ་ཟེ་དང་ཁྱིམ་བདག་དད་པ་རྣམས་དང་། བྱིས་པ་སོ་སོའི་སྐྱེ་བོ་དད་པས་དོན་དུ་གཉེར་བ་དང་། འདུན་པ་དང་། ཆོས་འདོད་པ་དང་། ཆོས་ཀྱི་སྣོད་དུ་གྱུར་པ་རྣམས་ལ་མ་རྟོག་པར་བྱིན་ཅིག །སྐྱེས་བུ་ཐ་མ་པར་མ་གྱུར་ཅིག །ཀུན་དགའ་

བོ་ཁྱོད་གལ་ཏེ་བསྐལ་པ་གྲངས་མེད་པ་བྱེ་བར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་དང་། བླ་ན་མེད་པའི་ཆོས་དཀོན་མཆོག་གི་མཛོད་འདི་འཁོར་བཞི་རྣམས་ལ་ཡང་དག་པར་རབ་ཏུ་སྟོན་ན། དེ་ལྟ་ན་ནི་ཀུན་དགའ་བོ་ཁྱོད་དེ་བཞིན་གཤེགས་པ་ལ་ཉེས་པ་
བྱེད་པར་མི་འགྱུར་རོ། །ཅི་སྟེ་ཡང་དག་པར་རབ་ཏུ་མི་སྟོན་ན་ཉེས་པ་བྱེད་པར་འགྱུར་རོ། །ཀུན་དགའ་བོ་དགེ་སློང་དགྲ་བཅོམ་པ་ཟག་པ་ཟད་པ་གང་འདུས་མ་བྱས་ཀྱི་ཆོས་རྗེས་སུ་ཐོབ་ནས་གཞན་ལ་མི་འཆད། ཡང་དག་པར་རབ་ཏུ་མི་སྟོན་པ་དེས་སྟོན་པ་ལ་བསྙེན་བཀུར་བྱས་
པར་མི་འགྱུར། དེས་ངའི་དམ་པའི་ཆོས་ཡོངས་སུ་གཟུང་བར་མི་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་བས་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་ཚོང་དཔོན་ནམ་ཁྱིམ་
བདག་ཕྱུག་པོ་ནོར་ཆེ་བ། ལོངས་སྤྱོད་ཆེ་བ། བང་མཛོད་མང་བ། ནོར་དང་འབྲུ་དང་རྫས་དང་ཡོ་བྱད་མང་བ། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། དངུལ་མང་པོ་ཡོད་པ་དེ་ལ་ཕྱིར་རྒོལ་བའམ། དགྲ་བོ་འགའ་ཞིག་བང་མཛོད་དེར་མེ་
གཏོང་བ་དང་། གང་དེ་དང་མི་མཛའ་བ་ཕྱིར་རྒོལ་བ་དགྲ་བོར་གྱུར་པ། མི་ཕན་པར་འདོད་པ། མི་བདེ་བར་འདོད་པ། གྲུབ་པ་དང་། བདེ་བ་མི་འདོད་པ་གཞན་དེ་དག་ཀྱང་བང་མཛོད་ཚིག་པའི་མེ་དེ་མཐོང་ནས་མེ་མི་གསོད་ཅིང་གཡེལ་བར་གནས་པ་དང་། གང་དེའི་མཛའ་བོ་ཕན་པར་འདོད་
པ། བདེ་བར་འདོད་པ། གྲུབ་པ་དང་བདེ་བར་འདོད་པ་དེ་དག་གིས་ཀྱང་མེའི་ཕུང་པོ་ཆེན་པོ་དེས་ནོར་དང་འབྲུ་མང་པོ་དེ་དག་ཚིག་པ་མཐོང་ནས་གཡེལ་བར་གནས་པ་དང་། ཚོང་དཔོན་ནམ་ཁྱིམ་བདག་དེའི་མཛའ་བཤེས་དང་། ཉེ་དུ་དང་སྣག་གི་གཉེན་མཚམས་དོན་འདོད་པ་གྲུབ་པ་དང་བདེ་
བར་འདོད་པ་དེ་དག་མེ་དེ་མཐོང་ནས་མེ་དེ་མི་གསོད་དེ་གཡེལ་བར་གནས་ན་ཡང་དག་པར་ཞུགས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། ཀུན་དགའ་བོ་གང་དག་ཚོང་དཔོན་ནམ་ཁྱིམ་བདག་དོན་འདོད་

པ། ཕན་པ་འདོད་པ། བདེ་བར་འདོད་པ། གྲུབ་པ་དང་བདེ་བ་འདོད་པ་དེ་དག་ཀྱང་བང་མཛོད་ཚིག་པའི་མེ་དེ་མཐོང་ལ། བང་མཛོད་དེ་དག་གི་མེ་གསད་པ་ལ་གཡེལ་བར་གནས་ན་མེའི་ཕུང་པོ་དེས་རྒྱ་ཆེར་བང་མཛོད་ཐམས་ཅད་ཚིག་པར་འགྱུར་རམ། གསོལ་པ།
བཅོམ་ལྡན་འདས་དེ་ལྟ་ལགས་སོ། །བདེ་བར་གཤེགས་པ་དེ་ལྟ་ལགས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་ངས་བསྐལ་པ་གྲངས་མེད་པ་བྱེ་བར་དགེ་བའི་རྩ་བས་བསྒྲུབས་པའི་ཆོས་དཀོན་མཆོག་གི་བང་མཛོད་བླ་ན་མེད་པ་འདི་འཇིག་ཅིང་མི་སྣང་བར་གྱུར་པ་ན་དགེ་
སློང་གང་མ་དད་པ་ཚུལ་ཁྲིམས་འཆལ་པ། སྡིག་པའི་ཆོས་ཀུན་ཏུ་སྤྱོད་པ། འཕྱར་བ་སྔོན་དུ་འགྲོ་བ། རབ་ཏུ་དབེན་པ་ལ་བརྩོན་པ་བོར་བ། སྙོམ་ལས་ཅན་ལེ་ལོ་ཅན་ཐོས་པ་ཉུང་བ་དག་འབྱུང་སྟེ། ཉན་པ་ལ་འདུན་པར་ཡང་མི་འགྱུར་ན་ཆོས་དཀོན་མཆོག་འདི་ཡང་དག་པར་
གཟུང་བའི་ཕྱིར་གཞན་དག་ཉན་དུ་འཇུག་པར་ལྟ་ག་ལ་འགྱུར་བ་དེ་ལྟ་བུ་དག་འབྱུང་ངོ་། །བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ནི་ཆོས་དཀོན་མཆོག་གི་བང་མཛོད་འདི་ལྟ་བུ་མེས་ཚིག་པ་མཐོང་ན་མེ་དེ་གསད་པ་ལ་གཡེལ་བར་གནས་ན། ཀུན་དགའ་བོ་དེ་ཇི་སྙམ་དུ་སེམས་
ཆོས་དཀོན་མཆོག་འདི་ལྟ་བུ་ལས་ཡོངས་སུ་ཉམས་པར་མི་འགྱུར་རམ། དགེ་སློང་གང་དགྲ་བཅོམ་པ་ཟག་པ་ཟད་པ་དེ་དག་ཀྱང་འདུས་མ་བྱས་མངོན་སུམ་དུ་བྱས་ནས་ཆོས་བཤད་པ་དང་རབ་ཏུ་བསྟན་པ་ཡལ་བར་འདོར་བར་གནས་པ་དག་འབྱུང་སྟེ། དེ་དག་གིས་ཀྱང་སྟོན་པ་ལ་བསྙེན་
བཀུར་བྱས་པར་མི་འགྱུར་ལ། ངའི་དམ་པའི་ཆོས་ཀྱང་ཡོངས་སུ་གཟུང་བར་མི་འགྱུར་ཏེ། ཆོས་དཀོན་མཆོག་གི་མཛོད་བླ་ན་མེད་པ་དེ་ལྟར་མ་བཤད་པ་དང་ཀློག་ཏུ་མ་བཅུག་པས་ནུབ་པར་འགྱུར་རོ། །གསོལ་པ། བཅོམ་ལྡན་འདས་དེ་ལྟ་ལགས་སོ། །བདེ་བར་གཤེགས་པ་དེ་
ལྟ་ལགས་སོ། །ཀུན་དགའ་བོ་ཅི་ནས་འདིར་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཞིང་དོན་འདི་རྒྱ་ཆེར་ཡོངས་སུ་རྫོགས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་མི་ལ་ལ་མཚན་མོ་མུན་པ་རབ་ཏུ་གནག་པ་ན་རྩྭའི་

སྒྲོན་མ་ཐོགས་ནས་བདག་གི་ཁྱིམ་དུ་སོང་ཞིང་དེ་ན་ཡང་སྐྱེ་བོ་ཕལ་པོ་ཆེ་མུན་གནག་དེ་ལས་ཐར་བར་འདོད་པ་རྣམས་ཚོགས་པར་གྱུར་ལ་མི་དེ་རྩྭའི་སྒྲོན་མ་དེས་མུན་པ་མུན་གནག་ལས་ཐར་ནས་བདག་གི་ཁྱིམ་དུ་ཞུགས་ཏེ་སྒྲོན་མ་དེ་བསད་ནས་སུ་ལ་ཡང་མི་སྟེར་ན། ཀུན་དགའ་བོ་
དེ་ཇི་སྙམ་དུ་སེམས། གང་སྒྲོན་མ་ཡོད་བཞིན་དུ་སྐྱེ་བོ་མང་པོ་མུན་ནག་དེ་ལས་ཐར་བར་འདོད་པ་དག་འཁོད་པ་གང་ལ་ཡང་རྩྭའི་སྒྲོན་མ་མི་སྟེར་ན། ཀུན་དགའ་བོ་སྐྱེས་བུ་དེ་དེ་ལྟར་བྱེད་ན་ལེགས་པར་བྱ་བ་བྱེད་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་
གཤེགས་པ་མ་ལགས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་དགེ་སློང་དགྲ་བཅོམ་པ་ཟག་པ་ཟད་པ་གང་འདུས་མ་བྱས་ཀྱི་ཆོས་མངོན་སུམ་དུ་བྱས་ནས་བསྐལ་པ་གྲངས་མེད་པ་བྱ