Kinh tạng Tây Tạng (Kangyur Đại Học) — 050_མདོ་སྡེ།_ཆ

པར་འགྱུར་རོ། །ཀུན་
དགའ་བོ་ང་འདས་ནས་མ་འོངས་པའི་དུས་ན་བྱང་ཕྱོགས་ཀྱི་རྒྱུད་དུ་དགེ་སློང་འཚོ་བྱེད་ཅེས་བྱ་བ་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། སངས་རྒྱས་བརྒྱ་སྟོང་མང་པོ་ལ་བསྙེན་བཀུར་བྱས་པ། དགེ་བའི་རྩ་བ་བསྐྱེད་པ། ལྷག་པའི་བསམ་པ་བསྐྱེད་པ། ཐེག་པ་ཆེན་པོ་ལ་ཡང་དག་པར་ཞུགས་པ།
སྐྱེ་བོ་མང་པོ་ལ་ཕན་པ་དང་བདེ་བའི་ཕྱིར་ཞུགས་པ། མང་དུ་ཐོས་པ། བྱང་ཆུབ་སེམས་དཔའི་སྡེ་སྣོད་འཛིན་པ། ཐེག་པ་ཆེན་པོའི་བསྔགས་པ་བརྗོད་པ། ཐེག་པ་ཆེན་པོ་ཡང་དག་པར་རབ་ཏུ་སྟོན་པ་ཞིག་འབྱུང་བར་འགྱུར་ཏེ། དེ་ངའི་སྐུ་གདུང་གི་མཆོད་རྟེན་ཞིག་ཅིང་རལ་བ་མཐོང་ནས་
གསེར་གྱིས་བརྒྱན་པར་བྱེད་ཅིང་གདུགས་དང་རྒྱལ་མཚན་དང་བ་དན་དང་། དར་དང་། དྲིལ་བུ་གཡེར་ཁའི་དྲ་བ་གཡོགས་པ་དང་། དེ་བཞིན་གཤེགས་པའི་སྐུ་གཟུགས་དང་མཆོད་རྟེན་གྱི་ཁང་པ་དང་མཆོད་རྟེན་རྣམས་སེང་གེའི་རྒྱལ་མཚན་གྱིས་བརྒྱན་ཏེ། ལྷ་དང་མི་རྣམས་དགའ་བ་སྐྱེ་ཞིང་དེ་
ཡོངས་སུ་བསྐྱང་བ་དང་། ངའི་བསྟན་པ་ཡོངས་སུ་བསྐྱང་བ་དང་། སེམས་མ་དང་བ་རྣམས་དང་བར་བྱ་བ་དང་། དང་བ་རྣམས་ཕྱིར་ཞིང་འཕེལ་བ་དང་། སྐྱེ་བོ་མང་པོའི་དགེ་བའི་རྩ་བའི་ཚོགས་བསགས་པའི་ཕྱིར་ལོ་ལྔ་པ་བྱེད་དུ་འཇུག་པར་འགྱུར་རོ། །ཀུན་དགའ་བོ་དེའི་ཚེ་ན་དགེ་སློང་མི་བརྩོན་པ།
ལྷོད་པ་ཡོ་བྱད་མང་བ་སྤོང་བ་ལས་ཉམས་པ། ཚུལ་ཉམས་པ་ཚུལ་ཁྲིམས་འཆལ་པ། སྡིག་པའི་ཆོས་ཀུན་ཏུ་སྤྱོད་པ། འདུ་འཛི་ལ་དགའ་བ། རབ་ཏུ་དབེན་པ་ལ་མི་ལྟ་བ། བརྩོན་པ་བོར་བ། གནས་གཅིག་ན་འཁོད་པ། ཡོངས་སུ་འཛིན་པ་ལ་བརྩོན་པ། ཁྱིམ་པ་དང་རབ་ཏུ་བྱུང་བ་རྣམས་

དང་འདྲེས་པ། དཀོན་མཆོག་གསུམ་དང་མ་འདྲེས་པ། མ་གུས་པ་དགེ་སྦྱོང་ལྟར་བཅོས་པ་དག་ནི་མང་དུ་འབྱུང་བར་འགྱུར་རོ། །དེ་ན་དགེ་སློང་བརྩོན་འགྲུས་བརྩམས་པ། རབ་ཏུ་དབེན་པ་དྲན་པ་ཉེ་བར་གཞག་པ། མཉམ་པར་བཞག་པ། ཤེས་རབ་དང་ལྡན་པ། སེམས་
རྩེ་གཅིག་པ་དགེ་བའི་ཆོས་ཅན། འདོད་པ་ཆུང་བ། ཆོག་ཤེས་པ། བསོད་སྙོམས་ལ་རྒྱུ་བ། འཕགས་པའི་རིགས་ལ་གནས་པ། མང་དུ་ཐོས་པ་ཐོས་པ་བསགས་པ་དག་ནི་ཉུང་ངུ་འབྱུང་བར་འགྱུར་ཏེ། དེ་ལ་དགེ་སློང་འཚོ་བྱེད་ཁོང་ཁྲོ་བའི་སེམས་མེད་པ་དང་། དབང་པོ་མ་ཉམས་པ་དང་།
དད་པ་དང་དང་བ་མཆོག་དང་ལྡན་པས། གོས་ངུར་སྨྲིག་བགོས་ཤིང་ཚུལ་ཁྲིམས་དང་ལྡན་པའི་འདུ་ཤེས་ཅན་ཐམས་ཅད་ལ་སྦྱིན་གནས་སུ་འདུ་ཤེས་བསྐྱེད་ནས་སྦྱིན་པ་སྦྱིན། དགེ་བའི་རྩ་བ་སྐྱེད་པར་བྱེད་དེ། དེ་བྱང་ཆུབ་སེམས་དཔའ་བྱེད་པའི་དགེ་བའི་རྩ་བ་རྒྱ་ཆེན་པོ་རྣམ་པ་སྣ་ཚོགས་བསགས་ནས་
འཆི་བའི་དུས་བྱས་མ་ཐག་ཏུ་ནུབ་ཕྱོགས་སུ་སངས་རྒྱས་ཀྱི་ཞིང་བྱེ་བ་བརྒྱ་སྟོང་འདས་པ་ན་དེ་བཞིན་གཤེགས་པ་འོད་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ་འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱིས་བརྒྱན་པ་ཞེས་བྱ་བར་དེ་བཞིན་གཤེགས་པ་འོད་དྲི་མ་
མེད་པ་ཞེས་བྱ་བར་འགྱུར་རོ། །ཀུན་དགའ་བོ་དགེ་སློང་འཚོ་བྱེད་དེ་ཡང་ངའི་བསྟན་པ་འདི་ཡངས་ཤིང་རྒྱས་པར་བྱེད་པར་འགྱུར་གྱིས་ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་དགའ་བོ་ངའི་ཚངས་པར་སྤྱོད་པ་རྒྱས་པ་དང་ལྷ་དང་མི་རྣམས་ཀྱིས་མནོས་པར་འགྱུར་རོ། །ཀུན་
དགའ་བོ་ང་འདས་ནས་མ་འོངས་པའི་དུས་ན་མཐའ་འཁོབ་ཀྱི་ཡུལ་ནགས་ཀྱི་ས་ན་རྒྱལ་པོའི་ཕོ་བྲང་ཞི་བ་ཞེས་བྱ་བ་ཞིག་ཡོད་པར་འགྱུར་ཏེ། དེ་ན་རྒྱལ་པོ་མེས་སྦྱིན་ཞེས་བྱ་བ་དད་པ་དང་ལྡན་པ་དང་བ་ཞིག་འབྱུང་སྟེ། དེ་ངའི་སྐུ་གདུང་དང་ཉན་ཐོས་རྣམས་ལ་བསྟི་སྟང་དུ་བྱ་བ་དང་། བླ་མར་བྱ་བ་ནས་རྗེད་པར་བྱ་
བའི་བར་ལ་སྤྲོ་བར་འགྱུར་རོ། །ཀུན་དགའ་བོ་རྒྱལ་པོ་མེས་སྦྱིན་དེ་ཡང་རྒྱལ་པོའི་ཕོ་བྲང་ཞི་བ་དེར་ངའི་ཉན་ཐོས་རྣམས་བསྡུས་ནས་དང་བར་བྱེད་པར་འགྱུར་རོ། །དེར་དགྲ་བཅོམ་པ་སུམ་སྟོང་ལྷག་ཙམ་འདུས་པར་འགྱུར་ཏེ། ཐམས་ཅད་ཀྱང་རྫུ་འཕྲུལ་ཆེ་བ་མཐུ་ཆེ་བ་དབང་ཆེ་བར་གྲགས་པ་ནས་ཚངས་པ་

མཚུངས་པར་སྤྱོད་པ་རྣམས་ལ་ཆོས་འཆད་པས་ངལ་བ་མེད་པ་ཤ་སྟག་གོ། །ཀུན་དགའ་བོ་དེ་དག་ཀྱང་ངའི་བསྟན་པ་རྒྱས་པར་བྱེད་དེ་ལྷ་དང་མི་རྣམས་ལ་ཡངས་ཤིང་རྒྱ་ཆེ་བར་བྱེད་པར་འགྱུར་གྱིས་ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་དགའ་བོ་ང་འདས་ནས་བྱང་
ཕྱོགས་ཀྱི་རྒྱུད་ན་གྲོང་ཁྱེར་ཤིང་ཀུན་སྐྱེ་བ་ཞེས་བྱ་བ་ཞིག་ཡོད་པར་འགྱུར་ཏེ། དེར་ངའི་མཆེ་བ་ལ་མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། སིལ་སྙན་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དན་ལ་སོགས་པ་དང་། གོས་དང་དངུལ་དང་གསེར་
དང་རིན་པོ་ཆེ་རྣམས་ཀྱིས་བསྟི་སྟང་བྱེད་བླ་མར་བྱེད་རིམ་གྲོར་བྱེད་མཆོད་པར་བྱེད་པར་འགྱུར་རོ། །ཀུན་དགའ་བོ་ངའི་མཆོད་རྟེན་ཡང་གསེར་གྱིས་བརྒྱན་པར་འགྱུར་རོ། །ཀུན་དགའ་བོ་ས་ཕྱོགས་དེར་རབ་ཏུ་བྱུང་བའི་སྐྱེ་བོ་མང་པོ་འབྱུང་བར་འགྱུར་རོ། །སྐྱེ་བོ་མང་པོ་ཚུལ་ཁྲིམས་དང་ལྡན་པ་དང་། དགེ་
བའི་ཆོས་དང་ལྡན་པ་རྣམས་དང་། དགེ་སློང་གི་ཚོགས་བརྒྱ་སྟོང་དུ་མ་འབྱུང་བར་འགྱུར་རོ། །ཀུན་དགའ་བོ་དེ་ན་ཁྱིམ་པ་ཚུལ་ཁྲིམས་དང་ལྡན་པ། མང་དུ་ཐོས་པ་མཁས་པ་ཡིད་གཞུངས་པ། ངའི་བསྟན་པ་འདི་ལ་དད་པ་དང་དང་བ་དག་ཀྱང་མང་དུ་འབྱུང་སྟེ། དེ་དག་ངའི་སྐུ་གདུང་དང་ཉན་ཐོས་
རྣམས་ལ་བསྟི་སྟང་དུ་བྱ་བ་དང་། བླ་མར་བྱ་བ་དང་། རིམ་གྲོར་བྱ་བ་དང་། མཆོད་པར་བྱ་བ་དང་། རྗེད་པར་བྱ་བ་དང་། མངོན་པར་མཆོད་པར་བྱ་བའི་ཕྱིར་སྤྲོ་བར་འགྱུར་རོ། །དེ་དག་ངའི་དཀོན་མཆོག་གསུམ་ཡོངས་སུ་བཟུང་སྟེ། དགེ་བའི་རྩ་བ་དེས་ལྷ་དང་མིའི་ཕུན་སུམ་ཚོགས་པ་མྱོང་ནས་
ཁ་ཅིག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ། ཁ་ཅིག་ནི་རང་སངས་རྒྱས་ཀྱི་ཐེག་པས་ཡོངས་སུ་མྱ་ངན་ལས་འདའ། ཁ་ཅིག་ནི་ཉན་ཐོས་ཀྱི་ཐེག་པས་ཡོངས་སུ་མྱ་ངན་ལས་འདའ་བར་འགྱུར་ཏེ། ཀུན་དགའ་བོ་དེ་ལྟར་ན་དེ་དག་གི་བསྟི་སྟང་མཐུ་ཆེ་
བར་འགྱུར་རོ། །ཀུན་དགའ་བོ་དེ་དག་ཀྱང་ངའི་བསྟན་པ་འདི་རྒྱ་ཆེ་ཞིང་རྒྱས་པར་བྱེད་པར་འགྱུར་བ་དང་། ལྷ་དང་མི་རྣམས་ལ་ཡངས་ཤིང་ཤིན་ཏུ་རྒྱས་པར་འགྱུར་བ་དང་། བཀྲོལ་ཞིང་ཡང་དག་པར་བསྟན་པར་བྱེད་པར་འགྱུར་གྱིས་ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་

དགའ་བོ་ངའི་ཚངས་པར་སྤྱོད་པ་རྒྱས་པ་དང་ལྷ་དང་མི་རྣམས་ཀྱིས་ཡང་དག་པར་མནོས་པར་འགྱུར་རོ། །ཀུན་དགའ་བོ་འཛམ་བུའི་གླིང་ཐམས་ཅད་སྐུ་གདུང་གི་མཆོད་རྟེན་དང་། དེ་བཞིན་གཤེགས་པའི་སྐུ་གཟུགས་རྣམས་ཀྱིས་ཀྱང་ཀུན་དུ་རྒྱས་པར་འགྱུར་ན། ཀུན་དགའ་བོ་ལྷ་
དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་གི་གནས་རྣམས་ན་མི་སྣང་བར་གྱུར་པ་རྣམས་ཀྱིས་གང་བར་འགྱུར་བ་ལྟ་སྨོས་ཀྱང་ཅི་དགོས་ཀྱིས་ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་དགའ་བོ་དེ་ལྟར་ན་ངའི་ཆོས་འདུལ་བ་རྒྱས་པར་
འགྱུར་ཞིང་ལྷ་དང་མི་རྣམས་ལ་ཡངས་ཤིང་རྒྱ་ཆེ་བར་འགྱུར་རོ། །དམ་པའི་ཆོས་འཛིན་པའི་ལེའུ་སྟེ་དྲུག་པ་རྫོགས་སོ།། །།ཡང་དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་རིགས་ཀྱི་བུའམ་རིགས་ཀྱི་བུ་
མོ་རབ་ཏུ་བྱུང་བའམ། ཁྱིམ་ན་གནས་པ་གང་དག་ཁ་ཅིག་ཐ་ན་རིང་བསྲེལ་ཡུངས་འབྲུ་ཙམ་ལ་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན། ཀུན་དགའ་བོ་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ཡོངས་སུ་མྱ་ངན་ལས་འདས་པ་ཡིན་ཏེ། ཐ་མ་ཡོངས་སུ་
མྱ་ངན་ལས་འདའ་བར་ང་སྨྲའོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་རིགས་ཀྱི་བུའམ་རིགས་ཀྱི་བུ་མོ་གང་དག་ཁ་ཅིག་ཐ་ན་ངའི་ཕྱིར་བྱས་པའི་མཆོད་རྟེན་མཐོང་ནས་སེམས་དང་བ་སྐྱེད་ན། ཀུན་དགའ་བོ་འདི་ལ་སེམས་དང་བའི་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ཡང་མྱ་ངན་
ལས་འདས་པ་ཡིན་ཏེ། ཐ་མ་ཡོངས་སུ་མྱ་ངན་ལས་འདའ་བར་འགྱུར་བར་ངེས་པར་ཤེས་པར་གྱིས་ཤིག །ཀུན་དགའ་བོ་གང་ང་འདུག་པ་ལ་མངོན་སུམ་དུ་བསྟི་སྟང་བྱེད་པ་དང་། བླ་མར་བྱེད་པ་ནས་མཆོད་པར་བྱེད་པའི་བར་ལྟ་ཞོག །གང་ང་ཡོངས་སུ་མྱ་ངན་ལས་འདས་ནས་རིང་བསྲེལ་
ཡུངས་འབྲུ་ཙམ་ལ་བསྟི་སྟང་བྱེད་པ་ལྟ་ཡང་ཞོག །ངའི་ཕྱིར་མཆོད་རྟེན་བྱས་པ་ལ་གང་བསྟི་སྟང་བྱེད་པ་ལྟའང་ཞོག་སྟེ། ཀུན་དགའ་བོ་གང་དག་ཁ་ཅིག་སངས་རྒྱས་ལ་དམིགས་ནས་ཐ་ན་མེ་ཏོག་གཅིག་ནམ་མཁའ་ལ་འཐོར་ན། ཀུན་དགའ་བོ་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་མྱ་

ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱས་པ་རྫུ་འཕྲུལ་ཇི་ཙམ་དུ་ཆེ་བ་ལ་ལྟོས། གང་ན་སངས་རྒྱས་ལ་དམིགས་པའི་སེམས་ཀྱིས་མེ་ཏོག་གཅིག་ནམ་མཁའ་ལ་བོར་བས་ཀྱང་མྱ་ངན་ལས་འདས་པར་ཕྱིན་
པར་བྱེད་ན། ཀུན་དགའ་བོ་གང་དག་དེ་བཞིན་གཤེགས་པ་ལ་མངོན་སུམ་དུ་བསྟི་སྟང་བྱེད་པའམ། ཡོངས་སུ་མྱ་ངན་ལས་འདས་ནས་སྐུ་གདུང་ལ་སྐུ་གདུང་གི་མཆོད་པ་བྱེད་པ་ལྟ་ཅི་སྨོས་ཀུན་དགའ་བོ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡུལ་བསམ་གྱིས་མི་ཁྱབ་བོ། །ཀུན་
དགའ་བོ་དེ་བཞིན་གཤེགས་པ་བསམ་གྱིས་མི་ཁྱབ་པ་ལ་བསྟི་སྟང་བྱས་ན་རྣམ་པར་སྨིན་པ་ཡང་བསམ་གྱིས་མི་ཁྱབ་པར་ཤེས་པར་བྱའོ། །ཀུན་དགའ་བོ་སངས་རྒྱས་ལ་དམིགས་པའི་སེམས་ཀྱིས་ནམ་མཁའ་ལ་མེ་ཏོག་གཅིག་བོར་བའི་རྣམ་པར་སྨིན་པ་གལ་ཏེ་ངས་སངས་རྒྱས་ཀྱི་ཡེ་ཤེས་ཀྱིས་བསྟན་
ན་ཀུན་དགའ་བོ་ཁྱོད་ཉིད་ཀྱང་ངོ་མཚར་དང་རྨད་དུ་བྱུང་བར་འཛིན་པ་དང་། དགའ་བ་དང་མགུ་བ་དང་། རབ་ཏུ་དགའ་བར་གྱུར་ན་མ་འོངས་པའི་དུས་ན་ངའི་བུ་གང་དག་རབ་ཏུ་དད་པ་རབ་ཏུ་གུས་པ་རབ་ཏུ་དང་བ་རྣམས་དང་། གང་དག་སངས་རྒྱས་ཀྱི་ཡོན་ཏན་ལ་རྟོག་ཅིང་སངས་རྒྱས་ཀྱི་ཡེ་ཤེས་དོན་དུ་གཉེར་བར་
འགྱུར་བ་དེ་དག་ལྟ་ཅི་སྨོས། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སངས་རྒྱས་ལ་དམིགས་ནས་ནམ་མཁའ་ལ་མེ་ཏོག་གཅིག་བོར་བའི་རྣམ་པར་སྨིན་པ་བཤད་པའི་དུས་ལ་བབ་སྟེ། བཅོམ་
ལྡན་འདས་དུས་འདི་ལགས་སོ། །བདེ་བར་གཤེགས་པ་སྐབས་འདི་ལགས་སོ། །གང་བཅོམ་ལྡན་འདས་ལས་ཐོས་ནས་དགེ་སློང་རྣམས་ཡང་དག་པ་ཉིད་དུ་འཛིན་པར་འགྱུར་བ་དེ་ནི་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་
ལ་དོན་དང་ཕན་པ་དང་བདེ་བར་འགྱུར་རོ། །ད་ལྟར་དང་མ་འོངས་པའི་དུས་ཀྱི་སེམས་ཅན་རྣམས་དེ་བཞིན་གཤེགས་པ་ལས་ཐོས་ནས་ཡང་དང་ཡང་དུ་དགེ་བའི་རྩ་བ་སྐྱེད་པར་འགྱུར། སེམས་དང་བར་འགྱུར། ཡིད་བདེ་བ་ཡང་ཐོབ་པར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་

རྫོགས་པའི་སངས་རྒྱས་ཤཱཀྱ་ཐུབ་པ་ཤཱཀྱའི་རྒྱལ་པོ་ཐུགས་རྗེ་ཆེན་པོ་དང་ལྡན་པ། འཇིག་རྟེན་ཐམས་ཅད་ལ་ཕན་ཞིང་ཐུགས་བརྩེ་བ་ཅན་གྱིས་བདག་ཅག་དབུགས་ཕྱུང་ངོ་ཞེས་དེ་དག་རྒྱ་ཆེར་སྤྲོ་བར་འགྱུར་ཏེ་སངས་རྒྱས་ཡིད་ལ་བགྱིད་ཅིང་སངས་རྒྱས་ལ་དམིགས་པའི་དྲན་པ་སྐྱེད་
པར་འགྱུར་རོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་བཤད་དོ། །བཙུན་པ་དེ་བཞིན་ནོ་ཞེས་གསོལ་ནས་ཚེ་དང་ལྡན་པ་ཀུན་དགའ་བོ་
བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་གང་དག་ཁ་ཅིག་སངས་རྒྱས་ལ་དམིགས་ནས་ཐ་ན་སངས་རྒྱས་ལ་དམིགས་པའི་སེམས་ཀྱིས་མེ་ཏོག་གཅིག་ནམ་མཁའ་ལ་འདོར་ན། དེའི་རྣམ་པར་སྨིན་པ་གང་ཡིན་པ་
དེ་ནི་ཀུན་དགའ་བོ་གལ་ཏེ་སེམས་ཅན་འགའ་ཞིག་བསྐལ་པ་གཅིག་ཏུ་འཁོར་བ་འདི་ཇི་སྲིད་པར་ཀུན་དུ་རྒྱུག་ཅིང་འཁོར་ཡང་འཁོར་བའི་སྔོན་གྱི་མཐའ་མི་ཤེས་པ་བཞིན་དུ་བསོད་ནམས་མངོན་པར་འདུ་བྱ་བའི་དགེ་བའི་རྩ་བ་མངོན་པར་འདུ་བྱས་པ་དེའི་མཐའ་དེ་ནི་བརྒྱ་བྱིན་ཉིད་རྣམས་ཀྱིས་རྙེད་པར་སླ་
བ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་སངས་རྒྱས་ལ་ཕུལ་བའི་ཡོན་ནི་འཁོར་བ་ན་སྤྱོད་པའི་བདེ་བ་ཐམས་ཅད་ཀྱིས་མཐར་གཏུགས་པར་སླ་བ་མ་ཡིན་ཏེ། གཞན་དུ་ན་དགེ་བའི་རྩ་བ་དེའི་འབྲས་བུ་མྱ་ངན་ལས་འདས་པ་ཉིད་འབྲས་བུ་ཡིན་པས་ཐ་མ་མྱ་ངན་ལས་འདའ་
བར་ང་སྨྲའོ། །ཀུན་དགའ་བོ་གང་དག་ཁ་ཅིག་མངོན་དུ་བསྟི་སྟང་བྱེད་པ་ལྟ་ཡང་ཞོག །གང་ངའི་སྐུ་གདུང་དང་རིང་བསྲེལ་ཡུངས་འབྲུ་ཙམ་ལ་སྐུ་གདུང་གི་མཆོད་པ་བྱེད་པ་ལྟ་ཡང་ཞོག །གང་ངའི་ཕྱིར་མཆོད་རྟེན་བྱས་པ་རྣམས་ལ་བསྟི་སྟང་བྱེད་པ་ལྟ་ཡང་ཞོག །གང་སངས་རྒྱས་ལ་དམིགས་
ནས་ཐ་ན་མེ་ཏོག་གཅིག་ནམ་མཁའ་ལ་འདོར་བ་ལྟ་ཡང་ཞོག་སྟེ། ཀུན་དགའ་བོ་གལ་ཏེ་སེམས་ཅན་མྱ་ངན་ལས་འདའ་བའི་སྐལ་བ་མེད་པ་ཞིག་གིས་སངས་རྒྱས་ལ་དམིགས་ནས། ཐ་ན་མེ་ཏོག་གཅིག་ནམ་མཁའ་ལ་འདོར་ན་ཡང་ཀུན་དགའ་བོ་དགེ་བའི་རྩ་བ་དེའི་འབྲས་བུ་དེ་ཡང་མྱ་ངན་

ལས་འདས་པ་འབྲས་བུ་ཡིན་ཏེ། མྱ་ངན་ལས་འདས་པས་ཀླས་པ་དང་། མྱ་ངན་ལས་འདས་པའི་མཐས་གཏུགས་པར་ང་སྨྲའོ། །དགེ་བའི་རྩ་བ་དེ་དག་གི་མཐའ་ནི་མྱ་ངན་ལས་འདས་པ་ཡིན་ཏེ་མྱ་ངན་ལས་འདས་པ་ནི་གཙོ་བོ་ཡིན། མྱ་ངན་ལས་འདས་པ་ནི་ཁྱད་པར་ཅན་ཡིན། མྱ་ངན་ལས་
འདས་པ་ནི་མཆོག་ཡིན། མྱ་ངན་ལས་འདས་པ་ནི་གྱ་ནོམ་པ་ཡིན་ནོ། །སྦྱིན་པ་དེ་མཐར་ཕྱིན་པ་ལ་ཕུལ་བ་ནི་མྱ་ངན་ལས་འདས་པ་རྣམ་པར་དག་པར་ང་སྨྲའོ། །ཀུན་དགའ་བོ་རྒྱུ་དེས་དེ་བཞིན་གཤེགས་པ་སྦྱིན་གནས་རྣམས་ཀྱི་མཆོག་དང་། སྦྱིན་གནས་རྣམས་ཀྱི་རྒྱལ་པོ་ཡིན་ནོ། །
དེ་ཅིའི་ཕྱིར་ཞེ་ན། སྦྱིན་པ་གང་དེ་བཞིན་གཤེགས་པ་ལ་ཕུལ་བ་དེའི་འབྲས་བུ་མྱ་ངན་ལས་འདས་པར་འཐོབ་པར་འགྱུར་ཏེ། དེའི་ཕྱིར་དེ་བཞིན་གཤེགས་པ་སྦྱིན་གནས་རྣམས་ཀྱི་མཆོག་ཅེས་བྱའོ། །ཀུན་དགའ་བོ་ལམ་དེ་ནི་འཐུན་པའོ། །ཀུན་དགའ་བོ་འདི་ལྟར་རྣམ་གྲངས་འདིས་
ན་དེ་བཞིན་གཤེགས་པ་ནི་མ་ངེས་པར་ལེན་པ་རྣམས་ཀྱི་མཆོག་ཡིན་པར་བསྟན་ཏོ། །དེ་བཞིན་གཤེགས་པ་ལ་ཡོན་ཕུལ་བ་ཐམས་ཅད་ཀྱི་མཐའ་ནི་འབྲས་བུ་མྱ་ངན་ལས་འདས་པ་ཡིན་ཏེ། མྱ་ངན་ལས་འདས་པས་ཀླས་པ་དང་། མྱ་ངན་ལས་འདས་པའི་མཐས་གཏུགས་པར་འགྱུར་རོ། །ཀུན་དགའ་
བོ་སྦྱིན་པ་དེ་ལྟ་བུའང་ལྟ་ཞོག །དེ་ཅིའི་ཕྱིར་ཞེ་ན། ཀུན་དགའ་བོ་གང་སངས་རྒྱས་ལ་དམིགས་ནས་ཐ་ན་སེམས་གཅིག་བསྐྱེད་དེ་དང་བ་སྐྱེད་ན། ཀུན་དགའ་བོ་དེ་ཐམས་ཅད་ཀྱི་འབྲས་བུ་ཡང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ་མིར་གྱུར་པའི་སྦྱིན་པ་
བྱས་པ་དེ་ལྟ་བུ་ཡང་ལྟ་ཞོག་ལ། ཀུན་དགའ་བོ་གང་ཐ་ན་དུད་འགྲོའི་སྐྱེ་གནས་སུ་སོང་བའི་སེམས་ཅན་རྣམས་ཀྱང་སངས་རྒྱས་ལ་དམིགས་པའི་དྲན་པ་རྙེད་པ་དེ་དག་ཐམས་ཅད་ཀྱི་འབྲས་བུ་ཡང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ་འདི་ལྟར་དུད་
འགྲོའི་སྐྱེ་གནས་སུ་སོང་བའི་སེམས་ཅན་རྣམས་ཀྱང་ཐ་མ་མྱ་ངན་ལས་འདའ་བའི་བར་དུ་འགྱུར་ཏེ། འདི་ལྟར་རྫུ་འཕྲུལ་ཆེ་བས་སངས་རྒྱས་བཅོམ་ལྡན་འདས་རྣམས་ལ་ཡོན་ཕུལ་བ་ཇི་ཙམ་དུ་རྫུ་འཕྲུལ་ཆེ་བ་དང་། སངས་རྒྱས་རྣམས་ལ་སེམས་དང་བ་ཇི་ཙམ་དུ་རྫུ་འཕྲུལ་ཆེ་བ་ལ་ལྟོས། ཀུན་དགའ་

བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་དང་། ཀུན་དགའ་བོ་ཁྱོད་རྫུ་འཕྲུལ་ཆེ་བ་དང་། འབྲས་བུ་ཆེ་བ་དང་། ཕན་ཡོན་ཆེ་བ་དང་། རབ་ཏུ་རྒྱ་ཆེ་བ་དང་། འོད་ཆེ་བ་དང་། བདུད་རྩི་ལྟ་བུ་དང་། མི་འཆི་བས་ཀླས་པ་དང་། མི་འཆི་བའི་མཐས་གཏུགས་པར་འགྱུར་
རོ། །ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་བྱམས་པའི་ལུས་ཀྱི་ལས་དང་། བྱམས་པའི་ངག་གི་ལས་དང་བྱམས་པའི་ཡིད་ཀྱི་ལས་ཕན་པ་དང་། བདེ་བ་དང་གཉིས་སུ་མེད་པ་དང་། ཚད་མེད་པ་དང་། ཁོ་ན་མེད་པ་དང་། གནོད་སེམས་མེད་པས་བསྙེན་བཀུར་བྱས་ཏེ།
ཀུན་དགའ་བོ་གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱུན་དུ་ཞུགས་པས་ཡོངས་སུ་གང་བར་གྱུར་ཅིང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་རྣམས་ཀྱིས་ཡོངས་སུ་གང་བར་གྱུར་པ་འདི་ལྟ་སྟེ་དཔེར་ན། བུ་རམ་ཤིང་སྟུག་པོའམ། འབྲས་
ཞིང་སྟུག་པོའམ། འདམ་བུ་མདའ་རྒྱུ་སྟུག་པོའམ། འོད་མ་སྟུག་པོའམ། འདམ་བུ་སྟུག་པོའམ། ཏིལ་ཞིང་སྟུག་པོའམ། རྩྭ་ཀུ་ཤ་སྟུག་པོ་ལྟ་བུར་གྱུར་པ་དེ་དག་ཐམས་ཅད་ལ་རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་བསྐལ་པའམ་བསྐལ་པ་ལས་ལྷག་པར་བསྟི་སྟང་བྱེད། བླ་མར་
བྱེད། རིམ་གྲོར་བྱེད། མཆོད་པར་བྱེད་ཅིང་བདེ་བའི་ཡོ་བྱད་ཡིད་དུ་འོང་བ་ཐམས་ཅད་དང་། བདེ་བར་སྦྱར་བའི་སྤྱད་པ་ཐམས་ཅད་ཀྱིས་བསྙེན་བཀུར་བྱེད་ན་ཀུན་དགའ་བོ་དེ་ཇི་སྙམ་དུ་སེམས། རིགས་ཀྱི་བུའམ་རིགས་ཀྱི་བུ་མོ་དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ། བཅོམ་
ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཀའ་སྩལ་པ། ཀུན་དགའ་བོ་བསོད་ནམས་ཀྱི་ཕུང་པོ་གང་ཡིན་པ་དེ་ནི་གང་དེ་བཞིན་གཤེགས་པ་ལ་ཐ་ན་ཐལ་མོ་སྦྱར་བ་ལན་ཅིག་བྱས་ཏེ་དེ་བཞིན་གཤེགས་པ་ལ་ཕྱག་འཚལ་ལོ་ཞེས་ཚིག་ལན་ཅིག་སྨྲས་ན། ཀུན་དགའ་
བོ་ཐལ་མོ་སྦྱར་བ་གཅིག་གིས་བསྟི་སྟང་བྱས་པ་དེ་ལ་དགེ་བའི་རྩ་བ་སྔ་མ་དེས་བརྒྱའི་ཆར་ཡང་མི་ཆོག །སྟོང་གི་ཆ་དང་། བརྒྱ་སྟོང་གི་ཆ་དང་གྲངས་དང་ཆ་བགྲང་བ་དང་ཆར་ཡང་མི་ཆོག་གོ། །ཀུན་དགའ་བོ་དེ་ཅིའི་ཕྱིར་ཞེ་ན། དེ་ལྟར་དེ་བཞིན་གཤེགས་པ་ནི་སྦྱིན་གནས་རྣམས་ཀྱི་བླ་ན་མེད་པ་སྟེ།

དེ་བཞིན་གཤེགས་པ་ལ་ཡོན་ཕུལ་བ་དེ་ལྟར་རྫུ་འཕྲུལ་ཆེའོ། །ཀུན་དགའ་བོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དགྲ་བཅོམ་པས་ཡོངས་སུ་གང་བ་ལ་བསྙེན་བཀུར་བྱེད་པ་ལྟའང་ཞོག་ལ། ཀུན་དགའ་བོ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རང་
སངས་རྒྱས་ཀྱིས་ཡོངས་སུ་གང་བར་གྱུར་པ་འདི་ལྟ་སྟེ། བུ་རམ་ཤིང་སྟུག་པོའམ། འདམ་བུ་སྟུག་པོ་ནས་རྩྭ་ཀུ་ཤ་སྟུག་པོའི་བར་ལྟ་བུར་གྱུར་པ་དེ་དག་ལ་འགའ་ཞིག་ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་དང་། བདེ་བ་ལ་རེག་པར་གནས་པར་འགྱུར་བ་ཐམས་ཅད་ཀྱིས་བསྟི་
སྟང་བྱེད། བླ་མར་བྱེད། རི་མོར་བྱེད། མཆོད་པར་བྱེད་ཅིང་རང་སངས་རྒྱས་དེ་དག་ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་རིན་པོ་ཆེ་སྣ་བདུན་ལས་བྱས་ཏེ། དེ་དག་ལ་ཡང་ཇི་སྲིད་འཚོའི་བར་དུ་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་
དང་། གདུགས་དང་། རྒྱལ་མཚན་དང་། བ་དན་ཐམས་ཅད་ཀྱིས་བསྟི་སྟང་བྱེད། བླ་མར་བྱེད་པ་ནས་མཆོད་པར་བྱེད་པའི་བར་དུ་བྱེད་ན། ཀུན་དགའ་བོ་དེ་ཇི་སྙམ་དུ་སེམས། དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ་བཅོམ་ལྡན་འདས་མང་ལགས་སོ། །བདེ་བར་གཤེགས་
པ་མང་ལགས་སོ། །བཀའ་སྩལ་པ། ཀུན་དགའ་བོ་གང་བསོད་ནམས་ཀྱི་ཕུང་པོ་འདི་ནི་གང་དེ་བཞིན་གཤེགས་པ་ལ་ཐ་ན་སེམས་བསྐྱེད་པ་གཅིག་གིས་སེམས་རབ་ཏུ་དང་བས་རྗེས་སུ་དྲན་པ་དང་། སངས་རྒྱས་ཀྱི་ཡོན་ཏན་རྣམས་ལ་དད་པ་དང་རྟོག་པ་དང་མོས་པ་དང་། དེ་བཞིན་གཤེགས་པ་
རྣམས་ཀྱི་ཡེ་ཤེས་ནི་བསམ་གྱིས་མི་ཁྱབ་བོ་ཞེས་ཚིག་ཏུ་སྨྲ་བ་ནི་ཀུན་དགའ་བོ་སེམས་དང་བའི་དགེ་བའི་རྩ་བ་འདི་ལ་རང་སངས་རྒྱས་ལ་བསྐྱེད་པའི་བསོད་ནམས་ཀྱི་ཕུང་པོ་སྔ་མས་ཐ་ན་ཆ་ནས་རྒྱུའི་བར་དུ་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། ཀུན་དགའ་བོ་སངས་རྒྱས་བཅོམ་ལྡན་འདས་རྣམས་
ཀྱི་བྱམས་པ་དཔག་ཏུ་མེད། སྙིང་རྗེ་ཆེན་པོ་དཔག་ཏུ་མེད། ཚུལ་ཁྲིམས་དཔག་ཏུ་མེད། ཏིང་ངེ་འཛིན་དཔག་ཏུ་མེད། ཤེས་རབ་དཔག་ཏུ་མེད། རྣམ་པར་གྲོལ་བ་དཔག་ཏུ་མེད། རྣམ་པར་གྲོལ་བའི་ཡེ་ཤེས་མཐོང་བ་དཔག་ཏུ་མེད། ཡང་དག་པར་འགྲུབ་པ་དཔག་ཏུ་མེད། རྟོགས་པ་དཔག་ཏུ་

མེད་དེ། ཀུན་དགའ་བོ་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་བསམ་གྱིས་མི་ཁྱབ། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་དེ་ལ་རྣམ་པར་སྨིན་པ་ཡང་བསམ་གྱིས་མི་ཁྱབ་པར་ཤེས་པར་བྱོས་ལ་ཀུན་དགའ་བོ་ཁྱོད་མྱ་ངན་མ་བྱེད་སྨྲེ་སྔགས་མ་འདོན་ཅིག །
ཀུན་དགའ་བོ་ཁྱོད་རྫུ་འཕྲུལ་ཆེན་པོ་དང་རྒྱ་ཆེན་པོར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་ཁྱོད་ཀྱིས་ལོ་ཉི་ཤུ་ལྷག་གི་བར་དུ་དེ་བཞིན་གཤེགས་པ་ལ་བྱམས་པའི་ལུས་ཀྱི་ལས་དང་། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཀྱིས་བསྙེན་བཀུར་བྱས་ཤིང་ཆོས་ཀྱི་
ཕུང་པོ་བརྒྱད་ཁྲི་བཞི་སྟོང་བཟུང་སྟེ། མང་དུ་ཐོས་པ་རྣམས་ཀྱི་མཆོག །སྣ་ཚོགས་སྨྲ་བ་རྣམས་ཀྱི་མཆོག །གསལ་བ་དུལ་བ་འཇིགས་པ་མེད་པ། མང་དུ་ཐོས་པ། མདོ་འཛིན་པ། འདུལ་བ་འཛིན་པ། མ་མོ་འཛིན་པ། འཁོར་བཞི་རྣམས་ལ་ཆོས་འཆད་པས་ངལ་བ་མེད་པ་
ཡིན་ནོ། །ཀུན་དགའ་བོ་ང་འདས་ནས་ཁྱོད་དང་གནས་བརྟན་འོད་སྲུང་ཆེན་པོ་གཉིས་སྟོན་པའི་མཛད་པ་བྱེད་པར་འགྱུར་གྱིས། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་དགའ་བོ་ཁྱོད་རྫུ་འཕྲུལ་ཆེ་བར་འགྱུར། ཕན་ཡོན་ཆེ་བ་དང་། གཟི་ཆེ་བ་དང་། ཀུན་
དགའ་བོ་ཁྱོད་རྒྱ་ཆེ་བར་འགྱུར་རོ། །སྐུ་གདུང་མེད་པར་མི་འགྱུར་བའི་ལེའུ་སྟེ་བདུན་པ་རྫོགས་སོ།། །།བམ་པོ་བཞི་པ། དེ་ནས་ཡང་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སེམས་ཅན་གང་དག་ཁ་ཅིག་སངས་རྒྱས་བཅོམ་
ལྡན་འདས་རྣམས་ཀྱི་གསུང་ཐོས་སམ། མཚན་གྱི་སྒྲ་ཐོས་ན། ཀུན་དགའ་བོ་དེ་ཡང་དེ་དག་ལ་ཡོངས་སུ་མྱ་ངན་ལས་འདས་ཀྱི་བར་དུ་དོན་མེད་པར་མི་འགྱུར་བར་ང་སྨྲའོ། །ཀུན་དགའ་བོ་གང་སངས་རྒྱས་རྣམས་ལ་ཕྱག་འཚལ་ལོ་ཞེས་བྱ་བའི་ཚིག་དེའི་དོན་ཀྱང་གང་ཡིན། དེ་སྐད་
ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ནི་ཆོས་ཐམས་ཅད་ཀྱི་རྩ་བ་ལགས། བཅོམ་ལྡན་འདས་ནི་འདྲེན་པ་ལགས། བཅོམ་ལྡན་འདས་ནི་སྟོན་པ་ལགས་ན། བཅོམ་ལྡན་འདས་

དགེ་སློང་རྣམས་ལ་དོན་དེ་ལེགས་པར་བཤད་དུ་གསོལ། བཅོམ་ལྡན་འདས་ལས་མངོན་སུམ་དུ་ཐོས་ནས་དོན་དེ་བཞིན་དུ་འཛིན་པར་འགྱུར་རོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེའི་ཕྱིར་
ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །བཅོམ་ལྡན་འདས་དེ་བཞིན་ནོ་ཞེས་གསོལ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་འདི་ལ་སངས་རྒྱས་ལ་ཕྱག་འཚལ་
ལོ་ཞེས་བྱ་བ་ཚིག་དེའི་དོན་ནི་འདི་ཡིན་ཏེ། འདི་ལྟ་སྟེ། སངས་རྒྱས་བཅོམ་ལྡན་འདས་རྣམས་ཀྱི་མཚན་གྱི་སྒྲ་དོན་མེད་པར་མི་འགྱུར་བ་ཡིན་ནོ། །ཀུན་དགའ་བོ་དེ་ལྟར་ན་སངས་རྒྱས་ལ་ཕྱག་འཚལ་ལོ་ཞེས་བྱ་བ་འདི་ནི་དོན་མེད་པར་མི་འགྱུར་བར་བཤད་དོ། །ཀུན་དགའ་བོ་དེ་བས་ན་དོན་འདི་
རྒྱ་ཆེར་ཤེས་པར་བྱ་བ་དང་། ཡོངས་སུ་རྫོགས་པར་བྱ་བ་དང་། སངས་རྒྱས་བཅོམ་ལྡན་འདས་རྣམས་ཀྱི་མཚན་ཐོས་ན་དད་པའི་རིགས་ཀྱི་བུ་དང་རིགས་ཀྱི་བུ་མོ་དག་བསྟན་པ་འདི་ལ་རྒྱ་ཆེར་སེམས་དང་བར་འགྱུར་བར་བྱ་བའི་ཕྱིར་ཁྱོད་ལ་དཔེ་བསྟན་ཏོ། །ཀུན་དགའ་བོ་སྔོན་བྱུང་བ་འདས་
པའི་དུས་ན་ཚོང་པའི་ཚོགས་མང་པོ་རྒྱ་མཚོ་ཆེན་པོར་ཞུགས་པར་གྱུར་ཏེ། དེ་དག་རྒྱ་མཚོའི་དབུས་སུ་ཕྱིན་པ་དང་གྲུ་བོ་ཆེ་ཆུ་སྲིན་གྱིས་ཟིན་པར་གྱུར་ཏོ། །ཀུན་དགའ་བོ་དེ་ནས་ཚོང་པའི་ཚོགས་ཆེན་པོ་འཇིགས་ཤིང་སྔངས་སྐྲག་སྟེ། སྤུ་ཟིང་ཞེས་བྱེད་པར་གྱུར་ཅིང་འཆི་བའི་འཇིགས་པས་སྐྲག་
སྟེ། མགོན་མེད། སྐྱབས་མེད། དཔུང་གཉེན་མེད་པར་གྱུར་ནས་དེ་དག་སོ་སོ་ན་ངུ་ཞིང་ཆོ་ངེ་འདོན་སྨྲེ་སྔགས་འདོན་ཏེ་རྣམ་པར་སྨྲེ་བ་སྣ་ཚོགས་ཀྱིས་རྣམ་པར་སྨྲེ་སྟེ། ཀྱེ་མའོ་འཛམ་བུ་གླིང་དེ་ཉམས་རེ་དགའ། ཀྱེ་མའོ་འཚོ་བའི་འཇིག་རྟེན་དེ་རེ་བཟང་། ཀྱེ་མའོ་མིར་འགྱུར་བ་འདི་རྙེད་པར་
རེ་དཀའོ། །ཀྱེ་མའོ་ཕ་མ་དག་དང་འབྲལ་བར་འགྱུར་རོ། །ཀྱེ་མའོ་བུ་དང་ཆུང་མ་དང་། ཀྱེ་མའོ་མཛའ་བཤེས་དང་ཆུང་མའི་ཚོགས་རྣམས་ཕྱིན་ཅད་མི་མཐོང་ངོ་། །ཞེས་ངུ་ཞིང་སྨྲེ་སྔགས་འདོན། སྡུག་བསྔལ་དང་ཡིད་མི་བདེ་བ་མྱོང་སྟེ་འཚོ་བར་འདོད་པས་ལྷ་སྣ་ཚོགས་རྣམས་

ལ་ཕྱག་འཚལ་ལོ། །ཀུན་དགའ་བོ་དེ་ནས་ཚོང་པའི་ཚོགས་དེ་ན་དེད་དཔོན་མཁས་པ་གསལ་བ་ཡིད་གཞུངས་པ་སངས་རྒྱས་དང་ཆོས་དང་དགེ་འདུན་ལ་མངོན་པར་དང་བ། ལྷར་གཞན་མི་འཛིན་ཅིང་སངས་རྒྱས་བཅོམ་ལྡན་འདས་ལ་དད་པ་ཞིག་ཡོད་པར་གྱུར་ཏེ། དེས་
ཚོང་པ་དེ་དག་ཐམས་ཅད་ལ་འདི་སྐད་ཅེས་སྨྲས་སོ། །ཀྱེ་ཚོང་པ་དག་འཇིགས་ཤིང་སྐྲག་པ་ཆེན་པོ་འདི་ལས་ཕྱིན་ཅིང་ཐར་བར་འདོད་དམ། མཐར་ན་ཡང་བདེ་འགྲོ་མཐོ་རིས་སུ་སྐྱེ་བར་འདོད་ན་ཚུར་ཤེག །ཐམས་ཅད་ཚོགས་ཤིང་འཐུན་པས་ང་ཇི་སྐད་དུ་སྨྲ་བ་དེ་བཞིན་དུ་ཁྱེད་ཀྱང་སོ་སོར་
སྨྲོས་ཤིག་དང་། དེ་དག་གིས་སྨྲས་པ། དེད་དཔོན་ཁྱོད་སྨྲོས་ཤིག་བདག་ཅག་ཀྱང་ཁྱོད་སྨྲ་བ་བཞིན་དུ་ཟློས་སོ། །ཀུན་དགའ་བོ་དེ་ནས་དེད་དཔོན་དེ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་གྲུ་བོ་ཆེ་ལ་བཙུགས་ཏེ་སངས་རྒྱས་ལ་དམིགས་པའི་སེམས་ཀྱིས་སྒྲ་ཆེན་པོ་ཕྱུང་
སྟེ། སངས་རྒྱས་རྣམས་ལ་ཕྱག་འཚལ་ལོ། །མི་འཇིགས་པ་སྦྱིན་པ། ཐུགས་རྗེ་ཆེན་པོ་དང་ལྡན་པ། སེམས་ཅན་ཐམས་ཅད་ལ་ཐུགས་བརྩེ་བ་ཅན་སངས་རྒྱས་རྣམས་ལ་ཕྱག་འཚལ་ལོ་ཞེས་སངས་རྒྱས་ལ་ཕྱག་འཚལ་ཏོ། །ཚོང་པའི་ཚོགས་དེ་དག་ཀྱང་དེ་ཉིད་དུ་ཐལ་མོ་སྦྱར་ནས་མགྲིན་གཅིག་
ཏུ་ཚིག་སྨྲས་པ། སངས་རྒྱས་རྣམས་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། སེམས་ཅན་ཐམས་ཅད་ལ་ཐུགས་བརྩེ་བ་ཅན་ལ་ཕྱག་འཚལ་ལོ་ཞེས་བྱས་སོ། །ཀུན་དགའ་བོ་དེ་ནས་ཆུ་སྲིན་དེས་སངས་རྒྱས་ཀྱི་སྒྲ་དེ་ཐོས་སོ། །དེས་སངས་རྒྱས་ལ་ཕྱག་
འཚལ་ལོ་ཞེས་བྱ་བ་དེ་ཐོས་ནས་དགའ་བ་ཆེན་པོ་དང་རྣམ་པར་འཚེ་བ་མེད་པའི་སེམས་ཐོབ་པར་གྱུར་ཏེ་དེས་ཁ་སླར་བཙུམས་སོ། །ཀུན་དགའ་བོ་དེ་ནས་དེད་དཔོན་དེ་གྲུ་དེ་དང་བཅས་པར་བདེ་བར་ཐར་ཏེ། གྲུ་བོ་ཆེ་དེ་དག་བདེ་ཞིང་དོན་གྲུབ་ནས་སླར་འཛམ་བུའི་གླིང་དུ་འཁོར་ཏོ། །ཆུ་སྲིན་དེ་ཡང་སངས་
རྒྱས་ཀྱི་སྒྲ་དེ་ཐོས་པས་བདེ་བ་མྱོང་ཞིང་ཕྱིན་ཅད་སྲོག་ཆགས་གཞན་མི་ཟ་སྟེ་དེ་ལྟོགས་ནས་དེ་ཉིད་དུ་འཆི་བའི་དུས་བྱས་སོ། །དེ་འཆི་བའི་དུས་བྱས་མ་ཐག་ཏུ་དུད་འགྲོའི་སྐྱེ་གནས་ལས་ཤི་འཕོས་ནས་མི་དང་སྐལ་བ་མཉམ་པར་སྐྱེས་པར་གྱུར་ཏོ། །དེ་དེ་བཞིན་གཤེགས་པས་གསུངས་པའི་ཆོས་

འདུལ་བ་ལ་དད་པར་གྱུར་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །རབ་ཏུ་བྱུང་ནས་ཀྱང་དགེ་བའི་བཤེས་གཉེན་ལ་བསྙེན་ཅིང་བསྟེན་ལ་བསྙེན་བཀུར་བྱས་པས་དགྲ་བཅོམ་པ་ཐོབ་སྟེ། མངོན་པར་ཤེས་པ་དྲུག་མངོན་སུམ་དུ་བྱས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་
མྱ་ངན་ལས་འདས་སོ། །ཀུན་དགའ་བོ་ཆུ་སྲིན་དུད་འགྲོའི་སྐྱེ་གནས་སུ་གྱུར་པ་དེས་སངས་རྒྱས་ཀྱི་སྒྲ་ཐོས་པ་དེ་མིར་འགྱུར་བའི་རྒྱུར་གྱུར་པ་དང་། རབ་ཏུ་བྱུང་བའི་རྒྱུར་གྱུར་པ་དང་། དགྲ་བཅོམ་པ་ཐོབ་པའི་རྒྱུར་གྱུར་པ་དང་། ཡོངས་སུ་མྱ་ངན་ལས་འདས་པའི་རྒྱུར་གྱུར་པ་ལ་ལྟོས། ཀུན་
དགའ་བོ་སངས་རྒྱས་བཅོམ་ལྡན་འདས་རྣམས་ཀྱི་སྒྲ་ཐོས་པ་དེ་ཇི་ཙམ་དུ་རྫུ་འཕྲུལ་ཆེ་བ་དང་། མཚན་བརྗོད་པ་ཇི་ཙམ་དུ་རྫུ་འཕྲུལ་ཆེ་བ་དང་། སེམས་དང་བ་ཇི་ཙམ་དུ་རྫུ་འཕྲུལ་ཆེ་བ་ལ་ལྟོས། གང་ན་མི་དགེ་བར་གཏོགས་པ་དུད་འགྲོའི་སྐྱེ་གནས་སུ་གྱུར་པའི་ཆུ་སྲིན་གྱིས་སངས་རྒྱས་ཀྱི་སྒྲ་ཐོས་པ་
དེ་ཡང་དོན་མེད་པར་མ་གྱུར་ན་མིར་གྱུར་པ་ལྟ་ཅི་སྨོས། ཀུན་དགའ་བོ་ཁྱོད་ཀྱིས་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། འདི་ལྟར་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་སྒྲ་ཐོས་པ་ཡང་དོན་མེད་པར་མི་འགྱུར་ན། སངས་རྒྱས་ལ་བསྐྱེད་པའི་དགེ་བའི་རྩ་བ་དེ་ལས་
གཞན་ལྟ་ཅི་སྨོས། ཀུན་དགའ་བོ་ཉི་ཚེ་བ་བྱེད་པ་ནི་ཉི་ཚེ་བ་འགྲུབ། ཡོངས་སུ་རྫོགས་པ་བྱེད་པ་ནི་ཡོངས་སུ་རྫོགས་པ་འགྲུབ་བོ། །ངས་དེ་སྐད་སྨྲས་པ་དེ་ཡང་ངས་ཅི་ལ་བརྟེན་ཏེ་སྨྲས་ཤེ་ན། ཉི་ཚེ་བ་བྱེད་པ་ཞེས་བྱ་བ་ནི་གང་དད་པ་ལས་བྱུང་བ་དགེ་བའི་རྩ་བ་ཚུ་རོལ་པའི་དུས་ཅན་ཉན་ཐོས་ཀྱི་
ས་བོན་སྐྱེད་པ་སྟེ་ཉན་ཐོས་སུ་འགྱུར་རོ། །དེ་དགེ་བའི་རྩ་བ་དེས་ཉན་ཐོས་ཀྱི་ས་ཡོངས་སུ་རྫོགས་པར་བྱེད་དོ། །རང་གི་ཕྱིར་བྱེད་པ་ནི་རང་གི་དགེ་བའི་རྩ་བ་བསྐྱེད་ནས་རང་སངས་རྒྱས་ཀྱི་ས་ཡོངས་སུ་རྫོགས་པར་བྱེད་དེ། ཀུན་དགའ་བོ་ངས་འདི་ལ་བརྟེན་ནས་འདི་ཉི་ཚེ་བ་བྱེད་པའོ་ཞེས་སྨྲས་སོ། །
ཀུན་དགའ་བོ་ཡོངས་སུ་རྫོགས་པར་བྱེད་པ་ནི་ཀུན་དགའ་བོ་གང་ཐོག་མ་དང་ཐ་མ་མེད་པའི་དུས་ཅན་དགེ་བའི་རྩ་བ་སངས་རྒྱས་ལ་བསྐྱེད་པ། སངས་རྒྱས་ཀྱི་ས་བོན་བསྐྱེད་པ་སྟེ། དེ་དུས་རིང་མོ་ཞིག་འདས་ནས་བརྒྱ་ལ་བརྒྱ་ལམ་ན་རྒྱུ་དེ་དང་། རྐྱེན་དེ་དང་། དགེ་བའི་རྩ་བ་དེས་སངས་རྒྱས་བཅོམ་

ལྡན་འདས་རྣམས་མཉེས་པར་བྱེད་དོ། །མཉེས་པར་བྱས་ནས་ཀྱང་ཡོངས་སུ་རྫོགས་པར་བྱ་བའི་ཕྱིར་དེ་ལ་དགེ་བའི་རྩ་བ་སྐྱེད་དོ། །བསྐྱེད་ནས་ཀྱང་བྱང་ཆུབ་ཀྱི་ཚོགས་རྣམས་མངོན་པར་འདུས་བྱས་ནས་ཡན་ལག་རྣམས་ཡོངས་སུ་རྫོགས་པས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཞེས་འཇིག་རྟེན་ན་སྒྲ་རྣམ་པར་གྲགས་པའི་སངས་རྒྱས་སུ་འགྱུར་ཏེ། ཀུན་དགའ་བོ་འདི་ནི་ཡོངས་སུ་རྫོགས་པར་བྱེད་པ་ཞེས་བྱའོ། །དེ་ལྟར་ངས། གང་སྨྲས་པ་དེ་ནི་འདི་ལ་བརྟེན་ཏེ་སྨྲས་སོ། །ཀུན་དགའ་བོ་རྣམ་གྲངས་འདིས་ཀྱང་ཁྱོད་ཀྱིས་
འདི་ལྟར་གང་ཉི་ཚེ་བ་བྱེད་པས་ནི་ཉི་ཚེ་བ། ཡོངས་སུ་རྫོགས་པར་བྱེད་པས་ནི་ཡོངས་སུ་རྫོགས་པ་འགྲུབ་པར་རིག་པར་བྱའོ། །ཀུན་དགའ་བོ་ངས་སྤྱོད་པ་གཞན་ཡང་ཐ་ན་རྩ་བ་བཞི་པ་ཙམ་ཡང་བཤད་དོ། །དེ་ལྟར་ངས་གང་སྨྲས་པ་དེ་ངས་ཅི་ལ་བརྟེན་ཏེ་སྨྲས་ཤེ་ན། ཀུན་དགའ་བོ་ངས་སེམས་
ཅན་རིད་ཅིང་ཉམ་ཆུང་བ་རྣམས་ལ་བརྟེན་ནས་བཤད་དེ། ཀུན་དགའ་བོ་ང་ནི་སེམས་ཅན་ཆུད་ཟོས་པ་རྣམས་ཀྱི་སྐྱབས་སོ། །ང་ནི་རབ་ཏུ་ཆུད་ཟོས་པ་རྣམས་ཀྱི་མགོན་ནོ། །ང་ནི་དཔུང་གཉེན་ནོ། །ང་ནི་རྟེན་མེད་པ་དང་མགོན་མེད་པ་རྣམས་ཀྱི་རྟེན་དང་མགོན་ཡིན་ནོ། །ཀུན་དགའ་བོ་ང་ནི་སེམས་
ཅན་སྒྲོན་མ་མེད་པ་དང་། ལོང་བ་དང་། མིག་མེད་པ་རྣམས་ཀྱི་སྒྲོན་མ་དང་མིག་དང་། སྣང་བ་དང་འོད་བྱེད་པའོ། །ཀུན་དགའ་བོ་ཕས་ཀྱི་རྒོལ་བ་ཐམས་ཅད་ནི་སྐྱབས་མེད་པ། ལོང་བ། མིག་མེད་པ། ཡོངས་སུ་འདྲེན་པ་མེད་པའོ། །ཀུན་དགའ་བོ་ང་ནི་ལྷ་དང་བཅས་པའི་འཇིག་རྟེན་
གྱི་སྟོན་པའོ། །འཆོས་པའོ། །སེམས་ཅན་ཐམས་ཅད་ལ་སྙིང་བརྩེ་བ་ཅན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་ཕྱི་མའི་དུས་ཟད་པའི་དུས། དམ་པའི་ཆོས་འཇིག་པར་འགྱུར་བའི་དུས་ན་གང་དག་ངའི་བསྟན་པ་འདི་ལ་རབ་ཏུ་འབྱུང་བར་འགྱུར་བ་དག་རབ་ཏུ་བྱུང་ནས་བུའི་ལག་ནས་བཟུང་སྟེ། བུ་
དང་ལྷན་ཅིག་ཏུ་ཆང་སྐྱོགས་གང་གི་ཕྱིར་ཆང་པའི་ཁྱིམ་ནས་ཆང་པའི་ཁྱིམ་དུ་འཁྱམ་པ། ངའི་དམ་པའི་ཆོས་འདིའི་རྗེས་སུ་སློབ་པ་དེ་དག་ཐམས་ཅད་ཀྱང་ཀུན་དགའ་བོ་བསྐལ་པ་བཟང་པོ་འདི་ལ་ཡོངས་སུ་མྱ་ངན་ལས་འདའ་བར་འགྱུར་རོ། །ཀུན་དགའ་བོ་ཅིའི་ཕྱིར་བསྐལ་པ་འདི་བསྐལ་པ་བཟང་པོ་

ཞེས་བྱ་ཞེ་ན། ཀུན་དགའ་བོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འཇིག་པར་གྱུར་པའི་ཚེ་ས་ཆེན་པོ་རྒྱ་མཚོ་གཅིག་ཏུ་གྱུར་པ་ན་གནས་གཙང་མའི་རིས་ཀྱི་ལྷའི་བུ་རྣམས་ལྷའི་མིག་གིས་ཆུས་འཇིག་པ་ཐམས་ཅད་ལ་རྣམ་པར་བལྟའོ། །དེ་དག་གིས་བལྟས་ན་འཛམ་བུའི་གླིང་དུ་
པད་མ་ཆེན་པོ་གསེར་གྱི་ཁ་དོག་ལྟ་བུ་གསེར་གྱི་འོད་བྱུང་བ་འདབ་མ་སྟོང་ཡོད་པ་བསུང་ཞིམ་པ་ཡིད་དུ་འོང་བ་སྟོང་ཐམ་པ་མཐོང་ངོ་། །དེ་དག་གིས་དེ་མཐོང་ནས་འདི་སྙམ་དུ་སེམས་ཏེ། པད་མ་འདི་དག་ཇི་སྙེད་བྱུང་བ་དེ་སྙེད་ཀྱི་སངས་རྒྱས་བཅོམ་ལྡན་འདས་རྣམས་བསྐལ་པ་འདི་ལ་འབྱུང་བར་འགྱུར་རོ་
སྙམ་ནས་དེ་དག་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་གང་དུ་སངས་རྒྱས་སྟོང་འབྱུང་བ། ཀྱེ་མའོ་བསྐལ་པ་འདི་བཟང་པོར་འགྱུར་རོ། །ཀྱེ་མའོ་བསྐལ་པ་འདི་རབ་ཏུ་བཟང་པོར་འགྱུར་རོ་ཞེས་ཆེད་དུ་བརྗོད་པ་ཆེད་དུ་བརྗོད་དེ། ཀུན་དགའ་བོ་དེའི་ཕྱིར་
བསྐལ་པ་འདི་བཟང་པོ་ཞེས་བྱའོ། །ཀུན་དགའ་བོ་འདི་ལྟར་བསྐལ་པ་བཟང་པོ་འདི་ལ་བསྐལ་པ་བཟང་པོ་ཞེས་མིང་བཏགས་པའི་བསྐལ་པ་བཟང་པོའི་རྒྱུ་འདི་ཡིན་རྐྱེན་འདི་ཡིན་ནོ། །ཀུན་དགའ་བོ་བསྐལ་པ་བཟང་པོ་འདི་ལ་ང་འདས་ནས་སངས་རྒྱས་དགུ་བརྒྱ་དགུ་བཅུ་རྩ་དྲུག་འབྱུང་སྟེ། བསྐལ་པ་འདི་ལ་
འཁོར་བ་འཇིག་ཚུན་ཆད་ད་ལྟའི་ང་དང་བཞིའོ། །ཀུན་དགའ་བོ་ངའི་འོག་ཏུ་བྱམས་པ་འབྱུང་སྟེ། དེ་བཞིན་གཤེགས་པ་མོས་པ་ཞེས་བྱ་བ་སྟོང་གི་ཐ་མར་འབྱུང་ངོ་། །ཀུན་དགའ་བོ་རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། འདི་ལྟར་བསྐལ་པ་བཟང་པོ་འདི་ལ་ང་འདས་ནས་
སངས་རྒྱས་དགུ་བརྒྱ་དགུ་བཅུ་རྩ་དྲུག་འབྱུང་བའི་ཚེ། ཀུན་དགའ་བོ་ངའི་བསྟན་པ་འདི་ལ་གང་དག་དགེ་སྦྱོང་གི་རིགས་ཅན་དགེ་སྦྱོང་ཤིན་ཏེ་མ། དགེ་སྦྱོང་དུ་ཁས་འཆེ་བ། དགེ་སྦྱོང་ལྟར་བཅོས་པ། ངུར་སྨྲིག་གྱོན་པ་འབྱུང་བ་དེ་དག་ཐམས་ཅད་ཀྱང་བསྐལ་པ་བཟང་པོ་འདི་ལ་གང་བྱམས་པ་ནས་
མོས་པ་ལ་ཐུག་གི་བར་དུ་ཕྱིས་འབྱུང་བའི་སངས་རྒྱས་བཅོམ་ལྡན་འདས་དེ་དག་གི་འོག་ཏུ་མཐར་གྱིས་མྱ་ངན་ལས་འདའ་བར་འགྱུར་རོ། །དེ་དག་ཐམས་ཅད་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་སྟེ། དགེ་སློང་གཅིག་ཀྱང་ལྷག་མ་མི་ལུས་པར་

འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་དེ་བཞིན་གཤེགས་པ་ཆོས་ཀྱི་དབྱིངས་རྟོགས་ཤིང་རྗེས་སུ་རྟོགས་པ་ལ་འདི་ལྟ་བུ་དག་ཐ་ན་སེམས་དང་བ་གཅིག་བསྐྱེད་པ་དང་། དཀར་པོ་དང་ནག་པོའི་ཆོས་རྣམས་ཆུད་ཟ་བར་མི་འགྱུར་བའི་ཕྱིར་རོ། །ཀུན་དགའ་བོ་གང་དག་
ཁ་ཅིག་སེམས་དང་བས་སངས་རྒྱས་རྣམས་ལ་ཕྱག་འཚལ་ལོ་ཞེས་བྱ་བའི་ཚིག་བརྗོད་ན་ཀུན་དགའ་བོ་དགེ་བའི་རྩ་བ་དེ་ཡང་མྱ་ངན་ལས་འདའ་བ་ལ་གཞོལ་བར་ང་སྨྲ་སྟེ། མྱ་ངན་ལས་འདའ་བའི་མཐར་འགྱུར་བ་དང་། མྱ་ངན་ལས་འདའ་བའི་མུར་ཐུག་པར་འགྱུར་བར་ང་སྨྲ་ན། གང་དེ་བཞིན་
གཤེགས་པ་བཞུགས་པ་ལ་བསྟི་སྟང་བྱེད་པ་དང་། བླ་མར་བྱེད་པ་དང་། རིམ་གྲོར་བྱེད་པ་དང་། མཆོད་པར་བྱེད་པ་དང་། ཡོངས་སུ་མྱ་ངན་ལས་འདས་པའི་སྐུ་གདུང་ལ་སྐུ་གདུང་གི་མཆོད་པ་བྱེད་པ་ལྟ་ཅི་སྨོས། ཀུན་དགའ་བོ་དགེ་སློང་གི་རིགས་ངུར་སྨྲིག་བགོས་པ་དེ་དག་ནི་ཐ་ན་ལན་
འགའ་ཞིག་སངས་རྒྱས་རྣམས་ལ་ཕྱག་འཚལ་ལོ་ཞེས་ངེས་པར་ཚིག་ཏུ་རྗོད་པར་ཡང་འགྱུར་ན་སེམས་དང་བ་སྐྱེད་པར་འགྱུར་བ་དང་། དགེ་བའི་རྩ་བ་གཞན་དག་སྐྱེད་པར་འགྱུར་བ་ལྟ་ཅི་སྨོས། ཀུན་དགའ་བོ་ངས་འདི་ལ་དགོངས་ནས་ཀྱང་ངས་དེ་སྐད་བཤད་དོ། །དེ་ནས་བཅོམ་ལྡན་འདས་
ཀྱིས་ཚིག་དེ་དག་ཚིགས་སུ་བཅད་དེ་བཀའ་སྩལ་པ། དེ་ལྟར་སངས་རྒྱས་བསམ་མི་ཁྱབ། །སངས་རྒྱས་ཆོས་ཀྱང་བསམ་མི་ཁྱབ། །བསམ་མི་ཁྱབ་ལ་དད་བྱས་ན། །དེ་ཡི་རྣམ་སྨིན་བསམ་མི་ཁྱབ། །མཐུ་ཆེན་ལྡན་པ་སྣང་བ་མཛད་པ་པོ། །འདས་པའི་སངས་རྒྱས་རྣམས་ལ་མཆོད་
བྱས་ནས། །སྙིང་རྗེས་འཇིག་རྟེན་ཀུན་ཏུ་མཚུངས་མེད་ཅིང་། །གྲངས་མེད་བྱང་ཆུབ་འདི་འཚང་རྒྱ་བྱ་ཞེས། །དེ་ཚེ་སྦྱིན་ལ་མངོན་པར་བརྩོན་པར་གྱུར། །དད་པའི་དབང་པོ་སྒོམ་དང་བརྩོན་འགྲུས་ལྡན། །བརྩོན་འགྲུས་སྟོབས་ལྡན་འཐུན་པ་རབ་བསྐྱེད་ནས། །སྦྱིན་པ་བྱིན་ནས་སྐྱེ་དགུ་སྙིང་
བརྩེ་བྱས། །ཇི་ལྟར་ཕ་དང་མ་དང་སྲིང་མོ་དང་། །སྤུན་དང་གྲོགས་ལ་བྱམས་པར་འགྱུར་བ་བཞིན། །མཛའ་དང་མི་མཛའ་དག་ལ་ཁོང་ཁྲོ་སྤངས། །བྱང་ཆུབ་མཚུངས་མེད་གྲངས་མེད་ངས་ཐོབ་བོ། །བྱང་ཆུབ་ཞི་བ་མྱ་ངན་མེད་ཚོལ་ཕྱིར། །བསྐལ་པ་བྱེ་བར་ང་ཡིས་སྦྱིན་པ་བྱིན། །ཕན་

པར་འདོད་པས་སྙིང་རྗེ་རབ་བསྐྱེད་ནས། །མགོ་དང་མིག་དང་ཤ་དང་ཁྲག་རྣམས་དང་། །རྒྱལ་སྲིད་སྟོང་ཕྲག་རྣམ་པ་མང་པོ་བཏང་། །སྡུག་པའི་བུ་དང་ཆུང་མ་བུ་མོ་དང་། །དེ་བཞིན་རྟ་དང་བཞོན་པ་དུ་མ་དག །བྱང་ཆུབ་འདི་ཡི་ཆེད་དུ་ངས་སྔོན་བཏང་། །བསྐལ་པ་སྟོང་དང་བྱེ་བ་མང་པོར་ཡང་། །
བྱང་ཆུབ་དམ་པ་འདི་ནི་འདོད་པའི་ཕྱིར། །ཀུན་ཏུ་རྒྱུག་པའི་ཚེ་ནི་ཡང་དང་ཡང་། །དད་པ་མང་པོས་ངས་ནི་སྦྱིན་པ་བྱིན། །བྱང་ཆུབ་མཆོག་འདི་ཡོངས་སུ་ཚོལ་བའི་ཚེ། །ཚ་དང་གྲང་དང་བཀྲེས་དང་སྐོམ་པ་ཡི། །སྡུག་བསྔལ་མི་བཟད་མང་པོ་བཟོད་བྱས་ནས། །བརྩོན་འགྲུས་བརྩམས་ཏེ་བདག་
ནི་འཆི་དུས་བྱས། །བྱང་ཆུབ་ཞི་བ་མྱ་ངན་མེད་ཚོལ་ཚེ། །འཇིག་རྟེན་འདི་དག་ཀུན་ལ་ཕན་པའི་ཕྱིར། །གང་དག་ངས་སྤྱད་པ་ཡི་མཚན་ཉིད་རྣམས། །ལོ་བརྒྱའམ་ཡང་ན་བསྐལ་པར་བརྗོད་པར་བྱ། །ད་ནི་འཁོར་ཚེ་སངས་རྒྱས་བརྒྱ་དག་དང་། །སངས་རྒྱས་སྟོང་དང་བྱེ་མང་མཉེས་པར་
བྱས། །སངས་རྒྱས་མཐུ་ཆེན་དེ་དག་ཐམས་ཅད་ལ། །གསེར་གྱི་མེ་ཏོག་རྣམས་ཀྱིས་རྟག་ཏུ་བཀུར། །ཟས་དང་སྐོམ་དང་དེ་བཞིན་གོས་རྣམས་དང་། །སྤོས་དང་ཕྲེང་བ་དག་དང་བྱུག་པ་དང་། །བ་དན་རྒྱལ་མཚན་གདུགས་རྣམས་བྱེ་བ་ཡིས། །སངས་རྒྱས་བྱེ་བ་མང་པོ་ངས་མཆོད་དོ། །སྲོག་
ཆགས་མང་པོ་སྲོག་ཆགས་བྱེ་བ་མང་། །ཕ་མཐའ་མེད་པའི་འཁོར་བ་འདིར་འཁོར་རྣམས། །ངས་ནི་རྟག་ཏུ་དབུགས་ཕྱུང་བྱས་ཤིང་སོང་། །སྦྱིན་པ་རྒྱ་ཆེན་བཟང་པོ་དག་ཀྱང་བྱིན། །ཚུལ་ཁྲིམས་བཟོད་པ་དེ་བཞིན་བརྩོན་འགྲུས་དང་། །ཏིང་ངེ་འཛིན་དང་ཤེས་རབ་དེ་བཞིན་ཐབས། །ཡང་
དག་སྤོང་དང་དྲན་པ་ཉེར་གཞག་དང་། །དེ་བཞིན་རྫུ་འཕྲུལ་རྐང་བཞི་རབ་ཏུ་བསྒོམས། །བྱང་ཆུབ་དམ་པ་འདི་ནི་འདོད་པའི་ཕྱིར། །དབང་པོ་ལྔ་དང་སྟོབས་ལྔ་ལེགས་པར་བསྒོམས། །བྱང་ཆུབ་ཡན་ལག་བདུན་དང་འཕགས་པའི་ལམ། །བྱང་ཆུབ་ཕྱོགས་རྣམས་ཐམས་ཅད་ངས་བསྒོམས་སོ། །
གང་བྱས་ན་ནི་འཇིག་པར་མི་འགྱུར་བ། །འཕགས་པའི་ཡེ་ཤེས་ཀྱིས་ནི་དགོངས་པར་གྱིས། །རྟག་ཏུ་དང་བས་རབ་ཏུ་སྤྱད་བྱས་ན། །སྐྲ་རྩེ་ཙམ་དང་འབྲལ་བར་མི་འགྱུར་རོ། །ཕྱག་འཚལ་བའི་ལེའུ་སྟེ་བརྒྱད་པ་རྫོགས་སོ།། །།དེ་ནས་ཡང་བཅོམ་ལྡན་འདས་ཀྱིས་

ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སངས་རྒྱས་བཅོམ་ལྡན་འདས་རྣམས་ལ་དགེ་བའི་སེམས་གཅིག་བསྐྱེད་པ་ཡང་ཆུད་མི་ཟ་ན། དགེ་བའི་རྩ་བ་དེ་ལས་གཞན་རྣམས་ལྟ་ཅི་སྨོས། ཀུན་དགའ་བོ་དེའི་ཕྱིར་དོན་འདི་རྒྱ་ཆེར་ཤེས་པར་བྱ་བའི་
ཕྱིར་ཁྱོད་ལ་དཔེ་བསྟན་པར་བྱ་སྟེ། འདི་ལ་སྐྱེས་བུ་མཁས་པ་ཁ་ཅིག་ནི་འདི་ལྟར་དེ་བཞིན་གཤེགས་པ་ལ་དང་བའི་སེམས་གཅིག་བསྐྱེད་པ་ཡང་ཆུད་མི་ཟ་བ་དཔེས་ཤེས་པར་འགྱུར་རོ། །ཀུན་དགའ་བོ་འདི་ལྟ་སྟེ། དཔེར་ན་མི་ལ་ལ་ཞིག་གིས་སྐྲའི་རྩེ་མོ་བརྒྱར་གཤེགས་པས་ཆུའི་ཐིགས་
པ་གཅིག་བླངས་ཏེ་ངའི་ཐད་དུ་འོངས་ནས་འདི་སྐད་ཅེས་ཀྱེ་གོའུ་ཏ་མ་ཆུའི་ཐིགས་པ་འདི་ཁྱོད་ཀྱི་ལག་ཏུ་བཞག་གིས་བསྐལ་པ་འདས་ན་ཁྱོད་ཀྱིས་འདི་མཉམ་ཞིང་ལྷག་ཆད་མེད་པར་སླར་བདག་ལ་བྱིན་ཅིག །ཆུའི་ཐིགས་པ་འདི་ཁྱོད་ཀྱིས་རླུང་དང་ཉི་མས་མ་སྐམས་པར་གྱིས་ཤིག །རི་དགས་དང་བྱའི་ཚོགས་
རྣམས་ལ་མ་བླུད་ཅིག །ཆུ་གཞན་དང་འདྲེས་པར་ཡང་མ་བྱ་ཤིག །ཆུ་འདི་ཁྱོད་ཀྱིས་སྣོད་དུ་བླུགས་ཏེ་བཅང་བར་བྱའི་ས་ལ་མི་བཞག་གོ་ཞེས་ཟེར་ལ་དེ་དེ་བཞིན་གཤེགས་པས་བླངས་ནས་གང་གཱའི་ཀླུང་ཆེན་པོར་གང་ན་ཀློང་གིས་དཀྲུགས་པར་མི་འགྱུར་བའི་ས་ཕྱོགས་དེ་ལྟ་བུར་བཞག་ནས་ཆུའི་ཐིགས་པ་དེ་གང་
གཱའི་ཀླུང་ཆེན་པོའི་ནང་ན་ཀློང་གིས་མ་དཀྲུགས་ཤིང་རི་དགས་དང་བྱའི་ཚོགས་ཀྱིས་མ་འཐུངས་པར་ཆུའི་ཐིགས་པ་དེ་ཆུའི་ཀླུང་ཆེན་པོ་དང་ལྷན་ཅིག་ཏུ་འབབ་ཅིང་རིམ་གྱིས་རྒྱ་མཚོ་ཆེན་པོར་སོང་ལ། དེ་ནས་ཆུའི་ཐིགས་པ་དེ་རྣམ་པར་འཐོར་རླུང་གི་ཕུང་པོས་ཀྱང་བསྐལ་པའི་མཐའི་བར་དུ་ཟད་པར་མ་གྱུར་ལ་ཡོངས་
སུ་བརྟག་པ་བཟུང་སྟེ། མི་དེ་ཡང་བསྐལ་པར་གནས་ཤིང་ཡོངས་སུ་བརྟག་པ་བཟུང་སྟེ། ང་ཡང་བསྐལ་པར་གནས་ལ། དེ་ནི་མི་དེ་བསྐལ་པ་འདས་པ་དང་། སླར་ངའི་གན་དུ་འོངས་ནས་འདི་སྐད་ཅེས་ཀྱེ་གོའུ་ཏ་མ་ཆུའི་ཐིགས་པ་དེ་བདག་ལ་དགོས་པ་ཞིག་ཡོད་ཀྱིས་ཆུའི་ཐིགས་པ་དེ་སླར་བྱིན་ཅིག་ཅེས་
ཟེར་ན། ཀུན་དགའ་བོ་བསྐལ་པར་ལོན་ཡང་ཆུའི་ཐིགས་པ་དེ་རྒྱ་མཚོ་ཆེན་པོའི་ཕྱོགས་འདི་ལྟ་བུ་ཞིག་ན་ཡོད་དོ་ཞེས་དེ་བཞིན་གཤེགས་པས་མཁྱེན་པའི་ཡེ་ཤེས་དེ་དེ་བཞིན་གཤེགས་པ་ལ་མངའོ། །ཀུན་དགའ་བོ་དེ་བཞིན་གཤེགས་པ་ལ་ནི་ཡེ་ཤེས་གང་དང་ལྡན་ན་དེ་བཞིན་གཤེགས་པས་རྒྱ་མཚོ་

ཆེན་པོ་ནས་ཆུའི་ཐིགས་པ་དེ་སྐྲའི་རྩེ་མོ་ཚལ་བ་བརྒྱར་གཤེགས་པ་དེ་ཉིད་ཀྱིས་བླངས་ནས་ཆུ་གཞན་དང་མ་འདྲེས་རླན་པ་གཞན་གྱི་རྗེས་སུ་མ་སོང་མ་འབགས་མ་འདྲེས་ལ་མཉམ་ཞིང་ལྷག་ཆད་མེད་པར་སླར་མི་དེ་ལ་སྦྱིན་པའི་ཡེ་ཤེས་མངའོ། །ཀུན་དགའ་བོ་དེ་བཞིན་གཤེགས་པའི་ཡེ་ཤེས་ནི་དེ་ལྟར་
ཡོངས་སུ་དག་གོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་དེ་ལྟར་རྫུ་འཕྲུལ་ཆེ་ཞིང་དེ་ལྟར་མཐུ་ཆེ་ལ་དེ་ལྟར་དབང་ཆེ་བར་གྲགས་པ་སྟེ། དེ་ལྟར་ཡེ་ཤེས་དཔག་ཏུ་མེད་པ་དང་ལྡན་ཞིང་དེ་ལྟར་སྒྲིབ་པ་མེད་པའི་ཡེ་ཤེས་གཟིགས་པ་དང་ལྡན་ནོ། །ཀུན་དགའ་བོ་གང་དག་
ལ་ཆུའི་ཐིགས་པ་དེ་ལྟར་ཆུང་ངུ་བཞག་ཀྱང་ཡུན་རིང་པོ་ཇི་སྲིད་དུ་ཡང་ཆུད་ཟ་བར་མི་འགྱུར་བ་དེ་བཞིན་གཤེགས་པ་དེ་ལྟ་བུ་དག་ནི་དམ་པ་དག་གོ། །མཆོག་དག་གོ། །བཞག་པ་འཛིན་པ་དག་གོ། །ཀུན་དགའ་བོ་དོན་ཤེས་པར་བྱ་བའི་ཕྱིར་དཔེ་འདི་བསྟན་པ་འདི་ལ་དོན་བརྗོད་པར་བྱ་བ་གང་ཞེ་ན། ཀུན་དགའ་
བོ་སྐྲའི་རྩེ་མོ་ཕྲ་བ་ཞེས་བྱ་བ་དེ་ནི་སེམས་ཀྱི་ཚིག་བླ་དགས་སོ། །ཀུན་དགའ་བོ་གང་གཱའི་ཀླུང་ཆེན་པོ་ཞེས་བྱ་བ་དེ་ནི་འཁོར་བའི་རྒྱུན་གྱི་ཚིག་བླ་དགས་སོ། །ཀུན་དགའ་བོ་ཐིགས་པ་གཅིག་ཅེས་བྱ་བ་དེ་ནི་སེམས་གཅིག་བསྐྱེད་པའི་དགེ་བའི་རྩ་བའི་ཚིག་བླ་དགས་སོ། །ཀུན་དགའ་བོ་རྒྱ་མཚོ་ཆེན་པོ་
ཞེས་བྱ་བ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཚིག་བླ་དགས་སོ། །ཀུན་དགའ་བོ་མི་ཞེས་བྱ་བ་དེ་ནི་བྲམ་ཟེ་དང་ཁྱིམ་བདག་དད་པ་རྣམས་ཀྱི་ཚིག་བླ་དགས་སོ། །བསྐལ་པར་གནས་ཞེས་བྱ་བ་དེ་ནི་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པ་ཆུད་མི་
ཟ་བའི་ཚིག་བླ་དགས་སོ། །ཀུན་དགའ་བོ་ཇི་ལྟར་མི་ཆེ་གེ་མོ་ཞིག་གི་ཆུའི་ཐིགས་པ་གཅིག་ཡུན་རིང་པོ་ཇི་སྲིད་དུ་ཡང་ཆུད་མི་ཟ་བ་ལྟར། ཀུན་དགའ་བོ་དེ་བཞིན་དུ་དེ་བཞིན་གཤེགས་པ་ལ་སེམས་གཅིག་བསྐྱེད་པ་ཡང་ཆུད་མི་ཟ་ན་དགེ་བའི་རྩ་བ་དེ་ལས་གཞན་པ་ཤིན་ཏུ་ཁྱད་པར་ཅན་རྣམས་ལྟ་
ཅི་སྨོས་ཏེ། ཀུན་དགའ་བོ་དེ་དག་ཐམས་ཅད་ཀྱི་འབྲས་བུ་ནི་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བར་ང་སྨྲའོ། །ཀུན་དགའ་བོ་གཞན་ཡང་དེ་བཞིན་གཤེགས་པ་ལ་སེམས་ཅན་གང་དག་སེམས་དང་བ་གཅིག་བསྐྱེད་ནས་དེ་ལས་གཞན་པའི་ཉེས་པར་བྱས་པ་

འམ། ཉེས་པར་སྤྱད་པའམ། མི་དགེ་བའི་སྒྲིབ་པར་འགྱུར་བའི་སེམས་བསྐྱེད་པ། སྔོན་ཉེས་པར་བྱས་པ་བདག་གིས་བསགས་ཤིང་བདག་གིས་བྱས་པ་གཞན་གྱིས་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་དུ་སོང་ཡང་གང་གི་ཚེ་
སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་དག་འཇིག་རྟེན་དུ་བྱུང་བ་ན། དེ་དག་གི་སངས་རྒྱས་ཀྱི་ཡེ་ཤེས་ཐོགས་པ་མེད་ཅིང་སྒྲིབ་པ་མེད་པས་སེམས་ཅན་འདི་དག་སྔོན་དགེ་བའི་རྩ་བ་བྱས་པ་ལས་ཉེས་པར་སྤྱད་པའི་ལས་འགའ་ཞིག་གིས་ལོག་པར་ལྷུང་བར་གྱུར་པར་མཁྱེན་ཏེ།
སངས་རྒྱས་བཅོམ་ལྡན་འདས་རྣམས་ཀྱིས་དེ་དག་སྔོན་བྱས་པའི་དགེ་བའི་རྩ་བ་དང་ལྡན་པར་མཁྱེན་ནས་དགེ་བའི་སེམས་དེ་དང་། དགེ་བའི་རྩ་བའི་བྱིན་གྱི་རླབས་དེ་དང་། སྔོན་གྱི་རྒྱུ་དེས་ལོག་པར་ལྷུང་བ་དེ་ལས་འདོན་ནོ། །བཏོན་ནས་མྱ་ངན་ལས་ཟློའོ། །ཞི་བ་བདེ་བའི་ཐང་བསིལ་བ་འཇིགས་
པ་མེད་པ་ཕ་རོལ་གྱི་འགྲམ་དུ་འགོད་དོ། །བཀོད་ནས་ཀྱང་སངས་རྒྱས་བཅོམ་ལྡན་འདས་དེ་དག་རིགས་ཀྱི་བུ་དག་ཁྱོད་སྔོན་དགེ་བའི་རྩ་བ་འདི་ལྟ་བུ་ཞིག་དུས་དེ་ལྟ་བུ་ཞིག་ཏུ་ཚེ་རབས་དེ་ལྟ་བུ་ཞིག་གི་ཚེ་སངས་རྒྱས་བཅོམ་ལྡན་འདས་དེ་དག་ལ་བསྐྱེད་ཅིང་བཞག་པ་དྲན་པར་གྱིས་ཤིག་ཅེས་དྲན་པར་མཛད་
ཅིང་བསྐུལ་བ་དང་དེ་དག་གིས་སངས་རྒྱས་ཀྱི་མཐུས་དྲན་ནས་འདི་སྐད་ཅེས་བཅོམ་ལྡན་འདས་དེ་ལྟ་ལགས་སོ། །བདེ་བར་གཤེགས་པ་དེ་ལྟ་ལགས་སོ་ཞེས་ཟེར་རོ། །དེ་དག་ལ་སངས་རྒྱས་བཅོམ་ལྡན་འདས་དེ་དག་གིས་བཀའ་སྩལ་པ། རིགས་ཀྱི་བུ་དག་དགེ་བའི་རྩ་བ་འདི་དག་ནི་སྔོན་གྱི་སངས་
རྒྱས་ལ་བསྐྱེད་པ་དེ་དག་ཡིན་ཏེ། མ་ཟད་ཅིང་ཆུད་མ་ཟོས་སོ། །འདི་ལྟ་སྟེ་སྡུག་བསྔལ་ཐམས་ཅད་ཞི་བ་མྱ་ངན་ལས་འདས་པ་འདི་ཡང་དེའི་གཞིས་རྙེད་དོ། །རིགས་ཀྱི་བུ་དག་ཁྱེད་ཕ་མེས་ཀྱི་སྤྱོད་ཡུལ་དང་། འཕགས་པའི་སྤྱོད་ཡུལ་དུ་ཕྱིན་ནོ། །ཁྱོད་ནི་ཡུན་རིང་པོར་སྤྱོད་ཡུལ་མ་ཡིན་པ་ལ་
སྤྱོད་སྤྱོད་དོ། །ཐོག་མ་དང་ཐ་མ་མེད་པའི་འཁོར་བར་འཁོར་བར་གྱུར་ཏོ། །རིགས་ཀྱི་བུ་དག་ང་ལྟ་བུ་དག་ལ་དགེ་བའི་རྩ་བ་བཞག་པ་ནི་བཞག་པ་ཆུད་མི་ཟའོ། །ཀུན་དགའ་བོ་འདི་ལྟ་སྟེ་དཔེར་ན་རྒྱལ་པོའི་བུའམ་ཚོང་དཔོན་གྱི་བུ་ཞིག་ཉེས་པ་འགའ་ཞིག་གིས་བཙོན་རར་བཅུག་ལ་དེ་སྔོན་གྱི་ཉེས་

པ་གླེངས་ཤིང་སྤྱོས་ནས་དེ་སླར་མྱུར་དུ་ཕྱུང་བ་དེ་བཞིན་དུ་ཀུན་དགའ་བོ་གང་དག་སྔོན་གྱི་སངས་རྒྱས་རྣམས་ལ་དགེ་བའི་རྩ་བ་བསྐྱེད་པ་དེ་དག་ཉེས་པར་བྱས་པ་འགའ་འམ། དེ་ལས་གཞན་པའི་ཉེས་པས་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་དུ་སོང་ཡང་།
གང་གི་ཚེ་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་དག་འཇིག་རྟེན་དུ་བྱུང་བ་ན་སེམས་ཅན་གང་དག་ཁ་ཅིག་གིས་དགེ་བའི་སེམས་གཅིག་བསྐྱེད་པར་གྱུར་པ་དེ་དག་དགེ་བའི་རྩ་བ་དེ་དང་། སེམས་དེ་དང་། དགེ་བའི་རྩ་བའི་བྱིན་གྱི་རླབས་དེ་དང་། རྒྱུ་དེས་སངས་རྒྱས་བཅོམ་ལྡན་འདས་
དེ་དག་གིས་སེམས་ཅན་དེ་དག་སྔོན་གྱི་དགེ་བའི་རྩ་བ་དང་ལྡན་པར་མཁྱེན་ནས་ལོག་པར་ལྷུང་བ་དེ་ལས་བཏོན་ཏེ་མྱ་ངན་ལས་འདས་པའི་ཐང་བསིལ་བ་འཇིགས་པ་མེད་པ་ལ་འགོད་དོ། །བཀོད་ནས་ཀྱང་རིགས་ཀྱི་བུ་དག་ཁྱེད་དགེ་བའི་རྩ་བ་དེ་ལྟ་བུ་དེ་དྲན་པར་གྱིས་ཤིག་ཅེས་བསྐུལ་བ་དང་། དེ་དག་གིས་
གསོལ་པ། བཅོམ་ལྡན་འདས་དེ་ལྟ་ལགས་སོ། །བདེ་བར་གཤེགས་པ་དེ་ལྟ་ལགས་ཏེ་སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་རླབས་ཀྱིས་དྲན་ལགས་སོ་ཞེས་འཛེར་ཏོ། །དགེ་བའི་རྩ་བའི་ལེའུ་སྟེ་དགུ་པ་རྫོགས་སོ།། །།དེ་ནས་ཡང་བཅོམ་ལྡན་འདས་ཀྱིས་ཚེ་
དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། ང་ལྟ་བུ་དག་ལ་དགེ་བའི་རྩ་བ་ཇི་ཙམ་དུ་ཆུང་བ་བྱས་པ་ཡང་ཆུད་མི་ཟ་ཞིང་སེམས་གཅིག་བསྐྱེད་པའི་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་མྱ་ངན་ལས་འདས་པ་ཡིན་ཏེ།
ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ་དེ་བས་ན་དོན་དེ་ཉིད་རྒྱ་ཆེར་རབ་ཏུ་བརྗོད་པ་དང་ཅི་ནས་ཀྱང་འདི་ལ་རིགས་ཀྱི་བུའམ་རིགས་ཀྱི་བུ་མོ་དད་པ་མཁས་པ་ཁ་ཅིག་རྒྱ་ཆེར་མངོན་པར་དད་པ་དང་། ཀུན་དུ་རྟོག་པ་དང་། ནན་ཏན་སྐྱེད་པ་དང་། མངོན་པར་དད་ནས་རྒྱ་ཆེར་དགའ་བ་དང་།
མཆོག་ཏུ་དགའ་བ་ཆེན་པོ་སྐྱེད་པར་འགྱུར་བར་བྱ་བའི་ཕྱིར་ཁྱོད་ལ་དཔེ་བསྟན་ནོ། །ཀུན་དགའ་བོ་འདི་ལྟ་སྟེ་དཔེར་ན་ཉ་བ་མཆིལ་པ་ཐོགས་པས་ཉ་བཤོར་བའི་ཕྱིར་མཆིལ་པ་གཟན་མ་དང་བཅས་པ་མཚོ་ཆུ་ཆེན་པོར་བཅུག་ལ་དེར་བཅུག་པ་དེ་ཉས་མིད་པར་གྱུར་ན་མཆིལ་པ་མིད་པའི་ཉ་དེ་མཚོ་ཆུའི་ནང་

ན་འཕྱོ་ཡང་སྐམ་ལ་འདུག་པ་ཉིད་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་ཉ་དེ་ཉ་པས་མཆིལ་པའི་སྲད་བུ་སྲ་བས་ཟིན་པའི་ཕྱིར་རོ། །ཅི་སྟེ་ཉ་དེ་མཆིལ་པ་དང་བཅས་པར་ཆུའི་ནང་དུ་སོང་བར་གྱུར་ལ། སྲད་བུ་ཡང་མཆིལ་པ་དང་འབྲེལ་བར་གྱུར་ན་ཆུའི་ནང་ན་འདུག་པ་
ཡང་ཡིན་ལ། སྐམ་ལ་འདུག་པ་ཡང་ཡིན་ཏེ། ཡུ་བ་སྐམ་ལ་འདུག་ཅིང་ལེགས་པར་ཟིན་ན་ཉ་པ་དེ་འོངས་ནས་སྲད་བུ་དེས་ཉ་ཟིན་པར་ཤེས་ཏེ་དེས་སྲད་བུ་དེས་དྲངས་ནས་ཇི་ལྟར་འདོད་པར་སྐམ་ལ་ཕྱུང་སྟེ་དགའ་མགུར་བྱ་བ་བྱེད་པའི་དུས་དེ་ཡོད་དོ། །ཀུན་དགའ་བོ་དེ་བཞིན་དུ་སེམས་ཅན་གང་དག་
སངས་རྒྱས་བཅོམ་ལྡན་འདས་ལ་སེམས་དང་བར་བྱེད། དགེ་བའི་རྩ་བ་སྐྱེད་པར་བྱེད། ཡོན་འབུལ་ཞིང་ཐ་ན་སེམས་དང་བ་གཅིག་ཙམ་ཡང་སྐྱེད་ན། ཉེས་པར་བྱས་པའི་ལས་སྒྲིབ་པར་འགྱུར་བ་གཞན་གྱིས་བསྒྲིབས་པས་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་
འཇིག་རྟེན་ནམ། དེ་ལས་གཞན་པའི་མི་ཁོམ་པ་ལོག་པར་ལྟུང་བར་སོང་ཡང་། གང་གི་ཚེ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བ་ན་དེ་དག་སངས་རྒྱས་ཀྱི་ཡེ་ཤེས་ཀྱིས་སེམས་ཅན་འདི་དག་ནི་བྱང་ཆུབ་སེམས་དཔའི་ཐེག་པ་པའོ། །སེམས་ཅན་འདི་དག་ནི་རང་སངས་རྒྱས་ཀྱི་ཐེག་པ་
པའོ། སེམས་ཅན་འདི་དག་ནི་ཉན་ཐོས་ཀྱི་ཐེག་པ་པའོ། །སེམས་ཅན་འདི་དག་ནི་དགེ་བའི་རྩ་བ་བྱས་པའོ། །སེམས་ཅན་འདི་དག་ནི་དགེ་བའི་རྩ་བ་ཆད་པའོ། །སེམས་ཅན་འདི་དག་ནི་ཉམས་པའི་ཆ་དང་འཐུན་པའོ། །སེམས་ཅན་འདི་དག་ནི་ཁྱད་པར་དུ་འགྱུར་བའི་ཆ་དང་འཐུན་པའོ། །
འདི་དག་ནི་དག་པའི་ཆོས་རྟོགས་པས་ས་བོན་བཏབ་པ་དག་གོ། །འདི་ལྟ་སྟེ་འདི་ནི་སངས་རྒྱས་ལ་ཡོན་འབུལ་བ་ཐ་ན་དད་པ་དང་ལྡན་པའི་སེམས་གཅིག་བསྐྱེད་པའི་དགེ་བའི་ཆོས་རྣམ་པར་དག་པས་ས་བོན་བཏབ་པའོ་ཞེས་མཁྱེན་ཏོ། །ཡོན་གང་གི་རྣམ་པར་སྨིན་པས་གང་དག་གིས་སངས་རྒྱས་
བཅོམ་ལྡན་འདས་རྣམས་ལ་དད་པའི་སེམས་བསྐྱེད་པ་གཅིག་ཙམ་ཡང་སྐྱེད་པར་འགྱུར་བ་དེ་དག་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡེ་ཤེས་ཀྱིས་སེམས་བསྐྱེད་པའི་ཁྱད་པར་དེ་དག་གིས་ལོག་པར་ལྟུང་བ་དེ་ལས་འདོན་ནོ། །བཏོན་ནས་ཀྱང་མྱ་ངན་ལས་འདས་པའི་ཐང་བདེ་བ་

ལ་འགོད་དོ། །བཀོད་ནས་ཀྱང་རིགས་ཀྱི་བུ་ཁྱེད་དགེ་བའི་རྩ་བ་འདི་དག་དེ་བཞིན་གཤེགས་པ་འདི་ཞེས་བྱ་བ་ལ་བསྐྱེད་པ་དྲན་པར་གྱིས་ཤིག་ཅེས་སྐུལ་ཏོ། །གསོལ་པ། བཅོམ་ལྡན་འདས་དེ་ལྟ་ལགས་སོ། །བདེ་བར་གཤེགས་པ་དེ་ལྟ་ལགས་སོ། །བཀའ་སྩལ་པ། དེ་བས་ན་རིགས་
ཀྱི་བུ་དག་དེ་བཞིན་གཤེགས་པ་ལ་ཡོན་ཕུལ་བའི་དགེ་བའི་རྩ་བ་འདི་དག་ནི་འབྲས་བུ་ཆེན་པོ་དང་རྙེད་པ་ཆེན་པོ་དང་ལྡན་པ་དག་སྟེ། རིགས་ཀྱི་བུ་དག་ང་ལྟ་བུ་དག་ལ་བཞག་པ་བསོད་ནམས་ཀྱི་ཞིང་ཆེན་པོ་ལ་བཏབ་པ་དེ་དག་ནི་ཐ་ན་ཡུན་རིང་པོ་ཇི་སྲིད་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་ཆུད་
ཟ་བར་མི་འགྱུར་རོ། །དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ནི་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་འགྱུར་རོ། །ཀུན་དགའ་བོ་དོན་ཤེས་པར་བྱ་བའི་ཕྱིར་ངས་དཔེ་འདི་བྱས་པ་འདི་ལ་དོན་དུ་བལྟ་བ་གང་ཞེ་ན། ཀུན་དགའ་བོ་ཉ་ཞེས་བྱ་བ་དེ་ནི་སོ་སོའི་སྐྱེ་བོའི་ཚིག་བླ་དགས་སོ། །
ཀུན་དགའ་བོ་མཚོ་ཆུ་ཞེས་བྱ་བ་དེ་ནི་འཁོར་བའི་རྒྱ་མཚོའི་ཚིག་བླ་དགས་སོ། །ཀུན་དགའ་བོ་མཆིལ་པ་ཞེས་བྱ་བ་དེ་ནི་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པའི་ཚིག་བླ་དགས་སོ། །ཀུན་དགའ་བོ་སྲད་བུ་ཞེས་བྱ་བ་དེ་ནི་བསྡུ་བའི་དངོས་པོ་བཞིའི་ཚིག་བླ་དགས་སོ། །ཀུན་དགའ་བོ་ཉ་བ་
ཞེས་བྱ་བ་དེ་ནི་དེ་བཞིན་གཤེགས་པའི་ཚིག་བླ་དགས་སོ། །ཀུན་དགའ་བོ་ཉ་གསོན་པོ་ཞེས་བྱ་བ་དེ་ནི་སེམས་ཅན་རྣམས་མྱ་ངན་ལས་འདའ་བའི་འབྲས་བུ་ལ་འགོད་པའི་ཚིག་བླ་དགས་སོ། །ཀུན་དགའ་བོ་རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། གང་སངས་རྒྱས་ལ་
ཡོན་ཕུལ་བ་ནི་ཇི་སྲིད་མྱ་ངན་ལས་འདའ་བར་འགྱུར་བ་མ་གཏོགས་པར་ཇི་སྲིད་ཡུན་རིང་བར་ཡང་འཇིག་པ་མེད་ཡོངས་སུ་ཟད་པ་མེད་མཐར་ཐུག་པ་མེད་དོ། །ཀུན་དགའ་བོ་དེའི་ཕྱིར་སངས་རྒྱས་ལ་ཕུལ་བའི་ཡོན་ཇི་ལྟར་མྱ་ངན་ལས་འདའ་བས་ཀླས་ཤིང་མྱ་ངན་ལས་འདས་པའི་མཐས་གཏུགས་
པར་འགྱུར་བའི་དཔེ་གཞན་དག་ཀྱང་ཁྱོད་ལ་བསྟན་པར་བྱའོ། །ཀུན་དགའ་བོ་སེམས་ཅན་སྲེད་པ་ལ་སྤྱོད་པ། ཚོར་བ་ལ་ཆགས་པ་མྱོང་བ་འདོད་པས་འཁོར་བ་ལ་མངོན་པར་སྟོད་པ། འཁོར་བ་ལ་དགའ་བ། འཁོར་བ་འདོད་པས་སངས་རྒྱས་བཅོམ་ལྡན་འདས་ལ་ཡོན་འབུལ་ཞིང་མཐོ་

རིས་འདོད་པ་དང་། མིར་འགྱུར་བ་འདོད་པའི་ཕྱིར་དགེ་བའི་རྩ་བ་ཡོངས་སུ་བསྔོ་བ་དག་ཀྱང་ཡོད། སངས་རྒྱས་བཅོམ་ལྡན་འདས་ལ་ཡོན་ཕུལ་ནས་དགེ་བའི་རྩ་བ་འདིས་བདག་ཅག་ནམ་ཡང་ཡོངས་སུ་མྱ་ངན་ལས་འདའ་བར་མ་གྱུར་ཅིག་ཅེས་ཡོངས་སུ་སྔོ་བའི་སེམས་
ཅན་དག་ཀྱང་ཡོད་མོད་ཀྱི། ཀུན་དགའ་བོ་དགེ་བའི་རྩ་བ་དེས་སེམས་ཅན་དེ་དག་ཡོངས་སུ་མྱ་ངན་ལས་འདའ་བར་མི་འགྱུར་བའི་གནས་མེད་སྐབས་མེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་སངས་རྒྱས་བཅོམ་ལྡན་འདས་རྣམས་ནི་བླ་ན་མེད་པའི་བསོད་ནམས་ཀྱི་ཞིང་ཐ་བ་དང་
ཚེར་མ་མེད་པ། འདོད་ཆགས་དང་ཞེ་སྡང་གི་དྲི་མ་མེད་པ་ཡོངས་སུ་དག་པ་སྟེ། དེ་ལ་དགེ་བའི་རྩ་བའི་ས་བོན་ཇི་ཙམ་དུ་ཆུང་བ་དང་། དགེ་བའི་རྩ་བའི་ས་བོན་ཇི་ཙམ་དུ་རྒྱས་པ་དང་། ཇི་ཙམ་དུ་ཕྲ་བ་ཡང་རུང་ཇི་ཙམ་དུ་བྱང་ཆུབ་ཀྱི་ས་བོན་དུ་འགྱུར་བའམ། ཉན་ཐོས་ཀྱི་ས་བོན་དུ་འགྱུར་བའམ།
རང་སངས་རྒྱས་ཀྱི་ས་བོན་དུ་འགྱུར་བའི་དགེ་བའི་རྩ་བ་དེ་དག་ཐམས་ཅད་སླུ་བར་མི་བྱེད་དེ། དེ་ཡོངས་སུ་མ་བཏང་ན་ལོངས་སྤྱོད་འཕེལ་བ་ཕུན་སུམ་ཚོགས་པར་འགྱུར་ཞིང་སེམས་དང་བས་མཐོ་རིས་སུ་འགྱུར་བའི་ལམ་ཡོངས་སུ་དག་པ་དང་། མྱ་ངན་ལས་འདའ་བའི་མཐར་ཐུག་པར་འགྱུར་རོ། །
ཀུན་དགའ་བོ་འདི་ལྟ་སྟེ་དཔེར་ན། ཁྱིམ་བདག་ཞིང་པའི་ཞིང་ངོ་མེད་པ། སྡོང་དུམ་དང་ཚེར་མ་མེད་པ། གྱོ་མོ་དང་གསེག་མ་མེད་པ། ས་སྣག་ཆེ་བ་ཞིག་ཡོད་པར་གྱུར་ཏེ། ལེགས་པར་རྨོས་ཤིང་ལག་བྱད་ཀྱིས་ཕྱིན་པར་བྱས་ལ། དེའི་ས་བོན་ཡང་སར་པ་གྲུང་བོ་ཆེས་ལེགས་པར་
བྱས་པ། རླུང་དང་ཉི་མས་མ་སྣད་པ། མ་ཆག་མ་གྲུགས་ཤིང་མ་རུལ་ཏེ་ཆུད་མ་ཟོས་པར་གྱུར་ལ། ས་བོན་དེ་དག་དུས་དང་ཚིགས་སུ་ཞིང་ལ་བཏབ་སྟེ་དུས་དུས་སུ་ཆུས་བཅུས། དུས་སུ་སྐམས། ཐམས་ཅད་ལས་ལེགས་པར་བསྲུངས་ནས། ཀུན་དགའ་བོ་དེ་ནས་ཁྱིམ་པ་ཞིང་པ་དེ་དུས་
གཞན་ཞིག་ན་ཞིང་གི་དྲུང་དུ་སོང་སྟེ་ཞིང་གི་མུར་འདུག་ནས། ཀྱེ་ས་བོན་ཁྱེད་ས་བོན་དུ་མ་གྱུར་ཅིག །ཀྱེ་ས་བོན་ཁྱེད་མ་སྐྱེ་ཤིག །མ་འཕེལ་ཅིག །ང་ལ་འབྲས་བུ་མི་དགོས། རྙེད་པ་མི་དགོས་སོ་ཞེས་དེ་སྐད་ཟེར་ན། ཀུན་དགའ་བོ་དེ་ཇི་སྙམ་དུ་སེམས། ཁྱིམ་བདག་ཞིང་པ་དེའི་ཚིག་

གིས་ས་བོན་དེ་དག་ས་བོན་མ་ཡིན་པར་འགྱུར་རམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། འབྲས་བུ་དེ་འབྲས་བུ་མ་ཡིན་པར་འགྱུར་རམ། རྙེད་པ་མངོན་པར་མི་འགྲུབ་བམ། གསོལ་པ། བཅོམ་ལྡན་
འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་སྲིད་པ་ལ་སྟོད་ཅིང་སྲིད་པ་ལ་དགའ་བས་སངས་རྒྱས་ལ་ཡོན་ཕུལ་ནས་དགེ་བའི་རྩ་བ་འདིས་བདག་ཅག་ནམ་ཡང་ཡོངས་སུ་མྱ་ངན་ལས་འདའ་བར་མ་གྱུར་ཅིག་ཅེས་དེ་སྐད་ཟེར་ཡང་
དེས་ཡོངས་སུ་མྱ་ངན་ལས་འདའ་བར་མི་འགྱུར་བའི་གནས་མེད་གོ་སྐབས་མེད་ཀྱི། ཀུན་དགའ་བོ་སངས་རྒྱས་ལ་བསྐྱེད་པའི་དགེ་བའི་རྩ་བ་དེ་དག་མི་འདོད་ཀྱང་འབྲས་བུ་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདས་པའི་བར་དུ་འགྱུར་བར་ང་སྨྲའོ། །དེ་ལྟར་ཇི་ཙམ་དུ་སངས་
རྒྱས་བཅོམ་ལྡན་འདས་ལ་སེམས་གཅིག་བསྐྱེད་པའི་དགེ་བའི་རྩ་བ་བསྐྱེད་པ་དེ་དག་ཐམས་ཅད་ཀྱི་འབྲས་བུ་ཡང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བར་ང་སྨྲའོ། །ཀུན་དགའ་བོ་མ་འོངས་པའི་དུས་ན་རྒྱལ་པོ་རྐུ་འཕྲོག་བྱེད་པ་དང་ཀླ་ཀློ་དག་འབྱུང་བར་
འགྱུར་ཏེ། ཀུན་དགའ་བོ་དེར་རྒྱལ་པོ་རྐུ་འཕྲོག་བྱེད་པ་དང་། ཀླ་ཀློ་གང་དག་གིས་དེ་བཞིན་གཤེགས་པའི་མཆོད་རྟེན་དང་། དེ་བཞིན་གཤེགས་པའི་སྐུ་གཟུགས་མཐོང་ནས་སེམས་དང་བར་གྱུར་པ་དེ་དག་ཀུན་དགའ་བོ་སངས་རྒྱས་ཀྱི་ཆོས་ཐམས་ཅད་ཀྱང་མི་ཤེས་ཤིང་སངས་རྒྱས་ཀྱི་ཡོན་
ཏན་ཐམས་ཅད་ཀྱང་མི་ཤེས་སུ་ཟིན་ཀྱང་། ཀུན་དགའ་བོ་ངས་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་འགྲོ་བ་དེ་དང་དེ་དག་དང་། སྐྱེ་བ་དེ་དང་དེ་དག་ཏུ་བསྡུ་བའི་དངོས་པོ་བཞིས་བསྡུ་བ་བྱས་སོ། །བཞི་གང་ཞེ་ན། སྦྱིན་པ་དང་། སྙན་པར་སྨྲ་བ་དང་། དོན་སྤྱད་པ་དང་། དོན་འཐུན་
པའོ། །ཀུན་དགའ་བོ་དེ་དག་ངའི་མཆོད་རྟེན་མཐོང་ནས་ངེས་པར་སེམས་དང་བར་འགྱུར་རོ། །ཀུན་དགའ་བོ་དེ་དག་གི་དགེ་བའི་རྩ་བའི་འབྲས་བུ་དེ་ཡང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བར་ང་སྨྲའོ། །གང་མཐའ་འཁོབ་ཀྱི་རྒྱལ་པོ་རྐུ་གསོད་བྱེད་

པ་དང་། ཀླ་ཀློ་དེ་དག་གི་རྐུན་ལག་དང་། བློན་པོ་དང་། གཞོན་ནུ་དང་། རྩིས་མཁན་དང་། སྣ་ཆེན་པོ་ལ་གཏོགས་པ་དང་། འཁོར་དང་། མཛའ་བཤེས་དང་། ཉེ་དུ་དང་། གྲོགས་དང་། སྣག་གི་གཉེན་མཚམས་སུ་གྱུར་པ་གང་ཡིན་པ་དེ་དག་གིས་ང་མྱ་ངན་ལས་འདས་པའི་
མཆོད་རྟེན་མཐོང་ནས་ཚེགས་ཆུང་ངུས་སེམས་དང་བར་གྱུར་ན། ཀུན་དགའ་བོ་དེ་དག་ཐམས་ཅད་ཀྱང་སངས་རྒྱས་ཀྱི་ཆོས་རྣམས་སམ། སངས་རྒྱས་ཀྱི་ཡོན་ཏན་རྣམས་ཀྱིས་དགེ་བའི་རྩ་བ་སྐྱེད་པར་འགྱུར་ཏེ། ཀུན་དགའ་བོ་དེ་དག་ཀྱང་ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྡུ་བའི་
དངོས་པོ་བཞིས་ཡང་དག་པར་བསྡུས་སོ། །ཀུན་དགའ་བོ་དེ་དག་གི་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ཡང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ་ངས་ཡུན་རིང་པོ་ནས་སྐྱེ་དགུ་འདི་དག་བསྡུ་བའི་དངོས་པོ་བཞིས་བསྡུས་པ་དང་། ཡུན་
རིང་པོ་ནས་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་དང་ལྡན་པར་བྱས་པ་ལ་ལྟོས། ཀུན་དགའ་བོ་དེ་བཞིན་གཤེགས་པ་ལམ་དུ་ཞུགས་ཏེ་བཞུད་པ་ནས་དམའ་བ་ནི་མཐོན་པོར་འགྱུར། ས་མཐོན་པོ་ནི་དམའ་བར་འགྱུར། ས་ཕྱོགས་མི་མཉམ་པ་ནི་མཉམ་པར་འགྱུར། རབ་
ཏུ་དམའ་བ་ནི་རབ་ཏུ་མཐོན་པོར་འགྱུར་བ་དང་། དེ་བཞིན་གཤེགས་པ་བཞུད་པའི་འོག་ཏུ་སྔ་མཁོ་བཞིན་དུ་གནས་པར་འགྱུར་བ་དང་། ཤིང་ཐམས་ཅད་འདུད་པ་དང་། ཤིང་གི་ལྷ་ཐམས་ཅད་ཀྱང་ཕྱག་འཚལ་བ་དང་། དེ་བཞིན་གཤེགས་པ་བཞུད་པའི་འོག་ཏུ་སླར་སྔ་མཁོ་བཞིན་དུ་གནས་
པར་འགྱུར་བ་དང་། ངམ་གྲོག་དང་། གཡང་ས་དང་ཤོད་ཁུང་དང་རྩྭ་དང་སྡོང་དུམ་དང་ཚེར་མ་དང་གྱོ་མོ་དང་གསེག་མ་དང་ཐིབས་པོ་དང་གཡང་ས་མི་བདེ་བ་དེ་དག་ཐམས་ཅད་ཀྱང་འདུད་པ་དང་། མཉམ་པ་དང་། གཙང་བ་དང་། ཤིན་ཏུ་སྦྱངས་པ་དང་། མི་གཙང་བ་མེད་པ་དང་། མེ་ཏོག་
བསུང་ཞིམ་ཞིང་ཡིད་དུ་འོང་བ་བཀྲམ་པར་འགྱུར་རོ། །ཀུན་དགའ་བོ་དེ་བཞིན་གཤེགས་པས་འདི་ལྟར་སྔོན་དགེ་བ་རྣམས་ལེགས་པར་བྱས་པའི་ཕྱིར་ལམ་དུ་བཞུད་པ་ན་གཙང་མར་བཞུད་དོ། །ཀུན་དགའ་བོ་དེ་བཞིན་གཤེགས་པ་ལམ་དུ་ཞུགས་པ་ན་སེམས་ཅན་གང་མི་འདུད་པ་དེ་ལྟ་བུ་

དེ་མོད་པ་མ་ཡིན་པ་དང་། གང་སེམས་མེད་པའི་དངོས་པོ་རི་དང་། ངམ་གྲོག་དང་། གཡང་ས་དང་། ཤིང་དང་རྩྭ་དང་ཤིང་གེལ་པ་དང་། སྨན་དང་ནགས་ཚལ་སའི་སྟེང་ན་ཡོད་པ་དག་དེ་བཞིན་གཤེགས་པ་ལམ་དུ་བཞུད་པ་ག་ལ་བ་ལོགས་སུ་མི་འདུད་པ་དེ་དག་མོད་པ་མ་ཡིན་པ་
ལ་ལྟོས། དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ཉིད་ན་བླ་མ་ལ་བཏུད། རབ་ཏུ་བཏུད། ཕྱག་འཚལ་ཅིང་གནས། ཕ་མ་ལ་རབ་ཏུ་གུས་པར་བཏུད་ཅིང་གནས། རྒན་པ་དང་བར་མ་དང་གཞོན་པ་དང་། མཛའ་བཤེས་དང་ཉེ་དུ་དང་། སྣག་
གི་གཉེན་མཚམས་དང་། སངས་རྒྱས་དང་བྱང་ཆུབ་སེམས་དཔའ་དང་། དགེ་བའི་བཤེས་གཉེན་དང་། ཉན་ཐོས་དང་། རང་སངས་རྒྱས་དང་། མངོན་པར་ཤེས་པ་ལྔ་དང་ལྡན་པ་དང་། དེ་བཞིན་དུ་དེ་ལས་གཞན་པ་དགེ་སྦྱོང་དང་། བྲམ་ཟེ་རྣམས་ལ་བཏུད། ངས་སངས་རྒྱས་དང་བྱང་ཆུབ་
སེམས་དཔའ་དང་། དགེ་བའི་བཤེས་གཉེན་དང་། ཉན་ཐོས་དང་རང་སངས་རྒྱས་དང་། ཕྱི་རོལ་པའི་དྲང་སྲོང་དང་། དགེ་སྦྱོང་དང་། བྲམ་ཟེ་དང་། ཕ་མ་དང་། མཛའ་བཤེས་དང་། ཉེ་དུ་དང་། སྣག་གི་གཉེན་མཚམས་དེ་དག་ཐམས་ཅད་དང་། དེ་ལས་གཞན་པ་རྒན་པ་དང་། བར་མ་དང་།
གཞོན་པ་དང་། གྲོགས་པོ་རྣམས་ལ་ཡིད་རབ་ཏུ་དགའ་བར་བྱས་ཏེ་ལུས་ཀྱིས་ཕྱག་བྱས་ཤིང་ངག་གིས་དེ་དག་ལ་བླ་མར་བྱ་བའི་སྒོ་དེ་ནས་མངོན་པར་བཏུད་དོ། །ཀུན་དགའ་བོ་ངའི་ལས་དགེ་བའི་རྣམ་པར་སྨིན་པ་དེས་དེ་བཞིན་གཤེགས་པ་བྱང་ཆུབ་བརྙེས་ནས་དེ་བཞིན་གཤེགས་པ་ལམ་
དུ་བཞུད་པའི་ཚེ་དངོས་པོ་གང་སེམས་ཡོད་པའམ་སེམས་མེད་པ་ཡང་རུང་མ་གུས་པ་དང་། མི་འདུད་པ་དང་། རབ་ཏུ་མི་འདུད་པ་དེ་དག་མོད་པ་མ་ཡིན་ནོ། །ཀུན་དགའ་བོ་ངས་བླ་མ་ལྟ་བུ་དང་། དེ་བཞིན་གཤེགས་པ་དང་། སེམས་ཅན་རྣམས་ལ་སྦྱིན་པ་གཙང་བ་དང་། བཟང་བ་དང་།
ཡིད་དུ་འོང་བ་མང་པོ་རང་གིས་ལག་དར་ནས་སྦྱིན་པ་བྱིན་ཏེ། ཀུན་དགའ་བོ་ལས་དེའི་རྣམ་པར་སྨིན་པ་དེས་དེ་བཞིན་གཤེགས་པ་ལམ་དུ་བཞུད་པ་ན་བཟང་ཞིང་གཙང་ལ་ཤིན་ཏུ་སྦྱངས་ཏེ། ཤིང་དང་བོང་བ་དང་། འདམ་རྫབ་རྣམས་བསལ་བར་གྱུར་ཏོ། །ཀུན་དགའ་བོ་ང་བླ་ན་མེད་པ་

ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་ན་སེམས་ཅན་ཐམས་ཅད་ལ་ཕན་པ་དང་། སེམས་ཅན་ཐམས་ཅད་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་ངས་རྟག་ཏུ་སངས་རྒྱས་དང་བྱང་ཆུབ་སེམས་དཔའ་
དང་། དགེ་བའི་བཤེས་གཉེན་དང་། ཉན་ཐོས་དང་། རང་སངས་རྒྱས་དང་། ཕྱི་རོལ་པའི་དྲང་སྲོང་མང་པོ་རྣམས་ལམ་དུ་ཞུགས་པ་ན་ལམ་ཕྱག་དར་བྱས་སོ། །གནས་དང་འཆག་ས་དང་། འདུག་གནས་རྣམས་ཕྱག་དར་བྱས་སོ། །ངས་དེ་བཞིན་གཤེགས་པའི་མཆོད་རྟེན་དག་
བྱམས་པའི་སེམས་དང་། སྙོམས་པའི་སེམས་དང་། མི་མཉམ་པ་མེད་པའི་སེམས་དང་། གྱ་གྱུ་མེད་པའི་སེམས་དང་། ཕན་པའི་སེམས་ཀྱིས་ཕྱག་དར་བྱས་སོ། །གཙང་མར་བྱས་སོ། །ཀུན་དགའ་བོ་དགེ་བའི་རྩ་བ་དེས་དེ་བཞིན་གཤེགས་པས་ཕྱོགས་གང་དང་གང་ན་བཞེངས་སམ།
བཞུགས་སམ། འཆག་གམ། མནལ་བ་མཛད་དམ། ལམ་དུ་ཞུགས་ཀྱང་རུང་། ཚེགས་ཆུང་ངུས་ས་ཕྱོགས་དེ་དག་གཙང་ཞིང་དག་ལ་མཉམ་སྟེ་ལག་མཐིལ་ལྟ་བུར་གྱུར་ཏོ། །ཀུན་དགའ་བོ་གང་དེ་བཞིན་གཤེགས་པའི་སྐུའི་ཕྲིན་ལས་ཀྱི་ཁྱད་པར་གང་ཡིན་པ་དེ་དག་གི་མཐའ་ནི་རྟོགས་
པར་སླ་བ་མ་ཡིན་ནོ། །ཀུན་དགའ་བོ་དེ་བས་ན་དོན་དེ་རྒྱ་ཆེར་ཡོངས་སུ་རྫོགས་པར་བྱ་བ་དང་། འདི་ལ་རིགས་ཀྱི་བུའམ་རིགས་ཀྱི་བུ་མོ་དད་པ་ཅན་ཁ་ཅིག་ཅི་ནས་ཀྱང་དེ་བཞིན་གཤེགས་པ་ལ་དགའ་བ་དང་། སེམས་དང་བ་དང་གུས་པ་དང་། རི་མོར་བྱེད་པ་ཆེན་པོ་རྒྱས་པར་བསྐྱེད་
པའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་རིའི་རྒྱལ་པོ་རི་རབ་དཔག་ཚད་བརྒྱད་ཁྲི་བཞི་སྟོང་ནི་རྒྱ་མཚོ་ཆེན་པོའི་ནང་ནས་བྱུང་། དཔག་ཚད་བརྒྱད་ཁྲི་བཞི་སྟོང་ནི་ཆུའི་ནང་དུ་ནུབ་པའི་རིའི་རྒྱལ་པོ་ཆེན་པོ་དེ་སྲ་བ་རྡོ་རྗེ་ལྟར་གྱུར་དུ་ཟིན་ཀྱང་ཀུན་དགའ་བོ་དེ་བཞིན་གཤེགས་པ་ཡོངས་
སུ་མྱ་ངན་ལས་འདས་པའི་དབུ་སྐྲ་སྣད་པར་བྱ་བར་ཡང་སླ་བ་མ་ཡིན་ན། གཅིག་ཙམ་བསྒྱུར་ཞིང་འགྱུར་བར་དབྱུང་བ་ལྟ་ཅི་སྨོས་ཏེ་དེ་ནི་གནས་མེད་དོ། །ཀུན་དགའ་བོ་རིའི་རྒྱལ་པོ་རི་རབ་ལྟ་ཞོག་ལ། ཀུན་དགའ་བོ་རིའི་རྒྱལ་པོ་ཁོར་ཡུག་དང་ཁོར་ཡུག་ཆེན་པོ་འཕང་དུ་དཔག་ཚད་དྲུག་ཁྲི་

བརྒྱད་སྟོང་ཡོད་པ་རིའི་རྒྱལ་པོ་ཁོར་ཡུག་དང་ཁོར་ཡུག་ཆེན་པོ་རྡོ་རྗེ་ལྟ་བུ་གང་ཡིན་པ་དེ་དག་གིས་ཀྱང་ཀུན་དགའ་བོ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་དབུ་སྐྲ་འདུད་པའམ་ཡོངས་སུ་འདུད་པའམ་དབྱུང་བར་ཡང་སླ་བ་མ་ཡིན་ན་མེད་པར་བྱ་བ་ལྟ་ཅི་སྨོས་ཏེ། དེ་ནི་གནས་
མེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། གང་ངས་སྔོན་ཕྱེ་བའི་སེམས་ཅན་གང་ཡང་རྙེད་པར་སླ་བ་མ་ཡིན་ཏེ། ཀུན་དགའ་བོ་ངས་ནི་སེམས་ཅན་འཐབས་ཤིང་བྱེ་བ་རྣམས་འདུམ་ཞིང་འཐུན་པ་ལ་བཀོད་ནས་བརྟན་པ་དང་མི་
ཕྱེད་པ་དང་། གཅིག་ལ་གཅིག་བྱམས་པའི་སེམས་དང་ཕན་པའི་སེམས་དང་ལྡན་པར་བྱས་སོ། །ཀུན་དགའ་བོ་རྣམ་གྲངས་དེ་དང་། དགེ་བའི་རྩ་བ་དེས་དེ་བཞིན་གཤེགས་པའི་སྐུ་མི་ཕྱེད་པ་དང་། ཀུན་དགའ་བོ་དེ་བཞིན་གཤེགས་པའི་ཞབས་འབྲིང་འཁོར་མི་ཕྱེད་པར་གྱུར་ཏོ། །ཀུན་
དགའ་བོ་དེ་བཞིན་གཤེགས་པའི་ཞབས་འབྲིང་འཁོར་ཀྱང་གང་ཞེ་ན། ཀུན་དགའ་བོ་དེ་བཞིན་གཤེགས་པའི་ཞབས་འབྲིང་འཁོར་ནི་ཆོས་ཡིན་ཏེ། འདི་ལྟ་སྟེ། དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་
ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་སྟེ། ཀུན་དགའ་བོ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་ནི་དེ་བཞིན་གཤེགས་པའི་ཞབས་འབྲིང་འཁོར་ཆེན་པོ་ཡིན་ནོ། །གང་དེ་བཞིན་གཤེགས་པས་ཉན་ཐོས་གང་དག་དེ་ལ་བཀོད་
པ་དེ་དག་ཀྱང་ལྷ་དང་བཅས་པའི་འཇིག་རྟེན་གྱིས་དབྱེ་མི་ནུས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ཆོས་འདི་ལྟ་བུ་འདིའི་ཆོས་ཉིད་འདི་ཡིན་ཏེ། གང་ལྷ་དང་བཅས་ཚངས་པ་དང་བཅས་པའི་འཇིག་རྟེན་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་འཁོར་དང་བཅས་པ་ལྷ་དང་
མི་དང་ལྷ་མ་ཡིན་དུ་བཅས་པ་དང་། རི་རབ་དང་ཁོར་ཡུག་དང་ཁོར་ཡུག་ཆེན་པོ་དང་བཅས་པའི་ས་ཆེན་པོ་དེ་དག་གིས་ཐ་ན་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་དབུ་འདུད་པར་ཡང་སླ་བ་མ་ཡིན་ན་དབྱེ་བ་ལྟ་ཅི་སྨོས་ཏེ། དེ་ནི་གནས་མེད་དོ། །དེ་ཅིའི་ཕྱིར་ཞེ་ན། ཀུན་དགའ་

བོ་འདི་ལྟར་དེ་བཞིན་གཤེགས་པའི་སྐུ་མི་ཕྱེད་པ་དང་། སྐུ་གདུང་རྣམས་མི་ཕྱེད་པ་ཡིན་པའི་ཕྱིར་རོ། །ཀུན་དགའ་བོ་སེམས་ཅན་རྣམས་ལ་སྙིང་བརྩེ་བ་དང་བསྟན་པ་རྒྱས་པར་བྱ་བའི་ཕྱིར་སྔོན་གྱི་སྨོན་ལམ་གྱིས་དེ་བཞིན་གཤེགས་པས་སྐུ་གདུང་རྣམས་ཡུངས་
འབྲུ་ཙམ་དུ་བྱིན་གྱིས་བརླབས་སོ། །ཀུན་དགའ་བོ་དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཡོངས་སུ་མྱ་ངན་ལས་འདས་པའི་སྐུ་གདུང་རྣམས་རྒྱས་པར་གྱུར་ཅིག་ཅེས་
ངེས་པར་དེ་ལྟར་སེམས་བསྐྱེད་དེ་ཀུན་དགའ་བོ་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་སྐུ་གདུང་རྣམས་རྒྱས་པར་འགྱུར་བ་འདི་ཡང་སྔོན་གྱི་སྨོན་ལམ་གྱི་དབང་གིས་གྱུར་ཏོ། །ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་ཡང་གདུལ་བའི་སེམས་ཅན་དེ་དག་གིས་བཅོམ་
ལྡན་འདས་མཐོང་བར་འགྱུར་ཏེ། དེ་དག་གི་དོན་དང་སེམས་ཅན་ལ་སྙིང་བརྩེ་བའི་ཕྱིར་སྐུ་གདུང་ཕྱེ་བ་དང་། སྐུ་གདུང་ཡུངས་འབྲུ་ཙམ་དག་ཏུ་བྱིན་གྱིས་བརླབས་སོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་
འདའ་བའི་དུས་ཀྱི་ཚེ། འཇིག་རྟེན་ལ་སྙིང་བརྩེ་བའི་ཕྱིར་ཇི་ལྟར་སྐུ་གདུང་ཡུངས་འབྲུ་ཙམ་དག་ཏུ་བྱིན་གྱིས་རློབ་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་འཇུག་གོ། །ཀུན་དགའ་བོ་ངའི་སྐུའི་ཚིགས་ཐམས་ཅད་ཕྱེ་ཞིང་སྐུ་གདུང་ཡུངས་འབྲུ་ཙམ་དག་ཏུ་བྱིན་གྱིས་རློབ་པ་ན་སྡུག་བསྔལ་དུ་ཚོར་བ་
འབྱུང་མོད་ཀྱི། ཀུན་དགའ་བོ་འོན་ཀྱང་སེམས་ཅན་དེ་དག་རྗེས་སུ་གཟུང་བ་དང་། སྙིང་བརྩེ་བའི་ཕྱིར་དེ་བཞིན་གཤེགས་པ་སྡུག་བསྔལ་དུ་ཚོར་བ་བཟོད་པར་ནུས་ཏེ། ཡུལ་གྱི་མི་ཕྱི་མ་རྣམས་བདེ་བ་དང་དགེ་བའི་ལམ་གྱིས་རྗེས་སུ་གཟུང་བར་འགྱུར་རོ། །ཀུན་དགའ་བོ་གང་
རིང་བསྲེལ་ཡུངས་འབྲུ་ཙམ་དག་ལ་མེ་ཏོག་དང་། བདུག་པ་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དང་། གར་དང་། སིལ་སྙན་ལེན་པ་དང་། ཕེག་རྡོབ་པ་དང་། བསྟོད་པ་རྣམས་ཀྱིས་བསྟི་སྟང་བྱེད། བླ་མར་

བྱེད། རིམ་གྲོར་བྱེད། མཆོད་པར་བྱེད། རྗེད་པར་བྱེད། གསོལ་བར་བྱེད་ན། ཀུན་དགའ་བོ་དགེ་བའི་རྩ་བ་དེ་ཐམས་ཅད་ཀྱི་འབྲས་བུ་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བར་ང་སྨྲའོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་བརྒྱ་
ལོན་པ་ན་གྲོང་ཁྱེར་སྐྱ་སྣར་གྱི་བུ་ཞེས་བྱ་བར་རྒྱལ་པོ་མྱ་ངན་མེད་པ་ཞེས་བྱ་བ་མོའུ་རྱའི་རིགས་སུ་སྐྱེས་པ་ཆོས་ཅན་ཆོས་ཀྱི་རྒྱལ་པོ་ཞིག་འབྱུང་བར་འགྱུར་ཏེ། དེ་ཡང་ངའི་བསྟན་པ་ལ་དད་པར་འགྱུར་རོ། །དད་པར་གྱུར་ནས་ཀྱང་ངའི་སྐུ་གདུང་རྒྱས་པར་བྱེད་དོ། །དེ་དུས་གཅིག་ཏུ་ཉིན་
གཅིག་ལ་ངའི་སྐུ་གདུང་གི་མཆོད་རྟེན་བརྒྱད་ཁྲི་བཞི་སྟོང་བྱེད་པར་འགྱུར་གྱིས། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་དགའ་བོ་ངའི་སྐུ་གདུང་རྒྱས་པ་དང་། ལྷ་དང་མི་རྣམས་ལ་ཡངས་ཤིང་རྒྱ་ཆེ་བར་འགྱུར་རོ། །ཀུན་དགའ་བོ་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་བཞུགས་པ་ལ་གང་བསྟི་སྟང་བྱེད་པ་ལྟ་ཞོག །ཡོངས་སུ་མྱ་ངན་ལས་འདས་པའི་སྐུ་གདུང་ལ་གང་སྐུ་གདུང་གི་མཆོད་པ་བྱེད་པ་ལྟ་ཡང་ཞོག་ལ། ཀུན་དགའ་བོ་གང་དག་ཁ་ཅིག་ཐ་ན་རྨི་ལམ་ན་དེ་བཞིན་གཤེགས་པའི་མཆོད་རྟེན་
མཐོང་ནས་སེམས་དང་བར་བྱེད་ན། ཀུན་དགའ་བོ་དགེ་བའི་རྩ་བ་དེའི་འབྲས་བུ་ཡང་མྱ་ངན་ལས་འདས་པ་ཡིན་ཏེ། མྱ་ངན་ལས་འདས་པས་ཀླས་ཤིང་མྱ་ངན་ལས་འདས་པའི་མཐས་གཏུགས་པར་འགྱུར་བར་ང་སྨྲའོ། །ཀུན་དགའ་བོ་མ་འོངས་པའི་དུས་ན་སངས་རྒྱས་བཅོམ་ལྡན་འདས་གང་དག་
འབྱུང་བ་དེ་དག་ལས་གང་ངའི་ཡོན་ཏན་མི་སྒྲོགས་པའི་དེ་བཞིན་གཤེགས་པ་འཇིག་རྟེན་དུ་འབྱུང་བ་དེ་གང་ཡང་མེད་དོ། །འདི་ལྟ་སྟེ་དཔེར་ན་ང་ད་ལྟར་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་ཡོན་ཏན་སྒྲོགས་པ་དེ་བཞིན་དུ་མ་བྱོན་པའི་སངས་རྒྱས་བཅོམ་ལྡན་འདས་དེ་དག་ཀྱང་ངའི་
ཡོན་ཏན་ཡོངས་སུ་སྒྲོགས་པར་འགྱུར་རོ། །ཀུན་དགའ་བོ་གང་ལ་ལ་ངའི་ཆོས་བསྟན་པ་ལས་བརྩམས་ཏེ། ཆོས་རྣམ