Kinh tạng Tây Tạng (Kangyur Đại Học) — 050_མདོ་སྡེ།_ཆ

༄༅། །མདོ་སྡེ་ཆ་བཞུགས་སོ། །

༄༅༅། །རྒྱ་གར་སྐད་དུ། ཨཱརྱ་གྷ་ན་བྱཱུ་ཧ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་རྒྱན་སྟུག་པོ་བཀོད་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ།
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཆོས་ཐམས་ཅད་ལ་མངའ་སྒྱུར་བ་འདོད་པ་ནས།
གཟུགས་དང་། གཟུགས་མེད་པ་དང་། འདུ་ཤེས་མེད་པའི་སེམས་ཅན་རྣམས་ལས་འདས་ཏེ། སངས་རྒྱས་ཀྱི་ཞིང་སྟུག་པོ་ན་སྟོབས་མངའ་བ་རྣམས་དང་། རྫུ་འཕྲུལ་གྱི་རྐང་པ་རྣམས་ཀྱིས་
རྣམ་པར་འཕྲུལ་ཞིང་རྗེས་སུ་སྤྱོད་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣལ་འབྱོར་དམ་པའི་རྣལ་འབྱོར་ཅན་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་མུར་འདུག་བྱེད་
པ་ཐམས་ཅད་ཀྱི་གཞུང་རྣམ་པར་འཇོམས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་

ཐམས་ཅད་ཀྱི་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་པོ་བརྙེས་པ་དང་།
བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་འཕྲུལ་པའི་རྒྱལ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་རྣམ་པར་གྲོལ་བའི་ཟླ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་འཛིན་དང་། དེ་དག་ལ་སོགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་བྱེ་བ་སྙེད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་ཁམས་གསུམ་
པའི་ཡུལ་ལས་ཡོངས་སུ་འདས་པ། སེམས་དང་། ཡིད་དང་། རྣམ་པར་ཤེས་པ་དང་། ཀུན་གཞིའི་སྤྱོད་ཡུལ་ལས་ཡོངས་སུ་འདས་པ། ཡེ་ཤེས་དང་ཡིད་ཀྱི་ལུས་སུ་གནས་གྱུར་པ། སྒྱུ་མ་ལྟ་བུ་དང་། དཔའ་བར་འགྲོ་བ་དང་། ཆོས་ཀྱི་སྤྲིན་གྱིས་དང་། ཏིང་ངེ་འཛིན་
དང་ལྡན་པ། སངས་རྒྱས་དུ་མའི་ཕྱག་གི་དབང་བསྐུར་བས་དབང་བསྐུར་བ། ཁམས་གསུམ་པའི་ཡུལ་ལས་ཤིན་ཏུ་འདས་པའི་གཞལ་མེད་ཁང་གི་པད་མོ་ཆེན་པོ་ལ་འཁོད་པ་རྣམས་དང་ཐབས་ཅིག་ཏུ་བཞུགས་ཏེ། དེ་ན་མུར་འདུག་དང་། ཉན་ཐོས་དང་། རང་སངས་
རྒྱས་ཐམས་ཅད་ཀྱི་རྒྱུ་བ་མེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་བའི་ཆོས་ལ་བདེ་བར་སྤྱད་པ་བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་མཁྱེན་པའི་སྤྱོད་ཡུལ་བཙུན་པར་དབྱངས་

འབྱིན་པ་སྣ་ཚོགས་ཀྱི་གཟུགས་དུ་མ་སྟོན་པའི་ཏིང་ངེ་འཛིན་ལས་བཞེངས་སོ། །བཞེངས་ནས་ཀྱང་ཕོ་བྲང་འཇའ་དང་གློག་གི་འོད་ཅན་རྒྱན་དང་། ལྷབ་ལྷུབ་དུ་མས་བརྒྱན་པ་ནས་མངོན་པར་བྱུང་སྟེ། ཟླ་བ་དྲི་མ་མེད་པའི་སྙིང་པོ་ཞེས་བྱ་བའི་ཁང་སྟེངས་སུ་གཤེགས་སོ། །
གཤེགས་ནས་ཀྱང་སྟུག་པོའི་རིས་ཀྱི་རྒྱན་སེང་གེའི་གདན་དམ་པ་ལ་བྱང་ཆུབ་སེམས་དཔའ་དང་ཐབས་ཅིག་ཏུ་བཞུགས་སོ། །བཞུགས་ནས་ཀྱང་བཅོམ་ལྡན་འདས་ཀྱིས་ཕྱོགས་བཞིར་གཟིགས་ཏེ་གཙུག་གི་རིན་ཆེན་འོད་ཀྱི་རྒྱན་ཅེས་བྱ་བའི་འོད་ཟེར་གྱི་ཚོགས་ཆེན་པོ་འོད་ཟེར་
སྟོང་ཕྲག་བརྒྱའི་འཁོར་ཅན་སྨིན་མཚམས་ནས་ཕྱུང་སྟེ། འོད་ཟེར་གྱི་ཚོགས་དེ་བྱུང་བས་སངས་རྒྱས་ཀྱི་ཞིང་གི་རྒྱན་ཐམས་ཅད་སངས་རྒྱས་ཀྱི་རྒྱན་གཅིག་དང་འདྲ་བར་ཡོངས་སུ་སྣང་བར་གྱུར་ཏོ། །མཆོག་ཏུ་ཕྲ་བའི་རྡུལ་གྱི་ཕྲ་བ་ཉིད་དུ་སངས་རྒྱས་ཀྱི་ཞིང་ཐམས་ཅད་ཀྱི་རང་
བཞིན་ཕྲ་བ་ཉིད་ཀྱང་ཡོངས་སུ་སྣང་ངོ་། །སངས་རྒྱས་ཀྱི་ཞིང་སྟུག་པོ་ཡང་སངས་རྒྱས་ཀྱི་ཞིང་གཞན་གྱི་རང་བཞིན་རྡུལ་གྱི་ཕྲ་བ་ཉིད་ལས་འདས་ཏེ་གནས་སོ། །སངས་རྒྱས་ཀྱི་ཞིང་སྟུག་པོ་ནི་འོད་དང་། གཟའ་དང་། ཟླ་བ་སྤངས་པ་སྟེ། འདུས་མ་བྱས་ཀྱི་རང་བཞིན་ཉིད་ཀྱིས་
ཤིན་ཏུ་ཕྲ་བའི་རྡུལ་གྱི་ཕྲ་བ་ཉིད་དུ་མི་སྣང་གི །གཞན་དུ་མྱ་ངན་ལས་འདས་པ་དང་། ནམ་མཁའ་དང་མ་བརྟགས་པར་འགོག་པ་ལྟ་བུར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། སངས་རྒྱས་བཅོམ་ལྡན་འདས་རྣམས་དང་། སངས་རྒྱས་ཀྱི་ཞིང་གཞན་
དག་ན་སྤྱོད་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གཟིགས་སོ། །དེ་ནས་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་གི་རྒྱན་དང་། སངས་རྒྱས་དང་བྱང་ཆུབ་སེམས་དཔའི་མཐུ་ཕྱུང་བ་དེ་དག་གཟིགས་ནས་སངས་རྒྱས་ཀྱི་སྤྱན་གྱིས་ཕྱོགས་བཅུར་
བྱང་ཆུབ་སེམས་དཔའི་འཁོར་དང་བཅས་པ་ལ་གཟིགས་ནས་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ལ་བཀའ་སྩལ་པ། རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་སྟུག་པོའི་རྒྱན་ཞེས་བྱ་

བའི་སངས་རྒྱས་ཀྱི་ཞིང་འདི་ན་འདོད་པ་དང་། གཟུགས་དང་། གཟུགས་མེད་པ་དང་། འདུ་ཤེས་མེད་པའི་སེམས་ཅན་དུ་གཏོགས་པའི་གཟུགས་སྲེད་པ་དང་། མ་རིག་པ་དང་། ཏིང་ངེ་འཛིན་གྱི་འབྲས་བུ་ཡེ་ཤེས་ཀྱི་མེས་རྣམ་པར་བསྲེགས་ཏེ་གནས་གྱུར་པའི་
ཕྱིར་ཡེ་ཤེས་ཀྱི་ཏིང་ངེ་འཛིན་དང་། ཡིད་བཞིན་གྱི་ལུས་སྟོབས་དང་། མངོན་པར་ཤེས་པ་དང་། རྫུ་འཕྲུལ་གྱི་རྐང་པ་དང་། དབང་གིས་བརྒྱན་པ། གསེང་མེད་པ། རིང་དུ་གནས་པ། ཟླ་བ་དང་། ཉི་མ་དང་། ནོར་བུ་དང་། གློག་དང་། འཇའ་དང་། བྱི་རུ་དང་། བ་བླ་དང་།
ལྡོང་རོས་དང་། མཚལ་དང་། མགོ་ནག་གི་འབྲུ་དང་། ཀིང་ཤུ་ཀ་དང་། ཨིན་དྲ་གོ་པ་དང་། གསེར་དང་། ཙམ་པ་ཀ་དང་། པད་མོ་དང་། དུང་དང་། རྨ་བྱའི་མགུལ་དང་། མདོངས་བུ་མེ་ལོང་གི་ནང་ན་འདུག་པའི་གཟུགས་བརྙན་ལྟ་བུ་ཐོབ་ནས་ས་དང་སར་ཟག་པ་མེད་
པས་སྦྱངས་པའི་རྒྱུ་ཏིང་ངེ་འཛིན་ལ་དབང་སྒྱུར་བའི་ཕྱིར་སྨོན་ལམ་གྱི་མཐར་ཕྱིན་པ་བཅུའི་བསྔོ་བས་ལུས་ཐོབ་པའི་ཁྱད་པར་ཅན་དག་སངས་རྒྱས་ཀྱི་ཞིང་སྟུག་པོར་འོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་ཐམས་ཅད་རྣམ་པར་དགོད་
པ་ཡང་དག་པ་ཇི་ལྟ་བ་བཞིན་དུ་སྟོན་པ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་གཅིག་ཅིག་བཅོམ་ལྡན་འདས་ཀྱིས་བདག་ལ་ཞུ་བ་ཞུས་པ་ལུང་བསྟན་པའི་སླད་དུ་སྐབས་དབྱེ་བར་གནང་ན་བདག་གིས་ཞུའོ། །བཅོམ་ལྡན་འདས་ཀྱིས་བཀའ་སྩལ་པ། རྣམ་
པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དྲིས་ཤིག་དང་། ངས་ཅི་དང་ཅི་འདོད་པ་དེ་དང་དེའི་དྲི་བ་དྲིས་པ་ལུང་བསྟན་པས་སེམས་མགུ་བར་བྱས། ཁྱོད་ཀྱིས་ཇི་ལྟར་བཟོད་པ་དེ་ལྟར་

སྨྲོས་ཤིག །དེ་ནས་སངས་རྒྱས་ཀྱི་ཆོས་ཐམས་ཅད་རྣམ་པར་དགོད་པ་ཇི་ལྟ་བ་བཞིན་དུ་སྟོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ། བཅོམ་ལྡན་འདས་ཀྱིས་སྐབས་ཕྱེ་བ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་སངས་རྒྱས་ཀྱི་ཞིང་སྟུག་པོ་འབའ་ཞིག་འདོད་པ་དང་། གཟུགས་དང་། གཟུགས་མེད་པ་དང་། འདུ་ཤེས་མེད་པའི་སེམས་ཅན་ལས་འདས་ཏེ། གནས་སམ། སངས་རྒྱས་ཀྱི་ཞིང་གཞན་དག་ཀྱང་དེ་བཞིན་ནམ་ཅི་ལགས།
རིགས་ཀྱི་བུ་སངས་རྒྱས་ཀྱི་ཞིང་སྟུག་པོ་འབའ་ཞིག་འདོད་པ་དང་། གཟུགས་དང་། གཟུགས་མེད་པ་དང་། འདུ་ཤེས་མེད་པའི་སེམས་ཅན་ལས་འདས་ཏེ་གནས་པ་མ་ཡིན་གྱི་སངས་རྒྱས་ཀྱི་ཞིང་གཞན་དག་ཀྱང་ཡོད་དོ། །རིགས་ཀྱི་བུ་འདི་ནས་ཕ་རོལ་ཤིན་ཏུའང་ཕ་རོལ་
སངས་རྒྱས་ཀྱི་ཞིང་བྱེ་བ་སྟོང་ཕྲག་བརྒྱ་འདས་པའི་སྟེང་གི་ཕྱོགས་ཆ་ན་ཚངས་པའི་དབྱངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཞིང་དང་། དེ་བཞིན་དུ་སཱ་ལའི་དབང་པོའི་རྒྱལ་པོ་དེ་བཞིན་གཤེགས་པ་དང་། སྐར་མའི་རྒྱལ་པོ་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སངས་རྒྱས་ཀྱི་ཞིང་དང་། དེ་བཞིན་དུ་སངས་རྒྱས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཕ་རོལ་ཤིན་ཏུའང་ཕ་རོལ་ཏུ་འདས་པ་ན། སངས་
རྒྱས་ཀྱི་ཞིང་བྱེ་བ་སྟོང་ཕྲག་བརྒྱ་མང་པོ་བྱང་ཆུབ་སེམས་དཔའི་འཁོར་གྱི་ཚོགས་ཀྱིས་བརྒྱན་པ་ཤིན་ཏུ་ཡངས་ཤིང་ཆེ་བ་དག་ཡོད་དེ། སངས་རྒྱས་བཅོམ་ལྡན་འདས་དེ་དག་ཀྱང་འཁོར་གྱི་ཚོགས་དེ་དང་དེ་དག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བདག་
གི་སོ་སོ་རང་གི་འཕགས་པའི་ཡེ་ཤེས་ཀྱི་རྟོགས་པའི་སྤྱོད་ཡུལ་གྱི་གཏམ་དང་། མཐོང་བའི་ཆོས་ལ་བདེ་བར་གནས་པའི་ཆོས་ཚིག་དང་རྣམ་པར་རྟོག་པའི་སྤྱོད་ཡུལ་དང་། ཡི་གེ་དང་བྲལ་བ་དེ་བཞིན་ཉིད་དང་། ཡང་དག་པའི་མཐའ་དང་། མྱ་ངན་ལས་འདས་པ་ཐོབ་པར་བྱེད་

པ་ཕྱི་མའི་མཐའི་མུར་གཏུགས་པར་སྟོན། དེ་ནི་རྣམ་པར་བཀོད་པ་ཡང་དག་པ་ཇི་ལྟ་བ་བཞིན་དུ་སྟོན་ཏེ། དེ་ནི་གང་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ཁྱོད་ཀྱིས་འདིའི་ཕ་རོལ་ན་འཇིག་རྟེན་གཞན་དང་སངས་རྒྱས་དག་ཡོད་
དམ་ཞེས་སྨྲས་པ་དེའི་ལན་དུ་ངས་འདི་སྨྲས་སོ། །རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ཁྱོད་འབའ་ཞིག་སངས་རྒྱས་ཀྱི་ཞིང་གི་རྒྱན་དང་བྱང་ཆུབ་སེམས་དཔའ་ལ་ལྟད་མོ་བལྟ་བར་འདོད་པའི་ཕྱིར་དེ་བཞིན་གཤེགས་པ་ལ་དྲི་བར་སེམས་པར་མ་ཟད་ཀྱི། བྱང་
ཆུབ་སེམས་དཔའ་སེམས་དཔའ་ཆེན་པོ་ཤུགས་འཛིན་འདི་ཡང་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་གི་རྒྱན་དང་། སངས་རྒྱས་ཀྱི་སྒྲའི་དབྱངས་ཀྱི་དཀྱིལ་འཁོར་དང་སྤྱི་གཙུག་ཚད་མེད་པ་ལ་ལྟད་མོ་བལྟ་བར་འདོད་པའི་ཕྱིར་སངས་རྒྱས་ཀྱི་ཞིང་བྱེ་
བ་སྟོང་ཕྲག་བརྒྱར་སོང་ནས་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་དུ་རྫུ་འཕྲུལ་གྱི་མཆོག་གིས་གྱེན་དུ་སོང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་འཛིན་འདིས་དེ་བཞིན་གཤེགས་པ་གཅིག་ཙམ་གྱི་སངས་རྒྱས་ཀྱི་ཞིང་གི་རྒྱན་ཏམ། སངས་རྒྱས་
ཀྱི་གསུང་གི་དབྱངས་ཀྱི་དཀྱིལ་འཁོར་རམ། སྤྱི་གཙུག་ཚད་མེད་པ་ཡང་མ་མཐོང་སྟེ། དེས་མ་མཐོང་བ་དང་། ངོ་མཚར་དུ་གྱུར་ནས་སངས་རྒྱས་ཀྱི་གསུང་གི་དབྱངས་ཀྱི་དཀྱིལ་འཁོར་དང་། སྤྱི་གཙུག་བལྟར་ཚད་མེད་པ་བསམ་གྱིས་མི་ཁྱབ་པ། ཡང་དག་པར་
རྗེས་སུ་དྲན་ཞིང་མི་མཇེད་ཀྱི་འཇིག་རྟེན་གྱི་ཁམས་འདི་ཉིད་དུ་ཕྱིན་ནས་མཉན་དུ་ཡོད་པར་སངས་རྒྱས་བཅོམ་ལྡན་འདས་ཀྱི་སྤྱན་སྔར་འདུག་སྟེ། ཉེས་པ་ལ་ཉེས་པར་བཤགས་ནས་སངས་རྒྱས་རྣམས་ནམ་མཁའ་དང་མཉམ་པར་ཤེས་ཏེ་མངོན་པར་བསྟོད་ནས།
བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་རྟོགས་པའི་སྤྱོད་ཡུལ་ལ་མངོན་པར་མོས་ཤིང་སངས་རྒྱས་ཀྱི་ཞིང་སྟུག་པོ་ཉིད་དུ་སོང་སྟེ་གནས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ས་དང་སའི་མཚན་ཉིད་ལ་མཁས་པ་

ཕྲ་བ་དང་དམིགས་སུ་ཕེབས་པ་དང་། རྣམ་པར་གདོན་མི་ཟ་བའི་གཏམ་ཟློས་པ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེར་ཐལ་མོ་སྦྱར་བས་ཕྱག་འཚལ་ཏེ། བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་གཅིག་ཅིག་བཅོམ་ལྡན་འདས་ཀྱིས་བདག་ལ་ཞུ་བ་ཞུས་པ་ལུང་བསྟན་པའི་སླད་དུ་སྐབས་དབྱེ་བར་གནང་ན་བདག་གིས་ཞུའོ། །བཅོམ་
ལྡན་འདས་ཀྱིས་བཀའ་སྩལ་པ། རྡོ་རྗེའི་སྙིང་པོ་ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དྲིས་ཤིག་དང་། ངས་ཅི་དང་ཅི་འདོད་པ་དེ་དང་དེའི་དྲི་བ་དྲིས་པ་ལུང་བསྟན་པས་སེམས་མགུ་བར་བྱས་ཁྱོད་ཀྱིས་ཇི་ལྟར་བཟོད་པ་དེ་ལྟར་སྨྲོས་
ཤིག །དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་བཅོམ་ལྡན་འདས་ཀྱིས་སྐབས་ཕྱེ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་སངས་རྒྱས་ཞེས་བགྱི་བ་དང་། འཚང་རྒྱ་
བར་བགྱི་བ་ཞེས་བྱ་བའི་དོན་ཅི་ལགས། བཅོམ་ལྡན་འདས་དོན་དམ་པ་འཕགས་པའི་ཡུལ་ཆོས་ཉིད་ཀྱི་སངས་རྒྱས་ཀྱི་རིགས་སྟོན་པ་འདས་པ་དང་། མ་འོངས་པ་དང་། ད་ལྟར་བྱུང་བའི་སྤྱོད་པའི་ས་ལ་སྤྱོད་པ་དང་། གཟུགས་དང་། མཚན་ཉིད་དང་། ཡང་དག་པར་བསྡུ་བའི་
ལྟ་བར་ལྟུང་བ་རྣམས་དང་མུར་འདུག་གཞན་གྱི་སྨྲ་བ་ལ་མངོན་པར་ཆགས་པའི་བློའི་སྤྱོད་ཡུལ་ལ་སྤྱོད་པ་རྣམས་དང་། རྡུལ་དང་། གཅེས་པ་དང་། དབང་པོ་དང་། ཕྱོགས་དང་། དུས་དང་། ནམ་མཁའ་དང་། བདག་དང་། ཡིད་དང་། དབང་པོ་དང་། དོན་ཉེ་བར་འདུ་བའི་ལྟ་
བར་ལྟུང་བ་རྣམས་ཀྱི་བློ་རྣམ་པར་བཟློག་པའི་སླད་དུ་བཤད་དུ་གསོལ། བདེ་བར་གཤེགས་པ་བསྟན་དུ་གསོལ། མ་རིག་པ་དང་། སྲེད་པ་དང་། ལས་དང་། མིག་དང་། གཟུགས་དང་། སྣང་བ་དང་། དེ་ལས་སྐྱེ་བའི་ཡིད་ལ་བྱེད་པ་དང་། གསུམ་འདུ་བའི་རྣམ་པར་རྟོག་པའི་

ཤེས་པ་ཅན་དང་། རྒྱུ་དང་། དེ་མ་ཐག་པ་དང་། དབང་དང་། དམིགས་པའི་རྐྱེན་ལས་བྱུང་བའི་རྣམ་པར་ཤེས་པ་ལ་ཆགས་པར་སྤྱོད་པ་དང་། ཡོད་པ་དང་། མེད་པར་སྨྲ་བའི་རྟོགས་པ་ཅན་དང་། ཆོས་འདི་བའི་ཕུང་པོ་དང་། གང་ཟག་སྟོང་པ་ཉིད་
དུ་ལྟ་བར་ལྟུང་བ་རྣམས་ཀྱི་ཡང་བློ་རྣམ་པར་བཟློག་པའི་སླད་དུ་བཅོམ་ལྡན་འདས་བསྟན་དུ་གསོལ། །ཆོས་ཀྱི་དབང་པོ་ཐོས་པར་འགྱུར་གྱིས་བདེ་བར་གཤེགས་པ་བསྟན་དུ་གསོལ། །རྣམ་ཤེས་ལྔ་ཡི་རྒྱུ་ལ་སོགས། །མངའ་བདག་དམ་པ་མ་གཏོགས་པར། །སངས་
རྒྱས་བློ་དང་ཤེས་བྱ་དང་། །ཇི་ལྟར་གང་གིས་འཚང་རྒྱ་ཞིང་། །ཤེས་བྱ་རྣམ་པ་ལྔ་པོ་རྣམས། །ཐུགས་སུ་ཆུད་པ་སངས་རྒྱས་ཏེ། །ཆོས་རྣམས་ཐམས་ཅད་མཁྱེན་པས་ན། །མྱ་ངན་འདའ་དང་མཉམ་གཤེགས་པ། །བཅོམ་ལྡན་འདས་ཀྱིས་བཀའ་སྩལ་པ། དགེའོ་
དགེའོ་རྡོ་རྗེའི་སྙིང་པོ་ས་བཅུ་ལ་དབང་བ། རྣམ་པར་རྟོག་པའི་སྤྱོད་ཡུལ་ལས་འདས་པ། མཁས་པ་ཆོས་ཉིད་ཀྱི་སངས་རྒྱས་ཀྱི་རིགས་གྲགས་པར་བྱེད་པ་དགེའོ། །རྣལ་འབྱོར་དམ་པ་ལ་དབང་བ། སངས་རྒྱས་དང་འཚང་རྒྱ་བར་ཡོངས་སུ་དྲི་བ་འདི་ལ་ནི་ཁྱོད་འབའ་ཞིག་ལྟད་མོ་
བྱུང་བ་མ་ཡིན་གྱི། སྒྱུ་མ་བྱེད་པ་བཟང་པོ་དང་། རྒྱལ་བའི་བུ་གཞན་དག་ཀྱང་དོན་འདི་ལ་ལྟད་མོ་བྱུང་ཞིང་སངས་རྒྱས་ཀྱི་དངོས་པོ་འདྲི་སྟེ། དེ་བཞིན་གཤེགས་པ་ཞེས་བྱ་བའི་ཚིག་གི་དོན་འདི་ཅི་ཞིག །ཅི་གཟུགས་དེ་བཞིན་གཤེགས་པའམ། འོན་ཏེ་གཟུགས་ལས་གཞན་
ཞིག་དེ་བཞིན་གཤེགས་པའམ། དེ་བཞིན་དུ་ཕུང་པོ་དང་། ཁམས་དང་། སྐྱེ་མཆེད་ཀྱི་འདུ་བྱེད་ལས་ཀྱང་སྟེ། ནང་དང་ཕྱིའི་མཉམ་པ་ཉིད་ཀྱང་མི་མཐོང་ཞིང་བྱས་པའི་རྒྱུ་དང་འཇིག་པའི་ཆོས་ཅན་གྱི་ཕྱིར་ཕུང་པོ་རྣམས་ལ་དེ་བཞིན་གཤེགས་པ་མེད་དེ། རྡུལ་ཕྲ་མོ་མེད་པ་
ཐུགས་སུ་ཆུད་པའི་ཕྱིར་ཤེས་རབ་དང་། ཡེ་ཤེས་དང་། ཏིང་ངེ་འཛིན་གྱི་སྤྱོད་ཡུལ་ཏེ། མཉམ་པར་བཞག་པའི་ཐུགས་ཀྱིས་ཡང་དག་པར་རྗེས་སུ་མ་གཟིགས་ཤིང་ཕུང་པོ་རྣམས་སྐྱེས་པའི་ཕྱིར་དེ་བཞིན་གཤེགས་པའི་ཆོས་ཀྱི་སྐུ་ཡིན་པས་ན་རྟག་པ་ཉིད་དོ་སྙམ་མོ། །ཀྱེ་

རྒྱལ་བའི་བུ་ཆོས་ཀྱི་དབྱིངས་ཀྱི་ཤིན་ཏུ་ཕྱེ་བ་ལ་མཁས་པ་དེ་དགེའོ། །ཀྱེ་རྒྱལ་བའི་བུ་དེ་བས་ན་དགེ་བར་ཤིན་ཏུ་ཉོན་ཏེ་ཡིད་ལ་གྱིས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་དགེའོ་ཞེས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་བཅོམ་ལྡན་
འདས་ལས་ཕྱིར་ཉན་ཏོ། །བཅོམ་ལྡན་འདས་ཀྱིས་དེ་ལ་བཀའ་སྩལ་པ། རིགས་ཀྱི་བུ་རྡོ་རྗེ་ལྟ་བུའི་སྙིང་པོ་ཏིང་ངེ་འཛིན་ལ་དབང་བ་རྡོ་རྗེའི་སྙིང་པོ་ཕུང་པོ་རྣམས་ནི་དེ་བཞིན་གཤེགས་པ་མ་ཡིན། ཕུང་པོ་ལས་གཞན་ན་ཡང་མེད་དེ། ཕུང་པོ་ལ་གནས་པ་ཡང་མ་ཡིན། ཕུང་པོ་
ཡང་གནས་མ་ཡིན། སྐྱེ་བ་དང་འཇིག་པ་ཡང་གནས་མ་ཡིན། ཤེས་པར་བྱ་བ་ཡང་མ་ཡིན། ཤེས་པ་ཡང་མ་ཡིན། དོན་ཀྱང་མ་ཡིན། དབང་པོ་རྣམས་ཀྱང་མ་ཡིན་ནོ། །དེ་ཅིའི་ཕྱིར་ཞེ་ན། ཕུང་པོ་དང་། ཁམས་དང་། སྐྱེ་མཆེད་དང་། ཡུལ་རྣམས་ནི་མནོ་བསམ་མེད་
པའི་ཕྱིར་ཏེ། དེ་བཞིན་གཤེགས་པ་ནི་འདི་རྣམས་ལས་ནང་ངམ་ཕྱིར་ཡང་མི་བལྟའོ། །གཟུགས་ནི་སྐྱེད་པ་མེད་ཅིང་སེམས་མེད་པ་སྟེ། འབྱུང་བ་མེད་པའི་ཆོས་ཅན། མཐར་འཇིག་པ། རྩྭ་དང་། ཤིང་དང་། བོང་རྡོ་དང་འདྲ་བ། ཤིན་ཏུ་ཕྲ་བའི་རྡུལ་གྱི་ཚོགས་དབུ་བ་དང་
འདྲ་བའོ། །ཚོར་བ་ནི་གཉིས་ཚོགས་པ་ལས་ཆུའི་ཆུ་བུར་དང་འདྲ་བར་སྐྱེའོ། །འདུ་ཤེས་ནི་བུམ་པ་དང་། སྣམ་བུ་དང་། ཅོད་པན་ལ་སོགས་པའི་རྒྱུ་ལས་བྱུང་བ་སྟེ། དེ་ཡང་གཉིས་ལས་སྐྱེས་པའི་སྨིག་རྒྱུ་དང་འདྲ་བ་སྟེ། དཔེར་ན་དཔྱིད་ཀྱིས་མངོན་པར་གདུངས་པའི་
ས་ལ་ཉི་མའི་འོད་ཟེར་བབ་པ་གྱེན་དུ་ལངས་པ་རྣམས་ཆུའི་རླབས་ལྟ་བུར་རླབ་ཅིང་རི་དགས་དང་བྱ་སྐོམ་གྱིས་ཉེན་ཅིང་ཆུ་ཚོལ་བ་རྣམས་ལ་ཆུར་རྨོངས་པར་བྱ་བས་རྨོངས་པར་བྱེད་དོ། །དེ་བཞིན་དུ་འདུ་ཤེས་ཀྱང་དེའི་བདག་ཉིད་མ་ཡིན་པ། དེའི་བདག་ཉིད་མ་ཡིན་པའི་གཟུགས་
སུ་འཇུག་པ། ཡང་དག་པ་མ་ཡིན་པར་ཡོངས་སུ་བརྟགས་པ་ལས་སྐྱེས་པ། དཔྱོད་པ་རྣམས་ཀྱིས་བརྗོད་པ་ལས་ལོགས་ཤིག་ཏུ་མི་དམིགས་པ། བོང་བུའི་རྭ་དང་། མོ་གཤམ་གྱི་བུ་བརྗོད་པ་ལྟར་མིང་ཙམ་དུ་ཟད་པ་སྟེ། རྨི་ལམ་གྱི་གཟུགས་བརྗོད་པ་ལྟར་བལྟའོ། །

དཔེར་ན་རྨི་ལམ་ན་གཟུགས་ཀྱི་འདུ་ཤེས་མཐོང་བས་སད་པའི་ཚེ་གཟུགས་ལ་སོགས་པ་དང་། བུད་མེད་བཟང་མོ་ཡང་དམིགས་སུ་མེད་དོ། །དེ་བཞིན་དུ་མི་ཤེས་པས་ལོག་པ་ན་བུད་མེད་དང་སྐྱེས་པ་ལ་སོགས་པ་མཐོང་བ་ཡང་མངོན་པར་སངས་རྒྱས་ན་མི་དམིགས་
སོ། །འདུ་བྱེད་རྣམས་ནི་ཆུ་ཤིང་གི་སྙིང་པོ་ལྟ་བུ་སྟེ་བཙལ་ན། ལུས་དང་ངག་དང་ཡིད་ལས་བྱུང་བ་གཟུགས་མེད་པ་རྣམས་རྣལ་འབྱོར་ཅན་གྱི་དཔྱོད་པ་པ་རྣམས་ཀྱིས་མི་རྙེད་དོ། །རྣམ་པར་ཤེས་པ་ནི་སྒྱུ་མ་ལྟ་བུ་དེའི་བདག་ཉིད་མེད་པ་སྟེ། སྒྱུ་མ་བྱེད་པའམ། དེའི་སློབ་མས་ནན་
ཏན་དུ་རྩྭ་དང་ཤིང་དང་བོང་རྡོ་ཙམ་ལ་བརྟེན་ཏེ་གཟུགས་ཀྱི་ཡན་ལག་དུ་མ་ལས་མངོན་པར་བསྒྲུབས་པའི་སྒྱུ་མའི་གཟུགས་གླང་པོ་དང་། རྟ་དང་། ཤིང་རྟ་དང་། མི་དང་། རྒྱན་མ་བཏགས་པའི་གཟུགས་ཀྱི་ཕྱོགས་གཅིག་ངོ་མཚར་དུ་བསྟན་པ་ལྟ་བུ་དང་། གཞན་ཡང་མཁས་པ་རྣམས་
ལ་མ་ཡིན་གྱི་བུས་པའི་འགྲོ་བ་རྣམས་ལ་འདྲིད་པ་དེ་བཞིན་དུ་རྣམ་པར་ཤེས་པ་ཡང་རྣམ་པ་གཞན་དུ་འདུག་ལ། རྣམ་པ་གཞན་དུ་ཤིན་ཏུ་བརྟགས་ཤིང་ཤིན་ཏུ་རྟོག་སྟེ་དེ་ཡང་བདག་ཉིད་ཀྱིས་བདག་ལ་འཛིན་པ་གཉིས་སུ་ཤེས་ནས། སྒྱུ་མས་མངོན་པར་གྲུབ་པའི་གཟུགས་གཅིག་
པོའི་ངོ་མཚར་དང་འདྲ་བར་ཕྱིར་ལྡོག་གོ། །དེ་བཞིན་གཤེགས་པ་ནི་རྟག་པ་བརྟན་པ་ཐེར་ཟུག་མི་འཇིག་པ་སྟེ། སངས་རྒྱས་རྗེས་སུ་དྲན་པ་སྒོམ་པའི་རྣལ་འབྱོར་ཅན་རྣམས་ཀྱི་ཡུལ་ཡིན་ཏེ། དེ་བཞིན་གཤེགས་པའི་སྙིང་པོ་ཞེས་བསྒྲགས་པ་མྱ་ངན་ལས་འདས་པའི་དབྱིངས་
དང་། ནམ་མཁའ་ལྟ་བུར་མི་འཇིག་པ་སྟེ། མྱ་ངན་ལས་འདས་པའི་སྒྲ་ཆོས་ཀྱི་དབྱིངས་ཀྱི་ཚིག་གིས་འདས་པ་དང་། བྱུང་བ་དང་། འབྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་བསྟན་ཏེ། འདི་ལྟར་དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་
རུང་། ཆོས་རྣམས་ཀྱི་ཆོས་ཉིད་ཆོས་ཀྱི་གནས་ཉིད་དང་། ཆོས་ཀྱི་དབྱིངས་དང་། ཆོས་སྐྱོན་མེད་པ་གཉིས་པོ་འདི་ནི་དེ་བཞིན་གནས་པའོ། །རྡོ་རྗེའི་སྙིང་པོ་སྐྱོན་མེད་པ་ཞེས་བྱ་བ་ནི་ཡང་འབྱུང་བའི་ཉེས་པ་ཐམས་ཅད་དང་བྲལ་བའོ། །རྡོ་རྗེའི་སྙིང་པོ་སྐྱོན་མེད་པ་ནི་ཉེས་པ་

ཐམས་ཅད་དང་བྲལ་བར་མ་ཟད་ཀྱི་ཏིང་ངེ་འཛིན་ལ་ཡང་འཇུག་གོ། །སྐྱོན་མེད་པར་འདའ་བ་ནི་བྱང་ཆུབ་སེམས་དཔས་སྤང་བར་བྱ་སྟེ། དེ་ཅིའི་ཕྱིར་ཞེ་ན། འདི་ལྟར་ཏིང་ངེ་འཛིན་གྱི་སྒོ་དེ་ཉིད་དུ་མོས་ཏེ། སེམས་ཅན་ལ་ལྟ་བ་མེད་པར་གྱུར་ཅིང་ཡང་དག་པའི་མཐའ་མངོན་དུ་བྱས་
ནས་ལྕགས་བསྲེགས་པའི་མེ་དང་འདྲ་བར་མྱ་ངན་ལས་འདའ་བར་གྱུར་ཏེ། དེ་སེམས་ཅན་གྱི་དགོས་པ་ལ་བརྩོན་འགྲུས་བཏང་ཞིང་སྙིང་རྗེ་ཆེན་པོ་དང་། ཕ་རོལ་ཏུ་ཕྱིན་པ་རྣམས་དང་བྲལ་བས་སངས་རྒྱས་ཀྱི་གདུང་རྣམ་པར་ཆད་པར་བྱེད་ཅིང་ཉན་ཐོས་དང་རང་སངས་རྒྱས་མུར་
འདུག་བྱེད་པའི་ལམ་དུ་འགྲོ་སྟེ། ཏིང་ངེ་འཛིན་གྱི་འདམ་དུ་གླང་པོ་ཆེ་ཆེན་པོ་འདྲ་བར་རྣམ་པར་ཐོགས་ཏེ། རྣམ་པར་ཤེས་པའི་ཡུལ་རབ་ཏུ་ཞུམ་པས་སངས་རྒྱས་ཀྱི་ཆོས་ཀྱི་སྐྱེ་མཆེད་ཐམས་ཅད་ཀྱིས་ཀུན་ནས་མི་གནས་ཤིང་རྫོགས་པར་མི་བྱེད་པར་འགྱུར་བའི་ཕྱིར་མངོན་
དུ་མི་བྱ་ཞིང་། མ་རེག་པ་དང་། ཉེ་བར་མི་བསྒྲུབ་པར་གནས་པར་བྱའོ། །དེ་ལྟར་སངས་རྒྱས་ཀྱི་ཆོས་ཀྱི་སྐུའི་རྗེས་སུ་ཞུགས་ཏེ་སངས་རྒྱས་ཀྱི་ཆེ་བ་ཉིད་ཤེས་པས་ཆོས་ཀྱི་འཁོར་ལོ་བསྐོར་བའི་སངས་རྒྱས་རྣམ་པ་སྣ་ཚོགས་ཀྱི་ཚུལ་གྱི་ཡུལ་ལ་ཉེ་བར་སྤྱོད་པ། སྤྲུལ་
པའི་ཡུལ་ཅན། དེ་བཞིན་གཤེགས་པ་རྣམས་ཀྱིས་ཏིང་ངེ་འཛིན་ལས་བསླང་བའི་སྦྱོར་བ། ས་བརྒྱད་པ་ལས་འདས་པ། ཆོས་ཀྱི་སྤྲིན་གྱི་ས་ལ་ཤེས་པར་རབ་ཏུ་བྱས་པ། སངས་རྒྱས་ཀྱི་ཆེ་བ་ཉིད་མྱོང་ནས་དེ་བཞིན་གཤེགས་པ་བདག་གི་སོ་སོ་རང་གིས་རིག་པ་
འཕགས་པའི་ཡེ་ཤེས་ཀྱིས་རྟོགས་པའི་སྤྱོད་ཡུལ་གྱི་སར་ཞུགས་ཏེ་ཐམས་ཅད་དུ་འགྲོ་བ་མ་གཡོས་པའི་ཏིང་ངེ་འཛིན་སྤྱོད་པ། ལྷུན་གྱིས་གྲུབ་པ། རྟག་པ། ཐེར་ཟུག་པ། བརྟན་པ་སངས་རྒྱས་ཀྱི་ཞིང་སྟུག་པོ་ན་གནས་པར་འགྱུར་ཏེ། རྡོ་རྗེའི་དབང་པོ་ས་ལ་དབང་
བ་རྣམས་ལ་འཕྲུལ་པའི་འཇུག་པ་སྟོན་པར་འགྱུར་ཏེ། གནས་གྱུར་པ། ཡིད་བཞིན་གྱི་ཡེ་ཤེས་དང་ཏིང་ངེ་འཛིན་ཅན། སྟོབས་དང་། མངོན་པར་ཤེས་པ་དང་། རྫུ་འཕྲུལ་གྱི་རྐང་པ་དང་། དབང་ལ་སྤྱོད་པ། ངང་པའི་རྒྱལ་པོ་དང་འདྲ་བར་མ་ཞུགས་པའི་ཆུའི་ཟླ་བ་ལྟ་

བུར་འགྲོ་སྟེ། བལྟ་བའི་དོན་ཡོད་པ། མིའི་བདག་པོ་ཐམས་ཅད་ཀྱི་ཚོགས་ཀྱི་འཁོར་དུ་སེམས་ཅན་རྣམས་ཀྱི་བསམ་པ་ཇི་ལྟ་བུར་འདོད་པའི་གཟུགས་དག་གིས་སངས་རྒྱས་ཀྱི་ཞིང་སྟུག་པོ་བསྟན་པའི་ཕྱིར་སེམས་ཅན་གྱི་བསམ་པ་བཞིན་དུ་འཇུག་པར་
འགྱུར་རོ། །འདོད་པའི་ཁམས་ཀྱི་དབང་པོ་ཐམས་ཅད་དང་། དབང་སྒྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནོར་བུ་རིན་པོ་ཆེའི་སྙིང་པོ་ལ་སོགས་པའི་གནས་དག་ཏུ་བདེ་བ་རྣམས་མྱང་བར་བྱས་ཏེ་སའི་རིམ་པ་རྣམས་བསྟན་ནས་ཞིང་ནས་ཞིང་དུ་ཕུན་སུམ་བདེ་བ་
རྣམས་རབ་ཏུ་སྟོན་ཅིང་ཕྱི་མའི་མཐར་ཐུག་པར་བསྐུ་བ་གྲུབ་པའི་སྔགས་འཆང་ལྟར་མི་སྣང་ཞིང་ཁང་ཁྱིམ་གྱི་ལྷ་ལྟར་དེ་ན་གནས་བཞིན་དུ་མི་སྣང་བའི་གཟུགས་སུ་ཁྱིམ་ན་འདུག་པ་ལྟར་དེ་དག་སྤྲུལ་པའི་འོད་ཟེར་དང་། འཕྲུལ་པས་སྤྲུལ་པ་ལ་སྤྱོད་ཅིང་འགྲོའོ། །སོང་ནས་
ཀྱང་དེ་བཞིན་གཤེགས་པའི་སྤྲུལ་པའི་སྐུ་ནུབ་སྟེ། དེ་བཞིན་གཤེགས་པའི་སྐུ་ལ་ཞེན་ནས་གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དབང་པོ་ཕུང་པོ་སྤྲུལ་ཡིན་ཏེ། །སྲིད་དང་མ་རིག་ལས་ཀྱང་ཡིན། །བག་
ཆགས་ཀྱིས་བཅིངས་མི་བཟད་པ། །ཡུལ་དང་དབང་པོའི་རྒྱུ་ལས་བྱུང་། །རྣམ་དཔྱོད་ཚོགས་ནི་འདོད་ཆགས་རྣམས། །ཞགས་པ་སེམས་སྤྱོད་དེ་ཡིན་ནོ། །ཁྲོ་བ་མེ་ལྕེ་མཉམ་པ་སྟེ། །ཞེ་སྡང་དུག་གི་དངོས་པོ་ཡིན། །ཐུབ་སྤྱོད་རྣལ་འབྱོར་བཟང་ཅན་གྱིས། །འདི་དག་རྟག་
ཏུ་རྣམ་གཞིགས་ཏེ། །ཕུང་པོ་རྣམས་ནི་དོར་བའི་ཕྱིར། །རྣལ་འབྱོར་ཅན་གྱིས་རྣལ་འབྱོར་སྤྱོད། །གཟུགས་ནི་འབྱུང་བའི་ཚོགས་ཡིན་ཏེ། །ཕུང་པོ་ལྷག་མ་གཟུགས་མེད་པ། །ཇི་བཞིན་བར་སྣང་རི་མོ་དང་། །གྲིབ་ལ་སྡོང་དུམ་ལ་སོགས་མེད། །མཁའ་ལ་རླུང་གཟུགས་
མི་སྣང་དང་། །བྱ་ཡི་རྗེས་རྣམས་ཇི་བཞིན་ནི། །མཁས་པས་སོ་སོ་རང་རིག་པ། །ཡང་དག་ཉིད་དང་ཡང་དག་མཐའ། །ཚིག་གི་སྤྱོད་ཡུལ་འདས་པ་ནི། །སངས་རྒྱས་དངོས་པོ་མི་སྣང་སྟེ། །སངས་རྒྱས་སྒྲས་ནི་མྱ་ངན་འདས། །མྱ་ངན་འདས་ཀྱང་སངས་རྒྱས་ཏེ། །རྣམ་

རྟོག་རྟོག་དང་བྲལ་བས་ན། །དེ་ནི་བསྟན་དུ་མི་ནུས་པའོ། །རྒྱུ་དང་འབྲས་བུ་མེད་པ་སྟེ། །ཡོད་དང་མེད་ཀྱིས་རྣམ་པར་སྤངས། །རྡོ་བ་ཕྱེ་མར་བཏགས་པ་ལ། །གསེར་ནི་ཡོད་པར་མི་སྣང་སྟེ། །སྦྱང་བའི་ལས་ཀྱི་ཁྱད་པར་གྱིས། །གསེར་ནི་སྣང་བར་འགྱུར་བ་
ཡིན། །གཟུགས་རྣམས་རྡུལ་དུ་རྣམ་གཞིགས་ཏེ། །མཁས་པས་ཕུང་པོ་ལྷག་མ་དང་། །ཁམས་དང་སྐྱེ་མཆེད་ཚོགས་རྣམས་དང་། །རྣམ་པར་ཤེས་དང་དབང་པོ་དག །གཅིག་དང་ཐ་དད་དངོས་པོ་ཡང་། །རྡུལ་ཕྲན་རྣམ་པར་རབ་སྦྱངས་ན། །དངོས་པོར་སངས་རྒྱས་ཡོད་
པ་མིན། །སངས་རྒྱས་མེད་པའང་མ་ཡིན་ཏེ། །རྣལ་འབྱོར་ཅན་རྣམས་སངས་རྒྱས་མཐོང་། །མཚན་རབ་སུམ་ཅུ་རྩ་གཉིས་ཅན། །གང་ན་སྡུག་བསྔལ་དེ་ན་བདེ། །དེ་ཉིད་ལ་ནི་སྣང་བ་ཡིན། །སངས་རྒྱས་མེད་ཅེས་མི་བྱ་སྟེ། །སངས་རྒྱས་མཉམ་པར་བཞག་པ་
ཡོད། །རྒྱུ་ཡི་སངས་རྒྱས་དགེ་བ་ཅན། །རྩ་བ་མཁས་པ་ཉིད་ཀྱང་སྟེ། །འཇིག་རྟེན་ཀུན་གྱི་རྒྱལ་བ་དང་། །ཡང་དག་རྫོགས་པའི་སངས་རྒྱས་དང་། །འདི་དག་སངས་རྒྱས་ལྔར་གསུངས་སོ། །སྤྲུལ་པའི་རྒྱལ་བ་ལྷག་མ་རྣམས། །དེ་བཞིན་གཤེགས་པའི་སྙིང་
པོ་ཡོད། །མཚན་རབ་སུམ་ཅུ་རྩ་གཉིས་ཅན། །དེ་བས་སངས་རྒྱས་ཡོད་པ་སྟེ། །རྣལ་འབྱོར་ཅན་གྱི་ཐུབ་པས་མཐོང་། །ཁམས་རྣམས་གསུམ་པོ་འདས་པ་དང་། །རྣམ་པ་དུ་མར་སངས་རྒྱས་ཞིང་། །དེ་བཞིན་གཤེགས་ཀྱི་ལྷ་རྫས་ཞིང་། །རྒྱལ་སྲས་བཟང་པོས་
ཀུན་ཏུ་གང་། །དེ་ན་ཐུབ་ཆེན་སངས་རྒྱས་བཞུགས། །མཚན་གྱིས་ཀུན་ནས་ཡོངས་སུ་རྒྱས། །རྣལ་འབྱོར་རྣལ་ལ་མཉམ་པར་བཞག །ཆོས་དང་བཅས་སུ་རྣམ་པར་མཛེས། །དེ་བཞིན་ཕན་ཚུན་བསམ་གཏན་མཛད། །ཤེས་རབ་མ་ཤེས་ཤེས་བྱེད་ལ། །སྟུག་པོ་དེ་ན་
རྣམ་པར་སྤྱོད། །སྟུག་པོ་དེ་ཡི་སེམས་ཅན་སུ། །སངས་རྒྱས་གཟུགས་ཅན་དེ་དག་ཀུན། །སྐད་ཅིག་འཇིག་པར་ཤིན་ཏུ་འདས། །ཏིང་ངེ་འཛིན་ལ་རྟག་ཏུ་མོས། །དགའ་ལྡན་ནས་བབས་འཕྲུལ་པ་གང་། །རྟོག་པ་ཅན་རྣམས་ཀུན་གྱིས་མཐོང་། །སྟུག་པོ་ནས་གཤེགས་

གླང་པོ་སྟེ། །སངས་རྒྱས་གཟུགས་ནི་སྟུག་ན་བཞུགས། །སྣ་ཚོགས་རྣམ་མང་གཟུགས་ཚུལ་ཏེ། །སེམས་ཅན་བསམ་བཞིན་ཞུགས་པ་ཡིས། །དེ་བཞིན་གཤེགས་པ་མཉམ་གཞག་པ། །ཆུ་ཡི་ཟླ་བ་བཞིན་དུ་སྣང་། །སྣ་ཚོགས་གཟུགས་
ཀྱི་ནོར་བུ་ནི། །ཚོན་གྱི་འབྱོར་ལས་རྣམ་པར་མཛེས། །དེ་བཞིན་སངས་རྒྱས་སྟུག་ཞིང་ན། །མཉམ་པར་བཞག་པས་རྣམ་པར་མཛེས། །ཐམས་ཅད་ཆོས་ལ་གཟུགས་བརྙན་ལྟར། །གཅིག་དང་ཐ་དད་སྤངས་པར་ཏེ། །དགོས་པ་ཀུན་ལ་འཇུག་པ་ནི། །སྐྱེས་བུ་དམ་
པ་ཐམས་ཅད་མཁྱེན། །རྡུལ་ལས་མ་ཡིན་དུས་ལས་མིན། །དབང་པོ་ལས་མིན་གཅེས་ལས་མིན། །རྐྱེན་གྱིས་མ་ཡིན་འཇིག་རྟེན་དང་། །སངས་རྒྱས་ལྡན་པར་རྣམ་མཛེས་པ། །རྒྱུ་ཡི་ཚུལ་དུ་སངས་རྒྱས་ནི། །འབྲས་བུ་རྣམས་ལ་རྣམ་པར་མཛེས། །འཇིག་
རྟེན་སྐུ་ལ་འཁོད་བྱ་སྟེ། །རྒྱ་མཚོ་རི་དང་ཤིང་དག་དང་། །དེ་ལ་འགྲོ་བ་སྣ་ཚོགས་བཅས། །མཉམ་པར་བཞག་པས་ཤིན་ཏུ་དགྱེས། །བྱ་བ་ཐམས་ཅད་ཕྱི་ནང་དུ། །གཟའ་ཟླ་ལ་སོགས་མཛེས་པའི་རྣམས། །ཕྱིར་ཡང་ཕྱག་གི་མཐིལ་བཀོད་དེ། །ཡུངས་འབྲུར་
འགྲོ་བ་ཀུན་འཛུད་པ། །སངས་རྒྱས་ཐུབ་པའི་རྣལ་འབྱོར་མངའ། །ཐུབ་ཆེན་ཐུབ་པའི་དམ་པའོ། །འཇིག་རྟེན་རྣམས་ལ་བྱེད་པ་མེད། །སངས་རྒྱས་འཕྲུལ་གྱིས་སྤྲུལ་པ་སྟེ། །འབྱུང་བ་གསུམ་པོ་འདི་དག་ཀུན། །སངས་རྒྱས་འོད་ཀྱིས་རྣམ་པར་སྤྲུལ། །རབ་
རིབ་མི་ཤེས་མྱོས་མདོངས་པའི། །རྟོག་པ་ཅན་རྣམས་འཕྱན་པ་ཡིན། །བདག་དང་བདག་མེད་ལྟ་བའི་རྣམས། །ཡོད་དང་མེད་པའི་སྨྲ་བས་བཅོམ། །འོན་ཏམ་ཐམས་ཅད་འཇིག་པ་དང་། །ཅུང་ཟད་འཇིག་པས་སྨྲ་བ་རྣམས། །འདི་ལ་མེད་དམ་ཅུང་ཟད་
དམ། །བདག་དང་བདག་མེད་ག་ལ་ཡོད། །སངས་རྒྱས་སྣ་ཚོགས་འབྱུང་ཀུན་ན། །རྣལ་འབྱོར་མཁན་པོ་རྣམ་པར་མཛེས། །དྲི་ཟའི་གྲོང་ལ་བྱ་བ་རྣམས། །ཇི་ལྟར་སྣང་བ་འཇིག་རྟེན་ན། །རྨི་ལམ་རྣམ་པ་སྣ་ཚོགས་གཟུགས། །རི་དགས་རྣམས་ལ་སྨིག་རྒྱུ་

བཞིན། །དེ་བཞིན་འཇིག་རྟེན་སྣ་ཚོགས་དག །གདེག་ལ་སོགས་པའི་ལས་རྣམས་ཀྱང་། །རླུང་ལྡན་སོགས་པའི་ཐག་པ་བཞིན། །སངས་རྒྱས་རྣལ་འབྱོར་མཁྱེན་པའི་མཆོག །མི་ལ་འཁྲུལ་འཁོར་སྐོར་བ་སྟེ། །རྒྱ་མཚོའི་སྐྱ་བ་འཛིན་པ་འདྲ། །སྟུག་
པོའི་རིས་ཀྱི་ཡེ་ཤེས་ཀྱི་རྒྱན་ལས་བྱུང་ཞེས་བྱ་བའི་ལེའུ་སྟེ་དང་པོའོ།། །།དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་
ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ན་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མཚམས་མེད་པ་ལྔ་བགྱིས་པ་རྣམས་དང་། དམ་པའི་
ཆོས་སྤོང་བ་རྣམས་དང་། འཕགས་པ་སྤོང་བ་རྣམས་དང་། མནར་མེད་པ་ལ་གཞོལ་བ་རྣམས་དང་། མ་དང་ཕ་ལ་སྙིང་རིང་བ་རྣམས་དང་། ཚངས་པ་འགུམས་པ་རྣམས་དང་། བ་ལང་དང་། དགུམ་པ་འགུམས་པའི་སེམས་ཅན་རྣམས་ཇི་ལྟར་ཡོངས་སུ་འགྲོལ་བར་
འགྱུར། བཅོམ་ལྡན་འདས་སེམས་ཅན་དེ་དག་འཁོར་བའི་སྡུག་བསྔལ་ལ་ཇི་ལྟར་ཡོངས་སུ་འགྲོལ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སྦྱིན་པ་གཉིས་བྱིན་པའི་སེམས་ཅན་རྣམས་འཁོར་བའི་སྡུག་བསྔལ་ལས་ཡོངས་སུ་
འགྲོལ་བར་འགྱུར་ཏེ། དེ་འདི་ལྟར་ཆོས་ཀྱི་སྦྱིན་པ་དང་། ཟང་ཟིང་གི་སྦྱིན་པའོ། །ཆོས་ཀྱི་སྦྱིན་པས་ནི་སྐྱེ་བ་དྲན་པར་འགྱུར་རོ། །ཟང་ཟིང་གི་སྦྱིན་པས་ནི་སེམས་ཅན་ཐམས་ཅད་ལ་ཕན་བཏགས་པར་འགྱུར་རོ། །ཟང་ཟིང་གི་སྦྱིན་པས་ནི་བཀྲེས་པ་དང་། སྐོམ་པའི་
སྡུག་བསྔལ་ཡོངས་སུ་སྦྱོང་ངོ་། །ཆོས་ཀྱི་སྦྱིན་པས་ནི་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་གྱི་འཁོར་བའི་སྡུག་བསྔལ་ལས་ཡོངས་སུ་འགྲོལ་ཏོ། །འཇམ་དཔལ་སྦྱིན་པ་གཉིས་པོ་འདི་བྱིན་ན་སྦྱིན་པ་ཐམས་ཅད་

འདུས་པར་འགྱུར་རོ། །འཇམ་དཔལ་གཞན་ཡང་སྦྱིན་པ་ལྔས་སྦྱིན་པ་དང་ཉེ་བའི་སྦྱིན་པ་ཐམས་ཅད་འདུས་པར་འགྱུར་ཏེ། ལྔ་གང་ཞེ་ན་འདི་ལྟ་སྟེ། བཞོན་པ་སྦྱིན་པ་དང་། གདུགས་སྦྱིན་པ་དང་། དར་སྦྱིན་པ་དང་། གོས་སྦྱིན་པ་དང་། ཆོས་གོས་
དང་། བསོད་སྙོམས་དང་། མལ་ཆ་དང་། སྟན་དང་། ནད་ཀྱི་རྐྱེན་སྨན་དང་། ཡོ་བྱད་སྦྱིན་པ་རྣམས་ཀྱིས་སྡུག་བསྔལ་ཐམས་ཅད་ཡོངས་སུ་སྦྱངས་པར་འགྱུར་རོ། །འཇམ་དཔལ་ཡང་སེམས་ཅན་ལ་ལ་མཚམས་མེད་པ་ལྔ་བྱེད་པ་དག་གམ། དམ་པའི་ཆོས་སྤོང་
བ་དག་གམ། འཕགས་པ་སྤོང་བ་དག་གམ། མནར་མེད་པ་ལ་གཞོལ་བ་དག་གམ། བསྐལ་པར་གནས་པ་དག་གམ། སེམས་ཅན་གང་ལ་ལ་དཀོན་མཆོག་གསུམ་ལ་སྙིང་རིང་བའམ། སངས་རྒྱས་དང་ཆོས་དང་དགེ་འདུན་ལ་གནོད་པ་བྱེད་པའམ།
ཚོགས་ཀྱི་ནོར་ལ་འཕྲོག་པ་དག་གམ། ཆུང་ངུ་ན་ལུག་གསོད་པ་དག་ཀྱང་རུང་། ཕྱག་དར་བ་ཡང་རུང་། སྨེ་ཤ་ཅན་ཡང་རུང་སྟེ། འཇམ་དཔལ་སུས་ཤིན་ཏུ་རྒྱས་པ་ཆེན་པོ་རྨད་དུ་བྱུང་བའི་ཆོས་སྟུག་པོའི་རྒྱན་རིན་པོ་ཆེ་འདི་ཐོས་པ་དང་། འདྲི་བ་དང་།
འདྲིར་འཇུག་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་ལའང་རྒྱ་ཆེར་ཡང་དག་པར་སྟོན་པ་དང་། ཆུང་ངུ་ན་ཡི་གེ་གཅིག་ཀྱང་རུང་སྟེ་རྗོད་པ་དང་། སུ་འང་ཆོས་དེ་སྨྲ་བ་ལ་མཆོད་ཅིང་རིམ་གྲོ་བྱེད་པ་དང་། ནང་པར་ལངས་ནས་
ངོ་ཕྲད་པར་བྱེད་ཅིང་ལྟ་བ་དང་སྔར་སྨྲ་བ་སྦྱིན་པར་བྱེད་པ་དང་། ལག་པས་རེག་པར་བྱེད་པའི་སེམས་ཅན་དེ་དག་ཐམས་ཅད་འཇམ་དཔལ་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ལས་ཡོངས་
སུ་འགྲོལ་བར་འགྱུར་རོ། །འཇམ་དཔལ་སའི་ཕྱོགས་གང་ན་ཆོས་སྨྲ་བ་འདུག་གམ། དེའི་དུར་རམ། རོའམ། རོ་བམ་པ་ཞིག་ཡོད་ལ། དེའི་ངོ་མཐོང་ན་ཡང་མཚམས་མེད་པའི་ལས་ལྔ་རྣམས་བྱང་བར་འགྱུར་རོ། །འཇམ་དཔལ་རྒྱ་མཚོ་ཆེན་པོའི་ནང་ན་ཡི་

དགས་ལྟོ་དཔག་ཚད་བརྒྱ་སྟོང་དུ་མར་སྐྱེས་པ་ཡོད་དེ། ཡི་དགས་དེ་བདག་གི་ལས་ཀྱི་སྡུག་བསྔལ་མི་བཟད་པའི་ཚོར་བ་ཡོད་དོ། །འཇམ་དཔལ་དེ་བཞིན་དུ་སེམས་ཅན་སུ་མདོ་སྡེ་ཆེན་པོ་རིན་པོ་ཆེ་འདི་སྤོང་བ་དེ་དག་ཀྱང་སྡུག་བསྔལ་མྱོང་བར་འགྱུར་རོ། །འཇམ་
དཔལ་སུས་མདོ་སྡེ་རིན་པོ་ཆེ་འདི་རིམ་གྲོར་བྱས་ཏེ། མེ་ཏོག་དང་། བདུག་སྤོས་དང་། མར་མེ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། ལྷའི་བ་དན་གྱིས་མཆོད་པ་དང་། ཆོས་སྨྲ་
བ་དེ་ཡང་མཆོད་པར་བྱ་སྟེ། ཇི་སྟེ་ཆོས་སྨྲ་བ་དེ་མཚམས་མེད་པ་ལྔ་བྱེད་ན་ཡང་འོན་ཀྱང་དེའི་སེམས་འཁྲུགས་པར་མི་བྱའོ། །ཆུང་དུ་ན་བྱོལ་སོང་གི་སྐྱེ་གནས་སུ་གཏོགས་པའི་རི་དགས་དང་། བྱ་གང་ལ་ལས་ཆོས་སྨྲ་བ་དེ་ཤི་བའི་རོ་བམ་པ་དུར་ཁྲོད་ན་འདུག་
པའི་ཤ་ཟོས་ཀྱང་དེ་དག་ཐམས་ཅད་ཕྱིར་མི་ལྡོག་པར་འགྱུར་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་འཐོབ་པར་འགྱུར་རོ། །རི་དགས་དང་བྱ་གཞན་པོ་དེ་དག་ཐམས་ཅད་སངས་རྒྱས་ཀྱི་ཞིང་སྟུག་པོ་འདི་ཉིད་དུ་འཐོབ་པར་འགྱུར་ཏེ། དེ་ལ་ནེམ་ནུར་དང་།
ཐེ་ཙོམ་དང་ཡིད་གཉིས་མི་བྱའོ། །སེམས་ཅན་གང་ལ་ལ་སྔོན་དགེ་བའི་རྩ་བ་བསྐྱེད་པ། སྔོན་བྱང་ཆུབ་སེམས་དཔས་ཡོངས་སུ་བཟུང་བ། སྔོན་གྱི་བྱང་ཆུབ་སེམས་དཔའི་ས་བོན་ལས་ཡོངས་སུ་མཉམས་པ་དེ་དག་ཐམས་ཅད་ཕྱི་མའི་ཚེ་ཕྱི་མའི་དུས་ན་མདོ་སྡེ་
རིན་པོ་ཆེ་འདི་ཐོས་པར་འགྱུར་རོ། །ཐོས་ནས་ཀྱང་མཆོད་པ་ཆེན་པོས་མཆོད་པར་འགྱུར་རོ། །མདོ་སྡེ་ཐམས་ཅད་འདུས་པའི་རྒྱན་སྟུག་པོ་རིན་པོ་ཆེ་ལས་སྦྱིན་པའི་ལེའུ་སྟེ་གཉིས་པའོ།། །།མཐའ་ཡས་ཡུལ་ཅན་ཤིན་ཏུ་ཕྲ། །བསམ་
གཏན་མཁྱེན་པ་སྐྱེས་བུའི་མཆོག །དབང་པོ་འདས་པ་མངོན་སུམ་པ། །ཆགས་དང་དབང་པོ་རྣམ་པར་སྤངས། །བསམ་གཏན་བསམ་པ་བསམ་གཏན་པའི། །དེ་ནི་དགོས་པའི་ཚུལ་ཡིན་ཏེ། །ཐུབ་པ་རྣལ་འབྱོར་མཁས་པའི་རྣམས། །ཀུན་གྱི་སྙིང་ལ་

གནས་པ་ཡིན། །ཡོད་དང་མེད་ཀྱི་ཕྱོགས་དང་བྲལ། །སངས་རྒྱས་ཕྱོགས་ནི་དྲི་མ་མེད། །བློ་དང་ཤེས་བྱ་བྲལ་བ་སྟེ། །ཚད་དང་དབང་པོ་སྤངས་པ་ཡིན། །སེམས་ཤེས་རྣམས་ཀྱི་ཡུལ་མ་ཡིན། །དེ་ནི་གྲོལ་བ་རྣམས་ཀྱི་ཡུལ། །མཚན་
རྣམས་ཀུན་ཀྱང་སྣང་བ་སྟེ། །དེ་བཞིན་གཤེགས་ནི་མཚན་མེད་པའང་། །དྲེགས་ཅན་རྣམས་ཀྱི་དྲེགས་མེད་མཛད། །མཉམ་པར་བཞག་ཅིང་གོས་པ་མེད། །གཡོ་བ་མ་ཡིན་གཡོ་མེད་མིན། །ཆགས་མེད་ལམ་ལ་གནས་པ་སྟེ། །ལྷ་ཡུལ་བྱུང་བའི་ལྷ་རྣམས་
དང་། །དྲི་ཟ་ལྷ་མིན་མིའམ་ཅི། །ཐུབ་པ་རྣམས་དང་མུར་འདུག་གིས། །བསྟོད་ཀྱང་རྟག་ཏུ་ཡོང་མི་གཡོ། །དེ་ལ་ངོ་མཚར་སྲེད་པ་མེད། །འགྲོ་བ་གང་ནའང་གཡོ་བ་མེད། །སྔོན་ནས་དག་པའི་རྣལ་འབྱོར་གྱི། །དེ་ནི་ཕ་རོལ་ཡིན་པའི་ཕྱིར། །སངས་རྒྱས་འཕྲུལ་པའི་
སྤྱོད་པ་ཡིས། །བྱ་བ་ཙམ་དུ་ལྷ་རྣམས་ཀྱིས། །མཐོང་ཡང་དེ་དང་འདི་ན་མེད། །ཇི་བཞིན་ཉི་ཟླ་དེ་དང་འདྲ། །རྣལ་འབྱོར་ཡུལ་དུ་གནས་པ་ནི། །དྲེགས་པ་མེད་མཛད་འགྲོ་བས་མཐོང་། །རྣམ་པར་ཐ་དད་མུར་འདུག་རྣམས། །གང་ལ་གང་གིས་དབང་གྱུར་པ། །
དེ་ལ་དེ་ལྟའི་ཆོས་སྟོན་ཏེ། །རྣལ་འབྱོར་བསྐྱེད་པའི་འོད་ཟེར་གྱིས། །རྣལ་འབྱོར་ཆོས་ཅན་རྣམ་ཕྱེ་ཞིང་། །རྒྱལ་བའི་ཚུལ་དང་གསུམ་པོ་དག །རྒྱལ་པོའམ་རྒྱལ་པོའི་འཁོར་རྣམས་དང་། །རྒྱལ་པོའི་ཡུལ་གྱི་བྱ་བ་དང་། །དཀའ་ཐུབ་ཚལ་དང་ཞིང་རྣམས་ཀྱི། །ཕུན་
སུམ་ཚོགས་པ་དེ་ལས་བྱུང་། །ལྷ་རྫས་རྣམས་དང་ནམ་མཁའ་དང་། །རིན་ཆེན་འབྱུང་ཁུངས་རྣམ་དག་པ། །ལྷ་ཡི་ལྷ་ཡི་མཐུ་ཡིས་ན། །ཕྱོགས་དང་ཡུལ་ན་འབར་བ་ཡིན། །འབྱུང་བ་གསུམ་གྱི་ཐབས་རྣམས་གང་། །རྣམ་པ་སྣ་ཚོགས་མཁས་རྣམས་
ཀྱིས། །གང་རྣམས་བྱེད་གཞུག་བྱ་བ་དག །སངས་རྒྱས་ལྷུན་གྱིས་གྲུབ་འབྲས་བུ། །དེ་ནི་མདོ་འཛིན་འགྲོ་བ་ཡི། །དགོས་དང་དཀའ་ཐུབ་ཅན་རིག་དང་། །གད་མོ་རྩེ་བའི་སྦྱོར་བ་དང་། གར་མཁན་རྣམས་ལ་རྟག་ཏུའོ། །དགའ་ལྡན་གནས་བབས་འཇིག་

རྟེན་གྱིས། །མཐོང་བ་བུད་མེད་འགྲོ་དང་བཅས། །འཕྲོག་ཅིང་སྦྱིན་དང་འབྲེལ་པ་དང་། །ཅོད་པན་ཅན་དང་ལག་ན་གཞུར། །དམ་པ་རྣམས་ཀྱིས་ཀུན་དུ་མཐོང་། །སྟུག་པོ་ནས་ནི་དེ་མ་བྲལ། །ཡུལ་འདི་ཐུབ་པ་དེ་ཡིས་ཏེ། །ཐམས་ཅད་ན་ཡང་ཤིན་ཏུ་
སྣང་། །རབ་རིབ་ཅན་གྱི་རབ་རིབ་བཞིན། །རི་དགས་རྣམས་ཀྱི་སྨིག་རྒྱུ་འདྲ། །འཇིག་རྟེན་རྣམས་ཀྱིས་སྒྱུ་མ་ལ། །ཇི་ལྟར་གཞན་དུ་མཐོང་བ་དང་། །རྨི་ལམ་ན་ཡང་གཞན་དུ་བའི། །རྨི་ལམ་བཞིན་དུ་བུས་པས་མཐོང་། །ཁྱད་པར་རབ་ཏུ་མཐོང་བ་ནི། །
རྣལ་འབྱོར་ཅན་རྣམས་ལོག་ལོང་བཞིན། །ལྷ་ཡི་ལྷ་ཡི་ཡུལ་ཡིན་ཏེ། །དེ་ཡི་སྲས་ཀྱི་དུས་ཀུན་དུ། །མི་སྦྱིན་གུ་ལང་ཚངས་པ་དང་། །ས་ནན་ཏ་དང་ས་ནན་ད། །ས་ནན་གཞོན་ནུ་སེར་སྐྱ་དང་། །ནེ་ཙོ་ལ་སོགས་རྣམས་བསམས་ཀྱང་། །དེ་ཡི་ཡུལ་ལ་
རྣམ་པར་བསླད། །དེ་དག་རྣལ་འབྱོར་གྱིས་མི་མཐོང་། །ཐུབ་པ་གང་དག་འབྱུང་བ་དང་། །བྱུང་དང་ད་ལྟར་གང་འཁོད་པ། །དེ་དག་ཡུལ་ན་གང་ཡང་མིན། །ལྟ་བའི་བག་ཆགས་གཡོགས་པའི་ཕྱིར། །ས་དང་སར་ནི་རྣམ་སྤྱོད་པའི། །རྡོ་རྗེའི་སྙིང་པོ་དེ་ལ་
བསྟན། །ལྷ་ཡི་ལྷས་ནི་བྱས་པ་ཡི། །སྟུག་པོའི་ཞིང་ན་ཡོད་པ་ཡིས། །འདི་དག་རྡོ་རྗེའི་སྙིང་པོ་དེ། །མཉམ་པར་བཞག་ལ་ཤིན་ཏུ་བསྟན། །རྣལ་འབྱོར་ཅན་གྱི་རྣལ་འབྱོར་ཡུལ། །ཇི་ལྟར་གང་གིས་འབྱོར་པ་དག །དབྱིབས་དང་མདོག་དང་ཁྱད་པར་དག །བཟོ་
བོར་གྱུར་པས་བྱས་པ་ནི། །གཅེས་དང་རྡུལ་ཕྲན་དག་གི་སྟེ། །བརྟགས་པའི་དངོས་པོ་ཡོད་པ་མིན། །སྐྱེ་བ་དག་ནི་ཆོས་ཙམ་སྟེ། །ལྡོག་པར་འགྱུར་བའང་ཆོས་ཙམ་མོ། །ཀུན་ཏུ་ཕྲ་བའི་བདག་ཉིད་ཀྱི། །ཡོན་ཏན་དག་ཏུ་དངོས་ཡོད་བརྟགས། །མར་མེ་བཞིན་
དུ་གསལ་བྱེད་པ། །རྒྱུ་རྣམས་དགོས་པ་སྒྲུབ་པ་དག །མཚན་ཉིད་སྔ་ནས་མི་རྙེད་དེ། །འཇིག་དང་བྲལ་བས་མི་གནས་པའོ། །འདས་པ་འདས་པའི་དངོས་པོར་ཡང་། །ཡོད་པ་མ་ཡིན་འབྱུང་བ་མེད། །རྐྱེན་དུ་བྱ་རྣམས་མེད་པར་ཡང་། །བརྟགས་པའི་

དངོས་པོ་གང་ཡང་མེད། །རྐྱེན་རྣམས་ཡིན་ཏེ་འདུས་པ་ལ། །དངོས་པོ་ཡོད་པ་མ་ཡིན་ཏེ། །རྐྱེན་རྣམས་གང་གི་རྐྱེན་དུ་འགྱུར། །ཡོད་དང་མེད་པའི་དངོས་མི་སྣང་། །མེད་པའང་སྣང་བ་ཡོད་མ་ཡིན། །ཕྲ་བའི་བདག་གིས་རྣམ་པར་
བརྟགས། །ཕུང་པོ་རྫ་མ་རས་ལ་སོགས། །རི་དགས་སྐོམ་གདུངས་སྨིག་རྒྱུ་བཞིན། །རྨི་ལམ་དྲི་ཟ་འདྲ་བ་སྟེ། །གཙུག་ལག་ནོར་པ་དུག་དང་བཅས། །རབ་ཏུ་སྨྲ་བ་སུམ་བརྒྱ་ཡིས། །འཇུག་པ་དག་དང་ཕྱིར་ལྡོག་དང་། །མྱ་ངན་འདའ་བ་གང་ཡང་མེད། །དེ་
ནས་སངས་རྒྱས་ཀྱི་ཆོས་ཐམས་ཅད་རྣམ་པར་བཀོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་སའི་དབང་པོ། །ལག་པའི་ཕྲེང་བ་ཚད་མེད་པ། ལུས་དཔེ་མེད་པ། དཔུང་རྒྱན་དང་། ཅོད་པན་དང་། གཙུག་གི་ནོར་བུ་དང་། སེ་མོ་དོས་ཤིན་ཏུ་ཆས་པ་སྟན་ལས་ལངས་
ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐེག་པ་གསུམ་དང་འཇིག་རྟེན་དང་མི་འགལ་བ། ལྟ་བའི་ཆོས་ལ་བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་རིག་པའི་སྤྱོད་ཡུལ་བདེ་བ་ལ་གནས་པ་རྡོ་རྗེ་སྙིང་པོའི་
དབང་པོ་རྣལ་འབྱོར་ཆེན་པོའི་རྣལ་འབྱོར་ཅན། །རྣལ་འབྱོར་གྱི་མཁན་པོ་ས་དང་སའི་མཚམས་ཐམས་ཅད་མི་འགལ་བར་སྟོན་པ་ལ་འདི་སྐད་ཅེས་སྨྲས་སོ། །རྡོ་རྗེའི་དབང་པོ་ཁྱོད་སྐྱེ་བ་ཐམས་ཅད་དང་། རྒྱལ་པོའི་འཁོར་དག་ཏུ་ཅོད་པན་ཅན་དག་ལ་ཆོས་སྟོན་
པ་ཡིན་ཏེ། དེའི་ཕྱིར་རྒྱལ་བའི་སྲས་ཁྱོད་ལ་གསོལ་བ་གདབ་ཀྱིས་བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་རིག་པའི་སྤྱོད་ཡུལ་ལ་བདེ་བར་གནས་པའི་ཕྱིར་འཕགས་པ་ལྟ་བའི་ཆོས་ལ་བདེ་བར་གནས་པ་གཞན་གྱི་དྲིང་མི་འཇོག་པར་སྤྱོད་པའི་གནས་
སྟོན་ཅིག །དེས་བདག་དང་ཅོད་པན་ཅན་འདི་དག་གིས་བདག་མངོན་སུམ་དུ་གྱུར་པའི་སྤྱོད་ཡུལ་སངས་རྒྱས་ཀྱི་སའི་སྒོའི་བདེ་བ་ནན་ཏན་གྱིས་རབ་ཏུ་ཐོབ་སྟེ། ཡིད་བཞིན་གྱི་ལུས་རྣམ་པ་བཅུ་ལ་དབང་སྒྱུར་ཞིང་སྟོབས་དང་། མངོན་པར་ཤེས་པ་དང་། རྫུ་འཕྲུལ་

གྱི་རྐང་པ་དང་། དབང་གི་གཞལ་མེད་ཁང་གི་གནས་གྱུར་ཏེ། ཡང་དག་པའི་མཐའ་ལ་གནས་པ་སྤངས་ཏེ། སྣ་ཚོགས་ཀྱི་ལུས་ཡིད་བཞིན་གྱི་ནོར་བུ་དང་འདྲ་བའི་རང་བཞིན་དུ་གྱུར་ཏེ། རྒྱལ་པོའི་ཚོགས་ཀྱི་འཁོར་ཐམས་ཅད་དང་སྟུག་པོར་སྟུག་པོ་ན་སྤྱོད་པ་
རྣམས་ལ་ཆོས་སྣ་ཚོགས་སྟོན་པར་འགྱུར་རོ། །རྡོ་རྗེ་སྙིང་པོས་སྨྲས་པ། རྒྱལ་པོ་སྨྲོས་ཤིག་དགེའོ་དགེའོ། །ཅོད་པན་ཅན་ལ་ཁྱད་པར་དུ། །ཆོས་ལ་འཇུག་པ་བདག་མེད་པ། །སྟུག་པོའི་རྒྱན་ནི་རབ་སྟོན་པ། །སེམས་ཀྱི་རང་བཞིན་མཚན་ཉིད་དག །རྣམ་
རྟོག་སྤྱོད་ཡུལ་ཡིན་ཞེ་ན། །རྣམ་རྟོག་དོན་ལས་ཕྱིར་ལྡོག་པ། །འགྲོ་བ་རྣམ་རྟོག་མཐོང་ནས་ཏེ། །འགྲོ་བའི་རང་བཞིན་མཐོང་ནས་ཀྱང་། །ཏིང་ངེ་འཛིན་ལ་གནས་པར་འགྱུར། །ཆོས་ཀྱི་ངོ་བོ་ཉིད་བསྟན་གྱིས། །རྒྱལ་པོ་ང་ལ་དེ་ཉོན་ཅིག །དཔྱིད་ཀྱི་སྨིག་
རྒྱུ་ཇི་བཞིན་པ། །དེ་ཡི་རྣམ་པ་འགྲོ་བ་འདི། །མཚན་གཞི་མཚན་མ་རྒྱུ་རྣམས་ལས། །རྣམ་པར་རྟོག་པ་རྣམ་མི་རྟོག །བློ་དང་རྟོགས་བྱས་བསྐྱེད་པས་ཏེ། །རྟོགས་བྱ་དེའི་ཁྱད་གྱུར་པ། །གཉེན་པོར་གྱུར་པ་གཅིག་མེད་པ། །ཉི་མ་དང་ནི་གྲིབ་ལྟར་
གནས། །སེམས་མེད་ཙམ་པོའང་ཡོད་པ་མིན། །ཚད་དང་གཞལ་དང་གཉིས་ཀ་མེད། །རྣམ་པར་རྟོག་པ་སེམས་ཙམ་སྟེ། །རྣམ་པར་རྟོག་པ་རྣམ་མི་བརྟག །ཤེས་དང་ཤེས་བྱ་རྣམ་རྟོག་པ། །སེམས་ཙམ་དེ་ལྟར་ཡིན་ན་སྟེ། །
ཤེས་བྱ་སེམས་ཙམ་ཡིན་པ་ནི། །རྟག་ཏུ་ཙམ་ལ་ཤེས་ཡོད་མིན། །སེམས་ཆོས་ཀྱི་ནི་ངོ་བོ་ཉིད། །གང་ཟག་དག་དང་གཡོ་བ་རྣམས། །གང་ཚེ་སེམས་ལ་རྣམ་བརྟགས་ན། །རྟོག་དང་བརྟགས་པས་སྤངས་པ་ཡིན། །བརྒྱད་པོ་རྙེད་ནས་དག་པར་འགྱུར། །
དགུ་ལ་བསམ་གཏན་སྤྱོད་ཡུལ་ཏེ། །བཅུ་ལ་སངས་རྒྱས་སངས་རྒྱས་ཀྱིས། །དབང་བསྐུར་རྒྱལ་བར་འགྱུར་བ་ཡིན། །རྒྱལ་བའི་ཡུལ་ལ་ཆོས་རྣམས་ཀྱང་། །མི་ཟད་ཆོས་ཀྱི་སྐུར་འགྱུར་རོ། །ནམ་མཁའི་ཟད་དང་འདྲ་བ་སྟེ། །སེམས་དང་རྣམ་ཤེས་དེ་བཞིན་ཏེ། །

མི་འཇིགས་པ་ཡང་མ་ཡིན་ཞིང་། །རྟག་ཅིང་ཞི་བ་བདེ་ལ་བརྟན། །འདུས་མ་བྱས་པའི་ཡེ་ཤེས་ཏེ། །སྟུག་པོའི་ཞིང་ན་རྣམ་པར་མཛེས། །རྣམ་ཤེས་འབྱུང་གསུམ་འདས་པ་སྟེ། །སྣ་ཚོགས་གཟུགས་ཀྱི་རིན་ཆེན་བཞིན། །དེ་བཞིན་སངས་
རྒྱས་ས་བསམ་མེད། །སྟུག་བཞིན་རྒྱལ་བའི་གནས་གྱུར་པ། །ཇི་ལྟར་གྱོ་མོ་རྣམས་ཀྱི་རྒྱུ། །རྫ་མ་ཆག་པས་བསྟན་པ་བཞིན། །གྱོ་མོ་རྣམས་ཀྱང་རྡུལ་གྱི་སྟེ། །རྡུལ་ཡང་མཆོག་ཕྲའི་དེ་བཞིན་དུ། །དངོས་པོ་རྣམས་ཀྱི་རྐྱེན་རྣམས་ལ། །རྒྱུ་རྣམས་ཇི་ལྟར་སྣང་བ་བཞིན། །
ཟག་པ་མེད་པའི་ཆོས་རྣམས་ཀྱི། །རྒྱུ་ནི་དེ་བཞིན་ཟག་བཅས་པའོ། །ཇི་ལྟར་ཤིང་ལས་མེ་འབྱུང་བ། །ཕྱིས་ཀྱང་གཞན་དུ་འབར་བར་བྱེད། །དེ་བཞིན་ཡེ་ཤེས་བྱུང་བའི་མེ། །ཕྱིས་ཀྱང་གཞན་དུ་འབར་བར་བྱ། །གནས་ཀྱི་ལུས་ལས་འཕོས་གྱུར་ཅིང་། །སེམས་དང་
རྟོག་པས་རྣམ་སྤངས་པ། །ཆགས་པ་མེད་པའི་ཡེ་ཤེས་རོ། །སྟུག་པོའི་དབུས་ན་རྣམ་པར་མཛེས། །བསྐྱེད་མེད་རྣམ་པ་སྣ་ཚོགས་གཟུགས། །ས་ལ་གནས་པ་མ་ཡིན་པ། །ལྟ་བ་ཐམས་ཅད་ཟད་བྱེད་པའི། །བདག་མེད་ཉིད་ལ་སྐྱབས་སུ་སོང་། །རྒྱུད་ཀྱི་རྒྱུན་
རྣམས་ཆད་པའི་ཕྱིར། །འཇིག་པ་མེད་ཅིང་འབྱུང་མེད་པས། །ལྟ་བ་ཐམས་ཅད་ཟད་བྱེད་པ། །བདག་མེད་ཉིད་ལ་སྐྱབས་སུ་སོང་། །ཞིར་གྱུར་ཞི་བ་ཞིར་མ་བྱས། །ཞི་བས་ཞི་བ་བདེན་ཉིད་དུ། །ལྟ་བ་ཐམས་ཅད་རྣམ་དག་ཕྱིར། །བདག་མེད་ཉིད་ལ་སྐྱབས་སུ་
སོང་། །ས་རྣམས་སྣ་ཚོགས་བྱས་པ་ནི། །བདག་མེད་པ་ལ་བདག་མེད་པས། །མི་རྟག་ཐོ་བས་བཅོམ་པ་དང་། །རྣམ་པར་སྟོན་པའི་མདས་ཀྱང་སྟེ། །བསྲེག་པ་ཚིག་པའི་མེ་བཞིན་དུ། །བདག་ཉིད་ཞིར་འགྱུར་དེ་ཉིད་དུ། །དེ་བཞིན་ལྟ་བས་རྣམ་བརྟགས་
ཏེ། །བདག་མེད་བསམ་གཏན་རབ་གནས་པ། །ལྟ་བའི་ཆོས་ལ་བདེར་གནས་ཀྱི། །སོ་སོ་རང་རིག་སྤྱོད་ཡུལ་ལ། །ཐོག་མ་མེད་ནས་ཉེས་དྲི་མེད། །འཕགས་པ་རྣམས་ཀྱི་ས་ལ་གནས། །འཕགས་གནས་འཇིག་རྟེན་པས་སྤངས་ཏེ། །འཇིག་རྟེན་འདས་པའི་

འཕགས་ལ་གནས། །སེམས་ཀྱི་ས་ལས་རབ་གྱུར་ཏེ། །སྟུག་པོའི་དཀྱིལ་ན་རྣམ་པར་མཛེས། །མི་བདག་མི་བདག་དབང་པོ་རྣམས། །ཐམས་ཅད་ཀྱིས་ཀྱང་ཡང་སྨྲས་པ། །རྡོ་རྗེའི་སྙིང་པོ་སྐྱབས་དང་མགོན། །གང་ལ་སྐྱབས་སུ་མཆི་བར་བགྱི། །སངས་རྒྱས་
ཡོད་མིན་མེད་པ་མིན། །ཕུང་པོའི་སྐྱེ་ཤིང་རྣམ་བསྲེགས་ཏེ། །དཔུང་དང་བཅས་པའི་བདུད་བཅོམ་ནས། །སྟུག་པོ་སངས་རྒྱས་ས་ལ་གནས། །ཤེས་བྱ་དྲི་མེད་ཞི་བ་ལ། །སྐྱབས་སུ་སོང་ཤིག་གྲོགས་པོ་དག །རྟོག་དང་ཚད་ལས་བྲལ་བ་སྟེ། །བློ་དང་རྟོགས་བྱའི་
གནས་མ་ཡིན། །སྟུག་པོའི་དཀྱིལ་བཞུགས་རྣལ་འབྱོར་ཅན། །དེ་ཡང་གྲོགས་པོ་མགོན་སྐྱབས་སོ། །རྣལ་འབྱོར་ཅན་རྣམས་ཀུན་གྱི་ཞིང་། །ཞིང་མཆོག་བཟང་བ་སྟུག་པའོ། །རྣལ་འབྱོར་པ་ནི་མང་པོས་གང་། །སྟུག་པོ་དེ་ལ་སྐྱབས་སུ་སོང་། །སྤྲོས་པ་ཀུན་དང་
བྲལ་བ་སྟེ། །ལྟ་བའི་ཉེས་པ་རྣམ་པར་སྤངས། །རི་མོའི་ཐག་ཐུག་ལྟ་བུ་དང་། །རྨི་ལམ་མོ་གཤམ་བུ་འབྱུང་དང་། །རྨི་ལམ་བུད་མེད་བཟང་མོ་ལྟར། །ཐུབ་པ་རྣམས་ཀྱིས་འགྲོ་བ་མཐོང་། །དྲི་ཟའི་གྲོང་ཁྱེར་སྤྱོད་པ་བཞིན། །སྐྲ་ཕུང་མགལ་བ་བསྐོར་བ་ལྟར། །སྨིག་
རྒྱུ་རི་དགས་སྲེད་མཚུངས་སུ། །ཡོད་དང་མེད་པ་རྣམ་པར་སྤངས། །སྒྱུ་མའི་ལུས་གཟུགས་སྣ་ཚོགས་དང་། །འཕྲུལ་པའི་སྤྲུལ་པར་དེ་དག་ནི། །འཇིག་རྟེན་སྤྱོད་ཚེ་མཐོང་བ་སྟེ། །ས་དང་ས་ལ་ཐུབ་པ་རྣམས། །བསྡོར་མེད་དུ་མའི་གཟུགས་གྱུར་པ། །སྒྱུ་མའི་ཤིང་གི་
འབྲས་བུ་ལྟར། །སྤྲིན་དང་དུ་བ་གློག་ལྟར་ཡང་། །ཐུབ་པས་རྣལ་འབྱོར་རྣམ་པར་མཐོང་། །རྫ་ལ་སོགས་པའི་བཟོ་བཟུང་ལྟར། །འགྲོ་བ་བདག་གི་རྣམ་རྟོག་བྱུང་། །ཡིད་དང་ཡིད་ཀྱི་རྣམ་ཤེས་དང་། །ཆོས་ལྔའི་ངོ་བོ་ཉིད་རྣམས་དང་། །འཇུག་པའི་རྣམ་ཤེས་སྤྱོད་
པ་ནི། །བདག་མེད་མི་གཉིས་བརྒྱན་པ་སྟེ། །བག་ཆགས་ཐོག་མ་མེད་པ་ཡི། །སེམས་ཀྱི་གནས་ངན་ལེན་བྱུང་ཡོག །འོད་པའི་དབའ་རླབས་འདྲ་བར་ནི། །ཀུན་གཞི་ས་ལ་གནས་པ་ཡིན། །རླུང་གིས་ཇི་ལྟར་འོད་པ་ལ། །ཕན་ཚུན་དག་ཏུ་བསྐྱོད་བྱས་ན། །

དབའ་རླབས་རྣམས་ལ་འཇིག་པ་མེད། །འོད་པའང་མེད་པར་མི་འགྱུར་ཏེ། །སྔ་མེད་བག་ཆགས་གནས་ཅན་རྣམས། །འཇུག་པའི་ཡུལ་ལ་གཞོལ་བ་དག །སེམས་བརྒྱད་རྣམས་ཀྱི་འཇུག་པ་ནི། །རྣམ་པར་ཐ་དད་མ་ཡིན་ཏེ། །དུས་གཅིག་
ཏུ་ཡང་དེ་དག་འབྱུང་། །བར་བར་དུ་ནི་རིམ་གྱིས་སོ། །ཐོག་མ་མེད་ནས་སེམས་འཇུག་པ། །སྐར་མ་གཟའ་ཡི་དཀྱིལ་འཁོར་དང་། །ལོ་མ་མེ་ཏོག་འབྲས་བུ་དང་། །རི་དང་སྡེ་དང་ཚལ་སོགས་ལ། །རྟག་ཏུ་དུས་གཅིག་འཇུག་པ་སྟེ། །རིམ་གྱིས་ཀྱང་ནི་ཤེས་པར་
བྱོས། །ཡང་དག་མ་ཡིན་སྔ་མའི་ཡུལ། །མལ་ལ་གནས་བཞིན་མཐོང་བ་ཡིན། །ལུས་ཀྱི་འཇུག་པ་རིམ་གྱིས་ཀྱང་། །སྲོག་ལ་རྟེན་ཅིང་འབྱུང་བ་ཡིན། །རྫས་དང་གྲངས་དང་ཆོས་རྣམས་ལ། །ཐ་དད་རིམ་གྱིས་འབྱུང་བ་སྟེ། །མུར་ཞིང་བཅའ་དང་བཟའ་རྣམས་ལ། །
ཐ་དད་རིམ་གྱིས་འདའ་བ་མིན། །རོ་དང་དྲི་ཡི་རྣམ་པ་ལ། །རིམ་གྱིས་ཐ་དད་འབྱུང་བ་ཡིན། །རིམ་གྱིས་ཁ་དོག་ཁྱད་པར་གྱི། །སྣ་ཚོགས་ལ་ཡང་དུས་གཅིག་ཏུ། །རྒྱལ་པོ་སེམས་ནི་བསམ་མི་ཁྱབ། །རྟག་ཏུ་རང་བཞིན་འོད་ཅན་ནོ། །དེ་བཞིན་གཤེགས་པའི་
སྙིང་པོ་སྟེ། །རྡོ་བ་རྣམས་ཀྱི་གསེར་བཞིན་གནས། །ཡིད་ནི་ཀུན་གྱི་གཞི་ལས་བྱུང་། །ཡིད་ཀྱི་རྣམ་ཤེས་དེ་བཞིན་ཏེ། །རྣམ་ཤེས་དྲུག་པོ་རྣམ་པ་མང་། །ས་ཡི་ཁྱད་པར་བྱེད་པའོ། །བག་ཆགས་སེམས་དང་ལྷན་ཅིག་ཏུ། །ས་བོན་ཀུན་པའི་ཀུན་གཞི་ནི། །ཀུན་
ནས་ཉོན་མོངས་རྣམ་དག་པའི། །རྟག་ཏུ་རང་བཞིན་འོད་ཅན་གྱིས། །དེ་ལྟར་དེ་བཞིན་གཤེགས་ཀྱི་རིགས། །ངེས་དང་མ་ངེས་དགེ་བ་ཡིན། །རྟག་ཏུ་གནས་ལྟར་འབྱུང་བ་ནི། །རྒྱ་མཚོའི་རླབས་དག་ཇི་བཞིན་དུ། །ཐ་མ་འབྲིང་དང་རབ་རྣམས་སུ། །དེ་བཞིན་ཀུན་གཞིས་
ཁྱབ་པར་བྱེད། །ས་དང་ས་ལ་རྣམ་དག་ཅིང་། །གཞན་དུ་གྱུར་ནས་རྣམ་པར་མཛེས། །ཡང་དག་ཇི་བཞིན་དོན་སྟོན་ལ། །རྡོ་རྗེ་སྙིང་པོས་ཡང་སྨྲས་པ། །མཐོང་ཞིང་ཐོས་ཏེ་ཤེས་པས་ན། །ས་ཆེན་བདག་པོ་ཁྱོད་ཉིད་ཀྱིས། །སྤོབས་པ་ཅན་ལ་བསྟན་པར་

གྱིས། །ཁྱད་པར་དུའོ་ཁྱད་པར་བདག །ཁམས་ཕྲན་རྣམས་ཀྱི་ཁམས་རྣམས་དང་། །ས་ལ་འཁོར་ལོ་འཁོར་རྣམས་དང་། །ཀུན་གཞི་རྣམ་པར་དག་གྱུར་ན། །ས་ཡི་རྒྱལ་པོར་འགྱུར་བ་ཡིན། །འཛམ་བུའི་གླིང་ལ་དབང་བ་ཡི། །འཁོར་ལོ་འཁོར་བར་ཡང་འགྱུར་རོ། །
དགའ་ལྡན་ལ་སོགས་གཞལ་མེད་དུ། །མཚེ་མ་རབ་ཀྱི་དབང་པོར་འགྱུར། །དབང་པོའི་གནས་སུ་དབང་པོར་ཏེ། །དབང་སྒྱུར་གནས་སུ་དེ་བཞིན་ནོ། །འདོད་པའི་ཁམས་ཀྱི་དབང་པོའི་བདག །གཟུགས་ཁམས་བདག་པོའང་དེ་བཞིན་ཏེ། །གཟུགས་མེད་འདུ་ཤེས་མེད་
སེམས་ཅན། །བསམ་གཏན་བདེ་བའི་འབྲས་བུར་ཡང་། །ཡང་དག་མངོན་བྱ་མ་ཆགས་པས། །ཡང་དག་མཐའ་ལ་མ་རེག་པར། །འཇིགས་མེད་སེང་གེའི་སྒྲ་སྒྲོགས་ཤིང་། །དགའ་དང་ཡེ་ཤེས་ཡང་དག་ལྡན། །བསམ་གཏན་དབང་གི་བདེ་བས་ངོམས། །དེ་
ནི་སྟུག་པོར་སྨོན་པ་ཡིན། །ཁམས་གསུམ་སྤྱོད་པའི་ཉེས་པ་ཡིས། །ཆགས་མེད་མཉམ་པར་བཞག་པ་སྟེ། །མཐར་གྱིས་སྟུག་པོར་ཞུགས་ནས་སུ། །རྣམ་པར་སངས་རྒྱས་སངས་རྒྱས་པར། །ཆོས་ཀྱི་དབང་པོར་བདག་གྱུར་ཏེ། །རྟེན་ལས་གཞན་དུ་གྱུར་ཅིང་
བདེ། །རྟག་པ་བརྟན་པ་ཞི་བའི་ཆོས། །སྟུག་པོའི་དཀྱིལ་ན་སྲས་དང་བཅས། །ཆོས་ཀྱི་བདག་པོ་རྣམ་པར་མཛེས། །འཇིག་པ་མེད་པ་མི་ཡི་མཆོག །མྱ་ངན་འདས་པ་འཇིག་པ་མིན། །མུར་འདུག་རྣམས་ཀྱིས་ཇིར་རྗོད་བཞིན། །མཆོག་དང་ཐ་མ་བར་མ་ཡི། །
རྒྱལ་པོ་བཅུ་པོའི་ལས་རྣམས་ཀྱིས། །ཐེག་པ་གསུམ་དུ་གྱུར་པ་སྟེ། །སྟུག་པོ་ཚོལ་བའི་ཁྱད་པར་ཡང་། །རྒྱལ་པོ་ཡང་དག་སྐྱེ་བར་འགྱུར། །ས་དང་ས་ལ་གནས་པས་སོ། །འཇིག་ན་འདུས་བྱས་ཉེས་པར་འགྱུར། །འཆི་བ་རྣམས་ལའང་དེ་བཞིན་ཏེ། །རྒྱལ་པོ་འཇིག་
པ་མཐར་མ་ཡིན། །དེ་བཞིན་གཤེགས་པ་ཡེ་ཤེས་སྐུ། །སེམས་ཅན་ཟད་ཅིང་མེད་འགྱུར་བ། །དེ་སྟེ་མྱ་ངན་འདས་འཇིག་ན། །སྔོན་གྱི་མཐའ་ཡང་འཇིག་པ་དང་། །སེམས་ཅན་འབྱུང་བ་མེད་པར་འགྱུར། །སེམས་ཅན་ཁམས་རྣམས་ཟད་གྱུར་ན། །རྒྱལ་བའི་ཤེས་

བྱ་དངོས་པོ་མེད། །མྱ་ངན་འདའ་མེད་ཤེས་བྱ་མེད། །སངས་རྒྱས་སངས་རྒྱས་ཉིད་ཀྱང་མེད། །མེ་མར་བསྲེགས་པའི་དཔེ་རྣམས་དང་། །ས་བོན་ཚིག་པའི་དཔེ་དག་གིས། །རྟོག་ཅན་ཐར་ལ་མཁས་པ་རྣམས། །ལུས་ཅན་རྣམས་ལ་ཐར་པ་སྟོན། །
ཡོད་དང་མེད་པའི་རྣམ་ཐར་གྱིས། །ཐར་པའི་བདེ་ལས་དེ་དག་རིང་། །བསམ་གཏན་གནས་པ་ཐམས་ཅད་དེ། །ལུགས་སུ་འཇུག་དང་བཟློག་པ་དག །གཟུགས་མེད་འདུ་ཤེས་མེད་པ་དང་། །མངོན་ཤེས་དབང་དང་སྟོབས་རྣམས་དང་། །མ་ཉམས་ཉམས་པ་མེད་པ་
དང་། །ཆོས་ཀྱི་མཚན་ལ་མཁས་པ་རྣམས། །ས་ཡི་ཁམས་ལ་མཁས་པ་དག །མི་ཡི་དབང་པོ་སྟུག་པོར་འགྲོ། །ཡོད་དང་མེད་པ་འཇིག་པས་ནི། །དེ་དག་འཁོར་ལས་མི་འབྱུང་སྟེ། ཕྲད་པ་གསུམ་པོ་འཇིག་མེད་ཅིང་། །རྒྱུ་དང་དམིགས་པའི་རྐྱེན་རྣམས་དང་། །
དེ་མ་ཐག་དང་དབང་ཡང་སྟེ། །ས་རྣམས་བདག་མེད་ཕྱི་རོལ་དག །མིག་དང་གཟུགས་དག་རྒྱུར་བྱས་ཏེ། །ཕྲད་པས་གང་རྣམས་འཇུག་གྱུར་པ། །གཟུགས་རྣམས་མངོན་བྱེད་ཡེ་ཤེས་དང་། །དེ་དག་ཐམས་ཅད་ཞིག་པར་འགྱུར། །ཕྱི་དང་ནང་གི་ས་རྣམས་ནི། །
ཕན་ཚུན་སྟོབས་ཀྱིས་བྱུང་བ་སྟེ། །ཡོད་དང་མེད་པའི་ལྟ་བ་ལས། །དེ་སྟེ་གྲོལ་ནས་འཇིག་ན་ནི། །སེམས་དང་དམིགས་ལས་བྲལ་བའི་ཕྱིར། །རྣམ་པར་དམིགས་པས་མི་གནས་ཏེ། །མདུན་དུ་རྟོག་པ་མེད་གྱུར་ཅིང་། །དེ་ཡི་རང་བཞིན་མི་གནས་ལ། །གང་ཚེ་དམིགས་
པ་སྤང་བ་ལ། །རྣམ་པར་རྟོག་པ་མི་གནས་ཤིང་། །གང་ཚེ་གཉིས་ལས་རྣམ་གྲོལ་ཏེ། །རྟོག་མེད་རྟོག་པ་སྤངས་པས་ན། །དེ་ཚེ་སེམས་ནི་མཉམ་པར་བཞག །འགྲོ་བ་རྣམ་རྟོག་མེད་པར་མཐོང་། །གཟུང་དང་འཛིན་པ་མེད་པ་སྟེ། །བསམ་གྱིས་མི་ཁྱབ་ཤེས་ལ་
གནས། །རྟེན་པ་ལས་ནི་གྱུར་པ་སྟེ། །ཡེ་ཤེས་གནས་ངན་ལེན་པ་སྤངས། །ཡིད་བཞིན་རྣམ་པ་བཅུ་པོ་ནི། །སྣ་ཚོགས་གཟུགས་ཀྱིས་བརྒྱན་པ་སྟེ། །ས་གསུམ་རྒྱལ་པོ་རབ་བྱེད་ཅིང་། །རྒྱལ་པོ་སྟུག་པོར་རབ་ཏུ་འགྲོ། །གཟུགས་དང་སེམས་དང་སེམས་

ལས་བྱུང་། །མི་ལྡན་པ་དང་འདུས་མ་བྱས། །ནང་དང་ཕྱི་ཡི་ས་རྣམས་དང་། །ཐ་དད་རྣམ་པར་རབ་མཐོང་ཞིང་། །སོ་སོ་རང་གི་ཡེ་ཤེས་མཁས། །ལྟ་བའི་ཆོས་ལ་རྣམ་པར་གནས། །རྒྱལ་པོ་སྟུག་པོར་འདོད་པ་ནི། །ཡེ་ཤེས་མཁས་པ་རྣལ་འབྱོར་ཅན། །མཚན་
མ་མིང་དང་དེ་བཞིན་ཉིད། །རྣམ་པར་རྟོག་དང་ཡེ་ཤེས་དང་། །ཡང་དག་མཐའ་ཡི་གནས་པ་ཡིས། །སོ་སོ་རང་རིག་སྤྱོད་ཡུལ་དུ། །རྒྱལ་པོ་དག་དང་རྒྱལ་པོའི་བུ། །རྣལ་འབྱོར་སེམས་པའི་རྣལ་འབྱོར་ཅན། །རྒྱལ་པོ་སྟུག་པོར་འདོང་བ་ན། །སངས་རྒྱས་བསྟོད་
པའི་ཞིང་དུའོ། །ཕྲད་པ་གསུམ་དང་རྐྱེན་སྤངས་ཏེ། །བདག་གི་ཕྱོགས་ལས་འཕགས་གྱུར་ན། །ཕྱོགས་ལས་ཉམས་པས་འཇིག་པ་ནི། །རྟོག་པ་ཅན་དང་མཉམ་པར་འགྲོ། །མ་གྲུབ་པ་དང་ཡང་དཔེ་ཡི། །རྒྱལ་པོ་འགལ་བར་ཤིན་ཏུ་འགྱུར། །རྣམ་པར་རྟོག་
དང་ཉེས་པའི་མཚང་། །དེ་དག་རྣམ་པ་ལྔར་འགྱུར་རོ། །ཕྲད་པ་གསུམ་པོ་སུན་འབྱིན་པ། །ཆུད་ཟོས་བུང་བ་ཇི་བཞིན་དུ། །དེ་བཞིན་འཇིན་རྟེན་སུན་འབྱིན་པ། །ཡང་དག་མ་ཡིན་རྟོག་པ་སྨྲ། །དེ་ལ་ཉེས་པ་རྣམ་ལྔ་སྟེ། །རྟོག་པ་བསླད་པའི་མིག་ཅན་ལ། །འདྲ་
ཆོས་མི་འདྲའི་ཆོས་སྐྱོན་ཅན། །ནོར་དང་བཟློག་པ་མེད་པ་དང་། །བདག་གི་ཕྱོགས་ལས་ཉམས་པའི་བློ། །ཕ་རོལ་ཕྱོགས་ལ་རྟེན་པ་དང་། །ལྟ་བ་དེ་དག་འབྱུང་བ་ནི། །ཐོག་མའི་མཐའ་ནི་འཇིག་བྱེད་པའོ། །སེམས་ཅན་རྣམས་ཀྱི་སྔོན་གྱི་མཐའ། །རྒྱལ་པོ་ཡོད་པ་
མ་ཡིན་ཏེ། །ཀུན་ཏུ་རྒྱུག་ཅིང་འཁོར་བ་དག །འབྱུང་བ་དོག་པར་རྒྱུག་པའོ། །དེ་དང་དེ་ཡི་ལམ་རྒྱུད་དུ། །ཐུགས་རྗེ་དབང་གིས་རྒྱལ་བ་གཤེགས། །སྤྲུལ་པའི་འོད་ཟེར་ལྷ་རྫས་ཀྱིས། །ཟླ་བ་ལྟ་བུར་རྒྱུ་ཞིང་འཁོར། །སྔ་མའི་ལས་དང་ཚུལ་འཐུན་པར། །ཕ་
སྐྱབས་ཆོས་རྣམས་སྟོན་པ་མཛད། །རྒྱུད་དང་རྒྱུད་དུ་བྱིང་རྣམས་ལ། །ཆོས་ཀྱང་བསྟན་པར་མི་འགྱུར་ཏེ། །དེ་སྟེ་མྱ་ངན་འདའ་འཇིག་ན། །རྒྱལ་བས་ཡོན་ཏན་ཅི་ཞིག་བརྙེས། །དབང་སྒྱུར་གསུམ་པོ་རྣམས་དང་ཡང་། །རྣམ་པར་ཐར་དང་བདེན་པ་མཐོང་། །རྫུ་འཕྲུལ་

རྐང་པ་བཞི་པོ་དང་། །དྲན་པ་ཉེར་གཞག་སྟོང་པ་ཉིད། །ཐ་དད་ཡང་དག་ཤེས་བཞི་དང་། །འདྲི་ལ་ལུང་བསྟན་པ་རྣམས་དང་། །དམིགས་པ་དང་ནི་དེ་མ་ཐག །རྒྱུ་དང་དབང་ཡང་དེ་བཞིན་ཏེ། །གཟུགས་མེད་པ་དང་སྤྱོད་པ་དང་། །དབང་པོ་
སྟོབས་རྣམས་བཅས་པ་དང་། མངོན་པར་ཤེས་དང་དད་རྣམས་དང་། །རྣམ་པར་ཤེས་དང་དེ་རྒྱུ་དང་། །འདུས་བྱས་མ་བྱས་ཆོས་རྣམས་དང་། །བྱང་ཆུབ་ཡན་ལག་གང་ཟག་དང་། །རྣམ་པར་ཐར་དང་སྐྱེས་བུ་བརྒྱད། །ས་རྣམས་དག་དང་ཤེས་པ་དང་། །
ཟིལ་གྱིས་གནོན་པའི་སྐྱེ་མཆེད་དང་། །ཡེ་ཤེས་མངོན་དུ་ཆུད་པ་བཅུ། །སྡུག་བསྔལ་ཆོས་ཉིད་ཤེས་པ་དང་། །སྡུག་བསྔལ་གྱིས་སུ་སོ་སོར་རྟོག །སྡུག་བསྔལ་ཉིད་ཀྱི་རྗེས་སུ་ཤེས། །འདུས་པ་རྣམས་ཀྱི་ཆོས་ཤེས་དང་། །འདུས་པ་ལ་ནི་ཀུན་རྟོག་དང་། །
འདུས་ལ་རྗེས་སུ་འགྲོ་ཤེས་དང་། །འགོག་པ་དག་ལ་ཆོས་ཤེས་དང་། །འགོག་པ་དག་ལ་རྟོག་པ་དང་། །འགོག་ལ་རྗེས་སུ་འགྲོ་ཤེས་དང་། །ལམ་ལ་ཆོས་ཀྱི་ཤེས་པ་དང་། །ལམ་ལ་སོ་སོར་རྟོག་པ་དང་། །ལམ་ལ་རྗེས་སུ་འགྲོ་བ་ཤེས། །ཤེས་པ་རྣམས་
དང་སློབ་པ་བཅུ། །བརྒྱད་པ་མང་ན་ལན་བདུན་དང་། །རིགས་ལས་རིགས་དང་ལན་ཅིག་འོང་། །བར་ཆད་གཅིག་པོ་གང་ཟག་དང་། །བར་མར་མྱ་ངན་འདའ་བ་དང་། །གཞན་སྐྱེས་མྱ་ངན་འདའ་བ་དང་། །མངོན་པར་འདུ་བྱེད་མ་བྱས་དང་། །སྟེང་མའི་རྒྱུད་ཀྱང་
དེ་བཞིན་ཏེ། །རྒྱལ་པོ་དེ་དག་ཐམས་ཅད་ཀྱང་། །ཡེ་ཤེས་སྤྱོད་ཡུལ་ཡིན་པར་གསུངས། །རྣལ་འབྱོར་ཅན་ཡུལ་སྣ་ཚོགས་ཏེ། །ཐ་མ་མཆོག་དང་བར་མའོ། །བྱང་ཆུབ་སེམས་དཔའ་ཁྱད་པར་དུ། །མཆོག་དང་བཅས་པར་དེ་ལ་སྒོམ། །རང་སངས་རྒྱས་
ནི་དབུ་མར་ཏེ། །ཉན་ཐོས་པ་ནི་ཐ་མའོ། །བཅུ་གཅིག་པ་དང་བཅུ་གཉིས་པ། །ལྔ་གསུམ་བཅྭ་ལྔ་དག་ཏུ་ཡང་། །སེམས་ཀྱི་ཚོགས་ཀྱི་འགོག་པ་ནི། །རྣལ་འབྱོར་ཅན་རྣམས་ཤིན་ཏུ་བྱེད། །གང་འདས་དེ་ནི་འགགས་པ་ཡིན། །སེམས་ནི་རང་བཞིན་འོད་སྣང་

ཅན། །ཟག་པ་གང་ཡིན་དེ་སེམས་མིན། །སེམས་དང་ལྷན་ཅིག་གནས་པའང་མེད། །མ་འོངས་པ་ནི་མ་ཕྱིན་ཏེ། །ད་ལྟར་བྱུང་བ་གནས་པ་མེད། །སེམས་ནི་རྐྱེན་དང་མི་ལྡན་པར། །འདི་དང་གཞན་དུའང་སྐྱེ་བ་མེད། །བསམ་གཏན་བཞི་ན་སེམས་མེད་དེ། །འབྱུང་
བའི་རྒྱུ་ལ་གནོད་པ་མེད། །འབྱུང་བའི་རྒྱུ་ནི་རྣམ་ཤེས་ཏེ། །ཡིད་དང་རྣམ་ཤེས་ལྔ་པའོ། །རང་གི་རྣམ་རྟོག་མི་ཤེས་པས། །དབའ་རླབས་བཞིན་དུ་འབྱུང་བ་ཡིན། །བརྟག་དང་རྟོག་ལས་རྣམ་གྲོལ་བ། །ཐུབ་པ་ཀུན་གྱི་ཀུན་གཞིའོ། །ཡོད་དང་མེད་ལས་ལྷ་རྫས་སུ། །
གཞན་འགྱུར་འཇིག་པ་མ་ཡིན་ཞིང་། །སྟུག་པོ་དང་ནི་སྟུག་དཀྱིལ་དུ། །ཟླ་བ་ལྟ་བུར་རབ་ཏུ་མཛེས། །དེ་ནི་མི་འཇིག་བདེ་བར་གནས། །སྟུག་པོའི་དཀྱིལ་ན་སྲས་དང་བཅས། །ཐ་དད་མ་ཡིན་མཚན་ཉིད་མཁྱེན། །ཡེ་ཤེས་རོ་གཅིག་ཉིད་དུ་གྱུར། །བསམ་ཡས་རྣལ་
འབྱོར་ཡུལ་ཅན་ཏེ། །རྒྱལ་པོ་ཟླ་བ་ལྟ་བུར་སྤྱོད། །རྒྱལ་པོ་ཕུན་སུམ་ཚོགས་པ་འདི། །རྣལ་འབྱོར་ཁྱེར་བ་ཐུབ་རྣམས་ཀྱི། །རྟག་པར་རྒྱལ་པོ་དེ་ཡི་ཕྱིར། །ཁྱོད་ཀྱི་ཡིད་ཀྱང་རྣལ་འབྱོར་ཤོག །འདོད་གནས་རྣམ་པ་དྲུག་པོ་དང་། །ཚངས་པ་དག་གི་བཅུ་གཉིས་དང་། །
གཟུགས་མེད་ཤེས་མེད་སེམས་ཅན་དུ། །རྒྱལ་པོ་ཁྱོད་ནི་དབང་པོར་གྱིས། །སྟུག་པོར་འདོད་པའང་འཐོབ་པར་ཏེ། །བཟང་པོའི་སྟུག་པོར་སྨོན་པའི་ཕྱིར། །རྒྱལ་པོའི་ཡེ་ཤེས་བཅུ་པོ་རྣམས། །བསྒོམས་ན་སྟུག་པོར་འགྲོ་བར་འགྱུར། །ཆོས་དང་རྗེས་སུ་འགྲོ་ཤེས་
དང་། །ཕ་རོལ་སེམས་དང་ཀུན་རྫོབ་དང་། །སྡུག་བསྔལ་འདུས་པའི་ཤེས་པ་དང་། །འགོག་དང་ལམ་ལས་སྐྱེས་པ་དང་། །བྱང་བའི་ཤེས་དང་མི་སྐྱེ་དང་། །ཁོང་བཟོ་བསྒོམ་པ་དེ་བཞིན་ཏེ། །ཤ་ཀུན་ཏ་ལའི་རྒྱལ་རིགས་དང་། །ཨིག་ཤྭ་ཁུ་དང་སོ་མའི་རིགས། །
ཡང་དག་དོན་སྟོན་རྒྱལ་པོའི་མཆོག །ཁྱོད་ཀྱི་རིགས་ནི་ཁྱད་པར་འཕགས། དེ་ཡི་རིགས་སུ་ཁྱོད་སྐྱེས་ཤིང་། །ཞུམ་པ་མེད་པར་སྟུག་པོར་སོང་། །ལྟ་བའི་ཆོས་ལ་གནས་པ་ཡི། །རྣལ་འབྱོར་ཅན་གནས་དྲི་མེད་དུ། །སྦུད་པ་བཞིན་དུ་དབུགས་རྒྱུ་ཞིང་། །འགྲོ་

རྒྱུ་ལུག་དང་འདྲ་བ་སྟེ། །རྔ་ཕྲུག་བཞིན་དུ་ལུས་ཕྱེད་ཀྱིས། །འགྲོ་ཞིང་འོང་བ་བྱེད་པ་ནི། །ཐམས་ཅད་ལུས་ལ་ཡིད་ཡིན་ཏེ། །སྒྱུ་མའི་རི་དགས་བཞིན་དུ་གནས། །སྒྱུ་མའི་ཤིང་ལྟར་ཤིན་ཏུ་སྣང་། །ཆུ་བོའི་ནང་གི་མེ་བཞིན་དུ། །སྨིན་མ་མིག་དང་
ཡན་ལག་རྣམས། །སྒྱུར་བས་རྒྱལ་པོ་བཞིན་དུ་རྩེ། །སེམས་དང་སེམས་ལས་བྱུང་དང་ཡིད། །ཡིད་ཀྱི་རྣམ་པར་ཤེས་པ་དག །ཆོས་རྣམས་འདི་དག་དངོས་པོ་མེད། །སྤྲིན་གྱི་ཚུལ་དུ་འབྱུང་བ་སྟེ། །ཀུན་གཞི་ཐམས་ཅད་ས་བོན་འདི། །བག་ཆགས་རྣམས་
ཀྱིས་ཡོངས་སུ་དཀྲིས། །སྣ་ཚོགས་གཟུགས་ཀྱི་ནོར་བུ་དང་། །འཇའ་དང་གློག་རྣམས་ཇི་བཞིན་དུ། །ལུས་ཅན་རྣམས་ཀྱི་ལུས་ཀྱི་ཡུལ། །དེ་ལྟའི་གཟུགས་སུ་སྣང་བ་ཡིན། །ལུ་མའི་པད་མོ་ལྟ་བུར་དག །དྲི་མེད་ངང་པའི་རྒྱལ་པོ་བཞིན། །གསལ་བ་
གདོན་མི་ཟ་བའི་རིགས། །སངས་རྒྱས་སྤྲུལ་པ་བཞིན་དུ་གནས། །མཚན་མའི་མཐུ་ལས་མིང་འབྱུང་སྟེ། །མཚན་མ་རྐྱེན་ལས་བྱུང་བ་ཡིན། །མཚན་མ་མིང་དང་འབྲེལ་པ་སྟེ། །རྐྱེན་རྣམས་ཀྱིས་ཀྱང་རྣམ་པར་བརྟགས། །མཚན་མའི་ཚུལ་དང་དབྱིབས་དག་
ལས། །རྣམ་པར་རྟོག་པ་ཤིན་ཏུ་འབྱུང་། །རྣམ་པར་རྟོག་པ་སྐྱེད་པ་ཡི། །རྒྱུ་ལ་རྣམ་པ་གཉིས་སུ་གསུངས། །ཕྱི་རོལ་མཚན་མ་སེམས་རྣམས་དང་། །བག་ཆགས་ཡིད་ཀྱང་དེ་བཞིན་ཏེ། །སེམས་དང་ལྷན་ཅིག་ལྡན་པ་ནི། །ཁོང་པ་ལ་ནི་གནས་པ་ཡིན། །
ཡིད་དང་དབང་པོར་ལྡན་པ་ནི། །རྣམ་ཤེས་ལྔ་ཡི་རྒྱུ་ཡིན་ཏེ། །རྟག་ཏུ་ཡང་དག་ཡེ་ཤེས་ཀྱིས། །འཇིག་རྟེན་རྒྱུ་ལ་རྣམ་པར་ལྟ། །དེ་ལྟར་བྱེད་དང་བྱ་བ་མེད། །དེ་བཞིན་ཉིད་འདི་རྣམ་གཞན་མིན། །ཐམས་ཅད་ཆོས་ཀྱི་དེ་བཞིན་ཉིད། །ཕན་ཚུན་སྟོབས་ཀྱིས་འབྱུང་
བ་སྟེ། །རྣལ་འབྱོར་ཅན་རྣམས་དེ་ལྟར་ལྟ། །དེ་བཞིན་ཉིད་དུ་གསལ་བར་མཐོང་། །རང་བཞིན་ཡོངས་སུ་གྲུབ་པ་ནི། །ཆོས་རྣམས་ཆོས་ཉིད་དེ་ཡིན་ཏེ། །བརྟགས་པའི་དངོས་པོ་རང་བཞིན་དུ། །ཆོས་རྣམས་ཐམས་ཅད་མ་སྐྱེས་པ། །སྟོང་པ་ངོ་བོ་ཉིད་མེད་དེ། །ཡོད་

དང་མེད་པའི་ཕྱོགས་སྤངས་པ། །སྒྱུ་མ་རྨི་ལམ་རྣམས་དང་འདྲ། །དྲི་ཟའི་གྲོང་ཁྱེར་ལྟ་བུ་སྟེ། །སྐྲ་ཚོགས་རྣམས་དང་སྨིག་རྒྱུ་བཞིན། །དུ་བ་སྤྲིན་སྟུག་ལྟ་བུ་ནི། །མཚན་མ་ཚུལ་དང་དབྱིབས་རྣམས་ཀྱིས། །ཇི་ལྟར་མིང་དུ་འཇུག་པ་ཡི། །ཚིག་དང་ཡི་གེ་མང་པོ་དང་། །
མིང་རྣམས་མང་པོ་ལ་ཡང་སྟེ། །ཀུན་ཏུ་བརྟགས་པའི་རང་བཞིན་ཡིན། །གཞན་གྱི་དབང་ནི་དེ་ལས་གཞན། །ཡིད་དོན་དབང་པོ་འདུས་པ་ལས། །ས་བོན་ཀུན་ཅན་བག་ཆགས་དང་། །ཐ་དད་མ་ཡིན་སེམས་དང་བཅས། །རྣམ་པར་ཤེས་པ་ཀུན་ཏུ་འབྱུང་། །གཞན་གྱི་
དབང་གི་རང་བཞིན་ཡང་། །ཕན་ཚུན་སྟོབས་ཀྱི་རྒྱུ་ལས་སོ། །སོ་སོ་རང་རིག་ཤིན་ཏུ་ཕྲ། །མཐོང་བའི་ཆོས་ལ་གནས་པ་སྟེ། །རང་བཞིན་ཡོངས་སུ་རྫོགས་པ་འདི། །འཕགས་པ་རྣམས་ཀྱི་སྤྱོད་ཡུལ་ལོ། །འཕགས་པའི་རང་བཞིན་ཐུགས་ཆུད་པས། །སངས་རྒྱས་
རྣམས་དང་སངས་རྒྱས་སྲས། །རང་བཞིན་ཡོངས་སུ་རྫོགས་པ་ནི། །ཡང་དག་མཐའ་རུ་གཟིགས་པས་ན། །སྐྱེ་བ་ཟད་ཅེས་རྣམ་པར་གསུངས། །ཚངས་པའི་ལམ་ཡང་ནོན་ཆེས་སོ། །བྱས་ཀྱིས་བཟོད་ཡང་བྱ་བ་མེད། །ཕྱིན་ཆད་འབྱུང་བ་མེད་དོ་ཞེས། །སྡུག་བསྔལ་
ཀུན་ལས་རྣམ་པར་གྲོལ། །གཡོ་བ་ཐམས་ཅད་ཤིན་ཏུ་བྱུང་། །བག་ཆགས་མ་ལུས་བསྲེགས་པས་ན། །རྣམ་པར་རྟོག་པ་མི་འབྱུང་ཞིང་། །བདག་མེད་ཤིན་ཏུ་མཐོང་བ་ནི། །ཆོས་དང་གང་ཟག་བསྒྲགས་པ་སྟེ། །ས་བོན་རྣམས་དང་བྲལ་བས་ན། །སེམས་ཀྱི་ཚོགས་
རྣམས་མི་འཇུག་གོ། །ཐོག་མ་མེད་པའི་དུས་བསགས་པའི། །ཡིད་ཀྱི་གནས་ངན་ལེན་རྟོག་པའི། །སྤྲོས་པ་ཐམས་ཅད་མངོན་བསལ་བས། །མྱ་ངན་འདས་པ་ལྕགས་བསྲེགས་བཞིན། །ཇི་ལྟར་རབ་ཏུ་བསྲེགས་པའི་ལྕགས། །བསིལ་བར་གྱུར་ཀྱང་འཇིག་པ་མེད། །དེ་བཞིན་
གྲོལ་བ་ཐམས་ཅད་ཀྱང་། །མེ་ཟད་བཞིན་དུ་བསིལ་བ་ཡིན། །ཟག་པ་མེད་པའི་ཆོས་དབྱིངས་སུ། །ཞུགས་པ་སྟུག་པོའི་དཀྱིལ་འཁོར་ན། །རྒྱལ་བ་རྣམས་དང་རྒྱལ་སྲས་བཅས། །ཏིང་ངེ་འཛིན་ཀྱི་ཟས་གནས་པས། །མཉམ་པར་བཞག་ལ་མཉམ་བཞག་ཅིང་། །

མཐོང་བའི་ཆོས་ལ་བདེ་བར་གནས། །རྒྱལ་པོ་རྣལ་འབྱོར་ཅན་གྱི་ཡུལ། །རྣལ་འབྱོར་འདི་ཡིན་བརྩམ་པར་གྱིས། །དེ་སྟེ་རྒྱལ་སྲས་དགེ་བའི་གནས། །སྟུག་པོར་འགྲོ་བར་འདོད་ན་སྟེ། །སངས་རྒྱས་ཐམས་ཅད་བཞུགས་པའི་གནས། །ཞིང་གི་
མཆོག་ནི་སྟུག་པའོ། །དེ་ཕྱིར་རྒྱལ་པོ་དགེ་བར་རྩོམས། །རྒྱལ་པོ་རྣམས་ལའང་དགེ་བར་བགྱིས། །མིང་ནི་མཚན་མའི་མཐུ་ལས་བྱུང་། །མཚན་མ་རྐྱེན་ལས་བྱུང་བ་སྟེ། །མཚན་མ་ལས་ཀྱང་རྣམ་རྟོག་འབྱུང་། །གྲུབ་པ་རྣམས་ནི་མ་གཏོགས་པར། །རྫ་ལས་
སོགས་པ་དབང་པོའི་ཡུལ། །ཕུང་པོ་ཡོན་ཏན་ལྡན་པའི་རྣམས། །རྣམ་པར་རྟོག་པའི་མཚན་མ་འདི། །སྐྱེ་བ་ལ་ནི་རྒྱུ་ཡིན་ནོ། །ཁྱད་པར་བྱེད་པ་རྣམ་རྟོག་སྟེ། །གནས་ཀྱང་རྣམ་པར་ཤེས་པར་བྱེད། །འགྲོ་དང་མི་འགྲོ་འགྲོ་བ་ཡི། །གཏི་མུག་རྣམས་ཀྱང་ཤིན་ཏུ་
སྐྱེ། །རིང་པོ་ཐུང་ངུ་ཁ་དོག་དང་། །རྩུབ་པ་དག་དང་འཇམ་པའི་རྣམས། །སྒྲ་དང་དྲི་ལ་སོགས་པའི་ཡུལ། །མངར་དང་ཁ་དང་ཚ་བ་དང་། །ཡིད་ཀྱི་རྣམ་པར་ཤེས་པའི་ཡུལ། །ཇི་སྙེད་དགེ་དང་མི་དགེ་དང་། །འདུས་བྱས་ཆོས་དང་འདུས་མ་བྱས། །མྱ་ངན་འདས་
པ་ཡེ་ཤེས་ཡུལ། །སྐད་ཅིག་སྐད་ཅིག་རབ་ཏུ་འབྱུང་། །བྱུང་ཞིང་ཕྱིར་ཡང་ལྡོག་པ་སྟེ། །དེ་ནི་མགྱོགས་པར་ཤིན་ཏུ་འགྲོ། །རྣམ་པར་ཤེས་པ་རྒྱུ་ལས་བྱུང་། །ཡིད་དང་ཀུན་གཞི་རབ་འབྲེལ་བས། །ཁབ་ལོང་ལྟ་བུར་ཤིན་ཏུ་འཁོར། །ཁ་གཉིས་སྦྲུལ་ནི་ཇི་
བཞིན་པ། །ཡིད་ཀྱི་སྤྱོད་པ་དེ་བཞིན་ཏེ། །ཀུན་གཞི་རྣམ་ཤེས་ཡོག་པར་བྱེད། །གཅིག་ཏུ་འོན་ཀྱང་རབ་ཏུ་འབྱུང་། །ཡིད་ཀྱི་རྣམ་པར་ཤེས་དང་བཅས། །རྒྱུ་ཡི་དགོས་པ་བྱས་ནས་ལྡོག །བདག་ཏུ་དགོས་པའང་ཤིན་ཏུ་བྱེད། །བདག་གིར་བྱ་བའང་
འཕེལ་བར་བྱེད། །ལུས་ལ་དྲོད་ཀྱང་སྐྱེས་པ་སྟེ། །སྣ་ཚོགས་རྣམ་པར་རབ་ཏུ་སྤྱོད། །ཟས་དང་སྐོམ་དང་ལོངས་སྤྱོད་དང་། །གོས་དང་སྤོས་སོགས་རྣམ་སྤྱོད་དང་། །མཆོད་པ་དག་དང་རྒྱུག་པར་ཡང་། །མི་ཡི་ལུས་ནི་འཛིན་པ་ཡིན། །གར་དང་གད་མོ་རྩེད་མོ་དང་། །

ཡིད་ཀྱང་རྟག་ཏུ་བྱེད་པ་སྟེ། །སྐྲ་ཚོགས་མགལ་བ་བསྐོར་བ་དང་། །དྲི་ཟའི་གྲོང་ཁྱེར་རྨི་ལམ་དང་། །སྨིག་རྒྱུ་ལ་ཡང་དེ་བཞིན་དུ། །རྣམ་པར་རྟོག་པ་ཀུན་ཏུ་འཇུག །པྲ་བབ་ཀུན་ཏུ་འཁོར་བའི་སེམས། །བདག་སེམས་ཁོང་དུ་མི་ཆུད་པས། །ལུས་དང་སྣོད་ཀྱི་
རྣམ་པར་ཡང་། །ཕྱང་མོ་ཉུག་ལྟར་གནས་པའོ། །ཉམ་ཆུང་སྙིང་པོ་མེད་པ་སྟེ། །རྣམ་པར་རྟོག་པ་རྒྱུ་མེད་པ། །བདག་གིས་བརྟགས་པའི་དོན་ལ་སྤྱོད། །མཐོང་ནས་གནས་པ་གཟུགས་བརྙན་བཞིན། །རྒྱལ་པོ་རྣམ་ཤེས་ས་བོན་ནི། །ལྟ་བའི་ཡུལ་དུ་གཡོ་བ་སྟེ། །
བུས་པའི་ཚོགས་རྣམས་མྱོས་པར་བྱེད། །འཕགས་པ་མ་ཡིན་ས་ཡི་བདག །རྒྱལ་པོ་རྣམ་ཤེས་གསུམ་པོ་ཡི། །འཇུག་པ་རབ་ཏུ་བསྟན་པ་སྟེ། །འདི་རྣམས་དང་བྲལ་གྲུབ་པ་ཡི། །རང་བཞིན་ཡང་དག་ཉིད་ཡིན་ནོ། །བྱེ་བ་ཕྲག་ཞིང་ཇི་སྙེད་རྣམས། །ཤུགས་འཛིན་
གྱིས་ནི་མཐོང་བ་དང་། །འཕགས་པ་མཽད་གལ་བུ་ཡིས་ཀྱང་། །ལུས་དང་ལུས་ཆེ་མཛེས་པ་རྣམས། །དེ་དག་ལས་ནི་འདི་དག་འཕགས། །སྟུག་པོའི་ཞིང་ནའོ་ས་ཡི་བདག །ཐམས་ཅད་ཞིང་ན་ཅི་མཛེས་པ། །དེ་དག་དཔེའམ་ཆར་མི་རུང་། །བདེ་བ་ཡོད་དང་མངོན་
དགའ་དང་། །འོག་གི་ཞིང་རྣམས་བྱེ་བ་དག །དེ་དང་དེ་ན་གང་བཞུགས་པའི། །སངས་རྒྱས་དེ་དག་སྟུག་ལ་བསྟོད། །སྟུག་ཅེས་བྱ་ཡོད་སྔོན་མཐའ་མེད། །རང་བྱུང་འཕྲུལ་པ་དེ་ཡིན་ཏེ། །ཟག་པ་མེད་པའི་སངས་རྒྱས་སར། །འབྱུང་བ་གསུམ་ལས་འདས་ཏེ་གནས། །
དེ་ནི་བདེ་བ་ཉེར་ལེན་མེད། །ཁྱོད་དང་ང་ཡིར་སྤྱོད་དང་བྲལ། །ཐེར་ཟུག་མཆོག་ཏུ་རྟག་པ་སྟེ། །བརྟན་པ་སྟུག་པོར་འདུས་མ་བྱས། །ཡང་དག་སངས་རྒྱས་བྱང་ཆུབ་ཏུ། །འཚང་རྒྱ་འོག་མིན་གནས་མཆོག་ཏུ། །སངས་རྒྱས་མ་གྱུར་འདོད་ཁམས་སུ། །སངས་
རྒྱས་མཛད་པ་མི་མཛད་དེ། །དེ་དག་སྟུག་པོའི་ཞིང་གཤེགས་ནས། །སངས་རྒྱས་སྤྲུལ་པ་བྱེ་བ་ཡིས། །རྟག་ཏུ་རྣལ་འབྱོར་མཉམ་པར་བཞག །སྤྲུལ་པ་དག་དང་ཐབས་ཅིག་རོལ། །ཐམས་ཅད་ཞིང་དུ་ཟླ་བ་ལྟར། །གང་ལ་གང་གིས་དབང་འགྱུར་བ། །དེ་ལ་དེ་

ལྟར་འབྱུང་བ་སྟེ། །འཕྲུལ་པའི་སྤྲུལ་པ་དག་གིས་ཀྱང་། །ས་བཅུ་པ་ཡི་མདོ་མཆོག་དང་། །སྡོང་པོས་བརྒྱན་དང་དྲུ་མ་ཡི། །གང་ཡང་རྣམ་པར་སྤྲུལ་པའི་མདོ། །དཔལ་གྱི་ཕྲེང་བ་ལ་བཤད་དང་། །རྣམ་པར་སྣང་བའི་མདོ་སྡེ་དང་། །སྒྱུ་མ་དཔལ་
ལས་འགྲོ་བ་སོགས། །མདོ་སྡེ་རྣམ་པ་སྣ་ཚོགས་དག །སྟུག་པའི་རྒྱན་ནས་རྣམ་པར་བྱུང་། །སྟུག་པོའི་རྒྱན་གྱི་མདོ་སྡེ་འདི། །མདོ་སྡེ་ཀུན་ལས་འཕགས་པ་ཡིན། །རྒྱལ་པོ་འདི་ལ་རིམ་གྲོར་ཡང་། །རྒྱལ་པོ་རྣམས་དང་བཅས་པས་གྱིས། །གཟུགས་མེད་
འདོད་དང་གཟུགས་རྣམས་དང་། །འདུ་ཤེས་མེད་པ་དེ་བཞིན་ཏེ། །གནས་ལས་འདས་ཏེ་སངས་རྒྱས་དབང་། །བཞུགས་སོ་སྟུག་པོའི་དཀྱིལ་འཁོར་ན། །པད་མོ་འདྲ་བའི་གཞལ་མེད་ཁང་། །གཟུགས་མང་རྣམ་པ་སྣ་ཚོགས་ན། །ལྷ་རྫས་རྨད་ཀྱི་ཡེ་ཤེས་ཏེ། །
དེ་བཞིན་གཤེགས་པའི་རྣམ་དག་གིས། །རྣམ་གྲོལ་རྣལ་འབྱོར་ཅན་རྣམས་དང་། །དེ་ན་བཅོམ་ལྡན་ཐབས་ཅིག་བཞུགས། །སྟུག་པོའི་དཀྱིལ་བཞུགས་བསམ་གཏན་ཞུགས། །སངས་རྒྱས་ས་མཆོག་རྣམ་བཞི་ལ། །དེ་ན་བཞུགས་ཤིང་གཟུགས་འཛིན་པ། །
རྣལ་འབྱོར་མཁས་པ་ཉིད་ཚུལ་གྱིས། །དེ་ཡི་མཐའ་མ་མི་གཟིགས་པ། །གཟུགས་རྣམས་དང་ནི་ཡུལ་རྣམས་ཀྱི། །ཐུབ་པ་རྣལ་འབྱོར་མཁས་པའི་རྣམས། །གཟུགས་ཀྱི་རྣམ་པ་སྣ་ཚོགས་ཀྱང་། །སྟུག་པོའི་དཀྱིལ་ན་རྣམ་བཞུགས་ཤིང་། །ཐམས་ཅད་
རྣལ་འབྱོར་ཅན་གྱིས་བསྟན། །བ་བླ་གསེར་དང་ཟླ་འོད་ཙམ་པ་ཀ་དང་རྨ་བྱའི་མགྲིན་པ་པད་མོ་འདྲ། །དེ་ཡི་ས་ལ་བཞུགས་པའི་ལྷ་ཡི་ཡང་ལྷ་གཟུགས་ནི་རྣམ་པར་མཛེས་པ་སྟེ། །དེ་གཟུགས་ལྷ་རྒྱལ་གོ་པ་ཀ་དག་གློག་དང་འོལ་མ་བྱི་རུའི་འོད་བཞིན་དུ། །ལ་ལས་
བལ་ཆུང་སྐུ་དང་ན་བཟའ་ལོ་མ་རྩྭ་ལ་སོགས་པའི་མལ་བཞུགས་པར། །མཐོང་ངོ་ཉི་མ་སྟོང་ལྟར་ཤིན་ཏུ་རྣམ་པར་འབར་བའི་སྐུ་གཟུགས་མངའ་བ་ལ། །ཐུབ་ཅན་ལ་ལས་རྣལ་འབྱོར་དབང་ལ་སྟུག་དབུས་ཆུ་སྐྱེས་རེ་རེར་བཞུགས་པར་མཐོང་། །ཐུབ་པའི་ཐོར་ཚུགས་

ཚོགས་ནི་ལག་གིས་འགྲོ་ཡི་མགོ་བོ་གློད་པ་བཞིན་དུ་སྟེ། །ལ་ལར་གཟུགས་ནི་རྡོ་རྗེ་ཨནྡ་རྙིལ་གྱིས་སྤྲས་པའི་ཅོད་པན་བརྒྱན་པར་རོ། །ལ་ལས་ལ་ལར་ཐུབ་པ་དེ་ལ་འཁོར་ལོ་རི་མོ་ཉ་དུང་བཅས་པར་མཐོང་། །ལ་ལས་ཇི་ལྟར་ནམ་མཁའི་རྒྱུ་བའི་ལམ་ལ་འཇའ་ཟུག་བཞིན་
དུ་ཐུབ་པ་མཐོང་། །ལྷ་རྫས་ཕྱག་སོར་ཅན་གྱི་སྣ་ཚོགས་ཡུལ་ཅན་རི་རབ་ཕྱག་ཏུ་རབ་གཞོག་ཅིང་། །ཁམས་གསུམ་ཆུ་སྲིན་གནས་དང་ཆུ་གནས་དེ་བཞིན་བ་ལང་རྨིག་པར་ཤོང་བར་མཛད། །སྦྱིན་པའི་ཤུགས་ཀྱིས་མི་ཡི་བདག་པོའི་གཙུག་གི་ཅོད་པན་རྣམས་ཀྱིས་རབ་
མཆོད་ཅིང་། །ལ་ལ་དག་ན་རྒྱལ་དང་རྒྱལ་པོའི་འཁོར་ན་དགོས་པ་རྣམས་ན་མཁས་གྱུར་ཅིང་། །ཆད་པས་གཅོད་པར་སྣང་ངོ་སྟུག་པོའི་དབུས་ན་གཞན་དུ་རྣམ་པར་སྣང་བ་ནི། །ཐུབ་པ་རྣལ་འབྱོར་མཁས་པའི་ཡེ་ཤེས་རྣལ་འབྱོར་ཤིན་ཏུ་བྱེད་པ་རྣམས་ལ་སྟེ། །རང་གི་
ཡུལ་རྣམས་སྔོན་གྱི་རྒྱལ་བས་གསུངས་པ་དེ་དག་རྣལ་འབྱོར་གྱིས་སྟོན་ཅིང་། །ལ་ལས་གནས་དང་ལྟ་བ་ཡིད་དང་བློ་རྣམས་ཤིན་ཏུ་གཞན་དུ་གྱུར་པ་དང་། །དབང་དང་ཡེ་ཤེས་རྣམ་པ་སྣ་ཚོགས་ཏིང་ངེ་འཛིན་དང་ཡིད་བཞིན་སྐུ་མངའ་བར། །ལ་ལས་ཡུལ་ལ་ཆགས་
མེད་སྤྱོད་ཡུལ་རིག་པའི་བློ་ཡི་བྱ་བ་གཅོད་པར་ཏེ། །འདི་དང་གཞན་མེད་སྲེག་མེད་གྱུར་པས་ཚིག་བྱ་མེད་ཕྱིར་མྱ་ངན་འདས་པར་རོ། །སྣུམ་དང་འོད་འཕྲོ་མེད་པས་ཇི་ལྟར་འཇིག་རྟེན་འདི་ན་མེ་བཞིན་ཤིན་ཏུ་མྱ་ངན་འདས། །ལ་ལས་ཕ་རོལ་ཕྱིན་པའི་མཆོད་སྤྲིན་མཆོད་
བཅུག་མཆོད་སྦྱིན་བྱེད་པ་དག་ཏུ་སྟེ། །སྦྱིན་དང་མཆོད་དང་ཐུབ་པ་དག་ཀྱང་རྣམ་པ་ཚུལ་བཞིན་མཛད་པ་ཤིན་ཏུ་མཐོང་། །བདེ་བ་ཡོད་ཅེས་བྱ་བའི་ཞིང་མཆོག་དེ་ན་སྐྱེས་བུ་ཡོད་པ་དེ་དག་ནི། །མངལ་ནས་སྐྱེས་པ་མ་ཡིན་བདེ་བར་འབར་བའི་འོད་ཀྱི་དཀྱིལ་འཁོར་ཅན་
དག་སྟེ། །ལྷ་རྫས་གསེར་ལྟར་འབར་བ་ཟླ་བ་ལྟ་བུའི་ལུས་འཆང་རྣལ་འབྱོར་ཅན་གྱི་བདག །ལྷ་རྫས་འོད་བཟང་དེ་དང་གང་ཡང་མི་ནང་རྣལ་འབྱོར་ཅན་གྱི་དབང་པོའི་ཡུལ། །དེ་དག་བརྒྱ་ཆར་མི་ཕོད་རྣལ་འབྱོར་ཅན་གྱི་དབང