Kinh tạng Tây Tạng (Kangyur Đại Học) — 050_མདོ་སྡེ།_ཆ

་པོ་དག་གི་བདེ་དེ་ལ། །གཞན་དུ་བདག་ཅག་

ཉིད་ཀྱིས་བཤམས་པའི་ལོངས་སྤྱོད་པ་ཡི་ཞིང་གི་མེ་དེ་དག །མཐའ་ཡས་འོད་ཀྱི་བདེ་བ་ཅན་ན་རྒྱལ་བའི་སྲས་རྣམས་ལྷ་རྫས་འོད་འཁོར་ཅན། །རྣལ་འབྱོར་ཡང་དག་ཉིད་མོས་ཐུབ་དབང་ཁྱུ་མཆོག་བསམ་གཏན་བདུད་རྩི་མྱོང་བྱེད་དང་། །རྣམ་
པ་ཐ་དད་སྣ་ཚོགས་རིན་པོ་ཆེ་དག་ཡལ་ག་སྦྱངས་པའི་ནགས་ཚལ་ཤིང་། །ལྷ་རྫས་གསེར་ཕྱེའི་ཁམས་ལས་བསགས་པའི་ཞིང་གི་མཆོག་དེ་ཤིན་ཏུ་རྣམ་པར་མཛེས། །གསེར་དང་རིན་ཆེན་སྣ་ཚོགས་མེ་ཏོག་པད་མོ་དེ་ནི་མཆོག་ཏུ་རབ་ཏུ་བརྒྱན། །འདི་ནི་སངས་རྒྱས་
ཞིང་གི་གཏེར་ཡིན་དཔེ་མེད་དེ་ཀུན་མི་ཡང་པད་མོ་སྐྱེས། །ཐུབ་པ་དེ་ལ་དད་ཅིང་བསམ་གཏན་མཁས་ལ་སངས་རྒྱས་ལ་ནི་རབ་ཏུ་མོས། །བདག་གི་སྟོན་པ་ལ་ནི་བདག་བསྟན་ཡིད་ཅན་པད་མོ་དག་ལས་སྐྱེ་བ་སྟེ། །སངས་རྒྱས་ཞིང་གི་མཆོག་ན་གནས་པའི་མི་ནི་
བཟང་པོའི་མཚན་གྱིས་ཀུན་ནས་བརྒྱན། །དཔེ་བྱད་བཟང་པོ་བཅས་པས་རྨད་དུ་འབར་བའི་ལུས་ཅན་དཔལ་གྱི་བེའུ་དང་བཅས། །ཡོད་དང་མེད་པའི་རྣམ་རྟོག་རྟོག་པ་མེད་པས་དྲི་མེད་རྫུབ་པ་དག་གོ། །དེ་ལྟར་འདི་དག་རྣམ་པར་བསྟན་ནས་རྡོ་རྗེ་ཁྱུ་མཆོག་མཐེ་བོ་ཙམ་དུ་གྱུར།
སྲོ་མ་རྡུལ་ཕྲན་ཤིན་ཏུ་ཕྲ་བའི་སྐྲ་ཡི་བརྒྱ་ཆའི་གཟུགས་སུའང་དེ་བཞིན་གྱུར། །ལ་ལར་བདེ་གཤེགས་རང་རྒྱལ་ཉན་ཐོས་གཟུགས་དང་དེ་བཞིན་སྣ་ཚོགས་གཞན་དག་ཀྱང་། །གང་དང་གང་ལ་སེམས་ཀྱི་སྤྱོད་པ་ཇི་བཞིན་དེ་འདྲའི་གཟུགས་ཀྱི་ཁྱད་པར་དག །རྣལ་འབྱོར་
མཁས་པ་རྡོ་རྗེ་ཞེས་བྱས་ཚད་མེད་གཟུགས་ཀྱི་ཡུལ་དག་རྣམ་པར་སྤངས། །དེ་སྐད་བཤད་ནས་ཡང་སྨྲས་པ། །སྣ་ཚོགས་གཟུགས་ཅན་རྒྱལ་བའི་སྲས། །ས་རྣམས་དེ་བཞིན་དབང་རྣམས་དང་། །མ་ཉམས་མངོན་པར་ཤེས་པ་དང་། །སྒྱུ་མ་ལྟ་བུའི་ཏིང་འཛིན་དང་། །
དེ་ལྟར་ཡིད་བཞིན་ལུས་ཀྱང་སྟེ། །གཟུངས་དང་རྫུ་འཕྲུལ་རྐང་པ་དང་། །རྣམ་ཐར་ཐ་དད་ཡང་དག་རིག །སྟོབས་དང་འཇིགས་པ་མེད་པ་དང་། །ཕུང་པོ་ཁམས་རྣམས་ཟག་མེད་པ། །འདི་དག་གཞན་དུ་གྱུར་ནས་འཐོབ། །རྟག་པའི་སངས་རྒྱས་ས་ཡང་ངོ་། །ཆོས་

རྣམས་ལྔ་ཡི་རང་བཞིན་དང་། །རྣམ་པར་ཤེས་པ་བརྒྱད་རྣམས་དང་། །བདག་མེད་གཉིས་པོ་རབ་རྟོགས་ནས། །གཞན་དུ་འགྱུར་བ་འབྱུང་བར་འགྱུར། །ཡིད་བཞིན་ལུས་ནི་བཅུ་པོ་དག །སྒྱུ་མ་དཔའ་བར་འགྲོ་བས་བསྐོན། །མི་ཟད་སྨོན་ལམ་བཅུ་པོ་དང་། །
ལམ་གྱི་རྣམས་ཀྱིས་ཤིན་ཏུ་སྤྲུལ། །རྨི་ལམ་མེ་ལོང་གཟུགས་བརྙན་ནམ། །ཆུ་ཡི་ཟླ་བ་བཞིན་དུ་མཐོང་། །རྣལ་འབྱོར་ལམ་ལ་ཐུབ་པའི་རྣམས། །སངས་རྒྱས་ས་ལ་ཞུགས་པ་དང་། །རྒྱལ་བ་པད་མོའི་གདན་བཞུགས་པ། །རྒྱལ་བའི་སྲས་ཀྱིས་མདུན་
དུ་བྱས། །ཡོད་དང་མེད་པ་ཕྱོགས་བྲལ་བ། །རྡུལ་ཕྲན་རྣམ་པར་འཇིག་རྣམས་ཀྱིས། །དྲི་ཟ་གྲུབ་པའི་རྒྱལ་པོ་དང་། །ལྷ་ཡི་གནས་ན་འཁོད་པའི་ཚོགས། །རི་རབ་ས་ལ་འདོང་རྒྱུ་ཞིང་། །ནམ་མཁའི་དཀྱིལ་ནས་འདོད་སྤྱོད་ཀྱང་། །ཇི་ལྟར་སྣང་བར་མ་གྱུར་
པ། །དེ་བཞིན་རྒྱལ་སྲས་གཅེས་པའི་རྣམས། །རྣལ་འབྱོར་མེད་པས་མི་མཐོང་ངོ་། །རྣམ་པ་སྣ་ཚོགས་གཟུགས་དང་ལྡན། །ས་དང་ཞིང་རྣམས་བྱེ་བ་ན། །རྒྱལ་བ་མཆོད་ལ་མངོན་པར་མོས། །སྨོན་ལམ་དབང་ལ་གནས་པའི་རྣམས། །པད་མོའི་ཁང་པར་རབ་ཏུ་སྐྱེ། །
དབང་དང་བསམ་གཏན་སེམས་པ་དག །ཞིང་དང་ཞིང་དུ་མྱ་ངན་འདའ། །ཏིང་ངེ་འཛིན་ལས་སྐྱེས་པ་སྟོན། །ལྷུན་གྱིས་གྲུབ་པར་ཐམས་ཅད་དུ། །ཆུར་བྱུང་ཟླ་བ་འདྲ་བར་ཏེ། །ཉི་མ་ལྟ་བུར་ཁྱད་མེད་པ། །སྣང་བ་སེམས་ཅན་སྤྱོད་ཡུལ་དུ། །ཡང་དག་མཐའ་ལ་མི་རེག་
པར། །ཏིང་ངེ་འཛིན་ལ་རབ་ཏུ་ལྡོག །གྲུ་ལ་གནས་པའི་བུང་བ་དག །གང་ཆེན་མཚོ་ལ་འགྲོ་བ་བཞིན། །གང་དུ་གྲུ་འགྲོ་དེར་རྒྱུག་སྟེ། །དཔག་ཚད་ཤིན་ཏུ་མང་བར་ཡང་། །ཐུགས་རྗེས་ཉོན་མོངས་དམའ་བའི་ལུས། །སྡུག་བསྔལ་ཅན་གཟིགས་དེ་བཞིན་དུ། །དེ་
དག་འབྱུང་བ་རབ་ཏུ་སྟོན། །ཕྱིར་ལྡོག་བདག་མེད་པ་ཡང་སྟེ། །འཇིག་པ་དག་ཀྱང་རྣམ་མཁྱེན་ནས། །ཟད་པའི་དུས་སུ་མི་གནས་པ། །གཟུང་དང་འཛིན་གྱིས་འཕངས་པའི་རྣམས། །གཟུང་དང་འཛིན་ལ་སྤྱོད་པའི་རྣམས། །གཟུང་དང་འཛིན་གྱིས་བསྐྱེད་པས་ན། །མཚན་

མའི་གཞི་མེད་མཚན་ཉིད་མེད། །འཁོར་བའི་རྒྱུན་གྱིས་ཁྱེར་བའི་རྣམས། །ཡང་དང་ཡང་ཞིང་སྐྱེ་བ་ཡིན། །བཅགས་མེད་མཚོ་ཡི་གཏེར་གྱུར་ལ། །གཅིག་ལ་གཅིག་འཇུའི་སྤྲེའུ་ལྟར་ཡང་། །བྱེད་པ་གྲུ་ལ་གནས་ཀྱིས་མཐོང་། །འཇུ་བའི་གནས་དང་རྟེན་
མེད་པར། །དེ་བཞིན་རྒྱལ་བ་རྒྱལ་སྲས་རྣམས། །སྲེད་པས་རྣམ་པར་དཀྲུགས་པ་ཡི། །རྣམ་རྟོག་སྡུག་བསྔལ་གནས་པའི་རྣམས། །ས་ཡི་གནས་ནས་ཉོན་མོངས་ཕྱིར། །རབ་ཏུ་འབྱུང་དང་ཕྱིར་ལྡོག་དང་། །སྦྱིན་དང་མཆོད་པ་དག་ཀྱང་འབྱུང་། །འདི་འདྲ་རྣལ་འབྱོར་ཅན་གྱི་
ཆོས། །རྣམ་པ་སྣ་ཚོགས་བསྒོམ་པར་གྱིས།། །།འཕགས་པ་རྒྱན་སྟུག་པོ། བམ་པོ་གཉིས་པ། ཀུན་ཏུ་བཟང་པོ་མི་ཡི་བདག །གཟི་བརྗིད་ཆེན་པོ་སྣ་ཚོགས་གཟུགས། །བྱང་ཆུབ་སེམས་དཔའ་སེམས་དཔའ་ཆེས། །རྡོ་རྗེའི་སྙིང་པོ་ལ་སྨྲས་
པ། །འཐུན་པ་དག་ལ་དབང་བྱེད་དང་། །ལྷ་གནས་འཁོད་པ་གཞན་དག་དང་། །རིན་ཆེན་ཁང་པ་སྣ་ཚོགས་ན། །གང་ཡང་སྟུག་པོའི་དཀྱིལ་འཁོར་བའི། །རྒྱལ་སྲས་རྣལ་འབྱོར་ལྡན་པ་དག །གང་གིས་སྟུག་ཅེས་བྱ་ཐོས་ཏེ། །ཐོས་ནས་ནན་ཏན་བྱེད་པའི་རྣམས། །
གཞན་དུ་འགྱུར་ལ་གཞོལ་བ་དག །གཞན་དུ་འགྱུར་བའི་ཚུལ་ཐོས་ཤིང་། །ཏིང་འཛིན་དེ་ཡི་ཚུལ་སོང་བ། །སྟུག་པོར་རིང་པོར་མི་ཐོགས་འགྲོ། །སངས་རྒྱས་ཡང་དག་འགྲོ་ལ་མོས། །འགྲོ་བ་འཛིན་དང་ཤུགས་འཛིན་དང་། །འཇམ་དཔལ་རྣམ་པར་འཕྲུལ་པ་དང་།
མཐུ་ཆེན་འཕགས་པ་འཇིག་རྟེན་དབང་། །ཟླ་བ་ལ་སོགས་གཟུངས་དབང་རྒྱལ། །བློ་གྲོས་ཤིན་ཏུ་ཞི་བ་དང་། །ལྟེ་བ་རྡོ་རྗེ་རྣལ་འབྱོར་རིག །དྲུ་མ་ནམ་མཁའི་བདག་པོ་དང་། །ཕྱག་ན་རྡོ་རྗེ་བློ་ཆེན་དང་། །རྣལ་འབྱོར་ཅན་དང་རྒྱལ་སྲས་རྣམས། །གང་ཡང་བྱེ་བའི་ཞིང་དག་
ནས། །ཆོས་མཉན་ཕྱིར་ནི་འོངས་པའི་རྣམས། །སྟུག་པོའི་རྒྱན་ལ་གཞོལ་བ་དག །རྒྱལ་བ་མ་འོངས་མཐོང་ནས་ཀྱང་། །ཁོང་ནས་སྙིང་རྗེ་སྙིང་བརྩེ་སྟེ། །རྣལ་འབྱོར་ལྡན་ཅན་དབང་པོའི་གཙོ། །སྣ་ཚོགས་གཟུགས་ལ་རབ་ཏུ་སྨྲས། །རྣལ་འབྱོར་ཅན་གྱི་གཙོ་ལ་དྲིས། །

འཇིགས་མེད་རྡོ་རྗེ་སྙིང་པོ་ལ། །རིན་ཆེན་ཁང་པ་སྣ་ཚོགས་དང་། །དབང་སྒྱུར་ཁང་པ་བཟང་པོར་ཡང་། །ཇི་ལྟར་གང་གིས་སྣ་ཚོགས་བྱས། །སྣ་ཚོགས་གཟུགས་ཅན་ཁྱོད་ཀྱིས་སྨྲོས། །དངོས་པོ་ཀུན་གྱི་སྣ་ཚོགས་ཉིད། །འགྲོ་བ་དག་གི་ཡང་རབ་འབྱུང་། །རྫ་ལ་
སོགས་པའི་དངོས་པོ་དག །ཇི་ལྟར་ཆུ་འཇིམ་ཐལ་སྦྱར་ལས། །ལས་སུ་བྱ་བ་ཐམས་ཅད་བསྐྱེད། །འགྲོ་བ་འདི་དག་དེ་བཞིན་བྱས། །རྔ་དང་པི་བང་སྒྲ་ལ་སོགས། །ལས་སུ་བསྐྱོད་ལས་དབྱངས་འབྱིན་ཏེ། །དེ་བཞིན་འཇིག་རྟེན་འདི་ཡང་ཅི། །བསྐྱོད་པའི་ལས་ལས་
ཀུན་འབྱུང་ངམ། །རང་བཞིན་གསུམ་པོ་ཇི་བཞིན་དུ། །དངོས་པོ་གཅིག་ལ་ཀུན་ཏུ་གནས། །ས་རྣམས་འདི་ལྟར་ཐམས་ཅད་དུ། །དངོས་དང་དངོས་ལ་རབ་ཏུ་གནས། །དེ་བཞིན་འདི་དག་ཀུན་ཀྱང་ཅི། །དངོས་པོ་གཅིག་ལ་རབ་གནས་སམ། །གང་ཕྱིར་འདི་ལྟར་རྒྱན་དག་
སྣང་། །ཁམས་གསུམ་གཡོ་དང་མི་གཡོར་བཅས། །དགའ་ལྡན་མཚེ་མ་རབ་རྣམས་དང་། །དབང་སྒྱུར་རྣམས་ཀྱིས་བྱས་སམ་ཅི། །མིའམ་ཅི་དག་དུ་མ་དང་། །གྱ་ནོམ་སྣང་བས་བྱས་སམ་ཅི། །འོག་མིན་ཐོར་ཚུགས་ཅན་གྱིས་སམ། །འོན་ཏམ་གཟུགས་མེད་རྣམས་
ཀྱིས་བྱས། །ལྷ་རྣམས་བདག་པོ་ཐམས་ཅད་ཀྱིས། །གཅིག་ཏུ་འདུས་ཏེ་འདི་བྱས་སམ། །འཕྲུལ་པའི་སྤྲུལ་པ་དག་གིས་སམ། །རྒྱལ་བ་ཁྱུ་མཆོག་གིས་མཛད་དམ། །འོན་ཏམ་རྒྱལ་བ་རྒྱལ་སྲས་རྣམས། །ཞིང་གཞན་རྣམ་པར་བཞུགས་པས་སམ། །རྣལ་འབྱོར་ལ་
མཁས་རྣལ་འབྱོར་ཅན། །སངས་རྒྱས་ཞིང་དུ་བཞུགས་རྣམས་ཀྱིས། །ས་རྣམས་ཐམས་ཅད་བྱས་སམ་ཅི། །གང་ལ་ནོར་པ་རབ་ཏུ་གནས། །གང་འདི་ནོར་པ་སྣང་བ་དག །སྨིག་རྒྱུ་རྣམས་ལ་ཆུ་བཞིན་ཏེ། །རྫ་མའི་ཕྱོགས་ལ་ཡོན་ཏན་བཞིན། །འགྲོ་བ་གང་གི་ཕྱོགས་ལ་
གནས། །ཡོན་ཏན་མི་འབྲལ་ཡོན་ཏན་ཅན། །ཡོན་ཏན་མེད་དང་ཡོན་ཏན་གནས། །མ་ཡིན་ཕན་ཚུན་འབྲེལ་པས་ན། །ཡོན་ཏན་ཚོགས་སུ་རྣམ་པར་གནས། །ནོར་པ་སྣ་ཚོགས་དེ་བཞིན་དུ། །ག་ལའང་དེ་བཞིན་གནས་ཡིན་ནམ། །འགྲོ་བ་རྣམ་པ་སྣ་ཚོགས་རྣམས། །

ས་རྣམས་ལ་ནི་གང་སྣང་བ། །འོན་ཏམ་ཚངས་པས་ཕྱུང་བའམ། །འགྲོ་བ་མཐུ་བོ་ཆེ་ཡིས་སམ། །ཁྱུ་མཆོག་གིས་སམ་སྤུན་ཟས་སམ། །སེར་སྐྱ་ཡིས་སམ་རང་གིས་སམ། །གཅེས་པའི་རྐྱེན་གྱིས་བྱས་སམ་པ། །རང་བཞིན་གྱིས་སམ་དབང་
པོས་སམ། །དུས་དང་ཕྱོགས་ཀྱིས་བསྐྱེད་པའམ། །འོན་ཏམ་མ་རིག་སྲེད་པས་སམ། །ལྷ་ཡི་དྲང་སྲོང་ཐེ་ཙོམ་ཟ། །ལྷ་ཡི་ཚོགས་ཀྱང་དེ་བཞིན་ཏེ། །གྲུབ་དང་དྲི་ཟའི་རྒྱལ་པོ་རྣམས། །ས་ལ་གནས་པའི་རྣལ་འབྱོར་ཅན། །འོན་ཏམ་འདི་དག་མིག་འཕྲུལ་ལམ། །
འགྲོ་བ་དྲི་ཟ་འདྲ་ཞིག་གམ། །རྨི་ལམ་ཡིན་ནམ་སྨིག་རྒྱུ་འམ། །སྔོན་མེད་རྣམ་པར་རྟོག་ཡིན་ནམ། །གཟུང་དང་འཛིན་པའི་དངོས་པོར་ཡང་། །ཁ་གཉིས་སྦྲུལ་བཞིན་གནས་པའམ། །འོན་ཏམ་རང་བཞིན་འདི་མེད་དམ། །འཁྲུལ་འཁོར་རོ་ལངས་བཞིན་གནས་སམ། །
མགལ་པ་བསྐོར་བ་འདྲ་བའམ། །འོན་ཏམ་སྐྲ་ཡི་ཚོགས་ལྟ་བུའམ། །བྱེད་དང་ལས་ཀྱིས་མ་བྱས་ཤིང་། །དབང་པོ་ཀུ་བེ་རས་མ་བྱས། །མཆོད་སྦྱིན་སྦྱིན་བསྲེག་མཆོད་འབྲས་སམ། །སྨྲང་གི་གཞུང་གི་ལམ་གྱིས་སམ། །རྒྱུ་རྣམས་ཤིན་ཏུ་ཕལ་ཆེ་བས། །ནན་
ཏན་རྟག་པ་མ་ཡིན་ཏེ། །འགྲོ་བ་འཛིན་པ་མེད་པའང་མིན། །རྒྱུ་རྣམས་ཀྱི་ཡང་རྒྱུ་དག་སྟེ། །འགྲོ་བ་ངོ་བོ་ཉིད་ཀྱིས་གྲུབ། །ལས་ཀྱི་བག་ཆགས་རྣམས་ལས་བྱུང་། །རྣམ་ཤེས་བརྒྱད་པོའི་སྐྱེས་བུ་ནི། །ཀུན་གཞི་ཞེས་ཀྱང་བྱ་བ་སྟེ། །དེས་ནི་སྣ་ཚོགས་འདི་དག་ཀུན། །
རྫ་མའི་འཁྲུལ་འཁོར་བཞིན་དུ་བསྐོར། །ཏིལ་བཀྲུམ་ཏིལ་མར་ཇི་བཞིན་དུ། །ལན་ཚྭའི་ཚ་བྲོ་ཇི་ལྟ་བུར། །གཟུགས་ལ་མི་རྟག་ཉིད་ཇི་བཞིན། །སྐྱེས་བུ་འདི་ཡང་དེ་བཞིན་གནས། །ཇི་ལྟར་བསུང་ལ་སོགས་ལས་དྲི། །ཡོན་ཏན་རྣམས་ལ་ཡོན་ཏན་མཚན། །ཉི་ཟླ་གཉིས་
ཀྱི་འོད་ཟེར་བཞིན། །དེ་ལྟར་སྐྱེས་བུ་གནས་པ་ཡིན། །དགོས་དང་བྱེད་པ་མེད་པ་སྟེ། །ཡོད་དང་མེད་ཀྱི་ཕྱོགས་ཀྱིས་སྤངས། །གཅིག་དང་ཐ་དད་མེད་པ་སྟེ། །མུར་འདུག་ཕྱོགས་ཀྱིས་རྣམ་པར་སྤངས། །རྗེས་སུ་འགྲོ་བའི་ཤེས་པ་མེད། །ནམ་ཡང་རྣམ་པར་མི་བརྟག་སྟེ། །

གྲོལ་བའི་སོ་སོ་རང་རིག་པ། །སངས་རྒྱས་སར་སྐྱེས་ཐུབ་ཅན་གྱི། །གཟུང་དང་འཛིན་པ་མེད་པ་སྟེ། །སྔ་མེད་སེམས་དང་སེམས་བྱུང་གིས། །རྣམ་ཤེས་བརྒྱད་དང་བྲལ་བ་སྟེ། །ནམ་ཡང་རྣམ་པར་མི་བརྟག་པའོ། །དེ་ལ་གནས་པ་ཆུ་རླབས་བཞིན། །ཕན་ཚུན་མཚན་
ཉིད་ཐ་མི་དད། །འབྱུང་ཞིང་ཕྱིར་ཡང་ལྡོག་པ་སྟེ། །དེ་ཡི་ལྡན་པ་རིག་པ་མིན། །ཇི་ལྟར་ཐུབ་པའི་རྣལ་འབྱོར་དང་། །རྫུ་འཕྲུལ་ཅན་གྱི་རྫུ་འཕྲུལ་བཞིན། །མཉམ་པར་བཞག་པས་རབ་ཏུ་མཐོང་། །རྣལ་འབྱོར་འགྲོ་བ་གཞན་གྱིས་མིན། །དེ་བཞིན་འཇུག་པའི་རྣམ་ཤེས་
རྣམས། །དེ་དག་ཀུན་གཞི་ལྷན་ཅིག་གནས། །རྣལ་འབྱོར་ཅན་གྱིས་རྟག་ཏུ་མཐོང་། །སངས་རྒྱས་སངས་རྒྱས་སྲས་དེ་བཞིན། །དེས་ནི་འདི་དག་ཐམས་ཅད་ཀྱང་། །ཇི་ལྟར་ནོར་བུ་ཕུག་པ་རྣམས། །སྐུད་ལ་བརྒྱུས་དང་འཁོར་ལོ་བཞིན། །ལས་ཀྱི་རླུང་གིས་སྐོར་བྱེད་པ། །
ཇི་ལྟར་རྫ་མཁན་འཁོར་ལོ་དང་། །ལག་དང་ཐལ་སྦྱོར་བསྐོར་བ་ཡིས། །ཀུན་ཏུ་བསྐོར་ཅིང་སྣོད་བྱེད་པ། །ཡོན་ཏན་སྣ་ཚོགས་རྣམ་པར་ལྡན། །དེ་བཞིན་རྣམ་ཤེས་བརྒྱད་ཀྱི་མི། །ཁམས་ཀྱི་གཟུགས་བརྙན་ལྷན་ཅིག་ཏུ། །ས་ནི་རྣམ་པར་བྱེད་པ་སྟེ། །ཕྱི་ནང་རྒྱུ་བའི་འགྲོ་བ་
རྣམས། །གང་ལ་འཇིག་རྟེན་འདི་དག་ཀུན། །ནམ་མཁའི་སྐར་ཚོགས་ཇི་བཞིན་དུ། །གནས་ཤིང་རྣམ་པ་སྣ་ཚོགས་གནས། །རླུང་གི་རྟ་ཡིས་ཤིན་ཏུ་བསྐོར། །ཇི་ལྟར་མཁའ་ལ་བྱ་རྣམས་ཀྱི། །རྗེས་ནི་སྣང་བ་མ་ཡིན་ཏེ། །བར་སྣང་ཡོད་པ་མ་ཡིན་ནའང་། །བྱ་རྣམས་རྒྱུ་བའི་བྱེད་
པ་མེད། །དེ་བཞིན་རྣམ་པར་ཤེས་པའི་མི། །བདག་ཡོད་མ་ཡིན་གཞན་ཡོད་མིན། །རྣམ་དག་བར་སྣང་འདྲ་བ་དག །དབའ་རླབས་བཞིན་དུ་རབ་ཏུ་འབྱུང་། །བག་ཆགས་རྣམ་པའི་ཉེས་པ་ཡིས། །མི་ཆགས་པད་མོའི་ཟླ་བ་བཞིན། །པད་མོ་ལ་ནི་ཆུ་མེད་མིན། །ཆུ་ལ་ཟླ་གཟུགས་
མེད་པ་ཡང་། །ཆུ་སོང་ཟླ་བ་ཡོད་པ་སྟེ། །པད་མོའི་འདབ་ལ་དེ་བཞིན་ཆུ། །མིག་ལ་བུད་མེད་གཞོན་ནུ་དག །མིག་གིས་མཐོང་བ་ཇིར་མི་འགྱུར། །དེ་བཞིན་ཀུན་གཞི་རྣམ་པར་ཤེས། །ལས་རྣམས་ཅིག་ཅར་བྱེད་པ་སྟེ། །འགྲོ་བ་དག་གི་ལུས་ལ་ནི། །ཁྱབ་གནས་ས་བོན་ཀུན་

ཅན་ནོ། །སྟུག་པོའི་སྤྲིན་དང་འདྲ་བར་ཡང་། །ས་རྣམས་ཡོག་པར་ཤིན་ཏུ་གནས། །ཚེ་དང་རྣམ་ཤེས་ཀུན་ནས་ཡོག །དྲོད་ཀྱང་དེ་བཞིན་སྟོབས་ཆེན་གྱིས། །སྣ་ཚོགས་གཟུགས་ཀྱི་ལུས་ཅན་གྱི། །རྣམ་པ་སྣ་ཚོགས་གཟུགས་ཀྱང་སྟོན། །
རྫ་མཁན་ཇི་ལྟར་ས་སྣོད་ལ། །སྤྱོད་པ་ཇི་བཞིན་དེ་ལྟའོ། །བ་ལང་སོགས་པའི་རུ་མཐོང་ཞིང་། །བོང་བུ་རྭ་ནི་མེད་པ་སྟེ། །མ་མཐོང་བར་ནི་མེད་པ་མེད། །བ་ལང་རྭ་ཡི་མེད་པ་ཡང་། །ཕྱིན་ཅི་ལོག་ཏུ་དམིགས་པས་མེད། །ཕྱིན་ཅི་ལོག་ཏུ་མནར་སེམས་ལ། །ཤིན་ཏུ་ཕྲ་བའི་
རྡུལ་གཤིག་ན། །ཡོད་པ་དེ་དག་མེད་པར་འགྲོ། །མེད་པ་ཡོད་པའི་རྒྱུ་ལས་ཏེ། །མེད་པ་ཡོད་ཅེས་རྟོག་པ་ནི། །ཡོད་པ་མེད་ལས་བལྟོས་པ་སྟེ། །ཕན་ཚུན་ལྟོས་པའི་རྒྱུ་ལས་སོ། །བློ་དང་རྟོགས་བྱ་མེད་པ་སྟེ། །ཁོང་དུ་ཆུད་པ་སྐྱེ་བ་མེད། །མགལ་བའི་འཁོར་ལོ་
འཁོར་ལོ་མིན། །ཇི་ལྟར་སྐྲ་ཚོགས་མཐོང་བ་བཞིན། །དྲི་ཟའི་གྲོང་ཁྱེར་སྒྱུ་མ་དག །ཅི་ཞིག་མཐོང་ནས་འབྱུང་བ་བཞིན། །བློ་ཡི་འབྱུང་བ་རྒྱུ་མེད་པར། །ཡོད་པ་མ་ཡིན་རྣམ་རྟོག་པ། །རྟོགས་བྱ་རྣམ་པར་རྟོག་པས་བསྐྱེད། །ལུས་ཅན་རྣམས་ཀྱི་ཡིད་སྐྱེས་ཏེ། །མིང་དང་
འདུ་ཤེས་འབྲེལ་བ་དང་། །རང་བཞིན་གཉིས་ཀྱི་བག་ཆགས་ཀྱིས། །མི་ཡི་སེམས་ནི་རབ་ཏུ་འབྱུང་། །གྲུབ་པའི་དོན་ནི་མི་སྐྱེའོ། །ཐོག་མ་མེད་པའི་དུས་ན་བསགས། །གནས་ངན་ལེན་གྱི་ཡུལ་ལས་བྱུང་། །རབ་ཏུ་སྤྲོས་པས་བསྒོས་ཡིད་ལས། །སེམས་ཀྱི་ཚོགས་ནི་འབྱུང་
བར་འགྱུར། །གཟུང་དང་འཛིན་པའི་དངོས་པོར་ཡང་། །ཀུན་ཏུ་སྐྱེ་བ་མི་ཡི་སེམས། །རྫ་ལ་སོགས་པའི་གཟུགས་ཀྱི་དབྱིབས། །སྣང་བ་གཞན་ཡོད་མ་ཡིན་ཏེ། །འདི་དག་ཐམས་ཅད་བློ་ཙམ་པས། །རྟོགས་བྱའི་དངོས་པོ་ཡོད་པ་མིན། །བློ་དང་རྟོགས་བྱའི་དངོས་པོར་ནི། །
བདག་ཉིད་རབ་ཏུ་འཇུག་པ་སྟེ། །བྱིས་པ་རྣམས་ཀྱིས་མི་རིགས་པ། །བག་ཆགས་རྣམས་ཀྱིས་སེམས་མྱོས་རྣམས། །རྣམ་པ་བརྒྱད་དང་རྣམ་བདུན་དང་། །དུས་གཅིག་ཏུ་ཡང་འབྱུང་བར་འགྱུར། །སྔོན་མེད་བག་ཆགས་ལྡན་པས་ན། །ཀུན་གཞི་ས་བོན་ཐམས་ཅད་ཅན། །

རྒྱ་མཚོའི་དབའ་རླབས་ཇི་བཞིན་དུ། །རླུང་གི་རྐྱེན་གྱིས་བསྐྱོད་པ་ལྟར། །གར་བྱེད་ཅིང་ནི་རབ་ཏུ་འབྱུང་། །རྣམ་པར་རྒྱུན་ཀྱང་མི་འཆད་དོ། །བློ་ཡི་འོད་པ་དེ་བཞིན་རྟག །ཡུལ་དང་རེག་པས་བསྐུལ་བའི་ཕྱིར། །སྣ་ཚོགས་བདག་རྟོག་རྣམ་ཤེས་ཀྱིས། །བདག་ལ་
བདག་གིར་འཛིན་པར་བྱེད། །ཇི་ལྟར་ས་ལ་རྣམ་རྟོག་མེད། །འགྱུར་མེད་རྣམ་པ་སྣ་ཚོགས་གཟུགས། །དགོས་པའི་རྣམ་པར་གྱུར་པ་ནི། །དེ་འདྲ་ཀུན་གཞི་རྣམ་ཤེས་ལའོ། །ཇི་ལྟར་མི་ཞིག་ལག་པ་ཡིས། །རང་གི་ལུས་ལ་མཉེད་པ་དང་། །ཕྱོགས་ཀྱི་གླང་པོ་བདག་ལུས་
ལ། །བདག་གིས་སྣ་ཡིས་ཆུ་འཐོར་དང་། །ཇི་ལྟར་ཤེད་ཅན་ལ་ལ་དག །བདག་གི་ལུས་ལ་སོས་འདེབས་པ། །དེ་བཞིན་བློ་ནི་བརྟགས་དོན་ལ། །དོན་གཉིས་ཚུལ་དུ་འཇུག་པའོ། །བློ་ཡི་ཡུལ་དུ་བྱ་བ་འདི། །ཁམས་གསུམ་རྣམ་པར་ཁྱབ་པར་གནས། །ཕྱི་དང་ནང་གི་བྱ་
བར་ཡང་། །རྣལ་འབྱོར་མཁས་པས་མཐོང་བ་ཡིན། །སངས་རྒྱས་རྣམས་ཀྱིས་འདི་ཀུན་གཟིགས། །ས་ལ་ཇི་སྙེད་སྣང་བ་དག །རྣམ་པ་སྣ་ཚོགས་དབྱིབས་ཀྱི་གཟུགས། །ས་ལ་རྣམ་པ་སྣ་ཚོགས་སོ། །ཆོས་འདི་ཡང་དག་བཤད་པ་དང་། །རྡོ་རྗེ་སྙིང་པོ་འཇིགས་མེད་པ། །
མི་སྨྲའི་དངོས་ལ་དགར་གྱུར་ཏེ། །བསམ་གྱིས་མི་ཁྱབ་ཆོས་དབྱིངས་ཀྱི། །ལྷ་ཡི་བསམ་གཏན་མི་གཡོ་བ། །སངས་རྒྱས་སྤྱོད་ཡུལ་ཞུགས་པ་དང་། །སྟུག་པོ་ནས་ནི་འོངས་པའི་གཟུགས། །མཐོང་ནས་རྣལ་འབྱོར་ལམ་གནས་པ། །ཐུབ་པ་དེ་ཡི་ལྷ་རྫས་ལུས། །རྣལ་
འབྱོར་བཏང་སྟེ་ཡང་གནས་སོ། །འདོད་དང་གཟུགས་དང་གཟུགས་མེད་དང་། །འདུ་ཤེས་མེད་པའི་གནས་རྣམས་ཀྱི། །མུན་པའི་ཚོགས་ནས་ཕྱིར་བྱུང་སྟེ། །སྟུག་པོ་དེ་ནས་འདིར་འོངས་སོ། །སངས་རྒྱས་རྣམས་ཀྱི་བཞུགས་པའི་གནས། །སངས་རྒྱས་ཞིང་ནི་མཆོག་རབ་
ནས། །གཟུགས་ཀྱི་རྣམ་པ་དུ་མ་ཡི། །སངས་རྒྱས་སྐུ་ཡང་རྣམ་བྱུང་ནས། མི་ཡི་ཁམས་ན་རྣམ་པར་འཕྲུལ། །སུ་བློ་ཅི་འདོད་ཕན་པར་རོ། །སྟུག་པོ་ཡི་ནི་མིང་ཕྱུང་ནས། །རྒྱལ་བའི་སྲས་པོ་ཐམས་ཅད་ཀྱང་། །ཕན་ཚུན་གཅིག་ལ་གཅིག་བལྟས་ཏེ། །གཅིག་ལ་

གཅིག་ནི་རབ་སྨྲས་པ། །སྟུག་པོ་དྲི་མེད་བསོད་ནམས་ཏེ། །སྡིག་པ་ཐམས་ཅད་འཇིག་པར་བྱེད། །རྣལ་འབྱོར་ཅན་གྱི་གནས་ཀྱི་མཆོག །སངས་རྒྱས་ཞིང་གི་དམ་པ་ཕུལ། །ཡུ་བུས་དེ་ཡི་སྒྲ་ཐོས་ཏེ། །ཐོས་ནས་བདག་ཅག་དགའ་བའི་ཡིད། །སྟུག་པོ་རྣལ་
འབྱོར་ཅན་གནས་ཀྱི། །བརྟན་ལམ་བདག་ཅག་ཐོབ་པར་བྱ། །འོག་མིན་ཚངས་པ་ཐོར་ཚུགས་ཅན། །གཙང་མའི་གནས་ཀྱིས་རྣམ་སྤངས་པ། །ཞིང་གི་ངོ་མཚར་ལྟད་མོ་དང་། །སངས་རྒྱས་རྒྱལ་བའི་སྲས་ཀྱི་ཡབ། །ཚངས་པས་དེ་ཚེ་གསོལ་ནས་སུ། །གཙང་མའི་གནས་
ཀྱི་འཇིགས་མེད་རྣམས། །དེ་དག་ཐམས་ཅད་སེམས་པ་ནི། །ཚངས་པ་སྟུག་པོར་འགྲོ་མི་འགྲོ། །ཚངས་པ་རྣལ་འབྱོར་ཆེན་པོ་ཅན། །མུན་པས་དེ་དག་བསླད་པར་གྱུར། །ཐུབ་པ་མི་ཤེས་ཐུབ་རིག་གི། །ཇི་ལྟར་གནས་ནི་ཐོབ་པར་འགྱུར། །ཚངས་པ་དེ་ན་ཀུན་ཏུ་
སེམས། །བློ་ཡིས་ཚངས་པ་རིག་པའི་མཆོག །འདོད་དང་གཟུགས་ཀྱི་བདག་པོ་དག །རྒྱུ་བ་དེ་ན་མེད་པ་སྟེ། །ནམ་མཁའི་ཁང་པ་གནས་རྣམས་དང་། །འདུ་ཤེས་མེད་པ་དེ་བཞིན་ཏེ། །མུར་འདུག་གཞན་ལ་གྲགས་པ་ཡི། །རྣལ་འབྱོར་ཅན་རྣམས་དེར་མི་འགྲོ། །བདག་
གིས་བྱ་བ་བྱས་སམ་ཅི། །བསམས་ཏེ་འདིར་ཡང་འོངས་པར་གྱུར། །བདག་འགྲོའམ་བརྟན་ཞིང་རྟག་པ་ཡི། །ཐེར་ཟུག་འདུས་མ་བྱས་སྟུག་ཏུ། །གལ་ཏེ་ཡང་ན་ཐུབ་པ་སྟེ། །རྣལ་འབྱོར་མངའ་བ་ལྷའི་ཡང་ལྷའི། །མཐུ་ཡིས་རྣལ་འབྱོར་མཁྱེན་རྣམས་ཀྱི། །ཕོ་བྲང་
སྟུག་པོ་དེར་འགྲོ་འམ། །ཐུབ་པ་དེ་ལ་ཕྱག་འཚལ་ལོ། །དེ་སྐད་སྨྲས་ནས་ཐོར་ཚུགས་ཅན། །མཐོང་བ་ཤིན་ཏུ་འབར་བ་ཡི། །སངས་རྒྱས་ལམ་ན་བཞུགས་པ་རྣམས། །གསུངས་ཤིག་གསུངས་ཤིག་ཐུབ་པའི་རྣམས། །ཁྱེད་ལ་ཅི་འཚལ་ཅི་གྱིས་ཤིག །སངས་
རྒྱས་དབང་པོ་བཀའ་སྩལ་གསོལ། །སྟུག་པོ་ཇི་ལྟར་འཐོབ་པར་འགྱུར། །གཟུགས་ཡུལ་འདི་ལས་ཕྱིར་ལོག་ཤིག །དེར་འགྲོ་མེད་པ་གཟུགས་ཅན་རྣམས། །སྟུག་པོ་དེ་ནི་ཐུབ་ཆེན་ཡུལ། །བླ་ན་མེད་པའི་སངས་རྒྱས་ཞིང་། །འདུ་ཤེས་མེད་པས་མི་འཐོབ་སྟེ། །

དེ་བཞིན་འདོད་པའི་ཁམས་དབང་གི། །མུར་འདུག་གཞན་ན་གྲགས་པས་ཀྱང་། །རྣལ་འབྱོར་རིག་ལམ་སྟུག་མི་འཐོབ། །ཚངས་པ་ཉིད་ཀྱིས་དེ་གསུང་ཐོས། །མཆོད་སྦྱིན་གསོལ་བའི་ཞལ་ན་སྟེ། །དེ་ནི་དེ་ནས་ཕྱིར་ལོག་སྟེ། །ཚངས་པའི་གནས་སུ་ཡང་སོང་
ངོ་། །དེ་ཡི་ཕྱིར་ན་དེར་འགྲོ་བ། །ཚངས་པ་ཡིས་ཀྱང་མི་ཐོབ་པས། །གཟུགས་མེད་འདོད་དང་གཟུགས་ཅན་རྣམས། །དེར་འགྲོ་ཡོད་པ་ཡོང་མ་ཡིན། །ཅི་ཕྱིར་དད་པ་འདི་འདྲ་རྙེད། །སྟུག་པོའི་དཀྱིལ་འཁོར་མཐོང་བ་ཡང་། །རྣལ་འབྱོར་ཅན་གྱི་གནས་ཀྱི་མཆོག །
དེ་ཕྱིར་ངོ་མཚར་ཐོབ་པར་གྱུར། །སྒྱུ་མའི་ཏིང་ངེ་འཛིན་གྱི་ཡུལ། །རྣལ་འབྱོར་ཅན་གནས་སྟུག་པོ་དེ། །འདི་ནི་གཅིག་ནས་གཅིག་ཏུ་ཐོས། །དེ་ནས་བྱུང་བས་རྣམ་པར་བསྙད། །སྣ་ཚོགས་ཚིག་འདི་ཐོས་པ་ནི། །ཐུབ་ཅན་རྡོ་རྗེ་སྙིང་པོ་ཡི། །རྒྱལ་སྲས་ཁྱོད་ཀྱིས་སྨྲ་
བར་གྱིས། །རྒྱལ་བའི་སྲས་རྣམས་ཉན་པར་འདོད། །དབང་སྒྱུར་རྒྱལ་པོ་དེ་བཞིན་གྱིས། །གཟི་བརྗིད་ཆེན་པོ་མ་ཐོགས་ཤིག །མཚེ་མ་རབ་དང་དགའ་ལྡན་དང་། །གཙང་གནས་འཇིགས་པ་མེད་པའི་རྣམས། །ཐུབ་པའི་བཀའ་ནི་མ་ལུས་པར། །སྨྲ་བར་སུ་
ཞིག་ནུས་པ་ཡོད། །གཞན་དུ་ཁྱོད་དང་སངས་རྒྱས་རྣམས། །ཐུབ་ཆེན་ཐུབ་པ་བསྣམས་པ་དག །སངས་རྒྱས་ཡུལ་ནི་བསམ་མི་ཁྱབ། །མཆོག་གི་གཙོ་བོ་སངས་རྒྱས་ཀྱི། །རྣལ་འབྱོར་རྣལ་འབྱོར་མེད་པ་ལ། །སུ་ཡིས་ཇི་ལྟར་བསྟན་པར་ནུས། །མཚེ་མ་རབ་
དང་ཤུགས་འཛིན་དང་། །དབང་སྒྱུར་རྒྱལ་བའི་སྲས་པོ་དག །གཅིག་པའི་དབྱངས་སུ་ཡང་སྨྲས་ཏེ། །གསུངས་ཤིག་གསུངས་ཤིག་རྒྱལ་བའི་སྲས། །རྣམ་པར་འཕྲུལ་དང་འཇམ་དཔལ་དང་། །བྱམས་པ་མིའམ་ཅི་ཡི་བདག །རྣལ་འབྱོར་ཅན་གཞན་གང་དེ་ནི། །
དེ་དག་སྨྲ་བ་སྨྲོས་ཤིག་སྒྲོགས། །ནམ་མཁའ་ལས་ཀྱང་སྒྲ་བྱུང་སྟེ། །ལྷ་དང་སྔགས་འཆང་རྣམས་ཀྱིས་ཀྱང་། །དེ་ནས་ཤིན་ཏུ་རྔ་བརྡུངས་པ། །གསུངས་ཤིག་གསུངས་ཤིག་རྒྱལ་བའི་སྲས། །དེ་དག་དེ་སྐད་སྨྲ་བ་ན། །ཐོར་ཚུགས་ཅན་གྱི་ཚངས་པ་འོངས། །ས་

འཁོད་ཀུན་ལས་སྨྲས་པ་ནི། །སྟན་གྱི་མཆོག་ལ་འདུག་ནས་དེ། །ངོ་མཚར་ལྷ་རྫས་འདི་ཅི་ཞིག །ཐུབ་པ་རྣམས་ཀྱི་ཚོགས་འཁོར་ན། །རྣལ་འབྱོར་དབང་པོ་ཐམས་ཅད་དང་། །སློབ་མ་མཁས་པ་དེ་དག་ཀྱང་། །ཁྱུ་མཆོག་ཐུབ་ལ་འདྲི་བར་འདོད། །རྒྱལ་
སྲས་རྡོ་རྗེ་དབང་པོ་ལ། །སྐབས་འདི་ཇི་ཞིག་སུ་ཞིག་ལ། །རྒྱལ་བའི་སྲས་ཀྱིས་གསུངས་པ་ཡིན། །ཀུ་རུའི་བུ་དང་དི་ལི་པ། །འཁོར་ལོ་འཁོར་བ་མན་མཐའ་སྟེ། །ཡང་ན་ཡོ་བ་ན་ཤྭ་ལ། །ལྷ་རྫས་མི་ཡི་གཏམ་བརྗོད་དམ། །གཉི་བུ་ཨིག་ཤྭ་ཀུ་ལ་འམ། །དེ་བཞིན་
གཞུ་སྟོང་བདོག་པ་ལའམ། །འོན་ཏམ་གནས་སྲུང་པོ་ལའམ། །འཁོར་ལོ་འཁོར་བ་གཞན་དག་ལའམ། །འདོད་དང་གཟུགས་དང་གཟུགས་མེད་ལའམ། །འདུ་ཤེས་མེད་གནས་གནས་པ་ལའམ། །ནམ་མཁའ་མཐའ་ཡས་རྣམ་ཤེས་སམ། །འོན་ཏེ་ཅུང་ཟད་མེད་
པ་དག །ཐུབ་ཆེན་རང་སངས་རྒྱས་དག་ལའམ། །ཉན་ཐོས་རྒྱལ་བའི་སྲས་ལའམ། །སངས་རྒྱས་ས་ལ་ཞུགས་པ་ཡི། །རྒྱལ་དབང་རྣམས་ལ་གཏམ་འདིའམ། །འདི་ཅི་ལྷ་མིན་ལྷ་སྲས་སམ། །འོན་ཏེ་སྐར་མའི་དེ་བཞིན་ནམ། །ཇི་ལྟར་གྱུར་པ་ཁྱོད་ཀྱིས་གསུངས། །
བདག་ཅག་སློབ་མ་ཕྱོགས་སུ་ཉན། །བླ་མའི་ཚིག་ནི་ཐོས་ནས་ཀྱང་། །རྒྱལ་བའི་སྲས་པོ་ཐམས་ཅད་དག །ཕན་ཚུན་ཤིན་ཏུ་དཔྱོད་པར་བྱེད། །དེ་ཡི་ཏིང་འཛིན་འགྲོ་སོང་རྣམས། །རྒྱལ་བའི་སྲས་རྣམས་ཚིག་ཐོས་པ། །ཐོར་ཚུགས་ཅན་ལས་མངོན་དུ་སྟེ། །སློབ་མར་
བཅས་པར་ཉན་འདོད་པ། །གཙང་གནས་བདག་པོ་ཉིད་ཀྱང་ཡིན། །ཐར་ཟླ་བློ་གྲོས་མི་ཟད་དང་། །ནམ་མཁའི་དབང་པོ་འགྲོ་བ་འཛིན། །མཐུ་ཆེན་སྤྱན་རས་གཟིགས་དབང་དང་། །རྣལ་འབྱོར་ཤེས་པ་གཟུངས་ཀྱི་དབང་། །ལྷ་ཡི་ཅོད་པན་རྣལ་འབྱོར་དབང་། །གཙུག་ན་
རིན་ཆེན་བློ་གྲོས་ཤིང་། །ལག་ན་རྡོ་རྗེ་ཞི་བའི་བློ། །ལག་ན་རིན་ཆེན་བློ་ཆེན་དང་། །འདི་དག་རྒྱལ་སྲས་གཞན་དག་ཀྱང་། །བྱེ་བའི་ཞིང་རྣམས་ཀུན་ནས་འོངས། །རྡོ་རྗེའི་སྙིང་པོ་བློ་ཅན་ལ། །དེ་དག་ཀུན་གྱིས་རྣམ་བལྟས་ནས། །པད་མོའི་སྟན་ལ་འཁོད་པའི་རྣམས། །རྒྱལ་

བའི་སྲས་ལ་གསོལ་བ་འདེབས། །བློ་ཆེན་རབ་ཏུ་བཤད་པར་གྱིས། །རྒྱལ་བའི་སྲས་རྣམས་ཉན་པར་འདོད། །འདས་པ་དག་དང་མ་འོངས་ཚུལ། །ད་ལྟར་བྱུང་བའི་གང་ཚིག་ཀྱང་། །རྒྱུ་དང་དཔེ་ཡིས་རབ་གསལ་བར། །ཁྱོད་ཀྱི་ཞལ་ནས་བྱུང་བ་རྣམས། །
གདོན་མི་ཟ་བའི་ཚིག་འདི་ཡང་། །ཁྱོད་ཀྱིས་རྒྱལ་བ་དེ་ཞལ་ནས། །ཐམས་ཅད་མ་ལུས་ཐོས་པ་སྟེ། །སྐྱོན་མེད་དེ་བཞིན་གཤེགས་པའི་མཁྱེན། །ཏིང་འཛིན་དབང་སྒྱུར་རྒྱལ་པོ་ཡིས། །ཐམས་ཅད་བློ་གྲོས་རྣམ་བལྟས་ནས། །རྡོ་རྗེ་སྙིང་པོ་འཇིགས་མེད་ཀྱིས། །རྣལ་
འབྱོར་ཅན་ལ་ཚིག་སྨྲས་པ། །རྒྱལ་བའི་གསུང་རབ་མ་ལུས་པར། །སྨྲ་བར་སུས་ཀྱང་ནུས་པ་མེད། །དེ་ཡི་བྱིན་རླབས་མ་གཏོགས་པར། །སངས་རྒྱས་རྣམས་དང་རྒྱལ་སྲས་ཀྱི། །སངས་རྒྱས་ཀུན་ལ་ཕྱག་འཚལ་ཏེ། །སངས་རྒྱས་བྱིན་གྱིས་བརླབས་པ་དག །ནོར་
བུ་རིན་ཆེན་སྣ་ཚོགས་ཁང་། །དབང་སྒྱུར་གནས་བཟང་འཁོད་རྣམས་ལའང་། །ཡེ་ཤེས་དད་པས་སྨྲ་བར་བྱ། །སངས་རྒྱས་རིགས་བྱེད་ཚུལ་ཡིན་ཏེ། །ང་ལས་འདི་དག་ཐམས་ཅད་ཉོན། །དེ་བཞིན་གཤེགས་ཀྱི་ཡེ་ཤེས་དགེ། །རྒྱལ་པོ་རྣམས་ལ་གཏམ་འདི་མིན། །
མི་བདག་མཆོག་རྣམས་འདས་པ་ལའང་། །འདི་ནི་སངས་རྒྱས་རིགས་ཀྱི་གཏམ། །སྟུག་དཀྱིལ་ཕུན་སུམ་ཚོགས་རྣམས་ཀྱི། །རྣལ་འབྱོར་ཅན་གྱི་རྣལ་འབྱོར་ཡུལ། །སངས་རྒྱས་ཀུན་གྱི་ཕུན་སུམ་ཚོགས། །དེ་བཞིན་གཤེགས་ཀྱི་ཡེ་ཤེས་ཕྲ། །རྟོག་མེད་རྟོག་པ་
སྤངས་པ་སྟེ། །སོ་སོ་རང་རིག་མཁས་པའི་ཡུལ། །བརྗོད་པ་དང་ནི་རྣམ་པར་བྲལ། །དེ་ནི་སྨྲ་བར་དད་པ་མེད། །བདག་གིས་དེ་ཡི་མཐུ་ཐོས་པ། །ལྷ་རྫས་ཀྱི་ནི་ཡེ་ཤེས་དང་། །ཏིང་ངེ་འཛིན་གྱི་མེ་ཏོག་གིས། །རྫོགས་པའི་སངས་རྒྱས་གསུངས་པ་ནི། །སྟུག་པོའི་དཀྱིལ་
དུ་མཉམ་བཞག་པས། །ཐམས་ཅད་ཕྱོགས་ལས་རྣམ་གྲོལ་ཞིང་། །ཡོད་དང་མེད་པའི་ཕྱོགས་སྤངས་པ། །ཡོད་དང་མེད་པའི་ཕྱོགས་དང་བྲལ། །དབུ་མའི་ལམ་ནི་དགེ་བ་སྟེ། །གཞན་དུ་འགྱུར་བའི་ལྷ་རྫས་ཚུལ། །སངས་རྒྱས་ས་ལ་འཇུག་པར་བྱེད། །དབུ་མའི་

ལམ་པོ་དེ་ཉིད་ཀྱང་། །མཐའ་བཞི་རྣམ་པར་སྤངས་པ་སྟེ། །རྣམ་པར་རྟོག་མེད་དམིགས་མེད་པ། །སྟུག་ན་གནས་པས་ཤིན་ཏུ་མཐོང་། །ཐུབ་ཆེན་དེ་ཉིད་ལམ་ཤེས་པ། །བདག་མེད་ཡེ་ཤེས་མཁས་རྣམས་ཀྱིས། །བླ་མའི་ཚིག་འདི་ཐོས་པ་དང་། །
རྣལ་འབྱོར་ཅན་རྣམས་ཐམས་ཅད་ཀྱང་། །རྐང་པ་གཉིས་ལ་མཉམ་བཏུད་ནས། །རྡོ་རྗེ་ཞེས་ལ་སྨྲས་པ་ནི། །རྣལ་འབྱོར་ཅན་རྣམས་ཉན་པར་བརྩོན། །སྐོམ་པ་རྣམས་ནི་ཆུ་ཚོལ་བཞིན། །ཁྱོད་ཀྱི་ཞལ་ནས་བཏུང་འདོད་པ། །ཚིག་གི་སྦྲང་རྩི་བུང་བ་བཞིན། །རྣལ་འབྱོར་
དབང་པོ་ཡང་དག་གསུངས། །རྒྱལ་བའི་སྲས་རྣམས་ཤིན་ཏུ་ཉན། །རྣལ་འབྱོར་ཅན་རྣམས་རྣལ་འབྱོར་བློ། །ཡེ་ཤེས་དབང་པོ་འཕྲུལ་ཆེན་རྣམས། །ཞིང་གི་བདག་པོ་རྒྱལ་ཆེན་རྣམས། །རྣལ་འབྱོར་ལམ་ལ་རྟོག་བྱེད་པ། །བདེ་གཤེགས་བཀའ་ནི་ཉན་པར་རོ། །ཁྱོད་
ཀྱི་ཞལ་ནས་རྣམ་བྱུང་བ། །རྣམ་པ་སྣ་ཚོགས་དཀའ་བའི་སྒྲ། །ཁོང་དུ་ཆུད་བྱེད་མཚན་བཟང་དང་། །ཚངས་པའི་ཡང་དག་གཤེགས་པ་དང་། །དབང་པོའི་དོན་གྲགས་ཁྱད་པར་དུའོ། །སྣ་ཚོགས་ཐུབ་པ་དེ་ཡི་གསུང་། །སྒྲ་ཡི་དོན་ལ་མཁས་པ་ཡི། །དེ་ཕྱིར་བདག་ནི་སྨྲར་
མ་མོས། །བརྟག་བྱ་རྟོག་པ་རྣམ་པར་སྤངས། །བར་སྣང་རི་མོ་ཇི་བཞིན་དང་། །གྲིབ་མ་སྟོང་ལ་སོགས་པས་སྤངས། །དེ་སྟེ་སྣང་ན་རྨད་དུ་རུང་། །དེ་བཞིན་གཤེགས་པ་ཐུབ་པའི་བཀའ། །མཁའ་ལ་བྱ་རྗེས་ཇི་བཞིན་དུ། །བལྟ་བར་ཤིན་ཏུ་དཀོན་པ་བཞིན། །དེ་བཞིན་གཤེགས་
པ་ཐུབ་པའི་བཀའ། །དེ་ནི་བསྟན་པར་མི་ནུས་སོ། །ས་རྣམས་གསུམ་དུ་མཁས་པ་ཡིས། །དཔེ་ཡིས་ཀུན་ཏུ་རབ་བསྟན་གྱིས། །དཔེ་དང་བྲལ་བའི་དེ་བཞིན་ཉིད། །ཐུབ་པའི་ཞལ་ནས་རྣམ་པར་འབྱུང་། །དེ་ཡི་ཚིག་ལ་དཔེ་མེད་དེ། །རྨི་ལམ་ལྟ་བུར་བདག་ལ་སྣང་། །
རབ་རིབ་མགལ་བ་བསྐོར་བ་དང་། །སྐྲ་ཡི་ཚོགས་དང་དེ་བཞིན་འདྲ། །ཇི་ལྟར་སྒྱུ་མའི་གྲོང་ཁྱེར་དང་། །རླུང་ནི་ཤིན་ཏུ་བལྟ་དཀའ་དང་། །སྒྱུ་མ་སྨིག་རྒྱུ་འདྲ་བ་སྟེ། །རྣམ་རྟོག་གཉིས་པོ་རབ་ཏུ་སྤངས། །འོན་ཏམ་རྣལ་འབྱོར་སྣ་ཚོགས་པ། །ཐུབ་པའི་གསུང་ནི་དེ་བཞིན་ཏེ། །

བདག་གིས་རྣལ་འབྱོར་ཅན་དབུས་སུ། །བཤད་པར་དེ་ཕྱིར་དད་པ་མེད། །འདི་དག་ཐམས་ཅད་མཁས་པ་སྟེ། །དེ་བཞིན་ཉིད་བློ་ཤེས་པའི་རྣམས། །སངས་རྒྱས་སྤྱོད་ཡུལ་བསམ་ཡས་པ། །དེ་ཕྱིར་སྨྲ་བར་དད་པ་མེད། །འོན་ཀྱང་བརྗོད་དོ་ཐུབ་པའི་རྣལ་འབྱོར་གྱིས། །
དེ་རིང་བདག་ལས་ཉོན་ཅིག་རྒྱལ་སྲས་རྣམས། །སྣ་ཚོགས་ཚིག་གི་དོན་ལྡན་ཐུབ་པའི་བཀའ། །དཔེ་མེད་སེམས་དང་ཡིད་ལས་རྣམ་པར་འདས། །ཇི་ལྟར་བུང་བས་མེ་ཏོག་རོ་འཐུངས་ཤིང་། །ལྷག་མ་གཞན་དག་འཐུང་བར་བྱེད་བཞིན། །སྙིང་ཁུ་ཐུབ་པའི་མཆོག་
རྣམས་ཀྱིས་འཐུངས་ཏེ། །དེ་ཡི་འཐུངས་ལྷག་བདག་གིས་དེ་རིང་བཤད། །དེ་ནི་ཡིད་དང་ཚིག་གིས་ཀྱང་། །བསྟན་པར་ནུས་པ་མ་ཡིན་ལ། །ལྷ་ཡི་ལྷ་ཡི་ཡུལ་ཡིན་ཏེ། །མཁས་རྣམས་དགེ་བ་འཕེལ་བར་བྱེད། །མི་ཡི་གཟུགས་སུ་བྱས་ནས་སུ། །སངས་
རྒྱས་ཞེས་ནི་མཚན་ལྡན་པ། །ཅོད་པན་ཅན་དང་གཞན་ལ་སྣང་། །གཞལ་མེད་ཁང་གནས་གཞན་ལ་ཡང་། །འོད་ཀྱི་དཀྱིལ་འཁོར་འཁོར་ལོ་དང་། །མཚན་བཟང་རྣམ་པ་སྣ་ཚོགས་སུ། །ས་ལ་སྣ་ཚོགས་སྣང་བ་ནི། །མུར་འདུག་འདུས་པའི་དྲེགས་པ་སེལ། །
དུས་རྣམས་བཞི་པོ་ཐམས་ཅད་དུ། །སངས་རྒྱས་རྣམས་ཀྱི་དུས་དུས་ལ། །སྟུག་ན་བཞུགས་པས་དུས་སྤྲུལ་ཏེ། །རྣམ་པར་ཕྱེ་བ་རབ་ཏུ་མཛད། །བཟང་དུས་དེ་བཞིན་གསུམ་པ་དང་། །གཉིས་ཀྱི་ཕ་རོལ་དུས་ངན་དང་། །དེ་དག་དུ་ཡང་ཅི་དགོས་པ། །ས་ལ་ལུས་ཅན་
རྣམས་ཀྱིས་ཏེ། །ལྡན་པ་དེ་དག་ཐམས་ཅད་མཛད། །སྟུག་པོའི་དཀྱིལ་ན་བཞུགས་ཤིང་སྟེ། །སྟུག་པོ་དེ་ནི་དྲི་མེད་གནས། །སྦྱོར་ཆེན་རྣམས་ཀྱི་བདེ་བའི་གཞི། །ངན་དང་གཉིས་ཀྱི་ཕ་རོལ་མཚམས། །ཐུབ་པ་གཟུགས་ནི་རྣམ་བཟུང་ནས། །དྲི་མེད་སྟུག་ན་རྣལ་འབྱོར་
ལྡན། །ཟླ་བ་བཞིན་དུ་འགྲོ་ལ་སྣང་། །སྣ་ཚོགས་འགྲོ་བ་གང་ཤེས་ཀྱིས། །སྣ་ཚོགས་གཟུགས་སུ་མཛེས་པ་ནི། །གང་ལ་གང་སྣང་གང་གིས་ཀྱང་། །ཇི་ལྟར་གང་ལ་དེ་བདེ་བ། །དེ་དག་དེ་ལ་ཐམས་ཅད་དུ། །དེ་ཕྱིར་ཆ་ཡིས་མིག་ལ་གནས། །ཤེས་ཅན་ཡུལ་ཅན་

ཐུབ་པ་ནི། །རྣལ་འབྱོར་མཁྱེན་པ་ཤེས་པས་སྣང་། །དབང་པོ་ཆེ་གཟུགས་གཞན་དག་དང་། །འཇུག་འདོད་ཀྱི་དང་དེ་བཞིན་གཞན། །སེར་སྐྱ་ཡི་ཡང་གཟུགས་སུ་སྟེ། །ཐུབ་པ་ལ་ལར་མཁའ་བཞུགས་པ། །ཤེས་བྱེད་ཤེས་ལ་ཡང་དག་སྣང་། །ས་
ནད་ས་ནན་ད་ན་ལ། །ས་ནད་གཞོན་ནུ་མེ་དག་དང་། །སྒྲ་གཅན་མི་ཅི་མ་བུ་རུ། །ཨིག་ཤྭ་ཀུ་དང་ཟླ་བའི་རིགས། །ཐམས་ཅད་ས་ཡི་རྒྱལ་པོ་ལ། །ཐམས་ཅད་ས་ཡང་མཆོད་པ་སྟེ། །སྐུ་ནི་སུ་སུ་ཅི་འདོད་བཞིན། །ལ་ལར་མུར་འདུག་སྤྱོད་སྤྲུལ་ཏེ། །སྟོན་པ་འགྲོ་བ་རྣམས་
ཀྱིས་མཐོང་། །ཚུལ་གྱི་གཙུག་ལག་སྟོན་པར་ཡང་། །ཅི་བཞིན་རིགས་པར་རབ་སྟོན་ཅིང་། །རྡོ་རྗེ་དངུལ་དང་གསེར་དག་དང་། །ཟངས་དང་ལྕགས་ཀྱི་འབྱུང་ཁུངས་དང་། །རོ་ཉེ་ཞ་ཉེ་མུ་ཏིག་དང་། །པད་མ་རཱ་ག་ཨན་ད་རྙིལ། །བཻ་དཱུརྱ་དང་ཤེལ་དག་དང་། །ཨ་སྨ་
གར་བྷ་མུ་ས་ར། །ཚུལ་དང་བརྟགས་པ་ཐམས་ཅད་ལྡན། །མཁན་པོ་བླ་མ་ཀུན་འགྲོ་དང་། །གང་གིས་ལུས་ཅན་སུ་སུ་ཅིར། །ས་ལ་བདེ་བ་སྐྱེ་བ་བཞིན། །དེ་ལ་དེ་བདེ་ཐམས་ཅད་དུ། །ཐུབ་པའི་རྣལ་འབྱོར་རབ་ལས་བྱུང་། །ལྷ་ཡི་བུ་མོས་མི་སྤྱོད་དོ། །དེ་བཞིན་དྲི་ཟའི་བུད་
མེད་ཀྱིས། །འདོད་ཁམས་དབང་པོའི་བུད་མེད་དང་། །དེ་བཞིན་ཀླུ་ཡི་བུད་མེད་ཀྱིས། །མི་ཅི་ལྷ་མིན་བུ་མོ་དང་། །གནོད་སྦྱིན་བུ་མོས་དེ་བཞིན་ནོ། །དེ་ནི་འདོད་པའི་ཡུལ་ལས་རྒྱལ། །གཟུགས་ཅན་རྣམས་ཀྱི་ཡུལ་དེ་བཞིན། །ནམ་མཁའ་རྣམ་ཤེས་མཐའ་ཡས་དང་། །
ཅུང་ཟད་མེད་པའང་དེ་བཞིན་ཏེ། །འདུ་ཤེས་ཡོད་མིན་མ་ཡིན་གྱི། །གནས་ན་རྣམ་པར་རྨོངས་པ་མེད། །ཀུན་ཏུ་ལ་སོགས་འདི་དག་ལམ། །རྣལ་འབྱོར་ཅན་གྱི་འཆིང་བའི་དངོས། །མ་ཞི་མི་དགེ་གཞན་དག་ཀྱང་། །སྲོག་ཆགས་རྣམས་ཀྱི་ས་ཡོད་པ། །ལུས་ཅན་
རྣམས་ཀྱི་ལུས་ཀྱི་ཡུལ། །སྟུག་ན་གནས་ལ་སྟུག་ན་མེད། །ཞིང་དེ་དྲི་མེད་བསོད་ནམས་ཏེ། །སྟུག་པོ་སྙིང་པོ་ཤིན་ཏུ་མཛེས། །དེ་བཞིན་ཐར་པ་ཐར་ཤེས་ལ། །ཞིང་གི་ནང་ན་ཞིང་གི་མཆོག །སངས་རྒྱས་རྣམས་ཀྱི་ཞིང་རབ་སྟེ། །སྟུག་པོ་དེ་ནི་ཡུན་དུ་བརྟག །མངའ་

རྣམས་བཅུ་པོ་དེ་དག་དང་། །སྟོབས་དང་མངོན་མཁྱེན་ཏིང་ངེ་འཛིན། །ཡིད་ཀྱི་རྒྱུ་ལས་བྱུང་བའི་སྐུས། །སངས་རྒྱས་དེ་ན་རྣམ་པར་མཛེས། །ས་རྣམས་བཅུ་པོ་ཀུན་བསྒོམས་ཏེ། །རྣམ་ཐར་བདེན་པ་སྟོང་པ་ཉིད། །མཚན་མེད་སྨོན་པ་མེད་པ་དང་། །ཕ་རོལ་ཕྱིན་དྲུག་དེ་
བཞིན་ཏེ། །བསྒོམ་དང་སྦྱིན་དང་ཚུལ་ཁྲིམས་དང་། །ཤེས་རབ་རྣམས་ཀྱིས་དེ་སྐུ་འཐོབ། །ཡན་ལག་གཟུགས་ཀུན་མེ་ཏོག་གི། །འདུས་མ་བྱས་པ་སངས་རྒྱས་སྐུའོ། །རྟོག་མེད་རྟོག་དང་བྲལ་བ་སྟེ། །བདག་མེད་ཡིད་དང་དབང་པོ་རྣམས། །ཤེས་རབ་དབང་པོའི་སྒོར་ལྡན་
ཞིང་། །མཚན་གྱིས་ཀུན་ནས་ཤིན་ཏུ་བསགས། །སྦྱིན་དང་ཚུལ་ཁྲིམས་ལ་སོགས་ཀྱིས། །དཀར་པོའི་ལས་རྣམས་བྱས་པས་ན། །སངས་རྒྱས་སྐུ་ཡི་གནས་ཀྱི་མཆོག །སྟུག་པོའི་རིས་སུ་འཐོབ་པར་འགྱུར། །དེ་བཞིན་གཤེགས་པའི་ལྷ་རྫས་གནས། །ཉི་ཟླ་རྣམ་
པར་སྤངས་པ་སྟེ། །རྒྱུ་སྐར་སྐར་ཕྲན་སྣང་བ་དང་། །ཟླ་བ་དུས་དང་ལྟད་མོ་མེད། །རྣལ་འབྱོར་ཅན་གྱི་འོད་འཆར་དང་། །སངས་རྒྱས་རྣམས་ཀྱི་འོད་ཀྱིས་ཀྱང་། །ཀུན་ནས་བཟང་པོའི་སྟུག་པོ་དེ། །ཉི་མ་བཞིན་དུ་ཀུན་ནས་སྣང་། །དུས་ཀྱི་འབྲི་བ་དེ་ན་མེད། །ནད་རྣམས་གང་
ཡང་ཡོད་པ་མིན། །འཆི་རྒ་མེད་པའི་གནས་ཡིན་ཏེ། །སྟུག་པོ་དེ་ནི་ཞིང་གི་མཆོག །ཐམས་ཅད་གཟུགས་ལྡན་ཞི་བའི་གནས། །དྲི་མེད་མཐོང་བའི་ཚོགས་ཅན་གྱི། །སངས་རྒྱས་ཞིང་སྟུག་བསོད་ནམས་ཏེ། །ལྷ་རྣམས་ཀུན་གྱིས་སྨོན་པར་བྱ། །རྣལ་འབྱོར་ཅན་རྣམས་ཁྱད་པར་དུ། །
ས་དང་ས་ལ་གནས་པ་དག །སེམས་ཙམ་རང་བཞིན་དངོས་པོ་རྣམས། །གང་ཕྱིར་རབ་ཏུ་བསྟན་པས་ན། །ཡིད་དང་སེམས་དང་ཀུན་གཞིའི་ཚུལ། །རང་བཞིན་གསུམ་པོ་དེ་བཞིན་ཏེ། །ཆོས་ལ་བདག་མེད་རང་བཞིན་ཅན། །གནས་ནི་གཞན་དུ་འགྱུར་བ་སྟེ། །ལུས་ནི་ཤིན་ཏུ་
གནས་གྱུར་པས། །ཐུབ་པ་རྣམས་ནི་དེར་འདོང་སྟེ། །རྣལ་འབྱོར་ཅན་གྱི་གནས་ཀྱི་མཆོག །སྟུག་པོ་ཞིང་རབ་དམ་པར་རོ། །སྟུག་པོར་འཇུག་པ་ཞེས་བྱ་བ་སྟེ་ལེའུ་གསུམ་མོ།། །།ལུས་ནི་རྫས་དགུའི་རང་བཞིན་ཅན། །འདུས་བྱས་རྡུལ་ཕྲན་

ཚོགས་ཡིན་ཏེ། །ཡོན་ཏན་ཚོགས་ཀྱིས་རྣམ་སྣ་ཚོགས། །འབྱུང་དང་འབྱུང་གནས་ཚོགས་ཡིན་ཏེ། །ཁུ་ཆུ་ཁྲག་ལས་ཀུན་འབྱུང་བ། །སྔོན་མེད་རྣམ་པར་འཕེལ་བ་སྟེ། །སྟེང་གཟུགས་འོག་ཏུ་འགྲོ་བ་ཡིན། །སྡུག་བསྔལ་འཁྲུལ་འཁོར་ཐོག་མ་མེད། །
ལས་ཀྱི་རྣམ་པ་བརྒྱས་ཀྱང་གཡོགས། །དུག་གི་ཤིང་གི་ས་བཞིན་དུ། །དཔའ་དང་རྡུལ་གྱིས་དེ་བཞིན་དུ། །མུན་པས་ཀྱང་ནི་གསོས་པ་སྟེ། །ལམ་རྒྱུད་དོག་པར་ཤིན་ཏུ་འཕྱན། །དུས་ཀྱིས་བསྐུལ་ཅིང་རབ་ཏུ་སྐྱེ། །ཡོན་ཏན་ལས་ཀྱིས་འདའ་བ་ནི། །ཕྱུགས་དང་མི་ཡི་མངལ་
སྐྱེས་པས། །ཀླུ་དང་ཡི་དགས་ཤ་ཟ་དང་། །འབར་བ་ལྷ་ཡི་ནང་དུ་ཡང་། །སྐྱེ་འམ་ལྷ་མིན་འཇིག་རྟེན་ནམ། །སྔགས་འཆང་རིགས་སུ་དེ་བཞིན་ཏེ། །འོན་ཏམ་རྣལ་འབྱོར་ཅན་དབུས་སུ། །བསམ་གཏན་ཞིག་ཅིང་མངོན་སྐྱེ་བ། །འཁོར་ལོ་འཁོར་རིགས་དམ་པར་ཡང་། །བར་བར་དུ་ནི་སྐྱེ་
བར་འགྱུར། །སྐྱེས་ནས་རིག་པ་འཛིན་པ་ནི། །གང་ཚེ་དབང་པོ་འཕེལ་བ་ན། །སུ་ཡི་གང་གི་གང་ཚེ་ལས། །ལྷན་ཅིག་སྐྱེས་པ་རབ་བྱུང་ཞིང་། །ལྷན་ཅིག་སྐྱེས་པའི་ལས་ཚུལ་གྱིས། །ལམ་དང་ལམ་དུ་རབ་ཏུ་འཇུག །བརྟག་མེད་རྟོག་དང་བྲལ་བ་ཡི། །གང་ཚེ་ཆོས་ནི་མངོན་རྟོགས་
ན། །ཐར་པ་རྣམས་ཀྱི་ཐར་གསུམ་སྟེ། །ཡི་གེ་ཡི་གེ་མེད་བྱས་པའོ། །འབྱུང་བ་ཐམས་ཅད་རྒྱུ་ཡི་ཚོགས། །དེ་ནི་འོད་སྣང་མཆོག་ཡིན་ཏེ། །ཡང་དག་བླ་ནས་བླར་སྦྱངས་པ། །སྟུག་པོའི་དཀྱིལ་ན་རྣམ་པར་གནས། །བྱེ་བའི་ཞིང་དང་མཉམ་ལུས་ཀྱིས། །སྤྲུལ་པས་ཁྱབ་པར་
བྱས་ཤིང་གནས། །དེ་སྟེ་དེ་ཤེས་ཡོད་ན་ནི། །དོག་པའི་ལམ་ནས་འགྲོལ་བར་འགྱུར། །དེ་ལྟའི་སྐྱེས་བུ་སྐྱེས་པ་ནི། །ཁྱད་པར་ཤེས་ཞེས་རྣམ་པར་བརྗོད། །ལྷ་ཡི་ལྷ་ཡིས་ཡང་དག་གསུངས། །རྒྱལ་བའི་སྲས་ཀྱིས་མདུན་བྱས་ཤིང་། །མངལ་གྱི་སྐྱེ་བ་འབྱུང་བ་ནི། །བྱས་པ་
ཡིན་ནོ་མི་རྣམས་ཀྱི། །མ་རིག་སྲེད་དང་ལས་སྐྱེས་མིན། །ཉོན་མོངས་ལས་ལས་ཤིན་ཏུ་བྱུང་། །མཚན་མ་མེད་པ་མངོན་གྱུར་ཅིང་། །མཚན་མ་མེད་ལས་རབ་འདས་ཏེ། །ཡི་གེ་མེད་པ་དེ་བྱུང་ནས། །སྤྲོས་པ་ཐམས་ཅད་རབ་བྲལ་ཞིང་། །སྟུག་པོའི་དཀྱིལ་དུ་རབ་ཏུ་འགྲོ། །

དམིགས་ལས་སེམས་ཞིག་འགྱུར་བ་ནི། །རྣལ་འབྱོར་ཅན་གྱི་སྒྲ་རྨོངས་པས། །རྩེད་མོ་ལ་སོགས་ལྷ་རྫས་དང་། །མཐོ་རིས་བུད་མེད་བསྟེན་རྨོངས་ཀྱིས། །གང་ཚེ་ཐུབ་ཆེན་མ་འདུག་པ། །དེ་ཚེ་སེམས་ནི་འབྱུང་བ་སྟེ། །ལམ་ལས་བསྐྱོད་ཅེས་བྱ་བ་ཡི། །ཏིང་འཛིན་འདོད་
པའི་ཁམས་སྐྱེས་པ། །གཟུགས་དང་གཟུགས་མེད་འགྲོ་བ་ན། །ཏིང་ངེ་འཛིན་ནི་རབ་ཏུ་སྐྱེ། །སེམས་ཅན་འདུ་ཤེས་མེད་སོང་ན། །ཏིང་ངེ་འཛིན་ལས་བྲལ་བར་འགྱུར། །ནམ་མཁའ་རྣམ་ཤེས་མཐའ་ཡས་ཀྱི། །ཏིང་ངེ་འཛིན་ལ་དབང་མེད་འགྱུར། །རྒྱལ་བ་གང་ཚེ་ཐུབ་
དབང་གྱུར། །གཉིས་དང་བྲལ་བས་བྱང་བ་ཡི། །སེམས་ནི་མངོན་པར་མི་འབྱུང་ངོ་། །དེ་བདེན་དེ་ནི་རྣལ་འབྱོར་ཏེ། །བསམ་གཏན་པ་ཡི་བསམ་གཏན་ཡིན། །བསམ་གཏན་རྟག་ཏུ་བསམ་གཏན་བྱ། །དེ་སྟེ་སྟུག་དཀྱིལ་འདོད་ནའོ། །མངལ་གྱི་སྐྱེ་བ་འབྱུང་བ་ཞེས་བྱ་བ་
སྟེ་ལེའུ་བཞིའོ།། །།རྣམ་བརྒྱད་རྣམ་པ་དགུ་ཡི་སེམས། །མ་རིག་འཇིག་རྟེན་རྒྱུ་ཡིན་ཏེ། །འདི་ནི་སེམས་དང་སེམས་འབྱུང་མཐུ། །གང་གནས་རྣམ་པ་སྣ་ཚོགས་པའོ། །དེ་ཡི་མཐུས་ཀྱང་འཇུག་པ་ནི། །རྣམ་ཤེས་རྣམས་དང་དབང་པོ་རྣམས། །
མ་རིག་ལ་སོགས་རྣམ་པ་འདི། །རྩ་བའི་སེམས་ནི་བརྟན་གནས་པ། །ཡན་ལག་བཅུ་གཉིས་ཐམས་ཅད་དང་། །འབྱུང་བ་རྣམས་དང་འབྱུང་གནས་དང་། །ཡུལ་དང་དབང་པོ་འཇིག་རྟེན་དང་། །སྐད་ཅིག་འཇིག་པའི་རྒྱུ་ཡིན་ནོ། །ཐུབ་པ་ལྷ་ཡི་ལྷས་གསུངས་པ། །རྒྱུ་དང་
འབྲས་བུ་སྤངས་པ་སྟེ། །ཚངས་པའི་འཇིག་རྟེན་མཐར་ཐུག་གི། །འགྲོ་བ་དབང་པོར་བཅས་པ་འདི། །འཇིག་རྟེན་བཙལ་བས་མ་བསྐྱེད་དེ། །བདག་ཉིད་རྫ་མ་བཞིན་འཇིག་པ། །ནང་དང་ཕྱི་དག་རྟག་པར་ཏེ། །འགྲོ་བ་གནས་དང་གཡོ་བ་དག །ལྷ་ཡི་ལྷ་ཡི་ཡུལ་ཡིན་ཏེ། །
ས་ལ་སུས་ཀྱང་མི་མཐོང་བ། །མུར་འདུག་གྲགས་པ་གཞན་དག་སྟེ། །ཐུབ་གྲགས་མཚན་མ་ཅན་གྱིས་སོ། །ཕན་ཚུན་བཅིངས་པས་བཅིངས་པ་ནི། །སྲེད་པ་སྣ་ཚོགས་རྣམ་པས་ཏེ། །རྣམ་ཤེས་མྱུར་དུ་འགྲོ་བས་ན། །སེམས་ཀྱི་རྣམ་པར་མི་རྟོགས་སོ། །ལོ་སྟོང་མཐའ་

རུ་ཐུག་པ་ཡི། །མཆོད་སྦྱིན་རྣམས་ཀྱིས་ཚངས་པའི་ཐབས། །ཐོབ་ནས་སླར་དུ་ལྡོག་པ་ནི། །ས་མ་ཡ་རུ་རིགས་སེམས་པ། །འདོད་སྦྱོར་བཀག་སྲོག་འབྲས་བུ་དང་། །གང་ཡང་ཟླ་བའི་འབྲས་བུ་དང་། །མེར་གཞུག་པ་ཡི་འབྲས་བུ་དང་། །གང་གཞན་མཆོད་
སྦྱིན་འབྲས་བུ་དང་། །ཕྱུགས་བཅིང་བ་ཡི་འབྲས་བུ་ཡང་། །ཚངས་པའི་འཇིག་རྟེན་ནས་ལྡོག་གོ། །ཆོས་གསུམ་ཅན་གྱི་འགྲོ་བ་དག །ཅི་ཉེས་མི་རིག་ཐོར་ཚུགས་ཅན། །ཡོན་ཏན་གསུམ་གྱི་འབྲུ་འབྲེལ་བ། །ཆུ་སྐྱེས་བཞིན་དུ་སྙིང་པོ་མེད། །འདི་ཡིས་ཐར་པ་མི་རྙེད་པ། །
སྟུག་པོ་དེ་བཞིན་གཤེགས་པའི་གནས། །དེ་ནི་རྣལ་འབྱོར་གྱིས་འཐོབ་སྟེ། །སྟུག་པོ་རྣལ་འབྱོར་རིག་པའི་གནས། །དེ་བས་ཚུལ་གཅིག་ཚངས་པའི་བདག །རྣལ་འབྱོར་ཅན་རྣམས་འཇུག་བརྩོན་པར། །འདི་ལ་བདག་གཉེན་གང་དག་ཀྱང་། །སྐྱེ་ཞིང་འཆི་བ་ཡོད་མེད་
དེ། །མི་ཆོད་གཞིག་ཏུ་མེད་པ་ནི། །ལུས་ཅན་ཀུན་གྱི་རྣམ་པར་ཤེས། །བག་ཆགས་ཀྱིས་ནི་མི་གོས་པ། །སྔོན་མེད་དུས་ནས་བྱུང་བས་སོ། །ཡིད་ཀྱི་གནས་ངན་ལེན་བསགས་པའི། །སྤྲོས་པས་ཀྱང་ངོ་ཅིར་མི་འཇུག །ཇི་ལྟར་ལྷ་རྫས་ཆུ་སྐྱེས་དང་། །ནམ་མཁའ་ལ་ཡང་
ཕྱག་དར་དང་། །སྤྲིན་གྱི་དྲི་མས་ཉི་ཟླ་ལ། །དེ་བཞིན་མི་གོས་རྣལ་འབྱོར་ཅན། །མ་བཤོལ་རབ་ཏུ་བརྩོན་པར་གྱིས། །ཐམས་ཅད་སངས་རྒྱས་བྱིན་གྱིས་བརླབས། །རྣལ་འབྱོར་བདེ་གཤེགས་ལྷ་ཡི་རྫས། །རྣལ་འབྱོར་ཅན་གྱི་ཚུལ་སྐྱེད་པ། །ཚུལ་ཁྲིམས་ཅན་གྱི་
ཚུལ་འཐུངས་ཏེ། །ཡེ་ཤེས་ཅན་གྱིས་ཤེས་འཐུངས་ཤིང་། །མཆོག་གི་ཡེ་ཤེས་འཐུངས་ནས་ཀྱང་། །འཁོར་བ་ལས་ནི་འདའ་བར་གྱིས། །འདི་ལ་ཁམས་རྣམས་གང་ཡང་མེད། །ཕུང་པོ་ལྔ་དང་རྣམ་ཤེས་ཀྱང་། །མིང་དང་གཟུགས་དག་རྒྱུར་བྱས་ཤིང་། །ལུས་ཅན་
རྣམས་ཀྱི་ཡིད་ཀྱང་སྐྱེ། །ཇི་ལྟར་མེ་ནི་ཤིང་དབང་གིས། །འབར་ཏེ་འབར་བར་རྟོག་པ་མེད། །དེ་བཞིན་ཕུང་པོ་ཤིང་རྟ་སྟོང་། །ཅི་ཕྱིར་རྣལ་འབྱོར་འཇུག་མི་བྱ། །རི་དགས་སྲེད་དང་དྲི་ཟ་ཡི། །གནས་དང་སྒྲ་ཚོགས་སྣང་བ་རུ། །རི་དགས་བུས་པ་ལ་སོགས་མཐོང་། །ཡང་

དག་མ་ཡིན་ལྟས་བསླད་པས། །དེ་བཞིན་ཡུལ་ལས་བྱུང་བའི་སེམས། །ཁབ་ལོང་ལྟ་བུར་འཁོར་བ་སྟེ། །གང་ཡང་འདི་ལ་དངོས་མེད་པ། །འབྱུང་བ་རྣམས་དང་འབྱུང་བ་ཡི། །གཡོ་བ་དྲོ་བ་གཤེར་སྲ་བར། །བུས་པ་རྣམས་ནི་རྟག་ཏུ་རྟོག །འབྱུང་བ་སེམས་ཀྱི་ཚོགས་
ལས་ན། །ཅི་ཕྱིར་རྣལ་འབྱོར་འཇུག་མི་བྱ། །ཇི་ཙམ་མ་ཞིག་ལུས་ཡོད་དང་། །ཇི་ཙམ་དུ་ནི་བློ་འབྱུང་བ། །དེ་བར་རྣལ་འབྱོར་ཡེ་ཤེས་ལ། །མ་གཤོལ་བསམ་གཏན་རབ་ཏུ་གྱིས། །ཐམས་ཅད་སྒྱུ་མ་རྨི་ལམ་ལྟར། །འབྱུང་བ་གསུམ་ཀུན་རབ་ཏུ་ལྟོས། །སྨིག་རྒྱུ་
ཆུ་ཟླ་ལྟ་བུ་ན། །ཅི་ཕྱིར་རྣལ་འབྱོར་འཇུག་མི་བྱ། །ཇི་བཞིན་དྲི་ཟའི་གྲོང་ཁྱེར་ན། །འགྲོ་བའི་སྤྱོད་པ་རྣམ་པར་སྣང་། །དེ་བཞིན་ལུས་ལ་ཕུང་པོའི་སྤྱོད། །ཅི་ཕྱིར་རྣལ་འབྱོར་འཇུག་མི་བྱ། །རྨི་ལམ་དག་ན་འགྲོ་བའི་ཚོགས། །ཇི་ལྟར་རྨི་ལམ་རྨི་བས་མཐོང་། །དེ་བཞིན་ཕུང་
པོའི་གནས་ཡིན་ན། །ཅི་ཕྱིར་རྣལ་འབྱོར་འཇུག་མི་བྱ། །ས་འདི་ས་ལ་སོགས་པའི་ཚོགས། །འདུས་པ་རྡུལ་གྱི་ཕུང་པོ་ཡིན། །འདི་སེམས་སེམས་བྱུང་ཚོགས་ཡིན་པར། །རྒྱལ་བའི་སྲས་རྣམས་ཀུན་ལྟོས་ཤིག །འབྱུང་བ་ཆེན་པོ་བཞི་པོ་རྣམས། །ཕན་ཚུན་ཀུན་ནས་
འདུས་པ་སྟེ། །གདེག་པ་ལ་སོགས་ལྡན་པ་ཡིན། །ཅི་ཕྱིར་རྣལ་འབྱོར་འཇུག་མི་བྱ། །འདི་ནི་རླུང་དང་མཁྲིས་པས་མྱོས། །རོ་བསླབ་ལྟ་བུར་གནས་པ་སྟེ། །བྱེད་པ་གང་ཡང་ཡོད་པ་མིན། །ཅི་ཕྱིར་རྣལ་འབྱོར་འཇུག་མི་བྱ། །དབུ་བའི་གོང་བུ་ལྟ་བུ་ཀུན། །འགྲོ་བ་གནས་
ཤིང་གཡོ་བའི་རྣམས། །སྨིག་རྒྱུ་འདྲ་བའི་འདུ་ཤེས་སུ། །རྫ་ལ་སོགས་པ་ཤིན་ཏུ་རྟོགས། །ཚོར་བ་ཆུ་བུར་ལྟ་བུ་སྟེ། །བདེ་དང་མི་བདེར་རྟོག་པ་ཡིན། །ཆུ་ཤིང་འདྲ་བའི་འདུ་བྱེད་རྣམས། །ཞིག་པ་གྲུགས་པ་སྙིང་པོ་མེད། །རྣམ་པར་ཤེས་པ་སྒྱུ་མ་འདྲ། །དེ་ཡི་དངོས་
ལ་གནས་པ་མེད། །རྩྭ་ཤིང་གནས་པ་ཇི་བཞིན་ཏེ། །ཅི་ཕྱིར་རྣལ་འབྱོར་འཇུག་མི་བྱ། །འདི་ནི་རྨི་ལམ་རྣམ་མྱོས་འདི། །འདི་ནི་སྒྱུ་མ་བུས་པ་འདྲིད། །འདི་དག་ཐམས་ཅད་སྨིག་རྒྱུ་སྟེ། །དེ་བཞིན་དྲི་ཟའི་གྲོང་ཁྱེར་རོ། །གང་རྒྱན་འདི་དག་སྣང་བ་ཡི། །ཁམས་གསུམ་འགྲོ་དང་

མི་འགྲོ་བ། །དེ་ཀུན་བློ་ཡིས་རྟོགས་བྱ་བ། །འཇིགས་མེད་རྒྱལ་བའི་སྲས་རྣམས་ཀྱིས། །ཉེས་པའི་རྒྱུ་ནི་རྩྭ་དང་བཅས། །ཡེ་ཤེས་མེ་ཡིས་རབ་བསྲེགས་ན། །ལྷ་རྫས་བདེ་བ་ཡོད་པར་འགྲོ། །རྣལ་འབྱོར་ཅན་གནས་སྟུག་པོར་ཡང་། །འཇིགས་མེད་འདི་ནི་མཚན་
མ་མེད། །མཚན་མ་བཅིངས་པའི་ངོ་བོ་ཅན། །མཚན་མ་མེད་པ་རྟག་ཏུ་བདེ། །མཚན་མ་སེམས་ཀྱི་སྤྱོད་ཡུལ་ལོ། །སེམས་ཀྱི་སྤྱོད་ཡུལ་བདེན་པ་མིན། །བདེན་པ་བློ་གྲོས་སྤྱོད་ཡུལ་ཏེ། །སེམས་ནི་ཤེས་རབ་སྤྱོད་ཡུལ་ཏེ། །མཚན་མར་གནས་པ་མེད་པའོ། །ཀྱེ་མ་
མཚན་མ་འདི་ཀུན་ཡིན། །གནས་གསུམ་ཚངས་པར་བསྒྲགས་པ་སྟེ། །མཚན་མ་མིང་དང་ཡུལ་རྣམས་དང་། །སྒྲ་ལ་སོགས་པ་ཀུན་བརྗོད་པའོ། །དབང་པོ་ཀུན་གྱི་ཡུལ་རྣམས་ནི། །ལུས་ཅན་རྣམས་ཀྱི་འཆིང་བའི་རྒྱུ། །འཆིང་བར་བྱ་དང་འཆིང་དང་རྒྱུ། །གང་འགྲོལ་གང་
གིས་འགྲོལ་བ་དང་། །ཐར་དང་ཐར་པའི་བདེ་བ་དང་། །མཐོང་བའི་ཆོས་ལ་གནས་པ་དང་། །བདག་མེད་པ་རུ་ཤེས་ཉིད་ཀྱང་། །འདོད་ཆགས་བཅོམ་པར་གྱུར་པ་ནའོ། །དེ་ནས་མི་བདག་རིན་ཆེན་གཙུག །བློ་ཆེན་བྱང་ཆུབ་སེམས་དཔའ་ཡིས། །རྣལ་འབྱོར་ཅན་ཀུན་དབང་ལ་
སྨྲས། །རྡོ་རྗེའི་སྙིང་པོ་འཇིགས་མེད་ལ། །བྱེ་བའི་ཞིང་རྣམས་ཐམས་ཅད་ལ། །རྒྱལ་སྲས་ཁྱོད་ནི་བརྩོན་པ་སྟེ། །རྒྱལ་བ་རྣམས་ལ་ཁྱོད་ཚད་དེ། །རྣལ་འབྱོར་ཅན་ལ་ཉེ་བར་གནས། །རྣལ་འབྱོར་ཐེ་ཚོམ་བཅད་པ་སྟེ། །དཔེ་རྣམས་གྲུབ་པར་བྱ་བའི་ཕྱིར། །བརྟག་བྱ་ཡན་ལག་
ཐམས་ཅད་དག །ལུས་ཅན་རྣམས་ཀྱི་ལུས་སྐྱེས་པ། །ཚུལ་ནི་སྒྲ་ཡིས་བརྗོད་པར་མཛད། །ཚིག་ཏུ་བརྗོད་པར་ཅིར་མི་བགྱི། །གནད་དང་ཟུང་གིས་རྣམ་པར་མཛོད། །མི་ཟིན་པ་ཡི་རྒྱུ་རྣམས་དང་། །བགབ་ཟུངས་ནོར་གྱིས་གཞོམ་པར་གྱིས། །
ཕུང་པོའི་རྒྱུ་རྣམས་བསལ་བར་མཛོད། །ཡང་དག་འགྱུར་བ་མེད་པ་དང་། །དགེ་བ་ཡིས་ཀྱང་མཁས་པས་སོ། །རིང་པོ་མི་ཐོགས་ཐར་པ་འཐོབ། །ཕུང་པོའི་རྒྱུ་རྣམས་བསྲེགས་ནས་སུ། །ཆོས་མིན་ཆོས་ཀྱི་ཚེ་འབྱུང་སྟེ། །འདི་དང་གཞན་དུའང་འཐོབ་པར་འགྱུར། །ཤེས་པས་སྡུག་

བསྔལ་རྣམས་ལས་འགྲོལ། །སྲེད་པ་ཡིས་ནི་རྟག་ཏུ་བཅིངས། །མི་ཤེས་ལས་དང་སྲེད་པ་ཡིས། །ལུས་ཅན་རྒྱ་ཆེར་ཤིན་ཏུ་བྱས། །གཟུགས་དང་སྣང་བ་ཡིད་བྱེད་དང་། །རྣམ་ཤེས་ཡུལ་ལ་མངོན་གྱུར་པས། །མྱུར་ཕྱིར་ཁོང་དུ་མི་ཆུད་པ། །སྤྱོད་ཡུལ་དུ་ནི་སེམས་རྒྱུ་བའོ། །
ཡིད་སྔོན་འགྲོ་བ་ཆོས་རྣམས་ཏེ། །ལུས་ཅན་ཀུན་གྱི་དེ་བཞིན་ནོ། །ཡིད་འགྲོ་ཡིད་ནི་གཅེས་པ་དག །ཡིད་དུ་འོང་བས་ཅིར་མི་བཤད། །གང་དང་གང་གི་རྫས་ཀྱིས་སུ། །མི་རྣམས་སྟུག་པོར་འགྲུབ་པ་ཡི། །དེས་ནི་དེ་ཡི་དངོས་འགྱུར་བ། །སྣ་ཚོགས་གཟུགས་ཀྱི་ནོར་བུ་བཞིན། །
ཇི་ལྟར་ནོར་བུ་སྣ་ཚོགས་གཟུགས། །ཚོན་དང་འབྱོར་ན་རྣམ་པར་མཛེས། །རྣལ་འབྱོར་ཅན་དབུས་ཁྱོད་དེ་བཞིན། །དེ་བཞིན་གཤེགས་གཟུགས་སྣ་ཚོགས་ཀྱིས། །དབང་སྒྱུར་ཕོ་བྲང་དགེ་བ་ན། །ཐམས་ཅད་དག་ན་སྣང་བ་ནི། །རྒྱལ་བའི་སྲས་ཀྱི་མདུན་དུ་བྱས། །མྱ་ངན་འདའ་དང་
མྱ་ངན་འདས། །སྟུག་པོ་མཐར་མཆོག་ཡེ་ཤེས་ཏེ། །ཆོས་ཀྱི་དབྱིངས་དང་རྫུ་འཕྲུལ་ཡང་། །སྟུག་དེ་རྣལ་འབྱོར་ཅན་གྱི་གནས། །དེ་ནི་མཚོན་གྱིས་མི་ཆོད་དེ། །དེ་ནི་མེས་ཀྱང་མི་ཚིག་པ། །མི་ཆོད་པ་དང་མི་ཕྱེད་པ། །དེ་ནི་ཡུལ་གནས་རྟག་པའོ། །དེ་ནི་ཆུས་ཀྱང་མི་གཤེར་ཏེ། །
རླུང་གིས་ཀྱང་ནི་མི་སྐམ་མོ། །དེ་ནི་རྫ་ལྟར་འཇིག་པ་དང་། །ནན་ཏན་བྱ་རྗེས་བྱུང་བ་མིན། །རྟག་པ་བརྟན་པ་མི་འཇིག་པ། །སྐྱེ་ཅན་ཀུན་གྱི་རྣམ་པར་ཤེས། །རྒྱུ་ཡིས་སུན་དབྱུང་མ་ཡིན་པ། །འདྲ་དང་མི་འདྲ་རྣམས་ཀྱིས་ཏེ། །དམ་བཅས་ཡན་ལག་རྣམས་ཀྱི་ཡང་། །མཐའ་མ་
ཐུག་པ་མེད་པར་འགྱུར། །དམ་བཅས་པ་ཡི་དམ་བཅའ་དང་། །རྒྱུ་ཡི་ཁྱད་པར་རྒྱུ་དག་སྟེ། །དེ་བས་དེ་ལ་རྒལ་དུ་མེད། །རྟོག་པ་ཅན་གྱི་སྤྱོད་ཡུལ་མིན། །རྣམ་པར་ཤེས་པ་གཞན་གྱུར་ན། །དེ་ནི་སྟུག་པོ་སེམས་སྤངས་པའོ། །རྟོག་ཅན་རྣམས་ཀྱི་ཡུལ་མ་ཡིན། །དེ་
བཞིན་གཤེགས་པའི་ཕོ་བྲང་སྟུག །མ་སྐྱེས་སྔོན་དང་ཐ་མ་མེད། །ལྷུན་གྱིས་གྲུབ་པའི་སྟོབས་ལས་བྱུང་། །རྒྱུ་མེད་པ་དང་ལས་སྐྱེས་མིན། །དབང་པོ་ཆེན་པོས་བྱས་པའང་མིན། །གཟུགས་མེད་གཟུགས་དང་འདོད་པ་ལས། །ཡང་དག་འདས་ཏེ་གནས་པ་ཡིན། །

འདོད་པའི་ཁམས་ལས་འདས་ནས་སུ། །གཟུགས་དང་གཟུགས་མེད་འདུ་ཤེས་མེད། །མུན་པའི་རྒྱུ་ལས་རབ་འདས་ནས། །སྟུག་པོའི་ཞིང་ནི་རྣམ་པར་མཛེས། །ཕྱོགས་འདི་མཁའ་ལས་གྲུབ་པ་སྟེ། །རྒྱུ་ཅན་རྣམས་ཀྱི་སྤྱོད་ཡུལ་མིན། །ཡོད་དང་
མེད་པའི་ཕྱོགས་དང་བྲལ། །གཅིག་དང་གཞན་པ་སྤངས་པའོ། །གཅེས་པ་དང་ནི་རང་བཞིན་མིན། །འདོད་རྒྱལ་དང་ཡང་དབང་པོ་མིན། །ཁྱུ་མཆོག་གི་ཡང་ཕྱོགས་མ་ཡིན། །དེ་བཞིན་རིག་ཅན་གསུམ་གྱི་ཡང་། །རྡུལ་གྱི་རྐྱེན་ལས་བྱུང་མ་ཡིན། །སྒྲ་རྣམས་ཀྱིས་ཀྱང་
བརྗོད་དུ་མེད། །ངོ་བོ་ཉིད་ཀྱིས་བསྐྱེད་པ་མིན། །འདོད་རྒྱལ་གྱིས་ཀྱང་མི་རྙེད་དོ། །མ་རིག་ལས་དང་སྲེད་པས་མིན། །མི་ཤེས་ལས་ཀྱང་སྨོས་པ་མིན། །ཁུར་ཁྱེར་ཁུར་གྱི་ཡུལ་ཡིན་ཏེ། །འདི་ནི་སངས་རྒྱས་རྣམས་ཀྱི་ཡུལ། །ལྷ་རྫས་དེ་བཞིན་གཤེགས་ཀྱིས་མཁྱེན། །
ས་བཅུ་དག་ཏུ་རྣམ་པར་སྦྱངས། །རྣལ་འབྱོར་ཅན་གྱི་སྣ་ཚོགས་ཡུལ། །དོན་གྱི་དམ་པ་སྟོན་པའོ། །ལས་ཅི་ལས་མིན་གང་ཞེས་ཏེ། །བྱིས་པ་རྣམས་ནི་མྱོས་པར་གྱུར། །ལས་དང་ལས་མིན་བཤད་པ་ན། །རྣལ་འབྱོར་ཅན་རྣམས་བདེར་གྱུར་པ། །སྣ་ཚོགས་སྣང་བ་རང་
སེམས་ཏེ། །ལུས་ཅན་རྣམས་ཀྱི་བདག་ཉིད་གཉིས། །ཕྱི་དང་ནང་དང་ཐམས་ཅད་དུ། །གཟུང་དང་འཛིན་པ་ལྟ་བུར་གནས། །སེམས་ཀྱིས་སེམས་ནི་མཐོང་ཡིན་ཡང་། །ཁོང་དུ་མི་ཆུད་བུས་པ་རྣམས། །ཁ་གཉིས་སེམས་དེ་ལུས་ཅན་གྱི། །ཡིན་ཀྱང་ཤེས་པར་མ་
གྱུར་པ། །བདག་གི་བྱེད་པའང་དེ་བཞིན་བྱེད། །ཡུལ་ལྟ་བུར་ཡང་རབ་ཏུ་སྣང་། །རྫ་མ་ལ་སོགས་གཟུགས་སུ་གནས། །རྫ་ལ་སོགས་པའང་ཡོད་པ་མིན། །འདི་ཡི་དོན་ལ་ཐུབ་པ་དག །རྣལ་འབྱོར་ཉམ་ཆུང་རྣམ་པར་མྱོས། །རྣལ་འབྱོར་དེ་ཡང་མི་རྟོགས་པ། །བདག་
གི་རྣམ་རྟོག་ལམ་གནས་པས། །སེམས་འདི་གཉིས་ཀའི་བདག་ཉིད་དེ། །མེ་ལོང་ཟླ་བ་བཞིན་དུ་གནས། །ཇི་ལྟར་རབ་རིབ་རབ་རིབ་ཅན། །སྐྲ་ཚོགས་ལྟོས་ཤིག་ལྟོས་ཤིག་ཀྱེ། །ཕན་ཚུན་དག་ཏུ་སྟོན་མོད་ཀྱི། །བདག་ཉེས་དབང་པོ་ཞན་བྱུང་གི། །འདི་ན་གང་ཡང་སྐྲ་ཚོགས་

མེད། །རྒྱན་དང་ནོར་བུ་དག་ཀྱང་ངོ་། །ཡོད་དང་མེད་པའི་དངོས་པོ་ལྟར། །དབང་པོའི་ཉེས་པས་མཐོང་བ་ཡིན། །དེ་བཞིན་རྟོག་ཅན་དབང་གིས་འདི། །བདག་གི་བློ་ནི་ཇི་ལྟར་གནས། །ཚངས་ལ་སོགས་པའི་གནས་ཐུག་པར། །རྟོག་པ་མེད་པས་རབ་ཏུ་འཛིན། །གང་འདི་
མང་པོ་སྣང་བ་དག །སྣ་ཚོགས་ཚངས་ལ་སོགས་པའི་མཚན། །སྣ་ཚོགས་ཐམས་ཅད་བདག་གི་སེམས། །རྫ་ལ་སོགས་པའི་ཡོན་ཏན་མཚན། །ནང་དུ་གྱུར་པའི་གཟུགས་རྣམས་དང་། །མཐོ་རིས་གནས་པའི་གནས་རྣམས་དང་། །གང་འདི་ཕྱི་ནང་བྱ་བ་རྣམས། །
ཐམས་ཅད་སེམས་ལས་བྱུང་བའོ། །རྒྱན་སྟུག་རྣལ་འབྱོར་གང་ཡིན་པ། །དེ་ནི་གུད་ན་ཡོད་པ་མིན། །རྣལ་འབྱོར་ཅན་གྱི་བསོད་ནམས་ཀྱིས། །ཞུགས་པ་འདི་ལ་བསླབ་པར་གྱིས། །དབང་སྒྱུར་ལྷ་རྫས་གནས་དག་དང་། །ཡང་ན་གཟུགས་ཅན་རྣམས་གནས་དང་། །འདུ་
ཤེས་མེད་པའི་གནས་སུ་འམ། །འོག་མ་ཡིན་པའི་གནས་སུ་ཡང་། །ཅུང་ཟད་མེད་དང་རྣམ་ཤེས་དང་། །འདུ་ཤེས་ཡོད་པ་མ་ཡིན་དང་། །སྣ་ཚོགས་ཀྱི་ནི་གནས་དག་ཏུ། །འདོད་ཆགས་ཀྱི་ནི་ཕྱོགས་བཤིག་ན། །ཁྱོད་ནི་མྱུར་དུ་དེར་གནས་པ། །སྟུག་པོ་རྣལ་འབྱོར་
ཅན་གནས་སུ། །རྒྱལ་བའི་སྲས་ཀྱིས་མདུན་བྱས་ཏེ། །སྟུག་པོ་དེར་ནི་འགྲོ་བར་གྱིས། །རྣལ་འབྱོར་དེ་ལ་སྤྱད་པར་གྱིས། །བདག་གི་གཉེན་གྱིས་ཅི་ཞིག་བྱ། །བདག་གི་གཉེན་ནི་རྟག་ཏུ་འཆིང་། །འཁོར་བའི་ལམ་རྒྱུད་རྒྱུ་ཡང་ཡིན། །དབང་པོ་རྣམས་ནི་གཡོ་བ་སྟེ། །
བུད་མེད་རྣམས་ལའང་བློ་འཁྲུལ་པས། །ཁུ་ཆུ་ཁྲག་མནམ་མི་ཞིམ་པའི། །འཇི་བར་སྲིན་བུ་སྐྱེས་གྱུར་པ། །དགུ་འམ་བཅུ་ཞིག་པ་དང་ཡང་། །ཁུ་ཆུ་སྨིན་ནས་མངོན་པར་སྐྱེ། །དབང་པོ་རྣམས་ཀྱིས་ཀུན་ཡོག་པ། །སྲིན་བུ་གཡོ་བ་ཇི་བཞིན་ཏེ། །རིམ་པ་དེ་ཡི་ཚུལ་གྱིས་ན། །
ཇི་སྲིད་སེམས་ཅན་གནས་བར་དུའོ། །ལུས་ཅན་རྣམས་ཀྱི་སྐྱེ་ལ་ལྟོས། །ཚེ་ཚེར་དེ་དག་བྱུང་བ་སྟེ། །ཕ་དང་མ་ནི་སྟོང་དག་དང་། །བུ་དང་ཆུང་མ་བརྒྱ་དག་ཀྱང་། །ཐམས་ཅད་གནས་སུ་རྙེད་པ་ནི། །ལུས་ཅན་སྐྱེ་ལ་གནས་པའོ། །རྨི་ལམ་དག་ན་བུ་མེད་པའི། །མོ་གཤམ་བུ་

འབྱུང་ཇི་བཞིན་དུ། །བུ་རྙེད་པ་ཡི་དགའ་བ་དང་། །རྨི་ལམ་རྨི་ཚེ་དེ་ཉིད་ལྡན། །དེ་ནི་ཤིར་གྱུར་དེ་ནས་དེ། །རྨི་ལམ་ཤེས་ནས་སད་པ་དང་། །རྨི་ལམ་གྱི་ནི་བུ་ཤི་མེད། །གང་ཡང་སྐྱེ་བ་ཡོད་པ་མིན། །ཆུ་བོ་རབ་ཚལ་བུ་དང་ནི། །གྲོང་ཁྱེར་དག་དང་རི་རྣམས་
དང་། །གྲོང་དང་ཚོང་འདུས་ཕྱུགས་སླས་དང་། །དཀའ་ཐུབ་ཚལ་བུའི་གནས་རྣམས་དང་། །འགྲོ་བ་དག་གིས་རྒྱས་པའི་ཡུལ། །ཞིང་དང་བ་ལང་ལུག་གིས་གང་། །འཇིག་རྟེན་གྱི་ནི་ལོངས་སྤྱོད་ཀྱང་། །དེ་དང་འདི་དང་གཞན་དུའང་སྣང་། །ཇི་ལྟར་འཇིག་རྟེན་འདིར་རྒྱུག་པ། །
རྨི་ལམ་རྒྱུག་པ་དེ་བཞིན་ཏེ། །གདེག་དང་བསྐུམ་ལ་སོགས་པ་ཡང་། །དེ་དང་འདིར་ཡང་སྣང་བ་ཡིན། །མཁས་པས་རྨི་ལམ་གང་མཐོང་བ། །སྐྱེ་བ་མེད་ཅིང་འཆི་མེད་པར། །སླར་སད་ནས་སུ་སེམས་པ་ནི། །བུ་མོ་མཁས་པ་དག་ཡིན་ནོ། །ཇི་ལྟར་རི་དང་དེའུ་རྣམས་ཀྱི། །
གྲིབ་མ་ཀུན་དུ་སྣང་བ་བཞིན། །དེ་ལྟར་འཇིག་རྟེན་རྨི་ལམ་ཡང་། །མཁས་པ་རྣམས་ནི་དེ་བཞིན་བསམ། །ཇི་ལྟར་སྐྱེས་བུ་ཉལ་བ་ཞིག །བུད་མེད་ལྷན་ཅིག་རྩེ་དགའ་རྨི། །སྣ་ཚོགས་ཡིད་དུ་འོང་བ་དང་། །ལྷ་རབ་བཙུན་མོ་མཉམ་པ་དང་། །གཞན་ཡང་སྣ་ཚོགས་དངོས་
པོས་ཏེ། །སད་ནས་རྣམ་པར་སེམས་པ་ནི། །ཅི་ཞིག་བདེན་ནམ་རྨི་ལམ་ཡིན། །རྨི་ལམ་བུད་མེད་ལྷན་ཅིག་ཏུ། །རྩེས་ནས་ཕྱིར་ནི་བདག་སད་དེ། །འདི་བརྫུན་བུས་པ་སླུ་བ་ཡིན། །དེ་བཞིན་བདག་གི་གཉེན་པ་ཀུན། །རྒྱལ་སྲིད་སྟོབས་ཀྱང་དེ་བཞིན་ནོ། །དམག་པ་གྱོས་
པོ་བུ་དག་དང་། །མ་དང་ཕུ་ནུ་ཕ་དག་ཀྱང་། །རྨི་ལམ་ལྟ་བུར་རིག་བྱ་སྟེ། །རྣལ་འབྱོར་སྦྱར་བར་ཇིར་མི་བྱ། །དཀའ་ཐུབ་ཚལ་དང་ཞིང་རྣམས་དང་། །རི་དང་རི་ཡི་སྨན་གཤོང་དང་། །འོ་མ་འབྱུང་དང་མཱ་ལ་ཡ། །ལྷུན་པོ་བྱིན་དང་དབང་ཆེན་དང་། །གངས་ཀྱི་རི་དང་ཀཻ་ལཱ་ས། །
ཆར་འབབ་ལ་ཡང་གང་གནས་དང་། །འཛམ་བུ་འབྲས་བུའི་ཁུ་བ་དང་། །གང་དག་བདུད་རྩི་ཟ་བ་དང་། །ཕན་དུ་ཀམ་བལ་པར་ཡ་ཏྲ། །ཀོ་བི་དར་ན་གང་འཁོད་དང་། །རི་རབ་ནང་ན་གང་གནས་དང་། །དཔག་བསམ་ཤིང་ལ་གང་གནས་དང་། །རང་རྒྱལ་རྒྱལ་བའི་སྲས་རྣམས་དང་། །

ཉན་ཐོས་རྫུ་འཕྲུལ་ཆེན་པོ་དང་། །ཐམས་ཅད་ཀྱི་ནི་རྣལ་འབྱོར་འདི། །གང་འབྱུང་འབྱུང་བ་རྣམས་ཀྱི་སྟེ། །པད་མོའི་གནས་སུ་བརྟེན་བཅས་ཏེ། །སྐྱིལ་མོ་ཀྲུང་དུ་མཉམ་བཞག་ཅིང་། །རྟག་ཏུ་རྣལ་འབྱོར་སྦྱང་བར་གྱིས། །འདོད་དང་བདེ་ལས་རྣམ་པར་དབེན། །དབང་པོ་དབང་
པོའི་དོན་གྱི་རྣམས། །ཐམས་ཅད་ལས་ཀྱང་ཕྱིར་བཟློག་ཅིང་། །ལྕགས་ཀྱུས་གླང་པོ་ཇི་བཞིན་དུ། །སེམས་ནི་མཉམ་པར་བཞག་པར་གྱིས། །འཇིག་རྟེན་འཇིག་རྟེན་འདས་བསམ་གཏན། །གང་ཡང་དེ་བཞིན་གཤེགས་པའི་དགེ། །འདོད་དང་དགའ་བ་དབེན་ལ་སོགས། །
ཡང་ན་ཐམས་ཅད་བསྒྲགས་པ་དང་། །ཁྱད་པར་དུ་ཡང་གཟུགས་མེད་དང་། །འདུ་ཤེས་མེད་པའི་བསམ་གཏན་རྣམས། །ནམ་མཁའ་རྣམ་ཤེས་མཐའ་ཡས་དང་། །འདུ་ཤེས་ཡོད་མིན་མེད་མིན་རྣམས། །ཉི་མ་དང་ནི་ཟླ་བའི་དབྱིབས། །པད་མོ་དང་ནི་འོད་འདྲ་ཞིང་། །ནམ་
མཁའ་རི་མོ་མེ་འདྲ་བར། །རྣལ་འབྱོར་ཞུགས་པས་རབ་ཏུ་མཐོང་། །འདི་དག་ཐམས་ཅད་སྤངས་ནས་སུ། །སྣང་བ་མེད་པར་རབ་ཏུ་གནས། །གང་ཚེ་མཚན་མེད་རྣལ་འབྱོར་ཅན། །རྣམ་པར་མི་རྟོག་ཆགས་མེད་ན། །སངས་རྒྱས་བྱེ་བ་རྣམས་ཀྱང་མཐོང་། །ཞིང་དང་ཞིང་ན་
མཉམ་བཞག་པ། །དེ་དག་ཕྱག་གིས་དབང་བསྐུར་བར། །དེ་ཡི་སྤྱི་བོར་དབང་བསྐུར་ཏེ། །སངས་རྒྱས་ས་ལ་ཞུགས་པ་དང་། །སྣ་ཚོགས་གཟུགས་ནི་རབ་ཏུ་འབྱུང་། །སྣ་ཚོགས་ཚུལ་གྱི་དངོས་ཐོབ་ནས། །ཀུན་མཁྱེན་ཐམས་ཅད་རིག་པར་འགྱུར། །སྟོབས་དང་མངོན་ཤེས་དབང་ཡང་
འཐོབ། །གཟུངས་དང་ཐམས་ཅད་ཏིང་ངེ་འཛིན། །ཐམས་ཅད་ཀྱི་ནི་འབྱུང་གནས་འགྱུར། །ཐུབ་པ་རྣལ་འབྱོར་སྐྱེད་པའི་ཡང་། །གཟུགས་ནི་རྡུལ་དུ་རྣམ་གཞིགས་ཤིང་། །མཆོག་རྡུལ་ཡན་ཆད་ཉིན་དབེན་ཕྱིར། །ཡོད་ལས་མེད་པར་འགྱུར་བ་སྟེ། །བོང་བུས་བ་ལང་རྭ་མཐོང་བཞིན། །
ཆ་ཤས་མེད་ཕྱིར་ཆ་ཤས་ཅན། །ཕུང་པོ་ལས་ནི་ཕུང་ཅན་མེད། །དེ་བས་ལས་ཀྱི་འབྲས་གྱུར་པ། །འདི་ནི་སྒྱུ་མའི་བུས་བྱས་བཞིན། །འདི་ན་ལས་མེད་འབྲས་བུ་མེད། །ལས་ཀྱི་སྒྲུབ་པའང་ཡོད་པ་མིན། །འཇིག་རྟེན་བྱེད་པས་མ་བྱས་ཏེ། །བྱེད་པ་བྱེད་པ་མ་ཡིན་ནོ། །བྱེད་ལ་

བྱེད་པ་ཡོད་ན་ནི། །འདི་རྣམས་ཐུག་པ་མེད་པར་འགྱུར། །ཐུག་མེད་བྱས་པའི་ཉེས་པ་ཡིས། །ཐུབ་པ་དྲི་མ་ཅན་དུ་གྱུར། །དེ་སྟེ་ལམ་རྒྱུད་སྣ་ཚོགས་རྣམས། །ཆུ་དང་ནམ་མཁའ་ས་གནས་པའི། །ལུས་ཅན་ལུས་ལ་ཀུན་གནས་ཏེ། །སྐྱེ་བ་བཟང་པོ་གནས་
སུ་སྟེ། །རིས་སུ་འགྲོ་བ་ཡོད་པས་ན། །ཇི་ལྟར་འདོད་པར་ལུས་ཅན་འགྲོ། །དབང་པོ་སོ་སོ་བྱ་བ་ཡང་། །ཇི་ལྟར་འདོད་པར་ཡུལ་འཛིན་ཏེ། །འདི་ནི་རྣམ་རྟོག་རྣམ་འགྱུར་བ། །ཞོ་མར་ཇི་ལྟར་འོ་མ་ལས། །དེ་བཞིན་སྐྱེ་དང་གནས་དང་འཇིག །ལས་ཀྱིས་བྱས་པར་འགྱུར་སེམས་
ན། །རྨི་ལམ་དྲི་ཟ་སྒྱུ་མ་སྤྲིན། །བྲག་ཅ་དང་ནི་གློག་འདྲ་བ། །སྨིག་རྒྱུ་རི་དགས་སྲེད་པ་ལྟར། །དངོས་པོ་རྣམ་བསྒོམས་རྣལ་འབྱོར་ཅན། །ཐོག་མ་མེད་ནས་བསགས་པ་ཡི། །མི་ཡི་རྣམ་སྤྲོས་བག་ཆགས་ཀྱིས། །སྣ་ཚོགས་གནས་ངན་ལེན་པ་དང་། །
སྣ་ཚོགས་རྟོག་པས་ལས་སུ་བརྟགས། །དབང་པོ་སྒྱུ་མ་ལྟ་བུ་ཡིན། །ཡུལ་རྣམས་རྨི་ལམ་འདྲ་བ་སྟེ། །བྱེད་དང་ལས་དང་བྱ་བ་ཡང་། །རྣལ་འབྱོར་སྒྲུབ་པས་མི་བརྟག་གོ། །རྟོག་པ་ཉམས་པའི་རྟོག་པ་ཅན། །རྣམ་མྱོས་ཤེས་པ་ཉམ་ཆུང་བས། །བྱེད་པར་རབ་
ཏུ་རྟོག་པ་ནི། །བྱ་བས་འགྲོ་བར་བྱས་པར་ཏེ། །འཇིག་རྟེན་གཅེས་པས་བྱས་མ་ཡིན། །རྡུལ་གྱི་རྐྱེན་ལས་བྱུང་བའང་མིན། །རྒྱུ་མེད་པས་ཀྱང་བྱས་མ་ཡིན། །ངོ་བོ་ཉིད་ཀྱིས་བྱུང་བའང་མིན། །རྡོ་རྗེ་ལྕགས་དང་ཁབ་ལོང་དང་། །རིན་ཆེན་ཕྲེང་བ་རྒྱན་རྣམས་ཀྱིས། །ཇི་ལྟ་བུ་ཡི་
ལས་ཤིག་བྱས། །ནོར་བུ་གསེར་དུ་མིང་བཏགས་པས། །བྱ་དང་རི་དགས་ཁྲ་བོ་དང་། །ཚེར་མ་རྣམས་ཀྱི་རྣོ་དངོས་དང་། །འགྲོ་བ་སྣ་ཚོགས་ངོ་མཚར་བ། །རྣམ་རྟོག་ལས་ལས་མ་སྐྱེས་སོ། །ལས་ཀྱི་གང་ལས་མ་ཡིན་ཞེས། །རྟོག་ཅན་བདེན་ལ་མྱོས་པ་ནི། །བདེན་པའི་དངོས་
པོར་མི་ཤེས་པ། །འདི་ནི་རྣམ་རྟོག་ལས་མིན་དུ། །འོ་མའི་ནང་ན་ཡོད་པའི་དུག །རྗེས་སུ་མི་བདེ་རྣམ་པར་འགྱུར། །རྣམ་པར་རྟོག་པའང་ཐམས་ཅད་དུ། །དེ་བཞིན་དངོས་པོ་རྣམས་ལ་འཇུག །དངོས་པོ་སྐྱེ་བ་མ་ཡིན་ཏེ། །དངོས་པོ་རྣམ་པར་འཇིག་པའང་མེད། །རྣམ་རྟོག་

སྣ་ཚོགས་དེ་དག་ནི། །རྟོག་པ་ཅན་གྱིས་མི་རིག་གོ། །འགྲོ་བའི་རིས་ཀྱི་དངོས་པོ་དག །རྣལ་འབྱོར་སྤྱོད་པས་རྣམ་པར་གཞིག །སྦྱར་ཞིང་རྣལ་འབྱོར་དེ་ལ་ཞུགས། །ལས་དང་ལས་མིན་མ་སེམས་པར། །རིས་སུ་འགྲོ་བའི་དངོས་པོ་ཡིས། །ཟླ་བ་ཉི་མ་རྣམ་མཛེས་པ། །
རླུང་གིས་ཤིན་ཏུ་བསྐྱོད་ནས་ཀྱང་། །མཁའ་ལ་རྟེན་པ་མེད་པར་འགྲོ། །ཤིན་ཏུ་ཕྲ་ཞིང་ཤེས་དཀའི་ལས། །སྟུག་པོར་གནས་པར་རབ་ཏུ་མཐོང་། །ལས་དེ་ཅི་ཞིག་ཡོད་པར་འགྱུར། །ཞུགས་བརྩོན་རྣལ་འབྱོར་ཅན་དག་ལ། །ཇི་ལྟར་མེ་ནི་ཤིང་གི་རི། །ཐལ་བར་བྱེད་པ་སྐད་
ཅིག་ཏུ། །རྣལ་འབྱོར་ཅན་གྱི་ཐམས་ཅད་ལས། །ཡེ་ཤེས་མེས་ཚིག་སྐད་ཅིག་ཏུ། །ལས་དང་བག་ཆགས་ལྷན་ཅིག་ཏུ། །མང་པོའི་དུས་ནས་བསགས་པ་དག །རྣལ་འབྱོར་ཡེ་ཤེས་བག་ཆགས་ཀྱིས། །ཐམས་ཅད་ཞིག་བྱེད་སྐད་ཅིག་ཏུ། །ཇི་ལྟར་སྒྲོན་མས་མུན་པའི་
ཚོགས། །སྐད་ཅིག་ཏུ་ནི་བསལ་བྱེད་པ། །ཡེ་ཤེས་སྒྲོན་མས་ཐུབ་པ་དེ། །མི་ཤེས་རྣམ་པར་སེལ་བར་བྱ། །རྒྱན་སྟུག་པོ་ཐེག་པ་ཆེན་པོའི་མདོ་ལས་བདག་གི་ལས་ཀྱི་བྱ་བ་སྤྱད་པ་ཞེས་བྱ་བ་སྟེ། ལེའུ་ལྔ་པའོ།། །།བམ་པོ་གསུམ་པ། འཇིམ་པ་
རྩྭ་སྨིག་ཐག་པ་ལས། །ཇི་ལྟར་གནས་པའི་ཁྱིམ་གྱི་རྣམས། །ཕན་ཚུན་ཀུན་ནས་འདུས་འབྱོར་ཅིང་། །ས་ཡི་དབུས་ན་སྣང་བ་ནི། །རེ་རེ་ལ་ཡང་ཁྱིམ་མེད་དེ། །རྫས་དང་དངོས་ལ་རྣམ་བརྟགས་ན། །རྫས་ཀྱི་རྣམ་པ་འདུས་པ་ལ། །ཁྱིམ་ཞེས་གདགས་ཤིང་བརྗོད་པ་སྟེ། །
སོར་མོ་ཕན་ཚུན་ཀུན་འདུས་ན། །ཇི་ལྟར་ལག་པའི་ཕུག་རོན་དུ། །ལག་པ་གཉིས་ནི་བསྡུས་ལས་འགྱུར། །ཐ་དད་པ་ལས་མི་འབྱུང་ངོ་། །གཡུལ་དང་ཤིང་རྟ་བསྙེམས་བྲལ་ཁང་། །གྲོང་ཁྱེར་ནགས་ཚལ་དེ་བཞིན་ཏེ། །རི་དང་སྤྲིན་དང་དབའ་རླབས་ཀྱང་། །བྲག་ཅ་
གློག་དང་འདྲ་བའོ། །སྨིག་སྒྱུ་ཆུ་ཟླ་སྒྱུ་འདྲ་བ། །སྣམ་བུ་རྫ་སོགས་གྲགས་པ་སྟེ། །མཁས་ལ་དངོས་པོ་ཐམས་ཅད་ཀྱང་། །རྨི་ལམ་འདྲ་བར་ཀུན་ཏུ་སྣང་། །དེ་བཞིན་ལུས་ཁྱིམ་སྣ་ཚོགས་པ། །བུས་པའི་ལམ་རྒྱུད་དོག་པ་ན། །ཁམས་ཀྱིས་རི་བཞིན་གྱུར་པ་སྟེ། །ཁྱིམ་

ལྟར་རྟག་ཏུ་མི་བརྟན་ལ། །འབྱུང་བ་མེད་ཅིང་འཇིག་པ་མེད། །བདག་ལས་མ་ཡིན་གཞན་ལས་མིན། །རྟག་དང་ཆད་ལས་རྣམ་པར་གྲོལ། །གཟུང་དང་འཛིན་པ་ཡོངས་སུ་སྤངས། །ཇི་ལྟར་དྲི་ཟའི་གྲོང་ཁྱེར་ནི། །མདོག་ཏུ་ཟད་ཀྱང་གྲོང་ལྟར་སྣང་། །དེ་བཞིན་
རང་རྟོག་རྣམ་བརྟགས་པའི། །དངོས་པོ་རྣམས་ཀྱང་རབ་ཏུ་འབྱུང་། །ཆོས་རྣམས་སྨིག་རྒྱུ་ལྟ་བུ་སྟེ། །ཡོད་མེད་རྣམ་བྲལ་དགེ་བ་ཡིན། །རྨི་ལམ་སྤྲིན་ལྟར་སྣང་བ་སྟེ། །རྩིག་ངོས་རི་མོའི་ཕུག་ལྟ་བུའོ། །ཞ་བོ་ལོང་བ་འདྲ་བ་ནི། །དངོས་ཀུན་གཅིག་གིས་གཅིག་རྒྱུ་བ། །
རང་བཞིན་རྟོགས་པར་མི་རུང་སྟེ། །རྣལ་འབྱོར་ཅན་གྱིས་ཡང་དག་མཐོང་། །རྡུལ་ཕྲན་རྣམ་པར་གཞིགས་པ་དང་། །རྡུལ་གྱི་དངོས་པོ་མི་གནས་ཏེ། །རང་བཞིན་ཀུན་གྱི་མཆོག་ཡིན་པས། །རྡུལ་ཕྲན་མཆོག་ཅེས་དེ་ཕྱིར་བརྗོད། །དེ་ཕྱིར་བློ་ནི་ཕྱིར་ལྡོག་སྟེ། །སྒྲ་ལ་
སོགས་པའི་ཡོན་ཏན་སྤངས། །རྣལ་འབྱོར་མཁས་པའི་རྣལ་འབྱོར་ཅན། །དེ་ཚེ་ངལ་བསོའི་ཡིད་དུ་འགྱུར། །ངལ་བསོའི་ཡིད་ལྡན་རྣལ་འབྱོར་ཅན། །བཅིངས་པ་ཀུན་ལས་གྲོལ་བས་ན། །འདི་དང་ཕ་བིར་མི་སྐྱེ་སྟེ། །བསམ་གཏན་ཚུལ་ལ་མོས་པ་རྣམས། །སྣ་
ཚོགས་རིན་ཆེན་སྙིང་པོ་ཡི། །གནས་ན་དབང་ཅན་དེ་དག་རྩེ། །ཡོན་ཏན་དབང་ཕྱུག་ཉེས་པ་མེད། །རིག་འཛིན་བུད་མེད་མང་པོ་དང་། །ཐུབ་པ་རྣམས་ཀྱིས་རབ་མཆོད་ཅིང་། །རྨི་ལམ་བཞིན་དུ་གནས་པ་ཡིན། །འདི་ན་གནས་ཀྱང་ཚངས་པ་དང་། །ཐུབ་དང་ཐུབ་པའི་བུ་རྣམས་
དང་། །རིག་འཛིན་ཚོགས་ཀྱིས་དེ་བཞིན་ཏེ། །སྤྱི་གཙུག་བལྟ་བར་མི་ནུས་སོ། །འདི་ནི་ཐུབ་པའི་རྣལ་འབྱོར་ཡུལ། །དེ་བས་བསམ་གཏན་བརྩོན་པར་གྱིས། །འདི་ནི་ཀུན་གྱི་ཡུལ་མ་ཡིན། །དེ་ཕྱིར་གྲོགས་པོ་བསྟན་པར་གྱིས། །བརྟན་པ་ས་རྣམས་སྣ་ཚོགས་དང་། །འོད་ཅན་
རྣམས་ཀྱི་གནས་སུ་ཡང་། །འདོད་ཆགས་ཕྱོགས་དང་བཅས་པ་དང་། །གཏི་མུག་ཞེ་སྡང་དེ་བཞིན་དུ། །བཅོམ་སྟེ་སྟུག་པོ་རབ་ཡངས་པ། །ཡིད་བཞིན་ཞི་བའི་གནས་སུ་འགྲོ། །དེ་ནི་འཆི་བདག་ཡུལ་མ་ཡིན། །རྣམ་ཤེས་སྤྱོད་ཡུལ་དེ་བཞིན་མིན། །མཚན་མ་མེད་པའི་གནས་

ཡིན་ཏེ། །རྟོག་པས་དེ་བསྒྲུབ་མ་ཡིན་ནོ། །འདི་ནི་ལྷ་རྫས་གནས་ཡིན་ཏེ། །ཐུབ་པ་རྣལ་འབྱོར་ལྡན་པ་ཡི། །དེ་བས་ཞིང་མཆོག་དེ་འདོད་ན། །ཐུབ་པས་བསམ་གཏན་དེ་ལ་གྱིས། །འདོད་ཆགས་ཞེ་སྡང་རྣམ་བཅོམ་སྟེ། །ང་མེད་ང་ཡི་འགྲོ་མེད་དུ། །འདོད་ཆགས་ཞེ་སྡང་
མི་བསམ་པར། །བསམ་གཏན་མཆོག་ལ་བསྒོམ་པར་གྱིས། །ཕན་ཚུན་ཡུལ་ལ་འཛིན་པའི་ཕྱིར། །གཉིས་ཀྱི་བློ་ནི་རབ་ཏུ་འབྱུང་། །ཡོད་མེད་རྟོག་པས་དེ་བཞིན་དུ། །རྣམ་ཤེས་རྣམས་ལ་ཀུན་གཞིའོ། །བུད་མེད་རོ་སྨད་ཤས་རྒྱས་ཤིང་། །སྐྲ་བཟང་མིག་ཀྱང་མཛེས་པ་
དང་། །སྣ་ལེགས་འཕྲལ་བའི་དབྱིབས་སྡུག་ལ། །སྨིན་མ་སྟུག་ཅིང་བལྟ་མཛེས་པ། །ཇི་ལྟར་ལ་ལ་དེར་ཆགས་པའི། །ཡིད་ཀྱིས་རྣམ་པར་མྱོས་པའི་སེམས། །ལྟ་ཞིང་རྣམ་པར་རྟོག་པའི་ཚེ། །མཁས་མིན་དེ་ལ་ཤིན་ཏུ་མྱོས། །འགྲོ་འདུག་འགྲེང་ཡང་དེ་བཞིན་ཏེ། །སྣོམ་
ཟ་གཉིད་ཀྱིས་ལོག་པ་ནའང་། །འདོད་ཅན་གཞན་དུ་མི་སེམས་ཏེ། །འདོད་པ་ཅན་མོ་ཡིད་ལ་བྱེད། །དེ་བཞིན་ཁྱོད་བློ་རྙོག་པ་ཅན། །རྣམ་པ་ཀུན་ཏུ་ཡིད་ལ་གནས། །རྫབ་ཡུལ་རྙོག་དང་ལྡན་པ་ཡི། །བཅིངས་པའི་དབང་དུ་མ་འགྲོ་ཤིག །ཇི་ལྟར་ལ་ལ་རྟོག་པ་ཅན། །བློ་ཡི་
སྤྱོད་ཡུལ་རྣམ་འཁྲུལ་བ། །མ་ཧེ་དག་དང་བ་གླང་དང་། །གླང་པོ་དག་དང་བསེ་རྣམས་དང་། །རང་ག་ཀྲྀ་ཥྞ་ས་ར་དང་། །ཤ་ར་བ་དང་སུ་ར་དང་། །སྨྱན་དང་གཡག་ཀྱང་དེ་བཞིན་ཏེ། །མགོ་དཀར་རྣ་དང་ཁྱུ་མཆོག་གི། །རུ་ཆེན་རྣམ་པར་མཐོང་བ་དང་། །འདི་བདེན་གཞན་དུ་མི་འགྱུར་
ཞེས། །སེང་སྟག་བོང་བུ་སོགས་པ་ཡི། །རྭ་རྣམས་ལ་ནི་མེད་ཅེས་ཏེ། །ཡོད་དང་མེད་པའི་ལྟ་བ་ཡང་། །མི་མཁས་རྣམས་ལ་རབ་ཏུ་འབྱུང་། །དེ་ལྟར་གཞན་གྱི་རྭ་མཐོང་ཞིང་། །བོང་བུའི་མེད་ཅེས་རྣམ་རྟོག་འབྱུང་། །ཇི་སྟེ་གཞན་གྱིས་མ་མཐོང་ན། །བོང་རུ་མེད་སྙམ་དེ་
མི་འབྱུང་། །ལོག་པར་དམིགས་པའི་རྒྱུ་ཡི་ཕྱིར། །འདི་ན་མེད་ཅེས་རྟོག་པ་འབྱུང་། །དེ་ལ་དམིགས་པ་མེད་པས་ཀྱང་། །གདོན་མི་ཟ་བར་མེད་ལ་རྟེན། །རྙོག་ཅན་ང་རྒྱལ་རྟོག་ཡུལ་ལ། །བློ་གྲོས་སྤྱོད་ཡུལ་མ་རྟོག་ཅིག །བ་ལང་བ་མན་མ་ཧེ་རྣམས། །རྟོག་པས་བརྟགས་པ་

ཇི་བཞིན་ཏེ། །དེ་ལྟར་ཁྱོད་ཀྱིས་སེམས་སྤྱོད་དང་། །ཕུང་པོ་སྐྱེ་མཆེད་སྤྱོད་ཡུལ་དག །མངོན་སུམ་ཚད་མ་དག་གིས་སམ། །ཤེས་རབ་ཀྱིས་ཀྱང་རྣམ་པར་ལྟོས། །རྣམ་གྲོལ་མཐོ་རིས་འགྲོ་བའམ། །ཇི་ལྟར་འདོད་པ་བཞིན་དུའང་འགྱུར། །ཚངས་པའི་གནས་སུ་
ཚངས་པར་རམ། །མཚེ་མ་རབ་དང་གནས་དབེན་དང་། །རིན་ཆེན་སྣ་ཚོགས་གནས་སུ་ཡང་། །དབང་སྒྱུར་རྣམ་པར་མཛེས་པར་འགྱུར། །འོད་ཆུང་རྒྱས་པ་དག་ཏུ་འམ། །འདོད་ཁམས་བདག་པོ་དབང་ཅན་ནམ། །ཉི་ཟླ་བདག་བདག་གནས་སུ་འམ། །གཞན་ཡང་
འོད་འབར་གཟར་ཡང་རུང་། །སུམ་ཅུ་རྩ་གསུམ་རྒྱལ་ཆེན་དང་། །འཕྲུལ་ལ་དགའ་བའི་གནས་སུ་ཡང་། །ཚངས་གནས་བཅུ་དང་ལྡན་པ་ཡི། །རྣལ་འབྱོར་ཅན་ནི་རྣམ་པར་མཛེས། །གྱ་ནོམ་སྣང་དང་ཤིན་ཏུ་མཐོང་། །འདོད་མེད་མི་དྲོས་དེ་བཞིན་ཏེ། །འོག་མིན་གནས་
ཀྱི་ལྷ་རྫས་ན། །འོག་མིན་ཤིན་ཏུ་རྣམ་པར་མཛེས། །ཅུང་ཟད་མེད་མཁའ་རྣམ་ཤེས་དང་། །འདུ་ཤེས་ཡོད་མེད་མ་ཡིན་དང་། །དེ་བཞིན་འཕྲུལ་གྱི་བདེ་ཅན་དང་། །ཞིང་བཟང་གཞན་དུ་དེ་བཞིན་ཏེ། །མཁའ་ལ་འགྲོ་དང་སྤོབས་པ་བཞིན། །འཁོར་ལོ་འཁོར་བའི་རིགས་སུ་
གནས། །གྲོལ་བ་རྣམས་ཀྱི་གྲོལ་ཡུལ་ལ། །སུ་གནས་དེ་དག་རྣལ་འབྱོར་ཅན། །འདོད་ཆགས་སྟོབས་ལས་སྔོན་རྒྱལ་བ། །དེ་དག་བཟང་པོའི་ས་ལ་གནས། །འདི་ལྟའི་རྣལ་འབྱོར་ལྡན་པས་ན། །རྣལ་འབྱོར་ལ་ནི་ཐུབ་པར་རྩེ། །རྫ་མ་འཇིག་པའི་གྱོ་མོ་ཡི། །ཇི་ལྟར་
རྒྱུར་ཡང་འགྱུར་བ་དང་། །སྐད་ཅིག་འཇིག་ལ་སྐད་ཅིག་སྟེ། །མི་རྟག་ཉིད་ཀྱང་རྟག་པ་ཡི། །ས་བོན་ཇི་བཞིན་མྱུ་གུ་ལ། །རྒྱུ་རྣམས་དེ་དག་འདྲ་བ་ཡིན། །མྱུ་གུ་གཞན་མིན་ས་བོན་ལས། །ས་བོན་ཉིད་ཀྱང་མྱུ་གུ་མིན། །ས་སྣར་རྣམས་ལས་རྫ་སྣར་འབྱུང་། །ཚོས་ནས་
དམར་རུར་མངོན་པར་འབྱུང་། །གནག་དང་སྣར་དང་འདྲེས་པ་དང་། །གྲོ་བོ་དམར་པོ་དག་ཀྱང་སྐྱེ། །འདམ་བུ་ལས་ནི་སྒོག་པར་འགྱུར། །རྭ་ལས་ལན་ཚྭར་དེ་བཞིན་ཏེ། །མི་གཙང་སྦྲང་བུ་དག་ལས་ཀྱང་། །སྲིན་བུར་འགྱུར་གཞན་མི་འདྲ་མང་། །རྒྱུ་དང་འདྲ་བའི་འབྲས་བུ་ནི། །ས་རྣམས་

གང་ནའང་ཡོད་པ་མིན། །གྱུར་པའི་རྒྱུ་ལས་འབྲས་བུ་འབྱུང་། །རྡུལ་ཕྲན་གང་དག་རྒྱུར་འགྱུར་ནི། །དངོས་པོ་འཇིག་པ་མེད་པར་ཏེ། །རྣམ་པར་རྟོག་ལ་མི་རྟོག་ཅིང་། །རྒྱུ་ཡི་བདག་དང་ནང་གི་བདག །བདག་གི་མཆོག་ཀྱང་མེད་པ་སྟེ། །བདག་དང་དབང་པོ་ཡིད་དང་དོན། །
འདུས་པའི་རྒྱུ་ནི་མ་ཡིན་ཏེ། །ཕྲད་ལས་འབྱུང་དང་རྣམ་ཤེས་དང་། །རྐྱེན་རྣམས་ཡོད་པ་མ་ཡིན་ནོ། །ཤེས་ཅན་ཤེས་པས་ཡུལ་རྣམས་ལ། །མཁས་པའི་སྟོབས་དང་ལྡན་པས་ནི། །སྡེ་དཔུང་སྟོབས་དང་བཞོན་བཅས་པའི། །ཉོན་མོངས་བདུད་རྣམས་གདུལ་བར་བྱ། །སྲེད་
པ་འཇིག་རྟེན་དམའ་བར་བྱེད། །སྦྲང་རྩིས་བད་ཀན་མང་པོ་བཞིན། །སྲེད་པ་བཅོམ་ཞིང་ཐུབ་པའི་རྣམས། །རྣམ་པ་མང་ལས་རྣམ་པར་གྲོལ། །སྲེད་པས་རྣམ་པར་དཀྲུགས་པ་ན། །འཁོར་ལས་རྣམ་པར་མི་འགྲོལ་ཏེ། །སྲེད་དང་རྣམ་བྲལ་འཐར་བར་འགྱུར། །དེ་བས་རྣལ་འབྱོར་
སྦྱར་བར་གྱིས། །ཡུན་རིང་ཡོད་པའི་བག་ཆགས་ནི། །སྦྲུལ་གདུག་ཁྲོས་པ་ཇི་བཞིན་ཡང་། །འདི་དང་ཕ་བིར་འདྲིད་པ་ནི། །འཁོར་བའི་ལམ་རྒྱུད་དོག་པར་རོ། །འཕགས་པ་རྒྱན་སྟུག་པོ་ལས་རྣལ་འབྱོར་རྣམ་པར་ཕྱེ་བའི་སྤྱོད་པ་ཞེས་བྱ་བའི་ལེའུ་སྟེ་དྲུག་གོ། །།
སངས་རྒྱས་རྣལ་འབྱོར་རྣམ་ཕྱེ་དང་། །བདག་ལྡན་དེ་ཡི་བྱིན་གྱིས་བརླབས། །རྒྱལ་བ་དག་དང་རྒྱལ་བའི་སྲས། །བྱེ་བའི་ཞིང་ན་བཞུགས་པ་དང་། །ཁམས་གསུམ་གནས་པ་ཐམས་ཅད་དང་། །ས་གནས་རྣལ་འབྱོར་ལྡན་པ་དང་། །བདེ་ཡོད་ཞིང་དང་སྟུག་པོ་སྟེ། །རྣལ་
འབྱོར་ཅན་གྱི་ཞིང་མཆོག་དང་། །སངས་རྒྱས་པད་མོའི་དབུས་བཞུགས་པ། །རྡུལ་ཕྲན་བཞིན་བཞུགས་བདག་གིས་མཐོང་། །རྣལ་འབྱོར་དེ་ལས་བདག་ལངས་ནས། །ས་ལ་རྒྱལ་བ་དེ་དག་ནི། །སྟུག་པོའི་ཞིང་ན་བདག་བཞུགས་ཤིང་། །རྒྱལ་སྲས་ཐབས་ཅིག་བཞུགས་པ་
དག །མེ་ཏོག་ཨ་ཏ་སི་འདྲ་བའི། །མཁའ་ལ་ཟླ་འདྲ་བཞིན་བཞུགས་མཐོང་། །མཐེ་བོའི་ཚིགས་དང་རབ་འདྲ་བ། །ས་རྣམས་དགེ་ལ་རབ་སྦྱོར་བའི། །རྣམ་གྲོལ་སྙིང་པོ་བདག་གིས་མཐོང་། །འདི་ན་བུ་ཁྱོད་སུ་ཞིག་ཅེས། །སྙིང་པོ་དེ་ལྟར་སེམས་གྱུར་ཏེ། །ཐུབ་པ་འདི་ནི་

གཅིག་ཅིག་སྙམ། །དེ་ཚེ་སྐུ་རུ་ཞུགས་པར་གྱུར། །འགྲོ་བ་རྣམས་ཀྱང་སྐུར་ཞུགས་ནས། །ཐུབ་པའི་པད་མོའི་སྙིང་པོ་ཡིས། །སངས་རྒྱས་རྣམས་ཀྱི་ལོངས་སྤྱོད་དང་། །ཁམས་གསུམ་ཀུན་ན་གནས་པར་ཡང་། །གང་ཚེ་མཐོང་བ་དེ་དུས་ན། །ཀྱེ་མ་
མཚར་ཆེས་བསམ་པ་དང་། །དེ་ཚེ་ཐུབ་པ་ལྷ་ཡི་ལྷས། །རྣལ་འབྱོར་ཡུལ་ནི་རབ་བསྡུས་ཏེ། །ཐུབ་པས་སྔོན་བཞིན་བཞག་པར་གྱུར། །ཀྱེ་མ་བསམ་ཡས་ལྷ་རྫས་འདི། །རྣལ་འབྱོར་ཅན་གྱི་སྣ་ཚོགས་གཟུགས། །སངས་རྒྱས་ལྷ་ཡི་ཡུལ་ཡིན་ཏེ། །བསམ་གྱིས་མི་
ཁྱབ་བདག་གིས་མཐོང་། །ཆོས་ཀྱི་སྤྲིན་གྱི་ཏིང་འཛིན་དང་། །དགའ་དང་མི་གཡོ་དེ་བཞིན་ཏེ། །རིང་སོང་མངོན་དུ་གྱུར་པ་དང་། །འོད་བྱེད་པ་ཡི་མ་ལུས་པར། །སྒྱུ་མ་དཔའ་བར་འགྲོ་ལ་སོགས། །གཟི་བརྗིད་ཅན་ཡང་མ་ལུས་པར། །གཟུགས་རྣམས་ཀྱི་ཡང་ཡུལ་ཡིན་ཏེ། །
འོག་མིན་ཐབས་ལས་བྱུང་བའོ། །དེ་ནི་ཡིད་བཞིན་འགྱུར་སྐུ་ཡིས། །དབང་གི་ཡོན་ཏན་བརྒྱད་པོ་རྣམས། །ཕྲ་ཚོགས་ཆེ་བའི་ཡོན་ཏན་དང་། །འཐོབ་དང་འདོད་འབྱོར་བསྒྲགས་པ་དང་། །བདག་པོ་དབང་དང་ལྡན་པ་དང་། །ཇི་ལྟར་འདོད་པར་རུང་བའི་རྣམས། །ཐོབ་ནས་སྟུག་པོའི་
དབུས་ཡུལ་ན། །རྣམ་པར་གནས་ཤིང་རབ་ཏུ་རྩེ། །སྤྲུལ་པའི་ལྷ་རྫས་སྟུག་པོ་ནས། །ཕྱིན་པ་དགེ་བ་དེ་དག་ཀྱང་། །ལྷུན་གྱིས་གྲུབ་པ་སངས་རྒྱས་ཀྱི། །འཕྲུལ་པ་རྣམས་ནི་རབ་ཏུ་འབྱེད། །རྒྱལ་བ་རྣམས་དང་རྒྱལ་སྲས་སུ། །ཐབས་ཅིག་བཞུགས་པར་ཀུན་ན་སྣང་། །དེ་
ལྟར་ས་འདི་སྣ་ཚོགས་ཏེ། །རང་གི་གཟུགས་ལྡན་རྣམས་ཀྱང་འདྲེས། །ཆ་ལས་ཕྱིར་ལྡོག་དེ་ཡི་ཚེ། །བྱ་བ་བྱས་པས་སྟུག་པོའི་གཞི། །ཤེས་པས་བཅད་ཅིང་མཁས་པའི་རྣམས། །ཐུབ་པ་དག་གིས་སྟུག་པོ་མཐོང་། །གཞལ་མེད་པད་མོ་འདྲ་བ་ན། །མེ་ལྟར་རབ་ཏུ་འབར་བ་
ཡིན། །ཐུབ་པ་རྣལ་འབྱོར་བདེ་མོས་པ། །རྣལ་འབྱོར་ཅན་དང་ལྷན་ཅིག་གནས། །དཔལ་བེའུ་མཚན་དང་ཐམས་ཅད་ལྡན། །ཕྲ་བའི་ལུས་ཅན་རང་གི་འོད། །དེ་དག་དབུས་སུ་ཐུབ་པའི་དབང་། །ཁྱོད་ནི་གནས་པར་རབ་ཏུ་འགྱུར། །ལྟོས་ཤིག་ལྷ་ཡི་ཅོད་པན་དང་། །དྲུ་མ་

མིའམ་ཅི་ཡི་བདག །གཞལ་མེད་བྱེ་བ་མང་པོ་ཡིས། །ཟླ་བ་བཞིན་དུ་རབ་ཏུ་འབར། །ཐུབ་པ་རྣམས་དང་རྒྱལ་བའི་སྲས། །དགའ་ལྡན་ལ་སོགས་ལྷ་ཡི་མཆོག །ཨ་ཏ་ས་ཡི་མེ་ཏོག་འདྲ། །ཤེས་རབ་བཟང་ཞིང་མཚན་མང་བ། །ཕྲེང་བ་ཅོད་པན་ཐོགས་པའི་རྣམས། །
གཞལ་མེད་མང་པོས་གནས་པ་སྟེ། །ལུས་ནི་རབ་ཏུ་འབར་བ་དང་། །ཀུན་མཁྱེན་ཐམས་ཅད་མངོན་གྱུར་པ། །ཐོགས་པ་མེད་པའི་སྤོབས་པ་དང་། །ཀུན་ཏུ་བཟང་པོ་སྟོབས་ཆེན་ཏེ། །ཟླ་བ་འདྲ་བའི་གཞལ་མེད་ཀྱིས། །སྟུག་པོའི་གང་ཆེན་མཚོ་ལ་གནས། །རྣམ་པ་དུ་མར་
ཐམས་ཅད་ནས། །ཐུབ་པ་རྣམས་ཀྱིས་བསྟོད་པ་སྟེ། །ཆགས་མེད་ཚངས་པའི་ཁྱུ་མཆོག་དང་། །གྲུབ་དང་དྲི་ཟ་ཚོགས་རྣམས་དང་། །མཁས་དང་ངེས་པར་ལྡན་པ་ཡི། །སྐྱེས་བུའི་ཚོགས་ཀྱི་བདག་པོ་དང་། །རྒྱལ་བའི་སྲས་ཀྱིས་མདུན་དུ་བྱས། །རྣལ་འབྱོར་སྤྱོད་
པས་ཁྱད་པར་དུ། །གཟིམས་པ་ལྟ་བུར་མཐོང་བ་ནི། །དེ་དག་ལེ་ལོ་བྲལ་བས་ཏེ། །གཉིད་དང་སྙོམ་སོགས་བསྲབས་པ་ཡིས། །སངས་རྒྱས་ལྷ་ཡི་རྗེས་སུ་འབྲང་། །མུར་འདུག་ཀུན་གྱིས་མཐོང་གྱུར་ཅིང་། །དེ་བཞི