Kinh tạng Tây Tạng (Kangyur Đại Học) — 050_མདོ་སྡེ།_ཆ

ན་ལྷ་དང་ཚངས་ལ་སོགས། །འཛམ་གླིང་པ་དང་འོག་མིན་
དང་། །འཕྲུལ་གྱིས་སྤྲུལ་པས་ཐུབ་མཐོང་བ། །འགྲོ་བས་སྣ་ཚོགས་ཀུན་གཟུགས་སུ། །ས་ལ་ཀུན་ནས་ཞུགས་པར་ཏེ། །ཆོ་འཕྲུལ་རྣམ་པ་མང་པོ་ཡིས། །མགོན་པོ་ཤིན་ཏུ་རྣམ་པར་མཛེས། །ལ་ལ་ཉལ་ཞིང་རབ་ཏུ་འབར། །དེ་བཞིན་གཞན་དག་ཕན་ཚུན་འཆག །
ལ་ལ་གཡེན་སྤྱོ་བྲེལ་ཅིང་སྒོམ། །དེ་བཞིན་གཞན་ཡང་མྱ་ངན་འདའ། །ལ་ལ་མངལ་དུ་འཇུག་པ་དང་། །སྐྱེ་དང་འབྱུང་དང་དཀའ་སྤྱོད་དང་། །བྱང་ཆུབ་རྣམ་པར་འཚང་རྒྱ་ཞིང་། །ཆོས་ཀྱི་འཁོར་ལོ་བསྐོར་བར་རོ། །སངས་རྒྱས་ཉིད་དང་སངས་རྒྱས་ཡུལ། །སངས་རྒྱས་ཡེ་ཤེས་བླ་ན་
མེད། །རྒྱལ་བའི་སྲས་པོ་འཇིགས་མེད་པ། །དེ་དག་ཀུན་གྱིས་འཐོབ་འགྱུར་ཏེ། །ཐུབ་པ་ཤཱཀྱའི་སེང་གེ་ཡིས། །ཇི་ལྟར་བརྙེས་བཞིན་གྲོགས་པོ་རྣམས། །རྒྱལ་སྲས་འཇིགས་པ་མེད་པ་ཡིས། །འདི་དག་ཀུན་ལ་ཡིད་ཆེས་ཀྱིས། །ཡིད་ཆེས་གྱུར་ན་སངས་རྒྱས་སམ། །

ཐར་བར་འགྱུར་བ་ཐེ་ཙོམ་མེད། །འཁོར་ལོ་འཁོར་བའི་རྒྱལ་པོར་འགྱུར། །སྤོབས་ཅན་ཁམས་ཀྱི་བདག་པོ་དང་། །ཚངས་ལ་སོགས་པའི་གནས་སུ་ཡང་། །གནས་འགྱུར་འཁོར་གྱི་བདག་པོར་འགྱུར། །དྲི་མེད་ཞིང་གི་པད་མོ་ལ། །ཐུབ་པའི་དབུས་སུ་
སྐྱེ་བར་འགྱུར། །པད་མོའི་དབུས་སུ་སྐྱེ་བ་ཡང་། །བརྩོན་འགྲུས་ལྡན་པའི་སྲས་ཀྱིས་འཐོབ། །བརྩོན་པས་བདུད་ལས་རྒྱལ་བར་འགྱུར། །བག་ཆགས་འདོད་པའི་རྒྱུ་ལས་ཀྱང་། །འདོད་བདག་བདག་པོ་ཕམ་བྱས་ཤིང་། །ཐེག་པ་གཅིག་ལ་རབ་ཏུ་འཇུག །བརྩོན་
འགྲུས་ལྡན་ཞིང་ཞི་མེད་པའི། །རིགས་ཀྱང་ཐུབ་པ་རབ་ཏུ་སྟོན། །སྲས་པོ་ཡངས་པའི་རིགས་གྱུར་ཅིང་། །ཞིང་དང་ཞིང་དུ་བདག་པོར་འགྱུར། །སངས་རྒྱས་ཉིད་དུ་སྨོན་སེམས་ན། །སངས་རྒྱས་རིགས་ནི་རྣམ་པར་དག །རྣམ་དག་རིགས་ཅན་སྲས་དེ་ནི། །སངས་རྒྱས་
རྣམས་ཀྱིས་ལུང་བསྟན་ཏེ། །མྱུར་དུ་སངས་རྒྱས་ཅི་འདྲ་བ། །དེ་བཞིན་ཐུབ་པ་འཚང་རྒྱའོ། །རྣམ་སངས་རྒྱས་ནས་ཉེར་འཚོ་བ། །ཚངས་ལ་སོགས་དང་རྣལ་འབྱོར་ཅན། །ས་ལྟར་རྟག་པའི་དུས་སུ་ཡང་། །ལུས་ཅན་རྣམས་ལ་ཉེ་བར་གནས། །ཐམས་ཅད་སྨན་གྱི་
རྣལ་འབྱོར་ཅན། །ཇི་ལྟར་གྲོང་དང་གྲོང་གནས་པ། །ནད་རྣམས་རབ་ཏུ་སེལ་བ་ལྟར། །རབ་ཏུ་མཁས་པ་དེ་བྱེད་པ། །རྣམ་རྟོག་མེད་པའི་ཡིད་ཀྱིས་ཏེ། །བཅད་ཀྱང་གཡོ་ཞིང་འགུལ་བ་མེད། །འདི་ནི་རྣམ་པར་རིག་པ་ཙམ། །ཡིད་ནི་ནང་དང་ཕྱིར་ཡང་སྤྱོད། །བདག་དང་བདག་
གི་མེད་པ་སྟེ། །ནོར་བར་མཐོང་ཞིང་མི་གཡོའོ། །ཡིད་ཀྱི་རྣམ་ཤེས་ཡུལ་ཅན་གྱི། །ཀུན་གཞི་ཀུན་ནས་གནས་པ་སྟེ། །གཅད་དང་གཅོད་པར་བྱེད་པ་དང་། །དེ་ཉིད་གཅད་བྱ་གཅོད་པའང་ཡིན། །ལུས་ཅན་ཀུན་གྱི་ཀུན་གཞི་ནི། །ལས་ཀྱི་བག་ཆགས་རྣམས་ཀྱིས་ཡོག །
ཁར་བ་ནོར་བུ་ཉི་མ་དག །ལྡན་ལས་མེ་འབྱུང་ཇི་བཞིན་ཏེ། །གཙུབ་མ་གཙུབ་སྟན་འདུས་ལས་མིན། །མིས་ཀྱང་བྱས་པ་མ་ཡིན་ནོ། །དེ་བཞིན་སེམས་ཡིད་རྣམ་ཤེས་དང་། །དབང་པོ་དོན་དང་ཡིད་དང་ལས། །སེམས་རྣམས་རབ་ཏུ་སྐྱེར་གྱུར་པ། །རྒྱ་མཚོའི་དབའ་རླབས་

ཅི་བཞིན་ནོ། །སྨིག་རྒྱུ་ནམ་མཁའ་སྒྱུ་མ་དང་། །རྨི་ལམ་མ་ཡིན་ནོར་བའང་མིན། །སྦལ་པ་རུས་སྦལ་སྤུ་དག་དང་། །རི་བོང་རྭ་དང་མཉམ་པའང་མིན། །མེ་ནི་ཤིང་ལས་སྐྱེ་བར་འགྱུར། །གློག་ནི་དེ་བཞིན་སྤྲིན་ལས་སོ། །མེད་ལ་སྐྱེད་པ་སུ་ཡང་མེད། །རྫ་སོགས་རྫ་མཁན་
ལྟ་བུའོ། །ཇི་ལྟར་རྩྭ་དང་ཤིང་དག་ལ། །བརྟེན་ཅིང་ལྷན་ཅིག་སྒྱུ་འབྱུང་བ། །དེ་བཞིན་མོས་ལ་སོགས་པ་ཀུན། །སེམས་དང་སེམས་བྱུང་ལྷན་ཅིག་གནས། །སེམས་ཀྱི་ཡུལ་ནི་བསམ་དུ་མེད། །སྟུག་ན་གནས་པས་ལེགས་པར་མཐོང་། །ལྷ་རྫས་སྔོན་མེད་ལྷན་ཅིག་སྐྱེས། །
མྱ་ངན་འདས་དང་ནམ་མཁའ་བཞིན། །སོ་སོར་མ་བརྟགས་འགོག་པ་ལྟར། །དུས་གསུམ་རྣམ་པར་སྤངས་པ་སྟེ། །འོད་ཅན་རྟག་ཏུ་དག་པ་ནི། །ལུས་ཅན་ཀུན་གྱི་ཀུན་གཞིའོ། །དང་པོ་ཚེས་པའི་ཟླ་མདོག་ལྟར། །བྱེ་བའི་ཞིང་དུ་སྣང་བ་སྟེ། །རི་རབ་གནས་ཤིང་འཁོར་བ་ཡང་། །
དངོས་པོ་འཇིག་པ་མ་ཡིན་ནོ། །དེ་བཞིན་ཡིད་སེམས་རྣམ་པར་ཤེས། །སེམས་ཅན་ཁམས་ན་འཁོར་མོད་ཀྱི། །དེ་ལ་འཕེལ་ཞིང་འབྲི་མེད་དེ། །རྟག་ཏུ་རང་བཞིན་འོད་སྣང་བའོ། །ཇི་ལྟར་ཟླ་བ་སྐྱེ་འབྲི་བར། །མི་ཤེས་འགྲོ་བ་རྣམ་རྟོག་ཀྱང་། །སྐྱེ་འབྲི་ཟླ་ལ་ཡོད་པ་མིན། །
གླིང་དང་གླིང་དུའང་རབ་ཏུ་སྣང་། །དེ་བཞིན་ཀུན་གཞི་རྣམ་ཤེས་ལ། །བྱིས་པ་མི་ཤེས་འགྲོ་རྣམས་ཀྱང་། །རྟག་ཏུ་སྐྱེ་བྲིར་རྣམ་རྟོག་སྟེ། །དེ་ནི་ཟག་མེད་སངས་རྒྱས་སོ། །ཀུན་གཞི་འདི་ལ་ཇི་ལྟར་ཡང་། །འབྱུང་བས་ཐ་དད་མི་འགྱུར་ཏེ། །འཇུག་པའི་རྣམ་ཤེས་སོང་གནས་
པ། །བག་ཆགས་ཀྱིས་ནི་ཟླ་བ་བཞིན། །ཆུ་ཀླུང་དབུས་ཀྱི་ཤིང་ལྟ་བུར། །ཆུ་བོའི་ཀླུང་དང་འགྲོགས་མོད་ཀྱི། །ཐ་དད་མཚན་དུའང་རབ་ཏུ་གྲུབ། །རྒྱ་མཚོ་ཆེན་པོར་དེ་བཞིན་འགྲོ། །དེ་ལྟར་ཀུན་གཞི་རྣམ་ཤེས་ཀྱང་། །རྟག་ཏུ་བག་ཆགས་ལྡན་འགྱུར་བ། །རྣམ་པར་ཤེས་པ་བདུན་
པོ་དང་། །འགྲོགས་ཀྱང་འདྲེ་བ་མེད་པ་སྟེ། །ཀུན་ནས་ཉོན་མོངས་རྣམ་བྱང་དང་། །རྣམ་པར་དག་པའི་རྒྱུ་ཡང་དེ། །ཆོས་མཐོང་འཕགས་པ་རྣམས་ཀྱི་ཡང་། །དེ་ནི་རྣལ་འབྱོར་མཉམ་བཞག་པ། །བྱོལ་སོང་མི་དང་ལྷར་སྐྱེས་དང་། །ཤ་ཟ་ལྟོ་འཕྱེ་ཡི་དྭགས་དང་། །ལྷ་མིན་དྲི་

ཟ་འབར་བ་ཡི། །ལམ་རྒྱུད་ཀུན་ཀྱང་དེ་ཡི་དབང་། །སངས་རྒྱས་ཀུན་གྱི་གཞི་མཛེས་ལའང་། །དེ་ཉིད་རྒྱུར་ནི་གྱུར་པ་སྟེ། །དེ་རྟོགས་ནས་ནི་སངས་རྒྱས་དང་། །རིགས་དང་ཐེག་པ་གཞན་མིན་འགྱུར། །ཐམས་ཅད་ལུས་ལ་རྟག་ཏུ་གནས། །སྤྱོད་ལོང་ཡོད་ལ་
རྣམ་པར་འདུག །དཔལ་དང་ལྡན་ལ་ཁྱད་པར་དུ། །ཐམས་ཅད་ཀུན་ཀྱང་རབ་ཏུ་གནས། །རབ་དང་འབྲིང་དང་ཐ་མ་ལའང་། །འགྲོ་བ་དོག་པ་ཐམས་ཅད་ན། །དེ་ནི་ཀུན་ཏུ་གནས་པ་སྟེ། །ལུས་ཅན་རྣམས་ཀྱི་ལུས་ལ་རྟེན། །འབྲས་བུའི་བདག་དང་རྒྱུ་ཡི་བདག །ནང་གི་བདག་ཀྱང་
དེ་ཉིད་ལ། །བྱིས་པ་རྣམས་ཀྱིས་ཁོར་ཟུག་བརྟག །དེ་ཡི་དབྱིངས་ལ་ཐོག་མ་མེད། །གནས་ངན་ལེན་དང་ལས་ཀྱིས་བསྐྱེད། །བག་ཆགས་ཐོག་མ་མེད་པས་བསགས། །འཚོ་ཞིང་གསོ་བར་བྱེད་པ་ནི། །རྣམ་པར་ཤེས་པ་བདུན་པོ་སྟེ། །ཡིད་ནི་རྟག་ཏུ་རླུང་དང་མཉམ། །གཡོ་
ཞིང་མྱུར་བར་རབ་ཏུ་འཇུག །ལུས་ཅན་རྣམས་ཀྱི་ལུས་གནས་ཤིང་། །ཁམས་ཀྱི་གོང་ལ་གནས་པའོ། །ལས་ཀྱི་རླུང་གིས་བསྐྱོད་པ་ནི། །དབང་པོ་རྣམས་ལ་ཁྱབ་པར་གནས། །རྣམ་ཤེས་བདུན་དང་ལྷན་ཅིག་ཏུ། །དབའ་རླབས་བཞིན་དུ་རྒྱུ་བ་སྟེ། །རྡུལ་ཕྲན་དུས་དང་གཙོ་བོ་
དང་། །དེ་བཞིན་སྐྱེས་བུ་དབང་བཅས་སུ། །ཀུན་གཞི་གཅིག་པུ་དགེ་བ་དེ། །རྟོག་པ་ཅན་གྱིས་ཐེར་ཟུག་བརྟག །རྟག་ཏུ་སྣ་ཚོགས་རྣམ་པའི་གཟུགས། །གཡོ་ཞིང་མྱུར་འབྱུང་བྱེད་པ་སྟེ། །ཀུན་གཞི་ས་རྣམས་ཐམས་ཅད་དུ། །ཕྱི་ནང་བཅས་པར་གནས་པ་ཡིན། །དེ་ནི་ས་ཡི་
རྒྱུ་ཡིན་པར། །རྒྱུ་ཅན་རྣམས་ཀྱིས་བརྟག་པ་སྟེ། །དེ་ཡི་འགྲོ་བ་ཤིན་ཏུ་ཕྲ། །རྟོག་པ་ཅན་རྣམས་མྱོས་པར་བྱེད། །བདག་དོན་དབང་པོ་ཡིད་མྱོས་པའི། །ཡང་དག་མ་མཐོང་མྱོས་པར་འགྱུར། །སྔོན་གྱི་ལས་ཀྱིས་བསྐྱོད་པ་ཡི། །རྣམ་པར་ཤེས་པ་སྲེད་པའི་རྒྱུ། །སྣ་ཚོགས་
གཟུགས་ཅན་འགྲོ་བ་དང་། །མི་རྣམས་ཀྱི་ཡང་རྒྱུ་ཡིན་ནོ། །འཇིགས་མེད་རྒྱལ་བའི་སྲས་རྣམས་ལ། །རྡོ་རྗེའི་སྙིང་པོས་ཡང་སྨྲས་པ། །ཀུན་གཞི་དང་ལུགས་དགེ་བ་ནི། །རྒྱལ་སྲས་རྣམས་ཀྱིས་མཐོང་ཐོས་ཏེ། །ཀུན་གཞིའི་མཆོག་ཏུ་དགེ་བ་ནི། །ཐམས་ཅད་ལུས་ལ་ཞེན་པ་སྟེ། །

སུམ་ཅུ་རྩ་གཉིས་མཚན་ལྡན་ཞིང་། །རྣམ་པ་སྣ་ཚོགས་གཟུགས་མངའ་བའི། །རྒྱལ་བ་འཁོར་ལོ་འཁོར་བར་ཡང་། །ས་རྣམས་ལ་ལར་འགྲོ་བས་མཐོང་། །ཇི་ལྟར་ཟླ་བ་སྐར་ཚོགས་དང་། །ལྷན་ཅིག་མཁའ་ལ་གནས་པ་ལྟར། །རྣམ་ཤེས་རྣམས་དང་ཀུན་གཞི་ཡང་། །
དེ་བཞིན་ལྷན་ཅིག་ལུས་ལ་གནས། །ཇི་ལྟར་དབང་གིས་སྒྱུར་བའི་ལྷ། །ལྷ་ཡི་བུ་མོས་མདུན་བདར་ཅིང་། །རིན་ཆེན་དབུས་ན་རྣམ་མཛེས་པ། །དེ་བཞིན་ཀུན་གཞི་ས་རྣམས་ལ། །ཇི་ལྟར་ཆུ་དབང་ཆུ་ཡི་ལྷ། །ཆུ་ཀླུང་རྒྱ་མཚོ་མཆིང་རྣམས་ལ། །ཇི་བཞིན་སྐྱེ་ལྡན་ས་ཡང་སྟེ། །དེ་བཞིན་
སེམས་ནི་རྣམ་པར་མཛེས། །ཇི་ལྟར་གཞལ་མེད་གནས་པའི་ཉི། །རི་རབ་ལོགས་ན་རྣམ་པར་མཛེས། །ལྷ་རྣམས་ཀྱིས་ནི་ཕྱག་ཀྱང་བྱ། །དེ་བཞིན་ཀུན་གཞི་སངས་རྒྱས་སར། །ས་བཅུ་དག་ལ་ལྷན་ཅིག་ཏུ། །སྤྱད་པ་སྤྱོད་པ་རྒྱལ་བའི་སྲས། །ཐེག་པ་ཆེན་པོས་ཕྱུང་བ་སྟེ། །
ལུས་ལ་གནས་པ་རྣམ་པར་མཛེས། །རྗོད་པའི་ཞལ་གྱིས་རྟག་པར་ཡང་། །རྒྱལ་བ་རྣམས་ནི་ཀུན་ནས་བསྟོད། །ཉན་ཐོས་རྣམས་དང་རང་རྒྱལ་དང་། །རྒྱལ་བའི་སྲས་རྣམས་ཁྱད་པར་དུ། །ས་དང་ས་ལ་རྣམ་དག་པ། །རྒྱལ་བའི་སྲས་ཞེས་མངོན་བསྒྲགས་དང་། །
རྒྱལ་བ་དག་དང་རྒྱལ་བའི་སྲས། །དེ་དག་ཀུན་གཞི་འདི་ལ་བརྗོད། །ལུང་སྟོན་ལུང་བསྟན་འགྱུར་བ་ཡི། །རྒྱལ་སྲས་རྒྱལ་བ་དེ་བཞིན་ཏེ། །ཀུན་གཞི་དྲི་མེད་བསོད་ནམས་ཀྱིས། །དེ་བཞིན་གཤེགས་པར་འགྱུར་བ་ཡིན། །འདི་ལྟ་བུ་ཡི་ཀུན་གཞིའི་ཡུལ། །སྟུག་ན་གནས་
པའི་རྣལ་འབྱོར་ཅན། །ཐུབ་བརྩོན་རྣལ་འབྱོར་སྤྱོད་པ་ཡིས། །རབ་ཏུ་མཐོང་ཞིང་རྣལ་འབྱོར་གྱིས། །སངས་རྒྱས་དག་དང་རང་སངས་རྒྱས། །ཉན་ཐོས་རྣམས་དང་མུར་འདུག་གཞན། །དེ་ཉིད་རྟོགས་ནས་མཐོང་བ་ནི། །རྣལ་འབྱོར་འཇིགས་མེད་རྣལ་འབྱོར་རོ། །རྣམ་པར་
ཤེས་པའི་སྤྱོད་ཡུལ་གང་། །འདི་ལྟར་སྣང་བ་ཅི་ཡང་རུང་། །རྣམ་པར་ཤེས་པར་གྱུར་པ་སྟེ། །རྫ་ལ་སོགས་པ་ས་མ་ཡིན། །འདི་ལྟར་ནོར་པ་གང་སྣང་བ། །སྣ་ཚོགས་རྫ་གྲགས་ཅི་ཡང་རུང་། །དེ་ནི་ཀུན་གཞི་གྱུར་པ་སྟེ། །སྣང་བ་ནོར་པའི་མཚན་ཉིད་དོ། །ཀུན་གཞི་ཆུ་ཀླུང་དེ་

བཞིན་དུ། །སྣ་ཚོགས་སྣང་མངོན་འགྲོ་བས་མཐོང་། །བག་ཆགས་རྣམས་ཀྱིས་བསྒོས་པའི་སེམས། །གཟུང་དང་འཛིན་པ་རབ་ཏུ་འཁོར། །དངོས་པོ་སྒྱུ་འདྲ་མ་ཡིན་ཏེ། །སྐྲ་ཡི་ཚོགས་དང་སྨིག་རྒྱུ་མིན། །སྐྱེས་དང་མ་སྐྱེས་མ་ཡིན་ཏེ། །སྟོང་དང་མི་སྟོང་
རྣམ་པར་སྤངས། །དངོས་སུ་གཅིག་མེད་མི་འགྱུར་ཏེ། །རིང་དང་ཐུང་ལ་སོགས་པ་བཞིན། །སྒྱུ་མའི་རང་བཞིན་སྐྱེས་པ་ནི། །གང་ན་ཅི་ཡང་ཡོད་པ་མིན། །དེ་ནི་རིག་སྔགས་སྒྱུ་མ་སྟེ། །སྐྱེས་བུ་རྣམས་ལ་རབ་ཏུ་སྣང་། །སྨིག་རྒྱུ་སྐྲ་ལ་སོགས་པའི་ཚོགས། །གཉིས་ལས་ཉེ་
བར་མངོན་པ་སྟེ། །གཅིག་མེད་པར་ནི་གཉིས་པོ་ཡང་། །མ་བྱུང་འབྱུང་བར་མི་འགྱུར་ཏེ། །སྒྱུ་ལ་སོགས་པ་རྣམ་བརྟགས་པ། །འདི་ནི་རྣམ་ཤེས་གྱུར་པའོ། །སྒྱུ་མེད་སྒྱུ་ཞེས་བྱ་བ་ཡི། །དངོས་པོ་གང་དང་གང་ཡང་མེད། །ཅིའང་རུང་སྟེ་གང་ཡོད་པ། །སྒྱུ་མས་བྱས་པའང་
ཡོད་པ་ཡིན། །མྱོས་པར་བྱེད་པ་འཇིག་རྟེན་ན། །སེམས་ལ་དབང་མེད་རྣམས་ལ་ཡོད། །སྒྱུ་མ་དག་གམ་གྱོ་མོ་དག །སྣ་ཚོགས་སྒྱུ་མས་མ་བྱས་ཏེ། །གཡོ་བ་གང་དག་ཅི་ཡང་རུང་། །དེ་ནི་སྣང་མིན་སུས་མི་མཐོང་། །འདི་ལ་རྣམ་རྟོག་གཡོ་བ་ནི། །ཁབ་ལོང་དག་ལ་ལྕགས་
བཞིན་ཏེ། །སེམས་ཅན་མེད་ལ་མི་རྟག་པའི། །ཤེལ་སྒོང་ནོར་བུ་ཇི་བཞིན་ནོ། །ཀུན་གཞི་ཀུན་ནས་སྣ་ཚོགས་པ། །བྱེད་པ་བཞིན་དུ་སྣང་བ་སྟེ། །སྐྱེ་ཞིང་འཆི་བར་འགྱུར་མོད་ཀྱི། །འཁོར་བ་པོ་ནི་གང་ཡང་མེད། །རྨི་ལམ་འདྲ་བར་སྐྱེ་ཤི་དག །རབ་ཏུ་མཐོང་ན་རྣམ་པར་
འགྲོལ། །ཐུབ་པ་གང་ཚེ་གྱུར་པ་ན། །གྲོལ་བ་ཞེས་ནི་བརྗོད་པ་སྟེ། །རིགས་དང་གཞུང་གིས་བསྟན་པ་ནི། །སངས་རྒྱས་ཁྱུ་མཆོག་དེ་ཡིན་ནོ། །ཐམས་ཅད་ཆོས་ལ་མེ་ལོང་བཞིན། །སྲང་ཡིན་དེ་བཞིན་ཚད་མ་སྟེ། །དངོས་པོ་ཀུན་ལ་སྒྲོན་མ་བཞིན། །ཁབ་ལོང་བ་ཡི་རྡོ་ལྟར་
གནས། །རྣལ་འབྱོར་ལམ་གྱི་མཚན་ཉིད་དེ། །འཇིག་པ་རྣམས་ཀྱང་རྣམ་པར་བཟློག །བསམ་གཏན་པ་ཡི་བསམ་གཏན་མཆོག །རྣམ་པར་བྱང་བའི་རྒྱུ་ཡིན་ནོ། །ཀུན་ནས་ཉོན་མོངས་ཟད་པར་བྱེད། །ལམ་ཡང་རྣམ་པར་སྦྱོང་བའོ། །དམ་པའི་དོན་གྱི་སྤྱོད་ཡུལ་ཏེ། །འགྱུར་

བ་རབ་ཏུ་སྟོན་པའོ། །འཕགས་པ་རྒྱན་སྟུག་པོ་ལས་ལེའུ་བདུན་ནོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་ཕྱོགས་བཅུར་བལྟས་ཏེ། གཙུག་གི་རིན་པོ་ཆེའི་འོད་ཟེར་གྱིས་འཇིག་རྟེན་གྱི་ཁམས་ཐམས་ཅད་དང་། དབང་བྱེད་ཀྱི་གནས་
དང་། ནོར་བུ་རིན་པོ་ཆེའི་སྙིང་པོའི་ཕོ་བྲང་ན་གནས་པའི་རྒྱལ་བའི་སྲས་རྣམས་ལའང་སྣང་བར་བྱས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དག་པ་ཇི་ལྟ་བ་བཞིན་དུ་འགོད་པ་སྟོན་པ་ལ་སྨྲས་པ། ཡང་དག་པ་ཇི་ལྟ་བ་བཞིན་དུ་འགོད་པ་སྟོན་པ་ཁ་བ་ཡོད་པའི་ངོས་ལ་རི་དགས་
ཐམས་ཅད་གསོད་པ་ཞེས་བྱ་བའི་རི་དགས་ཀྱི་རིགས་ཤིག་ཡོད་དེ། དེ་ནི་གཅོམ་སྒྱུ་བརྒྱ་སྟོང་གིས་རི་དགས་མང་པོ་ཉེ་བར་བྲིད་ཅིང་ཐབས་ལ་བབ་པའི་རི་དགས་རྣམས་བསད་ཅིང་ཟའོ། །རི་དགས་དྲུས་མ་ཕྲུ་གུ་དང་བཅས་པ་མཐོང་ནའང་ཕྲུ་གུའི་སྐད་དུ་འབོད་དོ། །རི་དགས་རྭ་ཅན་མཐོང་
ནའང་རྭ་དེ་དང་འདྲ་བར་བསྒྱུར་ཏེ་གན་དུ་འགྲོའོ། །དེ་ནས་དེ་དག་དེ་ལ་བག་རྟོན་པ་དང་། དེས་དེ་དག་བག་རྟོན་པར་རིག་ནས་བསད་ཅིང་བསད་ཅིང་ཟའོ། །རྭ་མཐོང་ནའང་རྭའི་གཟུགས་སུ་བསྟན་ཏེ། དེ་དག་བག་ཕབ་ནས་ཇི་ལྟར་འདོད་པར་བསད་ཅིང་བསད་ཅིང་ཟ་སྟེ། ཇི་ལྟར་རི་
དགས་ཞེ་གཏུམ་པའི་ངང་ཚུལ་ཅན་དེ་རྣམ་པ་སྣ་ཚོགས་ཀྱིས་རི་དགས་གསོད་པ་དེ་བཞིན་དུ་ཀུན་གཞི་རྣམ་པར་ཤེས་པའང་ཕས་ཀྱི་རྒོལ་བ་མུར་འདུག་བདག་ཏུ་སྨྲ་བ་ལ་མངོན་པར་ཞེན་པ། བདག་གི་ཆོས་ཉིད་ཀྱི་རྣམ་པར་གནས་པ། འཛིན་པ་དེ་དང་དེ་དག་གིས་བཅིངས་པ་དེ་དང་དེ་
དག་ལ་དེ་ལྟ་དེ་ལྟ་བུའི་རང་བཞིན་གྱི་བདག་ཉིད་ཀྱིས་བདག་ཏུ་སྨྲ་བ་ཡོངས་སུ་རྟོག་ཅིང་རྡུལ་ཕྲ་མོ་ཡན་ཆད་དུ་རབ་ཏུ་ཤེས་པར་བྱེད་པ་དེ་དག་ལ་དེའི་བདག་ཏུ་འཛིན་པ་ཉིད་དུ་གནས་པ་ནི་གཞན་དུ་རྣམ་པར་ཤེས་པ་ཙམ་དུ་མི་གནས་པའི་བར་དུ་སྟེ། བདག་ཡོངས་སུ་རྟོགས་པར་བྱེད་པ་རྣམས་
ཀྱིས་ནི་ཡིད་དང་དབང་པོ་དང་དོན་དུ་ལྡན་པ་ལས་ཤེས་པ་སྐྱེ་བ་མཐོང་གི། བདག་དང་ཡིད་དང་དབང་པོ་དང་། དོན་འདུས་པའི་རྒྱུ་ལས་ནི་མ་ཡིན་ནོ། །དཔེར་ན་མེ་ཏོག་དང་གོས་སུ་ཕྲད་ན་བསུང་གི་ཁྱད་པར་དུ་འགྱུར་གྱི། མ་ཕྲད་པར་ནི་བསུང་དམིགས་པར་མི་འགྱུར་རོ། །དེ་བཞིན་དུ་

སེམས་དང་། སེམས་ལས་བྱུང་བ་དང་། ཡིད་དང་རྣམ་པར་ཤེས་པ་རྣམས་མ་གཏོགས་པར་དོན་དེ་མ་ཡིན་པར་གྱུར་པ་སྣོད་དང་བདར་ལྟ་བུའམ། མེ་མར་དང་རྫ་ལྟ་བུའམ། སྨིག་ལོང་དང་ཨི་ཤ་ཀ་ལྟ་བུ་གཞན་ནི་གང་ཡང་མེད་དེ། རྒྱུ་དང་རྐྱེན་ལས་སེམས་
དང་སེམས་ལས་བྱུང་བའི་ཚོགས་རབ་ཏུ་འབྱུང་ཞིང་བདག་མེད་ལ་ཕྲ་བ་དང་། བསྐྱེད་དུ་མི་རུང་བ་དང་། ཆ་མེད་པ་དང་། དག་ཅིང་ཐོག་མ་ནས་འོད་སྣང་བ་དང་། ཡུལ་རྣམ་པར་རིག་པའི་རྣལ་འབྱོར་ཅན་རྣམས་ཀྱི་འཕགས་པ་སོ་སོ་རང་གིས་རིག་པའི་སྤྱོད་ཡུལ་མ་གཏོགས་པར་རྟོགས་པར་
བྱེད་པ་རྣམས་ཀྱིས་མི་དམིགས་སོ། །འདི་ཉིད་ནི་རི་དགས་ཀྱི་གཅམ་ཞེ་གཏུམ་པོ་ལྟ་བུར་འཇིག་རྟེན་རྣམས་ལ་ཡོད་པ་དང་། མེད་པ་དང་། གཅིག་པ་དང་། མང་པོ་དང་། ཐམས་ཅད་དང་། ཐམས་ཅད་མ་ཡིན་པའི་ལྟ་བསྐྱེད་པར་བྱེད་པ་སྟེ། ལུས་ཅན་རྣམ་པར་རིག་པ་ཙམ་དུ་ཁོང་
དུ་མ་ཆུད་པའི་རྣམས་བདག་དང་བདག་གིར་སྨྲ་བ་ལ་མངོན་པར་ཞེན་པར་ཡང་ལྟུང་བར་བྱེད་དོ། །མི་ཤེས་པའི་ཕྱིར་ཆོས་ཁོང་དུ་ཆུད་པར་འདོད་པའི་བློས་འཁོར་བའི་རྒྱུད་ཀྱི་འཁོར་ལོ་ལ་ཞོན་ཞིང་འདི་དང་ཕ་བི་ནས་རབ་ཏུ་རྒྱུག་སྟེ། དགེ་བའི་བཤེས་གཉེན་སངས་རྒྱས་དང་བྱང་ཆུབ་སེམས་
དཔའ་དང་བྲལ་བ། རང་གི་ཕྱོགས་ལས་རིང་བ་བས་ཀྱང་ཆེས་རིང་བར་ཉམས་པའི་བློ་ཅན། འཕགས་པའི་ལམ་གྱི་ཡན་ལག་བརྒྱད་ཐོབ་པར་མི་ནུས་པ། ཐེག་པ་གསུམ་ལས་འགའ་ཙམ་ལའང་མི་འཇུག་པའི་རྣམ་པ་འཛིན་པ་ལས་རྣམ་པར་ཕྱིར་ལྡོག་པ་མ་སྐྱེས་ཀྱི་བར་དུ་
འཕགས་པའི་བདེན་པ་མི་མཐོང་བས། སྟུག་པོའི་དཀྱིལ་འཁོར་གྱི་སྐལ་བ་ཅན་རྣམས་ཀྱང་སྟུག་པོའམ་སྟུག་པོའི་སྒྲ་ཡང་མི་ཐོས་སོ། །ཡང་དག་པ་ཇི་ལྟ་བ་བཞིན་དུ་འགོད་པ་སྟོན་པ་འདི་ནི་རྣལ་འབྱོར་ཅན་རྣམས་ཀྱི་ལྟ་བ་ཡོངས་སུ་སྦྱང་བ་སྟེ། འདི་ལ་ཁྱོད་དང་བྱང་ཆུབ་སེམས་དཔའ་
གཞན་གྱིས་ཀྱང་བརྩོན་པར་གྱིས་ཤིག །སངས་རྒྱས་ཀྱི་ཞིང་སྟུག་པོར་འཇུག་པའི་གཏམ་གྱི་ཚུལ་ཡང་རྣལ་འབྱོར་ཅན་རྣམས་ལ་སྟོན་ཅིག །རང་གི་རྣམ་པར་རིག་པའི་ཡུལ་ཞེས་བྱ་བ་སྟེ་ལེའུ་བརྒྱད་དོ།། །།ཁབ་ལོང་རྡོ་ལ་ཇི་ལྟར་ལྕགས། །ཡོངས་ཀྱིས་

ཀུན་ཏུ་རབ་འཁོར་བ། །དེ་བཞིན་ཕུང་པོའི་ཤིང་རྟ་སྟེ། །སྟོང་ཞིང་བག་ཆགས་བྱུང་བ་འཁོར། །རྩྭ་དང་འཇིམ་པ་ཤིང་སྨིག་དང་། །ཐག་པ་རྣམས་སུ་འདུས་ཚོགས་ལས། །ཁྱིམ་དུ་ཇི་ལྟར་སྣང་གྱུར་པ། །དེ་བཞིན་ཕུང་པོའི་གཟུགས་འདིའོ། །ལྕགས་དང་ཁབ་ལོང་
རོ་ལངས་ལ། །སེམས་ཅན་ཉེ་བར་དམིགས་མེད་ཀྱང་། །ཐམས་ཅད་སེམས་ཅན་ལྟ་བུར་གཡོ། །དེ་བཞིན་ཕུང་པོ་བདག་མེད་པའོ། །རྒྱལ་སྲས་ཕྱག་ན་རིན་ཆེན་གྱིས། །གཟུགས་མང་རྒྱལ་མཆོག་ལ་སྨྲས་པ། །མཉམ་བཞག་རྡོ་རྗེའི་སྙིང་པོ་ལ། །རྒྱལ་པོ་ཁྱོད་ཀྱིས་དྲི་
བར་བྱོས། །རྒྱལ་སྲས་འཇིགས་མེད་མཁས་པའི་རྣམས། །ཀུན་གྱིས་ཐོས་པར་འགྱུར་བ་ནི། །བརྟག་བྲལ་བརྟག་པར་མི་ནུས་པ། །བརྗོད་པས་རྣམ་པར་སྤངས་པ་སྟེ། །མིང་དང་མིང་ཅན་རྣམ་བྲལ་བ། །འོན་ཀྱང་འདུ་བ་དེ་བཞིན་ཏེ། །སྣ་ཚོགས་གྱུར་པའི་ས་འདི་
ཡི། །རང་བཞིན་ཅི་དང་ཅིར་གནས་པ། །དེ་ནས་གཟུགས་མང་རྒྱལ་པོ་ཡིས། །རྡོ་རྗེ་སྙིང་པོ་འཇིགས་མེད་ལ། །རྗེས་སུ་འབྲེལ་བའི་སྐབས་དྲིས་པ། །དངོས་པོ་དོན་གཞན་བརྟག་པ་སྟེ། །རྡོ་རྗེའི་དབང་པོའི་དངོས་པོ་གང་། །ལ་ལ་རབ་ཏུ་བརྟག་བྱ་བ། །མིང་དང་འདུ་
ཤེས་སོགས་པའི་ཡུལ། །ཡོད་དམ་རྡོ་རྗེ་སྙིང་པོས་སྨྲོས། །མིང་རྣམས་སུས་བྱས་ཇི་ལྟ་བུ། །མིང་ནི་ཅི་ལ་རབ་ཏུ་གནས། །མི་མགོན་ཚིག་ནི་ཐོས་པ་དང་། །རྡོ་རྗེའི་སྙིང་པོས་དེ་ལ་སྨྲས། །འདི་དག་ཐམས་ཅད་མིང་ཙམ་སྟེ། །འདུ་ཤེས་ཙམ་ལ་རབ་ཏུ་གནས། །
བརྗོད་ལས་ཐ་དད་གྱུར་པ་ཡི། །བརྗོད་པར་བྱ་བ་ཡོད་པ་མིན། །ཕུང་པོ་བཞི་པོ་མིང་ཡིན་ཏེ། །གཟུགས་ཀྱང་ཙམ་ཞེས་རྣམ་པར་བརྟག །ཙམ་ལ་མིང་དུ་བཏགས་པ་ནི། །སྐྱེས་བུ་འདི་ཞེས་བྱ་བ་སྟེ། །ཙམ་ལ་མཚན་མ་ཞེས་བྱ་བར། །རྒྱལ་བ་རྒྱལ་སྲས་དག་གིས་
གསུངས། །མཚན་མ་མེད་པར་མིང་དུ་ནི། །དེ་དག་རྣམ་པར་རྟོག་མི་ནུས། །དེ་བས་མཚན་མ་རྟེན་བྱས་ཤིང་། །མིང་དུ་ཀུན་ནས་བརྟག་པ་ཡིན། །ཇི་ལྟར་ལྡིང་དང་ལྔ་བྱིད་དང་། །བར་པ་ང་ཡང་ཡོད་པ་མིན། །མཚན་མ་མེད་པར་ཅི་ཡང་རུང་། །བྱིས་པས་དེ་ལ་

རྣམ་མི་བརྟག །དེ་བཞིན་ས་འདི་ཐམས་ཅད་ཀྱང་། །མཚན་མ་མེད་པར་ཡོད་པ་མིན། །ཅི་ཡང་མཚན་མར་མི་རྟོག་པ། །མཚན་མ་ཡོད་ན་རྣམ་པར་བརྟག །རྫ་དང་སྣམ་བུ་ཤིང་རྟ་དག །གཟུགས་ཡོད་པ་ལ་རྣམ་པར་བརྗོད། །འཇིག་རྟེན་འདི་ནི་
འདི་ཙམ་སྟེ། །གཟུགས་ཙམ་རྣམ་པ་གཞན་མི་འགྱུར། །ཙམ་ལ་མིང་དུ་བརྟགས་པ་སྟེ། །འདི་ལ་ཡང་དག་མིང་ཡོད་མིན། །མིང་མེད་རྣམ་པར་བྲལ་བར་ཡང་། །ས་རྣམས་ཐུབ་པས་མཐོང་བ་ན། །རྣམ་པར་རྟོག་པ་རབ་ཏུ་འཇུག །རྣམ་རྟོག་མེད་པ་མི་སྐྱེའོ། །
ཚེར་སྐྱེ་མེད་པ་གཞན་གྱུར་པ། །མི་ཟད་དེ་ལ་སྐྱེ་བར་འགྱུར། །རྒྱུ་མེད་ཕྱིར་ན་མིང་མེད་དེ། །འདུ་ཤེས་ཙམ་ལ་རྣམ་པར་རྟོག །དེ་བས་རྒྱལ་པོས་རྟག་པར་ཡང་། །འདུ་ཤེས་མ་ཡིན་འདུ་ཤེས་སྒོམས། །འདི་དག་ཐམས་ཅད་འདི་ཙམ་སྟེ། །ཐམས་ཅད་ལས་ནི་
གཞན་མེད་དོ། །ཙམ་ནི་གཟུགས་སུ་ཤེས་པར་བྱ། །དེ་བཞིན་ལུས་དང་གཟུགས་དང་དབྱིབས། །ཆ་ལུགས་རིང་དང་སྐུ་ཡངས་ཏེ། །མཚན་མ་དང་ནི་རྣམ་གྲངས་གཅིག །འདུ་ཤེས་མིང་དང་རྣམ་རྟོག་དང་། །བརྗོད་དང་ཁྱད་པར་ལྷན་ཅིག་སྟེ། །ཙམ་དང་མཚན་མ་འདུ་
ཤེས་སུ། །སྤྱོད་པར་རབ་ཏུ་གདགས་པ་སྟེ། །ཙམ་ལ་གནས་དེ་མིང་རྣམས་ཀྱང་། །ཀུན་རྫོབ་དོན་དུ་རྣམ་པར་བརྟགས། །བརྗོད་པ་མེད་པར་དངོས་པོ་ནི། །མ་བྱུང་འབྱུང་བར་མི་འགྱུར་ཏེ། །རྣམ་ཤེས་རྣམས་ཀྱི་འབྱུང་བ་ཡང་། །རྟོག་བྱ་མེད་པར་ཡོད་པ་མིན། །རྟོག་
བྱ་མིང་དང་ཙམ་པོ་ནི། །ས་རྣམས་ཐམས་ཅད་དེ་ཉིད་དེ། །དངོས་པོ་གང་ལ་གང་མིང་གིས། །བརྟག་པར་བྱ་བ་དེ་བཞིན་མེད། །འདི་ནི་ཆོས་རྣམས་ཆོས་ཉིད་དེ། །བརྟགས་ན་གནས་པ་མེད་པའོ། །འདི་དག་ཐམས་ཅད་མིང་ཙམ་སྟེ། །འདུ་ཤེས་ཅན་གྱི་དངོས་པོ་མེད། །
དེ་མེད་པས་ན་མིང་མེད་དེ། །མིང་མེད་པས་ན་རྣམ་མི་བརྟག །རྣམ་པར་མི་རྟོག་ཞིར་འགྱུར་བ། །བསྲེག་པ་ཚིག་པའི་མེ་བཞིན་ཏེ། །ཁུར་ཙས་ཇི་ལྟར་ཁུར་བསྐུར་བ། །དེ་དང་ཐ་དད་མཚན་ཅན་ཏེ། །དེ་བཞིན་ཙམ་ནི་མིང་གི་ཁུར། །དེ་དང་ཐ་དད་མཚན་ཉིད་ཁྱེར། །

སེམས་ལ་ཙམ་ཞེས་རྣམ་པར་བརྟགས། །མིང་གིས་ཙམ་དུ་སེམས་ཙམ་གྱིས། །འདི་ནི་སྐྱེས་བུ་སྡོང་པོ་ཞེས། །ཅི་ཡང་རུང་སྟེ་མིང་ཙམ་བརྟག །འབྱུང་བ་རྣམས་དང་འདུས་པ་དང་། །ཙམ་ཡང་གཟུགས་ལ་རྣམ་པར་བརྟག །ཙམ་པོ་མེད་པར་འབྱུང་བ་ཡི། །ཙམ་
ཞེས་བྱ་བ་མི་དམིགས་ཏེ། །བུམ་པའི་ངོས་ལ་ཡོན་ཏན་ལྟར། །ཙམ་ལ་མིང་ནི་རྣམ་པར་གནས། །བུམ་པ་བུམ་པའི་དངོས་པོ་ཡིས། །རྣམ་པར་དབེན་ཞིང་མིང་དང་བྲལ། །བུམ་པ་བུམ་པའི་དངོས་པོར་རམ། །མིང་ཡང་མིང་དུ་གནས་པ་མེད། །རྣལ་འབྱོར་ཅན་གྱིས་
གང་གི་ཚེ། །མིང་ཙམ་གཡོ་བ་མེད་པ་དང་། །རྣམ་རྟོག་གཉིས་དང་འབྲེལ་བ་ཡི། །མིང་ཙམ་ཡོད་མེད་མཐོང་བ་ན། །ཇི་ལྟར་མེ་ལྡན་ལྕགས་རྣམས་དང་། །སྤྲ་ཚིལ་དག་ཀྱང་རྒྱ་སྐྱེགས་ཀྱང་། །ཆུ་དང་མཉམ་པར་ཁུ་བར་འགྱུར། །འོན་ཀྱང་ཆུ་ཡི་ཡོན་ཏན་མེད། །དེ་
བཞིན་ཀུན་གཞི་རྣམ་ཤེས་པ། །རྣམ་ཤེས་བདུན་དང་ལྷན་ཅིག་ཏུ། །རྟག་ཏུ་ལུས་སུ་འཇུག་པར་བྱེད། །རྣམ་པར་ཤེས་པས་ཡུན་དུ་སྤངས། །ཁབ་ལོང་རྡོ་ལས་རྟེན་བྱས་ཤིང་། །ལྕགས་ནི་སེམས་ཅན་བཞིན་འཁོར་ཡང་། །དེ་དག་གཉིས་ཀ་བྱེད་པ་མེད། །སེམས་
ཅན་གསོན་པོ་བཞིན་དུ་གཡོ། །སེམས་ནི་བདུན་ཞེས་བགྲང་བ་ཡིན། །ཀུན་གཞི་བརྒྱད་པ་དེ་བཞིན་ནོ། །བག་ཆགས་སྲད་བུས་བརྒྱུས་པས་ན། །སེམས་ཅན་བཞིན་གཡོ་སེམས་ཅན་མེད། །ལུས་ན་ཀུན་ཏུ་རྒྱས་པར་འདུག །འགྲོ་བ་དོག་པར་འཁོར་བ་སྟེ། །གཅིག་
ལས་གཅིག་གིས་མི་ཤེས་པ། །བྱེད་མེད་ལྕགས་དང་ཁབ་ལོང་བཞིན། །མགོ་བོ་དུ་མ་ལྕེ་མང་པོ། །ཁ་མང་ལག་པ་དུ་མ་དང་། །ལུས་ཀྱང་དུ་མར་རབ་བསྒྱུར་ཅིང་། །དེ་བཞིན་གཤེགས་ལ་མཆོད་བྱེད་པ། །ཤིན་ཏུ་མང་བའི་ཞིང་གི་རྣམས། །ཚད་མེད་སྟོང་དུ་འགྲོ་བྱས་
ཤིང་། །དེ་དང་དེར་ཡང་མགོན་པོའི་རྣམས། །དེ་དག་ཀུན་ལ་རྟག་མཆོད་བྱེད། །རི་རབ་རི་དང་མཉམ་པ་ཡི། །མེ་ཏོག་ན་བཟའ་ཆར་མང་པོ། །སྣ་ཚོགས་རྣམ་པ་ཐ་དད་པས། །དེ་དག་མཆོད་པ་རབ་ཏུ་བྱེད། །ཕྲེང་བ་ཕྲེང་ཕྱེད་ཅོད་པན་དང་། །རིན་ཆེན་བརྒྱན་པ་སྣ་ཚོགས་

ཀྱིས། །ཐམས་ཅད་མཁྱེན་དང་རྒྱལ་སྲས་ལ། །རྟག་པར་མཆོད་པ་རབ་ཏུ་བྱེད། །སྤྲིན་ལྟ་བུ་ཡི་གཞལ་མེད་ཁང་། །སྣ་ཚོགས་མང་པོའི་གཟུགས་འགྱུར་བ། །མཐའ་མ་ནམ་མཁའི་མུ་དང་མཉམ། །གཞན་ཡང་རྡུལ་ཕྲན་རྡུལ་སྙེད་ཀྱི། །སྤྲུལ་
མང་ལྷ་ཡི་བུ་མོ་ཡིས། །རོལ་མོ་སིལ་སྙན་རབ་བསྒྲགས་ཏེ། །གཞལ་མེད་དག་ལ་མངོན་གནས་ནས། །དེ་བཞིན་གཤེགས་ལ་མཆོད་པ་བྱེད། །སྟོབས་དང་མངོན་ཤེས་དབང་ཐོབ་ཅིང་། །དོག་པའི་ས་ནས་མ་ཉམས་པ། །ཆོས་ཀྱི་སྤྲིན་ལས་འཐོན་གྱུར་ནས། །
སངས་རྒྱས་ས་ལ་ཞུགས་པའི་རྣམས། །སྒྱུ་མ་དཔའ་བར་འགྲོ་ལ་སོགས། །ཏིང་ངེ་འཛིན་ལ་མཉམ་བཞག་སྟེ། །གཟུངས་ལ་མཁས་པར་གྱུར་པའི་རྣམས། །དེ་བཞིན་གཤེགས་ལ་མཆོད་པ་བྱེད། །སངས་རྒྱས་ཡང་དག་བརྗོད་མོས་རྣམས། །མཐའ་ཡས་ཞིང་
དུ་འགྲོ་བྱས་ཤིང་། །ཡང་དག་ཡོན་ཏན་ལྡན་པ་དག །སངས་རྒྱས་ཡོན་ཏན་རབ་ཏུ་བརྗོད། །དཔུང་དང་བཅས་པའི་བདུད་བཅོམ་སྟེ། །རྒྱལ་བ་དག་དང་ཐབས་ཅིག་ཏུ། །རྒྱལ་སྲས་སོ་སོ་རང་རིག་པའི། །རྟོགས་པར་བྱ་བའི་ཏིང་འཛིན་སྒོམ། །གནས་གཞན་གྱུར་
པའི་ཡོན་ཏན་ཅན། །ཆོས་ལ་བདག་མེད་སྟོན་པའི་རྣམས། །སྤྲོས་པ་ཐམས་ཅད་རྒྱུན་བཅད་ཅིང་། །དམ་པའི་དོན་ལ་རྣམ་སྒོམ་པ། །ཆོས་ལྔ་རྣམས་ཀྱི་རང་བཞིན་དང་། །རྣམ་ཤེས་བརྒྱད་ལའང་དེ་བཞིན་ཏེ། །མཁས་པ་བྱས་པར་རྟག་གྱུར་ཅིང་། །མཉམ་པར་
བཞག་རྣམས་མཆོད་པར་བྱེད། །ཤིན་ཏུ་ཕྲ་བའི་རྡུལ་འདྲ་དང་། །དེ་བཞིན་ཆེན་པོའི་ལུས་ཀྱིས་ཀྱང་། །སྣ་ཚོགས་པ་ཡི་གཟུགས་གྱུར་ནས། །དེ་བཞིན་གཤེགས་ལ་མཆོད་པ་བྱེད། །ས་རྣམས་ཀུན་ཀ་བདག་ལུས་དང་། །ཡུངས་ཀར་འབྲུར་ཡང་རབ་འཛུད་བྱེད། །རྒྱ་
མཚོ་བ་ལང་རྗེས་སུ་བྱེད། །བ་ལང་རྗེས་ཀྱང་གང་ཆེན་མཚོར། །སྤུ་གཅིག་རྩེ་མོར་བརྟན་གཡོ་བའི། །འགྲོ་བ་རབ་ཏུ་འཛུད་བྱེད་ཀྱང་། །གནོད་པར་བྱེད་པ་མ་ཡིན་ཏེ། །འགྲོ་བ་དག་ན་རྣམ་པར་སྤྱོད། །ལོངས་སྤྱོད་ཅན་གྱི་སྐྱིད་ལོངས་ཡུལ། །ཉི་ཟླ་ས་དང་མཉམ་པ་སྟེ། །

འཚིག་མེད་ས་དང་འདྲ་བར་ཡང་། །རྣམ་པ་ཀུན་གྱིས་ཕན་འདོགས་ཤིང་། །མེ་དང་རླུང་དག་འདྲ་བ་སྟེ། །རྟག་ཏུ་ཆུ་དང་སྨན་འདྲ་བ། །རིན་ཆེན་ཁམས་ཀྱི་འབྱུང་ཁུངས་ལྟར། །སེམས་ཅན་ཀུན་ཀྱང་ཉེ་བར་འཚོ། །སྐྱེས་པ་མེད་ཅིང་འགགས་པ་མེད། །མ་ཆད་རྟག་པ་
འང་མེད་པ་སྟེ། །ཐ་དད་དོན་མིན་དོན་གཅིག་མིན། །འགྲོ་མེད་འོང་བ་མེད་པའི་རྣམས། །རྣམ་པར་བརྟགས་པའི་མིང་དག་དང་། །ཀུན་དུ་བརྟགས་པའི་རང་བཞིན་གྱིས། །སེམས་ཅན་རྣམས་ཀྱི་དོན་བྱེད་པ། །མིང་དང་མིང་མེད་རྣམ་སྤངས་དག །སྒྱུ་མ་ལྟ་བུ་རྨི་ལམ་འདྲ། །
དྲི་ཟའི་གྲོང་ཁྱེར་དཔེ་བཞིན་ཏེ། །སྨིག་རྒྱུ་ཆུ་ཡི་ཟླ་བ་འདྲ། །རང་བཞིན་ཀུན་དུ་བརྟགས་པ་དག །གློག་དང་སྤྲིན་དང་དུ་བ་དང་། །མགལ་བའི་འཁོར་ལོ་སྨིག་རྒྱུ་འདྲ། །འདི་ཚུལ་བརྟགས་པའི་ཆོས་རྣམས་ནི། །རང་བཞིན་ཀུན་དུ་བརྟགས་པ་སྟེ། །གང་དང་གང་གི་མིང་རྣམས་
ཀྱིས། །ཆོས་རྣམས་གང་དང་གང་བརྗོད་པ། །དེ་ནི་དེ་ན་ཡོད་པ་མིན། །ཀུན་ཏུ་བརྟགས་པའི་རང་བཞིན་ནོ། །འདི་དག་ཐམས་ཅད་མིང་ཙམ་སྟེ། །འགྲོ་བ་འདི་ནི་མིང་ཙམ་མོ། །བརྗོད་པ་དང་ནི་ཐ་དད་པ། །བརྗོད་པར་བྱ་བ་གང་ཡང་མེད། །འདི་ནི་ས་ཡི་རང་བཞིན་ཏེ། །
ཀུན་ཏུ་བརྟགས་པ་རབ་ཏུ་བསྟན། །མིག་དང་གཟུགས་ལས་བརྟེན་བྱས་ཤིང་། །གསུམ་ལས་ཡིད་དེ་འབྱུང་བ་ཡིན། །རྔ་སྒྲ་མེ་ནི་འདུ་འཕྲོད་ལས། །མྱུ་གུ་ས་བོན་ས་ལས་རིམ། །ཁང་པ་ལ་སོགས་སྣ་ཚོགས་དང་། །སྣམ་བུ་རྫ་ལ་སོགས་པ་དང་། །ལུས་ཅན་རྣམས་
དང་ཆོས་རྣམས་ཀྱི། །འདི་ནི་རང་བཞིན་གཞན་དབང་ངོ་། །དོན་རྣམས་དོར་བ་མེད་པ་དང་། །གང་ཡང་ཟག་པ་མེད་པའི་ཆོས། །སོ་སོ་རང་རིག་རྒྱུད་རྣམས་དང་། །ཆོས་ལ་བདག་མེད་ཉིད་དག་ནི། །ཐམས་ཅད་ཆོས་ཀྱི་གྲུབ་པ་སྟེ། །རང་བཞིན་དུ་ནི་དེ་བརྟགས་སོ། །
རང་བཞིན་གྱིས་ནི་ཆོས་ཀྱི་རྣམས། །ཐ་དད་མཚན་དུ་བསྒྲགས་པ་སྟེ། །ཆོས་རྣམས་ཐམས་ཅད་འདྲེས་པར་ནི། །རང་བཞིན་མེད་ན་རབ་ཏུ་འགྱུར། །གཅིག་མིན་རྫས་རྣམས་འདུས་པ་ལས། །སྒྱུ་མའི་མཁན་པོས་གཅིག་མིན་གཟུགས། །རྟོགས་པར་སླ་བ་

མ་ཡིན་པའི། །སྒྱུ་མའི་རི་དགས་བྱས་པ་བཞིན། །དེ་ལྟར་དངོས་པོ་ཐམས་ཅད་ཀྱང་། །རྣམ་པར་རྟོག་པས་རྣམ་པར་བརྟགས། །རྟོག་པར་མི་རུང་མི་གཅིག་གཟུགས། །ཀུན་ཏུ་བརྟགས་པའི་རང་བཞིན་ནོ། །སྣ་ཚོགས་ནོར་བུ་འདྲ་བ་ཡི། །རི་དགས་
རྫས་ཀྱི་རྒྱུ་ཚོགས་ནས། །སྒྱུ་མའི་མཁན་པོས་རྣམ་བྱས་དང་། །སེམས་ཅན་ཀུན་གྱི་གཟུགས་བཞིན་ཏེ། །དེ་ལྟར་དངོས་པོ་འདི་དག་ཀུན། །རྣམ་པར་རྟོགས་པས་རྣམ་པར་བརྟགས། །རང་བཞིན་རྟོགས་པར་དཀའ་བ་སྟེ། །ཀུན་ཏུ་བརྟགས་པའི་རང་བཞིན་ནོ། །ཇི་
ལྟར་ནོར་བུ་སྣ་ཚོགས་གཟུགས། །ཚོན་དང་ཕྲད་ན་རྣམ་པར་མཛེས། །དེ་བཞིན་ས་རྣམས་ཀུན་ཀ་སྟེ། །རྟོག་པས་རྣམ་པར་བརྟགས་བྱས་ན། །ཡོན་ཏན་དངོས་སུ་མི་གནས་ཏེ། །སྒྱུ་མ་རྨི་ལམ་སྤྲིན་དང་འདྲ། །སྨིག་རྒྱུ་ཆུ་ཟླ་ལྟ་བུ་སྟེ། །ཀུན་ཏུ་བརྟགས་པའི་རང་བཞིན་
ནོ། །ཇི་ལྟར་དྲི་ཟའི་ཁང་པ་དག །ཁང་པ་མ་ཡིན་ཁང་པར་སྣང་། །རྒྱུ་མེད་པར་ཡང་མི་སྣང་སྟེ། །དེ་བཞིན་ས་རྣམས་སྣ་ཚོགས་ཉིད། །ཉི་ཟླ་གཞལ་ཡས་ཁང་རྣམས་དང་། །ཐ་མལ་རི་དང་རིན་ཆེན་རི། །དུ་བ་སྤྲིན་གྱི་གནོད་པས་ནི། །ནམས་ཀྱང་ཉེས་པར་མི་
འགྱུར་ཏེ། །བདག་དང་གཞན་དང་གཉིས་ཀ་ལས། །རྟོག་པས་རྣམ་པར་བརྟག་བྱས་ན། །དངོས་ཉིད་མི་འགྲུབ་དངོས་རྣམས་ཀྱི། །རང་བཞིན་ཀུན་ཏུ་བརྟག་པའོ། །རྒྱུ་ལས་དངོས་པོ་མི་འབྱུང་སྟེ། །རྒྱུ་མེད་ལས་ཀྱང་མ་ཡིན་ནོ། །རང་བཞིན་ཞེས་བྱ་རྣམ་རྟོག་
སྟེ། །དངོས་དང་དངོས་མེད་རྣམ་པར་བརྟགས། །མཚན་མ་ལ་ནི་མིང་རྟེན་ཏེ། །གཉིས་ལ་རྣམ་པར་རྟོག་པ་གནས། །ཡང་དག་ཤེས་དང་དེ་བཞིན་ཉིད། །རྣམ་པར་རྟོག་པ་ཟློག་པའོ། །སེམས་ནི་མཚན་མ་འདྲ་བ་སྟེ། །མཚན་མ་ཡིད་ལ་གནས་པ་ཡིན། །ཡིད་ལ་
སེམས་རྣམས་ལྔ་པོ་ནི། །དབའ་རླབས་བཞིན་དུ་རབ་ཏུ་འབྱུང་། །སེམས་ནི་བག་ཆགས་རྒྱུ་བ་སྟེ། །བག་ཆགས་རྣམས་ལ་ཐོག་མ་མེད། །ཐོག་མ་མེད་པའི་བློ་ཡི་ཡུལ། །ཡུལ་ནི་སེམས་ཀྱི་ནོར་བའོ། །སེམས་ནི་ཡུལ་དང་འདྲ་བ་སྟེ། །ས་རྣམས་ཡུལ་ཞེས་བྱ་བ་ཡིན། །ཐམས་

ཅད་ས་བོན་ཀུན་གཞི་ལ། །རྣམ་པར་ཤེས་པ་ཀུན་ཀྱང་གནས། །རྣམ་ཤེས་བདུན་པོ་ཀུན་གཞི་ལས། །རབ་ཏུ་འབྱུང་ངོ་ཕན་ཚུན་དང་། །སེམས་ཀྱི་རྣམས་དང་ཀུན་གཞི་ལ། །རྟག་མེད་ཆད་པའང་མེད་པ་སྟེ། །ས་རྣམས་ཐམས་ཅད་ཀུན་གཞི་ཡིན། །བར་སྣང་རྣམ་པར་གནས་
པ་སྟེ། །གསུམ་པོ་འདུས་པའི་རྐྱེན་བྱུང་བ། །བདག་དང་དབང་པོ་དག་ལས་བྱུང་། །ལུས་ཅན་རྣམས་ཀྱི་རྣམ་ཤེས་ནི། །ཡུལ་རྣམས་རྙེད་ནས་འབྱུང་བ་སྟེ། །འདི་ནི་རྟོག་པ་ཅན་གྱི་ཚུལ། །རྒྱུ་དང་ལས་ཀྱི་རྒྱུས་བྱུང་བ། །དབང་པོ་ས་རྣམས་ཐམས་ཅད་དང་། །ཚངས་ལ་སོགས་
པ་ཕྱི་རོལ་དང་། །དེ་དག་ལྷ་མིན་ལས་ཀྱང་མིན། །རྡུལ་ཕྲན་གྱིས་ཀྱང་ས་མ་བྱས། །ས་རྣམས་ལྟ་བུར་ཀུན་གཞི་ཉིད། །ལྟ་བའི་ཡུལ་དུ་གཡོ་བ་ཡིན། །རྐྱེན་རྣམས་ཀུན་གཞི་མ་བྱས་ཏེ། །རྐྱེན་གྱིས་ཀུན་གཞི་བྱས་པ་མིན། །འདི་དག་ལ་ནི་གསུམ་འདུས་མེད། །
རྣམ་ཤེས་འོན་ཀྱང་འཁོར་བ་སྟེ། །ཤེལ་འདྲ་ཟླ་བ་བཞིན་དུ་ཡང་། །རྣམ་ཤེས་རྣམས་དང་ལྷན་ཅིག་རྒྱུ། །བག་ཆགས་བྱུང་བའི་རྣམ་ཤེས་དང་། །ཀུན་གཞི་རྟག་ཏུ་འགྲོགས་པ་ནི། །ཟླ་བ་སྤྱང་ཀིས་ཟིན་པ་བཞིན། །རྣམ་ཤེས་རྣམས་དང་ལྷན་ཅིག་རྒྱུ། །བག་ཆགས་དེ་
ལས་ལངས་པ་ཡིས། །རྒྱས་པར་བྱེད་དོ་ཡང་དང་ཡང་། །རྒྱས་པ་གཞན་ཡང་རྒྱས་བྱེད་དེ། །དེ་ལའང་གཞན་གྱིས་ཡང་དང་ཡང་། །དེ་ལྟར་རབ་ཏུ་འཇུག་པའི་སེམས། །མཐོང་ནས་སེམས་དེ་རྣམ་པར་ལྡོག །མི་བརྟན་ཡུལ་ལ་ཀུན་ནས་འབྲེལ། །ཁབ་ལོང་རྡོ་ལ་
ལྕགས་བཞིན་ཏེ། །ཀུན་གྱི་གཞི་ལ་སེམས་ཡོད་པ། །ཟག་བཅས་ཟག་པ་མེད་པ་དག །བག་ཆགས་དག་གིས་བསྒོས་པའི་རྣམས། །འཇུག་དང་ཕྱིར་ལྡོག་བྱེད་པ་ཡིན། །ཇི་ལྟར་བསྲེག་ལས་མེ་བུས་ཤིང་། །གཞན་དུ་མེ་ཡང་རབ་ཏུ་བུད། །དེ་དང་གཞན་དུ་དེ་
བཞིན་བུད། །དེ་དག་ནས་ཀྱང་སྤོ་བཞིན་དང་། །དེ་ལྟར་ཀུན་གཞི་རྣམ་ཤེས་དང་། །གཞན་ཡང་དེ་ལས་བྱུང་བ་རྣམས། །ཆོས་ལ་རབ་ཏུ་རྒྱུ་བ་ནི། །གཏོགས་དང་ཟག་པ་མེད་པ་དག །མཐོང་བའི་ཆོས་ལ་གནས་པ་ཡི། །ཡུལ་དང་ཡུལ་ཅན་དེ་ཡིན་ཏེ། །འཕགས་

པ་མཐོང་བའི་ཆོས་ཅན་གྱི། །ཏིང་ངེ་འཛིན་ཀྱང་འདི་དག་ཡིན། །འཕགས་པ་དེ་དག་དེ་ལྡན་ཞིང་། །སྒོམ་དང་མཐོང་དང་ལྡན་པས་ན། །ཆོས་ཀུན་དེ་བཞིན་ཉིད་ཤེས་པ། །ཞིང་ནས་ཞིང་དུ་རབ་ཏུ་འདོང་། །ཇི་ལྟར་ཤིན་ཏུ་བཟང་བའི་གསེར། །གསེར་གྱི་
དབྱིངས་ན་མི་སྣང་སྟེ། །བརྩལ་བས་ཤིན་ཏུ་ཞིབ་བཏགས་ནས། །ཡོངས་སུ་སྦྱངས་ན་སྣང་བར་འགྱུར། །དེ་བཞིན་ཀུན་གཞི་རྣམ་ཤེས་པ། །རྣམ་པར་ཤེས་པ་བདུན་དང་བཅས། །ཏིང་ངེ་འཛིན་གྱིས་ཡོངས་སྦྱངས་པའི། །རྣལ་འབྱོར་ཅན་གྱིས་རྟག་ཏུ་མཐོང་། །ཇི་ལྟར་མ་
བསྲུབས་ཞོ་ལ་ཡང་། །དེ་ན་མར་ཡོད་མི་སྣང་སྟེ། །བསྲུབ་པའི་ཚུལ་གྱིས་མཐོང་བས་ན། །མཁས་པ་རྣམས་ཀྱིས་དེ་ཕྱིར་བསྲུབ། །དེ་བཞིན་ཀུན་གཞི་རྣམ་པར་ཤེས། །རྣམ་ཤེས་བདུན་དང་ལྡན་པ་ཡང་། །རྣམ་པར་བསྲུབས་ཤིང་སྟུག་སྤྱོད་པའི། །ཐུབ་པ་རྣམས་ཀྱིས་
མཐོང་བ་ཡིན། །མ་རིག་པ་ནི་སྡུག་ཅེས་བྱ། །དཀྱིལ་འཁོར་ཡེ་ཤེས་རྣམ་གྲངས་ཏེ། །དཀྱིལ་འཁོར་འདི་ལ་བསླབས་པ་ཡི། །རྣལ་འབྱོར་ཅན་རྣམས་སྟུག་པོར་འདོང་། །གཟུགས་མེད་གཟུགས་ཡོད་ནམ་མཁའ་དང་། །རྣམ་ཤེས་འདུ་ཤེས་མ་ཡོད་དག །རྣལ་
འབྱོར་ཅན་གྱིས་ཡུལ་བསྒོམས་སམ། །དེ་དག་སྟུག་པོའི་ཞིང་དུ་འདོང་། །ཉི་མ་ཟླ་བའི་འོད་བཞིན་དུ། །འཇིགས་པ་མེད་པའི་རྒྱལ་བའི་སྲས། །རྣལ་འབྱོར་ཅན་གྱི་ཐུབ་སྟོན་ཅིང་། །རྣལ་འབྱོར་སྤྱོད་པའི་ལམ་གནས་པ། །སངས་རྒྱས་ཀུན་གྱིས་དབང་བསྐུར་བས། །དེ་ནི་
དབང་བསྐུར་སྟུག་པོར་སོང་། །སངས་རྒྱས་རྣལ་འབྱོར་རྗེས་སུ་མཐོང་། །གཞན་དུ་གྱུར་ནས་སྟུག་པོར་སོང་། །སྟུག་ན་གནས་ཤིང་སྤྲུལ་པ་དང་། །སྤྲུལ་པའི་སྤྲུལ་པ་དེ་དག་གིས། །གང་ན་གང་ཆོས་སུ་འདོད་པ། །དེ་ནི་མཁའ་ལ་འདུག་ཅིང་སྟོན། །སྔོན་མེད་དུས་ཀྱི་གནས་
ངན་ལེན། །བག་ཆགས་རྒྱུ་ཡིས་བསགས་པ་ཡི། །ཀུན་གཞི་རྣམ་རྟོག་བྱས་པ་ཡིས། །བཅིངས་པ་ཀུན་ཏུ་རབ་ཏུ་འབྱུང་། །ཇི་ལྟར་རྒྱ་མཚོའི་དབའ་རླབས་རྣམས། །རླུང་གིས་རབ་ཏུ་བསྐྱོད་པ་དག །རྒྱུན་མི་འཆད་པར་རབ་ཏུ་འབྱུང་། །རྣམ་ཤེས་དེ་བཞིན་ཀུན་གཞི་ལ། །

རྣམ་ཤེས་དེ་ནི་དེས་བྱས་པའི། །བག་ཆགས་རྣམས་ཀྱིས་རྒྱས་པར་འགྱུར། །འབྱུང་ཞིང་ལ་ལ་ཕྱིར་ལྡོག་སྟེ། །ཆད་མེད་རྟག་པ་མེད་པའོ། །རང་སེམས་ཁོང་དུ་མ་ཆུད་པས། །ཡུལ་ལ་གཞོལ་བའི་རྣམ་ཤེས་རྣམས། །རབ་ཏུ་ཞུགས་ཀྱང་ཕྱིར་ལྡོག་པ། །འགྲོ་བ་
རང་སེམས་མཐོང་བའི་ཚེ། །དེ་བཞིན་གཞན་དུ་གྱུར་པའི་སེམས། །མེ་དང་བསྲེག་པ་ཇི་བཞིན་ཏེ། །ཀུན་གཞི་ཡུལ་ལྟར་སྣང་བ་ཡང་། །གཞན་དུ་གྱུར་ནས་ཟག་པ་མེད། །ཟག་མེད་འགྲོས་སུ་སོང་བ་དང་། །འཕགས་པའི་རིགས་སུ་སྐྱེ་བར་འགྱུར། །ཀུན་གཞི་ཡུལ་
ལྟར་སྣང་བ་ནི། །ས་རྣམས་ཁྱབ་པར་བྱས་ཤིང་གནས། །ཡིད་ནི་བདག་ལ་བདག་ཅེས་ཏེ། །ངར་སེམས་རབ་ཏུ་འཇུག་པ་ཡིན། །རྣམ་ཤེས་ཁ་དོག་ཁྱད་པར་དང་། །ཀུན་དུ་གཅོད་པ་རབ་ཏུ་བྱེད། །སེམས་ནི་ལས་རྣམས་སོགས་པ་སྟེ། །ཡིད་ནི་ཁོང་དུ་ཆུད་པར་
བྱེད། །རྣམ་པར་ཤེས་པས་རྣམ་པར་རིག །ལྔ་པོས་སྣང་བ་མཐོང་བར་འགྱུར། །རབ་རིབ་ལྡན་པ་མྱོས་པ་ཡིས། །ཇི་ལྟར་སྐྲ་ཚོགས་མཐོང་བ་བཞིན། །གཟུགས་ལ་སོགས་ལ་གཟུགས་མེད་དེ། །སེམས་ནི་གཟུགས་ལྟར་གནས་པ་ཡིན། །ཉི་མ་ཟླ་བའི་ནོར་བུ་དག །
ཡོངས་སུ་དག་པའི་མཚན་ཉིད་ཅན། །ཉི་ཟླའི་ཟེར་གྱིས་ཕོག་པ་དང་། །དེ་དག་རང་གི་ཡོན་ཏན་འབྱིན། །དེ་བཞིན་ཀུན་གཞི་རྣམ་ཤེས་པ། །དེ་བཞིན་གཤེགས་པའི་དགེ་སྙིང་པོ། །ཟག་མེད་ལེགས་དང་ལྡན་གྱུར་ཏེ། །གཞན་དུ་འགྱུར་ན་རབ་ཏུ་འབྱིན། །འདི་ལྟར་སྣང་བ་
གང་ཡང་རུང་། །མཚན་མ་གཟུགས་སུ་སྣང་བའི་རྣམས། །བག་ཆགས་ཡོག་པའི་ཀུན་གཞི་སྟེ། །ས་རྣམས་ཀུན་ན་གཟུགས་ལྟར་གནས། ཇི་ལྟར་འོ་མ་གྱུར་པ་དང་། །ཡོན་ཏན་ཞོ་དང་དར་བར་སྣང་། །དེ་བཞིན་ཀུན་གཞི་རྣམ་ཤེས་ཀྱང་། །རྣམ་པར་གྱུར་ནས་གཟུགས་
ལྟར་གནས། །ཇི་ལྟར་རབ་རིབ་ལྡན་པས་སྐྲ། །མིག་གི་ཉེས་པས་རྣམ་མཐོང་བ། །དེ་བཞིན་བག་ཆགས་ཉེས་ལྡན་པའི། །ཀུན་གཞི་ལུས་ཅན་རྣམས་ཀྱི་སྟེ། །རྟག་ཏུ་མིག་གི་ནང་སོང་བའི། །གཟུགས་ཀྱི་སྣང་བ་རབ་ཏུ་འཇུག །འདི་དག་སྣང་བ་ཅི་ཡང་རུང་། །སྨིག་

རྒྱུ་ཆུ་ཡི་དཔེ་བཞིན་ཏེ། །གཟུགས་ནི་ཡོད་དང་མེད་ཀྱིས་སྤངས། །ཀུན་གཞི་རྗེས་སུ་མཐོང་བའོ། །མིག་དང་གཟུགས་ལས་རྟེན་བྱས་ཤིང་། །དེ་ནི་སྒྱུ་མ་བཞིན་དུ་འབྱུང་། །རྟག་ཏུ་མིག་གི་ནང་སོང་བ། །སྨིག་རྒྱུ་བཞིན་དུ་རབ་ཏུ་
གཡོ། །གཟུགས་ཀྱི་ཡོན་ཏན་ལྡན་པའི་གཟུགས། །ཀུན་གཞི་གཟུགས་ལྟར་གནས་པ་སྟེ། །བྱིས་པ་ཇི་ལྟར་བརྟགས་པ་བཞིན། །གཟུགས་ནི་གུད་ན་ཡོད་པ་མིན། །བྱེད་མེད་སེམས་པའང་མེད་པ་སྟེ། །དབུ་བའི་ཕུང་པོ་བཞིན་དུ་གནས། །གཉིད་ལོག་ར་རོ་
དྲེགས་པ་དང་། །འགྲོ་འདུག་རྣམ་པར་རྒྱུག་པ་ཡི། །བྱ་བ་ཅིག་ཅར་བྱེད་པ་ནི། །ལུས་ཅན་རྣམས་ཀྱི་ཀུན་གཞིའོ། །ཇི་ལྟར་གདུང་བས་བསར་ས་ལས། །གྱེན་དུ་ལྡང་བའི་སྨིག་རྒྱུ་རྣམས། །དཔྱིད་ཀའི་ཆུ་ལྟར་རབ་ཏུ་གཡོ། །རི་དགས་རྣམས་ལ་སླུ་བར་བྱེད། །དེ་བཞིན་ཀུན་
གཞི་རྣམ་ཤེས་ཀྱང་། །གཟུགས་མིན་ལྟ་བའི་སྤྱོད་ཡུལ་དུ། །གཟུགས་སྣང་ཇི་ལྟར་རྟོག་ཅན་གྱིས། །བརྟགས་བཞིན་གཟུགས་འདྲ་མ་ཡིན་ནོ། །ཇི་ལྟར་ཁབ་ལོང་མཐོང་བ་དང་། །ལྕགས་ནི་མྱུར་བར་ཀུན་ཏུ་འཁོར། །འོན་ཀྱང་དེ་ལ་སེམས་པ་མེད། །སེམས་ལྡན་བཞིན་དུ་
འང་རབ་ཏུ་སྣང་། །དེ་བཞིན་ཀུན་གཞི་རྣམ་ཤེས་ཀྱང་། །སེམས་མེད་སེམས་ཅན་ཇི་བཞིན་དུ། །འགྲོ་དང་འོང་བར་གཡོ་བ་སྟེ། །ས་རྣམས་འབྲི་བར་རབ་ཏུ་བྱེད། །ཇི་ལྟར་རྒྱ་མཚོའི་ཛ་རུ་ནི། །སྲོག་མེད་པར་ཡང་གཡོ་འགུལ་ཏེ། །དེ་བཞིན་ཀུན་གཞི་རྣམ་ཤེས་པ། །ལུས་
ལ་གནས་ཤིང་གཡོ་བར་གྱུར། །གླང་པོ་གླང་པོའི་གཟུགས་བརྙན་དང་། །ཇི་ལྟར་འཐབ་ཅིང་ཆོམས་ནས་མིན། །དེ་བཞིན་ཀུན་གཞི་རྣམ་ཤེས་པ། །འཇུག་པ་ཆོམས་ནས་མི་རྒྱུའོ། །ཇི་ལྟར་པད་མོ་དྲི་མེད་པ། །འདམ་གྱི་ནང་ནས་བྱུང་བ་ནི། །མི་དང་ལྷ་དང་བཙུན་ལ་འོས། །
ལྷ་ཡུལ་གནས་པ་ཀུན་ཀྱང་འདོད། །དེ་བཞིན་ཀུན་གཞི་རྣམ་པར་ཤེས། །བག་ཆགས་འདམ་ནས་བྱུང་བ་ནི། །རྣམ་དག་གཞན་དུ་གནས་གྱུར་པ། །བདག་ཉིད་ཆེ་རྣམས་འདོད་པ་ཡིན། །ཇི་ལྟར་རིན་ཆེན་རྣམ་པར་དག །རི་བྲགས་མི་ཡིས་བཅགས་བརྡུངས་ཀྱང་། །རྒྱལ་པོའི་

ཅོད་པན་དུ་ཡང་འོས། །ཅོད་པན་ལ་ཡང་གདགས་པ་ཡིན། །དེ་བཞིན་ཀུན་གཞི་རྣམ་པར་ཤེས། །བག་ཆགས་རྣམས་ཀྱིས་བཅགས་བརྡུངས་པ། །རྣམ་དག་སངས་རྒྱས་རིགས་ཡིན་ཏེ། །སངས་རྒྱས་ཉིད་དུ་དེ་གཟུང་ངོ་། །ཇི་ལྟར་ཆུ་གཏིང་རྡོ་བ་དག །ཉ་ལྕིབས་དག་
གིས་ཡོངས་དཀྲིས་པ། །དེ་བཞིན་ཀུན་གཞི་རྣམ་ཤེས་ཀྱང་། །བག་ཆགས་དྲི་མ་ཅན་དུ་བྱས། །གཟུང་དང་འཛིན་པའི་གཟུངས་སུ་ཡང་། །དངོས་པོ་གཉིས་ཀྱིས་རབ་ཏུ་འཇུག །ཇི་ལྟར་ཁ་གཉིས་ཡོད་པའི་སྦྲུལ། །གང་དུ་འདོད་པ་དེར་འགྲོ་སྟེ། །དེ་བཞིན་ཀུན་གཞི་
རྣམ་པར་ཤེས། །རིམ་དང་ཅིག་ཅར་རྒྱུ་བ་ཡིན། །རྟག་ཏུ་སྣ་ཚོགས་གཟུགས་ལྟ་བུ། །དེ་ལ་རྟོག་པས་རྣམ་པར་བརྟག །རྟོག་ཅན་རྣམ་པར་མྱོས་འགྱུར་བ། །བདག་དང་བདག་གིར་རྣམ་རྟོག་ཅིང་། །ཡོད་དང་མེད་ཀྱི་རྒྱུ་སྡོད་པའི། །ས་རྣམས་ལ་ཡང་རྣམ་རྟོག་སྟེ། །འགྱུར་
བའི་ཡོངས་སུ་གྱུར་པ་དང་། །ཀུན་གཞི་ཟབ་པ་ཉིད་དག་ཀྱང་། །བློ་ཆུང་རྣམས་ཀྱིས་མི་རིགས་པས། །སྒྱུ་མའི་རི་དགས་བཞིན་དུ་འཁོར། །རང་བཞིན་གཅིག་མིན་ཤེས་པར་དཀའ། །ལུས་ཅན་ཀུན་ལ་འདྲ་བ་སྟེ། །དེ་བཞིན་ཀུན་གཞི་རྣམ་ཤེས་ཀྱང་། །རྟག་ཏུ་སྒྱུ་
མའི་རི་དགས་འདྲ། །སེམས་ཅན་གཅིག་མིན་ཤེས་པར་དཀའ། །ཡོད་དང་མེད་པར་རྣམ་པར་བརྟགས། །རྡུལ་དང་གཙོ་བོ་སྐྱེས་བུ་དང་། །མི་གསལ་ཚངས་པའང་དེ་ཡིན་ཏེ། །རྟོག་པས་འཁྲུལ་པའི་རྟོག་ཅན་རྣམས། །ཀུན་གཞི་ལ་ནི་རྟག་ཏུ་རྟོག །ས་རྣམས་ལྟ་བུར་
གནས་པ་ལ། །སྣ་ཚོགས་སར་ཡང་དེ་བཞིན་རྟོག །ས་ལ་གང་གིས་རྟོག་གྱུར་པའི། །ཡིད་ནི་ཀུན་ནས་རྟོག་ཅེས་བྱ། །ཇི་ལྟར་རི་མོ་མཐོ་དམན་དང་། །རྣམ་པ་སྣ་ཚོགས་སྤྲིན་གྱི་གཟུགས། །འཇའ་དང་རི་དགས་སྲེད་བྱེད་དང་། །སྤྲིན་སྒྲ་འབྲུག་ཀྱང་ཇི་བཞིན་ཏེ། །རབ་རིབ་
ཅན་གྱི་ཕྲེང་བ་དང་། །བཟང་མོའི་གདོང་ཡང་དེ་བཞིན་དུ། །རྨི་ལམ་དག་ན་རྣམ་སྣ་ཚོགས། །དྲི་ཟའི་ཁང་པ་གནས་རྟེན་དང་། །རོ་ལངས་ཆུ་ཡི་ཤིང་རྣམས་དང་། །བྲག་ཅ་སྤྲིན་དང་དུ་བ་དང་། །མེ་ལོང་མིག་ལ་གཟུགས་བརྙན་དང་། །ཆུ་ལ་ཆུ་ཡི་ཟླ་བ་དང་། །རྣམ་རྟོག་

འདི་དང་མང་པོར་ཡང་། །འགྲོ་བ་རྣམས་ནི་ཀུན་གཞི་རྟོག །གང་ཚེ་ཀུན་གཞི་འདི་འདྲ་བར། །རྣམ་པ་སྣ་ཚོགས་ཀུན་མཐོང་སྟེ། །འགྲོ་བ་རང་སེམས་མཐོང་བ་དང་། །དེའི་ཚེ་སེམས་ནི་ཕྱིར་ལྡོག་གོ། །ཆོས་རྣམས་ཐམས་ཅད་ཀུན་གྱི་གཞི། །བག་ཆགས་སྙེམས་
ལ་སོགས་པ་དང་། །རྟོག་པས་རྙོག་པ་ཅན་དུ་བྱས། །གཞན་དུ་གྱུར་ནས་ཟག་པ་མེད། །ཟག་མེད་ངང་ལུགས་རབ་ཐོབ་ནས། །དེ་དག་རྟག་ཅིང་བརྟན་པར་འགྱུར། །ནམ་མཁའ་མྱ་ངན་འདས་དང་མཉམ། །འགོག་དང་འདྲ་བ་དེ་བཞིན་ཏེ། །མཉམ་གཞག་སེམས་དང་ལྡན་པ་ལ། །
མི་ཟག་ཆོས་རྣམས་སྐྱེ་བར་འགྱུར། །རྫུ་འཕྲུལ་བསམ་གཏན་རྣམ་ཐར་དང་། །ཏིང་ངེ་འཛིན་དང་སྟོབས་རྣམས་དང་། །ཐབས་དང་སྟོབས་དང་མངོན་ཤེས་དག །འབྲི་མེད་མི་ཟད་དེ་བཞིན་ཏེ། །ནམ་མཁའ་ཟད་ཀྱི་མཐར་སྙེགས་ཤིང་། །དབྱིངས་བློ་རྣམ་ཤེས་རྟག་པ་དང་། །
མཐར་ཕྱིན་བཅུ་ཡི་གནས་ལྡན་ཞིང་། །ཡིད་བཞིན་ཤིན་ཏུ་བརྟན་པའི་ལུས། །རྣལ་འབྱོར་མཁས་པའི་རྣལ་འབྱོར་ཅན། །གཞན་དུ་གྱུར་ནས་རབ་ཏུ་འཐོབ། །འཇིག་པ་མྱ་ངན་འདའ་མ་ཡིན། །སེམས་ཅན་ཡོད་མིན་སྐྱེ་བ་མེད། །འབྲི་མེད་གང་བ་མེད་པར་ཡང་། །རྒྱལ་བ་
རྣམས་ཀྱིས་འགྲོ་བ་བཤད། །ཞིང་གཞན་རྣམས་དང་ཞིང་འདི་ཡི། །ཆོས་ཉིད་གཅིག་ཏུ་ཟད་པ་སྟེ། །སྐྱེས་པར་གྱུར་ཏམ་མ་སྐྱེས་ཀྱང་། །ཆོས་རྣམས་ཆོས་ཉིད་དེ་བཞིན་གནས། །རྣལ་འབྱོར་ལྡན་པ་གྲོལ་བ་ལ། །རྟག་མེད་ཆད་པ་མེད་པ་སྟེ། །སེམས་ཅན་ཁམས་རྣམས་
ཞིག་གྱུར་ན། །ཐམས་ཅད་མཁྱེན་པ་མི་སྣང་ངོ་། །མ་བྱོན་པ་ཡི་རྒྱལ་བ་དང་། །འདས་དང་ད་ལྟར་བྱུང་བ་དག །མཉམ་པ་མ་ཡིན་འཐུན་པ་མིན། །ཤེས་བྱ་ཟད་ནས་དེ་དག་འབྱུང་། །བདུད་རྣམས་ཚར་བཅད་ལོག་པ་སྟེ། །བརྗོད་དང་བཅས་དང་བརྗོད་མེད་ཀྱང་། །དེ་སྟེ་སེམས་
ཅན་འཇིག་ན་ནི། །སྡུག་བསྔལ་སྦུབས་ལས་མི་འགྲོལ་ལོ། །ལྕགས་ཀྱི་གར་བུ་བསྲེགས་པ་ལས། །མེ་ལས་བྱུང་སྟེ་བསིལ་གྱུར་ཅིང་། །ལྕགས་ནི་རྟག་པར་འདུག་པ་བཞིན། །དེ་ལྟར་རྣལ་འབྱོར་ཅན་དག་འཁོད། །ཕུང་པོའི་ཁྱིམ་དང་ངེས་བྱུང་བའི། །བག་ཆགས་རྣམས་

ཀྱང་གྱུར་པ་དང་། །ཐུབ་པ་རྣལ་འབྱོར་བརྩོན་པའི་རྣམས། །དེ་དག་རྟག་ཅིང་གྲོལ་བ་ཡིན། །རྣམ་ཤེས་རྣམས་ནི་དབའ་རླབས་བཞིན། །ཀུན་གཞི་མཚོ་ལས་འབྱུང་བ་སྟེ། །ཆོས་ལྔའི་རང་བཞིན་རྣམ་ཤེས་ཀྱིས། །རབ་ཏུ་བསྐྱོད་ཅིང་ཤིན་ཏུ་རྒྱུ། །གནས་ངན་ལེན་གྱི་
སྤྲོས་པ་ཡིས། །བཅོམ་པ་གནས་མེད་དོན་གྱི་གཟུགས། །ལྟ་བའི་ཡུལ་དུ་རྣམ་པར་གཡོ། །དེ་ལྟར་ཤེས་ནས་ཕྱིར་ལོག་སྟེ། །གཞན་གྱུར་མི་བཟད་རྟག་པའི་རྣམས། །མགོན་པོ་དག་ནི་སྟུག་པོར་འདོང་། །སྟུག་ན་གནས་པ་ཟླ་བ་བཞིན། །རྟག་ཏུ་གཟུགས་བརྙན་
རྣམ་པར་མཛེས། །ཕུང་པོ་སྟུག་པ་ཀུན་གཞི་སྟེ། །ཡིད་ནི་དེ་ལ་ཉེ་ཕན་ནོ། །རྣམ་པར་ཤེས་པ་རྟོགས་པར་བྱེད། །གཟུགས་དང་ལས་ལ་སོགས་པའི་རྒྱུ། །རྣམ་ཤེས་ལྔ་ཡི་ཚོགས་རྣམས་ནི། །དབང་པོར་བཅས་ཤིང་ཡུལ་གཞོལ་བས། །སྣ་ཚོགས་ཡིད་ལ་འཛིན་
པར་བྱེད། །ཀུན་གཞི་ཡུལ་ཅན་མ་ཡིན་ནོ། །ཚེ་ནི་ཀུན་གཞི་རྣམ་ཤེས་ཏེ། །ཡིད་ནི་དྲོད་དུ་རབ་ཏུ་གནས། །ཡིད་ཀྱི་རྣམ་ཤེས་དེ་ན་སྟེ། །ལྷག་མ་དབང་པོ་ལྔར་ཡང་གནས། །སེམས་དང་ཡིད་དང་རྣམ་པར་ཤེས། །ཕུང་པོའི་དབུས་ན་རྣམ་པར་གནས། །བག་ཆགས་
ལས་དང་འབྲེལ་བའི་རྣམས། །སྔོན་ཅད་བྱས་པ་རྣམས་ཀྱིས་འབྱུང་། །འདོད་ཆགས་སྲེད་ལས་བྱུང་བ་ཡི། །ལས་ཀྱིས་བྱ་བ་བྱེད་པ་སྟེ། །སྔོན་ཆད་དེ་དག་ལས་བྱས་པས། །རྒྱུན་དུ་ལས་རྣམས་འབྱུང་བ་ཡིན། །ལུས་ལས་ལུས་ནི་གཞན་ལ་འགྲོ། །འཕོ་བ་སྲིན་བུ་པད་པ་
བཞིན། །སེམས་དང་སེམས་བྱུང་བཅས་པའི་རྣམས། །རྒྱུན་ཆགས་པར་ནི་ཤིན་ཏུ་འདོང་། །ཡང་ཞིང་ཕུང་པོའི་ཚོགས་རྣམས་དང་། །རྣམ་ཤེས་སྲིད་པ་དོག་པར་ཡང་། །ཚོགས་ཤིང་རབ་ཏུ་འབྱུང་བ་ནི། །ལས་རྣམས་ཤིན་ཏུ་འབྱུང་བའི་ཕྱིར། །ཚེ་དང་དྲོད་དང་
རྣམ་ཤེས་འདིས། །གང་ཚེ་ལུས་ནི་བོར་གྱུར་པ། །དེ་ཚེ་ལུས་ནི་དོར་བ་སྟེ། །ཤིང་བཞིན་ཚོར་བ་མེད་པའོ། །སེམས་ནི་ཀུན་གཞི་རྣམ་པར་ཤེས། །ངར་སེམས་བདག་ཉིད་ཡིད་ཡིན་ནོ། །གང་ཞིག་ཡུལ་ལ་འཛིན་བྱེད་པ། །དེ་ནི་རྣམ་པར་ཤེས་ཞེས་བྱ། །སེམས་ནི་ལས་རྣམས་

སོགས་པ་སྟེ། །ཡིད་ནི་ཁོང་དུ་ཆུད་པར་བྱེད། །རྣམ་པར་ཤེས་པས་རྣམ་པར་རིག །ལྔ་པོས་སྣང་བ་རྟོགས་པར་བྱེད།། །།འཕགས་པ་རྒྱན་སྟུག་པོ། །བམ་པོ་བཞི་པ་སྟེ་ཐ་མ། ལུས་ནི་སེམས་ཀྱིས་བཟུང་བ་ཡིན། །ཡིད་ནི་ལམ་རྒྱུད་
འདོད་པ་སྟེ། །རྣམ་པར་ཤེས་པས་རྣམ་པར་རིག །སྣང་བ་གཅོད་པ་ལྔ་པོའོ། །རྒྱུ་ལ་དམིགས་ཤིང་རྣམ་ཤེས་རྣམས། །སྐྱེ་སྟེ་གཞན་ནི་དེ་རྗེས་འབྲང་། །ཡིད་ལ་དམིགས་ཤིང་གཞན་དག་ཀྱང་། །མཐར་ཆགས་སུ་ནི་རབ་ཏུ་འབྱུང་། །ཡིད་རྙེད་ནས་ཀྱང་གཞན་དག་ནི། །
དབང་གི་ཡོན་ཏན་རྣམས་ཀྱིས་བྱས། །དབང་ནི་ལྔ་དང་ལྷན་ཅིག་ཏུ། །རྣམ་པར་ཤེས་པ་རབ་ཏུ་བྱེད། །འདུ་བྱེད་རྒྱུ་དང་ལྷན་ཅིག་ཏུ། །རོ་ལངས་འགྲོ་དང་འདྲ་བ་སྟེ། །སྨིག་རྒྱུ་དག་ནི་གཟུགས་དང་མཉམ། །ལོག་པ་མ་ཡིན་བདེན་པ་མིན། །འདི་ནི་བདག་མེད་སྟོང་པ་སྟེ། །
སྲིད་པས་ཀུན་དུ་དྲངས་པ་ཡིན། །འབྱུང་རྣམས་ལྷན་ཅིག་འབྱུང་བ་དག །ཐམས་ཅད་དུས་ཡིད་ལྷན་ཅིག་སྟེ། །སེམས་བྱུང་ཡིད་ཅེས་བྱ་བ་དང་། །ལྷན་ཅིག་རྣམ་པར་ཤེས་པ་འབྱུང་། །རྣམ་ཤེས་ལྔ་པོ་དེ་དག་དང་། །ཡིད་ཀྱི་རྣམ་ཤེས་ལྡན་པ་ནི། །གནས་ངན་ལེན་
དང་སྲེད་བསྒོས་པ། །རྒྱུན་མི་འཆད་པར་རབ་ཏུ་འབྱུང་། །ལུས་ཅན་ཀུན་གྱི་ཀུན་གཞི་ཡང་། །སེམས་དང་སེམས་བྱུང་ལྡན་པ་འབྱུང་། །ཀུན་གཞི་རྙེད་ནས་དེ་དག་རྒྱུ། །རྒྱུ་ནས་རྒྱས་པར་བྱེད་པ་སྟེ། །སེམས་རྣམས་ལམ་རྒྱུད་ཐམས་ཅད་དུ། །རྟག་པར་གཅིག་ལས་གཅིག་
རྒྱས་འགྱུར། །ས་འདི་རྣམ་པ་སྣ་ཚོགས་པ། །རྣམ་པར་ཤེས་པ་རྣམས་ལས་འབྱུང་། །ཀུན་གཞི་སྣ་ཚོགས་གཟུགས་ཅན་ནི། །རྣམ་ཤེས་རྣམས་ཀྱི་གནས་ཡིན་ནོ། །ཕན་ཚུན་རྒྱུ་ཡི་སྟོབས་ལྡན་པ། །རྣམ་ཤེས་འཁོར་ལོ་འཁོར་བ་སྟེ། །ཀུན་གཞི་མཚོ་ལས་དབའ་
རླབས་བཞིན། །ས་བོན་དག་དང་མྱུ་གུའི་རྒྱུད། །ཆུ་བོའི་རྒྱུན་ཀྱང་མཚམས་མེད་ཅིང་། །རྒྱུན་མི་འཆད་པར་འབྱུང་མོད་ཀྱི། །ཐ་དད་བྱེ་བྲག་དག་ཀྱང་སྣང་། །དེ་བཞིན་རྣམ་ཤེས་སྤྱོད་པ་སྟེ། །མཚམས་མེད་པ་ཡི་རྒྱུན་དུ་ཡང་། །རྒྱུན་མི་འཆད་པར་རབ་ཏུ་འབྱུང་། །གསུམ་དང་

ལྡན་ཞིང་གསུམ་ལས་ཡང་། །སེམས་དང་ཡིད་དང་རྣམ་ཤེས་རྣམས། །བག་ཆགས་སྲེད་པས་བསྐྱེད་པ་དང་། །རང་སེམས་རྣམ་པར་འཁྲུལ་པ་ཡིས། །དབའ་རླབས་བཞིན་དུ་རྟག་ཏུ་འབྱུང་། །ཆོས་རྣམས་ཀུན་གྱི་འབྱུང་བ་དག །ཕྱི་དང་ནང་ཡང་རྣམ་བསྒོམས་ཏེ། །
ཐུབ་པའི་གནས་ཀྱང་རྣམ་བསྒོམས་ནས། །མཉམ་པར་གཞག་པ་སྟུག་པོར་འགྲོ། །རྡོ་རྗེའི་སྙིང་པོ་ཁྱོད་དང་ཡང་། །རྒྱལ་སྲས་འཇིགས་མེད་གཞན་དག་ཀྱང་། །སྟུག་པོར་འཇུག་པར་བྱེད་པའི་ཆོས། །ཐམས་ཅད་ཆོས་ཀྱང་རབ་སྟོན་པ། །རྒྱལ་བ་རྣམས་དང་རྒྱལ་
སྲས་རྣམས། །ཐབས་ཅིག་རབ་ཏུ་རྣམ་དགོངས་ཏེ། །ཆོས་ཀྱི་མཚན་ཉིད་དཔེ་མེད་པ། །རྨད་དུ་བྱུང་བ་འདི་བསྟན་ཏོ། །རྡོ་རྗེ་སྙིང་པོ་འཇིགས་མེད་པ། །རིན་ཆེན་སྣ་ཚོགས་ཟླ་སྙིང་གི། །སེང་གེའི་ཁྲི་ལ་རབ་འདུག་སྟེ། །ཤེས་རབ་ཆེན་པོས་རྣམ་བསྒོམས་ཀྱིས། །རྒྱལ་
བའི་སྲས་ཀྱིས་མདུན་བདར་བ། །སྟུག་པོའི་རྒྱན་ལ་རྣམ་པར་བསྒོམས། །རྣམ་པར་བསྒོམས་ནས་རྟག་པར་འདི། །རྣལ་འབྱོར་ཅན་གྱི་རྣལ་འབྱོར་སྟོན། །ཟླ་དབང་རྒྱལ་བ་དེས་བསྟན་ལ། །བག་མེད་པར་ནི་མ་བྱེད་ཅིག །ཟླ་བའི་དཔལ་གྱི་བཅོམ་ལྡན་འདས། །སྤྲུལ་པར་བྱ་བ་མང་
སྤྲུལ་ཅིང་། །འདོད་པའི་ཁམས་ཀྱི་བསྙེམས་བྲལ་དང་། །གཟུགས་ཅན་རྣམས་ཀྱི་གནས་སུ་ཡང་། །རྒྱལ་སྲས་རྣམས་ཀྱིས་ཀུན་ནས་བསྐོར། །ལྷ་རྣམས་ཀྱིས་ཀྱང་མདུན་བདར་ཅིང་། །ཚུལ་གྱིས་དམ་པ་སྟོན་པ་ནི། །འཇིགས་མེད་སྟུག་པོའི་རྒྱན་ཡིན་ནོ། །རྣལ་འབྱོར་
ཅན་གྱིས་སྤྱོད་པའི་མཆོག །ཚུལ་བཟང་རྣལ་འབྱོར་སྤྱོད་པ་སྟེ། །སོ་སོ་རང་རིག་ཤེས་པ་ཡི། །ཏིང་ངེ་འཛིན་དང་བདེ་བའི་རྣམས། །ཡང་དག་མཐའ་ལ་མི་རིག་པར། །རྗེས་སུ་མྱོང་བར་བྱས་ནས་ཀྱང་། །རྣལ་འབྱོར་བདེ་ལས་མངོན་ལངས་ཤིང་། །གཅིག་ལ་གཅིག་
ནི་ཕན་ཚུན་ལྟ། །རྣལ་འབྱོར་སྤྱོད་པའི་ཚུལ་དགེ་འདི། །གང་གིས་ཤིན་ཏུ་མཐོང་བར་གྱུར། །རྣམ་པ་སྣ་ཚོགས་འོས་པ་ཡི། །སྟན་གྱི་མཆོག་ལ་འཁོད་པའི་རྣམས། །ཀུན་ཀྱང་ངོ་མཚར་རབ་ཏུ་རྙེད། །བསམ་བྱེད་བསམ་གཏན་བསམ་པ་དང་། །བསམ་གཏན་

རྣམས་ཀྱི་དགོས་པ་དག །རྒྱལ་སྲས་འཇིགས་པ་མེད་པའི་རྣམས། །ཀུན་ཀྱང་སེམས་ཤིང་རབ་ཏུ་གནས། །སྟུག་པོའི་རྒྱན་དང་རྒྱལ་པོ་ལ། །ལྟ་བ་མཉམ་པར་བཞག་པའི་རྣམས། །མགོ་ལ་ཅོད་པན་ཐོགས་པ་དག །མཚན་རབ་སུམ་ཅུ་རྩ་གཉིས་
ཀྱིས། །ཡན་ལག་བྲིས་པ་དེ་དག་ཀུན། །བྱེ་བའི་ཞིང་ནས་འོངས་པ་སྟེ། །གཡོ་བ་རྣམས་དང་ཤིན་ཏུ་བྲལ། །ཐམས་ཅད་གོས་བཟང་ཆ་ལུགས་མཛེས། །རྣལ་འབྱོར་སྤྱོད་པ་སྟོབས་ཆེན་ཏེ། །བལྟའོ་རྡོ་རྗེ་སྙིང་པོ་ལ། །རྣམ་པར་རྟོག་དང་རྣམ་དཔྱོད་ལ། །ཆོས་ལ་
མོས་པ་ཡང་དག་ཏུ། །མཐོང་སྟེ་དེ་ནས་དེ་ཀུན་དང་། །ཕྱོགས་རྣམས་བཞི་པོར་བལྟ་བྱས་ཏེ། །འཛུམ་པ་སྔོན་དུ་རབ་བཏང་ནས། །འཇམ་ཞིང་སྙན་པའི་དབྱངས་སུ་སྨྲས། །རྒྱལ་སྲས་མཉམ་པར་བཞག་པའི་རྣམས། །རྣལ་འབྱོར་ཅན་གྱི་རྣལ་འབྱོར་ཡུལ། །གང་ལ་རྟོག་
ཅན་མྱོས་འགྱུར་བ། །དེ་དག་བདག་ལས་མཉན་པར་གྱིས། །གང་བསམ་གང་གིས་ཇི་ལྟ་བུར། །བསམ་གཏན་བསམ་བྱེད་དགོས་པ་དག །འདོད་དང་སྡིག་པ་རྣམས་ཀྱིས་དབེན། །རྣམ་པར་རྟོག་བཅས་རྣམ་དཔྱོད་བཅས། །དགའ་བདེ་དབེན་ལས་སྐྱེས་པར་ཡང་། །བསམ་
གཏན་དང་པོ་སྐྱེ་བ་ཡིན། །དེ་ལྟ་བུ་ཡི་རིམ་ཚུལ་དུ། །བཞི་དང་བརྒྱད་དང་དེ་བཞིན་བཅུ། །མུར་འདུག་བདག་ཏུ་སྨྲ་བ་དང་། །བསམ་གཏན་ཅན་རྣམས་བསམ་གཏན་བྱེད། །ཉན་ཐོས་ཐེག་པ་ཅན་རྣམས་དང་། །རང་རྒྱལ་ཐེག་ལྡན་དེ་བཞིན་ཏེ། །ཀུན་ཀྱང་རྟག་ཏུ་བསམ་གཏན་
བྱེད། །ཆོས་རྣམས་དང་ནི་ས་དག་གི། །རང་གི་མཚན་ཉིད་རྟོགས་པ་དང་། །ཕུང་པོའི་སྐྱེ་མཆེད་ཚོགས་ཀྱི་རྣམས། །འདི་དག་ཐམས་ཅད་བདག་མེད་དེ། །བྱེད་པ་མེད་ཅིང་གཡོ་བ་མེད། །གསུམ་པོ་འདུས་ལས་རབ་ཏུ་བྱུང་། །འཁྲུལ་འཁོར་རོ་ལངས་འདྲ་བ་སྟེ། །བྱེད་པ་རྣམས་
ཀྱིས་རྣམ་པར་སྤངས། །ཐུབ་པ་ཕྱི་རོལ་བསམ་གཏན་བྱེད། །སྟོང་པར་ལྟ་བའི་ལྟ་བ་ཅན། །ཆོས་ཀྱི་མཚན་ལ་མོས་པ་རྣམས། །ཆུད་གསོན་མཚན་ཉིད་མ་ཡིན་ནོ། །ཕུང་པོ་བདག་མེད་མཁས་པའི་རྣམས། །བསམ་གཏན་འདི་འདྲར་བསམ་གཏན་བྱེད། །དེ་བཞིན་གཤེགས་

ཀྱི་བསམ་གཏན་དག །ལྷ་རྫས་བསོད་ནམས་ལྟ་སྦྱོང་བ། །རྣལ་འབྱོར་ཅན་དང་རྒྱལ་བའི་སྲས། །མཉམ་བཞག་རྟག་པར་བསམ་གཏན་བྱེད། །འདི་དག་ཐམས་ཅད་སེམས་ཙམ་སྟེ། །མཚན་ཅན་མཚན་ཉིད་ཡོད་པ་མིན། །ཕུང་པོ་རྣམས་མེད་ཁམས་ཡོད་མིན། །
ཐམས་ཅད་ཆོས་ལ་མཚན་ཉིད་མེད། །རྡུལ་ཕྲན་རྣམ་པར་གཞིགས་པ་དང་། །དེ་དག་དེ་ལྟར་མི་གནས་སོ། །རྟོག་པ་བསྐྱེད་པས་བརྟགས་པ་ནི། །དངོས་པོ་ས་དང་ཆུ་ལ་སོགས། །དངོས་པོའི་རང་བཞིན་མི་ཤེས་པ། །མཚན་ཉིད་དུ་ཡང་རྣམ་པར་རྟོག །ཁ་དོག་སྡུག་
དང་མི་སྡུག་དང་། །ཁ་དོག་སྣང་གཞན་དེ་བཞིན་ཏེ། །འཇའ་དང་ཨིན་དྲ་གོ་བ་ལྟར། །ཁ་དོག་སྣ་མང་སྤྲིན་ལྟ་བུའི། །སངས་རྒྱས་སྐུ་དང་འདྲ་བ་ཡིས། །ཐམས་ཅད་འགྲོ་བ་ཀུན་བཀང་སྟེ། །རྒྱས་པའི་སྐྱེ་མཆེད་ཅེས་བྱ་བས། །འབྱུང་བ་རྣམས་ཀྱང་རྣམ་གཞིགས་ཏེ། །
རྣལ་འབྱོར་ཤེས་པ་གཟུགས་ཅན་གྱིས། །ལུས་ལ་རྟག་ཏུ་གཟུགས་ཀྱང་མཐོང་། །གང་ལ་དམིགས་ཏེ་མཉམ་བཞག་པ། །དེ་ལ་དམིགས་ཤིང་རྣམ་པར་ལྡང་། །གང་དང་གང་ལ་རྣམ་རྟོག་པ། །དེ་དང་དེ་ནི་དམིགས་པ་ཡིན། །རྣལ་འབྱོར་ཅན་མེད་རྣལ་འབྱོར་མེད། །
དེ་ལྟར་རྣམ་པར་རྟོག་པ་ནི། །རྣལ་འབྱོར་ཅན་གྱི་རྣལ་འབྱོར་ཉིད། །ཀུན་གཞི་ས་རྣམས་ཐམས་ཅད་དང་། །ཐུབ་པའི་རྣལ་འབྱོར་བདེ་ལ་གནས། །ཆོས་དང་ཆོས་ཀྱི་མཚན་ཉིད་ཀྱང་། །རྟག་ཏུ་རབ་ཏུ་རྟོགས་བྱས་ཤིང་། །མཉམ་པར་བཞག་པའི་ཁྱད་པར་དག །
མཉམ་བཞག་ལྡན་པ་རབ་ཏུ་སྟོན། །ཆོས་ཀྱི་རང་བཞིན་རྣམ་ཕྱེ་བས། །རྣལ་འབྱོར་ཅན་གྱི་བློ་འཁྲུག་པ། །བློ་གྲོས་ཞན་པས་རབ་ཏུ་སྐྱེ། །ཆོས་དང་བདག་ལ་འཛིན་པར་འགྱུར། །ཡིད་ཆེས་ལུང་དང་མི་ལྡན་པར། །ཆོས་རྣམས་སྟོན་པར་བྱེད་པ་ནི། །མཚན་ཉིད་རྣམ་
པར་རྟོག་པ་ཡིས། །བདག་ཀྱང་ཆུད་ཟོས་གཞན་ཆུད་གསོན། །མཚན་ཉིད་ཅན་མེད་མཚན་ཉིད་མེད། །འདྲེས་པའི་ཕྱིར་ན་རྣམ་པར་སྣང་། །མངར་བའི་རྣམས་ནི་མཁྲིས་པ་སེལ། །བད་ཀན་ཚ་སྐྱུར་ལན་ཚྭ་སྟེ། །མ་ཞུ་ཚ་བའི་རྣམ་པ་དང་། །ལན་ཚྭ་ལ་སོགས་

རྣམ་པས་སེལ། །མཁྲིས་པ་བད་ཀན་འཁྲུགས་པ་ལས། །རིམས་རྣམས་སྐྱེ་བར་འགྱུར་བ་དང་། །ལུས་ཅན་རྣམས་ཀྱི་ལུས་ཡུལ་དུ། །འདུས་པ་རླུང་ལས་བྱུང་བ་དང་། །རིམས་དག་རྣམ་པར་གཞིག་པའི་ཕྱིར། །ཐུབ་པས་བསྡུ་བ་བྱས་པ་ནི། །ཁར་
ལ་སོགས་ཡན་ལག་དྲུག །ཤ་དང་སྐོལ་མ་ཁུ་བ་དག །ཐ་དད་མཚན་གྱིས་འཇིག་འགྱུར་བ། །ལུས་ཅན་རྣམས་ཀྱི་རིམས་ཀུན་ཏོ། །རྣམ་ཤེས་རྣམས་ནི་ཀུན་གཞི་ལ། །ཕན་ཚུན་ཐ་དད་མི་གནས་ཏེ། །གལ་ཏེ་ཆོས་ཀྱི་རང་བཞིན་ནམ། །མཚན་ཉིད་གཅིག་ནི་ཡོད་
གྱུར་ན། །དེ་ཚེ་ཆོས་དང་མཚན་ཉིད་ལ། །མཚན་ཉིད་མི་འདྲ་མེད་པར་འགྱུར། །རྫས་རྣམས་བསྡུས་པས་སེལ་མི་ནུས། །མི་ཡང་སོས་པར་མི་འགྱུར་རོ། །སོས་དང་རྣམ་པར་བསལ་བ་འདི། །མཁས་པ་རྣམས་ཀྱིས་མཐོང་བ་སྟེ། །གཞན་དུ་ཀུན་གཞི་རྣམ་
ཤེས་པ། །རྣམ་པ་མང་པོར་གནས་པ་སྟེ། །སྒྱུ་མའི་རི་དགས་བཞིན་འཁོར་བ། །རྣལ་འབྱོར་བརྩོན་པས་བརྟགས་པ་ཡིན། །མཚན་མེད་མཚན་ཅན་མེད་པ་སྟེ། །ཕུང་པོ་རྣམས་ལས་ཕུང་པོ་ཅན། །གཞན་མེད་ཡན་ལག་ཉིང་ལག་ལས། །ཡན་ལག་ཅན་མེད་
ཡན་ལག་ལ། །འཇིག་རྟེན་རྒྱུ་ཡིས་མ་བྱས་ཏེ། །འབྲས་བུ་རྣམས་ལ་རྒྱུ་ཡང་མེད། །འཇིག་རྟེན་རྡུལ་ཕྲན་བསགས་པ་མིན། །ཕྱོགས་དང་གནས་སུ་མི་འགྲོའོ། །དེ་དག་སོར་གཉིས་སོར་གསུམ་དུ། །ཅི་ཡང་རྩོམ་པར་མི་བྱེད་དེ། །དངོས་པོ་ཡོད་པ་ཕྲད་པའི་
ཕྱིར། །རྡུལ་ཕྲན་ཐམས་ཅད་འདུ་བར་འདོང་། །དེ་ཚེ་ཡོན་ཏན་ཁྱད་ཡོད་པ། །ཡོན་ཏན་རྣམས་ཀྱིས་ཡོན་ཏན་དུ། །འཇིག་རྟེན་མ་བྱས་རང་བཞིན་གྱིས། །འཇིག་རྟེན་རྐྱེན་ལས་མ་བྱུང་སྟེ། །འདོད་རྒྱལ་དངོས་ཀྱིས་དེ་བཞིན་མིན། །ཆོས་གསུམ་པས་ཀྱང་མ་བྱས་ཏེ། །བག་
ཆགས་རྣམས་ཀྱིས་དཀྲུགས་པའི་སེམས། །རྣམ་པར་རྟོག་པ་མང་པོའི་གནས། །སྙིང་གི་ཕྱོགས་ན་གནས་པ་ཡི། །ལུས་ཅན་ཀུན་གྱི་ཀུན་གཞི་དང་། །སེམས་དང་ཡིད་དང་རྣམ་ཤེས་རྣམས། །འགྲོ་བ་དག་གིས་སྣ་ཚོགས་བརྟགས། །འགྲོ་བ་མ་ལུས་རབ་མནན་ཏེ། །

སྒྱུ་མའི་རི་དགས་བཞིན་དུ་གནས། །སེམས་ཙམ་དུ་ནི་འཇུག་པ་ལས། །གཞན་དུ་ཡོངས་སུ་གནས་འཕོ་སྟེ། །ས་ལ་སྟོང་ཞེས་བརྗོད་པར་བྱ། །སེམས་ནི་དངོས་པོའི་ཚུལ་དུ་གནས། །རྫ་ལ་སོགས་པའི་ཡུལ་མེད་དེ། །སེམས་ནི་རྫ་མ་ལྟ་བུའོ། །ས་ལ་གཟུགས་
རྣམས་ཡོད་པ་དང་། །ལྷ་ཡུལ་གནས་པའི་ཁྱིམ་རྣམས་དང་། །རྣམ་པ་སྣ་ཚོགས་གང་སྣང་བ། །དེ་དག་ཀུན་གཞི་སྣང་བ་ཡིན། །ཀུན་གཞི་ཀུན་ཏུ་ལག་པ་སྟེ། །ཀུན་ཏུ་ཁ་མིག་མགོ་བོ་ཡང་། །ཅིག་ཅར་བ་དང་རིམ་གྱིས་ཀྱང་། །ས་རྣམས་ཡོག་པར་རབ་ཏུ་གནས། །
བུས་པ་རྣམ་པར་མྱོས་བྱེད་དེ། །གང་གི་སྙིང་ལ་གང་གནས་པ། །དེ་ནི་དེ་ལ་གཉིས་ཚུལ་དུ། །ལུས་ཀུན་བཀང་སྟེ་རབ་ཏུ་གནས། །སྟོང་མིན་དངོས་པོ་གང་ཡང་མེད། །ཐོ་བས་ཇི་ལྟར་རྫ་བཞིན་དུ། །དངོས་པོ་གང་ལ་གཞོམ་བྱ་བའི། །དངོས་པོ་དངོས་སུ་ཡོད་པ་མིན། །
དེ་སྟེ་སྟོང་པའི་དངོས་ཡོད་ན། །འཇིག་མེད་མ་ཡིན་གཞིག་པར་འགྱུར། །གཞིག་བྱ་གཞིག་པར་བྱེད་པ་གང་། །དེ་ནི་རྣམ་པར་རྟོག་པས་བརྟགས། །རི་རབ་རི་བོ་ཙམ་འགྱུར་བའི། །བདག་ཏུ་ལྟ་བ་མི་གནོད་ཀྱི། །སྟོང་ཉིད་ལྟ་བ་གནོད་པ་ནི། །ང་རྒྱལ་མི་བདེན་བརྟགས་
པའོ། །རྣལ་འབྱོར་སྤྱོད་པས་སྟོང་པ་ཉིད། །གནས་མ་ཡིན་པར་སྦྱར་མི་བྱ། །གནས་མིན་གལ་ཏེ་སྦྱར་གྱུར་ན། །བདུད་རྩི་དུག་ཏུ་འགྱུར་བ་ཡིན། །ལྟ་བ་ཇི་སྙེད་གང་ཡང་རུང་། །ལུས་ཅན་རྣམས་ལ་ཡོད་པ་ཡི། །ལྟ་བ་རྣམ་པར་སྤང་བའི་ཕྱིར། །སྟོང་པ་ཉིད་ཀྱི་
ཚུལ་བསྟན་ཏོ། །སྟོང་པ་ཉིད་ཀྱི་ལྟ་ཐོས་ཀྱང་། །ལ་ལའི་ལྟ་བ་མ་ཞིག་ན། །གསོར་མི་རུང་བའི་ལྟ་ཅན་ཏེ། །སྨན་པས་བཏང་བའི་ནད་པ་བཞིན། །ཇི་ལྟར་བསྲེག་པ་ཚིག་པའི་མེ། །བསྲེག་པ་མེད་པས་མི་གནས་སོ། །དེ་བཞིན་བསྲེག་བྱ་ལྟ་ཚིག་ན། །སྟོང་ཉིད་མེ་ཡང་
འགག་པར་འགྱུར། །ལྟ་བས་འགོག་པའི་དུས་སུ་ཡང་། །ཡེ་ཤེས་ཡང་དག་མེ་འབྱུང་སྟེ། །ཉོན་མོངས་ཐམས་ཅད་སྲེག་པར་བྱེད། །ཉོན་མོངས་བསྲེགས་ནས་རྣམ་པར་མཛེས། །ཐུབ་པ་རྣལ་འབྱོར་ལྡན་པའི་རྣམས། །ཡེ་ཤེས་འདི་ལྡན་ཐུབ་སྤྱོད་དག །དེ་བཞིན་

གཤེགས་པའི་གནས་ཀྱི་མཆོག །སྟུག་པོ་དེར་ནི་རབ་ཏུ་འདོང་། །རི་བོང་རྭ་ཡིས་རི་བོ་རྣམས། །མངོན་པར་གཞིག་བྱ་མ་མཐོང་སྟེ། །འདི་ལ་མོ་གཤམ་བུ་ཡིས་ཀྱང་། །སྲོག་ཆགས་གང་ཡང་བསད་པ་མེད། །རི་བོང་རྭ་ཡི་གཞུ་ཡིས་ཀྱང་། །སུ་ཡང་ཐབ་མོ་མི་
བྱེད་དེ། །མོ་གཤམ་བུ་ལ་སུ་ཡང་རུང་། །ཁྱིམ་གྱི་ལས་སུ་མི་སྐོའོ། །སྟོང་པ་ཉིད་དང་མི་རྟག་ཉིད། །རྟག་ཏུ་དངོས་དང་གཅིག་གྱུར་ཏེ། །ཡོད་དང་མེད་པའི་རང་བཞིན་ཡང་། །དེ་བཞིན་གཅིག་པ་ཉིད་དུ་གྱུར། །མངལ་ན་གནས་དུས་ཚུན་ཆད་ཀྱང་། །གཟུགས་རྣམས་གཞིག་
པར་བརྩོན་པ་སྟེ། །གང་ནའང་དེ་མེད་གཟུགས་ཡོད་མིན། །གཟུགས་མེད་པར་ཡང་དེ་མེད་དེ། །ཁྱད་པར་མེད་པར་འབྱུང་བ་ནི། །མ་བསྒྲིབས་ཟླ་དང་འོད་ཟེར་བཞིན། །དེ་བཞིན་དངོས་རྣམས་སྟོང་ཉིད་དང་། །ལྷན་ཅིག་གཅིག་ཏུ་འབྱུང་བ་སྟེ། །ཕན་ཚུན་རྣམ་པ་ཐ་དད་དུ། །
དེ་དག་དགོས་པ་མི་སྒྲུབ་བོ། །རྒྱུ་དང་རྐྱེན་རྣམས་ཚོགས་པ་ལས། །རྣལ་འབྱོར་ཅན་གྱི་ལས་སྒྲུབ་བོ། །ལུས་འདི་བདག་ཡོད་མ་ཡིན་ཏེ། །རོ་ལངས་འཁྲུལ་འཁོར་རབ་ཏུ་འདྲ། །སྲེད་པའི་སྲད་བུས་བཅིངས་བྱས་ཤིང་། །ཡུལ་གྱི་རྣམས་ཀྱིས་དྲང་བ་ཡིན། །ལྷ་རྫས་སྟོང་པ་
ཉིད་བཤད་པ། །ལྟ་བ་ཐམས་ཅད་སྦྱོང་བ་སྟེ། །མཐའ་རྒལ་སྟོང་པ་ཉིད་ལྟ་བ། །རྒྱལ་བ་རྣམས་ཀྱིས་ལྟ་མེད་བཤད། །སྟོང་ཉིད་ལྟ་བ་སྦྱོང་བ་ནི། །ཡོད་དང་མེད་པ་གཞིག་པའི་ཕྱིར། །བློ་ལྡན་མཉམ་པར་བཞག་པ་ཡི། །རྣལ་འབྱོར་ཅན་གྱིས་རྟག་ཏུ་བསྒོམ། །རྩྭ་དང་ཤིང་
དང་གྱོ་མོ་དག །སྒྱུ་མའི་མཁན་པོས་རྒྱུར་བྱས་ཏེ། །སྔགས་ཀྱིས་ཅི་དང་ཅིར་འདོད་པར། །གཟུགས་ཀྱི་དངོས་སུ་རབ་ཏུ་བྱེད། །གཟུགས་དང་སྣང་བ་ཡིད་བྱེད་དང་། །སྲེད་དང་མིག་རྣམས་རྒྱུར་བྱས་ཤིང་། །མིག་གི་རྣམ་ཤེས་སྒྱུ་མ་བཞིན། །སྨིག་རྒྱུ་བཞིན་དུ་དེ་གཡོའོ། །
གང་གི་ཡུལ་དུའང་འོང་བ་མེད། །ཡུལ་གཞན་དག་ཏུའང་འགྲོ་བ་མིན། །འདི་ལྟའི་རྣམ་ཤེས་འབྱུང་བ་ལ། །ཡོད་དང་མེད་པར་བརྟག་མི་བྱ། །སྐྲ་ཡི་ཚོགས་དང་བོང་བུའི་རྭ། །མོ་གཤམ་བུ་དང་སྨིག་རྒྱུ་དང་། །དྲི་ཟའི་གྲོང་ཁྱེར་རྨི་ལམ་དག །མིང་དུ་གྲག་གི་ཡོད་པ་མིན། །

སྟག་དང་གཟིག་དང་དོམ་དག་དང་། །རྔ་རྟ་བོང་བུ་ཁྱི་རྣམས་དང་། །གཡི་དང་མཚའ་དང་རུས་སྦལ་ལ། །རྭ་ནི་ཡོད་པ་མ་ཡིན་ན། །ཐུབ་པ་རྩོད་པར་བརྩོན་པ་ཡིས། །དེ་དག་ཅི་ཕྱིར་མི་བརྟག་ཅིང་། །བོང་བུའི་རྭ་ལ་བརྟག་པར་བྱ། །ཅི་གོ་དེ་དག་བསྒྲུབ་ནུས་སམ། །ཤེས་རབ་ཅན་
གྱིས་སར་བསྟན་པ། །དེ་དག་ཉི་ཚེ་བརྟག་པར་བྱ། །རྟོག་པ་ཅན་རྣམས་འཁོར་བ་ནི། །བླུན་པོ་ལོང་བ་འོན་པ་འདྲ། །སྒྲོལ་བའི་ཡེ་ཤེས་དེ་ལ་མེད། །སོ་སོ་རང་རིག་ཡུལ་ཡང་མེད། །གཞན་གྱིས་བྱས་པའི་ཚུལ་དག་ལ། །རྣམ་པར་རྟོག་པས་ཅི་ཞིག་ནུས། །སྟུག་པོར་
གནས་པར་རྣམ་པར་རྟོགས། །དེ་ལ་བརྟགས་ཤིང་དགེ་བ་འཐོབ། །རྣལ་འབྱོར་མཉམ་བཞག་རྣལ་འབྱོར་ཅན། །དེ་ན་གནས་པ་བཞིན་དུ་སྣང་། །ལྷ་ཡུལ་གནས་པའི་བསྙེམས་བྲལ་དང་། །ཟླ་བ་གཟའ་ལ་སོགས་པ་ཡང་། །རླུང་གིས་རབ་ཏུ་བསྐྱོད་པའི་རྣམས། །
རི་རབ་རྟེན་ཅིང་རྒྱུ་བ་ཡིན། །དེ་བཞིན་རྣམ་པར་ཤེས་པ་བདུན། །བག་ཆགས་རྣམས་དང་ལྡན་པ་ཡི། །ཀུན་གཞི་ཀུན་གྱི་ས་བོན་ཅན། །དེ་ལ་བརྟེན་ཅིང་རབ་ཏུ་རྒྱུ། །ཇི་ལྟར་ས་ལ་ཀུན་བརྟེན་ཅིང་། །ས་སྐྱེ་ཀུན་ཀྱང་འབྱུང་བ་བཞིན། །སེམས་ཅན་ཀུན་གྱི་གནས་ཡིན་ཏེ། །
འབྱུང་ཁུངས་ཀུན་གྱི་ཁྱད་པར་དུ། །དེ་བཞིན་ཀུན་གཞི་རྣམ་ཤེས་ཀྱང་། །རྣམ་ཤེས་རྣམས་ཀྱི་གནས་ཡིན་ཏེ། །སེམས་དང་སེམས་ལས་བྱུང་བར་ལྡན། །དབའ་རླབས་བཞིན་དུ་རབ་ཏུ་འབྱུང་། །ཇི་ལྟར་རྨ་བྱའི་འདབ་སྒྲོ་རྣམས། །འོད་དང་ཁ་དོག་རྣམ་མང་སྟེ། །གཙུག་
ཕུད་ཅན་རྣམས་འདབ་སྒྲོ་ཡིས། །རྨ་བྱ་མོ་དང་ལོངས་རྩེ་བ། །དེ་བཞིན་ཀུན་གཞི་རྣམ་ཤེས་ཀྱང་། །ས་བོན་མང་ཅན་མཚོ་ལྟར་གནས། །ཐམས་ཅད་ཆོས་ཀྱི་གཞི་ཡིན་ཏེ། །རྣལ་འབྱོར་ཅན་གྱིས་རྟག་ཏུ་མཐོང་། །ཇི་ལྟར་རྒྱ་མཚོ་ཆུ་བོ་ཡིས། །ཉིན་གཅིག་བཞིན་དུ་དགང་བྱ་
ཡང་། །ཆུ་བོ་རྣམས་ནི་རྒྱུན་མི་འཆད། །རྒྱ་མཚོ་རྟོག་པར་ཡོང་མི་བྱེད། །དེ་བཞིན་ཀུན་གཞི་རྣམ་ཤེས་ཀྱང་། །ཟབ་ཅིང་མཚོ་ལྟར་གནས་པ་སྟེ། །རྣམ་ཤེས་རྣམས་ཀྱིས་ཉིན་གཅིག་བཞིན། །བག་ཆགས་ཆུ་བོས་རབ་ཏུ་དགང་། །ཇི་ལྟར་རིན་ཆེན་ལྡན་པའི་ས། །སྣ་

ཚོགས་ཀུན་དུ་ཕན་འདོགས་ཏེ། །སེམས་ཅན་རྣམས་ཀྱང་ཉེ་བར་འཚོ། །ཡོན་ཏན་དངོས་སུ་རྟོན་པ་ཡིན། །དེ་བཞིན་ཀུན་གཞི་རྣམ་ཤེས་ཀྱང་། །རྣམ་རྟོག་རྣམས་དང་ལྷན་ཅིག་འབྱུང་། །དེ་ནི་འཁོར་བ་འཕེལ་བྱེད་དེ། །གྱུར་ན་དེ་བཞིན་གཤེགས་པ་
ཡིན། །དེ་བཞིན་གཤེགས་པ་སྟོབས་བཅུ་ཅན། །སྤྱོད་པ་ལེགས་སྤྱད་གཙང་བ་སྟེ། །ས་བཅུ་པ་ལས་མངོན་བྱུང་སྟེ། །བདེ་བར་གཤེགས་པའི་སར་ཞུགས་ནས། །ཡང་དག་མཐའ་ལ་རབ་གནས་པ། །སྣ་ཚོགས་སེམས་ཅན་རྣམ་སྤྲུལ་པར། །འཇིག་པ་མེད་
པར་འབྱུང་བ་ནི། །རྣམ་པར་རྟོག་མེད་ས་བཞིན་ནོ། །སོས་ཀ་མེ་ཏོག་མང་པོའི་གཟུགས། །མི་དང་བྱ་ཡི་ཡིད་དུ་འོང་། །དེ་བཞིན་སྣ་ཚོགས་ལེན་པའི་སེམས། །ཐུབ་ཤེས་ཡིད་འོང་མྱོས་པར་བྱེད། །ཇི་ལྟར་དོན་མཁས་རྒྱལ་བའི་སྲས། །འབྱུང་ལས་བྱུང་བ་
མ་ཡིན་པ། །མེད་པའི་བློ་ཅན་དེ་བཞིན་ཏེ། །ལོག་པར་སྨྲ་ལ་བརྩོན་པ་དག །ཆོས་དང་མི་འཐུན་ཕྲ་མ་ཅན། །ལྕེ་གཉིས་ལོག་པར་ལྟ་བ་དག །རྣམ་པ་གཞན་དུ་གནས་པའི་དངོས། །རྣམ་པ་གཞན་དུ་སྟོན་པར་བྱེད། །ཇི་ལྟར་སྒྱུ་མའི་སྐྱེས་བུ་ཞིག །འབྲས་བུ་
སྣ་ཚོགས་སྟོན་བྱེད་པ། །འབྲས་བུ་མེ་ཏོག་དེ་ན་མེད། །སྔགས་དང་ཁོང་བཟོས་ཟོ་མདོག་བདེ། །འཇིག་རྟེན་རྣམ་པ་གཞན་གནས་པ། །རྣམ་པ་གཞན་དུ་སྟོན་པར་བྱེད། །རྒྱལ་བ་རྣམས་དང་རྒྱལ་བའི་སྲས། །ཀུན་ཀྱང་ཐབས་ཀྱི་དམིགས་ལ་མཁས། །བསྟན་
པ་གཞན་ལ་ཇི་སྙེད་དུ། །བསྟན་པ་བྱས་པ་དེ་དག་ཀུན། །བདེ་གཤེགས་རྣལ་འབྱོར་མཁས་པ་ཡིས། །བསྟན་པ་སྟུག་པོའི་རྒྱན་ལ་བསྟན། །ཁམས་རྣམས་དྲུག་དང་བཅྭ་བརྒྱད་བསྟན། །སྐྱེ་མཆེད་བཅུ་དང་གཉིས་ཀྱི་མི། །ཡིད་ཀྱི་སྲད་བུས་བཏགས་པ་དག །
སེམས་ཅན་ཀུན་དུ་རབ་ཏུ་འཁོར། །རྣམ་པར་ཤེས་པ་བརྒྱད་ཀྱི་ཚོགས། །ཁམས་དང་སྐྱེ་མཆེད་ཕུང་པོ་སྟེ། །ཡིད་ཀྱི་སྲད་བུས་བཅིང་བྱས་ཤིང་། །ལུས་དང་ལུས་ལ་རབ་ཏུ་རྒྱུ། །འདི་ནི་འགྲོ་བའི་སྐྱེས་བུ་སྟེ། །འགྲོ་བ་རྣམས་ཀྱི་དོན་དུ་བསྟན། །ལུས་ཅན་ཀུན་གྱི་སྐྱེས་

བུ་ནི། །འགྲོ་ཡང་བྱུང་བ་མ་ཡིན་ཏེ། །ཁམས་རྣམས་དྲུག་པོ་སྐྱེས་བུ་ཡིན། །སྐྱེ་མཆེད་བཅུ་གཉིས་དེ་བཞིན་ཏེ། །བཅྭ་བརྒྱད་རྣམས་ལ་ཡིད་རྒྱུ་བ། །དབང་སྒྱུར་ཞེས་ནི་བྱ་བ་སྟེ། །དབང་སྒྱུར་ཕོ་བྲང་སྣ་ཚོགས་པ། །ནོར་བུ་རིན་ཆེན་གྲོང་རྡལ་དང་། །དགའ་ལྡན་
ལ་སོགས་བསྙེམས་བྲལ་དང་། །མཚེ་མའི་གནས་སུའང་དེ་བཞིན་བཤད། །རྡོ་རྗེ་སྙིང་པོ་དབང་ཅན་ལ། །རྒྱལ་སྲས་འཇིགས་པ་མེད་པའི་རྣམས། །དགེའོ་དགེ་ཞེས་དགའ་འབོད་ཅིང་། །ཐམས་ཅད་མགོ་བོས་ཕྱག་འཚལ་ལོ། །ཐུབ་ལྡན་རྣལ་འབྱོར་སྤྱོད་པ་དང་། །རྒྱལ་
བ་དག་དང་རྒྱལ་བའི་སྲས། །ཞིང་དང་ཞིང་ན་བཞུགས་པ་དང་། །ལྷ་ཡུལ་གནས་པའི་རྒྱལ་སྲས་དང་། །རྣལ་འབྱོར་བདག་པོ་རྣལ་འབྱོར་ཅན། །ཡེ་ཤེས་དབང་པོ་འཕྲུལ་ཆེན་དང་། །དབང་སྒྱུར་ལྷ་མོའི་ཚོགས་རྣམས་ཀྱང་། །ཐལ་མོ་སྦྱར་ཏེ་གནས་པར་གྱུར། །ཕན་ཚུན་
གཅིག་ལ་གཅིག་ལྟ་ཞིང་། །རྒྱལ་བའི་སྲས་ལ་སྨྲ་བ་ནི། །འགྲོ་བའི་ལྷ་རྫས་སྐྱེས་བུ་ཡང་། །མུར་འདུག་བདག་སྨྲ་སྤངས་པ་སྟེ། །ཐུབ་ཅན་ཀུན་གྱི་སྐྱེས་བུ་ནི། །ཐུབ་པའི་ཁྱུ་མཆོག་ཁྱོད་ཀྱིས་བསྟན། །འདས་དང་ད་ལྟར་བྱུང་བ་ཡིས། །སྔོན་བྱས་མ་བྱས་ཐོབ་པ་ནི། །
སྔོན་གྱི་རྒྱལ་བའི་སྲས་རྣམས་ཀྱིས། །ཁམས་དྲུག་སྐྱེས་བུ་དགེ་བའོ། །ཇི་ལྟར་མཁའ་ལ་བྱ་རྗེས་རྣམས། །རྣམ་པར་བཞག་པ་དེ་བཞིན་དུ། །སེམས་ཚོགས་ལྡན་པའི་ཁམས་ཀྱི་རྣམས། །གཏན་ཚིགས་བཅས་པ་རབ་ཏུ་བསྟན། །ཇི་ལྟར་ཤིང་ལས་མེ་དག་གི། །མེ་
ལྕེ་གནམ་དུ་གནས་པར་འགྱུར། །བསྲེག་པ་གཞན་ནི་མ་རྙེད་ཅིང་། །རླུང་གིས་བབ་ན་གཏན་མི་འབར། །བྱ་རྗེས་རྣམ་པར་བཞག་པ་ནི། །མཁའ་ལ་གནས་པ་མི་སྣང་སྟེ། །འཁོར་བའི་འཁོར་ལོར་འཁོར་བ་ཡི། །འགྲོ་བའི་སྐྱེས་བུ་སྣང་བ་ཡིན། །བྱ་རྣམས་རྐང་
པས་མི་འདོང་སྟེ། །དེ་དག་སྒྲོ་ཡི་ཤུགས་ཀྱིས་འདོང་། །བྱ་ཡི་རྗེས་དང་འདྲ་བ་ནི། །སྐྱེས་བུའི་སྒོ་ནས་རབ་ཏུ་བསྟན། །ལས་ཀྱི་སྐྱེས་བུ་བསྟན་པ་ནི། །འཁོར་རྣམས་རྟག་ཏུ་འཁོར་བ་སྟེ། །བདེ་དང་སྡུག་བསྔལ་མྱོང་བྱེད་པ། །བྱས་པའི་ལས་ནི་ཆུད་མི་ཟ། །ཇི་ལྟར་

ཞིང་པ་རྣམས་ཀྱི་ལས། །འབྲས་བུ་མེད་པར་མི་འགྱུར་ཏེ། །དོན་དང་ལྡན་པ་དེ་དག་ནི། །གཞན་ཡང་འོང་ཞེས་རྨོ་བ་མེད། །ལྷ་རྫས་འགྲོ་བའི་སྐྱེས་བུ་ནི། །རྣལ་འབྱོར་ཅན་ལ་རྣལ་འབྱོར་སྟོན། །ལུས་ཅན་ལུས་ཀྱི་ནང་ནས་ཞིང་། །དེ་ནི་དགེ་བའི་ལས་
བྱེད་དོ། །འདི་དང་ཕྱི་མའི་བདེ་བ་དང་། །ལྷ་ཡུལ་གནས་པའི་གནས་མཐོང་ཞིང་། །འཁོར་ལས་སངས་རྒྱས་རྒྱུར་འགྱུར་བའི། །བསོད་ནམས་རྣམས་ནི་རྟག་ཏུ་བྱེད། །ཐར་དང་ཕ་རོལ་ཕྱིན་རྣམས་དང་། །སངས་རྒྱས་བསམ་གཏན་སྤྱོད་ཡུལ་ཀུན། །འགྲོ་བའི་སྐྱེས་བུ་
མེད་ན་ནི། །ཀུན་ཀྱང་འབྲས་བུ་མེད་པར་འགྱུར། །ལྷ་ཡི་བདེ་བ་ཐམས་ཅད་དང་། །དབང་སྒྱུར་རྣམས་ཀྱི་འབྲས་བུ་དང་། །དེ་བཞིན་ཉིད་མཐོང་ཐུབ་པ་ཡི། །རྣལ་འབྱོར་རྣམས་ཀྱང་མེད་པར་འགྱུར། །ལས་དང་ལས་ཀྱི་འབྲས་བུ་མཐོང་། །ལས་རྣམས་དོན་མེད་མ་ཡིན་ཏེ། །
འོ་དོད་འབོད་ལ་སོགས་པ་དང་། །མནར་མེད་མཐའ་དང་ལྷ་རྣམས་ཀྱི། །ལམ་གྱི་རྒྱུད་ཀྱང་ཡོད་པ་ཡིན། །འགྲོ་བའི་སྐྱེས་བུ་དེ་ཡོད་ན། །སྲེད་པའི་འཁོར་ལོས་འཁོར་བར་འགྱུར། །འཁོར་དང་བྲལ་ན་ཐར་པ་སྟེ། །བློ་ཞན་རྣམས་ཀྱིས་མི་ཤེས་སོ། །འཇུག་པའི་སྐྱེས་བུ་
མེད་ན་ནི། །མོ་གཤམ་བུ་ཡང་འགྲོ་བར་འགྱུར། །བོང་བུའི་རྭ་ཡང་རྣོ་འགྱུར་ཏེ། །བྱེ་མ་ལས་ཀྱང་ཏིལ་མར་འབྱུང་། །ཕྱི་དང་ནང་གི་ས་རྣམས་ནི། །ཕན་ཚུན་སྟོབས་ཀྱིས་བྱུང་བ་སྟེ། །གང་དང་གང་དུ་འགྲོ་བ་དག །དེ་དང་དེ་དག་འགྲོགས་པ་ཡིན། །ལྷ་དང་ལྷ་ཡི་བུ་མོའི་
ཚོགས། །དབང་སྒྱུར་རྒྱལ་བའི་སྲས་རྣམས་དང་། །དྲི་ཟ་གྲུབ་པའི་རྒྱལ་པོ་དང་། །སྔགས་འཆང་ཆུང་མའི་ཚོགས་རྣམས་ཀྱང་། །ཐུབ་ལ་མཆོད་པར་འོས་པ་ཡི། །རྡོ་རྗེའི་སྙིང་པོ་སྲས་བཅས་ལ། །མཆོད་དེ་གསོལ་བ་འདེབས་པར་བྱེད། །ཐམས་ཅད་དགེའོ་དགེ་ཞེས་སྨྲ། །
ཉམས་པ་མེད་པའི་ཆོས་ཀྱི་ཚུལ། །རྒྱུ་དང་དཔེ་ཡིས་བརྒྱན་པ་ནི། །གཞན་གྱི་རྒོལ་བ་འཇོམས་པ་སྟེ། །དཔའ་བོ་ཆེན་པོ་ཁྱོད་ཀྱིས་བསྟན། །བགབ་ཟུངས་ལྟག་ཆོད་ཚར་གཅོད་པ། །བདག་གི་ཕྱོགས་ཀྱི་ཡོན་ཏན་སྟོན། །ཤེས་རབ་ཅན་གྱིས་བསྟན་དུ་གསོལ། །འགྲོ་བ་འདི་

དག་ཉན་པར་འགྱུར། །ཇི་སྙེད་རྒྱལ་བའི་སྲས་རྣམས་དང་། །ལྷ་ཡི་རྒྱལ་པོ་ཀུན་ཀྱང་ཉོན། །ཤིན་ཏུ་དཀའ་བའི་བསམ་ཡས་རྒྱུ། །བརྟགས་འདས་རྟོགས་དང་བྲལ་བ་ཡི། །རྒྱུ་དང་དཔེ་ཡི་མེ་ཏོག་སྟེ། །རྣལ་འབྱོར་རྣམས་ཀྱི་ཐུབ་དགེ་བ། །སྟུག་པོའི་རྒྱན་ནི་བཤད་པར་བྱ། །
དེ་ནི་ཐུབ་ལ་རྣལ་འབྱོར་སྟོན། །སྟུག་པོའི་རྒྱན་དེ་སྣ་ཚོགས་ཏེ། །སྟུག་ན་སྤྱོད་པའི་ཐུབ་པ་ཡི། །སངས་རྒྱས་རྣམས་ཀྱི་གནས་ཀྱི་མཆོག །ཐུབ་པ་ཀུན་གྱི་དམ་པའོ། །ས་སྟེངས་ཐུབ་པའི་དྲུ་མ་ལ། །རྡོ་རྗེ་སྙིང་པོས་ཡང་སྨྲས་པ། །རྟག་པར་དྲུ་མ་ཁྱོད་ཀྱིས་ཀྱང་། །ཆོས་ཀྱི་དངོས་ཉིད་
ཤེས་པར་གྱིས། །དངོས་པོ་རྣམས་ཀྱི་རང་བཞིན་ནི། །དངོས་སུ་སྟོང་ངམ་རྟག་པ་ཞེས། །འདི་འདྲའི་ལྟ་དང་ལྡན་པ་ཡི། །ཐུབ་པའི་རྣལ་འབྱོར་མི་འཁྲུལ་ལོ། །ཆོས་པ་གཅིག་པུ་རྟོགས་པ་ཡིས། །ཆོས་པར་མངོན་དུ་ཤེས་པ་སྟེ། །དངོས་པོ་ཀུན་གྱི་རང་བཞིན་ཡང་། །དངོས་པོ་གཅིག་གིས་
ཤེས་པར་འགྱུར། །ཇི་ལྟར་ཇི་བཞིན་བསྲུབས་པའི་ཞོ། །སོར་མོའི་རྩེ་མོས་མངོན་ཤེས་པ། །དེ་བཞིན་དངོས་པོ་ཐམས་ཅད་ཀྱི། །རང་བཞིན་དངོས་པོས་ཤེས་པར་འགྱུར། །དངོས་པོ་ཇི་མེད་སྟོང་པ་ཉིད། །དངོས་པོ་དངོས་པོར་ཡོད་པའང་མེད། །འདི་དག་ཀུན་གཞི་རྣམ་པ་སྟེ། །སྟོང་
ཉིད་ཀུན་གཞི་རྣམ་པའོ། །རྒྱལ་སྲས་དྲུ་མ་འཇིགས་མེད་པས། །རྡོ་རྗེའི་སྙིང་པོ་དེ་ལ་སྨྲས། །ལུས་ཅན་རྣམས་ཀྱི་ཁམས་ཀྱི་མི། །ཇི་ལྟ་བུར་ན་སེམས་ཙམ་འགྱུར། །འབྱུང་བ་ཆེན་པོ་རྒྱུར་བྱས་ཤིང་། །འབྱུང་ལས་འབྱུང་བའི་ཇི་ལྟ་བུ། །གཡོ་གཤེར་ཚ་དང་སྲ་བ་ཡི། །ཁམས་རྣམས་
ཇི་ལྟར་འབྱུང་བར་འགྱུར། །རྒྱལ་སྲས་རྡོ་རྗེ་སྙིང་པོ་ཡིས། །དྲུ་མའི་བདག་པོའི་ཚིག་ཐོས་ནས། །མིའམ་ཅི་བདག་ཁྱོད་དགེ་སྟེ། །ཁྱོད་ནི་དགེ་འོ་ཡང་དགེ་འོ། །རྣལ་འབྱོར་ཅན་གྱི་སྙིང་པོའི་མཆོག །ཡིད་འོང་བྱེད་པ་གང་དྲིས་པ། །སེམས་ཀྱི་སྐྱེས་བུའི་ལུས་ཅན་ལ། །ཁམས་རྣམས་སྐྱེ་
འགྱུར་ཇི་ལྟ་ཞེས། །དེ་ཕྱིར་དབང་སྒྱུར་རྒྱལ་སྲས་ལ། །དེ་ནི་དགེ་བར་བཤད་པར་བྱ། །དེ་བས་མིའམ་ཅི་ཡི་བདག །པི་བང་སློབ་དཔོན་བདག་ལས་ཉོན། །ཇི་ལྟར་མིའམ་ཅི་ཡི་བདག །ཁྱོད་དང་མི་ཅི་མང་བཅས་པ། །བསྙེམས་བྲལ་མང་པོ་སྣ་ཚོགས་ཀྱིས། །ནམ་མཁའ་ལས་ནི་རབ་

འདོང་ཞིང་། །རྒྱལ་བ་ཉན་ཐོས་ཚོགས་འཁོར་དུ། །པི་བང་སྒྲ་དབྱངས་སྙན་བླངས་པས། །ཐུབ་པ་དྲུ་མ་ལྟོས་ཤིག་ཅེས། །ཕན་ཚུན་གཅིག་ལ་གཅིག་ཀྱང་གསུང་། །བསྙེམས་བྲལ་མང་པོ་སྣ་ཚོགས་ན། །མིའམ་ཅི་དང་འགྲོགས་རྩེ་ཞིང་། །པི་བང་བཻ་དཱུརྱས་སྤྲས་པ། །
ལེན་ཅིང་མཁའ་ལ་འགྲོ་བའི་ཚེ། །པི་བང་ཡིད་འོང་ཤིན་ཏུ་སྙན། །དབྱངས་ཀྱིས་ཡོངས་སུ་སྦྱང་བ་སྟེ། །མིའམ་ཅི་ཡི་བདག་པོ་ཡིས། །རབ་ཏུ་བླངས་པར་བྱས་པའི་ཚེ། །ཉན་ཐོས་རྣམས་ཀྱང་གར་བྱེད་དེ། །ཉན་ཐོས་དེ་དག་གྱུར་པ་དེ། །རྒྱལ་སྲས་རྣམས་ཀྱིས་མཐོང་བ་དང་། །འོད་སྲུང་
རྣལ་འབྱོར་བཟང་ཅན་དང་། །ལྷ་ཡི་ཅོད་པན་ལ་སྨྲས་པ། །རྣམ་རྟོག་མེད་པའི་སྒྲ་དབྱངས་ཀྱི། །པི་བང་སྒྲ་ནི་བསྒྲགས་པ་ཡིས། །འདོད་ཆགས་བྲལ་བ་ཅི་ཕྱིར་གྱུར། །འོད་སྲུང་ཁྱོད་ཀྱིས་ངེད་ལ་སྟོན། །རྒྱལ་སྲས་སྟོབས་ཆེན་དམུ་རླུང་བཞིན། །རི་དགས་རྣམས་དང་འདྲ་བ་ནི། །ཉན་
ཐོས་གཡོ་བའི་བློ་ཅན་རྣམས། །བག་ཆགས་འདམ་གྱི་དྲི་མ་ཅན། །ཉོན་མོངས་རྣམ་རྟོག་བྱུང་བས་མནར། །ཡང་དག་སངས་རྒྱས་སྐུ་རྙེད་ནས། །བག་ཆགས་དྲི་མ་ཡོངས་བསལ་ཏེ། །བདག་མེད་གཉིས་ཀྱིས་ཡོངས་དག་ཅིང་། །ཤེས་བྱ་སྒྲིབ་པའི་དྲི་མེད་ན། །སེམས་ཀྱི་ཁམས་ལས་གཞན་
གྱུར་པ། །དེ་བཞིན་གཤེགས་པར་རབ་ཏུ་འགྱུར། །ཁྱོད་ནི་དབང་ཆེན་ཕྲ་ཡུལ་ལྡན། །ཤེས་རྒྱ་ཆེ་ཞིང་གཙུག་ལག་མཁས། །དབང་པོ་འཇིག་རྟེན་ཕྱོལ་བ་ཡི། །གཙུག་ལག་མཚན་ལ་ཁྱོད་གནས་ཏེ། །མིའམ་ཅི་ཡི་གཙུག་ལག་ཀྱང་། །དེ་བཞིན་གཤེགས་པའི་རྣལ་འབྱོར་དགེ། །
ས་ཡི་མཚན་ཉིད་མཁས་བྱ་ལ། །བསླབ་སྟེ་ཟླ་བ་བཞིན་གནས་པ། །མིའམ་ཅི་ཡི་དབང་པོ་ཁྱོད། །ས་དང་ཞིང་རྣམས་བྱེ་བར་མཛེས། །ཁྱོད་ནི་དེ་ལྟར་རྣམ་མཛེས་ཞིང་། །ཐུབ་ཅན་དབང་སྒྱུར་ཚོགས་དབུས་སུ། །ཁམས་ཀྱི་སེམས་ལས་སྐྱེས་པའི་མི། །ཁོ་བོ་ལ་ནི་སྲས་ཀྱིས་
དྲིས། །མཉམ་སེམས་མཉམ་པར་གཞག་པ་ཡིས། །ཐམས་ཅད་ལྷན་ཅིག་མཉན་པར་གྱིས། །ཁམས་རྣམས་གང་དུ་ཅི་ཚུལ་གང་། །སེམས་སུ་གྲགས་པའི་སྐྱེས་བུ་ལ། །རྒྱུ་རྣམས་གང་གིས་འབྱུང་བ་ཡི། །དེ་ཚུལ་